Loading

ལྕང་ལོ་ཅན་གྱི་ཕོ་བྲང་གི་མདོ།
སྣ་ཚོགས།
not checked
།།རྒྱ་གར་སྐད་དུ། ཨཱ་ཊཱ་ནཱ་ཊི་ཡ་སཱུ་ཏྲ། བོད་སྐད་དུ། ལྕང་ལོ་ཅན་གྱི་ཕོ་བྲང་གི་ མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་ པོའི་རི་ལ་བཞུགས་སོ། །དེ་ནས་རྒྱལ་པོ་ཆེན་པོ་བཞི་པོ་གནོད་སྦྱིན་མང་པོའི་སྡེ་དང༌། དྲི་ཟ་མང་པོའི་སྡེ་དང༌། གྲུལ་བུམ་གྱི་སྡེ་མང་པོ་དང༌། ཀླུའི་སྡེ་མང་པོ་རྣམས་ཕྱོགས་ བཞི་བསྲུང་ཞིང་གནས་སོ། །ཕྱོགས་བཞིར་ཚན་ཚན་དུ་གནས་སོ། །ཕྱོགས་བཞི་སྐྱོབ་ཅིང་གནས་སོ། །མཚན་མོ་འོངས་ཏེ། ཁ་དོག་སྣ་ཚོགས་པ་ཅན་གྱིས་བྱ་རྒོད་ཕུང་པོའི་རི་འབའ་ ཞིག་སྣང་བར་བྱས་ཏེ། བཅོམ་ལྡན་འདས་ག་ལ་བ་དེར་སོང་ནས། བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །གནོད་སྦྱིན་དེ་རྣམས་ལས་ཀྱང༌། གང་ལ་ ལས་བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་བཅོམ་ལྡན་འདས་ལ་བསྙུན་གསོལ་ཏེ། བསྙུན་གསོལ་ནས། ཇི་ལྟར་སྙིང་པོ་དང༌། སྙིང་ པོ་མེད་པའི་གཏམ་འདྲི་ཞིང་ཕྱོགས་གཅིག་ཏུ་འཁོད་དོ། །གང་སུ་དག་གིས་བཅོམ་ལྡན་འདས་ལ་ཐལ་མོ་སྦྱར་བའི་ཕྱག་བྱས་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་ མིང་དང་རིགས་སྤྱོད་ཅིང་ཕྱོགས་གཅིག་ཏུ་འཁོད་དོ། །གང་སུ་དག་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་དེ་ནས་རྒྱལ་པོ་ཆེན་པོ་རྣམ་ཐོས་ཀྱི་ བུས༑ བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གནོད་སྦྱིན་མ་རུངས་པ་གང་ལ་ལ་ཞིག་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་མ་རུངས་པ་གང་ལ་ལ་ ཞིག་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་བཙུན་པ་བཅོམ་ལྡན་འདས་ལམ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་ ༄༅། །བཙུན་པ་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་དམན་པ་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། ། གནོད་སྦྱིན་དམན་པ་གང་ལ་ལ་ཞིག་བཙུན་པ་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་པའི་ རྒྱུ་གང་ལགས། བཙུན་པ་བཅོམ་ལྡན་འདས་ཀྱིས་སྲོག་གཅོད་པ་སྤོང་བའི་ཆོས་བསྟན་པ་དང༌། མ་བྱིན་བར་ལེན་པ་སྤོང་བའི་ཆོས་བསྟན་པ་དང༌། འདོད་པ་ལོག་པར་ སྤྱོད་པ་སྤོང་བའི་ཆོས་བསྟན་པ་དང༌། བརྫུན་དུ་སྨྲ་བ་སྦོང་བའི་ཆོས་བསྟན་པ་དང༌། མྱོས་བར་འགྱུར་བའི་ཆང་གི་བཏུང་བ་སྤོང་བའི་ཆོས་བསྟན་པ་མཛད་ལ། གནོད་སྦྱིན་ གང་དེ་རྣམས་སྲོག་གཅོད་པ་སྤོང་བ་ལ་མི་དགའ་བར་གྱུར་བ་དང༌། མ་བྱིན་པར་ལེན་པ་སྤོང་བ་ལ་མི་དགའ་བར་གྱུར་པ་དང༌། འདོད་པ་ལོག་པར་སྤྱོད་པ་སྤོང་བ་ལ་མི་ དགའ་བར་གྱུར་པ་དང༌། བརྫུན་དུ་སྨྲ་བ་སྤོང་བ་ལ་མི་དགའ་བར་གྱུར་པ་དང༌། མྱོས་བར་འགྱུར་བའི་ཆང་གི་བཏུང་བ་སྤོང་བ་ལ་མི་དགའ་བར་གྱུར་པས། དེ་རྣམས་ལ་ མི་དགའ་ཞིང་མི་འདོད་པར་གྱུར་ཏོ། །བཙུན་པ་བཅོམ་ལྡན་འདས་ཀྱི་ཉན་ཐོས་ཇི་སྙེད་ཡོད་པ་རྣམས་འབྲོག་དགོན་པའི་ལམ་དུ་ཞུགས་ནས་ཉལ་བ་དང༌། འདུག་པ་ལ་ བརྟེན་ནོ། །སྒྲ་མེད་ཅིང་དབྱངས་མེད་པར་དབེན་པར་གནས་ཤིང་འདུ་འཛིའི་འཚེ་བ་མེད་དོ། །སོ་སོར་དགེ་སྦྱོང་རྣམས་མཐུན་པར་གནས་སོ། །དེ་ན་གནོད་སྦྱིན་མ་རུངས་པ་རྣམས་ ཀྱི་གནས་ཡོད་དོ། །གང་ཞིག་གིས་བཅོམ་ལྡན་འདས་ཀྱི་གསུང་རབ་ལ་མ་དད་པར་གྱུར་ཏེ། དེ་རྣམས་དད་པར་བྱ་བའི་ཕྱིར་བཙུན་པ་བཅོམ་ལྡན་འདས་ལ་བསླབ་པར་བྱ་སྟེ། ལྕང་ལོ་ཅན་གྱི་ཕོ་བྲང་གིས་བསྲུང་དུ་གསོལ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་རྣམས་ལ་བསྲུང་བ་དང༌། སྦ་བ་དང༌། འཚེ་བ་མེད་པ་དང༌། བདེ་བ་དང༌། ལེགས་པར་གནས་སོ། །བཅོམ་ལྡན་འདས་ཀྱིས་ཅང་མི་གསུང་བའི་ཚུལ་གྱིས་གནང་ངོ༌། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས་བཅོམ་ལྡན་འདས་ཀྱིས་གནང་བ་ ཤེས་ཏེ། དེའི་ཚེ་འདི་ལྟར་ལྕང་ལོ་ཅན་གྱི་ཕོ་བྲང་གིས་སྲུངས་ཤིག་ཅེས་གསོལ་ཏོ། །སྤྱན་ལྡན་དཔལ་དང་ལྡན་པ་ཡི། །རྣམ་པར་གཟིགས་ལ་ཕྱག་འཚལ་ལོ། །འབྱུང་པོ་རྣམས་ ལ་བརྩེ་བ་ཡི། །གཙུག་ཏོར་ཅན་ལའང་ཕྱག་འཚལ་ལོ། །མགོན་མེད་རྣམས་ལ་གདུང་བ་ཡི། །ཐམས་ཅད་སྐྱོབ་ལ་ཕྱག་འཚལ་ལོ། །བདུད་ཀྱི་སྡེ་རྣམས་འཇོམས་པ་ཡི། །འཁོར་ བ་འཇིག་ལ་ཕྱག་འཚལ་ལོ། །བྲམ་ཟེ་དཔལ་དང་ལྡན་པ་ཡི། །གསེར་ཐུབ་ལ་ནི་ཕྱག་འཚལ་ལོ། །སེམས་ཅན་རྣམ་གྲོལ་མཛད་པ་ཡི། །འོད་སྲུང་ལ་ནི་ཕྱག་འཚལ་ལོ། ། ༄༅། །ཤཱཀྱའི་སྲས་ནི་དབལ་དང་ལྡན། །ཉི་མའི་རྒྱུད་ལ་ཕྱག་འཚལ་ལོ། །སྡུག་བསྔལ་ཀུན་ལས་སྒྲོལ་མཛད་བ། །གང་ཞིག་ཆོས་ནི་རབ་སྟོན་མཛད། ། གང་ཡང་འཇིག་རྟེན་པར་གྱུར་པ། །ཇི་ལྟ་བ་བཞིན་གཟིགས་གྱུར་བའི། །དེ་རྣམས་ལ་ནི་ཕྲམ་མེད། །འཇིགས་པ་མེད་པ་ཆེན་པོའོ། །གང་ཞིག་གཽ་ཏམ་ཕྱག་བྱེད་པ། །ལྷ་དང་མི་ ལ་ཕན་པ་ཡིན། །རིག་པ་དང་ནི་ཞབས་སུ་ལྡན། །འཇིགས་པ་མེད་པ་ཆེན་པོ་སྟེ། །ཉི་མའི་དཀྱིལ་འཁོར་ཆེན་པོ་ནི། །གང་ཞིག་ཏུ་ནི་ནུབ་ཅིང་འཆར། །གང་དུ་ཉི་མ་ནུབ་གྱུར་པ། ། དེ་ནི་མཚན་མོར་འགྱུར་བ་ཡིན། །གང་དུ་ཉི་མ་ཤར་གྱུར་པ། །དེ་ནི་ཉིན་མོ་ཞེས་བརྗོད་དོ། །གཏིང་ནི་ཟབ་བའི་རྒྱ་མཚོ་ཡི། །དེ་ནི་ཆུ་ཡི་བཅུད་བཟང་ངོ༌། །དེ་ལྟར་དེར་ནི་སྐྱེས་ གྱུར་པའི། །རྒྱ་མཚོའི་ཆུ་ཡི་བཅུད་བཞིན་ནོ། །འདིར་ནི་ཤར་གྱི་ཕྱོགས་ཀྱི་ནི། །སྐྱེ་བོ་རྣམས་ལ་འདི་བརྗོད་དེ། །དེ་ཡི་ཕྱོགས་ནི་ཀུན་སྐྱོང་བའི། །རྒྱལ་པོ་ཆེན་པོ་གྲགས་ཆེན་ ལྡན༑ ༑དྲི་ཟ་རྣམས་ཀྱི་བདག་པོ་སྟེ། །མིང་ནི་རྒྱལ་པོ་ཡུལ་འཁོར་སྐྱོང༌། །དྲི་ཟ་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ ནི་གཅིག་ཏུ་ཐོས་པ་སྟེ། །དབང་ངོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ །དེ་ཡང་སངས་རྒྱས་མཐོང་བ་དང༌། །ཉི་མའི་གཉན་གྱི་སངས་རྒྱས་ནི། །འཇིགས་དང་ བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ༑ ༑སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ ཁྱོད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དོ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་ རྒྱས་གཽ་ཏམ་ཕྱག་འཚལ་ལོ། །གང་ཡང་ཡི་དྭགས་རྗོད་བྱེད་པ། །ཕྲ་མ་རྒྱབ་ཀྱི་ཤ་ཅན་དང༌། །སྲོག་གཅོད་པ་ལ་ཆགས་པ་དང༌། །སྐྱེ་བོ་མ་ལུས་འཇོམས་པའོ། །འདིར་ནི་ལྷོ་ཡི་ཕྱོགས་ གནས་པའི། །སྐྱེ་བོ་རྣམས་ལ་འདི་སྐད་བརྗོད། །དེ་ཡི་གནས་ནི་ཡོངས་སྐྱོང་བ། །རྒྱལ་པོ་ཆེན་པོ་གྲགས་ལྡན་པ། །གྲུལ་བུམ་རྣམས་ཀྱི་བདག་པོ་སྟེ། །མིང་ནི་འཕགས་སྐྱེས་པོ་ཞེས་ བྱ༑ ༑གྲུལ་བུམ་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་ དགུ་བཅུ་རྩ་གཅིག་གོ །དེ་ཡང་སངས་རྒྱས་མཐོང་བ་དང༌། །ཉི་མའི་རྒྱུད་ཀྱིས་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་ ༄༅། །དེ། །རྒྱལ་བ་གཽ་ཏམ་ཕྱག་གྱིས་ཤིག། རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །ཉི་མའི་ དཀྱིལ་འཁོར་ཆེན་པོ་ནི། །གང་ནས་གང་དུ་ཤར་གྱུར་པ། །དེར་ནི་ཉིན་མོར་འགྱུར་བ་སྟེ། །ཉིན་མོ་ཞེས་ནི་བརྗོད་པ་ཡིན། །གང་དུ་ཉི་མ་ནུབ་གྱུར་པ། །དེ་ནི་མཚན་མོར་ རྗོད་པར་བྱེད། །གཏིང་ནི་ཟབ་པའི་རྒྱ་མཚོ་ཡི། །དེ་ཡི་ཆུ་ནི་བཅུད་བཟང་ངོ༌། །དེ་ལྟར་དེར་ནི་སྐྱེས་གྱུར་པའི། །རྒྱ་མཚོའི་ཆུ་ཡི་བཅུད་བཞིན་ནོ། །འདིར་ནི་ནུབ་ཀྱི་ཕྱོགས་ཀྱི་ནི།། སྐྱེ་བོ་རྣམས་ལ་འདི་བརྗོད་དེ། །དེ་ཡི་ཕྱོགས་ནི་ཀུན་སྐྱོང་བའི། །རྒྱལ་པོ་ཆེན་པོ་གྲགས་ཆེན་ལྡན། །ཀླུ་རྣམས་ཀྱི་ནི་བདག་པོ་སྟེ། །འདི་ཡི་མིང་ནི་མིག་མི་བཟང༌། །ཀླུ་ཡི་ འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་ རྩ་གཅིག་གོ །དེ་ཡང་སངས་རྒྱས་མཐོང་བ་དང༌། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་ མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་ དེ་ལྟར་འདི་བརྗོད་དེ། །རྒྱལ་བ་གཽ་ཏམ་ཕྱག་གྱིས་ཤིག། རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །གང་ཞིག་བྱང་ཕྱོགས་ སྒྲ་མི་སྙན། །ལྷུན་པོ་བལྟན་སྡུག་རི་དགའ། །དེར་སྐྱེས་བ་ཡི་མི་རྣམས་ནི། །བདག་གིས་ཡོངས་སུ་བཟུང་བ་མེད། །དེ་རྣམས་ས་བོན་འདེབས་པ་མེད། །རྨོ་བ་ཡང་ནི་མེད་པ་ཡིན། ། དཀའ་སྤྱད་མེད་པར་འབྲས་སྨིན་ཞིང༌། །མི་རྣམས་ཡོངས་སུ་ལོངས་སྤྱོད་དོ། །སྤུན་མེད་མ་གྲུགས་ཤིན་ཏུ་དག །དྲི་བཟང་འབྲས་ནི་འབྲས་བུར་ལྡན། །འབྲས་ཀྱི་འོ་མ་ལ་འཚེད་ ཅིང༌། །དེ་བཞིན་བཅོས་ནས་ལོངས་སྤྱོད་དོ། །བ་ལང་རྐང་གཅིག་ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །རྐང་པ་གཅིག་བའི་ཕྱུག་ཞོན་ནས། །ཡུལ་དང་ཕྱོགས་ སུ་འགྲོ་བར་བྱེད། །བུད་མེད་ཀྱི་ནི་བཞོན་པ་ལ། །ཞོན་ནས་ཡུལ་དང་ཕྱོགས་སུ་འགྲོ། སྐྱེས་པའི་གཞོན་པ་ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །གཞོན་ནུ་མ་ ཡི་བཞོན་པ་ལ། །ཞོན་ནས་ཡུལ་དང་ཕྱོགས་སུ་འགྲོ་།གཞོན་ནུའི་གཞོན་པ་ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །བཞོན་པ་དེ་རྣམས་ལ་ཞོན་ནས། །ཕྱོགས་ ཀུན་དུ་ནི་རྗེས་སུ་འགྲོ། གཙོ་བོ་རྒྱལ་པོ་ཁྱེད་མེད་དོ། །གླང་ཆེན་བཞོན་དང་རྟ་ཡི་བཞོན། །ལྷ་ཡི་གཞོན་པ་ལ་གནས་ནས། །ཁང་བཟང་དང་ནི་ཕྱོགས་དང་ནི། །རྒྱལ་པོ་ཆེན་བོ་ ༄༅། །གྲགས་དང་ལྡན། །དེའི་ཡང་གྲུབ་པའི་གྲོང་ཁྱེར་ནི། །དྲི་མེད་བར་སྣང་ལ་གནས་པ། །ལྕང་ལོ་ཅན་དང་ཀུ་ཤའི་གྲོང༌། །ཕ་རོལ་ཀུ་ཤའི་གྲོང་དང་ནི། ། ནཱ་ཊཱའི་གྲོང་དང་ཕ་རོལ་གྱི། །ཀུ་ཤི་ཏ་ཡི་གྲོང་ཡིན་ནོ། །བྱང་གི་ཕྱོགས་ན་ཐམས་ཅད་རྒྱས། །སྐྱེ་བོའི་ཚོགས་པ་མང་པོ་གནས། །དགུ་བཅུ་རྩ་དགུ་གྲོང་མཁའ་ལ། །རྒྱལ་པོའི་ ཕོ་བྲང་ལྕང་ལོ་ཅན། །སླར་ཡང་དྲང་སྲོང་ཆེན་པོ་དང༌། །རྒྱལ་པོ་ཆེན་པོ་ལུས་ངན་བོ། །བི་སཱ་ཎཱ་ཞེས་བ་རྒྱལ་པོའི་ཕོ་བྲང་ངོ༌། །དེའི་ཕྱིར་རྒྱལ་པོ་ཆེན་པོ་རྣམ་ཐོས་ཀྱི་བུ་དང༌། ལུས་ངན་པོ་ཞེས་བརྗོད་དོ། །སོ་སོར་རབ་ཏུ་གསལ་ཞིང་ཞི་བ་དང༌། དེ་དང་དེར་ནི་དེ་དང་དེ་མདངས་དང༌། དེའི་གཟི་བརྗིད་དང༌། དཔའ་ཞིང་སྟོབས་དང་ལྡན་པའི་རྒྱལ་པོ་ སྟོབས་དང་ལྡན་པའི་མིང་ངོ༌། །ས་གཞི་ཡང་ནི་བཅུད་ལྡན་ནོ། །གནས་དེར་སྤྲིན་རྣམས་ཆར་འབེབས་པར་བྱེད་དོ། །དེར་ནི་བྷ་ག་ལ་བ་ཏཱི་ཞེས་པའི་རྫིང་བུའོ། །གང་དུ་ གནོད་སྦྱིན་ཚོགས་དང་ལྷན་ཅིག་ཏུ་གནས་སོ། །དེར་ནི་རྟག་ཏུ་ཤིང་གི་འབྲས། །སྣ་ཚོགས་བྱ་རྣམས་ལྷན་ཅིག་གནས། །རྨ་བྱ་ཁྲུང་ཁྲུང་སྒྲ་སྒྲོགས་ཤིང༌། །ཁུ་བྱུག་ རྣམས་ནི་ཚན་ཚན་གནས། །ཤང་ཤང་ཏེའུ་སྒྲ་སྒྲོགས་ཤིང༌། །དེ་ནས་ཡང་ནི་ངུར་པ་དང༌། །གོང་མོ་ནགས་ཀྱི་བྱ་གག་ནི། །ནགས་ཀྱི་རྫིང་བུར་གནས་པའོ། །ནེ་ཙོ་རི་ སྐེགས་དེ་སྒྲ་འབྱིན། །དཎྜ་མཱ་ཊ་བྱ་དཀར་ནི། །དུས་ཀུན་དུ་ནི་མཛེས་པར་བྱེད། །ལུས་ངན་རྒྱལ་པོའི་རྫིང་རྟག་མཛེས། །འདི་ནི་བྱང་གི་ཕྱོགས་ཀྱི་ཡུལ། །སྐྱེ་བོ་རྣམས་ནི་འདི་བཞིན་ བརྗོད། །དེ་ཡི་ཕྱོགས་ནི་ཡོངས་སྐྱོང་བའི། །རྒྱལ་པོ་ཆེན་པོ་གྲགས་དང་ལྡན། །གནོད་སྦྱིན་རྣམས་ཀྱི་བདག་བོ་སྟེ། །འདི་ཡི་མིང་ནི་ལུས་ངན་པོ། །གནོད་སྦྱིན་འཁོར་དང་བཅས་ པ་ནི༑ ༑གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། དེ་ཡང་ སངས་རྒྱས་མཐོང་བ་དང༌། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་ མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དེ། །རྒྱལ་བ་གཽ་ཏམ་ ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །འདིར་ནི་དྲང་སྲོང་ཆེན་པོས་ལྕང་ལོ་ཅན་གྱི་ཕོ་བྲང་དང་ བཅས་པས་སྲུངས་ཤིག །དགེ་སློང་ངམ། དགེ་སློང་མ་འམ། དགེ་བསྙེན་ནམ། །དགེ་བསྙེན་མ་རྣམས་ལ་བསྲུང་བ་དང༌། སྦ་བ་དང༌། འཚེ་བ་མེད་པ་དང༌། བདེ་བ་དང༌། ལེགས་ ༄༅། །བར་གནས་སོ། །དྲང་སྲོང་ཆེན་པོ། གང་སུ་དག་དགེ་སློང་དང་བཅས་པའམ། དགེ་སློང་མ་དང་བཅས་པའམ། དགེ་བསྙེན་དང་བཅས་པའམ། དགེ་ བསྙེན་མ་དང་བཅས་པ་རྣམས་ལ། འདིར་ལྕང་ལོ་ཅན་གྱི་ཕོ་བྲང་གིས་དེ་བསྲུང་བ་དང་ཡོངས་སུ་རྫོགས་པ་ཐམས་ཅད་ཡིད་ལ་ཟུངས་ཤིག །དེའི་ཡང་མི་མ་ཡིན་རྣམས་སོ། ། གནོད་སྦྱིན་ནམ། གནོད་སྦྱིན་མོའམ། གནོད་སྦྱིན་གྱི་བུ་ཕོའམ། གནོད་སྦྱིན་གྱི་བུ་མོའམ། གནོད་སྦྱིན་གྱི་བློན་པོ་ཆེན་པོའམ། གནོད་སྦྱིན་གྱི་འཁོར་རྨ། གནོད་སྦྱིན་ གྱི་གཡོག་འཁོར་རམ། དྲི་ཟ་ཕོའམ། དྲི་ཟ་མོའམ། དྲི་ཟའི་བུ་མོའམ། དྲི་ཟའི་བློན་པོ་ཆེན་པོའམ། དྲི་ཟའི་འཁོར་རམ། དྲི་ཟའི་གཡོག་འཁོར་རམ། གྲུལ་བུམ་ཕོའམ། གྲུལ་བུམ་མོའམ། གྲུལ་བུམ་གྱི་བུ་ཕོའམ། གྲུལ་བུམ་གྱི་བུ་མོའམ། གྲུལ་བུམ་གྱི་བློན་པོ་ཆེན་པོའམ། གྲུལ་བུམ་གྱི་འཁོར་རམ། གྲུལ་བུམ་གྱི་གཡོག་འཁོར་རམ། ཀླུ་ ཕོ་འམ། ཀླུ་མོའམ། ཀླུའི་བུ་ཕོའམ། ཀླུའི་བུ་མོའམ། ཀླུའི་བློན་པོ་ཆེན་པོའམ། ཀླུའི་འཁོར་རམ། ཀླུའི་གཡོག་འཁོར་རམ། རབ་ཏུ་སྡང་བའི་སེམས་ཀྱིས་འགྲོའམ། རྗེས་སུ་འགྲོའམ། རྗེས་སུ་འགྲོ་བ་དང༌། སྡོད་པ་དང༌། ལྷན་ཅིག་ཏུ་སྡོད་པ་དང༌། གནས་པ་དང༌། ལྷན་ཅིག་ཏུ་གནས་པ་དང༌། ཉལ་བ་དང༌། ལྷན་ཅིག་ཏུ་ཉལ་བ་རྣམས་ ནི༑ དྲང་སྲོང་ཆེན་པོ། འདི་རྣམས་ནི་མི་མ་ཡིན་ཞེས་བྱའོ། །གྲོང་ངམ། གྲོང་རྡལ་ལམ། བཀུར་སྟིར་བྱེད་པའམ། བསྟི་སྟང་དུ་བྱེད་པ་ལ། དྲང་སྲོང་ཆེན་པོ། མི་མ་ཡིན་རྣམས་ཀྱིས་ དེ་ཐོབ་པ་མ་ཡིན་ནོ། །རྒྱལ་པོའི་ཕོ་བྲང་ལྕང་ལོ་ཅན་ཞེས་བྱ་བ་ལ་གཞི་འམ། གནས་ས་མེད་དོ། །དྲང་སྲོང་ཆེན་པོ། མི་མ་ཡིན་རྣམས་དང༌། གནོད་སྦྱིན་རྣམས་ཀྱིས་ལྷན་ཅིག་ཏུ་གནས་ པའང་མི་ཐོབ་བོ། །དྲང་སྲོང་ཆེན་པོ། གཞན་ཡང༌། མི་མ་ཡིན་རྣམས་ཀྱིས་བཀའ་མཉན་པར་བྱའོ། །དྲང་སྲོང་ཆེན་པོ། གཞན་ཡང༌། མི་མ་ཡིན་རྣམས་ཀྱིས་བདག་ལ་ཕན་པ་རྫོགས་ པ་དང༌། ཕ་རོལ་ལ་སྨོད་པ་དང༌། རྩོད་པ་དང༌། དྲང་སྲོང་ཆེན་པོ། གཞན་ཡང༌། མི་མ་ཡིན་རྣམས་ལ་སྣོད་མེར་རབ་ཏུ་འབར་བ་མགོ་ལ་བསྐོན་པ་དང༌། དྲང་སྲོང་ཆེན་པོ། གཞན་ ཡང༌། མི་མ་ཡིན་རྣམས་ཀྱི་མགོ་པོ་ཚལ་བ་བདུན་དུ་གཤེགས་པར་བྱེད་དོ། །དྲང་སྲོང་ཆེན་པོ། གཞན་ཡང༌། མི་མ་ཡིན་ནི་གཏུམ་པ་དང༌། དྲང་པ་དང༌། ཁྲོ་བའོ། །དེ་རྣམས་ཀྱིས་ འདི་ལྟར་རྒྱལ་པོ་ཆེན་པོ་ལ་རྗོད་པར་བྱེད་དོ། །རྒྱལ་པོ་ཆེན་པོ་ལ་བརྗོད་པར་མ་ནུས་ན་སྐྱེས་བུ་ལ་སོགས་པ་ལ་རྗོད་པར་བྱེད་དོ། །རྒྱལ་པོའི་སྐྱེས་བུ་ལ་བརྗོད་པར་མ་ནུས་ན། དེའི་ འོག་མའི་སྐྱེས་བུ་རྣམས་ལ་རྗོད་པར་བྱེད་དོ། །དྲང་སྲོང་ཆེན་པོ། དེ་ཡང་མི་མ་ཡིན་རྣམས་རྒྱལ་པོ་ཆེན་པོ་ལ་འགལ་བ་སྨྲ་བའོ། །དྲང་སྲོང་ཆེན་པོ། འདི་ལྟ་སྟེ། མང་ག་དྷའི་ ༄༅། །ཡུལ་གྱི་རྒྱལ་པོ་ལ་ཆོམ་རྐུན་བྱུང་ན་དེ་མ་ཐག་ཏུ་རྒྱལ་པོ་ལ་རྗོད་པར་བྱེད་དོ། །རྒྱལ་པོ་ལ་བརྗོད་པར་མ་ནུས་ན། རྒྱལ་པོའི་སྐྱེས་བུ་ལ་རྗོད་བར་བྱེད་དོ། ། སྐྱེས་བུ་ལ་བརྗོད་པར་མ་ནུས་ན་དེའི་འོག་མའི་སྐྱེས་བུ་ལ་རྗོད་པར་བྱེད་པ་བཞིན་ནོ། །དྲང་སྲོང་ཆེན་པོ། དེ་ཡང་མ་ག་དྷའི་རྒྱལ་པོ་ལ་ཆོམ་རྐུན་གྱིས་གནོད་པ་བྱེད་པར་བརྗོད་དོ། ། དྲང་སྲོང་ཆེན་པོ། འདི་ལྟ་བུ་མི་མ་ཡིན་ཡོད་པ་རྣམས་གཏུམ་པ་དང༌། དྲག་པ་དང༌། ཁྲོ་བའོ། །དེ་མ་ཐག་ཏུ་རྒྱལ་པོ་རྣམས་ལ་རྗོད་པར་བྱེད་དོ། །རྒྱལ་བོ་ཆེན་པོ་ལ་བརྗོད་པར་ མ་ནུས་ན་རྒྱལ་པོའི་སྐྱེས་བུ་ལ་རྗོད་པར་བྱེད་དོ། །སྐྱེས་བུ་ལ་བརྗོད་པར་མ་ནུས་ན་དེ་འོག་མའི་སྐྱེས་བུ་ལ་རྗོད་པར་བྱེད་དོ། །དྲང་སྲོང་ཆེན་པོ། དེ་ནི་མི་མ་ཡིན་རྣམས་རྒྱལ་པོ་ ཆེན་པོ་རྣམས་ལ་འགལ་བར་རྗོད་པར་བྱེད་དོ། །དྲང་སྲོང་ཆེན་པོ། མི་མ་ཡིན་གང་ཞིག་གནོད་སྦྱིན་ཕོའམ། གནོད་སྦྱིན་མོའམ། གནོད་སྦྱིན་གྱི་བུ་ཕོའམ། གནོད་སྦྱིན་གྱི་ བུ་མོའམ། གནོད་སྦྱིན་གྱི་བློན་པོ་ཆེན་པོའམ། གནོད་སྦྱིན་གྱི་འཁོར་རམ། གནོད་སྦྱིན་གྱི་གཡོག་འཁོར་རམ། དྲི་ཟ་ཕོའམ། དྲི་ཟ་མོའམ། དྲི་ཟའི་བུ་ཕོའམ། དྲི་ ཟའི་བུ་མོའམ། དྲི་ཟའི་བློན་པོ་ཆེན་པོའམ། དྲི་ཟའི་གཡོག་འཁོར་རམ། གྲུལ་བུམ་ཕོའམ། གྲུལ་བུམ་མོའམ། གྲུལ་བུམ་གྱི་བུ་ཕོའམ། གྲུལ་བུམ་གྱི་བུ་མོའམ། གྲུལ་ བུམ་གྱི་བློན་པོ་ཆེན་པོའམ། གྲུལ་བུམ་གྱི་འཁོར་རམ། གྲུལ་བུམ་གྱི་གཡོག་འཁོར་རམ། ཀླུ་ཕོ་འམ། ཀླུ་མོ་འམ། ཀླུའི་བུ་ཕོའམ། ཀླུའི་བུ་མོའམ། ཀླུའི་བློན་པོ་ཆེན་པོའམ། ཀླུའི་ འཁོར་རམ། ཀླུའི་གཡོག་འཁོར་རམ། རབ་ཏུ་སྡང་བའི་སེམས་ཀྱིས་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་རྣམས་འགྲོ་བའམ། རྗེས་སུ་འགྲོ་བའམ། རྗེས་སུ་འགྲོ་བ་དང༌། སྡོད་པ་དང༌། ལྷན་ཅིག་ཏུ་སྡོད་པ་དང༌། གནས་པ་དང༌། ལྷན་གཅིག་ཏུ་གནས་པ་དང༌། ཉལ་བ་དང༌། ལྷན་ཅིག་ཏུ་ཉལ་བ་དང༌། འདི་རྣམས་ནི་གནོད་སྦྱིན་ རྣམས་དང༌། གནོད་སྦྱིན་ཆེན་པོ་རྣམས་དང༌། སྡེ་དཔོན་རྣམས་དང༌། སྡེ་དཔོན་ཆེན་པོ་རྣམས་ལ་གསོལ་བར་བྱེད་པ་དང༌། ང་རོ་སྒྲོགས་པར་བྱེད་པ་དང༌། སྒྲ་ཆེར་སྒྲོགས་པར་ བྱེད་པའོ། །འདིར་གནོད་སྦྱིན་གྱིས་བཟུང་ནས་གནོད་སྦྱིན་འདིས་ཚེ་འཕྲོག་པར་བྱེད་པ་དང༌། གནོད་སྦྱིན་འདིས་འཚེ་བར་བྱེད་པ་དང༌། གནོད་སྦྱིན་འདི་རྣམ་པར་འཐོ་འཚམ་པར་ བྱེད་པ་དང༌། གནོད་སྦྱིན་འདི་གནོད་པར་བྱེད་པ་དང༌། གནོད་སྦྱིན་འདི་རྣམ་པར་གནོད་པར་བྱེད་པ་དང༌། གནོད་སྦྱིན་འདིས་ནི་མི་གཏོང་བར་བྱེད་དོ། །གནོད་སྦྱིན་རྣམས་དང༌། གནོད་སྦྱིན་ཆེན་པོ་རྣམས་དང༌། སྡེ་དཔོན་རྣམས་དང༌། སྡེ་དཔོན་ཆེན་པོ་རྣམས་གང་ཞེ་ན། དབང་པོ་ཟླ་བ་ཆུ་ཟ་དང༌། །བྷཱ་ར་དྭ་ཛ་སྐྱེ་དགུའི་བདག །ཙིནྡན་དང་ནི་འོད་མཆོག་ ༄༅། །དང༌། །མགུལ་བ་མཛེས་དང་མགུལ་ངེས་དང༌། །སྐྱེ་དགུའི་བླ་མར་གྱུར་བ་དང༌། །ལྷ་ལས་བྱུང་བའི་ཁ་ལོ་བ། །དྲི་ཟ་སྣ་ཚོགས་སྡེ་དང་ནི། །མི་རྒྱལ་རྒྱལ་ བའི་ཁྱུ་མཆོག་དང༌། །དེ་བཞིན་རི་དང་གངས་ཅན་དང༌། །གང་བ་སྨིན་དྲུག་ཕུག་དང་ནི། །འཚོ་བ་དང་ནི་བཏང་བཟུང་དང༌། །སྣ་ཚོགས་བཤེས་གཉེན་གཉའ་ཤིང་འཛིན། ། ས་སྐྱོང་རབ་ཏུ་རྟོགས་བ་དང༌། །ངོ་ཚ་མིག་དང་ཁང་པ་དང༌། །ལྔ་ལེན་གཏུམ་པོ་ཨཱ་ལ་པ་ཀ། སྲིད་སྒྲུབ་ཡིད་བཟང་བཞིན་བཟང་དང༌། །ཞོ་གདོང་ནོར་བུ་སྤྱོད། །དེ་ བཞིན་དབང་ཕྱུག་དང་བཅས་སོ། །འདི་རྣམས་ནི་གནོད་སྦྱིན་རྣམས་དང༌། གནོད་སྦྱིན་ཆེན་པོ་རྣམས་དང༌། སྡེ་དཔོན་རྣམས་དང༌། སྡེ་དཔོན་ཆེན་པོ་རྣམས་ལ་གསོལ་ བར་བྱེད་པ་དང༌། ང་རོ་སྒྲོགས་པར་བྱེད་པ་དང༌། སྒྲ་ཆེར་སྒྲོགས་པར་བྱེད་པའོ། །འདིར་གནོད་སྦྱིན་གྱིས་བཟུང་ནས། གནོད་སྦྱིན་འདིས་ཚེ་འཕྲོག་པར་བྱེད་པ་དང༌། གནོད་སྦྱིན་འདི་འཚེ་བར་བྱེད་པ་དང༌། གནོད་སྦྱིན་འདིས་རྣམ་པར་མཐོ་འཚམ་པར་བྱེད་པ་དང༌། གནོད་སྦྱིན་འདིས་གནོད་པར་བྱེད་པ་དང༌། གནོད་སྦྱིན་འདི་རྣམ་ པར་གནོད་པར་བྱེད་པ་དང༌། གནོད་སྦྱིན་འདིས་ནི་མི་གཏོང་བར་བྱེད་དོ། །དྲང་སྲོང་ཆེན་པོ། འདིས་ནི་ལྕད་ལོ་ཅན་གྱི་ཕོ་བྲང་གིས་སྲུངས་ཤིག། དགེ་སློང་དང༌། དགེ་ སློང་མ་དང༌། དགེ་བསྙེན་དང༌། དགེ་བསྙེན་མ་རྣམས་ལ་བསྲུང་བ་དང༌། སྦ་བ་དང༌། འཚོ་བ་མེད་པ་དང༌། བདེ་བ་དང་ལེགས་པར་གནས་སོ། །དྲང་སྲོང་ཆེན་པོ། ད་ནི་བདག་ཅག་རྣམས་ འགྲོ་བར་བགྱིའོ། །བདག་ཅག་རྣམས་ནི་བྱ་བ་མང་བ་དང༌། བྱེད་པ་མང་བས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱེད་རྣམས་ད་ནི་འགྲོ་བར་གྱིས་ཤིག ། དེ་ནས་རྒྱལ་པོ་ཆེན་པོ་བཞི་པོ་རྣམས་ལངས་ནས། བཅོམ་ལྡན་འདས་ལ་ཕྱག་བྱས་ཏེ་བསྐོར་བ་བྱས་ནས་དེར་མི་སྣང་བར་གྱུར་ཏོ། །གནོད་སྦྱིན་དེ་རྣམས་ཀྱང་ལངས་ནས་གང་སུ་དག་ གིས༑ བཅོམ་ལྡན་འདས་ལ་ཕྱག་བྱས་ཏེ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །གང་སུ་དག་གིས་བཅོམ་ལྡན་འདས་ལ་བསྙུན་གསོལ་སྟེ། བསྙུན་གསོལ་ནས་སྙིང་པོ་ དང༑ སྙིང་པོ་མེད་པ་ཇི་ལྟར་ཞེས་ཞུས་པ་དེ་རྣམས་དེ་ཉིད་དུ་མི་སྣང་བར་གྱུར་ཏོ། །གང་སུ་དག་གིས་བཅོམ་ལྡན་འདས་ག་ལ་བ་དེར་ཐལ་མོ་སྦྱར་ནས་དེ་ཉིད་དུ་མི་སྣང་བར་གྱུར་ཏོ། ། གང་ལ་ལ་ཞིག་གིས་མིང་དང༌། རིགས་རྣམ་པར་དཔྱད་ནས་དེ་ཉིད་དུ་མི་སྣང་བར་གྱུར་ཏོ། །གང་ལ་ལ་ཞིག་ཅང་མི་སྨྲ་བར་གྱུར་ཏེ་དེ་ཉིད་དུ་མི་སྣང་བར་གྱུར་ཏོ། །ལྕང་ལོ་ཅན་གྱི་ཕོ་ བླང་གི་མདོ་ལས། སྐབས་རབ་མཆོག་དང་པོའོ།། །།དེ་ནས་ཡང་བཅོམ་ལྡན་འདས་ཀྱིས་དེའི་མཚན་མ་འདས་ནས། དགེ་སློང་རྣམས་བོས་ནས། དགེ་ ༄༅། །སློང་དག། འདིའི་མཚན་མོ་རྒྱལ་པོ་ཆེན་པོ་བཞི་པོ་རྣམས་དང༌། གནོད་སྦྱིན་གྱི་སྡེ་དཔོན་ཆེན་པོ་རྣམས་དང༌། དྲི་ཟའི་སྡེ་མང་པོ་དང༌། གྲུལ་བུ་མ་གྱི་སྡེ་ མང་པོ་དང༌། ཀླུའི་སྡེ་མང་པོ་དང༌། ཕྱོགས་བཞི་བསྲུང་ཞིང་གནས་སོ། །ཕྱོགས་བཞིར་ཚོན་ཚན་དུ་གནས་སོ། །ཕྱོགས་བཞི་སྐྱོང་ཞིང་གནས་སོ། །མཚན་མོ་འོངས་ཏེ་ཁ་དོག་སྣ་ ཚོགས་པ་ཅན་གྱིས་བྱ་རྒོད་ཕུང་པོའི་རི་འབའ་ཞིག་སྣང་བར་བྱས་ཏེ། བཅོམ་ལྡན་འདས་ག་ལ་བ་དེར་སོང་སྟེ་སོང་ནས། ང་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། ། དགེ་སློང་དག་དང༌། གནོད་སྦྱིན་དེ་རྣམས་གང་ལ་ལ་ཞིག་གིས་ང་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་ང་ལ་བསྙུན་གསོལ་ཏེ། བསྙུན་གསོལ་ ནས་ཇི་ལྟར་སྙིང་པོ་དང༌། སྙིང་པོ་མེད་པའི་གཏམ་འདྲི་ཞིང་ཕྱོགས་གཅིག་ཏུ་འཁོད་དོ། །གང་སུ་དག་གིས་ང་ལ་ཐལ་མོ་སྦྱར་ནས་ཕྱོགས་གཅིག་ཏུ་འཁོད་དོ། །གང་སུ་དག་གིས་ མིང་དང་རིགས་དཔྱོད་ཅིང་ཕྱོགས་གཅིག་ཏུ་འཁོད་དོ། །གང་སུ་དག་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་དགེ་སློང་དག་དང༌། རྒྱལ་པོ་ཆེན་ པོ་རྣམ་ཐོས་ཀྱི་བུས་ང་ལ་འདི་སྐད་ཅེས་གསོལ་ནས། གནོད་སྦྱིན་མ་རུངས་པ་ཡོད་པ་རྣམས་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་མ་རུངས་པ་ གང་ལ་ཞིག་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་བཙུན་པ་བཅོམ་ལྡན་འདས་ལམ་དད་པར་གྱུར་ཏོ། །གནོད་སྦྱིན་འབྲིང་པོ་གང་ལ་ལ་ཞིག་ བཙུན་པ་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་དམན་པ་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་ཏོ། །གནོད་སྦྱིན་དམན་པ་གང་ལ་ལ་ ཞིག་བཙུན་པ་བཅོམ་ལྡན་འདས་ལ་དད་པར་གྱུར་ཏོ། །གནོད་སྦྱིན་གང་ལ་ལ་ཞིག་བཙུན་པ་བཅོམ་ལྡན་འདས་ལ་མ་དད་པར་གྱུར་པའི་རྒྱུ་གང་ལགས། བཙུན་པ་བཅོམ་ལྡན་ འདས་ཀྱིས་སྲོག་གཅོད་པ་སྤོང་བའི་ཆོས་བསྟན་པ་དང༌། མ་བྱིན་པར་ལེན་པ་སྤོང་བའི་ཆོས་བསྟན་པ་དང༌། འདོད་པས་ལོག་པར་སྤྱོད་པ་སྤོང་བའི་ཆོས་བསྟན་པ་དང༌། བརྫུན་དུ་སྨྲ་ བ་སྤོང་བའི་ཆོས་བསྟན་པ་དང༌། མྱོས་པར་འགྱུར་བའི་ཆང་གི་བཏུང་བ་སྤོང་བའི་ཆོས་བསྟན་པས་སོ། །གནོད་སྦྱིན་གང་དག་དེ་རྣམས་བཙུན་པས་སྲོག་གཅོད་པ་སྤོང་བ་ལ་མི་དགའ་ བར་གྱུར་པ་དང༌། མ་བྱིན་པར་ལེན་པ་སྤོང་བ་ལ་མི་དགའ་བར་གྱུར་པ་དང༌། འདོད་པས་ལོག་པར་སྤྱོད་པ་སྤོང་བ་ལ་མི་དགའ་བར་གྱུར་པ་དང༌། བརྫུན་དུ་སྨྲ་བ་སྤོང་བ་ལ་མི་ དགའ་བར་གྱུར་པ་དང༌། མྱོས་པར་འགྱུར་བའི་ཆང་གི་བཏུང་བ་སྤོང་བ་ལ་མི་དགའ་བར་གྱུར་པས་སོ། །དེ་རྣམས་ལ་མི་དགའ་ཞིང་མི་འདོད་པར་གྱུར་ཏོ། །བཙུན་པ་བཅོམ་ ༄༅། །ལྡན་འདས། ཉན་ཐོས་ཇི་སྙེད་ཡོད་པ་རྣམས་འབྲོག་དགོན་པའི་ལམ་དུ་ཞུགས་ནས་ཉལ་བ་དང༌། འདུག་པ་དང་བརྟེན་ཏོ། །སྒྲ་མེད་ཅིང་དབྱངས་མེད་པར་དབེན་ པར་གནས་ཤིང་འདུ་འཛིའི་འཚེ་བ་མེད་དོ། །སོ་སོར་དགེ་སྦྱོང་རྣམས་མཐུན་ཞིང་གནས་སོ། །དེ་ན་གནོད་སྦྱིན་མ་རུངས་རྣམས་ཀྱི་གནས་ཡོད་དོ། །གང་ཞིག་བཅོམ་ལྡན་འདས་ ཀྱི་གསུང་རང་ལམ་དད་པར་གྱུར་ཏེ། དེ་རྣམས་དད་པར་བྱ་བའི་ཕྱིར་བཙུན་པ་བཅོམ་ལྡན་འདས་ལ་བསླབ་པར་བྱ་སྟེ། ལྕང་ལོ་ཅན་གྱི་ཕོ་བྲང་གིས་བསྲུང་དུ་གསོལ། དགེ་ སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་རྣམས་ལ་བསྲུང་བ་དང༌། སྦ་བ་དང༌། འཚེ་བ་མེད་པ་དང༌། བདེ་བ་དང༌། ལེགས་པར་གནས་སོ། །དགེ་ སློང་རྣམས་ལ་བདག་གིས་ཅང་མི་གསུང་བའི་ཚུལ་གྱིས་གནང་བ་བྱིན་ནོ། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས་གནང་བ་བྱིན་པར་ཤེས་ཏེ། དེའི་ཚེ་འདི་ལྟར་ལྕང་ ལོ་ཅན་གྱི་ཕོ་བྲང་གིས་སྲུངས་ཤིག་ཅེས་གསོལ་ཏོ། །སྤྱན་ལྡན་དཔལ་དང་ལྡན་པ་ཡི། །རྣམ་པར་གཟིགས་ལ་ཕྱག་འཚལ་ལོ། །སེམས་ཅན་རྣམས་ལ་བརྩེ་བ་ ཡི༑ ༑གཙུག་ཏོར་ཅན་ལ་ཕྱག་འཚལ་ལོ། །མགོན་མེད་རྣམས་ལ་གདུང་བ་ཡི། །ཐམས་ཅད་སྐྱོབ་ལ་ཕྱག་འཚལ་ལོ། །འདུད་ཀྱི་སྡེ་རྣམས་འཇོམས་པ་ཡི། །འཁོར་བ་ འཇིག་ལ་ཕྱག་འཚལ་ལོ། །བྲམ་ཟེ་དཔལ་དང་ལྡན་པ་ཡི། །གསེར་ཐུབ་ལ་ནི་ཕྱག་འཚལ་ལོ། །སེམས་ཅན་རྣམ་གྲོལ་མཛད་པ་ཡི། །འོད་སྲུང་ལ་ནི་ཕྱག་འཚལ་ལོ། །ཤཱཀྱའི་ སྲས་ནི་དཔལ་དང་ལྡན། །ཉི་མའི་རྒྱུད་ལ་ཕྱག་འཚལ་ལོ། །སྡུག་བསྔལ་ཀུན་ལས་གྲོལ་མཛད་པ། །གང་ཞིག་ཆོས་ནི་རབ་སྟོན་མཛད། །གང་ཡང་འཇིག་རྟེན་པར་གྱུར་ པ༑ ༑ཇི་ལྟར་བ་བཞིན་གཟིགས་གྱུར་པའི། །དེ་རྣམས་ལ་ནི་ཕྲ་མ་མེད། །འཇིགས་པ་མེད་པ་ཆེན་པོ་ནི། །གང་ཞིག་གཽ་ཏམ་ཕྱག་བྱེད་པ། །ལྷ་དང་མི་ལ་ཕན་པ་ཡིན། །རིག་ པ་དང་ནི་ཞབས་སུ་ལྡན། །འཇིགས་པ་མེད་པ་ཆེན་པོ་སྟེ། །ཉི་མའི་དཀྱིལ་འཁོར་ཆེན་པོ་ནི། །གང་ཞིག་ཏུ་ནི་ནུབ་ཅིང་འཆར། །གང་དུ་ཉི་མ་ནུབ་གྱུར་པ། །དེར་ནི་མཚན་ མོར་འགྱུར་བ་ཡིན། །གང་དུ་ཉི་མ་ཤར་གྱུར་པ། །དེར་ནི་ཉིན་མོ་ཞེས་བརྗོད་དོ། །གཏིང་ནི་ཟབ་པའི་རྒྱ་མཚོ་ཡི། །དེ་ཡི་ཆུ་ཡི་བཅུད་བཟང་ངོ༌། །དེ་ལྟར་དེར་ནི་སྐྱེས་གྱུར་པའི།། རྒྱ་མཚོའི་ཆུ་ཡི་བཅུད་བཞིན་ནོ། །འདིར་ནི་ཤར་གྱི་ཕྱོགས་ཀྱི་ནི། །སྐྱེ་བོ་རྣམས་ལ་འདི་རྗོད་དོ། །དེ་ཡི་ཕྱོགས་ནི་ཡོངས་སྐྱོང་བའི། །རྒྱལ་པོ་ཆེན་པོ་གྲགས་ཆེན་ལྡན། །དྲི་ ཟ་རྣམས་ཀྱི་བདག་པོ་སྟེ། །མིང་ནི་རྒྱལ་པོ་ཡུལ་འཁོར་སྐྱོང༌། །དྲི་ཟ་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་ ༄༅། །གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ །དེ་ཡང་སངས་རྒྱས་མཐོང་བ་དང༌། །ཉི་མའི་གཉེན་གྱི་སངས་རྒྱས་ ནི༑ ༑འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་པ་ལ།། མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་འདི་བརྗོད་དོ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིའོ། །རིག་པ་དང་ནི་ ཞབས་སུ་ལྡན། །རྒྱལ་བ་གཽ་ཏམ་ཕྱག་འཚལ་ལོ། །གང་ཡང་ཡི་དྭགས་རྗོད་བྱེད་པ། །ཕྲ་མ་རྒྱབ་ཀྱི་ཤ་ཅན་དང༌། །སྲོག་གཅོད་པ་ལ་ཆགས་པ་དང༌། །སྐྱེས་བུ་མ་ལུས་འཇོམས་ པའོ༑ ༑འདིར་ནི་ལྷོ་ཡི་ཕྱོགས་གནས་པའི། །སྐྱེ་བོ་རྣམས་ལ་འདི་སྐད་བརྗོད། །དེ་ཡི་གནས་ནི་ཡོངས་སྐྱོང་བ། །རྒྱལ་པོ་ཆེན་པོ་གྲགས་ལྡན་པ། །གྲུལ་བུམ་རྣམས་ཀྱི་བདག་པོ་སྟེ།། མིང་ནི་འཕགས་སྐྱེས་པོ་ཞེས་བྱ། །གྲུལ་བུམ་འཁོར་དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ །དེ་ཡང་སངས་རྒྱས་མཐོང་བ་དང༌། །ཉི་མའི་རྒྱུད་ཀྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ ནི་ཉན་པའོ། །དེ་ཕྱིར་དེ་ལྟར་འདི་བརྗོད་དོ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ ལོ༑ ༑ཉི་མའི་དཀྱིལ་འཁོར་ཆེན་པོ་ནི། །གང་ནས་གང་དུ་ཤར་གྱུར་པ། །དེར་ནི་ཉིན་མོར་འགྱུར་བ་སྟེ། །ཉིན་མོར་ཞེས་ནི་བརྗོད་པ་ཡིན། །གང་དུ་ཉི་མ་ནུབ་གྱུར་པ། །དེ་ནི་མཚན་ མོར་རྗོད་པར་བྱེད། །གཏིང་ནི་ཟབ་པའི་རྒྱ་མཚོ་ཡི། །དེའི་ཆུ་ཡི་བཅུད་བཟང་ངོ༌། །དེ་ལྟར་དེར་ནི་སྐྱེས་གྱུར་པའི། །རྒྱ་མཚོའི་ཆུ་ཡི་བཅུད་བཞིན་ནོ། །འདིར་ནི་ནུབ་ཀྱི་ཕྱོགས་ཀྱི་ནི།། སྐྱེ་བོ་རྣམས་ལ་འདི་བརྗོད་དེ། །དེའི་ཕྱོགས་ནི་ཀུན་བསྐྱོད་པའི། །རྒྱལ་པོ་ཆེན་པོ་གྲགས་ཆེན་ལྡན། །ཀླུ་རྣམས་ཀྱི་ནི་བདག་པོ་སྟེ། །འདི་ཡི་མིང་ནི་མིག་མི་བཟང༌། །ཀླུ་ཡི་འཁོར་ དང་བཅས་པ་ནི། །གླུ་དང་གར་གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ། དེ་ཡང་སངས་རྒྱས་མཐོང་བ་དང༌། །ཉི་མའི་གཉེན་གྱི་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིད་དོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། ། ༄༅། །སྐྱེས་བུ་མཆོག་ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་བའོ། །དེ་ཕྱིར་དེ་ལྟར་འདི་ བརྗོད་དོ། །རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏམ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །གང་ཞིག་བྱང་ཕྱོགས་སྒྲ་མི་ སྙན༑ ལྷུན་པོ་བལྟ་ན་སྡུག་རི་དགའ། །དེར་སྐྱེས་པ་ཡི་མི་རྣམས་ནི། །བདག་གིར་ཡོངས་སུ་བཟུང་བ་མེད། །དེ་རྣམས་ས་བོན་འདེབས་པ་མེད། །རྨོ་བ་ཡང་ནི་མེད་པ་ཡིན། ། དཀའ་སྤྱད་མེད་པར་འབྲས་སྨིན་ནས། །མི་རྣམས་ཡོངས་སུ་ལོངས་སྤྱོད་དོ། །སྤུན་མེད་མ་གྲུགས་ཤིན་ཏུ་དག །དྲི་བཟང་འབྲས་ནི་འབྲས་བུར་ལྡན། །འབྲས་ཀྱི་འོ་མ་ལ་འཚེད་ ཅིང༌། །དེ་བཞིན་བཙོས་ནས་ལོངས་སྤྱོད་དོ། །བ་ལང་རྐང་གཅིག་ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །རྐང་པ་གཅིག་པའི་ཕྱུགས་ཞོན་ནས། །ཡུལ་དང་ཕྱོགས་ སུ་འགྲོ་བར་བྱེད། །བུད་མེད་ཀྱི་ནི་བཞོན་པ་ལ། །ཞོན་ནས་ཡུལ་དང་ཕྱོགས་སུ་འགྲོ་།སྐྱེས་བའི་བཞོན་པ་ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །གཞོན་ནུ་ མ་ཡི་བཞོན་པ་ལ། །ཞོན་ནས་ཡུལ་དང་ཕྱོགས་སུ་འགྲོ། གཞོན་ནུའི་བཞོན་པ་ལ་ཞོན་ནས། །ཡུལ་དང་ཕྱོགས་སུ་འགྲོ་བར་བྱེད། །བཞོན་པ་དེ་རྣམས་ལ་ཞེན་ནས། །ཕྱོགས་ ཀུན་དུ་ནི་རྗེས་སུ་འགྲོ་།གཙོ་བོ་རྒྱལ་པོ་ཁྱད་མེད་དོ། །གླང་ཆེན་བཞོན་དང་རྟ་ཡི་བཞོན། །ལྷའི་བཞོན་པ་ལ་གནས་ནས། །ཁང་བཟང་དང་ནི་ཁྱོགས་རྣམས་ནི། །རྒྱལ་པོ་ཆེན་པོ་ གྲགས་ཆེན་ལྡན། །དེའི་ཡང་གྲུབ་པའི་གྲོང་ཁྱེར་ནི། །དྲི་མེད་པར་སྣང་ལ་གནས་པ། །ལྕང་ལོ་ཅན་དང་ཀུ་ཤའི་གྲོང༌། །ཕ་རོལ་ཀུ་ཤའི་གྲོང་དང་ནི། །ནཱ་ཊཱའི་གྲོང་དང་ཕ་རོལ་གྱི། ། ཀུ་ཤའི་ཏ་ཡི་གྲོང་ཡིན་ནོ། །བྱང་གི་ཕྱོགས་ན་ཐམས་ཅད་རྒྱས། །སྐྱེ་བོའི་ཚོགས་པ་མང་པོ་གནས། །དགུ་བཅུ་རྩ་དགུ་གྲོང་མཁའ་ལ། །རྒྱལ་པོའི་ཕོ་བྲང་ལྕང་ལོ་ཅན། །སླར་ཡང་ དྲང་སྲོང་ཆེན་པོ་དང༌། །རྒྱལ་པོ་ཆེན་པོ་ལུས་ངན་པོ། །ཅོག་ལྡན་ཞེས་པ་རྒྱལ་པོ་ཆེན་པོའི་ཕོ་བྲང་ངོ༌། །དེའི་ཕྱིར་རྒྱལ་པོ་ཆེན་པོ་རྣམ་ཐོས་ཀྱི་བུ་དང༌། ལུས་ངན་པོ་ཞེས་བརྗོད་དོ།། སོ་སོར་རབ་ཏུ་གསལ་ཞིང་ཞི་བ་དང༌། དེ་དང་དེར་ནི་དེ་དང་དེ་མདངས་དང༌། དེའི་གཟི་བརྗིད་དང༌། དཔའ་ཞིང་སྟོབས་དང་ལྡན་པའི་རྒྱལ་པོ་སྟོབས་དང་ལྡན་པའི་མིང་ངོ༌། །ས་ གཞི་ཡང་ནི་བཅུད་ལྡན་ནོ། །གནས་དེར་སྤྲིན་རྣམས་ཆར་འབེབས་པར་བྱེད་དོ། །དེར་ནི་བྷ་ག་ལ་བ་ཏཱི་ཞེས་པའི་རྫིང་བུའོ། །གང་དུ་གནོད་སྦྱིན་ཚོགས་དང་ལྷན་ཅིག་ཏུ་གནས་ སོ༑ ༑དེར་ནི་རྟག་ཏུ་ཤིང་གི་འབྲས། །སྣ་ཚོགས་བྱ་རྣམས་ལྷན་ཅིག་གནས། །རྨ་བྱ་ཁྲུང་ཁྲུང་སྒྲ་སྒྲོགས་ཤིང༌། །ཁུ་བྱུག་རྣམས་ནི་ཚན་ཚན་གནས། །ཤང་ཤང་ཏེའུ་སྒྲ་སྒྲོགས་ ༄༅། །ཤིང༌། །དེ་ནས་ཡང་ནི་དུར་པ་དང༌། །གོང་མོ་ནགས་ཀྱི་བྱ་གག་རྣམས། །ནགས་ཀྱི་རྫིང་བུར་གནས་པའོ། །ནེ་ཙོ་རི་སྐེགས་དེ་སྒྲ་འབྱིན། །དཎྜ་མཱ་ན་ བྱ་དཀར་དང༌། །དུས་ཀུན་དུ་ནི་མཛེས་པར་བྱེད། །ལུས་ངན་རྒྱལ་པོའི་རྫིང་རྟག་མཛེས། །འདི་ནི་བྱང་གི་ཕྱོགས་ཀྱི་ཡུལ། །སྐྱེ་བོ་རྣམས་ནི་འདི་བཞིན་བརྗོད། །དེ་ཡི་ཕྱོགས་ནི་ ཡོངས་སྐྱོང་བའི། །རྒྱལ་པོ་ཆེན་པོ་གྲགས་དང་ལྡན། །གནོད་སྦྱིན་རྣམས་ཀྱི་བདག་པོ་སྟེ། །འདི་ཡི་མིང་ནི་ལུས་ངན་བོ། །གནོད་སྦྱིན་འཁོར་དང་བཅས་པ་ནི། །གླུ་དང་གར་ གྱིས་དགའ་བར་བྱེད། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །དེ་ནི་དགུ་བཅུ་རྩ་གཅིག་གོ །དེ་ཡང་སངས་རྒྱས་མཐོང་ བ་དང༌། །ཉི་མའི་གཉེན་གྱིས་སངས་རྒྱས་ནི། །འཇིགས་དང་བྲལ་བ་ཆེན་པོ་ལ། །ཐག་རིང་ནས་ནི་ཕྱག་བགྱིའོ། །སྐྱེས་བུ་ཅང་མཁྱེན་ཁྱེད་ཕྱག་འཚལ། །སྐྱེས་བུ་མཆོག་ ཁྱོད་ཕྱག་འཚལ་ལོ། །དགེ་བ་རྟག་ཏུ་གསུང་བ་ལ། །མི་མ་ཡིན་རྣམས་ཁྱེད་ཕྱག་འཚལ། །རྟག་ཏུ་འདི་ནི་ཉན་པའོ། །དེ་ཕྱིར་དེ་ལྟར་ཉན་པའོ། །དེ་ཕྱིར་དེ་ལྟར་འདི་བརྗོད་ དོ༑ ༑རྒྱལ་བ་གཽ་ཏམ་ཕྱག་གྱིས་ཤིག །རྒྱལ་བ་གཽ་ཏ་མ་ཕྱག་བགྱིད་དོ། །རིག་པ་དང་ནི་ཞབས་སུ་ལྡན། །སངས་རྒྱས་གཽ་ཏམ་ཕྱག་འཚལ་ལོ། །འདིར་ནི་དྲང་སྲོང་ཆེན་པོས་ ལྕང་ལོ་ཅན་དང་བཅས་པས་སྲུངས་ཤིག །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་རྣམས་བསྲུང་བ་དང༌། སྦ་བ་དང༌། འཚེ་བར་མེད་པ་དང༌། བདེ་བ་དང༌། ལེགས་པར་གནས་སོ། །དྲང་སྲོང་ཆེན་པོ། གང་སུ་དག །དགེ་སློང་དང་བཅས་པའམ། དགེ་སློང་མ་དང་བཅས་པའམ། དགེ་བསྙེན་དང་བཅས་པའམ། དགེ་བསྙེན་མ་དང་བཅས་ པ་རྣམས་དང༌། འདིར་ལྕང་ལོ་ཅན་གྱི་ཕོ་བྲང་གིས་དེ་བསྲུང་བ་དང༌། ཡོངས་སུ་རྫོགས་པ་ཐམས་ཅད་ཡོངས་སུ་གཟུང་ཞིག །དེ་ཡང་མི་མ་ཡིན་རྣམས་སོ། །གནོད་སྦྱིན་ནམ། གནོད་ སྦྱིན་མོའམ། གནོད་སྦྱིན་གྱི་བུ་ཕོའམ། གནོད་སྦྱིན་གྱི་བུ་མོའམ། གནོད་སྦྱིན་གྱི་བློན་པོ་ཆེན་པོའམ། གནོད་སྦྱིན་གྱི་འཁོར་རམ། གནོད་སྦྱིན་གྱི་གཡོག་འཁོར་རམ། དྲི་ཟ་ ཕོའམ། དྲི་ཟ་མོའམ། དྲི་ཟའི་ཕུ་ཕོའམ། དྲི་ཟའི་བུ་མོའམ། དྲི་ཟའི་བློན་པོ་ཆེན་པོའམ། དྲི་ཟའི་འཁོར་རམ། དྲི་ཟའི་གཡོག་འཁོར་རམ། གྲུལ་བུམ་ཕོའམ། གྲུལ་བུམ་ མོའམ། གྲུལ་བུམ་གྱི་བུ་ཕོའམ། གྲུལ་བུམ་གྱི་བུ་མོའམ། གྲུལ་བུམ་གྱི་བློན་པོ་ཆེན་པོའམ། གྲུལ་བུམ་གྱི་འཁོར་རམ། གྲུལ་བུམ་གྱི་གཡོག་འཁོར་རམ། ཀླུ་ཕོའམ། ཀླུ་མོའམ། ཀླུའི་བུ་ཕོའམ། ཀླུའི་བུ་མོ་འམ། ཀླུའི་བློན་པོ་ཆེན་པོའམ། ཀླུའི་འཁོར་རམ། ཀླུའི་གཡོག་འཁོར་རྣམས། རབ་ཏུ་སྡང་བའི་སེམས་ཀྱིས་འགྲོ་བའམ། རྗེས་ ༄༅། །སུ་འགྲོ་བའམ། རྗེས་སུ་འགྲོ་བ་དང༌། སྡོད་པ་དང༌། ལྷན་ཅིག་ཏུ་སྡོད་པ་དང༌། གནས་པ་དང༌། ལྷན་ཅིག་ཏུ་གནས་པ་དང༌། ཉལ་བ་དང་ ལྷན་ཅིག་ཏུ་གནས་པ་དང༌། ཉལ་བ་དང༌། ལྷན་ཅིག་ཏུ་ཉལ་བ་རྣམས་ལ། དྲང་སྲོང་ཆེན་པོ། འདི་རྣམས་ནི་མི་མ་ཡིན་རྣམས་ཞེས་བྱའོ། །གྲོང་ངམ། གྲོང་རྡལ་ལམ། བཀུར་སྟིར་བྱེད་ པའམ། བསྟི་སྟང་དུ་བྱེད་པ་རྣམས། དྲང་སྲོང་ཆེན་པོ། མི་མ་ཡིན་རྣམས་ཀྱིས་དེ་ཐོབ་པ་མ་ཡིན་ནོ། །རྒྱལ་པོ་ཆེན་པོའི་ཕོ་བྲང་ལྕང་ལོ་ཅན་ཞེས་བྱ་བ་གཞིའམ། གནས་ས་མེད་དོ། །དྲང་སྲོང་ཆེན་པོ། མི་མ་ཡིན་རྣམས་ཀྱིས་གནོད་སྦྱིན་དང་ལྷན་ཅིག་ཏུ་གནས་པའང་མི་འཐོབ་བོ། །དྲང་སྲོང་ཆེན་པོ། གཞན་ཡང་མི་མ་ཡིན་རྣམས་ཀྱིས་བཀའ་མཉན་པར་བྱའོ། །དྲང་སྲོང་ཆེན་པོ། གཞན་ ཡང༌། མི་མ་ཡིན་རྣམས་ཀྱིས་བདག་ལ་ཕན་པ་རྫོགས་པ་དང༌། ཕ་རོལ་ལ་སྨོད་པ་དང༌། རྩོད་བ་དང༌། དྲང་སྲོང་ཆེན་པོ། གཞན་ཡང༌། མི་མ་ཡིན་རྣམས་ལ་སྣོད་མེར་རབ་ཏུ་འབར་ བ་མགོ་ལ་བསྐོན་པ་དང༌། དྲང་སྲོང་ཆེན་པོ། གཞན་ཡང༌། མི་མ་ཡིན་རྣམས་ཀྱི་མགོ་བོ་ཚལ་བ་བདུན་དུ་གཤེགས་པར་བྱེད་དོ། །དྲང་སྲོང་ཆེན་པོ། གཞན་ཡང༌། མི་མ་ཡིན་ནི་གཏུམ་ བ་དང༌། དྲག་པ་དང༌། ཁྲོ་བའོ། །དེ་རྣམས་ཀྱིས་འདི་ལྟར་རྒྱལ་པོ་ཆེན་པོ་ལ་རྗོད་དོ། །རྒྱལ་པོ་ཆེན་པོ་ལ་བརྗོད་པར་མ་ནུས་ན་སྐྱེས་བུ་ལ་སོགས་པ་ལ་རྗོད་པར་བྱེད་དོ། ། རྒྱལ་པོ་ཆེན་པོའི་སྐྱེས་བུ་ལ་བརྗོད་པར་མ་ནུས་ན། དེའི་འོག་མའི་སྐྱེས་བུ་ལ་རྗོད་པར་བྱེད་དོ། །དྲང་སྲོང་ཆེན་པོ། དེ་ཡང་མི་མ་ཡིན་རྣམས་རྒྱལ་པོ་ཆེན་པོ་ལ་འགལ་བ་སྨྲ་བའོ། །དྲང་ སྲོང་ཆེན་པོ། འདི་ལྟ་སྟེ། མ་ག་དྷའི་ཡུལ་གྱི་རྒྱལ་པོ་ལ་ཆོམ་རྐུན་བྱུང་ན། དེ་མ་ཐག་ཏུ་རྒྱལ་པོ་ལ་རྗོད་པར་བྱེད་དོ། །རྒྱལ་པོ་ལ་བརྗོད་པར་མ་ནུས་ན་རྒྱལ་པོའི་སྐྱེས་བུ་ལ་རྗོད་པར་ བྱེད་དོ། །སྐྱེས་བུ་ལ་བརྗོད་པར་མ་ནུས་ན། དེའི་འོག་མའི་སྐྱེས་བུ་བརྗོད་པར་བྱེད་པ་བཞིན་ནོ། །དྲང་སྲོང་ཆེན་པོ། ཡང་མ་ག་དྷའི་རྒྱལ་པོ་ལ་ཆོམ་རྐུན་གྱིས་གནོད་པ་བྱེད་པར་བརྗོད་ དོ༑ ༑དྲང་སྲོང་ཆེན་པོ། འདི་ལྟ་བུའི་མི་མ་ཡིན་ཡོད་པ་རྣམས་གཏུམ་པ་དང༌། དྲག་པ་དང༌། ཁྲོ་བའོ། །དེ་མ་ཐག་ཏུ་རྒྱལ་པོ་ཆེན་པོ་རྣམས་ལ་རྗོད་པར་བྱེད་དོ། །རྒྱལ་པོ་ཆེན་པོ་ལ་ བརྗོད་པར་མ་ནུས་ན་རྒྱལ་པོའི་སྐྱེས་བུ་ལ་རྗོད་པར་བྱེད་དོ། །སྐྱེས་བུ་ལ་བརྗོད་པར་མ་ནུས་ན་དེའི་འོག་མའི་སྐྱེས་བུ་ལ་རྗོད་པར་བྱེད་དོ། །དྲང་སྲོང་ཆེན་པོ། མི་མ་ཡིན་རྣམས་ རྒྱལ་པོ་ཆེན་པོ་རྣམས་ལ་འགལ་བ་རྗོད་པར་བྱེད་དོ། །དྲང་སྲོང་ཆེན་པོ། མི་མ་ཡིན་གང་ཞིག་གནོད་སྦྱིན་ནམ། གནོད་སྦྱིན་མོ་འམ། གནོད་སྦྱིན་གྱི་བུའམ། གནོད་སྦྱིན་ གྱི་བུ་མོའམ། གནོད་སྦྱིན་གྱི་བློན་པོ་ཆེན་པོའམ། གནོད་སྦྱིན་གྱི་འཁོར་རམ། གནོད་སྦྱིན་གྱི་གཡོག་འཁོར་རམ། དྲི་ཟ་ཕོའམ། དྲི་ཟ་མོའམ། དྲི་ཟའི་བུ་ཕོའམ། ༄༅། །དྲི་ཟའི་བུ་མོ་འམ། དྲི་ཟའི་བློན་པོ་ཆེན་པོ་འམ། དྲི་ཟའི་འཁོར་རམ། དྲི་ཟའི་གཡོག་འཁོར་རམ། གྲུལ་བུམ་པོའམ། གྲུལ་བུམ་མོའམ། གྲུལ་བུམ་གྱི་ བུ་ཕོ་འམ། གྲུལ་བུམ་གྱི་བུ་མོའམ། གྲུལ་བུམ་གྱི་བློན་པོ་ཆེན་པོའམ། གྲུལ་བུམ་གྱི་འཁོར་རམ། གྲུལ་བུམ་གྱི་གཡོག་འཁོར་རམ། ཀླུ་ཕོ་འམ། ཀླུ་མོ་འམ། ཀླུའི་བུ་ཕོ་འམ། ཀླུའི་ བུ་མོ་འམ། ཀླུའི་བློན་པོ་ཆེན་པོའམ། ཀླུའི་འཁོར་རམ། ཀླུའི་གཡོག་འཁོར་རྣམས་རབ་ཏུ་སྡང་བའི་སེམས་ཀྱིས་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་ བསྙེན་མ་རྣམས་འགྲོ་བ་འམ། རྗེས་སུ་འགྲོ་བའམ། རྗེས་སུ་འགྲོ་བ་དང༌། སྡོད་པ་དང༌། ལྷན་ཅིག་ཏུ་སྡོད་པ་དང༌། ཉལ་བ་དང༌། ལྷན་ཅིག་ཏུ་ཉལ་བ་དང༌། འདི་རྣམས་ནི་ གནོད་སྦྱིན་རྣམས་དང༌། གནོད་སྦྱིན་ཆེན་པོ་རྣམས་དང༌། སྡེ་དཔོན་རྣམས་དང༌། སྡེ་དཔོན་ཆེན་པོ་རྣམས་ལ་གསོལ་བར་བྱེད་པ་དང༌། ང་རོ་སྒྲོགས་པར་བྱེད་པ་དང༌། སྒྲ་ ཆེར་སྒྲོགས་པར་བྱེད་པའོ། །འདིར་གནོད་སྦྱིན་གྱིས་བཟུང་ནས་གནོད་སྦྱིན་འདིས་ཚེ་འཕྲོག་པར་བྱེད་པ་དང༌། གནོད་སྦྱིན་འདིས་འཚེ་བར་བྱེད་པ་དང༌། གནོད་སྦྱིན་འདིས་ རྣམ་པར་མཐོ་འཚམ་པར་བྱེད་པ་དང༌། གནོད་སྦྱིན་འདིས་གནོད་པར་བྱེད་པ་དང༌། གནོད་སྦྱིན་འདིས་རྣམ་པར་གནོད་པར་བྱེད་པ་དང༌། གནོད་སྦྱིན་འདིས་མི་གཏོང་པར་ བྱེད?་དོ། །གནོད་སྦྱིན་རྣམས་དང༌། གནོད་སྦྱིན་ཆེན་པོ་རྣམས་དང༌། སྡེ་དཔོན་རྣམས་དང༌། སྡེ་དཔོན་ཆེན་པོ་རྣམས་གང་ཞེ་ན། དབང་པོ་ཟླ་བ་ཆུ་ཟླ་དང༌། །བྷཱ་ར་དྭ་ཛ་སྐྱེ་དགུའི་ བདག །ཙནྡན་དང་ནི་འདོད་མཆོག་དང༌། །མགུལ་པ་མཛེས་དང་མགུལ་ངེས་དང༌། །སྐྱེ་དགུའི་བླ་མར་གྱུར་པ་དང༌། །ལྷ་ལས་བྱུང་བའི་ཁ་ལོ་བ། །དྲི་ཟ་སྣ་ཚོགས་སྡེ་དང་ནི། །མི་ རྒྱལ་རྒྱལ་བའི་ཁྱུ་མཆོག་དང༌། །དེ་བཞིན་རི་དང་གངས་ཅན་དང༌། །གང་བ་སྨིན་དྲུག་ཕུག་དང་ནི། །འཚེ་བ་དང་ནི་བཏང་བཟུང་དང༌། །སྣ་ཚོགས་བཤེས་གཉེན་གཉའ་ཤིང་འཛིན།། ས་སྐྱོང་རབ་ཏུ་རྟོགས་པ་དང༌། །ངོ་ཚ་མིག་དང་ཁང་པ་དང༌། །ལྔ་ལེན་གཏུམ་པོ་ཨཱ་ལ་པ་ཀ །སྲིད་སྒྲུབ་ཡིད་བཟང་བཞིན་བཟང་དང༌། །ཞོ་སྡོང་ནོར་བུ་ནོར་བུ་སྤྱོད། །དེ་བཞིན་དབང་ ཕྱུག་དང་བཅས་སོ། །འདི་རྣམས་ནི་གནོད་སྦྱིན་རྣམས་དང༌། གནོད་སྦྱིན་ཆེན་པོ་རྣམས་དང༌། སྡེ་དཔོན་རྣམས་དང༌། སྡེ་དཔོན་ཆེན་པོ་རྣམས་ལ་གསོལ་བར་བྱེད་པ་དང༌། ང་རོ་སྒྲོགས་ པར་བྱེད་པ་དང༌། སྒྲ་ཆེར་སྒྲོགས་པར་བྱེད་པའོ། །འདིར་གནོད་སྦྱིན་གྱིས་བཟུང་ནས། གནོད་སྦྱིན་འདིས་ཚེ་འཕྲོག་པར་བྱེད་པ་དང༌། གནོད་སྦྱིན་འདིས་འཚེ་བར་བྱེད་པ་དང༌། གནོད་སྦྱིན་འདིས་རྣམ་པར་མཐོ་འཚམ་པར་བྱེད་པ་དང༌། གནོད་སྦྱིན་འདིས་གནོད་པར་བྱེད་བ་དང༌། གནོད་སྦྱིན་འདིས་རྣམ་པར་གནོད་པར་བྱེད་པ་དང༌། གནོད་སྦྱིན་འདིས་ནི་ ༄༅། །མི་གཏོང་བར་བྱེད་དོ། །དྲང་སྲོང་ཆེན་པོ། འདིས་ནི་ལྕང་ལོ་ཅན་གྱི་ཕོ་བྲང་གིས་སྲུངས་ཤིག །དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་ བསྙེན་མ་དང༌། དགེ་བསྙེན་མ་རྣམས་ལ་བསྲུང་བ་དང༌། སྦ་བ་དང༌། འཚེ་བ་མེད་པ་དང༌། བདེ་བ་དང༌། ལེགས་པར་གནས་སོ། །དྲང་སྲོང་ཆེན་པོ། ད་ནི་བདག་ཅག་རྣམས་འགྲོ་ བར་བགྱིའོ། །བདག་ཅག་རྣམས་ནི་བྱ་བ་མང་བ་དང༌། བྱེད་པ་མང་བས་སོ། །དགེ་སློང་དག །བདག་གིས་ད་ནི་རྒྱལ་པོ་ཆེན་པོ་རྣམས་ལ་འགྲོ་བའི་གནང་བ་བྱིན་ནོ། །དེ་ནས་རྒྱལ་ པོ་ཆེན་པོ་བཞི་པོ་རྣམས་ལངས་ནས། བདག་ལ་ཕྱག་བྱས་ཏེ། བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །དགེ་སློང་དག །གནོད་སྦྱིན་རྣམས་ཀྱིས་ཀྱང་ལངས་ནས་ བདག་ལ་ཕྱག་བྱས་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །གང་སུ་དག་གིས་བདག་ལ་བསྙུན་གསོལ་ཏེ། བསྙུན་གསོལ་ནས་སྙིང་པོ་དང་།སྙིང་པོ་མེད་པ་ཇི་ལྟར་ ཞེས་ཞུས་པ་དེ་རྣམས་དེ་ཉིད་དུ་མི་སྣང་བར་གྱུར་ཏོ། །གང་སུ་དག་གིས་བདག་ག་ལ་བ་དེར་ཐལ་མོ་སྦྱར་ནས་འདུད་པ་བྱས་ཏེ་མི་སྣང་བར་གྱུར་ཏོ། །གང་ལ་ལ་ཞིག་གིས་ མིང་དང༌། རིགས་རྣམ་པར་དཔྱད་ནས་དེ་ཉིད་དུ་མི་སྣང་བར་གྱུར་ཏོ། །གང་ལ་ལ་ཞིག་ཅང་མི་སྨྲ་བར་གྱུར་ཏེ། དེ་ཉིད་དུ་མི་སྣང་བར་གྱུར་ཏོ། །དགེ་སློང་དག། ཁ་ཏོན་དུ་ ཟུངས་ལ་ལྕང་ལོ་ཅན་གྱི་ཕོ་བྲང་གིས་སྲུངས་ཤིག ། དགེ་སློང་དག །ཆོངས་ལ་ལྕང་ལོ་ཅན་གྱི་ཕོ་བྲང་གིས་སྲུངས་ཤིག །དགེ་སློང་དག །དོན་དང་བཅས་པས་ལྕང་ལོ་ཅན་གྱི་ཕོ་བྲང་གིས་ སྲུངས་ཤིག །དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་རྣམས་ལ་བསྲུང་བ་དང༌། སྦ་བ་དང༌། འཚེ་བ་མེད་པ་དང༌། བདེ་བ་དང༌། ལེགས་པར་གནས་སོ། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་བ་དང༌། དགེ་སློང་དེ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །སྐབས་རབས་མཆོག་གཉིས་པ་སྟེ་ལྕང་ ལོ་ཅན་གྱི་ཕོ་བྲང་གི་མདོ་རྫོགས་སོ།། །།པཎྜི་ཏ་ཨཱ་ནནད་ཤྲཱིའི་ཞལ་སྔ་ནས། མང་དུ་ཐོས་པའི་ལོཙྪ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། སྐད་གཉིས་སྨྲ་བ་རྣམས་ཀྱི་གདན་ས་གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སའི་སྟེང་དུ་ཉི་ཟླ་ལྟར་གྱུར་ཅིག། Copyright © 2012 by the Asian Classics Input Project. All rights reserved.