Loading

དམ་པའི་ཆོས་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ།
མདོ་སྡེ།
not checked
༄༅༅། །རྒྱ་གར་སྐད་དུ། སངྔྷརྨ་པུཎྚ་རཱི་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་ སྐད་དུ། དམ་པའི་ཆོས་པདྨ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་ དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ ༄༅༅། །ཁབ་ན། བྱ་རྒོད་ཀྱི་ཕུང་པོའི་རི་ལ་བཞུགས་ཏེ། དགེ་སློང་ཁྲི་ཉིས་སྟོང་གི་དགེ་སློང་གི་ དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་ པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་ དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ། མངོན་པར་ཤེས་པས་མངོན་པར་ཤེས་པའི་ཉན་ཐོས་ཆེན་པོ་ཤ་ སྟག་ལ་འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽཎྜི་ནྱ་དང༌། ཚེ་དང་ལྡན་པ་རྟ་ཐུལ་དང༌། ཚེ་དང་ལྡན་པ་རླངས་པ་དང༌། ཚེ་དང་ལྡན་པ་མིང་ཆེན་དང༌། ཚེ་དང་ལྡན་པ་བཟང་པོ་དང༌། ཚེ་དང་ལྡན་པ་འོད་སྲུང་ཆེན་པོ་དང༌། ཚེ་དང་ལྡན་པ་ ལྟེང་རྒྱས་འོད་སྲུང་དང༌། ཚེ་དང་ལྡན་པ་ཆུ་ཀླུང་འོད་སྲུང་དང༌། ཚེ་དང་ལྡན་པ་ག་ཡ་འོད་སྲུང་དང༌། ཚེ་དང་ལྡན་པ་ཤཱ་རིའི་ བུ་དང༌། ཚེ་དང་ལྡན་པ་མཽངྒལ་གྱི་བུ་ཆེན་པོ་དང༌། ཚེ་དང་ལྡན་པ་ཀཱ་ཏྱའི་བུ་ཆེན་པོ་དང༌། ཚེ་དང་ལྡན་པ་མ་འགགས་པ་དང༌། ཚེ་དང་ལྡན་པ་ནམ་གྲུ་དང༌། ཚེ་དང་ལྡན་པ་ཀ་པི་ན་དང༌། ཚེ་དང་ལྡན་པ་བ་ལང་བདག་དང༌། ཚེ་དང་ལྡན་པ་པི་ལི་ནྡའི་བུ་ ༄༅༅། །དང༑ ཚེ་དང་ལྡན་པ་བ་ཀུ་ལ་དང༌། ཚེ་དང་ལྡན་པ་གསུས་པོ་ཆེ་དང༌། ཚེ་དང་ལྡན་པ་བྷ་ར་དྷྭ་ཛ་དང༌། ཚེ་དང་ ལྡན་པ་དགའ་བོ་དང༌། ཚེ་དང་ལྡན་པ་ཉེ་དགའ་དང༌། ཚེ་དང་ལྡན་པ་མཛེས་དགའ་དང༌། ཚེ་དང་ལྡན་པ་བྱམས་མའི་བུ་གང་པོ་ དང༑ ཚེ་དང་ལྡན་པ་རབ་འབྱོར་དང༌། ཚེ་དང་ལྡན་པ་སྒྲ་གཅན་ཟིན་དང༌། དེ་དག་དང་ཉན་ཐོས་ཆེན་པོ་གཞན་དག་དང༌། སློབ་པ་ཚེ་དང་ལྡན་པ་ཀུན་དགའ་བོ་དང༌། གཞན་ཡང་སློབ་པ་དང་མི་སློབ་པའི་དགེ་སློང་ཉིས་སྟོང་དང༌། སྐྱེ་དགུའི་བདག་ མོ་ཆེན་མོ་ལ་སོགས་པ་དགེ་སློང་མ་དྲུག་སྟོང་དང༌། སྒྲ་གཅན་ཟིན་གྱི་མ་དགེ་སློང་མ་གྲགས་འཛིན་འཁོར་དང་བཅས་པ་དང་ ཐབས་གཅིག་གོ །བྱང་ཆུབ་སེམས་དཔའ་བརྒྱད་ཁྲི་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ ལས་ཕྱིར་མི་ལྡོག་པ། གཟུངས་ཐོབ་པ། སྤོབས་པ་ཆེན་པོ་ལ་གནས་པ། ཕྱིར་མི་ལྡོག་པའི་ཆོས་ཀྱི་འཁོར་ལོ་བསྐོར་བ། སངས་རྒྱས་བརྒྱ་སྟོང་མང་པོ་ལ་བསྙེན་བཀུར་ བྱས་པ། སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་པ། སངས་རྒྱས་བརྒྱ་སྟོང་མང་པོ་ས་ཡང་དག་པར་བསྟོད་པ། ལུས་དང་ངག་དང་སེམས་བྱམས་པས་ཡོངས་ སུ་བསྒོས་པ། དེ་བཞིན་གཤེགས་པའི་ཡེ་ཤེས་འཛུད་པ་ལ་མཁས་པ། ཤེས་རབ་ཆེན་པོ། ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པར་ཁོང་དུ་ཆུད་པ། འཇིག་རྟེན་གྱི་ཁམས་ བརྒྱ་སྟོང་མང་པོར་རྣམ་པར་གྲགས་པ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་ཡང་དག་པར་སྒྲོལ་བ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་ བོ་འཇམ་དཔལ་གཞོན་ནུར་གྱུར་པ་དང༌། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང༌། བྱང་ཆུབ་སེམས་དཔའ་མཐུ་ཆེན་ཐོབ་དང༌། བྱང་ཆུབ་སེམས་དཔའ་དོན་ ཐམས་ཅད་ཅེས་བྱ་བ་དང༌། བྱང་ཆུབ་སེམས་དཔའ་རྟག་ཏུ་བརྩོན་དང༌། བྱང་ཆུབ་སེམས་དཔའ་བརྩོན་པ་མི་གཏོང་བ་དང༌། བྱང་ཆུབ་སེམས་དཔའ་ལག་ན་རིན་ཆེན་དང༌། བྱང་ཆུབ་སེམས་དཔའ་སྨན་གྱི་རྒྱལ་པོ་དང༌། བྱང་ཆུབ་སེམས་དཔའ་སྨན་ཡང་དག་འཕགས་དང༌། བྱང་ཆུབ་སེམས་དཔའ་བཀོད་པའི་རྒྱལ་པོ་དང༌། བྱང་ཆུབ་སེམས་ ༄༅། །དཔའ་རབ་ཏུ་སྦྱིན་པ་དང༌། བྱང་ཆུབ་སེམས་དཔའ་རིན་ཆེན་ཟླ་བ་དང༌། བྱང་ཆུབ་སེམས་དཔའ་རིན་ཆེན་འོད་དང༌། བྱང་ཆུབ་སེམས་དཔའ་ཟླ་གང་ དང༑ བྱང་ཆུབ་སེམས་དཔའ་གནོན་པ་ཆེན་པོ་དང༌། བྱང་ཆུབ་སེམས་དཔའ་མཐའ་ཡས་གནོན་དང༌། བྱང་ཆུབ་སེམས་དཔའ་འཇིག་རྟེན་གསུམ་གནོན་དང༌། བྱང་ཆུབ་ སེམས་དཔའ་སྤོབས་པ་ཆེན་པོ་དང༌། བྱང་ཆུབ་སེམས་དཔའ་རྟག་པར་རྒྱུན་དུ་བརྩོན་དང༌། བྱང་ཆུབ་སེམས་དཔའ་ས་འཛིན་དང༌། བྱང་ཆུབ་སེམས་དཔའ་བློ་གྲོས་མི་ཟད་ པ་དང༌། བྱང་ཆུབ་སེམས་དཔའ་པདྨའི་དཔལ་དང༌། བྱང་ཆུབ་སེམས་དཔའ་སྐར་མའི་རྒྱལ་པོ་དང༌། བྱང་ཆུབ་སེམས་དཔའ་བྱམས་པ་དང༌། བྱང་ཆུབ་སེམས་དཔའ་ སེམས་དཔའ་ཆེན་པོ་སེང་གེ་དག་དང་ཡང་ཐབས་གཅིག་གོ །བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་འདི་ལྟ་སྟེ། བཟང་སྐྱོང་དང༌། དཀོན་མཆོག་འབྱུང་གནས་ དང༑ དེད་དཔོན་བཟང་པོ་དང༌། མིས་བྱིན་དང༌། ཕུག་སྤས་དང༌། ཆུས་བྱིན་དང༌། དབང་པོས་བྱིན་དང༌། བླ་མའི་བློ་གྲོས་དང༌། ཁྱད་པར་བློ་གྲོས་དང༌། འཕེལ་བའི་བློ་གྲོས་ དང༑ མཐོང་བ་དོན་ཡོད་དང༌། ཤིན་ཏུ་ཡང་དག་ཞུགས་དང༌། རབ་ཀྱི་རྩལ་གྱིས་རྣམ་པར་གནོན་པ་དང༌། དཔེ་མེད་བློ་གྲོས་དང༌། ཉི་མའི་སྙིང་པོ་དང༌། ས་འཛིན་དག་ དང་ཡང་ཐབས་གཅིག་སྟེ། དེ་དག་ལ་སོགས་པ་བྱང་ཆུབ་སེམས་དཔའ་བརྒྱད་ཁྲི་དག་དང་ཡང་ཐབས་གཅིག་གོ །ལྷ་རྣམས་ཀྱི་དབང་པོ་བརྒྱ་བྱིན་དང༌། འཁོར་ལྷའི་བུ་ཉི་ཁྲི་འདི་ལྟ་ སྟེ། ལྷའི་བུ་ཟླ་བ་དང༌། ལྷའི་བུ་ཉི་མ་དང༌། ཀུན་ཏུ་དྲི་དང༌། རིན་ཆེན་འོད་དང༌། ལྷའི་བུ་སྣང་འོད་དང༌། དེ་དག་ལ་སོགས་པ་ལྷའི་བུ་ཉི་ཁྲི་དང་ཡང་ཐབས་གཅིག་གོ །རྒྱལ་པོ་ ཆེན་པོ་བཞི་དང༌། འཁོར་ལྷའི་བུ་སུམ་ཁྲི་འདི་ལྟ་སྟེ། རྒྱལ་པོ་ཆེན་པོ་འཕགས་སྐྱེས་པོ་དང༌། རྒྱལ་པོ་ཆེན་པོ་མིག་མི་བཟང་དང༌། རྒྱལ་པོ་ཆེན་པོ་ཡུལ་འཁོར་སྲུང་དང༌། རྒྱལ་ པོ་ཆེན་པོ་རྣམ་ཐོས་ཀྱི་བུ་དང༌། ལྷའི་བུ་དབང་ཕྱུག་དང༌། ལྷའི་བུ་དབང་ཕྱུག་ཆེན་པོ་དང༌། འཁོར་ལྷའི་བུ་སུམ་ཁྲི་དག་དང་ཡང་ཐབས་གཅིག་གོ །མི་མཇེད་ཀྱི་བདག་པོ་ཚངས་ པ་དང༌། འཁོར་ཚངས་རིས་ཀྱི་ལྷའི་བུ་ཁྲི་ཉིས་སྟོང་འདི་ལྟ་སྟེ། ཚངས་པ་གཙུག་ཕུད་ཅན་དང༌། ཚངས་པ་སྐར་མའི་འོད་དང༌། དེ་དག་ལ་སོགས་པ་ཚངས་རིས་ཀྱི་ལྷའི་བུ་ཁྲི་ ཉིས་སྟོང་དང་ཡང་ཐབས་གཅིག་གོ །ཀླུའི་རྒྱལ་པོ་བརྒྱད་འདི་ལྟ་སྟེ། ཀླུའི་རྒྱལ་པོ་དགའ་བོ་དང༌། ཉེ་དགའ་དང༌། རྒྱ་མཚོ་དང༌། ནོར་རྒྱས་ཀྱི་བུ་དང༌། འཇོག་པོ་དང༌། གཟི་ཅན་ དང༑ མ་དྲོས་པ་དང༌། ཀླུའི་རྒྱལ་པོ་ཨུཏྤ་ལ་དང༌། འཁོར་ཀླུ་བྱ་བ་བརྒྱ་སྟོང་མང་པོ་དག་དང་ཡང་ཐབས་གཅིག་གོ །མིའམ་ཅིའི་རྒྱལ་པོ་བཞི་འདི་ལྟ་སྟེ། མི་འམ་ཅིའི་རྒྱལ་པོ་ ༄༅། །ལྗོན་པ་དང༌། མིའམ་ཅིའི་རྒྱལ་པོ་ཆོས་ཆེན་དང༌། མིའམ་ཅིའི་རྒྱལ་པོ་ཆོས་བཟང་དང༌། མིའམ་ཅིའི་རྒྱལ་པོ་ཆོས་འཛིན་དང༌། འཁོར་མིའམ་ཅི་བྱེ་བ་ བརྒྱ་སྟོང་མང་པོ་དག་དང་ཡང་ཐབས་གཅིག་གོ །དྲི་ཟའི་རིས་ཀྱི་ལྷའི་བུ་བཞི་འདི་ལྟ་སྟེ། དྲི་ཟ་ཡིད་དུ་འོང་བ་དང༌། ཡིད་འོང་དབྱངས་དང༌། འཇམ་སྙན་དང༌། དྲི་ཟ་དབྱངས་ སྙན་དང༌། འཁོར་དྲི་ཟ་བྱེ་བ་བརྒྱ་སྟོང་མང་པོ་དག་དང་ཡང་ཐབས་གཅིག་གོ །ལྷ་མ་ཡིན་གྱི་དབང་པོ་བཞི་འདི་ལྟ་སྟེ། ལྷ་མ་ཡིན་གྱི་དབང་པོ་སྟོབས་ཅན་དང༌། ཕྲག་རྩུབ་དང༌། ཐགས་བཟང་རིས་དང༌། ལྷ་མ་ཡིན་གྱི་དབང་པོ་སྒྲ་གཅན་དང༌། འཁོར་ལྷ་མ་ཡིན་བྱེ་བ་བརྒྱ་སྟོང་མང་པོ་དག་དང་ཡང་ཐབས་གཅིག་གོ །ནམ་མཁའ་ལྡིང་གི་དབང་པོ་བཞི་ འདི་ལྟ་སྟེ། ནམ་མཁའ་ལྡིང་གི་དབང་པོ་གཟི་བརྗིད་ཆེན་པོ་དང༌། ལུས་ཆེན་པོ་དང༌། རྫོགས་ཆེན་དང༌། ནམ་མཁའ་ལྡིང་གི་དབང་པོ་འཕྲུལ་ཆེན་ཐོབ་དང༌། འཁོར་ནམ་ མཁའ་ལྡིང་བྱེ་བ་བརྒྱ་སྟོང་མང་པོ་དང་ཡང་ཐབས་གཅིག་གོ །ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་དང་ཡང་ཐབས་གཅིག་གོ །དེའི་ཚེ་ན་བཅོམ་ལྡན་ འདས་འཁོར་བཞི་པོ་དེ་དག་གིས་ཡོངས་སུ་བསྐོར་ཅིང་མདུན་གྱིས་བལྟས་ཏེ། བསྟི་སྟང་དུ་བྱས། བཙུན་པར་བྱས། རི་མོར་བྱས། མཆོད་པར་བྱས། བརྗེད་པར་བྱས། གསོལ་བ་བྱས་ཏེ། ངེས་པར་བསྟན་པ་ཆེན་པོ་ཞེས་བྱ་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ ཅད་ཀྱིས་ཡོངས་སུ་བཟུང་བ་བཤད་པར་བཞེད་དེ། ཆོས་ཀྱི་གདན་དེ་ཉིད་ལ་སྐྱིལ་མོ་ཀྲུང་བཅས་ནས། མཐའ་ཡས་ངེས་པར་བསྟན་པའི་གནས་ཞེས་བྱ་བའི་ཏིང་ངེ་འཛིན་ལ་སྙོམས་ པར་ཞུགས་ཏེ་སྐུ་མི་གཡོ་ཞིང་སེམས་མི་གཡོ་བར་གྱུར་ནས་བཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ། བཅོམ་ལྡན་འདས་ལ་ལྷའི་མེ་ཏོག་མནྡཱ་ར་དང༌། མནྡཱ་ར་ཆེན་པོ་དང༌། མཉྫུ་ཥ་ཀ་དང༌། མཉྫུ་ཥ་ཀ་ཆེན་པོ་རྣམས་ཀྱི་མེ་ཏོག་གི་ཆར་ཆེན་པོ་མངོན་པར་བབ་སྟེ། བཅོམ་ལྡན་འདས་དང་འཁོར་བཞི་པོ་དེ་དག་ལ་འཐོར་རོ། །ཐམས་ ཅད་དང་ལྡན་པའི་སངས་རྒྱས་ཀྱི་ཞིང་ཡང་རྣམ་པ་དྲུག་ཏུ་གཡོས་པར་གྱུར་ཏེ། འགུལ། ཀུན་ཏུ་རབ་ཏུ་འགུལ། ལྡེག །ཀུན་ཏུ་རབ་ཏུ་ལྡེག །འཁྲུགས། ཀུན་ཏུ་རབ་ཏུ་འཁྲུགས་ སོ། །དེའི་ཚེ་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་ དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་རྣམས་དང༌། རྒྱལ་ཕྲན་དང༌། སྟོབས་ཀྱི་འཁོར་ལོས་བསྒྱུར་བ་དང༌། གླིང་བཞིའི་འཁོར་ལོས་བསྒྱུར་བ་ ༄༅། །གང་དག་འཁོར་དེར་འདུས་ནས་འཁོད་པར་གྱུར་པ་འཁོར་དང་བཅས་པ་དེ་དག་ཐམས་ཅད་བཅོམ་ལྡན་འདས་ལ་ལྟ་ཞིང་འཁོད་དེ་ངོ་མཚར་དུ་གྱུར། རྨད་དུ་གྱུར། ཤིན་ཏུ་དགའ་བར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྤུ་ནས་འོད་ཟེར་གཅིག་བྱུང་ནས། དེ་ཤར་ཕྱོགས་སུ་སངས་རྒྱས་ཀྱི་ ཞིང་ཁྲི་བརྒྱད་སྟོང་དུ་སོང་སྟེ། སངས་རྒྱས་ཀྱི་ཞིང་དེ་དག་ཐམས་ཅད་མནར་མེད་པའི་སེམས་ཅན་དམྱལ་བ་ཆེན་པོ་ཡན་ཆད་སྲིད་པའི་རྩེ་མོ་མན་ཆད་འོད་ཟེར་དེའི་འོད་ཀྱིས་ ཤིན་ཏུ་ཁྱབ་པར་སྣང་ངོ༌། །སངས་རྒྱས་ཀྱི་ཞིང་དེ་དག་གི་འགྲོ་བ་དྲུག་པོ་དེ་དག་ན་སེམས་ཅན་གང་ཡོད་པ་དེ་དག་ཐམས་ཅད་མ་ལུས་པར་སྣང་ངོ༌། །སངས་རྒྱས་ཀྱི་ཞིང་དེ་ དག་ན་སངས་རྒྱས་བཅོམ་ལྡན་འདས་གང་དག་བཞུགས་ཤིང་འཚོ་གཞེས་པ་དེ་དག་ཐམས་ཅད་ཀྱང་སྣང་ངོ༌། །སངས་རྒྱས་བཅོམ་ལྡན་འདས་དེ་དག་ཆོས་གང་འཆད་པ་དེ་ དག་ཐམས་ཅད་ཀྱང་མ་ལུས་པར་གྲག་གོ །སངས་རྒྱས་ཀྱི་ཞིང་དེ་དག་ན་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དང༌། རྣལ་འབྱོར་ཅན་དང༌། རྣལ་འབྱོར་སྤྱོད་པ་གང་དག་འབྲས་བུ་ཐོབ་པ་དང༌། འབྲས་བུ་མ་ཐོབ་པ་དེ་དག་ཐམས་ཅད་ཀྱང་སྣང་ངོ༌། །སངས་རྒྱས་ཀྱི་ཞིང་དེ་དག་ན། བྱང་ཆུབ་སེམས་དཔའ་སེམས་ དཔའ་ཆེན་པོ་གང་དག་ཉན་པ་དང༌། དམིགས་པ་དང༌། མོས་པ་རྣམ་པ་སྣ་ཚོགས་དུ་མའི་རྒྱུའི་ཐབས་མཁས་པ་དག་གིས་བྱང་ཆུབ་སེམས་དཔའི་སྤྱད་པ་སྤྱོད་པ་དེ་དག་ཐམས་ཅད་ ཀྱང་སྣང་ངོ༌། །སངས་རྒྱས་ཀྱི་ཞིང་དེ་དག་ན། སངས་རྒྱས་བཅོམ་ལྡན་འདས་གང་དག་ཡོངས་སུ་མྱ་ངན་ལས་འདའ་བ་དེ་དག་ཐམས་ཅད་ཀྱང་སྣང་ངོ༌། །སངས་རྒྱས་ཀྱི་ཞིང་དེ་དག་ན། སངས་རྒྱས་བཅོམ་ལྡན་འདས་གང་དག་ཡོངས་སུ་མྱ་ངན་ལས་འདས་པ་རྣམས་ཀྱི་རིང་བསྲེལ་གྱི་མཆོད་རྟེན་རིན་པོ་ཆེ་ལས་བྱས་པ་དེ་དག་ཐམས་ཅད་ཀྱང་སྣང་ངོ༌། །དེ་ནས་བྱང་ཆུབ་ སེམས་དཔའ་སེམས་དཔའ་ཆེན་པོ་བྱམས་པ་འདི་སྙམ་དུ་སེམས་ཏེ། ཀྱེ་མ་དེ་བཞིན་གཤེགས་པས་ལྟས་ཆོ་འཕྲུལ་ཆེན་པོ་བསྟན་པ་འདི་འདིར་ཅིའི་རྒྱུར་འགྱུར་ཞིག་གུ། ཅིའི་ ཕྱིར་བཅོམ་ལྡན་འདས་ཀྱིས་ལྟས་ཆོ་འཕྲུལ་ཆེན་པོ་འདི་ལྟ་བུ་འདི་བསྟན་ཏེ། བཅོམ་ལྡན་འདས་ཀྱང་ཏིང་ངེ་འཛིན་ལ་སྙོམས་པར་ཞུགས་ཤིང༌། རྫུ་འཕྲུལ་གྱི་ཆོ་འཕྲུལ་ཆེན་པོ་ངོ་ མཚར་རྨད་དུ་བྱུང་བ་ཆེན་པོ་བསམ་གྱིས་མི་ཁྱབ་པ་འདི་ལྟ་བུ་འདི་དག་ཀྱང་སྣང་བར་གྱུར་པ་འདིའི་དོན་བདག་གིས་སུ་ལ་དྲི། འདི་ན་དོན་འདིའི་ལན་ལྡོན་ནུས་པ་ནི་སུ་ཡོད་སྙམ་མོ།། དེ་ཡང་འདི་སྙམ་དུ་འཇམ་དཔལ་གཞོན་ནུར་གྱུར་པ་འདི་སྔོན་གྱི་རྒྱལ་བ་རྣམས་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། སངས་རྒྱས་མང་པོ་ལ་བསྙེན་བཀུར་བྱས་ ༄༅། །པ་སྟེ༑ འཇམ་དཔལ་གཞོན་ནུར་གྱུར་པ་འདིས་སྔོན་ཆད་ཀྱང་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ རྣམས་ཀྱི་ལྟས་འདི་ལྟ་བུ་བྱུང་བ་རྣམས་མཐོང་ཞིང་སྔོན་ཆད་ཆོས་ཆེན་པོའི་འབེལ་བའི་གཏམ་དག་ཀྱང་མྱོང་བས་ན། བདག་གིས་འཇམ་དཔལ་གཞོན་ནུར་གྱུར་པ་ལ་ དེའི་དོན་དྲིའོ་སྙམ་དུ་སེམས་སོ། །དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མའི་འཁོར་བཞི་པོ་དེ་དག་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་མང་པོ་དེ་དག་ཀྱང༌། བཅོམ་ལྡན་འདས་ཀྱི་ལྟས་ཀྱི་རྫུ་འཕྲུལ་ གྱི་ཆོ་འཕྲུལ་ཆེན་པོའི་སྣང་བ་འདི་ལྟ་བུ་འདི་མཐོང་ནས་ངོ་མཚར་དུ་གྱུར། རྨད་དུ་གྱུར། ལྟད་མོར་གྱུར་ཏེ་འདི་སྙམ་དུ། བཅོམ་ལྡན་འདས་ཀྱིས་རྫུ་འཕྲུལ་གྱི་ཆོ་འཕྲུལ་ ཆེན་པོའི་སྣང་བ་འདི་ལྟ་བུ་འདི་བསྟན་པ་བདག་ཅག་གིས་སུ་ལ་དྲི་སྙམ་དུ་སེམས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་སྐད་ཅིག་ཐང་ཅིག་ ཡུད་ཙམ་དེ་ཉིད་ལ་འཁོར་བཞི་པོ་རྣམས་ཀྱི་སེམས་ཀྱི་རྣམ་པར་རྟོག་པ་སེམས་ཀྱིས་ཤེས་ནས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བཅོམ་ལྡན་འདས་ཀྱིས་ལྟས་ངོ་མཚར་རྨད་དུ་བྱུང་བ་རྫུ་འཕྲུལ་གྱི་སྣང་བ་འདི་ལྟ་བུ་འདི་བསྟན་ཏེ། སངས་རྒྱས་ཀྱི་ཞིང་ཁྲི་བརྒྱད་སྟོང་པོ་འདི་དག་རྣམ་པར་བཀྲ་བ། མཆོག་ཏུ་ལྟ་ན་ སྡུག་པ༑ དེ་བཞིན་གཤེགས་པ་སྔོན་དུ་བཞུད་པ། དེ་བཞིན་གཤེགས་པ་ཡོངས་སུ་འདྲེན་པར་སྣང་བ་འདིའི་རྒྱུ་གང༌། རྐྱེན་གང༌། དེ་ནས་བྱང་ཆུབ་སེམས་དཔའ་སེམས་དཔའ་ ཆེན་པོ་བྱམས་པས་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་པ་འདི་དག་སྨྲས་སོ། །འཇམ་དཔལ་ཅི་ཡི་ཕྱིར་ན་འདི་ལྟ་བུ། །མི་ཡི་མགོན་པོས་འོད་ཟེར་གཅིག་པོ་འདི། ། ཞལ་གྱི་སྨིན་མཚམས་ཀྱི་ནི་མཛོད་སྤུ་ནས། །ཤིན་ཏུ་སྣང་བའི་འོད་ཟེར་རབ་ཏུ་བཏང༌། །ལྷ་རྣམས་དགའ་བས་ཙནྡན་ཕྱེ་མ་དང༌། །ལྷ་ཡི་སྤོས་རབ་ཡིད་དུ་འོང་བ་དང༌། །མནྡཱ་ར་དང་ མཉྫུ་ཥ་ཀ་ཡི། །མེ་ཏོག་དག་གི་ཆར་ཆེན་རབ་ཏུ་ཕབ། །དེས་ནི་ས་འདི་ཀུན་ཏུ་མཛེས་གྱུར་ཅིང༌། །འཁོར་བཞི་འདི་དག་དགའ་བ་རབ་ཏུ་ཐོབ། །ཞིང་རྣམས་འདི་དག་ཐམས་ཅད་རྣམ་ དྲུག་ཏུ༑ ༑ཤིན་ཏུ་འཇིགས་པའི་གཟུགས་སུ་ཀུན་ནས་གཡོས། །འོད་ཟེར་དེ་ཡིས་ཤར་གྱི་ཕྱོགས་ལོགས་ཀྱི། །ཞིང་ནི་སྟོང་ཕྲག་བཅོ་བརྒྱད་ཚངས་བ་རྣམས། །སྐད་ཅིག་གཅིག་གིས་ ཐམས་ཅད་རབ་ཏུ་སྣང༌། །ཞིང་རྣམས་གསེར་གྱི་ཁ་དོག་བཞིན་དུ་མཛེས། །མནར་མེད་ཡན་ཆད་སྲིད་པའི་རྩེ་མོའི་བར། །ཞིང་དེ་དག་ན་སེམས་ཅན་ཇི་སྙེད་པ། །འགྲོ་བ་དྲུག་པོ་དེ་ ༄༅། །ན་ཡོད་པ་རྣམས། །གང་དག་དེར་ཡང་ཤི་འཕོ་སྐྱེ་བ་རྣམས། །དེ་དག་ལས་ཀྱི་རྣམ་པ་སྣ་ཚོགས་དང༌། །འགྲོ་བ་བདེ་དང་མི་བདེ་རྣམས་ཀྱང་སྣང༌། །བཟང་པོ་ ངན་པ་དེ་བཞིན་པར་མ་ཡང༌། །འདི་ན་འདུག་ཀྱང་དེ་དག་ཐམས་ཅད་མཐོང༌། །སངས་རྒྱས་སེང་གེ་མི་ཡི་དབང་པོ་རྣམས། །ཆོས་ཉིད་རབ་སྟོན་རྣམ་པར་དབྱེ་བ་མཐོང༌། །སེམས་ ཅན་བྱེ་བ་མང་ལ་རབ་སྟོན་པ། །སྙན་པའི་སྒྲ་དང་དབྱངས་སུ་གསུང་བ་དག །ཟབ་ཅིང་རྒྱ་ཆེ་རྨད་དུ་བྱུང་བའི་སྒྲ། །སོ་སོའི་ཞིང་རྣམས་སུ་ཡང་རབ་ཏུ་འབྱིན། །དཔེ་དང་གཏན་ ཚིགས་ཁྲག་ཁྲིག་བྱེ་བ་ཡིས། །སངས་རྒྱས་ཆོས་འདི་རབ་ཏུ་སྟོན་པ་ནི། །སེམས་ཅན་གང་རྣམས་སྡུག་བསྔལ་གཟིར་བ་དག །སྐྱེ་དང་རྒ་བས་ཡིད་སྐྱོ་མི་ཤེས་ལ། །འདི་ནི་ དགེ་སློང་སྡུག་བསྔལ་ཐ་མ་ཞེས། །དེ་ལ་རབ་ཞི་མྱ་ངན་འདས་པ་སྟོན། །མི་རྣམས་གང་གིས་རྒྱ་ཆེ་མཐུ་ཐོབ་ཅིང༌། །སངས་རྒྱས་མཐོང་བས་དེ་བཞིན་བསོད་ནམས་ལྡན། །དེ་ དག་ལ་ནི་ཆོས་ཚུལ་འདི་བརྗོད་ཅིང༌། །རང་རྒྱལ་ཐེག་པ་ཡང་ནི་སྟོན་པ་མཛད། །གཞན་ཡང་བདེ་བར་གཤེགས་པའི་སྲས་པོ་གང༌། །བླ་ན་མེད་པའི་ཡེ་ཤེས་ཚོལ་བ་དག། བྱ་བ་སྣ་ཚོགས་རྟག་ཏུ་བྱེད་པ་ལ། །དེ་དག་ལ་ནི་བྱང་ཆུབ་ཕྱིར་བསྔགས་གསུང༌། །འདི་ན་འདུག་བཞིན་དེ་ན་འདི་འདྲ་དང༌། །ཁྱད་པར་གཞན་ཡང་སྟོང་ཕྲག་བྱེ་བ་དག །ཤིན་ ཏུ་མཐོང་ཞིང་ཐོས་ཏེ་འཇམ་པའི་དབྱངས། །དེ་དག་ལས་ནི་ཕྱོགས་ཙམ་སྨོས་པར་བྱ། །བདག་མཐོང་ཞིང་རྣམས་མང་པོ་དེ་དག་ནའང༌། །བྱང་ཆུབ་སེམས་དཔའ་གངྒཱའི་བྱེ་མ་སྙེད།། གང་རྣམས་བྱེ་བ་སྟོང་ཕྲག་མི་ཉུང་བ། །བརྩོན་འགྲུས་རྣམ་པ་མང་པོས་བྱང་ཆུབ་སྐྱེད། །ལ་ལ་སྦྱིན་པ་སྦྱིན་པའང་དེ་བཞིན་ཏེ། །ནོར་དང་འགྲོན་བུ་གསེར་དང་དངུལ་རྣམས་དང༌། །མུ་ ཏིག་ནོར་བུ་མན་ཤེལ་བྱུ་རུ་དང༌། །བྲན་ཕོ་བྲན་མོ་རྟ་དང་ཤིང་རྟ་ལུག །དེ་བཞིན་རིན་ཆེན་དག་གིས་བརྒྱན་པའི་ཁྱོགས། །ཡོངས་སུ་དགའ་བའི་ཡིད་ཀྱིས་སྦྱིན་པ་གཏོང༌། །བདག་ ཅག་གིས་ཀྱང་ཐེག་མཆོག་ཐོབ་ཤོག་ཅེས། །བྱང་ཆུབ་མཆོག་འདིར་ཡོངས་སུ་བསྔོ་བར་བྱེད། །སྦྱིན་པ་འདི་འདྲ་འདི་དག་སྦྱིན་བྱས་ན། །ཁམས་གསུམ་ནང་ན་ཐེག་མཆོག་ཁྱད་ པར་ཅན། །སངས་རྒྱས་ཐེག་པ་བདེ་གཤེགས་གང་བསྔགས་པ། །དེ་ནི་བདག་གིས་མྱུར་དུ་ཐོབ་གྱུར་ཅིང་།ལ་ལ་རྟ་བཞི་ཅན་གྱི་ཤིང་རྟ་ལ། །ཁ་ཁྱེར་བཅས་པ་མེ་ཏོག་རྒྱལ་མཚན་ བརྒྱན༑ ༑རིན་ཆེན་དག་ལས་བྱས་པའི་བ་དན་ཅན། །ལ་ལས་དེ་ལྟ་བུ་ཡང་སྦྱིན་པ་བྱིན། །དེ་བཞིན་བུ་དང་ཆུང་མ་རྣམས་ཀྱང་བྱིན། །ལ་ལ་ཕངས་པའི་ཤ་ཡང་སྦྱིན་པར་བྱེད། ། བྱང་ཆུབ་དམ་པ་འདི་ནི་འཚོལ་བའི་ཕྱིར། །ལག་པ་དང་ནི་རྐང་པ་བསླངས་ན་བྱིན། །ལ་ལ་དག་གི་མགོ་དང་ལ་ལས་མིག །ལ་ལ་བདག་གི་ལུས་མཆོག་རབ་ཀྱང་གཏོང༌། །དང་ ༄༅། །བའི་སེམས་ཀྱིས་སྦྱིན་པ་རྣམས་བྱིན་ནས། །དེ་བཞིན་གཤེགས་ཀྱི་ཡེ་ཤེས་དོན་དུ་གཉེར། །འཇམ་དཔལ་བདག་གིས་མཐོང་བ་ལ་ལ་ན། །རྒྱལ་སྲིད་ སྐྱིད་པ་རྣམ་པར་སྤངས་བྱས་ཏེ། །བཙུན་མོའི་འཁོར་དང་དེ་བཞིན་གླིང་ཀུན་དང༌། །གཉེན་དང་བློན་པོ་ཐམས་ཅད་རྣམ་སྤངས་ནས། །འཇིག་རྟེན་རྣམ་པར་འདྲེན་གྱི་དྲུང་དོང་སྟེ། ། ཞི་བའི་ཕྱིར་ནི་ཆོས་རབ་མཆོག་འདྲི་ཞིང༌། །ངུར་སྨྲིག་གོས་རྣམས་རབ་ཏུ་གྱོན་བྱེད་དེ། །སྐྲ་དང་ཁ་སྤུ་དག་ཀྱང་འདྲེག་པར་བྱེད། །བདག་མཐོང་བྱང་ཆུབ་སེམས་དཔའ་ལ་ལ་ནི། ། དགེ་སློང་གྱུར་ཅིང་ནགས་ཚལ་གནས་པ་དག །དགོན་པ་སྟོང་པ་རྣམས་སུ་གནས་འཆའ་ཞིང༌། །ལ་ལ་ལུང་ནོད་ཁ་ཏོན་བྱེད་ལ་དགའ། །བདག་མཐོང་བྱང་ཆུབ་སེམས་དཔའ་ ལ་ལ་དག །རི་སུལ་དག་ཏུ་ཞུགས་པའི་བརྟན་པ་རྣམས། །སངས་རྒྱས་ཡེ་ཤེས་འདི་ལ་རྣམ་པར་སྒོམ། །ཡོངས་སུ་སེམས་ཤིང་ཉེ་བར་རྟོགས་པར་བྱེད། །ཁ་ཅིག་གིས་ནི་ འདོད་པ་མ་ལུས་སྤངས། །ཡོངས་བསྒོམས་བདག་ཉིད་སྤྱོད་ཡུལ་རྣམ་པར་དག །མངོན་པར་ཤེས་པ་ལྔ་ཡང་དེར་ཐོབ་ནས། །བདེ་བར་གཤེགས་པའི་སྲས་པོ་དགོན་པར་ གནས༑ ༑བརྟན་པ་ལ་ལ་རྐང་གཤིབས་དེར་གནས་ཏེ། །འདྲེན་པའི་སྤྱན་སྔར་ཐལ་མོ་སྦྱར་བྱས་ནས། །དགའ་བ་བསྐྱེད་དེ་རྒྱལ་དབང་རྒྱལ་པོ་ལ། །ཚིགས་སུ་བཅད་པ་སྟོང་ གིས་མངོན་པར་བསྟོད། །དྲན་དང་ལྡན་ཞིང་དུལ་བ་མི་འཇིགས་པ། །ལ་ལ་སྤྱོད་པ་ཕྲ་བ་ཤེས་པ་དག །རྐང་གཉིས་གཙོ་ལ་ཆོས་ཀྱང་འདྲི་བར་བྱེད། །ཐོས་ནས་དེ་དག་ཆོས་རྣམས་ འཛིན་པར་འགྱུར། །ཡོངས་བསྒོམས་བདག་ཉིད་རྒྱལ་དབང་སྲས་པོ་རྣམས། །ལ་ལ་དག་གིས་དེ་དང་དེར་མཐོང་བ། །དཔེ་དང་གཏན་ཚིགས་ཁྲག་ཁྲིག་དུ་མ་ཡིས། །སྲོག་ཆགས་བྱེ་ བ་མང་ལ་ཆོས་རྣམས་སྟོན། །མཆོག་ཏུ་དགའ་སྐྱེས་ཆོས་རྣམས་རབ་སྟོན་ཅིང༌། །བྱང་ཆུབ་སེམས་དཔའ་མང་པོ་ཡང་དག་འཛུད། །བདུད་རྣམས་སྟོབས་དང་བཞོན་པར་བཅས་ བཅོམ་སྟེ། །ཆོས་ཀྱི་རྔ་འདི་ཤིན་ཏུ་རྡུང་བར་བྱེད། །ལ་ལ་བདེ་བར་གཤེགས་ཀྱི་བསྟན་པ་ལ། །བདེར་གཤེགས་སྲས་ལ་ལྷ་མི་གནོད་སྦྱིན་དང༌། །སྲིན་པོས་མཆོད་ཀྱང་ངོ་མཚར་ མི་འཛིན་ཅིང༌། །སྙེམས་མེད་ཞི་ཞིང་རབ་ཞི་སྤྱོད་པ་མཐོང༌། །ཕལ་ཆེར་ནགས་གནས་དེ་བཞིན་གཞན་དག་ཀྱང༌། །སྣང་བའི་འོད་ནི་ལུས་ལས་རབ་གཏོང་སྟེ། །སེམས་ཅན་དམྱལ་ ནས་སེམས་ཅན་རྣམས་འདོན་ཅིང༌། །དེ་དག་བྱང་ཆུབ་སེམས་ལ་ཡང་ཡང་དག་འཛུད། །རྒྱལ་བའི་སྲས་པོ་ལ་ལ་བརྩོན་འགྲུས་གནས། །ཁ་ཅིག་གིས་ཀྱང་མ་ལུས་གཉིད་སྤངས་ནས། ། འཆག་པ་བྱེད་ཅིང་ནགས་ཚལ་གནས་པ་དག །དེ་དག་བརྩོན་པས་བྱང་ཆུབ་མཆོག་ལ་ཞུགས། །ལ་ལ་ཚུལ་ཁྲིམས་མ་རལ་སྲུང་བ་ནི། །རྟག་ཏུ་རྣམ་དག་ནོར་བུ་རིན་ཆེན་བཞིན། ། ༄༅། །ལ་ལ་སྤྱད་པ་ཡོངས་སུ་རྫོགས་པར་འགྱུར། །དེ་དག་ཁྲིམས་ཀྱིས་བྱང་ཆུབ་མཆོག་ལ་ཞུགས། །རྒྱལ་སྲས་ལ་ལ་བཟོད་པའི་སྟོབས་ཅན་ཏེ། །དགེ་སློང་ང་ རྒྱལ་ཅན་དག་ཁྲོ་བ་དང༌། །དེ་བཞིན་གཤེ་ཞིང་སྡིག་པའང་བཟོད་པར་བྱེད། །བཟོད་པས་དེ་དག་བྱང་ཆུབ་མཆོག་ལ་ཞུགས། །བདག་མཐོང་བྱང་ཆུབ་སེམས་དཔའ་ལ་ལ་ ནི། །རྩེད་མོ་དགའ་བ་ཐམས་ཅད་རྣམ་སྤངས་ཏེ། །བྱིས་པའི་གྲོགས་པོ་རྣམས་ཀྱང་ཡོངས་སྤངས་ནས། །འཕགས་པ་རྣམས་དང་འགྲོགས་དགའ་མཉམ་པར་གཞག །རྣམ་ པར་གཡེང་བའི་སེམས་ནི་རྣམ་སྤངས་ནས། །ལོ་སྟོང་བྱེ་བར་ནགས་དང་རི་སུལ་ན། །རྩེ་གཅིག་སེམས་སུ་བསམ་གཏན་བྱེད་པ་རྣམས། །དེ་དག་བསམ་གཏན་བྱང་ཆུབ་མཆོག་ ལ་ཞུགས། །དགེ་འདུན་སློབ་བཅས་རྒྱལ་བ་མངོན་སུམ་དུ། །བཟའ་དང་བཅའ་དང་དེ་བཞིན་ཟས་དང་སྐོམ། །ན་བའི་སྨན་ནི་མི་ཉུང་མང་པོ་དག །ཁ་ཅིག་དེ་ལྟར་སྦྱིན་པ་སྦྱིན་པར་ བྱེད༑ ༑དགེ་འདུན་སློབ་བཅས་རྒྱལ་བ་མངོན་སུམ་དུ། །དེ་དག་གོས་བརྒྱ་བྱེ་བ་སྦྱིན་པར་བྱེད། །ལ་ལ་སྟོང་ཕྲག་བྱེ་བ་བརྒྱ་རི་དང༌། །རིན་ཐང་མེད་པའི་གོས་རྣམས་རབ་ཏུ་འབུལ།། རིན་པོ་ཆེ་དང་དེ་བཞིན་ཙནྡན་གྱི། །གཙུག་ལག་ཁང་ནི་བྱེ་བ་བརྒྱ་བྱས་ནས། །སྟན་དང་མལ་ཆ་མང་པོས་བརྒྱན་པ་རྣམས། །བདེ་བར་གཤེགས་པ་རྣམས་ལ་མངོན་སུམ་ འབུལ། །ཀུན་དགའ་ར་བ་ཡིད་འོང་གཙང་མ་རྣམས། །མེ་ཏོག་འབྲས་བུ་སྣ་ཚོགས་ལྡན་པ་དག །སྐྱེས་བུ་ཁྱུ་མཆོག་ཉན་ཐོས་བཅས་པ་ལ། །ལ་ལ་ཉིན་པར་ཞུགས་ཕྱིར་རབ་ཏུ་འབུལ། ། དགའ་བ་སྐྱེས་ནས་སྣ་ཚོགས་རྣམ་མང་པོ། །དེ་ལྟ་བུ་ཡི་སྦྱིན་པ་སྦྱིན་པར་བྱེད། །བྱིན་ནས་བྱང་ཆུབ་ཕྱིར་ཡང་བརྩོན་འགྲུས་བསྐྱེད། །སྦྱིན་པས་དེ་དག་བྱང་ཆུབ་མཆོག་ལ་ཞུགས། །ལ་ ལ་ཞི་བའི་ཆོས་ཀྱང་རབ་འཆད་དེ། །དཔེ་དང་གཏན་ཚིགས་ཁྲག་ཁྲིག་དུ་མ་ཡིས། །དེ་དག་སྲོག་ཆགས་བྱེ་བ་སྟོང་ལ་སྟོན། །དེ་དག་ཡེ་ཤེས་བྱང་ཆུབ་མཆོག་ལ་ཞུགས། །བྱེད་པ་མེད་ པའི་ཆོས་རབ་ཤེས་པ་ནི། །གཉིས་མེད་རབ་ཞུགས་ནམ་མཁའ་མཚུངས་འདྲ་བ། །མ་ཆགས་བདེ་བར་གཤེགས་པའི་སྲས་པོ་རྣམ། །དེ་དག་ཤེས་རབ་བྱང་ཆུབ་མཆོག་ལ་ཞུགས། བདག་གིས་གཞན་ཡང་མཐོང་བ་འཇམ་པའི་དབྱངས། །བདེར་གཤེགས་མྱ་ངན་འདས་པའི་བསྟན་པ་ལ། །བྱང་ཆུབ་སེམས་དཔའ་བརྟན་པ་མང་བྱུང་ནས། །རྒྱལ་བའི་རིང་བསྲེལ་ དག་ལ་རིམ་གྲོ་བྱེད། །མཆོད་རྟེན་བྱེ་བ་སྟོང་ཕྲག་མི་ཉུང་བ། །ཇི་ལྟར་གངྒཱའི་ཀླུང་གི་བྱེ་མ་བཞིན། །གང་གིས་བྱེ་བ་ཞིང་རྣམས་རྟག་བརྒྱན་པ། །རྒྱལ་སྲས་དེ་དག་བྱེད་དུ་འཇུག་པ་ མཐོང༌། །རིན་ཆེན་སྣ་བདུན་མཆོག་གི་རྒྱལ་མཚན་གདུགས། །དེ་ན་བྱེ་བ་སྟོང་རྣམས་བསྒྲེང་བ་ནི། །འཕང་དུ་དཔག་ཚད་ལྔ་སྟོང་ཕྱིན་པ་སྟེ། །ཁོར་ཡུག་ཏུ་ནི་དཔག་ཚད་ཉིས་སྟོང་ ༄༅། །ཡོད༑ ༑རྣམ་རྒྱལ་བ་དན་བཅས་པ་ཁོར་མོར་མཛེས། །དྲིལ་དང་དྲིལ་བུ་གཡེར་ཁ་རྟག་ཏུ་འཁྲོལ། །མེ་ཏོག་དྲི་དང་དེ་བཞིན་སིལ་སྙན་གྱིས། །ལྷ་མི་སྲིན་པོ་ གནོད་སྦྱིན་རྣམས་ཀྱིས་མཆོད། །ཡོངས་འདུ་ཤིང་གི་མེ་ཏོག་རྒྱས་པ་བཞིན། །དེ་ལྟར་ཕྱོགས་བཅུ་དེ་དག་མཛེས་བྱས་ཏེ། །རྒྱལ་བའི་རིང་བསྲེལ་དག་ལ་འདི་འདྲ་འདིར། །བདེ་ གཤེགས་སྲས་ཀྱིས་མཆོད་པ་བྱེད་དུ་བཙུད། །རྒྱལ་བས་འོད་ཟེར་གཅིག་པོ་འདི་བཏང་བས། །ལྷར་བཅས་འཇིག་རྟེན་འདི་དག་རབ་རྒྱས་པ། །བདག་དང་སྲོག་ཆགས་བྱེ་བ་མང་པོ་ འདིས༑ ༑འདི་ན་འདུག་བཞིན་དེ་དག་ཐམས་ཅད་མཐོང༌། །གང་གིས་འོད་ཟེར་གཅིག་པ་དེར་བཏང་བས། །ཞིང་རྣམས་སྟོང་ཕྲག་མང་པོར་སྟོན་པ་དེ། །ཀྱེ་མ་སྐྱེས་བུ་ཁྱུ་མཆོག་ དེ་ཡི་མཐུ། །ཀྱེ་མ་ཡེ་ཤེས་རྒྱ་ཆེ་ཟག་མེད་དོ། །རྨད་དུ་བྱུང་བ་ཚད་མེད་འདི་འདྲ་བའི། །ལྟས་རྣམས་མཐོང་ནས་བདག་ཅག་ངོ་མཚར་གྱུར། །འདི་ཡི་དོན་རྣམས་འཇམ་དབྱངས་ རབ་སྟོན་ཏེ། །སངས་རྒྱས་སྲས་རྣམས་ཐེ་ཚོམ་གྱུར་པ་སྩོལ། །འཁོར་བཞི་འདི་དག་རབ་ཏུ་དགའ་སེམས་ཀྱིས། །དཔའ་བོ་ཁྱོད་དང་བདག་ལ་མངོན་པར་ལྟ། །བདེ་བར་ གཤེགས་པས་དེ་རིང་ཅི་ཡི་ཕྱིར། །སྣང་བ་འདི་འདྲ་འདི་ནི་རབ་ཏུ་བཏང༌། །བདེ་གཤེགས་སྲས་པོ་ཁྱོད་ཀྱི་ལུང་སྟོན་ལ། །དགའ་བ་སྐྱེད་ཅིང་ཐེ་ཚོམ་རྣམ་པར་སེལ། །འདི་ལྟར་ འོད་ཟེར་རྒྱ་ཆེན་རབ་བཏང་བ། །དེ་དག་ཅི་འདྲའི་དོན་དུ་འགྱུར་བ་ཞིག །བདེ་བར་གཤེགས་པ་སྐྱེས་བུ་དམ་པ་ཡིས། །བྱང་ཆུབ་སྙིང་པོར་ཆོས་མཆོག་གང་བརྙེས་པ། །དེ་དག་འཇིག་ རྟེན་མགོན་པོ་འདིར་འཆད་དམ། །བྱང་ཆུབ་སེམས་དཔའ་འདི་དག་ལུང་སྟོན་ཏམ། །ཞིང་རྣམས་སྟོང་ཕྲག་དུ་མ་གང་བསྟན་པ། །སྣ་ཚོགས་རབ་ཏུ་བཀྲ་བ་རིན་ཆེན་བརྒྱན། །མཐའ་ ཡས་སྤྱན་ཅན་སངས་རྒྱས་རྣམས་སྣང་བ། །འདི་ནི་མི་ཆུད་རྒྱུར་འགྱུར་གོར་མ་ཆག །རྒྱལ་བའི་སྲས་ལ་བྱམས་པས་ཀུན་དྲིས་ནས། །ལྷ་མི་གནོད་སྦྱིན་སྲིན་པོ་དེ་དག་དགའ། ། འཇམ་དབྱངས་འདིར་ནི་ཅི་ཞིག་ལུང་སྟོན་ཅེས། །འཁོར་རྣམས་བཞི་པོ་དེ་དག་ཤིན་ཏུ་སྡོད། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་ པོ་བྱམས་པ་དང༌། ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་ལ་སྨྲས་པ། རིགས་ཀྱི་བུ་དག །འདི་ནི་དེ་བཞིན་གཤེགས་པ་ཆོས་ཆེན་པོ་བསྒྲགས་པའི་འབེལ་བའི་ གཏམ་མཛད་པར་དགོངས་པའོ། །རིགས་ཀྱི་བུ་དག །འདི་ནི་དེ་བཞིན་གཤེགས་པས་ཆོས་ཀྱི་ཆར་ཆེན་པོ་མངོན་པར་དབབ་པ་དང༌། ཆོས་ཀྱི་རྔ་ཆེན་པོ་རབ་ཏུ་བརྡུང་བ་དང༌། ཆོས་ ཀྱི་རྒྱལ་མཚན་ཆེན་པོ་བསྒྲེང་བ་དང༌། ཆོས་ཀྱི་སྒྲོན་མེ་ཆེན་པོ་རབ་ཏུ་འབར་བར་མཛད་པ་དང༌། ཆོས་ཀྱི་དུང་ཆེན་པོ་རབ་ཏུ་འབུད་པ་དང༌། ཆོས་ཀྱི་རྔ་བོ་ཆེན་པོ་རབ་ཏུ་བརྡུང་བ་དང༌། ༄༅། །ཆོས་བསྟན་པ་ཆེན་པོ་མཛད་པར་དགོངས་པ་སྟེ། རིགས་ཀྱི་བུ་དག །བདག་ཇི་ལྟར་སྤོབས་པ་དང༌། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྔ་ལྟས་འདི་ལྟ་བུ་འདི་བདག་གིས་མཐོང་སྟེ། སྔོན་གྱི་དེ་བཞིན་གཤེགས་པ་དེ་དག་གིས་ཀྱང་འོད་ཟེར་གྱི་སྣང་བ་འདི་བཏང་ བས༑ བདག་ནི་འདི་ལྟར་དེ་བཞིན་གཤེགས་པའང་ཆོས་ཆེན་པོ་བསྒྲག་པའི་འབེལ་བའི་གཏམ་མཛད་པར་བཞེད་པ་དང༌། ཆོས་ཆེན་པོ་བསྒྲག་པ་ཐོས་པར་མཛད་བཞེད་ པས་འདི་ལྟ་བུའི་སྔ་ལྟས་འདི་མཛད་པ་སྙམ་བྱེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་ཐམས་ཅད་ དང་མི་མཐུན་པའི་ཆོས་ཀྱི་རྣམ་གྲངས་བསྒྲག་པར་བཞད་པས་སྔ་ལྟས་ཆོ་འཕྲུལ་ཆེན་པོ་འོད་ཟེར་རབ་ཏུ་བཏང་བའི་སྣང་བ་འདི་ལྟ་བུ་འདི་སྟོན་ཏོ། །རིགས་ཀྱི་བུ་དང༌། བདག་ གིས་དྲན་པ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ། ཡངས་པ་དཔག་ཏུ་མེད་པ། བསམ་གྱིས་མི་ཁྱབ་པ་དཔག་གིས་མི་ལང་བ་ཚད་མེད་པ་དེའི་ ཕ་རོལ་གྱིའང་ཆེས་ཕ་རོལ་ཏུ་གྱུར་པ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་ བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཉི་ཟླ་སྒྲོན་མ་ཞེས་བྱ་བ་འཇིག་རྟེན་དུ་བྱུང་ སྟེ༑ དེས་ཆོས་བསྟན་པ་ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ་ཚིག་འབྲུ་བཟང་པོ། མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ་ ཡོངས་སུ་བྱང་བ་ཡང་དག་པར་སྟོན་ཏེ་འདི་ལྟ་སྟེ། ཉན་ཐོས་རྣམས་ལ་ནི་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་ལས་ཤིན་ཏུ་འདའ་བའི་ཕྱིར། མྱ་ངན་ལས་འདས་པའི་མཐར་ཐུག་པ་འཕགས་པའི་བདེན་པ་བཞི་དང་ལྡན་པ། རྟེན་ཅིང་འབྲེལ་པར་འབྱུང་བ་ལ་འཇུག་ པའི་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ཏེ། ཕ་རོལ་ཏུ་ཕྱིན་པ་དྲུག་དང་ལྡན་པ། ཐམས་ཅད་མཁྱེན་པའི་ཡེ་ཤེས་ཀྱི་མཐར་ཐུག་པའི་ཆོས་སྟོན་ཏོ། །རིགས་ཀྱི་བུ་དག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེའི་ ཕ་རོལ་གྱིའང་ཆེས་ཕ་རོལ་ན། ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་ཞེས་བྱ་བ་ཞིག་འཇིག་རྟེན་དུ་བྱུང་སྟེ། མ་ཕམ་པ། འདི་ ༄༅། །ལྟར་སྔ་རོལ་དང་སྔ་རོལ་བརྗོད་པའི་ཚུལ་འདིས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་ཞེས་བྱ་བར་ མཚན་གཅིག་པ། རིགས་དང་གདུང་གཅིག་པ་ཤ་སྟག་སྟེ། འདི་ལྟར་བྷ་ར་དྷྭ་ཛའི་རིགས་སུ་མཐུན་པ་དེ་བཞིན་གཤེགས་པ་ཉིད་ཁྲི་བྱུང་ངོ༌། །མ་ཕམ་པ། དེ་ལ་དེ་བཞིན་གཤེགས་ པ་ཉི་ཁྲི་པོ་དེ་དག་ཐོག་མའི་དེ་བཞིན་གཤེགས་པ་ནས་ཐ་མའི་དེ་བཞིན་གཤེགས་པའི་བར་དུ་དེ་དག་གིས་ཆོས་བཤད་པའང་ཚངས་པར་སྤྱོད་པ་ཐོག་མར་དགེ་བ། བར་དུ་དགེ་ བ༑ ཐ་མར་དགེ་བ། དོན་བཟང་པོ་ཚིག་འབྲུ་བཟང་པོ། མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་སྟོན་ཏེ་འདི་ལྟ་སྟེ། ཉན་ཐོས་རྣམས་ ལ་ནི་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་ལས་ཤིན་ཏུ་འདའ་བའི་ཕྱིར། མྱ་ངན་ལས་འདས་པའི་མཐར་ཐུག་པ་འཕགས་པའི་བདེན་པ་བཞི་དང་ལྡན་པ་རྟེན་ཅིང་འབྲེལ་པར་འབྱུང་བ་ལ་འཇུག་པའི་ཆོས་སྟོན་ཏོ། །བྱང་ཆུབ་སེམས་དཔའ་སེམས་ དཔའ་ཆེན་པོ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ཏེ། ཕ་རོལ་ཏུ་ཕྱིན་པ་དྲུག་དང་ལྡན་པ་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་ མཐར་ཐུག་པའི་ཆོས་སྟོན་ཏོ། །མ་ཕམ་པ། འདི་ལྟར་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེ་སྔོན་གཞོན་ ནུར་གྱུར་ཅིང་ཁབ་ན་བཞུགས་པ་ལས་མངོན་པར་མ་བྱུང་བའི་ཚེ་སྲས་བརྒྱད་ཡོད་པར་གྱུར་ཏེ། འདི་ལྟ་སྟེ། རྒྱལ་བུ་གཞོན་ནུ་བློ་གྲོས་ཞེས་བྱ་བ་དང༌། བཟང་པོའི་བློ་གྲོས་དང༌། མཐའ་ ཡས་བློ་གྲོས་དང༌། དཀོན་མཆོག་བློ་གྲོས་དང༌། ཁྱད་པར་བློ་གྲོས་དང༌། ཐེ་ཚོམ་ཀུན་བཅོམ་དང༌། དབྱངས་ཀྱི་བློ་གྲོས་དང༌། རྒྱལ་བུ་གཞོན་ནུ་ཆོས་ཀྱི་བློ་གྲོས་ཞེས་བྱ་བ་ཡོད་དོ། །མ་ ཕམ་པ༑ བཅོམ་ལྡན་འདས་ཉི་ཟླ་སྒྲོན་མ་དེའི་སྲས་རྒྱལ་བུ་གཞོན་ནུ་བརྒྱད་པོ་དེ་དག་རྫུ་འཕྲུལ་ཆེན་པོར་གྱུར་ཏེ། དེ་དག་རེ་རེའང་གླིང་ཆེན་པོ་བཞི་ལ་ཀུན་ཏུ་ལོངས་སྤྱོད་པར་ གྱུར་ཅིང་དེ་དག་ན་རྒྱལ་པོ་བྱེད་དོ། །དེ་དག་གིས་བཅོམ་ལྡན་འདས་དེ་ཁབ་ནས་མངོན་པར་བྱུང་བར་ཤེས་ཤིང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་ རྫོགས་པར་སངས་རྒྱས་པར་ཐོས་ནས། རྒྱལ་པོའི་ལོངས་སྤྱོད་ཐམས་ཅད་སྤངས་ཏེ། བཅོམ་ལྡན་འདས་དེའི་རྗེས་སུ་རབ་ཏུ་བྱུང་ནས་ཐམས་ཅད་ཀྱང་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཏུ་ཡང་དག་པར་ཞུགས་ཏེ་ཆོས་སྨྲ་བར་གྱུར་ཏོ། །རྒྱལ་བུ་གཞོན་ནུ་དེ་དག་རྟག་ཏུ་ཚངས་པར་སྤྱོད་ཅིང་སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་པར་ ༄༅། །གྱུར་ཏོ༑ ༑མ་ཕམ་པ། དེའི་ཚེ་ནའང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེས། ངེས་ པར་བསྟན་པ་ཆེན་པོ་ཞེས་བྱ་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའ་རྣམས་ལ་གདམས་པ་སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་ བཤད་ནས། དེའི་ཚེ་སྐད་ཅིག་ཐང་ཅིག་ཡུད་ཙམ་དེ་ཉིད་ལ་འཁོར་འདུས་པ་དེ་ཉིད་དུ་ཆོས་ཀྱི་གདན་ཆེན་པོ་དེ་ཉིད་ལ་སྐྱིལ་མོ་ཀྲུང་བཅས་ཏེ། མཐའ་ཡས་ངེས་པར་བསྟན་པའི་ གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྐུ་མི་གཡོ་ཞིང་སེམས་མི་གཡོ་བར་གྱུར་ནས་བཞུགས་སོ། །བཅོམ་ལྡན་འདས་དེ་སྙོམས་པར་ཞུགས་མ་ཐག་ཏུ། བཅོམ་ལྡན་འདས་ལ་མེ་ཏོག་མནྡཱ་ར་བ་དང༌། མནྡཱ་ར་བ་ཆེན་པོ་དང༌། མཉྫུ་ཥ་ཀ་དང༌། མཉྫུ་ཥ་ཀ་ཆེན་པོ་དང༌། ལྷའི་མེ་ཏོག་དག་གིས་ཆར་ཆེན་པོ་མངོན་པར་བབ་སྟེ། བཅོམ་ ལྡན་འདས་འཁོར་དང་བཅས་པ་ལ་མངོན་པར་འཐོར་རོ། །ཐམས་ཅད་དང་ལྡན་པའི་སངས་རྒྱས་ཀྱི་ཞིང་ཡང་རྣམ་པ་དྲུག་ཏུ་རབ་ཏུ་གཡོས་པར་གྱུར་ཏེ། འགུལ། ཀུན་ཏུ་རབ་ ཏུ་འགུལ། ལྡེག །ཀུན་ཏུ་རབ་ཏུ་ལྡེག །འཁྲུགས། ཀུན་ཏུ་རབ་ཏུ་འཁྲུགས་སོ། །མ་ཕམ་པ། ཡང་དེའི་ཚེ་འཁོར་དེར་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་རྣམས་ དང༌། རྒྱལ་ཕྲན་དང༌། སྟོབས་ཀྱི་འཁོར་ལོ་སྒྱུར་བ་དང༌། གླིང་བཞིའི་འཁོར་ལོས་བསྒྱུར་བ་རྣམས་འདུས་ནས་འཁོད་པར་གྱུར་པ་འཁོར་དང་བཅས་པ་དེ་དག་ཐམས་ཅད་བཅོམ་ལྡན་ འདས་ལ་ལྟ་ཞིང་ངོ་མཚར་དུ་གྱུར། རྨད་དུ་གྱུར། དགའ་བར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་དེ་བཞིན་གཤེགས་པ་ཉི་ཟླ་སྒྲོན་མའི་སྨིན་མཚམས་ཀྱི་བར་གྱི་མཛོད་སྤུ་ ནས་འོད་ཟེར་གཅིག་བྱུང་ནས་དེ་ཤར་ཕྱོགས་སུ་སངས་རྒྱས་ཀྱི་ཞིང་ཉི་ཁྲིར་བྱུང་སྟེ། སངས་རྒྱས་ཀྱི་ཞིང་དེ་དག་ཐམས་ཅད་འོད་ཟེར་དེའི་འོད་ཀྱིས་ཤིན་ཏུ་ཁྱབ་པར་སྣང་བར་གྱུར་ ཏེ༑ མ་ཕམ་པ། འདི་ལྟ་སྟེ། དཔེར་ན། ད་ལྟར་སངས་རྒྱས་ཀྱི་ཞིང་འདི་དག་སྣང་བར་གྱུར་པ་བཞིན་ནོ། །མ་ཕམ་པ། ཡང་དེའི་ཚེ་བཅོམ་ལྡན་འདས་དེའི་ཞབས་འབྲིང་ན། བྱང་ ཆུབ་སེམས་དཔའ་བྱེ་བ་ཕྲག་ཉི་ཤུ་འཁོད་པ་དང༌། འཁོར་དེ་ན་ཆོས་ཉན་པ་དེ་དག་འོད་ཟེར་ཆེན་པོའི་སྣང་བ་དེས་འཇིག་རྟེན་སྣང་བར་བྱས་པ་མཐོང་ནས་ངོ་མཚར་དུ་འགྱུར། རྨད་ དུ་གྱུར་ཏེ། ལྟད་མོ་ཆེར་བྱུང་ངོ༌། །མ་ཕམ་པ། དེའི་ཚེ་ན་ཡང་བཅོམ་ལྡན་འདས་དེའི་བསྟན་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་མཆོག་ཅེས་བྱ་བ་བྱུང་སྟེ། ༄༅། །དེའི་སློབ་མ་བརྒྱད་བརྒྱ་ཡོད་དོ། །བཅོམ་ལྡན་འདས་དེའང་ཏིང་ངེ་འཛིན་དེ་ལས་བཞེངས་ནས་བྱང་ཆུབ་སེམས་དཔའ་འོད་མཆོག་ལས་བརྩམས་ཏེ། དམ་ པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་ཡང་དག་པར་སྟོན་ཏེ། བར་གྱི་བསྐལ་པ་དྲུག་ཅུ་ཚང་བར་གདན་གཅིག་ལ་བཞུགས་ནས་སྐུ་མི་བསྐྱོད། སེམས་མི་གཡོ་བར་ བཤད་དོ། །འཁོར་དེ་དག་ཐམས་ཅད་ཀྱང་སྟན་གཅིག་ལ་འཁོད་དེ། ལུས་མི་བསྐྱོད་སེམས་མི་གཡོ་བར་བར་གྱི་བསྐལ་པ་དྲུག་ཅུར་བཅོམ་ལྡན་འདས་དེ་ལ་ཆོས་ཉན་ཏེ། འཁོར་ དེ་ན་སེམས་ཅན་འགའ་ཡང་ལུས་ངལ་བའང་མེད། སེམས་སྐྱོ་བའང་མེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་ཉི་ཟླ་སྒྲོན་མས་བར་གྱི་བསྐལ་པ་དྲུག་ཅུ་འདས་ཀྱི་བར་དུ། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའ་རྣམས་ ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་བཤད་ནས། སྐད་ཅིག་དེ་ཉིད་ལ་མྱ་ངན་ལས་འདའོ་ཞེས་ལྷ་དང་བཅས། བདུད་དང་བཅས། ཚངས་པ་དང་ བཅས་པའི་འཇིག་རྟེན་དང༌། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་མདུན་དུ། དགེ་སློང་དག །དོ་མོད་ནམ་གྱི་གུང་ཐུན་ལ་དེ་བཞིན་གཤེགས་པ་ཕུང་པོའི་ལྷག་མ་ མེད་པའི་མྱ་ངན་ལས་འདའ་བའི་དབྱིངས་སུ་ཡོངས་སུ་མྱ་ངན་ལས་འདའོ་ཞེས་གསུངས་སོ། །མ་ཕམ་པ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་ཉི་ཟླ་སྒྲོན་མ་དེས། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་གྱི་སྙིང་པོ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་ བསྟན་ནས་འཁོར་དེ་དག་ཐམས་ཅད་ལ་བཀའ་སྩལ་པ། དགེ་སློང་དག། བྱང་ཆུབ་སེམས་དཔའ་དཔལ་གྱི་སྙིང་པོ་འདི། ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མ་མེད་པའི་སྤྱན་ཞེས་བྱ་བར་འགྱུར་རོ་ཞེས་བྱ་བར་གསུངས་ སོ༑ ༑མ་ཕམ་པ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླའི་སྒྲོན་མ་དེའི་ནུབ་མོ་ནམ་གྱི་གུང་ཐུན་ལ། ཕུང་ པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་དེའང་བྱང་ཆུབ་སེམས་དཔའ་ སེམས་དཔའ་ཆེན་པོ་འོད་མཆོག་དེས་བླངས་ཏེ། བར་གྱི་བསྐལ་པ་བརྒྱད་ཅུའི་བར་དུ་བཅོམ་ལྡན་འདས་མྱ་ངན་ལས་འདས་པ་དེའི་བསྟན་པ་ལ་ཡང་དག་པར་བསྟན་ཏོ། །མ་ ༄༅། །ཕམ་པ། དེ་ལ་བཅོམ་ལྡན་འདས་དེའི་སྲས་བློ་གྲོས་ལ་སོགས་པ་བརྒྱད་པོ་དེ་དག་བྱང་ཆུབ་སེམས་དཔའ་འོད་མཆོག་དེའི་སློབ་མར་གྱུར་ཏེ། དེས་དེ་དག་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་དག་གིས་དེའི་འོག་ཏུ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་མཐོང་སྟེ། བཀུར་སྟི་བྱས་ ནས་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་དག་གི་ཐ་མ་ནི་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་མར་མེ་མཛད་ཡིན་ནོ། །སློབ་མ་བརྒྱད་བརྒྱ་པོ་དེ་དག་ལས་གཅིག་རྙེད་པ་ལ་རབ་ཏུ་གདུ་བ། བཀུར་སྟི་ལ་གདུ་བ། ཤེས་ཀྱི་ཁེ་ལ་གདུ་བ། གྲགས་པ་འདོད་པས་དེ་ལ་བསྟན་པའི་ཚིག་དང༌། ཡི་གེ་མི་ཟིན། མི་ཆགས་ཏེ། དེའི་མིང་ཡང་གྲགས་འདོད་ཅེས་བྱ་བར་གྱུར་ཏོ། །དེས་ཀྱང་དགེ་བའི་རྩ་བ་དེས་སངས་རྒྱས་ བྱེ་བ་ཁྲག་ཁྲིག་བརྒྱ་སྟོང་མང་པོ་མཉེས་པར་བྱས་སོ། །མཉེས་པར་བྱས་ནས་བསྟི་སྟང་བྱས། བཙུན་པར་བྱས། རི་མོར་བྱས། མཆོད་པ་དང༌། བཀུར་བ་དང༌། རིམ་གྲོ་བྱས་ སོ༑ ༑མ་ཕམ་པ། དེའི་ཚེ་དེའི་དུས་ན་བྱང་ཆུབ་སེམས་དཔའ་འོད་མཆོག་ཅེས་བྱ་བ་ཆོས་སྨྲ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ། ཡིད་གཉིས་སམ། ཐེ་ ཚོམ་ཟ་བར་གྱུར་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཁོ་བོ་དེའི་ཚེ་དེའི་དུས་ན་བྱང་ཆུབ་སེམས་དཔའ་འོད་མཆོག་ཅེས་བྱ་བ་ཆོས་སྨྲ་བར་གྱུར་ཏོ། །གང་ཡང་བྱང་ཆུབ་སེམས་དཔའ་ གྲགས་འདོད་ཅེས་བྱ་བ་ལེ་ལོ་ཅན་དུ་གྱུར་པ་དེ་ནི། མ་ཕམ་པ་ཁྱོད་ཉིད་དེའི་ཚེ་དེའི་དུས་ན། བྱང་ཆུབ་སེམས་དཔའ་གྲགས་འདོད་ཅེས་བྱ་བ་ལེ་ལོ་ཅན་དུ་གྱུར་པ་ཡིན་ནོ། །མ་ཕམ་པ། དེ་ལྟར་ཁོ་བོས་རྣམ་གྲངས་འདིས་ན་བཅོམ་ལྡན་འདས་ཀྱི་སྔ་ལྟས་འདི་ལྟ་བུའི་འོད་ཟེར་བཏང་བ་མཐོང་ནས། བཅོམ་ལྡན་འདས་ཀྱང་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་ མདོ་སྡེ་ཤིན་ཏུ་རྒྱས་པ་ཆེན་པོ་དེ་བཤད་པར་བཞེད་པ་སྙམ་བྱེད་དོ། །དེ་ནས་འཇམ་དཔལ་གཞོན་ནུར་གྱུར་པས་དོན་དེ་ཉིད་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་ སྨྲས་སོ༑ ༑འདས་པའི་དུས་རྣམས་རྗེས་སུ་དྲན་པ་ནི། །ཚད་མེད་བསམ་གྱིས་མི་ཁྱབ་བསྐལ་པ་ན། །དེ་ཚེ་རྒྱལ་བ་བྱུང་བ་སྐྱེ་དགུའི་མཆོག །མཚན་ནི་ཉི་ཟླ་སྒྲོན་མ་ཞེས་བྱ་བ། །སྐྱེ་ དགུ་འདྲེན་པ་དེ་ནི་ཆོས་སྟོན་ཏེ། །སེམས་ཅན་མཐའ་ཡས་བྱེ་བ་རྣམ་པར་འདུལ། །བྱང་ཆུབ་སེམས་དཔའ་བསམ་ཡས་བྱེ་བ་སྟོང༌། །མང་པོ་དེ་དག་ཡེ་ཤེས་ཡང་དག་འཛུད། །རྣམ་ པར་འདྲེན་པ་གཞོན་ནུར་གྱུར་པ་ཡི། །དེ་ཚེ་དེ་ཡི་སྲས་གྱུར་རྒྱལ་པོ་དག །ཐུབ་ཆེན་རབ་ཏུ་བྱུང་བ་དེ་མཐོང་ནས། །འདོད་སྤངས་ཐམས་ཅད་མྱུར་བར་རབ་ཏུ་བྱུང༌། །འཇིག་རྟེན་ ༄༅། །མགོན་པོ་དེ་ཡི་ཆོས་བཤད་པ། །མཐའ་ཡས་ངེས་པར་བསྟན་པ་མདོ་སྡེ་མཆོག །དེ་མིང་ཤིན་ཏུ་རྒྱས་པའི་མདོ་ཞེས་བྱ། །སྲོག་ཆགས་སྟོང་ཕྲག་བྱེ་བ་ དག་ལ་སྟོན། །རྣམ་པར་འདྲེན་པ་དེ་ཡིས་བཤད་མ་ཐག །དེ་ཚེ་སྐད་ཅིག་སྐྱིལ་མོ་ཀྲུང་བཅས་ནས། །མཐའ་ཡས་ངེས་བསྟན་ཏིང་འཛིན་དམ་པ་ལ། །ཐུབ་མཆོག་ཆོས་གདན་བཞུགས་ ནས་བསམ་གཏན་མཛད། །ལྷ་ཡི་མེ་ཏོག་མནྡཱ་ར་བ་འབབ། །རྨ་བརྡུངས་པར་ནི་རྔ་ཡི་སྒྲ་ཡང་བྱུང༌། །ལྷ་དང་གནོད་སྦྱིན་པར་སྣང་གནས་འཁོད་པ། །རྐང་གཉིས་དམ་པ་ལ་ནི་མཆོད་ པ་བྱེད༑ ༑ཞིང་རྣམས་ཐམས་ཅད་དེ་མ་ཐག་ཏུ་གཡོས། །དེ་ན་ངོ་མཚར་རྨད་དུ་བྱུང་བར་གྱུར། །སྨིན་མཚམས་ནས་ནི་ཤིན་ཏུ་མཛེས་པ་ཡི། །འདྲེན་པས་འོད་ཟེར་གཅིག་པོ་རབ་ བཏང་བ། །ཤར་གྱི་ཕྱོགས་སུ་འོད་ཟེར་དེ་སོང་བས། །ཞིང་རྣམས་སྟོང་ཕྲག་བཅོ་བརྒྱད་ཚང་བ་དག །རབ་ཏུ་སྣང་བས་འཇིག་རྟེན་ཐམས་ཅད་མཛེས། །སེམས་ཅན་རྣམས་ཀྱི་ ཤི་འཕོ་སྐྱེ་བ་སྟོན། །རྣམ་པར་འདྲེན་པའི་འོད་ཟེར་དེ་ཡི་མཐུས། །དེ་ལྟར་དེ་ན་ལ་ལ་རིན་ཆེན་ཞིང༌། །དེ་བཞིན་ཁ་དོག་བཻ་ཌཱུཪྻ་ཡི་མདོག །བལྟ་ན་སྡུག་པ་སྣ་ཚོགས་སྣང་བར་ གྱུར༑ ༑ལྷ་དང་མི་དང་དེ་བཞིན་གནོད་སྦྱིན་ཀླུ། །ལྷ་ཡི་བུ་མོ་དྲི་ཟ་མིའམ་ཅི། །གང་རྣམས་བདེ་བར་གཤེགས་ལ་མཆོད་བརྩོན་པ། །དེ་དག་འཇིག་རྟེན་ཁམས་ན་མཆོད་ བྱེད་སྣང༌། །སངས་རྒྱས་རང་འབྱུང་དེ་དག་ཉིད་ཀྱང་སྣང༌། །གསེར་གྱི་མཆོད་སྡོང་ལྟ་བུར་བལྟ་ན་སྡུག །བཻ་ཌཱུཪྻ་ཡི་དབུས་ན་གསེར་གཟུགས་བཞིན། །འཁོར་གྱི་དབུས་ན་ཆོས་ནི་རབ་ཏུ་ གསུང༌། །དེ་ན་ཉན་ཐོས་གྲངས་ཡོད་མ་ཡིན་ཏེ། །བདེ་གཤེགས་ཉན་ཐོས་དེ་སྙེད་ཚད་མེད་པ། །སོ་སོའི་ཞིང་དུ་རྣམ་པར་འདྲེན་པ་ཡི། །འོད་ཟེར་འོད་ཀྱིས་དེ་དག་ཐམས་ཅད་སྟོན། ། བརྩོན་འགྲུས་ལྡན་ཞིང་ཚུལ་ཁྲིམས་མ་ཉམས་ཏེ། །ཚུལ་ཁྲིམས་སྐྱོན་མེད་ནོར་བུ་རིན་ཆེན་འདྲ། །མི་མགོན་སྲས་དག་རི་ཡི་སུལ་དག་ན། །གནས་ཤིང་སྤྱོད་པ་དེ་དག་སྣང་བར་གྱུར། ། བདོག་པ་ཐམས་ཅད་མ་ལུས་ཡོངས་སུ་གཏོང༌། །བརྟན་པ་བཟོད་པའི་སྟོབས་ཅན་བསམ་གཏན་དགའ། །བྱང་ཆུབ་སེམས་དཔའ་གངྒཱའི་བྱེ་སྙེད་མང༌། །འོད་ཟེར་དེ་ཡིས་ཐམས་ཅད་རབ་ ཏུ་སྣང༑ ༑བསྐྱོད་པ་མེད་ཅིང་གཡོ་བ་མེད་པར་ཡང༌། །བཟོད་ནས་བསམ་གཏན་དགའ་ཞིང་མཉམ་པར་བཞག །དེ་དག་བསམ་གཏན་བྱང་ཆུབ་མཆོག་ཞུགས་པ། །བདེ་བར་གཤེགས་ པའི་ཐུགས་ཀྱི་སྲས་རྣམས་སྣང༌། །ཡང་དག་ཞི་བ་ཟག་པ་མེད་པའི་གནས། །ཤིན་ཏུ་ཤེས་ནས་ཡང་དག་རབ་སྟོན་ཏེ། །འཇིག་རྟེན་ཁམས་མང་དུ་ནི་ཆོས་ཀྱང་འཆད། །དེ་འདྲའི་བྱེད་ པ་བདེར་གཤེགས་མཐུ་ཡིས་བྱུང༌། །ཉི་མ་ཟླ་བ་སྒྲོན་མ་དེ་ཡི་མཐུས། །སྐྱོང་བའི་འཁོར་བཞིས་དེ་དག་མཐོང་ནས་སུ། །དེ་ཚེ་ཐམས་ཅད་དགའ་བར་གནས་གྱུར་ཏེ། །འདི་ལྟར་ཅི་ ༄༅། །ཞིག་ཅེས་ནི་ཕན་ཚུན་འདྲི། །གནོད་སྦྱིན་ལྷ་མིས་དེ་མཆོད་མི་རིང་བར། །འཇིག་རྟེན་འདྲེན་པ་ཏིང་ངེ་འཛིན་ལས་བཞེངས། །ཆོས་སྨྲ་བྱང་ཆུབ་སེམས་དཔའ་ གང་མཁས་པ། །འོད་མཆོག་སྲས་ལ་དེ་ཚེ་འདི་སྐད་གསུངས། །མཁས་པ་ཁྱོད་ནི་འཇིག་རྟེན་མིག་དང་ལམ། །ང་ཡི་ཆོས་འཛིན་ཤིན་ཏུ་ཡིད་བརྟན་པས། །ཇི་ལྟར་སྲོག་ཆགས་ཕན་ ཕྱིར་ངས་བཤད་པ། །ང་ཡི་ཆོས་མཛོད་འདི་ལ་ཁྱོད་མངོན་སུམ། །བྱང་ཆུབ་སེམས་དཔའ་མང་པོ་ཀུན་བཀོད་དེ། །དགའ་བར་བྱས་ཤིང་ཤིན་ཏུ་བསྔགས་བསྟོད་ནས། །བར་གྱི་ བསྐལ་པ་དྲུག་ཅུ་ཚང་བར་ནི། །དེ་ཚེ་རྒྱལ་བ་དེ་ཡིས་ཆོས་མཆོག་བཤད། །གདན་གཅིག་སྟེང་བཞུགས་འཇིག་རྟེན་མགོན་པོ་ཡིས། །ཆོས་མཆོག་དམ་པ་དག་ནི་གང་བཤད་ པ༑ ༑དེ་དག་ཐམས་ཅད་འོད་མཆོག་རྒྱལ་བའི་སྲས། །ཆོས་སྨྲར་གྱུར་པ་དེ་ཡིས་ཤིན་ཏུ་བཟུང༌། །རྒྱལ་བ་དེས་ནི་ཆོས་ཀྱི་མཆོག་བཤད་དེ། །སྐྱེ་བོ་དུ་མ་རབ་ཏུ་དགའ་བྱས་ ནས༑ ༑དེ་ཡི་ཉིན་པར་ལྷར་བཅས་འཇིག་རྟེན་མདུན། །རྣམ་པར་འདྲེན་པ་དེ་ནི་འདི་སྐད་གསུང༌། །ང་ཡིས་ཆོས་ཀྱི་ཚུལ་འདི་རབ་བསྟན་ཏེ། །ཆོས་ཀྱི་རང་བཞིན་ཅི་འདྲ་བཤད་ ཟིན་གྱི། །དགེ་སློང་དོ་ནུབ་ནམ་གྱི་གུང་ཐུན་ལ། །ང་ནི་མྱ་ངན་འདའ་བའི་དུས་ལ་བབ། །ང་ཡི་བསྟན་པ་འདི་ལ་རབ་སྦྱོར་ལ། །བག་མེད་མ་ཡིན་དད་པ་སྙིང་པོར་གྱིས། །བསྐལ་ པ་བྱེ་བ་ཁྲག་ཁྲིག་འདས་པར་ཡང༌། །རྒྱལ་བ་དྲང་སྲོང་ཆེན་པོ་རྙེད་པར་དཀའ། །རྐང་གཉིས་དམ་པ་ཤིན་ཏུ་མྱུར་བ་རུ། །མྱ་ངན་ལས་ནི་འདའ་བའི་སྒྲ་ཐོས་ནས། །སངས་རྒྱས་ སྲས་རྣམས་མང་པོ་མྱ་ངན་སྐྱེས། །སྡུག་བསྔལ་རབ་དང་ཤིན་ཏུ་ལྡན་པར་གྱུར། །སྲོག་ཆགས་བསམ་ཡས་བྱེ་མང་དེ་དག་ལ། །མི་ཡི་དབང་པོ་རྒྱལ་པོས་དབུགས་ཕྱུང་བ། །མྱ་ ངན་ང་འདས་དགེ་སློང་མ་འཇིགས་ཤིག །ང་ཡི་འོག་ཏུ་སངས་རྒྱས་འབྱུང་བ་ནི། །བྱང་ཆུབ་སེམས་དཔའ་དཔལ་སྙིང་མཁས་པ་འདི། །ཟག་མེད་ཡེ་ཤེས་འདི་ནི་རྟོགས་པར་རིག། ང་ཡི་བྱང་ཆུབ་མཆོག་རབ་འཐོབ་འགྱུར་ཏེ། །སྤྱན་དང་ཡན་ལག་དྲི་མེད་རྒྱལ་བར་འོང༌། །དེ་ཚེ་དེ་ཡི་ནམ་གྱི་གུང་ཐུན་ལ། །རྒྱུ་ཟད་མེ་དང་འདྲ་བར་མྱ་ངན་འདས། །དེ་ཡི་སྐུ་གདུང་ ཤིན་ཏུ་རྒྱས་གྱུར་ཏེ། །མཆོད་རྟེན་བྱེ་བ་ཁྲག་ཁྲིག་མཐའ་ཡས་སོ། །དེ་ན་དགེ་སློང་དེ་བཞིན་དགེ་སློང་མ། །གང་རྣམས་བྱང་ཆུབ་མཆོག་ལ་རབ་ཞུགས་ཤིང༌། །བདེ་གཤེགས་ དེ་ཡི་བསྟན་ལ་མངོན་བརྩོན་པ། །དེ་དག་མི་ཉུང་གངྒཱའི་བྱེ་མ་སྙེད། །དེ་ཚེ་ཆོས་སྨྲར་གང་གྱུར་དགེ་སློང་ནི། །གང་གིས་ཆོས་དེ་བཟུང་བ་འོད་མཆོག་སྟེ། །བར་གྱི་བསྐལ་པ་བརྒྱད་ ཅུ་ཚང་བར་དེས། །བསྐལ་པ་དེ་ལ་ཆོས་མཆོག་རབ་ཏུ་སྟོན། །དེ་ཡི་སློབ་མར་གྱུར་པ་བརྒྱད་བརྒྱ་དག །དེ་དག་ཐམས་ཅད་ཡོངས་སུ་སྨིན་པར་བྱས། །དེ་དག་སངས་རྒྱས་བྱེ་ ༄༅། །བ་མང་པོ་མཐོང༌། །དྲང་སྲོང་ཆེན་པོ་དེ་དག་བཀུར་སྟི་བྱས། །དེ་ཚེ་སྤྱད་པ་རྗེས་སུ་མཐུན་སྤྱད་ན། །འཇིག་རྟེན་མང་པོ་ཁམས་སུ་སངས་རྒྱས་གྱུར། ། གཅིག་འོག་གཅིག་ཏུ་དེ་དག་རྗེས་བཞིན་དུ། །བྱང་ཆུབ་མཆོག་ཏུ་གཅིག་གིས་གཅིག་ལུང་བསྟན། །སངས་རྒྱས་དེ་དག་རིམ་གྱིས་བྱུང་བ་ཡི། །ཐ་མར་གྱུར་པ་མར་མེ་མཛད་ པ་སྟེ༑ ༑ལྷ་ཡི་ལྷ་མཆོག་དྲང་སྲོང་མང་པོའི་མཆོག །སྲོག་ཆགས་བྱེ་བ་སྟོང་ཡང་རྣམ་པར་བཏུལ། །གང་སྔོན་བདེ་བར་གཤེགས་པ་དེ་ཡི་སྲས། །དེ་ཡི་ཚེ་ན་འོད་མཆོག་ ཆོས་སྨྲ་བའི། །སློབ་མ་སྲེད་དང་ལྡན་ཞིང་ལེ་ལོ་ཅན། །ཤེས་ཀྱི་ཁེ་དང་རྙེད་པ་འཚོལ་བ་དང༌། །ཤིན་ཏུ་གྲགས་པ་འདོད་པའི་ཤས་ཆེ་ཞིང༌། །གྲོང་ནས་གྲོང་དུ་རྒྱུ་བར་གྱུར་ པ་སྟེ༑ ༑དེ་ཡི་ཁ་ཏོན་ལུང་ནོས་དེ་བཞིན་ཀུན། །དེ་ཡི་ཚེ་ན་བཤད་པ་རྣམས་མི་ཟིན། །དེ་ཡི་མིང་ཡང་འདི་ཞེས་བྱ་བར་གྱུར། །གྲགས་པ་འདོད་ཅེས་ཕྱོགས་སུ་རྣམ་པར་གྲགས།། དེ་ཡང་དགེ་བ་རྣམས་ཀྱི་ལས་དེ་དག །འདྲེན་མར་གྱུར་པ་མངོན་པར་འདུས་བྱས་པས། །སངས་རྒྱས་སྟོང་ཕྲག་བྱེ་བ་མཉེས་བྱས་ཏེ། །དེ་དག་མཆོད་པ་རྒྱ་ཆེར་བྱས་པར་གྱུར། ། རྗེས་སུ་མཐུན་པའི་སྤྱོད་པ་རབ་སྤྱད་ནས། །སངས་རྒྱས་ཤཱཀྱ་སེང་གེ་འདི་ཡང་མཐོང༌། །དེ་ནི་འདིར་ཡང་ཐ་མར་བྱུང་བ་སྟེ། །རྗེས་བཞིན་བྱང་ཆུབ་མཆོག་ཀྱང་འཐོབ་འགྱུར་བ། ། བྱམས་པའི་རིགས་སུ་བཅོམ་ལྡན་འདས་སུ་འགྱུར། །སྲོག་ཆགས་སྟོང་ཕྲག་བྱེ་བ་རྣམ་པར་འདུལ། །བདེར་གཤེགས་མྱ་ངན་འདས་པའི་བསྟན་པ་ལ། །དེ་ཚེ་ལེ་ལོ་ཅན་དུ་གང་གྱུར་ པ༑ ༑དེ་ན་དེ་འདྲར་གྱུར་པ་ཁྱོད་ཉིད་དོ། །དེ་ཚེ་ཆོས་སྨྲར་གྱུར་པ་ཁོ་བོ་སྟེ། །ཁོ་བོས་དེ་དང་དེ་ཡི་རྒྱུ་དང་གཞིས། །ཡེ་ཤེས་གྲགས་པ་དེ་ཡི་ལྟས་བྱུང་བ། །སྔོན་ཚེ་དེ་ན་ཁོ་བོས་མཐོང་ གྱུར་པ༑ ༑དེ་འདྲའི་ལྟས་འདི་དེང་ཡང་མཐོང་བས་ན། །ངེས་པར་རྒྱལ་བའི་དབང་པོ་ཀུན་ཏུ་སྤྱན། །ཤཱཀྱའི་རྒྱལ་ཆེན་དོན་དམ་གཟིགས་པས་ཀྱང༌། །དེ་ཚེ་ཁོ་བོས་རྣམ་གྲངས་མཆོག་ ཐོས་གང༌། །དེ་དག་ཉིད་ནི་འདིས་ཀྱང་བཤད་པར་དགོངས། །དེ་ཡི་ལྟས་ཉིད་དེ་རིང་ཡོངས་རྫོགས་ཀྱི། །རྣམ་པར་འདྲེན་པ་རྣམས་ཀྱི་ཐབས་མཁས་པ། །ཤཱཀྱ་སེང་གེ་ཡང་དག་ འཇོག་མཛད་དེ། །ཆོས་ཀྱི་དབྱིངས་ཉིད་ཕྱག་རྒྱ་སྟོན་པར་འགྱུར། །ཐལ་མོ་སྦྱར་ཏེ་སེམས་བཟང་བརྩོན་པར་གྱིས། །འཇིག་རྟེན་ཕན་ཞིང་ཐུགས་བརྩེ་གནོན་གྱུར་ཏེ། །མཐའ་ཡས་ པ་ཡི་ཆོས་ཀྱི་ཆར་པ་འབབ། །གང་དག་བྱང་ཆུབ་ཕྱིར་ཞུགས་ངོམས་པར་མཛད། །བྱང་ཆུབ་སེམས་དཔའ་བྱང་ཆུབ་འདིར་ཞུགས་པ། །གང་དག་མཁས་པ་ཉིད་ལས་སྐྱེས་གྱུར་པ། ། དེ་དག་རྣམས་ཀྱི་སོམ་ཉི་གང་ཡིན་དང༌། །ཡིད་གཉིས་ཐེ་ཚོམ་གང་ཡིན་དེ་སེལ་གྱུར། །དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་ལས། གླེང་གཞིའི་ལེའུ་ཞེས་བྱ་ ༄༅། །སྟེ་དང་པོའོ།། །།དམ་པའི་ཆོས་པདྨ་དཀར་པོ། བམ་པོ་གཉིས་པ། དེ་ནས་བཅོམ་ལྡན་འདས་དྲན་པ་དང་ལྡན་ཞིང་མཁྱེན་བཞིན་དུ་ ཏིང་ངེ་འཛིན་དེ་ལས་བཞེངས་སོ། །བཞེངས་ནས་ཚེ་དང་ལྡན་པ་ཤཱ་རདྭ་ཏིའི་བུ་ལ་བཀའ་སྩལ་པ། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་རྣམས་ཀྱིས་ཐུགས་སུ་ཆུད་པ། སངས་རྒྱས་ཀྱི་ཡེ་ཤེས་ནི་ཟབ་པ། མཐོང་བར་དཀའ་བ། རྟོགས་པར་དཀའ་བ་སྟེ། ཉན་ཐོས་དང་རང་སངས་རྒྱས་ཐམས་ ཅད་ཀྱིས་ཤེས་པར་དཀའོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི། སངས་རྒྱས་བྱེ་བ་ཁྲག་ ཁྲིག་བརྒྱ་སྟོང་མང་པོ་ལ་བསྙེན་བཀུར་མཛད་མཛད་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྤྱོད་པ་སྤྱད་སྤྱད་ པ༑ ཡུན་རིང་པོ་ནས་རྗེས་སུ་ཞུགས་པ། བརྩོན་འགྲུས་མཛད་མཛད་པ་སྟེ། ངོ་མཚར་དང་རྨད་དུ་བྱུང་བའི་ཆོས་དང་ལྡན་ཞིང་ཤེས་པར་དཀའ་བའི་ཆོས་རྣམས་མཁྱེན་ པའི་ཕྱིར་རོ། །ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ལྡེམ་པོར་དགོངས་ཏེ་བཤད་པ་ནི་ཤེས་པར་དཀའོ། ། དེ་ཅིའི་ཕྱིར་ཞེ་ན། རང་གིས་རིག་པའི་ཆོས་རྣམས་ཐབས་མཁས་པ་དང༌། ཡེ་ཤེས་མཐོང་བ་དང༌། རྒྱུ་དང༌། གཞི་དང༌། དམིགས་པ་དང༌། ངེས་པའི་ཚིག་དང༌། རྣམ་པར་རིག་ བྱེད་སྣ་ཚོགས་ཀྱིས་ཡང་དག་པར་སྟོན་ཏེ། ཐབས་མཁས་པ་དེ་དང་དེ་དག་གིས་སེམས་ཅན་དེ་དང་དེ་ལ་ཆགས་པ་རྣམས་རབ་ཏུ་འགྲེལ་བའི་ཕྱིར་རོ། །ཤཱ་རིའི་བུ། དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཐབས་མཁས་པ་ཆེན་པོ་དང༌། ཡེ་ཤེས་མཐོང་བ་དམ་པའི་ཕ་རོལ་ཏུ་བྱོན་པའོ། །ཤཱ་རིའི་བུ། དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི། ཆགས་པ་མེད་ཅིང་ཐོགས་པ་མེད་པའི་ཡེ་ཤེས་མཐོང་བ་དང༌། སྟོབས་དང༌། མི་འཇིགས་ པ་དང༌། མ་འདྲེས་པ་དང༌། དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང་སྙོམས་པར་འཇུག་པ་ དང༌། རྨད་དུ་བྱུང་བའི་ཆོས་དང་ལྡན་ཏེ། ཆོས་རྣམ་པ་སྣ་ཚོགས་ཡང་དག་པར་སྟོན་པའོ། །ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་རྣམས་ནི་ངོ་མཚར་ཆེན་པོ་བརྙེས་པའོ། །ཤཱ་རིའི་བུ། དེ་ཙམ་གྱིས་བཤད་པ་ཆོད་པར་གྱིས་ཤིག། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་ ༄༅། །རྫོགས་པའི་སངས་རྒྱས་རྣམས་ནི་ངོ་མཚར་མཆོག་བརྙེས་པ་སྟེ། ཤཱ་རིའི་བུ། དེ་བཞིན་གཤེགས་པས་ཆོས་གང་མཁྱེན་པའི་ཆོས་དེའང་དེ་བཞིན་ གཤེགས་པས་དེ་བཞིན་གཤེགས་པ་ཉིད་ལ་འཆད་དོ། །ཤཱ་རིའི་བུ། ཆོས་ཐམས་ཅད་ཀྱང་དེ་བཞིན་གཤེགས་པ་ཉིད་སྟོན་ཏོ། །ཆོས་ཐམས་ཅད་ཀྱང་དེ་བཞིན་གཤེགས་ པ་ཉིད་ཀྱིས་མཁྱེན་ཏེ་ཆོས་དེ་དག་གང་ཡིན་པ་དང༌། ཆོས་དེ་དག་ཇི་ལྟ་བུ་ཡིན་པ་དང༌། ཆོས་དེ་དག་ཅི་འདྲ་བ་དང༌། ཆོས་དེ་དག་གིས་མཚན་ཉིད་གང་ཡིན་པ་དང༌། ཆོས་ དེ་དག་གི་ངོ་བོ་ཉིད་ཅི་ཡིན་པ་དང༌། ཆོས་དེ་དག་གང་ཡིན་པ་དང༌། ཇི་ལྟ་བུ་ཡིན་པ་དང༌། ཅི་འདྲ་བ་དང༌། མཚན་ཉིད་གང་ཡིན་པ་དང༌། ངོ་བོ་ཉིད་ཅི་ཡིན་པའང་མཁྱེན་ཏོ། །དེ་ནས་ བཅོམ་ལྡན་འདས་ཀྱིས་དོན་དེ་ཉིད་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ལྷ་མིར་བཅས་པའི་འཇིག་རྟེན་ན། །དཔའ་བོ་ཆེན་པོ་དཔག་མེད་པ། ། རྣམ་འདྲེན་སེམས་ཅན་ཐམས་ཅད་ཀྱིས། །རྣམ་པ་ཀུན་ཏུ་ཤེས་མི་ནུས། །དེ་དག་སྟོབས་དང་རྣམ་ཐར་དང༌། །འཇིགས་མེད་གང་དག་ཅི་འདྲ་དང༌། །སངས་རྒྱས་ཆོས་རྣམས་ཅི་ འདྲ་བ༑ ༑སུས་ཀྱང་ཤེས་པར་མི་ནུས་སོ། །སངས་རྒྱས་བྱེ་བ་གང་དག་ན། །ཟབ་ཅིང་ཤིན་ཏུ་ཕྲ་བ་དང༌། །རིག་དཀའ་མཐོང་བར་དཀའ་བ་ཡི། །སྤྱོད་པ་དག་ནི་སྔན་ཆད་བསྙེན། ། བསྐལ་པ་བྱེ་བ་བསམ་ཡས་སུ། །སྤྱོད་པ་དེ་དག་སྤྱད་པ་ཡི། །འབྲས་བུ་དེ་ནི་ཅི་འདྲ་བ། །བྱང་ཆུབ་སྙིང་པོར་ངས་མཐོང་ངོ༌། །དེ་ནི་འཇིག་རྟེན་རྣམས་འདྲེན་པ། །གཞན་དག་ན་ནི་ངས་ཀྱང་དེ།། ཅི་ལྟ་ཡིན་དང་ཅི་འདྲ་དང༌། །དེ་ཡི་མཚན་ཉིད་ཅི་འདྲ་ཤེས། །དེ་ནི་བསྟན་དུ་མི་ནུས་ཏེ། །དེ་ནི་བརྗོད་དུ་ཡོང་མེད་དོ། །མོས་པ་ལ་ནི་གང་གནས་པ། །བྱང་ཆུབ་སེམས་དཔའ་མ་གཏོགས་ པར༑ ༑གང་ལ་ཆོས་དེ་བསྟན་པ་དང༌། །བསྟན་པ་དག་ཀྱང་ཤེས་པ་ཡི། །དེ་འདྲའི་སེམས་ཅན་སུ་ཡང་ནི། །འཇིག་རྟེན་དག་ན་ཡོད་མ་ཡིན། །གང་དག་འཇིག་རྟེན་མཁྱེན་པའི་ཉན་ཐོས་ པ༑ ༑ལྷག་པར་བྱས་པ་བདེ་བར་གཤེགས་པས་བསྔགས། །ཟག་ཟད་ཐ་མའི་ལུས་འཛིན་དེ་དག་གི །ཡུལ་ནི་རྒྱལ་བའི་ཡེ་ཤེས་འདི་ལ་མེད། །གལ་ཏེ་འཇིག་རྟེན་དེ་དག་ཐམས་ ཅད་དུ༑ ༑ཤཱ་རིའི་བུ་དང་འདྲ་བས་གང་གྱུར་ཏེ། །གཅིག་ཏུ་འདུས་པར་གྱུར་ནས་རྣམ་བསམས་ཀྱང༌། །དེ་དག་བདེར་གཤེགས་ཡེ་ཤེས་ཤེས་མི་ནུས། །གལ་ཏེ་ཁྱོད་དང་འདྲ་བའི་ མཁས་རྣམས་ཀྱིས། །ཕྱོགས་རྣམས་བཅུ་ཆར་གང་བར་གྱུར་པ་དང༌། །གང་ཡང་ང་ཡི་ཉན་ཐོས་འདི་གཞན་རྣམས། །དེ་དག་གིས་ཀྱང་དེ་བཞིན་གང་གྱུར་ཏེ། །དེ་དག་ཐམས་ཅད་གཅིག་ ཏུ་དེང་འདུས་ནས། །བདེ་བར་གཤེགས་པའི་ཡེ་ཤེས་རྣམས་བསམས་ཀྱང༌། །ཇི་ཙམ་ཚད་མེད་ཡེ་ཤེས་ངས་ཤེས་པ། །ཐམས་ཅད་འདུས་པས་ཤེས་པར་མི་ནུས་སོ། །ཟག་པ་མེད་པར་ ༄༅། །གྱུར་པའི་རང་སངས་རྒྱས། །དབང་པོ་རྣོ་བ་ཐ་མའི་ལུས་འཛིན་པས། །ཇི་ལྟར་སྨྱིག་དང་འདམ་བུའི་ཚལ་བཞིན་དུ། །ཕྱོགས་བཅུ་ཐམས་ཅད་ གང་བར་གྱུར་པ་དག །གཅིག་ཏུ་འདུས་ནས་རྣམ་པར་བསམས་བྱས་ཀྱང༌། །ང་ཡི་ཆོས་ཀྱི་མཆོག་གི་ཕྱོགས་ཙམ་ཡང༌། །བསྐལ་པ་བྱེ་བ་ཁྲག་ཁྲིག་མཐའ་ཡས་སུ། །དེ་ཡི་ཡང་ དག་དོན་ནི་ཡོང་མི་ཤེས། །བྱང་ཆུབ་སེམས་དཔའ་ཐེག་པར་གསར་ཞུགས་པ། །སངས་རྒྱས་བྱེ་བ་མང་ལ་བྱ་བ་བྱས། །ཤིན་ཏུ་ངེས་དོན་ཆོས་སྨྲ་མང་པོ་རྣམས། །དེ་དག་གིས་ཀྱང་ ཕྱོགས་བཅུ་གང་གྱུར་ཏེ། །སྨྱིག་དང་འདམ་བུ་བཞིན་དུ་འཇིག་རྟེན་ཀུན། །བར་མཚམས་མེད་པར་རྟག་ཏུ་གང་གྱུར་ལ། །གཅིག་ཏུ་འདུས་ནས་རྣམ་པར་སེམས་བྱེད་ཅིང༌། །ཤེས་ རབ་ཕྲ་བས་གཞན་དུ་མི་སེམས་པར། །བསྐལ་པ་བྱེ་བ་མང་པོ་དཔག་མེད་པ། །གངྒཱའི་བྱེ་མ་སྙེད་དུ་བསམ་བྱས་ཀྱང༌། །ཆོས་གང་བདེ་བར་གཤེགས་པས་མངོན་གཟིགས་པ། །འདི་ ལ་དེ་དག་རྣམས་ཀྱི་ཡུལ་མེད་དོ། །ཕྱིར་མི་ལྡོག་པའི་བྱང་ཆུབ་སེམས་དཔའ་གང༌། །མི་ཉུང་གངྒཱའི་བྱེ་མ་སྙེད་རྣམས་ཀྱིས། །གཞན་དུ་མི་སེམས་རྣམ་པར་བསམས་བྱས་ཀྱང༌།། འདི་ལ་དེ་དག་གི་ཡང་ཡུལ་མེད་དོ། །ཟབ་ཅིང་ཤིན་ཏུ་ཕྲ་བའི་ཆོས་རྟོགས་ཤིང༌། །རྟོག་པ་མེད་ལ་ཐམས་ཅད་ཟག་མེད་པ། །ཕྱོགས་བཅུའི་འཇིག་རྟེན་རྒྱལ་བ་དེ་དག་དང༌། །ངས་ནི་ འདི་ན་དེ་དག་ཅི་འདྲ་ཤེས། །གཞན་མིན་གསུང་བ་རྒྱལ་བ་དྲང་སྲོང་ཆེ། །ཡུན་རིང་དུས་ན་མཆོག་གི་དོན་འཆད་ཀྱི། །བདེ་བར་གཤེགས་པས་གང་བསྟན་དེ་ལ་ནི། །མོས་པ་ཕུན་སུམ་ཚོགས་ བྱོས་ཤཱ་རིའི་བུ། །ཉན་ཐོས་པ་ནི་འདི་དག་ཐམས་ཅད་དང༌། །རང་སངས་རྒྱས་སུ་མི་གང་ཞུགས་པ་དང༌། །མྱ་ངན་འདས་ལ་ངས་ནི་གང་བཀོད་ཅིང༌། །སྡུག་བསྔལ་རྒྱུད་ལས་ཡང་དག་དཀྲོལ་ ལ་བསྒོའོ། །གང་ཕྱིར་འཇིག་རྟེན་དུ་ནི་ཆོས་མང་བཤད། །དེ་དང་དེ་ལ་ཆགས་པ་རབ་དཀྲོལ་ཞིང༌། །ཐེག་པ་གསུམ་དག་ཉེ་བར་བསྟན་པ་ནི། །དེ་དག་ང་ཡི་ཐབས་མཁས་མཆོག་ཡིན་ནོ། ། དེ་ནས་འཁོར་དེ་ན་ཀུན་ཤེས་ཀཽ་ཎྜི་ནྱ་ལ་སོགས་པ་ཉན་ཐོས་ཆེན་པོ་གང་དག་དགྲ་བཅོམ་པ་ཟག་པ་ཟད་པ་དབང་དང་ལྡན་པར་གྱུར་པ་སྟོང་ཉིས་བརྒྱ་དང༌། གཞན་ཡང་གང་དག་ཉན་ཐོས་ ཀྱི་ཐེག་པ་ལ་ཞུགས་པའི་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དག་དང༌། གང་ཡང་རང་སངས་རྒྱས་ཀྱི་ཐེག་པ་ལ་ཞུགས་པ་དེ་དག་ཐམས་ཅད་འདི་ སྙམ་དུ་སེམས་ཏེ། བཅོམ་ལྡན་འདས་ཀྱིས་དེ་བཞིན་གཤེགས་པ་རྣམས་ཀྱི་ཐབས་མཁས་པ་ཆེར་བསྔགས་པ་དང༌། ཆོས་ཟབ་མོ་དེ་ཡང་མངོན་པར་རྫོགས་པར་སངས་རྒྱས་སོ་ཞེས་ གསུང་ཞིང་ཉན་ཐོས་དང༌། རང་སངས་རྒྱས་ཐམས་ཅད་ཀྱིས་ཤེས་པར་དཀའོ་ཞེས་གསུངས་པའི་རྒྱུ་ནི་གང༌། གཞི་ནི་ཅི་ཞིག །འདི་ལྟར་བཅོམ་ལྡན་འདས་ཀྱིས་རྣམ་པར་ ༄༅། །གྲོལ་བ་གཅིག་གོ །ཞེས་བཀའ་སྩལ་ཏོ། །བདག་ཅག་རྣམས་ཀྱང་སངས་རྒྱས་ཀྱི་ཆོས་རྣམས་རྙེད་པར་འགྱུར་ཞིང་མྱ་ངན་ལས་འདས་པ་ཐོབ་པ་ཡིན་མོད་ཀྱི། བཅོམ་ལྡན་འདས་ཀྱིས་གསུངས་པ་དེའི་དོན་བདག་ཅག་གིས་མ་རིག་གོ་སྙམ་མོ། །དེ་ནས་ཚེ་དང་ལྡན་པ་ཤཱ་རིའི་བུས་འཁོར་བཞི་པོ་དེ་དག་སོམ་ཉི་དང་ཐེ་ཚོམ་ཟ་བར་རིག་སྟེ། སེམས་ ཀྱི་རྣམ་པར་རྟོག་པ་སེམས་ཀྱིས་ཤེས་ནས། བདག་ཉིད་ཀྱང་ཆོས་ལ་ཐེ་ཚོམ་ཟ་བར་གྱུར་ཏེ། དེའི་ཚེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་ བཅོམ་ལྡན་འདས་ཀྱིས་དེ་བཞིན་གཤེགས་པ་རྣམས་ཀྱི་ཐབས་མཁས་པ་མཁྱེན་པའི་ཆོས་བསྟན་པ་ཡང་དང་ཡང་བསྔགས་པ་མཛད་པ་དང༌། ཆོས་ཟབ་མོ་ངས་མངོན་པར་རྫོགས་ པར་སངས་རྒྱས་སོ་ཞེས་བགྱི་བ་དང༌། ལྡེམ་པོར་དགོངས་ཏེ་བཤད་པའང་ཤེས་པར་དཀའོ་ཞེས་ཡང་དང་ཡང་གསུངས་པའི་རྒྱུ་གང་ལགས། རྐྱེན་གང་ལགས། བདག་གིས་ བཅོམ་ལྡན་འདས་ལས་ཆོས་ཀྱི་རྣམ་གྲངས་འདི་ལྟ་བུ་སྔོན་ཆད་མ་ཐོས་ཏེ། བཅོམ་ལྡན་འདས། འཁོར་བཞི་པོ་འདི་དག་ཀྱང་ཐེ་ཚོམ་དང་སོམ་ཉི་འཚལ་ན། དེ་བཞིན་གཤེགས་ པས་ཅི་ལ་དགོངས་ཏེ། དེ་བཞིན་གཤེགས་པའི་ཆོས་ཟབ་མོ་ཡང་དང་ཡང་གསུང་བ་མཛད་པ་དེ་བཅོམ་ལྡན་འདས་ཀྱིས་ལེགས་པར་བཤད་དུ་གསོལ། དེ་ནས་ཚེ་དང་ལྡན་པ་ ཤཱ་རིའི་བུས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །སྟོབས་དང་རྣམ་ཐར་བསམ་གཏན་དག །དཔག་ཏུ་མེད་པ་ངས་ཐོབ་ཅེས། །རིང་ནས་མི་ཡི་ཉི་མ་ཡིས། །དེང་གདོད་དཀའ་ མཆིད་འདི་འདྲ་མཛད། །ཁྱོད་ལ་ཞུ་བ་མ་མཆིས་པར། །བྱང་ཆུབ་སྙིང་པོའང་བརྗོད་པ་མཛད། །ཁྱོད་ལ་སུ་ཡང་མི་ཞུ་བར། །ལྡེམ་པོར་དགོངས་ཏེ་བཤད་པ་བརྗོད། །མ་ཞུས་པར་ནི་གསུང་ མཛད་དེ། །ཉིད་ཀྱི་སྤྱོད་པ་བསྔགས་པ་མཛད། །ཡེ་ཤེས་བརྙེས་པ་བརྗོད་མཛད་ཅིང༌། །ཟབ་མོ་དག་ཀྱང་རབ་བཤད་པས། །དབང་ལྡན་གྱུར་ཅིང་ཟག་མེད་པ། །མྱ་ངན་འདས་པར་གང་བཞུགས་ རྣམས༑ ༑རྒྱལ་བ་ཅི་ཞིག་གསུང་སྙམ་སྟེ། །དེ་རིང་འདི་དག་ཐེ་ཚོམ་འགྱུར། །རང་རྒྱལ་བྱང་ཆུབ་གང་འཚལ་བ། །དགེ་སློང་དེ་བཞིན་དགེ་སློང་མ། །ལྷ་དང་ཀླུ་དང་གནོད་སྦྱིན་དང༌། །ལྟོ་ འཕྱེ་ཆེ་དང་དྲི་ཟ་དག །ཐེ་ཚོམ་འཚལ་ཞིང་རྣམ་སེམས་ཏེ། །དེ་དག་ཕན་ཚུན་གཏམ་མཆི་ཞིང༌། །རྐང་གཉིས་མཆོག་ལ་རབ་ལྟ་ན། །ཐུབ་པ་ཆེན་པོ་ལུང་བསྟན་གསོལ། །བདེ་བར་ གཤེགས་པའི་ཉན་ཐོས་རྣམས། །འདི་ན་ཇི་སྙེད་མཆིས་པ་ཀུན། །དེ་ཡི་ནང་ན་བདག་མཆོག་ཅེས། །དྲང་སྲོང་མཆོག་གིས་བསྟན་ལགས་ན། །མི་ཡི་གཙོ་བོ་ཉིད་ཀྱི་གནས། །འདི་ལ་ བདག་ཀྱང་ཐེ་ཚོམ་འཚལ། །མྱ་ངན་འདས་མཐར་བདག་ཕྱིར་ཏམ། །འོན་ཏེ་བདག་ལ་སྤྱོད་བསྟན་ཏམ། །རྔ་མཆོག་དབྱངས་ཀྱིས་རབ་ཏུ་གསུང་ཕྱུང་སྟེ། །ཆོས་འདི་ཇི་ལྟ་ལགས་པ་ ༄༅། །བཤད་དུ་གསོལ། །རྒྱལ་སྲས་ཐུགས་སྲས་མཆིས་པ་འདི་དག་རྣམས། །ཐལ་མོ་སྦྱར་བར་བགྱིས་ནས་རྒྱལ་ལ་ལྟ། །ལྷ་དང་ཀླུ་དང་གནོད་སྦྱིན་སྲིན་པོར་ བཅས༑ ༑བྱེ་བ་སྟོང་ཕྲག་གངྒཱའི་བྱེ་མ་སྙེད། །བྱང་ཆུབ་མཆོག་འདི་འཚལ་བ་གང་ལགས་པ། །བརྒྱད་ཁྲི་ཚང་བར་གང་མཆིས་དེ་དག་དང༌། །ས་བདག་འཁོར་ལོ་སྒྱུར་བའི་རྒྱལ་པོ་ གང༑ ༑བྱེ་བ་སྟོང་གི་ཞིང་ནས་ལྷགས་པ་དག །སྤྱོད་པ་ཇི་ལྟར་ཡོངས་སུ་རྫོགས་བགྱི་ཞེས། །ཐམས་ཅད་ཐལ་མོ་སྦྱར་ཏ་གུས་པར་མཆིས། །དེ་སྐད་ཅེས་གསོལ་པ་དང༌། བཅོམ་ ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། དོན་འདི་བཤད་པས་ཅི་ཞིག་བྱ། དེ་ཅིའི་ཕྱིར་ཞེ་ན། ཤཱ་རིའི་བུ། དོན་འདི་བཤད་ན་ ལྷ་དང་བཅས་པའི་འཇིག་རྟེན་འདི་དངངས་པར་འགྱུར་རོ། །ཡང་ཚེ་དང་ལྡན་པ་ཤཱ་རིའི་བུས། བཅོམ་ལྡན་འདས་ལ་ལན་གཉིས་སུ་གསོལ་བ་བཏབ་པ། དོན་འདི་ཉིད་བཅོམ་ལྡན་ འདས༑ བཤད་དུ་གསོལ། བདེ་བར་གཤེགས་པ། བཤད་དུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས། འཁོར་འདི་ན་སྲོག་ཆགས་བརྒྱ་ཕྲག་མང་པོ། སྲོག་ ཆགས་སྟོང་ཕྲག་མང་པོ། སྲོག་ཆགས་བརྒྱ་སྟོང་ཕྲག་མང་པོ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་སྔོན་གྱི་སངས་རྒྱས་མཐོང་བ་ཤེས་རབ་དང་ལྡན་པ་གང་དག། བཅོམ་ལྡན་འདས་ཀྱིས་བཤད་པ་ལ་དད་པ་དང༌། ཡིད་ཆེས་པ་དང༌། འཛིན་པར་འགྱུར་བ་མཆིས་སོ། །དེ་ནས་དེའི་ཚེ་ཚེ་དང་ལྡན་པ་ཤཱ་རིའི་བུས་ཚིགས་སུ་བཅད་པ་འདི་གསོལ་ཏོ། ། སྲོག་ཆགས་སྟོང་རྣམས་འཁོར་ན་མཆིས་པ་དག །དད་དགའ་བདེ་བར་གཤེགས་ལ་གུས་པ་སྟེ། །ཁྱོད་ཀྱི་ཆོས་བསྟན་དེ་དག་འཚལ་བར་འགྱུར། །མི་དབང་རྒྱལ་པོ་གསལ་བར་ བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་ལན་གཉིས་སུ་ཡང་འདི་སྐད་ཅེས་བཀའ་སྩལ་ཏོ། ཤཱ་རིའི་བུ། དོན་འདི་བཤད་པས་ཅི་ཞིག་བྱ། ཤཱ་རིའི་བུ། དོན་འདི་བཤད་ན་ལྷ་དང་བཅས་པའི་འཇིག་རྟེན་འདི་དངངས་པར་འགྱུར་ཏེ། དགེ་སློང་ལྷག་པའི་ང་རྒྱལ་ཅན་དུ་གྱུར་པ་རྣམས་གཡང་ས་ཆེན་པོར་ལྷུང་བར་འགྱུར་ རོ༑ ༑དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ང་ཡི་ཆོས་འདི་བཤད་པས་ཆོག། ཡེ་ཤེས་འདི་ཕྲ་བརྟག་མི་ནུས། །བྱིས་པ་མང་འཁོད་ང་ རྒྱལ་ཅན། །ང་ཡིས་ཆོས་བཤད་མི་ཤེས་སྤོང༌། །དེ་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་ལན་གསུམ་དུ་ཡང་གསོལ་བ་བཏབ་པ། དོན་འདི་ཉིད་བཅོམ་ལྡན་འདས། བཤད་དུ་གསོལ། བདེ་བར་གཤེགས་པ། བཤད་དུ་གསོལ། བཅོམ་ལྡན་འདས། འཁོར་འདི་ན་བདག་དང་འདྲ་བ་བརྒྱ་ཕྲག་མང་དུ་མཆིས་སོ། །བཅོམ་ལྡན་འདས། སྲོག་ ༄༅། །ཆགས་བརྒྱ་ཕྲག་མང་པོ། སྲོག་ཆགས་སྟོང་ཕྲག་མང་པོ། སྲོག་ཆགས་བརྒྱ་སྟོང་ཕྲག་མང་པོ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་བཅོམ་ ལྡན་འདས་སྔོན་གྱི་སྲིད་པ་དག་ན་ཡོངས་སུ་སྨིན་པར་མཛད་པ་གཞན་དག་ཀྱང་མཆིས་ཏེ། བཅོམ་ལྡན་འདས་ཀྱིས་བཤད་པ་ལ་དད་པར་འགྱུར། ཡིད་ཆེས་པར་འགྱུར། འཛིན་ པར་འགྱུར་རོ། །དེའང་དེ་དག་གི་ཡུན་རིང་པོའི་དོན་དང་སྨན་པ་དང་བདེ་བར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །རྐང་ གཉིས་རྣམས་ཀྱི་མཆོག་གིས་ཆོས་བཤད་གསོལ། །ཁྱོད་ལ་སྲས་ཀྱི་ཐུ་བོ་བདག་གསོལ་པ། །འདི་ན་སྲོག་ཆགས་བྱེ་བ་སྟོང་མཆིས་པ། །དེ་དག་ཁྱོད་ཀྱིས་ཆོས་བཤད་འདི་དད་ འགྱུར༑ ༑སྔོན་གྱི་སྲིད་པ་རྣམས་སུ་ཁྱོད་ཀྱིས་གང༌། །ཡུན་རིང་རྟག་ཏུ་སེམས་ཅན་སྨིན་མཛད་པ། །དེ་ཀུན་ཐལ་མོ་སྦྱར་ཏེ་འདི་ན་མཆིས། །དེ་དག་ཆོས་འདི་ལ་ནི་དད་པར་འགྱུར། ། བདག་འདྲ་བརྒྱ་ཕྲག་བཅུ་གཉིས་འདི་དག་དང༌། །གང་དག་བྱང་ཆུབ་མཆོག་ཏུ་ཞུགས་པ་དང༌། །དེ་ལ་གཟིགས་ནས་བདེ་གཤེགས་རབ་བཤད་དེ། །དེ་དག་དགའ་བ་མཆོག་ཀྱང་ བསྐྱེད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུས་ལན་གསུམ་དུ་གསོལ་པ་བཏབ་པ་མཁྱེན་ནས། ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་ སྩལ་ཏོ༑ ༑ཤཱ་རིའི་བུ། འདི་ལྟར་དེ་བཞིན་གཤེགས་པ་ལ་ལན་གསུམ་གྱི་བར་དུ་གསོལ་པ་འདེབས་ན། ཤཱ་རིའི་བུ། དེ་ལྟར་གསོལ་པ་འདེབས་པ་ལ་ཁྱོད་ལ་ཇི་སྐད་བྱས། ཤཱ་རིའི་བུ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་གཟུང་ཞིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་མ་ཐག་ཏུ། འཁོར་དེ་ནས་དགེ་སློང་དང༌། དགེ་ སློང་མ་དང༌། དགེ་བསྙེན་དང༌། དགེ་བསྙེན་མ་ལྷག་པའི་ང་རྒྱལ་ཅན་ལྔ་སྟོང་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བཙལ་ནས་འཁོར་དེ་ ནས་དོང་ངོ༌། །འདི་ལྟར་ལྷག་པའི་ང་རྒྱལ་གྱིས་དགེ་བའི་རྩ་བ་མ་ཐོབ་པར་ནི་ཐོབ་པར་འདུ་ཤེས། ཁོང་དུ་མ་ཆུད་པར་ནི་ཁོང་དུ་ཆུད་པར་འདུ་ཤེས་པ་དེ་དག་རང་གི་སྐྱོན་ཤེས་ ཏོ༑ འཁོར་དེ་ནས་དོང་བ་ལ་བཅོམ་ལྡན་འདས་ཀྱིས་ཅང་མི་གསུང་བར་གྱུར་པས་གནང་ངོ༌། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ རིའི་བུ༑ ངའི་འཁོར་ཤིན་ཏེ་མ་མེད་པར་གྱུར་ཏེ། ཤཱ་རིའི་བུ། སྙིང་པོ་མ་ཡིན་པ་མེད་པར་གྱུར་ལ་དད་པའི་སྙིང་པོ་ལ་གནས་ཏེ་ལྷག་པའི་ང་རྒྱལ་ཅན་དེ་དག་དོང་བའང་ལེགས་སོ། ཤཱ་རིའི་ བུ༑ དེ་ལྟ་བས་ན་དེའི་དོན་བཤད་དོ། །བཅོམ་ལྡན་འདས། ལེགས་སོ་ཞེས་གསོལ་ནས། ཤཱ་རིའི་བུ། བཅོམ་ལྡན་འདས་ཀྱི་ལྟར་ཉན་པ་དང༌། བཅོམ་ལྡན་འདས་ཀྱིས་འདི་སྐད་ཅེས་བཀའ་ ༄༅། །སྩལ་ཏོ། །ཤཱ་རིའི་བུ། དེ་བཞིན་གཤེགས་པ་ནི་བརྒྱ་ལ་རེས་འགའ་ཞིག་འདི་ལྟ་བུའི་ཆོས་བསྟན་པ་གསུང་ངོ༌། །འདི་ལྟ་སྟེ། དཔེར་ན། ཨུ་དུམྦ་རའི་ཚལ་ལ་ མེ་ཏོག་ནི་བརྒྱ་ལ་རེས་འགའ་འབྱུང་ངོ༌། །ཤཱ་རིའི་བུ། དེ་བཞིན་དུ་དེ་བཞིན་གཤེགས་པའང་བརྒྱལ་རེས་འགའ་ཞིག་ཆོས་བསྟན་པ་འདི་ལྟ་བུ་གསུང་ངོ༌། །ཤཱ་རིའི་བུ། ང་ལ་ཡིད་ཆེས་ པར་གྱིས་ཤིག །ང་ནི་བདེན་པར་སྨྲ་བའོ། །ང་ནི་ཡང་དག་པར་སྨྲ་བའོ། །ང་ནི་གཞན་མ་ཡིན་པར་སྨྲ་བའོ། །ཤཱ་རིའི་བུ། དེ་བཞིན་གཤེགས་པའི་ལྡེམ་པོར་དགོངས་ཏེ་བཤད་པའི་ དོན་ཁོང་དུ་ཆུད་པར་དཀའོ། །དེ་ཅིའི་ཕྱིར་ཞེ་ན། ཤཱ་རིའི་བུ། ངས་ངེས་པའི་ཚིག་དང༌། བསྟན་པ་དང༌། བརྗོད་པ་དང༌། དཔེ་སྣ་ཚོགས་དང༌། ཐབས་ལ་མཁས་པ་རྣམ་པ་བརྒྱ་སྟོང་ དག་གིས་ཆོས་རབ་ཏུ་བཤད་པ་ནི་རྟོག་ཏུ་མེད་ཅིང་རྟོག་གེའི་སྤྱོད་ཡུལ་མ་ཡིན་པའི་ཕྱིར་ཏེ། ཤཱ་རིའི་བུ། ཆོས་དེ་ནི་དེ་བཞིན་གཤེགས་པས་མཁྱེན་པར་བྱ་བའོ། །དེ་ཅིའི་ཕྱིར་ཞེ་ ན༑ ཤཱ་རིའི་བུ། བྱ་བ་གཅིག་དང༌། བྱེད་པ་གཅིག་དང༌། བྱ་བ་ཆེན་པོ་དང༌། བྱེད་པ་ཆེན་པོའི་ཕྱིར། བྱ་བ་གང་དང༌། བྱེད་པ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་འཇིག་རྟེན་དུ་འབྱུང་བའི་ཕྱིར་རོ། །ཤཱ་རིའི་བུ། དེ་བཞིན་གཤེགས་པའི་བྱ་བ་གཅིག་པོ་དང༌། བྱེད་པ་གཅིག་པོ་དང༌། བྱ་བ་ཆེན་པོ་དང༌། བྱེད་པ་ཆེན་པོ་ དང༌། བྱ་བ་གང་དང༌། བྱེད་པ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་བ་གང་ཞེ་ན། དེ་ནི་སེམས་ཅན་རྣམས་དེ་བཞིན་གཤེགས་ པའི་ཡེ་ཤེས་མཐོང་བ་ཡང་དག་པར་འཛིན་དུ་གཟུད་པའི་རྒྱུའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་ངོ༌། །སེམས་ཅན་རྣམས་ ལ་དེ་བཞིན་གཤེགས་པའི་ཡེ་ཤེས་མཐོང་བ་ཡང་དག་པར་བསྟན་པའི་རྒྱུའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་ངོ༌། ། སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ལ་ཞུགས་པའི་རྒྱུའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་ ངོ༌། །སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཁོང་དུ་ཆུད་པར་བྱ་བའི་རྒྱུའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་ རྟེན་དུ་འབྱུང་ངོ༌། །སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བའི་ལམ་དུ་གཟུད་པའི་རྒྱུའི་ཕྱིར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་འཇིག་རྟེན་དུ་འབྱུང་སྟེ། ཤཱ་རིའི་བུ། དེ་ནི་དེ་བཞིན་གཤེགས་པའི་བྱ་བ་གཅིག་པོ་དང༌། བྱེད་པ་གཅིག་པོ་དང༌། བྱ་བ་ཆེན་པོ་དང༌། བྱེད་པ་ཆེན་པོ་དང༌། འཇིག་རྟེན་དུ་འབྱུང་བའི་ ༄༅། །དགོངས་པ་གཅིག་པའོ། །ཤཱ་རིའི་བུ། དེ་ལྟར་དེ་བཞིན་གཤེགས་པས་བྱ་བ་གཅིག་པོ་དང༌། བྱེད་པ་གཅིག་པོ་དང༌། བྱ་བ་ཆེན་པོ་དང༌། བྱེད་པ་ཆེན་པོ་དེ་དེ་བཞིན་ གཤེགས་པས་མཛད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། ང་ནི་དེ་བཞིན་གཤེགས་པའི་ཡེ་ཤེས་མཐོང་བ་ཡང་དག་པར་འཛིན་དུ་འཇུག་པའོ། །ཤཱ་རིའི་བུ། ང་ནི་དེ་བཞིན་ གཤེགས་པའི་ཡེ་ཤེས་མཐོང་བ་ཡང་དག་པར་སྟོན་པའོ། །ཤཱ་རིའི་བུ། ང་ནི་དེ་བཞིན་གཤེགས་པའི་ཡེ་ཤེས་མཐོང་བ་ལ་འཇུག་པར་བྱེད་པའོ། །ཤཱ་རིའི་བུ། ང་ནི་དེ་བཞིན་ གཤེགས་པའི་ཡེ་ཤེས་མཐོང་བ་ཁོང་དུ་ཆུད་པར་བྱེད་དོ། །ཤཱ་རིའི་བུ། ང་ནི་དེ་བཞིན་གཤེགས་པའི་ཡེ་ཤེས་མཐོང་བའི་ལམ་ལ་འཛུད་པའོ། །ཤཱ་རིའི་བུ། ངའང་ཐེག་པ་ གཅིག་ལས་བརྩམས་ཏེ་སེམས་ཅན་རྣམས་ལ་ཆོས་སྟོན་པ་འདི་ལྟ་སྟེ། སངས་རྒྱས་ཀྱི་ཐེག་པ་ཐམས་ཅད་མཁྱེན་པ་ཉིད་ཀྱི་མཐར་ཐུག་པ་སྟེ། ཐེག་པ་གཉིས་སམ་གསུམ་ཞེས་ བྱ་བ་གང་ཡང་མེད་དོ། །ཤཱ་རིའི་བུ། ཕྱོགས་བཅུའི་འཇིག་རྟེན་ཐམས་ཅད་ནའང་ཆོས་ཉིད་ནི་འདིའོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་གང་དག་འདས་པའི་དུས་ན་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་རྣམས་སུ་བྱུང་སྟེ། སེམས་ཅན་མོས་པ་ཐ་དད་པ་དང༌། ཁམས་དང་བསམ་པ་ཐ་དད་པ་རྣམས་ཀྱི་བསམ་པ་མཁྱེན་ནས་སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་སྙིང་བརྩེ་བ་དང༌། སྐྱེ་བོ་ཕལ་པོ་ཆེ་དང༌། ལྷ་དང༌། མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་སྣ་ཚོགས་མངོན་པར་བསྒྲུབ་པ་བསྟན་པ་དང༌། རྒྱུ་དང༌། གཞི་དང༌། དཔེ་དང༌། དམིགས་པ་དང༌། ངེས་པའི་ཚིག་དང༌། ཐབས་མཁས་པ་ རྣམ་པ་སྣ་ཚོགས་ཀྱིས་ཆོས་བསྟན་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང༌། ཤཱ་རིའི་བུ། ཐེག་པ་གཅིག་ལ་བརྩམས་ནས་སེམས་ཅན་རྣམས་ལ་ཆོས་བསྟན་ཏེ་ དེའང་འདི་ལྟར་སངས་རྒྱས་ཀྱི་ཐེག་པ་ཐམས་ཅད་མཁྱེན་པ་ཉིད་ཀྱི་མཐར་ཐུག་པ་སྟེ། གང་འདི་སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཡང་དག་པར་འཛིན་ དུ་འཛུད་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་སྟོན་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ལ་འཇུག་པར་བྱེད་པ། དེ་བཞིན་གཤེགས་པའི་ཡེ་ཤེས་མཐོང་ བ་ཉིད་ཁོང་དུ་ཆུད་པར་བྱེད་པ། སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཀྱི་ལམ་དུ་འཇུག་པར་བྱེད་པའི་ཆོས་སྟོན་ཏེ། ཤཱ་རིའི་བུ། འདས་པའི་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལས་སེམས་ཅན་གང་དག་གིས་ཆོས་དེ་ཐོས་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་ ༄༅། །བྱང་ཆུབ་ཐོབ་པར་གྱུར་ཏོ། །ཤཱ་རིའི་བུ། མ་འོངས་པའི་དུས་ན་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་རྣམས་སུ་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་འབྱུང་བ། སེམས་ཅན་མོས་པ་ཐ་དད་པ་དང༌། བསམ་པ་ཐ་དད་པ་དང་ཁམས་ཐ་དད་པ་རྣམས་ཀྱི་བསམ་པ་མཁྱེན་ ནས། སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་སྙིང་བརྩེ་བ་དང༌། སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་སྣ་ ཚོགས་མངོན་པར་བསྒྲུབ་པ་བསྟན་པ་དང༌། རྒྱུ་དང༌། གཞི་དང༌། དཔེ་དང༌། དམིགས་པ་དང༌། ངེས་པའི་ཚིག་དང༌། ཐབས་མཁས་པ་རྣམ་པ་སྣ་ཚོགས་ཀྱིས་ཆོས་སྟོན་པར་ འགྱུར་བའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང༌། ཤཱ་རིའི་བུ། ཐེག་པ་གཅིག་ལས་བརྩམས་ནས་སེམས་ཅན་རྣམས་ལ་ཆོས་སྟོན་པར་འགྱུར་ཏེ། དེའང་འདི་ ལྟར་སངས་རྒྱས་ཀྱི་ཐེག་པ་ཐམས་ཅད་མཁྱེན་པ་ཉིད་ཀྱི་མཐར་ཐུག་པ་སྟེ། གང་འདི་སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཡང་དག་པར་འཛིན་དུ་ འཇུག་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་སྟོན་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ལ་འཇུག་པར་བྱེད་པ། དེ་བཞིན་གཤེགས་པའི་ཡེ་ ཤེས་མཐོང་བ་ཉིད་ཁོང་དུ་ཆུད་པར་བྱེད་པ། སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཀྱི་ལམ་དུ་འཇུག་པར་བྱེད་པའི་ཆོས་སྟོན་པར་འགྱུར་ཏེ། ཤཱ་རིའི་བུ། མ་ འོངས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལས་སེམས་ཅན་གང་དག་ཆོས་ཉན་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཐོབ་པར་འགྱུར་རོ། །ཤཱ་རིའི་བུ། ད་ལྟར་བྱུང་བའི་དུས་ན་ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་དག་ན་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་གང་དག་བཞུགས་ཏེ་འཚོ་ཞིང་གཞེས་པ། སེམས་ཅན་མོས་པ་ཐ་དད་པ་དང༌། ཁམས་དང་བསམ་པ་ཐ་དད་པ་རྣམས་ཀྱི་བསམ་པ་མཁྱེན་ ནས། སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་སྙིང་བརྩེ་བ་དང་སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་སྣ་ཚོགས་ མངོན་པར་བསྒྲུབ་པ་བསྟན་པ་དང༌། རྒྱུ་དང༌། གཞི་དང༌། དཔེ་དང༌། དམིགས་པ་དང༌། ངེས་པའི་ཚིག་དང་ཐབས་མཁས་པ་རྣམ་པ་སྣ་ཚོགས་ཀྱིས་ཆོས་སྟོན་པའི་སངས་རྒྱས་བཅོམ་ ལྡན་འདས་དེ་དག་ཐམས་ཅད་ཀྱང༌། ཤཱ་རིའི་བུ། ཐེག་པ་གཅིག་ལས་བརྩམས་ནས་སེམས་ཅན་རྣམས་ལ་ཆོས་སྟོན་ཏེ། དེའང་འདི་ལྟར་སངས་རྒྱས་ཀྱི་ཐེག་པ་ཐམས་ཅད་མཁྱེན་ ༄༅། །པ་ཉིད་ཀྱི་མཐར་ཐུག་པ་སྟེ། གང་འདི་སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཡང་དག་པར་འཛིན་དུ་འཇུག་པ། དེ་བཞིན་གཤེགས་ པའི་ཡེ་ཤེས་མཐོང་བ་ཉིད་སྟོན་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ལ་འཇུག་པར་བྱེད་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཁོང་དུ་ཆུད་པར་ བྱེད་པ། སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཀྱིས་ལམ་དུ་འཇུག་པར་བྱེད་པའི་ཆོས་སྟོན་ཏེ། ཤཱ་རིའི་བུ། ད་ལྟར་གྱི་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལས། སེམས་ཅན་གང་དག་ཆོས་ཉན་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་ འགྱུར་རོ། །ཤཱ་རིའི་བུ། དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངའང་སེམས་ཅན་མོས་པ་ཐ་དད་པ་དང༌། ཁམས་དང་བསམ་པ་ཐ་ དད་པ་རྣམས་ཀྱི་བསམ་པ་མཁྱེན་ནས་སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་སྙིང་བརྩེ་བ་དང་སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་ཕན་ པ་དང་བདེ་བའི་ཕྱིར། སྣ་ཚོགས་མངོན་པར་བསྒྲུབ་པ་བསྟན་པ་དང༌། རྒྱུ་དང༌། གཞི་དང༌། དཔེ་དང༌། དམིགས་པ་དང༌། ངེས་པའི་ཚིག་དང་ཐབས་མཁས་པ་རྣམ་པ་སྣ་ཚོགས་ཀྱིས་ ཆོས་སྟོན་ཏོ། །ཤཱ་རིའི་བུ། ངའང་ཐེག་པ་གཅིག་ལས་བརྩམས་ནས་སེམས་ཅན་རྣམས་ལ་ཆོས་སྟོན་ཏེ། འདི་ལྟར་སངས་རྒྱས་ཀྱི་ཐེག་པ་ཐམས་ཅད་མཁྱེན་པ་ཉིད་ཀྱི་མཐར་ཐུག་པ་སྟེ། གང་འདིའི་སེམས་ཅན་རྣམས་དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཡང་དག་པར་འཛིན་དུ་འཇུག་པ་དང༌། དེ་བཞིན་གཤེགས་པའི་ཡེ་ཤེས་མཐོང་བ་ཉིད་སྟོན་པ་དང༌། དེ་ བཞིན་གཤེགས་པའི་ཡེ་ཤེས་མཐོང་བ་ཉིད་ལ་འཇུག་པར་བྱེད་པ། དེ་བཞིན་གཤེགས་པའི་ཡེ་ཤེས་མཐོང་བ་ཉིད་ཁོང་དུ་ཆུད་པར་བྱེད་པ། སེམས་ཅན་རྣམས་དེ་བཞིན་གཤེགས་ པའི་ཡེ་ཤེས་མཐོང་བ་ཉིད་ཀྱི་ལམ་དུ་འཇུག་པར་བྱེད་པའི་ཆོས་སྟོན་ཏེ། ཤཱ་རིའི་བུ། སེམས་ཅན་གང་དག་ད་ལྟར་ང་ལ་འདི་ལྟར་ཆོས་ཉན་པ་དེ་དག་ཐམས་ཅད་ཀྱང་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཐོབ་པར་འགྱུར་རོ། །ཤཱ་རིའི་བུ་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། འདི་ལྟར་ཕྱོགས་བཅུའི་འཇིག་རྟེན་གང་ནའང་ཐེག་པ་གཉིས་སུ་ གདགས་པའང་མེད་ན་གསུམ་དུ་ལྟ་ག་ལ་ཡོད། འོན་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་བསྐལ་པའི་སྙིགས་མ་ལས་བྱུང་ ངམ། སེམས་ཅན་གྱི་སྙིགས་མའམ། ཉོན་མོངས་པའི་སྙིགས་མའམ། ལྟ་བའི་སྙིགས་མའམ། ཚེའི་སྙིགས་མ་ལས་བྱུང་ན། ཤཱ་རིའི་བུ། འདི་ལྟ་བུར་བསྐལ་པ་དང་འཁྲུལ་ ༄༅། །པའི་སྙིགས་མ་དང་དྲི་མ་མང་པོ་དང་བརྐམ་པའི་སེམས་ཅན་དགེ་བའི་རྩ་བ་ཆུང་བ་དེའི་ཚེ། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་རྣམས་ཐབས་མཁས་པས་སངས་རྒྱས་ཀྱི་ཐེག་པ་གཅིག་པོ་དེ་ལས་ཐེག་པ་གསུམ་དུ་བཤད་དེ་བསྟན་ཏོ། །ཤཱ་རིའི་བུ། དེ་ལྟར་གང་ཉན་ཐོས་སམ། དགྲ་ བཅོམ་པའམ། རང་སངས་རྒྱས་རྣམས་དེ་བཞིན་གཤེགས་པའི་བྱ་བ་སངས་རྒྱས་ཀྱི་ཐེག་པ་ཡང་དག་པར་འཛིན་དུ་འཇུག་པ་ལ་མི་ཉན། མི་འཇུག། ཁོང་དུ་ཆུད་པར་མི་བྱེད་ པ་དེ་དག་ནི། ཤཱ་རིའི་བུ། དེ་བཞིན་གཤེགས་པའི་ཉན་ཐོས་མ་ཡིན་པར་རིག་པར་བྱའོ། །དགྲ་བཅོམ་པའང་མ་ཡིན། རང་སངས་རྒྱས་ཀྱང་མ་ཡིན་པར་རིག་པར་བྱའོ། །ཤཱ་ རིའི་བུ། ཡང་དགེ་སློང་ངམ། དགེ་སློང་མ་ལ་ལ་དགྲ་བཅོམ་པར་ཁས་འཆེ་ཞིང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་ཡོངས་སུ་མི་འཛིན་ཏེ། ང་ནི་ སངས་རྒྱས་ཀྱི་ཐེག་པ་བཅད་པའོ་ཞེས་ཟེར་ཞིང་ངའི་ལུས་འདི་ཐ་མ་བྱ་ངན་ལས་འདའ་བའོ་ཞེས་ཟེར་བ་ནི། ཤཱ་རིའི་བུ། དེ་ལྷག་པའི་ང་རྒྱལ་ཅན་དུ་ཤེས་པར་བྱའོ། །དེ་ ཅིའི་ཕྱིར་ཞེ་ན། ཤཱ་རིའི་བུ། དགེ་སློང་དགྲ་བཅོམ་པ་ཟག་པ་ཟད་པ་དེས། དེ་བཞིན་གཤེགས་པ་མངོན་སུམ་དུ་གྱུར་ཏེ། ཆོས་འདི་ཐོས་ནས་དད་པར་མི་འགྱུར་བའི་གོ་སྐབས་ མེད་ཅིང་གནས་མ་ཡིན་ཏེ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ནི་མ་གཏོགས་སོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ པ་དེའི་ཚེ། མདོ་སྡེ་འདི་ལྟ་བུ་འདི་འཛིན་པའམ་འཆང་བའི་ཉན་ཐོས་མི་འབྱུང་སྟེ། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཞན་ལས་ ཆོས་འདི་ལ་ཐེ་ཚོམ་མེད་པར་འགྱུར་རོ། །ཤཱ་རིའི་བུ། ང་ལ་དད་པར་གྱིས་ཤིག །ཡིད་ཆེས་པར་གྱིས་ཤིག །རྟོགས་པར་གྱིས་ཤིག །ཤཱ་རིའི་བུ། དེ་བཞིན་གཤེགས་པ་རྣམས་ལ་ བརྫུན་དུ་སྨྲ་བ་མེད་དེ། ཤཱ་རིའི་བུ། ཐེག་པ་འདི་ནི་གཅིག་ཏུ་ཟད་དེ། འདི་ལྟ་སྟེ། སངས་རྒྱས་ཀྱི་ཐེག་པའོ། །དེ་ནས་བཅོམ་ལྡན་འདས་དོན་དེ་ཉིད་རྒྱས་པར་སྟོན་ཅིང་དེའི་ཚེ་ཚིགས་སུ་ བཅད་པ་འདི་དག་བཀའ་སྩལ་ཏོ། །ང་རྒྱལ་ཅན་གྱི་དགེ་སློང་དང༌། །དགེ་སློང་མ་དང་དགེ་བསྙེན་དང༌། །དགེ་བསྙེན་མ་རྣམས་མ་དད་པ། །ལྔ་སྟོང་ལས་ནི་མི་ཉུང་བ་དང༌། །བསླབ་པ་ཞིག་གྲལ་ ལྡན་པ་རྣམས། །ཉེས་པ་འདི་དག་མཐོང་གྱུར་ནས། །སྐྱོན་རྣམས་ཡོངས་སུ་སྦེད་པའི་ཕྱིར། །བྱིས་པའི་བློ་ཅན་དེ་དག་དོང༌། །གང་གིས་ཆོས་འདི་ཉན་པར་འགྱུར་བ་ཡི། །དེ་དག་ལ་ནི་ དགེ་བ་དེ་མེད་དེ། །འཁོར་གྱི་སྙིགས་མ་ཉིད་དུ་མཁྱེན་ནས་སུ། །འཇིག་རྟེན་མགོན་པོ་ངས་ཀྱང་བསལ་བ་ཡིན། །ང་ཡི་འཁོར་ནི་ལེགས་པར་འཁོད། །ཤུན་པ་མེད་ཅིང་དག་པ་སྟེ། །སྙིང་ ༄༅། །པོ་མ་ཡིན་ཀུན་མེད་འགྱུར། །འདི་དག་སྙིང་པོ་རབ་ཏུ་གནས། །སྐྱེས་བུ་དམ་པ་སྐྱོབ་པ་སངས་རྒྱས་དག །ཐབས་ལ་མཁས་པ་བརྒྱ་ཕྲག་དུ་མ་ཡིས། །རྫོགས་ པའི་སངས་རྒྱས་ཆོས་ནི་ཅི་གསུང་པ། །ཅི་འདྲ་ང་ལ་ཉོན་ཅིག་ཤཱ་རིའི་བུ། །དེ་དག་སྤྱོད་པ་བསམ་པ་ཅི་འདྲའང་མཁྱེན། །སྲོག་ཆགས་བྱེ་བ་མོས་པ་ཐ་དད་པ། །དེ་དག་སྔོན་ཆད་དགེ་བ་ ཅི་བྱས་དང༌། །ལས་རྣམས་སྣ་ཚོགས་དག་ནི་མཁྱེན་ནས་སུ། །ངེས་པའི་ཚིག་དང་གཞི་རྣམས་སྣ་ཚོགས་ཀྱིས། །སྲོག་ཆགས་དེ་དག་ཁོང་དུ་ཆུད་པར་བྱེད། །ངས་ནི་རྒྱུ་དང་དཔེ་ཡང་ བརྒྱ་དག་གིས། །སེམས་ཅན་དེ་ལྟ་དེ་ལྟར་མགུ་བར་བྱས། །མདོ་སྡེ་དེ་བཞིན་ཚིགས་སུ་བཅད་པའང་བཤད། །དེ་ལྟར་བྱུང་དང་སྐྱེས་རབས་རྨད་བྱུང་དང༌། །གླེང་གཞི་པ་བཞིན་ གཏན་ལ་དབབ་པ་དང༌། །དབྱངས་སྙན་དཔེ་བརྒྱ་སྣ་ཚོགས་རྣམས་ཀྱིས་བཤད། །མི་མཁས་གང་དག་དམན་ལ་མངོན་དགའ་ཞིང༌། །སངས་རྒྱས་བྱེ་བ་མང་ལ་སྤྱོད་མ་སྤྱད། །འཁོར་ བར་ཆགས་ཤིང་ཤིན་ཏུ་སྡུག་བསྔལ་བ། །དེ་ལ་མྱ་ངན་འདའ་བ་ཉེ་བར་བསྟན། །སངས་རྒྱས་ཡེ་ཤེས་རབ་ཏུ་རྟོགས་བྱ་ཕྱིར། །ད་ལྟར་རང་བྱུང་བ་ནི་ཐབས་མཛོད་དེ། །ཁྱེད་ ཅག་སངས་རྒྱས་སུ་ཡང་འགྲུབ་པོ་ཞེས། །དེ་རྣམས་ལ་ནི་རེ་ཞིག་མི་གསུང་ངོ༌། །ཅིའི་ཕྱིར་ཞེ་ན་སྐྱོབ་པ་དུས་ལ་བཞེས། །ང་ལ་གཟིགས་ཏེ་དེ་ནས་གདོད་འཆད་དོ་།དལ་བ་དེ་ནི་ བརྒྱ་ལ་དེང་ཐོབ་པས། །དེ་ཕྱིར་ཡང་དག་ངེས་པ་འདིར་བཤད་དོ། །ང་ཡི་བསྟན་པ་ཡན་ལག་དགུ་པོ་ཡང༌། །སེམས་ཅན་དག་གི་མཐུ་དང་སྟོབས་ལས་བཤད། །འདི་ལྟར་ཐབས་ཀྱིས་མཆོག་ སྦྱིན་ཡེ་ཤེས་ལ། །རབ་ཏུ་གཟུད་པའི་ཕྱིར་ནི་ངས་བཤད་དོ། །གང་དག་རྟག་ཏུ་རྣམ་པར་དག་གྱུར་པ། །གསལ་གཙང་རབ་ཏུ་ངེས་པ་སངས་རྒྱས་སྲས། །སངས་རྒྱས་བྱེ་བ་མང་ལ་ལྷག་ བྱས་པ། །དེ་དག་ལ་ནི་རབ་རྒྱས་མདོ་རྣམས་བཤད། །འདི་ལྟར་དེ་དག་བསམ་པ་རྫོགས་པ་དང༌། །རྣམ་པར་དག་པའི་ཚུལ་དང་ལྡན་གྱུར་པ། །དེ་དག་ལ་ནི་མ་འོངས་དུས་ན་ཡང༌། །ཕན་ ཞིང་བརྩེ་བའི་སངས་རྒྱས་འགྱུར་ཞེས་གསུང༌། །ཐོས་ནས་འགྲོ་མཆོག་སངས་རྒྱས་འགྱུར་སྙམ་སྟེ། །ཐམས་ཅད་ཤིན་ཏུ་དགའ་བས་ཁྱབ་པར་འགྱུར། །དེ་དག་སྤྱོད་པ་རྣམས་ཀྱང་ངས་ ཤེས་ནས། །ཤིན་ཏུ་རྒྱས་པའི་མདོ་སྡེ་རབ་ཏུ་བཤད། །འདི་ལྟར་འདྲེན་པའི་ཉན་ཐོས་དེ་དག་ལ། །གང་དག་ང་ཡི་བསྟན་པ་འདི་ཐོས་པ། །ཚིགས་བཅད་གཅིག་ཙམ་ཐོས་མ་བཟུང་ ཡང་རུང༌། །ཐམས་ཅད་ཐེ་ཚོམ་མེད་པར་བྱང་ཆུབ་འགྱུར། །ཐེག་པ་ཐ་དད་པར་ནི་གང་སྟོན་པ། སྐྱེས་མཆོག་རྣམས་ཀྱི་ཐབས་མཁས་མ་གཏོགས་པར། །ཐེག་པ་གཅིག་སྟེ་གཉིས་ སུ་ཡོད་མ་ཡིན། །འཇིག་རྟེན་ན་ནི་ནམ་ཡང་གསུམ་དུ་མེད། །སངས་རྒྱས་རྣམས་ཀྱི་ཡེ་ཤེས་བསྟན་པའི་ཕྱིར། །འཇིག་རྟེན་དུ་ཡང་འཇིག་རྟེན་མགོན་པོ་བྱུང༌། །བྱ་བ་གཅིག་སྟེ་ ༄༅། །གཉིས་སུ་ཡོད་མ་ཡིན། །སངས་རྒྱས་ཐེག་པ་དམན་པས་མི་འདྲེན་ཏོ། །རང་འབྱུང་བདག་ཉིད་ཅི་ལ་གནས་པ་དང༌། །སངས་རྒྱས་ཇི་ལྟ་བུ་དང་ཅི་འདྲ་བ། །སྟོབས་ དང་བསམ་གཏན་རྣམ་ཐར་དབང་པོ་རྣམས། །དེ་དག་ཉིད་ལ་སེམས་ཅན་རབ་ཏུ་འཇོག །བྱང་ཆུབ་རྡུལ་མེད་དམ་པ་ཐོབ་ནས་སུ། །ཐེག་པ་དམན་ལ་སེམས་ཅན་གཅིག་བཀོད་ན། །འདི་ ནི་ང་ཡི་ལེགས་པ་མ་ཡིན་ཏེ། །སེར་སྣའི་ཉེས་པའང་ང་ལ་ཡོད་པར་འགྱུར། །ང་ལ་སེ་སྣ་དག་ནི་ཅུང་ཟད་མེད། །ང་ལ་ཕྲག་དོག་མེད་ཅིང་འདོད་ཆགས་མེད། །སྡིག་པའི་ཆོས་ རྣམས་ཐམས་ཅད་ངས་བཅད་དེ། །དེ་ཕྱིར་འགྲོ་བ་རྟོགས་པས་ང་སངས་རྒྱས། །ཇི་ལྟར་མཚན་རྣམས་ཀྱིས་ནི་ང་བརྒྱན་ཏེ། །འཇིག་རྟེན་འདི་དག་ཐམས་ཅད་རབ་སྣང་བྱེད། །སྲོག་ ཆགས་བརྒྱ་ཕྲག་དུ་མས་མདུན་བལྟས་ཤིང༌། །ཆོས་ཀྱི་རང་བཞིན་ཕྱག་རྒྱ་འདི་བཤད་དོ། །ང་ནི་འདི་སྙམ་སེམས་ཏེ་ཤཱ་རིའི་བུ། །སུམ་ཅུ་རྩ་གཉིས་མཚན་གྱི་གཟུགས་ལྡན་ ཞིང༌། །བདག་འོད་རང་བྱུང་འཇིག་རྟེན་རིག་པར་ཡང༌། །དེ་ལྟར་ཅི་ནས་སེམས་ཅན་ཀུན་འགྱུར་སྙམ། །ཇི་ལྟར་མཐོང་ཞིང་ཇི་ལྟར་བསམས་པ་དང༌། །ང་ཡིས་སྔན་ཆད་ཇི་ལྟར་ བརྣགས་པ་དེ། །ང་ཡི་སྨོན་ལམ་དེ་དག་ཡོངས་རྫོགས་ཏེ། །བྱང་ཆུབ་སངས་རྒྱས་ནས་ནི་མ་བསྟན་ཏོ། །སེམས་ཅན་རྣམས་ལ་བྱང་ཆུབ་འདུན་སྐྱེད་ཅེས། །ངས་ནི་དེ་སྐད་སྨྲས་ན་ ཤཱ་རིའི་བུ། །མི་ཤེས་སེམས་ཅན་རྣམས་ནི་འདིར་མྱོས་ཏེ། །ང་ཡི་ལེགས་བཤད་འཛིན་པར་གཞར་མི་འགྱུར། །དེ་དག་འདི་འདྲའི་ཚུལ་དུ་ངས་ཤེས་ཏེ། །ཚེ་རབས་སྔ་མར་སྤྱོད་པ་རྣམས་ མ་སྤྱད། །འདོད་པའི་ཡོན་ཏན་རྣམས་ལ་ཆགས་ཤིང་ཞེན། །སྲེད་པས་བརྒྱལ་ཞིང་གཏི་མུག་མྱོས་པ་རྣམས། །དེ་དག་འདོད་རྒྱུས་ངན་འགྲོར་རབ་ཏུ་ལྟུང༌། །འགྲོ་བ་དྲུག་ཏུ་ཀུན་ཏུ་ཉོན་ མོངས་ཏེ། །དུར་ཁྲོད་དེ་དག་ཕྱི་ཕྱིར་འཕེལ་བར་བྱེད། །བསོད་ནམས་ཆུང་བས་སྡུག་བསྔལ་ཀུན་གྱིས་གཟིར། །ལྟ་བའི་ཐིབས་པོར་རྟག་ཏུ་རྣམ་པར་ཆགས། །ཡོད་དང་མེད་དང་དེ་བཞིན་ ཡོད་མེད་པ། །ལྟར་གྱུར་དྲུག་ཅུ་གཉིས་ལ་བརྟན་ནས་སུ། །དངོས་པོ་མེད་ལ་ཡོངས་སུ་འཛིན་ཅིང་གནས། །སྦྱང་པར་དཀའ་ཞིང་ལོག་བྱེད་ང་རྒྱལ་ཅན། །བྱིས་པ་ཐོས་ཉུང་ཡོན་པོ་གཡོ་ བྱེད་རྣམས། །ཚེ་རབས་བྱེ་བ་ཕྲག་སྟེང་ནམ་དུ་ཡང༌། །དེ་དག་སངས་རྒྱས་སྒྲ་འདི་མི་ཐོས་སོ། །ང་ཡི་ཐབས་ཀྱིས་དེ་ལ་ཤཱ་རིའི་བུ། །སྡུག་བསྔལ་མཐར་ཕྱུང་ཤིང་ཅེས་དེ་སྐད་སྨྲས། ། སེམས་ཅན་སྡུག་བསྔལ་གཟིར་བ་མཐོང་བས་ན། །དེ་དག་མྱ་ངན་འདས་པ་ཉེ་བར་བསྟན། །འདི་ལྟར་ངས་ནི་ཆོས་རྣམས་འདི་དག་ཀུན། །གདོད་ནས་རབ་ཞི་མྱ་ངན་རྟག་འདས་བཤད། ། སངས་རྒྱས་སྲས་དེ་སྤྱོད་པ་ཀུན་རྫོགས་ནས། །ཕྱི་མའི་དུས་ཀྱི་ཚེ་ལ་རྒྱལ་བར་འགྱུར། །ཐེག་པ་གསུམ་དུ་གང་རྣམས་བསྟན་པ་ནི། །ང་ཡི་ཐབས་མཁས་ཚུལ་ནི་དེ་འདྲ་སྟེ། །ཐེག་པ་ ༄༅། །གཅིག་སྟེ་དེ་བཞིན་ཚུལ་ཡང་གཅིག །དེ་ལྟར་འདྲེན་པ་རྣམས་ཀྱིས་བཤད་པ་གཅིག །གང་འདིར་ལ་ལ་ཐེ་ཚོམ་ཡོད་པ་དག །ཐེ་ཚོམ་ཟ་དང་དེ་བཞིན་སོམ་ ཉི་སྤོངས། །གཞན་དུ་མི་གསུང་འཇིག་རྟེན་འདྲེན་པ་རྣམས། །ཐེག་པ་འདི་ནི་གཅིག་སྟེ་གཉིས་སུ་མེད། །སྔོན་གྱི་དེ་བཞིན་གཤེགས་པ་གང་འབྱུང་བ། །སངས་རྒྱས་སྟོང་ངམ་མྱ་ ངན་ཡོངས་འདས་ཤིང༌། །འདས་པའི་དུས་ན་བསྐལ་པ་གྲངས་མེད་ལ། གང་དག་ཚད་ནི་ནམ་ཡང་ཡོང་མེད་པ། །སྐྱེས་བུ་དམ་པ་དེ་དག་ཐམས་ཅད་ཀྱིས། །དཔེ་དང་གཞི་དང་རྒྱུ་ དང་བཅས་པ་དང༌། །ཐབས་ལ་མཁས་པ་བརྒྱ་ཕྲག་དུ་མ་ཡིས། །རྣམ་པར་དག་པའི་ཆོས་རྣམས་པར་རབ་བཤད་པ། །དེ་དག་ཐམས་ཅད་ཐེག་པ་གཅིག་སྟོན་ཅིང༌། །སྲོག་ཆགས་ སྟོང་ཕྲག་བྱེ་བ་བསམ་ཡས་རྣམས། །ཐེག་པ་གཅིག་པོ་ལ་ཡང་རབ་འཛུད་དེ། །ཐེག་པ་གཅིག་ལ་ཡོངས་སུ་སྨིན་པར་བྱེད། །མོས་དང་དེ་བཞིན་བསམ་པ་རྣམས་མཁྱེན་ ནས། །དེ་བཞིན་གཤེགས་པས་ལྷར་བཅས་འཇིག་རྟེན་དུ། །རྒྱལ་བའི་ཐབས་གཞན་རྣམ་པ་མང་པོ་དག །གང་གིས་ཆོས་མཆོག་འདི་ནི་རབ་བསྟན་པ། །སེམས་ཅན་གང་ གིས་དེ་ལས་མངོན་སུམ་དེར། །ཆོས་ཉན་པ་དང་འོན་ཏེ་ཐོས་ལྡན་པ། །སྤྱིན་པ་སྦྱིན་ཞིང་ཚུལ་ཁྲིམས་སྤྱོད་པ་དང༌། །བཟོད་པས་སྤྱོད་པ་ཐམས་ཅད་བསྒྲུབ་པ་དང༌། །བརྩོན་འགྲུས་ བསམ་གཏན་ལྷག་པར་བྱས་པ་དང༌། །ཤེས་རབ་ཀྱིས་ནི་ཆོས་འདི་རྣམས་བསམས་ཏེ། །རྣམ་པ་ཐ་དད་བསོད་ནམས་སུས་བྱས་པ། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །མྱ་ངན་ ཤེས་པའི་རྒྱལ་བ་དེ་དག་གི། །བསྟན་པ་དེ་ལ་སེམས་ཅན་གང་ཞུགས་ཏེ། །དེ་ན་བཟོད་ཅིང་ཞི་ལ་དུལ་བ་ནི། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །རྒྱལ་བ་མྱ་ངན་འདས་པ་དེ་དག་ ། །རྒྱལ་བའི་རིང་བསྲེལ་དག་ལ་སུ་མཆོད་ཅིང༌། །རིན་ཆེན་མཆོད་རྟེན་སྟོང་ཕྲག་དུ་མ་དག །གསེར་དང་དངུལ་དང་འོན་ཏེ་ཤེལ་གྱིའམ། །རྡོ་ཡི་སྙིང་པོའི་མཆོད་རྟེན་གང་གིས་བྱས། ། བཻཌཱུཪྻ་མཆོག་དེ་བཞིན་ཨནད་རྙིལ། །ལ་ལས་མུ་ཏིག་ཀེ་ཀེ་རུ་ལས་བྱས། །དེ་དག་གིས་ཀྱང་བྱང་ཆུབ་ཐོབ་པར་འགྱུར། །གང་གི་མཆོད་རྟེན་རྡོ་ལས་བྱས་པ་དང༌། གང་གི་ཨ་ག་རུ་ དང་ཙནྡན་ནམ། །གང་གིས་ཐང་ཤིང་མཆོད་རྟེན་བྱས་པ་དང༌། །ལ་ལས་ཤིང་མང་གཞན་ལས་བྱས་པ་དང༌། །ས་དང་སོ་ཕག་ལས་ནི་བརྩིགས་པ་ཡི། །རྒྱལ་བའི་མཆོད་རྟེན་དགའ་ ཞིང་བྱས་པ་དང༌། །དེ་ཕྱིར་ས་རྡུལ་ཕུང་པོ་དག་ལས་ཀྱང༌། །མྱ་ངན་དགོན་པ་གང་དུ་བྱས་པ་དང༌། །བྱིས་པ་རྩེད་མོར་དེ་དང་དེ་དག་ཏུ། །གང་གིས་རྒྱལ་བ་དེ་ཕྱིར་མཆོད་རྟེན་དག །བྱེ་མ་ ལས་ནི་ཕུང་པོ་བྱས་པ་ཡང༌། །དེ་རྣམས་ཀྱིས་ཀྱང་བྱང་ཆུབ་ཐོབ་པར་འགྱུར། །ལ་ལས་དེ་བཞིན་རིན་ཆེན་གཟུགས་བྱས་པ། །སུམ་ཅུ་རྩ་གཉིས་མཚན་དང་ལྡན་པའི་གཟུགས། །གང་ ༄༅། །གིས་དེ་ཕྱིར་བྱས་པ་དེ་དག་ཀྱང༌། །དེ་དག་ཐམས་ཅད་བྱང་ཆུབ་ཐོབ་པར་གྱུར། །ལ་ལས་དེར་ནི་རིན་ཆེན་སྣ་བདུན་དང༌། །ལ་ལས་དེ་བཞིན་ཟངས་དང༌། འཁར་བ་ལས། །བདེ་བར་གཤེགས་པ་རྣམས་ཀྱི་གཟུགས་བྱས་པ། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །རོ་ཉེ་དང་ནི་ལྕགས་སམ་ས་ཡང་རུང༌། །བདེ་བར་གཤེགས་ པ་རྣམས་ཀྱི་གཟུགས་བྱས་ཏེ། །བལྟ་ན་སྡུག་པ་འཇིམ་པའི་ལས་བྱེད་བཅུག །དེ་དག་ཐམས་ཅད་བྱང་ཆུབ་ཐོབ་པར་འགྱུར། །གང་གིས་རྩིག་ངོས་གཟུགས་ཀྱི་རི་མོ་དག །བསོད་ནམས་ བརྒྱ་མཚན་ཡོངས་སུ་རྫོགས་པའི་སྐུ། །བདག་གིས་བྲིས་སམ་འདྲི་རུ་བཅུག་ཀྱང་རུང༌། །དེ་དག་ཐམས་ཅད་བྱང་ཆུབ་ཐོབ་པར་གྱུར། །སྐྱེས་བུ་དག་གམ་འོན་ཏེ་གཞོན་ནུའང་རུང༌། ། གང་དག་ལ་ལ་དེ་ནི་སློབ་པའི་ཚེ། །རྩེད་མོ་དགའ་དང་གསང་བ་བྱེད་པ་ན། །རྩིག་ངོས་སེན་མོ་ཤིང་བུས་གཟུགས་བྲིས་པ། །དེ་དག་ཐམས་ཅད་བྱང་ཆུབ་ཐོབ་གྱུར་ཏེ། །དེ་དག་ ཐམས་ཅད་སྙིང་རྗེ་ཅན་དུ་གྱུར། །ཐམས་ཅད་ཀྱང་ནི་སྲོག་ཆགས་བྱེ་བ་སྒྲོལ། །བྱང་ཆུབ་སེམས་དཔའ་མང་པོ་ཡང་དག་འཛུད། །དེ་བཞིན་གཤེགས་པ་རྣམས་ཀྱི་རིང་བསྲེལ་དང༌། ། འཇིམ་པའི་གཟུགས་དང་མཆོད་རྟེན་དག་ལའང་རུང༌། །རྩིག་ངོས་བྲིས་དང་རྡུལ་ཕུང་མཆོད་རྟེན་ལ། །དེ་ལ་མེ་ཏོག་དང་ནི་སྤོས་གསོལ་ཏེ། །དེར་ནི་གང་གིས་རབ་སྙན་ཅང་ཏེའུ་ དང༌། །དུང་དང་རྔ་ཆེན་རོལ་མོའི་སྒྲ་བྱེད་བཅུག །བྱང་ཆུབ་མཆོག་རབ་མཆོད་པ་བྱ་བའི་ཕྱིར། །གང་དག་རྔ་རྣམས་རབ་ཏུ་རྡུང་བྱེད་ཅིང༌། །པི་ཝང་དང་ནི་ཕེག་དང་འཁར་བའི་རྔ། །རྫ་རྔ་ རྒྱུད་གཅིག་གླིང་བུ་ཡིད་འོང་དང༌། །ཨེ་ཀོན་དང་རབ་ཏུ་སྙན་འབྱིན་པ་།དེ་དག་ཐམས་ཅད་བྱང་ཆུབ་ཐོབ་པར་འགྱུར། །བདེ་བར་གཤེགས་པ་རྣམས་ལ་མཆོད་པའི་ཕྱིར། །གང་དག་ ལྕགས་ཀྱི་སིལ་ཁྲོལ་རྡུང་བཅུག་དང༌། །ཆུ་ལ་བརྡབས་དང་ཐལ་མོ་བརྡབས་པ་དང༌། །ཡིད་དུ་འོང་ཞིང་སྙན་པའི་གླུ་བླངས་དང༌། །རིང་བསྲེལ་དེ་དག་རྣམས་མང་མཆོད་བྱས་པ། །དེ་དག་ ཐམས་ཅད་འཇིག་རྟེན་སངས་རྒྱས་འགྱུར། །བདེ་གཤེགས་རིང་བསྲེལ་ལ་ནི་ཅུང་ཟད་དང༌། །སིལ་སྙན་གཅིག་བརྡུངས་པ་ཡི་སྒྲ་ཕྱུང་ངམ། །མེ་ཏོག་གཅིག་ཙམ་གྱིས་ནི་མཆོད་པ་དང༌། བདེ་གཤེགས་གཟུགས་དག་རྩིག་ངོས་བྲིས་པ་ལ། །འཁྲུག་བཞིན་པ་ཡི་སེམས་ཀྱིས་མཆོད་ན་ཡང༌། །དེ་དག་རིམ་གྱིས་སངས་རྒྱས་བྱེ་བ་མཐོང༌། །མཆོད་རྟེན་དག་ལ་གང་གིས་ ཐལ་མོ་སྦྱར། །ཡོངས་སུ་ཚང་བའམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང༌། །དེ་བཞིན་ལན་གཅིག་ལུས་ཀྱང་བཏུད་པ་དང༌། །གང་གིས་རིང་བསྲེལ་ གནས་པ་དེ་དག་ལ། གཡེངས་པའི་སེམས་ཀྱིས་ཕྱག་འཚལ་སངས་རྒྱས་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང༌། །དེ་དག་ཀུན་གྱིས་བྱང་ཆུབ་མཆོག་འདི་འཐོབ།། ༄༅། །དེ་ཚེ་བདེ་བར་གཤེགས་པ་དེ་དག་ནི། །མྱ་ངན་འདས་སམ་ཡང་ན་བཞུགས་ཀྱང་རུང༌། །སེམས་ཅན་གང་གིས་ཆོས་འདི་མིང་ཐོས་པ། །དེ་དག་ཐམས་ཅད་ བྱང་ཆུབ་ཐོབ་པར་འགྱུར། །ཕྱིས་འབྱུང་སངས་རྒྱས་བྱེ་བ་མང་པོ་རྣམས། །དེ་དག་བསམ་གྱིས་མི་ཁྱབ་ཚད་ཀྱང་མེད། །འཇིག་རྟེན་མགོན་མཆོག་རྒྱལ་བ་དེ་དག་ཀྱང༌། །ཐབས་ འདི་རྣམས་ནི་རབ་ཏུ་སྟོན་པར་འགྱུར། །གང་གིས་སངས་རྒྱས་ཡེ་ཤེས་ཟག་མེད་པ། །འདི་ལ་སྲོག་ཆགས་བྱེ་བ་འདུལ་མཛད་པ། །འཇིག་རྟེན་རྣམ་པར་འདྲེན་པ་དེ་དག་གི། ཐབས་ ལ་མཁས་པ་དག་ནི་མཐའ་ཡས་འགྱུར། །ཆོས་འདི་ཐོས་ནས་སངས་རྒྱས་མི་འགྱུར་བ། །སེམས་ཅན་དེ་དག་ནམ་ཡང་གཅིག་ཀྱང་མེད། །བྱང་ཆུབ་ཕྱིར་སྤྱད་ནས་ནི་སྤྱོད་པར་གཞུག་ དེ་ནི་དེ་བཞིན་གཤེགས་རྣམས་སྨོན་ལམ་མོ། །ཆོས་སྒོ་བྱེ་བ་སྟོང་ཕྲག་དུ་མ་དག །མ་འོངས་དུས་ན་རབ་ཏུ་སྟོན་འགྱུར་ཏེ། །ཐེག་པ་གཅིག་པོ་འདི་ནི་མངོན་སྟོན་ཅིང༌། །དེ་བཞིན་ གཤེགས་པ་ཉིད་དུ་ཆོས་སྟོན་འགྱུར། །ཆོས་ཀྱི་ཚུལ་འདི་རྟག་ཏུ་གནས་པ་དང༌། །ཆོས་ཀྱི་རང་བཞིན་རྟག་ཏུ་འོད་གསལ་བར། །རྐང་གཉིས་དམ་པ་སངས་རྒྱས་རྣམས་མཁྱེན་ ནས། །ང་ཡི་ཐེག་པ་གཅིག་ཅེས་སྟོན་པར་འགྱུར། །ཆོས་ཀྱི་གནས་ཉིད་སྐྱོན་མེད་ཆོས་ཉིད་ནི། །འཇིག་རྟེན་འདི་ན་རྟག་ཏུ་མི་གཡོ་ནས། །ས་ཡི་སྙིང་པོར་བྱང་ཆུབ་སངས་རྒྱས་ཏེ།། ཐབས་ལ་མཁས་པ་ཤིན་ཏུ་སྟོན་པར་འགྱུར། །ལྷ་མི་རྣམས་ཀྱིས་མཆོད་པའི་སངས་རྒྱས་རྣམས། །ཕྱོགས་བཅུ་བཞུགས་པ་གངྒཱའི་བྱེ་མ་སྙེད། །འདི་ན་སྲོག་ཆགས་ཐམས་ཅད་བདེ་བྱའི་ཕྱིར། ། དེ་དག་རྣམས་ཀྱང་ཐེག་པ་མཆོག་འདི་འཆད། །ཞི་བའི་ས་མཆོག་འདི་ནི་སངས་རྒྱས་ནས། །ཐབས་ལ་མཁས་པས་རབ་ཏུ་སྟོན་མཛད་ཅིང༌། །ཐེག་པ་རྣམ་པ་ཐ་དད་མངོན་པར་འཆད། །ཐེག་ པ་གཅིག་པོའང་ཡོངས་སུ་སྟོན་མཛད་དོ། །ལུས་ཅན་ཀུན་གྱི་སྤྱོད་པ་རིག་པ་དང༌། །དེ་བཞིན་སྔོན་ཆད་ཅི་བསྒོམས་ཅི་བསམ་པ། །དེ་བྱི་མཐུ་དང་བརྩོན་འགྲུས་རྣམས་ཀྱང་རིག །ཤིན་ཏུ་ དག་པ་མཁྱེན་ནས་རབ་ཏུ་སྟོན། །འདྲེན་པའི་ཡེ་ཤེས་སྟོབས་ཀྱིས་རྒྱུ་མང་དང༌། །དཔེ་དང་གཞི་ཡང་མང་པོ་རབ་སྟོན་ཏེ། །སེམས་ཅན་མོས་པ་སྣ་ཚོགས་རིག་ནས་ནི། །སྣ་ཚོགས་མངོན་ པར་བསྒྲུབ་པ་ཉེ་བར་སྟོན། །ད་ལྟར་རྒྱལ་དབང་འདྲེན་པ་ང་ཡང་ནི། །སེམས་ཅན་རྣམས་ལ་བདེ་བྱའི་ཕྱིར་བྱུང་སྟེ། །སྣ་ཚོགས་བསྒྲུབ་པ་བྱེ་བ་ཕྲག་སྟོང་གིས། །སངས་རྒྱས་བྱང་ཆུབ་འདི་ ནི་ཡང་དག་བསྟན། །སྲོག་ཆགས་རྣམས་ཀྱི་མོས་དང་དད་བསམ་མཁྱེན་ནས། །ཆོས་རྣམས་རྣམ་པ་མང་པོ་རབ་བཤད་དེ། །རྣམ་པ་སྣ་ཚོགས་ཐབས་ཀྱིས་དགའ་བ་བསྐྱེད། །དེ་ནི་ང་ཡི་རང་ རིག་ཡེ་ཤེས་སྟོབས། །ང་ཡིས་མཐོང་བ་སེམས་ཅན་དབུལ་པོ་རྣམས། །ཤེས་རབ་བསོད་ནམས་རྣམས་དང་བྲལ་གྱུར་ཅིང༌། །འཁོར་བར་བྱིང་ལ་མྱ་ངན་ཞུགས་པ་རྣམས། །སྡུག་ ༄༅། །བསྔལ་རྒྱུད་དུ་ཤིན་ཏུ་ནུབ་པ་སྟེ། །སྲེད་པས་ཆགས་པ་གཡག་གི་རྔ་མ་བཞིན། །འདོད་པས་འདི་དག་རྟག་ཏུ་ལྡོངས་པར་བྱས། །སངས་རྒྱས་མཐུ་ཆེན་རྣམས་ ཀྱང་མི་ཚོལ་ཞིང༌། །སྡུག་བསྔལ་མཐར་འགྲོ་བ་ཡི་ཆོས་མི་ཚོལ། །འགྲོ་བ་དྲུག་པོ་རྣམས་སུ་ཟིན་པའི་སེམས། །ལོག་པར་མཐོང་བའི་ལྟ་ལ་མི་གཡོ་གནས། །སྡུག་བསྔལ་བ་ཡི་སྡུག་ བསྔལ་རབ་མྱོང་བ། །དེ་ལ་ང་ཡི་སྙིང་རྗེ་སྟོབས་ལྡན་ཏེ། །བྱང་ཆུབ་སྙིང་པོར་དེར་ནི་ང་སེམས་ཤིང༌། །བདུན་ཕྲག་གསུམ་དུ་ཚང་བར་རབ་གནས་ཏེ། །ང་ནི་འདི་འདྲའི་དོན་ལ་རབ་སེམས་ ཤིང༑ ༑དེ་ན་སྡོང་པོ་དེ་ལ་བལྟས་པ་ནི། །ཤིང་མཆོག་དེ་ལ་མིག་མི་འཛུམ་པར་བལྟ། །དེ་ཡི་དྲུང་ན་ཕན་ཚུན་འཆག་ཅིང་གནས། །ཡེ་ཤེས་འདི་ནི་དམ་པ་ངོ་མཚར་ཏེ། །སེམས་ཅན་ འདི་དག་མི་མཁས་གཏི་མུག་ལྡོངས། །དེ་ཚེ་ང་ལ་ཚངས་དང་བརྒྱ་བྱིན་དང༌། །དབང་ཕྱུག་ཆེ་དང་འཇིག་རྟེན་སྐྱོང་བཞི་དང༌། །དེ་བཞིན་དབང་ཕྱུག་དག་ཀྱང་གསོལ་འདེབས་ཏེ། །ལྷ་ རྣམས་བྱེ་བ་སྟོང་ཕྲག་མང་པོ་ཡང༌། །ཐམས་ཅད་ཐལ་མོ་སྦྱར་ནས་གུས་པར་འཁོད། །དོན་རྣམས་ཇི་ལྟར་བྱ་བ་རབ་ཏུ་བསམས། །ང་ཡིས་བྱང་ཆུབ་ཡོན་ཏན་བསྔགས་ན་ནི། ། སེམས་ཅན་འདི་དག་སྡུག་བསྔལ་གཟིར་བ་སྟེ། །ང་ཡི་ཆོས་ལ་བྱིས་པའི་བློ་ཅན་སྐུར། །དེ་ལྟར་སྐུར་བས་ངན་སོང་གནས་སུ་འགྲོ་།ངས་ནི་ཡོང་མ་བཤད་ན་དགར་འགྱུར་གྱི། ། ང་དེང་ཞི་བར་མྱ་ངན་འདའ་སླ་སྙམ། །སྔོན་གྱི་སངས་རྒྱས་རྣམས་དང་དེ་དག་གི །ཐབས་མཁས་ཇི་ལྟ་བ་ཡང་རབ་དྲན་ཏེ། །ངས་ཀྱང་འདི་ལྟར་སངས་རྒྱས་བྱང་ཆུབ་འདི། །རྣམ་པ་གསུམ་དུ་ འདིར་བྱེད་རབ་ཏུ་བཤད། །ང་ཡིས་དོན་དེ་དེ་ལྟར་བསམས་པ་ན། །ཕྱོགས་བཅུའི་སངས་རྒྱས་དེ་དག་གཞན་གྱིས་ཀྱང༌། །དེ་དག་རང་གི་ལུས་ཀྱང་ང་བསྟན་ནས། །ལེགས་ཞེས་བྱ་བའི་སྒྲ་ ཡང་རབ་བསྒྲགས་ཏེ། །ཐུབ་པ་འཇིག་རྟེན་རྣམ་པར་འདྲེན་པའི་མཆོག །བླ་ན་མེད་པའི་ཡེ་ཤེས་འདི་རྟོགས་ནས། །ཐབས་ལ་མཁས་པ་རྣམ་པར་བསམས་པ་དང༌། །འཇིག་རྟེན་འདྲེན་པ་ རྣམས་ཀྱི་རྗེས་སློབ་ལེགས། །ངེད་ཀྱང་དམ་པའི་གནས་ནི་རྟོགས་པའི་ཚེ། །རྣམ་པ་གསུམ་དུ་ཕྱེ་སྟེ་རབ་ཏུ་སྟོན། །མཁས་པ་མ་ཡིན་དད་པ་ཆུང་བའི་མི། །སངས་རྒྱས་རྣམས་ལ་དད་པར་ མི་འགྱུར་ཏེ། །དེ་བས་ངེད་ཀྱིས་རྒྱུ་རྣམས་ཀུན་བསྡུས་པས། །ཐབས་ལ་མཁས་པ་རྣམས་ནི་རབ་སྤྱད་ཅིང༌། །འབྲས་བུ་འདོད་པ་ཡོངས་སུ་བརྗོད་བྱས་ཏེ། །བྱང་ཆུབ་སེམས་དཔའ་མང་པོ་ ཡང་དག་བཙུད། །སྐྱེས་བུ་ཁྱུ་མཆོག་དག་གི་ཡིད་འོང་སྒྲ། །ཐོས་ནས་དེ་ཚེ་ང་ནི་དགའ་བར་གྱུར། །དགའ་བའི་སེམས་ཀྱིས་སྐྱོབ་བ་དེ་དག་ལ། །དྲང་སྲོང་ཆེ་མཆོག་དོན་ཡོད་གསུང་ བ་སྟེ༑ ༑མཁས་པ་འཇིག་རྟེན་འདྲེན་པས་གསུངས་པ་ལྟར། །བདག་ཀྱང་དེ་བཞིན་སྤྱད་པར་བགྱི་ཞེས་སྨྲས། །ང་ནི་འཁྲུག་དང་མི་བཟད་འདི་ཡི་ཚེ། །སེམས་ཅན་སྙིགས་མར་གྱུར་ ༄༅། །བའི་ནང་དུ་སྐྱེས། །དེ་ལྟར་ངས་རིག་ནས་ནི་ཤཱ་རིའི་བུ། །དེ་ཡི་ཚེ་ན་ཝཱ་ར་ཎཱ་སིར་སོང༌། །དེ་ན་དགེ་སློང་ལྔ་པོ་དག་ལ་ཡང༌། །རབ་ཞི་ས་ཡི་ཆོས་ནི་ཐབས་ཀྱིས་ བཤད། །དེ་ནས་ང་ཡིས་ཆོས་ཀྱི་འཁོར་ལོ་བསྐོར། །མྱ་ངན་འདའ་བའི་སྒྲ་ཡང་འཇིག་རྟེན་བྱུང༌། །དགྲ་བཅོམ་སྒྲ་དང་དེ་བཞིན་ཆོས་ཀྱི་སྒྲ། །དགེ་འདུན་སྒྲ་ཡང་དེ་ཚེ་བྱུང་བར་གྱུར། ། ལོ་གྲངས་མི་ཉུང་བར་ནི་རབ་བཤད་དོ། །མྱ་ངན་འདའ་བའི་ས་ཡང་མངོན་པར་བསྟན། །འཁོར་བ་སྡུག་བསྔལ་མཐའ་ནི་འདི་ཡིན་ཞེས། །དེ་བཞིན་རྟག་པར་དུས་སུ་ངས་སྨྲས་སོ། །ངས་ ནི་དེ་ཡི་ཚེ་ན་ཤཱ་རིའི་བུ། །རྐང་གཉིས་དམ་པའི་སྲས་རྣམས་མཐོང་བ་ནི། །གང་དག་བྱང་ཆུབ་དམ་པ་མཆོག་ཞུགས་པ། །བྱེ་བ་ཁྲག་ཁྲིག་སྟོང་ཕྲག་མཐའ་ཡས་པ། །ང་ཡི་དྲུང་དུ་དེ་ དག་ཉེར་ལྷགས་ནས། །ཐལ་མོ་སྦྱར་ཏེ་ཐམས་ཅད་གུས་པར་འཁོད། །གང་དག་ཐབས་ལ་མཁས་པ་རྣམས་མང་པོ། །རྒྱལ་བ་དག་ལ་ཆོས་ཐོས་དེ་དག་མཐོང༌། །དེ་ནས་སྐད་ཅིག་ དེ་ལ་འདི་སྙམ་དུ། །ང་ཡིས་ཆོས་མཆོག་བཤད་པའི་དུས་ལ་བབ། །གང་ཕྱིར་ང་ནི་འཇིག་རྟེན་འདིར་སྐྱེས་པ། །བྱང་ཆུབ་མཆོག་རབ་དེ་ནི་འདིར་བསྟན་ཏོ། །མཚན་མར་འདུ་ཤེས་ བྱིས་པའི་བློ་དང་ལྡན། །མི་མཁས་ལྷག་པའི་ང་རྒྱལ་ལྡན་པ་རྣམས། །དེ་རིང་འདི་ལ་དད་པར་དཀའ་འགྱུར་གྱི། །བྱང་ཆུབ་སེམས་དཔའ་འདི་དག་ཉན་སྙམ་སྟེ། །དེ་ཚེ་ང་ནི་ འཇིགས་མེད་རབ་ཏུ་དགའ། །ཡང་དག་ནང་འཇོག་ཐམས་ཅད་རྣམ་སྤངས་ནས། །བདེ་བར་གཤེགས་པའི་སྲིད་ཀྱི་དབུས་སུ་བཤད། །དེ་དག་བྱང་ཆུབ་ལ་ནི་ཡང་དག་བཙུད། །འདི་འདྲའི་ སངས་རྒྱས་སྲས་རྣམས་མཐོང་ནས་ནི། །ཁྱོད་ཀྱང་སོམ་ཉི་རྣམ་པར་སྤངས་པར་འགྱུར། །གང་དག་ཟག་ཟད་བརྒྱ་ཕྲག་བཅུ་གཉིས་པོ། །འདི་དག་ཐམས་ཅད་འཇིག་རྟེན་སངས་རྒྱས་ འགྱུར། །སྔ་མའི་སྐྱོབ་པ་དེ་དག་ཅི་འདྲ་དང༌། །མ་འོངས་རྒྱལ་བའི་ཆོས་ཉིད་ཇི་ལྟ་བར། །ངས་ཀྱང་དེ་ལ་རྣམ་པར་རྟོག་སྤངས་ཏེ། །དེ་བཞིན་དུ་ནི་ཁྱོད་ལ་ངས་དེང་བཤད། །རེས་འགའ་ གང་དུ་ཅི་ཡིས་འཇིག་རྟེན་དུ། །སྐྱེས་བུ་ཁྱུ་མཆོག་དག་ནི་འབྱུང་བར་འགྱུར། །མཐའ་ཡས་མིག་ཅན་འཇིག་རྟེན་བྱུང་ན་ཡང༌། །རེས་འགའ་འདི་འདྲ་བ་ཡི་ཆོས་འཆད་དེ། །བསྐལ་པ་ བྱེ་བ་ཁྲག་ཁྲིག་སྙེད་དུ་ཡང༌། །འདི་འདྲའི་ཆོས་མཆོག་རབ་ཏུ་རྙེད་པར་དཀའ། །གང་དག་ཆོས་མཆོག་ཐོས་ནས་དད་འགྱུར་བ། །དེ་འདྲའི་སེམས་ཅན་ཤིན་ཏུ་རྙེད་པར་དཀའ། །ཨུ་ དུམྦ་རའི་མེ་ཏོག་རྙེད་དཀའ་བཞིན། །རས་འགའ་གང་ཞིག་ཅི་ཡིས་སྣང་གྱུར་ན། །གཟུགས་དེ་འགྲོ་བའི་ཡིད་དུ་འོང་བ་སྟེ། །ལྷར་བཅས་འཇིག་རྟེན་རྣམས་ལ་ངོ་མཚར་གྱུར། །དེ་ བས་ལེགས་བཤད་ཆོས་འདི་སུས་ཐོས་ནས། །རྗེས་སུ་ཡི་རང་ཚིག་གཅིག་བརྗོད་ན་ཡང༌། །ཤིན་ཏུ་ངོ་མཚར་ཆེ་བར་འདིར་བསྟན་ཏེ། །དེས་ནི་སངས་རྒྱས་ཐམས་ཅད་མཆོད་པར་ ༄༅། །འགྱུར། །འདི་ལ་ཐེ་ཚོམ་སོམ་ཉི་རྣམ་པར་སྤོངས། །ཆོས་ཀྱི་རྒྱལ་པོ་ངས་ནི་ཀུན་བསྟན་ཏེ། །བྱང་ཆུབ་དམ་པ་འདི་ལ་ཡང་དག་གཟུང༌། །འདི་ན་ང་ལ་ཉན་ཐོས་ གང་ཡང་མེད། །ཤཱ་རིའི་བུ་ཁྱོད་འདི་ནི་གསང་ཆེན་གྱིས། །ང་ཡིས་ཉན་ཐོས་གང་འདི་ཐམས་ཅད་དང༌། །བྱང་ཆུབ་སེམས་དཔའ་གཙོ་བོ་འདི་དག་གིས། །ང་ཡི་གསང་ཆེན་འདི་ནི་ ཐུབ་པར་གྱིས། །ཅི་ཕྱིར་ཞེན་སྙིགས་མ་ལྔ་ཡི་ཚེ། །སེམས་ཅན་ངན་པ་གཏུམ་པོ་འབྱུང་བས་ན། །བྱིས་པའི་བློ་ཅན་འདོད་པས་ལྡོངས་གྱུར་པ། །དེ་དག་ནམ་ཡང་བྱང་ཆུབ་སེམས་ མི་སྐྱེ༑ ༑ཐེག་པ་གཅིག་བོ་འདི་ནི་རྒྱལ་བ་དེས། །སྔོན་རབ་བཤད་པ་ཡིན་ཞེས་ཐོས་ནས་སུ། །མ་འོངས་དུས་ན་སེམས་ཅན་མྱོས་གྱུར་ཏེ། །མདོ་སྡེ་སྤངས་པ་སེམས་ཅན་དམྱལ་ བར་འགྲོ། །སེམས་ཅན་གང་དག་འཛེམ་ཞིང་གཙང་བ་དང༌། །གང་དག་བྱང་ཆུབ་དམ་པ་མཆོག་ཞུགས་པ། །དེ་དག་ལ་ནི་འཇིགས་པ་མེད་གྱིས་ལ། །ཐེག་པ་གཅིག་གི་བསྔགས་ པ་མཐའ་ཡས་ཤོད། །འདྲེན་པ་རྣམས་ཀྱིས་བཤད་པ་དེ་ལྟ་བུ། །ཐབས་ལ་མཁས་པ་དམ་པ་མཆོག་འདི་ནི། །ལྡེམ་པོར་ངག་རྣམས་རབ་ཏུ་མང་པོར་བཤད། །འདི་ནི་མ་ བསླབས་རྣམས་ཀྱིས་རིག་པར་དཀའ། །དེ་བས་འཇིག་རྟེན་སློབ་དཔོན་སངས་རྒྱས་ཀྱི། །སྐྱོབ་པའི་ལྡེམ་པོ་གང་ནི་ཤེས་རབ་ཀྱིས། །ཐེ་ཚོམ་ཆོད་ལ་སོམ་ཉི་རྣམས་སྤོངས་ཏེ། ། སངས་རྒྱས་འགྱུར་གྱི་དགའ་བ་རབ་ཏུ་སྐྱེད། །དམ་པའི་ཆོས་པདྨ་དཀར་པོ་ལས། ཐབས་ལ་མཁས་པའི་ལེའུ་ཞེས་བྱ་སྟེ་གཉིས་པའོ།། །།དམ་པའི་ཆོས་པདྨ་དཀར་པོ། ། བམ་པོ་གསུམ་པ། དེ་ནས་ཚེ་དང་ལྡན་པ་ཤཱ་རིའི་བུ་དེའི་ཚེ་ཚིམ་ཞིང་མགུ་ལ་ཡིད་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ག་ལ་བ་དེ་ལོགས་ སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ཀྱི་སྤྱན་སྔ་ན་བཅོམ་ལྡན་འདས་ཁོ་ན་ལ་རབ་ཏུ་ལྟ་ཞིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟ་ བུའི་གསུང་འདི་བཅོམ་ལྡན་འདས་ལས་ཐོས་ནས། བདག་ངོ་མཚར་དང་རྨད་དུ་གྱུར་ཏེ་དགའ་བ་ཐོབ་བོ། །དེ་ཅིའི་སླད་དུ་ཞེ་ན། བཅོམ་ལྡན་འདས། བྱང་ཆུབ་སེམས་དཔའ་གཞན་ དག་ཀྱང་མཐོང༌། བྱང་ཆུབ་སེམས་དཔའ་རྣམས་ཀྱི་མ་འོངས་པའི་དུས་ཀྱི་སངས་རྒྱས་ཀྱི་མཚན་ཡང་ཐོས་ཏེ། འདི་ལྟ་བུའི་ཆོས་ནི་བཅོམ་ལྡན་འདས་ལས་བདག་གིས་མ་ཐོས་ལ། བདག་ དེ་བཞིན་གཤེགས་པའི་ཡེ་ཤེས་གཟིགས་པ་འདི་ལྟ་བུ་ལས་ཉམས་སོ་སྙམ་ནས་ཤིན་ཏུ་མྱ་ངན་དུ་གྱུར། །ཤིན་ཏུ་ཡོངས་སུ་གདུང་བར་གྱུར་པའི་སླད་དུའོ། །བཅོམ་ལྡན་འདས། བདག་རི་དང༌། རི་སུལ་དང༌། ནགས་ཁྲོད་དང༌། ཀུན་དགའ་ར་བ་དང༌། ཆུ་འགྲམ་དང༌། ཤིང་དྲུང་དབེན་པར་གདུགས་ལ་གནས་པའི་སླད་དུ་རྟག་པར་ནམ་མཆི་བ་དེའི་ཚེའང་བཅོམ་ ༄༅། །ལྡན་འདས་འདི་ལྟར་ཆོས་ཀྱི་དབྱིངས་ལ་འཇུག་པ་མཚུངས་ན། བཅོམ་ལྡན་འདས་ཀྱིས་བདག་ཅག་ཐེག་པ་དམན་པ་བས་ངེས་པར་བཏོན་པ་སྙམ་དུ་གནས་ པ་དེ་ལྟ་བུས་མང་དུ་གནས་ཏེ། བཅོམ་ལྡན་འདས་དེའང་བདག་ཅག་གིས་ནོངས་ཀྱི། བཅོམ་ལྡན་འདས་ཀྱིས་མ་ནོངས་སོ་ཞེས་དེའི་ཚེ་བ་དག་དེ་སྙམ་དུ་སེམས་སོ། །དེ་ཅིའི་སླད་དུ་ ཞེ་ན༑ གང་འདི་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ཏེ། ཡང་དག་ཕུལ་གྱི་ཆོས་བསྟན་པ་གསུང་བ་བདག་ཅག་གིས་བསྙད་ན་ནི། བཅོམ་ལྡན་འདས། བདག་ཅག་ཀྱང་ཆོས་འདི་ཉིད་ལ་ངེས་པར་འབྱུང་བར་འགྱུར་བ་ཞིག་ན། བཅོམ་ལྡན་འདས་བྱང་ཆུབ་སེམས་དཔའ་མ་ཚོགས་པར། བཅོམ་ལྡན་འདས་ ཀྱིས་ལྡེམ་པོར་དགོངས་ཏེ་བཤད་པ་དེ་བདག་ཅག་གིས་མ་རྟོགས་ཏེ། རིངས་ཐབས་སུ་དེ་བཞིན་གཤེགས་པས་ཆོས་བསྟན་པ་ཐོག་མར་གསུངས་པ་ཉིད་ཐོས་ནས། བཟུང་ ཞིང་བསྒོམས་ཏེ་བསམས་ཤིང་ཡིད་ལ་བཟུང་བས། བཅོམ་ལྡན་འདས། བདག་ཉིད་ལ་དེ་ལྟར་འགྱོད་པས་མང་དུ་གདུགས་མཚན་བས་པར་འགྱུར་རོ། །བཅོམ་ལྡན་འདས། རྨད་དུ་བྱུང་བའི་ཆོས་ཀྱི་སྒྲ་སྔོན་མ་ཐོས་པ་འདི་ལྟ་བུ་བཅོམ་ལྡན་འདས་ལས་ཐོས་པས། བཅོམ་ལྡན་འདས། དེང་བདག་མྱ་ངན་ལས་འདས་པ་ཐོབ་སྟེ། བཅོམ་ལྡན་འདས། དེང་བདག་བསིལ་བར་གྱུར་ཏོ། །བཅོམ་ལྡན། དེང་བདག་ཡོངས་སུ་མྱ་ངན་ལས་འདས་སོ། །བཅོམ་ལྡན་འདས་དེང་བདག་གིས་དགྲ་བཅོམ་པ་ཐོབ་བོ། །བཅོམ་ལྡན་འདས། དེང་ བདག་བཅོམ་ལྡན་འདས་ཀྱི་སྲས་ཐུ་བོ། ཐུགས་ཀྱི་སྲས་ཞལ་ནས་སྐྱེས་པ། ཆོས་ལས་སྐྱེས་པ། ཆོས་ཀྱི་སྤྲུལ་པ། ཆོས་ཀྱི་བགོ་སྐལ་ལ་སྤྱོད་པ་ཆོས་ཀྱིས་གྲུབ་པ་སྟེ། དེང་བདག་ ཡོངས་སུ་གདུང་བ་དང་བྲལ་ལོ། །དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །སྒྲ་འདི་ཐོས་ནས་ཚིམ་པ་རབ་སྐྱེས་ཏེ། །རྣམ་ འདྲེན་ཆེན་པོ་བདག་ནི་ངོ་མཚར་གྱུར། །བདག་ལ་ཐེ་ཚོམ་ནམ་ཡང་ཕྱིས་མི་འབྱུང༌། །ཐེག་པ་མཆོག་འདིར་བདག་ནི་ཡོངས་སྨིན་གྱིས། །བདེ་བར་གཤེགས་པའི་གསུང་དེ་ངོ་མཚར་ ཏེ༑ ༑སྲོག་ཆགས་རྣམས་ཀྱི་ཐེ་ཚོམ་མྱ་ངན་བསལ། །ཟག་པ་ཟད་པ་བདག་གི་མྱ་ངན་ཀྱང༌། །གསུང་ཐོས་པས་ནི་ཐམས་ཅད་བསལ་བར་གྱུར། །གདུགས་ལ་གནས་ཤིང་ཕན་ ཚུན་མཆི་བ་དང༌། །ནགས་ཚལ་ཁྲོད་དང་ཀུན་དགའ་ཤིང་དྲུང་དང༌། །རི་དང་རི་སུལ་གནས་པར་འགྱུར་བའི་ཚེ། །བསམ་པ་འདི་དག་ཉིད་ནི་རྗེས་སུ་སེམས། །ཟག་པ་མེད་ པའི་ཆོས་སུ་མཚུངས་པ་ལ། །འདི་ལྟར་ཁམས་གསུམ་པ་ཡི་ཆོས་ཀྱི་མཆོག །མ་འོངས་དུས་ན་སྟོན་པར་མི་འགྱུར་བ། །ཀྱེ་མ་བདག་ནི་སྡིག་པའི་སེམས་ཀྱིས་བསླུས། །མཚུངས་ ༄༅། །པའི་ཆོས་རྣམས་ལ་ནི་བདག་རྨོངས་པས། །བདག་ནི་སུམ་ཅུ་རྩ་གཉིས་མཚན་ལས་ཉམས། །གསེར་གྱི་ཁ་དོག་མདོག་ཀྱང་རབ་ཏུ་སྟོར། །སྟོབས་དང་རྣམ་ ཐར་འདི་དག་ཀུན་ལས་ཉམས། །ཐུབ་པ་ཆེན་པོ་དཔེ་བྱད་བཟང་པོ་གང༌། །མཆོག་རབ་དམ་པ་བརྒྱད་ཅུ་ཚང་བ་དང༌། །གང་ཡང་མ་འདྲེས་པ་ཡི་བཅོ་བརྒྱད་ཆོས། །དེ་ལས་ཀྱེ་མ་ བདག་ཅག་ཉམས་ཤིང་བསླུས། །འཇིག་རྟེན་ཕན་པ་ཐུགས་བརྩེ་ཁྱོད་མཐོང་ནས། །གདུགས་ལ་མཆིས་ནས་གཅིག་ཏུ་གནས་པའི་ཚེ། །མ་ཆགས་ཡེ་ཤེས་བསམ་གྱིས་མི་ཁྱབ་ ལས༑ ༑ཀྱེ་མ་བདག་ནི་བསླུས་ཞེས་རྣམ་པར་སེམས། །དེ་ལྟར་མང་དུ་རྣམ་པར་སེམས་པ་ཡིས། །མགོན་པོ་གདུགས་དང་མཚན་ཡང་བས་པར་གྱུར། །འདི་ལས་བདག་ནི་ཉམས་ སམ་མ་ཉམས་ཞེས། །བཅོམ་ལྡན་འདས་ལ་རེ་ཞིག་ཞུ་སྙམ་བགྱིད། །བྱང་ཆུབ་སེམས་དཔའ་མང་པོ་གཞན་དག་ལ། །འཇིག་རྟེན་འདྲེན་པས་བསྟོད་པ་མཐོང་ནས་སུ། །རྒྱལ་ བ་དབང་པོ་བདག་ནི་དེ་སེམས་ཤིང༌། །གདུགས་དང་མཚན་མོ་རྟག་ཏུ་དེ་བཞིན་པས། །ཡེ་ཤེས་བརྟག་མེད་ཕྲ་ཞིང་ཟག་མེད་པ། །རྒྱལ་བས་བྱང་ཆུབ་སྙིང་པོར་གསུངས་པས་ན། ། འདི་ནི་ལྡེམ་པོར་དགོངས་ཏེ་གསུངས་པ་ཞེས། །སངས་རྒྱས་ཆོས་འདི་ཐོས་ནས་བདག་བཟོད་དོ། །སྔན་ཆད་བདག་ནི་ལྟ་ལ་ཆགས་གྱུར་པ། །མུ་སྟེགས་ཅན་གྱིས་བཀུར་བའི་ ཀུན་ཏུ་རྒྱུ། །དེ་ནས་མགོན་པོས་བདག་གི་བསམ་མཁྱེན་ནས། །ལྟ་བ་དགྲོལ་ཕྱིར་མྱ་ངན་འདའ་བ་གསུངས། །ལྟ་བར་གྱུར་པ་དེ་དག་ཀུན་ལས་དཀྲོལ། །བདག་གིས་སྟོང་པ་ཉིད་ཀྱི་ཆོས་ཐོབ་སྟེ། ། དེ་ཕྱིར་བདག་ནི་མྱ་ངན་འདས་སྙམ་བགྱིད། །མྱ་ངན་འདས་ཞེས་བགྱི་བ་དེ་མ་ལགས། །གང་ཚེ་སངས་རྒྱས་སེམས་ཅན་གཙོར་གྱུར་ཏེ། །ལྷ་མི་གནོད་སྦྱིན་སྲིན་པོས་མདུན་དུ་བདར། །སུམ་ཅུ་རྩ་ གཉིས་མཚན་གྱི་གཟུགས་ལྡན་པ། །དེ་ཚེ་མ་ལུས་མྱ་ངན་འདས་པ་ལགས། །ལྷར་བཅས་འཇིག་རྟེན་རྣམས་ཀྱི་མདུན་དུ་ཡང༌། །གང་ཚེ་བདག་ནི་བྱང་ཆུབ་ལུང་བསྟན། །གསུང་ཐོས་ བདག་ནི་དེ་རིང་མྱ་ངན་འདས། །འདི་ལྟར་རློམ་སེམས་ཀུན་ཀྱང་རྣམ་པར་བསལ། །ཐོག་མ་རྣམ་པར་འདྲེན་གྱི་གསུང་ཐོས་ནས། །ས་འདིར་སངས་རྒྱས་ཆད་བྱད་མངོན་སྤྲུལ་ནས། འདི་བདུད་ ཀྱལ་ཀ་བྱེད་པ་མ་ཡིན་གྲང༌། །དེ་ལྟར་བདག་ནི་བག་ཚའི་སྟོབས་སྐྱེས་སོ། །གང་གི་ཚེ་ན་རྒྱུ་དང་གཞི་རྣམས་དང༌། །དཔེ་རྣམས་བྱེ་བ་ཁྲག་ཁྲིག་རྣམས་ཀྱིས་ཀྱང༌། །སངས་རྒྱས་བྱང་ཆུབ་མཆོག་ དེ་གནས་པར་བསྟན། །དེ་ནས་བདག་ནི་ཆོས་ཐོས་ཐེ་ཚོམ་བྲལ། །གང་ཚེ་བདག་ལ་སངས་རྒྱས་བྱེ་བ་སྟོང༌། །མྱ་ངན་ཡོངས་འདས་རྒྱལ་བ་འདས་པས་བརྗོད། །ཐབས་མཁས་པ་ལ་རབ་ཏུ་ གནས་ནས་ནི། །དེ་དག་གིས་ཀྱང་ཆོས་འདི་ཤིན་ཏུ་བཤད། །མ་བྱོན་སངས་རྒྱས་མང་དང་འཇིག་རྟེན་ན། །དོན་དམ་གཟིགས་པ་གང་དག་བཞུགས་པ་རྣམས། །ཐབས་ལ་མཁས་པ་བརྒྱ་ཡི་ ༄༅། །རང་གི་ཆོས། །ཤིན་ཏུ་སྟོན་པར་འགྱུར་ཞིང་དེ་ལྟར་འཆད། །དེ་ལྟར་ཁྱོད་ཉིད་སྤྱོད་པ་ཅི་འདྲ་བར། །ཁབ་ནས་བྱུང་བ་ཚུན་ཆད་རབ་བསྟན་ཅིང༌། །ཆོས་ཀྱི་འཁོར་ལོ་ ཅི་འདྲ་ཁྱོད་ཀྱིས་མཁྱེན། །ཇི་ལྟར་ཁྱོད་ཀྱིས་ཆོས་བཤད་གནས་པ་ལས། །དེ་བས་འདི་ནི་བདུད་མ་ལགས་པར་འཚལ། །འཇིག་རྟེན་མགོན་པོ་ཡང་དག་སྤྱོད་སྟོན་པ། །འདི་ལ་བདུད་ཀྱི་ སྤྱོད་ཡུལ་མ་མཆིས་ན། །བདག་ཉིད་དེ་ལྟར་སེམས་ལ་ཐེ་ཚོམ་སྐྱེས། །གང་ཚེ་འཇམ་ཞིང་ཟབ་མོ་སྙན་པ་ཡི། །སངས་རྒྱས་གསུང་གིས་བདག་གི་དགའ་བ་བསྐྱེད། །དེ་ན་བདག་ གི་དོགས་པ་ཀུན་བསལ་གྱུར། །བདག་ནི་ཐེ་ཚོམ་བྲལ་ཏེ་ཡེ་ཤེས་གནས། །ལྷར་བཅས་འཇིག་རྟེན་དག་གིས་མདུན་བདར་ཏེ། །དེ་བཞིན་གཤེགས་པར་བདག་འགྱུར་ཐེ་ཚོམ་བྲལ། བྱང་ཆུབ་སེམས་དཔའ་མང་པོ་ཀུན་འཛུད་ཅིང༌། །སངས་རྒྱས་བྱང་ཆུབ་འདི་ཡང་དགོངས་པར་བཤད། །དེ་སྐད་ཅེས་གསོལ་བ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་ བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། ལྷ་དང་བཅས་པའི་འཇིག་རྟེན་འདི་དག་གི་བདུད་དང་བདུད་དུ་བཅས། ཚངས་པར་བཅས། དགེ་སྦྱོང་དང་བྲམ་ཟེར་བཅས་པའི་ སྐྱེ་དགུའི་མདུན་དུ་ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །ཤཱ་རིའི་བུ། ངས་ཁྱོད་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུའི་དྲུང་དུ་བླ་ན་མེད་པ་ཡང་དག་ པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱ་སྟེ། ཤཱ་རིའི་བུ་ཁྱོད་ཡུན་རིང་པོ་ནས་ང་ཡི་རྗེས་སུ་སློབ་པར་གྱུར་པ་ཡིན་ཏེ། ཤཱ་རིའི་བུ་ཁྱོད་བྱང་ཆུབ་སེམས་དཔའི་མན་ངག་དང༌། བྱང་ ཆུབ་སེམས་དཔའི་གསང་ཆེན་གྱིས་ངའི་གསུང་རབ་འདི་ལ་སྐྱེས་པར་གྱུར་ཏོ། ཤཱ་རིའི་བུ། འདི་ལྟར་ཁྱོད་བྱང་ཆུབ་སེམས་དཔའི་བྱིན་གྱི་རླབས་ཀྱིས་སྔོན་གྱི་སྤྱོད་པ་དང༌། སྨོན་ལམ་དང༌། བྱང་ཆུབ་སེམས་དཔའི་མན་ངག་དང༌། བྱང་ཆུབ་སེམས་དཔའི་གསང་ཆེན་མི་དྲན་ནས། བདག་མྱ་ངན་ལས་འདས་སོ་སྙམ་དུ་སེམས་ཏེ། ཤཱ་རིའི་བུ། ངས་ཁྱོད་སྔོན་གྱི་སྤྱོད་པ་དང༌། སྨོན་ལམ་དང༌། ཡེ་ཤེས་ཁོང་དུ་ཆུད་པ་དྲན་པར་བྱ་བར་འདོད་དེ། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ། བྱང་ཆུབ་སེམས་དཔའ་རྣམས་ ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་འདི། ཉན་ཐོས་རྣམས་ལ་ཡང་དག་པར་བསྟན་ཏོ། །ཤཱ་རིའི་བུ་ཁྱོད་འདི་ལྟར་མ་འོངས་པའི་དུས་ན། བསྐལ་པ་དཔག་ ཡས་བསམ་གྱིས་མི་ཁྱབ་པ་དཔག་ཏུ་མེད་པར་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་དམ་པའི་ཆོས་བཟུང་ཞིང༌། མཆོད་པ་རྣམ་པ་སྣ་ཚོགས་བྱས་ཏེ། བྱང་ཆུབ་སེམས་ དཔའི་སྤྱོད་པ་འདི་དག་ཡོངས་སུ་རྫོགས་པར་བྱས་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་ ༄༅། །པ༑ འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་པདྨའི་འོད་ཅེས་བྱ་ བར་འཇིག་རྟེན་དུ་འབྱུང་བར་འགྱུར་རོ། ཤཱ་རིའི་བུ། དེའི་ཚེ་ན། བཅོམ་ལྡན་འདས་དེ་བཞིན་གཤེགས་པ་པདྨའི་འོད་དེའི་སངས་རྒྱས་ཀྱི་ཞིང་རྡུལ་མེད་པ་ཞེས་བྱ་བར་འགྱུར་ཏེ། མཉམ་པ་ཉམས་དགའ་བ། བཟང་བ་སྡུག་པ་ཡོངས་སུ་དག་པ། འབྱོར་པ་རྒྱས་པ། བདེ་བ་ལོ་ལེགས་པ། མི་དང་ལྷ་མང་པོས་རབ་ཏུ་གང་བ། །གཞི་བཻ་ཌཱུཪྻ་ལ་གསེར་གྱི་སྐུད་ པས་མིག་མང་རིས་སུ་བྲིས་པ། མིག་མང་རིས་དེ་ཀུན་ཏུ་རིན་པོ་ཆེའི་ཤིང་སྐྱེས་ཏེ། རྟག་པར་རྒྱུན་དུ་རིན་པོ་ཆེ་སྣ་བདུན་གྱི་མེ་ཏོག་དང་འབྲས་བུ་དང་ལྡན་པར་འགྱུར་རོ། །ཤཱ་ རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་འོད་དེའང་ཐེག་པ་གསུམ་ལས་བརྩམས་ནས་ཆོས་སྟོན་ཏེ། གཞན་ཡང༌། ཤཱ་རིའི་ བུ༑ དེ་བཞིན་གཤེགས་པ་དེ་བསྐལ་པའི་སྙིགས་མ་ལ་མི་འབྱུང་མོད་ཀྱི། འོན་ཀྱང་སྔོན་གྱི་སྨོན་ལམ་གྱི་དབང་གིས་ཆོས་སྟོན་པར་འགྱུར་རོ། ཤཱ་རིའི་བུ། བསྐལ་པ་དེའི་ མིང་ཡང་རིན་པོ་ཆེ་ཆེན་པོས་བརྒྱན་པ་ཞེས་བྱ་བར་འགྱུར་རོ། །ཤཱ་རིའི་བུ། འདི་ཇི་སྙམ་དུ་སེམས། ཅིའི་ཕྱིར་བསྐལ་པ་དེ་རིན་པོ་ཆེ་ཆེན་པོས་བརྒྱན་པ་ཞེས་བྱ་ཞེ་ན། ཤཱ་རིའི་བུ། སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་རྣམས་ནི་རིན་པོ་ཆེ་ཆེན་པོ་ཞེས་བྱ་སྟེ། དེའི་ཚེ་དེའི་དུས་ན་འཇིག་རྟེན་གྱི་ཁམས་རྡུལ་མེད་པ་དེར། དེ་དག་དཔག་ཏུ་མེད་པ། བགྲང་དུ་མེད་ པ༑ བསམ་གྱིས་མི་ཁྱབ་པ། བགྲང་བ་ལས་འདས་པ་མང་པོ་འབྱུང་སྟེ། དེ་བཞིན་གཤེགས་པས་བགྲང་བ་ནི་མ་གཏོགས་སོ། །དེའི་ཕྱིར་བསྐལ་པ་དེ་རིན་པོ་ཆེ་ཆེན་པོས་བརྒྱན་པ་ ཞེས་བྱའོ། ཤཱ་རིའི་བུ། འདི་ལྟར་ཡང་དེའི་ཚེ། བྱང་ཆུབ་སེམས་དཔའ་རྣམས་སངས་རྒྱས་ཀྱི་ཞིང་དེ་ན་ཕལ་ཆེར་རིན་པོ་ཆེའི་པདྨའི་སྟེང་ནས་གོམ་པ་འདོར་ཞིང་འགྲོ་བར་འགྱུར་ཏེ། བྱང་ཆུབ་སེམས་དཔའ་འབྱུང་བ་དེ་དག་ནི་ལས་དང་པོ་པ་མ་ཡིན་ཏེ། དགེ་བའི་རྩ་བ་ཡུན་རིང་པོ་ནས་སྤྱད་པ། ལོ་བརྒྱ་སྟོང་མང་པོར་ཚངས་པར་སྤྱོད་པ་སྤྱད་པ། དེ་བཞིན་གཤེགས་ པས་ཡོངས་སུ་བསྟོད་པ། སངས་རྒྱས་ཀྱི་ཡེ་ཤེས་ལ་བརྩོན་པ། མངོན་པར་ཤེས་པ་ཆེན་པོ་ཡོངས་སུ་སྦྱངས་པ་ལས་སྐྱེས་པ། ཆོས་ཀྱི་ཚུལ་ཐམས་ཅད་ལ་མཁས་པ། མཉེན་པ་ དྲན་པ་དང་ལྡན་པ་ཡིན་ཏེ། ཤཱ་རིའི་བུ། ཕལ་ཆེར་ནི་བྱང་ཆུབ་སེམས་དཔའ་དེ་ལྟ་བུས་སངས་རྒྱས་ཀྱི་ཞིང་དེ་ཡོངས་སུ་གང་བར་འགྱུར་རོ། །ཤཱ་རིའི་བུ། འདི་ལྟར་ཡང་དེ་བཞིན་ གཤེགས་པ་པདྨའི་འོད་དེའི་ཚེའི་ཚད་ནི། གཞོན་ནུར་གྱུར་པ་མ་གཏོགས་པར་བར་གྱི་བསྐལ་པ་བཅུ་གཉིས་སུ་འགྱུར་རོ། །སེམས་ཅན་དེ་དག་གི་ཚེའི་ཚད་ནི་བར་གྱི་བསྐལ་པ་བརྒྱད་ ༄༅། །དུ་འགྱུར་རོ། །ཤཱ་རིའི་བུ། དེ་བཞིན་གཤེགས་པ་པདྨའི་འོད་དེའི་བར་གྱི་བསྐལ་པ་བཅུ་གཉིས་འདས་པ་དང༌། དགེ་སློང་དག། བྱང་ཆུབ་སེམས་དཔའ་ སེམས་དཔའ་ཆེན་པོ་མོས་པ་རྫོགས་པ་འདི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ ཀྱི་སྟོན་པ་སངས་རྒྱས་བཅོམ་ལྡན་འདས་པདྨའི་ཁྱུ་མཆོག་རྣམ་པར་གནོན་པ་ཞེས་བྱ་བར་འཇིག་རྟེན་དུ་འབྱུང་ངོ་ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་མོས་པ་རྫོགས་ པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ནས། ཡོངས་སུ་མྱ་ངན་ལས་འདའ་བར་འགྱུར་རོ། །ཤཱ་རིའི་བུ། དེ་བཞིན་གཤེགས་པ་པདྨའི་ཁྱུ་ མཆོག་རྣམ་པར་གནོན་པ་དེའི་སངས་རྒྱས་ཀྱི་ཞིང་ཡང་རྣམ་པ་དེ་འདྲ་བར་འགྱུར་རོ། །ཡང་ཤཱ་རིའི་བུ། དེ་བཞིན་གཤེགས་པ་པདྨའི་འོད་དེ་ཡོངས་སུ་མྱ་ངན་ལས་འདས་ནས་བར་ གྱི་བསྐལ་པ་སུམ་ཅུ་རྩ་གཉིས་སུ་དམ་པའི་ཆོས་གནས་པར་འགྱུར་རོ། །བར་གྱི་བསྐལ་པ་སུམ་ཅུ་རྩ་གཉིས་སུ་དམ་པའི་ཆོས་ཀྱི་གཟུགས་བརྙན་གནས་པར་འགྱུར་རོ། །དེ་ནས་ བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མ་འོངས་དུ་ན་ཤཱ་རིའི་བུ་ཁྱོད་ཀྱང༌། །རྒྱལ་བ་དེ་བཞིན་གཤེགས་པར་འབྱུང་འགྱུར་ཏེ། །པདྨའི་འོད་ཅེས་བྱ་ བ་ཀུན་ཏུ་སྤྱན། །སྲོག་ཆགས་བྱེ་བ་སྟོང་དག་རྣམ་པར་འདུལ། །སངས་རྒྱས་བྱེ་བ་མང་ལ་བཀུར་སྟི་བྱས། །དེར་ནི་སྤྱོད་པ་སྟོབས་རྣམས་རབ་བསྒྲུབས་ནས། །སྟོབས་བཅུ་དག་ཀྱང་མངོན་ པར་བསྐྱེད་བྱས་ཏེ། །བྱང་ཆུབ་དམ་པ་མཆོག་ཀྱང་ཐོབ་པར་འགྱུར། །ཚད་མེད་བསམ་གྱིས་མི་ཁྱབ་བསྐལ་པ་ན། །དེ་ཚེ་བསྐལ་པ་རིན་ཆེན་མང་པོ་འབྱུང༌། །འཇིག་རྟེན་མིང་ཡང་དེ་ཚེ་རྡུལ་ མེད་པ། །རྐང་གཉིས་གཙོ་བོའི་ཞིང་ནི་རྣམ་པར་དག། བཻ་ཌཱུཪྻ་ཡིས་དེ་བཞིན་ས་གཞི་ཡོག །གསེར་གྱི་སྐུད་པས་སོ་སོར་རབ་ཏུ་བརྒྱན། །མེ་ཏོག་འབྲས་བུས་བརྒྱན་ཞིང་བལྟ་སྡུག་པའི།། རིན་ཆེན་ཤིང་ལྗོན་བརྒྱ་དང་རབ་ཏུ་ལྡན། །དྲན་ལྡན་བྱང་ཆུབ་སེམས་དཔའ་དེ་ན་མང༌། །སྤྱོད་པ་མངོན་པར་བསྒྲུབ་ལ་རབ་མཁས་ཤིང༌། །གང་གིས་སངས་རྒྱས་བརྒྱ་ལས་སྤྱོད་བསླབས་ པ༑ ༑དེ་དག་སངས་རྒྱས་ཞིང་དེར་སྐྱེ་བར་འགྱུར། །རྒྱལ་བ་དེ་ཡི་ཐ་མའི་དུས་ཀྱི་ཚེ། །གཞོན་ནུའི་ས་ལས་ཤིན་ཏུ་འདས་གྱུར་ནས། །འདོད་པ་རྣམ་པར་སྤངས་ནས་མངོན་འབྱུང་སྟེ། ། བྱང་ཆུབ་དམ་པ་མཆོག་ཀྱང་ཐོབ་པར་འགྱུར། །དེ་ན་རྒྱལ་བ་དེ་ཡི་ཚེ་ཚད་ནི། །བར་གྱི་བསྐལ་པ་བཅུ་གཉིས་ཚང་བར་འགྱུར། །དེ་ན་མི་དེ་དག་གི་ཚེ་ཚད་ནི། །བར་གྱི་བསྐལ་པ་ ༄༅། །བརྒྱད་དུ་ཐུབ་པར་འགྱུར། །རྒྱལ་བ་དེ་ནི་མྱ་ངན་འདས་ནས་ཀྱང༌། །བར་གྱི་བསྐལ་པ་སུམ་ཅུ་གཉིས་ཚང་བར། །ལྷར་བཅས་འཇིག་རྟེན་རྣམས་ལ་ཕན་པའི་ཕྱིར།། དེ་ཡི་ཏེས་ན་དམ་པའི་ཆོས་གནས་སོ། །དམ་པའི་ཆོས་ནུབ་དེ་ཡི་གཟུགས་བརྙན་ཡང༌། །བར་གྱི་བསྐལ་པ་སུམ་ཅུ་གཉིས་སུ་གནས། །སྐྱོབ་པ་དེ་ཡི་སྐུ་གདུང་རྒྱས་འགྱུར་ཏེ། །ལྷ་དང་མི་ ཡིས་རྟག་ཏུ་རིམ་གྲོ་བྱས། །བཅོམ་ལྡན་འདས་དེ་དེ་ལྟར་འབྱུང་འགྱུར་གྱི། །ཤཱ་རིའི་བུ་ཁྱོད་རབ་ཏུ་དགའ་བར་གྱིས། །ཟིལ་གྱིས་མི་ནོན་རྐང་གཉིས་གཙོ་བོ་སྟེ། །དེ་ལྟར་འགྱུར་བ་ དེ་ནི་ཁྱོད་ཉིད་ཡིན། །དེ་ནས་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་འཁོར་བཞི་པོ་དེ་དག་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་རྣམས་ཚེ་དང་ལྡན་པ་ཤཱ་རིའི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ ལུང་བསྟན་པ་འདི། བཅོམ་ལྡན་འདས་ལས་མངོན་སུམ་དུ་ཐོས་ནས། ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས། དགའ་བ་དང་ཡིད་བདེ་བ་སྐྱེས་ཏེ། རང་རང་གི་གོས་ བཅོམ་ལྡན་འདས་ཀྱི་སྐུ་ལ་གསོལ་ཏོ། །ལྷའི་དབང་པོ་བརྒྱ་བྱིན་དང༌། མི་མཇེད་ཀྱི་བདག་པོ་ཚངས་པ་དང༌། ལྷའི་བུ་གཞན་བྱེ་བ་བརྒྱ་སྟོང་དག་གིས་ཀྱང༌། བཅོམ་ལྡན་འདས་ཀྱི་སྐུ་ ལ་ལྷའི་ན་བཟའ་དག་གསོལ། ལྷའི་མེ་ཏོག་མནྡཱ་ར་དང་མནྡཱ་ར་ཆེན་པོ་དག་ཀྱང་མངོན་པར་གཏོར། སྟེང་གི་བར་སྣང་ལ་ལྷའི་གོས་དག་ཀྱང་བསྐོན། ལྷའི་སིལ་སྙན་བརྒྱ་སྟོང་དང༌། རྔ་དག་ཀྱང་ སྟེང་གི་བར་སྣང་ལ་བརྡུངས་ཏེ། མེ་ཏོག་གི་ཆར་ཆེན་པོའང་མངོན་པར་ཕབ་ནས། ཚིག་འདི་སྐད་དུ་བཅོམ་ལྡན་འདས་ཀྱིས་སྔོན་ཡུལ་ཝཱ་ར་ཎཱ་སི་དྲང་སྲོང་ལྷུང་བ་རི་དྭགས་ཀྱི་ནགས་སུ་ཆོས་ ཀྱི་འཁོར་ལོ་བསྐོར་ཏེ། དེང་འདིར་ཡང་བཅོམ་ལྡན་འདས་ཀྱིས་བླ་ན་མེད་པའི་ཆོས་ཀྱི་འཁོར་ལོ་བསྐོར་ཏོ་ཞེས་སྨྲས་ནས། ལྷའི་བུ་དེ་རྣམས་ཀྱིས་དེའི་ཚེ་ཚིགས་སུ་བཅད་པ་འདི་དག་ གསོལ་ཏོ། །ཝཱ་ར་ཎཱ་སིར་འཇིག་རྟེན་ན། །མཚུངས་མེད་གང་ཟག་དཔའ་ཆེན་གྱིས། །ཕུང་པོའི་སྐྱེ་འཇིག་སྟོན་པ་ཡི། །ཆོས་ཀྱི་འཁོར་ལོ་རབ་བསྐོར་ཏེ། །དེར་ནི་ཐོག་མར་རབ་ཏུ་བསྐོར།། འདྲེན་པས་འདི་དང་ལན་གཉིས་ཏེ། །ཡིད་ཆེས་དཀའ་བ་གང་ལགས་ཏེ། །རྣམ་འདྲེན་ཁྱོད་ཀྱིས་དེང་བཤད་དོ། །འཇིག་རྟེན་མགོན་པོའི་སྤྱན་སྔར་ནི། །བདག་ཅག་ཆོས་མང་ཐོས་ན་ཡང༌།། འདི་འདྲ་བ་ཡི་ཆོས་འདི་ནི། །སྔན་ཆད་ནམ་ཡང་མ་ཐོས་སོ། །དྲང་སྲོང་ཆེན་པོའི་ལྡེམ་ངག་ལ། །དཔའ་བོ་བདག་ཅག་རྗེས་ཡི་རང༌། །ཇི་ལྟར་འཇིགས་མེད་ཤཱ་རིའི་བུ། །འཕགས་པ་འདི་ ལ་ལུང་བསྟན་བཞིན། །དེ་འདྲ་བདག་ཅག་འཇིག་རྟེན་དུ། །བླ་མེད་སངས་རྒྱས་གྲུབ་འགྱུར་ནས། །དགོངས་ཏེ་བཤད་པ་སངས་རྒྱས་ཀྱི། །བྱང་ཆུབ་བླ་མེད་སྟོན་པར་ཤོག །འཇིག་རྟེན་ ༄༅། །འདི་དང་གཞན་དག་ཏུ། །རྫོགས་པའི་སངས་རྒྱས་མཉེས་བགྱིས་ཏེ། །བདག་ཅག་དགེ་བ་ཅི་བགྱིས་པ། །བྱང་ཆུབ་ཏུ་ཡང་སྨོན་པར་ཤོག །དེ་ནས་བཅོམ་ ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ། བཅོམ་ལྡན་ འདས་ལས་མངོན་སུམ་དུ་ཐོས་ནས། བཅོམ་ལྡན་འདས། བདག་ཐེ་ཚོམ་མ་མཆིས་པར་གྱུར། སོམ་ཉི་དང་བྲལ་བར་གྱུར་ཏོ། །བཅོམ་ལྡན་འདས། གང་དག་དབང་དང་ལྡན་ པར་གྱུར་པ་སྟོང་ཉིས་བརྒྱ་པོ་སྔོན་བཅོམ་ལྡན་འདས་ཀྱིས་སློབ་པའི་ས་ལ་བཀོད་དེ། དགེ་སློང་དག། གང་འདི་སྐྱེ་བ་དང༌། རྒ་བ་དང༌། ན་བ་དང༌། འཆི་བ་ལས་ཡང་དག་པར་འདའ་ བ༑ ཡོངས་སུ་མྱ་ངན་ལས་འདས་པའི་མཐར་ཐུག་པ། མྱ་ངན་ལས་འདས་པ་ལ་ཡང་དག་པར་གཞོལ་བ་དེ་ནི། ངའི་ཆོས་འདུལ་བའི་མཐར་ཐུག་པ་ཡིན་ནོ་ཞེས་དེ་སྐད་གཏམས་ ཤིང་དེ་སྐད་རྗེས་སུ་བསྟན་པ་འདི་དག་དང༌། བཅོམ་ལྡན་འདས་སློབ་པ་དང་མི་སློབ་པའི་དགེ་སློང་བདག་ཏུ་ལྟ་བ་དང༌། འབྱུང་བར་ལྟ་བ་དང༌། འཇིག་པར་ལྟ་བའི་ལྟ་བ་ཐམས་ཅད་ རྣམ་པར་སྤངས་པ། བཅོམ་ལྡན་འདས་ཀྱི་ཉན་ཐོས་ཉིས་སྟོང་པོ་འདི་དག་ཐམས་ཅད་ཀྱང་བདག་མྱ་ངན་ལས་འདས་པའི་ས་ལ་གནས་སོ་སྙམ་བགྱིད་དེ། འདི་དག་སྔོན་མ་ཐོས་ པའི་ཆོས་འདི་ལྟ་བུ་འདི་བཅོམ་ལྡན་འདས་ལས་ཐོས་ནས་ཐེ་ཚོམ་འཚལ་བར་གྱུར་ན། བཅོམ་ལྡན་འདས། ཅི་ནས་འཁོར་བཞི་པོ་འདི་དག་ཐེ་ཚོམ་མ་མཆིས། །སོམ་ཉི་མ་མཆིས་པར་ གནས་པར་འགྱུར་བར་དགེ་སློང་འདི་དག་གི་དོགས་པ་བསལ་བའི་སླད་དུ། བཅོམ་ལྡན་འདས་ཀྱིས་ལེགས་པར་བཀའ་སྩལ་དུ་གསོལ། དེ་སྐད་ཅེས་གསོལ་པ་དང༌། བཅོམ་ལྡན་ འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། སེམས་ཅན་མོས་པ་ཐ་དད་པ་དང༌། བསམ་པ་ཐ་དད་པ་དང༌། ཁམས་ཐ་དད་པ་རྣམས་ཀྱི་བསམ་ པ་མཁྱེན་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་ལྟར་སྣ་ཚོགས་མངོན་པར་བསྒྲུབ་པ་དང༌། རྒྱུ་དང༌། གཞི་དང༌། དཔེ་དང༌། དམིགས་པ་ དང༑ ངེས་པའི་ཚིག་དང༌། ཐབས་ལ་མཁས་པ་རྣམ་པ་སྣ་ཚོགས་ཀྱིས་ཆོས་སྟོན་ཏོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལས་བརྩམས་ཏེ། ཆོས་བསྟན་པ་ཐམས་ ཅད་ཀྱིས་བྱང་ཆུབ་སེམས་དཔའི་ཐེག་པ་འདི་ཉིད་ལ་ཡང་དག་པར་འཛུད་དོ་ཞེས་ངས་ཁྱོད་ལ་བསྟན་ཟིན་པ་མ་ཡིན་ནམ། ཤཱ་རིའི་བུ། འོན་ཀྱང་དོན་དེ་རྒྱས་པར་བསྟན་པའི་ཕྱིར་ཁྱོད་ལ་ དཔེ་བསྟན་པར་བྱའོ། །དེ་ཅིའི་ཕྱིར་ཞེ་ན། སྐྱེས་བུ་མཁས་པ་ལ་ལ་ནི་སྨྲས་པའི་དོན་དཔེས་ཤེས་པར་འགྱུར་བའི་ཕྱིར་རོ། །ཤཱ་རིའི་བུ། འདི་ལྟ་སྟེ། དཔེར་ན། གྲོང་ངམ། གྲོང་ཁྱེར་ ༄༅། །རམ། གྲོང་བརྡལ་ལམ། ལྗོངས་སམ། ཡུལ་འཁོར་རམ། རྒྱལ་པོའི་ཕོ་བྲང་འཁོར་ལ་ལ་ཞིག་ན། ཁྱིམ་བདག་རྒན་པོ། འཁོགས་པ། གཏུགས་པ། དུས་ ཡོལ་བ། དགོག་ཏུ་ཕྱིན་པ། ཕྱུག་པ། ནོར་ཆེ་བ། ལོངས་སྤྱོད་ཆེ་བ་ཞིག་འདུག་ལ། དེའི་ཁང་པའང་མཐོ་ཞིང་ཡངས་པ་བརྩིགས་ནས་རིང་དུ་ལོན་པ། གྲུམ་པ། སྲོག་ཆགས་ བརྒྱ་ཕྲག་གཅིག་གམ། གཉིས་སམ། གསུམ་མམ། བཞི་འམ། ལྔའི་གནས་སྒོ་གཅིག་པ་ཞིག་ཡོད་དེ། རྩྭས་གཡོགས་པ། ཁྱམས་རྣམས་ཀྱང་གྲུམ་པ། ཀ་བའི་རྩ་པ་རུལ་ བ༑ རྩིག་པ་དང་སྒོའི་སྐྱང་ནུལ་གོགས་པར་གྱུར་བའི་ཁང་བ་དེ་ལ་གློ་བུར་དུ་མེའི་ཕུང་པོ་ཆེན་པོ་ངོགས་ཐམས་ཅད་ཀུན་ནས་རབ་ཏུ་འབར་བར་གྱུར་ལ། སྐྱེས་བུ་དེ་ལའང་ཁྱེའུ་ ལྔའམ། བཅུའམ། ཉི་ཤུའམ། མང་ཞིག་ཡོད་དེ། སྐྱེས་བུ་དེ་ནི་ཁང་པ་དེ་ནས་བྱུང་བར་གྱུར་ལ། ཤཱ་རིའི་བུ། དེ་ནས་སྐྱེས་བུ་དེས་བདག་གི་ཁང་པ་ལ་མེའི་ཕུང་པོ་ཆེན་པོ་ ཀུན་ནས་འབར་བར་མཐོང་སྟེ། དངངས་སྐྲག་ནས་སེམས་མི་བདེ་བར་གྱུར་ཏེ། འདི་ལྟར་བདག་ནི་མེའི་ཕུང་པོ་ཆེན་པོ་འདིས་མ་རེག་མ་ཚིག་ཅིང་བདེ་བར་མྱུར་དུ་ཁྱིམ་འབར་ བ་འདིའི་སྒོར་བྱུང་སྟེ་འགྲོ་ནུས་མོད་ཀྱི། བདག་གི་བུ་བྱིས་པ་གཞོན་ནུ་འདི་དག་ཁྱིམ་འབར་བ་འདི་ན་རྩེད་མོ་དག་གིས་རྩེ་དགའ་ཞིང་དགའ་མགུར་སྤྱོད་དེ། ཁྱིམ་འདི་ཚིག་ པར་མ་ཚོར། མི་ཤེས། མ་རིག །མ་རྟོགས་ནས་འདི་ལྟར་མེའི་ཕུང་པོ་ཆེན་པོས་ཤིན་ཏུ་གདུངས་ཏེ། སྡུག་བསྔལ་གྱི་ཕུང་པོ་ཆེན་པོས་རེག་ཀྱང་མི་དགའ་མི་བྱེད་དེ། སྡུག་བསྔལ་དུའང་ ཡིད་ལ་མི་འཛིན། ཕྱིར་འབྱུང་བར་ཡང་ཡིད་ལ་བྱ་བ་མི་སྐྱེད་དོ་སྙམ་དུ་སེམས་སོ། །ཤཱ་རིའི་བུ། སྐྱེས་བུ་དེའང་སྟོབས་དང་ལྡན་ཞིང་ལག་སྟོབས་ཆེ་བ་ཡིན་ཏེ། དེ་འདི་ལྟར་བདག་སྟོབས་དང་ ལྡན་ཞིང་ལག་སྟོབས་ཡོད་ན། བདག་གིས་ཁྱེའུ་འདི་དག་ཐམས་ཅད་གཅིག་ཏུ་བསྡུས་ལ། པང་པར་བླངས་ཏེ་ཁྱེར་ལ་ཁྱིམ་འདི་ནས་ཕྱུང་ངོ་སྙམ་དུ་བསམས་པ་དང༌། དེས་ཀྱང་འདི་སྙམ་ དུ་བསམས་ཏེ། ཁང་པ་འདི་སྒོ་གཅིག་པོ་ཡོད་ལ། སྒོ་དེའང་དོག །གཞོན་ནུ་འདི་དག་ནི་གཡོ་ཞིང་རྒོད་དེ་བྱིས་པར་གྱུར་པས་འཐེན་པར་འགྱུར་དུ་འོང་སྟེ། དེ་དག་མེའི་ཕུང་པོ་ཆེན་པོ་ འདིས་ཚུལ་མ་ཡིན་པར་ཉོན་མོངས་པར་འགྱུར་གྱི། འདི་དག་ལ་སྦྲན་ཏོ་སྙམ་དུ་དེ་ལྟར་བསམས་ནས། གཞོན་ནུ་དེ་དག་ལ་སྨྲས་པ། ཁྱིམ་འདི་ལ་མེའི་ཕུང་པོ་ཆེན་པོ་འབར་ཏེ་འདིར་ ཐམས་ཅད་མེའི་ཕུང་པོ་ཆེན་པོ་འདིས་ཚིག་ནས། ཚུལ་མ་ཡིན་པར་ཉོན་མོངས་པར་འགྱུར་དུ་འོང་གི །གཞོན་ནུ་ཁྱེད་ཚུར་ཤོག་ཕྱིར་བྱུང་ཞེས་བྱས་པ་དང༌། དེ་ལྟར་ཕན་པར་འདོད་ པའི་སྐྱེས་བུ་དེས་དེ་སྐད་དུ་བསྒོ་བ། གཞོན་ནུ་དེ་དག་གིས་མེ་འབར་བ་འདི་ལྟ་གོ་ཅི་ཞིག་ཅེས་མི་ཤེས་ནས་མི་དགར་མི་བྱེད། །མི་འཇིགས། མི་སྐྲག །འཇིགས་པར་མ་གྱུར་ཏེ་མི་སེམས། ༄༅། །ཕྱིར་འབྱུང་དུ་མི་བཏུབ་ཅིང༌། མ་རིག། མི་ཤེས་ཏེ། །གཞན་དུ་ན་དེ་དང་དེ་དག་ཏུ་འཕྱན་ཞིང་ཕྱི་ཕྱིར་བརྒྱུགས་ཏེ་ཕ་དེ་ལ་བལྟའོ། །དེ་ཅིའི་ཕྱིར་ཞེ་ན། དེ་དག་འདི་ལྟར་ བྱིས་པར་གྱུར་པའི་ཕྱིར་རོ། །དེ་ནས་ཡང་སྐྱེས་བུ་དེ་འདི་སྙམ་དུ་སེམས་ཏེ། ཁྱིམ་འདི་ལ་མེའི་ཕུང་པོ་ཆེན་པོ་འབར་ཏེ། འདིར་བདག་དང་གཞོན་ནུ་འདི་དག་ཚུལ་མ་ཡིན་པར་མེའི་ཕུང་པོ་ ཆེན་པོ་འདིས་ཉོན་མོངས་པར་འགྱུར་དུ་འོང་གི། འདི་ལྟར་བདག་གིས་ཐབས་མཁས་པས་གཞོན་ནུ་འདི་དག་ཁྱིམ་འདི་ནས་གདོན་ཏོ་སྙམ་ནས། སྐྱེས་བུ་དེས་གཞོན་ནུ་དེ་དག་གིས་ བསམ་པ་ཤེས། མོས་པ་རིག་པར་གྱུར་ཏེ། གཞོན་ནུ་དེ་དག་གི་བརྩེན་པ་ནི་དུ་མ་སྟེ། རྣམ་པ་ཐ་དད་པའང་དུ་མ་ཞིག་ཡིན་ལ། དགའ་བར་འགྱུར་བལ་འདོད་པ་དང༌། མཛེས་པ་ དང༑ སྡུག་པ་དང༌། ཡིད་དུ་འོང་བ་རྣམ་པ་དུ་མ་ཡིན་ན་དེ་དག་ཀྱང་དཀོན་པར་གྱུར་ཏེ། དེ་ནས་སྐྱེས་བུ་དེས་གཞོན་ནུ་དེ་དག་གི་བསམ་པ་ཤེས་པས་འདི་སྐད་ཅེས་སྨྲས་ཏེ། གཞོན་ནུ་ དག༑ ཁྱེད་ཀྱི་རྩེད་མོར་བྱ་བ་དགའ་བར་འགྱུར་བ། ངོ་མཚར་རྨད་དུ་བྱུང་བ། གང་མ་རྙེད་པའི་ཕྱིར་མི་དགའ་བར་གྱུར་བ་དེ་དག་ཁ་དོག་སྣ་ཚོགས་རྣམ་པ་མང་པོ་དེ་འདི་ལྟ་སྟེ། གླང་ གི་ཤིང་རྟ་དང༌། རའི་ཤིང་རྟ་དང༌། རི་དྭགས་ཀྱི་ཤིང་རྟ་ཁྱེད་ཀྱིས་ཇི་ལྟར་བསམས་པ། མཛེས་པ་དང༌། སྡུག་པ་དང༌། ཡིད་དུ་འོང་བ་དེ་དག་ཐམས་ཅད་ཁྱེད་རྩེར་གཞུག་པའི་ཕྱིར། ངས་ཁང་པའི་ཕྱི་སྒོར་བཀོད་ཀྱི། ཁང་པ་འདི་ནས་ཁྱེད་ཕྱིར་བྱུང་ལ་རྒྱུགས་ཏེ་ཤོག་ཅིག་དང༌། ངས་ཁྱེད་ཅག་སུ་ཅི་འདོད་པ་དེ་ལ་དེ་སྦྱིན་གྱི། དེ་དག་གི་ཕྱིར་མྱུར་དུ་རྒྱུགས་ཏེ་ཤོག་ཅིག་ ཅེས་བྱས་པ་དང༌། གཞོན་ནུ་དེ་དག་འདོད་པ་དང༌། མཛེས་པ་དང༌། སྡུག་པ་དང༌། ཡིད་དུ་འོང་བ་ཇི་ལྟ་བུར་འདོད་པ་དང༌། ཇི་ལྟ་བུར་བསམས་པ་རྣམས་ཀྱི་མིང་ཐོས་ནས་འབར་བར་ གྱུར་པའི་ཁང་པ་དེ་ནས་རྩེད་མོར་བྱ་བ་དང༌། དགའ་བར་བྱ་བའི་ཕྱིར་མྱུར་བ་ཁོ་ནར་བརྩོན་འགྲུས་བརྩམས་ནས། མཐུ་དང་ལྡན་པའི་བང་གིས་གཅིག་ལ་གཅིག་སྡོད་པ་མེད་པར་སུ་སྔ། དེ་བས་ ཀྱང་སུ་སྔ་ཞེས་ལུས་གཅིག་ལ་གཅིག་བསྔོས་ཤིང་བརྒྱུགས་ཏེ། ཁྱིམ་འབར་བ་དེ་ནས་མྱུར་དུ་ཕྱིར་འཐོན་ཏོ། །དེ་ནས་སྐྱེས་བུ་དེས་བྱིས་པ་དེ་དག་བདེ་ཞིང་ལེགས་པར་འཐོན་པ་མཐོང་ ནས། འཇིགས་པ་མེད་པར་གྱུར་བར་རིག་སྟེ། གྲོང་གི་དཔོང་ས་བླ་གབ་མེད་པར་འདུག་ནས་དགའ་བ་དང་རངས་པ་སྐྱེས་ཏེ། མྱ་ངན་མེད་ཅིང་སྒྲིབ་པ་དང་བྲལ་ནས་འཇིགས་པ་མེད་པ་ ཐོབ་པར་གྱུར་ཏེ། དེ་ནས་བྱིས་པ་དེ་དག་ཕ་དེ་དག་ལ་འདུག་པ་དེར་དོང་ནས་ཕྱིན་པ་དང༌། འདི་སྐད་དུ་ཡང་རྩེད་མོར་བགྱི་བ་རྣམ་པ་མང་པོ་དགའ་བར་འགྱུར་བ་དེ་དག་འདི་ལྟ་སྟེ། གླང་ གི་ཤིང་རྟ་དང༌། རའི་ཤིང་རྟ་དང༌། རི་དྭགས་ཀྱི་ཤིང་རྟ་བདག་ཅག་ལ་སྩལ་དུ་གསོལ་ཞེས་སྨྲས་པ་དང༌། ཤཱ་རིའི་བུ། དེ་ནས་སྐྱེས་བུ་དེས་བདག་གི་བུ་རྣམས་ལ་རླུང་ལྟར་མགྱོགས་ ༄༅། །ཤིང་མཐུ་དང་ལྡན་པའི་གླང་གི་ཤིང་རྟ་བྱིན་ཏེ། རིན་པོ་ཆེ་སྣ་བདུན་ལས་བྱས་པ། ལོགས་དང་ལྡན་པ། དྲིལ་བུ་གཡེར་ཁའི་དྲ་བ་རབ་ཏུ་དཔྱངས་པ། མཐོ་ཞིང་ བརྟན་པ། རིན་པོ་ཆེ་ངོ་མཚར་རྨད་དུ་བྱུང་བའི་རྒྱན་གྱིས་བརྒྱན་པ། རིན་པོ་ཆེའི་ཕྲེང་བས་མཛེས་པར་བྱས་པ། མེ་ཏོག་གི་ཕྲེང་བས་བརྒྱན་པ། ཤིང་བལ་གྱི་སྟན་བཏིང་པ། རས་ བཅོས་བུ་དང་དར་གྱིས་གཡོགས་པ། རྒྱབ་རྟེན་དམར་པོ་གཉིས་སུ་བཞག་པ། གླང་དཀར་པོ་ཐལ་ཀར་ཤིན་ཏུ་མགྱོགས་པ་དག་དང་བཅས་ནས། བ་དན་དང་ལྡན་པ་སྐྱེས་བུ་མང་ པོས་བཟུང་བ། གླང་སྟོབས་དང་ལྡན་ཞིང་རླུང་བཞིན་དུ་མགྱོགས་པ། ཁ་དོག་མཐུན་པ་རྣམ་པ་སྣ་ཚོགས་པའི་གླང་གི་ཤིང་རྟ་བྱིས་པ་རྣམས་ལ་རེ་རེ་བྱིན་ནོ། །ཤཱ་རིའི་བུ། དེ་ཅིའི་ ཕྱིར་ཞེ་ན། མི་དེ་དེ་ལྟར་ཕྱུག་ལ་ནོར་ཆེ་བ་བང་མཛོད་མང་བས་དེས་འདི་སྙམ་དུ་བསམས་ཏེ། བདག་གིས་བྱིས་པ་འདི་རྣམས་ལ་བཞོན་པ་ངན་པ་བྱིན་ཏེ། བདག་ལ་ཅི་ཞིག་བྱ་ སྙམ་མོ། །དེ་ཅིའི་ཕྱིར་ཞེ་ན། གཞོན་ནུ་འདི་དག་ཀུན་ཀྱང་བདག་ཉིད་ཀྱི་བུ་སྟེ། ཐམས་ཅད་ཀྱང་བདག་ལ་སྡུག་ཅིང་ཡིད་དུ་འོང་ལ། བདག་ལའང་བཞོན་པ་ཆེན་པོ་འདི་ལྟ་བུ་ དག་ཡོད་ན། བདག་གིས་གཞོན་ནུ་འདི་དག་ཐམས་ཅད་ལ་སྙོམས་པར་བསམ་གྱི། མི་སྙོམས་པར་མི་བྱའོ། །བདག་ཀྱང་བང་མཛོད་མང་གི། བདག་གིས་སེམས་ཅན་ཐམས་ ཅད་ལའང་བཞོན་པ་ཆེན་པོ་འདི་འདྲ་བ་དག་སྦྱིན་ན། བདག་གི་བུ་རྣམས་ལ་ལྟ་ཅི་སྨོས་སྙམ་པའི་ཕྱིར་རོ། །དེའི་ཚེ་གཞོན་ནུ་དེ་དག་ཀྱང་བཞོན་པ་ཆེན་པོ་དེ་དག་ལ་ཞོན་ནས། ངོ་མཚར་དང་ རྨད་དུ་བྱུང་བ་ཐོབ་པར་གྱུར་ན། ཤཱ་རིའི་བུ། འདི་ཇི་སྙམ་དུ་སེམས། སྐྱེས་བུ་དེས་གཞོན་ནུ་དེ་དག་ལ་འདི་ལྟར་སྔོན་དུ་བཞོན་པ་རྣམ་པ་གསུམ་བསྟན་ལ། ཕྱིས་ཐམས་ཅད་ཀྱང་བཞོན་པ་ ཆེན་པོ་བྱིན་ཏེ། བཞོན་པ་རླབས་པོ་ཆེའི་བྱིན་ན་བརྫུན་དུ་སྨྲས་པ་མི་འགྱུར་རམ། ཤཱ་རིའི་བུས་གསོལ་པ། བཅོམ་ལྡན་འདས། དེ་ལྟར་མ་ལགས་སོ། །བདེ་བར་གཤེགས་པ། དེ་ལྟ་མ་ ལགས་སོ། །སྐྱེས་བུ་དེས་འདི་ལྟར་ཐབས་མཁས་པས་བྱིས་པ་དེ་རྣམས་ཁྱིམ་འབར་བ་དེ་ནས་ཕྱུང་སྟེ། སྲོག་སྩལ་བའི་སླད་དུ་དེ་ཉིད་ཀྱི་རྒྱུས་སྐྱེས་བུ་དེ་ཤོ་བེ་མཆི་བ་མ་ལགས་སོ། །དེ་ཅིའི་ སླད་དུ་ཞེ་ན། བཅོམ་ལྡན་འདས། བདག་གི་ལུས་ཐོབ་པ་ཉིད་ཀྱིས་རྩེད་མོར་བགྱི་བ་ཐམས་ཅད་ཀྱང་ཐོབ་པ་ལགས་ཏེ། འདི་ལྟར་བཅོམ་ལྡན་འདས། སྐྱེས་བུ་དེས་གཞོན་ནུ་དེ་དག་ལ་ཤིང་ རྟ་གཅིག་མ་སྩལ་དུ་ལགས་ཀྱང༌། བཅོམ་ལྡན་འདས། སྐྱེས་བུ་དེ་ཤོ་བེ་མཆི་བར་མི་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས། སྐྱེས་བུ་དེས་ཐོག་མ་ནས་ཐབས་མཁས་པས་ གཞོན་ནུ་དེ་དག་བདག་གིས་སྡུག་བསྔལ་གྱི་ཕུང་པོ་ཆེན་པོ་ལས་ཐར་བར་བགྱིའོ་སྙམ་དུ་བསམས་པའི་སླད་དུ་སྟེ། རྣམ་གྲངས་འདིས་ཀྱང་སྐྱེས་བུ་དེ་ཤོ་བེ་མཆི་བ་མ་ལགས་ན། སྐྱེས་ ༄༅། །བུ་དེ་བདག་ལ་བང་མཛོད་མང་པོའང་མཆིས་ལ། བུ་ཡང་སྡུག་པར་བསམས་ནས། ལེགས་སུ་འདོད་པས་སྤུ་མདོག་མཐུན་པའི་བཞོན་པ། བཞོན་པ་ཆེན་པོ་ སྩལ་བ་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས། སྐྱེས་བུ་དེ་ཤོ་བེ་མཆི་བ་མ་ལགས་སོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་ སྐད་ཅེས་བཀའ་སྩལ་ཏོ། །ཤཱ་རིའི་བུ། ལེགས་སོ། །ལེགས་སོ། །དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །ཤཱ་རིའི་བུ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་འཇིགས་པ་ཐམས་ཅད་སེལ་བ། འཚེ་བ་དང༌། འཁྲུག་པ་དང༌། གནོད་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། མ་རིག་པའི་མུན་པ་ མུན་ནག་གི་རབ་རིབ་སྒྲིབ་པ་དང༌། ཡོངས་སུ་དཀྲིས་པ་ཐམས་ཅད་ལས་ཡོང་ཡེ་རྣམ་པར་གྲོལ་བ་དེ་བཞིན་གཤེགས་པའི་ཡེ་ཤེས་དང༌། སྟོབས་དང༌། མི་འཇིགས་པ་དང༌། སངས་ རྒྱས་ཀྱི་ཆོས་མ་འདྲེས་པ་དང་ལྡན་པ། རྫུ་འཕྲུལ་གྱི་སྟོབས་ཀྱིས་ཤིན་ཏུ་སྟོབས་དང་ལྡན་པ། འཇིག་རྟེན་གྱི་ཕ་ཐབས་ཆེན་པོ་ལ་མཁས་པའི་ཡེ་ཤེས་དམ་པའི་ཕ་རོལ་ཏུ་སོན་པ། སྙིང་རྗེ་ཆེན་པོ་མི་སྐྱོ་བའི་ཡིད་ཀྱི་ཕན་པར་འདོད་པ་སྙིང་བརྩེ་བ་དང་ལྡན་པ་དེ། ཁམས་གསུམ་སྡུག་བསྔལ་གྱི་ཕུང་པོ་ཆེན་པོ་འབར་བ་གདུང་ཕྱམ་དང་སྟེང་གི་གཡོགས་མ་ཞིག་པའི་ ཁང་བ་དང་འདྲ་བར་སེམས་ཅན་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་དང༌། མ་ རིག་པའི་མུན་པ་མུན་ནག་གི་རབ་རིབ་སྒྲིབ་པ་དང་ཡོངས་སུ་དཀྲིས་པར་ཞུགས་པ་རྣམས་འདོད་ཆགས་དང༌། ཞེ་སྡང་དང༌། གཏི་མུག་ལས་ཡོངས་སུ་གྲོལ་བར་བྱ་བ་དང༌། བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཏུ་གཟུད་པའི་ཕྱིར་འབྱུང་སྟེ། དེ་བྱུང་མ་ཐག་ཏུ་སེམས་ཅན་རྣམས་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པས་སྲེག་པ་དང༌། བཙོ་བ་དང༌། གདུང་བ་དང༌། ཡོངས་སུ་གདུང་བ་དང༌། ལོངས་སྤྱོད་ཀྱི་ཕྱིར་འདོད་པའི་རྒྱུའི་གཞིས་སྡུག་བསྔལ་ རྣམ་པ་མང་པོ་རབ་ཏུ་མྱོང་བ་དང༌། ད་ལྟར་གྱི་ཚེ་ལ་ཚོལ་བ་དང་ཡོངས་སུ་བསགས་པའི་ཕྱིར། ཚེ་ཕྱི་མ་ལ་སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྔེའི་འཇིག་རྟེན་ དུ་སྡུག་བསྔལ་རྣམ་པ་མང་པོ་རབ་ཏུ་མྱོང་བ་དང༌། ལྷ་དང་མི་དབུལ་པོ་དང༌། མི་སྡུག་པ་དང་ཕྲད་པ་དང༌། སྡུག་པ་དང་བྲལ་བའི་སྡུག་བསྔལ་རབ་ཏུ་མྱོང་བ་དེ་ཉིད་དུ། སྡུག་བསྔལ་གྱི་ ཕུང་པོ་འཁོར་ཞིང༌། རྩེ་དགའ་ལ་དགའ་མགུར་སྤྱོད་དེ། མི་སྐྲག་མི་དངང་དངང་བར་མི་འགྱུར། མ་རིག་མ་ཚོར་སྐྱོ་བར་མི་བྱེད། འབྱུང་བ་མི་ཚོལ་བར་ཁང་པ་འབར་བ་དང་འདྲ་བའི་ ༄༅། །ཁམས་གསུམ་དེར་མངོན་པར་དགའ་ནས་དེ་དང་དེ་དག་ཏུ་རྒྱུག་སྟེ། སྡུག་བསྔལ་གྱི་ཕུང་པོ་ཆེན་པོ་དེ་ལྟ་བུས་གཟིར་ཀྱང༌། སྡུག་བསྔལ་དུ་འདུ་ཤེས་པ་ ཡིད་ལ་བྱ་བ་མི་སྐྱེད་པར་གཟིགས་སོ། །ཤཱ་རིའི་བུ། དེ་ལ་ང་ནི་སེམས་ཅན་འདི་དག་གི་ཕ་སྟེ། ངས་སེམས་ཅན་འདི་དག་སྡུག་བསྔལ་གྱི་ཕུང་པོ་ཆེན་པོ་འདི་ལྟ་བུ་འདི་ལས་ཡོངས་ སུ་ཐར་བར་བྱ་ཞིང་ངས་གང་གི་སེམས་ཅན་འདི་དག་རྩེ་བ་དང༌། དགའ་བ་དང༌། དགའ་མགུར་སྤྱོད་པ་དང༌། རྣམ་པར་རྩེ་བར་བྱེད་པར་འགྱུར་བ་སངས་རྒྱས་ཀྱི་ཡེ་ཤེས་བདེ་ བ་དཔག་ཏུ་མེད་ཅིང་བསམ་གྱིས་མི་ཁྱབ་པ། སེམས་ཅན་འདི་དག་ལ་སྦྱིན་པར་བྱ་བར་དེ་བཞིན་གཤེགས་པས་དེ་ལྟར་གཟིགས་སོ། །ཤཱ་རིའི་བུ། དེ་ལ་ང་ཡེ་ཤེས་ཀྱི་སྟོབས་ དང་ལྡན་ཞིང་རྫུ་འཕྲུལ་གྱི་སྟོབས་དང་ལྡན་ཞེས་གལ་ཏེ་ཐབས་མ་ཡིན་པས་སེམས་ཅན་འདི་དག་ལ་དེ་བཞིན་གཤེགས་པའི་ཡེ་ཤེས་གཟིགས་པ་དང༌། སྟོབས་དང༌། མི་འཇིགས་ པ་རྣམས་ཐོབ་པར་བྱས་སུ་ཟིན་ན། སེམས་ཅན་འདི་དག་ཆོས་འདི་དག་གིས་ངེས་པར་འབྱུང་པར་མི་འགྱུར་རོ། །དེ་ཅིའི་ཕྱིར་ཞེ་ན། སེམས་ཅན་འདི་དག་ནི་འདོད་པའི་ཡོན་ ཏན་ལྔ་པོ་དག་ལ་ཤིན་ཏུ་ཆགས་པ། སེམས་ཅན་འདི་དག་ནི་ཁམས་གསུམ་གྱི་དགའ་བ་ལ་ཤིན་ཏུ་ཆགས་པ། སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་ དང༑ སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་ལས་མ་ཐར་བ། བསྲེག་བཙོ་གདུང༌། ཡོངས་སུ་གདུང་བ། སྟེང་གཡོགས་དང༌། གདུང་ཕྱམ་ འབར་བའི་ཁྱིམ་དང་འདྲ་བའི་ཁམས་གསུམ་ནས་མ་བྱུང་བ་སྟེ། དེ་དག་གིས་སངས་རྒྱས་ཀྱི་ཡེ་ཤེས་ལ་ཇི་ལྟར་ལོངས་སྤྱོད་པར་འགྱུར་ཞེས་དེ་བཞིན་གཤེགས་པས་དེ་ལྟར་གཟིགས་ སོ༑ ༑དེ་ལ་ཤཱ་རིའི་བུ། འདི་ལྟར་སྐྱེས་བུ་ལག་སྟོབས་ཅན་དེས་ལག་སྟོབས་བཞག་སྟེ། ཐབས་མཁས་པས་གཞོན་ནུ་དེ་དག་ཁྱིམ་འབར་བ་དེ་ནས་འདོན་ཏེ། བཏོན་ནས་དེ་དག་ཕྱིས་ རླབས་ཆེ་བའི་བཞོན་པ་ཆེན་པོ་བྱིན་པ་དེ་བཞིན་དུ། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་བཞིན་གཤེགས་པའི་ཡེ་ཤེས་དང༌། སྟོབས་དང༌། མི་འཇིགས་པ་དང་ལྡན་པའང་དེ་བཞིན་གཤེགས་པའི་ཡེ་ཤེས་དང༌། སྟོབས་དང༌། མི་འཇིགས་པ་བཞག་སྟེ། ཐབས་མཁས་པའི་ཡེ་ཤེས་ཀྱིས་གདུང་ཕྱམ་དང་ སྟེང་གཡོངས་འབར་བའི་ཁྱིམ་དང་འདྲ་བའི་ཁམས་གསུམ་ནས་སེམས་ཅན་རྣམས་འདོན་པའི་ཕྱིར་ཐེག་པ་གསུམ་སྟོན་པ་འདི་ལྟ་སྟེ། ཉན་ཐོས་ཀྱི་ཐེག་པ་དང༌། རང་སངས་རྒྱས་ ཀྱི་ཐེག་པ་དང༌། བྱང་ཆུབ་སེམས་དཔའི་ཐེག་པ་སྟེ། ཐེག་པ་གསུམ་གྱིས་སེམས་ཅན་རྣམས་དྲངས་ཏེ། དེ་དག་ལ་འདི་སྐད་ཅེས་གསུངས་ཏེ། ཁྱེད་ཅག་ཁྱིམ་འབར་བ་དང་འདྲ་ ༄༅། །པའི་ཁམས་གསུམ་གྱི་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་ངན་པ་ལ་དགའ་བར་མ་བྱེད་ཅིག །ཁྱེད་ཅག་ཁམས་གསུམ་འདིར་མངོན་པར་དགའ་ བས་འདོད་པ་ལྔའི་ཡོན་ཏན་དང་བཅས་པའི་སྲེད་པས་བསྲེག་བཙོ་གདུང༌། །ཡོངས་སུ་གདུང་བར་གྱུར་གྱི། ཁམས་གསུམ་འདི་ནས་འབྱུང་བ་འདི་ལྟ་སྟེ། ཉན་ཐོས་ཀྱི་ཐེག་པ་ དང༌། རང་སངས་རྒྱས་ཀྱི་ཐེག་པ་དང༌། བྱང་ཆུབ་སེམས་དཔའི་ཐེག་པ་སྟེ། ཐེག་པ་གསུམ་པོ་དག་ཐོབ་པར་གྱིས་ཤིག། ང་ནི་གནས་འདི་ལ་ཁྱེད་ཀྱི་སྙིང་སྡང་བ་སྟེ། ངས་ཁྱེད་ ལ་ཐེག་པ་འདི་གསུམ་སྦྱིན་གྱི། ཁམས་གསུམ་ནས་འབྱུང་བའི་ཕྱིར་བརྩོན་པར་གྱིས་ཤིག །ཀྱེ་སེམས་ཅན་དག། ཐེག་པ་འདི་དག་ནི་གང་འཕགས་པ་རྣམས་ལ། འཕགས་ པ་རྣམས་ཀྱིས་རབ་ཏུ་བསྟོད་པ། དགའ་བ་ཆེན་པོ་དང་ལྡན་པ་ཡིན་ཏེ། ཁྱེད་ཅག་མི་ཕོངས་པར་བརྩོན་ཞིང་དགའ་ལ། དགའ་མགུར་སྤྱོད་པར་འགྱུར་གྱི། དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པས་དགའ་བ་ཆེན་པོ་རབ་ཏུ་མྱོང་བར་འགྱུར་ རོ། །བདེ་བ་དང་ཡིད་བདེ་བ་ཆེན་པོ་དང་ཡང་ལྡན་པར་འགྱུར་ཞེས་གསུང་ངོ༌། །ཤཱ་རིའི་བུ། དེ་ལ་སེམས་ཅན་གང་མཁས་པར་གྱུར་པ་དེ་དག་ནི་དེ་བཞིན་གཤེགས་པ་འཇིག་ རྟེན་གྱི་ཕ་ལ་མངོན་པར་ཡིད་ཆེས་པར་འགྱུར་རོ། །མངོན་པར་ཡིད་ཆེས་ནས་ཀྱང་དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དོ། །དེ་ལ་སེམས་ཅན་ཁ་ཅིག་གཞན་གྱི་སྒྲ་ཐོས་ པའི་རྗེས་སུ་འགྲོ་བར་འདོད་པ་དག་ནི། བདག་ཡོངས་སུ་མྱ་ངན་ལས་འདའ་བ་དང༌། འཕགས་པའི་བདེན་པ་བཞི་ཁོང་དུ་ཆུད་པར་བྱ་བའི་ཕྱིར། དེ་བཞིན་གཤེགས་པའི་བསྟན་པ་ ལ་བརྩོན་པར་བྱེད་དེ། དེ་དག་ནི་ཉན་ཐོས་ཀྱི་ཐེག་པ་འདོད་ཅིང༌། ཁམས་གསུམ་ནས་བྱུང་བ་ཞེས་བྱ་སྟེ། དཔེར་ན། ཁྱིམ་འབར་བ་དེ་ནས་བྱིས་པ་ཁ་ཅིག་རི་དྭགས་ཀྱི་ཤིང་རྟ་ འདོད་དེ་ཕྱིར་བྱུང་བ་ལྟ་བུའོ། །སེམས་ཅན་གཞན་ཡང་སློབ་དཔོན་མེད་པའི་ཡེ་ཤེས་དང༌། དུལ་བར་གནས་པ་དང་ཞི་གནས་འདོད་པ་དག་ནི། བདག་ཡོངས་སུ་མྱ་ངན་ལས་འདའ་ བ་དང༌། རྒྱུ་དང་རྐྱེན་ཡོངས་སུ་ཁོང་དུ་ཆུད་པར་བྱ་བའི་ཕྱིར། དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དེ། དེ་དག་ནི་རང་སངས་རྒྱས་ཀྱི་ཐེག་པ་འདོད་ཅིང་ཁམས་གསུམ་ ནས་བྱུང་བ་ཞེས་བྱ་སྟེ། དཔེར་ན། ཁྱིམ་འབར་བ་དེ་ནས་བྱིས་པ་ཁ་ཅིག་རའི་ཤིང་རྟ་འདོད་དེ་བྱུང་བ་ལྟ་བུའོ། །ཡང་སེམས་ཅན་ཁ་ཅིག་ཐམས་ཅད་མཁྱེན་པའི་ཡེ་ཤེས། སངས་རྒྱས་ཀྱི་ ཡེ་ཤེས། རང་འབྱུང་གི་ཡེ་ཤེས། སློབ་དཔོན་མེད་པའི་ཡེ་ཤེས་འདོད་པ་དག་ནི། སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་སྙིང་བརྩེ་བ་དང༌། ལྷ་དང་ ༄༅། །མི་དང་སྐྱེ་བོ་ཕལ་པོ་ཆེའི་དོན་དང༌། ཕན་པ་དང༌། བདེ་བ་དང༌། སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བ་དང༌། དེ་བཞིན་གཤེགས་པའི་ཡེ་ ཤེས་དང༌། སྟོབས་དང༌། མི་འཇིགས་པ་ཁོང་དུ་ཆུད་པར་བྱ་བའི་ཕྱིར། དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དེ། དེ་དག་ནི་ཐེག་པ་ཆེན་པོ་འདོད་ཅིང༌། ཁམས་ གསུམ་ནས་འབྱུང་བ་ཞེས་བྱའོ། །དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱ་སྟེ། དཔེར་ན། ཁྱིམ་འབར་བ་དེ་ནས་བྱིས་པ་ཁ་ཅིག་གླང་གི་ཤིང་རྟ་འདོད་དེ་ ཕྱིར་བྱུང་བ་ལྟ་བུའོ། །ཤཱ་རིའི་བུ། འདི་ལྟ་སྟེ། དཔེར་ན། མི་དེས་ཁྱིམ་འབར་བ་དེ་ནས་གཞོན་ནུ་དེ་དག་འཐོན་པར་མཐོང་ནས། བདེ་བར་ལེགས་པར་ཐར་ཏེ། འཇིགས་པ་མེད་ པར་རིག་ལ། བདག་ཀྱང་ནོར་མང་བར་ཤེས་ནས། བྱིས་པ་དེ་དག་ལ་བཞོན་པ་རླབས་ཆེན་པོ་གཅིག་བྱིན་པ་དེ་བཞིན་དུ། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་ཀྱང་སེམས་ཅན་བྱེ་བ་དུ་མ་སྡུག་བསྔལ་དང༌། འཇིགས་པ་དང༌། བག་ཚ་བ་དང༌། གཙེ་བས་ཡོངས་སུ་གང་བའི་ཁམས་གསུམ་ནས་ ཡོངས་སུ་ཐར་ཏེ། དེ་བཞིན་གཤེགས་པའི་བསྟན་པའི་སྒོ་ནས་བྱུང་ནས། འཇིགས་པ་དང༌། བག་ཚ་བ་དང༌། གཙེ་བའི་གནོད་པ་དག་ལས་ཡོངས་སུ་ཐར་ཏེ། མྱ་ངན་ལས་ འདས་པའི་བདེ་བ་ཐོབ་པར་གཟིགས་ནས། ཤཱ་རིའི་བུ། དེ་དག་ལ་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདག་ལ་ཡེ་ཤེས་དང༌། སྟོབས་དང༌། མི་འཇིགས་པའི་མཛོད་མང་བར་མཁྱེན་ཏེ། དེ་དག་ཐམས་ཅད་ཀྱང་བདག་ཉིད་ཀྱི་བུ་ཡིན་པར་ཐུགས་སུ་ཆུད་ནས་སེམས་ཅན་དེ་དག་ཐམས་ཅད་ཀྱང་སངས་རྒྱས་ཀྱི་ཐེག་པ་ཉིད་ཀྱིས་ཡོངས་ སུ་མྱ་ངན་ལས་འདའ་བར་མཛད་ཀྱི། སེམས་ཅན་གང་ལའང་སོ་སོ་བདག་གི་མྱ་ངན་ལས་འདས་པ་མི་གསུང་སྟེ། སེམས་ཅན་དེ་དག་ཐམས་ཅད་ཀྱང་དེ་བཞིན་གཤེགས་པའི་མྱ་ངན་ལས་ འདའ་བར་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདའ་བར་མཛད་དོ། །ཤཱ་རིའི་བུ། སེམས་ཅན་གང་དག་ཁམས་གསུམ་ནས་ཐར་བར་གྱུར་པ་དེ་དག་ལའང་དེ་བཞིན་ གཤེགས་པས་བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པ། འཕགས་པའི་བདེན་པའི་མཆོག་དང་བརྩོན་པ་དགའ་བར་འགྱུར་བ་ཐམས་ ཅད་ཁ་དོག་གཅིག་བ་སྦྱིན་པར་མཛད་དོ། །ཤཱ་རིའི་བུ། འདི་ལྟ་སྟེ། དཔེར་ན། སྐྱེས་བུ་དེས་འདི་ལྟར་གཞོན་ནུ་དེ་དག་ལ་བཞོན་པ་གསུམ་བསྟན་ནས་དེ་དག་ཐམས་ཅད་ལ་བཞོན་པ་ ཆེན་པོ་གཅིག་བྱིན་ཏེ། རིན་པོ་ཆེ་སྣ་བདུན་ལས་བྱས་པ། རྒྱན་ཐམས་ཅད་ཀྱིས་བརྒྱན་པ། ཁ་དོག་གཅིག་པ། བཞོན་པ་རླབས་པོ་ཆེ་བཞོན་པའི་མཆོག་ཐམས་ཅད་ལ་བྱིན་པའི་ ༄༅། །ཕྱིར། །བརྫུན་དུ་སྨྲ་བ་མ་ཡིན་པ་དེ་བཞིན་དུ། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་འདི་ལྟར་ཐབས་ མཁས་པས། དང་པོ་ཐེག་པ་གསུམ་བསྟན་ནས། ཕྱིས་ཐེག་པ་གཅིག་པ་ཉིད་ཀྱིས་སེམས་ཅན་རྣམས་ཡོངས་སུ་མྱ་ངན་ལས་འདའ་བར་མཛད་པའི་ཕྱིར་བརྫུན་དུ་སྨྲ་བ་མ་ཡིན་ནོ། ། དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་ནི་ཡེ་ཤེས་དང༌། སྟོབས་དང༌། མི་འཇིགས་པའི་བང་མཛོད་མང་པོ་དང་ལྡན་ཏེ། སེམས་ཅན་ཀུན་ལ་ཐམས་ཅད་མཁྱེན་ པའི་ཡེ་ཤེས་དང་ལྡན་པའི་ཆོས་བསྟན་པའི་མཐུ་མངའ་བའི་ཕྱིར་རོ། །ཤཱ་རིའི་བུ། འདི་ལྟར་ཐབས་མཁས་པ་སྣ་ཚོགས་དང༌། ཡེ་ཤེས་མངོན་པར་བསྒྲུབས་པས། དེ་བཞིན་ གཤེགས་པ་ཐེག་པ་ཆེན་པོ་གཅིག་ཏུ་སྟོན་པར་རྣམ་གྲངས་འདིས་ཀྱང་དེ་ལྟ་བུར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ ཏོ། །ཇི་ལྟར་སྐྱེས་བུ་ཞིག་གི་ཁྱིམ་ཡོད་པ། །ཆེ་ལ་རབ་ཏུ་འགྲུམས་ཏེ་ཞིག་ལ་ཐུག །དེ་བཞིན་ཁྱམས་རྣམས་ཞིག་པར་གྱུར་པ་སྟེ། །ཀ་བའི་རྩ་བ་དག་ཀྱང་རུལ་བར་གྱུར། །པུ་ཤུ་ དང་ནི་སྐར་ཁུང་ཕྱོགས་རེར་བྲལ། །རྩིག་པ་རེ་ལྡེ་སྐྱང་ནུལ་རྣམས་ཀྱང་གོགས། །སྟེགས་བུ་དག་ཀྱང་རྙིངས་ནས་འགྲུམས་ཤིང་ཞིག །རྩྭ་ཡིས་གཡོགས་པ་ཀུན་ཀྱང་འདྲལ་ཞིང་ འཛག །བརྒྱ་ཕྲག་ལྔ་དག་ལས་ནི་མི་ཉུང་བ། །དེ་ན་དེ་དག་གི་ཡང་གནས་སུ་གྱུར། །ཁང་ཕྲན་ཤིན་ཏུ་དོག་པ་མང་པོ་དག །སྨྲེ་བས་རབ་ཏུ་གང་ཞིང་སྨད་པར་གྱུར། །དེ་ན་ཁྱམས་རྣམས་དགུ་པོ་ ཐམས་ཅད་འགྲུམས། །ར་བ་རྩིག་པ་དག་ཀྱང་དེ་བཞིན་ཞིག །བྱ་རྒོད་བྱེ་བ་དག་ནི་དེ་ན་གནས། །དེ་བཞིན་ཕུག་རོན་འུག་པ་བྱ་གཞན་དང༌། །མི་བཟད་གདུག་པའི་སྦྲུལ་རྣམས་དེ་ན་ཡོད། །དུག་ ཆེན་དྲག་པོ་རྣམས་ཀྱང་ཕྱོགས་ཕྱོགས་ནས། །སྡིག་པ་དང་ནི་བྱི་བ་སྣ་ཚོགས་དང༌། །ཤིན་ཏུ་གཏུམ་པའི་སྲོག་ཆགས་རྣམ་མང་གནས། །མི་མ་ཡིན་པའང་གནས་དང་གནས་དག་ན། བཤང་གཅི་དག་གིས་རབ་ཏུ་སྨེ་བར་བྱས། །སྲིན་བུ་མེ་ཁྱེར་གྲོག་མ་སྤུར་བུས་གང༌། །ཁྱི་རྣམས་དང་ནི་ཝ་དག་ང་རོ་འདོན། །ཅེ་སྤྱང་མི་བཟད་ཁྲོ་བོ་དེ་ན་འཁོད། །མི་རོ་རྣམས་ལ་འཁྲེན་ ཅིང་རབ་ཏུ་ཟ། །དེ་ཡི་ཐེ་རེལ་སྡོད་ཅིང་ལྟ་བ་ཡང༌། །ཝ་དང་ཁྱི་དག་དེ་ན་དུ་མ་འཁོད། །དེ་དག་ཉམ་ཆུང་རྟག་ཏུ་བཀྲེས་པས་ཉེན། །གནས་དང་གནས་ན་རྣམ་པར་འཆའ་ཞིང་ཟ། །འཐབ་ མོ་བྱེད་དེ་རབ་ཏུ་སྒྲ་ཡང་འབྱིན། །རྣམ་པ་དེ་འདྲར་ཁྱིམ་དེ་རབ་ཏུ་འཇིགས། །མི་ཡི་རོ་དག་ལ་ཡང་རྣམ་འཁྲེན་ཞིང༌། །ཤིན་ཏུ་དྲག་སེམས་གནོད་སྦྱིན་དེ་ན་འཁོད། །སྦྲུལ་དང་རྐང་བརྒྱ་ པ་དང་གཅན་གཟན་རྣམས། །དེ་ཡི་གནས་དང་གནས་ན་རབ་ཏུ་འཁོད། །དེ་དག་ཕྱོགས་དང་ཕྱོགས་སུ་ཚང་བཅས་ཏེ། །ཕྲུག་གུ་རྣམས་ཀྱང་ཀློག་ཅིང་འཇོག་པར་བྱེད། །དེ་དག་གིས་ ༄༅། །ནི་བཞག་ཅིང་བཀོད་པ་ལ། །གནོད་སྦྱིན་རྣམས་ཀྱང་དེ་ལ་ཕལ་ཆེར་ཟ། །རབ་ཏུ་གཏུམ་སེམས་སེམས་ཅན་གཞན་ཟོས་པས། །ཇི་ཙམ་གནོད་སྦྱིན་དེ་དག་ འགྲངས་གྱུར་ཏེ། །སེམས་ཅན་གཞན་གྱི་ཤ་ཡིས་ལུས་རྒྱས་ནས། །དེ་ཚེ་དེ་ན་རབ་ཏུ་འཐབ་མོ་བྱེད། །མི་བཟད་གཏུམ་སེམས་ཁྲོ་བའི་གྲུལ་བུམ་རྣམས། །ཞིག་པའི་ཁྱིམ་དེ་རྣམས་སུ་ གནས་འཆའ་སྟེ། །མཐོ་གང་ཚད་དང་དེ་བཞིན་ཁྲུ་གང་ཚད། །ཁྲུ་དོའི་ཚད་ཀྱི་ཕན་ཚུན་རྒྱུ་ཞིང་འགྲོ། །དེ་དག་ཁྱི་ཡི་རྐང་ནས་བཟུང་ནས་ནི། །དེ་བཞིན་ས་ལ་གན་ཀྱལ་དེ་བཞག་སྟེ། མགུལ་བར་རབ་ཏུ་བགས་ཤིང་བསྡིགས་པ་ཡིས། །འཁང་བུ་བཅུག་པ་དེ་ལ་དགའ་བར་བྱེད། །གཅེར་བུ་གནག་ཅིང་དེ་བཞིན་རིད་པ་ཡི། །ཡི་དྭགས་ཆེ་ཞིང་རིང་བའང་དེར་གནས་ཏེ། རབ་ཏུ་བཀྲེས་པས་ཁ་ཟས་ཀུན་འཚོལ་ཞིང༌། །དེ་དག་དེ་ན་ཉམ་ཐག་ཆོ་ངེས་འདེབས། །ལ་ལ་གླང་གི་མགོ་ལ་ཁབ་ཀྱི་ཁ། །མི་ཙམ་དང་ནི་དེ་བཞིན་ཁྱི་ཙམ་དག །ཟས་ལ་སྲེད་པས་ རབ་ཏུ་གདུངས་པའི་ཕྱིར། །སྐྲ་དག་ལྷུག་པར་བཞིག་ཅིང་སྒྲ་ཡང་འབྱིན། །གནོད་སྦྱིན་ཤ་ཟ་ཡི་དྭགས་དེ་དག་ཀྱང༌། །སྲེད་བརྐམ་ཁ་ཟས་དག་ནི་འཚོལ་བའི་ཕྱིར། །རྟག་ཏུ་མཐོངས་ དང་སྐར་ཁུང་དག་ནས་ཀྱང༌། །དེ་ན་ཕྱོགས་བཞིར་རབ་ཏུ་ལྟ་བར་བྱེད། །དེ་ལྟར་ཁྱིམ་དེ་མི་བཟད་འཇིག་གྱུར་ལ། །ཆེ་ཞིང་མཐོ་ལ་རབ་ཏུ་མི་བརྟན་ཏེ། །རྣམ་པར་འགྲུམས་ཤིང་ འཇིག་ཉེ་འཇིགས་པ་དེ། །སྐྱེས་བུ་གཅིག་ཅིག་ཡོངས་སུ་དབང་གྱུར་ལ། སྐྱེས་བུ་དེ་ཡང་ཁྱིམ་གྱི་ཕྱི་རོལ་བྱུང༌། ཁྱིམ་དེ་ཀུན་ཀྱང་རབ་ཏུ་འབར་གྱུར་ཏེ། །ངོས་བཞི་ཐམས་ཅད་ནས་ནི་གློ་བུར་ དུ། །མེ་ལྕེ་སྟོང་སྙེད་ཀུན་ཏུ་འབར་བར་འགྱུར། །འོད་མ་དང་ནི་ཤིང་དག་མེས་ཚིག་སྟེ། །དྲག་པོའི་སྒྲ་རྣམས་ཤིན་ཏུ་འཇིགས་པར་འབྱུང༌། །ཀ་བ་དང་ནི་དེ་བཞིན་རྩིག་པར་འབར། ། གནོད་སྦྱིན་ཡི་དྭགས་དག་ཀྱང་སྒྲ་དག་འབྱིན། །བྱ་རྒོད་བརྒྱ་ཡང་རག་རོག་ཚིག་པར་འགྱུར། །གྲུལ་བུམ་དག་ནི་གདོང་ཚིག་ལྡེམ་ཞིང་འཕྱན། །དེ་ན་ཀུན་ཏུ་སྦྲུལ་བརྒྱ་མང་པོ་དག །མེ་ ཡིས་ཚིག་ནས་ཙེར་ལྷང་སྒྲ་ཡང་འབྱིན། །བསོད་ནམས་མེད་པ་མེ་ཡིས་ཀུན་ཚིག་ཅིང༌། །དེ་ན་ཤ་ཟ་མང་པོ་ཕན་ཚུན་རྒྱུ། །དེ་དག་གཅིག་ལ་གཅིག་ནི་སོས་བཏབ་སྟེ། །ཚིག་པར་གྱུར་ བ་དག་ལ་ཁྲག་གིས་འཐོར། །དེ་ན་ལྕེ་སྤྱང་དུས་བྱས་ཤི་བ་ལ། །སེམས་ཅན་དག་ནི་ཕན་ཚུན་རྣམ་པར་ཟ། །ངན་སྐྱུགས་ཚིག་པའི་དྲི་ང་ཡིད་མི་འོང༌། །འཇིག་རྟེན་དག་ན་ཕྱོགས་བཞིར་ རབ་ཏུ་འཐུལ། །སྲིན་བུ་རྐང་བརྒྱ་བ་དག་བྲོས་པ་ལ། །དེ་ལ་གྲུལ་བུམ་དག་ནི་ཤིན་ཏུ་ཟ། །བཀྲེས་པ་དང་ནི་སྐོམ་པས་རབ་གདུངས་ཤིང༌། །ཡི་དྭགས་རྣམས་ཀྱང་སྒྲ་འབར་ཀུན་ འཕྱན་ཏེ། །དེ་ལྟར་ཁྱིམ་དེ་ཤིན་ཏུ་མི་བཟད་འཇིགས། །མེ་ལྕེ་དག་ནི་སྟོང་སྙེད་འབར་བར་འགྱུར། །སྐྱེས་བུ་ཁྱིམ་དེའི་བདག་པོ་དེ་ཉིད་ནི། །ཤིན་ཏུ་རྣམ་པར་ལྟ་ཞིང་སྒོ་ན་འདུག་ ༄༅། །དེ་ན་དེ་ཡིས་ཐོས་པ་བདག་གི་བུ། །འདི་ལྟར་བྱིས་པ་དག་ནི་མི་ཤེས་པས། །རྩེད་མོ་བརྩེན་པ་དག་ལ་ཆགས་པའི་བློ། །རྩེད་མོ་དགའ་འམ་རབ་ཏུ་དྲགས་མྱོས་ ཞེས། །དེ་ཐོས་བདག་གི་བྱིས་པ་ཁྱེའུ་འདི་ཀུན། །མྱུར་དུ་ཚིག་ཅིང་ཆུད་ཟོས་མི་འགྱུར་བར། །བདག་གི་བུ་རྣམས་རབ་ཏུ་ཐར་བྱའི་ཕྱིར། །ཁྱིམ་དེའི་ནང་དུ་མྱུར་དུ་ཞུགས་ནས་ སུ། །དེ་ལ་དེས་ནི་ཁྱིམ་གྱི་ཉེས་བརྗོད་དེ། །སྡུག་བསྔལ་འདི་དག་མི་བཟད་རིགས་ཀྱི་བུ། །སེམས་ཅན་རྣམ་པ་མང་ཞིང་མེ་འདི་དང༌། །སྡུག་བསྔལ་ཆེན་པོ་དག་ཀྱང་གཅིག་ཕྱིར་ གཅིག། སྦྲུལ་གདུག་ཤིན་ཏུ་གཏུམ་སེམས་གནོད་སྦྱིན་དང༌། །གྲུལ་བུམ་དང་ནི་ཡི་དྭགས་མང་པོ་གནས། །ཅེ་སྤྱང་དག་དང་ཝ་དང་ཁྱི་ཡང་མང༌། །བྱ་རྒོད་དག་ཀྱང་ཁ་ཟས་ཀུན་ ཏུ་འཚོལ། །དེ་འདྲ་བ་དག་འདི་ན་མང་གནས་ཏེ། །མེ་མེད་ཟིན་ཡང་ཤིན་ཏུ་མི་བཟད་འཇིགས། །འདི་ཡི་ཁོ་ར་ཡུག་ཏུ་མེ་འབར་ཏེ། །འདི་ན་དེ་འདྲའི་སྡུག་བསྔལ་འབའ་ཞིག་ གོ། །དེ་ལྟར་བྱིས་པའི་བློ་ཅན་དེ་སྦྲན་ཏེ། །གཞོན་ནུ་རྣམས་ནི་རྩེད་མོས་རབ་མྱོས་པས། །ཕ་ཡིས་བསྒོ་བ་དེ་ལ་མི་སེམས་ཏེ། །དེ་དག་གི་ནི་ཡིད་ལ་ཅི་མི་སྙམ། །དེ་ཚེ་སྐྱེས་བུ་ དེ་ནི་ཡང་སེམས་པ། །བུ་ཕྱིར་སེམས་པས་བདག་ནི་སྡུག་བསྔལ་ཏེ། །བདག་གི་བུ་དང་རྒྱུད་དག་མེད་པ་རུ། །མེ་འདིས་འདི་དག་ཚིག་ན་མི་རུང་ཞེས། །དེ་ཡི་དུས་ན་དེ་ཡི་ཐབས་ བསམས་པ། །རྩེད་མོ་དག་ལ་བྱིས་པ་འདི་ཆགས་ཏེ། །འདི་ན་རྩེད་མོ་དགའ་བ་ཅི་ཡང་མེད། །ཀྱེ་མ་འདི་ལྟར་བྱིས་པ་གླེན་ཞིང་རྨོངས། །དེ་ལ་དེ་ཡིས་སྨྲས་པ་གཞོན་ནུ་ཉོན། །བཞོན་པ་རྣམ་པ་ གསུམ་པོ་ང་ལ་ཡོད། །ར་དང་གླང་པོ་རི་དྭགས་མཆོག་ལས་བཅས། །ཆེ་ཞིང་མཐོ་ལ་ལེགས་པར་བརྒྱན་པ་དག། ཁྱིམ་གྱི་ཕྱི་རོལ་ན་ནི་དེ་དག་ཡོད། །ཕྱི་རོལ་བྱུང་ལ་དེ་ལ་དགོས་པར་ སྤྱོད། །ཁྱེད་ཅག་རྣམས་ཀྱི་ཕྱིར་ནི་ངས་བྱས་ཀྱི། །དེ་ལ་དགའ་བར་ལྷན་ཅིག་ཕྱིར་འཐོན་ཅིག །བཞོན་པ་དེ་འདྲ་ཡོད་པར་ཤེས་ནས་སུ། །དེ་དག་བརྩོན་འགྲུས་བརྩམས་ཏེ་རིངས་གྱུར་ནས། ། དེ་ཡི་མོད་ལ་ཐམས་ཅད་ཕྱི་རོལ་འཐོན། །སྡུག་བསྔལ་དག་ལས་ཐར་ཏེ་སྟོང་པར་འདུག །མི་དེས་བྱིས་པ་འཐོན་པ་མཐོང་ནས་སུ། གྲོང་ཁྱེར་དབུས་ཀྱི་དཔོང་སར་གནས་པ་ནི། །སེང་ གེའི་ཁྲི་ལ་འདུག་ནས་དེ་སྐད་སྨྲས། །ཀྱེ་མ་ང་ནི་དེ་རིང་མྱ་ངན་འདས། །ང་ཡིས་དཀའ་བར་རྙེད་པ་ཉོན་མོངས་དག །བུ་སྡུག་ཉི་ཤུ་འདི་དག་སྙིང་གི་བུ། །སྐྱེ་བོ་མང་པོས་གང་ཞིག་ འཇིགས་པ་ཡི། །དེ་དག་མི་བཟད་གདོན་དཀའི་ཁྱིམ་ན་འཁོད། །ཀུན་ཏུ་འབར་ཞིང་མེ་ལྕེ་ཅིག་གིས་གང༌། །དེ་དག་རྩེད་མོ་དགའ་ལ་ཆགས་པར་གྱུར། །ངས་ནི་དེ་རིང་དེ་དག་ཐར་ བྱས་ཏེ། །དེ་བས་ང་དང་མྱ་ངན་འདས་པར་གྱུར། །ཕ་དེ་བདེ་བར་འདུག་པར་རིག་ནས་སུ། །བྱིས་པ་དེ་དག་ལྷགས་ནས་འདི་སྐད་སྨྲ། །བཞོན་པ་ཡིད་དུ་འོང་བ་གསུམ་པོ་རྣམས། །ཡབ་ ༄༅། །ཀྱིས་གསུངས་པ་བཞིན་དུ་བདག་ཅག་སྩོལ། །བཞོན་པ་རྣམ་པ་གསུམ་པོ་ཁྱེད་སྦྱིན་ཞེས། །ཡབ་ཁྱོད་ཀྱིས་ནི་ཁྱིམ་དེར་གང་གསུངས་པ། །གལ་ཏེ་དེ་དག་ཐམས་ ཅད་མེད་ན་ནི། །ད་འདིར་དུས་ལ་བབ་ཀྱི་དེ་དག་སྩོལ། །མི་དེ་མཛོད་ཀྱི་གཏེར་དང་ལྡན་པ་སྟེ། །གསེར་དང་དངུལ་དང་ནོར་བུ་མུ་ཏིག་དང༌། །བྲན་དང་འགྲོན་བུ་དག་ནི་མི་ཉུང་བ། ། བཞོན་པ་དེ་ཡང་རྣམ་པ་སྣ་གཅིག་བྱིན། །གླང་གི་ཤིང་རྟ་རིན་ཆེན་དམ་པ་སྟེ། །ལོགས་བཅས་དྲིལ་བུ་གཡེར་ཁའི་དྲ་བས་བྲེས། །གདུགས་དང་རྒྱལ་མཚན་དག་གིས་ལེགས་པར་ བརྒྱན། །མུ་ཏིག་དང་ནི་ནོར་བུའི་དྲ་བས་གཡོགས། །གསེར་གྱི་མེ་ཏོག་རྣམས་ཀྱི་ཕྲེང་བ་དག །ཕྱོགས་དང་ཕྱོགས་རྣམས་སུ་ནི་ཤིན་ཏུ་དཔྱངས། །རབ་ཏུ་ཆེ་བའི་གོས་རྒྱུས་དེས་ གཡོགས་ཏེ། །དཀར་བཟང་བཅོས་བུའི་རས་རྣམས་ཤིན་ཏུ་བཏིང༌། །དེ་ན་དེ་བཞིན་འཇམ་པའི་དར་རྣམས་དང༌། །ཤིང་རྟ་དེ་ལ་ཤིང་བལ་མཆོག་ཀྱང་བཏིང༌། །གོས་རབ་ཀོ་ཏམ་པ་ མཆོག་དང་བའི་མཚན། །བྱེ་བ་ཕྲག་སྟོང་རི་བ་རྣམས་ཀྱིས་གཡོགས། །རིན་ཆེན་ཤིང་རྟ་བཅས་པ་དེ་དག་ནི། །གླང་པོ་དཀར་ཞིང་ཚོ་ལ་སྟོབས་དང་ལྡན། །བལྟ་ན་སྡུག་ཅིང་ཤིན་ཏུ་ བོང་ཡང་ཆེ། །སྐྱེས་བུ་དམ་པ་དག་གིས་རབ་ཏུ་བརྟེན། །སྐྱེས་བུ་དེ་ནི་བུ་རྣམས་ཐམས་ཅད་ལ། །དེ་ལྟ་བུ་ཡི་ཤིང་རྟ་མཆོག་བྱིན་ཏེ། །དེས་ནི་དེ་དག་དགའ་ཞིང་རངས་ནས་སུ། །ཕྱོགས་ དང་ཕྱོགས་མཚམས་དག་ཏུ་རྩེ་ཞིང་དོང༌། །དེ་བཞིན་དྲང་སྲོང་ང་ཡང་ཤཱ་རིའི་བུ། །སེམས་ཅན་རྣམས་ཀྱི་སྐྱབས་དང་ཕ་ཡིན་ཏེ། །སྲོག་ཆགས་འདི་དག་ཐམས་ཅད་ང་ཡི་བུ། །བྱིས་པ་དག་ནི་ ཁམས་གསུམ་འདོད་ལ་ཆགས། །ཁམས་གསུམ་དག་ནི་ཁང་པ་དེ་འདྲ་སྟེ། །སྡུག་བསྔལ་ཤིན་ཏུ་མི་བཟད་བརྒྱ་ཡིས་དཀྲུགས། །ན་བ་དང་ནི་སྐྱེ་རྒ་དུ་མ་རྒྱས། །མ་ལུས་ཐམས་ཅད་ནས་ཀྱང་ རབ་ཏུ་འབར། །ང་ནི་ཁམས་གསུམ་དག་ལས་ཐར་ཅིང་ཞི། །ནགས་ཚལ་དག་ན་གནས་ཤིང་དབེན་པར་འདུག །ངས་ནི་ཁམས་གསུམ་འདི་དག་ཡོངས་བཟུང་སྟེ། །འདི་ན་གང་རྣམས་ སྲེག་པ་ང་ཡི་བུ། །ང་ཉིད་དེ་ཡི་སྐྱབས་སུ་རིག་ནས་སུ། །དེ་ལ་ཉེས་པ་དག་ནི་ངས་བསྟན་ཏེ། །འདི་ལྟར་འདོད་ལ་རྣམ་པར་ཆགས་པའི་བློ། །བྱིས་པ་འདི་ཀུན་ང་ཡི་མི་ཉན་ཏོ། །ཐབས་ལ་ མཁས་པ་དག་ནི་ངས་སྦྱར་ཏེ། །དེ་དག་ལ་ཡང་ཐེག་པ་གསུམ་དུ་བཤད། །ཁམས་གསུམ་དག་གིས་ཉེས་པ་མང་མཁྱེན་ནས། །གདོན་བར་བྱ་བའི་ཕྱིར་ནི་ཐབས་བཤད་དོ། །བུ་གང་ ང་ལ་བརྟེན་པར་གྱུར་པ་དག །མངོན་ཤེས་དྲུག་དང་གསུམ་རིག་མཐུ་ཆེན་དང༌། །འདི་ན་རང་རྒྱལ་རྣམས་ནི་གང་ཡོད་དང༌། །ཕྱིར་མི་ལྡོག་པའི་བྱང་ཆུབ་སེམས་དཔའ་གང༌། །ངས་ནི་ བུ་འདྲར་མཁས་པ་དེ་དག་ལ། །དེ་ཡི་ཚེ་ན་དཔེ་མཆོག་འདི་དག་གིས། །སངས་རྒྱས་ཐེག་པ་གཅིག་པུ་འདི་བཤད་དེ། །ཐམས་ཅད་རྒྱལ་པར་འགྱུར་གྱི་འདི་གཟུང་ཞིག །སངས་རྒྱས་རྐང་ ༄༅། །གཉིས་མཆོག་གི་ཡེ་ཤེས་དེ། །ཁྱད་པར་འཕགས་ཤིང་ཤིན་ཏུ་ཡིད་དུ་འོང༌། །འཇིག་རྟེན་འདི་དག་ཀུན་ན་ཁྱད་པར་ཅན། །ཡངས་པའི་དངོས་པོ་དེ་བཞིན་ཕྱག་ བྱར་འོས། །སྟོབས་དང་བསམ་གཏན་དེ་བཞིན་རྣམ་ཐར་དང༌། །ཏིང་ངེ་འཛིན་དག་བྱེ་བ་དུ་མ་བརྒྱ། །ཤིང་རྟ་དེ་ནི་དེ་འདྲ་མཆོག་ཡིན་ཏེ། །དེ་ལ་སངས་རྒྱས་སྲས་རྣམས་རྟག་ཏུ་དགའ། ། དེ་ལ་བརྩེན་པས་ཉིན་མཚན་འདས་པར་བྱེད། །དུས་དང་ཟླ་བ་ཕྱེད་དང་ཟླ་བ་དང༌། །དེ་བཞིན་ལོ་དང་བར་གྱི་བསྐལ་པ་དང༌། །བསྐལ་པ་བྱེ་བ་སྟོང་ཡང་འདས་པར་བྱེད། །བདེ་གཤེགས་ ཉན་ཐོས་གང་རྣམས་ཉན་པ་དང༌། །བྱང་ཆུབ་སེམས་དཔའ་མང་པོ་རྣམས་བརྩེན་ཞིང༌། །འདིས་ནི་བྱང་ཆུབ་སྙིང་པོ་དེར་འགྲོ་སྟེ། །རིན་ཆེན་ཐེག་པ་འདི་ནི་དམ་པ་མཆོག །སྐར་ རྒྱལ་ཁྱོད་ཀྱིས་འདི་ལྟར་རིག་པར་གྱིས། །ཕྱོགས་བཅུ་ཐམས་ཅད་དུ་ནི་བཙལ་བྱས་ཀྱང༌། །སྐྱེས་བུ་དམ་པའི་ཐབས་རྣམས་མ་གཏོགས་པར། །དེ་ལ་ཐེག་པ་གཉིས་སུ་གང་ ནའང་མེད། །ཁྱོད་ཀྱི་ཕ་ང་ཁྱེད་ཀྱང་ང་ཡི་བུ། །ཁྱེད་རྣམས་ཁམས་གསུམ་རབ་ཏུ་འཇིགས་པ་ན། །བསྐལ་པ་བྱེ་བ་མང་པོར་བསྲེགས་པ་ཡི། །སྡུག་བསྔལ་དག་ལས་ངས་ནི་རབ་ ཏུ་བཏོན། །འདི་ལྟར་མྱ་ངན་འདས་པར་ངས་བསྟན་པ། །འཁོར་བའི་སྡུག་བསྔལ་དག་ལས་ཁྱེད་ཐར་ཏེ། །ཁྱེད་ནི་ད་དུང་མྱ་ངན་ཡོངས་མ་འདས། །སངས་རྒྱས་ཐེག་པ་ཉིད་ནི་ བཙལ་བར་བྱ། །འདི་ན་བྱང་ཆུབ་སེམས་དཔའ་གང་འཁོད་པ། །ང་ཡི་སངས་རྒྱས་ཚུལ་འདི་ཀུན་ཉོན་ཅིག །འདིས་ནི་བྱང་ཆུབ་སེམས་དཔའ་མང་པོ་འདུལ། །འདི་ནི་རྒྱལ་བའི་ཐབས་ ལ་མཁས་པ་ཡིན། གང་ཚེ་ཐེག་པ་དམན་པ་སྨད་པ་ལ། །དེ་ལ་སེམས་ཅན་དགའ་བར་གྱུར་པ་ན། །དེ་ཚེ་སྡུག་བསྔལ་འཕགས་པའི་བདེན་པ་དག །གཞན་མི་གསུང་བ་འཇིག་ རྟེན་འདྲེན་པ་འཆད། །གང་རྣམས་བྱིས་པའི་བློ་དག་མི་ཤེས་པས། །སྡུག་བསྔལ་དག་ནི་རྩ་བ་མི་མཐོང་བ། །དེ་དག་ལ་ཡང་ལམ་རྣམས་བསྟན་པར་བྱ། །སྲེད་པ་ཀུན་འབྱུང་ལས་ནི་ སྡུག་བསྔལ་སྐྱེ། །རྟག་ཏུ་མི་གནས་སྲེད་པ་འགོག་པ་ཡང༌། །འདི་ནི་ང་ཡི་འགོག་པ་བདེན་གསུམ་པ་ཡིན། །གཞན་མ་ཡིན་པ་གང་གིས་སྐྱེས་བུ་མཐར། །ལམ་རྣམས་བསྒོམས་ནས་ རྣམ་པར་ཐར་པར་འགྱུར། །དེ་དག་ཅི་ལས་རྣམ་གྲོལ་ཤཱ་རིའི་བུ། །མེད་པར་འཛིན་ལས་དེ་རྣམས་རྣམ་གྲོལ་ཏེ། །ཀུན་ལས་དེ་དག་ད་དུང་ཐར་མ་ཡིན། །མྱ་ངན་དེ་མ་འདས་ཞེས་ འདྲེན་པ་གསུང༌། །དེ་ལ་ཐར་བར་ཅི་ཕྱིར་བཤད་མ་མཛད། །བྱང་ཆུབ་དམ་པ་མཆོག་འདི་མ་ཐོབ་ཕྱིར། །འཇིག་རྟེན་བདེ་བྱའི་ཕྱིར་ནི་ང་སྐྱེས་པས། །ཆོས་ཀྱི་རྒྱལ་པོ་ང་ནི་དེ་ལྟར་འདོད།། ཐ་མར་དེ་རིང་ངས་ནི་གང་བཤད་པ། །ང་ཡི་ཆོས་ཀྱི་རྒྱ་འདི་ཤཱ་རིའི་བུ། །ལྷར་བཅས་འཇིག་རྟེན་དག་ལ་ཕན་བྱའི་ཕྱིར། །ཕྱོགས་དང་ཕྱོགས་མཚམས་དག་ཏུ་བཤད་པར་གྱིས། ། ༄༅། །ཁྱོད་ཀྱིས་བསྟན་པའི་ཚེ་ན་སེམས་ཅན་གང༌། །རྗེས་སུ་ཡི་རང་ངོ་ཞེས་ཚིག་སྨྲ་ཞིང༌། །མདོ་འདི་མགོ་བོས་རབ་ཏུ་ལེན་པ་ནི། །མི་དེ་ཕྱིར་མི་ལྡོག་པར་ཁྱོད་གཟུང་ ཞིག །མདོ་སྡེ་འདི་ལ་དད་པར་གང་གྱུར་པ། །དེས་ནི་སྔོན་གྱི་དེ་བཞིན་གཤེགས་པ་མཐོང༌། །དེ་དག་ལ་ཡང་བཀུར་སྟི་བྱས་པ་ཡིན། །རྣམ་པ་འདི་ལྟ་བུ་ཡི་ཆོས་ཀྱང་ཐོས། །ང་ ཡིས་བཤད་པ་འདི་ལ་གང་དད་པ། །དེས་ནི་ཁྱོད་དང་ང་ཡང་མཐོང་བ་ཡིན། །ང་ཡི་དགེ་སློང་དགེ་འདུན་འདི་ཀུན་དང༌། །བྱང་ཆུབ་སེམས་དཔའ་འདི་དག་ཀུན་ཀྱང་མཐོང༌། །མངོན་ པར་ཤེས་པས་རིག་ནས་ངས་འདི་བསྟན། །མདོ་འདིས་སྐྱེ་བོ་བྱིས་པ་མྱོས་པར་འགྱུར། །འདི་ལ་ཉན་ཐོས་རྣམས་ཀྱི་ཡུལ་ཡང་མེད། །འདི་ལ་རང་སངས་རྒྱས་ཀྱི་འགྲོ་བ་མེད། ། ཤཱ་རིའི་བུ་ཁྱོད་མོས་པར་མི་བྱེད་ན། །ང་ཡི་ཉན་ཐོས་འདི་དག་གཞན་ཅི་སྨོས། །འདི་དག་ང་ལ་དད་ཕྱིར་འབྲང་བ་སྟེ། །སོ་སོར་རང་གིས་རིག་པའི་ཡེ་ཤེས་མེད། །ཁྱོད་ཀྱིས་ ང་རྒྱལ་ཅན་དང་ཁེངས་པ་དང༌། །མི་རིགས་ཞུགས་པ་དག་ལ་འདི་མ་བཤད། །བྱིས་པ་འདོད་ལ་རྟག་ཏུ་རབ་མྱོས་ཤིང༌། །མི་ཤེས་པས་ན་ཆོས་བསྟན་སྤོང་བར་བྱེད། །འཇིག་ རྟེན་རྟག་ཏུ་ལེགས་གནས་སངས་རྒྱས་ཚུལ། །ང་ཡི་ཐབས་མཁས་འདི་ནི་རབ་སྤངས་ཤིང༌། །ཁྲོ་གཉེར་བྱས་ཏེ་ཐེག་པ་སྤངས་པ་ཡི། །དེ་ཡི་མི་བཟད་རྣམ་སྨིན་འདིར་ཉོན་ཅིག་ ང་ནི་འདུག་གམ་མྱ་ངན་འདས་ཀྱང་རུང༌། །རྣམ་པ་འདི་འདྲ་མདོ་སྡེ་རབ་སྤངས་ཤིང༌། །དགེ་སློང་དེ་དག་ལ་ཡང་སྡང་འདོད་པས། །དེ་ཡི་རྣམ་པར་སྨིན་པ་ང་ལས་ཉོན། །དེ་དག་མི་ལས་འཆི་ འཕོས་མནར་མེད་དུ། །བསྐལ་པ་ཚང་བར་རབ་ཏུ་གནས་པར་འགྱུར། །དེ་ནས་བར་གྱི་བསྐལ་པ་དུ་མར་ཡང༌། །བྱིས་པ་ཤི་ཞིང་འཕོས་ནས་དེར་ཡང་ལྷུང༌། །སེམས་ཅན་དམྱལ་ལས་ནམ་ ཞིག་ཤི་འཕོས་ཀྱང༌། །དེ་ནས་དུད་འགྲོ་དག་ཏུ་སྐྱེ་བར་འགྱུར། །ཤིན་ཏུ་རིད་པའི་ཝ་དང་ཁྱིར་གྱུར་ཅིང༌། །གཞན་དག་རྩེད་མོ་བྱེད་པའི་གཞིར་འགྱུར་ཏེ། །དེ་ན་དེ་དག་ཁ་དོག་གནག་པར་ འགྱུར། །སྲེའོ་རྨ་ཅན་གཡན་པ་དག་གིས་གང༌། །སྤུ་ཡང་བྱི་ཞིང་ཤིན་ཏུ་ཉམ་ཆུང་འགྱུར། །ང་ཡི་བྱང་ཆུབ་མཆོག་འདིར་ཞེ་སྡང་པས། །སྲོག་ཆགས་ནང་ན་རྟག་ཏུ་སྨད་འགྱུར་ཏེ། །རྡོ་དང་ བོང་བས་ཕོག་ནས་ཤིན་ཏུ་འཁང༌། །དེ་དང་དེ་ན་དབྱུག་པས་ཀུན་བསྡིགས་ལ། །བཀྲེས་ཤིང་སྐོམ་པར་གྱུར་པས་ལུས་ཀྱང་བསྐམས། །བྱིས་པའི་བློ་གང་སངས་རྒྱས་ཚུལ་སྤོང་བ། །རྔ་ མོ་དང་ནི་བོང་བུར་ཡང་འགྱུར་ཏེ། །ཁ་ཟས་བསམ་པ་དག་ལ་རྗེས་སེམས་ཤིང༌། །ཁལ་རྣམས་བཀལ་ནས་དབྱུག་པ་བརྒྱ་ཡིས་བརྡེགས། །ཕྱིར་ཡང་དེ་དག་དེར་ནི་ཝར་གྱུར་ཏེ། །ཤིན་ ཏུ་མི་སྡུག་ཞར་བ་འཐེང་པོར་འགྱུར། །གྲོང་གི་གཞོན་ནུ་དག་གིས་རབ་གཅེས་ཤིང༌། །བྱིས་པ་དེ་དག་རྡོ་དང་བོང་བས་བརྡེག །དེ་ནས་བྱིས་པའི་བློ་ཅན་ཤི་འཕོས་ནས། །དཔག་ཚད་དག་ ༄༅། །ཀྱང་ལྔ་བརྒྱ་མཉམ་པ་ཡི། །སྲོག་ཆགས་ལུས་རིད་རྣམས་སུ་གྱུར་ནས་སུ། །ཤིན་ཏུ་བླུན་ཞིང་རྨོངས་ལ་འགྲེ་ཞིང་ལྡོག །འདི་འདྲ་བ་ཡི་མདོ་སྡེ་སྤངས་པས་ན། །དེ་ དག་རྐང་པ་མེད་པའི་ལྟོ་འཕྱེར་འགྱུར། །སྲོག་ཆགས་བྱེ་བ་མང་པོས་བཟའ་བས་ན། །དེ་དག་ཤིན་ཏུ་མི་བཟད་ཚོར་བ་མྱོང༌། །ནམ་ཞིག་མི་ལུས་ཐོབ་པར་གྱུར་པ་ན། །ང་ཡི་མདོ་སྡེ་འདི་ ལ་མ་དད་པས། །དེ་ན་དེ་དག་ལུས་གནག་ཐེང་པོར་འགྱུར། །སྒྱུར་པོ་ཞར་བ་ལྡོངས་པ་གླེང་ཞིང་སྨྲས། །སངས་རྒྱས་བྱང་ཆུབ་འདི་ལ་མ་དད་པས། །འཇིག་རྟེན་དག་ན་ཡིད་ཀྱང་མི་ ཆེས་ཏེ། །དེ་དག་ཁ་ནས་རུལ་མནམ་རྒྱུན་མི་འཆད། །དེ་ཡི་ལུས་ལ་གནོད་སྦྱིན་གདོན་ཀྱང་གནོད། །དབུལ་ཞིང་གཞན་གྱི་མངག་གཞུག་བྱེད་པ་སྟེ། །ཉམ་ཆུང་གཞན་གྱིས་ རྟག་ཏུ་བཀོལ་བར་འགྱུར། །དེ་དག་ཤིན་ཏུ་ནད་དང་གནོད་པ་མང༌། །མགོན་མེད་འགྱུར་ཞིང་འཇིག་རྟེན་དག་ན་རྒྱུ། །དེ་ན་དེ་ཡིས་གང་ལ་ཉེར་བསྙེན་ཀྱང༌། །དེ་ལ་དེ་དག་སྦྱིན་ པར་དད་མི་འགྱུར། །བྱིན་ན་ཡང་ནི་མྱུར་དུ་སྟོར་འགྱུར་ཏེ། །དེ་ཡི་སྡིག་པའི་འབྲས་བུ་དེ་འདྲའོ། །དེས་ན་དེ་ཡིས་སྨན་དག་རྙེད་པ་ནི། །ཤིན་ཏུ་སྦྱར་ལེགས་མཁས་པས་བྱིན་ན་ ཡང༌། །དེས་ཀྱང་དེ་དག་ནད་ནི་ཕྱིར་ཞིང་སྐྱེ། །ནམ་ཡང་དེ་ཡི་ནད་རྣམས་མཐར་མི་འབྱུང༌། །གཞན་གྱིས་རྐུན་པོ་བྱས་པར་གྱུར་པ་དང༌། །འཁྲུག་ཅིང་དེ་བཞིན་དཔུང་འཆའ་འཐབ་ པ་དང༌། །དེ་བཞིན་གཞན་གྱིས་ནོར་རྣམས་འཕྲོག་པ་ཡང༌། །སྡིག་པའི་ལས་ཀྱིས་དེ་ཡི་སྟེང་དུ་འབབ། །ང་ཡི་སངས་རྒྱས་ཚུལ་འདི་སྤངས་པས་ན། །མི་དབང་རྒྱལ་པོ་འཇིག་རྟེན་སྟོན་པ་ཡི། ། འཇིག་རྟེན་མགོན་པོ་དེས་ནི་ཡོང་མི་མཐོང༌། །དེ་ནི་མི་ཁོམ་པར་ཡང་གནས་པར་འགྱུར། །བྱིས་པ་དེས་ནི་ཆོས་ཀྱང་མི་ཐོས་ཏེ། །དེ་དག་སེམས་པ་མེད་ཅིང་འོན་པར་འགྱུར། །བྱང་ཆུབ་འདི་འདྲ་ བ་ནི་སྤངས་པས་ན། །དེ་དག་ནམ་ཡང་ཞི་བར་མི་འགྱུར་རོ། །བསྐལ་པ་གངྒཱའི་ཀླུང་གི་བྱེ་མ་སྙེད། །ཁྲག་ཁྲིག་དག་ནི་བརྒྱ་སྟོང་མང་པོ་ཡང༌། །ལུས་ནི་མ་གྲིམས་ཡན་ལག་མ་ཚང་འགྱུར། ། དེ་ནི་མདོ་སྡེ་འདི་སྤངས་སྡིག་པའི་འབྲས། །དེ་ཡི་སྐྱེད་མོས་ཚལ་ནི་སེམས་ཅན་དམྱལ། །ངན་སོང་དག་ནི་དེ་ཡི་ཁྱིམ་ཡིན་ཏེ། །ཕག་དང་བོང་བུ་ཝ་དང་ས་འཛུལ་བར། །དེ་ན་དེ་དག་ རྟག་ཏུ་གནས་པར་འགྱུར། །དེ་དག་མི་ཡི་ལུས་སུ་གྱུར་ན་ཡང༌། །ལྡོངས་པ་དང་ནི་འོན་པ་གླེན་པ་སྟེ། །རྟག་ཏུ་དབུལ་ཞིང་གཞན་གྱིས་མངག་པར་འགྱུར། །དེ་ཚེ་དེ་ཡི་རྒྱན་ནི་དེ་དག་གོ། དེ་ན་དེ་ཡི་གོས་ནི་ནད་ཡིན་ཏེ། །ལུས་ལ་རྨ་ནི་བྱེ་བ་ཁྲག་ཁྲིག་འབྱུང༌། །དེ་བཞིན་ཤུ་བ་གཡན་པ་འབྲུམ་བུ་དང༌། །དེ་བཞིན་ཤ་བཀྲ་མཛེ་དག་བཤུལ་བར་མནམ། །དེ་ཡི་འཇིག་ཚོགས་ ལྟ་བ་སྟུག་པོར་འགྱུར། །དེ་ཡི་ཁྲོ་བའི་སྟོབས་ཀྱང་ཤིན་ཏུ་ཆེ། །དེ་ཡི་འདོད་ཆགས་དག་ཀྱང་ཤིན་ཏུ་བདོ། །དེ་ནི་དུད་འགྲོའི་སྐྱེ་གནས་རྣམས་སུ་རྟག །གང་གིས་ང་ཡི་མདོ་སྡེ་འདི་ ༄༅། །སྤངས་པ། །དེ་རིང་གལ་ཏེ་ང་ཡིས་ཤཱ་རིའི་བུ། །དེ་ཡི་ཉེས་པ་བསྐལ་པར་བརྗོད་ན་ཡང༌། །ཉེས་པའི་མཐར་ནི་ཕྱིན་པར་ཡོང་མི་ནུས། །ངས་ནི་དེ་ཡི་དོན་རྣམས་ རབ་མཐོང་བས། །ཤཱ་རིའི་བུ་ཁྱོད་ཡང་དག་བསྟན་པ་ནི། །ཁྱོད་ཀྱིས་སྐྱེ་བོ་བྱིས་པའི་མདུན་དུ་ཡང༌། །མདོ་སྡེ་འདི་འདྲ་མ་བཤད་ཅིག་ཅེས་བསྒོ། །འདི་ལྟར་གང་དག་བཙལ་ཞིང་ མང་ཐོས་པ། །དྲན་དང་ལྡན་ཞིང་གང་མཁས་ཡེ་ཤེས་ལྡན། །བྱང་ཆུབ་དམ་པ་མཆོག་ལ་གང་ཞུགས་པ། །དེ་ལ་ཁྱོད་ཀྱིས་དོན་དམ་འདི་སྒྲོགས་ཤིག །གང་གིས་སངས་རྒྱས་ བྱེ་བ་མང་པོ་མཐོང༌། །གང་གིས་དཔག་ཏུ་མེད་པའི་དགེ་བ་བསྐྱེད། །གང་རྣམས་ལྷག་པའི་བསམ་པ་ཤིན་ཏུ་བརྟན། །དེ་ལ་ཁྱོད་ཀྱིས་དོན་དམ་འདི་སྒྲོགས་ཤིག །གང་རྣམས་ བརྩོན་འགྲུས་ལྡན་ཞིང་རྟག་བྱམས་སེམས། །བྱམས་པ་དེ་ལ་དེ་དག་རིང་དུ་བསྒོམས། །ལུས་དང་དེ་བཞིན་སྲོག་ཀྱང་རབ་ཏུ་བཏང༌། །དེ་དག་ལ་ནི་མདོ་འདི་མངོན་སུམ་ཤོད། ། ཕན་ཚུན་རྟོག་ཅིང་རིམ་གྲོར་བཅས་པ་དང༌། །གང་རྣམས་བྱིས་པ་དག་ཀྱང་མི་སྟེན་ཞིང༌། །གང་དག་རུ་སུལ་རྣམས་སུ་དགའ་བ་དག །དེ་ལ་མདོ་སྡེ་བཟང་པོའི་སྒྲོགས་ཤིག ། དགེ་བའི་བཤེས་གཉེན་དག་ལ་རབ་བསྙེན་ཞིང༌། །སྡིག་པའི་གྲོགས་པོ་དག་ནི་ཡོངས་སྤོང་བ། །དེ་ལྟ་བུ་ཡི་སངས་རྒྱས་སྲས་མཐོང་ན། །དེ་དག་ལ་ཡང་མདོ་སྡེ་འདི་སྟོན་ཅིག ། ཚུལ་ཁྲིམས་མ་ཉམས་ནོར་བུ་རིན་ཆེན་བཞིན། །ཤིན་ཏུ་རྒྱས་པའི་མདོ་སྡེ་གཟུང་བར་གནས། །དེ་འདྲ་སངས་རྒྱས་སྲས་པོ་མཐོང་ན་ཡང༌། །དེ་དག་མདུན་དུ་མདོ་སྡེ་འདི་ཤོད་ཅིག །ཁྲོ་བ་ མེད་ཅིང་རྟག་ཏུ་དྲང་བ་སྟེ། །སྲོག་ཆགས་ཐམས་ཅད་ལ་ཡང་སྙིང་རྗེར་ལྡན། །བདེ་བར་གཤེགས་པ་དག་ལ་རིམ་གྲོར་བཅས། །དེ་ཡི་མདུན་དུ་མདོ་སྡེ་འདི་ཤོད་ཅིག །གང་དག་འཁོར་ གྱི་དབུས་སུ་ཆོས་སྟོན་པ། །དཔེ་རྣམས་བྱེ་བ་ཁྲག་ཁྲིག་དུ་མ་ཡིས། །མ་ཆགས་གྱུར་ཅིང་ནན་ཏན་ཡིད་ཀྱིས་འཆད། །དེ་དག་ལ་ཡང་མདོ་སྡེ་འདི་ཤོད་ཅིག །ཐམས་ཅད་མཁྱེན་པ་ཉིད་ནི་ ཡོངས་འཚོལ་ཤིང༌། །གང་དག་ཐལ་མོ་སྦྱར་ཏེ་མགོ་ལ་ཐུག །ལེགས་པར་སྨྲ་བའི་དགེ་སློང་འཚོལ་བའི་ཕྱིར། །གང་དག་ཕྱོགས་བཅུ་ཀུན་ཏུ་རབ་ཏུ་འགྲོ། །ཤིན་ཏུ་རྒྱས་པའི་མདོ་ སྡེ་ཀུན་འཛིན་ཏེ། །དེ་ནི་ནམ་ཡང་གཞན་ལ་དགའ་མི་བྱེད། །གཞན་ལས་ཚིགས་བཅད་གཅིག་ཀྱང་མི་འཛིན་པ། །དེ་དག་ལ་ཡང་མདོ་སྡེ་མཆོག་འདི་ཤོད། །ཇི་ལྟར་དེ་བཞིན་ གཤེགས་པའི་སྐུ་གདུང་འཛིན། །དེ་ལྟར་མི་དག་ལ་ལ་དེ་འཚོལ་ཏེ། །དེ་བཞིན་དུ་ཡང་འདི་འདྲ་མདོ་སྡེ་འཚོལ། །རྙེད་ནས་ཀྱང་ནི་དེ་དག་སྤྱི་བོས་ལེན། །མདོ་སྡེ་གཞན་ལ་ནམ་ཡང་ མི་སེམས་ཏེ། །འཇིག་རྟེན་རྒྱང་པན་པ་དང་བསྟན་བཅོས་གཞན་།དེ་འདྲ་བྱིས་པ་རྣམས་ཀྱིས་སྤྱོད་ཡུལ་ཏེ། །དེ་དག་ཁྱོད་ཀྱིས་སྤོངས་ལ་འདི་ཤོད་ཅིག །བསྐལ་པ་ཚང་བར་ཡང་ནི་ཤཱ་ ༄༅། །རིའི་བུ། །བྱང་ཆུབ་དམ་པ་མཆོག་འདིར་གང་ཞུགས་པའི། །རྣམ་པ་བྱེ་བ་ཕྲག་སྟོང་མང་སྨྲ་བ། །དེ་དག་མདུན་དུ་མདོ་སྡེ་འདི་ཤོད་ཅིག། དམ་པའི་ཆོས་པདྨ་ དཀར་པོ་ལས། །དཔེའི་ལེའུ་ཞེས་བྱ་སྟེ་གསུམ་པའོ།། །།དམ་པའི་ཆོས་པདྨ་དཀར་པོ། བམ་པོ་བཞི་པ། དེ་ནས་ཚེ་དང་ལྡན་པ་རབ་འབྱོར་དང༌། ཚེ་དང་ལྡན་ པ་ཀཱ་ཏྱཱའི་བུ་ཆེན་པོ་དང༌། ཚེ་དང་ལྡན་པ་འོད་སྲུང་ཆེན་པོ་དང༌། ཚེ་དང་ལྡན་པ་མཽངྒལ་གྱི་བུ་ཆེན་པོས། སྔོན་མ་ཐོས་པའི་ཆོས་རྣམ་པ་འདི་ལྟ་བུ་འདི་བཅོམ་ལྡན་འདས་ལས་ཐོས་ ཤིང༑ ཚེ་དང་ལྡན་པ་ཤཱ་རིའི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་སུམ་དུ་ལུང་བསྟན་པ་ཐོས་ནས་ངོ་མཚར་དུ་གྱུར། །རྨད་དུ་གྱུར། ཤིན་ཏུ་དགའ་བར་ གྱུར་ཏེ། དེའི་ཚེ་སྟན་ལས་ལངས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང༌། བླ་གོས་ཕྲག་པ་གཅིག་ཏུ་གཟར་ཏེ་བུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་མངོན་དུ་ལྟ་ཞིང༌། ལུས་བཏུད། ལུས་མངོན་པར་བཏུད། ལུས་རྣམ་པར་བཏུད། ལུས་ ཤིན་ཏུ་བཏུད་དེ། དེའི་ཚེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་རྒས་གཏུགས་འཁོགས་ནས། དགེ་སློང་གི་དགེ་འདུན་འདིའི་ནང་ ནའང་གནས་བརྟན་དུ་འཛིན་ཏེ། རྒས་འཁོགས་ཤིང་བདག་ཅག་མྱ་ངན་ལས་འདས་པ་ཐོབ་སྙམ་ནས། བཅོམ་ལྡན་འདས། བདག་ཅག་ལ་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་ཏུ་བརྩོན་པ་མ་མཆིས་ཏེ། བདག་ཅག་ནི་བརྩོན་འགྲུས་བརྩམ་པའི་རྔོ་མི་ཐོགས་པའོ། །གང་གི་ཚེ་བཅོམ་ལྡན་འདས་ཆོས་སྟོན་ཅིང༌། བཅོམ་ལྡན་འདས་རིང་དུའང་བཞུགས་པར་ གྱུར་ཏེ་ཆོས་བཤད་པ་དེ་ལ་བདག་ཅག་ཀྱང་མཆིས་པར་གྱུར་པ་དེའི་ཚེ་ན་ནི། བཅོམ་ལྡན་འདས། བདག་ཅག་ཀྱང་རིང་དུ་མཆིས་ཤིང༌། བཅོམ་ལྡན་འདས་ལ་རིང་དུ་བསྙེན་བཀུར་ བགྱིས་པས། ཡན་ལག་དང་ཉིང་ལག་ཀྱང་བྲོ་འཚལ། ཚིགས་དང་ཚིགས་ཕྲེའུ་རྣམས་ཀྱང་བྲོ་འཚལ་ཏོ། །བཅོམ་ལྡན་འདས། དེའི་སླད་དུ་བཅོམ་ལྡན་འདས་ཀྱིས་ཆོས་བསྟན་པ་ ནའང་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་ཐམས་ཅད་བདག་ཅག་གིས་བརྗོད་ཀྱི། སངས་རྒྱས་ཀྱི་ཆོས་འདི་དག་དང༌། སངས་རྒྱས་ཀྱི་ཞིང་གི་བཀོད་པ་འདི་དག་ དང༑ བྱང་ཆུབ་སེམས་དཔའི་རྣམ་པར་རོལ་པ་དག་དང༌། དེ་བཞིན་གཤེགས་པའི་རྣམ་པར་རོལ་པ་དག་ལ་བདག་ཅག་གིས་རེ་བ་མ་བསྐྱེད་དོ། །དེ་ཅིའི་སླད་དུ་ཞེ་ན། བཅོམ་ལྡན་ འདས། འདི་ལྟར་བདག་ཅག་ཁམས་གསུམ་ནས་བྱུང་སྟེ། མྱ་ངན་ལས་འདས་པར་འདུ་ཤེས་ཤིང༌། བདག་ཅག་ནི་རྒས་འཁོགས་པས། དེའི་སླད་དུ། བཅོམ་ལྡན་འདས། བདག་ ༄༅། །ཅག་གིས་བྱང་ཆུབ་སེམས་དཔའ་གཞན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཅིང་གཏམས་མོད་ཀྱི། བཅོམ་ལྡན་འདས། དེ་ལ་བདག་ ཅག་གིས་རེ་བའི་སེམས་གཅིག་ཀྱང་བསྐྱེད་པར་མ་གྱུར་ཏེ། བཅོམ་ལྡན་འདས། བདག་ཅག་གིས་བཅོམ་ལྡན་འདས་ཀྱི་དྲུང་ནས་ཉན་ཐོས་རྣམས་ཀྱང་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཏུ་འགྱུར་བར་ལུང་བསྟན་པ་ཐོས་ནས། ངོ་མཚར་དང༌། རྨད་དུ་གྱུར་ཏོ། །བཅོམ་ལྡན་འདས། དེང་འཕྲལ་ལ་དེ་བཞིན་གཤེགས་པའི་གསུང་སྔོན་མ་ཐོས་པ་ རྣམ་པ་འདི་ལྟ་བུ་འདི་ཐོས་ནས། བདག་ཅག་གིས་རྙེད་པ་ཆེན་པོ་ཐོབ་བོ། །བཅོམ་ལྡན་འདས། བདག་ཅག་གིས་རིན་པོ་ཆེ་ཆེན་པོ་ཐོབ་བོ། །བཅོམ་ལྡན་འདས། བདག་ཅག་ གིས་ཚད་མ་མཆིས་པའི་རིན་པོ་ཆེ་ཆེན་པོ་ཐོབ་བོ། །བཅོམ་ལྡན་འདས། བདག་ཅག་གིས་མ་བསླབས། མ་བཙལ། མ་བསམས། མ་སྨོས་པར་རྣམ་པ་འདི་ལྟ་བུའི་རིན་པོ་ ཆེ་ཆེན་པོ་འདི་ཐོབ་སྟེ། བཅོམ་ལྡན་འདས། བདག་ཅག་སྤོབས་སོ། །བདེ་བར་གཤེགས་པ། སྤོབས་སོ། །བཅོམ་ལྡན་འདས། འདི་ལྟ་སྟེ། དཔེར་ན། མི་ལ་ལ་ཞིག་འདི་ལྟར་ ཕའི་གན་ནས་ལོགས་ཤིག་ཏུ་མཆིས་ལ། དེ་ལོགས་ཤིག་ཏུ་མཆིས་ནས་ཡུལ་ཕྱོགས་གཅིག་ཅིག་ཏུ་ཕྱིན་ཏེ། དེ་དང་དེར་དགུང་ལོ་མང་དུ་ཉི་ཤུ་འམ། སུམ་ཅུའམ། བཞི་བཅུའམ། ལྔ་ བཅུར་གནས་ཏེ། བཅོམ་ལྡན་འདས། དེ་ནས་མི་དེ་ཆེན་པོ་ཞིག་ཏུ་ལགས་ལ། དེའང་དབུལ་པོར་གྱུར་ནས་འཚོ་བ་འཚོལ་ཞིང༌། འཚལ་མ་དང་རད་པའི་སླད་དུ་ཕྱོགས་དང་ཕྱོགས་ མཚམས་སུ་མཆིས་ནས། ཡུལ་ཕྱོགས་གཅིག་ཅིག་ཏུ་ཕྱིན་ཏེ། དེའི་ཕ་དེའང་ཡུལ་གཞན་དུ་མཆིས་ལ། ནོར་དང༌། འགྲོན་བུ་དང༌། མཛོད་དང༌། བང་བ་མང་པོར་གྱུར་ཏེ། གསེར་ དང༑ དངུལ་དང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱུ་རུ་དང༌། ས་ལེ་སྦྲམ་དང༌། དངུལ་དགོག་དང་ལྡན་པར་གྱུར་ལ། བྲན་ཕོ་དང༌། བྲན་མོ་ དང༑ སུག་ལས་བགྱིད་པ་དང༌། ཞོ་ཤས་འཚོ་བའི་མི་མང་པོར་གྱུར་ལ། གླང་པོ་ཆེ་དང༌། རྟ་དང༌། ཤིང་རྟ་དང༌། བ་ལང་དང༌། ལུག་མང་པོ་དང་ལྡན་པར་གྱུར་ཏེ། གཡོག་མང་ ཞིང་ཡུལ་ཆེན་པོའི་ནང་ན་ནོར་དང་ལྡན་པ་ལགས་ལ། འདུ་བ་དང༌། འཕེལ་བ་དང༌། རྨོ་བ་དང༌། འཚོལ་བའང་མང་དུ་གྱུར་ཏེ། བཅོམ་ལྡན་འདས། དེ་ནས་མི་དབུལ་པོ་དེ་ འཚལ་མ་དང་རད་པ་འཚོལ་བའི་སླད་དུ། གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་དུ་མཐར་གྱིས་འཁྱམ་པ་ལས། དེ་ན་ ནོར་དང༌། འགྲོན་བུ་དང༌། མཛོད་དང༌། བང་བ་མང་པོ་མཆིས་པའི་མི་དེ་གང་ན་མཆིས་པའི་གྲོང་ཁྱེར་དེར་ཕྱིན་པར་གྱུར་ཏེ། བཅོམ་ལྡན་འདས། དེ་ནས་མི་དབུལ་པོ་དེའི་ཕ་ནོར་ ༄༅། །དང༌། འགྲོན་བུ་དང༌། མཛོད་དང༌། བང་བ་མང་པོ་ཅན་དེ་གྲོང་ཁྱེར་དེ་ན་གནས་ཤིང༌། བུ་ལོ་ལྔ་བཅུའི་བར་དུ་སྟོར་བ་དེ་རྟག་པར་རྒྱུན་དུ་དྲན་ཡང་བདག་གཅིག་ པུ་ནང་དུ་གདུང་བ་མ་གཏོགས་པར་གཞན་སུ་ལའང་མི་སྨྲ་བར་འདི་སྙམ་དུའང་བདག་ནི་རྒས་ཤིང་འཁོགས་ཏེ་གཏུགས་ན། བདག་ལ་འགྲོན་བུ་དང༌། གསེར་དང༌། ནོར་དང༌། འབྲུ་ དང༑ མཛོད་དང༌། བང་བ་མང་དུ་ཡོད་ལ། བདག་ལ་བུ་ནི་གཅིག་ཀྱང་མེད་ན། བདག་ནི་འཆི་བའི་དུས་བྱེད་པར་འགྱུར་ཏེ། འདི་དག་ཐམས་ཅད་མ་སྤྱད་པར་ཆུད་ཟོས་པར་ མི་འགྱུར་རམ་སྙམ་དུ་དེ་ཕྱིར་ཞིང་བུ་དེ་དྲན་ནས། ཀྱེ་མ། གལ་ཏེ་བདག་གི་བུ་དེ་ནོར་གྱི་ཚོགས་འདི་ལ་སྤྱོད་པར་གྱུར་ན་ནི། བདག་མྱ་ངན་མེད་པར་འགྱུར་བར་སེམས་ལ། བཅོམ་ལྡན་འདས། དེ་ནས་མི་དབུལ་པོ་དེ་རད་པ་དང་འཚལ་མ་འཚོལ་ཞིང་མཐར་གྱིས་འགྲོན་བུ་དང༌། གསེར་དང༌། ནོར་དང༌། འབྲུ་དང༌། མཛོད་དང༌། བང་བ་མང་པོ་ཅན་ གྱི་མི་དེའི་གནས་ག་ལ་བ་དེར་མཆིས་ཏེ། བཅོམ་ལྡན་འདས། དེ་ནས་མི་དབུལ་པོའི་ཕ་དེ་བདག་གི་མཆིས་བྲང་གི་ཆབ་སྒོ་ན་བྲམ་ཟེ་དང༌། རྒྱལ་རིགས་དང༌། རྗེའུ་རིགས་ དང༑ དམངས་རིགས་ཀྱི་འཁོར་ཆེན་པོས་ཡོངས་སུ་བསྐོར་ཅིང་མདུན་གྱིས་བལྟས་ཏེ། སེངྒེའི་ཁྲི་ཆེན་པོ་སུག་རྟེན་དང་བཅས་པ་གསེར་དང༌། དངུལ་གྱིས་ཤིན་ཏུ་བརྒྱན་པ་ ལ་མཆིས་ནས། འགྲོན་བུ་བྱེ་བ་བརྒྱ་སྟོང་གིས་སྤྱོད་པ་བགྱིད་དེ། རྔ་ཡབ་ཀྱིས་གཡོབ་ཅིང་བླ་རེ་བྲེས་པའི་སའི་ཕྱོགས། མེ་ཏོག་སིལ་མ་གཏོར་ཅིང་རིན་པོ་ཆེའི་ཕྲེང་བ་དཔྱངས་པ་ན་འབྱོར་ཅིང་ ལོངས་སྤྱོད་པ་ཆེན་པོས་མཆིས་ལ། བཅོམ་ལྡན་འདས། མི་དབུལ་པོ་དེས་རང་གི་ཕ་དེ་རང་གི་མཆིས་བྲང་གི་ཆབ་སྒོ་ན་རྣམ་པ་འདི་ལྟ་བུའི་ལོངས་སྤྱོད་མཆིས་ཤིང༌། སྐྱེ་བོ་ཕལ་པོ་ཆེས་ ཡོངས་སུ་བསྐོར་ནས་ཁྱིམ་བདག་གི་སུག་ལས་བགྱིད་པ་མཐོང་སྟེ། མཐོང་ནས་ཀྱང་འཇིགས་ཤིང་སྐྲག་ལ་མི་དགའ་ནས་སྤུ་ཟིང་ཞེས་བགྱིད་དེ། རབ་ཏུ་ཡིད་མི་བདེ་ནས་འདི་སྙམ་དུ་ སེམས་ཏེ། རྒྱལ་པོའམ། བློན་པོ་ཆེན་པོ་འདི་དང་བདག་གློ་བུར་དུ་ཕྲད་དེ། འདི་ན་བདག་གི་བྱ་བ་ཅིའང་མེད་ཀྱི། བདག་དབུལ་པོའི་གནས་ག་ལ་བ་དེར་སོང་ལ། དེར་བདག་གི་ཟས་ དང་གོས་ཉོན་མི་མོངས་པར་རྙེད་ཀྱི། བདག་འདིར་རིང་དུ་ཐོགས་སུ་ཟིན་ན་མི་རུང་ངོ༌། །འདིར་བག་ཙམ་གཟུངས་སུ་ཟིན་ཏམ། ཉེས་པ་གཞན་ལ་ལ་དང་ཕྲད་པར་གྱུར་དུ་མི་འོང་ངམ་སྙམ་ ནས། བཅོམ་ལྡན་འདས། དེ་ནས་མི་དབུལ་པོ་དེ་འཇིགས་པ་བརྒྱུད་མར་ཡིད་ལ་བགྱིད་ཅིང་སྐྲག་ནས། དེ་ན་མི་གནས་པར་རིངས་པར་བྲོས་ཏེ་མཆིས་པ་དང༌། བཅོམ་ལྡན་འདས། དེ་ནས་ མི་ཕྱུག་པོ་དེ། བདག་གི་མཆིས་བྲང་གི་ཆབ་སྒོ་ན་སེང་གེའི་ཁྲི་ལ་མཆིས་པས། བདག་གི་བུ་དེ་མཐོང་མ་ཐག་ཏུ་ངོ་མཚར་ཏེ། མཐོང་ནས་ཀྱང་དགའ་མགུ་རངས་ཏེ། རབ་ཏུ་དགའ་ཞིང་ ༄༅། །དགའ་བ་དང༌། ཡིད་བདེ་བ་སྐྱེས་པར་གྱུར་ནས་འདི་སྙམ་དུ་འགྲོན་བུ་དང༌། གསེར་དང༌། ནོར་དང༌། འབྲུ་དང༌། མཛོད་དང༌། བང་བའི་ལོངས་སྤྱོད་ཆེན་པོ་འདི་ ལ་སྤྱོད་པ་འདི་ལྟར་རྙེད་དེ། བདག་ནི་རྒས་འཁོགས་གཏུགས་ནས། བདག་ཀྱང་འདི་ཉིད་ཕྱིར་ཞིང་དྲན་ན་འདིའང་ཁོ་བདག་ཉིད་འདིར་འོངས་པ་ངོ་མཚར་ཆེའོ་སྙམ་དུ་སེམས་སོ། ། བཅོམ་ལྡན་འདས། དེ་ནས་མི་དེ་བུ་ལ་སྲེད་པས་གདུངས་པས། དེའི་ཚེ་སྐད་ཅིག་ཐང་ཅིག་ཡུད་ཙམ་དེ་ཉིད་ལ། མི་མགྱོགས་པ་དག་བཀྱེ་སྟེ། གྲོགས་པོ་དག །དེང་ལ་མི་དེ་མྱུར་དུ་ ཁྲིད་དེ་ཤོག་ཅིག་ཅེས་བསྒོ་ནས། བཅོམ་ལྡན་འདས། དེ་ནས་མི་དེ་དག་ཐམས་ཅད་ཀྱིས་མགྱོགས་པར་བརྒྱུགས་ནས་མི་དབུལ་པོ་དེ་བཟུང་བ་དང༌། བཅོམ་ལྡན་འདས། དེ་ནས་ མི་དབུལ་པོ་དེ་དེའི་ཚེ་ན་འཇིགས་ཤིང་སྐྲག་ལ། མི་དགའ་ནས་བ་སྤུ་ཞིང་ཞེས་བགྱིད་ཅིང་རབ་ཏུ་ཡིད་མི་བདེ་སྟེ། དངངས་པའི་སྒྲ་དྲག་པོ་ཕྱུང་ནས། ཀུ་ཅོ་འདོན་ཅིང་ཁོ་བོས་ཁྱེད་ ལ་ཉེས་པ་ཅུང་ཟད་ཀྱང་མ་བྱས་ན་ཞེས་ཚིག་ཏུ་སྨྲས་ཏེ། དེ་ནས་མི་དེ་དག་གིས་ནན་གྱིས་མི་དབུལ་པོ་དེ་ཀུ་ཅོ་འདོན་བཞིན་དུ་ཁྲིད་པ་དང༌། དེ་ནས་མི་དབུལ་པོ་དེ་འཇིགས་ཤིང་ སྐྲག་ལ་མི་དགའ་ནས། སྤུ་ཞིང་ཞེས་བགྱིད་ཅིང་རབ་ཏུ་ཡིད་མི་བདེ་སྟེ། འདི་ལྟར་བདག་གསོད་དུ་བཅུག་ནས་མ་རུང་བར་མི་བྱའམ་སྙམ་སེམས་ཤིང༌། དེ་བ་རྒྱལ་ཏེ་དོག་ས་ལ་ འགྱེལ་ནས་མྱོས་པར་གྱུར་ལ། དེའི་ཕ་དེའང་ཉེ་བ་ཞིག་ན་མཆིས་ནས། དེས་མི་དེ་དག་ལ་ཁྱེད་ཀྱིས་མིའུ་ནི་ཁྲིད་དེ་མ་འོང་བར། འུ་ནི་ཆུ་གྲང་མོས་གཏོར་ཅིག་ཅེས་དེ་སྐད་སྨྲས་ནས། གཞན་ མི་མཆིས་ཏེ། དེ་ཅིའི་སླད་དུ་ཞེ་ན། ཁྱིམ་བདག་དེ་བདག་ནི་མཐུ་ཆེན་པོ་དང་ལྡན་ལ། མི་དབུལ་པོ་འདི་ནི་དམན་པ་ལ་མོས་པར་འཚལ་ནས། ཁྱིམ་བདག་གི་བུ་ལགས་པར་ཡང་འཚལ་ན། བཅོམ་ལྡན་འདས། དེ་ནས་ཁྱིམ་བདག་དེ་ཐབས་མཁས་པའི་སླད་དུ། འདི་དག་གི་བུ་ལགས་ཞེས་སུ་ལའང་མི་མཆི་སྟེ། བཅོམ་ལྡན་འདས། དེ་ནས་ཁྱིམ་བདག་དེས་མི་གཞན་ཞིག་ལ། ཀྱེ་མི་ཁྱོད་སོང་སྟེ། མི་དབུལ་པོ་ཕ་བི་ལ་ཀྱེ་མི་ཁྱོད་བཏང་གི། གར་དགའ་བར་འགྲོ་ལ་རག་གོ་ཞེས་བསྒོ་ཞིག་ཅེས་མཆི་ན། ལྷ། བཀའ་བཞིན་འཚལ་ཞེས་མི་དེས་དེ་ལས་མཉན་ནས། མི་དབུལ་པོ་དེ་ག་ལ་བ་དེར་མཆིས་ཏེ་ཕྱིན་ནས། མི་དབུལ་པོ་དེ་ལ། ཀྱེ་མི་ཁྱོད་བཏང་གི་གར་དགའ་བར་འགྲོ་ལ་རག་གོ་ཞེས་བགྱིས་ནས། དེ་ནས་མི་དབུལ་པོ་དེ་ཚིག་དེ་ཐོས་པ་དང༌། ངོ་ མཚར་དང་རྨད་དུ་བྱུང་བ་ཐོབ་པར་གྱུར་ཏེ། སའི་ཕྱོགས་དེ་ནས་ལངས་ནས། དེ་མི་དབུལ་པོའི་གནས་ག་ལ་བ་དེར་འཚལ་མ་དང་རད་པ་འཚོལ་བའི་སླད་དུ་མཆིས་ཏེ། དེ་ནས་ཁྱིམ་ བདག་དེས་མི་དབུལ་པོ་དེ་དགུག་པའི་སླད་དུ་ཐབས་མཁས་པ་སྦྱར་བ། དེས་དེ་ལ་མདོག་མི་སྡུག་ཅིང་མདངས་ངན་པའི་མི་གཉིས་ཤིག་མངགས་ཏེ། ཁྱེད་གཉིས་དེང་ལ་གང་འདིར་འོངས་ ༄༅། །པའི་མི་དེ་ལ་ཁྱེད་རང་གི་ཚིག་གིས་ཉི་མའི་གླ་ཐང་གིས་གླ་གྱིས་ལ། ངའི་ཁྱིམ་འདིར་ལས་བྱེད་དུ་ཆུག་ཅིག །དེ་གལ་ཏེ་འདི་སྐད་དུ་ལས་ཅི་བྱ་ཞེས་ཟེར་ བ་དང༌། ཁྱེད་གཉིས་ཀྱིས་དེ་ལ་འདི་སྐད་དུ། ངེད་གཉིས་དང་ལྷན་ཅིག་ཏུ་ཕྱག་དར་གྱི་ཕུང་པོ་ཕྱག་གོ་ཞེས་སྨྲོས་ཤིག་ཅེས་བགྱིས་ནས། མི་དེ་གཉིས་ཀྱིས་མི་དབུལ་པོ་དེ་བཙལ་ཏེ་ སུག་ལས་དེ་བཞིན་དུ་བསྒྲུབས་ནས། དེ་ནས་མི་དེ་གཉིས་དང༌། མི་དབུལ་པོ་དེས་མི་ནོར་ཆེན་པོ་དེ་ལས་གླ་བླངས་ཏེ། ཁྱིམ་དེ་ཉིད་ན་ཕྱག་དར་གྱི་ཕུང་པོ་འཕྱག་ཅིང༌། མི་ནོར་པོ་ ཆེ་དེ་ཉིད་ཀྱི་ཁྱིམ་དྲུང་གི་སྤྱིལ་པོ་ན་གནས་ཤིང་མཆིས་ནས། མི་ཕྱུག་པོ་དེས་མཐོངས་ཁུང་དང་སྐར་ཁུང་དག་ནས་བདག་གི་བུ་ཕྱག་དར་འཕྱག་པ་མཐོང་སྟེ། མཐོང་ནས་ངོ་ མཚར་དུ་གྱུར་ཏོ། །དེ་ནས་ཁྱིམ་བདག་དེ་ཕྲེང་བ་དང་རྒྱན་བཀྲོལ་ཏེ། རད་པ་བཟང་པོ་འཇམ་པོ་ཆེན་པོ་ཕུད་ནས་རད་པ་དྲི་མ་ཅན་འཚལ་ཏེ། བདག་གི་གནས་ནས་བབས་ནས་ སུག་པ་གཡོན་པ་ན་སྐོན་པ་ཐོགས་ཏེ། ཕྱག་དར་གྱིས་བདག་གི་ལུས་ལ་གོས་པར་བགྱིས་ནས། རྒྱང་རིང་པོ་ནས་སྨྲ་ཞིང་བུ་ག་ལ་བ་དེར་མཆིས་ཏེ་ཕྱིན་ནས། འདི་སྐད་དུ་ ཁྱོད་མ་འཁོད་པར་སྐོན་པ་ཐོགས་ལ་ཕྱག་དར་སྐྱོས་ཤིག་ཅེས་མཆིས་ཤིང༌། ཐབས་འདིས་བུ་དེ་ལ་སྨྲས་ཏེ། ཡང་འདི་སྐད་བསྒོའོ། །ཀྱེ་མི་ཁྱོད་འདི་ཉིད་ན་ལས་བྱོས་ལ་ ཕྱིར་གཞན་དུ་མ་འགྲོ་ཞིག་དང༌། ངས་ཁྱོད་གླ་བསྐྱེད་དེ་སྦྱིན་ནོ། །ཁྱོད་ལ་ཅི་དང་ཅི་དགོས་པ་ཡང་ན་བུམ་པའི་རིན་ནམ། ཡང་ན་རིལ་པའི་རིན་ནམ། ཡང་ན་ཕྲུ་བའི་རིན་ནམ། ཡང་ན་ཤིང་ གི་རིན་ནམ། ཡང་ན་ལན་ཚྭའི་རིན་ནམ། ཡང་ན་ཟས་སམ། ཡང་ན་གོས་ཀྱང་རུང་སྟེ། དེ་དག་ང་ལ་འཛེམ་པ་མེད་པར་སློང་ཤིག །ཀྱེ་སྐྱེས་བུ། ང་ལ་རས་རྙིང་པའང་ཡོད་དེ། དེ་སྟེ་ དེའང་ཁྱོད་ལ་དགོས་ནའང་སློངས་ཤིག་དང༌། ངས་ཁྱེད་ལ་སྦྱིན་ནོ། །ཀྱེ་སྐྱེས་བུ། ཡོ་བྱད་ཀྱི་རྣམ་པ་དེ་ལྟ་བུ་དེ་དག་ཁྱོད་ལ་ཅི་དང་ཅི་དགོས་པ་དེ་དང་དེ་དག་ཐམས་ཅད་ངས་ཁྱོད་ལ་སྦྱིན་གྱི། མི་ཁྱོད་མྱ་ངན་མེད་པར་བྱོས་ལ། ཁྱོད་ཀྱི་ཕ་ཇི་ལྟ་བ་དེ་བཞིན་དུ་ཁྱོད་ཀྱིས་ང་ལ་སོམས་ཤིག །དེ་ཅིའི་ཕྱིར་ཞེ་ན། ང་ནི་རྒན། ཁྱོད་ནི་གཞོན་ཏེ་ཁྱོད་ཀྱིས་ངའི་ཕྱག་དར་གྱི་ཕུང་ཕོ་ འདི་ཕྱགས་ཤིང་ལས་མང་པོ་བྱས་ཏེ། ཀྱེ་མི་ཁྱོད་ལས་འདི་བྱེད་པའི་ཚེ། སྒྱུའམ། གྱ་གྱུའམ། གཡོའམ། ང་རྒྱལ་ལམ། འཆབ་པ་སྔོན་བྱས་པའམ། བྱེད་པའང་མེད་དེ། ཀྱེ་ སྐྱེས་བུ་ཇི་ལྟར་མི་འདི་དག་གཞན་ལས་བྱེད་པའི་ཚེ། སྐྱོན་དེ་དག་ཡོད་པ། ཁྱོད་ལ་རྣམ་པ་ཐམས་ཅད་དུ་ཉེས་པ་དེ་དག་ལས་གཅིག་ཀྱང་མ་མཐོང་གི། དེང་ཕན་ཆད་ང་ལ་ཁྱོད་ ནི་ངའི་སྙིང་གི་བུ་ཇི་ལྟ་བ་དེ་དང་འདྲ་བ་ཡིན་ནོ། །བཅོམ་ལྡན་འདས། དེ་ནས་ཁྱིམ་བདག་དེས་མི་དབུལ་པོ་དེ་ལ་བུ་ཞེས་མིང་དུ་བཏགས་སོ། །མི་དབུལ་པོ་དེའང་ཁྱིམ་བདག་དེ་ལ་ཕར་ ༄༅། །འདུ་ཤེས་བསྐྱེད་དེ། བཅོམ་ལྡན་འདས། རྣམ་གྲངས་འདིས་ཁྱིམ་བདག་དེ་བུ་འཚལ་བས་སྐོམ་ནས། དགུང་ལོ་ཉི་ཤུའི་བར་དུ་བུ་དེ་ཕྱག་དར་གྱི་ཕུང་པོ་ འཕྱག་ཏུ་སྩལ་ཏེ། དེ་ནས་དགུང་ལོ་ཉི་ཤུ་འདས་པ་དང༌། མི་དབུལ་པོ་དེ་ཁྱིམ་བདག་དེའི་མཆིས་བྲང་གི་སླད་ནང་དུ་མཆི་བ་ལ་འཛེམ་པ་མ་མཆིས་པར་གྱུར་ཏེ། སྤྱིལ་པོ་དེ་ ཉིད་ན་གནས་ཤིང་མཆིས་པ་ལས། བཅོམ་ལྡན་འདས། དེ་ནས་ཁྱིམ་བདག་དེ་བྲོ་འཚལ་བར་གྱུར་ཏེ། བདག་འགུམ་པའི་དུས་ལ་བབ་པར་མཐོང་ནས། དེ་མི་དབུལ་པོ་དེ་ལ་ འདི་སྐད་དུ། ཀྱེ་མི་ཁྱོད་ཚུར་ཤོག། ངའི་འགྲོན་བུ་དང༌། གསེར་དང༌། ནོར་དང༌། འབྲུ་དང༌། མཛོད་དང༌། བང་བ་ཤིན་ཏུ་མང་དུ་ཡོད་པ་འདི་དག་ང་ནི་ནད་ཚབས་ཆེ་ན། དེ་ དག་སུ་ལ་སྦྱིན་པ་དང༌། སུ་ལས་བླང་བ་དང༌། གང་སྦ་བར་བྱ་བ་དེ་དག་ཐམས་ཅད་ཁྱོད་ཀྱིས་ཤེས་པར་འདོད་དོ། །དེ་ཅིའི་ཕྱིར་ཞེ་ན། ཇི་ལྟར་ང་ནོར་འདིའི་བདག་པོར་གྱུར་པ་ ལྟར་ཁྱེད་ཀྱང་དེ་བཞིན་གྱིས། ངའི་འདི་ལས་ཁྱོད་ཀྱིས་ཅུང་ཟད་ཀྱང་ཆུད་མ་གཟན་ཞིག་ཅེས་མཆི་ནས། བཅོམ་ལྡན་འདས། དེ་ནས་མི་དབུལ་པོ་དེ་རྣམ་གྲངས་འདིས་ ཁྱིམ་བདག་དེའི་འགྲོན་བུ་དང༌། གསེར་དང༌། ནོར་དང༌། འབྲུ་དང༌། མཛོད་དང༌། བང་བ་རབ་ཏུ་མང་བ་དེ་དག་མཆིས་པར་འཚལ་ལ། བདག་ཉིད་དེ་ལ་རེ་བ་མ་མཆིས་ ཤིང༑ ཐ་ན་ཕྱེ་ཕུལ་གང་གི་རིན་ཐང་ཙམ་ཡང་དེ་ལ་ཅུང་ཟད་ཀྱང་སློང་བ་མ་མཆིས་ཏེ། རྩྭའི་སྤྱིལ་བོ་དེ་ན་གནས་ཤིང་མཆིས་ནས། དབུལ་པོའི་བསམ་པ་དེ་ཉིད་རྗེས་སུ་སེམས་སོ། ། བཅོམ་ལྡན་འདས། དེ་ནི་ཁྱིམ་བདག་དེས་བུ་དེ་སྲུང་ནུས་ཤིང་ཡོངས་སུ་སྨིན་པར་འཚལ། སེམས་བཏུལ་ཏེ་རྒྱ་ཆེན་པོར་སེམས་ཤིང༌། སྔོན་དབུལ་པོ་བསམས་ན་ཉམ་ང་ཞིང་ངོ་ཚ་ སྟེ་སྨོད་པར་འཚལ་ནས་བདག་འགུམ་པའི་དུས་ལ་བབ་པ་དང་མི་དབུལ་པོ་དེ་དགུག་སྟེ། ཉེ་དུ་འདུས་པ་མང་པོ་དང་སྤྲད་ནས། རྒྱལ་པོ་དང༌། བློན་པོ་དང༌། གྲོང་རྡལ་གྱི་མི་དང༌། ཡུལ་ མིའི་མདུན་དུ་མངོན་སུམ་དུ་འདི་སྐད་ཅེས་བསྒྲགས་སོ། །ཁྱོད་ཉོན་ཅིག །འདི་ནི་ཁོ་བོའི་སྙིང་གི་བུ་ཁོ་བོས་བསྐྱེད་པ་སྟེ། གྲོང་ཁྱེར་གྱི་མིང་འདི་ཞེས་བྱ་བ་ནས་འཁྱམས་ནས་ལོ་ལྔ་བཅུ་ ལོན་ཏེ། འདིའི་མིང་འདི་ཞེས་བྱ། ཁོ་བོའི་མིང་ནི་འདི་ཞེས་བྱ་སྟེ། ཁོ་བོ་འདི་འཚོལ་བའི་ཕྱིར་གྲོང་ཁྱེར་དེ་ནས་འདིར་འོངས་སོ། །འདི་ནི་ཁོ་བོའི་བུ། ཁོ་བོ་ནི་འདིའི་ཕ་སྟེ། བདག་ གི་སྤྱོད་པ་དང༌། ལོངས་སྤྱོད་ཅི་ཡོད་པ་ཐམས་ཅད་ནི་མི་འདི་ལ་བྱིན་ནོ། །ཁོ་བོའི་ནང་གི་ནོར་ཅུང་ཟད་ཅི་ཡོད་པ་དེ་ཀུན་ཀྱང་འདི་ཉིད་ཤེས་སོ་ཞེས་བགྱིས་པ་དང༌། བཅོམ་ལྡན་འདས། དེ་ནས་མི་དབུལ་པོ་དེས་དེའི་ཚེ་འདི་ལྟ་བུའི་སྒྲ་ཐོས་ནས། ངོ་མཚར་དང་རྨད་དུ་གྱུར་ཏེ། འདི་ལྟར་བདག་གིས་འཕྲལ་ལ་འགྲོན་བུ་དང༌། གསེར་དང༌། ནོར་དང༌། འབྲུ་དང༌། མཛོད་ ༄༅། །དང༌། བང་བ་མང་པོ་རྙེད་དོ་སྙམ་དུ་སེམས་སོ། །བཅོམ་ལྡན་འདས། དེ་བཞིན་དུ་བདག་ཅག་ནི་དེ་བཞིན་གཤེགས་པའི་སྲས་དང་འདྲ་སྟེ། དེ་བཞིན་གཤེགས་ པ་བདག་ཅག་ལ་ཁྱེད་ནི་ངའི་བུའོ་ཞེས་བཀའ་སྩལ་ཏེ། ཁྱིམ་བདག་དེ་ཇི་ལྟ་བ་བཞིན་ནོ། །བཅོམ་ལྡན་འདས། བདག་ཅག་ནི་སྡུག་བསྔལ་གསུམ་གྱིས་གཟིར་ཏོ། །གསུམ་གང་ཞེ་ ན༑ འདི་ལྟ་སྟེ། སྡུག་བསྔལ་གྱི་སྡུག་བསྔལ་ཉིད་དང༌། འདུ་བྱེད་ཀྱི་སྡུག་བསྔལ་ཉིད་དང༌། འགྱུར་བའི་སྡུག་བསྔལ་ཉིད་དོ། །འཁོར་བ་ན་དམན་པ་ལ་མོས་པས་བདག་ཅག་ བཅོམ་ལྡན་འདས་ཆོས་ངན་པ་མང་པོ་ཕྱག་དར་གྱི་ཕུང་པོ་དང་འདྲ་བ་ལ་སེམས་སུ་སྩལ་ཏེ། དེ་རྣམས་ལ་བདག་ཅག་ཞུགས་ནས་འབད་ཅིང་བཙལ་ནས། བཅོམ་ལྡན་འདས། བདག་ ཅག་མྱ་ངན་ལས་འདའ་བ་ཙམ་ཞིག་གདུགས་ཀྱི་གླ་བཞིན་དུ་འཚོལ་ཞིང་གསོལ་ཏེ། བཅོམ་ལྡན་འདས། བདག་ཅག་ནི་མྱ་ངན་ལས་འདའ་བ་དེ་རྙེད་པས་ན་དགའ་བར་གྱུར་ཏེ། དེ་ བཞིན་གཤེགས་པ་ལས་ཆོས་འདི་དག་ལ་ཞུགས་ཏེ། འབད་ཅིང་བཙལ་བས། མང་པོ་རྙེད་པར་སེམས་སོ། །དེ་བཞིན་གཤེགས་པས་བདག་ཅག་དམན་པ་ལ་མོས་པར་མཁྱེན་ ཏོ༑ ༑དེའི་སླད་དུ་བཅོམ་ལྡན་འདས་ཀྱིས་བདག་ཅག་ཡལ་བར་བཞག་སྟེ། འདི་ལྟར་དེ་བཞིན་གཤེགས་པའི་ཡེ་ཤེས་ཀྱི་མཛོད་དུ་ཁྱད་འགྱུར་རོ་ཞེས་མ་བཏོལ་མ་བསྟན་ཏེ། བཅོམ་ལྡན་འདས། ཐབས་མཁས་པས་བདག་ཅག་དེ་བཞིན་གཤེགས་པའི་ཡེ་ཤེས་ཀྱི་མཛོད་ལ་བགོ་སྐལ་སྤྱོད་པར་བཀོད་ན། བཅོམ་ལྡན་འདས། བདག་ཅག་དེ་ལ་རེ་བ་མ་མཆིས་ ཏེ༑ འདི་ལྟར་བདག་ཅག་གིས་དེ་བཞིན་གཤེགས་པ་ལས་མྱ་ངན་ལས་འདའ་བ་གདུགས་ཀྱི་གླ་ཐང་བཞིན་དུ་བགྱིས་པ་ནི། དེ་ཉིད་བདག་ཅག་གིས་མང་དུ་བགྱིས་པར་འཚལ་ཏོ། ། བཅོམ་ལྡན་འདས། བདག་ཅག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ། དེ་བཞིན་གཤེགས་པའི་ཡེ་ཤེས་ལས་བརྩམས་ནས་ཆོས་རྒྱ་ཆེན་པོ་བཤད་དེ་།དེ་ བཞིན་གཤེགས་པའི་ཡེ་ཤེས་འབྱེད་ཅིང་སྟོན་ཏེ། ཉེ་བར་སྟོན་དུ་ལགས་ཀྱང༌། བཅོམ་ལྡན་འདས། བདག་ཅག་དེ་ལ་རེ་བ་མ་མཆིས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་ པ་ཐབས་མཁས་པས་བདག་ཅག་གི་མོས་པ་རབ་ཏུ་མཁྱེན་ན་དེ་བདག་ཅག་གིས་ནི་མ་འཚལ། མ་རྟོགས་སོ། །བཅོམ་ལྡན་འདས་ཀྱིས་འདི་ལྟར་བདག་ཅག་ལ་བཅོམ་ལྡན་འདས་ ཀྱི་སྲས་ཡང་དག་པ་ཞེས་གསུངས་ཏེ། བཅོམ་ལྡན་འདས་ཀྱིས་བདག་ཅག་དེ་བཞིན་གཤེགས་པའི་ཡེ་ཤེས་ཀྱི་བགོ་སྐལ་ལ་སྤྱོད་པར་དྲན་པར་མཛད་དོ། །དེ་ཅིའི་སླད་དུ་ཞེ་ན། འདི་ལྟར་བདག་ཅག་དེ་བཞིན་གཤེགས་པའི་སྲས་ཡང་དག་པ་ལགས་མོད་ཀྱི། བདག་ཅག་དམན་པ་ལ་མོས་པའི་སླད་དུའོ། །གལ་ཏེ་བཅོམ་ལྡན་འདས་ཀྱིས་བདག་ཅག་གི་ ༄༅། །མོས་པའི་སྟོབས་གཟིགས་ནས། །བཅོམ་ལྡན་འདས་ཀྱིས་བདག་ཅག་ལ་བྱང་ཆུབ་སེམས་དཔའ་ཞེས་བགྱི་བར་དཀའ་སྩལ་ཏོ། །བཅོམ་ལྡན་འདས་ཀྱིས་ བདག་ཅག་བགྱི་བ་རྣམས་གཉིས་བགྱིད་དུ་སྩལ་ཏེ། དེ་དག་བྱང་ཆུབ་སེམས་དཔའ་རྣམས་ཀྱི་མདུན་དུ་ནི་དམན་པ་ལ་མོས་པ་ཞེས་བཀའ་སྩལ་ཏེ། དེ་དག་ནི་སངས་རྒྱས་ཀྱི་བྱང་ཆུབ་ རྒྱ་ཆེན་པོ་ལ་ཡང་དག་པར་བཙུད་དོ། །བཅོམ་ལྡན་འདས་ཀྱིས་བདག་ཅག་གི་མོས་པའི་སྟོབས་མཁྱེན་ནས། དེ་སྐད་ཅེས་བཀའ་སྩལ་ཏོ། །བཅོམ་ལྡན་འདས། རྣམ་གྲངས་འདིས་ བདག་ཅག་འདི་སྐད་ཅེས་བདག་ཅག་རེ་བ་མ་མཆིས། མི་འཚལ། མ་བསླངས། མ་བཙལ། མ་བསམས། མ་གསོལ་བར་འཕྲལ་ལ། དེ་བཞིན་གཤེགས་ པའི་སྲས་འདི་དག་བཞིན་དུ་ཐམས་ཅད་མཁྱེན་པའི་རིན་པོ་ཆེ་ཐོབ་བོ་ཞེས་མཆིའོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །དེ་ ལྟར་འཕྲལ་ལ་དེ་རིང་བདག་ཅག་གིས། །འདྲེན་པའི་གསུང་སྒྲ་ཡིད་དུ་འོང་བ་ཐོས། །གསུང་ཐོས་པས་ན་བདག་ཅག་དགའ་བ་ཐོབ། །བདག་ཅག་ངོ་མཚར་དེ་བཞིན་རྨད་དུ་གྱུར། ། བདེ་ཆེན་ཆེན་པོ་མཆོག་གི་ཕུར་མོ[?] རྣམས། །བསམས་པ་མ་མཆིས་རྣམ་ཡང་མ་གསོལ་པར། །དེ་དག་ཡུད་ཙམ་གྱིས་ནི་དེང་རྙེད་དེ། །བདག་ཅག་ཐམས་ཅད་དེང་ཐོས་ངོ་མཚར་ གྱུར༑ ༑ཇི་ལྟར་བྱིས་པར་གྱུར་པའི་མི་ཞིག་ནི། །སྐྱེ་བོ་བྱིས་པ་རྣམས་ཀྱིས་བསླུས་ནས་སུ། །ཕ་ཡི་གན་ནས་གར་ཏེ་མཆིས་པ་ནི། །གཞན་གྱི་ཡུལ་ཡང་ཤིན་ཏུ་རིང་བར་མཆིས། ། བདག་གི་བུ་ནི་འཁྱམས་པར་བཙལ་བས་ན། །དེ་ཚེ་ཕ་ཡང་དེ་ཡི་མྱ་ངན་བགྱིད། །དགུང་ལོ་ལྔ་བཅུ་ལས་ཀྱང་མི་ཉུང་བར། །མྱ་ངན་དེ་བགྱིད་ཕྱོགས་དང་ཕྱོགས་མཚམས་འཚོལ། །དེ་ ནི་དེ་ལྟར་བུ་དེ་འཚོལ་བ་ན། །གྲོང་ཁྱེར་ཆེན་པོ་གཞན་དུ་མཆིས་པ་དང༌། །འདོད་པའི་ཡོན་ཏན་ལྔ་དང་ལྡན་པར་ནི། །ཁྱིམ་རྣམས་བརྩིགས་ཤིང་དེ་ན་རབ་ཏུ་གནས། །དེ་ལ་གསེར་ རྣམས་དང་ནི་འགྲོན་བུ་དང༌། །ནོར་དང་འབྲུ་དང་མན་ཤེས་བྱི་རུ་དང༌། །གླང་པོ་ཆེ་དང་རྟ་དང་དཔུང་བུ་ཆུང༌། །དེ་བཞིན་ཕྱུགས་དང་བ་ལང་ལུག་མང་སྟེ། །འཕེལ་ཞིང་འདུ་བ་དང་ནི་ དེ་བཞིན་ཞིང༌། །བྲན་ཕོ་བྲན་མོ་མངག་པའི་ཚོགས་མང་སྟེ། །སྲོག་ཆགས་བྱེ་བ་སྟོང་གིས་རི་མོ་བགྱིས། །རྒྱལ་པོ་ལ་ཡང་དེ་ནི་རྟག་ཏུ་གནང༌། །གྲོང་ན་སུ་གནས་པ་ཡི་གྲོང་པ་དང༌། ། གྲོང་ཁྱེར་པས་ནི་དེ་ལ་ཐལ་སྦྱར་གྱུར། །དགོས་པ་མང་ལ་ཤིན་ཏུ་དབང་བས་ན། །ཚོང་པ་མང་པོ་དེ་ཡི་དྲུང་དུ་མཆི། །དེ་ལྟར་མི་དེ་འབྱོར་པར་ལྡན་པ་སྟེ། །རྒས་ཤིང་འཁོགས་ལ་ ཤིན་ཏུ་གཏུགས་པར་འགྱུར། །དེ་ནི་བུ་ཡི་མྱ་ངན་བགྱིད་སེམས་པས། །ཉིན་དང་མཚན་མོ་རྟག་ཏུ་བས་པར་གྱུར། །བདག་གི་བུ་ནི་དེ་འདྲ་བློ་གྲོས་ལོག །དེ་ནི་འཁྱམས་ནས་ལོ་ཡང་ ༄༅། །ལྔ་བཅུ་ལོན། །འདི་ལྟར་བདག་ལ་མཛོད་ནི་མང་དུ་ཡོད། །བདག་ནི་འཆི་བའི་དུས་ལ་ཉེ་བར་གྱུར། །དེའི་བུ་བྱིས་པ་དེ་ནི་དེ་ཡི་ཚེ། །དབུལ་ཞིང་རྟག་ཏུ་ཕོངས་ པར་གྱུར་པས་ན། །ཟས་དང་དེ་བཞིན་གོས་རྣམས་འཚོལ་པའི་ཕྱིར། །གྲོང་དང་གྲོང་རྣམས་སུ་ཡང་རྗེས་སུ་རྒྱུ། །ཅུང་ཟད་ཙམ་ནི་རེས་འགའ་འཚོལ་བ་ན། །ཅུང་ཟད་རྙེད་ཅིང་ རེས་འགའ་ཅི་མི་རྙེད། །བྱིས་པ་དེ་ནི་གཞན་གྱི་ཁྱིམ་ན་རྐེ། །གཡན་པ་དང་ནི་རྐོམ་པོས་ལུས་ཀྱང་ཡོག། གང་ན་ཕ་མཆིས་གྲོང་ཁྱེར་དེར་མཆི་ཞིང༌། །འཚལ་མ་དང་ནི་རད་པ་ འཚོལ་བ་ན། །རང་གི་ཕ་ཡི་ཁྱིམ་དེ་གལ་བར། །དེ་ནི་མཐར་གྱིས་དེ་རུ་ཕྱིན་པར་གྱུར། །སྐྱེས་བུ་དེ་ནི་ཕྱུག་ཅིང་ནོར་མང་སྟེ། །སྒོ་ན་སེང་གེའི་ཁྲི་ཡི་སྟེང་ན་མཆིས། །སྲོག་ཆགས་ བརྒྱ་ཕྲག་དུ་མས་འཁོར་བར་བསྐོར། །དེ་སྟེང་པར་སྣང་ལ་ཡང་བླ་རེ་བྲེས། །སྐྱེ་བོ་ཡིད་བརྟན་དེ་ཡི་གམ་ཡོ་འཁོད། །ལ་ལ་དག་ནི་ནོར་དང་འགྲོན་བུ་འགྲང༌། །ལ་ལ་དག་ནི་དེ་ན་ སྤྲིང་བ་འདྲི། །ལ་ལ་སྐྱེད་དང་སྤོགས་སུ་རབ་ཏུ་གཏོང༌། །ཁྱིམ་བདག་དེ་ཁྱིམ་རབ་ཏུ་བརྒྱན་པ་དག། །དབུལ་པོ་དེས་ནི་ཁྱིམ་དེ་མཐོང་ནས་སུ། །བདག་ནི་དེང་འདིར་ག་ལས་ཅི་ [?] འོངས། །འདི་ནི་རྒྱལ་པོའམ་ཡང་ན་བློན་པོ་ཡིན། །འདི་ནི་ཉེས་པར་གྱུར་ན་མི་རུང་ཞེས། །ཚམ་གཟུངས་སུ་ཡང་བཟུང་བར་མི་འགྱུར་གྲང༌། །མི་དེ་དེ་སྙམ་སེམས་ཤིང་ འབྲོས་བགྱིད་ལ། །དབུལ་པོ་རྣམས་ཀྱི་ཤུལ་སྲང་ཀུན་ཏུ་འདྲི། །ཕྱུག་པོ་དེས་ནི་བདག་གི་བུ་མཐོང་ནས། །སེང་གེའི་ཁྲི་ལ་མཆིས་ཤིང་དགའ་བར་གྱུར། །དེས་ནི་དེ་ཡི་གན་དུ་འཛིན་པར་ བཏང༌། །སྐྱེས་བུ་དབུལ་པོ་དེ་ནི་ཁྲིད་དེ་ཤོག། དེ་ཡི་མོད་ལ་མི་དེ་བཟུང་བ་དང༌། །བཟུང་མ་ཐག་ཏུ་དེ་ནི་བརྒྱལ་བར་གྱུར། །གོར་མ་ཆག་པར་བདག་གསོད་ཉེ་བར་ལྷགས། །བདག་ལ་ཟས་ དང་གོས་ཀྱིས་ཅི་ཞིག་བྱ། །ནོར་མང་མཁས་པ་དེ་ཡིས་དེ་མཐོང་ནས། །བྱིས་པ་ལོག་ཡིད་འདི་ནི་དམན་ལ་མོས། །ང་ཡི་འབྱོར་པ་འདི་ལ་དད་མི་བྱེད། །འདི་ནི་བདག་གི་ཕ་ཞེས་ཡིད་ མི་ཆེས། །དེ་ཡིས་སེམས་ཅན་དམན་ཞིང་གོས་ངན་ལ། །ཡོན་པོ་ཞར་བ་ཐང་འགྲུམས་གྱུར་པ་ཡི། །དེ་འདྲའི་མི་དག་ཁ་ཅིག་བཏང་ནས་སུ། །ལས་བྱེད་པ་ཡི་མི་དེ་རབ་ཚོལ་ཅིག། ང་ ཡི་འདི་ན་ཕྱག་དར་རུལ་པ་དང༌། གཅིན་དང་བཤང་བས་མ་རུང་གྱུར་པ་རྣམས། །དེ་དག་འཕྱག་པའི་ཕྱིར་ནི་ལས་བྱོས་ཤོག། ཁྱོད་ནི་གླ་ཡང་ཉིས་གྱུར་སྦྱིན་པར་བྱ། །མི་དེས་འདི་ལྟ་ བུ་ཡི་སྒྲ་ཐོས་ནས། །འོངས་ཏེ་ས་ཕྱོགས་དེ་དག་དེ་ཡིས་ཕྱགས། །ཁྱིམ་གྱི་དྲུང་དུ་རྩ་ཡི་སྤྱི་བོ་ན། །དེར་ཡང་གནས་བཅས་ནས་ནི་འདུག་པར་བྱེད། །སྐར་ཁུང་སྣང་བ་ནས་ནི་རྟག་པར་ ཡང༑ ༑ཕྱུག་པོ་དེས་ཀྱང་སྐྱེས་བུ་དེ་བལྟས་ཏེ། །དམན་ལ་མོས་པ་བདག་གི་བུ་འདི་ནི། །ཕྱག་དར་ཕུང་པོ་རྣམས་ནི་འཕྱག་པར་བྱེད། །དེ་ནི་བབས་ཏེ་སྐོན་བུ་ཐོགས་བགྱིད་ཅིང༌། །དྲི་ ༄༅། །མ་ཅན་གྱི་གོས་དག་འཚལ་ནས་སུ། །དེ་ཡི་གན་དུ་ཉེ་བར་མཆིས་ནས་ནི། །ལས་རྣམས་མི་བྱེད་ཅེས་ནི་རབ་ཏུ་སྤྱོས། །ཁྱོད་ལས་གླ་ཡང་ཉིས་གྱུར་སྦྱིན་པར་ བྱ༑ ༑དེ་བཞིན་རྐང་པ་བསྐུ་བའང་ཉིས་གྱུར་དུ། །ལན་ཚྭ་ཅན་གྱི་ཟས་ནི་ཁྱོད་ལ་སྦྱིན། །རས་དང་ཚོད་མ་དག་ཀྱང་སྦྱིན་པར་བྱ། །དེ་ཚེ་དེ་ལྟར་དེ་ལྟ་སྤྱོས་ནས་ནི། །མཁས་པས་དེ་ ནི་སླར་ཡང་རབ་ཏུ་དཀྲིས། །ཁྱོད་ཀྱིས་འདིར་ནི་ཤིན་ཏུ་ལས་བྱོས་ཤིག །ང་ཡི་བུ་ཡིན་ཡང་དག་ཐེ་ཚོམ་མེད། །དེ་ནི་བགས་ཀྱིས་བགས་ཀྱིས་ཁྱིམ་བཞག་སྟེ། །ལོ་གྲངས་ཉི་ཤུ་ བར་དུ་ཚང་བར་ཡང༌། །མི་དེ་ལས་རྣམས་ལེགས་པར་བགྱིད་དུ་སྩལ། །བགས་ཀྱིས་མི་དེ་རྣམ་པར་ཡིད་ཕབ་ནས། །དེས་ནི་ཤེལ་དང་འགྲོན་བུ་མུ་ཏིག་ཀྱང༌། །ཁྱིམ་དེ་ཉིད་དུ་ རབ་ཏུ་སྦེད་པར་བྱེད། །དེ་ནི་ཐམས་ཅད་བགྲང་ཞིང་བརྩི་བར་བགྱིད། །དོན་དང་ནོར་རྣམས་ཀུན་ལའང་དེ་སེམས་སོ། །དེ་ཡི་མཆིས་བྲང་གི་ནི་སླད་རོལ་ན། །བྱིས་པ་དེ་ནི་ གཅིག་པུ་སྤྱིལ་བུར་གནས། །བདག་ལ་ལོངས་སྤྱོད་འདི་དག་ཡོད་མེད་ཅེས། །དབུལ་པོའི་བསམ་པ་དག་ནི་རྗེས་སུ་སེམས། །བུ་དེ་འདུ་ཤེས་རྒྱ་ཆེར་གྱུར་པ་ནི། །དེ་ཡི་ རྣམ་པ་དེ་འདྲ་དེས་འཚལ་ནས། །མཛའ་བོ་གཉེན་བཤེས་མང་པོ་ཀུན་བསགས་ཏེ། ནོར་འདི་ཐམས་ཅད་འདི་ལ་གཏད་པར་བྱ། །དེ་ཡིས་རྒྱལ་པོའི་གྲོང་དང་གྲོང་ཁྱེར་ མི༑ ༑ཚོང་པ་མང་པོ་དག་ཀྱང་བསགས་ནས་སུ། །འཁོར་གྱི་དབུས་སུ་འདི་སྐད་ཚིག་སྨྲས་པ། །བདག་གི་བུ[?] འདི་སྟོར་ནས་ཡུན་རིང་སྟེ། །སྔར་ནི་ལོ་གྲངས་ལྔ་བཅུ་ཚང་བར་ལོན། །གཞན་ ཡང་བདག་གིས་མཐོང་ནས་ཉི་ཤུ་ལགས། །གྲོང་ཁྱེར་འདི་ཞེས་བགྱི་བར་བདག་གིས་སྟོར། །དེ་འཚོལ་སླད་དུ་བདག་ནི་འདིར་མཆིས་སོ། །བདག་གི་ནོར་འདི་ཀུན་གྱི་བདག་པོ་སྟེ། །འདི་ དག་ཐམས་ཅད་མ་ལུས་འདི་ལ་གཏད། །ཕ་ཡི་ནོར་གྱིས་དགོས་དགུར་སྤྱད་པར་གྱིས། །བྲན་བཟའ་འདི་དག་ཀུན་ཀྱང་རབ་ཏུ་སྦྱིན། །དམན་ལ་མོས་དང་ཕ་ཡི་ཡོན་ཏན་དང༌། །སྔོན་གྱི་ དབུལ་ཞིང་ཕོངས་པ་དྲན་ནས་ནི། །མི་དེ་ཤིན་ཏུ་ངོ་མཚར་ཐོབ་པར་གྱུར། །བྲན་བཟའ་རྙེད་པས་དེ་རིང་ཤིན་ཏུ་བདེ། །དེ་བཞིན་བདག་ཅག་རྣམ་པར་འདྲེན་པ་ཡིས། །དམན་པ་ལ་ནི་མོས་ པར་མཁྱེན་པས་ན། །སངས་རྒྱས་སུ་ཡང་འགྱུར་ཞེས་མ་བསྟན་ཏེ། །ཁྱོད་ནི་ཉན་ཐོས་ང་ཡི་བུ་ཡིན་ནོ། །བདག་ལ་འཇིག་རྟེན་མགོན་པོས་བཀའ་སྩལ་པ། །མཆོག་རབ་བྱང་ཆུབ་ལ་ནི་ སུ་ཞུགས་རྣམས། །ལམ་གང་བསྒོམས་པས་སངས་རྒྱས་འགྱུར་བ་ཡི། །བླ་མེད་ལམ་ནི་དེ་ལ་འོད་སྲུང་ཤོད། །དེ་ཕྱིར་བདེ་བར་གཤེགས་པས་བཀའ་སྩལ་ནས། །བྱང་ཆུབ་སེམས་ དཔའ་སྟོབས་ཆེན་མང་པོ་ལ། །རྒྱུ་དང་དཔེ་ཡང་བྱེ་བ་ཁྲག་ཁྲིག་གིས། །བདག་ཅག་གིས་ཀྱང་བླ་མེད་ལམ་བསྟན་ཏོ། །རྒྱལ་བའི་སྲས་ཀྱིས་བདག་ལས་ཐོས་ནས་ནི། །བྱང་ཆུབ་མཆོག་ ༄༅། །ལམ་དེ་ནི་གོམས་པར་བགྱིད། །སངས་རྒྱས་སུ་ནི་འཇིག་རྟེན་འདི་འགྱུར་ཞེས། །དེ་མ་ཐག་ཏུ་དེ་དག་ལུང་ཡང་བསྟན། །ཆོས་མཛོད་འདི་ནི་ཡང་དག་སྲུང་བགྱིད་ ཅིང༑ ༑རྒྱལ་པའི་སྲས་རྣམས་ལ་ནི་བསྟན་པ་ཡང༌། །ཇི་ལྟར་མི་དེའི་ཡིད་བརྟན་དེ་བཞིན་དུ། །རྣམ་པར་འདྲེན་པ་དེ་འདྲའི་ལས་བགྱིའོ། །དབུལ་པོ་དག་གི་བསམ་པ་རྣམ་པར་སེམས། སངས་རྒྱས་མཛོད་འདི་རྣམས་ནི་རབ་སྦྱིན་ཞིང༌། །རྒྱལ་བའི་ཡེ་ཤེས་རབ་ཏུ་བཤད་མོད་ཀྱི། །རྒྱལ་བའི་ཡེ་ཤེས་འདི་ནི་དོན་མི་གཉེར། །བདག་ཉིད་མྱ་ངན་ལས་ཀྱང་འདའ་བར་ རྟོག༑ ཡེ་ཤེས་འདི་ཙམ་ལས་ནི་གཞན་མི་འབྱུང༌། །སངས་རྒྱས་རྣམས་ཀྱི་ཞིང་གི་བཀོད་ཐོས་ནས། །བདག་ཅག་ནམ་ཡང་དགའ་བར་མ་གྱུར་ཏོ། །ཆོས་འདི་ཐམས་ཅད་ ཟག་མེད་ཞི་བ་སྟེ། འགོག་པ་དང་ནི་སྐྱེ་བ་རྣམ་པར་སྤངས། །འདི་ནི་ཆོས་རྣམས་གང་ཡང་མ་མཆིས་ཤེས། །དེ་ལྟར་བསམས་ན་དད་པར་མ་གྱུར་ཏོ། །སངས་རྒྱས་ཡེ་ ཤེས་བླ་ན་མེད་པ་ལ། །བདག་ཅག་ཡུན་རིང་དུས་ནས་མི་རེ་ཞིང༌། །བདག་ཅག་ནམ་ཡང་འདི་ལ་མ་སྨོན་ཏེ། །རྒྱལ་བས་འདི་ནི་དམ་པའི་མཐར་གསུངས་སོ། །མྱ་ངན་འདས་ པའི་མཐར་ཐུག་ལུས་འདི་ལ། །སྟོང་པ་ཉིད་དུ་ཡུན་རིང་ཡོངས་སུ་བསྒོམས། །ཁམས་གསུམ་སྡུག་བསྔལ་གཟིར་ལས་ཡོངས་སུ་ཐར། །བདག་ཅག་གིས་ནི་རྒྱལ་བའི་ བསྟན་པ་བགྱིས། །རྒྱལ་བའི་སྲས་ལ་གང་ཚེ་རབ་བསྟན་ཏོ། །བྱང་ཆུབ་མཆོག་ལ་ཡང་དག་སུ་ཞུགས་པ། །དེ་དག་ལ་ནི་ཆོས་གང་ཅི་བཤད་པ། །དེ་ལ་བདག་ཅག་ནམ་ཡང་རོ་ མ་མཆིས། །བདག་ཅག་འཇིག་རྟེན་སློབ་དཔོན་རང་བྱུང་གིས། །དུས་ལ་བཞེས་པ་མཛད་ནས་ཡལ་བར་བཞག །བདག་ཅག་རྣམས་ཀྱི་དད་པ་རབ་བརྟགས་ནས། །ཡང་དག་ལྡེམ་ དགོངས་ཚིག་དོན་དེ་མ་བཤད། །དེ་ཡི་ཐབས་མཁས་པ་ནི་ཇི་ལྟ་བུར། །དུས་སུ་ནོར་མང་པོ་ཡི་སྐྱེས་བུ་ལྟར། །དམན་པར་དད་པ་བུ་དེ་ལེགས་པར་བཏུལ། །བཏུལ་ནས་དེ་ལ་ནོར་ ཡང་རབ་ཏུ་སྩལ། །ཐབས་ལ་མཁས་པས་རབ་ཏུ་སྟོན་མཛད་དེ། །དམན་ལ་མོས་པའི་སྲས་རྣམས་འདུལ་མཛད་ཅིང༌། །བཏུལ་ནས་སངས་རྒྱས་ཡེ་ཤེས་འདི་སྩོལ་བ། །འཇིག་རྟེན་ མགོན་པོ་ཤིན་ཏུ་དཀའ་བ་མཛད། །སངས་རྒྱས་བསྟན་པ་འདི་ལ་བདག་ཅག་རྣམས། །ཐོག་མའི་འབྲས་བུ་ཟག་མེད་དམ་པ་ཐོབ། །ཇི་ལྟར་དབུལ་པོས་ནོར་རྣམས་རྙེད་པ་བཞིན། ། དེ་རིང་འཕྲལ་ལ་བདག་ཅག་ངོ་མཚར་ཐོབ། །བདག་ཅག་ཚུལ་ཁྲིམས་གང་རྣམས་ཡུན་རིང་དུ། །འཇིག་རྟེན་མཁྱེན་པའི་བསྟན་ལ་ལེགས་གསུངས་པ། །མགོན་པོ་སྔོན་ཆད་ཚུལ་ ཁྲིམས་སྤྱད་པ་ཡི། །དེ་ཡི་འབྲས་བུ་དེ་རིང་བདག་ཅག་ཐོབ། །ཚངས་པར་སྤྱོད་པ་མཆོག་རབ་རྣམ་དག་གང༌། །འདྲེན་པའི་བསྟན་ལ་ཤིན་ཏུ་བསྙེན་བགྱིད་པ། །དེ་ཡི་འབྲས་བུ་ཞིག་ ༄༅། །ཁྱད་པར་ཅན། །རྒྱ་ཆེན་ཟག་པ་མ་མཆིས་དེ་རིང་ཐོབ། །མགོན་པོ་དེ་རིང་བདག་ཅག་སྒྲོགས་གྱུར་ཏེ། །བྱང་ཆུབ་དམ་པ་ཡང་དག་བསྒྲག་པར་བགྱི། །བྱང་ཆུབ་པ་ཡི་ སྒྲ་ཡང་རབ་ཏུ་བརྗོད། །དེ་བས་བདག་ཅག་སྒྲོགས་པ་མི་བཟད་འདྲ། །མགོན་པོ་དེང་ནི་བདག་ཅག་འོས་གྱུར་ཏེ། །ལྷ་དང་བཅས་པའི་འཇིག་རྟེན་བདུད་དང་བཅས། །ཚངས་པར་ བཅས་པའི་སེམས་ཅན་ཐམས་ཅད་ཀྱིས། །བདག་ཅག་ཤིན་ཏུ་མཆོད་པར་འོས་པ་ལགས། །མི་ཡི་འཇིག་རྟེན་འདི་ན་གང་དཀའ་བ། །དཀའ་བ་འདི་འདྲ་བདག་ཅག་མཛད་པས་ན། ། བསྐལ་པ་བྱེ་བ་མང་པོར་འབད་པས་ཀྱང༌། །ཁྱོད་ལ་ལན་གློན་རྡོ་ཐོགས་ག་ལ་མཆིས། །མགོ་དང་ལག་པ་དང་ནི་རྐང་པས་ཀྱང༌། །ལན་དུ་ཕན་པར་བགྱི་བ་ཤིན་ཏུ་དཀའ། །གངྒཱའི་ བྱེ་སྙེད་བསྐལ་པ་རྫོགས་པར་ཡང༌། །མགོ་དང་ཕྲག་ལ་གང་གིས་ཁྱེར་བ་དང༌། །བཅའ་དང་བཟའ་དང་སྐོམ་དང་གོས་རྣམས་དང༌། །མལ་ཆ་སྟན་དང་སྟེང་གཡོགས་ཆེན་པོ་ཕུལ།། ཙནྡན་དག་ལས་གཙུག་ལག་ཁང་བགྱིས་ཏེ། །བཅོས་བུའི་རས་ཕྲུགས་རབ་ཏུ་བཏིང་བ་དང༌། །ན་བའི་གསོས་སྨན་རྣམ་པ་མང་པོ་ཡང༌། །བདེ་བར་གཤེགས་པ་མཆོད་ཕྱིར་ རྟག་ཕུལ་ཏེ། །གངྒཱའི་བྱེ་སྙེད་བསྐལ་པར་ཕུལ་ཡང་ནི། །དེ་ལ་ནམ་ཡང་ལན་གློན་རྔོ་མི་ཐོགས། །མཚུངས་མེད་མཐུ་མངའ་ཆེ་བའི་ཆོས་ལྡན་པ། །བཟོད་པའི་སྟོབས་གནས་རྫུ་ འཕྲུལ་ཆེ་རྣམས་དང༌། །སངས་རྒྱས་རྒྱལ་ཆེན་ཟག་མེད་རྒྱལ་བ་ནི། །བྱིས་པ་དག་གི་འདི་འདྲ་ཤིན་ཏུ་བཟོད། །དེ་བཞིན་རྟག་ཏུ་རྗེས་སུ་མཐུན་འཇུག་ཅིང༌། །མཚན་མ་སྤྱོད་པ་རྣམས་ལ་ ཆོས་སྟོན་ཏེ། །ཆོས་ཀྱི་དབང་ཕྱུག་འཇིག་རྟེན་ཀུན་ལ་དབང༌། །དབང་ཕྱུག་ཆེན་པོ་འཇིག་རྟེན་འདྲེན་དབང་པོ། །སེམས་ཅན་གནས་རྣམས་རབ་ཏུ་མཁྱེན་པས་ན། །སོ་སོར་བསྒྲུབ་པ་རྣམ་ པ་མང་པོར་སྟོན། །དེ་དག་མོས་པ་སྣ་ཚོགས་མཁྱེན་ནས་སུ། །བརྒྱ་ཕྲག་སྟོང་གིས་རབ་ཏུ་ཆོས་འཆད་དོ། །སེམས་ཅན་ཐམས་ཅད་དང་ནི་གང་ཟག་གི །དེ་བཞིན་གཤེགས་ཀྱི་སྤྱོད་པ་ རབ་མཁྱེན་པས། །བྱང་ཆུབ་དམ་པ་འདི་ནི་རབ་སྟོན་ཅིང༌། །ཆོས་རྣམས་རྣམ་པ་མང་པོ་ཤིན་ཏུ་གསུང༌། །དམ་པའི་ཆོས་པདྨ་དཀར་པོ་ལས། མོས་པའི་ལེའུ་ཞེས་བྱ་སྟེ་བཞི་པའོ།། །། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་དང༌། གཞན་ཡང་གནས་བརྟན་ཉན་ཐོས་ཆེན་པོ་དེ་དག་ལ་བཀའ་སྩལ་པ། འོད་སྲུང༌། ལེགས་སོ། །ལེགས་སོ། །ཁྱེད་ ཀྱིས་དེ་བཞིན་གཤེགས་པའི་ཡང་དག་པའི་ཡོན་ཏན་བསྔགས་པ་བརྗོད་པ་ནི། འོད་སྲུང༌། ཁྱེད་ལེགས་སོ། །འོད་སྲུང༌། དེ་དག་ནི་དེ་བཞིན་གཤེགས་པའི་ཡོན་ཏན་ནོ། །དེ་བས་གཞན་ ཡང་མང་ཞིང་ཚད་མེད་གྲངས་མེད་དེ། བསྐལ་པ་དཔག་ཏུ་མེད་པར་བཤད་ཀྱང༌། དེ་དག་གི་མཐའ་རྟོགས་པར་སླ་བ་མ་ཡིན་ནོ། །འོད་སྲུང༌། དེ་བཞིན་གཤེགས་པ་ནི་ཆོས་ཀྱི་རྗེ།། ༄༅། །ཆོས་ཐམས་ཅད་ཀྱི་རྒྱལ་པོ་གཙོ་བོ་མངའ་བ་སྟེ། འོད་སྲུང༌། དེ་བཞིན་གཤེགས་པས་ཆོས་གང་དུ་བཞག་པ་དང༌། ཇི་ལྟར་བཞག་པ་དེ་དག་དེ་བཞིན་དུ་ འགྱུར་རོ། །འོད་སྲུང༌། དེ་བཞིན་གཤེགས་པ་ཆོས་ཐམས་ཅད་རིག་པར་འཇོག་སྟེ། དེ་བཞིན་གཤེགས་པའི་ཡེ་ཤེས་ཀྱིས་འཇོག་གོ །ཇི་ལྟར་ཆོས་དེ་དག་ཐམས་ཅད་མཁྱེན་ པའི་ས་ཉིད་དུ་འབྱུང་བར་དེ་ལྟར་འཇོག་གོ །ཆོས་ཐམས་ཅད་ཀྱི་དོན་གྱི་རིམ་པ་ལ་དེ་བཞིན་གཤེགས་པ་གཟིགས་ཏེ། ཆོས་ཐམས་ཅད་ལ་ལྷག་པའི་བསམ་པ་ཐོབ། ཆོས་ ཐམས་ཅད་ངེས་པར་གཏན་ལ་དབབ་པ་ལ་ཐབས་མཁས་པའི་ཡེ་ཤེས་དམ་པ་མཆོག་ཐོབ་སྟེ། འོད་སྲུང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་ནི་ཐམས་ཅད་མཁྱེན་པའི་ཡེ་ཤེས་སྟོན་པའོ། །ཐམས་ཅད་མཁྱེན་པའི་ཡེ་ཤེས་ལ་འཛུད་པའོ། །ཐམས་ཅད་མཁྱེན་པའི་ཡེ་ཤེས་ལ་འཇོག་པའོ། །འོད་སྲུང༌། འདི་ལྟ་སྟེ། དཔེར་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན། རྩྭ་དང༌། ཤིང་གེལ་པ་དང༌། སྨན་དང༌། ནགས་ཚལ་ཁ་དོག་སྣ་ཚོགས་རྣམ་པ་དུ་མ་དང༌། སྨན་མང་པོ་མིང་ཐ་དད་དུ་བཏགས་པ་ས་དང༌། རི་དང་རི་སུལ་དག་ནས་ཇི་སྙེད་སྐྱེས་པ། སྤྲིན་ཆུ་ཆེན་པོས་རྒྱས་པ་འདུས་ནས། ཐམས་ཅད་དང་ལྡན་པའི་སྟོང་གསུམ་གྱི་སྟོང་ ཆེན་པོའི་འཇིག་རྟེན་གྱི་ཁམས་ཁེབས་པར་བྱས་སོ། །ཀུན་ཁེབས་པར་བྱས་ནས་དུས་གཅིག་ཏུ་ཆར་མཉམ་པར་ཕབ་སྟེ། འོད་སྲུང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ ཁམས་འདིའི་རྩྭ་དང༌། ཤིང་གེལ་པ་དང༌། སྨན་དང༌། ནགས་ཚལ་དེ་ན། སྡོང་བུ་དང༌། ཡལ་ག་དང༌། ལོ་མ་དང༌། འདབ་མ་གཞོན་ཞིང་འཇམ་པ་ཅི་ཡོད་པ་དང༌། སྡོང་བུ་དང༌། ཡལ་ག་དང༌། ལོ་མ་དང༌། འདབ་མ་བར་མ་ཅི་ཡོད་པ་དང༌། སྡོང་བུ་དང༌། ཡལ་ག་དང༌། ལོ་མ་དང༌། འདབ་མ་ཆེན་པོ་དང༌། རྩྭ་དང༌། ཤིང་གེལ་པ་དང༌། སྨན་པ་དང༌། ནགས་ཚལ་ གྱི་སྡོང་པོ་དང༌། སྡོང་པོ་ཆེན་པོ་ཅི་ཡོད་པ་དེ་དག་ཐམས་ཅད། སྤྲིན་ཆེན་པོ་ལས་ཆར་བབ་པ་ལ་མཐུ་དང་ཡུལ་ཇི་ལྟ་བ་བཞིན་དུ་ཆུའི་ཁམས་སོ་སོར་འཐུངས་ཏེ། དེའང་སྤྲིན་ཆེན་པོ་ གཅིག་ལས་བྱུང་བ། རོ་གཅིག་པའི་ཆུ་མང་པོས་ས་བོན་ཇི་ལྟ་བར་རྗེས་སུ་མཐུན་པར་སྐྱེས་ཏེ། འཕེལ་ཞིང་རྒྱས་པར་འགྱུར་རོ། །དེ་བཞིན་དུ་མེ་ཏོག་དང༌། འབྲས་བུ་འབྱུང་སྟེ། དེ་དག་ཀྱང་སོ་སོའི་མིང་ཐོབ་བོ། །ས་གཅིག་ལ་གནས་པའི་སྨན་མང་པོ་ས་བོན་མང་པོ་དེ་ཐམས་ཅད་ཆུ་རོ་གཅིག་པས་བངས་པ་དེ་བཞིན་དུ། འོད་སྲུང༌། དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ངོ༌། །ཇི་ལྟར་སྤྲིན་ཆེན་པོ་འདུས་པ་དེ་བཞིན་དུ་དེ་བཞིན་གཤེགས་པ་བྱུང་ནས། ལྷ་དང༌། མི་དང༌། ལྷ་ ༄༅། །མ་ཡིན་དུ་བཅས་པ་ཐམས་ཅད་དང་ལྡན་པའི་འཇིག་རྟེན་ལ་དབྱངས་ཀྱིས་གོ་བར་མཛད་དོ། །དེ་ལ་འདི་ལྟ་སྟེ། དཔེར་ན། སྤྲིན་ཆེན་པོ་དེས་ཐམས་ཅད་དང་ ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁེབས་པ་དེ་བཞིན་དུ། འོད་སྲུང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ ཀྱིས་ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱི་མདུན་དུ་སྒྲ་འདི་སྐད་འབྱིན་ཅིང་དབྱངས་ཀྱིས་ཐོས་པར་བྱེད་དེ། ལྷ་དང་མི་དག །ང་ནི་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏེ། བརྒལ་ནས་བསྒྲལ་ལོ། །གྲོལ་ནས་དགྲོལ་ལོ། །དབུགས་ཕྱིན་ནས་དབུགས་དབྱུང་ངོ༌། །ཡོངས་སུ་མྱ་ངན་ལས་འདས་ ནས་ཡོངས་སུ་མྱ་ངན་ལས་འདའོ། །ང་ནི་ད་ལྟར་གྱི་འཇིག་རྟེན་དང༌། འཇིག་རྟེན་གཞན་ཡང་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཐམས་ ཅད་མཁྱེན་ཅིང་ཐམས་ཅད་གཟིགས་སོ། །ལྷ་དང་མི་དག། ཆོས་ཉན་པའི་ཕྱིར་ངའི་དྲུང་དུ་ཤོག་ཅིག །ང་ནི་ལམ་སྟོན་པའོ། །ལམ་འཆད་པའོ། །ལམ་རིག་པའོ། །ལམ་ མཁས་པའོ། །འོད་སྲུང༌། དེ་ལྟར་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་དེ་བཞིན་གཤེགས་པ་ལ་ཆོས་ཉན་ཞིང་ཉེ་བར་ལྷགས་པའི་སེམས་ཅན་དེ་དག་གི་དབང་པོ་ དང༑ བརྩོན་འགྲུས་ཀྱི་རིམ་པ་དེ་བཞིན་གཤེགས་པས་མཁྱེན་ནས། དེ་དག་ལ་ཆོས་ཀྱི་རྣམ་གྲངས་ཉེ་བར་སྦྱོར་རོ། །དེ་དག་ལ་ཆོས་ཀྱི་གཏམ་མང་པོ་སྣ་ཚོགས་དགའ་བ། ཚིམ་པ། མགུ་བར་བྱེད་པ། ཕན་པ་དང་བདེ་བར་འགྱུར་བའི་གཏམ་གང་གིས་སེམས་ཅན་ཚེ་འདི་ལ་བདེ་བར་འགྱུར་ཞིང་འཆི་བའི་དུས་བྱས་ནས་ཀྱང་བདེ་འགྲོར་སྐྱེ་ལ། གར་སྐྱེས་པ་དེར་ འདོད་པ་མང་པོ་སྤྱོད་ཀྱང་ཆོས་ཉན་ཞིང༌། ཆོས་དེ་ཐོས་ནས་སྒྲིབ་པ་མེད་པར་འགྱུར་ཏེ། མཐར་གྱིས་ཐམས་ཅད་མཁྱེན་པའི་ཆོས་ལ་སྟོབས་ཇི་ལྟ་བ་དང༌། ཡུལ་ཇི་ལྟ་བ་དང༌། མཐུ་ཇི་ལྟ་བ་བཞིན་དུ་འཇུག་པ་འགྱུར་བ་གསུང་ངོ༌། །འོད་སྲུང༌། འདི་ལྟ་སྟེ། དཔེར་ན། སྤྲིན་ཆེན་པོ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁེབས་ནས་ཆར་ མཉམ་པར་ཕབ་སྟེ། རྩྭ་དང༌། ཤིང་གེལ་པ་དང༌། སྨན་དང༌། ནགས་ཚལ་ཐམས་ཅད་ཆུས་ངོམས་ཏེ། སྟོབས་ཇི་ལྟ་བ་དང༌། ཡུལ་ཇི་ལྟ་བ་དང༌། མཐུ་ཇི་ལྟ་བ་བཞིན་དུ་རྩྭ་ དང༌། ཤིང་གེལ་པ་དང༌། སྨན་དང༌། ནགས་ཚལ་ལ་སོགས་བས་ཆུ་འཐུང་སྟེ། བདག་བདག་གི་སོ་སོའི་རིགས་དང་ཚད་དུ་སྐྱེའོ། །འོད་སྲུང༌། དེ་བཞིན་དུ་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་བཤད་པ། ཆོས་ཐམས་ཅད་རོ་གཅིག་པ་སྟེ། དེ་ནི་རྣམ་པར་གྲོལ་བ་དང༌། འདོད་ཆགས་དང་བྲལ་བ་དང༌། འགྲོག་ ༄༅། །པ་དང༌། ཐམས་ཅད་མཁྱེན་པའི་ཡེ་ཤེས་ཀྱི་མཐར་རོ་གཅིག་གོ །འོད་སྲུང༌། དེ་བཞིན་དུ་དེ་བཞིན་གཤེགས་པས་ཆོས་བཤད་པ་དེ་ལ་སེམས་ ཅན་གང་ཉན་པ་དང༌། འཛིན་པ་དང༌། འཛུད་པ་དེ་དག་བདག་གིས་བདག་ཤེས་པའམ་རིག་པའམ་རྟོགས་པ་མེད་དོ། །དེ་ཅིའི་ཕྱིར་ཞེ་ན། འོད་སྲུང༌། དེ་བཞིན་གཤེགས་ པས་འདི་ལྟར་སེམས་ཅན་དེ་དག་དེ་བཞིན་དུ་མཁྱེན་ཏེ། དེ་དག་སུ་ཡིན་པ་དང༌། དེ་དག་ཅི་ལྟ་བུ་ཡིན་པ་དང༌། དེ་དག་ཅི་འདྲ་བ་དང༌། དེ་དག་ཅི་ལ་སེམས་པ་དང༌། དེ་དག་ ཇི་ལྟར་སེམས་པ་དང༌། དེ་དག་ཅིས་སེམས་པ་དང༌། དེ་དག་ཅི་ལ་སྒོམ་པ་དང༌། དེ་དག་ཇི་ལྟར་སྒོམ་པ་དང༌། དེ་དག་ཅིས་སྒོམ་པ་དང༌། དེ་དག་ཅི་འཐོབ་པ་དང༌། དེ་དག་ ཇི་ལྟར་འཐོབ་པ་དང༌། དེ་དག་ཅིས་འཐོབ་པ་དེ་དག་ཐམས་ཅད་ནི། འོད་སྲུང༌། །དེ་བཞིན་གཤེགས་པ་ལ་མངོན་སུམ་སྟེ། མངོན་སུམ་དུ་གཟིགས། ཇི་ལྟ་བ་བཞིན་དུ་ གཟིགས་པའི་ཕྱིར་རོ། །འོད་སྲུང༌། འདི་ལྟ་སྟེ། རྣམ་པར་གྲོལ་བའི་རོ་དང༌། མྱ་ངན་ལས་འདས་པའི་མཐར་ཐུག་པ་དང༌། རྟག་པར་ཡོངས་སུ་མྱ་ངན་ལས་འདས་པ་དང༌། ས་གཅིག་པ་དང༌། ནམ་མཁའི་སྤྱོད་ཡུལ་དུ་ངས་ཆོས་རྣམས་རོ་གཅིག་པར་རྟོགས་ཀྱང༌། སེམས་ཅན་རྣམས་ཀྱི་དད་པ་བསྲུང་བའི་ཕྱིར། ས་དེ་དང་དེ་དག་ན་གནས་པའི་ སེམས་ཅན་རྩྭ་དང༌། ཤིང་གེལ་བ་དང༌། སྨན་དང༌། ནགས་ཚལ་རབ་འབྲིང་ཐ་མ་དེ་དག་ལྟ་བུ་ལ་ཐམས་ཅད་མཁྱེན་པའི་ཡེ་ཤེས་གློ་བུར་དུ་མི་སྟོན་ཏོ། །འོད་སྲུང༌། དེ་བཞིན་གཤེགས་ པས་ལྡེམ་པོར་དགོངས་ཏེ་བཤད་པ་ལ་ཁྱེད་འཇུག་མི་ནུས་པས་ཁྱེད་ངོ་མཚར་དུ་གྱུར་ཏོ། །དེ་ཅིའི་ཕྱིར་ཞེ་ན། འོད་སྲུང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་རྣམས་ཀྱིས་དགོངས་ཏེ་བཤད་པ་ནི་ཤེས་པར་དཀའ་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དེའི་དོན་རྒྱས་པར་སྟོན་ཅིང༌། དེའི་ཚེ་ཚིགས་སུ་བཅད་པ་འདི་དག་ བཀའ་སྩལ་ཏོ། །ཆོས་རྒྱལ་སྲིད་པ་འཇོམས་མཛད་པ། །ང་ནི་འཇིག་རྟེན་བྱུང་ནས་སུ། །མོས་པ་རྣམ་པར་མཁྱེན་གྱུར་ནས། །སེམས་ཅན་རྣམས་ལ་ཆོས་འཆད་དོ། །དཔའ་བོ་ཆེན་ པོ་བློ་བརྟན་པས། །བཤད་པ་རྣམས་ནི་ཡུན་རིང་སྲུང༌། །གསང་ཆེན་དག་ཀྱང་འཛིན་མཛད་ཅིང༌། །སྲོག་ཆགས་རྣམས་ལ་མི་སྟོན་ཏོ། །ཡེ་ཤེས་དེ་ནི་ཤེས་དགའ་སྟེ། །བྱིས་པ་ རྣམས་ཀྱིས་འཕྲ་ལ་ཐོས། །མི་ཤེས་པས་ན་ཐེ་ཚོམ་གྱུར། །དེ་ལས་ཉམས་ཤིང་དེ་དག་འཁྱམ། །དེ་ཡི་སྟོབས་ཀྱང་ཅི་འདྲ་དང༌། །ཡུལ་ཡང་ཇི་བཞིན་བཤད་པར་བྱ། །ཐ་དད་པ་ ཡི་དོན་རྣམས་ཀྱིས། །ལྟ་བ་དག་ནི་དྲང་པོར་བྱ། །འོད་སྲུང་སྤྲིན་ནི་ཇི་ལྟ་བུར། །འདུས་ནས་འཇིག་རྟེན་ཁམས་རྣམས་སུ། །ས་རྣམས་རབ་ཏུ་ཡོག་པར་ནི། །ཐམས་ཅད་དུ་ཡང་ཁེབས་ ༄༅། །པར་གྱུར། །དེ་ནི་རབ་ཏུ་ཆུས་རྒྱས་ཏེ། །སྤྲིན་ཆེན་གློག་གི་ཕྲེང་བར་བཅས། །སྐད་ཀྱིས་ཤིན་ཏུ་སྒྲ་འབྱིན་ཅིང༌། །ལུས་ཅན་རྣམས་ལ་དགའ་བར་བྱེད། །ཉི་ མའི་འོད་ནི་བསྒྲིབས་པས་ན། །དཀྱིལ་འཁོར་དག་ཀྱང་བསིལ་བར་བྱས། །ལག་གིས་སླེབས་པར་འདུག་ནས་སུ། །ཐམས་ཅད་དུ་ནི་ཆར་ཡང་འབེབས། །དེ་ནི་སྙོམས་པར་འབེབས་ པ་ཡང༌། །ཆུ་ཡི་ཕུང་པོ་མི་ཆུང་བར། །ཀུན་ཏུ་བབ་པར་གྱུར་པས་ན། །ས་འདི་རྣམས་ཀྱང་ངོམས་པར་བྱས། །གང་དག་ས་འདི་རྣམས་ལས་ནི། །སྐྱེ་བར་གྱུར་པ་སྨན་རྣམས་ དང༌། །རྩྭ་དང་གེལ་བ་ནགས་ཚལ་དང༌། །སྡོང་པོ་དང་ནི་སྡོང་ཆེན་དང༌། །འབྲུ་ཡི་རྣམ་པ་མང་པོ་དང༌། །སྔོན་པོར་གྱུར་པ་དག་ཀྱང་རུང༌། །རི་དང་རི་སུལ་ནགས་རྣམས་ སམ༑ ༑སྨན་ལྗོངས་ནས་ནི་གང་འཁྲུངས་པ། །སྤྲིན་གྱིས་ཐམས་ཅད་ངོམས་པར་བྱེད། །རྩྭ་དང་གེལ་པ་ནགས་ཚལ་དང༌། །གདུངས་པའི་ས་ཡང་ངོམས་པར་བྱས། །སྨན་ རྣམས་ལ་ཡང་ཀུན་ཏུ་ཕབ། །ཆུ་དེ་རྣམས་ཀྱང་རོ་གཅིག་སྟེ། །སྤྲིན་ལས་བབ་པ་འདི་ན་གནས། །ཇི་ལྟར་སྟོབས་དང་ཡུལ་གཞན་དུ། །རྩྭ་དང་གེལ་པ་དེ་འཐུང་ངོ༌། །སྡོང་པོ་ དང་ནི་སྡོང་པོ་ཆེན་པོ་རྣམས། །ཆུང་ངུ་བར་མ་ན་ཚོད་ཇི་བཞིན་དུ། །ཇི་ལྟར་སྟོབས་བཞིན་ཐམས་ཅད་ཆུ་འཐུང་སྟེ། །འཐུངས་ནས་ཇི་ལྟར་འདོད་པ་བཞིན་དུ་སྐྱེ། །སྤྲིན་ལས་ ཆར་པ་བབ་པས་རྩི་ཆེན་རྣམས། །སྡོང་བུ་སྦུ་གུ་ཤུན་པ་ཇི་ལྟར་བར། །ཡལ་ག་གྱེས་དང་འདབ་མ་ཇི་བཞིན་དུ། །འབྲས་བུ་མེ་ཏོག་རྣམས་ཀྱང་དེ་བཞིན་འཕེལ། །ཆར་པ་རོ་གཅིག་པ་ ཡང་བབ་པས་ན། །ཇི་ལྟའི་སྟོབས་དང་ཡུལ་ནི་ཅི་འདྲ་བར། །གང་གིས་ས་བོན་དག་ནི་ཅི་འདྲ་ལས། །དེ་དག་རང་རང་ལས་ནི་སྐྱེ་བ་འབྱིན། །འོད་སྲུང་དེ་བཞིན་སངས་རྒྱས་འཇིག་རྟེན་ འདིར༑ ༑འཇིག་རྟེན་ཆར་འཛིན་སྤྲིན་དང་འདྲ་བར་འབྱུང༌། །འཇིག་རྟེན་མགོན་པོ་བྱུང་ནས་ཆད་པར་འགྱུར། །སྲོག་ཆགས་ལ་ནི་ཡང་དག་སྤྱོད་པར་སྟོན། །ལྷར་བཅས་འཇིག་རྟེན་ དག་གིས་མདུན་བདར་ནས། །དེ་ལྟར་དྲང་སྲོང་ཆེན་པོ་རབ་སྒྲོགས་ཏེ། །དེ་ནི་རྐང་གཉིས་མཆོག་རྒྱལ་དེ་བཞིན་གཤེགས། །སྤྲིན་ལྟ་བུར་ནི་འཇིག་རྟེན་འདིར་བྱུང་སྟེ། །རབ་ཏུ་ལུས་ བསྐམས་སྲིད་པ་གསུམ་ཆགས་པ། །སེམས་ཅན་ཐམས་ཅད་ངས་ནི་ངོམས་པར་བྱས། །སྡུག་བསྔལ་དག་གིས་བསྐམས་པ་བདེ་ལ་དགོད། །ངས་ནི་འདོད་དང་མྱ་ངན་འདས་པའང་ སྦྱིན༑ ༑ལྷ་དང་མི་ཚོགས་རྣམས་ཀྱང་ང་ལ་ཉོན། །ང་ལ་ལྟ་བའི་ཕྱིར་ནི་ཉེ་བར་ཤོག །དེ་བཞིན་གཤེགས་པ་བཅོམ་ལྡན་ཟིལ་མི་ནོན། །བསྒྲལ་བའི་ཕྱིར་ནི་འཇིག་རྟེན་འདིར་ སྐྱེས་ཏེ༑ ༑རྣམ་དག་ཤིན་ཏུ་མཐོང་བར་བྱ་བའི་ཆོས། །སྲོག་ཆགས་བྱེ་བ་སྟོང་ལ་བཤད་པར་བྱ། །དེ་ཡི་མཉམ་པ་ཉིད་དང་ཡང་དག་གཅིག །དེ་ནི་རྣམ་གྲོལ་མྱ་ངན་འདའ་བ་ ༄༅། །ཡིན༑ ༑རྟག་ཏུ་བྱང་ཆུབ་ཕྱིར་ནི་ཞུགས་པར་ཡང༌། །དབྱངས་གཅིག་གིས་ནི་རབ་ཏུ་ཆོས་བཤད་དེ། །དེ་ནི་མཉམ་པ་ཉིད་དེ་མི་མཉམ་མེད། །འདོད་ ཆགས་མེད་ཅིང་ཞེ་སྡང་དག་ཀྱང་མེད། །ནམ་ཡང་ང་ལ་རྗེས་སུ་ཆགས་པ་མེད། །སུ་ལའང་ང་ནི་མཛའ་ཞིང་སྡང་བ་མེད། །སེམས་ཅན་གཅིག་བཞིན་འགྲོ་བ་གཞན་ལ་སྟེ། ། ལུས་ཅན་རྣམས་ལ་ཆོས་ནི་སྙོམས་པར་འཆད། །ལས་གཞན་མི་བྱེད་རབ་ཏུ་ཆོས་འཆད་དེ། །འགྲོ་བ་དང་ནི་འགྲེང་དང་འདུག་པ་དང༌། །མལ་དུ་ཞུགས་ཏེ་ཉལ་བའི་ཚེ་ན་ ཡང༌། །ནམ་ཡང་ང་ལ་སྐྱོ་བར་གྱུར་པ་མེད། །སྤྲིན་གྱིས་ཆར་པ་མཉམ་པར་ཕབ་པ་བཞིན། །འཇིག་རྟེན་འདི་རྣམས་ཐམས་ཅད་ངོམས་པར་བྱ། །འཕགས་པ་དང་ནི་མ་རབས་ མཚུངས་པའི་བློ། །ཚུལ་ཁྲིམས་ལྡན་དང་ཚུལ་ཁྲིམས་འཆལ་བ་དང༌། །དེ་བཞིན་མི་གང་སྤྱོད་པ་ཉམས་པ་དང༌། །སྤྱོད་དང་ཆོ་ག་རྣམས་སུ་ལྡན་པ་དང༌། །ལྟ་ལ་གནས་ ཤིང་ལྟ་བ་གང་ཉམས་དང༌། །ཡང་དག་གང་ལྟ་ལྟ་བ་རྣམ་དག་དང༌། །བློ་གྲོས་ངན་པ་དང་ནི་དམ་པའང་རུང༌། །དབང་པོ་བརྟུལ་པོ་རྣམས་ལ་ཆོས་བཤད་དེ། །སྐྱོ་བ་ཐམས་ ཅད་རབ་ཏུ་རྣམ་སྤངས་ནས། །ངས་ནི་ཡང་དག་ཆོས་ཀྱི་ཆར་པ་ཕབ། །ཇི་ལྟའི་སྟོབས་བཞིན་ང་ལ་མཉན་ནས་ནི། །ལྷ་མི་ནང་ན་ཡིད་དུ་འོང་བ་དང༌། །འཁོར་ལོས་བསྒྱུར་ དབང་རྒྱ་བྱིན་ཚངས་པ་ཡི། །རྣམ་པ་མང་པོའི་ས་ལ་གནས་པར་འགྱུར། །ཕྲན་ཚེགས་ཕྲན་ཚེགས་སྨན་རྣམས་འདི་དག་དང༌། །འཇིག་རྟེན་འདི་ན་གང་ཆུང་འདི་དག་དང༌། །བར་མ་ ཆེན་པོ་དམན་རྣམས་གཞན་དག་ཀྱང༌། །དེ་དག་ཐམས་ཅད་རབ་ཏུ་བཤད་ཀྱི་ཉོན། །ཟག་པ་མེད་པའི་ཆོས་རྣམས་རབ་ཤེས་ནས། །མི་དག་མྱ་ངན་འདས་ཐོབ་གནས་པ་དང༌། ། དྲུག་མངོན་ཤེས་ཤིང་གསུམ་རིག་གང་འགྱུར་པ། །དེ་ནི་བར་མའི་སྨན་ཞེས་བྱ་བ་ཡིན། །གང་དག་རི་སུལ་རྣམས་ན་གནས་པ་དང༌། །མི་གང་རང་རྒྱལ་བྱང་ཆུབ་འདོད་བྱེད་པ། །དེ་ འདྲ་འབྲིང་དུ་རྣམ་པར་དག་པའི་བློ། །དེ་ནི་བར་མའི་སྨན་ཞེས་བྱ་བ་ཡིན། །བརྩོན་འགྲུས་དང་ནི་བསམ་གཏན་རྣམས་བསྟེན་ཅིང༌། །ལྷ་དང་མི་མགོན་སངས་རྒྱས་འགྱུར་བྱ་ཞེས། །སྐྱེས་བུ་ ཁྱུ་མཆོག་ཏུ་ཡང་གང་སྨོན་པ། །དེ་ནི་སྨན་གྱི་མཆོག་ཅེས་བྱ་བ་ཡིན། །བདེ་བར་གཤེགས་པའི་སྲས་པོ་གང་བཞུགས་པ། །བྱམས་པ་བསྙེན་ཅིང་འདི་ལ་ཞི་བ་སྤྱོད། །སྐྱེས་བུ་ཁྱུ་མཆོག་ ཏུ་ཡང་ཐེ་ཚོམ་མེད། །དེ་འདྲ་འདི་ན་སྡོང་པོ་ཡིན་ཞེས་བྱ། །ཕྱིར་མི་ལྡོག་པའི་འཁོར་ལོ་རབ་བསྐོར་ཞིང༌། །རྫུ་འཕྲུལ་སྟོབས་ལ་གནས་པ་གང་དཔའ་བ། །སྲོག་ཆགས་བྱེ་བ་མང་པོ་རབ་ ཏུ་འགྲོལ། །དེ་ནི་འདི་ན་སྡོང་པོ་ཆེན་པོ་ཡིན། །རྒྱལ་བས་ཆོས་དེ་མཉམ་པར་བཤད་པ་ནི། །སྤྲིན་གྱིས་ཆར་པ་མཉམ་པ་ཕབ་པ་བཞིན། །སྣ་ཚོགས་མངོན་ཤེས་འདི་འདྲ་འདི་དག་ཀྱང༌།། ༄༅། །ས་སྟེང་སྨན་རྣམས་ཇི་ལྟར་གནས་པ་བཞིན། །དེ་ལྟ་བུ་ཡི་དཔེ་དག་བསྟན་པ་ཡིས། །དེ་བཞིན་གཤེགས་པའི་ཐབས་རྣམས་ཤེས་པར་གྱིས། །ཇི་ལྟར་དེ་ཡིས་ ཆོས་གཅིག་བཤད་པ་ཡང༌། །སྣ་ཚོགས་ཚིག་ནི་ཆར་གྱི་ཐིགས་པ་བཞིན། །ངས་ཀྱང་ཆོས་ཀྱི་ཆར་པ་ཕབ་པས་ན། །འཇིག་རྟེན་འདི་དག་ཐམས་ཅད་ངོམས་པར་གྱུར། །རབ་ཏུ་བཤད་ པ་རོ་གཅིག་ཆོས་ལ་ཡང༌། །ཅི་འདྲ་སྟོབས་བཞིན་རྗེས་སུ་རྣམ་པར་སེམས། །ཇི་ལྟར་རྩྭ་དང་གེལ་པའི་ཤིང་རྣམས་དང༌། །བར་མའི་སྨན་རྣམས་ལ་ཡང་ཇི་ལྟ་བར། །སྡོང་པོ་དང་ནི་ སྡོང་པོ་ཆེན་པོ་དེ། །ཆར་བབ་ཕྱོགས་བཅུ་ཀུན་ནའང་མཛེས་པ་བཞིན། །འདི་ནི་རྟག་ཏུ་འཇིག་རྟེན་ཕན་པའི་ཆོས། །འཇིག་རྟེན་འདི་ཀུན་ཆོས་ཀྱིས་ངོམས་པར་བྱེད། །འཇིག་རྟེན་ ཐམས་ཅད་ངོམས་པར་བྱས་ནས་ནི། །སྨན་རྣམས་ལ་ནི་མེ་ཏོག་རབ་ཏུ་འབྱུང༌། །བར་མའི་སྨན་རྣམས་རྣམ་པར་སྐྱེ་བ་ནི། །དགྲ་བཅོམ་གང་དག་ཟག་པ་ཟད་གནས་དང༌། །ནགས་ ཚལ་ཁྲོད་ནས་རང་སངས་རྒྱས་རྣམས་ལ། །ལེགས་པར་གསུངས་པའི་ཆོས་རྣམས་བསྟན་པར་བྱ། །བྱང་ཆུབ་སེམས་དཔའ་མང་པོ་དྲན་ལྡན་བརྟན། །བྱང་ཆུབ་མཆོག་འདི་ཡོངས་ སུ་འཚོལ་བ་ན། །ཁམས་གསུམ་ཐམས་ཅད་རྟོགས་པར་ཁོང་ཆུད་པ། །དེ་དག་རྟག་ཏུ་སྐྱེ་བ་སྡོང་པོ་བཞིན། །རྫུ་འཕྲུལ་གང་ལྡན་བསམ་གཏན་བཞིར་ཞུགས་པ། །གང་དག་སྟོང་ པ་ཉིད་ཐོས་དགའ་སྐྱེད་ཅིང༌། །འོད་ཟེར་སྟོང་ཕྲག་རབ་ཏུ་གཏོང་བ་རྣམས། །དེ་དག་སྡོང་པོ་ཆེན་པོ་ཞེས་ཀྱང་བྱ། །འོད་སྲུང་འདི་ལྟ་བུ་ཡི་ཆོས་བཤད་པ། །སྤྲིན་གྱིས་ཆར་པ་མཉམ་པར་ཕབ་ པ་བཞིན། །མི་ཡི་མེ་ཏོག་མང་པོ་མཐའ་ཡས་པ། །དེས་ནི་མང་པོའི་སྨན་བཞིན་རྣམ་པར་སྐྱེད། །རང་གིས་རིག་པའི་ཆོས་རྣམས་རབ་ཏུ་བཤད། །སངས་རྒྱས་བྱང་ཆུབ་དག་ནི་དུས་སུ་ བསྟན། །དེ་ནི་འཇིག་རྟེན་འདྲེན་པ་ཐམས་ཅད་དང༌། །ང་ཡི་ཐབས་ལ་མཁས་པ་མཆོག་ཡིན་ནོ། །འདི་ལྟར་དོན་དམ་ཡང་དག་ངས་བཤད་པ། །ཉན་ཐོས་དེ་ཀུན་མྱ་ངན་མ་འདས་ཏེ། །དེ་ དག་བྱང་ཆུབ་སྤྱོད་པ་རབ་སྤྱད་ནས། །ཉན་ཐོས་འདི་དག་ཐམས་ཅད་སངས་རྒྱས་འགྱུར། །འོད་སྲུང༌། གཞན་ཡང་དེ་བཞིན་གཤེགས་པ་ནི་སེམས་ཅན་འདུལ་བར་མཚུངས་ཏེ། མི་ མཚུངས་པ་མེད་དོ། །འོད་སྲུང༌། འདི་ལྟ་སྟེ། དཔེར་ན། ཉི་མ་དང༌། ཟླ་བའི་འོད་ཀྱིས་འཇིག་རྟེན་ཐམས་ཅད་དུ་སྣང་བར་བྱེད་པ་ནི། དགེ་བ་བྱེད་པ་དང༌། མི་དགེ་བ་བྱེད་བ་དང༌། སྟེང་ ན་གནས་པ་དང༌། འོག་ན་གནས་པ་དང༌། དྲི་ཞིམ་པ་དང༌། དྲི་མི་ཞིམ་པ་ཐམས་ཅད་ལ་མཉམ་པར་འོད་ཀྱིས་ཕོག་སྟེ། མི་མཉམ་པ་མ་ཡིན་ནོ། །འོད་སྲུང༌། དེ་བཞིན་དུ་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཐམས་ཅད་མཁྱེན་པའི་ཡེ་ཤེས་ཀྱི་སེམས་ཀྱི་འོད་ཀྱིས་འགྲོ་བ་ལྔར་སྐྱེས་པའི་སེམས་ཅན་ཐམས་ཅད་ཇི་ལྟར་ ༄༅། །མོས་པ་བཞིན་དུ་ཐེག་པ་ཆེན་པོ་པ་དང༌། རང་སངས་རྒྱས་ཀྱི་ཐེག་པ་ཅན་དང༌། ཉན་ཐོས་ཀྱི་ཐེག་པ་ཅན་རྣམས་ལ་ཆོས་བཤད་པ་དེ་མཉམ་པར་འཇུག་ལ། དེ་ བཞིན་གཤེགས་པའི་ཡེ་ཤེས་ནི་སྐྱེ་བའང་མེད། འབྲི་བའང་མེད་དེ། འདི་ལྟར་བསོད་ནམས་དང༌། ཡེ་ཤེས་ཡང་དག་པར་སྡུད་པར་འགྱུར་རོ།། །།དམ་པའི་ ཆོས་པདྨ་དཀར་པོ། བམ་པོ་ལྔ་པ། འོད་སྲུང༌། ཐེག་པ་ནི་གསུམ་དུ་མེད་དེ། སེམས་ཅན་སྤྱོད་པ་ཐ་དད་པས། དེའི་ཕྱིར་གྱི་ན་ཐེག་པ་གསུམ་དུ་བཏགས་པར་ཟད་དོ། །དེ་སྐད་ ཅེས་བཀའ་སྩལ་ནས། བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། གལ་ཏེ་ཐེག་པ་གསུམ་དུ་མ་མཆིས་ན། ཅིའི་ སླད་དུ་ད་ལྟར་བྱུང་བའི་དུས་ན་ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔར་གདགས་པས་རབ་ཏུ་གདགས། དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་ ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང༌། འདི་ལྟ་སྟེ། དཔེར་ན། རྫ་མཁན་གྱིས་འཇིམ་པ་མཚུངས་པ་ལ་སྣོད་བྱས་ཏེ། དེ་ལས་ཁ་ཅིག་ནི་ བུ་རམ་གྱི་སྣོད་དུ་གྱུར། ཁ་ཅིག་ནི་མར་གྱི་སྣོད། ཁ་ཅིག་ནི་ཞོ་དང་འོ་མའི་སྣོད། ཁ་ཅིག་ནི་ངན་པ་མི་གཙང་བའི་སྣོད་དུ་གྱུར། འཇིམ་པ་ལ་ཐ་དད་པ་མེད་མོད་ཀྱི། རྫས་བཅུག་པ་ ཙམ་གྱིས་སྣོད་ཐ་དད་པར་སྣང་ངོ༌། །འོད་སྲུང༌། དེ་བཞིན་དུ་ཐེག་པ་གཅིག་པུ་འདི་ཉིད་དེ། འདི་ལྟ་སྟེ། སངས་རྒྱས་ཀྱི་ཐེག་པ་སྟེ་ཐེག་པ་གཉིས་སམ་གསུམ་དུ་མེད་དོ། །དེ་སྐད་ཅེས་ བཀའ་སྩལ་ནས། བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། གལ་ཏེ་སེམས་ཅན་མོས་པ་ཐ་དད་པ་གང་དག་ཁམས་ གསུམ་ནས་བྱུང་བ་དེ་དག་གི་མྱ་ངན་ལས་འདས་པ་གཅིག་གམ། འོན་ཏེ་གཉིས་སམ་གསུམ། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང༌། ཆོས་ཐམས་ཅད་མཉམ་པ་ཉིད་དུ་ ཁོང་དུ་ཆུད་པའི་ཕྱིར། མྱ་ངན་ལས་འདའ་བས་ན་དེ་ནི་གཅིག་སྟེ། གཉིས་སུ་མེད། གསུམ་དུའང་མེད་དོ། །འོད་སྲུང༌། སྐྱེས་བུ་མཁས་པ་ཁ་ཅིག་ནི་དཔེས་བཤད་པའི་དོན་རིག་པར་ འགྱུར་ཏེ། དེའི་ཕྱིར་ཁྱོད་ལ་དཔེ་བསྟན་པར་བྱའོ། །འོད་སྲུང༌། འདི་ལྟ་སྟེ། དཔེར་ན། མི་དམུས་ལོང་ཞིག་འདི་སྐད་དུ། ཁ་དོག་བཟང་པོ་དང༌། ཁ་དོག་ངན་པའི་གཟུགས་ཀྱང་མེད། ཁ་དོག་བཟང་པོ་དང༌། ཁ་དོག་ངན་པའི་གཟུགས་མཐོང་བའང་མེད། ཉི་མ་དང་ཟླ་བའང་མེད། སྐར་མའང་མེད། གཟའ་མཐོང་བའང་མེད་དོ་ཞེས་ཟེར་རོ། །དེ་ནས་མི་གཞན་དག་ གིས་དམུས་ལོང་དེའི་མདུན་དུ་འདི་སྐད་ཅེས། ཁ་དོག་བཟང་པོ་དང་ཁ་དོག་ངན་པ་དག་ཀྱང་ཡོད། ཁ་དོག་བཟང་པོ་དང་ཁ་དོག་ངན་པའི་གཟུགས་མཐོང་བའང་ཡོད། དེ་བཞིན་དུ་ཉི་ ༄༅། །མ་དང༌། ཟླ་བ་དང༌། སྐར་མའང་ཡོད། གཟའ་ཡང་ཡོད། །གཟའ་མཐོང་བའང་ཡོད་དེ་ཞེས་སྨྲས་ན། མི་དམུས་ལོང་དེ་མི་དེ་དག་ལ་ཡིད་མི་ཆེས་ཤིང་ སྨྲས་པ་བཞིན་མི་འཛིན་ཏོ། །དེ་ནས་སྨན་པ་ནད་ཐམས་ཅད་ཤེས་པ་ལ་ལ་ཞིག་གིས་དམུས་ལོང་དེ་མཐོང་ནས་དེ་འདི་སྙམ་དུ་སེམས་ཏེ། མི་དེ་སྔོན་གྱི་སྡིག་པའི་ལས་ཀྱིས་ནད་ དུ་གྱུར་ཏེ། གང་ཅུང་ཟད་ནད་དུ་གྱུར་པ་དེ་ཐམས་ཅད་རྣམ་པ་བཞི་སྟེ། རླུང་ལས་གྱུར་པ་དང༌། མཁྲིས་པ་ལས་གྱུར་པ་དང༌། བད་ཀན་ལས་གྱུར་པ་དང༌། འདུས་པ་ལས་གྱུར་ པའོ་སྙམ་མོ། །དེ་ནས་སྨན་པས་དེའི་ནད་ཞི་བར་བྱ་བའི་ཕྱིར་ཡང་དང་ཡང་ཐབས་བསམས་ཏེ། གང་འདི་ན་སྨན་ཡོད་པ་རྣམས་ཀྱིས་ནི་ནད་དེ་ཕྱིན་པར་མི་ནུས་ཀྱི། གངས་ཀྱི་ རིའི་རྒྱལ་པོ་ལ་སྨན་སྣ་བཞི་ཡོད་དེ། བཞི་གང་ཞེ་ན། འདི་ལྟ་སྟེ། གཅིག་ཏུ་ནི་ཁ་དོག་དང་རོ་ཐམས་ཅད་ཀྱི་གནས་དང་ལྡན་པ་ཞེས་བྱ་བ་དང༌། གཉིས་སུ་ན་ནད་ཐམས་ཅད་ལས་ རབ་ཏུ་ཐར་པར་བྱེད་པ་ཞེས་བྱ་བ་དང༌། གསུམ་དུ་ན་དུག་ཐམས་ཅད་ལས་ཐར་བར་བྱེད་པ་ཞེས་བྱ་བ་དང༌། བཞིར་ན་གནས་གང་ན་འདུག་པར་བདེ་བ་སྦྱིན་པ་ཞེས་བྱ་བ་དང་དེ་བཞི་ ཡོད་དོ་སྙམ་མོ། །དེ་ནས་དམུས་ལོང་དེ་ལ་སྨན་པ་དེས་སྙིང་རྗེ་བསྐྱེད་ནས། ཐབས་གང་གིས་གངས་ཀྱི་རིའི་རྒྱལ་པོ་ལ་འགྲོ་ནུས་པ་དེ་ལྟ་བུའི་ཐབས་བསམས་ཏེ། སོང་ནས་ཡར་ ཡང་འཛེགས། མར་ཡང་བབས། །ངོས་ལའང་བཙལ་ཏོ། །དེ་ལྟར་བཙལ་ཏེ། སྨན་དེ་སྣ་བཞི་རྙེད་ནས། རྙེད་པ་དང་ཁ་ཅིག་ནི་སོས་བཅས་ཏེ་བྱིན། ཁ་ཅིག་ནི་བཏགས། ཁ་ཅིག་ནི་ཕྲད་ གཞན་དང་སྦྱར་ལ་བཙོས་ཏེ་སྦྱིན། ཁ་ཅིག་ནི་ཕྲད་རློན་པ་དང་སྦྱར་ཏེ་བྱིན། ཁ་ཅིག་ནི་ལུས་ཀྱི་གནས་ཐུར་མས་ཕུག་སྟེ་བླུགས། ཁ་ཅིག་ནི་མེས་བསྲེགས་ཏེ་བྱིན། ཁ་ཅིག་ནི་ཕྲད་ གཞན་དང་སྦྱར་ཏེ། ཟས་དང་སྐོམ་ལ་སོགས་པ་དང་བསྲེས་ཏེ་བྱིན་ནོ། །དེ་ནས་དམུས་ལོང་དེ་ཐབས་སྦྱར་བ་དེས་མིག་ཐོབ་བོ། །དེས་མིག་ཐོབ་ནས། ཕྱི་དང༌། ནང་དང༌། རིང་པོ་དང༌། ཉེ་བ་དང༌། ཟླ་བ་དང༌། ཉི་མའི་འོད་དང༌། སྐར་མ་དང༌། གཟའི་གཟུགས་ཐམས་ཅད་ཀྱང་མཐོང་ནས། འདི་སྐད་ཅེས། ཀྱེ་མ། ཨ་ལ་ལ་བླུན་པོ་ཁོ་བོ་སྔོན་ནི་བསྟན་ཀྱང་ཡིད་མི་ ཆེས་ཤིང་སྨྲས་པ་བཞིན་མི་འཛིན་ན། ད་ནི་ཁོ་བོས་ཐམས་ཅད་མཐོང་ནས་དམུས་ལོང་ལས་ཐར་ཏེ་ཁོ་བོས་མིག་ཐོབ་པས། ཁོ་བོ་ལྟ་བུར་ཁྱད་པར་དུ་འཕགས་པ་གང་ཡང་མེད་དོ་ ཞེས་སྨྲས་སོ། །དེའི་ཚེ་ན་དྲང་སྲོང་མངོན་པར་ཤེས་པ་ལྔ་དང་ལྡན་པ་ལྷའི་མིག་དང༌། ལྷའི་རྣ་བ་དང༌། ཕ་རོལ་གྱི་སེམས་ཤེས་པ་དང༌། སྔོན་གྱི་གནས་རྗེས་སུ་དྲན་པའི་ཤེས་པ་ དང༌། རྫུ་འཕྲུལ་མངོན་སུམ་དུ་བྱ་བ་ལ་མཁས་པ་དག་ཅིག་ཡོད་དེ། དེ་དག་གིས་མི་དེ་ལ་འདི་སྐད་ཅེས་སྨྲས་ཏེ། ཀྱེ། མི་ཁྱོད་ནི་མིག་རྙེད་པ་འབའ་ཞིག་ཏུ་ཟད་ཀྱི། ཁྱོད་གཞན་ ༄༅། །ཅིའང་མི་ཤེས་ན་ཁྱོད་ཀྱི་ང་རྒྱལ་དེ་ཅི་ལས་བྱུང༌། ཁྱོད་ལ་ནི་ཤེས་རབ་ཀྱང་མེད། མཁས་པའང་མ་ཡིན་ནོ། །དེ་དག་གིས་ཡང་དེ་ལ་འདི་སྐད་ཅེས་སྨྲས་ཏེ། ཀྱེ༑ མི་ཁྱོད་གང་གི་ཚེ་ཁྱིམ་གྱི་ནང་ན་འདུག་པ་ན། ཕྱི་ལོགས་ཀྱི་གཟུགས་གཞན་དག་མི་མཐོང་མི་ཤེས། ཁྱོད་ཀྱིས་སེམས་ཅན་གང་དག་བྱམས་པར་སེམས་པ་དང༌། གནོད་པར་སེམས་ པ་དེ་དག་ཀྱང་མི་ཤེས། དཔག་ཚད་ལྔའི་བར་ན་འདུག་པའི་སྨྲ་བ་དང༌། རྔ་དང༌། དུང་ལ་སོགས་པའི་སྒྲའང་མི་ཤེས་མི་ཐོས། རྒྱང་གྲགས་གཅིག་གི་བར་དུ་གོམ་པ་མི་འདོར་བར་ འགྲོའང་མི་ནུས། མའི་ལྟོ་ན་སྐྱེ་ཞིང་འཕེལ་བའི་བྱེད་པ་དེ་དག་ཀྱང་མི་དྲན་ན། ཇི་ལྟར་མཁས་པ་ཡིན། ཇི་ལྟར་ན་ཐམས་ཅད་མཐོང་ཞེས་སྨྲ། ཀྱེ༑ མི་ཁྱོད་ཀྱིས་སྣང་བ་གང་ཡིན་ པ་དེ་ནི་མུན་པར་ཤེས་སོ། །མུན་པ་གང་ཡིན་པ་དེ་ནི་སྣང་བར་ཤེས་སོ་ཞེས་སྨྲས་པ་དང༌། དེ་ནས་མི་དེས་དྲང་སྲོང་དེ་དག་ལ་འདི་སྐད་ཅེས་སྨྲས་ཏེ། ཐབས་གང་དང་དགེ་བའི་ ལས་ཅི་བྱས་ན། འདི་འདྲ་བའི་ཤེས་རབ་འཐོབ། ཁྱོད་ཀྱི་བྱ་དགའ་ལ་ཡོན་ཏན་དེ་དག་ཐོབ་པར་གྱིས་ཤིག །དེ་ནས་དྲང་སྲོང་དེ་དག་གིས་མི་དེ་ལ་འདི་སྐད་ཅེས་སྨྲས་སོ། །གལ་ ཏེ་འདོད་ན་འབྲོག་དགོན་པར་གནས་པར་གྱིས། ཡང་ན་བྲག་ཕུག་ཏུ་འདུག་ལ་ཆོས་སེམས་ཤིང་ཁྱོད་ཀྱིས་ཉོན་མོངས་པ་རྣམས་སྤང་བར་བྱ་སྟེ། དེ་བཞིན་དུ་སྦྱངས་པའི་ཡོན་ ཏན་དང་ལྡན་ན། མངོན་པར་ཤེས་པ་རབ་ཏུ་འཐོབ་བོ། །དེ་ནས་མི་དེས་དེའི་དོན་བླངས་ཏེ། རབ་ཏུ་བྱུང་ནས་དགོན་པ་ལ་གནས་ཏེ། སེམས་རྩེ་གཅིག་པས་འཇིག་རྟེན་གྱི་སྲེད་པ་སྤངས་ཏེ། མངོན་པར་ཤེས་པ་ལྔ་ཐོབ་བོ། །མངོན་པར་ཤེས་པ་ལྔ་ཐོབ་ནས་བསམས་པ། སྔོན་བདག་གིས་ལས་གཞན་བྱས་པ་དེས་བདག་གིས་ཡོན་ཏན་གང་ཡང་མ་ཐོབ་བོ། །ད་ནི་གར་བསམས་ པར་འགྲོའོ། །སྔོན་བདག་ནི་ཤེས་རབ་ཆུང་ཞིང་རྟོགས་པ་ཆུང་སྟེ། བདག་གི་ནི་དམུས་ལོང་དུ་གྱུར་པའོ་སྙམ་མོ། །འོད་སྲུང༌། དེ་ལྟར་དོན་དེ་རིག་པར་བྱ་བའི་ཕྱིར། དཔེ་འདི་བྱས་ཏེ་ དེའི་དོན་ནི་འདི་ལྟར་བལྟའོ། །འོད་སྲུང༌། དམུས་ལོང་ཞེས་བྱ་བ་དེ་ནི་སེམས་ཅན་འགྲོ་བ་ལྔའི་འཁོར་བ་ན་གནས་པ་རྣམས་ཀྱི་ཚིག་བླ་དྭགས་ཏེ། གང་དག་དམ་པའི་ཆོས་མི་ཤེས་ ཤིང༑ ཉོན་མོངས་པའི་མུན་པ་མུན་ནག་སྐྱེད་པ་དེ་དག་མ་རིག་པས་ལྡོངས་སོ། །མ་རིག་པས་ལྡོངས་པས་འདུ་བྱེད་སོགས་སོ། །འདུ་བྱེད་ཀྱི་རྐྱེན་གྱིས་མིང་དང་གཟུགས་ནས། དེ་ བཞིན་དུ་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་དེའི་བར་དུ་འབྱུང་བར་འགྱུར་རོ། །དེ་ལྟར་མ་རིག་པས་ལྡོངས་ཏེ། སེམས་ཅན་འཁོར་བ་ན་གནས་པ་རྣམས་ལ་དེ་བཞིན་ གཤེགས་པས་ཐུགས་རྗེ་བསྐྱེད་ནས། ཁམས་གསུམ་ལས་འདས་ཀྱང་བུ་གཅིག་པའི་ཕ་བྱམས་པ་བཞིན་དུ། ཐུགས་རྗེ་ཆེན་པོ་བསྐྱེད་ནས་ཁམས་གསུམ་དུ་གཤེགས་ཏེ། སེམས་ ༄༅། །ཅན་རྣམས་འཁོར་བའི་འཁོར་ལོ་ན་འཁྱམ་ཞིང་ཉོན་མོངས་ཀྱང་དེ་དག་འཁོར་བ་ལས་འབྱུང་བ་ཡང་དག་པ་ཇི་ལྟ་བ་བཞིན་དུ་མི་ཤེས་པར་དེ་དག་བཅོམ་ ལྡན་འདས་ཀྱི་ཤེས་རབ་ཀྱི་སྤྱན་གྱིས་གཟིགས་སོ། །གཟིགས་ནས་ཀྱང་སེམས་ཅན་འདི་དག་སྔོན་དགེ་བ་བྱས་པས་ཞེ་སྡང་ཆུང་ལ་འདོད་ཆགས་ཆེ་བ་དང༌། འདོད་ཆགས་ཆུང་ལ་ ཞེ་སྡང་ཆེ་བ་དང༌། ཁ་ཅིག་ཤེས་རབ་ཆུང་བ་དང༌། ཁ་ཅིག་མཁས་པ་དང༌། ཁ་ཅིག་ཡོངས་སུ་སྨིན་ཅིང་དག་པ་དང༌། ཁ་ཅིག་ལོག་པར་ལྟ་བ་མཁྱེན་ནས། སེམས་ཅན་དེ་དག་ ལ་དེ་བཞིན་གཤེགས་པ་ཐབས་མཁས་པས་ཐེག་པ་གསུམ་དུ་བཤད་དོ། །དེ་ལ་ཇི་ལྟར་དྲང་སྲོང་དེ་དག་མངོན་པར་ཤེས་པ་ལྔ་དང་ལྡན་ཞིང་མིག་རྣམ་པར་དག་པ་དེ་བཞིན་དུ་ བྱང་ཆུབ་སེམས་དཔས་བྱང་ཆུབ་ཏུ་སེམས་བསྐྱེད་དེ། མི་སྐྱེ་བའི་ཆོས་ལ་བཟོད་པ་ཐོབ་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ བར་བལྟའོ། །དེ་ལ་སྨན་པ་ཆེན་པོ་དེ་ཇི་ལྟ་བ་བཞིན་དུ་དེ་བཞིན་གཤེགས་པར་བལྟའོ། །དམུས་ལོང་ཇི་ལྟ་བ་བཞིན་དུ་གཏི་མུག་གིས་ལྡོངས་པའི་སེམས་ཅན་དུ་བལྟའོ། །རླུང་ དང༑ མཁྲིས་པ་དང༌། བད་གན་ཇི་ལྟ་བ་དེ་བཞིན་དུ་འདོད་ཆགས་དང༌། ཞེ་སྡང་དང༌། གཏི་མུག་དང༌། ལྟ་བ་དྲུག་ཅུ་རྩ་གཉིས་སུ་གྱུར་པར་བལྟའོ། །ཇི་ལྟར་སྨན་སྣ་བཞི་པོ་ དེ་ལྟར་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། མྱ་ངན་ལས་འདས་པའི་སྒོར་བལྟའོ། །ཇི་ལྟ་ཇི་ལྟ་བུར་སྨན་རྣམས་བཏང་བས། དེ་ལྟ་དེ་ལྟ་བུར་ནད་རབ་ཏུ་ ཞི་བ་དེ་བཞིན་དུ་རྣམ་པར་ཐར་པའི་སྒོ་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་བསྒོམས་པས་མ་རིག་པ་འགག་པར་བྱེད་ཅིང༌། མ་རིག་པ་འགགས་པས་འདུ་བྱེད་ འགག་པ་ནས། དེ་བཞིན་དུ་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་དེའི་བར་དུ་འགག་པར་གྱུར་ཏེ། དེ་བཞིན་དུ་དེའི་སེམས་དགེ་བ་ལའང་མི་གནས། སྡིག་པ་ལའང་མི་ གནས་ཏེ། ཇི་ལྟར་དམུས་ལོང་གིས་མིག་མཐོང་བ་དེ་བཞིན་དུ་ཉན་ཐོས་དང༌། རང་སངས་རྒྱས་ཀྱི་ཐེག་པ་ཅན་དུ་བལྟའོ། །འཁོར་བའི་ཉོན་མོངས་པས་བཅིངས་པ་གཅོད་ཅིང་ཉོན་ མོངས་པའི་བཅིང་བ་ལས་རྣམ་པར་གྲོལ་ཏེ་ཁམས་གསུམ་གྱི་འགྲོ་བ་དྲུག་ལས་རབ་ཏུ་ཐར་བས་ན། དེའི་ཕྱིར་ཉན་ཐོས་ཀྱི་ཐེག་པ་ཅན་གྱི་འདི་ལྟར་ཤེས་ནས། འདི་སྐད་ཅེས་མངོན་ པར་རྫོགས་པར་འཚང་རྒྱ་བར་བྱ་བའི་ཆོས་གཞན་མེད་དེ། བདག་ནི་མྱ་ངན་ལས་འདས་པ་ཐོབ་བོ་ཞེས་ཟེར་རོ། །དེ་ནས་དེ་བཞིན་གཤེགས་པ་དེ་ལ་ཆོས་སྟོན་ཏེ། གང་གིས་ ཆོས་ཐམས་ཅད་མ་ཐོབ་པ་དེ་ལ་མྱ་ངན་ལས་འདས་པ་ག་ལ་ཡོད་ཅེས་དེ་བཞིན་གཤེགས་པས་དེ་དག་བྱང་ཆུབ་ཏུ་བཙུད་དེ། དེ་བྱང་ཆུབ་ཀྱི་སེམས་བསྐྱེད་ནས་འཁོར་བ་ལའང་ ༄༅། །མི་གནས། མྱ་ངན་ལས་འདའ་བ་ཐོབ་པར་ཡང་མི་འགྱུར་རོ། །དེས་ཁམས་གསུམ་རབ་ཏུ་རྟོགས་ནས་ཕྱོགས་བཅུའི་འཇིག་རྟེན་སྟོང་པ་དང༌། སྤྲུལ་པ་ལྟ་བུ་ དང༑ སྒྱུ་མ་ལྟ་བུ་དང༌། རྨི་ལམ་དང༌། སྨིག་རྒྱུ་དང༌། བྲག་ཅ་ལྟ་བུ་དང༌། ཆོས་ཐམས་ཅད་མ་སྐྱེས་པ་དང༌། མ་འགགས་པ་དང༌། མ་བཅིངས་པ་དང༌། མ་གྲོལ་བ་དང༌། མུན་ པའང་མ་ཡིན། སྣང་བའང་མ་ཡིན་པར་མཐོང་ངོ༌། །གང་གིས་དེ་ལྟར་ཆོས་ཟབ་མོ་མཐོང་བ་དང་ཐོས་པ་དེས་ཁམས་གསུམ་ཐམས་ཅད་གང་བའི་སེམས་ཅན་གྱི་བསམ་པ་དང་ མོས་པ་ཐ་དད་པ་མི་མཐོང་བའི་ཚུལ་གྱིས་མཐོང་ངོ༌། །དེ་ནས་བཅོམ་ལྡན་འདས་ཀྱིས་དེའི་དོན་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཇི་ལྟར་ ཉི་མ་ཟླ་བའི་འོད། །ཡོན་ཏན་ལྡན་དང་སྡིག་ཅན་གྱི། །མི་ལ་མཉམ་པར་རབ་འཆར་ཏེ། །དེ་ལ་སྐྱེ་ཞིང་འབྲི་བ་མེད། །དེ་བཞིན་གཤེགས་ཀྱི་ཤེས་རབ་འོད། །སྙོམས་པ་ཉི་མ་ ཟླ་བ་བཞིན། །ལྷག་ཅིང་ཆད་པ་མེད་པར་ནི། །སེམས་ཅན་ཐམས་ཅད་རྣམ་པར་འདུལ། །ཇི་ལྟར་ཁམ་སྣོད་རྫ་མཁན་གྱིས། །འཇིམ་པ་མཚུངས་ལས་བྱས་པ་དག། དེ་ ལས་སྣོད་དུ་གྱུར་པ་ནི། །བུ་རམ་འོ་མ་མར་དང་ཆུ། །ཡང་ན་ལ་ལ་མི་གཙང་དང༌། །ཁ་ཅིག་ཞོ་ཡི་སྣོད་དུ་གྱུར། །ཁམ་པ་སྣ་གཅིག་དེས་བླངས་ཏེ། །རྫ་མཁན་གྱིས་ནི་སྡོང་དུ་ བྱས༑ ༑ཇི་ལྟར་དངོས་པོ་བཅུག་པ་བཞིན། །དེས་ནི་སྣོད་ཀྱང་སོ་སོར་རྟོགས། །དེ་བཞིན་སེམས་ཅན་བྱེ་བྲག་མེད། །ཐ་དད་མོས་པས་དེ་བཞིན་གཤེགས། །ཐེག་པ་ཐ་དད་རབ་སྟོན་ཀྱང༌། །ཐེག་པ་ སངས་རྒྱས་ཐེག་པར་ངེས། །འཁོར་བའི་འཁོར་ལོ་མི་ཤེས་པས། །མྱ་ངན་འདས་པའང་ཤེས་མ་ཡིན། །ཆོས་རྣམས་བདག་ཉིད་རྣམ་སྤངས་ཤིང༌། །སྟོང་པར་གང་དག་རྣམ་ཤེས་པ། །དེ་ དག་སངས་རྒྱས་བཅོམ་ལྡན་གྱི། །བྱང་ཆུབ་ཡང་དག་ཉིད་དུ་ཤེས། །ཤེས་རབ་བར་མར་གདགས་པ་ནི། །དེ་ནི་རང་རྒྱས་ཞེས་ཀྱང་བྱ། །སྟོང་པར་ཤེས་ནས་རྣམས་བཏུལ་བ། །དེ་ནི་ཉན་ ཐོས་ཉིད་དུ་བཞག །ཆོས་རྣམས་ཐམས་ཅད་རྟོགས་པ་ནི། །ཡང་དག་རྫོགས་པའི་སངས་རྒྱས་ཡིན། །ཇི་ལྟར་དམུས་ལོང་ལ་ལས་ནི། །ཉི་ཟླ་གཟའ་དང་སྐར་མ་རྣམས། །དེས་མ་མཐོང་ བས་འདི་སྐད་ཅེས། །གཟུགས་ནི་རྣམ་ཀུན་མེད་ཅེས་སྨྲ། །སྨན་པ་ཆེན་པོས་དམུས་ལོང་ལ། །སྙིང་རྗེ་ཆེན་པོ་བསྐྱེད་ནས་སུ། །གངས་ཀྱི་རི་ལ་དེ་སོང་སྟེ། །གྱེན་འཛེགས་ཐུར་བབས་ཐད་ ཀར་སོང༌། །ཁ་དོག་རོ་ཀུན་གནས་ལྡན་པ། །དེ་ལ་སོགས་པ་སྣ་བཞི་དག །རི་ལས་སྨན་ཡང་ཀུན་རྙེད་དེ། །དེ་ནས་དེ་དག་རབ་ཏུ་སྦྱར། །ཁ་ཅིག་དག་ནི་སོས་ཀྱང་བཅས། །ཁ་ཅིག་ བཏབས་ཏེ་དེ་བཞིན་གཞན། །ཡན་ལག་ཏུ་ཡང་ཁབ་རྩེ་བཅུག །དམུས་ལོང་ལ་ནི་རབ་ཏུ་གཏོང༌། །དེ་ཡིས་མིག་ཐོབ་ཉི་ཟླ་དང༌། །སྐར་མ་གཟའ་རྣམས་མཐོང་བར་གྱུར། །མི་ཤེས་ ༄༅། །པས་ན་སྔོན་སྨྲས་ཤེས། །དེ་ནི་དེ་ལྟར་སེམས་པར་གྱུར། །དེ་བཞིན་སེམས་ཅན་མི་ཤེས་ཚེ། །དམུས་ལོང་འདྲ་དག་འདི་ན་འཁོར། །རྟེན་འབྱུང་འཁོར་ལོ་མི་ ཤེས་པས། །སྡུག་བསྔལ་ཆུ་བོའི་ལམ་དུ་གྱུར། །དེ་བཞིན་མི་ཤེས་རྨོངས་པ་ཡི། །འཇིག་རྟེན་དུ་ནི་ཀུན་གྱི་མཆོག །སྨན་པ་ཆེན་པོ་དེ་བཞིན་གཤེགས། །སྙིང་རྗེ་བདག་ཉིད་ འདིར་བྱུང་སྟེ། །སྟོན་པ་ཐབས་ལ་མཁས་པས་ན། །དེས་ནི་དམ་པའི་ཆོས་བཤད་དེ། །བླ་མེད་ཡང་དག་རྫོགས་བྱང་ཆུབ། །ཐེག་པ་དམ་པར་ཞུགས་ལ་བཤད། །འདྲེན་པས་ ཤེས་རབ་འབྲིང་ལ་ཡང༌། །བར་མ་དག་གི་རབ་ཏུ་བཤད། །འཁོར་བས་འཇིགས་ལ་བྱང་ཆུབ་ཀྱང༌། །གཞན་དུ་རབ་ཏུ་བཤད་པ་ཡིན། །ཁམས་གསུམ་ལས་ནི་བྱུང་བ་ཡི། །ཉན་ ཐོས་རྣམས་ཀྱིས་འདི་ལྟར་ཤེས། །མྱ་ངན་འདས་པའི་དྲི་མེད་ཞི། །བདག་གིས་རབ་ཏུ་ཐོབ་སྙམ་སེམས། །ཆོས་ཀུན་ཁོང་དུ་ཆུད་གྱུར་ན། །མི་འཆི་མྱ་ངན་འདས་པ་ཐོབ། །དྲང་ སྲོང་ཆེ་རྣམས་དེ་ལ་ནི། །ཤིན་ཏུ་སྙིང་རྗེ་བསྐྱེད་ནས་སུ། །དེ་ལ་སྨྲས་པ་བླུན་པོ་ཁྱོད། །ཡེ་ཤེས་ཅན་དུ་བདག་མ་སེམས། །གང་ཚེ་ཁྱོད་ནི་ཁང་པ་ཡི། །ནང་ན་འདུག་པར་གྱུར་ པ་ན༑ ༑ཕྱི་རོལ་དག་ན་གང་ཡོད་པ། །ཤེས་རབ་ཆུང་ཁྱོད་དེ་མི་ཤེས། །གང་ཞིག་ནང་ན་འདུག་པ་དེས། །བྱས་དང་མ་བྱས་ཕྱི་རོལ་གྱི། །ཤེས་བྱ་ད་དུང་མི་ཤེས་ན། །ཤེས་ཆུང[?] ཁྱད་ཀྱིས་ག་ལ་ཤེས། །དཔག་ཚད་ལྔ་ཙམ་བར་དག་གི། སྒྲ་གང་བྱུང་བ་དེ་རྣམས་ཀྱང༌། །དེ་ཡང་ཐོས་པར་མི་ནུས་ན། །དེ་བས་རིང་བ་གཞན་ཅི་སྨོས། །ཁྱོད་ལ་གང་དག་ཉེས་སེམས་དང༌། ། དེ་བཞིན་གཞན་དག་བྱམས་པ་ཡང༌། །ཁྱོད་ཀྱིས་དེ་དག་ཤེས་མི་ནུས། །ཅི་ཕྱིར་ཁྱོད་ཀྱིས་ང་རྒྱལ་བྱ། །རྒྱང་གྲགས་ཙམ་དུ་འགྲོ་ན་ཡང༌། །གོམ་པ་མ་བོར་འགྲོ་མི་ནུས། །མ་ཡི་མངལ་དུ་ཅི་ བྱུང་བ། །དེ་དག་དེ་མ་ཐག་ཏུ་བརྗེད། །སུ་ལ་མངོན་ཤེས་འདི་ལྔ་ཡོད། །དེ་འདིར་ཐམས་ཅད་ཤེས་ཞེས་བྱ། །ཁྱོད་ནི་གཏི་མུག་ཅང་མི་ཤེས། །བདག་ནི་ཐམས་ཅད་ཤེས་ཞེས་སྨྲ། ། ཐམས་ཅད་མཁྱེན་པར་ཁྱེད་འདོད་ན། །འདི་ལྟར་མངོན་པར་ཤེས་པ་སྒྲུབས། །མངོན་པར་ཤེས་པ་དེ་བསྒྲུབས་ན། །དགོན་པར་གནས་ཤིང་རྣམ་དག་ཆོས། །བསམ་པར་བྱ་སྟེ་དེ་ཡིས་ ཁྱོད༑ ༑མངོན་པར་ཤེས་པ་ཐོབ་པར་འགྱུར། །དོན་གཟུང་དགོན་པར་དེ་སོང་སྟེ། །ཤིན་ཏུ་མཉམ་གཞག་རྣམ་པར་སེམས། །མངོན་པར་ཤེས་པ་ལྔ་ཐོབ་སྟེ། །རིང་པོར་མི་ཐོགས་ཡོན་ ཏན་ལྡན། །དེ་བཞིན་ཉན་ཐོས་ཐམས་ཅད་ཀྱང༌། །མྱ་ངན་འདས་ཐོབ་འདུ་ཤེས་ཏེ། །རྒྱལ་བས་བཤད་པ་དེ་དག་ལ། །མྱ་ངན་མ་འདས་དེ་ངལ་བསོ། །གང་ཡང་ཚུལ་འདི་གསུང་བ་ནི།། སངས་རྒྱས་རྣམས་ཀྱི་ཐབས་འདི་སྟེ། །ཐམས་ཅད་མཁྱེན་པ་མ་གཏོགས་པར། །མྱ་ངན་འདའ་མེད་འདི་རྩོམས་ཤིག །དུས་གསུམ་ཡེ་ཤེས་མཐའ་ཡས་དང༌། །ཕ་རོལ་ཕྱིན་དྲུག་དགེ་ ༄༅། །བ་དང༌། །སྟོང་པ་ཉིད་དང་མཚན་མ་མེད། །སྨོན་ལམ་རྣམ་པར་སྤངས་པ་དང༌། །བྱང་ཆུབ་སེམས་དང་གཞན་ཡང་གང༌། །མྱ་ངན་འདའ་པར་འགྲོ་བའི་ཆོས། །ཚངས་ པའི་གནས་པ་རྣམ་བཞི་དང༌། །བསྡུ་བ་རྣམས་སུ་གང་བརྗོད་པ། །སེམས་ཅན་རྣམས་ནི་འདུལ་བའི་ཕྱིར། །དྲང་སྲོང་མཆོག་གིས་རབ་ཏུ་བརྗོད། །རྨི་ལམ་སྒྱུ་མའི་རང་བཞིན་དང༌། །སྙིང་ པོ་མེད་པ་ཆུ་ཤིང་ཕུང༌། །བྲག་ཅ་དང་ཡང་མཚུངས་པར་ནི། །གང་གིས་ཆོས་རྣམས་རབ་ཤེས་ཤིང༌། །ཁམས་གསུམ་ལྷག་མ་མ་ལུས་པར། །དེ་ཡི་རང་བཞིན་ཤེས་བར་ཡང༌། ། བཅིངས་མེད་རྣམ་པར་གྲོལ་མེད་པའི། །མྱ་ངན་འདས་པ་མི་ཤེས་སོ། །ཆོས་ཀུན་སྟོང་ཞིང་མཉམ་པ་སྟེ། །ཐ་དད་དབྱེར་མེད་བདག་ཉིད་དོ། །དེ་དག་ལ་ནི་མི་རྟོགས་ཏེ། །ཆོས་ནི་གང་ཡང་ མཐོང་མེད་ན། །ཆོས་ཀྱི་སྐུ་ནི་མ་ལུས་པར། །ཤེས་རབ་ཆེན་པོ་དེས་མཐོང་ངོ༌། །ཐེག་པ་གསུམ་དུ་ཡོང་མེད་དེ། །འདི་ན་ཐེག་པ་གཅིག་པུ་ཡོད། །ཆོས་ཀུན་མཉམ་སྟེ་ཐམས་ཅད་ ཀྱང༑ ༑མཉམ་ཞིང་སྙོམས་ཏེ་རྟག་ཏུ་མཉམ། །དེ་ལྟར་རིག་ནས་ཞི་བ་ཡི། །མི་འཆི་མྱ་ངན་འདའ་བ་ཤེས། །དམ་པའི་ཆོས་པདྨ་དཀར་པོ་ལས། །སྨན་གྱི་ལེའུ་ཞེས་བྱ་སྟེ་ལྔ་པའོ།། །། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་དེ་དག་བཀའ་སྩལ་ནས། ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། ཀྱེ་དགེ་སློང་དག །ཁྱེད་མོས་ པར་བྱ། ཁོང་དུ་ཆུད་པར་བྱའོ། །ངའི་ཉན་ཐོས་དགེ་སློང་འོད་སྲུང་འདི། སངས་རྒྱས་བྱེ་བ་སྟོང་ཕྲག་སུམ་ཅུ་ལ་བཀུར་སྟི་བྱེད། བཙུན་པར་བྱེད། རི་མོར་བྱེད། མཆོད་པ་བྱེད་པར་འགྱུར་ ཏེ༑ སངས་རྒྱས་བཅོམ་ལྡན་འདས་དེ་དག་གི་དམ་པའི་ཆོས་འཛིན་པར་འགྱུར་རོ། །དེ་ལུས་ཐ་མའི་ཚེ་བསྐལ་པ་བཀོད་པ་ཆེན་པོ་ཞེས་བྱ་བ་ལ་འཇིག་རྟེན་གྱི་ཁམས་སྣང་བ་ཐོབ་པ་ཞེས་ བྱ་བར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་ཟེར་རབ་ཏུ་སྣང་བ་ཞེས་བྱ་བར་འཇིག་རྟེན་དུ་འབྱུང་ངོ༌། །དེའི་ཚེའི་ཚད་ནི་བར་གྱི་བསྐལ་ པ་བཅུ་གཉིས་སུ་འགྱུར་རོ། །བར་གྱི་བསྐལ་པ་ཉི་ཤུར་ནི་དམ་པའི་ཆོས་གནས་པར་འགྱུར་རོ། །བར་གྱི་བསྐལ་པ་ཉི་ཤུར་ནི་དམ་པའི་ཆོས་ཀྱི་གཟུགས་བརྙན་གནས་པར་འགྱུར་ རོ༑ ༑དེའི་ཚེ་སངས་རྒྱས་ཀྱི་ཞིང་དེ་ཡང་དག་པར་འགྱུར་ཏེ། གཙང་ཞིང་གྱོ་མོ་དང་གསེག་མ་མེད་པ་ངམ་གྲོག་དང་གཡང་ས་མེད་པ། འཇིམ་ངན་དང་སྨེ་བ་མེད་དེ། མཉམ་པ། ཉམས་དགའ་བ། མཛེས་པ་བལྟ་ན་སྡུག་པ་བཻ་ཌཱུཪྻའི་གཞི་ལ་རིན་པོ་ཆེའི་ཤིང་ལྗོན་པས་རབ་ཏུ་བརྒྱན་པ། གསེར་གྱི་སྐུད་པས་མིག་མང་རིས་སུ་བྲིས་པ་མེ་ཏོག་གིས་གང་བ་སྟེ། ༄༅། །དེར་བྱང་ཆུབ་སེམས་དཔའ་བརྒྱ་སྟོང་ཕྲག་མང་པོ་འབྱུང་བར་འགྱུར་རོ། །དེར་ཉན་ཐོས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་འབྱུང་ངོ༌། །དེ་ན་བདུད་སྡིག་ ཅན་དང་བདུད་ཀྱི་དཀྱིལ་འཁོར་ཡང་མི་སྣང་ངོ༌། །དེར་བདུད་དང་བདུད་ཀྱི་འཁོར་དང་བྱུང་ནའང༌། བཅོམ་ལྡན་འདས་དེ་བཞིན་གཤེགས་པ་འོད་ཟེར་རབ་ཏུ་སྣང་བ་དེའི་བསྟན་པ་ལ་ དམ་པའི་ཆོས་ཡོངས་སུ་འཛིན་པ་ལ་བརྩོན་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དགེ་སློང་ཁྱེད་དག་སངས་རྒྱས་ སྤྱན་གྱིས་ངས། །གྲངས་མེད་བསྐལ་པར་གནས་བརྟན་འོད་སྲུང་འདིས། །རྐང་གཉིས་རྣམས་ཀྱི་དམ་པ་མཆོད་བྱས་ནས། །མ་འོངས་དུས་ན་སངས་རྒྱས་འགྱུར་བར་མཐོང༌། །སྟོང་ ཕྲག་སུམ་ཅུ་ཡོངས་སུ་ཚང་བ་ཡི། །རྒྱལ་བ་རྣམས་ནི་འོད་སྲུང་འདི་ཡིས་མཐོང༌། །སངས་རྒྱས་ཡེ་ཤེས་ཕྱིར་ནི་དགེ་སློང་འདི། །དེ་ན་ཚངས་པར་སྤྱད་པ་སྤྱོད་འགྱུར་ཞིང༌། །རྐང་ གཉིས་གཙོ་བོ་རྣམས་ལ་མཆོད་བྱས་ནས། །བླ་ན་མེད་ཀྱི་ཡེ་ཤེས་འདི་བསྒྲུབས་ཏེ། །དེ་ནི་ཐ་མའི་ལུས་ཚེ་འཇིག་རྟེན་མགོན། །མཚུངས་པ་མེད་པ་དྲང་སྲོང་ཆེན་པོར་འགྱུར། ། དེ་ཡི་ཞིང་ཡང་རྣམ་བཀྲ་མཆོག་གྱུར་ཏེ། །བཟང་ཞིང་རྣམ་དག་ཉམས་དགའ་བལྟ་ན་སྡུག །རྟག་ཏུ་དགའ་བྱེད་ཡིད་དུ་འོང་བའི་གཟུགས། །གསེར་གྱི་སྐུད་པ་དག་གིས་ལེགས་ པར་བརྒྱན། །དེ་ཡི་རིན་ཆེན་ཤིང་ལྗོན་སྣ་ཚོགས་པ། །མིག་མང་རིས་བྲེས་དེ་ནང་རེ་རེ་སྟེ། །ཡིད་དུ་འོང་བའི་དྲི་ཡང་རྣམ་པར་འབྱུང༌། །དེ་ནི་དགེ་སློང་འདི་ཡི་ཞིང་དུ་འགྱུར། །མེ་ཏོག་ མང་པོས་ལེགས་པར་བརྒྱན་པ་སྟེ། །མེ་ཏོག་སྣ་ཚོགས་རྣམས་ཀྱིས་མཛེས་པར་བྱས། །ངམ་གྲོག་གཡང་ས་རྣམས་ཀྱང་དེ་ན་མེད། །མཉམ་ཞིང་བཟང་ལ་བལྟ་ན་སྡུག་པར་འགྱུར། ། དེ་ན་བྱང་ཆུབ་སེམས་དཔའ་བྱེ་བ་སྟོང༌། །རྫུ་འཕྲུལ་ཆེ་ཞིང་ཤིན་ཏུ་དུལ་བའི་སེམས། །སྐྱོབ་པའི་མདོ་སྡེ་ཤིན་ཏུ་རྒྱས་འཛིན་པ། །སྟོང་ཕྲག་དུ་མ་མང་པོ་འབྱུང་བར་འགྱུར། །དེ་ཚེ་ ཆོས་ཀྱི་རྒྱལ་པོའི་ཉན་ཐོས་ནི། །ཟག་མེད་ཐ་མའི་ལུས་འཛིན་རྣམས་འབྱུང་འགྱུར། །བསྐལ་པར་ལྷ་ཡི་ཤེས་པས་བགྲངས་ན་ཡང༌། །དེ་དག་ཚད་ནི་ནམ་ཡང་མི་ཟིན་ཏོ། །དེ་ནི་ བར་གྱི་བསྐལ་པ་བཅུ་གཉིས་གནས། །དམ་པའི་ཆོས་ནི་ཉི་ཤུ་ཚང་བར་གནས། །བར་གྱི་བསྐལ་པ་ཉི་ཤུར་གཟུགས་བརྙན་ཏེ། །འོད་ཟེར་རབ་སྣང་དེ་བཀོད་དེ་ལྟར་འགྱུར། །དེ་ ནས་ཚེ་དང་ལྡན་པ་གནས་བརྟན་མཽངྒལ་གྱི་བུ་ཆེན་པོ་དང༌། ཚེ་དང་ལྡན་པ་རབ་འབྱོར་དང༌། ཚེ་དང་ལྡན་པ་ཀཱ་ཏྱཱ་ཡའི་བུ་ཆེན་པོ་ལུས་འདར་ནས་མིག་མི་འཛུམ་པར་བཅོམ་ལྡན་ འདས་ལ་བལྟ་ཞིང༌། །དེའི་ཚེ་སོ་སོའི་ཡིད་ལ་བརྗོད་ནས། ཚིགས་སུ་བཅད་པ་འདི་དག་གསོལ་ཏོ། །དཔའ་བོ་ཆེན་པོ་དགྲ་བཅོམ་པ། །ཤཱཀྱ་སེང་གེ་མི་ཡི་མཆོག །བདག་ཅག་ལ་ ༄༅། །ནི་ཐུགས་བརྩེའི་ཕྱིར། །སངས་རྒྱས་སྒྲ་ནི་བསྒྲག་ཏུ་གསོལ། །སྐབས་མཁྱེན་པས་ན་ངེས་པར་ཡང༌། །བདག་ཅག་ལ་ནི་མི་མཆོག་གིས། །བདུད་རྩི་དག་གི་ རབ་གཏོར་ཏེ། །རྒྱལ་བས་བདག་ཅག་ལུང་བསྟན་འགྱུར། །མུ་གེ་བྱུང་ཚེ་མི་འགའ་ཞིག །ཁ་ཟས་བཟང་པོ་རྙེད་ནས་སུ། །བདག་གིས་ཁ་ཟས་རྙེད་དོ་ཞེས། །དེ་ཡང་བསྟན་ནས་ རབ་ཏུ་སྨྲ། །དེ་བཞིན་བདག་ཅག་སྤྲོ་བ་ནི། །ཐེག་པ་དམན་པར་སེམས་པ་ལས། །སངས་རྒྱས་ཡེ་ཤེས་ཐོབ་འགྱུར་ཏེ། །དུས་ངན་སེམས་ཅན་ཟས་རྙེད་བཞིན། །བདག་ཅག་ རྫོགས་པའི་སངས་རྒྱས་ཀྱི། །ཐུབ་པ་ཆེན་པོས་ལུང་མ་བསྟན། མི་ལྟར་སུག་པ་བཅུག་ནས་ནི། །ཁ་ཟས་དེ་ཡང་མ་བརྩལ་བཞིན། །དཔའ་བོ་བདག་ཅག་སྤྲོ་བ་ཡང༌། །བླ་ན་ མེད་པའི་གསུང་ཐོས་ཤིང༌། །གང་ཚེ་ལུང་བསྟན་གྱུར་པ་ན། །དེ་ཚེ་མྱ་ངན་འདས་པར་འགྱུར། །ཕན་པར་བཞེད་པ་ཐུགས་བརྩེ་བ། །དཔའ་བོ་ཆེན་པོ་ལུང་བསྟན་གསོལ། ། དབུལ་པོར་སེམས་པ་རྣམས་ཀྱང་ནི། །ཐུབ་པ་ཆེན་པོ་མཐར་འགྱུར་རོ། །དེ་ནས་བཅོམ་ལྡན་འདས་ཀྱིས་གནས་བརྟན་ཉན་ཐོས་ཆེན་པོ་དེ་དག་གི་སེམས་ཀྱི་རྟོག་པ་དེ་ལྟ་བུ་དེ་ ཐུགས་ཀྱིས་ཐུགས་སུ་ཆུད་ནས། ཡང་ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག །ངའི་ཉན་ཐོས་ཆེན་པོ་གནས་བརྟན་རབ་འབྱོར་ འདི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་སུམ་ཅུ་ལ་བཀུར་སྟིར་བྱེད། བཙུན་པར་བྱེད། རི་མོར་བྱེད། མཆོད་པར་བྱེད། བརྗེད་པར་བྱེད། །གསོལ་བར་བྱེད་ཅིང་དེ་ན་ཚངས་པར་ སྤྱོད་པ་སྤྱད་དེ་བྱང་ཆུབ་སྒྲུབ་པར་འགྱུར་རོ། །དེ་ལྟ་བུར་ལྷག་པར་བྱ་བ་བྱས་ཏེ། ལུས་ཐ་མ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་ པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་ འདས་ཟླ་བའི་ཏོག་ཅེས་བྱ་བ་འཇིག་རྟེན་དུ་འབྱུང་སྟེ། སངས་རྒྱས་ཀྱི་ཞིང་རིན་པོ་ཆེ་འབྱུང་བ་ཞེས་བྱ་བར་འགྱུར་རོ། །བསྐལ་པ་དེ་ནི་རིན་པོ་ཆེ་སྣང་བ་ཞེས་བྱ་བར་འགྱུར་རོ། ། སངས་རྒྱས་ཀྱི་ཞིང་དེ་ནི་མཉམ་པ་ཉམས་དགའ་བ། ཤེལ་གྱི་གཞི་ལ་རིན་པོ་ཆེའི་ཤིང་ལྗོན་པས་རྣམ་པར་སྤྲས་པ། ངམ་གྲོག་དང་གཡང་ས་མེད་པ། འཇིམ་ངན་དང་སྨེ་བ་ མེད་པ། ཡིད་དུ་འོང་བའི་མེ་ཏོག་དག་བཀྲམ་པར་འགྱུར་ཏེ། ཁང་པ་བརྩེགས་པའི་ཡོངས་སུ་སྤྱོད་པ་དག་ན། མི་རྣམས་གནས་པར་འགྱུར་རོ། །དེར་ཉན་ཐོས་མང་པོ་ཚད་ མེད་པར་འབྱུང་བར་འགྱུར་ཏེ། དེ་དག་གི་མཐའ་ནི་བགྲང་བར་རྟོགས་པར་མི་ནུས་སོ། །དེར་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་འབྱུང་བར་འགྱུར་རོ། ། ༄༅། །བཅོམ་ལྡན་འདས་དེའི་ཚེའི་ཚད་ནི། བར་གྱི་བསྐལ་པ་བཅུ་གཉིས་སུ་འགྱུར། དམ་པའི་ཆོས་འདི་ནི་བར་གྱི་བསྐལ་པ་ཉི་ཤུར་གནས་པར་འགྱུར། དམ་པའི་ཆོས་ཀྱི་གཟུགས་བརྙན་ཡང་བར་གྱི་བསྐལ་པ་ཉི་ཤུར་གནས་པར་འགྱུར་རོ། །བཅོམ་ལྡན་འདས་དེ་ནམ་མཁའ་བར་སྣང་ལ་གནས་ནས་རྟག་ཏུ་ཆོས་སྟོན་ཏེ། བྱང་ ཆུབ་སེམས་དཔའ་བརྒྱ་སྟོང་མང་པོ་དང༌། ཉན་ཐོས་བརྒྱ་སྟོང་མང་པོ་འབྱུང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། ངས་དེང་དགེ་སློང་དག་ནི་མོས་པར་བྱ། །ཁོང་དུ་ཆུད་པར་བྱའོ་ང་ལས་ཉོན། །ང་ཡི་ཉན་ཐོས་གནས་བརྟན་རབ་འབྱོར་ནི། །མ་འོངས་དུས་ཀྱི་ཚེ་ན་སངས་རྒྱས་འགྱུར། །བྱེ་བ་ ཁྲག་ཁྲིག་སུམ་ཅུ་ཚད་པ་ཡི། །སངས་རྒྱས་མཐུ་ཆེན་རྣམས་ཀྱང་རབ་ཏུ་མཐོང༌། །ཡེ་ཤེས་འདི་ཡི་ཕྱིར་ཡང་འདི་ཉིད་ནི། །དེ་ཚེ་མཐུན་པའི་སྤྱོད་པ་སྤྱད་པར་འགྱུར། །ཐ་ མའི་ལུས་ཀྱི་ཚེ་ན་དཔའ་བོ་དེ། །སུམ་ཅུ་རྩ་གཉིས་མཚན་གྱི་གཟུགས་དང་ལྡན། །དྲང་སྲོང་ཆེན་པོ་གསེར་གྱི་མཆོད་སྡོང་འདྲ། །འཇིག་རྟེན་རྣམས་ལ་ཕན་ཞིང་ཐུགས་བརྩེར་ འགྱུར། །སྲོག་ཆགས་བྱེ་བ་ཁྲག་ཁྲིག་བསྒྲལ་ནས་ནི། །འཇིག་རྟེན་རྩྭ་ལག་དེ་ནི་གནས་པ་ཡི། །ཞིང་དེ་ཤིན་ཏུ་བལྟ་ན་སྡུག་པ་དང༌། །སྐྱེ་བོ་མང་པོའི་ཡིད་འོང་མཛེས་ པར་འགྱུར། །དེ་ན་བྱང་ཆུབ་སེམས་དཔའ་མཐུ་ཆེན་མང༌། །ཕྱིར་མི་ལྡོག་པའི་འཁོར་ལོ་སྐོར་བྱེད་པ། །རྒྱལ་བ་དེ་ཡི་བསྟན་ལ་དབང་པོ་རྣོ། །དེ་དག་རྣམས་ཀྱིས་སངས་རྒྱས་ ཞིང་མཛེས་འགྱུར། །དེ་ཡི་ཉན་ཐོས་མང་པོ་གྲངས་མེད་དེ། །དེ་དག་ཚད་ནི་ནམ་ཡང་མི་ཟིན་ནོ། །དྲུག་མངོན་ཤེས་ཤིང་གསུམ་རིག་རྫུ་འཕྲུལ་ཆེ། །རྣམ་ཐར་བརྒྱད་ལ་ཤིན་ ཏུ་གནས་པའོ། །བྱང་ཆུབ་མཆོག་འདི་རབ་ཏུ་བཤད་པ་ན། །རྫུ་འཕྲུལ་སྟོབས་ནི་བསམ་གྱིས་མི་ཁྱབ་འགྱུར། །གདྒཱའི་བྱེ་མ་སྙེད་ཀྱི་ལྷ་དང་མི། །དེ་ལ་རྟག་ཏུ་ཐལ་མོ་སྦྱོར་བར་ འགྱུར། །དེ་ནི་བར་གྱི་བསྐལ་པ་བཅུ་གཉིས་གནས། །དམ་ཆོས་བར་གྱི་བསྐལ་པ་ཉི་ཤུར་གནས། །དེ་བཞིན་རྐང་གཉིས་མཆོག་གི་གཟུགས་བརྙན་ཡང༌། །བར་གྱི་བསྐལ་ པ་ཉི་ཤུར་གནས་པར་འགྱུར། །དེ་ནས་ཡང་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག །ཁྱེད་མོས་པར་བྱ། ཁྱེད་ཁོང་དུ་ཆུད་པར་བྱའོ། །ངའི་ཉན་ཐོས་གནས་བརྟན་ཀཱ་ཏྱཱ་ཡའི་བུ་ཆེན་པོ་འདི། སངས་རྒྱས་བྱེ་བ་སྟོང་ཕྲག་བརྒྱད་ལ་བཀུར་སྟིར་བྱེད། བཙུན་པར་བྱེད། །རི་མོར་བྱེད། མཆོད་པར་བྱེད། བརྗེད་པར་བྱེད། གསོལ་བར་བྱེད་པར་འགྱུར་རོ། །དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་ནས་ཀྱང༌། རིན་པོ་ཆེ་སྣ་བདུན་འདི་ལྟ་སྟེ། ༄༅། །གསེར་དང༌། དངུལ་དང༌། བཻ་ཌཱུཪྻ་དང༌། ཤེལ་དང༌། མུ་ཏིག་དམར་པོ་དང༌། རྡོའི་སྙིང་པོ་དང༌། རིན་པོ་ཆེ་སྣ་བདུན་པ་སྤུག་ལས་མཆོད་རྟེན་འཕང་དུ་ དཔག་ཚད་སྟོང༌། ཁོར་ཡུག་ཏུ་དཔག་ཚད་ལྔ་བརྒྱ་པ་དག་བྱེད་པར་འགྱུར་ཏེ། མཆོད་རྟེན་དེ་དག་ལ་མེ་ཏོག་དང༌། བདུག་པ་དང༌། སྤོས་དང༌། ཕྲང་བ་དང༌། བྱུག་པ་དང༌། ཕྱེ་ མ་དང༌། གོས་དང༌། གདུགས་དང༌། རྒྱལ་མཚན་དང༌། ལྷའི་བ་དན་དང༌། རྣམ་པར་རྒྱལ་བའི་བ་དན་དག་གིས་མཆོད་པ་བྱེད་པར་འགྱུར་རོ། །དེའི་ཕ་རོལ་གྱིའང་ཆེས་ ཕ་རོལ་ཏུ་སངས་རྒྱས་བྱེ་བ་ཕྲག་ཉི་ཤུ་ལ་དེ་ལྟ་བུའི་བཀུར་སྟིར་བྱེད། བཙུན་པར་བྱེད། རི་མོར་བྱེད། མཆོད་པར་བྱེད། བརྗེད་པར་བྱེད། གསོལ་བར་བྱེད་པར་འགྱུར་རོ། ། དེ་ནས་ལུས་ཐ་མ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་ པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཛ་མྦུའི་ཆུ་བོའི་གསེར་གྱི་འོད་ཅེས་བྱ་བར་འཇིག་རྟེན་དུ་འབྱུང་ ངོ༌། །དེའི་སངས་རྒྱས་ཀྱི་ཞིང་ཡང་ཡོངས་སུ་དག་པར་འགྱུར་ཏེ། མཉམ་པ་ཉམས་དགའ་བ། མཛེས་པ་བལྟ་ན་སྡུག་པ། ཤེལ་གྱི་གཞི་ལ་རིན་པོ་ཆེའི་ཤིང་ལྗོན་པས་ རྣམ་པར་སྤྲས་པ། གསེར་གྱི་སྐུད་པ་བྲེས་པ། མེ་ཏོག་གིས་ཆལ་བར་བཀྲམ་པ། སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དང༌། ལྷ་མ་ཡིན་གྱི་ རིས་མེད་དེ། ལྷ་དང་མི་མང་པོས་ཡོངས་སུ་གང་བ། ཉན་ཐོས་བརྒྱ་སྟོང་མང་པོས་མཛེས་པར་བྱས་པ། བྱང་ཆུབ་སེམས་དཔའ་བརྒྱ་སྟོང་མང་པོས་བརྒྱན་པར་འགྱུར་རོ། །དེའི་ཚེའི་ ཚད་ནི་བར་གྱི་བསྐལ་པ་བཅུ་གཉིས་སུ་འགྱུར། དེའི་དམ་པའི་ཆོས་ནི་བར་གྱི་བསྐལ་པ་ཉི་ཤུར་གནས་པར་འགྱུར། དམ་པའི་ཆོས་ཀྱི་གཟུགས་བརྙན་ཡང་བར་གྱི་བསྐལ་པ་ཉི་ཤུར་ གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གཞན་དུ་མི་འགྱུར་བ་ཡི་ཚིག་བརྗོད་ཀྱི། །དེ་རིང་ང་ལས་དགེ་སློང་ཀུན་ ཉོན་ཅིག །ང་ཡི་ཉན་ཐོས་གནས་བརྟན་ཀཱ་ཏྱཱའི་བུ། །འདི་ནི་རྣམ་འདྲེན་རྣམས་ལ་མཆོད་བྱེད་འགྱུར། །འཇིག་རྟེན་འདྲེན་པ་མྱ་ངན་ཡོངས་འདས་ནས། །དེ་དག་རྣམས་ཀྱི་མཆོད་རྟེན་ རྣམ་མང་བྱེད། །བཀུར་སྟི་རྣམ་པ་མང་པོ་བྱེད་འགྱུར་ཞིང༌། སྤོས་དང་མེ་ཏོག་གིས་ཀྱང་མཆོད་པར་འགྱུར། །དེ་ཡིས་ཐ་མ་ཡི་ནི་ལུས་ཐོབ་ནས། །ཡོངས་སུ་དག་པའི་ཞིང་དུ་རྒྱལ་ བར་འགྱུར། །ཡེ་ཤེས་འདི་ཉིད་ཡོངས་སུ་རྫོགས་བྱས་ཏེ། །སྲོག་ཆགས་བྱེ་བ་སྟོང་ལ་འཆད་པར་བྱེད། །ལྷར་བཅས་འཇིག་རྟེན་དག་ན་བཀུར་སྟི་བྱས། །འོད་བྱེད་གཙོ་བོ་བཅོམ་ ༄༅། །ལྡན་འདས་སུ་འགྱུར། །དེ་མིང་ཛམྦུའི་ཆུ་བོ་གསེར་གྱི་འོད། །ལྷ་མི་བྱེ་བ་དག་ཀྱང་ཤིན་ཏུ་སྒྲོལ། །བྱང་ཆུབ་སེམས་དཔའ་དེ་བཞིན་ཉན་ཐོས་མང༌། །སངས་རྒྱས་ ཞིང་དེར་ཚད་མེད་གྲངས་མེད་དེ། །ཐམས་ཅད་འབྱུང་དང་འཇིགས་པ་རབ་སྤངས་ནས། །སངས་རྒྱས་བསྟན་པ་མཛེས་པར་བྱེད་པར་འགྱུར། །དེ་ནས་བཅོམ་ལྡན་འདས་ཀྱིས་ ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག །ཁྱེད་མོས་པར་བྱ། ཁོང་དུ་ཆུད་པར་བྱའོ། །ང་ཡི་ཉན་ཐོས་གནས་བརྟན་མཽངྒལ་གྱི་བུ་ཆེན་ པོ་འདི། སངས་རྒྱས་ཉི་ཁྲི་བརྒྱད་སྟོང་མཉེས་པར་བྱེད་པར་འགྱུར་ཏེ། སངས་རྒྱས་བཅོམ་ལྡན་འདས་དེ་དག་ལ་རྣམ་པ་མང་པོས་བཀུར་སྟི་བྱེད། བཙུན་པར་བྱེད། རི་མོར་བྱེད། མཆོད་པ་བྱེད། བརྗེད་པ་བྱེད། གསོལ་བར་བྱེད་པར་འགྱུར་རོ། །སངས་རྒྱས་བཅོམ་ལྡན་འདས་དེ་དག་ཡོངས་སུ་མྱ་ངན་ལས་འདས་ནས་ཀྱང༌། རིན་པོ་ཆེ་སྣ་བདུན་འདི་ལྟ་སྟེ། གསེར་དང༌། དངུལ་དང༌། བཻ་ཌཱུཪྻ་དང༌། ཤེལ་དང༌། མུ་ཏིག་དམར་པོ་དང༌། རྡོའི་སྙིང་པོ་དང༌། སྤུག་གི་མཆོད་རྟེན་འཕང་དུ་དཔག་ཚད་སྟོང༌། ཁོ་ར་ཁོར་ཡུག་ཏུ་དཔག་ ཚད་ལྔ་བརྒྱ་པ་དག་བྱེད་པར་འགྱུར་ཏེ། མཆོད་རྟེན་དེ་དག་ལ་མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། གོས་དང༌། གདུགས་དང༌། རྒྱལ་མཚན་དང༌། ལྷའི་བ་དན་དང༌། རྣམ་པར་རྒྱལ་བའི་བ་དན་དག་གིས་མཆོད་པར་བྱེད་པར་འགྱུར་རོ། །དེའི་ཕ་རོལ་གྱིའང་ཆེས་ཕ་རོལ་དུའང་སངས་རྒྱས་བྱེ་བ་ཁྲག་ཁྲིག་བརྒྱ་ སྟོང་ཕྲག་ཉི་ཤུ་རྣམས་ལ། དེ་བཞིན་དུ་འདི་ལྟར་བཀུར་སྟིར་བྱེད། བཙུན་པར་བྱེད། རི་མོར་བྱེད། མཆོད་པར་བྱེད། བརྗེད་པར་བྱེད། གསོལ་བར་བྱེད་པར་འགྱུར་རོ། །དེའི་འོག་ཏུ་ ལུས་ཐ་མ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་ བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཏ་མ་ལའི་ལོ་མ་དང་ཙནྡན་ཀྱི་དྲི་ཞེས་བྱ་བར་འཇིག་རྟེན་དུ་འབྱུང་སྟེ། དེའི་སངས་རྒྱས་ཀྱི་ ཞིང་ནི་མངོན་པར་དགའ་བ་ཞེས་བྱ་བར་འགྱུར་རོ། །བསྐལ་པ་དེ་ནི་དགའ་བས་གང་བ་ཞེས་བྱ་བར་འགྱུར་རོ། །དེའི་སངས་རྒྱས་ཀྱི་ཞིང་དེ་ཡོངས་སུ་དག་པ་སྟེ། མཉམ་པ་ཉམས་ དགའ་བ། མཛེས་པ་བལྟ་ན་སྡུག་པ། ཤེལ་གྱི་གཞི་ལ་རིན་པོ་ཆེའི་ཤིང་ལྗོན་པས་རྣམ་པར་སྤྲས་པ་མེ་ཏོག་སིལ་མས་གཏོར་བ། ལྷ་དང་མི་མང་པོས་རབ་ཏུ་གང་བ་སྟེ། འདི་ ལྟར་ཉན་ཐོས་དང་བྱང་ཆུབ་སེམས་དཔའི་དྲང་སྲོང་བརྒྱ་སྟོང་གནས་པར་འགྱུར་རོ། །དེའི་ཚེའི་ཚད་ནི་བར་གྱི་བསྐལ་པ་ཉི་ཤུ་རྩ་བཞིར་འགྱུར། དེའི་དམ་པའི་ཆོས་ནི་བར་གྱི་ ༄༅། །བསྐལ་པ་བཞི་བཅུར་གནས་པར་འགྱུར། དམ་པའི་ཆོས་ཀྱི་གཟུགས་བརྙན་ཡང་བར་གྱི་བསྐལ་པ་བཞི་བཅུར་གནས་པར་འགྱུར་རོ། །དེ་ནས་བཅོམ་ལྡན་ འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ང་ཡི་ཉན་ཐོས་མཽངྒལ་རིགས་འདི་ནི། །མི་ཡི་ལུས་སུ་གྱུར་པ་དེ་བོར་ནས། །སྐྱོབ་པ་རྒྱལ་བ་སྟོང་ཕྲག་ཉི་ཤུ་ དང༑ ༑གཞན་ཡང་རྡུལ་དང་བྲལ་བ་བརྒྱད་རྣམས་མཐོང༌། །ཚངས་པར་སྤྱད་པ་ཡང་ནི་དེར་སྤྱད་དེ། །སངས་རྒྱས་ཡེ་ཤེས་འདི་ནི་ཚོལ་བྱེད་ཅིང༌། །རྐང་གཉིས་གཙོ་བོ་འདྲེན་པ་ དེ་དག་ལ། །དེ་ཚེ་བཀུར་སྟི་རྣམ་པ་མང་པོ་བྱེད། །དེ་དག་གསུངས་པ་དམ་ཆོས་དྲི་མེད་པ། །བསྐལ་པ་བྱེ་བ་སྟོང་དུ་འཛིན་པར་འགྱུར། །བདེ་གཤེགས་དེ་དག་མྱ་ངན་ཡོངས་ འདས་ནས། །མཆོད་རྟེན་དག་ལ་དེ་ཚེ་མཆོད་བྱེད་འགྱུར། །རྒྱལ་མཆོག་དེ་དག་རྣམས་ཀྱི་མཆོད་རྟེན་ནི། །རིན་ཆེན་མཆོད་རྟེན་བ་དན་བཅས་པ་བྱེད། །འཇིག་རྟེན་ཕན་པ་ མཛད་པ་སྐྱོབ་རྣམས་ལ། །རོལ་མོའི་སྒྲ་དང་མེ་ཏོག་སྤོས་ཀྱིས་མཆོད། །དེ་ནས་འདི་ལྟར་ཐ་མའི་ལུས་ཀྱི་ཚེ། །བལྟ་སྡུག་ཡིད་དུ་འོང་བའི་ཞིང་དེར་ནི། །འཇིག་རྟེན་ཕན་པ་ ཐུགས་བརྩེར་དེར་འགྱུར་ཏེ། །མིང་ནི་ཏ་ལའི་ལོ་མ་ཙནྡན་དྲི། །བར་གྱི་བསྐལ་པ་ཉི་ཤུ་བཞི་ཚང་བར། །བདེ་བར་གཤེགས་པའི་ཚེ་ཡི་ཚད་དུ་འགྱུར། །རྟག་ཏུ་ལྷ་རྣམས་དང་ དང་ནི་མི་དག་ལ། །སངས་རྒྱས་ཚུལ་འདི་རབ་ཏུ་སྟོན་པར་འགྱུར། །དེ་ནས་རྒྱལ་བ་དེ་ཡི་ཉན་ཐོས་མང༌། །བྱེ་བ་སྟོང་ཕྲག་གངྒཱའི་བྱེ་མ་སྙེད། །དྲུག་མངོན་ཤེས་ཤིང་གསུམ་རིག་རྫུ་ འཕྲུལ་ཆེ། །བདེ་གཤེགས་བསྟན་ལ་མངོན་པར་ཤེས་པ་ཐོབ། །ཕྱིར་མི་ལྡོག་པའི་བྱང་ཆུབ་སེམས་དཔའ་མང༌། །བརྩོན་འགྲུས་བརྩམས་ཤིང་རྟག་ཏུ་ཤེས་བཞིན་ཅན། །བདེ་ བར་གཤེགས་ཀྱི་བསྟན་ལ་བརྩོན་བྱེད་པ། །སྟོང་ཕྲག་མང་པོ་དེ་དག་དེ་ན་ཡོད། །རྒྱལ་བ་དེ་དག་མྱ་ངན་ཡོངས་འདས་ནས། །བར་གྱི་བསྐལ་པ་བཞི་བཅུ་ཚང་བར་ནི། །དེ་ཡི་ཚེ་ན་ དམ་ཆོས་གནས་པར་འགྱུར། །གཟུགས་བརྙན་ཚད་ཀྱང་དེ་དང་མཉམ་པར་འགྱུར། །ང་ཡི་ཉན་ཐོས་འཕྲུལ་ཆེན་ལྔ་པོ་འདི། །ངས་ནི་དེ་དག་བྱང་ཆུབ་མཆོག་ལུང་བསྟན། །མ་ འོངས་དུས་ན་རང་འབྱུང་རྒྱལ་བ་ཡི། །དེ་དག་གི་ནི་སྤྱོད་པ་ང་ལས་ཉོན། །དམ་པའི་ཆོས་པདྨ་དཀར་པོ་ལས། ཉན་ཐོས་ལུང་བསྟན་པའི་ལེའུ་ཞེས་བྱ་སྟེ་དྲུག་པའོ།། །། དགེ་སློང་དག །སྔོན་བྱུང་བ་འདས་པའི་དུས་ན་བསྐལ་བ་གྲངས་མེད་པའི་ཡང་ཆེས་གྲངས་མེད་པ། དཔག་ཏུ་མེད་བསམ་གྱིས་མི་ཁྱབ་པ། གཞལ་དུ་མེད་པ་ཚད་མེད་པའི་ཕ་རོལ་ གྱིའང་ཆེས་ཕ་རོལ་ཏུ་གྱུར་པ། དེའི་ཚེ་དེའི་དུས་ན་བསྐལ་པ་གཟུགས་ཆེན་པོ་ཞེས་བྱ་བ་ལ། འཇིག་རྟེན་གྱི་ཁམས་འབྱུང་བ་ཞེས་བྱ་བར་དེ་བཞིན་གཤེགས་པ་དགྲ་བཅོམ་ ༄༅། །པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་པ། ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་ཞེས་བྱ་བ་འཇིག་རྟེན་དུ་བྱུང་ངོ༌། །དགེ་སློང་དག ། དེ་བཞིན་གཤེགས་པ་དེ་བྱུང་ནས་ཇི་སྲིད་ལོན་ཞེ་ན། དགེ་སློང་དག །འདི་ལྟ་སྟེ། དཔེར་ན། མི་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ སའི་ཁམས་ཐམས་ཅད་བཏབས་ཏེ་ཕྱེ་མར་བྱས་ལ། དེ་ནས་མི་དེས་འཇིག་རྟེན་གྱི་ཁམས་དེ་ནས་རྡུལ་ཕྲ་རབ་ཀྱི་རྡུལ་གཅིག་བླངས་ཏེ། ཤར་ཕྱོགས་སུ་འཇིག་རྟེན་གྱི་ཁམས་ སྟོང་འདས་ནས། དེར་རྡུལ་ཕྲ་རབ་ཀྱི་རྡུལ་གཅིག་བཞག །དེ་ནས་ཡང་མི་དེས་རྡུལ་ཕྲ་རབ་ཀྱི་རྡུལ་གཅིག་བླངས་ཏེ། དེའི་ཕ་རོལ་གྱིའང་ཆེས་ཕ་རོལ་འཇིག་རྟེན་གྱི་ཁམས་ སྟོང་འདས་ནས་རྡུལ་ཕྲ་རབ་ཀྱི་རྡུལ་གཅིག་བཞག་ལ། རྣམ་གྲངས་འདིས་མི་དེས་ཤར་ཕྱོགས་སུ་སའི་ཁམས་དེ་ཐམས་ཅད་བཞག་ན། དགེ་སློང་དག །དེ་ཇི་སྙམ་དུ་སེམས། འཇིག་རྟེན་གྱི་ཁམས་དེ་དག་གི་མཐའ་དང་མུ་བགྲང་བས་རྟོགས་པར་ནུས་སམ། དེ་དག་གིས་གསོལ་པ། བཅོམ་ལྡན་འདས། དེ་རྔོ་མི་སོགས[?]སོ། །བདེ་བར་གཤེགས་པ་དེ་རྡོ་ མི་ཐོགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག །གང་དག་ཏུ་རྡུལ་ཕྲ་རབ་བཞག་པ་དང༌། གང་དག་ཏུ་མ་བཞག་པའི་འཇིག་རྟེན་གྱི་ཁམས་དེ་རྣམས་ནི་རྩིས་ པའམ་རྩིས་པ་ཆེན་པོ་ལ་ལ་ཞིག་གིས་བགྲང་ཞིང་རྟོགས་པར་ནུས་ཀྱི། བཅོམ་ལྡན་འདས་དེ་བཞིན་གཤེགས་པ་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ། ཡོངས་སུ་མྱ་ངན་ལས་འདས་ནས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཇི་སྙེད་ལོན་པའི་བསྐལ་པ་ནི་བགྲང་བའི་ཚུལ་གྱིས་མཐའ་རྟོགས་པར་མི་ནུས་ཏེ། དགེ་སློང་དག །དེ་བཞིན་ གཤེགས་པ་དེ་ཡོངས་སུ་མྱ་ངན་ལས་འདས་ནས། དེ་ཙམ་དུ་ཡུན་རིང་བ་ནི་དེ་ལྟར་བསམ་གྱིས་མི་ཁྱབ་ཅིང་དེ་ལྟར་ཚད་མེད་དེ། ངས་ནི་དེ་བཞིན་གཤེགས་པའི་ཡེ་ཤེས་མཐོང་ པའི་སྟོབས་བསྐྱེད་པས། ཁ་སང་ངམ་དེ་རིང་ཡོངས་སུ་མྱ་ངན་ལས་འདས་པ་བཞིན་དྲན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ ཏོ༑ ༑རྗེས་སུ་དྲན་པ་འདས་པའི་བསྐལ་པ་མང༌། །དེ་ཚེ་ཐུབ་ཆེན་རྐང་གཉིས་རྣམས་ཀྱི་མཆོག །མངོན་ཤེས་ཡེ་ཤེས་ཆེན་པོས་ཟིལ་གྱིས་གནོན། །རྒྱལ་བ་དམ་པ་འཇིག་རྟེན་ བྱུང་བར་འགྱུར། །འདི་ལྟར་སྟོང་གསུམ་འདི་ཡི་འཇིག་རྟེན་ཁམས། །ལ་ལས་ཕྲ་རབ་རྡུལ་གྱི་རྡུལ་དུ་བྱས། །དེ་ནས་ཕྲ་རབ་རྡུལ་གཅིག་ཁྱེར་ནས་སུ། །ཞིང་སྟོང་རྣམས་ནི་འདས་ ༄༅། །ནས་དེ་བཞག་ལ། །དེ་བཞིན་དུ་ནི་གཉིས་དང་གསུམ་བཞག་སྟེ། །དེས་ནི་རྡུལ་དུ་གྱུར་པ་ཀུན་བཞག་པས། །འཇིག་རྟེན་འདི་ཡི་ཁམས་ནི་སྟོངས་གྱུར་ཅིང༌། ། རྡུལ་ཕྲན་དེ་ཡང་ཐམས་ཅད་ཟད་གྱུར་ལ། །འཇིག་རྟེན་ཁམས་དེ་དག་ན་ཡོད་པ་ཡི། །རྡུལ་ཕྲན་ཕྱེ་མ་དེ་ཡང་ཚད་མེད་པ། །དེ་དག་མ་ལུས་གང་གིས་རྡུལ་བྱས་ཏེ། །བསྐལ་པ་བརྒྱ་ འདས་མཚན་མར་འཇོག་བྱེད་པ། །དེ་ལྟར་བདེ་གཤེགས་མྱ་ངན་དེ་འདས་ནས། །བསྐལ་པ་བྱེ་བ་མང་པོ་དཔག་ཏུ་མེད། །ཕྲ་རབ་རྡུ་ཀུན་མཚན་མར་མི་ཆོག་སྟེ། །དེ་སྙེད་ བསྐལ་པ་མང་པོ་ཟད་པར་གྱུར། །འདྲེན་པ་མྱ་ངན་འདས་རིང་དེ་སྲིད་ལོན། །ཉན་ཐོས་བྱང་ཆུབ་སེམས་དཔའ་དེ་དག་ཀྱང༌། །དེ་འདྲ་དེ་བཞིན་གཤེགས་ཀྱི་ཡེ་ཤེས་ཀྱིས། །ཐམས་ ཅད་དྲན་པ་ཁ་སང་དེ་རིང་བཞིན། །དགེ་སློང་གང་དག་ཡེ་ཤེས་མཐའ་ཡས་ཅན། །དེ་བཞིན་གཤེགས་ཀྱི་ཡེ་ཤེས་འདི་འདྲའོ། །དྲན་པ་ཕྲ་ཞིང་ཟག་པ་མེད་པ་ཡིས། །བསྐལ་པ་ དུ་མ་བརྒྱས་ནི་ང་སངས་རྒྱས། །དགེ་སློང་དག །འདི་ལྟར་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་ པོས་ཟིལ་གྱིས་གནོན་པ་དེའི་ཚེའི་ཚད་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་རྩ་བཞིར་གྱུར་ཏོ། །བཅོམ་ལྡན་འདས་དེ་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་མངོན་པར་རྫོགས་པར་སངས་མ་རྒྱས་པར། སྔར་བྱང་ཆུབ་ཀྱི་སྙིང་པོ་མཆོག་དམ་པར་སོང་ནས། བདུད་ཀྱི་སྡེ་ཐམས་ཅད་རབ་ཏུ་བཅོམ་ཞིང་ཕམ་པར་བྱས་སོ། །རབ་ཏུ་བཅོམ་ ཞིང་ཕམ་པར་བྱས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་བྱའོ་སྙམ་ན་ཡང༌། དེ་སྲིད་དུ་དེ་ལ་ཆོས་དེ་དག་མངོན་སུམ་དུ་ ནི་མ་གྱུར་ཏོ། །དེ་བྱང་ཆུབ་ཀྱི་ཤིང་དྲུང་དུ་བྱང་ཆུབ་ཀྱི་སྙིང་པོར་བར་གྱི་བསྐལ་པ་གཅིག་ཏུ་གནས། བར་གྱི་བསྐལ་པ་གཉིས་སུ་གནས་ཀྱང་དེ་སྲིད་དུ་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་མ་རྒྱས་ནས། བར་གྱི་བསྐལ་པ་གསུམ་དང༌། བཞི་དང༌། ལྔ་དང༌། དྲུག་དང༌། བདུན་དང༌། བརྒྱད་དང༌། དགུ་དང༌། བཅུར་ ཡང་བྱང་ཆུབ་ཀྱི་ཤིང་དྲུང་དུ་བྱང་ཆུབ་ཀྱི་སྙིང་པོ་སྐྱིལ་མོ་ཀྲུང་ལན་གཅིག་བཅས་པ་ལས། བར་དུ་མ་ལངས་པར་འདུག་ཅིང་སེམས་མི་གཡོ། ལུས་མི་འགུལ་ཞིང༌། མི་འགྱུར་བར་ འདུག་ཀྱང་དེ་སྲིད་དུའང་དེ་ལ་ཆོས་དེ་དག་མངོན་དུ་མ་གྱུར་ནས། དགེ་སློང་དག །སུམ་ཅུ་རྩ་གསུམ་པའི་ལྷ་རྣམས་ཀྱིས། བཅོམ་ལྡན་འདས་བྱང་ཆུབ་ཀྱི་སྙིང་པོ་མཆོག་དམ་ པར་སོང་བའི་བཅོམ་ལྡན་འདས་དེ་གང་ལ་འདུག་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པའི་སེངྒེའི་ཁྲི་ཆེན་པོ་འཕང་དུ་དཔག་ ༄༅། །ཚད་ལྔ་བརྒྱ་པ་བཤམས་ཏེ། བཅོམ་ལྡན་འདས་དེ་བྱང་ཆུབ་ཀྱི་སྙིང་པོར་འདུག་མ་ཐག་ཏུ། དེ་ནས་ཚངས་རིས་ཀྱི་ལྷའི་བུ་དག་གིས། བྱང་ཆུབ་ཀྱི་སྙིང་པོ་དེའི་ཁོར་ ཡུག་དཔག་ཚད་བཅུ་ཚུན་ཆད་དུ་མེ་ཏོག་གི་ཆར་མངོན་པར་ཕབ་བོ། །བར་སྣང་ལས་རླུང་ལངས་པས་མེ་ཏོག་གང་དག་རྙིས་པ་དེ་དག་སེལ་ཏོ། །དེ་ལྟར་མེ་ཏོག་གི་ཆར་དེ་རབ་ཏུ་ཕབ་ པ་དེ༑ བཅོམ་ལྡན་འདས་བྱང་ཆུབ་གྱི་སྙིང་པོ་ལ་འདུག་པ་དེ་ལ་རྒྱུན་མི་འཆད་པར་རབ་ཏུ་ཕབ་སྟེ། བཅོམ་ལྡན་འདས་དེ་ལ་བར་གྱི་བསྐལ་པ་བཅུ་ཚང་བར་མངོན་པར་ཕབ་བོ། །དེ་ ལྟར་མེ་ཏོག་གི་ཆར་དེ་རབ་ཏུ་ཕབ་སྟེ། བཅོམ་ལྡན་འདས་དེ་དེ་ཡོངས་སུ་མྱ་ངན་ལས་འདའ་བའི་དུས་ཀྱི་བར་དུ་རབ་ཏུ་ཕབ་ཅིང༌། བཅོམ་ལྡན་འདས་དེ་ལ་མངོན་པར་འཐོར་རོ། ། རྒྱལ་ཆེན་བཞིའི་རིས་ཀྱི་ལྷའི་བུ་དག་ཀྱང༌། བཅོམ་ལྡན་འདས་བྱང་ཆུབ་ཀྱི་སྙིང་པོ་མཆོག་དམ་པ་ན་འདུག་པ་དེ་ལ་བཀུར་སྟི་བྱ་བའི་ཕྱིར། ལྷ་ཡུལ་པའི་ལྷའི་རྔ་རབ་ཏུ་བརྡུངས་ཏེ་ བར་གྱི་བསྐལ་པ་བཅུ་ཚང་བར་རབ་ཏུ་བརྡུངས་ནས། དེ་ནས་བཅོམ་ལྡན་འདས་དེ་ནམ་ཡོངས་སུ་མྱ་ངན་ལས་འདའ་བ་ཆེན་པོའི་དུས་ཀྱི་བར་དུ། ལྷའི་སིལ་སྙན་དག་རྒྱུན་མི་འཆད་ པར་རབ་ཏུ་བསིལ་ཏོ། །དགེ་སློང་དག །དེ་ནས་བར་གྱི་བསྐལ་པ་བཅུ་འདས་པ་དང༌། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །མངོན་པར་རྫོགས་ པར་སངས་རྒྱས་མ་ཐག་ཏུ་བཅོམ་ལྡན་འདས་དེ་གཞོན་ནུར་གྱུར་པའི་ཚེ། དེ་ལ་སྙིང་གི་བུ་ཤ་སྟག་བཅུ་དྲུག་ཡོད་དེ། དེ་དག་གི་བུ་ཐུ་བོ་ནི་ཡེ་ཤེས་འབྱུང་གནས་ཞེས་བྱ་བར་འགྱུར་ ཏེ༑ དགེ་སློང་དག །འདི་ལྟར་རྒྱལ་བུ་གཞོན་ནུ་བཅུ་དྲུག་པོ་དེ་དག་རེ་རེ་ལའང་རྩེད་མོར་བྱ་བ། སྣ་ཚོགས་བཀྲ་བ། དགའ་བར་འགྱུར་བ་བལྟ་ན་སྡུག་པ་རྣམ་པ་དུ་མ་ཡོད་ལ། དགེ་ སློང་དག་དེ་ནས་རྒྱལ་བུ་གཞོན་ནུར་གྱུར་པ་བཅུ་དྲུག་པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་ པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་རིག་ནས། རྩེད་མོར་བྱ་བ། དགའ་ བར་འགྱུར་བ་རྣམ་པ་མང་པོ་དེ་དག་སྤངས་ཏེ། མ་དང་མ་མ་དག་བཞིན་དུ་ཡོངས་སུ་བསྐོར་ཅིང་མདུན་དུ་བདར་ནས། འཁོར་ལོ་སྒྱུར་བའི་རྒྱལ་པོ་འཕགས་པའི་མཛོད་མང་པོ་དང༌། རྒྱལ་པོའི་བློན་པོ་དང༌། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་ ༄༅། །དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་བྱང་ཆུབ་ཀྱི་སྙིང་པོ་མཆོག་དམ་པ་ན་འདུག་པ་ག་ལ་བ་དེར་ དོང་ངོ༌། །བཅོམ་ལྡན་འདས་དེ་ལ་བཀུར་སྟི་བྱ་བ་དང༌། བཙུན་པར་བྱ་བ་དང༌། རི་མོར་བྱ་བ་དང༌། མཆོད་པ་དང༌། བརྗེད་པ་དང༌། གསོལ་བའི་ཕྱིར་དེར་དོང་སྟེ་ལྷགས་ནས། བཅོམ་ ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཐལ་མོ་སྦྱར་ཏེ། བཅོམ་ལྡན་འདས་དེའི་སྤྱན་སྔར་ཚུལ་དང་འདྲ་བའི་ ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །མངོན་པ་ཆེན་པོ་དྲུག་ལྡན་བླ་ན་མེད། །བསྐལ་པ་མཐའ་ཡས་དག་གིས་ཡང་དག་བསྒྲུབས། །ལུས་ཅན་ཐམས་ཅད་ མ་ལུས་བསྒྲལ་བའི་ཕྱིར། །ཁྱོད་ཀྱི་བརྣག་པ་བཟད་དེ་འདིར་རྫོགས་སོ། །རབ་ཏུ་དཀའ་མཛད་བསྐལ་པ་བར་མ་བཅུར། །གདན་གཅིག་དེ་ལ་བཞུགས་ཏེ་མཛད་པ་ན། །བར་དུ་ནམ་ ཡང་ཁྱོད་ཀྱི་སྐུ་མ་གཡོས། །ཕྱག་ཞབས་མ་གཡོས་དེ་བཞིན་གར་མ་གཤེགས། །ཁྱོད་ཐུགས་ཞི་བར་གྱུར་ཅིང་ཤིན་ཏུ་གནས། །རྟག་པར་མི་གཡོ་གྱུར་ཅིང་མི་འགུལ་ཏེ། །ཁྱོད་ ལ་ནམ་ཡང་གཡེང་བ་མི་མངའ་ལ། །ཁྱོད་ནི་རབ་ཞི་ཟག་པ་མེད་ལ་གནས། །དགེ་བ་དང་ནི་བདེ་བ་དགའ་བ་དང༌། །གནོད་པ་མེད་པར་བྱང་ཆུབ་མཆོག་འདི་བརྙེས། །དེ་ལྟ་བུ་ནི་ བདག་ཅག་རྣམས་ཀྱི་ཁེ། །མི་དབང་སེང་གེ་བདག་ཅག་དགེ་བར་སྐྱེས། །སྐྱེ་དགུ་འདི་ཀུན་མགོན་མེད་སྡུག་བསྔལ་ཏེ། །མིག་ཕྱུང་བདེ་བ་དག་ལས་རྣམ་པར་ཉམས། །སྡུག་བསྔལ་མཐར་ མཆི་ལམ་རྣམས་མི་འཚལ་བས། །ཐར་པའི་ཕྱིར་ནི་བརྩོན་འགྲུས་མི་སྐྱེད་དོ། །ཡུན་རིང་དུ་ནི་ངན་སོང་འཕེལ་བར་བགྱིད། །ལྷ་ཡི་ལུས་ལས་ཡོངས་སུ་ཉམས་པའི་ཆོས། །དེ་ན་རྒྱལ་ བའི་སྒྲ་ནི་ཡོང་མི་གྲག །འཇིག་རྟེན་འདི་ཀུན་གཏི་མུག་མུན་གནག་གོ །ཟག་མེད་དམ་པ་ཞི་བའི་གོ་འཕང་ནི། །འཇིག་རྟེན་རིག་པ་ཁྱོད་ཀྱིས་དེང་བརྙེས་པས། །བདག་ཅག་རྣམས་དང་ འཇིག་རྟེན་རྗེས་སུ་བཟུང༌། །མགོན་པོ་ཁྱོད་ལ་རབ་ཏུ་སྐྱབས་སུ་མཆི། །དགེ་སློང་དག །དེ་ནས་རྒྱལ་བུ་གཞོན་ནུར་གྱུར་བའི་བྱིས་པ་བཅུ་དྲུག་པོ་དེ་རྣམས་ཀྱིས་བཅོམ་ལྡན་འདས་ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ་ལ་ཚུལ་དང་འདྲ་བའི་ཚིགས་སུ་བཅད་ པ་འདི་དག་གིས་མངོན་པར་བསྟོད་ནས། སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་ཐུགས་བརྩེ་བ་དང༌། ལྷ་དང་མི་དང་སྐྱེ་བོ་ཕལ་པོ་ཆེའི་དོན་ དང་ཕན་པ་དང་བདེ་བའི་སླད་དུ། བཅོམ་ལྡན་འདས། ཆོས་བཤད་དུ་གསོལ། །བདེ་བར་གཤེགས་པ། ཆོས་བཤད་དུ་གསོལ་ཞེས་བཅོམ་ལྡན་འདས་དེ་ལ་ཆོས་ཀྱི་འཁོར་ལོ་ ༄༅། །བསྐོར་བར་གསོལ་བ་བཏབ་སྟེ། དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བསོད་ནམས་བརྒྱ་ཡི་མཚན་ཅན་ཆོས་བཤད་གསོལ། །རྣམ་པར་འདྲེན་པ་ མཚུངས་མེད་དྲང་སྲོང་ཆེ། །ཡེ་ཤེས་དམ་པ་ཁྱད་པར་འཕགས་བརྙེས་པ། །ལྷ་དང་བཅས་པའི་འཇིག་རྟེན་རྣམས་ལ་སྟོན། །བདག་ཅག་རྣམས་དང་སེམས་ཅན་འདི་དག་སྒྲོལ། ། ཅི་ནས་བྱང་ཆུབ་མཆོག་འདི་བདག་ཅག་དང༌། །སེམས་ཅན་འདི་རྣམས་ཀྱིས་ཀྱང་ཐོབ་འགྱུར་བར། །དེ་བཞིན་གཤེགས་ཀྱི་ཡེ་ཤེས་བསྟན་དུ་གསོལ། །སྤྱོད་པ་དང་ནི་ཡེ་ཤེས་ ཀུན་ཀྱང་མཁྱེན། །བསམ་པ་རྣམས་དང་སྔོན་གྱི་བསོད་ནམས་དང༌། །སྲོག་ཆགས་ཀུན་གྱི་མོས་པ་རྣམས་མཁྱེན་པ། །བླ་མེད་འཁོར་ལོ་དམ་པ་བསྐོར་དུ་གསོལ།། །། དམ་པའི་ཆོས་པདྨ་དཀར་པོ། །བམ་པོ་དྲུག་པ། །དགེ་སློང་དག །དེ་ནས་ཡང་དེའི་ཚེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དང༌། ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་རྣམ་པ་དྲུག་ཏུ་གཡོས་ནས་སྣང་བ་ཆེན་པོས་ཁྱབ་པར་གྱུར་ཏེ། འཇིག་རྟེན་གྱི་ཁམས་ དེ་དག་ཐམས་ཅད་ཀྱི་འཇིག་རྟེན་གྱི་བར་མི་ཁོམ་པར་གྱུར་ཅིང༌། མུན་པ་མུན་ནག་ཏུ་གྱུར་པ་གང་དག་ན། ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ། འདི་ལྟར་ གཟི་བརྗིད་ཆེ་བ་དེ་དག་གི་འོད་ཀྱིས་ཀྱང་སྣང་བར་མི་ནུས་ཏེ། དེ་དག་གི་ཁ་དོག་གིས་ཀྱང་ཁ་དོག་དང་གཟི་བརྗིད་དུ་བྱེད་མི་ནུས་པ་དེ་དག་ཏུའང་དེའི་ཚེ་སྣང་བ་ཆེན་པོར་བྱུང་བར་གྱུར་ ཏོ༑ ༑འཇིག་རྟེན་གྱི་བར་དེ་དག་ཏུ་སེམས་ཅན་གང་དག་སྐྱེས་པ་དེ་དག་ཀྱང༌། གཅིག་གིས་གཅིག་མཐོང་ནས། ཨེ་མ་ཀྱེ་སེམས་ཅན་གཞན་དག་ཅིག་ཀྱང་འདིར་སྐྱེས་ཤིང་འཁོད་ པ་ལྟ༑ ཨེ་མ་ཀྱེ་སེམས་ཅན་གཞན་དག་ཅིག་ཀྱང་འདིར་སྐྱེས་ཤིང་འཁོད་པ་ལྟ་ཞེས་གཅིག་གིས་གཅིག་ཤེས་སོ། །འཇིག་རྟེན་གྱི་ཁམས་དེ་དག་ཐམས་ཅད་ན་ལྷའི་གནས་ དང་ལྷའི་གཞལ་མེད་ཁང་གང་དག་ཡོད་པ་ནས། ཚངས་པའི་འཇིག་རྟེན་གྱི་བར་དུའང་རྣམ་པ་དྲུག་ཏུ་གཡོས་པར་གྱུར་ནས། སྣང་བ་ཆེན་པོས་ཁྱབ་སྟེ། ལྷ་རྣམས་ཀྱི་ལྷའི་ མཐུ་ལས་ཀྱང་འདས་སོ། །དགེ་སློང་དག །དེ་ལྟར་དེའི་ཚེ་འཇིག་རྟེན་གྱི་ཁམས་དེ་དག་ཏུ་ས་ཆེར་གཡོས་ཤིང་སྣང་བ་ཆེན་པོའང་བྱུང་བར་གྱུར་ཏོ། །དེ་ནས་ཤར་ཕྱོགས་སུ་ འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་དེ་དག་ན་ཚངས་པའི་གཞལ་མེད་ཁང་གང་དག་ཡོད་པ་དེ་དག་ཤིན་ཏུ་མཛེས་ཤིང་ལྷན་ནེ་ལྷང་ངེར་གྱུར་ལ། དཔལ་ ༄༅། །དང་ལྡན་ཞིང་གཟི་བརྗིད་ཅན་དུ་གྱུར་ཏོ། །དགེ་སློང་དག །དེ་ནས་ཚངས་པ་དེ་དག་འདི་སྙམ་དུ། ཚངས་པའི་གཞལ་མེད་ཁང་འདི་དག་ཤིན་ཏུ་མཛེས་ ཤིང་ལྷན་ནེ་ལྷང་ངེར་གྱུར་ལ། དཔལ་དང་ལྡན་ཞིང་གཟི་བརྗིད་ཅན་དུ་གྱུར་པ་འདི་སུའི་སྔ་ལྟས་སུ་འགྱུར་སྙམ་དུ་སེམས་སོ། །དགེ་སློང་དག །དེ་ནས་འཇིག་རྟེན་གྱི་ཁམས་བྱེ་ བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན། ཚངས་པ་ཆེན་པོ་གང་དག་འཁོད་པ་དེ་དག་ཐམས་ཅད་གནས་དག་ཏུ་ཕན་ཚུན་དོང་ནས་སྨྲའོ། །དགེ་སློང་དག །དེ་ནས་ཚངས་ པ་ཆེན་པོ་སེམས་ཅན་ཐམས་ཅད་སྐྱོབ་པ་ཞེས་བྱ་བས། ཚངས་པ་ཆེན་པོའི་ཚོགས་དེ་ལ་ཚིགས་སུ་བཅད་དེ་སྨྲས་པ། བདག་ཅག་ཐམས་ཅད་དེ་རིང་ཤིན་ཏུ་དགའ། །གཞལ་ མེད་ཁང་མཆོག་འདི་དག་རབ་ཏུ་འབར། །དཔལ་ལྡན་ལྷམ་མེ་ཡིད་དུ་འོང་བ་སྟེ། །ཅི་ཡི་ཕྱིར་ན་དེ་རིང་འདི་འདྲར་གྱུར། །དོན་འདི་བཙལ་བར་བྱས་ན་རབ་ཏུ་ལེགས། །ལྷ་ཡི་བུ་ ཞིག་དེ་རིང་སྐྱེས་གྱུར་ཏེ། །འདི་འདྲ་བར་ནི་དེ་ཡི་མཐུས་གྱུར་ཏམ། །སྔོན་ཆད་མ་བྱུང་འདི་ནི་དེ་རིང་སྣང༌། །གལ་ཏེ་སངས་རྒྱས་མི་དབང་རྒྱལ་པོ་དེ། །འཇིག་རྟེན་ག་ཤེད་དུ་ནི་དེང་ བྱུང་སྟེ། །དེ་རིང་ཕྱོགས་བཅུ་དག་ན་དཔལ་འབར་བ། །འདི་འདྲ་འདི་ནི་དེ་ཡི་ལྟས་ཡིན་ནམ། །དགེ་སློང་དག །དེ་ནས་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་ པོ་དེ་དག་ན་ཚངས་པ་ཆེན་པོ་གང་དག་འཁོད་པ་དེ་དག་ཐམས་ཅད་ལྷན་ཅིག་འདུས་ནས་དེ་དག་རང་རང་གི་ཚངས་པའི་ལྷའི་གཞལ་མེད་ཁང་དེ་དག་ཏུ་ཞུགས་ཏེ། ལྷའི་མེ་ཏོག་གི་ཕུར་མ་རི་རང་ ཙམ་ཐོགས་ནས། ཕྱོགས་བཞིར་རྒྱུ་ཞིང་འདོང་བ་ལས། ནུབ་ཕྱོགས་ལོགས་སུ་དོང་བ་དང༌། དགེ་སློང་དག །དེ་ནས་ཚངས་པ་ཆེན་པོ་དེ་དག་གིས་ནུབ་ཕྱོགས་ལོགས་ན་བཅོམ་ལྡན་འདས་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ། བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ཤིང༌། བྱང་ཆུབ་ཀྱི་ཤིང་དྲུང་ན་སེང་གེའི་ཁྲི་ལ་བཞུགས་ཏེ། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་དག་གིས་ནི་ཡོངས་སུ་བསྐོར་ཅིང་མདུན་གྱིས་བལྟས་ཏེ། སྲས་རྒྱལ་བུ་གཞོན་ནུ་བཅུ་དྲུག་པོ་དེ་དག་གིས་ནི་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པར་མཐོང་ ངོ༑ ༑མཐོང་ནས་ཀྱང་བཅོམ་ལྡན་འདས་དེ་ག་ལ་བ་དེར་དོང་ནས་ལྷགས་པ་དང༌། བཅོམ་ལྡན་འདས་དེའི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་དེ་ལ་ལན་བརྒྱ་སྟོང་དུ་མ་ བསྐོར་བ་བྱས་ནས། མེ་ཏོག་གི་ཕུར་མ་རི་རབ་ཙམ་དེ་དག་གིས་བཅོམ་ལྡན་འདས་དེ་ལ་གཏོར། རབ་ཏུ་གཏོར་ཏེ། བྱང་ཆུབ་ཀྱི་ཤིང་དེའི་དཔག་ཚད་བཅུ་ཚུན་ཆད་གཏོར་ནས། ཚངས་ ༄༅། །པའི་གཞལ་མེད་ཁང་དེ་དག་ཀྱང་བཅོམ་ལྡན་འདས་དེ་ལ་ཕུལ་ཏེ། བཅོམ་ལྡན་འདས། བདག་ཅག་ལ་ཐུགས་བརྩེ་བའི་སླད་དུ་ཚངས་པའི་གཞལ་མེད་ཁང་ འདི་དག་བཞེས་སུ་གསོལ། བཅོམ་ལྡན་འདས། བདག་ཅག་ལ་ཐུགས་བརྩེ་བའི་སླད་དུ་ཚངས་པའི་གཞལ་མེད་ཁང་འདི་དག་ཡོངས་སུ་སྤྱད་དུ་གསོལ། བདེ་བར་གཤེགས་པ། ཡོངས་སུ་སྤྱད་དུ་གསོལ་ཞེས་གསོལ་ཏོ། །དགེ་སློང་དག །དེ་ནས་ཚངས་པ་ཆེན་པོ་དེ་དག་གིས་རང་རང་གི་གཞལ་མེད་ཁང་དེ་དག་བཅོམ་ལྡན་འདས་དེ་ལ་ཕུལ་ནས། དེའི་ཚེ་ བཅོམ་ལྡན་འདས་དེའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ངོ་མཚར་གྱུར་པ་རྒྱལ་བ་ཚད་མེད་པ། །འཇིག་རྟེན་ཕན་པ་ཐུགས་བརྩེ་ འདིར་བྱུང་སྟེ། །མགོན་པོ་བླ་མ་སྟོན་པ་བྱུང་གྱུར་པས། །དེང་ནི་ཕྱོགས་བཅུ་པོ་དག་རྗེས་སུ་གཟུང༌། །འདི་དག་ནས་ཀྱང་འཇིག་རྟེན་མཁས་རྣམས་ནི། །བྱེ་བ་ཁྲག་ཁྲིག་ལྔ་བཅུ་ཚང་ བ་ནས། །བདག་ཅག་དེ་ནས་རྒྱལ་ལ་ཕྱག་འཚལ་ལྷགས། །གཞལ་མེད་ཁང་མཆོག་རྣམ་པ་ཀུན་ཏུ་སྤངས། །བདག་ཅག་རྣམས་ཀྱིས་སྔོན་ཆད་ལས་བགྱིས་པས། །གཞལ་མེད་ ཁང་པ་རི་མོ་བཀྲ་འདི་དག །བདག་ཅག་རྣམས་ལ་ཐུགས་བརྩེའི་སླད་དུ་བཞེས། །འཇིག་རྟེན་མཁྱེན་པ་ཅི་དགྱེས་སྤྱད་དུ་གསོལ། །དགེ་སློང་དག །དེ་ནས་ཚངས་པ་ཆེན་པོ་དེ་དག་ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེའི་སྤྱན་སྔར་ཚུལ་དང་འདྲ་བའི་ ཚིགས་སུ་བཅད་པ་འདི་དག་གིས་མངོན་པར་བསྟོད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་དུ་ཆོས་ཀྱི་འཁོར་ལོ་བསྐོར་དུ་གསོལ། བཅོམ་ ལྡན་འདས། མྱ་ངན་ལས་འདའ་བ་བཤད་དུ་གསོལ། བཅོམ་ལྡན་འདས། སེམས་ཅན་རྣམས་བསྒྲལ་དུ་གསོལ། བཅོམ་ལྡན་འདས། འཇིག་རྟེན་འདི་དག་རྗེས་སུ་གཟུང་དུ་ གསོལ། བཅོམ་ལྡན་འདས། ལྷ་དང་བཅས། བདུད་དང་བཅས། ཚངས་པ་དང་བཅས་པའི་འཇིག་རྟེན་དང༌། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་རྣམས་དང༌། ལྷ་དང་མི་ དང་ལྷ་མ་ཡིན་དུ་བཅས་པ་ལ་ཆོས་བསྟན་དུ་གསོལ། དེ་ནི་སྐྱེ་བོ་མང་པོ་ལ་སྨན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་ཐུགས་བརྩེ་བ་དང༌། སྐྱེ་བོ་ཕལ་པོ་ཆེ་དང༌། ལྷ་དང་མི་རྣམས་ཀྱི་དོན་དང་སྨན་པ་དང་བདེ་བར་འགྱུར་རོ། །དགེ་སློང་དག །དེ་ནས་ཚངས་པ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་གིས་སྒྲ་སྐད་གཅིག་ཏུ་མཐུན་ པར་བརྗོད་དེ། བཅོམ་ལྡན་འདས་དེ་ལ་ཚིགས་སུ་བཅད་པ་འདི་དག་གསོལ་ཏོ། །བཅོམ་ལྡན་འདས་ཀྱིས་ཆོས་བཤད་གསོལ། །རྐང་གཉིས་གཙོ་བོས་བསྟན་དུ་གསོལ། །བྱམས་ ༄༅། །པའི་སྟོབས་ཀྱིས་བཤད་དུ་གསོལ། །སེམས་ཅན་སྡུག་བསྔལ་རྣམས་ལས་སྒྲོལ། །འཇིག་རྟེན་སྒྲོན་མ་རྙེད་དཀའ་སྟེ། །ཨུ་དུམྦཱ་རའི་མེ་ཏོག་བཞིན། ། དཔའ་བོ་ཆེན་པོ་བྱུང་བས་ན། །དེ་བཞིན་གཤེགས་ལ་གསོལ་བར་འཚལ། །དགེ་སློང་དག །དེ་ནས་ཚངས་པ་ཆེན་པོ་དེ་དག་ལ། བཅོམ་ལྡན་འདས་དེས་ཅང་མི་གསུང་བར་ གྱུར་པས་གནང་ངོ༌། །དགེ་སློང་དག །དེའི་ཚེ་ན་ཤར་ལྷོའི་ཕྱོགས་མཚམས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་དག་ན། ཚངས་པའི་གཞལ་མེད་ ཁང་གང་དག་ཡོད་པ་དེ་དག་ཤིན་ཏུ་མཛེས་ཤིང་ལྷན་ནེ་ལྷང་ངེར་གྱུར་ལ། དཔལ་དང་ལྡན་ཞིང་གཟི་བརྗིད་ཅན་དུ་གྱུར་ཏོ། །དགེ་སློང་དག །དེ་ནས་ཚངས་པ་ཆེན་པོ་དེ་ དག་འདི་སྙམ་དུ། །ཚངས་པའི་གཞལ་མེད་ཁང་གང་དག་ཡོད་པ་དེ་དག་ཤིན་ཏུ་མཛེས་ཤིང་ལྷན་ནེ་ལྷང་ངེར་གྱུར་ལ། དཔལ་དང་ལྡན་ཞིང་གཟི་བརྗིད་ཅན་དུ་གྱུར་པ་འདི། སུའི་སྔ་ལྟས་སུ་འགྱུར་སྙམ་དུ་སེམས་སོ། །དགེ་སློང་དག །དེ་ནས་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན་ཚངས་པ་ཆེན་པོ་གང་དག་འཁོད་པ་ དེ་དག་ཐམས་ཅད་གནས་དག་ཏུ་ཕན་ཚུན་དོང་ནས་སྨྲའོ། །དགེ་སློང་དག །དེ་ནས་ཚངས་པ་ཆེན་པོ་རབ་ཏུ་སྙིང་རྗེ་ཅན་ཞེས་བྱ་བས། ཚངས་པའི་ཚོགས་ཆེན་པོ་དེ་ལ་ཚིགས་ སུ་བཅད་དེ་སྨྲས་པ། གྲོགས་དག་སུ་ཡི་སྔ་ལྟས་ཀྱིས། །གཞལ་མེད་ཁང་རྣམས་དེང་མཛེས་ཤིང༌། །ཤིན་ཏུ་གཟི་བརྗིད་ལྡན་གྱུར་པར། །དེ་རིང་འདི་ན་སྣང་བར་འགྱུར། །ཅི་སྟེ་དེ་རིང་ ལྷ་ཡི་བུ། །བསོད་ནམས་ཅན་ཞིག་འདིར་འོངས་ཏེ། །དེ་ཡི་མཐུས་ནི་གཞལ་མེད་ཁང༌། །འདི་དག་ཐམས་ཅད་མཛེས་གྱུར་ཏམ། །འོན་ཏེ་སངས་རྒྱས་རྐང་གཉིས་མཆོག །འཇིག་རྟེན་ འདིར་ནི་བྱུང་གྱུར་ཏམ། །གང་གིས་མཐུས་ནི་འདི་ལྟར་དེང༌། །གཞལ་མེད་ཁང་འདི་འདི་འདྲར་གྱུར། །ཐམས་ཅད་འདུས་ཏེ་བརྟག་པར་བྱ། །འདི་ནི་དོན་ཆུང་མ་ཡིན་ཏེ། །སྔོན་ཆད་དག་ནི་ འདི་འདྲ་བའི། །ལྟས་ནི་ནམ་ཡང་མ་མཐོང་ངོ༌། །ཕྱོགས་བཞི་དག་ཏུ་འདོང་བར་བྱ། །བྱ་བ་སྙེད་ཀྱི་ཞིང་ཡང་བསྐོར། །དེ་རིང་སངས་རྒྱས་འཇིག་རྟེན་དུ། །གདོན་མི་ཟ་བར་འབྱུང་བར་ འགྱུར༑ ༑དགེ་སློང་དག །དེ་ནས་ཚངས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག། རང་རང་གི་ཚངས་པའི་ལྷའི་གཞལ་མེད་ཁང་དེ་དག་ཏུ་ཞུགས་ཏེ། ལྷའི་མེ་ཏོག་གི་ཕུར་ མ་རི་རབ་ཙམ་ཐོགས་ནས། ཕྱོགས་བཞིར་རྒྱུ་ཞིང་འདོང་བ་ལས། ནུབ་བྱང་གི་ཕྱོགས་མཚམས་སུ་དོང་བ་དང༌། དགེ་སློང་དག །དེ་ནས་ཚངས་པ་ཆེན་པོ་དེ་དག་གིས་ནུབ་བྱང་གི་ ཕྱོགས་མཚམས་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་ ༄༅། །དེ༑ བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ཤིང༌། བྱང་ཆུབ་ཀྱི་ཤིང་དྲུང་ན་སེང་གེའི་ཁྲི་ལ་བཞུགས་ཏེ། ལྷ་དང༌། ཀླུ་དང༌། གནོད་སྦྱིན་དང༌། དྲི་ ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་དག་གིས་ནི་ཡོངས་སུ་བསྐོར་ཅིང་མདུན་གྱིས་བལྟས་ཏེ། སྲས་ རྒྱལ་བུ་གཞོན་ནུ་བཅུ་དྲུག་པོ་དེ་དག་ནི་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་མཐོང་ངོ༌། །མཐོང་ནས་ཀྱང་བཅོམ་ལྡན་འདས་དེ་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་བསྐོར་བ་བྱས་ནས་མེ་ཏོག་གི་ཕུར་མ་རི་རབ་ཙམ་དེ་དག་གིས་བཅོམ་ ལྡན་འདས་དེ་ལ་གཏོར། རབ་ཏུ་གཏོར་ཏེ། བྱང་ཆུབ་ཀྱི་ཤིང་དེའི་དཔག་ཚད་བཅུ་ཚུན་ཆད་གཏོར་ནས། ཚངས་པའི་གཞལ་མེད་ཁང་དག་ཀྱང་བཅོམ་ལྡན་འདས་དེ་ལ་ཕུལ་ ཏེ༑ བཅོམ་ལྡན་འདས། བདག་ཅག་ལ་ཐུགས་བརྩེ་བའི་སླད་དུ་ཚངས་པའི་གཞལ་མེད་ཁང་འདི་དག་བཞེས་སུ་གསོལ། བདེ་བར་གཤེགས་པ། བདག་ཅག་ལ་ཐུགས་བརྩེ་ བའི་སླད་དུ་ཚངས་བའི་གཞལ་མེད་ཁང་འདི་དག་ཡོངས་སུ་སྤྱད་དུ་གསོལ་ཞེས་གསོལ་ཏོ། །དགེ་སློང་དག །དེ་ནས་ཚངས་པ་ཆེན་པོ་དེ་དག་གིས་རང་རང་གི་གཞལ་མེད་ཁང་དེ་ དག་བཅོམ་ལྡན་འདས་དེ་ལ་ཕུལ་ནས། དེའི་ཚེ་བཅོམ་ལྡན་འདས་དེའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །མཚུངས་མེད་དྲང་སྲོང་ཆེ་ལ་ ཕྱག་འཚལ་ལོ། །ཀ་ལ་པིངྐའི་དབྱངས་སྙན་ལྷ་ཡི་ལྷ། །རྣམ་པར་འདྲེན་པ་ལྷར་བཅས་འཇིག་རྟེན་ན། །འཇིག་རྟེན་ཕན་བརྩེ་ཁྱོད་ལ་ཕྱག་འཚལ་ལོ། །མགོན་པོ་ཤིན་ཏུ་ཡུན་རིང་བརྒྱ་ ལམ་ན། །ངོ་མཚར་གྱུར་པ་དེ་རིང་འཇིག་རྟེན་བྱུང༌། །བསྐལ་པ་བརྒྱ་ཚངས་འཚོལ་བའི་འཇིག་རྟེན་འདི། །སངས་རྒྱས་བརྒྱད་ཅུ་དག་དང་མཚུངས་པར་གྱུར། །བསྐལ་པ་ཁྲག་ཁྲིག་བརྒྱད་ ཅུ་རྫོགས་པར་ནི། །རྐང་གཉིས་གཙོ་བོས་སྔོན་ཆད་སྟོངས་པར་གྱུར། །དེ་སྲིད་ངན་སོང་ས་འདི་རྣམ་པར་འཕེལ། །ལྷ་ཡི་ལུས་ནི་རྟག་ཏུ་ཉམས་པར་གྱུར། །ད་ནི་བདག་ཅག་རྣམས་ཀྱི་ བསོད་ནམས་ཀྱིས། །ཆོས་ཀྱི་རྒྱལ་པོ་མིག་དང་རྟེན་དང་གནས། །སྐྱོབ་དང་ཕ་དང་རྩ་ལག་ཕན་མཛད་པ། །ཐུགས་བརྩེར་ལྡན་པ་འཇིག་རྟེན་འདིར་བྱུང་ངོ༌། །དགེ་སློང་དག །དེ་ནས་ ཚངས་པ་ཆེན་པོ་དེ་དག་གིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་ གནོད་པ་དེའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་ ༄༅། །དུ་ཆོས་ཀྱི་འཁོར་ལོ་བསྐོར་དུ་གསོལ། བཅོམ་ལྡན་འདས། མྱ་ངན་ལས་འདའ་བ་བཤད་དུ་གསོལ། བཅོམ་ལྡན་འདས། སེམས་ཅན་རྣམས་བསྒྲལ་དུ་ གསོལ། བཅོམ་ལྡན་འདས། འཇིག་རྟེན་འདི་དག་རྗེས་སུ་གཟུང་དུ་གསོལ། བཅོམ་ལྡན་འདས། ལྷ་དང་བཅས། བདུད་དང་བཅས། ཚངས་པ་དང་བཅས་པའི་འཇིག་རྟེན་དང༌། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་རྣམས་དང༌། ལྷ་དང་མི་དང་ལྷ་མ་ཡིན་དུ་བཅས་པ་ལ་ཆོས་བཤད་དུ་གསོལ། དེ་ནི་སྐྱེ་བོ་མང་པོ་ལ་སྨན་པ་དང༌། སྐྱེ་བོ་མང་པོ་ལ་བདེ་བ་ དང༌། འཇིག་རྟེན་ལ་ཐུགས་བརྩེ་བ་དང༌། སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་སྨན་པ་དང་བདེ་བར་འགྱུར་རོ། །དགེ་སློང་དག །དེ་ནས་ཚངས་པ་ཆེན་པོ་བྱེ་བ་ཁྲག་ ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་གིས་སྒྲ་སྐད་གཅིག་ཏུ་མཐུན་པར་བརྗོད་དེ། བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །ཐུབ་པ་ཆེན་པོ་འཁོར་ལོ་མཆོག་ བསྐོར་གསོལ། །ཕྱོགས་བཅུ་རྣམས་སུ་ཆོས་རབ་བཤད་དུ་གསོལ། །སྡུག་བསྔལ་ཆོས་ཀྱིས་གཟིར་བའི་སེམས་ཅན་སྒྲོལ། །ལུས་ཅན་རྣམས་ལ་དགའ་ཞིང་རངས་པ་སྐྱེད། །དེ་ཐོས་ པས་ན་བྱང་ཆུབ་ཐོབ་འགྱུར་ཏེ། །ལྷ་ཡི་གནས་རྣམས་སུ་ཡང་མཆིས་པར་འགྱུར། །ཀུན་གྱིས་ལྷ་མ་ཡིན་གྱི་ལུས་སྤངས་ཏེ། །དུལ་ཞིང་ཞི་ལ་རབ་ཏུ་བདེ་བར་འགྱུར། །དགེ་སློང་དག །དེ་ ནས་ཚངས་པ་དེ་དག་ལའང་བཅོམ་ལྡན་འདས་དེས་ཅང་མི་གསུང་བར་གྱུར་པས་གནང་ངོ༌། །དགེ་སློང་དག །དེའི་ཚེ་ལྷོ་ཕྱོགས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་ བཅུ་པོ་དེ་དག་ན་ཚངས་པའི་གཞལ་མེད་ཁང་གང་དག་ཡོད་པ་དེ་དག་ཤིན་ཏུ་མཛེས་ཤིང་ལྷན་ནེ་ལྷང་ངེར་གྱུར་ལ། དཔལ་དང་ལྡན་ཞིང་གཟི་བརྗིད་ཅན་དུ་གྱུར་ཏོ། །དགེ་སློང་དག །དེ་ ནས་ཚངས་པ་ཆེན་པོ་དེ་དག་འདི་སྙམ་དུ་ཚངས་པའི་གཞལ་མེད་ཁང་འདི་དག་ནི་ཤིན་ཏུ་མཛེས་ཤིང་ལྷན་ནེ་ལྷང་ངེར་གྱུར་ལ། དཔལ་དང་ལྡན་ཞིང་གཟི་བརྗིད་ཅན་དུ་གྱུར་པ་འདི་སུའི་ སྔ་ལྟས་སུ་འགྱུར་སྙམ་དུ་སེམས་སོ། །དགེ་སློང་དག །དེ་ནས་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན་ཚངས་པ་ཆེན་པོ་གང་དག་འཁོད་པ་དེ་དག་ཐམས་ ཅད་གནས་དག་ཏུ་ཕན་ཚུན་དོང་ནས་སྨྲའོ། །དགེ་སློང་དག། དེ་ནས་ཚངས་པ་ཆེན་པོ་ཆོས་བཟང་ཞེས་བྱ་བས་ཚངས་པའི་ཚོགས་ཆེན་པོ་དེ་ལ་ཚིགས་སུ་བཅད་དེ་སྨྲས་པ། གྲོགས་པོ་དེ་ རིང་རྒྱུ་མེད་རྐྱེན་མེད་པར། །གཞལ་མེད་ཁང་འདི་ཐམས་ཅད་གཟི་ཅན་གྱུར། །འཇིག་རྟེན་འདིར་ནི་ཅུང་ཟད་ལྟས་ཅི་སྟོན། །དེ་ཡི་དོན་ནི་ལེགས་པར་བཙལ་པར་བྱ། །བསྐལ་པ་ བརྒྱ་ཕྲག་མི་ཉུང་འདས་པ་ནས། །འདི་འདྲའི་ལྟས་སྔོན་ནམ་ཡང་བྱུང་མ་གྱུར། །ཡང་ན་འདིར་ནི་ལྷ་ཡི་བུ་ཞིག་སྐྱེས། །ཡང་ན་འཇིག་རྟེན་འདིར་ནི་སངས་རྒྱས་བྱུང༌། །དགེ་སློང་ ༄༅། །དག༑ དེ་ནས་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན་ཚངས་པ་ཆེན་པོ་གང་དག་འཁོད་པ་དེ་དག་ཐམས་ཅད་ལྷན་ཅིག་ཏུ་འདུས་ ནས༑ རང་རང་གི་ཚངས་པའི་གཞལ་མེད་ཁང་དེ་དག་ཏུ་བཞུགས་ཏེ། ལྷའི་མེ་ཏོག་གི་ཕུར་མ་རི་རབ་ཙམ་དེ་དག་ཐོགས་ནས། ཕྱོགས་བཞིར་རྒྱུ་ཞིང་འདོང་པ་ལས་བྱང་ཕྱོགས་ སུ་དོང་བ་དང༌། དགེ་སློང་དག །དེ་ནས་ཚངས་པ་ཆེན་པོ་དེ་དག་གིས་བྱང་ཕྱོགས་ལོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་མངོན་པར་ཤེས་པའི་ཡེ་ཤེས་ཆེན་པོ་ཟིལ་གྱིས་གནོན་པ་དེ། བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ཤིང་བྱང་ཆུབ་ཀྱི་ཤིང་དྲུང་ན་སེངྒེའི་ཁྲི་ལ་བཞུགས་ ཏེ༑ ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་དག་གིས་ནི་ཡོངས་ སུ་བསྐོར་ཅིང་མདུན་གྱིས་བལྟས་ཏེ། སྲས་རྒྱལ་བུ་གཞོན་ནུ་བཅུ་དྲུག་པོ་དེ་དག་ནི་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་མཐོང་ངོ༌། །མཐོང་ནས་ཀྱང་བཅོམ་ལྡན་ འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་བསྐོར་བ་བྱས་ནས། མེ་ཏོག་ གི་ཕུར་མ་རི་རབ་ཙམ་དེ་དག་གིས་བཅོམ་ལྡན་འདས་དེ་ལ་གཏོར། རབ་ཏུ་གཏོར་ཏེ། བྱང་ཆུབ་ཀྱི་ཤིང་དེའི་དཔག་ཚད་བཅུ་ཚུན་ཆད་གཏོར་ནས་ཚངས་པའི་གཞལ་མེད་ཁང་དེ་དག་ ཀྱང་བཅོམ་ལྡན་འདས་ལ་ཕུལ་ཏེ། བཅོམ་ལྡན་འདས། བདག་ཅག་ལ་ཐུགས་བརྩེ་བའི་སླད་དུ་ཚངས་པའི་གཞལ་མེད་ཁང་འདི་དག་བཞེས་སུ་གསོལ། བདེ་བར་གཤེགས་པ། བདག་ཅག་ལ་ཐུགས་བརྩེ་བའི་སླད་དུ་ཚངས་པའི་གཞལ་མེད་ཁང་འདི་དག་ཡོངས་སུ་སྤྱད་དུ་གསོལ་ཞེས་གསོལ་ཏོ། །དགེ་སློང་དག །དེ་ནས་ཚངས་པ་ཆེན་པོ་དེ་དག་གིས་ཀྱང་རང་རང་ གི་གཞལ་མེད་ཁང་དེ་དག་བཅོམ་ལྡན་འདས་དེ་ལ་ཕུལ་ནས། དེའི་ཚེ་བཅོམ་ལྡན་འདས་དེའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འདྲེན་ པ་མཐོང་བ་ཤིན་ཏུ་རྙེད་པར་དཀའ། །ལེགས་གཤེགས་ཁྱོད་ནི་སྲིད་པའི་འདོད་ཆགས་འཇོམས། །འཇིག་རྟེན་གྱི་ནི་རིང་ལོན་ཁྱོད་དེ་མཐོང༌། །བསྐལ་པ་བརྒྱ་སྙེད་ཚང་ནས་སྣང་བར་ འགྱུར། །འཇིག་རྟེན་མགོན་པོ་སྐྱེ་དགུ་སྐོམ་ངོམས་མཛོད། །སྔོན་ཆད་མ་མཐོང་བརྒྱ་ལམ་སྣང་བར་གྱུར། །རྙེད་དཀའ་ཨུ་དུམྺཱ་རའི་མེ་ཏོག་བཞིན། །དེ་བཞིན་རྣམ་པར་འདྲེན་པ་བརྒྱ་ ལམ་མཐོང༌། །རྣམ་པར་འདྲེན་པ་བདག་ཅག་གཞལ་མེད་ཁང༌། །ཁྱོད་ཀྱི་མཐུས་ནི་དེ་རིང་མཛེས་པར་གྱུར། །ཀུན་ཏུ་སྤྱན་གྱིས་འདི་དག་བཞེས་སུ་གསོལ། །བདག་ཅག་ཐུགས་ ༄༅། །བརྩེའི་སླད་དུ་སྤྱད་པ་མཛོད། །དགེ་སློང་དག །དེ་ནས་ཚངས་པ་ཆེན་པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེའི་སྤྱན་སྔར། ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ ནས༑ བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་དུ་ཆོས་ཀྱི་འཁོར་ལོ་བསྐོར་དུ་གསོལ། བཅོམ་ལྡན་འདས། མྱ་ངན་ལས་འདའ་བ་ བཤད་དུ་གསོལ། བཅོམ་ལྡན་འདས། སེམས་ཅན་རྣམས་བསྒྲལ་དུ་གསོལ། །བཅོམ་ལྡན་འདས། འཇིག་རྟེན་འདི་དག་རྗེས་སུ་གཟུང་དུ་གསོལ། །བཅོམ་ལྡན་འདས། ལྷ་ དང་བཅས། བདུད་དང་བཅས། ཚངས་པ་དང་བཅས་པའི་འཇིག་རྟེན་དང༌། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་རྣམས་དང༌། ལྷ་དང་མི་དང་ལྷ་མ་ཡིན་དུ་བཅས་པ་ལ་ ཆོས་བཤད་དུ་གསོལ། དེ་ནི་སྐྱེ་བོ་མང་པོ་ལ་སྨན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་ཐུགས་བརྩེ་བ་དང༌། སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང༌། སྨན་ པ་དང་བདེ་བར་འགྱུར་རོ། །དགེ་སློང་དག །དེ་ནས་ཚངས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་གིས་སྒྲ་སྐད་གཅིག་ཏུ་མཐུན་པར་བརྗོད་དེ། བཅོམ་ལྡན་འདས་ལ་ ཚིགས་སུ་བཅད་པ་འདི་དག་གསོལ་ཏོ། །རྣམ་པར་འདྲེན་པ་བཅོམ་ལྡན་ཆོས་བཤད་གསོལ། །ཆོས་ཀྱི་འཁོར་ལོ་རབ་ཏུ་བསྐོར་དུ་གསོལ། །ཆོས་ཀྱི་རྔ་རྣམས་རབ་ཏུ་བརྡུང་དུ་གསོལ། ། ཆོས་ཀྱི་དུང་ཡང་རབ་ཏུ་བུད་པར་གསོལ། །དམ་ཆོས་ཆར་པ་འཇིག་རྟེན་དབབ་ཏུ་གསོལ། །དབྱངས་སྙན་པས་ནི་ལེགས་པར་བསྟན་དུ་གསོལ། །གསོལ་བ་བཞིན་དུ་ཆོས་ནི་བཤད་དུ་ གསོལ། །སེམས་ཅན་བྱེ་བ་ཁྲག་ཁྲིག་དགྲོལ་དུ་གསོལ། །དགེ་སློང་དག །དེ་ནས་ཚངས་པ་ཆེན་པོ་དག་ལ་ཡང་བཅོམ་ལྡན་འདས་དེས་ཅང་མི་གསུང་བར་གྱུར་པས་གནང་ངོ༌། །དེ་ བཞིན་དུ་སྦྱར་ཏེ་དེ་བཞིན་དུ་ལྷོ་ནུབ་ཀྱི་ཕྱོགས་དང༌། དེ་བཞིན་དུ་ནུབ་ཀྱི་ཕྱོགས་དང༌། དེ་བཞིན་དུ་ནུབ་བྱང་གི་ཕྱོགས་དང༌། དེ་བཞིན་དུ་བྱང་གི་ཕྱོགས་དང༌། དེ་བཞིན་དུ་བྱང་ཤར་གྱི་ ཕྱོགས་དང༌། འོག་གི་ཕྱོགས་ཀྱང་དེ་བཞིན་ནོ། །དགེ་སློང་དག །དེ་ནས་སྟེང་གི་ཕྱོགས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན་ཚངས་པའི་གཞལ་ མེད་ཁང་གང་དང་གང་དག་ཡོད་པ་དེ་དག་ཤིན་ཏུ་མཛེས་ཤིང་ལྷན་ནེ་ལྷང་ངེར་གྱུར་ལ་དཔལ་དང་ལྡན་ཞིང་གཟི་བརྗིད་ཅན་དུ་གྱུར་ཏོ། །དགེ་སློང་དག །དེ་ནས་ཚངས་པ་ཆེན་པོ་དེ་ དག་འདི་སྙམ་དུ་ཚངས་པའི་གཞལ་མེད་ཁང་འདི་དག་ཤིན་ཏུ་མཛེས་ཤིང་ལྷན་ནེ་ལྷང་ངེར་གྱུར་ལ་དཔལ་དང་ལྡན་ཞིང་གཟི་བརྗིད་ཅན་དུ་གྱུར་པ་འདི་སུའི་སྔ་ལྟས་སུ་འགྱུར་སྙམ་ ༄༅། །དུ་སེམས་སོ། །དགེ་སློང་དག །དེ་ནས་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན། ཚངས་པ་ཆེན་པོ་གང་དག་འཁོད་པ་དེ་དག་ཐམས་ ཅད་གནས་དག་ཏུ་ཕན་ཚུན་དོང་ནས་སྨྲའོ། །དགེ་སློང་དག །དེ་ནས་ཚངས་པ་ཆེན་པོ་གཙུག་ཏོར་ཅན་ཞེས་བྱ་བས་ཚངས་པའི་ཚོགས་ཆེན་པོ་དེ་དག་ལ་ཚིགས་སུ་བཅད་དེ་སྨྲས་པ། གྲོགས་པོ་ཅི་ཡི་རྒྱུ་ཡིས་འདི་ལྟར་གྱུར། །གཞལ་མེད་ཁང་རྣམས་གང་གིས་ཡོངས་སུ་ཁྱབ། གཟི་དང་ཁ་དོག་དང་ནི་འབར་བས་ཀྱང༌། །ཤིན་ཏུ་རྒྱས་པ་འདི་ལ་རྒྱུ་ཅི་ཡོད། །འདི་ འདྲ་སྔོན་ཆད་བདག་ཅག་ཡོང་མ་མཐོང༌། །སུས་ཀྱང་སྔོན་ཆད་འདི་འདྲ་མ་ཐོས་ཏེ། །དེ་རིང་འདི་ལྟར་འོད་ཀྱིས་འདི་ཁྱབ་པ་།ཤིན་ཏུ་ཆེར་མཛེས་འདི་ལ་རྒྱུ་ཅི་ཡོད། །ཅི་སྟེ་དགེ་བའི་ ལས་དང་ལྡན་པ་ཡི། །ལྷ་ཡི་བུ་ཞིག་དེ་རིང་འདིར་བྱུང་སྟེ། །བྱུང་བ་དེ་ཡི་མཐུ་ནི་འདི་ཡིན་ནམ། །ཡང་ན་བརྒྱ་ལ་སངས་རྒྱས་འཇིག་རྟེན་བྱུང༌། །དགེ་སློང་དག །དེ་ནས་འཇིག་རྟེན་ གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་ན་ཚངས་པ་ཆེན་པོ་གང་དག་ལ་འཁོད་པ་དེ་དག་ཐམས་ཅད་ལྷན་ཅིག་འདུས་ནས། རང་རང་གི་ཚངས་པའི་གཞལ་མེད་ ཁང་དེ་དག་ཏུ་ཞུགས་ཏེ། ལྷའི་མེ་ཏོག་གི་ཕུར་མ་རི་རབ་ཙམ་ཐོགས་ནས། ཕྱོགས་བཞིར་རྒྱུ་ཞིང་འདོང་བ་ལས་འོག་གི་ཕྱོགས་ལོགས་སུ་དོང་བ་དང༌། དགེ་སློང་དག །དེ་ནས་ ཚངས་པ་ཆེན་པོ་དེ་དག་གི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་ གནོན་པ་བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ཤིང༌། བྱང་ཆུབ་ཀྱི་ཤིང་དྲུང་ན་སེངྒེའི་ཁྲི་ལ་བཞུགས་ཏེ། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་དག་གིས་ནི་ཡོངས་སུ་བསྐོར་ཅིང་མདུན་གྱིས་བལྟས་ཏེ། སྲས་རྒྱལ་བུ་གཞོན་ནུ་བཅུ་དྲུག་པོ་དེ་དག་ནི་ ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པ་མཐོང་ངོ༌། །མཐོང་ནས་ཀྱང་བཅོམ་ལྡན་འདས་དེ་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་ བཙལ་ཏེ། བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་བསྐོར་བ་བྱས་ནས། མེ་ཏོག་གི་ཕུར་མ་རི་རབ་ཙམ་དེ་དག་གིས་བཅོམ་ལྡན་འདས་དེ་ལ་གཏོར། རབ་ཏུ་གཏོར་ཏེ། བྱང་ཆུབ་ཀྱི་ ཤིང་དེའི་དཔག་ཚད་བཅུ་ཚུན་ཆད་གཏོར་ནས། ཚངས་པའི་གཞལ་མེད་ཁང་དེ་དག་ཀྱང་བཅོམ་ལྡན་འདས་དེ་ལ་ཕུལ་ཏེ། བཅོམ་ལྡན་འདས། བདག་ཅག་ལ་ཐུགས་བརྩེ་བའི་སླད་དུ་ ཚངས་པའི་གཞལ་མེད་ཁང་འདི་དག་བཞེས་སུ་གསོལ། བདེ་བར་གཤེགས་པ། བདག་ཅག་ལ་ཐུགས་བརྩེ་བའི་སླད་དུ་ཚངས་པའི་གཞལ་མེད་ཁང་འདི་དག་ཡོངས་སུ་སྤྱད་དུ་གསོལ། ༄༅། །ཞེས་གསོལ་ཏོ། །དགེ་སློང་དག །དེ་ནས་ཚངས་པ་ཆེན་པོ་དེ་དག་རང་རང་གི་གཞལ་མེད་ཁང་དེ་དག་བཅོམ་ལྡན་འདས་དེ་ལ་ཕུལ་ནས། དེའི་ཚེ་བཅོམ་ལྡན་ འདས་དེ་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཁམས་གསུམ་དག་ན་སེམས་ཅན་རྣམས། །བཅིངས་པ་གང་དག་འགྲོལ་བ་ཡི། །འཇིག་རྟེན་ མགོན་པོ་སྐྱོབས་མཛད་པ། །སངས་རྒྱས་རྣམས་ནི་མཐོང་བ་ལེགས། །འཇིག་རྟེན་དབང་པོ་ཀུན་ཏུ་སྤྱན། །ཕྱོགས་བཅུར་རྣམ་པར་གཟིགས་མཛད་ཅིང༌། །འཆི་བ་མེད་པའི་སྒོ་ཕྱེ་ ནས༑ ༑སྐྱེ་བོ་མང་པོ་ཤིན་ཏུ་སྒྲོལ། །སྔོན་ཆད་བསྐལ་པ་བསམ་མི་ཁྱབ། །འདས་པ་དེ་དག་སྟོངས་གྱུར་ཏེ། །རྒྱལ་བ་དབང་པོ་མ་མཐོང་བས། །ཕྱོགས་བཅུ་དག་ནི་ལྡོངས་པར་ གྱུར༑ ༑མི་བཟད་སེམས་ཅན་དམྱལ་བ་དང༌། །ལྷ་མིན་དུད་འགྲོ་སྐྱེ་གནས་འཕེལ། །སྲོག་ཆགས་བྱེ་བ་ཕྲག་སྟོང་ནི། །ཡི་དྭགས་རྣམས་སུ་སྐྱེ་བར་འགྱུར། །ལྷ་མི་ལུས་ལས་ཉམས་ ནས་ནི། །འཆི་ཞིང་འཕོས་ནས་ངན་འགྲོར་མཆིས། །སངས་རྒྱས་རྣམས་ཀྱི་ཆོས་མ་ཐོས། །དེ་ཡི་འགྲོ་བ་སྡིག་ཅན་འགྱུར། །སྲོག་ཆགས་ཀུན་གྱི་སྤྱོད་པ་དག་པའི། །རྒྱུད་ཀྱི་ཤེས་རབ་ ཉམས་པར་གྱུར། །དེ་དག་བདེ་བ་རྣམ་པར་ཞིག །བདེ་བའི་འདུ་ཤེས་ཞིག་པར་གྱུར། །དེ་དག་ཆོ་ག་ལོག་པ་ལགས། །དམ་ཆོས་མ་ལགས་རྣམས་ལ་གནས། །འཇིག་རྟེན་ མགོན་གྱིས་མ་བརྟུལ་བས། །ངན་འགྲོ་རྣམས་སུ་དེ་དག་ལྷུང༌། །དགེ་བ་འཇིག་རྟེན་སྒྲོན་མ་ཡི། །ཤིན་ཏུ་རིང་ནས་བྱོན་པར་འགྱུར། །སེམས་ཅན་ཀུན་གྱི་སླད་དུ་ཡང༌། །རྗེས་སུ་ཐུགས་བརྩེ་ འདིར་བྱུང་ངོ༌། །སངས་རྒྱས་ཡེ་ཤེས་བླ་མེད་པ། །དགའ་ཞིང་བདེ་བར་རབ་ཏུ་བརྙེས། །ལྷ་དང་བཅས་པའི་འཇིག་རྟེན་དང༌། །བདག་ཅག་ཁྱོད་ལ་རྗེས་ཡི་རང༌། །གཙོ་བོ་ཁྱོད་ཀྱི་མཐུ་ཡིས་ ནི༑ ༑གཞལ་མེད་ཁང་དག་རྣམ་བཀྲ་བ། །དཔའ་བོ་ཆེན་པོ་ཁྱོད་ལ་འབུལ། །ཐུབ་པ་ཆེན་པོ་བཞེས་སུ་གསོལ། །བདག་ཅག་རྣམས་ལ་ཐུགས་བརྩེའི་སླད། །རྣམ་འདྲེན་ཡོངས་སུ་སྤྱད་དུ་ གསོལ། །བདག་ཅག་རྣམས་དང་སེམས་ཅན་ཀུན། །བྱང་ཆུབ་མཆོག་ལ་རེག་པར་བགྱི། །དགེ་སློང་དག །དེ་ནས་ཚངས་པ་ཆེན་པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེའི་སྤྱན་སྔར་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་ པར་བསྟོད་ནས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་དུ་ཆོས་ཀྱི་འཁོར་ལོ་བསྐོར་དུ་གསོལ། །བཅོམ་ལྡན་འདས། །མྱ་ངན་ལས་འདའ་ བ་བཤད་དུ་གསོལ། །བཅོམ་ལྡན་འདས། སེམས་ཅན་ཐམས་ཅད་བསྒྲལ་དུ་གསོལ། །བཅོམ་ལྡན་འདས། འཇིག་རྟེན་འདི་དག་རྗེས་སུ་གཟུང་དུ་གསོལ། བཅོམ་ལྡན་འདས། ལྷ་དང་ ༄༅། །བཅས། བདུད་དང་བཅས། ཚངས་པ་དང་བཅས་པའི་འཇིག་རྟེན་དང༌། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་རྣམས་དང༌། ལྷ་དང་མི་དང་ལྷ་མ་ཡིན་དུ་ བཅས་པ་ལ་ཆོས་བཤད་དུ་གསོལ། དེ་ནི་སྐྱེ་བོ་མང་པོ་ལ་སྨན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་ཐུགས་བརྩེ་བ་དང༌། སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ ཀྱི་དོན་དང༌། སྨན་པ་དང་བདེ་བར་འགྱུར་རོ། །དགེ་སློང་དག །དེ་ནས་ཚངས་པ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་པོ་དེ་དག་གི་སྒྲ་སྐད་གཅིག་ཏུ་མཐུན་པར་བརྗོད་དེ། བཅོམ་ལྡན་འདས་དེ་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གསོལ་ཏོ། །འཁོར་ལོ་བླ་མེད་དམ་པ་བསྐོར་དུ་གསོལ། །འཆི་བ་མེད་པའི་རྔ་ཡང་བརྡུང་དུ་གསོལ། །སེམས་ ཅན་སྡུག་བསྔལ་བརྒྱ་ལས་ཐར་བར་མཛོད། །མྱ་ངན་འདས་པའི་ལམ་ཡང་བསྟན་དུ་གསོལ། །བདག་ཅག་གསོལ་བ་བཞིན་དུ་ཆོས་གསུང་ཞིང༌། །འཇིག་རྟེན་འདི་དང་བདག་ཅག་ རྗེས་སུ་གཟུང༌། །བསྐལ་པ་བྱེ་བ་སྟོང་དུ་བསྒྲུབས་པ་ཡི། །གསུང་སྙན་འཇམ་པ་དེ་དག་དབྱུང་དུ་གསོལ། །དགེ་སློང་དག །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། ཚངས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དེ་དག་དང༌། སྲས་རྒྱལ་བུ་གཞོན་ནུ་བཅུ་དྲུག་པོ་དེ་དག་གིས་གསོལ་བ་བཏབ་པ་མཁྱེན་ནས། དེའི་ཚེ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། གང་གིས་ཀྱང་འཇིག་རྟེན་དུ་ ཆོས་དང་མཐུན་པས་མ་བསྐོར་བའི་ཆོས་ཀྱི་འཁོར་ལོ་འདི་ལྟ་སྟེ། འདི་ནི་སྡུག་བསྔལ་བའོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་ བསྔལ་འགོག་པར་འགྲོ་བའི་ལམ་མོ་ཞེས་བྱ་བ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་རོ། །དགེ་སློང་དག །འདི་ལྟར་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་ གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག། སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་ གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང༌། མྱ་ངན་དང༌། སྨྲེ་ སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །མ་ རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་ ༄༅། །པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག ། སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང༌། མྱ་ངན་དང༌། སྨྲེ་སྔགས་ འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་འགག་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ་ཞེས་བྱ་བ་ རྟེན་ཅིང་འབྲེལ་པར་འབྱུང་བ་ལ་འཇུག་པའང་རྒྱ་ཆེར་རབ་ཏུ་སྟོན་ཏོ། །དགེ་སློང་དག །དེ་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེས། ཆོས་ཀྱི་འཁོར་ལོ་འདི་ལྷ་དང་བཅས། བདུད་དང་བཅས། ཚངས་པ་དང་བཅས་པའི་འཇིག་ རྟེན་དང༌། དགེ་སྦྱོང་དང་བྲམ་ཟེར་བཅས་པའི་འཁོར་གྱི་མདུན་དུ་བསྐོར་ནས། སྐད་ཅིག་ཐང་ཅིག་ཡུད་ཙམ་དེ་ཉིད་ལ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་ལེན་པ་ མེད་པར་ཟག་པ་རྣམས་ལས་སེམས་རྣམ་པར་གྲོལ་ནས། དེ་དག་ཐམས་ཅད་ཀྱང་རིག་པ་གསུམ་དང་ལྡན་པ་དང༌། མངོན་པར་ཤེས་པ་དྲུག་དང་ལྡན་པ་དང༌། རྣམ་པར་ཐར་པ་ བརྒྱད་ལ་བསམ་གཏན་པར་གྱུར་ཏོ། །དགེ་སློང་དག །དེ་ནས་ཡང་མཐར་གྱིས་བཅོམ་ལྡན་འདས་དེ་ཆོས་བསྟན་པ་ལན་གཉིས་སུ་མཛད་དེ། དེ་བཞིན་ལན་གསུམ། ལན་བཞིའི་བར་ དུ་ཆོས་བསྟན་པ་མཛད་དོ། །དགེ་སློང་དག །དེ་ནས་བཅོམ་ལྡན་འདས་དེའི་ཆོས་བསྟན་པ་ལན་རེ་རེ་ལའང་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་གངྒཱའི་ཀླུང་གི་བྱེ་མ་སྙེད་ལེན་པ་ མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དགེ་སློང་དག །དེའི་འོག་ཏུ་བཅོམ་ལྡན་འདས་དེའི་ཉན་ཐོས་ཀྱི་དགེ་འདུན་བགྲང་བ་ལས་འདས་པ་བྱུང་ངོ༌། །དགེ་སློང་དག། དེ་ནས་ཡང་དེའི་ཚེ་རྒྱལ་བུ་བཅུ་དྲུག་པོ་དེ་དག་གཞོན་ནུར་གྱུར་བཞིན་དུ་དད་དེ། ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་དག་ཐམས་ཅད་དགེ་ཚུལ་ཕར་གྱུར་ཏེ། མཛངས་ཤིང་གསལ་ ལ་ཡིད་རྣོ་ཞིང་མཁས་ཏེ། སངས་རྒྱས་བརྒྱ་སྟོང་མང་པོ་ལ་སྤྱད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་སྟེ། དགེ་སློང་དག །དེ་ནས་དགེ་ཚུལ་བཅུ་དྲུག་ པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ་ལ་འདི་ སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པའི་ཉན་ཐོས་བྱེ་བ་ཁྲག་ཁྲིག་བརྒྱ་སྟོང་མང་པོ་འདི་དགྲ་བཅོམ་ལྡན་འདས་ཀྱིས་ཆོས་བསྟན་པས་རྫུ་འཕྲུལ་ཆེ་ཞིང་ ༄༅། །མཐུ་ཆེ་བ་དང་དབང་ཆེ་བར་ཡོངས་སུ་གྲུབ་བོ། །བཅོམ་ལྡན་འདས། དེ་ལྟར་ལགས་པས་བདག་ཅག་ལ་ཐུགས་བརྩེ་བའི་སླད་དུ་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ལས་བརྩམས་ཏེ་ཆོས་བསྟན་དུ་གསོལ། བདག་ཅག་ཀྱང་དེ་བཞིན་གཤེགས་པའི་རྗེས་སུ་སློབ་བོ། །བཅོམ་ལྡན་འདས། དེ་བཞིན་གཤེགས་པའི་ཡེ་ཤེས་ བདག་ཅག་མཐོང་བར་འཚལ་ལོ། །བདག་ཅག་གི་དོན་འདི་ལ་བཅོམ་ལྡན་འདས་ཉིད་མངོན་སུམ་སྟེ། བཅོམ་ལྡན་འདས་ཁྱོད་སེམས་ཅན་ཐམས་ཅད་ཀྱི་བསམ་པ་མཁྱེན་པས་ བདག་ཅག་གི་བསམ་པའང་མཁྱེན་ཏོ། །དགེ་སློང་དག །དེ་ནས་དེའི་ཚེ་རྒྱལ་བུ་གཞོན་ནུ་བྱིས་པ་ཁྱེའུ་རབ་ཏུ་བྱུང་བ་དགེ་ཚུལ་དེ་དག་མཐོང་ནས། འཁོར་ལོས་བསྒྱུར་བའི་རྒྱལ་ པོ་དེའི་འཁོར་དུ་གྱུར་པ་ཇི་སྙེད་ཡོད་པའི་ཕྱེད་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་རབ་ཏུ་བྱུང་བར་གྱུར་ཏོ། །དགེ་སློང་དག །དེ་ནས་བཅོམ་ལྡན་འདས་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེས་དགེ་ཚུལ་དེ་དག་གིས་གསོལ་བ་ བཏབ་པ་མཁྱེན་ཏེ། བསྐལ་པ་ཉི་ཁྲི་འདས་ནས་དམ་པའི་ཆོས་པདྨ་དཀར་པོ་ཞེས་བྱ་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའ་རྣམས་ལ་ གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་དེ་འཁོར་བཞི་པོ་དེ་དག་ཐམས་ཅད་ལ་རྒྱ་ཆེར་རབ་ཏུ་བསྟན་ཏོ། །དགེ་སློང་དག །དེ་ནས་ཡང་དེའི་ཚེ་ན་བཅོམ་ལྡན་ འདས་ཀྱིས་བཤད་པ་དགེ་ཚུལ་བཅུ་དྲུག་པོ་དེ་དག་གིས་བླངས་སོ། །བཟུང་ངོ༌། །ཀུན་ཆུབ་པར་བྱས་སོ། །དགེ་སློང་དག །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེས། དགེ་ཚུལ་བཅུ་དྲུག་པོ་དེ་དག་བླ་ན་མེད་པ་ཡང་དག་པར་རྫོགས་པའི་ བྱང་ཆུབ་ཏུ་ལུང་བསྟན་ཏོ། །དགེ་སློང་དག །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ཤེས་པའི་ཡེ་ ཤེས་ཆེན་པོས་ཟིལ་གྱིས་གནོན་པས་ཆོས་ཀྱི་རྣམ་གྲངས་འདི་བཤད་པ་ལ། ཉན་ཐོས་རྣམས་དང༌། དགེ་ཚུལ་བཅུ་དྲུག་པོ་དེ་དག་མོས་པར་གྱུར་ཏོ། །སྲོག་ཆགས་བྱེ་བ་ཁྲག་ ཁྲིག་བརྒྱ་སྟོང་མང་པོ་ནི་ཐེ་ཚོམ་ཟ་བར་གྱུར་ཏོ། །དགེ་སློང་དག །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེས། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་བསྐལ་པ་བརྒྱ་སྟོང་གི་བར་དུ་མི་མནོ་བར་བསྟན་ནས། ནང་དུ་ཡང་དག་ ༄༅། །འཇོག་ལ་འཇུག་པའི་ཕྱིར་གཙུག་ལག་ཁང་དུ་ཞུགས་སོ། །དགེ་སློང་དག །དེ་བཞིན་གཤེགས་པ་དེ་འདི་ལྟར། བསྐལ་པ་བརྒྱད་ཁྲི་བཞི་སྟོང་གི་བར་ དུ་གཙུག་ལག་ཁང་དུ་གནས་ཏེ། ནང་དུ་ཡང་དག་འཇོག་ལ་ཞུགས་སོ། །དགེ་སློང་དག །དེ་ནས་དགེ་ཚུལ་བཅུ་དྲུག་པོ་དེ་དག་གིས། བཅོམ་ལྡན་འདས་དེ་ནང་དུ་ཡང་དག་འཇོག་ ལ་ཞུགས་པར་རིག་ནས་སོ་སོ་ནས་ཆོས་ཀྱི་སྟན་སེང་གེའི་ཁྲི་བཤམས་ཏེ། དེ་དག་ལ་འཁོད་ནས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་འཁོར་བཞི་པོ་དག་ལ་བསྐལ་ པ་བརྒྱད་ཁྲི་བཞི་སྟོང་དུ་རྒྱ་ཆེར་རབ་ཏུ་བསྟན་ཏོ། །དགེ་སློང་དག །དེ་ནས་དགེ་ཚུལ་བྱང་ཆུབ་སེམས་དཔའ་རེ་རེས་ཀྱང༌། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་དྲུག་ ཅུ་དྲུག་ཅུའི་བྱེ་མ་སྙེད་ལ་ཡང་དག་པར་བསྟན་ཏེ། ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས། ཡང་དག་པར་འཛིན་དུ་བཅུག །ཞུགས་པར་བྱས་ནས་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དགེ་སློང་དག །དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་དེ། བསྐལ་པ་བརྒྱད་ཁྲི་བཞི་སྟོང་པོ་དེ་དག་འདས་ནས། དྲན་པ་དང་ལྡན་ཞིང་མཁྱེན་ བཞིན་དུ་ཏིང་ངེ་འཛིན་དེ་ལས་བཞེངས་སོ། །བཅོམ་ལྡན་འདས་དེ་བཞེངས་ནས་ཆོས་ཀྱི་གདན་ག་ལ་བ་དེར་བཞུད་དེ་བྱོན་ནས་གདན་བཤམས་པ་ལ་བཞུགས་སོ། །དགེ་སློང་དག །དེ་ནས་ བཅོམ་ལྡན་འདས་དེ་ཆོས་ཀྱི་གདན་དེ་ལ་བཞུགས་མ་ཐག་ཏུ། དེ་ནས་འཁོར་འདུས་པ་ཐམས་ཅད་ལ་གཟིགས་ནས་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག །དགེ་ཚུལ་ བཅུ་དྲུག་པོ་འདི་དག་ངོ་མཚར་དུ་གྱུར་པ། རྨད་དུ་གྱུར་པ། ཤེས་རབ་དང་ལྡན་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་བྱས་པ། ཤིན་ཏུ་སྤྱོད་པ་སྤྱད་པ། སངས་རྒྱས་ཀྱི་ཡེ་ཤེས་འཛིན་དུ་འཇུག་པ། སངས་རྒྱས་ཀྱི་ཡེ་ཤེས་ལ་འཛུད་པ། སངས་རྒྱས་ཀྱི་ཡེ་ཤེས་ཡང་དག་པར་སྟོན་པ་ཡིན་གྱི། དགེ་སློང་དག །དགེ་ཚུལ་བཅུ་དྲུག་པོ་འདི་ དག་ལ་ཕྱིར་ཞིང་བསྙེན་བཀུར་གྱིས་ཤིག །དགེ་སློང་དག །ཉན་ཐོས་ཀྱི་ཐེག་པ་ཅན་ནམ། རང་སངས་རྒྱས་ཀྱི་ཐེག་པ་ཅན་ནམ། བྱང་ཆུབ་སེམས་དཔའི་ཐེག་པ་ཅན་ཡང་རུང་སྟེ། གང་ དག་ཁ་ཅིག་རིགས་ཀྱི་བུ་འདི་དག་གིས་ཆོས་བཤད་པ་ལ་མི་སྤོང་མི་སྨོད་པ་དེ་དག་ཐམས་ཅད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ། །དེ་དག་ཐམས་ ཅད་དེ་བཞིན་གཤེགས་པའི་ཡེ་ཤེས་ཐོབ་པར་འགྱུར་རོ། །དགེ་སློང་དག །རིགས་ཀྱི་བུ་བཅུ་དྲུག་པོ་དེ་དག་གིས་བཅོམ་ལྡན་འདས་དེའི་བསྟན་པ་ལ་དམ་པའི་ཆོས་པདྨ་དཀར་ ༄༅། །པོའི་ཆོས་ཀྱི་རྣམ་གྲངས་འདི་ཡང་དང་ཡང་དུ་རབ་ཏུ་བསྟན་ཏོ། །དགེ་སློང་དག །དགེ་ཚུལ་བྱང་ཆུབ་སེམས་དཔའ་སེམས་དཔའ་ཆེན་པོ་བཅུ་དྲུག་པོ་བྱང་ ཆུབ་སེམས་དཔའ་དེ་དག་རེ་རེས་ཀྱང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་དྲུག་ཅུ་དྲུག་ཅུའི་བྱེ་མ་སྙེད་བྱང་ཆུབ་ཏུ་ཡང་དག་པར་བཙུད་པར་གྱུར་ཏེ། དེ་དག་ཐམས་ ཅད་ཀྱང་དེ་དག་ཉིད་དང༌། ཚེ་རབས་དེ་དང་དེ་དག་ཏུ་རབ་ཏུ་བྱུང་སྟེ། དེ་དག་ལ་ལྟ་ཞིང་དེ་དག་ལ་ཆོས་ཉན་ཏོ། །དེ་དག་གིས་སངས་རྒྱས་བྱེ་བ་སྟོང་ཕྲག་བཞི་བཅུ་མཉེས་པར་བྱས་ སོ༑ ༑ཁ་ཅིག་ནི་ད་དུང་ཡང་མཉེས་པར་བྱེད་དོ། །དགེ་སློང་དག །ཁྱེད་མོས་པར་བྱ། ཁོང་དུ་ཆུད་པར་བྱའོ། །རྒྱལ་བུ་གཞོན་ནུ་བཅུ་དྲུག་པོ་དེ་དག་གཞོན་ནུར་གྱུར་བཞིན་དུ་བཅོམ་ ལྡན་འདས་དེའི་བསྟན་པ་ལ་དགེ་ཚུལ་ཆོས་སྨྲ་བར་གྱུར་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས། དེ་དག་ ཐམས་ཅད་ད་ལྟ་ན་བཞུགས་ཏེ་འཚོ་ཞིང་གཞེས་སོ། །ཕྱོགས་བཅུའི་སངས་རྒྱས་ཀྱི་ཞིང་ཐ་དད་པ་དག་ན་ཉན་ཐོས་དང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ ལ་ཆོས་སྟོན་ཏོ། །དགེ་སློང་དག །འདི་ལྟ་སྟེ། ཤར་ཕྱོགས་ན་འཇིག་རྟེན་གྱི་ཁམས་མངོན་པར་དགའ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་མི་འཁྲུགས་པ་ཞེས་བྱ་བ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷུན་པོ་བརྩེགས་པ་ཞེས་བྱ་བའོ། །དགེ་སློང་དག། །ཤར་ ལྷོའི་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་སྒྲ་ཞེས་བྱ་བ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་སེང་གེའི་རྒྱལ་མཚན་ཞེས་བྱ་བའོ། །དགེ་སློང་དག །ལྷོ་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའ་ལ་གནས་ པ་ཞེས་བྱ་བ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟག་པར་ཡོངས་སུ་མྱ་ངན་ལས་འདས་པ་ཞེས་བྱ་བའོ། །དགེ་སློང་དག །ལྷོ་ནུབ་ཀྱི་ ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་རྒྱལ་མཚན་ཞེས་བྱ་བ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་ཚངས་པའི་རྒྱལ་མཚན་ཞེས་བྱ་བའོ། །དགེ་སློང་དག །ནུབ་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་ དཔག་མེད་ཅེས་བྱ་བ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་གྱི་ཁམས་ཐམས་ཅད་ཀྱི་གནོད་པ་དང་སྐྱོ་བ་ལས་རབ་ཏུ་ ༄༅། །བརྒལ་བ་ཞེས་བྱ་བའོ། །དགེ་སློང་དག །ནུབ་བྱང་གི་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏ་མ་ལའི་ འདབ་མ་དང་ཙནྡན་གྱི་དྲི་མངོན་པར་ཤེས་པ་ཞེས་བྱ་བ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷུན་པོ་ལྟ་བུ་ཞེས་བྱ་བའོ། །དགེ་སློང་ དག །བྱང་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་སྒྲ་མར་མེ་ཞེས་བྱ་བ་དང༌། དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་སྤྲིན་སྒྲ་རྒྱལ་པོ་ཞེས་བྱ་བའོ། །དགེ་སློང་དག །བྱང་ཤར་གྱི་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་འཇིག་རྟེན་ཐམས་ཅད་ཀྱི་འཇིགས་པ་དང་ཕམ་པ་དང་བག་ཚ་བ་རྣམ་པར་འཇོམས་པ་ཞེས་བྱ་བའོ། །དགེ་སློང་དག །དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ནི་བཅུ་དྲུག་པ་སྟེ། དབུས་ཀྱི་འཇིག་རྟེན་གྱི་ཁམས་མི་མཇེད་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་ རྫོགས་པར་སངས་རྒྱས་སོ། །དགེ་སློང་དག །དགེ་ཚུལ་དུ་གྱུར་པ་ངེད་ལས་སེམས་ཅན་གང་དག་གིས་ཆོས་ཐོས་ཤིང༌། བཅོམ་ལྡན་འདས་དེའི་བསྟན་པ་ལ་བྱང་ཆུབ་སེམས་ དཔའ་རེ་རེས་ཀྱང་སེམས་ཅན་བརྒྱ་སྟོང་ཕྲག་མང་པོ་གངྒཱའི་ཀླུང་གི་བྱེ་མ་སྙེད་ངེད་ཀྱིས་སོ་སོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་བཙུད་པ་དེ་དག །དགེ་ སློང་དག །ད་དུང་ཉན་ཐོས་ཀྱི་ས་ན་གནས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡོངས་སུ་སྨིན་པར་བྱེད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་ པར་རྫོགས་པར་འཚང་རྒྱ་བའི་གོ་རིམ་ནི་དེ་ལྟའོ། །དེ་ཅིའི་ཕྱིར་ཞེ་ན། དགེ་སློང་དག །འདི་ལྟར་དེ་བཞིན་གཤེགས་པའི་ཡེ་ཤེས་ལ་མོས་པར་དཀའ་བའི་ཕྱིར་རོ། །དགེ་སློང་དག། ང་བྱང་ཆུབ་སེམས་དཔར་གྱུར་པས་བཅོམ་ལྡན་འདས་དེའི་བསྟན་པ་ལ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་དཔག་ཏུ་མེད་པ་བགྲང་དུ་མེད་པ་གངྒཱའི་ཀླུང་གི་བྱེ་མ་སྙེད་གང་དག་ཐམས་ ཅད་མཁྱེན་པའི་ཆོས་ཐོས་པར་བྱ་བའི་སེམས་ཅན་དེ་དག་གང་ཞེ་ན། དགེ་སློང་དག །དེ་དག་ནི་ཁྱེད་ཡིན་ཏེ། དེའི་ཚེ་དེའི་དུས་ན་སེམས་ཅན་དག་ཏུ་གྱུར་ཏོ། །དགེ་སློང་དག །ང་ མྱ་ངན་ལས་འདས་ནས་མ་འོངས་པའི་དུས་ན་ཉན་ཐོས་གང་དག་འབྱུང་བ་དེ་དག་བྱང་ཆུབ་སེམས་དཔའི་སྤྱོད་པ་ཉན་ཡང་བདག་ཅག་བྱང་ཆུབ་སེམས་དཔའ་ཡིན་པར་མི་ཤེས་པས། དེ་དག་ཐམས་ཅད་ཀྱང་ཡོངས་སུ་མྱ་ངན་ལས་འདའ་བར་འདུ་ཤེས་ནས་ཡོངས་སུ་མྱ་ངན་ལས་འདའ་བར་འགྱུར་རོ། །དགེ་སློང་དག །འོན་ཀྱང་འཇིག་རྟེན་གྱི་ཁམས་གཞན་དག་ན། ༄༅། །ང་མིང་གཞན་དང་གཞན་དག་གིས་གནས་པ་དེར་དེ་དག་དེ་བཞིན་གཤེགས་པའི་ཡེ་ཤེས་འཚོལ་ཞིང་སྐྱེ་བར་འགྱུར་རོ། །དེ་ནའང་དེ་བཞིན་གཤེགས་ པ་རྣམས་ཀྱི་ཡོངས་སུ་མྱ་ངན་ལས་འདས་པ་འདི་གཅིག་པུ་སྟེ། འདི་ལས་གུད་ན་མྱ་ངན་ལས་འདའ་བ་གཉིས་སུ་གཞན་དག་མེད་དོ་ཞེས་དེ་ལྟ་བུའི་བྱ་བ་འདི་ཉན་པར་འགྱུར་རོ། །དགེ་ སློང་དག །ཆོས་བསྟན་པ་མངོན་པར་བསྒྲུབ་པ་དེ་ནི། དེ་བཞིན་གཤེགས་པ་རྣམས་ཀྱི་ཐབས་མཁས་པར་རིག་པར་བྱ་སྟེ། དགེ་སློང་དག །གང་གི་ཚེ་ན་དེ་བཞིན་གཤེགས་ པ་བདག་ཉིད་ཡོངས་སུ་མྱ་ངན་ལས་འདའ་བའི་དུས་ཀྱང་གཟིགས་ལ་འཁོར་ཡོངས་སུ་དག་ཅིང་མོས་པ་སྙིང་པོར་བྱེད་པ། སྟོང་པའི་ཆོས་རྟོགས་པར་བྱེད་པ། སྟོང་པའི་ཆོས་ རྟོགས་པར་ཁོང་དུ་ཆུད་པ། བསམ་གཏན་དང་ལྡན་པ། བསམ་གཏན་ཆེན་པོ་དང་ལྡན་པའང་གཟིགས་ན། དགེ་སློང་དག །དེ་བཞིན་གཤེགས་པ་དུས་ལ་བབ་པར་མཁྱེན་ ནས༑ བྱང་ཆུབ་སེམས་དཔའ་ཐམས་ཅད་དང༌། ཉན་ཐོས་ཐམས་ཅད་བསགས་ཏེ་ཕྱིས་དོན་འདི་ཡང་དག་པར་སྒྲོགས་སོ། །དགེ་སློང་དག །འཇིག་རྟེན་ན་ཐེག་པའམ། ཡོངས་ སུ་མྱ་ངན་ལས་འདས་པ་གཉིས་སུ་གང་ཡང་མེད་ན། གསུམ་དུ་ལྟ་ཅི་སྨོས། དགེ་སློང་དག །འདི་ནི་དེ་བཞིན་གཤེགས་པ་རྣམས་ཀྱི་ཐབས་མཁས་པ་སྟེ། སེམས་ ཅན་ཡུན་རིང་དུ་མ་རུང་ཞིང་དམན་པ་ལ་དགའ་བ་འདོད་པ་ལ་ཆགས་པར་མཁྱེན་ནས། དགེ་སློང་དག །དེ་དག་གང་ལ་མོས་པ་བཞིན་དུ་དེ་དག་ལ་དེ་བཞིན་གཤེགས་པ་མྱ་ངན་ལས་ འདས་པ་དེ་འཆད་དོ། །དགེ་སློང་དག །འདི་ལྟ་སྟེ། དཔེར་ན། འདི་ལྟར་རིན་པོ་ཆེའི་གླིང་འདོང་བའི་ཕྱིར་འབྲོག་དགོན་པ་དཔག་ཚད་ལྔ་བརྒྱ་པ་དེར་སྐྱེ་བོའི་ཚོགས་ལྷགས་པར་གྱུར་ ཏེ༑ དེ་དག་གི་ནང་ན་ལམ་མཚོན་པ་མཛངས་ཤིང་གསལ་ལ། ཡིད་གཞུངས་ཤིང་མཁས་པ་གཅིག་པུ་ཡོད་པ་དེས་མྱ་ངམ་དགོན་པ་དེ་ལས་འགྲོན་པ་མང་པོ་དེ་དག་སྒྲོལ་ལོ། །དེ་ ནས་སྐྱེ་བོ་ཕལ་པོ་ཆེ་དེ་དག་ངལ་ཞིང་ཆད་དེ་སྐྲག་ནས་འདི་སྐད་ཅེས། ཀྱེ་འཕགས་པ་མཚོན་མ་ཡོངས་སུ་འདྲེན་པ་བདག་ཅག་ངལ་ཞིང་ཆད་དེ་འཇིགས་ཤིང་སྐྲག་པས་མྱ་ངན་དེ་ ལས་མ་འདས་པར་མཁྱེན་པར་མཛོད་ཅིག །འབྲོག་དགོན་པ་འདི་ནི་ཤིན་ཏུ་རིང་བས་སླར་ལྡོག་གོ་ཞེས་བྱས་པ་དང༌། དགེ་སློང་དག །དེ་ནས་མཚོན་མ་དེ་དག་ཐབས་མཁས་པས་ མི་དེ་དག་སླར་ལྡོག་པར་འདོད་པར་ཤེས་ནས། འདི་སྙམ་དུ་ཉོན་མོངས་འདི་དག་རིན་པོ་ཆེའི་གླིང་ཆེན་པོ་དེ་ལྟ་བུར་མི་འགྲོ་བར་གྱུར་ན་མི་རུང་ངོ་སྙམ་དུ་བསམས་ནས་དེས་དེ་དག་ ལ་སྙིང་བརྩེ་བའི་ཕྱིར་ཐབས་མཁས་པ་སྦྱར་ཏེ། དགོན་པའི་དབུས་སུ་དཔག་ཚད་བརྒྱའམ། དཔག་ཚད་ཉིས་བརྒྱ་འདས་པ་དང་རྫུ་འཕྲུལ་གྱི་གྲོང་ཁྱེར་མངོན་པར་སྤྲུལ་ནས་དེ་ནས་ ༄༅། །དེས་མི་དེ་དག་ལ་འདི་སྐད་ཅེས། ཁྱེད་ཅག་མ་འཇིགས་ཤིག །སླར་མ་ལྡོག་པར་ཡུལ་ཆེན་པོ་འདིར་ངལ་སོས་ཤིག། བྱ་བ་གང་དག་ཅི་ཡོད་པ་དེ་དག་ ཐམས་ཅད་ཀྱང་འདིར་གྱིས་ཤིག །འདིར་མྱ་ངན་ལས་འདའ་བ་ཐོབ་པར་གནས་པར་གྱིས་ཤིག། འདིར་ངལ་བསོས་ནས་སུ་ལ་དགོས་པར་གྱུར་པ་དེ་ནི་རིན་པོ་ཆེའི་གླིང་ཆེན་པོ་ འདིར་འདོང་ངོ་ཞེས་བསྒོ་བ་དང༌། དགེ་སློང་དག །དེ་ནས་དགོན་པར་ཕྱིན་པའི་མི་དེ་དག་བདག་ཅག་ནི་འབྲོག་དགོན་པ་ལས་ཐར་ནས་འདིར་མྱ་ངན་ལས་འདའ་བ་ཐོབ་སྟེ་གནས་ སོ་སྙམ་ནས་ངོ་མཚར་ཐོབ་པར་གྱུར་ཏོ། །དགེ་སློང་དག། དེ་ནས་མི་དེ་དག་རྫུ་འཕྲུལ་གྱི་གྲོང་ཁྱེར་དེར་ཞུགས་ནས་ཕྱིན་པ་སྙམ་དུ་འདུ་ཤེས་པར་གྱུར། བརྒལ་བ་སྙམ་དུ་ འདུ་ཤེས་པར་གྱུར། མྱ་ངན་ལས་འདས་པར་འདུ་ཤེས་པར་གྱུར། བདག་ཅག་མྱ་ངན་ལས་འདས་ཤིང་བསིལ་བར་གྱུར་པར་སེམས་པར་གྱུར་ཏོ། །དེ་ནས་མཚོན་མས་ དེ་དག་ངལ་བསོས་པར་ཤེས་ནས་རྫུ་འཕྲུལ་གྱི་གྲོང་ཁྱེར་དེ་མི་སྣང་བར་བྱས་སོ། །མི་སྣང་བར་བྱས་ནས་མི་དེ་དག་ལ་འདི་སྐད་ཅེས་གྲོང་ཁྱེར་ཆེན་པོ་འདི་ནི་ཁྱེད་ངལ་བསོ་བའི་ ཕྱིར་ཁོ་བོས་སྤྲུལ་པ་ཡིན་ཏེ། རིན་པོ་ཆེའི་གླིང་ཆེན་པོ་དེ་དང་ཡང་ཉེ་བས་སེམས་ཅན་ཁྱེད་འདོང་ངོ་ཞེས་བསྒོ་བ་དེ་བཞིན་དུ། དགེ་སློང་དག །དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་ཀྱང༌། ཁྱེད་དང་སེམས་ཅན་ཐམས་ཅད་ཀྱི་མཚོན་མའོ། །དགེ་སློང་དག །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་ཀྱིས་འདི་ལྟར་ཉོན་མོངས་པའི་དགོན་པ་ཆེན་པོ་འདི་ལ་སྐྱོ་བར་བྱ། བཟླ་བར་བྱ། སྤང་བར་བྱ་ན། སེམས་ཅན་འདི་དག་སངས་རྒྱས་ཀྱི་ཡེ་ཤེས་ གཅིག་པུ་ཐོས་ནས་སྤངས་ཏེ་ཕྱིར་ལྡོག་ཅིང༌། སངས་རྒྱས་ཀྱི་ཡེ་ཤེས་བསྒྲུབ་པ་འདི་ཉོན་མོངས་པ་མང་པོ་ཞེས་མི་འཇུག་པར་མི་འགྱུར་གྲང་ཞེས་གཟིགས་ཏེ། དེ་ལ་དེ་བཞིན་གཤེགས་ པས་སེམས་ཅན་བསམ་པའི་སྟོབས་ཆུང་བར་མཁྱེན་ནས། ཇི་ལྟར་མཚོན་མ་དེས་སེམས་ཅན་དེ་དག་ངལ་བསོ་བའི་ཕྱིར་རྫུ་འཕྲུལ་གྱི་གྲོང་ཁྱེར་དེ་མངོན་པར་སྤྲུལ་ཏེ། སེམས་ཅན་དེ་དག་ ངལ་བསོ་ནས་འདི་ནི་རྫུ་འཕྲུལ་གྱི་གྲོང་ཁྱེར་ཡིན་ནོ་ཞེས་བསྒོ་བ་དེ་བཞིན་དུ། དགེ་སློང་དག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐབས་མཁས་ པ་ཆེན་པོས་སེམས་ཅན་རྣམས་ངལ་བསོ་བའི་ཕྱིར། བར་དུ་མྱ་ངན་ལས་འདའ་བའི་ས་གཉིས་བཤད་ཅིང་རབ་ཏུ་བསྟན་ཏེ། འདི་ལྟར་ཉན་ཐོས་ཀྱིས་དང༌། རང་སངས་རྒྱས་ཀྱི་ས་སྟེ། དགེ་ སློང་དག །གང་གི་དུས་ན་སེམས་ཅན་དེ་དག་དེ་ལ་གནས་པར་གྱུར་པ་དེ་ན། དགེ་སློང་དག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་འདི་སྐད་ ༄༅། །དུ༑ དགེ་སློང་དག། ཁྱེད་བྱ་བ་བྱས་པ་མ་ཡིན་ཏེ། བྱེད་པ་བྱས་པ་མ་ཡིན་ལ། དགེ་སློང་དག། ཁྱེད་དེ་བཞིན་གཤེགས་པའི་ཡེ་ཤེས་ལ་ཉེ་བར་གྱུར་གྱི་ ལྟོས་ཤིག །རྟོགས་ཤིག། གང་ཁྱེད་ཀྱི་མྱ་ངན་ལས་འདས་པ་དེ་མྱ་ངན་ལས་འདས་པ་མ་ཡིན་ཏེ། དགེ་སློང་དག །གང་ཐེག་པ་གསུམ་དུ་བཤད་པ་དེ་ནི་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐབས་མཁས་པའོ་ཞེས་ཡང་དག་པར་སྒྲོགས་སོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱས་ པར་བསྟན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མངོན་ཤེས་ཡེ་ཤེས་ཟིལ་གནོན་འཇིག་རྟེན་འདྲེན། །འདི་ལྟར་བྱང་ཆུབ་སྙིང་པོར་ཞུགས་གྱུར་ པ༑ ༑དེ་ཡང་བར་གྱི་བསྐལ་པ་བཅུ་ཚང་བར། །དོན་དམ་གཟིགས་པ་བྱང་ཆུབ་མ་བརྙེས་སོ། །ལྷ་དང་ཀླུ་དང་ལྷ་མིན་གསང་བ་པ། །རྒྱལ་བ་དེ་ལ་རབ་ཏུ་མཆོད་པར་ བརྩོན། །མི་ཡི་འདྲེན་པ་བྱང་ཆུབ་སངས་རྒྱས་ལ། །དེར་ནི་མེ་ཏོག་ཆར་པ་རབ་ཏུ་ཕབ། །རྒྱལ་བ་དེ་ལ་མཆོད་ཅིང་བཀུར་སྟིའི་ཕྱིར། །སྟེང་གི་མཁའ་ལ་དེ་དག་རྔ་བརྡུང་ ངོ༑ ༑རིང་ནས་བླ་ན་མེད་པའི་གནས་རྟོགས་ཕྱིར། །དེ་ནས་རྒྱལ་བ་ཤིན་ཏུ་སྡུག་བསྔལ་གྱུར། །དེ་ནས་བར་གྱི་བསྐལ་པ་བཅུ་འདས་ནས། །བཅོམ་ལྡན་ཟིལ་གནོན་ དེ་ཡིས་བྱང་ཆུབ་ཐོབ། །དེ་ཚེ་ལྷ་མི་ཀླུ་དང་ལྷ་མ་ཡིན། །ཐམས་ཅད་རབ་ཏུ་དགའ་ཞིང་མགུ་པར་གྱུར། །ཡོན་ཏན་ཕྱུག་བ་མི་གཙོ་དེ་ཡི་སྲས། །གཞོན་ནུར་གྱུར་པ་དཔའ་བོ་བཅུ་ དྲུག་རྣམས། །སྲོག་ཆགས་བྱེ་བ་སྟོང་གིས་མདུན་བདར་ཏེ། །རྐང་གཉིས་དབང་པོ་མཆོག་དེའི་དྲུང་དུ་འདོང༌། །རྣམ་པར་འདྲེན་གྱི་ཞབས་ལ་ཕྱག་བཙལ་ནས། །མི་དབང་སེང་ གེས་འདིར་ནི་ལེགས་བཤད་པས། །བདག་ཅག་འཇིག་རྟེན་འདི་རྣམས་ཚིམ་མཛད་ཅིང༌། །ཆོས་རབ་བསྟན་དུ་གསོལ་ཞེས་གསོལ་བ་བཏབ། །རིང་ནས་ཕྱོགས་བཅུའི་འཇིག་ རྟེན་འདི་རྣམས་སུ། །རྣམ་འདྲེན་ཆེན་པོ་བྱུང་བར་རབ་ཏུ་རིག །ལྟས་ཀྱིས་སྲོག་ཆགས་རྣམས་ནི་བསྐུལ་བའི་ཕྱིར། །ཚངས་པའི་གཞལ་མེད་ཁང་རྣམས་རབ་ཏུ་བསྐྱོད། ། ཤར་གྱི་ཕྱོགས་སུ་ཞིང་རྣམས་བྱེ་བ་ཕྲག། སྟོང་ཕྲག་ལྔ་བཅུ་དེ་དག་གཡོས་པར་གྱུར། །དེ་ནས་ཚངས་པ་གཞལ་མེད་ཁང་མཆོག་དག། དེ་དག་རབ་ཏུ་གཟི་བརྗིད་ལྡན་ པར་གྱུར། །དེ་དག་སྔ་ལྟས་འདི་འདྲ་རིག་གྱུར་ནས། །འཇིག་རྟེན་འདྲེན་དབང་དྲུང་དུ་ཉེ་བར་ལྷགས། །འདྲེན་པ་དེ་ལ་མེ་ཏོག་མངོན་པར་འཐོར། །དེ་ལ་གཞལ་མེད་ ཁང་དེ་ཐམས་ཅད་ཕུལ། །འཁོར་ལོ་རབ་ཏུ་བསྐོར་བར་གསོལ་བ་འདེབས། །ཚིགས་སུ་བཅད་པའི་དབྱངས་ཀྱིས་མངོན་པར་བསྟོད། །ད་དུང་ང་ཡི་ཆོས་བཤད་དུས་མིན་ ༄༅། །ཞེས། །མི་དབང་རྒྱལ་པོ་དེ་ནི་མ་གསུང་གྱུར། །དེ་བཞིན་དུ་ནི་ལྷོ་ཡི་ཕྱོགས་ལོགས་དང༌། །དེ་བཞིན་དུ་ཡང་ནུབ་དང་འོག་དང་བྱང༌། །སྟེང་གི་ ཕྱོགས་དང་ཕྱོགས་མཚམས་དེ་བཞིན་ཏེ། །ཚངས་པ་བྱེ་བ་ཕྲག་སྟོང་ལྷགས་གྱུར་ནས། །འདྲེན་པ་དེ་ལ་མངོན་པར་ཡང་གཏོར་ཏེ། །རྣམ་པར་འདྲེན་པའི་ཞབས་ལ་ཕྱག་ བཙལ་ནས། །གཞལ་མེད་ཁང་རྣམས་ཐམས་ཅད་དེར་ཕུལ་ཏེ། །མངོན་པར་བསྟོད་པ་བྱས་ནས་ཡང་གསོལ་པ། །མཐའ་ཡས་སྤྱན་ལྡན་འཁོར་ལོ་བསྐོར་དུ་གསོལ། ། བསྐལ་པ་བྱེ་བ་མང་ཁྱོད་རྙེད་རབ་དཀའ། །སྔོན་ཆད་བྱམས་པའི་སྟོབས་བསྙེན་བསྟན་དུ་གསོལ། །འཆི་བ་མེད་པའི་སྒོ་ཡང་དབྱེ་བར་གསོལ། །གསོལ་བ་མཐའ་ཡས་ སྤྱན་གྱིས་མཁྱེན་ནས་ནི། །རྣམ་པ་མང་པོར་ཆོས་རྣམས་རབ་བསྟན་པ། །བདེན་པ་བཞི་རྣམས་རབ་ཏུ་རྒྱས་པ་དང༌། །དངོས་པོ་འདི་དག་ཐམས་ཅད་རྟེན་ནས་བྱུང༌། ། མ་རིག་ལ་སོགས་འཆི་བཞི་སྡུག་བསྔལ་ཡང༌། །མཐའ་ཡས་པར་ནི་སྤྱན་དང་ལྡན་པས་གསུངས། །སྐྱེ་བ་ལས་ནི་ཉེས་པ་འདི་ཀུན་བྱུང༌། མི་ཡི་འཆི་བདག་འདི་ ཡང་ཤེས་པར་གྱིས། །རྣམ་པ་མང་པོ་སྣ་ཚོགས་མཐའ་ཡས་པ། ། ཆོས་རྣམས་དེ་ཡིས་བཤད་མ་ཐག་ཏུ་ཡང༌། །ཐོས་ནས་སེམས་ཅན་བྱེ་བ་ཁྲག་ཁྲིག་ཕྲག། བརྒྱད་ ཅུ་ཉན་ཐོས་ས་ལ་མྱུར་དུ་གནས། །རྒྱལ་བ་དེ་ཡི་ཆོས་མང་བཤད་པ་ནི། །གཞན་ཡང་ལན་གཉིས་སུ་ནི་གྱུར་པ་ན། །སེམས་ཅན་གངྒཱའི་བྱེ་སྙེད་རྣམ་དག་སྟེ། །སྐད་ཅིག་གིས་ནི་དེ་ཀུན་ ཉན་ཐོས་གྱུར། །དེ་ཡི་འོག་ཏུ་དེ་ཚེ་འཇིག་རྟེན་གྱི། །རྣམ་འདྲེན་དེ་ཡི་དགེ་འདུན་གྲངས་མེད་བྱུང༌། །བསྐལ་པ་ཁྲག་ཁྲིག་བྱེ་བར་བགྲངས་ན་ཡང༌། །རེ་རེ་ལ་ཡང་དེ་དག་མཐར་ མི་ཕྱིན། །རྒྱལ་བུ་བཅུ་དྲུག་པོ་ནི་དེ་དག་ཀྱང༌། །ཐམས་ཅད་གཞོན་ནུར་གྱུར་པ་སྙིང་གི་བུ། །འདྲེན་པ་ཁྱོད་ཀྱིས་ཆོས་མཆོག་བསྟན་གསོལ་ཞེས། །རྒྱལ་བ་དེ་ལ་དགེ་ཚུལ་དེ་ དག་གསོལ། །ཇི་ལྟར་སྐྱེ་དགུ་ཀུན་མཆོག་ཁྱོད་བཞིན་དུ། །བདག་ཅག་འཇིག་རྟེན་མཁྱེན་པར་འགྱུར་བར་ཤོག །ཇི་ལྟར་དཔའ་བོ་སྤྱན་དག་ཁྱེད་བཞིན་དུ། །སེམས་ ཅན་འདི་དག་ཐམས་ཅད་དེ་བཞིན་ཤོག། དེ་སྲས་གཞོན་ནུར་གྱུར་པ་དེ་དག་གི །བསམ་པ་དག་ནི་རྒྱལ་བ་དེས་མཁྱེན་པས། །དཔེ་རྣམས་བྱེ་བ་ཁྲག་ཁྲིག་དུ་མ་ཡིས། །བྱང་ཆུབ་ དམ་པ་མཆོག་ནི་རབ་ཏུ་བསྟན། །རྒྱུ་ནི་མང་པོ་སྟོང་གིས་ཉེར་བསྟན་ཏེ། །མངོན་པར་ཤེས་དང་ཡེ་ཤེས་རབ་ཏུ་བསྒྲགས། །བྱང་ཆུབ་སེམས་དཔའ་མཁས་པ་སྤྱོད་པ་བཞིན།། འཇིག་རྟེན་མགོན་པོས་ཡང་དག་སྤྱོད་པ་བསྟན། །གང་དག་ཚད་ནི་གངྒཱའི་བྱེ་སྙེད་ཀྱི། །ཚིགས་སུ་བཅད་པ་སྟོང་ཕྲག་མི་ཉུང་བར། །རབ་རྒྱས་མདོ་སྡེ་དམ་ཆོས་པདྨ་དཀར། ༄༅། །འདི་ཉིད་བཅོམ་ལྡན་འདས་ཀྱིས་རབ་ཏུ་བཤད། །རྒྱལ་པ་དེས་ཀྱང་མདོ་སྡེ་འདི་བཤད་ནས། །འཇིག་རྟེན་མགོན་པོ་གཙུག་ལག་ཁང་བཞུགས་ ཏེ༑ ༑སྟན་གཅིག་སྟེང་དུ་མཉམ་པར་བཞག་ནས་སུ། །བསྐལ་པ་བརྒྱད་ཅུ་རྩ་བཞིར་ཚང་བར་བརྟགས། །འདྲེན་པ་གཙུག་ལག་ཁང་བཞུགས་མི་འབྱུང་བར། །དགེ་ཚུལ་ དེ་དག་རྣམས་ཀྱིས་རིག་གྱུར་ནས། །སངས་རྒྱས་ཡེ་ཤེས་ཟག་མེད་ཞི་བ་འདི། །སྲོག་ཆགས་བྱེ་བ་མང་པོ་རྣམས་ལ་བསྒྲགས། །སོ་སོར་ཁྲི་སྟན་བཤམས་ཏེ་འདུག་ནས་ནི། ། དེ་དག་ལ་ཡང་མདོ་སྡེ་འདི་ཉིད་བཤད། །བདེ་བར་གཤེགས་པ་དེ་ཡི་བསྟན་པ་ལ། །དེ་དག་དེ་འདྲའི་ཚུལ་དུ་དབང་བྱེད་དོ། །བདེ་གཤེགས་སྲས་པོ་དེ་དག་རེ་རེས་ཀྱང༌། ། དེ་ཡི་ཚེ་ན་སེམས་ཅན་སྟོང་ཕྲག་ནི། །གངྒཱ་དྲུག་ཅུའི་བྱེ་མ་སྙེད་ལ་བསྒྲགས། །སེམས་ཅན་མཐའ་ཡས་པ་དག་རྣམ་པར་འདུལ། །རྒྱལ་བ་དེ་དག་མྱ་ངན་ཡོངས་འདས་ ནས༑ ༑དེ་དག་སྤྱན་ནས་སངས་རྒྱས་བྱེ་བ་མཐོང༌། །དེ་ཚེ་ཐོས་བྱས་རྣམས་དང་ལྷན་ཅིག་ཏུ། །རྐང་གཉིས་དམ་པ་ལ་ཡང་མཆོད་པ་བྱེད། །སྤྱོད་པ་ཡངས་པ་ཁྱད་པར་ འཕགས་སྤྱད་ནས། །དེ་དག་ཕྱོགས་བཅུར་བྱང་ཆུབ་སངས་རྒྱས་ཏེ། །རྒྱལ་བ་དེ་ཡི་སྲས་དེ་བཅུ་དྲུག་པོ། །ཕྱོགས་རྣམས་ཀུན་ན་རྒྱལ་བ་གཉིས་གཉིས་སོ། །དེ་ ཚེ་གང་དག་ཐོས་བྱས་དེ་དག་ཀྱང༌། །རྒྱལ་བ་དེ་ཡི་ཉན་ཐོས་ཐམས་ཅད་དེ། །བདག་གིས་རྣམ་པ་ཐ་དད་ཐབས་རྣམས་ཀྱིས། །བྱང་ཆུབ་འདི་ཉིད་རབ་ཏུ་ཐོབ་པར་བྱས། །ང་ ཡང་དེ་དག་ནང་དུ་གཏོགས་པར་གྱུར། །ངས་ཀྱང་ཁྱེད་རྣམས་ཐམས་ཅད་ཐོས་པར་བྱས། །དེ་ཕྱིར་ད་དུང་ང་ཡི་ཉན་ཐོས་ཁྱེད། །བྱང་ཆུབ་འདི་ལ་ཐམས་ཅད་ཐབས་ཀྱིས་ བཀྲི༑ གང་གི་ཕྱིར་ན་ང་ནི་ཆོས་འཆད་ཅིང༌། །གང་ཕྱིར་བྱང་ཆུབ་མཆོག་འདི་ངས་བཀྲི་བ། །རྒྱུ་འདི་རྐྱེན་འདི་དེ་ཚེ་སྔོན་བྱུང་ངོ༌། །དགེ་སློང་དག་གིས་གནས་འདིར་མ་འཇིགས་ ཤིག༑ ཇི་ལྟར་དགོན་པ་མ་རུངས་བཟོད་རླག་པ། །སྟོང་པ་གནས་མེད་རྟེན་ཀྱང་མེད་པ་ལ། །གཅན་གཟན་རབ་ཏུ་མང་ཞིང་ཆུ་མེད་དོ། །དེ་ནི་བྱིས་པ་འཇིགས་པར་བྱེད་པ་ ཡིན༑ ༑དེ་ལ་སྐྱེས་བུ་སྟོང་ཕྲག་དུ་མ་རྣམས། །དགོན་པ་དེར་ནི་དེ་དག་ཞུགས་པར་གྱུར། །དགོན་པ་དེ་ཡང་སྟོང་ཞིང་རིང་བ་ནི། །དཔག་ཚད་ལྔ་བརྒྱ་སྙེད་དུ་ཚང་བར་ གྱུར༑ ༑མྱ་ངམ་དགོན་པ་རབ་ཏུ་འཇིགས་པ་ན། །དེ་ན་དེ་ཡི་མཚོན་མར་གང་གྱུར་པ། །སྐྱེས་བུ་ཕྱུག་ཅིང་དྲན་ལྡན་གསལ་བ་སྟེ། །ཤིན་ཏུ་དཔའ་ཞིང་རྟུལ་ལ་འཇིགས་ པ་མེད། །སྲོག་ཆགས་བྱེ་བ་མང་པོ་དེ་དག་སྐྱོ། །དེ་ཚེ་མཚོན་མ་དེ་ལ་སྨྲས་པ་ནི། །འཕགས་པ་བདག་ཅག་སྐྱོ་སྟེ་མི་ནུས་ན། །བདག་ཅག་དེ་རིང་འདི་ནས་ལྡོག་པར་ ༄༅། །དགའ། །དེ་ཚེ་མཁས་ཤིང་ཤིན་ཏུ་མཛངས་པ་ཡི། །འདྲེན་པ་དེ་ཡང་དེ་ཚེ་ཐབས་སེམས་ཏེ། །ཀྱི་ཧུད་བྱིས་པ་འདི་དག་ཐམས་ཅད་ནི། །བདག་ ཉིད་ལྡོག་པར་རིན་པོ་ཆེ་ལས་ཉམས། །འདི་ལྟར་ང་ཡིས་རྫུ་འཕྲུལ་སྟོབས་ཀྱིས་དེང༌། །ཁང་པ་བྱེ་བ་སྟོང་གིས་རབ་བརྒྱན་ཞིང༌། །གཙུག་ལག་ཁང་དང་ཚལ་བུས་བརྒྱན་ པ་ཡི༑ ༑གྲོང་ཁྱེར་ཆེན་པོ་མངོན་པར་སྤྲུལ་ནས་སུ། །རྫིང་དང་འབབ་ཆུ་དག་ཀྱང་མངོན་པར་སྤྲུལ། །ཀུན་དགའ་དང་ནི་མེ་ཏོག་དག་གིས་བརྒྱན། །སྒོ་དང་རྩིག་པས་ཤིན་ ཏུ་མཛེས་བྱས་ཤིང༌། །སྐྱེས་པ་བུད་མེད་མཚུངས་མེད་རྣམས་ལྡན་པ། །སྤྲུལ་ནས་དེ་དག་རྣམས་ལ་འདི་སྐད་དུ། །འཇིགས་པར་མ་བྱེད་རབ་ཏུ་དགའ་བར་བྱོས། གྲོང་ ཁྱེར་མཆོག་ཏུ་ཁྱེད་རྣམས་ད་ཕྱིན་གྱི། །ཞུགས་ཏེ་དོན་རྣམས་མྱུར་དུ་གྱིས་ཞེས་སྨྲས། །ཅི་ནས་དེ་དག་ཐམས་ཅད་ཕར་འགྲོ་བར། །དབུགས་ཕྱུང་བྱ་བའི་ཕྱིར་ནི་ཚིག་ སྨྲས་པ། །དགོན་པ་མ་རུངས་ཀུན་ལས་བརྒལ་ཟིན་ཏེ། །མྱ་ངན་འདས་ཟིན་སེམས་ནི་དགའ་བར་བྱོས། །ཐམས་ཅད་ངལ་བསོས་གྱུར་པའི་ཚུལ་རིག་ནས། །ཤིན་ཏུ་ རི་མོ་བྱས་ཏེ་ཡང་སྨྲས་པ། །ཚུར་ཤོག་ཁོ་བོས་སྨྲས་པ་རྣམས་ལ་ཉོན། །འདི་ནི་རྫུ་འཕྲུལ་གྲོང་ཁྱེར་སྤྲུལ་པ་སྟེ། །ཁྱེད་རྣམས་སྐྱོ་བར་ཁོ་བོས་རིག་པས་ན། །ཁྱེད་ རྣམས་ཕྱིར་མི་ལྡོག་པར་བྱ་བའི་ཕྱིར། །འདི་འདྲ་འདི་ནི་ཁོ་བོས་ཐབས་མཁས་ཡིན། །གླིང་དུ་འགྲོ་བའི་ཕྱིར་ནི་བརྩོན་འགྲུས་བསྐྱེད། །དགེ་སློང་ང་ཡང་དེ་བཞིན་མཚོན་ མ་སྟེ༑ ༑སྲོག་ཆགས་བྱེ་བ་སྟོང་གི་འདྲེན་པ་ཡིན། །ཉོན་མོངས་སྒོ་ངའི་སྦུབས་བརྟོལ་མི་ནུས་ཤིང༌། །སྐྱོ་བའི་སེམས་ཅན་དག་ཀྱང་དེ་བཞིན་མཐོང༌། །དེ་ཕྱིར་དེ་ཡི་དོན་དུ་ ངས་བསམས་ཏེ། །བསྟི་བའི་གནས་སུ་མྱ་ངན་འདས་འདི་བྱས། །སྡུག་བསྔལ་ཐམས་ཅད་རྗེས་སུ་རྟོགས་པ་འདི། །དགྲ་བཅོམ་ས་ལ་ཁྱེད་ཅག་བྱ་བ་བྱས། །གང་གི་ཚེ་ན་ ཁྱེད་ཅག་འདུག་གནས་འདིར། །གནས་པར་དགྲ་བཅོམ་ཐམས་ཅད་མཐོང་ནས་ནི། །དེ་ཡི་འོག་ཏུ་ཐམས་ཅད་འདིར་བསྡུས་ཏེ། །ཆོས་འདི་ཇི་བཞིན་ཡང་དག་དོན་བཤད་དོ། ། དྲང་སྲོང་ཆེན་པོས་ཐེག་པ་གསུམ་བསྟན་པ། །རྣམ་འདྲེན་རྣམས་ཀྱི་ཐབས་ལ་མཁས་པ་སྟེ། །ཐེག་པ་གཅིག་སྟེ་གཉིས་སུ་ཡོད་མ་ཡིན། །བསྟི་བའི་དོན་དུ་ཐེག་པ་གཉིས་ བསྟན་ཏོ། །དགེ་སློང་དག་གོ་དེ་ཕྱིར་དེ་རིང་ངས། །འདི་ཙམ་གྱིས་ནི་མྱ་ངན་མི་འདའ་སྟེ། །ཁྱོད་ཀྱིས་ཐམས་ཅད་མཁྱེན་གྱི་ཡེ་ཤེས་ཕྱིར། །བརྩོན་འགྲུས་རླབས་ཆེན་ དམ་པ་བསྐྱེད་པར་གྱིས། །ནམ་ཞིག་ཐམས་ཅད་མཁྱེན་གྱི་ཡེ་ཤེས་ཐོབ། །རྒྱལ་བའི་ཆོས་རྣམས་གང་དག་སྟོབས་བཅུ་དང༌། །སུམ་ཅུ་རྩ་གཉིས་མཚན་གྱི་གཟུགས་ ༄༅། །ལྡན་པ། །སངས་རྒྱས་གྱུར་ནས་མྱ་ངན་འདས་པ་ཡིན། །འདྲེན་པ་རྣམས་ཀྱི་བསྟན་པ་འདི་འདྲ་སྟེ། །བསྟི་བའི་ཕྱིར་ནི་མྱ་ངན་འདས་པ་གསུང༌། །ངལ་བསོས་ རིག་ནས་མྱ་ངན་འདའ་ཕྱིར་ཀུན། །ཐམས་ཅད་མཁྱེན་གྱི་ཤེས་ལ་བཀྲི་ཞེས་བཤད། །དམ་པའི་ཆོས་པདྨ་དཀར་པོ་ལས། །སྔོན་གྱི་སྦྱོར་བའི་ལེའུ་ཞེས་བྱ་སྟེ་བདུན་པའོ།། །། དམ་པའི་ཆོས་པདྨ་དཀར་པོ། བམ་པོ་བདུན་པ། དེ་ནས་ཚེ་དང་ལྡན་པ་བྱམས་མའི་བུ་གང་པོས། བཅོམ་ལྡན་འདས་ཐབས་མཁས་པའི་ཡེ་ཤེས་གཟིགས་པ་དང༌། ལྡེམ་ པོར་དགོངས་ཏེ་གསུངས་པ་བསྟན་པ་འདི་ལྟ་བུ་འདིའང་ཐོས། ཉན་ཐོས་ཆེན་པོ་དེ་དག་ལུང་བསྟན་པའང་ཐོས། སྔོན་གྱི་སྦྱོར་བ་དང་ལྡན་པའི་གཏམ་འདི་དང་བཅོམ་ལྡན་འདས་ ཀྱི་ཁྱུ་མཆོག་ཏུ་གྱུར་པ་འདིའང་ཐོས་ནས། ངོ་མཚར་དུ་གྱུར། རྨད་དུ་གྱུར་ཏེ། ཟང་ཟིང་མེད་པའི་སེམས་ཀྱིས་དགའ་བ་དང་མཆོག་ཏུ་དགའ་བས་ཁྱབ་པར་གྱུར་ནས། དེ་མཆོག་ཏུ་ དགའ་བ་ཆེན་པོ་དང༌། ཆོས་ལ་གུས་པ་ཆེན་པོས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་ཕྱག་བཙལ་ནས་འདི་སྙམ་དུ་འདི་ལྟར་ཁམས་ཐ་དད་པའི་འཇིག་རྟེན་གྱི་རྗེས་ སུ་མཐུན་པར་འཇུག་པ་དང༌། ཐབས་མཁས་པའི་ཡེ་ཤེས་གཟིགས་པ་མང་པོས་སེམས་ཅན་རྣམས་ལ་ཆོས་སྟོན་པ་དང༌། དེ་དང་དེ་ལ་ཆགས་པའི་སེམས་ཅན་རྣམས་རབ་ཏུ་ འགྲེལ་བ་ནི། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཤིན་ཏུ་དཀའ་བ་མཛད་དེ། བཅོམ་ལྡན་འདས། ངོ་མཚར་ཏོ། །བདེ་བར་ གཤེགས་པ། ངོ་མཚར་ཏོ། །བཅོམ་ལྡན་འདས། འདི་ལ་ནི་བདག་ཅག་གིས་བགྱིད་པའི་རྡོ་ག་ལ་ཐོགས་ཏེ། དེ་བཞིན་གཤེགས་པ་ཉིད་ཀྱིས་བདག་ཅག་གིས་བསམ་པ་དང་སྔོན་གྱི་ སྦྱོར་བའི་སྤྱོད་པ་མཁྱེན་ཏོ་སྙམ་དུ་སེམས་བསྐྱེད་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འདུག་ནས་བཅོམ་ལྡན་འདས་ཉིད་ལ་ཕྱག་འཚལ་ ཞིང་མིག་མ་འཛུམ་པར་བལྟའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་བྱམས་མའི་བུ་གང་པོའི་སེམས་ཀྱི་བསམ་པ་ལ་གཟིགས་ནས། ཐམས་ཅད་དང་ལྡན་པའི་དགེ་སློང་ གི་དགེ་འདུན་ལ་བཀའ་སྩལ་པ། དགེ་སློང་དག། ཁྱེད་ངའི་ཉན་ཐོས་བྱམས་མའི་བུ་གང་པོ་འདི་ལ་ལྟོས། འདི་ནི་ངས་དགེ་སློང་གི་དགེ་འདུན་འདིའི་ནང་ན་ཆོས་སྒྲོག་པ་རྣམས་ཀྱི་ མཆོག་ཏུ་བསྟན་པ་ཡང་དག་པའི་ཡོན་ཏན་མང་པོས་བསྟོད་པ། ངའི་བསྟན་པ་འདི་ལ་རྣམ་པ་མང་པོས་དམ་པའི་ཆོས་ཡོངས་སུ་འཛིན་པར་མངོན་པར་བརྩོན་པ། འཁོར་བཞི་ ཡང་དག་པར་རབ་ཏུ་དགའ་བར་བྱེད་པ། ཡང་དག་པར་འཛིན་དུ་འཇུག་པ། ཡང་དག་པར་གཟེངས་བསྟོད་པ། ཆོས་འཆད་པས་ངལ་བ་མེད་པ། ཆོས་འདི་འཆད་ནུས་པ། ༄༅། །ཚངས་པ་མཚུངས་པར་སྤྱོད་པ་རྣམས་ལ་ཕན་འདོགས་ནུས་པ་སྟེ། དགེ་སློང་དག །དེ་བཞིན་གཤེགས་པ་མ་གཏོགས་པར་གཞན་གྱིས་བྱམས་མའི་ བུ་གང་པོ་དོན་ནམ་ཚིག་འབྲུས་ཡོངས་སུ་གཏུག་པར་མི་ནུས་སོ། །དགེ་སློང་དག། འདི་ཇི་སྙམ་དུ་སེམས། འདི་ང་འབའ་ཞིག་གི་དམ་པའི་ཆོས་འཛིན་པ་ཡིན་སྙམ་དུ་སེམས་ ན༑ དགེ་སློང་དག །ཁྱེད་ཀྱིས་དེ་ལྟར་མི་ལྟའོ། །དེ་ཅིའི་ཕྱིར་ཞེ་ན། དགེ་སློང་དག །ངས་མངོན་པར་དྲན་ཏེ། འདས་པའི་དུས་ན་སངས་རྒྱས་བྱེ་བ་ཕྲག་དགུ་བཅུ་རྩ་དགུ་ བྱུང་པའི་སངས་རྒྱས་བཅོམ་ལྡན་འདས་དེ་དག་གི་བསྟན་པ་ལ་འདི་ཉིད་ཀྱིས་དམ་པའི་ཆོས་ཡོངས་སུ་བཟུང་སྟེ། ཇི་ལྟར་ད་ལྟར་ངའི་ཆོས་སྒྲོག་པ་རྣམས་ཀྱི་མཆོག་ཏུ་གྱུར་པ་ བཞིན་དུ་ཐམས་ཅད་དུའང་གྱུར་ཏོ། །ཐམས་ཅད་དུའང་སྟོང་པ་ཉིད་རྟོགས་པར་ཁོང་དུ་ཆུད་པར་གྱུར་ཏོ། །ཐམས་ཅད་དུའང་སོ་སོ་ཡང་དག་པར་རིག་པ་ཐོབ་པར་གྱུར་ཏོ། ། ཐམས་ཅད་དུའང་བྱང་ཆུབ་སེམས་དཔའི་མངོན་པར་ཤེས་པ་ལེགས་པར་རྟོགས་པར་ཁོང་དུ་ཆུད་པར་གྱུར་ཏོ། །ཤིན་ཏུ་ངེས་པར་ཆོས་སྟོན་པ་དང༌། ཐེ་ཚོམ་མེད་པར་ཆོས་ སྟོན་པ་དང༌། ཡོངས་སུ་དག་པར་ཆོས་སྟོན་པར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་གི་བསྟན་པ་ལ་ཆོས་བཙལ་ཏེ་ཚངས་པར་སྤྱོད་པ་སྤྱད་དོ། །ཐམས་ཅད་ དུའང་ཉན་ཐོས་སུ་ཀུན་གྱིས་ཤེས་ཏེ། དེ་ཐབས་འདིས་སེམས་ཅན་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་གྲངས་མེད་པ་རྣམས་ཀྱི་དོན་བྱས་སོ། །སེམས་ཅན་དཔག་ཏུ་མེད་གྲངས་ མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ཐམས་ཅད་དུའང་སངས་རྒྱས་ཀྱི་བྱ་བས་སེམས་ཅན་རྣམས་ལ་ཉེ་བར་གནས་ པར་གྱུར་ཏོ། །ཐམས་ཅད་དུའང་བདག་གིས་སངས་རྒྱས་ཀྱི་ཞིང་ཡོངས་སུ་དག་པར་བྱས་སོ། །སེམས་ཅན་དག། ཡོངས་སུ་སྨིན་པར་བྱ་བ་ལ་བརྩོན་པར་གྱུར་ཏོ། ། དགེ་སློང་དག། རྣམ་པར་གཟིགས་ལ་སོགས་པ་དེ་བཞིན་གཤེགས་པ་བདུན་པོ་དེ་དག་གི་ཐ་མ་ནི་ང་ཡིན་ཏེ། དེ་དག་གིའང་ཆོས་བརྗོད་པའི་མཆོག་ཏུ་གྱུར་ཏོ། །དགེ་ སློང་དག། བསྐལ་པ་བཟང་པོ་འདི་ལ་མ་འོངས་པའི་དུས་ན་སངས་རྒྱས་སྟོང་དུ་སངས་རྒྱས་བཞིས་མ་ཚང་བ་གང་དག་འབྱུང་བ་དེ་དག་གི་བསྟན་པ་ལའང་བྱམས་མའི་བུ་ གང་པོ་འདི་ཉིད་ཆོས་སྟོན་པའི་མཆོག་ཏུ་འགྱུར། དམ་པའི་ཆོས་ཡོངས་སུ་འཛིན་པར་འགྱུར་རོ། །དེ་བཞིན་དུ་མ་འོངས་པའི་དུས་ན་སངས་རྒྱས་བཅོམ་ལྡན་འདས་དཔག་ཏུ་ མེད་གྲངས་མེད་པའི་དམ་པའི་ཆོས་ཀུན་འཛིན་པར་འགྱུར་རོ། །སེམས་ཅན་དཔག་ཏུ་མེད་གྲངས་མེད་པ་རྣམས་ཀྱི་དོན་བྱེད་པར་འགྱུར་རོ། །སེམས་ཅན་དཔག་ཏུ་མེད་ ༄༅། །གྲངས་མེད་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱེད་པར་འགྱུར་རོ། །རྟག་ཏུ་རྒྱུན་མི་ཆད་པར་ འགྱུར་རོ། །བདག་གི་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་དང༌། སེམས་ཅན་ཡོངས་སུ་སྨིན་པར་བྱ་བ་ལ་བརྩོན་པར་འགྱུར་རོ། །དེས་བྱང་ཆུབ་སེམས་ དཔའི་སྤྱོད་པ་འདི་ལྟ་བུ་ཡོངས་སུ་རྫོགས་པར་བྱས་ཏེ། བསྐལ་པ་གྲངས་མེད་དཔག་ཏུ་མེད་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་ རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་ པ༑ འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཆོས་རབ་ཏུ་སྣང་བ་ཞེས་ བྱ་བ་འཇིག་རྟེན་དུ་འབྱུང་སྟེ། སངས་རྒྱས་ཀྱི་ཞིང་འདི་ཉིད་དུ་འབྱུང་བར་འགྱུར་རོ། །དགེ་སློང་དག །ཡང་དེའི་ཚེ་སངས་རྒྱས་ཀྱི་ཞིང་འདི་སྟོང་གསུམ་གྱི་སྟོང་ཆེན་ པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་སངས་རྒྱས་ཀྱི་ཞིང་གཅིག་ཏུ་འགྱུར་ཏེ། དེ་རིན་པོ་ཆེ་སྣ་བདུན་གྱི་གཞི་ལ་ལག་མཐིལ་ལྟར་མཉམ་པར་མེད་པ་ རིན་པོ་ཆེ་སྣ་བདུན་གྱི་ཁང་པ་བརྩེགས་པས་ཡོངས་སུ་གང་བར་འགྱུར་རོ། །ལྷའི་གཞལ་མེད་ཁང་དག་དང་ཡང་ཉེ་བར་འགྱུར་ཏེ། ལྷ་དག་གིས་ཀྱང་མི་མཐོང༌། མི་དག་གིས་ ཀྱང་ལྷ་མཐོང་བར་འགྱུར་རོ། །དགེ་སློང་དག །དེའི་ཚེ་སངས་རྒྱས་ཀྱི་ཞིང་འདི་ན་ངན་སོང་མེད་པར་འགྱུར། བུད་མེད་ཀྱང་མེད་དེ། །སེམས་ཅན་དེ་དག་ཐམས་ཅད་ཀྱང་བརྫུས་ ཏེ་སྐྱེ་བ། ཚངས་པར་སྤྱོད་པ་ཡིད་ལ་བྱེད་པའི་ལུས་འོད་རང་ལ་ཡོད་པ། རྫུ་འཕྲུལ་ཅན་ནམ་མཁའ་ལ་འགྲོ་བ། བརྩོན་འགྲུས་དང་ལྡན་པ། དྲན་པ་དང་ལྡན་པ། ཤེས་ རབ་དང་ལྡན་པ། ལུས་གསེར་གྱི་ཁ་དོག་ཅན་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལུས་བརྒྱན་པར་འགྱུར་རོ། །དགེ་སློང་དག །ཡང་དེའི་ཚེ་སངས་རྒྱས་ཀྱི་ཞིང་ འདིར་སེམས་ཅན་དེ་དག་གི་ཟས་རྣམ་པ་གཉིས་སུ་འགྱུར་ཏེ། གཉིས་གང་ཞེ་ན། འདི་ལྟ་སྟེ། ཆོས་ཀྱི་དགའ་བའི་ཟས་དང༌། བསམ་གཏན་གྱི་དགའ་བའི་ཟས་སོ། །དེའི་བྱང་ ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་དཔག་ཏུ་མེད་པ་འབྱུང་སྟེ། ཐམས་ཅད་ཀྱང་མངོན་པར་ཤེས་པ་ཆེན་པོ་ཐོབ་པ། སོ་སོ་ཡང་དག་པར་རིག་པ་རྣམས་ རྟོགས་པར་ཁོང་དུ་ཆུད་པ། སེམས་ཅན་ལ་འདེམས་མཁས་པ་ཤ་སྟག་སྟེ། དེའི་ཉན་ཐོས་བགྲང་བ་ལས་འདས་པ་འབྱུང་སྟེ། རྫུ་འཕྲུལ་ཆེ་བ། མཐུ་ཆེ་བ། རྣམ་པར་ ༄༅། །ཐར་པ་བརྒྱད་ལ་བསམ་གཏན་པ་ཤ་སྟག་གོ །སངས་རྒྱས་ཀྱི་ཞིང་དེ་དེ་ལྟ་བུའི་ཡོན་ཏན་ཚད་མེད་པ་དང་ལྡན་པར་འགྱུར་རོ། །བསྐལ་པ་ནི་རིན་ པོ་ཆེ་སྣང་བ་ཞེས་བྱ་བར་འགྱུར་རོ། །འཇིག་རྟེན་གྱི་ཁམས་དེ་ནི་ཤིན་ཏུ་རྣམ་པར་དག་པ་ཞེས་བྱ་བར་འགྱུར་རོ། །དེའི་ཚེའི་ཚད་ནི་བསྐལ་པ་གྲངས་མེད་དཔག་ཏུ་མེད་ པར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རབ་ཏུ་སྣང་བ་དེ་ཡོངས་སུ་མྱ་ངན་ལས་འདས་ནས་ ཀྱང༑ དམ་པའི་ཆོས་ཡུན་རིང་དུ་གནས་པར་འགྱུར། འཇིག་རྟེན་གྱི་ཁམས་དེ་རིན་པོ་ཆེའི་མཆོད་རྟེན་གྱིས་གང་བར་འགྱུར་རོ། །དགེ་སློང་དག །དེ་ལྟར་བཅོམ་ ལྡན་འདས་དེའི་སངས་རྒྱས་ཀྱི་ཞིང་དེ་ཡོན་ཏན་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་ གཤེགས་པས་དེ་སྐད་ཅེས་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །ང་ཡི་བུ་ནི་ཐབས་མཁས་ལེགས་བསླབས་པས། །ཇི་ལྟར་སྤྱོད་ པ་སྤྱད་པར་གྱུར་པ་དང༌། །ཇི་ལྟར་བྱང་ཆུབ་སྤྱོད་པ་འདིར་སྤྱད་པ། །དོན་དེ་ང་ལས་ཉོན་ཅིག་དགེ་སློང་དག །ཐེག་པ་རླབས་པོ་ཆེས་ནི་སྐྲག་འགྱུར་ཞིང༌། །འདི་ན་ སེམས་ཅན་དམན་ལ་མོས་རིག་ནས། བྱང་ཆུབ་སེམས་དཔའ་འདི་དག་ཉན་ཐོས་གྱུར། །རང་རྒྱལ་བྱང་ཆུབ་བར་ཡང་རབ་ཏུ་སྟོན། །ཐབས་ལ་མཁས་པ་བརྒྱ་ཕྲག་དུ་མ་ཡིས། ། བྱང་ཆུབ་སེམས་དཔའ་མང་པོ་སྨིན་པར་བྱེད། །འདི་སྐད་བདག་ཅག་ཉན་ཐོས་བདག་ཅག་ནི། །བྱང་ཆུབ་དམ་པ་མཆོག་ལས་རིང་ཞེས་སྨྲ། །དེ་དག་རྗེས་སུ་སྤྱོད་པ་དེ་སློབ་པས།། སེམས་ཅན་བྱེ་བ་འདི་དག་སྨིན་པར་འགྱུར། །དམན་ལ་མོས་ཤིང་ལེ་ལོ་ཅན་གྱི་ཚུལ། །དེ་དག་ཐམས་ཅད་མཐར་གྱིས་སངས་རྒྱས་འགྱུར། །དེ་དག་མི་ཚོར་བར་ནི་སྤྱད་པ་ སྤྱོད༑ ༑བདག་ཅག་ཉན་ཐོས་བྱེད་པ་ཆུང་བ་ཡིན། །ཤི་འཕོ་སྐྱེ་བ་ཀུན་ལས་རབ་ཏུ་སྐྱོ། །བདག་གི་ཞིང་ཡང་ཡོངས་སུ་དག་པར་བྱེད། །བདག་ཉིད་འདོད་ཆགས་བཅས་ཤིང་ ཞེ་སྡང་བཅས། །གཏི་མུག་བཅས་པར་ཡང་ནི་རབ་ཏུ་སྟོན། །སེམས་ཅན་ལྟ་ལ་ཆགས་པར་རིག་ནས་ཀྱང༌། །དེ་ཡི་ལྟ་བ་རྣམས་ལ་ཉེ་བར་གནས། །ང་ཡི་ཉན་ཐོས་མང་དུ་ དེ་ལྟར་སྤྱོད། །སེམས་ཅན་ཐབས་ཀྱིས་རྣམ་པར་གྲོལ་བར་བྱེད། །དེ་ཡིས་སྤྱོད་པ་ཐམས་ཅད་རབ་བསྟན་ན། །མི་མཁས་མི་རྣམས་ཤིན་ཏུ་མྱོས་པར་འགྱུར། །དགེ་ སློང་གང་པོ་ང་ཡི་ཉན་ཐོས་འདི། །སངས་རྒྱས་རྣམས་ཀྱི་ཡེ་ཤེས་འདི་འཚོལ་ཕྱིར། །སྔོན་གྱི་སངས་རྒྱས་བྱེ་བ་སྟོང་ལ་སྤྱད། །དེ་དག་རྣམས་ཀྱི་དམ་ཆོས་ཡོངས་སུ་བཟུང་ ༄༅། །ཀུན་ཏུ་འདི་ནི་ཉན་ཐོས་མཆོག་ཏུ་གྱུར། །མང་དུ་ཐོས་ཤིང་འཇིགས་མེད་སྣ་ཚོགས་བརྗོད། །རྟག་ཏུ་མི་སྐྱོད་ཡང་དག་དགའ་བར་བྱེད། །རྟག་ ཏུ་སངས་རྒྱས་བྱེ་བས་ཉེ་བར་གནས། །རྟག་ཏུ་མངོན་ཤེས་ཆེན་པོས་རྟོགས་པར་རིག །སོ་སོ་ཡང་དག་རིག་པ་ཐོབ་པར་གྱུར། །སེམས་ཅན་རྣམས་ཀྱི་དབང་པོ་ སྤྱོད་ཡུལ་ཤེས། །རྟག་ཏུ་རྣམ་པར་དག་པའི་ཆོས་ཀྱང་འཆད། །དམ་པའི་ཆོས་ཀྱི་མཆོག་ཀྱང་རབ་འཆད་ཅིང༌། །བླ་ན་མེད་པའི་ཐེག་པ་མཆོག་འདི་ལ། །སེམས་ ཅན་བྱེ་བ་ཕྲག་སྟོང་ཡོངས་སྨིན་བྱེད། །བདག་གི་ཞིང་མཆོག་རྣམ་པར་དག་པར་བྱེད། །མ་འོངས་དུས་ཀྱི་ཚེ་ཡང་དེ་བཞིན་དུ། །སངས་རྒྱས་བྱེ་བ་ཕྲག་སྟོང་ མཆོད་པར་འགྱུར། །དམ་པའི་ཆོས་མཆོག་རྣམས་ཀྱང་རབ་ཏུ་འཛིན། །བདག་གི་ཞིང་ཡང་ཡོངས་སུ་དག་བྱེད་འགྱུར། །རྟག་ཏུ་འཇིགས་པ་མེད་པར་ཆོས་ འཆད་དེ། །ཐབས་ལ་མཁས་པ་བྱེ་བ་ཕྲག་སྟོང་གིས། །ཐམས་ཅད་མཁྱེན་གྱི་ཡེ་ཤེས་ཟག་མེད་ལ། །སེམས་ཅན་མང་པོ་ཡོངས་སུ་སྨིན་པར་བྱེད། །མི་ ཡི་འདྲེན་པ་རྣམས་ལ་དེས་མཆོད་ནས། །དམ་པའི་ཆོས་མཆོག་རྟག་ཏུ་བཟུང་ནས་ནི། །འཇིག་རྟེན་དུ་ཡང་རང་བྱུང་སངས་རྒྱས་འགྱུར། །ཆོས་རབ་སྣང་ཞེས་ ཕྱོགས་སུ་རབ་ཏུ་གྲགས། །དེ་ཡི་ཞིང་ཡང་ཤིན་ཏུ་རྣམ་དག་འགྱུར། །རིན་ཆེན་སྣ་བདུན་རྟག་ཏུ་ཁྱད་པར་འཕགས། །བསྐལ་པ་དེ་ནི་རིན་ཆེན་སྣང་བ་ཡིན། །འཇིག་རྟེན་ ཁམས་དེ་ཤིན་ཏུ་རྣམ་དག་ཡིན། །མངོན་ཤེས་ཆེ་ལ་ཤིན་ཏུ་མཁས་པ་ཡིན། །བྱང་ཆུབ་སེམས་དཔའ་བྱེ་བ་སྟོང་མང་སྟེ། །རྣམ་དག་བློ་ཅན་རྫུ་འཕྲུལ་ཆེ་རྣམས་ཀྱིས། ། འཇིག་རྟེན་ཁམས་དེ་ཡོངས་སུ་གང་བར་འགྱུར། །དེ་བཞིན་ཉན་ཐོས་དག་ཀྱང་བྱེ་བ་སྟོང༌། །དེ་ཚེ་འདྲེན་པའི་དགེ་འདུན་འབྱུང་བ་ནི། །རྣམ་ཐར་བརྒྱད་ལ་བསམ་གཏན་རྫུ་ འཕྲུལ་ཆེ། །སོ་སོ་ཡང་དག་རིག་པ་རྟོགས་པར་རིག །སེམས་ཅན་ཐམས་ཅད་སངས་རྒྱས་ཞིང་དེ་ན། །ཚངས་པར་སྤྱོད་ཅིང་རབ་ཏུ་དགའ་བར་འགྱུར། །ཐམས་ཅད་གསེར་ གྱི་མདོག་ཅན་བརྫུས་ཏེ་སྐྱེ། །སུམ་ཅུ་རྩ་གཉིས་མཚན་གྱི་གཟུགས་དང་ལྡན། །ཆོས་ལ་མངོན་པར་དགའ་བ་མ་གཏོགས་པར། །དེ་ན་ཟས་ཀྱི་འདུ་ཤེས་མེད་པར་འགྱུར། ། དེར་ནི་བུད་མེད་རྣམས་ཀྱང་མི་འབྱུང་སྟེ། །ངན་སོང་དང་ནི་ངན་འགྲོས་འཇིགས་པ་མེད། །སེམས་ཅན་རབ་ཏུ་དགེ་བས་ཀུན་གང་སྟེ། །གང་པོ་ཡོན་ཏན་ཡང་དག་རྫོགས་ ལྡན་གྱི། །ཞིང་མཆོག་དེ་ནི་དེ་འདྲར་འགྱུར་བ་སྟེ། །འདི་ནི་ཅུང་ཟད་ཙམ་ཞིག་བཤད་པ་ཡིན། །དེ་ནས་དབང་དང་ལྡན་པར་གྱུར་པ་སྟོང་ཉིས་བརྒྱ་པོ་དེ་དག་འདི་ ༄༅། །སྙམ་དུ་སེམས་ཏེ། གལ་ཏེ་བདག་ཅག་ཀྱང་བཅོམ་ལྡན་འདས་ཀྱིས་ཉན་ཐོས་ཆེན་པོ་གཞན་དག་ཇི་ལྟར་ལུང་བསྟན་པ་དེ་བཞིན་དུ། དེ་བཞིན་ གཤེགས་པས་བདག་ཅག་སོ་སོར་ལུང་བསྟན་ན་ངོ་མཚར་དུ་འགྱུར། རྨད་དུ་འགྱུར་སྙམ་མོ། །དེ་ནས་བཅོམ་ལྡན་འདས་ཀྱིས་ཉན་ཐོས་ཆེན་པོ་དེ་དག་གི་སེམས་ཀྱི་རྣམ་ པར་རྟོག་པ་ཐུགས་ཀྱིས་ཐུགས་སུ་ཆུད་ནས། ཚེ་དང་ལྡན་པ་འོད་སྲུང་ཆེན་པོ་ལ་བཀའ་སྩལ་པ། འོད་སྲུང༌། དབང་དང་ལྡན་པར་གྱུར་པ་སྟོང་ཉིས་བརྒྱ་པོ་གང་དག་ད་ ལྟར་ང་མངོན་སུམ་དུ་གྱུར་པའི་སྟོང་ཉིས་བརྒྱ་པོ་འདི་དག་ཐམས་ཅད་འདིའི་འོག་ཏུ་ལུང་བསྟན་ཏོ། །འོད་སྲུང༌། དེ་ལ་ཉན་ཐོས་ཆེན་པོ་དགེ་སློང་ཀཽ་ཎྜི་ནྱ་སངས་རྒྱས་བྱེ་བ་ ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་གཉིས་ཀྱི་ཕ་རོལ་གྱི་འང་ཆེས་ཕ་རོལ་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་ སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་ འདས་ཀུན་ཏུ་སྣང་བ་ཞེས་བྱ་བར་འཇིག་རྟེན་དུ་འབྱུང་སྟེ། འོད་སྲུང༌། དེ་ན་མིང་འདི་གཅིག་ཏུ་བཏགས་པ་དེ་བཞིན་གཤེགས་པ་ལྔ་བརྒྱ་འབྱུང་བར་འགྱུར་རོ། །ཉན་ ཐོས་ཆེན་པོ་ལྔ་བརྒྱ་པོ་ཐམས་ཅད་གཅིག་གི་འོག་ཏུ་གཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། ཐམས་ཅད་ཀྱང་ཀུན་ཏུ་སྣང་བ་ ཞེས་བྱ་བར་འགྱུར་རོ། །འདི་ལྟ་སྟེ། ག་ཡཱ་འོད་སྲུང་དང༌། ཆུ་ཀླུང་འོད་སྲུང་དང༌། ལྟེང་རྒྱས་འོད་སྲུང་དང༌། ནག་པོ་དང༌། འཆར་ཀ་ནག་པོ་དང༌། མ་འགགས་པ་དང༌། ནམ་ གྲུ་དང༌། ཀ་པི་ན་དང༌། བ་ཀུ་ལ་དང༌། སྐུལ་བྱེད་དང༌། ལེགས་འོངས་ལ་སོགས་པ་དབང་དང་ལྡན་པར་གྱུར་པ་ལྔ་བརྒྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་ སུ་བཅད་པ་འདི་དག་བཀའ་སྩལ་ཏོ། །ཀཽ་ཎྜི་ནྱ་རིགས་ང་ཡི་ཉན་ཐོས་འདི། །མ་འོངས་དུས་ཀྱི་བསྐལ་པ་མཐའ་ཡས་ན། །དེ་བཞིན་གཤེགས་པ་འཇིག་རྟེན་མགོན་དུ་འགྱུར།། སྲོག་ཆགས་བྱེ་བ་ཕྲག་སྟོང་རྣམ་པར་འདུལ། །མ་འོངས་དུས་ཀྱི་མཐའ་ཡས་བསྐལ་པ་ན། །སངས་རྒྱས་མང་པོ་མཐའ་ཡས་མཐོང་ནས་ནི། །ཀུན་ཏུ་སྣང་ཞེས་བྱ་བའི་ རྒྱལ་བར་འགྱུར། །དེ་ཡི་ཞིང་ཡང་ཡོངས་སུ་དག་པར་འགྱུར། །སངས་རྒྱས་སྟོབས་དང་འོད་དུ་ལྡན་པར་འགྱུར། །ཕྱོགས་བཅུ་དག་ཏུ་སྒྲ་ཡང་རྣམ་པར་བསྒྲགས། །སྲོག་ ཆགས་བྱེ་བ་སྟོང་གིས་མདུན་གྱིས་བལྟས། །བྱང་ཆུབ་དམ་པ་མཆོག་ཀྱང་སྟོན་པར་འགྱུར། །དེ་ནས་བྱང་ཆུབ་སེམས་དཔའ་བརྩོན་པ་རྣམས། །གཞལ་མེད་ཁང་མཆོག་ ༄༅། །ཏུ་ནི་མངོན་ཞུགས་ནས། །དེ་ན་གནས་ཤིང་རྗེས་སུ་རྣམ་པར་སེམས། །རྣམ་དག་ཚུལ་ཁྲིམས་རྟག་ཏུ་ལེགས་པའི་ཚུལ། །རྐང་གཉིས་གཙོ་ བོ་དེ་ཡི་ཆོས་ཐོས་ནས། །ཞིང་གཞན་དུ་ནི་དེ་དག་རྟག་ཏུ་ཡང༌། །དེ་དག་སངས་རྒྱས་སྟོང་ལ་ཕྱག་འཚལ་འགྲོ། །དེ་དག་ལ་ནི་རྒྱ་ཆེའི་མཆོད་བྱས་ཏེ། །སྐད་ཅིག་གིས་ནི་ རྣམ་པར་འདྲེན་པ་ཡིན། །ཞིང་དེར་དེ་དག་ཕྱིར་ཡང་འོང་བར་འགྱུར། །རབ་ཏུ་སྣང་ཞེས་བྱ་བ་མི་ཡི་གཙོ། །སྤྱོད་པའི་སྟོབས་ནི་དེ་ལྟར་དེ་འདྲར་འགྱུར། །བདེ་གཤེགས་དེ་ ཡི་ཚེ་ཚད་འགྱུར་པར་ནི། །བསྐལ་པ་སྟོང་ཕྲག་དྲུག་ཅུ་ཚང་བར་འགྱུར། །སྐྱོབ་པ་ཡོངས་སུ་མྱ་ངན་འདས་ནས་ནི། །དེ་ལས་ཉིས་གྱུར་དམ་ཆོས་དེར་གནས་འགྱུར། །དེ་ཡི་ གཟུགས་བརྙན་འབྱུང་བར་འགྱུར་བ་ནི། །དེ་ཡི་སུམ་འགྱུར་དེ་སྲིད་དུས་སུའོ། །སྐྱོབ་པ་དེ་ཡི་དམ་ཆོས་མེད་གྱུར་ནས། །ལྷ་རྣམས་དང་ནི་མི་དག་སྡུག་བསྔལ་འགྱུར། །སྐྱེས་ མཆོག་ཀུན་ཏུ་སྣང་ཞེས་བྱ་བར་ཡང༌། །མིང་གཅིག་པ་ཡི་རྒྱལ་བ་འབྱུང་བ་ནི། །འདྲེན་པ་ལྔ་བརྒྱ་ཡོངས་སུ་ཚང་བ་སྟེ། །དེ་དག་གཅིག་གི་འོག་ཏུ་གཅིག་འབྱུང་འགྱུར། ། དེ་དག་ཀུན་གྱི་བཀོད་པ་དེ་འདྲ་སྟེ། །རྫུ་འཕྲུལ་སྟོབས་དང་དེ་བཞིན་སངས་རྒྱས་ཞིང༌། །འདུས་ལ་དེ་བཞིན་དམ་ཆོས་དེ་འདྲ་སྟེ། །དམ་པའི་ཆོས་གནས་པ་ཡང་ མཉམ་པར་འགྱུར། །ཀུན་ཏུ་སྣང་བ་སྐྱེས་བུ་དམ་པ་ཡི། །ཇི་ལྟར་ང་ཡིས་སྔར་ནི་བཤད་པ་བཞིན། །དེ་ཚེ་སྒྲ་ནི་ལྷར་བཅས་འཇིག་རྟེན་དུ། །ཐམས་ཅད་དེ་དག་ལྟ་བུར་འགྱུར་ བ་ཡིན། །ཇི་ལྟར་འཇིག་རྟེན་ཐམས་ཅད་ངས་བསྟན་བཞིན། །འདི་ནི་ང་ཡི་འོག་ཏུ་འབྱུང་ངོ་ཞེས། །མཐར་གྱིས་དེ་ལྟར་འདི་དག་གཅིག་ནས་གཅིག །ཕན་ཞིང་སྙིང་བརྩེ་བ་ དག་ལུང་བསྟན་འགྱུར། །འོད་སྲུང་ཁྱོད་ཀྱིས་དེ་རིང་དབང་ལྡན་པ། །ལྔ་བརྒྱ་ལས་ནི་མི་ཉུང་འདི་དག་དང༌། །ང་ཡི་ཉན་ཐོས་གཞན་ཡང་དེ་ལྟར་ཟུང༌། །དེ་བཞིན་དུ་ཡང་ ཉན་ཐོས་གཞན་ལ་བསྒོ། །དེ་ནས་དགྲ་བཅོམ་པ་ལྔ་བརྒྱ་པོ་དེ་དག་བཅོམ་ལྡན་འདས་ལས་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་སུམ་དུ་ལུང་ བསྟན་པ་ཐོས་ནས་ཚིམ་ཞིང་མགུ་ལ་ཡི་རང་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་ བོས་ཕྱག་བཙལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་རྟག་ཏུ་རྒྱུན་མི་ཆད་པར་འདི་ནི་བདག་ཅག་གི་མྱ་ངན་ལས་འདའ་བ་ལགས་ཏེ། བདག་ ཅག་ནི་ཡོངས་སུ་མྱ་ངན་ལས་འདས་སོ་སྙམ་སེམས་ལ། ཡོངས་སུ་བསྒོམས་པའི་ནོངས་པ་དེ་དག་བདག་ཅག་གིས་བཤགས་སོ། །བཅོམ་ལྡན་འདས། འདི་ནི་བདག་ ༄༅། །གིས་མ་རྟོགས། མ་འཚལ། མི་མཁས་པ་ལགས་ཏེ། དེ་ཅིའི་སླད་དུ་ཞེ་ན། འདི་ལྟར་བདག་ཅག་དེ་བཞིན་གཤེགས་པའི་ཡེ་ཤེས་ཀྱིས་མངོན་ པར་རྫོགས་པར་འཚང་རྒྱ་བར་བགྱི་བ་ལགས་ན། འདི་ལྟ་བུའི་ཡེ་ཤེས་ཆུང་ངུས་འཚལ་ལོ་སྙམ་མོ། །འདི་ལྟ་སྟེ། དཔེར་ན། མི་ལ་ལ་ཞིག་མཛའ་བོའི་མཆིས་ བྲང་དུ་མཆིས་ནས། དེ་ཕྱག་ལས་ཁོམ་མ་མ་མཆིས་ཉལ་བ་ལ་མཛའ་བོ་དེས། འདིའི་ནོར་བུ་རིན་པོ་ཆེར་འདི་བྱའོ་ཞེས་རིན་ཐང་མ་མཆིས་པའི་ནོར་བུ་རིན་པོ་ཆེ་དེ་གོས་ ཀྱི་མཐའ་མར་ཕུར་རོ། །བཅོམ་ལྡན་འདས། དེ་ནས་མི་དེ་མཆིས་ལངས་ཏེ་འཕགས་ནས་ཡུལ་ཕྱོགས་གཞན་དུ་མཆིས་ཏེ། དེ་དེ་ན་ཉོན་མོངས་པར་གྱུར་ནས་འཚལ་ མ་དང་རད་པ་ཚོལ་བའི་སླད་དུ། ཤིན་ཏུ་ཉོན་མོངས་ཤིང་ཆེར་འབད་དེ། གང་ཞིག་ནས་ཁ་ཟས་ཅུང་ཟད་རྙེད་ནས་དེས་མགུ་སྟེ་རབ་ཏུ་དགའ་བར་གྱུར་ཏོ། །བཅོམ་ལྡན་འདས། དེ་ནས་མི་དེའི་མཛའ་བོ་རྙིང་པས་དེའི་གོས་ཀྱི་མཐའ་མར་རིན་ཐང་མ་མཆིས་པའི་ནོར་བུ་རིན་པོ་ཆེ་ཕུར་མ་བགྱིས་པའི་མི་དེས་ཡང་མཐོང་ནས། དེས་དེ་ལ་འདི་སྐད་ཅེས། ཀྱེ་ མི་ཁྱོད་ཟས་དང་སྐོམ་འཚོལ་བའི་ཕྱིར་ཅི་སྟེ་ཉོན་མོངས་སུ་འོང་ཞེས། ཀྱེ་མི་ཁྱོད་བདེ་བར་གནས་པར་བྱ་བའི་ཕྱིར་ངས་འདོད་པ་ཐམས་ཅད་གྲུབ་པར་བྱེད་པ་རིན་ཐང་མེད་ པའི་ནོར་བུ་རིན་པོ་ཆེ་གོས་ཀྱི་མཐའ་མར་ཕུར་ཏེ། ཀྱེ་མི་ཁྱོད་ངས་ནོར་བུ་རིན་པོ་ཆེ་དེ་བྱིན་ནས། ཀྱེ་མི་ཁྱོད་ཀྱི་གོས་ཀྱི་མཐའ་མ་ལ་ནོར་བུ་རིན་པོ་ཆེ་རིན་ཐང་མེད་པ་ཕུར་ན། བདག་ལ་ནམ་ཕུར། སུ་ཞིག་གིས་ཕུར། ཅིའི་རྒྱུ་ཅིའི་ཕྱིར་ཕུར་བ། ཀྱེ་མི་ཁྱོད་ཅུང་ཟད་ཀྱང་མི་ལྟ་འམ། ཀྱེ་མི་ཁྱོད་བྱིས་པའི་རང་བཞིན་ཅན་ཏེ། ཀྱེ་མི་ཁྱོད་ཉོན་མོངས་པར་ ཟས་དང་གོས་འཚོལ་བ་ཙམ་གྱིས་ཆོག་པར་འཛིན་ཏམ། ཀྱེ་མི་ཁྱོད་སོང་ལ་རིན་ཐང་མེད་པའི་ནོར་བུ་རིན་པོ་ཆེ་འདི་ཁྱེར་ཏེ། གྲོང་ཁྱེར་ཆེན་པོར་སོང་ལ་ནོར་བུ་དེས་ནོར་གྱི་ བྱ་བ་ཐམས་ཅད་བྱོས་ཤིག་ཅེས་མཆི་བ་དེ་བཞིན་དུ། བཅོམ་ལྡན་འདས། བདག་ཅག་ཀྱང་དེ་བཞིན་གཤེགས་པས་ཐོག་མ་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཐམས་ ཅད་མཁྱེན་པ་ཉིད་ཀྱི་སེམས་བསྐྱེད་པར་གྱུར་པ་དེ་དག་བདག་ཅག་གིས་མ་རྟོགས་མ་འཚལ་ཏེ། བཅོམ་ལྡན་འདས། དེའི་སླད་དུ་བདག་ཅག་ཀྱང་དགྲ་བཅོམ་པའི་ས་ ནས་མྱ་ངན་ལས་འདས་པ་སྙམ་བགྱིད་དོ། །བཅོམ་ལྡན་འདས། བདག་ཅག་ཉོན་མོངས་པར་ཚོལ་ཞིང༌། བཅོམ་ལྡན་འདས། འདི་ལྟ་བུའི་ཡེ་ཤེས་ཆུང་ངུས་འཚལ་བར་འཛིན་ཏོ། ། ཐམས་ཅད་མཁྱེན་པའི་ཡེ་ཤེས་སུ་སྨོན་པ་རྟག་ཏུ་མ་ཉམས་པ་དེས། བཅོམ་ལྡན་འདས། བདག་ཅག་དེ་བཞིན་གཤེགས་པས་ཁོང་དུ་ཆུད་པར་བསྟན་པ། དགེ་སློང་དག །ཁྱོད་འདི་ ༄༅། །ལྟར་མྱ་ངན་ལས་འདས་པར་མ་སེམས་ཤིང་།དགེ་སློང་དག །ངས་སྔོན་ཡོངས་སུ་སྨིན་པར་བྱས་པའི་དགེ་བའི་རྩ་བ་དེ་དག་ཁྱེད་ཀྱི་སེམས་ལ་ཡོད་དོ། །ཆོས་ བཤད་ཅིང་བརྗོད་པས་ཁྱོད་ད་ལྟར་མྱ་ངན་ལས་འདའ་བ་ཡིན་པར་སེམས་དཔའ་དེའང་ང་ཡི་ཐབས་མཁས་པའོ་ཞེས་དེ་ལྟར་བཅོམ་ལྡན་འདས་ཀྱིས་བདག་ཅག་ཁོང་དུ་ཆུད་པར་བགྱིས་ཏེ། དེ་རིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་ཀུན་ཤེས་ཀཽ་ཎྜི་ནྱ་ལ་སོགས་པ་དབང་དང་ལྡན་པར་གྱུར་པ་ལྔ་བརྒྱ་པོ་དེ་དག་གིས་དེའི་ཚེ་ཚིགས་ སུ་བཅད་པ་འདི་དག་གསོལ་ཏོ། །གང་ཕྱིར་མཆོག་རབ་བྱང་ཆུབ་ལུང་བསྟན་ཏེ། །འདི་འདྲ་བ་ཡི་དབུགས་འབྱིན་བླ་མེད་པ། །འདི་ཐོས་ནས་ནི་བདག་ཅག་དགའ་མགུ་སྟེ། ། བཅོམ་ལྡན་མཐའ་ཡས་སྦྱན་ལ་ཕྱག་འཚལ་ལོ། །ཇི་ལྟར་བྱིས་པ་མི་མཁས་མ་འཚལ་བཞིན། །བདེ་བར་གཤེགས་པའི་བསྟན་ལ་བདག་ཅག་ནི། །མྱ་ངན་འདས་པ་ཙམ་ གྱིས་འཚལ་འཛིན་པ། །ནོངས་པ་དེ་དག་ཁྱེད་ལ་རབ་ཏུ་བཤགས། །ཇི་ལྟར་དཔེར་ན་མི་འགའ་ལ་ལ་ཞིག །དེ་ཡི་མཛའ་བོའི་ཁྱིམ་དེར་ཕྱིན་གྱུར་ནས། །གྲོགས་པོ་དེ་ ནི་ནོར་བདག་ཕྱུག་པོ་སྟེ། །དེས་ནི་དེ་ལ་བཟའ་བཅའ་མང་སྩལ་ནས། །ཟས་ཀྱིས་དེ་ནི་ཡང་དག་ཚིམ་པར་བགྱིས། །རིན་ཆེན་དུ་མ་རི་བ་དེ་སྩལ་ཏེ། །དེ་ཡི་བླ་གོས་མཐའ་ མར་ཕུར་ཏེ་མདུད། །དེ་ལ་སྩལ་ནས་དེ་ནི་དགའ་བར་གྱུར། །བྱིས་པ་དེ་ཡང་དེ་ནས་མཆིས་གྱུར་པ། །ལངས་ནས་དེ་ཡང་གྲོང་ཁྱེར་གཞན་དུ་མཆིས། །དེ་ནི་ཉོན་མོངས་གྱུར་ཏེ་ཕོངས་ ཤིང་འཚོལ། །འཚལ་མ་ཡོངས་སུ་འཚོལ་བས་ཤིན་ཏུ་སྐྱོ། །ཁ་ཟས་དེ་བཙལ་མྱ་ངན་འདས་པར་གྱུར། །དེ་ནི་ཁ་ཟས་རྒྱ་ཆེ་མི་སེམས་ཤིང༌། །དེ་ཡི་རིན་པོ་ཆེ་ཡང་མི་དྲན་གྱུར།། བླ་གོས་ལ་ནི་ཕུར་བར་དྲན་མ་མཆིས། །དེ་ནི་གྲོགས་པོ་སྔ་མ་དེ་མཐོང་ནས། །བདག་གི་ཁྱིམ་དུ་རིན་ཆེན་བྱིན་པ་དེ། །དེ་ལ་ཤིན་ཏུ་ཡོངས་སུ་སྤྱོས་བརྒྱད་ནས། །རིན་ཆེན་ གོས་ཀྱི་མཐའ་ན་མཆིས་པ་བསྟན། །དེ་ཡིས་མཐོང་ནས་བདེ་བ་མཆོག་དང་ལྡན། །རིན་ཆེན་དེ་ཡི་མཐུ་ནི་དེ་འདྲ་སྟེ། །ནོར་མང་མཛོད་སྟོབས་ཅན་དུ་དེ་གྱུར་ནས། །འདོད་ པའི་ཡོན་ཏན་ལྔ་དང་ཤིན་ཏུ་ལྡན། །དེ་བཞིན་བཅོམ་ལྡན་བདག་ཅག་འདི་ལྟ་བུར། །སྔོན་གྱི་སྲིད་པ་ཤིན་ཏུ་ཡུན་རིང་ནས། །དེ་བཞིན་གཤེགས་པ་ཉིད་ཀྱི་འདི་སྩལ་ཏེ། །སྔོན་ གྱི་སྨོན་ལམ་རྣམས་ནི་མ་འཚལ་བས། །བཅོམ་ལྡན་བདག་ཅག་འདི་ན་བྱིས་པའི་བློ། །བདག་ཅག་བདེ་གཤེགས་བསྟན་པ་མ་འཚལ་བས། །བདག་ཅག་མྱ་ངན་འདས་ ཙམ་འཚལ་བར་གཟུང༌། །བླ་མ་མི་རེ་མི་ཚོལ་མི་སེམས་སོ། །འདི་འདྲའི་མྱ་ངན་འདས་པ་ཡོད་མེད་ཅེས། །འཇིག་རྟེན་གཉེན་གྱིས་བདག་ཅག་འཚལ་བར་བགྱིས། །མྱ་ངན་ ༄༅། །འདས་གང་མཆོག་ཏུ་བདེ་བ་དེ། །སྐྱེས་བུ་དམ་པ་རྣམས་ཀྱི་ཡེ་ཤེས་མཆོག །འདི་ལྟར་ཡངས་པ་རྒྱ་ཆེན་རྣམ་མང་གི །བླ་ན་མེད་པའི་ལུང་བསྟན་ རབ་ཐོས་ཏེ། །མགོན་པོ་གཅིག་ལ་གཅིག་ལུང་སྟོན་པ་ཡིས། །བདག་ཅག་དགའ་ཞིང་མགུ་བ་རངས་པ་སྐྱེས། །དམ་པའི་ཆོས་པདྨ་དཀར་པོ་ལས། །དགེ་སློང་ལྔ་བརྒྱ་ལུང[?] བསྟན་པའི་ལེའུ་ཞེས་བྱ་སྟེ་བརྒྱད་པའོ།། །།དེ་ནས་དེའི་ཚེ་ཚེ་དང་ལྡན་པ་ཀུན་དགའ་བོ་འདི་སྙམ་དུ་བདག་ཀྱང་ལུང་བསྟན་པ་འདི་ལྟ་བུ་ཐོབ་པར་བྱའོ་སྙམ་ དུ་སེམས་ཏེ། དེ་འདི་སྙམ་དུ་བསམས་ཤིང་རྗེས་སུ་རྣམ་པར་བསམས་ཏེ་སྨོན་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་གཏུགས་སོ། །ཚེ་དང་ལྡན་པ་སྒྲ་གཅན་ ཟིན་གྱིས་ཀྱང་དེ་སྙམ་དུ་བསམས་ཏེ་རྗེས་སུ་རྣམ་པར་བསམས་ཤིང་སྨོན་ནས། བཅོམ་ལྡན་འདས་ཀྱི་ཞབས་ལ་གཏུགས་ཏེ་ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ལའང་སྐབས་དབྱེ་བར་གསོལ། །བདེ་བར་གཤེགས་པ། བདག་ཅག་ལ་སྐབས་དབྱེ་བར་གསོལ། བཅོམ་ལྡན་འདས་ནི་བདག་ཅག་གི་ཕ་དང༌། སྐྱེད་པ་དང༌། སྐྱབས་དང་ གནས་དང༌། དཔུང་གཉེན་ལགས་སོ། །བཅོམ་ལྡན་འདས། བདག་ཀྱང་བཅོམ་ལྡན་འདས་ཀྱི་སྲས། བཅོམ་ལྡན་འདས་ཀྱི་ཞབས་འབྲིང་བ་སྟེ། བཅོམ་ལྡན་འདས་ཀྱི་ཆོས་ ཀྱི་མཛོད་འཛིན་པ་ལགས་སོ་ཞེས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ན་ཤིན་ཏུ་རི་མོ་བགྱིད་པར་གྱུར་ཏོ། །དེའི་སླད་དུ་བཅོམ་ལྡན་འདས་ཀྱིས་བདག་ཅག་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཏུ་མྱུར་དུ་ལུང་བསྟན་ན། བཅོམ་ལྡན་འདས། མཐུན་པ་ལགས་སོ། །གཞན་ཡང་དགེ་སློང་ཉིས་སྟོང་ལྷག་ཙམ་སློབ་པ་དང་མི་སློབ་པ་དེ་དག་སྟན་ ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཐལ་མོ་སྦྱར་ཏེ་བཅོམ་ལྡན་འདས་ཀྱི་སྤྱན་སྔ་ན། བཅོམ་ལྡན་འདས་ལ་ལྟ་ཞིང་འདུག་ནས་བསམས་པ་འདི་ཉིད་འདི་ལྟ་སྟེ། སངས་ རྒྱས་ཀྱི་ཡེ་ཤེས་འདི་ཉིད་ལ་རྗེས་སུ་སེམས་ཏེ། བདག་ཅག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་གྱུར་ཅིག་སྙམ་མོ། །དེ་ནས་བཅོམ་ལྡན་ འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་མ་འོངས་པའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་ རྒྱས་བཅོམ་ལྡན་འདས་རྒྱ་མཚོ་མཆོག་འཆང་བློ་རྣམ་པར་རོལ་པའི་མངོན་པར་ཤེས་པ་ཞེས་བྱ་བར་འཇིག་རྟེན་དུ་འབྱུང་སྟེ། སངས་རྒྱས་བྱེ་བ་ཕྲག་དྲུག་ཅུ་རྩ་གཉིས་ལ་བསྟི་ ༄༅། །སྟང་དུ་བྱས། བཙུན་པར་བྱས། རི་མོར་བྱས། མཆོད་པར་བྱས་ཏེ། སངས་རྒྱས་བཅོམ་ལྡན་འདས་དེ་དག་གི་དམ་པའི་ཆོས་བླངས་ཤིང་བསྟན་པ་ ཡོངས་སུ་བཟུང་སྟེ་།བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ ཀླུང་ཉི་ཤུའི་བྱེ་མ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱེད་པར་འགྱུར་རོ། །ཁྱོད་ཀྱི་སངས་རྒྱས་ཀྱི་ཞིང་དེ་ཤིན་ཏུ་འབྱོར་ཅིང༌། །ས་གཞི་ནི་ བཻ་ཌཱུཪྻ་ལས་གྲུབ་པར་འགྱུར་རོ། །འཇིག་རྟེན་གྱི་ཁམས་དེ་ནི་མ་བསྙལ་བའི་རྒྱལ་མཚན་ཞེས་བྱ་བར་འགྱུར་རོ། །བསྐལ་པ་དེ་ནི་ཡིད་དུ་འོང་བའི་སྒྲ་མངོན་པར་བསྒྲགས་པ་ཞེས་ བྱ་བར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཆང་བློ་རྣམ་པར་རོལ་བའི་མངོན་པར་ ཤེས་པ་དེའི་ཚེའི་ཚད་ནི་བསྐལ་པ་དཔག་ཏུ་མེད་པར་འགྱུར་ཏེ། བཅོམ་ལྡན་འདས་དེའི་ཚེའི་ཚད་ནི་བགྲང་བས་མཐར་ཕྱིན་པར་མི་ནུས་པའི་བསྐལ་པ་བྱེ་བ་ཁྲག་ཁྲིག་བརྒྱ་ སྟོང་གྲངས་མེད་པར་འགྱུར་རོ། །ཀུན་དགའ་བོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཆང་བློ་ རྣམ་པར་རོལ་པའི་མངོན་པར་ཤེས་པ་དེའི་ཚེའི་ཚད་ཇི་ཙམ་དུ་འགྱུར་བ་དེའི་ཉིས་འགྱུར་དུ་ཡོངས་སུ་མྱ་ངན་ལས་འདས་ནས་དམ་པའི་ཆོས་གནས་པར་འགྱུར་རོ། །བཅོམ་ལྡན་འདས་དེའི་ དམ་པའི་ཆོས་ཇི་ཙམ་དུ་གནས་པར་འགྱུར་བ་དེའི་ཉིས་འགྱུར་དུ་དམ་པའི་ཆོས་ཀྱི་གཟུགས་བརྙན་གནས་པར་འགྱུར་རོ། །ཡང༌། ཀུན་དགའ་བོ། བཅོམ་ལྡན་འདས་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཆང་བློ་རྣམ་པར་རོལ་བའི་མངོན་པར་ཤེས་པ་དེ་ལ་ཕྱོགས་བཅུའི་སངས་རྒྱས་བྱེ་བ་ཁྲག་ཁྲིག་ བརྒྱ་སྟོང་ཕྲག་མང་པོ་གངྒཱའི་ཀླུང་གི་བྱེ་མ་སྙེད་དག་བསྔགས་པ་བརྗོད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ངས་ནི་ དགེ་སློང་དགེ་འདུན་མོས་པར་བྱ། །ཀུན་དགའ་བཟང་པོ་ང་ཡི་ཆོས་འཛིན་པ། །བདེ་གཤེགས་བྱེ་བ་དྲུག་ཅུ་མཆོད་བྱས་ནས། །མ་འོངས་དུས་ཀྱི་ཚེ་ན་རྒྱལ་བར་འགྱུར། །དེ་ཡི་ མིང་ནི་རྒྱ་མཚོ་བློ་འཛིན་ཏེ། །མངོན་པར་ཤེས་ཐོབ་ཅེས་ཀྱང་དེ་ན་གྲགས། །བལྟ་ན་སྡུག་པ་ཡོངས་སུ་དག་པའི་ཞིང༌། །མ་བསྙལ་རྒྱལ་མཚན་རྒྱལ་བའི་བ་དན་ནོ། །བྱང་ཆུབ་ སེམས་དཔའ་གངྒཱའི་བྱེ་སྙེད་དེར། །དེ་བས་ལྷག་པར་ཡོངས་སུ་སྨིན་པར་བྱེད། །རྒྱལ་བ་དེ་ནི་རྫུ་འཕྲུལ་ཆེ་བར་འགྱུར། །ཕྱོགས་བཅུའི་འཇིག་རྟེན་དུ་ནི་སྒྲ་ཡང་གྲགས། །དེ་ཚེ་ཚེ་ ༄༅། །ཡང་དཔག་ཏུ་མེད་པར་འགྱུར། །འཇིག་རྟེན་རྣམས་ལ་ཕན་ཞིང་བརྩེ་ཕྱིར་གནས། །སྐྱོབ་པ་དེ་ནི་མྱ་ངན་འདས་འོག་ཏུ། །ཉིས་གྱུར་དེ་ཡི་དམ་ཆོས་གནས་པར་ འགྱུར། །དེ་ནས་གཟུགས་བརྙན་དེ་ཡི་ཉིས་གྱུར་དུ། །གནས་ཏེ་རྒྱལ་བ་དེ་ཡི་བསྟན་པ་ལ། །དེ་ནས་སེམས་ཅན་གངྒཱའི་བྱེ་མ་སྙེད། །སངས་རྒྱས་བྱང་ཆུབ་འདི་ལ་རྒྱུ་ཡང་སྐྱེད། །དེ་ ནས་འཁོར་དེ་ན་བྱང་ཆུབ་སེམས་དཔའ་ཐེག་པ་ལ་གསར་དུ་ཡང་དག་པར་ཞུགས་པ་བརྒྱ་སྟོང་འདི་སྙམ་དུ་སེམས་ཏེ། བྱང་ཆུབ་སེམས་དཔའ་རྣམས་ལའང་དེ་ལྟ་བུར་རྒྱ་ཆེར་ལུང་ བསྟན་པ་བདག་ཅག་གིས་སྔོན་མ་ཐོས་ན་ཉན་ཐོས་རྣམས་ལ་ལྟ་ཅི་སྨོས་ཏེ། འདི་ལ་རྒྱུ་གང་དང་རྐྱེན་ཅི་ཞིག་ཡོད་སྙམ་མོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ དེ་དག་གི་སེམས་ཀྱི་རྣམ་པར་རྟོག་པ་ཐུགས་ཀྱིས་ཐུགས་སུ་ཆུད་ནས། བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག །སྐད་ཅིག་ཡུད་ཙམ་གཅིག་ལ་མཉམ་ དུ་ང་དང་ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་ནམ་མཁའ་མངོན་འཕགས་རྒྱལ་པོའི་སྤྱན་སྔར། །བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་ནས་རིགས་ཀྱི་བུ་འདི་ནི་རྟག་ཏུ་རྒྱུན་མི་ཆད་པར་མང་དུ་ཐོས་པ་ལ་བརྩོན་པ་འགྱུར་ཏོ། །ང་ནི་བརྩོན་འགྲུས་རྩོམ་པ་ལ་བརྩོན་ ཏེ། །དེའི་ཕྱིར་ང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ། བཟང་པོ་འདི་ནི་སངས་རྒྱས་བཅོམ་ལྡན་འདས་རྣམས་ ཀྱི་དམ་པའི་ཆོས་ཀྱི་མཛོད་འཛིན་པར་འགྱུར་ཏེ། རིགས་ཀྱི་བུ་དག །འདི་ལྟ་སྟེ། བྱང་ཆུབ་སེམས་དཔའ་རྣམས་ཡོངས་སུ་གྲུབ་པར་བྱ་བའི་ཕྱིར། རིགས་ཀྱི་བུ་འདིའི་སྨོན་ལམ་ནི་འདི་ ཡིན་ནོ། །དེ་ནས་ཚེ་དང་ལྡན་པ་ཀུན་དགའ་བོས། བཅོམ་ལྡན་འདས་ལས་བདག་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོས། བདག་གི་སངས་ རྒྱས་ཀྱི་ཞིང་གི་ཡོན་ཏན་བཀོད་པ་ཐོས། སྔོན་གྱི་སྨོན་ལམ་དང་སྤྱོད་པའང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་པར་ གྱུར་ཏེ། དེའི་ཚེ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོའི་དམ་པའི་ཆོས་དང་བདག་གི་སྔོན་གྱི་སྨོན་ལམ་དྲན་ནོ། །དེ་ནས་ཚེ་དང་ལྡན་པ་ཀུན་དགའ་བོས་དེའི་ཚེ་ཚིགས་ སུ་བཅད་པ་འདི་དག་གསོལ་ཏོ། །ངོ་མཚར་གྱུར་པ་རྒྱལ་བ་དཔག་མེད་པས། །སྐྱོབ་པ་ཡོངས་སུ་མྱ་ངན་འདས་རྣམས་ཀྱི། །ཆོས་བསྟན་པ་དག་བདག་ལ་དྲན་མཛད་པས། །ཁ་ སང་དེ་རིང་བཞིན་དུ་དྲན་པར་གྱུར། །ཐེ་ཚོམ་མ་མཆིས་བྱང་ཆུབ་དོན་དུ་གནས། །བདག་གི་ཐབས་ལ་མཁས་པ་འདི་འདྲ་སྟེ། །བདག་ནི་བདེ་བར་གཤེགས་པའི་ཞབས་འབྲིང་ ༄༅། །ལགས། །བྱང་ཆུབ་དོན་དུ་དམ་པའི་ཆོས་ཀྱང་འཛིན། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་སྒྲ་གཅན་ཟིན་ལ་བཀའ་སྩལ་པ། སྒྲ་ གཅན་ཟིན་ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་གྱི་ཁམས་བཅུའི་རྡུལ་ཕྲ་རབ་ཀྱི་རྡུལ་སྙེད་ལ་བསྟི་ སྟང་དུ་བྱས། བཙུན་པར་བྱས། རི་མོར་བྱས། མཆོད་པར་བྱས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་པོ་ཆེ་སྣ་བདུན་ གྱི་པདྨ་ལ་གོམ་པས་འགྲོ་བ་ཞེས་བྱ་བར་འགྱུར་རོ། །རྟག་ཏུའང་སངས་རྒྱས་བཅོམ་ལྡན་འདས་དེ་དག་གི་སྲས་ཐུ་བོར་འགྱུར་ཏེ་འདི་ལྟ་སྟེ། དཔེར་ན། ད་ལྟར་ང་ཡི་བཞིན་ནོ། །སྒྲ་གཅན་ ཟིན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་སྣ་བདུན་གྱི་པདྨ་ལ་གོམ་པས་འགྲོ་བ་དེའི་ཚེའི་ཚད་ཀྱང་འདི་ལྟ་བུར་ འགྱུར། ཡོན་ཏན་རྣམ་པ་མང་པོ་ཐམས་ཅད་ཕུན་སུམ་ཚོགས་པའང་འདི་ལྟ་བུར་འགྱུར་ཏེ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་རྒྱ་མཚོ་མཆོག་འཆང་བློ་རྣམ་པར་རོལ་བའི་མངོན་པར་ཤེས་པའི་ཡོན་ཏན་རྣམ་པ་ཐམས་ཅད་དང་ལྡན་པའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་བཞིན་དུ་འགྱུར་རོ། ། སྒྲ་གཅན་ཟིན་།དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཆང་བློ་རྣམ་པར་རོལ་བའི་མངོན་པར་ཤེས་པ་དེ་ཡི་སྲས་ཐུ་བོར་ ཡང་ཁྱོད་ཉིད་འགྱུར་ཏེ། དེ་ཡི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་ བཅད་པ་འདི་དག་བཀའ་སྩལ་ཏོ། །སྒྲ་གཅན་ཟིན་འདི་ང་ཡི་བུ་ཐུ་བོ། །གཞོན་ནུར་གྱུར་པའི་ཚེ་ན་སྙིང་གི་བུ། །བྱང་ཆུབ་ཐོབ་ཀྱང་ང་ཡི་བུ་ཡིན་ཏེ། །དྲང་སྲོང་ཆེན་པོ་ཆོས་ཀྱི་བགོ་ སྐལ་འཛིན། །མ་འོངས་དུས་ན་སངས་རྒྱས་བྱེ་མང་པོ། །དེ་དག་ཚད་མེད་པ་ནི་མཐོང་བར་འགྱུར། །བྱང་ཆུབ་ཡོངས་སུ་བཙལ་བར་བྱ་བའི་ཕྱིར། །རྒྱལ་པ་དེ་དག་ཀུན་གྱི་སྲས་སུ་འགྱུར། ། སྒྲ་གཅན་ཟིན་གྱིས་སྤྱོད་འདི་མི་ཤེས་ཏེ། །འདི་ཡི་སྨོན་ལམ་དག་ནི་ངས་ཤེས་སོ། །བདག་ནི་དེ་བཞིན་གཤེགས་པའི་སྲས་པོ་ཞེས། །འཇིག་རྟེན་གཉེན་ལ་ཡང་དག་སྤྱོམས་པར་ བྱེད། །སྒྲ་གཅན་ཟིན་པ་ང་ཡི་བུ་འདི་ཡི། །ཡོན་ཏན་བྱེ་བ་ཁྲག་ཁྲིག་དཔག་ཏུ་མེད། །དེ་ལ་ནམ་ཡང་ཚད་གཟུང་ཡོད་མེད་དེ། །དེ་ལྟར་འདི་ནི་བྱང་ཆུབ་དོན་དུ་གནས། །དེ་ནས་ ༄༅། །བཅོམ་ལྡན་འདས་ཀྱིས་ཉན་ཐོས་སློབ་པ་དང་མི་སློབ་པ་ཉིས་སྟོང་པོ་དེ་དག་བཅོམ་ལྡན་འདས་ཀྱི་སྤྱན་སྔ་ན་བཅོམ་ལྡན་འདས་ལ་ལྟ་ཞིང་སེམས་དང་པོ་ དང༑ སེམས་མཉེན་པ་དང༌། སེམས་འཇམ་པར་བཅོམ་ལྡན་འདས་ཀྱིས་གཟིགས་ཏེ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་ དགའ་བོ། །ཉན་ཐོས་སློབ་པ་དང་མི་སློབ་པ་མི་སློབ་པ་ཉིས་སྟོང་པོ་འདི་དག་མཐོང་ངམ། །གསོལ་བ། བཅོམ་ལྡན་འདས། མཐོང་ལགས་སོ། །བདེ་བར་གཤེགས་པ། མཐོང་ལགས་སོ། །བཅོམ་ ལྡན་འདས་ཀྱིས་བཀའ་སྩལ་པ། ཀུན་དགའ་བོ། །དགེ་སློང་ཉིས་སྟོང་པ་དེ་དག་ཐམས་ཅད་མཉམ་དུ་བྱང་ཆུབ་སེམས་དཔའི་སྤྱོད་པ་ཡང་དག་པར་སྒྲུབ་པར་འགྱུར་ཏེ། སངས་རྒྱས་ བཅོམ་ལྡན་འདས་འཇིག་རྟེན་གྱི་ཁམས་ལྔ་བཅུའི་རྡུལ་ཕྲ་རབ་ཀྱི་རྡུལ་སྙེད་ལ་བསྟི་སྟང་བྱས། བཙུན་པར་བྱས། །རི་མོར་བྱས། །མཆོད་པར་བྱས། དམ་པའི་ཆོས་བཟུང་ནས། ལུས་ཐ་མལ་སྐད་ཅིག་ཐང་ཅིག་ཡུད་ཙམ་གཅིག་ལ་ཕྱོགས་བཅུའི་འཇིག་རྟེན་གྱི་ཁམས་གཞན་དང་གཞན་དག་གིས་སངས་རྒྱས་ཀྱི་ཞིང་རྣམས་སུ་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་མངོན་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་མེ་ཏོག་གི་རྒྱལ་པོ་ཞེས་བྱ་བར་འཇིག་ རྟེན་དུ་འབྱུང་སྟེ། དེ་དག་གི་ཚེའི་ཚད་ནི་བསྐལ་པ་ཚང་བར་འགྱུར། །དེ་དག་གིས་སངས་རྒྱས་ཀྱི་ཞིང་གི་ཡོན་ཏན་བཀོད་པའང་མཚུངས་པར་འགྱུར་རོ། །དེ་དག་གི་ཉན་ཐོས་ཀྱི་ཚོགས་ དང༑ བྱང་ཆུབ་སེམས་དཔའི་ཚོགས་ཀྱང་མཉམ་པར་འགྱུར་རོ། །དེ་དག་མཉམ་དུ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་དག་གི་དམ་པའི་ཆོས་ཀྱང་མཉམ་པར་གནས་ པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཀུན་དགའ་གང་དག་ང་ཡི་མདུན་འཁོད་པ། །ཉན་ཐོས་ཉིས་སྟོང་འདི་དག་ཐམས་ཅད་ ནི༑ ༑མ་འོངས་དུ་ན་དེ་བཞིན་གཤེགས་འགྱུར་ཞེས། །ངས་ནི་མཁས་རྣམས་དེ་རིང་ལུས་བསྟན་ནོ། །དཔེ་བསྟན་པ་ནི་མཐའ་ཡས་རྣམ་དག་གིས། །སངས་རྒྱས་རྣམས་ལ་མཆོད་པ་མཆོག་ བྱས་ནས། །ཐ་མའི་ལུས་དེ་ལ་ནི་གནས་ནས་སུ། །ང་ཡི་བྱང་ཆུབ་མཆོག་འདི་ཐོབ་པར་འགྱུར། །ཕྱོགས་བཅུ་རྣམས་སུ་མིང་ནི་གཅིག་འགྱུར་ཏེ། སྐད་ཅིག་དེ་བཞིན་ཡུད་ཙམ་གཅིག་ལ་ ནི༑ ༑ཤིང་མཆོག་རྣམས་ཀྱི་དྲུང་དུ་འཁོད་ནས་སུ། །ཡེ་ཤེས་ཐོབ་སྟེ་སངས་རྒྱས་རྣམས་སུ་འགྱུར། །དེ་དག་རྣམས་ཀྱི་མིང་ནི་གཅིག་གྱུར་ཏེ། །རིན་ཆེན་ཏོག་ཅེས་བྱ་བར་འཇིག་རྟེན་གྲགས་ དེ་དག་རྣམས་ཀྱི་ཞིང་མཆོག་མཚུངས་པར་འགྱུར། །ཉན་ཐོས་བྱང་ཆུབ་སེམས་དཔའི་ཚོགས་ཀྱང་མཉམ། །རྫུ་འཕྲུལ་གྱུར་པའང་འཇིག་རྟེན་འདི་ཀུན་ན། །མཉམ་ཞིང་དེ་དག་ཕྱོགས་ ༄༅། །བཅུ་རྣམས་སུ་ཡང༌། །ཆོས་བཤད་ནས་ནི་མཉམ་དུ་མྱ་ངན་འདའ། །དེ་དག་དམ་ཆོས་མཉམ་དུ་གནས་པར་འགྱུར། །དེ་ནས་སློབ་པ་དང་མི་སློབ་པའི་ ཉན་ཐོས་དེ་དག་བཅོམ་ལྡན་འདས་ལས་མངོན་སུམ་དུ་རང་རང་གི་ལུང་བསྟན་པ་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས། བཅོམ་ ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །ལུང་བསྟན་པ་འདི་ཐོས་པས་ན། །འཇིག་རྟེན་སྒྲོན་མ་བདག་ཅག་ངོམས། །བདུད་རྩི་ཇི་ལྟར་གཏོར་བ་བཞིན། །དེ་བཞིན་ གཤེགས་པ་བདག་ཅག་བདེ། །བདག་ཅག་མི་མཆོག་མི་འགྱུར་ཞེས། །བདག་ཅག་ཡིད་གཉིས་དོགས་མ་མཆིས། །ལུང་བསྟན་པ་ནི་འདི་ཐོས་པས། དེ་རིང་བདག་ཅག་བདེ་ བ་ཐོབ། །དམ་པའི་ཆོས་པདྨ་དཀར་པོ་ལས། ཀུན་དགའ་བོ་དང༌། སྒྲ་གཅན་ཟིན་དང༌། དགེ་སློང་ཉིས་སྟོང་ལུང་བསྟན་པའི་ལེའུ་ཞེས་བྱ་སྟེ་དགུ་པའོ།། །།དེ་ ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྨན་གྱི་རྒྱལ་པོ་ལ་སོགས་པ་བྱང་ཆུབ་སེམས་དཔའ་བརྒྱད་ཁྲི་པོ་དེ་དག་ལ་བཀའ་སྩལ་པ། སྨན་གྱི་རྒྱལ་པོ། འཁོར་འདིའི་ལྷ་ དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱ་ཆེན་པོ་དང༌། མི་དང་མི་མ་ཡིན་པ་དང༌། དགེ་སློང་དང༌། དགེ་སློང་ མ་དང༌། དགེ་བསྙེན་དང༌། དགེ་བསྙེན་མ་ཉན་ཐོས་ཀྱི་ཐེག་པ་ཅན་དང༌། བྱང་ཆུབ་སེམས་དཔའི་ཐེག་པ་ཅན་མང་པོ་འདི་དག་གིས་ཆོས་ཀྱི་རྣམ་གྲངས་འདི་དེ་བཞིན་གཤེགས་པ་ལས་ མངོན་སུམ་དུ་ཐོས་པ་དེ་དག་མཐོང་ངམ། གསོལ་བ། བཅོམ་ལྡན་འདས། མཐོང་ལགས་སོ། །བདེ་བར་གཤེགས་པ། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྨན་ གྱི་རྒྱལ་པོ། འདི་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་སྟེ། འཁོར་འདིའི་ནང་ན་གང་དག་ཐ་ན་ཚིགས་སུ་བཅད་པ་གཅིག་ཐོས་པ་དང༌། ཚིག་གཅིག་ཐོས་པ་དང༌། གང་ དག་གིས་ཐ་ན་མདོ་སྡེ་འདི་ལ་སེམས་བསྐྱེད་པ་གཅིག་ཙམ་གྱིས་རྗེས་སུ་ཡི་རང་བའི་འཁོར་བཞི་པོ་དེ་དག་ཐམས་ཅད་ནི། སྨན་གྱི་རྒྱལ་པོ། ངས་བླ་ན་མེད་པ་ཡང་དག་པར་རྫོགས་པའི་ བྱང་ཆུབ་ཏུ་ལུང་བསྟན་ཏོ། །སྨན་གྱི་རྒྱལ་པོ། གང་ལ་ལ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ཆོས་ཀྱི་རྣམ་གྲངས་འདི་ཉན་པ་དང་ཐ་ན་ཚིགས་སུ་བཅད་པ་ གཅིག་ཐོས་ནས། སེམས་བསྐྱེད་པ་གཅིག་ཙམ་གྱིས་ཀྱང་རྗེས་སུ་ཡི་རང་བར་འགྱུར་བའི་རིགས་ཀྱི་བུའམ་རིགས་ཀྱི་བུ་མོ་དེ་དག །སྨན་གྱི་རྒྱལ་པོ། ངས་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཏུ་ལུང་བསྟན་ཏོ། །སྨན་གྱི་རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་དེ་དག་གིས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚང་བལ་བསྙེན་བཀུར་བྱས་པ་ཡིན་ནོ། ༄༅། །སྨན་གྱི་རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་དེ་དག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་སྨོན་ལམ་བཏབ་པ་ཡིན་ཏེ། །སྨན་གྱི་ རྒྱལ་པོ། །རིགས་ཀྱི་བུའམ་རིགས་ཀྱི་བུ་མོ་དེ་དག་སེམས་ཅན་རྣམས་ལ་སྙིང་བརྩེ་བའི་ཕྱིར། །ཛམྦུའི་གླིང་འདིར་མིར་སྐྱེས་པར་རིག་པར་བྱའོ། །གང་དག་ཆོས་ཀྱི་རྣམ་གྲངས་ འདི་ལས་ཐ་ན་ཚིགས་སུ་བཅད་པ་གཅིག་ཙམ་ཡང་འཛིན་ཏམ། ཀློག་གམ། །སྟོན་ཏམ། །ཡང་དག་པར་བརྗོད་དམ། ཡི་གེར་འདྲིའམ། བྲིས་ནས་རྗེས་སུ་དྲན་པར་བྱེད་དམ། ། དུས་དུས་སུ་ལྟའམ། གླེགས་བམ་དེ་ལ་དེ་བཞིན་གཤེགས་པ་ལ་བྱ་བ་བཞིན་དུ་གུས་པ་སྐྱེས་དམ། སྟོན་པ་ལ་བྱ་བ་བཞིན་དུ་གུས་པར་བཀུར་སྟི་བྱེད་དམ། བརྩུན་པར་བྱེད་དམ། རིམ་གྲོར་བྱེད་དམ། མཆོད་དམ། གླེགས་བམ་དེ་ལ་མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། གོས་དང༌། གདུགས་དང༌། རྒྱལ་མཚན་ དང༌། ལྷའི་བ་དན་དང༌། རོལ་མོའི་སྒྲ་ལ་སོགས་པ་དང༌། ཕྱག་འཚལ་བ་དང༌། ཐལ་མོ་སྦྱོར་བ་བྱེད་པས་མཆོད་དམ། སྨན་གྱི་རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ ཆོས་ཀྱི་རྣམ་གྲངས་འདི་ལས་ཐ་ན་ཚིགས་སུ་བཅད་པ་གཅིག་ཙམ་ཡང་འཛིན་ཏམ། རྗེས་སུ་ཡི་རང་ན། སྨན་གྱི་རྒྱལ་པོ་དེ་དག་ཐམས་ཅད་ངས་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་ལུང་བསྟན་ཏོ། །སྨན་གྱི་རྒྱལ་པོ། དེ་ལ་སྐྱེས་པའམ་བུད་མེད་གང་ལ་ལ་ཞིག་འདི་སྐད་དུ་མ་འོངས་པའི་དུས་ན་དེ་བཞིན་གཤེགས་ལ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་སུ་འགྱུར་པའི་སེམས་ཅན་དེ་དག་ཅི་ལྟ་བུ་དག་ཅིག་ཅེས་ཟེར་ན། སྨན་གྱི་རྒྱལ་པོ། སྐྱེས་པའམ་བུད་མེད་དེ་ལ་རིགས་ཀྱི་བུའམ་རིགས་ཀྱི་བུ་མོ་དེ་བསྟན་པར་བྱ་སྟེ། གང་གིས་ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་ཡང་འཛིན་ཏམ། ཐོས་པར་བྱེད་དམ། བཤད་དམ། ཆོས་ཀྱི་རྣམ་གྲངས་འདི་ལ་རི་མོ་བྱེད་ན། རིགས་ཀྱི་བུའམ་རིགས་ཀྱི་བུ་མོ་དེ་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འཇིག་རྟེན་དུ་འབྱུང་བར་ལྟོས་ཤིག་ཅེས་བྱའོ། །དེ་ ཅིའི་ཕྱིར་ཞེ་ན། སྨན་གྱི་རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་དེ་དེ་བཞིན་གཤེགས་པར་རིག་པར་བྱ་བའི་ཕྱིར་ཏེ། གང་གིས་ཆོས་ཀྱི་རྣམ་གྲངས་འདི་ལས་ཐ་ན་ཚིགས་སུ་ བཅད་པ་གཅིག་ཙམ་བཟུང་ནའང་ལྷ་དང་བཅས་པའི་འཇིག་རྟེན་གྱིས་དེ་བཞིན་གཤེགས་པ་ལ་བཀུར་སྟི་བྱ་བ་བཞིན་དུ་བྱ་ན། གང་ཞིག་ཆོས་ཀྱི་རྣམ་གྲངས་འདི་མཐའ་དག་ཆུབ་ པར་འཛིན་ཏམ། འཆང་པའམ། ཀུན་ཆུབ་པར་བྱེད་པའམ། རབ་ཏུ་སྟོན་པའམ། ཡི་གེར་འདྲིའམ་བྲིས་ནས་རྗེས་སུ་དྲན་པར་བྱེད་པའམ། །གླེགས་བམ་དེ་ལ་མེ་ཏོག་དང༌། །བདུག་ ༄༅། །པ་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། གོས་དང༌། །གདུགས་དང༌། རྒྱལ་མཚན་དང༌། ལྷའི་བ་དན་དང༌། རོལ་མོའི་སྒྲ་དང༌། ཐལ་མོ་སྦྱར་ཏེ་ཕྱག་འཚལ་ཞིང་རབ་ཏུ་འདུད་པ་དག་གིས་རི་མོར་བྱེད་པ་ལྟ་ཅི་སྨོས། །སྨན་གྱི་རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་དེ་བླ་ན་མེད་པ་ཡང་དག་པར་རྫོགས་པའི་ བྱང་ཆུབ་ཏུ་ཡོངས་སུ་གྲུབ་པར་རིག་པར་བྱའོ། །དེས་དེ་བཞིན་གཤེགས་པ་མཐོང་བར་རིག་པར་བྱའོ། །འཇིག་རྟེན་ལ་ཕན་ཞིང་སྙིང་བརྩེ་བ་སྨོན་ལམ་གྱི་དབང་གིས་ཆོས་ཀྱི་ རྣམ་གྲངས་འདི་རབ་ཏུ་བསྟན་པའི་ཕྱིར་ཛམྦུའི་གླིང་འདིར་མིར་སྐྱེས་ཏེ། བདག་ཉིད་རྒྱ་ཆེར་ཆོས་མངོན་པར་འདུ་བྱེད་པ་དང༌། སངས་རྒྱས་ཀྱི་ཞིང་རྒྱ་ཆེན་པོར་སྐྱེ་བ་བཞག་སྟེ། ཆོས་ ཀྱི་རྣམ་གྲངས་འདི་ཤིན་ཏུ་ཡང་དག་པར་བསྟེན་པའི་ཕྱིར་ང་ཡོངས་སུ་མྱ་ངན་ལས་འདས་ནས་སེམས་ཅན་རྣམས་ལ་ཕན་ཞིང་སྙིང་བརྩེ་བའི་དོན་དུ་སྐྱེས་པར་རིག་པར་བྱའོ། །སྨན་གྱི་ རྒྱལ་པོ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། གང་གི་ཆོས་ཀྱི་རྣམ་གྲངས་འདི་བཤད་དམ་ཐ་ན་གསངས་སྟེ་རྐུན་བུར་སེམས་ཅན་གཅིག་ལའང་ཡང་དག་ པར་བཤད་དམ་བསྟན་ནའང༌། སྨན་གྱི་རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་དེ། དེ་བཞིན་གཤེགས་པའི་ཕོ་ཉ་ཡིན་པར་རིག་པར་བྱའོ། །རིགས་ཀྱི་བུའམ་རིགས་ཀྱི་བུ་ མོད་དེ་དེ་བཞིན་གཤེགས་པའི་བྱ་བ་བྱེད་པ་སྟེ། དེ་བཞིན་གཤེགས་པས་མངགས་པར་རིག་པར་བྱའོ། །སྨན་གྱི་རྒྱལ་པོ། སེམས་ཅན་སྡང་བའི་སེམས་དང་ལྡན་པ་དང༌། སྡིག་ པའི་སེམས་དང་ལྡན་པ་དང༌། །དྲག་ཤུལ་གྱི་སེམས་དང་ལྡན་པ་གང་ལ་ལས། །དེ་བཞིན་གཤེགས་པ་ལ་མངོན་དུ་བསྐལ་བར་མི་སྙན་པ་སྨྲ་བ་བས། །གང་ཞིག་མདོ་སྡེ་འདི་འཛིན་ པ་ཆོས་སྨྲ་བ་དེ་ལྟ་བུ་ཁྱིམ་ན་གནས་པའམ་རབ་ཏུ་བྱུང་བ་དེ་དག་ལ་བདེན་པའམ་མི་བདེན་པའི་ཚིག་མི་སྙན་པ་གཅིག་པ་བསྒྲགས་པ་དེ་སྡིག་པའི་ལས་ཤིན་ཏུ་མི་བཟད་པར་བཤད་ དེ༑ དེ་ཅིའི་ཕྱིར་ཞེ་ན། སྨན་གྱི་རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་དེ་ནི་དེ་བཞིན་གཤེགས་པའི་རྒྱན་གྱིས་བརྒྱན་པར་རིག་པར་བྱ་བའི་ཕྱིར་ཏེ། སྨན་གྱི་རྒྱལ་པོ། གང་གིས་ཆོས་ ཀྱི་རྣམ་གྲངས་འདི་ཡི་གེར་བྲིས་ནས་གླེགས་བམ་དུ་བྱས་ཏེ་ཕྲག་པ་ལ་ཐོགས་པ་དེས། དེ་བཞིན་གཤེགས་པ་ཕྲག་པ་ལ་ཐོགས་པར་འགྱུར་ཏེ། དེ་གང་དང་གང་དུ་འགྲོ་བ་དེ་དང་ དེར་སེམས་ཅན་རྣམས་ཀྱིས་ཐལ་མོ་སྦྱར་བར་བྱ། བཀུར་སྟིར་བྱ། བཙུན་པར་བྱ། རི་མོར་བྱ། མཆོད་པར་བྱའོ། །ལྷ་དང་མིའི་མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་ དང༌། བྱུག་པ་དང༌། ཕྱེ་མ་དང༌། གདུགས་དང༌། །རྒྱལ་མཚན་དང༌། །ལྷའི་བ་དན་དང༌། རོལ་མོའི་སྒྲ་དང༌། །བཟའ་བ་དང༌། །བཅའ་བ་དང་ཁ་ཟས་དང༌། །བཏུང་བ་ ༄༅། །དང༑ བཞོན་པ་དང༌། མཆོག་ཏུ་འགྱུར་པའི་ལྷའི་རིན་པོ་ཆེའི་ཕུང་པོ་དག་གིས་ཆོས་སྨྲ་བ་དེ་ལ་བཀུར་སྟི་བྱ། །ཆོས་སྨྲ་བ་དེ་ལ་ལྷའི་རིན་པོ་ཆེའི་ཕུང་ པོ་དག་དབུལ་བར་བྱའོ། །དེ་ཅིའི་ཕྱིར་ཞེ་ན། ཆོས་ཀྱི་རྣམ་གྲངས་འདི་ལན་གཅིག་ཡང་དག་པར་རབ་ཏུ་བསྟན་ནའང་འདི་ཐོས་པས་དཔག་ཏུ་མེད་གྲངས་མེད་པའི་སེམས་ཅན་རྣམས་ མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་འགྲུབ་པར་འགྱུར་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ ཏོ༑ ༑སངས་རྒྱས་ཉིད་དུ་གནས་འདོད་ཅིང༌། །རང་འབྱུང་ཡེ་ཤེས་འདོད་པ་ཡིས། །གང་རྣམས་ཚུལ་འདི་འཛིན་བྱེད་པ། །སེམས་ཅན་དེ་དག་བཀུར་སྟི་བྱ། །ཐམས་ཅད་མཁྱེན་ ཉིད་གང་འདོད་དེ། །ཇི་ལྟར་མྱུར་དུ་ཐོབ་སྙམ་པ། །དེས་ནི་མདོ་སྡེ་འདི་བཟུང་སྟེ། །འཛིན་པ་ལ་ཡང་བཀུར་སྟི་བྱ། །སེམས་ཅན་རྣམས་ལ་བརྩེ་དོན་དུ། །མདོ་སྡེ་འདི་ནི་སུ་ཀློག་པ། ། སེམས་ཅན་རྣམ་པར་འདུལ་བའི་ཕྱིར། །འཇིག་རྟེན་མགོན་གྱིས་བཀྱེ་བ་ཡིན། །སེམས་ཅན་རྣམས་ལ་སྙིང་བརྩེའི་ཕྱིར། །གང་ཞིག་མདོ་སྡེ་འདི་འཛིན་པ། །སྐྱེ་བ་བཟང་པོ་བཏང་ ནས་སུ་།དཔའ་བོ་དེ་ནི་འདིར་འོངས་སོ། །བླ་ན་མེད་པའི་མདོ་སྡེ་འདི། །ཕྱི་མའི་དུས་ལ་རབ་འཆད་ཅིང༌། །གང་ཕྱིར་དེ་ན་དེ་སྣང་བ། །སྐྱེ་བ་ལ་ནི་དེ་དབང་ངོ༌། །ཆོས་སྨྲ་བ་ལ་རིན་ ཆེན་འཐོར། །མི་ཡི་སྤོས་རབ་ཐམས་ཅད་དང་།ལྷ་ཡི་མེ་ཏོག་དག་གིས་མཆོད། །ལྷ་ཡི་གོས་ཀྱིས་ཀུན་ཏུ་འགེབས། །ཕྱི་དུས་འཇིགས་པ་དེ་ན་ཡང༌། །མྱ་ངན་ང་འདས་མདོ་འཛིན་ པ༑ ༑ཇི་ལྟར་རྒྱལ་དབང་རང་བྱུང་བཞིན། །དེ་ལ་རྟག་ཏུ་ཐལ་སྦྱོར་འགྱུར། །ལན་གཅིག་མདོ་སྡེ་འདི་སྨྲ་བ། །རྒྱལ་སྲས་དེ་ནི་མཆོད་པའི་ཕྱིར། །བཟའ་བཅའ་དེ་བཞིན་ཟས་དང་སྐོམ། ། གནས་དང་མལ་ཆ་གོས་བྱེ་སྦྱིན། །གང་རྣམས་མདོ་འདི་ཕྱི་དུས་ན། །ཡི་གེར་འདྲི་འཆང་ཉན་པ་ནི། །མི་ཡི་སྲིད་པར་ངས་བཏང་སྟེ། །དེ་བཞིན་གཤེགས་པའི་བྱ་བ་བྱེད། །གང་ཞིག་ང་ ཡི་མདུན་འདུག་ནས། །ཁྲོ་གཉེར་བྱས་ཤིང་གནོད་སེམས་ཀྱིས། བསྐལ་པ་ཚང་བར་མི་སྙན་བསྒྲགས། །མི་དེ་སྡིག་པ་མང་དུ་འཕེལ། །མདོ་སྡེ་འདི་ནི་རབ་སྟོན་པ། །གང་རྣམས་ མདོ་འཛིན་དེ་དག་ལ། །གཤེ་ཞིང་མི་བསྔགས་སྨྲ་བ་དེ། །སྡིག་པ་ཤིན་ཏུ་དེས་མང་བཤད། །བྱང་ཆུབ་མཆོག་འདི་ཡོངས་འཚོལ་ཞིང༌། །བསྐལ་པ་རྫོགས་པར་ཐལ་སྦྱར་ཏེ།། ཚིགས་བཅད་དུ་ཁྲག་ཁྲིག་གིས། །མི་གང་ལ་ལ་མངོན་པར་བསྟོད། །དགའ་སྐྱེས་ང་ལ་བསྟོད་པ་ནི། །དེ་ལས་བསོད་ནམས་ཆེས་མང་རྙེད། །མི་གང་དེ་ཡི་བསྔགས་བརྗོད་པ། ། དེ་བས་བསོད་ནམས་མང་དུ་འཕེལ། །བསྐལ་པ་བྱེ་སྟོང་བཅོ་བརྒྱད་དུ། །སྒྲ་དང་གཟུགས་དང་རོ་རྣམས་དང༌། །ལྷ་ཡི་རེག་དང་ལྷ་ཡྶྤོས་ཀྱིས། །གཟུགས་རྟེན་དེ་དག་སུས་མཆོད་དེ། ༄༅། །བསྐལ་པ་བྱེ་སྟོང་བཅོ་བརྒྱད་དུ། །རྟེན་ལ་དེ་ལྟར་མཆོད་པ་བས། །ལན་གཅིག་མདོ་སྡེ་འདི་ཐོས་ན། །ངོ་མཚར་ཆེན་པོ་དེས་ཐོབ་འགྱུར། །སྨན་ གྱི་རྒྱལ་པོ། །ཁྱོད་མོས་པར་བྱ། ཁྱོད་ཀྱིས་ཁོང་དུ་ཆུད་པར་བྱའོ། །སྨན་གྱི་རྒྱལ་པོ། ངས་ཆོས་ཀྱི་རྣམ་གྲངས་མང་པོ་བཤད་དོ། །འཆད་དོ། །བཤད་པར་བྱའོ། །སྨན་གྱི་ རྒྱལ་པོ། ཆོས་ཀྱི་རྣམ་གྲངས་དེ་དག་ཐམས་ཅད་ཀྱི་ནང་ན། ཆོས་ཀྱི་རྣམ་གྲངས་འདི་ནི་འཇིག་རྟེན་ཐམས་ཅད་དང་མི་མཐུན་བ་སྟེ། འཇིག་རྟེན་ཐམས་ཅད་ཡིད་ཆེས་པར་མི་ འགྱུར་བའོ། །སྨན་གྱི་རྒྱལ་པོ། །འདི་ནི་དེ་བཞིན་གཤེགས་པའི་མངོན་པར་ཤེས་པའི་ནང་གི་གསང་ཆེན་ཏེ། དེ་བཞིན་གཤེགས་པའི་སྟོབས་ཀྱིས་བསྲུངས་པ་སྔོན་མ་ འཕེལ་བའོ། །གནས་འདི་ནི་སྔོན་མ་བསྟན་པ་སྟེ། །སྨན་གྱི་རྒྱལ་པོ། དེ་བཞིན་གཤེགས་པ་བཞུགས་པ་ནའང༌། ཆོས་ཀྱི་རྣམ་གྲངས་འདི་ལ་སྐྱེ་བོ་མང་པོ་སྤོང་ན། དེ་བཞིན་ གཤེགས་པ་ཡོངས་སུ་མྱ་ངན་ལས་འདས་ནས་ལྟ་ཅི་སྨོས། །སྨན་གྱི་རྒྱལ་པོ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། །གང་དག་ཆོས་ཀྱི་རྣམ་གྲངས་འདི་ལ་དད་ པ་དང༌། ཀློག་པ་དང༌། ཡི་གེར་འདྲི་བ་དང༌། བཀུར་སྟི་བྱེད་པ་དང༌། གཞན་དག་ལའང་ཐོས་པར་བྱེད་པའི་རིགས་ཀྱི་བུའམ་རིགས་ཀྱི་བུ་མོ་དེ་དག་ནི། དེ་བཞིན་གཤེགས་ པའི་ཆོས་གོས་ཀྱིས་གཡོགས་པར་རིག་པར་བྱའོ། །འཇིག་རྟེན་གྱི་ཁམས་གཞན་ན་བཞུགས་པའི་དེ་བཞིན་གཤེགས་པ་རྣམས་ཀྱིས་གཟིགས་ཤིང་བྱིན་གྱིས་བརླབས་པའོ། །དེ་དག་ སོ་སོ་རང་གི་དད་པའི་སྟོབས་དང༌། དགེ་བའི་རྩ་བའི་སྟོབས་དང༌། སྨོན་ལམ་གྱི་སྟོབས་ཅན་དུ་འགྱུར་རོ། །སྨན་གྱི་རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་དེ་དག་དེ་བཞིན་གཤེགས་ པ་དང་གནས་གཅིག་ན་འདུག་པར་འགྱུར་ཏེ། དེ་དག་གི་སྤྱི་བོ་ལ་དེ་བཞིན་གཤེགས་པའི་ཕྱག་གིས་སྙུགས་པར་འགྱུར་རོ། །སྨན་གྱི་རྒྱལ་པོ། ས་ཕྱོགས་གང་ན་ཆོས་ཀྱི་རྣམ་གྲངས་ འདི་འཆད་དམ། སྟོན་ཏམ། ཡི་གེར་འདྲིའམ། ཁ་ཏོན་བྱེད་དམ། ཡང་དག་པར་བརྗོད་པའི་ས་ཕྱོགས་དེར། སྨན་གྱི་རྒྱལ་པོ། དེ་བཞིན་གཤེགས་པའི་མཆོད་རྟེན་རིན་པོ་ཆེ་ལས་བྱས་ པ་མཐོ་ཞིང་ཆེ་བ་བྱའོ། །དེར་དེ་བཞིན་གཤེགས་པའི་སྐུ་གདུང་ངེས་པར་གཞག་མི་དགོས་སོ། །དེ་ཅིའི་ཕྱིར་ཞེ་ན། དེར་དེ་བཞིན་གཤེགས་པའི་སྐུ་གདུང་གཅིག་ཏུ་འདུས་པ་གཞག་ པར་འགྱུར་བའི་ཕྱིར་རོ། །ས་ཕྱོགས་གང་ན་ཆོས་ཀྱི་རྣམ་གྲངས་འདི་འཆད་དམ། སྟོན་ཏམ། ཀློག་གམ། ཡང་དག་པར་བརྗོད་དམ། ཡི་གེར་འདྲིའམ། གླེགས་བམ་དུ་བྱས་ཏེ་གཞག་ པ་དེར་མཆོད་རྟེན་བཞིན་དུ་བཀུར་སྟི་དང༌། བཙུན་པར་བྱ་བ་དང༌། རི་མོ་དང་མཆོད་པར་བྱའོ། །མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། གོས་ ༄༅། །དང༌། གདུགས་དང༌། རྒྱལ་མཚན་དང༌། ལྷའི་བ་དན་དང༌། རྣམ་པར་རྒྱལ་བའི་བདེན་ཐམས་ཅད་དང༌། གླུ་དང༌། རོལ་མོའི་སྒྲ་དང༌། གར་དང༌། སིལ་ སྙན་དང༌། ཕེག་རྡོབ་པ་ཐམས་ཅད་ཀྱིས་མཆོད་པར་བྱའོ། །སྨན་གྱི་རྒྱལ་པོ། སེམས་ཅན་གང་དག་དེ་བཞིན་གཤེགས་པའི་མཆོད་རྟེན་དེ་ལ་ཕྱག་འཚལ་བའམ་མཐོང་བ་རྙེད་ པ་དེ་དག་ཐམས་ཅད་ནི། སྨན་གྱི་རྒྱལ་པོ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཤིན་ཏུ་ཉེ་བར་གྱུར་པར་རིག་པར་བྱའོ། །དེ་ཅིའི་ཕྱིར་ཞེ་ན། སྨན་གྱི་རྒྱལ་ པོ༑ ཁྱིམ་ན་གནས་པ་དང༌། རབ་ཏུ་བྱུང་བའི་བྱང་ཆུབ་སེམས་དཔའ་མང་པོ་དག །བྱང་ཆུབ་སེམས་དཔའི་སྤྱད་པ་སྤྱོད་ཀྱང་ཆོས་ཀྱི་རྣམ་གྲངས་འདི་ལྟ་བའམ། མཉན་པའམ། ཡི་ གེར་འདྲི་བའམ། མཆོད་པར་ཡང་མི་རྙེད་དོ། །སྨན་གྱི་རྒྱལ་པོ། ཇི་ཙམ་དུ་ཆོས་ཀྱི་རྣམ་གྲངས་འདི་མི་ཉན་པ་དེ་ཙམ་དུ། བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ ལ་མཁས་པ་མ་ཡིན་ནོ། །གང་གི་ཚེ་ཆོས་ཀྱི་རྣམ་གྲངས་འདི་མཉན་ཏེ་ཐོས་ནས་མོས་པ་དང༌། རྟོགས་པ་དང༌། འཇུག་པ་དང༌། ཤེས་པ་དང༌། ཡོངས་སུ་འཛིན་པ་དེའི་ཚེ། བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྙེན་པར་འགྱུར་ཏེ། ཉེ་བར་གནས་པ་ཡིན་ནོ། །སྨན་གྱི་རྒྱལ་པོ། འདི་ལྟ་སྟེ། དཔེར་ན། མི་ལ་ལ་ཞིག་ཆུ་འདོད་པར་གྱུར་ཏེ་ཆུ་ འཚོལ་ཞིང༌། དེས་ཆུའི་ཕྱིར་སྐམ་སའི་ཕྱོགས་ཤིག་ཏུ་ཁྲོན་པ་རྐོར་བཅུག་སྟེ། དེ་རྐོ་བ་ན་སྐམ་ཞིང་སྐྱ་བའི་ས་འབྱིན་པར་མཐོང་སྟེ། མཐོང་ནས་འདི་ལྟར་འདི་ནས་ཆུ་ད་དུང་ཐག་རིང་ ངོ་སྙམ་དུ་སེམས་སོ། །དེ་ནས་དུས་གཞན་ཞིག་ན། མི་དེས་ས་གཤེར་བ་དང་འདྲེས་པ་འདམ་རྫབ་དང་ཆུའི་ཐིགས་པ་ཟག་པ་འབྱིན་ཅིང་ཁྲོན་པ་རྐོ་བའི་མི་དེ་དག་ལུས་ལ་འདམ་ རྫབ་ཀྱིས་གོས་པར་མཐོང་སྟེ། དེ་ནས་ཡང༌། སྨན་གྱི་རྒྱལ་པོ། མི་དེས་སྔ་ལྟས་དེ་མཐོང་ནས་དོགས་པ་དང་ཐེ་ཚོམ་མེད་དེ། འདི་ནས་ཆུ་ནི་ཉེའོ་སྙམ་མོ། །སྨན་གྱི་རྒྱལ་པོ། དེ་ བཞིན་དུ་ཅི་ཙམ་དུ་ཆོས་ཀྱི་རྣམ་གྲངས་འདི་མི་ཉན། མི་འཛིན། ཁོང་དུ་ཆུད་པར་མི་བྱེད། མི་འཇུག། མི་སེམས་པའི་བར་དུ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་རིང་བ་ཡིན་ནོ། །སྨན་གྱི་རྒྱལ་པོ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཆོས་ཀྱི་རྣམ་གྲངས་འདི་ ཉན་ཅིང་འཛིན་པ་དང༌། འཇུག་པ་དང༌། ཁ་ཏོན་དུ་བྱེད་པ་དང༌། སེམས་པ་དང༌། སྒོམ་པ་དེའི་ཚེ། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་གྱུར་བ་ཡིན་ ཏེ༑ སྨན་གྱི་རྒྱལ་པོ། ཆོས་ཀྱི་རྣམ་གྲངས་འདི་ལས་སེམས་ཅན་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྐྱེའོ། །དེ་ཅིའི་ཕྱིར་ཞེ་ན། ཆོས་ཀྱི་རྣམ་གྲངས་འདི་ནི་ལྡེམ་ ༄༅། །པོར་དགོངས་ཏེ་བཤད་པ་འགྲེལ་པའི་མཆོག་ཡིན་པའི་ཕྱིར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་གྲུབ་པར་བྱ་བའི་ཕྱིར་ཆོས་གསང་བའི་གནས་བཤད་པའོ། །སྨན་གྱི་རྒྱལ་པོ། བྱང་ཆུབ་སེམས་དཔའ་གང་ལ་ལ་ཞིག་ཆོས་ ཀྱི་རྣམ་གྲངས་འདིས་སྐྲག་ཅིང་དངངས་ཏེ་དངངས་པར་གྱུར་ན། སྨན་གྱི་རྒྱལ་པོ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཐེག་པ་ལ་གསར་དུ་ཞུགས་པར་རིག་པར་བྱའོ། །གལ་ཏེ་ཡང་ ཉན་ཐོས་ཀྱི་ཐེག་པ་ཅན་ཞིག་ཆོས་ཀྱི་རྣམ་གྲངས་འདིས་སྐྲག་ཅིང་དངངས་ཏེ་དངངས་པར་གྱུར་ན། སྨན་གྱི་རྒྱལ་པོ། དེ་ནི་ཉན་ཐོས་ཀྱི་ཐེག་པ་ཅན་གྱི་གང་ཟག་ང་རྒྱལ་ཅན་དུ་རིག་པར་ བྱའོ། །སྨན་གྱི་རྒྱལ་པོ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་ཞིག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ཕྱི་མའི་དུས་ཕྱི་མའི་ཚེ་ན། ཆོས་ཀྱི་ རྣམ་གྲངས་འདི་འཁོར་བཞི་ལ་ཡང་དག་པར་སྟོན་ན། སྨན་གྱི་རྒྱལ་པོ། བྱང་ཆུབ་སེམས་དཔའ་དེས་དེ་བཞིན་གཤེགས་པའི་གནས་སུ་ཞུགས་ཏེ། དེ་བཞིན་གཤེགས་པའི་ ཆོས་གོས་བགོས་ལ་དེ་བཞིན་གཤེགས་པའི་སྟན་ལ་འདུག་སྟེ། ཆོས་ཀྱི་རྣམ་གྲངས་འདི་ཕྱིས་འཁོར་བཞི་ལ་ཡང་དག་པར་བཤད་པར་བྱའོ། །སྨན་གྱི་རྒྱལ་པོ། དེ་བཞིན་ གཤེགས་པའི་གནས་གང་ཞེ་ན། སྨན་གྱི་རྒྱལ་པོ། སེམས་ཅན་ཐམས་ཅད་ལ་བྱམས་པར་གནས་པ་ནི། སྨན་གྱི་རྒྱལ་པོ། དེ་བཞིན་གཤེགས་པའི་གནས་ཏེ། སྨན་གྱི་རྒྱལ་པོ། དེར་ རིགས་ཀྱི་བུ་དེ་འཇུག་པར་བྱའོ། །སྨན་གྱི་རྒྱལ་པོ། དེ་བཞིན་གཤེགས་པའི་ཆོས་གོས་གང་ཞེ་ན། སྨན་གྱི་རྒྱལ་པོ། བཟོད་པ་དང༌། དེས་པ་ཆེན་པོ་ནི་དེ་བཞིན་གཤེགས་པའི་ཆོས་ གོས་ཏེ། སྨན་གྱི་རྒྱལ་པོ། དེའང་རིགས་ཀྱི་བུ་དེས་བགོ་བར་བྱའོ། །སྨན་གྱི་རྒྱལ་པོ། དེ་བཞིན་གཤེགས་པའི་ཆོས་ཀྱི་སྟན་གང་ཞེ་ན། ཆོས་ཐམས་ཅད་སྟོང་པ་ཉིད་དུ་འཇུག་པ་སྟེ། སྨན་གྱི་རྒྱལ་པོ། དེ་བཞིན་གཤེགས་པའི་ཆོས་ཀྱི་སྟན་དེ་ལ་རིགས་ཀྱི་བུ་དེས་འདུག་པར་བྱའོ། །འདུག་ནས་ཆོས་ཀྱི་རྣམ་གྲངས་འདི་འཁོར་བཞི་པོ་དག་ལ་ཡང་དག་པར་བསྟན་ པར་བྱའོ། །བྱང་ཆུབ་སེམས་དཔའ་མི་ཞན་པའི་སེམས་ཀྱིས་བྱང་ཆུབ་སེམས་དཔའི་ཚོགས་དང༌། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་འཁོར་བཞི་པོ་དག་གི་ མདུན་དུ་རབ་ཏུ་བསྟན་པར་བྱའོ། །སྨན་གྱི་རྒྱལ་པོ། ང་འཇིག་རྟེན་གྱི་ཁམས་གཞན་ན་འདུག་ནའང་སྤྲུལ་པས་རིགས་ཀྱི་བུ་དེའི་འཁོར་དང་མཐུན་པར་བྱའོ། །སྤྲུལ་པའི་དགེ་སློང་ དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དག་ཆོས་ཉན་དུ་དགྱེའོ། །ཆོས་སྨྲ་བ་དེས་བཤད་པ་དེ་ལ་དེ་དག་ཕྱིར་མི་ཟློག་ཅིང་སྤོང་བར་མི་བྱེད་དོ། །གལ་ཏེ་དེ་དགོན་ ༄༅། །པ་ན་འདུག་པར་གྱུར་ན་དེར་ངས་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་ པོ་མང་པོ་ཆོས་ཉན་དུ་དགྱེའོ། །སྨན་གྱི་རྒྱལ་པོ། ང་འཇིག་རྟེན་གྱི་ཁམས་གཞན་ན་འདུག་ནའང་རིགས་ཀྱི་བུ་དེ་ལ་ངའི་ངོ་བོ་ཉེ་བར་བསྟན་ཏོ། །གང་དག་ཆོས་ཀྱི་རྣམ་གྲངས་འདི་ལས་ཚིག་ དང་ཡི་གེ་ཆད་པར་གྱུར་པ་དེ་དག་ཁ་ཏོན་བྱེད་པ་ན་སླར་ཐོན་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཞེན་པ་ཐམས་ཅད་རྣམ་ སྤངས་ཏེ། །འདི་འདྲ་བ་ཡི་མདོ་སྡེ་ཉོན། །འདི་ནི་ཤིན་ཏུ་ཐོས་པར་དཀའ། །མོས་པ་རྙེད་པར་ཤིན་ཏུ་དཀའ། །ཇི་ལྟར་ལ་ལ་ཆུ་འདོད་པས། །སྐམ་སར་ཁྲོན་པ་རྐོར་བཅུག་ལ། ། ཕྱི་ཕྱིར་རབ་ཏུ་རྐོ་བ་ན། །ས་སྐམ་དག་ནི་འབྱུང་བར་མཐོང༌། །དེས་མཐོང་དེ་ན་སེམས་པ་ནི། །འདི་ནས་ཆུ་ཡང་རྒྱང་རིང་སྟེ། །ས་སྐམ་རྐོ་བར་བྱེད་པ་ཡང༌། །འདི་ནི་རྒྱང་རིང་མཚན་ མ་སྙམ། །ཕྱི་ཕྱིར་ས་དག་སྣུམ་པ་ཡི། །གཤེར་པ་གང་ཚེ་མཐོང་གྱུར་པ། །དེ་ན་དེ་ལ་ཐུག་པར་འགྱུར། །དེ་ནས་ཆུ་ཡང་ཐག་མི་རིང༌། །དེ་བཞིན་མདོ་འདི་མི་ཉན་ཅིང༌། །ཕྱི་ཕྱིར་ ཤིན་ཏུ་མ་བསྒོམས་པ། །དེ་དག་སངས་རྒྱས་ཡེ་ཤེས་ནི། །འདི་འདྲ་བ་ལས་ཤིན་ཏུ་རིང༌། །གང་ཚེ་ཉན་ཐོས་རྣམས་ཀྱི་ནི། །གཏན་ལ་ཕབ་པ་མདོ་སྡེའི་རྒྱལ། །ཟབ་མོ་ འདི་ནི་ཉན་འགྱུར་ཞིང༌། །ལན་གཅིག་མ་ཡིན་སེམས་བྱེད་པ། །མཁས་པ་དེ་དག་སངས་རྒྱས་ཀྱི། །ཡེ་ཤེས་ལ་ནི་ཉེ་བར་གྱུར། །ཇི་ལྟར་ས་ནི་གཤེར་བ་ཡིས། །ཆུ་དང་ཉེ་ཞེས་བྱ་ བ་བཞིན། །རྒྱལ་བའི་གནས་དེར་རབ་ཞུགས་ཏེ། །ཆོས་གོས་དག་ཀྱང་བགོ་ནས་སུ། །ང་ཡི་སྟན་ལ་འདུག་ནས་ནི། །མདོ་སྡེ་འདི་ནི་མི་འཇིགས་ཤོད། །བྱམས་པའི་སྟོབས་ནི་ང་ ཡི་གནས། །བཟོད་དང་དེས་པ་ཆོས་གོས་ཏེ། སྟོང་པ་ཉིད་ནི་ང་ཡི་སྟན། །དེ་ལ་འདུག་ནས་རབ་ཏུ་སྟོན། །དབྱིག་པ་བོང་བ་མདུང་ཐུང་དང༌། །གཤེ་ཞིང་སྡིགས་པར་བྱེད་པ་ནི། གང་ དུ་བཤད་པ་དེ་བྱུང་ཡང༌། །ང་དྲན་ནས་ནི་དེ་བཟོད་བྱ། །བྱེ་བ་ཕྲག་སྟོང་ཞིང་དུ་ཡང༌། །ང་ཡི་ལུས་ཀྱི་དངོས་པོ་བརྟན། །བསྐལ་པ་བྱེ་བ་བསམ་ཡས་སུ། །སེམས་ཅན་རྣམས་ལ་ཆོས་ སྟོན་ཏོ། །ཡོངས་སུ་མྱ་ངན་ང་འདས་ནས། །མདོ་སྡེ་འདི་ནི་གང་སྟོན་པ། །ང་ནི་དཔའ་བོ་དེ་ལ་ཡང༌། །སྤྲུལ་པ་མང་པོ་དགྱེ་བར་བྱ། །དགེ་སློང་རྣམས་དང་དགེ་སློང་མ། །དགེ་བསྙེན་ རྣམས་དང་དགེ་བསྙེན་མ། །དེ་དག་དེ་ལ་མཆོད་པ་བྱེད། །འཁོར་རྣམས་ལ་ཡང་རི་མོ་བྱེད། །བོང་དབྱུག་དེ་བཞིན་གཤེ་པ་དང༌། །སྡིགས་པར་བྱེད་ཅིང་སྤྱོས་པ་དག །དེ་ལ་གང་ རྣམས་བྱེད་པ་ཡང༌། །སྤྲུལ་པ་རྣམས་ཀྱིས་དེ་དག་ཟློག །མི་དང་བྲལ་བའི་ཡུལ་ཕྱོགས་དང༌། །དགོན་པ་རྣམས་དང་རི་དག་ལ། །ནམ་ཞིག་གཅིག་པུ་གནས་ནས་སུ། །ཁ་ཏོན་བྱེད་ ༄༅། །པར་འགྱུར་བ་ན། །དེ་ན་འོང་གསལ་ང་ཡི་ལུས། །ངས་ནི་དེ་ལ་བསྟན་པར་བྱ། །དེ་ཡི་ཁ་ཏོན་ནོར་བ་ཡང༌། །ཕྱིར་ཞིང་ཐོན་པར་འགྱུར་བར་བྱ། །གཅིག་པུར་ ནགས་ན་རྒྱུ་བྱེད་ཅིང༌། །དེ་ནི་དེ་ན་གནས་པའི་ཚེ། །ལྷ་དང་གནོད་སྦྱིན་དུ་མ་དག །དེ་ཡི་གྲོགས་སུ་དགྱེ་བར་བྱ། །འཁོར་བཞི་ལ་ནི་རབ་སྟོན་པ། །དེ་ཡི་ཡོན་ཏན་དེ་འདྲར་འགྱུར། ། ནགས་ཚལ་རི་སུལ་གཅིག་གནས་ཤིང༌། །ཁ་ཏོན་བྱེད་པ་དེས་ང་མཐོང༌། །དེ་ཡི་སྦོབས་པ་ཐོགས་མེད་འགྱུར། །ཆོས་དང་ངེས་ཚིག་མང་པོ་ཤེས། །འདི་ལྟར་སངས་རྒྱས་བྱིན་ བརླབས་པས། །སྲོག་ཆགས་བྱེ་སྟོང་དེས་ཚིམ་བྱེད། །སེམས་ཅན་གང་དག་དེར་བརྟན་པ། །བྱང་ཆུབ་སེམས་དཔར་དེ་མྱུར་འགྲོ་།དེ་དང་བསྟེན་ཅིང་འགྲོགས་པ་ཀུན། །སངས་ རྒྱས་གངྒཱའི་བྱེ་སྙེད་མཐོང༌། །དམ་པའི་ཆོས་པདྨ་དཀར་པོ་ལས། །ཆོས་སྨྲ་བའི་ལེའུ་ཞེས་བྱ་སྟེ་བཅུ་པའོ།། །།དམ་པའི་ཆོས་པདྨ་དཀར་པོ། བམ་པོ་ བརྒྱད་པ། དེ་ནས་བཅོམ་ལྡན་འདས་ཀྱི་སྤྱན་སྔར་ས་ཕྱོགས་དེའི་འཁོར་གྱི་དབུས་ནས་རིན་པོ་ཆེ་སྣ་བདུན་གྱི་མཆོད་རྟེན་བྱུང་སྟེ། འཕང་དུ་ནི་དཔག་ཚད་ལྔ་བརྒྱ། ཁོར་ ཡུག་ཏུ་ནི་དེ་དང་འཚམ་པ། བཀྲ་བ་བལྟ་ན་སྡུག་པ། མེ་ཏོག་བཀྲམ་པའི་སྟེགས་བུ་ལྔ་སྟོང་གིས་ལེགས་པར་བརྒྱན་པ། རྟ་བ་བས་སྟོང་ཕྲག་མང་པོས་བརྒྱན་པ། ལྷའི་བ་ དན་དང་རྣམ་པར་རྒྱལ་བའི་བ་དན་སྟོང་གིས་བརྒྱན་པ། རིན་པོ་ཆེའི་ཕྲེང་བ་སྟོང་དབྱངས་པ། དར་དང་དྲིལ་བུ་སྟོང་རབ་ཏུ་དཔྱངས་པ། མངོན་པར་བྱུང་ནས་ནམ་མཁའ་བར་སྣང་ལ་གནས་ ཏེ༑ ཏ་མ་ལའི་འདབ་མ་དང༌། ཙནྡན་གྱི་དྲི་རབ་ཏུ་བྱུང་བས་དྲི་དེས་ཐམས་ཅད་དང་ལྡན་པའི་འཇིག་རྟེན་གྱི་ཁམས་འདི་ཁྱབ་པར་གྱུར་ཏེ། དེའི་གདུགས་ཀྱི་ཕྲེང་བ་རྒྱལ་ཆེན་བཞིའི་རིས་ཀྱི་ལྷའི་ ཁང་པའི་བར་དུ་འཕགས་པར་གྱུར་ཏོ། །རིན་པོ་ཆེ་སྣ་བདུན་ལས་བྱས་པ་འདི་ལྟ་སྟེ། གསེར་དང༌། དངུལ་དང༌། བཻ་ཌཱུཪྻ་དང༌། སྤུག་དང༌། རྡོའི་སྙིང་པོ་དང༌། མུ་ཏིག་དམར་པོ་དང༌། ཀེ་ ཀེ་རུའོ། །མཆོད་རྟེན་དེ་ལ་སུམ་ཅུ་རྩ་གསུམ་རིས་ཀྱི་ལྷའི་བུ་རྣམས་ལྷའི་མེ་ཏོག་མནྡཱ་ར་བ་དང༌། མནྡཱ་ར་བ་ཆེན་པོས་རིན་པོ་ཆེའི་མཆོད་རྟེན་དེ་ལ་འཐོར་རོ། །མངོན་པར་རབ་ཏུ་འཐོར་ རོ༑ ༑རིན་པོ་ཆེའི་མཆོད་རྟེན་དེ་ལས་འདི་འདྲ་བའི་སྒྲ་འབྱུང་སྟེ། དེ་བཞིན་གཤེགས་པ་རྣམས་ལ་ནི། སེམས་པ་མེད་དོ། །རྟོག་པ་མེད་དོ། །སྤྱོད་ལམ་ཐམས་ཅད་ཀྱང་བསྟན་ ཏོ༑ ༑དེ་བཞིན་གཤེགས་པ་རྣམས་ནི་ཕུང་པོ་དང༌། ཁམས་དང༌། སྐྱེ་མཆེད་ལས་རབ་ཏུ་ཕྱེ་བ་མ་ཡིན་ནོ། །ལས་དང་ཉོན་མོངས་པ་དང༌། ཕ་མ་དང༌། འབྱུང་བ་ཆེན་པོ་ལས་འབྱུང་ བ་མ་ཡིན་གྱི། ཤ་དང༌། ཁྲག་དང༌། ཆུ་བ་ལས་རྣམ་པར་འབྲེལ་བ་མ་ཡིན་ནོ། །དབུགས་ནང་དུ་རྒྱུ་བ་དང༌། ཕྱི་རོལ་དུ་རྒྱུ་བ་དང༌། སྲོག་དང་ཉེ་བར་འབྲེལ་བ་མ་ཡིན་ནོ། །དེ་ ༄༅། །བཞིན་གཤེགས་པ་རྣམས་ནི་ནམ་མཁའ་དང་མཚུངས་ཏེ། རྟག་པ་མ་ཡིན། མི་རྟག་པའང་མ་ཡིན་ནོ། །འོན་ཀྱང་དེ་བཞིན་གཤེགས་པ་རིན་ཆེན་མང་བསྐལ་ པ་བྱེ་བ་ཁྲག་ཁྲིག་བརྒྱ་སྟོང་མང་པོར་ཡོངས་སུ་མྱ་ངན་ལས་འདས་པ་རྟོག་པ་དང༌། རྣམ་པར་རྟོག་པ་ཐམས་ཅད་དང་བྲལ་བ། སེམས་ཅན་རྣམས་ཀྱི་དོན་གྱི་ཕྱིར་སྔོན་གྱི་སྨོན་ལམ་ གྱི་དབང་གིས་ཆོས་ཉན་པའི་ཕྱིར་དང༌། སེམས་ཅན་ཡོངས་སུ་སྨིན་པར་བྱ་བའི་ཕྱིར་མཐོང་སྟེ། དེ་བཞིན་གཤེགས་པའི་སྐུ་ལ་ནི་ཅུང་ཟད་ཀྱང་རྟོག་པ་མེད་དོ། །དེ་བཞིན་གཤེགས་ པ་རྣམས་ནི་ཡི་གེ་འབྲུ་གཅིག་ཀྱང་མ་གསུངས་སོ། །ཇི་ལྟར་འདུལ་བའི་སེམས་ཅན་རྣམས་ཁམས་སོ་སོ་བ་དང༌། མོས་པ་སོ་སོ་བ་རྣམས་དང༌། ཆོས་ཀྱི་གཏམ་དེ་བཞིན་གཤེགས་པ་ལ་ ཉན་ཏོ། །གང་དེ་བཞིན་གཤེགས་པ་དེ་ནི་དེ་བཞིན་ཉིད། གང་དེ་བཞིན་ཉིད་དེ་ནི་ཡང་དག་པའི་མཐའ། ཡང་དག་པའི་མཐའ་དེ་ནི་ཆོས་ཀྱི་དབྱིངས། གང་དེ་བཞིན་ཉིད་དང༌། ཡང་ དག་པའི་མཐའ་དང༌། ཆོས་ཀྱི་དབྱིངས་དེ་ནི་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་སོ། །དེ་ལྟར་ཡོངས་སུ་དག་པའི་དེ་བཞིན་གཤེགས་པ་རྣམས་གང་གི་ཚེ་གཤེགས་ པ་དང༌། མཐོང་བ་དང༌། སྨྲས་པ་ནི། སྔོན་གྱི་སྨོན་ལམ་གྱི་དབང་གིས་བསམ་པ་ཡོངས་སུ་དག་པའི་སེམས་ཅན་རྣམས་ལ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་ཐབ་ མཁས་པ་ཆེན་པོ་བསྟན་ཏོ། །ཡང་རིན་པོ་ཆེའི་མཆོད་རྟེན་དེ་ལས་སྒྲ་འདི་གཉིས་བྱུང་ངོ༌། །བཅོམ་ལྡན་འདས་ཤཱཀྱ་ཐུབ་པ་ཁྱོད་ཀྱིས་དམ་པའི་ཆོས་པདྨ་དཀར་པོ་ཞེས་བྱ་བའི་ ཆོས་ཀྱི་རྣམ་གྲངས་འདི་ལེགས་པར་གསུངས་པ་ལེགས་སོ། །ལེགས་སོ། །བཅོམ་ལྡན་འདས། དེ་དེ་ལྟའོ། །བདེ་བར་གཤེགས་པ། དེ་དེ་ལྟའོ་ཞེས་བྱ་བའི་སྒྲ་འདི་འདྲ་བ་བྱུང་ ངོ༌། །དེ་ནས་འཁོར་བཞི་པོ་དེ་དག་གིས་རིན་པོ་ཆེའི་མཆོད་རྟེན་ཆེན་པོ་ནམ་མཁའ་བར་སྣང་ལ་འདུག་པ་དེ་མཐོང་ནས། དགའ་བ་སྐྱེས་ཤིང་མགུ་བ་དང༌། རངས་པ་དང༌། མཆོག་ ཏུ་དགའ་བར་གྱུར་ཏེ། དེའི་ཚེ་སྟན་ལས་ལངས་ནས་ཐལ་མོ་སྦྱར་ཏེ་འཁོད་དོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོ་ཞེས་བྱ་བས་ལྷ་དང་མི་ དང་ལྷ་མ་ཡིན་དུ་བཅས་པའི་འཇིག་རྟེན་ངོ་མཚར་དུ་འཛིན་པར་གྱུར་པར་རིག་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རིན་པོ་ཆེའི་མཆོད་ རྟེན་ཆེན་པོ་འདི་ལྟ་བུ་འདི་བྱུང་བའི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས། རིན་པོ་ཆེའི་མཆོད་རྟེན་ཆེན་པོ་འདི་ལས་འདི་ལྟ་བུའི་སྒྲ་འབྱིན་པ་སུ་ལགས། དེ་སྐད་ ཅེས་གསོལ་པ་དང༌། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །སྤོབས་པ་ཆེན་པོ། རིན་པོ་ཆེའི་ ༄༅། །མཆོད་རྟེན་ཆེན་པོ་འདིའི་ནང་ན་དེ་བཞིན་གཤེགས་པའི་སྐུ་གཅིག་ཏུ་འདུས་པ་ཞུགས་སོ། །འདི་ནི་དེའི་མཆོད་རྟེན་ཏེ། དེས་སྒྲ་འདི་བྱུང་ངོ༌། ། སྤོབས་པ་ཆེན་པོ་ཤར་ཕྱོགས་སུ་འཇིག་རྟེན་གྱི་ཁམས་སྟོང་ཕྲག་གྲངས་མེད་པ་འདས་པ་ན། འཇིག་རྟེན་གྱི་ཁམས་རིན་པོ་ཆེ་རྣམ་པར་དག་པ་ཞེས་བྱ་བ་ཡོད་དེ། དེར་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་ཞེས་བྱ་བ་བྱུང་སྟེ། བཅོམ་ལྡན་འདས། དེས་སྨོན་ལམ་འདི་སྐད་དུ། ང་སྔོན་བྱང་ཆུབ་སེམས་ དཔའི་སྤྱད་པ་སྤྱོད་པ་ན། ཇི་སྲིད་དུ་ངས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་བྱང་ཆུབ་སེམས་དཔའ་རྣམས་ལ་གདམས་པ་འདི་མ་ཐོས་པ་དེ་སྲིད་དུ་བླ་ན་མེད་པ་ ཡང་དག་པར་རྫོགས་པའི་བྱང་ཆུབ་ལ་ངེས་པར་འབྱུང་བར་མི་བྱའི། གང་གི་ཚེ་ངས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ཐོས་པ་དེའི་འོག་ཏུ་ང་བླ་ན་མེད་པ་ ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་གྲུབ་པར་གྱུར་ཅིག་ཅེས་སྨོན་ལམ་བཏབ་བོ། །སྤོབས་པ་ཆེན་པོ། ཡང་བཅོམ་ལྡན་འདས་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེ་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ། ལྷ་དང་བཅས་པའི་འཇིག་རྟེན་གྱི་མདུན་དུ་འདི་སྐད་ཅེས། དགེ་ སློང་དག །ང་ཡོངས་སུ་མྱ་ངན་ལས་འདས་ནས། དེ་བཞིན་གཤེགས་པའི་ལུས་གཟུགས་ཀྱི་རིན་པོ་ཆེའི་མཆོད་རྟེན་ཆེན་པོ་གཅིག་བྱོས་ཤིག །མཆོད་རྟེན་ལྷག་མ་རྣམས་ནི་ངའི་ཕྱིར་ གྱིས་ཤིག་ཅེས་མོས་པར་བྱས་སོ། །སྤོབས་པ་ཆེན་པོ། ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེས། ངའི་ མཆོད་རྟེན་འདི་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། སངས་རྒྱས་ཀྱི་ཞིང་གང་དང་གང་དུ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་ སྟོན་པ་དེ་དང་དེ་དག་ཏུ་ངའི་ལུས་གཟུགས་ཀྱི་མཆོད་རྟེན་འདི་མངོན་པར་བྱུང་སྟེ། སངས་རྒྱས་བཅོམ་ལྡན་འདས་དེ་དང་དེ་དག་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ འཆད་པ་ན། འཁོར་གྱི་དཀྱིལ་འཁོར་གྱི་སྟེང་གི་ནམ་མཁའ་ལ་འདུག་ནས། སངས་རྒྱས་བཅོམ་ལྡན་འདས་དེ་དང་དེ་དག་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སྟོན་པ་ ལ་ངའི་ལུས་གཟུགས་ཀྱིས་ལེགས་སོ། །ཞེས་བྱ་བ་སྦྱིན་ནོ་ཞེས་དེ་ལྟར་བྱིན་གྱིས་བརླབས་སོ། །སྤོབས་པ་ཆེན་པོ། དེའི་ཕྱིར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་སྐུ་གདུང་གི་མཆོད་རྟེན་འདི། འཇིག་རྟེན་གྱི་ཁམས་མི་མཇེད་འདིར་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ ༄༅། །ངས་བཤད་པ་ན། འཁོར་གྱི་དཀྱིལ་འཁོར་འདིའི་དབུས་ནས་མངོན་པར་བྱུང་སྟེ། སྟེང་གི་ནམ་མཁའ་བར་སྣང་ལ་འདུག་ནས་ལེགས་སོ། །ཞེས་བྱ་བ་ བྱིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་བཅོམ་ལྡན་ འདས་ཀྱི་མཐུས་དེ་བཞིན་གཤེགས་པའི་སྐུ་འདི་བལྟའོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོ་ ལ་འདི་སྐད་ཅེས་བཀའ་སྩལ་ཏོ། །སྤོབས་པ་ཆེན་པོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་ སྨོན་ལམ་ལྕི་བར་གྱུར་ཏོ། །དེའི་སྨོན་ལམ་ནི་འདི་ལྟ་སྟེ། གང་གི་ཚེ་སངས་རྒྱས་ཀྱི་ཞིང་གཞན་དག་ཏུ་སངས་རྒྱས་བཅོམ་ལྡན་འདས་རྣམས་དམ་པའི་ཆོས་པདྨ་དཀར་པོའི་ཆོས་ཀྱི་ རྣམ་གྲངས་འདི་འཆད་པ་དེའི་ཚེ། ངའི་ལུས་གཟུགས་ཀྱི་མཆོད་རྟེན་འདི་དམ་པའི་ཆོས་པདྨ་དཀར་པོ་འདི་མཉན་པའི་ཕྱིར་དེ་བཞིན་གཤེགས་པ་རྣམས་ཀྱི་གན་དུ་འགྲོ་བར་གྱུར་ཅིག ། གང་གི་ཚེ། སངས་རྒྱས་བཅོམ་ལྡན་འདས་དེ་དག་འཁོར་བཞི་ལ་ངའི་ལུས་གཟུགས་ཕྱེ་སྟེ་བསྟན་པར་འདོད་པར་གྱུར་ན། དེ་ནས་དེ་བཞིན་གཤེགས་པ་དེ་དག་གིས་ཕྱོགས་བཅུའི་ སངས་རྒྱས་ཀྱི་ཞིང་སོ་སོ་ན་དེ་བཞིན་གཤེགས་པའི་སྐུ་ལུས་སྤྲུལ་པ་མིང་ཐ་དད་པ་གང་དག་སངས་རྒྱས་ཀྱི་ཞིང་དེ་དང་དེ་དག་ན་ཆོས་སྟོན་པ་དེ་དག་ཐམས་ཅད་གསོག་ལ་དེའི་འོག་ཏུ། དེ་ བཞིན་གཤེགས་པའི་སྐུ་ལུས་སྤྲུལ་པ་དེ་དག་དང་ལྷན་ཅིག་ཏུ་ངའི་ལུས་གཟུགས་ཀྱི་མཆོད་རྟེན་འདི་ཕྱེ་སྟེ། འཁོར་བཞི་ལ་བསྟན་པར་བྱའོ་ཞེས་སྨོན་ལམ་བཏབ་བོ། །སྤོབས་པ་ཆེན་ པོ༑ དེའི་ཕྱིར་ངས་དེ་བཞིན་གཤེགས་པའི་གཟུགས་སྤྲུལ་པ་མང་པོ་གང་དག་ཕྱོགས་བཅུའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་གཞན་དང་གཞན་སྟོང་དག་ན་སེམས་ཅན་རྣམས་ ལ་ཆོས་སྟོན་པ་དེ་དག་ཐམས་ཅད་འདིར་བསྡུ་བར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པོས་འདི་སྐད་ཅེས་གསོལ་ཏོ། །བཅོམ་ ལྡན་འདས། དེ་བཞིན་གཤེགས་པའི་སྐུ། དེ་བཞིན་གཤེགས་པས་སྤྲུལ་པ་དེ་དག་ཐམས་ཅད་ལ་བདག་ཅག་གིས་ཕྱག་བགྱིའོ། །དེ་ནས་དེའི་ཚེ་བཅོམ་ལྡན་འདས་ཀྱི་ཞལ་གྱི་མཛོད་སྤུ་ནས་ འོད་ཟེར་བཏང་སྟེ། འོད་ཟེར་བཏང་མ་ཐག་ཏུ་ཤར་ཕྱོགས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་ལྔ་བཅུའི་བྱེ་མ་སྙེད་དག་ན། སངས་རྒྱས་བཅོམ་ལྡན་འདས་ གང་དག་བཞུགས་པ་དེ་དག་ཐམས་ཅད་སྣང་ངོ༌། །སངས་རྒྱས་ཀྱི་ཞིང་དེ་དག་ནི་ཤེལ་གྱི་གཞི་ལ་རིན་པོ་ཆེའི་ཤིང་ལྗོན་པས་བརྒྱན་པ། རས་བཅོས་བུ་དང་དར་གྱི་ལྡ་ལྡིས་ལེགས་པར་ ༄༅། །བརྒྱན་པ། བྱང་ཆུབ་སེམས་དཔའ་བརྒྱ་སྟོང་མང་པོས་ཡོངས་སུ་གང་བ། བླ་བྲེ་བྲེས་པ། རིན་པོ་ཆེ་སྣ་བདུན་དང་གསེར་གྱི་དྲ་བས་གཡོགས་པར་སྣང་ ངོ༑ ༑དེ་དག་ན་སངས་རྒྱས་བཅོམ་ལྡན་འདས་དེ་དག་དབྱངས་སྙན་ཅིང་འཇམ་པས། སེམས་ཅན་རྣམས་ལ་ཆོས་སྟོན་པར་སྣང་ངོ༌། །སངས་རྒྱས་ཀྱི་ཞིང་དེ་དག་བྱང་ཆུབ་སེམས་དཔའ་ བརྒྱ་སྟོང་གིས་ཡོངས་སུ་གང་བར་སྣང་ངོ༌། །དེ་བཞིན་དུ་ཤར་ལྷོའི་ཕྱོགས་དང༌། དེ་བཞིན་དུ་ལྷོའི་ཕྱོགས་དང༌། དེ་བཞིན་དུ་ལྷོ་ནུབ་ཀྱི་ཕྱོགས་དང༌། དེ་བཞིན་དུ་ནུབ་ཀྱི་ཕྱོགས་དང༌། དེ་བཞིན་དུ་ནུབ་བྱང་གི་ཕྱོགས་དང༌། དེ་བཞིན་དུ་བྱང་གི་ཕྱོགས་དང༌། དེ་བཞིན་དུ་བྱང་ཤར་གྱི་ཕྱོགས་དང༌། དེ་བཞིན་དུ་སྟེང་གི་ཕྱོགས་དང༌། དེ་བཞིན་དུ་འོག་གི་ཕྱོགས་ཏེ། ཕྱོགས་ བཅུ་ཐམས་ཅད་ཀྱི་ཕྱོགས་རེ་རེ་ནའང་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་གངྒཱའི་ཀླུང་གི་བྱེ་མ་སྙེད་དག་ན་སངས་རྒྱས་བཅོམ་ལྡན་འདས་བྱེ་བ་ཁྲག་ཁྲིག་བརྒྱ་སྟོང་ ཕྲག་མང་པོ་གངྒཱའི་ཀླུང་གི་བྱེ་མ་སྙེད་གང་དག་བཞུགས་པ་དེ་དག་ཐམས་ཅད་སྣང་ངོ༌། །དེ་ནས་ཕྱོགས་བཅུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་དེ་དག་གིས་རང་རང་གི་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། རིགས་ཀྱི་བུ་དག །ངེད་ནི་དེ་བཞིན་གཤེགས་པ་རིན་ཆེན་མང་གི་སྐུ་གདུང་གི་མཆོད་རྟེན་ལ་ཕྱག་ བྱ་བའི་ཕྱིར། འཇིག་རྟེན་གྱི་ཁམས་མི་མཇེད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་གན་དུ་འདོང་ངོ༌། །དེ་ནས་ སངས་རྒྱས་བཅོམ་ལྡན་འདས་དེ་དག་བདག་བདག་གི་ཞབས་འབྲིང་བ་དང་ལྷན་ཅིག་ཏུ་བདག་དང་གཉིས་སམ། བདག་དང་གསུམ་འཇིག་རྟེན་གྱི་ཁམས་མི་མཇེད་འདིར་གཤེགས་ སོ༑ ༑འདི་ལྟར་དེའི་ཚེ་ཐམས་ཅད་དང་ལྡན་པའི་འཇིག་རྟེན་གྱི་ཁམས་མི་མཇེད་འདི་རིན་པོ་ཆེའི་ཤིང་ལྗོན་པས་རབ་ཏུ་བརྒྱན་པར་གྱུར་ཏོ། །བཻ་ཌཱུཪྻའི་གཞི་ལ་རིན་པོ་ཆེ་སྣ་བདུན་ དང་གསེར་གྱི་དྲ་བས་བྲེས་པ། རིན་པོ་ཆེ་ཆེན་པོའི་སྤོས་དང་བདུག་པས་བདུགས་པ། མེ་ཏོག་མནྡཱ་ར་བ་དང་མནྡཱ་ར་བ་ཆེན་པོས་ཀུན་ཏུ་བཀྲམ་པ། དྲིལ་བུ་གཡེར་ཀའི་དྲ་བས་ བརྒྱན་པ། གསེར་གྱི་སྐུད་པས་མིག་མང་རིས་བུ་བྲིས་པར་གྱུར་ཏེ། གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་ཀྱང་མེད་ པར་གྱུར། རི་ནག་པོའང་མེད་པར་གྱུར། རི་བཏང་ཟུང་དང༌། བཏང་བཟུང་ཆེན་པོའང་མེད་པར་གྱུར། ཁོར་ཡུག་དང་ཁོར་ཡུག་ཆེན་པོའང་མེད་པར་གྱུར། རིའི་རྒྱལ་པོ་རི་རབ་ཀྱང་ མེད་པར་གྱུར། རི་ཆེན་པོ་དང༌། རི་གཞན་ཡང་མེད་པར་གྱུར། རྒྱ་མཚོ་ཆེན་པོའང་མེད་པར་གྱུར། འབབ་ཆུ་དང་འབབ་ཆུ་ཆེན་པོའང་མེད་པར་ཡོངས་སུ་གནས་པར་གྱུར་ཏོ། །ལྷ་དང་ ༄༅། །མི་དང་ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་ཡང་མེད་པར་གྱུར་ཏོ། །འདི་ ལྟར་དེའི་ཚེ་འཇིག་རྟེན་གྱི་ཁམས་མི་མཇེད་འདིར་འགྲོ་བ་དྲུག་ཏུ་སྐྱེས་པའི་སེམས་ཅན་དེ་དག་ཐམས་ཅད་ཀུན་འཇིག་རྟེན་གྱི་ཁམས་གཞན་དག་ཏུ་བཀོད་པར་གྱུར་ཏོ། །གང་དག་འཁོར་ དེར་འདུས་པ་དེ་དག་ནི་མ་གཏོགས་སོ། །དེ་ནས་སངས་རྒྱས་བཅོམ་ལྡན་འདས་དེ་དག་ཞབས་འབྲིང་བ་དང་གཉིས་སམ་ཞབས་འབྲིང་བ་དང་གསུམ་འཇིག་རྟེན་གྱི་ཁམས་མི་མཇེད་ འདིར་གཤེགས་སོ། །དེ་བཞིན་གཤེགས་པ་གཤེགས་ཤིང་བྱོན་པ་དེ་དག་རིན་པོ་ཆེའི་ཤིང་ལྗོན་པའི་དྲུང་ན་གནས་ཤིང་བཞུགས་ཏེ། རིན་པོ་ཆེའི་ཤིང་ལྗོན་པ་རེ་རེའི་འཕང་ ཡང་དཔག་ཚད་ལྔ་བརྒྱ་བར་གྱུར་ཏེ། ཡལ་ག་དང༌། ལོ་མ་དང༌། འདབ་མ་དང༌། སྦོམས་ནི་རི་བཞིན། མེ་ཏོག་དང་འབྲས་བུས་ནི་རབ་ཏུ་བརྒྱན་པ་སྟེ། རིན་པོ་ཆེའི་ཤིང་ལྗོན་པ་ རེ་རེའི་དྲུང་ནའང་སེང་གེའི་ཁྲི་འཕང་དུ་དཔག་ཚད་བརྒྱ་པ། རིན་པོ་ཆེ་ཆེན་པོས་བརྒྱན་པ་བཤམས་པ་དེ་ལ་དེ་བཞིན་གཤེགས་པ་སྐྱིལ་མོ་ཀྲུང་བཅས་ཏེ་བཞུགས་པར་གྱུར་ ཏོ༑ ༑རྣམ་གྲངས་འདིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ན་རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་ན། དེ་བཞིན་གཤེགས་པ་རྣམས་སྐྱིལ་ མོ་ཀྲུང་བཅས་ཏེ་བཞུགས་པར་གྱུར་ཏོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་དེ་བཞིན་གཤེགས་པས་རབ་ཏུ་གང་བར་གྱུར་ཀྱང་བཅོམ་ལྡན་འདས་ དེ་བཞིན་གཤེགས་པ་ཤཱཀྱ་ཐུབ་པའི་སྐུ་སྤྲུལ་པ་ཕྱོགས་གཅིག་ནས་ཀྱང་ཐམས་ཅད་ཚོགས་པ་ནི་མ་ཡིན་ནོ། །དེ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་ཤཱཀྱ་ཐུབ་པས་དེ་བཞིན་གཤེགས་པའི་སྐུ་གཤེགས་ཤིང་བྱོན་པ་དེ་དག་གི་གོ་མངོན་པར་སྤྲུལ་ཏེ། ཕྱོགས་བཅུ་ཐམས་ཅད་དུ་སངས་རྒྱས་ཀྱི་ཞིང་བྱེ་བ་སྟོང་ ཕྲག་ཉི་ཤུ་ཐམས་ཅད་བཻ་ཌཱུཪྻ་ལས་ནི་བྱས། རིན་པོ་ཆེ་སྣ་བདུན་དང་གསེར་གྱི་དྲ་བ་ནི་བྲེས། དྲིལ་བུ་གཡེར་ཀའི་དྲ་བས་ནི་བརྒྱན། མེ་ཏོག་མནྡཱ་ར་བ་དང་མནྡཱ་ར་བ་ཆེན་པོ་ནི་ཀུན་ ཏུ་བཀྲམ། ལྷའི་བླ་བྲེ་ནི་བྲེས། ལྷའི་མེ་ཏོག་གི་ཕྲེང་བ་ནི་དབྱངས། ལྷའི་སྤོས་དང༌། བདུག་པས་ནི་བདུགས་ཏེ། སངས་རྒྱས་ཀྱི་ཞིང་བྱེ་བ་སྟོང་ཕྲག་ཉི་ཤུ་པོ་དེ་དག་ཐམས་ཅད་ ན་གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་ཀྱང་མེད། རི་ནག་པོའང་མེད། རི་བཏང་ཟུང་དང་བཏང་ཟུང་ཆེ་ན་ པོའང་མེད། རི་ཁོར་ཡུག་དང་ཁོར་ཡུག་ཆེན་པོའང་མེད། རིའི་རྒྱལ་པོ་རི་རབ་ཀྱང་མེད། རི་ཆེན་པོ་དང་རི་གཞན་ཡང་མེད། རྒྱ་མཚོ་ཆེན་པོའང་མེད་པར་གྱུར་ཅིང༌། འབ་ ༄༅། །ཆུ་དང་འབབ་ཆུ་ཆེན་པོའང་མེད་པར་ཡོངས་སུ་བཞག་གོ །ལྷ་དང་མི་དང་ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་ཅན་དམྱལ་བ་དང༌། དུད་ འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་ཡང་མེད་པར་གྱུར་ཏེ། སངས་རྒྱས་ཀྱི་ཞིང་དེ་ཐམས་ཅད་སངས་རྒྱས་ཀྱི་ཞིང་གཅིག་དང་མཚུངས་ཤིང༌། ཕྱོགས་གཅིག་དང་ འདྲ་བར་ཡོངས་སུ་གནས་པར་གྱུར་ཏེ། མཉམ་ཞིང་ཉམས་དགའ་ལ། རིན་པོ་ཆེ་སྣ་བདུན་གྱི་ཤིང་ལྗོན་པ་དག་གིས་བརྒྱན་པར་གྱུར་ཏེ། ཤིང་ལྗོན་པ་དེ་དག་འཕང་དུ་ནི་དཔག་ ཚད་ལྔ་བརྒྱ་པ། སྦོམས་སུ་ནི་རི་བཞིན། ཡལ་ག་དང༌། ལོ་མ་དང༌། མེ་ཏོག་དང༌། འབྲས་བུ་དང་ནི་ལྡན་ནོ། །རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་ན། སེང་གེའི་ཁྲི་ ཁོར་ཡུག་ཏུ་ནི་དཔག་ཚད་ལྔ་བརྒྱ་པ། ལྷའི་རིན་པོ་ཆེ་ལས་བྱས་པ། བཀྲ་བ་བལྟ་ན་སྡུག་པ་བཤམས་པར་གྱུར་ཏེ། དེ་བཞིན་གཤེགས་པ་གཤེགས་ཤིང་བྱོན་པ་རྣམས་ཤིང་ དྲུང་དེ་དག་ན་སེང་གེའི་ཁྲི་དག་ལ་སྐྱིལ་མོ་ཀྲུང་བཅས་ཏེ་བཞུགས་སོ། །རྣམ་གྲངས་འདིས་གཞན་ཡང་ཕྱོགས་རེ་རེར་ཡང་འཇིག་རྟེན་གྱི་ཁམས་བྱེ་བ་སྟོང་ཕྲག་ཉི་ཤུ་དེ་བཞིན་ གཤེགས་པ་ཤཱཀྱ་ཐུབ་པས་ཡོངས་སུ་གང་བར་མཛད་དོ། །དེ་བཞིན་གཤེགས་པ་བྱོན་ཅིང་གཤེགས་པ་དེ་དག་གི་གོ་དབྱེ་བའི་ཕྱིར། གཞན་ཡང་ཕྱོགས་རེ་རེར་ཡང་འཇིག་ རྟེན་གྱི་ཁམས་བྱེ་བ་སྟོང་ཕྲག་ཉི་ཤུར་གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་བོའི་ཕོ་བྲང་འཁོར་ཀྱང་མེད་པར་གྱུར། རི་ནག་པོའང་མེད་པར་གྱུར། རི་བཏང་ཟུང་དང་བཏང་ཟུང་ཆེན་པོའང་མེད་པར་གྱུར། རི་ཁོར་ཡུག་དང་ཁོར་ཡུག་ཆེན་པོའང་མེད་པར་གྱུར། རིའི་རྒྱལ་པོ་རི་རབ་ཀྱང་མེད་པར་གྱུར། རི་ཆེན་པོ་དང་རི་གཞན་ཡང་ མེད་པར་གྱུར། རྒྱ་མཚོ་ཆེན་པོའང་མེད་པར་གྱུར། འབབ་ཆུ་དང་འབབ་ཆུ་ཆེན་པོའང་མེད་པར་ཡོངས་སུ་བཞག་གོ། ལྷ་དང་མི་དང་ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་ ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་ཡང་མེད་པར་གྱུར་ཏེ། སེམས་ཅན་དེ་དག་ཐམས་ཅད་འཇིག་རྟེན་གྱི་ཁམས་གཞན་དག་ཏུ་བཀོད་དོ། ། སངས་རྒྱས་ཀྱི་ཞིང་དེ་དག་ནི་བཻ་ཌཱུཪྻ་ལས་གྲུབ་པ་རིན་པོ་ཆེ་སྣ་བདུན་དང་གསེར་གྱི་དྲ་བས་བྲེས་པ། དྲིལ་བུ་གཡེར་ཀའི་དྲ་བས་བརྒྱན་པ། མེ་ཏོག་མནྡཱ་ར་བ་དང་མནྡཱ་ར་བ་ཆེ་པོས་ ཀུན་ཏུ་བཀྲམ་པ། ལྷའི་བླ་བྲེ་བྲེས་པ། ལྷའི་མེ་ཏོག་གི་ཕྲེང་བ་མངོན་པར་དབྱངས་པ། ལྷའི་སྤོས་དང་བདུག་པས་བདུགས་པ། རིན་པོ་ཆེའི་ཤིང་ལྗོན་པས་མཛེས་པར་བྱས་པ་སྟེ། རིན་པོ་ཆེའི་ཤིང་ལྗོན་པ་དེ་དག་ཐམས་ཅད་ཀྱི་ཚད་ཀྱང་དཔག་ཚད་ལྔ་བརྒྱ་པའོ། །སེང་གེའི་ཁྲི་དཔག་ཚད་ལྔ་བརྒྱ་པ་དེ་དག་ཀྱང་མངོན་པར་སྤྲུལ་ཏེ། རིན་པོ་ཆེའི་ཤིང་ལྗོན་པའི་དྲུང་ ༄༅། །དག་ན། སོ་སོའི་སེང་གེའི་ཁྲི་ལ་དེ་བཞིན་གཤེགས་པ་དེ་དག་སྐྱིལ་མོ་ཀྲུང་བཅས་ཏེ་བཞུགས་སོ། །ཡང་དེའི་ཚེ་བཅོམ་ལྡན་འདས་ཤཱཀྱ་ཐུབ་པས་ སྤྲུལ་པའི་དེ་བཞིན་གཤེགས་པ་གང་དག་ཤར་ཕྱོགས་ན་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་གི་བྱེ་མ་སྙེད་དག་ན་ཆོས་སྟོན་པ་དེ་དག་ཐམས་ཅད་ གཤེགས་སོ། །དེ་བཞིན་དུ་ཕྱོགས་བཅུ་ནས་གཤེགས་ཤིང་བྱོན་པ་དེ་དག་ནི་ཕྱོགས་བརྒྱད་ན་བཞུགས་པར་གྱུར་ཏོ། །དེའི་ཚེ་ཕྱོགས་བརྒྱད་ནས་གཤེགས་པའི་དེ་བཞིན་ གཤེགས་པ་དེ་དག་གི་ཕྱོགས་རེ་རེར་ཡང་འཇིག་རྟེན་གྱི་ཁམས་བྱེ་བ་ཕྲག་སུམ་ཅུ་ཀུན་ཏུ་ནོན་པར་གྱུར་ཏོ། །དེ་ནས་དེ་བཞིན་གཤེགས་པ་དེ་དག་རང་རང་གི་སེང་གེའི་ཁྲི་ ལ་བཞུགས་ནས་རང་རང་གི་ཞབས་འབྲིང་བ་དག་བཅོམ་ལྡན་འདས་ཤཱཀྱ་ཐུབ་པའི་ཐད་དུ་བཀྱེ་སྟེ། །རིན་པོ་ཆེའི་མེ་ཏོག་གི་ཕུར་མ་བསྐུར་ནས་འདི་སྐད་ཅེས་བཀའ་སྩལ་ ཏོ༑ ༑རིགས་ཀྱི་བུ་དག །ཁྱེད་རྒྱལ་པོའི་ཁབ་ཀྱི་བྱ་རྒོད་ཀྱི་ཕུང་པོའི་རི་ལ་སོང་སྟེ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་ཕྱག་ཚོལ་ལ། ངའི་ཚིག་གིས་བྱང་ཆུབ་སེམས་དཔའི་ཚོགས་དང༌། ཉན་ཐོས་ཀྱི་ཚོགས་དང་བཅས་པ་ལ་གནོད་པ་ཉུང་ངམ། སྙུན་ཉུང་ངམ། སྟོབས་དང་ལྡན་ནམ། བདེ་བར་རེག་པ་ལ་གནས་སམ་ཞེས་དྲིས་ལ། རིན་པོ་ཆེའི་ཕུང་པོ་འདིས་གཏོར་ཏེ་འདི་སྐད་ཅེས། བཅོམ་ལྡན་འདས་ཀྱིས་དེ་བཞིན་ གཤེགས་པའི་རིན་པོ་ཆེའི་མཆོད་རྟེན་ཆེན་པོ་འདི་དབྱེ་བར་དད་པ་དབུལ་ལོ་ཞེས་གསོལ་ཅིང༌། དེ་ལྟར་དེ་བཞིན་གཤེགས་པ་དེ་དག་ཐམས་ཅད་ཀྱིས་རང་རང་གི་ཞབས་འབྲིང་ བ་བཀྱེའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་དེའི་དུས་ན། བདག་གིས་སྤྲུལ་པ་མ་ལུས་པར་ཚོགས་པར་མཁྱེན། སོ་སོར་སེང་གེའི་ཁྲི་དག་ ལ་བཞུགས་པར་མཁྱེན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་ཞབས་འབྲིང་བ་ལྷགས་པར་མཁྱེན་ཏེ། དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་དད་པ་ཕུལ་བར་མཁྱེན་ནས། དེའི་ཚེ་རང་གི་ཆོས་ཀྱི་གདན་ལས་བཞེངས་ཏེ་ནམ་མཁའ་ བར་སྣང་ལ་བཞུགས་སོ། །འཁོར་བཞི་པོ་དེ་དག་ཐམས་ཅད་ཀྱང་སྟན་ལས་ལངས་ནས། ཐལ་མོ་སྦྱར་ཏེ་བཅོམ་ལྡན་འདས་ལ་ལྟ་ཞིང་འཁོད་དོ། །དེ་ནས་བཅོམ་ལྡན་འདས་ ཀྱིས་རིན་པོ་ཆེའི་མཆོད་རྟེན་ཆེན་པོ་ནམ་མཁའ་ལ་འདུག་པ་དེ་ཕྱག་གཡས་པའི་སོར་མོས་དབུས་ནས་ཕྱེའོ། །ཕྱེ་ནས་ལོགས་གཉིས་སོ་སོར་གདངས་སོ། །འདི་ལྟ་སྟེ། དཔེར་ ༄༅། །ན༑ གྲོང་ཁྱེར་ཆེན་པོའི་སྒོ་འཕར་ཆེན་པོ་བཅད་པའི་གཏན་པ་ཕྱུང་ནས་སོ་སོར་དབྱེ་བ་དེ་བཞིན་དུ། བཅོམ་ལྡན་འདས་ཀྱིས་རིན་པོ་ཆེའི་མཆོད་ རྟེན་ཆེན་པོ་དེ་ཕྱག་གཡས་པའི་སོར་མོས་དབུས་ནས་ཕྱེ་སྟེ་ས་ལེར་མཛད་དོ། །དེ་བཞིན་གཤེགས་པའི་རིན་པོ་ཆེའི་མཆོད་རྟེན་ཆེན་པོ་དེ་ཕྱེ་མ་ཐག་ཏུ་དེ་ནས་བཅོམ་ལྡན་ འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་སེང་གེའི་ཁྲི་ལ་བཞུགས་ཏེ། སྐྱིལ་མོ་ཀྲུང་བཅས་ནས་སྐུ་ཀུན་བསྐམས་ ཤིང་སྐུ་མ་གཡོས་པར། ཇི་ལྟར་ཏིང་ངེ་འཛིན་ལ་སྙོམས་པར་ཞུགས་པ་དེ་བཞིན་དུ་སྣང་སྟེ། འདི་སྐད་ཅེས་བཅོམ་ལྡན་འདས་ཤཱཀྱ་ཐུབ་པ་ཁྱོད་ཀྱིས་དམ་པའི་ཆོས་པདྨ་ དཀར་པོའི་ཆོས་ཀྱི་རྣམ་གྲངས་འདི་ལེགས་པར་བཤད་པ་ལེགས་སོ། །ལེགས་སོ། །བཅོམ་ལྡན་འདས་ཤཱཀྱ་ཐུབ་པ་ཁྱོད་ཀྱིས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་ གྲངས་འདི་བཤད་པ་ཡང་ལེགས་སོ། །བཅོམ་ལྡན་འདས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ཉན་པའི་ཕྱིར་ཁོ་བོ་འདིར་འོངས་སོ་ཞེས་གསུང་ངོ༌། །དེ་ནས་ འཁོར་བཞི་པོ་དེ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་ པོ་ནས། ཡོངས་སུ་མྱ་ངན་ལས་འདས་པ་དེ་སྐད་གསུང་བ་ཐོས་ནས་ངོ་མཚར་དང་རྨད་དུ་གྱུར་ཏེ། དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་རིན་ཆེན་མང་དང༌། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལྷ་དང་མིའི་རིན་པོ་ཆེའི་ ཕུང་པོས་མངོན་པར་གཏོར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གིས། བཅོམ་ལྡན་འདས་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སེང་གེའི་ཁྲི་དེ་ཕྱེད་བདར་ཏེ་རིན་པོ་ཆེའི་མཆོད་རྟེན་ཆེན་པོ་དེའི་ནང་ནས། བཅོམ་ལྡན་ འདས་དེ་བཞིན་གཤེགས་པ་ཤཱཀྱ་ཐུབ་པ་འདིར་བཞུགས་ཞེས་དེ་སྐད་གསུང་ངོ༌། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་གདན་དེའི་ཕྱེད་ལ་བཞུགས་སོ། །དེ་ བཞིན་གཤེགས་པ་དེ་དང་ལྷན་ཅིག་ཏུ་དེ་བཞིན་གཤེགས་པ་གཉིས་ཀ་རིན་པོ་ཆེའི་མཆོད་རྟེན་ཆེན་པོ་དེའི་དབུས་ན་སེང་གེའི་ཁྲི་ལ་བཞུགས་ནས་ནམ་མཁའ་བར་སྣང་བ་ལ་གནས་པར་ སྣང་ངོ༌། །དེ་ནས་འཁོར་བཞི་པོ་དེ་དག་འདི་སྙམ་དུ་བདག་ཅག་དེ་བཞིན་གཤེགས་པ་འདི་དག་དང་ཐག་རིང་ན་བདག་ཅག་ཀྱང་དེ་བཞིན་གཤེགས་པའི་མཐུས་ནམ་མཁའ་ལ་འཕགས་ ༄༅། །པར་བྱའོ་སྙམ་དུ་སེམས་སོ། །དེ་ནས་བཅོམ་ལྡན་འདས་ཀྱིས་འཁོར་བཞི་པོ་དེ་དག་གི་སེམས་ཀྱི་རྟོག་པ་ཐུགས་ཀྱིས་ཐུགས་སུ་ཆུད་ནས། དེའི་དུས་ན་ རྫུ་འཕྲུལ་གྱི་སྟོབས་ཀྱིས་འཁོར་བཞི་པོ་དེ་དག་ནམ་མཁའ་བར་སྣང་ལ་བཀོད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་དེའི་ཚེ་འཁོར་བཞི་པོ་དེ་ དག་ལ་བཀའ་སྩལ་པ། དགེ་སློང་དག། ཁྱེད་ཀྱི་ནང་ན་འཇིག་རྟེན་གྱི་ཁམས་མི་མཇེད་འདིར་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ཡང་དག་པར་འཆད་ པར་སྤྲོ་བ་སུ་ཡོད། དེ་བཞིན་གཤེགས་པ་མངོན་སུམ་དུ་བཞུགས་ཏེ། དེའི་དུས་འདིའོ། །དེའི་ཚེ་འདིའོ། །དགེ་སློང་དག །དེ་བཞིན་གཤེགས་པ་དམ་པའི་ཆོས་པདྨ་ དཀར་པོའི་ཆོས་ཀྱི་རྣམ་གྲངས་འདི་བཞག་སྟེ་ཡོངས་སུ་མྱ་ངན་ལས་འདའ་བར་འདོད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ།། དགེ་སློང་གང་དག་འདྲེན་པ་དྲང་སྲོང་ཆེ། །མྱ་ངན་འདས་འདི་རིན་ཆེན་མཆོད་རྟེན་འདིར། །བཞུགས་ནས་ཆོས་འདི་གསན་ཅིང་གཤེགས་མཛད་ན། །ཆོས་ཀྱི་ཆེད་དུ་བརྩོན་ འགྲུས་སུ་མི་སྐྱེད། །མྱ་ངན་ཡོངས་འདས་བསྐལ་པ་བྱེ་བ་མང༌། །འོན་ཀྱང་ད་དུང་དེ་ནི་ཆོས་གསན་ཏེ། །ཆོས་ཀྱི་ཆེད་དུ་དེ་དང་དེར་ཡང་གཤེགས། །འདི་འདྲའི་ཆོས་འདི་ཤིན་ ཏུ་རྙེད་པར་དཀའ། །རྣམ་པར་འདྲེན་པ་འདི་ཡི་སྨོན་ལམ་ནི། །སྲིད་པ་སྔ་མ་དག་ལ་བསྙེན་གྱུར་པས། །མྱ་ངན་འདས་ཀྱང་འཇིག་རྟེན་འདི་ཀུན་ན། །ཕྱོགས་བཅུ་ཐམས་ཅད་དུ་ཡང་ ཡོངས་སུ་རྒྱུ། །བྱེ་བ་སྟོང་ཕྲག་གངྒཱའི་བྱེ་མ་སྙེད། །འདི་དག་ཐམས་ཅད་ང་ཡི་ལུས་ཡིན་ཏེ། །མགོན་པོ་མྱ་ངན་འདས་པ་འདི་ལྟ་དང༌། །ཆོས་ཀྱི་བྱ་བ་བྱ་ཕྱིར་དེ་དག་ལྷགས། །ཅི་ནས་ ཆོས་ཚུལ་ཡུན་རིང་གནས་འགྱུར་བར། །ཐམས་ཅད་དམ་པའི་ཆོས་འདི་བསྲུང་བའི་ཕྱིར། །ཉན་ཐོས་དེ་བཞིན་མི་དང་ལྷ་ཀུན་དང༌། །སོ་སོ་རང་རང་གི་ནི་ཞིང་བོར་ཏེ། །སངས་ རྒྱས་འདི་དག་བཞུགས་པར་བྱ་བའི་ཕྱིར། །ངས་ནི་རྫུ་འཕྲུལ་སྟོབས་ཀྱིས་འདི་ལྟ་བུར། །འཇིག་རྟེན་ཁམས་མང་སྟོང་ཕྲག་བྱེ་བ་ནས། །སེམས་ཅན་ཐམས་ཅད་སྤོས་ཤིང་ཡོངས་དག་ བྱས༑ ༑ཆོས་ཀྱི་ཚུལ་འདི་ཇི་ལྟར་བསྟན་བྱ་ཞེས། །དེ་ལྟ་བུར་ནི་ང་ཡང་ཤིན་ཏུ་བརྩོན། །ཤིང་དབང་དྲུང་ན་སངས་རྒྱས་ཚང་མེད་པ། །ཇི་ལྟར་པདྨའི་ཕུང་པོ་བཞིན་དུ་བཞུགས། ། བྱེ་བ་ཕྲག་ནི་མི་ཉུང་ཤིང་དྲུང་ན། །སེང་གེའི་ཁྲི་ལ་འདྲེན་པ་བཞུགས་པ་ནི། །རབ་ཏུ་མཛེས་པར་རྟག་ཏུ་དེར་བཞུགས་ཏེ། །མུན་ནག་ཆེན་པོའི་ནང་ན་མེ་བཞིན་ནོ། །འཇིག་རྟེན་ རྣམ་འདྲེན་རྣམས་ཀྱི་ཡིད་འོང་དྲི། །ཕྱོགས་བཅུ་རྣམས་སུ་རབ་ཏུ་ལྡང་བ་དེ། །སེམས་ཅན་འདི་དག་ཀུན་དང་འདྲེས་པར་གྱུར། །རླུང་རྣམས་འདིར་ནི་རྟག་པར་ལངས་པ་བཞིན། །ང་ནི་ ༄༅། །མྱ་ངན་འདས་ནས་གང༌། །ཆོས་ཀྱི་རྣམ་གྲངས་འདི་འཛིན་པ། །འཇིག་རྟེན་མགོན་པོའི་སྤྱན་སྔ་འདིར། །ཚིག་ནི་མྱུར་དུ་སྨྲ་བར་གྱིས། །སངས་རྒྱས་མྱ་ངན་ ཡོངས་འདས་པ། །ཐུབ་པ་རིན་ཆེན་མང་པོ་ཡང༌། །འདི་ལ་སྤྲོ་བ་སུ་བྱེད་པ། །དེ་ཡི་སེང་གེའི་སྒྲ་གསན་ཏོ། །གཉིས་པ་ང་དང་འདྲེན་པ་བྱེ་བ་ཕྲག །མང་པོ་གང་དག་ལྷགས་པ་འདི་དག་ ཀྱང༑ ༑གང་རྣམས་ཆོས་འདི་བཤད་པར་སྤྲོ་བ་ཡི། །རྒྱལ་བའི་སྲས་ཀྱི་བརྩོན་པ་ཉན་པར་བྱེད། །འདི་ལྟ་བུ་ཡི་ཆོས་འདི་མཉན་པའི་ཕྱིར། །ཕྱོགས་དང་ཕྱོགས་མཚམས་རྟག་ཏུ་སུ་ འགྲོ་བ། །དེས་ནི་ང་དང་རིན་ཆེན་མང་བ་ཡི། །རྒྱལ་བ་རང་བྱུང་རྟག་ཏུ་མཆོད་པ་ཡིན། །མདོ་སྡེ་རབ་ཏུ་བསྟན་པས་འཇིག་རྟེན་མགོན། །གང་འདི་ལྷགས་པར་གྱུར་ཅིང་གང་དག་གིས།། ས་འདི་བཀྲ་མཛེས་བྱས་པ་དེ་ཀུན་ལ། །མཆོད་པ་རྒྱ་ཆེ་མི་ཆུང་བྱས་པར་འགྱུར། །མཆོད་རྟེན་ནང་བཞུགས་བཅོམ་ལྡན་འདས་འདི་དང༌། །ང་ཡང་སྟན་གྱི་སྟེང་ན་འདུག་པ་དང༌། །ཞིང་ བརྒྱ་དུ་མ་དག་ནས་གང་ལྷགས་པ། །འཇིག་རྟེན་མགོན་གཞན་མང་པོ་འདི་མཐོང་བ། །སེམས་ཅན་ཀུན་ལ་སྙིང་བརྩེའི་ཕྱིར། །རིགས་ཀྱི་བུ་དག་ཁྱེད་ཅག་སོམས། །ཤིན་ཏུ་བྱ་ དཀའ་གནས་འདི་ལ། །རྣམ་པར་འདྲེན་པས་སྤྲོ་བར་མཛད། །མདོ་སྡེ་སྟོང་ཕྲག་མང་པོ་དག །གངྒཱའི་བྱེ་མ་ཇི་བཞིན་པ། །དེ་དག་གང་ཞིག་སྟོན་བྱེད་པ། །དེ་ནི་དཀའ་བ་མ་ ཡིན་ནོ། །གང་གི་ལག་གིས་རི་རབ་རི། །ཆང་པར་བླངས་པར་བྱས་ནས་སུ། །ཞིང་རྣམས་བྱེ་བར་འཕེན་བྱེད་པ། །དེ་ནི་དཀའ་བ་མ་ཡིན་ནོ། །གང་གིས་སྟོང་གསུམ་འདི་དག་ཀྱང༌། །རྐང་ པའི་མཐེ་བོས་བསྐྱོད་ནས་སུ། །ཞིང་རྣམས་བྱེ་བར་འཕེན་པར་ཡང༌། །དེ་ནི་དཀའ་བ་མ་ཡིན་ནོ། །མི་གང་སྲིད་པའི་རྩེར་གནས་ནས། །མདོ་སྡེ་གཞན་དག་སྟོང་རྣམས་ཀྱི། །ཆོས་འདི་རབ་ ཏུ་འཆད་པ་ཡང༌། །དེ་ནི་དཀའ་བ་མ་ཡིན་ནོ། །འཇིག་རྟེན་དབང་པོ་མྱ་ངན་འདས། །ཕྱི་དུས་ཤིན་ཏུ་མི་བཟད་ལ། །གང་ཞིག་མདོ་སྡེ་འདི་འཛིན་ཏམ། །འཆད་པ་དེ་ནི་ཤིན་ཏུ་དཀའ། ། གང་ཞིག་ནམ་མཁའི་ཁམས་ཀུན་ཡང༌། །ཆད་པ་གཅིག་གི་ནང་བཅུག་ཅིང༌། །རབ་ཏུ་བཙུག་སྟེ་འགྲོ་བ་ནི། །དེ་ནི་དཀའ་བ་མ་ཡིན་ནོ། །ང་ནི་མྱ་ངན་འདའ་བའི་ཚེ། །གང་ཞིག་མདོ་སྡེ་ འདི་འདྲ་བ། །ཕྱི་དུས་ཡི་གེ་འདྲིར་འཇུག་པ། །དེ་ནི་ཤིན་ཏུ་དཀའ་བ་ཡིན། །གང་ཞིག་ས་ཡི་ཁམས་རྣམས་ཀུན། །སེན་མོའི་རྩེ་མོར་འཇུག་བྱེད་ལ། །རབ་ཏུ་བཅུག་ནས་འགྲོ་བྱེད་ ཅིང༑ ༑ཚངས་པའི་འཇིག་རྟེན་འཛེག་བྱེད་པ། །འཇིག་རྟེན་ཀུན་གྱི་མདུན་དུ་འདིར། །དེ་ལྟར་དཀའ་བ་བྱས་པ་ཡང༌། །དེས་ནི་དཀའ་བ་བྱས་མ་ཡིན། །བརྩོན་འགྲུས་དག་ཀྱང་དེ་ཙམ་ མེད༑ ༑ང་ནི་མྱ་ངན་འདས་པའི་ཚེ། །ཕྱི་མའི་དུས་ན་མདོ་སྡེ་འདི། །སུ་ཞིག་སྨྲ་བར་བྱེད་པ་དེ། །དེ་བས་ཤིན་ཏུ་དཀར་བར་བྱེད། །བསྐལ་པས་བསྲེག་པར་མི་གང་ཞིག །རྩྭ་ཡི་ ༄༅། །ཁུར་བུ་ཐོགས་ནས་སུ། །ཚིག་བཞིན་དུ་ནི་དབུས་འགྲོ་བ། །འཇིག་རྟེན་ན་ནི་དེ་མི་དཀའ། །ང་ནི་མྱ་ངན་འདས་པའི་ཚེ། །གང་གིས་མདོ་འདི་བཟུང་ ནས་ཀྱང༌། །སེམས་ཅན་གཅིག་ལའང་ཐོས་བྱེད་པ། །དེ་བས་ཤིན་ཏུ་དཀའ་བ་ཡིན། །ཆོས་ཀྱི་ཕུང་པོ་སྟོང་ཕྲག་ནི། །བརྒྱད་ཅུ་རྩ་བཞིན་འཛིན་བྱེད་ཅིང༌། །ལུང་བཅས་ཇི་སྐད་ གསུངས་པ་བཞིན། །སྲོག་ཆགས་བྱེ་བ་རྣམས་ལ་འཆད། །དེ་ཚེ་གང་ཞིག་དགེ་སློང་རྣམས། །འདུལ་བྱེད་ང་ཡི་ཉན་ཐོས་རྣམས། །མངོན་པར་ཤེས་ལ་བཀོད་པ་ཡང༌། །དེ་ ནི[?] དཀའ་བ་མ་ཡིན་ནོ། །གང་ཞིག་མདོ་འདི་འཛིན་པའམ། །དད་དམ་མོས་པར་བྱེད་པའམ། །ཡང་དང་ཡང་དུ་འཆད་བྱེད་པ། །འདི་ནི་དེ་བས་ཤིན་ཏུ་དཀའ། །སྟོང་ཕྲག་བྱེ་བ་ མང་པོ་རྣམས། །གངྒཱའི་བྱེ་མ་ཇི་བཞིན་པ། །མངོན་ཤེས་དྲུག་ལྡན་སྐལ་ཆེན་དང༌། །དགྲ་བཅོམ་ཉིད་ལ་དགོད་པ་པས། །ང་ནི་མྱ་ངན་འདས་འོག་ཏུ། །གང་ཞིག་མདོ་མཆོག་ འདི་འཛིན་པ། །མི་མཆོག་དེ་ནི་དེ་བས་ཀྱང༌། །ཤིན་ཏུ་ལས་མང་བྱེད་པ་ཡིན། །སངས་རྒྱས་ཡེ་ཤེས་ཆེད་ཀྱི་ཕྱིར། །འཇིག་རྟེན་ཁམས་ནི་སྟོང་རྣམས་སུ། །ང་ཡིས་ཤིན་ཏུ་ ཆོས་མང་བཤད། །ད་དུང་དུ་ཡང་ང་འཆད་དོ། །འདི་ནི་མདོ་སྡེ་ཐམས་ཅད་བས[?]། །མདོ་སྡེ་དམ་པ་མཆོག་ཅེས་བྱ། །མདོ་སྡེ་འདི་ནི་སུ་འཛིན་པ། །དེ་ནི་རྒྱལ་བའི་སྐུ་འཛིན་ ཏོ༑ ༑རིགས་ཀྱི་བུ་དག་ཕྱི་དུས་ན། །ཁྱེད་ཅག་རྣམས་ལས་གང་སུ་ཞིག །མདོ་སྡེ་འཛིན་པར་སྤྲོ་བ་ཁྱེད། །དེ་བཞིན་གཤེགས་པའི་སྤྱན་སྔར་སྨྲོས། །ཤིན་ཏུ་གཟུང་དཀའ་མདོ་འདི་ ནི༑ ༑གང་ཞིག་ཡུད་ཙམ་འཛིན་པ་ཡང༌། །འཇིག་རྟེན་མགོན་ལ་རྣམ་ཀུན་ཏུ། །དཀའ་བ་ཆེན་པོ་བྱས་པར་གྱུར། །འཇིག་རྟེན་མགོན་གྱིས་ཐམས་ཅད་དུ། །དེ་ནི་ཤིན་ཏུ་བསྔགས་ པ་ཡིན། །ཤིན་ཏུ་དཔའ་ཞིང་ནུས་པ་སྟེ། །བྱང་ཆུབ་ཏུ་ནི་མངོན་ཤེས་མྱུར། །མདོ་སྡེ་འདི་ནི་སུ་འཛིན་པ། །གཅེས་པ་ཁྱེར་བ་དེ་ཡིན་ཏེ། །འཇིག་རྟེན་མགོན་གྱི་ཐུགས་ཀྱི་སྲས། ། དུལ་བའི་ས་ཡང་རྗེས་སུ་ཐོབ། །མི་གཙོ་མྱ་ངན་འདས་པ་ན། །མདོ་སྡེ་འདི་ནི་རབ་སྟོན་པ། །ལྷ་དང་མིར་བཅས་འཇིག་རྟེན་ན། །དེ་ནི་མིག་ཏུ་གྱུར་པ་ཡིན། །གང་ཞིག་ཕྱི་མའི་ དུས་ཀྱི་ཚེ། །མདོ་སྡེ་འདི་ནི་ཡུད་ཙམ་ཞིག །འཆད་པར་བྱེད་པ་མཁས་པ་དེ། །སེམས་ཅན་ཀུན་གྱིས་ཕྱག་བྱའི་འོས། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཚོགས་ མ་ལུས་པ་དང༌། ལྷ་དང་ལྷ་མ་ཡིན་དུ་བཅས་པའི་འཇིག་རྟེན་ལ་བོས་ཏེ། འདི་སྐད་ཅེས་བཀའ་སྩལ་ཏོ། །དགེ་སློང་དག །སྔོན་བྱུང་བ་འདས་པའི་དུས་ན། །བསྐལ་པ་ཚད་མེད་གྲངས་ མེད་པར་ངས་དམ་པའི་ཆོས་པདྨ་དཀར་པོའི་མདོ་ཡོངས་སུ་བཙལ་ཏེ། སྐྱོ་མ་མྱོང་ལ་ངལ་བ་མེད་པར་གྱུར་ཏོ། །སྔོན[?] བསྐལ་པ་དུ་མ་ལ་བསྐལ་པ་བརྒྱ་སྟོང་ཕྲག་དུ་མར། །ང་རྒྱལ་པོར་གྱུར་ཏེ། ༄༅། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་ནས་ངའི་སེམས་ལྡོག་པར་མ་གྱུར་ཏོ། །ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ པར་བྱ་བའི་ཕྱིར་བརྩོན་པར་གྱུར་ནས། སྦྱིན་པ་ཚད་མེད་པ་རབ་ཏུ་བྱིན་ཏེ། གསེར་དང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱུ་རུ་དང༌། ས་ལེ་སྦྲམ་ དང༑ དངུལ་དང༌། རྡོའི་སྙིང་པོ་དང༌། སྤུག་དང༌། མུ་ཏིག་དམར་པོ་དང༌། གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་ དང༑ ཆུང་མ་དང༌། བུ་ཕོ་དང༌། བུ་མོ་དང༌། བྲན་ཕོ་དང༌། བྲན་མོ་དང༌། གླང་པོ་ཆེ་དང༌། རྟ་དང༌། ཤིང་རྟ་དང༌། བདག་གི་ལུས་ཀྱི་བར་དུ་ཡོངས་སུ་བཏང་སྟེ། ལག་པ་དང༌། རྐང་པ་དང༌། མགོ་དང༌། ཡན་ལག་དང༌། ཉིང་ལག་ཐམས་ཅད་དང༌། སྲོག་སྦྱིན་པ་པོར་གྱུར་ནས་ང་ནམ་དུའང་ཀུན་འཛིན་པའི་སེམས་མ་སྐྱེས་སོ། །དེའི་ཚེ་འཇིག་རྟེན་འདི་ ཚེ་རིང་པོར་གྱུར་ཏེ། ལོ་བརྒྱ་སྟོང་དུ་མར་འཚོའོ། །དེའི་ཚེ་ངས་ཆོས་ཀྱི་ཕྱིར་ཆོས་ཀྱི་རྒྱལ་པོ་བྱས་ཀྱི། ཡུལ་འཁོར་གྱི་ཕྱིར་ནི་མ་ཡིན་ཏེ། བུ་ཐུ་བོ་དབང་བསྐུར་ནས་ང་ཕྱོགས་ བཞིར་ཆོས་ཀྱི་མཆོག་འཚོལ་བ་ལ་བརྩོན་པར་གྱུར་ཏོ། །ངས་དྲིལ་བུ་བརྡུངས་ཏེ་འདི་སྐད་ཅེས། ང་ལ་སུས་ཆོས་ཀྱི་མཆོག་རབ་ཏུ་བྱིན་པ་དང༌། དོན་རྣམ་པར་བཤད་པ་དེའི་བྲན་ ངས་བྱའོ་ཞེས་གྲགས་པར་བྱས་སོ། །དེ་ནས་དེའི་ཚེ་དྲང་སྲོང་ཞིག་ཡོད་པ་དེ་ལ་འདི་སྐད་ཅེས། རྒྱལ་པོ་ཆེན་པོ། དམ་པའི་ཆོས་པདྨ་དཀར་པོ་ཞེས་བྱ་བའི་མདོ་མཆོག་གི་ཆོས་བསྟན་ པ་ཡོད་དེ། བྲན་དུ་ཁས་ལེན་ན་ཆོས་དེ་ཁོ་བོས་ཁྱོད་ཀྱིས་ཐོས་པར་བྱའོ་ཞེས་ཟེར་བ་དང༌། ངས་དྲང་སྲོང་དེའི་ཚིག་ཐོས་ནས་དགའ་མགུ་རངས། ཡིད་རབ་ཏུ་དགའ་སྟེ། དྲང་ སྲོང་དེ་ག་ལ་བ་དེར་བསྙེན་ནས་འདི་སྐད་ཅེས། བྲན་གྱི་ལས་ཅི་བྱེད་པ་དེ་བྱའོ་ཞེས་སྨྲས་ཏེ། དེ་ལྟར་ང་དྲང་སྲོང་དེའི་བྲན་དུ་ཁས་བླངས་ནས་རྩྭ་དང༌། ཤིང་དང༌། ཆུ་དང༌། རྩ་བ་ དང༑ རྡོག་གུ་དང༌། འབྲས་བུ་ལ་སོགས་པ་ལེན་པའི་ལས་བྱས་ཏེ། ངས་སྒོ་བསྲུང་བ་ཡན་ཆད་བྱས་སོ། །ཉིན་པར་རྣམ་པ་དེ་ལྟ་བུའི་ལས་བྱས་ནས་མཚན་མོ་མལ་ཁྲིའི་རྐང་པའང་ བཟུང་ངོ༌། །འོན་ཀྱང་ངའི་ལུས་ངལ་བར་གྱུར་པའང་མེད། སེམས་ངལ་བར་གྱུར་པའང་མེད་དེ། ལས་དེ་ལྟར་བྱས་པས་ལོ་སྟོང་ཚང་བར་འདས་སོ། །དེ་ནས་བཅོམ་ལྡན་ འདས་ཀྱིས། དེའི་ཚེ་དོན་འདི་ཡོངས་སུ་བསྟན་པའི་ཕྱིར་ཚིགས་སུ་བཅད་པ་འདི་དག་བཀའ་སྩལ་ཏོ། །བསྐལ་པ་འདས་པ་ཡང་དག་རྗེས་དྲན་ཏེ། །ངས་སྔོན་ཆོས་ཕྱིར་ཆོས་ རྒྱལ་གྱུར་པ་ན། །ཆོས་ཀྱི་ཕྱིར་ནི་ང་ཡིས་རྒྱལ་པོ་བྱས། །འདོད་ཕྱིར་མ་ཡིན་ཆོས་མཆོག་དོན་དུའོ། །གང་ཞིག་ཆོས་སྨྲ་དེ་ཡི་བྲན་བྱ་ཞེས། །ངས་ནི་ཕྱོགས་བཞིར་དེ་སྐད་བསྒྲགས་ ༄༅། །པར་བྱས། །དེ་ཡི་ཚེ་ན་དྲང་སྲོང་མཁས་ཡོད་པ། །དམ་པ་ཆོས་ཤེས་བྱ་བ་མདོ་སྡེ་སྨྲ། །དེ་ནི་ང་ལ་གལ་ཏེ་ཆོས་འདོད་ན། །བྲན་དུ་ཁས་ལོང་དེ་ནས་ ཆོས་བཤད་ཟེར། །ཚིག་དེ་ཐོས་ནས་ང་ནི་རབ་ཏུ་དགའ། །དེ་ན་བྲན་གྱིས་བྱ་བའི་ལས་དེ་བྱས། །དམ་པའི་ཆོས་ཕྱིར་བྲན་ནི་བྱེད་པ་ན། །ལུས་དང་སེམས་ལ་ངལ་བས་མ་རེག་གོ །དེ་ ཚེ་ང་ནི་སེམས་ཅན་ཕྱིར་སྨོན་གྱི། །བདག་གི་ཕྱིར་མིན་འདོད་ཕྱིར་མ་ཡིན་ཏེ། །ལས་གཞན་མེད་པར་ཕྱོགས་བཅུ་རྣམས་སུ་རྒྱུ། །བསྐལ་པ་སྟོང་དུ་རྫོགས་པར་མི་སྐྱོ་བར། །ཆོས་ ཤེས་བྱ་བ་མདོ་སྡེ་སྙེད་ཀྱི་བར། །རྒྱལ་པོ་དེས་ནི་དེ་སྙེད་བརྩོན་འགྲུས་བརྩམས། །དགེ་སློང་དག །འདི་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོར་གྱུར་པ་གཞན་ཞིག་ ཡིན་སྙམ་དུ་འཛིན་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེའི་ཚེ་དེའི་དུས་ན་རྒྱལ་པོར་གྱུར་པ་དེ་ནི་ང་ཡིན་ནོ། །དགེ་སློང་དག །དེའི་ཚེ་དེའི་དུས་ན་དྲང་སྲོང་དུ་གྱུར་པ་དེ་ གཞན་ཡིན་སྙམ་དུ་འཛིན་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དགེ་སློང་དག །ལྷས་བྱིན་འདི་དེའི་ཚེ་དེའི་དུས་ན་དྲང་སྲོང་དུ་གྱུར་ཏེ། དགེ་སློང་དག །ལྷས་བྱིན་ཡང་ ངའི་དགེ་བའི་བཤེས་གཉེན་ནོ། །ལྷས་བྱིན་ལ་བརྟེན་ཏེ་ངས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་སོ། །བྱམས་པ་ཆེན་པོ་དང༌། སྙིང་རྗེ་ཆེན་པོ་དང༌། དགའ་བ་ཆེན་པོ་དང༌། བཏང་སྙོམས་ཆེན་པོ་དང༌། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུ་དང༌། འོད་འདོམ་གང་བ་དང༌། མདོག་གསེར་གྱི་ཁ་དོག་དང༌། སྟོབས་ བཅུ་དང༌། མི་འཇིགས་པ་བཞི་དང༌། བསྡུ་བའི་དངོས་པོ་བཞི་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང༌། རྫུ་འཕྲུལ་གྱི་སྟོབས་ཆེན་པོ་དང༌། ཕྱོགས་བཅུའི་སེམས་ ཅན་བསྒྲལ་བ་དེ་ཐམས་ཅད་ཀྱང་ལྷས་བྱིན་ལ་བརྟེན་ཏེ་རྫོགས་པར་བྱས་སོ། །དགེ་སློང་དག །ཁྱོད་མོས་པར་བྱའོ། །ཁོང་དུ་ཆུད་པར་བྱའོ། །དགེ་སློང་དག །ལྷས་བྱིན་འདི་མ་འོངས་ པའི་དུས་བསྐལ་པ་ཚད་མེད་གྲངས་མེད་པ་ན། འཇིག་རྟེན་གྱི་ཁམས་ལྷའི་ཐེམ་སྐས་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷའི་ རྒྱལ་པོ་ཞེས་བྱ་བར་འགྱུར་རོ། །དགེ་སློང་དག །དེ་བཞིན་གཤེགས་པ་ལྷའི་རྒྱལ་པོ་དེའི་ཚེའི་ཚད་ནི་བར་གྱི་བསྐལ་པ་ཉི་ཤུར་འགྱུར་རོ། །ཆོས་ཀྱང་རྒྱས་པར་སྟོན་པར་འགྱུར་ རོ༑ ༑སེམས་ཅན་གངྒཱའི་ཀླུང་གི་བྱེ་མ་སྙེད་དག་ནི་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །སེམས་ཅན་དུ་མ་ནི་རང་བྱང་ཆུབ་ཏུ་ སེམས་བསྐྱེད་པར་འགྱུར་རོ། །སེམས་ཅན་གངྒཱའི་ཀླུང་གི་བྱེ་མ་སྙེད་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་ཞིང་ཕྱིར་མི་ལྡོག་པའི་བཟོད་ ༄༅། །པའང་ཐོབ་པར་འགྱུར་རོ། །དགེ་སློང་དག །དེ་བཞིན་གཤེགས་པ་ལྷའི་རྒྱལ་པོ་ཡོངས་སུ་མྱ་ངན་ལས་འདས་ནས། དམ་པའི་ཆོས་བར་གྱི་བསྐལ་པ་ཉི་ ཤུར་གནས་སོ། །དེའི་སྐུ་གདུང་གི་རིང་བསྲེལ་ནི་འགྱེས་པར་མི་འགྱུར་ཞིང་དེའི་སྐུ་གདུང་གཅིག་ཏུ་འདུས་པར་འགྱུར་ཏེ། རིན་པོ་ཆེ་སྣ་བདུན་གྱི་མཆོད་རྟེན་དུ་བཅུག་ནས། མཆོད་ རྟེན་དེའང་འཕང་དུ་ནི་དཔག་ཚད་དྲུག་ཅུ། རྒྱར་ནི་དཔག་ཚད་བཞི་བཅུ་པར་འགྱུར་རོ། །དེ་ལ་མི་དང་ལྷ་ཐམས་ཅད་ཀྱིས་སྤོས་དང༌། བདུག་པ་དང༌། མེ་ཏོག་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། གོས་དང༌། གདུགས་དང༌། རྒྱལ་མཚན་དང༌། ལྷའི་བ་དན་ལ་སོགས་པས་མཆོད་པར་བྱེད་པར་འགྱུར་རོ། །ཚིགས་སུ་བཅད་པའི་དབྱངས་ཀྱིས་བསྟོད་ པར་འགྱུར་རོ། །གང་དག་མཆོད་རྟེན་དེ་ལ་སྐོར་བར་བྱེད་པའམ་འདུད་པ་དེ་དག་ཀྱང་ལ་ལ་ནི་འབྲས་བུའི་མཆོག་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །ལ་ལ་ ནི་རང་བྱང་ཆུབ་ཐོབ་པར་འགྱུར་རོ། །ལྷ་དང་མི་བསམ་གྱིས་མི་ཁྱབ་དཔག་ཏུ་མེད་པ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་ པར་འགྱུར་རོ། །དེ་ནས་ཡང་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག །མ་འོངས་པའི་དུས་ན་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ དམ་པའི་ཆོས་པདྨ་དཀར་པོའི་མདོའི་ལེའུ་འདི་ཉན་པ་དང༌། ཐོས་ནས་སོམ་ཉི་མི་ཟ་བ་དང༌། རྣམ་པར་དག་པའི་སེམས་ཀྱིས་མོས་པ་དེ་དག་གིས་ངན་འགྲོ་གསུམ་གྱི་སྒོ་བཅད་པར་ འགྱུར་ཏེ། སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དུ་སྐྱེ་བར་མི་འགྱུར་རོ། །ཕྱོགས་བཅུའི་སངས་རྒྱས་ཀྱི་ཞིང་དུ་སྐྱེས་ནའང་ཚེ་རབས་ཚེ་རབས་ སུ་མདོ་སྡེ་འདི་ཐོས་པར་འགྱུར་རོ། །ལྷ་དང་མིའི་འཇིག་རྟེན་དུ་སྐྱེས་ནའང་དེས་གནས་ཁྱད་པར་ཅན་ཐོབ་པར་འགྱུར་རོ། །སངས་རྒྱས་ཀྱི་ཞིང་གང་དུ་སྐྱེ་བ་དེར་ཡང་དེ་བཞིན་གཤེགས་ པའི་སྤྱན་སྔར་རིན་པོ་ཆེ་སྣ་བདུན་གྱི་པདྨའི་ནང་ནས་བརྫུས་ཏེ་སྐྱེ་བར་འགྱུར་རོ། །དེ་ནས་དེའི་ཚེ་འོག་གི་ཕྱོགས་ནས་དེ་བཞིན་གཤེགས་གཤེགས་པ་རིན་ཆེན་མང་གི་སངས་རྒྱས་ཀྱི་ཞིང་ནས། བྱང་ཆུབ་ སེམས་དཔའ་སེམས་དཔའ་ཆེན་པོ་ཤེས་རབ་བརྩེགས་ཞེས་བྱ་བ་འོངས་པ་དེས། དེ་བཞིན་གཤེགས་པ་རིན་ཆེན་མང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཉིད་ཀྱི་སངས་ རྒྱས་ཀྱི་ཞིང་དུ་གཤེགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་རབ་བརྩེགས་ལ་འདི་སྐད་ཅེས་བཀའ་སྩལ་ཏོ། །རིགས་ ཀྱི་བུ། ཡུད་ཙམ་ཞིག་སྡོད་ཅིག །ངའི་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང་ཆོས་རྣམ་པར་གཏན་ལ་དབབ་པ་འགའ་ཞིག་གྱིས་ལ། ཕྱིས་ ༄༅། །བདག་གི་སངས་རྒྱས་ཀྱི་ཞིང་དུ་སོང་ཞིག །དེ་ནས་དེའི་ཚེ་འཇམ་དཔལ་གཞོན་ནུར་གྱུར་པ་པདྨ་འདབ་མ་སྟོང་ཡོད་པ། ཚད་ཤིང་རྟའི་འཕང་ལོ་ ཙམ་ལ་འདུག་སྟེ། བྱང་ཆུབ་སེམས་དཔའ་དུ་མས་ཡོངས་སུ་བསྐོར་ནས། རྒྱ་མཚོའི་ནང་ནས་ཀླུའི་རྒྱལ་པོ་རྒྱ་མཚོའི་ཁང་པ་ནས་སྟེང་གི་ནམ་མཁའ་ལ་འཕགས་ཏེ། ནམ་མཁའ་ ལས་བྱ་རྒོད་ཀྱི་ཕུང་པོའི་རི་ལ་བཅོམ་ལྡན་འདས་ཀྱི་གན་དུ་སོང་ངོ༌། །དེ་ནས་འཇམ་དཔལ་གཞོན་ནུར་གྱུར་པ་པདྨ་ལས་བབས་ཏེ། བཅོམ་ལྡན་འདས་ཤཱཀྱ་ཐུབ་པ་དང༌། དེ་བཞིན་གཤེགས་པ་རིན་ཆེན་མང་གི་ཞབས་ལ་མགོ་བོས་ཕྱག་འཚལ་ནས། བྱང་ཆུབ་སེམས་དཔའ་ཤེས་རབ་བརྩེགས་ག་ལ་བ་དེར་སོང་སྟེ། ཕྱིན་ནས་བྱང་ཆུབ་སེམས་ དཔའ་ཤེས་རབ་བརྩེགས་དང་མངོན་སུམ་དུ་ཀུན་དགའ་ཞིང་ཡང་དག་པར་མགུ་བའི་གཏམ་རྣམ་པ་མང་པོ་བྱས་ཏེ་ཕྱོགས་གཅིག་ཏུ་འདུག་གོ །དེ་ནས་བྱང་ཆུབ་སེམས་ དཔའ་ཤེས་རབ་བརྩེགས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་རྒྱ་མཚོར་ཞུགས་ཏེ། སེམས་ཅན་གྱི་ཁམས་ཇི་སྙེད་ཅིག་ བཏུལ༑ འཇམ་དཔལ་གྱིས་སྨྲས་པ། ཇི་ཙམ་དུ་ཚིག་གིས་བརྗོད་མི་ནུས་ཤིང་སེམས་ཀྱིས་བསམ་མི་ནུས་པ་དེ་སྙེད་དུ་ཚད་མེད་གྲངས་མེད་པའི་སེམས་ཅན་དུ་མ་དག་བཏུལ་ལོ། ། རིགས་ཀྱི་བུ། སྐད་ཅིག་སྡོད་ཅིག་དང་སྔ་ལྟས་ཀྱི་བར་དུ་མཐོང་བར་འགྱུར་རོ། །འཇམ་དཔལ་གཞོན་ནུར་གྱུར་པས་དེ་སྐད་ཅེས་སྨྲས་མ་ཐག་ཏུ་དེའི་ཚེ་པདྨ་སྟོང་ཕྲག་དུ་མ་རྒྱ་མཚོའི་ནང་ ནས་སྟེང་གི་ནམ་མཁའ་ལ་བྱུང་སྟེ། པདྨ་དེ་དག་ལ་བྱང་ཆུབ་སེམས་དཔའ་སྟོང་ཕྲག་དུ་མ་འཁོད་དོ། །དེ་ནས་བྱང་ཆུབ་དཔའ་དེ་དག་ནམ་མཁའ་ལས་བྱ་རྒོད་ཀྱི་ཕུང་པོའི་རི་ག་ལ་བ་དེར་ ལྷགས་ཏེ། སྟེང་གི་ནམ་མཁའ་ལ་འཁོད་པར་སྣང་ངོ༌། །དེ་དག་ཐམས་ཅད་ཀྱང་འཇམ་དཔལ་གཞོན་ནུར་གྱུར་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཏུལ་བ་ཤ་ སྟག་གོ །དེ་ནས་བྱང་ཆུབ་སེམས་དཔའ་གང་དག་སྔོན་ཐེག་པ་ཆེན་པོ་ལ་ཡང་དག་པར་ཞུགས་པར་གྱུར་པ་དེ་དག་ནི་ཐེག་པ་ཆེན་པོའི་ཡོན་ཏན་དང་ཕ་རོལ་ཏུ་ཕྱིན་པ་དྲུག་པོ་དག་ གི་བསྔགས་པ་བརྗོད་དོ། །གང་དག་སྔོན་ཉན་ཐོས་བྱེད་བྱེད་པའི་བྱང་ཆུབ་སེམས་དཔའ་དེ་དག་ནི་ཉན་ཐོས་ཀྱི་ཐེག་པ་ཉིད་རྗོད་དེ། དེ་དག་ཐམས་ཅད་ཀྱང་ཆོས་ཐམས་ཅད་སྟོང་པ་ ཉིད་དང༌། ཐེག་པ་ཆེན་པོའི་ཡོན་ཏན་ཡང་ཡང་དག་པར་ཤེས་པ་ཤ་སྟག་གོ །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ཤེས་རབ་བརྩེགས་ལ་འདི་སྐད་ ཅེས་སྨྲས་སོ། །རིགས་ཀྱི་བུ། འདི་དག་ཐམས་ཅད་ནི་ཁོ་བོས་རྒྱ་མཚོར་ཞུགས་ནས། སེམས་དུལ་བར་བྱས་པ་ཡིན་ཏེ། དེ་དག་ཀྱང་འདི་ན་སྣང་ངོ༌། །དེ་ནས་བྱང་ཆུབ་སེམས་དཔའ་ ༄༅། །ཤེས་རབ་བརྩེགས་ཀྱིས་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་པའི་དབྱངས་ཀྱིས་ཡོངས་སུ་དྲིས་པ། བཟང་པོ་ཆེན་པོ་ཤེས་རབ་དཔེར་ བརྗོད་པ། །ཁྱོད་ཀྱིས་སེམས་ཅན་གྲངས་མེད་དེང་བཏུལ་བ། །མི་ཡི་ལྷ་ཁྱོད་ལ་ནི་དེ་འདྲི་ཡི། །འདི་ནི་སུ་ཡི་མཐུ་ལགས་དེ་གསུངས་ཤིག །བྱང་ཆུབ་ལམ་བསྟན་པ་ཡི་མདོ་གང་ དང༌། །ཆོས་ནི་གང་ཞིག་ཁྱོད་ཀྱིས་རབ་བསྟན་ན། །དེ་ཐོས་འདི་དག་བྱང་ཆུབ་སེམས་སྐྱེས་ཤིང༌། །ཐམས་ཅད་མཁྱེན་ཉིད་ངེས་ཏེ་གཏིང་ཡང་རྙེད། །འཇམ་དཔལ་གྱིས་སྨྲས་ པ། རྒྱ་མཚོའི་ནང་དུ་དམ་པའི་ཆོས་པདྨ་དཀར་པོའི་མདོ་བཤད་དེ། །གཞན་མ་ཡིན་ནོ། །ཤེས་རབ་བརྩེགས་ཀྱིས་སྨྲས་པ། མདོ་འདི་ཟབ་ཅིང་ཕྲ་ལ་མཐོང་བར་དཀའ་སྟེ། མདོ་ སྡེ་འདི་དང་མཚུངས་པའི་མདོ་སྡེ་གཞན་གང་ཡང་མེད་ན། སེམས་ཅན་གང་ལ་ལ་མདོ་སྡེ་དཀོན་མཆོག་འདི་ཁོང་དུ་ཆུད་པའམ། བླ་ན་མེད་པ་ཡང་དག་པར་རྫོགས་པའི་བྱང་ ཆུབ་མངོན་པར་རྫོགས་པར་འཚང་རྒྱ་བར་ནུས་པ་ཡོད་དམ། འཇམ་དཔལ་གྱིས་སྨྲས་པ། རིགས་ཀྱི་བུ། ཡོད་དེ། ཀླུའི་རྒྱལ་པོ་རྒྱ་མཚོའི་བུ་མོ་སྐྱེས་ནས་ལོ་བརྒྱད་ འཁོར་བ་[?] ཤེས་རབ་ཆེ་བ། དབང་པོ་རྣོ་བ། ཡེ་ཤེས་སྔོན་དུ་འགྲོ་བའི་ལུས་དང་ངག་དང་ཡིད་ཀྱི་ལས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་བཤད་པའི་ཚིག་ འབྲུ་དང་དོན་འཛིན་པའི་གཟུངས་ཐོབ་པ་ཆོས་ཐམས་ཅད་དང་སེམས་ཅན་ཐམས་ཅད་ལ་མཉམ་པར་གཞག་པའི་ཏིང་ངེ་འཛིན་སྟོང་སྐད་ཅིག་གཅིག་གིས་ཐོབ་པ། བྱང་ཆུབ་ཀྱི་ སེམས་ལས་ཕྱིར་མི་ལྡོག་པ། སྨོན་ལམ་རྒྱ་ཆེ་བ་སེམས་ཅན། ཐམས་ཅད་ལ་བདག་དང་འདྲ་བར་ཕངས་པར་སེམས་པ་དང་ལྡན་པ། ཡོན་ཏན་བསྐྱེད་པར་ནུས་ཤིང་དེ་དག་ལས་ཡོངས་ སུ་མི་ཉམས་པ། བཞིན་འཛུམ་པ་ཁ་དོག་རྒྱས་པ་མཆོག་དང༌། ལྡན་པ། བྱམས་པའི་སེམས་དང་ལྡན་པ་སྙིང་རྗེའི་ཚིག་སྨྲ་བ་དེ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་ པར་འཚང་རྒྱ་བར་ནུས་སོ། །ཤེས་རབ་བརྩེགས་ཀྱིས་སྨྲས་པ། ཁོ་བོས་མཐོང་བ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་བྱང་ཆུབ་ཀྱི་ཕྱིར་འབད་ཅིང་བྱང་ཆུབ་སེམས་ དཔར་གྱུར་པ་ན་བསོད་ནམས་དུ་མ་མཛད་དོ། བསྐལ་པ་སྟོང་ཕྲག །དུ་མར་ནམ་ཡང་བརྩོན་འགྲུས་མ་ཉམས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་ཐ་ན་ཡུངས་ ཀར་ཙམ་གྱི་ཕྱོགས་གང་དུའང་སེམས་ཅན་གྱི་ཕྱིར་སྐུ་མ་བོར་བ་ཅུང་ཟད་ཀྱང་མེད་དེ། ཕྱིས་བྱང་ཆུབ་མངོན་པར་རྫོགས་པར་སངས་རྒྱས་ནས། དེས་ཡུད་ཙམ་གྱིས་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནུས་ཞེས་བྱ་བ་དེ་ལ་སུ་ཞིག་ཡིད་ཆེས། དེ་ནས་དེའི་ཚེ་ཀླུའི་རྒྱལ་པོ་རྒྱ་མཚོའི་བུ་མོ་མདུན་ན་འདུག་པར་སྣང་སྟེ། དེས་ ༄༅། །བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས། ཕྱོགས་གཅིག་ཏུ་འདུག་ནས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བསོད་ནམས་ བསོད་ནམས་ཤིན་ཏུ་ཟབ། །ཕྱོགས་རྣམས་ཀུན་ཏུ་ཁྱབ་པ་ལགས། །སུམ་ཅུ་རྩ་གཉིས་མཚན་རྣམས་ཀྱིས། །ཕྲ་བའི་སྐུ་ནི་ལེགས་པར་བརྒྱན། །དཔེ་བྱད་བཟང་པོ་རྣམས་དང་ལྡན། ། སེམས་ཅན་ཀུན་གྱིས་ཕྱག་ཀྱང་བགྱིས། །སེམས་ཅན་ཐམས་ཅད་འདུ་བ་ནི། །དཔེར་ན་གྲོང་བར་འདྲ་བ་ལགས། །བདག་ནི་འདོད་བཞིན་བྱང་ཆུབ་སྟེ། །དེ་བཞིན་གཤེགས་པ་བདག་གི་ དབང༌། །སྡུག་བསྔལ་རྣམས་ལས་གྲོལ་བའི་ཆོས། །རྒྱ་ཆེར་རབ་ཏུ་བསྟན་པར་བགྱི། །དེ་ནས་དེའི་ཚེ་ཚེ་དང་ལྡན་པ་ཤཱ་རིའི་བུས། ཀླུའི་རྒྱལ་པོ་རྒྱ་མཚོའི་བུ་མོ་ལ་འདི་སྐད་ཅེས་སྨྲས་སོ། །ཆེ་ ཞེ་ཁྱོད་ཕྱིར་མི་ལྡོག་པར་བྱང་ཆུབ་ཏུ་སེམས་སྐྱེས་ཤིང་ཤེས་རབ་དཔག་ཏུ་མེད་པ་ཡོད་དུ་ཟད་དེ། ཡང་དག་པར་རྫོགས་པའི་སངས་རྒྱས་ཉིད་ནི་རྙེད་པར་དཀའོ། །ཆེ་ཞེ་བུད་མེད་ བརྩོན་འགྲུས་མི་འདོར་ཞིང་བསྐལ་པ་སྟོང་ཕྲག་དུ་མར་བསོད་ནམས་དག་བྱེད་ལ། ཕ་རོལ་ཏུ་ཕྱིན་པ་དྲུག་པོ་དག་ཡོངས་སུ་རྫོགས་པར་བྱེད་ཀྱང་ད་དུང་སངས་རྒྱས་ཉིད་མི་ཐོབ་པ་ ཡོད་དེ། དེ་ཅིའི་ཕྱིར་ཞེ་ན། བུད་མེད་ཀྱིས་ད་དུང་གནས་ལྔ་མ་ཐོབ་པའི་ཕྱིར་ཏེ། ལྔ་གང་ཞེ་ན། དང་པོ་ཚངས་པའི་གནས་དང༌། གཉིས་པ་བརྒྱ་བྱིན་གྱི་གནས་དང༌། གསུམ་པ་ རྒྱལ་ཆེན་བཞིའི་གནས་དང༌། བཞི་པ་འཁོར་ལོས་བསྒྱུར་བའི་གནས་དང༌། ལྔ་པ་ཕྱིར་མི་ལྡོག་པའི་བྱང་ཆུབ་སེམས་དཔའི་གནས་སོ། །དེ་ནས་དེའི་ཚེ་ཀླུའི་རྒྱལ་པོ་རྒྱ་མཚོའི་བུ་མོ་ལ་སྟོང་གསུམ་ གྱི་སྟོང་ཆེན་པོ་འཇིག་རྟེན་གྱི་ཁམས་མ་ལུས་པའི་རིན་དུ་ཆོག་པའི་ནོར་བུ་གཅིག་ཡོད་པ་དེ། ཀླུའི་རྒྱལ་པོའི་བུ་མོ་དེས་བཅོམ་ལྡན་འདས་ལ་ཕུལ་ནས། བཅོམ་ལྡན་འདས་ཀྱིས་ཀྱང་ཐུགས་ བརྩེ་བའི་ཕྱིར་དེ་བཞེས་སོ། །དེ་ནས་ཀླུའི་རྒྱལ་པོ་རྒྱ་མཚོའི་བུ་མོས། །བྱང་ཆུབ་སེམས་དཔའ་ཤེས་རབ་བརྩེགས་དང༌། གནས་བརྟན་ཤཱ་རིའི་བུ་ལ་འདི་སྐད་ཅེས་སྨྲས་སོ། །གང་བདག་གིས་ བཅོམ་ལྡན་འདས་ལ་ནོར་བུ་ཕུལ་བ་དེ། བཅོམ་ལྡན་འདས་ཀྱིས་མྱུར་དུ་བཞེས་སམ། འོན་ཏེ་མ་བཞེས། གནས་བརྟན་གྱིས་སྨྲས་པ། ཁྱོད་ཀྱིས་ཀྱང་མྱུར་དུ་ཕུལ་ལོ། །བཅོམ་ལྡན་འདས་ ཀྱིས་ཀྱང་མྱུར་དུ་བཞེས་སོ། །ཀླུའི་རྒྱལ་པོ་རྒྱ་མཚོའི་བུ་མོས་སྨྲས་པ། བཙུན་པ་ཤཱ་རིའི་བུ། གལ་ཏེ་བདག་གི་རྫུ་འཕྲུལ་ཆེ་བར་གྱུར་ན། དེ་བས་ཀྱང་ཆེས་མྱུར་དུ་ཡང་དག་པར་རྫོགས་པའི་བྱང་ ཆུབ་མངོན་པར་རྫོགས་པར་འཚང་རྒྱ་སྟེ། ནོར་བུ་འདི་བཞེས་པ་ནི་དེ་ལྟ་མ་ཡིན་ནོ། །དེ་ནས་དེའི་ཚེ་འཇིག་རྟེན་ཐམས་ཅད་དང༌། གནས་བརྟན་ཤཱ་རིའི་བུའི་མངོན་སུམ་དུ་ཀླུའི་རྒྱལ་པོ་རྒྱ་ མཚོའི་བུ་མོའི་བུད་མེད་ཀྱི་དབང་པོ་མི་སྣང་བར་གྱུར་ཏེ་སྐྱེས་པའི་དབང་པོ་བྱུང་ནས། བདག་ཉིད་བྱང་ཆུབ་སེམས་དཔར་འགྱུར་བར་ཡང་དག་པར་བསྟན་ཏེ་དེའི་ཚེ་ལྷོ་ཕྱོགས་སུ་སོང་ངོ༌། །དེ་ ༄༅། །ནས་ལྷོ་ཕྱོགས་སུ་འཇིག་རྟེན་གྱི་ཁམས་དྲི་མ་མེད་ཅེས་བྱ་བ་དང༌། རིན་པོ་ཆེ་སྣ་བདུན་གྱི་ཤིང་དྲུང་དུ་འདུག་ནས་བདག་ཉིད་མངོན་པར་རྫོགས་པར་སངས་རྒྱས་པར་ཀུན་ཏུ་བསྟན་ ཏེ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་ཐམས་ཅད་དང་ལྡན་པའི་གཟུགས་ཀྱི་ལུས་ཀྱི་འོད་ཀྱི་ཕྱོགས་བཅུར་ཁྱབ་པར་བྱས་ཏེ་ཆོས་སྟོན་པར་བྱེད་དོ། ། གང་དག་འཇིག་རྟེན་གྱི་ཁམས་མི་མཇེད་ན་འཁོད་པའི་སེམས་ཅན་དེ་དག་ཐམས་ཅད་ཀྱིས་ཀྱང༌། དེ་བཞིན་གཤེགས་པ་དེ་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་ མ་ཡིན་དང༌། ནམ་མཁའ་ལྡིང་དང་མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་དེ་དག་ཐམས་ཅད་ཀྱིས་ཕྱག་བྱས་ཤིང་དེ་དག་ལ་ཆོས་སྟོན་པར་མཛད་པར་མཐོང་ ངོ༌། །སེམས་ཅན་གང་དག་དེ་བཞིན་གཤེགས་པ་དེས་ཆོས་བསྟན་པ་ཉན་པ་དེ་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ།། འཇིག་རྟེན་གྱི་ཁམས་དྲི་མ་མེད་པ་དེ་དག་དང༌། འཇིག་རྟེན་གྱི་ཁམས་མི་མཇེད་འདིའང་རྣམ་པ་དྲུག་ཏུ་གཡོས་སོ། །བཅོམ་ལྡན་འདས་ཤཱཀྱ་ཐུབ་པའི་འཁོར་གྱི་དཀྱིལ་འཁོར་ལས་ ཀྱང་སྲོག་ཆགས་སུམ་སྟོང་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སྲོག་ཆགས་སུམ་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་ གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་བརྩེགས་དང༌། གནས་བརྟན་ཤཱ་རིའི་བུ་ཅང་མི་སྨྲ་བར་གྱུར་ཏོ། །དམ་པའི་ཆོས་པདྨ་དཀར་པོ་ལས། མཆོད་རྟེན་ བསྟན་པའི་ལེའུ་ཞེས་བྱ་སྟེ་བཅུ་གཅིག་པའོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་དང༌། བྱང་ཆུབ་སེམས་དཔའ་སེམས་དཔའ་ ཆེན་པོ་སྤོབས་པ་ཆེན་པོའི་གཡོག་བྱང་ཆུབ་སེམས་དཔའ་ཉིས་འབུམ་དང་ལྷན་ཅིག་བཅོམ་ལྡན་འདས་ཀྱི་སྤྱན་སྔར་ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས། དོན་འདི་ལ་ ཐུགས་ལས་ཆུང་ངུར་མཛད་དུ་གསོལ། བཅོམ་ལྡན་འདས། བདག་ཅག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་སེམས་ཅན་རྣམས་ ལ་བསྟན་པར་བགྱིའོ། །ཡང་དག་པར་བསྟན་པར་བགྱིའོ། །བཅོམ་ལྡན་འདས། འདི་ལྟར་ཡང་དེའི་ཚེ། སེམས་ཅན་དམུ་རྒོད་དགེ་བའི་རྩ་བ་ཆུང་བ་ལྷག་པའི་ང་རྒྱལ་ཅན། རྙེད་ པ་དང་བཀུར་སྟིལ་གནས་པ། མི་དགེ་བའི་རྩ་བ་ལ་ཞུགས་པ། འདུལ་དཀའ་བ། མོས་པ་དང་བྲལ་བ། མ་མོས་པ་མང་པ་དག་འབྱུང་ལགས་མོད་ཀྱི། བཅོམ་ལྡན་འདས། བདག་ ཅག་གིས་བཟོད་པའི་སྟོབས་བསྟན་ཏེ། དེའི་དུས་ན་མདོ་འདི་བསྟན་པར་བགྱི། གཟུང་བར་བགྱི། བཤད་པར་བགྱི། ཡི་གེར་འདྲི་བར་བགྱི། བསྟི་སྟང་དུ་བགྱི། རིམ་གྲོ་བགྱི། མཆོད་ ༄༅། །པར་བགྱིའོ། །བཅོམ་ལྡན་འདས། བདག་ཅག་གིས་ལུས་དང་སྲོག་ཀྱང་བོར་ཏེ། མདོ་འདི་བཤད་པར་བགྱི་ཡི། བཅོམ་ལྡན་འདས། ཐུགས་ལས་ ཆུང་ངུར་མཛད་དུ་གསོལ། དེ་ནས་འཁོར་དེའི་དགེ་སློང་སློབ་པ་དང༌། མི་སློབ་པ་དང༌། དགེ་སློང་ལྔ་བརྒྱ་ཙམ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ ལྡན་འདས། བདག་ཅག་ཀྱང་འཇིག་རྟེན་གྱི་ཁམས་གཞན་དག་ཏུ་ཆོས་ཀྱི་རྣམས་གྲངས་འདི་རབ་ཏུ་བསྟན་པར་སྤྲོ་ལགས་སོ། །དེ་ནས་བཅོམ་ལྡན་འདས་ཀྱི་ཉན་ཐོས་སློབ་པ་དང༌། མི་སློབ་པ་ཇི་སྙེད་པོ་དེ་དག་དང༌། གང་དག་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དགེ་སློང་བརྒྱད་སྟོང་པོ་དེ་དག་ཐམས་ཅད་ཀྱིས་ བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཐུགས་ལས་ཆུང་ངུར་མཛད་དུ་གསོལ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་སླད་མའི་ཚེ་སླད་མའི་དུས་ན་བདག་ཅག་གིས་ཀྱང་ཆོས་ཀྱི་རྣམ་གྲངས་འདི་འཇིག་རྟེན་གྱི་ཁམས་གཞན་དག་ཏུ་བཤད་ པར་བགྱིའོ། །དེ་ཅིའི་སྲད་དུ་ཞེ་ན། བཅོམ་ལྡན་འདས། འཇིག་རྟེན་གྱི་ཁམས་མི་མཇེད་འདིའི་སེམས་ཅན་དག་ནི་ལྷག་བའི་ང་རྒྱལ་ཅན་དགེ་བའི་རྩ་བ་ཆུང་བ། རྟག་ཏུ་གནོད་ སེམས་ཀྱི་སེམས་དང་ལྡན་པ། གཡོན་ཅན་ཡོན་པེའི་རང་བཞིན་ཅན་ལགས་པའི་སླད་དུའོ། །དེ་ནས་བཅོམ་ལྡན་འདས་ཀྱིས་སྲུ་སྐྱེ་དགུའི་བདག་མོ་ཆེན་མོ་གཽ་ཏ་མཱི་དགེ་སློང་མ་སློབ་ པ་དང༌། མི་སློབ་པ་དགེ་སློང་མ་དྲུག་སྟོང་དང་ལྷན་ཅིག་ཏུ་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ལྟ་ཞིང་ འཁོད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་བཀའ་སྩལ་པ། གཽ་ཏ་མཱི་ཁྱོད་བདག་ནི་དེ་བཞིན་གཤེགས་པས་ཡོངས་སུ་མ་བརྗོད་དེ།། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་སྙམ་དུ་ཡིད་མི་བདེ་བར་དེ་བཞིན་གཤེགས་པ་ལ་ལྟ་ཞིང་མ་འདུག་ཅིག །གཽ་ཏ་མཱི། འདི་ལྟར་འཁོར་ཐམས་ཅད་ ལུང་བསྟན་པས་ཁྱོད་ཀྱང་ལུང་བསྟན་ཟིན་ནོ། །གཽ་ཏ་མཱི་ཁྱོད་འདི་ནས་བཟུང་སྟེ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་སུམ་ཅུ་རྩ་བརྒྱད་ཀྱི་ཐད་ན། བྱང་ཆུབ་སེམས་དཔའ་སེམས་ དཔའ་ཆེན་པོ་ཆོས་སྨྲ་བར་འགྱུར་རོ། །སློབ་པ་དང་མི་སློབ་པའི་དགེ་སློང་མ་དྲུག་སྟོང་འདི་དག་དང་ཁྱོད་ལྷན་ཅིག་ཏུ་དེ་བཞིན་གཤེགས་པ་དེ་དག་གི་ཐད་ནས་བྱང་ཆུབ་སེམས་དཔའ་ཆོས་ སྨྲ་བར་འགྱུར་རོ། །དེའི་ཕ་རོལ་གྱིའང་ཆེས་ཕ་རོལ་ནས་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ ༄༅། །པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ ཀྱི་སྟོན་པ་སངས་རྒྱས་བཅོམ་ལྡན་འདས་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་འཇིག་རྟེན་དུ་འབྱུང་བར་འགྱུར་ཏེ། གཽ་ཏ་མཱི། དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། བྱང་ཆུབ་སེམས་དཔའ་དྲུག་སྟོང་པོ་དེ་དག་གཅིག་ནས་གཅིག་ཏུ་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཏུ་ལུང་སྟོན་པས་ལུང་སྟོན་པར་འགྱུར་རོ། །དེ་ནས་སྒྲ་གཅན་ཟིན་གྱི་མ་དགེ་སློང་མ་གྲགས་འཛིན་འདི་སྙམ་དུ། བཅོམ་ལྡན་འདས་ཀྱིས་བདག་གི་མིང་ མ་སྨོས་སོ་སྙམ་དུ་སེམས་སོ། །དེ་ནས་བཅོམ་ལྡན་འདས་ཀྱིས་དགེ་སློང་མ་གྲགས་འཛིན་གྱི་སེམས་ཀྱི་རྟོག་པ་ཐུགས་ཀྱིས་ཐུགས་སུ་ཆུད་ནས། དགེ་སློང་མ་གྲགས་འཛིན་ལ་འདི་ སྐད་ཅེས་བཀའ་སྩལ་ཏོ། །གྲགས་འཛིན་ཁྱོད་མོས་པར་བྱའོ། །ཁོང་དུ་ཆུད་པར་བྱའོ། །ཁྱོད་ཀྱང་སངས་རྒྱས་བྱེ་བ་སྟོང་ཕྲག་བཅུའི་ཐད་ན་བྱང་ཆུབ་སེམས་དཔའ་ཆོས་སྨྲ་བར་ འགྱུར་རོ། །བྱང་ཆུབ་སེམས་དཔའི་སྤྱོད་པ་རིམ་གྱིས་ཡོངས་སུ་རྫོགས་པར་བྱས་ནས། འཇིག་རྟེན་གྱི་ཁམས་བཟང་པོ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་ རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་ཟེར་བརྒྱ་སྟོང་ཡོངས་སུ་རྫོགས་པའི་རྒྱལ་མཚན་ཞེས་བྱ་བར་འཇིག་རྟེན་དུ་འབྱུང་བར་འགྱུར་རོ། །བཅོམ་ལྡན་འདས་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་བརྒྱ་སྟོང་ཡོངས་སུ་རྫོགས་པའི་རྒྱལ་མཚན་དེའི་ཚེའི་ཚད་ནི་དཔག་ཏུ་མེད་པར་འགྱུར་རོ། །དེ་ནས་དགེ་སློང་ མ་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་དགེ་སློང་མ་གཡོག་འཁོར་དགེ་སློང་མ་དྲུག་སྟོང་དང༌། དགེ་སློང་མ་གྲགས་འཛིན་གཡོག་འཁོར་དགེ་སློང་མ་བཞི་སྟོང་དང༌། བཅོམ་ལྡན་འདས་ ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བདག་ཅག་ལུང་བསྟན་པ་ཐོབ་ནས་ངོ་མཚར་དང་རྨད་དུ་གྱུར་ཏེ། དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བཅོམ་ལྡན་འདྲེན་པ་ རྣམ་པར་འདྲེན་པ་སྟེ། །ལྷར་བཅས་འཇིག་རྟེན་དག་གི་སྟོན་པ་ལགས། །དབུགས་འབྱིན་ལྷ་དང་མི་ཡིས་མཆོད་པ་སྟེ། །མགོན་པོ་བདག་ཅག་རྣམས་ཀྱང་དེང་ཚིམ་བགྱིས། །དེ་ནས་དགེ་ སློང་མ་རྣམས་ཀྱིས་ཚིགས་སུ་བཅད་པ་འདི་གསོལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ཀྱང་སླད་མའི་དུས་སླད་མའི་ཚེ་ན་།ཆོས་ཀྱི་ ༄༅། །རྣམ་གྲངས་འདི་འཇིག་རྟེན་གྱི་ཁམས་གཞན་དག་ཏུ་སྟོན་པར་སྤྲོ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་གཟུངས་ ཐོབ་པ་ཕྱིར་མི་ལྡོག་པའི་ཆོས་ཀྱི་འཁོར་ལོ་བསྐོར་བའི། །བྱང་ཆུབ་སེམས་དཔའ་བརྒྱད་ཁྲི་པོ་དེ་དག་ག་ལ་བ་དེ་ལོགས་སུ་གཟིགས་སོ། །དེ་ནས་བཅོམ་ལྡན་འདས་ཀྱིས་ གཟིགས་མ་ཐག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་འདི་སྙམ་ དུ༑ ཆོས་ཀྱི་རྣམ་གྲངས་འདི་བཤད་པར་བྱ་བའི་ཕྱིར། བཅོམ་ལྡན་འདས་ཀྱིས་བདག་ཅག་ལ་བསྐུལ་བ་མཛད་དོ་སྙམ་དུ་སེམས་སོ། །དེ་དག་དེ་སྙམ་དུ་བསམས་ནས་ཀུན་ གཡོས་ཏེ་ཕན་ཚུན་དུ་སྨྲས་པ། རིགས་ཀྱི་བུ་དག། མ་འོངས་པའི་དུས་ན་ཆོས་ཀྱི་རྣམ་གྲངས་འདི་བཤད་པར་བྱ་བའི་ཕྱིར། བཅོམ་ལྡན་འདས་ཀྱིས་བདག་ཅག་ལ་བསྐུལ[?] བ་མཛད་ན་བདག་ཅག་གིས་ཇི་ལྟར་བྱ། དེ་ནས་རིགས་ཀྱི་བུ་དེ་དག་བཅོམ་ལྡན་འདས་ལ་གུས་པ་དང༌། བདག་ཉིད་ཀྱི་སྔོན་གྱི་སྤྱོད་པ་དང༌། སྨོན་ལམ་གྱིས་བཅོམ་ལྡན་ འདས་ཀྱི་སྤྱན་སྔར་སེང་གེའི་སྒྲ་ཕྱུང་བ། བཅོམ་ལྡན་འདས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་བདག་ཅག་ཕྱོགས་བཅུར་མཆིས་ཏེ། བཅོམ་ལྡན་འདས་ ཀྱི་མཐུས་ཆོས་ཀྱི་རྣམ་གྲངས་འདི་སེམས་ཅན་རྣམས་ཡི་གེར་འདྲིར་སྩལ་བར་བགྱི། ཀློག་ཏུ་སྩལ་བར་བགྱི། སེམས་སུ་སྩལ་པར་བགྱི། འཆད་དུ་སྩལ་བར་བགྱིའོ། །བཅོམ་ལྡན་ འདས་ཀྱང་འཇིག་རྟེན་གྱི་ཁམས་གཞན་ན་བཞུགས་ཏེ། བདག་ཅག་ལ་བསྲུང་བ་དང༌། སྐྱོབས་པ་དང༌། སྦེད་པ་མཛད་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ ཆེན་པོ་དེ་དག་གིས་བཅོམ་ལྡན་འདས་ལ་དབྱངས་མཐུན་པར་ཚིགས་སུ་བཅད་པ་འདི་དག་གསོལ་ཏོ། །བཅོམ་ལྡན་འདས་ཁྱོད་ཐུགས་ལས་ཆུང་མཛད་གསོལ། །ཁྱོད་ནི་མྱ་ ངན་འདས་ནས་བདག་ཅག་རྣམས། །ཤིན་ཏུ་མ་རུངས་སླད་མའི་དུས་ཀྱི་ཚེ། །མདོ་སྡེ་དམ་པ་འདི་ནི་བཤད་པར་བགྱི། །བྱིས་པ་རྣམས་ཀྱིས་སྤྱོས་པ་དང་།བརྡེག་པ་དང་ནི་དབྱུག་ཐོགས་ ཏེ། །གཟས་པ་རྣམས་ནི་བཟོད་པར་བགྱི། །འདྲེན་པ་བག་ལ་ཞ་བར་བགྱི། །མ་རུངས་སླད་མའི་དུས་ལ་ནི། །ལོག་པའི་བློ་དང་ཡོན་པོ་དང༌། །བྱིས་པ་གཡོ་དང་ང་རྒྱལ་ཅན། ། མ་ཐོབ་ཐོབ་པར་འདུ་ཤེས་པ། །དགོན་པ་དག་ལ་རབ་སེམས་ཤིང༌། །ཚེམ་བུ་དག་ཀྱང་བགོས་ནས་ནི། །ཡོ་བྱད་བསྙུངས་ཚུལ་སྤྱོད་དོ་ཞེས། །བློ་ངན་དེ་སྐད་སྨྲ་བར་འགྱུར། རོ་བྲོ་ཆགས་ཤིང་ཞེན་པ་རྣམས། །ཁྱིམ་པ་དག་ལ་ཆོས་ཀྱང་འཆད། །མངོན་ཤེས་དྲུག་ཅན་ཇི་བཞིན་དུ། །བསྟི་སྟང་དག་ཀྱང་བགྱིད་པར་འགྱུར། །གཏུམ་པའི་སེམས་ ༄༅། །དང་སྡང་སེམས་ལྡན། །ཁྱིམ་དང་ནོར་ལ་རྣམ་པར་སེམས། །དགོན་པ་དཔེན་པར་རབ་ཞུགས་ཏེ། །བདག་ཅག་རྣམས་ལ་སྐུར་བ་འདེགས། ། བདག་ཅག་ལ་ནི་འདི་སྐད་མཆི། །རྙེད་དང་བཀུར་སྟི་གནས་པ་སྟེ། །དགེ་སློང་འདི་དག་མུ་སྟེགས་ཅན། །བདག་གི་རང་བཟོ་རབ་ཏུ་འཆད། །རྙེད་པ་དང་ནི་བཀུར་སྟིའི་ཕྱིར།། རང་གིས་མདོ་སྡེ་བྱས་ནས་སུ། །འཁོར་གྱི་དབུས་སུ་འཆད་བྱེད་ཅེས། །བདག་ཅག་རྣམས་ལ་ཤིན་ཏུ་འཕྱ། །རྒྱལ་པོ་དང་ནི་རྒྱལ་བུ་དང༌། །དེ་བཞིན་རྒྱལ་པོའི་བློན་པོ་ དང༌། །བྲམ་ཟེ་དང་ནི་ཁྱིམ་བདག་དང༌། །དགེ་སློང་གཞན་དག་དྲུང་དུ་ནི། །བདག་ཅག་རྣམས་ལ་མི་བསྔགས་བརྗོད། །མུ་སྟེགས་ཅན་ཞེས་ཚིག་ཀྱང་བརྗོད། །དྲང་སྲོང་ཆེ་ལ་ གུས་པས་ན། །ཐམས་ཅད་བདག་ཅག་བཟོད་པར་བགྱི། །དེ་ཚེ་ངན་པའི་བློ་གྲོས་ཅན། བདག་ཅག་རྣམས་ལ་སྨོད་པར་འགྱུར། །འདི་དག་སངས་རྒྱས་འགྱུར་ཞེས་ཏེ། རྣམ་པ་ ཐམས་ཅད་བཟོད་པར་བགྱི། །འཁྲུག་པའི་བསྐལ་པ་འཇིགས་པ་ལ། །མ་རུངས་འཇིགས་པ་ཆེན་པོའི་ཚེ། །གནོད་སྦྱིན་གཟུགས་ཅན་དགེ་སློང་མང༌། །བདག་ཅག་ལ་ནི་མི་སྙན་ བརྗོད། །འཇིག་རྟེན་དབང་ལ་གུས་པ་ཡིས། །ཤིན་ཏུ་དགའ་བ་སྤྲོ་བར་བགྱི། །བཟོད་པའི་གོ་ཆ་བགོས་ནས་སུ། །མདོ་འདི་རབ་ཏུ་བཤད་པར་བགྱི། །འདྲེན་པ་བདག་ཅག་ལུས་དང་ ནི། །སྲོག་ཀྱང་དོན་དུ་གཉེར་མ་ལགས། །བདག་ཅག་བྱང་ཆུབ་དོན་གཉེར་བས། །ཁྱོད་ཀྱིས་བཏམས་གཏད་འཛིན་པ་ལགས། །ལྡེམ་པོར་དགོངས་བཤད་མ་འཚལ་བ། །དགེ་སློང་སྡིག་ ཅན་ཅི་འདྲ་དག །སླད་མའི་དུས་ན་འབྱུང་བ་ནི། །བཅོམ་ལྡན་ཉིད་ཀྱིས་རབ་ཏུ་མཁྱེན། །གཙུག་ལག་ཁང་ནས་བསྐྲད་པ་དང༌། །བཅིང་དང་བརྡེག་པ་རྣམ་མང་དང༌། །ཕྱིར་ཞིང་བཅས་ པ་མ་ལགས་དང༌། །ཁྲོ་གཉེར་ཐམས་ཅད་བཟོད་པར་བགྱི། །འཇིག་རྟེན་མགོན་གྱིས་བཀའ་སྩལ་པ། །དྲན་པར་བགྱིད་པས་སླད་དུ་ན། །འཁོར་གྱི་དབུས་སུ་མི་འཇིགས་པར། །མདོ་ འདི་རབ་ཏུ་བཤད་པར་བགྱི། །འདྲེན་པ་འདི་ནི་འདི་ཚོལ་པ། །གྲོང་ཁྱེར་གྲོང་དུ་གང་བྱུང་བ། །དེ་དག་ཏུ་ནི་མཆིས་ནས་སུ། །ཁྱོད་ཀྱིས་བཏམས་པ་སྩལ་བར་བགྱི། །འཇིག་རྟེན་དབང་ པོ་ཐུབ་པ་ཆེ། །ཁྱོད་ཀྱི་མངག་གཞུག་བདག་ཅག་འཚལ། །མྱ་ངན་རབ་འདས་ཞི་རྙེད་པ། །ཐུགས་ལས་ཆུང་ངུར་མཛད་དུ་གསོལ། །ཕྱོགས་བཅུ་དག་ནས་གང་གཤེགས་པ།། འཇིག་རྟེན་སྒྲོན་མ་ཐམས་ཅད་ཀྱི། །མོས་པ་རྣམ་པར་མཁྱེན་པས་ན། །བདེན་པའི་ཚིག་ནི་སྨྲ་བར་བགྱིད། །དམ་པའི་ཆོས་པདྨ་དཀར་པོ་ལས། སྤྲོ་བར་བྱ་བའི་ལེའུ་ཞེས་བྱ་ སྟེ་བཅུ་གཉིས་པའོ།། །།དམ་པའི་ཆོས་པདྨ་དཀར་པོ། བམ་པོ་དགུ་པ། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་ ༄༅། །གསོལ་ཏོ། །བཅོམ་ལྡན་འདས། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་བཅོམ་ལྡན་འདས་ལ་གུས་པར་སྤྲོ་བ་ནི་དཀའ་བ་བགྱིད་པ། ཤིན་ ཏུ་དཀའ་བ་བགྱིད་པ་ལགས་སོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་གིས། སླད་མའི་ཚེ་སླད་མའི་དུས་ན་ཆོས་ཀྱི་རྣམ་གྲངས་འདི་ཇི་ ལྟར་རབ་ཏུ་བཤད་པར་བགྱི། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། ཆོས་བཞི་ལ་གནས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཀྱི་རྣམ་གྲངས་འདི་ཕྱི་མའི་ཚེ་ཕྱི་མའི་དུས་ན་ཡང་དག་པར་རབ་ཏུ་བསྟན་པར་བྱའོ། །བཞི་གང་ཞེ་ན། འཇམ་དཔལ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཆོ་ག་དང་སྤྱོད་ཡུལ་ལ་གནས་ཏེ་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་བསྟན་པར་བྱའོ། ། འཇམ་དཔལ། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་དག་ཆོ་ག་དང་སྤྱོད་ཡུལ་ལ་གནས་པ་ཡིན་ཞེ་ན། འཇམ་དཔལ། གང་གི་ཚེ་བྱང་ཆུབ་སེམས་ དཔའ་སེམས་དཔའ་ཆེན་པོ་བཟོད་པ་དང༌། དུལ་བ་དང༌། དུལ་བའི་ས་ཐོབ་ཅིང་ཡིད་མི་སྡང་ལ་ཕྲག་དོག་མེད་པར་འགྱུར་ཏེ། འཇམ་དཔལ། གང་གི་ཚེ་བྱང་ཆུབ་སེམས་ དཔའ་སེམས་དཔའ་ཆེན་པོ་དག་ཆོས་གང་ལའང་མི་སྤྱོད་ཅིང་ཆོས་ཀྱི་རྣམ་གྲངས་ཀྱི་རང་གི་མཚན་ཉིད་ལ་ཡང་དག་པར་བལྟ་བ་བཞིན་དུ་བལྟ་སྟེ། གང་ཆོས་རྣམས་ལ་རྣམ་པར་མི་ དཔྱོད་རྣམ་པར་མི་རྟོག་པ་དེ་ནི། འཇམ་དཔལ། བྱང་ཆུབ་སེམས་དཔའ་སེམས་དཔའ་ཆེན་པོའི་ཆོ་ག་ཞེས་བྱའོ། །འཇམ་དཔལ། བྱང་ཆུབ་སེམས་དཔའ་སེམས་དཔའ་ཆེན་ པོའི་སྤྱོད་ཡུལ་གང་ཞེ་ན། འཇམ་དཔལ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་པོ་ལ་མི་སྟེན། རྒྱལ་བུ་དང༌། རྒྱལ་པོའི་བློན་པོ་ཆེན་པོ་དང༌། རྒྱལ་པོའི་ ཞབས་འབྲིང་བ་ལ་མི་སྟེན། མི་བསྙེན། བསྙེན་བཀུར་མི་བྱེད། ཉེ་བར་མི་འགྲོ། གཞན་མུ་སྟེགས་ཅན་སྤྱོད་པ་པ༈དང༌། ཀུན་ཏུ་རྒྱུ་བ་པ་དང༌། འཚོ་བ་པ་དང༌། གཅེར་བུ་པ་རྣམས་ དང༌། སྙན་དངགས་ཀྱི་བསྟན་བཅོས་ལ་ཞུགས་པའི་སེམས་ཅན་རྣམས་དང་མི་སྟེན། མི་བསྙེན། བསྙེན་བཀུར་མི་བྱེད། འཇིག་རྟེན་རྒྱང་པན་པའི་གསང་ཚིག་འཆང་བའི་འཇིག་ རྟེན་རྒྱང་པན་པ་ལ་མི་སྟེན། མི་བསྙེན། བསྙེན་བཀུར་མི་བྱེད། དེ་དག་དང་ལྷན་ཅིག་ཏུ་འདྲིས་པར་མི་བྱེད། གདོལ་པ་པ་དང༌། ཟོལ་པ་རྣམས་དང་མ་ཡིན། ཕག་འཚོང་བ་རྣམས་དང་མ་ ཡིན༑ བྱ་གག་འཚོང་པ་རྣམས་དང་མ་ཡིན། རི་དྭགས་ཀྱི་རྔོན་པ་རྣམས་དང་མ་ཡིན། ཉ་པ་རྣམས་དང་མ་ཡིན། གླུ་མཁན་དང༌། གར་མཁན་དང༌། ལྕགས་ཀྱི་སིལ་ཁྲོལ་བྱེད་པ་རྣམས་ ༄༅། །དང་མ་ཡིན། གྱད་རྣམས་དང་མ་ཡིན། གཞན་དག་གི་དགའ་བ་དང་རྩེ་བའི་གནས་རྣམས་སུ་མི་འགྲོ་།དེ་དག་དང་ལྷན་ཅིག་འདྲིས་པར་ཡང་མི་བྱེད་དེ། དྲུང་ དུ་ལྷགས་པ་ལ་དུས་སུ་ཆོས་བཤད་པ་ནི་མ་གཏོགས་ཏེ། དེའང་མི་གནས་པར་འཆད་པའོ། །ཉན་ཐོས་ཀྱི་ཐེག་པ་ཅན་གྱི་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་ བསྙེན་མ་ལ་མི་སྟེན། མི་བསྙེན། བསྙེན་བཀུར་མི་བྱེད། དེ་དག་དང་འདྲིས་པར་མི་བྱེད་དེ། འཆགས་སའམ། གནས་ཁང་ངམ། གཙུག་ལག་ཁང་ནའང་དེ་དག་དང་འགྲོགས་པའི་སྤྱོད་ ཡུལ་བ་མ་ཡིན་ནོ། །དྲུང་དུ་ལྷགས་པ་ལ་དུས་སུ་ཆོས་འཆད་པ་ནི་མ་གཏོགས་ཏེ་དེའང་མི་གནས་པར་འཆད་པའོ། །འཇམ་དཔལ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་ པོའི་སྤྱོད་ཡུལ་ལོ། །འཇམ་དཔལ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་ལ་རྗེས་སུ་ཆགས་པ་གང་ཡང་རུང་བ་མཚན་མར་བཟུང་ནས་རྟག་ཏུ་ཆོས་ འཆད་པ་མ་ཡིན། བུད་མེད་ལ་རྟག་ཏུ་བལྟ་བར་འདོད་པ་མ་ཡིན། ཁྱིམ་དག་ཏུ་སོང་སྟེ་བུད་མེད་དམ། བུ་མོའམ། ཁྱིམ་མི་མོ་ལ་རྟག་ཏུ་ཆོས་བཤད་པར་སེམས་པ་མ་ཡིན། ཡང་དག་པར་མགུ་བར་བྱེད་པ་མ་ཡིན། མ་ནིང་ལ་ཆོས་མི་སྟོན། དེ་དག་དང་ལྷན་ཅིག་འདྲིས་པར་མི་བྱེད། ཡང་དག་པར་མགུ་བར་བྱེད་པ་མ་ཡིན། སློང་བའི་ཕྱིར་གཅིག་པུ་ཁྱིམ་ དུ་མི་འཇུག་སྟེ། དེ་བཞིན་གཤེགས་པ་རྗེས་སུ་དྲན་པ་བསྒོམ་པ་ནི་མ་གཏོགས་སོ། །གལ་ཏེ་བུད་མེད་ལ་ཆོས་སྟོན་ནའང་དེ་ཐ་མ་ཆོས་ལ་འདོད་ཆགས་པས་ཀྱང་ཆོས་མི་སྟོན་ན་དེ་བུད་ མེད་ལ་འདོད་ཆགས་པས་ལྟ་ཅི་སྨོས། དེ་ཆོས་སྟོན་པ་ན་ཐ་ན་སོའི་ཕྲེང་བའང་མི་སྟོན་ན་བཞིན་གྱི་འགྱུར་པ་ཆེན་པོ་ལྟ་ཅི་སྨོས། དགེ་ཚུལ་དང༌། དགེ་ཚུལ་མ་དང༌། དགེ་སློང་དང༌། དགེ་སློང་ མ་དང༌། གཞོན་ནུ་དང༌། གཞོན་ནུ་མ་དང་མི་སྟེན། དེ་དག་དང་གཏམ་ཡང་མི་བྱེད་ལ་ནང་དུ་ཡང་དག་པར་འཇོག་ལ་འཇུག་པར་དགའ་ཞིང་ནང་དུ་ཡང་དག་འཇོག་ལ་རྟག་ཏུ་བསྙེན་པ་ཡིན་ ཏེ། འཇམ་དཔལ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱོད་ཡུལ་དང་པོའོ། །འཇམ་དཔལ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ ཅད་ལ་སྟོང་པར་བལྟ་སྟེ། ཇི་ལྟར་གནས་པ་བཞིན་དང༌། མ་ལོག་པར་གནས་པ་དང༌། ཡང་དག་པ་ཇི་ལྟ་བ་བཞིན་དུ་གནས་པ་དང༌། མི་བསྐྱོད་པ། མི་གཡོ་བ། མི་ལྡོག་པ། མི་འགྱུར་ བ། རྟག་ཏུ་ཡང་དག་པ་ཇི་ལྟ་བ་བཞིན་དུ་གནས་པ་དང༌། ནམ་མཁའི་ངོ་བོ་ཉིད་ལྟ་བུ་ངེས་པའི་ཚིག་དང་ཐ་སྙད་རྣམ་པར་སྤང་པ་མ་སྐྱེས་པ། མ་བྱུང་བ། ཡང་དག་པར་མ་བྱུང་བ། མེད་ པ། འདུས་མ་བྱས་པ། རྒྱུན་མེད་པ། མེད་པ་ལ་ཚིག་གིས་བརྗོད་པ། མི་ཆགས་པའི་གནས་ལ་འདུག་པ་འདུ་ཤེས་ཕྱིན་ཅི་ལོག་ལས་བྱུང་བར། དེ་ལྟར། འཇམ་དཔལ། བྱང་ཆུབ་ ༄༅། །སེམས་དཔའ་སེམས་དཔའ་ཆེན་པོ་རྟག་ཏུ་ཆོས་ཐམས་ཅད་ལ་ལྟ་ཞིང་གནས་པ་འདིས་གནས་ན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་ ཡུལ་ལ་གནས་པ་ཡིན་ཏེ། འཇམ་དཔལ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱོད་ཡུལ་གཉིས་པའོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱས་པར་ སྟོན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཕྱི་དུས་ཤིན་ཏུ་འཇིགས་པ་ལ། ཞུམ་པ་མེད་ཅིང་མི་འཇིགས་པར། །མདོ་སྡེ་འདི་ནི་བསྟན་པར་ཡང༌། །བྱང་ཆུབ་ སེམས་དཔའ་གང་འདོད་པ། །ཆོ་ག་སྤྱོད་ཡུལ་བསྲུང་བྱ་ཞིང༌། །འདུ་འཇི་མེད་ལ་གཙང་བར་བྱ། །རྒྱལ་པོ་དང་ནི་རྒྱལ་བུ་དང༌། །འདྲིས་བྱེད་རྟག་ཏུ་སྤང་བར་བྱ། །རྒྱལ་པོའི་ཞབས་ འབྲིང་གང་ཡིན་དང༌། །གདོལ་པ་དང་ནི་ཟོལ་པ་དང༌། །མུ་སྟེགས་ཅན་ནི་དེ་དག་དང༌། །རྣམ་པ་ཀུན་ཏུ་འདྲིས་མི་བྱ། །དགེ་སློང་འདུལ་དང་ལུང་གནས་པ། །དགྲ་བཅོམ་སྙམ་དུ་ སེམས་བྱེད་ཅིང༌། །ང་རྒྱལ་ཅན་རྣམས་བསྟེན་མི་བྱ། །ཚུལ་ཁྲིམས་འཆལ་རྣམས་རྣམ་པར་སྤང༌། །རྒོད་ཅིང་སྨྲ་བའི་སྤྱོད་ཡུལ་ཅན། །དགེ་སློང་མ་རྣམས་རྟག་ཏུ་སྤངས། །མི་བརྟན་ པར་ནི་མངོན་པ་ཡི། །དགེ་བསྙེན་རྣམས་ཀྱང་སྤང་བར་བྱ། །དགེ་བསྙེན་མ་གང་ཚེ་འདི་ལ། མྱ་ངན་འདས་པ་གང་ཚོལ་བ། །དེ་དག་དང་ནི་འདྲིས་བྱེད་སྤང༌། །འདི་ནི་ཆོ་ག་ ཡིན་ཞེས་བྱ། །གང་ཞིག་དེ་ཡི་ཐད་འོངས་ནས། །བྱང་ཆུབ་མཆོག་ཕྱིར་ཆོས་འདྲི་ན། །གནས་པ་མེད་ཅིང་མི་ཞན་པར། དཔའ་བོ་རྟག་ཏུ་དེ་ལ་ཤོད། །བུད་མེད་མ་ནིང་སེམས་ཅན་གང༌། དེ་དག་འདྲིས་བྱེད་རྣམ་པར་སྤང༌། །ཁྱིམ་རྣམས་སུ་ནི་མནའ་མ་དང༌། །གཞོན་ནུ་མ་རྣམས་རྣམ་པར་སྤང༌། དེ་ལ་ནམ་དུའང་དགའ་མི་བྱེད། །མཁས་དང་རྒོད་པ་འདྲི་བ་དང༌། །ཕག་འཚོང་ བ་དང་བཤན་པ་དང༌། །འདྲིས་པར་བྱེད་པ་རྣམ་པར་སྤང༌། །གང་དག་སྲོག་ཆགས་རྣམ་མང་དག །ལོངས་སྤྱོད་ཕྱིར་ནི་གསོད་པ་དང༌། །བཟའ་ཕྱིར་ཤ་རྣམས་འཚོང་བྱེད་པ། །དེ་དག་འདྲིས་ བྱེད་རྣམ་པར་སྤང༌། །གང་དག་བུད་མེད་གསོ་བྱེད་དང༌། །གར་མཁན་གྱད་དང་སིལ་ཁྲོལ་བ། །གང་གཞན་དེ་དང་འདྲ་བ་ཡང༌། །དེ་དག་རྣམས་དང་འདྲིས་བྱེད་སྤང༌། །རེས་མའི་གཙོ་བོ་ བསྟེན་མི་བྱ། །ཇི་སྙེད་ལོངས་སྤྱོད་འཚོ་བ་གཞན། །ཤིན་ཏུ་དགའ་བ་དེ་དག་ཀྱང༌། །རྣམ་པ་ཀུན་ཏུ་ཡོངས་སུ་སྤང༌། །མཁས་པ་བུད་མེད་རྣམས་ལ་ཡང༌། །གང་གི་དུས་ན་ཆོས་འཆད་ པ༑ ༑དེ་ནི་གཅིག་པུ་མི་འགྲོ་སྟེ། །རྒོད་ཅིང་འདུག་པར་མི་བྱའོ། །གང་ཚེ་ཟས་ཕྱིར་ཡང་དང་ཡང༌། །གྲོང་དུ་འཇུག་པར་བྱེད་པ་ན། །དགེ་སློང་གཉིས་པ་བཙལ་བར་བྱ། །ཡང་ན་སངས་ རྒྱས་དྲན་པར་བྱ། །གང་གིས་ཤེས་རབ་ལྡན་པ་དག །མདོ་སྡེ་འདི་འདྲ་འཛིན་གནས་པའི། །ཆོ་ག་དང་ནི་སྤྱོད་ཡུལ་དག། །ཐོག་མར་ངས་བཤད་འདི་ཡིན་ནོ། །གང་ཚེ་འདུས་བྱས་ ༄༅། །འདུས་མ་བྱས། །ཡང་དག་ཡང་དག་མ་ཡིན་དང༌། །རབ་འབྲིང་ཐ་མའི་ཆོས་རྣམས་ལ། །རྣམ་པ་ཀུན་ཏུ་སྤྱོད་པ་མེད། །བརྟན་པ་བུད་མེད་ཅེས་མི་སྤྱོད།། སྐྱེས་པ་ཞེས་ཀྱང་མི་རྟོག་སྟེ། །ཆོས་སོ་ཅོག་ནི་མ་སྐྱེས་ཕྱིར། །བཙལ་བ་བྱས་ཀྱང་མི་མཐོང་བ། །འདི་ནི་བྱང་ཆུབ་སེམས་དཔའ་ཡི། །ཆོ་ག་རྣམ་པ་ཀུན་ཏུ་བསྟན། །དེ་དག་སྤྱོད་ ཡུལ་ཅི་འདྲ་བ། །དེ་ནི་རྣམ་པར་མཉན་པར་གྱིས། །ཆོས་འདི་དག་ནི་ཡོད་པ་མ་ཡིན་བསྟན། །ཐམས་ཅད་འབྱུང་བ་མེད་ཅིང་སྐྱེ་བ་མེད། །རྟག་ཏུ་མི་གཡོ་སྟོང་པ་ཉིད་དུ་གནས། ། དེ་ནི་མཁས་པ་རྣམས་ཀྱི་སྤྱོད་ཡུལ་ཡིན། །འདི་དག་འདུ་ཤེས་ལོག་པར་བརྟགས་པ་སྟེ། །ཡང་དག་མིན་ལ་ཡང་དག་ཡོད་ལ་མེད། །མ་བྱུང་བ་དང་མ་སྐྱེས་ཆོས་རྣམས་ལ། ། ཡང་དག་ཉིད་དང་འབྱུང་བར་ལོག་པར་བརྟགས། །སེམས་ནི་རྟག་ཏུ་རྩེ་གཅིག་མཉམ་གཞག་སྟེ། །རི་རབ་ཕུང་པོ་ཇི་བཞིན་རབ་ཏུ་གནས། །དེ་བཞིན་འདུག་ནས་ནམ་ མཁའ་ལྟ་བུར་ནི། །ཆོས་རྣམས་འདི་དག་ཀུན་ལ་བརྟག་པར་བྱ། །རྟག་ཏུ་ནམ་མཁའ་མཚུངས་པར་སྙིང་པོ་མེད། །མི་གཡོ་རློམ་སེམས་རྣམ་པར་སྤངས་པ་སྟེ། །ཆོས་རྣམས་ འདི་དག་རྟག་པའི་དུས་གནས་པ། །འདི་ནི་མཁས་པ་རྣམས་ཀྱི་སྤྱོད་ཡུལ་ཡིན། །ང་ནི་མྱ་ངན་འདས་ནས་དགེ་སློང་གང༌། །ང་ཡི་སྤྱོད་ཡུལ་འདི་ནི་རབ་སྲུང་ཞིང༌། །དེ་ནི་ནམ་ ཡང་ཞུམ་པ་མེད་པ་ཡིས། །འཇིག་རྟེན་དུའང་མདོ་འདི་རབ་ཤོད་ཅིག །མཁས་པ་དུས་སུ་སེམས་པར་བྱེད་པ་ན། །ཁང་བུར་ཞུགས་ཏེ་དེ་བཞིན་སྒོ་བཅད་ནས། །ཆོས་འདི་ཐམས་ཅད་ ལ་ནི་ཚུལ་བཞིན་བལྟ། །ལངས་ནས་ཞུམ་པ་མེད་པའི་སེམས་ཀྱིས་ཤོད། །རྒྱལ་པོ་རྣམས་དང་རྒྱལ་པོའི་བུ་གང་དག །ཆོས་ཉན་པ་རྣམས་འདི་ནི་དེ་ལ་སྲུང༌། །གཞན་ཡང་ཁྱིམ་ བདག་དག་དང་བྲམ་ཟེ་རྣམས། །ཐམས་ཅད་དེ་ཡི་གཡོག་ཏུ་འཁོད་པར་འགྱུར། །འཇམ་དཔལ། གཞན་ཡང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཕྱི་མའི་ དུས་ཕྱི་མའི་ཚེ་དམ་པའི་ཆོས་རབ་ཏུ་འཇིག་པར་འགྱུར་བ་ན། །བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་འདི་རབ་ཏུ་སྟོན་པར་འདོད་པ་ནི་བདེ་བ་ལ་གནས་ པ་ཡིན་ནོ། །དེ་བདེ་བ་ལ་གནས་ཏེ་ཆོས་འཆད་དོ། །ལུས་ལ་ཡོད་དམ། གླེགས་བམ་དུ་བྱས་སམ། གཞན་དག་ལ་སྟོན་ནའང༌། ཤིན་ཏུ་ཀླན་ཀ་ཚོལ་བའི་རང་བཞིན་ཅན་མ་ཡིན། དགེ་སློང་ ཆོས་སྨྲ་བ་གཞན་དག་ལ་སྐུར་བར་མི་བྱེད། །མི་སྙན་པ་མི་སྨྲ། མི་སྙན་པ་མི་བརྗོད། གཞན་ཉན་ཐོས་ཀྱི་ཐེག་པ་ཅན་གྱི་དགེ་སློང་དག་གི་མིང་སྨོས་ཏེ་མི་སྙན་པ་མི་སྨྲ། མི་སྙན་པ་མི་རྗོད་ ཅིང་དེ་དག་ལ་ཕྱིར་རྒོལ་བར་འདུ་ཤེས་པ་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་བདེ་བའི་གནས་ལ་གནས་པའི་ཕྱིར་ཏེ། དེ་ཆོས་ཉན་དུ་འོངས་ཤིང་ལྷགས་པ་རྣམས་ལ་ཕན་འདོགས་ ༄༅། །པ་དང༌། ཕྲག་དོག་མེད་པར་ཆོས་སྟོན་ཏོ། །མི་རྩོད་ཅིང་དྲི་བ་དྲིས་ཀྱང་ཉན་ཐོས་ཀྱི་ཐེག་པས་ལན་མི་ལྡོན་ཏེ། ཅི་ནས་སངས་རྒྱས་ཀྱི་ཡེ་ཤེས་མངོན་པར་ རྫོགས་པར་འཚང་རྒྱ་བ་དེ་ལྟ་བུར་ལན་ལྡོན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མཁས་པ་བདེ་ལ་རྟག་ཏུ་གནས་པར་ འགྱུར༑ ༑དེ་ལ་འདུག་ནས་དེ་བཞིན་ཆོས་ཀྱང་སྟོན། །གཙང་ཞིང་ཡིད་དུ་འོང་བའི་ས་ཕྱོགས་སུ། །ཡངས་པའི་སྟན་ནི་རབ་ཏུ་བཤམས་བཏིང་སྟེ། །བཟང་པོའི་ཚོན་གྱིས་ལེགས་ པར་ཁ་བསྒྱུར་བ། །ཆོས་གོས་གཙང་མ་དེ་ནི་རབ་བགོས་ནས། །རྡུལ་གཟན་བཟང་པོ་དེ་བཞིན་བཤམས་བྱས་ལ། །ཤམ་ཐབས་ཆེ་ཚད་ལེགས་པར་རབ་བགོས་ནས། །བཅོས་ པུའི་རས་རྣམས་སྣ་ཚོགས་ལེགས་བཏིང་བ། །རྐང་བརྟེན་བཅས་པའི་ཁྲི་ལ་རབ་འདུག་ཅིང༌། །རྐང་པ་ལེགས་པར་བཀྲུས་ཏེ་སྟེང་འཛེགས་ནས། །མགོ་དང་བཞིན་གྱི་མདངས་ ནི་རབ་སྣུམ་ཞིང༌། །ཆོས་ཀྱི་སྟན་དེ་ལ་ནི་རབ་འདུག་ནས། །སེམས་ཅན་ལྷགས་པ་རྩེ་གཅིག་གྱུར་རྣམས་ལ། །གཏམ་མང་རྣམ་པ་སྣ་ཚོགས་ཉེ་བར་སྟོན། །དགེ་སློང་ དག་དང་དགེ་སློང་མ་རྣམས་དང༌། །དགེ་བསྙེན་རྣམས་དང་དགེ་བསྙེན་མ་དག་དང༌། །རྒྱལ་པོ་དག་དང་རྒྱལ་བུ་རྣམས་ལ་ཡང༌། །མཁས་ཏེ་རྟག་ཏུ་ཕྲག་དོག་མེད་པར་ ནི༑ ༑སྣ་ཚོགས་དོན་ལྡན་སྙན་པའི་གཏམ་ཡང་སྟོན། །དེ་ཚེ་དེ་ལ་དེ་དག་དྲི་དྲིས་ནས། །དེ་ལ་མཐུན་པའི་དོན་རྣམས་རབ་ཏུ་སྟོན། །ཅི་ནས་ཐོས་པས་བྱང་ཆུབ་འཐོབ་འགྱུར་བ། །དེ་ལྟར་ དོན་གྱི་རྣམ་པ་རབ་ཏུ་སྟོན། །ལེ་ལོ་དག་ཀྱང་རྣམ་པར་རབ་སྤངས་ནས། །སྐྱོ་བ་སྙམ་པའི་འདུ་ཤེས་བསྐྱེད་མི་བྱ། །མཁས་པས་མི་དགའ་ཐམས་ཅད་རྣམ་པ[?] སྤང༌། །བྱམས་པའི་ སྟོབས་ནི་འཁོར་ལ་བསྒོམ་པར་བྱ། །ཉིན་མཚན་དུ་ཡང་ཆོས་མཆོག་རབ་ཏུ་བསྒོམ། །མཁས་པ་དེས་ནི་བྱེ་བ་ཁྲག་ཁྲིག་དཀྱེས། །འཁོར་རྣམས་མགུ་ཞིང་དེ་བཞིན་དགའ་བར་བྱེད། ། དེ་ལ་ནམ་ཡང་འདོད་པ་ཅུང་ཟད་མེད། །ཟས་དང་སྐོམ་དང་བཟའ་དང་བཅའ་བ་དང༌། །གོས་དང་མལ་ཆ་ཆོས་གོས་རྣམས་དང་ནི། །ན་བའི་གསོས་སྨན་དག་ཀྱང་མི་བསམ་སྟེ། །འཁོར་ རྣམས་ལ་ནི་ཅི་ཡང་མི་བསླང་ངོ༌། །གཞན་དུ་མཁས་པ་རྟག་ཏུ་བདག་ཉིད་དང༌། །སེམས་ཅན་འདི་དག་སངས་རྒྱས་གྲུབ་པར་ཤོག །ཕན་ཕྱིར་འཇིག་རྟེན་ཆོས་གང་བསྟན་པ་དེ། །བདག་ གི་བདེ་བའི་ཡོ་བྱད་ཀུན་སྙམ་སེམས། །དགེ་སློང་གང་ཞིག་མྱ་ངན་ང་འདས་ནས། །ཕྲག་དོག་མེད་པར་འདི་ནི་རབ་སྟོན་པ། །དེ་ལ་སྡུག་བསྔལ་མེད་ཅིང་བར་ཆད་མེད། །ནམ་ཡང་ མྱ་ངན་རྣམས་ཀྱང་འཁྲུག་པའང་མེད། །དེ་ལ་སུ་ཡང་སྤངས་པར་མི་བྱེད་དེ། །བརྡག་པ་མེད་ཅིང་མི་སྙན་སྨྲ་བའང་མེད། །དེ་ནི་ནམ་ཡང་བསྐྲད་པར་མི་འགྱུར་ཏེ། །འདི་ལྟར་དེ་ ༄༅། །ནི་བཟོད་པའི་སྟོབས་ལ་གནས། །རྟག་ཏུ་མཁས་པ་བདེ་ལ་གནས་པ་དེ། །ཇི་ལྟར་ངེས་བཤད་བཞིན་དུ་གནས་པ་ནི། །ཡོན་ཏན་བྱེ་བ་དུ་མ་བརྒྱ་ འབྱུང་སྟེ། །དེ་ནི་བསྐལ་པ་བརྒྱར་ཡང་བརྗོད་མི་ནུས། འཇམ་དཔལ། གཞན་ཡང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་དམ་པའི་ཆོས་ཟད་པའི་མཐའ་ མའི་དུས་ཀྱི་ཚེ། མདོ་སྡེ་འདི་འཆད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕྲག་དོག་དང༌། །གཡོ་དང་སྒྱུ་མེད་པ་ཡིན། བྱང་ཆུབ་སེམས་དཔའི་ཐེག་པ་ཅན་གྱི་གང་ ཟག་གཞན་དག་ལ་མི་སྙན་པ་མི་སྨྲ། སྐུར་པ་མི་འདེབས། བརྙས་པར་མི་བྱེད་དོ། །དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་ཉན་ཐོས་ཀྱི་ཐེག་པ་ཅན་ ནམ༑ རང་སངས་རྒྱས་ཀྱི་ཐེག་པ་ཅན་ནམ། བྱང་ཆུབ་སེམས་དཔའི་ཐེག་པ་ཅན་གཞན་དག་ལ་འགྱོད་པ་སྐྱེད་པར་མི་བྱེད་དེ། རིགས་ཀྱི་བུ་དག །ཁྱེད་བླ་ན་མེད་པ་ཡང་དག་ པར་རྫོགས་པའི་བྱང་ཆུབ་དང་རིང་སྟེ་ཁྱེད་དེ་ན་མི་སྣང་ངོ༌། །ཁྱེད་ནི་རབ་ཏུ་བག་མེད་པར་གནས་པ་སྟེ། ཁྱེད་ནི་དེ་བཞིན་གཤེགས་པའི་ཡེ་ཤེས་མངོན་པར་རྫོགས་པར་འཚང་ རྒྱ་བའི་མཐུ་མེད་པའོ་ཞེས་བྱང་ཆུབ་སེམས་དཔའི་ཐེག་པ་ཅན་གང་ལའང་ཐེ་ཚོམ་སྐྱེ་བར་མི་བྱེད་དོ། །ཆོས་ཀྱིས་རྩོད་པ་ལ་དགའ་བ་མ་ཡིན་ཏེ། ཆོས་ལ་རྩོད་པར་མི་བྱེད་དོ། ། ཐམས་ཅད་ཐམས་ཅད་ལ་བྱམས་པའི་སྟོབས་མི་མཐོང་ངོ༌། །དེ་བཞིན་གཤེགས་པ་ཐམས་ཅད་ལ་ཕར་འདུ་ཤེས་སྐྱེད་དོ། །བྱང་ཆུབ་སེམས་དཔའ་ཐམས་ཅད་ལ་སྟོན་པར་འདུ་ཤེས་ སྐྱེད་དོ། །ཕྱོགས་བཅུའི་འཇིག་རྟེན་རྣམས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འཁོད་པ་དེ་དག་ལ་རྒྱུན་མི་ཆད་པར་ལྷག་པའི་བསམ་པས་གུས་པར་ཕྱག་ འཚལ་ལོ། །ཆོས་འཆད་པ་ན་ལྷག་ཆད་མེད་པར་ཆོས་འཆད་དོ། །ཆོས་ཀྱི་རྣམ་གྲངས་འདི་རབ་ཏུ་བསྟན་པ་ན་ཆོས་ཀྱི་དགའ་བ་སྙོམས་པར་བྱེད་དོ། །ཐ་ན་འགའ་ཙམ་ལའང་ཆོས་ཀྱི་ དགའ་བས་ལྷག་པར་ཕན་འདོགས་པར་མི་བྱེད་དོ། །འཇམ་དཔལ། ཆོས་འདི་གསུམ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་ཡོངས་སུ་མྱ་ ངན་ལས་འདས་ནས་དམ་པའི་ཆོས་ཟད་པའི་མཐའ་མའི་དུས་ཀྱི་ཚེ། ཆོས་ཀྱི་རྣམ་གྲངས་འདི་ཡང་དག་པར་སྟོན་པ་ན། བདེ་བར་རེག་པ་ལ་གནས་ཤིང་གཙེ་བ་མེད་པར་ཆོས་ཀྱི་རྣམ་ གྲངས་འདི་རབ་ཏུ་སྟོན་ཏོ། །དེའི་ཆོས་ཡང་དག་པར་འགྲོ་བའི་གྲོགས་དག་ཀྱང་འབྱུང་བར་འགྱུར་རོ། །གང་དག་དེ་ལ་ཆོས་ཉན་པའི་ཆོས་ཀྱི་རྣམ་གྲངས་འདི་ཉན་པ་དང༌། དད་པ་ དང༑ ཡིད་ཆེས་པ་དང༌། འཛིན་པ་དང༌། ཀུན་ཆུབ་པར་བྱེད་པ་དང༌། ཡི་གེར་འདྲི་བ་དང༌། ཡི་གེར་འདྲིར་འཇུག་པ་དང༌། གླེགས་བམ་དུ་བྱས་ཏེ་བསྟི་སྟང་དུ་བྱེད་པ་དང༌། བཙུན་ ༄༅། །པར་བྱེད་པ་དང༌། རིམ་གྲོར་བྱེད་པ་དང༌། མཆོད་པར་བྱེད་པ་དེ་དག་ཀྱང་འབྱུང་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ ཏེ༑ བདེ་བར་གཤེགས་པས་དེ་སྐད་ཅེས་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །གང་ཞིག་མདོ་འདི་འཆད་འདོད་ཆོས་སྨྲ་བས། །གཡོ་དང་ ང་རྒྱལ་དེ་བཞིན་འཕྱ་བ་དང༌། །མ་ལུས་པར་ནི་ཡོངས་སུ་སྤང་བར་བྱ། །དེ་བཞིན་མཁས་པས་ཕྲག་དོག་གཞར་མི་བྱ། །ནམ་དུའང་སུ་ལའང་མི་སྙན་བརྗོད་མི་བྱ། །ལྟ་བས་རྩོད་ པ་ནམ་ཡང་མི་བྱའོ། །བླ་མེད་ཡེ་ཤེས་ཁྱོད་ཐོབ་མི་འགྱུར་ཞེས། །ཐེ་ཚོམ་གནས་ནི་ནམ་ཡང་མི་བྱའོ། །དེ་ནི་རྟག་ཏུ་དྲང་ཞིང་མཉེན་པ་སྟེ། །བདེ་བར་གཤེགས་ཀྱི་སྲས་པོ་བཟོད་ ལྡན་འགྱུར། །ཆོས་འདི་ཡང་དང་ཡང་དུ་རབ་སྟོན་ཀྱང༌། །དེ་འདིར་སྐྱོ་བར་འགྱུར་བ་ཅུང་ཟད་མེད། །བྱང་ཆུབ་སེམས་དཔའ་གང་དག་ཕྱོགས་བཅུ་ཡི། །འཇིག་རྟེན་དག་ན་སེམས་ཅན་ སྙིང་བརྩེས་རྒྱུ། །དེ་ཀུན་བདག་གི་སྟོན་ཅེས་དེ་དག་ལ། །མཁས་པ་རྣམས་ནི་བླ་མར་གུས་པ་སྐྱེད། །སངས་རྒྱས་རྐང་གཉིས་མཆོག་རྣམས་དྲན་བྱས་ལ། །རྒྱལ་བ་རྣམས་ལ་རྟག་ ཏུ་ཕར་སེམས་སྐྱེད། །ང་རྒྱལ་འདུ་ཤེས་ཐམས་ཅད་རྣམས་སྤངས་ནས། །དེ་ཚེ་དེ་ལ་བར་ཀུན་འབྱུང་མི་འགྱུར། །རྣམ་པ་འདི་འདྲའི་ཆོས་འདི་ཐོས་ནས་ནི། །མཁས་པས་དེ་ཚེ་ལེགས་ པར་བསྲུང་བར་བྱ། །བདེ་བར་གནས་པའི་ཕྱིར་དང་མཉམ་གཞག་ན། །སྲོག་ཆགས་བྱེ་བས་རབ་ཏུ་བསྲུང་བར་འགྱུར། །འཇམ་དཔལ། གཞན་ཡང་དེ་བཞིན་གཤེགས་པ་ཡོངས་སུ་ མྱ་ངན་ལས་འདས་ནས། དམ་པའི་ཆོས་སྤོང་བའི་དུས་ཀྱི་ཚེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་འདི་འཛིན་པར་འདོད་པའི་དགེ་སློང་དེས། ཁྱིམ་ ན་གནས་པ་དང་རབ་ཏུ་བྱུང་བ་རྣམས་ལས་རིང་བ་བས་ཀྱང་རིང་དུ་གནས་པར་བྱའོ། །བྱམས་པ་ལ་གནས་པས་གནས་པར་བྱའོ། །སེམས་ཅན་གང་དག་བྱང་ཆུབ་ཏུ་ཡང་དག་ པར་མ་ཞུགས་པ་དེ་དག་ཐམས་ཅད་ལ་སྙིང་རྗེ་བསྐྱེད་པར་བྱའོ། །དེས་འདི་སྙམ་དུ་ཀྱེ་མ་གང་དག་དེ་བཞིན་གཤེགས་པའི་ཐབས་མཁས་པ། ལྡེམ་པོར་དགོངས་ཏེ་བཤད་པ་མི་ ཉན་པ་དང༌། མི་ཤེས་པ་དང༌། མི་རྟོགས་པ་དང༌། མི་འདྲི་བ་དང༌། མ་དད་པ་དང༌། མ་མོས་པའི་སེམས་ཅན་དེ་དག་ནི་ཤིན་ཏུ་ཤེས་རབ་འཆལ་བའི་རང་བཞིན་ཅན་དག་གོ ། གཞན་ཡང་སེམས་ཅན་འདི་དག་ནི་ཆོས་ཀྱི་རྣམས་འདི་ལ་མི་འཇུག་ཅིང་ཁོང་དུ་མི་ཆུད་པ་དག་སྟེ། འདི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་ པར་རྫོགས་པར་སངས་རྒྱས་ནས་གང་ལ་གང་གནས་པར་འགྱུར་བ་དེ་ལ་དེ་རྫུ་འཕྲུལ་གྱི་སྟོབས་ཀྱིས་འདུན་པར་བྱའོ། །ཡིད་ཆེས་པར་བྱའོ། །འཇུག་པར་བྱའོ། །ཡོངས་སུ་སྨིན་ ༄༅། །པར་བྱའོ། །སྙམ་དུ་བསམ་པར་བྱའོ། །འཇམ་དཔལ། ཆོས་བཞི་པོ་འདི་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་ གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་སྟོན་པ་ན་གནོད་པ་མེད་པར་འགྱུར་རོ། །དགེ་སློང་དང༌། དགེ་སློང་མ་དང༌། དགེ་ བསྙེན་དང༌། དགེ་བསྙེན་མ་དང༌། རྒྱལ་པོ་དང༌། རྒྱལ་བུ་དང༌། རྒྱལ་པོའི་བློན་པོ་ཆེན་པོ་དང༌། རྒྱལ་པོའི་སྣ་ཆེན་པོ་ལ་གཏོགས་པ་དང༌། གྲོང་རྡལ་གྱི་མི་དང༌། ཡུལ་གྱི་མི་དང༌། བྲམ་ཟེ་དང༌། ཁྱིམ་བདག་རྣམས། བསྟི་སྟང་དུ་བྱེད། བཙུན་པར་བྱེད། རི་མོ་བྱེད། མཆོད་པ་བྱེད་པར་འགྱུར་རོ། །བར་སྣང་ལ་གནས་པའི་ལྷ་དད་པ་དག་ཀྱང་ཆོས་ཉན་པའི་ ཕྱིར་དེའི་ཕྱི་བཞིན་འབྲང་བར་འགྱུར་རོ། །ལྷའི་བུ་རྣམས་ཀྱང་དེ་བསྲུང་བའི་ཕྱིར་རྟག་ཏུ་ཕྱི་བཞིན་འབྲང་བར་འགྱུར་རོ། །གྲོང་ན་འདུག་ཀྱང་རུང༌། གཙུག་ལག་ཁང་ན་ འདུག་ཀྱང་རུང༌། ཆོས་ཡོངས་སུ་འདྲི་བ་དག་ཉིན་མཚན་དུ་དེའི་དྲུང་དུ་འདོང་བར་འགྱུར། །དེ་ལན་བཏབ་པས་དགའ་མགུ་རངས་པར་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ། ཆོས་ཀྱི་རྣམ་གྲངས་འདི་ནི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པའི་ཕྱིར་རོ། །འཇམ་དཔལ། ཆོས་ཀྱི་རྣམ་གྲངས་འདི་ནི་འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་རྟག་ཏུ་བྱིན་གྱིས་བརླབས་པའི་ཕྱིར་རོ། །འཇམ་དཔལ། ཆོས་ཀྱི་རྣམ་གྲངས་ འདི་ནི་འཇིག་རྟེན་གྱི་ཁམས་མང་པོར་ཡང་སྒྲའམ་དབྱངས་སམ་མིང་ཐོས་པར་ཡང་རྙེད་པར་དཀའོ། །འཇམ་དཔལ། འདི་ལྟ་སྟེ། དཔེར་ན། སྟོབས་ཀྱི་འཁོར་ལོ་སྒྱུར་བའི་རྒྱལ་པོ་ ནི་སྟོབས་ཀྱིས་བདག་གི་རྒྱལ་སྲིད་ཐུབ་སྟེ། དེ་ལ་ཕྱིར་རྒོལ་བ་རྒྱལ་པོ་ཟླ་དག་དང་དེ་འཐབ་མོ་བྱེད་པར་གྱུར་ན། སྟོབས་ཀྱི་འཁོར་ལོ་སྒྱུར་བའི་རྒྱལ་པོ་དེ་ལ་དམག་མི་མང་པོ་ཡོད་དེ། དེ་ དག་དང་དགྲ་དེ་དག་འཐབ་བོ། །རྒྱལ་པོ་དེས་དམག་མི་འཐབ་པ་དེ་མཐོང་ནས། དམག་མི་དེ་དག་ལ་དགའ་ཞིང་མགུ་རངས་པར་འགྱུར་རོ། །དེ་དགའ་ཞིང་མགུ་རངས་ནས་དམག་ མི་དེ་དག་ལ་སྦྱིན་པ་རྣམ་པ་དུ་མ་སྦྱིན་པར་བྱེད་དེ། འདི་ལྟ་སྟེ། གྲོང་དང༌། གྲོང་གི་ཞིང་རྣམས་སྦྱིན་ནོ། །གྲོང་ཁྱེར་དང༌། གྲོང་ཁྱེར་གྱི་ཞིང་དང༌། གོས་དང༌། ཐོད་དང༌། ལག་པའི་ རྒྱན་དང༌། མགུལ་རྒྱན་དང༌། གསེར་གྱི་ཚོང་ཚོང་དང༌། རྣ་རྒྱན་དང༌། སེ་མོ་དོ་དང༌། དོ་ཤལ་དང༌། འགྲོན་བུ་དང༌། གསེར་དང༌། དངུལ་དང༌། ནོར་བུ་དང༌། མུ་ཏིག་དང་། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱུ་རུའང་སྦྱིན་པར་བྱེད། གླང་པོ་ཆེ་དང༌། རྟ་དང༌། ཤིང་རྟ་དང༌། རྐང་ཐང་དང༌། བྲན་ཕོ་དང༌། བྲན་མོའང་སྦྱིན་པར་བྱེད། བཞོན་པ་ ༄༅། །དང༑ ཁྱོགས་ཀྱང་སྦྱིན་པར་བྱེད་དོ། གཙུག་གི་ནོར་བུ་ནི་སུ་ལའང་སྦྱིན་པར་མི་བྱེད་དོ། །དེ་ཅིའི་ཕྱིར་ཞེ་ན། རྒྱལ་པོའི་གཙུག་ཏུ་བཏགས་པའི་ནོར་བུ་ དེ་ནི་གཅིག་པུ་ཁོ་ན་ཡིན་པའི་ཕྱིར་རོ། །འཇམ་དཔལ། གང་གི་ཚེ་རྒྱལ་པོས་གཙུག་གི་ནོར་བུ་དེའང་སྦྱིན་པར་བྱེད་པ་ན། རྒྱལ་པོའི་དཔུང་གི་ཚོགས་ཡན་ལག་བཞི་པོ་དེ་ དག་ཐམས་ཅད་ངོ་མཚར་དུ་འགྱུར། རྨད་དུ་འགྱུར་རོ། །འཇམ་དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉིད་ཀྱི་ ལག་སྟོབས་ཀྱི་བསོད་ནམས་ལས་བྱུང་བའི་ཁམས་གསུམ་ཆོས་ཀྱི་རྒྱལ་པོ་མཛད་པའི་ཁམས་གསུམ་དེ་དག་ལ་བདུད་སྡིག་ཅན་གནོན་ཏེ། དེ་ནས་དེ་བཞིན་གཤེགས་པའི་འཕགས་ པའི་དམག་མི་རྣམས་དང༌། བདུད་དུ་འཐབ་མོ་བྱེད་དོ། །འཇམ་དཔལ། དེས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་རྒྱལ་པོ། ཆོས་ ཀྱི་བདག་པོ་འཕགས་པའི་དམག་མི་འཐབ་མོ་བྱེད་པ་དེ་དག་ལ་མདོ་སྡེ་བརྒྱ་སྟོང་རྣམ་པ་དུ་མ་འཆད་དོ། །འཁོར་བཞི་ཡང་དག་པར་དགའ་བར་བྱ་བའི་ཕྱིར་དེ་དག་ལ་མྱ་ངན་ལས་ འདས་པའི་གྲོང་ཁྱེར་དང༌། ཆོས་ཀྱི་གྲོང་ཁྱེར་ཆེན་པོའི་སྦྱིན་པ་བྱིན་ཏེ། མྱ་ངན་ལས་འདས་པས་དེ་དག་ལ་རྗོད་ཅིང་ཆོས་ཀྱི་རྣམ་གྲངས་འདི་ལྟ་བུ་འདི་ནི་མི་འཆད་དོ། །འཇམ་དཔལ། དེ་ལ་ཇི་ལྟར་སྟོབས་ཀྱི་འཁོར་ལོས་སྒྱུར་བའི་རྒྱལ་པོ་དམག་མི་དེ་དག་འཐབ་པ་ན་སྐྱེས་བུའི་རྩལ་ཆེན་པོས་ངོ་མཚར་དུ་གྱུར་ནས་ཕྱིས་བདོག་པ་ཐམས་ཅད་ཀྱི་མཆོག་གཙུག་གི་ནོར་བུ་ འཇིག་རྟེན་ཐམས་ཅད་ཡིད་མི་ཆེས་ཤིང་ངོ་མཚར་དུ་གྱུར་པ་དེ་སྦྱིན་པར་བྱེད་དོ། །འཇམ་དཔལ། ཇི་ལྟར་རྒྱལ་པོ་དེའི་གཙུག་གི་ནོར་བུ་གཙུག་ན་འདུག་པ་དེ་ཡུན་རིང་དུ་བསྲུངས་ པ་དང་དོན་དུ། འཇམ་དཔལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁམས་གསུམ་ན་ཆོས་ཀྱི་རྒྱལ་པོ་ཆེན་པོ་ཆོས་ཀྱི་རྒྱལ་པོ་མཛད་ པ༑ གང་ཚེ་ཉན་ཐོས་དག་དང༌། བྱང་ཆུབ་སེམས་དཔའ་དག་ཕུང་པོའི་བདུད་དམ། ཉོན་མོངས་པའི་བདུད་དང་འཐབ་པ་གཟིགས་ཏེ། དེ་དག་དང་ལྷན་ཅིག་ཏུ་འཐབ་པ་ན། གང་ གི་མི་འདོད་ཆགས་དང་ཞེ་སྡང་དང་གཏི་མུག་ཟད་དེ། ཁམས་གསུམ་པ་ཐམས་ཅད་ནས་བྱུང་ཞིང་བདུད་ཐམས་ཅད་འཇོམས་པ་སྐྱེས་བུའི་རྩལ་ཆེན་པོ་བྱས་པར་གྱུར་པ་དེའི་ ཚེ༑ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཉེས་ནས་འཕགས་པའི་དམག་མི་དེ་དག་ལ་འཇིག་རྟེན་ཐམས་ཅད་དང་མི་མཐུན་པ། འཇིག་རྟེན་ཐམས་ཅད་ལ་ཡིད་མི་ཆེས་པ། སྔོན་མ་བཤད། སྔོན་མ་བསྟན་པའི་ཆོས་ཀྱི་རྣམ་གྲངས་འདི་ལྟ་བུ་འདི་བཤད་དེ། ཀུན་གྱིས་ཐམས་ཅད་མཁྱེན་པ་ཉིད་ཐོབ་པར་ ༄༅། །བྱེད་པ་སྤྱི་གཙུག་གི་ནོར་བུ་ཆེན་པོ་དང་འདྲ་བ། དེ་བཞིན་གཤེགས་པས་ཉན་ཐོས་རྣམས་ལ་རབ་ཏུ་སྦྱིན་ནོ། །འཇམ་དཔལ། འདི་ནི་དེ་བཞིན་གཤེགས་ པ་རྣམས་ཀྱིས་ཆོས་བསྟན་པའི་མཆོག་སྟེ། འདི་ནི་དེ་བཞིན་གཤེགས་པ་རྣམས་ཀྱི་ཆོས་ཀྱི་རྣམ་གྲངས་ཀྱི་མཐུའོ། །ཆོས་ཀྱི་རྣམ་གྲངས་ཐམས་ཅད་ཀྱི་ནང་ན་ཆོས་ཀྱི་རྣམ་གྲངས་ འདི་ཟབ་སྟེ། འཇིག་རྟེན་ཐམས་ཅད་དང་མི་མཐུན་པའོ། །འཇམ་དཔལ། སྟོབས་ཀྱི་འཁོར་ལོས་སྒྱུར་བའི་རྒྱལ་པོ་དེ་ཉིད་ཀྱིས་རིང་དུ་བསྲུངས་པའི་གཙུག་གི་ནོར་བུ་བཀྲོལ་ཏེ། དམག་མི་མཆོག་རྣམས་ལ་བྱིན་བ་དེ་བཞིན་དུ། དེ་བཞིན་གཤེགས་པའི་ཆོས་ཀྱི་རྣམ་གྲངས་གསང་བ་ཡུན་རིང་པོར་གསུངས་པ། ཆོས་ཀྱི་རྣམ་གྲངས་ཐམས་ཅད་ཀྱི་སྤྱི་བོ་ ལ་འདུག་པ། དེ་བཞིན་གཤེགས་པས་མཁྱེན་པ་དེ། དེ་བཞིན་གཤེགས་པས་དེ་རིང་ཡང་དག་པར་རབ་ཏུ་སྟོན་ཏོ། །དེ་ནས་བཅོམ་ལྡན་འདས་དོན་འདི་ཉིད་རྒྱས་པར་སྟོན་ ཅིང་དེའི་ཚེ་ཚིགས་སུ་བཅད་བ་འདི་དག་བཀའ་སྩལ་ཏོ། །བྱམས་པའི་སྟོབས་ནི་རབ་ཏུ་སྟོན་པར་བྱེད། །རྟག་ཏུ་སེམས་ཅན་ཀུན་ལ་སྙིང་ཡང་བརྩེ། །བདེ་བར་གཤེགས་པས་ བསྔགས་པའི་མདོ་སྡེ་མཆོག །འདི་འདྲའི་ཆོས་འདི་རབ་ཏུ་སྟོན་པར་བྱེད། །གང་དག་ཁྱིམ་ན་གནས་དང་རབ་བྱུང་དང༌། །བྱང་ཆུབ་སེམས་དཔའ་མ་ཡིན་ཕྱི་དུས་དེར། །ཆོས་ འདི་ཐོས་ནས་སྨོད་པར་འགྱུར་འོང་ཞེས། །ཐམས་ཅད་ལའང་དེས་ནི་བྱམས་སྟོབས་བསྟན། །བདག་གིས་བྱང་ཆུབ་རྗེས་སུ་འཐོབ་འགྱུར་ཏེ། །དེ་བཞིན་གཤེགས་ལ་འཇུག་ པར་ནམ་གྱུར་པ། །དེ་ཚེ་ཐབས་ལ་གནས་ནས་ཁྱེད་ལ་སྦྱིན། །བྱང་ཆུབ་མཆོག་འདི་ཀུན་ཏུ་བསྒྲགས་པར་བྱ། །དཔེར་ན་སྟོབས་ཀྱི་འཁོར་ལོས་སྒྱུར་རྒྱལ་གྱིས། །མགུ་ནས་དམག་མི་ རྣམས་ལ་མགྲོན་མང་བྱིན། །གླང་ཆེན་རྟ་དང་ཤིང་རྟ་རྐང་ཐང་དང༌། །གྲོང་རྣམས་དང་ནི་གྲོང་ཁྱེར་རྣམས་ཀྱང་བྱིན། །དགའ་ནས་ཁ་ཅིག་ལ་ནི་ལག་པའི་རྒྱན། །དངུལ་དང་གསེར་གྱི་ཚོང་ ཚོང་རྣམས་ཀྱང་བྱིན། །མུ་ཏིག་ནོར་བུ་བྱུ་རུ་མན་ཤེལ་དང༌། །སྦྱིན་པར་བྱ་བ་རྣམ་པ་མང་པོ་བྱིན། །གང་ཚེ་དེ་ནི་དེ་ལ་གང་ཞིག་གིས། །ཚམ་ཚོམ་མེད་པའི་མཆོག་གིས་ངོ་མཚར་ གྱུར༑ ༑དེ་ཡིས་ངོ་མཚར་བྱས་པར་ཤེས་ནས་སུ། །ཅོད་པན་ལས་ནི་ནོར་བུ་བཀྲོལ་ཏེ་བྱིན། །བཟོད་པའི་སྟོབས་དང་ཤེས་རབ་མཛོད་མང་པོ། །སངས་རྒྱས་ཆོས་རྒྱལ་ངས་ཀྱང་དེ་ བཞིན་དུ། །ཕན་ཞིང་སྙིང་རྗེའི་རྗེས་སུ་ཐུགས་བརྩེའི་ཕྱིར། །ཆོས་ཀྱིས་འཇིག་རྟེན་འདི་དག་ཐམས་ཅད་བསྟན། །འཚོ་བའི་སེམས་ཅན་དག་ཀྱང་གཟིགས་ནས་སུ། །མདོ་སྡེ་ བྱེ་བ་ཕྲག་སྟོང་རྣམས་ཀྱང་བཤད། །སེམས་ཅན་གང་འདིར་ཉོན་མོངས་འཇོམས་གཙང་བ། །སྲོག་ཆགས་དེ་དག་རྣམས་ཀྱི་མཐུ་མཁྱེན་ནས། །དེ་ནས་ཆོས་རྒྱལ་སྨན་པ་ཆེན་པོ་ ༄༅། །ཡང༑ ༑རྣམ་གྲངས་བྱེ་བ་ཕྲག་བརྒྱ་འཆད་མཛད་ཅིང༌། །སེམས་ཅན་སྟོབས་དང་ཡེ་ཤེས་ལྡན་མཁྱེན་ནས། །གཙུག་གི་ནོར་བུ་ལྟ་བུའི་མདོ་འདི་ བཤད། །མདོ་སྡེ་ཀུན་གྱི་མཆོག་གྱུར་འདི་ཡིན་ཏེ། །འཇིག་རྟེན་དུ་ནི་མདོ་སྡེ་མཐའ་འདི་བཤད། །ངས་ནི་ནམ་ཡང་མ་བཤད་རབ་བསྲུངས་པ། །དེ་ནི་དེ་རིང་བསྒྲགས་ཀྱི་ཐམས་ ཅད་ཉོན། །ང་ནི་ཡོངས་སུ་མྱ་ངན་འདས་གྱུར་ནས། །འདི་འདྲའི་ཆོས་བཞི་འདི་དག་བསྟན་པར་བྱ། །གང་ཞིག་བྱང་ཆུབ་དམ་པ་མཆོག་འདོད་དང༌། །དེ་དག་ང་ཡི་བྱ་བ་རྣམས་ བྱེད་པ། །དེ་ལ་མྱ་ངན་མེད་ཅིང་བར་ཆད་མེད། །མདོག་མི་སྡུག་ཅིང་ན་བར་མི་འགྱུར་དང༌། །དེ་ཡི་མདོག་ཀྱང་ནག་པོར་མི་འགྱུར་ཏེ། །དེ་ནི་གྲོང་ཁྱེར་ངན་པར་ཡོངས་མི་གནས། ། རྟག་ཏུ་མཐོང་དགའ་དྲང་སྲོང་ཆེན་པོ་དེ། །དེ་བཞིན་གཤེགས་པ་བཞིན་དུ་མཆོད་པར་འགྱུར། །ལྷ་ཡི་བུ་ཕོ་གཞོན་ནུ་དེ་དག་ཀྱང༌། །རྟག་ཏུ་དེ་ཡི་གཡོག་ཀྱང་བྱེད་པར་འགྱུར། ། དེ་ལ་ནམ་ཡང་མཚོན་དང་དུག་མི་ཚུགས། །ལུས་ལ་བོང་རྡོ་དབྱུག་བས་མི་ཕོག་གོ །དེ་ལ་གང་དག་ཁ་ངན་ཟེར་བ་ནི། །དེ་དག་ཁ་ཡང་ལྐུགས་ཤིང་ཟུམས་པར་འགྱུར། །མྱ་ ངན་ང་འདས་མདོ་འདི་གང་འཛིན་པ། །དེ་ནི་སྲོག་ཆགས་རྣམས་ཀྱི་མཉན་དུ་འགྱུར། །སྣང་བ་ཐོབ་ཅིང་ས་འདིའི་སྟེང་ན་རྒྱུ། །སྲོག་ཆགས་བྱེ་བ་མང་པོའི་རབ་རིབ་སེལ། །དེ་ ཡིས་རྨི་ལམ་བཟང་པོའི་དངོས་མཐོང་སྟེ། །དེས་ནི་དགེ་སློང་དགེ་སློང་མ་ཡང་མཐོང༌། །དེ་བཞིན་བདག་ལུས་སེང་གེའི་ཁྲི་ལ་འདུག །རྣམ་པ་མང་པོའི་ཆོས་རྣམས་སྟོན་པར་བྱེད། ། དེ་ནི་རྨི་ལམ་ན་ཡང་ལྷ་ཀླུ་དང༌། །གནོད་སྦྱིན་ལྷ་མིན་གངྒཱའི་བྱེ་མ་སྙེད། །ཐམས་ཅད་ཐལ་མོ་སྦྱར་བ་དེ་དག་ལ། །ཆོས་ཀྱི་དམ་པ་རྣམ་པ་མང་པོ་འཆད། །དེ་ནི་རྨི་ལམ་དེ་བཞིན་ གཤེགས་མཐོང་སྟེ། །སྲོག་ཆགས་བྱེ་བ་མང་ལ་ཆོས་སྟོན་ཅིང༌། །འོད་ཟེར་སྟོང་དག་རབ་ཏུ་འགྱེད་མཛད་ལ། །མགོན་པོ་དབྱངས་སྙན་གསེར་གྱི་མདོག་འདྲ་མཐོང༌། །དེ་ཡང་ དེ་ན་ཐལ་མོ་སྦྱར་འདུག་ནས། །ཐུབ་པ་རྐང་གཉིས་མཆོག་ལ་མངོན་པར་བསྟོད། །རྒྱལ་པ་སྨན་བ་ཆེན་པོ་དེ་ཡང་ནི། །འཁོར་བཞི་དག་ལ་ཆོས་མཆོག་སྟོན་པ་མཛད། །དེ་ཡིས་ཐོས་ ནས་རབ་ཏུ་དགའ་བར་འགྱུར། །རབ་ཏུ་མགུ་རྐང་གཉིས་མཆོག་ལ་མངོན་པར་བསྟོད། །རྒྱལ་པ་སྨན་བ་ཆེན་པོ་དེ་ཡང་ནི། །འཁོར་བཞི་དག་ལ་ཆོས་མཆོག་སྟོན་པ་མཛད། །དེ་ཡིས་ཐོས་ བོས་དེ་ཡི་བསམ་མཁྱེན་ནས། །རིགས་ཀྱི་བུ་ཁྱོད་མ་འོངས་དུས་ན་འདིར། །ཡེ་ཤེས་བླ་མེད་ཞི་བ་རེག་འགྱུར་ཞེས། །སྐྱེས་བུ་ཁྱུ་མཆོག་ཉིད་དུ་དེ་ལུང་སྟོན། །ཁྱོད་ཀྱི་ཞིང་ཡང་ཤིན་ ཏུ་རྒྱ་ཆེར་འགྱུར། །འཁོར་བཞི་རྣམས་ཀྱང་ཇི་ལྟར་ང་ཡི་བཞིན། །གུས་པར་གྱུར་ཅིང་ཐལ་མོ་རབ་སྦྱར་ཏེ། །དེ་དག་ཟག་མེད་ཆོས་མང་ཉན་པར་འགྱུར། །དེས་ནི་བདག་གི་ལུས་ ༄༅། །ཀྱང་ཡང་མཐོང་བ། །རི་སུལ་དག་ན་ཆོས་ནི་སྒོམ་བྱེད་ཅིང༌། །ཆོས་ལ་གོམས་པར་བྱས་པས་ཆོས་ཉིད་རེག །དེ་ཡིས་ཏིང་ངེ་འཛིན་རྙེད་རྒྱལ་བ་མཐོང༌། གསེར་གྱི་ཁ་དོག་བསོད་ནམས་རྒྱལ་མཚན་ལྡན། །རྨི་ལམ་དག་ན་མཐོང་ནས་ཆོས་ཀྱང་ཉན། །ཐོས་ནས་དེ་ཡང་འཁོར་ལ་རབ་ཏུ་སྟོན། །དེ་ཡི་རྨི་ལམ་དུ་ནི་དེ་འདྲ་རྨི། །རྨི་ ལམ་ན་ཡང་རྒྱལ་སྲིད་ཐམས་ཅད་དང༌། །བཙུན་མོའི་འཁོར་དང་དེ་བཞིན་གཉེན་ཚོགས་སྤངས། །འདོད་པ་ཐམས་ཅད་སྤངས་ཏེ་མངོན་པར་བྱུང༌། །བྱང་ཆུབ་སྙིང་པོ་ག་ལ་ ཡོད་པར་སོང༌། །བྱང་ཆུབ་འདོད་པའི་ཕྱིར་ནི་ཤིང་དྲུང་དེར། །དེ་ན་སེང་གེའི་ཁྲི་ལ་འདུག་ནས་སུ། །དེ་བཞིན་དུ་ཡང་ཞག་བདུན་འདས་ནས་ནི། །དེ་བཞིན་གཤེགས་ཀྱི་ ཡེ་ཤེས་རྗེས་སུ་ཐོབ། །བྱང་ཆུབ་ཐོབ་སྟེ་དེ་ནས་ལངས་ནས་སུ། །ཟག་པ་མེད་པའི་འཁོར་ལོ་རབ་བསྐོར་ཏེ། །བསྐལ་པ་བསམ་གྱིས་མི་ཁྱབ་བྱེ་སྟོང་དུ། །འཁོར་བཞི་དག་ལ་ དེ་ནི་ཆོས་སྟོན་ཏོ། །དེར་ནི་ཟག་པ་མེད་པའི་ཆོས་བསྟན་ནས། །སྲོག་ཆགས་བྱེ་བ་མང་པོ་མྱ་ངན་བཟླས། །རྒྱུ་ཟད་མར་མེ་བཞིན་དུ་མྱ་ངན་འདའ། །དེ་ནི་རྨི་ལམ་རྣམ་པ་དེ་འདྲ་ རྨི༑ ༑ང་ཡིས་ལེགས་བཤད་ང་ཡི་ཆོས་མདོ་མཆོག །གང་ཞིག་ཕྱི་མའི་དུས་ན་རབ་སྟོན་པ། །དེ་ཡི་ཕན་ཡོན་མང་ཞིང་མཐའ་ཡས་ཏེ། །འཇམ་དབྱངས་དེ་དག་འདྲ་བར་ དེ་རྟོག་འགྱུར། །དམ་པའི་ཆོས་པདྨ་དཀར་པོ་ལས། བདེ་བར་གནས་པའི་ལེའུ་ཞེས་བྱ་སྟེ་བཅུ་གསུམ་པའོ།། །།དེ་ནས་འཇིག་རྟེན་གྱི་ཁམས་གཞན་དག་ནས་ལྷགས་ པའི་བྱང་ཆུབ་སེམས་དཔའ་སེམས་དཔའ་ཆེན་པོ་གངྒཱའི་ཀླུང་བརྒྱད་ཀྱི་བྱེ་མ་སྙེད། དེའི་ཚེ་འཁོར་གྱི་དཀྱིལ་འཁོར་དེ་ནས་ལངས་ཏེ་དེ་དག་ལ་ཐལ་མོ་སྦྱར་ནས་བཅོམ་ལྡན་འདས་ ལ་ཕྱག་བཙལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་བཅོམ་ལྡན་འདས་ཀྱིས་བདག་ཅག་ལ་གནང་ན། བཅོམ་ལྡན་འདས། བདག་ཅག་གིས་ཀྱང་དེ་བཞིན་ གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་འཇིག་རྟེན་གྱི་ཁམས་མི་མཇེད་འདིར་ཡང་དག་པར་རབ་ཏུ་བསྟན་པར་བགྱིའོ། །བཀླག་པར་བགྱིའོ། །ཡི་གེར་འདྲི་ བར་བགྱིའོ། །མཆོད་བར་བགྱིའོ། །ཆོས་ཀྱི་རྣམ་གྲངས་འདི་ལ་བརྩོན་པར་བགྱིའོ། །བཅོམ་ལྡན་འདས། ཆོས་ཀྱི་རྣམ་གྲངས་འདི་བདག་ཅག་ལ་ལེགས་པར་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག །ཁྱེད་ཀྱིས་འདི་བྱ་བ་ཅི་དགོས། འཇིག་རྟེན་གྱི་ཁམས་མི་ མཇེད་འདི་ན་ངའི་བྱང་ཆུབ་སེམས་དཔའ་སྟོང་ཕྲག་གངྒཱའི་ཀླུང་དྲུག་ཅུའི་བྱེ་མ་སྙེད་ཡོད་དེ། བྱང་ཆུབ་སེམས་དཔའ་དེ་ལྟ་བུ་རྣམས་ཀྱི་བྱང་ཆུབ་སེམས་དཔའ་རེ་རེའི་གཡོག་ཀྱང༌། བྱང་ཆུབ་ ༄༅། །སེམས་དཔའ་སྟོང་ཕྲག་གངྒཱའི་ཀླུང་དྲུག་ཅུའི་བྱེ་མ་སྙེད་ཁོ་ན་སྟེ། བྱང་ཆུབ་སེམས་དཔའ་དེ་དག་རེ་རེའི་གཡོག་ཀྱང་དེ་སྙེད་དོ། །དེ་དག་ང་ཡོངས་སུ་ མྱ་ངན་ལས་འདས་ནས་ཕྱི་མའི་དུས་ཕྱི་མའི་ཚེ་ན་ཆོས་ཀྱི་རྣམ་གྲངས་འདི་འཛིན་ཏོ། །ཡང་དག་པར་རབ་ཏུ་སྟོན་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་མ་ཐག་ཏུ་ འཇིག་རྟེན་གྱི་ཁམས་མི་མཇེད་འདི་ཀུན་ཏུ་གས། རྣམ་པར་གས་པར་གྱུར་ཏོ། །གས་པ་དེ་དག་གི་བར་ནས་གང་དག་འཇིག་རྟེན་གྱི་ཁམས་མི་མཇེད་འདི་ཉིད་ལ་བརྟེན་ཅིང༌། ས་ ཆེན་པོ་འདིའི་འོག་གི་ནམ་མཁའི་ཁམས་ལ་གནས་པའི་བྱང་ཆུབ་སེམས་དཔའ་ལུས་གསེར་གྱི་ཁ་དོག་ལྟ་བུ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་བྱེ་བ་ ཁྲག་ཁྲིག་བརྒྱ་སྟོང་ཕྲག་མང་པོ་འཐོན་ཏེ། དེ་དག་བཅོམ་ལྡན་འདས་ཀྱི་གསུང་འདི་ལྟ་བུ་འདི་ཐོས་ནས་ས་རུམ་ནས་འཐོན་ཏེ། དེ་དག་ལས་བྱང་ཆུབ་སེམས་དཔའ་རེ་རེ་ཡང༌། གཡོག་བྱང་ཆུབ་སེམས་དཔའ་གངྒཱའི་ཀླུང་དྲུག་ཅུའི་བྱེ་མ་སྙེད་ཡོད་ཅིང༌། ཚོགས་དང་ཚོགས་ཆེན་པོ་དང༌། ཚོགས་ཀྱི་སློབ་དཔོན་ནོ། །བྱང་ཆུབ་སེམས་དཔའ་སེམས་དཔའ་ ཆེན་པོ་ཚོགས་དང་ཚོགས་ཆེན་པོ་དང༌། ཚོགས་ཀྱི་སློབ་དཔོན་འདི་ལྟ་བུའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་དྲུག་ཅུའི་བྱེ་མ་སྙེད་དེ་དག་འཇིག་ རྟེན་གྱི་ཁམས་མི་མཇེད་འདིའི་ས་རུམ་འདི་ནས་འཐོན་པར་གྱུར་ན། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གངྒཱའི་ཀླུང་ལྔ་བཅུའི་བྱེ་མ་སྙེད་ ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གངྒཱའི་ཀླུང་བཞི་བཅུའི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་ དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གངྒཱའི་ཀླུང་སུམ་ཅུའི་བྱེ་མ་སྙེད་ཡོད་པ་རྣམས་ལྟ་ཅི་སྨོས། །བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་ སེམས་དཔའ་གངྒཱའི་ཀླུང་ཉི་ཤུའི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གངྒཱའི་ཀླུང་བཅུའི་བྱེ་མ་སྙེད་ཡོད་ པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གངྒཱའི་ཀླུང་ལྔ་དང༌། བཞི་དང༌། གསུམ་དང༌། གཉིས་ཀྱི་བྱེ་མ་སྙེད་ཡོད་པ་རྣམས་ ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་གངྒཱའི་ཀླུང་གཅིག་གི་བྱེ་མ་སྙེད་ཡོད་པ་རྣམས་ལྟ་ཅི་སྨོས། །བྱང་ཆུབ་སེམས་དཔའ་སེམས་ དཔའ་ཆེན་པོ་གཡོག་བྱང་ཆུབ་སེམས་དཔའ་གངྒཱའི་ཀླུང་ཕྱེད་ཀྱི་བྱེ་མ་སྙེད་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་ ༄༅། །གངྒཱའི་ཀླུང་གི་བྱེ་མའི་བཞི་ཆ་དང༌། དྲུག་ཆ་དང༌། བརྒྱད་ཆ་དང༌། ཉི་ཤུ་ཆ་དང༌། ལྔ་བཅུ་ཆ་དང༌། བརྒྱའི་ཆ་དང༌། སྟོང་གི་ཆ་དང༌། བརྒྱ་ཕྲག་སྟོང་གི་ ཆ་དང༌། བྱེ་བའི་ཆ་དང༌། བྱེ་བ་བརྒྱའི་ཆ་དང༌། བྱེ་བ་སྟོང་གི་ཆ་དང༌། བྱེ་བ་བརྒྱ་སྟོང་གི་ཆ་དང༌། བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཆ་ཡོད་པ་རྣམས་ལྟ་ཅི་སྨོས། །བྱང་ཆུབ་སེམས་ དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་ཡོད་པ་རྣམས་ལྟ་ཅི་སྨོས། །བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་ བྱེ་བ་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་སྟོང་ཕྲག་བརྒྱ་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་ སེམས་དཔའ་ཆེན་པོ་གཡོག་སྟོང་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་ལྔ་བརྒྱ་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་ སེམས་དཔའ་ཆེན་པོ་གཡོག་བཞི་བརྒྱ་དང༌། སུམ་བརྒྱ་དང༌། ཉིས་བརྒྱ་ཡོད་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བརྒྱ་ཡོད་པ་རྣམས་ ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་བྱང་ཆུབ་སེམས་དཔའ་ལྔ་བཅུ་ཡོད་པ་རྣམས་ལྟ་ཅི་སྨོས། དེ་བཞིན་དུ་སྦྱར་ཏེ་བྱང་ཆུབ་སེམས་དཔའ་སེམས་ དཔའ་ཆེན་པོ་གཡོག་བྱང་ཆུབ་སེམས་དཔའ་བཞི་བཅུ་པ་དང༌། སུམ་ཅུ་པ་དང༌། ཉི་ཤུ་པ་དང༌། བཅུ་པ་དང༌། ལྔ་པ་དང༌། བཞི་པ་དང༌། གསུམ་པ་དང༌། གཉིས་པ་རྣམས་ལྟ་ཅི་སྨོས། བྱང་ ཆུབ་སེམས་དཔའ་སེམས་དཔའ་ཆེན་པོ་བདག་དང་གཉིས་པ་རྣམས་ལྟ་ཅི་སྨོས། བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་མེད་པ་དེ་གཅིག་པུ་གནས་པ་རྣམས་ལྟ་ཅི་སྨོས་ཏེ། དེ་དག་གི་གྲངས་སམ། བགྲང་བའམ། དཔེའམ། ཟླའང་མི་དམིགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་འཇིག་རྟེན་གྱི་ཁམས་མི་མཇེད་འདིའི་ས་རུམ་ནས་འཐོན་ནོ། །དེ་ དག་འཐོན་ནས་བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་ཡོངས་སུ་མྱ་ངན་ལས་འདས་པ་དང༌། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་ལྷན་ཅིག་ཏུ་སེང་ གེའི་ཁྲི་གང་ལ་བཞུགས་པའི་རིན་པོ་ཆེའི་མཆོད་རྟེན་ཆེན་པོ་ནམ་མཁའ་བར་སྣང་ལ་གནས་པ་ག་ལ་བ་དེར་དོང་སྟེ་ལྷགས་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་དེ་གཉིས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཉིད་ཀྱི་སྤྲུལ་པ། དེ་བཞིན་གཤེགས་པའི་སྐུ་གང་དག་ཕྱོགས་བཅུ་ ཀུན་གྱི་འཇིག་རྟེན་གྱི་ཁམས་གཞན་དང་གཞན་དག་ནས་འདུས་པ། རིན་པོ་ཆེ་སྣ་ཚོགས་ཀྱི་ཤིང་ལྗོན་པའི་དྲུང་དག་ན་སེང་གེའི་ཁྲི་དག་ལ་བཞུགས་པའི་བཅོམ་ལྡན་འདས་དེ་དག་ཐམས་ཅད་ལ་ ༄༅། །བཏུད་ཅིང་ཕྱག་བཙལ་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ལན་བརྒྱ་སྟོང་དུ་མར་བསྐོར་བ་ བྱས་ནས། བྱང་ཆུབ་སེམས་དཔའི་བསྟོད་པ་རྣམ་པ་དུ་མས་མངོན་པར་བསྟོད་དེ་ཕྱོགས་གཅིག་ཏུ་འཁོད་ནས་ཐལ་མོ་སྦྱར་ཏེ། བཅོམ་ལྡན་འདས་དེ་བཞིན་གཤེགས་པ་དག་ བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང༌། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་ ལ་མངོན་དུ་ཕྱག་འཚལ་ལོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ས་རུམ་ནས་འཐོན་ནས། བར་གྱི་བསྐལ་པ་ལྔ་བཅུ་རྫོགས་པར་འདས་ཀྱི་བར་དུ་དེ་བཞིན་ གཤེགས་པ་རྣམས་ལ་ཕྱག་འཚལ་ཞིང་བྱང་ཆུབ་སེམས་དཔའི་བསྟོད་པ་རྣམ་པ་དུ་མས་བསྟོད་དོ། བར་གྱི་བསྐལ་པ་ལྔ་བཅུ་པོ་དེ་དག་ལ་བཅོམ་ལྡན་འདས་ཤཱཀྱ་ཐུབ་པ་དེ་ཅང་ མི་གསུང་བར་གྱུར་ཏོ། །འཁོར་བཞི་པོ་དེ་དག་ཀྱང་བར་གྱི་བསྐལ་པ་ལྔ་བཅུ་པོ་དེ་དག་ཉིད་ལ་མི་སྨྲ་བར་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱི་རྫུ་འཕྲུལ་མངོན་ པར་འདུ་བྱ་བ་འདི་ལྟ་བུ་མཛད་དེ། རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་མངོན་པར་མཛད་པས་འཁོར་བཞི་པོ་དེ་དག་གིས་དེ་དག་ཕྱི་དྲོ་གཅིག་ཁོ་ན་སྙམ་དུ་ཤེས་སོ། །འཇིག་ རྟེན་གྱི་ཁམས་མི་མཇེད་འདིའང་འཇིག་རྟེན་གྱི་ཁམས་སྟོང་ཕྲག་བརྒྱའི་ནམ་མཁའ་ཙམ་དུ་གྱུར་ཏེ། བྱང་ཆུབ་སེམས་དཔས་ཡོངས་སུ་གང་བར་མཐོང་ངོ༌། །བྱང་ཆུབ་སེམས་དཔའི་ཚོགས་ ཆེན་པོ་དང༌། བྱང་ཆུབ་སེམས་དཔའི་ཕུང་པོ་ཆེན་པོ་དེའི་གཙོ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བཞི་གང་དག་བྱུང་བ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ ཆེན་པོ་སྤྱོད་པ་ཁྱད་པར་ཅན་ཞེས་བྱ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་མཐའ་ཡས་ཞེས་བྱ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་རྣམ་ དག་ཅེས་བྱ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་བརྟན་པ་ཞེས་བྱ་བ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བཞི་པོ་དེ་དག་ནི་བྱང་ཆུབ་སེམས་དཔའི་ ཚོགས་ཆེན་པོ་དང༌། བྱང་ཆུབ་སེམས་དཔའི་ཕུང་པོ་ཆེན་པོ་དེའི་གཙོ་བོར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཞི་པོ་དེ་དག་བྱང་ཆུབ་སེམས་དཔའི་ཚོགས་ ཆེན་པོ་དང༌། བྱང་ཆུབ་སེམས་དཔའི་ཕུང་པོ་ཆེན་པོ་དེའི་མདུན་དུ་འདུག་སྟེ། བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ ལ་གནོད་པ་ཆུང་ལགས་སམ། སྙུན་ཉུང་ལགས་སམ། བདེ་བར་རེག་པ་ལ་གནས་ལགས་སམ། བཅོམ་ལྡན་འདས་ཁྱོད་ཀྱི་སེམས་ཅན་རྣམས་ཚུལ་མཛེས་ལགས་སམ། ལེགས་ ༄༅། །པར་གོ་བ་ལགས་སམ། གདུལ་སླ་བ་ལགས་སམ། རྣམ་པར་སྦྱང་སླ་བ་ལགས་སམ། བཅོམ་ལྡན་འདས་ལ་སྐྱོ་བ་སྐྱེད་པར་མི་བགྱིད་ལགས་སམ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཞི་པོ་དེ་དག་གིས། བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །འཇིག་རྟེན་མགོན་པོ་འོད་མཛད་ པ། །བདེ་བར་རེག་ལ་གནས་ལགས་སམ། །གནོད་ལས་རྣམ་པར་རབ་གྲོལ་ལམ། །སྡིག་པ་མི་མངའ་སྐུ་བདེའམ། །ཁྱོད་ཀྱི་སེམས་ཅན་ཚུལ་མཛེས་སམ། །གདུལ་སླ་ སྦྱང་བར་སླ་ལགས་སམ། །འཇིག་རྟེན་མགོན་གྱིས་བཤད་པ་ན། །སྐྱོ་བ་སྐྱེད་པར་མི་བགྱིད་དམ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཚོགས་ཆེན་པོ་དང༌། བྱང་ཆུབ་སེམས་དཔའི་ཕུང་པོ་ཆེན་པོ་དེའི་གཙོ་བོ་བྱང་ཆུབ་སེམས་དཔའ་བཞི་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག །དེ་བཞིན་ཏེ། བདེ་བར་རེག་པ་ལ་གནས་སོ། །གནོད་ པ་ཆུང་ངོ༌། །སྙུན་ཉུང་ངོ༌། །ངའི་སེམས་ཅན་འདི་དག་ཚུལ་མཛེས་སོ། །གོ་སླའོ། །གདུལ་སླའོ། རྣམ་པར་སྦྱང་སླའོ། །རྣམ་པར་སྦྱོང་བ་ན་ང་ལ་སྐྱོ་བ་མི་སྐྱེའོ། །དེ་ཅིའི་ཕྱིར་ ཞེ་ན། རིགས་ཀྱི་བུ་དག །ང་ཉིད་ཀྱིས་སེམས་ཅན་འདི་དག་སྔོན་གྱི་ཡང་དག་པར་རྫོགས་པའི་སངས་རྒྱས་ཀྱི་ཚེ་ཡོངས་སུ་སྦྱང་བ་བྱས་པའི་ཕྱིར་ཏེ། རིགས་ཀྱི་བུ་དག །ང་མཐོང་ བ་དང་ཐོས་པ་ཙམ་གྱིས་ཀྱང་མོས་པར་འགྱུར་ལ། སངས་རྒྱས་ཀྱི་ཡེ་ཤེས་ལ་འབབ་ཅིང་འདུག་སྟེ། གང་དག་ཉན་ཐོས་ཀྱི་ས་ལ་ཡོངས་སུ་འདྲིས་པར་བྱས་པ་རྣམས་ནི་མ་གཏོགས་ སོ༑ ༑དེ་དག་ཀྱང་ངས་ད་ལྟར་སངས་རྒྱས་ཀྱི་ཡེ་ཤེས་ལ་བཙུད་དེ། དོན་དམ་པ་ཐོས་པར་བྱས་སོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་ཚིགས་སུ་ བཅད་པ་འདི་དག་གསོལ་ཏོ། །དཔའ་བོ་ཆེན་པོ་ལེགས་སོ་ལེགས། །ཁྱོད་ཀྱི་སེམས་ཀྱི་ཚུལ་མཛེས་ཤིང༌། །གདུལ་སླ་རྣམ་པ་སྦྱང་སླ་དང༌། །འདྲེན་པ་གང་དག་ཁྱོད་ཀྱི་ནི། །ཡེ་ཤེས་ ཟབ་མོ་འདི་ཉན་ཅིང༌། །ཐོས་ནས་མོས་པར་འགྱུར་བ་དང༌། །འདྲེན་པར་འཇུག་པར་འགྱུར་བ་ལ། །བདག་ཅག་རྗེས་སུ་ཡི་རང་ངོ༌། །དེ་སྐད་ཅེས་གསོལ་བ་དང༌། བཅོམ་ལྡན་འདས་ཀྱིས་བྱང་ ཆུབ་སེམས་དཔའི་ཚོགས་ཆེན་པོ་དང༌། བྱང་ཆུབ་སེམས་དཔའི་ཕུང་པོ་ཆེན་པོ་དེའི་གཙོ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་བཞི་པོ་དེ་དག་ལ། །རིགས་ཀྱི་བུ་དག །ལེགས་ སོ༑ ༑ལེགས་སོ། །རིགས་ཀྱི་བུ་དག །ཁྱེད་དེ་བཞིན་གཤེགས་པ་ལ་མངོན་པར་བསྟོད་པའང་ལེགས་སོ། །ལེགས་སོ་ཞེས་བྱ་བ་བྱིན་ནོ། །དེའི་ཚེ་བྱང་ཆུབ་སེམས་དཔའ་སེམས་ དཔའ་ཆེན་པོ་བྱམས་པ་དང༌། གཞན་ཡང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་བརྒྱད་ཀྱི་བྱེ་མ་སྙེད་དག་འདི་སྙམ་དུ་སེམས་པར་གྱུར་ཏེ། བྱང་ཆུབ་སེམས་ ༄༅། །དཔའི་ཚོགས་ཆེན་པོ་དང༌། བྱང་ཆུབ་སེམས་དཔའི་ཕུང་པོ་ཆེན་པོ་གང་ས་རུམ་ནས་འཐོན་ཏེ། བཅོམ་ལྡན་འདས་ཀྱི་སྤྱན་སྔར་འདུག་ནས་བཅོམ་ ལྡན་འདས་ལ་བསྟི་སྟང་དུ་བྱེད། བཙུན་པར་བྱེད། བཅོམ་ལྡན་འདས་ལ་དགྱེས་པར་བྱེད་པ་འདི་དག་བདག་ཅག་གིས་སྔོན་མ་མཐོང༌། སྔོན་མ་ཐོས་ན་བྱང་ཆུབ་སེམས་དཔའ་ སེམས་དཔའ་ཆེན་པོ་འདི་དག་ག་ལས་ལྷགས་སྙམ་སེམས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བདག་ཉིད་ཐེ་ཚོམ་དང་སོམ་ཉིར་གྱུར་ བའང་ཤེས། བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་བརྒྱད་ཀྱི་བྱེ་མ་སྙེད་དེ་དག་གི་སེམས་ཀྱི་རྣམ་པར་རྟོག་པའང་སེམས་ ཀྱིས་རིག་ནས་དེའི་ཚེ་ཐལ་མོ་སྦྱར་ཏེ། བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་དོན་དེ་ཞུས་པ། བྱང་ཆུབ་སེམས་དཔའ་སྔོན་མ་བྱུང༌། །བརྒྱ་སྟོང་ཕྲག་ནི་ མང་པོ་དང༌། །བྱེ་བ་ཕྲག་ནི་མཐའ་ཡས་པ། །རྐང་གཉིས་མཆོག་གིས་བསྟན་དུ་གསོལ། །རྫུ་འཕྲུལ་ཆེན་པོ་འདི་དག་རྣམས། །གང་ནས་ཇི་ལྟར་ལྷགས་པར་གྱུར། ། རབ་ཏུ་ཆེ་བའི་ལུས་ཀྱི་གཟུགས། །འདི་དག་གང་ནས་ཇི་ལྟར་ལྷགས། །འདི་དག་ཐམས་ཅད་བརྟན་ལྡན་ཞིང༌། །དྲན་དང་ལྡན་ལ་དྲང་སྲོང་ཆེ། །ཤིན་ཏུ་བལྟ་ན་སྡུག་ བའི་གཟུགས། །འདི་དག་གང་ནས་ལྷག་པར་གྱུར། །བྱང་ཆུབ་སེམས་དཔའ་མཁས་གྱུར་པ། །རེ་རེའི་གཡོག་ཀྱང་དཔག་མི་ལང༌། །གངྒཱའི་བྱེ་མ་ཇི་སྙེད་པ། །དེ་སྙེད་མཆིས་སོ་འཇིག་ རྟེན་དབང༌། །བྱང་ཆུབ་སེམས་དཔའི་གཡོག་རྣམས་ནི། །གྲངས་ལྡན་དྲུག་ཅུར་ཡོངས་ཚང་བ། །གངྒཱའི་ཀླུང་གི་བྱེ་མ་སྙེད། །ཀུན་ཀྱང་བྱང་ཆུབ་ཞུགས་པ་ལགས། །དཔའ་བོ་གཡོག་དང་ ལྡན་གྱུར་པ། །རྣམ་པ་འདི་འདྲའི་སྐྱོ་བ་རྣམས་ཀྱི། །འདི་དག་ཚད་ནི་གངྒཱའི་ཀླུང༌། །དྲུག་ཅུ་ཁོ་ནའི་བྱེ་མ་སྙེད། །གཞན་དག་དེ་བས་ཆེས་མང་སྟེ། །གཡོག་རྣམས་མཐའ་ཡས་ལྡན་པ་ལགས། གངྒཱ་ཕྲག་ནི་ལྔ་བཅུ་དང༌། །བཞི་བཅུ་དང་ནི་སུམ་ཅུ་དང༌། །གངྒཱ་ཉི་ཤུའི་བྱེ་སྙེད་དེ། །གཡོག་འཁོར་དེ་དག་དེ་སྙེད་ལགས། །གཞན་དག་དེ་བས་ཆེས་མང་སྟེ། །དེ་དག་རྣམས་ཀྱི་ བཅུ་དང་ལྔ། །སྐྱོབ་པ་སངས་རྒྱས་སྲས་རྣམས་ཀྱི། །སོ་སོ་རེ་རེའི་གཡོག་གྱུར་པ། །གང་ནས་འདི་འདྲའི་འཁོར་འདི་རྣམས། །རྣམ་པར་འདྲེན་པ་དེ་རིང་ལྷགས། །སོ་སོ་རེ་རེ་རེའི་གཡོག་ གྱུར་པ། །རྗེས་སུ་སློབ་པའི་གྲོགས་པོ་དག །གངྒཱ་བཞི་དང་གསུམ་རྣམས་དང༌། །གཉིས་ཀྱི་བྱེ་མ་སྙེད་ཀྱང་མཆིས། །གཞན་ཡང་དེ་བས་ཆེས་མང་བ། །དེ་ཡི་གྲངས་ནི་མཐའ་ཡས་ ཏེ༑ ༑བསྐལ་པ་བྱེ་བ་སྟོང་དུ་ཡང༌། །དེ་དག་དཔག་པར་ནུས་མ་ལགས། །བྱང་ཆུབ་སེམས་དཔའ་དཔའ་བོ་པ། །སྐྱོབ་པ་དག་གི་གཡོག་རྣམས་ནི། །གངྒཱ་ཕྱེད་དང་སུམ་ཆ་དང༌། བཅུ་ ༄༅། །དང་ཉི་ཤུའི་ཆ་ཡང་མཆིས། །གཞན་ཡང་དེ་བས་ཆེས་མང་སྟེ། །བསྐལ་པ་བྱེ་བ་བརྒྱ་རྣམས་སུ། །རེ་རེ་བགྲང་བར་བགྱིས་ན་ནི། །དེ་དག་རྣམས་ལ་ཚད་མ་ མཆིས། །གཞན་ཡང་དེ་བས་ཆེས་མང་སྟེ། །གཡོག་རྣམས་ཉུང་བ་མ་ལགས་པ། །བྱེ་བ་བྱེ་ཕྲག་བྱེ་བ་དང༌། །དེ་བཞིན་བྱེ་བ་ཕྱེད་པའང་མཆིས། །གཞན་ཡང་དྲང་སྲོང་ཆེ་རྣམས་ཀྱི། ། བྱང་ཆུབ་སེམས་དཔའ་ཤེས་རབ་ཆེ། །བགྲང་བ་ལས་ནི་འདས་པ་རྣམས། །ཐམས་ཅད་གུས་དང་བཅས་པར་གནས། །གཡོག་འཁོར་སྟོང་དང་ལྡན་པ་དང༌། །དེ་བཞིན་བརྒྱ་ དང་ལྔ་བཅུ་དང༌། །བསྐལ་པ་བྱེ་བ་ཕྲག་བརྒྱར་ཡང༌། །དེ་དག་བགྲང་བར་ནུས་མ་ལགས། །དཔའ་བོ་དག་གི་གཡོག་རྣམས་ནི། །ཉི་ཤུ་དག་དང་བཅུ་དང་ལྔ། །དེ་བཞིན་ བཞི་གསུམ་གཉིས་པ་ཡང༌། །དེ་དག་ལ་ནི་གྲང་མ་མཆིས། །གང་དག་བདག་ཉིད་གཅིག་རྒྱུ་ཞིང༌། །གཅིག་བུ་ཞི་བ་མྱོང་བགྱིད་པ། །གང་དག་དེ་རིང་འདིར་ལྷགས་པ། ། དེ་དག་ལ་ཡང་གྲངས་མ་མཆིས། །གྲངས་ཤིང་ལག་ན་ཐོགས་ནས་སུ། །གངྒཱའི་བྱེ་མ་སྙེད་རྣམས་ཀྱི། །བསྐལ་པར་གལ་ཏེ་མིས་བགྲངས་ཀྱང༌། །དེས་ནི་མཐའ་མ་རྙེད་མ་ ལགས། །ཀུན་ཀྱང་ཆེ་བའི་བདག་ཉིད་ཅན། །སྐྱོབ་པ་བརྩོན་འགྲུས་ལྡན་པ་སྟེ། །བྱང་ཆུབ་སེམས་དཔའ་དཔའ་བོ་པ། །འདི་རྣམས་གང་ལས་བྱུང་བ་ལགས། །གང་ གིས་འདི་དག་ཆོས་རྣམས་བསྟན། །བྱང་ཆུབ་ལ་ནི་སུ་ཡིས་བཀོད། །འདི་དག་སུ་ཡི་བསྟན་ལ་མོས། །གང་གིས་བསྟན་པ་འཛིན་པ་ལགས། །ས་འདི་ཐམས་ཅད་བརྟོལ་ནས་ སུ༑ །ཕྱོགས་བཞི་དག་ནི་ཀུན་ནས་ཀྱང༌། །མཁས་ཤིང་རྫུ་འཕྲུལ་ལྡན་པ་ཡང༌། །ཤེས་རབ་ཆེན་པོ་རྣམས་ཀྱང་འཐོན། །བྱང་ཆུབ་སེམས་དཔའ་འཇིགས་བྲལ་བ། །དེ་ལྟར་ འཐོན་པ་འདི་དག་གིས། །ཐུབ་པ་འཇིག་རྟེན་ཁམས་འདི་ཡང༌། །ཀུན་ཏུ་ས་ང་སེང་བགྱིས་ལགས་སོ། །འདི་དག་ནམ་ཡང་བདག་ཅག་གིས། །སྔོན་ཆད་ཡོང་ཡ་མ་མཐོང་ན། །དེ་ ཡི་ཞིང་གི་མི་རྣམས་ནི། །འཇིག་རྟེན་འདྲེན་པས་བསྟན་དུ་གསོལ། །ཕྱོགས་བཅུ་དག་ཏུ་བདག་ཅག་རྣམས། །འདི་ལྟར་ཡང་དང་ཡང་མཆིས་ན། །བྱང་ཆུབ་སེམས་དཔའ་འདི་དག་ ནི༑ ༑བདག་ཅག་རྣམས་ཀྱིས་ཡོང་མ་མཐོང༌། །ཁྱོད་ཀྱི་སྲས་རྣམས་གཅིག་ཀྱང་ནི། །བདག་ཅག་ནམ་ཡང་མ་མཐོང་བ། །འདི་དག་དེ་རིང་འཕྲལ་ལ་མཐོང༌། །ཐུབ་པ་དེ་ཡི་སྤྱོད་ པ་གསུངས། །བྱང་ཆུབ་སེམས་དཔའ་ཁྲག་ཁྲིག་ཕྲག །སྟོང་གི་ཕྲག་ནི་བརྒྱ་རྣམས་ཀྱང༌། །ཐམས་ཅད་ངོ་མཚར་ལྟད་མོར་གྱུར། །རྐང་གཉིས་མཆོག་ལ་དེ་དག་ལྟ། །བྱང་ ཆུབ་སེམས་དཔའ་འཇིགས་བྲལ་བ། །དཔའ་བོ་འདི་དག་ག་ལས་མཆིས། །ཕུང་པོ་མི་མངའ་དཔག་ཡས་པ། །དཔའ་བོ་ཆེན་པོ་ལུང་བསྟན་གསོལ། །ཡང་དེའི་ཚེ་བཅོམ་ ༄༅། །ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་སྤྲུལ་པ་གང་དག་ཕྱོགས་བཅུའི་འཇིག་རྟེན་གྱི་ཁམས་གཞན་དག་ན་སེམས་ཅན་རྣམས་ལ་ ཆོས་སྟོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་འཇིག་རྟེན་གྱི་ཁམས་གཞན་དག་ནས་གཤེགས་ ནས༑ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཕྱོགས་བརྒྱད་ཀུན་ནས་རིན་པོ་ཆེའི་ཤིང་ལྗོན་པའི་དྲུང་ དག་ན་རིན་པོ་ཆེའི་སེང་གེའི་ཁྲི་ཆེན་པོ་ལ་སྐྱིལ་མོ་ཀྲུང་བཅས་ཏེ་བཞུགས་པ། དེ་བཞིན་གཤེགས་པ་དེ་དག་གི་སོ་སོའི་ཞབས་འབྲིང་བ་དེ་དག་གིས་ཀྱང་བྱང་ཆུབ་སེམས་ དཔའི་ཚོགས་ཆེན་པོ་དང༌། བྱང་ཆུབ་སེམས་དཔའི་ཕུང་པོ་ཆེན་པོ་ས་རུམ་ནས་འཐོན་ཏེ་ནམ་མཁའ་ལ་འཁོད་པ་དེ་དག་མཐོང་ནས། ངོ་མཚར་དང་རྨད་དུ་གྱུར། སོ་སོའི་དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མ་མཆིས། གྲངས་མ་མཆིས་པ་འདི་ སྙེད་གང་ནས་ལྷགས། དེ་སྐད་ཅེས་གསོལ་པ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས། རང་རང་གི་ཞབས་འབྲིང་ བ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག །ཁྱེད་ཡུལ་ཙམ་ཞིག་སྔོད་ཅིག་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ། བཅོམ་ལྡན་འདས་ ཤཱཀྱ་ཐུབ་པའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེ། བཅོམ་ལྡན་འདས་ཤཱཀྱ་ཐུབ་པ་དེ་ལ་དོན་འདི་འདྲི་སྟེ། བཅོམ་ལྡན་འདས་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེའི་ལན་ལྡོན་པར་འགྱུར་གྱི། དེ་ལས་ཁྱེད་ཉོན་ཅིག །དེ་ནས་བཅོམ་ལྡན་འདས་ཀྱིས་བྱང་ཆུབ་ སེམས་དཔའ་སེམས་དཔའ་ཆེན་པོ་བྱམས་པ་ལ་བཀའ་སྩལ་པ། མ་ཕམ་པ། གང་ཁྱོད་ཀྱིས་ང་ལ་གནས་རྒྱ་ཆེན་པོ་འདི་དྲིས་པ། མ་ཕམ་པ། ལེགས་སོ། །ལེགས་སོ། །དེ་ ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། རིགས་ཀྱི་བུ་དག །དེ་བཞིན་གཤེགས་པའི་ཡེ་ཤེས་མཐོང་བ་ དང༑ དེ་བཞིན་གཤེགས་པའི་ཁྱུ་མཆོག་ཏུ་གྱུར་པ་དང༌། དེ་བཞིན་གཤེགས་པའི་འཕྲིན་ལས་དང༌། དེ་བཞིན་གཤེགས་པའི་རྣམ་པར་རོལ་པ་དང༌། དེ་བཞིན་གཤེགས་ པའི་མཐུ་བགྱིངས་པ་དང༌། དེ་བཞིན་གཤེགས་པའི་ཕ་རོལ་གནོན་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ཡང་དག་པར་རབ་ཏུ་སྟོན་ ༄༅། །གྱི༑ རིགས་ཀྱི་བུ་དག་དེའི་ཕྱིར། བྱང་ཆུབ་སེམས་དཔའི་ཚོགས་འདི་ཐམས་ཅད་སྒྲིམས་ཤིག །ཤིན་ཏུ་གོ་གྱོན་ལ་མཐུ་བརྟན་པར་གྱིས་ཤིག །དེ་ ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གཞན་མ་ཡིན་པའི་ཚིག་རྣམས་ངས་བཤད་ཀྱི། །རིགས་ཀྱི་བུ་དག་ཐམས་ཅད་རབ་ཏུ་བསྒྲིམས། ། དེ་བཞིན་གཤེགས་ཀྱི་ཡེ་ཤེས་བསམ་མི་ཁྱབ། །འདི་ལ་མཁས་རྣམས་ཞུམ་པར་མ་བྱེད་ཅིག །ཀུན་ཀྱང་བརྟན་དང་ལྡན་ཞིང་དྲན་ལྡན་བྱོས། །ཀུན་ཀྱང་མཉམ་པར་གཞག་ཅིང་གནས་ པར་གྱིས། །དེ་བཞིན་གཤེགས་པ་རྣམས་ཀྱི་ངོ་མཚར་བ། །སྔོན་ཆད་མ་བྱུང་ཆོས་ནི་མཉན་པར་བྱོས། །ངས་ནི་ཁྱེད་ཅག་ལེགས་པར་ཡོངས་དགོད་ཀྱི། །ཐམས་ཅད་ཐེ་ཚོམ་ནམ་ཡང་ མ་བྱེད་ཅིག །རྣམ་པར་འདྲེན་པ་གཞན་དུ་གསུང་མ་ཡིན། །ང་ཡི་ཡེ་ཤེས་ནམ་ཡང་གྲངས་ཡོད་མིན། །བདེ་བར་གཤེགས་པས་ཆོས་ཟབ་ཐུགས་ཆུད་དེ། །བརྟག་མི་ནུས་ ཤིང་དེ་ལ་ཚད་ཀྱང་མེད། །ངས་ནི་ཆོས་དེ་རབ་ཏུ་བསྟན་པར་བྱས། །དེ་དག་ཅི་འདྲ་ཅི་ལྟ་ང་ལས་ཉོན། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་དེ་དག་བཀའ་ སྩལ་ནས། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བཀའ་སྩལ་པ། མ་ཕམ་པ་ཁྱོད་མོས་པར་བྱ། ཁྱོད་ཁོང་དུ་ཆུད་པར་བྱའོ། །མ་ཕམ་པ་ཁྱོད་བྱང་ ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད། གྲངས་མེད་བསམ་གྱིས་མི་ཁྱབ་གཞལ་དུ་མེད། བགྲང་དུ་མེད་པ་གང་དག་ཁྱོད་ཀྱིས་སྔོན་མ་མཐོང་བ་ས་རུམ་ནས་ གདོད་འཐོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ཐམས་ཅད་ནི། མ་ཕམ་པ། ང་འཇིག་རྟེན་གྱི་ཁམས་མི་མཇེད་འདིར་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ང་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཙུད་དེ་ཡོངས་སུ་བསྔོས་སོ། །རིགས་ཀྱི་བུ། འདི་དག་ནི་ ངས་བྱང་ཆུབ་སེམས་དཔའི་ཆོས་འདི་ལ་ཡོངས་སུ་སྨིན་པར་བྱས་པ། རབ་ཏུ་བཀོད་པ་བཞག་པ། ཡོངས་སུ་གནས་པར་བྱས་པ། བཙུད་པ་ཁོང་དུ་ཆུད་པར་བྱས་པ་དག་གོ །མ་ཕམ་པ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི་འཇིག་རྟེན་གྱི་ཁམས་མི་མཇེད་འདིའི་འོག་གི་ནམ་མཁའི་ཁམས་ཀྱི་ཡོངས་སུ་ཟིན་པ་ན་གནས་ཏེ། ཁ་ཏོན་དང༌། ལུང་ནོད་པ་ དང༑ ཚུལ་བཞིན་ཡིད་ལ་བྱེད་པ་ལ་ཞུགས་པ་དག་གོ །རིགས་ཀྱི་བུ། འདི་དག་ནི་འདུ་འཛི་ལ་མི་དགའ་ཞིང༌། འདུ་འཛི་མེད་པ་ལ་དགའ་བ། བརྩོན་པ་མི་འདོར་ཞིང་བརྩོན་འགྲུས་ བརྩམས་པ་དག་གོ །མ་ཕམ་པ། རིགས་ཀྱི་བུ་འདི་དག་ནི་དབེན་པ་ལ་མངོན་པར་དགའ་ཞིང་དབེན་པ་ལ་མོས་པ་སྟེ། རིགས་ཀྱི་བུ། འདི་དག་ནི་ལྷ་དང་མི་ལ་བརྟེན་ཅིང་མི་གནས་ ༄༅། །སོ༑ ༑རིགས་ཀྱི་བུ། འདི་དག་ནི་འདུ་འཛི་མེད་པའི་སྤྱོད་པ་ལ་དགའ་བ། ཆོས་ཀྱི་ཀུན་དགའ་བ་ལ་མོས་པ། སངས་རྒྱས་ཀྱི་ཡེ་ཤེས་ལ་བརྩོན་པ་ དག་གོ །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་ཆུབ་སེམས་དཔའ་འདི་དག་དཔག་མེད་པ། །འདི་དག་བསམ་གྱིས་ མི་ཁྱབ་ཚད་ཀྱང་མེད། །རྫུ་འཕྲུལ་ཤེས་རབ་ཐོས་པ་རྣམས་དང་ལྡན། །བསྐལ་པ་བྱེ་བ་མང་པོར་ཡེ་ཤེས་སྤྱད། །ང་ཡིས་འདི་དག་ཐམས་ཅད་བྱང་ཆུབ་ལ། །ཡོངས་སུ་ སྨིན་བྱས་ང་ཡི་ཞིང་ན་འཁོད། །འདི་དག་ཐམས་ཅད་ང་ཡིས་སྨིན་བྱས་ཏེ། བྱང་ཆུབ་སེམས་དཔའ་འདི་དག་ང་ཡི་བུ། །འདི་དག་ཐམས་ཅད་མགོན་དང་སྦྱངས་ལ་མོས།། འདུ་འཛི་ས་ནི་རྟག་ཏུ་སྤོང་བར་བྱེད། །ང་ཡི་སྤྱོད་པ་མཆོག་གི་རྗེས་སློབ་ཅིང༌། །ང་བུ་འདི་དག་འདུ་འཛི་མེད་པར་སྤྱོད། །ནམ་མཁས་ཡོངས་སུ་འཛིན་པ་དེར་གནས་ ཏེ༑ ༑ཞིང་འདིའི་འོག་ན་དཔའ་རྣམས་ཡོངས་སུ་སྤྱོད། །བྱང་ཆུབ་སེམས་དཔའ་འདི་ནི་ཀུན་སྒྲུབ་ཅིང༌། །ཉིན་མཚན་དུ་ནི་བག་ཡོད་ཤིན་ཏུ་བརྩོན། །ཐམས་ཅད་བརྩོན་ འགྲུས་བརྩམས་པ་དྲན་དང་ལྡན། །དཔག་ཏུ་མེད་པའི་ཤེས་རབ་སྟོབས་ལ་གནས། །འདི་དག་མི་འཇིགས་པར་ཡང་ཆོས་འཆད་པའི། །འོད་གསལ་འདི་དག་ ཐམས་ཅད་ང་ཡི་བུ། །བྱང་ཆུབ་དམ་པ་འདི་ནི་ངས་ཐོབ་ནས། །གྲོང་ཁྱེར་ག་ཡ་དེ་ཡི་ཤིང་དྲུང་དེར། །ཆོས་ཀྱི་འཁོར་ལོ་བླ་ན་མེད་པ་བསྐོར། །ཐམས་ཅད་བྱང་ཆུབ་མཆོག་ འདིར་སྨིན་པར་བྱས། །ཟག་མེད་ཡང་དག་ང་ཡི་ཚིག་འདི་ནི། །ཐོས་ནས་ཐམས་ཅད་ང་ལ་དད་པར་གྱིས། །ང་ཡིས་དེ་ལྟར་བྱང་ཆུབ་མཆོག་ཐོབ་རིང༌། །ངས་ནི་འདི་དག་ཐམས་ཅད་ ཡོངས་སྨིན་བྱས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང༌། །བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་དེ་དག་ངོ་མཚར་དུ་གྱུར། རྨད་དུ་ གྱུར་ནས། ཇི་ལྟར་ན་བཅོམ་ལྡན་འདས་སྐད་ཅིག་བཞུགས་ནས། ཡུན་རིང་པོ་མ་ལོན་པར་བྱང་ཆུབ་སེམས་དཔའ་གྲངས་མེད་པ་འདི་སྙེད་འདི་དག་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་ཡང་དག་པར་བཙུད་དེ་ཡོངས་སུ་སྨིན་པར་མཛད་སྙམས་མོ། །དེ་ནས་བཅོམ་ལྡན་འདས་ལ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་ གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་གཞོན་ནུར་གྱུར་པ་ན། སེར་སྐྱའི་གནས་ཀྱི་ཤཱཀྱའི་གྲོང་ཁྱེར་ནས་མངོན་པར་བྱུང་སྟེ། ག་ཡའི་གྲོང་ཁྱེར་ནས་ཤིན་ཏུ་མི་རིང་ བ་བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། བཅོམ་ལྡན་འདས། དེང་དུ་དེའི་དུས་ ༄༅། །ནས་ལོ་བཞི་བཅུ་ལྷག་ཙམ་ལགས་ན། བཅོམ་ལྡན་འདས། ཇི་ལྟར་དེ་བཞིན་གཤེགས་པས་དུས་འདི་ཙམ་གྱིས་དེ་བཞིན་གཤེགས་པའི་མཛད་ པ་དཔག་ཏུ་མ་མཆིས་པ་འདི་དང༌། དེ་བཞིན་གཤེགས་པའི་ཁྱུ་མཆོག་ཏུ་གྱུར་པ་དང༌། དེ་བཞིན་གཤེགས་པའི་ཕ་རོལ་གནོན་པ་མཛད་ཅིང་བྱང་ཆུབ་སེམས་དཔའི་ཚོགས་ དང༑ བྱང་ཆུབ་སེམས་དཔའི་ཕུང་པོ་འདི་བཅོམ་ལྡན་འདས་ཀྱིས་དུས་དེ་ཙམ་གྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཙུད་ཅིང་ཡོངས་སུ་སྨིན་པར་མཛད། བཅོམ་ ལྡན་འདས། བྱང་ཆུབ་སེམས་དཔའི་ཚོགས་དང༌། བྱང་ཆུབ་སེམས་དཔའི་ཕུང་པོ་འདི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་བགྲངས་ཀྱང་མཐའ་མི་རྙེད་པ་དེ་ཙམ་དུ། བཅོམ་ ལྡན་འདས། དཔག་ཏུ་མ་མཆིས་པ། དེ་ལྟར་གྲངས་མ་མཆིས་པའི་བྱང་ཆུབ་སེམས་དཔའ་འདི་དག་ནི། ཡུན་རིང་པོར་ཚངས་པར་སྤྱོད་པ་སྤྱད་པ། སངས་རྒྱས་བརྒྱ་སྟོང་ མང་པོ་ལ་དགེ་བའི་རྩ་བ་བསྐྲུན་པ། བསྐལ་པ་བརྒྱ་སྟོང་མང་པོར་ཡོངས་སུ་གྲུབ་པ་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་ན། མི་གཞན་ཞིག་བཙས་ནས་ ལོ་ཉི་ཤུ་རྩ་ལྔ་ལོན་པ་གཞོན་ནུ་ཐོར་བུ་ལང་ཚོ་སྐྲ་ནག་པོ་ཐོག་མའི་ན་ཚོད་དང་ལྡན་པ་འགའ་ཞིག་མཆིས་ལ། དེས་བུ་ལོ་བརྒྱ་ལོན་པ་དག་སྟོན་ཅིང༌། རིགས་ཀྱི་བུ་འདི་དག་ ནི་ངའི་བུའོ་ཞེས་དེ་སྐད་སྨྲས་ལ། མི་ལོ་བརྒྱ་ལོན་པ་དེ་དག་ཀྱང་འདི་སྐད་དུ། འདི་ནི་བདག་གི་ཕ་སྟེ་སྐྱེད་པ་ཡིན་ནོ་ཞེས་མཆི་ན། བཅོམ་ལྡན་འདས། མི་དེའི་ཚིག་ལ་འཇིག་ རྟེན་ཡིད་ཆེས་པར་མི་འགྱུར་ཏེ། ཡིད་ཆེས་པར་དཀའ་བ་ལགས་སོ། །བཅོམ་ལྡན་འདས། དེ་བཞིན་དུ་དེ་བཞིན་གཤེགས་པའང་བླ་ན་མེད་པ་ཡང་དག་པར་རྫོགས་པའི་ བྱང་ཆུབ་མངོན་པར་རྫོགས་པའི་སངས་རྒྱས་ནས། རིང་པོ་མ་ལགས་པར་བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མ་མཆིས་པ་མང་པོ་བསྐལ་པ་བྱེ་བ་ཁྲག་ཁྲིག་ བརྒྱ་སྟོང་མང་པོར་ཚངས་པར་སྤྱོད་པ་སྤྱད་པ། ཡུན་རིང་པོར་སངས་རྒྱས་ཀྱི་ཡེ་ཤེས་ལ་ངེས་པར་བགྱིས་པ། ཏིང་ངེ་འཛིན་གྱི་སྒོ་བརྒྱ་སྟོང་ལ་མཉམ་པར་གཞག་པ་དང་ལྡན་པ་ལ་ མཁས་པ། མངོན་པར་ཤེས་པ་ཆེན་པོ་ཡོངས་སུ་སྤྱད་པ་བགྱིས་པ། སངས་རྒྱས་ཀྱིས་ལ་མཁས་པ། དེ་བཞིན་གཤེགས་པའི་ཆོས་རྣམས་ཡང་དག་པར་བརྗོད་པ་ལ་མཁས་ པ༑ འཇིག་རྟེན་ན་ངོ་མཚར་དང་རྨད་དུ་གྱུར་པ། བརྩོན་འགྲུས་དང་སྟོབས་དང་མཐུ་ཆེན་པོ་ཐོབ་པ་དེ་དག་ལ། བཅོམ་ལྡན་འདས་ཀྱིས་འདི་སྐད་དུ། ངས་འདི་དག་ཐོག་མ་ ནས་བྱང་ཆུབ་སེམས་དཔའི་ས་འདི་ལ་ཡང་དག་པར་བཙུད་དེ། ཡོངས་སུ་སྨིན་པར་བྱས་ཤིང་ཡོངས་སུ་བསྔོས་ཏེ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ ༄༅། །མངོན་པར་རྫོགས་པར་སངས་རྒྱས་ནས། ང་ཉིད་ཀྱིས་བརྩོན་འགྲུས་དང་ཕ་རོལ་གནོན་པ་འདི་དག་ཐམས་ཅད་བྱས་སོ་ཞེས་གསུངས་པ་ལ། བཅོམ་ ལྡན་འདས༑ བདག་ཅག་ནི་དེ་བཞིན་གཤེགས་པ་གཞན་མ་ལགས་པར་གསུང་པ་སྟེ། དོན་འདི་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །ཞེས་དེ་བཞིན་གཤེགས་པ་ ལ་ཡིད་ཆེས་ལགས་མོད་ཀྱི། བཅོམ་ལྡན་འདས། བྱང་ཆུབ་སེམས་དཔའ་ཐེག་པ་ལ་གསར་དུ་ཡང་དག་པར་ཞུགས་པ་རྣམས་གནས་འདི་ལ་ཐེ་ཚོམ་འཚལ་བར་འགྱུར་ རོ༑ ༑དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་ཐོས་ན་ཡིད་མི་ཆེས་མི་དད་མི་མོས་པར་འགྱུར་ཏེ། བཅོམ་ལྡན་འདས། དེའི་སླད་དུ་དེ་དག་ནི་ཆོས་ཀྱིས་ཕོངས་པར་འགྱུར་བའི་ལས་མངོན་པར་འདུ་བགྱིད་པ་དང་རྣམ་པར་འགྱུར་རོ། །ཅི་ནས་བདག་ཅག་ཀྱང་ཆེས་འདི་ལ་ཐེ་ཚོམ་འཚལ་བར་མི་ འགྱུར་བ་དང༌། མ་འོངས་པའི་དུས་ནའང་རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ཅན་དག་གིས་ཐོས་ནའང་ཐེ་ཚོམ་འཚལ་བར་མི་འགྱུར་བར་ བཅོམ་ལྡན་འདས་ཀྱིས་དོན་འདི་ལེགས་པར་བཤད་དུ་གསོལ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས། དེའི་ཚེ་བཅོམ་ལྡན་འདས་ལ་ཚིགས་ སུ་བཅད་པ་འདི་དག་གསོལ་ཏོ། །གང་ཚེ་སེར་སྐྱའི་གནས་སུ་བལྟམས་གྱུར་ཅིང༌། །ཤཱཀྱའི་གནས་ནས་མངོན་པར་བྱུང་ནས་སུ། །གྲོང་ཁྱེར་ག་ཡར་བྱང་ཆུབ་བརྙེས་གྱུར་པ། ། འཇིག་རྟེན་མགོན་པོ་དེ་ནས་ཡུན་མི་རིང༌། །འཇིགས་བྲལ་འདི་དག་དང་ནི་གཞན་མང་བ། །ཚོགས་ཆེན་བསྐལ་པ་བྱེ་བར་སྤྱད་པ་སྟེ། །རྫུ་འཕྲུལ་སྟོབས་ལ་གནས་ཤིང་མི་ གཡོ་བ། །ལེགས་བསླབས་ཤེས་རབ་སྟོབས་ཀྱང་རྟོགས་པར་རིག །ཆུ་ཡི་པདྨ་ལྟ་བུར་མ་གོས་པ། །དེ་དག་ས་འདི་བརྟོལ་ནས་དེང་འདིར་ལྷགས། །འཇིག་རྟེན་བདག་པོ་ དྲན་ལྡན་སློབ་མ་སྲས། །ཐམས་ཅད་ཐལ་སྦྱར་གུས་དང་བཅས་ཏེ་མཆིས། །ཁྱོད་ཀྱི་རྨད་བྱུང་འདི་འདྲ་དེ་དག་ལ། །བྱང་ཆུབ་སེམས་དཔའ་ཇི་ལྟར་ཡིད་ཆེས་འགྱུར། །ཐེ་ཚོམ་ གཞོམ་པའི་སླད་དུ་བཀའ་སྩལ་ཏེ། །དོན་འདི་ཅི་བཞིན་ཁྱོད་ཀྱིས་འདིར་བཤད་གསོལ། །དཔེར་ན་འདི་ན་སྐྱེས་བུ་ལ་ལ་ཞིག །བཙས་ནས་ལོ་ནི་ཉི་ཤུ་ལྷག་ལོན་པ། །གཞོན་ ནུ་ཐོར་བུ་ལང་ཚོ་སྐྲ་གནག་དེས། །བཙས་ནས་ལོ་བརྒྱ་ལོན་ལ་བུར་རྟོན་ཅིང༌། །སྐྲ་སྐྱ་གཉེར་མ་ཅན་དག་འདི་སྐད་དུ། །འདི་ནི་བདག་ཅག་ལུས་སྐྱེད་ཡིན་མཆི་ན། །ཐོར་བུའི་བུ་ནི་ འདི་འདྲ་འདི་དག་ལ། །འཇིག་རྟེན་མགོན་པོ་ཤིན་ཏུ་ཡིད་ཆེས་དཀའ། །དེ་བཞིན་བཅོམ་ལྡན་འདས་ཀྱང་སྐུ་གཞོན་ལ། །བྱང་ཆུབ་སེམས་དཔའ་མཁས་པ་མང་པོ་འདི། །དྲན་ ༄༅། །དང་ལྡན་ཞིང་མི་འཇིགས་ཤེས་རབ་ཅན། །བསྐལ་པ་བྱེ་བ་སྟོང་དུ་ལེགས་པར་བསླབས། །བརྟེན་དང་ལྡན་ཞིང་ཤེས་རབ་མཁས་གྱུར་པ། ། ཐམས་ཅད་བྱད་བཞིན་བཟང་ཞིང་བལྟ་ན་སྡུག །ཆོས་རྣམས་གཏན་ལ་དབབ་ཅིང་མི་འཇིགས་པ། །འཇིག་རྟེན་རྣམ་པར་འདྲེན་པས་ཡོངས་སུ་བསྟོད། །རླུང་ལྟར་ཆགས་ པ་མ་མཆིས་རྒྱུ་བ་སྟེ། །ནམ་མཁའི་ཁམས་ལ་རྟག་ཏུ་གནས་མ་ལགས། །སངས་རྒྱས་བྱང་ཆུབ་འདི་ནི་ཡོངས་ཚོལ་ཞིང༌། །བདེ་བར་གཤེགས་ཀྱི་སྲས་རྣམས་བརྩོན་ འགྲུས་སྐྱེད། །འཇིག་རྟེན་མགོན་པོའི་མངོན་སུམ་ཐོས་པས་ན། །བདག་ཅག་ལ་ནི་ཐེ་ཚོམ་གཞར་མ་མཆིས། །འཇིག་རྟེན་རྣམ་འདྲེན་མྱ་ངན་འདས་པ་ན། །འདི་ལ་ཇི་ ལྟ་བུར་ནི་ཡིད་ཆེས་འགྱུར། །ག་[?] འདི་ལ་ནི་ཐེ་ཚོམ་འཚལ་བ་ཡིས། །བྱང་ཆུབ་སེམས་དཔའ་ངན་འགྲོར་མཆིས་ས་རེ། །བཅོམ་ལྡན་ཇི་ལྟར་བྱང་ཆུབ་སེམས་དཔའ་ རྣམས༑ ༑སྨིན་མཛད་ཇི་བཞིན་དེ་ནི་ལུང་བསྟན་གསོལ། །དམ་པའི་ཆོས་པདྨ་དཀར་པོ་ལས། བྱང་ཆུབ་སེམས་དཔའ་ས་རུམ་ནས་འཐོན་པའི་ལེའུ་ཞེས་བྱ་སྟེ། བཅུ་བཞི་ པའོ།། །།དམ་པའི་ཆོས་པདྨ་དཀར་པོ། བམ་པོ་བཅུ་པ། དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ལ་བཀའ་ སྩལ་པ། རིགས་ཀྱི་བུ་དག །དེ་བཞིན་གཤེགས་པ་ངས་ཡང་དག་པའི་ཚིག་སྨྲས་པ་ལ་དད་ཅིང་ཡིད་ཆེས་པར་གྱིས་ཤིག། ལན་གཉིས་ལན་གསུམ་དུའང་བཅོམ་ལྡན་འདས་ཀྱིས་ བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག །དེ་བཞིན་གཤེགས་པ་ངས་ཡང་དག་པའི་ཚིག་སྨྲས་པ་ལ་དད་ཅིང་ཡིད་ཆེས་པར་གྱིས་ཤིག །དེ་ནས་ཐམས་ ཅད་དང་ལྡན་པའི་བྱང་ཆུབ་སེམས་དཔའི་ཚོགས་ཀྱིས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་མདུན་དུ་བཞག་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ ཅེས་གསོལ་ཏོ། །བཅོམ་ལྡན་འདས་ཀྱིས་དོན་འདི་བཤད་དུ་གསོལ། །བདེ་བར་གཤེགས་པས་བཤད་དུ་གསོལ། དེ་བཞིན་གཤེགས་པས་བཀའ་སྩལ་པ་ལ་བདག་ཅག་ཡིད་ ཆེས་པར་བགྱིད་དོ། །ལན་གཉིས་སུའང་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ དོན་འདི་བཤད་དུ་གསོལ། བདེ་བར་གཤེགས་པས་བཤད་དུ་གསོལ། དེ་བཞིན་གཤེགས་པས་བཀའ་སྩལ་པ་ལ་བདག་ཅག་ཡིད་ཆེས་པར་བགྱིད་དོ། །ལན་གསུམ་ དུའང་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དོན་འདི་བཤད་དུ་གསོལ། ༄༅། །བདེ་བར་གཤེགས་པས་བཤད་དུ་གསོལ། དེ་བཞིན་གཤེགས་པས་བཀའ་སྩལ་པ་ལ་བདག་ཅག་ཡིད་ཆེས་པར་བགྱིད་དོ། །དེ་ནས་བཅོམ་ལྡན་ འདས་ཀྱིས་བྱང་ཆུབ་སེམས་དཔའ་དེ་རྣམས་ཀྱིས་ལན་གསུམ་གྱི་བར་དུ་གསོལ་བ་བཏབ་པ་མཁྱེན་ནས། བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་དག་ དེའི་ཕྱིར་ཏིང་ངེ་འཛིན་གྱི་སྟོབས་བསྐྱེད་པ་འདི་ལྟ་བུ་འདི་ཉོན་ཅིག །རིགས་ཀྱི་བུ་དག །ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་འདིས་ནི། བཅོམ་ལྡན་འདས་ཤཱཀྱ་ ཐུབ་པ་ཤཱཀྱའི་ཁྱིམ་ནས་མངོན་པར་བྱུང་སྟེ། གྲོང་ཁྱེར་ག་ཡ་ཞེས་བྱ་བར་བྱང་ཆུབ་ཀྱི་སྙིང་པོ་མཆོག་དམ་པར་གཤེགས་ནས་ད་གདོད་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་མངོན་པར་རྫོགས་པར་སངས་རྒྱས་སོ་སྙམ་དུ་དེ་ལྟར་ཤེས་མོད་ཀྱི། རིགས་ཀྱི་བུ་དག །ང་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོ་ནས། བླ་ན་མེད་པ་ཡང་དག་པར་ རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །རིགས་ཀྱི་བུ་དག །འདི་ལྟ་སྟེ། དཔེར་ན། མི་ལལ་ཞིག་བྱུང་ལ་དེས་འཇིག་རྟེན་གྱི་ཁམས་གྲངས་མེད་པ་ བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུའི་སའི་ཁམས་ཀྱི་རྡུལ་ཕྲ་རབ་དག་ལས་རྡུལ་ཕྲ་རབ་གཅིག་ཁྱེར་ཏེ། ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་བྱེ་བ་ཁྲག་ ཁྲིག་བརྒྱ་སྟོང་ཕྲག་ལྔ་བཅུ་ཁོ་ན་འདས་ནས་རྡུལ་ཕྲ་རབ་ཀྱི་རྡུལ་དེ་བཞག་ལ། མི་དེས་རྣམ་གྲངས་འདིས་འཇིག་རྟེན་གྱི་ཁམས་དེ་དག་ཐམས་ཅད་ཀྱི་སའི་ཁམས་རྣམས་ཟད་པར་བྱས་ ནས༑ སའི་ཁམས་ཀྱི་རྡུལ་ཕྲ་རབ་ཀྱི་རྡུལ་དེ་དག་ཐམས་ཅད་རྣམ་གྲངས་འདི་དང་བཞག་པའི་ཚུལ་འདིས་ཤར་ཕྱོགས་སུ་བཞག་ན། རིགས་ཀྱི་བུ་དག །འདི་ཇི་སྙམ་དུ་སེམས། འཇིག་ རྟེན་གྱི་ཁམས་དེ་དག་ལ་ལ་ཞིག་གིས་བསམ་པའམ། དཔག་པའམ། བགྲང་བའམ། བརྟག་པར་ནུས་སམ། དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ ཆེན་པོ་བྱམས་པ་དང་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་གྱི་ཁམས་ དེ་དག་ནི་གྲངས་མ་མཆིས་པ། བགྲང་དུ་མ་མཆིས་པ། སེམས་ཀྱིས་ལས་ཡང་དག་པར་འདས་པ་སྟེ། བཅོམ་ལྡན་འདས། ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་ འཕགས་པའི་ཡེ་ཤེས་ཀྱི་བསམ་པའམ། དཔག་པའམ། བགྲང་བའམ། བརྟག་པར་མི་ནུས་སོ། །བཅོམ་ལྡན་འདས། གནས་འདི་ནི། བདག་ཅག་ཕྱིར་མི་ལྡོག་པའི་ས་ལ་ གནས་པའི་བྱང་ཆུབ་སེམས་དཔའ་རྣམས་ཀྱི་བསམ་པའི་སྤྱོད་ཡུལ་དུའང་མི་འགྱུར་ཏེ། བཅོམ་ལྡན་འདས། འཇིག་རྟེན་གྱི་ཁམས་དེ་དག་དེ་ཙམ་དུ་ཚད་མ་མཆིས་པ་ལགས་སོ། །དེ་སྐད་ ༄༅། །ཅེས་གསོལ་པ་དང༌། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག ། ཁྱེད་མོས་པར་བྱའོ། །ཁྱེད་ཀྱིས་ཁོང་དུ་ཆུད་པར་བྱའོ། །རིགས་ཀྱི་བུ་དག། འཇིག་རྟེན་གྱི་ཁམས་ཇི་སྙེད་པ་དེ་དག་ལས། མི་དེས་གང་དག་ཏུ་རྡུལ་ཕྲ་རབ་དེ་དག་བཞག་པ་དང༌། རིགས་ ཀྱི་བུ་དག །གང་དག་ཏུ་མ་བཞག་པའི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་དེ་དག་ཐམས་ཅད་ན་རྡུལ་ཕྲ་རབ་ཀྱི་རྡུལ་ཡོད་པ་དག་ནི། རིགས་ཀྱི་བུ་དག། ང་བླ་ན་མེད་པ་ ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ཇི་སྙེད་པ་དེ་སྙེད་དུ་མེད་དོ། །རིགས་ཀྱི་བུ་དག །གང་ཚུན་ཆད་ངས་ འཇིག་རྟེན་གྱི་ཁམས་མི་མཇེད་འདི་དང༌། འཇིག་རྟེན་གྱི་ཁམས་གཞན་བྱེ་བ་ཁྲག་ཁྲིག་བརྒྱ་སྟོང་དག་ཏུ་སེམས་ཅན་རྣམས་ལ་ཆོས་བསྟན་པ་དེའི་བར་དུ། རིགས་ཀྱི་བུ་དག། ངས་ དེ་བཞིན་གཤེགས་པ་མར་མེ་མཛད་ལ་སོགས་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་ཡོངས་སུ་བརྗོད་པའི་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཡོངས་སུ་མྱ་ངན་ལས་འདའ་བར་བྱ་བའི་ཕྱིར། རིགས་ཀྱི་བུ་དག །ངས་ཐབས་མཁས་པས་ཆོས་བསྟན་པ་མངོན་པར་ བསྒྲུབ་པ་དེ་དག་སྤྲུལ་ཏོ། །རིགས་ཀྱི་བུ་དག །ཡང་དེ་བཞིན་གཤེགས་པ་ནི། སེམས་ཅན་འོངས་ཤིང་ལྷགས་པ་རྣམས་ཀྱི་དབང་པོ་དང་བརྩོན་འགྲུས་ཀྱི་རིམ་པ་ལ་གཟིགས་ནས་། དེ་དང་དེ་དག་ཏུ་བདག་གི་མིང་བརྗོད་ཅིང་དེ་དང་དེ་དག་ཏུ་བདག་ཉིད་ཡོངས་སུ་མྱ་ངན་ལས་འདས་པར་བརྗོད་དེ། ཆོས་ཀྱི་རྣམ་གྲངས་རྣམ་པ་མང་པོས་དེ་ལྟ་དེ་ལྟ་བུར་སེམས་ཅན་རྣམས་ཡོངས་ སུ་ཚིམ་པར་མཛད་དོ། །རིགས་ཀྱི་བུ་དག །དེ་ལ་དེ་བཞིན་གཤེགས་པས་མོས་པ་ཐ་དད་པའི་སེམས་ཅན་དགེ་བའི་རྩ་བ་ཆུང་བ། ཉེ་བའི་ཉོན་མོངས་པ་མང་བ་རྣམས་ལ་འདི་སྐད་དུ། དགེ་ སློང་དག །ང་ནི་ན་གཞོན་ཏེ། མངོན་པར་བྱུང་བ་དང༌། དགེ་སློང་དག །ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་ནོ་ཞེས་གསུང་ ངོ༑ ༑རིགས་ཀྱི་བུ་དག །དེ་ལྟར་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ནས་ཡུན་རིང་མོད་ཀྱི། ང་མངོན་པར་རྫོགས་པར་སངས་རྒྱས་ནས་རིང་པོར་མ་ལོན་ནོ་ཞེས་གསུངས་ ཏེ༑ སེམས་ཅན་རྣམས་ཡོངས་སུ་སྨིན་པར་བྱ་བ་དང་གཟུད་པའི་དོན་མ་གཏོགས་པར་ཆོས་ཀྱི་རྣམ་གྲངས་འདི་དག་མ་བཤད་དོ། །རིགས་ཀྱི་བུ་དག །ཆོས་ཀྱི་རྣམ་གྲངས་དེ་དག་ཐམས་ཅད་ ཀྱང་དེ་བཞིན་གཤེགས་པས་སེམས་ཅན་རྣམས་གདུལ་བའི་ཕྱིར་གསུངས་སོ། །རིགས་ཀྱི་བུ་དག །དེ་བཞིན་གཤེགས་པས་སེམས་ཅན་རྣམས་གདུལ་བའི་ཕྱིར་ཚིག་གང་གསུངས་པ་ ༄༅། །བདག་ལས་སྨོས་ཀྱང་རུང༌། གཞན་ལས་སྨོས་ཀྱང་རུང༌། བདག་ལ་དམིགས་ཀྱང་རུང༌། གཞན་ལ་དམིགས་ཀྱང་རུང་སྟེ། དེ་བཞིན་གཤེགས་པས་ གང་ཅི་བཤད་པའི་ཆོས་ཀྱི་རྣམ་གྲངས་དེ་དག་ཐམས་ཅད་ནི་བདེན་པ་དེ་བཞིན་གཤེགས་པས་གསུངས་པ་སྟེ། འདི་ལ་དེ་བཞིན་གཤེགས་པ་ལ་བརྫུན་དུ་སྨྲ་བ་མེད་དོ། དེ་ཅིའི་ ཕྱིར་ཞེ་ན། དེ་བཞིན་གཤེགས་པས་ཁམས་གསུམ་པ་སྐྱེ་བ་མེད་པ་དང༌། འཆི་བ་མེད་པ་དང༌། འཆི་འཕོ་མེད་པ་དང༌། འབྱུང་བ་མེད་པ་དང༌། འཁོར་བ་མེད་པ་དང༌། ཡོངས་ སུ་མྱ་ངན་ལས་འདའ་བ་མེད་པ་དང༌། བྱུང་བ་མ་ཡིན་པ་དང༌། མ་བྱུང་བ་མ་ཡིན་པ་དང༌། ཡོད་པ་མ་ཡིན་པ་དང༌། མེད་པ་མ་ཡིན་པ་དང༌། དེ་བཞིན་དུ་མ་ཡིན་པ་དང༌། གཞན་དུ་ མ་ཡིན་པ་དང༌། མ་ནོར་བ་དེ་བཞིན་ཉིད་མ་ཡིན་པ་དང༌། མ་ནོར་བ་དེ་བཞིན་ཉིད་མ་ཡིན་པའང་མ་ཡིན་པ་ཡང་དག་པ་ཇི་ལྟ་བ་བཞིན་དུ་གཟིགས་ཤིང༌། ཇི་ལྟར་བྱིས་པ་སོ་སོའི་ སྐྱེ་བོས་མཐོང་བ་དེ་ལྟར་དེ་བཞིན་གཤེགས་པས་ཁམས་གསུམ་པ་གཟིགས་པ་མ་ཡིན་པའི་ཕྱིར་རོ། །དེ་བཞིན་གཤེགས་པ་ནི་གནས་འདི་ལ་མངོན་སུམ་གྱི་ཆོས་དང་ལྡན་ ཏེ༑ བསྙེལ་བ་མི་མངའ་བའི་ཆོས་ཅན་ནོ། །དེ་ལ་དེ་བཞིན་གཤེགས་པས་གང་ཅི་གསུངས་པ་དེ་དག་ཐམས་ཅད་བདེན་ཏེ། མི་རྫུན་ནོ། །ཡང་སེམས་ཅན་སྤྱོད་པ་ཐ་དད་པ་ དང༑ བསམ་པ་ཐ་དད་པ་དང༌། འདུ་ཤེས་དང་རྣམ་པར་རྟོག་པ་སྤྱོད་པ་རྣམས་ཀྱི་དགེ་བའི་རྩ་བ་བསྐྱེད་པའི་ཕྱིར། ཆོས་ཀྱི་རྣམ་གྲངས་རྣམ་པ་མང་པོ་དམིགས་པ་རྣམ་པ་མང་པོས་ བཤད་དོ། །རིགས་ཀྱི་བུ་དག །དེ་བཞིན་གཤེགས་པས་མཛད་པ་གང་ཡིན་པ་དེ་ནི་དེ་བཞིན་གཤེགས་པ་མཛད་དོ། །ཡུན་རིང་པོ་དེ་སྲིད་ནས་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པའི་ཚེའི་ཚད་ནི་དཔག་ཏུ་མེད་དོ། །དེ་བཞིན་གཤེགས་པ་ནི་ཡོངས་སུ་མྱ་ངན་ལས་མི་འདའ་སྟེ་རྟག་ཏུ་བཞུགས་མོད་ཀྱི། འདུལ་བའི་དབང་གིས་ཡོངས་སུ་མྱ་ངན་ ལས་འདས་པའང་སྟོན་ཏོ། །རིགས་ཀྱི་བུ་དག། ངས་ད་དུང་ཡང་སྔོན་གྱི་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བྱས་པའི་ཚེའི་ཚད་དུའང་མ་ཕྱིན་ཏེ། རིགས་ཀྱི་བུ་དག། ངས་ད་དུང་ཡང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དེ་ཉིས་གྱུར་གྱིས་ངའི་ཚེའི་ཚད་ཚང་བར་འགྱུར་རོ། །རིགས་ཀྱི་བུ་དག །ངས་འདི་ལྟར་ཡོངས་སུ་མྱ་ངན་ལས་ནི་མི་འདའ་མོད་ཀྱི་ ཡོངས་སུ་མྱ་ངན་ལས་འདའ་བར་སྨྲས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ་དག །ངས་རྣམ་གྲངས་འདིས་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་ཏེ། ང་ཡོངས་སུ་མྱ་ངན་ ལས་མི་འདའ་བར་ཧ་ཅང་ཡང་ཡུན་རིང་དུ་འདུག་ཅིང་རྒྱུན་དུ་མཐོང་བ[?] སེམས་ཅན་དགེ་བའི་རྩ་བ་མ་བྱས་པ། བསོད་ནམས་དང་བྲལ་བ། དབུལ་པོར་གྱུར་པ། འདོད་པ་ལ་བརྐམ་ ༄༅། །པ༑ ལྡོངས་པ། ལྟ་བ་མང་པོའི་དྲ་བས་ཁེབས་པ་རྣམས་དེ་བཞིན་གཤེགས་པ་བཞུགས་སོ་སྙམ་སྟེ། སླེབས་པར་འཛིན་པའི་འདུ་ཤེས་ཅན་དུ་འགྱུར་ ཞིང་རྙེད་དཀའ་བའི་འདུ་ཤེས་མི་སྐྱེད་དེ། དེ་བཞིན་གཤེགས་པ་བདག་ཅག་དང་ཉེའོ་ཞེས་ཁམས་གསུམ་ནས་འབྱུང་བའི་ཕྱིར་བརྩོན་འགྲུས་མི་རྩོམ་ཞིང༌། དེ་བཞིན་གཤེགས་ པ་དཀོན་པར་འདུ་ཤེས་མི་སྐྱེད་པར་འགྱུར་རོ་སྙམ་སྟེ། རིགས་ཀྱི་བུ་དག །དེའི་ཕྱིར་དེ་བཞིན་གཤེགས་པ་ཐབས་མཁས་པས། དགེ་སློང་དག །དེ་བཞིན་གཤེགས་པ་དག་ འབྱུང་བ་ནི་ཤིན་ཏུ་རྙེད་པར་དཀའོ་ཞེས་ཚིག་དེ་སྐད་གསུང་ངོ༌། །དེ་ཅིའི་ཕྱིར་ཞེ་ན། འདི་ལྟར་སེམས་ཅན་དེ་དག་གིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོས། དེ་བཞིན་ གཤེགས་པ་མཐོང་བར་འགྱུར་ཡང་སྲིད། མི་འགྱུར་ཡང་སྲིད་དེ། རིགས་ཀྱི་བུ་དག །དེའི་ཕྱིར་ངས་དེ་དག་ལ་དམིགས་པ་བྱས་ཏེ། དགེ་སློང་དག །དེ་བཞིན་གཤེགས་པ་ རྣམས་འབྱུང་བ་ནི་རྙེད་པར་དཀའོ་ཞེས་སྨྲས་པ། དེ་དག་གིས་དེ་བཞིན་གཤེགས་པ་དག་འབྱུང་བ་རབ་ཏུ་རྙེད་པར་དཀའ་བར་རིག་ནས་ངོ་མཚར་དུ་འདུ་ཤེས་བསྐྱེད་པར་འགྱུར་ མྱ་ངན་གྱི་འདུ་ཤེས་བསྐྱེད་པར་འགྱུར་རོ། །དེ་བཞིན་གཤེགས་པ་མི་མཐོང་ནའང༌། དེ་བཞིན་གཤེགས་པ་ལ་ལྟ་བས་སྐོམ་པར་འགྱུར་རོ། །དེ་དག་གི་དེ་བཞིན་གཤེགས་པ་ ལ་དམིགས་པ་ཡིད་ལ་བྱེད་པའི་དགེ་བའི་རྩ་བ་དེ་དག་ཡུན་རིང་པོའི་དོན་དང་ཕན་པ་དང་བདེ་བར་གྱུར་པའི་དོན་དུ་རིག་ནས། དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་ མོད་ཀྱི། སེམས་ཅན་རྣམས་འདུལ་བའི་དབང་གིས་ཡོངས་སུ་མྱ་ངན་ལས་འདའ་བར་གསུངས་སོ། །རིགས་ཀྱི་བུ་དག། གང་འདི་སྐད་དུ་གསུངས་པ་དེ་ནི་དེ་བཞིན་གཤེགས་པའི་ ཆོས་ཀྱི་རྣམ་གྲངས་ཏེ། དེ་ལ་དེ་བཞིན་གཤེགས་པ་བརྫུན་དུ་སྨྲ་བ་མེད་དོ། །རིགས་ཀྱི་བུ་དག །འདི་ལྟ་སྟེ། དཔེར་ན། སྐྱེས་བུ་སྨན་པ་ནད་ཐམས་ཅད་རབ་ཏུ་ཞི་བར་བྱ་བ་ལ་མཁས་པ། གསལ་བ་ཡིད་གཞུངས་པ་ཤིན་ཏུ་བྱང་བ་འགའ་ཞིག་ཡོད་ལ། སྐྱེས་བུ་དེ་ལའང་བུ་མང་པོ་བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུའམ། བརྒྱའམ། སྟོང་ཡོད་ པར་གྱུར་ལ། སྨན་པ་དེ་ལོགས་ཤིག་ཏུ་སོང་སྟེ་དེའི་བུ་དེ་དག་ཐམས་ཅད་དབྱིག་དུག་འཐུངས་སམ། མདའ་དུག་འཐུངས་ནས། དེ་རྣམས་དབྱིག་དུག་དང༌། མདའ་དུག་དེ་དག་གིས་སྡུག་ བསྔལ་གྱི་ཚོར་བ་དག་གིས་ཉོན་མོངས་ཤིང་གདུངས་ཏེ་ས་ལ་འགྲེ་ལྡོག་ལ། དེ་ནས་དེ་དག་གི་ཕ་སྨན་པ་ལོགས་ཤིག་ནས་འོངས་ནས། བུ་དེ་རྣམས་དབྱིག་དུག་གམ། མདའ་དུག་ དེའི་སྡུག་བསྔལ་གྱིས་ཉམ་ཐག་སྟེ། ཁ་ཅིག་ནི་འདུ་ཤེས་ལོག་པར་གྱུར། ཁ་ཅིག་ནི་འདུ་ཤེས་མ་ལོག་སྟེ། དེ་དག་ཐམས་ཅད་སྡུག་བསྔལ་དེ་ཉིད་ཀྱིས་ཉམ་ཐག་ལ་ཕ་དེ་མཐོང་ནས་ ༄༅། །མངོན་པར་དགའ་སྟེ། དེ་ལ་འདི་སྐད་ཅེས་ཡབ་བདེ་ཞིང་གནོད་པ་མི་མངའ་སྟེ། ལེགས་པར་བྱོན་ཏམ། བདག་ཅག་གི་ལུས་འཇིག་པར་བྱེད་པ་དབྱིག་དུག་ གམ༑ མདའ་དུག་འདི་ལས་ཡོངས་སུ་དགྲོལ་བར་གསོལ། ཡབ་ཀྱིས་བདག་ཅག་ལ་སྲོག་སྩལ་དུ་གསོལ་ཞེས་སྨྲས་པ་དང༌། དེ་ནས་སྨན་པ་དེས་བུ་དེ་དག་སྡུག་བསྔལ་གྱིས་ཉམ་ཐག་ སྟེ༑ ན་བས་ཉོན་མོངས་ཤིང་གདུང་ཏེ་ས་ལ་འགྲེ་ལྡོག་པ་མཐོང་ནས། དེས་སྨན་ཆེན་པོ་ཁ་དོག་དང་ལྡན་པ། དྲི་དང་ལྡན་པ། རོ་དང་ལྡན་པ་བསྡུས་ནས་རྡོ་ལ་བཏགས་ཏེ། བུ་དེ་དག་ འཐུང་དུ་བཅུག་ནས་འདི་སྐད་ཅེས་བུ་ཁྱོད་རྣམས་སྨན་ཆེན་པོ་ཁ་དོག་དང་ལྡན་པ། དྲི་དང་ལྡན་པ། རོ་དང་ལྡན་པ་འདི་འཐུང་ཞིག །རིགས་ཀྱི་བུ་དག །ཁྱེད་སྨན་བཟང་པོ་འདི་འཐུངས་ ན༑ མྱུར་དུ་དབྱིག་དུག་གམ། མདའ་དུག་ལས་ཐར་ཏེ། བདེ་ཞིང་ནད་མེད་པར་འགྱུར་རོ་ཞེས་སྨྲས་ན། དེ་ནས་སྨན་པ་དེའི་བུ་གང་དག་འདུ་ཤེས་མ་ལོག་པ་དེ་དག་ནི་སྨན་དེའི་ཁ་དོག་མཐོང་ དྲི་བསྣམས། རོ་མྱངས་ནས་མྱུར་དུ་འཐུངས་པ་དང༌། དེ་དག་ནད་ཐམས་ཅད་ལས་ཐམས་ཅད་ཀྱི་ཐམས་ཅད་དུ་ཐར་བར་གྱུར་ཏོ། །དེའི་བུ་གང་དག་འདུ་ཤེས་ལོག་པར་གྱུར་པ་དེ་དག་གིས་ ཕ་དེ་ལ་མངོན་པར་བསྟོད་དེ། འདི་སྐད་དུ་ཡབ་བདེ་ཞིང་གནོད་པ་མི་མངའ་སྟེ། ལེགས་པར་བྱོན་ཏམ། བདག་ཅག་གསོར་གསོལ་ཞེས་ཚིག་དེ་སྐད་སྨྲས་ཏེ་སྨན་བྱིན་པ་མི་འཐུང་ ངོ༑ ༑དེ་ཅིའི་ཕྱིར་ཞེ་ན། འདི་ལྟར་དེ་དག་འདུ་ཤེས་ལོག་པར་གྱུར་པ་དེས་སྨན་དེའི་ཁ་དོག་ཀྱང་མི་འདོད། དྲིའང་མི་འདོད། རོའང་མི་འདོད་དོ། །དེ་ནས་སྐྱེས་བུ་སྨན་པ་དེས་འདི་སྙམ་དུ་ བསམས་ཏེ། བདག་གི་བུ་འདི་དག་དབྱིག་དུག་གམ། མདའ་དུག་དེས་འདུ་ཤེས་ལོག་པར་གྱུར་པས་སྨན་འདིའང་འཐུང་དུ་མ་རུང་སྟེ། ང་ལ་ནི་མངོན་པར་བསྟོད་ན། བདག་གིས་ བུ་འདི་དག་ལ་ཐབས་མཁས་པས་སྨན་འདི་བླུད་དོ་སྙམ་མོ། །དེ་ནས་སྨན་པ་དེ་བུ་དེ་དག་ལ་ཐབས་མཁས་པས་སྨན་བླུད་པར་འདོད་ནས་འདི་སྐད་ཅེས། རིགས་ཀྱི་བུ་དག། ང་ནི་རྒས་ འཁོགས་གཏུགས་ཏེ། ངའི་འཆི་བའི་དུས་ཉེ་བར་གནས་ཀྱི་བུ་ཁྱེད་རྣམས་མྱ་ངན་མ་བྱེད་ཅིག །མི་བདེ་བར་མ་གྱུར་ཅིག །སྨན་ཆེན་པོ་བྱིན་པ་འདི་འདོད་ན་སྨན་འདི་འཐུང་ཞིག་ཅེས་ སྨྲས་ཏེ། བུ་དེ་དག་ལ་ཐབས་མཁས་པས་དེ་སྐད་བསྒོ་ནས། ཡུལ་གཞན་དུ་སོང་སྟེ་ཕྱིན་ནས་བདག་ཤིའོ་ཞེས་བུ་ནད་པ་དེ་དག་ཐོས་པར་བྱས་པ་དང༌། དེ་དག་དེའི་ཚེ་ཤིན་ཏུ་མྱ་ངན་དུ་ གྱུར། ཤིན་ཏུ་སྨྲེ་སྔགས་འདོན་པར་གྱུར་ཏེ། བདག་ཅག་གི་ཕ་མགོན་པོ་སྐྱེད་པ། རྗེས་སུ་སྙིང་བརྩེ་བ་གཅིག་པུ་དེའང་ཤི་བས། དེའི་ཕྱིར་ད་བདག་ཅག་མགོན་མེད་པར་གྱུར་ཏོ་སྙམ་མོ། ། དེ་དག་བདག་ཉིད་མགོན་མེད་པར་མཐོང༌། བདག་ཉིད་སྐྱབས་མེད་པར་མཐོང་ནས་ཕྱིར་ཞིང་མྱ་ངན་བྱེད་པས་གཟིར་བར་གྱུར་ཏེ། དེ་དག་ཕྱིར་ཞིང་མྱ་ངན་བྱེད་པས་གཟིར་བ་དེས་འདུ་ཤེས་ ༄༅། །ལོག་པ་འདུ་ཤེས་མ་ལོག་པར་གྱུར་ཏེ། སྨན་གང་ཁ་དོག་དང་དྲི་དང་རོར་ལྡན་པ་དེའང་ཁ་དོག་དང་དྲི་དང་རོར་ལྡན་པར་ཤེས་ནས་དེ་ནས་དེའི་ཚེ་དེ་འཐུངས་སོ། ། དེ་འཐུངས་ནས་ནད་དེ་ལས་ཐར་བར་གྱུར་ཏོ། །དེ་ནས་སྨན་པ་དེས་བུ་དེ་དག་ནད་སོས་པར་རིག་ནས་སླར་བདག་ཉིད་བསྟན་ན། རིགས་ཀྱི་བུ་དག །འདི་ཇི་སྙམ་དུ་སེམས། སྨན་ པ་ཐབས་མཁས་པ་བྱེད་པ་དེ་ལ་ལ་ལ་དག་དེ་བརྫུན་དུ་སྨྲའོ་ཞེས་ཟེར་རམ། གསོལ་པ། བཅོམ་ལྡན་འདས། དེ་ནི་མ་ལགས་སོ། །བདེ་བར་གཤེགས་པ། དེ་ནི་མ་ལགས་ སོ༑ ༑བཀའ་སྩལ་པ། རིགས་ཀྱི་བུ་དག །དེ་བཞིན་དུ་ངའང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་དཔག་ཏུ་མེད་པ་ནས། བླ་ན་མེད་པ་ཡང་དག་པར་རྫོགས་པའི་ བྱང་ཆུབ་འདི་མངོན་པར་རྫོགས་པར་སངས་རྒྱས་མོད་ཀྱི། ངས་སྐབས་སྐབས་སུ་ཐབས་མཁས་པ་འདི་ལྟ་བུ་དག་སེམས་ཅན་རྣམས་གདུལ་བའི་ཕྱིར་བསྟན་ཏེ། གནས་དེར་ ང་ལ་བརྫུན་དུ་སྨྲ་བར་འགྱུར་བ་གང་ཡང་མེད་དོ། །དེ་ནས་བཅོམ་ལྡན་འདས་དོན་གྱི་རྣམ་པ་འདི་ཉིད་རྒྱས་པར་སྟོན་ཅིང༌། དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ ཏོ༑ ༑བསྐལ་པ་བྱེ་སྟོང་བསམ་གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་འདི་ནི་ངས་ཐོབ་སྟེ། །ང་ནི་རྟག་ཏུ་ཆོས་ཀྱང་ར་བ་འཆད་དོ། །བྱང་ ཆུབ་སེམས་དཔའ་མང་འདི་ཡང་དག་གཟུང༌། །སངས་རྒྱས་ཡེ་ཤེས་ལ་ནི་དེ་དག་དགོད། །སེམས་ཅན་བྱེ་བ་ཁྲག་ཁྲིག་མཐའ་ཡས་པ། །བསྐལ་པ་བྱེ་བ་མང་པོར་སྨིན་པར་ བྱ༑ ༑མྱ་ངན་འདས་པའི་ས་ཡང་བསྟན་བྱ་སྟེ། །སེམས་ཅན་རྣམ་པར་གདུལ་ཕྱིར་ཐབས་བརྗོད་དོ། །དེ་ཚེ་ང་ནི་མྱ་ངན་མི་འདའ་སྟེ། འདི་ཉིད་ན་ནི་ཆོས་རྣམས་རབ་སྟོན་ཏོ། །དེ་ ན་ང་བདག་ཉིད་ཀྱང་བྱིན་གྱིས་བརླབ། །ང་ཡིས་སེམས་ཅན་ཀུན་ཀྱང་བྱིན་གྱིས་བརླབ། །ལོག་པའི་བློ་ལྡན་བླུན་པོའི་མི་རྣམས་ཀྱིས། །འདི་ན་ང་འདུག་པ་ཡང་མི་མཐོང་ངོ༌། །ང་ལུས་ ཡོངས་སུ་མྱ་ངན་འདས་མཐོང་ནས། །རིང་བསྲེལ་རྣམས་ལ་མཆོད་པ་རྣམ་མང་བྱེད། །ང་མ་མཐོང་བས་དེ་དག་སྲེད་པ་སྐྱེད། །དེ་ནས་དེ་དག་སེམས་ཀྱང་དྲང་པོར་འགྱུར། །ནམ་ཞིག་ དེ་དག་འཇམ་ཞིང་མཉན་དྲང་སྟེ། །སེམས་ཅན་ལུས་ཀྱང་བཏང་བར་གྱུར་པ་ན། །དེ་ན་ང་ཡི་ཉན་ཐོས་དགེ་འདུན་བྱས། །བྱ་རྒོད་ཕུང་པོར་ང་ཉིད་དེར་བསྟན་ཏེ། །དེ་ལ་ང་ཡིས་ཕྱིས་ནི་འདི་སྐད་ སྨྲས༑ ༑འདི་ཉིད་ན་སྟེ་མྱ་ངན་ང་མ་འདས། །དགེ་སློང་གང་དག་དེ་ནི་ང་ཐབས་མཁས། །ཡང་ཡང་ང་འབྱུང་འཚོ་བའི་འཇིག་རྟེན་དུ། །སེམས་ཅན་གཞན་གྱི་ང་ནི་མདུན་དུ་བྱས། །དེ་ལ་བྱང་ ཆུབ་མཆོག་འདི་རབ་ཏུ་བཤད། །འཇིག་མགོན་མྱ་ངན་མ་འདས་མ་རྟོགས་པར། །ཁྱོད་ཀྱིས་ང་ཡི་སྒྲ་ཡང་མི་ཐོས་སོ། །སེམས་ཅན་རྣམ་པར་འཇིག་པར་ངས་མཐོང་ཡང༌། །ངས་ནི་ ༄༅། །བདག་གི་ལུས་ཉིད་མ་བསྟན་ཏེ། །རེ་ཞིག་ང་མཐོང་བར་ནི་འདོད་བྱས་ལ། །སྐོམ་པར་གྱུར་ནས་དམ་པའི་ཆོས་བཤད་དོ། །རྟག་ཏུ་ང་ཡི་བྱིན་རླབས་ དེ་འདྲ་སྟེ། །བསྐལ་པ་བསམ་ཡས་བྱེ་བ་སྟོང་དུ་ནི། །བྱ་རྒོད་ཕུང་པོ་འདི་ལས་མི་འཕོ་ཡང༌། །གུད་ན་བྱེ་བ་སྙེད་ཀྱི་མལ་ཆ་ཡོད། །གང་ཚེ་འཇིག་རྟེན་ཁམས་འདི་སེམས་ཅན་ གྱིས༑ ༑བསྐལ་པས་སྲེག་པར་མཐོང་ཞིང་རྟོག་པ་ན། །དེ་ཚེ་ང་ཡི་སངས་རྒྱས་ཞིང་འདི་ནི། །ལྷ་དང་མི་ཡིས་ཡོངས་སུ་གང་བར་འགྱུར། །དེ་དག་རྩེ་ཞིང་དགའ་བ་སྣ་ཚོགས་ལྡན། ། སྐྱེད་མོས་ཁང་བཟང་གཞལ་མེད་བྱེ་བ་ཡོད། །རིན་ཆེན་རི་བོ་རྣམས་དང་དེ་བཞིན་དུ། །མེ་ཏོག་འབྲས་ལྡན་ཤིང་ལྗོན་རྣམས་ཀྱིས་བརྒྱན། །སྟེང་ནས་ལྷ་རྣམས་རྔ་ཆེན་རབ་ཏུ་བརྡུང༌། ། མནྡཱ་ར་ཡི་ཆར་ཡང་ཤིན་ཏུ་འབེབས། །མཁས་པ་གཞན་གང་བྱང་ཆུབ་འདིར་ཞུགས་དང༌། །ང་དང་ཉན་ཐོས་རྣམས་ལ་མངོན་པར་འཐོར། །ང་ཡི་ཞིང་འདི་དེ་ལྟར་རྟག་གནས་ཀྱང༌། ། གཞན་དག་འདི་ལ་བསྐལ་པས་སྲེག་པར་རྟོག། མྱ་ངན་བརྒྱ་ཡིས་གང་ཞིག་གཙེས་པ་དང༌། །འཇིག་རྟེན་ཁམས་ནི་ཤིན་ཏུ་འཇིག་པར་མཐོང༌། །ལོ་མང་བྱེ་བར་དེ་བཞིན་ གཤེགས་རྣམས་དང༌། །ཆོས་དང་ང་ཡི་དགེ་འདུན་ཚོགས་རྣམ་ཀྱི། །མིང་ནི་ནམ་ཡང་ཐོས་པར་མི་འགྱུར་ཏེ། སྡིག་པའི་ལས་ཀྱི་འབྲས་བུ་དེ་འདྲའོ། །ནམ་ཞིག་སེམས་ ཅན་འཇམ་ཞིང་མཉེན་པ་རྣམས། །མི་ཡི་འཇིག་རྟེན་འདིར་ནི་སྐྱེས་གྱུར་ཏེ། །དགེ་བའི་ལས་ཀྱིས་དེ་ལྟར་སྐྱེས་མ་ཐག །ང་ནི་ཆོས་རྣམས་རབ་ཏུ་འཆད་པར་མཐོང༌། །དེ་དག་ལ་ནི་ནམ་ ཡང་ང་མི་འཆད། །བྱ་བ་འདི་འདྲ་མཐའ་ཡས་འདི་དག་སྟེ། །དེ་ཡིས་ཡུན་རིང་ནས་ནི་ང་མཐོང་ངོ༌། །དེ་ལ་རྒྱལ་པ་ཤིན་ཏུ་རྙེད་དཀར་བཤད། །ང་ཡི་ཡེ་ཤེས་སྟོབས་ནི་འདི་འདྲ་སྟེ། ། དེ་ནི་ཤིན་ཏུ་འོད་གསལ་མཐའ་ཡོང་མེད། །ང་ཡི་ཚེ་རིང་བསྐལ་པ་མཐའ་ཡས་ཏེ། །དེ་ནི་སྔོན་གྱི་སྤྱོད་པ་སྤྱད་པས་བསྒྲུབས། །མཁས་རྣམས་འདི་ལ་སོམ་ཉི་མ་བྱེད་པར། །ཐེ་ཚོམ་ཟ་ བ་རྣམས་ནི་མ་ལུས་སྤོངས། །ངས་ནི་ཚིག་དེ་ཡང་དག་རབ་སྨྲས་ཏེ། །རྫུན་གྱི་ཚིག་ནི་ང་ལས་གཞར་མི་འབྱུང༌། །དཔེར་ན་ཐབས་བསླབས་པ་ཡི་སྨན་པ་དེས། །འདུ་ཤེས་ལོག་པར་ གྱུར་པའི་བུ་རྣམས་ཕྱིར། །བདག་ཉིད་མ་ཤི་བཞིན་དུ་ཤི་ཞེས་བརྗོད། །དེ་རྫུན་མི་སྨྲ་སྙམ་དུ་མཁས་པས་རིག །དེ་བཞིན་ང་ཡང་རང་འབྱུང་འཇིག་རྟེན་ཕ། །སྐྱེ་དགུ་ཀུན་གྱི་གསོ་ བྱེད་མགོན་པོ་སྟེ། །བུས་པ་གཏི་མུག་ལོག་པར་རྣམ་རིག་ནས། །མྱ་ངན་མ་འདས་མྱ་ངན་འདའ་བར་བསྟན། །ཅི་ཕྱིར་ཞེ་ན་རྟག་པར་ང་མཐོང་ན། །མི་ཤེས་མ་རིག་པ་རྣམས་ལེ་ལོར་འགྱུར། ། འདོད་པ་ལ་ཡང་བག་མེད་ཡིད་རྟོན་ཏེ། །བག་མེད་རྒྱུ་ཡིས་ངན་འགྲོར་རབ་ཏུ་ལྟུང༌། །སྤྱོད་དང་སྤྱོད་པ་རིག་ནས་རྟག་པར་ཡང༌། །ཅི་ནས་བྱང་ཆུབ་ལ་ནི་དགོད་པ་དང༌། །ཅི་ནས་སངས་རྒྱས་ ༄༅། །ཆོས་རྣམས་ཐོབ་བྱའི་ཕྱིར། །སེམས་ཅན་རྣམས་ལ་ང་ནི་དེ་བཞིན་སྨྲ། །དམ་པའི་ཆོས་པདྨ་དཀར་པོ་ལས། དེ་བཞིན་གཤེགས་པའི་སྐུ་ཚེའི་ཚད་ཀྱི་ ལེའུ་ཞེས་བྱ་སྟེ་བཅོ་ལྔ་པའོ།། །།དེ་བཞིན་གཤེགས་པའི་སྐུ་ཚེའི་ཚད་བསྟན་པ་བཤད་པ་ན། སེམས་ཅན་གྲངས་མེད་དཔག་ཏུ་མེད་པ་རྣམས་ཀྱི་དོན་བྱས་ པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བཀའ་སྩལ་པ། མ་ཕམ་པ། དེ་བཞིན་གཤེགས་པའི་ཚེའི་ཚད་བསྟན་ པའི་ཆོས་ཀྱི་རྣམ་གྲངས་འདི་བཤད་པ་ན། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་དྲུག་ཅུ་རྩ་བརྒྱད་ཀྱི་བྱེ་མ་སྙེད་དག་མི་སྐྱེ་བའི་ཆོས་ལ་བཟོད་པ་སྐྱེས་སོ། ། དེ་སྟོང་དུ་བསྒྲེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་གིས་གཟུངས་ཐོབ་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་སྟོང་གི་འཇིག་ རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། ཐོགས་པ་མེད་པའི་སྤོབས་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ ཆེན་པོ་གཞན་ཡང་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་བྱེ་བ་བརྒྱ་སྟོང་དུ་ཡོངས་སུ་བསྒྱུར་བའི་གཟུངས་ཐོབ་པར་གྱུར་ཏོ། །བྱང་ཆུབ་སེམས་དཔའ་ སེམས་དཔའ་ཆེན་པོ་གཞན་ཡང་སྟོང་གི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས། །ཆོས་ཀྱི་རྣམ་གྲངས་འདི་ཐོས་ནས་ཕྱིར་མི་ལྡོག་པའི་འཁོར་ལོ་བསྐོར་ཏོ། ། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་སྟོང་བར་མའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། །དྲི་མ་མེད་པར་ སྣང་བ་ཞེས་བྱ་བའི་ཆོས་ཀྱི་འཁོར་ལོ་བསྐོར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་སྟོང་ཆུང་ངུའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ ཆོས་ཀྱི་རྣམ་གྲངས་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་བརྒྱད་ཀྱིས་ཐོགས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ ཡང་གླིང་བཞི་པ་བཞིའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་ བཞིས་ཐོགས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་གླིང་བཞི་པ་གསུམ་གྱི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་ རྣམ་གྲངས་འདི་ཐོས་ནས། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་གསུམ་གྱིས་ཐོགས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ ༄༅། །ཡང་གླིང་བཞི་པ་གཉིས་ཀྱི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། བླ་ན་མེད་པ་ཡང་དག་ པར་རྫོགས་པའི་བྱང་ཆུབ་ཏུ་སྐྱེ་བ་གཉིས་ཀྱིས་ཐོགས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་གླིང་བཞི་པ་གཅིག་གི་འཇིག་རྟེན་གྱི་ཁམས་ ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་གཅིག་གིས་ཐོགས་པར་གྱུར་ཏོ། །བྱང་ཆུབ་ སེམས་དཔའ་སེམས་དཔའ་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བརྒྱད་ཀྱི་རྡུལ་ཕྲ་རབ་ཀྱི་རྡུལ་སྙེད་དག་གིས་ཆོས་ཀྱི་རྣམ་གྲངས་འདི་ཐོས་ནས། བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་ཆོས་མངོན་པར་རྟོགས་ པའི་གནས་བསྟན་མ་ཐག་ཏུ། དེའི་མོད་ལ་སྟེང་གི་ནམ་མཁའ་བར་སྣང་ལས་མེ་ཏོག་མནྡཱ་ར་དང༌། མནྡཱ་ར་ཆེན་པོའི་མེ་ཏོག་གི་ཆར་ཆེན་པོ་མངོན་པར་བབ་སྟེ། འཇིག་རྟེན་གྱི་ ཁམས་བྱེ་བ་ཁྲག་ཁྲིག་བརྒྱ་སྟོང་དེ་དག་ན། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་རིན་པོ་ཆེའི་ཤིང་ལྗོན་པའི་དྲུང་དག་ན་སེང་གེའི་ཁྲི་ལ་བཞུགས་པ་དེ་དག་ཐམས་ཅད་ལ་ འཐོར་མངོན་པར་རབ་ཏུ་འཐོར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤའྐྱ་ཐུབ་པ་དང༌། ཡོངས་སུ་མྱ་ངན་ལས་ འདས་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་སེང་གེའི་ཁྲི་ལ་བཞུགས་པ་ལའང་འཐོར། མངོན་པར་རབ་ ཏུ་འཐོར་རོ། །ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་དང༌། འཁོར་བཞི་པོ་དེ་དག་ལའང་འཐོར། །མངོན་པར་རབ་ཏུ་འཐོར་རོ། །བར་སྣང་ལས་ལྷའི་ཙནྡན་དང༌། ཨ་ག་རུའི་ཕྱེ་མའང་རབ་ཏུ་བབ་བོ། །སྟེང་གི་ནམ་མཁའི་བར་སྣང་ལས་རྔ་དག་ཀྱང་མ་བརྡུངས་པར་ཡིད་དུ་འོང་བ་སྙན་ཅིང་འཇམ་པའི་སྒྲ་འབྱིན་ཏོ། །སྟེང་ནས་ལྷའི་རས་བཅོས་བུ་ཟུང་ བརྒྱ་སྟོང་དག་ཀྱང་ལྟུང་ངོ༌། །སྟེང་གི་ནམ་མཁའི་བར་སྣང་ལས་རྒྱན་ཕྲེད་དང༌། སེ་མོ་དོ་དང༌། མུ་ཏིག་གི་ཕྲེང་བ་དང༌། ནོར་བུ་རིན་པོ་ཆེ་དང༌། ནོར་བུ་རིན་པོ་ཆེ་ཆེན་པོ་དག་ཀྱང་ཕྱོགས་ ཐམས་ཅད་དུ་ཀུན་ནས་རབ་ཏུ་འཕྱད་དོ། །རིན་ཐང་མེད་པའི་བདུག་པའི་པོག་ཕོར་རིན་པོ་ཆེ་ལས་བྱས་པ་བརྒྱ་སྟོང་དག་ཀྱང་ཀུན་ནས་རང་རྒྱུའོ། །དེ་བཞིན་གཤེགས་པ་རེ་རེ་ལའང་རིན་ པོ་ཆེའི་གདུགས་གྱི་ཕྲེང་བ་ཚངས་པའི་འཇིག་རྟེན་ལ་ཐུག་པ། སྟེང་གི་ནམ་མཁའ་བར་སྣང་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཛིན་ཏོ། །རྣམ་གྲངས་འདིས་ ༄༅། །སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་དེ་དག་ཐམས་ཅད་ལའང༌། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རིན་པོ་ཆེའི་གདུགས་ ཀྱི་ཕྲེང་བ་ཚངས་པའི་འཇིག་རྟེན་ལ་ཐུག་པ་སྟེང་གི་ནམ་མཁའ་བར་སྣང་ལ་འཛིན་ཏོ། །སོ་སོ་ནས་ཚིགས་སུ་བཅད་པ་མངོན་པར་བསྒྲུབ་པ་ཡང་དག་པར་སངས་རྒྱས་ལ་བསྟོད་པ་ དག་གིས་ཀྱང་དེ་བཞིན་གཤེགས་པ་དེ་དག་ལ་མངོན་པར་བསྟོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་དེའི་ཚེ་ཚིགས་སུ་བཅད་པ་འདི་དག་ གསོལ་ཏོ། །བདེ་བར་གཤེགས་པས་ངོ་མཚར་ཆོས་བསྒྲགས་པ། །འདྲེན་པ་རྣམས་ཀྱི་མཐུ་ཆེན་ཅི་འདྲ་དང༌། །ཇི་ལྟར་སྐུ་ཚེའི་ཚད་ཀྱང་མཐའ་ཡས་པ། །བདག་ཅག་རྣམས་ཀྱིས་ འདི་སྔོན་ཡོང་མ་ཐོས། །བདེ་བར་གཤེགས་པས་མངོན་དུ་རྣམ་ཕྱེ་བ། །འདི་འདྲའི་ཆོས་དེ་དེ་རིང་ཐོས་པས་ན། །སྲོག་ཆགས་བྱེ་བ་སྟོང་རྣམས་དགའ་བས་ཁྱབ། །འཇིག་རྟེན་རྣམ་ པར་འདྲེན་གྱི་ཐུགས་སྲས་ནི། །ཁ་ཅིག་མི་ལྡོག་བྱང་ཆུབ་མཆོག་ལ་འཁོད། །ཁ་ཅིག་གཟུངས་རྣམས་ཀྱི་ནི་མཆོག་ལ་གནས། །ཁ་ཅིག་སྤོབས་པ་ཐོགས་པ་མེད་ལ་འཁོད། །ཁ་ ཅིག་བྱེ་བ་སྟོང་གི་གཟུངས་ལ་གནས། །དེ་བཞིན་གཞན་ཡང་ཞིང་རྡུལ་ཕྲ་རབ་རྙེད། །དེ་དག་སངས་རྒྱས་ཡེ་ཤེས་མཆོག་ལ་གནས། །དེ་བཞིན་ཁ་ཅིག་སྐྱེ་བ་བརྒྱད་ཀྱིས་ན། མཐའ་ ཡས་གཟིགས་པ་རྒྱལ་བ་རྣམས་སུ་འགྱུར། །རྣམ་པར་འདྲེན་པའི་ཆོས་འདི་ཐོས་ནས་སུ། །ཁ་ཅིག་སྐྱེ་བ་བཞི་ལས་རབ་ཏུ་འདས། །གཞན་དག་ཁ་ཅིག་གསུམ་དང་གཉིས་ཀྱིས་ན། །དོན་ དམ་གཟིགས་པ་བྱང་ཆུབ་ཐོབ་པར་འགྱུར། །ཁ་ཅིག་དེ་ན་སྐྱེ་བ་གཅིག་གནས་ནས། །སྲིད་པ་གཞན་ལ་ཐམས་ཅད་མཁྱེན་དུ་འགྱུར། །འདྲེན་པའི་སྐུ་ཚེའི་ཚད་འདི་ཐོས་པས་ན། །འབྲས་ བུ་ཟག་མེད་དེ་འདྲ་རབ་ཏུ་ཐོབ། །སེམས་ཅན་བྱེ་བ་གང་རྣམས་ཆོས་ཐོས་ནས། །བྱང་ཆུབ་སེམས་དཔའ་ལ་ནི་སེམས་བསྐྱེད་པ། །ཞིང་བརྒྱད་དག་གི་ཕྲ་རབ་རྡུལ་སྙེད་དེ། །བགྲངས་ན་ དཔག་མི་ལང་བ་དེ་སྙེད་དོ། །སངས་རྒྱས་བྱང་ཆུབ་འདི་ནི་རབ་བསྟན་པས། །མཐའ་ཡས་པ་གང་ལ་ཚད་ཀྱང་མ་མཆིས་པ། །ནམ་མཁའི་ཁམས་ལྟར་དཔག་ཏུ་མ་མཆིས་ཏེ། །དྲང་སྲོང་ ཆེན་པོས་དེ་འདྲའི་འཕྲིན་ལས་མཛད། །མནྡཱ་ར་བའི་ཆར་པ་རབ་ཏུ་འབབ། །ལྷ་ཡི་བུ་དག་བྱེ་སྟོང་མང་པོ་དང༌། །བརྒྱ་བྱིན་ཚངས་པ་གངྒཱའི་བྱེ་མ་སྙེད། །ཞིང་སྟོང་བྱེ་བ་དག་ནས་དེ་ དག་ལྷགས། །ཙནྡན་དང་ནི་སྤོས་མཆོག་ཕྱེ་མ་དང༌། །ཨ་ག་རུ་ཡི་ཕྱེ་མས་འཐོར་བཞིན་དུ། །ནམ་མཁའ་ལ་ནི་བྱ་བཞིན་རབ་རྒྱུ་ཞིང༌། །རྒྱལ་བའི་དབང་པོ་ལ་ཡང་ཚུལ་བཞིན་འཐོར།། སྟེང་གི་ནམ་མཁའ་ལས་ནི་རྔ་རྣམས་ཀྱང༌། །མ་བརྡུངས་པར་ནི་སྒྲ་སྙན་ཉིད་ལས་གྲག །ལྷ་རས་བཅོས་བུ་བྱེ་བ་སྟོང་རྣམས་ཀྱང༌། །འདྲེན་པ་རྣམས་ལ་བསྐོར་ཞིང་འཐོར་བར་བགྱིད། ། ༄༅། །བདུག་པ་རིན་ཐང་མ་མཆིས་རི་བ་ཡི། །རིན་ཆེན་པོག་ཕོར་བྱེ་བ་སྟོང་རྣམས་ཀྱང༌། །སྐྱོབ་པ་འཇིག་རྟེན་བདག་པོ་མཆོད་སླད་དུ། །དེ་ན་ཀུན་ཏུ་བདག་ ཉིད་རབ་ཏུ་རྒྱུ། །གདུགས་རྣམས་བྱེ་བ་ཁྲག་ཁྲིག་མཐའ་ཡས་པ། །རིན་ཆེན་དག་ལས་བགྱིས་པ་མཐོ་ཞིང་ཆེ། །ཕལ་ཆེན་ཚངས་པའི་འཇིག་རྟེན་པར་ཐུག་པ། །བྱང་ཆུབ་སེམས་ དཔའ་མཁས་པ་འདི་དག་འཛིན། །རྒྱལ་བའི་བ་དན་བལྟ་སྡུག་བཅས་པ་ཡི། །འདྲེན་པ་རྣམས་ཀྱི་རྒྱལ་མཚན་རབ་ཏུ་བཙུགས། །བདེ་གཤེགས་སྲས་རྣམས་རབ་ཏུ་སེམས་དགའ་ བས༑ ༑ཚིགས་སུ་བཅད་པ་སྟོང་གིས་མངོན་པར་བསྟོད། །དེ་འདྲ་ངོ་མཚར་ཁྱད་འཕགས་རྨད་བྱུང་བ། །སྣ་ཚོགས་འདི་དག་འདྲེན་པ་དེ་རིང་གདའ། །སྐུ་ཚེའི་ཚད་ནི་ངེས་པར་ བསྟན་མཛད་པས། །སེམས་ཅན་འདི་ཀུན་རབ་ཏུ་དགའ་བ་ཐོབ། །ཕྱོགས་བཅུ་དག་ན་དེ་རིང་དོན་རྒྱ་ཆེ། །འདྲེན་པ་རྣམས་ཀྱི་གསུང་ཡང་མངོན་པར་འཕགས། །སྲོག་ ཆགས་བྱེ་བ་སྟོང་རྣམས་ཚིམ་པར་གྱུར། །བྱང་ཆུབ་ཕྱིར་ནི་དགེ་བ་རྣམས་དང་ལྡན། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ ལ་བཀའ་སྩལ་པ། མ་ཕམ་པ། དེ་བཞིན་གཤེགས་པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་བཤད་པ་ན། སེམས་ཅན་གང་དག་གིས་སེམས་བསྐྱེད་པ་གཅིག་ ཙམ་ཞིག་མོས་པ་བསྐྱེད་དམ། མངོན་པར་དད་ན་རིགས་ཀྱི་བུའམ་རིགས་ཀྱི་བུ་མོ་དག་བསོད་ནམས་ཇི་ཙམ་ཞིག་སྐྱེ་བར་འགྱུར་བ་དེ་ལེགས་པར་རབ་ཏུ་ཉོན་ལ་ཡིད་ལ་གཟུང་ཞིག་དང་ དེ་དག་བསོད་ནམས་ཇི་ཙམ་བསྐྱེད་པར་འགྱུར་བ་དེ་བཤད་དོ། །མ་ཕམ་པ། འདི་ལྟ་སྟེ། དཔེར་ན། རིགས་ཀྱི་བུའམ་རིགས་ཀྱི་བུ་མོ་ལ་ལ་བླ་ན་མེད་པ་ཡང་དག་པར་རྫོགས་པའི་ བྱང་ཆུབ་འདོད་དེ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་དུ་ཕ་རོལ་ཏུ་ཕྱིན་པ་ལྔ་པོ་འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང༌། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་ པའི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང༌། བསམ་གཏན་གྱི་ཕ་རོལ་ཏུ་ཕྱིན་པ་སྤྱད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་ན། མ་ཕམ་པ། རིགས་ ཀྱི་བུའམ་རིགས་ཀྱི་བུ་མོ་གང་དག་གིས། དེ་བཞིན་གཤེགས་པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་ཐོས་ནས། སེམས་བསྐྱེད་པ་གཅིག་ཙམ་ཞིག་མོས་པ་བསྐྱེད་དམ། མངོན་པར་དད་ན་དེའི་བསོད་ནམས་མངོན་པར་འདུས་བྱས་པ་འདི་ལ། ཕ་རོལ་ཏུ་ཕྱིན་པ་ལྔ་དང་ལྡན་པ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་དུ་ཡོངས་སུ་རྫོགས་པར་བསོད་ ནམས་མངོན་པར་བྱས་པ་དང༌། དགེ་བའི་རྩ་བ་མངོན་པར་འདུ་བྱས་པ་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ་།སྟོང་གི་ཆ་དང་བརྒྱ་སྟོང་གི་ཆ་དང༌། བྱེ་བའི་ཆ་དང༌། བྱེ་བ་བརྒྱའི་ཆ་དང༌། ༄༅། །བྱེ་བ་སྟོང་གི་ཆ་དང༌། བྱེ་བ་བརྒྱ་སྟོང་གི་ཆ་དང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོ་སྟེ། གྲངས་སུ་ཡང༌། ཆར་ཡང༌། བགྲང་བར་ཡང༌། དཔེར་ཡང༌། རྒྱུར་ཡང་མི་བཟོད་དོ། །མ་ཕམ་པ། དེ་ལྟ་བུའི་བསོད་ནམས་མངོན་པར་འདུ་བྱེད་པ་དང་ལྡན་པའི་རིགས་ཀྱི་བུའམ་རིགས་ཀྱི་བུ་མོ་དེ། བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ལས་ཕྱིར་ལྡོག་པ་དེ་ནི་གནས་མེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་ཡེ་ཤེས་བླ་ན་མེད། །ཡེ་ ཤེས་འདི་ནི་འཚོལ་བའི་ཕྱིར། །གང་གིས་ཕ་རོལ་ཕྱིན་པ་ལྔ། །ཡི་དམ་བཅས་ནས་དེར་ཞུགས་ཏེ། །བསྐལ་པ་བྱེ་བ་སྟོང་ཕྲག་ཀྱང༌། །བརྒྱད་དུ་ཚང་བར་རབ་ཏུ་སྦྱོར། །ཕྱི་ཕྱིར་ ཉན་ཐོས་རྣམས་དང་ནི། །སངས་རྒྱས་རྣམས་ལ་སྦྱིན་པ་བྱིན། །བྱང་ཆུབ་སེམས་དཔའ་བྱེ་བ་དང༌། །རང་སངས་རྒྱས་ནི་མང་པོ་ལ། །བཟའ་བཅའ་ཟས་དང་སྐོམ་རྣམས་དང༌། །གོས་ དང་མལ་ཆས་མགུ་བར་བྱེད། །གནས་དང་གཙུག་ལག་ཁང་རྣམས་ཀྱང༌། །ཙནྡན་ལས་ནི་འདིར་བྱས་དང༌། །ཀུན་དགའ་ར་བ་ཉམས་དགའ་དང༌། །འཆགས་མཛེས་པར་ བྱས་པ་རྣམས། །སྦྱིན་པ་སྣ་ཚོགས་རྣམ་པ་མང༌། །དེ་ལྟ་བུ་ཡི་སྦྱིན་འདིར་བྱིན། །བསྐལ་པ་བྱེ་བ་ཕྲག་སྟོང་དུ། །བྱིན་ནས་བྱང་ཆུབ་ཕྱིར་ཡང་བསྔོས། །སངས་རྒྱས་ཡེ་ཤེས་ཆེད་ ཀྱི་ཕྱིར། །རྫོགས་སངས་རྒྱས་ཀྱིས་བསྔགས་དག་ཅིང༌། །མ་ཉམས་ཡང་དག་བསྟོད་པ་ཡི། །ཚུལ་ཁྲིམས་ཕྱིར་ཞིང་སྲུང་བར་བྱེད། །ཕྱིར་ཞིང་བཟོད་པ་སྒོམ་པར་བྱེད། །འདུལ་བའི་ ས་ལ་རབ་ཏུ་གནས། །བརྟན་དང་ལྡན་ཞིང་དྲན་དང་ལྡན། །ཁ་ངན་མང་པོ་བཟོད་པར་བྱེད། །དམིགས་པ་ཅན་གྱི་སེམས་ཅན་དག །ང་རྒྱལ་དག་ལ་རབ་གནས་པས། །སྨད་པ་བྱས་པ་ དེ་དག་ཀྱང༌། །སངས་རྒྱས་ཡེ་ཤེས་ཕྱིར་བཟོད་དོ། །བརྩོན་འགྲུས་ལ་ནི་རྟག་ཏུ་འབད། །དྲན་པ་བརྟན་ཞིང་མངོན་པར་བརྩོན། །ཡིད་ལ་གཞན་དུ་རྟོག་པ་མེད། །བསྐལ་པ་བྱེ་བར་དེ་ བཞིན་གྱུར། །དགོན་པའི་གནས་ན་རབ་ཏུ་འདུག །འཆག་སར་མངོན་པར་སོང་ནས་སུ། །གཉིད་དང་རྨུགས་པ་རབ་སྤངས་ཏེ། །བསྐལ་པ་བྱེ་བར་དེ་དག་སྤྱོད། །བསམ་གཏན་ བསམ་གཏན་ཆེན་པོ་པ། །བསམ་གཏན་དགའ་ཞིང་མཉམ་པར་གཞག །བསྐལ་པ་བྱེ་བ་སྟོང་ཕྲག་བརྒྱད། །དེ་ལས་མི་ཉུང་བསམ་གཏན་བྱེད། །དཔའ་བོ་དེ་ནི་བསམ་གཏན་དེས། ཐམས་ཅད་མཁྱེན་པར་བདག་བསྒྱུར་ཞེས། །བྱང་ཆུབ་དམ་པ་དོན་དུ་གཉེར། །བསམ་གཏན་དག་གི་ཕ་རོལ་སོང༌། །བསྐལ་པ་བྱེ་བ་ཕྲག་སྟོང་དུ། །བྱ་བ་འདི་ལ་རབ་གནས་པའི། །དེ་ དག་བསོད་ནམས་གང་ཡིན་པ། །གང་སྔར་ཡོངས་སུ་བསྒྲགས་པ་བས། །སྐྱེས་པ་རྣམས་སམ་བུད་མེད་དག །གང་གིས་ང་ཡི་ཚེ་ཐོས་ནས། །སྐད་ཅིག་དད་པར་བྱེད་པ་ཡང༌། །བསོད་ ༄༅། །ནམས་དེ་ནི་མཐའ་ཡས་སོ། །གཡོ་བ་དང་ནི་རློམ་སེམས་དང༌། །ཐེ་ཚོམ་དག་ཀྱང་རྣམ་སྤངས་ཏེ། །ཡུད་ཙམ་ཤིན་ཏུ་མོས་པ་ཡང༌། །དེ་ཡི་འབྲས་བུ་འདི་ འདྲའོ། །བསྐལ་པ་བྱེ་བར་སྤྱོད་པ་ཡི། །བྱང་ཆུབ་སེམས་དཔའ་གང་ཡིན་པ། །དེ་ཚེ་བསམ་གྱིས་མི་ཁྱབ་པ། །འདི་ཐོས་དེ་དག་མི་སྤང་ངོ༌། །སྤྱི་བོ་ཡིས་ཀྱང་ཕྱག་འཚལ་ཏེ། །མ་ འོངས་པ་ཡི་དུས་ན་ཡང༌། །བདག་ཅག་འདི་འདྲར་རབ་གྱུར་ཅིག །སྲོག་ཆགས་བྱེ་བ་བསྒྲལ་བར་བགྱི། །ཇི་ལྟར་མགོན་པོ་ཤཱཀྱ་ཐུབ། །ཐུབ་ཆེན་ཤཱཀྱ་སེང་གེ་ཡིས། །བྱང་ཆུབ་ སྙིང་པོར་བཞུགས་ནས་སུ། །སེང་གེའི་སྒྲ་འདི་བསྒྲགས་པ་ལྟར། །བདག་ཀྱང་མ་འོངས་དུས་ཀྱི་ཚེ། །ལུས་ཅན་ཀུན་གྱིས་བཀུར་སྟི་ཞིང༌། །བྱང་ཆུབ་སྙིང་པོར་འདུག་ནས་ནི། །འདི་ལྟ་བུ་ ཡི་ཆོས་བཤད་དོ། །མི་གང་ཐོས་པ་འཛིན་གྱུར་ཅིང༌། །ལྷག་པའི་བསམ་པ་ཕུན་སུམ་ཚོགས། །ལྡེམ་པོར་དགོངས་ཏེ་བཤད་ཅེས་པ། །དེ་དག་རྣམས་ནི་ཐེ་ཚོམ་མེད། །མ་ཕམ་པ། གཞན་ ཡང་དེ་བཞིན་གཤེགས་པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་ཐོས་ནས་འབབ་པ་དང༌། འཇུག་པ་དང༌། ཁོང་དུ་ཆུད་པ་དེ་ནི་དེ་བས་སངས་རྒྱས་ཀྱི་ཡེ་ཤེས་སུ་འགྱུར་བའི་ བསོད་ནམས་མངོན་པར་འདུ་བྱེད་པ་ཆེས་དཔག་ཏུ་མེད་པ་སྐྱེད་ན། གང་ཆོས་ཀྱི་རྣམ་གྲངས་འདི་ལྟ་བུ་འདི་ཉན་ཏམ། སྒྲོགས་སམ། འཛིན་ཏམ། ཡི་གེར་འདྲིའམ། ཡི་གེར་འདྲིར་ འཇུག་གམ། གླེགས་བམ་ལ་མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། གོས་དང༌། གདུགས་དང༌། རྒྱལ་མཚན་དང༌། ལྷའི་བ་དན་དང༌། འབྲུ་མར་ གྱི་མར་མེ་དང༌། མར་གྱི་མར་མེ་དང༌། སྤོས་མར་གྱི་མར་མེ་དག་གིས་བསྟི་སྟང་བྱེད་དམ། །བསྟི་སྟང་བྱེད་དུ་འཇུག་པ་ལྟ་ཅི་སྨོས་ཏེ། སངས་རྒྱས་ཀྱི་ཡེ་ཤེས་སུ་འགྱུར་བའི་བསོད་ནམས་ མངོན་པར་འདུ་བྱེད་པ་ཆེས་མང་དུ་སྐྱེད་དོ། །མ་ཕམ་པ། གང་གི་ཚེ་རིགས་ཀྱི་བུའམ་རིགས་ཀྱི་བུ་མོ་དེ་བཞིན་གཤེགས་པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་ཐོས་ ནས་ལྷག་པའི་བསམ་པས་མོས་པར་བྱེད་པ་དེའི་ཚེ། དེའི་ལྷག་པའི་བསམ་པའི་མཚན་ཉིད་ནི་འདི་ཡིན་པར་རིག་པར་བྱ་སྟེ། འདི་ལྟ་སྟེ། ང་བྱ་རྒོད་ཀྱི་ཕུང་པོའི་རིལ་འདུག་སྟེ་ བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་བ་དང༌། བྱང་ཆུབ་སེམས་དཔའི་ཚོགས་ཀྱིས་མདུན་གྱིས་བལྟས་པ་དང༌། ཉན་ཐོས་ཀྱི་དགེ་འདུན་གྱི་དབུས་ན་འདུག་ཅིང་ཆོས་སྟོན་པར་མཐོང་བ་ དང༑ ངའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མི་མཇེད་འདི་གཞི་བཻ་ཌཱུཪྻ་ལས་གྲུབ་ཅིང་མཉམ་པར་གནས་ལ། གསེར་སྐུད་མིག་མང་རིས་སུ་བྲིས་ཤིང་རིན་པོ་ཆེའི་ཤིང་ལྗོན་པ་རྣམས་ ཀྱིས་རྣམ་པར་བཀྲ་བར་མཐོང་བ་དང༌། འདི་ན་ཡོངས་སུ་སྤྱོད་པའི་ཁང་པ་བརྩེགས་པ་དག་ན་བྱང་ཆུབ་སེམས་དཔའ་དག་གནས་པར་མཐོང་བ་སྟེ། མ་ཕམ་པ། འདི་ལྷག་པའི་བསམ་ ༄༅། །པས་མོས་པའི་རིགས་ཀྱི་བུའམ་རིགས་ཀྱི་བུ་མོའི་ལྷག་པའི་བསམ་པའི་མཚན་ཉིད་དུ་རིག་པར་བྱའོ། །མ་ཕམ་པ། ཡང་དེ་བཞིན་གཤེགས་པ་ཡོངས་སུ་མྱ་ངན་ ལས་འདས་ནས། གང་དག་ཆོས་ཀྱི་རྣམ་གྲངས་འདི་ཐོས་ན་མི་སྤོང་གི་སྟེང་དུ་རྗེས་སུ་ཡི་རང་བ་དེ་དག་ཀྱང༌། ལྷག་པའི་བསམ་པས་མོས་པའི་རིགས་ཀྱི་བུར་ངས་བཤད་ན། གང་ འཛིན་པ་དང་ཀློག་པ་ལྟ་ཅི་སྨོས་ཏེ། དེ་ནི་ད་བཞིན་གཤེགས་པ་ཕྲག་པ་ལ་ཐོགས་པ་ཡིན་ནོ། །མ་ཕམ་པ། གང་ཆོས་ཀྱི་རྣམ་གྲངས་འདི་གླེགས་བམ་དུ་བྱས་ཤིང་ཕྲག་པ་ལ་ ཐོགས་པའི་རིགས་ཀྱི་བུའམ་རིགས་ཀྱི་བུ་མོ་དེས་ངའི་མཆོད་རྟེན་བྱ་མི་དགོས། གཙུག་ལག་ཁང་བྱ་མི་དགོས། དགེ་སློང་གི་དགེ་འདུན་གྱི་ན་བའི་གསོས་སྨན་དང་ཡོ་བྱད་དག་ སྦྱིན་མི་དགོས་སོ། །དེ་ཅིའི་ཕྱིར་ཞེ་ན། མ་ཕམ་པ། རིགས་ཀྱི་བུའམ་རིགས་ཀྱི་བུ་མོ་དེས་ངའི་སྐུ་གདུང་ལ་སྐུ་གདུང་གི་མཆོད་པ་བྱས་པ་ཡིན། རིན་པོ་ཆེ་སྣ་བདུན་གྱི་མཆོད་ རྟེན་འཕང་དུ་ནི་ཚངས་པའི་འཇིག་རྟེན་ལ་ཐུག་པ། ཁོ་ར་ཁོར་ཡུག་ཏུ་ནི་རིམ་བཞིན་དུ་གདུགས་ཡོངས་སུ་བཟུང་བ་དང་བཅས་པ། ལྷའི་བ་དན་དང་བཅས་པ། དྲིལ་བུའི་སྒྲ་ གསལ་བར་འབྱུང་བ་དག་བྱས་པ་ཡིན་ནོ། །སྐུ་གདུང་གི་མཆོད་རྟེན་དེ་དག་ལ་ལྷ་དང་མིའི་མེ་ཏོག་དང༌། སྤོས་དང༌། བདུག་པ་དང༌། ཕྲེང་བ་དང༌། བྱུག་པ་དང༌། ཕྱེ་མ་ དང༑ གོས་དང༌། གདུགས་དང༌། རྒྱལ་མཚན་དང༌། ལྷའི་བ་དན་དང༌། རྣམ་པར་རྒྱལ་བའི་བ་དན་རྣམ་པ་མང་པོ་དག་གིས་བཀུར་སྟི་རྣམ་པ་མང་པོ་བྱས་པ་ཡིན་ནོ། །ཡིད་དུ་འོང་བ་སྙན་ ཅིང་གསལ་བའི་སྒྲ་དང༌། རྔ་བོ་ཆེ་རྣམ་པ་མང་པོ་དག་དང༌། རོལ་མོའི་སྒྲ་དང༌། ཕེག་རྡོབ་པ་དང༌། རྣམ་པ་ཐ་དད་པའི་གླུ་དང༌། གར་དང༌། བཞད་གད་དང༌། རོལ་མོ་རྣམ་པ་མང་པོ་ ཚད་མེད་པས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་མང་པོར་བཀུར་སྟིར་བྱས་པར་འགྱུར་རོ། །མ་ཕམ་པ། ང་ཡོངས་སུ་མྱ་ངན་ལས་འདས་ནས་ཆོས་ཀྱི་རྣམ་གྲངས་འདི་བཟུང་ བ་དང༌། བཀླགས་པ་དང༌། ཡི་གེར་བྲིས་པ་དང༌། རབ་ཏུ་སྟོན་པ་དེས་ངའི་ཕྱིར་ཙནྡན་དམར་པོའི་གཙུག་ལག་ཁང་རྒྱ་ཆེན་པོ་ཡངས་པ་མཐོན་པོ། ཁང་བཟང་སུམ་ཅུ་རྩ་གཉིས་ཡོད་པ་ བརྒྱད་བརྩེགས། དགེ་སློང་སྟོང་གི་གནས་ཀུན་དགའ་ར་བ་དང་མེ་ཏོག་གིས་མཛེས་པར་བྱས་པ། འཆག་སའི་ནགས་ཚལ་དང་ལྡན་པ། མལ་སྟན་དང་བཅས་པ། བཟའ་བ་དང༌། བཅའ་བ་དང༌། ཟས་དང༌། སྐོམ་དང༌། ན་བའི་གསོས་སྨན་གྱིས་ཡོངས་སུ་གང་བ། བདེ་བའི་ཡོ་བྱད་ཐམས་ཅད་ཀྱིས་རབ་ཏུ་བརྒྱན་པ་དག་བྱས་པར་གྱུར་ཏོ། །དེ་དག་མང་ཞིང་ དཔག་ཏུ་མེད་དེ། བརྒྱའམ། སྟོང་ངམ། སྟོང་ཕྲག་བརྒྱའམ། བྱེ་བའམ། བྱེ་བ་བརྒྱའམ། བྱེ་བ་སྟོང་ངམ། བྱེ་བ་བརྒྱ་སྟོང་ངམ། བྱེ་བ་ཁྲག་ཁྲིག་བརྒྱ་སྟོང་དེ་དག་ངའི་མདུན་དུ་ ༄༅། །ཉན་ཐོས་ཀྱི་དགེ་འདུན་ལ་ཕུལ་ཏེ། དེ་དག་ཀྱང་ངས་ཡོངས་སུ་སྤྱད་པར་རིག་པར་བྱའོ། །མ་ཕམ་པ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ ནས་གང་ཞིག་ཆོས་ཀྱི་རྣམ་གྲངས་འདི་འཛིན་ཏམ། ཀློག་གམ། སྟོན་ཏམ། ཡི་གེར་འདྲིའམ། ཡི་གེར་འདྲིར་འཇུག་ཀྱང་རུང་སྟེ། རྣམ་གྲངས་འདིས་དེས་ང་ཡོངས་སུ་མྱ་ངན་ལས་འདས་ ནས་རིང་བསྲེལ་གྱི་མཆོད་རྟེན་དག་བྱ་མི་དགོས་སོ། །དགེ་འདུན་ལ་མཆོད་པ་བྱ་མི་དགོས་སོ་ཞེས་ང་དེ་སྐད་འཆད་ན། མ་ཕམ་པ། གང་ཆོས་ཀྱི་རྣམ་གྲངས་འདི་འཛིན་ཅིང༌། སྦྱིན་ པ་སྒྲུབ་པའམ། ཚུལ་ཁྲིམས་སམ། བཟོད་པའམ། བརྩོན་འགྲུས་སམ། བསམ་གཏན་ནམ། ཤེས་རབ་སྒྲུབ་པ་ལྟ་ཅི་སྨོས་ཏེ། རིགས་ཀྱི་བུའམ་རིགས་ཀྱི་བུ་མོ་དེ་བསོད་ནམས་ མངོན་པར་འདུ་བྱེད་པ་ཆེས་དཔག་ཏུ་མེད་པ་གྲངས་མེད་པ་མཐའ་ཡས་པ་སྐྱེད་པ་ལྟ་ཅི་སྨོས། མ་ཕམ་པ། འདི་ལྟ་སྟེ། དཔེར་ན། ནམ་མཁའི་ཁམས་ནི་ཤར་དང༌། ལྷོ་དང༌། ནུབ་དང༌། བྱང་དང༌། སྟེང་དང༌། འོག་གི་ཕྱོགས་དང༌། ཕྱོགས་མཚམས་རྣམས་སུའང་མུ་མེད་པ་དེ་བཞིན་དུ། རིགས་ཀྱི་བུའམ་རིགས་ཀྱི་བུ་མོ་དེ་བསོད་ནམས་མངོན་པར་ འདུ་བྱེད་པ། སངས་རྒྱས་ཀྱི་ཡེ་ཤེས་སུ་འགྱུར་པ་གྲངས་མེད་དཔག་ཏུ་མེད་པ་བསྐྱེད་དོ། །གང་ཆོས་ཀྱི་རྣམ་གྲངས་འདི་འཛིན་ཏམ། ཀློག་གམ། སྟོན་ཏམ། ཡི་གེར་འདྲིའམ། ཡི་ གེར་འདྲིར་འཇུག་ན། དེ་ནི་དེ་བཞིན་གཤེགས་པའི་མཆོད་རྟེན་ལ་བསྟི་སྟང་བྱ་བའི་ཕྱིར་མངོན་པར་བརྩོན་པ་ཡིན་ནོ། །དེ་བཞིན་གཤེགས་པའི་ཉན་ཐོས་རྣམས་ཀྱི་བསྔགས་པ་སྨྲ་བའོ།། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོན་ཏན་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་བརྗོད་ཅིང་གཞན་དག་ལ་ཡང་དག་པར་རབ་ཏུ་སྟོན་པ་ཡིན་ནོ། །བཟོད་པ་བསྒྲུབས་ པ་དང༌། ཚུལ་ཁྲིམས་དང་ལྡན་པ་དང༌། དགེ་བའི་ཆོས་ཅན་དང་འགྲོགས་ན་བདེ་བ་དང༌། བཟོད་པ་ཅན་དང༌། དུལ་བ་དང༌། ཕྲག་དོག་མེད་པ་དང༌། ཁྲོ་བ་ཡིད་ལ་བྱེད་པ་དང་བྲལ་ པ་དང༌། གནོད་སེམས་མེད་པ་ཡིད་ལ་བྱེད་པ་དང༌། དྲན་པ་དང་ལྡན་པ་དང༌། མཐུ་དང་ལྡན་པ་ཡིན། བརྩོན་འགྲུས་དང་ལྡན་པ་ཡིན་ཏེ། སངས་རྒྱས་ཀྱི་ཆོས་འཚོལ་བ་ལ་རྟག་ཏུ་ བརྩོན་པ་ཡིན། བསམ་གཏན་པ་ཡིན། ནང་དུ་ཡང་དག་འཇོག་ལྷུར་ལེན་པ་ཡིན། ནང་དུ་ཡང་དག་འཇོག་མང་དུ་བྱེད་པ་དང༌། འདྲི་བ་རབ་ཏུ་དབྱེ་བ་ལ་མཁས་པ་ཡིན། འདྲི་བ་བྱེ་བ་ ཁྲག་ཁྲིག་བརྒྱ་སྟོང་གི་ལན་ལྡོན་པ་ཡིན་ནོ། །མ་ཕམ་པ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་ཞིག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་འཛིན་པའི་ཡོན་ཏན་དག་ནི་གང་དག་ངས་ཡོངས་སུ་བརྗོད་པ་འདི་ལྟ་བུ་འདི་དག་ཡིན་ནོ། །མ་ཕམ་པ། རིགས་ཀྱི་བུའམ་རིགས་ཀྱི་བུ་མོ་དེ་འདི་ལྟར་རིག་པར་བྱ་ ༄༅། །སྟེ༑ རིགས་ཀྱི་བུའམ་རིགས་ཀྱི་བུ་མོ་དེ་བྱང་ཆུབ་ཀྱི་སྙིང་པོར་ཡང་དག་པར་ཞུགས་ཏེ། བྱང་ཆུབ་མངོན་པར་རྫོགས་པར་སངས་རྒྱས་པར་བྱ་བའི་ཕྱིར། བྱང་ ཆུབ་ཀྱི་ཤིང་དྲུང་དུ་འགྲོ་བ་ཡིན་པར་རིག་པར་བྱའོ། །མ་ཕམ་པ། རིགས་ཀྱི་བུའམ་རིགས་ཀྱི་བུ་མོ་དེ་གང་ན་འགྲེང་ངམ་འདུག་གམ་འཆག་པ་དེར། མ་ཕམ་པ། དེ་བཞིན་གཤེགས་ པའི་ཕྱིར་མཆོད་རྟེན་བརྩིག་གོ །ལྷ་དང་བཅས་པའི་འཇིག་རྟེན་གྱིས་ཀྱང་འདི་དེ་བཞིན་གཤེགས་པའི་མཆོད་རྟེན་ཡིན་ནོ་ཞེས་དེ་ལ་བརྗོད་པར་བྱའོ། །དེ་ནས་བཅོམ་ལྡན་འདས་ཀྱིས་ དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མི་མགོན་མྱ་ངན་འདས་པ་ན། མདོ་སྡེ་འདི་ནི་གང་འཛིན་པ། །བསོད་ནམས་ཕུང་པོ་མུ་མེད་པར། །ང་ཡིས་ཡང་དང་ཡང་དུ་ བསྔགས། །དེས་ནི་ང་ལ་མཆོད་པ་བྱས། །རིང་བསྲེལ་གྱི་ནི་མཆོད་རྟེན་ཡང༌། །རིན་ཆེན་བྱས་པ་སྣ་ཚོགས་པ། །བལྟ་ན་སྡུག་ཅིང་མཛེས་རྣམས་བྱས། །འཕང་དུ་ཚངས་པའི་འཇིག་ རྟེན་མཉམ། །གདུགས་ཕྲེང་རྣམས་དང་རབ་ཏུ་ལྡན། །ཁོར་ཡུག་ལྡན་དཔལ་ཅན་ཏེ། །རྣམ་རྒྱལ་བ་དན་རྣམས་དང་ལྡན། །དྲིལ་བུ་གསལ་བའི་སྒྲ་འབྱུང་སྟེ། །དར་གྱི་ལྡ་ལྡིས་མཛེས་ པར་བྱས། །དེ་བཞིན་དྲིལ་བུ་རླུང་བསྐྱོད་པས། །རྒྱལ་བའི་རིང་བསྲེལ་ཤིན་ཏུ་མཛེས། །སྤོས་དང་མེ་ཏོག་བྱུག་པ་དང༌། །གོས་དང་རོལ་མོའི་སྒྲ་རྣམས་དང༌། །རྔ་རྣམས་ཀྱིས་ཀྱང་ཡང་ དང་ཡང༌། །དེ་དག་མཆོད་པ་རྒྱ་ཆེན་བྱས། །རོལ་མོ་སྒྲ་སྙན་ཆ་བྱད་རྣམས། །རིང་བསྲེལ་དེ་ལ་བརྡུངས་ཤིང་བསིལ། །སྤོས་དང་འབྲུ་མར་མར་མེ་དང༌། །དེ་དག་ལྷ་ནི་ཀུན་ནས་ ཕུལ༑ ༑གང་གིས་མདོ་སྡེ་འདི་བཟུང་ཞིང༌། །ཟད་པའི་དུས་ལ་སྟོན་པ་ཡིས། །དེས་ནི་མཆོད་པ་རྣམ་མང་པོ། །དེའང་མཐའ་ཡས་དེ་ལ་བྱས། །གཙུག་ལག་ཁང་མང་བྱེ་བ་དག ། ཙནྡན་ལས་ནི་བྱས་པ་ཡིན། །ཁང་བཟང་སུམ་ཅུ་རྩ་གཉིས་ཏེ། །དེ་དག་འཕང་དུ་བརྒྱད་བརྩེག་གོ །མལ་ཆ་དག་གིས་ཉེ་བར་བརྟེན། །བཟའ་བཅའ་རྣམས་ཀྱང་ཚོགས་པར་ལྡན།། ཡོལ་བ་བཟང་པོ་རབ་ཏུ་བཤམས། །གནས་རྣམས་ཀྱང་ནི་རྣམ་པར་སྟོང༌། །མེ་ཏོག་ཀུན་དགས་མཛེས་བྱས་པའི། །ཀུན་དགའ་དག་དང་འཆག་ས་བྱིན། །གཟུགས་མང་རྣམ་པ་སྣ་ ཚོགས་ཀྱི། །གདིང་གཡོག་མང་པོ་དེ་བཞིན་ནོ། །རྣམ་འདྲེན་མྱ་ངན་འདས་པ་ན། གང་ཞིག་མདོ་འདི་འཛིན་པ་དེས། །ང་ཡི་མདུན་དུ་དགེ་འདུན་ལ། །མཆོད་པ་མང་པོ་བྱས་པ་ ཡིན༑ ༑མོས་པ་སྙིང་པོར་གང་གྱུར་ཏེ། །གང་ཞིག་མདོ་འདི་ཀློག་པའམ། །ཡི་གེར་འདྲི་བར་བྱེད་པ་དེ། །དེ་བས་བསོད་ནམས་མང་དུ་ཐོབ། །མི་འགའ་ལ་ལས་གླེགས་བམ་ལ། །ཤིན་ཏུ་ ངེས་ཚིག་འདིར་བཅུག་སྟེ། །སྤོས་དང་ཕྲེང་བ་བྱུག་པ་ཡིས། །གླེགས་བམ་དེ་ལ་མཆོད་པ་བྱེད། །སྤོས་ཀྱི་འབྲུ་མར་བཀང་བ་ཡི། །མར་མེ་རྟག་ཏུ་སུ་འབུལ་ཞིང༌། །སྣ་མ་ཨུཏྤལ་སིལ་ ༄༅། །མ་དང༌། །ཙམྤ་ཀས་ཀྱང་རབ་ཏུ་གཏོར། །གླེགས་བམ་དག་ལ་འདི་འདྲ་བའི། །མཆོད་པ་བྱེད་པའི་མི་དེ་ནི། །བསོད་ནམས་མང་པོ་རབ་འཕེལ་ ཏེ༑ ༑དེ་ལ་ཚད་ཀྱང་ཡོང་མེད་དོ། །ཇི་ལྟར་ནམ་མཁའི་ཁམས་ཀྱི་ཚད། །ཕྱོགས་བཅུ་དག་ནི་ཐམས་ཅད་དུ། །རྟག་ཏུ་རྙེད་པར་འགྱུར་མ་ཡིན། །བསོད་ནམས་ཕུང་པོ་འདི་ དེ་འདྲ། །བཟོད་ཅིང་དུལ་ཏེ་མཉམ་པར་བཞག །ཚུལ་ཁྲིམས་ལྡན་ཞིང་བསམ་གཏན་པ། །ཡང་དག་ནང་འཇོག་སྤྱོད་ཡུལ་ཅན། །དེ་འདྲ་བ་ལྟ་སྨོས་ཅི་དགོས། །ཁྲོ་བ་མེད་ ཅིང་ཕྲ་མ་མེད། །མཆོད་རྟེན་དག་ལ་གུས་པར་གནས། །དགེ་སློང་རྣམས་ལའང་རྟག་ཏུ་འདུད། །ང་རྒྱལ་མེད་ཅིང་ལེ་ལོ་མེད། །ཤེས་རབ་ལྡན་ཞིང་བདེ་བཞིན་བརྟན། །དྲི་ བ་དྲིས་ན་མི་ཁྲོ་སྟེ། །སྙིང་རྗེ་བློ་ཡིས་སྲོག་ཆགས་ལ། །རྗེས་སུ་མཐུན་པར་བར་ཏུ་སྟོན། །གང་ཞིག་དེ་འདྲར་གྱུར་ནས་སུ། །མདོ་འདི་ཡང་ནི་གང་འཛིན་པ། །དེ་ཡི་བསོད་ ནམས་ཕུང་པོ་ནི། །ཚད་ཀྱང་རྙེད་པར་མི་འགྱུར་རོ། །མདོ་འདི་འཛིན་པར་བྱེད་པ་ཡི། །དེ་ལ་སུ་ཡི་ཆོས་སྨྲ་བ། །གལ་ཏེ་མི་འགས་མཐོང་ན་ཡང༌། །དེ་ལ་ཤིན་ཏུ་བཀུར་སྟི་བྱ། །ལྷ་ ཡི་མེ་ཏོག་རྣམས་ཀྱིས་དེ་ལ་གཏོར། །ལྷ་ཡི་གོས་རྣམས་ཀྱིས་ཀྱང་མངོན་པར་དག་པ། །དེ་ཡི་རྐང་པར་མགོ་བོས་ཕྱག་འཚལ་ཏེ། །དེ་ལ་དེ་བཞིན་གཤེགས་པར་འདུ་ཤེས་བསྐྱེད།། དེ་མཐོང་ནས་ནི་དེ་ཚེ་འདི་སྙམ་དུ། །དེ་ནི་ཤིང་ལྗོན་དྲུང་དུ་འགྲོར་འགྱུར་ཏེ། །ལྷ་དང་བཅས་པའི་འཇིག་རྟེན་ཕན་པའི་ཕྱིར། །བླ་མེད་བྱང་ཆུབ་ཞིང་འཚང་རྒྱ་སྙམ་བསམ། །མདོ་སྡེ་འདི་ ལས་ཚིགས་བཅད་གཅིག་བརྗོད་ཅིང༌། །དེ་འདྲའི་མཁས་དེ་གང་ན་འཆག་པའམ། །གང་ན་འགྲེང་ངམ་འོན་ཏེ་འདུག་པའམ། །དཔའ་བོ་གང་དུ་ཉལ་བར་བྱེད་པའང་རུང༌། །དེར་ ནི་འདྲེན་པ་སངས་རྒྱས་བཅོམ་ལྡན་གྱི། །ཆེད་དུ་སྐྱེས་བུ་དམ་པའི་མཆོད་རྟེན་ནི། །བལྟ་ན་སྡུག་པ་སྣ་ཚོགས་བྱེད་དུ་གཞུག །དེ་བཞིན་དེར་ནི་མཆོད་པ་སྣ་ཚོགས་བྱས། །གང་ན་ སངས་རྒྱས་བུ་དེ་འདུག་པ་ཡི། །ས་ཕྱོགས་དེ་ནི་ང་ཡིས་ཡོངས་སུ་སྤྱད། །ངས་ནི་དེ་ཉིད་དུ་ཡང་འཆག་པ་བྱས། །དེ་ཉིད་དུ་ཡང་ང་ནི་འདུག་པར་གྱུར། །དམ་པའི་ཆོས་པདྨ་དཀར་ པོ་ལས། བསོད་ནམས་ཀྱི་རྣམ་གྲངས་ཀྱི་ལེའུ་ཞེས་བྱ་སྟེ་བཅུ་དྲུག་པའོ།། །།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་ པས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་གིས་ཆོས་ཀྱི་རྣམ་གྲངས་འདི་བཤད་པ་ཐོས་ནས་རྗེས་སུ་ཡི་རང་ན། བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་དེ་བསོད་ནམས་ཇི་སྙེད་ཅིག་བསྐྱེད་པར་འགྱུར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་དེའི་ཚེ་ཚིགས་སུ་བཅད་པ་འདི་དག་ ༄༅། །གསོལ་ཏོ། །དཔའ་ཆེན་མྱ་ངན་འདས་ནས་གང༌། །མདོ་འདི་འདྲ་བ་ཉན་པ་དང༌། །ཐོས་ནས་རྗེས་སུ་ཡི་རང་བ། །དེ་ཡི་དགེ་བ་ཅི་ཙམ་འགྱུར། ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །མ་ཕམ་པ། དེ་བཞིན་གཤེགས་པ་ཡོངས་སུ་མྱ་ངན་ལས་ འདས་ནས། རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། སྐྱེས་བུ་མཁས་པའམ། གཞོན་ནུའམ། གཞོན་ནུ་མ་གང་ལ་ལ་ཆོས་ཀྱི་རྣམ་གྲངས་འདི་བཤད་པ་ཉན་ཅིང་ཐོས་ནས་ཀྱང་རྗེས་སུ་ཡི་རང་ལ་ཆོས་ཉན་པ་དེ་ནས་སོང་སྟེ། གཙུག་ལག་ཁང་ན་འདུག་གམ། ཁྱིམ་ན་འདུག་ གམ༑ དགོན་པ་ན་འདུག་གམ། སྲང་ན་འདུག་གམ། གྲོང་ན་འདུག་གམ། ལྟོ་ངས་ན་འདུག་ཀྱང་རུང་སྟེ། རྒྱུ་དེ་དག་དང༌། བྱེད་རྒྱུ་དེ་དག་དང༌། ཆོས་དེ་ཇི་ལྟར་ཐོས་པ་དང༌། ཇི་ ལྟར་ཟིན་པ་བཞིན་དུ་ཅི་ནུས་ཀྱིས། ཕའམ། མའམ། ཉེ་དུའམ། ཡང་དག་པར་མགུ་བར་འགྱུར་བའམ། འདྲིས་པའམ། གཞན་གང་ཡང་རུང་སྟེ། སེམས་ཅན་ཕ་རོལ་ལ་ བསྟན་ནས་དེས་དེ་ཐོས་ཏེ། རྗེས་སུ་ཡི་རང་ལ་རྗེས་སུ་ཡི་རང་ནས་ཀྱང་གཞན་ལ་སྨྲས་ཏེ། དེས་ཀྱང་དེ་ཐོས་ནས་རྗེས་སུ་ཡི་རང་ལ་དེས་ཀྱང་གཞན་ལ་སྨྲས་ཏེ། དེས་ཀྱང་དེ་ཐོས་ ནས་རྗེས་སུ་ཡི་རང་ལ། དེ་ལྟར་ན་རྣམ་གྲངས་འདིས་གཅིག་ནས་གཅིག་ཏུ་བརྒྱུད་དེ་ལྔ་བཅུ་པ་ལ་ཐུག་ན། མ་ཕམ་པ། གཅིག་ནས་གཅིག་ཏུ་བརྒྱུད་དེ་ཐོས་པ། རྗེས་སུ་ཡི་རང་ བ་ལྔ་བཅུ་པའི་མིར་གྱུར་པ་གང་ཡིན་པ། མ་ཕམ་པ། རིགས་ཀྱི་བུའམ་རིགས་ཀྱི་བུ་མོ་དེའི་རྗེས་སུ་ཡི་རང་བ་དང་ལྡན་པའི་བསོད་ནམས་མངོན་པར་འདུ་བྱེད་པ་དེ། ངས་བཤད་ ཀྱི༑ ལེགས་པར་རབ་ཏུ་ཉོན་ལ་ཡིད་ལ་གཟུང་ཞིག་དང་ངས་ཁྱོད་ལ་བཤད་དོ། །མ་ཕམ་པ། འདི་ལྟ་སྟེ། དཔེར་ན། འཇིག་རྟེན་གྱི་ཁམས་གྲངས་མེད་པ་བརྒྱ་སྟོང་ཕྲག་ བཞི་ན་སེམས་ཅན་འཁོད་ཅིང་ཡོད་པ་འགྲོ་བ་དྲུག་ཏུ་སྐྱེས་པ། སྒོ་ང་ལས་སྐྱེས་པའམ། མངལ་ནས་སྐྱེས་པའམ། དྲོད་གཤེར་ལས་སྐྱེས་པའམ། བརྫུས་ཏེ་སྐྱེས་པའམ། གཟུགས་ཅན་ནམ། གཟུགས་མེད་པའམ། འདུ་ཤེས་ཅན་ནམ། འདུ་ཤེས་མེད་པའམ། འདུ་ཤེས་མེད་འདུ་ཤེས་མེད་མིན་ནམ། རྐང་མེད་དམ། རྐང་གཉིས་པའམ། རྐང་ བཞི་པའམ། རྐང་མ་ངས་སམ། སེམས་ཅན་ཇི་ཙམ་སེམས་ཅན་གྱི་ཁམས་སུ་བསྡུས་ཤིང༌། ཡང་དག་པར་འདུ་བར་འགྱུར་བ་རྣམས་མི་བསོད་ནམས་འདོད་པ། ཕན་པར་ འདོད་པ་འགའ་ཞིག་བྱུང་བས། སེམས་ཅན་གྱི་ཚོགས་དེ་ལ་འདོད་པའི་རྩེད་མོ་དང་དགའ་བའི་ལོངས་སྤྱོད་སྡུག་པ་མཛེས་པ་གཅེས་པ་ཡིད་དུ་འོང་བ་དག་བྱིན་ལ། འདོད་པའི་རྩེད་མོ་ ༄༅། །ལ་དགའ་བ་ཡོངས་སུ་ལོངས་སྤྱོད་པར་བྱ་བའི་ཕྱིར་སེམས་ཅན་རེ་རེ་ལའང་ཛམྦུའི་གླིང་ཡོངས་སུ་གང་བ་བྱིན་ཏེ། འགྲོན་བུ་དང༌། གསེར་དང༌། དངུལ་དང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱུ་རུ་དང༌། རྟའི་ཤིང་རྟ་དང༌། གླང་གི་ཤིང་རྟ་དང༌། གླང་པོ་ཆེའི་ཤིང་རྟ་དང༌། ཁང་པ་ བརྩེགས་པ་དང༌། ཁང་པའང་བྱིན་ཏེ། མ་ཕམ་པ། རྣམ་གྲངས་འདིས་སྦྱིན་པའི་བདག་པོ་སྦྱིན་བདག་ཆེན་པོའི་མི་དེས་ལོ་བརྒྱད་ཅུ་ཚང་བར་སྦྱིན་པ་བྱིན་ལ། མ་ཕམ་པ། དེ་ ནས་སྦྱིན་པའི་བདག་པོ་སྦྱིན་བདག་ཆེན་པོའི་མི་དེ་འདི་སྙམ་དུ་སེམས་ཏེ། སེམས་ཅན་འདི་དག་ཐམས་ཅད་ཀྱང་བདག་གིས་བརྩེན་དུ་བཅུག །དགའ་བར་བྱས། བདེ་བར་ གསོས་ན། སེམས་ཅན་འདི་དག་མགོ་སྐྱ་ཞིང་གཉེར་མས་གང་སྟེ། ན་ཚོད་ལོ་བརྒྱད་ཅུ་ལོན་པས་རྒས་ཏེ་འཆི་བའི་དུས་བྱེད་པར་ཡང་ཉེ་བར་གྱུར་ན། བདག་གིས་འདི་ དག་དེ་བཞིན་གཤེགས་པས་གསུངས་པའི་ཆོས་འདུལ་བ་ལ་རབ་ཏུ་བཙུད་དེ་རྗེས་སུ་བསྟན་ཏོ་སྙམ་ནས། མ་ཕམ་པ། དེ་ནས་མི་དེས་སེམས་ཅན་དེ་དག་ཐམས་ཅད་ དེ་བཞིན་གཤེགས་པས་གསུངས་པའི་ཆོས་འདུལ་བ་ལ་ཡང་དག་པར་བཙུད་དེ། ཡང་དག་པར་བཙུད་ནས་འཛིན་དུ་བཅུག་ལ། སེམས་ཅན་དེ་དག་གིས་ཀྱང་ཆོས་དེ་ མཉན་ཏེ་ཐོས་ནས་སྐད་ཅིག་ཐང་ཅིག་ཡུད་ཙམ་གཅིག་ལ་འདུས་ཏེ་ཐམས་ཅད་རྒྱུན་དུ་ཞུགས་པར་གྱུར། ལན་གཅིག་ཕྱིར་འོང་བ་དང༌། ཕྱིར་མི་འོང་བའི་འབྲས་བུ་ཐོབ་པར་གྱུར་ པ་ནས། ཟག་པ་ཟད་པ་བསམ་གཏན་པ་བསམ་གཏན་ཆེན་པོ་རྣམ་པར་ཐར་པ་བརྒྱད་ལ་བསམ་གཏན་པའི་དགྲ་བཅོམ་པའི་བར་དུ་གྱུར་ན། མ་ཕམ་པ། འདི་ཇི་སྙམ་དུ་སེམས། སྦྱིན་ བའི་བདག་པོ་སྦྱིན་པའི་བདག་པོ་ཆེན་པོའི་མི་དེ་གཞི་དེ་ལས་བསོད་ནམས་མང་པོ་དཔག་ཏུ་མེད་གྲངས་མེད་པ་སྐྱེད་དམ། དེ་སྐད་ཅེས་བཀའ་སྩལ་ནས་བཅོམ་ལྡན་འདས་ལ་བྱང་ཆུབ་ སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་དེ་ལྟ་ལགས་སོ། །བདེ་བར་གཤེགས་པ། དེ་དེ་ལྟ་ལགས་ཏེ། སྦྱིན་པའི་བདག་པོ་ སྦྱིན་པའི་བདག་པོ་ཆེན་པོའི་མི་དེ་སེམས་ཅན་དེ་སྙེད་ལ་བདེ་བའི་ཡོ་བྱད་ཐམས་ཅད་སྩལ་བའི་སླད་དུ་རྒྱུ་དེས་ཀྱང་བསོད་ནམས་མང་དུ་སྐྱེད་ན། བཅོམ་ལྡན་འདས། དེའི་འོག་ཏུ་དགྲ་བཅོམ་ པ་ཉིད་ལ་རབ་ཏུ་བཀོད་པ་ལྟ་སྨོས་ཀྱང་ཅི་འཚལ། དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་ལ་འདི་སྐད་ཅེས་བཀའ་ སྩལ་ཏོ། །མ་ཕམ་པ་ཁྱོད་མོས་པར་བྱ། ཁོང་དུ་ཆུད་པར་བྱའོ། །སྦྱིན་པའི་བདག་པོ་སྦྱིན་བདག་ཆེན་པོའི་མི་གང་གིས། འཇིག་རྟེན་གྱི་ཁམས་གྲངས་མེད་པ་བརྒྱ་སྟོང་ཕྲག་བཞིའི་ ༄༅། །སེམས་ཅན་ཐམས་ཅད་ལ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོ་བྱས་ཏེ། དགྲ་བཅོམ་པ་ཉིད་ལ་རབ་ཏུ་རབ་ཏུ་བཀོད་ནས་བསོད་ནམས་བསྐྱེད་ལ་།གང་ཡང་ གཅིག་ནས་གཅིག་ཏུ་བརྒྱུད་དེ་ཐོས་པ་ལྔ་བཅུ་པར་གྱུར་པའི་མི་དེས། ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་གམ་ཚིག་གཅིག་ཙམ་ཐོས་ཏེ་རྗེས་སུ་ཡི་རང་ན། གང་ མི་དེའི་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་ནི། སྦྱིན་བའི་བདག་པོ་སྦྱིན་བདག་ཆེན་པོའི་མི་དེའི་སྦྱིན་པ་དང་ལྡན་པ་དང༌། དགྲ་བཅོམ་པ་ཉིད་ལ་བཀོད་པ་ དང་ལྡན་པའི་བསོད་ནམས་བྱ་བའི་དངོས་པོ་དེ་བས་གང་མི་གཅིག་ནས་གཅིག་ཏུ་བརྒྱུད་པའི་ལྔ་བཅུ་པའི་མིས་ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་གམ་ཚིག་ གཅིག་ཐོས་ནས་རྗེས་སུ་ཡི་རང་བ་ནི་ཆེས་མང་སྟེ། མ་ཕམ་པ། རྗེས་སུ་ཡི་རང་བ་དང་ལྡན་པའི་བསོད་ནམས་མངོན་པར་འདུ་བྱེད་པ་དང༌། དགེ་བ་མངོན་པར་འདུ་བྱེད་པ་འདིའི་ མདུན་ན། སྔ་མའི་སྦྱིན་པ་དང་ལྡན་པ་དང༌། དགྲ་བཅོམ་པ་ཉིད་ལ་བཀོད་པ་དང་ལྡན་པའི་བསོད་ནམས་མངོན་པར་འདུ་བྱེད་པ་དེས་བརྒྱའི་ཆར་ཡང་ཉེ་བར་མི་འགྲོ་།སྟོང་ གི་ཆར་ཡང་བརྒྱ་སྟོང་གི་ཆར་ཡང་བྱེ་བའི་ཆར་ཡང་བྱེ་བ་བརྒྱའི་ཆར་ཡང་བྱེ་བ་སྟོང་གི་ཆར་ཡང་བྱེ་བ་བརྒྱ་སྟོང་གི་ཆར་ཡང་བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོ་སྟེ། བགྲང་བར་ཡང་ཆར་ཡང་གྲངས་སུའང་དཔེར་ཡང་རྒྱུར་ཡང་མི་བཟོད་དོ། །མ་ཕམ་པ། དེ་ལྟར་ལྔ་བཅུ་བའི་མི་དེ་ཐ་ན་ཆོས་ཀྱི་རྣམ་གྲངས་འདི་ལས་ཚིགས་སུ་བཅད་པ་གཅིག་གམ་ཚིག་གཅིག་ ལ་རྗེས་སུ་ཡི་རང་བའང༌། བསོད་ནམས་འདི་སྙེད་སྐྱེད་ན། མ་ཕམ་པ། གང་གིས་ངའི་མངོན་སུམ་དུ་ཆོས་ཀྱི་རྣམ་གྲངས་འདི་མཉན་ཏེ་ཐོས་ནས་རྗེས་སུ་ཡི་རང་བ་ལྟ་ཅི་སྨོས་ཏེ། མ་ཕམ་ བ༑ དེའི་བསོད་ནམས་མངོན་པར་འདུ་བྱེད་པ་ནི་ཆེས་དཔག་ཏུ་མེད་ཆེས་གྲངས་མེད་ཅེས་ངས་བཤད་དོ། །མ་ཕམ་པ། ཡང་རིགས་ཀྱི་བུའམ་རིགས་ཀྱི་བུ་མོ་གང་གིས་ཆོས་ཀྱི་རྣམ་གྲངས་ འདི་མཉན་པའི་ཕྱིར། བདག་གི་ཁྱིམ་ནས་བྱུང་སྟེ་གཙུག་ལག་ཁང་དུ་སོང་ལ། དེ་ཕྱིན་ནས་དེར་འགྲེང་ངམ་འདུག་སྟེ་ཆོས་ཀྱི་རྣམ་གྲངས་འདི་ཡུད་ཙམ་མཉན་ན། སེམས་ཅན་དེ་བསོད་ ནམས་མངོན་པར་འདུ་བྱ་བ་དེ་ཙམ་བྱས་ཤིང་བསགས་པས། དེ་ཚེ་བརྗེས་ནས་ལུས་ཕྱི་མ་དང་བདག་གི་ངོ་བོ་ཕྱི་མ་ཐོབ་པ་ལ་གླང་གི་ཤིང་རྟ་འཐོབ་པར་འགྱུར་རོ། །རྟའི་ཤིང་རྟ་དང༌། གླང་པོ་ཆེའི་ཤིང་རྟ་དང༌། ཁྱོགས་ཀྱི་བཞོན་པ་དང༌། གྲུའི་བཞོན་པ་དང༌། ཁྱུ་མཆོག་གི་བཞོན་པ་དང༌། ལྷའི་གཞལ་མེད་ཁང་ཐོབ་པར་འགྱུར་རོ། །གལ་ཏེ་ཡང་མདོའི་ཆོས་སྒྲོག་ པ་དེར་ཡུད་ཙམ་ཞིག་འདུག་སྟེ་ཆོས་ཀྱི་རྣམ་གྲངས་འདི་ཉན་ཏམ། ཕ་རོལ་འདུག་ཅུ་བཅུག་གམ། སེམས་ཅན་གཞན་ལ་སྟན་བགོས་ན། བསོད་ནམས་མངོན་པར་འདུ་བྱེད་པ་དེས། ༄༅། །བརྒྱ་བྱིན་གྱི་སྟན་དང༌། ཚངས་པའི་སྟན་དང༌། འཁོར་ལོ་སྒྱུར་བའི་སེང་གེའི་ཁྲི་ཐོབ་པར་འགྱུར་རོ། །མ་ཕམ་པ། གལ་ཏེ་རིགས་ཀྱི་བུའམ་རིགས་ཀྱི་ བུ་མོ་གང་ལ་ལས་མི་གཞན་ཞིག་ལ་འདི་སྐད་དུ། ཀྱེ་མི་ཁྱོད་ཚུར་ཤོག །དམ་པའི་ཆོས་པདྨ་དཀར་པོ་ཞེས་བྱ་བའི་ཆོས་ཀྱི་རྣམ་གྲངས་འདི་ཉོན་ཅིག་ཅེས་སྨྲས་ལ། མི་དེའང་སྤྲོ་ བ་རྙེད་ནས་གལ་ཏེ་ཡུད་ཙམ་ཞིག་མཉན་ན་སེམས་ཅན་དེ་སྤྲོ་བའི་དགེ་བའི་རྩ་བ་མངོན་པར་འདུས་བྱས་པ་དེས། གཟུངས་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ དང་ལྷན་ཅིག་འགྲོགས་པ་འཐོབ་བོ། །བླུན་པོར་མི་འགྱུར་རོ། །དབང་པོ་རྣོ་ཞིང་ཤེས་རབ་དང་ལྡན་པར་འགྱུར་རོ། །ཚེ་རབས་བརྒྱ་སྟོང་དུའང་ཁ་རུལ་ཅིང་མནམ་པར་མི་འགྱུར། དེ་ལ་ ལྕེ་ནད་མེད་པར་འགྱུར། ཁ་ནད་མེད་པར་འགྱུར། སོ་སྔོན་པོར་མི་འགྱུར། སོ་མི་མཉམ་པ་མེད་པ་དང༌། སོ་མི་སེར་བ་དང༌། སོ་གྱེད་འདུམས་མེད་པ་དང༌། སོ་སྔོ་བ་མེད་པ་དང༌། སོ་ བྱུང་བ་མེད་པ་དང༌། སོ་ཡོ་བ་མེད་པར་འགྱུར་རོ། །མཆུ་འཕྱང་དུ་མི་འགྱུར། མཆུ་ནང་དུ་སོང་བ་མ་ཡིན་པ་དང༌། མཆུ་ལོག་པ་མེད་པ་དང༌། མཆུ་ཤོ་རེར་མ་གྱུར་པ་དང༌། མཆུ་ཡོ་བ་ མེད་པ་དང༌། མཆུ་གནག་པ་མེད་པ་དང༌། མཆུ་མི་སྡུག་པ་མེད་པར་འགྱུར་རོ། །སྣ་ལེབ་ལེབ་པོར་མི་འགྱུར། སྣ་ཡོན་པོར་མི་འགྱུར་རོ། །གདོང་རིང་པོར་མི་འགྱུར། གདོང་ ཡོན་པོར་མི་འགྱུར། གདོང་ནག་པོར་མི་འགྱུར། གདོང་བལྟ་ན་མི་སྡུག་པར་མི་འགྱུར་རོ། །མ་ཕམ་པ། འདི་ལྟར་ལྕེ་དང༌། སོ་དང༌། མཆུ་སྲབ་ཅིང་ཤིན་ཏུ་ལེགས་པར་འགྱུར། སྣ་ཆེ་བ་ དང༌། བཞིན་གྱི་དབྱིབས་ལེགས་པ་དང༌། སྨིན་མ་ལེགས་པ་དང༌། དཔྲལ་བའི་དབྱེས་ཆེ་བར་འགྱུར། དཔེ་བྱད་རྫོགས་པ་ཐོབ་པར་འགྱུར་རོ། །དེ་བཞིན་གཤེགས་པས་གདམས་ པ་དང་རྗེས་སུ་བསྟན་པའང་ཐོབ་པར་འགྱུར་རོ། །སངས་རྒྱས་བཅོམ་ལྡན་འདས་རྣམས་དང་ཡང་མྱུར་དུ་ཕྲད་པར་འགྱུར་རོ། །མ་ཕམ་པ་ལྟོས། སེམས་ཅན་གཅིག་སྤྲོ་བར་བྱས་པས་ ཀྱང༑ བསོད་ནམས་དེ་ཙམ་སྐྱེད་ན་གང་གིས་བསྟི་སྟང་དུ་བྱས་ཏེ་མཉན་ཏམ། བསྟི་སྟང་དུ་བྱས་ཏེ་ཀློག་གམ། བསྟི་སྟང་དུ་བྱས་ཏེ་སྟོན་ཏམ། བསྟི་སྟང་དུ་བྱས་ཏེ་རབ་ཏུ་འཆད་པ་ ལྟ་ཅི་སྨོས། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གཅིག་ནས་གཅིག་ཏུ་བརྒྱུད་པ་ལྔ་བཅུ་པ། །གང་གིས་མདོ་འདིའི་ཚིགས་བཅད་ གཅིག་མཉན་ཏེ། །ཐོས་ནས་སེམས་དང་རྗེས་སུ་ཡི་རང་བའི། །བསོད་ནམས་ཇི་སྙེད་འབྱུང་བ་དེ་ཉོན་ཅིག །གལ་ཏེ་སྦྱིན་བྱེད་མི་ཞིག་བྱུང་གྱུར་ཏེ། །རྟག་ཏུ་སེམས་ཅན་བྱེ་བ་ཁྲག་ ཁྲིག་ལ། །གང་སྔར་ང་ཡིས་དཔེ་བྱས་དེ་དག་རྣམས། །དེ་ཀུན་ལོ་ཡང་བརྒྱད་ཅུ་ཚིམ་པར་བྱས། །མགོ་ལ་སྐྲ་དཀར་གཉེར་མ་ཀུན་བྱུང་སྟེ། །དེ་དག་རྒ་ལ་ཉེར་གནས་དེས་མཐོང་ ༄༅། །ནས༑ ༑ཀྱེ་མ་སེམས་ཅན་ཉོན་མོངས་འདི་དག་ཀུན། །ཆོས་ཀྱིས་འདི་དག་རབ་ཏུ་བསྟན་པར་བྱ། །དེ་ཡིས་དེ་རྣམས་ལ་ནི་ཕྱི་ཆོས་སྨྲས། །མྱ་ངན་འདའ་ པའི་ས་ཡང་རབ་ཏུ་བཤད། །སྲིད་པ་ཐམས་ཅད་དབུ་བ་སྨིག་རྒྱུ་འདྲ། །སྲིད་པ་ཀུན་ལ་མྱུར་དུ་ཡིད་བྱུང་བྱོས། །སྦྱིན་པ་བྱེད་པའི་མི་དེའི་གན་ནས་སུ། །སེམས་ཅན་དེ་དག་ཀུན་གྱིས་ ཆོས་ཐོས་ནས། །ཟག་པ་ཟད་ཅིང་ཐ་མའི་ལུས་འཛིན་པར། །དུས་གཅིག་ཏུ་ན་དགྲ་བཅོམ་ཐོབ་གྱུར་ཀྱང༌། །གང་ཞིག་བརྒྱུད་དེ་ཚིགས་བཅད་གཅིག་ཐོས་ཤིང༌། །རྗེས་སུ་ཡི་རང་ བསོད་ནམས་ཇི་སྙེད་པ། །དེ་ཡི་བསོད་ནམས་དེ་བས་ཆེས་མང་སྟེ། །བསོད་ནམས་ཕུང་པོ་སྔ་མས་ཆར་མི་ཕོད། །གང་གིས་བརྒྱུད་དེ་ཚིགས་བཅད་གཅིག་ཐོས་པ། །དེ་ལྟར་ དེ་ཡི་བསོད་ནམས་མང་གྱུར་ཏེ། །དེ་དག་མཐའ་ཡས་ཚད་ཀྱང་ཡོང་མེད་ན། །མངོན་སུམ་ཐོས་པ་དེ་ནི་སྨོས་ཅི་དགོས། །གང་དེར་སེམས་ཅན་གཅིག་ལའང་སྨྲས་པ་ནི། །བསྐལ་ པ་བྱེ་བ་ཁྲག་ཁྲིག་དུ་མར་ཡང༌། །མདོ་འདི་ཡང་ནི་ཤིན་ཏུ་རྙེད་དཀའ་ཡིས་།སོང་སྟེ་ཆོས་ཉོན་ཅེས་ནི་སྤྲོ་བར་བྱས། །སེམས་ཅན་དེ་དག་དེ་ཡིས་སྤྲོ་བྱས་ནས། །མདོ་འདི་ཡང་ནི་ཡུད་ ཙམ་ཉན་བྱེད་པ། །དེ་ཡི་ལས་ཀྱི་འབྲས་བུ་མཉན་པར་གྱིས། །ནམ་ཡང་དེ་ལ་ཁ་ཡི་ནད་མེད་འགྱུར། །དེ་ཡི་ལྕེ་ཡང་ན་བར་གཞར་མི་འགྱུར། །དེ་ཡི་སོ་རྣམས་འབྱུང་བར་མི་འགྱུར་ རོ། །སྔོན་པོ་སེར་པོ་མི་མཐུན་གཞར་མི་འགྱུར། །མཆུ་མི་སྡུག་པར་ཡང་ནི་ཡོང་མི་འགྱུར། །དེ་གདོང་ཡོའམ་སྐམ་ཞིང་རིད་པ་མེད། །ནམ་ཡང་སྣ་ལེབ་ཏུ་ནི་ཡོང་མི་འགྱུར། །སོ་དང་མཆུ་ དང་བཞིན་གྱི་དཀྱིལ་འཁོར་དང༌། །དེ་ཡི་སྣ་དང་དཔྲལ་བའི་དབྱིབས་ཀྱང་ལེགས། །མི་རྣམས་ཀྱིས་ནི་བལྟ་ན་སྡུག་པར་འགྱུར། །དེ་ཡི་ཁ་ནི་རུལ་པར་གཞར་མི་འགྱུར། །ཨུཏྤལ་བཞིན་ དུ་རྟག་ཏུ་དྲི་ཞིམ་པ། །དེ་ཡི་ཁ་ནས་དྲི་ཡང་འབྱུང་བར་འགྱུར། །དཔའ་བོ་ཁྱིམ་ནས་གཙུག་ལག་ཁང་དུ་སོང༌། །མདོ་སྡེ་ཉན་པའི་ཕྱིར་ནི་དེར་སོང་སྟེ། །སོང་ནས་དེར་ནི་ཡུད་ཙམ་དེས་ ཆོས་མཉན། །དད་པའི་སེམས་ཀྱི་འབྲས་བུ་མཉན་པར་གྱིས། །དེ་ཡི་ལུས་ནི་ཤིན་ཏུ་དཀར་བར་འགྱུར། །བརྟན་པ་དེ་ནི་རྟ་ཡི་ཤིང་རྟས་འགྲོ། །གླང་ཆེན་ཤིང་རྟ་མཐོན་པོར་འདུག་ ནས་སུ། །རིན་པོ་ཆེ་ཡིས་བརྒྱན་པ་ཞོན་ཞིང་ཆག །ཤིན་ཏུ་སྤུད་པའི་ཁྱོགས་ཀྱང་དེས་ཐོབ་ནས། །དེ་དག་དུ་མ་མི་ཡིས་བཏེག་ཅིང་བཀུར། །ཆོས་ཉན་ཕྱིར་ནི་སོང་བ་གྱུར་པ་ དེའི༑ ༑འབྲས་བུ་དགེ་བ་འདི་འདྲར་འགྱུར་བ་ཡིན། །དེ་ནི་འཁོར་གྱི་ནང་དེར་འདུག་ནས་སུ། །དཀར་པོའི་ལས་རྣམས་བྱས་པ་དེ་དག་གིས། །ཚངས་པའི་སྟན་དང་རྒྱལ་པོའི་སྟན་ རྣམས་དང༌། །བརྒྱ་བྱིན་སྟན་རྣམས་ཀྱང་ནི་དེས་ཐོབ་འགྱུར། །དམ་པའི་ཆོས་པདྨ་དཀར་པོ་ལས། རྗེས་སུ་ཡི་རང་བའི་བསོད་ནམས་བསྟན་པའི་ལེའུ་ཞེས་བྱ་སྟེ་བཅུ་བདུན་པའོ།། །། ༄༅། །དམ་པའི་ཆོས་པདྨ་དཀར་པོ། བམ་པོ་བཅུ་གཅིག་པ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་པར་རྒྱུན་དུ་བརྩོན་ ལ་བཀའ་སྩལ་པ། རིགས་ཀྱི་བུ་གང་ལ་ལ་ཆོས་ཀྱི་རྣམ་གྲངས་འདི་འཛིན་པའམ་ཀློག་པའམ་སྟོན་པའམ་ཡི་གེར་འདྲི་བའང་རུང་སྟེ། རིགས་ཀྱི་བུ་དེ་མིག་གི་ཡོན་ཏན་བརྒྱད་བརྒྱ་ ཐོབ་པར་འགྱུར་རོ། །རྣ་བའི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །སྣའི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། །ལྕེའི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །ལུས་ ཀྱི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། །ཡིད་ཀྱི་ཡོན་ཏན་སྟོང་ཉིས་བརྒྱ་ཐོབ་པར་འགྱུར་རོ། །དེ་ཡོན་ཏན་བརྒྱ་ཕྲག་མང་པོས་དབང་པོ་དྲུག་གི་གྲོང་ཡོངས་སུ་དག་ཅིང༌། ཤིན་ ཏུ་ཡོངས་སུ་དག་པར་འགྱུར་རོ། །དེའི་ཕ་དང་མ་ལས་བྱུང་བའི་ཤའི་མིག་ཐ་མལ་བ་དེ་ལྟར་ཡོངས་སུ་དག་པའི་མིག་གི་དབང་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ ཀྱི་ཕྱི་ནང་དང༌། བྲག་དང༌། ནགས་སྟུག་པོར་བཅས་པ་དང༌། འོག་ཏུ་མནར་མེད་པའི་སེམས་ཅན་དམྱལ་བ་ཆེན་པོ་ལ་ཐུག་པ་ཡན་ཆད། སྟེང་དུ་སྲིད་པའི་རྩེ་མོར་ཐུག་པའི་བར་ དུ་དེ་དག་ཐམས་ཅད་མཐོང་ངོ༌། །ཤའི་མིག་ཐ་མལ་བས་སེམས་ཅན་གང་དག་དེར་སྐྱེས་པ་དེ་དག་ཐམས་ཅད་ཀྱང་མཐོང་སྟེ། དེ་དག་གི་ལས་ཀྱི་རྣམ་པར་སྨིན་པའང་ཤེས་ སོ༑ ༑དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འཁོར་གྱི་དབུས་སུ་མི་འཇིགས་པ། །གང་ཞིག་མདོ་སྡེ་འདི་འཆད་ཅིང༌། །ལེ་ལོ་མེད་པར་ རབ་འཆད་པ། །དེ་ཡི་ཡོན་ཏན་ང་ལས་ཉན། །ཡོན་ཏན་དག་ནི་བརྒྱད་བརྒྱ་ཡི། །དེ་ཡི་མིག་ནི་ཀུན་ཏུ་མཛེས། །དེས་ནི་དེ་མིག་དྲི་མ་མེད། །རྙོག་པ་མེད་ཅིང་དག་པར་འགྱུར། །ཕ་དང་ མ་ལས་བྱུང་བ་ཡི། །དེ་ཡི་ཤ་ཡི་མིག་དེས་ནི། །འཇིག་རྟེན་ཁམས་འདི་ཐམས་ཅད་ཀྱང༌། །ཕྱི་ནང་བཅས་པ་རབ་ཏུ་མཐོང༌། །ལྷུན་པོའི་རི་རབ་ཐམས་ཅད་དང༌། །ཁོ་ར་ཡུག་ཀྱང་དེས་ མཐོང་སྟེ། །རི་གཞན་གང་རྣམས་གྲགས་པ་དང༌། །རྒྱ་མཚོ་དག་ཀྱང་མཐོང་བར་འགྱུར། །འོག་ཏུ་མནར་མེད་དམྱལ་བར་ཐུག །སྟེང་དུ་སྲིད་པའི་རྩེར་གནས་པ། །བརྟན་པ་དེས་ནི་ ཀུན་མཐོང་སྟེ། །ཤ་ཡི་མིག་ནི་དེ་འདྲའོ། །ད་དུང་དེ་ལ་ལྷ་ཡི་མིག །མེད་པས་ཤེས་པ་མ་ཡིན་ནོ། །དེ་ཡི་ཤ་ཡི་མིག་གི་ཡུལ། །དེ་དག་དེ་ལྟར་འགྱུར་བ་ཡིན། །རྟག་པར་རྒྱུན་དུ་ བརྩོན། །གཞན་ཡང་རིགས་ཀྱི་བུའམ་རིགས་ཀྱི་བུ་མོ་དེས་ཆོས་ཀྱི་རྣམ་གྲངས་འདི་ཡང་དག་པར་བསྟན་ཅིང་གཞན་དག་ལ་ཡང་དག་པར་བཤད་ན། རྣ་བའི་ཡོན་ཏན་སྟོང་ཉིས་བརྒྱ་པོ་ དེ་དག་དང་ལྡན་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་མནར་མེད་པའི་སེམས་ཅན་དམྱལ་བ་ཆེན་པོ་ལ་ཐུག་པ་ཡན་ཆད། སྲིད་པའི་རྩེ་མོ་ལ་ཐུག་པ་མན་ཆད་ན། ༄༅། །ཕྱི་ནང་གི་སྒྲ་རྣམ་པ་མང་པོ་གང་དག་འབྱུང་བ་འདི་ལྟ་སྟེ། གླང་པོ་ཆེའི་སྒྲའམ། རྟའི་སྒྲའམ། རྔ་མོའི་སྒྲའམ། བ་གླང་གི་སྒྲའམ། རའི་སྒྲའམ། ཤིང་ རྟའི་སྒྲའམ། དུ་བའི་སྒྲའམ། མྱ་ངན་གྱི་སྒྲའམ། འཇིགས་པའི་སྒྲའམ། དུང་གི་སྒྲའམ། དྲིལ་བུའི་སྒྲའམ། རྔའི་སྒྲའམ། རྩེད་མོའི་སྒྲའམ། གླུའི་སྒྲའམ། རོལ་མོའི་སྒྲའམ། སྐྱེས་པའི་སྒྲའམ། བུད་མེད་ཀྱི་སྒྲའམ། ཁྱེའུའི་སྒྲའམ། བུ་མོའི་སྒྲའམ། ཆོས་ཀྱི་སྒྲའམ། ཆོས་མ་ཡིན་པའི་སྒྲའམ། བདེ་བའི་སྒྲའམ། སྡུག་བསྔལ་བའི་སྒྲའམ། བྱིས་ པའི་སྒྲའམ། འཕགས་པའི་སྒྲའམ། ཡིད་དུ་འོང་བའི་སྒྲའམ། ཡིད་དུ་མི་འོང་བའི་སྒྲའམ། ལྷའི་སྒྲའམ། ཀླུའི་སྒྲའམ། གནོད་སྦྱིན་གྱི་སྒྲའམ། དྲི་ཟའི་སྒྲའམ། ལྷ་མ་ ཡིན་གྱི་སྒྲའམ། ནམ་མཁའ་ལྡིང་གི་སྒྲའམ། མིའམ་ཅིའི་སྒྲའམ། ལྟོ་འཕྱེ་ཆེན་པོའི་སྒྲའམ། མིའི་སྒྲའམ། མི་མ་ཡིན་པའི་སྒྲའམ། མེའི་སྒྲའམ། ཆུའི་སྒྲའམ། རླུང་གི་ སྒྲའམ། གྲོང་གི་སྒྲའམ། གྲོང་ཁྱེར་གྱི་སྒྲའམ། དགེ་སློང་གི་སྒྲའམ། ཉན་ཐོས་ཀྱི་སྒྲའམ། རང་སངས་རྒྱས་ཀྱི་སྒྲའམ། བྱང་ཆུབ་སེམས་དཔའི་སྒྲའམ། དེ་བཞིན་གཤེགས་ པའི་སྒྲའམ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཕྱི་ནང་ན། སྒྲ་ཅི་བྱུང་བ་ཇི་སྙེད་པ་དེ་དག་ཐམས་ཅད་རྣ་བའི་དབང་པོ་ཐམས་ང་ཡོངས་སུ་དག་པ་དེས་ཐོས་ ཏེ༑ རེ་ཞིག་ལྷའི་རྣ་བ་ནི་མི་སྒྲུབ་མོད་ཀྱི། སེམས་ཅན་དེ་དང་དེ་དག་གི་སྐད་དུ་རབ་ཏུ་རྟོགས་སོ། །སེམས་ཅན་དེ་དང་དེ་དག་གིས་སྐད་ལ་རྣམ་པར་རྟོག་གོ །རྣམ་པར་འབྱེད་དོ། །རྣ་བའི་ དབང་པོ་ཐ་མལ་པ་དེས་སེམས་ཅན་དེ་དང་དེ་དག་གིས་སྐད་རྣམས་ཐོས་ཀྱང༌། དེའི་རྣ་བའི་དབང་པོ་ལ་སྒྲ་དེ་དག་ཐམས་ཅད་ཀྱིས་ཟིལ་གྱིས་མི་ནོན་ཏོ། །རྟག་པར་རྒྱུན་དུ་བརྩོན། བྱང་ཆུབ་ སེམས་དཔའ་སེམས་དཔའ་ཆེན་པོ་དེ་རྣ་བའི་དབང་པོ་འདི་ལྟ་བུ་ཐོབ་པར་འགྱུར་ཏེ། རེ་ཞིག་ལྷའི་རྣ་བ་ནི་མངོན་པར་མི་སྒྲུབ་བོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་ བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །དེ་ཡི་རྣ་བའི་དབང་པོ་ཐ་མལ་པ། །རྙོག་པ་མེད་ཅིང་རྣམ་པར་དག་པར་འགྱུར། །འཇིག་ རྟེན་ཁམས་འདི་དག་ན་མ་ལུས་པར། །རྣམ་པ་མང་པོའི་སྒྲ་རྣམས་དེས་ཐོས་ཏེ། །རྔ་བོ་ཆེ་དང་རྫ་རྔ་སྒྲ་སྙན་དང༌། །པི་ཝང་གླིང་བུ་དང་ནི་པ་ལ་ཀི །ཤིང་རྟ་བ་ལང་ར་དང་ལུག་དག་དང༌། རྟ་དང་གླང་ཆེན་དག་གི་སྒྲ་ཡང་ཐོམ། །འཇམ་ཞིང་ཡིད་འོང་གླུ་ཡི་དབྱངས་ཀྱང་ཐོས། །བརྟན་པ་དེ་ནི་དེ་ལ་ཆགས་པ་མེད། །གང་དང་གང་ན་སུ་དང་སུ་སྨྲ་བ། །བྱེ་བ་སྙེད་ཀྱི་མི་ཡི་སྒྲ་ རྣམས་ཐོས། །ལྷ་ཡི་སྒྲ་དང་ཀླུ་ཡི་དབྱངས་རྣམས་ཀྱང༌། །སྙན་ཅིང་ཡིད་དུ་འོང་བ་རྟག་པར་ཐོས། །སྐྱེས་པ་བུད་མེད་དག་གི་སྒྲ་རྣམས་དང༌། །ཁྱེའུ་དང་བུ་མོའི་སྒྲ་ཡང་དེ་བཞིན་ཐོས། ། ༄༅། །རི་དང་ཕུག་ན་གང་གནས་དེ་དག་དང༌། །ཁུ་བྱུག་རྨ་བྱ་ཀ་ལ་པིངྐ་དང༌། །བྱ་རྣམས་གང་དག་ཤང་ཤང[?] ཏེའུ་རྣམས་དང༌། །དེ་དག་རྣམས་ཀྱི་སྒྲ་ སྙན་འདིར་ཐོས་སོ། །སེམས་དམྱལ་དག་ན་སྡུག་བསྔལ་གང་མྱོང་བ། །ཤིན་ཏུ་མི་བཟད་པ་ཡི་སྒྲ་རྣམས་དང༌། །ཟས་ཀྱི་སྡུག་བསྔལ་དག་གིས་ཉེན་པ་ཡི། །ཡི་དྭགས་རྣམས་ ཀྱི་སྒྲ་ཕྱུང་དེ་བཞིན་ཐོས། །ལྷ་མ་ཡིན་དང་རྒྱ་མཚོའི་ནང་གནས་དང༌། །སྒྲ་འབྱིན་པ་དང་དེ་བཞིན་གཞན་དག་དང༌། །ཆོས་སྨྲ་བ་དེ་འདི་ན་འདུག་བཞིན་དུ། །སྒྲ་རྣམས་ཐམས་ ཅད་ཐོས་ཏེ་ཆོད་པ་མེད། །དུད་འགྲོའི་སྐྱེ་གནས་དག་ན་ཕན་ཚུན་དུ། །སྨྲ་བར་བྱེད་པའི་སྒྲ་རྣམས་གང་ཡིན་པ། །རྣམ་པ་ཐ་དད་སྒྲ་རྣམས་མང་པོ་དག །དེ་ནི་འདི་ན་འདུག་བཞིན་དེ་ དག་ཐོས། །ལྷ་གང་ཚངས་པའི་འཇིག་རྟེན་གནས་པ་དང༌། །གང་དག་འོག་མིན་དང་ནི་འོད་གསལ་ལྷ། །ཕན་ཚུན་དུ་ནི་སྒྲ་སྐད་གང་འབྱིན་པ། །དེ་དག་མ་ལུས་ཐམས་ཅད་ དེས་ཐོས་སོ། །བདེ་བར་གཤེགས་ཀྱི་བསྟན་ལ་རབ་བྱུང་ནས། །དགེ་སློང་གང་དག་ཁ་ཏོན་བྱེད་པ་དང༌། །འཁོར་གྱི་ནང་ན་ཆོས་སྟོན་གང་ཡིན་པ། །དེ་དག་སྒྲ་ཡང་རྟག་ཏུ་ དེ་ཡིས་ཐོས། །འཇིག་རྟེན་ཁམས་འདིར་བྱང་ཆུབ་སེམས་དཔའ་གང༌། །ཁ་ཏོན་དག་ཀྱང་བྱེད་ཅིང་ཕན་ཚུན་དུ། །ཆོས་རྣམས་ཡང་དག་རྗོད་པར་གང་བྱེད་པ། དེ་དག་སྒྲ་ རྣམས་རྣམ་པ་ཐ་དད་ཐོས། །བྱང་ཆུབ་སེམས་དཔའ་མདོ་འདི་གང་འཛིན་པས། །སངས་རྒྱས་བཅོམ་ལྡན་མི་འདུལ་ཁ་ལོ་སྒྱུར། །འཁོར་རྣམས་ལ་ཡང་ཆོས་མཆོག་གང་གསུང་བ། ། དུས་གཅིག་ཏུ་ནི་དེ་ཡང་དེ་ཡིས་ཐོས། །མནར་མེད་ཡན་ཆད་སྟེང་དུ་སྲིད་པའི་རྩེ། །སྟོང་གསུམ་གྱི་ནི་ཞིང་འདི་ཐམས་ཅད་ན། །ནང་ལོགས་དག་དང་ཕྱི་ལོགས་དག་ནས་ཀྱང༌། །སེམས་ ཅན་གང་གིས་སྒྲ་མང་ཕྱུང་བ་དང༌། །སེམས་ཅན་ཀུན་གྱི་སྒྲ་རྣམས་ཐོས་གྱུར་ཀྱང༌། །འོན་ཀྱང་དེ་ཡི་རྣ་བ་འགག་པ་མེད། །དབང་པོ་གསལ་ཞིང་གནས་དང་གནས་ཀྱང་ཤེས། །རྣ་བའི་ དབང་པོ་ཐ་མལ་དེ་ཙམ་མོ། །རེ་ཞིག་ལྷ་ཡི་ལ་ནི་འབད་མི་བྱེད། །ཐ་མལ་རྣ་བ་དེ་ནི་དེ་ལྟར་འདུག །འཇིགས་མེད་གང་གིས་མདོ་འདི་བཟུང་བ་ནི། །དེ་ཡི་ཡོན་ཏན་དག་ནི་དེ་འདྲར་འགྱུར། ། རྟག་པར་རྒྱུན་དུ་བརྩོན་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་འདི་འཛིན་ཏམ། རབ་ཏུ་སྟོན་ཏམ། ཁ་ཏོན་བྱེད་དམ། ཡི་གེར་འདྲི་བ་དེ། སྣའི་ཡོན་ཏན་ བརྒྱད་བརྒྱ་དང་ལྡན་ཞིང་སྣའི་དབང་པོ་ཡོངས་སུ་དག་པར་འགྱུར་ཏེ། དེའི་སྣའི་དབང་པོ་ཡོངས་སུ་དག་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཕྱི་ནང་གི་དྲི་རྣམ་པ་ མང་པོ་ཡོད་པ་འདི་ལྟ་སྟེ། རུལ་བའི་དྲིའམ། ཡིད་དུ་འོང་བའི་དྲིའམ། ཡིད་དུ་མི་འོང་བའི་དྲིའམ། མེ་ཏོག་རྣམ་པ་ཐ་དད་པའི་དྲི་འདི་ལྟ་སྟེ། སྣ་མའི་མེ་ཏོག་དང༌། མ་ལི་ཀ་དང༌། ཙམྤ་ ༄༅། །ཀ་དང༌། སྐྱ་སྣར་གྱི་དྲི་རྣམས་ཀྱང་ཚོར་རོ། །ཆུ་ལས་སྐྱེས་པའི་མེ་ཏོག་རྣམ་པ་མང་པོའི་དྲི་རྣམས་ཀྱང་ཚོར་ཏེ་འདི་ལྟ་སྟེ། ཨུཏྤ་ལ་དང༌། པདྨ་དང༌། ཀུ་མུ་ ཏ་དང༌། པདྨ་དཀར་པོ་རྣམས་ཀྱི་དྲི་དག་ཀྱང་ཚོར་རོ། །མེ་ཏོག་དང་འབྲས་བུའི་ཤིང་རྣམ་པ་མང་པོའི་མེ་ཏོག་དང༌། འབྲས་བུའི་དྲི་རྣམས་ཀྱང་ཚོར་ཏེ། འདི་ལྟ་སྟེ། ཙནྡན་དང༌། ཏ་མ་ལའི་འདབ་མ་དང༌། རྒྱ་སྤོས་དང༌། ཨ་ག་རུའི་དྲི་ཞིམ་པོ་རྣམས་ཀྱང་ཚོར་རོ། །སྤོས་རྣམ་པ་ཐ་དད་པ་བརྒྱ་སྟོང་གནས་གཅིག་ན་འདུག་པ་ཐམས་ཅད་ཀྱང་ ཚོར་རོ། །ཐམས་ཅད་ཀྱང་ཤེས་སོ། །སེམས་ཅན་གྱི་དྲི་རྣམ་པ་མང་པོའང་ཚོར་ཏེ་འདི་ལྟ་སྟེ། གླང་པོ་ཆེ་དང༌། རྟ་དང༌། བ་ལང་དང༌། ར་ལུག་དང༌། ཕྱུགས་ཀྱི་དྲི་རྣམས་ ཀྱང་ཚོར་རོ། །དུད་འགྲོའི་སྐྱེ་གནས་སུ་སོང་བའི་སྲོག་ཆགས་རྣམ་པ་མང་པོའི་ལུས་ཀྱི་དྲི་རྣམས་ཀྱང་ཚོར་རོ། །སྐྱེས་པ་དང༌། བུད་མེད་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ཁྱེའུ་དང༌། བུ་མོའི་ལུས་ཀྱི་དྲི་རྣམས་ཀྱང་ཚོར་རོ། །རྩྭ་དང༌། ཤིང་གེལ་པ་དང༌། སྨན་དང༌། ནགས་ཐག་རིང་པོ་ན་འདུག་པའི་དྲི་རྣམས་ཀྱང་ཚོར་རོ། །དྲི་ཡང་དག་པར་ཚོར་ཏེ་དྲི་ཡང་དག་ པར་ཤེས་མོད་ཀྱི། དྲི་དེ་དག་གིས་མི་འཕྲོགས། དེ་དག་གིས་མྱོས་པར་མི་འགྱུར་རོ། །དེ་འདི་ན་འདུག་བཞིན་དུ་ལྷ་དག་གི་དྲི་རྣམས་ཀྱང་ཚོར་ཏེ་འདི་ལྟ་སྟེ། ཡོངས་འདུས་བརྟོལ་ གྱི་དྲི་རྣམས་ཀྱང་ཚོར་རོ། །མེ་ཏོག་མནད་ར་དང༌། མནད་ར་ཆེན་པོ་དང༌། མཉཛུ་ཥ་ཀ་དང༌། མཉྫུ་ཥ་ཀ་ཆེན་པོ་རྣམས་ཀྱི་ལྷའི་དྲི་རྣམས་ཀྱང་ཚོར་རོ། །ལྷའི་ཨ་ག་རུའི་ཕྱེ་མ་དང༌། ཙནྡན་ གྱི་ཕྱེ་མ་དག་གི་དྲི་རྣམས་ཀྱང་ཚོར་རོ། །ལྷའི་མེ་ཏོག་རྣམ་པ་ཐ་དད་པ་བརྒྱ་སྟོང་གི་དྲི་དག་ཀྱང་ཚོར་རོ། །དེ་དག་གི་མང་རྣམས་ཀྱང་ཤེས་སོ། །ལྷའི་བུའི་ལུས་ཀྱི་དྲི་རྣམས་ཀྱང་ཚོར་ཏེ་ འདི་ལྟ་སྟེ། ལྷའི་དབང་པོ་བརྒྱ་བྱིན་གྱི་ལུས་ཀྱི་དྲིའང་ཚོར་རོ། །རྣམ་པར་རྒྱལ་པའི་ཁང་བཟང་ན་རྩེ་དགའ་ཞིང་དགའ་མགུར་སྤྱོད་པའམ། ཆོས་བཟང་ལྷའི་འདུན་ས་ན་སུམ་ཅུ་རྩ་ གསུམ་པའི་ལྷ་རྣམས་ལ་ཆོས་སྟོན་པའམ། རྩེ་དགའ་བའི་ཕྱིར་སྐྱེད་མོས་ཚལ་གྱི་སར་བྱུང་བདེའང་ཤེས་སོ། །ལྷའི་བུ་གཞན་རྣམས་ཀྱི་སོ་སོའི་ལུས་ཀྱི་དྲི་རྣམས་ཀྱང་ཚོར་རོ། །ལྷའི་ བུ་མོ་རྣམས་དང་ལྷའི་ཆུང་མ་རྣམས་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ལྷ་གཞོན་ནུ་རྣམས་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ལྷ་གཞོན་ནུ་མ་རྣམས་ཀྱི་ལུས་ཀྱི་དྲི་རྣམས་ཀྱང་ཚོར་ཏེ། དྲི་ དེ་དག་གིས་ཀྱང་མི་འཕྲོགས་ཤིང་མྱོས་པར་ཡང་མི་འགྱུར་རོ། །རྣམ་གྲངས་འདིས་སྲིད་པའི་རྩེ་མོའི་བར་དུ་སྐྱེས་པའི་སེམས་ཅན་དེ་དག་གི་ལུས་ཀྱི་དྲི་རྣམས་ཀྱང་ཚོར་རོ། །ཚངས་ རིས་ཀྱི་ལྷའི་བུ་རྣམས་དང༌། ཚངས་པ་ཆེན་པོ་རྣམས་ཀྱི་ལུས་ཀྱི་དྲི་རྣམས་ཀྱང་སོར་རོ། །རྣམ་གྲངས་འདིས་ལྷའི་རིས་ཐམས་ཅད་ཀྱི་ལུས་ཀྱི་དྲི་རྣམས་ཀྱང་ཚོར་རོ། །ཉན་ཐོས་དང༌། ༄༅། །རང་སངས་རྒྱས་དང༌། བྱང་ཆུབ་སེམས་དཔའ་དང༌། དེ་བཞིན་གཤེགས་པ་དག་གི་སྐུའི་དྲི་རྣམས་ཀྱང་ཚོར་རོ། །དེ་བཞིན་གཤེགས་པ་དག་ གི་གདན་གྱི་དྲི་རྣམས་ཀྱང་ཚོར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གང་ན་བཞུགས་པ་དེའང་རབ་ཏུ་ཤེས་སོ། །དེའི་ སྣའི་དབང་པོ་དེའང་དྲི་རྣམ་པ་མང་པོ་དེ་དང་དེ་དག་གིས་མི་འཕྲོགས་ཏེ། ཉམས་པའམ་གནོད་པར་འགྱུར་བའང་མེད་དོ། །དེ་འདོད་ན་དྲི་དེ་དང་དེ་དག་གཞན་དག་ལའང་ སྟོན་ཏེ། དེ་དྲན་པ་ཉམས་པར་འགྱུར་བ་མེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དེ་ཡི་སྣ་ཡི་དབང་པོ་རྣམ་དག་ འགྱུར། །གང་རྣམས་འཇིག་རྟེན་ཁམས་འདི་ཐམས་ཅད་ན། །དྲི་ཞིམ་དྲི་མི་ཞིམ་པ་ཅི་ཡོད་པ། །དེས་ནི་རྣམ་པ་མང་པོའི་དྲི་ཡང་ཚོར། །སྣ་མའི་མེ་ཏོག་དྲི་དང་མ་ལི་ ཀ །ཙནྡན་ཏ་མ་ལ་ཡི་འདབ་མ་དང༌། །རྒྱ་སྤོས་དག་དང་ཨ་ག་རུ་ཡི་དྲི། །མེ་ཏོག་འབྲས་བུ་སྣ་མང་དེ་དག་དང༌། །སྐྱེས་པ་བུད་མེད་རིང་ན་འདུག་པ་དང༌། །ཁྱེའུ་ རྣམས་དང་ནི་བུ་མོ་དེ་དག་དང༌། །སེམས་ཅན་རྣམས་ཀྱི་དྲི་ཡང་དེ་བཞིན་ཤེས། །དེ་ཡི་གནས་ཀྱང་དེས་ནི་དྲི་ལས་ཤེས། །འཁོར་ལོས་བསྒྱུར་རྒྱལ་རྣམས་ཀྱང་དེ་ཡིས་ ཤེས༑ ༑སྟོབས་ཀྱི་འཁོར་ལོས་བསྒྱུར་དང་རྒྱལ་ཕྲན་དང༌། །དེ་བཞིན་ཁྱེའུ་དང་བུ་མོ་དེ་དག་དང༌། །ཆུང་མའི་འཁོར་ཀུན་དྲི་ལས་དེ་ཡིས་ཤེས། །ཡོངས་སུ་ལོངས་སྤྱོད་རིན་ཆེན་ རྣམ་མང་དང༌། །སྦ་བ་གང་དག་ས་ལ་འདུག་རྣམས་དང༌། །བུད་མེད་རིན་པོ་ཆེར་གྱུར་དེ་དག་ཀྱང༌། །བྱང་ཆུབ་སེམས་དཔའ་དེ་ཡིས་དྲི་ལས་ཤེས། །དེ་དག་རྣམས་ཀྱི་རྒྱན་ རྣམས་ཅི་ཡོད་པ། །ལུས་ལ་བཏགས་པ་རྣམ་པ་སྣ་ཚོགས་གཟུགས། །གོས་དང་ཕྲེང་བ་བྱུག་པ་སྤོས་རྣམས་ཀྱང༌། །དྲི་ལས་བྱང་ཆུབ་སེམས་དཔའ་དེ་ཡིས་ཤེས། །དེ་བཞིན་འགྲེང་དང་ འདུག་དང་ཉལ་བ་དང༌། །རྩེད་མོ་དགའ་བ་མཐུ་སྟོབས་ཐམས་ཅད་ཀྱང༌། །མདོ་སྡེ་དམ་པ་འདི་ནི་གང་འཛིན་པ། །བརྟན་པ་དེ་ཡི་སྣ་ཡི་སྟོབས་ཀྱིས་ཤེས། །སྤོས་མཆོག་འབྲུ་མར་དྲི་ཡང་ དེ་བཞིན་ཏེ། །མེ་ཏོག་འབྲས་བུ་རྣམ་པ་མང་པོའི་དྲི། །དྲི་འདི་ག་གེ་མོ་ན་ཡོང་ཅེས་ཀྱང༌། །འདུག་བཞིན་དུ་ནི་ཅིག་ཅར་ཤེས་ཤིང་ཚོར། །རི་ཡི་ཕྲག་ནི་རྣམ་པ་སྣ་ཚོགས་ན། །ཙནྡན་མེ་ ཏོག་རྒྱས་མང་གང་ཡོད་དང༌། །སེམས་ཅན་གང་དག་དེ་ན་གནས་པ་ཡང༌། །མཁས་དེས་དེ་དག་ཐམས་ཅད་དྲི་ལས་ཤེས། །ཁོར་ཡུག་ངོས་ལ་གང་དག་གནས་པ་དང༌། །རྒྱ་མཚོའི་ དབུས་རྙ[?] གང་དག་འཁོད་པ་དང༌། །ས་ཡི་དབུས་ན་སེམས་ཅན་གང་གནས་པ། །མཁས་པ་དེས་ནི་ཐམས་ཅད་དྲི་ལས་ཤེས། །ལྷ་དང་ལྷ་མ་ཡིན་ཡང་དེ་བཞིན་ཤེས། །དེས་ནི་ལྷ་ ༄༅། །མིན་བུ་མོ་དག་ཀྱང་ཤེས། །ལྷ་མ་ཡིན་གྱི་རྩེད་མོ་དགའ་བའང་ཤེས། །དེ་ཡི་སྣ་ཡི་དབང་པོའི་མཐུ་དེ་འདྲ། །ནགས་ཁྲོད་དག་ན་རྐང་བཞི་གང་ཡོད་ པ༑ ༑སེང་གེ་སྟག་དང་དེ་བཞིན་གླང་ཆེན་མཆོག །དེ་ན་མ་ཧེ་བ་ལང་བ་མེན་རྣམས། །དེ་དག་གནས་པ་དེ་ཡི་སྣ་ཡིས་ཤེས། །བུད་མེད་གང་དག་སྦྲུམ་མར་གྱུར་པ་དང༌། །ཁྱེའུ་ འམ་འོན་ཏེ་བུ་མོ་གང་ཡིན་པ། །རུམ་ན་འཆང་བ་ཤིན་ཏུ་ངལ་བའི་ལུས། །དེ་ལ་གང་ཡོད་དེ་ཡི་དྲི་ལས་ཤེས། །སེམས་ཅན་མངལ་དུ་ཞུགས་པའང་དེས་ཤེས་ཏེ། །རྣམ་པར་ འཇིག་པའི་ཆོས་ཀྱང་དེ་ཡིས་ཤེས། །བུད་མེད་འདི་ནི་སྡུག་བསྔལ་རྣམས་དང་བྲལ། །བསོད་ནམས་ལྡན་པའི་བུ་ནི་འབྱུང་བར་ཤེས། །སྐྱེས་བུའི་བསམ་པ་མང་པོར་རབ་ཤེས་ ཏེ༑ ༑བསམ་པའི་དྲི་ཡང་དེ་བཞིན་དེ་ཡིས་ཚོར། །འདོད་ཆགས་ཞེ་སྡང་དེ་བཞིན་འཆབ་པ་དག །ཉེ་བར་ཞི་བའི་སེམས་ཀྱི་དྲི་ཡང་ཚོར། །ས་ལ་གཏེར་རྣམས་གང་དག་ཡོད་ གྱུར་པ། །ནོར་རྣམས་དང་ནི་གསེར་དངུལ་འགྲོན་བུ་ཡིས། །ལྕགས་ཀྱི་སྒྲོམ་རྣམས་དེ་བཞིན་གང་བ་དག །དྲི་ལས་བྱང་ཆུབ་སེམས་དཔའ་དེ་ཡིས་ཤེས། །མུ་ཏིག་ནོར་བུ་དོ་ ཤལ་སེ་མོ་དོ། །རིན་ཐང་མེད་པའི་རིན་ཆེན་རྣམ་མང་པོ། །རིན་ཐང་མེད་པའི་མིང་དང་འོད་དབྱིབས་ཀྱང༌། །དེ་དག་ཐམས་ཅད་དེ་ཡི་དྲི་ལས་ཤེས། །དེ་བཞིན་སྟེང་གི་ལྷ་ཡི་མེ་ ཏོག་རྣམས། །མནྡཱ་ར་དང་མཉྫུ་ཥ་ཀ་དང༌། །ཡོངས་འདུའི་མེ་ཏོག་གང་དག་ཡོད་གྱུར་པ། །དཔའ་བོ་འདི་ན་འདུག་བཞིན་དེ་དག་ཚོར། །གང་གི་གཞལ་མེད་ཁང་རྣམས་ཅི་འདྲ་བ། ། ཡངས་དང་འབྲིང་དང་དེ་བཞིན་ཆུང་ངུ་དང༌། །དེ་ན་རྣམ་པ་སྣ་ཚོགས་གཟུགས་ཡོད་པ། །འདི་ན་འདུག་བཞིན་སྣ་ཡི་སྟོབས་ཀྱིས་ཚོར། །སྐྱེད་མོས་ཚལ་གྱི་ས་ཡང་དེ་བཞིན་ཤེས། ། ཆོས་བཟང་དང་ནི་རྣམ་པར་རྒྱལ་བ་ཡི། །ཁང་བཟང་མཆོག་ན་ལྷ་གང་འཁོད་པ་དག །དེ་ན་ལྷའི་བུ་བརྩེ་ན་པའང་རྟག་ཏུ་ཤེས། །གང་ཞིག་གང་ན་ལས་ནི་བྱེད་པའང༌། །འདུག་ དང་ཉལ་དང་གང་དུ་འགྲོ་བ་ཡང༌། །འདི་ན་འདུག་བཞིན་དེ་དག་དྲི་ཡང་ཚོར། །ལྷ་ཡི་བུ་རྣམས་དེས་ནི་དྲི་ལས་ཤེས། །མེ་ཏོག་མང་བརྒྱན་ལྷ་ཡི་བུ་མོ་གང༌། །ཕྲེང་བ་ཐོགས་ཤིང་ ལྷབ་ལྷུབ་རྣམས་ཀྱིས་བརྒྱན། །གང་དང་གང་དུ་བརྩེན་ཞིང་འདོང་བ་དག །བྱང་ཆུབ་སེམས་དཔའ་དེ་ཡིས་དྲི་ལས་ཤེས། །སྟེང་དུ་སྲིད་པའི་རྩེ་མོའི་བར་གྱི་ལྷ། །ཚངས་པ་ཚངས་ ཆེན་གཞལ་མེད་ཁང་རྒྱུ་བ། །བསམ་གཏན་གནས་སམ་འོན་ཏེ་ལངས་པ་ཡང༌། །དེ་དག་དེར་ནི་དྲི་ལས་རབ་ཏུ་ཤེས། །འོད་གསལ་གྱི་ནི་ལྷ་ཡི་བུ་རྣམས་ཀྱང༌། །འཆི་འཕོས་སྐྱེས་ པ་གསར་དུ་འོངས་པ་ཤེས། །བྱང་ཆུབ་སེམས་དཔའ་མདོ་འདི་འཛིན་པ་ཡི། །སྣ་ཡི་དབང་པོ་འདི་འདྲར་འགྱུར་བ་ཡིན། །དགེ་སློང་གང་རྣམས་བདེ་གཤེགས་བསྟན་པ་ ༄༅། །ལ༑ ༑མངོན་པར་བརྩོན་པ་འཆག་ཅིང་འདུག་པ་དང༌། །ལུང་ནོད་ཁ་ཏོན་མོས་པའི་དགེ་སློང་རྣམས། །ཐམས་ཅད་བྱང་ཆུབ་སེམས་དཔའ་ དེ་ཡིས་ཤེས། །རྒྱལ་བའི་སྲས་པོ་ཉན་ཐོས་གང་ཡོད་པ། །ལ་ལ་རྟག་ཏུ་ཤིང་དྲུང་གནས་པ་དག །དགེ་སློང་འདི་ཞེས་བྱ་བར་འདིར་གནས་ཤེས། །དེ་དག་ཐམས་ཅད་ མཁས་པ་དེས་ཤེས་སོ། །བྱང་ཆུབ་སེམས་དཔའ་དྲན་ལྡན་བསམ་གཏན་པ། །རྟག་ཏུ་ལུང་ནོད་ཁ་ཏོན་དགའ་གང་དག །འཁོར་གྱི་ནང་ན་ཆོས་ཀྱང་རབ་འཆད་པ། ། དེ་དག་དྲི་ལས་བྱང་ཆུབ་སེམས་དཔས་ཤེས། །བདེ་བར་གཤེགས་པ་ཐུབ་ཆེན་ཕྱོགས་གང་ན། །ཉན་ཐོས་དགེ་འདུན་མདུན་གྱིས་བལྟས་དུས་ན། །ཕན་ཞིང་ཐུགས་ བརྩེ་རབ་ཏུ་ཆོས་འཆད་པ། །འཇིག་རྟེན་མགོན་པོ་དེ་ཡང་དྲི་ལས་ཤེས། །སེམས་ཅན་གང་རྣམས་ཆོས་འདི་ཉན་པ་དག །གང་རྣམས་ཐོས་ནས་དགའ་བའི་ཡིད་གྱུར་ པ༑ ༑དེ་ན་རྒྱལ་བའི་འཁོར་རྣམས་ཐམས་ཅད་ཀྱང༌། །འདི་ན་འདུག་བཞིན་བྱང་ཆུབ་སེམས་དཔས་ཤེས། །དེ་ཡི་སྣ་ཡི་སྟོབས་ནི་དེ་འདྲར་འགྱུར། །དེ་ལ་ལྷ་ཡི་སྣ་ནི་ ད་དུང་མེད། །ཟག་པ་མེད་པར་གྱུར་པ་ལྷ་ཡི་སྣ། །དེ་ཡི་སྡུན་དུ་འགྲོ་པར་འདི་འགྱུར་རོ། །རྟག་[?]པར་རྒྱུན་དུ་བརྩོན། གཞན་ཡང་རིགས་ཀྱི་བུའམ་རིགས་ཀྱི་བུ་མོ་དེ་ཆོས་ཀྱི་རྣམ་ གྲངས་འདི་འཛིན་ཏམ། སྟོན་ཏམ། རབ་ཏུ་འཆད་དམ། ཡི་གེར་འདྲིར་འཇུག་ན། ལྕེའི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་པའི་ལྕེའི་དབང་པོ་ཐོབ་པར་འགྱུར་ཏེ། དེ་ལྕེའི་ དབང་པོ་དེ་ལྟ་བུས་རོ་གང་དག་མྱངས་པ་དང༌། རོ་གང་དག་ཚོར་བ་དང༌། རོ་གང་དག་ལྕེའི་དབང་པོ་ལ་རེག་པ་དེ་ཐམས་ཅད་ལྷའི་རོ་བྲོ་བ་དམ་པར་འགྱུར་རོ། །ཇི་ལྟར་ཡིད་དུ་མི་འོང་ བའི་རོ་གང་དག་ཡང་མི་མྱོང་བ་དེ་ལྟ་བུ་མྱོང་བར་འགྱུར་རོ། །ཡིད་དུ་མི་འོང་བའི་རོ་གང་ཡིན་པ་དེ་དག་ཀྱང༌། དེའི་ལྕེའི་དབང་པོའི་སྟེང་དུ་རེག་ན་ལྷའི་རོ་བྲོ་བར་འགྱུར་རོ། །འཁོར་ གྱི་ནང་དུ་སོང་ནས་ཆོས་གང་བཤད་པ་དེས། སེམས་ཅན་དེ་དག་དབང་པོ་ཚིམ་པར་འགྱུར་ཏེ། མགུ་བ་དང༌། ཡོངས་སུ་མགུ་བ་དང༌། མཆོག་ཏུ་དགའ་བ་སྐྱེའོ། །དེའི་སྒྲའང་ ཟབ་ཅིང་ཡིད་དུ་འོང་ལ་མཉེན་ཞིང་སྙན་པར་འགྱུར་ཏེ། སྙིང་ལ་འབབ་པ་དང་དགའ་བར་འགྱུར་བ་དེས་སེམས་ཅན་དེ་དག་དགའ་མགུ་ཡི་རང་བའི་སེམས་སུ་འགྱུར་རོ། །གང་ དག་ལ་ཆོས་བཤད་པ་དེ་དག་གིས་ཀྱང་དེའི་དབྱངས་འཇམ་ཞིང་སྙན་པ་ཡིད་དུ་འོང་བའི་སྒྲ་ཐོས་ནས། ལྷ་རྣམས་ཀྱང་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌། ཆོས་མཉན་པའི་ཕྱིར་དེའི་དྲུང་དུ་འགྲོ་བར་སེམས་སོ། །ལྷའི་བུ་དང་ལྷའི་བུ་མོ་རྣམས་ཀྱང་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌། ཆོས་མཉན་པའི་ཕྱིར་དྲུང་དུ་ ༄༅། །འགྲོ་བར་སེམས་སོ། །བརྒྱ་བྱིན་དང༌། ཚངས་པ་དང༌། ཚངས་རིས་ཀྱི་ལྷའི་བུ་རྣམས་ཀྱང་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌། ཆོས་ མཉན་པའི་ཕྱིར་དྲུང་དུ་འགྲོ་བར་སེམས་སོ། །ཀླུ་དང༌། ཀླུའི་བུ་མོ་རྣམས་ཀྱང་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌། ཆོས་མཉན་པའི་ཕྱིར་དྲུང་དུ་འགྲོ་བར་ སེམས་སོ། །ལྷ་མ་ཡིན་དང༌། ལྷ་མ་ཡིན་གྱི་བུ་མོ་རྣམས་ཀྱང་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌། ཆོས་མཉན་པའི་ཕྱིར་དྲུང་དུ་འགྲོ་བར་སེམས་སོ། ། ནམ་མཁའ་ལྡིང་དང༌། ནམ་མཁའ་ལྡིང་གི་བུ་མོ་རྣམས་ཀྱང་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌། ཆོས་མཉན་པའི་ཕྱིར་དྲུང་དུ་འགྲོ་བར་སེམས་སོ། །མིའམ་ ཅི་དང༌། མིའམ་ཅིའི་བུ་མོ་དང༌། གནོད་སྦྱིན་དང༌། གནོད་སྦྱིན་གྱི་བུ་མོ་དང༌། ཤ་ཟ་དང༌། ཤ་ཟའི་བུ་མོ་རྣམས་ཀྱང་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་དང༌། ཆོས་མཉན་པར་བྱ་བའི་ཕྱིར་དྲུང་དུ་འགྲོ་བར་སེམས་ཏེ། དེ་དག་ཀྱང་དེ་ལ་བཀུར་སྟི་བྱེད། བསྟི་སྟང་དུ་བྱེད། བཙུན་པར་བྱེད། མཆོད་པ་དང༌། གསོལ་བར་བྱེད། དབུལ་ བར་བྱེད་དོ། །དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་རྣམས་ཀྱང་ལྟ་འདོད་པར་འགྱུར་རོ། །རྒྱལ་པོ་དང༌། རྒྱལ་བུ་དང༌། རྒྱལ་པོའི་བློན་ པོ་རྣམས་ཀྱང་ལྟ་འདོད་པར་འགྱུར་རོ། །སྟོབས་ཀྱི་འཁོར་ལོ་སྒྱུར་བའི་རྒྱལ་པོ་དང༌། འཁོར་ལོ་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་བུ་དང་བཅས་པ། བློན་པོ་དང་བཅས་ པ༑ བཙུན་མོའི་འཁོར་བཅས་པ་དང༌། གཡོག་འཁོར་དང་བཅས་པའང་བཀུར་སྟི་བྱ་བའི་ཕྱིར་ལྟ་འདོད་པར་འགྱུར་རོ། །ཆོས་སྨྲ་བ་དེ་དེ་བཞིན་གཤེགས་པས་ཇི་སྐད་གསུངས་ པ་བཞིན་ཡང་དག་པ་ཇི་ལྟ་བ་བཞིན་དུ་སྙན་པའི་ཆོས་འཆད་དོ། །བྲམ་ཟེ་དང༌། ཁྱིམ་བདག་དང༌། ཡུལ་གྱི་མི་གཞན་དག་ཀྱང་རྟག་ཏུ་རྒྱུན་མི་འཆད་པར་ཚེའི་མཐའ་མར་ཕྱིན་ གྱི་བར་དུ། ཆོས་སྨྲ་བ་དེའི་ཕྱི་བཞིན་དུ་འབྲང་བར་འགྱུར་རོ། །དེ་བཞིན་གཤེགས་པའི་ཉན་ཐོས་རྣམས་ཀྱང་དེ་ལ་ལྟ་འདོད་པར་འགྱུར་རོ། །རང་སངས་རྒྱས་རྣམས་ཀྱང་དེ་ལ་ལྟ་ འདོད་པར་འགྱུར་རོ། །སངས་རྒྱས་བཅོམ་ལྡན་འདས་རྣམས་ཀྱང་དེ་ལ་གཟིགས་བཞེད་པར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་དེ་ཕྱོགས་གང་ན་འདུག་པ་དེའི་ཕྱོགས་སུ་ དེ་བཞིན་གཤེགས་པ་གཟིགས་ཏེ་ཆོས་འཆད་དོ། །སངས་རྒྱས་ཀྱི་ཆོས་རྣམས་ཀྱི་སྣོད་དུ་འགྱུར་ཏེ། དེ་ལྟར་དེ་ཟབ་ཅིང་ཡིད་དུ་འོང་བའི་ཆོས་རྣམས་ཀྱི་སྒྲ་འབྱིན་པར་འགྱུར་རོ། ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དེ་ཡི་ལྕེ་ཡི་དབང་པོ་མཆོག་ཏུ་འགྱུར། །ནམ་ཡང་ངན་པའི་རོ་ནི་ཡོང་མི་མྱོང༌། །རེག་མ་ཐག་ཏུ་ ༄༅། །ལྷ་ཡི་རོ་བྲོར་འགྱུར། །ལྷ་ཡི་རོ་བྲོ་ཤིན་ཏུ་ལྡན་པ་ཡིན། །རྣ་བར་སྙན་ཅིང་ཡིད་དུ་འོང་བ་དང༌། །འཇམ་ཞིང་མཉེན་པའི་སྒྲ་སྐད་རབ་ཏུ་སྨྲ། །འཁོར་གྱི་ དབུས་དེར་དགའ་བར་འགྱུར་བ་ཡི། །ཟབ་མོའི་དབྱངས་ནི་རྟག་པར་རབ་ཏུ་སྨྲ། །བྱེ་བ་ཁྲག་ཁྲིག་དུ་མའི་དཔེ་རྣམས་ཀྱིས། །དེས་བཤད་པ་ལ་ཆོས་རྣམས་གང་ཉན་པ། །དེ་ན་དེ་ལ་ མཆོག་ཏུ་དགའ་བ་སྐྱེད། །དེ་ལ་མཆོད་པ་དཔག་ཏུ་མེད་པ་བྱེད། །ལྷ་དང་ཀླུ་དང་གནོད་སྦྱིན་ལྷ་མིན་དང༌། །གསང་བ་བདག་རྟག་ཏུ་དེ་ལྟ་འདོད། །ཆོས་འདི་ཤིན་ཏུ་གུས་པར་ཉན་ པ་དེ། །ཡོན་ཏན་འདི་དག་ཐམས་ཅད་དེ་ཡིས་འགྱུར། །འདོད་པར་གྱུར་ན་འཇིག་རྟེན་ཁམས་འདི་དག །དབྱངས་ཀྱིས་ཐམས་ཅད་དུ་ཡང་གོ་བར་བྱེད། །དེ་ཡི་དབྱངས་ནི་མཉེན་ཞིང་ འཇམ་པ་སྟེ། །ཟབ་ཅིང་སྙན་ལ་ཤིན་ཏུ་དགའ་བར་འགྱུར། །རྒྱལ་པོ་ས་བདག་འཁོར་ལོ་སྒྱུར་བ་རྣམས། །མཆོད་པའི་ཕྱིར་ནི་དེ་ཡི་དྲུང་དུ་འདོང༌། །བུ་དང་ཆུང་མར་བཅས་ཏེ་ ཐལ་མོ་སྦྱར། །རྟག་ཏུ་དེ་ལ་ཆོས་ནི་ཉན་པར་འགྱུར། །གནོད་སྦྱིན་རྣམས་ཀྱིས་རྟག་ཏུ་བཀུར་སྟི་བྱེད། །ཀླུ་དང་དྲི་ཟ་དག་གི་ཚོགས་རྣམས་དང༌། །ཤ་ཟ་ཕོ་དང་ཤ་ཟ་མོ་རྣམས་ ཀྱིས༑ ༑བསྟི་སྟང་རི་མོ་མཆོད་པ་རྣམས་ཀྱང་བྱས། །ཚངས་པ་རྣམས་ལ་དེ་ནི་དབང་བྱེད་འགྱུར། །ལྷ་བུ་དབང་ཕྱུག་ཆེ་དང་དབང་ཕྱུག་དང༌། །བརྒྱ་བྱིན་དེ་བཞིན་ལྷ་ཡི་བུ་གཞན་ དང༑ ༑ལྷ་ཡི་བུ་མོ་མང་པོ་དྲུང་དུ་འགྲོ་།སངས་རྒྱས་འཇིག་རྟེན་ཕན་ཞིང་ཐུགས་བརྩེ་གང༌། །ཉན་ཐོས་བཅས་པས་དེ་ཡི་དབྱངས་ཐོས་ནས། །ཞལ་སྟོན་པ་དང་བསྲུང་བ་ དག་ཀྱང་མཛད། །ཆོས་འདི་འཆད་པ་ལ་ནི་དགྱེས་པར་འགྱུར། །རྟག་པར་རྒྱུན་དུ་བརྩོན། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་གྲངས་འདི་ འཛིན་ཏམ། ཀློག་གམ། རབ་ཏུ་འཆད་དམ། སྟོན་ཏམ། ཡི་གེར་བྲིས་ན། དེའི་ལུས་ཀྱི་ཡོན་ཏན་བརྒྱད་བརྒྱ་ཐོབ་པར་འགྱུར་རོ། །དེའི་ལུས་ཡོངས་སུ་དག་སྟེ་པགས་པའི་ མདོག་བཻ་ཌཱུཪྻ་ལྟར་དག་ཅིང་སེམས་ཅན་རྣམས་ཀྱིས་མཐོང་ན་དགའ་བར་འགྱུར་རོ། །དེའི་ལུས་ཡོངས་སུ་དག་པ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ ཐམས་ཅད་སྣང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གང་དག་འཆི་འཕོ་བ་དང༌། སྐྱེ་བ་དང༌། ངན་པ་དང༌། བཟང་པོ་དང༌། མདོག་ བཟང་པོ་དང༌། མདོག་ངན་པ་དང༌། བདེ་འགྲོ་དང༌། ངན་འགྲོ་དང༌། རི་ཁོར་ཡུག་དང༌། ཁོར་ཡུག་ཆེན་པོ་དང༌། ལྷུན་པོ་དང༌། རིའི་རྒྱལ་པོ་རི་རབ་ལ་སེམས་ཅན་གང་ དག་གནས་པ་རྣམས་དང༌། འོག་ཏུ་མནར་མེད་པའི་སེམས་ཅན་དམྱལ་བ་ལ་ཐུག་པ་དང༌། སྟེང་དུ་སྲིད་པའི་རྩེ་མོའི་བར་དུ་སེམས་ཅན་གང་དག་གནས་པ་དེ་དག་ཐམས་ ༄༅། །ཅད་ཀྱང་བདག་གི་ལུས་ལ་སྣང་བར་འགྱུར་རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཉན་ཐོས་སམ། རང་སངས་རྒྱས་སམ། བྱང་ཆུབ་སེམས་དཔའམ། དེ་བཞིན་གཤེགས་པ་གང་ལ་ལ་དག་བཞུགས་པ་དང༌། དེ་བཞིན་གཤེགས་པ་དེ་དག་ཆོས་གང་སྟོན་པ་དང༌། སེམས་ཅན་གང་དག་དེ་བཞིན་ གཤེགས་པ་དེ་དག་ལ་བསྙེན་བཀུར་བྱེད་པ་དང༌། སེམས་ཅན་དེ་དག་ཐམས་ཅད་ཀྱི་ལུས་སོ་སོར་ཐོབ་པའང་བདག་གི་ལུས་ལ་སྣང་བར་འགྱུར་རོ། །དེ་ཅིའི་ཕྱིར་ཞེ་ན། འདི་ ལྟར་དེའི་ལུས་ཡོངས་སུ་དག་པའི་ཕྱིར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །གང་ཞིག་རྒྱ་ཆེ་མདོ་འདི་འཛིན་བྱེད་པ། །དེ་ཡི་ ལུས་ནི་ཡོངས་སུ་དག་པར་འགྱུར། །རྣམ་དག་བཻ་ཌཱུཪྻ་ལྟར[?] གྲུབ་པ་སྟེ། །རྟག་ཏུ་སེམས་ཅན་རྣམས་ཀྱིས་མཐོང་ན་དགའ། །མེ་ལོང་ཕྱིས་པར་གཟུགས་བརྙན་སྣང་བ་ བཞིན༑ །ལུས་ལ་འཇིག་རྟེན་དེ་དག་དེ་བཞིན་སྣང༌། །སེམས་ཅན་གཞན་མིན་རང་བྱུང་དེ་ཡིས་མཐོང༌། །ཡོངས་སུ་དག་པའི་ལུས་ནི་དེ་འདྲའོ། །འཇིག་རྟེན་ཁམས་ འདིའི་སེམས་ཅན་ཅི་ཡོད་པ། །ལྷ་མི་ལྷ་མ་ཡིན་དང་གསང་བ་པ། །སེམས་དམྱལ་ཡི་དྭགས་དུད་འགྲོའི་སྐྱེ་གནས་རྣམས། །ལུས་དེ་ལ་ནི་གཟུགས་བརྙན་སོ་སོར་སྣང༌། །སྲིད་ པའི་རྩེ་བར་གཞལ་མེད་ཁང་གི་ལྷ། །བྲག་རྣམས་དང་ནི་རི་དང་ཁོ་ར་ཡུག །གངས་རི་རི་རབ་ལྷུན་པོ་ཆེན་པོ་རྣམས། །དེ་ཡི་ལུས་ལས་རྣམ་པ་ཐམས་ཅད་སྣང༌། །དེ་ཡི་ལུས་ ལ་ཉན་ཐོས་བཅས་པ་ཡི། །སངས་རྒྱས་རྣམས་དང་སངས་རྒྱས་སྲས་གཞན་ཡང༌། །བྱང་ཆུབ་སེམས་དཔའ་གཅིག་པུ་གང་གནས་དང༌། །ཚོགས་ལ་གང་དག་ཆོས་སྟོན་ རྣམས་ཀྱང་སྣང༌། །དེ་ཡི་རྣམ་དག་ལུས་ནི་དེ་འདྲ་སྟེ། །འཇིག་རྟེན་ཁམས་རྣམས་ཐམས་ཅད་དེ་ལ་སྣང༌། །དེ་ནི་ད་དུང་ལྷ་ཡིས་མ་ཐོབ་སྟེ། །དེ་ཡི་རང་བཞིན་ལུས་ནི་དེ་ འདྲའོ། །རྟག་པར་རྒྱུན་དུ་བརྩོན། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་ འདི་འཛིན་ཏམ། སྟོན་ཏམ། རབ་ཏུ་འཆད་དམ། ཡི་གེར་འདྲིའམ། ཀློག་ན། ཡིད་ཀྱི་ལས་ཀྱི་ཡོན་ཏན་སྟོང་ཉིས་བརྒྱ་པོ་དེ་དག་དང་ལྡན་ཞིང་ཡིད་ཀྱི་དབང་པོ་ཡོངས་སུ་ དག་པར་འགྱུར་རོ། །དེ་ཡིད་ཀྱི་དབང་པོ་ཡོངས་སུ་དག་པ་དེས། ཐ་ན་ཚིགས་སུ་བཅད་པ་གཅིག་ཐོས་པས་ཀྱང་དེའི་དོན་མང་པོར་ཤེས་སོ། །དེས་དེ་དག་ཁོང་དུ་ཆུང་ནས་ དེའི་ཕྱིར་ཟླ་བ་གཅིག་ཏུ་ཆོས་སྟོན་ཏོ། །ཟླ་བ་བཞིའམ་ལོར་ཡང་ཆོས་སྟོན་ཏོ། །ཆོས་གང་བཤད་པ་དེ་ལ་དེ་བརྗེད་ངས་བར་མི་འགྱུར་རོ། །འཇིག་རྟེན་པའི་འཇིག་རྟེན་གྱི་ ༄༅། །ཐ་སྙད་གང་དག་སྐད་དམ་སྔགས་ཅི་ཡོད་པ་དེ་དག་ཐམས་ཅད་ཆོས་ཀྱི་ཚུལ་དང་སྦྱོར་རོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ ན༑ སེམས་ཅན་འགྲོ་བ་དྲུག་ཏུ་སྐྱེས་ཤིང་འཁོར་བའི་སེམས་ཅན་གང་ཇི་སྙེད་པ་དེ་དག་ཐམས་ཅད་ཀྱི་སེམས་ཀྱི་སྤྱོད་པའི་གཡོ་བ་རྣམས་ཀྱང་ཤེས་སོ། །གཡོས་པ་དང་ བསམ་པ་དང་སྤྲོས་པ་རྣམས་ཀྱང་ཤེས་ཤིང་རབ་ཏུ་རྟོགས་སོ། །རེ་ཞིག་འཕགས་པའི་ཡེ་ཤེས་མ་ཐོབ་ཀྱང་དེའི་ཡིད་ཀྱི་དབང་པོ་འདི་ལྟ་བུར་ཡོངས་སུ་དག་པར་འགྱུར་ རོ༑ ༑ཆོས་ཀྱི་ངེས་པའི་ཚིག་གང་དང་གང་རྗེས་སུ་བསམས་ཏེ། གཏམ་སྟོན་པ་དེ་དག་ཐམས་ཅད་ཀྱང་ཡང་དག་པར་སྟོན་ཏོ། །དེ་བཞིན་གཤེགས་པས་གསུངས་པ་ ཐམས་ཅད་སྟོན་ཏོ། །སྔོན་གྱི་རྒྱལ་བས་མདོ་སྡེའི་རྣམ་གྲངས་བསྟན་པ་ཐམས་ཅད་འཆད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་ སྩལ་ཏོ། །དེ་ཡི་ཡིད་ཀྱི་དབང་པོ་རྣམ་དག་འགྱུར། །གསལ་ཞིང་འོད་གསལ་རྙོག་པ་མེད་པ་སྟེ། །ངན་པ་བཟང་པོ་དེ་བཞིན་བར་མ་དང༌། །དེས་ནི་རྣམ་པ་མང་པོའི་ ཆོས་རབ་ཤེས། །བརྟན་པ་དེས་ནི་ཚིགས་བཅད་གཅིག་ཐོས་ཀྱང༌། །དེ་དོན་རྣམ་པ་མང་པོ་དེ་ཡིས་ཤེས། །ཟླ་བ་བཞིའམ་དེ་བཞིན་ལོ་ཡི་བར། །རྟག་ཏུ་ཡང་དག་འབྲེལ་ བ་རབ་ཏུ་སྨྲ། །སེམས་ཅན་གང་རྣམས་འཇིག་རྟེན་ཁམས་འདི་ཡི། །ཕྱི་རོལ་དག་དང་ནང་ན་གང་གནས་པ། །ལྷ་མི་ལྷ་མ་ཡིན་དང་གསང་བ་པ། །ཀླུ་དང་དུད་འགྲོའི་སྐྱེ་གནས་གར་ སོང་དང༌། །འགྲོ་བ་དྲུག་ན་གནས་པའི་སེམས་ཅན་རྣམས། །དེ་དག་རྣམས་ཀྱིས་རྣམ་པར་ཅི་བསམས་པ། །སྐད་ཅིག་ཏུ་ནི་ཐམས་ཅད་མཁས་པས་ཤེས། །མདོ་འཛིན་པ་ཡི་ཕན་ཡོན་ འདི་དག་གོ །བསོད་ནམས་བརྒྱ་ཡི་མཚན་ལྡན་སངས་རྒྱས་ཀྱིས། །འཇིག་རྟེན་ཀུན་ལ་ཆོས་གང་རབ་བཤད་པ། །དེ་ཡི་རྣམ་པར་དག་པའི་སྒྲ་ཡང་ཐོས། །དེ་ཡིས་ཅི་བསྟན་པ་ ཡང་དེས་བཟུང་སྟེ། །ཆོས་ཀྱི་མཆོག་ཀྱང་མང་དུ་རྣམ་པར་སེམས། །དེ་ནི་རྟག་ཏུ་མང་པོ་སྟོན་པར་འགྱུར། །དེ་ནི་རྨོངས་པར་ནམ་ཡང་མི་འགྱུར་ཏེ། །མདོ་འཛིན་པ་ཡི་ཕན་ཡོན་ འདི་དག་གོ །དེས་ནི་མཚམས་དང་ཚིགས་ཀྱང་རབ་ཏུ་ཤེས། །ཆོས་རྣམས་ཀུན་གྱི་མཚན་ཉིད་མི་མཐུན་དང༌། །དོན་དང་ངེས་པའི་ཚིག་ཀྱང་རབ་ཏུ་ཤེས། །ཇི་ལྟར་དེ་དག་ ཤེས་པ་བཞིན་དུ་འཆད། །སྔོན་གྱི་འཇིག་རྟེན་དག་གི་སློབ་དཔོན་གྱིས། །ཡུན་རིང་འདིར་ནི་མདོ་སྡེ་གང་བཤད་པ། །དེ་ཡི་ཆོས་རྣམས་འཁོར་གྱི་དབུས་སུ་ཡང༌། །འཇིགས་པ་ མེད་པར་རྟག་ཏུ་དེ་འཆད་དོ། །མདོ་འདི་བཟུང་བ་དང་ནི་བཀླགས་པ་ཡིས། །དེ་ཡི་ཡིད་ཀྱི་དབང་པོ་དེ་འདྲར་འགྱུར། །ད་དུང་མ་ཆགས་ཡེ་ཤེས་མ་ཐོབ་སྟེ། །འདི་ནི་དེ་ཡི་སྔོན་དུ་འགྲོ་ ༄༅། །བར་འགྱུར། །བདེ་བར་གཤེགས་པའི་མདོ་འདི་འཛིན་པ་ཡང༌། །སློབ་དཔོན་གྱི་ནི་ས་ལ་འདུག་པ་ཡིན། །སེམས་ཅན་ཐམས་ཅད་ལ་ཡང་ཆོས་ སྨྲ་སྟེ། །ངེས་ཚིག་བྱེ་བ་སྙེད་ལ་མཁས་པར་འགྱུར། །དམ་པའི་ཆོས་པདྨ་དཀར་པོ་ལས། སྐྱེ་མཆེད་དྲུག་རྣམ་པར་དག་པའི་ཕན་ཡོན་གྱི་ལེའུ་ཞེས་བྱ་སྟེ་བཅོ་བརྒྱད་ པའོ།། །།དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་ལ་བཀའ་སྩལ་པ། མཐུ་ཆེན་ཐོབ་།རྣམ་གྲངས་ འདིས་ཀྱང་འདི་ལྟར་རིག་པར་བྱ་སྟེ། གང་དག་ཁ་ཅིག་ཆོས་ཀྱི་རྣམ་གྲངས་འདི་ལྟ་བུ་འདི་རྗོད་པ་དང༌། མདོ་སྡེ་འདི་ལྟ་བུ་འཛིན་པའི་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་ལ་གཤེ་ཞིང་མི་སྙན་པར་སྨྲ་བ་དང༌། ཚོགས་པ་མི་དབྱུང་བའི་ཚིག་རྩུབ་པོ་ཟེར་བ་དེ་དག་གི་རྣམ་པར་སྨིན་པ་འདོད་པ་མ་ཡིན་པར་འགྱུར་ ཏེ༑ དེ་ནི་ཚིག་གིས་བརྗོད་དུའང་མི་ནུས་སོ། །གང་དག་མདོ་སྡེ་འདི་ལྟ་བུ་འདི་འཛིན་པ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། འཆད་པ་དང༌། གཞན་དག་ ལའང་རྒྱ་ཆེར་ཡང་དག་པར་རབ་ཏུ་སྟོན་པ་དེ་དག་གི་རྣམ་པར་སྨིན་པ་ནི་འདོད་པར་འགྱུར་ཏེ། ཇི་ལྟར་ངས་སྔར་བརྗོད་པ་དེ་ལྟ་བུར་མིག་དང༌། རྣ་བ་དང༌། སྣ་དང༌། ལྕེ་ དང༑ ལུས་དང༌། ཡིད་ཡོངས་སུ་དག་པ་ཐོབ་པར་འགྱུར་རོ། །མཐུ་ཆེན་ཐོབ། སྔོན་བྱུང་བ་འདས་པའི་དུས་ན། བསྐལ་པ་གྲངས་མེད་པའི་ཡང་ཆེས་གྲངས་མེད་པ་ཡངས་པ། ཚད་ མེད་པ། བསམ་གྱིས་མི་ཁྱབ་པ་དེ་དག་གིའང་ཆེས་ཕ་རོལ་ཏུ་གྱུར་བ་དེའི་ཚེ་དེའི་དུས་ན་ཐ་དད་དུ་གནས་པའི་བསྐལ་པ་ལ། འཇིག་རྟེན་གྱི་ཁམས་ཆེར་འབྱུང་བར་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་ སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིགས་བསྒྲགས་དབྱངས་ཀྱི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། མཐུ་ཆེན་ཐོབ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་དེ་འཇིག་རྟེན་གྱི་ཁམས་ཆེར་བྱུང་བ་ དེ་ན་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་མདུན་ན་ཆོས་སྟོན་ཏེ། འདི་ལྟ་སྟེ། ཉན་ཐོས་རྣམས་ལ་ནི་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུགས་པ་ལས་ཤིན་ཏུ་འདའ་བའི་ཕྱིར་།མྱ་ངན་ལས་འདས་པའི་མཐར་ཐུག་ ༄༅། །པ་འཕགས་པའི་བདེན་པ་བཞི་དང་ལྡན་པ་རྟེན་ཅིང་འབྲེལ་པར་འབྱུང་བ་ལ་འཇུག་པའི་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ ཆེན་པོ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བརྩམས་ཏེ། ཕ་རོལ་ཏུ་ཕྱིན་པ་དྲུག་དང་ལྡན་པ་དེ་བཞིན་གཤེགས་པའི་ཡེ་ཤེས་ཀྱི་མཐར་ཐུག་པའི་ ཆོས་སྟོན་ཏོ། །མཐུ་ཆེན་ཐོབ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་དེའི་ ཚེའི་ཚད་ནི། བསྐལ་བ་བྱེ་བ་ཁྲག་ཁྲིག་བརྒྱ་ཕྲག་སྟོང་གངྒཱའི་ཀླུང་བཞིའི་བྱེ་མ་སྙེད་དུ་གྱུར་ཏོ། །དེ་ཡོངས་སུ་མྱ་ངན་ལས་འདས་ནས་ཀྱང༌། བསྐལ་པ་བྱེ་བ་ཁྲག་ཁྲིག་བརྒྱ་ སྟོང་ཕྲག་ཛམྦུའི་གླིང་གི་རྡུལ་ཕྲ་རབ་སྙེད་དུ་དམ་པའི་ཆོས་གནས་པར་གྱུར་ཏོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གླིང་བཞིའི་རྡུལ་ཕྲ་རབ་སྙེད་དུ་དམ་པའི་ཆོས་ཀྱི་གཟུགས་ བརྙན་གནས་པར་གྱུར་ཏོ། །མཐུ་ཆེན་ཐོབ། འཇིག་རྟེན་གྱི་ཁམས་ཆེར་འབྱུང་བ་དེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་དེ་ཡོངས་སུ་མྱ་ངན་ལས་འདས་པའི་དམ་པའི་ཆོས་དང༌། དམ་པའི་ཆོས་ཀྱི་གཟུགས་བརྙན་ཡང་མེད་པར་གྱུར་ནས། དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་གཞན་ཡང་འཇིག་རྟེན་དུ་བྱུང་ངོ༌། །མཐུ་ཆེན་ཐོབ། དེ་ལྟ་ བུ་གཅིག་ནས་གཅིག་ཏུ་ཆེར་འབྱུང་བའི་འཇིག་རྟེན་གྱི་ཁམས་དེར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ ཀྱི་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུ་བྱུང་ངོ༌། །མཐུ་ཆེན་ཐོབ། ཐ་དད་དུ་གནས་པའི་བསྐལ་པ་ལ། འཇིག་རྟེན་གྱི་ཁམས་ཆེར་འབྱུང་བ་དེར་དེ་བཞིན་གཤེགས་པ་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་འཇིགས་བསྒྲགས་དབྱངས་ཀྱི་རྒྱལ་པོ། དེ་བཞིན་གཤེགས་པ་ཐམས་ཅད་ཀྱི་ཐོག་མར་གང་བྱུང་བའི་བཅོམ་ལྡན་འདས་ཡོངས་སུ་ མྱ་ངན་ལས་འདས་པ་དེའི་དམ་པའི་ཆོས་ནུབ་པར་གྱུར་ཏེ། དམ་པའི་ཆོས་ཀྱི་གཟུགས་བརྙན་ཡང་ནུབ་པར་གྱུར་བའི་ཚེ། དེའི་བསྟན་པ་ལ་ང་རྒྱལ་ཅན་གྱི་དགེ་སློང་གིས་ཤིན་ ཏུ་ནོན་པར་གྱུར་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་ཞེས་བྱ་བའི་དགེ་སློང་ཞིག་བྱུང་ངོ༌། །མཐུ་ཆེན་ཐོབ། ཅིའི་ཕྱིར་བྱང་ཆུབ་སེམས་ ༄༅། །དཔའ་སེམས་དཔའ་ཆེན་པོ་དེ་རྟག་ཏུ་བརྙས་པ་ཞེས་བྱ་ཞེ་ན། མཐུ་ཆེན་ཐོབ། བྱང་ཆུབ་སེམས་དཔའ་སེམས་དཔའ་ཆེན་པོ་དེས། དགེ་སློང་ ངམ༑ དགེ་སློང་མའམ། དགེ་བསྙེན་ནམ། དགེ་བསྙེན་མ་སུ་མཐོང་ཡང་རུང་སྟེ། དེ་དག་གི་དྲུང་དུ་སོང་ནས་འདི་སྐད་དུ། ཁོ་བོ་ནི་ཚེ་དང་ལྡན་པ་ཁྱེད་ལ་བརྙས་པར་མི་ བྱེད་དེ། ཁྱེད་ནི་མ་བརྙེས་པའོ། །དེ་ཅིའི་ཕྱིར་ཞེ་ན། ཁྱེད་ཐམས་ཅད་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་ཅིག་དང༌། ཁྱེད་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་སུ་འགྱུར་རོ་ཞེས་སྨྲའོ། །མཐུ་ཆེན་ཐོབ། རྣམ་གྲངས་འདིས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་སློང་དུ་གྱུར་པ་དེ་སེམས་ཅན་ རྒྱང་རིང་པོ་ན་འདུག་པ་སུ་མཐོང་ཡང་རུང་སྟེ། དེའི་དྲུང་དུ་སོང་ཞིང་དེ་སྐད་དུ་ཡང་དག་པར་སྒྲོགས་པ་མ་གཏོགས་པར་ལུང་ཡང་མི་ནོད། ཁ་ཏོན་ཡང་མི་བྱེད་དེ། དགེ་སློང་ ངམ༑ དགེ་སློང་མའམ། དགེ་བསྙེན་ནམ། དགེ་བསྙེན་མ་དེ་དང་དེ་དག་གི་དྲུང་དུ་སོང་ནས། འདི་སྐད་དུ་ཁོ་བོ་ནི་ཚེ་དང་ལྡན་པ་ཁྱེད་ལ་བརྙས་པར་མི་བྱེད་དེ། ཁྱེད་ནི་མ་ བརྙས་པའོ། །དེ་ཅིའི་ཕྱིར་ཞེ་ན། ཁྱེད་ཐམས་ཅད་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་ཅིག་དང༌། ཁྱེད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་སུ་འགྱུར་རོ་ཞེས་སྨྲའོ། །མཐུ་ཆེན་ཐོབ། བྱང་ཆུབ་སེམས་དཔའ་སེམས་དཔའ་ཆེན་པོ་དེས་དེའི་ཚེ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་ མའམ། སུ་དང་སུ་ལ་དེ་སྐད་བསྒྲགས་པ་དེ་དག་ཐམས་ཅད་ལས་ཕལ་ཆེར་དེ་ལ་ཁྲོ་ཞིང་གནོད་པར་སེམས་ལ་མ་དད་པ་སྐྱེད་དེ། དེ་ལ་གཤེ་ཞིང་སྤྱོས་ཏེ། ཅིའི་ཕྱིར་དགེ་སློང་འདི་ མ་དྲིས་པར་བརྙས་པའི་སེམས་མེད་དོ་ཞེས་བདག་ཅག་ལ་སྟོན་ཏེ། བདག་ཉིད་ལ་བརྙས་པར་བྱེད་ཅིང་འདི་ལྟར་མ་བསམས། མི་འདོད་པར་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་ཏུ་བདག་ཅག་ལ་ལུང་སྟོན་ཅེས་སྨྲའོ། །མཐུ་ཆེན་ཐོབ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དེ་ལྟ་བུར་གཤེ་ཞིང་སྤྱོ་བས་ལོ་མང་པོ་འདས་ཏེ། སུ་ལའང་མི་ཁྲོ་ ཞིང་གནོད་སེམས་མི་སྐྱེད་དོ། །དེ་ལྟར་དེ་ཡང་དག་པར་སྒྲོགས་པ་ལ་བོད་པ་དང༌། དབྱུག་པ་འཕེན་ཀྱང༌། དེས་དེ་དག་ལ་ཐག་རིང་པོ་ནས་སྒྲ་ཆེན་པོ་བྱས་ཏེ། ཁོ་བོ་ཁྱེད་ལ་བརྙས་པར་མི་ བྱེད་དོ་ཞེས་ཡང་དག་པར་སྒྲོག་གོ །དེས་ང་རྒྱལ་ཅན་གྱི་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དེ་དག་ལ་རྟག་ཏུ་རྒྱུན་མི་འཆད་པར་ཡང་དག་པར་བསྒྲགས་པས་ དེ་དག་གིས་དེ་ལ་མིང་རྟག་ཏུ་བརྙས་པ་ཞེས་བཏགས་སོ། །མཐུ་ཆེན་ཐོབ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེ་འཆི་བའི་དུས་བྱེད་པ་ཉེ་བར་གནས་ཏེ། ༄༅། །འཆི་བའི་དུས་ཀྱི་ཚེ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ཐོས་པར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོ་དེས་ཆོས་ཀྱི་རྣམ་གྲངས་འདི་ཚིགས་སུ་བཅད་པ་དཀྲིགས་ཕྲག་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུ་བཤད་ པ་དེའང༌། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེ། འཆི་བའི་དུས་ཉེ་བར་གནས་པའི་ཚེ་བར་སྣང་གི་སྒྲ་ལས་ཆོས་ཀྱི་རྣམ་གྲངས་འདི་ཐོས་སོ། །སུས་ ཀྱང་མ་སྨྲས་པར་དེས་པར་སྣང་ལས་སྒྲ་ཐོས་ཏེ། ཆོས་ཀྱི་རྣམ་གྲངས་འདི་བཟུང་ནས་མིག་རྣམ་པར་དག་པ་དང༌། རྣ་བ་རྣམ་པར་དག་པ་དང༌། སྣ་རྣམ་པར་དག་པ་དང༌། ལྕེ་རྣམ་པར་དག་ པ་དང༌། ལུས་རྣམ་པར་དག་པ་དང༌། ཡིད་རྣམ་པར་དག་པ་དེ་ལྟ་བུ་ཐོབ་བོ། །རྣམ་པར་དག་པ་དེ་དག་ཐོབ་མ་ཐག་ཏུ་ཕྱིར་ཡང་ལོ་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུར་བདག་གི་སྲོག་ གི་འདུ་བྱེད་བྱིན་གྱིས་བརླབས་ཏེ། ཆོས་ཀྱི་རྣམ་གྲངས་འདི་ཡང་དག་པར་བསྒྲགས་སོ། །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་ང་རྒྱལ་ཅན་གང་དག་ལ་ སྔོན་ཁྱེད་ལ་ཁོ་བོས་བརྙས་པར་མི་བྱེད་དོ་ཞེས་བསྒྲགས་པ་གང་དག་གིས། དེའི་མིང་རྟག་ཏུ་བརྙས་པར་བཏགས་པར་དེ་དག་གིས། དེའི་རྫུ་འཕྲུལ་གྱི་སྟོབས་ཀྱི་མཐུ་དང༌། དམ་ བཅས་པའི་སྟོབས་ཀྱི་མཐུ་དང༌། སྤོབས་པའི་སྟོབས་ཀྱི་མཐུ་དང༌། ཤེས་རབ་ཀྱི་མཐུ་རྒྱ་ཆེན་པོ་མཐོང་ནས། ཐམས་ཅད་ཀྱང་ཆོས་མཉན་པའི་ཕྱིར་ཕྱིན་འཁོད་པར་གྱུར་ཏོ། །དེས་ གཞན་ཡང་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་བཙུད་དོ། །མཐུ་ཆེན་ཐོབ་།བྱང་ཆུབ་ སེམས་དཔའ་སེམས་དཔའ་ཆེན་པོ་དེ། དེ་ནས་ཤི་འཕོས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་དབྱངས་ཀྱི་རྒྱལ་པོ་ཞེས་བྱ་བར་ མཚན་མཐུན་པ་བྱེ་བ་བརྒྱ་ཕྲག་ཉི་ཤུ་མཉེས་པར་བྱས་ཏེ། ཐམས་ཅད་དུའང་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་བསྟན་ཏོ། །དེ་སྔོན་གྱི་དགེ་བའི་རྩ་བ་དེས་རིམ་གྱིས་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྔ་སྒྲའི་རྒྱལ་པོ་ཞེས་བྱ་བར་མཚན་མཐུན་པ་བྱེ་བ་བརྒྱ་ཕྲག་ཉི་ཤུ་མཐར་གྱིས་མཉེས་པར་བྱས་ནས། དེ་ ཐམས་ཅད་དུའང་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་བཟུང་སྟེ། འཁོར་བཞི་ལ་ཡང་དག་པར་རབ་ཏུ་བཤད་དོ། །དེ་སྔོན་གྱི་དགེ་བའི་རྩ་བ་དེས་མཐར་གྱིས་ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་སྒྲ་རྒྱལ་པོ་ཞེས་བྱ་བར་མཚན་མཐུན་པ་བྱེ་བ་བརྒྱ་ཕྲག་ཉི་ཤུ་མཉེས་པར་བྱས་ནས། ཐམས་ཅད་ ༄༅། །དུའང་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ཉིད་བཟུང་སྟེ། འཁོར་བཞི་ལ་ཡང་དག་པར་རབ་ཏུ་བཤད་དོ། །ཐམས་ཅད་ནའང་ མིག་ཡོངས་སུ་དག་པ་དང་ལྡན་པར་གྱུར་ཏོ། །རྣ་བ་ཡོངས་སུ་དག་པ་དང༌། སྣ་ཡོངས་སུ་དག་པ་དང༌། ལྕེ་ཡོངས་སུ་དག་པ་དང༌། ལུས་ཡོངས་སུ་དག་པ་དང༌། ཡིད་ཡོངས་སུ་དག་ པ་དེ་ལྟ་བུ་དང་ལྡན་པར་གྱུར་ཏོ། །མཐུ་ཆེན་ཐོབ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙེས་པ་དེས། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་དེ་སྙེད་ ལ་བསྟི་སྟང་བྱས། བླ་མར་བྱས། རི་མོ་དང༌། མཆོད་པ་དང༌། གསོལ་བ་དང༌། དབུལ་བ་བྱས་ཏེ། གཞན་ཡང་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྟི་སྟང་དུ་བྱ་བ་ དང༑ བླ་མར་བྱ་བ་དང༌། རི་མོ་དང༌། མཆོད་པ་དང༌། གསོལ་པ་བྱས་ནས། དེ་དག་ཐམས་ཅད་དུའང་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་བཟུང་སྟེ། སྔོན་ གྱི་དགེ་བའི་རྩ་བ་དེ་ཉིད་ཡོངས་སུ་སྨིན་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །མཐུ་ཆེན་ཐོབ། དེའི་ཚེ་དེའི་དུས་ན་བཅོམ་ ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་བསྒྲགས་དབྱངས་ཀྱི་རྒྱལ་པོའི་བསྟན་པ་ལ། འཁོར་བཞི་རྣམས་ཀྱིས་རྟག་ཏུ་ བརྙས་པར་གྲགས་ཤིང༌། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་སྙེད་མཉེས་པར་བྱས་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ ཏུ་བརྙས་པ་དེ། གཞན་ཞིག་ཡིན་སྙམ་དུ་སོམ་ཉིའམ། ཡིད་གཉིས་སམ། ཐེ་ཚོམ་ཟ་བར་གྱུར་ན། མཐུ་ཆེན་ཐོབ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་ དུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་ཞེས་བྱ་བར་གྱུར་ཏོ། །མཐུ་ཆེན་ཐོབ། གལ་ཏེ་ངས་སྔོན་ཆོས་ཀྱི་རྣམ་གྲངས་འདི་མ་བླངས་མ་བཟུང་བར་གྱུར་ན་།ང་འདི་ ལྟར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་མི་འགྱུར་ཏེ། མཐུ་ཆེན་ཐོབ། དེ་ལྟར་ངས་སྔོན་གྱི་དེ་བཞིན་གཤེགས་པ་དགྲ་བཅོམ་པ་ ཡང་དག་པར་རྫོགས་པའི་སངས་རྒྱས་རྣམས་ཀྱིས་གན་ནས་ཆོས་ཀྱི་རྣམ་གྲངས་འདི་བཟུང་སྟེ། བཀླགས་པ་དང་བསྟན་པས་དེའི་ཕྱིར་ང་འདི་ལྟར་མྱུར་དུ་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །མཐུ་ཆེན་ཐོབ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་བརྙས་པ་དེས་དགེ་སློང་དང༌། དགེ་སློང་མ་དང༌། དགེ་ བསྙེན་དང༌། དགེ་བསྙེན་མ་བརྒྱ་ཕྲག་མང་པོ་དག་ལ། བཅོམ་ལྡན་འདས་དེའི་བསྟན་པ་ལ་ཆོས་ཀྱི་རྣམ་གྲངས་འདི་ཡང་དག་པར་བསྒྲགས་ཤིང་།ཁོ་བོ་ཁྱེད་ལ་བརྙས་ ༄༅། །པར་མི་བྱེད་དོ། །ཁྱེད་ཅག་ཐམས་ཅད་ཀྱང་བྱང་ཆུབ་སེམས་དཔའི་སྤྱད་པ་སྤྱོད་ཅིག་དང༌། ཁྱེད་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་སུ་འགྱུར་རོ་ཞེས་བྱས་པ་དང༌། གང་གིས་བྱང་ཆུབ་སེམས་དཔའ་དེ་ལ་གནོད་སེམས་བསྐྱེད་པར་གྱུར་པ་དེ་དག་གིས་བསྐལ་པ་བྱེ་བ་ བརྒྱ་ཕྲག་ཉི་ཤུར་ནམ་ཡང་དེ་བཞིན་གཤེགས་པ་མ་མཐོང༌། ཆོས་ཀྱི་སྒྲའང་མ་ཐོས། དགེ་འདུན་གྱི་སྒྲའང་མ་ཐོས་སོ། །བསྐལ་པ་སྟོང་ཕྲག་བཅུར་མནར་མེད་པའི་ སེམས་ཅན་དམྱལ་བ་ཆེན་པོར་སྡུག་བསྔལ་མི་བཟད་པ་མྱོང་ངོ༌། །དེ་དག་ཐམས་ཅད་ཀྱི་ལས་ཀྱི་སྒྲིབ་པ་དེ་ལས་ཡོངས་སུ་ཐར་ནས། བྱང་ཆུབ་སེམས་དཔའ་སེམས་ དཔའ་ཆེན་པོ་དེ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །མཐུ་ཆེན་ཐོབ། དེའི་ཚེ་དེའི་དུས་ན་སེམས་ཅན་དུ་གྱུར་པ། བྱང་ཆུབ་སེམས་དཔའ་སེམས་དཔའ་ཆེན་པོ་ལ་བསྟིང་བ་དང༌། འཕྱ་བ་བྱས་པ་དེ་དག་གང་ཡིན་སྙམ་དུ་སོམ་ཉིའམ་ཡིད་གཉིས་སམ་ཐེ་ཚོམ་ཟ་བར་གྱུར་ན། མཐུ་ ཆེན་ཐོབ། འཁོར་འདི་ཉིད་ཀྱི་ནང་ན་བཟང་སྐྱོང་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་དང༌། སེང་གེའི་ཟླ་བ་ལ་སོགས་པ་དགེ་སློང་མ་ལྔ་བརྒྱ་དང༌། བདེ་གཤེགས་ སེམས་པ་ལ་སོགས་པ་དགེ་བསྙེན་མ་ལྔ་བརྒྱ་སྟེ། ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱས་སོ། །མཐུ་ཆེན་ཐོབ། ཆོས་ཀྱི་ རྣམ་གྲངས་འདི་འཛིན་པ་དང༌། སྟོན་པ་དང་ལྡན་པའི་བསོད་ནམས་ཀྱི་ཕུང་པོ་དེ་ལྟར་དོན་ཆེ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཐོབ་པར་བྱེད་པར་འགྱུར་རོ། །མཐུ་ཆེན་ཐོབ། དེ་ལྟ་བས་ན་དེ་བཞིན་གཤེགས་པ་ང་ཡོངས་སུ་མྱ་ངན་ལས་འདས་ནས། བྱང་ཆུབ་སེམས་དཔའ་སེམས་ དཔའ་ཆེན་པོ་རྣམས་ཀྱིས་ཆོས་ཀྱི་རྣམ་གྲངས་འདི་རྒྱུན་མི་འཆད་པར་གཟུང་བར་བྱའོ། །བསྟན་པར་བྱའོ། །བཀླག་པར་བྱའོ། །བཤད་པར་བྱའོ། །དེ་ནས་བཅོམ་ལྡན་འདས་ ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འདས་པའི་དུས་རྣམས་རྗེས་སུ་དྲན་པ་ནི། །འཇིགས་བསྒྲགས་དབྱངས་རྒྱལ་རྒྱལ་བ་གང་བྱུང་བ། །ལྷ་མི་གནོད་སྦྱིན་སྲིན་ པོའི་འདྲེན་པ་སྟེ། །མཐུ་ཆེན་དེ་ལ་ལྷ་དང་མི་ཡིས་མཆོད། །རྒྱལ་བ་དེ་ནི་མྱ་ངན་ཡོངས་འདས་ནས། །དམ་ཆོས་[?] གས་པར་གྱུར་པ་ཐ་མ་ལ། །དེ་ན་བྱང་ཆུབ་སེམས་དཔའ་དགེ་ སློང་བྱུང༌། །དེ་ཡི་མིང་ནི་རྟག་ཏུ་བརྙས་ཞེས་བྱ། །དེ་ན་དགེ་སློང་གཞན་དང་དེ་བཞིན་དུ། །དམིགས་པར་ལྟ་བའི་དགེ་སློང་དེ་གན་སོང༌། །ཁོ་བོས་ཁྱེད་ལ་ནམ་ཡང་བརྙས་པ་མེད། ༄༅། །ཁྱེད་ཀྱིས་བྱང་ཆུབ་མཆོག་ཕྱིར་སྤྱད་པ་སྤྱོད། །དེ་བཞིན་རྟག་ཏུ་ཡང་དག་བསྒྲགས་པ་ན། །གཤེ་ཞིང་བརྒྱད་པ་དེ་དག་བཟོད་པར་བྱེད། །འཆི་ བའི་དུས་བྱེད་ཉེ་བར་གནས་པ་དང༌། །དེ་ཡིས་མདོ་སྡེ་འདི་ནི་ཐོས་གྱུར་ནས། །དེ་ཚེ་མཁས་པས་འཆི་བའི་དུས་མ་བྱས། །ཚེ་ཡང་ཤིན་ཏུ་རིང་པོར་བྱིན་བརླབས་ཏེ། །རྣམ་ པར་འདྲེན་པ་དེ་ཡི་བསྟན་པ་ལ། །དེ་ཚེ་མདོ་འདི་ཡང་ནི་རབ་ཏུ་བཤད། །དམིགས་ཅན་མང་པོ་དེ་དག་ཐམས་ཅད་ཀྱང༌། །དེ་ཡིས་བྱང་ཆུབ་ཏུ་ནི་ཡོངས་སྨིན་བྱས། །དེ་ནས་ བྱང་ཆུབ་སེམས་དཔའ་ཤི་འཕོས་ནས། །སངས་རྒྱས་བྱེ་བ་ཕྲག་སྟོང་མཉེས་བྱས་ཏེ། །མཐར་གྱིས་བསོད་ནམས་བྱས་པ་དེ་དག་གིས། །མདོ་འདི་ཡང་ནི་རྟག་པར་རབ་ཏུ་ བཤད། །རྒྱལ་བའི་སྲས་དེས་བྱང་ཆུབ་ཡང་དག་ཐོབ། །ཤཱཀྱ་ཐུབ་པ་ང་ཉིད་དེ་ཡིན་ནོ། །དེ་ཚེ་གང་དག་དམིགས་ཅན་དགེ་སློང་དང༌། །དགེ་སློང་མ་དང་དགེ་བསྙེན་གང་རྣམས་ དང༑ ༑དེ་ན་དགེ་བསྙེན་མ་རྣམས་གང་བྱུང་བ། །མཁས་པས་དེ་ཚེ་བྱང་ཆུབ་བསྒྲགས་གྱུར་པ། །དེ་དག་རྣམས་ཀྱི་སངས་རྒྱས་བྱེ་མང་མཐོང༌། །དེ་དག་ལྔ་བརྒྱ་མི་ཉུང་འདི་ རྣམས་དང༌། །དེ་བཞིན་དགེ་སློང་ཕ་དང་དགེ་སློང་མ། །ང་ཡི་མངོན་སུམ་དགེ་བསྙེན་འདི་དག་སྟེ། །ཐམས་ཅད་ང་ཡིས་ཆོས་མཆོག་ཐོས་བྱས་ནས། །ངས་ནི་འདི་དག་ཐམས་ ཅད་ཡོངས་སྨིན་བྱས། །མྱ་ངན་ང་འདས་དཔའ་བོ་འདི་ཀུན་ནི། །འདི་ན་མདོ་སྡེ་མཆོག་འདི་འཛིན་པར་འགྱུར། །བསྐལ་པ་མཐའ་ཡས་བྱེ་བ་མང་པོར་ཡང༌། །འདི་འདྲའི་ཆོས་ ནི་ནམ་ཡང་མི་ཐོས་ཏེ། །སངས་རྒྱས་བྱེ་བ་ཕྲག་བརྒྱ་འབྱུང་ན་ཡང༌། །དེ་དག་ཀྱང་ནི་མདོ་འདི་མི་འཆད་དོ། །དེ་ཕྱིར་རང་བྱུང་ཉིད་ཀྱིས་བརྗོད་པའི་ཆོས། །འདི་ལྟ་བུ་ཡི་ རྣམ་པ་ཐོས་ནས་སུ། །ཡང་དང་ཡང་ནི་རབ་ཏུ་འདི་བཟུང་ལ། །མྱ་ངན་ང་འདས་མདོ་འདི་རབ་ཤོད་ཅིག །དམ་པའི་ཆོས་པདྨ་དཀར་པོ་ལས། རྟག་ཏུ་བརྙས་པའི་ལེའུ་ཞེས་བྱ་སྟེ་ བཅུ་དགུ་པའོ།། །།དེ་ནས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་སྟོང་གི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་སྙེད་གང་དག་ས་རུམ་ནས་འཐོན་པ་དེ་དག་ ཐམས་ཅད་ཀྱིས་བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་ཡོངས་སུ་མྱ་ངན་ ལས་འདས་ནས། བདག་ཅག་གིས་སངས་རྒྱས་ཀྱི་ཞིང་ཐམས་ཅད་ན། བཅོམ་ལྡན་འདས་ཀྱིས་སངས་རྒྱས་ཀྱི་ཞིང་གང་དག་ལགས་པ་གང་དུ་བཅོམ་ལྡན་འདས་ཡོངས་སུ་མྱ་ངན་ ལས་འདའ་བར་འགྱུར་བ་དེ་དང་དེར་ཆོས་ཀྱི་རྣམ་གྲངས་འདི་རབ་ཏུ་བཤད་པར་བགྱིའོ། །བཅོམ་ལྡན་འདས། བདག་ཅག་ནི་ཆོས་ཀྱི་རྣམ་གྲངས་རྒྱ་ཆེན་པོ་འདི་ལྟ་བུ་བཟུང་བ་དང༌། བཀླག་ ༄༅། །པ་དང༌། བསྟན་པ་དང༌། རབ་ཏུ་བཤད་པ་དང༌། ཡི་གེར་འདྲི་བར་འཚལ་བ་ལགས་སོ། །དེ་ནས་འཇམ་དཔལ་ལ་སོགས་པ་བྱང་ཆུབ་སེམས་དཔའ་བྱེ་ བ་ཁྲག་ཁྲིག་བརྒྱ་སྟོང་མང་པོ་གང་དག་འཇིག་རྟེན་གྱི་ཁམས་མི་མཇེད་འདི་ན་གནས་པ་དག་དང༌། དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དང༌། ལྷ་ དང༑ ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་རྣམས་དང༌། བྱང་ཆུབ་སེམས་དཔའ་ སེམས་དཔའ་ཆེན་པོ་གངྒཱའི་ཀླུང་གི་བྱེ་མ་སྙེད་ཀྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ ནས༑ བདག་ཅག་གིས་ཀྱང་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་བཤད་པར་བགྱིའོ། །བཅོམ་ལྡན་འདས། ལུས་མི་གདའ་བར་བར་སྣང་ལ་གནས་ཏེ་དབྱངས་ཀྱིས་ཡང་ དག་པར་བསྒྲག་པར་བགྱིའོ། །དགེ་བའི་རྩ་བ་མ་བསྐྲུན་པའི་སེམས་ཅན་རྣམས་དགེ་བའི་རྩ་བ་བསྐྲུན་པར་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ སེམས་དཔའ་ཆེན་པོ་སྔ་མ་ཚོགས་དང་ཚོགས་ཆེན་པོ་དང༌། ཚོགས་ཀྱི་སློབ་དཔོན་དེ་དག་གི་གཙོ་བོ་གཅིག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་ཁྱད་པར་ཅན་ ཞེས་བྱ་བ། ཚོགས་དང་ཚོགས་ཆེན་པོ་དང༌། ཚོགས་ཀྱི་སློབ་དཔོན་ལ་འདི་སྐད་ཅེས་བཀའ་སྩལ་ཏོ། །སྤྱོད་པ་ཁྱད་པར་ཅན། ལེགས་སོ། །ལེགས་སོ། །ཁྱོད་ཀྱིས་དེ་ལྟར་གྱིས་ཤིག་དང༌། ཆོས་ཀྱི་རྣམ་གྲངས་འདིའི་ཕྱིར་ཁྱེད་དེ་བཞིན་གཤེགས་པས་ཡོངས་སུ་སྨིན་པར་བྱས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང༌། བཅོམ་ལྡན་འདས་ ཡོངས་སུ་མྱ་ངན་ལས་འདས་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེ་མཆོད་རྟེན་གྱི་དབུས་ན་སེང་གེའི་ཁྲི་ལ་བཞུགས་པ་གཉིས་ ཀ་འཛུམ་པ་མཛད་ནས། གཉིས་ཀའི་ཞལ་གྱི་སྒོ་ནས་ལྗགས་ཀྱི་དབང་པོ་ཕྱུང་སྟེ། ལྗགས་ཀྱི་དབང་པོ་དེ་ཉིད་ཀྱིས་ཚངས་པའི་འཇིག་རྟེན་གྱི་བར་དུ་ཕྱིན་ནས། ལྗགས་ཀྱི་དབང་ པོ་དེ་གཉིས་ལས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་མང་པོ་བྱུང་ངོ༌། །འོད་ཟེར་དེ་དག་ལས་འོད་ཟེར་རེ་རེ་ལས་ཀྱང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་ ལུས་ཀྱི་མདོག་གསེར་གྱི་ཁ་དོག་འདྲ་བ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ། པདྨའི་སྙིང་པོའི་སེང་གེའི་ཁྲི་ལ་འཁོད་པ་དག་བྱུང་ངོ༌། །བྱང་ཆུབ་ སེམས་དཔའ་དེ་དག་ཀྱང་ཕྱོགས་དང་ཕྱོགས་མཚམས་ཀྱི་འཇིག་རྟེན་གྱི་ཁམས་བརྒྱ་སྟོང་དག་ཏུ་དོང་སྟེ། ཕྱོགས་དང་ཕྱོགས་མཚམས་དེ་དག་ཐམས་ཅད་བར་སྣང་ ༄༅། །ལ་འཁོད་ནས་ཆོས་སྟོན་ཏོ། །ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ ཐུབ་པ་དང༌། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གི་ལྗགས་ཀྱི་དབང་པོས་རྫུ་འཕྲུལ་གྱི་ཆོ་འཕྲུལ་ མཛད་པ་དེ་བཞིན་དུ། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་གཞན་དག་ནས་།དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་གང་དག་གཤེགས་པའི་རིན་པོ་ཆེའི་ཤིང་ལྗོན་པའི་དྲུང་དག་ན། སེང་གེའི་ཁྲི་ལ་སོ་སོར་བཞུགས་པ་དེ་དག་ཀྱང་ལྗགས་ཀྱི་དབང་པོས་རྫུ་འཕྲུལ་གྱི་ཆོ་འཕྲུལ་མཛད་ དོ༑ ༑དེ་ནས་བཅོམ་ལྡན་འདས་ཤཱཀྱ་ཐུབ་པ་དང༌། དེ་བཞིན་གཤེགས་པ་རིན་ཆེན་མང་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ དེ་དག་ཐམས་ཅད་ཀྱིས་ལོ་འབུམ་ཚང་གི་བར་དུ་རྫུ་འཕྲུལ་མངོན་པར་འདུ་བྱེད་པ་མཛད་དོ། །དེ་ནས་ལོ་འབུམ་འདས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་དེ་དག་གིས་ལྗགས་ཀྱི་དབང་པོ་དེ་དག་བསྡུས་ཏེ། དུས་གཅིག་ཏུ་སྐད་ཅིག་ཐང་ཅིག་ཡུད་ཙམ་གཅིག་ལ་ཐམས་ཅད་ཀྱི་མགུར་གསལ་བའི་སྒྲ་ཆེན་པོ་ ཕྱུང་སྟེ། སེ་གོལ་གཏོགས་པའི་སྒྲ་གཅིག་མཛད་དོ། །མགུར་གསལ་བའི་སྒྲ་ཆེན་པོ་དེ་དང༌། སེ་གོལ་གཏོགས་པའི་སྒྲ་ཆེན་པོ་དེས། ཕྱོགས་བཅུའི་སངས་རྒྱས་ཀྱི་ཞིང་ བྱེ་བ་ཁྲག་ཁྲིག་བརྒྱ་སྟོང་ཇི་སྙེད་པ་དེ་དག་ཐམས་ཅད་གཡོས་པར་གྱུར་ཏེ། གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། འགུལ། རབ་ཏུ་འགུལ། ཀུན་ཏུ་རབ་ཏུ། འགུལ༑ ལྡེག །རབ་ཏུ་ལྡེག །ཀུན་ཏུ་རབ་ཏུ་ལྡེག་གོ །སངས་རྒྱས་ཀྱི་ཞིང་དེ་དག་ན་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་སེམས་ཅན་ཇི་སྙེད་འཁོད་པ་དེ་དག་དེ་ན་འདུག་བཞིན་དུ་སངས་རྒྱས་ཀྱི་མཐུས་དེ་དག་ཐམས་ཅད་ཀྱིས་འཇིག་རྟེན་གྱི་ཁམས་ མི་མཇེད་འདི་མཐོང་སྟེ། དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་རིན་པོ་ཆེའི་ཤིང་ལྗོན་པའི་དྲུང་ན་སེང་གེའི་ཁྲི་སོ་སོ་ལ་བཞུགས་པ་དེ་དག་དང༌། བཅོམ་ལྡན་འདས་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང༌། བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་རིན་ཆེན་མང་རིན་པོ་ཆེའི་མཆོད་རྟེན་ཆེན་པོ་དེའི་དབུས་ན་སེང་གེའི་ཁྲི་ལ་བཞུགས་པ་དེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་ ༄༅། །པ་དང་ལྷན་ཅིག་ཏུ་བཞུགས་པ་དང༌། འཁོར་བཞི་པོ་དེ་དག་ཀྱང་མཐོང་ངོ༌། །དེ་མཐོང་ནས་ངོ་མཚར་དུ་གྱུར། རྨད་དུ་གྱུར། ཤིན་ཏུ་དགའ་བ་ཐོབ་ པར་གྱུར་ཏེ་བར་སྣང་ལས་སྒྲ་འདི་སྐད་ཅེས་ཐོས་ཏེ། ཀྱེ་གྲོགས་པོ་དག །འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་གྲངས་མེད་པ་དག་འདས་པ་ན་འཇིག་ རྟེན་གྱི་ཁམས་མི་མཇེད་ཅེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་དེ། ད་ལྟར་དམ་པའི་ཆོས་པདྨ་ དཀར་པོ་ཞེས་བྱ་བའི་ཆོས་ཀྱི་རྣམ་གྲངས་འདི་ཤིན་ཏུ་རྒྱས་པ་ཆེན་པོའི་མདོ་སྡེ། བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་ བ༑ བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཡང་དག་པར་རབ་ཏུ་འཆད་ཀྱི། དེ་ལ་ཁྱེད་ཀྱང་ལྷག་པའི་བསམ་པས་རྗེས་སུ་ཡི་རང་བར་གྱིས་ཤིག །བཅོམ་ ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་ཕྱག་ཚོལ་ཅིག །མཆོད་པ་གྱིས་ཤིག་ཅེས་ཐོས་སོ། །དེ་ནས་ སེམས་ཅན་དེ་དག་ཐམས་ཅད་ཀྱིས་བར་སྣང་ལས་དེ་ལྟ་བུའི་སྒྲ་ཐོས་ནས་དེ་ན་འཁོད་བཞིན་དུ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་ཕྱག་འཚལ་ ལོ་ཞེས་ཚིག་དེ་སྐད་སྨྲས་སོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང༌། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ལ་མཆོད་པའི་ལས་ཀྱི་ཕྱིར་ཐལ་མོ་ སྦྱར་ཏེ། མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། ལྷའི་བ་དན་དང༌། རྣམ་པར་རྒྱལ་བའི་བ་ དན་མང་པོ་འཇིག་རྟེན་གྱི་ཁམས་མི་མཇེད་འདི་ག་ལ་བ་དེ་ལོགས་སུ་འཐོར་རོ། །ཕྱང་ཕྲུལ་དང༌། བགོ་བ་དང༌། སེ་མོ་དོ་དང༌། དོ་ཤལ་དང༌། ནོར་བུ་དང༌། རིན་པོ་ཆེ་རྣམ་པ་མང་པོའང་ གཏོར་ཏོ། །མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ཆོས་གོས་དང༌། གདུགས་དང༌། རྒྱལ་མཚན་དང༌། ལྷའི་བ་དན་དང༌། རྣམ་པར་རྒྱལ་ བའི་བ་དན་དང༌། སེ་མོ་དོ་དང༌། དོ་ཤལ་དང༌། ནོར་བུ་དང༌། རིན་པོ་ཆེ་གཏོར་བ་དེ་དག་ཐམས་ཅད་ལ་འཇིག་རྟེན་གྱི་ཁམས་མི་མཇེད་འདིར་འོངས་ཏེ། མེ་ཏོག་དང༌། བདུག་པ་དང༌། སྤོས་ དང༑ ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། ལྷའི་བ་དན་དང༌། རྣམ་པར་རྒྱལ་བའི་བ་དན་རྣམ་པ་མང་པོ་དང༌། སེ་མོ་དོ་དང༌། དོ་ཤལ་དང༌། ནོར་བུ་དང༌། རིན་པོ་ཆེ་དེ་དག་གིས་ཐམས་ཅད་དང་ལྡན་པའི་འཇིག་རྟེན་གྱི་ཁམས་མི་མཇེད་འདི་ཁེབས་པར་གྱུར་ཏེ། འཇིག་རྟེན་གྱི་ཁམས་གཞན་བྱེ་བ་ཁྲག་ཁྲིག་བརྒྱ་སྟོང་དེ་དག་ ༄༅། །དང་ལྷན་ཅིག་ཏུ་ཁེབས་པར་གྱུར་ནས་གཅིག་ཏུ་གྱུར་ཏེ། གང་དག་ན་དེ་བཞིན་གཤེགས་པ་དེ་དག་བཞུགས་པ། འཇིག་རྟེན་གྱི་ཁམས་བྱེ་བ་ཁྲག་ཁྲིག་ བརྒྱ་སྟོང་དེ་དག་ཐམས་ཅད་ཀྱི་སྟེང་གི་ནམ་མཁའ་བར་སྣང་ལ་མེ་ཏོག་གི་བླ་བྲེ་ཆེན་པོས་ཀུན་ཏུ་ཁེབས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྤྱོད་པ་ཁྱད་པར་ཅན་ལ་སོགས་ པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བཀའ་སྩལ་པ། རིགས་ཀྱི་བུ་དག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ ཀྱི་མཐུ་བསམ་གྱིས་མི་ཁྱབ་པ་སྟེ། རིགས་ཀྱི་བུ་དག །ཆོས་ཀྱི་རྣམ་གྲངས་འདི་ཡོངས་སུ་གཏད་པའི་ཕྱིར། ངས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་ཆོས་ཀྱི་སྒོ་རྣམ་པ་ ཐ་དད་པ་དག་གིས་ཕན་ཡོན་གྱི་རྣམ་གྲངས་མང་པོ་བཤད་མོད་ཀྱི། ངས་ཆོས་ཀྱི་རྣམ་གྲངས་འདིའི་ཡོན་ཏན་བཤད་ཀྱང་ཡོན་ཏན་གྱི་ཕ་རོལ་ཏུ་མི་ཕྱིན་ཏོ། །རིགས་ཀྱི་བུ་དག ། མདོར་ན་སངས་རྒྱས་ཀྱི་ཆོས་ཐམས་ཅད་དང༌། སངས་རྒྱས་ཀྱི་ཁྱུ་མཆོག་ཏུ་གྱུར་པ་ཐམས་ཅད་དང༌། སངས་རྒྱས་ཀྱི་གསང་ཆེན་ཐམས་ཅ་དང༌། སངས་རྒྱས་ཀྱི་ཟབ་མོའི་གནས་ ཐམས་ཅད་ངས་ཆོས་ཀྱི་རྣམ་གྲངས་འདིར་བཤད་དོ། །རིགས་ཀྱི་བུ་དག །དེ་ལྟ་བས་ན་ཁྱེད་ཀྱིས་ཀྱང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་ འདི་ལ་གུས་པར་གཟུང་བར་བྱའོ། །བསྟན་པར་བྱའོ། །ཡི་གེར་འདྲི་བར་བྱའོ། །བཀླག་པར་བྱའོ། །རབ་ཏུ་བཤད་པར་བྱའོ། །བསྒོམ་པར་བྱའོ། །མཆོད་པར་བྱའོ། །རིགས་ཀྱི་བུ་དག །ས་ ཕྱོགས་གང་ན་ཆོས་ཀྱི་རྣམ་གྲངས་འདི་ཀློག་གམ། སྟོན་ཏམ། རབ་ཏུ་འཆད་དམ། ཡི་གེར་འདྲིའམ། སེམས་སམ། འདོན་ཏམ། ཁ་ཏོན་བྱེད་དམ། གླེགས་བམ་དུ་བྱས་པ། ཀུན་ དགའ་ར་བ་འམ། གཙུག་ལག་ཁང་ངམ། ཁྱིམ་མམ། གནས་སམ། ཤིང་དྲུང་ངམ། ཁང་པའམ། གནས་ཁང་ངམ། ཕྱུག་ན་འདུག་ཀྱང་རུང་སྟེ། ས་ཕྱོགས་དེར་དེ་བཞིན་གཤེགས་ པའི་ཕྱིར་མཆོད་རྟེན་བྱའོ། །དེ་ཅིའི་ཕྱིར་ཞེ་ན། ས་ཕྱོགས་དེ་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སྙིང་པོར་རིག་པར་བྱ་བ་དང༌། ས་ཕྱོགས་དེར་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་རིག་པར་བྱ་བ་དང༌། ས་ ཕྱོགས་དེར་དེ་བཞིན་གཤེགས་པ་ཐམས་ཅད་ཀྱིས་ཆོས་ཀྱི་འཁོར་ལོ་རབ་ཏུ་བསྐོར་བ་དང༌། ས་ཕྱོགས་དེར་དེ་བཞིན་གཤེགས་པ་ཐམས་ཅད་ཡོངས་སུ་མྱ་ངན་ལས་འདས་པར་ རིག་པར་བྱ་བ་ཡིན་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མངོན་ཤེས་ཟྱེ་ཤེས་རབ་ཏུ་གནས་རྣམས་ཀྱི། །འཇིག་ ༄༅། །རྟེན་ཕན་པའི་ཆོས་ནི་བསམ་མི་ཁྱབ། །ལུས་ཅན་འདི་ཀུན་མཆོག་ཏུ་དགའ་བའི་ཕྱིར། །མཐའ་ཡས་སྤྱན་གྱིས་རྫུ་འཕྲུལ་རབ་ཏུ་བསྟན། །འོད་ཟེར་ སྟོང་རྣམས་རབ་ཏུ་ཀུན་འགྱེད་ཅིང༌། །ལྗགས་ཀྱི་དབང་པོས་ཚངས་པའི་འཇིག་རྟེན་ཕྱིན། །བྱང་ཆུབ་མཆོག་ལ་ཞུགས་པ་དེ་དག་ཕྱིར། །ངོ་མཚར་གྱུར་པའི་རྫུ་འཕྲུལ་དེ་དག་ བསྟན། །སངས་རྒྱས་རྣམས་ཀྱི་མགུར་སེལ་སྒྲ་མཛད་ཅིང༌། །སེ་གོལ་གཅིག་གི་སྒྲ་དག་གང་ཕྱུང་བ། །དེ་དག་ཕྱོགས་བཅུའི་འཇིག་རྟེན་ཇི་ཙམ་པ། །འཇིག་རྟེན་ཁམས་དེ་ ཐམས་ཅད་གོ་བར་བྱས། །ཅི་ནས་དེ་དག་དགའ་ནས་ཕྱི་དུས་ན། །བདེ་གཤེགས་མྱ་ངན་འདས་ནས་མེད་འཛིན་པར། །དེ་དག་དང་ནི་ཆོ་འཕྲུལ་གཞན་རྣམས་དང༌། ཡོན་ཏན་ རྣམས་ནི་ཕན་ཞིང་ཐུགས་བརྩེ་བསྟན། །འཇིག་རྟེན་རྣམ་འདྲེན་མྱ་ངན་འདས་པ་ན། །མདོ་སྡེ་མཆོག་འདི་གང་དག་འཛིན་པ་ཡི། །བདེ་གཤེགས་སྲས་པོ་རྣམས་ཀྱི་བསྔགས་ པ་ནི༑ ༑བསྐལ་པ་བྱེ་བ་སྟོང་ཕྲག་མང་བརྗོད་ཀྱང༌། །དེ་དག་གི་ནི་ཡོན་ཏན་མཐའ་ཡས་ཏེ། །ཇི་ལྟར་ཕྱོགས་རྣམས་སུ་ནི་ནམ་མཁའ་བཞིན། །གང་དག་རྟག་ཏུ་མདོ་སྡེ་འདི་ འཛིན་པ། །དེ་དག་ཡོན་ཏན་བསམ་གྱིས་མི་ཁྱབ་འགྱུར། །འཇིག་རྟེན་འདྲེན་པ་མྱ་ངན་འདས་འདི་དང༌། །ང་དང་འདྲེན་པ་འདི་དག་ཐམས་ཅད་མཐོང༌། །བྱང་ཆུབ་སེམས་ དཔའ་མང་པོ་འདི་ཀུན་དང༌། །འཁོར་བཞི་རྣམས་དང་དེ་ཡིས་མཐོང་བ་ཡིན། །དེ་ཡིས་དེང་འདིར་ང་ནི་མཉེས་པར་བྱས། །རྒྱལ་བའི་དབང་པོ་མྱ་ངན་འདས་འདི་དང༌། །ཕྱོགས་བཅུ་ རྣམས་ན་གང་དག་གཞན་བཞུགས་པ། །འདྲེན་པ་དེ་དག་ཐམས་ཅད་མཉེས་པར་བྱས། །གང་ཞིག་མདོ་སྡེ་འདི་ནི་འཛིན་བྱེད་པ། །འདས་དང་ད་ལྟར་མ་བྱོན་སངས་རྒྱས་དང༌། ། ཕྱོགས་བཅུ་དག་ན་གང་དག་བཞུགས་པ་ཡང༌། །དེ་ཀུན་མཐོང་ཞིང་ཤིན་ཏུ་མཆོད་པར་འགྱུར། །མདོ་སྡེ་ཡང་དག་ཆོས་འདི་གང་འཛིན་པས། །བྱང་ཆུབ་སྙིང་པོ་རྣམ་པར་གང་ དགོངས་པ། །སྐྱེས་མཆོག་རྣམས་ཀྱི་གསང་ཆེན་ཤེས་པར་འགྱུར། །དེ་ནི་དེ་ཡང་མྱུར་དུ་རྗེས་སུ་སེམས། །གང་ཞིག་མདོ་སྡེ་དམ་པ་འདི་འཛིན་པ། །འདི་ཡི་སྤོབས་པ་དག་ནི་ མཐའ་ཡས་འགྱུར། །ཇི་ལྟར་རླུང་ནི་གང་དུའང་ཐོགས་མེད་བཞིན། །ཆོས་དང་དོན་དང་ངེས་པའི་ཚིག་ཀྱང་ཤེས། །འདྲེན་པ་རྣམས་ཀྱིས་དགོངས་ཏེ་གང་གསུངས་པ། །མདོ་སྡེ་ རྣམས་ཀྱི་མཚམས་སྦྱར་རྟག་ཏུ་ཤེས། །རྣམ་པར་འདྲེན་པ་མྱ་ངན་འདས་པ་ཡི། །མདོ་སྡེ་རྣམས་ཀྱི་ཡང་དག་དོན་དེས་ཤེས། །ཟླ་བ་ཉི་མ་འདྲ་བར་དེ་འགྱུར་ཏེ། །དེ་ནི་ཤིན་ཏུ་སྣང་ ཞིང་གསལ་བྱེད་འགྱུར། །དེ་ནི་ས་ལ་རྒྱུ་ཞིང་དེ་དང་དེར། །བྱང་ཆུབ་སེམས་དཔའ་མང་པོ་ཡང་དག་འཛུད། །དེ་བས་བྱང་ཆུབ་སེམས་དཔའ་མཁས་གང་དག །འདི་འདྲ་པ་ཡི་ ༄༅། །ཕན་ཡོན་འདི་ཐོས་ནས། །མྱ་ངན་ང་འདས་མདོ་འདི་གཟུང་ཞིག་དང༌། །དེ་དག་ཐེ་ཚོམ་མེད་པར་བྱང་ཆུབ་འགྱུར། །དམ་པའི་ཆོས་པདྨ་དཀར་ པོ་ལས། དེ་བཞིན་གཤེགས་པའི་རྫུ་འཕྲུལ་མངོན་པར་འདུ་བྱེད་པའི་ལེའུ་ཞེས་བྱ་སྟེ་ཉི་ཤུ་པའོ།། །།དམ་པའི་ཆོས་པདྨ་དཀར་པོ། བམ་པོ་བཅུ་ གཉིས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དམ་པའི་ཆོས་ པདྨ་དཀར་པོའི་ཆོས་ཀྱི་རྣམ་གྲངས་འདི། ལུས་ལ་ཐོགས་སམ་གླེགས་བམ་དུ་བགྱིས་ཏེ་འཛིན་པའི་རིགས་ཀྱི་བུའམ་རིགས་ཀྱི་བུ་མོ་དེ་བསོད་ནམས་ཇི་སྙེད་ཅིག་སྐྱེད་པར་ འགྱུར། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །སྨན་གྱི་ རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་བརྒྱད་ཅུའི་བྱེ་མ་སྙེད་ལ་བསྟི་སྟང་དུ་བྱེད། བཙུན་ པར་བྱེད། རི་མོར་བྱེད། མཆོད་པ་བྱེད་ན། སྨན་གྱི་རྒྱལ་པོ། འདི་ཇི་སྙམ་དུ་སེམས། རིགས་ཀྱི་བུའམ་རིགས་ཀྱི་བུ་མོ་དེ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་ པ༑ བཅོམ་ལྡན་འདས། མང་ལགས་སོ། །བདེ་བར་གཤེགས་པ། མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྨན་གྱི་རྒྱལ་པོ་ཁྱོད་མོས་པར་བྱའོ། །ཁོང་དུ་ ཆུད་པར་བྱའོ། །སྨན་གྱི་རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་ གཅིག་ཙམ་ཡང་འཛིན་པ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། ནན་ཏན་གྱིས་སྒྲུབ་ན། སྨན་གྱི་རྒྱལ་པོ། རིགས་ཀྱི་བུའམ་རིགས་ཀྱི་བུ་མོ་དེ་གཞི་དེ་ལས་དེ་བས་ཆེས་ བསོད་ནམས་མང་དུ་སྐྱེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་ དམ་པའི་ཆོས་ཀྱི་རྣམ་གྲངས་འདི་ལུས་ལ་ཐོགས་སམ་གླེགས་བམ་དུ་བགྱིས་ཏེ། འཛིན་པའི་རིགས་ཀྱི་བུའམ་རིགས་ཀྱི་བུ་མོ་དེ་བདག་གིས་བསྲུང་བ་དང་བསྐྱབ་པ་དང་སྦ་བའི་སླད་ དུ་གཟུངས་སྔགས་ཀྱི་ཚིག་རྣམས་སྩལ་བར་བགྱིའོ། །ཏདྱ་ཐཱ། ཨ་ནྱེ། མ་ནེ་མ་མ་ནེ། ཙིཏྟེ་ཙི་ར་ཏེ། ཤ་མེ་ཤ་མེ་ཡི་ཏཱ་བྷི། ཤཱནྟེ། མུཀྟེ། མུཀྟ་ཏ་མེ་ས་མེ། ཨ་བི་ཤ་ ༄༅། །མེ་ས་མ་ས་མེ། ཛ་ཡེ། ཀྵ་ཡེ་ཨཀྵ་ཡེ། ཨཀྵི་ཎོ། ཤཱནྟེ། ཤ་མི་ཏེ་དྷཱ་ར་ཎཱི། ཨཱ་ལོ་ཀ་བྷཱ་སེ། པྲ་ཏྱ་བེཀྵ་ཎཱི། བི་བི་རུ་ཨ་བྷྱནྟ། ར་ནི་བི་ཥྚེ། ཨ་བྷྱནྟ་ར་ ནི་བིཥྚི་ཨ་ཏྱནྟ་པ་རི་ཤུདྡྷི། ཨུཏྐུ་ལེ། མུཏྐུ་ལེ། ཨ་ར་ཊེ། པ་ར་ཊེ། ཤྲུ་ཀཱ་ཀྵཱི་ཨ་ས་མ་ས་མེ། བུདྡྷ་བི་ལོ་ཀི་ཏེ། དྷརྨ་པ་རཱི་ཀཥི་ཏེ། སངྒྷ་ནི་རྒོ་ཥ་ཎཱི། ནི་རྒྷོ་ཥ་ཎཱི། བྷ་ཡཱ་བྷ་ཡ། ཤོ་དྷ་ནཱི་ མནྟྲེ་མནྟྲ། ཀྵ་ཡ་ཏེ་རུ་ཏ་ཀཽ་ཤ་ལ། ཨཀྵ་ཡེ་ཨཀྵཱ་བ་ན་ཏཱ་ཡཱ་པ་ལོ། །ཨ་མནྱ་ན་ཏཱ་ཡ། བཅོམ་ལྡན་འདས། གཟུངས་སྔགས་ཀྱི་ཚིག་འདི་དག་ནི། སངས་རྒྱས་བཅོམ་ལྡན་ འདས་གངྒཱའི་ཀླུང་དྲུག་ཅུའི་བྱེ་མ་སྙེད་ཀྱིས་བཤད་པ་སྟེ། གང་གིས་མདོ་སྡེ་འདི་ལྟ་བུ་འཛིན་པ་ཆོས་སྨྲ་བ་འདི་ལྟ་བུ་དེ་དག་དང་འགལ་བར་བགྱིས་ན་སངས་རྒྱས་བཅོམ་ ལྡན་འདས་དེ་དག་ཐམས་ཅད་ལ་དེ་འཁུས་པ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་ལ་འདི་སྐད་ཅེས་ བཀའ་སྩལ་ཏོ། །སྨན་གྱི་རྒྱལ་པོ་ཁྱོད་ཀྱིས་གཟུངས་སྔགས་ཀྱི་ཚིག་རྣམས་སྨྲས་པས། སེམས་ཅན་མང་པོའི་དོན་བྱས་ཤིང་སྨན་གྱི་རྒྱལ་པོ་སེམས་ཅན་རྣམས་ལ་སྙིང་བརྩེ་ བའི་ཕྱིར་བསྲུང་བ་དང༌། བསྐྱབ་པ་དང༌། སྦ་བ་བྱས་པ་ལེགས་སོ། །ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ ཏུ་སྦྱིན་པས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཀྱང༌། ཆོས་སྨྲ་བ་འདི་ལྟ་བུ་དག་གི་ཆེད་དུ་གཟུངས་སྔགས་ཀྱི་ཚིག་རྣམས་སྩལ་བར་བགྱི་སྟེ། དེས་ཆོས་སྨྲ་བ་ འདི་ལྟ་བུ་དེ་དག་ལ་གླགས་ལྟ་བ་གང་གིས་ཀྱང་གླགས་མི་རྙེད་པ་འདི་ལྟ་སྟེ། གནོད་སྦྱིན་ནམ། སྲིན་པོའམ། སྲུལ་པོའམ། གཤེད་བྱེད་དམ། གྲུལ་བུམ་མམ། ཡི་དྭགས་གླགས་ལྟ་བ་རྣམས་ ཀྱིས་གླགས་མི་རྙེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་སྦྱིན་པས་དེའི་ཚེ་གཟུངས་སྔགས་ཀྱི་ཚིག་འདི་དག་སྨྲས་སོ། །ཏདྱ་ཐཱ། ཛྭ་ལེ་མ་ཧཱ་ཛྭ་ལེ། ཨུཀྐེ། མུཀྐེ༑ ཨ་ཌེ་ཨ་ཌཱ་བ་ཏི། ནྲྀ་ཊྱོ་ནྲྀ་ཊཱ་བ་ཏི། ཨཊྚི་ནི། བིཊྚི་ཙི་ཊྚི་ནི། ནྲྀ་ཊ་ཊི་ནི། ནྲྀཊྚཱ་བ་ཏི་སྲཱཧཱ། བཅོམ་ལྡན་འདས། གཟུངས་སྔགས་ཀྱི་ཚིག་འདི་དག་ནི་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་ཀྱིས་གསུངས་ཤིང་རྗེས་སུ་ཡི་རང་བ་སྟེ། གང་གིས་ཆོས་སྨྲ་བ་འདི་ལྟ་བུ་འདི་དག་དང་འགལ་བར་བགྱིས་ན། དེ་དེ་བཞིན་གཤེགས་པ་དེ་དག་ཐམས་ཅད་ལ་འཁུས་པ་ལགས་སོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་རྣམ་ཐོས་ཀྱི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་ཆོས་སྨྲ་བ་དེ་དག་ལ་གློ་བ་བརྩེ་བས་སྨན་པ་དང༌། བདེ་བ་དང༌། བསྲུང་བ་དང༌། བསྐྱབ་པ་དང༌། སྤ་བའི་སླད་དུ་གཟུངས་སྔགས་ཀྱི་ཚིག་རྣམས་བརྗོད་པར་བགྱིའོ། ། ༄༅། །ཏདྱ་ཐཱ། ཨཊྚ། ནཊྚེ་ཏ་ནཊྚེ། ཨ་ན་ཏེ་ནཱ་ཏི། ཀུ་ན་ཊི་སྭཱཧཱ། བཅོམ་ལྡན་འདས། གཟུངས་སྔགས་ཀྱི་ཚིག་འདི་དག་གིས་ཆོས་སྨྲ་བ་དེ་དག་ལ་དཔག་ ཚད་བརྒྱ་ཚུན་ཆད་དུ་བསྲུང་བར་བགྱིའོ། །རིགས་ཀྱི་བུའམ་རིགས་ཀྱི་བུ་མོ་མདོ་སྡེ་འདི་ལྟ་བུ་འཛིན་ཅིང༌། ཆོས་སྨྲ་བ་དེ་དག་ལའང་བསྲུང་བ་བགྱིས་པར་འགྱུར། བདེ་ལེགས་ སུ་བགྱིས་པར་འགྱུར་རོ། །དེ་ནས་རྒྱལ་པོ་ཆེན་པོ་འཕགས་སྐྱེས་པོ་དྲི་ཟ་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས། འཁོར་དེར་འདུས་པར་གྱུར་ ཏེ་འདུག་པ་དེ་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ པ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་མདོ་སྡེ་འདི་ལྟ་བུ་འཛིན་པ། ཆོས་སྨྲ་བ་འདི་ལྟ་བུ་དེ་དག་བསྲུང་བ་ དང༑ བསྐྱབ་པ་དང༌། སྦ་བའི་སླད་དུ་གཟུངས་སྔགས་ཀྱི་ཚིག་རྣམས་བརྗོད་པར་བགྱིའོ། །ཏདྱ་ཐཱ། ཨ་ག་ཎོ་ག་ཎོ། གཽ་རི་གནྡྷ་རི། ཙཎྜ་ལི། མ་ཏིངྒ། པུཀྐ་སི། ཀུ་ ལེ༑ པྲུ་ཧི་སྭཱཧཱ། བཅོམ་ལྡན་འདས། གཟུངས་སྔགས་ཀྱི་ཚིག་འདི་དག་ནི་སངས་རྒྱས་བྱེ་བ་ཕྲག་བཞི་བཅུ་རྩ་གཉིས་ཀྱིས་གསུངས་ཏེ། གང་ཞིག་ཆོས་སྨྲ་བ་ འདི་ལྟ་བུ་འདི་དག་དང་འགལ་བར་བགྱིད་ན། དེ་དག་ཐམས་ཅད་ལ་འཁུས་པ་ལགས་སོ། །དེ་ནས་སྲིན་མོ་འཕྱང་མ་ཞེས་བྱ་བ་དང༌། སྲིན་མོ་རྣམ་པར་འཕྱང་མ་ཞེས་བྱ་བ་དང༌། སྲིན་ མོ་སོ་བརྩེགས་ཞེས་བྱ་བ་དང༌། སྲིན་མོ་མེ་ཏོག་སོ་ཞེས་བྱ་བ་དང༌། སྲིན་མོ་ཅོད་པན་སོ་ཞེས་བྱ་བ་དང༌། སྲིན་མོ་སྒྲ་ཅན་ཞེས་བྱ་བ་དང༌། སྲིན་མོ་མེ་ཞེས་བྱ་བ་དང༌། སྲིན་མོ་ཕྲེང་བ་ འཆང་ཞེས་བྱ་བ་དང༌། སྲིན་མོ་མདུང་ཅན་ཞེས་བྱ་བ་དང༌། སྲིན་མོ་སེམས་ཅན་ཐམས་ཅད་ཀྱི་མདངས་འཕྲོག་ཅེས་བྱ་བ་དང༌། འཕྲོག་མ་བུ་དང་གཡོག་ཏུ་བཅས་པ་དང༌། སྲིན་ མོ་དེ་དག་ཐམས་ཅད་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། སྲིན་མོ་དེ་དག་ཐམས་ཅད་ཀྱིས་སྒྲ་སྐད་གཅིག་ཏུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ ལྡན་འདས། བདག་ཅག་གིས་ཀྱང་མདོ་སྡེ་འདི་འཛིན་པ་ཆོས་སྨྲ་བ་འདི་ལྟ་བུ་དེ་དག་བསྲུང་བ་དང༌། བསྐྱབ་པ་དང༌། སྤ་བ་བགྱིའོ། །བདེ་ལེགས་སུ་འགྱུར་བར་བགྱིའོ། །ཅི་ནས་ ཚེས་སྨྲ་བ་དེ་དག་ལ་གླགས་ལྟ་བ་དང༌། སྐབས་འཚོལ་བ་དག་གིས་ཀྱང་གླགས་མི་རྙེད་པར་བགྱིའོ། །དེ་ནས་སྲིན་མོ་དེ་དག་ཐམས་ཅད་ཀྱིས་སྒྲ་སྐད་གཅིག་ཏུ་ཚིག་མཐུན་པར་ བཅོམ་ལྡན་འདས་ལ་གཟུངས་སྔགས་ཀྱི་ཚིག་འདི་དག་ཕུལ་ལོ། །ཏདྱ་ཐཱ། ཨི་ཏི་མེ། ཨི་ཏི་མེ། ཨི་ཏི་མེ། ཨི་ཏི་མེ། ཨི་ཏི་མེ། ནི་མེ། ནི་མེ། ནི་མེ། ནི་མེ། ནི་མེ། རུ་ཧེ། རུ་ ༄༅། །ཧེ༑ རུ་ཧེ། རུ་ཧེ། རུ་ཧེ། ཧ་སྟེ། ཧ་སྟེ། ཧ་སྟེ། ཧ་སྟེ། ཧ་སྟེ་སྭཱཧཱ། འདི་སྤྱི་བོར་བཞག་ནས་ཆོས་སྨྲ་བ་རྣམས་ལ་སུའང་འཁུ་བར་མ་གྱུར་ཅིག །གནོད་ སྦྱིན་ནམ། སྲིན་པོའམ། ཡི་དྭགས་སམ། ཤ་ཟའམ། སྲུལ་པོའམ། གཤེད་བྱེད་དམ། རོ་ལངས་སམ། རེངས་པའམ། གནོན་པོའམ། བརྗེད་བྱེད་ཀྱི་གཟུགས་སམ། གནོད་ སྦྱིན་གྱིས་བྱས་པའམ། མིས་བྱས་པའམ། མི་མ་ཡིན་པས་བྱས་པའམ། རིམས་ནད་ཉིན་གཅིག་པའམ། ཉིན་གཉིས་པའམ། ཉིན་གསུམ་པའམ། ཉིན་བཞི་པའམ། རྟག་ པའི་རིགས་སམ། ཐ་ན་རྨི་ལམ་ནའང་བུད་མེད་ཀྱི་གཟུགས་སམ། སྐྱེས་པའི་གཟུགས་སམ། ཁྱེའུའི་གཟུགས་སམ། བུ་མོའི་གཟུགས་ཀྱིས་མཐོ་འཚམ་པར་འགྱུར་བ་དེ་ནི་གནས་ མ་མཆིས་སོ། །དེ་ནས་སྲིན་མོ་དེ་དག་གིས་སྒྲ་སྐད་གཅིག་ཏུ་ཚིག་མཐུན་པར་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །གང་གིས་གསང་སྔགས་འདི་ཐོས་ནས།། ཆོས་སྨྲ་བ་དང་འགལ་བགྱིད་པ། །དེའི་མགོ་ཚལ་བ་བདུན་དུ་འགས། །ཨརྫ་ཀ་ཡི་དོག་པ་བཞིན། །གང་ཞིག་ཆོས་སྨྲ་འགལ་བགྱིད་པ། །མ་བསད་པ་ཡི་འགྲོ་གང་དང༌། །ཕ་ བསད་འགྲོ་བ་གང་ལགས་པའི། །འགྲོ་བ་དེ་ནི་དེར་མཆིའོ། །གང་ཞིག་ཆོས་སྨྲ་འགལ་བགྱིད་པ། །ཏིལ་འཚིར་དག་གི་འགྲོ་གང་དང༌། །ཏིལ་རྡུང་འགྲོ་བ་གང་ལགས་པའི།། འགྲོ་བ་དེར་ནི་དེ་མཆིའོ། །གང་ཞིག་ཆོས་སྨྲ་འགལ་བགྱིད་པ། །སྲང་ལ་གཡོ་བགྱིད་འགྲོ་གང་དང༌། །བྲེ་འཆོས་འགྲོ་བ་གང་ལགས་པའི། །འགྲོ་བ་དེར་ནི་དེ་མཆིའོ། །དེ་སྐད་ཅེས་གསོལ་ ནས༑ མདུང་ཅན་ལ་སོགས་པ་སྲིན་མོ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཀྱང་ཆོས་སྨྲ་བ་འདི་ལྟ་བུ་དེ་དག་ལ་བསྲུང་ བར་བགྱིའོ། །བདེ་ལེགས་སུ་འགྱུར་བ་དང༌། ཆད་པ་སྤང་བ་དང༌། དུག་གཞིལ་བར་བགྱིའོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་སྲིན་མོ་དེ་དག་ལ་འདི་སྐད་ ཅེས་བཀའ་སྩལ་ཏོ། །ཀྱེ་སྲིན་མོ་དག །ལེགས་སོ། །ལེགས་སོ། །ཁྱེད་ཀྱིས་ཆོས་སྨྲ་བ་དེ་དག་ལ་བསྲུང་བ་དང༌། བསྐྱབ་པ་དང༌། སྦ་བ་གྱིས་ཤིག །གང་དག་ཐ་ན་ཆོས་ཀྱི་རྣམ་གྲངས་ འདིའི་མིང་ཙམ་འཛིན་པ་དེ་དག་ལའང་མདུང་ཅན་ཁྱོད་འཁོར་དང་བཅས་པས་བསྲུང་བར་བྱ་ན། གང་དག་ཆོས་ཀྱི་རྣམ་གྲངས་འདི་མཐའ་དག་ཆུབ་པར་འཛིན་པ་དང༌། གླེགས་བམ་ དུ་བྱས་ཏེ་རིམ་གྲོ་བྱེད་པ་དང༌། མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། ལྷའི་བདན་དང༌། འབྲུ་མར་གྱི་མར་མེའམ། མར་གྱི་མར་མེའམ། སྤོས་མར་གྱི་མར་མེའམ། ཙམྤ་ཀའི་མར་གྱི་མར་མེའམ། བར་ཤ་ཀའི་མར་གྱི་མར་མེའམ། ཨུཏྤ་ལའི་མར་གྱི་མར་མེའམ། སྣ་ ༄༅། །མའི་མར་གྱི་མར་མེའམ། དེ་ལྟ་བུའི་མཆོད་པའི་ཡོ་བྱད་རྣམ་པ་མང་པོ་བརྒྱ་སྟོང་གིས་རིམ་གྲོ་བྱེད་པ་ལྟ་ཅི་སྨོས་ཏེ། མདུང་ཅན་ཁྱོད་གཡོག་དང་ བཅས་པས་བསྲུང་བར་བྱའོ། །གཟུངས་སྔགས་ཀྱི་ལེའུ་འདི་བཤད་པ་ན་སྲོག་ཆགས་དྲུག་ཁྲི་བརྒྱད་སྟོང་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དམ་པའི་ཆོས་ པདྨ་དཀར་པོ་ལས། གཟུངས་སྔགས་ཀྱི་ལེའུ་ཞེས་བྱ་སྟེ་ཉི་ཤུ་རྩ་གཅིག་པའོ།། །།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་ པོ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པས་འདི་སྐད་ཅེས་གསོལ་ཏོ། །བཅོམ་ལྡན་འདས། ཅིའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ སྨན་གྱི་རྒྱལ་པོ་འཇིག་རྟེན་གྱི་ཁམས་མི་མཇེད་འདི་ན་རྒྱུ་བ་དང༌། བཅོམ་ལྡན་འདས་འདི་དཀའ་བ་བགྱིད་པ་བྱེ་བ་ཁྲག་ཁྲིག་བརྒྱ་སྟོང་མང་པོ་དག་གདའ། བཅོམ་ལྡན་ འདས། གང་ཐོས་པས་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ ཡིན་པ་རྣམས་དང༌། འཇིག་རྟེན་གྱི་ཁམས་གཞན་ནས་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང༌། ཉན་ཐོས་ཆེན་པོ་འདི་དག་གིས་ཐོས་ནས་ཐམས་ ཅད་དགའ་མགུ་རངས་ཤིང་ཡིད་བདེ་བར་འགྱུར་བ། བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོའི་སྤྱོད་པ་གང་ཅི་ལགས་པའི་ཕྱོགས་ཙམ་ཞིག །དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལེགས་པར་བཤད་དུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་ པོ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པས་གསོལ་བ་བཏབ་པ་མཁྱེན་ནས། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མའི་རྒྱལ་པོ་མེ་ཏོག་ཀུན་ ཏུ་རྒྱས་པ་མངོན་པར་ཤེས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། སྔོན་བྱུང་བ་འདས་པའི་དུས་ན་བསྐལ་པ་གངྒཱའི་ཀླུང་གི་བྱེ་མ་སྙེད་དུ་གྱུར་པ་དེའི་ཚེ་དེའི་དུས་ན། དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ ལོ་སྒྱུར་བ། བླ་ན་མེད་པ། ལྷ་དང་མི་རྣམས་གྱི་སྟོན་པ་སངས་རྒྱས་བཅོམ་ལྡན་འདས་ཉི་ཟླ་དྲི་མ་མེད་པའི་འོད་དཔལ་ཞེས་བྱ་བ་འཇིག་རྟེན་དུ་བྱུང་སྟེ། སྐར་མའི་རྒྱལ་པོ་མེ་ཏོག་ ཀུན་ཏུ་རྒྱས་པ་མངོན་པར་ཤེས་པ། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་དེའི་བྱང་ཆུབ་ ༄༅། །སེམས་དཔའ་བྱེ་བ་བརྒྱད་ཅུའི་འདུས་པ་ཆེན་པོ་བྱུང་ངོ༌། །གངྒཱའི་ཀླུང་བདུན་ཅུ་རྩ་གཉིས་ཀྱི་བྱེ་མ་སྙེད་ཀྱི་ཉན་ཐོས་འདུས་པ་བྱུང་ངོ༌། །དེའི་བསྟན་པ་ལ་ བུད་མེད་མེད་པར་གྱུར་ཏོ། །སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། ཡི་དྭགས་དང༌། ལྷ་མ་ཡིན་གྱི་རིས་མེད་དོ། །སངས་རྒྱས་ཀྱི་ཞིང་ཡང་ལག་མཐིལ་ལྟར་ མཉམ་ལ་ཉམས་དགའ་བར་གྱུར་ཏོ། །ལྷའི་བཻ་ཌཱུཪྻ་ལས་གྲུབ་པའི་ས་ཕྱོགས་རིན་པོ་ཆེ་དང་ཙནྡན་གྱི་ཤིང་ལྗོན་པས་བརྒྱན་ཅིང༌། རིན་པོ་ཆེའི་དྲ་བས་བྲེས་པ། དར་གྱི་ལྡ་ལྡི་ མངོན་པར་རབ་ཏུ་དཔྱངས་པ། རིན་པོ་ཆེའི་བོག་ཕོར་ནས་བདུག་བས་བདུགས་པ། རིན་པོ་ཆེའི་ཤིང་ལྗོན་པའི་དྲུང་ཐམས་ཅད་ན། རིན་པོ་ཆེའི་མཁའ་རྟེན་མདའ་རྒྱང་གང་ གི་ཚད་ཙམ་བྱས་པ་ཡོད་པ། རིན་པོ་ཆེའི་མཁའ་རྟེན་ཐམས་ཅད་ཀྱི་སྟེང་ན་ལྷའི་བུ་བྱེ་བ་བརྒྱ་དག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་ལ་མཆོད་པ་བྱ་བའི་ཕྱིར། སིལ་སྙན་བྱེད་ཅིང་ཕེག་རྡོབ་པ་དང༌། རོལ་མོའི་སྒྲ་འབྱིན་ཅིང་འཁོད་དོ། །བཅོམ་ལྡན་འདས་དེའང་ བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ལས་བརྩམས་ཏེ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི། ཉན་ ཐོས་ཆེན་པོ་དེ་དག་དང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་རྒྱས་པར་རབ་ཏུ་སྟོན་ཏོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བཅོམ་ལྡན་ འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་དེའི་ཚེའི་ཚད་ནི་བསྐལ་པ་བཞི་ཁྲི་ཉིས་སྟོང་དུ་གྱུར་ཏོ། །བྱང་ ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ཉན་ཐོས་ཆེན་པོ་དེ་དག་གི་ཚེའི་ཚད་ཀྱང་དེ་ཙམ་དུ་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ ཅད་ཀྱིས་མཐོང་ན་དགའ་བ་དེའང༌། བཅོམ་ལྡན་འདས་དེའི་གསུང་རབ་ལ་དཀའ་བ་བྱེད་པ་ལ་བརྩོན་པར་གྱུར་ཏེ། དེ་ལོ་ཁྲི་ཉིས་སྟོང་དུ་འཆག་པ་ལ་ཞུགས་ཤིང་བརྩོན་འགྲུས་ ཆེན་པོ་བརྩམས་པས་རྣལ་འབྱོར་ལ་བརྩོན་པར་གྱུར་ཏོ། །དེ་ལོ་ཁྲི་ཉིས་སྟོང་འདས་ནས་གཟུགས་ཐམས་ཅད་ཡང་དག་པར་སྟོན་པ་ཞེས་བྱ་བའི་ཏིང་ངེ་འཛིན་ཐོབ་སྟེ། ཏིང་ངེ་ འཛིན་དེ་ཐོབ་མ་ཐག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་ཚིམ་ཞིང་མགུ་སྟེ་ཡི་རངས་ནས་རབ་ཏུ་དགའ་ཞིང་དགའ་ བ་དང་ཡིད་བདེ་བ་སྐྱེས་ནས། དེའི་ཚེ་འདི་སྙམ་དུ་སེམས་ཏེ། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ལ་བརྟེན་ནས་གཟུངས་ཐམས་ཅད་ཡང་དག་པར་སྟོན་པ་ཞེས་ ༄༅། །བྱ་བའི་ཏིང་ངེ་འཛིན་བདག་གིས་ཐོབ་བོ་སྙམ་མོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་ དགའ་བ་དེའང་འདི་སྙམ་དུ་སེམས་ཏེ། འདི་ལྟར་བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་དང༌། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་མཆོད་པར་བྱའོ་སྙམ་ནས། དེའི་ཚེ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་སེམས་དཔའ་སེམས་ དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ། དེའི་མོད་ལ་སྟེང་གི་བར་སྣང་ལས་མེ་ཏོག་མནྡཱ་ར་དང་མནྡཱ་ ར་ཆེན་པོའི་ལྷའི་མེ་ཏོག་གི་ཆར་ཆེན་པོ་མངོན་པར་བབ་བོ། །དུས་ཀྱི་རྗེས་སུ་འབྲང་བའི་ཙནྡན་གྱི་སྤྲིན་ཅེས་ཏེ། ཙནྡན་སྤྲུལ་གྱི་སྙིང་པོའི་ཆར་ཆེན་པོ་མངོན་པར་བབ་སྟེ། སྐར་ མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་དེ་ལྟ་བུའི་སྤོས་ཀྱི་རྣམ་པ་ཞོ་གཉིས་ཀྱི་རིན་དུ་འཇིག་རྟེན་གྱི་ཁམས་མི་མཇེད་འདིས་མི་ཆོག་གོ །སྐར་མའི་རྒྱལ་པོ་མེ་ཏོག་ ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དྲན་པ་དང་ལྡན་ཞིང་ཤེས་བཞིན་དུ་ཏིང་ངེ་ འཛིན་དེ་ལས་ལངས་སོ། །ལངས་ནས་འདི་སྙམ་དུ་སེམས་ཏེ། ཇི་ལྟར་ལུས་ཡོངས་སུ་བཏང་བ་ལྟར་ནི་རྫུ་འཕྲུལ་གྱི་ཆོ་འཕྲུལ་དག་གིས། བཅོམ་ལྡན་འདས་ལ་མཆོད་པ་བྱས་པ་མ་ཡིན་ ནོ་སྙམ་མོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེ་ དེའི་ཚེ། ཨ་ག་རུ་དང༌། དུ་རུ་ཀ་དང༌། པོག་གི་ཁུ་བ་ཟ་ཞིང་ཙམྤ་ཀའི་མར་ཡང་འཐུང་ངོ༌། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། རྣམ་གྲངས་འདིས་བྱང་ཆུབ་ སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་རྟག་ཏུ་སྤོས་ཟ་ཞིང་ཙམྤ་ཀའི་མར་འཐུང་བས་ལོ་བཅུ་གཉིས་འདས་པར་གྱུར་ཏོ། །སྐར་མའི་རྒྱལ་ དཔོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ལོ་བཅུ་གཉིས་པོ་དེ་འདས་ནས་ རང་གི་ལུས་ལྷའི་རས་ཀྱིས་ཀུན་ཏུ་དཀྲིས་ནས་འབྲུ་མར་གྱིས་ཞེན་པར་བྱས་ཏེ་བདག་གི་བྱིན་གྱི་རླབས་བྱས་སོ། །བདག་གིས་བྱིན་གྱི་རླབས་བྱས་ནས། དེ་བཞིན་གཤེགས་པ་ དང༌། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་མཆོད་པའི་ལས་ཀྱི་ཕྱིར་བདག་གི་ལུས་ལ་མེ་འབར་བར་བྱས་སོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་ ༄༅། །པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་ལུས་ཀྱི་མར་མེ་འབར་བ་ དེའི་འོད་ཀྱིས་འཇིག་རྟེན་གྱི་ཁམས་གངྒཱའི་ཀླུང་བརྒྱད་ཅུའི་བྱེ་མ་སྙེད་ཁྱབ་པར་གྱུར་ཏེ། འཇིག་རྟེན་གྱི་ཁམས་དེ་དག་གི་སངས་རྒྱས་བཅོམ་ལྡན་འདས་གངྒཱའི་ཀླུང་བརྒྱད་ཅུའི་ བྱེ་མ་སྙེད་ཐམས་ཅད་ཀྱིས་ལེགས་སོ་ཞེས་བྱ་བ་བྱིན་ཏེ། ལེགས་སོ། །ལེགས་སོ། །རིགས་ཀྱི་བུ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བརྩོན་འགྲུས་ རྩོམ་པ་ཡང་དག་པའོ། །འདི་ནི་དེ་བཞིན་གཤེགས་པ་ལ་མཆོད་པ་དང༌། ཆོས་ལ་མཆོད་པ་ཡང་དག་པ་སྟེ། མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌། བྱུག་ པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། ལྷའི་བ་དན་གྱིས་མཆོད་པ་དང༌། ཟང་ཟིང་གིས་མཆོད་པ་དང༌། ཙནྡན་སྦྲུལ[?] གྱི་སྙིང་པོས་མཆོད་པ་ནི་ དེ་ལྟ་མ་ཡིན་ནོ། །རིགས་ཀྱི་བུ། སྦྱིན་པ་འདི་ནི་མཆོག་སྟེ། རྒྱལ་སྲིད་ཡོངས་སུ་གཏོང་བའི་སྦྱིན་པ་ནི་དེ་ལྟ་མ་ཡིན་ནོ། །བུ་དང་ཆུང་མ་ཕངས་པ་ཡོངས་སུ་གཏོང་བའི་སྦྱིན་ པའང་དེ་ལྟ་མ་ཡིན་ནོ། །རིགས་ཀྱི་བུ། གང་བདག་གིས་ལུས་གཏོང་བའི་ཆོས་ཀྱི་མཆོད་པ་འདི་ནི་མཆོད་པ་ཁྱད་པར་ཅན་ནོ། །དམ་པའོ། །མཆོག་གོ །ཕུལ་ལོ། །གྱ་ནོམ་ པའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། སངས་རྒྱས་བཅོམ་ལྡན་འདས་དེ་དག་གིས་ཚིག་དེ་སྐད་ཅེས་གསུངས་ནས་དེ་ནས་ཅང་མི་གསུང་བར་གྱུར་ཏོ། །སྐར་ མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་ལུས་ལ་འབར་བ་ལོ་བཅུ་གཉིས་ ཀྱི་བར་དུ་ཞི་བར་མ་སོང་ངོ༌། །དེ་ཕྱིས་ལོ་བཅུ་གཉིས་འདས་ནས་ཞི་བར་གྱུར་ཏེ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པར་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་ པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས་དེ་བཞིན་གཤེགས་པ་ལ་འདི་ལྟ་བུའི་མཆོད་པ་དང༌། ཆོས་ཀྱི་མཆོད་པ་བྱས་ཏེ། དེ་ནས་ཤི་འཕོས་ནས་བཅོམ་ལྡན་འདས་ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་གྱི་གསུང་རབ་ལ་རྒྱལ་པོ་དྲི་མ་མེད་པས་བྱིན་པའི་ཁྱིམ་དུ་སྐྱེས་ཏེ་སྐྱིལ་མོ་ ཀྲུང་བཅས་བཞིན་དུ་པང་པར་བརྫུས་ཏེ་བྱུང་བར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་སྐྱེས་མ་ཐག་ཏུ། དེའི་ཚེ་ རང་གི་ཕ་མ་ལ་ཚིགས་སུ་བཅད་དེ་སྨྲས་པ། རྒྱལ་མཆོག་འདི་ན་བདག་འཆག་ཅིང༌། །དེར་གནས་བདག་གིས་ཏིང་འཛིན་ཐོབ། །བདག་གིས་ལུས་ཕངས་ཡོངས་བཏང་སྟེ། །བརྩོན་ ༄༅། །འགྲུས་སྲ་བརྩམས་བརྟུལ་ཞུགས་ཆེ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་ པོ་སེམས་ཅན་ཐམས་ཅད་ཀྱིས་མཐོང་ན་དགའ་བས་ཚིགས་སུ་བཅད་པ་དེ་སྨྲས་ནས། རང་གི་ཕ་མ་ལ་འདི་སྐད་ཅེས། ཡབ་ཡུམ། བཅོམ་ལྡན་འདས་གང་ལ་བདག་གིས་ མཆོད་ནས། སྒྲ་ཐམས་ཅད་ལ་མཁས་པའི་གཟུངས་ཐོབ་ཅིང༌། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདིའང་ཚིགས་སུ་བཅད་པ་བྱེ་བ་ཁྲག་ཁྲིག་བརྒྱ་སྟོང་ གཏམས་པ་དང༌། དཀྲིགས་པ་དང༌། མི་འཁྲུགས་པ་བྱེ་བ་ཕྲག་བརྒྱད་ཅུས། བཅོམ་ལྡན་འདས་དེ་ལས་ཐོས་པར་གྱུར་པའི་བཅོམ་ལྡན་འདས་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་དེ་ད་ལྟར་ཡང་བཞུགས་ཏེ་འཚོ་གཞེས་ཀྱི། ཡབ་ཡུམ། བདག་བཅོམ་ལྡན་འདས་དེའི་ དྲུང་དུ་མཆིས་ན་ལེགས་སོ། །དེར་མཆིས་ནས་ཡང་བཅོམ་ལྡན་འདས་དེ་ལ་མཆོད་པ་བགྱིའོ་ཞེས་སྨྲས་སོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེའི་ཚེ། ནམ་མཁའ་ལ་ཤིང་ཏ་ལ་བདུན་ཙམ་དུ་མངོན་པར་འཕགས་ ཏེ། རིན་པོ་ཆེ་སྣ་བདུན་གྱི་ཁང་བ་བརྩེགས་པར་སྐྱིལ་མོ་ཀྲུང་བཅས་ནས་བཅོམ་ལྡན་འདས་དེའི་དྲུང་དུ་སོང་སྟེ་ཕྱིན་པ་དང༌། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ ཏེ། བཅོམ་ལྡན་འདས་དེ་ལ་ལན་བདུན་བསྐོར་བ་བྱས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཕྱག་བཙལ་ཏེ་ཚིགས་སུ་ བཅད་པ་འདིས་མངོན་པར་བསྟོད་དོ། །དཔའ་བོ་མི་དབང་ཤིན་ཏུ་དྲི་མེད་ཞལ། །ཕྱོགས་བཅུ་འདིར་ནི་ཁྱོད་ཀྱིས་འོད་ཟེར་མཛེས། །བདེ་གཤེགས་ཁྱོད་ལ་བདག་གིས་མཆོད་ མཆོག་བགྱིས། །མགོན་པོ་ལྟ་བའི་སླད་དུ་བདག་འདིར་མཆིས། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེའི་ཚེ་བྱང་ཆུབ་སེམས་དཔའ་སེམས་དཔའ་ ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བས་ཚིགས་སུ་བཅད་པ་འདི་སྨྲས་ནས། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཁྱོད་ད་དུང་བཞུགས་སམ། སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ ཤེས་པ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་གྱིས། བྱང་ཆུབ་སེམས་དཔའ་སེམས་ ༄༅། །དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ང་ཡོངས་སུ་མྱ་ངན་ལས་འདའ་བའི་ དུས་ལ་བབ་སྟེ། རིགས་ཀྱི་བུ། ང་ཚེ་ཟད་པའི་དུས་ལ་བབ་ཀྱི། རིགས་ཀྱི་བུ་ཁྱོད་སོང་ལ། ངའི་ཁྲི་ཤོམས་ཤིག་དང༌། ང་ཡོངས་སུ་མྱ་ངན་ལས་འདའོ། །སྐར་མའི་རྒྱལ་པོ་མེ་ཏོག་ ཀུན་ཏུ་རྒྱས་པ་མངོན་པར་ཤེས་པ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། བསྟན་པ་འདི་ངས་ཁྱོད་ལ་ཡོངས་ སུ་གཏད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་དང༌། ཉན་ཐོས་ཆེན་པོ་འདི་དག་དང༌། སངས་རྒྱས་ཀྱི་བྱང་ཆུབ་འདི་དག་དང༌། འཇིག་རྟེན་གྱི་ཁམས་ འདི་དག་དང༌། རིན་པོ་ཆེའི་མཁའ་རྟེན་འདི་དག་དང༌། རིན་པོ་ཆེའི་ཤིང་ལྗོན་པ་འདི་དག་དང༌། ངའི་བསྙེན་བཀུར་བྱེད་པའི་ལྷའི་བུ་འདི་རྣམས་ཀྱང་ཡོངས་སུ་གཏད་དོ། ། རིགས་ཀྱི་བུ། ང་ཡོངས་སུ་མྱ་ངན་ལས་འདས་པའི་རིང་བསྲེལ་གང་ཡིན་པ་དེ་དག་ཀྱང་ཡོངས་སུ་གཏད་དོ། །རིགས་ཀྱི་བུ། ངའི་རིང་བསྲེལ་ལ་ཁྱོད་ཀྱིས་ཀྱང་མཆོད་པ་རྒྱ་ཆེར་ གྱིས་ཤིག །རིང་བསྲེལ་དེ་དག་ཀྱང་རྒྱས་པར་གྱིས་ཤིག །མཆོད་རྟེན་སྟོང་ཕྲག་མང་པོ་གྱིས་ཤིག །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བཅོམ་ལྡན་ འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་དྲི་མ་མེད་པའི་འོད་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ ཅན་ཐམས་ཅད་ཀྱིས་མཐོང་ན་དགའ་བ་དེ་ལ་དེ་ལྟར་རྗེས་སུ་བསྟན་ནས་དེའི་ནུབ་མོ་ནམ་གྱི་ཆ་སྨད་ལ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་ འདས་སོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བས། བཅོམ་ལྡན་འདས་དེ་བཞིན་གཤེགས་པ་ཉི་ཟླ་དྲི་མ་མེད་པའི་འོད་དཔལ་དེ་ཡོངས་སུ་མྱ་ངན་ལས་འདས་པར་རིག་སྟེ། ཙནྡན་སྦྲུལ་གྱི་སྙིང་པོ་སྤུངས་ནས་དེ་བཞིན་གཤེགས་ པའི་སྐུ་བསྲེགས་ཏེ། དེ་བཞིན་གཤེགས་པའི་སྐུ་ཚིག་པ་ཞི་བར་རིག་ནས་རིང་བསྲེལ་བསྡུས་ཏེ་ངུ་ཞིང་ཆོ་ངེས་བཏབ་ནས་སྨྲེ་སྔགས་འདོན་ཏོ། །སྐར་མའི་རྒྱལ་པོ་མེ་ཏོག་ཀུན་ ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དུས་ཏེ་ཆོ་ངེས་བཏབ་ནས་སྨྲེ་སྔགས་འདོན་ཏེ། ༄༅། །རིན་པོ་ཆེ་སྣ་བདུན་གྱི་བུམ་པ་བརྒྱད་ཁྲི་བཞི་སྟོང་བྱེད་དུ་བཅུག་ནས། དེ་དག་གི་ནང་དུ་དེ་བཞིན་གཤེགས་པའི་རིང་བསྲེལ་བཅུག་སྟེ། རིན་པོ་ཆེ་སྣ་ བདུན་གྱི་མཆོད་རྟེན་འཕང་དུ་ཚངས་པའི་འཇིག་རྟེན་ལ་ཐུག་པ་གདུགས་ཀྱི་ཕྲེང་བས་ལེགས་པར་བརྒྱན་པ། དར་དང་དྲིལ་བུ་ལེགས་པར་དབྱངས་པ་བརྒྱད་ཁྲི་བཞི་སྟོང་བྱས་ ཏེ༑ དེས་མཆོད་རྟེན་དེ་དག་བྱས་ནས་འདི་སྙམ་དུ་བསམས་ཏེ། བདག་གིས་བཅོམ་ལྡན་འདས་ཉི་ཟླ་དྲི་མ་མེད་པའི་འོད་དཔལ། དེ་བཞིན་གཤེགས་པའི་སྐུ་གདུང་ལ་མཆོད་ པ་ནི་བྱས་ན་དེ་བས་ཀྱང་ལྷག་པ་ཆེས་ཁྱད་པར་དུ་འཕགས་པ་དེ་བཞིན་གཤེགས་པའི་རིང་བསྲེལ་ལ་མཆོད་པ་བྱའོ་སྙམ་མོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས་ཐམས་ཅད་དང་ལྡན་པའི་བྱང་ཆུབ་སེམས་ དཔའི་ཚོགས་དེ་དང༌། ཉན་ཐོས་ཆེན་པོ་དེ་དག་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ ཆེན་པོ་དང༌། མི་དང་མི་མ་ཡིན་པའི་ཚོགས་དེ་དག་ལ་སྨྲས་པ། རིགས་ཀྱི་བུ་དག །ཁྱེད་ཐམས་ཅད་ཀྱིས་བཅོམ་ལྡན་འདས་དེའི་རིང་བསྲེལ་རྣམས་ལ་མཆོད་པ་བྱ་བར་ སོམས་ཤིག །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། དེའི་ཚེ་དེ་བཞིན་གཤེགས་པའི་མཆོད་རྟེན་བརྒྱད་ཁྲི་བཞི་སྟོང་གི་མདུན་དུ། རང་གི་ལག་པ་བསོད་ནམས་བརྒྱས་བརྒྱན་པ་འབར་བར་བྱས་ཏེ། འབར་བར་བྱས་བས་ལོ་བདུན་ཁྲི་ ཉིས་སྟོང་གི་བར་དུ་དེ་བཞིན་གཤེགས་པའི་མཆོད་རྟེན་དེ་དག་ལ་མཆོད་པ་བྱས་སོ། །དེས་མཆོད་པ་དེ་བྱས་པས་འཁོར་དེ་ལས་ཉན་ཐོས་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་ བཏུལ་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ཀྱང་གཟུགས་ཐམས་ཅད་ཡང་དག་པར་སྟོན་པའི་ཏིང་ངེ་འཛིན་ཐོབ་པར་གྱུར་ཏོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་ པ་མངོན་པར་ཤེས་པ། དེ་ནས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་དང༌། ཉན་ཐོས་ཆེན་པོ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ ཐམས་ཅད་ཀྱིས་མཐོང་ན་དགའ་བ་དེ་ཡན་ལག་མ་ཚང་བར་མཐོང་ནས་དུས་ཏེ་ཆོ་ངེས་བཏབ་ནས་སྨྲེ་སྔགས་འདོན་ཅིང་གཅིག་ལ་གཅིག་འདི་སྐད་སྨྲས་ཏེ། བདག་ཅག་གི་སློབ་དཔོན་ རྗེས་སུ་སྟོན་པ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་འདི་ད་ལྟར་ཡན་ལག་མ་ཚང་ཞིང་ལག་པ་མེད་པར་གྱུར་ཏོ་ཞེས་ཟེར་རོ། ། ༄༅། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ ན་དགའ་བ་དེས། བྱང་ཆུབ་སེམས་དཔའ་སེམས་ཆེན་པོ་དེ་དག་དང༌། ཉན་ཐོས་དེ་དག་དང༌། ལྷའི་བུ་དེ་དག་ལ་སྨྲས་པ། རིགས་ཀྱི་བུ་དག །ཁོ་བོའི་ཡན་ལག་ཉམས་པར་ མཐོང་བས་མ་ངུ་ཞིག །ཆོ་ངེས་མ་འདེབས་ཤིག །སྨྲེ་སྔགས་མ་འདོན་ཅིག །རིགས་ཀྱི་བུ་དག །ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན། སངས་ རྒྱས་བཅོམ་ལྡན་འདས་གང་དག་བཞུགས་ཤིང་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཁོ་བོས་དཔང་དུ་བཞག་སྟེ། དེ་དག་གི་སྤྱན་སྔར་བདེན་ པའི་བྱིན་གྱིས་བརླབས་སོ། །བདེན་པ་དང་བདེན་པའི་ཚིག་གང་གིས་བདག་གི་ལག་པ་དེ་བཞིན་གཤེགས་པ་ལ་མཆོད་པའི་ཕྱིར་ཡོངས་སུ་བཏང་བས། བདག་གི་ལུས་ གསེར་གྱི་ཁ་དོག་ཏུ་འགྱུར་བའི་བདེན་པ་དང་བདེན་པའི་ཚིག་དེས། བདག་གི་ལག་པ་འདི་སྔོན་གྱི་བཞིན་དུ་གྱུར་ཅིག །ས་ཆེན་པོ་འདི་ལན་དྲུག་ཏུ་གཡོས་པར་གྱུར་ཅིག །བར་ སྣང་ལ་གནས་པའི་ལྷའི་བུ་རྣམས་ཀྱིས་མེ་ཏོག་གི་ཆར་ཆེན་པོ་ཕོབ་ཅིག་ཅེས་བྱས་སོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ནས་བྱང་ཆུབ་སེམས་ དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། བདེན་པའི་བྱིན་གྱི་རླབས་དེ་བྱས་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ འདི་རྣམ་པ་དྲུག་ཏུ་གཡོས་སོ། །སྟེང་གི་བར་སྣང་ལས་ཀྱང་མེ་ཏོག་གི་ཆར་ཆེན་པོ་མངོན་པར་བབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་ མཐོང་ན་དགའ་བ་དེའི་ལག་པ་དེའང༌། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཉིད་ཀྱི་བསོད་ནམས་ཀྱི་སྟོབས་བསྐྱེད་པ་དང༌། ཡེ་ཤེས་ཀྱི་སྟོབས་བསྐྱེད་པ་ དེས་སྔོན་གྱི་བཞིན་དུ་གྱུར་ཏོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེའི་ཚེ་དེའི་དུས་ན་བྱང་ཆུབ་སེམས་དཔའ་སེམས་དཔའ་ཆེ་པོ་སེམས་ཅན་ཐམས་ ཅད་ཀྱིས་མཐོང་ན་དགའ་བ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སོམ་ཉི་འམ། ཡིད་གཉིས་སམ། ཐེ་ཚོམ་ཟ་བར་གྱུར་ན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ མངོན་པར་ཤེས་པ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་ སྨན་གྱི་རྒྱལ་པོ་འདི་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་གྱུར་ཏོ། །སྐར་མའི་རྒྱལ་ ༄༅། །པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་བྱ་དཀའ་བ་བྱེ་བ་ཁྲག་ཁྲིག་བརྒྱ་སྟོང་དེ་ སྙེད་བྱེད་དོ། །ལུས་ཡོངས་སུ་གཏོང་བའང་བྱེད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའ་ཐེག་ པ་ལ་ཡང་དག་པར་ཞུགས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་འདོད་པས། དེ་བཞིན་གཤེགས་པའི་མཆོད་རྟེན་དེ་དག་ལ་རྐང་པའི་མཐེ་བོ་འབར་ བར་བྱའོ། །ལག་པའི་སོར་མོའམ། རྐང་པའི་སོར་མོ་གཅིག་གམ། ཡན་ལག་གཅིག་གམ། ལག་པ་འབར་བར་བྱའོ། །བྱང་ཆུབ་སེམས་དཔའི་ཐེག་པ་ལ་ཞུགས་ པའི་རིགས་ཀྱི་བུའམ་རིགས་ཀྱི་བུ་མོ་དེ་ནི་བསོད་ནམས་མངོན་པར་འདུ་བྱེད་པ་ཆེས་མང་དུ་སྐྱེད་དོ། །རྒྱལ་སྲིད་ཡོང་སྶུ་བཏང་བས་ནི་དེ་ལྟ་མ་ཡིན་ནོ། །ཆུང་མ་དང༌། བུ་ ཕོ་དང༌། བུ་མོ་ཕངས་པ་ཡོངས་སུ་བཏང་བས་ནི་དེ་ལྟ་མ་ཡིན་ནོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ནགས་ཚལ་དང་བཅས་པ། རྒྱ་མཚོ་དང་བཅས་པ། རི་ དང་བཅས་པ། འབབ་ཆུའི་དོང་དང༌། མཚོ་དང༌། མཆེའུ་དང༌། ཁྲོན་པ་དང༌། ཁྲོན་པ་དང༌། ཀུན་དགའི་ར་བ་དང་བཅས་པ་ཡོངས་སུ་བཏང་བས་ནི་དེ་ལྟ་མ་ཡིན་ནོ། །སྐར་མའི་རྒྱལ་པོ་ མེ་ཏོག་ཀུན་ཏུ་རྒྱས་པ་མངོན་པར་ཤེས་པ། རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་གང་གིས་སྟོང་གསུམ་གྱི་སྟོང་ཆེན་པོའི་འཇིག་ རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སངས་རྒྱས་དང༌། བྱང་ཆུབ་སེམས་དཔའ་དང༌། ཉན་ཐོས་དང༌། རང་སངས་རྒྱས་ཐམས་ཅད་ལ་སྦྱིན་པ་བྱིན་ན། སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། རིགས་ཀྱི་བུའམ། རིགས་ཀྱི་བུ་མོ་དེ་ནི་རིགས་ཀྱི་བུའམ་རིགས་ཀྱི་བུ་མོ་གང་གིས། དམ་པའི་ཆོས་པདྨ་དཀར་པོའི་ཆོས་ ཀྱི་རྣམ་གྲངས་འདི་ལས། ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་འཛིན་པ་དེ་བསོད་ནམས་ཇི་སྙེད་ཅིག་སྐྱེད་པ་དེ་སྙེད་དུ་མི་སྐྱེད་དེ། དེའི་བསོད་ནམས་མངོན་པར་ འདུ་བྱེད་པ་འདི་ནི་དེ་བས་ཆེས་མང་བར་བཤད་ཀྱི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སངས་རྒྱས་དང༌། བྱང་ ཆུབ་སེམས་དཔའ་དང༌། ཉན་ཐོས་དང༌། རང་སངས་རྒྱས་ཐམས་ཅད་ལ་སྦྱིན་པ་བྱིན་པ་ནི་དེ་ལྟ་མ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་ སྟེ༑ དཔེར་ན། འབབ་ཆུའི་དོང་དང་མཚོ་དང་མཚེའུ་ཐམས་ཅད་ཀྱི་ནང་ན་རྒྱ་མཚོ་ནི་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་ ༄༅། །དུ་དེ་བཞི་གཤེགས་པ་ཐམས་ཅད་ཀྱིས་བཤད་པའི་མདོ་སྡེ་ཐམས་ཅད་ཀྱི་ནང་ན་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་མཆོག་ཏུ་གྱུར་ པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ། དཔེར་ན། རི་ནག་པོ་དང་ཁོར་ཡུག་དང་ཁོར་ཡུག་ཆེན་པོ་ཐམས་ཅད་ཀྱི་ནང་ན་རི་རབ་ནི་ རིའི་རྒྱལ་པོ་སྟེ། མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དེ་བཞིན་གཤེགས་པས་གསུངས་པའི་མདོ་སྡེ་ཐམས་ ཅད་ཀྱི་ནང་ན། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་རྒྱལ་པོ་སྟེ། མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ ལྟ་སྟེ༑ དཔེར་ན། སྐར་མ་ཐམས་ཅད་ཀྱི་ནང་ན་ཟླ་བ་ནི་འོད་བྱེད་པའི་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དེ་ བཞིན་གཤེགས་པས་གསུངས་པའི་མདོ་སྡེ་ཐམས་ཅད་ཀྱི་ནང་ན། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ནི་ཟླ་བ་བྱེ་བ་ཁྲག་ཁྲིག་བརྒྱ་སྟོང་བས་ལྷག་པར་འོད་ བྱེད་པའི་མཆོག་ཏུ་གྱུར་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ། དཔེར་ན། ཉི་མའི་དཀྱིལ་འཁོར་ནི་མུན་པ་མུ་གནག་ཐམས་ཅད་ སེལ་བར་བྱེད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདིའང་མི་དགེ་བའི་མུན་པ་མུན་གནག་ ཐམས་ཅད་སེལ་བར་བྱེད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ། དཔེར་ན། སུམ་ཅུ་རྩ་གསུམ་པའི་ལྷ་རྣམས་ཀྱི་ནང་ན་བརྒྱ་བྱིན་ནི་ལྷ་རྣམས་ཀྱི་ དབང་པོ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདིའང་དེ་བཞིན་གཤེགས་པས་གསུངས་ པའི་མདོ་སྡེ་ཐམས་ཅད་ཀྱི་ནང་ན་དབང་པོ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ། དཔེར་ན། མི་མཇད་ཀྱི་བདག་པོ་ཚངས་པ་ནི་ཚངས་ རིས་ཀྱི་ལྷ་ཐམས་ཅད་ཀྱི་རྒྱལ་པོ་སྟེ། ཚངས་པའི་འཇིག་རྟེན་ན་ཕའི་བྱ་བ་བྱེད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པདྨ་དཀར་ པོའི་ཆོས་ཀྱི་རྣམ་གྲངས་འདིའང་སེམས་ཅན་སློབ་པ་དང༌། མི་སློབ་པ་ཐམས་ཅད་དང༌། ཉན་ཐོས་དང༌། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་ཐམས་ཅད་ ལ་ཕའི་བྱ་བ་བྱེད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ། དཔེར་ན། རྒྱུན་དུ་ཞུགས་པ་དང༌། ལན་གཅིག་ཕྱིར་འོང་བ་དང༌། ཕྱིར་མི་འོང་བ་ ༄༅། །དང༑ དགྲ་བཅོམ་པ་དང༌། རང་སངས་རྒྱས་རྣམས་ནི་བྱིས་པ་སོ་སོའི་སྐྱེ་བོ་ཐམས་ཅད་ལས་འདས་པའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་ པར་ཤེས་པ། དེ་བཞིན་དུ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདིའང་དེ་བཞིན་གཤེགས་པས་གསུངས་པའི་མདོ་སྡེ་ཐམས་ཅད་ལས་འདས་ཤིང་མངོན་ པར་འཕགས་ཏེ་མཆོག་ཏུ་གྱུར་པར་རིག་པར་བྱའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། གང་དག་མདོ་སྡེའི་རྒྱལ་པོ་འདི་འཛིན་པ་དེ་དག་ཀྱང་ སེམས་ཅན་ཐམས་ཅད་ཀྱི་གཙོ་བོར་གྱུར་པར་རིག་པར་བྱའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། འདི་ལྟ་སྟེ། དཔེར་ན། ཉན་ཐོས་དང་རང་ སངས་རྒྱས་ཐམས་ཅད་ཀྱི་ནང་ན་བྱང་ཆུབ་སེམས་དཔའ་ནི་མཆོག་ཅེས་བྱའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་ པདྨ་དཀར་པོའི་ཆོས་ཀྱི་རྣམ་གྲངས་འདིའང་དེ་བཞིན་གཤེགས་པས་གསུངས་པའི་མདོ་སྡེ་ཐམས་ཅད་ཀྱི་ནང་ན་མཆོག་ཅེས་བྱའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ མངོན་པར་ཤེས་པ། འདི་ལྟ་སྟེ། དཔེར་ན། ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ཀྱི་ནང་ན་དེ་བཞིན་གཤེགས་པ་ནི་ཆོས་ཀྱི་རྒྱལ་པོར་ ཐབས་གསོལ་པ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདིའང་བྱང་ཆུབ་སེམས་ དཔའི་ཐེག་པ་ལ་ཡང་དག་པར་ཞུགས་པ་རྣམས་ལ་དེ་བཞིན་གཤེགས་པ་དང་འདྲ་བ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དམ་པའི་ཆོས་པདྨ་དཀར་ པོའི་ཆོས་ཀྱི་རྣམ་གྲངས་འདི་ནི་སེམས་ཅན་ཐམས་ཅད་འཇིགས་པ་ཐམས་ཅད་ལས་སྐྱོབ་པ། སྡུག་བསྔལ་ཐམས་ཅད་ལས་ཐར་བར་བྱེད་པ་སྟེ། སྐོམ་པ་རྣམས་ལ་མཚེའུ་དང་འདྲའོ། །གྲང་བས་ ཉེན་པ་རྣམས་ལ་མེ་དང་འདྲའོ། །གཅེར་བུ་རྣམས་ལ་གོས་དང་འདྲའོ། །ཚོང་པ་རྣམས་ལ་དེད་དཔོན་དང་འདྲའོ། །བུ་རྣམས་ལ་མ་དང་འདྲའོ། །ཕ་རོལ་ཏུ་འགྲོ་བ་རྣམས་ལ་གྲུ་ དང་འདྲའོ། །ནད་པ་རྣམས་ལ་སྨན་པ་དང་འདྲའོ། །མུན་པ་མུན་གནག་གིས་བསྒྲིབས་པ་རྣམས་ལ་མར་མེ་དང་འདྲའོ། །ནོར་འདོད་པ་རྣམས་ལ་རིན་པོ་ཆེ་དང་འདྲའོ། །ཁམས་ཀྱི་ རྒྱལ་པོ་ཐམས་ཅད་ལ་འཁོར་ལོ་སྒྱུར་བ་དང་འདྲའོ། །འབབ་ཆུ་རྣམས་ལ་རྒྱ་མཚོ་དང་འདྲའོ། །མུན་པ་མུན་གནག་ཐམས་ཅད་སེལ་བའི་ཕྱིར་སྒྲོན་མ་དང་འདྲའོ། །སྐར་མའི་རྒྱལ་ པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་བཞིན་དུ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདིའང་སྡུག་བསྔལ་ཐམས་ཅད་ལས་རབ་ཏུ་ཐར་བར་བྱེད་པའོ། །ནད་ ༄༅། །ཐམས་ཅད་གཅོད་པའོ། །འཁོར་བའི་བཅིང་བ་ཉམ་ང་བ་ཐམས་ཅད་ལས་རབ་ཏུ་ཐར་པར་བྱེད་པའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ ཤེས་པ། གང་གིས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ཐོས་པ་དང༌། གང་ཡི་གེར་འདྲི་བ་དང༌། གང་ཡི་གེར་འདྲིར་འཇུག་པ་དང༌། སྐར་མའི་རྒྱལ་པོ་མེ་ ཏོག་ཀུན་ཏུ་རྒྱས་པ་མངོན་པར་ཤེས་པ། གང་གིས་ཆོས་ཀྱི་རྣམ་གྲངས་འདི་གཟུང་ངམ། བསྟན་ཏམ། ཐོས་སམ། ཡི་གེར་བྲིས་སམ། ཡི་གེར་འདྲིར་འཇུག་གམ། གླེགས་ བམ་དུ་བྱས་ཏེ་བསྟི་སྟང་དུ་བྱེད་པ་དང༌། བཙུན་པར་བྱེད་པ་དང༌། བཀུར་སྟིར་བྱེད་པ་དང༌། མཆོད་པ་དང༌། མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌། བྱུག་ པ་དང༌། ཕྱེ་མ་དང༌། གོས་དང༌། གདུགས་དང༌། རྒྱལ་མཚན་དང༌། བ་དན་དང༌། རོལ་མོའི་སྒྲ་དང༌། ན་བཟའ་དང༌། ཐལ་མོ་སྦྱར་བའི་ལས་དང༌། མར་གྱི་མར་མེའམ། འབྲུ་མར་གྱི་མར་མེའམ། སྤོས་མར་གྱི་མར་མེའམ། ཙམ་པ་ཀའི་མར་གྱི་མར་མེའམ། སྣ་མ་དང༌། སྐྱ་ནར་དང༌། པར་ཤ་ཀ་དང༌། ན་བ་མ་ལི་ཀའི་མར་གྱི་མར་མེའམ། མཆོད་པ་རྣམ་པ་མང་པོ་དག་གིས་བསྟི་སྟང་དུ་བྱེད། བཙུན་པར་བྱེད། རིམ་གྲོར་བྱེད། མཆོད་པར་བྱེད་པའི་བསོད་ནམས་མངོན་པར་འདུ་བྱེད་པ་ཇི་སྙེད་ཅིག་འཕེལ་བར་ འགྱུར་བའི་བསོད་ནམས་མངོན་པར་འདུ་བྱེད་པ་དེ་དག་གི་མཐའ་ནི། སངས་རྒྱས་ཀྱི་ཡེ་ཤེས་ཀྱིས་ཀྱང་རྟོགས་པར་མི་ནུས་སོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ ཤེས་པ། གང་ཞིག་སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་འཛིན་པ་དང༌། སྟོན་པ་དང༌། ཉན་པའི་རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་ པར་ཞུགས་པ་དེ་བསོད་ནམས་མང་དུ་བསྐྱེད་པར་འགྱུར་རོ། །གལ་ཏེ་བུད་མེད་གཅིག་གིས་ཆོས་ཀྱི་རྣམ་གྲངས་འདི་ཐོས་ནས་འཛིན་ན། དེ་ཉིད་བུད་མེད་ཀྱི་ལུས་ཀྱི་ཐ་མར་འགྱུར་ རོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བུད་མེད་གང་ལ་ལས་སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་ལྔ་བརྒྱ་པ་ཐ་མ་ལ་ཐོས་ནས་ནན་ཏན་བྱེད་ པ་དེ། འདི་ནས་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། གང་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་ཚེ་དཔག་མེད་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་བཞུགས་ཏེ་འཚོ་ཞིང་གཞེས་པ་དེར། དེ་པདྨའི་སྙིང་པོའི་སེང་གེའི་ཁྲི་ལ་འདུག་བཞིན་དུ་སྐྱེ་ བར་འགྱུར་རོ། །དེ་འདོད་ཆགས་ཀྱིས་གཟིར་བར་མི་འགྱུར་ཏེ། ཞེ་སྡང་གིས་མ་ཡིན། གཏི་མུག་གིས་མ་ཡིན། ང་རྒྱལ་གྱིས་མ་ཡིན། སེར་སྣས་མ་ཡིན། ཁྲོ་བས་མ་ཡིན། གནོད་ ༄༅། །སེམས་ཀྱིས་མ་ཡིན་ཏེ། དེ་སྐྱེས་མ་ཐག་ཏུ་མངོན་པར་ཤེས་པ་ལྔ་ཐོབ་པར་འགྱུར་རོ། །མི་སྐྱེ་བའི་ཆོས་ལ་བཟོད་པའང་ཐོབ་པར་འགྱུར་རོ། །སྐར་མའི་རྒྱལ་པོ་ མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་དེས་མི་སྐྱེ་བའི་ཆོས་ལ་བཟོད་པ་ཐོབ་ནས། དེ་བཞིན་གཤེགས་པ་གངྒཱའི་ཀླུང་བདུན་ཅུ་ རྩ་གཉིས་ཀྱི་བྱེ་མ་སྙེད་མཐོང་བར་འགྱུར་རོ། །མིག་གི་དབང་པོ་ཡོངས་སུ་དག་པ་གང་གིས་སངས་རྒྱས་བཅོམ་ལྡན་འདས་དེ་དག་མཐོང་བར་འགྱུར་བ་དེ་འདྲ་བར་མིག་གི་དབང་པོ་ ཡོངས་སུ་དག་པར་འགྱུར་རོ། །སངས་རྒྱས་བཅོམ་ལྡན་འདས་དེ་དག་གིས་ཀྱང་དེ་ལ་ལེགས་སོ་ཞེས་བྱ་བ་སྦྱིན་པར་འགྱུར་ཏེ། གང་ཁྱོད་ཀྱིས་དམ་པའི་ཆོས་པདྨ་དཀར་པོའི་ཆོས་ཀྱི་ རྣམ་གྲངས་འདི་ཐོས་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེའི་གསུང་རབ་ལ་ལུང་མནོས་པ་དང༌། ཁ་ཏོན་ བྱས་པ་དང༌། བསྒོམས་པ་དང༌། བསམས་པ་དང༌། ཡིད་ལ་བྱས་པ་དང༌། སེམས་ཅན་གཞན་དག་ལའང་རབ་ཏུ་བསྟན་པ། རིགས་ཀྱི་བུ་ལེགས་སོ། །ལེགས་སོ། །རིགས་ཀྱི་ བུ་ཁྱོད་ཀྱི་བསོད་ནམས་མངོན་པར་འདུ་བྱེད་པ་འདི་ནི་མེས་ཚིག་པའམ་ཆུས་ཁྱེར་བར་མི་ནུས་སོ། །རིགས་ཀྱི་བུ་ཁྱོད་ཀྱི་བསོད་ནམས་མངོན་པར་འདུ་བྱེད་པ་འདི་ནི་སངས་རྒྱས་ བརྒྱ་སྟོང་གིས་ཀྱང་བཤད་པར་མི་ནུས་སོ། །རིགས་ཀྱི་བུ་ཁྱོད་ཀྱིས་བདུད་ཕྱིར་རྒོལ་བ་བཅོམ་མོ། །སྲིད་པའི་རྒྱ་མཚོ་ལས་བརྒལ་ཏོ། །དགྲའི་ཚེར་མ་དཀྲུགས་སོ། །སངས་རྒྱས་བརྒྱ་སྟོང་གིས་ བྱིན་གྱིས་བརླབས་སོ། །རིགས་ཀྱི་བུ། ལྷ་དང་བཅས་པའི་འཇིག་རྟེན་ན་ཁྱོད་འདྲ་བ་མེད་དོ། །དེ་བཞིན་གཤེགས་པ་གཅིག་པུ་མ་གཏོགས་པར་གཞན་ཉན་ཐོས་སམ་རང་སངས་རྒྱས་ སམ་བྱང་ཆུབ་སེམས་དཔའ་གང་གིས་ཀྱང༌། ཁྱོད་ལ་བསོད་ནམས་ཀྱིས་ཀྱང་རུང༌། ཡེ་ཤེས་ཀྱིས་ཀྱང་རུང༌། ཤེས་རབ་ཀྱིས་ཀྱང་རུང༌། ཏིང་ངེ་འཛིན་གྱིས་ཀྱང་རུང་སྟེ། ཟིལ་གྱིས་ གནོན་པར་མི་ནུས་སོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡེ་ཤེས་ཀྱི་སྟོབས་བསྐྱེད་པ་འདི་ལྟ་བུ་ཐོབ་པར་ འགྱུར་རོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། གང་ལ་ལས་སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་བཤད་པ་ཐོས་ནས། ལེགས་སོ། །ལེགས་སོ་ཞེས་ བྱ་བ་བྱིན་པ་དེའི་ཁ་ནས་ཨུཏྤ་ལའི་དྲི་འབྱུང་བར་འགྱུར། །དེའི་ལུས་ལས་ཀྱང་ཙནྡན་གྱི་དྲི་འབྱུང་བར་འགྱུར་རོ། །གང་གིས་ཆོས་ཀྱི་རྣམ་གྲངས་འདི་འཆད་པ་ན་ལེགས་སོ་ཞེས་བྱ་བ་ བྱིན་པ་དེའི་ཆོས་ཅན་གྱི་ཡོན་ཏན་གྱི་ཕན་ཡོན་དེ་དག་ནི། ངས་ད་ལྟར་གང་དག་བཤད་པ་དེ་འདྲ་བར་འགྱུར་རོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ལྟ་བས་ ༄༅། །ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱིས་མཐོང་ན་དགའ་བའི་སྔོན་གྱི་སྦྱོར་བའི་ལེའུ་འདི་ཅི་ནས། ཕྱི་མིའི་ཚེ་ཕྱི་མའི་ དུས་ལྔ་བརྒྱ་པ་ཐ་མ་ལ་ཛམྦུའི་གླིང་འདི་ན་སྤྱོད་ཅིང་ནུབ་པར་མི་འགྱུར་བ་དང༌། བདུད་སྡིག་ཅན་གྱིས་གླགས་མི་རྙེད་པ་དང༌། བདུད་ཀྱི་རིས་ཀྱི་ལྷ་དང༌། ཀླུ་དང༌། གནོད་སྦྱིན་ དང༌། དྲི་ཟ་དང༌། གྲུལ་བུམ་རྣམས་ཀྱིས་གླགས་མི་རྙེད་པར་བྱ་བའི་ཕྱིར་ངས་ཁྱོད་ལ་ཡོངས་སུ་གཏད་དོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། དེ་ ལྟ་བས་ན་ཆོས་ཀྱི་རྣམ་གྲངས་འདི་ཛམྦུའི་གླིང་འདིར་སེམས་ཅན་ནད་པ་ནད་ཀྱིས་བཏབ་པ་རྣམས་ལ་སྨན་ལྟ་བུར་འགྱུར་བར་བྱིན་གྱིས་བརླབས་པར་བྱས་ཏེ། ཆོས་ཀྱི་རྣམ་ གྲངས་འདི་ཐོས་ནས་ལུས་ལ་ནད་ཀྱི་མི་ཟུག་གོ །རྒ་བས་མ་ཡིན། དུས་མ་ཡིན་པར་འཆི་བས་མ་ཡིན་ནོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། གལ་ཏེ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་གང་ལ་ལས་མདོ་སྡེ་འདི་འཛིན་པའི་དགེ་སློང་དེ་ལྟ་བུ་དེ་མཐོང་ན། དེ་ལ་ཙནྡན་གྱི་ཕྱེ་མ་དང༌། ཨུཏྤ་ལ་སྔོན་ པོས་མངོན་པར་གཏོར་བར་བྱའོ། །མངོན་པར་གཏོར་ནས་ཀྱང་འདི་སྙམ་དུ་རིགས་ཀྱི་བུ་འདི་ནི་བྱང་ཆུབ་ཀྱི་སྙིང་པོར་འགྲོ་བར་འགྱུར། འདི་ནི་རྩྭ་ལེན་པར་འགྱུར། འདི་ནི་ བྱང་ཆུབ་ཀྱི་སྙིང་པོར་རྩྭ་འདིང་བར་འགྱུར། འདི་ནི་བདུད་ཀྱི་ཕྱོགས་ཕམ་པར་བྱེད་པར་འགྱུར། འདི་ནི་ཆོས་ཀྱི་དུང་འབུད་པར་འགྱུར། འདི་ནི་ཆོས་ཀྱི་རྔ་བརྡུང་བར་འགྱུར། འདི་ནི་འཁོར་བའི་རྒྱ་མཚོ་ལས་བརྒལ་བར་ འགྱུར་རོ་སྙམ་དུ་སེམས་བསྐྱེད་པར་བྱའོ། །སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ། རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ ཞུགས་པས། མདོ་སྡེ་འདི་ལྟ་བུ་འཛིན་པའི་དགེ་སློང་མཐོང་ནས་དེ་ལྟར་སེམས་བསྐྱེད་པར་བྱས་ཏེ། དེ་ལྟར་ན་དེའི་ཡོན་ཏན་དག་ནི་དེ་བཞིན་གཤེགས་པས་ཅི་འདྲ་བ་དག་བཤད་པ་ དེ་འདྲ་བ་དག་ཏུ་འགྱུར་རོ། །སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་འདི་བཤད་པ་ན། བྱང་ཆུབ་སེམས་དཔའ་བརྒྱད་ཁྲི་བཞི་སྟོང་གིས་སྒྲ་ཐམས་ཅད་ལ་མཁས་པ་དང་ལྡན་པའི་ གཟུངས་ཐོབ་པར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེས་ཀྱང༌། སྐར་མའི་རྒྱལ་པོ་མེ་ཏོག་ ཀུན་ཏུ་རྒྱས་པ་མངོན་པར་ཤེས་པ། དེ་ལྟར་ཁྱོད་ཀྱིས་དེ་བཞིན་གཤེགས་པ་ལ་བསམ་གྱིས་མི་ཁྱབ་པའི་ཡོན་ཏན་གྱི་ཆོས་དྲིས་པ་ལེགས་སོ། །ལེགས་སོ་ཞེས་བྱ་བ་བྱིན་ནོ། །དམ་ པའི་ཆོས་པདྨ་དཀར་པོ་ལས། སྨན་གྱི་རྒྱལ་པོའི་སྔོན་གྱི་སྦྱོར་བའི་ལེའུ་ཞེས་བྱ་སྟེ་ཉི་ཤུ་རྩ་གཉིས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ ༄༅། །པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེའི་ཚེ། སྐྱེས་བུ་ཆེན་པོའི་མཚན་སྨིན་མཚམས་ཀྱི་མཛོད་སྤུ་ནས་འོད་ཕྱུང་སྟེ། འོད་དེས་ཤར་ཕྱོགས་ སུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་བཅོ་བརྒྱད་ཀྱི་བྱེ་མ་སྙེད་དག་ཁྱབ་པར་བྱས་ཏེ། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་བཅོ་ བརྒྱད་ཀྱི་བྱེ་མ་སྙེད་དེ་དག་འདས་པ་དེ་ན་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་པདྨའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ། བྱང་ཆུབ་སེམས་དཔའི་དགེ་འདུན་རྒྱ་ཆེན་པོ་ ཚད་མེད་པས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ ཤཱཀྱ་ཐུབ་པ་དེས་མཛོད་སྤུ་ནས་འོད་གང་བཏང་བ་དེས། དེའི་ཚེ་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་དེ་སྣང་བ་ཆེན་པོས་ཁྱབ་པར་གྱུར་ཏོ། །འཇིག་ རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་དེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཞེས་བྱ་བ་དགེ་བའི་རྩ་བ་བསྐྱེད་པ། སྔོན་ཡང་ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མང་པོའི་འོད་ཟེར་དེ་ལྟ་བུ་མཐོང་ཞིང༌། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ ཀྱིས་ཏིང་ངེ་འཛིན་མང་པོ་ཐོབ་པ་འདི་ལྟ་སྟེ། རྒྱལ་མཚན་གྱི་རྩེ་མོའི་དཔུང་རྒྱན་གྱི་ཏིང་ངེ་འཛིན་ཐོབ། དམ་པའི་ཆོས་པདྨ་དཀར་པོའི་ཏིང་ངེ་འཛིན་ཐོབ། དྲི་མ་མེད་པས་བྱིན་པའི་ཏིང་ངེ་འཛིན་ཐོབ་ སྐར་མའི་རྒྱལ་པོ་རྣམ་པར་རོལ་བའི་ཏིང་ངེ་འཛིན་ཐོབ། རླུང་ལྟ་བུའི་ཏིང་ངེ་འཛིན་ཐོབ། ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་ཐོབ། ཟླ་བ་སྒྲོན་མའི་ཏིང་ངེ་འཛིན་ཐོབ། སྒྲ་ཐམས་ཅད་ ལ་མཁས་པའི་ཏིང་ངེ་འཛིན་ཐོབ། བསོད་ནམས་ཐམས་ཅད་ཀུན་ལས་བསྡུས་པའི་ཏིང་ངེ་འཛིན་ཐོབ། དད་པ་ཅན་གྱི་ཏིང་ངེ་འཛིན་ཐོབ། རྫུ་འཕྲུལ་གྱི་རྣམ་པར་རོལ་པའི་ཏིང་ ངེ་འཛིན་ཐོབ། ཡེ་ཤེས་ཏ་ལ་ལའི་ཏིང་ངེ་འཛིན་ཐོབ། བཀོད་པའི་རྒྱལ་པོའི་ཏིང་ངེ་འཛིན་ཐོབ། དྲི་མ་མེད་པའི་འོད་ཀྱི་ཏིང་ངེ་འཛིན་ཐོབ། དྲི་མ་མེད་པའི་སྙིང་པོའི་ཏིང་ངེ་འཛིན་ ཐོབ། ཟད་པར་ཆུབ་པའི་ཏིང་ངེ་འཛིན་ཐོབ། ཉི་མའི་འཁོར་བའི་ཏིང་ངེ་འཛིན་ཐོབ། དེ་བཞིན་དུ་སྦྱར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་ ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་ཕྲག་གངྒཱའི་ཀླུང་གི་བྱེ་མ་སྙེད་ཀྱི་བར་དུ་ཐོབ་པར་འདུག་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དེའི་ལུས་ ༄༅། །ལ་འོད་དེས་ཕོག་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་འདབ་མ་ དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་བལྟ་བ་དང༌། ཕྱག་བགྱི་བ་དང༌། བསྙེན་བཀུར་བགྱི་བ་ དང༑ འཇམ་དཔལ་གཞོན་ནུར་གྱུར་པ་དེའང་བལྟ་བ་དང༌། བྱང་ཆུབ་སེམས་དཔའ་སྨན་གྱི་རྒྱལ་པོ་དེའང་བལྟ་བ་དང༌། བྱང་ཆུབ་སེམས་དཔའ་རབ་ཏུ་སྦྱིན་པ་དེའང་བལྟ་བ་ དང༑ བྱང་ཆུབ་སེམས་དཔའ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་མངོན་པར་ཤེས་པ་དེའང་བལྟ་བ་དང༌། བྱང་ཆུབ་སེམས་དཔའ་སྤྱོད་པ་ཁྱད་པར་ཅན་དེའང་བལྟ་བ་ དང༑ བྱང་ཆུབ་སེམས་དཔའ་བཀོད་པའི་རྒྱལ་པོ་དེའང་བལྟ་བ་དང༌། བྱང་ཆུབ་སེམས་དཔའ་སྨན་ཡང་དག་འཕགས་དེའང་བལྟ་བའི་སླད་དུ། འཇིག་རྟེན་གྱི་ཁམས་མི་ མཇེད་དུ་མཆིའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ ཏོག་ཀུན་ཏུ་རྒྱས་པས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་འཇིག་རྟེན་གྱི་ཁམས་མི་མཇེད་ དེར་སོང་སྟེ་ཕྱིན་ནས་ངན་པའི་འདུ་ཤེས་བསྐྱེད་པར་མི་བྱའོ། །རིགས་ཀྱི་བུ། འཇིག་རྟེན་གྱི་ཁམས་མི་མཇེད་དེ་ནི་མཐོ་དམན་ཅན་དང༌། ས་ལས་གྲུབ་པ་དང༌། རི་ནག་པོས་གང་བ་དང༌། འཇིམ་ངན་གྱིས་ཡོངས་སུ་གང་བའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེའང་སྐུ་ཐུང་ངོ༌། །བྱང་ཆུབ་སེམས་ དཔའ་སེམས་དཔའ་ཆེན་པོ་དེ་དག་ཀྱང་ལུས་ཐུང་ངོ༌། །རིགས་ཀྱི་བུ་ཁྱོད་ཀྱི་ལུས་ཐོབ་པ་ནི་དཔག་ཚད་བཞི་ཁྲི་ཉིས་སྟོང་ངོ༌། །རིགས་ཀྱི་བུ། ངའི་ལུས་ནི་དཔག་ཚད་འབུམ་ཕྲག་དྲུག་ཅུ་ རྩ་བརྒྱད་ཡོད་དོ། །རིགས་ཀྱི་བུ་ཁྱོད་ནི་མཛེས་པ་བལྟ་ན་སྡུག་པ། གཟུགས་བཟང་བ། ཁ་དོག་བཟང་པོ་རྒྱས་པ་མཆོག་དང་ལྡན་པ། བསོད་ནམས་བརྒྱ་སྟོང་བས་ཤིན་ཏུ་ལྷག་ པའི་དཔལ་དང་ལྡན་པའོ། །རིགས་ཀྱི་བུ། དེ་ལྟ་བས་ན་འཇིག་རྟེན་གྱི་ཁམས་མི་མཇེད་དུ་ཕྱིན་ནས། དེ་བཞིན་གཤེགས་པ་དང༌། བྱང་ཆུབ་སེམས་དཔའ་རྣམས་དང༌། སངས་རྒྱས་ ཀྱི་ཞིང་དེ་ལ་ངན་པའི་འདུ་ཤེས་མ་སྐྱེད་ཅིག །དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་བཅོམ་ལྡན་འདས་དེ་བཞིན་ ༄༅། །གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ་ལ་འདི་སྐད་ཅེས་གསོལ་ ཏོ༑ ༑བཅོམ་ལྡན་འདས། བདག་ནི་དེ་བཞིན་གཤེགས་པའི་བྱིན་གྱི་རླབས་དང༌། དེ་བཞིན་གཤེགས་པའི་སྟོབས་བསྐྱེད་པ་དང༌། དེ་བཞིན་གཤེགས་པའི་རྣམ་པར་རོལ་པ་དང༌། དེ་བཞིན་གཤེགས་པའི་བཀོད་པ་དང༌། དེ་བཞིན་གཤེགས་པའི་མངོན་པར་འཕགས་པའི་ཡེ་ཤེས་ཀྱིས་འཇིག་རྟེན་གྱི་ཁམས་མི་མཇེད་དེར་མཆིའོ། །དེ་ནས་བྱང་ཆུབ་སེམས་ དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་དེའི་ཚེ་སངས་རྒྱས་ཀྱི་ཞིང་དེ་ནས་མ་གཡོས་ཤིང༌། སྟན་དེ་ལས་མ་ལངས་པར་འདི་ལྟ་བུའི་ཏིང་ངེ་འཛིན་ལ་སྙོམས་པར་ ཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དེ་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ། དེའི་མོད་ལ་འཇིག་རྟེན་གྱི་ཁམས་མི་མཇེད་ དུ་བྱ་རྒོད་ཀྱི་ཕུང་པོའི་རི་ལ་དེ་བཞིན་གཤེགས་པའི་ཆོས་ཀྱི་གདན་གྱི་དྲུང་དུ། པདྨ་ཆུ་བ་ནི་གསེར། འདབ་མ་ནི་དངུལ། སྙིང་པོ་ནི་པདྨ་དང་ནེ་ཙོའམ་ཅི་ལས་གྲུབ་པ་བྱེ་བ་ཁྲག་ ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་བྱུང་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས། པདྨ་བཀོད་པ་བྱུང་བ་དེ་མཐོང་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་ཆུ་བ་ནི་གསེར། འདབ་མ་ནི་དངུལ། སྙིང་པོ་ནི་པདྨ་དང༌། ནེ་ ཙོའམ་ཅི་ལས་གྲུབ་པའི་པདྨ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་གདའ་བ་འདི་སུའི་སྔ་ལྟས་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་འཇམ་དཔལ་ གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། འདི་ནི་ཤར་ཕྱོགས་ལོགས་ནས་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པ་ནས། བཅོམ་ ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་སངས་རྒྱས་ཀྱི་ཞིང་ ནས༑ བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་བསྐོར་ཅིང་མདུན་དུ་བདར་ཏེ། ང་ལ་ བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་མཉན་པའི་ཕྱིར། འཇིག་རྟེན་གྱི་ཁམས་མི་མཇེད་འདིར་འོངས་ བ་དེའི་སྔ་ལྟས་སོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུ་དེས་དགེ་བའི་རྩ་བའི་ཚོགས་ཅི་ ༄༅། །བགྱིས་ན། དགེ་བའི་རྩ་བའི་ཚོགས་བསགས་པ་དེས་འདི་ལྟ་བུའི་ཁྱད་པར་འདི་ཐོབ། བཅོམ་ལྡན་འདས། བྱང་ཆུབ་སེམས་དཔའ་དེ་ཏིང་ངེ་འཛིན་ གང་ལ་སྤྱོད་པའི་ཏིང་ངེ་འཛིན་དེ་བཅོམ་ལྡན་འདས་བདག་གིས་མཉན་པར་བགྱིའོ། །བཅོམ་ལྡན་འདས། བདག་གིས་ཏིང་ངེ་འཛིན་དེ་ལ་སྤྱད་པར་བགྱིའོ། །བྱང་ཆུབ་སེམས་ དཔའ་སེམས་དཔའ་ཆེན་པོ་དེ་ཅི་འདྲ་བ་དང༌། ཁ་དོག་ཅི་འདྲ་བ་དང༌། གཟུགས་ཅི་འདྲ་བ་དང༌། རྟགས་ཅི་འདྲ་བ་དང༌། དབྱིབས་ཅི་འདྲ་བ་དང༌། དེའི་སྤྱོད་པ་ཅི་ལགས་པ། བདག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བལྟ་བར་བགྱིའོ། །བཅོམ་ལྡན་འདས། བརྡ་ལྟས་གང་གིས་བསྐུལ་མ་ཐག་ཏུ། བྱང་ཆུབ་སེམས་དཔའ་སེམས་ དཔའ་ཆེན་པོ་དེ་འཇིག་རྟེན་གྱི་ཁམས་མི་མཇེད་འདིར་མཆི་བར་འགྱུར་བ་དེ་ལྟ་བུའི་བརྡ་ལྟས་ཤིག་དེ་བཞིན་གཤེགས་པས་ལེགས་པར་མཛད་དུ་གསོལ། །དེ་ནས་བཅོམ་ ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་ལ་འདི་སྐད་ཅེས་གསུངས་སོ། །ཅི་ནས་བརྡ་ལྟས་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་ བོའི་དབྱངས་འཇིག་རྟེན་གྱི་ཁམས་མི་མཇེད་འདིར་མཆི་བ་དེ་ལྟ་བུའི་བརྡ་ལྟས་བཅོམ་ལྡན་འདས་ཀྱིས་མཛོད་ཅིག །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་གིས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་བསྐུལ་བའི་ ཕྱིར། འཇམ་དཔལ་གཞོན་ནུར་གྱུར་པ་འདི་རིགས་ཀྱི་བུ་ཁྱེད་ཀྱི་མཐུ་མཐོང་བར་དགའ་བས་རིགས་ཀྱི་བུ་ཁྱོད་འཇིག་རྟེན་གྱི་ཁམས་མི་མཇེད་འདིར་ཤོག་ཅིག་ཅེས་དེ་ལྟ་བུའི་ བརྡ་མཛད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་པདྨའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་ཞབས་ལ་མགོ་བོས་ཕྱག་བཙལ་ནས་ལན་གསུམ་བསྐོར་བ་བྱས་ཏེ། བྱང་ཆུབ་སེམས་ དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པོ་དེ་དག་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་ པ་དེ་ནས་མི་སྣང་བར་གྱུར་ནས། འཇིག་རྟེན་གྱི་ཁམས་མི་མཇེད་འདིར་འོངས་ཏེ། ཞིང་དག་ནི་རབ་ཏུ་གཡོ་བར་བྱེད། པདྨའི་ཆར་ནི་རབ་ཏུ་འབེབས། སིལ་སྙན་བྱེ་བ་ཁྲག་ཁྲིག་ ༄༅། །བརྒྱ་སྟོང་ནི་ལེན་ཅིང༌། མིག་ནི་ཨུཏྤ་ལ་སྔོན་པོའི་འདབ་མ་འདྲ། བཞིན་ནི་ཟླ་བ་བྱེ་བ་ཁྲག་ཁྲིག་བརྒྱ་སྟོང་བས་ལྷག །ལུས་ཀྱི་མདོག་ནི་གསེར་གྱི་ཁ་དོག་ འདྲ་ལ། ལུས་བསོད་ནམས་བརྒྱ་སྟོང་གིས་ནི་བརྒྱན། དཔལ་གྱིས་ནི་རབ་ཏུ་འབར། གཟི་བརྗིད་ཀྱིས་ནི་ཤིན་ཏུ་ལྷག་གར་གྱུར། ལུས་ནི་མཚན་རྣམས་ཀྱིས་རྣམ་པར་སྤྲས། ལུས་སྲེད་མེད་ཀྱི་བུའི་ལུས་ལྟར་ནི་མཁྲེགས་པ། རིན་པོ་ཆེ་སྣ་བདུན་གྱི་ཁང་པ་བརྩེགས་པར་ཞུགས་ཏེ། ནམ་མཁའ་ལ་ཏ་ལ་བདུན་ཙམ་ནས་བྱང་ཆུབ་སེམས་དཔའི་ཚོགས་ ཀྱིས་ཡོངས་སུ་བསྐོར་ཅིང་མདུན་དུ་བདར་ནས་འོངས་ཏེ། དེ་འཇིག་རྟེན་གྱི་ཁམས་མི་མཇེད་འདི་ག་ལ་བ་དང༌། བྱ་རྒོད་ཕུང་པོའི་རི་ག་ལ་བ་དེར་འོངས་ཏེ་ཕྱིན་ནས། ཁང་པ་ བརྩེགས་པ་དེ་ནས་བབས་ཏེ། བརྒྱ་སྟོང་རི་བའི་མུ་ཏིག་གི་ཕྲེང་བ་ཐོགས་ཤིང༌། བཅོམ་ལྡན་འདས་ག་ལ་བ་དེར་སོང་ནས་ཕྱིན་པ་དང༌། བཅོམ་ལྡན་འདས་ཀྱི་ཞབས་ལ་ མགོ་བོས་ཕྱག་བཙལ་ཏེ། ལན་བདུན་སྐོར་བ་བྱས་ནས་བཅོམ་ལྡན་འདས་ལ་མཆོད་པ་བྱ་བའི་ཕྱིར་མུ་ཏིག་གི་ཕྲེང་བ་ཕུལ་ལོ། །ཕུལ་ནས་བཅོམ་ལྡན་འདས་ལ་འདི་སྐད་ ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ ཀུན་ཏུ་རྒྱས་པ་བཅོམ་ལྡན་འདས་ལ་གནོད་པ་ཉུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་གནས་སམ་ཞེས་སྙུན་གསོལ་ཏོ། །བཅོམ་ལྡན་འདས་དེ་ འདི་སྐད་ཅེས་ཀྱང་གསུང་སྟེ། བཅོམ་ལྡན་འདས་ཁྱོད་བཟོད་དམ། གཞེས་སམ། ཁམས་རྣམས་མཐུན་ནམ། ཁྱོད་ཀྱི་སེམས་ཅན་རྣམས་གོ་སླ་འམ། གདུལ་སླའམ། གསོ་ སླའམ། གཙང་མ་འདོད་དམ། ཧ་ཅང་འདོད་ཆགས་མི་སྤྱོད་དམ། ཧ་ཅང་ཞེ་སྡང་མི་སྤྱོད་དམ། ཧ་ཅང་གཏི་མུག་མི་སྤྱོད་དམ། བཅོམ་ལྡན་འདས་ཁྱོད་ཀྱི་སེམས་ཅན་དག་ཤིན་ ཏུ་ཕྲག་དོག་ཅན་མ་ཡིན་ནམ། སེར་སྣ་ཅན་མ་ཡིན་ནམ། མར་མི་འཛིན་པ་མ་ཡིན་ནམ། ཕར་མི་འཛིན་པ་མ་ཡིན་ནམ། དགེ་སློང་དུ་མི་འཛིན་པ་མ་ཡིན་ནམ། བྲམ་ཟེར་མི་ འཛིན་པ་མ་ཡིན་ནམ། ལོག་པར་ལྟ་བ་མ་ཡིན་ནམ། སེམས་མ་དུལ་བ་མ་ཡིན་ནམ། དབང་པོ་མ་བསྲུངས་པ་མ་ཡིན་ནམ། བཅོམ་ལྡན་འདས་ཁྱོད་ཀྱིས་སེམས་ཅན་དེ་དག་གིས་ བདུད་ཕྱིར་རྒོལ་པ་བཅོམ་མམ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་དེ། རིན་པོ་ཆེ་སྣ་བདུན་གྱི་མཆོད་རྟེན་གྱི་ནང་ན་བཞུགས་པ་ཆོས་གསན་པའི་ཕྱིར་འཇིག་རྟེན་གྱི་ཁམས་མི་མཇེད་དུ་གཤེགས་སམ། བཅོམ་ལྡན་འདས་དེ་བཞིན་གཤེགས་པ་རིན་ ༄༅། །ཆེན་མང་ལའང་བཅོམ་ལྡན་འདས་དེ་འདྲི་བ། བཅོམ་ལྡན་འདས་དེ་བཞིན་གཤེགས་པ་རིན་ཆེན་མང་དེ་བཟོད་དམ། གཤེགས་སམ། བཅོམ་ལྡན་ འདས་དེ་བཞིན་གཤེགས་པ་རིན་ཆེན་མང་རིང་དུ་གཞེས་སམ་ཞེས་གསུང་ངོ༌། །བཅོམ་ལྡན་འདས། བདག་གིས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་རིང་བསྲེལ་གྱི་སྐུ་བལྟ་བར་བགྱིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་རིན་ཆེན་མང་དེའི་རིང་བསྲེལ་གྱི་སྐུ། དེ་བཞིན་གཤེགས་པས་ལེགས་པར་བསྟན་དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་ སུ་མྱ་ངན་ལས་འདས་པ་རིན་ཆེན་མང་དེ་ལ་འདི་སྐད་ཅེས་གསུངས་སོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་བཅོམ་ ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་རིན་ཆེན་མང་མཐོང་བར་འཆལ་ནས་མཆིས་སོ།། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་ དབྱངས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ང་དང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ མཐོང་བར་འདོད་པ་དང༌། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་མཉན་པ་དང༌། འཇམ་དཔལ་གཞོན་ནུར་གྱུར་པ་བལྟ་བའི་ཕྱིར་འོངས་པ་ལེགས་སོ། ། ལེགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་པདྨའི་དཔལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་ སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་དེ་བཞིན་གཤེགས་པ་གང་གི་དྲུང་དུ་སྔོན་དགེ་བའི་རྩ་བ་ཇི་ལྟ་བུ་ཞིག་བསྐྲུན། དེ་ནས་བཅོམ་ལྡན་འདས་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་པདྨའི་དཔལ་ལ་འདི་སྐད་ཅེས་བཀའ་སྩལ་ ཏོ༑ ༑རིགས་ཀྱི་བུ། སྔོན་བྱུང་བ་འདས་པའི་དུས་ན་བསྐལ་པ་མཐོང་ན་དགའ་བ་ལ། འཇིག་རྟེན་གྱི་ཁམས་གཟུགས་ཐམས་ཅད་ཤིན་ཏུ་སྟོན་པར་དེ་བཞིན་གཤེགས་པ་དགྲ་བཅོམ་ ༄༅། །པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྤྲིན་དང་རྔ་སྒྲ་རྒྱལ་པོ་ཞེས་བྱ་བ་འདི་འཇིག་རྟེན་དུ་བྱུང་སྟེ། རིགས་ཀྱི་བུ། བཅོམ་ལྡན་འདས་དེ་བཞིན་ གཤེགས་པ་སྤྲིན་དང་རྔ་སྒྲ་རྒྱལ་པོ་དེ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་སིལ་སྙན་བརྒྱ་སྟོང་རབ་ཏུ་བླངས་ཏེ། ལོ་ཁྲི་ཉིས་སྟོང་དུ་ མཆོད་པ་བྱས་སོ། །རིན་པོ་ཆེ་སྣ་བདུན་གྱི་སྣོད་བརྒྱད་ཁྲི་བཞི་སྟོང་ཕུལ་ལོ། །རིགས་ཀྱི་བུ། དེ་བཞིན་གཤེགས་པ་སྤྲིན་དང་རྔ་སྒྲ་རྒྱལ་པོའི་གསུང་རབ་དེ་ལ་བྱང་ཆུབ་སེམས་ དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་དེ་ལྟ་བུའི་དད་པ་ཐོབ་བོ། །དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་སྤྲིན་དང་རྔ་སྒྲ་རྒྱལ་པོ་ལ་མཆོད་པ་བྱས་ཤིང་སྣོད་བརྒྱད་ཁྲི་བཞི་སྟོང་དེ་དག་ཕུལ་བ་དེ། གཞན་ཞིག་ཡིན་སྙམ་དུ་ཁྱོད་སོམ་ཉིའམ། ཡིད་གཉིས་ སམ། ཐེ་ཚོམ་ཟ་བར་གྱུར་ན་རིགས་ཀྱི་བུ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ། གང་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ ཡང་དག་པར་རྫོགས་པའི་སངས་རྒྱས་སྤྲིན་དང་རྔ་སྒྲ་རྒྱལ་པོ་དེ་ལ་མཆོད་པ་བྱས་པ་དང༌། སྣོད་དེ་དག་ཀྱང་ཕུལ་བ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་ དབྱངས་འདི་ཉིད་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དེ་ནི། སངས་རྒྱས་མང་པོ་ལ་བསྙེན་བཀུར་བྱས་པ། སངས་རྒྱས་བརྒྱ་ སྟོང་མང་པོ་ལ་དགེ་བའི་རྩ་བ་བསྐྱེད་པ། ཡོངས་སུ་སྦྱང་བ་བྱས་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདིས་སྔོན་ཡང་སངས་རྒྱས་བཅོམ་ལྡན་ འདས་གངྒཱའི་ཀླུང་གི་བྱེ་མ་སྙེད་མཐོང་ངོ༌། །པདྨའི་དཔལ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་མཐོང་ངམ། པདྨའི་དཔལ་ གྱིས་གསོལ་བ། བཅོམ་ལྡན་འདས། མཐོང་ལགས་སོ། །བདེ་བར་གཤེགས་པ། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། པདྨའི་དཔལ། བྱང་ཆུབ་ སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འདི་ནི། གཟུགས་མང་པོས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སྟོན་ཏེ། འདི་ལྟ་སྟེ། ལ་ལར་ནི་ ཚངས་པའི་གཟུགས་ཀྱིས། ལ་ལར་ནི་བརྒྱ་བྱིན་གྱི་གཟུགས་ཀྱིས། ལ་ལར་ནི་དབང་ཕྱུག་གི་གཟུགས་ཀྱིས། ལ་ལར་ནི་དབང་ཕྱུག་ཆེན་པོའི་གཟུགས་ཀྱིས། ལ་ལར་ནི་དམག་ ༄༅། །དཔོན་གྱི་གཟུགས་ཀྱིས། ལ་ལར་ནི་མཆོག་གི་གཟུགས་ཀྱིས། ལ་ལར་ནི་འཁོར་ལོས་བསྒྱུར་བའི་གཟུགས་ཀྱིས། ལ་ལར་ནི་ཁམས་ཀྱི་རྒྱལ་པོའི་ གཟུགས་ཀྱིས། ལ་ལར་ནི་ཚོང་དཔོན་གྱི་གཟུགས་ཀྱིས། ལ་ལར་ནི་ཁྱིམ་བདག་གི་གཟུགས་ཀྱིས། ལ་ལར་ནི་གྲོང་མིའི་གཟུགས་ཀྱིས། ལ་ལར་ནི་བྲམ་ཟེའི་གཟུགས་ ཀྱིས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སྟོན་ཏོ། །ལ་ལར་ནི་དགེ་སློང་གི་གཟུགས་ཀྱིས། ལ་ལར་ནི་དགེ་སློང་མའི་གཟུགས་ཀྱིས། ལ་ལར་ནི་དགེ་བསྙེན་ གྱི་གཟུགས་ཀྱིས། ལ་ལར་ནི་དགེ་བསྙེན་མའི་གཟུགས་ཀྱིས། ལ་ལར་ནི་ཚོང་དཔོན་གྱི་ཆུང་མའི་གཟུགས་ཀྱིས། ལ་ལར་ནི་ཁྱིམ་བདག་གི་ཆུང་མའི་གཟུགས་ཀྱིས། ལ་ལར་ ནི་གྲོང་མའི་ཆུང་མའི་གཟུགས་ཀྱིས། ལ་ལར་ནི་ཁྱེའུའི་གཟུགས་ཀྱིས། ལ་ལར་ནི་བུ་མོའི་གཟུགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་རྣམས་ལ་སྟོན་ཏེ། རིགས་ཀྱི་བུ། གཟུགས་འདི་སྙེད་ཅིག་ཀུན་ཏུ་སྟོན་པས། བྱང་ཆུབ་སེམས་དཔའ་སེམས་དཔའ་ ཆེན་པོའི་སང་སང་པོའི་དབྱངས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་རྣམས་ལ་སྟོན་ཏོ། །ཁ་ཅིག་ལ་ནི། གནོད་སྦྱིན་གྱི་གཟུགས་ཀྱི་བར་གྱི་བྱང་ ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་རྣམས་ལ་སྟོན་ཏོ། །ཁ་ཅིག་ལ་ལྷ་མ་ཡིན་གྱི་གཟུགས་ ཀྱིས༑ ཁ་ཅིག་ལ་ནམ་མཁའ་ལྡིང་གི་གཟུགས་ཀྱིས། ཁ་ཅིག་ལ་མིའམ་ཅིའི་གཟུགས་ཀྱིས། ཁ་ཅིག་ལ་ལྟོ་འཕྱེ་ཆེན་པོའི་གཟུགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་ པོ་སང་སང་པོའི་དབྱངས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་རྣམས་ལ་སྟོན་ཏོ། །སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་ རྗེའི་འཇིག་རྟེན་དང༌། མི་ཁོམ་པར་སྐྱེས་པའི་བར་གྱི་སེམས་ཅན་རྣམས་ལའང་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་སྐྱོབ་པར་འགྱུར་རོ། །བཙུན་མོའི་ འཁོར་གྱི་ནང་ན་འདུག་པའི་བར་གྱི་སེམས་ཅན་རྣམས་ལའང་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་བུད་མེད་ཀྱི་གཟུགས་སུ་མངོན་པར་སྤྲུལ་ཏེ། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་འཇིག་རྟེན་གྱི་ཁམས་མི་མཇེད་འདིར་སེམས་ཅན་རྣམས་ལ་ཆོས་སྟོན་ཏོ། །པདྨའི་དཔལ། བྱང་ཆུབ་སེམས་དཔའ་སེམས་ དཔའ་ཆེན་པོ་སང་སང་པོའི་དབྱངས་ནི། འཇིག་རྟེན་གྱི་ཁམས་མི་མཇེད་དུ་སྐྱེས་པའི་སེམས་ཅན་རྣམས་ལ་སྐྱོབ་པ་སྟེ། འཇིག་རྟེན་གྱི་ཁམས་མི་མཇེད་འདི་ན། བྱང་ཆུབ་སེམས་ ༄༅། །དཔའ་སེམས་དཔའ་ཆེན་པོ་སང་སང་པོའི་དབྱངས་འདི་དེ་སྙེད་ཀྱི་གཟུགས་སུ་སྤྲུལ་པས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སེམས་ཅན་ རྣམས་ལ་སྟོན་ཏེ། སྐྱེས་བུ་དམ་པ་འདི་རྫུ་འཕྲུལ་ཡང་ཉམས་པ་མེད། ཤེས་རབ་ཀྱང་ཉམས་པ་མེད་དོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སང་ སང་པོའི་དབྱངས་ནི་ཡེ་ཤེས་ཀྱི་སྣང་བ་འདི་སྙེད་ཀྱིས་འཇིག་རྟེན་གྱི་ཁམས་མི་མཇེད་འདི་ན་སྣང་ངོ༌། །འཇིག་རྟེན་གྱི་ཁམས་གཞན་གངྒཱའི་ཀླུང་གི་བྱེ་མ་སྙེད་དག་ནའང༌། བྱང་ཆུབ་ སེམས་དཔས་འདུལ་བའི་སེམས་ཅན་རྣམས་ལ་འདི་བྱང་ཆུབ་སེམས་དཔའི་གཟུགས་ཀྱིས་ཆོས་སྟོན་ཏོ། །ཉན་ཐོས་ཀྱིས་འདུལ་བའི་སེམས་ཅན་རྣམས་ལ་ཉན་ཐོས་ཀྱི་གཟུགས་ ཀྱིས་ཆོས་སྟོན་ཏོ། །རང་སངས་རྒྱས་ཀྱིས་འདུལ་བའི་སེམས་ཅན་རྣམས་ལ་རང་སངས་རྒྱས་ཀྱི་གཟུགས་ཀྱིས་ཆོས་སྟོན་ཏོ། །དེ་བཞིན་གཤེགས་པའི་གཟུགས་ཀྱིས་འདུལ་ བའི་སེམས་ཅན་རྣམས་ལ་དེ་བཞིན་གཤེགས་པའི་གཟུགས་ཀྱིས་ཆོས་སྟོན་ཏོ། །དེ་བཞིན་གཤེགས་པའི་རིང་བསྲེལ་གྱི་བར་གྱིས་འདུལ་བའི་སེམས་ཅན་རྣམས་ལ་དེ་ བཞིན་གཤེགས་པའི་རིང་བསྲེལ་སྟོན་ཏོ། །ཡོངས་སུ་མྱ་ངན་ལས་འདའ་བའི་བར་གྱིས་འདུལ་བའི་སེམས་ཅན་རྣམས་ལ་བདག་ཡོངས་སུ་མྱ་ངན་ལས་འདས་པར་སྟོན་ཏོ།། པདྨའི་དཔལ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོའི་སང་སང་པོའི་དབྱངས་ནི་ཡེ་ཤེས་ཀྱི་སྟོབས་བསྐྱེད་པ་ཐོབ་པའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་ དཔའ་སེམས་དཔའ་ཆེན་པོ་པདྨའི་དཔལ་གྱི་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དགེ་བའི་རྩ་བ་ བསྐྲུན་པ་འདི། བཅོམ་ལྡན་འདས། ཏིང་ངེ་འཛིན་གང་ལ་གནས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས་སེམས་ཅན་འདི་སྙེད་བཏུལ་བའི་ཏིང་ ངེ་འཛིན་དེ་གང་ལགས། དེ་སྐད་ཅེས་གསོལ་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས། བྱང་ཆུབ་ སེམས་དཔའ་སེམས་དཔའ་ཆེན་པོ་པདྨའི་དཔལ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ཏིང་ངེ་འཛིན་གང་ལ་གནས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་སང་ སང་པོའི་དབྱངས་ཀྱིས་འདི་ལྟར་སེམས་ཅན་དཔག་ཏུ་མེད་པའི་དོན་བྱས་པ་ནི། གཟུགས་ཐམས་ཅད་ཡང་དག་པར་སྟོན་པ་ཞེས་བྱ་བའི་ཏིང་ངེ་འཛིན་འདི་ཡིན་ནོ། །སང་སང་པོའི་ དབྱངས་ཀྱི་ལེའུ་འདི་བཤད་པ་ན། བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་དང་ལྷན་ཅིག་ཏུ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་ ༄༅། །བརྒྱད་ཅུ་རྩ་བཞི་གང་དག་འཇིག་རྟེན་གྱི་ཁམས་མི་མཇེད་འདིར་ལྷགས་པ་དེ་དག་ཐམས་ཅད་ཀྱིས་གཟུགས་ཐམས་ཅད་ཡང་དག་པར་སྟོན་པའི་ཏིང་ ངེ་འཛིན་ཐོབ་པར་གྱུར་ཏོ། །འཇིག་རྟེན་གྱི་ཁམས་མི་མཇེད་འདི་ན་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བགྲང་བ་ལས་འདས་པ་དེ་དག་གིས་ཀྱང༌། གཟུགས་ ཐམས་ཅད་ཡང་དག་པར་སྟོན་པའི་ཏིང་ངེ་འཛིན་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་ཀྱིས། བཅོམ་ལྡན་འདས་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང༌། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་རིན་ཆེན་མང་གི་རིང་བསྲེལ་གྱི་མཆོད་རྟེན་ལ་ཡངས་ཤིང་རྒྱ་ཆེ་བའི་མཆོད་པ་བྱས་ནས། རིན་པོ་ཆེ་སྣ་བདུན་གྱི་ཁང་པ་བརྩེགས་པར་བཞུགས་ཏེ། ཞིང་རྣམས་ ནི་རབ་ཏུ་གཡོ་བར་བྱེད། པདྨའི་ཆར་ནི་རབ་ཏུ་འབེབས། སིལ་སྙན་བྱེ་བ་ཁྲག་ཁྲིག་བརྒྱ་སྟོང་ནི་ལེན་ཅིང༌། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་ རྩ་བཞིས་ཡོངས་སུ་བསྐོར་ཏེ་མདུན་དུ་བདར་ནས། ལྷན་ཅིག་ཏུ་སླར་རང་རང་གི་སངས་རྒྱས་ཀྱི་ཞིང་དུ་སོང་སྟེ་ཕྱིན་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་པདྨའི་འདབ་མ་དྲི་མ་མེད་པ་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་གྱི་ཁམས་ མི་མཇེད་དུ་བདག་གིས་སེམས་ཅན་གྱི་དོན་བྱས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གི་རིང་བསྲེལ་གྱི་ མཆོད་རྟེན་ཡང་མཐོང་ངོ༌། །ཕྱག་ཀྱང་བགྱིས་སོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའང་མཐོང་སྟེ་ཕྱག་བགྱིས་སོ། །འཇམ་དཔལ་གཞོན་ནུར་གྱུར་པ་དེའང་ མཐོང་ངོ༌། །བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་བརྩོན་འགྲུས་ཀྱི་སྟོབས་ཀྱི་ཤུགས་ཐོབ་པ་དེ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་སྦྱིན་ པ་དེའང་མཐོང་ངོ༌། །བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པོ་དེ་དག་ཐམས་ཅད་ཀྱིས་ཀྱང་གཟུགས་ཐམས་ཅད་ཡང་དག་པར་སྟོན་པའི་ཏིང་ངེ་ འཛིན་ཐོབ་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སང་སང་པོའི་དབྱངས་འགྲོ་བ་དང་འོང་བའི་ལེའུ་འདི་བཤད་པ་ན། བྱང་ཆུབ་སེམས་དཔའ་བཞི་ཁྲི་ཉིས་ སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་པདྨའི་དཔལ་གྱིས་ཀྱང་དམ་པའི་ཆོས་པདྨ་དཀར་པོའི་ཏིང་ངེ་འཛིན་ཐོབ་པར་ ༄༅། །གྱུར་ཏོ། །དམ་པའི་ཆོས་པདྨ་དཀར་པོ་ལས། སང་སང་པོའི་དབྱངས་ཀྱི་ལེའུ་ཞེས་བྱ་སྟེ་ཉི་ཤུ་རྩ་གསུམ་པའོ།། །།དམ་པའི་ཆོས་པདྨ་དཀར་པོ། བམ་པོ་བཅུ་གསུམ་པ་སྟེ་ཐ་མ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་ པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས། བྱང་ཆུབ་ སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ཅིའི་སླད་དུ་སྤྱན་རས་གཟིགས་ཀྱི་དབང་ཕྱུག་ཅེས་བགྱི། དེ་སྐད་ཅེས་གསོལ་པ་དང༌། བཅོམ་ལྡན་འདས་ ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། འདི་ལ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཇི་སྙེད་ ཅིག་སྡུག་བསྔལ་གང་དག་མྱོང་བར་གྱུར་པ་དེ་དག་གིས། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མིང་ཐོས་ན། དེ་དག་ཐམས་ ཅད་སྡུག་བསྔལ་གྱི་ཕུང་པོ་དེ་ལས་ཡོངས་སུ་ཐར་བར་འགྱུར་རོ། །རིགས་ཀྱི་བུ། སེམས་ཅན་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ ཕྱུག་གི་མིང་འཛིན་པ་དེ་དག །གལ་ཏེ་མེའི་ཕུང་པོ་ཆེན་པོར་ལྷུང་ནའང༌། དེ་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་གཟི་ བརྗིད་ཀྱིས། མེའི་ཕུང་པོ་ཆེན་པོ་རབ་ཏུ་འབར་བ་ལས་དེ་ཐར་བར་འགྱུར་རོ། །རིགས་ཀྱི་བུ། གལ་ཏེ་ཆུ་ཀླུང་དག་གིས་ཁྱེར་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་ གཟིགས་ཀྱི་དབང་ཕྱུག་ལ་བོས་ན། ཆུ་ཀླུང་དེ་དག་ཐམས་ཅད་ཀྱིས་སེམས་ཅན་དེ་དག་ཐམས་ཅད་གཏིང་ཚུགས་པར་བྱེད་དོ། །རིགས་ཀྱི་བུ། གལ་ཏེ་སེམས་ཅན་བྱེ་བ་ཁྲག་ཁྲིག་ བརྒྱ་སྟོང་རྒྱ་མཚོའི་ནང་དུ་གྲུར་ཞུགས་ཏེ། འགྲོན་བུ་དང༌། གསེར་དང༌། ནོར་བུ་དང༌། མུ་ཏིག་དང༌། བཻཌཱུཪྻ་དང༌། དུང་དང༌། མན་ཤེལ་དང༌། རྡོའི་སྙིང་པོ་དང༌། བྱུ་རུ་དང༌། སྤུག་དང༌། མུ་ཏིག་དམར་པོ་ལ་སོགས་པའི་ཕྱིར་དོང་བ་དེ་རྣམས། རླུང་ནག་པོས་སྲིན་མོའི་གླིང་དུ་འཕགས་པར་གྱུར་ལ། དེ་ན་སེམས་ཅན་གཅིག་འགའ་ཞིག་གིས་སྤྱན་རས་ གཟིགས་དབང་ཕྱུག་ལ་བོས་ན། དེ་དག་ཐམས་ཅད་སྲིན་མོའི་གླིང་དེ་ནས་ཐར་བར་འགྱུར་རོ། །རིགས་ཀྱི་བུ། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་ རས་གཟིགས་ཀྱི་དབང་ཕྱུག་སྤྱན་རས་གཟིགས་དབང་ཕྱུག་ཅེས་བཏགས་སོ། །རིགས་ཀྱི་བུ། གལ་ཏེ་བསད་པར་བཀྲི་བ་ལས་སྤྱན་རས་གཟིགས་དབང་ཕྱུག་ལ་བོས་ན། གཤེད་མ་དེ་དག་ ༄༅། །གི་མཚོན་དེ་དག་དུམ་བུ་དུམ་བུར་ཆག་ཅིང་གྲུགས་པར་འགྱུར་རོ། །རིགས་ཀྱི་བུ། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གནོད་ སྦྱིན་དང་སྲིན་པོས་གང་བར་གྱུར་ཀྱང༌། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མིང་འཛིན་པ་ལ་དེ་དག་ཐམས་ཅད་ཀྱི་སྡང་བའི་སེམས་ ཀྱིས་ལྟའང་མི་ཕོད་དོ། །རིགས་ཀྱི་བུ། སེམས་ཅན་ལ་ལ་ལྕགས་སྒྲོག་དང༌། ཤིང་སྒྲོག་ཏུ་བཅུག་པར་གྱུར་ན་ཉེས་ཡོད་ཀྱང་རུང༌། ཉེས་མེད་ཀྱང་རུང་ན། བྱང་ཆུབ་སེམས་ དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མིང་ནས་ཕྱུང་བས་ལྕགས་སྒྲོག་དང་ཤིང་སྒྲོག་ཏུ་བཅུག་པ་དག་གི་བུ་ག་བྱེ་བར་འགྱུར་རོ། །རིགས་ཀྱི་བུ། བྱང་ ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མཐུ་ནི་དེ་འདྲའོ། །རིགས་ཀྱི་བུ། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ གཡོན་ཅན་དང༌། ཆོམ་རྐུན་དང༌། དགྲ་ལག་ན་མཚོན་ཐོགས་པས་ས་གང་བར་གྱུར་ཏེ། དེར་དེད་དཔོན་གཅིག་གིས་མགྲོན་པོ་མང་པོ་ཕལ་པོ་ཆེ་རིན་པོ་ཆེས་ཕྱུག་པ་དེད་དེ་དོང་བ་ ལས༑ འདོང་བ་དེ་དག་གིས་གཡོན་ཅན་ཆོམ་རྐུན་དང་དགྲ་ལག་ན་མཚོན་ཐོགས་པ་དེ་དག་མཐོང་སྟེ། མཐོང་ནས་ཀྱང་འཇིགས་པའི་བསྐྲག་སྟེ་བདག་ཅག་སྐྱབས་མེད་པར་ཤེས་ པ་ལས་དེད་དཔོན་དེས་མགྲོན་པོ་མང་པོ་ལ་འདི་སྐད་ཅེས་མ་འཇིགས་ཤིག །རིགས་ཀྱི་བུ་དག །མ་འཇིགས་ཤིག །མི་འཇིགས་པ་སྦྱིན་པ་བྱང་ཆུབ་སེམས་དཔའ་སེམས་དཔའ་ཆེན་པོ་ སྤྱན་རས་གཟིགས་དབང་ཕྱུག་ལ་སྒྲ་སྐད་གཅིག་ཏུ་བོས་ཤིག་དང༌། དེས་ཁྱོད་ཆོམ་རྐུན་གྱིས་འཇིགས་པ་དང༌། དགྲའི་འཇིགས་པ་འདི་ལས་ཡོངས་སུ་ཐར་བར་འགྱུར་རོ་ཞེས་བསྒོ་ལ། དེ་ནས་མགྲོན་པོ་མང་པོ་ཐམས་ཅད་ཀྱིས་སྒྲ་སྐད་གཅིག་ཏུ་སྤྱན་རས་གཟིགས་དབང་ཕྱུག་ལ་བོས་ཏེ། འཇིགས་པ་མེད་པའི་སྦྱིན་པ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་ རས་གཟིགས་དབང་ཕྱུག་དེ་ལ་ཕྱག་འཚལ་ལོ། །ཕྱག་འཚལ་ལོ་ཞེས་མིང་ནས་ཕྱུང་མ་ཐག་ཏུ། མགྲོན་པོ་ཕལ་པོ་ཆེ་དེ་དག་ཐམས་ཅད་འཇིགས་པ་ཐམས་ཅད་ལས་ཡོངས་སུ་ ཐར་བར་འགྱུར་ཏེ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མཐུ་ནི་དེ་འདྲའོ། །རིགས་ཀྱི་བུ། སེམས་ཅན་གང་དག་ འདོད་ཆགས་སྤྱོད་པ་དེ་དག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ལ་ཕྱག་བྱས་ན་འདོད་ཆགས་དང་བྲལ་བར་འགྱུར་རོ། ། སེམས་ཅན་གང་དག་ཞེ་སྡང་སྤྱོད་པ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་བྱས་ན་ཞེ་སྡང་དང་བྲལ་བར་འགྱུར་རོ། ། ༄༅། །སེམས་ཅན་གང་དག་གཏི་མུག་སྤྱོད་པ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་བྱས་ན་ གཏི་མུག་དང་བྲལ་བར་འགྱུར་རོ། །རིགས་ཀྱི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ནི་རྫུ་འཕྲུལ་ཆེ་བའོ། །རིགས་ཀྱི་བུ། བུད་མེད་བུ་ཕོ་འདོད་པ་གང་ལ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ན་དེ་ལས་བུ་ཕོ་འབྱུང་སྟེ། གཟུགས་བཟང་ བ༑ མཛེས་པ། བལྟ་ན་སྡུག་པ། ཁྱེའུའི་མཚན་དང་ལྡན་པ། སྐྱེ་བོ་མང་པོའི་ཡིད་དུ་འོང་ཞིང་སྡུག་པ་དགེ་བའི་རྩ་བ་བསྐྱེད་པ་འབྱུང་ངོ༌། །གང་བུ་མོ་འདོད་པ་དེའང་བུ་ མོ་འབྱུང་སྟེ། གཟུགས་བཟང་བ། མཛེས་པ། བལྟ་ན་སྡུག་པ། བུ་མོའི་མཚན་དང་ལྡན་པ། སྐྱེ་བོ་མང་པོའི་ཡིད་དུ་འོང་ཞིང་སྡུག་པ་དགེ་བའི་རྩ་བ་བསྐྱེད་པ་འབྱུང་ངོ༌། ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་གི་མཐུ་ནི་དེ་འདྲའོ། །གང་དག་བྱང་ཆུབ་སེམས་དཔའ་སེམས་དཔའ་ཆེན་ པོ་སྤྱན་རས་གཟིགས་ཀྱི་དབང་ཕྱུག་ལ་ཕྱག་འཚལ་བ་དེ་དག་དོན་ཡོད་པའི་འབྲས་བུར་འགྱུར་རོ། །རིགས་ཀྱི་བུ། གང་ཞིག་བྱང་ཆུབ་སེམས་དཔའ་སེམས་དཔའ་ཆེན་པོ་ སྤྱན་རས་གཟིགས་ཀྱི་དབང་ཕྱུག་ལ་ཕྱག་འཚལ་ཞིང་མིང་འཛིན་ལ། གང་ཞིག་སངས་རྒྱས་བཅོམ་ལྡན་འདས་གངྒཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་དག་ལ་ཕྱག་འཚལ་ཞིང་ མིང་འཛིན་པ་དང༌། ཡང་གང་ཞིག་གིས་སངས་རྒྱས་བཅོམ་ལྡན་འདས་གངྒཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་བཞུགས་ཏེ། འཚོ་ཞིང་གཞེས་པ་དེ་དག་ལ་ན་བཟའ་དང༌། བསོད་ སྙོམས་དང༌། གཟིམས་ཆ་དང༌། སྙུན་གྱི་གསོས་སྨན་དང༌། ཡོ་བྱད་ཀྱིས་མཆོད་པ་བྱེད་ན། རིགས་ཀྱི་བུ། འདི་ཇི་སྙམ་དུ་སེམས། རིགས་ཀྱི་བུའམ་རིགས་ཀྱི་བུ་མོ་དེ་དག་བསོད་ ནམས་མངོན་པར་འདུ་བྱེད་པ་དེ་ཙམ་ཞིག་སྐྱེད། དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པས། བཅོམ་ལྡན་འདས་ལ་འདི་ སྐད་ཅེས་གསོལ་ཏོ། །རིགས་ཀྱི་བུའམ་རིགས་ཀྱི་བུ་མོ་དེ་དག་གཞི་དེ་ལས་བསོད་ནམས་སྐྱེད་པ་ནི། བཅོམ་ལྡན་འདས། མང་ལགས་སོ། །བདེ་བར་གཤེགས་པ། མང་ལགས་སོ། ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། གང་གིས་སངས་རྒྱས་བཅོམ་ལྡན་འདས་དེ་སྙེད་ལ་བསྐུར་སྟི་བྱས་པའི་བསོད་ནམས་མངོན་པར་འདུ་བྱེད་པ་དང༌། གང་གིས་ ཐ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ལ་ཕྱག་ལན་གཅིག་བྱས་པ་དང༌། མིང་འཛིན་པའི་བསོད་ནམས་མངོན་པར་འདུ་བྱེད་པ་གཉིས་ ༄༅། །ཀ་མཉམ་སྟེ། ལྷག་པའང་མེད། འཕགས་པའང་མེད་དོ། །གང་གིས་སངས་རྒྱས་བཅོམ་ལྡན་འདས་གངྒཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་ལ་ཕྱག་ འཚལ་ཞིང་མིང་འཛིན་པ་དང༌། གང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ལ་ཕྱག་འཚལ་ཞིང་མིང་འཛིན་པའི་བསོད་ནམས་ཀྱི་ཕུང་ པོ་དེ་གཉིས་ཀ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུའང་ཟད་པར་བྱ་བ་སླ་བ་མ་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ ཀྱི་དབང་ཕྱུག་གི་མིང་འཛིན་པའི་བསོད་ནམས་དེ་ལྟར་དཔག་ཏུ་མེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པས་ འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་འཇིག་རྟེན་གྱི་ཁམས་མི་མཇེད་འདི་ན་ རྣམ་པར་རྒྱུ། ཇི་ལྟར་སེམས་ཅན་རྣམས་ལ་ཆོས་སྟོན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་གི་ཐབས་མཁས་པའི་ཡུལ་ནི་ ཅི་འདྲ་བ་ཞིག་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལ་འདི་སྐད་ཅེས་བཀའ་སྩལ་ ཏོ༑ ༑རིགས་ཀྱི་བུ། གང་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སངས་རྒྱས་ཀྱི་གཟུགས་ཀྱིས་སེམས་ཅན་རྣམས་ལ་ཆོས་སྟོན་པའི་འཇིག་ རྟེན་གྱི་ཁམས་དག་ཡོད་དོ། །གང་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་བྱང་ཆུབ་སེམས་དཔའ་སེམས་དཔའ་ཆེན་པོའི་གཟུགས་ ཀྱིས་ཆོས་སྟོན་པའི་འཇིག་རྟེན་གྱི་ཁམས་དག་ཀྱང་ཡོད་དོ། །སེམས་ཅན་ཁ་ཅིག་ལ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་རང་སངས་ རྒྱས་ཀྱི་གཟུགས་ཀྱིས་ཆོས་སྟོན་ཏོ། །ཁ་ཅིག་ལ་ཉན་ཐོས་ཀྱི་གཟུགས་ཀྱིས། ཁ་ཅིག་ལ་ཚངས་པའི་གཟུགས་ཀྱིས། ཁ་ཅིག་ལ་བརྒྱ་བྱིན་གྱི་གཟུགས་ཀྱིས། སེམས་ཅན་ ཁ་ཅིག་ལ་ནི་བྱང་ཆུབ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུར་དྲི་ཟའི་གཟུགས་ཀྱིས་ཆོས་སྟོན་ཏོ། །གནོད་སྦྱིན་གྱིས་འདུལ་བའི་སེམས་ཅན་རྣམས་ལ་ནི་གནོད་ སྦྱིན་གྱི་གཟུགས་ཀྱིས་ཆོས་སྟོན་ཏོ། །དབང་ཕྱུག་གིས་འདུལ་བའི་སེམས་ཅན་རྣམས་ལ་ནི་དབང་ཕྱུག་གི་གཟུགས་ཀྱིས་ཆོས་སྟོན་ཏོ། །དབང་ཕྱུག་ཆེན་པོས་འདུལ་བའི་སེམས་ ཅན་རྣམས་ལ་ནི་དབང་ཕྱུག་ཆེན་པོའི་གཟུགས་ཀྱིས་ཆོས་སྟོན་ཏོ། །འཁོར་ལོས་སྒྱུར་བའི་རྒྱལ་པོས་འདུལ་བའི་སེམས་ཅན་རྣམས་ནི་འཁོར་ལོས་སྒྱུར་བའི་རྒྱལ་པོའི་གཟུགས་ ༄༅། །ཀྱིས་ཆོས་སྟོན་ཏོ། །ཤ་ཟས་འདུལ་བའི་སེམས་ཅན་རྣམས་ལ་ནི་ཤ་ཟའི་གཟུགས་ཀྱིས་ཆོས་སྟོན་ཏོ། །མཆོག་གིས་འདུལ་བའི་སེམས་ཅན་རྣམས་ལ་ནི་ མཆོག་གི་གཟུགས་ཀྱིས་ཆོས་སྟོན་ཏོ། །དམག་དཔོན་གྱིས་འདུལ་བའི་སེམས་ཅན་རྣམས་ལ་ནི་དམག་དཔོན་གྱི་གཟུགས་ཀྱིས་ཆོས་སྟོན་ཏོ། །བྲམ་ཟེས་འདུལ་བའི་སེམས་ཅན་ རྣམས་ལ་ནི་བྲམ་ཟེའི་གཟུགས་ཀྱིས་ཆོས་སྟོན་ཏོ། །ལག་ན་རྡོ་རྗེས་འདུལ་བའི་སེམས་ཅན་རྣམས་ལ་ནི་ལག་ན་རྡོ་རྗེའི་གཟུགས་ཀྱིས་ཆོས་སྟོན་ཏོ། །རིགས་ཀྱི་བུ། དེ་ལྟར་བྱང་ ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །རིགས་ཀྱི་བུ། དེ་ལྟ་བས་ན་བྱང་ཆུབ་སེམས་དཔའ་ སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་ལ་མཆོད་ཅིག །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་འདི་ འཇིགས་པའི་སེམས་ཅན་རྣམས་ལ་མི་འཇིགས་པ་སྦྱིན་པ་སྟེ། དེའི་ཕྱིར་འཇིག་རྟེན་གྱི་ཁམས་མི་མཇེད་འདི་ན་མི་འཇིགས་པ་སྦྱིན་པ་ཞེས་ཀུན་གྱིས་ཤེས་སོ། །དེ་ནས་ བཅོམ་ལྡན་འདས་ལ་བློ་གྲོས་མི་ཟད་པས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ ཀྱི་དབང་ཕྱུག་ལ་ཆོས་ཀྱི་དགབ་པ་སྩལ་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེའི་དུས་ལ་བབ་པར་ཤེས་ན་བྱིན་ཅིག །དེ་ནས་བྱང་ཆུབ་སེམས་དཔའ་ སེམས་དཔའ་ཆེན་པོ་བློ་གྲོས་མི་ཟད་པས་བདག་གི་མགུལ་ནས་བརྒྱ་སྟོང་རི་བའི་མུ་ཏིག་གི་དོ་ཤལ་བཀྲོལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ དབང་ཕྱུག་ལ་ཆོས་ཀྱི་དགབ་པར་བྱིན་ཏེ། སྐྱེས་བུ་དམ་པ། བདག་ལས་ཆོས་ཀྱི་དགབ་པ་འདི་ལོང་ཞིག །དེས་མ་བླངས་ནས་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་མུ་ཏིག་གི་དོ་ཤལ་འདི་བདག་ལ་སྙིང་བརྩེ་བའི་ཕྱིར་ལོང་ཞིག །དེ་ནས་བྱང་ཆུབ་ སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལ་སྙིང་བརྩེ་བ་དང༌། འཁོར་བཞི་པོ་དེ་དག་དང༌། ལྷ་ དང༑ ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་ཡིན་པ་ལ་སྙིང་བརྩེ་བའི་ཕྱིར། བྱང་ཆུབ་ སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལས་མུ་ཏིག་གི་དོ་ཤལ་བླངས་སོ། །བླངས་ནས་ཆ་གཉིས་སུ་བགོས་ཏེ་བགོས་ནས་ཆ་གཅིག་ནི་བཅོམ་ལྡན་འདས་ཤཱཀྱ་ཐུབ་པ་ ༄༅། །ལ་ཕུལ་ལོ། །ཆ་གཅིག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གི་རིན་པོ་ཆེའི་མཆོད་རྟེན་ལ་ཕུལ་ ལོ༑ ༑རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་འཇིག་རྟེན་གྱི་ཁམས་མི་མཇེད་འདི་ན་དེ་ལྟ་བུའི་རྣམ་པར་འཕྲུལ་པས་རྣམ་ པར་རྒྱུའོ། །དེ་ལ་དེའི་ཆོས་ཉིད་ནི་འདི་སྐད་ཅེས་བྱའོ། །རྒྱལ་མཚན་ཁྲ་བོས་བློ་གྲོས་མི་ཟད་ལ། །དེ་ཡི་དོན་གྱི་རྒྱུ་ནི་ཀུན་དྲིས་པ། །རྒྱལ་པོའི་སྲས་པོ་འདི་ལྟར་ཅི་ཡི་ཕྱིར། ། སྤྱན་རས་གཟིགས་ཀྱི་དབང་པོ་ཞེས་འདི་བགྱི། །དེ་ནས་དེ་ཡིས་ཕྱོགས་རྣམས་ཀུན་བལྟས་ཏེ། །སྨོན་ལམ་རྒྱ་མཚོ་བློ་གྲོས་མི་ཟད་པས། རྒྱལ་མཚན་ཁྲ་བོ་དེ་ལ་འདི་སྐད་ སྨྲས༑ ༑སྤྱན་རས་གཟིགས་ཀྱི་དབང་པོའི་སྤྱོད་པ་ཉོན། །བསྐལ་པ་བསམ་ཡས་བྱེ་བ་དུ་མ་བརྒྱར། །སངས་རྒྱས་སྟོང་ཕྲག་བྱེ་བ་མང་པོ་ལ། །སྨོན་ལམ་ཇི་ལྟར་རབ་ཏུ་རྣམ་ པར་སྦྱངས། །དེ་དག་ཁོ་བོས་རབ་ཏུ་བཤད་ཀྱི་ཉོན། །མཉན་པར་བྱེད་ཅིང་ལྟ་བར་བྱེད་པ་དང༌། །རིམ་གྱིས་དེ་ལྟར་རྗེས་སུ་དྲན་པ་ཡང༌། །སྲོག་ཆགས་རྣམས་ནི་འབྲས་བུ་ ཡོད་པར་འགྱུར། །སྡུག་བསྔལ་དང་ནི་མྱ་ངན་ཐམས་ཅད་སོལ། །གལ་ཏེ་གསོད་པས་མེ་ཡི་དོང་དུ་ཡང༌། །གསད་པར་བྱ་བའི་ཕྱིར་ནི་བོར་བའི་མིས། །སྤྱན་རས་གཟིགས་ཀྱི་ དབང་པོ་དྲན་ན་ནི། །ཆུས་བཏབ་བཞིན་དུ་མེ་དག་ཞི་བར་འགྱུར། །རྒྱ་མཚོ་དང་ནི་མྱ་ངམ་རྒལ་ན་ཡང༌། །ཀླུ་དང་འབྱུང་པོ་ལྷ་མ་ཡིན་གནས་སུ། །སྤྱན་རས་གཟིགས་ཀྱི་དབང་པོ་ དྲན་ན་ནི། །ཆུ་ཡི་ནང་དུ་ནམ་ཡང་མི་ནུབ་བོ། །རབ་ཏུ་སྡང་བའི་ཡིད་ཀྱིས་གསད་པའི་ཕྱིར། །རི་རབ་ལྷུན་པོའི་རྩེ་ནས་བོར་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །ཉི་མ་ ལྟ་བུར་ནམ་མཁར་གནས་པར་འགྱུར། །གལ་ཏེ་རྡོ་རྗེ་ཡི་ནི་རི་དག་ཀྱང༌། །གསང་བའི་ཕྱིར་ནི་སྤྱི་བོར་འོངས་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །བ་སྤུའི་ཁུང་ཙམ་ གཙེས་པར་མི་ནུས་སོ། །གསད་པའི་སེམས་ཀྱིས་ལག་ན་མཚོན་ཐོགས་ཏེ། །དགྲ་ཚོགས་མང་པོས་ཀུན་ཏུ་བསྐོར་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་ བྱམས་པའི་སེམས་སུ་འགྱུར། །གལ་ཏེ་གསོད་པ་ཉེ་བར་འོངས་ནས་སུ། །གཤེད་མ་མི་ཡི་དབང་དུ་གྱུར་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་ཡི་མཚོན་ཆ་ དུམ་བུ་དུམ་བུར་འགྱུར། །དེ་སྟེ་ཤིང་ངམ་ལྕགས་ལས་བྱས་པ་ཡི། །ཁོང་སྒྲིལ་དང་ནི་གདོས་ཀྱིས་བཅིངས་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །བཅིངས་པ་མྱུར་ དུ་རྣམ་པར་བཅད་པར་འགྱུར། །སྔགས་དང་སྟོབས་དང་སྨན་དང་རིག་སྔགས་དང༌། །རོ་ལངས་པ་དང་འབྱུང་པོ་ལུས་འཇིགས་པ། །སྤྱན་རས་གཟིགས་ཀྱི་དབང་པོ་དྲན་ན་ནི། ༄༅། །གང་ནས་རབ་ཏུ་བཏང་བ་དེ་སླར་འགྲོ། གནོད་སྦྱིན་ལྷ་མིན་འབྱུང་པོ་ཀླུ་འབར་བ། །མདངས་འཕྲོག་པ་ཡིས་ཡོངས་སུ་བསྐོར་ན་ཡང༌། །སྤྱན་རས་གཟིགས་ ཀྱི་དབང་པོ་དྲན་ན་ནི། །བ་སྤུའི་ཁུང་ཙམ་གཅེས་པར་ཡོང་མི་ནུས། །མཆེ་བ་སེན་རྣོན་རབ་ཏུ་འཇིགས་པ་ཡི། །གཅན་གཟན་མ་རུངས་པ་ཡིས་བསྐོར་ན་ཡང༌། །སྤྱན་རས་གཟིགས་ ཀྱི་དབང་པོ་དྲན་ན་ནི། །མྱུར་བར་ཕྱོགས་ཀུན་ཏུ་ཡང་འགྲོ་བར་འགྱུར། །མིག་འཇིགས་མེ་ལྕེ་ལྟ་བུར་འོད་འཕྲོ་བ། །མིག་དུག་ཅན་གྱིས་ཡོངས་སུ་བསྐོར་ན་ཡང༌། །སྤྱན་རས་གཟིགས་ ཀྱི་དབང་པོ་དྲན་ན་ནི། །ཤིན་ཏུ་མྱུར་བར་གདུག་པ་མེད་པར་འགྱུར། །བཟང་པོའི་གློག་ཀྱང་འབྱུང་ཞིང་སྡུག་པ་ཡི། །སྤྲིན་ལས་ལྕེ་དང་སེར་བ་ཆར་འབབ་པ། །སྤྱན་རས་གཟིགས་ཀྱི་ དབང་པོ་དྲན་ན་ནི། །དེ་མ་ཐག་ཏུ་མྱུར་བར་རབ་ཏུ་ཞི། །སྡུག་བསྔལ་མང་པོ་བརྒྱ་ཡིས་གཙེས་པ་དང༌། །སྡུག་བསྔལ་མང་པོས་གཟིར་བའི་སེམས་ཅན་མཐོང༌། །ཡེ་ཤེས་དགེ་ བའི་སྟོབས་ཀྱིས་སྤྱན་རས་གཟིགས། །དེ་བས་ལྷར་བཅས་འགྲོ་བ་སྐྱོབ་པའོ། །རྫུ་འཕྲུལ་སྟོབས་ཀྱིས་ཕ་རོལ་སོང་བ་སྟེ། །ཐབས་དང་ཡེ་ཤེས་ཡངས་པ་བསླབས་པས་ན། ། ཕྱོགས་བཅུའི་འགྲོ་བ་མང་པོ་ཐམས་ཅད་དང༌། །མ་ལུས་ཞིང་ཀུན་ཏུ་ཡང་རབ་ཏུ་སྣང༌། །སྲོག་ཆགས་རྣམས་ཀྱི་ངན་འགྲོའི་འཇིགས་པ་དང༌། །མི་ཁོམ་པ་དང་སེམས་ཅན་ དམྱལ་བ་དང༌། །བྱོལ་སོང་དང་ནི་གཤིན་རྗེས་བསྐོར་བ་ཡང༌། །སྐྱེ་རྒ་ན་བས་གཟིར་བ་མཐར་ཞི་བྱེད། །ཤིན་ཏུ་དགེ་བའི་སྤྱན་དེ་བྱམས་པའི་སྤྱན། །ཐབས་དང་ཤེས་རབ་ཁྱད་པར་ ཡོད་པའི་སྤྱན། །སྙིང་རྗེའི་སྤྱན་དང་བྱམས་པའི་སྤྱན་དང་ལྡན། །ཞལ་བཟང་སྤྱན་བཟང་ཤིན་ཏུ་བལྟ་འདོད་པ། །དྲི་མ་མེད་པ་དྲི་མ་བྲལ་བའི་འོད། །རབ་རིབ་མེད་པ་ཡེ་ཤེས་ཉི་ མའི་འོད། །སྤྲིན་གྱིས་ཆོད་པར་གྱུར་པ་མེད་པའི་འོད། །འཇིག་རྟེན་དག་ན་ལྷག་གེ་ལྷང་ངེར་མཛེས། །སྙིང་རྗེ་ལས་བྱུང་ཚུལ་ཁྲིམས་གྲགས་པ་སྟེ། །དགེ་བའི་ཡོན་ཏན་བྱམས་ཡིད་སྤྲིན་ ཆེན་པོ། །སྲོག་ཆགས་རྣམས་ཀྱི་ཉོན་མོངས་མེ་ཞི་བྱེད། །ཆོས་ཀྱི་ཆར་པ་བདུད་རྩི་རབ་ཏུ་འབེབས། །འཐབ་མོ་དང་ནི་རྩོད་ཅིང་འགྱེད་པ་ཡི། །འཇིགས་ཆེན་གཡུལ་ངོར་སྐྱེས་བུ་ སོང་ན་ཡང༌། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་དགྲ་རྣམས་རབ་ཏུ་ཞི། །སྤྲིན་གྱི་སྒྲ་དང་རྔ་པོ་ཆེ་ཡི་སྒྲ། །འབྲུག་གི་སྒྲ་དང་ཚངས་པའི་དབྱངས་སྙན་པ། །དབྱངས་ ཀྱི་དཀྱིལ་འཁོར་ཕ་རོལ་ཕྱིན་པ་སྟེ། །སྤྱན་རས་གཟིགས་ཀྱི་དབང་པོ་དྲན་པར་བྱ། །དག་པའི་སེམས་དཔའ་སྤྱན་རས་གཟིགས་དབང་པོ། །ཐེ་ཚོམ་མ་ཟ་དྲན་བྱོས་དྲན་པར་གྱིས། ། འཆི་བའི་ཚེ་དང་ཉོན་མོངས་གཙེས་པའི་ཚེ། །མགོན་དང་སྐྱབས་དང་དཔུང་གཉེན་དུ་ཡང་འགྱུར། །ཡོན་ཏན་ཐམས་ཅད་ཀྱི་ནི་ཕ་རོལ་ཕྱིན། །སེམས་ཅན་ཀུན་ལ་སྙིང་རྗེ་བྱམས་ ༄༅། །པའི་སྤྱན། །ཡང་དག་ཡོན་ཏན་ཡོན་ཏན་རྒྱ་མཚོ་ཆེ། །སྤྱན་རས་གཟིགས་ཀྱི་དབང་པོར་ཕྱག་བྱར་འོས། །འདི་ལྟར་འགྲོ་བ་རྣམས་ལ་སྙིང་བརྩེ་བ། །ཕྱི་ མའི་དུས་ན་སངས་རྒྱས་སུ་ཡང་འགྱུར། །འཇིགས་དང་མྱ་ངན་ཐམས་ཅད་འཇིག་བྱེད་པ། །སྤྱན་རས་གཟིགས་དབང་དེ་ནི་དྲན་པར་བྱ། །འཇིག་རྟེན་དབང་གི་རྒྱལ་པོ་གཙོ་བོ་ སྟེ། །དགེ་སློང་ཆོས་ཀྱི་འབྱུང་གནས་འཇིག་རྟེན་མཆོད། །བསྐལ་པ་བརྒྱ་ཕྲག་མང་པོ་སྤྱད་ནས་སུ། །རྡུལ་བྲལ་བླ་ན་མེད་པའི་བྱང་ཆུབ་འཐོབ། །འདྲེན་པ་སྣང་བ་མཐའ་ཡས་གཡས་ གཡོན་ནས། །བསིལ་ཡབ་ཐོགས་ཏེ་དེ་བཞིན་གཡོབ་ཅིང་འདུག །སྒྱུ་མ་ལྟ་བུའི་ཏིང་ངེ་འཛིན་གྱིས་ཀྱང༌། །ཞིང་རྣམས་ཀུན་ཏུ་སོང་ནས་རྒྱལ་བ་མཆོད། །ནུབ་ཀྱི་ཕྱོགས་ན་ བདེ་བའི་འབྱུང་གནས་ཏེ། །རྡུལ་བྲལ་འཇིག་རྟེན་ཁམས་འདི་བདེ་བ་ཅན། །དེ་ན་སེམས་ཅན་ཁ་ལོ་སྒྱུར་བ་ཡི། །འདྲེན་པ་ཚེ་མཐའ་ཡས་པའང་ད་ལྟར་བཞུགས། །དེར་ནི་ བུད་མེད་རྣམས་ཀྱང་མི་འབྱུང་སྟེ། རྣམ་པ་ཀུན་ཏུ་གཡེམ་པའི་ཆོས་མེད་དོ། །རྒྱལ་བའི་སྲས་པོ་དེ་དག་བརྫུས་ཏེ་སྐྱེ། །དྲི་མ་མེད་པའི་པདྨའི་སྙིང་པོར་འདུག །འདྲེན་པ་ཚེ་ མཐའ་ཡས་པ་དེ་ཉིད་ཀྱང༌། །པདྨའི་སྙིང་པོ་དྲི་མེད་དགའ་བ་ལ། །སེང་གེའི་ཁྲི་ལ་རབ་ཏུ་བཞུགས་པ་ཡང༌། །སཱ་ལའི་རྒྱལ་པོ་ལྟ་བུར་རྣམ་པར་མཛེས། །འཇིག་རྟེན་འདྲེན་ པ་འདི་ཡང་དེ་བཞིན་ཏེ། །སྲིད་པ་གསུམ་ན་དེ་འདྲ་ཡོང་མེད་དོ། །གང་གིས་སྤྱན་རས་གཟིགས་དབང་མིང་ཐོས་པ། །དེ་ཡི་བསོད་ནམས་དག་ནི་ཟད་མི་འགྱུར། །དེ་ནས་བྱང་ཆུབ་སེམས་ དཔའ་སེམས་དཔའ་ཆེན་པོ་ས་འཛིན་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སུ་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ གི་ལེའུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་རྣམ་པར་འཕྲུལ་པ་བསྟན་པ་ཀུན་ནས་སྒོའི་ལེའུ། །སྤྱན་རས་གཟིགས་དབང་ཕྱུག་གི་ རྣམ་པར་སྤྲུལ་པའི་ཆོ་འཕྲུལ་འདི་ཐོས་པའི་སེམས་ཅན་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ལགས་སོ། །ཀུན་ནས་སྒོའི་ལེའུ་བསྟན་པ་འདི་བཅོམ་ལྡན་འདས་ཀྱིས་ བཤད་པ་ན། འཁོར་དེ་ལས་སྲོག་ཆགས་བརྒྱད་ཁྲི་བཞི་སྟོང་གིས་མི་མཉམ་པ་དང་མཉམ་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། ། དམ་པའི་ཆོས་པདྨ་དཀར་པོ་ལས། སྤྱན་རས་གཟིགས་དབང་ཕྱུག་གི་རྣམ་པར་འཕྲུལ་པ་བསྟན་པ་ཀུན་ནས་སྒོའི་ལེའུ་ཞེས་བྱ་སྟེ་ཉི་ཤུ་རྩ་བཞི་པའོ།། །།དེ་ནས་བཅོམ་ ༄༅། །ལྡན་འདས་ཀྱིས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། རིགས་ཀྱི་བུ་དག །སྔོན་བྱུང་བ་འདས་པའི་དུས་ན་བསྐལ་ པ་གྲངས་མེད་པར་གྱུར་པ་དེའི་ཚེ་དེའི་དུས་ན། བསྐལ་པ་མཐོང་ན་དགའ་བ་ལ་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པར་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ཞེས་བྱ་བ་འཇིག་རྟེན་དུ་བྱུང་ངོ༌། །དེ་བཞིན་གཤེགས་ པ་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་གསུང་རབ་ལ། རྒྱལ་པོ་དགེ་བ་བཀོད་པ་ཞེས་བྱ་བ་བྱུང་སྟེ། རིགས་ཀྱི་བུ་དག །རྒྱལ་པོ་དགེ་བ་བཀོད་པ་ དེའི་ཆུང་མ་དྲི་མ་མེད་པས་བྱིན་པ་ཞེས་བྱ་བ་ཞིག་ཡོད་དོ། །རིགས་ཀྱི་བུ་དག །རྒྱལ་པོ་དགེ་བ་བཀོད་པ་དེ་ལ་བུ་གཉིས་ཤིག་ཡོད་དེ། གཅིག་གི་མིང་ནི་དྲི་མ་མེད་པའི་སྙིང་པོ། གཅིག་གི་མིང་ནི་དྲི་མ་མེད་པའི་མིག་སྟེ། ཁྱེའུ་དེ་གཉིས་རྫུ་འཕྲུལ་དང་ལྡན། ཤེས་རབ་དང་ལྡན་པ། བསོད་ནམས་དང་ལྡན། ཡེ་ཤེས་དང་ལྡན་ཏེ། བྱང་ཆུབ་སེམས་དཔའི་ སྤྱོད་པ་ལ་བརྩོན་པར་གྱུར་ཏོ། །འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང༌། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་པའི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་ པ་དང༌། བསམ་གཏན་གྱི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པའི་ཕ་རོལ་ཏུ་ཕྱིན་པ་དང༌། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་དང༌། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་དག་ལ་བརྩོན་པར་གྱུར་ཏེ། ཐམས་ཅད་ཀྱི་ཕ་རོལ་ཏུ་སོན་པར་གྱུར་ཏོ། །དྲི་མ་མེད་པའི་ཏིང་ངེ་འཛིན་གྱི་ཕ་རོལ་ ཏུ་སོང་ངོ༌། །རྒྱུ་སྐར་དང་སྐར་མ་དང་ཉི་མའི་ཏིང་ངེ་འཛིན་གྱི་ཕ་རོལ་ཏུ་སོང་ངོ༌། །དྲི་མ་མེད་པའི་འོད་ཀྱི་ཏིང་ངེ་འཛིན་གྱི་ཕ་རོལ་ཏུ་སོང་ངོ༌། །དྲི་མ་མེད་པའི་འོད་གསལ་བའི་ཏིང་ངེ་ འཛིན་གྱི་ཕ་རོལ་ཏུ་སོང་ངོ༌། །དཔའ་རྒྱན་གྱི་ཏིང་ངེ་འཛིན་གྱི་ཕ་རོལ་ཏུ་སོང་ངོ༌། །གཟི་བརྗིད་ཆེན་པོའི་སྙིང་པོའི་ཏིང་ངེ་འཛིན་གྱི་ཕ་རོལ་ཏུ་སོང་བར་གྱུར་ཏོ། །བཅོམ་ལྡན་འདས། དེའང་ དེའི་ཚེ་དེའི་དུས་ན་སེམས་ཅན་དེ་དག་ལ་ཐུགས་བརྩེ་བ་དང༌། རྒྱལ་པོ་དགེ་བ་བཀོད་པ་དེ་ལ་ཐུགས་བརྩེ་བའི་ཕྱིར། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སྟོན་ ཏོ། །རིགས་ཀྱི་བུ། །དེ་ནས་ཁྱེའུ་དྲི་མ་མེད་པའི་སྙིང་པོ་དང༌། ཁྱེའུ་དྲི་མ་མེད་པའི་མིག །བདག་ཅག་སྐྱེད་པའི་མ་ག་ལ་བ་དེར་སོང་སྟེ། ཕྱིན་ནས་སོར་མོ་བཅུའི་ཐལ་མོ་སྦྱར་ ༄༅། །ཏེ། བདག་ཅག་སྐྱེད་པའི་མ་ལ་འདི་སྐད་ཅེས་སྨྲས་སོ། །ཡུམ། ཚུར་སྤྱོན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ་ལ་བལྟ་བ་དང་ཕྱག་བགྱི་བ་དང་བསྙེན་བཀུར་བགྱི་བའི་སླད་དུ། བཅོམ་ལྡན་འདས་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་དྲུང་དུ་བཞུད་དེ། ཅིའི་སླད་དུ་ཞེ་ན། ཡུམ། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མི་ཏོག་ཀུན་ཏུ་རྒྱས་པ་དེ། ལྷ་དང་བཅས་པའི་ འཇིག་རྟེན་གྱི་མདུན་དུ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་རྒྱས་པར་རབ་ཏུ་འཆད་ཀྱི། དེ་མཉན་པའི་ཕྱིར་བཞུད་དོ། །རིགས་ཀྱི་བུ་དག་ལ་དེ་སྐད་ཅེས་སྨྲས་ ནས། རྒྱལ་པོའི་ཆུང་མ་དྲི་མ་མེད་པས་བྱིན་པས། ཁྱེའུ་དྲི་མ་མེད་པའི་སྙིང་པོ་དང༌། དྲི་མ་མེད་པའི་མིག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག །ཁྱེད་ཀྱི་ཕ་རྒྱལ་ པོ་དགེ་བ་བཀོད་པ་འདི་བྲམ་ཟེ་ལ་དད་པས། དེ་བཞིན་གཤེགས་པ་དེ་ལ་བལྟ་བའི་ཕྱིར་འགྲོར་མི་སྟེར་རོ། །རིགས་ཀྱི་བུ་དག །དེ་ནས་ཁྱེའུ་དྲི་མ་མེད་པའི་སྙིང་པོ་དང་ ཁྱེའུ་དྲི་མ་མེད་པའི་མིག་གིས་སོར་མོའི་བཅུའི་ཐལ་མོ་སྦྱར་ནས། བདག་ཅག་སྐྱེད་པའི་མ་ལ་འདི་སྐད་ཅེས་སྨྲས་སོ། །བདག་ཅག་ལོག་པར་ལྟ་བའི་ཁྱིམ་དུ་སྐྱེས་ཏེ། བདག་ཅག་ཆོས་ ཀྱི་རྒྱལ་པོའི་བུ་མ་ལགས་པ་སྟེ། རིགས་ཀྱི་བུ་དག །དེ་ནས་རྒྱལ་པོའི་ཆུང་མ་དྲི་མ་མེད་པས་བྱིན་པས། །ཁྱེའུ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག །ཁྱེད་ཀྱིས་ བདག་ཅག་གི་ཕ་རྒྱལ་པོ་དགེ་བ་བཀོད་པ་ལ་སྙིང་བརྩེ་བའི་ཕྱིར། ཆོ་འཕྲུལ་ཅུང་ཟད་ཅིག་ལེགས་པར་སྟོན་ཅིག་དང་ཁྱེད་ལ་དད་པར་འགྱུར་ཡང་སྲིད་ཀྱི། སེམས་དད་པར་གྱུར་ ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་གན་དུ་ འདོང་དུ་གནང་ངོ༌། །རིགས་ཀྱི་བུ་དག །དེ་ནས་ཁྱེའུ་དྲི་མ་མེད་པའི་སྙིང་པོ་དང༌། ཁྱེའུ་དྲི་མ་མེད་པའི་མིག་གིས། དེའི་ཚེ་ཏ་ལ་བདུན་ཙམ་དུ་ནམ་མཁའ་ལ་འཕགས་ནས། ཕ་རྒྱལ་པོ་དགེ་བ་བཀོད་པ་དེ་ལ་སྙིང་བརྩེ་བའི་ཕྱིར། སངས་རྒྱས་ཀྱིས་གནང་བའི་ཆོ་འཕྲུལ་ཟུང་དུ་བྱེད་དེ། དེ་དག་ནམ་མཁའ་བར་སྣང་དེ་ལ་དོང་ནས་ཉལ་བར་བྱེད་དོ། ། པར་སྣང་དེ་ལ་འཆག་གོ །བར་སྣང་དེ་ལ་རྡུལ་སྤྲུག་གོ །བར་སྣང་དེ་ཉིད་ལ་ལུས་ཀྱི་སྨད་ནས་ཆུའི་རྒྱུན་གཏོང་ཞིང༌། ལུས་ཀྱི་སྟོད་ནས་མེའི་ཕུང་པོ་རབ་ཏུ་འབར་བར་བྱེད་ ༄༅། །དོ། །ལུས་ཀྱི་སྟོད་ནས་ཆུའི་རྒྱུན་གཏོང་ཞིང༌། ལུས་ཀྱི་སྨད་ནས་མེའི་ཕུང་པོ་རབ་ཏུ་འབར་བར་བྱེད་དོ། །དེ་དག་ནམ་མཁའ་དེ་ཉིད་ལ་ཆེན་པོར་གྱུར་ ནས་ཆུང་ངུར་གྱུར། ཆུང་ངུར་གྱུར་ནས་ཆེན་པོར་གྱུར་ཏོ། །བར་སྣང་དེ་ཉིད་ལ་མི་སྣང་བར་གྱུར་ཏེ་ས་ལས་བྱུང་ངོ༌། །ས་ལས་བྱུང་ནས་ནམ་མཁའ་ལ་འཕགས་སོ། །རིགས་ ཀྱི་བུ་དག །ཁྱེའུ་དེ་གཉིས་ཀྱིས་རྫུ་འཕྲུལ་གྱི་ཆོ་འཕྲུལ་དེ་སྙེད་ཀྱིས་རང་གི་ཕ་རྒྱལ་པོ་དགེ་བ་བཀོད་པ་བཏུལ་ལོ། །རིགས་ཀྱི་བུ་དག །དེ་ནས་རྒྱལ་པོ་དགེ་བ་བཀོད་པས་ཁྱེའུ་ དེ་གཉིས་ཀྱི་རྫུ་འཕྲུལ་གྱི་ཆོ་འཕྲུལ་དེ་དག་མཐོང་ནས། དེའི་ཚེ་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་བདེ་བ་དང༌། ཡིད་བདེ་བ་སྐྱེས་ནས་སོར་མོ་བཅུའི་ཐལ་མོ་སྦྱར་ ཏེ། ཁྱེའུ་དེ་དག་ལ་འདི་སྐད་ཅེས། རིགས་ཀྱི་བུ་དག །ཁྱོད་ཀྱི་སྟོན་པ་སུ། ཁྱེད་སུའི་སློབ་མ་ཞེས་སྨྲས་སོ། །རིགས་ཀྱི་བུ་དག །དེ་ནས་ཁྱེའུ་དེ་གཉིས་ཀྱིས་རྒྱལ་པོ་དགེ་བ་ བཀོད་པ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་ སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ་བཞུགས་ཏེ་འཚོ་ཞིང་གཞེས་ལ་རིན་པོ་ཆེའི་ཤིང་བྱང་ཆུབ་ཀྱི་ཤིང་དྲུང་ན་ཆོས་ཀྱི་གདན་ལ་བཞུགས་ཏེ། ལྷ་དང་བཅས། བདུད་དང་བཅས། ཚངས་པ་དང་བཅས་པའི་མདུན་ན་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་རྒྱས་པར་རབ་ཏུ་འཆད་པའི་བཅོམ་ལྡན་འདས་དེ་ནི་བདག་ཅག་གི་སྟོན་པ་སྟེ། རྒྱལ་པོ་ཆེན་པོ། བདག་ཅག་ནི་དེའི་སློབ་མའོ། །རིགས་ཀྱི་བུ་དག །དེ་ནས་རྒྱལ་པོ་དགེ་བ་བཀོད་པས་ཁྱེའུ་དེ་གཉིས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག །ཁྱེད་ཀྱི་སྟོན་པ་ བལྟ་ཞིང་བཅོམ་ལྡན་འདས་དེའི་དྲུང་དུ་བདག་ཀྱང་འགྲོའོ། །རིགས་ཀྱི་བུ་དག །དེ་ནས་ཁྱེའུ་དེ་གཉིས་པར་སྣང་དེ་ལས་བབས་ནས། བདག་ཅག་སྐྱེད་པའི་མ་ག་ལ་བ་དེར་སོང་སྟེ། ཕྱིན་ནས་སོར་མོ་བཅུའི་ཐལ་མོ་སྦྱར་ཏེ། བདག་ཅག་སྐྱེད་པའི་མ་ལ་འདི་སྐད་ཅེས་སྨྲས་སོ། །ཡུམ། བདག་ཅག་གི་ཡབ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ བཏུལ་ལགས་སོ། །བདག་ཅག་གིས་ཡབ་ཀྱི་སྟོན་པའི་བགྱི་བ་བགྱིས་སོ། །བདག་ཅག་བཅོམ་ལྡན་འདས་དེ་ལས་རབ་ཏུ་འབྱུང་ན། ཡུམ། ད་ནི་བདག་ཅག་གཏང་བའི་རིགས་ སོ། །རིགས་ཀྱི་བུ་དག །དེ་ནས་ཁྱེའུ་དྲི་མ་མེད་པའི་སྙིང་པོ་དང༌། ཁྱེའུ་དྲི་མ་མེད་པའི་མིག་གིས་དེའི་ཚེ་བདག་ཅག་སྐྱེད་པའི་མ་ལ་ཚིགས་སུ་བཅད་པ་འདི་དག་སྨྲས་སོ། །ཁྱིམ་མེད་ རབ་ཏུ་འབྱུང་བར་ནི། །ཡུམ་གྱིས་བདག་ཅག་གནང་བར་མཛོད། །དེ་བཞིན་གཤེགས་པ་རྙེད་པར་དགའ། །བདག་ཅག་རབ་ཏུ་འབྱུང་བར་བགྱི། །ཨུ་དུམྦཱ་རའི་མེ་ཏོག་བཞིན། །རྒྱལ་ ༄༅། །བ་ཤིན་ཏུ་རྙེད་པར་དཀའ། །དལ་བ་འབྱོར་པའང་རྙེད་དཀའ་བས། །རབ་ཏུ་འབྱུང་གི་གཏང་དུ་གསོལ། །རྒྱལ་པོའི་ཆུང་མ་དྲི་མ་མེད་པས་བྱིན་པས་སྨྲས་ པ༑ དེ་རིང་ཁྱེད་གཉིས་གཏང་བར་བྱ། །བྱིས་པ་དག་གོ་ལེགས་པ་དེང༌། །དེ་བཞིན་གཤེགས་པ་རྙེད་དཀའ་བས། །བདག་ཀྱང་རབ་ཏུ་བྱུང་བར་བྱ། །རིགས་ཀྱི་བུ་དག །ཁྱེའུ་ དེ་དག་གིས་ཚིགས་སུ་བཅད་པ་འདི་དག་སྨྲས་ནས། བདག་གི་ཕ་དང་མ་ལ་འདི་སྐད་ཅེས་སྨྲས་སོ། །ཡབ་ཡུམ། ལེགས་སོ། །ཚུར་སྤྱོན། ཁྱེད་དང་ཐམས་ཅད་ལྷན་ཅིག་ བཞུད་དོ། །བཅོམ་ལྡན་འདས་དེ་ལ་བལྟ་བ་དང༌། ཕྱག་བགྱི་བ་དང༌། བསྙེན་བཀུར་བགྱི་བའི་སླད་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་དྲུང་དུ་བཞུད་དོ། །དེ་ཅིའི་སླད་དུ་ཞེ་ན། ཡབ་ཡུམ། སངས་རྒྱས་འབྱུང་བ་རྙེད་ པར་དཀའ་སྟེ། ཨུ་དུམྦཱ་རའི་མེ་ཏོག་དང་འདྲ་ཞིང་གཉའ་ཤིང་གི་བུ་གར་རུས་སྦལ་གྱི་མགྲིན་པ་ཆུད་པ་དང་འདྲ་བའི་སླད་དུའོ། །ཡབ་ཡུམ། སངས་རྒྱས་བཅོམ་ལྡན་འདས་དག་ འབྱུང་བ་རྙེད་པར་དཀའ་སྟེ། དེ་བས་ན། ཡབ་ཡུམ། བདག་ཅག་བསོད་ནམས་མཆོག་གིས་བརྟན་པས་གསུང་རབ་འདི་ལྟ་བུ་ལ་སྐྱེས་ཏེ། ཡབ་ཡུམ། བདག་ཅག་བཏང་ན་ ལེགས་ཏེ་བདག་ཅག་མཆི་ཞིང༌། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་ རྒྱས་པའི་བསྟན་པ་ལ་རབ་ཏུ་བྱུང་ངོ༌། །དེ་ཅིའི་སླད་དུ་ཞེ་ན། ཡབ་ཡུམ། དེ་བཞིན་གཤེགས་པ་མཐོང་བ་རྙེད་པར་དཀའ་བ་དང༌། ད་ལྟར་གྱི་དུས་ན་འདི་འདྲ་བའི་ཆོས་ཀྱི་རྒྱལ་པོ་རྙེད་པར་ དཀའ་བ་དང༌། འདི་ལྟ་བུའི་དལ་བ་འབྱོར་པ་ཤིན་ཏུ་རྙེད་པར་དཀའ་བའི་སླད་དུའོ། །རིགས་ཀྱི་བུ་དག །དེའི་ཚེ་ན། རྒྱལ་པོ་དགེ་བ་བཀོད་པ་དེའི་བཙུན་མོའི་འཁོར་ལས་སླས་བརྒྱད་ཁྲི་ བཞི་སྟོང་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདིའི་སྣོད་དུ་གྱུར་ཏོ། །ཁྱེའུ་དྲི་མ་མེད་པའི་སྙིང་པོ་དང༌། དྲི་མ་མེད་པའི་མིག་གིས་ཆོས་ཀྱི་རྣམ་གྲངས་འདི་ལ་སྤྱད་དེ། བསྐལ་ པ་བྱེ་བ་ཁྲག་ཁྲིག་བརྒྱ་སྟོང་དུ་ངན་སོང་ཐམས་ཅད་ཇི་ལྟར་བསལ་སྙམ་ནས། སེམས་ཅན་ཐམས་ཅད་ཀྱི་ངན་སོང་ཐམས་ཅད་སེལ་བའི་ཏིང་ངེ་འཛིན་ལ་སྤྱད་པར་གྱུར་ཏོ། །ཁྱེའུ་དེ་དག་ གི་མ་དྲི་མ་མེད་པས་བྱིན་པ་རྒྱལ་པོའི་ཆུང་མ་དེའང་སངས་རྒྱས་ཐམས་ཅད་ཀྱིས་ཀུན་བསྟན་པ། སངས་རྒྱས་ཐམས་ཅད་ཀྱི་ཆོས་གསང་བའི་གནས་ཤེས་སོ། །རིགས་ཀྱི་བུ་དག། དེ་ནས་ཁྱེའུ་དེ་གཉིས་ཀྱིས་རྒྱལ་པོ་དགེ་བ་བཀོད་པ་དེ་བཞིན་གཤེགས་པའི་བསྟན་པ་ལ་བཏུལ་ཏེ་ཞུགས་པར་བྱས་ནས་ཡོངས་སུ་སྨིན་པར་བྱས་ཏེ། གཉེན་འདབ་དང༌། རྒྱལ་པོའི་ ༄༅། །ཆུང་མ་དྲི་མ་མེད་པས་ཕྱིན་པ་དེ་དང༌། གཉེན་འདབ་དང༌། རྒྱལ་པོ་དགེ་བ་བཀོད་པའི་ཁྱེའུ་དེ་གཉིས་ཀྱང༌། སྲོག་ཆགས་བཞི་ཁྲི་ཉིས་སྟོང་དང་བཙུན་ མོའི་འཁོར་དང་བཅས་བློན་པོ་དང་བཅས་ཏེ། ཐམས་ཅད་འགྲོགས་ནས་ལྷན་ཅིག་ཏུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ག་ལ་བ་དེར་དོང་སྟེ། ལྷགས་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་ འདས་ལ་ལན་བདུན་དུ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །རིགས་ཀྱི་བུ་དག །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེས། རྒྱལ་པོ་དགེ་བ་བཀོད་པ་འཁོར་དང་བཅས་ཏེ་ལྷགས་པར་མཁྱེན་ནས། ཆོས་ཀྱི་ གཏམ་གྱིས་ཤིན་ཏུ་ལེགས་པར་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དོ། །རིགས་ ཀྱི་བུ་དག །དེ་ནས་བཅོམ་ལྡན་འདས་དེས་རྒྱལ་པོ་དགེ་བ་བཀོད་པ་ལ། ཆོས་ཀྱི་གཏམ་གྱིས་ཤིན་ཏུ་ལེགས་པར་ཡང་དག་པར་བསྟན། ཡང་དག་པར་འཛིན་དུ་བཅུག་ ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་པས། དེའི་ཚེ་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས། ནུ་བོ་ཅོད་ པན་གྱིས་བཅིངས་ཏེ། རྒྱལ་པོར་བཅུག་ནས་བུ་དང༌། གཉེན་འདབ་དང༌། འཁོར་དང་བཅས་པ་དང༌། རྒྱལ་པོའི་ཆུང་མ་དྲི་མ་མེད་པས་བྱིན་པ་དེའང༌། བུད་མེད་ཀྱི་ཚོགས་ཐམས་ཅད་ དང༑ འཁོར་དང༌། ཁྱེའུ་དེ་གཉིས་དང་ལྷན་ཅིག་ཏུ་སྲོག་ཆགས་བརྒྱད་ཁྲི་བཞི་སྟོང་དང་ལྷན་ཅིག་འགྲོགས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་གསུང་རབ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། རབ་ཏུ་བྱུང་ནས་རྒྱལ་ པོ་དགེ་བ་བཀོད་པ་འཁོར་དང་བཅས་པས་ལོ་བརྒྱད་ཁྲི་བཞི་སྟོང་དུ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ལ་བསམ་པ་དང༌། བསྒོམ་པ་དང༌། ཀུན་ཆུབ་པར་བྱ་བ་ ལ་བརྩོན་པར་འགྱུར་རོ། །རིགས་ཀྱི་བུ་དག །དེ་ནས་རྒྱལ་པོ་དགེ་བ་བཀོད་པ་ལོ་བརྒྱད་ཁྲི་བཞི་སྟོང་འདས་ནས། ཡོན་ཏན་གྱི་རྒྱན་ཐམས་ཅད་བཀོད་པ་ཞེས་བྱ་བའི་ཏིང་ངེ་འཛིན་ ཐོབ་སྟེ། ཏིང་ངེ་འཛིན་དེ་ཐོབ་མ་ཐག་ཏུ་དེའི་ཚེ་ནམ་མཁའ་ལ་ཏ་ལ་བདུན་ཙམ་དུ་འཕགས་སོ། །དེ་ནས། རིགས་ཀྱི་བུ་དག །རྒྱལ་པོ་དགེ་བ་བཀོད་པ་ནམ་མཁའི་དཀྱིལ་དུ་ ༄༅། །འདུག་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་ མེ་ཏོག་ཀུན་ཏུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གི་བུ་འདི་གཉིས་སྟོན་པ་ལགས་ཏེ། གང་འདི་དག་གིས་རྫུ་འཕྲུལ་གྱིས་ལྟ་བར་གྱུར་པ་ཆེན་པོ་ དེ་ལས་བཟློག་སྟེ། དེ་བཞིན་གཤེགས་པའི་བསྟན་པ་ལ་རབ་ཏུ་བཞག་གོ །ཡོངས་སུ་སྨིན་པར་བགྱིས། ཞུགས་པར་བགྱིས་སོ། །དེ་བཞིན་གཤེགས་པ་ལ་ང་ལྟ་བ་དང༌། ཕྱག་བགྱི་བའི་སླད་དུའང་བསྐུལ་ལོ། །བཅོམ་ལྡན་འདས། ཁྱེའུ་འདི་གཉིས་བདག་གི་དགེ་བའི་བཤེས་གཉེན་ཏེ། སྔོན་གྱི་དགེ་བའི་རྩ་བ་དྲན་པར་བགྱི་བའི་སླད་དུ། བུའི་ གཟུགས་ཀྱི་བདག་གི་ཁྱིམ་དུ་སྐྱེས་སོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་ སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པས་རྒྱལ་པོ་དགེ་བ་བཀོད་པ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ། དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། ། དགེ་བའི་རྩ་བ་བསྐྱེད་པའི་རིགས་ཀྱི་བུའམ་རིགས་ཀྱི་བུ་མོ་རྣམས་ནི་སྲིད་པའི་འགྲོ་བ་དང་འཆི་འཕོའི་གནས་ཐམས་ཅད་དུ་སྐྱེས་པ་ནའང༌། གང་དག་སྟོན་པའི་བྱེད་པས་ཉེ་ པར་གནས་པ་དང༌། གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་དང༌། འཛུད་པ་དང༌། ཡོངས་སུ་སྨིན་པར་བྱེད་པའི་དགེ་བའི་བཤེས་གཉེན་རྣམས་ རྙེད་པར་སླ་བར་འགྱུར་རོ། །རྒྱལ་པོ་ཆེན་པོ། འདི་ལྟ་སྟེ། དགེ་བའི་བཤེས་གཉེན་གྱིས་ཡོངས་སུ་ཟིན་པ། དེ་བཞིན་གཤེགས་པ་ལྟར་འཛུད་པ་གནས་འདི་ནི་རྒྱ་ཆེ་བའོ། །རྒྱལ་པོ་ཆེན་ པོ༑ ཁྱེའུ་འདི་གཉིས་མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། །བདེ་བར་གཤེགས་པ། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་ པོ་ཆེན་པོ༑ ཁྱེའུ་འདི་གཉིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་དྲུག་ཅུ་རྩ་ལྔའི་བྱེ་མ་སྙེད་ལ་མཆོད་པ་བྱེད་དོ། །སེམས་ཅན་རྣམས་ ལ་སྙིང་བརྩེ་བའི་ཕྱིར་ལོག་པར་ལྟ་བའི་སེམས་ཅན་རྣམས་ཡང་དག་པར་ལྟ་བ་ལ་བརྩོན་འགྲུས་བསྐྱེད་པའི་ཕྱིར་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་འཛིན་པར་ འགྱུར་རོ། །རིགས་ཀྱི་བུ་དག །དེ་ནས་རྒྱལ་པོ་དགེ་བ་བཀོད་པ་ནམ་མཁའི་དཀྱིལ་འཁོར་དེ་ནས་བབས་ཏེ། སོར་མོ་བཅུའི་ཐལ་མོ་སྦྱར་ནས་བཅོམ་ལྡན་འདས་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་ ༄༅། །གཤེགས་པ་ཇི་ལྟ་བུའི་ཡེ་ཤེས་དང་ལྡན་པས། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་གང་གི་སླད་དུ་དབུའི་གཙུག་ཏོར་རྣམ་པར་མཛེས། སྤྱན་དྲི་མ་མ་མཆིས་པ་ལགས། སྨིན་མཚམས་ཀྱི་མཛོད་སྤུ་མཛེས་ཤིང༌། ཟླ་བ་དུང་ལྟར་དཀར་ལ་མཛེས། མཉམ་ ཞིང་ཐགས་བཟང་བའི་ཚེམས་ཀྱི་ཕྲེང་བ་ཞལ་གྱི་ནང་ནས་མཛེས། བཅོམ་ལྡན་འདས་ཀྱི་ཞལ་གྱི་སྒྲོས་མེ་ཏོག་བིམྦ་ལྟར་དམར་བ་དང༌། བདེ་བར་གཤེགས་པའི་སྤྱན་མཛེས་ པ་དེ་བཞིན་གཤེགས་པས་ལེགས་པར་བཤད་དུ་གསོལ། རིགས་ཀྱི་བུ་དག །དེ་ནས་རྒྱལ་པོ་དགེ་བ་བཀོད་པས་ཡོན་ཏན་དེ་སྙེད་ཀྱིས། བཅོམ་ལྡན་འདས་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ་ལ་མངོན་པར་བསྟོད་ནས། ཡོན་ཏན་བྱེ་བ་ཁྲག་ ཁྲིག་བརྒྱ་སྟོང་གཞན་དག་གིས་ཀྱང་བཅོམ་ལྡན་འདས་དེ་ལ་བསྟོད་དོ། །དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ཙམ་དུ་དེ་བཞིན་གཤེགས་པའི་བསྟན་པ་འདི་ དོན་ཆེ་ཞིང༌། ཡོན་ཏན་བསམ་གྱིས་མི་ཁྱབ་པ་དང་ལྡན་པའི་ཆོས་འདུལ་བ་གསུངས་ཏེ། ཇི་ཙམ་དུ་དེ་བཞིན་གཤེགས་པས་བསླབ་པ་ལེགས་པར་བཅས་པ་ནི་ངོ་མཚར་ཏོ། །བཅོམ་ ལྡན་འདས། དེང་སླན་ཆད་བདག་སླར་སམས་ཀྱི་དབང་དུ་མཆི་བར་མི་བགྱིའོ། །སླར་ལོག་པར་ལྟ་བའི་དབང་དུ་མཆི་བར་མི་བགྱིའོ། །སླར་ཁྲོ་བའི་དབང་དུ་མཆི་བར་མི་བགྱིའོ། ། སླར་སྡིག་པའི་སེམས་བསྐྱེད་པའི་དབང་དུ་མཆི་བར་མི་བགྱིའོ། །བཅོམ་ལྡན་འདས། བདག་མི་དགེ་བའི་ཆོས་འདི་སྙེད་དང་ལྡན་ན། བཅོམ་ལྡན་འདས་ཀྱི་དྲུང་དུ་མཆི་བར་མ་ འཚལ་ལོ་ཞེས་སྨྲས་ཏེ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ ཏུ་རྒྱས་པའི་ཞབས་ལ་མགོ་བོས་ཕྱག་བཙལ་ནས་བར་སྣང་ལ་སོང་སྟེ་འཆག་གོ །དེ་ནས་རྒྱལ་པོ་དགེ་བ་བཀོད་པ་དང༌། རྒྱལ་པོའི་ཆུང་མ་དྲི་མ་མེད་པས་བྱིན་པ་དེས། བརྒྱ་སྟོང་རི་ བའི་མུ་ཏིག་གི་རྒྱན་ཕྲེང་བཅོམ་ལྡན་འདས་ཀྱི་སྟེང་གི་བར་སྣང་ལ་གཏོར་ལ་གཏོར་ཏོ། །མུ་ཏིག་གི་རྒྱན་ཕྲེང་དེ་གཏོར་མ་ཐག་ཏུ་བཅོམ་ལྡན་འདས་ཀྱི་སྟེང་ན། མུ་ཏིག་གི་རྒྱན་ཕྲེང་གི་ཁང་ པ་བརྩེགས་པ་གྲུ་བཞི་ལྷམ་པ། ཀ་བ་བཞི་ཟུག་པ། ངོས་མཉམ་པ་ཤིན་ཏུ་རྣམ་པར་ཕྱེ་བ་བལྟ་ན་སྡུག་པ་གནས་པར་གྱུར་ཏེ། ཁང་པ་བརྩེགས་པ་དེར་རས་བཅོས་བུ་བརྒྱ་སྟོང་ ༄༅། །དུ་མ་བཏིང་བའི་ཁྲི་བྱུང་ངོ༌། །ཁྲི་དེ་དག་ལ་དེ་བཞིན་གཤེགས་པའི་སྐུ་སྐྱིལ་མོ་ཀྲུང་བཅས་ཏེ་བཞུགས་པར་སྣང་ངོ༌། །དེ་ནས་རྒྱལ་པོ་དགེ་བ་བཀོད་པ་ འདི་སྙམ་དུ་སེམས་ཏེ། སངས་རྒྱས་ཀྱི་ཡེ་ཤེས་འདི་ནི་མཐུ་ཆེ་ཞིང༌། དེ་བཞིན་གཤེགས་པ་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པས་འདི་ལྟར་དེ་བཞིན་གཤེགས་པའི་ སྐུ་ཁང་པ་བརྩེགས་པའི་དབུས་ན་མཛེས་ཤིང་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པར་གདའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པས་འཁོར་བཞི་པོ་དེ་དག་ལ་བཀའ་སྩལ་པ། དགེ་སློང་དག །རྒྱལ་པོ་དགེ་བ་བཀོད་པ་ནམ་མཁའི་དཀྱིལ་ན་ འདུག་ཅིང་སེང་གེའི་སྒྲ་སྒྲོགས་པ་མཐོང་ངམ། གསོལ་པ། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག །རྒྱལ་པོ་དགེ་བ་བཀོད་པས་ངའི་ བསྟན་པ་ལ་དགེ་སློང་གི་ཚུལ་དུ་བྱས་ནས། བསྐལ་པ་མངོན་འཕགས་རྒྱལ་པོ་ཞེས་བྱ་བ་ལ་འཇིག་རྟེན་གྱི་ཁམས་ཡངས་ལྡན་དུ། དེ་བཞིན་གཤེགས་པ་དགྲ་བཅོམ་པ་ ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་ རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སཱ་ལའི་དབང་པོའི་རྒྱལ་པོ་ཞེས་བྱ་བར་འཇིག་རྟེན་དུ་འབྱུང་སྟེ། དགེ་སློང་དག །དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་སཱ་ལའི་དབང་པོའི་རྒྱལ་པོ་དེའི་བྱང་ཆུབ་སེམས་དཔའི་དགེ་འདུན་དཔག་ཏུ་མེད་པ་དང༌། ཉན་ཐོས་ཀྱི་དགེ་འདུན་དཔག་ཏུ་མེད་པར་འགྱུར་རོ། །འཇིག་རྟེན་ གྱི་ཁམས་ཡངས་ལྡན་ཡང༌། ལག་མཐིལ་ལྟར་མཉམ་པར་འགྱུར་རོ། །དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ཡོན་ཏན་བསམ་གྱིས་ མི་ཁྱབ་པར་འགྱུར་རོ། །རིགས་ཀྱི་བུ་དག །དེའི་ཚེ་དེའི་དུས་ན་རྒྱལ་པོ་དགེ་བ་བཀོད་པ་ཞེས་བྱ་བར་གྱུར་པ་དེ། གཞན་ཞིག་ཡིན་སྙམ་དུ་ཁྱོད་སོམ་ཉིའམ། ཡིད་གཉི་སམ། ཐེ་ ཚོམ་ཟ་བར་གྱུར་ན། རིགས་ཀྱི་བུ་དག །ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་པདྨའི་དཔལ་འདི་ཉིད་དེའི་ཚེ་དེའི་དུས་ན་ རྒྱལ་པོ་དགེ་བ་བཀོད་པ་ཞེས་བྱ་བར་གྱུར་ཏོ། །རིགས་ཀྱི་བུ་དག །དེའི་ཚེ་དེའི་དུས་ན་རྒྱལ་པོའི་ཆུང་མ་དྲི་མ་མེད་པས་བྱིན་པ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སོམ་ ཉིའམ། ཡིད་གཉིས་སམ། ཐེ་ཚོམ་ཟ་བར་གྱུར་ན། རིགས་ཀྱི་བུ་དག །ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་ ༄༅། །བའི་འོད་ཟེར་གྱིས་བརྒྱན་པའི་རྒྱལ་མཚན་ཞེས་བྱ་བ་འདི་ཉིད་དེའི་ཚེ་དེའི་དུས་ན། རྒྱལ་པོའི་ཆུང་མ་དྲི་མ་མེད་པས་བྱིན་པ་ཞེས་བྱ་བར་གྱུར་ཏེ། རྒྱལ་པོ་ དགེ་བ་བཀོད་པ་དང༌། སེམས་ཅན་དེ་དག་ལ་སྙིང་བརྩེ་བའི་ཕྱིར་རྒྱལ་པོ་དགེ་བ་བཀོད་པའི་ཆུང་མར་ཁས་བླངས་པར་གྱུར་ཏོ། །རིགས་ཀྱི་བུ་དག །དེའི་ཚེ་དེའི་དུས་ན་ཁྱེའུ་དེ་གཉིས་ སུ་གྱུར་པ་དེ། གཞན་དག་ཞིག་ཡིན་པ་སྙམ་དུ་ཁྱེད་སོམ་ཉིའམ། ཡིད་གཉིས་སམ། ཐེ་ཚོམ་ཟ་བར་གྱུར་ན། རིགས་ཀྱི་བུ་དང་།ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ ན༑ སྨན་གྱི་རྒྱལ་པོ་དང༌། སྨན་ཡང་དག་འཕགས་འདི་གཉིས་དེའི་ཚེ་དེའི་དུས་ན། རྒྱལ་པོ་དགེ་བ་བཀོད་པའི་བུར་གྱུར་ཏོ། །རིགས་ཀྱི་བུ་དག །དེ་ལྟར་བྱང་ཆུབ་སེམས་དཔའ་ སེམས་དཔའ་ཆེན་པོ་སྨན་གྱི་རྒྱལ་པོ་དང༌། སྨན་ཡང་དག་འཕགས་གཉིས་ཡོན་ཏན་བསམ་གྱིས་མི་ཁྱབ་པ་དང་ལྡན་ཏེ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་དགེ་ བའི་རྩ་བ་བསྐྱེད་པའོ། །སྐྱེས་བུ་དམ་པ་འདི་གཉིས་ཀའང་བསམ་གྱིས་མི་ཁྱབ་པའི་ཆོས་ཀྱིས་ཡང་དག་པར་འཕགས་སོ། །གང་དག་སྐྱེས་བུ་དམ་པ་འདི་གཉིས་ཀྱི་མིང་ འཛིན་པ་དེ་དག་ཐམས་ཅད་ཀྱིས་ཀྱང་ལྷ་དང་བཅས་པའི་འཇིག་རྟེན་གྱིས་ཕྱག་བྱས་པར་འགྱུར་རོ། །སྔོན་གྱི་སྦྱོར་བའི་ལེའུ་འདི་བཤད་པ་ན། སྲོག་ཆགས་བརྒྱད་ཁྲི་བཞི་ སྟོང་ཆོས་རྣམས་ལ་ཆོས་ཀྱི་མིག་རྔུལ[?] མེད་ཅིང་དྲི་མ་དང་བྲལ་བ་རྣམ་པར་དག་གོ །དམ་པའི་ཆོས་པདྨ་དཀར་པོ་ལས། རྒྱལ་པོ་དགེ་བ་བཀོད་པའི་སྔོན་གྱི་སྦྱོར་བའི་ལེའུ་ ཞེས་བྱ་སྟེ་ཉི་ཤུ་རྩ་ལྔ་པའོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ། བྱང་ཆུབ་སེམས་དཔའ་སེམས་དཔའ་ཆེན་པོ་བགྲང་བ་ལས་ འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་ པོ་དང༌། མི་དང་མི་མ་ཡིན་པ་དག་གིས་ཀྱང་ཡོངས་སུ་བསྐོར་ཅིང་མདུན་དུ་བདར་ཏེ། ལྷན་ཅིག་ཏུ་ཤར་ཕྱོགས་ནས་ཞིང་དག་ནི་རབ་ཏུ་གཡོ་བར་བྱེད། པདྨའི་ཆར་ནི་རབ་ཏུ་འབེབས་ སིལ་སྙན་བྱེ་བ་ཁྲག་ཁྲིག་བརྒྱ་སྟོང་ནི་རབ་ཏུ་ལེན་ཅིང༌། བྱང་ཆུབ་སེམས་དཔའི་མཐུ་ཆེན་པོ་དང༌། བྱང་ཆུབ་སེམས་དཔའི་རྣམ་པར་འཕྲུལ་པ་ཆེན་པོ་དང༌། བྱང་ཆུབ་སེམས་ དཔའི་རྫུ་འཕྲུལ་ཆེན་པོ་དང༌། བྱང་ཆུབ་སེམས་དཔའི་ཆེ་བ་ཉིད་དང༌། བྱང་ཆུབ་སེམས་དཔའི་གཟི་བརྗིད་ཆེན་པོ་འབར་བ་དང༌། བྱང་ཆུབ་སེམས་དཔའི་ཐེག་པ་ཆེན་པོ་དང་ བྱང་ཆུབ་སེམས་དཔའི་རྫུ་འཕྲུལ་ཆེན་པོ་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་ ༄༅། །དང༌། མི་དང་མི་མ་ཡིན་པའི་རྣམ་པར་འཕྲུལ་པ་ཆེན་པོ་དང༌། དེ་ལྟར་རྫུ་འཕྲུལ་གྱི་ཆོ་འཕྲུལ་བསམ་གྱིས་མི་ཁྱབ་པ་དག་གིས་བྱང་ཆུབ་སེམས་དཔའ་ སེམས་དཔའ་ཆེན་པོ་ཀུན་ཏུ་བཟང་པོ་འཇིག་རྟེན་གྱི་ཁམས་མི་མཇེད་འདིར་ཕྱིན་ནས། དེ་རིའི་རྒྱལ་པོ་བྱ་རྒོད་ཀྱི་ཕུང་པོ་ག་ལ་བ་དང༌། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ ནས༑ བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་ལན་བདུན་སྐོར་བ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས། བདག་བཅོམ་ལྡན་འདས་དེ་བཞིན་གཤེགས་པ་དཀོན་མཆོག་གཟི་བརྗིད་མངོན་འཕགས་རྒྱལ་པོའི་སངས་རྒྱས་ཀྱི་ཞིང་ནས་འདིར་མཆིས་ཏེ། བཅོམ་ ལྡན་འདས། འཇིག་རྟེན་གྱི་ཁམས་མི་མཇེད་འདི་ན་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སྟོན་པ་དེ་མཉན་པའི་སླད་དུ་བཅོམ་ལྡན་འདས་དེ་བཞིན་གཤེགས་ པ་ཤཱཀྱ་ཐུབ་པའི་དྲུང་དུ་བདག་མཆིས་སོ། །བཅོམ་ལྡན་འདས། བྱང་ཆུབ་སེམས་དཔའ་བརྒྱ་སྟོང་འདི་སྙེད་འདི་དག་ཀྱང༌། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་ གྲངས་འདི་མཉན་པའི་སླད་དུ་མཆིས་སོ། །དེའི་སླད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་དམ་པའི་ཆོས་ པདྨ་དཀར་པོའི་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་རྣམས་ལ་རྒྱ་ཆེར་ལེགས་པར་བཤད་དུ་གསོལ། དེ་སྐད་ཅེས་གསོལ་ནས། བཅོམ་ལྡན་ འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ ནི་མགོ་སྨོས་པ་ཙམ་གྱིས་ཁོང་དུ་ཆུད་པ་ཤ་སྟག་གོ །དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ནི་འདི་ལྟ་སྟེ། དེ་བཞིན་ཉིད་དང༌། ཡང་དག་པའི་མཐའ་དང༌། ཆོས་ཀྱི་ དབྱིངས་དང་དབྱེར་མེད་པའོ། །བྱང་ཆུབ་སེམས་དཔའ་དེ་དག་གིས་གསོལ་པ། བཅོམ་ལྡན་འདས། དེ་དེ་ལྟ་ལགས་སོ། །བདེ་བར་གཤེགས་པ། དེ་དེ་ལྟ་ལགས་སོ། །དེ་ནས་ འཁོར་དེར་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་འདུས་པ་དེ་དག་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ལ་རབ་ཏུ་དགོད་པའི་ཕྱིར། ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ཆོས་བཞི་དང་ལྡན་པའི་བུད་མེད་ཀྱིས་ དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་ལག་ཏུ་ཐོབ་པར་འགྱུར་རོ། །བཞི་གང་ཞེ་ན། འདི་ལྟ་སྟེ། སངས་རྒྱས་བཅོམ་ལྡན་འདས་རྣམས་ཀྱིས་བྱིན་གྱིས་བརླབས་པར་ ༄༅། །འགྱུར་བ་དང༌། དགེ་བའི་རྩ་བ་བསྐྱེད་པར་འགྱུར་བ་དང༌། ངེས་པའི་ཕུང་པོ་ལ་གནས་པར་འགྱུར་བ་དང༌། སེམས་ཅན་ཐམས་ཅད་ཡོངས་སུ་བསྐྱབ་ པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་པ་སྟེ། རིགས་ཀྱི་བུ། ཆོས་བཞི་པོ་དེ་དག་དང་ལྡན་པའི་བུད་མེད་ཀྱིས་དམ་པའི་ཆོས་པདྨ་ དཀར་པོའི་ཆོས་ཀྱི་རྣམ་གྲངས་འདི་ལག་ཏུ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་འདི་སྐད་ཅེས་ གསོལ་ཏོ། །བཅོམ་ལྡན་འདས། བདག་གིས་སླད་མའི་ཚེ་སླད་མའི་དུས་ལྔ་བརྒྱའི་ཐ་མ་ལ། མདོ་སྡེ་འདི་ལྟ་བུ་འཛིན་པའི་དགེ་སློང་རྣམས་ལ་བསྲུང་བར་བགྱིའོ། །བདེ་ ལེགས་སུ་འགྱུར་བར་བགྱིའོ། །ཆད་པ་སྤང་བར་བགྱིའོ། །དུག་གཞིལ་བར་བགྱིའོ། །ཅི་ནས་ཆོས་སྨྲ་བ་དེ་དག་ལ་གླགས་ལྟ་བ་དང༌། སྐབས་འཚོལ་བ་གང་གིས་ཀྱང་ གླགས་རྙེད་པར་མི་འགྱུར་བ་དང༌། བདུད་སྡིག་ཅན་དང༌། བདུད་ཀྱི་བུ་རྣམས་དང༌། བདུད་ཀྱི་རིས་ཀྱི་ལྷའི་བུ་རྣམས་དང༌། བདུད་ཀྱི་བུ་མོ་རྣམས་དང༌། བདུད་ཀྱི་འཁོར་ གླགས་ལྟ་བ་དང༌། སྐབས་འཚོལ་བ་རྣམས་ཀྱིས་གླགས་མི་རྙེད་པར་འགྱུར་བས་ན། བདུད་ཀྱི་ཀུན་ནས་ལྡང་བའི་བར་དུ་འབྱུང་བར་མི་འགྱུར་བ་དང༌། ལྷའི་བུ་དང༌། གནོད་ སྦྱིན་དང༌། ཡི་དྭགས་དང༌། སྲུལ་པོ་དང༌། གཤེད་བྱེད་དང༌། རོ་ལངས་དག་ཆོས་སྨྲ་བ་དེ་ལ་གླགས་ལྟ་བ་དང་སྐབས་འཚོལ་བ་ནའང་སྐབས་རྙེད་པར་མི་འགྱུར་བར། བཅོམ་ལྡན་ འདས༑ བདག་གིས་ཆོས་སྨྲ་བ་དེ་ལ་རྟག་པར་རྒྱུན་དུ་དུས་ཐམས་ཅད་དུ་བསྲུང་བར་བགྱིའོ། །བསྐྱབ་པར་བགྱིའོ། །བཅོམ་ལྡན་འདས། གང་གི་ཚེ་ཆོས་སྨྲ་བ་དེ་ཆོས་ཀྱི་རྣམ་གྲངས་ འདི་ལ་སེམས་ཤིང༌། རྣལ་འབྱོར་ལ་བརྩོན་པ་དང༌། འཆག་པ་ལ་ཞུགས་པར་གྱུར་པ་དེའི་ཚེ་ཆོས་ཀྱིས་རྣམ་གྲངས་འདི་བསྲུང་བའི་སླད་དུ་བདག་གླང་པོ་ཆེའི་རྒྱལ་པོ་ཐལ་ཀར་མཆེ་ བ་དྲུག་པ་ལ་འཚལ་ཏེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ནས། ཆོས་སྨྲ་བ་དེའི་འཆག་པའི་གནས་སུ་ཆོས་སྨྲ་བ་དེའི་དྲུང་དུ་མཆི་བར་བགྱིའོ། །གང་གི་ཚེ་ཆོས་ སྨྲ་བ་དེ་ཆོས་ཀྱི་རྣམ་གྲངས་འདི་ལ་སེམས་ཤིང་རྣལ་འབྱོར་གྱི་རྗེས་སུ་ཞུགས་པ་དེས། ཆོས་ཀྱི་རྣམ་གྲངས་འདི་ལས་ཐ་ན་ཚིག་དང་ཡི་གེ་གཅིག་ཙམ་ཡང་ལན་འགའ་ནོར་བར་གྱུར་པ་ དེའི་ཚེ། བདག་གླང་པོ་ཆེའི་རྒྱལ་པོ་ཐལ་ཀར་མཆེ་བ་དྲུག་པ་ལ་འཚལ་ནས། ཆོས་སྨྲ་བ་དེ་ལ་བདག་གི་ངོ་བསྟན་ཏེ། ཆོས་ཀྱི་རྣམ་གྲངས་འདི་མ་ཉམས་པར་ཟློས་སུ་སྩལ་ཏོ། །ཆོས་ སྨྲ་བ་དེས་བདག་གི་ལུས་མཐོང་ཞིང་ཆོས་ཀྱི་རྣམ་གྲངས་འདི་མ་ཉམས་པར་བདག་ལ་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་ཆོས་ ༄༅། །ཀྱི་རྣམ་གྲངས་འདི་ལ་བརྩོན་འགྲུས་རྩོམ་མོ། །བདག་མཐོང་མ་ཐག་ཏུ་ཏིང་ངེ་འཛིན་ཐོབ་པར་འགྱུར་རོ། །གཟུངས་འཁྱིལ་བ་ཞེས་བགྱི་བའི་གཟུངས་ ཐོབ་པར་འགྱུར་རོ། །བྱེ་བ་བརྒྱ་སྟོང་དུ་འཁྱིལ་བ་ཞེས་བགྱི་བའི་གཟུངས་ཐོབ་པར་འགྱུར་རོ། །སྒྲ་ཐམས་ཅད་ལ་མཁས་པ་ཞེས་བགྱི་བའི་གཟུངས་ཐོབ་པར་འགྱུར་རོ། །བཅོམ་ ལྡན་འདས། སླད་མའི་ཚེ་སླད་མའི་དུས་ལྔ་བརྒྱ་པ་ཐ་མ་ལ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་དག་མདོ་སྡེ་འདི་ལྟ་བུ་འཛིན་པ་དང༌། མདོ་ སྡེ་འདི་ལྟ་བུ་ཡི་གེར་འདྲི་བ་དང༌། མདོ་སྡེ་འདི་ལྟ་བུ་འཚོལ་བ་དང༌། མདོ་སྡེ་འདི་ལྟ་བུ་ཀློག་པ་དང༌། གང་དག་སླད་མའི་ཚེ་སླད་མའི་དུས་ལྔ་བརྒྱ་པ་ཐ་མ་ལ་ཆོས་ཀྱི་རྣམ་གྲངས་ འདིའི་ཆེད་དུ། གདུགས་བདུན་གསུམ་ཉི་ཤུ་རྩ་གཅིག་ཏུ་འཆག་ཅིང་བརྩོན་པར་གྱུར་ན། དེ་དག་ལ་བདག་གིས་སེམས་ཅན་ཐམས་ཅད་ཀྱིས་མཐོང་ན་དགའ་བའི་ལུས་བསྟན་ པར་བགྱིའོ། །གླང་པོ་ཆེའི་རྒྱལ་པོ་ཐལ་ཀར་མཆེ་བ་དྲུག་པ་ལ་འཚལ་ཏེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ནས། གདུགས་ཉི་ཤུ་རྩ་གཅིག་པ་ལ་ཆོས་ སྨྲ་བ་དེ་དག་འཆག་པའི་ཐད་དུ་མཆིའོ། །མཆིས་ནས་ཆོས་སྨྲ་བ་དེ་དག་ལ་ཡང་དག་པར་བསྟན་པར་བགྱིའོ། །ཡང་དག་པར་འཛིན་དུ་སྩལ་བར་བགྱིའོ། །ཡང་དག་པར་ གཟེངས་བསྟོད་པར་བགྱིའོ། །ཡང་དག་པར་རབ་ཏུ་དགའ་བར་བགྱིའོ། །དེ་དག་ལ་གཟུངས་ཀྱང་སྩལ་བར་བགྱིའོ། །ཅི་ནས་ཆོས་སྨྲ་བ་དེ་དག་ལ་སུས་ཀྱང་མི་ཚུགས་པར་འགྱུར་བ་ དང༑ དེ་དག་ལ་མིའམ་མི་མ་ལགས་པས་གླགས་མི་རྙེད་པར་འགྱུར་བ་དང༌། བུད་མེད་ཀྱིས་འཕྲོགས་པར་མི་འགྱུར་བར་དེ་དག་ལ་བསྲུང་བར་བགྱིའོ། །བདེ་ལེགས་སུ་འགྱུར་བར་ བགྱིའོ། །ཆད་པ་སྤང་བར་བགྱིའོ། །དུག་གཞིལ་བར་བགྱིའོ། །བཅོམ་ལྡན་འདས། ཆོས་སྨྲ་བ་དེ་དག་ལ་བདག་གིས་གཟུངས་སྔགས་ཀྱི་ཚིགས་འདི་དག་སྩལ་བར་བགྱིའོ། ། བཅོམ་ལྡན་འདས། གཟུངས་སྔགས་ཀྱི་ཚིགས་འདི་དག་གསན་དུ་གསོལ། །ཏདྱ་ཐཱ། སུ་དཎྜ། དཎྜ་པ་ཏི་དཎྜཱ་བརྟ་ནི། དཎྜ་ཀུ་ཤ་ལེ། དཎྜཱ་སུ་དྷཱ་རི། སུ་དྷཱ་ར་བ་ཏི་བུདྡྷ་པ་ཤ་ནེ། དྷཱ་ར་ཎི་ ཨཱ་བརྟ་ནི། ཨཱ་བརྟ་ནི། སངྒྷ་པ་རཱི་ཀྵི་ཏེ། སངྒྷ་ནི་ར་ག་ས་ཏེ། དྷརྨ་པ་རཱི་ཀྵི་ཏེ། སརྦ་སཏྭ་རུ་ཏ། ཀཽ་ཤ་ལྱ། ཀཽ་ཤ་ལྱ་ནུ་ག་ཏེ། སིདྷ་བི་ཀྲཱི་ཌི་ཏེ། ཨ་ནུ་བརྟེ། བརྟ་ནི། བརྟ་ལི་སྭཱ་ཧཱ། བཅོམ་ ལྡན་འདས། གཟུགས་སྔགས་ཀྱི་ཚིགས་འདི་དག་བྱང་ཆུབ་སེམས་དཔའ་གང་གི་རྣ་བའི་དབང་པོ་ལ་གྲངས་པ་དེ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོའི་ བྱིན་གྱིས་བརླབས་སུ་རིག་པར་བགྱིའོ། །བཅོམ་ལྡན་འདས། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདིའང་ཛམྦུའི་གླིང་འདི་ན་སྤྱོད་པ་ན། བྱང་ཆུབ་སེམས་དཔའ་གང་ ༄༅། །དག་གི་ལག་ཏུ་ཐོབ་པར་གྱུར་པ་ན། བཅོམ་ལྡན་འདས། ཆོས་སྨྲ་བ་དེ་དག་གིས་བྱང་ཆུབ་སེམས་དཔའ་ཀུན་ཏུ་བཟང་པོའི་མཐུ་དང༌། བྱང་ཆུབ་སེམས་དཔའ་ ཀུན་ཏུ་བཟང་པོའི་གཟི་བརྗིད་ཀྱིས་དམ་པའི་ཆོས་ཀྱི་རྣམ་གྲངས་འདི་བདག་ཅག་ལག་ཏུ་ཐོབ་བོ་སྙམ་དུ་དེ་ལྟར་རིག་པར་བགྱིའོ། །བཅོམ་ལྡན་འདས། གང་དག་མདོ་སྡེ་འདི་ཡི་གེར་ འདྲི་བ་དང་འཛིན་པའི་སེམས་ཅན་དེ་དག་གིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ཐོབ་པར་འགྱུར་རོ། །སེམས་ཅན་དེ་དག་གིས་སངས་རྒྱས་མང་པོ་ལ་དགེ་བའི་ རྩ་བ་བསྐྱེད་པར་འགྱུར་རོ། །བཅོམ་ལྡན་འདས། སེམས་ཅན་དེ་དག་ནི་དེ་བཞིན་གཤེགས་པའི་ཕྱག་གིས་སྤྱི་བོ་ལ་བྱུགས་པར་འགྱུར་རོ། །བཅོམ་ལྡན་འདས། དེ་དག་ གིས་བདག་ཀྱང་དགའ་བར་བགྱིས་པར་འགྱུར་རོ། །གང་དག་མདོ་འདི་ཡི་གེར་འདྲིར་སྩོལ་བ་དང༌། གང་དག་འདིའི་དོན་ཁོང་དུ་ཆུད་པར་བགྱིད་པ་དང༌། བཅོམ་ལྡན་འདས། མདོ་སྡེ་འདི་ཡི་གེར་བྲིས་པ་དེ་དག་འདི་ནས་ཤི་འཕོས་ནས་སུམ་ཅུ་རྩ་གསུམ་པའི་ལྷ་རྣམས་དང་སྐལ་པ་མཉམ་པར་སྐྱེ་བར་འགྱུར་ཏེ། སྐྱེས་མ་ཐག་ཏུ་དེའི་དྲུང་དུ་ལྷའི་བུ་མོ་ བརྒྱད་ཁྲི་བཞི་སྟོང་མཆི་བར་འགྱུར། ལྷའི་བུ་མོ་དེ་དག་རྔ་བོ་ཆེ་ཙམ་གྱི་ཅོད་པན་ཅན་ལྷའི་བུ་མོ་དེ་དག་གི་ནང་ན་གནས་པར་འགྱུར་རོ། །བཅོམ་ལྡན་འདས། ཆོས་ཀྱི་རྣམ་གྲངས་ འདི་ཡི་གེར་བྲིས་པའི་བསོད་ནམས་ཀྱི་ཕུང་པོའང་འདི་འདྲ་ལགས་ན། གང་དག་ལུང་ནོད་པ་དང༌། ཁ་ཏོན་བགྱིད་པ་དང༌། སེམས་པ་དང༌། ཡིད་ལ་བགྱིད་པ་ལྟ་སྨོས་ཀྱང་ཅི་འཚལ། བཅོམ་ ལྡན་འདས། དེ་ལྟ་ལགས་པས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་སེམས་ཀྱིས་ཀུན་བསམས་ཏེ་ཡི་གེར་འདྲི་བར་བགྱིའོ། །གང་མི་གཡེང་བར་ཡིད་ལ་བགྱིད་པས་ ཡི་གེར་བྲིས་ན། དེ་ལ་སངས་རྒྱས་བརྒྱ་སྟོང་ཕྱག་རྐྱོང་བར་འགྱུར་རོ། །འཆི་བའི་ཚེའང་སངས་རྒྱས་སྟོང་གི་ཞལ་མཐོང་བར་འགྱུར་རོ། །ངན་འགྲོ་ལོག་པར་ལྟུང་བར་མཆི་བར་མི་འགྱུར་ རོ༑ ༑འདི་ནས་ཤི་འཕོས་ནས་ཀྱང་དགའ་ལྡན་གྱི་ལྷ་རྣམས་དང་སྐལ་པ་མཉམ་པར་སྐྱེ་བར་འགྱུར་ཏེ། གང་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་མཚན་ བཟང་པོ་སུམ་ཅུ་རྩ་གཉིས་དང་ལྡན་པ་དེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང༌། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་གིས་མདུན་གྱིས་བལྟས་ཏེ་ཆོས་འཆད་པར་ དེར་སྐྱེའོ། །དེ་ལྟ་ལགས་པས་རིགས་ཀྱི་བུའམ་རིགས་ཀྱི་བུ་མོ་མཁས་པས། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་གུས་པར་ཡི་གེར་འདྲི་བར་བགྱིའོ། །གུས་པར་ལུང་ ནོད་པར་བགྱིའོ། །གུས་པར་ཁ་ཏོན་དུ་བགྱིའོ། །གུས་པར་ཡིད་ལ་བགྱིའོ། །བཅོམ་ལྡན་འདས། ཆོས་ཀྱི་རྣམ་གྲངས་འདི་ཡི་གེར་བྲིས་པ་དང༌། ལུང་མནོས་པ་དང༌། ཁ་ཏོན་ ༄༅། །བགྱིས་པ་དང༌། བསྒོམས་པ་དང༌། ཡིད་ལ་བགྱིས་པ་ནི། དེ་ལྟར་ཡོན་ཏན་དཔག་ཏུ་མ་མཆིས་པར་འགྱུར་རོ། །བཅོམ་ལྡན་འདས། དེ་ལྟ་ལགས་ པས༑ རིགས་ཀྱི་བུའམ་རིགས་ཀྱི་བུ་མོ་མཁས་པས་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་བཟུང་པར་བགྱིས་ཏེ། དེ་དག་གི་ཡོན་ཏན་གྱི་ཕན་ཡོན་འདི་སྙེད་དུ་ འགྱུར་རོ། །བཅོམ་ལྡན་འདས། དེ་ལྟ་ལགས་པས། ཅི་ནས་བདག་གི་བྱིན་གྱི་རླབས་ཀྱིས་ཆོས་ཀྱི་རྣམ་གྲངས་འདི་ཛམྦུའི་གླིང་འདི་ན་སྤྱོད་པར་འགྱུར་བར་བདག་གིས་ཆོས་ཀྱི་ རྣམ་གྲངས་འདི་བྱིན་གྱིས་བརླབ་པར་བགྱིའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བྱང་ ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཀུན་ཏུ་བཟང་པོ་ཁྱོད་སྐྱེ་བོ་མང་པོ་ལ་ཕན་པའི་ཕྱིར་ཞུགས་པ་དང༌། འདི་ལྟར་བསམ་གྱིས་མི་ཁྱབ་པའི་ཆོས་དང་ ལྡན་ཞིང་སྙིང་རྗེ་ཆེན་པོས་ཟིན་པའི་ལྷག་པའི་བསམ་པ་དང༌། བསམ་གྱིས་མི་ཁྱབ་པས་ཟིན་པའི་སེམས་བསྐྱེད་པས། ཁྱོད་ཀྱིས་ཆོས་སྨྲ་བ་དེ་དག་ལ་བྱིན་གྱིས་རློབ་པ་བྱེད་ པ་ལེགས་སོ། །ལེགས་སོ་ཞེས་བྱ་བ་བྱིན་ནོ། །རིགས་ཀྱི་བུ། གང་ལ་ལ་དག་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོའི་མིང་འཛིན་པ་དེ་དག་གིས། དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་མཐོང་བ་དང༌། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདིའང་བཅོམ་ལྡན་འདས་ཤཱཀྱ་ཐུབ་པའི་ གན་ནས་ཐོས་པ་དང༌། དེ་དག་གིས་དེ་བཞིན་གཤེགས་པ་ཤཱཀྱ་ཐུབ་པ་མཆོད་པ་དང༌། དེ་བཞིན་གཤེགས་པ་ཤཱཀྱ་ཐུབ་པས་ཆོས་བསྟན་པ་ལ་ལེགས་སོ་ཞེས་བྱ་བ་བྱིན་པ་དང༌། ཆོས་ཀྱི་རྣམ་གྲངས་འདི་ལ་རྗེས་སུ་ཡི་རང་བ་དང༌། དེ་བཞིན་གཤེགས་པ་ཤཱཀྱ་ཐུབ་པས་དེ་དག་གི་སྤྱི་བོར་ཕྱག་བཞག་པ་དང༌། དེ་དག་གིས་བཅོམ་ལྡན་འདས་ཤཱཀྱ་ཐུབ་པ་ཆོས་གོས་ ཀྱིས་གཡོགས་པར་རིག་པར་བྱའོ། །ཀུན་ཏུ་བཟང་པོ། རིགས་ཀྱི་བུའམ་རིགས་ཀྱི་བུ་མོ་དེ་དག་དེ་བཞིན་གཤེགས་པའི་བསྟན་པ་འཛིན་པར་རིག་པར་བྱའོ། །དེ་དག་འཇིག་རྟེན་རྒྱང་པན་ པ་ལ་དགའ་བར་མི་འགྱུར་རོ། །དེ་དག་སྙན་དངགས་ལ་ཞུགས་པའི་སེམས་ཅན་རྣམས་ལ་དགའ་བར་མི་འགྱུར་རོ། །དེ་དག་གར་བྱེད་པ་དང༌། རོལ་མོ་བྱེད་པ་དང༌། གྱད་དང༌། ཤ་ འཚོང་བ་དང༌། བཤན་པ་དང༌། བྱ་གག་འཚོང་བ་དང༌། ཕག་འཚོང་བ་དང༌། བུད་མེད་དག་གསོ་བའི་སེམས་ཅན་རྣམས་ལ་དགའ་བར་མི་འགྱུར་རོ། །མདོ་སྡེ་འདི་ལྟ་བུ་ཐོས་པ་དང༌། ཡི་གེར་བྲིས་པ་དང༌། འཛིན་པ་དང༌། བཀླགས་པ་དེ་དག་གཞན་ལ་སྲེད་པར་མི་འགྱུར་རོ། །སེམས་ཅན་དེ་དག་ཆོས་ཀྱི་ངོ་བོ་ཉིད་དང་ལྡན་པར་འགྱུར་རོ། །དེ་དག་སོ་སོའི་བདག་ཉིད་ ༄༅། །ཚུལ་བཞིན་ཡིད་ལ་བྱེད་པར་འགྱུར་རོ། །རང་གི་བསོད་ནམས་ཀྱི་སྟོབས་བསྐྱེད་པར་འགྱུར་རོ། །དེ་དག་སེམས་ཅན་རྣམས་ཀྱིས་མཐོང་ན་དགའ་བར་ འགྱུར་རོ། །དགེ་སློང་གང་དག་མདོ་སྡེ་འདི་ལྟ་བུ་འཛིན་པ་དེ་དག་འདོད་ཆགས་ཀྱིས་གཟིར་བར་མི་འགྱུར་རོ། །ཞེ་སྡང་མེད་པ་དང༌། གཏི་མུག་མེད་པ་དང༌། སེར་སྣ་མེད་པ་དང༌། འཆབ་པ་མེད་པ་དང༌། ང་རྒྱལ་མེད་པ་དང༌། ཆེ་བའི་ང་རྒྱལ་མེད་པ་དང་ལོག་པའི་རྒྱལ་མེད་པར་འགྱུར་རོ། །ཀུན་ཏུ་བཟང་པོ། ཆོས་སྨྲ་བ་དེ་དག་བདག་གི་རྙེད་པས་ ཆོག་ཤེས་པར་འགྱུར་རོ། །ཀུན་ཏུ་བཟང་པོ། གང་གིས་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ། དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་འཛིན་པའི་དགེ་ སློང་མཐོང་ན། འདི་སྙམ་དུ་རིགས་ཀྱི་བུ་འདི་ནི་བྱང་ཆུབ་ཀྱི་སྙིང་པོར་འགྲོ་བར་འགྱུར་རོ། །རིགས་ཀྱི་བུ་འདི་ནི་བདུད་ཀྱི་འཐབ་མོའི་ཚོགས་ལས་རྒྱལ་པར་འགྱུར་རོ། །རིགས་ ཀྱི་བུ་འདི་ནི་ཆོས་ཀྱི་འཁོར་ལོ་བསྐོར་བར་འགྱུར་རོ། །འདི་ནི་ཆོས་ཀྱི་རྔ་བརྡུང་བར་འགྱུར་རོ། །འདི་ནི་ཆོས་ཀྱི་དུང་འབུད་པར་འགྱུར་རོ། །འདི་ནི་ཆོས་ཀྱི་ཆར་རབ་ཏུ་འབེབས་ པར་འགྱུར་རོ། །འདི་ནི་ཆོས་ཀྱི་སེང་གེའི་ཁྲི་ལ་འདུག་པར་འགྱུར་རོ་སྙམ་དུ་སེམས་བསྐྱེད་པར་བྱའོ། །གང་དག་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ། ཆོས་ཀྱི་རྣམ་གྲངས་ འདི་འཛིན་པའི་དགེ་སློང་དེ་དག་བརྐམ་པར་མི་འགྱུར་རོ། །ཆོས་གོས་ལ་ཆགས་པ་དང༌། ལྷུང་བཟེད་ལ་ཆགས་པར་མི་འགྱུར་རོ། །ཆོས་སྨྲ་བ་དེ་དག་དྲང་པོར་འགྱུར་རོ། །ཆོས་སྨྲ་བ་དེ་དག་ རྣམ་པར་ཐར་པ་གསུམ་ཐོབ་པར་འགྱུར་རོ། །དེ་དག་གི་ཚེ་འདི་ལ་བཟློག་པར་འགྱུར་རོ། །གང་དག་མདོ་སྡེ་འདི་ལྟ་བུ་འཛིན་པ་ཆོས་སྨྲ་བའི་དགེ་སློང་རྣམས་སྨོད་པར་བྱེད་པའི་སེམས་ཅན་དེ་དག་དམུས་ལོང་ དུ་འགྱུར་རོ། །གང་དག་གིས་མདོ་སྡེ་འདི་ལྟ་བུ་འཛིན་པའི་དགེ་སློང་རྣམས་ལ་མི་སྙན་པ་བསྒྲགས་ན། དེ་དག་ཚེ་འདི་ཉིད་ལ་ལུས་ལ་ཤ་བཀྲ་འབྱུང་བར་འགྱུར་རོ། །གང་དག་མདོ་ སྡེ་འདི་ལྟ་བུ་ཡི་གེར་འདྲི་བ་རྣམས་ལ་འཕྱ་བ་དང་བསྟིང་བ་དེ་དག་སོ་ཆག་པར་འགྱུར་རོ། །སོ་ཐགས་ངན་པར་འགྱུར་རོ། །མཆུ་མི་སྡུག་པར་འགྱུར་རོ། །སྣ་ལེབ་པར་འགྱུར་རོ། །ལག་ པ་དང་རྐང་པ་ལོག་པར་འགྱུར་རོ། །མིག་ལོག་པར་འགྱུར་རོ། །ལུས་དྲི་མི་ཞིམ་པར་འགྱུར་རོ། །ལུས་ལ་འབྲས་དང༌། འབྲུམ་བུ་ཕྲ་མོ་དང༌། རྐང་ཤུ་དང༌། ཤུ་བ་དང༌། གཡན་པས་ གང་བར་འགྱུར་རོ། །གང་དག་མདོ་སྡེ་འདི་ལྟ་བུ་འཛིན་པ་དང༌། མདོ་སྡེ་འདི་ལྟ་བུ་ཡི་གེར་འདྲི་བ་དང༌། མདོ་སྡེ་འདི་ལྟ་བུ་ཀློག་པ་དང༌། མདོ་སྡེ་འདི་ལྟ་བུ་འཆད་པ་རྣམས་ལ་མི་སྙན་ པའི་ཚིག་བདེན་པའམ། མི་བདེན་པ་བསྒྲགས་ན་སྡིག་པའི་ལས་ཤིན་ཏུ་ལྕི་བར་རིག་པར་བྱའོ། །ཀུན་ཏུ་བཟང་པོ། དེ་བས་ན་ཆོས་ཀྱི་རྣམ་གྲངས་འདི་འཛིན་པའི་དགེ་སློང་ལ་རྒྱང་མ་ ༄༅། །ནས་ཀྱང་ལྡང་པར་བྱའོ། །ཇི་ལྟར་དེ་བཞིན་གཤེགས་པ་ལ་གུས་པར་བྱ་བ་བཞིན་དུ་མདོ་སྡེ་འདི་ལྟ་བུ་འཛིན་པའི་དགེ་སློང་དེ་དག་ལའང་གུས་པར་བྱའོ། ། ཀུན་ཏུ་བཟང་པོ། སྤྲོ་བར་བྱ་བའི་ལེའུ་འདི་བཤད་པ་ན། བྱང་ཆུབ་སེམས་དཔའ་སེམས་དཔའ་ཆེན་པོ་གདྒཱའི་ཀླུང་གི་བྱེ་མ་སྙེད་ཀྱིས་བྱེ་བ་བརྒྱ་སྟོང་དུ་འཁྱིལ་བ་ཞེས་བྱ་བའི་ གཟུངས་ཐོབ་པར་འགྱུར་རོ། །དམ་པའི་ཆོས་པདྨ་དཀར་པོ་ལས། ཀུན་ཏུ་བཟང་པོས་སྤྲོ་བར་བྱ་བའི་ལེའུ་ཞེས་བྱ་སྟེ་ཉི་ཤུ་རྩ་དྲུག་པའོ།། །།དེ་ནས་བཅོམ་ལྡན་ འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཆོས་ཀྱི་གདན་དེ་ལས་བཞེངས་ཏེ། ཐམས་ཅད་དང་ལྡན་པའི་བྱང་ཆུབ་སེམས་ དཔའ་དེ་དག་བསྡུས་ནས་རྫུ་འཕྲུལ་མངོན་པར་འདུ་མཛད་པ་ཡོངས་སུ་གྲུབ་པའི་ཕྱག་གཡས་པས། དེ་དག་གི་ལག་པ་གཡས་པ་ནས་བཟུང་ནས་དེའི་ཚེ་འདི་སྐད་ཅེས་བཀའ་ སྩལ་ཏོ། །རིགས་ཀྱི་བུ་དག །ངས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཁྱེད་ཀྱི་ ལག་ཏུ་གཏད་དོ། །ཡོངས་སུ་གཏད་དོ། །རྗེས་སུ་གཏད་དོ། །བཞག་གོ །གཏམས་སོ། །རིགས་ཀྱི་བུ་དག །ཁྱེད་ཀྱི་ཅི་ནས་ཀྱང་རྒྱ་ཆེར་རྒྱས་པར་འགྱུར་བ་དེ་ལྟར་གྱིས་ ཤིག །ལན་གཉིས་ལན་གསུམ་དུའང་བཅོམ་ལྡན་འདས་ཀྱི་ཕྱག་གཡས་པས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ཀྱི་ལག་པ་གཡས་པ་ནས་བཟུང་སྟེ་འདི་སྐད་ ཅེས་བཀའ་སྩལ་ཏོ། །རིགས་ཀྱི་བུ་དག །ངས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ ཁྱེད་ཀྱི་ལག་ཏུ་གཏད་དོ། །ཡོངས་སུ་གཏད་དོ། །རྗེས་སུ་གཏད་དོ། །བཞག་གོ །གཏམས་སོ། །རིགས་ཀྱི་བུ་དག །ཁྱེད་ཀྱིས་བླངས་ལ་བཟུང་ངོ༌། །བཀླག་གོ །ཀུན་ཆུབ་པར་བྱའོ། ། བསྟན་པར་བྱའོ། །བཤད་པར་བྱའོ། །སེམས་ཅན་ཐམས་ཅད་ལ་བསྒྲག་པར་བྱའོ། །རིགས་ཀྱི་བུ་དག །ང་ལ་སེར་སྣ་མེད་དོ། །འཛིན་པའི་སེམས་མེད་དོ། །འཇིགས་པ་མེད་པར་ སངས་རྒྱས་ཀྱི་ཡེ་ཤེས་སྦྱིན་པའོ། །དེ་བཞིན་གཤེགས་པའི་ཡེ་ཤེས་དང་རང་བྱུང་གི་ཡེ་ཤེས་སྦྱིན་པའོ། །རིགས་ཀྱི་བུ་དག །ང་ནི་སྦྱིན་པའི་བདག་པོ་ཆེན་པོ་སྟེ། རིགས་ཀྱི་བུ་ དག །ཁྱེད་ཀྱང་ངའི་རྗེས་སུ་སློབས་ཤིག །སེར་སྣ་མེད་པར་གྱིས་ལ་དེ་བཞིན་གཤེགས་པའི་ཡེ་ཤེས་མཐོང་བ་ཐབས་མཁས་པ་ཆེན་པོའི་ཆོས་ཀྱི་རྣམ་གྲངས་འདི་འོངས་ཤིང་ ལྷགས་པའི་རིགས་ཀྱི་བུ་དང་རིགས་ཀྱི་བུ་མོ་དག་ལ་ཡང་དག་པར་སྒྲོགས་ཤིག །རིགས་ཀྱི་བུའམ་རིགས་ཀྱི་བུ་མོ་གང་དག་དད་པ་དང༌། སེམས་ཅན་གང་དག་མ་དད་པ་དེ་དག་ཆོས་ཀྱི་ ༄༅། །རྣམ་གྲངས་འདི་ལ་ཡང་དག་པར་གཟུད་བར་བྱའོ། །རིགས་ཀྱི་བུ་དག །ཁྱེད་ཀྱིས་དེ་ལྟར་བྱས་ན་དེ་བཞིན་གཤེགས་པ་ལ་ལན་ལོན་པར་འགྱུར་རོ། །བཅོམ་ ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་བས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་ པོ་དེ་དག་དགའ་བ་དང༌། མཆོག་ཏུ་དགའ་བས་ཁྱབ་པར་བྱས་པར་གྱུར་ནས། རྗེས་ཆེར་བསྐྱེད་དེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་ཤཱཀྱ་ཐུབ་པ་ག་ལ་བ་དེ་ལོགས་སུ་ལུས་བཏུད། ལུས་རབ་ཏུ་བཏུད་ནས་ལུས་བཅུམས་ཏེ་མགོ་སྨད་ནས་ཐལ་མོ་སྦྱར་ཏེ། ཐམས་ཅད་ཀྱི་སྒྲ་སྐད་གཅིག་ཏུ་ བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་ཇི་སྐད་བཀའ་སྩལ་པ་དེ་བཞིན་དུ་འཚལ་ ལོ༑ ༑དེ་བཞིན་གཤེགས་པ་ཐམས་ཅད་ཀྱི་བཀའ་ཡོངས་སུ་རྫོགས་པར་བགྱིའོ། བཅོམ་ལྡན་འདས། ཐུགས་ལས་ཆུང་ངུར་ཅི་བདེར་བཞུགས་སུ་གསོལ། ལན་གཉིས་ ལན་གསུམ་དུའང་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེས་སྒྲ་སྐད་གཅིག་ཏུ་ཚིག་འདི་སྐད་ཅེས་བཅོམ་ལྡན་འདས་ལ་ཐུགས་ལས་ཆུང་ངུར་ཅི་བདེར་ བཞུགས་སུ་གསོལ། བཅོམ་ལྡན་འདས། ཇི་སྐད་དུ་དེ་བཞིན་གཤེགས་པས་བཀའ་སྩལ་པ་དེ་བཞིན་དུ་བགྱིའོ། །དེ་བཞིན་གཤེགས་པ་ཐམས་ཅད་ཀྱི་བཀའ་ཡོངས་སུ་རྫོགས་པར་ བགྱིའོ་ཞེས་གསོལ་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས། འཇིག་རྟེན་གྱི་ཁམས་གཞན་དག་ནས་ བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཐམས་ཅད་སླར་གཤེགས་སུ་གསོལ་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་དེ་དག་ལ་ཅི་བདེར་གནས་པར་མཛོད་ཅིག་ཅེས་དེ་བཞིན་གཤེགས་པ་དེ་དག་ལ་ཅི་བདེར་གནས་པར་མཛོད་ཅིག་ཅེས་བྱ་བར་གསུངས་སོ། །བཅོམ་ལྡན་ འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་མཆོད་རྟེན་ཡང་གནས་ཇི་ལྟ་བ་བཞིན་དུ་བཞག་གོ །དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་ཡང་ཅི་བདེར་བཞུགས་ཤིག་ཅེས་གསུངས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྲངས་མེད་དཔག་ཏུ་མེད་པ་འཇིག་རྟེན་གྱི་ཁམས་གཞན་དག་ནས་བྱོན་ཏེ། རིན་པོ་ཆེའི་ཤིང་ལྗོན་པ་དག་གི་དྲུང་ན་སེང་གེའི་ ༄༅། །ཁྲི་ལ་བཞུགས་པ་དེ་དག་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དང༌། ཐམས་ཅད་དང་ལྡན་པའི་ བྱང་ཆུབ་སེམས་དཔའི་ཚོགས་དེ་དག་དང༌། སྤྱོད་པ་ཁྱད་པར་ཅན་ལ་སོགས་པ་ས་རུམ་ནས་འཐོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་དེ་དག་ དང༑ ཉན་ཐོས་ཆེན་པོ་དེ་དག་དང༌། འཁོར་བཞི་པོ་དེ་དག་དང༌། ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་ མངོན་པར་བསྟོད་དོ། །འཕགས་པ་དམ་པའི་ཆོས་པདྨ་དཀར་པོ་ལས། ཡོངས་སུ་གཏད་པའི་ལེའུ་ཞེས་བྱ་སྟེ་ཉི་ཤུ་བདུན་པའོ།། །།གང་ན་མདོ་སྡེ་འདི་ཡོད་པར། ། མེ་མར་མུར་གྱི་དོང་འབོགས་ཤིང༌། །སྤུ་གྲི་གཏམས་ལས་འཛེགས་ནས་ཀྱང༌། །རིགས་ཀྱི་བུ་དག་འགྲོ་བར་བྱ། །འཕགས་པ་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་ ཡོངས་སུ་རྒྱས་པ་ཆེན་པོའི་མདོ་སྡེ་བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ། སངས་རྒྱས་ཐམས་ཅད་ཀྱི་གསང་ཚེ་ན།། སངས་རྒྱས་ཐམས་ཅད་ཀྱི་སྦ་བ། སངས་རྒྱས་ཐམས་ཅད་ཀྱི་རིགས། སངས་རྒྱས་ཐམས་ཅད་ཀྱི་གསང་བའི་གནས། སངས་རྒྱས་ཐམས་ཅད་ཀྱི་བྱང་ཆུབ་ཀྱི་སྙིང་པོ། སངས་ རྒྱས་ཐམས་ཅད་ཀྱི་ཆོས་ཀྱི་འཁོར་ལོ་བསྐོར་བ། སངས་རྒྱས་ཐམས་ཅད་ཀྱི་སྐུ་གཅིག་ཏུ་འདུས་པ། ཐབས་མཁས་པ་ཆེན་པོ་ཐེག་པ་གཅིག་ཏུ་བསྟན་པ། དོན་དམ་པ་བསྒྲུབ་པ་བསྟན་ པའི་མདོ་རྫོགས་སོ།། །།རྒྱ་གར་གྱི་མཁན་པོ་སུ་རེནྡྲ་པོ་དྷི་དང༌། ཞུ་ཆེན་གྱི་ལོ་ཙཱ་བ་བནྡེ་སྣ་ནམ་ཡེ་ཤེས་སྡེས་བསྒྱུར་ཞིང་ཞུས་ཏེ་གཏན་ལ་ཕབ་པ།། །། Copyright © 2012 by the Asian Classics Input Project. All rights reserved.