Tibetan Works reader

སངས་རྒྱས་ཕལ་པོ་ཆེ་ཞེས་བྱ་བ་ཤིན་ཏུ་རྒྱས་པ་ཆེན་པོའི་མདོ།

ཕལ་ཆེན།

ཁ checked, but not manually proofread ༄༅༅། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ། བམ་ པོ་ཉི་ཤུ་གཉིས་པ། དེ་ནས་ལྷའི་བུ་དྲན་པ་དང་ལྡན་པས་བྱང་ཆུབ་སེམས་དཔའ་ཆོས་ཀྱི་བློ་ གྲོས་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། འཇིག་རྟེན་གྱི་ཁམས་ཐམས་ཅད་ན་ བྱང་ཆུབ་སེམས་དཔའ་འཕགས་པའི་གསུང་རབ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་ ༄༅། །ཞིང་ངུར་སྨྲིག་གི་གོས་འཆང་བ་དེ་དག་གིས་ཚངས་པའི་སྤྱོད་པ་ཡོངས་སུ་དག་པ་ གང་གིས་བྱང་ཆུབ་སེམས་དཔའ་རྣམ་པར་དགོད་པ་འདི་དག་ལས་འདས་ཏེ་མྱུར་དུ་བླ་ན་མེད་པ་ཡང་དག་ པར་རྫོགས་པའི་བྱང་ཆུབ་ཏུ་འབྱུང་བར་འགྱུར་བ་དེ་ཇི་ལྟར་ཡིད་ལ་བྱ། དེ་སྐད་ཅེས་སྨྲས་པ་དང༑ བྱང་ཆུབ་ སེམས་དཔའ་ཆོས་ཀྱི་བློ་གྲོས་ཀྱིས་ལྷའི་བུ་དྲན་པ་དང་ལྡན་པ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། དེ་ བས་ན༑ བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་རྣམས་ཀྱིས་དམིགས་པ་བཅུ་རྣམ་པར་ བསྒོམས་ཏེ་གོང་དུ་ཆོས་བཅུ་ཡིད་ལ་བྱའོ། །དམིགས་པ་བཅུ་རྣམ་པར་བསྒོམས་པ་གང་ཞེ་ན། འདི་ལྟ་སྟེ། ལུས་དང་ལུས་ཀྱི་ལས་དང༌། ངག་དང་ངག་ཀྱི་ལས་དང༌། ཡིད་དང་ཡིད་ཀྱི་ལས་དང༌། སངས་རྒྱས་དང༌། ཆོས་དང༌། དགེ་འདུན་དང༌། བསླབ་པ་ཡང་དག་པར་བླང་ བ་དག་སྟེ། ཅི། ཚངས་པའི་སྤྱོད་པ་དེ་ལུས་སམ། དེ་སྟེ་ཚངས་པའི་སྤྱོད་པ་དེ་ལུས་ཡིན་ན་ནི། ཚངས་པའི་སྤྱོད་པ་མི་གཙང་བར་འགྱུར། ཚངས་པའི་སྤྱོད་པ་ཆོས་མ་ཡིན་པར་འགྱུར། ཚངས་པའི་སྤྱོད་པ་འཁྲུགས་པར་འགྱུར། ཚངས་པའི་སྤྱོད་པ་དྲི་ང་བར་འགྱུར། ཚངས་པའི་ སྤྱོད་པ་གཙང་བ་མ་ཡིན་པར་འགྱུར། ཚངས་པའི་སྤྱོད་པ་སྨད་པར་འགྱུར། ཚངས་པའི་སྤྱོད་པ་མི་མཐུན་པར་འགྱུར། ཚངས་པའི་སྤྱོད་པ་ ཀུན་ནས་ཉོན་མོངས་པར་འགྱུར། ཚངས་པའི་སྤྱོད་པ་ཀེང་རུས་སུ་འགྱུར། ཚངས་པའི་སྤྱོད་པ་སྲིན་གྱི་ཚང་དུ་འགྱུར་རོ། །དེ་སྟེ་ལུས་ཀྱི་ ༄༅། །ལས་ཚངས་པའི་སྤྱོད་པ་ཡིན་ན་ནི། ཉལ་བ་ཚངས་པའི་སྤྱོད་པར་འགྱུར། འདུག་པ་ཚངས་པའི་སྤྱོད་པར་འགྱུར། འགྲེང་བ་ཚངས་པའི་སྤྱོད་པར་འགྱུར། འགྲོ་བ་ཚངས་པའི་སྤྱོད་པར་འགྱུར། བལྟས་པ་ཚངས་པའི་སྤྱོད་པར་འགྱུར། རྣམ་པར་བལྟས་ པ་ཚངས་པའི་སྤྱོད་པར་འགྱུར། བསྐུམ་པ་ཚངས་པའི་སྤྱོད་པར་འགྱུར། བརྐྱང་བ་ཚངས་པའི་སྤྱོད་པར་འགྱུར། འཁོར་བ་ཚངས་པའི་སྤྱོད་ པར་འགྱུར། འགྲེས་པ་ཚངས་པའི་སྤྱོད་པར་འགྱུར་རོ། །དེ་སྟེ་ངག་ཚངས་པའི་སྤྱོད་པ་ཡིན་ན་ནི། དབྱངས་ཚངས་པའི་སྤྱོད་པར་འགྱུར། ང་ རོ་ཚངས་པའི་སྤྱོད་པར་འགྱུར། བརྗོད་པ་ཚངས་པའི་སྤྱོད་བར་འགྱུར། སྨྲ་བ་ཚངས་པའི་སྤྱོད་པར་འགྱུར། སྨྲོས་པ་ཚངས་པའི་སྤྱོད་པར་ འགྱུར༑ ཐོང་གནས་རྩོལ་བ་ཚངས་པའི་སྤྱོད་པར་འགྱུར། ལྕེ་བསྒྱུར་བ་ཚངས་པའི་སྤྱོད་པར་འགྱུར། མཆུ་སྦྱར་བ་ཚངས་པའི་སྤྱོད་པར་འགྱུར། ཚིག་སྦྱར་བ་ཚངས་པའི་སྤྱོད་པར་འགྱུར་རོ། །དེ་སྟེ་ངག་གི་ལས་ཚངས་པའི་སྤྱོད་པ་ཡིན་ན་ནི། །བརྗོད་པ་ཚངས་པའི་སྤྱོད་པར་འགྱུར། བརྡར་བྱས་པ་ཚངས་པའི་སྤྱོད་པར་འགྱུར། ཤིན་ཏུ་བསྟན་པ་ཚངས་པའི་སྤྱོད་པར་འགྱུར། བསྟན་པས་རྣམ་པར་བསྟན་པ་ཚངས་པའི་སྤྱོད་པར་འགྱུར། ལེགས་པར་བརྗོད་པ་ཚངས་པའི་སྤྱོད་པར་འགྱུར། ངན་དུ་བརྗོད་ པ་ཚངས་པའི་སྤྱོད་པར་འགྱུར། རྣམ་པར་གདགས་པ་ཚངས་པའི་སྤྱོད་པར་འགྱུར། རྣམ་པར་སྤྱོད་པ་ཚངས་པའི་སྤྱོད་པར་འགྱུར། ཡོངས་སུ་སྨོས་པ་ཚངས་པའི་སྤྱོད་པར་ འགྱུར་རོ། །དེ་སྟེ་ཡིད་ཚངས་པའི་སྤྱོད་པ་ཡིན་ན་ནི། དཔྱོད་པ་ཚངས་པའི་སྤྱོད་པར་འགྱུར། རྣམ་པར་དཔྱོད་པ་ཚངས་པའི་སྤྱོད་པར་འགྱུར། རྟོག་པ་ཚངས་པའི་སྤྱོད་པར་འགྱུར། རྣམ་པར་རྟོག་པ་ཚངས་པའི་སྤྱོད་པར་འགྱུར། དྲན་པ་ཚངས་པའི་སྤྱོད་པར་འགྱུར། ཕྱིར་དྲན་པ་ཚངས་པའི་སྤྱོད་པར་འགྱུར། སེམས་པ་ཚངས་པའི་སྤྱོད་པར་འགྱུར། རྣམ་པར་ སེམས་པ་ཚངས་པའི་སྤྱོད་པར་འགྱུར། སྒྱུ་མ་ཚངས་པའི་སྤྱོད་པར་འགྱུར། རྨི་ལམ་ཚངས་པའི་སྤྱོད་པར་འགྱུར་རོ། །དེ་སྟེ་ཡིད་ཀྱི་ལས་ཚངས་པའི་སྤྱོད་པ་ཡིན་ན་ནི། འདུ་ཤེས་ ཚངས་པའི་སྤྱོད་པར་འགྱུར། ཡིད་ལ་བྱེད་པ་ཚངས་པའི་སྤྱོད་པར་འགྱུར། གྲང་བ་ཚངས་པའི་སྤྱོད་པར་འགྱུར། དྲོ་བ་ཚངས་པའི་སྤྱོད་པར་འགྱུར། བདེ་བ་ཚངས་པའི་སྤྱོད་པར་ ༄༅། །འགྱུར༑ སྡུག་བསྔལ་ཚངས་པའི་སྤྱོད་པར་འགྱུར། བཀྲེས་པ་ཆངས་པའི་སྤྱོད་པར་འགྱུར། སྐོམ་པ་ཚངས་པའི་སྤྱོད་པར་འགྱུར། དགའ་བ་ཚངས་པའི་ སྤྱོད་པར་འགྱུར། ཞུམ་པ་ཚངས་པའི་སྤྱོད་པར་འགྱུར་རོ། །དེ་སྟེ་སངས་རྒྱས་ཚངས་པའི་སྤྱོད་པ་ཡིན་ན་ནི། གཟུགས་སངས་རྒྱས་སམ། འོན་ཏམ་ཚོར་བ་སངས་རྒྱས་ སམ༑ འདུ་ཤེས་སངས་རྒྱས་སམ། འདུ་བྱེད་སངས་རྒྱས་སམ། རྣམ་པར་ཤེས་པ་སངས་རྒྱས་སམ། མཚན་རྣམས་སངས་རྒྱས་སམ། མངོན་པར་ཤེས་པ་སངས་ རྒྱས་སམ། ལས་སངས་རྒྱས་སམ། འོན་ཏེ་རྣམ་པར་སྨིན་པ་སངས་རྒྱས་སམ། དེ་སྟེ་ལེགས་པར་བཤད་པའི་ཆོས་ཉིད་ཚངས་པར་སྤྱོད་པའི་གནས་ཡིན་ན་ནི། འགོག་ པ་གནས་སུ་འགྱུར་རོ། །མྱ་ངན་ལས་འདས་པ་གནས་སུ་འགྱུར་རོ། །བྲལ་བ་གནས་སུ་འགྱུར་རོ། །མ་སྐྱེས་པ་གནས་སུ་འགྱུར་རོ། །མ་བྱུང་བ་གནས་སུ་འགྱུར་རོ།། གྲགས་པ་མེད་པ་གནས་སུ་འགྱུར་རོ། །རྟོག་པ་མེད་པ་གནས་སུ་འགྱུར་རོ། །རྒྱུ་བ་མེད་པ་གནས་སུ་འགྱུར་རོ། །ཕྲད་པ་མེད་པའི་གནས་ནི། ཚངས་པའི་གནས་སུ་ འགྱུར་རོ། །དེ་སྟེ་དགེ་འདུན་སྡོམ་པའི་ནན་ཏན་ཅན་ཚངས་པའི་སྤྱོད་པ་ཡིན་ན་ནི། རྒྱུན་དུ་ཞུགས་པའི་འབྲས་བུའི་ཕྱིར་དགེ་འདུན་ནམ། འོན་ཏམ་རྒྱུན་དུ་ཞུགས་ པའི་འབྲས་བུ་དགེ་འདུན། ལན་གཅིག་ཕྱིར་འོང་བའི་འབྲས་བུའི་ཕྱིར་དགེ་འདུན་ནམ། འོན་ཏམ་ལན་གཅིག་ཕྱིར་འོད་བའི་འབྲས་བུ་དགེ་འདུན། ཕྱིར་མི་འོང་བའི་ འབྲས་བུའི་ཕྱིར་དགེ་འདུན་ནམ། འོན་ཏམ་ཕྱིར་མི་འོང་བའི་འབྲས་བུ་དགེ་འདུན། དགྲ་བཅོམ་པའི་འབྲས་བུའི་ཕྱིར་དགེ་འདུན་ནམ། འོན་ཏམ་དགྲ་བཅོམ་པའི་ འབྲས་བུ་དགེ་འདུན། གསུམ་རིག་པ་ཉིད་དགེ་འདུན་ནམ། དྲུག་མངོན་པར་ཤེས་པ་དགེ་འདུན་ནམ། འོན་ཏམ་ཁོང་དུ་ཆུད་པར་ནན་ཏན་དུ་བྱེད་པ་ཚངས་པའི་སྤྱོད་པ། དེ་སྟེ་བསླབ་པ་ཡང་དག་པར་བླངས་པ་ཚངས་པའི་སྤྱོད་པ་ཡིན་ན་ནི། ཐ་དད་དུ་གནས་པ་བསླབ་པ་ཡང་དག་པར་བླང་བའམ། ཡོངས་སུ་དག་པ་བསླབ་པ་ཡང་དག་པར་ བླང་བའམ། སློབ་དཔོན་གྱི་ཚིག་བསླབ་པ་ཡང་དག་པར་བླང་བའམ། ལན་གསུམ་དུ་བཟླས་པ་བསླབ་པ་ཡང་དག་པར་བླང་བའམ། མཁན་པོ་བསླབ་པ་ཡང་དག་པར་ བླང་བའམ། སྐྲ་བྲེགས་པ་དང༌། ངུར་སྨྲིག་གི་གོས་འཆང་བ་བསླབ་པ་ཡང་དག་པར་བླང་བའམ། སློང་མོས་འཚོ་བ་བསླབ་པ་ཡང་དག་པར་བླང་བའམ། འོན་ཏམ་དེ་ དག་ཚངས་པའི་སྤྱོད་པའམ་ཞེས་དེ་ལྟར་ཆོས་དེ་དག་ལ་རྣམ་པར་སྒོམ་ན། བདག་གི་ལུས་ལ་མངོན་པར་ཆགས་པ་མེད་པ་དང༌། སྒོམ་པ་ལ་ཞེན་པ་མེད་པ་དང༌། ཆོས་ ༄༅། །རྣམས་གནས་པ་མེད་པ་དང༌། འདས་པ་རྒྱུ་བ་མེད་པ་དང༌། མ་འོངས་པ་མ་ཕྱིན་པ་དང༌། ད་ལྟར་བྱུང་བ་སྟོང་པ་དང༌། ལས་ལ་བྱེད་པ་མེད་པ་དང༌། རྣམ་ པར་སྨིན་པ་ལ་ཚོར་བ་མེད་པ་དང༌། འཇིག་རྟེན་འདི་འཕོས་པ་མེད་པ་དང༌། འཇིག་རྟེན་ཕ་རོལ་ཆུད་མི་ཟ་བའི་ཕྱིར་ཚངས་པའི་སྤྱོད་པ་ཞེས་བྱ་བའི་ཆོས་དེ་གང་ཡིན། དེ་ གང་ལས་བྱུང༌། དེ་སུའི། དེ་ཅི་ཞིག། དེ་སུས་བྱས། དེ་ཡོད་དམ། དེ་མེད་དམ། དེ་གཟུགས་སམ། དེ་གཟུགས་མ་ཡིན་ནམ། དེ་ཚོར་བའམ། དེ་ཚོར་བ་མ་ཡིན་ ནམ༑ དེ་འདུ་ཤེས་སམ། དེ་འདུ་ཤེས་མ་ཡིན་ནམ། དེ་འདུ་བྱེད་དམ། དེ་འདུ་བྱེད་མ་ཡིན་ནམ། དེ་རྣམ་པར་ཤེས་པའམ། དེ་རྣམ་པར་ཤེས་པ་མ་ཡིན་ནམ། ཚངས་པར་སྤྱོད་པའི་ཆོས་དེ་གང་ཞིག་ཅེས་དེ་ལྟར་མི་དམིགས་ཤིང་དུས་གསུམ་མཉམ་པ་ཉིད་དུ་ནམ་མཁའ་ཡོངས་སུ་རྒྱས་པར་བྱ་བ་དང༌། ཆགས་པ་མེད་པར་ ཡིད་ལ་བྱ་བ་དང༌། སེམས་ལ་བསྒྲིབས་པ་མེད་པ་དང༌། གཉིས་སུ་མེད་པར་ཤིན་ཏུ་སྤྱོད་པ་དང༌། བསྒྲིབས་པ་མེད་པའི་སྦྱོར་བ་དང༌། མཚན་མ་མེད་པའི་ཆོས་གཟུང་ བ་དང༌། མཚན་ཉིད་མེད་པའི་ཆོས་རབ་ཏུ་ཤེས་པ་དང༌། སངས་རྒྱས་ཀྱི་ཆོས་མཉམ་པ་ཉིད་དང༌། སངས་རྒྱས་ཀྱི་ཆོས་ཐམས་ཅད་ལ་ཡང་དག་པར་སེམས་པས་ཚངས་ པའི་སྤྱོད་པ་ཡོངས་སུ་དག་པར་ཡིད་ལ་བྱའོ། །གོང་དུ་ཡང་ཆོས་བཅུ་དང་ལྡན་པས་ཡིད་ལ་བྱ་སྟེ། བཅུ་གང་ཞེ་ན། འདི་ལྟ་སྟེ། གནས་དང་གནས་མ་ཡིན་པ་ཤེས་པ་དང༌། འདས་ པ་དང༌། མ་འོངས་པ་དང༌། ད་ལྟར་བྱུང་བའི་ལས་དང༌། རྣམ་པར་སྨིན་པ་ཤེས་པ་དང་ལྡན་པ་དང༌། བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་ པར་འཇུག་པ་དང༌། ཀུན་ནས་ཉོན་མོངས་པ་དང༌། རྣམ་པར་བྱང་བ་དང༌། རྣམ་པར་ལྡང་བ་ཤེས་པ་དང་ལྡན་པ་དང༌། དབང་པོ་དང༌། བརྩོན་འགྲུས་ཐ་དད་པ་དང༌། ཡོངས་ སུ་རྫོགས་པ་མཆོག་དང༌། ཐ་མ་ཤེས་པ་དང་ལྡན་པ་དང༌། མོས་པ་ཐ་དད་པ་དང༌། མོས་པ་དུ་མ་ཤེས་པ་དང་ལྡན་པ་དང༌། ཁམས་ཐ་དད་པ་དང༌། ཁམས་དུ་མ་ཤེས་པ་དང་ ལྡན་པ་དང༌། ཐམས་ཅད་དུ་འགྲོ་བའི་ལམ་ཤེས་པ་དང་ལྡན་པ་དང༌། ལྷའི་མིག་ཐོགས་པ་མེད་པ་དང་ལྡན་པ་དང༌། བསྒྲིབས་པ་མེད་པ་རྗེས་སུ་དྲན་པ་ཤེས་པ་དང་ལྡན་པ་ དང༌། བག་ཆགས་ཀྱི་མཚམས་སྦྱོར་བ་ཡང་དག་པར་གཅད་པ་ཤེས་པ་དང་ལྡན་པ་སྟེ། དེ་བཞིན་གཤེགས་པའི་སྟོབས་རེ་རེ་ལ་ཡང་རྣམ་པར་དབྱེ་བ་ཤིན་ཏུ་རྒྱ་ཆེ་བར་ཁོང་དུ་ ཆུད་པར་བྱའོ། །ཐམས་ཅད་ཀྱང་ཚད་མེད་པར་བལྟ་བར་བྱའོ། །ཐོས་ནས་ཀྱང་སྙིང་རྗེ་ཆེན་པོ་ལ་བསྟན་པར་བྱའོ། །སེམས་ཅན་རྣམ་པར་སྒོམ་པ་ཡང་མི་གཏང་བར་བྱའོ། ། ༄༅། །ཆོས་ལ་ཤིན་ཏུ་བརྟག་པ་ཡང་མི་གཞིག་པར་བྱའོ། །བླ་ན་མེད་པའི་ཆོས་ལ་ཡང་དག་པའི་ཡི་དམ་ཡང་ཤིན་ཏུ་བརྩམ་པར་བྱའོ། །རྣམ་པར་ སྨིན་པ་ལ་ཡང་རེ་བ་མེད་པར་བྱའོ། །སྒྱུ་མའི་རང་བཞིན་ཡང་རྗེས་སུ་རྟོགས་པར་བྱའོ། །རྨི་ལམ་གྱི་རང་བཞིན་དུ་ཡང་ཡང་དག་པར་སྤྱད་པར་བྱའོ། །མིག་ཡོར་གྱི་ རང་བཞིན་དང་ཡང་ཐ་མི་དད་པར་བྱའོ། །སྒྲ་བརྙན་གྱི་རང་བཞིན་ཡང་སྤྱོད་ཡུལ་དུ་བྱའོ། །སྤྲུལ་པའི་རང་བཞིན་དུ་ཡང་མོས་པར་བྱ་སྟེ། དེ་དེ་ལྟར་ཞུགས་པས་ཉོན་ མོངས་པ་ཆུང་བར་སངས་རྒྱས་ཀྱི་ཆོས་ཐམས་ཅད་ཀྱང་མངོན་དུ་འགྱུར་རོ། །དེས་ཆོས་དེ་དག་གཉིས་སུ་མེད་པར་རྟོགས་པས་སེམས་དང་པོ་བསྐྱེད་པ་ཉིད་ཀྱིས་བླ་ན་མེད་པ་ ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བའི་གནས་ཡོད་དོ། ཆོས་ཐམས་ཅད་སེམས་ཀྱི་རང་བཞིན་དུ་ཤེས་པས་གཞན་གྱི་དྲིང་མི་འཇོག་པར་ཤེས་ རབ་ཀྱི་ཕུང་པོ་དང་ཡང་ལྡན་པར་འགྱུར་རོ། །ཤིན་ཏུ་རྒྱས་པ་ཆེན་པོའི་མདོ། །སངས་རྒྱས་ཕལ་པོ་ཆེ་ཞེས་བྱ་བ་ལས་ཚངས་པར་སྤྱོད་པའི་ལེའུ་ཞེས་བྱ་སྟེ། ཉི་ཤུ་རྩ་གཅིག་ པའོ༑༑ །།དེ་ནས་ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་ཆོས་ཀྱི་བློ་གྲོས་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། བསོད་ནམས་ཀྱི་ཕུང་པོ་ཇི་ཙམ་ ཞིག་དང་ལྡན་ན། སེམས་དང་པོ་བསྐྱེད་པའི་བྱང་ཆུབ་སེམས་དབར་འགྱུར། དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་ལྷའི་དབང་པོ་བརྒྱ་བྱིན་ལ་ འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། གནས་འདི་ནི། ཡིད་ཆེས་པར་ཤིན་ཏུ་དཀའ་སྟེ། ཤེས་པར་དཀའ། བརྟག་པར་དཀའ། མངོན་པར་དད་པར་དཀའ། ཤིན་ཏུ་ རྟོགས་པར་དཀའ། ཀུན་ནས་སྒྲུབ་པར་དཀའ། ཡང་དག་པར་སྤྱད་པར་དཀའ། བརྗོད་པར་དཀའ། བསྐྱེད་པར་དཀའ། བརྒལ་བར་དཀའ། ཁོང་དུ་ཆུད་པར་དཀའ། འོན་ ཀྱང་ཅི་ཚུལ་དུ་སངས་རྒྱས་ཀྱི་མཐུས་བཤད་པར་བྱའོ། །ཀྱེ་རྒྱལ་བའི་སྲས། དེ་ལ་ཇི་སྙམ་དུ་སེམས། གང་ཤར་ཕྱོགས་ཀྱི་འཇིག་རྟེན་གྱི་ཁམས་གྲངས་མེད་པར་གཏོགས་ པའི་སེམས་ཅན་དེ་དག་ལ་ལ་ཞིག་གིས་བསྐལ་པར་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ་བསླབ་པའི་ཚིག་ལྔ་པོ་དག་ཀྱང་འཛིན་དུ་བཙུད་པར་གྱུར་ལ། དེ་ བཞིན་དུ་ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་དང༌། དེ་བཞིན་དུ་བྱང་ཤར་གྱི་ཕྱོགས་མཚམས་དང༌། ཤར་ལྷོའི་ཕྱོགས་མཚམས་དང༌། ལྷོ་ནུབ་ཀྱི་ཕྱོགས་ མཚམས་དང༌། དེ་བཞིན་དུ་ནུབ་བྱང་གི་ཕྱོགས་མཚམས་དང༌། དེ་བཞིན་དུ་འོག་གི་ཕྱོགས་དང༌། དེ་བཞིན་དུ་སྟེང་གི་ཕྱོགས་ཀྱི་འཇིག་རྟེན་གྱི་ཁམས་གྲངས་མེད་པར་ ༄༅། །གཏོགས་པའི་སེམས་ཅན་རྣམས་ཀྱང་བསྐལ་པར་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ་བསླབ་པའི་ཚིག་ལྔ་པོ་དག་ཀྱང་འཛིན་དུ་ བཙུད་ན། རྒྱལ་བའི་སྲས། དེ་ལ་ཇི་སྙམ་དུ་སེམས། དེའི་རྒྱུས་བསོད་ནམས་མང་དུ་འཕེལ་ལམ། དེ་སྐད་ཅེས་སྨྲས་པ་དང༌། ལྷའི་དབང་པོ་བརྒྱ་བྱིན་གྱིས་བྱང་ ཆུབ་སེམས་དཔའ་ཆོས་ཀྱི་བློ་གྲོས་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། བསོད་ནམས་འདི་ནི། སངས་རྒྱས་བཅོམ་ལྡན་འདས་རྣམས་མ་གཏོགས་པར་ གཞན་གྱིས་ཤེས་པར་མི་ནུས་སོ། །སྨྲས་པ། ཀྱེ་རྒྱལ་བའི་སྲས། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་དང་པོ་བསྐྱེད་པའི་བསོད་ནམས་ཀྱི་ཕུང་པོ་ལ་ ནི༑ དེ་དག་གི་བསོད་ནམས་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆར་ཡང་ཉེ་བར་མི་འགྲོ་།བརྒྱ་སྟོང་གི་ཆ་དང༌། བྱེ་བའི་ཆ་དང༌། བྱེ་བ་བརྒྱའི་ཆ་དང༌། བྱེ་བ་སྟོང་གི་ཆ་དང༌། བྱེ་བ་བརྒྱ་སྟོང་གི་ཆ་དང༌། བྱེ་བ་ཁྲག་ཁྲིག་བརྒྱའི་ཆ་དང༌། བྱེ་བ་ཁྲག་ཁྲིག་སྟོང་གི་ཆ་དང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་ འགྲོ། གྲངས་དང༌། ཆ་དང༌། བགྲང་བ་དང༌། དཔེ་དང༌། རྒྱུར་ཡང་ཉེ་བར་མི་འགྲོའོ། །ཀྱེ་རྒྱལ་བའི་སྲས། དཔེ་སྔ་མ་དག་ལྟ་ཞོག་གི། ཀྱེ་རྒྱལ་བའི་སྲས། ཕྱོགས་བཅུའི་ འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་ཇི་སྙེད་པ་དེ་དག་བསྐལ་པ་བརྒྱར་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ་དགེ་བ་བཅུའི་ལས་ཀྱི་ ལམ་རྣམས་ལ་ཡང་དག་པར་སྦྱར་བར་གྱུར་ལ། གཞུང་དེ་བཞིན་དུ་བསྐལ་པ་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ་བསམ་གཏན་བཞི་ལ་རབ་ཏུ་བཀོད་ པ་དང༌། བསྐལ་པ་བརྒྱ་ཕྲག་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ་ཚངས་པའི་རྣམ་པར་སྤྱོད་པ་བཞི་ལ་རབ་ཏུ་བཀོད་པ་དང༌། བསྐལ་པ་བྱེ་བར་བདེ་བའི་ ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ་གཟུགས་མེད་པའི་སྙོམས་པར་འཇུག་པ་བཞི་ལ་རབ་ཏུ་བཀོད་པར་གྱུར་པ་དང༌། བསྐལ་པ་བྱེ་བར་བདེ་བའི་ཡོ་བྱད་ཐམས་ཅད་ཀྱིས་ རིམ་གྲོར་བྱས་ཏེ་རྒྱུན་དུ་ཞུགས་པའི་འབྲས་བུ་ལ་རབ་ཏུ་བཀོད་པ་དང༌། བསྐལ་པ་བྱེ་བ་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ་ལན་གཅིག་ཕྱིར་འོང་བའི་ འབྲས་བུ་ལ་རབ་ཏུ་བཀོད་པ་དང༌། བསྐལ་པ་བྱ་བ་བརྒྱ་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ་ཕྱིར་མི་འོང་བའི་འབྲས་བུ་ལ་རབ་ཏུ་བཀོད་པ་དང༌། བསྐལ་ པ་བྱེ་བ་ཁྲག་ཁྲིག་ཏུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ་དགྲ་བཅོམ་པ་ལ་རབ་ཏུ་བཀོད་པ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་བདེ་བའི་ཡོ་བྱད་ ༄༅། །ཐམས་ཅད་ཀྱིས་རིམ་གྲོར་བྱས་ཏེ་རང་སངས་རྒྱས་ཀྱི་བྱང་ཆུབ་ལ་རབ་ཏུ་བཞག་པར་གྱུར་ན། ཀྱེ་རྒྱལ་བའི་སྲས། དེ་ལ་ཇི་སྙམ་དུ་སེམས། དེའི་ རྒྱུས་བསོད་ནམས་མང་དུ་འཕེལ་ལམ། ལྷའི་དབང་པོ་བརྒྱ་བྱིན་གྱིས་སྨྲས་པ། ཀྱེ་རྒྱལ་བའི་སྲས། དེ་ནི། སངས་རྒྱས་བཅོམ་ལྡན་འདས་ཀྱིས་མཁྱེན་ཏོ། །བྱང་ཆུབ་སེམས་ དཔའ་ཆོས་ཀྱི་བློ་གྲོས་ཀྱིས་སྨྲས་པ། ཀྱེ་རྒྱལ་བའི་སྲས། བྱང་ཆུབ་སེམས་དཔའ་སེམས་དང་པོ་བསྐྱེད་པའི་བསོད་ནམས་ཀྱི་ཕུང་པོ་དེ་ལ་བསོད་ནམས་ཀྱི་ཕུང་པོ་སྔ་མ་ དེས་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང༌། བརྒྱ་སྟོང་གི་ཆ་དང༌། བྱེ་བའི་ཆ་དང༌། བྱེ་བ་བརྒྱའི་ཆ་དང༌། བྱེ་བ་སྟོང་གི་ཆ་དང༌། བྱེ་བ་བརྒྱ་སྟོང་གི་ཆ་དང༌། གྲངས་ དང༌། ཆ་དང༌། བགྲང་བ་དང༌། དཔེ་དང༌། རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས། གང་འདི་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་ པར་གཏོགས་པའི་སེམས་ཅན་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཤིང་བསླབ་པའི་ཚིག་ལྔ་ལ་བཞག་པ་དང༌། དགེ་བ་བཅུའི་ལས་ཀྱི་ལམ་ལ་ཡང་དག་པར་སྦྱར་བ་དང༌། བསམ་གཏན་བཞི་ལ་རབ་ཏུ་དགོད་པ་དང༌། ཚངས་པའི་རྣམ་པར་སྤྱོད་པ་བཞི་དང༌། གཟུགས་མེད་པའི་སྙོམས་ པར་འཇུག་པ་བཞི་དང༌། རྒྱུན་དུ་ཞུགས་པའི་འབྲས་བུ་དང༌། ལན་གཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བའི་འབྲས་བུ་དང༌། དགྲ་བཅོམ་པ་ཉིད་དང༌། རང་སངས་རྒྱས་ ཀྱི་བྱང་ཆུབ་ལ་རབ་ཏུ་དགོད་པ་དེ་ཙམ་གྱིས་ནི། སངས་རྒྱས་སུ་མི་འགྱུར་ཏེ། དེ་ནི། འདི་ལྟར་དེ་བཞིན་གཤེགས་པའི་རིགས་རྒྱུན་མི་གཅད་པའི་ཕྱིར་སེམས་སྐྱེའོ། །འཇིག་རྟེན་ གྱི་ཁམས་ཐམས་ཅད་མ་ལུས་པར་ཁྱབ་པར་བྱ་བའི་ཕྱིར་སེམས་སྐྱེའོ། །འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་ཐམས་ཅད་ཡང་དག་པར་བསྒྲལ་བའི་ ཕྱིར་སེམས་སྐྱེའོ། །འཇིག་རྟེན་གྱི་ཁམས་ཐམས་ཅད་འདུ་བ་དང༌། འཇིག་པ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །འཇིག་རྟེན་གྱི་ཁམས་ཐམས་ཅད་དུ་གཏོགས་པའི་ སེམས་ཅན་རྣམས་ཀྱི་ཀུན་ནས་ཉོན་མོངས་པ་དང༌། རྣམ་པར་བྱང་བ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །འཇིག་རྟེན་གྱི་ཁམས་ཐམས་ཅད་ཀྱི་རང་བཞིན་ཡོངས་སུ་ དག་པ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །སེམས་ཅན་ཐམས་ཅད་ཀྱི་བསམ་པ་དང༌། བག་ལ་ཉལ་དང༌། བག་ཆགས་ཀྱི་མཚམས་སྦྱོར་བ་ཡོངས་སུ་ཤེས་པར་ བྱ་བའི་ཕྱིར་སེམས་སྐྱེའོ། །སེམས་ཅན་ཐམས་ཅད་ཀྱི་འཆི་འཕོ་དང༌། །སྐྱེ་བ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །སེམས་ཅན་ཐམས་ཅད་ཀྱི་དབང་པོ་དང༌། སྦྱོར་བ་ ༄༅། །ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །སེམས་ཅན་ཐམས་ཅད་ཀྱི་སེམས་དང༌། སྤྱོད་པ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། ། སེམས་ཅན་ཐམས་ཅད་ཀྱི་དུས་གསུམ་གྱི་ཤེས་པ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་དེ་ནི། འདི་ལྟར་ སངས་རྒྱས་ཐམས་ཅད་དང་ཡུལ་མཉམ་པ་ཉིད་དུ་བྱ་བའི་ཕྱིར་སེམས་སྐྱེའོ། །ཀྱེ་རྒྱལ་བའི་སྲས། དཔེ་སྔ་མ་དག་ལྟ་ཞོག་གི །ཀྱེ་རྒྱལ་བའི་སྲས། འདི་ལ་སྐྱེས་བུ་ལ་ལ་ ཞིག་བྱུང་སྟེ། དེ་སེམས་བསྐྱེད་པ་གཅིག་གིས་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་འདའ་ལ། སེམས་བསྐྱེད་པ་དེ་དང་འདྲ་བས་ཤར་ཕྱོགས་སུ་བསྐལ་པ་ གྲངས་མེད་པ་ཟད་ཟད་དུ་འདས་པ་བྱས་ཀྱང་ཤར་ཕྱོགས་ཀྱི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཟད་པར་མ་ཟུང་ནས་དེའི་འོག་ཏུ་སྐྱེས་བུ་གཉིས་པ་ ཞིག་བྱུང་སྟེ། སྐྱེས་བུ་སྔ་མ་དེས་བསྐལ་པ་གྲངས་མེད་པ་འདས་པ་སྙེད་སེམས་བསྐྱེད་པ་གཅིག་གིས་འདས་ཏེ། དེའི་འོག་ཏུ་སྐྱེས་བུ་གསུམ་པ་ཞིག་བྱུང་སྟེ། སྐྱེས་བུ་ སྔ་མ་དེ་གཉིས་ཀྱིས་བསྐལ་པ་གྲངས་མེད་པ་གཉིས་ཀྱིས་འདས་པ་དེ་དག་སེམས་བསྐྱེད་པ་གཅིག་གིས་འདས་ཏེ། དེའི་འོག་ཏུ་སྐྱེས་བུ་བཞི་པ་ཞིག་བྱུང་ནས་སྔ་མ་ གསུམ་གྱིས་འཇིག་རྟེན་གྱི་ཁམས་གྲངས་མེད་པར་འདས་པ་དེ་དག་སེམས་བསྐྱེད་པ་གཅིག་གིས་འདས་ལ། དེའི་འོག་ཏུ་སྐྱེས་བུ་ལྔ་པ་ཞིག་བྱུང་སྟེ། སྐྱེས་བུ་སྔ་མ་བཞིས་བསྐལ་ པ་གྲངས་མེད་པར་འདས་པ་དེ་དག་སེམས་བསྐྱེད་པ་གཅིག་གིས་འདས་ནས་དེའི་འོག་ཏུ་སྐྱེས་བུ་དྲུག་པ་ཞིག་བྱུང་སྟེ། སྐྱེས་བུ་སྔ་མ་རྣམས་ཀྱིས་བསྐལ་པ་གྲངས་མེད་པར་འདས་པ་ དེ་དག་སེམས་བསྐྱེད་པ་གཅིག་གིས་འདས་ཏེ། དེའི་འོག་ཏུ་སྐྱེས་བུ་བདུན་པ་ཞིག་སྐྱེས་ལ། སྐྱེས་བུ་སྔ་མ་དྲུག་གིས་བསྐལ་པ་གྲངས་མེད་པར་འདས་པ་དེ་དག་སེམས་ བསྐྱེད་པ་གཅིག་གིས་འདས་ཏེ། དེའི་འོག་ཏུ་སྐྱེས་བུ་བརྒྱད་པ་ཞིག་སྐྱེས་ཏེ། སྐྱེས་བུ་སྔ་མ་བདུན་གྱིས་བསྐལ་པ་གྲངས་མེད་པར་འདས་པ་དེ་དག་སེམས་བསྐྱེད་པ་གཅིག་ གིས་འདས་ལ། དེའི་འོག་ཏུ་སྐྱེས་བུ་དགུ་པ་ཞིག་བྱུང་སྟེ། སྐྱེས་བུ་སྔ་མ་བརྒྱད་ཀྱིས་བསྐལ་པ་གྲངས་མེད་པར་འདས་པ་དེ་དག་སེམས་བསྐྱེད་པ་གཅིག་གིས་འདས་པར་བྱས་ ཏེ༑ དེའི་འོག་ཏུ་སྐྱེས་བུ་བཅུ་པ་ཞིག་བྱུང་ནས་སྐྱེས་བུ་སྔ་མ་དགུས་བསྐལ་པ་གྲངས་མེད་པར་འདས་པ་དེ་དག་སེམས་བསྐྱེད་པ་གཅིག་གིས་འདས་ལ། སེམས་བསྐྱེད་པ་དེ་ལྟ་ བུས་འདའ་བས་ཤར་ཕྱོགས་ལོགས་སུ་བསྐལ་པ་གྲངས་མེད་པར་བགྲོད་ཀྱང་ཤར་ཕྱོགས་ཀྱི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པའི་མཐའ་ནི། ཤེས་པར་ ༄༅། །མི་རུང་ངོ༌། །ཤར་ཕྱོགས་སུ་ཇི་ལྟ་བ་དེ་བཞིན་དུ་ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་དང༌། བྱང་ཤར་གྱི་ཕྱོགས་མཚམས་དང༌། ཤར་ ལྷོའི་ཕྱོགས་མཚམས་དང༌། ལྷོ་ནུབ་ཀྱི་ཕྱོགས་མཚམས་དང༌། ནུབ་བྱང་གི་ཕྱོགས་མཚམས་དང༌། འོག་དང༌། སྟེང་གི་ཕྱོགས་རྣམས་བཅུ་པོ་ཐམས་ཅད་དུ་ཡང་དེ་བཞིན་དུ་ རྒྱ་ཆེར་སྦྱར་ཏེ། སྐྱེས་བུ་དེ་དག་གིས་ཕྱོགས་བཅུར་ཇི་སྙེད་དུ་འདས་པ་དེ་དག་སྐྱེས་བུ་རེ་རེར་ཕྱོགས་བཅུར་རྣམ་པར་དགོད་པས་སེམས་བསྐྱེད་པ་གཅིག་གིས་བསྐལ་པ་ གྲངས་མེད་པ་འདའ་བའི་ཚུལ་དུ་བསྐལ་པ་གྲངས་མེད་པར་འདས་པ་དེ་དག་སྐྱེས་བུ་བརྒྱ་དག་གིས་འཇིག་རྟེན་གྱི་ཁམས་ཡོངས་སུ་དགོད་པའི་ཚུལ་དུ་ཕྱོགས་བཅུར་འཇིག་ རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ནི། མཐར་རྙེད་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་ པོ་བསྐྱེད་པའི་དགེ་བའི་རྩ་བ་ནི། མཐའ་མེད་དོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས། བྱང་ཆུབ་སེམས་དཔའ་རྣམས་ཀྱི་སེམས་སྐྱེ་བ་ནི། འཇིག་རྟེན་གྱི་ཁམས་གཅིག་ ཏུ་འགྲོ་བའམ། གྲངས་ཡོངས་སུ་ཤེས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་མ་ཡིན་གྱི། འདི་ལྟར་ཕྱོགས་བཅུ་ཚད་མེད་པར་ཡོངས་སུ་ཤེས་ནས་ བྱང་ཆུབ་སེམས་དཔའ་རྣམས་ཀྱི་སེམས་སྐྱེས་ཏེ། འདི་ལྟར་འཇིག་རྟེན་གྱི་ཁམས་ཕྲ་བ་ཡངས་པར་ཡོངས་སུ་ཤེས་པ་དང༌། འཇིག་རྟེན་གྱི་ཁམས་ཡངས་པ་ཕྲ་བར་ཡོངས་སུ་ཤེས་ པ་དང༌། འཇིག་རྟེན་གྱི་ཁམས་སྣྲེལ་ཞི་འཇིག་རྟེན་གྱི་ཁམས་སྤྱིའུ་ཚུགས་སུ་རྒྱུ་བར་ཡོངས་སུ་ཤེས་པ་དང༌། འཇིག་རྟེན་གྱི་ཁམས་སྤྱིའུ་ཚུགས་སུ་རྒྱུ་བ་འཇིག་རྟེན་གྱི་ཁམས་ སྣྲེལ་ཞིང་ཡོངས་སུ་ཤེས་པ་དང༌། འཇིག་རྟེན་གྱི་ཁམས་ཆུང་ངུ་འཇིག་རྟེན་གྱི་ཁམས་ཆེན་པོར་ཡོངས་སུ་ཤེས་པ་དང༌། འཇིག་རྟེན་གྱི་ཁམས་ཆེན་པོ་འཇིག་རྟེན་གྱི་ཁམས་ཆུང་ ངུར་ཡོངས་སུ་ཤེས་པ་དང༌། འཇིག་རྟེན་གྱི་ཁམས་ཡངས་པ་འཇིག་རྟེན་གྱི་ཁམས་དོག་པར་ཡོངས་སུ་ཤེས་པ་དང༌། འཇིག་རྟེན་གྱི་ཁམས་དོག་པ་འཇིག་རྟེན་གྱི་ཁམས་ཡངས་ པར་ཡོངས་སུ་ཤེས་པ་དང༌། འཇིག་རྟེན་གྱི་ཁམས་གཅིག་འཇིག་རྟེན་གྱི་ཁམས་བརྗོད་དུ་མེད་པར་ཡོངས་སུ་ཤེས་པ་དང༌། འཇིག་རྟེན་གྱི་ཁམས་བརྗོད་དུ་མེད་པ་འཇིག་རྟེན་གྱི་ ཁམས་གཅིག་ཏུ་ཡོངས་སུ་ཤེས་པ་དང༌། འཇིག་རྟེན་གྱི་ཁམས་བརྗོད་དུ་མེད་པ་འཇིག་རྟེན་གྱི་ཁམས་གཅིག་ཏུ་གཟུད་པ་ཡོངས་སུ་ཤེས་པ་དང༌། འཇིག་རྟེན་གྱི་ཁམས་གཅིག་ འཇིག་རྟེན་གྱི་ཁམས་བརྗོད་དུ་མེད་པར་གཟུད་པ་ཡོངས་སུ་ཤེས་པ་དང༌། འཇིག་རྟེན་གྱི་ཁམས་ཀུན་ནས་ཉོན་མོངས་པ་འཇིག་རྟེན་གྱི་ཁམས་རྣམ་པར་དག་པར་ཡོངས་སུ་ ༄༅། །ཤེས་པ་དང༌། འཇིག་རྟེན་གྱི་ཁམས་རྣམ་པར་དག་པ་འཇིག་རྟེན་གྱི་ཁམས་ཀུན་ནས་ཉོན་མོངས་པར་ཡོངས་སུ་ཤེས་པ་དང༌། སྐྲའི་རྩེ་མོ་འཇིག་ རྟེན་གྱི་ཁམས་ཚད་མེད་པར་ཡོངས་སུ་ཤེས་པ་དང༌། འཇིག་རྟེན་གྱི་ཁམས་ཚད་མེད་པ་སྐྲའི་རྩེ་མོར་ཡོངས་སུ་ཤེས་པ་དང༌། འཇིག་རྟེན་གྱི་ཁམས་གཅིག་འཇིག་རྟེན་གྱི་ ཁམས་ཐམས་ཅད་དུ་སྒྲུབ་པར་ཡོངས་སུ་ཤེས་པ་དང༌། འཇིག་རྟེན་གྱི་ཁམས་ཐམས་ཅད་ལུས་མེད་པའི་རང་བཞིན་དུ་ཡོངས་སུ་ཤེས་པ་དང༌། འཇིག་རྟེན་གྱི་ཁམས་འབྱམས་ ཀླས་པ་མ་ལུས་པ་ཐམས་ཅད་སེམས་བསྐྱེད་པ་གཅིག་གིས་ཐོགས་པ་མེད་པར་ཡོངས་སུ་ཤེས་པས། བྱང་ཆུབ་སེམས་དཔའ་རྣམས་ཀྱི་སེམས་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་སྐྱེའོ། །ཀྱེ་རྒྱལ་བའི་སྲས། འཇིག་རྟེན་གྱི་ཁམས་འདའ་བའི་དཔེ་སྔ་མ་དེ་དག་ལྟ་ཞོག་གི །ཀྱེ་རྒྱལ་བའི་སྲས། སྐྱེས་བུ་ལ་ལ་ཞིག་སྐྱེས་པར་གྱུར་ཏེ། དེའི་ སེམས་བསྐྱེད་པ་གཅིག་གིས་ཤར་ཕྱོགས་སུ་འདུ་བ་དང༌། འཇིག་པའི་བསྐལ་པ་གྲངས་མེད་པ་བགྲང་ལ། སེམས་བསྐྱེད་པས་བགྲང་བ་འདིའི་ཚུལ་དུ་ཤར་ཕྱོགས་སུ་བསྐལ་ པ་གྲངས་མེད་པ་ཟད་ཟད་དུ་བགྲངས་ཀྱང་ཤར་ཕྱོགས་ཀྱི་འཇིག་རྟེན་གྱི་ཁམས་ཀྱི་འདུ་བའི་བསྐལ་པ་དང༌། འཇིག་པའི་བསྐལ་པའི་མཐའ་ཤེས་པར་མི་རུང་ནས་དེའི་འོག་ཏུ་ སྐྱེས་བུ་གཉིས་པ་ཞིག་སྐྱེས་ཏེ། སྐྱེས་བུ་སྔ་མ་དེས་བསྐལ་པ་གྲངས་མེད་པར་འདུ་བ་དང༌། འཇིག་པའི་བསྐལ་པ་བགྲངས་པ་དེ་དག་ཐམས་ཅད་སྐད་ཅིག་གཅིག་གིས་བགྲངས་ ཏེ༑ དེའི་འོག་ཏུ་སྐྱེས་བུ་གསུམ་པ་ཞིག་བྱུང་ལ་སྐྱེས་བུ་སྔ་མ་གཉིས་ཀྱིས་བསྐལ་པ་གྲངས་མེད་པར་འདུ་བ་དང༌། འཇིག་པ་བགྲངས་པ་དེ་དག་སེམས་བསྐྱེད་པ་གཅིག་གིས་ བགྲངས་ཏེ། དེའི་འོག་ཏུ་སྐྱེས་བུ་བཞི་པ་ཞིག་བྱུང་ནས་སྔ་མ་གསུམ་གྱིས་བསྐལ་པ་གྲངས་མེད་པར་འདུ་བ་དང༌། འཇིག་པ་བགྲངས་པ་དེ་དག་སྐད་ཅིག་གཅིག་གིས་བགྲངས་ ཏེ༑ དེའི་འོག་ཏུ་སྐྱེས་བུ་ལྔ་པ་ཞིག་བྱུང་ནས་སྐྱེས་བུ་སྔ་མ་བཞིས་བསྐལ་པ་གྲངས་མེད་པར་འདུ་བ་དང༌། འཇིག་པ་བགྲངས་པ་དེ་དག་སྐད་ཅིག་གཅིག་གིས་བགྲངས་པར་ གྱུར་ལ༑ དེའི་འོག་ཏུ་སྐྱེས་བུ་དྲུག་པ་ཞིག་བྱུང་སྟེ། སྐྱེས་བུ་སྔ་མ་ལྔས་བསྐལ་པ་གྲངས་མེད་པར་འདུ་བ་དང༌། འཇིག་པ་བགྲངས་པ་དེ་དག་སྐད་ཅིག་གཅིག་གིས་བགྲངས་ ཏེ༑ དེའི་འོག་ཏུ་སྐྱེས་བུ་བདུན་པ་ཞིག་བྱུང་ནས་སྐྱེས་བུ་སྔ་མ་དྲུག་གིས་བསྐལ་པ་གྲངས་མེད་པར་འདུ་བ་དང༌། འཇིག་པ་བགྲངས་པ་དེ་དག་སྐད་ཅིག་གཅིག་གིས་བགྲངས་པར་ གྱུར་ལ༑ དེའི་འོག་ཏུ་སྐྱེས་བུ་བརྒྱད་པ་ཞིག་བྱུང་ནས་སྐྱེས་བུ་སྔ་མ་བདུན་གྱིས་བསྐལ་པ་གྲངས་མེད་པར་འདུ་བ་དང༌། འཇིག་པའི་བསྐལ་པ་བགྲངས་པ་དེ་དག་སྐད་ཅིག་གཅིག་ ༄༅། །གིས་བགྲངས་པར་གྱུར་ཏེ། དེའི་འོག་ཏུ་སྐྱེས་བུ་དགུ་བ་ཞིག་སྐྱེས་ལ། སྐྱེས་བུ་སྔ་མ་བརྒྱད་ཀྱིས་བསྐལ་པ་གྲངས་མེད་པར་འདུ་བ་དང༌། འཇིག་པའི་ བསྐལ་པ་བགྲངས་པ་དེ་དག་སྐད་ཅིག་གཅིག་གིས་བགྲངས་ཏེ། དེའི་འོག་ཏུ་སྐྱེས་བུ་བཅུ་བ་ཞིག་བྱུང་ནས་སྐྱེས་བུ་དགུ་པོ་སྔ་མ་རྣམས་ཀྱིས་བསྐལ་པ་གྲངས་མེད་པར་འདུ་ བ་དང༌། འཇིག་པའི་བསྐལ་པ་བགྲངས་པ་དེ་དག་སྐད་ཅིག་གཅིག་གིས་བགྲངས་པར་གྱུར་ན། ཀྱེ་རྒྱལ་བའི་སྲས། སྐྱེས་བུ་དེ་དག་གྲངས་མེད་པའི་ཚུལ་དུ་ཕྱོགས་བཅུར་ རྣམ་པར་བཀོད་པ་དང༌། སྐད་ཅིག་གཅིག་གིས་འཇིག་རྟེན་གྱི་ཁམས་འདུ་བ་དང༌། འཇིག་པ་གྲངས་མེད་པ་བགྲང་བའི་ཚུལ་དུ་བསྐལ་པ་གྲངས་མེད་པར་བགྲངས་ན། འཇིག་རྟེན་གྱི་ཁམས་དེ་དག་གི་འདུ་བ་དང༌། འཇིག་པའི་བསྐལ་པ་གཅིག་ནས་གཅིག་ཏུ་བརྒྱུད་པ་ནི། ཕྱོགས་བཅུར་མཐའ་ཐུག་པར་རུང་ཡང་སྲིད་ཀྱི། བྱང་ཆུབ་སེམས་ དཔའ་སེམས་དང་པོ་བསྐྱེད་པའི་བླ་ན་མེད་པ་ཡང་དག་པར་རྫོགས་པའི་དགེ་བའི་རྩ་བ་ནི། མཐའ་ཐུག་པར་མི་རུང་ངོ༌། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས། འཇིག་ རྟེན་འགའི་འདུ་བ་དང༌། འཇིག་པ་བགྲང་བ་རབ་ཏུ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ མི་སྐྱེའོ༑ འཇིག་རྟེན་གྱི་ཁམས་མ་ལུས་པ་ཐམས་ཅད་ཀྱི་འཇིག་པ་དང༌། འདུ་བའི་བསྐལ་པ་ཤེས་པར་བྱ་བ་ལ་འཇུག་པའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཏུ་སེམས་སྐྱེ་སྟེ། འདི་ལྟར་བསྐལ་པ་རིང་པོ་ལ་བསྐལ་པ་ཐུང་ངུར་ཡང་དག་པར་འཇུག་པ་ཤེས་པར་བྱ་བ་དང༌། བསྐལ་པ་ཐུང་ངུ་ལ་བསྐལ་པ་རིང་ བོར་ཡང་དག་པར་འཇུག་པ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །བསྐལ་པ་གཅིག་ལ་བསྐལ་པ་ གྲངས་མེད་པར་ཡང་དག་པར་འཇུག་པ་ཤེས་པར་བྱ་བ་དང༌། བསྐལ་པ་གྲངས་མེད་པ་ལ་བསྐལ་པ་གཅིག་ཏུ་ཡང་དག་པར་འཇུག་པ་ཤེས་པར་བྱ་བ་དང༌། འདི་ལྟ་སྟེ། སངས་ རྒྱས་དང་བཅས་པའི་བསྐལ་པ་སངས་རྒྱས་མེད་པའི་བསྐལ་པར་ཡང་དག་པར་འཇུག་པ་ཤེས་པར་བྱ་བ་དང༌། སངས་རྒྱས་མེད་པའི་བསྐལ་པ་སངས་རྒྱས་དང་བཅས་པའི་བསྐལ་པ་ ཡང་དག་པར་འཇུག་པ་ཤེས་པ་བྱ་བ་དང༌། སངས་རྒྱས་བརྗོད་དུ་མེད་པའི་བསྐལ་པ་སངས་རྒྱས་གཅིག་གི་བསྐལ་པར་ཡང་དག་པར་འཇུག་པ་ཤེས་པར་བྱ་བ་དང༌། སངས་ རྒྱས་གཅིག་གི་བསྐལ་པ་སངས་རྒྱས་བརྗོད་དུ་མེད་པའི་བསྐལ་པར་ཡང་དག་པར་འཇུག་པ་ཤེས་པར་བྱ་བ་དང༌། འདི་ལྟ་སྟེ། བསྐལ་པ་རྣམ་པ་ཐ་དད་པ་ལ་བསྐལ་པ་རྣམ་པ་ ༄༅། །ཐ་མི་དད་པར་ཡང་དག་པར་འཇུག་པ་ཤེས་པར་བྱ་བ་དང༌། བསྐལ་པ་རྣམ་པ་ཐ་མི་དད་པ་ལ་བསྐལ་པ་རྣམ་པ་ཐ་དད་པར་ཡང་དག་པར་འཇུག་པ་ཤེས་ པ་དང༌། བསྐལ་པ་ཟད་པ་ལ་བསྐལ་པ་མ་ཟད་པར་ཡང་དག་པར་འཇུག་པ་ཤེས་པར་བྱ་བ་དང༌། བསྐལ་པ་མ་ཟད་པ་ལ་བསྐལ་པ་ཟད་པར་ཁོང་དུ་ཆུད་པས་ཡང་དག་པར་ འཇུག་པ་ཤེས་པར་བྱ་བ་དང༌། འདི་ལྟ་སྟེ། བསྐལ་པ་བརྗོད་དུ་མེད་པ་སེམས་བསྐྱེད་པ་གཅིག་ཏུ་ཡང་དག་པར་འཇུག་པ་ཤེས་པར་བྱ་བ་དང༌། སེམས་བསྐྱེད་པ་གཅིག་ བསྐལ་པ་བརྗོད་དུ་མེད་པར་ཡང་དག་པར་འཇུག་པ་ཤེས་པར་བྱ་བ་དང༌། འདི་ལྟ་སྟེ། བསྐལ་པ་ཐམས་ཅད་བསྐལ་པ་མེད་པར་རབ་ཏུ་འཇུག་པ་ཤེས་པར་བྱ་བ་དང༌། བསྐལ་པ་མ་ཡིན་པ་བསྐལ་པར་འཇུག་པ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། ། འདི་ལྟ་སྟེ། སྔོན་གྱི་མཐའི་མུར་ཐུག་པའི་བསྐལ་པ་དང༌། ཕྱི་མའི་མཐའི་མུར་ཐུག་པའི་བསྐལ་པ་དང༌། ད་ལྟར་བྱུང་བའི་བསྐལ་པ་དང༌། འཇིག་རྟེན་གྱི་ཁམས་མ་ལུས་ པ་ཐམས་ཅད་ཀྱི་འདུ་བ་དང༌། འཇིག་པའི་བསྐལ་པ་སེམས་བསྐྱེད་པ་གཅིག་གིས་ཡོངས་སུ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་ པར་རྫོགས་པའི་སངས་རྒྱས་སུ་སེམས་སྐྱེ་སྟེ། འདི་ལྟར་བསྐལ་པ་ཐམས་ཅད་ཀྱི་རྒྱུས་མངོན་པར་ཤེས་པར་བྱ་བའི་ཕྱིར་དེ་ཐོག་མར་གོ་ཆ་ཆེན་པོ་མངོན་པར་སྒྲུབ་བོ། །ཀྱེ་རྒྱལ་བའི་ སྲས༑ འཇིག་རྟེན་གྱི་ཁམས་འདུ་བ་དང༌། འཇིག་པའི་བསྐལ་པ་བགྲང་བའི་དཔེ་དེ་དག་ལྟ་ཞོག་གི །ཀྱེ་རྒྱལ་བའི་སྲས། འདི་ལ་སྐྱེས་བུ་ལ་ལ་ཞིག་སྐྱེས་པར་གྱུར་ཏེ། དེས་སེམས་ བསྐྱེད་པ་གཅིག་གིས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་དད་པ་སྣ་ཚོགས་པ་ཐམས་ཅད་ཤེས་ལ། ཚུལ་དེ་ལྟ་བུར་སེམས་བསྐྱེད་པ་རེ་རེ་ ཞིང་ཤེས་པས་ཤར་ཕྱོགས་སུ་བསྐལ་པ་གྲངས་མེད་པ་ཟད་པར་བྱས་ཀྱང་སེམས་ཅན་རྣམས་ཀྱི་མོས་པ་ཐ་དད་པ་གཅིག་ནས་གཅིག་ཏུ་བརྒྱུད་པའི་མཐའ་ཟད་པར་མི་རུང་བ་ནས་ གཞུང་དེ་བཞིན་དུ་སྐྱེས་བུ་བཅུ་པའི་བར་དུ་སྟེ། ཤར་ཕྱོགས་སུ་ཇི་ལྟ་བ་དེ་བཞིན་དུ་སྟེང་གི་ཕྱོགས་ཀྱི་བར་གྱི་ཕྱོགས་བཅུ་ཐམས་ཅད་དུ་རྒྱ་ཆེར་བྱས་ན། དེ་དག་གི་མོས་པ་ཐ་ དད་པ་གཅིག་ནས་གཅིག་ཏུ་བརྒྱུད་པ་ནི། མཐར་ཐུག་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་ དགེ་བའི་རྩ་བ་ནི། མཐར་ཐུག་པར་མི་རུང་ངོ༌། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས། སེམས་ཅན་དེ་ཙམ་གྱི་མོས་པ་ཐ་དད་པ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ ༄༅། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེའི། འདི་ལྟར་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་གཏོགས་པའི་སེམས་ ཅན་རྣམས་ཀྱི་དད་པ་སྣ་ཚོགས་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་ སྟེ༑ མོས་པ་མཐའ་དང་དབུས་མེད་པ་ལ་འཇུག་པ་དང༌། སེམས་ཅན་གྱི་མོས་པ་ཐ་དད་པ་ལ་མཁས་པ་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། སེམས་ཅན་གཅིག་སེམས་ཅན་གྲངས་མེད་པར་ཡང་དག་པར་འཇུག་པར་བྱ་བའི་ཕྱིར་དད་པའི་ ཚུལ་བརྗོད་དུ་མེད་པའི་སྣང་བའི་འོད་ཀྱིས་མོས་པ་གཅིག་ནས་གཅིག་ཏུ་བརྒྱུད་པ་མ་ལུས་པ་དང༌། འགྲོ་བ་རྒྱ་མཚོ་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་ དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། འདས་པ་དང༌། མ་འོངས་པ་དང༌། ད་ལྟར་བྱུང་བའི་དགེ་བ་དང་མི་དགེ་བ་ལ་མོས་ པ་ཚད་མེད་པ་ལ་འཇུག་པར་བྱ་བ་དང༌། དུས་གསུམ་ཐམས་ཅད་ཀྱི་མོས་པ་སྣ་ཚོགས་ཀྱི་དབང་གིས་ཡོངས་སུ་ཤེས་པར་བྱ་བ་དང༌། མོས་པ་ཇི་ལྟ་བ་བཞིན་དུ་མངོན་ པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། སྐལ་པ་མཉམ་པའི་མོས་པ་དང༌། སྐལ་པ་ མི་མཉམ་པའི་མོས་པ་ཤེས་པ་ལ་འཇུག་པར་བྱ་བ་དང༌། མོས་པ་ཐམས་ཅད་མོས་པ་གཅིག་ཏུ་ཡང་དག་པར་འཇུག་པ་དང༌། མོས་པ་གཅིག་མོས་པ་ཐམས་ཅད་དང་མཉམ་པ་ ཉིད་དུ་མངོན་པར་འཚང་རྒྱ་བར་བྱ་བ་དང༌། དེ་བཞིན་གཤེགས་པའི་སྟོབས་ལ་རབ་ཏུ་འཇུག་པའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་ཏུ་སེམས་སྐྱེའོ། །འདི་ལྟ་སྟེ། མོས་པ་བླ་མ་དང་བཅས་པ་དང༌། མོས་པ་བླ་ན་མེད་པ་དང༌། ལྷག་མ་དང་བཅས་པ་དང༌། ལྷག་མ་མེད་པ་དང༌། མཉམ་པ་དང༌། མི་མཉམ་པའི་ མོས་པའི་བྱེ་བྲག་ཤེས་པ་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། གནས་ པའི་མོས་པ་དང༌། མི་གནས་པའི་མོས་པ་དང༌། ཐུན་མོང་གི་མོས་པ་དང༌། ཐུན་མོང་མ་ཡིན་པའི་མོས་པ་དང༌། འདྲེས་པ་དང༌། མ་འདྲེས་པ་དང༌། དགེ་བ་དང༌། མི་དགེ་བ་དང༌། འཇིག་རྟེན་པ་དང༌། འཇིག་རྟེན་ལས་འདས་པའི་མོས་པ་དང༌། ཆོས་ཐམས་ཅད་ཀྱི་བྱེ་བྲག་ཤིན་ཏུ་ཤེས་པའི་དམ་པ་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་ ༄༅། །རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། དགེ་བའི་མོས་པ་དང༌། ཡངས་པའི་མོས་པ་དང༌། མོས་པ་ བར་མ་དང༌། ཐ་དད་པ་དང༌། ངེས་པའི་མོས་པ་མ་ལུས་པ་ཐམས་ཅད་བསྒྲིབས་པ་མེད་པའི་ཡེ་ཤེས་དང༌། ཆགས་པ་མེད་པའི་སངས་རྒྱས་ཀྱི་རྣམ་པར་ཐར་པས་མངོན་པར་ འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། རྣམ་པར་དག་པའི་མོས་པ་དང༌། ཀུན་ ནས་ཉོན་མོངས་པའི་མོས་པ་དང༌། ཡངས་པའི་མོས་པ་དང༌། དོག་པའི་མོས་པ་དང༌། ཕྲ་བའི་མོས་པ་དང༌། རྒྱ་ཆེ་བའི་མོས་པ་དང༌། སེམས་ཅན་གྱི་ཁམས་མ་ལུས་པ་ཐམས་ ཅད་ཀྱི་མོས་པའི་ཚུལ་རྣམ་པ་ཐ་དད་པ་ལ་རབ་ཏུ་འཇུག་པར་བྱ་བ་དང༌། སེམས་ཅན་གཅིག་གི་མོས་པ་སྣ་ཚོགས་འབྱམས་ཀླས་པ་བཅུ་མངོན་པར་འཚང་རྒྱ་བར་བྱ་བའི་ ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། རྒྱུད་སྟུག་པོའི་མོས་པ་དང༌། སྦྱོར་བའི་མོས་པ་དང༌། ཡོངས་སུ་བརྟགས་པའི་མོས་པ་དང༌། ངང་གིས་རྗེས་སུ་འབྲང་བའི་མོས་པ་དང༌། རྒྱུའི་ཚོགས་དང་ལྡན་པའི་མོས་པ་དང༌། རྐྱེན་གྱི་ཚོགས་ལས་བྱུང་བའི་མོས་པ་དང༌། མོས་པའི་དྲ་བ་མ་ལུས་པ་ཐམས་ཅད་མཉམ་པ་ཉིད་དུ་འཇུག་ཅིང་ཡོངས་སུ་རིག་པའི་ཤེས་པས་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས། མོས་པ་སྣ་ཚོགས་ཀྱི་དཔེ་ཐ་དད་པ་སྔ་མ་དེ་དག་ལྟ་ཞོག་གི །ཀྱེ་རྒྱལ་བའི་སྲས། འདི་ལ་སྐྱེས་བུ་ལ་ལ་ཞིག་ སྐྱེས་པར་གྱུར་ཏེ། དེའི་སེམས་གཅིག་བསྐྱེད་པས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་དབང་པོ་སྣ་ཚོགས་རབ་ཏུ་ཤེས་པར་གྱུར་ལ། དེ་ ལྟ་བུའི་ཚུལ་དུ་སེམས་བསྐྱེད་པ་རེ་རེ་ལ་ཤེས་པས་ཤར་ཕྱོགས་ལོགས་སུ་བསྐལ་པ་གྲངས་མེད་པ་ཟད་པར་བྱས་ཀྱང་ཤར་ཕྱོགས་ཀྱི་སེམས་ཅན་རྣམས་ཀྱི་དབང་པོ་སྣ་ཚོགས་ གཅིག་ནས་གཅིག་ཏུ་བརྒྱུད་པ་མཐར་ཐུག་པར་མི་རུང་ལ། ཚུལ་དེ་བཞིན་དུ་མོས་པ་ལ་ཇི་སྐད་དུ་བརྗོད་པ་བཞིན་དབང་པོ་ཐ་དད་པ་ལ་ཡང་ཤེས་པར་བྱས་ཏེ། དེ་དག་གི་དབང་པོ་ སྣ་ཚོགས་གཅིག་ནས་གཅིག་ཏུ་བརྒྱུད་པ་ནི། ཕྱོགས་བཅུར་མཐར་ཐུག་པར་རུང་ཡང་སྲིད་ཀྱི། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ སེམས་དང་པོ་བསྐྱེད་པའི་དགེ་བའི་རྩ་བ་ནི། མཐའ་མེད་དོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དག །སེམས་ཅན་དེ་ཙམ་དག་གི་དབང་པོ་སྣ་ཚོགས་ཤེས་པར་བྱ་བའི་ཕྱིར་བྱན་ ༄༅། །ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བ་མ་ཡིན་གྱི། འདི་ལྟར་འཇིག་རྟེན་གྱི་ཁམས་མ་ལུས་པ་ཐམས་ ཅད་དུ་གཏོགས་པའི་སེམས་ཅན་རྣམས་ཀྱི་དབང་པོ་ཡོངས་སུ་ཤེས་པར་བྱ་བའི་དོན་དུ་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ སྐྱེའོ༑ ༑གཞུང་དེ་བཞིན་དུ་ཇི་ལྟར་མོས་པ་ལ་བརྗོད་པ་དེ་བཞིན་དབང་པོ་རྣམས་ལ་ཡང་ཤེས་པར་བྱ་སྟེ། ཐིབས་པོར་གྱུར་པའི་དབང་པོ་དང༌། སྦྱོར་བ་དང་ལྡན་པའི་དབང་པོ་དང༌། ཡོངས་སུ་བརྟགས་པའི་དབང་པོ་དང༌། ངང་གི་རྗེས་སུ་འབྲང་བའི་དབང་པོ་དང༌། རྒྱུའི་ཚོགས་དང་ལྡན་པའི་དབང་པོ་དང༌། རྐྱེན་གྱི་ཚོགས་ལས་བྱུང་བའི་དབང་པོ་དང༌། དབང་ པོའི་དྲན་པ་ཐམས་ཅད་མ་ལུས་པ་ལ་མཉམ་པ་ཉིད་དུ་འཇུག་ཅིང་ཡོངས་སུ་རིག་པའི་ཤེས་པས་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས། དབང་པོ་སྣ་ཚོགས་ཀྱི་དཔེ་སྔ་མ་དེ་དག་ལྟ་ཞོག་གི །ཀྱེ་རྒྱལ་བའི་སྲས། འདི་ལ་སྐྱེས་བུ་ལ་ ལ་ཞིག་སྐྱེས་པར་གྱུར་ཏེ། དེའི་སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་བསམ་པ་སྣ་ཚོགས་ཡོངས་སུ་ ཤེས་པར་གྱུར་ལ། ཚུལ་དེ་ལྟ་བུར་སེམས་བསྐྱེད་པ་རེ་རེར་ཤེས་པས་ཤར་ཕྱོགས་ལོགས་སུ་བསྐལ་པ་གྲངས་མེད་པ་ཟད་པར་བྱས་ཀྱང་སེམས་ཅན་གྱི་བསམ་པ་སྣ་ཚོགས་ ཀྱི་མཐར་ཕྱིན་པར་མ་རུང་ལ། གཞུང་དེ་བཞིན་དུ་ཕྱོགས་བཅུའི་སེམས་ཅན་རྣམས་ཀྱི་བསམ་པ་སྣ་ཚོགས་ནི། ཤེས་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི། མཐར་ཐུག་པར་མི་རུང་ངོ༌། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས། སེམས་ཅན་དེ་ཙམ་དག་གི་ བསམ་པ་སྣ་ཚོགས་ཡོངས་སུ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེའོ། །འདི་ལྟར་འཇིག་རྟེན་གྱི་ ཁམས་མ་ལུས་པ་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་བསམ་པ་སྣ་ཚོགས་ཡོངས་སུ་ཤེས་པས་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་ཏེ། གཞུང་དེ་ལྟར་མོས་པ་ལ་ཇི་ལྟར་བརྗོད་པ་བཞིན་དུ་སྟེ། བསམ་པ་ཐིབས་པོར་གྱུར་པ་དང༌། སྦྱོར་བ་དང་ལྡན་ པའི་བསམ་པ་དང༌། ཡོངས་སུ་གཏོགས་པའི་བསམ་པ་དང༌། ངང་གིས་རྗེས་སུ་འབྲང་བའི་བསམ་པ་དང༌། རྒྱུའི་ཚོགས་དང་ལྡན་པའི་བསམ་པ་དང༌། རྐྱེན་གྱི་ཚོགས་ལས་བྱུང་ ༄༅། །བའི་བསམ་པའི་བར་དུ་བསམ་པའི་དྲ་བ་མ་ལུས་པ་ཐམས་ཅད་མཉམ་པ་ཉིད་དུ་འཇུག་ཅིང་ཡོངས་སུ་རིག་པའི་ཤེས་པས་མངོན་པར་འཚང་རྒྱ་བར་བྱ་ བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས། བསམ་པ་སྣ་ཚོགས་ཀྱི་དཔེ་སྔ་མ་དེ་དག་ལྟ་ ཞོག་གི། ཀྱེ་རྒྱལ་བའི་སྲས། འདི་ལ་སྐྱེས་བུ་ལ་ལ་ཞིག་སྐྱེས་ཏེ། དེའི་སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ ཀྱི་སྦྱོར་བ་ཡོངས་སུ་ཤེས་ལ། གཞུང་དེ་ལྟར་མོས་པ་ལ་ཇི་ལྟར་བརྗོད་པ་བཞིན་དུ་སྟེ། ཕྱོགས་བཅུའི་སྦྱོར་བ་སྣ་ཚོགས་གཅིག་ནས་གཅིག་ཏུ་བརྒྱུད་པ་དེ་དག་ནི། མཐར་ཐུག་ པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི། མཐར་ཐུག་པར་མི་རུང་ངོ༌། །དེ་ཅིའི་ ཕྱིར་ཞེ་ན། ཀྱེ་རྒྱལ་བའི་སྲས། སེམས་ཅན་དེ་ཙམ་དག་གི་སྦྱོར་བ་སྣ་ཚོགས་ཤེས་པའི་དོན་དུ་ནི། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་ཏུ་སེམས་མི་སྐྱེའི། འདི་ལྟར་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་སྦྱོར་བ་སྣ་ཚོགས་ཡོངས་སུ་ཤེས་པས་མངོན་པར་ འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །གཞུང་དེ་ལྟར་མོས་པ་ལ་ཇི་སྐད་དུ་བརྗོད་པ་བཞིན་ཏེ། སྦྱོར་ བའི་དྲ་བ་མ་ལུས་པ་ཐམས་ཅད་ཀྱི་བར་དུ་མཉམ་པ་ཉིད་དུ་འཇུག་ཅིང་ཡོངས་སུ་རིག་པའི་ཤེས་པས་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས། སྦྱོར་བ་སྣ་ཚོགས་ཀྱི་དཔེ་དེ་དག་ལྟ་ཞོག་གི །ཀྱེ་རྒྱལ་བའི་སྲས། འདི་ལ་སྐྱེས་བུ་ལ་ལ་ཞིག་སྐྱེས་ཏེ་།དེའི་ སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་སེམས་བསྐྱེད་པ་སྣ་ཚོགས་རབ་ཏུ་ཤེས་ལ། ཚུལ་དེ་ལྟ་བུའི་སེམས་བསྐྱེད་ པ་ཡོངས་སུ་ཤེས་པས་གཞུང་དེ་བཞིན་དུ་སྟེ། ཕྱོགས་བཅུའི་སེམས་བསྐྱེད་པ་སྣ་ཚོགས་གཅིག་ནས་གཅིག་ཏུ་བརྒྱུད་པ་ནི། མཐར་ཐུག་པར་རུང་ཡང་སྲིད་ཀྱི། བྱང་ཆུབ་སེམས་ དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི། མཐར་ཐུག་པར་མི་རུང་ངོ༌། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས། སེམས་ ཅན་དེ་ཙམ་དག་གི་སེམས་སྣ་ཚོགས་ཡོངས་སུ་ཤེས་པར་བྱ་བའི་དོན་དུ་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བ་མ་ཡིན་ ༄༅། །གྱི༑ འདི་ལྟར་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། སེམས་ཅན་གྱི་ཁམས་ཀྱིས་གཏུགས་པ། ནམ་མཁའི་དབྱིངས་ཀྱིས་ཀླས་པའི་ སེམས་ཅན་གྱི་ཁམས་མཐའ་དང་དབུས་མེད་པའི་སེམས་སྣ་ཚོགས་ཐམས་ཅད་ཡོངས་སུ་ཤེས་པས་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །གཞུང་དེ་ལྟར་མོས་པ་ལ་ཇི་སྐད་དུ་བརྗོད་པ་བཞིན་ཏེ། སེམས་བསྐྱེད་པའི་དྲ་བ་མ་ལུས་པ་ཐམས་ཅད་མཉམ་ པ་ཉིད་དུ་འཇུག་ཅིང་ཡོངས་སུ་རིག་པའི་ཤེས་པས་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ སེམས་སྐྱེའོ། །ཀྱེ་རྒྱལ་བའི་སྲས། སེམས་བསྐྱེད་པའི་དཔེ་སྔ་མ་དེ་དག་ལྟ་ཞོག་གི། ཀྱེ་རྒྱལ་བའི་སྲས། འདི་ལ་སྐྱེས་བུ་ལ་ལ་ཞིག་སྐྱེས་པར་གྱུར་ཏེ། དེའི་སེམས་བསྐྱེད་ པ་གཅིག་གིས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་ལས་སྣ་ཚོགས་རབ་ཏུ་ཤེས་ལ། སེམས་བསྐྱེད་པ་ཤེས་པའི་ཚུལ་དེ་ལྟ་བུས་ ཤར་ཕྱོགས་ལོགས་སུ་བསྐལ་པ་གྲངས་མེད་པ་ཟད་པར་བྱས་ཀྱང་སེམས་ཅན་རྣམས་ཀྱི་ལས་སྣ་ཚོགས་གཅིག་ནས་གཅིག་ཏུ་བརྒྱུད་པ་མཐར་ཐུག་པར་མི་རུང་ལ། དེ་ བཞིན་དུ་སྐྱེས་བུ་བཅུ་བའི་བར་དུ་སྐྱེས་པར་གྱུར་ཏེ། སྐྱེས་བུ་དགུ་པོ་དེ་དག་གིས་སེམས་ཅན་རྣམས་ཀྱི་ལས་སྣ་ཚོགས་གཅིག་ནས་གཅིག་ཏུ་བརྒྱུད་པ་ཡོངས་སུ་ཤེས་པར་བྱ་བའི་ ཕྱིར་བསྐལ་པ་གྲངས་མེད་པ་ཟད་པར་བྱས་པ་དེ་དག་སེམས་བསྐྱེད་པ་གཅིག་གིས་ཤེས་པར་གྱུར་ཀྱང་ཕྱོགས་བཅུར་ལས་སྣ་ཚོགས་གཅིག་ནས་གཅིག་ཏུ་བརྒྱུད་པ་དེ་དག་ནི། མཐར་ཐུག་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི། མཐར་ཐུག་པར་མི་རུང་ངོ༌། ། དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས། སེམས་ཅན་དེ་ཙམ་དག་གི་ལས་སྣ་ཚོགས་ཡོངས་སུ་ཤེས་པར་བྱ་བའི་དོན་དུ་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་སེམས་སྐྱེ་བ་མ་ཡིན་གྱི། འདི་ལྟར་འཇིག་རྟེན་གྱི་ཁམས་དང༌། དུས་གསུམ་མ་ལུས་པ་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་ལས་སྣ་ཚོགས་ཡོངས་ སུ་ཤེས་པས་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། ལས་སྣ་ཚོགས་མཐའ་ དང་དབུས་མེད་པ་ལ་རབ་ཏུ་འཇུག་པ་དང༌། ལས་ཀྱི་བྱེ་བྲག་ཐམས་ཅད་ལ་མཁས་པ་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་ ༄༅། །རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། སེམས་ཅན་གཅིག་གྲངས་མེད་ཅིང་རྣམ་པ་ཐ་དད་པར་ཡང་དག་པར་འཇུག་པ་དང༌། ལས་ཀྱི་ཚུལ་ བརྗོད་པའི་སྣང་བ་རབ་ཏུ་ཐོབ་པ་དང༌། ལས་ཐམས་ཅད་མ་ལུས་པ་གཅིག་ནས་གཅིག་ཏུ་བརྒྱུད་པ་དང༌། ལས་དང་ལྡན་པའི་འགྲོ་བ་རྒྱ་མཚོ་མངོན་པར་འཚང་རྒྱ་བར་བྱ་བའི་ཕྱིར་ བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། འདས་པ་དང༌། མ་འོངས་པ་དང༌། ད་ལྟར་བྱུང་བའི་ལས་དགེ་བ་དང་ མི་དགེ་བ་རྣམ་པ་ཐ་དད་པ་ལ་རབ་ཏུ་འཇུག་ཅིང་དུས་གསུམ་ཐམས་ཅད་ཀྱི་ལས་སྣ་ཚོགས་ཀྱི་དབང་གིས་ཡོངས་སུ་ཤེས་པར་བྱ་བ་དང༌། ལས་ཇི་ལྟ་བ་བཞིན་དུ་མངོན་པར་འཚང་ རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། སྐལ་པ་མཉམ་པའི་ལས་དང༌། སྐལ་པ་མི་མཉམ་ པའི་ལས་ཤེས་པའི་མཆོག་ཐོབ་པར་བྱ་བ་དང༌། ལས་ཐམས་ཅད་ལས་གཅིག་ཏུ་ཡང་དག་པར་འཇུག་པ་དང༌། ལས་གཅིག་ལས་ཐམས་ཅད་དང་མཉམ་པ་ཉིད་དུ་མངོན་པར་ འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། བླ་མ་དང་བཅས་པའི་ལས་དང༌། བླ་ན་ མེད་པའི་ལས་དང༌། ལྷག་མ་དང་བཅས་པའི་ལས་དང༌། མཉམ་པའི་ལས་དང༌། མི་མཉམ་པའི་ལས་ཀྱི་བྱེ་བྲག་ཡེ་ཤེས་ཀྱི་རྒྱུད་ཆེན་པོས་མངོན་པར་འཚང་རྒྱ་ཞིང་ཤེས་པར་བྱ་བའི་ ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། གནས་པའི་ལས་དང༌། མི་གནས་པའི་ལས་དང༌། ཐུན་མོང་གི་ལས་ དང༌། ཐུན་མོང་མ་ཡིན་པའི་ལས་དང༌། མཐའ་ཡས་པའི་ལས་དང༌། མུ་མེད་པའི་ལས་དང༌། མ་འདྲེས་པའི་ལས་དང༌། དགེ་བའི་ལས་དང༌། མི་དགེ་བའི་ལས་དང༌། འཇིག་རྟེན་པའི་ ལས་དང༌། འཇིག་རྟེན་ལས་འདས་པའི་ལས་དང༌། ལས་ཀྱི་བྱེ་བྲག་ཐམས་ཅད་ལ་ཡེ་ཤེས་ཀྱི་རྒྱུད་ཆེན་པོས་མངོན་པར་འཚང་རྒྱ་ཞིང་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་ རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། ཤེས་པའི་ལས་དང༌། མི་ཤེས་པའི་ལས་དང༌། ཆེན་པོ་དང༌། འབྲིང་དང༌། ཚད་མེད་པའི་ལས་ཀྱི་ སྒྲིབ་པ་ཐམས་ཅད་མ་ལུས་པར་ཆགས་པ་མེད་པས་ཤེས་པར་བྱ་བ་དང༌། སངས་རྒྱས་ཀྱི་རྣམ་པར་ཐར་པ་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། རྣམ་པར་དག་པའི་ལས་དང༌། ཀུན་ནས་ཉོན་མོངས་པའི་ལས་དང༌། རྒྱ་ཆེན་པོའི་ལས་དང༌། རྒྱ་ཆུང་ངུའི་ ༄༅། །ལས་དང༌། ཀུན་ཏུ་འབྲེལ་བའི་ལས་དང༌། ཀུན་ཏུ་མ་འབྲེལ་བའི་ལས་དང༌། ཕྲ་བའི་ལས་དང༌། སྦོམ་པའི་ལས་དང༌། ལས་མ་ལུས་པར་སེམས་ཅན་གྱི་ ཁམས་ཀྱི་ལས་ཀྱི་ཚུལ་རྣམ་པ་ཐ་དད་པ་ལ་རབ་ཏུ་འཇུག་པ་དང༌། སེམས་ཅན་གཅིག་གིས་ལས་སྣ་ཚོགས་འབྱམས་ཀླས་པ་བཅུ་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་ སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། ཐིབས་པོར་གྱུར་པའི་ལས་དང༌། སྦྱོར་བ་ཅན་གྱི་ལས་དང༌། ཆུང་བའི་ལས་ དང༌། དྲན་པ་དང་ལྡན་པའི་ལས་དང༌། རྒྱུའི་ཚོགས་དང་ལྡན་པའི་ལས་དང༌། རྐྱེན་གྱི་ཚོགས་ལས་བྱུང་བའི་ལས་དང༌། ལས་ཀྱི་དྲ་བ་ཐམས་ཅད་མ་ལུས་པ་མཉམ་པ་ཉིད་དུ་ ཡོངས་སུ་རིག་ཅིང་ཤེས་པས་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། ། བམ་པོ་ཉི་ཤུ་གསུམ་པ། ཀྱེ་རྒྱལ་བའི་སྲས། ལས་སྣ་ཚོགས་ཀྱི་དཔེ་སྔ་མ་དེ་དག་ལྟ་ཞོག་གི །ཀྱེ་རྒྱལ་བའི་སྲས། འདི་ལ་སྐྱེས་བུ་ལ་ལ་ཞིག་སྐྱེས་ཏེ། དེའི་སེམས་བསྐྱེད་པ་ གཅིག་གིས་ཤར་ཕྱོགས་ལོགས་སུ་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་སེམས་བསྐྱེད་པ་ཤེས་པར་གྱུར་ལ། ཚུལ་དེ་ལྟར་སེམས་ བསྐྱེད་པ་རེ་རེ་རེ་ཡོངས་སུ་ཤེས་པས་ཤར་ཕྱོགས་ལོགས་སུ་བསྐལ་པ་གྲངས་མེད་པ་ཟད་པར་བྱས་ཀྱང་སེམས་ཅན་རྣམས་ཀྱི་ཉོན་མོངས་པ་སྣ་ཚོགས་མཐར་ཐུག་པར་མ་རུང་ལ། དེ་ བཞིན་དུ་དེའི་འོག་ཏུ་སྐྱེས་བུ་གཉིས་པ་ཞིག་སྐྱེས་ཞེས་བྱ་བ་ནས་སྐྱེས་བུ་བཅུ་པ་སྐྱེས་པའི་བར་དུ་སྟེ། སྐྱེས་བུ་དགུ་པོ་དེ་དག་གིས་བསྐལ་པ་གྲངས་མེད་པར་ཉོན་མོངས་པ་སྣ་ ཚོགས་རབ་ཏུ་ཤེས་པ་དེ་དག་སེམས་བསྐྱེད་པ་གཅིག་གིས་ཡོངས་སུ་ཤེས་པར་གྱུར་ལ། ཚུལ་དེ་འདྲ་བར་སེམས་བསྐྱེད་པ་རེ་རེར་ཡོངས་སུ་ཤེས་པས་གཞུང་དེ་བཞིན་དུ་སྟེ། ཕྱོགས་བཅུའི་ཉོན་མོངས་པ་སྣ་ཚོགས་གཅིག་ནས་གཅིག་ཏུ་བརྒྱུད་པ་དེ་དག་ནི། མཐར་ཐུག་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི། མཐར་ཐུག་པར་མི་རུང་ངོ༌། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས། སེམས་ཅན་དེ་ཙམ་དག་གི་ཉོན་མོངས་པ་སྣ་ ཚོགས་ཡོངས་སུ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བ་མ་ཡིན་གྱི། འདི་ལྟ་སྟེ། འཇིག་རྟེན་གྱི་ ཁམས་མ་ལུས་པ་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་ཉོན་མོངས་པ་ཚད་མེད་པ་ཐམས་ཅད་ཡོངས་སུ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་ ༄༅། །མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། ཉོན་མོངས་པ་ཡང་བ་དང༌། ཉོན་མོངས་པ་ལྕི་བ་མངོན་པར་འཚང་རྒྱ་བའི་ཡེ་ ཤེས་ཡོངས་སུ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། བག་ལ་ཉལ་བའི་ཉོན་ མོངས་པ་དང༌། སེམས་ཅན་ཀུན་ནས་འཁོར་བའི་ཉོན་མོངས་པ་དང༌། སེམས་ཅན་ཐམས་ཅད་ཀྱི་ཉོན་མོངས་པ་དང༌། རྣམ་པར་བྱང་བ་རྣམ་པར་དགོང་པ་ཡོངས་སུ་ཤེས་པར་ བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། སེམས་ཅན་གཅིག་གི་ཉོན་མོངས་པ་ཚད་མེད་པ་ སྣ་ཚོགས་རང་དབང་མེད་པར་བྱེད་པའི་ཉོན་མོངས་པ་རྣམ་པར་གཅད་པའི་ཡེ་ཤེས་ཡོངས་སུ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། སེམས་ཅན་ཐམས་ཅད་ཀྱི་ཉོན་མོངས་པ་དང༌། རྣམ་པར་དཔྱོད་པ་རྣམ་པ་སྣ་ཚོགས་ཤེས་པ་ཡོངས་སུ་ཤེས་པར་བྱ་བའི་ ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། མ་རིག་པ་ལ་གནས་པའི་ཉོན་མོངས་པ་དང༌། སྲེད་པ་དང་ ལྡན་པའི་ཉོན་མོངས་པ་དང༌། སྲིད་པའི་རྒྱུད་ཐམས་ཅད་ཀྱི་ཉོན་མོངས་པ་ཀུན་ཏུ་སྦྱོར་བ་རྣམ་པར་གཅོད་པའི་ཡེ་ཤེས་ཡོངས་སུ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། འདོད་ཆགས་ཀྱིས་ཡེ་རྔམ་པའི་ཉོན་མོངས་པ་དང༌། ཞེ་སྡང་གིས་ཁོང་ཁྲོ་བ་དང༌། གཏི་མུག་གིས་ མངོན་པར་ཁེབས་པ་དང༌། ཆ་མཉམ་པའི་ཉོན་མོངས་པ་དང༌། ཉོན་མོངས་པ་ཐམས་ཅད་རྩ་བ་དང་བཅས་ཏེ་རྣམ་པར་གཅོད་པའི་ཡེ་ཤེས་ཡོངས་སུ་ཤེས་པར་བྱ་བའི་ཕྱིར་བྱང་ཆུབ་ སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། བདག་ཏུ་བྱ་བ་ཤིན་ཏུ་བསྒོམས་པའི་ཉོན་མོངས་པ་དང༌། བདག་གིར་བྱ་བ་ལ་ མངོན་པར་ཞེན་པ་དང༌། ང་རྒྱལ་གྱིས་བསླང་བ་དང༌། ང་རྒྱལ་གྱིས་མངོན་པར་སྤྲེལ་བའི་ཉོན་མོངས་པ་དང༌། ཉོན་མོངས་པ་ཐམས་ཅད་མ་ལུས་པར་ཁོང་དུ་ཆུད་ཅིང་ཡོངས་སུ་ཤེས་ པར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། ཚུལ་བཞིན་མ་ཡིན་པ་ཡིད་ལ་བྱེད་པ་ལས་བྱུང་བའི་ ཡོངས་སུ་རྟོག་པ་རྩ་བར་གྱུར་པའི་ཉོན་མོངས་པ་དང༌། ཡོངས་སུ་རྟོགས་པའི་ཤུགས་ཀྱི་རྗེས་སུ་འབྲང་བའི་ཉོན་མོངས་པའི་རྣམ་པར་རྟོག་པ་དང༌། འཇིག་ཚོགས་ལ་མངོན་པར་ཞེན་ ༄༅། །པ་དང༌། ལྟ་བའི་རྣམ་པ་དྲུག་ཅུ་རྩ་གཉིས་ཀྱི་ཚུལ་སྣ་ཚོགས་དང་ལྡན་པའི་ཉོན་མོངས་པ་མངོན་པར་འཚང་རྒྱ་བའི་ཡེ་ཤེས་ཡོངས་སུ་ཤེས་པར་བྱ་བའི་ཕྱིར་ བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། སྒྲིབ་པའི་ཉོན་མོངས་པ་དང༌། ཀུན་ནས་སྒྲིབ་པའི་ཉོན་མོངས་པ་ ཐམས་ཅད་ཤེས་པས་རྣམ་པར་དག་པར་བྱ་བ་དང༌། སྙིང་རྗེ་ཆེན་པོས་ཡོངས་སུ་བསྐྱབ་པའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་ཏུ་སེམས་སྐྱེའོ། །བསམ་པ་དང༌། བག་ལ་ཉལ་བ་དང༌། ཀུན་ནས་འཁོར་བའི་ཉོན་མོངས་པའི་དྲ་བ་ཐམས་ཅད་རྣམ་པར་གཅད་པའི་ཕྱིར་བྱང་ཆུབ་སེམས་དཔའ་རྣམས་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས། ཉོན་མོངས་པ་སྣ་ཚོགས་ཀྱི་དཔེ་དེ་དག་ལྟའང་ཞོག་གི །ཀྱེ་རྒྱལ་བའི་སྲས། འདི་ལ་སྐྱེས་བུ་ ལ་ལ་ཞིག་སྐྱེས་པར་གྱུར་ལ། དེའི་སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་ཚད་མེད་པར་གཏོགས་པའི་སེམས་ཅན་རྣམས་དང་ལྷན་ཅིག་པས་ཤར་ཕྱོགས་ ལོགས་སུ་སངས་རྒྱས་བཅོམ་ལྡན་འདས་ཚད་མེད་པ་དག་མནབས་སྩལ་བྲོ་བའི་མཆོག་ཚད་མེད་པ་དང༌། བདུག་སྤོས་ཚད་མེད་པ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། བ་དན་ཚད་མེད་པ་དང༌། ཕོ་བྲང་ཚད་མེད་པ་དང༌། བླ་རེ་ཚད་མེད་པ་དང༌། གཞལ་མེད་ཁང་ཚད་མེད་པ་དང༌། རིན་པོ་ཆེའི་དྲ་བ་དཔག་ཏུ་མེད་པ་དང༌། སེངྒེའི་ གདན་དཔག་ཏུ་མེད་པ་དང༌། རིན་པོ་ཆེའི་རྒྱན་དང༌། ལྷབ་ལྷུབ་ཚད་མེད་པ་དང༌། མཆོད་པའི་རྣམ་པ་ཚད་མེད་པས་མཉེས་པར་བྱས་ཏེ་བསྐལ་པ་ཚད་མེད་པར་བསྙེན་བཀུར་ལ། རིམ་གྲོ་དང༌། བཀུར་སྟི་བྱས་ཏེ་རྗེ་ས་དང་མཆོད་པས་བཏུད་ཅིང་ཕྱག་འཚལ་ཏེ་སྤྱི་བོས་གཏུགས་ནས་སྙན་པར་བརྗོད་དེ་འཁོར་ཞིང་ཞལ་དུ་བལྟ་ལ། དེ་བཞིན་གཤེགས་པ་རེ་རེ་ ལ་ཡང་མི་དེ་དང་འགྲོ་བ་ཕལ་འཇིག་རྟེན་གྱི་ཁམས་ཚད་མེད་པར་གཏོགས་པ་དེ་དག་གིས་ཤིན་ཏུ་དད་པར་མར་མེ་གྲངས་མེད་པ་དག་ཀྱང་བུས་ཏེ། སྐྱེས་བུ་དེས་ཇི་ལྟ་བ་བཞིན་དུ་ སེམས་ཅན་དེ་དག་གིས་ཀྱང་འཇིག་རྟེན་གྱི་ཁམས་དེ་སྙེད་པོ་དེ་དག་ནོར་བུ་རིན་པོ་ཆེ་རྣམ་པར་སྣང་བ་དང༌། ཡིད་བཞིན་གྱི་རྒྱལ་པོ་དང༌། ཕྱོགས་ཐམས་ཅད་སྣང་བར་བྱེད་པ་དང༌། མེའི་འོད་དང༌། བརྒལ་དཀའ་བ་དང༌། ཆུའི་ཟླ་བའི་འོད་དང༌། རིན་པོ་ཆེའི་རྒྱན་དང༌། བསོད་ནམས་ཀྱི་རྒྱལ་མཚན་དང༌། ནོར་བུ་ཡིད་དུ་འོང་བ་དང༌། དེ་དག་ལ་སོགས་པ་རིན་པོ་ཆེ་ ཚད་མེད་པས་ཡོངས་སུ་བཀང་སྟེ་ཡོན་དུ་གསོལ་ལ། དེ་བཞིན་དུ་མེ་ཏོག་དང༌། ཕྲེང་བ་དང༌། སྤོས་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་ ༄༅། །དང༌། བ་དན་དང༌། ཕོ་བྲང་དང༌། གནམ་ཡོལ་དང༌། སིལ་སྙན་དང༌། རོལ་མོ་བརྡུང་བ་དང༌། གླུ་དང༌། རིན་པོ་ཆེའི་དྲ་བ་དང༌། གསེར་གྱི་དྲ་བ་དང༌། ནོར་ བུའི་དྲ་བ་དང༌། དྲིལ་བུའི་དྲ་བ་དང༌། སེངྒེའི་ཁྲི་དང༌། དེ་བཞིན་དུ་སངས་རྒྱས་ཀྱི་མཆོད་པ་བརྩམས་པ་རྒྱ་ཆེར་ཏེ། དེ་བཞིན་གཤེགས་པ་དེ་དག་བཞུགས་ཞིང་འཚོ་སྐྱོང་བའི་ཚེ་ མཆོད་པའི་རྣམ་པ་དེ་ལྟ་བུས་མཆོད་ནས་མྱ་ངན་ལས་འདས་ནས་ཀྱང་མི་དེ་དང༌། འགྲོ་བ་ཕལ་འཇིག་རྟེན་གྱི་ཁམས་ཚད་མེད་པར་གཏོགས་པ་དེ་སྙེད་ཀྱིས་དེ་བཞིན་གཤེགས་ པ་རེ་རེ་ཞིང་ཡང་མཆོད་རྟེན་འཇིག་རྟེན་གྱི་ཁམས་ཚད་མེད་པ་དང་མཉམ་པར་ཡངས་ཤིང་རྒྱ་ཆེ་བ། རིན་པོ་ཆེ་ཚད་མེད་པ་ལས་བརྩིགས་ཏེ། རྒྱན་དང༌། རིན་པོ་ཆེ་ཚད་མེད་པས་ བརྒྱན་པ་ལ། མཆོད་རྟེན་གཅིག་ཇི་ལྟ་བ་བཞིན་དུ་མཆོད་རྟེན་དཔག་ཏུ་མེད་པ་མང་པོ་ལ་ཡང་དེ་བཞིན་དུ་བྱས་ཏེ། ཐམས་ཅད་ཀྱི་ཚད་ཀྱང་དེ་ཙམ་ལ། མཆོད་རྟེན་རེ་རེ་ལ་ ཡང་དེ་བཞིན་གཤེགས་པའི་སྐུ་གཟུགས་མང་པོ་ཚད་མེད་པར་བྱས་ཏེ་འཇིག་རྟེན་གྱི་ཁམས་མང་པོ་ཡང་སྣང་བས་རྒྱས་པར་གྱུར་ལ། རྣམ་གྲངས་དེ་ལྟ་བུར་དེ་བཞིན་ གཤེགས་པ་ལ་མཆོད་པ་དང༌། རིམ་གྲོའི་ཡོན་ཏན་ཡོངས་སུ་བརྗོད་པ་དེ་དག་བྱེད་ཅིང༌། ཡོངས་སུ་མྱ་ངན་ལས་འདས་པ་དེ་དག་ལ་ཡང་མཆོད་པ་བྱ་བས་བསྐལ་པ་ཚད་ མེད་པ་ཟད་པར་གྱུར་ཏེ། ཤར་ཕྱོགས་སུ་ཇི་ལྟ་བ་དེ་བཞིན་དུ་ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་དང༌། བྱང་ཤར་གྱི་ཕྱོགས་མཚམས་དང༌། ཤར་ལྷོའི་ཕྱོགས་ མཚམས་དང༌། ལྷོ་ནུབ་ཀྱི་ཕྱོགས་མཚམས་དང༌། ནུབ་བྱང་གི་ཕྱོགས་མཚམས་དང༌། འོག་དང༌། སྟེང་གི་ཕྱོགས་དང༌། ཕྱོགས་བཅུ་ཐམས་ཅད་དུ་ཡང་རྒྱ་ཆེར་ཏེ། སྐྱེས་བུ་བཅུ་ སྔོན་དུ་འགྲོ་བས་ཕྱོགས་བཅུ་རེ་རེ་ལ་སྐྱེས་བུ་རེ་རེ་ཞིང་ཡང་ཕྱོགས་བཅུར་བྱས་ན། ཀྱེ་རྒྱལ་བའི་སྲས། དེ་ལ་ཇི་སྙམ་དུ་སེམས། སྐྱེས་བུ་དེ་ལ་སོགས་པའི་མི་འཇིག་རྟེན་གྱི་ཁམས་ ཚད་མེད་པ་བཅུར་གཏོགས་པ་དེ་དག་ལ་དེའི་རྒྱུས་བསོད་ནམས་ཀྱི་ཕུང་པོ་ཆེར་འཕེལ་ལམ། སྨྲས་པ། ཀྱེ་རྒྱལ་བའི་སྲས། དེ་ནི། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ ཀྱི་ཡེ་ཤེས་ཀྱིས་ཐུགས་སུ་ཆུད་པར་ཟད་དོ། །སྨྲས་པ། ཀྱེ་རྒྱལ་བའི་སྲས། བྱང་ཆུབ་སེམས་དཔའ་སེམས་དང་པོ་བསྐྱེད་པའི་བསོད་ནམས་ཀྱི་ཕུང་པོ་ཇི་ཙམ་ཡོད་པའི་བསོད་ནམས་ ཀྱི་ཕུང་པོ་དེ་ལ་བསྐལ་པ་ཚད་མེད་པར་མཉེས་པར་བྱས་པའི་སངས་རྒྱས་མཆོད་པ་དང༌། རིམ་གྲོ་ལས་བྱུང་བའི་བསོད་ནམས་ཀྱི་ཕུང་པོ་སྔ་མ་དེས་ནི། བརྒྱའི་ཆར་ཡང་ཉེ་བར་མི་ འགྲོའོ༑ ༑སྟོང་གི་ཆ་དང༌། བརྒྱ་སྟོང་གི་ཆ་དང༌། བྱེ་བ་བརྒྱ་སྟོང་གི་ཆར་ཡང་ཉེ་བར་མི་འགྲོ། གྲངས་དང༌། ཆ་དང༌། བགྲང་བ་དང༌། དཔེ་དང་རྒྱུར་ཡང་ཉེ་བར་མི་འགྲོའོ། །ཀྱེ་རྒྱལ་བའི་སྲས། ༄༅། །དཔེ་སྔ་མ་དེ་དག་ལྟའང་ཞོག་གི །ཀྱེ་རྒྱལ་བའི་སྲས། འདི་ལ་སྐྱེས་བུ་གཉིས་པ་ཞིག་བྱུང་སྟེ། དེའི་སེམས་བསྐྱེད་པ་གཅིག་གིས་སྐྱེས་བུ་སྔ་མ་དེ་དང༌། འགྲོ་བ་ཕལ་འཇིག་རྟེན་གྱི་ཁམས་ཚད་མེད་པར་གཏོགས་པ་སྔ་མ་རྣམས་ཀྱིས་བསྐལ་པ་ཚད་མེད་པར་སངས་རྒྱས་མཆོད་པ་དང༌། རིམ་གྲོ་མངོན་པར་འདུ་བྱས་པ་དེ་དག་སེམས་ བསྐྱེད་པ་གཅིག་གིས་མངོན་པར་འདུ་བྱེད་ལ། ཚུལ་དེ་ལྟ་བུར་སེམས་བསྐྱེད་པ་རེ་རེར་མཉེས་པར་བྱེད་པས་ཤར་ཕྱོགས་ལོགས་སུ་འཇིག་རྟེན་གྱི་ཁམས་ཚད་མེད་པར་ གཏོགས་པའི་སེམས་ཅན་རྣམས་དང་ལྷན་ཅིག་པས་སངས་རྒྱས་བཅོམ་ལྡན་འདས་ཚད་མེད་པ་མཉེས་པར་བྱས་ཏེ། གཞུང་དེ་བཞིན་དུ་ཐོག་མ་ལ་ཇི་སྐད་དུ་བརྗོད་པ་དེ་ བཞིན་དུ་གཉིས་པ་ལ་དཔག་ཏུ་མེད་པ། གསུམ་པ་ལ་གྲངས་མེད་པ། བཞི་པ་ལ་བསམ་གྱིས་མི་ཁྱབ་པ། ལྔ་པ་ལ་མཚུངས་པ་མེད་པ། དྲུག་པ་ལ་ཀུན་ཏུ་མཐའ་ཡས་པ། བདུན་པ་ལ་མུ་མེད་པ། བརྒྱད་པ་ལ་ས་མཚམས་མེད་པ། དགུ་པ་ལ་གཞལ་དུ་མེད་པའི་བར་དུ་སྟེ། ཀྱེ་རྒྱལ་བའི་སྲས། དཔེ་སྔ་མ་དེ་ལྟའང་ཞོག་གི །ཀྱེ་རྒྱལ་བའི་སྲས། འདི་ལ་སྐྱེས་བུ་བཅུ་པ་ཞིག་སྐྱེས་ཏེ། སྐྱེས་བུ་སྔ་མ་དགུ་པོ་དེ་དག་དང༌། འཇིག་རྟེན་གྱི་ཁམས་གཞལ་དུ་མེད་པ་བཅུར་གཏོགས་པའི་སེམས་ཅན་ཕལ་དེ་དག་གིས་བསྐལ་ པ་དཔག་ཏུ་མེད་པར་སངས་རྒྱས་མཆོད་པ་དང༌། རིམ་གྲོས་མཉེས་པར་བྱས་པ་དེ་ཙམ་དུ་སེམས་བསྐྱེད་པ་གཅིག་གིས་མཉེས་པར་བྱེད་ཅིང༌། ཚུལ་དེ་ལྟར་སེམས་བསྐྱེད་པ་རེ་རེར་ མཉེས་པར་བྱེད་པས་ཤར་ཕྱོགས་ལོགས་སུ་འཇིག་རྟེན་གྱི་ཁམས་བརྗོད་དུ་མེད་པར་གཏོགས་པའི་སེམས་ཅན་རྣམས་དང་ལྷན་ཅིག་པས་ཞལ་ཟས་བྲོ་བའི་མཆོག་བརྗོད་དུ་མེད་པ་ ཞེས་བྱ་བ་ནས་གཞན་ཡང་རྒྱ་ཆེར་ཏེ། དེ་ལྟ་བུས་སངས་རྒྱས་བཅོམ་ལྡན་འདས་བརྗོད་དུ་མེད་པ་མཉེས་པར་བྱས་པ་ནས་ཀྱེ་རྒྱལ་བའི་སྲས། བྱང་ཆུབ་སེམས་དཔའ་སེམས་དང་པོ་ བསྐྱེད་པའི་བསོད་ནམས་ཀྱི་ཕུང་པོ་ལ་བསྐལ་པ་བརྗོད་དུ་མེད་པར་གཏོགས་པའི་སངས་རྒྱས་མཆོད་པ་དང༌། བསྙེན་བཀུར་བ་ལས་བྱུང་བའི་བསོད་ནམས་ཀྱི་ཕུང་པོ་སྔ་མས་བརྒྱའི་ཆར་ ཡང་ཉེ་བར་མི་འགྲོ་ཞེས་བྱ་བ་ནས་རྒྱུའི་བར་དུ་ཡང་ཉེ་བར་མི་འགྲོ་ཞེས་བྱ་བའི་བར་དུ་སྟེ། དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས། དེ་ནི། འདི་ལྟར་སངས་རྒྱས་སྐྱེས་པ་དེ་ཙམ་ཉི་ ཚེ་ཞིག་མཆོད་ཅིང་བསྙེན་བཀུར་བའམ། སངས་རྒྱས་ཀྱི་མཆོད་པའི་ཡོ་བྱད་དེ་ཙམ་དག་གི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཏུ་སེམས་མི་སྐྱེའི། དེ་ནི། འདི་ལྟར་འཇིག་རྟེན་གྱི་ཁམས་འབྱམས་ཀླས་པ་མ་ལུས་པ་ཐམས་ཅད་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་དབྱིངས་ཀྱི་ ༄༅། །མཐས་གཏུགས་པ། བརྗོད་དུ་མེད་པའི་ཡང་བརྗོད་དུ་མེད་པ། ཕྱོགས་བཅུ་ཚད་ལས་འདས་པ། འབྱམས་ཀླས་པ། ཕྱོགས་ཀྱི་རྣམ་གྲངས་མཐའ་ཡས་ པའི་དྲ་བས་ཁྱབ་པ། མིག་འཕྲུལ་གྱི་རྣམ་པས་བསམ་ཡས་པ། འཇིག་རྟེན་གྱི་ཁམས་ཐམས་ཅད་གཞི་མཉམ་པར་ཆུད་པ། འཇིག་རྟེན་གྱི་ཁམས་མ་ལུས་པར་འདུས་པའི་ ཚུལ་ཤིན་ཏུ་བསྟན་པ། འདུ་ཤེས་ཀྱི་རྣམ་པ་ལ་གནས་པའི་ཕྱོགས་ཀྱི་དྲ་བ་རྣམ་པར་ཕྱེ་བ་ལ་གནས་པ་ཐམས་ཅད་དུ་གཏོགས་པ། ལྷག་མ་མེད་པ་མ་ལུས་པའི་འཇིག་རྟེན་ གྱི་ཁམས་ཀྱི་གྲངས་དང་ཚུལ་ཤིན་ཏུ་བསྟན་པ་དག་ཏུ་སྔོན་གྱི་མཐའི་མུར་ཐུག་པའི་བསྐལ་པ་བགྲངས་པའི་ཚུལ་ཤིན་ཏུ་བསྟན་པར་གཏོགས་པ་ཐམས་ཅད་མཁྱེན་པའི་ཡེ་ ཤེས་ཀྱི་ཚུལ་གྱིས་མངོན་པར་ཐུགས་སུ་ཆུད་པ་དག་ཏུ་སངས་རྒྱས་བཅོམ་ལྡན་འདས་གང་ཇི་སྙེད་ནུབ་པར་གྱུར་ཏེ། ཡོངས་སུ་མྱ་ངན་ལས་འདས་པ་དང༌། གང་ཡང་མ་ འོངས་པའི་དུས་ན་འཇིག་རྟེན་གྱི་ཁམས་ཐམས་ཅད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འབྱུང་བར་འགྱུར་བ་དང༌། གང་ ཡང་ད་ལྟར་བྱུང་བའི་དུས་ན་ད་ལྟར་ཕྱོགས་བཅུ་ན་སངས་རྒྱས་བཅོམ་ལྡན་འདས་རྣམས་བཞུགས་ཤིང་འཚོ་སྐྱོང་བ་དང༌། ཆོས་སྟོན་པ་དེ་དག་ཐམས་ཅད་མཆོད་ཅིང་རིམ་གྲོ་ བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་ཏེ། སེམས་བསྐྱེད་པ་དེ་སྐྱེས་མ་ཐག་ནས་དེ་དང་དེར་འདས་པའི་གྲངས་སུ་ གཏོགས་པ་དང༌། སྔོན་གྱི་མུར་གྱུར་པ་ཇི་སྙེད་པ་དེ་བཞིན་གཤེགས་པ་དེ་དག་གིས་མངོན་པར་ཐུགས་སུ་ཆུད་པ་དེ་དག་ཏུ་སངས་རྒྱས་བཅོམ་ལྡན་འདས་གང་ཇི་སྙེད་མྱ་ངན་ལས་ འདས་པ་དེ་དག་གི་དགེ་བའི་རྩ་བ་ཇི་ལྟ་བ་བཞིན་དུ་བྱང་ཆུབ་སེམས་དཔའ་ཡིད་ཆེས་སོ། །དེ་བཞིན་གཤེགས་པ་མ་བྱོན་པ་དེ་དང༌། དེའི་དུས་སུ་གཏོགས་པ་ཕྱི་མའི་མཐའི་མུར་བསྟན་ པ་དཔག་ཏུ་མེད་པ། མཐའ་དང་དབུས་མེད་པར་ཤིན་ཏུ་བསྟན་པ་དཔག་ཏུ་མེད་པ་དག་ཏུ་སངས་རྒྱས་བཅོམ་ལྡན་འདས་གང་ཇི་སྙེད་འབྱུང་བར་འགྱུར་བ་དེ་དག་གི་དགེ་བའི་རྩ་བ་ལ་ ཡང་བྱང་ཆུབ་སེམས་དཔའ་དེ་ཡིད་ཆེས་སོ། །ད་ལྟར་བྱུང་བའི་དེ་བཞིན་གཤེགས་པའི་སངས་རྒྱས་ཀྱི་ཡེ་ཤེས་མཐའ་དང་དབུས་མེད་པར་བསྟན་པ་མ་ལུས་པར་མངོན་པར་སངས་ རྒྱས་པའི་སངས་རྒྱས་བཅོམ་ལྡན་འདས་དེ་དག་གི་དགེ་བའི་རྩ་བ་ལ་ཡང་བྱང་ཆུབ་སེམས་དཔའ་དེ་ཡིད་ཆེས་ཤིང་ཡོངས་སུ་འཛིན་པར་བྱེད། ཡོངས་སུ་རྒྱས་པར་བྱེད། རབ་ཏུ་ཐོབ་ པར་བྱེད། ཁོང་དུ་ཆུད་པར་བྱེད། རབ་ཏུ་རེག་པར་བྱེད། ཤིན་ཏུ་སྒྲུབ་པར་བྱེད། རྒྱུད་གཅིག་ཏུ་གྱུར་པར་བྱེད། སངས་རྒྱས་ཐམས་ཅད་ཀྱང་མཉམ་པ་ཉིད་དུ་ཁོང་དུ་ཆུད་པར་བྱེད་དོ།། ༄༅། །དེ་ཅིའི་ཕྱིར་ཞེ་ན། འདི་ལྟར་སེམས་བསྐྱེད་པ་དེ་ནི། དེ་བཞིན་གཤེགས་པ་ཐམས་ཅད་ཀྱི་གདུང་རྒྱུད་མི་འཆད་པའི་ཕྱིར་སྐྱེའོ། །འཇིག་རྟེན་གྱི་ཁམས་ མ་ལུས་པ་ཐམས་ཅད་རྒྱས་པར་དགང་བའི་ཕྱིར་སྐྱེའོ། །འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་ཡོངས་སུ་བསྒྲལ་བའི་ཕྱིར་སྐྱེའོ། །འཇིག་རྟེན་གྱི་ ཁམས་ཐམས་ཅད་འདུ་བ་དང༌། འཇིག་པ་ཡོངས་སུ་ཤེས་པར་བྱ་བའི་ཕྱིར་སྐྱེའོ། །འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་ཀུན་ནས་ཉོན་ མོངས་པ་དང༌། རྣམ་པར་བྱང་བ་ཡོངས་སུ་ཤེས་པར་བྱ་བའི་ཕྱིར་སྐྱེའོ། །འཇིག་རྟེན་གྱི་ཁམས་ཐམས་ཅད་ཀྱི་སྲིད་པ་གསུམ་ཡོངས་སུ་དག་པ་ཡོངས་སུ་ཤེས་པར་བྱ་བའི་ ཕྱིར་སྐྱེའོ། །སེམས་ཅན་ཐམས་ཅད་ཀྱི་བསམ་པ་དང༌། བག་ལ་ཉལ་བ་དང༌། བག་ཆགས་ཐམས་ཅད་ཡོངས་སུ་ཤེས་པར་བྱ་བའི་ཕྱིར་སྐྱེའོ། །སེམས་ཅན་ཐམས་ཅད་ཀྱི་ ཤི་འཕོ་དང༌། སྐྱེ་བ་ཡོངས་སུ་ཤེས་པར་བྱ་བའི་ཕྱིར་སྐྱེའོ། །སེམས་ཅན་ཐམས་ཅད་ཀྱི་དབང་པོ་དང༌། སྦྱོར་བ་ཡོངས་སུ་ཤེས་པར་བྱ་བའི་ཕྱིར་སྐྱེའོ། །སེམས་ཅན་ཐམས་ ཅད་ཀྱི་སེམས་དང༌། སྤྱོད་པ་ཡོངས་སུ་ཤེས་པར་བྱ་བའི་ཕྱིར་སྐྱེའོ། །སེམས་ཅན་ཐམས་ཅད་ཀྱི་དུས་གསུམ་གྱི་ཤེས་པ་ཡོངས་སུ་ཤེས་པར་བྱ་བའི་ཕྱིར་སྐྱེ་སྟེ། སེམས་བསྐྱེད་ པ་དེས་སངས་རྒྱས་བཅོམ་ལྡན་འདས་འདས་པ་དག་དང་ཉེ་བར་འགྱུར་རོ། །སངས་རྒྱས་བཅོམ་ལྡན་འདས་མ་བྱོན་པ་དང༌། ད་ལྟར་བྱུང་བ་རྣམས་དང་ཉེ་བར་འགྱུར་རོ། །འདས་ པའི་སངས་རྒྱས་ཀྱི་བྱང་ཆུབ་ཏུ་ཉེ་བར་འགྲོའོ། །མ་བྱོན་པ་དང་ད་ལྟར་བྱུང་བའི་སངས་རྒྱས་ཀྱི་བྱང་ཆུབ་ཏུ་ཉེ་བར་འགྲོའོ། །སངས་རྒྱས་བཅོམ་ལྡན་འདས་འདས་པ་རྣམས་ཀྱི་ ཆོས་ཀྱང་ཐོབ་པར་འགྱུར་རོ། །སངས་རྒྱས་བཅོམ་ལྡན་འདས་མ་བྱོན་པ་རྣམས་ཀྱི་ཆོས་ཀྱང་ཐོབ་པར་འགྱུར་རོ། །སངས་རྒྱས་བཅོམ་ལྡན་འདས་ད་ལྟར་བྱུང་བ་རྣམས་ཀྱི་ཆོས་ ཀྱང་ཐོབ་པར་འགྱུར་རོ། །སངས་རྒྱས་བཅོམ་ལྡན་འདས་འདས་པ་རྣམས་དང་མཉམ་པ་ཉིད་དུ་ཉེ་བར་འགྲོའོ། །སངས་རྒྱས་བཅོམ་ལྡན་འདས་བ་བྱོན་པ་དང་ད་ལྟར་བྱུང་བ་རྣམས་ དང་མཉམ་པ་ཉིད་དུ་ཉེ་བར་འགྲོའོ། །སངས་རྒྱས་བཅོམ་ལྡན་འདས་འདས་པ་རྣམས་ཀྱི་ཡེ་ཤེས་ཀྱི་ཚོགས་རྣམ་པར་དག་པར་འགྱུར་རོ། །སངས་རྒྱས་བཅོམ་ལྡན་འདས་མ་བྱོན་ པ་དང་ད་ལྟར་བྱུང་བ་རྣམས་ཀྱི་ཡེ་ཤེས་ཀྱི་ཚོགས་ཀྱང་རྣམ་པར་དག་པར་འགྱུར་རོ། །སངས་རྒྱས་བཅོམ་ལྡན་འདས་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སྟོབས་ལ་ ཐུབ་པ་མེད་པ་ཡང་ཤིན་ཏུ་བརྟན་པར་འགྱུར་རོ། །འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་དག་གི་མི་བསྙེངས་པ་ཡོངས་སུ་དག་པའང་ ༄༅། །ཡོངས་སུ་རྫོགས་པར་བྱེད་དོ། །སངས་རྒྱས་བཅོམ་ལྡན་འདས་འདས་པ་རྣམས་ཀྱི་བསྟན་པར་བྱ་བའི་སངས་རྒྱས་ཀྱི་ཆོས་ཀྱི་རྒྱན་མཉམ་པ་ཉིད་ ཀྱང་རྗེས་སུ་འཐོབ་བོ། །སངས་རྒྱས་བཅོམ་ལྡན་འདས་མ་བྱོན་པ་དང་ད་ལྟར་བྱུང་བ་རྣམས་ཀྱི་བསྟན་པར་བྱ་བའི་སངས་རྒྱས་ཀྱི་ཆོས་ཀྱི་རྒྱན་མཉམ་པ་ཉིད་ཀྱང་ཡོངས་སུ་རྫོགས་ པར་བྱེད་དོ། །ནམ་མཁའི་དབྱིངས་ཀྱི་མཐར་ཐུག་པ་ཆོས་ཀྱི་དབྱིངས་མཐའ་དང་དབུས་མེད་པར་ཤིན་ཏུ་བསྟན་པའི་དུས་གསུམ་མཉམ་པ་ཉིད་དུ་ཐུགས་སུ་ཆུད་པའི་སངས་རྒྱས་ ཀྱི་ཡེ་ཤེས་ཀྱང་རྗེས་སུ་འཐོབ་བོ། །དེ་ཅིའི་ཕྱིར་ཞེ་ན། དེ་ལྟར་དེ་ནི། སངས་རྒྱས་སུ་ཤོག་ཅིག་ཅེས་བྱ་བའི་སེམས་བསྐྱེད་པ་དེས་འདས་པའི་སངས་རྒྱས་བཅོམ་ལྡན་འདས་རྣམས་ དང་ཉེ་བ་ཡིན། མ་བྱོན་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང་ཉེ་བ་ཡིན། འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་རྒྱས་ཀྱི་ཡུལ་ རྣམས་དང་མཉམ་པ་ཡིན། འདས་པའི་སངས་རྒྱས་ཀྱི་ཆོས་རྣམས་དང་མཉམ་པ་ཡིན་ནོ། །མ་འོངས་པ་དང༌། ད་ལྟར་བྱུང་བའི་སངས་རྒྱས་ཀྱི་ཆོས་རྣམས་དང་མཉམ་པ་ཡིན། སངས་རྒྱས་ཀྱི་ཆོས་ཀྱི་སྤྱོད་ཡུལ་ཐམས་ཅད་དང་མཉམ་པ་ཡིན། གཅིག་ཏུ་ངེས་པའི་ལུས་གཅིག་ཏུ་གྱུར་པས་ཀྱང་དུས་གསུམ་དུ་མཉམ་པའི་སངས་རྒྱས་ཐམས་ཅད་ཀྱི་ཡེ་ཤེས་ དང་འགྲོགས་པ་ཡང་ཐོབ་པ་སྟེ། ཡེ་ཤེས་དེ་དང་འགྲོགས་པར་འགྱུར་བའི་སེམས་བསྐྱེད་པར་འབྱུང་བ་དེ་སྐྱེས་མ་ཐག་ཏུ་ཕྱོགས་བཅུ་ན་སངས་རྒྱས་བཅོམ་ལྡན་འདས་རྣམས་ཀྱང་ ཆེད་དུ་བརྗོད་པ་མཛད་དོ། །སེམས་བསྐྱེད་པ་དེ་ཉིད་རྟེན་དུ་མཛད་དེ་འདུལ་བ་ཇི་བཞིན་དུ་ཆོས་ཀྱང་ཡང་དག་པར་སྟོན། འཇིག་རྟེན་གྱི་ཁམས་ཐམས་ཅད་དུ་ཡང་འདུལ་བ་ཚད་ མེད་པ་རྣམས་འབྱུང་བར་འགྱུར། འཇིག་རྟེན་གྱི་ཁམས་ཐམས་ཅད་ཀྱང་རབ་ཏུ་གཡོ་བར་འགྱུར། འཇིག་རྟེན་གྱི་ཁམས་ཐམས་ཅད་ཀྱང་སྣང་བས་རྒྱས་པར་འགྱུར། འཇིག་ རྟེན་གྱི་ཁམས་ཐམས་ཅད་ཀྱི་ངན་སོང་ཡང་རྒྱུན་ཆད་པར་འགྱུར། འཇིག་རྟེན་གྱི་ཁམས་ཐམས་ཅད་ཀྱང་ཡོངས་སུ་དག་པར་འགྱུར། འཇིག་རྟེན་གྱི་ཁམས་ཐམས་ཅད་དུ་ ཡང་སངས་རྒྱས་འབྱུང་བ་ཡང་དག་པར་སྟོན་པར་འགྱུར། སེམས་ཅན་ཐམས་ཅད་ཀྱང་རབ་ཏུ་དགའ་བར་འགྱུར། ཆོས་ཀྱི་དབྱིངས་ཐམས་ཅད་ལ་ཡང་རབ་ཏུ་འཇུག་པར་འགྱུར། སངས་རྒྱས་ཀྱི་རིགས་ཐམས་ཅད་ཀྱང་ཡོངས་སུ་འཛིན་པར་འགྱུར། སངས་རྒྱས་ཀྱི་རིགས་ཀྱི་སྣང་བ་ཐམས་ཅད་ཀྱང་རབ་ཏུ་ཐོབ་པར་འགྱུར་ཏེ། དུས་གསུམ་དུ་གཏོགས་པ་ལས་ སེམས་བསྐྱེད་པ་དེར་སངས་རྒྱས་སམ། སངས་རྒྱས་ཀྱི་ཆོས་སམ། བྱང་ཆུབ་སེམས་དཔའ་འམ། བྱང་ཆུབ་སེམས་དཔའི་ཆོས་སམ། རང་སངས་རྒྱས་སམ། རང་སངས་རྒྱས་ཀྱི་ ༄༅། །ཆོས་སམ། ཉན་ཐོས་སམ། ཉན་ཐོས་ཀྱི་ཆོས་སམ། འཇིག་རྟེན་པའམ། འཇིག་རྟེན་པའི་ཆོས་སམ། འཇིག་རྟེན་ལས་འདས་པའམ། འཇིག་རྟེན་ ལས་འདས་པའི་ཆོས་སམ། སེམས་ཅན་ནམ། སེམས་ཀྱི་ཆོས་ཀྱང་རུང་སྟེ། མ་འདུས་པ་གང་ཡང་མེད་དེ། ཐམས་ཅད་མཁྱེན་པ་ཉིད་ནི། མ་གཏོགས་སོ། །དེ་ལྟར་ན། སེམས་བསྐྱེད་པ་དེར་ནི། ཆོས་ཀྱི་དབྱིངས་ཐམས་ཅད་འདུས་སོ། །དེ་ནས་སངས་རྒྱས་ཀྱི་མཐུས་དེའི་ཚེ་ཕྱོགས་བཅུར་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ ཕྲ་བ་སྙེད་རྣམ་པ་དྲུག་ཏུ་གཡོས་པར་གྱུར་ཏེ། གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ། །རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ །རབ་ཏུ་ལྡེག་ གོ །ཀུན་ཏུ་ལྡེག་གོ །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར། རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག །རབ་ཏུ་ཤིག་ཤིག །ཀུན་ཏུ་ཤིག་ ཤིག་གོ །དེ་ནས་སངས་རྒྱས་ཀྱི་མཐུ་དང༌། སེམས་བསྐྱེད་པ་དེའི་ཡོན་ཏན་ཡང་དག་པར་བརྗོད་པའི་ཆོས་ཉིད་རབ་ཏུ་ཐོབ་པའི་ཕྱིར་ལྷ་རྫས་ཀྱི་མེ་ཏོག་གི་ཆར་ཡང་མངོན་པར་ བབ་བོ༑ ༑ལྷ་རྫས་ཀྱི་སྤོས་ཀྱི་ཆར་ཡང་མངོན་པར་བབ་བོ། །ལྷ་རྫས་ཀྱི་ཕྱེ་མའི་ཆར་ཡང་མངོན་པར་བབ་བོ། །ལྷ་རྫས་ཀྱི་ཕྲེང་བའི་ཆར་ཡང་མངོན་པར་བབ་བོ། །ལྷ་རྫས་ཀྱི་ གོས་ཀྱི་ཆར་ཡང་མངོན་པར་བབ་བོ། །ལྷ་རྫས་ཀྱི་རིན་པོ་ཆེའི་ཆར་ཡང་མངོན་པར་བབ་བོ། །ལྷ་རྫས་ཀྱི་རྒྱན་གྱི་ཆར་ཡང་མངོན་པར་བབ་བོ། །ལྷ་རྫས་ཀྱི་རོལ་མོ་རྣམས་ཀྱང་མངོན་ པར་སྒྲ་འབྱིན་པར་གྱུར་ཏོ། །ལྷ་རྫས་ཀྱི་སྣང་བ་ཡང་རབ་ཏུ་བྱུང་ངོ༌། །ལྷ་རྫས་ཀྱི་འོད་ཀྱང་རབ་ཏུ་བྱུང་ངོ༌། །ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ ཕྲ་བ་སྙེད་འདས་པའི་ཕ་རོལ་ནས་དེ་བཞིན་གཤེགས་པ་ཆོས་ཀྱི་བློ་གྲོས་སུ་མཚན་བཏགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱིས་ཞལ་མངོན་པར་བསྟན་ཏེ་གསུང་ བརྗོད་པ། ཆོས་ཀྱི་བློ་གྲོས་ལེགས་ལེགས་སོ། །ཕྱོགས་བཅུ་ན་དེ་བཞིན་གཤེགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་ཆོས་བསྟན་པ་དེ་ལ་ཆེད་དུ་བརྗོད་པ་མཛད་ དོ༑ ༑ངེད་ཀྱིས་ཀྱང་ཆོས་བསྟན་པ་འདི་ཉིད་ཤིན་ཏུ་རྣམ་པར་ཕྱེ་སྟེ། ངེད་ཀྱིས་ཇི་ལྟར་ཤིན་ཏུ་རྣམ་པར་ཕྱེ་བ་དེ་བཞིན་དུ་སངས་རྒྱས་ཐམས་ཅད་ཀྱིས་ཀྱང་ཤིན་ཏུ་རྣམ་པར་ཕྱེའོ། ། འདི་ཉིད་དུ་ཡང་ཁྱོད་ཀྱི་ཆོས་བསྟན་པ་དེས་བྱང་ཆུབ་སེམས་དཔའ་སངས་རྒྱས་ཀྱི་ཞིང་སྟོང་གི་རྡུལ་ཤིན་ཏུ་ཕྲ་བ་སྙེད་ཀྱིས་བྱང་ཆུབ་ཏུ་སེམས་བསྐྱེད་དོ། །དེ་དག་ཀྱང་ངེད་ཀྱིས་ ལུང་བསྟན་ཏེ། དེ་དག་ནི། མ་འོངས་པའི་དུས་བསྐལ་པ་སྟོང་ཕྲག་བརྗོད་དུ་མེད་པའི་མཐར་ཐམས་ཅད་ཀྱང་དུས་གཅིག་ཏུ་འཇིག་རྟེན་གྱི་ཁམས་མིང་ཐ་དད་པ་དག་ཏུ་དེ་བཞིན་ ༄༅། །གཤེགས་པ་མཚན་གཅིག་པ་ཤ་སྟག་འབྱུང་བར་འགྱུར་ཏེ། འདི་ལྟར་སེམས་རྣམ་པར་དག་པ་ཞེས་བྱ་བ་ཤ་སྟག་ཏུ་འགྱུར་རོ། །ངེད་ཀྱིས་ཆོས་བསྟན་ པ་འདི་ཡང་ཇི་ལྟར་མ་འོངས་པའི་དུས་ན་མ་འོངས་པའི་བྱང་ཆུབ་སེམས་དཔའ་མ་ཐོས་པ་རྣམས་ཀྱིས་ཐོས་པར་བྱ་བ་དང༌། ཇི་ལྟར་འཇིག་རྟེན་གྱི་ཁམས་མི་མཇེད་འདིར་སེམས་ ཅན་རྣམས་ཀྱིས་ཤེས་ཤིང༌། གླིང་བཞི་པ་འདིའི་རི་རབ་ཀྱི་རྩེ་མོ་ལ་ཇི་ལྟར་སེམས་ཅན་རྣམས་འདུལ་བར་གྱུར་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་བྱེ་བ་ཁྲག་ ཁྲིག་བརྒྱ་སྟོང་ཚད་མེད་པ། གྲངས་མེད་པ། བསམ་གྱིས་མི་ཁྱབ་པ། མཚུངས་པ་མེད་པ། ཀུན་ཏུ་མཐའ་ཡས་པ། དཔག་ཏུ་མེད་པ། ས་མཚམས་མེད་པ། བརྗོད་དུ་མེད་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་དག་ཏུ་ཡང་སེམས་ཅན་རྣམས་འདུལ་བར་འགྱུར་བར་བྱ་བའི་ཕྱིར་བྱིན་གྱིས་བརླབ་བོ། །ཐམས་ཅད་ན་ཡང་ ཆོས་བསྟན་པ་འདི་ཉིད་བྱང་ཆུབ་སེམས་དཔའ་ཆོས་ཀྱི་བློ་གྲོས་ཞེས་བྱ་བ་ཤ་སྟག་སངས་རྒྱས་ཀྱི་མཐུ་དང༌། བཅོམ་ལྡན་འདས་ཀྱི་སྔོན་གྱི་སྨོན་ལམ་གྱིས་སངས་རྒྱས་ཀྱི་ ཆོས་ཐམས་ཅད་ཡང་དག་པར་བསྟན་པ་དང༌། ཡེ་ཤེས་ཀྱི་སྣང་བ་ཤིན་ཏུ་གསལ་པར་བྱ་བ་དང༌། དོན་གྱིས་གདུལ་བའི་སྣང་བ་ཐོབ་པ་དང༌། ཆོས་ཉིད་རབ་ཏུ་འཐོབ་པར་བྱ་ པ་དང༌། བྱང་ཆུབ་སེམས་དཔའ་རྣམས་ཤིན་ཏུ་དགའ་བར་བྱ་བ་དང༌། སངས་རྒྱས་ཀྱི་ཆོས་ཀྱི་རྒྱུད་ཡང་དག་པར་བསྟན་པ་དང༌། སངས་རྒྱས་ཀྱི་ཆོས་མཉམ་པ་ཉིད་དུ་བྱ་བ་དང༌། ཆོས་ཀྱི་དབྱིངས་གཉིས་སུ་མེད་པ་ལ་འཇུག་པར་བྱ་བའི་ཕྱིར་རབ་ཏུ་སྟོན་ཏོ། །དེ་ནས་བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་ཕྱོགས་བཅུར་བལྟས་ཏེ་འཁོར་ཐམས་ཅད་ལ་ རྣམ་པར་བལྟས་ནས་ནམ་མཁའི་ཁམས་རྣམས་ལ་ནི། རྣམ་པར་དཔྱོད། སེམས་ཅན་གྱི་ཁམས་ནི། ཡོངས་སུ་སྨིན་པར་བྱེད། ལས་དང་རྣམ་པར་སྨིན་པའི་ཁམས་ནི། འགལ་ བར་མི་བྱེད། ནམ་མཁའི་ཁམས་ནི། ཡོངས་སུ་དག་པར་བྱེད། ཀུན་ནས་ཉོན་མོངས་པ་ལས་བྱུང་བ་ནི། རབ་ཏུ་སེལ། མོས་པ་ཡངས་པ་ལས་བྱུང་བ་ནི། ཤིན་ཏུ་འཕེལ་ བར་བྱེད། སེམས་ཅན་གྱི་དབང་པོ་ཐ་དད་པ་ལ་ནི། རབ་ཏུ་འཇུག །དུས་གསུམ་ནི། མཉམ་པར་བྱེད། མྱ་ངན་ལས་འདས་པའི་དབྱིངས་ལ་ནི། ཡང་དག་པར་རྟོག་ཅིང༌། རང་ གི་དགེ་བའི་རྩ་བའི་སྟོབས་ཡོངས་སུ་དག་པར་བྱ་བ་ལ་གཞོལ་བའི་ཕྱིར་དེའི་ཚེ་སངས་རྒྱས་ཀྱི་མཐུས་ཚིགས་སུ་བཅད་པ་འདི་དག་སྨྲས་སོ། །གང་ཞིག་ཕྱོགས་རྣམས་བཅུ་པོ་མ་ ལུས་རྒྱས་བྱས་ཤིང༌། །སེམས་ཅན་ཞིང་དང་ཆོས་གསུམ་དག་ཀྱང་རྟོགས་གྱུར་པ། །སངས་རྒྱས་མཚོ་མཆོག་བྱང་ཆུབ་སེམས་དཔའ་དེ་བཞིན་ཏེ། །དེ་དག་འཇིག་རྟེན་ཕན་ཕྱིར་ ༄༅། །སེམས་ཀྱི་དམ་པ་བསྐྱེད། །ནམ་མཁའི་དབྱིངས་ཀྱིས་ཀླས་པའི་ཆོས་དབྱིངས་ཇི་བཞིན་དང༌། །ཇི་ལྟར་སངས་རྒྱས་ཆོས་རྣམས་འགྲོ་ཀུན་རྗེས་སོང་དང༌། ། སངས་རྒྱས་ཐམས་ཅད་ཀུན་ཏུ་ཁྱབ་བརྙེས་ཇི་བཞིན་གྱི། །འགྲོ་བ་མི་ལྡོག་དོན་དུ་ཕན་པར་རབ་ཏུ་ཞུགས། །འཇིག་རྟེན་རྣམས་ལ་བྱམས་པས་རྟག་པར་རབ་གནས་ཤིང༌། །འཚེ་ བ་མེད་པ་འགྲོ་ལ་ཕན་ཕྱིར་སུ་ཞུགས་ཏེ། །སྣང་བ་མི་ཟད་འོད་བྱེད་གནས་སུ་གྱུར་པ་རྣམས། །བསམ་གྱིས་མི་ཁྱབ་སྟོབས་བཅུ་མངའ་བས་བྱིན་གྱིས་བརླབས། །དེ་ནི་ཞིང་རྣམས་ ཐ་དད་མ་ཡིན་ཚུལ་ཡང་རྙེད། །དེ་ནི་ལུས་ཀྱི་རྣམ་པ་ཀུན་ལ་རབ་ཏུ་ཞུགས། །བསོད་ནམས་ཡེ་ཤེས་དེ་ཡང་སངས་རྒྱས་བྱང་ཆུབ་བཞིན། །འདི་ནི་ཆགས་མེད་གཞོལ་བ་ཡེ་ཤེས་ རྒྱུར་སྐྱེས་སོ། །སྤྱིའུ་ཚུགས་རྒྱུ་བའི་འགྲོ་བ་སྣ་ཚོགས་མ་ལུས་པར། །གཞན་ཡང་ཞིང་རྣམས་འབྱམས་ཀླས་ཆགས་མེད་མཐར་ཐུག་པ། །དེ་དག་ཕྲ་སྦོམ་རྒྱ་ཆེ་ཡངས་པ་ཐམས་ ཅད་དུ༑ ༑བྱང་ཆུབ་སེམས་མཆོག་དེ་ནི་གཅིག་པུ་ཀུན་ཏུ་འགྲོ་།བརྗོད་དུ་མེད་པ་ཤིན་ཏུ་ཕྲ་ཞིང་མི་གནས་པའི། །བྱང་ཆུབ་སེམས་དཔའི་སྤྱོད་པ་མཆོག་ལ་རྟག་ཞུགས་ཤིང༌། ། མཁས་པ་གང་གིས་སངས་རྒྱས་ཆོས་མཐོང་མི་ངོམས་པ། །དེ་དག་ཆོས་རྣམས་རྒྱ་མཚོའི་རྣམ་པར་ཆུད་པ་ཡིན། །འཇིག་རྟེན་ལམ་རྒྱུད་ཀུན་ལ་སུ་ཞིག་སྙིང་བརྩེ་ཞིང༌། །འཇིག་ རྟེན་གསུམ་པོ་སྦྱང་པར་རྟག་ཏུ་ཞུགས་པ་རྣམས། །ཕྱི་མའི་མཐར་ཐུག་སངས་རྒྱས་གདུང་གི་རྒྱུན་མི་གཅོད། །དེ་ནི་བདུད་ཀྱི་ཁྱིམ་ཡང་རབ་ཏུ་འཇོམས་པ་ཡིན། །དུས་གསུམ་ རྒྱལ་བ་རྣམས་དང་རྒྱུད་གཅིག་དངོས་གྱུར་ཅིང༌། །ཤིན་ཏུ་ཕྲ་བའི་ཚུལ་གྱིས་ལམ་ལ་རྟག་བརྩོན་ཏེ། །སུ་ཞིག་སངས་རྒྱས་ཡུལ་ལ་དད་སེམས་པ། །དེ་ནི་ཆགས་མེད་ཐུབ་པ་ ཀུན་གྱིས་དབང་ཡང་བསྐུར། །རྡོ་རྗེ་ལྟ་བུར་སྲ་ཞིང་བརྟན་ལ་མི་ཤིགས་པ། །རྐང་གཉིས་གཙོ་བོས་མཛད་པ་རྟག་ཏུ་དྲན་ཤེས་ཤིང༌། །འདྲེན་པའི་སྤྱོད་ཡུལ་སྣང་རབ་ཤིན་ཏུ་རྙེད་པ་ རྣམས༑ ༑གཞན་གྱི་དྲིང་ལ་མི་རྒྱུག་བྱང་ཆུབ་སེམས་ཀྱང་སྐྱེ། །འགྲོ་བ་རྣམས་ཀྱི་འདུ་ཤེས་རྣམ་པ་མང་ཤེས་ཤིང༌། །དེ་བཞིན་ལས་དང་འབྲས་བུ་སེམས་ཀྱི་རྣམས་ཀྱང་སྟེ། ། གཞན་ཡང་དབང་པོའི་མཐུ་དང་ཁམས་རྣམས་དུས་མ་དག །ཀུན་ཀྱང་བྱང་ཆུབ་སེམས་དཔའ་སྤྱོད་ཡུལ་གཅིག་ཡིན་ནོ། །གང་ཞིག་ཆོས་ཀྱི་དབྱིངས་བཞིན་བྱང་ཆུབ་སེམས་ཡངས་ ཤིང༌། །རྟག་ཏུ་ཆོས་ལ་མི་གནས་ནམ་མཁའ་ཇི་བཞིན་པ། །ཆགས་མེད་སེམས་ལྡན་དེ་དག་སངས་རྒྱས་ཡེ་ཤེས་ཞུགས། །དེ་དག་རྟོགས་མེད་ཆོས་ཅན་ཡང་དག་མཐའ་ལ་ གནས༑ ༑སེམས་ཅན་བསམ་པ་རྣམ་འབྱེད་སེམས་ཅན་འདུ་ཤེས་མེད། །ཆོས་ཀྱི་རྣམ་རྟོག་ཁྲག་ཁྲིག་ཕ་མཐར་རབ་ཏུ་ཕྱིན། །དེ་དག་རྟོག་ལ་མོས་ཤིང་རྣམ་པར་མི་རྟོག་སྟེ། །དེ་ ༄༅། །དག་ཞིང་རྣམས་བྱེ་བ་ཁྲག་ཁྲིག་རྗེས་སུ་ཞུགས། །གང་ཞིག་སངས་རྒྱས་བྱེ་བ་ཁྲག་ཁྲིག་རྗེས་སེམས་ཤིང༌། །གང་ཞིག་ཆོས་དབྱིངས་ཚུལ་གྱི་མཛོད་ དུ་ཞུགས་གྱུར་ལ། །གང་ཞིག་སེམས་ཅན་དབང་པོའི་རྣམ་པའི་མཐར་ཕྱིན་པ། །དེ་དག་སེམས་ཅན་གཙོ་བཞིན་ཆོས་ཉིད་ཤེས་པ་ཡིན། །ལྷག་པའི་བསམ་པ་དག་དང་རྟག་ པར་མངོན་ལྡན་ཞིང༌། །སྐྱེས་བུའི་སེངྒེའི་བསྙེན་བཀུར་ཕྱིར་ལྡོག་མི་འགྱུར་ལ། །འཇིག་རྟེན་གཙོ་བོ་མཁས་པ་མཐོང་བས་མི་ངོམས་པ། །དེ་དག་སངས་རྒྱས་ཁྲག་ཁྲིག་ བྱེ་བས་བྱིན་གྱིས་བརླབས། །ཟབ་མོའི་ཆོས་རྣམས་རྣམ་པར་འབྱེད་ཀྱང་ཆགས་པ་མེད། །གནས་པ་མེད་པས་སེམས་ཀྱི་དམ་པ་རྟག་ཏུ་དག །དེ་དག་བསྐལ་པ་མཐའ་ཡས་ སྐྱེས་བུ་སེངྒེའི་སེམས། །དུས་གསུམ་ཆགས་པ་མེད་པར་རྟོགས་པའི་ཡིད་དང་ལྡན། །མི་འཕྲོག་ཐུབ་པར་མི་ནུས་ཡིད་ཀྱི་དབང་པོ་དང༌། །གསུམ་པ་རྗེས་སུ་སོང་དང་རྟག་ཏུ་ ལྡན་གྱུར་ཅིང༌། །ཆོས་རྣམས་འབྱམས་ཀླས་ཤིན་ཏུ་བསླབ་པས་རྨོངས་མེད་པ། །དེ་དག་ཆོས་དབྱིངས་འགེངས་ཀྱང་ནམ་ཡང་མི་ངོམས་སོ། །ཚིག་གི་ལམ་འདས་ཇི་བཞིན་ མཁས་པ་ཞི་བ་ཤེས། །དེ་བཞིན་ཉིད་ལ་ནམ་ཡང་རྣམ་པར་མི་འབྱེད་པ། །དེ་དག་སངས་རྒྱས་ཐམས་ཅད་ཡུལ་ལ་རྗེས་སེམས་ཤིང༌། །དུས་གསུམ་ཆགས་པ་མེད་པ་རྟོགས་ པའི་ཡིད་ལྡན་འགྱུར། །མཁས་པ་གང་ཞིག་སེམས་བསྐྱེད་འབྱམས་ཀླས་ཆོས་ཀྱི་དབྱིངས། །འགེངས་ཤིང་ཕྱོགས་བཅུའི་སངས་རྒྱས་ཞིང་དུ་འགྲོ་བ་ནི། །དེ་དག་ཁྲག་ཁྲིག་ ཚུལ་རྣམས་བརྗོད་དུ་མེད་པ་ཡི། །སྣང་བ་རྙེད་པར་གནས་པའི་རྒྱལ་བའི་སྲས་ཡིན་ནོ། །ཆོས་རབ་མུ་སྟེགས་སྙིང་རྗེའི་ཚུལ་གྱི་རྗེས་སོང་ཞིང༌། །བྱམས་པའི་ཕ་རོལ་ཕྱིན་པ་བར་ སྣང་ཇི་བཞིན་ཏེ། །སེམས་ཅན་ཁམས་ལ་ནམ་ཡང་ཡོངས་སུ་རྟོག་མེད་པ། །དེ་དག་རྣམ་རྟོག་མེད་ལ་བརྩོན་ཞིང་འཇིག་རྟེན་སྤྱོད། །ཕྱོགས་བཅུ་དག་ཏུ་བདེན་པས་འགྲོ་བ་ཡིད་ འབེབས་པར། །དོང་བས་སེམས་ཅན་གཙོ་བོ་དེ་དག་ཀུན་ཏུ་རྒྱུ། །བདེན་པའི་ཚིག་བརྩོན་རྟག་ཏུ་ངེས་པའི་སེམས་ལྡན་པ། །དེ་དག་ཕྱོགས་བཅུའི་མི་ཡི་མཆོག་གིས་བྱིན་གྱིས་ བརླབས། །འདས་པར་གྱུར་པའི་དུས་ཀྱང་དེ་དག་རྗེས་སུ་དྲན། །དེ་བཞིན་མ་འོངས་དུས་ལ་འཇུག་པ་རྣམ་པར་སྒོམ། །དེ་དག་ཕྱོགས་བཅུའི་འཇིག་རྟེན་ཀུན་ན་མི་གནས་ཏེ། །སེམས་ ཅན་ཕན་དང་དགྲོལ་ཕྱིར་ཀུན་ཏུ་རྣམ་པར་རྒྱུ། །ཡེ་ཤེས་འོད་མཆོག་དམ་པས་ཆགས་པ་མེད་གྱུར་ལ། །རྒྱུ་ཡི་རྣམ་པ་ཆོས་རབ་ནེམ་ནུར་མེད་བརྟན་རྣམས། །དེ་དག་ཐེ་ཚོམ་ཐམས་ ཅད་རྣམ་པར་ཟློག་པ་བྱེད། །ཆོས་ཀྱི་དབྱིངས་འདིར་ནེམ་ནུར་མེད་པར་རབ་ཏུ་འཇུག །གང་ཞིག་བདུད་རྣམས་ཀུན་གྱི་གནས་རྣམས་འཇོམས་བྱེད་དང༌། །གང་ཡང་སེམས་ཅན་ ༄༅། །རབ་རིབ་ཤིན་ཏུ་སེལ་བྱེད་དང༌། །གང་རྣམས་རྟོག་པ་འཇིག་ཅིང་རྣམ་རྟོག་མི་འགྲོགས་པ། །སེམས་ཅན་གཙོ་བོ་དེ་དག་ཡུལ་ལ་ཐེ་ཚོམ་མེད། །དུས་ གསུམ་མ་ལུས་ཐེ་ཚོམ་རྣམ་པར་བཟློག་བྱས་ཤིང༌། །བསམ་པའི་མཆོག་གིས་དེ་བཞིན་གཤེགས་པའི་དྲུང་འགྲོ་སྟེ། །དད་པའི་སྟོབས་དང་ལྡན་ཞིང་བློ་བརྟན་རྙེད་པ་རྣམས། ། དེ་དག་དོན་རྟོགས་ཁོང་དུ་ཆུད་ཅིང་བློ་ཡང་དག །མཁས་པ་འགྲོ་བའི་དོན་དུ་ཕྱི་མའི་མཐར་སྤྲོ་སྟེ། །སེམས་ཅན་དོན་དུ་རྣམ་ཐར་འབྱམས་ཀླས་ཡོངས་སུ་འཚོལ། །ཡུན་ རིང་དུས་སུ་སྐྱོ་བ་མེད་ཅིང་ཞུམ་པ་མེད། །སེམས་ཅན་དམྱལ་བ་སྡུག་བསྔལ་མང་པོ་ཟློག་པར་བྱེད། །དེ་དག་བསོད་ནམས་མི་ཟད་ཡེ་ཤེས་ལྡན། །འགྲོ་བའི་དབང་པོ་སྣ་ ཚོགས་བསམ་ལ་རབ་ཏུ་འཇུག །སྐྱེ་རྒུའི་ལས་ཀྱི་རྒྱུད་ཀྱང་ཤིན་ཏུ་ཤེས་བྱས་ཤིང༌། །བསམ་པ་ཇི་བཞིན་ཚུལ་འདྲའི་ཆོས་རྣམས་མཐའ་ཡས་བརྗོད། །འགྲོ་ལ་བྱམས་པའི་ ས་རྣམས་ཀུན་དང་རྗེས་སུ་ལྡན། །བདག་མེད་ཉིད་རྟོགས་འོན་ཀྱང་བཏང་སྙོམས་བྱེད་པ་མིན། །དེ་དག་སྙིང་བརྩེ་གཅིག་ཏུ་གསལ་བར་ཆོས་ཀྱང་བརྗོད། །འོན་ཀྱང་དམིགས་ པར་མི་གནས་དེ་དག་འཇིག་རྟེན་རྒྱུ། །དེ་དག་འོད་ཟེར་དྲ་བ་སྣ་ཚོགས་མདོག་བཀྱེ་ཞིང༌། །འགྲོ་བའི་མུན་པ་བསལ་ཏེ་ཀུན་ཏུ་སྣང་བྱས་ནས། །འོད་ཟེར་སྒོ་ཡི་པདྨོ་དག་ལ་ རྒྱལ་སྲས་རྣམས། །ཀུན་ཏུ་བསྟན་དེ་རྡུལ་དང་བྲལ་བའི་ཆོས་ཀྱང་སྟོན། །སྤུ་གཅིག་རྩེ་ལ་ཞིང་རྣམས་རྒྱལ་བས་བརྒྱན་པ་དང༌། །དེ་བཞིན་རྒྱལ་བའི་སྲས་ཀྱིས་བརྒྱན་པ་མངོན་ པར་མཐོང༌། །འཁོར་རྣམས་བློ་སེམས་གཞན་དང་གཞན་ཅན་དཔེ་མེད་པ། །འགྲོ་བ་དེ་དག་སེམས་ཤེས་རྨོངས་མེད་སྟོན་པ་བྱེད། །སེམས་འཇུག་གཅིག་གིས་ཕྱོགས་རྣམས་ བཅུ་པོ་ཐམས་ཅད་ཀྱི། །བརྗོད་དུ་མེད་པ་ཁྲག་ཁྲིག་ཞིང་རྣམས་ཀུན་བགྲོད་ཅིང༌། །སོང་སྟེ་སངས་རྒྱས་འགྲོ་བའི་དོན་དུ་མཆོད་བྱས་ནས། །དྲི་བ་ཁྲག་ཁྲིག་དོན་དང་ལྡན་པ་སྣ་ ཚོགས་འདྲི། །བདེ་གཤེགས་རྣམས་ལ་ཕ་ཡི་འདུ་ཤེས་ཉེར་བཞག་ཅིང༌། །ཆོས་ཀྱི་གཏེར་མཁས་རྟག་ཏུ་ཤེས་རབ་རྣོན་པོ་ཅན། །ཡེ་ཤེས་འབྱུང་གནས་མཁས་པས་སངས་ རྒྱས་ཆགས་མེད་ཕྱིར། །འགྲོ་བའི་དོན་འདོད་བྱང་ཆུབ་མཆོག་གི་སྤྱོད་པ་སྒྲུབ། །གང་རྣམས་ཆོས་དབྱིངས་རྣམ་པར་ཕྱེ་ཞིང་བསམ་བྱས་ཀྱང༌། །བསྐལ་པ་མང་པོ་འདས་བྱས་ཟད་ པར་མ་གྱུར་ཏེ། །ཆོས་ཉིད་གནས་མེད་གང་ལའང་ཆུད་པར་མ་གྱུར་ཀྱང༌། །ཆགས་མེད་ཡེ་ཤེས་ཅན་རྣམས་སྐྱོ་སེམས་མེད་པར་སྤྱོད། །དུས་གསུམ་རྒྱལ་བའི་རིགས་སུ་རིགས་དང་ ལྡན་གྱུར་ཅིང༌། །བདེ་གཤེགས་ཀུན་གྱི་སྐུ་ལས་ཡང་དག་བྱུང་གྱུར་པས། །ཆོས་ཀྱི་ལུས་ཅན་དེ་དག་འགྲོ་ལ་གཟུགས་ལུས་སྟོན། །སྒྱུ་མཁན་མཁས་པ་ཡིད་འོང་སྒྱུ་མ་སྟོན་པ་ ༄༅། །བཞིན༑ ༑མཁས་པ་དེ་དག་ལ་ལར་སྤྱོད་པ་མཆོག་རྙེད་སྣང༌། །ལ་ལར་མཁས་པ་སྐྱེ་ཞིང་མྱ་ངན་འདས་པར་སྣང༌། །བྱང་ཆུབ་དམ་པའི་མཆོག་ ཀྱང་རྣམ་པར་འཚང་རྒྱ་སྣང༌། །མྱ་ངན་འདའ་བ་སྟོན་པའང་དེ་བཞིན་ལ་ལར་སྣང༌། །རང་རྒྱལ་རྣམས་དང་ཉན་ཐོས་རྒྱལ་བའི་ས་མིན་པའི། །ཆོས་ཉིད་དེ་ལ་ཇི་ལྟར་རབ་ཏུ་ གནས་པ་ལྟོས། །ལུས་དང་སྒྲ་མེད་བསམ་མེད་འདུ་ཤེས་ལྡན་པ་མིན། །འོན་ཀྱང་བྱ་བ་སྣ་ཚོགས་དུ་མ་ཉེ་བར་སྟོན། །འགྲོ་བར་ཆོས་རྣམས་རྣམ་པར་འབྱེད་ཅིང་སྐྱེར་འགྱུར་ ཏེ༑ ༑འཇིག་རྟེན་གཙོ་བོ་མི་བཞུགས་ཕྱི་ན་རྒྱལ་སྲས་རྣམས། །ཆགས་མེད་མཐར་ཕྱིན་པ་ཡི་ཡེ་ཤེས་མི་གནས་ཏེ། །སངས་རྒྱས་བྱིན་བརླབས་རྣམ་པར་འཕྲུལ་པ་དག་ཀྱང་ སྟོན༑ ༑འཇིག་རྟེན་འདི་ན་དེ་དག་འདྲ་བ་གང་ཡང་མེད། །དེ་དག་པས་ཀྱང་འཕགས་པ་ལྟ་ཀོ་ཅི་ཞིག་སྨོས། །ཐམས་ཅད་མཁྱེན་པའི་ཡེ་ཤེས་ཡངས་པ་མ་ཐོབ་པར། །ཐམས་ ཅད་མཁྱེན་པའི་ཐབས་སུ་རྣམ་འཕྲུལ་མཆོག་ཀྱང་ཐོབ། །གང་རྣམས་ཆོས་རབ་འཕགས་པར་རྟག་ཏུ་འཇུག་བྱེད་པ། །དེ་དག་ཆོས་རབ་དམ་པ་མཆོག་གི་ཐེག་པ་ཡིན། །འཇིག་ རྟེན་དུས་དང་དུས་མིན་ཚོད་ཀྱང་ཤེས་བྱས་ཤིང༌། །དེ་དག་འགྲོ་ལ་ཕན་ཕྱིར་རྣམ་པར་འཕྲུལ་པ་སྟོན། །དཔའ་བོ་གང་རྣམས་ཞིང་ཀུན་བདག་གི་ལུས་འགེངས་ཤིང༌། །གང་ རྣམས་འཇིག་རྟེན་འོད་ཟེར་དྲ་བ་མཆོག་གཏོང་བ། །མུན་པ་བསལ་ཅིང་སྣང་བས་འཇིག་རྟེན་རྒྱས་པར་བྱེད། །ཀླུ་ཡི་དབང་པོ་བཞིན་དུ་ཆོས་ཀྱི་ཆར་པ་འབེབས། །རྨི་ལམ་ལྟ་བུ་ལོག་ པའི་སྒྱུ་མ་འདྲ་བ་ཡི། །འདུ་བྱེད་རབ་ཏུ་ཤེས་ནས་ལས་རྣམས་སྦྱོར་འཇུག་ཅིང༌། །འགྲོ་བ་ཐམས་ཅད་སྙིང་རྗེ་ཆེན་པོས་ཁྱབ་བྱས་ནས། །རང་བཞིན་དག་པས་ཐར་ལམ་བྱ་བ་མེད་པ་ སྟོན༑ ༑གང་རྣམས་རྒྱལ་བའི་སྟོབས་རྣམས་ཇི་བཞིན་ཚད་མེད་དང༌། །གང་རྣམས་མཁའ་ལྟར་འགྲོ་བ་ཀུན་ཏུ་མཐའ་ཡས་ཤིང༌། །གང་རྣམས་སེམས་ཅན་ཁམས་ཀུན་ཡོངས་སུ་ དགྲོལ་བརྩོན་པ། །དེ་དག་བསྐལ་པ་བྱེ་བ་གྲངས་མེད་སྤྱད་པ་སྤྱོད། །ལས་མཆོག་བླ་ན་མེད་པ་ཤིན་ཏུ་སྦྱངས་པ་ཡིས། །ཡོན་ཏན་དམ་པ་སྣ་ཚོགས་རྣམས་ཀྱང་ཀུན་སེམས་ཤིང༌། །བྱང་ ཆུབ་སེམས་དཔའ་དེ་དག་སྤྱོད་པ་མཆོག་མི་མཐོང༌། །ཐམས་ཅད་མཁྱེན་པའི་ཡེ་ཤེས་འབྱུང་བ་རྣམ་པར་ལྟ། །སེམས་འབྱུང་གཅིག་གིས་འཇིག་རྟེན་བསམ་གྱིས་མི་ཁྱབ་པ། །འབྱམས་ ཀླས་ཀུན་ཏུ་རྒྱུ་ཞིང་འགྲོ་བ་རབ་ཏུ་སྣང༌། །རྟོག་དང་རྣམ་རྟོག་མི་བྱེད་དག་པའི་སེམས་དང་ལྡན། །དེ་དག་གཅིག་མིན་ལུས་ལ་ལུས་གཅིག་སྟོན་པ་བྱེད། །དེ་དག་འཇིག་རྟེན་ཀུན་ལ་ རྟོག་པར་མི་བྱེད་དེ། །མགོན་པོ་ཀུན་གྱི་ཆོས་ཉིད་ཡོངས་སུ་མི་རྟོག་གོ །དེ་དག་ཆོས་ཀུན་རྣམ་འབྱེད་འདོད་ཆགས་བྲལ་གྱུར་ཀྱང༌། །འགྲོ་བ་ཐར་པར་བྱ་བ་ཡོངས་སུ་མི་གཏོང་ངོ༌། ། ༄༅། །འཇིག་རྟེན་ཀུན་གྱི་འདུ་ཤེས་རྣམ་པ་གང་ཡོད་པ། བཟང་ངན་འབྲིང་དང་དེ་བཞིན་ཆུང་དང་སྣ་ཚོགས་ཀྱིས། །འདུ་ཤེས་ཐིབས་པོ་དག་དང་རབ་བརྒལ་ རྣམ་ཕྱེ་སྟེ། །དེ་དག་བྱིན་བརླབས་རྣམ་པར་འཕྲུལ་པ་ཤིན་ཏུ་སྟོན། །ཇི་ལྟར་སྒྱུ་མ་རྣམ་པ་སྣ་ཚོགས་ཚད་མེད་པ། །དེ་འདྲའི་རྣམ་པར་འཕྲུལ་བས་ཆོས་དབྱིངས་འདི་དག་འགེངས། ནམ་མཁའི་དབྱིངས་ཀྱི་མཐས་ཀླས་ལུས་ཀྱི་བྱེ་བྲག་གིས། །འགྲོ་བ་རྣམས་ཀྱི་མོས་པ་ཇི་བཞིན་སྟོན་པར་བྱེད། །དེ་དག་གང་ལའང་མ་ཆགས་རྟོག་དང་རྣམ་རྟོག་མེད། །དོགས་པ་མེད་ ཅིང་ཉོན་མོངས་དེ་བཞིན་རློམ་སེམས་མེད། །དེ་དག་སངས་རྒྱས་ཆགས་པའི་བློ་མེད་ཐར་ལ་མིན། །འགྲོ་བ་ཀུན་ལའང་བདེ་བའི་འདུ་ཤེས་རབ་ཏུ་སྐྱེད། །འཇིག་རྟེན་ཀུན་ན་ ཤེས་ལ་མཁས་རབ་མི་འཇིགས་པ། །འཇིག་རྟེན་འདུ་ཤེས་གནས་ལ་འཇུག་པར་མི་བྱེད་དེ། །དེ་དག་ཆོས་ཀུན་འདི་ལ་འདུ་ཤེས་གང་ཞེས་རྟོག །དེ་ལྟར་གཞིགས་ན་དུས་ གསུམ་གང་ཡང་དམིགས་པ་མེད། །སྔོན་གྱི་མཐར་ཐུག་འདས་པའི་དུས་ལ་རབ་ཞུགས་ཏེ། །ཕྱི་མའི་མཐར་ཐུག་མ་འོངས་པ་ལ་རབ་ཞུགས་ནས། །ཞིང་རྣམས་ཀུན་ན་ཅི་ ཡོད་ཀུན་ཀྱང་དེ་བཞིན་དུ། །ཤིན་ཏུ་ཤེས་ཀྱང་རྟག་པར་གང་ཡང་མི་དམིགས་སོ། །མྱ་ངན་འདས་པའི་དབྱིངས་ལའང་བརྩོན་པར་དེ་བཞིན་གནས། །ཉོན་མོངས་མེད་པའི་ ཚུལ་གྱི་རྗེས་སོང་མི་གནས་ཏེ། །དེ་དག་ཡང་དག་མཐའ་འདྲ་དེ་ལ་འདྲ་བ་མེད། །བྱང་ཆུབ་སྤྱོད་པ་ལས་ཀྱང་དཔའ་བོ་མི་ལྡོག་གོ །གང་རྣམས་བྱང་ཆུབ་བརྟན་པ་རི་རབ་བཞིན་ གནས་ཤིང༌། །སངས་རྒྱས་རྒྱལ་སྲས་མཁས་པས་ཆོས་དབྱིངས་ཐམས་ཅད་དང༌། །འགྲོ་བ་ཀུན་ཏུ་ཤིན་ཏུ་གང་བྱས་པ། །འདི་ནི་དཔའ་བོ་རྣམས་ཀྱི་སྤྱོད་པའི་མཆོག་ཡིན་ནོ། ། བློ་མཆོག་དམ་པ་གང་ཞིག་ཐམས་ཅད་མཁྱེན་པ་ཡི། །རྣམ་གྲོལ་མཛེས་པའི་ཚུལ་མཆོག་ཡངས་པ་འདོད་པ་ནི། །དེས་ནི་གང་ལས་ཟག་ཟད་སྲིད་གསུམ་བདེ་འབྱུང་བའི། །བྱང་ ཆུབ་སེམས་ལ་རིམ་པ་མེད་པར་འཇུག་པར་གྱིས། །གང་གི་བསམ་པ་རྡུལ་བྲལ་བྱང་ཆུབ་སེམས་གནས་པ། །དེ་དག་ཡོན་ཏན་ལེགས་པ་ཟད་པར་བརྗོད་པི་ནུས། །ཡོན་ཀྱང་འགྲོ་ བའི་དོན་དུ་བདེ་གཤེགས་ལེགས་བརྗོད་ཕྱིར། །ཡོན་ཏན་ལྡན་པ་དེ་ཡི་སྤྱོད་པ་མཆོག་ཀྱང་ཉོན། །གང་གིས་ཞིང་རྣམས་བྱེ་བ་ཁྲག་ཁྲིག་རྡུལ་བྱས་ཏེ། །ཕྱོགས་རྣམས་རེ་རེ་ ཀུན་ཏུ་བཀང་སྟེ་བགྲང་བྱས་ཤིང༌། །དེ་ཡི་རྗེས་སུ་དཔག་པས་རྣམ་འདྲེན་ཟད་བྱེད་ན། །འདུ་ཤེས་རྣམས་ནི་མཐར་ཐུག་ཟད་པར་མི་འགྱུར་རོ། །གང་ཞིག་སེམས་ཅན་གྲངས་ མཁས་སེམས་ཅན་འདུ་ཤེས་མེད། །སྤྱོད་པ་ཙམ་དུ་གཞོལ་ཞིང་སྒྲ་ལ་མ་ཆགས་པར། །གང་ཞིག་འཇིག་རྟེན་ཁམས་འབྱེང་ཆགས་པ་མེད་པའི་སེམས། །དེ་དག་ལྡན་དང་གྲངས་ ༄༅། །མཁས་གྲངས་དམིགས་མེད་པ་ཡིན། །ཡིད་ཀྱིས་ནམ་མཁའི་དབྱིངས་ནི་མཐའ་ཡས་རྒྱ་ཆེ་དང༌། །དུས་རྣམས་འཇིག་རྟེན་ཀུན་ཏུ་རྟོགས་པའི་མཁས་པ་ གང༌། །སྦར་མོས་ཐལ་གཏོར་བཞིན་དུ་ཐེ་ཚོམ་རྣམས་གཏོར་བ། །དེ་དག་སངས་རྒྱས་ཆོས་རྟོགས་ཡིད་ཅན་ཆགས་པ་མེད། །གང་དག་ཕྱོགས་རྣམས་མཐའ་ཡས་ཞིང་ལ་ རབ་འཇུག་ཅིང༌། །སེམས་བསྐྱེད་གཅིག་གིས་བློ་ཉམས་མེད་པར་འདོད་བྱེད་པ། །དེ་དག་ཐ་དད་གྲངས་ལ་རྟོག་པས་དེར་ཞུགས་ཏེ། །སྐྱེ་བ་མེད་པའི་ཆོས་ལ་ཡང་དག་མཐའ་ ལྟར་མཁས། །གང་ཞིག་སངས་རྒྱས་བྱེ་བ་ཁྲག་ཁྲིག་བསམ་ཡས་པའི། །འཁོར་དུ་ཉེ་བར་ཕྱིན་ཏེ་ཞམ་རིང་འཁོར་གནས་ཤིང༌། །གཙོ་བོ་དག་ལ་འདྲི་བའི་ཐོག་མར་གང་འགྲོ་ བ༑ ༑སྤྱོད་ཡུལ་མཆོག་ཅན་དེ་ཡི་སྨོན་ལམ་མཆོག་འདི་ཡིན། །གང་ཞིག་ཕྱོགས་རྣམས་ཀུན་གྱི་མགོན་པོ་ཀུན་དྲན་ཞིང༌། །ཆོས་ཉིད་དེ་ལ་ནམ་ཡང་གནས་པར་མ་གྱུར་པ། ཁམས་གསུམ་དགེ་བ་གང་ཡོད་ཀུན་གྱི་རྒྱུ་ཡིན་ཏེ། །དེ་དག་ཞིང་རྣམས་ཐམས་ཅད་ཡོངས་སུ་དག་པར་སྦྱོང༌། །གང་རྣམས་སྐྱེ་བའི་རྒྱུད་དུ་སྲིད་གསུམ་སྣ་ཚོགས་རྣམས། །འཇིག་ རྟེན་ཀུན་ན་ཡོད་ལ་མ་ཆགས་མིག་གྱུར་པ། །དེ་དག་བག་ཆགས་མཁས་ཤིང་དེ་བཞིན་དབང་པོ་མཁས། །མོས་པ་བྱེ་བ་ཁྲག་ཁྲིག་བསམ་ཡས་དེ་བཞིན་མཁས། །འགྲོ་བའི་ བསམ་པ་ཇི་བཞིན་གང་གིས་ཤེས་གྱུར་ཅིང༌། །ཤེས་རབ་ཆེན་པོ་དེ་དག་དེ་བཞིན་ཆོས་སྟོན་པ། །དེ་དག་ཀུན་ནས་ཉོན་མོངས་རྣམ་དག་ཚུལ་ལ་མཁས། །སེམས་ཅན་མང་པོ་ རྣམ་པར་སྦྱོང་བའི་ལམ་ལྡན་སྟོན། །གང་ཞིག་ཏིང་འཛིན་བྱེ་བ་ཁྲག་ཁྲིག་བརྗོད་ཡས་རྣམས། །སེམས་ཀྱི་རྒྱུ་བ་གཅིག་གི་རྗེས་སུ་ཞུགས་གྱུར་པ། །དེ་དག་མཚན་མ་སྣ་ཚོགས་ གནས་པར་རབ་ཏུ་ཤེས། །ལྡང་བའི་རྒྱུ་ལ་མཁས་ཤིང་བློ་གྲོས་སྤྱོད་ཡུལ་ཤེས། །ཆགས་མེད་བྱང་ཆུབ་དེ་ལ་མངོན་དུ་གང་ཞུགས་ཤིང༌། །འགྲོ་ལ་ཕན་པའི་དོན་དུ་བློ་ཡངས་སུ་ ཞུགས་པ། །ཡེ་ཤེས་འབྱམས་ཀླས་འདི་དང་དེ་དག་ལྡན་པ་ཡིན། །དེ་ཕྱིར་དེ་དག་སྐྱེས་བུ་མཆོག་གི་གསུང་ཡང་སྒྲོག །གང་ཞིག་བསྐལ་པ་རིང་དང་བསྐལ་པ་ཐུང་མཁས་ཤིང༌། ། ཉིན་ཞག་མཁས་ཤིང་དེ་བཞིན་ཟླ་བ་ཟླ་ཕྱེད་མཁས། །གང་ཡང་འཇིག་རྟེན་རྟག་ཏུ་སྐྱེ་བ་མཁས་གྱུར་པ། །ཞིང་གི་རྣམ་པ་མཁས་ཤིང་རྣམ་ཕྱེའི་ཆོས་མེད་པའོ། །གང་རྣམས་ ཕྱོགས་ལ་ཞུགས་ཏེ་ཕྱོགས་ཀྱི་རྗེས་འབྲང་ཞིང༌། །ཕྱོགས་ཀུན་ཚད་ནི་རྗེས་སུ་ཤེས་པར་མ་གྱུར་པ། །དེ་དག་དབུས་མས་ཕྱོགས་ཀྱི་རྗེས་སུ་འགྲོ་བྱེད་ཅིང༌། །ཞིང་རྣམས་སྦྱོང་ཡང་ ཡོངས་སུ་དག་རྟོགས་ཆགས་པ་མེད། །སྟོབས་ལ་འཇུག་པས་རྒྱལ་བ་རྣམས་ཀྱི་སྟོབས་ཤེས་པ། །འགྲོ་བ་རྣམས་ཀྱི་གནས་དང་གནས་མིན་བསམ་བྱས་ནས། །འདས་དང་མ་འོངས་ ༄༅། །ད་ལྟར་བྱུང་བའི་ལས་ཀྱི་ས། །ཡང་དག་རྟོགས་བྱས་ལས་ཀྱི་རྣམ་པར་སྨིན་ལ་གནས། །འཇིག་རྟེན་ཀུན་མཁས་སྣ་ཚོགས་ཐ་དད་ཇི་བཞིན་དུ། །སྲིད་གསུམ་རྣམ་ པར་རྒྱུ་བའི་ཚུལ་ཡང་ཇི་བཞིན་དང༌། །དབང་པོ་རྣོན་པོ་འབྲིང་དང་དབང་པོ་ཐ་མར་ཡང༌། །འགྲོ་བ་མ་ལུས་ཀུན་གྱི་དབང་པོ་རྣམ་པར་འབྱེད། །མོས་པ་རྣམ་པ་སྣ་ཚོགས་དགེ་དང་མི་དགེ་དང༌། ། བཟང་ངན་དེ་བཞིན་འབྲིང་ལ་རྣམ་པར་སེམས་བྱེད་ཅིང༌། །འགྲོ་བ་ཀུན་ན་འགྲོ་བ་བརྟན་པ་རྣམ་པར་འབྱེད། །སྲིད་གསུམ་རྒྱུ་ཡི་རྒྱུད་ཀྱང་དེ་དག་རབ་ཏུ་ཤེས། །བསམ་གཏན་རྣམ་ ཐར་ཉོན་མོངས་ཇི་བཞིན་མཚན་མ་མཐོང༌། །ཉོན་མོངས་མཚམས་སྦྱོར་རྣམ་བྱང་ཅི་འགྱུར་དང༌། །སྔོན་ཆད་གནས་ཀྱི་བདེ་དང་སྡུག་བསྔལ་རྒྱུད་རྣམས་ཀྱང༌། །བརྟན་པ་རྣམས་ནི་ སངས་རྒྱས་སྟོབས་རྣམས་སྦྱོང་བར་བྱེད། །ཇི་ལྟར་འགྲོ་བའི་ལམ་རྒྱུད་ཉོན་མོངས་ལས་འཇུག་དང༌། །འགྲོ་རྒྱུད་ཐམས་ཅད་འཇིག་ཅིང་ཞིག་འགྱུར་ཐམས་ཅད་དང༌། །ཟག་པ་སྣ་ ཚོགས་རྣམས་ཀྱང་ཇི་ལྟར་སྐྱེ་འགྱུར་བ། །བག་ཆགས་མཚམས་སྦྱར་ཇི་བཞིན་དེ་བཞིན་རབ་ཏུ་འཇུག །ཇི་ལྟར་འཇིག་རྟེན་ཉོན་མོངས་ཟད་ཅིང་དག་གྱུར་པ། །དེ་ལ་སྐྱེས་བུ་ཁྱུ་ མཆོག་སྤྱོད་པའི་བློ་དང་ལྡན། །སྟོབས་འཆང་དག་ནི་སྟོབས་བཅུ་རྣམས་ཀྱི་འོད་སྣང་སྟེ། །རྒྱལ་བའི་སྟོབས་ཀྱང་ཐོབ་མིན་ཐེ་ཚོམ་ཡོད་པ་མིན། །སྤུ་རྩེ་གཅིག་ལ་གང་རྣམས་ རྣམ་པར་སེམས་བྱེད་ཅིང༌། །ལ་ལ་ཉོན་མོངས་ལ་ལ་དག་དང་ཡངས་པ་ཡི། །སྣ་ཚོགས་ཞིང་རྣམས་ཚད་ལས་འདས་པ་ཀུ་ན་མཐོང་ནས། །ལས་དང་བྱ་བ་སྣ་ཚོགས་རྒྱུད་དུ་རབ་ཏུ་ ཤེས༑ ༑གང་རྣམས་རྡུལ་གཅིག་རྩེ་ལ་རྣམ་སེམས་བརྗོད་མེད་པའི། །ཞིང་དང་བདེ་གཤེགས་སྲས་རྣམས་སེམས་ཅན་གཙོ་མཐོང་ཡང༌། །ཞིང་རྣམས་འཁྲུགས་ཤིང་འདྲེས་པའི་ ཉེས་པ་གང་ཡང་མེད། །གཅིག་ལ་འཇུག་པས་རྣལ་འབྱོར་ལྡན་པ་ཀུན་ལ་འཇུག །སྤུ་གཅིག་རྩེ་ལ་ཕྱོགས་བཅུ་ཐམས་ཅད་རྣམ་ཕྱེ་སྟེ། །ནམ་མཁའི་དབྱིངས་ཐུགས་འཇིག་ རྟེན་ཁམས་རྣམས་ཀུན་ཞུགས་ཤིང༌། །ཕྱོགས་འགའ་ཙམ་ཡང་རྒྱལ་བས་སྟོང་པར་མཐོང་བ་མེད། །དེ་བཞིན་ཞིང་དང་འཇིག་རྟེན་འབྱམས་ཀླས་དེ་དག་སྦྱོང༌། །བམ་པོ་ཉི་ ཤུ་བཞི་པ། དེ་ལྟར་བརྟན་པས་རྒྱལ་བས་སྟོང་མིན་ཞིང་ཤེས་ནས། །འཇིག་རྟེན་ཀུན་ཀྱང་སྤུ་རྩེ་གཅིག་ལ་ཡོད་པར་འཇུག །དུས་གསུམ་རྒྱུད་རྣམས་མཚན་ཉིད་ཐ་དད་ཁམས་ཀུན་ དང༌། །ཉིན་ཞག་དུས་དང་ཟླ་ཕྱེད་རྒྱུད་ཀྱི་རྣམ་ཐར་འཇུག །དེ་ལྟར་རྒྱལ་སྲས་འཇིགས་མེད་བྱང་ཆུབ་སེམས་དཔའ་རྣམས། །སྐྱེས་བུ་ཁྱུ་མཆོག་ཡེ་ཤེས་རྒྱལ་སྲིད་ཐོབ་ཞུགས་པ། ། དེ་དག་འདི་འདྲ་ཤེས་ནས་རྗེས་སུ་སེམས་བྱེད་ཅིང༌། །བདེ་གཤེགས་རྣམས་ལ་དགའ་བ་མཐའ་ཡས་ཡངས་པ་འཐོབ། །གང་རྣམས་བྱེ་བ་ཁྲག་ཁྲིག་སྣ་ཚོགས་ལུས་བསྒྱུར་ཅིང༌། ། ༄༅། །ཕྱོགས་བཅུའི་རྒྱལ་བ་ཐམས་ཅད་མངོན་པར་མཆོད་པའི་ཕྱིར། །རྣམ་འཕྲུལ་དམ་པ་བཟང་པོ་ཀུན་ཏུ་སྟོན་བྱེད་པ། །དེ་དག་མགོན་པོ་རྣམས་ཀྱི་སྤྱོད་ཡུལ་ རབ་ལ་ཞུགས། །གང་རྣམས་སངས་རྒྱས་བྱེ་བ་ཁྲག་ཁྲིག་དྲུང་བསླབ་ཅིང༌། །གང་རྣམས་ཆོས་ཀྱི་མཛོད་རྟོགས་ཡིད་ལ་ངོམས་མེད་དེ། །གང་དག་མགོན་པོ་ཁྱུ་མཆོག་རྣམས་ ལ་དགའ་སེམས་པ། །དེ་དག་ཆོས་ཀྱི་སྤྲིན་ཡིན་སྤྱོད་པ་མང་ལ་སྤྱོད། །ཡེ་ཤེས་འཕེལ་བར་འགྱུར་བའི་ཆོས་ཀྱི་གནས་མཁས་པ། །དེ་དག་སངས་རྒྱས་འབྱུང་གནས་ཏིང་ འཛིན་ཐོབ་པ་ཡིན། །རི་རྒྱལ་ལྟ་བུ་དེ་དག་དད་པའི་འབྱུང་གནས་རྟེན། །ཡེ་ཤེས་འབྱུང་གནས་འགྲོ་བའི་ཡོན་ཏན་འབྱུང་གནས་སོ། །གནས་པ་མེད་པ་དམ་པ་ཤིན་ཏུ་ ཡངས་པ་དང༌། །ཐམས་ཅད་མཁྱེན་ལ་མངོན་གྱུར་མྱ་ངན་མེད་པ་དང༌། །སེམས་ཅན་སྐྱོབ་ཅིང་ཉོན་མོངས་རྙོག་པ་མེད་ཞུགས་པའི། །བྱམས་པའི་བསམ་པས་འགྲོ་བ་ ཀུན་ཀྱང་འགེངས། །དེ་དག་སྙིང་རྗེའི་བློ་ཡང་ཤིན་ཏུ་ཡངས་པ་ཡིན། །བདག་ལ་ཅིར་སེམས་དེ་བཞིན་སངས་རྒྱས་སེམས་ཅན་ལ། །གཞན་དུ་ནམ་མཁའ་ལྟ་བུར་མཚན་ ཉིད་མེད་པར་འཇུག །ཉམས་པར་གྱུར་པའི་སེམས་ཅན་རྣམས་མཐོང་ཕྱིར་ཞིང་རྩོམ། །བྱང་ཆུབ་སེམས་ལ་མཁས་པ་དག་གི་ཚད་དག་ནི། །བསྐལ་པ་བྱེ་བའི་མཐས་ཀྱང་ བརྗོད་པར་མི་ནུས་ཏེ། །ཅི་ཕྱིར་ཞེ་ན་དེ་ལས་སངས་རྒྱས་ཐམས་ཅད་བྱུང༌། །དབང་བདེས་རིམ་གྲོར་བྱས་དང་རང་རྒྱལ་ཀུན་ཀྱང་བྱུང༌། །ཕྱོགས་བཅུར་ཞིང་རྣམས་གྲངས་མེད་བཅུར་ ནི་བགྲངས་གྱུར་པའི། །སེམས་ཅན་ཐམས་ཅད་བསྐལ་པ་གཅིག་ཏུ་བདེར་བཀོད་ཅིང༌། །བསླབ་པ་བཅུ་དང་དགེ་བཅུ་བསམ་གཏན་ཐོབ་པ་དང༌། །ཚངས་པ་དག་དང་རྣམ་གྲོལ་ཞི་ བའི་གནས་བཀོད་ཅིང༌། །དེ་དག་བསྐལ་པ་བྱེ་བར་བདེ་བར་རབ་བཀོད་དེ། །དགྲ་བཅོམ་ཉོན་མོངས་ཞི་ལ་རབ་ཏུ་བཀོད་བྱས་ཀྱང༌། །བྱང་ཆུབ་སེམས་དཔའ་དགེ་བའི་ཚོགས་ཀྱི་ ཆར་མི་རུང༌། །བྱང་ཆུབ་སེམས་དཔའ་ཞུགས་མ་ཐག་ཏུ་ཚོགས་ཆེན་གསོག །ཉོན་མོངས་མེད་ཅིང་ཤིན་ཏུ་ཕྲ་ལམ་རྟོགས་པ་ཡིན། །རང་རྒྱལ་སེམས་ཅན་བྱེ་བ་ཁྲག་ཁྲིག་ བཀོད་གྱུར་ཀྱང༌། །བསོད་ནམས་བསགས་པ་དེས་ནི་བྱང་ཆུབ་སེམས་རབ་ལ། །གྲངས་དང་ཆ་དང་བགྲངས་པའི་རྣམ་པར་ཉེར་མི་འགྲོ་།ཞིང་གི་རྡུལ་ནི་ཚད་ཀྱིས་ཤེས་པར་རུང་ ཡང་སྲིད། །སྐད་ཅིག་སེམས་ཀྱིས་ཞིང་མང་ཡོངས་སུ་འདས་བྱས་ཤིང༌། །དེ་ལྟར་བསྐལ་པ་བརྗོད་ཡས་ཟད་པར་འགྲོ་བྱས་ན། །ཞིང་མཐའ་ཐུག་པར་རུང་སྲིད་བྱང་ཆུབ་ སེམས་མཆོག་མིན། །མཐའ་རྣམས་ཀུན་ཏུ་བསྐལ་པ་མང་པོའི་མཐའ་མེད་དེ། །སྔོན་གྱི་མཐར་གྱུར་བསྐལ་པ་དེ་བཞིན་མ་འོངས་དང༌། །ད་ལྟར་བྱུང་བའི་བསྐལ་པ་ཟད་དང་ ༄༅། །ཐུག་མེད་པའི། །བསྐལ་པ་དེ་དག་ཟད་སྲིད་བྱང་ཆུབ་སེམས་མ་ཡིན། །ཅི་ཕྱིར་ཞེ་ན་འདི་ལྟར་ཕྱོགས་རྣམས་ཀུན་བཀང་ཞིང༌། །རྟོག་དང་རྣམ་ རྟོག་ཡོངས་སུ་ཤེས་པར་བྱ་བའི་ཕྱིར། །སྐད་ཅིག་གཅིག་གིས་དུས་གསུམ་རྟོགས་པར་བྱ་དོན་དུ། །འགྲོ་བའི་དོན་དུ་འདོད་ཅིང་སེམས་མཆོག་རིན་ཆེན་སྐྱེ། །ཕྱོགས་ བཅུའི་ཞིང་རྣམས་སྟོང་མང་ཀུན་ཏུ་མཐའ་ཡས་པའི། །འགྲོ་བ་རྣམས་ཀྱི་མོས་པ་བསམ་པ་ཅི་འདྲ་དང༌། །སྦྱོར་བ་གང་དང་སེམས་དང་སྤྱོད་པ་དེ་བཞིན་ཏེ། །མཐར་ཐུག་རུང་ སྲིད་མཁའ་འདྲའི་བྱང་ཆུབ་སེམས་མཐའ་མིན། །དེ་ནི་འདི་ལྟར་ཕྱོགས་བཅུ་བྱམས་དང་སྙིང་རྗེ་དང༌། །བསམ་པ་ཆེན་པོས་འགྲོ་བ་ཐམས་ཅད་རྒྱས་བྱས་ཤིང༌། །ཐར་པའི་ དོན་དུ་སངས་རྒྱས་ཡོན་ཏན་ཀུན་སྤྱོད་ཕྱིར། །རིན་ཆེན་སེམས་ཀྱི་སྟོབས་ནི་ཚད་མེད་རབ་ཏུ་སྐྱེས། །མོས་དང་བསམ་པ་ཡིད་བཞིན་ཡང་དག་སྦྱོར་བ་དང༌། །འགྲོ་བའི་དབང་ པོ་སྦྱོར་བ་སེམས་དང་སྤྱོད་པ་རྣམས། །སྐད་ཅིག་གཅིག་གིས་ཇི་བཞིན་རྟོགས་པར་བྱ་བའི་ཕྱིར། །ཐམས་ཅད་མཁྱེན་པའི་ཡེ་ཤེས་ལྟ་བུའི་སེམས་སྐྱེས་སོ། །འགྲོ་བའི་ ལས་དང་ཉོན་མོངས་སྣ་ཚོགས་འབྱམས་ཀླས་པ། །གང་གིས་ཁམས་གསུམ་འདི་དག་ཏུ་ནི་སྐྱེ་འགྱུར་བ། །དེ་དག་མཐའ་ནི་ཕྱོགས་བཅུར་རྙེད་པར་རུང་སྲིད་ཀྱི། །བྱང་ཆུབ་ སེམས་ཀྱི་མཆོག་ལ་ཀུན་ཏུ་མཐའ་མེད་དོ། །ཅི་ཕྱིར་ཞེ་ན་འདི་ལྟར་ཉོན་མོངས་ལས་གྲོལ་བའི། །སེམས་ནི་དེ་བཞིན་གཤེགས་པ་མཆོད་པའི་དོན་དུ་སྐྱེ། །ཉོན་མོངས་གྲོལ་བྱེད་དེ་ བཞིན་ལས་ཀྱི་རྒྱུད་ཀྱང་གཅོད། །དུས་གསུམ་མུན་པ་སེལ་ཅིང་མི་ཟད་སྙིང་རྗེས་བྱུང༌། །ཕྱོགས་བཅུའི་སངས་རྒྱས་མཐའ་ཡས་མ་ལུས་ཐམས་ཅད་དང༌། །སེམས་ཅན་མང་པོ་ཐམས་ ཅད་སེམས་གཅིག་བསྐྱེད་པ་ཡིས། །སྤོས་དང་མེ་ཏོག་ཕྲེང་བ་བྱུག་པ་དམ་པ་དང༌། །གདུགས་དང་རྒྱལ་མཚན་བཟའ་བཏུང་ན་བཟས་མཆོད་པར་བྱེད། །གཞན་ཡང་གདན་གྱི་རྣམ་ པ་འཆག་ས་དམ་པ་དང༌། །ཕོ་བྲང་མང་པོ་སྣ་ཚོགས་ཙནྡན་མཆོག་བསངས་པ། །ནོར་བུ་རིན་ཆེན་རྣམ་པར་སྣང་བས་བརྒྱན་པ་དང༌། །ཡིད་བཞིན་ནོར་བུ་ཡིད་འོང་བརྒྱན་པས་ མཆོད་བྱས་ཏེ། །དེ་ལྟར་བདེ་གཤེགས་སེམས་ཅན་མངོན་པར་མཆོད་བྱེད་པས། །བསྐལ་པ་ཁྲག་ཁྲིག་བརྗོད་དུ་མེད་པ་ཟད་བྱས་ཀྱང༌། །བྱང་ཆུབ་སེམས་དཔའི་བདེ་བསགས་ མཐར་ཕྱིན་བདེ་བ་ཉིད། །གང་བསྒྲུབས་བྱང་ཆུབ་སེམས་ལ་མཉམ་པར་ཉེར་མི་འགྲོ་།ཇི་སྙེད་དཔེར་བརྗོད་བྱས་པ་འདི་དག་ཐམས་ཅད་ཀྱང༌། །ཡང་དག་སྐྱེས་པའི་བྱང་ཆུབ་སེམས་ ཀྱི་ཆར་མི་རུང༌། །དེ་ཡང་འདི་ལྟར་དུས་གསུམ་བཞུགས་པའི་སྐྱེས་བུ་མཆོག །ཐམས་ཅད་བྱང་ཆུབ་སེམས་མཆོག་དེ་ལས་བྱུང་བ་ཡིན། །བྱང་ཆུབ་སེམས་ནི་ཆགས་པ་མེད་པའི་ ༄༅། །མཐར་ཕྱིན་ཏེ། །ཐམས་ཅད་ཚད་ལ་གནས་ཀྱང་དེ་ལ་ཚད་ཡོད་མིན། །ཐམས་ཅད་མཁྱེན་པའི་ཡེ་ཤེས་གཞོལ་ཞིང་ཚད་མེད་སྟོབས། །སེམས་ཅན་ རང་བཞིན་དེ་བཞིན་བྱང་ཆུབ་མཐར་ཡང་ཕྱིན། །བྱང་ཆུབ་སེམས་འདི་ནམ་མཁའི་མཐའ་དང་མཉམ་པ་སྟེ། །ཆོས་རྣམས་ཀུན་ལ་ཁྱབ་པ་ཆོས་དབྱིངས་ཇི་བཞིན་ནོ། །ཚད་མེད་ དེ་བཞིན་ཉིད་ཀུན་དེ་ཡི་སྤྱོད་ཡུལ་གྱུར། །དེས་ནི་ཀུན་ཏུ་ཁྱབ་པའི་སེམས་ཅན་གཙོ་བོ་བཞིན། །དེ་ནི་འབྱམས་ཀླས་ཆོས་རྣམས་ཀུན་ལ་རྗེས་སུ་ཞུགས། །དེས་ནི་ཞིང་རྣམས་མ་ ལུས་འབྱམས་ཀླས་ཀུན་ཏུ་ཁྱབ། །དེས་ནི་ཤེས་པ་འབྱམས་ཀླས་ཐམས་ཅད་རྟོགས་པར་ཆུད། །དེས་ནི་སངས་རྒྱས་འབྱམས་ཀླས་ཀུན་དང་འགལ་མེད་ཐོབ། །རྟག་ཏུ་བསོད་ ནམས་བླ་ན་མེད་པ་དག་དང་ལྡན། །དེ་བཞིན་རྟག་ཏུ་ཚུལ་ཁྲིམས་རྣམ་དག་མི་གནས་ལྡན། །རྟག་ཏུ་ཀུན་གཏོང་རྟག་པར་རབ་ཏུ་དགེ་བ་སྟེ། །ལྡོག་པ་མེད་པའི་བརྩོན་འགྲུས་ མཆོག་དང་རབ་ཏུ་ལྡན། །བསམ་གཏན་མཛོད་ལ་རྟག་པར་བསམ་གཏན་འཇུག་པ་བྱེད། །ཤེས་རབ་ཤིན་ཏུ་ལངས་པ་དང་ཡང་རྟག་ཏུ་ལྡན། །རྒྱལ་སྲས་རྣམས་ཀྱི་ས་རབ་ དམ་པ་གང་ཡོད་པ། །དེ་དག་དོན་དུ་ཡེ་ཤེས་ཀུན་ཏུ་བཟང་པོ་བྱུང༌། །འགྲོ་བ་ཀུན་ན་སྐྱེས་བུ་སེངྒེ་གང་བཞུགས་པ། །དེ་དག་གིས་ནི་བྱང་ཆུབ་སེམས་རབ་བྱིན་གྱིས་བརླབས།། ཏིང་ངེ་འཛིན་དང་གཟུངས་ཀྱི་དམ་པས་རབ་ཏུ་བརྒྱན། །དེ་བཞིན་གཤེགས་པའི་རྣམ་འཕྲུལ་རྫུ་འཕྲུལ་རྣམ་པས་བརྒྱན། །འཇིག་རྟེན་ཡུན་དང་འགྲོ་བ་རྣམས་ཀྱི་ཇི་ཙམ་ཚད། །ནམ་ མཁའི་ཚད་ཀྱང་ཕྱོགས་བཅུ་དག་ཏུ་ཇི་ཙམ་པ། །དེ་དག་པས་ཀྱང་བྱང་ཆུབ་སེམས་འདི་ཚད་མེད་དེ། །དེ་ལས་སྐྱེས་བུའི་སེངྒེ་ཀུན་ཀྱང་སྐྱེས་ཤིང་བྱུང༌། །བྱང་ཆུབ་སེམས་འདི་ སྟོབས་བཅུ་རྣམས་ཀྱི་རྩ་བ་སྟེ། །བརྟན་པ་བཞི་ཡི་གནས་ཡིན་སོ་སོར་ཤེས་པའི་རྩ། །རྒྱལ་བའི་ཆོས་རྣམས་བཅོ་བརྒྱད་ཡང་དག་འབྱིན་པ་སྟེ། །སྐྱེས་བུ་གཙོ་བོས་མཁྱེན་ པར་བྱ་བའི་ཆོས་ཀུན་འབྱིན། །གཟུགས་ཀྱི་སྐུ་ནི་མཚན་རབ་རྣམས་ཀྱིས་བསགས་པ་དང༌། །ཆོས་སྐུ་མཉམ་ཉིད་རྟོག་པ་མི་མངའ་བརྙེས་པ་དང༌། །འགྲོ་བས་མཆོད་པའི་ ཡེ་ཤེས་ཆགས་མེད་གང་བྱུང་བ། །ཀུན་གྱི་རྩ་བ་འབྱུང་གནས་བྱང་ཆུབ་སེམས་འདི་ཡིན། །རང་རྒྱལ་ཐེག་པ་འབྱུང་ཞིང་ཉན་ཐོས་ཐེག་པའང་འབྱུང༌། །བསམ་གཏན་ཏིང་ འཛིན་བདེ་བ་གཟུགས་ཀྱི་ཁམས་རྣམས་དང༌། །གཟུགས་མེད་ཁམས་རྣམས་ཏིང་ངེ་འཛིན་གྱི་བདེ་བ་དག །ཀུན་གྱི་རྩ་བ་འབྱུང་གནས་བྱང་ཆུབ་སེམས་མཆོག་འདི་ཡིན་ནོ། ། མི་དང་དེ་བཞིན་ལྷ་ཡི་དབང་པོའི་བདེ་བ་དང༌། །ལམ་རྒྱུད་སྣ་ཚོགས་ཀུན་ཀྱང་འདི་ལ་ཤིན་ཏུ་སྦྱངས། །བརྩོན་འགྲུས་སྟོབས་དང་དབང་པོའི་བདེ་བ་གང་ཡོད་པ། །ཀུན་གྱི་རྩ་བ་དང་ ༄༅། །པོ་བྱང་ཆུབ་སེམས་འདི་ཡིན། །ཅི་ཕྱིར་ཞེ་ན་འདི་ལྟར་བྱང་ཆུབ་སེམས་བསྐྱེད་ཅིང༌། །ཕ་རོལ་ཕྱིན་དྲུག་བརྩོན་པར་སྤྱད་པ་རབ་ཏུ་སྤྱོད། །སེམས་ཅན་རྣམས་ ལའང་སྤྱོད་པ་ཡང་དག་རབ་ཏུ་སྟོན། །དེས་ནི་ཁམས་གསུམ་འགྲོ་བའི་བདེ་བ་ཀུན་ཀྱང་འབྱུང༌། །སངས་རྒྱས་ཆགས་མེད་ཐུགས་ཆུད་དོན་དམ་མཁྱེན་པ་རྣམས། །ཆོས་ཀྱི་ དམ་པ་མཆོག་རྣམས་ཡང་དག་ཀུན་སྟོན་ཅིང༌། །རྒྱ་ཆེན་ཉོན་མོངས་ལས་ལས་སེམས་ཅན་དགྲོལ་མཛད་དེ། །མྱ་ངན་འདས་པ་དམ་པ་མཆོག་ལ་དགོད་མཛད་པ། །ཡེ་ ཤེས་འོད་ཟེར་འོད་ཡངས་ཉི་མ་ལྟ་བུ་སྟེ། །འགྲོ་བར་སྤྱོད་པ་དཀར་པོས་ཡོངས་རྒྱས་ཟླ་བ་བཞིན། །ཡོན་ཏན་ཤིན་ཏུ་བསགས་པ་ཚད་མེད་ཆུ་ལྟ་བུ། །དྲི་མེད་ཆགས་པ་མི་ མངའ་ཚད་མེད་མཁའ་དབྱིངས་འདྲ། །གང་ཞིག་ཡོན་ཏན་མཐའ་ཡས་བྱང་ཆུབ་སེམས་ཡངས་པ། །ཤིན་ཏུ་ཆེ་ཞིང་བདེ་སྐྱེད་ཚད་མེད་སྨོན་བྱེད་ཅིང༌། །ཕྱི་མའི་མཐར་ཐུག་ སྤྱོད་པར་སྨོན་པས་སུ་བརྩོན་པ། །དེ་དག་སེམས་ཅན་གདུལ་བའི་དོན་ཕྱིར་རྟག་ཏུ་བརྩོན། །འཇིག་རྟེན་འབྱམས་ཀླས་ཐམས་ཅད་རྣམ་པར་སྦྱང་བའི་ཕྱིར། །སྨོན་ལམ་བྱེ་བ་ ཁྲག་ཁྲིག་བསམ་གྱིས་མི་ཁྱབ་དང༌། །སྟོང་པ་མཚན་མ་མེད་པ་སྨོན་མེད་མི་གནས་པའི། །སྨོན་ལམ་བྱེ་བ་བརྒྱས་ནི་སེམས་དེ་དག་པར་འགྱུར། །ཆོས་ཀྱི་རང་བཞིན་ནམ་ མཁའ་ལྟ་བུ་སུས་རྟོགས་ཤིང༌། །ཞི་དང་རབ་ཞི་ཉེར་ཞིག་ཐམས་ཅད་མཉམ་གཞོག་པ། །དེ་དག་ཆོས་གྲངས་ཁྲག་ཁྲིག་བསམ་གྱིས་མི་ཁྱབ་པའི། །གྲངས་སུ་འགྲོ་ལ་སྟོན་ཀྱང་ དེ་ནི་གནས་པ་མེད། །ཕྱོགས་བཅུ་ཀུན་གྱི་འཇིག་རྟེན་གཙོ་བོ་ཇི་སྙེད་པ། །དེ་དག་ཀུན་གྱིས་བྱང་ཆུབ་སེམས་མཆོག་འདི་བསྔགས་ཏེ། །ཡོན་ཏན་བརྒྱ་ཕྲག་བསམ་གྱིས་མི་ཁྱབ་ པས་ཀྱང་བརྒྱན། །སེམས་ཅན་གཙོ་བཞིན་ཡོངས་དག་ཕ་རོལ་ཕྱིན་པ་ཡིན། །བསྐལ་པ་སེམས་ཅན་སྙེད་དུ་གལ་ཏེ་ལེགས་བརྗོད་ཀྱང༌། །བྱང་ཆུབ་སེམས་རབ་དེ་ལ་མཐར་ཐུག་ གང་ཡང་མེད། །རྒྱལ་བ་འབྱུང་བའི་རིགས་ཆེན་དེར་ནི་གང་སྐྱེས་པ། །དེ་ཡི་དཔེ་ནི་ཁམས་གསུམ་གློངས་ཀྱང་གང་ཡང་མེད། །དུས་གསུམ་རྒྱལ་བ་ཀུན་གྱིས་གང་ཞིག་རྣམ་བསགས་ པའི༑ ༑བྱང་ཆུབ་སེམས་རབ་དེ་ལ་སྨོན་ལམ་ཀུན་གྱི་གྱིས། །བྱང་ཆུབ་སེམས་རབ་དམ་པ་དེ་ནི་བསོད་ནམས་གཏེར། །དེས་ནི་རྒྱལ་སྲས་ཆགས་པ་མེད་པ་རབ་ཏུ་འཐོབ། །འགྲོ་ བའི་སེམས་དང་སྤྱོད་པ་ཤེས་ཤིང་མཐོང་རུང་སྲིད། །ཞིང་རྣམས་རྡུལ་དུ་བླགས་ཏེ་བགྲངས་པར་ནུས་ཀྱང་སྲིད། །བར་སྣང་སྐྲ་ཡིས་མཉམ་པར་གཞལ་བར་ནུས་སྲིད་ཀྱི། །བྱང་ཆུབ་ སེམས་མཆོག་ཡོན་ཏན་མཐར་ཕྱིན་མི་ནུས་སོ། །འདི་ལས་དུས་གསུམ་སངས་རྒྱས་ཐམས་ཅད་རབ་ཏུ་བྱུང༌། །འདི་ལས་འཇིག་རྟེན་འགྲོ་བ་ཀུན་གྱི་བདེ་བ་འབྱུང༌། །འདི་ལས་རྒྱལ་ ༄༅། །བས་བསྔགས་པའི་ལེགས་པ་ཐམས་ཅད་འབྱུང༌། །འདིས་ནི་སེམས་ཅན་གཙོ་བོ་ཐེ་ཚོམ་མེད་པར་འགྱུར། །འདིས་ནི་འཇིག་རྟེན་ཀུན་གྱི་སྒྲིབ་པ་ཟད་པར་ འགྱུར༑ ༑འདིས་ནི་ཞིང་རྣམས་ཡོངས་སུ་དག་པའི་མཆོག་ཏུ་འགྱུར། །འདི་ལས་འཇིག་རྟེན་དམ་པ་ཤེས་དང་ལྡན་པ་འབྱུང༌། །གང་ཞིག་ཕྱོགས་བཅུའི་རྒྱལ་བ་བལྟ་བར་འདོད་པ་ དང༌། །གང་ཞིག་བྱིན་དང་བསོད་ནམས་མི་ཟད་མཛོད་འདོད་དང༌། །གང་ཞིག་འགྲོ་བ་ཀུན་གྱི་སྡུག་བསྔལ་ཟློག་འདོད་པ། །དེས་ནི་ཡོན་ཏན་མཐའ་ཡས་བྱང་ཆུབ་སེམས་བསྐྱེད་ བྱ༑ ༑ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། བྱང་ཆུབ་སེམས་དཔའ་སེམས་དང་པོ་བསྐྱེད་པའི་བསོད་ནམས་ཀྱི་ཕུང་པོའི་དཔེ་ཡང་དག་པར་ བསགས་པ་ཚིགས་སུ་བཅད་པའི་ལེའུ་ཞེས་བྱ་སྟེ། ཉི་ཤུ་གཉིས་པའོ།། །།དེ་ནས་བྱང་ཆུབ་སེམས་དཔའ་བརྩོན་འགྲུས་བློ་གྲོས་ཀྱིས་བྱང་ཆུབ་སེམས་དཔའ་ཆོས་ཀྱི་ བློ་གྲོས་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་ཀྱི་སེམས་བསྐྱེད་པ་རབ་ཏུ་ཐོབ་པ། སེམས་དང་པོ་བསྐྱེད་པ་ལ་ གནས་པ། དེ་ལྟར་ཚད་མེད་པའི་བསོད་ནམས་ཀྱི་ཚོགས་དང་ལྡན་པ། ཐམས་ཅད་མཁྱེན་པའི་ཡེ་ཤེས་རྒྱ་ཆེན་པོ་ལ་ཡང་དག་པར་འཛེག་པ། བྱང་ཆུབ་སེམས་དཔའི་ སྐྱོན་མེད་པ་ཤིན་ཏུ་ཆུད་པ། འཇིག་རྟེན་ཀུན་ཏུ་ཁྲིད་པར་བྱེད་པ་རྣམ་པར་ཟློག་པ། རྫོགས་པའི་སངས་རྒྱས་ཀྱི་འཇིག་རྟེན་ལས་འདས་པའི་ཆོས་ཉིད་ཀྱི་རྗེས་སུ་སོང་བ། འདས་པ་ དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ། བྱང་ཆུབ་སེམས་དཔའི་རྣམ་པར་དགོད་པ་ལ་ཤིན་ཏུ་ངེས་པ། རྫོགས་པའི་ བྱང་ཆུབ་ཏུ་རབ་ཏུ་གཞོལ་བ་དེ་དག་གིས་དེ་བཞིན་གཤེགས་པའི་བསྟན་པ་ལ་ཇི་ལྟར་བརྩོན་པར་བྱས་པའི་རྣམ་པ་གང་གིས་དེ་བཞིན་གཤེགས་པ་ཐམས་ཅད་མཉེས་པར་ འགྱུར་བ་དང༌། བྱང་ཆུབ་སེམས་དཔའི་རྣམ་པར་དགོད་པ་ལས་འདས་པར་འགྱུར་བ་དང༌། སྤྱོད་པའི་དཀྱིལ་འཁོར་ཆེན་པོ་ཡོངས་སུ་དག་པར་འགྱུར་བ་དང༌། སྨོན་ལམ་ཆེན་པོ་ ཡོངས་སུ་རྫོགས་པར་འགྱུར་བ་དང༌། བྱང་ཆུབ་སེམས་དཔའི་གཏེར་ཆེན་པོ་རབ་ཏུ་ཐོབ་པར་འགྱུར་བ་དང༌། སེམས་ཅན་རྣམས་ལ་སྣོད་ཇི་བཞིན་དུ་སྦྱིན་པ་བྱེད་པར་འགྱུར་བ་དང༌། ཕ་རོལ་ཏུ་ཕྱིན་པའི་ཕྱོགས་ཡོངས་སུ་མི་གཏོང་བར་འགྱུར་བ་དང༌། ཇི་ལྟར་དམ་བཅས་པའི་སེམས་ཅན་རྣམས་སྒྲོལ་བར་འགྱུར་བ་དང༌། སངས་རྒྱས་དང༌། ཆོས་དང༌། དགེ་འདུན་ གྱི་གདུང་མི་འཆད་པར་འགྱུར་བ་དང༌། དགེ་བའི་རྩ་བ་དམིགས་པ་ཐམས་ཅད་དུ་སྦྱོར་བ་དོན་མེད་པར་མི་འགྱུར་བ་དང༌། ཀྱེ་རྒྱལ་བའི་སྲས། བྱང་ཆུབ་སེམས་དཔའ་རྣམས་ཀྱིས་ ༄༅། །དེ་ལ་བརྩོན་པར་བྱས་པས་ཆོས་ཀྱི་ཡུལ་འདི་དག་ཡོངས་སུ་རྫོགས་པར་འགྱུར་བར་ཇི་ལྟར་བརྩམ་པར་བྱ་བ་དེ་ལེགས་པར་བཤད་པར་མཛོད་ཅིག། འཁོར་འདི་དག་ཐམས་ཅད་ནི། ཉན་པར་འདོད་དོ། །སེམས་ཅན་ཆེན་པོ་དེ་དག་གིས་བརྩོན་པའི་རྣམ་པ་ཇི་ལྟ་བུས་མ་རིག་པའི་མུན་ནག་ཐམས་ཅད་བསལ་ཏེ་བདུད་ཀྱི་ དཀྲུགས་མའི་འཁོར་ཐམས་ཅད་ལས་ཤིན་ཏུ་རྒྱལ་བར་བྱས་ནས་ཕས་ཀྱི་རྒོལ་བ་ཐམས་ཅད་ཟིལ་གྱིས་མནན་ཏེ་སེམས་ཀྱི་དྲི་མ་ཀུན་ནས་ཉོན་མོངས་པའི་ཕྱོགས་ཐམས་ ཅད་ཀུན་ནས་བསལ་ནས་དགེ་བའི་རྩ་བ་ཕུན་སུམ་ཚོགས་པ་ཐམས་ཅད་ཤིན་ཏུ་བསྒྲུབས་ཏེ། མི་ཁོམ་པ་དང༌། ངན་སོང་དང༌། ངན་འགྲོའི་ལམ་ཐམས་ཅད་རྣམ་པར་ བཟློག་ནས་ཡེ་ཤེས་ཀྱི་དཀྱིལ་འཁོར་ཆེན་པོ་རྣམ་པར་བྱང་བར་བྱས་ཏེ་བྱང་ཆུབ་སེམས་དཔའི་ས་དང༌། ཕ་རོལ་ཏུ་ཕྱིན་པ་དང༌། གཟུངས་དང༌། ཏིང་ངེ་འཛིན་དང༌། མངོན་ པར་ཤེས་པ་དང༌། རིག་པ་དང༌། མི་འཇིགས་པ་ཡོངས་སུ་དག་པ་རྣམས་མངོན་པར་བསྒྲུབས་ནས་སངས་རྒྱས་ཀྱི་ཞིང་ཐམས་ཅད་རྣམ་པར་དག་པ་དང༌། མཚན་དང་དཔེ་ བྱད་བཟང་པོ་དང༌། སྐུ་དང༌། གསུང་དང༌། ཐུགས་ཀྱི་རྒྱན་མངོན་པར་སྒྲུབ་པ་ཡོངས་སུ་རྒྱས་པར་བྱས་ཏེ་དེ་བཞིན་གཤེགས་པ་ཐམས་ཅད་ཀྱི་སྟོབས་དང༌། མི་འཇིགས་ པ་དང༌། སངས་རྒྱས་ཀྱི་ཆོས་མ་འདྲེས་པ་མཉམ་པ་ཉིད་ཀྱི་རྗེས་སུ་སོང་སྟེ་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་རྟོགས་པར་འགྱུར་བ་དང༌། དེ་ལྟར་མངོན་པར་བྱང་ཆུབ་ནས་ ཀྱང་བསམ་པའི་ཚུལ་བཞིན་དུ་སངས་རྒྱས་ཀྱི་ཞིང་ཡོངས་སུ་གྲུབ་པར་གྱུར་པ་དག་ཏུ་ཇི་ལྟར་ཡོངས་སུ་སྨིན་པར་བྱ་བའི་སེམས་ཅན་དག་ལ་དུས་དང༌། དབང་པོའི་རྒྱུད་ཇི་ལྟ་བ་ བཞིན་དུ་སངས་རྒྱས་ཀྱི་མཛད་པ་མཐའ་ཡས་པ་འབྱིན་པར་འགྱུར་བ་དེ་ལེགས་པར་ཤོད་ཅིག །འཁོར་འདི་དག་ཐམས་ཅད་ནི། ཉན་པར་འདོད་དོ། །ཇི་ལྟར་ཡང་བྱང་ཆུབ་སེམས་ དཔའ་རྣམས་ཀྱིས་བྱང་ཆུབ་སེམས་དཔའི་ཡོན་ཏན་འདི་དང༌། གཞན་དག་དང༌། བྱང་ཆུབ་སེམས་དཔའི་ཆོས་དང༌། བྱང་ཆུབ་སེམས་དཔའི་སྤྱོད་པ་དང༌། བྱང་ཆུབ་སེམས་དཔའི་ ལམ་གྱི་ཡུལ་རྣམས་ཡོངས་སུ་རྫོགས་པར་བྱས་ཏེ་མྱུར་དུ་དེ་བཞིན་གཤེགས་པའི་མཉམ་པ་ཉིད་འཐོབ་པ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་རྣམས་ཀྱིས་བསྐལ་པ་བརྒྱ་སྟོང་གྲངས་མེད་པར་ཡང་དག་པར་བསྒྲུབས་པའི་ཆོས་ཀྱི་མཛོད་འདི་ཡང་ཡང་དག་པར་སྲུང་ཞིང་བྱང་ཆུབ་སེམས་དཔའི་སྤྱོད་པ་ལ་ གནས་ཤིང་སྟོན་པ་དང༌། འཆད་པའི་ཚེ་བདུད་དམ། བདུད་ཀྱི་རིགས་སུ་གཏོགས་པ་དང༌། ཕས་ཀྱི་རྒོལ་བ་ཐམས་ཅད་ཀྱིས་ཟིལ་གྱིས་མི་ནོན་པ་དང༌། འཇིག་རྟེན་གྱི་ཁམས་ ༄༅། །ཐམས་ཅད་དུ་ཡང་སྐྱོ་བ་མེད་པར་དམ་པའི་ཆོས་ཡོངས་སུ་འཛིན་པར་བྱེད་པ་དང༌། དེ་ཡང་དག་པར་སྟོན་པའི་ཚེ་ལྷའི་དབང་པོ་རྣམས་ཀྱིས་ རིམ་གྲོར་བྱ་བ་དང༌། གཞུང་དེ་བཞིན་དུ་ཀླུའི་དབང་པོ་དང༌། གནོད་སྦྱིན་གྱི་དབང་པོ་དང༌། དྲི་ཟའི་དབང་པོ་དང༌། ལྷ་མ་ཡིན་གྱི་དབང་པོ་དང༌། ནམ་མཁའ་ལྡིང་གི་དབང་པོ་ དང༌། མིའམ་ཅིའི་དབང་པོ་དང༌། ལྟོ་འཕྱེ་ཆེན་པོའི་དབང་པོ་དང༌། མིའི་དབང་པོ་དང༌། ཚངས་པའི་དབང་པོས་རིམ་གྲོར་བྱ་བ་རབ་ཏུ་འཐོབ་པ་དང༌། དེ་བཞིན་གཤེགས་པ་ ཆོས་ཀྱི་དབང་པོས་རིམ་གྲོར་བྱ་བ་རབ་ཏུ་འཐོབ་པ་དང༌། དེ་ལྟར་རིམ་གྲོར་བྱས་ནས་ཀྱང་འཇིག་རྟེན་ཐམས་ཅད་ཀྱིས་ཕྱག་བྱ་བ། འཇིག་རྟེན་ཐམས་ཅད་ཀྱིས་མངོན་པར་ མཆོད་པ། འཇིག་རྟེན་ཐམས་ཅད་ཀྱིས་དབང་བསྐུར་བ། དེ་བཞིན་གཤེགས་པ་ཐམས་ཅད་ཀྱིས་ཤིན་ཏུ་དགོངས་པ། བྱང་ཆུབ་སེམས་དཔའི་ཚོགས་ཀྱིས་ཤིན་ཏུ་བསྲུང་ བ༑ རང་གི་དགེ་བའི་རྩ་བ་དང་སྨོན་ལམ་རབ་ཏུ་ཐོབ་པ། ཆོས་དཀར་པོ་ཆེན་པོ་ཡང་དག་པར་སྤེལ་བ་རྣམས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་རྣམས་ཀྱི་ཆོས་ཀྱི་མཛོད་རྣམ་པར་འབྱེད་པར་འགྱུར་བ་དང༌། དམ་པའི་ཆོས་ཡོངས་སུ་འཛིན་པ་རྒྱ་ཆེན་པོ་རབ་ཏུ་འབྱེད་པ་དང༌། བྱང་ཆུབ་སེམས་དཔའི་རིམ་ གྱིས་སྤྱོད་པ་ཡོངས་སུ་སྒྲུབ་པ་ཤིན་ཏུ་སྟོན་པར་འགྱུར་བ་དེ་ལྟ་བུའི་གནས་དག་ཡང་དག་པར་བསྟན་པ་མཛོད་ཅིག །དེ་ནས་བྱང་ཆུབ་སེམས་དཔའ་བརྩོན་འགྲུས་བློ་གྲོས་ ཀྱིས་དོན་འདི་ཉིད་བསྟན་ཏེ་བརྗོད་པའི་ཕྱིར་བྱང་ཆུབ་སེམས་དཔའ་ཆོས་ཀྱི་བློ་གྲོས་ལ་ཚིགས་སུ་བཅད་དེ་སྨྲས་པ། སྤྱོད་ལ་འཇུག་པ་མཐའ་ཡས་ཡངས་པ་དག །རང་བྱུང་ཡེ་ ཤེས་སྒྲུབ་པ་དགེ་བ་རྣམས། །རྫོགས་པའི་བྱང་ཆུབ་སེམས་དཔའ་ཡོན་ཏན་ཅན། །གྲགས་པ་ཆེན་པོ་རྣམས་ལ་ལེགས་པར་ཤོད། །བྱང་ཆུབ་སེམས་དཔའ་གང་རྣམས་སེམས་ ཐོབ་ཅིང༌། །བསོད་ནམས་ལྡན་པ་ཡེ་ཤེས་ཐོབ་པ་རྣམས། །སྐྱོན་མེད་ཞུགས་པས་འཇིག་རྟེན་རྣམས་ཟློག་ཅིང༌། །ཡང་དག་སངས་རྒྱས་ཆོས་མཉམ་ཉིད་ཐོབ་རྣམས། །དེ་དག་གིས་ ནི་བདེ་གཤེགས་བསྟན་པ་ལ། །བརྩོན་འགྲུས་བརྟན་པས་ཇི་ལྟར་བརྩོན་པར་བྱ། །གང་གིས་ཕྱོགས་བཅུའི་རྒྱལ་བ་མཉེས་བྱས་ཤིང༌། །ཡང་དག་སངས་རྒྱས་སའང་གནན་བྱ་ དང༌། །སྤྱོད་པ་དག་དང་སྨོན་ལམ་ཡོང་དག་དང༌། །ཡེ་ཤེས་གཏེར་ཆེན་རབ་ཏུ་འཐོབ་འགྱུར་ཞིང༌། །ཐོབ་ནས་དེ་དག་འགྲོ་ཀུན་མི་གནས་པས། །ཡོངས་སུ་བླངས་པ་རྟག་ཏུ་གཏོང་ བྱེད་དང༌། །གང་ཡང་ཕ་རོལ་ཕྱིན་པ་མཆོག་གི་ལམ། །དེ་དག་མི་གཏོང་རབ་ཏུ་སྤྱོད་པ་དང༌། །སེམས་ཅན་ཇི་ལྟར་སྒྲོལ་བྱེད་དམ་བཅས་ཤིང༌། །ཡང་དག་སངས་རྒྱས་བསམ་པ་ ༄༅། །མཉམ་འཛིན་དང༌། །མིག་གི་དམིགས་པ་བརྟེན་པ་ཐམས་ཅད་ཀྱི། །འབྱུང་བ་ཡོན་ཏན་ཅན་ལ་སྟོབ་འགྱུར་ཞིང༌། །སྐྱེས་བུ་ཁྱུ་མཆོག་དེ་དག་བརྩོན་ འགྱུར་བའི། །རྣམ་དག་ལམ་དེ་ཁྱུ་མཆོག་ཁྱོད་ཀྱིས་སྟོན། །ཇི་ལྟར་དེ་དག་མུན་པ་ཀུན་བསལ་ཅིང༌། །འཁྲུག་པའི་འཁོར་རྣམས་ཐམས་ཅད་ཕམ་བྱས་ནས། །དྲི་མ་བྲལ་བའི་དགེ་ ལྡན་མཁས་པ་རྣམས། །སྐྱེས་བུ་ཁྱུ་མཆོག་ཡེ་ཤེས་ལྡན་འགྱུར་དང༌། །མི་ཁོམ་ངན་སོང་ལམ་རྣམས་ཡོངས་སྤངས་ཤིང༌། །ཡེ་ཤེས་ཆེན་པོའི་དཀྱིལ་འཁོར་མཆོག་སྤྱོད་དང༌། ། ཡོན་ཏན་བཟང་པོ་ཐམས་ཅད་ལྡན་གྱུར་ཅིང༌། །རྒྱལ་བའི་ཡེ་ཤེས་སྟོབས་ཀྱང་འཐོབ་འགྱུར་དང༌། །སྐྱེས་བུ་ཁྱུ་མཆོག་ཡེ་ཤེས་ཞུགས་ནས་ཀྱང༌། །སེམས་ཅན་བསམ་པ་ཇི་ བཞིན་སྟོན་བྱེད་ཅིང༌། །མཐའ་ཡས་ཡངས་པའི་ཞིང་རྣམས་བསམ་ཡས་སུ། །སྟོན་པ་ཆེན་པོའི་ལས་ཀྱང་བྱེད་པ་དང༌། །ཅི་ནས་དེ་དག་སྤྱོད་པ་མཆོག་ཐོབ་ནས། །མི་ཡི་ཁྱུ་ མཆོག་མཛོད་རྣམས་སྟོན་བྱེད་དེ། །ཟིལ་གྱིས་མི་ནོན་གཞན་གྱིས་མི་ཕམ་པར། །རྒྱལ་བའི་ཆོས་ཉིད་རྟག་ཏུ་འཛིན་བྱེད་སྟོན། །སེངྒེ་བཞིན་དུ་ཇི་ལྟར་འཇིགས་པ་མེད། །ཇི་ ལྟར་ཟླ་བཞིན་དག་པའི་མདོག་ཏུ་སྤྱོད། །ཆུ་ལ་པདྨོ་བཞིན་དུ་ཆགས་མེད་པ། །དེ་དག་རྒྱལ་བའི་ཡོན་ཏན་ཇི་ལྟར་སྤྱོད། །དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་ཆོས་ཀྱི་ བློ་གྲོས་ཀྱིས་བྱང་ཆུབ་སེམས་དཔའ་བརྩོན་འགྲུས་བློ་གྲོས་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། ཁྱོད་ནི། སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་ རྟེན་ལ་སྙིང་བརྩེ་བ་དང༌། ལྷ་དང་མི་རྣམས་ཀྱི་དོན་དང༌། ཕན་པ་དང༌། བདེ་བའི་ཕྱིར་ཞུགས་པ་སྟེ། ཀྱེ་རྒྱལ་བའི་སྲས། ཁྱོད་དེ་ལྟར་བྱང་ཆུབ་སེམས་དཔའི་སྤྱོད་པ་ཤིན་ཏུ་རྟོགས་ཤིང་ རྣམ་པར་དག་པར་བརྩམས་ཏེ་འདྲི་ཞིང༌། དེ་ལྟར་རྒྱལ་བའི་སྲས། ཁྱོད་དེ་བཞིན་གཤེགས་པ་དྲི་བ་ཆོས་མང་པོ་ལ་རབ་ཏུ་གནས་པ། བརྩོན་འགྲུས་ཆེན་པོས་ཤིན་ཏུ་བསགས་ པ་བརྩོན་འགྲུས་ལྡོག་པ་མེད་པས་ཤིན་ཏུ་བྱུང་བ་འདྲི་བར་བྱེད་པ་ནི། ཀྱེ་རྒྱལ་བའི་སྲས། ལེགས་སོ། །ལེགས་སོ། །ཀྱེ་རྒྱལ་བའི་སྲས། དེའི་ཕྱིར་ཤིན་ཏུ་ལེགས་པར་ཉོན་ལ་ ཡིད་ལ་ཟུངས་ཤིག་དང༌། སངས་རྒྱས་ཀྱི་མཐུ་དང༌། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་ཙམ་བསྟན་པར་བྱའོ། །ཀྱེ་རྒྱལ་བའི་སྲས། འདི་ལ་བྱང་ཆུབ་སེམས་དཔའ་ཐམས་ ཅད་མཁྱེན་པ་ཉིད་དུ་སེམས་བསྐྱེད་པ་ཐོབ་པ་རྣམས་ཀྱིས་ཐོག་མར་སེམས་བསྐྱེད་པ་དེ་མི་ཉམས་པར་ཡོངས་སུ་བསྲུང་བ་དང༌། རིམ་གྲོར་བྱ་བའི་ཕྱིར་བག་ཡོད་པར་བྱའོ། །ཀྱེ་ རྒྱལ་བའི་སྲས། དེ་ལ་རྣམ་པ་བཅུས་ནི། བྱང་ཆུབ་སེམས་དཔའ་བག་ཡོད་པ་ལ་གནས་པ་ཞེས་བྱ་སྟེ། བཅུ་གང་ཞེ་ན། ཚུལ་ཁྲིམས་ཀྱི་ཕུང་པོ་ཤིན་ཏུ་བསྲུངས་བ་དང༌། བྱང་ ༄༅། །ཆུབ་ཀྱི་སེམས་མ་ཉམས་ཤིང་ཤིན་ཏུ་སྦྱངས་པ་དང༌། བྱང་ཆུབ་སེམས་དཔའི་བསམ་པ་གཡོ་དང་སྒྱུ་མེད་པ་དང༌། དགེ་བའི་རྩ་བ་སྦྱོར་བ་ཕྱིར་ མི་ལྡོག་པ་དང༌། རང་གི་སེམས་བསྐྱེད་པ་ཤིན་ཏུ་རྟོགས་པ་དང༌། ཕྱོགས་ཁྱིམ་པ་དང་སོ་སོའི་སྐྱེ་བོ་དང་མ་འདྲེས་པ་དང༌། དགེ་བའི་རྩ་བའི་ལས་འཇིག་རྟེན་གྱི་འདུ་ ཤེས་དང་འདོད་པ་ཐམས་ཅད་དང་བྲལ་བ་དང༌། བྱང་ཆུབ་སེམས་དཔའི་ལམ་ཉན་ཐོས་དང༌། རང་སངས་རྒྱས་ཀྱི་ཐེག་པ་སྤངས་པ་རབ་ཏུ་ཐོབ་པ་དང༌། དགེ་བའི་རྩ་བ་བརྩམ་ པ་ནན་ཏན་རྒྱུན་ཆད་པ་མེད་པ་དང༌། བདག་གི་རྒྱུད་ཀྱི་སྟོབས་ཀྱི་ཤུགས་ཤིན་ཏུ་བརྟག་པ་དག་སྟེ། ཀྱེ་རྒྱལ་བའི་སྲས། རྣམ་པ་བཅུ་པོ་འདི་དག་དང་ལྡན་པའི་བྱང་ཆུབ་སེམས་ དཔའ་ནི། བག་ཡོད་པ་ལ་གནས་པ་ཞེས་བྱའོ། །ཀྱེ་རྒྱལ་བའི་སྲས། དེ་ལ་བྱང་ཆུབ་སེམས་དཔའ་བག་ཡོད་པ་ལ་གནས་པ་རྣམ་པ་བཅུས་ནི། ཡོངས་སུ་དག་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། ཀྱེ་རྒྱལ་བའི་སྲས། འདི་ལ་བྱང་ཆུབ་སེམས་དཔའ་ཇི་ལྟར་སྨྲས་པ་དེ་ལྟར་བྱེད་པ་ཡིན། ཤེས་བཞིན་གྱི་དྲན་པ་ཅན་ཡིན། ཁེངས་པ་མེད་ཅིང་ གཡེང་བ་མེད་དེ་བསམ་གཏན་ཟབ་མོ་ལ་རབ་ཏུ་གནས་པ་ཡིན། སངས་རྒྱས་ཀྱི་ཆོས་ཟབ་མོ་བཙལ་བ་ལ་ནན་ཏན་དུ་བྱེད་ཅིང་རྒྱུན་མི་གཅོད་པ་ཡིན། ལྷག་མཐོང་མངོན་ པར་སྒྲུབ་པ་ལ་མཁས་ཤིང་ཇི་ལྟར་ཐོས་པའི་ཆོས་ལ་ཚུལ་བཞིན་དུ་རྟོག་པར་ཞུགས་པ་ཡིན། བསམ་གཏན་གྱི་རྗེས་སུ་སོང་བའི་སེམས་ཀྱིས་དེ་བཞིན་གཤེགས་པའི་ རྣམ་པར་འཕྲུལ་པ་ཟབ་མོའི་རྗེས་སུ་སོང་བ་ཡིན། ས་དང་མཉམ་ཞིང་མཐོན་དམན་དང་བྲལ་བ་ཡིན། སྦྱོར་བ་བཟང་ངན་དང་བར་མ་ལ་སེམས་ཉམས་པ་མེད་པ་ཡིན། སེམས་ ཅན་ཀུན་གྱི་ནང་ན་ཆུང་ངུ་ན་ཐམས་ཅད་མཁྱེན་པ་ཉིད་དུ་སེམས་གཅིག་བསྐྱེད་པ་ལ་ཡང་སྟོན་པའི་བསམ་པ་ཐོབ་པ་ཡིན། མཁན་པོ་དང༌། སློབ་དཔོན་དང༌། དགེ་བའི་བཤེས་ གཉེན་དང༌། བྱང་ཆུབ་སེམས་དཔའ་དང༌། ཆོས་སྨྲ་བ་རྣམས་ལ་རིམ་གྲོ་དང༌། བཀུར་སྟི་དང༌། ངང་ཚུལ་ཅན་དུ་གནས་པ་ཡིན་ཏེ། ཀྱེ་རྒྱལ་བའི་སྲས། རྣམ་པ་བཅུ་པོ་དེ་དག་ གིས་བྱང་ཆུབ་སེམས་དཔའ་བག་ཡོད་པ་ལ་གནས་པ་ཡོངས་སུ་དག་པར་འགྱུར་རོ། །ཀྱེ་རྒྱལ་བའི་སྲས། དེ་ལ་བྱང་ཆུབ་སེམས་དཔའ་བག་ཡོད་པ། བརྩོན་འགྲུས་བརྩམས་པ། དྲན་པ་ཉེ་བར་གཞག་པ། མོས་པ་ཆེ་བ། རྣལ་འབྱོར་རྒྱུན་མ་ཆད་པ། ཆོས་ཐམས་ཅད་ལ་མི་གནས་པ། ཆོས་ཐམས་ཅད་ལ་བརྩོན་པ། ཉོན་མོངས་པ་མེད་པའི་ཚུལ་ལ་ཞུགས་ པ༑ སེམས་ཡངས་པ། སངས་རྒྱས་ཀྱི་ཆོས་མཐའ་དང་དབུས་མེད་པའི་རྗེས་སུ་སོང་བ་རྣམས་ཀྱིས་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ ༄༅། །རྒྱས་རྣམས་མཉེས་པར་འགྱུར་ཏེ། ཀྱེ་རྒྱལ་བའི་སྲས། བྱང་ཆུབ་སེམས་དཔས་ཆོས་བཅུས་དེ་བཞིན་གཤེགས་པ་རྣམས་མཉེས་པར་བྱའོ། །བཅུ་ གང་ཞེ་ན། བྱང་ཆུབ་སེམས་དཔའི་བརྩོན་འགྲུས་ཐམས་ཅད་ལ་ཕྱིར་མི་ལྡོག་པ་དང༌། ལུས་དང་སྲོག་ལ་མི་ལྟ་བ་དང༌། འཚོ་བའི་ཡོ་བྱད་དང་འཚོ་བའི་རྐྱེན་ལ་དོན་དུ་གཉེར་ བ་མེད་པ་དང༌། ཆོས་ཐམས་ཅད་རྣམ་པར་སྒོམ་པས་ནམ་མཁའ་དང་མཉམ་པ་དང༌། ཆོས་ཀྱི་དབྱིངས་ལ་ཡང་དག་པར་གཞོལ་བའི་ལྷག་མཐོང་ལ་མཁས་པ་དང༌། མི་ གནས་པའི་ཆོས་རྣམ་པར་སྒོམ་པའི་ཕྱག་རྒྱ་དང༌། རྟག་ཏུ་རྒྱུན་མི་འཆད་པར་སྒྲུབ་པའི་སྨོན་ལམ་ཆེན་པོ་དང༌། ཡོངས་སུ་སྦྱངས་པའི་བཟོད་པ་ཤེས་པའི་སྣང་བ་དང༌། རང་ གི་དགེ་བའི་ཆོས་བསགས་པ་དང་མ་བསགས་པ་ཤིན་ཏུ་བརྟགས་པ་དང༌། མངོན་པར་འདུ་བྱ་བ་མེད་པའི་སྒོ་ཤིན་ཏུ་བྱང་བ་སྟེ། ཀྱེ་རྒྱལ་བའི་སྲས། བཅུ་པོ་དེ་དག་གིས་དེ་ བཞིན་གཤེགས་པ་མཉེས་པར་བྱའོ། །ཀྱེ་རྒྱལ་བའི་སྲས། དེ་ལ་བྱང་ཆུབ་སེམས་དཔའ་ཆོས་བཅུ་ལ་གནས་པ་རྣམས་ཀྱིས་ནི། དེ་བཞིན་གཤེགས་པ་རྣམས་མཉེས་པར་ འགྱུར་བ་ཡིན་ཏེ། བཅུ་གང་ཞེ་ན། འདི་ལྟ་སྟེ། བག་ཡོད་པ་ལ་གནས་པ་དང༌། མི་སྐྱེ་བའི་བཟོད་པ་ལ་གནས་པ་དང༌། སྙིང་རྗེ་ཆེན་པོ་ལ་གནས་པ་དང༌། ཕ་རོལ་ཏུ་ཕྱིན་པ་ ཡོངས་སུ་རྫོགས་པར་བྱ་བ་ལ་གནས་པ་དང༌། སྤྱོད་པ་ཡོངས་སུ་རྫོགས་པར་བྱ་བ་ལ་གནས་པ་དང༌། སྨོན་ལམ་མངོན་པར་སྒྲུབ་པ་ལ་གནས་པ་དང༌། ཐབས་མཁས་པ་ལ་གནས་པ་ དང༌། བརྟན་པའི་སྟོབས་ཀྱི་ཤུགས་ལ་གནས་པ་དང༌། ཆོས་ཐམས་ཅད་ནམ་མཁའི་རང་བཞིན་ལྟ་བུ་ལ་རབ་ཏུ་གནས་པ་དང༌། ལེན་པ་མེད་པ་ལ་གནས་པ་སྟེ། ཀྱེ་རྒྱལ་བའི་སྲས། ཆོས་དེ་དག་ལ་གནས་པའི་བྱང་ཆུབ་སེམས་དཔའ་རྣམས་ཀྱིས་ནི། དེ་བཞིན་གཤེགས་པ་མཉེས་པར་འགྱུར་རོ། །ཀྱེ་རྒྱལ་བའི་སྲས། དེ་ལ་ཆོས་བཅུ་དང་ལྡན་པའི་བྱང་ཆུབ་སེམས་ དཔའ་རྣམས་ནི། ས་རྣམ་པར་དགོད་པ་ལས་འདའ་བ་ཡིན་ཏེ། བཅུ་གང་ཞེ་ན། འདི་ལྟ་སྟེ། བསོད་ནམས་དང་ཡེ་ཤེས་ཀྱི་ཚོགས་ཤིན་ཏུ་བསགས་པ་དང༌། ཕ་རོལ་ཏུ་ཕྱིན་པ་རྣམ་ པར་ཕྱེ་བ་ཚད་མེད་པའི་ལམ་གཞན་གྱི་དྲིང་མི་འཇོག་པའི་ཡེ་ཤེས་སྣང་བ་དང༌། དགེ་བའི་བཤེས་གཉེན་དང་འགྲོགས་པ་རྒྱུན་མ་ཆད་པ་དང༌། བརྩོན་འགྲུས་ཞིག་པ་མེད་པ་ དང༌། དེ་བཞིན་གཤེགས་པའི་བྱིན་གྱི་རླབས་ཀྱིས་ལེགས་པར་བསླབ་པ་དང༌། དགེ་བའི་རྩ་བ་སྦྱོར་བས་མི་སྐྱོ་བ་དང༌། ཐེག་པའི་རྒྱན་ཤིན་ཏུ་བཤམས་པ་དང༌། ཡེ་ཤེས་ཀྱི་ བསམ་པ་རབ་ཏུ་རྣོ་བ་དང༌། ས་དང་ས་མ་ཡིན་པའི་ཆོས་ཀྱི་སྒོ་ལ་མི་གནས་པ་དང༌། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཐམས་ཅད་དང་ ༄༅། །དགེ་བའི་རྩ་བའི་རྒྱུད་ཀྱི་ཚུལ་གཅིག་ཏུ་གྱུར་པ་དག་སྟེ། ཀྱེ་རྒྱལ་བའི་སྲས། ཆོས་བཅུ་པོ་དེ་དག་གིས་བྱང་ཆུབ་སེམས་དཔའ་རྣམས་ས་ནས་སར་རྣམ་ པར་དགོད་པ་ལས་འདའ་བ་ཡིན་ནོ། །ཀྱེ་རྒྱལ་བའི་སྲས། བྱང་ཆུབ་སེམས་དཔའ་དེ་དག་ནི། ཐོག་མ་ནས་ས་རྣམ་པར་དགོད་པ་ཐམས་ཅད་ལ་མཁས་པ་རྣམ་པར་དཔྱོད་པ་ ཡིན་ཏེ༑ ཆོས་ཀྱི་སྒོ་གང་གིས་གང་ཁོང་དུ་ཆུད་པར་འགྱུར་བ་དང༌། ཡེ་ཤེས་ཀྱི་སྒོ་གང་གིས་ཐོབ་པར་འགྱུར་བ་དང༌། སྒྲུབ་པ་གང་ཡིན་པ་དང༌། རྒྱུ་མཐུན་པ་གང་ཡིན་པ་དང༌། སྤྱོད་ཡུལ་གང་ཡིན་པ་དང༌། རྣམ་པར་འཕྲུལ་པ་གང་ཡིན་པ་དང༌། ཡང་དག་པར་མཐོང་བ་གང་ཡིན་པ་དང༌། ཆོས་ཀྱི་སྒོ་རྣམ་པར་དབྱེ་བའི་ཁྱད་པར་གང་ཡིན་པ་དང༌། ཇི་ལྟར་ ཐོབ་པར་བྱ་བ་ཐམས་ཅད་ཀྱང་རྣམ་པར་དཔྱོད་དོ། །དེ་དག་ལ་ཤིན་ཏུ་རྣམ་པར་དཔྱད་པས་ཆོས་ཐམས་ཅད་ལ་མི་གནས་ཤིང༌། སེམས་ཀྱི་རང་བཞིན་གྱི་ཆོས་ཐམས་ཅད་ཁོང་ དུ་ཆུད་པས་བྱང་ཆུབ་སེམས་དཔའི་ས་ཡང་དག་པར་འདའོ། །ཀྱེ་རྒྱལ་བའི་སྲས། བྱང་ཆུབ་སེམས་དཔའ་རྣམས་ནི། འདི་ལྟར་བདག་ཅག་གིས་ཅི་ནས་ཀྱང་མྱུར་དུ་འདའ་བར་ བྱའོ༑ ༑སྙམ་དུ་མི་སེམས་ཏེ། དེ་ཅིའི་ཕྱིར་ཞེ་ན། འདི་ལྟར་དེ་དག་འདི་སྙམ་དུ་སེམས་ཏེ། བདག་ཅག་ས་ནས་ས་ལ་རྣམ་པར་གནས་པས། ཇི་ལྟ་ཇི་ལྟར་ཡང་དག་པར་གནས་ པ་དེ་ལྟ་དེ་ལྟར་བསོད་ནམས་ཀྱི་ཚོགས་ཆེས་ཆེ་བ་སྐྱེ་བར་འགྱུར་ཏེ། ཇི་ལྟ་ཇི་ལྟར་བསོད་ནམས་ཀྱི་ཚོགས་ཆེན་པོ་སྐྱེས་པར་གྱུར་པ་དེ་ལྟ་དེ་ལྟར་དེ་བཞིན་གཤེགས་པའི་སའི་རྗེས་ སུ་སོང་ཞིང་སངས་རྒྱས་ཀྱི་མཛད་པ་ཚད་མེད་པས་ཉེ་བར་གནས་པར་འགྱུར་རོ། །སྙམ་སྟེ། དེ་དག་སྦྱོར་བ་རྒྱུན་མ་ཆད་ཅིང༌། སྐྱོ་བ་མེད་པའི་ཡིད་དང་ལྡན་པ་དང༌། ཚོགས་ཀྱི་ རྒྱན་ཆེན་པོས་བྱང་ཆུབ་སེམས་དཔའི་ས་རྣམ་པར་དགོད་པ་ལས་ཡང་དག་པར་འདའོ། །ཀྱེ་རྒྱལ་བའི་སྲས། དེ་ལ་བྱང་ཆུབ་སེམས་དཔའ་རྣམས་ཀྱིས་རྣམ་པ་བཅུས་སྤྱོད་པའི་ དཀྱིལ་འཁོར་ཡོངས་སུ་སྦྱང་བར་བྱ་སྟེ། བཅུ་གང་ཞེ་ན། ཡོ་བྱད་ཡོངས་སུ་གཟུང་བ་མེད་པ་དང༌། འགྲོ་བ་ཐམས་ཅད་ཚིམ་པར་བྱེད་པ་དང༌། ཚུལ་ཁྲིམས་ཡང་དག་པར་བླངས་ པ་ཁ་ན་མ་ཐོ་བ་མེད་པ་དང༌། བཟོད་པ་དང་དེས་པ་མི་ཟད་པའི་སའི་རྗེས་སུ་སོང་བ་དང༌། བརྩོན་འགྲུས་རྩོམ་པ་ཕྱིར་མི་ལྡོག་པའི་སྦྱོར་བ་དང་ལྡན་པ་དང༌། དྲན་པའི་སྟོབས་ཀྱི་ ཤུགས་རྨོངས་པ་མེད་པ་དང༌། གཅིག་ལས་རྣམ་པ་ཐ་དད་པའི་ཆོས་ཀྱི་རྗེས་སུ་སོང་ཞིང་ཁོང་དུ་ཆུད་པ་དང༌། གནས་མེད་པའི་སྤྱོད་པ་སྒྲུབ་དཀའ་བ་ཐམས་ཅད་ལ་སེམས་རིའི་ རྒྱལ་པོ་ལྟ་བུ་དང༌། སེམས་ཅན་ཐམས་ཅད་མ་འདྲེས་པའི་མུ་སྟེགས་སུ་གྱུར་པ་དང༌། འགྲོ་བ་ཐམས་ཅད་དུ་སངས་རྒྱས་ཐམས་ཅད་དང་རྒྱུད་ཀྱི་ཚུལ་གཅིག་ཏུ་གྱུར་པ་སྟེ། ཀྱེ་རྒྱལ་ ༄༅། །བའི་སྲས། རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའ་རྣམས་ཀྱིས་སྤྱོད་པའི་དཀྱིལ་འཁོར་ཡོངས་སུ་སྦྱང་བར་བྱའོ། །དེ་དག་གི་བྱང་ཆུབ་ སེམས་དཔའི་སྤྱོད་པ་དེ་ལྟར་ཡོངས་སུ་སྦྱངས་པ་དེས་རྣམ་པ་བཅུས་ཤིན་ཏུ་དག་པར་འགྱུར་ཏེ། བཅུ་གང་ཞེ་ན། སེམས་ཅན་གྱི་གཙོ་བོ་འཇིག་རྟེན་གྱི་ཁམས་གཞན་ན་ བཞུགས་པས་ཡང་དག་པར་དགོངས་པ་དང༌། འདས་པའི་བྱང་ཆུབ་སེམས་དཔའི་གྲོགས་ཀྱིས་དགེ་བའི་རྩ་བ་བསྐྱེད་པ་དང༌། སངས་རྒྱས་ཀྱི་བྱིན་གྱི་རླབས་ཡང་དག་ པར་གཟུང་བ་ལ་མཁས་པ་དང༌། དགེ་བའི་བཤེས་གཉེན་ལ་ཡང་དག་པར་བརྟེན་པ་དང༌། མོས་པ་དང༌། བརྩོན་འགྲུས་དང༌། བག་ཡོད་པ་ལ་རབ་ཏུ་གནས་པ་དང༌། ཆོས་ ཐ་དད་པ་ཐམས་ཅད་ལ་ཐ་མི་དད་པར་རྟོགས་པ་དང༌། སྙིང་རྗེའི་བྱིན་གྱི་རླབས་ཤིན་ཏུ་ཆེ་བ་དང༌། ཆོས་ཐམས་ཅད་ཡང་དག་པར་ཇི་ལྟ་བ་བཞིན་དུ་རྣམ་པར་ལྟ་བའི་ཤེས་རབ་ ཀྱི་ཕ་རོལ་ཏུ་ཕྱིན་པ་མངོན་པར་སྒྲུབ་པ་དང༌། ཐབས་ལ་མཁས་པ་རྣམ་པར་དཔྱོད་པའི་སྦྱོར་བ་དང༌། སྦྱོར་བ་ཐམས་ཅད་ལ་དེ་བཞིན་གཤེགས་པའི་སྟོབས་ཀྱི་རྗེས་སུ་འབྲང་ བ་དག་སྟེ། ཀྱེ་རྒྱལ་བའི་སྲས། རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའ་རྣམས་ཀྱིས་སྤྱོད་པའི་དཀྱིལ་འཁོར་ཡོངས་སུ་སྦྱང་བར་བྱའོ། །ཀྱེ་རྒྱལ་བའི་སྲས། དེ་ལ་ བྱང་ཆུབ་སེམས་དཔའི་སྨོན་ལམ་རྣམ་པར་དག་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། སྐྱོ་བ་མེད་པར་སེམས་ཅན་གྱི་ཁམས་ཡོངས་སུ་སྨིན་པར་བྱ་བའི་སྨོན་ལམ་དང༌། དགེ་ བའི་རྩ་བ་སྣ་ཚོགས་བསགས་པས་འཇིག་རྟེན་གྱི་ཁམས་ཡོངས་སུ་དག་པར་བྱ་བའི་སྨོན་ལམ་དང༌། ལུས་དང་སྲོག་གིས་བསྔོ་ཞིང་དམ་པའི་ཆོས་ཡོངས་སུ་འཛིན་པའི་སྨོན་ ལམ་དང༌། ཡེ་ཤེས་ཀྱི་སྒོ་རྣམ་པར་དཔྱད་པ་ཁོང་དུ་ཆུད་པས་སངས་རྒྱས་ཀྱི་ཞིང་ལ་འཇུག་པའི་སྨོན་ལམ་དང༌། བྱང་ཆུབ་སེམས་དཔའ་ཐམས་ཅད་དང་གཉིས་སུ་མེད་པས་ཚུལ་ གཅིག་གི་རྒྱུད་དུ་འགྲོ་བའི་སྨོན་ལམ་དང༌། དེ་བཞིན་གཤེགས་པའི་སྒོ་ལ་འཇུག་པས་ཆོས་ཐམས་ཅད་ཁོང་དུ་ཆུད་པའི་སྨོན་ལམ་དང༌། མོས་པ་རྣམ་པར་སྦྱངས་པས་བལྟ་ན་དོན་ ཡོད་པའི་སྨོན་ལམ་དང༌། ཕྱི་མའི་མཐར་བྱིན་གྱིས་བརླབས་པས་བསྐལ་པར་གནས་པའི་སྨོན་ལམ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་ཐེག་པའི་རྒྱན་རྣམ་པ་ཐམས་ ཅད་ཀྱི་སྒོ་ནས་རྣམ་པར་སྦྱངས་པའི་སྨོན་ལམ་དག་སྟེ། ཀྱེ་རྒྱལ་བའི་སྲས། བྱང་ཆུབ་སེམས་དཔའ་རྣམས་ནི། དེ་ལྟར་སྨོན་ལམ་རྣམ་པར་སྦྱོང་ངོ༌། །དེ་དག་རྣམ་པ་བཅུས་སྨོན་ལམ་ ཡོངས་སུ་རྫོགས་པར་བྱེད་དེ། བཅུ་གང་ཞེ་ན། ཡོངས་སུ་སྐྱོ་བ་མེད་པ་དང༌། རྒྱ་ཆེན་པོ་མངོན་པར་སྒྲུབ་པ་དང༌། བྱང་ཆུབ་སེམས་དཔའ་སྨོན་ལམ་ཁྱད་པར་དུ་འཕགས་པ་རྣམས་ ༄༅། །ཀྱི་རྗེས་སུ་འཇུག་པ་དང༌། འཇིག་རྟེན་གྱི་ཁམས་གཞན་ན་བཞུགས་པའི་དེ་བཞིན་གཤེགས་པའི་སངས་རྒྱས་ཀྱི་ཞིང་ཐོས་ནས་རང་གི་སྨོན་ལམ་དུ་ མངོན་པར་སྒྲུབ་པ་དང༌། བསམ་པ་ཕྱི་མའི་མཐའི་མུར་ཐུག་པ་དང༌། སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བར་གཏུགས་པའི་སྨོན་ལམ་ཆེན་པོ་དང་ ལྡན་པ་དང༌། བསྐལ་པ་ཐམས་ཅད་དུ་གནས་པས་མི་འཇིགས་པ་དང༌། སྡུག་བསྔལ་ཐམས་ཅད་ཀྱིས་ཅི་མི་སྙམ་པ་དང༌། བདེ་བ་ཐམས་ཅད་ལ་ཡེ་མི་རྔམ་པ་དང༌། བསམ་ པ་མཉམ་པ་མེད་པའི་རྣམ་པར་ཐར་པ་ཡོངས་སུ་སྲུང་བ་དག་སྟེ། དེ་དག་སྨོན་ལམ་ཆེན་པོ་དེ་ལྟར་ཡོངས་སུ་སྦྱོང་ཞིང་ཡོངས་སུ་རྫོགས་པར་བྱེད་པའི་ཚེ་སངས་རྒྱས་མཐོང་བའི་ གཏེར་ཟད་མི་ཤེས་པའང་རབ་ཏུ་འཐོབ་བོ། །གཟུངས་འཁྲུལ་པ་མེད་པའི་གཏེར་ཟད་མི་ཤེས་པའང་རབ་ཏུ་འཐོབ་བོ། །སྨོན་ལམ་ཟད་མི་ཤེས་པས་ཆོས་ཐམས་ཅད་ཤིན་ཏུ་ རྟོགས་པའི་གཟུངས་ཀྱང་རབ་ཏུ་འཐོབ་བོ། །སྙིང་རྗེ་ཆེན་པོས་འགྲོ་བ་ཐམས་ཅད་ཡོངས་སུ་སྐྱོབ་པའི་གཏེར་ཟད་མི་ཤེས་པའང་རབ་ཏུ་འཐོབ་བོ། །ཏིང་ངེ་འཛིན་གྱི་རྒྱུད་ཀྱི་གཏེར་ ཟད་མི་ཤེས་པའང་རབ་ཏུ་འཐོབ་བོ། །འགྲོ་བ་ཐམས་ཅད་ཚིམ་པར་བྱ་བའི་བསོད་ནམས་ཀྱི་གཏེར་ཟད་མི་ཤེས་པའང་རབ་ཏུ་འཐོབ་བོ། །ཆོས་ཐམས་ཅད་ཡང་དག་པ་ཇི་ལྟ་ བ་བཞིན་དུ་བརྟག་པའི་ཡེ་ཤེས་ཀྱི་གཏེར་ཟད་མི་ཤེས་པའང་རབ་ཏུ་འཐོབ་བོ། །རྣམ་པར་སྨིན་པ་ལ་གནས་པ་མངོན་པར་སྒྲུབ་པའི་གཏེར་ཟད་མི་ཤེས་པའང་རབ་ཏུ་འཐོབ་བོ། །སངས་ རྒྱས་ཀྱི་བྱིན་གྱི་རླབས་མཐའ་ཡས་པའི་གཏེར་ཟད་མི་ཤེས་པའང་རབ་ཏུ་འཐོབ་བོ། །འཇིག་རྟེན་གྱི་ཁམས་མཐའ་དང་དབུས་མེད་པར་གཏོགས་པ་ལ་འཇུག་པའི་གཏེར་ཟད་མི་ཤེས་ པའང་རབ་ཏུ་འཐོབ་བོ། །དེ་ལྟར་གཏེར་རབ་ཏུ་ཐོབ་ཅིང་བསོད་ནམས་དང༌། ཡེ་ཤེས་ཀྱི་ཚོགས་ཟད་མི་ཤེས་པ་དང་ལྡན་པ་དེ་དག་ཡེ་ཤེས་ཆེན་པོའི་དཀྱིལ་འཁོར་ཡོངས་སུ་དག་ པས༑ སེམས་ཅན་རྣམས་ལ་བསམ་པ་ཇི་ལྟ་བ་བཞིན་དུ་ཆོས་ཀྱི་གཏེར་གྱི་སྦྱིན་པ་བྱེད་དོ། །དེ་ལ་རྒྱལ་བའི་སྲས། བྱང་ཆུབ་སེམས་དཔའ་རྣམས་སེམས་ཅན་རྣམས་ཀྱི་བསམ་ པ་ཇི་ལྟ་བ་བཞིན་དུ་ཇི་ལྟར་འཇུག་ཅེ་ན། སྦྱོར་བ་ཇི་ལྟ་བུར་རྒྱུ་བ་དང༌། རྒྱུ་དང་རྐྱེན་ཇི་ལྟ་བ་དང༌། སེམས་དང་སེམས་ལས་བྱུང་བའི་སྦྱོར་བ་ཇི་ལྟ་བ་ལས་སེམས་ཅན་རྣམས་ཀྱི་ བསམ་པ་ཇི་ལྟ་བ་བཞིན་དུ་འཇུག་སྟེ། དེ་དག་དེ་ལྟར་བསམ་པ་ལ་ཞུགས་པ་རྣམས་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་ཤེས་ཤིང་ཆོས་ཡང་དག་པར་སྟོན་ ཏེ༑ དེ་དག་འདོད་ཆགས་ཀྱི་བསམ་པ་རྣམ་པར་བཟློག་པའི་ཕྱིར་མི་སྡུག་པ་ཡང་དག་པར་སྟོན་ཏོ། །ཞེ་སྡང་གི་བསམ་པ་རྣམ་པར་བཟློག་པའི་ཕྱིར་བྱམས་པ་ཆེན་པོའི་སྦྱོར་བ་ཡང་ ༄༅། །དག་པར་སྟོན་ཏོ། །གཏི་མུག་གི་བསམ་པ་རྣམ་པར་བཟློག་པའི་ཕྱིར་ཆོས་རྣམ་པར་འབྱེད་པ་ལ་མཁས་པ་ཡང་དག་པར་སྟོན་ཏོ། །ཆ་མཉམ་པ་རྣམ་ པར་བཟློག་པའི་ཕྱིར་ཡེ་ཤེས་ཀྱི་ཁྱད་པར་དང་ལྡན་པའི་ཆོས་ཀྱི་སྒོ་ཡང་དག་པར་སྟོན་ཏོ། །འཁོར་བའི་བསམ་པ་རྣམ་པར་བཟློག་པའི་ཕྱིར་སྡུག་བསྔལ་གསུམ་དང་ལྡན་པ་ ཡང་དག་པར་སྟོན་ཏོ། །གནས་ཀྱི་བསམ་པ་རྣམ་པར་བཟློག་པའི་ཕྱིར་གནས་མེད་པའི་ཆོས་ཀྱི་སྒོ་ཡང་དག་པར་སྟོན་ཏོ། །ཞུམ་པའི་བསམ་པ་རྣམ་པར་བཟློག་པའི་ཕྱིར་རྒྱ་ ཆེན་པོའི་ཡུལ་ཡང་དག་པར་སྟོན་ཏོ། །བདག་གི་ང་རྒྱལ་གྱིས་བཅོམ་པའི་བསམ་པ་རྣམ་པར་བཟློག་པའི་ཕྱིར་ཆོས་ཀྱི་མཉམ་པ་ཉིད་ཡང་དག་པར་སྟོན་ཏོ། །གཡོ་དང་ སྒྱུས་མི་མཉམ་པའི་བསམ་པ་རྣམ་པར་བཟློག་པའི་ཕྱིར་བྱང་ཆུབ་སེམས་དཔའི་བསམ་པ་མཉམ་པ་ཉིད་དང༌། ཞི་བའི་གནས་ཀྱི་བསམ་པ་མངོན་པར་སྒྲུབ་པ་ཡང་དག་ པར་སྟོན་ཏོ། །དེ་དག་ནི། དེ་ལྟར་སེམས་ཅན་རྣམས་ལ་བསམ་པ་ཇི་ལྟ་བ་བཞིན་དུ་ཆོས་ཀྱི་གཏེར་ཡང་དག་པར་སྟོན་ཏེ། དེ་ཡང་དོན་དབྱེར་མེད་པ་ཡང་དག་པར་སྟོན་ཏོ། ། ཡི་གེའི་མཚམས་འབྱོར་བར་སྦྱར་བས་ཡང་དག་པར་སྟོན་ཏོ། །ཤེས་པ་རྣམ་པར་དབྱེ་བས་ཡང་དག་པར་སྟོན་ཏོ། །བསྟན་པ་སྔ་ཕྱི་མ་འདྲེས་པས་ཡང་དག་པར་སྟོན་ཏོ། ། ཆོས་ཀྱི་ཚུལ་དང་ཚུལ་མ་ཡིན་པའི་བྱེ་བྲག་དབྱེར་མེད་པས་ཡང་དག་པར་སྟོན་ཏོ། །མཚན་ཉིད་ཀྱི་ཕྱག་རྒྱ་རྣམ་པར་མི་འཁྲུག་པས་ཡང་དག་པར་སྟོན་ཏོ། །ཆོས་རབ་ཏུ་དགོད་པ་རྒྱུན་ ཆད་པ་མེད་པས་ཡང་དག་པར་སྟོན་ཏོ། །མཐའ་ཡས་པ་སྦྱད་[*SPYAD?] པས་ཡང་དག་པར་སྟོན་ཏོ། །ཐེ་ཚོམ་ཐམས་ཅད་ཤིན་ཏུ་གཅད་པའི་ཕྱིར་ཡང་དག་པར་སྟོན་ཏོ། །དབང་པོའི་རྒྱུད་ལ་ འཇུག་པའི་ཕྱིར་ཡང་དག་པར་སྟོན་ཏོ། །དེ་བཞིན་གཤེགས་པའི་ཕྱག་རྒྱ་ལ་དགོད་པར་གཞོལ་བས་ཡང་དག་པར་སྟོན་ཏོ། །ཡང་དག་པའི་མཐའ་མཚན་ཉིད་མེད་པ་རྣམ་པར་མི་ འཁྲུག་པས་ཡང་དག་པར་སྟོན་ཏོ། །ཆོས་ཀྱི་དབྱིངས་ལ་ཡང་དག་པར་གཞོལ་བས་ཡང་དག་པར་སྟོན་ཏོ། །ཆོས་ཀྱི་རྔ་ཡང་དག་པར་བརྡུང་བས་ཡང་དག་པར་སྟོན་ཏོ། །གནས་ཐམས་ ཅད་ཡང་དག་པར་སྤངས་པས་ཡང་དག་པར་སྟོན་ཏོ། །དེ་བཞིན་གཤེགས་པ་ཐམས་ཅད་རྗེས་སུ་དྲན་པ་མི་གཏོང་བས་ཡང་དག་པར་སྟོན་ཏོ། །ཚིག་དང་སྐད་དང་སྒྲ་དང་ངག་གི་ལམ་ ཐམས་ཅད་མཉམ་པ་ཉིད་ལ་མི་གནས་པས་ཡང་དག་པར་སྟོན་ཏོ། །རྣམ་པར་མི་རྟོག་པའི་དབྱིངས་ཀྱི་རྗེས་སུ་འགྲོ་བས་ཡང་དག་པར་སྟོན་ཏོ། །དཔེ་ཐམས་ཅད་རྣམ་པར་དགོད་ པས་རྒྱུད་དང་མི་འགལ་བར་བརྟན་པར་བྱ་བས་ཡང་དག་པར་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་རང་གི་ལུས་སུ་སེམས་པ་ལ་ཡང་དག་ ༄༅། །པར་གཞོལ་བས་ཡང་དག་པར་སྟོན་ཏོ། །དེ་ལྟར་སེམས་ཅན་ལ་ཆོས་ཡང་དག་པར་སྟོན་ཅིང་རྟག་ཏུ་རྒྱུན་མི་འཆད་པར་ཆོས་ཀྱི་ནན་ཏན་གྱི་མཚན་ཉིད་ ཀྱི་རྗེས་སུ་འབྲང་བ་དང༌། རང་གི་དོན་གཏིང་ཚུགས་པར་བྱེད་པ་དང༌། ཕ་རོལ་ཏུ་ཕྱིན་པའི་ཕྱོགས་མི་གཏོང་བས་རྒྱ་ཆེན་པོའི་ཕ་རོལ་ཏུ་ཕྱིན་པའི་ཐེག་པ་ཡང་དག་པར་སྒྲུབ་བོ། ། དེ་ལའང་སེམས་ཅན་ཐམས་ཅད་ཚིམ་པར་བྱ་བ་དང༌། ཡོ་བྱད་ཀྱིས་ཡོངས་སུ་བསྟུད་པ་དང༌། སྦྱོར་བ་མཉམ་པར་ཡོངས་སུ་གཏོང་བས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་དག་ པར་བྱེད་དོ། །ཡང་དག་པར་བླངས་པ་མི་གཏོང་བ་དང༌། གནས་མེད་པ་དང༌། ང་རྒྱལ་མེད་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པར་བྱེད་དོ། །ཉེས་པ་ཐམས་ཅད་ ཁྱད་དུ་གསོད་པ་དང༌། སེམས་ཅན་ཐམས་ཅད་ཀྱིས་མི་འཁྲུགས་པ་དང༌། མཉམ་པ་ཉིད་ལ་གཞོལ་བ་དང༌། མཐོན་དམན་མེད་པ་དང༌། ཟད་མི་ཤེས་པའི་ས་མཉམ་པར་ འཛིན་པས་བཟོད་པའི་ཕ་རོལ་ཏུ་ཕྱིན་པ་ཡོངས་སུ་དག་པར་བྱེད་དོ། །བརྩམ་པ་ཆེན་པོར་རྩོམ་པ་དང༌། བརྩམ་པ་ཐམས་ཅད་ལ་ཞུམ་པ་མེད་པ་དང༌། སྦྱོར་བ་ཕྱིར་མི་ལྡོག་ པ་དང༌། ཡིད་ལ་བྱེད་པ་ཕྱིར་མི་འགྱུར་བ་དང༌། མཐུ་མཐའ་ཡས་པ་དང༌། སྟོབས་ལ་ཐུབ་པ་མེད་པ་དང༌། སྔོན་དུ་འདོར་བ་མི་འཕྲོག་པ་དང༌། དད་པའི་མཐུ་ཆེན་པོ་དང༌། བླང་ པ་དང་དོར་བ་མེད་པའི་ཚོགས་ཐམས་ཅད་ཡོངས་སུ་རྒྱས་པར་བྱ་བ་དང༌། ཐམས་ཅད་མཁྱེན་པའི་སྒོ་ཉམས་པ་མེད་པ་ལ་ཡང་དག་པར་འཇུག་པས་བརྩོན་འགྲུས་ཀྱི་ཕ་རོལ་ཏུ་ ཕྱིན་པ་ཡོངས་སུ་དག་པར་བྱེད་དོ། །འདོད་པའི་ཡོན་ཏན་ཐམས་ཅད་ཀྱི་འདུ་འཛི་ཡོངས་སུ་སྦྱོང་བ་དང་མི་འབྲལ་བ་དང༌། རིམ་གྱིས་བསམ་གཏན་དང་ཏིང་ངེ་འཛིན་མངོན་པར་ སྒྲུབ་པ་དང༌། གནས་མེད་ཅིང་བླང་བ་མེད་པ་ཤིན་ཏུ་རྟོགས་པ་དང༌། ཉོན་མོངས་པ་ཐམས་ཅད་རབ་ཏུ་སེལ་པ་དང༌། ཏིང་ངེ་འཛིན་སྒོ་མཐའ་ཡས་པ་མངོན་པར་སྒྲུབ་པ་དང༌། མངོན་པར་ཤེས་པ་ཆེན་པོས་རྣམ་པར་འཕྲུལ་པའི་རྗེས་སུ་འགྲོ་བ་དང༌། རིམ་གྱིས་རྣམ་པར་སྤོང་བའི་ཏིང་ངེ་འཛིན་གྱི་སྒོ་ལ་རབ་ཏུ་འཇུག་པ་དང༌། ཏིང་ངེ་འཛིན་གཅིག་ལ་སྒོ་ མཐའ་ཡས་པ་རབ་ཏུ་འཇུག་པ་དང༌། ཏིང་ངེ་འཛིན་གྱི་སྤྱོད་ཡུལ་ཐམས་ཅད་ཤེས་པ་དང༌། དེའི་ཡུལ་གྱི་རྗེས་སུ་རབ་ཏུ་ཞུགས་པ་དང༌། ཏིང་ངེ་འཛིན་དང་སྙོམས་པར་འཇུག་པ་ ཐམས་ཅད་ཡེ་ཤེས་ཀྱི་ཕྱག་རྒྱ་མི་འཁྲུག་པའི་ཐམས་ཅད་མཁྱེན་པའི་ས་ལ་ཉེ་བར་གྱུར་པས་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་དག་པར་བྱེད་དོ། །སངས་རྒྱས་ཀྱི་ཆོས་ ཐམས་ཅད་མཉན་པ་དང༌། གཟུང་བ་དང༌། བླང་བ་དང༌། བཅང་བ་དང༌། དགེ་བའི་བཤེས་གཉེན་ཐམས་ཅད་བསྙེན་བཀུར་བས་ཡོངས་སུ་མི་སྐྱོ་བ་དང༌། ཐོས་པ་ཐམས་ཅད་ ༄༅། །ཀྱིས་མི་ངོམ་པ་དང༌། ཇི་ལྟར་ཐོས་པ་ལ་ཚུལ་བཞིན་དུ་རྟོག་པ་དང༌། དེ་ལ་མངོན་སུམ་དུ་མཉམ་པར་གཞོག་པ་དང༌། སྒྲོ་འདོགས་པའི་ལྟ་བ་ཐམས་ ཅད་དང་བྲལ་བ་དང༌། ཆོས་ཐམས་ཅད་རྣམ་པར་འབྱེད་པ་ལ་མཁས་པ་དང༌། མཚན་ཉིད་ཀྱི་ཕྱག་རྒྱ་ཐ་མི་དད་པ་དང༌། དེ་བཞིན་གཤེགས་པའི་སྒོ་ནས་ལྷུན་གྱིས་གྲུབ་པར་ སྒོམ་ཞིང་རྣམ་པར་སྒོམ་པ་དང༌། སྟོབས་ལ་འཇུག་པ་དང༌། ཐམས་ཅད་མཁྱེན་པའི་ཡེ་ཤེས་ལ་འཇུག་པ་རྒྱུན་མི་འཆད་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་སྒོ་ཀུན་དང་ ལྡན་པས་ཐམས་ཅད་མཁྱེན་པའི་སྒོར་འཇུག་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པར་བྱེད་དོ། །འཇིག་རྟེན་གྱི་བྱ་བའི་རྒྱུད་ཐམས་ཅད་སྟོན་པ་དང༌། སེམས་ ཅན་ཡོངས་སུ་སྨིན་པས་ཡོངས་སུ་མི་སྐྱོ་བ་དང༌། བསམ་པ་བཞིན་དུ་བྱ་བ་སྟོན་པ་དང༌། བྱ་བ་ཐམས་ཅད་ལ་མངོན་པར་ཆགས་པ་མེད་པ་དང༌། བྱིས་པའི་སྤྱོད་པ་དང༌། འཕགས་ པའི་སྤྱོད་པ་བསམ་པ་ཇི་ལྟ་བ་བཞིན་དུ་སྟོན་པ་དང༌། འཁོར་བ་དང་མྱ་ངན་ལས་འདས་པ་ཉེ་བར་སྟོན་པ་དང༌། སྦྱོར་བ་ཐམས་ཅད་ཤིན་ཏུ་བརྟགས་པས་རྒྱུ་བ་དང༌། རྒྱན་ ཐམས་ཅད་བསྟན་པ་གནས་མེད་པ་དང༌། འགྲོ་བ་ཐམས་ཅད་ཀྱི་རྗེས་སུ་འགྲོ་ཞིང་རྗེས་སུ་འབྲང་བ་དང༌། སེམས་ཅན་ཐམས་ཅད་སྒྲོལ་བའི་སྤྱོད་པས་ཐབས་ལ་མཁས་ པའི་ཕ་རོལ་ཏུ་ཕྱིན་པ་ཡོངས་སུ་སྦྱོང་ངོ༌། །སེམས་ཅན་གྱི་ཁམས་མཐར་ཐུག་པར་ཡོངས་སུ་སྨིན་པར་བྱ་བ་དང༌། འཇིག་རྟེན་གྱི་ཁམས་མཐར་ཐུག་པར་ཡོངས་སུ་སྦྱང་བ་དང༌། དེ་བཞིན་གཤེགས་པ་མཐར་ཐུག་པར་མཆོད་པ་དང༌། ཆོས་ཆགས་པ་མེད་པའི་མཐར་ཐུག་པར་རྣམ་པར་འཚང་རྒྱ་བ་དང༌། ཆོས་ཀྱི་དབྱིངས་ཀྱི་མཐར་ཐུག་པའི་སྤྱོད་པའི་དཀྱིལ་ འཁོར་ཡོངས་སུ་རྫོགས་པར་བྱ་བ་དང༌། བསྐལ་པ་ཕྱི་མའི་མཐར་ཐུག་པར་རབ་ཏུ་གནས་པ་དང༌། སེམས་བསྐྱེད་པའི་མཐར་ཐུག་པར་སྟོབས་ལ་འཇུག་པ་དང༌། འགྲོ་བ་དང་ ལྡོག་པ་མཐར་ཐུག་པར་མངོན་པར་འཚང་རྒྱ་བ་དང༌། ཞིང་གི་གནས་ཀྱི་མཐར་ཐུག་པར་ཐམས་ཅད་མཐོང་བ་དང༌། དེ་བཞིན་གཤེགས་པའི་ཡེ་ཤེས་ཀྱི་མཐར་ཐུག་པ་རབ་ ཏུ་ཐོབ་པར་བྱ་བས་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་དག་པར་བྱེད་དོ། །བསམ་པའི་སྟོབས་ཀུན་ནས་ཉོན་མོངས་པ་མེད་པ་དང༌། ལྷག་པའི་བསམ་པའི་སྟོབས་དབང་དུ་གྱུར་ ཅིང་ཐུབ་པ་མེད་པ་དང༌། སྙིང་རྗེ་ཆེན་པོའི་སྟོབས་སྐྱོ་བ་མེད་པ་དང༌། བྱམས་པ་ཆེན་པོའི་སྟོབས་སྙོམས་པའི་སྦྱོར་བ་ཅན་དང༌། གཟུངས་ཀྱི་སྟོབས་དོན་ཐམས་ཅད་ཀྱི་སྦྱོར་བ་ལ་ བསྒྲིབས་པ་མེད་པ་དང༌། སྤོབས་པའི་སྟོབས་འགྲོ་བ་ཐམས་ཅད་ཚིམ་པར་བྱེད་པ་དང༌། ཕ་རོལ་ཏུ་ཕྱིན་པའི་སྟོབས་ཐེག་པ་ཐམས་ཅད་ཀྱི་རྒྱན་བྱེད་པ་དང༌། སྨོན་ལམ་གྱི་སྟོབས་ ༄༅། །གཅད་དུ་མི་རུང་བ་དང༌། མངོན་པར་ཤེས་པའི་སྟོབས་ཚད་མེད་པ་མངོན་པར་སྒྲུབ་པ་དང༌། སངས་རྒྱས་ཀྱི་བྱིན་གྱི་རླབས་ལ་མོས་པ་དམ་པའི་སྟོབས་ རབ་ཏུ་འཛིན་པས་སྟོབས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པར་བྱེད་དོ། །འདོད་ཆགས་ཀྱི་སྤྱོད་པ་ཁོང་དུ་ཆུད་པ་དང༌། ཞེ་སྡང་གི་སྤྱོད་པ་རྗེས་སུ་རྟོགས་པ་དང༌། གཏི་མུག་གི་ སྤྱོད་པ་རབ་ཏུ་རྟོགས་པ་དང༌། ཆ་མཉམ་པའི་སྤྱོད་པ་རྗེས་སུ་ཤེས་པ་དང༌། སློབ་པའི་སེམས་ཅན་གྱི་སྤྱོད་པ་རབ་ཏུ་རྟོགས་པ་དང༌། སྐད་ཅིག་གཅིག་གིས་སེམས་ཅན་མཐའ་ ཡས་པའི་སྤྱོད་པ་རྣམ་པར་རྟོགས་པ་དང༌། སེམས་དང་བསམ་པ་མཐའ་ཡས་པ་ཐམས་ཅད་ཤེས་པར་བྱེད་པ་དང༌། ཆོས་ཐམས་ཅད་ལ་ཡང་དག་པ་ཇི་ལྟ་བ་བཞིན་དུ་རྟོགས་ པ་དང༌། དེ་བཞིན་གཤེགས་པའི་སྟོབས་ཀྱི་རྗེས་སུ་འཇུག་པ་དང༌། ཆོས་ཀྱི་དབྱིངས་ཀྱི་སྒོ་ཐམས་ཅད་དང་ལྡན་པ་ཁོང་དུ་ཆུད་པས་ཡེ་ཤེས་ཀྱི་ཕ་རོལ་ཏུ་ཕྱིན་པ་ཡོངས་སུ་ དག་པར་བྱེད་དོ། །བམ་པོ་ཉི་ཤུ་ལྔ་པ། དེ་དག་དེ་ལྟར་ཕ་རོལ་ཏུ་ཕྱིན་པ་རྣམས་ཡོངས་སུ་སྦྱོང་ཞིང༌། ཕ་རོལ་ཏུ་ཕྱིན་པ་དེ་དག་ཡོངས་སུ་རྫོགས་པར་བྱེད་པ་དང༌། ཕ་རོལ་གྱི་ཕྱོགས་མི་གཏོང་བ་དང༌། བྱང་ཆུབ་སེམས་དཔའི་ཐེག་པ་རྒྱ་ཆེན་པོའི་རྒྱན་དང་ལྡན་པ་ལ་གནས་ཤིང་སེམས་ཅན་གྱི་ཁམས་ཇི་ལྟར་དམ་བཅས་པ་བཞིན་དུ་ ཡང་དག་པར་སྒྲོལ་ལོ། །དེ་དག་དགེ་བའི་ལས་ཤིན་ཏུ་བསགས་པ་སྟོན་པས་ངན་སོང་དུ་འགྲོ་བའི་སེམས་ཅན་སྒྲོལ་ལོ། །བརྩམ་པ་ཆེན་པོ་ལ་གཟུད་པས་སེམས་ཅན་གྱི་ཁམས་ མི་ཁོམ་པར་འགྲོ་བ་སྒྲོལ་ལོ། །ལྷག་མཐོང་ཉེ་བར་བསྟབས་པས་གཟུགས་ཀྱི་ཁམས་ན་འཁོད་པའི་སེམས་ཅན་གྱི་ཁམས་སྒྲོལ་ལོ། །ཕྲ་བའི་ཡེ་ཤེས་ཉེ་བར་བསྟབས་པས་གཟུགས་ མེད་པའི་ཁམས་སུ་སྐྱེས་པའི་སེམས་ཅན་རྣམས་སྒྲོལ་ལོ། །ཞི་བའི་ཚུལ་ཉེ་བར་བསྟབས་པས་ཉན་ཐོས་དང༌། རང་སངས་རྒྱས་ཀྱི་ཐེག་པ་ལ་མོས་པའི་སེམས་ཅན་གྱི་ཁམས་སྒྲོལ་ ལོ༑ ༑སྟོབས་བཅུའི་རྒྱན་ཆེན་པོ་དང་ལྡན་པ་བསྟབས་པས་ཐེག་པ་ཆེན་པོ་ལ་མོས་པའི་སེམས་ཅན་གྱི་ཁམས་སྒྲོལ་ལོ། །དེ་ལྟར་ན། སྔོན་ལས་དང་པོ་པའི་ས་ལ་གནས་པའི་ཚེ་སེམས་ ཅན་གཡང་ས་ཆེན་པོ་ནས་ལྷུང་བ་རྣམ་པ་ཐ་དད་པར་གྱུར་པ་ཇི་ལྟ་བ་བཞིན་དུ་ཤེས་ཏེ་སྒོ་སྣ་ཚོགས་ནས་གཟུད་པར་བྱའོ། །ཞེས་སེངྒེའི་སྒྲ་བསྒྲགས་པ་དེ་བཞིན་དུ་ཡེ་ཤེས་ཐོབ་ པ་རྣམས་སེམས་ཅན་ཐམས་ཅད་བསྒྲལ་བའི་ཕྱིར་རབ་ཏུ་ཞུགས་པ་ཡིན་ནོ། །ཀྱེ་རྒྱལ་བའི་སྲས། །བྱང་ཆུབ་སེམས་དཔའ་ཡེ་ཤེས་དེ་ལྟ་བུ་ལ་ཞུགས་པ་ནི། རྟག་ཏུ་རྒྱུན་མི་ གཅོད་པར་སངས་རྒྱས་ཀྱི་རིགས་དང༌། ཆོས་ཀྱི་རིགས་དང༌། དགེ་འདུན་གྱི་རིགས་མི་གཅོད་པའི་ཕྱིར་ཞུགས་པ་ཡིན་ཏེ། དེ་དག་བྱང་ཆུབ་ཀྱི་སེམས་གཞན་གྱི་སེམས་ཀྱི་རྒྱུད་ལ་ ༄༅། །གཞོལ་བས་སངས་རྒྱས་ཀྱི་རིགས་མི་གཅོད་པ་ཡིན། ཆོས་ཀྱི་མཛོད་རྣམ་པར་འགྲེལ་པས་ཆོས་ཀྱི་རིགས་མི་གཅོད་པ་ཡིན། བསྟན་པའི་ཚུལ་དང་ འགལ་བར་མི་བྱེད་པས་དགེ་འདུན་གྱི་རིགས་མི་གཅོད་པ་ཡིན། སྨོན་ལམ་ཆེན་པོ་ཡང་དག་པར་བརྗོད་པས་སངས་རྒྱས་ཀྱི་རིགས་མི་གཅོད་པ་ཡིན། རྟེན་ཅིང་འབྲེལ་པར་ འབྱུང་བའི་ཚུལ་ཡང་དག་པར་སྟོན་པས་ཆོས་ཀྱི་རིགས་མི་གཅོད་པ་ཡིན། སྙིང་པོ་ཐོབ་པར་བྱེད་པའི་ཆོས་ལ་བརྩོན་པས་དགེ་འདུན་གྱི་རིགས་མི་གཅོད་པ་ཡིན། དེ་བཞིན་ གཤེགས་པའི་ས་བོན་སེམས་ཅན་གྱི་ཞིང་ལ་འདེབས་པས་སངས་རྒྱས་ཀྱི་རིགས་མི་གཅོད་པ་ཡིན། དམ་པའི་ཆོས་ཡོངས་སུ་འཛིན་པས་ཆོས་ཀྱི་རིགས་མི་གཅོད་པ་ཡིན། ཚོགས་ཆེན་པོ་ཡོངས་སུ་སྡུད་པ་ལ་མི་སྐྱོ་བས་དགེ་འདུན་གྱི་རིགས་མི་གཅོད་པ་ཡིན། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ ཀྱི་མཛད་པ་དྲན་པའི་ཕྱིར་རྟག་ཏུ་དེ་བཞིན་གཤེགས་པའི་གདམས་ངག་དང༌། རྗེས་སུ་བསྟན་པ་མི་གཏོང་པས་སངས་རྒྱས་དང༌། ཆོས་དང༌། དགེ་འདུན་གྱི་རིགས་མི་གཅོད་པ་ཡིན། དེ་དག་དེ་ལྟར་སྐྱབས་གསུམ་གྱི་རིགས་མི་གཅོད་པའི་ཕྱིར་ཞུགས་པས་རྩོམ་པ་ཐམས་ཅད་ཁ་ན་མ་ཐོ་བ་མེད་པ་ཡིན་ཏེ། བརྩམ་པ་གང་ཅི་རྩོམ་ཡང་རུང༌། དེ་དག་ཐམས་ཅད་དུ་ཐོགས་པ་མེད་ པར་ཐམས་ཅད་མཁྱེན་པའི་སྒོར་འབྱུང་བ་ཐོབ་བར་བྱེད་དོ། །དེ་དག་དེ་ལྟར་ལུས་ཀྱི་ལས་ཁ་ན་མ་ཐོ་བ་མེད་པ་དང༌། ངག་གི་ལས་ཁ་ན་མ་ཐོ་བ་མེད་པ་དང༌། ཡིད་ཀྱི་ལས་ཁ་ན་མ་ཐོ་བ་མེད་པ་ལ་གནས་པས་ དགེ་བའི་རྩ་བ་རྩོམ་པ་དོན་ཡོད་པར་རྩོམ་པ་ཡིན་ཏེ། སེམས་ཅན་གྱི་དོན་སྦྱོར་བ་དོན་ཡོད་པར་རྩོམ་མོ། །སེམས་ཅན་དོན་ཡོད་པར་འདུལ་བར་བྱེད་དོ། །ཆོས་དོན་ཡོད་པར་སྟོན་ ཏོ༑ ༑དེའི་ཆོས་བསྟན་པ་ཐམས་ཅད་ཀྱང་སེམས་ཅན་གྱི་བསམ་པ་ཚིམ་པར་བྱ་བ་ལ་ཐོགས་པ་མེད་པས་ཁོང་དུ་ཆུད་པར་འགྱུར་རོ། །དེའི་སེམས་བསྐྱེད་པ་གཅིག་ཙམ་ཡང་ལོག་ པར་མི་འགྱུར་ཏེ། སེམས་བསྐྱེད་པ་གཞན་ཐབས་དང་ཤེས་རབ་ཀྱིས་ཡོངས་སུ་ཟིན་པ་ཐམས་ཅད་ཀྱང་ཐམས་ཅད་མཁྱེན་པ་ཉིད་དུ་ཡོངས་སུ་བསྔོའོ། །དེ་དེ་ལྟར་ཆོས་དཀར་པོ་ བསགས་པ་དོན་ཡོད་པ་དེ་ལྟ་བུ་ལ་གནས་པས། རྒྱན་རྣམ་པར་ཕྱེ་བ་བཅུས་སེམས་བསྐྱེད་པ་ཐམས་ཅད་ཡོངས་སུ་བསྔོ་སྟེ། བཅུ་གང་ཞེ་ན། འདི་ལྟར་ལུས་ཀྱི་རྒྱན་སེམས་ཅན་ འདུལ་བ་ཇི་བཞིན་དུ་ཡང་དག་པར་སྟོན་པ་དང༌། ངག་གི་རྒྱན་ཐེ་ཚོམ་ཐམས་ཅད་གཅོད་པ་དང༌། སེམས་ཀྱི་རྒྱན་སྐད་ཅིག་གཅིག་གིས་ཏིང་ངེ་འཛིན་རྗེས་སུ་རྟོགས་པར་བྱེད་པ་དང༌། སངས་རྒྱས་ཀྱི་ཞིང་གི་རྒྱན་ཀུན་ནས་ཉོན་མོངས་པ་མེད་པ་དང༌། འོད་ཀྱི་རྒྱན་འོད་ཟེར་གྱི་དྲ་བ་མཐའ་དང་དབུས་མེད་པ་བཀྱེ་བས་འགྲོ་བ་ཐམས་ཅད་སྣང་བར་བྱེད་པ་དང༌། འཁོར་གྱི་ ༄༅། །དཀྱིལ་འཁོར་གྱི་རྒྱན་སེམས་ཅན་གྱི་རྣམ་པ་ཚད་མེད་པའི་ཚོགས་ཡོངས་སུ་མགུ་བར་བྱེད་པ་དང༌། རྫུ་འཕྲུལ་གྱི་རྣམ་པར་འཕྲུལ་པའི་རྒྱན་སེམས་ ཅན་གྱི་བསམ་པ་ཇི་ལྟ་བ་བཞིན་དུ་རྫུ་འཕྲུལ་གྱི་རྣམ་པར་འཕྲུལ་བ་དང༌། བསྟན་པའི་རྒྱན་མཁས་པའི་སྐྱེ་བོ་ཐམས་ཅད་ཀྱིས་ཡོངས་སུ་བཟུང་བ་དང༌། མྱ་ངན་ལས་འདས་ པའི་རྒྱན་མངོན་པར་སངས་རྒྱས་པ་གཅིག་གིས་ཕྱོགས་བཅུ་མ་ལུས་པར་རྒྱས་པར་འགེངས་པ་དང༌། ཆོས་བྱིན་གྱིས་བརླབ་པའི་རྒྱན་ཡུལ་དང༌། དུས་དང༌། སྣོད་ཇི་ལྟ་བ་ བཞིན་དུ་སྟོན་པ་དག་སྟེ། དེ་དག་རྒྱན་དེ་ལྟ་བུས་སེམས་བསྐྱེད་པ་ཐམས་ཅད་དུ་མངོན་པར་སྒྲུབ་པས་ལུས་དང༌། ངག་དང༌། ཡིད་ཀྱི་ལས་དོན་ཡོད་པ་དང༌། ཡེ་ཤེས་ཆེན་ པོ་དོན་ཡོད་པ་རབ་ཏུ་འཐོབ་སྟེ། དེ་དག་མཐོང་བས་ཀྱང་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་འགྱུར་བའི་ཕྱིར་སེམས་ཅན་རྣམས་ ལ་དོན་ཡོད་པ་ཡིན་ཏེ། ཐོས་པ་དང༌། བསྙེན་བཀུར་བ་དང༌། འགྲོགས་པ་དང༌། རྗེས་སུ་དྲན་པ་དང༌། རྗེས་སུ་རབ་ཏུ་བྱུང་བ་དང༌། ཆོས་སྟོན་པ་དང༌། དགེ་བའི་རྩ་བ་ལ་རྗེས་སུ་ ཡི་རང་པ་དང༌། དད་ཅིང་མོས་པ་དང༌། ཆུང་ངུ་ན་མིང་བརྗོད་པ་ཙམ་ཡང་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པའི་ཕྱིར་སེམས་ཅན་རྣམས་ ལ་དོན་དུ་འགྱུར་བ་ཡིན་ནོ། །ཀྱེ་རྒྱལ་བའི་སྲས། འདི་ལྟ་སྟེ། དཔེར་ན། རྩིའི་མིང་མཐོང་ན་བདེ་བ་ཞེས་བྱ་བ་དེ་མཐོང་མ་ཐག་ཏུ་སེམས་ཅན་རྣམས་ཀྱི་ལུས་ལ་ཞེན་པའམ། ལྟོར་ཟོས་ པའི་དུག་རབ་ཏུ་ཞི་བར་འགྱུར་རོ། །ཀྱེ་རྒྱལ་བའི་སྲས། དེ་བཞིན་དུ་ཆོས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་ཡང་མཐོང་མ་ཐག་ཏུ་སེམས་ཅན་རྣམས་ཀྱི་ཉོན་མོངས་པའི་དུག་ ཐམས་ཅད་བྱང་བར་འགྱུར་ཏེ། ཆོས་དཀར་པོའི་སྟོབས་ཀྱི་ཤུགས་ཀྱང་སྐྱེ་བར་འགྱུར་རོ། །ཀྱེ་རྒྱལ་བའི་སྲས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཉིད་དེ་ལྟ་བུ་དང་ ལྡན་ཞིང་ཆོས་དེ་དག་ལ་གནས་ཏེ་ཤེས་རབ་ཀྱི་འོད་ཆེན་པོས་མ་རིག་པའི་མུན་པ་བསལ་ནས་བདུད་ཀྱི་དཀྲུགས་མའི་འཁོར་ཐམས་ཅད་བྱམས་པ་དང༌། སྙིང་རྗེ་ཆེན་པོའི་སྟོབས་ཀྱིས་ ཕམ་པར་བྱས་ཏེ་ཡེ་ཤེས་དང༌། བསོད་ནམས་ཀྱི་སྟོབས་ཀྱི་ཤུགས་ཀྱིས་ཕས་ཀྱི་རྒོལ་བ་ཐམས་ཅད་ཟིལ་གྱིས་མནན་ནས་རྡོ་རྗེ་ལྟ་བུའི་ཏིང་ངེ་འཛིན་ལ་འཇུག་པས། སེམས་ཀྱི་དྲི་ མ་ཐམས་ཅད་དང༌། ཉོན་མོངས་པའི་ཕྱོགས་ཐམས་ཅད་བསལ་ནས་སྐྱོ་བ་མེད་པའི་སྟོབས་དང་ཤུགས་ཀྱི་དགེ་བའི་རྩ་བ་ཕུན་སུམ་ཚོགས་པ་ཐམས་ཅད་རབ་ཏུ་སྒྲུབ་སྟེ། སྔོན་ ཆད་སངས་རྒྱས་ཀྱི་ཞིང་ཡོངས་སུ་དག་པར་སྤྱད་པའི་སྟོབས་དང་ཤུགས་ཀྱིས་མི་ཁོམ་པ་དང༌། ངན་སོང་དང༌། ངན་འགྲོའི་ལམ་ཐམས་ཅད་རྣམ་པར་བཟློག་ནས་མངོན་པར་ཞེན་པ་ ༄༅། །མེད་པའི་སྟོབས་དང་ཤུགས་ཀྱིས་ཡེ་ཤེས་ཀྱི་དཀྱིལ་འཁོར་ཡོངས་སུ་སྦྱངས་ཏེ། རིམ་གྱིས་ཐབས་དང༌། ཤེས་རབ་ཀྱི་སྟོབས་དང་ཤུགས་ཀྱིས་བྱང་ཆུབ་ སེམས་དཔའི་ས་དང༌། ཕ་རོལ་ཏུ་ཕྱིན་པ་དང༌། ཏིང་ངེ་འཛིན་དང༌། མངོན་པར་ཤེས་པ་དང༌། རིག་པ་དང༌། མི་འཇིགས་པ་ཡོངས་སུ་དག་པ་མངོན་པར་བསྒྲུབས་ནས་ཆོས་དཀར་པོ་ ཐམས་ཅད་ཀྱི་སྟོབས་དང༌། ཤུགས་ཀྱིས་སངས་རྒྱས་ཐམས་ཅད་ཀྱི་མཚན་དང༌། དཔེ་བྱད་བཟང་པོ་དང༌། སྐུ་དང་གསུང་དང་ཐུགས་ཀྱི་རྒྱན་ཡོངས་སུ་དག་པ་མངོན་པར་སྒྲུབ་པ་ རབ་ཏུ་རྒྱས་པར་བྱས་ཏེ། ཡེ་ཤེས་ཀྱི་ཤེས་པར་བྱ་བའི་དབང་དང༌། བྱིན་གྱི་རླབས་ཀྱིས་དེ་བཞིན་གཤེགས་པའི་སྟོབས་དང༌། སངས་རྒྱས་ཀྱི་ཆོས་མ་འདྲེས་པ་ཐམས་ཅད་ མཉམ་པ་ཉིད་དུ་ཁོང་དུ་ཆུད་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་འཐོབ་ཅིང༌། ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ཡང་སྨོན་ལམ་གྱི་ ཁྱད་པར་ཇི་ལྟ་བ་བཞིན་དུ་འཐོབ་པར་འགྱུར་རོ། །སྔོན་གྱི་བྱིན་གྱི་རླབས་དང༌། ཡེ་ཤེས་ཀྱི་བྱིན་གྱི་རླབས་ཀྱིས་མངོན་པར་སངས་རྒྱས་ནས་སེམས་ཅན་རྣམས་ཀྱི་བསམ་པ་ ཇི་ལྟ་བ་བཞིན་དུ་སངས་རྒྱས་ཀྱི་ཞིང་བསྟན་ཏེ། འདུལ་བ་ཇི་ལྟ་བ་བཞིན་དུ་སེམས་ཅན་རྣམས་ལ་ཆོས་ཀྱི་འཁོར་ལོ་ཆེན་པོ་བསྐོར་ཅིང་མཐའ་ཡས་པའི་སེམས་ཅན་རྣམ་ པར་འདུལ་ལོ། །ཀྱེ་རྒྱལ་བའི་སྲས། དེ་ལྟར་བྱང་ཆུབ་སེམས་དཔའ་ཆོས་དེ་ལྟ་བུ་དང་ལྡན་པ་དག་ནི། ཚུལ་དེ་ལྟ་བུས་སངས་རྒྱས་ཐམས་ཅད་དང་མཉམ་པ་ཉིད་ཀྱི་བར་དུ་ཐོབ་པར་ འགྱུར་ཏེ། བྱང་ཆུབ་སེམས་དཔའི་སྤྱོད་པ་ཐོབ་ནས་ཀྱང་འཇིག་རྟེན་གྱི་ཁམས་མཐའ་ཡས་པ་དག་ཏུ་དམ་པའི་ཆོས་ཡོངས་སུ་འཛིན་ཅིང་ཆོས་སྨྲ་བ་ཆེན་པོའང་བྱེད་དོ། །དེ་ལྟར་ཆོས་ སྨྲ་བ་བྱེད་པའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱིན་གྱིས་བརླབས་པ་དེ་དག་ཆོས་ཀྱི་མཛོད་ཆེན་པོ་གཟུང་ཞིང་བསྲུང་བའི་ཕྱིར་ ཐ་དད་པ་ཡང་དག་པར་ཤེས་པས་ཆོས་ཀྱི་ཚུལ་རབ་ཏུ་དབྱེ་བའི་རྗེས་སུ་སོང་བའི་བྱང་ཆུབ་སེམས་དཔའི་ཚིག་གིས་འཁོར་གྱི་དཀྱིལ་འཁོར་མཐའ་ཡས་པར་བདག་གི་ལུས་ཀྱི་ རྒྱན་བྱིན་གྱིས་བརླབས་ཏེ། བསྟན་པ་མངོན་པར་སྒྲུབ་པ་རྣམ་པའི་མཆོག་ཐམས་ཅད་དང་ལྡན་པ་དང༌། ཐ་དད་པ་ཡང་དག་པར་ཤེས་པའི་མཁས་པ་མཐའ་ཡས་པ་དང༌། ཡེ་ ཤེས་མི་ཟད་པའི་སྒོར་འཇུག་པ་དང༌། དབྱངས་ཀྱི་དཀྱིལ་འཁོར་ཤིན་ཏུ་རྣམ་པར་ཕྱེ་བའི་བྱིན་གྱི་རླབས་དང༌། དབྱངས་གཅིག་བསྒྲགས་པས་འཁོར་གྱི་དཀྱིལ་འཁོར་ཐམས་ ཅད་མགུ་བར་བྱེད་པའི་དབྱངས་ཀྱི་ཡན་ལག་རྣམ་པར་དག་པ་བསམ་པ་དང༌། བག་ལ་ཉལ་བ་དང༌། ཤེས་པའི་ས་ཇི་ལྟ་བ་བཞིན་དུ་རྗེས་སུ་འབྲང་བ་དང༌། ལུས་ཀྱི་བྱིན་གྱི་རླབས་ ༄༅། །ཀྱིས་འཁོར་གྱི་དཀྱིལ་འཁོར་ཐམས་ཅད་ཀྱི་ནང་དུ་ཕྱིན་ཀྱང་ཟིལ་གྱིས་མི་ནོན་པ་དང༌། ལུས་ཀྱི་རྒྱན་སྒོ་ཐམས་ཅད་དུ་རྣམ་པར་བསྟན་པ་དང༌། འཁོར་གྱི་ དཀྱིལ་འཁོར་ཐམས་ཅད་ཀྱི་སེམས་དང༌། བསམ་པ་ཁོང་དུ་ཆུད་པས་རབ་ཏུ་རྟོགས་པ་དང༌། ཚིག་གྲོལ་བའི་བྱིན་གྱི་རླབས་ཀྱིས་བསྟན་པ་དང༌། ཆོས་འཆད་པའི་བྱིན་གྱི་ རླབས་ལ་མཁས་པས་ཆོས་ཀྱི་གཏམ་ཆེན་པོ་བྱེད་དེ། སྟོབས་དང་ཤུགས་ཀྱི་དབང་ཐུབ་པ་མེད་པ་དང༌། འཇིགས་པ་མེད་པའི་དབང་ཞུམ་པ་མེད་པ་དང༌། ཆོས་ཀྱི་དབང་ ཟིལ་གྱིས་མི་ནོན་པ་དང༌། ཡེ་ཤེས་ཀྱི་དབང་གཞན་གྱིས་མི་ཐུབ་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པའི་དབང་ཆོས་ཀྱི་མཚན་ཉིད་འཁྲུགས་པ་མེད་པ་དང༌། ཐ་དད་ པ་ཡང་དག་པར་ཤེས་པའི་དབང་མཚམས་སྦྱོར་བ་རྒྱུན་ཆད་པ་མེད་པར་བསམ་པ་ཤིན་ཏུ་རྟོགས་པ་དང༌། གཟུངས་ཀྱི་དབང་ཆོས་ཐམས་ཅད་རྣམ་པར་གདོན་མི་ཟ་བ་ལ་ འཇུག་པ་དང༌། སྨོན་ལམ་གྱི་དབང་དཔེ་སྣ་ཚོགས་ཀྱིས་བསྟན་པའི་ཚུལ་ཉེ་བར་སྒྲུབ་པ་ཤིན་ཏུ་བསྟན་པ་དང༌། སྙིང་རྗེ་ཆེན་པོའི་དབང་ཕྱིར་མི་ལྡོག་ཅིང་རྒྱུན་མ་ཆད་པ་དང༌། བྱམས་པ་ཆེན་པོའི་དབང་སྔོན་ཤིན་ཏུ་སྐྱེས་པས་བསམ་པ་ཐམས་ཅད་སིམ་པར་བྱེད་པའི་འོད་ཟེར་གྱི་དྲ་བ་ཆེན་པོ་གཏོང་བས་ཆོས་ཀྱི་གཏམ་ཆེན་པོ་བྱེད་དོ། །དེ་དག་ནི། དེ་བཞིན་གཤེགས་པ་སེངྒེའི་གདན་ལ་བཞུགས་ཤིང་ཆོས་ཀྱི་གཏམ་གསུང་བ་དང༌། བྱང་ཆུབ་སེམས་དཔའ་ཡེ་ཤེས་དང་སྨོན་ལམ་གྱི་ཁྱད་པར་དང་ལྡན་པ་མ་གཏོགས་པར་ སེམས་ཅན་གྱི་རིས་ན་བྱང་ཆུབ་སེམས་དཔའ་དེ་ལ་ཕྱིར་བརྒལ་བའམ། སྤྱི་གཙུག་བལྟ་བའམ། ཟིལ་གྱིས་མནན་པའམ། དྲི་བའི་ཚོགས་ཡོངས་སུ་དྲི་བས་ཐུབ་པར་བྱ་བར་ནུས་ པའི་སེམས་ཅན་གང་ཡང་མེད་དེ། དེ་ནི། གནས་མེད་དོ། །ཀྱེ་རྒྱལ་བའི་སྲས། གལ་ཏེ་བྱང་ཆུབ་སེམས་དཔའ་དབང་དེ་ལྟ་བུ་ཐོབ་པ་ལ་འཇིག་རྟེན་གྱི་ཁམས་བརྗོད་དུ་མེད་པ་ཙམ་དུ་ ཡངས་པའི་འཁོར་གྱི་དཀྱིལ་འཁོར་ཞིག་ཡོད་ལ། འཁོར་གྱི་དཀྱིལ་འཁོར་དེ་ཡང་སེམས་ཅན་སྟོང་གསུམ་གྱི་བདག་པོའི་གཟི་བརྗིད་ཐོབ་པ་ཤ་སྟག་གིས་གང་བ་ཞིག་ཡིན་ན་ ཡང་དེ་དག་ཐམས་ཅད་བྱང་ཆུབ་སེམས་དཔའ་འཁོར་གྱི་དཀྱིལ་འཁོར་དུ་འོངས་མ་ཐག་ཏུ་ལུས་བསྟན་པའི་དབང་གིས་ཟིལ་གྱིས་མནན་ཏེ། བྱམས་པ་ཆེན་པོའི་དབང་གིས་ལུས་ ཀྱི་གཞི་ཚིམ་པར་བྱས་ནས་ཡེ་ཤེས་ཆེན་པོའི་དབང་གིས་སེམས་དང་བསམ་པ་རྣམ་པར་ཤེས་པར་བྱས་ཏེ་མི་འཇིགས་པའི་བསམ་པ་ཆེན་པོས་ཆོས་སྟོན་པ་བྱེད་ཅིང༌། སྤོབས་ པ་ཆེན་པོའི་དབང་གིས་སེམས་ཅན་ཚིམ་པར་བྱེད་དོ། །ཀྱེ་རྒྱལ་བའི་སྲས། དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེ་ནི། ཡེ་ཤེས་ཀྱི་དཀྱིལ་འཁོར་ཚད་མེད་པ་དང་ ༄༅། །ལྡན༑ ཆོས་རྣམ་པར་འབྱེད་པ་ཤིན་ཏུ་རྣམ་པར་ཕྱེ་བ་ལ་མཁས་པ་དང་ལྡན། དྲན་པའི་སྟོབས་དང་ཤུགས་མ་ཉམས་ཤིང་རྒྱ་ཆེ་བ་དང་ལྡན། ཆོས་ ཐམས་ཅད་ཀྱི་ཚུལ་རྣམ་པར་གདོན་མི་ཟ་བར་བཟུང་ཞིང་བླངས་པས་རྟོགས་པར་མཁས་པ་དང་ལྡན། བྱང་ཆུབ་སེམས་དཔའི་ཐབས་མཁས་པ་མཐའ་དབུས་མེད་པ་དང་ལྡན། ཆོས་ཀྱི་མཚན་ཉིད་བསྒྲིབས་པ་མེད་པའི་ཆོས་སྟོན་པ་ལ་མཁས་པ་དང་ལྡན། མོས་པ་ལ་མཁས་པ་སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་བླངས་པ་དང་ལྡན། དུས་ གསུམ་གྱི་དེ་བཞིན་གཤེགས་པའི་དཀྱིལ་འཁོར་དུ་ཡང་དག་པར་གཞོལ་བའི་ཡེ་ཤེས་ཀྱི་བྱིན་གྱི་རླབས་ལ་མཁས་པ་དང་ལྡན། སེམས་ཅན་ཐམས་ཅད་ཀྱི་གཙོ་བོ་ འདས་པ་དང༌། མ་བྱོན་པ་དང༌། ད་ལྟར་བྱུང་བ་རྣམས་དང་རྒྱུད་ཀྱི་ཚུལ་གཅིག་ཏུ་གྱུར་པའི་བསམ་པ་བཟང་པོ་རྣམ་པར་དག་པ་ལ་མཁས་པ་དང་ལྡན་པས་ཆོས་སྨྲ་བ་ཆེན་པོ་ བྱེད་ཅིང༌། དེ་བཞིན་གཤེགས་པ་རྣམས་ཀྱི་ཆོས་ཀྱི་མཛོད་ཀྱང་རྣམ་པར་འབྱེད་དོ། །འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་པ་རྣམས་ཀྱི་ཡེ་ ཤེས་ཀྱི་བྱིན་གྱིས་བརླབས་པའི་བྱང་ཆུབ་སེམས་དཔའི་ཡིད་ཀྱི་སྨོན་ལམ་དང༌། ཡེ་ཤེས་འབྱམས་ཀླས་པས་དམ་པའི་ཆོས་ཀྱང་ཡོངས་སུ་འཛིན་ཏོ། །དེ་ནས་བྱང་ཆུབ་སེམས་ དཔའ་ཆོས་ཀྱི་བློ་གྲོས་ཀྱིས་ཡང་བྱང་ཆུབ་སེམས་དཔའ་རིམ་གྱིས་ཡང་དག་པར་འབྱུང་བའི་ཆོས་ཀྱི་སྒོའི་ལེའུ་ཡང་དག་པར་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་དེའི་ ཚེ་ཚིགས་སུ་བཅད་པ་འདི་དག་སྨྲས་སོ། །བསོད་ནམས་ཚོགས་བསགས་བྱང་ཆུབ་སེམས་ལ་གནས་པ་རྣམས། །རྟག་ཏུ་བག་ཡོད་བློ་བརྟན་མཐུ་ཆེན་བདོག་པ་དག །དྲན་དང་ལྡན་ ཞིང་བྱང་ཆུབ་སེམས་རབ་མི་གཏོང་བས། །ཕྱོགས་རྣམས་བཅུ་པོར་བདེ་གཤེགས་རྣམས་ནི་མཉེས་པར་བྱེད། །བརྩོན་འགྲུས་བརྩམས་པ་དྲན་ལྡན་མོས་པ་བརྟན་པ་ཅན། །འཇིག་ རྟེན་ཀུན་ལ་རྟག་ཏུ་མི་གནས་མི་ལྡོག་པ། །ཟབ་པའི་ཆོས་ཞུགས་མྱ་ངན་མེད་པའི་ཚུལ་མཁས་རྣམས། །ཕྱོགས་རྣམས་བཅུ་པོར་བདེ་གཤེགས་རྣམས་ནི་མཉེས་པར་བྱེད། །བརྩོན་ འགྲུས་བརྟན་པས་བདེ་གཤེགས་མཉེས་པར་བྱས་ནས་ཀྱང༌། །དུས་གསུམ་བསོད་ནམས་ཚོགས་དང་ཡེ་ཤེས་ལྡན་པ་རྣམས། །ས་རྣམས་གནོད་བྱེད་སྤྱོད་མཆོག་ཉམས་པ་མེད་ པར་བྱེད། །ཐུབ་པའི་སྨོན་ལམ་རྫོགས་བྱེད་སྟོན་པའང་དེ་བཞིན་བྱེད། །ཡེ་ཤེས་གཅིག་ལ་ཞུགས་པ་དེ་དག་ཐོབ་བྱ་བ། །ཐོབ་ནས་འགྲོ་བ་ཀུན་ལ་སྦྱིན་པ་རབ་ཏུ་གཏོང༌། །བསམ་པ་ དག་དང་ཁམས་དང་སྦྱོར་བ་ཤེས་བྱས་ནས། །དབང་པོ་ཇི་བཞིན་མཁས་པ་དེ་ལྟར་ཆོས་ཀྱང་སྟོན། །ཕ་རོལ་ཕྱིན་ལ་བརྩོན་པ་མཐུ་ཆེན་ལྡན་པ་རྣམས། །འགྲོ་བ་རྣམས་ལ་ཆོས་སྟོན་ ༄༅། །བདག་གི་དོན་མི་གཏོང༌། །ཕ་རོལ་ཕྱིན་རྫོགས་གྲོལ་བ་མཐུ་ཆེན་ལྡན་པ་རྣམས། །ཁྱུ་མཆོག་མཐུ་ཡིས་འཁོར་བའི་མཚོ་ལས་སེམས་ཅན་སྒྲོལ། །དེ་ལྟར་ ཉིན་མཚན་སྐྱོ་བ་མེད་པར་བརྩོན་བྱེད་ཅིང༌། །དྲང་སྲོང་རྒྱལ་བ་ཆོས་རིགས་མི་གཅོད་ཞུགས་པ་ཡིས། །དཀར་པོའི་སྤྱོད་པ་གང་ཡང་རུང་སྟེ་སྤྱོད་པ་རྣམས། །ཐམས་ཅད་དོན་ཡོད་ རྒྱལ་བ་རྣམས་ཀྱི་སར་འགྲོའོ། །དེ་དག་ཅི་སྤྱོད་ཐམས་ཅད་འགྲོ་བ་རྣམས་ལ་ཡང༌། །རྣམ་སྨིན་དོན་ཡོད་ཉོན་མོངས་དྲི་མ་སྦྱོང་བར་འགྱུར། །འདི་འདྲའི་ཆོས་ལྡན་དེ་དག་མུན་པ་ བསལ་བྱས་ཤིང༌། །བདུད་འཁྲུག་འཁོར་ལོ་ཕམ་བྱས་བྱང་ཆུབ་ཐོབ་པར་བྱེད། །དེ་ལྟར་བརྩོན་ཞིང་ཡེ་ཤེས་ཐོབ་པའི་བདེ་གཤེགས་སྲས། །བདེ་གཤེགས་རྣམས་ཀྱི་ཆོས་ རབ་མཛོད་ཀྱང་རབ་ཏུ་སྟོན། །དེ་དག་ཆོས་སྨྲའི་བྱ་བ་ཀུན་ཀྱང་ཤིན་ཏུ་བྱེད། །བདུད་རྩི་མཆོག་ཞིམ་སྤྲིན་གྱི་ཆར་ཡང་མངོན་པར་འབེབས། །དེ་དག་སྙིང་རྗེ་བྱམས་པས་འགྲོ་བ་ ཀུན་བཀང་ཞིང༌། །བརྟན་པ་དེ་རྣམས་འཁོར་གྱི་བསམ་པ་ཤེས་བྱས་ནས། །གང་གི་བསམ་པ་བློ་གྲོས་སེམས་རྒྱུད་ཅི་འདྲ་བ། །དེ་བཞིན་རྒྱལ་བའི་ཆོས་ནི་སྟོང་ཕྲག་དུ་མ་སྟོན། གླང་པོའི་སྟབས་སྡུག་ཚུལ་བཟང་འགྲོས་སུ་འགྲོ་བ་རྣམས། །སེངྒེའི་རྩལ་ལྟར་རྟག་ཏུ་སུས་ཀྱང་མི་ཐུབ་ཅིང༌། །ཡེ་ཤེས་རྒྱ་མཚོ་ལྟ་བུ་རི་རབ་བཞིན་གནས་པ། །སྤྲིན་ལྟར་ འགྲོ་བ་ཀུན་གྱི་ཉོན་མོངས་ཞི་བར་བྱེད། །བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་དེ་སྐད་ཅེས་སྨྲས་པ་དང༌། དེ་ལ་སྟོན་པས་རྗེས་སུ་དགྱེས་པར་མཛད་དོ། །ཤིན་ཏུ་རྒྱས་པ་ཆེན་པོའི་ མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། ཆོས་སྣང་བའི་ལེའུ་ཞེས་བྱ་བ་སྟེ། ཉི་ཤུ་གསུམ་པའོ།། །།དེ་ནས་སངས་རྒྱས་ཀྱི་མཐུས་ཤར་ཕྱོགས་ཀྱི་འཇིག་རྟེན་གྱི་ཁམས་ ཐམས་ཅད་དང༌། ལྷོ་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་དང༌། གཞུང་དེ་བཞིན་དུ་སྟེང་གི་ཕྱོགས་ཀྱི་འཇིག་རྟེན་གྱི་ཁམས་ཀྱི་བར་ཐམས་ཅད་ན་གླིང་བཞི་པ་འདི་ལ་སོགས་པ་ གླིང་བཞི་པ་རེ་རེ་ན་དེ་བཞིན་གཤེགས་པ་མང་པོ་བཞུགས་པར་སྣང་ངོ༌། །བྱང་ཆུབ་སེམས་དཔའ་དེ་དག་ཀྱང་དེ་བཞིན་གཤེགས་པའི་བྱིན་གྱི་རླབས་ཀྱིས་ཆོས་སྟོན་ཏོ། །བདག་ཀྱང་ དེ་བཞིན་གཤེགས་པའི་བྱིན་གྱི་རླབས་ཀྱིས་ཆོས་སྟོན་ཏོ། །བདག་ཀྱང་དེ་བཞིན་གཤེགས་པའི་ཞབས་ཀྱི་དྲུང་ན་འཁོད་པར་ཤེས་སོ། །བཅོམ་ལྡན་འདས་ཀྱིས་རྫུ་འཕྲུལ་མངོན་ པར་འདུ་མཛད་པ་མ་བཤིག་མ་བཏང་བར་བྱང་ཆུབ་ཀྱི་ཤིང་དྲུང་ཡང་མ་སྤངས་པར་རི་རབ་ཀྱི་རྩེ་མོ་ནས་མཚེ་མའི་གནས་ཀྱི་ལྷའི་བུ་རབ་མཚེ་མའི་ཁང་པ་ནོར་བུ་སྣ་ཚོགས་གང་ན་ བ་དེར་གཤེགས་པར་སྣང་ངོ༌། །ཇི་ལྟར་གླིང་བཞི་པ་འདི་ན་བཅོམ་ལྡན་འདས་རབ་མཚེ་མའི་གནས་སུ་གཤེགས་པར་སྣང་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ན་ ༄༅། །ཡང་རབ་མཚེ་མའི་གནས་སུ་གཤེགས་པར་སྣང་སྟེ། བྱིན་གྱི་རླབས་སྔ་མ་རྣམས་ཀྱང་དེ་བཞིན་མ་འཁྲུགས་པར་སྣང་ངོ༌། །དེ་ནས་ལྷའི་རྒྱལ་པོ་རབ་མཚེ་ མས་བཅོམ་ལྡན་འདས་རྒྱང་རིང་པོ་ནས་ཁང་པ་ནོར་བུ་སྣ་ཚོགས་ལོགས་སུ་མངོན་པར་གཤེགས་པ་མཐོང་ནས་རིངས་པའི་གཟུགས་སུ་ཁང་པ་ནོར་བུ་སྣ་ཚོགས་ཀྱི་ནང་དུ་དེ་བཞིན་ གཤེགས་པའི་གདན་རྫུ་འཕྲུལ་གྱིས་བསྒྲུབས་པའི་སེངྒེའི་ཁྲི་པདྨོའི་སྙིང་པོ་ཅན། ལྷ་རྫས་ཀྱི་རིན་པོ་ཆེ་ལས་བྱས་པ། བོག་རེ་བརྒྱ་སྟོང་ཕྲག་བཅུས་ཀུན་ནས་བརྒྱན་པ། གསེར་ གྱི་དྲ་བ་བརྒྱ་སྟོང་ཕྲག་བཅུས་ཀུན་ནས་མངོན་པར་བྲེས་པ། མེ་ཏོག་གི་བླ་རེ་བརྒྱ་སྟོང་ཕྲག་བཅུས་ཀུན་ཏུ་ཁྱབ་པར་བྱས་པ། ཕྲེང་བའི་བླ་རེ་བརྒྱ་སྟོང་ཕྲག་བཅུས་ཀུན་ཏུ་བརྒྱུས་ པ༑ སྤོས་ཀྱི་བླ་རེ་བརྒྱ་སྟོང་ཕྲག་བཅུས་སྤོས་ཐམས་ཅད་ཀུན་ཏུ་འཐུལ་བར་བདུག་པ། རིན་པོ་ཆེའི་བླ་རེ་བརྒྱ་སྟོང་ཕྲག་བཅུས་ཀུན་ཏུ་བྲེས་པ། མེ་ཏོག་གི་གདུགས་བརྒྱ་སྟོང་ ཕྲག་བཅུ་ཀུན་ནས་བཟུང་བ། ཕྲེང་བའི་གདུགས་བརྒྱ་སྟོང་ཕྲག་བཅུས་ཀུན་ནས་བཟུང་བ། རིན་པོ་ཆེའི་གདུགས་བརྒྱ་སྟོང་ཕྲག་བཅུ་ཀུན་ནས་བཟུང་བ། འོད་ཟེར་བརྒྱ་སྟོང་ ཕྲག་བཅུས་སྣང་བར་བྱས་པ། རབ་མཚེ་མའི་ལྷའི་རྒྱལ་པོ་བརྒྱ་སྟོང་ཕྲག་བཅུས་རབ་ཏུ་བཏུད་པ། ཚངས་པ་བརྒྱ་སྟོང་ཕྲག་བཅུས་མངོན་པར་ཕྱག་བྱ་བ། བྱང་ཆུབ་སེམས་ དཔའ་བརྒྱ་སྟོང་ཕྲག་བཅུས་མངོན་པར་བསྟོད་པ། རོལ་མོ་བརྡུང་བ་བརྒྱ་སྟོང་ཕྲག་བཅུས་སྒྲ་ཕྱུང་བ། ཆོས་ཀྱི་གླུའི་དབྱངས་བརྒྱ་སྟོང་ཕྲག་བཅུའི་གླུའི་དབྱངས་དང་ལྡན་པ། མེ་ཏོག་ གི་སྤྲིན་གྱི་ཆར་བརྒྱ་སྟོང་ཕྲག་བཅུ་རབ་ཏུ་ཕབ་པ། ཕྲེང་བའི་སྤྲིན་གྱི་ཆར་བརྒྱ་སྟོང་ཕྲག་བཅུ་རབ་ཏུ་ཕབ་པ། རྒྱན་གྱི་སྤྲིན་གྱི་ཆར་བརྒྱ་སྟོང་ཕྲག་བཅུ་རབ་ཏུ་ཕབ་པ། གོས་ཀྱི་སྤྲིན་ གྱི་ཆར་བརྒྱ་སྟོང་ཕྲག་བཅུ་རབ་ཏུ་ཕབ་པས་ཀུན་ནས་ཡོག་པ། ནོར་བུ་རིན་པོ་ཆེའི་སྤྲིན་བརྒྱ་སྟོང་ཕྲག་བཅུའི་ཆར་རབ་ཏུ་ཕབ་པས་ཀུན་ཏུ་སྣང་བར་བྱས་པ། དགེ་བའི་རྩ་བ་བརྒྱ་ སྟོང་ཕྲག་བཅུས་ཀུན་ནས་བྱུང་བ། སངས་རྒྱས་བརྒྱ་སྟོང་ཕྲག་བཅུས་བྱིན་གྱིས་བརླབས་པ། བསོད་ནམས་བརྒྱ་སྟོང་ཕྲག་བཅུས་བསགས་ཤིང་བསྒྲུབས་པ། ལྷག་པའི་ བསམ་པ་བརྒྱ་སྟོང་ཕྲག་བཅུས་ཤིན་ཏུ་སྦྱངས་པ། སྨོན་ལམ་བརྒྱ་སྟོང་ཕྲག་བཅུས་རྣམ་པར་དག་པར་བྱས་པ། སྤྱོད་པ་བརྒྱ་སྟོང་ཕྲག་བཅུས་ཀུན་ནས་བསླབ་པ། ཆོས་བརྒྱ་ སྟོང་ཕྲག་བཅུས་རབ་ཏུ་བརྟན་པ། རྣམ་པར་འཕྲུལ་བ་བརྒྱ་སྟོང་ཕྲག་བཅུ་དང་ལྡན་པ། ཡོན་ཏན་བརྒྱ་སྟོང་ཕྲག་བཅུས་ཤིན་ཏུ་འཕགས་པ། བརྗོད་པ་བརྒྱ་སྟོང་ཕྲག་བཅུ་ཤིན་ ཏུ་བརྗོད་པ་བཤམས་སོ། །ཇི་ལྟར་གླིང་བཞི་པ་འདིར་རབ་མཚེ་མའི་གནས་ཀྱི་ལྷའི་རྒྱལ་པོར་མཚེ་མའི་ཁང་པ་ནོར་བུ་སྣ་ཚོགས་སུ་དེ་བཞིན་གཤེགས་པའི་གདན་གཏིང་བ་ ༄༅། །དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་དག་གི་རབ་མཚེ་མའི་གནས་སུ་ཡང་ཁང་བ་ནོར་བུ་སྣ་ཚོགས་སུ་ལྷའི་རྒྱལ་པོ་རབ་མཚེ་ མ་རྣམས་ཀྱིས་དེ་བཞིན་གཤེགས་པའི་གདན་རྒྱན་འདི་འདྲ་བ་དང༌། བཤམ་པའི་ཚུལ་འདི་འདྲ་བ་དག་ཀྱང་བཏིང་བར་གྱུར་ཏོ། །དེ་ནས་ལྷའི་རྒྱལ་པོ་རབ་མཚེ་མས་བཅོམ་ལྡན་ འདས་ཀྱི་གདན་བཏིང་ནས་ཞེ་ས་དང༌། རིམ་གྲོར་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།། བཅོམ་ལྡན་འདས། གཤེགས་སུ་གསོལ། བདེ་བར་གཤེགས་པ། གཤེགས་སུ་གསོལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ བདེ་བར་གཤེགས་སམ། དེ་ནས་བཅོམ་ལྡན་འདས་ལྷའི་རྒྱལ་པོ་རབ་མཚེ་མས་སྤྱན་དྲངས་པ་བཞིན་དུ་ཁང་པ་ནོར་བུ་སྣ་ཚོགས་སུ་གཤེགས་སོ། །ཇི་ལྟར་གླིང་བཞི་པ་ འདིར་རབ་མཚེ་མའི་གནས་སུ་ལྷའི་རྒྱལ་པོ་རབ་མཚེ་མའི་ཁང་པ་ནོར་བུ་སྣ་ཚོགས་སུ་གཤེགས་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་ཡང་རབ་མཚེ་མའི་གནས་ ཀྱི་ཁང་པ་ནོར་བུ་སྣ་ཚོགས་སུ་གཤེགས་པར་སྣང་ངོ༌། །དེ་ནས་ལྷའི་རྒྱལ་པོ་རབ་མཚེ་མས་ལྷའི་དབང་པོའི་གནས་ཐམས་ཅད་དུ་སྒྲ་བསྒྲགས་ཏེ། ལྷའི་རྒྱལ་པོ་རབ་མཚེ་མས་ བཅོམ་ལྡན་འདས་ལ་གསོལ་བ་བཏབ་བོ། །དེ་ནས་ལྷའི་རྒྱལ་པོ་རབ་མཚེ་མས་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དགེ་ བའི་རྩ་བ་ཇི་ལྟར་བསྐྱེད་པ་དེ་རྗེས་སུ་དྲན་ནས་སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བཀྲ་ཤིས་དམ་པ་གང་ཞིག་གིས། །སངས་རྒྱས་ གྲགས་པའི་དམ་པར་མཚན་བཏགས་མཚན་གསོལ་བ། །ནོར་བུ་གཙུག་ཏུ་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་ གིས༑ ༑འཇིག་རྟེན་སྒྲོན་མ་བློ་ཞེས་མཚན་བཏགས་པ། །སྦྱངས་པའི་ལམ་དུ་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་ གིས༑ ༑བསྒྲིབས་མེད་གཟིགས་པ་འཛུམ་པའི་སྤྱན་དུ་མཚན་བཏགས་པ། །རྒྱན་གཅིག་ལྡན་པར་གཤེགས་པ་ལྟར། །ངེས་ནི་འདིར་ཡང་བཀྲ་ཤིས་མཆོག་གྱུར་ཅིག། བཀྲ་ ཤིས་དམ་པ་གང་ཞིག་གིས། །འཇིག་རྟེན་སྒྲོན་མ་མར་མེ་མཛད་ཅེས་མཚན་བཏགས་པ། །རྣམ་པར་རྒྱལ་པར་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་ གྱུར་ཅིག །བཀྲ་ཤིས་དམ་པ་གང་ཞིག་གིས། །བདེ་གཤེགས་ཡང་དག་དོན་གཟིགས་པ་ཞས་མཚན་བཏགས་པ། །དྲི་མེད་རྩེ་མོར་གཤེགས་པ་ལྟར། །དེས་ནི་འདིར་ཡང་བཀྲ་ ༄༅། །ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །དེ་བཞིན་གཤེགས་པ་རང་བྱུང་མཆོག་ཅེས་མཚན་བཏགས་པ། །རིན་ཆེན་སྤོས་སུ་གཤེགས་ པ་ལྟར༑ ༑དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །འཇིག་རྟེན་སྒྲོན་མ་དབྱིག་གི་ལྷ་ཞེས་མཚན་བཏགས་པ། །དྲི་མེད་སྣ་ཚོགས་ གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག། བཀྲ་ཤིས་དམ་པ་གང་ཞིག་གིས། །འགྲོ་བ་མེད་པ་སྨྲ་བའི་སྟག་ཅེས་མཚན་བཏགས་པ། །ཐམས་ཅད་ ཚུལ་དུ་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །ཡོན་ཏན་ཀུན་མངའ་དཔལ་གྱིས་རྒྱལ་བར་མཚན་བཏགས་ པ༑ ༑དགའ་བའི་རྒྱན་དུ་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །འཇིག་རྟེན་ཕན་བརྩོན་དཀའ་ཐུབ་དྲག་པོར་ མཚན་བཏགས་པ། །ཀུན་ནས་མདོག་ཏུ་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །ཇི་ལྟར་ལྷའི་རྒྱལ་པོ་རབ་མཚེ་མས་སངས་རྒྱས་ཀྱི་བྱིན་གྱི་ རླབས་ཀྱིས་སྔོན་གྱི་རྒྱལ་བའི་གཤེགས་པ་བརྗོད་དེ་མངོན་པར་བསྟོད་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་རྒྱལ་པོ་རབ་མཚེ་མ་རྣམས་ཀྱང་སངས་རྒྱས་ཀྱི་བྱིན་ གྱི་རླབས་ཀྱིས་སྔོན་གྱི་ཡང་དག་པར་རྫོགས་པའི་སངས་རྒྱས་གཤེགས་པ་བརྗོད་ཅིང་གླུའི་དབྱངས་ཀྱིས་ཚིགས་སུ་བཅད་དེ་མངོན་པར་བསྟོད་དོ། །དེ་ནས་བཅོམ་ལྡན་འདས་ཁང་ པ་ནོར་བུ་སྣ་ཚོགས་སུ་གཤེགས་ནས་གང་ན་བཏིང་བ་ལ་སྐྱིལ་མོ་ཀྲུང་བཅས་ཏེ་བཞུགས་སོ། །ཇི་ལྟར་བཅོམ་ལྡན་འདས་བཞུགས་པ་དེ་བཞིན་དུ་འཇིག་རྟེན་གྱི་ཁམས་ཐམས་ ཅད་དུའང་གདན་བཏིང་བ་དེ་དག་ལ་བཞུགས་པར་སྣང་ངོ༌། །བཅོམ་ལྡན་འདས་བཞུགས་མ་ཐག་ཏུ་ཁང་པ་ནོར་བུ་སྣ་ཚོགས་དེ། འདི་ལྟ་སྟེ། དཔེར་ན། རབ་མཚེ་མའི་ལྷའི་རིས་ ཐམས་ཅད་ཙམ་དུ་ཆེ་བར་གྱུར་པར་སྣང་སྟེ། འདི་ན་ཇི་ལྟ་བ་བཞིན་དུ་འཇིག་རྟེན་གྱི་ཁམས་ཐམས་ཅད་ན་ཡང་དེ་བཞིན་ནོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ ཆེ་ཞེས་བྱ་བ་ལས། རབ་མཚེ་མའི་གནས་རྣམ་པར་འཕྲུལ་བའི་ལེའུ་ཞེས་བྱ་བ་སྟེ། ཉི་ཤུ་བཞི་པའོ།། །།དེ་ནས་སངས་རྒྱས་ཀྱི་མཐུས་ཕྱོགས་བཅུ་ནས་བྱང་ཆུབ་ སེམས་དཔའ་མང་པོ་ལྷགས་པར་གྱུར་ཏེ། བྱང་ཆུབ་སེམས་དཔའ་རེ་རེ་ཞིང་ཡང་འཁོར་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འོངས་ཏེ་ བྱང་ཆུབ་སེམས་དཔའ་རེ་རེ་ཞིང་ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དང་ལྷན་གཅིག་ཏུ་ཕྱིན་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ ༄༅། །ཀྱང་མིང་འདི་ཞེས་བྱ་བ་དག་སྟེ། འདི་ལྟར་ཡོན་ཏན་དང་ལྡན་པ་དང༌། བློ་གྲོས་དང་ལྡན་པ་དང༌། དཔལ་དང་ལྡན་པ་དང༌། དགའ་བ་དང་ལྡན་པ་དང༌། ཁྲེལ་དང་ལྡན་པ་དང༌། བརྩོན་འགྲུས་དང་ལྡན་པ་དང༌། སྟོབས་དང་ལྡན་པ་དང༌། རིག་པ་དང་ལྡན་པ་དང༌། བློ་དང་ལྡན་པ་དང༌། ཡེ་ཤེས་དང་ལྡན་པ་དག་གོ། བྱང་ཆུབ་ སེམས་དཔའ་དེ་དག་ཐམས་ཅད་ཀྱང་འཇིག་རྟེན་གྱི་ཁམས་མིང་འདི་ཞེས་བྱ་བ་དག་ནས་འོངས་པ་སྟེ། འདི་ལྟར་གཉེན་དང་ལྡན་པ་དང༌། མེ་ཏོག་དང་ལྡན་པ་དང༌། ནོར་ དང་ལྡན་པ་དང༌། དཔལ་དང་ལྡན་པ་དང༌། སྒྲོན་མ་དང་ལྡན་པ་དང༌། རྡོ་རྗེ་དང་ལྡན་པ་དང༌། བདེ་བ་དང་ལྡན་པ་དང༌། ཉི་མ་དང་ལྡན་པ་དང༌། དགེ་བ་དང་ལྡན་པ་དང༌། ཚངས་ པ་དང་ལྡན་པ་དག་གོ །བྱང་ཆུབ་སེམས་དཔའ་དེ་དག་ཐམས་ཅད་ཀྱང་དེ་བཞིན་གཤེགས་པའི་མཚན་འདི་ཞེས་བྱ་བ་དག་གི་ཞམ་འབྲིང་ན་ཚངས་པར་སྤྱོད་པ་དག་སྟེ། འདི་ལྟར་ཉམས་པ་མེད་པའི་སྤྱན་དང༌། གཞན་མ་ཡིན་པའི་སྤྱན་དང༌། མི་གཡོ་བའི་སྤྱན་དང༌། མི་བསྐྱོད་པའི་སྤྱན་དང༌། ཆུའི་སྤྱན་དང༌། བཅིངས་པ་མེད་པའི་སྤྱན་དང༌། ཀུན་ཏུ་སྤྱོད་པའི་སྤྱན་དང༌། འོད་ཀྱི་སྤྱན་དང༌། དམ་པའི་སྤྱན་དང༌། མཐོན་མཐིང་གི་སྤྱན་དག་གོ །དེ་ནས་བྱང་ཆུབ་སེམས་དཔའ་དེ་དག་བཅོམ་ལྡན་འདས་ལ་ཕྱག་འཚལ་ ནས་སངས་རྒྱས་ཀྱི་མཐུས་ཕྱོགས་བཅུ་རྒྱས་པར་བྱས་ཏེ། གང་ནས་འོངས་པའི་ཕྱོགས་སུ་བརྟེན་ནས་སེངྒེའི་ཁྲི་རིན་པོ་ཆེའི་སྙིང་པོ་ཅན་དག་བཤམས་ཏེ་སྐྱིལ་མོ་ཀྲུང་བཅས་ནས་ འཁོད་དོ། །ཇི་ལྟར་གླིང་བཞི་པ་འདིར་རབ་མཚེ་མའི་གནས་སུ་བྱང་ཆུབ་སེམས་དཔའ་འོངས་པར་གྱུར་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཀུན་ཏུ་ ཡང་རབ་མཚེ་མའི་གནས་ཀྱི་ཁང་པ་ནོར་བུ་སྣ་ཚོགས་སུའང་ལྷགས་པར་གྱུར་ཏེ། བྱང་ཆུབ་སེམས་དཔའི་མིང་ཡང་དེ་སྐད་ཅེས་བྱ་བ་ཤ་སྟག། དེ་བཞིན་གཤེགས་པའི་མཚན་ ཀྱང་དེ་སྐད་ཅེས་བྱ་བའི་ཞམ་འབྲིང་ན་ཚངས་པར་སྤྱོད་པ་ཤ་སྟག་གོ། དེ་ནས་བཅོམ་ལྡན་འདས་ཀྱི་ཞབས་ཀྱི་བོལ་གཉིས་ནས་འོད་ཟེར་བྱེ་བ་བརྒྱ་སྟོང་བཀྱེ་སྟེ། ཕྱོགས་བཅུ་ཐམས་ ཅད་སྣང་བར་བྱས་ནས་འཇིག་རྟེན་གྱི་ཁམས་ཐམས་ཅད་བསྟན་ཏེ། བྱང་ཆུབ་སེམས་དཔའ་དེ་དག་གིས་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཀུན་གྱི་རབ་མཚེ་མའི་ གནས་ཐམས་ཅད་ན་ཡང་དེ་བཞིན་གཤེགས་པའི་རྣམ་པར་འཕྲུལ་པ་ཡོད་པ་མཐོང་ངོ༌། །དེ་ནས་བྱང་ཆུབ་སེམས་དཔའ་ཡོན་ཏན་དང་ལྡན་པས་སངས་རྒྱས་ཀྱི་མཐུས་ཕྱོགས་ བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་འོད་ཟེར་འོད་སྣང་བས། །ཕྱོགས་རྣམས་ཐམས་ཅད་རྣམ་པར་སྣང༌། །དེས་ནི་རབ་ཏུ་གསལ་ ༄༅། །བྱས་པས། །མིག་ལ་རབ་རིབ་གང་ཡང་མེད། །མཚེ་མ་རབ་ཀྱི་གནས་འདི་ན། །གང་ཟག་དམ་པ་སངས་རྒྱས་བཞུགས། །དེ་བཞིན་ཀུན་ནའང་གསལ་ བར་སྣང༌། །དེ་ནི་འཇིག་རྟེན་ངོ་མཚར་ཏོ། །སེམས་ཅན་གཙོ་བོ་བཅུ་ཡི་རྣམས། །གཤེགས་པར་གྱུར་པ་མངོན་པར་སྟོན། །དེ་དག་འཁོར་ཀྱང་ཅི་འདྲ་བ། །དེ་བཞིན་ཀུན་ན་རབ་ ཏུ་སྣང༌། །ཕྱོགས་རྣམས་བཅུ་པོ་ཐམས་ཅད་ན། །ཆོས་ཀྱི་དམ་པ་རབ་ཏུ་སྟོན། །དེ་ཀུན་མིང་ཡང་དེ་བཞིན་ཏེ། །བདག་ཅག་རྣམས་ཀྱི་ཀུན་རྫོབ་བཞིན། །འཇིག་རྟེན་ཁམས་ཀྱི་ མིང་དག་ཀྱང༌། །དེ་ཞེས་བྱ་བ་ཀུན་ནས་འོངས། །གང་ཟག་དམ་པ་དེ་དག་ནི། །ཚངས་པའི་སྤྱོད་པའང་དེ་ན་སྤྱོད། །བདག་ཅག་རྣམས་ལ་གང་བཏགས་པ། །ཀུན་གྱི་མིང་ ཡང་དེ་དང་མཐུན། །སངས་རྒྱས་ཞིང་རྣམས་མཐུན་ལྡན་པ། །དེ་དག་སངས་རྒྱས་རྣམ་འཕྲུལ་པའོ། །མི་ཡི་འཇིག་རྟེན་ཀུན་ན་ཡང༌། །འདི་ན་རྒྱལ་བ་བཞུགས་པར་ཤེས། ། གཞན་གྱིས་དེ་ཡི་རྒྱལ་པོ་ཡི། །གནས་ན་དེ་བཞིན་བཞུགས་པ་མཐོང༌། །འཇིག་རྟེན་ཁམས་རྣམས་ཐམས་ཅད་ན། །གང་ཟག་དམ་པ་དེ་བཞུགས་ཀྱང༌། །རྒྱལ་བ་མཚེ་མ་རབ་ གནས་ན། །བཞུགས་པར་བདག་ཅག་ཀུན་ཀྱང་སེམས། །འཇིག་རྟེན་ཁམས་རྣམས་ཐམས་ཅད་ན། །སངས་རྒྱས་གཟི་བརྗིད་བསམ་མི་ཁྱབ། །དེ་དག་སྨོན་ལམ་བསྐུལ་བའི་ ཕྱིར༑ ༑འཇིག་རྟེན་ཐམས་ཅད་སུ་རབ་ཏུ་བཀྱེ། །སེམས་ཅན་གཙོ་བོའི་རྣམ་འཕྲུལ་བ། །འདི་དག་དེ་རྣམས་ཀུན་གྱིས་མཐོང༌། །སངས་རྒྱས་ཡོན་ཏན་མཐའ་ཡས་ཏེ། །འཇིག་རྟེན་ཟང་ ཟིང་ཐུབ་པས་སྤངས། །ཕྱོགས་རྣམས་ཐམས་ཅད་ཀུན་ཏུ་བྱུང༌། །ཆགས་པ་མེད་པ་ནམ་མཁའ་བཞིན། །དེ་ནི་གཅིག་ལས་ཤིན་ཏུ་འདས། །མང་པོ་དག་ཏུའང་མི་དམིགས་སོ། ། མཐའ་ཡས་ལེགས་མངའ་སངས་རྒྱས་རྣམས། །དེ་དག་ཤེས་པར་ཇི་ལྟར་རུང༌། །གནས་པ་མེད་ཅིང་ལེན་པ་མེད། །ཆོས་དབྱིངས་རྟོགས་པར་ཐུགས་སུ་ཆུད། །དེ་ནས་བྱང་ཆུབ་ སེམས་དཔའ་བློ་གྲོས་དང་ལྡན་པས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་མགོན་ པོ་འཕྲུལ་ཆེན་རྣམས། །རྡུལ་མེད་གང་ཟག་དམ་པ་དག། འདུས་ཤིང་ཚོགས་པ་བསམ་ཡས་པའི། །བསྐལ་པ་དག་ཏུ་ཤིན་ཏུ་དཀོན། །དེ་དག་ཐམས་ཅད་ཀུན་གཟིགས་པ། །སེམས་ ཅན་གཙོ་བོ་འོད་མཛད་དེ། །སྲོག་ཆགས་ཀུན་ལ་ཕན་པའི་ཕྱིར། །སེམས་ཅན་རྣམས་ལ་ཆོས་སྟོན་ཏོ། །འཇིག་རྟེན་མུན་ནག་འདི་དག་ཏུ། །འཇིག་རྟེན་མགོན་པོ་བྱུང་གྱུར་པ། ། འཇིག་རྟེན་སྒྲོན་མ་དེ་དག་ནི། །བལྟ་བར་ཤིན་ཏུ་དཀའ་བ་ཡིན། །སྦྱིན་པ་ཚུལ་ཁྲིམས་བཟོད་པའི་རབ། །བརྩོན་འགྲུས་བསམ་གཏན་སྒོམ་པ་དང༌། །ཤེས་རབ་སྔོན་ཆད་སྤྱད་ ༄༅། །པས་ན༑ ༑འགྲོ་བ་ཐམས་ཅད་སྣང་བར་མཛད། །སངས་རྒྱས་འདྲ་བ་གང་ཡང་མེད། །དེ་ཕྱིར་དེ་དང་མཉམ་པ་མེད། །ཆོས་རྣམས་ཡོད་པ་མ་ཡིན་པས། ། སྐྱེས་བུའི་དམ་པ་མཐོང་བ་མེད། །སངས་རྒྱས་ཤེས་རབ་ཆེན་པོ་རྣམས། །མཚན་གྱི་ཚོགས་ནི་བསམ་མི་ཁྱབ། །སྐུ་ཡི་ཚོགས་ཀྱིས་ཤིན་ཏུ་འཕགས། །ཆོས་རྣམས་ཀུན་ གྱིས་ཡང་དག་བྱུང༌། །འཇིག་རྟེན་གྲགས་ཆེན་དམ་པའི་རྣམས། །དཔའ་བོ་ཆེན་པོ་དེ་དག་སྣང༌། །དེ་དག་མཚན་ཙམ་ཐོས་པས་ཀྱང༌། །ངན་སོང་ཐམས་ཅད་སྤངས་པར་འགྱུར།། བསྐལ་པ་རྣམས་ནི་བརྗོད་མེད་པར། །བྱང་ཆུབ་དོན་དུ་འཁོར་བྱས་ཀྱང༌། །འདི་ཡི་ཚུལ་ནི་མ་ཤེས་ན། །བྱང་ཆུབ་དོན་དུ་བཞུགས་པ་མིན། །སངས་རྒྱས་བསམ་གྱིས་མི་ཁྱབ་པ། ། བསྐལ་པ་བྱེ་བར་བཀུར་བ་དང༌། །གང་གིས་ཚུལ་འདི་བསམ་པ་གཉིས། །འདི་ནི་དེ་ལས་ཁྱད་དུ་འཕགས། །གང་གིས་བརྗོད་ཡས་ཞིང་གི་རྣམས། །རིན་ཆེན་གང་སྟེ་ཐུབ་ གསོལ་ཀྱང༌། །འདི་ཡི་ཚུལ་ནི་མ་ཤེས་ན། །སངས་རྒྱས་བྱང་ཆུབ་དེ་ལ་རིང༌། །དེ་ནས་བྱང་ཆུབ་སེམས་དཔའ་དཔལ་དང་ལྡན་པས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་ བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ནམ་མཁའ་དྲི་མ་མེད་པ་ལ། །ཉི་མའི་འོད་ཟེར་མཐའ་ཡས་པས། །དཔྱིད་ཀྱི་ཟླ་བ་ཐ་མ་ལ། །ཕྱོགས་ བཅུ་དག་ཏུ་རབ་ཏུ་སྣང༌། །དེ་ཚེ་སྨིག་རྒྱུ་ཅི་འདྲ་བ། །དེ་དག་བགྲང་བར་མི་ནུས་ཏེ། །མིག་ཅན་རྣམས་ཀྱང་དེ་ལ་རྨོངས། །ལོང་བ་རྣམས་ཀྱི་སྤྱོད་ཡུལ་མིན། །དེ་བཞིན་སེམས་ཅན་གཙོ་ པོ་ཡི༑ ༑ཡོན་ཏན་མཐའ་དང་དབུས་མེད་པ། །བསྐལ་པ་བསམ་གྱིས་མི་ཁྱབ་པར། །སུས་ཀྱང་ཤེས་པར་མི་ནུས་སོ། །དེ་དག་གང་ནས་བླངས་པ་མེད། །དེ་བཞིན་སུས་ཀྱང་ བྱས་པ་མེད། །དེ་ནི་ཅི་ལས་སྐྱེས་པ་མེད། །རྣམ་པར་བསྒོམས་ན་ཡོད་པ་མིན། །འོང་པ་མེད་པའི་ཆོས་རྣམས་ལ། །འགྲོ་བ་དེ་བཞིན་མི་དམིགས་ཏེ། །དེ་ཕྱིར་ དེ་དག་རྒྱུ་ཡང་མེད། །དེ་བཞིན་འཇིག་པའང་ཡོད་པ་མིན། །འཇིག་པ་མེད་པའི་ཆོས་རྣམས་ཀྱི། །རང་བཞིན་གང་གིས་ཤེས་པ་ནི། །གང་ལ་སྐྱེ་བ་མེད་པ་ཡི། །ཡང་དག་སངས་རྒྱས་ མཐོང་བ་ཡིན། །སྐྱེས་པ་མེད་པའི་ཆོས་རྣམས་ཀྱི། །རང་བཞིན་དངོས་པོ་མི་དམིགས་ཏེ། །དེ་འདྲའི་དོན་དུ་ཤེས་པས་ནི། །དམིགས་པ་མེད་པ་ཤེས་པ་ཡིན། །འདི་ལ་ཤེས་བྱེད་ གང་ཡང་མེད། །ཆོས་རྣམས་ཐམས་ཅད་མཚན་ཉིད་མེད། །ཆོས་ཉིད་འདི་ནི་ཤེས་གྱུར་ན། །ཡོངས་སུ་ཤེས་པ་གང་ཡང་མེད། །སྐྱེ་བ་དག་ནི་བརྗོད་པ་སྟེ། །དེ་ཕྱིར་ཞིང་རྣམས་རབ་ ཏུ་བརྗོད། །ཞིང་གི་རང་བཞིན་ཤེས་གྱུར་ན། །འཁྲུག་པ་མེད་པ་རབ་ཏུ་ཤེས། །གང་ཚེ་འཇིག་རྟེན་ཞིང་ཡིན་པར། །ཚུལ་བཞིན་དུ་ནི་རྟོགས་བྱེད་ན། །དེ་ཚེ་ཐམས་ཅད་དོན་བསྟན་པ།། ༄༅། །བྱང་ཆུབ་སེམས་དཔས་རབ་ཏུ་ཤེས། །དེ་ནས་བྱང་ཆུབ་སེམས་དཔའ་དགའ་བ་དང་ལྡན་པས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ ཏེ༑ དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གནས་འདི་ཤིན་ཏུ་རྒྱ་ཆེ་སྟེ། །ཆོས་ཀྱི་དབྱིངས་ཀྱིས་ཀླས་པ་ཡིན། །རྟག་ཏུ་ཀུན་ཏུ་སོང་བ་སྟེ། །ཡིད་དུ་འོང་ཞིང་གནས་ཀྱང་ མེད༑ ༑དེ་ལ་ཡང་དག་བརྟགས་བྱས་ཤིང༌། །རིམ་གྲོ་ཡོད་པར་དད་བྱེད་ན། །སྡུག་བསྔལ་ནམ་ཡང་མི་མཐོང་སྟེ། །ངན་སོང་རྣམས་ཀྱང་མི་མཐོང་ངོ༌། །ཚད་མེད་དེ་བཞིན་ གྲངས་མེད་པའི། །འཇིག་རྟེན་ཁམས་སུ་སུ་འགྲོ་བས། །གང་རྣམས་འདི་ན་སྣང་བ་ཡི། །སངས་རྒྱས་བྱིན་རླབས་ཐོས་པར་འགྱུར། །དྲང་སྲོང་ཆེན་པོའི་བྱིན་གྱི་རླབས། ། གང་གིས་ཐོས་པར་གྱུར་ནས་ཀྱང༌། །འདི་འདྲ་སངས་རྒྱས་ཆོས་སོ་ཞེས། །རྟོག་མེད་བླ་མེད་བྱང་ཆུབ་བོ། །གང་རྣམས་འདས་པའི་སངས་རྒྱས་ཀྱིས། །ཆོས་ཉིད་ལ་ནི་ཡིད་ ཆེས་པ༑ ༑དེ་ཀུན་འཇིག་རྟེན་སྒྲོན་མ་སྟེ། །རྐང་གཉིས་ལྡན་པའི་དམ་པར་འགྱུར། །སངས་རྒྱས་རྣམ་པར་འཕྲུལ་བ་འདི། །ལ་ལ་ཞིག་གིས་ཐོས་གྱུར་ཅིང༌། །ཐོས་ནས་ དད་པར་བྱེད་གྱུར་ན། །དེ་དག་མི་ཡི་དམ་པར་འགྱུར། །བརྟན་པ་གང་རྣམས་ད་ལྟར་ཡང༌། །སངས་རྒྱས་ཆོས་ལ་དད་བྱེད་པ། །དེ་དག་དོན་གཟིགས་མི་འཇིགས་པའི། །དེ་ བཞིན་གཤེགས་པར་འགྱུར་བ་ཡིན། །བསྐལ་པ་བསམ་གྱིས་མི་ཁྱབ་པར། །འདི་འདྲ་ཐོས་པ་ཤིན་ཏུ་དཀོན། །སྨོན་ལམ་དབང་ནི་མ་གཏོགས་པར། །བློ་གྲོས་འདི་འདྲར་འགྱུར་ བ་མིན༑ ༑སངས་རྒྱས་དམ་ཆོས་འདི་ལས་ཀྱང༌། །ལེགས་པར་བཤད་པ་བཟུང་བྱས་ཤིང༌། །གཞན་ལ་སྟོན་པར་སུ་བྱེད་པ། །དེ་དག་བསམ་གྱིས་མི་ཁྱབ་འགྱུར། །དེ་ལ་བརྩོན་ འགྲུས་བསྐྱེད་བྱས་ཤིང༌། །ཡིད་ལ་གོ་ཆ་བགོ་བྱས་ཏེ། །གང་ལས་སངས་རྒྱས་བརྗོད་པ་ཡི། །ཤེས་པ་འདི་འདྲ་མཉན་པར་བྱ། །དེ་ནས་བྱང་ཆུབ་སེམས་དཔའ་ཁྲེལ་དང་ལྡན་ པས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་ཞིག་ཐོས་ནས་འདི་འདྲ་བའི། །དགའ་བ་ཡངས་ པ་སྐྱེ་བ་དང༌། །ཐེ་ཚོམ་རྣམ་པར་གཅད་པ་ནི། །འཇིག་རྟེན་ན་ནི་ངོ་མཚར་ཆེ། །འདི་ལྟར་ཐམས་ཅད་གཟིགས་པའི་རྣམས། །ཉིད་ཀྱིས་འགྲོ་ལ་བཀའ་སྩལ་ན། །སངས་རྒྱས་མི་ མཁྱེན་གང་ཡང་མེད། །དེ་ལྟར་སངས་རྒྱས་བསམ་མི་ཁྱབ། །མི་ཤེས་པ་ཡི་རྒྱུ་ལས་ནི། །ཡེ་ཤེས་འཇུག་པར་མི་འགྱུར་ཏེ། །མུན་པའི་མཐུ་དང་སྣང་བ་གཉིས། །ལྷན་ཅིག་ འབྱུང་བར་མི་འགྱུར་བསྟན། །ཇི་ལྟར་གཟུགས་དང་གཟུགས་མེད་པ། །སྐལ་པ་མཉམ་པ་མེད་པར་བཤད། །དེ་ལྟར་ཤེས་དང་མི་ཤེས་པ། །འགྲོགས་པར་ཤིན་ཏུ་མི་འགྱུར་ ༄༅། །རོ༑ ༑འཁོར་དང་མྱ་ངན་འདས་པ་དག །ཇི་ལྟར་མེད་ལས་བརྟགས་པ་ལྟར། །དེ་བཞིན་ཤེས་དང་མི་ཤེས་པ། །མཚན་ཉིད་བཞིན་དུ་དམིགས་པ་མེད། །ཇི་ལྟར་ འཇིག་རྟེན་འཇིག་པ་དང༌། །འདུ་བར་འགྱུར་བ་རིང་བ་སྟེ། །ཕན་ཚུན་འགྲོགས་པར་མི་འགྱུར་བ། །ཤེས་དང་མི་ཤེས་དེ་བཞིན་ནོ། །ཇི་ལྟར་བྱང་ཆུབ་སེམས་དཔའ་ཡི། །ཐོག་ མའི་སེམས་དང་ཐ་མའི་སེམས། །ལྷན་ཅིག་མི་གནས་བྱུང་བ་ལྟར། །ཤེས་དང་མི་ཤེས་དེ་བཞིན་ནོ། །ཇི་ལྟར་ལུས་དང་རྣམ་ཤེས་པ། །གཞན་དང་གཞན་ལས་འབྱུང་ འགྱུར་བ། །དེ་བཞིན་ཤེས་དང་མི་ཤེས་གཉིས། །འགྲོགས་པར་འགྱུར་བ་ནམ་ཡང་མེད། །ཇི་ལྟར་དུག་ལ་ཕན་པའི་རྩི། །འཕྲལ་དུ་དུག་ནི་དུག་མིན་བྱེད། །དེ་ལྟར་ཤེས་ པ་མི་ཤེས་པས། །ཤིན་ཏུ་སེལ་བ་བྱེད་པར་བརྗོད། །སངས་རྒྱས་བླ་ན་གང་ཡང་མེད། །དེ་དང་འདྲ་བའང་ཡོད་པ་མིན། །དེ་ལས་གཞན་དུ་འགྱུར་བ་མེད། །དེ་བས་རྒྱལ་བ་ ཤིན་ཏུ་དཀོན། །དེ་ནས་བྱང་ཆུབ་སེམས་དཔའ་བརྩོན་འགྲུས་དང་ལྡན་པས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་དེ་སྨྲས་པ། ཆོས་རྣམས་འདི་དག་འགལ་མེད་པར། །མཁྱེན་ནས་སངས་རྒྱས་ཐུགས་སུ་ཆུད། །དེས་ནི་མི་མཁྱེན་གང་ཡང་མེད། །ཡེ་ཤེས་ཀྱི་ཡང་ཕ་རོལ་ཕྱིན། །ཇི་ལྟར་གསེར་དང་ས་ ལེ་སྦྲམ༑ ༑ངོ་བོ་ཉིད་ཀྱིས་འགལ་བ་མེད། །དེ་ལྟར་ཆོས་མིན་དེ་བཞིན་ཆོས། །དེ་དག་ཐམས་ཅད་མཚན་ཉིད་གཅིག །སེམས་ཅན་སེམས་ཅན་མ་ཡིན་པ། །ངོ་བོ་ཉིད་ཀྱིས་རང་བཞིན་ མེད༑ ༑གདགས་སུ་མེད་ལས་བྱུང་བ་ལྟར། །ཆོས་རྣམས་རང་བཞིན་དེ་བཞིན་ནོ། །མ་འོངས་དུས་ནི་ཇི་ལྟ་བུར། །འདས་པས་བརྗོད་པར་བྱ་བ་སྟེ། །དེ་ལ་མཚན་ཉིད་ཡོད་པ་མིན། །དེ་ བཞིན་ཆོས་ལ་མཚན་ཉིད་མེད། །འབྲེལ་བར་སྐྱེ་དང་འགག་པ་དང༌། །རང་བཞིན་མེད་དང་རང་བཞིན་དག །རྣམ་པ་ཐ་དད་གྱུར་པ་ལྟར། །སངས་རྒྱས་རང་བཞིན་དེ་བཞིན་ནོ། །མྱ་ ངན་འདས་པ་གཟུང་མེད་པ། །གཉིས་ཀྱི་དུས་ན་བརྗོད་པར་བྱས། །དེ་ལ་བྱེ་བྲག་གང་ཡང་མེད། །དེ་བཞིན་གཟུགས་ལ་རྣམ་རྟོག་པའོ། །ཇི་ལྟར་ཅི་ཞིག་བགྲང་བྱས་ཤིང༌། །བགྲང་ བར་བྱེད་ཅེས་བརྗོད་པ་ཡང༌། །དེ་ལ་ཐ་དད་གང་ཡང་མེད། །དེ་བཞིན་གཟུགས་ཀྱི་རང་བཞིན་ནོ། །ཇི་ལྟར་གཅིག་ནས་གཅིག་གི་བླར། །མང་པོའི་ཚུལ་དུ་བགྲང་བ་ཡིས། །དངོས་ པོ་གྲངས་མེད་འགྱུར་བ་ཡང༌། །བློ་ཡི་རྣམ་པ་ཐ་དད་བསྟན། །འཇིག་རྟེན་ཁམས་རྣམས་ལ་ལ་དག །བསམ་གྱིས་མི་ཁྱབ་ཚིག་གྱུར་ཀྱང༌། །ནམ་མཁའ་འཇིག་པར་འགྱུར་བ་མེད། ། རང་བྱུང་ཡེ་ཤེས་དེ་བཞིན་ནོ། །ཇི་ལྟར་འཇིག་རྟེན་ཕྱོགས་བཅུ་ཡི། །ནམ་མཁའ་སོ་སོར་བརྟགས་པ་ལྟར། །དེ་བཞིན་སངས་རྒྱས་རྣམས་མཐོང་སྟེ། །སངས་རྒྱས་རྣམས་ལ་རྟོག་མི་ ༄༅། །མངའ༑ ༑དེ་ནས་བྱང་ཆུབ་སེམས་དཔའ་སྟོབས་དང་ལྡན་པས་སངས་རྒྱས་ཀྱི་མཐུས་ཕྱོགས་བཅུ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་དེ་སྨྲས་པ། ཇི་ལྟར་ དུས་རྣམས་གསུམ་པོ་ཡིས། །སེམས་ཅན་ཁམས་རྣམས་བརྗོད་པར་འགྱུར། །སེམས་ཅན་དེ་དག་ཐམས་ཅད་ཀྱང༌། །ཕུང་པོ་ལྔ་ལས་ཤིན་ཏུ་བརྗོད། །དེ་རྣམས་ལས་ཀྱི་ཕུང་ཆེན་ ཡིན༑ ༑ལས་ཀྱི་རྩ་བའང་སེམས་ཡིན་ཏེ། །སེམས་ནི་སྒྱུ་མ་བཞིན་དུ་བཤད། །སྒྱུ་མར་གྱུར་པ་འགྲོ་འདིའོ། །གང་ན་འཇིག་རྟེན་འདི་འབྱུང་ཞིང༌། །ཡང་ན་ལྡོག་པར་འགྱུར་བ་ཡི། ། འཇིག་རྟེན་འཇིག་རྟེན་མི་བྱེད་དེ། །གཞན་གྱི་རྒྱུས་ཀྱང་བྱས་པ་མིན། །འཇིག་རྟེན་འདི་ན་འབྱུང་བ་འབྱུང༌། །འཇིག་རྟེན་འདིར་ཡང་ལྡོག་པར་འགྱུར། །འབྱུང་ཞེས་བརྗོད་པར་མི་ བྱ་སྟེ༑ ༑དེ་ནི་འཇིག་རྟེན་ཞེས་པ་ཡིན། །གང་ལ་འཇིག་རྟེན་སྣང་བ་ཞེས། །འདུ་ཤེས་རྣམ་པར་བརྟགས་པ་ཡི། །འཇིག་རྟེན་ཞེས་བྱ་གང་ཞིག་ཡིན། །སྣང་བ་ཞེས་བྱའང་ཅི་ ཞིག་ཡིན། །དུས་གསུམ་དག་ཏུ་རྒྱུ་བ་ཡི། །ཕུང་པོ་འདི་ནི་འཇིག་རྟེན་ཡིན། །དེ་དག་འགོག་པ་སྣང་བ་ཞེས། །འགྲོ་བ་དག་ཏུ་འདུ་ཤེས་འགྱུར། །ཕུང་པོ་ཞེས་བྱ་འདི་ནི་ཅི། ཕུང་པོའི་རང་བཞིན་ཇི་ལྟ་བུ། །ཕུང་པོ་རྣམས་ནི་མི་འཇིག་ཕྱིར། །དངོས་པོ་མེད་ཅེས་རབ་ཏུ་བརྗོད། །ཕུང་པོ་འདི་དག་རྣམ་བརྟགས་དོན། །དེ་དག་རང་བཞིན་སྟོང་པ་ཡིན་ མི་འཇིག་དོན་ནི་སྟོང་པ་སྟེ། །དངོས་པོ་མེད་ཅེས་བྱ་བའོ། །འཇིག་རྟེན་ཇི་བཞིན་སངས་རྒྱས་ཏེ། །སངས་རྒྱས་ཆོས་ཀྱང་དེ་བཞིན་ནོ། །སངས་རྒྱས་ཆོས་དང་སངས་རྒྱས་རྣམས། །ངོ་ བོ་ཉིད་ཀྱིས་རང་བཞིན་མེད། །མ་ནོར་ཡང་དག་ཇི་བཞིན་པའི། །ཆོས་ཉིད་འདི་ནི་རྟོགས་གྱུར་ནས། །ཀུན་གཟིགས་ཐམས་ཅད་མཁྱེན་པ་ཡི། །སངས་རྒྱས་ཀུན་ནས་རབ་ཏུ་སྣང༌། ། དེ་ནས་བྱང་ཆུབ་སེམས་དཔའ་རིག་པ་དང་ལྡན་པས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ནས་དེའི་ཚེ་ཚིགས་སུ་བཅད་དེ་སྨྲས་པ། རང་བཞིན་དངོས་པོ་མེད་པ་ ཡི༑ ༑འཇིག་རྟེན་ཁམས་རྣམས་ཐམས་ཅད་ཀྱི། །ས་ཡི་ཁམས་རྣམས་ཇི་བཞིན་ཏེ། །སངས་རྒྱས་རྣམ་འཕྲུལ་ངོ་མཚར་ཆེ། །དེ་ཡི་རང་བཞིན་འདི་ཡིན་ལ། །བརྗོད་ཅིང་བསྔགས་ པ་མཐའ་ཡས་ཏེ། །འདས་པའི་འཇིག་རྟེན་ཁམས་རྣམས་སུ། །སུས་ཀྱང་བརྗོད་པ་མ་ཡིན་ནོ། །གཞན་དུ་སེམས་ཅན་ལས་ཀྱིས་ན། །ཤིན་ཏུ་བསྟན་པར་བརྗོད་པ་སྟེ། །སེམས་ ཅན་རྣམས་ནི་མ་གཏོགས་པར། །ལས་ཞེས་བྱ་བ་ཅི་མི་དམིགས། །དེ་བཞིན་སྟོང་པའི་ལས་ཀྱིས་ཀྱང༌། །བརྗོད་པ་རྣམས་ནི་ཚད་མེད་པར། །སེམས་ཅན་ཀུན་གྱི་ལས་སུ་གྱུར། དེ་ལ་འོངས་པ་གང་ཡང་མེད། །ཇི་ལྟར་ཁ་དོག་དབྱིབས་ཀྱི་རྣམས། །ལས་ཀྱི་རྒྱུ་ནི་བསམ་མི་ཁྱབ། །སྣང་ཡང་དེ་དག་དེ་ན་མེད། །རྣམ་པར་རིག་པའི་དངོས་ཉིད་འདྲ། །དེ་བཞིན་ ༄༅། །སེམས་ཅན་གཙོ་བོ་ཡི། །སྐུ་ནི་བསམ་གྱིས་མི་ཁྱབ་པ། །བརྗོད་པ་རྣམས་ཀྱང་ཚད་མེད་པར། །ཞིང་རྣམས་ཀུན་ན་རབ་ཏུ་སྣང༌། །སྐུས་ནི་རྫོགས་པའི་སངས་ རྒྱས་མིན། །སངས་རྒྱས་རྣམས་ལ་སྐུ་མི་མངའ། །དཔའ་བོ་ཆེན་པོ་ཆོས་སྐུ་སྟེ། །ཆོས་ཀུན་རྟོགས་པར་ཐུགས་སུ་ཆུད། །གང་གིས་རང་བྱུང་རྣམས་ཀྱི་སྐུ། །ཡང་དག་ཇི་བཞིན་ མཐོང་བ་ནི། །སངས་རྒྱས་ཆོས་ནི་རྣམ་ཀུན་དང༌། །ཆོས་རྣམས་ལ་ཡང་རྨོངས་པ་མེད། །འདས་པར་གྱུར་པའི་ཆོས་རྣམས་ཀུན། །མྱ་ངན་འདས་པར་ཤེས་གྱུར་ན། །དེ་དག་ཤིན་ཏུ་མི་ གནས་པའི། །རྫོགས་པའི་སངས་རྒྱས་མཐོང་བ་ཡིན། །ཡང་དག་སངས་རྒྱས་སུས་མཐོང་ཞིང༌། །དྲན་པ་ཤིན་ཏུ་བསྒོམས་བྱས་ཏེ། །མཚན་མེད་ཐ་དད་མེད་པ་རྣམས། །དེ་དག་ ཆོས་ཀྱི་རྒྱལ་པོའི་སྲས། །དེ་ནས་བྱང་ཆུབ་སེམས་དཔའ་བློ་དང་ལྡན་པས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་དེ་སྨྲས་པ། ཇི་ལྟར་ རི་མོའི་ལས་རྣམས་ལ། །ཚོན་རྣམས་སྣ་ཚོགས་ཀུན་འདུ་བ། །ཀུན་ཀྱང་འབྱུང་བ་ཆེན་པོར་མཉམ། །སེམས་ཀྱིས་ཡོངས་སུ་བརྟགས་པ་ཡིན། །ཁམས་ལ་ཚོན་རྩི་དེ་དག་ མེད་༑ཚོན་རྩི་ལ་ཡང་ཁམས་མེད་དེ། །ཁམས་རྣམས་མ་གཏོགས་གཞན་ན་ཡང༌། །ཚོན་ཅེས་བྱ་བ་གང་ཡང་མེད། །སེམས་ལ་རི་མོ་དེ་མེད་དེ། །རི་མོ་ལའང་སེམས་མེད་ དོ༑ ༑སེམས་དེ་མ་གཏོགས་གཞན་དུ་ཡང༌། །རི་མོ་གང་ཡང་མི་དམིགས་སོ། །སེམས་དེ་རྟག་པ་མ་ཡིན་པ། །བསམ་གྱིས་མི་ཁྱབ་ཚད་མེད་ཅིང༌། །ཕན་ཚུན་ཤེས་པ་མེད་པ་ཡི། །གཟུགས་ རྣམས་ཐམས་ཅད་སྟོན་པར་བྱེད། །ཇི་ལྟར་རི་མོ་མཁན་གྱི་རྣམས། །སེམས་ནི་གང་གིས་རི་མོ་དེ། །བྲིས་པའི་སེམས་ཀྱང་མི་ཤེས་པ། །དེ་བཞིན་ཆོས་ཀྱི་རང་བཞིན་ནོ། །སེམས་ནི་རི་མོ་ མཁན་དང་འདྲ། །སེམས་ནི་ཕུང་པོ་བྱེད་པ་སྟེ། །འཇིག་རྟེན་ཁམས་ན་ཇི་སྙེད་པའི། །འཇིག་རྟེན་འདི་དག་སེམས་ཀྱིས་བྲིས། །སེམས་དང་འདྲ་བ་སངས་རྒྱས་ཏེ། །སངས་རྒྱས་ཇི་བཞིན་ འགྲོ་བའོ། །སེམས་དང་སངས་རྒྱས་དག་ལ་ཡང༌། །ངོ་བོ་ཉིད་ཀྱིས་ཟད་པ་མེད། །སེམས་ཀྱི་རྒྱུད་རྣམས་ཅི་འདྲ་བ། །དེ་དག་སངས་རྒྱས་རབ་ཏུ་མཁྱེན། །དེ་ཕྱིར་སངས་རྒྱས་རང་བཞིན་ གྱིས༑ ༑འགྲོ་བ་སྣ་ཚོགས་གྱུར་པར་སྣང༌། །ལུས་ཀྱི་རྣམས་ལ་སེམས་མེད་དེ། །སེམས་ལའང་ལུས་རྣམས་ཡོད་པ་མིན། །སངས་རྒྱས་མཛད་པའང་རབ་ཏུ་བྱེད། །དེ་ལྟར་སྤྱོད་པ་ངོ་མཚར་ ཆེ༑ ༑གང་ཞིག་དུས་གསུམ་ཐམས་ཅད་ཀྱི། །རྒྱལ་བ་ཐམས་ཅད་ཤེས་འདོད་ན། །སངས་རྒྱས་ཐམས་ཅད་སེམས་ཀྱི་དངོས། །ཆོས་ཀྱི་དབྱིངས་སུ་བལྟ་བར་གྱིས། །དེ་ནས་བྱང་ཆུབ་སེམས་ དཔའ་ཡེ་ཤེས་དང་ལྡན་པས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་དེ་སྨྲས་པ། གཟུང་དུ་མེད་ལ་འཛིན་ཅེས་བྱ། །སྣང་བ་མེད་པ་སྣང་བ་ ༄༅། །སྟེ༑ ༑མཉན་དུ་མེད་པར་ཉན་པར་བྱེད། །སེམས་མེད་པ་ཡི་སེམས་དང་ལྡན། །ཚད་མེད་པ་ལ་ཚད་མ་ཡིས། །གང་ཞིག་འཛིན་པར་མི་འདོད་པ། །དེ་ ནི་ཚད་མེད་ཚད་མ་ཡིས། །ནམ་ཡང་འཛིན་པར་མི་འགྱུར་རོ། །བརྗོད་དུ་མེད་པ་སྨྲ་བྱེད་པ། །བདག་ལ་ཤིན་ཏུ་སླུ་བ་སྟེ། །དེ་ཡི་དོན་ཀྱང་རྗོད་མི་བྱེད། །སྲོག་ཆགས་རྣམས་ ཀྱང་ཚིམ་མི་འགྱུར། །དེ་བཞིན་མཐའ་ཡས་བརྗོད་ལྡན་པའི། །བརྗོད་པ་གང་ཞིག་སྨྲ་འདོད་པ། །བསྐལ་པ་གྲངས་མེད་ཟད་བྱས་ཀྱང༌། །རང་བྱུང་རྣམས་ཀྱིས་བརྗོད་མི་ཟད། །ཡིད་ བཞིན་ནོར་བུ་དག་པ་ནི། །ཁ་དོག་ཀུན་ཏུ་རབ་ཏུ་སྣང༌། །དེ་ལ་ཁ་དོག་ཡོད་པ་མིན། །སངས་རྒྱས་ཡོན་ཏན་དེ་བཞིན་ནོ། །ཇི་ལྟར་ནམ་མཁའ་དྲི་མེད་ཅིང༌། །གཟུགས་མེད་བསྟན་ དུ་མེད་ཡིན་ཡང༌། །གཟུགས་རྣམས་ཐམས་ཅད་སྟོན་པར་བྱེད། །ནམ་མཁའ་སྣང་བ་གང་ཡང་མེད། །དེ་བཞིན་ཐམས་ཅད་གཟིགས་པ་རྣམས། །ཡོན་ཏན་ཀུན་དང་ལྡན་སྟོན་ཀྱང༌། ། དེ་ནི་སུས་ཀྱང་མཐོང་བ་མེད། །སེམས་ལའང་དེ་ནི་མི་གནས་སོ། །སངས་རྒྱས་སྒྲ་ནི་གྲགས་མོད་ཀྱི། །དེ་བཞིན་གཤེགས་པ་སྒྲ་མ་ཡིན། །སྒྲ་ནི་མ་གཏོགས་གཞན་དུ་ཡང༌། །སངས་ རྒྱས་ཤེས་པར་མི་རུང་ངོ༌། །ཇི་ལྟར་བདག་གིས་མཐོང་ཚུལ་དུ། །འདི་ནི་ཤེས་བྱའི་གནས་མ་ཡིན། །སངས་རྒྱས་བྱང་ཆུབ་བླང་དུ་མེད། །དེ་ལ་རྣམ་པར་རྟོག་པ་མེད། །སངས་རྒྱས་ཆོས་ རྣམས་གང་དག་ཀྱང༌། །སུ་ལའང་སངས་རྒྱས་གསུངས་པ་མེད། །སེམས་ཅན་བསམ་པ་ཇི་བཞིན་དུ། །དེ་ལ་དེ་འདྲ་སྟོན་པ་མཛད། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ ཞེས་བྱ་བ་ལས། རབ་མཚེ་མའི་གནས་སུ་བྱང་ཆུབ་སེམས་དཔའ་འདུས་པས་ཚིགས་སུ་བཅད་པ་བསྟན་པའི་ལེའུ་ཞེས་བྱ་བ་སྟེ། ཉི་ཤུ་ལྔ་པའོ།། །།བམ་པོ་ཉི་ཤུ་དྲུག་པ། དེ་ནས་དེའི་ཚེ་བྱང་ཆུབ་སེམས་དཔའ་ཡོན་ཏན་དང་ལྡན་པས་སངས་རྒྱས་ཀྱི་མཐུས་བྱང་ཆུབ་སེམས་དཔའི་ཏིང་ངེ་འཛིན་ཤིན་ཏུ་རྣམ་པར་ཕྱེ་བའི་རྣམ་པར་འབྱེད་པ་ཞེས་བྱ་བ་ལ་མཉམ་ པར་བཞག་པར་གྱུར་ཏོ། །དེ་ལྟར་བྱང་ཆུབ་སེམས་དཔའ་ཡོན་ཏན་དང་ལྡན་པ་བྱང་ཆུབ་སེམས་དཔའི་ཏིང་ངེ་འཛིན་རྣམ་པར་ཕྱེ་བའི་རྣམ་པར་འབྱེད་པ་དེ་ལ་མཉམ་པར་བཞག་མ་ཐག་ཏུ་ དེའི་ཚེ་ཕྱོགས་བཅུ་རེ་རེར་ཡང་འཇིག་རྟེན་གྱི་ཁམས་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འདས་པའི་ཕ་རོལ་ནས་དེ་བཞིན་གཤེགས་པའི་མཚན་ཡོན་ཏན་དང་ལྡན་པ་ ཞེས་བྱ་བ་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་ཞལ་བསྟན་པ་མཐོང་སྟེ། སངས་རྒྱས་བཅོམ་ལྡན་འདས་དེ་དག་གིས་དེ་ལ་འདི་སྐད་ཅེས་བཀའ་སྩལ་ཏོ། །ཡོན་ ཏན་དང་ལྡན་པ། དེ་ལྟར་ཁྱོད་བྱང་ཆུབ་སེམས་དཔའི་ཏིང་ངེ་འཛིན་ཤིན་ཏུ་རྣམ་པར་ཕྱེ་བའི་རྣམ་པར་འབྱེད་པ་ལ་མཉམ་པར་བཞག་པ་ལེགས་སོ། །ལེགས་སོ། །རིགས་ཀྱི་བུ། ཁྱོད་ ༄༅། །ལ་ནི༑ དེ་བཞིན་གཤེགས་པ་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཐམས་ཅད་ཀྱང་མཚན་མཐུན་པ་ཤ་སྟག་གིས་འདི་ལྟར་ བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྔོན་གྱི་སྨོན་ལམ་དང༌། སྔོན་གྱི་བྱིན་གྱི་རླབས་དང༌། བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བས་ ཤིན་ཏུ་བརྟན་པས་ན། འདི་ལྟར་ཆོས་བསྟན་པ་དང༌། སངས་རྒྱས་ཀྱི་ཡེ་ཤེས་རྣམ་པར་འཕེལ་བར་བྱ་བ་དང༌། འཇིག་རྟེན་གྱི་ཁམས་ལ་འཇུག་པར་བྱ་བ་དང༌། སེམས་ ཅན་གྱི་ཁམས་རྣམ་པར་སྒོམ་པ་དང༌། ཆགས་པ་མེད་པ་ལ་འཇུག་པར་བྱ་བ་དང༌། སྒྲིབ་པ་མེད་པའི་སྤྱོད་ཡུལ་དང༌། ཀུན་ནས་རབ་ཏུ་སྦྱོར་བ་དང༌། ཐམས་ཅད་མཁྱེན་པ་ རབ་ཏུ་སྒྲུབ་པ་དང༌། ཆོས་ཐམས་ཅད་ཁོང་དུ་ཆུད་པར་བྱ་བ་དང༌། དབང་པོ་ཐམས་ཅད་ཡོངས་སུ་ཤེས་པར་བྱ་བ་དང༌། ཆོས་བསྟན་པ་ཐམས་ཅད་ཡོངས་སུ་གཟུང་བར་བྱ་བ་ དང༌། འདི་ལྟར་བྱང་ཆུབ་སེམས་དཔའི་སྤྱོད་པ་བཅུ་བརྩམ་པ་རབ་ཏུ་ཐོབ་པར་བྱ་བའི་ཕྱིར་བྱིན་གྱིས་བརླབ་པ་མཛད་ཀྱི། རིགས་ཀྱི་བུ། ཁྱོད་ཀྱིས་སངས་རྒྱས་ཀྱི་མཐུ་དང༌། སངས་རྒྱས་ཀྱི་བྱིན་གྱི་རླབས་ཀྱིས་ཆོས་འདི་བསྟན་པ་ལ་སློབ་པར་གྱིས་ཤིག། དེ་ནས་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་ཡོན་ཏན་དང་ ལྡན་པ་ལ་ཆགས་པ་མེད་པ་ཉིད་ཉེ་བར་སྒྲུབ་པ་མཛད་དོ། །བསྒྲིབས་པ་མེད་པ་ཉིད་ཉེ་བར་སྒྲུབ་པ་མཛད་དོ། །བྱིན་གྱི་རླབས་ཉིད་ཉེ་བར་སྒྲུབ་པ་མཛད་དོ། །སློབ་དཔོན་མེད་པ་ཉིད་ ཉེ་བར་སྒྲུབ་པ་མཛད་དོ། །རྨོངས་པ་མེད་པ་ཉིད་ཉེ་བར་སྒྲུབ་པ་མཛད་དོ། །ཐ་དད་པ་མེད་པ་ཉིད་ཉེ་བར་སྒྲུབ་པ་མཛད་དོ། །ཁ་ན་མ་ཐོ་བ་མེད་པ་ཉིད་ཉེ་བར་སྒྲུབ་པ་མཛད་དོ། །ཚད་མེད་ པ་ཉིད་ཉེ་བར་སྒྲུབ་པ་མཛད་དོ། །ཟིལ་གྱིས་མི་ནོན་པ་ཉིད་ཉེ་བར་སྒྲུབ་པ་མཛད་དོ། །ཞུམ་པ་མེད་པ་ཉིད་ཉེ་བར་སྒྲུབ་པ་མཛད་དོ། །དེ་ཅིའི་ཕྱིར་ཞེ་ན། ཏིང་ངེ་འཛིན་འདི་ཉིད་ཀྱི་ཆོས་ ཉིད་ཐོབ་པའི་ཕྱིར་རོ། །དེ་ནས་སངས་རྒྱས་བཅོམ་ལྡན་འདས་དེ་དག་གིས་ཕྱག་གཡས་པ་བརྐྱང་སྟེ་བྱང་ཆུབ་སེམས་དཔའ་ཡོན་ཏན་དང་ལྡན་པའི་མགོ་ལ་བྱུག་པ་མཛད་དོ། ། སངས་རྒྱས་བཅོམ་ལྡན་འདས་དེ་དག་གིས་དེ་ལྟར་རེག་མ་ཐག་ཏུ་བྱང་ཆུབ་སེམས་དཔའ་ཡོན་ཏན་དང་ལྡན་པ་ཏིང་ངེ་འཛིན་དེ་ལས་ལངས་ཏེ་བྱང་ཆུབ་སེམས་དཔའ་རྣམས་ལ་ སྨྲས་པ༑ ཀྱེ་རྒྱལ་བའི་སྲས་དག །བྱང་ཆུབ་སེམས་དཔའི་ལས་ནི། བསམ་གྱིས་མི་ཁྱབ་སྟེ། དེ་ནི། འདི་ལྟར་ཆོས་ཀྱི་དབྱིངས་ཀྱིས་ཀླས་སོ། །ནམ་མཁའི་དབྱིངས་ཀྱི་མཐར་ཐུག་ གོ །ཀྱེ་རྒྱལ་བའི་སྲས་དག །དེ་ཅིའི་ཕྱིར་ཞེ་ན། དེ་ནི། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། འདས་པའི་སངས་རྒྱས་བཅོམ་ལྡན་འདས་རྣམས་ཀྱི་ ༄༅། །སྤྱོད་པ་ལའང་སློབ་བོ། །མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་སྤྱོད་པ་ལའང་སློབ་བོ། །ད་ལྟར་བྱུང་བའི་སངས་རྒྱས་བཅོམ་ལྡན་འདས་ རྣམས་ཀྱི་སྤྱོད་པ་ལའང་སློབ་བོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་རྣམས་ཀྱི་སྤྱོད་པ་གང་ལ་བསམ་སྟེ་དེ་སྐད་དུ་སྨྲས་པ་དེ་དག་གང་ཞེ་ན། ཀྱེ་རྒྱལ་བའི་སྲས་ དག །བཅུ་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་སངས་རྒྱས་བཅོམ་ལྡན་འདས་འདས་པ་དང༌། མ་བྱོན་པ་དང༌། ད་ལྟར་བྱུང་བ་རྣམས་ཀྱིས་གསུངས་ པ་དང༌། གསུང་བ་དང༌། གསུང་བར་འགྱུར་བ་སྟེ། བཅུ་གང་ཞེ་ན། འདི་ལྟ་སྟེ། དགའ་བར་བྱེད་པ་ཞེས་བྱ་བ་བྱང་ཆུབ་སེམས་དཔའ་སྤྱོད་པ་དང་པོ་དང༌། བདེ་བ་སྐྱེད་ པ་ཞེས་བྱ་བ་བྱང་ཆུབ་སེམས་དཔའི་སྤྱོད་པ་གཉིས་པ་དང༌། མི་མཐུན་པ་མེད་པ་ཞེས་བྱ་བ་བྱང་ཆུབ་སེམས་དཔའི་སྤྱོད་པ་གསུམ་པ་དང༌། མི་ཟད་པ་ཞེས་བྱ་བ་བྱང་ ཆུབ་སེམས་དཔའི་སྤྱོད་པ་བཞི་པ་དང༌། རྨོངས་པ་མེད་པ་ཞེས་བྱ་བ་བྱང་ཆུབ་སེམས་དཔའི་སྤྱོད་པ་ལྔ་པ་དང༌། ལྟ་བ་བཟང་པོ་ཞེས་བྱ་བ་བྱང་ཆུབ་སེམས་དཔའི་སྤྱོད་ པ་དྲུག་པ་དང༌། གནས་མེད་པ་ཞེས་བྱ་བ་བྱང་ཆུབ་སེམས་དཔའི་སྤྱོད་པ་བདུན་པ་དང༌། ཐུབ་པར་དཀའ་བ་ཞེས་བྱ་བ་བྱང་ཆུབ་སེམས་དཔའི་སྤྱོད་པ་བརྒྱད་པ་དང༌། ཆོས་ བཟང་པོ་ཞེས་བྱ་བ་བྱང་ཆུབ་སེམས་དཔའི་སྤྱོད་པ་དགུ་པ་དང༌། བདེན་པ་དང་ལྡན་པ་ཞེས་བྱ་བ་བྱང་ཆུབ་སེམས་དཔའི་སྤྱོད་པ་བཅུ་པ་དག་སྟེ། ཀྱེ་རྒྱལ་བའི་སྲས་དག །བཅུ་པོ་དེ་ དག་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་སངས་རྒྱས་བཅོམ་ལྡན་འདས་འདས་པ་དང༌། མ་བྱོན་པ་དང༌། ད་ལྟར་བྱུང་བ་རྣམས་ཀྱིས་གསུངས་པ་དང༌། གསུང་བ་དང༌། གསུང་བར་འགྱུར་བའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་སྤྱོད་པ་དང་པོ་དགའ་བར་བྱེད་པ་ཞེས་བྱ་བ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་བཅོམ་ལྡན་འདས་རྣམས་ཀྱི་སྔོན་གྱི་སྤྱོད་པའི་རྗེས་སུ་སློབ་ཅིང༌། རྗེས་སུ་དྲན་པར་བྱ་བ་དང༌། ཡིད་ཞུམ་པ་མེད་པ་དང༌། ཡིད་དང་བས་ཀུན་ཏུ་འཕེལ་བར་བྱ་བ་དང༌། ཡོངས་སུ་བཟུང་བ་དང༌། ཡང་དག་པར་བསྟན་པ་དང༌། རྗེས་སུ་རྒྱ་ཆེ་བར་བྱེད་ཅིང༌། སྡུག་བསྔལ་བའི་སེམས་ཅན་བདེ་བར་བྱ་ བའི་ཕྱིར་སེམས་ཅན་ཐམས་ཅད་ལ་བདོག་པ་ཐམས་ཅད་ཡོངས་སུ་གཏོང་བ་དང༌། འགྱོད་པ་མེད་པའི་སེམས་ཀྱི་སྦྱོར་བ་དང༌། རྣམ་པར་སྨིན་པ་ལ་ཡེ་རྔམ་པ་མེད་པ་དང༌། གྲགས་པ་འདོད་པ་མེད་པ་དང༌། གཉེན་འདོད་པ་མེད་པ་དང༌། ཁེ་འདོད་པ་མེད་པ་དང༌། གཞན་རྗེས་སུ་སྲུང་བ་དང༌། ཕ་རོལ་ལ་ཕན་གདགས་པ་དང༌། སེམས་ཅན་ཐམས་ཅད་ ༄༅། །ལ་ཕན་གདགས་པའི་སེམས་ཀྱིས་སྦྱིན་པའི་བདག་པོ་སྦྱིན་པ་བྱེད་པ་ཡིན་ཏེ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའི་སྤྱོད་པ་ དང་པོའོ། །སྤྱོད་པ་དེ་ལ་གནས་པའི་བྱང་ཆུབ་སེམས་དཔའ་ནི། སྐྱེ་བོ་མང་པོའི་ཡིད་དུ་འོང་བ་ཡིན་ཏེ། དེ་ནི། སེམས་ཅན་དབུལ་པོ་གང་དང་གང་ན་ཡོད་པ་དེ་དང་དེར་སྨོན་ ལམ་གྱི་དབང་གིས་རབ་ཏུ་སྐྱེས་ཏེ། སྐྱེས་ནས་ཀྱང་ཟད་མི་ཤེས་པའི་ལོངས་སྤྱོད་དང་ལྡན་ཞིང་ཤིན་ཏུ་ཕྱུག་པ་ཡིན་ཏེ། དེ་ལ་གལ་ཏེ་དུས་གཅིག་ཏུ་སློང་བའི་སྲོག་ཆགས་བྱེ་ བ་ཁྲག་ཁྲིག་བརྒྱ་སྟོང་གྲངས་མེད་པ་ཞིག་འོངས་ཏེ། འདི་སྐད་དུ། ཀྱེ་ཤེས་པར་གྱིས་ཤིག །བདག་ཅག་ཐམས་ཅད་ནི། བཀྲེས་པས་འཆིའོ། །གལ་ཏེ་བདག་ཅག་གིས་ཁྱོད་ ཀྱི་ཤ་ཟོས་ན་ནི། འཚོ་བར་འགྱུར་རོ། །ཞེས་ཚིག་ཏུ་སྨྲ་བར་གྱུར་ཀྱང་བྱང་ཆུབ་སེམས་དཔའ་ནི། སྦྱིན་པ་ཕུན་སུམ་ཚོགས་པ་རྣམ་པ་འདི་ལྟ་བུ་དང་ལྡན་ཏེ། སློང་བའི་སྲོག་ ཆགས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་དེ་སྙེད་ཅིག་ཉེ་བར་ལྷགས་ཀྱང་བྱང་ཆུབ་སེམས་དཔའ་ལ་དེའི་ཕྱིར་སེམས་བསྐྱེད་པ་གཅིག་ཀྱང་ཞུམ་པའི་བསམ་པར་མི་ འགྱུར་གྱི། སེམས་ཅན་དེ་དག་ཐམས་ཅད་ལ་སྙིང་རྗེ་ཆེན་པོ་རབ་ཏུ་སྐྱེས་ཏེ། གཞན་མང་པོ་ཞིག་འོངས་ཀྱང་དེ་བས་ཀྱང་ཆེས་དགའ་བ་དང༌། སྤྲོ་བ་འབྱུང་ཞིང་འདི་ལྟར་བདག་ གིས་གསོལ་བ་མ་བཏབ་པར་སངས་རྒྱས་ཀྱི་ཆོས་ལ་ཡང་དག་པར་སྟོབས་པའི་དགེ་བའི་བཤེས་གཉེན་སྡུག་བསྔལ་ཞིང༌། སློང་བ་སྦྱིན་པའི་གནས་སུ་གྱུར་པ་འདི་ལྟ་བུ་དག་དང་འགྲོགས་ པར་གྱུར་པ་ནི། བདག་གིས་ཐོབ་པ་ལེགས་པར་ཐོབ་སྟེ། ཅི་ནས་ཀྱང་སེམས་ཅན་འགའི་ཡིད་ཀྱང་མི་ཉམས་པར་བྱ་བ་དེ་ལྟར་བདག་གིས་བྱའོ། །བདག་གིས་དགེ་བའི་རྩ་བ་ཅི་ བྱས་པ་དང༌། ཅི་བྱེད་པ་དང༌། དགེ་བའི་རྩ་བ་ཅི་བྱེད་པར་འགྱུར་བ་དེས་ཇི་ཙམ་གྱིས་སེམས་ཅན་དེ་དག་ཐམས་ཅད་འགྲངས་ཤིང་དུས་བྱེད་པར་འགྱུར་བ་དེ་ཙམ་དུ་ཆེ་བའི་ལུས་སུ་ གྱུར་ཅིག །སེམས་ཅན་དེ་དག་འགྲངས་ཤིང་ཚིམ་པར་མ་གྱུར་གྱི་བར་དུ་བཅད་ཅིང་སྐྱེ་བས་མི་ཟད་པ་དེ་ཙམ་གྱི་ལུས་སུ་གྱུར་ཅིག །དགེ་བའི་རྩ་བ་དེས་ཀྱང་བླ་ན་མེད་པ་ཡང་དག་ པར་རྫོགས་པའི་བྱང་ཆུབ་ཏུ་ཡང་དག་པར་བསྒྲུབས་ཏེ། ཕུང་པོ་མ་ལུས་པའི་མྱ་ངན་ལས་འདས་པའི་ཁམས་སུ་མྱ་ངན་ལས་འདའ་བར་བྱའོ། །རྣམ་གྲངས་འདི་བཞིན་དུ་མ་འོངས་ པའི་དུས་ཀྱི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་དེ་དག་ཐམས་ཅད་ལས་འདི་འདྲ་བ་དང་ལྡན་པར་གྱུར་ཏེ། དེ་དག་ཐམས་ཅད་ཀྱང་བདག་གི་ཤ་ལ་ཟོས་ནས་བླ་ན་མེད་པ་ ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་བསྒྲུབས་ཏེ། སངས་རྒྱས་ཀྱི་ཆོས་ཐམས་ཅད་མཉམ་པའི་ཡེ་ཤེས་ཀྱིས་སངས་རྒྱས་ཀྱི་མཛད་པ་བྱས་ནས་ཕུང་པོའི་ལྷག་མ་མ་ ༄༅། །ལུས་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདའ་བར་གྱུར་ཅིག །བདག་ཉིད་ཀྱང་སེམས་ཅན་གྱི་བསམ་པ་ཡོངས་སུ་རྫོགས་པར་མ་ བྱས་ཀྱི་བར་དུ་བདག་ཏུ་འདུ་ཤེས་པའམ། སེམས་ཅན་དུ་འདུ་ཤེས་པའམ། སྲིད་པར་འདུ་ཤེས་པའམ། སྲོག་ཏུ་འདུ་ཤེས་པའམ། སོ་སོའི་སྐྱེ་བོར་འདུ་ཤེས་པའམ། གང་ ཟག་ཏུ་འདུ་ཤེས་པའམ། ཤེད་ཅན་དུ་འདུ་ཤེས་པའམ། ཤེད་བདག་ཏུ་འདུ་ཤེས་པའམ། བྱེད་པ་པོར་འདུ་ཤེས་པའམ། ཚོར་བ་པོར་འདུ་ཤེས་པའམ། གཞན་དུ་ཆོས་ཀྱི་ དབྱིངས་ཉེ་བར་གཟུང་བ་དང༌། སེམས་ཅན་གྱི་ཁམས་མཐའ་ཡས་པའི་ཆོས་ཉིད་ཉེ་བར་གཟུང་བ་དང༌། སྟོང་པའི་ཆོས་ཉིད་ཉེ་བར་གཟུང་བ་དང༌། འདོད་ཆགས་དང་བྲལ་བའི་ཆོས་ ཉིད་ཉེ་བར་གཟུང་བ་དང༌། མཚན་ཉིད་མེད་པའི་ཆོས་ཉིད་ཉེ་བར་གཟུང་བ་དང༌། དངོས་པོ་མེད་པའི་ཆོས་ཉིད་ཉེ་བར་གཟུང་བ་དང༌། གནས་མེད་པའི་ཆོས་ཉིད་ཉེ་བར་གཟུང་བ་ དང༌། གཞི་མེད་པའི་ཆོས་ཉིད་ཉེ་བར་གཟུང་བ་དང༌། མངོན་པར་འདུ་བྱ་བ་མེད་པའི་ཆོས་ཉིད་ཉེ་བར་གཟུང་བ་མ་གཏོགས་པར་མངོན་པར་འཚང་རྒྱ་བར་མ་གྱུར་ཅིག །ཅེས་ཏེ། དེ་ནི། བདག་ཀྱང་ཡང་དག་པར་རྗེས་སུ་མི་མཐོང༌། བདག་གི་ལུས་ཀྱང་ཡང་དག་པར་རྗེས་སུ་མི་མཐོང༌། ལེན་ཏོ། །ཞེས་བྱ་བར་ཡང་ཡང་དག་པར་རྗེས་སུ་མི་མཐོང༌། ལེན་པ་ ཡང་ཡང་དག་པར་རྗེས་སུ་མི་མཐོང༌། སྦྱིན་པའི་གནས་ཀྱང་ཡང་དག་པར་རྗེས་སུ་མ་མཐོང་སྟེ། དེ་ནི། ལས་ཀྱང་ཡང་དག་པར་རྗེས་སུ་མི་མཐོང༌། རྣམ་པར་སྨིན་པ་ཡང་ཡང་དག་ པར་རྗེས་སུ་མི་མཐོང༌། འབྲས་བུའང་ཡང་དག་པར་རྗེས་སུ་མི་མཐོང༌། འབྲས་བུ་ཆེན་པོའང་ཡང་དག་པར་རྗེས་སུ་མི་མཐོང༌། འབྲས་བུ་ཆུང་ངུ་ཡང་ཡང་དག་པར་རྗེས་སུ་མི་ མཐོང༌། དེ་འདས་པའི་དུས་ཀྱི་སེམས་ཅན་ཐམས་ཅད་ཀྱི་ལུས་ཞིག་པར་ཡིད་ལ་བྱེད་དོ། །མ་འོངས་པ་དང༌། ད་ལྟར་བྱུང་བའི་སེམས་ཅན་ཐམས་ཅད་ཀྱི་ལུས་འཇིག་པར་ཡིད་ ལ་བྱེད་དོ། །དེ་འདི་སྙམ་དུ་སེམས་ཏེ། ཀྱེ་མ། སེམས་ཅན་འདི་དག་རང་གི་ལུས་གྲངས་མེད་པ་ཞིག་ནི། འགགས་ཏེ། འགག་ཅིང་འགག་པར་འགྱུར་ཡང་སྙིང་པོ་མེད་པའི་ ལུས་ལས་སྙིང་པོ་མི་ལེན་པ་ནི། ངོ་མཚར་ཆེའོ། །དེ་ལྟ་ཡིན་གྱི། བདག་གིས་སེམས་ཅན་ཐམས་ཅད་བདེ་བས་རིམ་གྲོ་བྱ་བའི་ཕྱིར་དེ་བཞིན་གཤེགས་པའི་རྗེས་སུ་བསླབ་ པར་བྱའོ། །ཐམས་ཅད་མཁྱེན་པའི་ཡེ་ཤེས་ཀྱང་མངོན་པར་སངས་རྒྱས་ཏེ་ཆོས་ཐམས་ཅད་རྣམ་པར་སྦྱང་བའི་ཕྱིར་ཆོས་ཉིད་མི་འཇིག་པ་ཉེ་བར་བཟུང་སྟེ། དུས་གསུམ་མཉམ་ པ་ཉིད་དུ་མཐུན་པའི་ཚུལ་གྱིས་ཞི་བར་བྱ་བས་སེམས་ཅན་རྣམས་ལ་ཆོས་བསྟན་པར་བྱའོ། །སྙམ་དུ་སེམས་ཏེ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའི་ ༄༅། །སྤྱོད་པ་དང་པོ་སྟེ། དགའ་བར་བྱེད་པ་ཞེས་བྱའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་རྣམས་ཀྱི་སྤྱོད་པ་གཉིས་པ་བདེ་བ་སྐྱེད་པ་ཞེས་ བྱ་བ་དེ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་ཚུལ་ཁྲིམས་དང་ལྡན་པ་ཡིན་ཏེ། དེ་ནི། མི་གནས་པ་ཡིན། གཟུགས་དང༌། སྒྲ་དང༌། དྲི་དང༌། རོ་དང༌། རེག་ལ་མི་གནས་པ་སྟོན་པ་ཡིན། རིགས་ཀྱི་བུ་བདག་ཉིད་ཆེ་བ་ལ་མི་གནས་པ་ཡིན། རྒྱུད་ཀྱི་བདག་ཉིད་ཆེ་བ་ལ་མི་གནས་པ་ཡིན། ཟས་ཀྱི་བདག་ཉིད་ཆེ་བ་ལ་ མི་གནས་པ་ཡིན། གཟུགས་ཀྱི་བདག་ཉིད་ཆེ་བ་ལ་མི་གནས་པ་ཡིན། ལོངས་སྤྱོད་ཀྱི་བདག་ཉིད་ཆེ་བ་ལ་མི་གནས་པ་ཡིན་ཏེ། དེ་ལྟར་དེ་ནི། ཚུལ་ཁྲིམས་ལས་ཡོངས་ སུ་ཉམས་པ་མེད་ཅིང༌། འདི་ལྟར་ཀུན་ནས་འཁོར་བ་མེད་པ་དང༌། ཀུན་ཏུ་བཙལ་བ་མེད་པ་དང༌། ཡོངས་སུ་གདུང་བ་མེད་པ་དང༌། བར་ཆད་མེད་པ་དང༌། གཙེ་བ་མེད་པ་ དང༌། འཁྲུལ་པ་མེད་པར་བྱའོ། །སྣད་པ་མེད་པར་བྱའོ། །སངས་རྒྱས་ཀྱིས་བསྔགས་པའི་ཆོས་རྣམས་ཡོངས་སུ་གཟུང་ངོ༌། །སྙམ་དུ་སེམས་ཏེ། ཀྱེ་རྒྱལ་བའི་སྲས་དག ། བྱང་ཆུབ་སེམས་དཔའ་དེ་ལྟ་བུའི་ཚུལ་ཁྲིམས་དང་ལྡན་པའི་དྲུང་དུ་གལ་ཏེ་ཉིན་གཅིག་ཏུ་བདུད་བྱེ་བ་ཁྲག་ཁྲིག་བརྒྱ་སྟོང་ཞིག་འོངས་ཏེ། བདུད་རེ་རེ་ཞིང་ཡང་ལྷའི་བུ་མོ་ བྱེ་བ་ཁྲག་ཁྲིག་བརྒྱ་སྟོང་འདོད་པའི་ཆོ་ག་ཐམས་ཅད་ལ་མཁས་པ། བདེ་བར་རིམ་གྲོར་བྱ་བ་ཐམས་ཅད་ཐོགས་པ། ལུས་ཀྱི་རྒྱན་གྱིས་ལུས་ཡོངས་སུ་རྒྱས་པ་བྱེ་བ་ཁྲག་ཁྲིག་ བརྒྱ་སྟོང་རེ་རེ་བསྙེན་ཀྱང་བྱང་ཆུབ་སེམས་དཔས་འདོད་པ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བར་དུ་གཅོད་པ་ཡིན་པར་ཤེས་ནས་སྟོན་པ་མངོན་དུ་གྱུར་པའི་ ཕྱིར་འདོད་པ་དང་ལྡན་པའི་སེམས་བསྐྱེད་པ་གཅིག་ཀྱང་མི་འབྱུང་སྟེ། བྱང་ཆུབ་སེམས་དཔའ་ནི། ཐམས་ཅད་མཁྱེན་པ་ཉིད་ཡིད་ལ་བྱ་བ་དང་མི་འབྲལ་ལོ། །འདོད་པའི་དོན་དུ་སེམས་ ཅན་འགའ་ལའང་སྡུག་བསྔལ་གྱི་རྒྱུར་འགྱུར་བ་མི་བྱེད་དེ། ཆུང་ངུ་ན་སྲོག་གི་དབང་པོ་འགགས་པར་གྱུར་ཀྱང་གཞན་ལ་མི་དགའ་བ་མི་སྐྱེད་དོ། །ཀྱེ་རྒྱལ་བའི་སྲས་དག །བྱང་ ཆུབ་སེམས་དཔའ་རྣམས་ནི། དེ་བཞིན་གཤེགས་པ་མཐོང་ནས་ཆུང་ངུ་ན་སེམས་ཀྱི་རྒྱུད་གཅིག་ཙམ་གྱིས་ཀྱང་འདོད་པ་ལ་མི་སྤྱོད་ན། གཉིས་ཀྱིས་གཉིས་སྦྱར་བ་ལྟ་སྨོས་ ཀྱང་ཅི་དགོས་ཏེ། འདི་ནི། གནས་མེད་དོ། །བྱང་ཆུབ་སེམས་དཔའ་ནི། འདི་ལྟར་སེམས་སྐྱེས་ཏེ། སེམས་ཅན་འདི་དག་ནི། ཡུན་རིང་པོ་ནས་དེ་ལྟར་གཞོལ་བ། དེ་ལྟར་འབབ་ པ༑ དེ་ལྟར་བབ་པ། དེ་ལྟར་མོས་པ། དེ་ལྟ་བུའི་སྤྱོད་ཡུལ་ཅན། དེ་ལྟར་ངེས་པ། དེ་ལྟར་བྱིང་བ། དེ་ལྟར་ནོན་པ། དེ་ལྟར་ཆགས་པ། དེ་ལྟར་ཞུགས་པ་ཡིན་གྱི། བདག་གིས་ ༄༅། །ནི༑ བདུད་འདི་དག་དང༌། བདུད་ཀྱི་བུ་མོ་འདི་དག་དང༌། སེམས་ཅན་ཐམས་ཅད་ཅི་ནས་ཀྱང་བླ་ན་མེད་པའི་ཚུལ་ཁྲིམས་ཡོངས་སུ་དག་པ་ལ་བཀོད་དེ། ཐམས་ ཅད་མཁྱེན་པ་ཉིད་ལ་ཕྱིར་མི་ལྡོག་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱས་ཏེ། ཕུང་པོའི་ལྷག་མ་མ་ལུས་པའི་མྱ་ངན་ལས་ འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་བ་དེ་ལྟར་བྱའོ། །དེ་ཅིའི་ཕྱིར་ཞེ་ན། འདི་ལྟར་སངས་རྒྱས་ཐམས་ཅད་ཀྱི་རྗེས་སུ་བསླབ་སྟེ་མི་བྱ་བ་ཐམས་ཅད་ ཡོངས་སུ་སྤངས་པ་དང༌། ལུས་ཀྱིས་མི་ཤེས་པ་ཐམས་ཅད་ཡོངས་སུ་སྤངས་པ་མ་ཡིན་པ་དང༌། སེམས་ཀྱིས་ཀྱང་མ་ཡིན་པ་དེ་ནི། བདག་ཅག་གི་ལས་ཡིན་གྱི། ཀྱེ་རྒྱལ་བའི་ སྲས་དག །བདག་ཅག་གིས་སངས་རྒྱས་ཀྱི་ཆོས་ཐམས་ཅད་ཀྱི་རྗེས་སུ་སོང་བའི་ཡེ་ཤེས་ཀྱིས་སེམས་ཅན་ཐམས་ཅད་ཀྱི་ཕྱིན་ཅི་ལོག་རབ་ཏུ་སྤང་བའི་ཕྱིར་ཆོས་བསྟན་པར་ བྱའོ༑ ༑ཕྱིན་ཅི་ལོག་ནི། སེམས་ཅན་རྣམས་ལས་གཞན་ནའང་མེད་དེ། ཕྱིན་ཅི་ལོག་རྣམས་ལས་ཀྱང་སེམས་ཅན་རྣམས་གུད་ན་མེད་དོ། །ཕྱིན་ཅི་ལོག་ཏུའང་སེམས་ཅན་ འདུས་པ་མ་ཡིན། སེམས་ཅན་དུའང་ཕྱིན་ཅི་ལོག་འདུས་པ་མ་ཡིན་ནོ། །ཕྱིན་ཅི་ལོག་རྣམས་ཀྱང་སེམས་ཅན་མ་ཡིན། སེམས་ཅན་རྣམས་ཀྱང་ཕྱིན་ཅི་ལོག་མ་ཡིན་ནོ། ། ཕྱིན་ཅི་ལོག་རྣམས་ནི། ནང་ནའང་མེད། ཕྱིན་ཅི་ལོག་རྣམས་ནི། ཕྱི་རོལ་ནའང་མེད་དོ། །སེམས་ཅན་རྣམས་ཀྱང་ནང་ན་ཡང་མེད། སེམས་ཅན་རྣམས་ནི། ཕྱི་རོལ་ན་ཡང་མེད་དེ། ཆོས་དེ་དག་ཐམས་ཅད་ནི། གསོག །གསོབ། རྫུན་པ། བསླུ་བའི་ཆོས་ཅན་ཏེ། སྒྱུ་མ་ལྟ་བུ་བྱིས་པ་སླུ་བ་དང༌། ངན་པ། ཆུང་བ། སྙིང་པོ་མེད་པ། རྨི་ལམ་ལྟ་བུ། མིག་ཡོར་ལྟ་བུ་ སྟེ༑ དེ་དག་ཁོང་དུ་ཆུད་པར་བྱ་བའི་ཕྱིར་འདུ་བྱེད་རྗེས་སུ་རྟོགས་པའོ། །འདུ་བྱེད་རྗེས་སུ་རྟོགས་པའི་ཕྱིར་མྱ་ངན་ལས་འདས་པ་སྟེ། དེ་ནི། སངས་རྒྱས་ཀྱི་བྱང་ཆུབ་ཏུ་རྣམ་པར་ འཚང་རྒྱ་བར་བྱེད་དེ། རྒལ་བས་ནི། སྒྲོལ་བར་བྱེད། གྲོལ་བས་ནི། འགྲོལ་བར་བྱེད། ཞི་བས་ནི། ཞི་བར་བྱེད། དབུགས་ཕྱིན་པས་ནི། དབུགས་འབྱིན་པར་བྱེད། བཀྲུས་ པས་ནི༑ འཁྲུ་བར་བྱེད། དག་པས་ནི། དག་པར་བྱེད། མྱ་ངན་ལས་འདས་པས་ནི། མྱ་ངན་ལས་འདའ་བར་བྱེད། བདེ་བར་གྱུར་པས་ནི། བདེ་བར་བྱེད་པ་སྟེ། བདག་ཅག་ གིས་ནི༑ དེ་བཞིན་གཤེགས་པ་དང་སྐལ་པ་མི་མཐུན་པར་གནས་པར་མི་བྱ་སྟེ། བདག་ཅག་གིས་ནི། འཇིག་རྟེན་གྱི་སྤྱོད་པ་ཐམས་ཅད་སྤང་བར་བྱའོ། །བདག་ཅག་གིས་ནི། སངས་རྒྱས་ཀྱི་ཆོས་ཐམས་ཅད་དང་ལྡན་པར་བྱའོ། །བདག་ཅག་གིས་ནི། བླ་ན་མེད་པའི་ཆོས་མཉམ་པ་ཉིད་ཀྱིས་གནས་པར་བྱའོ། །བདག་ཅག་གིས་ནི། སེམས་ཅན་ ༄༅། །ཐམས་ཅད་ལ་སེམས་མཉམ་པས་ཡང་དག་པར་འཇུག་པར་བྱའོ། །བདག་ཅག་གིས་ནི། ཡུལ་ཐམས་ཅད་ཡོངས་སུ་ཤེས་པ་དང་ལྡན་པར་ བྱའོ༑ ༑བདག་ཅག་གིས་ནི། ཡོངས་སུ་སྤྱོད་པ་ཁ་ན་མ་ཐོ་བ་མེད་པའི་བག་ཆགས་དང་ལྡན་པར་བྱའོ། །བདག་ཅག་གིས་ནི། རྟོགས་པ་ཐམས་ཅད་དང་ལྡན་པར་ བྱའོ༑ ༑བདག་ཅག་གིས་ནི། འབྱུང་བ་ཐམས་ཅད་ལ་མཁས་པ་དང་ལྡན་པར་བྱའོ། །བདག་ཅག་གིས་ནི། བླ་ན་མེད་པའི་ཡེ་ཤེས་ཀུན་ཏུ་མཐའ་ཡས་པ། བརྗོད་དུ་ མེད་པ༑ མི་གནས་པ། འཕོས་པ་མེད་པ། མཐའ་དང་དབུས་མེད་པ། མི་ཟད་པ། གཟུགས་མེད་པ། བསྟན་དུ་མེད་པ་ལ་རབ་ཏུ་མོས་པར་བྱའོ། །ཞེས་ཟེར་ཏེ། ཀྱེ་ རྒྱལ་བའི་སྲས་དག། འདི་ནི། བྱང་ཆུབ་སེམས་དཔའི་སྤྱོད་པ་གཉིས་པ་སྟེ། བདེ་བ་སྐྱེད་པ་ཞེས་བྱའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའ་སེམས་ དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་གསུམ་པ་མི་མཐུན་པ་མེད་པ་ཞེས་བྱ་བ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་ཆོས་ ཉིད་ལ་བརྩོན་ཏེ་བཟོད་པ་དང་ལྡན་ཞིང་མངོན་པར་སྨྲ་བའི་ངང་ཚུལ་ཅན་ཡིན་ཏེ། དེ་ཡང་བདག་ལ་གནོད་པ་མ་ཡིན། ཕ་རོལ་ལ་གནོད་པ་མ་ཡིན། གཉིས་ཀ་ལ་ གནོད་པ་མ་ཡིན། བདག་བསྡུ་བ་མ་ཡིན། གཞན་བསྡུ་བ་མ་ཡིན། གཉིས་ཀ་བསྡུ་བ་མ་ཡིན། བདག་ཡོངས་སུ་གཟུང་བ་མ་ཡིན། གཞན་ཡོངས་སུ་གཟུང་བ་ མ་ཡིན༑ གཉིས་ཀ་ཡོངས་སུ་གཟུང་བ་མ་ཡིན། ཡང་དག་པར་བླངས་པ་གྲགས་པའི་ཕྱིར་མ་ཡིན་གྱི། བྱང་ཆུབ་སེམས་དཔའ་ནི། སེམས་འདི་ལྟར་སྐྱེ་སྟེ། བདག་ཅག་ གིས་སེམས་ཅན་ཐམས་ཅད་ལ་མི་དགེ་བ་ཐམས་ཅད་སྤང་བའི་ཕྱིར་ཆོས་བསྟན་པར་བྱའོ། །འདོད་ཆགས་སྤང་བ་དང༌། ཞེ་སྡང་སྤང་བ་དང༌། གཏི་མུག་སྤང་བ་དང༌། ང་རྒྱལ་ སྤང་བ་དང༌། འཆབ་པ་སྤང་བ་དང༌། ཕྲག་དོག་སྤང་བ་དང༌། སེར་སྣ་སྤང་བ་དང༌། གཡོ་དང་སྒྱུ་སྤང་བ་དང༌། བཟོད་པ་དང་ངེས་པ་ལ་གཞག་པའི་ཕྱིར་བདག་ཅག་གིས་སེམས་ ཅན་ཐམས་ཅད་ལ་ཆོས་བསྟན་པར་བྱའོ། །ཞེས་ཏེ། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་ནི། དེ་ལྟ་བུར་བཟོད་ཅིང་ངེས་པ་དང་ལྡན་པ་ཡིན་པས། དེ་ལ་གལ་ཏེ་ སྲོག་ཆགས་བརྒྱ་སྟོང་བྱེ་བ་གྲངས་མེད་པ་ཞིག་འོངས་ལ། སྲོག་ཆགས་དེ་དག་རེ་རེ་ཞིང་ཡང་ཁ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་སྤྲུལ་ཏེ་དྲུང་དུ་ཕྱིན་ལ། ཁ་རེ་རེ་ནས་ ཀྱང་མི་སྙན་པར་བརྗོད་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པས། མི་སྙན་ཅིང་ཡིད་དུ་མི་འོང་བ་དང༌། མི་འདོད་པ་དང༌། མི་སྡུག་པ་དང༌། མི་དགའ་བ་དང༌། མི་ཚུལ་བ་ ༄༅། །དང༌། འཕགས་པ་མ་ཡིན་པ་དང༌། འཕགས་པ་མ་ཡིན་པས་བརྗོད་པ་དང༌། འཕགས་པ་མ་ཡིན་པས་བསྙེན་པ་དང༌། ཡོངས་སུ་སྤང་བར་བྱ་བ་ ཤ་སྟག་ཏུ་བརྗོད་དེ། ལག་པ་རེ་རེ་ཞིང་ཡང་འཐབ་ཆ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ཐོགས་ཏེ། བྱང་ཆུབ་སེམས་དཔའི་ལུས་ལ་གནོད་པར་བྱས་ལ། ཉིན་གཅིག་ ཏུ་ཇི་ལྟ་བ་བཞིན་དུ་བསྐལ་པ་གྲངས་མེད་པར་ཡང་མཚམས་མེད་ཅིང་ངལ་མི་ཤེས། སྐྱོ་མི་ཤེས། རྒྱུན་མི་ཆད། གཏོང་བ་མེད། །སྡོད་པ་མེད། གཅུགས་སུ་མེད། དབུགས་ འབྱིན་པ་མེད། ཕྱིར་སྲི་བ་མེད་པར་བརྟགས་ཀྱང་ཀྱེ་རྒྱལ་བའི་སྲས་དག །དེ་ལྟ་བུའི་འཇིགས་པ་ཆེན་པོ། མི་ཟད་པ། མ་རུངས་པ། སྐྱི་གཡའ་བ། སྡུག་བསྔལ་བ། ཉམས་ སུ་འབབ་པ། ཚ་བ། རྩུབ་པས་ཕོག་སྟེ་སྲོག་ལ་བབ་པར་འཆི་མ་ཁད་ཀྱང་དེ་ལ་བྱང་ཆུབ་སེམས་དཔའ་འདི་སྙམ་དུ་སེམས་ཏེ། སྡུག་བསྔལ་གྱི་རྣམ་པ་འདི་ཙམ་དག་ གིས་ཕོག་པ་ལ་གལ་ཏེ་བདག་གིས་སེམས་འཁྲུག་པ་ཞིག་བྱས་སུ་ཟིན་ན། དེ་ནི། མ་དུལ་བ་དང༌། མི་བདེན་པ་དང༌། མི་མཁས་པ་དང༌། མ་ཞི་བ་དང༌། མ་བསྒོམས་ པ་དང༌། མ་བསྡམས་པ་དང༌། མ་ཁུག་པ་དང༌། བྱས་པ་མེད་པ་དང༌། མཉམ་པར་མ་བཞག་པ་དང༌། བདག་གི་ལུས་ལ་བརྟེན་པས་གཞན་གྱི་སེམས་མགུ་བར་བྱ་ བར་མི་ནུས་ཀྱི་ཞེས་ཏེ། དེ་ལུས་དང་སེམས་ཀྱི་རང་བཞིན་ཤེས་ནས་ཐོག་མ་དང་ཐ་མ་མེད་པར་སྐྱེ་བ་དང༌། འཁོར་བའི་སྡུག་བསྔལ་རྗེས་སུ་དྲན་ནས་ཆོས་འདི་དག་ནི། ཚུལ་གྱིས་ དེ་བཞིན་ནོ། །ཞེས་ནས་ཕྱིར་ཞིང་སེམས་དང་བར་བྱེད། རབ་ཏུ་དང་བར་བྱེད། དགའ་བར་བྱེད། རབ་ཏུ་དགའ་བར་བྱེད། ཚིམ་པར་བྱེད། གཟེངས་མཐོ་བར་བྱེད། སྤྲོ་བར་བྱེད། རབ་ཏུ་སྤྲོ་བར་བྱེད། འདུལ་བར་བྱེད། ཡོངས་སུ་འདོམས་པར་བྱེད་དེ། དེ་ལྟར་བདག་གིས་ཀྱང་སངས་རྒྱས་ཀྱི་ཆོས་ལ་བཞག་སྟེ། སེམས་ཅན་ཐམས་ཅད་ལའང་དོན་འདི་ བསྟན་པར་བྱའོ། །སྙམ་མོ། །དེ་ཅིའི་ཕྱིར་ཞེ་ན། འདི་ལྟར་ལུས་འདི་ནི། བདག་དང་བདག་གིས་སྟོང་པ་སྟེ། རང་བཞིན་གྱིས་སྟོང་པའོ། །སྟོང་པ་ཉིད་ལ་ནི། བདེ་བའམ། སྡུག་ བསྔལ་པའམ། གཉིས་སུ་བརྗོད་པ་མེད་པ་གང་ཡང་མེད་དོ། །གང་སྟོང་པ་དེ་ལ་ཅིའང་མེད་དེ། ཆོས་ཐམས་ཅད་ནི། ཅིའང་མ་ཡིན་པ་ཡིན་གྱི། དེ་དག་གིས་ཀྱང་ཡང་དག་ པར་ཤེས་པར་བྱས་ཏེ་སེམས་ཅན་ཐམས་ཅད་ལ་དངོས་པོར་འཛིན་པ་སྤང་བའི་ཕྱིར་ཆོས་བསྟན་པར་བྱ་དགོས་ཀྱི། དེ་ལྟར་བདག་གིས་འདི་དག་ལ་བྱམས་པའི་སེམས་དང༌། ཕན་པའི་སེམས་དང༌། བདེ་བའི་སེམས་དང༌། སྙིང་རྗེ་བའི་སེམས་དང༌། སྙིང་བརྩེ་བའི་སེམས་དང༌། ཕན་པར་དགའ་བའི་སེམས་དང༌། ཡོངས་སུ་མི་གཏོང་བའི་སེམས་དང༌། ༄༅། །འཚང་རྒྱ་བའི་སེམས་དང༌། བྱང་ཆུབ་པའི་སེམས་དང༌། མི་འཕྲོག་པའི་སེམས་དང༌། སངས་རྒྱས་ཀྱི་ཚུལ་གྱི་རྗེས་སུ་བསྙེགས་པའི་སེམས་ཀྱིས་ བཟོད་པར་བྱའོ། །སྙམ་མོ། །ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་གསུམ་པ་སྟེ། མི་མཐུན་ པ་མེད་པ་ཞེས་བྱའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྱོད་པ་བཞི་པ་མི་ཟད་པ་ཞེས་བྱ་བ་དེ་གང་ཞེ་ན། འདི་ལ་བྱང་ཆུབ་ སེམས་དཔའ་སེམས་དཔའ་ཆེན་པོ་བརྩོན་འགྲུས་དང་ལྡན་པ་ཡིན་ཏེ། བརྩོན་འགྲུས་མཆོག་དང་ལྡན་པ་ཡིན། བརྩོན་འགྲུས་རབ་དང་ལྡན་པ་ཡིན། བརྩོན་འགྲུས་དམ་ པ་དང་ལྡན་པ་ཡིན། བརྩོན་འགྲུས་ཕུལ་དང་ལྡན་པ་ཡིན། བརྩོན་འགྲུས་འཕགས་པ་དང་ལྡན་པ་ཡིན། བརྩོན་འགྲུས་གྱ་ནོམ་པ་དང་ལྡན་པ་ཡིན། བརྩོན་འགྲུས་བླ་ན་ མེད་པ་དང་ལྡན་པ་ཡིན། བརྩོན་འགྲུས་མི་ཉམས་པ་དང་ལྡན་པ་ཡིན་ཏེ། དེ་ལ་འདོད་ཆགས་ཀྱི་རང་བཞིན་མེད། ཞེ་སྡང་གི་རང་བཞིན་མེད། གཏི་མུག་གི་རང་བཞིན་མེད། ང་རྒྱལ་གྱི་རང་བཞིན་མེད་དོ། །འཆབ་པའི་རང་བཞིན་མེད། ཕྲག་དོག་གི་རང་བཞིན་མེད། འཇུངས་པའི་རང་བཞིན་མེད། སྒྱུའི་རང་བཞིན་མེད། ཁྲེལ་མེད་པའི་རང་བཞིན་ མེད་དོ༑ ༑དེ་ནི། སེམས་ཅན་གང་ལ་ཡང་མཐོ་བ་ཙམ་པའི་ཕྱིར་བརྩོན་འགྲུས་མི་རྩོམ་སྟེ། གཞན་དུ་ན་ཉོན་མོངས་པ་ཐམས་ཅད་ཡོངས་སུ་སྤང་བའི་ཕྱིར་བརྩོན་འགྲུས་རྩོམ་མོ། །བག་ ལ་ཉལ་བ་ཐམས་ཅད་ཡང་དག་པར་གཞོམ་པའི་ཕྱིར་བརྩོན་འགྲུས་རྩོམ་མོ། །བག་ཆགས་ཐམས་ཅད་ཡོངས་སུ་བསལ་བའི་ཕྱིར་བརྩོན་འགྲུས་རྩོམ་མོ། །སེམས་ཅན་གྱི་ཁམས་ ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །འཆི་འཕོ་དང༌། སྐྱེ་བ་ཐམས་ཅད་ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །ཉོན་མོངས་པ་ཐམས་ཅད་ཡོངས་ སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །སེམས་ཅན་གྱི་བསམ་པ་ཐམས་ཅད་ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །སེམས་ཅན་ཐམས་ཅད་ཀྱི་སྤྱོད་ཡུལ་ ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །སེམས་ཅན་ཐམས་ཅད་ཀྱི་དབང་པོ་དང་བརྩོན་འགྲུས་རྣམ་པ་ཐ་དད་པ་མཆོག་དང་ཐ་མའི་རྒྱུ་ཡོངས་སུ་ཤེས་པར་བྱ་བའི་ ཕྱིར་བརྩོན་འགྲུས་རྩོམ་མོ། །སེམས་ཅན་ཐམས་ཅད་ཀྱི་སེམས་དང༌། སྤྱོད་པ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །ཆོས་ཀྱི་དབྱིངས་ཐམས་ཅད་ལ་འཇུག་པ་ཡོངས་སུ་ ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །སངས་རྒྱས་ཀྱི་ཆོས་ཐམས་ཅད་ཀྱི་རང་བཞིན་དང༌། ངོ་བོ་ཉིད་ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །སངས་ ༄༅། །རྒྱས་ཀྱི་ཆོས་ཐམས་ཅད་མཉམ་པ་ཉིད་ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །དུས་གསུམ་ལ་མཁས་པ་མཉམ་པ་ཉིད་ཡོངས་སུ་ ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །སངས་རྒྱས་ཀྱི་ཆོས་ཐམས་ཅད་ཤེས་པའི་སྣང་བ་མཉམ་པ་ཉིད་ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། ། སངས་རྒྱས་ཀྱི་ཆོས་ཐམས་ཅད་རྟོགས་པར་འགྱུར་བའི་ཡེ་ཤེས་ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །སངས་རྒྱས་ཀྱི་ཆོས་ཐམས་ཅད་ཚུལ་གཅིག་ཏུ་ མངོན་པར་འཚང་རྒྱ་བ་ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ། །སངས་རྒྱས་ཀྱི་ཆོས་མཐའ་དང་དབུས་མེད་པ་ཐམས་ཅད་མངོན་པར་འཚང་རྒྱ་བ་ཡོངས་སུ་ཤེས་ པར་བྱ་བའི་ཕྱིར་བརྩོན་འགྲུས་རྩོམ་མོ། །སངས་རྒྱས་ཀྱི་ཆོས་ཐམས་ཅད་རྟོགས་པའི་ཡེ་ཤེས་ཆེན་པོ་ལ་མཁས་པ་ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་མོ།། སངས་རྒྱས་ཀྱི་ཆོས་ཐམས་ཅད་རབ་ཏུ་དབྱེ་བ་བསྟན་པ་དང༌། སྒྲུབ་པ་རབ་ཏུ་བསྟན་པའི་རྒྱུས་ཡོངས་སུ་ཤེས་པར་བྱ་བའི་ཕྱིར་བརྩོན་འགྲུས་རྩོམ་སྟེ། ཀྱེ་རྒྱལ་བའི་སྲས་ དག །བྱང་ཆུབ་སེམས་དཔའ་སེམས་དཔའ་ཆེན་པོ་ནི། དེ་ལྟ་བུའི་བརྩོན་འགྲུས་དང་ལྡན་པ་ཡིན་ནོ། །དེ་གལ་ཏེ་འཇིག་རྟེན་གྱི་ཁམས་གྲངས་མེད་པའི་སེམས་ཅན་རྣམས་ ཀྱི་དོན་དུ་སེམས་ཅན་རེ་རེའི་ཕྱིར་ཡང་བསྐལ་པ་གྲངས་མེད་པར་མནར་མེད་པའི་སེམས་ཅན་དམྱལ་བ་ཆེན་པོར་སྡུག་བསྔལ་དུ་འདུག་པར་ཡང་སྤྲོ་ཞིང་མོས་ཏེ། སེམས་ཅན་ དེ་དག་ཀྱང་དེ་ཙམ་གྱི་བར་གྱིས་ཡོངས་སུ་མྱ་ངན་ལས་འདའ་བར་གྱུར་ལ། དེའི་དུས་སུ་སངས་རྒྱས་བཅོམ་ལྡན་འདས་གྲངས་མེད་པ་ཞིག་བྱུང་སྟེ། སངས་རྒྱས་བཅོམ་ལྡན་ འདས་དེ་དག་སུས་མཐོང་བ་དེ་དག་ཐམས་ཅད་ཀྱང་བདེ་བའི་ཡོ་བྱད་ཀུན་དང་ལྡན་པར་གྱུར་ཀྱང་བྱང་ཆུབ་སེམས་དཔའ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ མངོན་པར་རྫོགས་པར་འཚང་མི་རྒྱ་ཞིང༌། བྱང་ཆུབ་སེམས་དཔའ་དེ་ནི། འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་ཕྱིར་སེམས་ཅན་རེ་རེའི་ དོན་དུ་ཡང་བསྐལ་པ་གྲངས་མེད་པར་སེམས་ཅན་དམྱལ་བ་ཆེན་པོ་ན་དེ་སྙེད་ཀྱི་སེམས་ཅན་ཡོངས་སུ་མྱ་ངན་ལས་འདས་ཀྱི་བར་དུ་འདུག་པར་སྤྲོ་སྟེ། དེ་ལ་ལ་ཞིག་གིས་ འདི་སྐད་དུ། རྒྱ་མཚོ་ཆེན་པོ་གྲངས་མེད་པ་སྐྲའི་རྩེ་མོས་གཞལ་ཏེ་འཇིག་རྟེན་གྱི་ཁམས་གྲངས་མེད་པ་རྡུལ་དུ་བླགས་ཏེ་བགྲང་བ་དེ་སྙེད་ཀྱི་སྡུག་བསྔལ་གྱི་ཚོར་བ་དང་སེམས་ སྐད་ཅིག་ཏུ་ཡང་མི་འབྲལ་བའི་སྡུག་བསྔལ་གྱི་རྣམ་པ་དེ་ལྟ་བུ་དང་མི་འབྲལ་བར་འགྱུར་རོ། །ཞེས་ཟེར་ན་ཡང༌། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་ནི། དེ་ལ་ ༄༅། །དེའི་ཕྱིར་སེམས་བསྐྱེད་པ་འགའ་ཙམ་ཡང་འགྱོད་པ་དང་ལྡན་པ་མི་འབྱུང་གི །དེ་ནི། འདི་སྙམ་སྟེ། དེ་ལྟར་བདག་གི་མཐུས་སེམས་ཅན་འདི་དག་ སྡུག་བསྔལ་གྱི་རྣམ་པ་དེ་ལྟ་བུ་ལས་ཡོངས་སུ་གྲོལ་བར་གྱུར་པ་ནི། བདག་གིས་ཐོབ་པ་ལེགས་པར་ཐོབ་པ། གལ་ཏེ་ཐབས་འདི་འདྲ་བས་འཇིག་རྟེན་གྱི་ཁམས་ཐམས་ཅད་ ཀྱི་སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བར་འགྱུར་ན་ཡང་བྱང་ཆུབ་སེམས་དཔས་སྦྱོར་བ་དེ་ལ་སྤྲོ་བར་བྱ་བ་ཡིན་ནོ། །ཞེས་ཏེ། དེ་བས་ཀྱང་ཆེས་དགའ་བ་ དང༌། སྤྲོ་བ་སྐྱེའོ། །ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་བཞི་པ་སྟེ། མི་ཟད་པ་ཞེས་བྱ་བའོ། ། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ལྔ་པ་རྨོངས་པ་མེད་པ་ཞེས་བྱ་བ་གང་ཞེ་ན། ཀྱེ་རྒྱལ་བའི་སྲས་ དག །འདི་ལ་བྱང་ཆུབ་སེམས་དཔའ་དྲན་པ་དང་ལྡན་པ་ཡིན་ཏེ། དྲན་པའི་དམ་པ་འཁྲུག་པ་མེད་པ། རྣམ་པར་འཁྲུག་པ་མེད་པ། བརྟན་པ། སྲ་བ། མི་ཤིགས་པ། ཟིལ་ གྱིས་མི་ནོན་པ། ཡོངས་སུ་དག་པ། ཆེ་བ། ཚད་མེད་པ། རྨོངས་པ་མེད་པ་དང་ལྡན་པ་ཡིན་ཏེ། དྲན་པ་དེས་འཇིག་རྟེན་པའི་སྤྱོད་པ་རྣམས་ཀྱང་ཡོངས་སུ་འཛིན་པ་ཡིན། འཇིག་ རྟེན་ལས་འདས་པའི་ཚིག་ཀྱང་ཡོངས་སུ་འཛིན་པ་ཡིན། གཟུགས་དང་གཟུགས་མེད་པའི་ཚིག་ཀྱང་ཡོངས་སུ་འཛིན་པ་ཡིན། གཟུགས་ཀྱི་རང་བཞིན་ལ་བཏགས་པའི་ཚིག་ཀྱང་ ཡོངས་སུ་འཛིན་པ་ཡིན་ཏེ། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ལ་བཏགས་པའི་ཚིག་ཀྱང་ཡོངས་སུ་འཛིན་པ་ཡིན། རྣམ་པར་ཤེས་པའི་རང་བཞིན་ ཡོངས་སུ་ཤེས་པར་བྱ་བའི་ཕྱིར་ཚིག་ཀྱང་ཡོངས་སུ་འཛིན་པ་ཡིན་ཏེ། དེ་འཇིག་རྟེན་འདི་ནས་ཀྱང་རྨོངས་པ་མེད་པར་ཤི་འཕོའོ། །འཇིག་རྟེན་ཕ་རོལ་ཏུ་ཡང་རྨོངས་པ་མེད་པར་ སྐྱེ་སྟེ། མའི་མངལ་དུ་ཡང་རྨོངས་པ་མེད་པར་འགྲོ། མའི་མངལ་ནས་ཀྱང་རྨོངས་པ་མེད་པར་འབྱུང་སྟེ། བྱང་ཆུབ་སེམས་དཔའི་སེམས་བསྐྱེད་པ་རྨོངས་པ་མེད་པས་གནས་ སོ༑ ༑རྨོངས་པ་མེད་པར་དགེ་བའི་བཤེས་གཉེན་རྣམས་མགུ་བར་བྱེད་དོ། །རྨོངས་པ་མེད་པར་སངས་རྒྱས་ཀྱི་ཆོས་ལ་མོས་པར་བྱེད་དོ། །རྨོངས་པ་མེད་པར་བདུད་ཀྱི་ལས་ རྣམས་རབ་ཏུ་ཤེས་སོ། །རྨོངས་པ་མེད་པར་བདུད་ཀྱི་ལས་རྣམས་སྤོང་བར་བྱེད་དོ། །རྨོངས་པ་མེད་པར་བསྐལ་པ་བརྗོད་དུ་མེད་པར་བྱང་ཆུབ་སེམས་དཔའི་སྤྱོད་པ་ལ་ གནས་སོ། །དེ་དྲན་པ་ཡོངས་སུ་དག་པའི་ཡན་ལག་ཚད་མེད་པ་དང་ལྡན་པ་ཡིན་ཏེ། དེས་སངས་རྒྱས་བཅོམ་ལྡན་འདས་རྣམས་དང༌། བྱང་ཆུབ་སེམས་དཔའ་འམ། དགེ་བའི་ ༄༅། །བཤེས་གཉེན་རྣམས་ལས་བསྐལ་པ་གྲངས་མེད་པ་ན་ཆོས་ཐོས་པར་གྱུར་པ། ཟབ་མོ་ཟབ་མོར་སྣང་བའམ། ཡངས་པའི་ཆོས་རྒྱན་རྣམ་པར་ཕྱེ་ བའམ༑ ཆོས་སྣ་ཚོགས་ཚིག་དང་ཡི་གེ་སྣ་ཚོགས་ཀྱིས་བསྟན་པའམ། བྱང་ཆུབ་སེམས་དཔའི་རྒྱན་གྱི་ཆོས་སངས་རྒྱས་ཀྱི་བྱིན་གྱི་རླབས་སྣང་བ་ཅན་ནམ། བླ་ན་མེད་པའི་ སངས་རྒྱས་ཀྱི་ཆོས་ལྷག་པའི་བསམ་པ་དགེ་བ་དང༌། མོས་པས་རྣམ་པར་དག་པའམ། འཇིག་རྟེན་ཐམས་ཅད་ལ་མི་གནས་པའི་ཆོས་འཇིག་རྟེན་གྱིས་ཁོང་དུ་ཆུད་པ་དང་ མཐུན་པའམ། ཆོས་ཡངས་པ་རྒྱ་ཆེན་པོའི་ཆོས་སུ་བསྟན་པའམ། རབ་རིབ་དང་བྲལ་བའི་ཆོས་འཇིག་རྟེན་གྱིས་ཤེས་པར་བྱ་བའམ། འཇིག་རྟེན་ཐམས་ཅད་དང་ཐུན་མོང་ མ་ཡིན་པའི་ཆོས་བྱང་ཆུབ་སེམས་དཔའི་ཡེ་ཤེས་ཀྱི་རྗེས་སུ་སོང་བའམ། བླ་ན་མེད་པའི་ཆོས་ཐམས་ཅད་མཁྱེན་པའི་ཆོས་ཀྱིས་རྒྱ་ཆེར་རྣམ་པར་འཕྲུལ་བ་བསྟན་པ་དེ་ལྟ་ བུ་དག་ཐོས་ཀྱང་བསྐལ་པ་གྲངས་མེད་པས་བརྗེད་པར་མི་འགྱུར། ཉམས་པར་མི་འགྱུར། རྒྱུན་ཆད་པར་མི་འགྱུར་རོ། །དེ་ཅིའི་ཕྱིར་ཞེ་ན། དེ་ནི། བྱང་ཆུབ་སེམས་དཔའ་སེམས་ དཔའ་ཆེན་པོ་སྤྱད་པ་སྤྱོད་པའི་ཚེ་སེམས་ཅན་སུ་ལ་ཡང་དྲན་པ་རྣམ་པར་འཁྲུག་པར་མི་བྱེད། ཆོས་རིག་པ་ཐོགས་པར་མི་བྱེད། དགེ་བའི་རྩ་བའི་བློ་གྲོས་འཇིག་པར་མི་བྱེད། གཞན་གྱི་བློ་ལ་གནོད་པར་མི་བྱེད་དོ། །ཀྱེ་རྒྱལ་བའི་སྲས་དག །གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་འདི་ལྟ་བུའི་སྒྲ་ཆེན་པོ་མཐོ་བ་དག་དང་ཕྲད་པར་གྱུར་ ཏེ༑ དྲག་པོའི་སྒྲ་དང༌། མི་བཟད་པར་བོས་པའི་སྒྲ་དང༌། སྐྱི་གཡའ་བའི་སྒྲ་དང༌། ཡིད་དུ་འོང་བའི་སྒྲ་རྣ་བའི་སྤྱོད་ཡུལ་དུ་འོངས་པ་དང༌། ཡིད་དུ་མི་འོང་བའི་སྒྲ་རྣ་བའི་ཡུལ་དུ་ འོངས་པ་དང༌། སེམས་འཁྲུག་པར་བྱེད་པ་དང༌། རྣ་བའི་རྣམ་པར་ཤེས་པ་འཁྲུག་པར་བྱེད་པ་དང༌། དབང་པོ་དྲུག་འཕྲོག་པར་བྱེད་པ་དག་དང་འགྲོགས་པར་གྱུར་ཀྱང་སྒྲ་དེ་ལྟ་ བུ་དག་གིས་བྱང་ཆུབ་སེམས་དཔའི་སེམས་སྐད་ཅིག་ཀྱང་སེམས་རྣམ་པར་འཁྲུག་པར་མི་འགྱུར་ཏེ། དྲན་པ་རྣམ་པར་འཁྲུག་པར་མི་འགྱུར་རོ། །སྤྱོད་ཡུལ་རྣམ་པར་འཁྲུག་ བར་མི་འགྱུར་རོ། །མགོ་རྨོངས་པར་མི་འགྱུར་རོ། །འཁོར་བར་མི་འགྱུར་རོ། །བསླད་པར་མི་འགྱུར་རོ། །བྱང་ཆུབ་སེམས་དཔའ་དེ་ནི། འདི་ལྟར་སྒྲ་དེ་ལྟ་བུ་དག་ཡིད་དུ་འོང་ཞིང་ མཐུན་པར་བྱེད་པ་དང༌། ཡིད་དུ་མི་འོང་ཞིང་ཁོང་ཁྲོ་བར་བྱེད་པ་དང༌། འཇིག་རྟེན་གྱི་ཁམས་གྲངས་མེད་པར་གྲགས་པར་བྱེད་པ་དག་གིས་སེ་གོལ་གཏོགས་པ་ཙམ་དུའང་ཏིང་ངེ་ འཛིན་ལས་ལྡང་བར་མི་འགྱུར་རོ། །སྤྱོད་ཡུལ་ལས་ལྡང་བར་མི་འགྱུར་རོ། །ཆོས་ལ་འཇུག་པ་ལས་ལྡང་བར་མི་འགྱུར་རོ། །བྱང་ཆུབ་ཀྱི་སྤྱོད་པ་ལ་གཅིག་ཏུ་འདུས་པ་ལས་ལྡང་ ༄༅། །བར་མི་འགྱུར་རོ། །བྱང་ཆུབ་ཀྱི་སེམས་ཡོངས་སུ་སྒོམ་པ་ལས་ལྡང་བར་མི་འགྱུར་རོ། །སངས་རྒྱས་རྗེས་སུ་དྲན་པ་ལས་ལྡང་བར་མི་འགྱུར་རོ། ། ཆོས་ཡང་དག་པ་ཇི་ལྟ་བ་བཞིན་དུ་རྣམ་པར་བརྟགས་པ་ལས་ལྡང་བར་མི་འགྱུར་རོ། །སེམས་ཅན་ཡོངས་སུ་སྨིན་པར་བྱ་བའི་ཡེ་ཤེས་རྒྱུན་འཆད་པར་མི་འགྱུར་རོ། །སེམས་ ཅན་ཡོངས་སུ་དག་པར་བྱ་བའི་གནས་ཤེས་པ་རྒྱུན་ཆད་པར་མི་འགྱུར་རོ། །དོན་ངེས་པར་ཤེས་པ་རྒྱུན་འཆད་པར་མི་འགྱུར་རོ། །གང་གིས་ལས་ཀྱི་སྒྲིབ་པར་འགྱུར་བའི་ སྡིག་ཏོའི་ལས་གསོག་པར་མི་བྱེད་དོ། །གང་གིས་ཉོན་མོངས་པའི་སྒྲིབ་པར་འགྱུར་བའི་ཉོན་མོངས་པ་སྡུད་པར་མི་བྱེད་དོ། །གང་གིས་ཆོས་ཀྱི་སྒྲིབ་པར་འགྱུར་བའི་ཆོས་ ལ་རིམ་གྲོ་བྱེད་པར་མི་བྱེད་དོ། །གང་གིས་ཆོས་འཇིག་པར་འོང་བའི་སྒྲིབ་པར་འགྱུར་བ་དམ་པའི་ཆོས་ཡོངས་སུ་སྤོང་བར་མི་བྱེད་དོ། །དེ་ལ་དེ་ལྟ་བུའི་སྒྲ་འཇིག་རྟེན་གྱི་ ཁམས་གྲངས་མེད་པར་གྲགས་པ་མི་སྙན་པ་དང༌། སྙན་པ་བསྐལ་པ་གྲངས་མེད་པར་མི་སྡོད་པ། འཁྲུག་པར་བྱེད་པ། སེམས་འཁྲུག་པ། ལུས་འཁྲུག་པ། དབང་པོ་ འཁྲུག་པ། མོས་པར་བྱེད་པ། འཁོར་བར་བྱེད་པ། རྙོག་པར་བྱེད་པ། རྣམ་པར་རྙོག་པར་བྱེད་པ། ཀུན་ཏུ་རྙོག་པར་བྱེད་པས་དཀྲུགས་པར་བྱས་ཀྱང་དེ་ལ་བྱང་ཆུབ་སེམས་ དཔའ་འདི་ལྟར་སེམས་སྐྱེ་སྟེ། བདག་གིས་ནི། འཕགས་པའི་ཆོས་ཡོངས་སུ་བསྒོམས་པས་ནང་དུ་མཉམ་པར་གཞག་པར་བྱའོ། །སྙམ་ནས་དེ་སྒྲ་ཐམས་ཅད་ཀྱི་སྐྱེ་བ་ལ་རབ་ཏུ་ རྟོག་གོ །གནས་པ་ལ་རབ་ཏུ་རྟོག་གོ །འགོག་པ་ལ་རབ་ཏུ་རྟོག་གོ །སྐྱེ་བའི་རང་བཞིན་ལ་འཇུག་གོ །འགོག་པའི་རང་བཞིན་ལ་འཇུག་གོ །གང་གིས་སྒྲ་དེ་དག་བརྗོད་པ་དེ་དག་ ཀྱང་དེ་ལྟ་བུའི་རང་བཞིན་ཉིད་དུ་ཤེས་ཏེ། སྒྲས་ཆགས་པར་མི་འགྱུར། སྒྲས་ཁོང་ཁྲོ་བར་མི་འགྱུར་ཞིང༌། དེའི་དྲན་པ་ཉམས་པར་མི་འགྱུར་རོ། །དེ་སྒྲ་དེ་དག་ཐམས་ཅད་ཀྱི་ མཚན་མ་འཛིན་ཅིང་མཚན་མ་བསྐྱེད་དེ། སྒྲས་བསྒོ་བ་ལ་མངོན་པར་ཆགས་པར་མི་འགྱུར་རོ། །སྒྲ་ལ་གནས་པར་མི་འགྱུར་རོ། །སྒྲ་ལ་མངོན་པར་ཆགས་པ་མི་སྐྱེད་དོ། །དེས་སྒྲ་ དེ་དག་བརྟགས་ན་མི་དམིགས་ཏེ། སྒྲ་དེ་དག་ཐམས་ཅད་ཀྱི་རང་བཞིན་རབ་ཏུ་ཤེས་སོ། །རང་བཞིན་དེ་ཡང་བྱས་པ་མེད་པར་ཁོང་དུ་ཆུད་དོ། །མངོན་པར་འདུ་བྱེད་པ་མེད་པའི་རྒྱས་ འདེབས་ཤིང་ཆོས་ཀྱི་དབྱིངས་ཀྱི་རང་བཞིན་གྱི་ཚུལ་དུ་ཆགས་པ་མེད་པའི་མཐར་ཡང་རབ་ཏུ་ཤེས་སོ། །འདི་ལྟར་བྱང་ཆུབ་སེམས་དཔའ་ཐམས་ཅད་མཁྱེན་པའི་མཐར་ཐུག་པ། ཕྱིར་མི་ལྡོག་པ་མཐའ་ཡས་པ། བསམ་གཏན་གྱི་ཚུལ་ཐ་དད་པ་ཐམས་ཅད་ལ་རབ་ཏུ་ཞུགས་པ། ཏིང་ངེ་འཛིན་ཐམས་ཅད་ལ་རྒྱུད་གཅིག་གི་ཚུལ་དུ་ཞུགས་པ། ཆོས་ཐམས་ཅད་ ༄༅། །མཐའ་དང་དབུས་མེད་པར་རབ་ཏུ་ཆུད་པའི་ལུས་ཀྱི་ལས་དབེན་པ་དང་ལྡན་པ། ངག་གི་ལས་དབེན་པ་དང་ལྡན་པ། ཡིད་ཀྱི་ལས་དབེན་པ་དང་ལྡན་པས། ཤེས་པ་རྟོགས་པའི་ཆོས་ཐམས་ཅད་ཀྱི་རང་བཞིན་མིང་དང་སྒྲ་མེད་པ་ཞེས་བྱ་བའི་ཏིང་ངེ་འཛིན་གྲངས་མེད་པའི་ཏིང་ངེ་འཛིན་གྱི་སྒོ་དང་ལྡན་པ་འཐོབ་སྟེ། སྙིང་རྗེ་ཆེན་པོ་ཡང་ ཡངས་ཤིང་ཚད་མེད་པར་བྱེད་དོ། །གལ་ཏེ་དེ་ལྟར་བྱང་ཆུབ་སེམས་དཔའི་ཏིང་ངེ་འཛིན་སྟོང་ཕྲག་གྲངས་མེད་པ་སེམས་ཀྱི་སྐད་ཅིག་གཅིག་གིས་ཐོབ་པར་བྱེད་ཀྱང་བྱང་ཆུབ་ སེམས་དཔའ་སེམས་ཏིང་ངེ་འཛིན་དང་ལྡན་པ་དེ་ལ་དེ་ལྟ་བུའི་རྣམ་པར་འཁྲུག་པས་དྲན་པ་རྣམ་པར་འཁྲུག་པར་མི་ནུས་ཀྱི། དེ་ཕྱིར་ཞིང་འདི་སྙམ་དུ་སེམས་སྐྱེའོ། །དེ་ ལྟར་བདག་གིས་སེམས་ཅན་དེ་དག་ཐམས་ཅད་བླ་ན་མེད་པའི་རྣམ་པར་དག་པ་ལ་རབ་ཏུ་བཀོད་དེ། ཐམས་ཅད་མཁྱེན་པ་ཉིད་ལས་ཕྱིར་མི་ལྡོག་པར་བྱས་ལ། ཕུང་པོ་མ་ ལུས་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའོ། །སྙམ་མོ། །ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ ཀྱི་བྱང་ཆུབ་སེམས་དཔའི་སྤྱོད་པ་ལྔ་པ་སྟེ། རྨོངས་པ་མེད་པ་ཞེས་བྱའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་ དཔའི་སྤྱོད་པ་དྲུག་པ་ལྟ་བ་བཟང་པོ་ཞེས་བྱ་བ་དེ་གང་ཞེ་ན། ཀྱེ་རྒྱལ་བའི་སྲས་དག། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་སུ་མེད་ཅིང་བསྟན་པ་མི་དམིགས། ལུས་ཀྱི་ལས་དབེན་པ་དང༌། ངག་གི་ལས་དབེན་པ་དང༌། ཡིད་ཀྱི་ལས་དབེན་པ་ཐོབ་པ་ཡིན། མ་ཆགས་མ་བཅིངས་པའི་ལུས་ཀྱི་ལས་དང༌། མ་ཆགས་མ་བཅིངས་པའི་ངག་ གིས་ལས་དང༌། མ་ཆགས་མ་བཅིངས་པའི་ཡིད་ཀྱི་ལས་མ་ཆགས་མ་བཅིངས་པར་བསྟན་པ། གནས་པ་མེད་པ། མི་གནས་པ། སེམས་ཇི་ལྟ་བ་བཞིན་དུ་གནས་པ། སེམས་ཀྱི་ རང་བཞིན་ཚད་མེད་པའི་རྗེས་སུ་སོང་བ། ཆོས་ཐམས་ཅད་ཀྱི་རང་བཞིན་འབྱམས་ཀླས་པའི་རྗེས་སུ་སོང་བ། མཚན་ཉིད་མི་དམིགས་ཤིང་མཚན་ཉིད་བསྟན་དུ་མེད་པ། ཟབ་པ། གཏིང་ དཔག་པར་དཀའ་བ། དེ་བཞིན་ཉིད་ཀྱི་རང་བཞིན་གྱི་རྗེས་སུ་སོང་བ། རྣམ་པར་སྨིན་པ་དང་བྲལ་བའི་སྐྱོན་མེད་པ། མངོན་པར་སྒྲུབ་པ་ལ་མཁས་པ། འགོག་པ་དང་མཐུན་པར་གནས་པ། མྱ་ངན་ལས་མ་འདས་པའི་དབྱིངས་ཀྱི་སྤྱོད་ཡུལ་ཅན། ཞི་བའི་རྒྱུད་རབ་ཏུ་ཐོབ་བ། དངོས་པོ་མེད་པའི་ཚུལ་གྱི་གཞིར་གྱུར་པ། ཚིག་གི་ལམ་ཆད་པ། འགྲོ་བ་ཐམས་ཅད་ལས་འཕགས་ པ༑ གནས་མེད་པའི་སྤྱོད་པ་རབ་ཏུ་ཐོབ་པ། བྱང་ཆུབ་ཀྱི་སེམས་བསྐྱེད་པའི་མཚན་མ་ལ་མཁས་པ། རྟོགས་པ་བཅིངས་པ་མེད་པ་ལ་གནས་པ། དེ་ཁོ་ན་ཉིད་ཀྱི་ཆོས་ཀྱི་གནས་ཀྱི་རྗེས་སུ་ ༄༅། །ཞུགས་པ། འཇིག་རྟེན་ཐམས་ཅད་ཀྱིས་མི་བརྗོད་པ། འཇིག་རྟེན་ལས་འདས་པའི་གནས་དང་ལྡན་པ་ཐོབ་པ་ཡིན་ཏེ། དེ་འདི་སྙམ་དུ་སེམས་སོ། ། ཀྱེ་སེམས་ཅན་འདི་དག་ཐམས་ཅད་ནི། རང་བཞིན་འདི་ལྟ་བུ་སྟེ། འདི་ལྟར་སེམས་ཅན་མེད་པའི་རང་བཞིན་ནོ། །ཀྱེ་ཆོས་འདི་དག་ཐམས་ཅད་ནི། རང་བཞིན་འདི་ལྟ་བུ་སྟེ། འདི་ལྟར་འདུས་བྱས་པ་མེད་པའི་རང་བཞིན་ནོ། །ཀྱེ་ཞིང་འདི་དག་ཐམས་ཅད་ནི། འདི་ལྟ་བུའི་མཚན་ཉིད་དེ། འདི་ལྟར་མཚན་ཉིད་མེད་པའོ། །ཀྱེ་དུས་འདི་དག་ཐམས་ཅད་ ནི༑ འདི་ལྟ་བུར་བྱུང་བ་སྟེ། འདི་ལྟར་ཚིག་གི་ལམ་ལ་གཞོལ་ཞིང་ཆོས་ཀུན་གྱི་རྣམ་པར་ཚིག་གི་ལམ་ལ་ཤིན་ཏུ་གནས་ཀྱང་ཆོས་ཐམས་ཅད་ནི། ཚིག་གི་ལམ་ལ་མི་ གནས་པའོ། །ཞེས་དེ་དེ་ལྟར་ཆོས་ཐམས་ཅད་ཟབ་པའང་རབ་ཏུ་ཤེས་སོ། །འཇིག་རྟེན་ཐམས་ཅད་དབེན་པ་ལ་ཡང་རབ་ཏུ་འཇུག་གོ །དེ་དེ་ལྟར་སངས་རྒྱས་ཀྱི་ཆོས་མ་བསྐྱེད་ པ་ལ་ཡང་རབ་ཏུ་འཇུག་གོ །སངས་རྒྱས་ཀྱི་ཆོས་ཀྱང་འཇིག་རྟེན་གྱི་ཆོས་སུ་རབ་ཏུ་འཇུག་གོ །འཇིག་རྟེན་གྱི་ཆོས་ཀྱང་སངས་རྒྱས་ཀྱི་ཆོས་སུ་རབ་ཏུ་འཇུག་གོ །སངས་རྒྱས་ ཀྱི་ཆོས་དང་འཇིག་རྟེན་གྱི་ཆོས་འདྲེས་པར་མི་བྱེད་དོ། །འཇིག་རྟེན་གྱི་ཆོས་དང་སངས་རྒྱས་ཀྱི་ཆོས་ཐ་དད་པར་ཡང་མི་བྱེད་དོ། །འདི་ལྟར་དུས་གསུམ་ལ་གནས་པའི་ཆོས་ཀྱི་ དབྱིངས་ཐ་དད་པ་མེད་པ་ལ་ཡང་རབ་ཏུ་འཇུག་གོ །བྱང་ཆུབ་སེམས་དཔའ་སེམས་དཔའ་ཆེན་པོ་ལས་ཀྱང་ཉམས་པར་མི་བྱེད་དེ། སེམས་ཅན་ཐམས་ཅད་ཡོངས་སུ་སྨིན་པར་ བྱ་བ་དང༌། གདུལ་བ་ལས་ཀྱང་མི་ལྡོག་སྟེ། སེམས་ཅན་ཐམས་ཅད་བསྐྱབ་པའི་ཕྱིར་སྙིང་རྗེ་ཆེན་པོ་ཡང་ཕྱིར་ཞིང་རབ་ཏུ་འཛིན་པར་བྱེད་དོ། །སེམས་ཅན་གྱི་ཁམས་བདག་ གིས་སྨིན་པར་མ་བྱས་པ་ནི། སུ་ཞིག་སྨིན་པར་བྱེད། སེམས་ཅན་གྱི་ཁམས་བདག་གིས་དུལ་བར་མ་བྱས་པ་ནི། སུ་ཞིག་དུལ་བར་བྱེད། སེམས་ཅན་གྱི་ཁམས་བདག་གིས་ཞི་ བར་མ་བྱས་པ་ནི། སུ་ཞིག་ཞི་བར་བྱེད། སེམས་ཅན་གྱི་ཁམས་བདག་གིས་ཤེས་པར་མ་བྱས་པ་ནི། སུ་ཞིག་ཤེས་པར་བྱེད། སེམས་ཅན་གྱི་ཁམས་བདག་གིས་དག་པར་མ་ བྱས་པ་ནི། སུ་ཞིག་དག་པར་བྱེད་དེ། དེ་ལྟར་བདག་གིས་དེ་ལྟ་བུར་ཟབ་པའི་ཆོས་ཡང་དག་པར་མཐོང་ལ། གཅིག་པུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ རྣམ་པར་འགྲོལ་བར་བྱ་བ་འདི་ནི། བདག་ལ་ཚུལ་དང་མི་འདྲ་བ་སྟེ། སེམས་ཅན་གྱི་ཁམས་འདིའང་མྱ་ངམ་ཆེན་པོའི་ལམ་དུ་ཞུགས་པ། ཉོན་མོངས་པས་ཀུན་ནས་ བཟུང་བས་ལྡོངས་པར་གྱུར་པ། ཚོར་བ་ཉམས་སུ་བབ་པ་མི་ཟད་པས་ནད་པར་གྱུར་པ། སྲེད་པས་བསྐོར་བའི་བཙོན་རར་ཞུགས་པ། སེམས་ཅན་དམྱལ་བ་དང༌། བྱོལ་སོང་གི་ ༄༅། །སྐྱེ་གནས་དང༌། གཤིན་རྗེའི་འཇིག་རྟེན་ནས་མ་གཡོས་པ། སྡུག་བསྔལ་གྱི་ཕུང་པོས་མི་སྐྱོ་བ། སྡོམ་པ་གསུམ་གྱིས་གཅུགས་སུ་མ་རུང་བ། མུན་ གང་གི་ནང་དུ་རབ་ཏུ་ཞུགས་པ། མ་རིག་པའི་མངལ་དུ་སྐྱེ་བ་དང་འཆི་བས་མནར་བ་འབྱུང་བ་མ་མཐོང་བར་མི་ཁོམ་པར་གྱུར་པ། མི་ཁོམ་པ་བརྒྱད་ཐོབ་པ། སེམས་ཀྱི་རབ་ རིབ་ཀྱིས་དྲི་མ་ཅན་དུ་གྱུར་པ། ཉོན་མོངས་པ་སྣ་ཚོགས་ཀྱི་ནད་ཀྱི་ཡན་ལག་གིས་བཏབ་པ། མྱ་ངམ་ཆེན་པོར་འཁྱམས་པ། ལྟ་བའི་མྱ་ངམ་གྱིས་བསྐོར་བའོ། །ཞེས་དེ་ ལྟར་བྱང་ཆུབ་སེམས་དཔའ་སེམས་ཅན་གྱི་ཁམས་ལ་རྟོག་པའི་ཚེ་སེམས་འདི་ལྟར་སྐྱེ་སྟེ། དེ་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་ཏེ། ཡེ་ཤེས་ཀྱི་སྣང་བ་བླ་ན་མེད་པ་ལ་ཞུགས་ནས་སེམས་ཅན་འདི་དག་ཡོངས་སུ་མ་སྨིན་ཅིང་རྣམ་པར་མ་དུལ་བར་བོར་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ མངོན་པར་འཚང་རྒྱ་བ་ནི། དུས་མ་ཡིན་གྱི། བདག་གིས་ནི། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་སེམས་ཅན་རྣམས་ཀྱང་བྱང་ཆུབ་སེམས་དཔའི་སྤྱོད་པ་ལ་ ཡོངས་སུ་སྨིན་པར་བྱའོ། །དུས་དེ་ལྟ་བུས་སེམས་ཅན་བྱང་ཆུབ་ཏུ་ཡོངས་སུ་མ་སྨིན་པ་རྣམས་ཡོངས་སུ་སྨིན་པར་བྱའོ། །མ་དུལ་བ་རྣམས་གདུལ་བར་བྱའོ། །སྙམ་མོ། ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་དྲུག་པ་ལྟ་བ་བཟང་པོ་ཞེས་བྱ་བ་སྟེ། བྱང་ཆུབ་སེམས་དཔའ་རྣམས་ སྤྱོད་པ་དེ་དག་ལ་གནས་པས་ལྷ་དང༌། བདུད་དང༌། ཚངས་པར་བཅས་པའི་འཇིག་རྟེན་དང༌། དགེ་སྦྱོང་དང༌། བྲམ་ཟེའི་སྐྱེ་རྒུར་བཅས་པ་དང༌། ལྷ་དང༌། དྲི་ཟ་དང༌། མི་དང༌། ལྷ་མ་ཡིན་ དུ་བཅས་པའི་འཇིག་རྟེན་གྱིས་བལྟ་ན་མཛེས་ཤིང༌། བྱང་ཆུབ་སེམས་དཔའ་དེ་མཐོང་བས་ཀྱང་སེམས་ཅན་རྣམས་བླ་ན་མེད་པ་ཡང་དག་རྫོགས་པའི་བྱང་ཆུབ་ཏུ་དོན་ཡོད་པར་འགྱུར་རོ།། ཐོས་པ་དང་བསྙེན་བཀུར་བས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དོན་ཡོད་པར་འགྱུར་རོ། །དམིགས་པ་གང་གིས་ཀྱང་རུང་སྟེ། བྱང་ཆུབ་སེམས་དཔའ་དེ་དང་འགྲོགས་ པ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དོན་ཡོད་པར་འགྱུར་རོ། །བམ་པོ་ཉི་ཤུ་བདུན་པ། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་ སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་བདུན་པ་གནས་མེད་པ་ཞེས་བྱ་བ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་གནས་མེད་པའི་ སེམས་ཀྱིས་འཇིག་རྟེན་གྱི་ཁམས་གྲངས་མེད་པ་ལ་འཇུག་པ་ཡིན། སེམས་བསྐྱེད་པ་རེ་རེས་ཞིང་གྲངས་མེད་པ་ཡོངས་སུ་སྦྱོང་སྟེ། ཞིང་ལ་གནས་མི་སྐྱེད་པ་ཡིན། སངས་རྒྱས་ ༄༅། །བཅོམ་ལྡན་འདས་གྲངས་མེད་པ་བལྟ་བའི་ཕྱིར་འགྲོ་ཞིང༌། མེ་ཏོག་གྲངས་མེད་པ་དང༌། སྤོས་གྲངས་མེད་པ་དང༌། ཕྲེང་བ་གྲངས་མེད་པ་དང༌། བྱུག་པ་ གྲངས་མེད་པ་དང༌། ཕྱེ་མ་གྲངས་མེད་པ་དང༌། ན་བཟའ་གྲངས་མེད་པ་དང༌། རིན་པོ་ཆེ་གྲངས་མེད་པ་དང༌། རྒྱལ་མཚན་གྲངས་མེད་པ་དང༌། བ་དན་གྲངས་མེད་པ་དང༌། རྒྱན་གྲངས་མེད་པ་དང༌། མངོན་པར་འདུ་བྱ་བ་གྲངས་མེད་པ་དང༌། མངོན་པར་འདུ་བྱ་བ་མེད་པའི་མཐར་ཕྱིན་པ་དང༌། གྲངས་མེད་པའི་བསམ་པས་བསམ་དུ་མེད་པའི་ ཆོས་ལ་གནས་པར་བྱ་བའི་ཕྱིར་སངས་རྒྱས་བཅོམ་ལྡན་འདས་གྲངས་མེད་པ་ལ་བལྟ་བ་དང༌། ཕྱག་འཚལ་བ་དང༌། མཆོད་པ་དང༌། བསྙེན་བཀུར་བའི་དོན་དུ་འགྲོ་ ཞིང༌། སེམས་བསྐྱེད་པ་རེ་རེ་ལ་སངས་རྒྱས་བཅོམ་ལྡན་འདས་གྲངས་མེད་པ་མཐོང་ཡང་སངས་རྒྱས་དེ་དག་ལ་གནས་མི་སྐྱེད་པ་ཡིན། སངས་རྒྱས་ཀྱི་ཞིང་རྣམས་ལ་གནས་ མི་སྐྱེད་པ་ཡིན། མཚན་རྣམས་ལ་གནས་མི་སྐྱེད་པ་ཡིན། དཔེ་བྱད་བཟང་པོ་རྣམས་ལ་གནས་མི་སྐྱེད་པ་ཡིན། སངས་རྒྱས་ཀྱི་འོད་ལ་གནས་མི་སྐྱེད་པ་ཡིན། སངས་ རྒྱས་ཀྱི་ཆོས་བསྟན་པ་ལ་གནས་མི་སྐྱེད་པ་ཡིན། ཕྱོགས་ལ་གནས་མི་སྐྱེད་པ་ཡིན། ཕྱོགས་མཚམས་ལ་གནས་མི་སྐྱེད་པ་ཡིན། དེ་བཞིན་གཤེགས་པའི་འཁོར་ གྱི་དཀྱིལ་འཁོར་ལ་གནས་མི་སྐྱེད་པ་ཡིན། བྱང་ཆུབ་སེམས་དཔའི་དགེ་འདུན་འདུས་པ་ལ་གནས་མི་སྐྱེད་པ་ཡིན། སངས་རྒྱས་ཀྱི་ཆོས་ཐམས་ཅད་ཉན་ཅིང་དགའ་བ་སྐྱེད་ དེ་བསམ་པ་ཡངས་པར་བྱེད་ལ། བྱང་ཆུབ་ཀྱི་སེམས་རབ་ཏུ་འཛིན་ཅིང༌། བྱང་ཆུབ་སེམས་དཔའི་སྤྱོད་པ་ལ་ཤིན་ཏུ་གནས་ཀྱང་སངས་རྒྱས་ཀྱི་ཆོས་ལ་གནས་མི་སྐྱེད་པ་ཡིན། དེ་བཞིན་གཤེགས་པ་རེ་རེ་བསྙེན་བཀུར་པ་ལ་ཡང་བསྐལ་པ་བརྗོད་དུ་མེད་པ་ཟད་པར་བྱེད་ཅིང༌། སངས་རྒྱས་བརྗོད་དུ་མེད་པ་མཐོང་བས་བསྐལ་པ་གྲངས་མེད་པར་གནས་ ཀྱང་སངས་རྒྱས་བལྟ་བ་དང༌། དེ་བཞིན་གཤེགས་པ་མངོན་དུ་བྱ་བ་དང༌། ཆོས་མཉན་པས་ངོམས་མི་ཤེས་ཏེ། སངས་རྒྱས་བལྟ་བ་དང༌། དེ་བཞིན་གཤེགས་པའི་ཆོས་ མཉན་པ་ལ་གནས་མི་སྐྱེད་དོ། །བྱང་ཆུབ་སེམས་དཔའི་རྒྱན་དང༌། འཁོར་གྱི་དཀྱིལ་འཁོར་དང༌། དེ་བཞིན་གཤེགས་པ་ཁོང་དུ་ཆུད་པར་བྱེད་ཀྱང་གནས་མི་སྐྱེད། ཆགས་ པའི་སེམས་མི་སྐྱེད་དོ། །འཇིག་རྟེན་གྱི་ཁམས་ཀུན་ནས་ཉོན་མོངས་པ་ལ་ཞུགས་ཀྱང་ཁོང་ཁྲོ་བ་མི་སྐྱེད། མོས་པ་མེད་པའི་སེམས་མི་སྐྱེད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ ཆུབ་སེམས་དཔས་ནི། སངས་རྒྱས་ཀྱི་ཆོས་ཉིད་ཇི་ལྟ་བ་བཞིན་དུ་ཤིན་ཏུ་ཁོང་དུ་ཆུད་དེ། དེ་ལ་ནི། ཀུན་ནས་ཉོན་མོངས་པའང་མེད། རྣམ་པར་བྱང་བའང་མེད། མུན་པའང་ ༄༅། །མེད། སྣང་བའང་མེད། རྣམ་པར་ཕྱེ་བའང་མེད། རྣམ་པ་ཐ་དད་པའང་མེད། རྣམ་པར་རྟོགས་པའང་མེད་དོ། །གཞན་དུ་འགྱུར་བའང་མེད། བདེ་ བ་ཡང་མེད། མི་བདེ་བ་ཡང་མེད། ལམ་ཡང་མེད། ལམ་མ་ཡིན་པའང་མེད་དོ། །བྱང་ཆུབ་སེམས་དཔའ་དེ་ལྟར་ཆོས་ཀྱི་དབྱིངས་ལ་ཞུགས་པ་ནི། སེམས་ཅན་གྱི་ཁམས་ ལའང་འཇུག་སྟེ། དེ་དག་ཀྱང་ཡོངས་སུ་སྨིན་པར་བྱེད་ཅིང་རྣམ་པར་འདུལ་ལ། སེམས་ཅན་རྣམས་ལ་གནས་སྐྱེད་པའང་མེད་དོ། །ཆོས་རྣམས་ཀུན་ནས་ཐོབ་པར་བྱེད་ ཀྱང་ཆོས་ལ་གནས་མི་སྐྱེད་དོ། །བྱང་ཆུབ་ཀྱི་སེམས་ལ་ཞུགས་པའི་ཡིད་ཀྱིས་འཚང་རྒྱ་བར་བྱ་བ་ལ་ཡང་རྣམ་པར་སྤྱོད་དེ། འཚང་རྒྱ་བར་བྱ་བ་དེ་ལ་གནས་མི་སྐྱེད་དོ།། ཚིག་གི་ལམ་ཡང་བརྗོད་དེ། ཚིག་གི་ལམ་ལ་གནས་པར་ཡང་མི་བྱེད་དོ། །སེམས་ཅན་གྱི་རྒྱུད་ལའང་འཇུག་སྟེ། སེམས་ཅན་གྱི་རྒྱུད་ལ་ཡང་གནས་པར་ཡང་མི་ བྱེད་དོ༑ ༑ཏིང་ངེ་འཛིན་ཀྱང་རབ་ཏུ་ཤེས་ཤིང༌། དེ་དག་ལའང་མཉམ་པར་གཞོག་སྟེ། ཏིང་ངེ་འཛིན་དེ་དག་ལ་གནས་ཀྱི་སེམས་ཀྱང་མི་སྐྱེད་དོ། །སངས་རྒྱས་ཀྱི་ཞིང་བརྗོད་ དུ་མེད་པར་འགྲོ་ཞིང་འཇུག་ལ། དེ་དག་ཏུ་ཕྱིན་ཏེ་མཐོང་ཞིང་གནས་ཀྱང་གནས་ཀྱི་སེམས་མི་སྐྱེད་དོ། །དེ་དག་ནས་འགྲོའང་ཆགས་པའི་སེམས་མི་སྐྱེད་དོ། །དེ་དག་སེམས་ འདི་ལྟར་སྐྱེད་དོ། །ཀྱེ་སངས་རྒྱས་ཀྱི་ཆོས་དེ་ལྟར་གཟུང་བ་མེད། སངས་རྒྱས་ཀྱི་བྱང་ཆུབ་དེ་ལྟར་སྒྲིབ་པ་མེད། ཆོས་དང་འདུལ་བ་དེ་ལྟར་ལེགས་པར་བསྟན། སངས་རྒྱས་ཀྱི་བསྟན་ པ་དེ་ལྟར་ལེགས་པར་གནས། བྱང་ཆུབ་སེམས་དཔའི་སྤྱོད་པ་དེ་ལྟར་ལེགས་པར་འདུག །བྱང་ཆུབ་ཀྱི་སེམས་དེ་ལྟར་ལེགས་པར་གནས། བྱང་ཆུབ་སེམས་དཔའི་རྣམ་པར་ ཐར་པ་དེ་ལྟར་ཤིན་ཏུ་རྟོགས། བྱང་ཆུབ་སེམས་དཔའི་རང་བཞིན་དེ་ལྟར་ཆགས་པ་མེད། བྱང་ཆུབ་སེམས་དཔའི་ཚུལ་དེ་ལྟར་གནས་པ་མེད༑ བྱང་ཆུབ་སེམས་དཔའི་ལམ་ དེ་ལྟར་ཤིན་ཏུ་སྦྱངས། བྱང་ཆུབ་སེམས་དཔའི་ལུང་བསྟན་པ་དེ་ལྟར་བྱིན་གྱིས་བརླབས་ཀྱང་བྱིས་པ་སོ་སོའི་སྐྱེ་བོ་འདི་དག་ནི། ཤེས་པ་མེད་པ། མཐོང་བ་མེད་པ། ཐ་དད་པ་ མེད་པ༑ མོས་པ་མེད་པ། མི་མཁས་པ། གནས་ལ་སྤྱོད་པ། བསམ་པ་རྨུགས་པ། འཁོར་བའི་རྒྱུད་ཤིན་ཏུ་འབྱུང་བ་ལ་གཞོལ་བ། སངས་རྒྱས་ལྟ་བ་ལ་ལོག་པར་ཞུགས་ པ༑ འདྲེན་པའི་ས་ལས་ཉམས་པ། ལམ་ཤེས་པའི་དྲུང་ནས་གར་བ། ཁ་ལོ་སྒྱུར་བ་མི་ཚོལ་བ། སྟོབས་བཅུ་ལ་རིམ་གྲོ་མེད་པ། བྱང་ཆུབ་སེམས་དཔའ་ལ་དྲིན་དུ་མི་གཟོ་ བ༑ དམའ་བ་ལ་གནས་པ། དངོས་པོ་མེད་པས་འཇིགས་པ། རིགས་བས་སྤངས་པ། ཚུལ་བཞིན་མ་ཡིན་པ་ལ་ཞུགས་པ། མཉམ་པ་ཉིད་ལས་ལོག་པར་ལྷུང་བ། གཡང་ ༄༅། །ས་ཆེན་པོར་རབ་ཏུ་ལྷུང་བ། བདུད་ཀྱི་བསམ་པ་ལ་ཞུགས་པ། སངས་རྒྱས་ཀྱི་བསམ་པ་ལས་རིང་དུ་གྱུར་པ། སྲད་པ་ལ་མངོན་པར་ཆགས་པ་ ཤ་སྟག་གོ །ཞེས་དེ་ལྟར་བྱང་ཆུབ་སེམས་དཔའ་སེམས་ཅན་གྱི་ཁམས་ལ་འཇུག་ཅིང༌། སྙིང་རྗེ་ཆེན་པོ་དེ་བས་ཀྱང་ཆེར་བསྐྱེད་ནས་སྙིང་རྗེ་ཆེན་པོ་རྒྱ་ཆེར་བྱས་ཏེ་ གནས་མེད་པའི་དགེ་བའི་རྩ་བ་ཡང་དག་པར་བསགས་ནས་འདི་སྙམ་དུ་སེམས་སྐྱེད་དོ། །གལ་ཏེ་སེམས་ཅན་རེ་རེའི་ཕྱིར་ཡུལ་རེ་རེ་དང༌། ཕྱོགས་རེ་རེར་ཡང་བསྐལ་ པ་བརྗོད་དུ་མེད་པར་སེམས་ཅན་རེ་རེ་འདུལ་བའི་ཕྱིར་འདུག་ལ། སེམས་ཅན་གཅིག་ལ་ཇི་ལྟ་བ་དེ་བཞིན་དུ་སེམས་ཅན་གྱི་ཁམས་ཐམས་ཅད་ཀྱི་དོན་དུ་འདུག་ཀྱང་ བདག་གིས་དེའི་ཕྱིར་མི་དགའ་བ་མི་སྐྱེད་དེ། ཡུལ་དེ་དང་ཕྱོགས་དེ་ནས་ཀྱང་བདག་གུད་དུ་གཡོ་བར་མི་བྱའོ། །གུད་དུ་འགྲོ་བར་མི་བྱའོ། །སྐྲའི་རྩེ་མོ་ཙམ་ལ་ཆོས་ ཀྱི་དབྱིངས་ཐམས་ཅད་འདུས་པར་བྱས་ཏེ། སྐྲའི་རྩེ་མོའི་ཚུལ་དེ་ལྟ་བུས་སྐྲའི་རྩེ་མོར་ཆུད་པ་རེ་རེར་ཡང་སེམས་ཅན་གྱི་ཁམས་ཡོངས་སུ་སྨིན་པར་བྱ་བ་དང༌། གདུལ་ བའི་ཕྱིར་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་གནས་པར་བྱའོ། །སྐྲའི་རྩེ་མོ་གཅིག་ལ་ཇི་ལྟ་བདེ་བཞིན་དུ་ཆོས་ཀྱི་དབྱིངས་མཐའ་དང་དབུས་མེད་པ་ཐམས་ ཅད་ལ་ཡང་དེ་ལྟར་ཏེ། སེ་གོལ་གཏོགས་པ་ཙམ་དུ་ཡང་གནས་ཀྱི་འདུ་ཤེས་མི་སྐྱེད་དོ། །གནས་པར་མི་བྱའོ། །གནས་ཀྱི་སེམས་མི་སྐྱེད་དོ། །སྐྲའི་རྩེ་མོ་ཙམ་རེ་རེ་ལ་ཡང་ལུས་ གནས་མེད་པ་དང༌། ཆོས་གནས་མེད་པ་དང༌། དྲན་པ་གནས་མེད་པ་དང༌། སྨོན་ལམ་གནས་མེད་པ་དང༌། ཏིང་ངེ་འཛིན་གནས་མེད་པ་དང༌། རྟོགས་པ་གནས་མེད་པ་དང༌། སྤྱོད་ཡུལ་ གནས་མེད་པ་དང༌། སེམས་ཅན་གྱི་ཁམས་འདུལ་བ་གནས་མེད་པ་དང༌། ཆོས་ཀྱི་དབྱིངས་ལ་འཇུག་པ་གནས་མེད་པས་ཕྱི་མའི་མཐའི་བསྐལ་བའི་མུར་ཐུག་པའི་བསྐལ་པར་བྱང་ ཆུབ་སེམས་དཔའི་སྤྱད་པ་སྤྱོད་དོ། །དེ་ཅིའི་ཕྱིར་ཞེ་ན། འདི་ནི། བྱང་ཆུབ་སེམས་དཔའ་འདི་ལྟར་སེམས་སྐྱེད་དེ། བདག་གིས་ཆོས་ཀྱི་དབྱིངས་ཐམས་ཅད་སྒྱུ་མ་ལྟ་བུར་ཤེས་པར་བྱའོ། །བདག་ གིས་སངས་རྒྱས་ཐམས་ཅད་བལྟར་མེད་པའི་ཚུལ་དུ་མིག་ཡོར་ལྟ་བུར་ཤེས་པར་བྱའོ། །བྱང་ཆུབ་སེམས་དཔའི་སྤྱོད་པ་གནས་མེད་པའི་ཕྱིར་རྨི་ལམ་ལྟ་བུར་ཤེས་པར་བྱའོ། །བདག་གིས་དེ་བཞིན་ གཤེགས་པ་རྣམས་ཀྱི་ཆོས་བསྟན་པ་བྲག་ཅ་ལྟ་བུར་ཤེས་པར་བྱའོ། །བདག་གིས་ལས་ཀྱི་རྣམ་པར་སྨིན་པའི་མཐུ་ལས་བྱུང་བས་འཇིག་རྟེན་ཐམས་ཅད་སྤྲུལ་པ་ལྟ་བུར་ཤེས་པར་བྱའོ། །བདག་གི་ སྤྱོད་པའི་མཐུ་ལས་བྱུང་བས་ལུས་ནི། ཡིད་ཀྱི་རྒྱུ་ལས་བྱུང་བར་ཤེས་པར་བྱའོ། །བདག་གིས་སྣ་ཚོགས་དང་འདྲེས་པའི་ཕྱིར་འགྲོ་བ་ཐམས་ཅད་ནི། སེམས་ལྟ་བུར་ཤེས་པར་བྱའོ། །རྣམ་པར་འགྱུར་བ་མེད་པས་ ༄༅། །བདག་གིས་ཆོས་ཐམས་ཅད་ནི། ཡང་དག་པའི་མཐའ་དང་མཉམ་པར་བསྟན་པར་བྱའོ། །བདག་གིས་ཕྱོགས་བཅུར་སེམས་བསྐྱེད་པས་རྒྱས་ པར་བཀང་སྟེ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པའི་བྱང་ཆུབ་སེམས་དཔའི་སྤྱོད་པ་ལ་གནས་པར་བྱའོ། །བདག་གིས་སེམས་ཡངས་པར་བསྒྱུར་ བ་དང༌། དྲན་པ་གནས་མེད་པས། སངས་རྒྱས་ཀྱི་ཆོས་ཁོང་དུ་ཆུད་ཅིང་མཁས་པ་སེམས་ཀྱི་སྐད་ཅིག་གཅིག་གིས་ཐོབ་པར་བྱའོ། །ཞེས་དེ་ལྟར་བྱང་ཆུབ་སེམས་དཔའ་དེ་ བདག་དང་སངས་རྒྱས་ལ་བདག་མེད་པའི་ཚུལ་གྱིས་ཡང་དག་པར་ལྟ་ཞིང༌། སེམས་ཅན་ཆགས་པ་མེད་པའི་མཐར་ཕྱིན་པའི་ཚིག་གི་ལམ་གྱིས་ལ་སྨིན་པར་བྱེད་པའི་ཚེ་ དགའ་བ་མཐའ་ཡས་པ་འཐོབ་བོ། །སངས་རྒྱས་དང་རྫོགས་པའི་སངས་རྒྱས་ཀྱི་ཆོས་ལ་མོས་པ་ཚད་མེད་པའང་ཡང་དག་པར་རབ་ཏུ་འཐོབ་བོ། །སེམས་ཅན་ཐམས་ཅད་ ཡོངས་སུ་བསྐྱབ་པའི་དོན་དུ་བདག་གིས་སྐྱོ་བའི་སེམས་མི་སྐྱེད་དོ། །སེམས་ཅན་གྱི་ཁམས་ཡོངས་སུ་མ་སྨིན་ཅིང་མ་དུལ་གྱི་བར་དུ་སྐྱོ་བའི་སྨོན་ལམ་མི་སྐྱེད་དོ། །བདག་ གིས་འཇིག་རྟེན་གྱི་ཁམས་ཐམས་ཅད་ལས་རྣམ་པར་འདས་པར་འཇིག་རྟེན་གྱི་ཁམས་ཐམས་ཅད་དུ་རྒྱུ་བར་བྱས་ཏེ་སྨོན་ལམ་གང་ལ་སེམས་ཅན་གྱི་སྒྲ་ཡོད་པ་དང༌། སེམས་ཅན་གྱི་ལས་དང༌། སེམས་ཅན་ཉེ་བར་ལེན་པ་དང༌། སེམས་ཅན་རྣམ་པར་གཞག་པ་དང༌། སེམས་ཅན་གྱི་འདུ་ཤེས་དང་ལྡན་པ་དང༌། སེམས་ཅན་གྱི་གློང་དང༌། སེམས་ ཅན་གྱི་འདུ་བྱེད་དང༌། སེམས་ཅན་གྱི་ཡུལ་དང༌། སེམས་ཅན་གྱི་འཇུག་པ་དང༌། སེམས་ཅན་གྱི་ལྡོག་པ་ཡོད་པ་དེ་ལ་བདག་གིས་གནས་པར་བྱའོ། །སེམས་ཅན་ཐམས་ཅད་འདུལ་ བའི་དབང་དུ་སྨོན་ལམ་དེ་ལས་གཡོ་བར་ཡང་མི་བྱ་སྟེ། སེམས་བསྐྱེད་པ་གཅིག་གིས་ཀྱང་གནས་ཀྱི་འདུ་ཤེས་བསྐྱད་པར་མི་བྱའོ། །དེ་ཅིའི་ཕྱིར་ཞེ་ན། བདག་གིས་གནས་མེད་ པ་དང་མི་གནས་པར་བྱ་སྟེ། བདག་གི་དོན་ཡོངས་སུ་སྦྱང་བར་བྱའོ། །ཡོངས་སུ་རྫོགས་པར་བྱའོ། །ཞེས་བྱ་བ་འདི་ནི། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་ རྣམས་ཀྱི་བྱང་ཆུབ་སེམས་དཔའི་སྤྱོད་པ་བདུན་པ་སྟེ། གནས་མེད་པ་ཞེས་བྱའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་ དཔའི་སྤྱོད་པ་ཐུབ་པར་དཀའ་བ་ཞེས་བྱ་བ་བརྒྱད་པ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་རྩ་བ་ཐུབ་པར་ དཀའ་བ། གདུལ་བར་དཀའ་བ། རབ་ཏུ་འདུལ་བར་དཀའ་བ། ཕྱེད་པར་དཀའ་བ། ཟིལ་གྱིས་མི་ནོན་པ། བསམ་གྱིས་མི་ཁྱབ་པ། ཀུན་ཏུ་མཐའ་ཡས་པ། མི་འཕྲོག་པ། བདག་ ༄༅། །ཉིད་ཆེ་བ། རྒྱུད་ཀྱི་ཚུལ་གཅིག་ཏུ་གྱུར་པས་སངས་རྒྱས་ཐམས་ཅད་ཀྱི་ཞམ་རིང་ན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སངས་རྒྱས་ཀྱི་ཆོས་ལ་ཤིན་ཏུ་ དད་པ་ཡིན། ཡངས་པར་དད་པ་ཡིན། དེ་བཞིན་གཤེགས་པའི་བྱང་ཆུབ་ལ་ཤིན་ཏུ་མོས་པ་ཡིན། བྱང་ཆུབ་སེམས་དཔའི་སྨོན་ལམ་གྱི་རྒྱུན་མི་འཆད་པ་ཡིན། བསྐལ་པ་ ཐམས་ཅད་དུ་མི་སྐྱོ་བའི་སེམས་དང་ལྡན་པ་ཡིན། སྡུག་བསྔལ་ཐམས་ཅད་ཀྱིས་སྒྱིད་ལུག་པར་འགྱུར་བ་མེད་པ་ཡིན། བདུད་ཐམས་ཅད་ཀྱིས་ཕྱིར་བརྒལ་དུ་མེད་པ་ཡིན། སངས་རྒྱས་ཐམས་ཅད་ཀྱིས་ཤིན་ཏུ་བྱིན་གྱིས་བརླབས་བ་ཡིན། བྱང་ཆུབ་སེམས་དཔའི་དཀའ་ཐུབ་ཐམས་ཅད་ཀྱིས་རྣམ་པར་སྦྱངས་པ་ཡིན། བྱང་ཆུབ་སེམས་དཔའི་ བརྟུལ་ཞུགས་ཀྱིས་ཚད་མི་ཤེས་པ་ཡིན། ཐེག་པ་ཆེན་པོའི་སྨོན་ལམ་ལས་ཕྱིར་མི་ལྡོག་པ་ཡིན། དེ་ལ་བྱང་ཆུབ་སེམས་དཔའི་སྤྱོད་པ་སྒྲུབ་པར་དཀའ་བ་ལ་གནས་ ཏེ་སེམས་བསྐྱེད་པ་གཅིག་གིས་བསྐལ་པ་གྲངས་མེད་པར་འཁོར་ཡང་ཕྱིར་མི་ལྡོག་པ་ཡིན་ཏེ། བྱང་ཆུབ་སེམས་དཔའི་སྨོན་ལམ་ཆེན་པོའང་རྒྱུན་མི་གཅོད་དོ། །དེ་ མཐོང་བ་ཙམ་གྱིས་ཀྱང་སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱེད་དོ། །ཐོས་པ་དང་བསྙེན་བཀུར་བས་ཀྱང་སེམས་ ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱེད་དོ། །སེམས་ཅན་ཐམས་ཅད་སེམས་ཅན་མེད་པར་ཡང་ཤེས་ཏེ། སེམས་ཅན་གྱི་ཁམས་ ཡོངས་སུ་གཏོང་བ་མ་ཡིན་ནོ། །འདི་ལྟ་སྟེ། དཔེར་ན། མཉན་པ་ནི། ཕ་རོལ་ཏུ་འགྲོ་བའང་མ་ཡིན། ཚུ་རོལ་ཏུ་འགྲོ་བའང་མ་ཡིན། ཆུ་ཀླུང་གི་གཞུང་ལ་གནས་པའང་མ་ཡིན། འགྲོ་བ་དང་འོང་བ་རྒྱུན་མི་འཆད་པའི་ཕྱིར་ཕ་རོལ་དང་ཕ་རོལ་མ་ཡིན་པར་སེམས་ཅན་རྣམས་ཀྱང་སྒྲོལ་ལོ། །དེ་བཞིན་དུ་བྱང་ཆུབ་སེམས་དཔའ་ཡང་འཁོར་བར་འགྲོ་བའང་ མ་ཡིན༑ མྱ་ངན་ལས་འདས་པར་འགྲོ་བའང་མ་ཡིན། འཁོར་བའི་རྒྱུད་ལ་གནས་པའང་མ་ཡིན། ཚུ་རོལ་གྱི་མུ་ནས་སེམས་ཅན་རྣམས་བསྐྱོད་དེ། ཕ་རོལ་གྱི་དོགས་[*NGOGS?] བདེ་ པ༑ འཇིགས་པ་མེད་པ། འཚེ་བ་མེད་པ། འཁྲུག་པ་མེད་པར་རབ་ཏུ་བཞག་ཀྱང་སེམས་ཅན་གྱི་ཁམས་བགྲངས་པའི་ཚུལ་གྱིས་མངོན་པར་ཆགས་པ་མེད་དོ། །སེམས་ ཅན་གཅིག་ལས་བསྐྱོད་ནས་མང་པོ་ལ་མངོན་པར་ཆགས་པར་ཡང་མི་བྱེད། མང་པོ་ལས་བསྐྱོད་ནས་སེམས་ཅན་གཅིག་ལ་མངོན་པར་ཆགས་པར་ཡང་མི་བྱེད། སེམས་ ཅན་གྱི་ཁམས་འཕེལ་བར་ཡང་མི་བྱེད། འབྲི་བར་ཡང་མི་བྱེད། སེམས་ཅན་གྱི་ཁམས་སྐྱེ་བར་ཡང་མི་བྱེད། འགོག་པར་ཡང་མི་བྱེད། ཟད་པར་ཡང་མི་བྱེད། གསོག་པར་ ༄༅། །ཡང་མི་བྱེད། རྣམ་པར་རྟོག་པར་ཡང་མི་བྱེད། རྣམ་པ་གཉིས་སུ་ཡང་མི་བྱེད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ནི། སེམས་ཅན་ གྱི་ཁམས་ལ་ཞུགས་ཤིང་ཁོང་དུ་ཆུད་པ་སྟེ། ཆོས་ཀྱི་དབྱིངས་ཇི་ལྟ་བར་སེམས་ཅན་གྱི་ཁམས་ཀྱང་དེ་བཞིན་ཏེ། སེམས་ཅན་གྱི་ཁམས་དང་ཆོས་ཀྱི་དབྱིངས་དེ་ལ་གཉིས་སུ་ མེད་དོ༑ ༑གཉིས་སུ་མེད་པའི་ཆོས་ལ་ནི། འབྲི་བའམ། འཕེལ་བའམ། འགགས་པའང་མེད་དེ། ཆོས་ཀྱི་རང་བཞིན་ནི། རང་བཞིན་གྱིས་མེད་པར་འགྱུར་བའམ། ལེན་པའམ། གནས་པའམ། མངོན་པར་ཆགས་པའམ། གཉིས་སུ་འགྱུར་བ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཆོས་ཀྱི་དབྱིངས་བསྟན་པའི་ཚུལ་དུ་གཉིས་སུ་མེད་པའི་ཕྱིར་རོ། ། དེ་ལྟར་ན། བྱང་ཆུབ་སེམས་དཔའ་ཆོས་ཀྱི་དབྱིངས་རབ་ཏུ་དབྱེ་བའི་མཁས་པ་ཁོང་དུ་ཆུད་པ་ཡིན་ཏེ། མཚན་ཉིད་རྣམ་པར་དག་པའི་ལུས་དང༌། དངོས་པོ་མེད་པ་ཡོངས་སུ། ཤེས་པ་དང༌། ཆོས་ཀྱི་མཚན་ཉིད་དང༌། རང་བཞིན་ཡོངས་སུ་རྟོགས་པས་མཚན་ཉིད་མེད་པ་ལ་གནས་པ་ཡིན། དེ་ནི། སེམས་ཅན་རྣམ་པ་སྣ་ཚོགས་ཀྱང་ཤེས། སེམས་ ཅན་གྱི་གྲངས་ཀྱང་ཤེས་ཏེ། འཇིག་རྟེན་གྱི་ཁམས་རྣམས་ལའང་མངོན་པར་ཆགས་པ་མེད་དོ། །སངས་རྒྱས་ཀྱི་ཞིང་ཐམས་ཅད་དུ་ཡང་སྣང་ངོ༌། །སངས་རྒྱས་རྣམས་ལའང་ འཇུག་ཅིང་ཁོང་དུ་ཆུད་པར་བྱེད་དེ། ལས་ལ་རྣམ་པར་རྟོག་པར་མི་བྱེད་དོ། །དོན་ཀྱང་ཤིན་ཏུ་རྟོགས་པ་ཡིན་ནོ། །དོན་གྱི་ཡི་གེ་ཡང་ཡོངས་སུ་བརྗོད་དོ། །ཆོས་འདོད་ཆགས་དང་བྲལ་བའི་མཐར་ ཕྱིན་པ་ཐམས་ཅད་ཀྱང་ཤེས་སོ། །རབ་ཏུ་ཤེས་སོ། །ཁོང་དུ་ཆུད་དོ། །བྱང་ཆུབ་སེམས་དཔའི་ལམ་དང་ཡང་མི་འབྲལ་ཏེ། བྱང་ཆུབ་སེམས་དཔའི་སྤྱོད་པ་ལས་ཀྱང་ཕྱིར་མི་ལྡོག་གོ། ཆོས་ཀྱི་དབྱིངས་སུ་གཟུད་པ་ལ་དབང་བསྒྱུར་བར་ཞུགས་པས་ཟད་མི་ཤེས་པའི་སྤྱད་པ་དང་ལྡན་པ་ཡིན་ནོ། །འདི་ལྟ་སྟེ། དཔེར་ན། གཙུབ་མ་ལས་བྱུང་བའི་མེའི་རྒྱུ་ཚད་མེད་པས་མེའི་ དགོས་པ་ལས་མ་འགག་པ་ཡིན་ཏེ། དེ་བཞིན་དུ་བྱང་ཆུབ་སེམས་དཔའ་པ་འཇིག་རྟེན་ཐམས་ཅད་ན་སེམས་ཅན་གྱི་དོན་ལས་འགག་པ་མེད་པར་ཞུགས་པ་ཡིན་ཏེ། ཀུན་གྱི་མཐར་ བྱས་པའང་མ་ཡིན། ཀུན་གྱི་མཐའ་མེད་པར་བྱས་པའང་མ་ཡིན་ནོ། །ཉེ་བར་ལེན་པ་དང་བཅས་པའང་མ་ཡིན། ཉེ་བར་ལེན་པ་མེད་པ་ཡང་མ་ཡིན་ནོ། །གནས་པའང་མ་ཡིན་ནོ། ། མི་གནས་པ་ཡང་མ་ཡིན་ནོ། །འཇིག་རྟེན་གྱི་ཆོས་ཀྱི་རྗེས་སུ་སོང་བའང་མ་ཡིན། སངས་རྒྱས་ཀྱི་ཆོས་ལ་གཞོལ་བའང་མ་ཡིན་ནོ། །སོ་སོའི་སྐྱེ་བོ་ཡང་མ་ཡིན། འབྲས་བུ་ལ་གནས་ པའང་མ་ཡིན་ནོ། །དེ་ལྟར་བྱང་ཆུབ་སེམས་དཔའ་ཐུབ་པར་དཀའ་བའི་སེམས་དང་ལྡན་པ་སྤྱད་པ་ལ་སྤྱོད་དེ། དེ་ནི། ཉན་ཐོས་ཀྱི་ཐེག་པ་མི་སྟོན་ཏོ། །རང་སངས་རྒྱས་ཀྱི་ཐེག་པ་ ༄༅། །མི་སྟོན་ཏོ། །སངས་རྒྱས་ཀྱི་ཆོས་ཀྱང་སྟོན་པ་མེད་དོ། །འཇིག་རྟེན་དང༌། འཇིག་རྟེན་གྱི་ཆོས་ཉེ་བར་ལེན་པ་མེད་དོ། །སེམས་ཅན་དང༌། སེམས་ཅན་ འཇིག་རྟེན་པ་ཉེ་བར་ལེན་པ་མེད་དོ། །ཉོན་མོངས་པ་དང་རྣམ་པར་བྱང་བ་ཉེ་བར་ལེན་པ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཀུན་ནས་ཉོན་མོངས་པ་མེད་པར་བྱང་ ཆུབ་སེམས་དཔའ་ཡོངས་སུ་ཤེས་སོ། །ཆོས་ཐམས་ཅད་ཉེ་བར་བླང་པ་མེད་པར་བྱང་ཆུབ་སེམས་དཔས་ཡོངས་སུ་ཤེས་སོ། །ཆོས་ཐམས་ཅད་ཞུགས་པ་མེད་པར་བྱང་ཆུབ་ སེམས་དཔས་ཡོངས་སུ་ཤེས་སོ། །ཆོས་ཐམས་ཅད་ལྡོག་པ་མེད་པར་བྱང་ཆུབ་སེམས་དཔས་ཡོངས་སུ་ཤེས་སོ། །དེ་དེ་ལྟར་ཞི་ཞིང་ཕྲ་བ་དང༌། ཟབ་པ་དང༌། བཟང་པོའི་ཆོས་ ལ་སྤྱོད་པའི་ཚེ་སྤྱོད་དོ། །ཞེས་བྱ་བར་མི་དམིགས་སོ། །སྤྱད་པར་བྱའོ། །ཞེས་བྱ་བར་མི་དམིགས་སོ། །ཁམས་ཀྱི་ཡུལ་དང༌། སྐྱེ་མཆེད་ཀྱི་ཡུལ་དང༌། ནང་གི་སྣང་བ་དང༌། ཕྱི་ རོལ་གྱི་སྣང་བ་དང༌། ཕྱི་ནང་གི་སྣང་བ་དང༌། སྨོན་ལམ་ཡོངས་སུ་སྒྲུབ་པ་དང༌། ཕ་རོལ་ཏུ་ཕྱིན་པ་རྣམས་དང༌། ཆོས་ཐམས་ཅད་དུ་ཡང་མི་དམིགས་སོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཀྱི་དབྱིངས་ཐམས་ཅད་ལ་ནི། གང་ཉན་ཐོས་ཀྱི་ཐེག་པ་ལ་ཞུགས་པའམ། རང་སངས་རྒྱས་ཀྱི་ཐེག་པ་ལ་ཞུགས་པའམ། བྱང་ཆུབ་སེམས་དཔའི་ཐེག་པ་ལ་ ཞུགས་པའམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པའམ། སོ་སོའི་སྐྱེ་བོའི་ཁམས་ལ་ཞུགས་པའམ། ཀུན་ནས་ཉོན་མོངས་པའི་ཁམས་ལ་ཞུགས་པའམ། རྣམ་པར་བྱང་བའི་ཁམས་ལ་ཞུགས་པའམ། འཁོར་བའི་ཁམས་ལ་ཞུགས་པའམ། མྱ་ངན་ལས་འདས་པའི་ཁམས་ལ་ཞུགས་པའི་ཆོས་གང་ཡང་མེད་དོ། །དེ་ཅིའི་ཕྱིར་ཞེ་ན། འདི་ ལ་ཆོས་གཉིས་ཞེས་བྱ་བ་གང་ཡང་མེད་དེ། མི་གཉིས་པའང་མེད་དོ། །འདི་ལྟ་སྟེ། དཔེར་ན། ནམ་མཁའ་ནི། ཕྱོགས་བཅུར་མ་རྙེད། མི་རྙེད། རྙེད་པར་མི་འགྱུར་ཡང་ནམ་མཁར་ བགྲང་བའི་ཚུལ་ཡོད་དོ། །དེ་བཞིན་དུ་བྱང་ཆུབ་སེམས་དཔས་ཀྱང་ཆོས་གང་ཡང་དམིགས་པ་མེད་དེ། ཆོས་ཐམས་ཅད་མངོན་པར་འཚང་རྒྱའོ། །ཞེས་གྲངས་སུ་བགྲང་བ་ཡང་ཡོད་ དེ༑ དེ་ནི། ཡང་དག་པ་བདེན་པ་སྟེ། ལོག་པ་མ་ཡིན་ནོ། །དེ་ནི། བྱ་བ་དང་མི་འགལ་བའི་སྤྱོད་པའང་སྟོན་ཏེ། སྨོན་ལམ་ཡང་མི་གཏོང་ངོ༌། །སེམས་ཅན་གྱི་ཁམས་ཡོངས་སུ་སྨིན་ པ་དང་གདུལ་བའང་བྱེད་དོ། །ཆོས་ཀྱི་འཁོར་ལོ་ཡང་བསྐོར་རོ། །རྒྱུ་དང་འབྲས་བུ་ཡང་འཇིག་པར་མི་བྱེད་དོ། །ཆོས་ཉིད་དང་ཡང་འགལ་བར་མི་བྱེད་དོ། །འདས་པ་དང༌། མ་བྱོན་ པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང་ཡང་མཉམ་པར་འགྱུར་བ་ཡིན་ཏེ། དེ་བཞིན་གཤེགས་པའི་རིགས་ཀྱང་རྒྱུན་ཆད་པར་མི་བྱེད། ཆོས་ཀྱི་ཚུལ་ ༄༅། །དང་ཡང་འགལ་བར་མི་བྱེད། ཆོས་ཀྱི་རྒྱུད་ཀྱང་རབ་ཏུ་ཤེས་སོ། །ཆོས་ཀྱི་སྤོབས་པའང་འཇིག་པར་མི་བྱེད། ཆོས་ཐོས་པས་ཀྱང་རློམ་སེམས་མེད་དེ། ཆོས་ཀྱི་འབྱུང་གནས་ཀྱང་རབ་ཏུ་ཐོབ། ཆོས་བརྗོད་པ་ཡང་རབ་ཏུ་བྱེད། མི་འཇིགས་པ་ལའང་རབ་ཏུ་གནས། སངས་རྒྱས་ཀྱི་སྤྱོད་པའང་མི་གཏོང་ངོ༌། །འཇིག་རྟེན་གྱི་ཚུལ་ ཡང་འགོག་པར་མི་བྱེད། འཇིག་རྟེན་མཉམ་པ་ཉིད་ཀྱང་རབ་ཏུ་སྟོན་ཏེ། འཇིག་རྟེན་གྱི་སྤྱོད་པ་རྣམས་ལའང་གནས་པ་མེད་དོ། །དེ་ལྟར་བྱང་ཆུབ་སེམས་དཔའ་ཐུབ་པར་དཀའ་ པའི་སེམས་དང་ལྡན་པ། བྱང་ཆུབ་སེམས་དཔའི་སྤྱད་པ་ལ་སྤྱོད་དེ། སེམས་ཅན་གྱི་ཁམས་ཀྱང་སེམས་ཅན་དམྱལ་བ་དང༌། བྱོལ་སོང་གི་སྐྱེ་གནས་དང༌། གཤིན་རྗེའི་འཇིག་ རྟེན་ནས་གྱེན་དུ་བསྐྱོད་དེ། དེ་དག་བསྐྱེད་ནས་ཀྱང་ཡོངས་སུ་སྨིན་པར་བྱེད་དོ། །འདུལ་བར་བྱེད་དོ། །རབ་ཏུ་གཞོག་བར་བྱེད་དོ། །འདས་པ་དང༌། མ་བྱོན་པ་དང༌། ད་ལྟར་བྱུང་ བའི་སངས་རྒྱས་བཅོམ་ལྡན་འདས་རྣམས་ཀྱི་ལམ་གྱི་རྒྱུད་ལས་ཀྱང་མི་གཡོའོ། །འཇིག་རྟེན་གནས་པ་དྲིན་དུ་མི་གཟོ་བས་ཡོངས་སུ་གང་བ་དང༌། དགྲས་ཡོངས་སུ་གང་བ་དང༌། ཀུན་ནས་ཉོན་མོངས་པས་ཡོངས་སུ་གང་བ་དང༌། མི་མཐུན་པས་ཡོངས་སུ་གང་བ་དང༌། ཡིད་གཞག་ཏུ་མི་རུང་བས་ཡོངས་སུ་གང་བ་དང༌། བྱིས་པས་ཡོངས་སུ་གང་བ་དང༌། མ་དད་པས་ཡོངས་སུ་གང་བ་དང༌། གཞན་གྱི་དྲིང་ལ་རྒྱུག་པས་ཡོངས་སུ་གང་བ་དང༌། ཤེས་རབ་ངན་པས་ཤིན་ཏུ་བྱུང་བ་དང༌། འཇིག་རྟེན་གནས་པ་སྲེད་པའི་བསམ་པ་དང༌། མ་ རིག་པས་ཀུན་ནས་ཉོན་མོངས་པར་གྱུར་པ་ན་བྱང་ཆུབ་སེམས་དཔའ་ནི། བྱང་ཆུབ་སེམས་དཔའི་སྤྱད་པ་སྤྱོད་དེ། དེ་འདི་སྙམ་དུ་སེམས་སོ། །འདི་ལྟར་བདག་གིས་འཇིག་རྟེན་གནས་ པ་དྲིན་དུ་གཟོ་བས་ཡོངས་སུ་གང་བ་དང༌། མཛའ་བོས་ཡོངས་སུ་གང་བ་དང༌། མཁས་པས་ཡོངས་སུ་གང་བར་བྱང་ཆུབ་སེམས་དཔའི་སྤྱོད་པ་སྤྱད་པ་ལྟ་ངོ་མཚར་དུའང་ཅི་ཆེ་སྟེ། དེ་ཇི་ ལྟ་ཞེ་ན། བདག་ནི། སེམས་ཅན་མཛའ་བའམ། མི་མཛའ་བ་གང་ལས་ཀྱང་ཆུང་དུ་ན་སྐྲའི་རྩེ་མོ་གཅིག་ཙམ་མམ། ཆུང་དུ་ན་དགེ་བར་བྱ་བ་སྦྱིན་པ་ཙམ་ཡང་མི་འདོད་མི་ཚོལ་ཏེ། ཕྱི་ མའི་མཐའི་མུར་ཐུག་པའི་བསྐལ་པར་བྱང་ཆུབ་སེམས་དཔའི་སྤྱད་པ་སྤྱོད་ཀྱང་གཞན་དུ་ན་སེམས་ཅན་དེ་དག་ཡོངས་སུ་འགྲོལ་བ་དང༌། སེམས་ཅན་དེ་དག་ཡོངས་སུ་དག་པར་འགྱུར་ བ་དང༌། སེམས་ཅན་དེ་དག་འབྱུང་བར་འགྱུར་བ་མ་གཏོགས་པར་དེ་དག་ལས་སེམས་སྐད་ཅིག་ཙམ་དུ་བདེ་བར་འགྱུར་བའང་མི་ཚོལ་ལོ། །དེ་ཅིའི་ཕྱིར་ཞེ་ན། བདག་ནི། སེམས་ལ་ལེན་ པ་མེད་ཅིང་ཐམས་ཅད་ལ་འདོད་པ་མེད་པས། སེམས་ཅན་གྱི་གཙོ་བོར་འགྱུར་བར་བྱེད་པ་སྟེ། འདི་ལྟར་བདག་གིས་ཅི་ནས་ཀྱང་སེམས་ཅན་དེ་དག་བླ་ན་མེད་པ་ཡང་དག་པར་རྫོགས་ ༄༅། །པའི་བྱང་ཆུབ་ཀྱི་མཐས་གཏུགས་ཏེ། ཤིན་ཏུ་བདེ་བའི་ཕ་རོལ་ཏུ་ཕྱིན་པར་འགྱུར་བར་ནན་ཏན་དུ་བྱའོ། །སྙམ་མོ། །ཀྱེ་རྒྱལ་བའི་སྲས་དག། འདི་ནི། བྱང་ ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་བརྒྱད་པ་སྟེ། ཐུབ་པར་དཀའ་བ་ཞེས་བྱའོ། །ཀྱེ་རྒྱལ་བའི་སྲས་དག། བྱང་ཆུབ་སེམས་དཔའ་ སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་དགུ་པ་ཆོས་བཟང་པོ་ཞེས་བྱ་བ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་ལྷ་དང་འཇིག་ རྟེན་དུ་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེར་བཅས་པའི་སྐྱེ་རྒུ་དང༌། ལྷ་དང༌། དྲི་ཟ་དང༌། མི་དང༌། ལྷ་མ་ཡིན་དུ་བཅས་པ་ན་ཆོས་ཀྱི་ མུ་སྟེགས་བཟང་པོར་གྱུར་པ་ཡིན་ཏེ། དེ་སངས་རྒྱས་ཀྱི་རིགས་མི་གཅད་པའི་ཕྱིར་དམ་པའི་ཆོས་ཡོངས་སུ་འཛིན་པར་བྱེད་པ་ཡིན། གཟུངས་ཀྱི་སྣང་བ་རྣམ་པར་དག་པ་ཐོབ་ པས་གཏམ་བྱ་བ་དང༌། ལུང་བསྟན་པ་ལ་སྤོབས་པ་ཡིན། ཆོས་དང་ལྡན་པའི་གཟུངས་ཐོབ་པས་དོན་ལ་སྤོབས་པ་ཡིན། ཆོས་ཇི་ལྟ་བ་བཞིན་གྱི་གཟུངས་ཆོས་ཡང་དག་པར་ སྐུལ་བ་ཐོབ་པས་ཆོས་ལ་སྤོབས་པ་ཡིན། ཚིག་དང་སྨྲ་བ་ཐམས་ཅད་ཀྱི་གཟུངས་རབ་ཏུ་ཐོབ་པས་ངེས་པའི་ཚིག་ལ་སྤོབས་པ་ཡིན། ཚིག་དང་ཡི་གེའི་དོན་ཀུན་ཏུ་མཐའ་ཡས་ ཤིང་ཟད་མི་ཤེས་པ་ལ་ཐོགས་པ་མེད་པའི་སྒོའི་གཟུངས་ཐོབ་པས་སྤོབས་པ་ཐོགས་པ་མེད་པ་ཡིན། སངས་རྒྱས་དབང་བསྐུར་བའི་གཟུངས་ཀྱི་དབང་བསྐུར་བས་མངོན་པར་དགའ་བར་ བྱེད་པའི་སྤོབས་པ་དང་ལྡན་པ་ཡིན། གཞན་གྱི་དྲིང་ལ་མི་འཇོག་པའི་གཟུངས་ཀྱི་སྒོ་ཐོབ་པས་སྣང་བ་ཐོབ་པའི་སྤོབས་པ་དང་ལྡན་པ་ཡིན། སྤོབས་པ་ཐུན་མོང་པའི་ཚུལ་ལ་ཞུགས་པས་ ཐུན་མོང་གི་སྤོབས་པ་དང་ལྡན་པ་ཡིན་ཏེ། དོན་མང་པོ་དང༌། ཚིག་མང་པོ་དང༌། ཡི་གེ་མང་པོ་དེ་དང་དེ་དག་ལ་ངེས་པའི་ཚིག་གིས་གཟུངས་ཀྱི་སྒོར་ཚུད་པས་ངེས་པའི་སྤོབས་པ་དང་ ལྡན་པ་ཡིན། རྒྱུད་མཐའ་ཡས་པའི་གཟུངས་ཐོབ་པས་མཐའ་ཡས་པའི་སྤོབས་པ་དང་ལྡན་པ་ཡིན་ཏེ། དེས་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་དོན་དུ་བདག་ གི་ལུས་གསེར་གྱི་མདོག་ཏུ་མངོན་པར་སྤྲུལ་ནས་ཆོས་འབྱམས་ཀླས་པ་ཐམས་ཅད་དབྱངས་ཀྱི་དཀྱིལ་འཁོར་གྱི་སྒོ་ཐམས་ཅད་དུ་ཆུད་པས་སེམས་ཅན་དེ་དག་དེ་དག་འདུལ་བའི་དབང་ དུ་བསམ་པ་ཇི་ལྟ་བ་བཞིན་དུ་བརྗོད་པ་དང༌། དབང་པོ་འབྱམས་ཀླས་པ་མཐའ་ཡས་པ་རྣམས་ལ་ལྕེ་ཡངས་པའི་བྱིན་གྱི་རླབས་ཀྱིས་དབྱངས་ཀྱི་ཡན་ལག་རྣམ་པར་དག་པ་དང༌། དུས་དང་ འབྱོར་བའི་ཆོས་བསྟན་པ་དང་སྙིང་རྗེ་ཆེན་པོ་འགལ་བ་མེད་པས་ཤིན་ཏུ་བསྟན་པ་དང༌། ཚིག་གཅིག་གི་སྒྲ་བརྗོད་པས་འདུལ་བ་ཇི་ལྟ་བ་བཞིན་དུ་ཚིམ་པར་འགྱུར་ཞིང་མཐའ་ཡས་ ༄༅། །པར་སྣང་བར་སྟོན་པས་སངས་རྒྱས་ཀྱི་མཛད་པ་ལ་སྤྱོད་དོ། །དེ་ནི། གལ་ཏེ་སེམས་ཅན་རེ་རེ་ཞིང་ཆོག་རྣམ་པ་ཐ་དད་པའི་ཚིག་གི་ཆོ་ག་ལས་སྣ་ཚོགས་ཀྱིས་ མངོན་པར་འདུ་བྱས་པ། རྣམ་པར་སྨིན་པ་བརྗོད་ཀྱིས་མི་ལང་ཞིང་འབྱམས་ཀླས་པས་ཉེ་བར་གནས་པ་བྱེ་བ་ཁྲག་ཁྲིག་བརྒྱ་སྟོང་བསམ་གྱིས་མི་ཁྱབ་པ། གྲངས་མེད་པ། རྣམ་པར་ ཕྱེ་བ༑ རྣམ་པ་ཐ་དད་པ། བརྗོད་དུ་མེད་པ་དང་ལྡན་པ་དེ་ལྟ་བུའི་སེམས་ཅན་ཤ་སྟག་བྱང་ཆུབ་སེམས་དཔའི་འཁོར་དུ་གྱུར་ལ། འཁོར་གྱི་དཀྱིལ་འཁོར་ཡང་འཇིག་རྟེན་གྱི་ ཁམས་བརྗོད་དུ་མེད་པ་ཙམ་དུ་ཡངས་པ་ཞིག་ཡིན་ཏེ། འདུལ་བ་བརྗོད་དུ་མེད་པ་ཞིག་འདུས་ནས་སེམས་ཅན་རེ་རེ་ལ་ཡང་ཁའི་སྒོ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ བརྗོད་དུ་མེད་པ་ཡོད་པར་གྱུར་ཏེ། སེམས་ཅན་གཅིག་ཇི་ལྟ་བར་སེམས་ཅན་དེ་དག་ཐམས་ཅད་ཀྱང་དེ་བཞིན་དུ་དེ་སྙེད་ཀྱི་ཁའི་སྒོ་དང་ལྡན་པ། སེམས་ཅན་དེ་དག་ཐམས་ཅད་ ཀྱིས་བྱང་ཆུབ་སེམས་དཔའ་ལ་སྐད་དུ་བརྗོད་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་རྣམ་པར་བརྟགས་པས་དུས་གཅིག་ཏུ་དབྱངས་གཅིག་ཏུ་འཕྱས་ཏེ་ཡོངས་སུ་དྲི་བར་བྱས་ ཀྱང་བྱང་ཆུབ་སེམས་དཔའ་ནི། དེ་ལྟ་བུའི་སེམས་ཅན་གཅིག་ནས་གཅིག་ཏུ་བརྒྱུད་པ་དང༌། དེ་ལྟ་བུའི་སྐད་གཅིག་ནས་གཅིག་ཏུ་བརྒྱུད་པ་དང༌། དེ་ལྟ་བུའི་བརྗོད་པ་སྣ་ ཚོགས་ཀྱིས་ཡོངས་སུ་དྲིས་པ་ལའང་ཆོས་གཟུང་བ་ལ་ཐོགས་པ་མེད་པ་ཡིན། བརྗོད་པ་ཤེས་པར་བྱ་བའི་ཕྱིར་རྣམ་པར་རྟོག་པ་མེད་པ་ཡིན་ཏེ། དྲི་བས་ཐེ་ཚོམ་ཡོངས་སུ་དྲིས་པ་ལ་ ཐོགས་པ་མེད་དོ། །འཁོར་གྱི་དཀྱིལ་འཁོར་གཅིག་ཏུ་ཇི་ལྟ་བ་དེ་བཞིན་དུ་འཁོར་གྱི་དཀྱིལ་འཁོར་བརྗོད་དུ་མེད་པ་དེ་ཙམ་ཐམས་ཅད་དུ་ཡང་དེ་བཞིན་ཏེ། དེ་ལ་བྱང་ཆུབ་སེམས་དཔའ་ འདི་སྙམ་དུ་སེམས་སོ། །གལ་ཏེ་སྐྲའི་རྩེ་མོ་རེ་རེ་ལས་སེམས་བསྐྱེད་པར་རེ་རེ་ཞིང་འཁོར་གྱི་དཀྱིལ་འཁོར་བརྗོད་དུ་མེད་པ་ཞིག་བྱུང་ལ། སེམས་སྐད་ཅིག་རེ་རེ་ལ་རྟོག་པ་གཞན་ དང་གཞན་གྱིས་སྐད་གཞན་དང་གཞན་དུ་བརྗོད་པས་ཆོས་ཀྱི་དབྱིངས་ཐམས་ཅད་གང་བར་བྱེད་ཅིང༌། འཁོར་གྱི་དཀྱིལ་འཁོར་རྣམ་པ་དེ་ལྟ་བུ་ཤ་སྟག་ཅིག་སྐྲའི་རྩེ་མོ་ཐམས་ ཅད་ལས་བྱུང་སྟེ། དེ་ལྟར་བྱུང་བས་ཕྱི་མའི་མཐའི་བསྐལ་པའི་མུར་ཐུག་པར་བྱུང་ཡང༌། འཁོར་གྱི་དཀྱིལ་འཁོར་དེ་དག་བྱུང་བས་ཕྱི་མའི་མཐའི་བསྐལ་པའི་མུར་ཐུག་པ་ཟད་པར་ གྱུར་ཏེ༑ འཁོར་དེ་རྣམས་ནི། ཟད་མི་ཤེས་པར་བྱུང་ལ། སྐྱེ་བའི་རྒྱུན་མི་འཆད་པ་ཞིག་ཡོད་དུ་ཟིན་ན་ཡང༌། བསྟན་པར་བྱ་བའི་ས་དེ་ལ་བྱང་ཆུབ་སེམས་དཔའ་སེམས་སྐད་ ཅིག་པ་འགའ་ཙམ་དུ་ཡང་ཞུམ་པ་མི་སྐྱེའོ། །སྙོམས་པ་མི་སྐྱེའོ། །སྒྱིད་ལུག་དང་ཁོང་སྙོམ་མི་སྐྱེའོ། །ཐེ་ཚོམ་དང་ཡིད་གཉིས་མི་སྐྱེའོ། །བག་ཚ་བ་དང་འཇིགས་པ་མི་སྐྱེའོ་ ༄༅། །རྨོངས་པ་དང་འཁྲུལ་པ་མི་སྐྱེའོ། །བྱང་ཆུབ་སེམས་དཔའ་ཆོས་བཟང་པོ་ལ་གནས་པ་དེ་ནི། འདི་སྙམ་དུ་སེམས་ཏེ། བདག་གིས་སེམས་ཅན་འདི་དག་ དང༌། སེམས་ཅན་གཞན་རྣམས་དང༌། སེམས་ཅན་གྱི་ཁམས་ཐམས་ཅད་ཀྱང་ཚིག་གི་ལམ་གྱིས་ཡོངས་སུ་མགུ་བར་བྱས་ཏེ་ཆོས་བཤད་པའི་མཐར་ཐུག་པར་མི་བྱ། ཆོས་ལ་ རྣམ་པར་ཐོགས་པར་མི་བྱའོ། །ཞེས་ནས་དེས་བརྗོད་པ་དེ་དག་ཐམས་ཅད་ཀྱང་རབ་ཏུ་ཤེས་ཏེ། སེམས་ཅན་དེ་དག་ལ་བརྟག་མི་དགོས་པར་འབྱུང་བའི་ཚིག་དང༌། ཚིག་གི་ཆོ་ ག་རྣམ་པ་ཐ་དད་པ་བརྟག་མི་དགོས་པར་འབྱུང་བ་དང༌། ཚིག་གི་རྣམ་པར་གདགས་པ་བརྗོད་དུ་མེད་པའི་ཡང་བརྗོད་དུ་མེད་པར་འབྱུང་བས་ཆོས་སྟོན་པར་བྱེད་དོ། །དེ་བརྗོད་ པ་དེ་དག་ཐམས་ཅད་ཀྱང་འཛིན་ལ། སེམས་ཀྱི་སྐད་ཅིག་གཅིག་གིས་ཀྱང་ཚིག་ཐམས་ཅད་མཁྱེན་པ་ཉིད་དུ་དབང་བསྐུར་བ། ཆགས་པ་མེད་པའི་སྙིང་པོ་ཅན། ཆོས་ཐམས་ ཅད་ཀྱི་སྣང་བ་རབ་ཏུ་ཐོབ་པ། ཐམས་ཅད་མཁྱེན་པའི་ཡེ་ཤེས་ལ་གཞོལ་བ་གཅིག་གིས་སེམས་ཅན་ཐམས་ཅད་ཀྱང་གོ་བར་བྱེད་དོ། །དེ་ལྟར་བྱང་ཆུབ་སེམས་དཔའ་སེམས་ དཔའ་ཆེན་པོ་བྱང་ཆུབ་སེམས་དཔའི་སྤྱོད་པ་ཆོས་བཟང་པོ་ལ་གནས་པ་ནི། མངོན་པར་ཆགས་པ་མེད་པའི་ཚུལ་གྱིས་བདག་རྣམ་པར་དག་པའང་རབ་ཏུ་འཐོབ་བོ། །སེམས་ ཅན་མེད་པར་འབྱུང་བའི་ཚུལ་གྱིས་སེམས་ཅན་ཐམས་ཅད་ཀྱི་དོན་ཀྱང་ཡོངས་སུ་རྫོགས་པར་བྱེད་དོ། །དེ་ནི། དུས་གཅིག་ཏུ་སྟོང་གསུམ་པ་བཅུ་ནས་སྟོང་གསུམ་པ་བརྗོད་ཀྱིས་མི་ལང་ བའི་དོན་དུ་བྱིན་གྱིས་བརླབས་ཤིང༌། བདག་གིས་ལུས་གསེར་གྱི་མདོག་ཏུ་མངོན་པར་སྤྲུལ་ཏེ་དབྱངས་ཀྱི་དཀྱིལ་འཁོར་ཐམས་ཅད་ཤེས་པའི་སྒོར་ཆུད་པ། ཆོས་ཐམས་ཅད་དུ་ ཁྱབ་པས་མཐའ་དང་དབུས་མེད་པའི་ཆོས་ཀྱི་སྒོར་འཇུག་ཅིང་སངས་རྒྱས་ཀྱི་འཕྲིན་ལས་སྒྲུབ་སྟེ། འཇིག་རྟེན་ཐམས་ཅད་དུ་རྒྱུ་བ་འགག་པས་འགྲོ་བ་མེད་པའི་ལུས་རྣམས་དང༌། འགྲོ་ པ་ཐམས་ཅད་དུ་འབྱུང་བས་མཐའ་ཡས་པར་འགྲོ་བའི་ལུས་རྣམས་དང༌། མི་སྐྱེ་བ་དང་མཉམ་པའི་ཆོས་ལ་བརྩོན་པས་མ་སྐྱེས་པའི་ལུས་རྣམས་དང༌། འགོག་པར་བརྗོད་པ་ཐམས་ ཅད་དམིགས་པ་མེད་པས་འགག་པ་མེད་པའི་ལུས་རྣམས་དང༌། ཇི་ལྟ་བ་བཞིན་དུ་དམིགས་པས་བདེན་པ་མེད་པའི་ལུས་རྣམས་དང༌། འཇིག་རྟེན་གྱི་བདེན་པ་བཞིན་དུ་རྣམ་པར་ དམིགས་པས་མི་སླུ་བའི་ལུས་རྣམས་དང༌། འཆི་འཕོ་བ་དང་སྐྱེ་བ་ལས་འདས་པས་མི་འཕོ་བའི་ལུས་རྣམས་དང༌། ཆོས་ཀྱི་དབྱིངས་ཀྱི་རང་བཞིན་འཇིག་པར་མི་བྱེད་པས་མི་འཇིག་ བའི་ལུས་རྣམས་དང༌། དུས་གསུམ་གྱི་ཚིག་གི་ལམ་ལ་བརྩོན་པས་སྐད་ཅིག་གཅིག་གི་ལུས་རྣམས་དང༌། ཆོས་ཀྱི་མཚན་ཉིད་ཤིན་ཏུ་རྟོགས་པའི་མཐར་ཐུག་པས་མཚན་ཉིད་ ༄༅། །མེད་པའི་ལུས་རྣམས་དང༌། ལུས་རྣམ་པར་ཕྱེ་བ་འབྱམས་ཀླས་པ་བཅུ་པོ་དེ་དག་དང་ལྡན་པའི་བྱང་ཆུབ་སེམས་དཔའ་ནི། དགེ་བའི་རྩ་བ་ཐམས་ཅད་བསྐྱེད་ པ་ལ་སེམས་ཅན་ཐམས་ཅད་ཀྱི་གནས་ཡིན་ནོ། །དབུགས་ཆེན་པོ་ཕྱིན་པར་བྱ་བ་ལ་སེམས་ཅན་ཐམས་ཅད་ཀྱི་དཔུད་[*DPUNG?] གཉེན་ཡིན་ནོ། །གནས་ཆེན་པོ་ཐོབ་པར་བྱ་བ་ལ་སེམས་ ཅན་ཐམས་ཅད་ཀྱི་སྐྱབས་ཡིན་ནོ། །བླ་ན་མེད་པའི་འབྱུང་བ་མཐོང་བར་བྱ་བ་ལ་སེམས་ཅན་ཐམས་ཅད་ཀྱི་རྟེན་ཡིན་ནོ། །ཆོས་ཀྱི་ཚུལ་ལ་འཇུག་པར་བྱ་བ་ལ་སེམས་ཅན་ཐམས་ ཅད་ཀྱི་འདྲེན་པ་ཡིན་ནོ། །ལས་ཀྱི་རྣམ་པར་སྨིན་པ་རྣམ་པར་དམིགས་པར་བྱ་བ་ལ་སེམས་ཅན་ཐམས་ཅད་ཀྱི་མེ་མར་ཡིན་ནོ། །ཆོས་ཟབ་མོ་རབ་ཏུ་ཐོབ་པར་བྱ་བ་ལ་འཇིག་ རྟེན་ཐམས་ཅད་ཀྱི་སྣང་བ་ཡིན་ནོ། །ཆོས་ཐམས་ཅད་ཇི་ལྟ་བ་བཞིན་དུ་རྨོངས་པ་མེད་པར་ཁོང་དུ་ཆུད་པར་བྱ་བ་ལ་ཁམས་གསུམ་ཐམས་ཅད་ཀྱི་སྒྲོན་མ་ཡིན་ནོ། །སྣང་ བའི་ས་རབ་ཏུ་ཐོབ་པར་བྱ་བ་ལ་འཇིག་རྟེན་ཐམས་ཅད་ཀྱི་སྣང་བ་ཡིན་ནོ། །སངས་རྒྱས་ཀྱི་རྣམ་པར་འཕྲུལ་པ་ཡང་དག་པར་བསྟན་པར་བྱ་བ་ལ་འགྲོ་བ་ཐམས་ཅད་རབ་ ཏུ་དགའ་བ་ཡིན་ནོ། །ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་དགུ་པ་ཆོས་བཟང་པོ་ཞེས་ བྱ་བ་སྟེ། དེ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། སངས་རྒྱས་ཀྱི་ཆོས་ཐམས་ཅད་དུ་འཇུག་པར་བྱ་བ་ལ་འགྲོ་བ་ཐམས་ཅད་ཀྱི་མུ་སྟེགས་ཡིན་ནོ། ། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་སྤྱོད་པ་བཅུ་པ་བདེན་པ་དང་ལྡན་པ་ཞེས་བྱ་བ་གང་ཞེ་ན། ཀྱེ་རྒྱལ་བའི་སྲས་ དག །འདི་ལ་བྱང་ཆུབ་སེམས་དཔའ་བདེན་པའི་ཚིག་དམ་པ་དང་ལྡན་པས་བདེན་པའི་ཚིག་ཅན་ཡིན་ཏེ། དེ་ནི། གང་སྨྲས་པ་དེ་བྱེད། གང་བྱེད་པ་དེ་སྨྲའོ། །དེ་འདས་པའི་སངས་ རྒྱས་བཅོམ་ལྡན་འདས་རྣམས་ཀྱི་བདེན་པའི་གསུང་ལ་ཡང་སློབ་བོ། །མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་བདེན་པའི་གསུང་ལ་ཡང་སློབ་བོ། །ད་ལྟར་བྱུང་བའི་སངས་ རྒྱས་བཅོམ་ལྡན་འདས་ཀྱི་བདེན་པའི་གསུང་ལའང་སློབ་བོ། །འདས་པའི་སངས་རྒྱས་བཅོམ་ལྡན་འདས་རྣམས་ཀྱི་རིགས་ལའང་འཇུག་གོ ། མ་བྱོན་པའི་སངས་རྒྱས་བཅོམ་ལྡན་ འདས་བཅོམ་ལྡན་འདས་རྣམས་ཀྱི་རིགས་ལའང་འཇུག་གོ །ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་རིགས་ལའང་འཇུག་གོ །འདས་པའི་དེ་བཞིན་གཤེགས་ པ་ཐམས་ཅད་ཀྱི་དགེ་བའི་རྩ་བ་ཡང་འཐོབ་བོ། །མ་བྱོན་པའི་དེ་བཞིན་གཤེགས་པ་ཐམས་ཅད་ཀྱི་དགེ་བའི་རྩ་བ་ཡང་འཐོབ་བོ། །ད་ལྟར་བྱུང་བའི་དེ་བཞིན་གཤེགས་པ་ཐམས་ ༄༅། །ཅད་ཀྱི་དགེ་བའི་རྩ་བ་ཡང་འཐོབ་བོ། །དེ་ནི། སངས་རྒྱས་བཅོམ་ལྡན་འདས་འདས་པ་དང༌། མ་བྱོན་པ་དང༌། ད་ལྟར་བྱུང་བ་ཐམས་ཅད་དང་དགེ་བའི་རྩ་ བ་ལྷན་ཅིག་ཏུ་གྱུར་པ་སྟེ། དེ་བཞིན་གཤེགས་པའི་རྗེས་སུ་བསླབ་པའི་ཡེ་ཤེས་དང་ལྡན་པས་གཉིས་སུ་མེད་པར་སྨྲ་བ་ཡིན་ནོ། །དེ་སེམས་ཅན་རྣམས་ཀྱི་གནས་དང་གནས་ མ་ཡིན་པའི་ཤེས་པ་ལའང་རབ་ཏུ་འཇུག་གོ །དེ་སེམས་ཅན་རྣམས་ཀྱི་འདས་པ་དང༌། མ་འོངས་པ་དང༌། ད་ལྟར་བྱུང་བའི་ལས་རྣམ་པར་སྨིན་པ་ཤེས་པ་ལའང་རབ་ཏུ་འཇུག་ གོ །དབང་པོ་དང༌། བརྩོན་འགྲུས་རྣམ་པ་ཐ་དད་པ་རྫོགས་པ་དང༌། མ་རྫོགས་པ་དང༌། རབ་དང༌། ཐ་མ་ཤེས་པ་ལ་ཡང་རབ་ཏུ་འཇུག་གོ །ཁམས་ཐ་དད་པ་དང༌། ཁམས་དུ་མ་ ལ་ཡང་རབ་ཏུ་འཇུག་གོ །མོས་པ་ཐ་དད་པ་དང༌། མོས་པ་དུ་མ་ལ་ཡང་རབ་ཏུ་འཇུག་གོ །ཐམས་ཅད་དུ་འགྲོ་བའི་ལམ་གྱི་ཡེ་ཤེས་ལ་ཡང་རབ་ཏུ་འཇུག་གོ །བསམ་གཏན་ དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པ་དང༌། ཀུན་ནས་ཉོན་མོངས་པ་དང༌། རྣམ་པར་བྱང་བ་རྣམ་པར་དགོད་པ་སེམས་ཅན་རྣམས་ཀྱི་དུས་དང་ དུས་མ་ཡིན་པའང་རབ་ཏུ་ཤེས་སོ། །འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་དུ་སྔོན་གྱི་གནས་རྗེས་སུ་དྲན་པའི་ཤེས་པ་ལ་ཡང་རབ་ཏུ་འཇུག་གོ །ལྷའི་མིག་ ཆགས་པ་མེད་པ་ཡང་མངོན་པར་སྒྲུབ་བོ། །ཟག་པ་ཟད་པར་ཤེས་པའང་རབ་ཏུ་ཤེས་ཏེ། བྱང་ཆུབ་སེམས་དཔའི་སྤྱོད་པ་ཉེ་བར་བཟུང་བ་ཡང་རྒྱུན་མི་གཅོད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི། འགྲོ་བ་ཐམས་ཅད་རྣམ་པར་དག་པར་བྱ་བ་དང༌། གདུལ་བའི་ཕྱིར་ཞུགས་པ་ཡིན་ཏེ། དེ་ཕྱིར་ཞིང་སེམས་འདི་སྙམ་དུ་སྐྱེའོ། །འདི་ལྟར་འཇིག་རྟེན་ན་ གནས་པ་ཡོངས་སུ་མ་གྲོལ་བར་བདག་རྣམ་པར་གྲོལ་བའི་ཚུལ་རབ་ཏུ་ཤེས་པར་བྱ་བ་དང༌། སེམས་ཅན་ཐམས་ཅད་ཡོངས་སུ་མ་བཀྲོལ་ཞིང་སྨོན་ལམ་རྗེས་སུ་མ་བསྲུངས་པར་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱ་བ་འདི་ནི། བདག་ལ་མི་ཆའི། དེ་བས་ནི། ཅི་ནས་ཀྱང་སེམས་ཅན་འདི་དག་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཀྱི་མཐས་གཏུགས་པར་འགྱུར་བ་དང༌། གང་འདི་ཕུང་པོའི་ལྷག་མ་མ་ལུས་པའི་མྱ་ངན་ལས་འདས་པའི་དབྱིངས་ཀྱི་མཐར་ཐུག་པར་གཞོལ་བར་འགྱུར་བ་དེ་ ལྟར་བྱའོ། །དེ་ཅིའི་ཕྱིར་ཞེ་ན། བདག་ཅག་ནི། སེམས་ཅན་ཐམས་ཅད་ཀྱིས་གསོལ་བ་མ་བཏབ་པའི་དགེ་བའི་བཤེས་གཉེན་ཏེ། སེམས་ཅན་ཐམས་ཅད་ཀྱིས་མ་བསྐུལ་བར་ཡང་ དག་པར་ཞུགས་པ། སེམས་ཅན་ཐམས་ཅད་ཀྱི་དགེ་བའི་རྩ་བ་ལ་ཐོག་མར་འགྲོ་བའོ། །བདག་ཅག་ནི། ཐམས་ཅད་མཁྱེན་པ་ཉིད་ལ་འཇུག་པའི་ཕྱིར་ཁ་ལོ་སྒྱུར་བ་སྟེ། བདག་ ༄༅། །ཅག་གིས་ནི། འགྲོ་བ་ཀུན་གྱིས་གོས་པ་མེད་པའི་ཕྱིར་མཆོག་ཏུ་གྱུར་པའོ། །བདག་ཅག་ནི། བླ་ན་མེད་པར་ཁ་ལོ་སྒྱུར་བའི་ས་ལ་དམ་པར་གྱུར་པའོ།། བདག་ཅག་ནི། སེམས་ཅན་མེད་པའི་མཐའ་ལ་རབ་རིབ་མེད་པའོ། །བདག་ཅག་ནི། སྔོན་གྱི་སྨོན་ལམ་གྱིས་ཐོབ་པ་དང་ལྡན་པའོ། །བདག་ཅག་ནི། བྱང་ཆུབ་སེམས་དཔའི་ཡོན་ ཏན་གྱི་རྒྱན་ཐམས་ཅད་ཀྱིས་ཤིན་ཏུ་སྤྲུལ་པའོ། །བདག་ཅག་ནི། སངས་རྒྱས་འདས་པ་དང༌། མ་བྱོན་པ་དང༌། ད་ལྟར་བྱུང་བ་ཐམས་ཅད་ཀྱིས་ཡོངས་སུ་བཟུང་པའོ། །ཞེས་ཏེ། དེ་ སྔོན་གྱི་སྨོན་ལམ་ཡང་འཇིག་པར་མི་བྱེད་དོ། །བླ་ན་མེད་པའི་ཡེ་ཤེས་ཀྱི་རྒྱན་ལའང་རབ་ཏུ་འཇུག་གོ །སེམས་ཅན་ཐམས་ཅད་ཀྱི་དོན་ཀྱང་ཡོངས་སུ་རྫོགས་པར་བྱེད་དོ། །སྔོན་ གྱི་སྨོན་ལམ་ཇི་ལྟར་བཏབ་པ་ཡང་ཐོག་མ་དང༌། བར་མ་དང༌། ཐ་མའི་ཚུལ་གྱིས་ཡོངས་སུ་རྫོགས་པར་བྱས་ནས་འགྲོ་བ་ཐམས་ཅད་རྣམ་པར་དག་པར་བྱ་བའི་ཕྱིར་ཆོས་ཐམས་ཅད་ ཤེས་པའི་མངོན་པར་ཤེས་པ་ཡང་རབ་ཏུ་ཐོབ་པར་བྱེད་དོ། །སེམས་བསྐྱེད་པ་རེ་རེ་ཞིང་ཡང་ཕྱོགས་བཅུར་རྒྱས་པར་འགྲོ་སྟེ། སེམས་བསྐྱེད་པ་གཅིག་གིས་ཀྱང་སངས་རྒྱས་ཀྱི་ ཞིང་བརྗོད་དུ་མེད་པའི་ཡང་བརྗོད་དུ་མེད་པ་ལ་འཇུག་གོ །སེམས་བསྐྱེད་པ་རེ་རེས་ཀྱང་ཡང་དག་པར་རྫོགས་པའི་སངས་རྒྱས་བརྗོད་དུ་མེད་པའི་ཡང་བརྗོད་དུ་མེད་པ་མཐོང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་སངས་རྒྱས་ཀྱི་ཞིང་གི་རྒྱན་ཡོངས་སུ་དག་པ་ལ་ཡང་རབ་ཏུ་འཇུག་གོ །དེ་བཞིན་གཤེགས་པའི་ རྣམ་པར་འཕྲུལ་བ་ཡང་ཡོངས་སུ་སྟོན་ཏོ། །ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པར་ལུས་བྱིན་གྱིས་བརླབས་པ། འགྲོ་བ་ཐམས་ཅད་དུ་ཁྱབ་པ། ཚང་མེད་ པ༑ མི་གནས་པ་ཡང་རབ་ཏུ་ཤེས་ཏེ། བདག་གི་ལུས་དེ་དག་ལའང་ཞིང་ཐམས་ཅད་ཡོངས་སུ་འདུས་པར་ཀུན་ཏུ་སྟོན་ཅིང༌། དུས་གསུམ་གྱི་སེམས་ཅན་ཐམས་ཅད་དང༌། ཆོས་ ཐམས་ཅད་དང༌། སངས་རྒྱས་ཐམས་ཅད་ཀྱང་རབ་ཏུ་སྟོན་ཏེ། སེམས་ཅན་དེ་དག་གི་འདུ་ཤེས་ཀྱི་རྒྱུད་དང་མཐུ་ལ་ཡང་རབ་ཏུ་འཇུག་གོ། སེམས་ཅན་དེ་དག་གི་བསམ་པ་དང༌། མོས་པ་དང༌། ལས་དང༌། རྣམ་པར་སྨིན་པ་རྣམ་པར་དག་པ་ཇི་ཙམ་པ་དེ་ཙམ་དུ་སེམས་ཅན་གདུལ་བའི་དོན་དུ་ལུས་བྱིན་གྱིས་རློབ་སྟེ། དེ་ཡང་འདི་ལྟར་བྱང་ཆུབ་སེམས་དཔའ་ ནི༑ སྒྱུ་མ་ལྟ་བུའི་ཆོས་ཐམས་ཅད་ཀྱིས་ཤིན་ཏུ་སྤྲུལ་པ་སྟེ། མིག་ཡོར་ལྟ་བུའི་སངས་རྒྱས་སྐྱེ་བར་བྱ་བ་ལ་ཕ་རོལ་ཏུ་ཕྱིན་པའོ། །འགྲོ་བ་ཐམས་ཅད་རྨི་ལམ་ལྟ་བུར་རྟོགས་པའི་ ཡིད་དང་ལྡན་པའོ། །དོན་དང་ཡི་གེའི་ཚོགས་ལ་མི་ཟད་པའི་མཛོད་དོ། །དྲན་པས་དབང་བསྒྱུར་བའི་ཆོས་ཐམས་ཅད་ལ་ངེས་པར་རྟོགས་པ་ཐོབ་པའོ། །ཤེས་རབ་ཆེ་བའི་ཏིང་ ༄༅། །ངེ་འཛིན་ཐམས་ཅད་ལ་ཡང་རབ་ཏུ་ཞུགས་པའོ། །གཉིས་སུ་མེད་པའི་ས་ལ་རྒྱུད་ཀྱི་ཚུལ་གཅིག་ཏུ་གྱུར་པའོ། །སེམས་ཅན་གྱི་ཁམས་གཉིས་ལ་གནས་པ་ལ་ སྙིང་རྗེ་ཆེན་པོར་གནས་པ་སྟེ། ཆོས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་ནི། ཆོས་བཅུའི་མཐར་དབེན་པར་གྱུར་པ་སྟེ། ཆོས་ཀྱི་དབྱིངས་མིག་འཕྲུལ་ལྟ་བུ་ལ་རབ་ཏུ་ འཇུག་ཅིང་གནས་པའོ། །ཆགས་པ་མེད་པའི་སངས་རྒྱས་ཀྱི་རྣམ་པར་ཐར་པ་ཡོངས་སུ་རྫོགས་པའོ། །ཁྱུ་མཆོག་གི་མཐུ་ཕྱུང་བས་སེངྒེའི་སྒྲ་སྒྲོག་པའོ། །མི་འཇིགས་པ་རབ་ ཏུ་ཐོབ་པའོ། །ཐོགས་པ་མེད་པའི་ཆོས་ཀྱི་འཁོར་ལོ་བསྐོར་བའོ། །ཕྱིར་མི་ལྡོག་པར་འཇིག་རྟེན་གྱི་ཁམས་ཐམས་ཅད་དུ་རྗེས་སུ་སྤྱོད་པའི་ཡེ་ཤེས་དང༌། རྣམ་པར་ཐར་བ་དང་ ལྡན་པའི་ཡེ་ཤེས་རྒྱ་མཚོ་ལ་རབ་ཏུ་ཞུགས་པའོ། །སེམས་ཅན་ཐམས་ཅད་ཀྱི་འཁོར་བའི་འཁོར་ལོ་བཟློག་པའི་ཕྱིར་རབ་ཏུ་ཞུགས་པའོ། །འདས་པ་དང༌། མ་བྱོན་པ་དང༌། ད་ ལྟར་བྱུང་བའི་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོའི་བྱིན་གྱི་རླབས་དང་ལྡན་པའོ། །སངས་རྒྱས་ཐམས་ཅད་ཀྱི་ཆོས་རྒྱ་མཚོའི་ཚུལ་གྱི་རྗེས་སུ་ཞུགས་ཤིང་གཏིང་ རྙེད་པའོ། །ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་བཅུ་པ་སྟེ། བདེན་པ་དང་ལྡན་པ་ཞེས་བྱའོ། །དེ་ལ་གནས་ པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བདེན་པས་ལྷ་དང༌། བདུད་དང༌། ཚངས་པར་བཅས་པའི་འཇིག་རྟེན་དང༌། དགེ་སྦྱོང་དང༌། བྲམ་ཟེའི་སྐྱེ་རྒུར་བཅས་པ་དང༌། ལྷ་དང༌། དྲི་ཟ་དང༌། མི་དང་ལྷ་མ་ཡིན་དུ་བཅས་པའི་འཇིག་རྟེན་དང་ཕྲད་པར་འདོང་ངོ༌། །ཤེས་པར་བྱེད་དོ། །ཚིམ་པར་བྱེད་དོ། །ཡོངས་སུ་དག་པར་བྱེད་དོ། །དེ་ནས་དེའི་ཚེ་སངས་ རྒྱས་ཀྱི་མཐུས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་རྣམ་པ་དྲུག་ཏུ་གཡོས་པར་གྱུར་ཏེ། གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་ སོ༑ ༑འགུལ་ཏོ། །རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ །རབ་ཏུ་ལྡེག་གོ། ཀུན་ཏུ་ལྡེག་གོ །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར། རབ་ཏུ་ འུར་འུར། ཀུན་ཏུ་འུར་འུར་རོ། །ཤིག་ཤིག །རབ་ཏུ་ཤིག་ཤིག ། ཀུན་ཏུ་ཤིག་ཤིག་གོ །སངས་རྒྱས་ཀྱི་མཐུས་ལྷ་རྫས་ཀྱི་མེ་ཏོག་གི་སྤྲིན་གྱི་ཆར་ཡང་མངོན་པར་བབ་བོ། །ལྷ་རྫས་ཀྱི་ སྤོས་ཀྱི་སྤྲིན་གྱི་ཆར་ཡང་མངོན་པར་བབ་བོ། །ལྷ་རྫས་ཀྱི་ཕྱེ་མའི་སྤྲིན་གྱི་ཆར་ཡང་མངོན་པར་བབ་བོ། །ལྷ་རྫས་ཀྱི་ཕྲེང་བའི་སྤྲིན་གྱི་ཆར་ཡང་མངོན་པར་བབ་བོ། །ལྷ་རྫས་ཀྱི་གོས་ཀྱི་ སྤྲིན་གྱི་ཆར་ཡང་མངོན་པར་བབ་བོ། །ལྷ་རྫས་ཀྱི་རིན་པོ་ཆེའི་སྤྲིན་གྱི་ཆར་ཡང་མངོན་པར་བབ་བོ། །ལྷ་རྫས་ཀྱི་རྒྱན་གྱི་སྤྲིན་གྱི་ཆར་ཡང་མངོན་པར་བབ་བོ། །ལྷ་རྫས་ཀྱི་རོལ་ ༄༅། །མོའི་སྒྲ་ཡང་མངོན་པར་བྱུང་ངོ༌། །ལྷ་རྫས་ཀྱི་སྣང་བའང་རབ་ཏུ་བྱུང་ངོ༌། །ལྷ་རྫས་ཀྱི་སྒྲའང་རབ་ཏུ་བྱུང་ངོ༌། །གླིང་བཞི་པ་འདིའི་ལྷའི་དབང་པོ་རབ་ མཚེ་མའི་གནས་ན་ཇི་ལྟ་བ་དེ་བཞིན་དུ་ཕྱོགས་བཅུ་ཐམས་ཅད་ཀྱང་རྒྱས་པར་བྱས་ཏེ། ཐམས་ཅད་ན་ཡང་སངས་རྒྱས་ཀྱི་མཐུས་ཆོས་འདི་ཉིད་བསྟན་པར་སྣང་ངོ༌། །ཕྱོགས་བཅུའི་ འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྒྱ་སྟོང་གི་རྡུལ་ཤིན་ཏུ་ཕྲ་བ་སྙེད་འདས་པའི་ཕ་རོལ་ནས་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྒྱ་སྟོང་གི་རྡུལ་ཤིན་ཏུ་ཕྲ་བ་ སྙེད་འོངས་ཏེ་ཕྱོགས་བཅུ་རྒྱས་པར་བྱས་ནས་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། དེ་ལྟར་ཁྱོད་བྱང་ཆུབ་སེམས་དཔའ་རྣམས་ཀྱི་སྤྱོད་པའི་ཆོས་ཉིད་འདི་སྟོན་པ་ལེགས་ སོ༑ ༑ལེགས་སོ། །ཀྱེ་རྒྱལ་བའི་སྲས། བདག་ཅག་ཀུན་ཀྱང་མིང་ཡོན་ཏན་དང་ལྡན་བཞེས་བྱ་བ་དག་སྟེ། དེ་བཞིན་གཤེགས་པའི་མཚན་ཀུན་ཏུ་ཡོན་ཏན་ཞེས་བྱ་བ་དག་གི་ དྲུང་ནས་འཇིག་རྟེན་གྱི་ཁམས་ཡོན་ཏན་གྱི་རྒྱལ་མཚན་ཞེས་བྱ་བ་དག་ནས་ཕྱིན་ཏེ། ཐམས་ཅད་ན་ཡང་སངས་རྒྱས་ཀྱི་མཐུས་འཁོར་འདི་འདྲ་བ་དག་ན་ཚིག་འདི་དག་དང༌། ཡི་གེ་ འདི་དག་དང༌། བསྟན་པ་འདི་དག་དང༌། དོན་འདི་ཉིད་བརྗོད་པས་ལྷག་ཆད་མེད་པར་ཆོས་བསྟན་པ་འདི་སྟོན་ཏོ། །ཀྱེ་རྒྱལ་བའི་སྲས། དེ་ལྟར་བདག་ཅག་ཐམས་ཅད་ཀྱང་སངས་ རྒྱས་ཀྱི་བྱིན་གྱི་རླབས་ཀྱིས་འཁོར་འདིར་ཕྱིན་ཏེ། ཇི་ལྟར་འཁོར་འདིར་བདག་ཅག་ཕྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པའི་འཇིག་རྟེན་གྱི་ཁམས་ ཐམས་ཅད་ཀྱི་རབ་མཚེ་མའི་གནས་ལྷ་རྒྱལ་པོ་རབ་མཚེ་མའི་ཁང་པ་ནོར་བུ་སྣ་ཚོགས་ཞེས་བྱ་བ་ཀུན་ཏུ་ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྒྱ་སྟོང་གི་རྡུལ་ཤིན་ཏུ་ཕྲ་བ་ སྙེད་ཕྱིན་བར་གྱུར་ཏོ། །བམ་པོ་ཉི་ཤུ་བརྒྱད་པ། དེ་ནས་བྱང་ཆུབ་སེམས་དཔའ་ཡོན་ཏན་དང་ལྡན་པས་ཕྱོགས་བཅུར་བལྟས་ཏེ། འཁོར་ཡོད་པ་ཐམས་ཅད་ལ་རྣམ་པར་བལྟས་ནས་ ཆོས་ཀྱི་དབྱིངས་ལ་རྣམ་པར་ལྟ་ཞིང༌། དེ་བཞིན་གཤེགས་པའི་རིགས་ཡང་དག་པར་གཟུང་བ་དང༌། བྱང་ཆུབ་སེམས་དཔའི་རིགས་ཡོངས་སུ་སྦྱང་བ་དང༌། སྨོན་ལམ་གྱི་རིགས་ཕྱིར་མི་ ལྡོག་པར་བྱ་བ་དང༌། སྤྱོད་པའི་རིགས་རྒྱུན་དུ་བསབ་པ་དང༌། དུས་གསུམ་གྱི་རྒྱུད་མཉམ་པར་བྱ་བ་དང༌། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ རིགས་ཡང་དག་པར་གཟུང་བ་དང༌། དགེ་བའི་རྩ་བ་ཇི་ལྟར་བསྐྱེད་པའི་རྒྱུད་བརྗོད་པ་དང༌། དུས་དང་ཇི་ལྟར་འབྱོར་པའི་ཡན་ལག་དང༌། དབང་པོ་དང༌། བསམ་པ་དང༌། མོས་པ་དང༌། ཉོན་མོངས་པ་དང༌། བག་ཆགས་དང༌། སེམས་དང༌། སྤྱོད་པ་དང༌། རྣམ་པར་གཡོས་པའི་རྒྱུད་ཐམས་ཅད་ཡོངས་སུ་བརྟག་པ་དང༌། སངས་རྒྱས་དང༌། བྱང་ཆུབ་སེམས་དཔའི་རིགས་ ༄༅། །ཐམས་ཅད་སྣང་བར་བྱེད་ཅིང༌། སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་དེ་སྨྲས་པ། ནམ་མཁའི་ལམ་གྱི་རྒྱུད་གཤེགས་ཤིང༌། །སྒྲིབ་པ་ མེད་པར་གཟིགས་པ་རྡུལ་རྣམས་སྦྱངས་གྱུར་པ། །ཀུན་ཏུ་མཐའ་ཡས་སྤྱོད་ཡུལ་ཅན། །སྟོབས་བཅུ་མངའ་བ་དེ་ལ་ཕྱག་འཚལ་ལོ། །གང་ཡང་རྒྱལ་བ་མི་ཡི་མཆོག །ཆགས་ པ་མི་མངའ་ཡོན་ཏན་ཚད་མེད་མངའ་བ་སྟེ། །འདས་དུས་མཉམ་པས་མཉམ་གྱུར་པ། །རྡུལ་བསལ་དེ་དག་སྤྱོད་པ་འདི་ཡིན་ནོ། །ཕྱོགས་བཅུའི་འཇིག་རྟེན་ཁམས་དག་ན། །དོན་ གྱི་དམ་པ་གཟིགས་པ་བརྟན་པ་བཞུགས་པ་རྣམས། །མཐའ་ཡས་ཉེས་པ་ཀུན་བསལ་བ། །གནས་མེད་དེ་དག་སྤྱོད་པ་འདི་ཡིན་ནོ། །ཆོས་དབྱིངས་བསམ་གྱིས་མི་ཁྱབ་པར། ། སྐྱེས་བུ་སེངྒེ་གང་རྣམས་བྱོན་པར་མ་གྱུར་པ། །ཐུགས་རྗེ་ཆེ་བསྐྱེད་རྣམ་སྤྱོད་པ། །ཕན་མཛད་དེ་དག་སྤྱོད་པ་འདི་ཡིན་ནོ། །དུས་གསུམ་གཞལ་དུ་མེད་པ་ཡི། །རང་བྱུང་ གཏི་མུག་རྣམ་པར་བསལ་བ་ཇི་སྙེད་པ། །ཐམས་ཅད་ཆོས་ཉིད་མཉམ་པ་སྟེ། །སྟོབས་མངའ་དེ་དག་སྤྱོད་པ་འདི་ཡིན་ནོ། །གང་རྣམས་མཐའ་དབུས་མེད་པ་ཡི། །འཇིག་རྟེན་ ཁམས་ཀྱི་སྲིད་པའི་རྒྱུད་རྣམས་རབ་གཟིགས་ཤིང༌། །གཟིགས་ནས་རྟོག་པ་མི་མངའ་བ། །མི་གཡོ་དེ་དག་སྤྱོད་པ་འདི་ཡིན་ནོ། །གང་རྣམས་ཆོས་ཀྱི་དབྱིངས་མཁྱེན་ཅིང༌། ། རྣམ་དག་དོན་གྱི་དམ་པ་གཟིགས་པ་བརྟན་པ་རྣམས། །གཏི་མུག་ཐ་བ་ང་རྒྱལ་སེལ་མཛད་པ། །ལེགས་མངའ་དེ་དག་སྤྱོད་པ་འདི་ཡིན་ནོ། །གང་རྣམས་སེམས་ཅན་ཀུན་མཁས་ ཤིང༌། །ཆོས་ཀྱི་དབྱིངས་ལ་ངོ་བོ་ཉིད་ཀྱིས་ཞུགས་གྱུར་པའི། །བདེ་གཤེགས་གཞན་དྲིང་མི་འཇོག་པ། །མཁའ་མཉམ་དེ་དག་སྤྱོད་པ་འདི་ཡིན་ནོ། །འཇིག་རྟེན་ཀུན་ཏུ་མཐའ་ཡས་ པ༑ ༑ནམ་མཁས་ཀླས་པ་ཡང་དག་ཐུགས་སུ་ཆུད་གྱུར་ཏེ། །ཟིལ་གྱིས་མི་ནོན་ཆོས་མངའ་བ། །ཐུབ་མཆོག་དེ་དག་སྤྱོད་པ་འདི་ཡིན་ནོ། །ལྡོག་པ་མེད་པ་དེ་དག་རྣམས། །མི་དམའི་ ཆོས་དང་ལྡན་པ་ཐུབ་པར་དཀའ་བ་དག། སྨོན་ལམ་སྟོབས་ཀྱི་མཐར་ཕྱིན་པ། །སྤྱོད་ལེགས་མངའ་བའི་སྤྱོད་འདི་མཉམ་པར་གྱིས། །མཐའ་དང་དབུས་ནི་མེད་པའི་སར། །རྗེས་ སུ་ཞུགས་ཤིང་ཐམས་ཅད་གཟིགས་པར་གྱུར་པ་རྣམས། །སྤྱོད་ཡུལ་ཟབ་མོ་མངའ་བ་ཡི། །སྨྲ་བའི་སེངྒེའི་སྤྱོད་པ་འདི་ཡིན་ནོ། །རབ་ཏུ་དབྱེ་བའི་ཚིག་རྒྱུས་ལ། །རྗེས་སུ་ཞུགས་ ཤིང་རྒོལ་བ་འདུལ་བར་མཛད་པ་ཡི། །ཆོས་རྣམས་རྟོགས་པ་མངའ་བ་རྣམས། །ཐུབ་ཆེན་དེ་དག་སྤྱོད་པ་འདི་ཡིན་ནོ། །འཇིག་རྟེན་བདེ་བ་སྐྱེད་མཛད་ཅིང༌། །སེམས་ཅན་ཉེས་མེད་ ཐུགས་དང་ལྡན་པ་རྣམས། །ཁ་ལོ་སྒྱུར་བ་མཉམ་མེད་པའི། །ཡོན་ཏན་ཚད་མེད་དེ་དག་སྤྱོད་འདི་ཡིན། །འཇིགས་པ་མེད་པ་སྟོབས་མཛད་ཅིང༌། །སེམས་ཅན་ཐམས་ཅད་རབ་ ༄༅། །ཏུ་ཚིམ་པར་མཛད་པ་རྣམས། །དང་ཞིང་རྙོག་པ་མེད་པ་ཡི། །དཔེ་མེད་དེ་དག་སྤྱོད་པ་འདི་ཡིན་ནོ། །དགེ་བའི་ཐུགས་དང་ལྡན་པ་རྣམས། །བསམ་པ་ རྣམ་པར་དག་ཅིང་སྤྲོས་པ་མེད་པ་ཡི། །དཔལ་གྱི་གཟི་བརྗིད་སྤུངས་རྒྱས་པ། །དཔའ་མཆོག་ལྡན་པ་དེ་དག་སྤྱོད་འདིའོ། །དོན་གྱི་ཕ་རོལ་ཕྱིན་པ་རྣམས། །ཡོན་ཏན་འབྱུང་གནས་ རྣམ་པར་དག་པའི་ཐུགས་མངའ་བ། །ཤིན་ཏུ་སེམས་པའི་བློ་ལྡན་རྣམས། །སྲིད་ནས་འཕགས་པ་དེ་དག་སྤྱོད་འདིའོ། །བདག་མེད་ཉམས་པ་མེད་པ་རྣམས། །རྔ་ཡི་དབྱངས་ རབ་མངའ་བ་ཞིང་དུ་གཞོལ་བ་དག །ཆོས་ཀྱི་ཚུལ་ལ་གནས་པ་རྣམས། །ཚིག་ལ་ཉམས་མེད་དེ་དག་སྤྱོད་འདིའོ། །སྦྱིན་པས་ཤིན་ཏུ་འཕགས་པ་རྣམས། །བསོད་ནམས་ མཚན་རབ་བརྒྱས་ཀྱང་རབ་ཏུ་བརྒྱན་པ་དག །འགྲོ་ལ་ཕན་པར་མཛད་པ་རྣམས། །བློ་རབ་དེ་དག་སྤྱོད་ཡུལ་འདི་ཡིན་ནོ། །ཡེ་ཤེས་ཤིན་ཏུ་ཟབ་པའི་སར། །རྗེས་སུ་ཞུགས་ ཤིང་བློ་གྲོས་ཤིན་ཏུ་བརྟན་པ་རྣམས། །མི་གཡོ་བརྟན་ཞིང་གནས་པ་དག །བརྟུལ་ཞུགས་བརྟན་པ་དེ་དག་སྤྱོད་འདིའོ། །ཆོས་ཀྱི་དབྱིངས་ལ་འཇུག་པ་ཡི། །རྗེས་སུ་འཇུག་ པའི་ཕ་རོལ་ཕྱིན་པར་གྱུར་པ་དག །རྣམ་པར་འཕྲུལ་ལ་བརྩོན་པ་རྣམས། །ཆོས་ཀྱི་ཉི་མ་དེ་དག་སྤྱོད་འདིའོ། །མི་མཉམ་མཉམ་པའི་བློ་མངའ་རྣམས། །མི་གཉིས་ཡོངས་སུ་ སྒོམ་པའི་ཏིང་ངེ་འཛིན་ལྡན་པ། །བསམ་པ་ཤིན་ཏུ་རྟོགས་པ་དག །ཐམས་ཅད་གཟིགས་པ་དེ་དག་སྤྱོད་འདིའོ། །འཇིག་རྟེན་ཁམས་ལ་རབ་འཇུག་པ། །ཕྲ་དང་ཡངས་དང་རྒྱ་ཆེའི་ རྣམ་པ་ཐམས་ཅད་དུ། །སྤྱོད་ཡུལ་ཐོབ་པར་གྱུར་པ་རྣམས། །ཡེ་ཤེས་རི་བོ་དེ་དག་སྤྱོད་འདིའོ། །ཡོངས་སུ་དག་པའི་སེམས་ལྡན་པ། །ཁམས་རྣམས་གསུམ་པོ་ཀུན་ཏུ་ཆགས་པ་ མེད་པ་དག །ཚུལ་ཁྲིམས་བརྟུལ་ཞུགས་མཐར་ཕྱིན་པ། །རྣམ་དག་སེམས་ལྡན་དེ་དག་སྤྱོད་འདིའོ། །ནམ་མཁའི་དབྱིངས་ཀྱི་མཐས་གཏུགས་པའི། །ཡེ་ཤེས་འབྱམས་ཀླས་མངོན་ པར་བརྗོད་དུ་མེད་པ་ལ། །ཞུགས་ཏེ་བསླབ་པའི་བློ་ལྡན་པ། །ཡེ་ཤེས་སྟོབས་ཅན་དེ་དག་སྤྱོད་འདིའོ། །ཡེ་ཤེས་གསལ་བའི་ཕུང་པོ་ཡིས། །དུས་གསུམ་ཆོས་ཀྱི་དབྱིངས་རྣམས་ བཀང་སྟེ་སྒྲུབ་བྱེད་ཀྱང༌། །སྒྱིད་ལུག་ཡིད་དུ་མི་འགྱུར་བ། །སངས་རྒྱས་ཡུལ་ཞུགས་དེ་དག་སྤྱོད་ཡུལ་ལོ། །ཀུན་ཏུ་འགྲོ་བར་སོང་གྱུར་ཅིང༌། །སྟོབས་བཅུ་མངའ་བའི་ཆོས་རྣམས་ ཀུན་ཀྱང་ཤེས་པ་རྣམས། །ལུས་ཀྱི་ཆོས་ཀྱང་ཆགས་མེད་པ། །ཡོན་ཏན་དཔལ་ཅན་དེ་དག་སྤྱོད་འདིའོ། །སེམས་ཅན་མཐའ་དང་དབུས་མེད་པ། །ཕྱོགས་བཅུ་འཇིག་རྟེན་དག་ན་རྒྱུ་ བར་གྱུར་པ་རྣམས། །སེམས་ཅན་ཀུན་གྱི་བདག་ནི་སྐྱབས་ཡིན་པ། །འཇིགས་མེད་དེ་དག་སྤྱོད་པ་འདི་ཡིན་ནོ། །རྟག་པར་བརྩོན་འགྲུས་གནས་འཆའ་ཞིང༌། །ནམ་ཡང་སངས་ ༄༅། །རྒྱས་ཆོས་ལ་ཞུམ་པ་མེད་པ་རྣམས། །དེ་ནི་འཇིག་རྟེན་སྦྱངས་ཕྱིར་ཏེ། །ཀླུ་ཆེན་དེ་དག་སྤྱོད་པ་འདི་ཡིན་ནོ། །དབང་པོ་དག་གི་རྒྱུས་ཤེས་པ། །མོས་པའི་ ཚུལ་གྱི་ཕ་རོལ་ཕྱིན་པར་གྱུར་པ་རྣམས། །སྣ་ཚོགས་ཁམས་ཀྱང་རྟོགས་གྱུར་པ། །མཉམ་མེད་རྟོགས་གྱུར་དེ་དག་སྤྱོད་འདིའོ། །ཕྱོགས་རྣམས་བཅུ་པོར་ཚད་མེད་པའི། ། མཐའ་དང་དབུས་མེད་རིན་ཆེན་མང་པོས་འགེངས་བྱེད་ཀྱང༌། །ནམ་ཡང་སྐྱེ་བའི་ཡིད་མེད་པ། །དད་པར་བྱེད་པ་དེ་དག་སྤྱོད་འདིའོ། །འོད་ཟེར་དྲ་བ་མཐའ་ཡས་པ། །ཀུན་ཏུ་ འགྱེད་ཅིང་འཇིག་རྟེན་སྣང་བར་བྱེད་པ་རྣམས། །སྣང་བའི་ཆོས་རྣམས་རྟོགས་གྱུར་པ། །བློ་གྲོས་སྒོམ་པ་དེ་དག་སྤྱོད་འདིའོ། །གང་ཞིག་ཕྱོགས་བཅུའི་ཞིང་གི་རྣམས། ། ཁྲག་ཁྲིག་བསམ་གྱིས་མི་ཁྱབ་ཐམས་ཅད་སྐྱོད་བྱེད་ཀྱང༌། །འཇིགས་པར་འགྱུར་བར་མི་བྱེད་དེ། །འཇིག་རྟེན་ཕན་པ་སྐྱེད་ལ་རྟག་ཏུ་བརྩོན། །ཚིག་གི་ཚུལ་ལ་མཁས་ པ་རྣམས། །བརྗོད་པ་རྣམ་པར་དབྱེ་བའི་ཕ་རོལ་ཕྱིན་གྱུར་པ། །ཤེས་པ་རྨོངས་མེད་མཁས་པ་དག །མི་སྒུལ་སེམས་ལྡན་དེ་དག་སྤྱོད་འདིའོ། །སྤྱིའུ་ཚུགས་རྒྱུ་ལ་མཁས་ པ་དག །ཞིང་རྣམས་རྣམ་པར་དབྱེ་བའི་ཕ་རོལ་ཕྱིན་པ་རྣམས། །མི་ཟད་ས་ལ་ཞུགས་པ་དག །ཕམ་བྱེད་བློ་གྲོས་དེ་དག་སྤྱོད་འདིའོ། །ཡོན་ཏན་ཁྲག་ཁྲིག་ཚད་མེད་པ། ། བྱང་ཆུབ་རབ་ལ་གཞོལ་ཞིང་སྤྱད་པ་སྤྱོད་པ་དག ། ཡོན་ཏན་ཐམས་ཅད་མཐར་ཕྱིན་པ། །ལེགས་པ་མི་ཟད་དེ་དག་སྤྱོད་འདིའོ། །འཇིག་རྟེན་འདས་པ་སྨྲ་བ་རྣམས། །སྨྲ་བའི་དམ་ པ་སྨྲ་བའི་སེངྒེར་གྱུར་པ་དག །འགྲོ་བ་དག་བྱའི་མཐར་ཕྱིན་པ། །རྣམ་དག་སེམས་ལྡན་དེ་དག་སྤྱོད་འདིའོ། །སངས་རྒྱས་རྣམས་ཀྱི་དབང་བསྐུར་བས། །ཆོས་ཀྱི་དམ་པ་རབ་ལ་མངོན་ པར་དབང་བསྐུར་ཞིང༌། །ཆོས་ཀྱི་ཚུལ་གྱི་རྗེས་སུ་སོང་བ་རྣམས། །ཡིད་ཡངས་ལྡན་པ་དེ་དག་སྤྱོད་འདིའོ། །འགྲོ་བའི་སྲིད་པ་ཀུན་སྲུང་ཞིང༌། །སེམས་ཅན་ཐམས་ཅད་རྣམ་པར་བསྒོམས་ པའི་ཡིད་ལྡན་པ། །ཤིན་ཏུ་རྟོགས་པའི་མཛོད་འཆང་རྣམས། །ཆོས་ཀྱི་རི་བོ་དེ་དག་སྤྱོད་འདི་ཡིན། །དབྱངས་ཀྱི་ཡན་ལག་གཅིག་གིས་ཀྱང༌། །འཁོར་རྣམས་བརྗོད་དུ་མེད་པ་ཤེས་ པར་བྱེད་པ་དག །དབྱངས་ཀྱི་ཚུལ་ལ་ཞུགས་པ་རྣམས། །ཆགས་མེད་མཐོང་བ་དེ་དག་སྤྱོད་འདིའོ། །གང་ཞིག་ཚིག་ལམ་རྗེས་སོང་ཞིང༌། །ཡེ་ཤེས་ཤིན་ཏུ་འཕགས་པས་རྣམ་པར་ མེ་རྟོག་པ། །རྣམ་པར་རྟོག་མེད་སྤྱོད་ཡུལ་ཅན། །རང་བཞིན་མེད་མཐོང་དེ་དག་སྤྱོད་འདིའོ། །ཆོས་ཀྱི་རྒྱ་མཚོར་གནས་འཆའ་ཞིང༌། །ཆོས་རྣམས་ཐམས་ཅད་རྒྱ་ཡིས་རབ་ཏུ་ འདེབས་བྱེད་པ། །མཚན་ཉིད་མེད་པའི་ཚུལ་ལྡན་རྣམས། །དཔལ་གྱི་ཚུལ་ཅན་དེ་དག་སྤྱོད་འདིའོ། །བདེ་བར་གཤེགས་པའི་ཞིང་གཅིག་ཏུ། །བསམ་གྱིས་མི་ཁྱབ་པ་ཡི་ ༄༅། །དུས་རྣམས་ཆུད་བྱེད་ཅིང༌། །བསྐལ་པ་གྲངས་མེད་འཛུད་བྱེད་པ། །སྐྱོ་མེད་བརྩོན་པ་དེ་དག་སྤྱོད་འདི་འོ། །ཐ་དད་མཚན་ཅན་མི་ཡི་དབང༌། །སྐྲ་ཡི་རྩེ་མོ་ གཅིག་ལ་སངས་རྒྱས་བརྗོད་ཡས་པ། །གང་གིས་དེ་དག་མཐོང་གྱུར་རྣམས། །སྤྱོད་པ་བཟང་ལྡན་དེ་དག་སྤྱོད་འདིའོ། །གང་གིས་སྐྲ་ཡི་ཆ་ཙམ་ལ། །བརྗོད་དུ་མེད་པའི་འདྲེན་ པ་རྣམས་ནི་མཐོང་གྱུར་ཅིང༌། །དེ་བཞིན་ཆོས་དབྱིངས་ཐམས་ཅད་དེ། །རྒྱལ་སྲས་དེ་དག་སྤྱོད་པ་འདི་ཡིན་ནོ། །བསྐལ་པ་བརྗོད་དུ་མེད་པ་རྣམས། །སེམས་བསྐྱེད་གཅིག་ གིས་རབ་ཏུ་ཤེས་པར་གྱུར་པ་རྣམས། །རིང་དང་ཐུང་བར་ངེས་མེད་པ། །རྣམ་ཐར་སྤྱོད་པ་དེ་དག་སྤྱོད་འདིའོ། །ལྟ་ཞིང་དོན་མེད་མི་འགྱུར་ལ། །སངས་རྒྱས་སྤྱོད་པ་དག་ལ་ དོན་ཡོད་ལས་ལྡན་རྣམས། །ཆགས་པ་མེད་པའི་ཡིད་ཅན་དག །རྒྱལ་བའི་དམ་པ་དེ་དག་སྤྱོད་འདི་ཡིན། །གང་གིས་སངས་རྒྱས་མཐོང་བའི་ཚེ། །བསྐལ་པ་ཁྲག་ཁྲིག་ནམ་ དུའང་ངོམས་པར་མི་འགྱུར་བར། །དགའ་བ་ཤིན་ཏུ་སྤྱོད་པ་རྣམས། །བལྟ་ན་དོན་ཡོད་དེ་དག་སྤྱོད་འདི་འོ། །སེམས་ཅན་ཁམས་ནི་མཐའ་ཡས་པ། །སེམས་ཤིང་བསྐལ་པ་ ཡང་པོ་ཟད་པར་བྱེད་པ་རྣམས། །སེམས་ཅན་མེད་པར་ཤེས་པ་དག །སེམས་ཅན་གཙོ་བོ་དེ་དག་སྤྱོད་འདི་འོ། །བསོད་ནམས་མང་པོ་བསགས་པ་རྣམས། །ཡེ་ཤེས་སྐྱོབ་པ་ བསོད་ནམས་ཆེན་པོའི་སྙིང་པོ་ཅན། །བསོད་ནམས་མུ་སྟེགས་འགྲོ་བ་ཡི། །སེམས་ཅན་དམ་པའི་སྤྱོད་འདི་འོ། །ཆོས་དབྱིངས་ཀུན་ཏུ་མཐའ་ཡས་པ། །ནམ་མཁའི་རྣམ་པ་བཞིན་ དུ་དེ་དག་ཚད་མེད་པ། །ཚིག་གི་ལམ་ལ་གནས་པ་རྣམས། །སེངྒེའི་སྒྲ་སྒྲོག་དེ་དག་སྤྱོད་འདི་འོ། །གང་ཞིག་ཏིང་འཛིན་གཅིག་པུ་ལ། །ཏིང་ངེ་འཛིན་ནི་ཁྲག་ཁྲིག་བརྗོད་དུ་མེད་ པ་ཡི༑ ༑ཆོས་ཀྱི་གནས་སུ་ཞུགས་གྱུར་པ། །སྨྲ་བའི་ཟླ་བ་དེ་དག་སྤྱོད་འདི་འོ། །བཟོད་པའི་སྟོབས་ཀྱི་མཐར་ཕྱིན་པ། །དེ་དག་ཆོས་རྣམས་ཐམས་ཅད་ཞི་ལ་བཟོད་པ་ཡིན། །མི་སྒུལ་ སེམས་དང་ལྡན་པ་རྣམས། །མཐའ་ཡས་ཤེས་ཅན་དེ་དག་སྤྱོད་འདི་འོ། །འཇིག་རྟེན་ཁམས་ནི་གཅིག་ནས་ཀྱང༌། །དེ་དག་ལུས་ནི་གཡོ་ཞིང་འཕྲོ་བར་མི་བྱེད་པར། །འགྲོ་བ་ཀུན་ ཏུའང་སྣང་བ་རྣམས། །མཐའ་ཡས་ལུས་ཅན་དེ་དག་སྤྱོད་འདི་ཡིན། །གང་ཞིག་ཞིང་གི་ཚུལ་རྣམས་ཀུན། །རྗེས་སུ་འཇུག་པ་ཤིན་ཏུ་ཕྲ་བར་རབ་ཤེས་ཀྱང༌། །ཡོངས་སུ་རྒྱས་བྱའི་ བློ་མེད་པ། །མཐའ་ཡས་སེམས་དཔའ་དེ་དག་སྤྱོད་འདི་འོ། །གནས་དང་གནས་མིན་ཤེས་གྱུར་ཅིང༌། །སྟོབས་ལ་འཇུག་པ་དག་ཏུ་ཤིན་ཏུ་ཞུགས་པ་རྣམས། །སྟོབས་ཀྱི་དམ་པ་ འཛིན་པ་དག །སྟོབས་ཀྱི་སྟོབས་ཆེན་དེ་དག་སྤྱོད་འདི་འོ། །འདས་པ་དག་དང་མ་འོངས་དང༌། །ད་ལྟར་བྱུང་བའི་ལས་རྣམས་ཤིན་ཏུ་འབྱམས་ཀླས་ལ། །རྟག་ཏུ་ཤེས་པ་འཇུག་གྱུར་ ༄༅། །པ༑ ༑ཚུལ་ཤེས་དེ་དག་སྤྱོད་པ་འདི་ཡིན་ནོ། །འགྲོ་བའི་དུས་དང་དུས་མིན་པ། །ཇི་ལྟར་སེམས་ཅན་འདུལ་བར་འགྱུར་བ་དེ་བཞིན་ཤེས། །དུས་ལ་འབེབས་ པར་མཁས་པ་རྣམས། །ཤེས་པ་དེ་དག་སྤྱོད་པ་འདི་ཡིན་ནོ། །ཆོས་ལ་སྤྱོད་པ་ཀུན་སྲུང་ཞིང༌། །ལུས་དང་ངག་དང་ཡིད་ཀྱི་རྣམས་ཀྱང་སྲུང་བྱེད་པ། །བདུད་ཀྱི་ལམ་དུ་མ་ ཞུགས་པ། །ཤེས་པའི་བློ་ཅན་དེ་དག་སྤྱོད་འདི་འོ། །རྣམ་པར་གཞག་པའི་རྒྱུས་མཁས་པ། །ཆོས་རྣམས་ལ་ནི་ཇི་ལྟར་སྤོབས་པར་འཇུག་པ་རྣམས། །དེ་བཞིན་ཉིད་དང་ ཡུལ་མཉམ་པ། །བདེར་གཤེགས་སྤྱོད་པ་དེ་དག་སྤྱོད་འདི་ཡིན། །ཆགས་མེད་མཛོད་ལ་བརྩོན་པ་དག །གཟུངས་ཀྱི་སྒོ་མོའི་དཀྱིལ་འཁོར་རབ་ཏུ་ཤེས་པ་རྣམས། །ཆོས་ཀྱི་ དབྱིངས་ལ་འཇུག་པ་ཡི། །རྗེས་སུ་ཞུགས་པ་དེ་དག་སྤྱོད་འདི་ཡིན། །དུས་གསུམ་གཤེགས་པའི་རྒྱལ་བ་རྣམས། །ཇི་སྙེད་བཞུགས་པ་ཀུན་དང་གཅིག་སེམས་ཡིད་ལྡན་ པ༑ ༑རང་བཞིན་གཅིག་ཏུ་རྟོགས་པ་རྣམས། །ཆགས་མེད་རིགས་ཅན་དེ་དག་སྤྱོད་འདི་འོ། །བསྒྲིབས་མེད་ཡེ་ཤེས་ཚུལ་ཤེས་ཤིང༌། །བསྒྲིབས་མེད་ཡེ་ཤེས་ཕྱག་རྒྱ་དག་ལ་ ཞུགས་པ་རྣམས། །བསྒྲིབས་མེད་མིག་ཀྱང་བདོག་བྱེད་པ། །མིག་ཅན་དེ་དག་སྤྱོད་པ་འདི་ཡིན་ནོ། །གཉིས་སུ་མེད་ལ་སྤྱོད་པ་ཡི། །རྫུ་འཕྲུལ་རྣམ་པར་གཞོག་པའི་མགོན་ པོ་ཐམས་ཅད་ཀུན། །རྣམ་པར་འཕྲུལ་པ་མཁྱེན་པ་རྣམས། །གཉིས་སུ་མེད་སྤྱོད་དེ་དག་སྤྱོད་འདི་འོ། །ཆོས་ཀྱི་སྤྲིན་ནི་མཐའ་ཡས་པའི། །ཆར་ཆེན་རབ་ཏུ་འབེབས་ཤིང་ཞིང་རྣམས་ ཡངས་པར་རྒྱུ། །དོན་རྣམས་ཐམས་ཅད་རྟོགས་གྱུར་པ། །ཆོས་སྤྲིན་དེ་དག་སྤྱོད་ཡུལ་འདི་ཡིན་ནོ། །དད་པ་ཕྱིར་ལྡོག་མི་འགྱུར་ཞིང༌། །རྩ་བ་ཤིན་ཏུ་ཚུགས་ཤིང་དད་པ་རྣམ་དག་ པ༑ ༑རྣམ་ཐར་ཤེས་པ་ཐམས་ཅད་ལ། །བསླབ་པ་རྣམས་ཀྱི་སྤྱོད་ཡིན་མཉན་པར་གྱིས། །འགྲོ་བ་འདི་དག་ཇི་སྙེད་པ། །མ་ལུས་ཐམས་ཅད་སེམས་བསྐྱེད་གཅིག་ཏུ་ཆུད་བྱས་ཏེ། ། སེམས་ཀྱི་རང་བཞིན་ཤེས་པ་རྣམས། །རང་བཞིན་མེད་པ་དེ་དག་སྤྱོད་འདི་ཡིན། །ཞིང་རྣམས་བསམ་གྱིས་མི་ཁྱབ་པ། །ཆོས་ཀྱི་དབྱིངས་རྣམས་ཀུན་ཏུ་གང་གིས་སྤྲུལ་བྱས་ཤིང༌། ། མཉམ་པ་མེད་པར་དེར་སྤྱོད་པ། །དཔེ་མེད་འགྲོ་ལྡན་དེ་དག་སྤྱོད་འདི་འོ། །སངས་རྒྱས་ཞིང་རྣམས་མཐའ་ཡས་ཏེ། །དེ་དག་ཀུན་ན་འཇིག་རྟེན་མགོན་པོ་གང་བཞུགས་པ། །དེ་ རྣམས་དང་ནི་མངོན་སུམ་དུ། །སངས་རྒྱས་ཞབས་ཀྱི་དྲུང་ན་འཁོད་གྱུར་པ། །དེ་དག་ལུས་ནི་གཅིག་པུར་ཡང༌། །ཏིང་ངེ་འཛིན་ལ་མཉམ་པར་གཞག་པ་རབ་ཏུ་སྟོན། །ལུས་ནི་སྟོང་ ཕྲག་མཐའ་ཡས་པ། །ཏིང་ངེ་འཛིན་ལས་ལྡང་ན་ཤིན་ཏུ་སྣང༌། །སྤྱོད་པ་ཟབ་དང་ལྡན་བྱས་ནས། །སྤྲོས་པ་མེད་པའི་སྤྱོད་པ་དག་ལ་རབ་སྤྱོད་པ། །དགའ་བའི་ཡིད་དང་ལྡན་པ་ ༄༅། །རྣམས༑ ༑སེམས་ཅན་ཀུན་ལ་དགའ་བར་བྱེད་པ་ཡིན། །དབང་པོ་ཐ་དད་ཚུལ་རྣམས་ལ། །བློ་གྲོས་གནས་ཤིང་ཤེས་པ་རབ་ཏུ་ཐོབ་པ་རྣམས། །དབང་པོ་ དག་ནི་མི་གནས་པ། །མ་དུལ་འདུལ་བ་འདི་དག་སྤྱོད་འདི་ཡིན། །ཐ་དད་ཆོས་ཀྱི་ཚུལ་རྣམས་ལ། །ཆོས་རྣམས་ཐམས་ཅད་ཀུན་ལ་དབང་བས་ཤེས་གྱུར་པ། །ཀུན་ཀྱང་སངས་ རྒྱས་མཛད་པ་ལ། །དམིགས་པའི་ཚོགས་ནི་རབ་ཏུ་སྤྱོད་པ་ཡིན། །ཤིན་ཏུ་ཡངས་པའི་ལྗགས་མངའ་བ། །དེ་དག་དབང་པོ་རྣམས་དང་ལེགས་པའི་སྤྱོད་ཐོས་ན། །སུ་ཡི་སེམས་ ཤིག་དད་མི་འགྱུར། །ནམ་མཁའ་ལྟ་བུ་དེ་དག་སྤྱོད་འདི་ཡིན། །ཀུན་ཏུ་མཐའ་ཡས་ཤེས་ལྡན་ཞིང༌། །ཆོས་རྣམས་ཀུན་ལ་ཀུན་ཏུ་མཐའ་ཡས་མིག་ཡོད་པ། །ཡེ་ཤེས་མཐའ་ ཡས་ཚུལ་ལྡན་པ། །མཐའ་ཡས་ཤེས་ཅན་དེ་དག་སྤྱོད་འདི་ཡིན། །ཟད་མི་ནུས་པ་ཟད་བྱེད་ཅིང༌། །བསོད་ནམས་འབྱམས་ཀླས་ཡོད་པས་བསོད་ནམས་མི་ཟད་པ། །འགྲོ་བ་དག་ པའི་མཐར་ཕྱིན་རྣམས། །འདྲ་མེད་དེ་དག་སྤྱོད་པ་འདི་ཡིན་ནོ། །ཚོགས་དང་ལྡན་ཞིང་འཇིག་རྟེན་དང༌། །དེ་དག་ཆོས་ཀྱི་ལམ་ལ་རབ་ཏུ་འཇུག་བྱས་ཀྱང༌། །དེ་དག་སེམས་ ཅན་འདུ་ཤེས་མེད། །སེམས་ཅན་བྱེ་བ་ཁྲག་ཁྲིག་རབ་ཏུ་འགྲེལ། །ཉོན་མོངས་མེད་པ་རྟོགས་ཤེས་ཤིང༌། །སྤྱོད་པ་མངོན་པར་ཤེས་པ་ཐམས་ཅད་མཐོང་བ་རྣམས། །བདེ་བའི་ ལམ་རྣམས་སྟོན་བྱེད་པ། །མིག་ཅན་དེ་དག་ཚུལ་ནི་འདི་ཡིན་ནོ། །སངས་རྒྱས་ཡེ་ཤེས་སྤྱོད་པ་དང༌། །ཚད་མེད་ཡོན་ཏན་དམ་པ་ཐོབ་པར་གྱུར་པ་རྣམས། །མི་འཇིགས་པ་ནི་རྙེད་གྱུར་ པ༑ ༑ཤེས་ཅན་དེ་དག་ཚུལ་ནི་འདི་ཡིན་ནོ། །འཇུག་པ་ཀུན་ལ་རབ་ཞུགས་ཤིང༌། །ཞིང་ལ་འཇུག་དང་ཆོས་ཀྱི་དབང་ལ་ཞུགས་གྱུར་པ། །སེམས་ཅན་ཞུགས་ལ་གནས་བྱས་ནས། ། སེམས་ཅན་དམ་པ་སེམས་ཅན་འགྲོལ་བར་བྱེད། །ཕྱོགས་རྣམས་ཀུན་ཏུ་ཆོས་ཀྱི་རྔ། །བརྡུངས་ཤིང་འཇིག་རྟེན་འདི་དག་སྟོན་བྱེད་པའི། །ཆོས་རབ་སྦྱིན་པའི་བདག་པོ་རྣམས། །ཉམས་ མེད་རྟོགས་བྱེད་དེ་དག་སྤྱོད་འདི་ཡིན། །སྐྱིལ་མོ་ཀྲུང་འདུག་གཅིག་གིས་ཀྱང༌། །ཞིང་ཡངས་བརྗོད་དུ་མེད་པ་ཀུན་ཏུ་རྒྱས་བྱེད་ཀྱང༌། །སུ་ཡི་ལུས་ལ་གནོད་མེད་པ། །ཆོས་སྐུ་ལྡན་ པ་དེ་དག་སྤྱོད་འདི་ཡིན། །དོན་དང་ཡི་གེ་གཅིག་ལ་ཡང༌། །ཤིན་ཏུ་བསྟན་པ་བྱེ་བ་ཁྲག་ཁྲིག་རྗེས་སུ་འབྲེང༌། །དེ་དག་མཐའ་ནི་རྙེད་མི་ནུས། །མཉམ་མེད་ཤེས་ལྡན་དེ་དག་སྤྱོད་ འདི་ཡིན། །བསྒྲིབས་པ་མེད་པའི་ཚུལ་ཤེས་པ། །སངས་རྒྱས་རྣམ་ཐར་ཚུལ་ལ་ཤིན་ཏུ་བསླབ་པ་རྣམས། །འཇིགས་པ་མེད་པར་གྱུར་པ་དག །ཚད་མེད་དེ་དག་ཚུལ་ནི་འདི་ཡིན་ནོ། ། དེ་དག་ཕྱོགས་རྣམས་རྒྱ་མཚོ་དང༌། །ཞིང་རྣམས་རྒྱ་མཚོ་མཐའ་མ་དག་དང་དབུས་མེད་པར། །ཤེས་པ་རྒྱ་མཚོ་ལྡན་པ་ཡི། །ཆོས་རྣམས་རྒྱ་མཚོས་འཇིག་རྟེན་ཚིམ་པར་བྱེད། །གང་ ༄༅། །རྣམས་གཤེགས་ཤིང་སྐྱེ་འགྱུར་དང༌། །བྱང་ཆུབ་རྣམ་པར་འཚང་རྒྱ་འགྲོ་བ་ཀུན་དག་ཏུ། །ཆུ་ཞིག་མངོན་པར་སྣང་གྱུར་པ། །མཐའ་དབུས་མེད་པ་དེ་དག་ སྤྱོད་འདི་ཡིན། །མྱ་ངན་འདའ་བ་དུ་མ་ཡང༌། །ཞིང་རྣམས་བྱེ་བ་ཁྲག་ཁྲིག་དག་ན་མངོན་པར་སྣང༌། །འོན་ཀྱང་སྨྲ་བའི་སེངྒེ་རྣམས། །མྱ་ངན་མི་འདའ་སྨོན་ལམ་ཕྱིར་མི་ལྡོག་ ཆོས་རྣམས་ལྷུན་ནི་གཅིག་གྱུར་ཅིང༌། །སེམས་ཅན་ཀུན་དང་ལུས་ཀྱང་གཅིག་ཏུ་གྱུར་པ་རྣམས། །རྒྱལ་བ་དག་ལ་རྟོག་མེད་པས། །ལུས་གཅིག་གྱུར་པ་སྤྱོད་འདི་ཡིན། ། ཚིག་དང་དོན་རྣམས་ཐ་དད་པ། །འཇིག་རྟེན་ཁམས་རྣམས་མཐའ་དང་དབུས་ཡོད་མ་ཡིན་པར། །རང་བཞིན་གཅིག་ལ་མོས་པ་དག། དུས་གསུམ་ཤེས་པ་དེ་དག་སྤྱོད་འདི་ ཡིན༑ ༑སེམས་ཅན་དག་དང་རྒྱལ་བ་དང༌། །ཆོས་ཀྱི་ཚུལ་རྣམས་ཀུན་ལ་ཟད་པ་མེད་རྙེད་པ། །སངས་རྒྱས་བྱིན་ལ་མོས་པ་དག །རྒྱལ་བས་བྱིན་བརླབས་དེ་དག་སྤྱོད་འདི་ ཡིན༑ ༑ཆགས་པ་མེད་པའི་སྐུ་འདྲ་ཞིང༌། །ཆགས་པ་མེད་པའི་མིག་གི་ཕ་རོལ་ཕྱིན་པ་རྣམས། །ཆགས་མེད་རྣ་བ་མཁས་པ་དག །ཆགས་མེད་ཡིད་ཅན་དེ་དག་སྤྱོད་འདི་ ཡིན༑ ༑མངོན་ཤེས་ཐམས་ཅད་རྙེད་པ་དང༌། །ཡེ་ཤེས་མངོན་པར་ཤེས་པའི་རྗེས་སུ་སོང་བ་རྣམས། །ཤེས་པ་ཀུན་གྱི་དཔལ་ལྡན་པ། །ཤེས་པ་བཟང་ཅན་དེ་དག་སྤྱོད་ འདི་ཡིན། །ཤིན་ཏུ་མཉམ་གཞག་སེམས་ལྡན་ཞིང༌། །ཡེ་ཤེས་མཐའ་ཡས་ཤས་རབ་ཤིན་ཏུ་ཆེ་བ་རྣམས། །ཀུན་ཏུ་སྤྱོད་ཡུལ་ལྡན་པ་དག །ཐམས་ཅད་གཟིགས་པ་དེ་དག་སྤྱོད་ འདི་ཡིན། །ཡོན་ཏན་ཀུན་གྱི་མཐར་ཕྱིན་པ། །སེམས་ཅན་ཡངས་པ་གཅིག་ནས་གཅིག་བརྒྱུད་སྒྲོལ་བ་རྣམས། །ཡིད་ནི་ཡོངས་སུ་ཉམས་མེད་པ། །རྟག་ཏུ་བརྩོན་པ་དེ་དག་སྤྱོད་ འདི་ཡིན། །ཀུན་མཁྱེན་ཐམས་ཅད་གཟིགས་པ་དག །སངས་རྒྱས་ཐམས་ཅད་དུས་གསུམ་གཤེགས་པ་མགོན་པོ་ཡི། །རིགས་དང་རྒྱུད་དུ་སྐྱེས་པ་རྣམས། །རྒྱལ་སྲས་དེ་དག་ སྤྱོད་པ་འདི་ཡིན་ནོ། །རྗེས་སུ་བསྟན་ལ་བརྩོན་བྱེད་པ། །ཕས་ཀྱི་རྒོལ་བའི་ལམ་ལ་འཇིགས་མེད་སྤྱོད་པ་དག །མཐའ་ཡས་བློ་ཡི་སྤྱོད་པ་དང༌། །སངས་རྒྱས་བྱང་ཆུབ་རྗེས་སུ་ཞུགས་ པ་རྣམས། །མཐའ་དབུས་མེད་པའི་ཞིང་གི་རྣམས། །ཐམས་ཅད་ཀུན་དུ་སྣང་བ་གཅིག་གིས་གསལ་བར་བྱེད། །ཐམས་ཅད་སྣང་བར་བྱེད་པ་རྣམས། །མུན་པ་སེལ་བའི་སྤྱོད་ པ་འདི་ཡིན་ནོ། །གང་དུ་རྒྱལ་བས་མཛད་འོས་པ། །དེར་ནི་སེམས་ཅན་ཁྲག་ཁྲིག་ཤིན་ཏུ་འདུས་བྱེད་ཅིང༌། །སངས་རྒྱས་སྐུ་དང་སངས་རྒྱས་ཞིང༌། །སངས་རྒྱས་རྒྱན་ཅན་ཁྲག་ ཁྲིག་སྣང་བར་བྱེད། །སྤྱོད་པ་དག་ནི་མཐའ་ཡས་ལ། །སུ་གནས་བརྟན་པ་དེ་དག་ཤེས་པར་ཇི་ལྟར་རུང༌། །སྤྱོད་པ་ཐམས་ཅད་ཤིན་ཏུ་སྟོན། །འགྲོ་བར་སྤྱོད་པ་ཐམས་ཅད་མཐར་ ༄༅། །ཐུག་བྱེད། །ཆོས་ཀྱི་དབྱིངས་དང་མཉམ་པ་ཡིན། །བདག་གི་ལུས་ནི་བརྗོད་དུ་མེད་པར་གྱུར་པ་ཡིས། །དེ་དག་ལེགས་པ་བརྗོད་བྱས་ཀྱང༌། །བསྐལ་པ་ ཁྲག་ཁྲིག་དག་གིས་མི་ཟད་དོ། །ཡོན་ཏན་ཀུན་ཏུ་མཐའ་ཡས་ཤིང༌། །ཡོན་ཏན་མཆོག་རྣམས་ཐམས་ཅད་མཐའ་ཡས་པའི། །ཡོན་ཏན་ཀུན་ནི་བརྗོད་ཡས་ཏེ། །ཐུབ་པས་ བསྐལ་པར་གསུངས་ཀྱང་ཟད་མི་འགྱུར། །རང་རྒྱལ་རྣམས་དང་ཉན་ཐོས་ལ། །གཞོལ་པར་གྱུར་པའི་འཇིག་རྟེན་གཞན་གྱི་རྣམས་ཀྱིས་ལྟ། །བསྐལ་པ་བརྗོད་ཡས་བརྗོད་བྱས་ ཀྱང༌། །ཟད་པར་མི་ནུས་དེ་ནི་སྨོན་ཅི་དགོས། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། ཡོན་ཏན་མེ་ཏོག་ཤིན་ཏུ་བསགས་པ་ཞེས་བྱ་བ་ བྱང་ཆུབ་སེམས་དཔའི་སྤྱོད་པ་བསྟན་པའི་ལེའུ་སྟེ། ཉི་ཤུ་དྲུག་པའོ།། །།དེ་ནས་བྱང་ཆུབ་སེམས་དཔའ་ཡོན་ཏན་དང་ལྡན་པས་ཡང་བྱང་ཆུབ་སེམས་དཔའ་དེ་ དག་ལ་སྨྲས་པ། ཀྱེ་རྒྱལ་བའི་སྲས་དག །བཅུ་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་གཏེར་ཡིན་ཏེ། སངས་རྒྱས་བཅོམ་ལྡན་འདས་འདས་པ་དང༌། མ་བྱོན་པ་དང༌། ད་ལྟར་བྱུང་བ་རྣམས་ཀྱིས་གསུངས་སོ། །གསུང་ངོ༌། །གསུང་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། དད་པའི་གཏེར་དང༌། ཚུལ་ཁྲིམས་ཀྱི་གཏེར་དང༌། ངོ་ཚ་ཤེས་པའི་ གཏེར་དང༌། ཁྲེལ་ཡོད་པའི་གཏེར་དང༌། ཐོས་པའི་གཏེར་དང༌། གཏོང་བའི་གཏེར་དང༌། དམ་འཆའ་བའི་གཏེར་དང༌། རྟོགས་པའི་གཏེར་དང༌། བློ་གྲོས་ཀྱི་གཏེར་དང༌། བློའི་གཏེར་ ཏེ༑ ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་གཏེར་བཅུ་པོ་དེ་དག་ནི། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ ལྡན་འདས་རྣམས་ཀྱིས་གསུངས་སོ། །གསུང་ངོ༌། །གསུང་བར་འགྱུར་རོ། །ཀྱེ་རྒྱལ་བའི་སྲས་དག །དེ་ལ་དད་པའི་གཏེར་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་ སེམས་དཔའ་ཆོས་ཐམས་ཅད་སྟོང་པ་ཞེས་བྱ་བར་དད་པར་བྱེད་དོ། །ཆོས་ཐམས་ཅད་མཚན་མ་མེད་པ་ཞེས་བྱ་བར་དད་པར་བྱེད་དོ། །ཆོས་ཐམས་ཅད་སྨོན་པ་མེད་པ་ཞེས་བྱ་ བར་དད་པར་བྱེད་དོ། །ཆོས་ཐམས་ཅད་མ་བྱས་པ་ཞེས་བྱ་བར་དད་པར་བྱེད་དོ། །ཆོས་ཐམས་ཅད་མ་བརྟགས་པ་ཞེས་བྱ་བར་དད་པར་བྱེད་དོ། །ཆོས་ཐམས་ཅད་གནས་མེད་པ་ ཞེས་བྱ་བར་དད་པར་བྱེད་དོ། །ཆོས་ཐམས་ཅད་ཚད་མེད་པ་ཞེས་བྱ་བར་དད་པར་བྱེད་དོ། །ཆོས་ཐམས་ཅད་བླ་ན་མེད་པ་ཞེས་བྱ་བར་དད་པར་བྱེད་དོ། །ཆོས་ཐམས་ཅད་འདར་ མི་རུང་བ་ཞེས་བྱ་བར་དད་པར་བྱེད་དོ། །ཆོས་ཐམས་ཅད་འབྱུང་བ་མེད་པ་ཞེས་བྱ་བར་དད་པར་བྱེད་དོ། །དེ་ནི། ཆོས་དང་མཐུན་པའི་དད་པ་དང་ལྡན་པ་ཡིན་ཏེ། ཆོས་ཐམས་ ༄༅། །ཅད་བསམ་གྱིས་མི་ཁྱབ་བོ། །ཞེས་བྱ་བས་ཞུམ་པར་མི་འགྱུར་རོ། །སངས་རྒྱས་ཐམས་ཅད་བསམ་གྱིས་མི་ཁྱབ་བོ། །ཞེས་བྱ་བས་ཞུམ་པར་མི་འགྱུར་ རོ༑ ༑སེམས་ཅན་གྱི་ཁམས་ཐམས་ཅད་བསམ་གྱིས་མི་ཁྱབ་བོ། །ཞེས་བྱ་བས་ཞུམ་པར་མི་འགྱུར་རོ། །ཆོས་ཀྱི་དབྱིངས་བསམ་གྱིས་མི་ཁྱབ་བོ། །ཞེས་བྱ་བས་ཞུམ་པར་མི་ འགྱུར་རོ། །ནམ་མཁའི་དབྱིངས་བསམ་གྱིས་མི་ཁྱབ་བོ། །ཞེས་བྱ་བས་ཞམ་པར་མི་འགྱུར་རོ། །མྱ་ངན་ལས་འདའ་བའི་དབྱིངས་བསམ་གྱིས་མི་ཁྱབ་བོ། །ཞེས་བྱ་བས་ཞུམ་པར་ མི་འགྱུར་རོ། །འདས་པའི་དུས་བསམ་གྱིས་མི་ཁྱབ་བོ། །ཞེས་བྱ་བས་ཞུམ་པར་མི་འགྱུར་རོ། །མ་འོངས་པའི་དུས་བསམ་གྱིས་མི་ཁྱབ་བོ། །ཞེས་བྱ་བས་ཞུམ་པར་མི་འགྱུར་ རོ༑ ༑དེ་ལྟར་བྱུང་བའི་དུས་བསམ་གྱིས་མི་ཁྱབ་བོ། །ཞེས་བྱ་བས་ཞུམ་པར་མི་འགྱུར་རོ། །བསྐལ་བ་ཐམས་ཅད་ལ་འཇུག་པ་བསམ་གྱིས་མི་ཁྱབ་པོ། །ཞེས་བྱ་བས་ཞུམ་པར་ མི་འགྱུར་རོ། །དེ་ཅིའི་ཕྱིར་ཞེ་ན། དེའི་དད་པ་ནི། སངས་རྒྱས་བཅོམ་ལྡན་འདས་རྣམས་ཀྱིས་ཇི་ལྟར་མཁྱེན་པ་བཞིན་དུ་གཅིག་ཏུ་ངེས་པར་གྱུར་བ་ཡིན་ཏེ། སངས་རྒྱས་ཀྱི་ཡེ་ ཤེས་ཀྱི་མཐའ་ཡང་ཟད་མི་ཤེས་སོ། །འཇིག་རྟེན་གྱི་ཁམས་རྣམས་ཀྱང་ཟད་མི་ཤེས་ཏེ། འཇིག་རྟེན་གྱི་ཁམས་རེ་རེར་ཡང་མཐའ་ཡས་པའི་སངས་རྒྱས་བཅོམ་ལྡན་འདས་ རྣམས་བླ་ན་མེད་པ་ཡང་དག་པར་རྫོགས་བའི་བྱང་ཆུབ་ཏུ་མངོན་པར་སངས་རྒྱས་སོ། །མངོན་པར་འཚང་རྒྱའོ། །མངོན་པར་འཚང་རྒྱ་བར་འགྱུར་རོ། །ཡང་དག་པར་བྱུང་ངོ༌། །ཡང་དག་ པར་འབྱུང་ངོ༌། །ཡང་དག་པར་འབྱུང་བར་འགྱུར་རོ། །ཡོངས་སུ་མྱ་ངན་འདས་སོ། །ཡོངས་སུ་མྱ་ངན་ལས་འདའོ། །ཡོངས་སུ་མྱ་ངན་ལས་འདའ་བར་འགྱུར་ཏེ། སངས་རྒྱས་ཀྱི་ཡེ་ ཤེས་དེ་ནི། འབྲི་བའམ། འཕེལ་བའམ། སྐྱེ་བའམ། འགག་པའམ། འཕོ་བའམ། འགྲོ་བའམ། ཉེ་བར་བྱེད་པའམ། རིང་བར་བྱེད་པའམ། ཤེས་པར་བྱེད་པའམ། འབྱིན་ པར་བྱེད་པ་མ་ཡིན་ཏེ། དེ་ནི། སངས་རྒྱས་ཀྱི་ཡེ་ཤེས་ལ་ཡང་དག་པར་གནས་པས། ཟད་པ་མེད་ཅིང་མཐའ་ཡས་པའི་དད་པའི་གཏེར་དང་ལྡན་པ་ཡིན་ནོ། །ཀྱེ་རྒྱལ་བའི་སྲས་དག། དད་པ་འདི་ནི། མཐའ་ཡས་པ། ཀུན་ཏུ་མཐའ་ཡས་པ། མི་ཟད་པ། ཕྱིར་མི་ལྡོག་པ། མྱུ་གུར་གྱུར་བ་མ་ཡིན་པ། ཐ་དད་པ་མ་ཡིན་པ། མ་འདྲེས་པ། རྩ་བ་བརྟན་པ། འཕགས་པ་ དང་མཐུན་པ། དེ་བཞིན་གཤེགས་པ་རིགས་ཀྱི་རྒྱུད་དུ་གྱུར་པ། སངས་རྒྱས་ཐམས་ཅད་ཀྱི་རིགས་ཡང་དག་པར་འཛིན་པ། བྱང་ཆུབ་སེམས་དཔའ་ཐམས་ཅད་ཀྱི་མོས་པ་ཡང་དག་པར་ སྐྱེད་པ༑ དེ་བཞིན་གཤེགས་པ་ཐམས་ཅད་ཀྱི་དགེ་བའི་རྩ་བའི་རྗེས་སུ་སོང་བ། ངེས་པར་རྟོགས་པ། སངས་རྒྱས་ཐམས་ཅད་ཀྱི་རིགས་ལ་མཁས་པར་གྱུར་པ་ཡིན་ཏེ། ཀྱེ་རྒྱལ་བའི་ ༄༅། །སྲས་དག། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དད་པའི་གཏེར་ཏེ། དེ་ལ་གནས་པའི་བྱང་ཆུབ་སེམས་དཔའ་རྣམས་ནི། སངས་ རྒྱས་ཀྱི་ཆོས་ཐམས་ཅད་ཐོས་པར་གྱུར་ན། བདེན་པར་ཁོང་དུ་ཆུད་དེ། སེམས་ཅན་ཐམས་ཅད་ལ་རྣམ་པར་དབྱེ་བའི་ཕྱིར་ནན་ཏན་དུ་བྱེད་པར་འགྱུར་རོ། །ཀྱེ་རྒྱལ་བའི་སྲས་དག། དེ་ལ་ བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་གཏེར་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་ཐོག་མར་ཕུན་སུམ་ཚོགས་པའི་ཚུལ་ཁྲིམས་དང་ལྡན་ པ་ཡིན༑ བྱིན་གྱིས་མ་བརླབས་པའི་ཚུལ་ཁྲིམས་དང་ལྡན་པ་ཡིན། མི་གནས་པའི་ཚུལ་ཁྲིམས་དང་ལྡན་པ་ཡིན། ལྷག་པར་ལྟ་བ་མེད་པའི་ཚུལ་ཁྲིམས་དང་ལྡན་པ་ཡིན། འགལ་བ་མེད་པའི་ཚུལ་ཁྲིམས་དང་ལྡན་པ་ཡིན། གཞན་ལ་མི་གནོད་པའི་ཚུལ་ཁྲིམས་དང་ལྡན་པ་ཡིན། མ་འདྲེས་པའི་ཚུལ་ཁྲིམས་དང་ལྡན་པ་ཡིན། ཉེ་བའི་ཉོན་མོངས་ པ་མེད་པའི་ཚུལ་ཁྲིམས་དང་ལྡན་པ་ཡིན། སྐྱོན་མེད་པའི་ཚུལ་ཁྲིམས་དང་ལྡན་པ་ཡིན། ཁ་ན་མ་ཐོ་བ་མེད་པའི་ཚུལ་ཁྲིམས་དང་ལྡན་པ་ཡིན། ཀྱེ་རྒྱལ་བའི་སྲས་དག །ཇི་ ལྟར་ན༑ བྱང་ཆུབ་སེམས་དཔའ་ཐོག་མར་ཕུན་སུམ་ཚོགས་པའི་ཚུལ་ཁྲིམས་དང་ལྡན་པ་ཡིན་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་ཐོག་མ་ཉིད་ དུ་སེམས་ཅན་ཐམས་ཅད་ལ་ཕན་པ་དང་བདེ་བར་སེམས་པའོ། །ཀྱེ་རྒྱལ་བའི་སྲས་དག། ཇི་ལྟར་ན། བྱང་ཆུབ་སེམས་དཔའ་བྱིན་གྱིས་མ་བརླབས་པའི་ཚུལ་ཁྲིམས་དང་ལྡན་པ་ ཡིན་ཞེ་ན། མུ་སྟེགས་ཅན་གྱི་གནས་དང་མི་འདྲ་བའི་ཚུལ་ཁྲིམས་ཡིན་ཏེ། དེ་ནི། འདི་ལྟར་རང་བཞིན་གྱིས་དུས་གསུམ་མཉམ་པ་ཉིད་དུ་གོ་ཆ་བགོས་ཤིང་སྤྱོད་པའོ། །ཇི་ལྟར་ ན༑ བྱང་ཆུབ་སེམས་དཔའ་མི་གནས་པའི་ཚུལ་ཁྲིམས་དང་ལྡན་པ་ཡིན་ཞེ་ན། ཀྱེ་རྒྱལ་བའི་སྲས་དག །འདི་ལ་འདོད་པའི་ཁམས་ལ་མི་གནས་པའི་ཚུལ་ཁྲིམས་ཅན་ཡིན། གཟུགས་ ཀྱི་ཁམས་ལ་མི་གནས་པའི་ཚུལ་ཁྲིམས་ཅན་ཡིན། གཟུགས་མེད་པའི་ཁམས་ལ་མི་གནས་པའི་ཚུལ་ཁྲིམས་ཅན་ཡིན། དེ་ཅིའི་ཕྱིར་ཞེ་ན། འཁོར་དེ་དག་ལ་བག་གིར་བྱ་བ་ མེད་དེ༑ དེ་ལྟར་ན། བྱང་ཆུབ་སེམས་དཔའ་མི་གནས་པའི་ཚུལ་ཁྲིམས་དང་ལྡན་པ་ཡིན་ནོ། །ཀྱེ་རྒྱལ་བའི་སྲས་དག། ཇི་ལྟར་ན་བྱང་ཆུབ་སེམས་དཔའ་ལྷག་པར་ལྟ་བ་མེད་ བའི་ཚུལ་ཁྲིམས་དང་ལྡན་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་འགྱོད་པ་མེད་པའི་རྒྱུ་དང་ལྡན་པ་ཡིན་ཏེ། དེ་ཅིའི་ཕྱིར་ཞེ་ན། དེ་ནི། འདི་ལྟར་མཚམས་མེད་པའི་ལས་ མངོན་པར་འདུ་མི་བྱེད་དེ། ཚུལ་ཁྲིམས་ལྷོད་པ་ལ་གཞོལ་བ་མ་ཡིན་ནོ། །དེ་ལྟར་ན། བྱང་ཆུབ་སེམས་དཔའ་ལྷག་པར་ལྟ་བ་མེད་པའི་ཚུལ་ཁྲིམས་དང་ལྡན་པ་ཡིན་ནོ། །ཇི་ལྟར་ ༄༅། །ན༑ བྱང་ཆུབ་སེམས་དཔའ་འགལ་བ་མེད་པའི་ཚུལ་ཁྲིམས་དང་ལྡན་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་མ་བཅས་པ་ནི། འཆའ་བར་མི་བྱེད། བཅས་ བ་ནི༑ གཅོད་པར་མི་བྱེད་དེ། དེ་ནི། མྱ་ངན་ལས་འདས་པའི་མཐར་ཐུག་ཏུ་ཇི་ལྟར་མཐུན་པའི་ཆོས་དང་ལྡན་པ་ཡིན་ནོ། །གང་གིས་ཕ་རོལ་གྱི་སྡུག་བསྔལ་གྱི་རྒྱུར་འགྱུར་བ་ དང༑ ཕ་རོལ་འཁྲུག་པར་འགྱུར་བའི་ཚུལ་ཁྲིམས་དེ་ལྟ་བུ་དམ་བཅའ་བ་ལ་དམ་བཅས་ཤིང་མི་གནས་ཏེ། དེ་ནི། འདི་ལྟར་ཕ་རོལ་གྱི་སེམས་དད་པར་བྱ་བའི་ཕྱིར་ཚུལ་ ཁྲིམས་ཡང་དག་པར་ལེན་པར་བྱེད་དོ། །ཇི་ལྟར་ན། བྱང་ཆུབ་སེམས་དཔའ་གཞན་ལ་མི་གནོད་པའི་ཚུལ་ཁྲིམས་དང་ལྡན་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་ སེམས་ཅན་ཐམས་ཅད་གཙེ་བའི་ཕྱིར་ཚུལ་ཁྲིམས་ཀྱི་རིག་སྔགས་དང༌། གསང་སྔགས་དང༌། སྨན་གྱི་སྦྱོར་བ་དེ་ལྟ་བུ་མི་སྒྲུབ་ཀྱི། དེ་ནི། སེམས་ཅན་ཐམས་ཅད་བསྐྱབ་ པའི་ཕྱིར་ཚུལ་ཁྲིམས་ཡང་དག་པར་བླངས་ཏེ་གནས་སོ། །ཇི་ལྟར་ན། བྱང་ཆུབ་སེམས་དཔའ་མ་འདྲེས་པའི་ཚུལ་ཁྲིམས་དང་ལྡན་པ་ཡིན་ཞེ་ན། འདི་ལ་བྱང་ཆུབ་སེམས་ དཔའ་ཆད་པར་ལྟ་བ་དང༌། རྟག་པར་ལྟ་བ་དང་འདྲེས་པའི་ཚུལ་ཁྲིམས་ཡང་དག་པར་ལེན་པར་མི་བྱེད་དེ། དེ་ནི། འདི་ལྟར་རྟེན་ཅིང་འབྲེལ་བར་འབྱུང་བ་ལ་བརྟེན་པའི་ ཚུལ་ཁྲིམས་ཡང་དག་པར་ལེན་ཏོ། །ཇི་ལྟར་ན། བྱང་ཆུབ་སེམས་དཔའ་ཉེ་བའི་ཉོན་མོངས་པ་མེད་པའི་ཚུལ་ཁྲིམས་དང་ལྡན་པ་ཡིན་ཞེ་ན། ཡོན་ཏན་མེད་པ་བསྟན་པར་བྱ་བའི་ཕྱིར་ གཞན་གྱི་སེམས་ལ་ལྟ་ཞིང་རྟོག་པ་རྣམ་པ་སྣ་ཚོགས་སུ་འགྱུར་བ་མ་ཡིན་ནོ། །དེ་ནི། འདི་ལྟར་ཆོས་ཀྱིས་ངོམས་པ་དང་ལྡན་པ་ཡིན་ཏེ། འབྱུང་བའི་ལམ་ཚོལ་ཞིང་སྦྱོར་བའི་ཚུལ་ ཁྲིམས་ཡང་དག་པར་བླངས་ཏེ་གནས་སོ། །ཇི་ལྟར་ན། བྱང་ཆུབ་སེམས་དཔའ་སྐྱོན་མེད་པའི་ཚུལ་ཁྲིམས་དང་ལྡན་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་ཚུལ་ཁྲིམས་དེས་ ལོག་པའི་ཚུལ་ཁྲིམས་ཉེ་བར་བཟུང་སྟེ་གང་གིས་ཕ་རོལ་པོ་དམའ་བའི་ཚུལ་ཅན་དུ་འགྱུར་བར་བདག་ལ་མི་བསྟོད། གཞན་ལ་མི་སྨོད་དོ། །དེ་ནི། འདི་ལྟར་གཡེང་བ་མེད་པ་ཉེ་བར་ བཟུང་སྟེ་ཚུལ་ཁྲིམས་ཡང་དག་པར་བླངས་ཤིང་གནས་སོ། །ཇི་ལྟར་ན། བྱང་ཆུབ་སེམས་དཔའ་ཁ་ན་མ་ཐོ་བ་མེད་པའི་ཚུལ་ཁྲིམས་དང་ལྡན་པ་ཡིན་ཞེ་ན། འདི་ལ་བྱང་ཆུབ་སེམས་ དཔའ་སྲོག་གཅོད་པ་ཡོངས་སུ་སྤངས་པ་ཡིན་ཏེ། མ་བྱིན་པར་ལེན་པ་དང༌། འདོད་པས་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མའི་ཚིག་དང༌། ངག་བརླང་བ་དང༌། ཚིག་ ཀྱལ་བ་དང༌། ཆགས་སེམས་དང༌། གནོད་སེམས་དང༌། ལོག་པར་ལྟ་བ་ཡོངས་སུ་སྤངས་པ་ཡིན་ཏེ། དགེ་བ་བཅུའི་ལས་ཀྱི་ལམ་ཡང་དག་པར་བླངས་ཏེ་གནས་སོ། །དེ་ལྟར་ན། བྱང་ཆུབ་ ༄༅། །སེམས་དཔའ་ཁ་ན་མ་ཐོ་བ་མེད་པའི་ཚུལ་ཁྲིམས་དང་ལྡན་པ་ཡིན། དེ་འདི་སྙམ་དུ་སེམས་སྐྱེད་དེ། གང་ཇི་སྙམ་དུ་སེམས་ཅན་རྣམས་ཚུལ་ཁྲིམས་ངན་པ་ ཅན་ལ་ཡི་དམ་འཆའ་ཞིང༌། སྤྱོད་པ་ཐམས་ཅད་ནི། ཕྱིན་ཅི་ལོག་གི་རྒྱུ་ལས་བྱུང་བ་སྟེ། དེ་ལྟར་སངས་རྒྱས་བཅོམ་ལྡན་འདས་རྣམས་ཀྱིས་ཐུགས་སུ་ཆུད་དེ་ཕྱིན་ཅི་ལོག་ཏུ་ གྱུར་པའི་སེམས་ཅན་རྣམས་ནི། ཚུལ་ཁྲིམས་ལོག་པ་ལ་སྤྱོད་ཀྱི། བདག་གིས་ནི། ཅི་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། དེ་ བཞིན་ཉིད་ཀྱི་དོན་དུ་ཆོས་བསྟན་པར་འགྱུར་བ་དེ་ལྟར་བྱའོ། །སྙམ་མོ། །ཀྱེ་རྒྱལ་པའི་སྲས་དག། འདི་ནི། བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་གཏེར་ཏེ། གཉིས་ པའོ། །ཀྱེ་རྒྱལ་བའི་སྲས་དག། དེ་ལ་བྱང་ཆུབ་སེམས་དཔའ་རྣམས་ཀྱི་ངོ་ཚ་ཤེས་པའི་གཏེར་གང་ཞེ་ན། ཀྱེ་རྒྱལ་བའི་སྲས་དག། འདི་ལ་བྱང་ཆུབ་སེམས་དཔའ་སྔོན་གྱི་མཐའི་ སྤྱོད་པ་ཉེ་བར་བཟུང་སྟེ། གང་འདི་ཚེ་རབས་ཀྱི་འཁོར་བ་ཐོག་པ་མ་དང་ཐ་མ་མེད་པ་རྒྱས་པར་མ་དང་འགྲོགས་པ་དང༌། ཕ་དང་འགྲོགས་པ་དང༌། ཞང་པོ་དང་འགྲོགས་པ་དང༌། སྲིད་ མོ་དང་འགྲོགས་པ་དང༌། སྤུན་དང་འགྲོགས་པ་དང༌། བུ་དང་འགྲོགས་པ་དང༌། བུ་མོ་དང་འགྲོགས་པར་གྱུར་ཀྱང་གཅིག་ལ་གཅིག་འཚེ་བ་དང༌། གཅིག་ལ་གཅིག་ཀྱལ་ཀ་བྱེད་ པ་དང༌། གཅིག་ལ་གཅིག་གནོད་པ་བྱེད་པ་དང༌། གཅིག་ལ་གཅིག་འཁྲིག་པ་དང༌། གཅིག་ལ་གཅིག་བསྔོ་བ་དང༌། གཅིག་ལ་གཅིག་འཇིག་པ་དང༌། གཅིག་ལ་གཅིག་འབོད་པ་དང༌། གཅིག་ལ་གཅིག་ཟ་བ་དང༌། གཅིག་ལ་གཅིག་དབང་བ་དང༌། གཅིག་ལ་གཅིག་འཁོལ་བར་གྱུར་པ་དེ་ཡང་འདོད་ཆགས་ཀྱི་དབང་དང༌། ཞེ་སྡང་གི་དབང་དང༌། གཏི་མུག་གི་དབང་ དང༌། རྒྱགས་པའི་དབང་དང༌། ང་རྒྱལ་གྱི་དབང་དང༌། འཆབ་པའི་དབང་དང༌། གཉའ་དྲག་གི་དབང་དང༌། ཕྲག་དོག་གི་དབང་དང༌། འཇུངས་པའི་དབང་དང༌། གཡོའི་དབང་དང༌། སྒྱུའི་ དབང་དང༌། མི་དགའ་བའི་ལས་འདི་རྣམས་ཤིན་ཏུ་བླངས་པའི་ཕྱིར་སེམས་ཅན་དག་གཅིག་ལ་གཅིག་འདི་ལྟ་བུའི་རྣམ་པ་ངན་པ་དག་ཉམས་སུ་མྱོང་བར་གྱུར་ཏེ། ཐམས་ཅད་ཀྱང་མི་ ཤེས་པའི་དབང་གིས་གྱུར་པ་ནས་གཡོ་དང་སྒྱུའི་བར་གྱི་དབང་གིས་གྱུར་ཏེ། གཅིག་ལ་གཅིག་བག་མི་བྱེད། རིམ་གྲོ་མི་བྱེད། གཅིག་ལ་གཅིག་བཀུར་སྟི་མི་བྱེད། གཅིག་ལ་གཅིག་ ཕུད་དུད་མི་བྱེད། གཅིག་ལ་གཅིག་བཙམ་པ་མེད་པ་དང༌། གཅིག་ལ་གཅིག་མི་མཁས་པ་དང༌། གཅིག་ལ་གཅིག་གནོད་པ་དང༌། གཅིག་ལ་གཅིག་གསོད་པ་དང༌། གཅིག་ལ་ གཅིག་དགྲར་བྱེད་པར་གྱུར་ཏོ། །ཞེས་ངོ་ཚ་སྐྱེད་དོ། །ཇི་ལྟར་འདས་པའི་དུས་ན་བདག་དང༌། སེམས་ཅན་རྣམས་ཀྱི་རྣམ་པར་ངན་པ་འདི་ལྟ་བུའི་ཚུལ་བྱུང་བ་དེ་བཞིན་ད་ལྟར་ ༄༅། །བྱུང་བའི་དུས་ན་ཡང་བདག་དང༌། སེམས་ཅན་ཐམས་ཅད་ལ་རྣམ་པ་ངན་བ་དེ་ལྟ་བུ་དག་ཡོད་དོ། །ཇི་ལྟར་ད་ལྟར་བྱུང་བའི་དུས་ན་བདག་དང༌། སེམས་ཅན་ རྣམས་ལ་རྣམ་པར་ངན་པ་དེ་ལྟ་བུ་དག་ཡོད་པ་དེ་བཞིན་མ་འོངས་པའི་དུས་ན་ཡང་བདག་དང༌། སེམས་ཅན་ཐམས་ཅད་ལ་རྣམ་པ་ངན་པ་དེ་ལྟ་བུ་དག་འབྱང་བར་འགྱུར་ཏེ། དེ་ནི། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ཐུགས་སུ་ཆུད་དོ། །དེ་ལྟར་བདག་གིས་ངོ་ཚ་མེད་ཅིང་མི་བཟོད་ལ། སངས་ རྒྱས་བཅོམ་ལྡན་འདས་འདས་བ་དང༌། མ་བྱོན་པ་དང༌། ད་ལྟར་བྱུང་བ་རྣམས་ཀྱིས་ཐུགས་སུ་ཆུད་བཞིན་དུ་རྣམ་པ་ངན་པ་འདི་ལྟ་བུ་ལ་གནས་པ་ནི། མི་རིགས་མི་ཆའི། །ད་ནི། བདག་གིས་ཅི་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་དེ་བཞིན་ཉིད་ཀྱི་དོན་དུ་སེམས་ཅན་རྣམས་ལ་ཆོས་བསྟན་པར་འགྱུར་བ་ དེ་ལྟར་བྱའོ། །ཀྱེ་རྒྱལ་བའི་སྲས་དག། འདི་ནི། བྱང་ཆུབ་སེམས་དཔའ་རྣམས་ཀྱི་ངོ་ཚ་ཤེས་པའི་གཏེར་ཏེ། གསུམ་པའོ། །ཀྱེ་རྒྱལ་བའི་སྲས་དག། དེ་ལ་བྱང་ཆུབ་སེམས་ དཔའ་རྣམས་ཀྱི་ཁྲེལ་ཡོད་པའི་གཏེར་གང་ཞེ་ན། ཀྱེ་རྒྱལ་བའི་སྲས་དག། འདི་ལ་བྱང་ཆུབ་སེམས་དཔའ་ནི། མཐའ་མེད་པར་ཚོལ་བས་ཁྲེལ་བར་འཛིན་པ་ཡིན་ཏེ། གཟུགས་ བཙལ་བ་དང༌། སྒྲ་དང༌། དྲི་དང༌། རོ་དང༌། རེག་བྱ་བཙལ་བ་དང༌། བུ་དང་བུ་མོའི་དོན་དུ་བཙལ་བ་དང༌། ནོར་དང༌། བྲན་ཕོ་དང༌། བྲན་མོ་དང༌། གཡོག་ཡིད་དུ་འོང་བ་བཙལ་པའི་ཕྱིར་ བདག་གིས་ཀྱང་མི་ཚུལ་མི་ཆ་བའི་གཅམ་བུ་བྱ་བར་འགྱུར་རོ། །ཞེས་ཏེ། དེ་ནི། ཚོལ་བའི་དབང་དུ་ཆགས་པ་ཉེ་བར་མི་ལེན་ཏོ། །ཞེས་སྡང་ཉེ་བར་མི་ལེན་ཏོ། །གཏི་མུག་ཉེ་བར་མི་ལེན་ ཏོ༑ ༑དེ་བཞིན་དུ་ང་རྒྱལ་དང༌། འཆབ་པ་དང༌། ཕྲག་དོག་དང༌། འཇུངས་པ་དང༌། གཡོ་དང༌། སྒྱུ་དང༌། གནོད་པར་བྱ་བ་ཉེ་བར་མི་ལེན་ཏོ། །དེ་ནི། འདི་ལྟར་དྲན་པ་སྐྱེ་སྟེ། གང་ཅི་ ཡང་རུང་སྟེ། སེམས་ཅན་རྣམས་རྣམ་པ་ངན་པ་དེ་ལྟ་བུ་ཉེ་བར་འཛིན་པ་ཐམས་ཅད་ནི། མ་རིག་པའི་དབང་ནས་གཡོ་དང༌། སྒྱུ་དང༌། གནོད་པར་བྱེད་པའི་དབང་གི་བར་གྱིས་བྱུང་བ་ སྟེ༑ དེ་དག་གཅིག་ལ་གཅིག་བག་མི་བྱེད། རིམ་གྲོ་མི་བྱེད། བསྟི་སྟང་དུ་མི་བྱེད། ཕུ་དུད་དུ་མི་བྱེད་ཅིང༌། བཙམ་པ་མེད་དེ། གྲོགས་པོར་མི་ཤེས་ཤིང་གཅིག་ལ་གཅིག་ཉམ་ང་ བ་དང༌། གཅིག་ལ་གཅིག་གསོད་པ་དང༌། གཅིག་ལ་གཅིག་དགྲར་ལེན་པ་འདི་ལྟ་བུའི་རྣམ་པ་ངན་པ་དག་ཉེ་བར་ལེན་ཏོ། །མངོན་པར་དགའོ། །མངོན་པར་ཞེ་ན་ཏོ། །ཚོལ་ལོ།། ཀུན་ཏུ་ཚོལ་ལོ། །ཀུན་ཏུ་བཙལ་ནས་མངོན་པར་སྨོན་ཏོ། །འཇལ་ལོ། །ཀུན་ཏུ་འཇལ་ལོ། །དེ་ལྟར་ཡང་མིག་ཉམས་པ་དེ་དག་ལམ་གང་དང་གང་ནས་མངལ་གྱི་དྲི་མས་གོས་ ༄༅། །ཏེ་བྱུང་བ་དེ་ཉིད་དུ་འཁྲིག་པའི་ཆོས་ལ་བརྟེན་ཏེ་མི་གཙང་བ་བྱུང་བ་ནི། ཀུན་གྱིས་ཀྱང་ཤེས་སོ། །དེ་བས་ན། དེ་ལྟར་བདག་བླ་ན་མེད་པ་ཡང་དག་ པར་རྫོགས་པའི་བྱང་ཆུབ་ཏུ་སྨོན་པ་ཁྲེལ་མེད་པའི་དབང་དུ་གྱུར་ནས་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་སྐུ་སླུ་བར་བྱེད་ པ་འདི་ནི། མི་རིགས་ཀྱི། ད་ནི། བདག་གིས་ཅི་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་དེ་བཞིན་ཉིད་ཀྱི་དོན་དུ་ཆོས་བསྟན་པར་ འགྱུར་བ་དེ་ལྟར་བྱའོ། །སྙམ་མོ། །ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་རྣམས་ཀྱི་ཁྲེལ་ཡོད་པའི་གཏེར་ཏེ། བཞི་པའོ། །ཀྱེ་རྒྱལ་བའི་སྲས་དག །དེ་ལ་བྱང་ ཆུབ་སེམས་དཔའ་རྣམས་ཀྱི་ཐོས་པའི་གཏེར་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་ཐོས་པ་དང་ལྡན་པ་ཡིན་ཏེ། འདི་ཡོད་ན་འདི་འབྱུང་ངོ༌། ། འདི་མེད་ན་འདི་མི་འབྱུང་ངོ༌། །འདི་བྱུང་བས་འདི་སྐྱེའོ། །འདི་འགག་པས་འདི་འགག་གོ །འདི་དག་ནི། འཇིག་རྟེན་པའི་ཆོས་སོ། །འདི་དག་ནི། འཇིག་རྟེན་ལས་འདས་ པའི་ཆོས་སོ། །འདི་དག་ནི། འདུས་བྱས་ཀྱི་ཆོས་སོ། །འདི་དག་ནི། འདུས་མ་བྱས་ཀྱི་ཆོས་སོ། །འདི་དག་ནི། ལུང་བསྟན་པའི་ཆོས་སོ། །འདི་དག་ནི། ལུང་མ་བསྟན་པའི་ ཆོས་སོ༑ ༑དེ་ལ་ཅི་ཡོད་པས་གང་འབྱུང་བར་འགྱུར་ཞེ་ན། མ་རིག་པ་ཡོད་པས་འདུ་བྱེད་རྣམས་འབྱུང་ངོ༌། །ཅི་མེད་པས་གང་མེད་པར་འགྱུར་ཞེ་ན། རྣམ་པར་ཤེས་པ་མེད་པས་མིང་ དང་གཟུགས་མེད་པར་འགྱུར་རོ། །ཅི་སྐྱེས་པས་གང་སྐྱེ་བར་འགྱུར་ཞེ་ན། སྲེད་པ་སྐྱེས་པས་སྡུག་བསྔལ་སྐྱེའོ། །ཅི་འགགས་པས་གང་འགག་པར་འགྱུར་ཞེ་ན། སྲིད་པ་འགགས་ པས་སྐྱེ་བ་འགག་གོ། དེ་ལ་འཇིག་རྟེན་པའི་ཆོས་རྣམས་གང་ཞེ་ན། གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པའོ། །དེ་ལ་འཇིག་རྟེན་ལས་ འདས་པའི་ཆོས་རྣམས་གང་ཞེ་ན། འདི་ལྟ་སྟེ། ཚུལ་ཁྲིམས་ཀྱི་ཕུང་པོ་དང༌། ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་ གྲོལ་བའི་ཡེ་ཤེས་མཐོང་བའི་ཕུང་པོ་སྟེ། འདི་དག་ནི། འཇིག་རྟེན་ལས་འདས་པའི་ཆོས་སོ། །འདུས་བྱས་ཀྱི་ཆོས་རྣམས་གང་ཞེ་ན། འདི་ལྟ་སྟེ། འདོད་པའི་ཁམས་དང༌། གཟུགས་ ཀྱི་ཁམས་དང༌། གཟུགས་མེད་པའི་ཁམས་དང༌། སེམས་ཅན་གྱི་ཁམས་ཏེ། འདི་དག་ནི། འདུས་བྱས་ཀྱི་ཆོས་སོ། །འདུས་མ་བྱས་ཀྱི་ཆོས་རྣམས་གང་ཞེ་ན། ནམ་མཁའ་དང༌། མྱ་ ངན་ལས་འདས་པ་དང༌། སོ་སོར་བརྟགས་ཏེ་འགོག་པ་དང༌། སོ་སོར་མ་བརྟགས་པར་འགོག་པ་དང༌། རྟེན་ཅིང་འབྲེལ་བར་འབྱུང་བ་དང༌། ཆོས་ཀྱི་གནས་ཉིད་དེ། འདི་དག་ནི་། ༄༅། །འདུས་མ་བྱས་པའི་ཆོས་སོ། །ལུང་བསྟན་པའི་ཆོས་རྣམས་གང་ཞེ་ན། འཕགས་པའི་བདེན་པ་བཞི་དང༌། དགེ་སྦྱོང་གི་འབྲས་བུ་བཞི་དང༌། ཐ་དད་པ་ཡང་དག་ པར་ཤེས་པ་བཞི་དང༌། མི་འཇིགས་པ་བཞི་དང༌། དྲན་པ་ཉེ་བར་གཞག་པ་བཞི་དང༌། ཡང་དག་པར་སྤོང་བ་བཞི་དང༌། རྫུ་འཕྲུལ་གྱི་རྐང་པ་བཞི་དང༌། དབང་པོ་ལྔ་དང༌། སྟོབས་ ལྔ་དང༌། བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱད་དེ། འདི་དག་ནི། ལུང་བསྟན་པའི་ཆོས་སོ། །ལུང་མ་བསྟན་པའི་ཆོས་རྣམས་གང་ཞེ་ན། འཇིག་རྟེན་མཐའ་ཡོད་པ་དང༌། འཇིག་རྟེན་མཐའ་མེད་པ་དང༌། མཐའ་ཡོད་པའང་མ་ཡིན། མཐའ་མེད་པའང་མ་ཡིན་པ་ཞེས་བྱ་བ་འདི་ནི། ལུང་དུ་མ་བསྟན་པའོ། །འཇིག་ རྟེན་རྟག་པ་དང༌། འཇིག་རྟེན་མི་རྟག་པ་དང༌། རྟག་པའང་ཡིན་ལ། མི་རྟག་པའང་ཡིན་པ་དང༌། རྟག་པའང་མ་ཡིན་ལ། མི་རྟག་པའང་མ་ཡིན་པ་ཞེས་བྱ་བ་འདི་ནི། ལུང་མ་ བསྟན་པའོ། །དེ་བཞིན་གཤེགས་པ་ཤི་ཕན་ཆད་ཡོད་པ་དང༌། དེ་བཞིན་གཤེགས་པ་ཤི་ཕན་ཆད་མེད་པ་དང༌། དེ་བཞིན་གཤེགས་པ་ཤི་ཕན་ཆད་ཡོད་ཀྱང་ཡོད་ལ། མེད་ ཀྱང་མེད་པ་དང༌། དེ་བཞིན་གཤེགས་པ་ཤི་ཕན་ཆད་ཡོད་པའང་མ་ཡིན། མེད་པའང་མ་ཡིན་པ་ཞེས་བྱ་བ་ནི། ལུང་མ་བསྟན་པའོ། །བདག་དང་སེམས་ཅན་རྣམས་ཡོད་ པ་དང༌། བདག་དང་སེམས་ཅན་རྣམས་མེད་པ་དང༌། བདག་དང་སེམས་ཅན་རྣམས་ཡོད་པའང་ཡིན་ལ། མེད་པའང་ཡིན་པ་དང༌། བདག་དང་སེམས་ཅན་རྣམས་ཡོད་པའང་མ་ ཡིན༑ མེད་པའང་མ་ཡིན་པ་ཞེས་བྱ་བ་འདི་ནི། ལུང་མ་བསྟན་པའོ། །སངས་རྒྱས་ཇི་སྙེད་ཅིག་ཡོངས་སུ་མྱ་ངན་ལས་འདས། རང་སངས་རྒྱས་ཇི་སྙེད་ཅིག་ཡོངས་སུ་མྱ་ངན་ལས་འདས་ ཉན་ཐོས་ཇི་སྙེད་ཅིག་ཡོངས་སུ་མྱ་ངན་ལས་འདས། སངས་རྒྱས་ཇི་སྙེད་ཅིག་མ་བྱོན། རང་སངས་རྒྱས་ཇི་སྙེད་ཅིག་མ་བྱོན། ཉན་ཐོས་ཇི་སྙེད་ཅིག་མ་བྱོན། བྱང་ཆུབ་སེམས་དཔའ་ ཇི་སྙེད་ཅིག་སྐྱེ་བར་འགྱུར། སངས་རྒྱས་ཇི་སྙེད་ཅིག་བཞུགས། རང་སངས་རྒྱས་ཇི་སྙེད་ཅིག་བཞུགས། ཉན་ཐོས་ཇི་སྙེད་ཅིག་བཞུགས། བྱང་ཆུབ་སེམས་དཔའ་ཇི་སྙེད་ཅིག་ བཞུགས། སངས་རྒྱས་དག་པས་སུ་སྔ། རང་སངས་རྒྱས་དག་པས་སུ་སྔ། ཉན་ཐོས་དག་པས་སུ་སྔ། བྱང་ཆུབ་སེམས་དཔའ་དག་པས་སུ་སྔ། སངས་རྒྱས་དག་པས་སུ་འཕྱི། རང་ སངས་རྒྱས་དག་པས་སུ་འཕྱི། ཉན་ཐོས་དག་པས་སུ་འཕྱི། སེམས་ཅན་དག་པས་སུ་འཕྱི། ཆོས་དག་པས་སུ་སྔ། འཇིག་རྟེན་གང་ནས་འོངས། འཇིག་རྟེན་གང་དུ་འགྲོ་།འཇིག་ རྟེན་གྱི་ཁམས་ཇི་སྙེད་ཅིག་ཆགས་པར་འགྱུར། འཇིག་རྟེན་གྱི་ཁམས་ཇི་སྙེད་ཅིག་གནས་པ་ཡིན། འཇིག་རྟེན་གྱི་ཁམས་གང་ནས་འོངས། འཇིག་རྟེན་གྱི་ཁམས་གང་ཞིག་ ༄༅། །ཡོངས་སུ་ཟད་པར་འགྱུར། འཁོར་བའི་སྔོན་གྱི་མཐའ་ནི། གང༌། འཁོར་བའི་ཕྱི་མའི་མཐའ་ནི། གང་ཞེས་བྱ་བ་འདི་ནི། ལུང་དུ་མ་བསྟན་པའོ། །དེ་འདི་ལྟར་ དྲན་པ་སྐྱེ་སྟེ། སེམས་ཅན་གང་སུའང་རུང་སྟེ། ཀུན་ཏུ་རྒྱུག་པ་དང༌། ཀུན་ཏུ་འཁོར་བ་ཐམས་ཅད་ནི། ཆོས་འདི་དག་མི་ཤེས་པའི་ཕྱིར་ཏེ། དེ་ལྟར་ཐོས་པ་དང་མི་ལྡན་པའི་སོ་སོའི་ སྐྱེ་བོ་རྣམས་ཀུན་ཏུ་རྒྱུག་གོ །ཀུན་ཏུ་འཁོར་རོ། །དེ་བས་ན། དེ་ནི། བདག་གིས་ཅི་ནས་ཀྱང་བསམ་པ་ཐམས་ཅད་ཐོས་པའི་མཛོད་བཟུང་སྟེ་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་མངོན་པར་སངས་རྒྱས་ནས་དེ་བཞིན་ཉིད་ཀྱི་དོན་དུ་ཆོས་བསྟན་པར་བྱའོ། །ཞེས་བྱ་བ་འདི་ནི། ཀྱེ་རྒྱལ་བའི་སྲས་དག། བྱང་ཆུབ་སེམས་དཔའ་རྣམས་ཀྱི་ ཐོས་པའི་གཏེར་ཏེ། ལྔ་པའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའ་རྣམས་ཀྱི་གཏོང་བའི་གཏེར་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་ དཔའ་གཏོང་བ་དང་ལྡན་པ་ཡིན། ཡོངས་སུ་གཏོང་བ་དང་ལྡན་པ་ཡིན། ནང་གི་གཏོང་བ་དང་ལྡན་པ་ཡིན། ཕྱི་རོལ་གྱི་གཏོང་བ་དང་ལྡན་པ་ཡིན། ཕྱི་ནང་གི་གཏོང་བ་དང་ ལྡན་པ་ཡིན། ཐམས་ཅད་གཏོང་བ་དང་ལྡན་པ་ཡིན། འདས་པ་གཏོང་བ་དང་ལྡན་པ་ཡིན། མ་འོངས་པ་གཏོང་བ་དང་ལྡན་པ་ཡིན། ད་ལྟར་བྱུང་བ་གཏོང་བ་དང་ལྡན་པ་ཡིན། ཤིན་ཏུ་གཏོང་པ་དང་ལྡན་པ་ཡིན་ཏེ། ཀྱེ་རྒྱལ་པའི་སྲས་དག །ཇི་ལྟར་ན། བྱང་ཆུབ་སེམས་དཔའ་གཏོང་བ་དང་ལྡན་པ་ཡིན་ཞེ་ན། ཀྱེ་རྒྱལ་བའི་སྲས་དག། འདི་ལ་བྱང་ཆུབ་ སེམས་དཔའ་རང་བཞིན་གྱིས་བགོ་བཤའ་བྱེད་པའི་ངང་ཚུལ་ཅན་ཡིན་ཏེ། དེ་རྟག་ཏུ་བགོ་བཤའ་བྱས་ཤིང་བདག་ཀྱང་ཤེས་ཀྱིས་སྤྱོད་པ་ཡིན་ཏེ། བདག་བདེ་བར་བྱ་བ་དང༌། བདག་ཡོངས་སུ་སྦྱང་བ་དང༌། བདག་རིམ་གྲོ་བྱ་བའི་ཕྱིར་ཡོ་བྱད་ཇི་སྙེད་དུ་བསགས་པ་དེ་དག་ཐམས་ཅད་ཀྱང་བགོ་བཤའ་བྱས་ཤིང་སྤྱོད་ཀྱི། མ་བགོས་པར་ནི། མ་ཡིན་ནོ། །དེ་ དག་སྤྱོད་པའི་ཚེའང་སེམས་འདི་སྙམ་དུ་སྐྱེད་དེ། ལུས་འདི་ལ་སྲིན་བུའི་རིགས་རྣམ་པ་སྣ་ཚོགས་བརྒྱད་ཅུ་གནས་ཏེ། དེ་དག་ཀྱང་བདག་གི་ལུས་འདི་བདེ་བས་ནི། བདེ་བར་འགྱུར་ བདག་གི་ལུས་འདི་སྡུག་བསྔལ་བས་ནི། སྡུག་བསྔལ་བར་འགྱུར་རོ། །ཞེས་དེ་གང་ཅི་ལ་སྤྱོད་པ་དེ་དག་ཐམས་ཅད་ཀྱང་མྱོང་བ་མེད་པའི་སེམས་ཀྱིས་དེ་དག་མི་འཆི་བ་དང༌། དེ་དག་བདེ་བར་བྱ་བའི་ཕྱིར་གཏོང་ངོ༌། །གཞན་ཡང་དེ་འདི་སྙམ་དུ་སེམས་ཏེ། ཡུན་རིང་པོ་ནས་ཟས་དང་ལུས་བདེ་བ་ལ་ཆགས་པར་གྱུར་གྱི། ད་ནི། བདག་གི་ལུས་ལ་ཆགས་ པ་ལས་རྣམ་པར་འདའ་བར་བྱའོ། །ཞེས་བྱ་བ་འདི་ནི། གཏོང་བའོ། །བྱང་ཆུབ་སེམས་དཔའི་ཡོངས་སུ་གཏོང་བ་གང་ཞེ་ན། འདི་ལ་བྱང་ཆུབ་སེམས་དཔའ་ལ་ཟས་སམ། སྐོམ་ ༄༅། །མམ༑ བཟའ་བའམ། བཅའ་བའམ། བལྡག་པའམ། བཏུང་བའམ། གཞིབ་པའམ། མྱང་བའམ། གོས་སམ། ཕྲེང་བའམ། བྱུག་པའམ། རྒྱན་ནམ། ཅིའང་རུང་སྟེ། གང་སྤྱད་ན་ནི། འཚོའི། མ་སྤྱད་ན་ནི། འཆི་བར་འགྱུར་བ་ཞིག་ཉེ་བར་གནས་པར་གྱུར་ལ། དེའི་ཚེ་སློང་བ་ཞིག་འོངས་ཏེ། དེ་ལ་ཅི་ནས་ཀྱང་ཟད་པར་འགྱུར་བ་ དང༑ ལྷག་མ་མེད་པར་བསླངས་ཀྱང་དེ་ལ་བྱང་ཆུབ་སེམས་དཔའ་འདི་སྙམ་དུ་སེམས་ཏེ། སྔོན་གྱི་མཐའ་དེ་དག་ཏུ་བདག་བཀྲེས་པས་ཤི་བར་གྱུར་པ་ཡང་དམིགས་པས་མི་ སླེབ་སྟེ། སུ་ལ་ཡང་ཕན་པར་མ་གྱུར་ཏོ། །ད་འདི་ལྟར་རིམ་པས་སྔོན་ཆད་མྱོང་བའི་ཆོས་ཅན་དང་མཉམ་པ་ཉིད་ཀྱིས་དུས་བྱས་པར་གྱུར་ལ། སེམས་ཅན་དེ་དག་ཀྱང་བདེ་ བར་གྱུར་ན། བདག་གིས་ཐོབ་པར་བྱ་བ་ལེགས་པར་ཐོབ་བོ། །བདག་གི་འདི་དག་ཀྱང་ཟད་ཀྱང་རུང༌། འཆི་བའི་མཐར་ཡང་ཐུག་ཀྱང་རུང་སྟེ། སེམས་ཅན་རྣམས་འཚོ་བར་ བྱའོ༑ ༑ཞེས་གཏོང་བ་འདི་ནི། ཡོངས་སུ་གཏོང་བའོ། །བྱང་ཆུབ་སེམས་དཔའི་ནང་གི་གཏོང་བ་གང་ཞེ་ན། འདི་ལ་བྱང་ཆུབ་སེམས་དཔའ་དར་ཞིང་བཟང་པོར་གནས་པ། གཟུགས་མཛེས་པ། བལྟ་ན་སྡུག་པ། མདོག་རྒྱས་པ་གྱ་ནོམ་པ་དང་ལྡན་པ། ཁྲུས་དང་བྱུག་པ་ལེགས་པར་བྱས་པ། ཕྲེང་བ་དང་རྒྱན་ལེགས་པར་བཏགས་པ། གོས་ གསར་པ་མ་བབ་པ་བགོས་པ། གླིང་བཞི་པའི་འཇིག་རྟེན་གྱི་ཁམས་སུ་རྒྱལ་པོར་དབང་བསྐུར་བས་དབང་བསྐུར་པ། རིན་པོ་ཆེ་བདུན་དང་ལྡན་པ་དེ་ལྟ་བུའི་དྲུང་དུ་སློང་བ་དག་ཅིག་ འོངས་ཏེ་འདི་སྐད་དུ། བདག་ཅག་ནི། ན་བས་གཟིར་ཏོ། །རྒས་སོ། །འཁོགས་སོ། །སྡུག་བསྔལ་གྱིས་མནར་ཏོ། །ནད་ཚབས་ཆེའོ། །ནད་གཡོག་མེད་དོ། །འཆི་ལ་ཐུག་གོ །གལ་ ཏེ་ཁྱོད་ཀྱི་ལུས་ལས་ལག་པའམ། རྐང་པའམ། ཤའམ། ཁྲག་གམ། མགོའམ། ཀླད་པའམ། རུས་པའམ། རྐང་ངམ། སུ་ལ་ཅི་དགོས་པ་དེ་དག་ཁྱེར་ཅིག་ཅེས་རྒྱལ་པོ་ལ་ཐག་ཐོགས་ མེད་པར་རང་གི་ལུས་བདག་ཅག་ལ་བྱིན་ན། ལུས་འདིས་བདག་ཅག་ནད་འདི་ལས་ལྡང་བར་འགྱུར་རོ། །ཞེས་ཟེར་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་འདི་ སྙམ་དུ་སེམས་ཏེ། ལུས་འདི་ལྟ་ཞིག་ཆོས་ཀྱི་དེ་འདྲ་བར་འགྱུར་ཡང་སུ་ལ་ཡང་ཕན་པར་མ་གྱུར་གྱི། ད་ནི། དེ་ལྟ་བུའི་ཆོས་ཅན་གྱི་ལུས་འདིས་སེམས་ཅན་འདི་དག་བདེ་བར་འགྱུར་ བར་བྱའོ། །ཞེས་ནས་དེ་ལ་སེམས་བསྐྱེད་པ་འགའ་ཙམ་ཡང་འགྱོད་པར་འགྱུར་བ་མེད་པ་འདི་ནི། ནང་གི་གཏོང་བ་ཞེས་བྱའོ། །དེ་ལ་བྱང་ཆུབ་སེམས་དཔའི་ཕྱི་རོལ་གྱི་གཏོང་ པ་གང་ཞེ་ན། འདི་ལ་བྱང་ཆུབ་སེམས་དཔའ་གཞུང་དེ་བཞིན་དུ་རྒྱ་ཆེར་དབང་བསྐུར་བ་དང༌། འཁོར་ལོས་བསྒྱུར་བའི་སྲིད་ལ་གནས་པ། གླིང་བཞི་ལ་དབང་བ། རིན་པོ་ཆེ་ ༄༅། །བདུན་དང་བདེ་བའི་ཡོ་བྱད་ཐམས་ཅད་དང་ལྡན་པ། ཐོག་མ་མངོན་པར་དབང་བསྐུར་བ་དེ་ལྟ་བུའི་དྲུང་དུ་སློང་བ་དག་ཅིག་ལྷགས་ཏེ་འདི་སྐད་དུ། བདག་ནི། བཀྲེན་ནོ། །དབུལ་ལོ། །ཤིན་ཏུ་སྡུག་བསྔལ་ལོ། །ནོར་དང་མི་ལྡན་ནོ། །ཁྱོད་ནི། བདེ་བའི་ཡོ་བྱད་ཐམས་ཅད་དང་ལྡན་ན། བྱམས་བུ་གླིང་བཞིའི་འཁོར་ལོས་བསྒྱུར་བའི་ སྲིད་བདག་ཅག་ལ་བྱིན་ཏེ། ཕྱིས་འདི་ལ་དབང་མི་བསྒྱུར་བར་བྱས་ན། དེས་ནི། བདག་ཅག་བདེ་བར་འགྱུར་རོ། །ཞེས་ཟེར་ན། དེ་ལ་བྱང་ཆུབ་སེམས་དཔའ་འདི་སྙམ་དུ་སེམས་ ཏེ༑ ཕུན་སུམ་ཚོགས་པ་ཐམས་ཅད་ནི། ཟད་པའི་མཐར་འགྱུར་ཏེ། དེའི་ཚེ་ནི། སུའི་བསམ་པ་ཡང་ཡོངས་སུ་མགུ་བར་བྱ་བར་མི་ནུས་ཀྱི། བདག་གིས་ད་ནི། འཕྲལ་དུ་ སེམས་ཅན་འདི་དག་གི་བསམ་པ་ཡོངས་སུ་ཚིམ་པར་བྱའོ་ཞེས་ནས་དེའི་རྒྱུས་སེམས་བསྐྱེད་པ་འགའ་ཙམ་འགྱོད་པར་འགྱུར་བ་མེད་པར་གཏོང་བ་འདི་ནི། ཕྱི་རོལ་གྱི་གཏོང་ བ་ཞེས་བྱའོ། །དེ་ལ་བྱང་ཆུབ་སེམས་དཔའི་ཕྱི་ནང་གི་གཏོང་བ་གང་ཞེ་ན། འདི་ལ་བྱང་ཆུབ་སེམས་དཔའ་འཁོར་ལོས་བསྒྱུར་བའི་སྲིད་ལ་དེ་ལྟར་དབང་བསྐུར་བ། བདེ་བའི་ ཡོ་བྱད་ཐམས་ཅད་དང་ལྡན་པ། བསག་པར་བྱ་བ་རྣམ་པར་བསགས་པ་དེ་ལྟ་བུའི་དྲུང་དུ་སློང་བ་དག་ཅིག་འོངས་ནས་འདི་སྐད་དུ། ཁྱོད་ཀྱིས་ནི། འཁོར་ལོས་བསྒྱུར་ བའི་རྒྱལ་པོ་སྔོན་ཆད་ཀྱང་མྱོང༌། བདག་ཅག་ནི། དགེ་བ་མ་མྱོང་བ་ཡིན་ན། བྱམས་བུ་འཁོར་ལོས་བསྒྱུར་བའི་སྲིད་བདག་ཅག་ལ་བྱིན་ལ། ཁྱོད་ཀྱིས་བདག་ཅག་རིམ་གྲོར་བྱ་བ་དང༌། བསྙེན་བཀུར་བར་གྱིས་ཤིག་ཅེས་ཟེར་ན། དེ་ལ་བྱང་ཆུབ་སེམས་དཔའ་འདི་སྙམ་དུ་སེམས་ཏེ། བདག་གི་ལུས་ཀྱི་ཆོས་ཉིད་དང༌། སྲིད་ཀྱི་ཆོས་ཉིད་དེ་དག་ཐམས་ཅད་ཀྱང་ཐ་མར་མེད་ པར་འགྱུར་བ་སྟེ། ལུས་ཀྱང་རྗེས་སུ་འབྲང་བར་གནས་ལ། སྲིད་ཀྱང་ཆེ་ཞིང་སློང་བ་རྣམས་ཀྱང་མངོན་དུ་གྱུར་པ་འདིའི་ཚེ་སྙིང་པོ་མེད་པ་ལས་སྙིང་པོ་བླང་བར་བྱའོ། །ཞེས་ནས་དེའི་ རྒྱུས་སེམས་བསྐྱེད་པ་འགའ་ཙམ་ཡང་འགྱོད་པར་འགྱུར་བ་མེད་པར་རིམ་གྲོ་བྱེད་ཅིང་གཏོང་བ་འདི་ནི། བྱང་ཆུབ་སེམས་དཔའི་ཕྱི་ནང་གི་གཏོང་བ་ཞེས་བྱའོ། །དེ་ལ་བྱང་ཆུབ་ སེམས་དཔའི་ཐམས་ཅད་གཏོང་བ་གང་ཞེ་ན། འདི་ལ་བྱང་ཆུབ་སེམས་དཔའ་འཁོར་ལོས་བསྒྱུར་བའི་རྒྱལ་སྲིད་ལ་དེ་ལྟར་དབང་བསྐུར་ཞིང༌། བདེ་བ་ཐམས་ཅད་དང་ལྡན་པ་དེ་ལྟ་ བུའི་དྲུང་དུ་སློང་བ་དག་ཅིག་ལྷགས་ཏེ་འདི་སྐད་དུ། བདག་ཅག་ནི། ཁྱོད་ཀྱི་ལེགས་པ་དང་ཡོན་ཏན་སྙན་པ་ཐོས་ནས་གྲོང་དང༌། གྲོང་ཁྱེར་དང༌། ལྗོངས་དང༌། ཁམས་དང༌། རྒྱལ་པོའི་གནས་དུ་མ་ནས་ཁྱོད་ནི། གདོན་མི་ཟ་བར་བདག་ཅག་གི་བསམ་པ་ཡོངས་སུ་ཚིམ་པར་བྱེད་པར་འགྱུར་སྙམ་སྟེ། འདིར་ཕྱིན་ན། བྱམས་བུ་ཁྱོད་ཀྱིས་བདག་ཅག་གི་ ༄༅། །བསམ་པ་ཡོངས་སུ་རྫོགས་པར་གྱིས་ཤིག་ཅེས་ནས་ལ་ལ་ནི། བདག་ཅག་ལ་རིན་པོ་ཆེ་བདུན་དགོས་སོ། །ཞེས་ཟེར། ལ་ལ་ནི། བདག་ཅག་ལ་གླིང་བཞི་དགོས་སོ། །ཞེས་ཟེར་ ལ་ལ་ནི། བདག་ཅག་ལ་རྒྱལ་པོའི་བུ་དགོས་སོ། །ཞེས་ཟེར། ལ་ལ་ནི། བདག་ཅག་ལ་རྒྱལ་པོའི་མིག་གཉིས་དགོས་སོ། །ཞེས་ཟེར། ལ་ལ་ནི། བདག་ཅག་ལ་རྒྱལ་པོའི་ལག་པ་གཉིས་དགོས་སོ། །ཞེས་ཟེར། ལ་ ལ་ནི༑ བདག་ཅག་ལ་རྒྱལ་པོའི་རྐང་པ་གཉིས་དགོས་སོ། །ཞེས་ཟེར། ལ་ལ་ནི། བདག་ཅག་ལ་རྒྱལ་པོའི་ཤ་དགོས་སོ། །ཞེས་ཟེར། ལ་ལ་ནི། བདག་ཅག་ལ་རྒྱལ་པོའི་ཁྲག་ དགོས་སོ། །ཞེས་ཟེར། ལ་ལ་ནི། བདག་ཅག་ལ་རྒྱལ་པོའི་མགོ་དགོས་སོ། །ཞེས་ཟེར། ལ་ལ་ནི། བདག་ཅག་ལ་རྒྱལ་པོའི་སྙིང་དགོས་སོ། །ཞེས་ཟེར་ན། དེ་ལ་བྱང་ཆུབ་ སེམས་དཔའ་འདི་སྙམ་དུ་སེམས་ཏེ། སྡུག་པ་དང༌། ཡིད་དུ་འོང་བ་ཐམས་ཅད་དང་བྲལ་ཞིང་བྱེ་བར་ཡང་གྱུར་ཏེ། སེམས་ཅན་གང་གི་བསམ་པ་ཡང་ཡོངས་སུ་ཚིམ་པར་མ་ གྱུར་གྱི། ད་ནི། བདག་གི་ལུས་འབྲལ་བར་འགྱུར་བའི་ཆོས་ཅན་འདིས་སེམས་ཅན་དེ་དག་གི་ཆགས་སེམས་རྩེ་གཞིལ་བར་བྱ་བའི་ཕྱིར་བསམ་པ་ཡོངས་སུ་ཚིམ་པར་བྱའོ། ། བཅོལ་བ་དང་ལྡན་པའི་ཆོས་ཀྱི་གནས་སུ་ནི། སེམས་བསྐྱེད་པར་མི་བྱའོ། །ཞེས་ནས་དེ་དག་ཐམས་ཅད་གཏོང་ཡང་དེའི་ཕྱིར་དེ་ལ་སེམས་བསྐྱེད་པ་གཅིག་ཙམ་ཡང་འགྱོད་པར་ འགྱུར་བ་མེད་དེ། སེམས་ཅན་གང་ལ་ཡང་རིམ་གྲོ་མེད་པར་མི་བྱེད་པ་དེ་ནི། བྱང་ཆུབ་སེམས་དཔའི་ཐམས་ཅད་གཏོང་བའོ། །དེ་ལ་བྱང་ཆུབ་སེམས་དཔའི་འདས་པ་གཏོང་བ་གང་ཞེ་ན། འདི་ལ་བྱང་ཆུབ་སེམས་དཔའ་སངས་རྒྱས་བཅོམ་ལྡན་འདས་འདས་པ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཐོས་པ་དང༌། འདས་པའི་སངས་རྒྱས་བཅོམ་ལྡན་འདས་རྣམས་ཀྱི་ཕུན་ སུམ་ཚོགས་པ་ཐམས་ཅད་ཉན་ཅིང་ཐོས་ནས་དེ་དག་ཐམས་ཅད་ལ་ཆགས་པར་མི་བྱེད། འབྲལ་བར་མི་བྱེད། དམིགས་སུ་མེད་པས་རབ་ཏུ་འཇུག་སྟེ། རྟོག་པར་མི་བྱེད། རྣམ་པར་ རྟོག་པར་མི་བྱེད། ཡོངས་སུ་རྟོག་པར་མི་བྱེད། སྨོན་པར་མི་བྱེད། ཆགས་པར་མི་བྱེད། ཞེན་པར་མི་བྱེད། རྟེན་པའི་སེམས་ཀྱིས་གནས་པར་མི་བྱེད་དེ། རྨི་ལམ་གྱི་ཆོས་དེ་ལྟ་བུ་ ཐོབ་པར་བྱེད་ཀྱང་དགེ་བའི་རྩ་བ་དེ་དག་ལ་སྙིང་པོའི་འདུ་ཤེས་མི་སྐྱེད་དོ། །དགེ་བའི་རྩ་བ་དེ་དག་ལ་རྟེན་པའི་འདུ་ཤེས་སུ་མི་བྱེད་དེ། འོན་ཀྱང་རྟེན་པའི་སེམས་ཅན་རྣམས་གཟུང་ བ་དང༌། སངས་རྒྱས་ཀྱི་ཆོས་ཀྱང་ཡོངས་སུ་སྨིན་པར་བྱ་བའི་ཕྱིར་བརྗོད་དོ། །འཆད་དོ། །སྟོན་ཏོ། །འདས་པའི་ཆོས་ཉིད་ལ་བརྟགས་ན། ཤར་ཕྱོགས་སུ་མི་མཐོང་ངོ༌། །ལྷོ་ཕྱོགས་ དང༌། ནུབ་ཕྱོགས་དང༌། བྱང་ཕྱོགས་སུ་རྗེས་སུ་མི་མཐོང་ངོ༌། །བྱང་ཤར་གྱི་ཕྱོགས་མཚམས་དང༌། ཤར་ལྷོའི་ཕྱོགས་མཚམས་དང༌། ལྷོ་ནུབ་ཀྱི་ཕྱོགས་མཚམས་དང༌། ནུབ་བྱང་ ༄༅། །གི་ཕྱོགས་མཚམས་དང༌། འོག་དང་སྟེང་གི་ཕྱོགས་སུ་རྗེས་སུ་མི་མཐོང་སྟེ། དེ་འདི་སྙམ་དུ། གང་ཅི་ཡང་རུང་མ་བཏང་བ་དེ་ནི། བཏང་བའོ། །སྙམ་དུ་སེམས་ཏེ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའི་འདས་པ་གཏོང་བའོ། །དེ་ལ་བྱང་ཆུབ་སེམས་དཔའི་མ་འོངས་པ་གཏོང་བ་གང་ཞེ་ན། འདི་ལ་བྱང་ཆུབ་སེམས་དཔའ་ སངས་རྒྱས་བཅོམ་ལྡན་འདས་མ་བྱོན་པ་རྣམས་ཀྱི་སྤྱོད་པ་ཉན་ན། མཚན་མའི་ཚུལ་དང་དངོས་པོར་འཛིན་པས་མི་འཛིན་ཏེ། འཇིག་རྟེན་གྱི་ཁམས་གཞན་ལ་བརྩོན་པར་མི་བྱེད་ པ་ཡིན༑ ཚོལ་བ་མི་མངའ་བ་ཡིན། འདོད་ཆགས་པའི་སེམས་ཀྱིས་མི་སྨོན་པ་ཡིན། དེ་ལ་སེམས་མི་སྡུད་པ་ཡིན་ཏེ། མྱོང་བར་མི་བྱེད་དོ། །སྨོན་པར་མི་བྱེད་དོ། །དེ་དག་ཏུ་དགེ་ བའི་རྩ་བ་རྣམས་མི་གཏོང་ངོ༌། །དེ་དག་ཏུ་དགེ་བའི་རྩ་བ་རྣམས་འཇུག་པར་མི་བྱེད་དེ། སྤྱོད་པའང་རྒྱུན་གཅོད་པར་མི་བྱེད་དོ། །འོན་ཀྱང་དམིགས་པ་དེས་སངས་རྒྱས་ཀྱི་ ཆོས་སུ་འགྲུབ་པར་བྱ་བའི་ཕྱིར་ཏེ། སེམས་ཅན་རྣམས་ཀྱི་བསམ་པ་དང༌། ཚོགས་སྡུད་པར་བྱེད་ཅིང་ཆོས་ཉིད་ཀྱང་རབ་ཏུ་སྡུད་དོ། །ཆོས་དེ་ནི། ཡུལ་ནའང་མི་གནས། ཕྱོགས་ན་ཡང་མི་གནས། ནང་ན་ཡང་མ་ཡིན། ཕྱི་རོལ་ན་ཡང་མ་ཡིན། རྒྱང་རིང་པོ་ན་ཡང་མ་ཡིན། དྲུང་ན་ཡང་མ་ཡིན་ནོ། །ཞེས་དེ་འདི་སྙམ་དུ་སེམས་ཏེ། གང་དུ་ནམ་ ཡང་སྤྱད་པ་མེད་པར་བྱའོ། །སྙམ་པ་འདི་ནི། མ་འོངས་པ་གཏོང་བའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ད་ལྟར་བྱུང་བ་གཏོང་བ་གང་ཞེ་ན། ཀྱེ་རྒྱལ་བའི་སྲས་ དག །འདི་ལ་བྱང་ཆུབ་སེམས་དཔའ་རྒྱལ་པོ་ཆེན་པོ་བཞིའི་རིས་ཀྱི་ལྷ་རྣམས་དང༌། སུམ་ཅུ་རྩ་གསུམ་དང༌། མཚེ་མ་དང༌། དགའ་ལྡན་དང༌། འཕྲུལ་དགའ་དང༌། གཞན་ འཕྲུལ་དབང་བྱེད་དང༌། ཚངས་པ་དང༌། ཚངས་རིས་དང༌། ཚངས་ལྷ་ཉེ་ཕན་དང༌། ཚངས་པ་ཀུན་འཁོར་དང༌། ཚངས་ཆེན་དང༌། སྣང་བ་དང༌། འོད་ཆུང་དང༌། ཚད་མེད་སྣང་བ་དང༌། ཤིན་ཏུ་སྣང་བ་དང༌། དགེ་བ་དང༌། ཆུང་དགེ་དང༌། ཚད་མེད་དགེ་བ་དང༌། དགེ་རྒྱས་དང༌། ཆེ་བ་དང༌། ཆུང་ཆེ་དང༌། ཚད་མེད་ཆེ་བ་དང༌། འབྲས་བུ་ཆེ་བ་དང༌། མི་ཆེ་བ་དང༌། མི་ གདུང་བ་དང༌། ཤིན་ཏུ་མཐོང་བ་དང༌། གྱ་ནོམ་སྣང་བ་དང༌། འོག་མིན་གྱི་ལྷ་རྣམས་ནས་ཉན་ཐོས་ཀྱི་ཕུན་སུམ་ཚོགས་པ་དང༌། རང་སངས་རྒྱས་ཀྱི་ཕུན་སུམ་ཚོགས་ པ་དག་ཀྱང་ཉན་ཏེ། དེས་དེ་དག་ཐོས་ནས་ཀྱང་རྨོངས་པར་མི་འགྱུར། ཤིན་ཏུ་རྨོངས་པར་མི་འགྱུར། རབ་ཏུ་རྨོངས་པར་མི་འགྱུར། ཞུམ་པར་མི་འགྱུར། ཀུན་ནས་ཞུམ་པར་མི་ འགྱུར༑ རྣམ་པར་ཞུམ་པར་མི་འགྱུར། ཤིན་ཏུ་ཞུམ་པར་མི་འགྱུར། དམའ་བར་མི་འགྱུར་ཏེ། འདི་ལྟར་དེ་ནི། ཤེས་པས་འདུ་བྱེད་དུ་གཏོགས་པ་ཐམས་ཅད་རྨི་ལམ་ལྟ་བུར་ ༄༅། །མངོན་དུ་བྱེད་དོ། །དེ་འདི་སྙམ་དུ་གང་སྦྱིན་པར་བྱ་བ་འདི་ནི། སུའི་ཡང་མ་ཡིན་ནོ། །སྙམ་སྟེ། ངན་སོང་གི་ལམ་ཉེ་བར་གནས་པ་བཟློག་པར་བྱ་ བ་དང༌། སངས་རྒྱས་ཀྱི་ཆོས་ཐམས་ཅད་བསྒྲུབ་པའི་ཕྱིར་ཆོས་སྟོན་ཀྱང་བྱང་ཆུབ་སེམས་དཔའི་ལམ་མངོན་དུ་གྱུར་པའི་ཕྱིར་དེ་ལ་སེམས་རྒྱུ་བ་མེད་དེ། འདི་ནི། ད་ལྟར་བྱུང་ བ་གཏོང་བ་ཞེས་བྱའོ། །དེ་ལ་བྱང་ཆུབ་སེམས་དཔའི་ཤིན་ཏུ་གཏོང་བ་གང་ཞེ་ན། འདི་ལ་བྱང་ཆུབ་སེམས་དཔའ་སེམས་ཅན་མིག་དང་མི་ལྡན་པ་དང༌། རྣ་བ་དང་མི་ལྡན་པ་དང༌། སྣ་དང་མི་ལྡན་པ་དང༌། ལྕེ་དང་མི་ལྡན་པ་དང༌། ལུས་དང་མི་ལྡན་པ་གྲངས་མེད་པ་ཞིག་གིས་འདི་སྐད་དུ་བདག་ཅག་ལ་ཅི་མེད་པ་དེ་ཁྱོད་ཀྱིས་བྱིན་ལ། ངེད་མི་ལྡན་པ་མེད་ པར་གྱིས་ཤིག །ཁྱོད་ནི། བསྐལ་པ་གྲངས་མེད་པར་མི་ལྡན་པར་འདུག་ཅིག །ཅེས་ཟེར་ན། བྱང་ཆུབ་སེམས་དཔའ་ནི། དེ་ཐོས་མ་ཐག་ཏུ་སེམས་ཅན་དེ་དག་མི་ལྡན་པ་མེད་ པར་སྒྲུབ་སྟེ། བསྐལ་པ་གྲངས་མེད་པར་དབང་པོ་དང་མི་ལྡན་པ་དེ་ཡང་ཉམས་སུ་ལེན་ཏོ། །དེ་མའི་ལྟོ་ན་འདུག་པའི་ཚེ་ཇི་ལྟ་བུར་སྤྱོད་པ་དང༌། མེར་མེར་པོར་འདུག་པ་ཇི་ ལྟ་བུ་ཡིན་པ་དང༌། རྡོས་པར་གྱུར་པ་ཇི་ལྟ་བུ་ཡིན་པ་དང༌། མཁྲེགས་པར་གྱུར་པ་ཇི་ལྟ་བུ་ཡིན་པ་དང༌། དབང་པོ་གྲུབ་པ་ཇི་ལྟ་བུ་ཡིན་པ་དང༌། སྐྱེས་པ་ཇི་ལྟ་བུ་ཡིན་པ་དང༌། རྒ་བ་ཇི་ལྟ་བུ་ཡིན་པ་དང༌། ན་བ་ཇི་ལྟ་བུ་ཡིན་པ་དང༌། ཤི་བ་ཇི་ལྟ་བུ་ཡིན་པ་དང༌། ལུས་ཀྱི་རང་བཞིན་ཐོག་མ་དང༌། བར་མ་དང༌། ཐ་མ་ཇི་ལྟ་བ་བཞིན་དུ་ཡང་དག་པར་རབ་ཏུ་ཤེས་སོ།། ངོམ་དུ་མི་རུང་བ་དང༌། ངོ་ཚ་སྐྱེ་བ། འཕགས་པ་མ་ཡིན་པ། དྲི་མི་ཞིམ་པ། རྗེན་པའི་དྲི་ཅན། རོར་འགྱུར་བ། རུས་པ་བསགས་པ། ཤ་དང་ཁྲག་གིས་གཡོགས་པ། རྨ་དགུ་ནས་རྟག་ཏུ་ ཟག་པའོ། །ཞེས་ནས་དེ་ནི། སེམས་བསྐྱེད་པ་གཅིག་ཙམ་གྱིས་ཀྱང་དེ་དོན་དུ་གཉེར་བར་མི་སེམས་ཏེ། སེམས་བསྐྱེད་པ་གཅིག་གིས་ཀྱང་ཆགས་པ་མི་སྐྱེད་དོ། །དེ་ཤིན་ཏུ་གཏོང་བ་ དེས་འཛིན་པ་མེད་པའི་ཡིད་དང་ལྡན་པ་ཡིན་ཏེ། ལུས་འདི་ནི། དེ་ལྟར་སྙིང་པོ་མེད་པ་ཡིན་ན། བདག་གིས་ལུས་འདི་སྙིང་པོ་མེད་པར་མངོན་པར་མཐོང་བཞིན་དུ་ལུས་ལ་ཆགས་པར་ ཇི་ལྟར་བྱ། སེམས་ཅན་འདི་དག་གི་བསམ་པ་དེ་བཞིན་ཡོངས་སུ་ཚིམ་པར་བྱའོ། །ལུས་སྙིང་པོ་མེད་པ་འདིས་འགྲོ་བ་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱའོ། །འགྲོ་བ་ ཐམས་ཅད་ཀྱིས་ཀྱང་ཤེས་པར་བྱའོ། །ཡེ་ཤེས་ཀྱི་ཚོགས་གང་ཡང་རུང་བ་ལ་ཡང་མི་གནས་པའི་ཚུལ་གྱིས་གཞག་པར་བྱའོ། །ཞེས་ནས་ལུས་ཀྱི་འདུ་ཤེས་ཀྱང་མེད། སེམས་ཀྱི་འདུ་ ཤེས་ཀྱང་མེད་དེ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའི་གཏོང་བའི་གཏོར་ཏེ། དྲུག་པའོ། །ཀྱེ་རྒྱལ་བའི་སྲས་དག། དེ་ལ་བྱང་ཆུབ་སེམས་དཔའི་ཡེ་ཤེས་ཀྱི་ ༄༅། །གཏེར་གང་ཞེ་ན། འདི་ལ་བྱང་ཆུབ་སེམས་དཔའ་གཟུགས་རབ་ཏུ་ཤེས་སོ། །གཟུགས་ཀུན་འབྱུང་བ་རབ་ཏུ་ཤེས་སོ། །གཟུགས་ཀྱི་འགོག་པ་རབ་ཏུ་ཤེས་སོ། ། གཟུགས་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ཡང་དག་པ་ཇི་ལྟ་བ་ བཞིན་དུ་རབ་ཏུ་ཤེས་སོ། །རྣམ་པར་ཤེས་པའི་ཀུན་འབྱུང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །རྣམ་པར་ཤེས་པ་འགོག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ སོ༑ ༑རྣམ་པར་ཤེས་པ་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །མ་རིག་པ་རབ་ཏུ་ཤེས་སོ། །མ་རིག་པའི་ཀུན་འབྱུང་བ་རབ་ཏུ་ཤེས་སོ། །མ་རིག་ པ་འགོག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །མ་རིག་པ་འགོག་པར་འགྱུར་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །སྲེད་པ་རབ་ཏུ་ཤེས་སོ། །སྲེད་ པ་ཀུན་འབྱུང་བ་རབ་ཏུ་ཤེས་སོ། །སྲེད་པ་འགོག་པ་རབ་ཏུ་ཤེས་སོ། །སྲེད་པ་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཉན་ཐོས་རབ་ཏུ་ཤེས་སོ། ཉན་ཐོས་ཀྱི་ཆོས་རབ་ཏུ་ཤེས་སོ། །ཉན་ཐོས་ཀྱི་ཀུན་འབྱུང་བ་རབ་ཏུ་ཤེས་སོ། །ཉན་ཐོས་ཀྱི་མྱ་ངན་ལས་འདའ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །རང་སངས་ རྒྱས་རབ་ཏུ་ཤེས་སོ། །རང་སངས་རྒྱས་ཀྱི་ཆོས་རབ་ཏུ་ཤེས་སོ། །རང་སངས་རྒྱས་ཀྱི་ཀུན་འབྱུང་བ་རབ་ཏུ་ཤེས་སོ། །རང་སངས་རྒྱས་ཀྱི་ཡོངས་སུ་མྱ་ངན་ལས་འདའ་བ་ཡང་དག་པ་ཇི་ལྟ་ བཞིན་དུ་རབ་ཏུ་ཤེས་སོ། །བྱང་ཆུབ་སེམས་དཔའ་རབ་ཏུ་ཤེས་སོ། །བྱང་ཆུབ་སེམས་དཔའི་ཆོས་རབ་ཏུ་ཤེས་སོ། །བྱང་ཆུབ་སེམས་དཔའི་ཀུན་འབྱུང་བ་རབ་ཏུ་ཤེས་སོ། །བྱང་ཆུབ་སེམས་ དཔའི་ཡོངས་སུ་མྱ་ངན་ལས་འདའ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཇི་ལྟར་ཤེས་ཤེ་ན། ལས་དང༌། ལས་ཀྱི་རྣམ་པར་སྨིན་པ་དང༌། བྱ་བ་དང༌། མངོན་པར་འདུ་བྱེད་པ་ དང༌། གསོ་བ་དང༌། གསོག་དང༌། སྙིང་པོ་མེད་པ་དང༌། བདག་མེད་པར་རབ་ཏུ་ཤེས་ཏེ། ཆོས་གང་ཡང་སྙིང་པོ་ཅན་དུ་ཤེས་པ་མེད་དོ། །ཆོས་གང་ལའང་རང་བཞིན་དུ་འདོགས་པ་ མེད་དེ༑ ངོ་བོ་ཉིད་ཀྱི་མཐས་གཏུགས་པར་ཐམས་ཅད་རབ་ཏུ་ཤེས་སོ། །སེམས་ཅན་རྣམས་ལ་ཡང་དེ་བཞིན་ཉིད་ཀྱི་དོན་དུ་ཆོས་སྟོན་ཏེ། དེ་ཅི་སྟོན་ཅེ་ན། འཇིག་པ་མེད་པའི་ ཕྱིར་ཆོས་སྟོན་ཏེ། གང་འཇིག་པ་མེད་པའི་ཕྱིར་ཞེ་ན། གཟུགས་འཇིག་པ་མེད་པའི་ཕྱིར། ཚོར་བ་འཇིག་པ་མེད་པའི་ཕྱིར། འདུ་ཤེས་འཇིག་པ་མེད་པའི་ཕྱིར། འདུ་བྱེད་འཇིག་ པ་མེད་པའི་ཕྱིར། རྣམ་པར་ཤེས་པ་འཇིག་པ་མེད་པའི་ཕྱིར་ཆོས་སྟོན་ཏོ། །མ་རིག་པ་འཇིག་པ་མེད་པའི་ཕྱིར། ཉན་ཐོས་ཀྱི་ཆོས་དང༌། རང་སངས་རྒྱས་ཀྱི་ཆོས་དང༌། བྱང་ཆུབ་ ༄༅། །སེམས་དཔའི་ཆོས་འཇིག་པ་མེད་པའི་ཕྱིར་ཆོས་སྟོན་ཏོ། །དེ་ཅིའི་ཕྱིར་ཞེ་ན། ཆོས་ནི། མ་སྐྱེས་པ། འདུས་མ་བྱས་པ། བྱེད་པ་པོ་མེད་པ། རྩོད་པ་མེད་པ། གནས་པ་མེད་པ། མ་སྐྱེས་པ། མི་འབྱུང་བ། མ་བླངས་པ། ཉེ་བར་མ་བླངས་པ། བྱེད་པ་མེད་པ་སྟེ། དེ་ཤེས་རབ་ཀྱི་གཏེར་དེ་ལྟ་བུ་དང་ལྡན་པས་ལས་གྲོན་ཆུང་ངུས་ཆོས་ཐམས་ ཅད་ལ་མཁས་པ། གཞན་གྱི་དྲིང་མི་འཇོག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཤེས་རབ་ཀྱི་གཏེར་དེ་ཡང་མི་ཟད་པ་ཡིན་ཏེ། དེ་ཡང་ཤིན་ཏུ་བསྟན་པ་བཅུས་མི་ ཟད་པ་ཡིན་ནོ། །བཅུ་གང་ཞེ་ན། ཐོས་པ་ལ་མཁས་པས་མི་ཟད་དོ། །དགེ་བའི་བཤེས་གཉེན་ལ་བསྙེན་པས་མི་ཟད་དོ། །ཚིག་རབ་ཏུ་དབྱེ་བ་ལ་མཁས་པས་མི་ཟད་དོ། །ཆོས་ ཀྱི་དབྱིངས་ལ་འཇུག་པ་མངོན་པར་སྒྲུབ་པས་མི་ཟད་དོ། །རྒྱན་གཅིག་པའི་ཡེ་ཤེས་ཀྱི་རྗེས་སུ་ཞུགས་པས་མི་ཟད་དོ། །བསོད་ནམས་ཐམས་ཅད་ཤིན་ཏུ་བསགས་པས་མི་ ཟད་དོ༑ ༑སྐྱོ་བ་མེད་པ་མངོན་པར་སྒྲུབ་པས་མི་ཟད་དོ། །གཟུངས་ཐམས་ཅད་ཀྱི་སྒོར་ཞུགས་པས་མི་ཟད་དོ། །སེམས་ཅན་ཐམས་ཅད་ཀྱི་སྐད་དང་སྒྲ་དང་བརྗོད་པ་སྣ་ཚོགས་ ཀྱི་ཕྱིར་མི་ཟད་དོ། །འགྲོ་བ་ཐམས་ཅད་ཀྱི་ཡིད་གཉིས་དང༌། ནེམ་ནུར་དང༌། ཐེ་ཚོམ་ཡང་དག་པར་གཅོད་པའི་ཕྱིར་མི་ཟད་དོ། །སངས་རྒྱས་ཀྱི་རྣམ་པར་འཕྲུལ་པ་ཐམས་ཅད་ ཡོངས་སུ་བསྟན་པས་སེམས་ཅན་ཐམས་ཅད་ཉེ་བར་འཚོ་བ་དང༌། ཡོངས་སུ་སྨིན་པར་བྱ་བ་དང༌། གདུལ་བའི་སྤྱོད་པ་ཤིན་ཏུ་རྟོགས་པའི་ཕྱིར་མི་ཟད་དེ། མི་ཟད་པ་ཤིན་ཏུ་བསྟན་ པ་བཅུ་པོ་དེ་དག་གིས་ཤེས་རབ་ཀྱི་གཏེར་དེ་མི་ཟད་པ་ཡིན་ནོ། །ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་གཏེར་ཡིན་ཏེ། དེ་ལ་གནས་པའི་ བྱང་ཆུབ་སེམས་དཔའ་རྣམས་ཤེས་རབ་དང༌། ཡེ་ཤེས་བླ་ན་མེད་པ་རྣམ་པར་འཚང་རྒྱའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའ་རྣམས་ཀྱི་དྲན་པའི་གཏེར་གང་ ཞེ་ན༑ ཀྱེ་རྒྱལ་བའི་སྲས་དག། འདི་ལ་བྱང་ཆུབ་སེམས་དཔའ་དྲན་པ་དང་ལྡན་པ་ཡིན་ཏེ། དེ་ཡང་རྒྱུད་རྨོངས་པ་མེད་པའི་དྲན་པས་སྔོན་གྱི་གནས་རྗེས་སུ་དྲན་ཏེ། འདི་ལྟར་ཚེ་ གཅིག་ཀྱང་རྗེས་སུ་དྲན་ནོ། །ཚེ་གཉིས་དང༌། གསུམ་དང༌། བཞི་དང༌། ལྔ་དང༌། ཚེ་བརྒྱ་དང༌། སྟོང་དང༌། ཚེ་བརྒྱ་ཕྲག་དུ་མ་དང༌། ཚེ་སྟོང་ཕྲག་དུ་མ་དང༌། ཚེ་བརྒྱ་སྟོང་ཕྲག་དུ་ མ་དང༌། འཇིག་པའི་བསྐལ་པའམ། འདུ་བའི་བསྐལ་པའམ། འཇིག་པ་དང་འདུ་བའི་བསྐལ་པའམ། འཇིག་པའི་བསྐལ་པ་དུ་མ་དང༌། འདུ་བའི་བསྐལ་པ་དུ་མ་དང༌། འདུ་ བ་དང་འཇིག་པའི་བསྐལ་པ་དུ་མ་དང༌། བསྐལ་པ་བརྒྱ་དང༌། བསྐལ་པ་སྟོང་དང༌། བསྐལ་པ་བརྒྱ་སྟོང་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དང༌། བསྐལ་པ་བྱེ་བ་ཁྲག་ཁྲིག་ ༄༅། །བརྒྱ་སྟོང་ཚད་མེད་པ་དང༌། བསྐལ་པ་བྱེ་བ་ཁྲག་ཁྲིག་གྲངས་མེད་པ། བསམ་གྱིས་མི་ཁྱབ་པ། མཚུངས་པ་མེད་པ། ཀུན་ཏུ་མཐའ་ཡས་པ། མུ་མེད་པ། ས་མཚམས་མེད་པ། གཞལ་དུ་མེད་པ། བརྗོད་དུ་མེད་པ་གཉིས་དང༌། གསུམ་དང༌། བཞི་དང༌། ལྔ་དང༌། གཞུང་དེ་བཞིན་དུ་བརྗོད་དུ་མེད་པ་ཡང་བརྗོད་དུ་མེད་པ་དང༌། སངས་ རྒྱས་སྐྱེ་བར་ལུང་བསྟན་པ་ཤིན་ཏུ་བརྗོད་པ་གཅིག་དང༌། གཉིས་དང༌། གསུམ་དང༌། བཞི་དང༌། ལྔ་ནས་སངས་རྒྱས་སྐྱེ་བར་ལུང་བསྟན་པ་ཤིན་ཏུ་བརྗོད་དུ་མེད་པ་བརྗོད་དུ་ མེད་པའི་ཡང་བརྗོད་དུ་མེད་པ་དང༌། སངས་རྒྱས་སྐྱེ་བ་གཅིག་བསྟན་ཏེ། དེ་དང་མཚམས་སྦྱར་བའི་ལུང་བསྟན་པ་གཅིག་དང༌། གཉིས་དང༌། གསུམ་དང༌། བཞི་དང༌། ལྔ་ ནས་སངས་རྒྱས་སྐྱེ་བ་ཤིན་ཏུ་བསྟན་ཏེ། དེ་དང་མཚམས་སྦྱོར་བ་ལུང་བསྟན་པ་བརྗོད་དུ་མེད་པའི་ཡང་བརྗོད་དུ་མེད་པ་དང༌། མདོའི་སྡེ་གཅིག་དང༌། གཉིས་དང༌། གསུམ་དང༌། བཞི་དང༌། ལྔ་ནས་བརྗོད་དུ་མེད་པའི་ཡང་བརྗོད་དུ་མེད་པའི་བར་དང༌། དབྱངས་ཀྱིས་བསྙད་པའི་སྡེ་དང༌། ལུང་བསྟན་པའི་སྡེ་དང༌། ཚིགས་སུ་བཅད་པའི་སྡེ་དང༌། གླེང་ གཞིའི་སྡེ་དང༌། ཆེད་དུ་བརྗོད་པའི་སྡེ་དང༌། འདི་ལྟར་འདས་པའི་སྡེ་དང༌། སྐྱེས་པ་རབས་ཀྱི་སྡེ་དང༌། ཤིན་ཏུ་རྒྱས་པའི་སྡེ་དང༌། ཆོས་རྨད་དུ་བྱུང་བ་བསྟན་པའི་སྡེ་དང༌། མན་ངག་བསྟན་པའི་སྡེ་གཅིག་དང༌། གཉིས་དང༌། གསུམ་དང༌། བཞི་དང༌། ལྔ་ནས་བརྗོད་དུ་མེད་པའི་ཡང་བརྗོད་དུ་མེད་པའི་བར་དང༌། འཁོར་འདུས་པ་གཅིག་དང༌། ཆོས་ཀྱི་མཚམས་ སྦྱར་བ་གཅིག་ནས་ཆོས་ཀྱི་མཚམས་སྦྱར་བ་བརྗོད་དུ་མེད་པའི་ཡང་བརྗོད་དུ་མེད་པའི་བར་དང༌། དབང་པོ་སྣ་ཚོགས་གཅིག་ནས་དབང་པོ་སྣ་ཚོགས་བརྗོད་དུ་མེད་པའི་ཡང་བརྗོད་ དུ་མེད་པའི་བར་དང༌། དབང་པོ་རྣམ་པ་ཐ་དད་པ་སྣ་ཚོགས་གཅིག་ནས་དབང་པོ་ཐ་དད་པ་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དང༌། ཉོན་མོངས་པ་སྣ་ཚོགས་ གཅིག་ནས་ཉོན་མོངས་པ་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དང༌། ཏིང་ངེ་འཛིན་སྣ་ཚོགས་གཅིག་ནས་ཏིང་ངེ་འཛིན་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་ དག་ཀྱང་དྲན་པ་དག་པ། དང་བ། རྙོག་པ་མེད་པ། རྣམ་པར་གསལ་བ། རྡུལ་མེད་པ། རྡུལ་དང་བྲལ་བ། དྲི་མ་མེད་པ། འོད་གསལ་བ། སང་སང་པོ། །བསྒྲིབས་པ་མེད་པས་རྗེས་སུ་དྲན་ནོ། །བྱང་ཆུབ་ སེམས་དཔའི་དྲན་པ་དེ་ནི། འཇིག་རྟེན་གྱི་འཁྲུལ་པས་མི་འཕྲོག་པ་ཡིན། ཕས་ཀྱི་རྒོལ་བ་ཐམས་ཅད་ཀྱིས་ཉེ་བར་ཉོན་མོངས་པར་མི་ནུས་པ་ཡིན། སྔོན་གྱི་དགེ་བའི་རྩ་བ་ཤིན་ ཏུ་སྦྱངས་པ་ཡིན། འཇིག་རྟེན་གྱི་ཆོས་ཐམས་ཅད་ཀྱིས་མ་གོས་པ་ཡིན། བདུད་དང་མུ་སྟེགས་ཅན་དམིགས་པ་ལ་གནས་པ་གཞན་གྱིས་མི་ཆོད་པ་ཡིན། ཚེ་རབས་ཀུན་ཏུ་ ༄༅། །འཕོ་བའི་ལུས་ཤིན་ཏུ་བསྟན་པ་ཐམས་ཅད་ཀྱིས་བརྗོད་པར་མི་ནུས་པ་ཡིན། སྔོན་གྱི་མཐའ་དང༌། ཕྱི་མའི་མཐའ་དང༌། ད་ལྟར་བྱུང་བའི་མཐས་རྣམ་ པར་མི་ཆོད་པ་ཡིན། འཇིག་རྟེན་གྱི་ཁམས་སུ་སྐྱེ་བ་དང་གནས་པ་ཐམས་ཅད་ཀྱིས་སྐྱོན་དུ་མ་གྱུར་པ་ཡིན། སངས་རྒྱས་སྐྱེས་པའི་འཁོར་གྱི་དཀྱིལ་འཁོར་དུ་འཇུག་པ་ཤིན་ ཏུ་བསྟན་པ་ཐམས་ཅད་ཀྱིས་ཐོགས་པ་མེད་པ་ཡིན། སངས་རྒྱས་ཀྱི་ཆོས་ཐམས་ཅད་ཀྱི་རྗེས་སུ་སོང་བ་ཡིན་ཏེ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་ རྣམས་ཀྱི་དྲན་པའི་གཏེར་ཏེ། བརྒྱད་པའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའ་རྣམས་ཀྱི་རྟོགས་པའི་གཏེར་གང་ཞེ་ན། ཀྱེ་རྒྱལ་བའི་སྲས་དག །འདི་ ལ་བྱང་ཆུབ་སེམས་དཔའ་རྟོགས་པ་དང་ལྡན་པ་ཡིན་ཏེ། དེ་ཡང་ཡི་གེ་དེ་བཞིན་གཞན་མ་ཡིན་པས་མདོའི་ཚུལ་གྱི་ཆོས་སྟོན་ཏོ། །དེ་ནི། ཚེའི་རྒྱུད་གཅིག་པ་ཡང་ཡོངས་སུ་ འཛིན་ཏོ། །ཚེའི་རྒྱུད་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡོངས་སུ་འཛིན་ཏོ། །སངས་རྒྱས་ཀྱི་མཚན་གཅིག་ཀྱང་ཡོངས་སུ་འཛིན་ཏོ། །སངས་རྒྱས་ཀྱི་མཚན་ བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །བསྐལ་པ་གྲངས་མེད་པ་བསྟན་པ་གཅིག་ཀྱང་ཡོངས་སུ་འཛིན་ཏོ། །བསྐལ་པ་གྲངས་མེད་པ་ བསྟན་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །དེ་བཞིན་གཤེགས་པར་ལུང་བསྟན་པ་བརྗོད་པ་གཅིག་ཀྱང་ཡོངས་སུ་འཛིན་ཏོ། །དེ་བཞིན་གཤེགས་ པར་ལུང་བསྟན་པར་བརྗོད་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །མདོ་གཅིག་ཀྱང་ཡོངས་སུ་འཛིན་ཏོ། །མདོ་བརྗོད་དུ་མེད་པའི་ཡང་བརྗོད་དུ་མེད་ པའི་བར་དུ་ཡང་ཡོངས་སུ་འཛིན་ཏོ། །འདུས་པ་གཅིག་ཀྱང་ཡོངས་སུ་འཛིན་ཏོ། །འདུས་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །ཆོས་ཀྱི་མཚམས་ སྦྱར་བ་གཅིག་ཀྱང་ཡོངས་སུ་འཛིན་ཏོ། །ཆོས་ཀྱི་མཚམས་སྦྱར་བ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །དབང་པོ་རྣམ་པ་ཐ་དད་པ་སྣ་ཚོགས་ གཅིག་ཀྱང་ཡོངས་སུ་འཛིན་ཏོ། །དབང་པོ་རྣམ་པ་ཐ་དད་པ་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །ཉོན་མོངས་པ་སྣ་ཚོགས་གཅིག་ཀྱང་ ཡོངས་སུ་འཛིན་ཏོ། །ཉོན་མོངས་པ་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །ཏིང་ངེ་འཛིན་སྣ་ཚོགས་གཅིག་ཀྱང་ཡོངས་སུ་འཛིན་ཏོ། ། ཏིང་ངེ་འཛིན་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་ ༄༅། །པོ་རྣམས་ཀྱི་རྟོགས་པའི་གཏེར་ཏེ། མི་ཟད་པ། ཀུན་ཏུ་མཐའ་ཡས་པ། དགང་དཀའ་བ། གཏིང་རྙེད་པར་དཀའ་བ། སྒྲུབ་པར་དཀའ་བ། མི་འཕྲོག་པ། ཐུག་པ་མེད་པ། བདག་ཉིད་ཆེ་བའི་སངས་རྒྱས་ཀྱི་ཡུལ་གྱི་རྗེས་སུ་སོང་བ་སྟེ། འདི་ནི། གཏེར་དགུ་པའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའ་རྣམས་ཀྱི་བློ་ གྲོས་ཀྱི་གཏེར་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་ཡང་དག་པར་རྟོགས་པར་བྱེད་པའི་རྟོགས་པ་དང་ལྡན་ཞིང་བློ་གྲོས་དང་ལྡན་པ་ཡིན་ཏེ། མདོ་ སྡེ་ཐམས་ཅད་དང་མི་འགལ་བས་དེ་ཆོས་སྟོན་པའི་ཚེ་དངོས་པོ་ཡོངས་སུ་ལྡོག་པ་གཅིག་ཀྱང་བརྩམས་ཏེ་ཆོས་སྟོན་པ་ནས་དངོས་པོ་ཡོངས་སུ་ལྡོག་པ་བརྗོད་དུ་མེད་པའི་ཡང་ བརྗོད་དུ་མེད་པའི་བར་དུ་ཆོས་སྟོན་ཏོ། །སངས་རྒྱས་ཀྱི་མཚན་གཅིག་ནས་ཚུལ་དེ་བཞིན་དུ་བརྗོད་དུ་མེད་པའི་ཡང་བརྗོད་དུ་མེད་པའི་བར་དང༌། འཇིག་རྟེན་གྱི་ཁམས་གཅིག་ དང༌། སངས་རྒྱས་སུ་ལུང་བསྟན་པ་གཅིག་དང༌། མདོ་གཅིག་དང༌། འཁོར་འདུས་པ་གཅིག་དང༌། ཆོས་ཀྱི་མཚམས་སྦྱར་བ་གཅིག་དང༌། དབང་པོ་རྣམ་པ་ཐ་དད་པ་སྣ་ ཚོགས་གཅིག་དང༌། ཉོན་མོངས་པ་སྣ་ཚོགས་གཅིག་དང༌། ཏིང་ངེ་འཛིན་སྣ་ཚོགས་གཅིག་ཀྱང་བརྩམས་ཏེ་ཆོས་སྟོན་པ་ནས་ཏིང་ངེ་འཛིན་སྣ་ཚོགས་བརྗོད་དུ་མེད་པའི་ཡང་ བརྗོད་དུ་མེད་པའི་བར་དུ་བརྩམས་ཏེ་ཆོས་སྟོན་ཏོ། །ཉི་མ་གཅིག་ཀྱང་ཟད་པར་བྱེད་ཅིང་ཆོས་སྟོན་པ་ནས་ཟླ་བ་ཕྱེད་དང༌། ཟླ་བ་གཅིག་དང༌། ལོ་གཅིག་དང༌། ལོ་བརྒྱ་དང༌། ལོ་སྟོང་དང༌། ལོ་བརྒྱ་ཕྲག་སྟོང་དང༌། བསྐལ་པ་དང༌། བསྐལ་པ་བརྒྱ་དང༌། བསྐལ་པ་སྟོང་དང༌། བསྐལ་པ་བརྒྱ་ཕྲག་སྟོང་དང༌། བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དང༌། བསྐལ་པ་ཚད་མེད་ པ་དང༌། བསམ་གྱིས་མི་ཁྱབ་པ་དང༌། བསྐལ་པ་དཔག་ཏུ་མེད་པ་དང༌། གྲངས་མེད་པ་དང༌། མཚུངས་པ་མེད་པ་དང༌། ཀུན་ཏུ་མཐའ་ཡས་པ་དང༌། མུ་མེད་པ་དང༌། ས་མཚམས་མེད་ པ་དང༌། གཞལ་དུ་མེད་པ་དང༌། བརྗོད་དུ་མེད་པ་དག་ཀྱང་ཟད་པར་བྱེད་ཅིང་ཆོས་སྟོན་ན། ཚིག་དང་ཡི་གེ་གཅིག་བརྩམས་ཀྱང་དོན་དང༌། ཚིག་དང༌། ཡི་གེའི་མཐར་ཐུག་པ་མེད་དེ། དེ་ཅིའི་ཕྱིར་ཞེ་ན། དེ་ནི། འདི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་གཏེར་བཅུ་རབ་ཏུ་ཐོབ་པའི་ཕྱིར་ཏེ། གཏེར་དེ་དག་ཐོབ་པས་གཟུངས་ཀྱི་སྙིང་པོའི་སྒོ་ཆོས་ཐམས་ཅད་ ལ་ཡང་དག་པར་གཞོལ་བ་ཞེས་བྱ་བ། གཟུངས་བརྒྱ་སྟོང་གྲངས་མེད་པའི་འཁོར་ཅན་མངོན་དུ་གྱུར་ཏེ། དེ་གཟུངས་ཀྱི་འཁོར་བརྒྱ་སྟོང་གྲངས་མེད་པ་སྟོན་པར་བྱེད་དོ། །ཆོས་སྣང་ བ་ཤིན་ཏུ་བསྟན་པ་ཐོབ་པས་སེམས་ཅན་ཐམས་ཅད་ལ་ཆོས་སྟོན་ཏོ། །ཆོས་ཀྱི་སྒོ་སྣང་བའི་ཆོས་ཅན་ལྕེ་ཡངས་པས་འཇིག་རྟེན་གྱི་ཁམས་ཐམས་ཅད་དུ་མངོན་པར་གོ་བར་བྱེད་ ༄༅། །པ་དང༌། དབྱངས་ཀྱི་ཡན་ལག་ལ་མཁས་པས་འགྲོ་བ་ཐམས་ཅད་ཚིམ་པར་བྱེད་པ་དང༌། དབང་པོ་ཇི་ལྟ་བ་བཞིན་དུ་མགུ་བར་བྱེད་པ་དང༌། ཉོན་ མོངས་པ་དང༌། ཀུན་ནས་འཁོར་བ་ཐམས་ཅད་རྣམ་པར་བཟློག་པ་དང༌། སྒྲ་དང་ཚིག་རྣམ་པ་ཐ་དད་པ་ཐམས་ཅད་ལ་རབ་ཏུ་ཞུགས་པ་དང༌། ཡི་གེ་ཐམས་ཅད་ཀྱི་སྤོབས་པས་ སྟོན་པའི་རྗེས་སུ་སོང་བ་དང༌། སེམས་ཅན་ཐམས་ཅད་ཀྱི་ས་བོན་གྲུང་པོ་ཡོངས་སུ་ཤེས་པའི་བསམ་པ་ཅན་དུ་བྱེད་པས་ཆོས་སྟོན་ཏེ། ཐོགས་པར་མི་བྱེད་དོ། །སྐྱོ་བར་མི་འགྱུར་ རོ༑ ༑དེ་ཅིའི་ཕྱིར་ཞེ་ན། དེ་ནི། འདི་ལྟར་བྱང་ཆུབ་སེམས་དཔས་ནམ་མཁའི་ཁམས་དང༌། ཆོས་ཀྱི་དབྱིངས་མཐའ་དང་དབུས་མེད་པ་རྒྱས་པར་བྱེད་པའི་ལུས་རབ་ཏུ་ཐོབ་པའི་ཕྱིར་ ཏེ༑ ཀྱེ་རྒྱལ་པའི་སྲས་དག །འདི་ནི། བྱང་ཆུབ་སེམས་དཔའི་གཏེར་བཅུས་བློ་གྲོས་མི་ཟད་པ། ཐུག་པ་མེད་པ། འདྲེས་པ་མེད་པ། རྣམ་པར་མི་ཆོད་པ། རྒྱུན་གཅད་པར་མི་ནུས་ པ༑ ཕྱིར་མི་ལྡོག་པ། གཏིང་རྙེད་པར་དཀའ་བ། རིང་དུ་གྱུར་པ། སྒོ་ཀུན་དང་ལྡན་པ། སངས་རྒྱས་ཐམས་ཅད་ཀྱི་ཆོས་ལ་ཞུགས་པའོ། །ཀྱེ་རྒྱལ་བའི་སྲས་དག །བཅུ་པོ་དེ་དག་ ནི། བྱང་ཆུབ་སེམས་དཔའ་རྣམས་ཀྱི་གཏེར་ཏེ། མི་ཟད་པའི་རྣམ་པ་བཅུས་མི་ཟད་པ་ཡིན་ནོ། །བླ་ན་མེད་པ་ཡིན་ནོ། །མཐར་རྫོགས་པའི་སངས་རྒྱས་སུ་འགྱུར་བ་ཡིན་ནོ། ། བཅུ་གང་ཞེ་ན། སེམས་ཅན་ཐམས་ཅད་ཀྱི་ཉེ་བར་འཚོ་བ་དང༌། སྔོན་གྱི་སྨོན་ལམ་ལེགས་པར་ཡོངས་སུ་བསྔོས་པ་དང༌། བསྐལ་པ་ཐམས་ཅད་ཀྱི་གྲངས་གཅད་དུ་མེད་པ་དང༌། ནམ་ མཁའི་དབྱིངས་དང་མཉམ་པ་ཉིད་དུ་ཁོང་དུ་ཆུད་པའི་ཕྱིར་སེམས་ཚད་མེད་པ་དང༌། འདུས་བྱས་ཀྱིས་མ་གོས་པའི་ཕྱིར་འདུས་མ་བྱས་ལ་ཡོངས་སུ་བསྔོས་པ་དང༌། དེ་མ་ཐག་པའི་ཡུལ་དུ་ གྱུར་པས་ཆོས་ཐམས་ཅད་ཟད་མི་ཤེས་པ་དང༌། སྨོན་ལམ་ཆེན་པོ་ཐ་དད་པ་མེད་པ་དང༌། སྤྱོད་པ་ལ་གནས་པའི་སྟོབས་ཤིན་ཏུ་འཛིན་པ་དང༌། སངས་རྒྱས་ཐམས་ཅད་ཀྱིས་ཡོངས་ སུ་བཟུང་བ་དང༌། ཆོས་ཐམས་ཅད་སྒྱུ་མ་ལྟ་བུར་འཇུག་པ་མཐའ་དང་དབུས་མེད་པ་ལ་ཞུགས་པ་སྟེ། མི་ཟད་པའི་རྣམ་པ་བཅུ་པོ་འདི་དག་གིས་འཇིག་རྟེན་གྱི་བྱ་བ་ཐམས་ཅད་ཀྱི་མཐར་ ཕྱིན་པ་ཟད་མི་ཤེས་པའི་གཏེར་ཆེན་པོར་འགྱུར་རོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། གཏེར་མི་ཟད་པ་བཅུ་བསྟན་པའི་ལེའུ་སྟེ། ཉི་ཤུ་ བདུན་པའོ།། །།བམ་པོ་ཉི་ཤུ་དགུ་པ། དེ་ནས་སངས་རྒྱས་ཀྱི་མཐུས་ཤར་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་དང༌། དེ་བཞིན་དུ་ལྷོ་ཕྱོགས་དང༌། ནུབ་ཕྱོགས་ དང༌། བྱང་ཕྱོགས་དང༌། བྱང་ཤར་གྱི་ཕྱོགས་མཚམས་དང༌། ཤར་ལྷོའི་ཕྱོགས་མཚམས་དང༌། ལྷོ་ནུབ་ཀྱི་ཕྱོགས་མཚམས་དང༌། ནུབ་བྱང་གི་ཕྱོགས་མཚམས་དང༌། འོག་དང་ ༄༅། །སྟེང་གི་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ན་ཡང་གླིང་བཞི་པ་འདི་ལ་སོགས་པ་གླིང་རེ་རེ་ན་ཡང་དེ་བཞིན་གཤེགས་རྣམས་བཞུགས་པར་སྣང་ངོ༌། ། བྱང་ཆུབ་སེམས་དཔའ་དེ་དག་ཀྱང་དེ་བཞིན་གཤེགས་པའི་བྱིན་གྱི་རླབས་ཀྱིས་ཆོས་སྟོན་ཏོ། །དེ་བཞིན་གཤེགས་པའི་ཞབས་ཀྱི་དྲུང་ན་ཡང་འཁོད་པར་ཤེས་སོ། །བཅོམ་ ལྡན་འདས་ཀྱིས་ཀྱང་རྫུ་འཕྲུལ་མངོན་པར་འདུ་མཛད་པ་དེ་ཕྱིར་མ་བརྟུལ། བྱང་ཆུབ་ཀྱི་ཤིང་དྲུང་ཡང་ཕྱིར་མ་བརྟུལ། རི་རབ་ཀྱི་རྩེ་མོ་ཡང་ཕྱིར་མ་བརྟུལ་བར་རབ་མཚེ་མའི་ གནས་ནས་དགའ་ལྡན་གྱི་གནས་ཀྱི་ལྷའི་རྒྱལ་པོ་རབ་དགའ་ལྡན་གྱི་ཁང་པ་རིན་པོ་ཆེའི་རྒྱན་ཅེས་བྱ་བ་གང་ན་བདེར་གཤེགས་པར་སྣང་ངོ༌། །ཇི་ལྟར་གླིང་བཞི་པ་འདི་ན་བཅོམ་ ལྡན་འདས་དགའ་ལྡན་གྱི་གནས་སུ་གཤེགས་པར་སྣང་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་དག་ན་ཡང་བཅོམ་ལྡན་འདས་དགའ་ལྡན་གྱི་གནས་ སུ་གཤེགས་པར་སྣང་སྟེ། བྱིན་གྱི་རླབས་སྔ་མ་དེ་དག་ཀྱང་མ་འཁྲུག་པར་སྣང་ངོ༌། །དེ་ནས་ལྷའི་རྒྱལ་པོ་རབ་དགའ་ལྡན་གྱིས་རྒྱང་མ་ནས་བཅོམ་ལྡན་འདས་ཁང་པ་རིན་ པོ་ཆེ་ཐམས་ཅད་ཀྱིས་བརྒྱན་པར་གཤེགས་པ་མཐོང་ནས་རིངས་པའི་གཟུགས་སུ་ཁང་པ་རིན་པོ་ཆེ་ཐམས་ཅད་ཀྱིས་བརྒྱན་པའི་ནང་དུ་དེ་བཞིན་གཤེགས་པའི་སེངྒེའི་གདན་ ནོར་བུ་རིན་པོ་ཆེ་ལས་བྱས་པ། ལྷ་རྫས་ཀྱི་རིན་པོ་ཆེའི་རྒྱུ་ལས་བསྒྲུབས་པ། དགེ་བའི་རྩ་བ་ཐམས་ཅད་ཀྱི་རྒྱུ་ལས་ཡོངས་སུ་གྲུབ་པ། དེ་བཞིན་གཤེགས་པའི་བྱིན་གྱི་རླབས། ཀྱིས་བྱུང་བ། དགེ་བའི་རྩ་བ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་མང་པོས་བྱུང་བ། སངས་རྒྱས་ཐམས་ཅད་ལས་བྱུང་བའི་ཆོས་དཀར་པོ་ལས་བྱུང་བ། བསོད་ནམས་ཀྱི་ སྟོབས་མཐའ་ཡས་པ་སྣ་ཚོགས་ཐམས་ཅད་དང་ལྡན་པ། ཁ་ན་མ་ཐོ་བ་མེད་པའི་རྣམ་པར་སྨིན་པ་ཐམས་ཅད་ཀྱིས་རྣམ་པར་དག་པ། མི་མཐུན་པ་མེད་པའི་འཇིག་རྟེན་ལས་ འདས་པའི་ཆོས་ཀྱིས་བྱུང་བ། གོས་པ་མེད་པ། འགྲོ་བ་ཐམས་ཅད་དུ་བྱུང་བ། ཐུབ་པ་མེད་པ། འགྲོ་བ་ཐམས་ཅད་ཀྱིས་བལྟ་ན་སྡུག་པ། བོག་རེ་བྱེ་བ་བརྒྱ་སྟོང་ཕྲག་བཅུས་བརྒྱན་ པ༑ གསེར་གྱི་དྲ་བ་བྱེ་བ་བརྒྱ་སྟོང་ཕྲག་བཅུ་ཀུན་ཏུ་བྲེས་པ། མེ་ཏོག་གི་བླ་རེ་བྱེ་བ་བརྒྱ་སྟོང་ཕྲག་བཅུ་ཀུན་ནས་བྲེས་པ། ཕྲེང་བའི་བླ་རེ་བྱེ་བ་བརྒྱ་སྟོང་ཕྲག་བཅུ་ཀུན་ནས་ལྡིང་བ། སྤོས་ཀྱི་བླ་རེ་བྱེ་བ་བརྒྱ་སྟོང་ཕྲག་བཅུས་སྤོས་ཀུན་ཏུ་འཐུལ་བར་སྦྱར་བ། རིན་པོ་ཆེའི་བླ་རེ་བྱེ་བ་བརྒྱ་སྟོང་ཕྲག་བཅུ་སྟེང་ནས་བཀབ་པ། མེ་ཏོག་གི་གདུགས་བྱེ་བ་བརྒྱ་སྟོང་ ཕྲག་བཅུས་ཀུན་ནས་བསྒྲེངས་པ། རིན་པོ་ཆེའི་གདུགས་བྱེ་བ་བརྒྱ་སྟོང་ཕྲག་བཅུས་ཀུན་ནས་བཀབ་པ། གདན་བྱེ་བ་ཁྲག་ཁྲིག་བརྒྱ་སྟོང་མངོན་པར་བཏིང་བ། རིན་པོ་ཆེའི་པུ་ཤུ་ ༄༅། །བྱ་བ་བརྒྱ་སྟོང་ཕྲག་བཅུ་རྒྱན་དུ་བསྒྲུབས་པ། ནོར་བུའི་དྲ་བ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་རྣམ་པར་ཕྱེ་བས་གཡོགས་པར་བྱས་པ། རིན་པོ་ཆེའི་དྲ་བ་བྱེ་བ་བརྒྱ་ སྟོང་ཕྲག་བཅུས་འཁོར་ཀུན་ཏུ་གཡོགས་པ། རིན་པོ་ཆེའི་ཕྲེང་བ་འཆང་བའི་དྲ་བ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་དབྱངས་པས་བཀབ་པ། ལྷབ་ལྷུབ་ཀྱི་དྲ་བ་བྱེ་བ་བརྒྱ་སྟོང་ ཕྲག་བཅུས་ཤིན་ཏུ་ཀླུབས་ཤིང་བརྒྱན་པ། གདུགས་ཀྱི་དྲ་བ་བྱེ་བ་བརྒྱ་སྟོང་ཕྲག་བཅུས་ཀུན་ནས་ཁེབས་པར་བཀབ་པ། གོས་སྣ་ཚོགས་ཀྱི་དྲ་བ་བྱེ་བ་བརྒྱ་སྟོང་ཕྲག་བཅུས་ སྣ་ཚོགས་སུ་གཡོགས་པ། རིན་པོ་ཆེའི་པདྨོའི་དྲ་བ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་རྒྱས་པར་བཀྲམ་པ། སྤོས་རིན་པོ་ཆེའི་དྲ་བ་བྱེ་བ་བརྒྱ་སྟོང་ཕྲག་བཅུ་འཐུལ་ཞིང་ཡིད་ དུ་འོང་བར་དྲི་ཞིམ་པ། རིན་པོ་ཆེའི་བླ་རེ་ཆེན་པོའི་དྲ་བ་བྱེ་བ་བརྒྱ་སྟོང་ཕྲག་བཅུའི་རྒྱན་ཆེན་པོ་བརྒྱན་པར་བྲེས་པ། རིན་པོ་ཆེའི་དྲིལ་བུའི་རྒྱན་གྱི་བླ་རེ་བྱེ་བ་བརྒྱ་སྟོང་ཕྲག་ བཅུས་ཡིད་དུ་འོང་བའི་སྒྲ་ཕྱུང་བ། ཙནྡན་རིན་པོ་ཆེའི་མདོག་ལྟ་བུའི་བླ་རེ་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་བར་བཀབ་པ། རིན་པོ་ཆེའི་མེ་ཏོག་སྣ་ཚོགས་ཀྱི་བླ་རེ་བྱེ་ བ་བརྒྱ་སྟོང་ཕྲག་བཅུ་མེ་ཏོག་ཤིན་ཏུ་རྒྱས་པ། གོས་ཁ་དོག་མཐའ་ཡས་པའི་བླ་རེ་བྱེ་བ་བརྒྱ་སྟོང་ཕྲག་བཅུས་སྣ་ཚོགས་སུ་སྣང་བར་བཀབ་པ། བྱང་ཆུབ་སེམས་དཔའི་ བླ་རེ་བྱེ་བ་བརྒྱ་སྟོང་ཕྲག་བཅུས་སྣ་ཚོགས་སུ་ཀུན་ནས་བཀབ་པ། གདུགས་ཀྱི་བླ་རེ་ཁ་དོག་རྣམ་པ་སྣ་ཚོགས་བྱེ་བ་བརྒྱ་སྟོང་ཕྲག་བཅུས་རབ་ཏུ་གཡོགས་ཤིང་རྣམ་པ་སྣ་ཚོགས་ སུ་སྣང་བ། གསེར་གྱི་བླ་རེ་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་བར་བཀབ་ཅིང་རྣམ་པར་དག་པར་བྱས་པ། བཻ་ཌཱུཪྻའི་བླ་རེ་བྱེ་བ་བརྒྱ་སྟོང་ཕྲག་བཅུས་ལྷ་རྫས་དྲི་མ་མེད་ཅིང་ ཤིན་ཏུ་དག་པར་བྱས་པ། སྙིང་པོ་སྣ་ཚོགས་ཅན་གྱི་བླ་རེ་བྱེ་བ་བརྒྱ་སྟོང་ཕྲག་བཅུས་རྣམ་པ་སྣ་ཚོགས་ཀྱིས་བླ་རེར་བཀབ་པ། རིན་པོ་ཆེ་ཐམས་ཅད་ཀྱི་བླ་རེ་བྱེ་བ་བརྒྱ་སྟོང་ ཕྲག་བཅུའི་ནོར་བུ་རིན་པོ་ཆེ་བཟང་པོས་ཤིན་ཏུ་མཛེས་ཤིང་ཁེབས་པར་བཀབ་པ། རིན་པོ་ཆེའི་རྒྱན་བྱེ་བ་བརྒྱ་སྟོང་ཕྲག་བཅུས་ཕྱོགས་ཐམས་ཅད་བཀང་བ། རིན་པོ་ཆེའི་ གཟུགས་བརྙན་གྱི་བླ་རེ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་རྣམ་པར་ཆེ་ཞིང་མཛེས་པར་བརྒྱན་པ། རིན་པོ་ཆེའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་ཕྲེང་བ་ཀུན་ཏུ་འབྲེལ་བར་ བརྒྱན་པ། སྤོས་ཀྱི་ཕྲེང་བ་བྱེ་བ་བརྒྱ་སྟོང་ཕྲག་བཅུས་མཆོད་པ་ལ་ཚུལ་དང་མཐུན་པའི་སྤོས་ཀྱི་དྲི་ཞིམ་པར་བྱས་པ། ལྷ་ལ་མཆོག་ཏུ་བྱ་བའི་སྤོས་དང་བདུག་སྤོས་བྱེ་བ་ཁྲག་ ཁྲིག་བརྒྱ་སྟོང་ཕྲག་བཅུས་ཁ་དོག་མཐའ་ཡས་པ་དང༌། དྲི་ཞིམ་པོར་བཏུལ་བའི་མཆོད་པ་ཅན། ལྷ་ལ་མཆོག་ཏུ་བྱ་བའི་ལྷབ་ལྷུབ་ཀྱི་རྒྱུད་བྱེ་བ་བརྒྱ་སྟོང་ཕྲག་བཅུ་མངོན་ ༄༅། །པར་ཀླུབས་ཤིང་དག་པར་བྱས་པ། རིན་པོ་ཆེའི་མེ་ཏོག་གི་ཕྲེང་བ་བྱེ་བ་བརྒྱ་སྟོང་ཕྲག་བཅུས་རིན་པོ་ཆེའི་ཐམས་ཅད་ཀྱི་རྒྱུད་དུ་མཛས་པར་བྱས་པ། དཔལ་ གྱི་སྙིང་པོའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་རིན་པོ་ཆེ་སྣ་ཚོགས་སུ་བརྒྱན་པ། ནོར་བུ་རིན་པོ་ཆེ་སྣ་ཚོགས་ཀྱི་ཕྲེང་བ་བྱེ་བ་བརྒྱ་སྟོང་ཕྲག་བཅུས་རིན་པོ་ཆེ་ཐམས་ཅད་ཀྱི་རྒྱན་ དུ་རྣམ་པར་དག་པ། ནོར་བུ་རིན་པོ་ཆེ་རྒྱ་མཚོའི་རྒྱན་གྱི་ཕྲེང་བ་བྱེ་བ་བརྒྱ་སྟོང་ཕྲག་བཅུས་གདན་གྱི་སྙིང་པོ་ཤིན་ཏུ་བརྒྱན་པ། དབང་པོའི་རྡོ་རྗེ་བྱེ་བ་བརྒྱ་སྟོང་ཕྲག་བཅུས་ཤིན་ ཏུ་སྤྲས་པ། རིན་པོ་ཆེའི་སྣམ་བུ་བྱེ་བ་བརྒྱ་སྟོང་ཕྲག་བཅུ་ཀུན་ཏུ་སྦྱངས་པ། འཇིག་རྟེན་མཐའ་ཡས་པའི་དབང་པོའི་ནོར་བུ་རིན་པོ་ཆེ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བཟང་ བར་བརྒྱན་པ། གསེར་གྱི་སྙིང་པོ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བསྒྲུབས་ཤིང་དག་པར་བྱས་པ། ནོར་བུ་རིན་པོ་ཆེ་རྣམ་པར་སྣང་བ་བྱེ་བ་བརྒྱ་སྟོང་ཕྲག་བཅུས་རྡུལ་མེད་ པར་སྣང་བར་བྱས་པ། ནོར་བུ་རིན་པོ་ཆེ་བརྒྱ་བྱིན་མངོན་པར་ཆགས་པ་བྱེ་བ་བརྒྱ་སྟོང་ཕྲག་བཅུས་སྙིང་པོ་མཐའ་ཡས་པར་སྣང་བར་བརྒྱན་པ། ནོར་བུ་རིན་པོ་ཆེ་དཔའ་ པའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་ཤིན་ཏུ་འབར་བར་བསྒྲུབས་པ། ནོར་བུ་རིན་པོ་ཆེ་སྣང་བའི་འོད་ཟེར་བྱེ་བ་བརྒྱ་སྟོང་ཕྲག་བཅུས་འོད་ཟེར་སྣང་བར་བྱས་པ། ནོར་བུ་རིན་པོ་ཆེ་ལྷ་ལ་མཆོག་ཏུ་བྱ་བ་བྱེ་བ་བརྒྱ་སྟོང་ཕྲག་བཅུས་སྐར་ཁུང་གི་ཤར་བུ་མཛེས་པར་བྲེས་པ། ནོར་བུ་རིན་པོ་ཆེ་བསོད་ནམས་ཀྱིས་དག་པ་བྱེ་བ་བརྒྱ་སྟོང་ཕྲག་བཅུས་ ཁ་དོག་གསལ་བར་གྱུར་པ། དངུལ་གྱི་རྟ་བབས་བྱེ་བ་བརྒྱ་སྟོང་ཕྲག་བཅུས་བྲེས་པའི་སྙིང་པོ་དཀར་པོ་རབ་ཏུ་རྣམ་པར་ཕྱེ་བ། འགྲོ་བ་རྒྱ་མཚོའི་ཟླ་གམ་བྱེ་བ་བརྒྱ་སྟོང་ཕྲག་བཅུས་ སྦུབས་ཤིན་ཏུ་བསྒྲུབས་པ། ནོར་བུ་རིན་པོ་ཆེ་དྲི་མ་མེད་པ་བྱེ་བ་བརྒྱ་སྟོང་ཕྲག་བཅུས་བལྟ་ན་མཛེས་པར་ཤིན་ཏུ་བརྒྱན་པ། ནོར་བུ་རིན་པོ་ཆེ་སེམས་ཀྱི་རྒྱལ་པོ་བྱེ་བ་བརྒྱ་སྟོང་ཕྲག་ བཅུས་འདབ་ཆགས་ཡིད་དུ་འོང་ཞིང་དགའ་བར་ཀུན་ཏུ་བརྒྱན་པ། ནོར་བུ་རིན་པོ་ཆེ་སེངྒེའི་གདོང་བྱེ་བ་བརྒྱ་སྟོང་ཕྲག་བཅུས་ཤིན་ཏུ་སྤྲས་པའི་མཆོད་པ་དང་ལྡན་པ། ནོར་བུ་རིན་པོ་ཆེ་ འཛམ་བུའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་མཐུ་བརྟན་པར་ཤིན་ཏུ་བརྟན་པ། ནོར་བུ་རིན་པོ་ཆེ་སྙིང་པོ་དག་པ་བྱེ་བ་བརྒྱ་སྟོང་ཕྲག་བཅུས་རྣམ་པར་སྣང་ཞིང་མཛེས་པར་ བྱས་པ༑ ནོར་བུ་རིན་པོ་ཆེ་དབང་པོའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་སྣང་བའི་གདུགས་སུ་བྲེས་པ། ནོར་བུ་རིན་པོ་ཆེ་དངུལ་གྱི་སྙིང་པོ་བྱེ་བ་བརྒྱ་སྟོང་ཕྲག་བཅུས་ནང་རྣམ་ པ་སྣ་ཚོགས་སུ་བཀྲམ་པ། ནོར་བུ་རིན་པོ་ཆེ་རི་རབ་ཀྱི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་སྙིང་པོ་ཤིན་ཏུ་བརྒྱན་པ། མུ་ཏིག་གི་ཕྲེང་བ་བྱེ་བ་བརྒྱ་སྟོང་ཕྲག་བཅུས་ཁ་ ༄༅། །དོག་མཛེས་པར་བྲེས་པ། བཻ་ཌཱུཪྻའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་དྲ་བར་བྲེས་པ། མུ་ཏིག་དམར་པོའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་རྣམ་ པ་སྣ་ཚོགས་སུ་རྣམ་པར་ཕྱེ་བ། ནོར་བུ་ཡིད་དུ་འོང་བའི་ཕྲེང་བ་བྱེ་བ་བརྒྱ་སྟོང་ཕྲག་བཅུ་རྣམ་པར་སྣ་ཚོགས་སུ་བཀོད་པ། རིན་པོ་ཆེ་ཤིན་ཏུ་སྣང་བའི་ཕྲེང་བ་བྱེ་བ་བརྒྱ་སྟོང་ ཕྲག་བཅུས་ཤིན་ཏུ་རྣམ་པར་བྱེ་ཞིང་རབ་ཏུ་བཟུང་བ། རིན་པོ་ཆེ་འབྲུ་སྣ་ཚོགས་ཀྱི་ཕྲེང་བ་བྱེ་བ་བརྒྱ་སྟོང་ཕྲག་བཅུས་ལུས་ཤིན་ཏུ་བརྒྱན་པ། མུ་ཏིག་དམར་པོའི་ཕྲེང་བ་བྱེ་ བ་བརྒྱ་སྟོང་ཕྲག་བཅུས་ཡིད་དུ་འོང་བར་སྣང་བ། ནོར་བུ་རིན་པོ་ཆེ་ཁ་དོག་དུ་མའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་སྙིང་པོ་ཁ་དོག་སྣ་ཚོགས་ཤིང་ཁ་དོག་མཐའ་ཡས་པའི་ མཐར་ཕྱིན་པ། དགའ་བར་བྱེད་པའི་ཕྲེང་བ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུས་དག་པར་སྦྱངས་པ། ནོར་བུ་རིན་པོ་ཆེ་དཔལ་གྱི་འོད་ཟེར་གྱི་ཕྲེང་བ་བྱེ་བ་བརྒྱ་སྟོང་ཕྲག་ བཅུས་དཔལ་ཆེན་པོ་རབ་ཏུ་ཐོབ་པ་ཐོབ་པར་གྱུར་པ། ནོར་བུའི་གཟུགས་བྱེ་བ་བརྒྱ་སྟོང་ཕྲག་བཅུས་ཕྱོགས་ཤིན་ཏུ་སྤ་བར་བརྒྱན་པ། རིན་པོ་ཆེའི་དབང་པོའི་འཁོར་བྱེ་ བ་བརྒྱ་སྟོང་ཕྲག་བཅུ་ལ་གནས་ཡོངས་སུ་འཛིན་པ། དུས་དང་མཐུན་པའི་ཙནྡན་བྱེ་བ་བརྒྱ་སྟོང་ཕྲག་བཅུས་འཇིག་རྟེན་གྱི་ཁམས་ཐམས་ཅད་དུ་དྲི་ཞིམ་པོས་རྒྱས་པར་ བྱས་པ༑ རིམ་གྲོ་བྱེད་པའི་མིའི་ཚོགས་བྱེ་བ་བརྒྱ་སྟོང་ཕྲག་བཅུས་སངས་རྒྱས་ཀྱི་ཞིང་ཐམས་ཅད་དུ་རྗེས་སུ་སོང་བ། སྤོས་ཀྱི་ཐུམ་པོ་ཤིན་ཏུ་ཆེ་བ་བྱེ་བ་བརྒྱ་སྟོང་ཕྲག་བཅུས་ཀུན་ཏུ་ རྒྱས་པ༑ ༑གཞན་གྱིས་ཕམ་པ་མེད་པའི་སྤོས་བྱེ་བ་བརྒྱ་སྟོང་ཕྲག་བཅུའི་དྲི་ཀུན་ཏུ་རྒྱས་པ། སྤོས་ཀྱི་གཟུགས་བྱེ་བ་བརྒྱ་སྟོང་ཕྲག་བཅུའི་དྲི་ཀུན་ཏུ་འབྱུང་བ། ཡིད་དུ་འོང་བའི་སྤོས་ བྱེ་བ་བརྒྱ་སྟོང་ཕྲག་བཅུའི་དྲི་རབ་ཏུ་འབྱུང་བ། སྣང་བ་སྟོན་པའི་སྤོས་བྱེ་བ་བརྒྱ་སྟོང་ཕྲག་བཅུའི་དྲིས་འགྲོ་བ་ཀུན་ཏུ་གང་བ། དྲི་སྣ་ཚོགས་ཁ་དོག་མཐའ་ཡས་པ་བྱེ་བ་བརྒྱ་སྟོང་ ཕྲག་བཅུས་སངས་རྒྱས་ཀྱི་ཞིང་ཐམས་ཅད་དུ་ཕྱིར་མི་ལྡོག་པར་ཞིམ་པ། བྱུག་པ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བྱུགས་པ། ཙནྡན་རྣམ་པ་ཐ་དད་པའི་སྤོས་བྱེ་བ་བརྒྱ་སྟོང་ ཕྲག་བཅུས་ཚོན་དུ་བསྐུས་ཤིང་མཛེས་པ། སྤོས་རྣམ་པ་ཐ་དད་པ་བྱེ་བ་བརྒྱ་སྟོང་ཕྲག་བཅུས་དྲི་ཞིམ་པོར་ཤིན་ཏུ་བསྒོས་པ། ཨ་ག་རུ་ནག་པོ་པདྨོའི་སྙིང་པོ་བྱེ་བ་བརྒྱ་སྟོང་ ཕྲག་བཅུས་སྤྲིན་གྱི་སྙིང་པོར་བྱས་པ། བདུག་སྤོས་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བདུགས་ཤིང་ཡོག་པ། བདུག་སྤོས་ཀྱི་འོད་ཟེར་བྱེ་བ་བརྒྱ་སྟོང་ཕྲག་བཅུ་དབང་པོ་ཞི་བར་ ཞིམ་པ༑ སྤོས་ཀུན་ཏུ་རྒྱུ་བ་བྱེ་བ་བརྒྱ་སྟོང་ཕྲག་བཅུ་ཡིད་དུ་འོང་བར་ཞིམ་པ། སྤོས་ཀྱི་འོད་ཟེར་བྱེ་བ་བརྒྱ་སྟོང་ཕྲག་བཅུས་རོ་ཐམས་ཅད་དུ་བདུགས་ཤིང་དྲི་ཞིམ་པ། སྤོས་ ༄༅། །རྣམ་པར་ཚོར་བར་བྱེད་པའི་དམ་པ་བྱེ་བ་བརྒྱ་སྟོང་ཕྲག་བཅུས་དབང་པོ་མི་འཁྲུག་པར་སྤོས་ཐམས་ཅད་ཀྱིས་མཆོད་པར་བྱས་པ། སྤོས་ཀྱི་རྒྱལ་པོ་ གཞལ་དུ་མེད་པ་བྱེ་བ་བརྒྱ་སྟོང་ཕྲག་བཅུས་སྤོས་ཀྱི་གཟུགས་རྣམ་པ་སྣ་ཚོགས་སུ་ཤིན་ཏུ་བརྒྱན་པ། ལྷ་རྫས་ཀྱི་མེ་ཏོག་གི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་མངོན་ པར་འབབ་པ། ལྷ་རྫས་ཀྱི་སྤོས་ཀྱི་སྤྲིན་བྱེ་བ་བརྒྱ་སྟོང་ཕྲག་བཅུ་མངོན་པར་འབབ་པ། ལྷ་རྫས་ཀྱི་ཕྱེ་མའི་སྤྲིན་བྱེ་བ་བརྒྱ་སྟོང་ཕྲག་བཅུ་མངོན་པར་འབབ་པ། ལྷ་རྫས་ཀྱི་ པདྨོའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་མངོན་པར་འབབ་པ། ལྷ་རྫས་ཀྱི་རིན་པོ་ཆེའི་མེ་ཏོག་གི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུའི་ཆར་མངོན་པར་འབབ་པ། ལྷ་ རྫས་ཀྱི་ཨུཏྤ་ལའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཀུན་ཏུ་ཡོག་པར་འབབ་པ། ལྷ་རྫས་ཀྱི་རིན་པོ་ཆེའི་མེ་ཏོག་གི་ཆར་བྱེ་བ་བརྒྱ་སྟོང་ཕྲག་བཅུ་རབ་ཏུ་འབབ་པ། ལྷ་ རྫས་ཀྱི་མེ་ཏོག་པུཎྜ་རཱི་ཀའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཤིན་ཏུ་འབབ་པ། ལྷ་རྫས་ཀྱི་མེ་ཏོག་མནྡཱ་ར་བའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུའི་ཚོགས་ཆེན་པོ་ རབ་ཏུ་འབབ་པ། ལྷ་རྫས་ཀྱི་མེ་ཏོག་ཐམས་ཅད་ཀྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་རྒྱུན་དུ་འབབ་པ། ན་བཟའི་སྤྲིན་བྱེ་བ་བརྒྱ་སྟོང་ཕྲག་བཅུས་བར་སྣང་ཁ་དོག་སྣ་ ཚོགས་སུ་གྱུར་པ། ནོར་བུ་རིན་པོ་ཆེའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཀུན་ཏུ་སྣང་བར་འབབ་པ། གདུགས་ཀྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཀུན་ནས་ཡོག་པར་འབབ་ པ༑ བ་དན་གྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཁ་དོག་སྣ་ཚོགས་དུ་མར་འབབ་པ། ལྷ་རྫས་ཀྱི་ཅོད་པན་གྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་སྣ་ཚོགས་སུ་འབབ་པ། ལྷབ་ལྷུབ་ ཀྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཤིན་ཏུ་ཀླུབས་པར་འབབ་པ། ལྷ་རྫས་ཀྱི་རིན་པོ་ཆེའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཁ་དོག་སྣ་ཚོགས་སུ་འབབ་པ། ལྷ་རྫས་ཀྱི་རིན་ པོ་ཆེའི་སེན་མོ་དོའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་རྒྱན་ཆེན་པོར་འབབ་པ། ལྷ་རྫས་ཀྱི་ཙནྡན་གྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཙནྡན་རྣམ་པ་སྣ་ཚོགས་ཀྱི་ཁ་དོག་ དུ་མར་འབབ་པ། ལྷ་རྫས་ཀྱི་ཨ་ག་རུ་དང༌། ཙནྡན་གྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཤིན་ཏུ་ཡོག་པར་འཐུལ་ཞིང་འབབ་པ། རིན་པོ་ཆེའི་རྒྱལ་མཚན་བྱེ་བ་བརྒྱ་སྟོང་ ཕྲག་བཅུ་ཤིན་ཏུ་བསྒྲེངས་པ། རིན་པོ་ཆེའི་བ་དན་བྱེ་བ་བརྒྱ་སྟོང་ཕྲག་བཅུ་ཤིན་ཏུ་དབྱངས་པ། སྣམ་བུ་རིན་པོ་ཆེའི་ལྡ་ལྡི་བྱེ་བ་བརྒྱ་སྟོང་ཕྲག་བཅུ་ཤིན་ཏུ་བྲེས་པ། སྤོས་ཀྱི་ སྣོད་བྱེ་བ་བརྒྱ་སྟོང་ཕྲག་བཅུ་ནས་ཤིན་ཏུ་འཐུལ་བ། རིན་པོ་ཆེའི་ཕྲེང་བའི་ཆུན་པོ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་དབྱངས་པ། རིན་པོ་ཆེའི་སིལ་སྙན་བྱེ་བ་བརྒྱ་སྟོང་ཕྲག་བཅུ་ ༄༅། །ཤིན་ཏུ་འཁྲོལ་ཞིང་འཛིན་པ། ལྷ་རྫས་ཀྱི་རྡུལ་ཡབ་བྱེ་བ་བརྒྱ་སྟོང་ཕྲག་བཅུ་རྣམ་པར་རློབ་ཅིང་འཛིན་པ། རིན་པོ་ཆེའི་དྲིལ་བུའི་དྲ་བ་བྱེ་བ་བརྒྱ་སྟོང་ ཕྲག་བཅུ་ཤིན་ཏུ་འཁྲོལ་བ། རིན་པོ་ཆེའི་སྟེགས་བུ་བྱེ་བ་བརྒྱ་སྟོང་ཕྲག་བཅུས་ཀུན་ནས་བསྐོར་བ། རིན་པོ་ཆེའི་ཤིང་ཏ་ལའི་ཕྲེང་བ་བྱེ་བ་བརྒྱ་སྟོང་ཕྲག་བཅུ་ཀུན་ནས་འགྲེང་བ། རིན་པོ་ཆེའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་ལྡ་ལྡིར་བརྒྱན་པ། རིན་པོ་ཆེའི་ཤིང་བྱེ་བ་བརྒྱ་སྟོང་ཕྲག་བཅུས་ཀུན་ནས་ཡོག་ཅིང་འཁོར་བ། ཁང་པ་བརྩེགས་པ་རིན་པོ་ཆེའི་ རྒྱན་ཅན་བྱེ་བ་བརྒྱ་སྟོང་ཕྲག་བཅུས་ནང་གི་རྒྱན་དུ་དཀྲིགས་པ། རིན་པོ་ཆེའི་ཁང་བུ་བྱེ་བ་བརྒྱ་སྟོང་གི་སྒོ་ལ་རིན་པོ་ཆེ་ཐམས་ཅད་ཀྱི་ཕྲེང་བ་བཀྱེ་བ། གསེར་གྱི་དྲིལ་བུ་བྱེ་བ་ བརྒྱ་སྟོང་ཕྲག་བཅུ་འཁྲོལ་བའི་སྒྲ་ཡིད་དུ་འོང་བར་འབྱུང་བ། དཔལ་གྱི་བེའུ་བྱེ་བ་བརྒྱ་སྟོང་ཕྲག་བཅུའི་ཕྲེང་བ་རབ་ཏུ་དབྱངས་པས་ཡོངས་སུ་དག་པ། རིན་པོ་ཆེའི་བཀྲ་ ཤིས་བྱེ་བ་བརྒྱ་སྟོང་ཕྲག་བཅུའི་མཚན་བཟང་པོ་བྱུང་བ། གསེར་གྱི་དམ་པ་བྱེ་བ་བརྒྱ་སྟོང་ཕྲག་བཅུའི་གསེར་གྱི་ལྕག་བོད་ཀྱིས་ཀུན་ཏུ་བལྟས་པ། རིན་པོ་ཆེའི་གདུགས་ གཅིག་ནས་གཅིག་ཏུ་བརྒྱུད་པ་བྱེ་བ་བརྒྱ་སྟོང་ཕྲག་བཅུ་རིན་པོ་ཆེ་ཐམས་ཅད་ཀྱི་ཡུ་བས་བཟུང་བ། རིན་པོ་ཆེའི་རྒྱན་བྱེ་བ་བརྒྱ་སྟོང་ཕྲག་བཅུས་རིན་པོ་ཆེའི་རྒྱན་གྱི་དྲ་བ་ ཐམས་ཅད་དུ་རྣམ་པར་བྲེས་པ། རིན་པོ་ཆེའི་འོད་ཟེར་བྱེ་བ་བརྒྱ་སྟོང་ཕྲག་བཅུ་འོད་ཟེར་སྣ་ཚོགས་སུ་རབ་ཏུ་འཕྲོ་བ། སྣང་བ་བྱེ་བ་བརྒྱ་སྟོང་ཕྲག་བཅུས་ཀུན་ཏུ་སྣང་བར་བྱེད་པ། འོད་ བྱེ་བ་བརྒྱ་སྟོང་ཕྲག་བཅུ་རབ་ཏུ་འཚེར་བ། ཉི་མའི་དཀྱིལ་འཁོར་གྱི་སྙིང་པོ་བྱེ་བ་བརྒྱ་སྟོང་ཕྲག་བཅུས་གཟུགས་རབ་ཏུ་མཛེས་ཤིང་ལུས་ཤིན་ཏུ་འཕགས་པ། ཟླ་བའི་དཀྱིལ་འཁོར་བྱེ་ བ་བརྒྱ་སྟོང་ཕྲག་བཅུས་ཁ་དོག་དུ་མར་བསྒྲུབས་པ། སྤོས་ཀྱི་འོད་ཟེར་བྱེ་བ་བརྒྱ་སྟོང་ཕྲག་བཅུ་རབ་རིབ་མེད་པར་སྣང་བ། ལྷ་རྫས་ཀྱི་པདྨོའི་དམ་པ་བྱེ་བ་བརྒྱ་སྟོང་ཕྲག་བཅུས་རབ་ ཏུ་བསྒྲུབས་ཤིང་སྙིང་པོ་ཤིན་ཏུ་འཕགས་པ། རིན་པོ་ཆེའི་དྲ་བ་བྱེ་བ་བརྒྱ་སྟོང་ཕྲག་བཅུས་སྙིང་པོ་ཀུན་ནས་ཡོག་པར་བྱས་པ། མེ་ཏོག་གི་དྲ་བ་བྱེ་བ་བརྒྱ་སྟོང་ཕྲག་བཅུ་ཀུན་ནས་རྒྱས་ པར་བཀྲམ་པ། སྤོས་ཀྱི་དྲ་བ་བྱེ་བ་བརྒྱ་སྟོང་ཕྲག་བཅུའི་དྲི་སྣ་ཚོགས་ཀྱིས་ཀུན་ནས་ཡོག་པ། ལྷ་རྫས་ཀྱི་གདན་རིན་པོ་ཆེ་བྱེ་བ་བརྒྱ་སྟོང་ཕྲག་བཅུ་མཛེས་པར་བཏིང་བ། ལྷ་རྫས་ ཀྱི་གོས་རིན་པོ་ཆེ་བྱེ་བ་བརྒྱ་སྟོང་ཕྲག་བཅུས་མཛེས་པར་བཀྲམ་པ། ལྷ་རྫས་ཀྱི་གོས་ཁ་དོག་སྔོན་པོ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་བརྒྱན་པར་བཏིང་བ། ལྷ་རྫས་ཀྱི་གོས་ ཁ་དོག་སེར་བོ་བྱེ་བ་བརྒྱ་སྟོང་ཕྲག་བཅུ་རྒྱན་ཆེན་པོར་བཏིང་བ། ལྷ་རྫས་ཀྱི་གོས་ཁ་དོག་དམར་པོ་བྱེ་བ་བརྒྱ་སྟོང་ཕྲག་བཅུ་ལྷའི་དགའ་བར་བཏིང་བ། ལྷ་རྫས་ཀྱི་གོས་ཁ་དོག་ ༄༅། །སྣ་ཚོགས་བྱེ་བ་བརྒྱ་སྟོང་ཕྲག་བཅུ་གོས་ཀྱི་རྒྱན་དུ་བཏིང་བ། ལྷ་རྫས་ཀྱི་རིན་པོ་ཆེ་སྣ་ཚོགས་ཀྱི་གོས་རྣམ་པ་སྣ་ཚོགས་བྱེ་བ་བརྒྱ་སྟོང་ཕྲག་བཅུ་ཁ་དོག་ ལེགས་པར་བཏིང་བ། སྤོས་སྣ་ཚོགས་ཀྱིས་ཡོངས་སུ་བསྒོས་པའི་གོས་བྱེ་བ་བརྒྱ་སྟོང་ཕྲག་བཅུ་གོས་བཟང་པོར་བཏིང་བ། རིན་པོ་ཆེ་རྨད་དུ་བྱུང་བ་ཐམས་ཅད་ཀྱི་གོས་བྱེ་ བ་བརྒྱ་སྟོང་ཕྲག་བཅུས་ཡིད་དུ་འོང་བའི་རྒྱན་དུ་བཏིང་བ། གོས་དཀར་པོ་སྣ་ཚོགས་བྱེ་བ་བརྒྱ་སྟོང་ཕྲག་བཅུས་བླ་གབ་ཏུ་བཀབ་པ། ལྷ་རྫས་ཀྱི་དྲིལ་བུའི་རྒྱལ་མཚན་བྱེ་བ་ བརྒྱ་སྟོང་ཕྲག་བཅུས་ཡིད་དུ་འོང་བའི་སྒྲ་ཕྱུང་བ། གསེར་གྱི་དྲ་བའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུ་སྒྲ་ཤིན་ཏུ་འབྱིན་ཅིང་ཡོངས་སུ་བཟུང་བ། ལྷ་རྫས་ཀྱི་སྣམ་བུ་ རིན་པོ་ཆེའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་རྒྱལ་མཚན་གྱི་དྲ་བའི་རྒྱན་དུ་བརྒྱན་པ། སྤོས་ཀྱི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་སྤོས་ཀྱི་དྲ་བ་ཐམས་ཅད་ཀྱི་ རྒྱན་རྣམ་པར་དག་པ། ལྷ་རྫས་ཀྱི་མེ་ཏོག་གི་རྒྱལ་མཚན་བྱེ་བ་བརྒྱ་སྟོང་ཕྲག་བཅུ་མེ་ཏོག་ཐམས་ཅད་ཀྱི་ཆར་དུ་འབབ་པ། ལྷ་རྫས་ཀྱི་གོས་ཀྱི་རྒྱལ་མཚན་བྱེ་བ་བརྒྱ་ སྟོང་ཕྲག་བཅུས་གོས་ཐམས་ཅད་དུ་བསྐྱོད་པ། ལྷ་རྫས་ཀྱི་ནོར་བུ་རིན་པོ་ཆེའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་མཛེས་པ་ཐམས་ཅད་ཀྱི་རྒྱལ་མཚན་དང་ལྡན་པར་ བྱས་པ༑ ལྷ་རྫས་ཀྱི་ལྷབ་ལྷུབ་ཀྱི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་ལྷབ་ལྷུབ་ཐམས་ཅད་ཀྱི་རྒྱལ་མཚན་རྣམ་པ་སྣ་ཚོགས་སུ་གྱུར་པ། ལྷ་རྫས་ཀྱི་ཕྲེང་བའི་རྒྱལ་མཚན་བྱེ་བ་ བརྒྱ་སྟོང་ཕྲག་བཅུ་ཕྱོགས་ཀུན་ནས་འགྲེང་བ། ལྷ་རྫས་ཀྱི་གདུགས་ཀྱི་རྒྱལ་མཚན་བྱེ་བ་བརྒྱ་སྟོང་ཕྲག་བཅུ་དྲིལ་བུ་ཐམས་ཅད་འཁྲོལ་བས་ཡིད་དུ་འོང་ཞིང་དགའ་བའི་སྒྲ་ཕྱུང་ བ༑ ལྷ་རྫས་ཀྱི་དུང་བྱེ་བ་བརྒྱ་སྟོང་ཕྲག་བཅུའི་སྒྲ་སྙན་པ་ཕྱུང་བ། ལྷ་རྫས་ཀྱི་རྔ་བྱེ་བ་བརྒྱ་སྟོང་ཕྲག་བཅུས་རྔ་ཆེན་པོའི་སྒྲ་ཤིན་ཏུ་ཕྱུང་བ། ལྷ་རྫས་ཀྱི་པི་ཝང་བྱེ་བ་བརྒྱ་སྟོང་ ཕྲག་བཅུས་ཡིད་དུ་འོང་ཞིང་འབྲེལ་བའི་སྒྲ་ཕྱུང་བ། ལྷ་རྫས་ཀྱི་ཁ་སྦྱར་བྱེ་བ་བརྒྱ་སྟོང་ཕྲག་བཅུས་དབྱངས་ཆེན་པོར་སྒྲ་བསྒྲགས་པ། ལྷ་རྫས་ཀྱི་སིལ་སྙན་བྱེ་བ་བརྒྱ་སྟོང་ཕྲག་ བཅུ་གླུ་དང་རོལ་མོར་སྦྱར་བ་དང་ལྡན་པ། ལྷ་རྫས་ཀྱི་རོལ་མོ་དབྱངས་ཀྱི་དམ་པ་བྱེ་བ་བརྒྱ་སྟོང་ཕྲག་བཅུའི་སྒྲ་ཡིད་དུ་འོང་བས་སངས་རྒྱས་ཀྱི་ཞིང་ཐམས་ཅད་དུ་མངོན་པར་ གྲགས་པར་བྱས་པ། སྤྲུལ་པའི་རོལ་མོ་བྱེ་བ་བརྒྱ་སྟོང་ཕྲག་བཅུས་འཇིག་རྟེན་གྱི་ཁམས་ཐམས་ཅད་སྒྲ་བརྙན་གྱི་ཚོགས་ལྟ་བུར་ཤེས་པར་བྱས་པ། ལྷ་རྫས་ཀྱི་རྔ་བོ་ཆེ་ བྱེ་བ་བརྒྱ་སྟོང་ཕྲག་བཅུ་ཤིན་ཏུ་བརྡུངས་པའི་སྒྲ་ཕྱུང་བ། ཡིད་ཀྱི་རང་བཞིན་གྱི་ལྷ་རྫས་ཀྱི་རོལ་མོ་བྱེ་བ་བརྒྱ་སྟོང་ཕྲག་བཅུས་རོལ་མོའི་སྒྲ་ཡིད་དུ་འོང་བ་དང་གླུའི་དབྱངས་ ༄༅། །སྙན་པ་ཕྱུང་བ། ལྷ་རྫས་ཀྱི་རོལ་མོར་གཏོགས་པ་སྣ་ཚོགས་བྱེ་བ་བརྒྱ་སྟོང་ཕྲག་བཅུས་ཡིད་དགའ་བ་དང་ཞི་བའི་སྒྲ་ཕྱུང་བ། ཚིག་གི་རིམ་པ་ཡིད་དུ་ འོང་བ་བྱེ་བ་བརྒྱ་སྟོང་ཕྲག་བཅུས་བསྟོད་ཅིང་མཆོད་པ། བསྟོད་པ་རྒྱ་ཆེན་པོ་བྱེ་བ་བརྒྱ་སྟོང་ཕྲག་བཅུས་དགའ་བར་བསྟོད་ཅིང་མཆོད་པ། ཟབ་མོར་བསྟོད་པ་བྱེ་བ་བརྒྱ་སྟོང་ ཕྲག་བཅུ་ཤིན་ཏུ་བསྒོམས་ཤིང་བསྟོད་པ། བསྟོད་པ་སྣ་ཚོགས་བྱེ་བ་བརྒྱ་སྟོང་ཕྲག་བཅུས་ལས་ཐམས་ཅད་ཀྱི་རྣམ་པར་སྨིན་པ་ལས་ཡོངས་སུ་བྱུང་བར་བསྟོད་པ། ཕྲ་བར་ བསྟོད་པ་བྱེ་བ་བརྒྱ་སྟོང་ཕྲག་བཅུས་ཡང་དག་པ་ཇི་ལྟ་བ་བཞིན་དུ་བསྟོད་པ། སྔོན་གྱི་སྤྱོད་པས་བསྟོད་པ་བྱེ་བ་བརྒྱ་སྟོང་ཕྲག་བཅུ་མངོན་པར་བརྗོད་དེ་འདས་པས་བསྟོད་པ། དགེ་བའི་བསྟོད་པ་བྱེ་བ་བརྒྱ་སྟོང་ཕྲག་བཅུས་བརྟན་ཅིང་བསྟོད་པ། སྔོན་གྱི་སངས་རྒྱས་བསྙེན་བཀུར་བའི་བསྟོད་པ་བྱེ་བ་བརྒྱ་སྟོང་ཕྲག་བཅུས་རྣམ་པར་དག་པར་བསྟོད་པ། ཆོས་ཀྱི་སྒོའི་བསྟོད་པ་བྱེ་བ་བརྒྱ་སྟོང་ཕྲག་བཅུས་མངོན་པར་བྱུང་བར་བསྟོད་ཅིང་འཇིགས་པ་མེད་པར་བསྟོད་པ། བསྟོད་པ་རྣམ་པ་ཐ་དད་པ་བྱེ་བ་བརྒྱ་སྟོང་ཕྲག་བཅུས་བྱང་ཆུབ་ སེམས་དཔའ་ཐམས་ཅད་ཀྱིས་མི་ཟད་པར་བརྗོད་ཅིང་བསྔགས་ཏེ་བསྟོད་པ། བྱང་ཆུབ་སེམས་དཔའི་སའི་གླུ་བྱེ་བ་བརྒྱ་སྟོང་ཕྲག་བཅུས་བྱང་ཆུབ་སེམས་དཔའི་ས་ཐམས་ཅད་གླུར་ བརྗོད་ཅིང་སྦྱར་བ། སངས་རྒྱས་ཀྱི་ཡོན་ཏན་བྱེ་བ་བརྒྱ་སྟོང་ཕྲག་བཅུས་ཐོགས་པ་མེད་པར་བསྟོད་པ། སངས་རྒྱས་མཐོང་བའི་གླུ་བྱེ་བ་བརྒྱ་སྟོང་ཕྲག་བཅུ་གླུའི་དབྱངས་སུ་བླངས་པ། ཆོས་ཟབ་མོའི་གླུ་བྱེ་བ་བརྒྱ་སྟོང་ཕྲག་བཅུས་ཐོགས་པ་མེད་པར་ཆོས་ཀྱི་སྣང་བ་ཐམས་ཅད་གླུ་བླངས་ཏེ་སྦྱར་བ། དབྱངས་རྒྱ་ཆེན་པོའི་གླུ་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་བའི་ སྒྲར་སངས་རྒྱས་ཀྱི་ཞིང་ཐམས་ཅད་དུ་བསྒྲགས་པ། སེམས་དང་བསམ་པ་བྱེ་བ་བརྒྱ་སྟོང་ཕྲག་བཅུ་ཐོགས་པ་མེད་པར་གླུར་བླངས་ཤིང་རྣ་བ་དང་བར་བྱས་པ། ཁམས་གསུམ་དུ་ གཏོགས་པའི་གླུ་བྱེ་བ་བརྒྱ་སྟོང་ཕྲག་བཅུས་ཆོས་ཐམས་ཅད་ཀྱི་རང་བཞིན་རྣམ་པར་བསྟན་པ། དགའ་བར་བྱེད་པའི་གླུ་བྱེ་བ་བརྒྱ་སྟོང་ཕྲག་བཅུ་ཐོགས་པ་མེད་པས་དད་པ་དང་ རིམ་གྲོ་རབ་ཏུ་བསྐྱེད་པ། སངས་རྒྱས་ཀྱི་སྤྱོད་ཡུལ་གྱི་གླུ་བྱེ་བ་བརྒྱ་སྟོང་ཕྲག་བཅུས་ཆོས་ཀྱི་དོན་ཐམས་ཅད་གསལ་བར་བརྗོད་ཅིང་སྒྲ་ཕྱུང་བ། གཟུངས་ཀྱི་གླུ་བྱེ་བ་བརྒྱ་སྟོང་ ཕྲག་བཅུས་ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་ལ་མཁས་པ་དང༌། དེ་བཞིན་གཤེགས་པ་ཐམས་ཅད་ཀྱི་གསུང་གི་ལྡེམ་པོ་དག་རབ་ཏུ་རྟོགས་པར་རྣམ་པར་སྟོན་པ། ཆོས་ ཐམས་ཅད་ཀྱི་གླུ་བྱེ་བ་བརྒྱ་སྟོང་ཕྲག་བཅུས་ཆོས་ཐམས་ཅད་ཀྱི་གླུ་དང༌། རོལ་མོ་དང༌། སིལ་སྙན་གྱི་སྒྲ་ཕྱུང་བ་དང་ལྡན་པ། བྱང་ཆུབ་སེམས་དཔའ་སེམས་དང་པོ་བསྐྱེད་པ་བྱེ་ ༄༅། །བ་བརྒྱ་སྟོང་ཕྲག་བཅུ་ལ་ཐམས་ཅད་མཁྱེན་པའི་སེམས་ཀྱི་སྟོབས་དང་ཤུགས་མཐོང་མ་ཐག་ཏུ་སྐྱེ་བར་བྱེད་པ། བྱང་ཆུབ་སེམས་དཔའ་ལས་ དང་པོ་པ་བྱེ་བ་བརྒྱ་སྟོང་ཕྲག་བཅུའི་སེམས་དགའ་ཞིང་མོས་པར་བྱེད་པ། བྱང་ཆུབ་སེམས་དཔའ་རྣལ་འབྱོར་ལ་སྤྱོད་པ་བྱེ་བ་བརྒྱ་སྟོང་ཕྲག་བཅུའི་མོས་པ་རྣམ་པར་སྦྱོང་ བ༑ བྱང་ཆུབ་སེམས་དཔའ་ཆེར་སྐྱེས་པ་བྱེ་བ་བརྒྱ་སྟོང་ཕྲག་བཅུའི་ཐེག་པ་ཆེན་པོ་བརྩམས་པ་རྒྱ་ཆེར་བྱེད་པ། བྱང་ཆུབ་སེམས་དཔའ་སྦྱོར་བ་དང་ལྡན་པ་བྱེ་བ་བརྒྱ་ སྟོང་ཕྲག་བཅུའི་ཐེག་པ་ཆེན་པོ་བརྩམས་པ་ཡོངས་སུ་རྒྱས་པར་བྱེད་པ། བྱང་ཆུབ་སེམས་དཔའ་བསམ་པ་དང་ལྡན་པ་བྱེ་བ་བརྒྱ་སྟོང་ཕྲག་བཅུའི་བྱང་ཆུབ་སེམས་དཔའི་ སྤྱོད་པ་ཐམས་ཅད་ཤིན་ཏུ་སྦྱོང་བ། བྱང་ཆུབ་སེམས་དཔའ་ཕྱིར་མི་ལྡོག་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་བྱང་ཆུབ་སེམས་དཔའི་ས་ཐམས་ཅད་རྣམ་པར་སྦྱོང་བ། བྱང་ཆུབ་སེམས་དཔའ་གཞོན་ནུར་གྱུར་པ་བྱེ་བ་བརྒྱ་སྟོང་ཕྲག་བཅུའི་བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་སྣང་བར་བྱེད་པ། བྱང་ཆུབ་སེམས་དཔའ་རྒྱལ་ཚབ་ བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་ལ་འཇུག་པར་བྱེད་པ། བྱང་ཆུབ་སེམས་དཔའ་དབང་བསྐུར་བ་བྱེ་བ་ཁྲག་ཁྲིག་བརྒྱ་སྟོང་ ཕྲག་བཅུ་དེ་བཞིན་གཤེགས་པའི་སྟོབས་གཞལ་དུ་མེད་པ་སྟོན་པ། བྱང་ཆུབ་སེམས་དཔའི་རྫུ་འཕྲུལ་བྱེ་བ་ཁྲག་ཁྲིག་བརྒྱ་སྟོང་ཐོབ་པར་རྣམ་པར་འཕྲུལ་བ། བྱང་ཆུབ་སེམས་ དཔའི་མོས་པ་བྱེ་བ་བརྒྱ་སྟོང་ཕྲག་བཅུ་སྒྲུབ་ཅིང་སྦྱོང་པ། བྱང་ཆུབ་སེམས་དཔའི་དགའ་བ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་སྐྱེས་པ། བྱང་ཆུབ་སེམས་དཔའི་དད་པ་བྱེ་བ་བརྒྱ་སྟོང་ ཕྲག་བཅུ་མི་ཤིགས་པར་རབ་ཏུ་གཞོག་པ། བྱང་ཆུབ་སེམས་དཔའི་ཤུགས་བྱེ་བ་བརྒྱ་སྟོང་ཕྲག་བཅུ་རྣམ་པར་འཕེལ་བར་བྱེད་པ། བྱང་ཆུབ་སེམས་དཔའི་རབ་ཏུ་དགའ་བ་བྱེ་བ་ བརྒྱ་སྟོང་ཕྲག་བཅུའི་ཆོས་ཀྱི་གྲགས་པ་རྣམ་པར་འཕེལ་བར་བྱེད་པ། བྱང་ཆུབ་སེམས་དཔའི་ཆོས་ཀྱི་དོན་བྱེ་བ་བརྒྱ་སྟོང་ཕྲག་བཅུའི་ཡེ་ཤེས་གདོན་མི་ཟ་བ་ངེས་པར་སྟོན་པ། བྱང་ཆུབ་སེམས་དཔའི་དྲན་པ་བྱེ་བ་བརྒྱ་སྟོང་ཕྲག་བཅུ་འཁྲུག་པ་མེད་པར་སྦྱོང་བ། བྱང་ཆུབ་སེམས་དཔའི་བློ་གྲོས་བྱེ་བ་བརྒྱ་སྟོང་ཕྲག་བཅུའི་ཡེ་ཤེས་གདོན་མི་ཟ་བ་སྐྱེད་པ། བྱང་ཆུབ་སེམས་དཔའི་རིགས་བྱེ་བ་བརྒྱ་སྟོང་ཕྲག་བཅུ་ལ་སངས་རྒྱས་ཀྱི་ཆོས་ཐམས་ཅད་འཛིན་པར་བྱིན་གྱིས་རློབ་པ། བྱང་ཆུབ་སེམས་དཔའི་བློ་གྲོས་བྱེ་བ་བརྒྱ་སྟོང་ཕྲག་ བཅུ་ཡངས་པའི་བློ་ཚད་མེད་པར་སྟོན་པ། བྱང་ཆུབ་སེམས་དཔའི་དད་པ་བྱེ་བ་བརྒྱ་སྟོང་ཕྲག་བཅུ་རྩ་བ་བརྟན་པར་བྱེད་པ། བྱང་ཆུབ་སེམས་དཔའི་གཏོང་བ་བྱེ་བ་བརྒྱ་ ༄༅། །སྟོང་ཕྲག་བཅུ་གཏོང་བ་ཐམས་ཅད་སྦྱིན་པས་རྣམ་པར་སྦྱོང་བ། བྱང་ཆུབ་སེམས་དཔའི་ཚུལ་ཁྲིམས་བྱེ་བ་བརྒྱ་སྟོང་ཕྲག་བཅུ་ཚད་མེད་པའི་ཚུལ་ཁྲིམས་ ཀྱི་ཕ་རོལ་ཏུ་ཕྱིན་པར་སྒྲུབ་པ། བྱང་ཆུབ་སེམས་དཔའི་བཟོད་པ་བྱེ་བ་བརྒྱ་སྟོང་ཕྲག་བཅུ་སེམས་འཁྲུག་པ་མེད་པས་སངས་རྒྱས་ཀྱི་ཆོས་ཐམས་ཅད་ལ་བཟོད་པར་འཇུག་པ། བྱང་ཆུབ་སེམས་དཔའི་བརྩོན་འགྲུས་བྱེ་བ་བརྒྱ་སྟོང་ཕྲག་བཅུ་མཐའ་ཡས་པའི་བརྩོན་འགྲུས་སུ་འབྱུང་བར་བྱེད་པ། བྱང་ཆུབ་སེམས་དཔའི་བསམ་གཏན་བྱེ་བ་བརྒྱ་སྟོང་ ཕྲག་བཅུ་ཚད་མེད་པའི་བསམ་གཏན་རྟོགས་པའི་སྣང་བར་བྱེད་པ། བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་སྒྲུབ་པ་བྱེ་བ་བརྒྱ་སྟོང་ཕྲག་བཅུ་ཤིན་ ཏུ་སྣང་ཞིང་ཤེས་པར་བྱེད་པ། བྱང་ཆུབ་སེམས་དཔའི་སྨོན་ལམ་བྱེ་བ་བརྒྱ་སྟོང་ཕྲག་བཅུའི་འབྱུང་བ་རྣམ་པར་སྦྱོང་བ། བྱང་ཆུབ་སེམས་དཔའི་ཆོས་ཀྱི་སྒོ་བྱེ་བ་བརྒྱ་ སྟོང་ཕྲག་བཅུའི་ཡེ་ཤེས་སྣང་བ་གསལ་བར་བྱེད་པ། ཕྱོགས་བཅུའི་སངས་རྒྱས་འབྱམས་ཀླས་པ་བྱེ་བ་བརྒྱ་སྟོང་ཕྲག་བཅུའི་ཆོས་ཀྱི་སྒོ་སྣང་བ་བྱིན་གྱིས་རློབ་པ། ཕྱོགས་ བཅུ་འབྱམས་ཀླས་པ་བྱེ་བ་བརྒྱ་སྟོང་ཕྲག་བཅུའི་ཆོས་ཀྱི་ཚུལ་རྨོངས་པ་མེད་ཅིང་གཏི་མུག་མེད་པར་སྨོན་པ། ཆོས་ཀྱི་འབྱུང་གནས་བྱེ་བ་བརྒྱ་སྟོང་ཕྲག་བཅུ་རབ་ཏུ་ཐོབ་ པར་བྱེད་པ། སངས་རྒྱས་ཀྱི་ཞིང་བྱེ་བ་བརྒྱ་སྟོང་ཕྲག་བཅུ་འབྱམས་ཀླས་པ་ལ་འཇུག་པར་བྱེད་པ། ཆོས་ཀྱི་ལུས་བྱེ་བ་བརྒྱ་སྟོང་ཕྲག་བཅུ་སངས་རྒྱས་ཀྱི་ཞིང་ཐམས་ཅད་དུ་འགྲོ་བར་བྱེད་ པ༑ དེ་བཞིན་གཤེགས་པའི་གསུང་བྱེ་བ་བརྒྱ་སྟོང་ཕྲག་བཅུ་མངོན་པར་སྒྲུབ་པ་རབ་ཏུ་ཤེས་པ་བྱེད་པ། ཐམས་ཅད་མཁྱེན་པ་ཉིད་ཀྱི་ཚུལ་བྱེ་བ་བརྒྱ་སྟོང་ཕྲག་བཅུ་མངོན་པར་སྒྲུབ་ པའི་འབྱུང་གནས་སུ་གྱུར་པ། ཆོས་འབྱམས་ཀླས་པ་བྱེ་བ་བརྒྱ་སྟོང་ཕྲག་བཅུའི་ཚོགས་རབ་ཏུ་སྒྲུབ་པ། ཆོས་ཀྱི་ཡེ་ཤེས་བྱེ་བ་བརྒྱ་སྟོང་ཕྲག་བཅུའི་སངས་རྒྱས་ཀྱི་ཆོས་ཐམས་ཅད་ མཐོང་བ་ལ་རྒྱལ་མཚན་དུ་གྱུར་པ། དེ་བཞིན་གཤེགས་པའི་ཡུལ་བྱེ་བ་བརྒྱ་སྟོང་ཕྲག་བཅུ་ཡང་དག་པར་སྟོན་པའི་སྤྱོད་ཡུལ་ཅན། ལྷའི་དབང་པོ་བྱེ་བ་བརྒྱ་སྟོང་ཕྲག་བཅུ་མངོན་ པར་དགའ་བའི་ལུས་ཅན། ཀླུའི་དབང་པོ་བྱེ་བ་བརྒྱ་སྟོང་ཕྲག་བཅུ་མི་སྐྱོ་བར་ལྟ་བ། གནོད་སྦྱིན་གྱི་དབང་པོ་བྱེ་བ་བརྒྱ་སྟོང་ཕྲག་བཅུ་ཐལ་མོ་སྦྱོར་ཞིང་སྤྱི་བོ་ལ་བཞག་པ། དྲི་ཟའི་ དབང་པོ་བྱེ་བ་བརྒྱ་སྟོང་ཕྲག་བཅུ་མི་ངོམས་པར་མོས་པས་ལྡང་བ། ལྷ་མ་ཡིན་གྱི་དབང་པོ་བྱེ་བ་བརྒྱ་སྟོང་ཕྲག་བཅུ་ང་རྒྱལ་གྱི་ཡིད་ཡོངས་སུ་ཆུད་པ། ནམ་མཁའ་ལྡིང་གི་དབང་པོ་ བྱེ་བ་བརྒྱ་སྟོང་ཕྲག་བཅུའི་ཁ་ནས་དར་ཤིན་ཏུ་དབྱངས་པ། མིའམ་ཅིའི་དབང་པོ་བྱེ་བ་བརྒྱ་སྟོང་ཕྲག་བཅུ་སེམས་རབ་ཏུ་དགའ་བ། ལྟོ་འཕྱེ་ཆེན་པོའི་དབང་པོ་བྱེ་བ་བརྒྱ་སྟོང་ཕྲག་ ༄༅། །བཅུས་དགའ་བའི་ཡིད་དུ་བལྟ་བ། ཚངས་པའི་དབང་པོ་བྱེ་བ་བརྒྱ་སྟོང་ཕྲག་བཅུ་ཞེས་ས་ཕུ་དུད་དུ་གནས་པ། འཇིག་རྟེན་གྱི་དབང་པོ་བྱེ་བ་བརྒྱ་སྟོང་ཕྲག་ བཅུས་སྤྱི་བོ་དང་ལུས་ཀྱིས་བཏུད་པ། ལྷའི་དབང་པོ་བརྒྱ་བྱིན་ལ་སོགས་པ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བལྟ་བ། རབ་མཚེ་མའི་ལྷའི་རྒྱལ་པོ་ལ་སོགས་པ་བྱེ་བ་བརྒྱ་ སྟོང་ཕྲག་བཅུས་དགའ་བ་ཆེན་པོའི་སྒྲ་ཕྱུང་བ། རབ་དགའ་ལྡན་གྱི་ལྷའི་རྒྱལ་པོ་ལ་སོགས་པ་བྱེ་བ་བརྒྱ་སྟོང་ཕྲག་བཅུས་རབ་ཏུ་བཏུད་པ། རབ་འཕྲུལ་དགའི་ལྷའི་རྒྱལ་པོ་ ལ་སོགས་པ་བྱེ་བ་བརྒྱ་སྟོང་ཕྲག་བཅུས་ཕྱག་བྱ་བ། དབང་བྱེད་ཀྱི་ལྷའི་རྒྱལ་པོ་ལ་སོགས་པ་བྱེ་བ་བརྒྱ་སྟོང་ཕྲག་བཅུས་ཐལ་མོ་སྦྱར་བ། ཚངས་པ་བྱེ་བ་བརྒྱ་སྟོང་ཕྲག་བཅུས་ བལྟ་བ༑ དབང་ཕྱུག་ཆེན་པོ་བྱེ་བ་བརྒྱ་སྟོང་ཕྲག་བཅུས་མངོན་པར་བརྗོད་པ། བྱང་ཆུབ་སེམས་དཔའ་བྱེ་བ་བརྒྱ་སྟོང་ཕྲག་བཅུས་མངོན་པར་བསྟོད་པ། ལྷའི་བུ་མོ་བྱེ་བ་བརྒྱ་ སྟོང་ཕྲག་བཅུས་ཤིན་ཏུ་མཆོད་པ། སྨོན་ལམ་གྱི་ལྷའི་བུ་བྱེ་བ་བརྒྱ་སྟོང་ཕྲག་བཅུ་མངོན་པར་དགའ་བ། སྔོན་འགྲོགས་པའི་ལྷ་བྱེ་བ་བརྒྱ་སྟོང་ཕྲག་བཅུས་སྒྲ་ཕྱུང་བ། ཚངས་རིས་ཀྱི་ལྷའི་བུ་བྱེ་བ་བརྒྱ་སྟོང་ཕྲག་བཅུས་ལུས་ཐམས་ཅད་ཀྱི་ཕྱག་བྱ་བ། ཚངས་ལྷ་ཉེ་ཕན་གྱི་ལྷ་བྱེ་བ་བརྒྱ་སྟོང་ཕྲག་བཅུས་སྤྱི་བོས་འདུད་པ། ཚངས་པ་ཀུན་རིས་ཀྱི་ལྷ་ བྱེ་བ་བརྒྱ་སྟོང་ཕྲག་བཅུས་བསྐོར་བ་བྱས་པ། ཚངས་པ་ཆེན་པོ་བྱེ་བ་བརྒྱ་སྟོང་ཕྲག་བཅུས་ཡོན་ཏན་མཐའ་ཡས་པའི་མཐར་ཕྱིན་པ་བརྒྱ་ཕྲག་སྟོང་གིས་ཤིན་ཏུ་བསྟོད་པའི་སྒྲ་ཕྱུང་བ། ཀུན་སྣང་དང་བའི་ལྷ་བྱེ་བ་བརྒྱ་སྟོང་ཕྲག་བཅུས་འཁོར་ལྔས་ཕྱག་བྱ་བ། འོད་ཆུང་གི་ལྷ་བྱེ་བ་བརྒྱ་སྟོང་ཕྲག་བཅུས་སངས་རྒྱས་སྐྱེ་བ་ཤིན་ཏུ་དཀོན་པའི་སྒྲ་བསྒྲགས་པ། ཚད་མེད་ འོད་ཀྱི་ལྷ་བྱེ་བ་བརྒྱ་སྟོང་ཕྲག་བཅུས་སངས་རྒྱས་ལེགས་པར་གཤེགས་སོ། །ཞེས་ཕྱག་བྱ་བ། ཀུན་སྣང་དང་བའི་ལྷ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བསྟོད་ཅིང་མངོན་པར་དགའ་བའི་ སྒྲ་ཕྱུང་བ། དགེ་བའི་ལྷ་བྱེ་བ་བརྒྱ་སྟོང་ཕྲག་བཅུས་གཞལ་མེད་ཁང་དང་བ་ཅན་དུ་འཕགས་པ། འོད་ཆུང་གི་ལྷ་བྱེ་བ་བརྒྱ་སྟོང་ཕྲག་བཅུས་སེམས་དང་བའི་ལུས་ཀྱིས་མངོན་པར་འདུད་ པ༑ ཚད་མེད་དགེ་བའི་ལྷ་བྱེ་བ་བརྒྱ་སྟོང་ཕྲག་བཅུས་སངས་རྒྱས་མཐོང་བར་མོས་ཤིང་རང་གི་ལུས་ཀྱིས་འདུད་པ། དགེ་རྒྱས་ཀྱི་ལྷ་བྱེ་བ་བརྒྱ་སྟོང་ཕྲག་བཅུས་མཆོད་པ་དང་རིམ་ གྲོ་བྱ་བ༑ ཆེ་བའི་ལྷ་བྱེ་བ་བརྒྱ་སྟོང་ཕྲག་བཅུས་དགེ་བའི་རྩ་བ་རྗེས་སུ་དྲན་པར་བྱ་བ། ཆུང་ཆེའི་ལྷ་བྱེ་བ་བརྒྱ་སྟོང་ཕྲག་བཅུས་དེ་བཞིན་གཤེགས་པ་ཆེ་བའི་འདུ་ཤེས་རབ་ཏུ་ སྐྱེས་ཤིང་བལྟ་བ། ཚད་མེད་ཆེ་བའི་ལྷ་བྱེ་བ་བརྒྱ་སྟོང་ཕྲག་བཅུས་དགེ་བའི་ཆོས་རྟོགས་ཤིང་རིམ་གྲོ་ཆེར་བྱ་བ། འབྲས་བུ་ཆེ་བའི་ལྷ་བྱེ་བ་བརྒྱ་སྟོང་ཕྲག་བཅུས་ལུས་ཤིན་ ༄༅། །ཏུ་འདུད་པ། མི་ཆེ་བའི་ལྷ་བྱེ་བ་བརྒྱ་སྟོང་ཕྲག་བཅུས་དད་པའི་རྩ་བ་བརྟན་པར་བྱས་ཏེ་མངོན་པར་བརྗོད་ཅིང་ལུས་འདུད་པ། མི་དྲོས་པའི་ལྷ་བྱེ་བ་བརྒྱ་ སྟོང་ཕྲག་བཅུས་སངས་རྒྱས་ཀྱི་སྤྱན་སྔ་ནས་ཐལ་མོ་སྦྱར་ཞིང་ངོམ་མི་ཤེས་པར་བལྟ་བ། གྱ་ནོམ་སྣང་བའི་ལྷ་བྱེ་བ་བརྒྱ་སྟོང་ཕྲག་བཅུས་མངོན་པར་བལྟས་ཏེ་ལུས་འདུད་ པ༑ ཤིན་ཏུ་མཐོང་བའི་ལྷ་བྱེ་བ་བརྒྱ་སྟོང་ཕྲག་བཅུས་སངས་རྒྱས་ཀྱིས་བསྟན་པ་ལ་ངོམ་མི་ཤེས་པར་ལུས་དབུལ་བ། འོག་མིན་གྱི་ལྷ་བྱེ་བ་བརྒྱ་སྟོང་ཕྲག་བཅུས་སྤྱི་བོས་ འདུད་ཅིང་མཆོད་པ། ལྷ་སྣ་ཚོགས་བྱེ་བ་བརྒྱ་སྟོང་ཕྲག་བཅུས་དགའ་བ་ཆེན་པོས་སྣང་བའི་སྒྲ་ཕྱུང་བ། ལྷ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བསམ་ཞིང་བསྒྲུབས་ཏེ་བརྒྱན་ པ༑ ལྷའི་བྱང་ཆུབ་སེམས་དཔའ་བྱེ་བ་བརྒྱ་སྟོང་ཕྲག་བཅུས་སངས་རྒྱས་ཀྱི་གདན་བསྒྲུབས་པ་ལ་བྱིན་གྱི་རླབས་རྒྱུན་མི་གཅོད་པ། ལྷའི་བྱང་ཆུབ་སེམས་དཔའ་ཆེན་པོ་བྱེ་བ་ བརྒྱ་སྟོང་ཕྲག་བཅུ་མེ་ཏོག་ཐོགས་པ་དང༌། སྤོས་ཐོགས་པ་དང༌། ཕྲེང་བ་ཐོགས་པ་དང༌། ཕྱེ་མ་ཐོགས་པ་དང༌། བྱུག་པ་ཐོགས་པ་དང༌། ན་བཟའ་ཐོགས་པ་དང༌། གདུགས་ ཐོགས་པ་དང༌། རྒྱལ་མཚན་ཐོགས་པ་དང༌། བ་དན་ཐོགས་པ་དང༌། རིན་པོ་ཆེ་ཐོགས་པ་དང༌། ཕྱང་ཕྲུལ་ཐོགས་པ་དང༌། ལྷབ་ལྷུབ་ཐོགས་པས་མངོན་པར་གཏོར་ཞིང་ ཆར་དུ་ཕབ་སྟེ་རབ་ཏུ་དགྱེ་བ། ལྷ་བྱེ་བ་བརྒྱ་སྟོང་ཕྲག་བཅུས་ལྷའི་ཁྱིམ་མངོན་པར་འཕགས་པ་གཅིག་ནས་གཅིག་ཏུ་བརྒྱུད་པའི་ཕ་རོལ་ཏུ་ཕྱིན་པར་བྱ་བ། ལྷའི་གཞལ་མེད་ཁང་བྱེ་ བ་བརྒྱ་སྟོང་ཕྲག་བཅུའི་ལྷའི་བུས་དད་པར་བསུ་བ། ལྷའི་བུ་བཙུན་པ་བྱེ་བ་བརྒྱ་སྟོང་ཕྲག་བཅུས་ལྷུན་ཤིན་ཏུ་བཟུང་བ། དབང་བསྐུར་བའི་ལྷའི་བུ་བྱེ་བ་བརྒྱ་སྟོང་ཕྲག་བཅུས་ལྷུན་ ཀུན་ནས་བཟུང་བ། བྱང་ཆུབ་སེམས་དཔའི་སེམས་བྱེ་བ་བརྒྱ་སྟོང་ཕྲག་བཅུ་ལེགས་པར་སེམས་ཤིང་སྤྱོད་པ། བྱང་ཆུབ་སེམས་དཔའ་བཙུན་པའི་སེམས་བསྐྱེད་པ་བྱེ་བ་བརྒྱ་ སྟོང་ཕྲག་བཅུའི་ཡིད་དགའ་བར་བྱེད་པ། བྱང་ཆུབ་སེམས་དཔའི་དབང་པོ་བྱེ་བ་བརྒྱ་སྟོང་ཕྲག་བཅུ་རབ་ཏུ་སིམ་པར་བྱེད་པ། བྱང་ཆུབ་སེམས་དཔའི་ལྷག་པའི་བསམ་པ་བྱེ་བ་བརྒྱ་ སྟོང་ཕྲག་བཅུ་ཡོངས་སུ་དག་པར་བྱེད་པ། བྱང་ཆུབ་སེམས་དཔའི་མོས་པ་བྱེ་བ་བརྒྱ་སྟོང་ཕྲག་བཅུ་རྣམ་པར་དག་པར་བྱེད་པ། བྱང་ཆུབ་སེམས་དཔའི་ལས་བྱེ་བ་བརྒྱ་སྟོང་ཕྲག་ བཅུ་ཡང་དག་པར་སྦྱོང་བ། བྱང་ཆུབ་སེམས་དཔའི་སྐྱེས་པའི་རབས་བྱེ་བ་བརྒྱ་སྟོང་ཕྲག་བཅུ་རབ་ཏུ་སྟོན་པར་བྱེད་པ། བྱང་ཆུབ་སེམས་དཔའི་ཆོས་ཀྱི་སྒོ་བྱེ་བ་བརྒྱ་སྟོང་ཕྲག་ བཅུ་རབ་ཏུ་སྣང་བར་བྱེད་པ། བྱང་ཆུབ་སེམས་དཔའི་ས་བྱེ་བ་བརྒྱ་སྟོང་ཕྲག་བཅུ་རབ་ཏུ་སྒྲུབ་པ། བྱང་ཆུབ་སེམས་དཔའི་རིས་བྱེ་བ་བརྒྱ་སྟོང་ཕྲག་བཅུ་ཡོངས་སུ་སྨིན་པར་ ༄༅། །འདུལ་པ། དགེ་བའི་རྩ་བ་བྱེ་བ་བརྒྱ་སྟོང་ཕྲག་བཅུས་ཡང་དག་པར་བྱུང་བ། སངས་རྒྱས་བྱེ་བ་བརྒྱ་སྟོང་ཕྲག་བཅུས་བྱིན་གྱིས་བརླབས་པ། བསོད་ ནམས་བྱེ་བ་བརྒྱ་སྟོང་ཕྲག་བཅུས་ཡོངས་སུ་གྲུབ་པ། ལྷག་པའི་བསམ་པ་བྱེ་བ་བརྒྱ་སྟོང་ཕྲག་བཅུས་ཡོངས་སུ་སྦྱངས་པ། སྨོན་ལམ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་ དག་པར་བྱས་པ། སྤྱོད་པ་བྱེ་བ་བརྒྱ་སྟོང་ཕྲག་བཅུས་ཡང་དག་པར་སྐྱེས་པ། ཆོས་བྱེ་བ་བརྒྱ་སྟོང་ཕྲག་བཅུས་ཉེ་བར་བརྟན་པ། རྣམ་པར་འཕྲུལ་པ་བྱེ་བ་བརྒྱ་སྟོང་ ཕྲག་བཅུས་རྗེས་སུ་སོང་བ། ཡོན་ཏན་བྱེ་བ་བརྒྱ་སྟོང་ཕྲག་བཅུས་ཤིན་ཏུ་འཕགས་པ་བཤམས་སོ། །བམ་པོ་སུམ་ཅུ་པ། ཇི་ལྟར་གླིང་བཞི་པ་ཆེན་པོ་འདིའི་ དགའ་ལྡན་གྱི་གནས་སུ་ལྷའི་དབང་པོ་རབ་དགའ་ལྡན་གྱི་ཁང་པ་ནོར་བུ་རིན་པོ་ཆེ་ཐམས་ཅད་ཀྱི་རྒྱན་ཅན་དུ་དེ་བཞིན་གཤེགས་པའི་གདན་བཏིང་བར་གྱུར་པ་དེ་བཞིན་ དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཆེན་པོ་དག་ནའང་དགའ་ལྡན་གྱི་གནས་དག་ཏུ་ལྷའི་རྒྱལ་པོ་རབ་དགའ་ལྡན་གྱི་ཁང་པ་རིན་པོ་ཆེ་ཐམས་ཅད་ཀྱི་རྒྱན་ ཅན་དག་ཏུ་རྒྱན་འདི་ལྟ་བུ་དང༌། ཚུལ་འདི་ལྟ་བུ་དང༌། དད་པ་འདི་ལྟ་བུ་དང༌། མོས་པ་འདི་ལྟ་བུ་དང༌། དགའ་བ་འདི་ལྟ་བུ་དང༌། རབ་ཏུ་དགའ་བ་འདི་ལྟ་བུ་དང༌། ཞེས་ འདི་ལྟ་བུ་དང༌། རིམ་གྲོ་འདི་ལྟ་བུ་དང༌། སྤྲོ་བ་འདི་ལྟ་བུ་དང༌། ཉེ་བར་སེམས་པ་འདི་ལྟ་བུས་དེ་བཞིན་གཤེགས་པའི་གདན་བཏིང་བར་གྱུར་ཏོ། །དེ་ནས་ལྷའི་དབང་པོ་རབ་དགའ་ ལྡན་གྱིས་གདན་བཏིང་ནས་ཞེ་ས་ཅན་གྱི་རིམ་གྲོ་དང་བཅས་པར་དགའ་ལྡན་གྱི་རིས་སུ་གཏོགས་པའི་ལྷའི་བུ་བྱེ་བ་བརྒྱ་སྟོང་ཕྲག་བཅུ་དང་ལྷན་ཅིག་ཏུ་དོང་སྟེ་བཅོམ་ལྡན་འདས་ བསུས་ནས་མེ་ཏོག་ཡོན་ཏན་གྲངས་མེད་བའི་སྤྲིན་གྱི་ཆར་ནི། རབ་ཏུ་ཕབ། སྤོས་ཡོན་ཏན་བསམ་གྱིས་མི་ཁྱབ་པའི་ཆར་ནི། ཤིན་ཏུ་ཕབ། ཕྲེང་བ་ཡོན་ཏན་སྣ་ཚོགས་དང་ ལྡན་པའི་སྤྲིན་ནི། རབ་ཏུ་བཀྱེ། ཙནྡན་ཤིན་ཏུ་དག་པའི་སྤྲིན་ཡངས་པ་ནི། རབ་ཏུ་བཀྱེ། གདུགས་རྣམ་པ་སྣ་ཚོགས་ཀྱི་སྤྲིན་གྱི་ཆར་ནི། རབ་ཏུ་ཕབ། ལྷ་རྫས་ཀྱི་གོས་རབ་ ཏུ་ཕྲ་བའི་སྤྲིན་ནི། རབ་ཏུ་བཀྱེ། རིན་པོ་ཆེ་ཡིད་དུ་འོང་བ་མཐའ་ཡས་པ་ཐམས་ཅད་ཀྱི་སྤྲིན་གྱི་ཆར་ནི། རབ་ཏུ་ཕབ། སེམས་ཤིན་ཏུ་དང་བས་ལྷ་རྫས་ཀྱི་ལྷབ་ལྷུབ་དང༌། འཕྱང་ ཕྲུལ་གྱི་སྤྲིན་གྱི་ཆར་ནི། རབ་ཏུ་ཕབ། བདུག་སྤོས་རྣམ་པ་དུ་མའི་སྤྲིན་གྱིས་ནི། ཀུན་ཏུ་བདུགས། ལྷ་རྫས་ཀྱི་ཙནྡན་གྱི་ཕྱེ་མ་དང༌། ཨ་ག་རུའི་ཕྱེ་མ་དང༌། སྤོས་དམ་པ་ཐམས་ ཅད་ཀྱི་ཕྱེ་མའི་སྤྲིན་གྱི་ཆར་ནི། རབ་ཏུ་ཕབ། ལྷའི་བུ་མཐའ་ཡས་པས་ཀྱང་རང་རང་གི་ལུས་ཀྱི་སྤྲིན་ཤིན་ཏུ་བཀྱེ། དགའ་ལྡན་གྱི་རིས་སུ་གཏོགས་པའི་ལྷའི་བུ་བྱེ་བ་བརྒྱ་སྟོང་ ༄༅། །ཕྲག་བཅུ་དང༌། དེ་མ་ཡིན་པའི་ལྷའི་རིས་ནས་འདུས་པའི་ལྷའི་བུ་རྣམས་ཀྱིས་ཀྱང་སེམས་ཤིན་ཏུ་དང་བས་ཞེས་རབ་ཏུ་བསྐྱེད་ནས་ཤིན་ཏུ་བཏུད་དེ་ཕྱག་ འཚལ་ཏོ། །ལྷའི་བུ་མོ་གྲངས་མེད་པ་དག་ཀྱང་དགའ་ཞིང་མོས་པའི་སེམས་ཀྱིས་བཅོམ་ལྡན་འདས་ལ་རབ་ཏུ་སེམས་སོ། །བྱང་ཆུབ་སེམས་དཔའ་དགའ་ལྡན་གྱི་གནས་ ན་སྤྱོད་པ་གྲངས་མེད་པ་རྣམས་ཀྱང་བར་སྣང་ལ་གནས་ཏེ་སངས་རྒྱས་ལ་མཆོད་པར་བརྩོན་པའི་སེམས་ཀྱིས་ལྷ་རྫས་ལས་འདས་པའི་མཆོད་པས་བཅོམ་ལྡན་འདས་ལ་མཆོད་པ་ བྱེད་དོ༑ ༑རིམ་གྲོ་བྱེད་དོ། །ཕྱག་འཚལ་ལོ། །དེའི་ཚེ་སངས་རྒྱས་ཀྱི་བྱིན་གྱི་རླབས་དང༌། སངས་རྒྱས་ཀྱི་སྔོན་གྱི་དགེ་བའི་རྩ་བ་རྒྱུ་མཐུན་པ་དང༌། དེ་བཞིན་གཤེགས་པའི་ ཆོ་འཕྲུལ་བསམ་གྱིས་མི་ཁྱབ་པས་རོལ་མོ་དཀྲོལ་བ་དང་བརྡུང་བའི་ཚོགས་གྲངས་མེད་པ་ཡང་སྒྲ་འབྱིན་པར་གྱུར་ཏོ། །ལྷའི་བུ་དགའ་ལྡན་གྱི་གནས་ན་འཁོད་པ་དང༌། ལྷའི་བུ་མོ་རྣམས་ཀྱང་བཅོམ་ལྡན་འདས་ལ་ནི། བལྟ། དེ་བཞིན་གཤེགས་པ་འབྱུང་བ་ཤིན་ཏུ་དཀོན་པར་ནི། རྗེས་སུ་སེམས་ཤིང༌། ཡང་དག་པར་རྫོགས་པའི་སངས་ རྒྱས་ནི། རྣམ་པའི་མཆོག་ཐམས་ཅད་དང་ལྡན་པ། སྒྲིབ་པ་མེད་པའི་ཆོས་ཅན་ནོ། །ཞེས་ཡང་དག་པར་ལྟ་ཞིང༌། དེ་ལོགས་སུ་མངོན་པར་བལྟ་བར་གྱུར་ཏོ། །དགའ་ལྡན་ གྱི་གནས་ན་འཁོད་པའི་འཁོར་ཐམས་ཅད་དང༌། ལྷ་བྱེ་བ་བརྒྱ་སྟོང་གྲངས་མེད་པ་བཅོམ་ལྡན་འདས་བསུ་བའི་ཕྱིར་རིན་པོ་ཆེ་ཐམས་ཅད་ཀྱི་མེ་ཏོག་གི་ཕུར་མ་ཐོགས་ཐོགས་པ་དང་ སྤོས་ཐམས་ཅད་ཀྱི་ཕུར་མ་ཐོགས་ཐོགས་པ་དང༌། རིན་པོ་ཆེ་ཐམས་ཅད་ཀྱི་ཕུར་མ་ཐོགས་ཐོགས་པ་དང༌། རྒྱན་ཐམས་ཅད་ཀྱི་ཕུར་མ་ཐོགས་ཐོགས་པ་དང༌། ལྷ་རྫས་ཀྱི་ཙནྡན་ ཐམས་ཅད་ཀྱི་ཕྱེ་མའི་ཕུར་མ་ཐོགས་ཐོགས་པ་དང༌། ལྷ་རྫས་ཀྱི་ཨ་ག་རུ་ཐམས་ཅད་ཀྱི་ཕྱེ་མའི་ཕུར་མ་ཐོགས་ཐོགས་པ་དང༌། ལྷ་རྫས་ཀྱི་རིན་པོ་ཆེ་ཐམས་ཅད་ཀྱི་ཕྱེ་མའི་ཕུར་ མ་ཐོགས་ཐོགས་པ་དང༌། ལྷ་རྫས་ཀྱི་སྤོས་ཀྱི་མེ་ཏོག་ཐམས་ཅད་ཀྱི་ཕྱེ་མའི་ཕུར་མ་ཐོགས་ཐོགས་པ་དང༌། ལྷ་རྫས་ཀྱི་མེ་ཏོག་མནྡཱ་ར་བའི་ཕུར་མ་ཐོགས་ཐོགས་པ་རྣམས་ཀྱང་ དོང་སྟེ་བཅོམ་ལྡན་འདས་ལ་གཏོར་ཏོ། །མངོན་པར་གཏོར་ཏོ། །རབ་ཏུ་གཏོར་ཏོ། །ལྷའི་བུ་དགའ་ལྡན་གྱི་གནས་སུ་གཏོགས་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ རྣམས་ཀྱང་བར་སྣང་ལ་འཁོད་དེ། ཡེ་ཤེས་ཀྱི་སྤྱོད་ཡུལ་ལ་གཞོལ་བའི་སེམས་ཀྱིས་སྤོས་དང༌། བདུག་པའི་སྤྲིན་གྱིས་བདུགས་པས་བར་སྣང་བརྒྱན་པར་བྱས་སོ། །སངས་ རྒྱས་ལ་དགའ་ཞིང་གཞོལ་བའི་སེམས་ཀྱིས་ལྷ་རྫས་ཀྱི་མེ་ཏོག་ཐམས་ཅད་ཀྱི་སྤྲིན་གྱི་ཆར་གྱིས་རབ་ཏུ་བརྒྱན་པས་བར་སྣང་བརྒྱན་པར་བྱས་སོ། །དེ་བཞིན་གཤེགས་པ་ལ་ཞེས་ ༄༅། །ཆེར་བྱ་བའི་སེམས་ཀྱིས་ལྷ་རྫས་ཀྱི་གདུགས་སྣ་ཚོགས་ཀྱི་སྤྲིན་གྱིས་བར་སྣང་གཡོགས་པར་བྱས་ཏེ་བརྒྱན་པར་བྱས་སོ། །སངས་རྒྱས་མཆོད་ པར་གཞོལ་བའི་སེམས་ཀྱིས་ལྷ་རྫས་ཀྱི་ཕྲེང་བ་སྣ་ཚོགས་ཀྱི་སྤྲིན་རབ་ཏུ་དགྱེ་བས་བར་སྣང་བརྒྱན་པར་བྱས་སོ། །སངས་རྒྱས་ལས་ཐོས་པར་མོས་པའི་སེམས་ཀྱིས་གསེར་ གྱི་དྲ་བ་གྲངས་མེད་པ་ལས་དྲིལ་བུ་སྣ་ཚོགས་ཀྱི་དྲ་བ་འཁྲོལ་ཞིང་སྒྲ་འབྱིན་པས་ཡོག་པར་བྱས་ཏེ་བར་སྣང་བརྒྱན་པར་བྱས་སོ། །དེ་བཞིན་གཤེགས་པ་ལ་ཡོན་གྱི་གནས་ དམ་པ་ཡིན་པར་འཛིན་པའི་སེམས་ཀྱིས་བླ་རེ་གྲངས་མེད་པ་ལས་རིན་པོ་ཆེ་ཐམས་ཅད་ཀྱི་སེན་མོ་དོའི་སྤྲིན་ལྡིང་ཞིང་འཕྲུལ་པའི་རྒྱན་གྱིས་བར་སྣང་བརྒྱན་པར་བྱས་སོ། ། སངས་རྒྱས་ལ་དགེ་བར་འདུན་པའི་སེམས་ཀྱིས་ལྷ་རྫས་ཀྱི་གཞལ་མེད་ཁང་གྲངས་མེད་པར་ལྷ་རྫས་ཀྱི་རོལ་མོ་བརྡུངས་པ་དང༌། དཀྲོལ་བ་ཐམས་ཅད་ཀྱི་སྒྲ་ཡིད་དུ་འོང་བ་ ཕྱུང་བས་བར་སྣང་བརྒྱན་པར་བྱས་སོ། །སངས་རྒྱས་སྐྱེ་བ་ཤིན་ཏུ་དཀོན་པར་དོགས་པའི་སེམས་ཀྱིས་ལྷ་རྫས་ཀྱི་ན་བཟའ་ཁ་དོག་སྣ་ཚོགས་པའི་སྤྲིན་དང༌། ན་བཟའ་ མཚུངས་པ་མེད་པའི་སྤྲིན་གྱི་ཆར་འབབ་པའི་རྒྱན་གྱིས་བར་སྣང་བརྒྱན་པར་བྱས་སོ། །སངས་རྒྱས་ལ་མོས་པ་མཐའ་ཡས་པའི་སེམས་ཀྱིས་ལྷ་རྫས་ཀྱི་ཅོད་པན་གྲངས་ མེད་པའི་སྤྲིན་ལས་ཅོད་པན་གྱི་ཆར་ཆེན་པོ་འཁོར་ཞིང་འབབ་པའི་རྒྱན་གྱིས་བར་སྣང་བརྒྱན་པར་བྱས་སོ། །སངས་རྒྱས་ལ་ཡིད་བདེ་བ་སྐྱེས་པའི་སེམས་ཀྱིས་ལྷ་རྫས་ཀྱི་རིན་ པོ་ཆེ་ཁ་དོག་སྣ་ཚོགས་གྲངས་མེད་པའི་སྤྲིན་ལས་ཕྲེང་བ་སྣ་ཚོགས་ཀྱི་ཆར་རྒྱུན་མི་འཆད་པར་འབབ་པའི་རྒྱན་གྱིས་བར་སྣང་བརྒྱན་པར་བྱས་སོ། །ལྷའི་བུ་བྱེ་བ་བརྒྱ་སྟོང་ གྲངས་མེད་པ་ཡང་ལྷ་རྫས་ཀྱི་མེ་ཏོག་ཁ་དོག་ཐ་དད་པ་གྲངས་མེད་པ་ལག་ན་ཐོགས་ཏེ། མེ་ཏོག་ཟད་མི་ཤེས་པའི་མཛོད་རབ་ཏུ་བཀྱེ་ནས་བཅོམ་ལྡན་འདས་ལ་མངོན་པར་ གཏོར་ཏོ། །མོས་པའི་སྤོས་དྲི་ཞིམ་པོ་རྙེད་ཅིང་སངས་རྒྱས་ལ་དད་པར་གནས་པས་ལྷ་རྫས་ཀྱི་སྤོས་དང༌། བདུག་པ་ཁ་དོག་སྣ་ཚོགས་གྲངས་མེད་པ་ལག་ན་ཐོགས་ཏེ་བཅོམ་ལྡན་ འདས་ལ་ཕུལ་ལོ། །རྒྱན་ཆེན་པོ་སྤྲུལ་པའི་སེམས་ཀྱིས་ལྷ་རྫས་ཀྱི་ཙནྡན་གྱི་ཕྱེ་མ་ཁ་དོག་སྣ་ཚོགས་གྲངས་མེད་པ་ལག་ན་ཐོགས་ཏེ་བཅོམ་ལྡན་འདས་ལ་མངོན་པར་གཏོར་ཏོ།། དགའ་བའི་སེམས་ཀྱིས་བཅོམ་ལྡན་འདས་ཀྱི་ཞམ་འབྲིང་དུ་འབྲང་ཞིང་རིན་པོ་ཆེའི་གདུགས་ཁ་དོག་སྣ་ཚོགས་གྲངས་མེད་པ་ལག་ན་ཐོགས་ཏེ། བཅོམ་ལྡན་འདས་ལ་མངོན་ པར་འགེབས་སོ། །སངས་རྒྱས་མཐའ་ཡས་པ་ལ་མོས་པའི་སེམས་རྣམ་པར་འཕེལ་བས་གོས་རིན་པོ་ཆེ་ཁ་དོག་སྣ་ཚོགས་གྲངས་མེད་པ་ལག་ན་ཐོགས་ཏེ་བཅོམ་ལྡན་འདས་ ༄༅། །གཤེགས་པའི་ལམ་གོས་ཀྱིས་ཡོག་པར་བྱས་སོ། །དེ་བཞིན་གཤེགས་པ་ལ་རིམ་གྲོ་བྱ་བར་མོས་པའི་སེམས་ཀྱིས་ལྷ་རྫས་ཀྱི་རྒྱལ་མཚན་རིན་པོ་ཆེ་ སྣ་ཚོགས་ཀྱི་ཁ་དོག་ཅན་ལག་ན་ཐོགས་ཤིང་བཅོམ་ལྡན་འདས་ཀྱི་ཞམ་རིང་དུ་འདོང་ངོ༌། །སངས་རྒྱས་ལ་དགའ་བ་མཐའ་ཡས་པ་རྣམ་པར་འཕེལ་བའི་སེམས་ཀྱིས་ལྷ་རྫས་ཀྱི་ ལྷབ་ལྷུབ་དང༌། འཕྱང་ཕྲུལ་ཁ་དོག་སྣ་ཚོགས་གྲངས་མེད་པའི་ཡང་གྲངས་མེད་པ་ལག་ན་ཐོགས་ཏེ་དེ་བཞིན་གཤེགས་པ་ལ་ཕུལ་ལོ། །དད་པ་མི་འཕྲོག་པའི་སེམས་ཀྱིས་ ལྷ་རྫས་ཀྱི་ཕྲེང་བ་གྲངས་མེད་པ་ལག་ན་ཐོགས་ཏེ་བཅོམ་ལྡན་འདས་ལ་མངོན་པར་གཏོར་ཏོ། །མཚུངས་པ་མེད་པའི་དགའ་བ་རྣམ་པར་འཕེལ་བས། ལྷ་རྫས་ཀྱི་བ་དན་རིན་ པོ་ཆེ་ཁ་དོག་སྣ་ཚོགས་གྲངས་མེད་པའི་ཡང་གྲངས་མེད་པ་ལག་ན་ཐོགས་ཏེ་བཅོམ་ལྡན་འདས་ཀྱི་དྲུང་ན་འཛིན་ཏོ། །ལྷའི་བུ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ཡང་ཞི་བ་ ལ་རབ་ཏུ་གཞོལ་ཞིང་བག་ཡོད་པ་ཚད་མེད་པའི་སེམས་ཀྱིས་ལྷ་རྫས་ཀྱི་རོལ་མོ་བརྡུང་བ་དང༌། དཀྲོལ་བ་ཁ་དོག་སྣ་ཚོགས་གྲངས་མེད་པ་ལག་ན་ཐོགས་ཏེ་ཡིད་དུ་འོང་བའི་ སྒྲ་དབྱངས་ཕྱུང་ནས་བཅོམ་ལྡན་འདས་དགྱེས་པར་བྱེད་དོ། །བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་དགའ་ལྡན་གྱི་གནས་ནས་འོངས་པ་རྣམས་ ཀྱང་ལྷ་རྫས་ལས་འདས་པའི་མཆོད་པ། ཁམས་གསུམ་ལས་རྣམ་པར་འདས་པ། དམིགས་པའི་ཆོས་ལས་བྱུང་བ། རྗེན་པའི་དྲི་མེད་པ། ཆགས་པ་མེད་པའི་སེམས་ཚིམ་པར་བྱེད་པ། ཆོས་ ཀྱི་ཚུལ་ཟབ་མོས་མངོན་པར་གྲུབ་པ། བློ་ཚད་མེད་པར་ཡངས་པ་ལས་བྱུང་བ། དད་པའི་རྩ་བ་བརྟན་པས་རྣམ་པར་སྤེལ་བ། དགེ་བའི་རྩ་བ་བསམ་གྱིས་མི་ཁྱབ་པ་ལས་བྱུང་བ། དགེ་བའི་ རྩ་བ་དང༌། འཕྲུལ་པ་གྲངས་མེད་པས་མངོན་པར་བསྒྲུབས་པ། སངས་རྒྱས་ཀྱི་མཆོད་པ་ཡིད་ཀྱི་རང་བཞིན་ལས་བྱུང་བ། མངོན་པར་འདུ་བྱ་བ་མེད་པའི་ཆོས་ཀྱི་སྒོའི་རྒྱས་བཏབ་ པས་ཆོས་ཀྱི་དབྱིངས་ཐམས་ཅད་ཀུན་ནས་ཡོག་པར་བྱས་སོ། །ལྷ་རྫས་ལས་འདས་པའི་ཕ་རོལ་ཏུ་ཕྱིན་པ་ལས་བྱུང་བའི་མེ་ཏོག་གི་བླ་རེ་སྣ་ཚོགས་ཀྱིས་ཆོས་ཀྱི་དབྱིངས་ཀུན་ནས་ ཁེབས་པར་བྱས་སོ། །ལྷ་རྫས་ལས་འདས་པ་མོས་པས་རྣམ་པར་དག་པ་སངས་རྒྱས་ཐམས་ཅད་ཀྱི་ཡུལ་རྒྱས་པར་འགེངས་པའི་ན་བཟའ་སྣ་ཚོགས་མངོན་པར་དགབ་པས་ཆོས་ཀྱི་ དབྱིངས་བརྒྱན་པར་བྱས་སོ། །ཆགས་པ་མེད་པའི་ཆོས་ཀྱི་རང་བཞིན་རྡོ་རྗེ་ལ་ཡང་དག་པར་ཞུགས་པའི་སེམས་ཀྱིས་ལྷ་རྫས་ལས་འདས་པ་མི་སྐྱེ་བའི་ཆོས་ལས་བྱུང་བའི་དྲིལ་བུ་ ཚོམ་བུར་བཅད་པའི་དྲ་བས་ཆོས་ཀྱི་དབྱིངས་བརྒྱན་པར་བྱས་སོ། །ཆོས་ཐམས་ཅད་སྒྱུ་མ་ལྟ་བུར་རྟོགས་པའི་སེམས་ཀྱིས་ལྷ་རྫས་ལས་འདས་པའི་སྤོས་ཐམས་ཅད་ཀྱི་མཆོག་ ༄༅། །གི་བདུག་པའི་རྒྱན་གྱིས་ཆོས་ཀྱི་དབྱིངས་བརྒྱན་པར་བྱས་སོ། །དེ་བཞིན་གཤེགས་པ་བཞུགས་པས་ཆོས་ཀྱི་དབྱིངས་རྒྱས་པར་བྱ་བའི་སེམས་ཀྱིས་ ལྷ་རྫས་ལས་འདས་པའི་རིན་པོ་ཆེ་ཐམས་ཅད་ཀྱི་ཁྲི་སངས་རྒྱས་ཀྱི་གདན་དུ་བཏིང་བའི་རྒྱན་གྱིས་ཆོས་ཀྱི་དབྱིངས་བརྒྱན་པར་བྱས་སོ། །སངས་རྒྱས་ཀྱི་མཆོད་པ་རང་བཞིན་འགག་ པ་མེད་པའི་སེམས་ཀྱིས་ལྷ་རྫས་ལས་འདས་པའི་རིན་པོ་ཆེ་སྣ་ཚོགས་ཀྱི་རྒྱལ་མཚན་ཡང་དག་པར་བསྒྲེངས་པའི་རྒྱན་གྱིས་ཆོས་ཀྱི་དབྱིངས་བརྒྱན་པར་བྱས་སོ། །རྨི་ལམ་ལྟ་བུའི་ ཆོས་ཉིད་ཀྱིས་བསམ་པ་ཚིམ་པས་ལྷ་རྫས་ལས་འདས་པའི་རིན་པོ་ཆེ་སྣ་ཚོགས་ཀྱིས་སངས་རྒྱས་ཀྱི་ཕོ་བྲང་བརྒྱན་པས་ཆོས་ཀྱི་དབྱིངས་བརྒྱན་པར་བྱས་སོ། །མི་གནས་པའི་ དགེ་བའི་རྩ་བ་བླང་བ་མེད་པ་ལས་བྱུང་བས་ལྷ་རྫས་ལས་འདས་པའི་རིན་པོ་ཆེ་སྣ་ཚོགས་ཀྱི་པདྨོས་ཀུན་ནས་ཡོག་པའི་རྒྱན་གྱིས་ཆོས་ཀྱི་དབྱིངས་བརྒྱན་པར་བྱས་སོ། །ལྷ་རྫས་ ལས་འདས་པའི་སྤོས་ཐམས་ཅད་ཀྱི་མཆོག་གི་སྤྲིན་གྱིས་ཆོས་ཀྱི་དབྱིངས་ཐམས་ཅད་རྒྱས་པར་བྱ་བ་དང༌། མེ་ཏོག་ཁ་དོག་མཐའ་ཡས་པ་སྣ་ཚོགས་ཀྱི་སྤྲིན་དང༌། ན་བཟའ་ ཁ་དོག་སྣ་ཚོགས་རྣམ་པ་ཐ་དད་པ་ཐམས་ཅད་ཀྱི་སྤྲིན་དང༌། ཙནྡན་གྱི་དྲི་ཞིམ་པོ་མཐའ་ཡས་པར་འཕྲོ་བ་ཐམས་ཅད་ཀྱི་སྤྲིན་དང༌། ལྷ་རྫས་ལས་འདས་པའི་རིན་པོ་ཆེ་ ཐམས་ཅད་ཀྱི་གདུགས་རྣམ་པ་སྣ་ཚོགས་ཀྱི་སྤྲིན་དང༌། སྤོས་དང་བདུག་པ་སྣ་ཚོགས་ཀྱི་ངད་ཀུན་ཏུ་ལྡང་བའི་སྤྲིན་དང༌། ཕྲེང་བ་ཡིད་དུ་འོང་བ་ཐམས་ཅད་ཀྱི་སྤྲིན་དང༌། ལྷ་རྫས་ལས་ འདས་པའི་ལྷབ་ལྷུབ་རྣམ་པར་དག་པ་ཐམས་ཅད་ཀྱི་སྤྲིན་དང༌། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་རང་གི་ལུས་གཏོང་བའི་སྤྲིན་དང༌། སངས་རྒྱས་ཀྱི་ ཡོན་ཏན་བརྗོད་པ་ལས་འདས་པས་བསྟོད་ཅིང་བསྔགས་པའི་བརྗོད་པ་ཟད་མི་ཤེས་པའི་སྤྲིན་དང༌། དེ་བཞིན་གཤེགས་པའི་བསྟོད་པས་བརྗོད་པ་ཇི་ལྟ་བ་བཞིན་དུ་ཡང་དག་པར་ བསྔགས་པའི་ཆོས་མ་ལོག་པ་བྱུང་བ། སངས་རྒྱས་ཀྱི་སྟོབས་མཐའ་དང་དབུས་མེད་པ་ལས་རྒྱུ་བས་འགྲོ་བ་ཐམས་ཅད་བདེ་བའི་ལམ་བསྟན་པ་དང༌། ཚིག་རྣམ་པར་འབྱེད་པ་ བརྗོད་དུ་མེད་པ་སྨོས་པས་ཆོས་ཚད་མེད་པ་ལ་གཞོལ་བའི་གཟུངས་ཀྱི་རྒྱུད་ཐམས་ཅད་ལས་བྱུང་བའི་ཐ་དད་པ་ཡང་དག་པར་ཤེས་པ་ལ་མཁས་པ། མི་ཟད་པ་དང་མི་འཇིགས་ པས་ཡིད་དགའ་བར་གྱུར་པའི་རིམ་གྲོ་ངོམ་མི་ཤེས་པས་དེ་བཞིན་གཤེགས་པ་ལ་མངོན་པར་བསྟོད་པ། ཚིག་རྣམ་པར་དབྱེ་ཞིང་བརྗོད་པས་བྱང་ཆུབ་སེམས་དཔའ་དེ་དག་ ཆོས་ཀྱི་དབྱིངས་ཀྱི་ལུས་ནམ་མཁའི་ཁམས་རྒྱས་པར་བྱེད་པ་བྱིན་གྱིས་བརླབས་ཏེ། སངས་རྒྱས་འདས་པ་དང༌། མ་བྱོན་པ་དང༌། ད་ལྟར་བྱུང་བ་ཐམས་ཅད་ཀྱིས་ཡོངས་སུ་ ༄༅། །བཟུང་བའི་ཡིད་ཀྱི་དབང་པོས་མངོན་པར་བསྟོད་དོ། །ལྷའི་རིས་གཞན་དང་གཞན་ནས་འདུས་པའི་འཁོར་དེ་དག་ཐམས་ཅད་དང༌། སངས་རྒྱས་ཀྱི་ ཞིང་བརྗོད་དུ་མེད་པ་ནས་འདུས་པའི་བྱང་ཆུབ་སེམས་དཔའི་འཁོར་རྣམས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཁྱུ་མཆོག་གི་མཐུ་ ཕྱུང་བ་བསམ་གྱིས་མི་ཁྱབ་པ་ཡོངས་སུ་སྟོན་ཅིང༌། དེ་བཞིན་གཤེགས་པའི་སྐུ་ཡང་དག་པར་འབྱུང་བ་དང༌། བསམ་གྱིས་མི་ཁྱབ་པའི་རྫུ་འཕྲུལ་ཡང་དག་པར་སྟོན་པ་དང༌། སེམས་ཅན་གྲངས་མེད་པའི་རྒྱུད་ཚིམ་པར་མཛད་པ་དང༌། སངས་རྒྱས་ཀྱི་རྒྱན་རྣམ་པར་ཕྱེ་བས་ནམ་མཁའི་ཁམས་ཐམས་ཅད་དང༌། ཆོས་ཀྱི་དབྱིངས་ཐམས་ཅད་རྒྱས་པར་ མཛད་པ། འགྲོ་བ་ཐམས་ཅད་ཀྱི་དགེ་བའི་རྩ་བ་མཐའ་ཡས་པ་བརྟན་པར་མཛད་པ། སངས་རྒྱས་ཀྱི་ཆོ་འཕྲུལ་གཞལ་དུ་མེད་པ་ལས་བྱུང་བ། ཚིག་གི་ལམ་ཐམས་ཅད་ལས་ཡང་ དག་པར་འདས་པ། བྱང་ཆུབ་སེམས་དཔའ་རིགས་དང་ལྡན་པ་ཐམས་ཅད་ཀྱིས་མངོན་པར་མོས་པར་བྱ་བ། སེམས་ཅན་འདུལ་བ་ཇི་ལྟ་བ་བཞིན་དུ་ཚིམ་པར་བྱ་བའི་ཕྱིར་སངས་ རྒྱས་ཀྱི་སྐུ་ཡངས་པ་རྗེས་སུ་ཁྱབ་པར་གྱུར་པ། དགེ་བའི་རྩ་བ་བརྗོད་པ་ཐམས་ཅད་རྣམ་པར་དག་པས་སངས་རྒྱས་ཀྱི་ཡོན་ཏན་ཚད་མེད་པ་ཡང་དག་པར་སྟོན་པ། དེ་བཞིན་ གཤེགས་པའི་ཡུལ་རྒྱུན་མི་འཆད་པར་འབྱུང་བའི་སངས་རྒྱས་ཀྱི་ཏིང་ངེ་འཛིན་ལས་བྱུང་བ། འགྲོ་བ་ཐམས་ཅད་མ་ལུས་པའི་ལུས་ཀྱི་རྗེས་སུ་བདལ་བ། སྐུའི་བྱིན་གྱི་རླབས་ལས་ མཚམས་མེད་པ། ཡིད་ཚད་མེད་པ་ཡོངས་སུ་མགུ་བར་མཛད་པ། ཐམས་ཅད་མཁྱེན་པ་ཉིད་ཀྱི་རིགས་རྒྱུན་མི་གཅོད་པ། སངས་རྒྱས་ཀྱི་རྣམ་པར་སྤྱོད་པ་མཐའ་དང་དབུས་མེད་ པ་འབྱུང་བ་བརྙེས་པ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་རིགས་སུ་བྱུང་བ། ཁམས་དང༌། མོས་པ་བགྲང་དུ་མེད་པ་ཐམས་ཅད་སྦྱོང་བར་མཛད་ པ༑ བྱང་ཆུབ་སེམས་དཔའ་ཐམས་ཅད་ཡེ་ཤེས་མངོན་པར་སྒྲུབ་པ་ལ་འཇུག་པར་མཛད་པ། བྱང་ཆུབ་སེམས་དཔའ་ཐམས་ཅད་ཀྱི་དབང་པོ་རབ་ཏུ་དགའ་བར་མཛད་པ། ཆོས་ཀྱི་སྤྲིན་ གྱིས་ནམ་མཁའི་ཁམས་ཐམས་ཅད་དུ་ཡོག་པར་མཛད་པ། ཆོས་ཀྱི་དབྱིངས་ཐམས་ཅད་མ་ལུས་པར་དེ་བཞིན་གཤེགས་པས་འདུལ་བའི་བྱིན་གྱི་རླབས་ཀྱིས་རློབ་པ། སེམས་ཅན་ ཐམས་ཅད་ཀྱི་རྟོག་པ་བསམ་པ་ཇི་ལྟ་བ་བཞིན་དུ་ཡོངས་སུ་རྒྱས་པར་མཛད་པ། མི་གནས་པའི་ཡེ་ཤེས་ཀྱི་རྒྱུད་ཀྱིས་འགྲོ་བ་ཐམས་ཅད་ལས་འཕགས་པ། ཡེ་ཤེས་ཀྱི་རྣམ་པ་ཐམས་ ཅད་བརྙེས་པ། སངས་རྒྱས་ཀྱི་བྱིན་གྱི་རླབས་སྣང་བ་གཟིགས་པ། དགེ་བའི་རྩ་བ་ཇི་ལྟར་བསྐྱེད་པ་བཞིན་དུ་ཡང་དག་པར་གཟིགས་པ། སེམས་བསྐྱེད་པ་རྒྱ་ཆེན་པོ་སྐྱེ་བར་མཛད་ ༄༅། །པ༑ འགྲོ་བ་ཐམས་ཅད་ཀུན་ཏུ་བཟང་པོ་ཐུབ་པ་མེད་པའི་ཡེ་ཤེས་ཡང་དག་པར་རྒྱུ་བས་བྱུང་བ། འགྲོ་བ་དང༌། ཞིང་ཐམས་ཅད་དུ་ཁྱབ་པ། ཆོས་ཀྱི་དབྱིངས་ ཐམས་ཅད་དུ་མི་ལྡོག་པར་གཤེགས་པ། སངས་རྒྱས་ཀྱི་སྐུའི་རྒྱུད་བརྗོད་དུ་མེད་པའི་ཡང་བརྗོད་དུ་མེད་པ་ཡང་དག་པར་སྟོན་པ། བསམ་པ་ཇི་ལྟ་བ་བཞིན་དུ་འཁྲུལ་པ་མི་ མངའ་བར་བྱིན་གྱིས་རློབ་པ། འགྲོ་བ་ཐམས་ཅད་ཀྱི་ཚིག་གི་རྣམ་པས་ཡོན་ཏན་མི་ཟད་པ། སངས་རྒྱས་རྗེས་སུ་དྲན་པས་ཆོས་ཀྱི་དབྱིངས་ཐམས་ཅད་རྒྱས་པར་མཛད་ པ༑ འཇིག་རྟེན་གྱི་ཁམས་མཐའ་དང་དབུས་མེད་པར་ཁྱབ་པར་མཛད་པ། བྱང་ཆུབ་ཀྱི་སེམས་ཀྱིས་ཇི་ལྟར་དམ་བཅས་པའི་སེམས་ཅན་རིམ་གྲོར་མཛད་པ། ཇི་ལྟར་བརྙེས་ པའི་ཆོས་ཀྱི་སྦྱིན་པ་མཛད་པ། སེམས་ཅན་ཇི་ལྟར་འདུལ་བ་བཞིན་དུ་འདུལ་བར་མཛད་པ། མོས་པ་དང་བསམ་པ་ཇི་ལྟ་བ་བཞིན་དུ་རྣམ་པར་དག་པར་མཛད་པ། གཟུགས་ ཀྱི་སྐུ་བསམ་གྱིས་མི་ཁྱབ་པར་བྱིན་གྱིས་རློབ་པ། འགྲོ་བ་ཐམས་ཅད་ལ་གནས་པ་མི་མངའ་ཞིང་མཉམ་པ་ཉིད་ཀྱི་རྗེས་སུ་བཞུད་པ། སྤྱོད་པ་ཐ་དད་པ་ལས་བྱུང་བ། དེ་བཞིན་ གཤེགས་པའི་སྟོབས་བཅུ་བསྒྲིབས་པ་མེད་པ། མངོན་པར་སངས་རྒྱས་པ། ཐུགས་ལ་ཆགས་པ་མི་མངའ་བས་རྟག་ཏུ་མཉམ་པར་བཞག་ཅིང་མ་འདྲེས་པ། ཡེ་ཤེས་ ཐམས་ཅད་ལ་རྣམ་པར་སྤྱོད་པ། དོན་དང་ཚིག་དང་ཡི་གེ་ལ་དད་པ་ཡང་དག་པར་སྟོན་པ། ཡེ་ཤེས་རྒྱ་མཚོ་མཐའ་དང་དབུས་མེད་པ་ལ་བཞུགས་པ། ཡོན་ཏན་གྱི་མཆོག་ཡེ་ཤེས་ ཀྱི་སྙིང་པོས་བྱུང་བས་ཆོས་ཀྱི་དབྱིངས་ཐམས་ཅད་དུ་སངས་རྒྱས་ཀྱི་ཉི་མ་ཤར་བ། འགྲོ་བ་ཐམས་ཅད་དུ་སྔོན་གྱི་སྨོན་ལམ་ཟད་པ་མི་མངའ་བར་ཆོས་ཀྱི་དབྱིངས་ཀྱི་རང་བཞིན་ལ་ གནས་པ། སངས་རྒྱས་ཀྱི་རྣམ་པར་སྤྱོད་པ་མ་ཉམས་པ་བརྙེས་པ། བདག་གི་དང་ཡོངས་སུ་གཟུང་བ་མེད་པས་གནས་པ་མི་མངའ་བ། འཇིག་རྟེན་ལས་འདས་པའི་ཆོས་ཐམས་ཅད་ འབྱུང་ཞིང༌། འཇིག་རྟེན་གྱི་ཆོས་ཐམས་ཅད་ཀྱིས་མ་གོས་པ། འགྲོ་བ་ཐམས་ཅད་ཀྱི་མི་ཤེས་པའི་རྒྱལ་མཚན་ཡང་དག་པར་བཅད་པ། འཇིག་རྟེན་ཐམས་ཅད་ཀྱི་མི་ཤེས་པ་ཆེན་ པོ་ཡོངས་སུ་བསལ་བའི་གནས་སུ་གྱུར་པ། འགྲོ་བ་ཐམས་ཅད་སྣང་བར་མངོན་པར་འདོན་པ། འཇིག་རྟེན་ཐམས་ཅད་ཡེ་ཤེས་ཁྱད་པར་དུ་འཕགས་པ་ལ་རབ་ཏུ་གཞོག་པ། འགྲོ་བ་ཐམས་ཅད་ཉེ་བར་འཚོ་བའི་བསོད་ནམས་ཡོངས་སུ་མི་ཟད་པ། བྱང་ཆུབ་སེམས་དཔའ་ཐམས་ཅད་ཀྱི་ཤེས་པ་ཐུགས་སུ་ཆུད་པས་དད་པར་བྱ་བར་འོས་པ། ཡང་དག་པར་ རྫོགས་པའི་སངས་རྒྱས་སུ་གཞོལ་བའི་བྱམས་པ་ཆེན་པོ་ལས་བྱུང་བ། ཐུགས་རྗེ་ཆེན་པོ་ཡང་དག་པར་སྟོན་པས་སྤྱོད་པ། སངས་རྒྱས་ཀྱི་སྐུ་བརྗོད་དུ་མེད་པའི་ཆོས་དང༌། སངས་ ༄༅། །རྒྱས་ཀྱི་ཆོས་སྣ་ཚོགས་བསམ་གྱིས་མི་ཁྱབ་པའི་གསུང་དང་དབྱངས་ཀྱི་ཆར་འབེབས་པ། སེམས་ཅན་གྱི་བསམ་པ་ཇི་ལྟ་བ་བཞིན་དུ་ཡང་དག་པར་ ཚིམ་པར་མཛད་པ། སྔོན་གྱི་མཐའ་དང༌། ཕྱི་མའི་མཐའ་དང༌། ད་ལྟར་བྱུང་བའི་མཐའ་དམིགས་པའི་བྱིན་རླབས་ཤིན་ཏུ་དག་ཅིང་བསམ་གྱིས་མི་ཁྱབ་པས་སེམས་ཅན་དག་ པར་མཛད་པ༑ བྱང་ཆུབ་སེམས་དཔའ་ཐམས་ཅད་ལུང་བསྟན་པ་རྒྱུན་མི་འཆད་པ། སངས་རྒྱས་ཀྱི་རིགས་སུ་དབང་བསྐུར་བས་དེ་བཞིན་གཤེགས་པའི་རྒྱུད་དུ་བྱུང་བ། འཇིག་རྟེན་ཐམས་ཅད་དུ་འཁོར་ལོ་མི་ལྡོག་པར་འཁོར་བ། འཇིག་རྟེན་ཐམས་ཅད་ཀྱི་མངོན་པར་ཞེན་པ་ཐམས་ཅད་ལས་འཕགས་པ། སངས་རྒྱས་ཀྱི་ཞིང་དང༌། ཆོས་ ཀྱི་དབྱིངས་ཐམས་ཅད་ཀྱི་མཐའ་ཀླས་པ་ལ་མི་གནས་པ། འགྲོ་བ་ཐམས་ཅད་མཉམ་པ་ཉིད་དུ་ཐུགས་སུ་ཆུད་པ། འཇིག་རྟེན་ལས་འདས་པའི་བསོད་ནམས་ཀྱིས་རྣམ་པར་ དག་པ༑ འཁོར་བ་ལ་མི་བཞུགས་པར་འཇིག་རྟེན་ཐམས་ཅད་དུ་སྣང་བར་གྱུར་པ། བཙལ་བ་མི་དམིགས་པས་ཆོས་ཀྱི་དབྱིངས་ཐམས་ཅད་ཀྱི་རང་བཞིན། ཡེ་ཤེས་ཀྱི་ཟླ་བ་ དེ་བཞིན་གཤེགས་པ་ཚད་མེད་པའི་རྗེས་སུ་བཞུད་པ། སྒྱུ་མ་ལྟ་བུའི་ཡེ་ཤེས་ཀྱིས་བྱིན་གྱིས་རློབ་པ། མིག་ཡོར་ལྟ་བུའི་ཡེ་ཤེས་ཀྱིས་རྣམ་པར་སྟོན་པ། རྨི་ལམ་ལྟ་བུར་ རྗེས་སུ་དྲན་པ། སྤྲུལ་པ་དང་མཉམ་པར་བྱུང་བ། སེམས་ཀྱི་རང་བཞིན་ལྟ་བུར་འཇིག་རྟེན་སྣ་ཚོགས་ཐམས་ཅད་བྱིན་གྱིས་རློབ་པ། ལས་ཀྱི་རྣམ་པར་སྨིན་པའི་ཚུལ་དང༌། བསམ་པ་ ཇི་ལྟ་བ་བཞིན་དུ་སེམས་ཅན་གྱི་སྐྱེ་མཆེད་རྣམ་པར་ཕྱེ་བ་ཡང་དག་པར་སྟོན་པ། སེམས་ཅན་གྱི་དབང་པོ་དང་མཐུན་པར་སངས་རྒྱས་ཀྱི་སྐུ་བྱུང་བ། དེ་བཞིན་གཤེགས་པའི་དམིགས་ པ་ལ་སེམས་ཅན་གྲངས་མེད་པའི་སེམས་ཡང་དག་པར་གནས་པ། འཇིག་རྟེན་ཐམས་ཅད་རྟེན་ཅིང་འབྲེལ་བར་འབྱུང་བ་རྣམ་པར་བསྟེན་པའི་རང་བཞིན་དུ་ཆོས་ཀྱི་མཚན་ཉིད་ ཀྱིས་ཡང་དག་པར་སྤྱོད་པ། ཡེ་ཤེས་ཀྱི་རྒྱུད་མཚན་ཉིད་མེད་པའི་རང་བཞིན་དང་མཚན་ཉིད་གཅིག་ཏུ་གྱུར་པ། འཇིག་རྟེན་ཐམས་ཅད་ཀྱི་རང་བཞིན་གྱི་མཚན་ཉིད་སྣང་བ་མངོན་ པར་སྒྲུབ་པའི་སྤྱོད་པ་ཡང་དག་པར་སྟོན་ཅིང༌། འགྲོ་བ་ཐམས་ཅད་གདོན་པར་བརྩོན་པ། སངས་རྒྱས་ཀྱི་སྤྱོད་ཡུལ་བླ་ན་མེད་པ་ཡང་དག་པར་སྟོན་པ། འཇིག་རྟེན་དང་ཞིང་ཐམས་ ཅད་ཡོངས་སུ་སྐྱོབ་པས་སངས་རྒྱས་ཀྱི་མཚན་མ་གཟུང་བར་འཇིག་རྟེན་དུ་མངོན་པར་བྱུང་བ། འཇིག་རྟེན་གྱི་ཉོན་མོངས་པའི་མཚན་མ་ཐམས་ཅད་རྣམ་པར་བསལ་བ། འཇིག་རྟེན་ ཐམས་ཅད་ཀྱི་རྗེས་སུ་དྲན་པ་དང༌། དམིགས་པར་འབྱོར་བར་གྱུར་པ། འཁྲུག་པ་མེད་པར་ཁོང་དུ་ཆུད་པར་འགྱུར་བའི་རྒྱུ་ཐེག་པ་ཆེན་པོས་ཞལ་ཡོངས་སུ་རྒྱས་པ། ཆོས་ཐམས་ ༄༅། །ཅད་ཀྱི་དོན་གྲུབ་པ། འགྲོ་བ་ཐམས་ཅད་ཀྱི་དགེ་བའི་རྩ་བས་རྣམ་པར་ཕྱེ་བ། ཉམས་པ་མེད་པའི་འཕྲིན་ལས་རྣམ་པར་སྨིན་པས་རྣམ་པར་དག་པ། ཡེ་ཤེས་ ཀྱི་འབྱུང་གནས་དུས་གསུམ་མཉམ་པ་ཉིད་དུ་ཐུགས་སུ་ཆུད་པ། འཇིག་རྟེན་ཐམས་ཅད་ཀྱི་ཡོངས་སུ་རྟོག་པ་ཡོངས་སུ་མི་རྟོག་པས་བྱུང་བ། འཇིག་རྟེན་གྱི་ཁམས་ཐམས་ཅད་ དུ་འོད་ཟེར་གྱི་དྲ་བས་གསལ་བར་གྱུར་པ། ཕྱོགས་བཅུ་འབྱམས་ཀླས་པ་ཐམས་ཅད་དུ་སངས་རྒྱས་ཀྱི་འོད་ཀྱིས་སྣང་བར་མཛད་པ། སངས་རྒྱས་ཐམས་ཅད་ཀྱི་རྗེས་སུ་བཞུད་པ་ བལྟ་བས་མི་ངོམས་ཤིང་བཏང་མི་བྲ་བ། ཡོན་ཏན་ཆེན་པོ་དང༌། ཡེ་ཤེས་དང༌། མངོན་པར་ཤེས་པ་དང༌། བྱང་ཆུབ་སེམས་དཔའི་སྤྱོད་པ་འབྱུང་བ་དང༌། དབང་པོ་མངོན་པར་ མཁྱེན་པའི་ཡེ་ཤེས་ཀྱི་སྤྱོད་ཡུལ་ཅན། ཡེ་ཤེས་ཀྱི་དཀྱིལ་འཁོར་གྱིས་སངས་རྒྱས་ཀྱི་མཛད་པ་རྒྱས་པར་མཛད་པ། སངས་རྒྱས་ཀྱི་འཕྲིན་ལས་ཤིན་ཏུ་སྒྲུབ་པ་ནུབ་ཅིང༌། འདས་ པ་དང༌། མ་འོངས་པ་དང༌། ད་ལྟར་བྱུང་བའི་ཐམས་ཅད་མཁྱེན་པའི་ཚུལ་སྟོན་པ། བྱང་ཆུབ་སེམས་དཔའི་གཟུངས་མཐའ་ཡས་པའི་ཆར་འབེབས་པ། བསམ་པ་ཡངས་པའི་ སྒོམ་པ་ཡོངས་སུ་འཛིན་པར་མཛད་པ། སངས་རྒྱས་ཀྱི་དཔལ་ཐམས་ཅད་ཀྱིས་རབ་ཏུ་འབར་བ། དེ་བཞིན་གཤེགས་པའི་སྐུ་ཁ་དོག་མཐའ་ཡས་པ་སྣ་ཚོགས་སུ་འཇིག་ རྟེན་ཐམས་ཅད་ལ་མངོན་པར་སྟོན་པ། སྒྲིབ་པའི་ཆོས་ཐམས་ཅད་དུ་མ་ལྷུང་བ། ཆོས་ཐམས་ཅད་ཀྱི་རང་བཞིན་གྱིས་དོན་གྱིས་དག་པ། ཡོན་ཏན་གྱི་ཆོས་ཐམས་ཅད་ལ་མངའ་བས་ མཛེས་པའི་དཀྱིལ་འཁོར་ཅན། ཡོན་ཏན་གྱི་འོད་ཟེར་མངའ་བའི་ཉི་མར་གྱུར་པ། བསོད་ནམས་ཀྱི་ཞིང་དུ་ཤར་བ། གཟི་བརྗིད་ཐམས་ཅད་ཀྱི་དྲ་བས་མངོན་པར་སྐྱེས་པ། འཇིག་ རྟེན་ཐམས་ཅད་དུ་སངས་རྒྱས་ཀྱིས་སྤྲུལ་པ་ཡང་དག་པར་འཛིན་པ། འཇིག་རྟེན་ཐམས་ཅད་སྤྲུལ་པར་ཐུགས་སུ་ཆུད་པའི་ཡེ་ཤེས་སྣང་བ་དང་ལྡན་པ། དེ་བཞིན་གཤེགས་ པའི་གོ་འཕང་ཆགས་པ་མེད་པ་མངའ་བ། ཕྱི་མའི་མཐའི་ཡོན་ཏན་འཇིག་རྟེན་ཐམས་ཅད་ཀྱིས་རྣམ་པར་ཤེས་པ། འགྲོ་བ་ཐམས་ཅད་དང་མཐུན་པར་སྟོན་པའི་ཡེ་ཤེས་ཀྱི་ཕྱག་ མངའ་བ། དེ་བཞིན་གཤེགས་པའི་ཡེ་ཤེས་ཀྱི་སྨན་པ། སེམས་ཅན་ཐམས་ཅད་བདེ་བར་མཛད་པ། འཇིག་རྟེན་ཚད་མེད་པ་ཐམས་ཅད་དུ་ཤིན་ཏུ་རྣམ་པར་དག་པས་རྗེས་ སུ་འབྲང་བ། འགྲོ་བ་དང་ཞིང་འབྱམས་ཀླས་པ་ཐམས་ཅད་དུ་ཕྱིར་མི་ལྡོག་པ། ཡེ་ཤེས་ཀྱི་སྤྱན་ཕུགས་རབ་རིབ་མེད་ཅིང་རྣམ་པར་དག་པ། སངས་རྒྱས་ཀྱི་ལོ་ལེགས་པ་ ཡང་དག་པར་སྟོན་པ། འཁུ་བའི་སེམས་ཅན་གྱི་ཁམས་ལས་སུ་རུང་བར་མཛད་པ། འདུལ་བ་སྣ་ཚོགས་དུ་མ་ལ་འཇུག་པ། དུས་བཞིན་དུ་འདུལ་བའི་རྒྱུན་མི་འཆད་པ། ༄༅། །འགྲོ་བ་ཐམས་ཅད་ལ་མཉམ་པའི་ཐུགས་ཀྱིས་ཡང་དག་པར་སྤྱོད་པ་ལས་སྐྱོན་མེད་པའི་རྣམ་པར་སྨིན་པ་དང༌། མྱ་ངན་ལས་འདས་པ་ཡང་དག་པར་ སྟོན་པ༑ བསམ་པ་དང༌། ལས་དང༌། རྒྱུ་མཐུན་པའི་འབྲས་བུ་ཇི་ལྟ་བ་བཞིན་དུ་སངས་རྒྱས་ཀྱི་སྐུ་རྣམ་པར་སྟོན་པ། སངས་རྒྱས་ཀྱི་སྐུ་ཇི་ལྟ་བ་བཞིན་དུ་སེམས་ཅན་གྱིས་ཆོས་ ཤེས་པ་འབྱུང་བར་མཛད་པ། སངས་རྒྱས་ཀྱིས་སྤྲུལ་པ་བྱིན་གྱིས་རློབ་པ། འཇིག་རྟེན་གྱི་ཆོས་ཐམས་ཅད་ལ་རྣམ་པར་གཟིགས་པའི་ཡེ་ཤེས་མངའ་བ། དགའ་བ་ཆེན་པོ་དང་ ལྷག་པའི་བསམ་པས་དབང་པོ་དགའ་བར་མཛད་པ། སངས་རྒྱས་མཐོང་བའི་དད་པའི་ཤུགས་མཐའ་ཡས་པས་བྱུང་བ། སེམས་ཅན་ཐམས་ཅད་ཀྱི་རང་གི་དགེ་བའི་རྩ་བ་ཕྱིར་ མི་ལྡོག་པར་མཛད་པ། སེམས་ཅན་གྱི་ལས་ཇི་ལྟ་བ་བཞིན་དུ་རྗེས་སུ་འབྲང་བར་མཛད་པ། འགྲོ་བ་གཉིད་ཀྱིས་ལོག་པ་ཐམས་ཅད་སད་པར་མཛད་པ། སངས་རྒྱས་སྐྱེ་བས་ དགེ་བ་ཡང་དག་པར་འཕེལ་བར་མཛད་པ། སེམས་ཅན་ལ་སངས་རྒྱས་ཀྱི་བག་དབབ་པ། ཆེན་པོ་སྟོབས་པ་མཛད་པ། འཇིག་རྟེན་གྱི་ལྟ་བ་ཐམས་ཅད་ལ་མི་གནས་ པ༑ ཡེ་ཤེས་ཀྱི་དོན་ལ་རབ་ཏུ་གཞོག་པ། རབ་ཏུ་གཞག་པའི་ཡེ་ཤེས་ཀྱི་ཚུལ་གྱི་སྤྱོད་ཡུལ་ཐུགས་སུ་ཆུད་པ། སངས་རྒྱས་ཀྱིས་གཟིགས་པའི་ཟིལ་གྱིས་ནོན་ པའི་རྒྱན་གྱིས་བརྒྱན་པ། ཆོས་ཀྱི་རྒྱུད་ཐུགས་སུ་ཆུད་པའི་རི་བོ་རྣམ་པར་དག་པ། སངས་རྒྱས་འབྱམས་ཀླས་པ་དང༌། བྱང་ཆུབ་སེམས་དཔའ་གཞན་དང་གཞན་དུ་སྟོན་པ། ཁ་ན་ མ་ཐོ་བ་མེད་པའི་ས་ལ་སེམས་ཅན་རབ་ཏུ་འགོད་པ། སངས་རྒྱས་ཀྱི་ཡོན་ཏན་གྲངས་མེད་པས་རྣམ་པར་བྲིས་པ། ལས་ཀྱིས་སྣ་ཚོགས་སུ་གྱུར་པའི་འཇིག་རྟེན་དུ་དེ་བཞིན་གཤེགས་ པ་སྣ་ཚོགས་ཡང་དག་པར་སྟོན་པ། སངས་རྒྱས་ཀྱི་འབྱུང་གནས་རྣམ་པར་སྦྱོང་བ། ཡེ་ཤེས་ཐམས་ཅད་ཡོངས་སུ་འཐོབ་པར་མཛད་པ། འཇིག་རྟེན་ཐམས་ཅད་ཀྱི་སྨོན་ལམ་ རྗེས་སུ་སྲུང་བ། མི་ཤིགས་པ། འགྲོ་བ་ཐམས་ཅད་ལ་དགེ་བའི་བཤེས་གཉེན་སྟོན་པ། སྣང་བ་དྲི་མ་མེད་ཅིང་མཆོག་ཏུ་དག་པར་མཛད་པ། འགྲོ་བ་མ་ལུས་པ་ཐམས་ཅད་ ཀྱིས་ཇི་ཙམ་དུ་མངོན་སུམ་དུ་མཐོང་བ་དེ་ཙམ་དུ་བརྗོད་དུ་མེད་པ། སེམས་ཅན་ཐམས་ཅད་ཀྱི་འགྲོ་བའི་རྗེས་སུ་སོང་བའི་བྱིན་གྱི་རླབས་མངའ་བ། གྲོགས་སྔོན་དུ་འགྲོ་བའི་ དགེ་བའི་རྩ་བས་སེམས་ཅན་རྣམ་པར་དག་པར་མཛད་པ། འགྲོ་བ་ཐམས་ཅད་ཀྱི་སྨོན་ལམ་གྱི་རྗེས་སུ་སོང་བ། ཉམས་པ་མེད་པ། སེམས་ཅན་ཐམས་ཅད་ཀྱི་དགེ་བའི་ རྩ་བ་ཡོངས་སུ་བཟུང་བས་དག་པར་མཛད་པ་ལས་བསགས་པའི་ཚུལ་གྱིས་ཡོངས་སུ་བྱུང་བ། བདུད་ཀྱི་དཀྲུག་མ་ཐམས་ཅད་རྣམ་པར་འཇོམས་པར་བྱུང་བ། ཆགས་པ་ ༄༅། །མེད་པའི་མཐའི་སྟོབས་ཀྱིས་བྱུང་བ། འགྲོ་བ་ཐམས་ཅད་ཀྱིས་བལྟ་ན་འོད་ཤིན་ཏུ་དང་བར་སྣང་བ། ཡེ་ཤེས་ཀྱི་དབྱིངས་ཆགས་པ་མེད་པའི་སྙིང་ པོའི་ཉི་མ་སེམས་ཅན་གང་ཡང་རུང་བ་ལ་ཆོས་ཀྱི་སྦྱིན་པ་མཛད་པ། འོད་ཟེར་གྱི་དཀྱིལ་འཁོར་གྱི་མཛོད་མཐའ་དང་དབུས་མེད་པ། དེ་བཞིན་གཤེགས་པའི་སྟོབས་ཀྱི་ ཡེ་ཤེས་ཀྱི་དཀྱིལ་འཁོར་མངའ་བ། འགྲོ་བ་ཐམས་ཅད་ལ་སྣང་བར་གྱུར་པ། བསམ་པ་དང་ཡང་དག་པར་རྟོགས་པ་ཐམས་ཅད་ཡོངས་སུ་རྫོགས་པ། ཕྱིར་རྒོལ་བ་ཤིན་ཏུ་ བཅོམ་པ། ཡོན་ཏན་གྱི་གནས་དམ་པ་མཆོག་ཏུ་གྱུར་པ། འགྲོ་བ་ཐམས་ཅད་ཀྱི་རྟེན་དུ་གྱུར་པ། ཡོན་ཏན་ཚད་མེད་པར་གྱུར་པ། འགྲོ་བ་ཐམས་ཅད་ཡོངས་སུ་དག་པར་མཛད་ པ༑ དགེ་བའི་རྩ་བ་ཆུང་ངུ་ཚད་མེད་པར་ཡོངས་སུ་འཛིན་པ། ཟད་མི་ཤེས་པའི་ཡེ་ཤེས་ཀྱི་སར་འཛུད་ཅིང་རབ་ཏུ་གཞོག་པ། འཇིག་རྟེན་ཐམས་ཅད་ཀྱི་དགེ་བའི་རྩ་བ་སེམས་ ལ་རག་ལུས་པར་ཡིད་ཆེས་པས་ཚད་མེད་པའི་བསོད་ནམས་དང་ཡོན་ཏན་དག་པར་མཛད་པ། ཡེ་ཤེས་ཀྱི་ཚུལ་གྱིས་ངན་སོང་གསུམ་གྱི་འགྲོ་བ་ཡོངས་སུ་སྐྱོབ་པའོ། །ཞེས་ རྣམ་པ་དེ་ལྟ་བུར་དེ་བཞིན་གཤེགས་པ་ལ་མོས་པ། རྣམ་པ་དེ་ལྟ་བུར་ཡང་དག་པར་རྫོགས་པའི་སངས་རྒྱས་ལ་ཡང་དག་པར་ལྟ་བ། རྣམ་པ་དེ་ལྟ་བུར་ཡེ་ཤེས་ཀྱི་མུ་སྟེགས་ ལས་འབབ་པ། རྣམ་པ་དེ་ལྟ་བུའི་ཡོན་ཏན་རྒྱ་མཚོའི་གང་ཆེན་མཚོ་ཐམས་ཅད་ལ་འཇུག་པ། རྣམ་པ་དེ་ལྟ་བུའི་ཡེ་ཤེས་ཀྱི་ནམ་མཁའི་རྗེས་སུ་ཕྱིན་པར་རྗེས་སུ་འགྲོ་བ། རྣམ་ པ་དེ་ལྟ་བུར་འགྲོ་བ་ཐམས་ཅད་ཀྱི་བསོད་ནམས་ཀྱི་ཞིང་དུ་ཡང་དག་པ་ཇི་ལྟ་བར་ཤེས་པ། རྣམ་པ་དེ་ལྟ་བུར་དེ་བཞིན་གཤེགས་པ་དྲན་པའི་སྒོས་ལྟ་བ། རྣམ་པ་དེ་ལྟ་བུར་ དགེ་བའི་འཕྲིན་ལས་རྣམ་པར་དག་པའི་མཚན་ཉིད་ཕུན་སུམ་ཚོགས་པས་དེ་བཞིན་གཤེགས་པ་ལ་རྟོག་པ། རྣམ་པ་དེ་ལྟ་བུའི་ཡང་དག་པར་རྫོགས་པའི་སངས་རྒྱས་ཀྱི་ སྐུ་ཆེན་པོ་འཇིག་རྟེན་གྱི་ཁམས་ཐམས་ཅད་དུ་སྣང་བར་བྱེད་པ། རྣམ་པ་དེ་ལྟ་བུའི་དེ་བཞིན་གཤེགས་པའི་སངས་རྒྱས་ཀྱི་རྣམ་པར་འཕྲུལ་བ་ཐམས་ཅད་ཡང་དག་པར་བསྟན་ པ་རྗེས་སུ་སེམས་པ་དེ་དག་གིས་དེ་བཞིན་གཤེགས་པའི་སྐུ་བཅོམ་ལྡན་འདས་ཀྱི་བ་སྤུའི་སྒོ་རེ་རེ་ནས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་འབྱུང་བ། གྲངས་མེད་ པར་རྣམ་པར་དག་པ། གྲངས་མེད་པར་ཤིན་ཏུ་སྣང་བ། གྲངས་མེད་པར་བལྟར་ཡོད་པ། གྲངས་མེད་པའི་སེམས་ཅན་གྱི་དགའ་བ་སྐྱེད་པ། གྲངས་མེད་པའི་སྤྲོ་བ་སྐྱེད་ པ༑ གྲངས་མེད་པའི་སངས་རྒྱས་ལ་འདུན་པ་རྣམ་པར་འཕེལ་བར་བྱེད་པ། གྲངས་མེད་པའི་ལྷག་བའི་བསམ་པ་རྣམ་པར་སྦྱོང་བ། གྲངས་མེད་པའི་དབང་པོ་སིམ་པར་བྱེད་ ༄༅། །པ༑ གྲངས་མེད་པའི་དེ་བཞིན་གཤེགས་པའི་སྤྱོད་ཡུལ་ཐོབ་པར་བྱེད་པ་མང་པོ་མཐོང་བར་གྱུར་ཏོ། །འོད་ཀྱི་འཁོར་ལོ་བྱེ་བ་ཁྲག་ཁྲིག་བརྒྱ་སྟོང་ བསམ་གྱིས་མི་ཁྱབ་པ་ཡང་དེ་བཞིན་གཤེགས་པའི་སྐུ་ལས་རྣམ་པར་འཕྲུལ་པ་སྣ་ཚོགས་ཀྱིས་འཕྲུལ་ཞིང་འབྱུང་བ། ཁ་དོག་བསམ་གྱིས་མི་ཁྱབ་པ། མདོག་བསམ་ གྱིས་མི་ཁྱབ་པ། འོད་བསམ་གྱིས་མི་ཁྱབ་པ། ཆོས་ཀྱི་དབྱིངས་མཐའ་དང་དབུས་མེད་པ་ཐམས་ཅད་རྒྱས་པར་བྱེད་པ། སངས་རྒྱས་ཀྱི་བྱིན་གྱི་རླབས་དང༌། སེམས་ཅན་ རྣམ་པར་དག་པས་དྲི་ཞིམ་པོར་རབ་ཏུ་བྱུང་བ། ཚིགས་སུ་བཅད་པ་བྱེ་བ་ཁྲག་ཁྲིག་བརྒྱ་སྟོང་བསམ་གྱིས་མི་ཁྱབ་པ་ཡོངས་སུ་འཛིན་པ། འཇིག་རྟེན་ཐམས་ཅད་ལས་རྣམ་ པར་འདས་ཤིང༌། འཇིག་རྟེན་ལས་འདས་པའི་དགེ་བའི་རྩ་བས་ཡོངས་སུ་བྱུང་བ། རྒྱན་བྱེ་བ་ཁྲག་ཁྲིག་བརྒྱ་སྟོང་བསམ་གྱིས་མི་ཁྱབ་པ། ཡང་དག་པར་སྟོན་པ། བསྐལ་ པ་བྱེ་བ་ཁྲག་ཁྲིག་བསམ་གྱིས་མི་ཁྱབ་པར་ཡོན་ཏན་མི་ཟད་པ། སངས་རྒྱས་ཀྱི་རྣམ་པར་འཕྲུལ་པ་ཟད་མི་ཤེས་པ་ལས་བྱུང་བ། སངས་རྒྱས་སྐྱེ་བ་བརྗོད་དུ་མེད་པ་ ཡང་དག་པར་སྟོན་པ། ཡེ་ཤེས་ཀྱི་སྒོ་ལ་རབ་ཏུ་གཞོག་པ། དོན་ཡངས་པ་ཤིན་ཏུ་སྟོན་པ། སངས་རྒྱས་ཀྱི་སྤྲུལ་པ་བརྗོད་དུ་མེད་པའི་ཚུལ་ཡང་དག་པར་སྟོན་པ། སངས་རྒྱས་ཀྱི་ཡུལ་མཐའ་དང་དབུས་མེད་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་ཁམས་ཀྱི་མཐར་ཐུག་པ། འཇིག་རྟེན་གྱི་ཁམས་ཐམས་ཅད་དུ་བྱིན་གྱི་རླབས་ཀྱིས་བྱུང་བ། འགྲོ་བ་ཐམས་ཅད་རྣམ་པར་དག་པ། མཉམ་པ་ཉིད་ཀྱི་རྗེས་སུ་སོང་བ། ཐམས་ཅད་མཁྱེན་པ་ཆགས་པ་མེད་པ། མཐའ་དང་དབུས་མེད་པའི་སངས་རྒྱས་ཀྱི་སྤྱོད་པ་ལས་བྱུང་ བ༑ དེ་བཞིན་གཤེགས་པ་བསམ་གྱིས་མི་ཁྱབ་པས་བསྟེན་པའི་དཔལ་ཡོད་པ། རིན་པོ་ཆེའི་འོད་འཕྲོ་བ་བྱེ་བ་བརྒྱ་སྟོང་བསམ་གྱིས་མི་ཁྱབ་པ་དེ་ལྟར་བྱུང་བ་མཐོང་བར་གྱུར་ ཏོ༑ ༑བཅོམ་ལྡན་འདས་ཀྱིས་ཀྱང་བྱིན་གྱི་རླབས་ཀྱིས་རྒྱན་སྨོན་ལམ་ཆེན་པོ་ལས་བྱུང་བའི་དགེ་བའི་རྩ་བ་མཐའ་ཡས་པ་དང༌། དེ་བཞིན་གཤེགས་པ་མཉེས་པར་བྱ་བའི་ སྤྱོད་པས་རྣམ་པར་དག་པ་དང༌། སྔོན་གྱི་བག་ཡོད་པ་ལས་ཡང་དག་པར་བྱུང་བའི་ཐམས་ཅད་མཁྱེན་པའི་སེམས་ཆགས་པ་མེད་པའི་དགེ་བའི་རྩ་བ་ལས་བྱུང་བ་དང༌། དེ་བཞིན་ གཤེགས་པ་འབྱམས་ཀླས་པ་འགྲོ་བ་ཐམས་ཅད་ཀྱི་ཐེ་ཚོམ་གཅོད་པ་དང༌། དེ་བཞིན་གཤེགས་པ་མཐོང་བ་ལ་སེམས་ཅན་ཚད་མེད་པ་རབ་ཏུ་དགོད་པ་དང༌། དགེ་བའི་ རྩ་བའི་སྒོ་དང༌། སངས་རྒྱས་ཀྱི་ཆོ་འཕྲུལ་ཟིལ་གྱིས་ནོན་པ་མེད་པ་ལ་རྒྱ་མཚོའི་མཐས་གཏུགས་པའི་སེམས་ཅན་གཟུད་པར་བྱ་བ་དང༌། བྱང་ཆུབ་སེམས་དཔའ་བཀའ་བཞིན་ ༄༅། །བྱེད་པ་ཐམས་ཅད་སངས་རྒྱས་ཀྱི་ཞིང་ཀུན་ནས་འདུས་པ་དང༌། སངས་རྒྱས་ཀྱི་བྱིན་གྱི་རླབས་དང༌། སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ ཡོངས་སུ་བརྗོད་པའི་ཚུལ་གྱིས་དེ་བཞིན་གཤེགས་པའི་འཁོར་དུ་ཇི་ལྟར་སངས་རྒྱས་ཀྱི་ཞིང་འབྱམས་ཀླས་པ་ཁྲག་ཁྲིག་བརྒྱ་སྟོང་བརྗོད་དུ་མེད་པ་གྲངས་མེད་པ་དག་ན་སེམས་ མ་དད་པ་རྣམས་དད་པར་བྱ་བ་དང༌། སེམས་དད་པ་རྣམས་རྣམ་པར་འཕེལ་བར་བྱ་བ་དང༌། སེམས་རྣམ་པར་འཕེལ་བ་རྣམས་རྣམ་པར་དག་པར་བྱ་བ་དང༌། སེམས་རྣམ་ པར་དག་པ་རྣམས་ཡོངས་སུ་སྨིན་པར་བྱ་བ་དང༌། སེམས་ཡོངས་སུ་སྨིན་པ་རྣམས་འདུལ་བར་བྱ་བ་དང༌། ཆོས་ཟབ་མོ་ཁོང་དུ་ཆུད་པར་བྱ་བ་དང༌། ཡེ་ཤེས་སྣང་བ་མཐའ་ དང་དབུས་མེད་པ་ཁོང་དུ་ཆུད་པར་བྱ་བ་དང༌། སེམས་ཚད་མེད་པ་རྣམས་རྒྱ་ཆེ་བར་བྱ་བ་དང༌། ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ལས་ཕྱིར་མི་ལྡོག་པར་བྱ་བ་དང༌། ཆོས་ཉིད་དང་མི་འགལ་བར་བྱ་བ་དང༌། ཡང་དག་པའི་མཐས་མི་སྐྲག་པར་བྱ་བ་དང༌། དེ་བཞིན་ཉིད་རབ་ཏུ་རྟོགས་པར་བྱ་བ་དང༌། ཕ་རོལ་ཏུ་ཕྱིན་པ་རྣམས་ཀྱང་རབ་ཏུ་རྫོགས་ པར་བྱ་བ་དང༌། འཇིག་རྟེན་ལས་འདས་པའི་དགེ་བའི་རྩ་བ་རྣམ་པར་སྦྱང་བར་བྱ་བ་དང༌། དམིགས་པ་ཐམས་ཅད་ལ་བརྩོན་པའི་སངས་རྒྱས་ཀྱི་རྣམ་པར་འཕྲུལ་པ་ཡང་ཀུན་ཏུ་ བཟང་པོའི་ཚུལ་དུ་མོས་པར་བྱ་བ་དང༌། བདུད་ཀྱི་ཡུལ་ལས་རྣམ་པར་ལྡོག་པར་བྱ་བ་དང༌། སངས་རྒྱས་ཀྱི་ཡུལ་འཐོབ་པར་བྱ་བ་དང༌། དེ་བཞིན་གཤེགས་པའི་ཆོས་ཉིད་ཤེས་པར་བྱ་བ་ དང༌། ཡེ་ཤེས་བསམ་གྱིས་མི་ཁྱབ་པ་སྐྱེ་བར་བྱ་བ་དང༌། ཐེག་པ་ཆེན་པོའི་སྨོན་ལམ་ལས་ཕྱིར་མི་ལྡོག་པར་བྱ་བ་དང༌། སངས་རྒྱས་བལྟ་བ་ལས་མི་འཕང་བར་བྱ་བ་དང༌། ཡེ་ཤེས་ཁོང་ དུ་ཆུད་པར་བྱ་བ་ཚད་མེད་པ་རྟོགས་པར་བྱ་བ་དང༌། ས་མཚམས་མེད་པའི་བསོད་ནམས་ཀྱི་སྟོབས་ཡང་དག་པར་ཡོངས་སུ་བསྒྲུབ་པར་བྱ་བ་དང༌། ཤིན་ཏུ་དགའ་བའི་སེམས་བསྐྱེད་ པར་བྱ་བ་དང༌། ཐེ་ཚོམ་མེད་པའི་ས་ལ་འཇུག་པར་བྱ་བ་དང༌། ཁ་ན་མ་ཐོ་བ་མེད་ཅིང་ཡོངས་སུ་དག་པ་འཐོབ་པར་བྱ་བ་དང༌། ཐམས་ཅད་མཁྱེན་པ་ཉིད་ལ་བརྟེན་པ་སོ་སོར་ཐོབ་ པར་བྱ་བ་དང༌། ཆོས་མཐོང་བ་ལས་ཕྱིར་མི་ལྡོག་པར་བྱ་བ་དང༌། བྱང་ཆུབ་སེམས་དཔའ་ཐམས་ཅད་ཀྱི་ཚོགས་ཀྱི་རྗེས་སུ་འཇུག་པར་བྱ་བ་དང༌། དུས་གསུམ་གྱི་སངས་རྒྱས་ཐམས་ ཅད་ཀྱི་རིགས་གྲུབ་པར་བྱ་བ་དེ་ལྟ་དེ་ལྟར་བཅོམ་ལྡན་འདས་ཀྱིས་ཐུགས་རྗེ་ཆེན་པོ་ཀུན་ཏུ་ཁྱབ་པ་དང༌། ཐམས་ཅད་མཁྱེན་པའི་ཡེ་ཤེས་ཀྱི་ཕུང་པོ་ཆེན་པོས་བྱིན་གྱི་རླབས་ཀྱི་ རྒྱན་རྣམ་པ་ཐ་དད་པ་མང་པོ་ཡང་དག་པར་བསྟན་ཏོ། །དེ་ལྟར་བཅོམ་ལྡན་འདས་ཀྱིས་སེམས་ཅན་ཐམས་ཅད་འདུལ་བའི་དབང་དུ་སངས་རྒྱས་ཀྱི་བདག་ཉིད་ཆེ་བ་བརྗོད་པའི་ ༄༅། །ཕྱིར་ཆགས་པ་མེད་པའི་ཡེ་ཤེས་ཀྱི་སྙིང་པོ་རབ་ཏུ་སྣང་བས་སངས་རྒྱས་ཀྱི་དཔལ་མཐའ་ཡས་པ་རབ་ཏུ་འབར་བ། སངས་རྒྱས་ཀྱི་ཆོ་འཕྲུལ་བསམ་གྱིས་མི་ ཁྱབ་པས་རྣམ་པར་སྣང་བ་ཐམས་ཅད་དུ་བཞུགས་པའི་དེ་བཞིན་གཤེགས་པའི་སྐུས་རྣམ་པར་འཕྲུལ་པ་མཐའ་དང་དབུས་མེད་པའི་ཆོ་འཕྲུལ་གྱི་མཐུ་དང་ལྡན་པ། དགོངས་པ་ ཡོངས་སུ་རྫོགས་པའི་སྔོན་གྱི་སྨོན་ལམ་གྱིས་ཡོངས་སུ་གྲུབ་པའི་ཡེ་ཤེས་ཀྱི་རྣམ་པར་གནོན་པས་དེ་བཞིན་གཤེགས་པའི་གཤེགས་སྟབས་ཕུན་སུམ་ཚོགས་པ། ཆོས་ཀྱི་དབང་ ཕྱུག་བརྙེས་པས་ཆོས་ཐམས་ཅད་ལ་མངའ་བ་དང་ལྡན་པ། ཐམས་ཅད་མཁྱེན་པ་ཉིད་ཀྱི་སྒོ་ནས་བྱུང་བའི་དེ་བཞིན་གཤེགས་པའི་སྐུ་རྣམ་པར་དག་པས་ཤིན་ཏུ་སྦྱངས་པ་མངའ་ བ༑ འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་དང་མཉམ་པ་ཉིད་དུ་གྱུར་པ། དགེ་བའི་རྩ་བ་ཐམས་ཅད་ཀྱིས་སྙིང་པོ་ཤིན་ཏུ་སྦྱངས་པ། འགྲོ་བ་ ཐམས་ཅད་ཀྱི་དཔེས་དཔེར་མི་འགྱུར་བའི་སྐུ་གཟུགས་མངའ་བ། མཚན་ཐམས་ཅད་ཀྱི་ལོ་མ་ཤིན་ཏུ་འཕགས་པའི་སྐུ་ཅན། སྟོབས་བཅུའི་རྒྱལ་མཚན་གྱི་སྟོབས་ཆེན་པོ་དང་ ལྡན་པ༑ བསྐལ་པ་མི་ཟད་པ་ཐམས་ཅད་དུ་བལྟ་བས་མི་ངོམ་པ། སྔོན་གྱི་དགེ་བའི་རྩ་བ་སྟོན་པའི་དབྱངས་ཀྱིས་ཡེ་ཤེས་ཀྱི་ང་རོར་གྱུར་པ། བྱང་ཆུབ་སེམས་དཔའ་ཐམས་ཅད་ ཀྱི་དཀྱིལ་འཁོར་མི་ཟད་པས་འགྲོ་བ་ཐམས་ཅད་ལ་ཉི་མའི་དཀྱིལ་འཁོར་དུ་གྱུར་པ། ཡོན་ཏན་ཐམས་ཅད་ཀྱི་རྒྱལ་པོ་ཆོས་ཐམས་ཅད་ཀྱི་སྲིད་ལ་མངའ་བའི་ཕྱིར་དུས་གསུམ་སྣང་བར་བྱེད་ པའི་གསུང་མངའ་བས་བྱིན་གྱི་རླབས་ཀྱི་རྒྱན་སྔོན་གྱི་དགེ་བའི་རྩ་བའི་ཚོགས་ལས་ཡང་དག་པར་བྱུང་བའི་བྱིན་གྱིས་བརླབས་སོ། །དེ་ནས་ལྷའི་རྒྱལ་པོ་རབ་དགའ་ལྡན་གྱིས་ཚུལ་འདི་ལྟ་ བུར་དེ་བཞིན་གཤེགས་པ་ལ་མཆོད་པ་དང༌། རིམ་གྲོ་དང༌། རྒྱན་ཀུན་ཏུ་བཤམས་པ་བྱས་ཏེ་དགའ་ལྡན་གྱི་རིས་ཀྱི་ལྷ་བྱེ་བ་བརྒྱ་སྟོང་གྲངས་མེད་པ་དང་ལྷན་ཅིག་ཏུ་ཞེས་ཅན་རིམ་གྲོ་ དང་བཅས་པར་བཅོམ་ལྡན་འདས་གང་ན་བ་དེར་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། གཤེགས་སུ་གསོལ། བདེ་བར་ གཤེགས་པ། གཤེགས་སུ་གསོལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བར་གཤེགས་སམ། དེ་ནས་བཅོམ་ལྡན་འདས་ལྷའི་རྒྱལ་པོ་ རབ་དགའ་ལྡན་གྱིས་སྤྱན་དྲངས་ནས་སངས་རྒྱས་ཀྱི་རྒྱན་རྣམ་པ་འདི་ལྟ་བུ་དང༌། སངས་རྒྱས་ཀྱི་བདག་ཉིད་ཆེ་བ་འགྲོ་བ་ཐམས་ཅད་ལ་མཛེས་པ། བྱང་ཆུབ་སེམས་དཔའ་ཐམས་ཅད་ མོས་པ། དགའ་ལྡན་གྱི་རིས་ཀྱི་ལྷའི་བུ་ཐམས་ཅད་མངོན་པར་དགའ་བ། ལྷའི་རྒྱལ་པོ་རབ་དགའ་ལྡན་གྱིས་མི་ངོམས་པར་རིམ་གྲོར་བྱ་ཞིང༌། ཚད་མེད་པའི་སེམས་ཅན་སངས་ ༄༅། །རྒྱས་ལ་དམིགས་པར་བརྩོན་པ་བསྐྱེད་པ། ཚད་མེད་པའི་སེམས་ཅན་སངས་རྒྱས་སུ་དགེ་བའི་རྩ་བ་བསྐྱེད་པ། མི་ཟད་པའི་བསོད་ནམས་དང་ལྡན་པར་ གྱུར་པ༑ དད་པ་དྲི་མ་མེད་པའི་ཚོགས་ཀྱིས་བསགས་པ། དེ་བཞིན་གཤེགས་པའི་ཞལ་བལྟ་བ་དང༌། མཆོད་པས་སྐྱོ་བར་མི་འགྱུར་བ། ལྷག་པའི་བསམ་པ་དགེ་བའི་ཚོགས་ཀྱིས་ ཡང་དག་པར་བསྡུས་པ། ཐམས་ཅད་མཁྱེན་པའི་དགེ་བའི་རྩ་བ་དང༌། སྨོན་ལམ་དང༌། སེམས་བསྐྱེད་པ་ལས་བྱུང་བས་ཁང་པ་རིན་པོ་ཆེ་ཐམས་ཅད་ཀྱིས་བརྒྱན་པར་གཤེགས་ སོ༑ ༑ཇི་ལྟར་བཅོམ་ལྡན་འདས་འདིར་གཤེགས་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་དང༌། དགའ་ལྡན་གྱི་གནས་དག་ཏུ་ཡང་གཤེགས་པར་སྣང་ ངོ༌། །བཅོམ་ལྡན་འདས་རིན་པོ་ཆེ་ཐམས་ཅད་ཀྱིས་བརྒྱན་པའི་ཁང་པར་གཤེགས་མ་ཐག་ཏུ་དེའི་ཚེ་རིན་པོ་ཆེ་ཐམས་ཅད་ཀྱིས་བརྒྱན་པའི་ཁང་པ་རིན་པོ་ཆེའི་རྒྱན་ལས་ཤིན་ཏུ་ འདས་པར་གནས་སོ། །ལྷ་རྫས་ལས་འདས་པའི་རིན་པོ་ཆེ་ཐམས་ཅད་ཀྱི་དྲ་བས་ཀུན་ནས་ཡོག་པར་གནས་སོ། །ལྷ་རྫས་ལས་འདས་པའི་རིན་པོ་ཆེ་ཐམས་ཅད་ཀྱི་སྤྲིན་གྱི་ཆར་ མངོན་པར་འབབ་པར་གནས་སོ། །ལྷ་རྫས་ལས་འདས་པའི་རིན་པོ་ཆེ་ཐམས་ཅད་ཀྱི་རྒྱན་གྱི་སྤྲིན་གྱིས་བརྒྱན་པར་གནས་སོ། །ལྷ་རྫས་ལས་འདས་པའི་གོས་ཐམས་ཅད་ཀྱི་ སྤྲིན་རབ་ཏུ་གཏོང་བར་གནས་སོ། །ལྷ་རྫས་ལས་འདས་པའི་ཙནྡན་ཐམས་ཅད་ཀྱི་སྤྲིན་ཆེན་པོ་རབ་ཏུ་གཏོང་བར་གནས་སོ། །ལྷ་རྫས་ལས་འདས་པའི་དྲི་ཐམས་ཅད་ཀྱི་མཆོག་ དང༌། བདུག་པ་འཐུལ་བའི་སྤྲིན་གྱི་ཆར་རབ་ཏུ་འབབ་པར་གནས་སོ། །ལྷ་རྫས་ལས་འདས་པའི་རིན་པོ་ཆེ་སྣ་ཚོགས་ཐམས་ཅད་ཀྱི་སྤྲིན་རྣམ་པ་ཐ་དད་པའི་ཆར་རབ་ཏུ་འབབ་ པར་གནས་སོ། །ལྷ་རྫས་ལས་འདས་པའི་མེ་ཏོག་མང་པོའི་སྤྲིན་གྱི་ཚོགས་ཀྱི་ཆར་རབ་ཏུ་འབབ་པར་གནས་སོ། །ལྷ་རྫས་ལས་འདས་པའི་སིལ་སྙན་དང༌། བརྡུང་བ་བྱེ་བ་བརྒྱ་ སྟོང་བསམ་གྱིས་མི་ཁྱབ་པའི་སྒྲ་རབ་ཏུ་འབྱིན་པར་གནས་སོ། །ཐམས་ཅད་མཁྱེན་པའི་ཆོས་ཀྱི་དབྱིངས་སུ་གྲག་པའི་རོལ་མོའི་སྒྲ་དང༌། གླུའི་དབྱངས་ཀྱང་རབ་ཏུ་འགྱེད་པར་ གནས་པར་གྱུར་ཏེ། ཇི་ལྟར་བཅོམ་ལྡན་འདས་གཤེགས་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་དང༌། དགའ་ལྡན་གྱི་གནས་དག་ཏུའང་རིན་པོ་ ཆེ་ཐམས་ཅད་ཀྱིས་བརྒྱན་པའི་ཁང་པར་གཤེགས་པར་སྣང་ངོ༌། །དེ་ནས་ལྷའི་རྒྱལ་པོ་རབ་དགའ་ལྡན་གྱིས་ལྷའི་གནས་ཐམས་ཅད་དུ་ལྷའི་རྒྱལ་པོ་རབ་དགའ་ལྡན་གྱིས་ དེ་བཞིན་གཤེགས་པ་ལ་གསོལ་བ་བཏབ་བོ། །ཞེས་སྒྲ་བརྗོད་དོ། །དེ་ནས་སངས་རྒྱས་ཀྱི་མཐུས་ལྷའི་རྒྱལ་པོ་རབ་དགའ་ལྡན་ལ་བར་ཆད་དུ་མི་འགྱུར་བ་དང༌། སྔོན་གྱི་ ༄༅། །དགེ་བའི་རྩ་བའི་ཚོགས་དང༌། ཚད་མེད་པའི་དགེ་བའི་རྩ་བས་བརྟན་པ་དང༌། མཐའ་ཡས་པར་སེམས་བསྐྱེད་པའི་དད་པ་རྣམ་པར་འཕེལ་བ་དང༌། ཤུགས་ཆེན་པོ་ཡང་དག་པར་བསྐྱེད་པ་དང༌། དགའ་བ་ཆེན་པོ་ཤིན་ཏུ་བསྐྱེད་པ་དང༌། དགེ་བའི་བསམ་པ་རྣམ་པར་སྦྱངས་པ་དང༌། ཐམས་ཅད་མཁྱེན་པ་ཉིད་དུ་སེམས་བསྐྱེད་ པས་དགའ་བར་བྱ་བ་དང༌། ཆོས་ལ་བར་ཆད་མེད་པའི་ཡིད་དུ་འགྱུར་བར་བྱ་བ་དང༌། ཆོས་རྣམས་མི་ཉམས་པར་བྱ་བའི་ཕྱིར་དགའ་ལྡན་གྱི་གནས་ཀྱི་གླུ་དང༌། རོལ་མོ་ བརྡུང་བ་དང༌། དཀྲོལ་བའི་སྒྲ་རྒྱུན་མི་འཆད་པར་གྱུར་ཏོ། །དེ་ནས་ལྷའི་རྒྱལ་པོ་རབ་དགའ་ལྡན་གྱིས་སངས་རྒྱས་ཀྱི་མཐུས་སྔོན་གྱི་ཡང་དག་པར་རྫོགས་པའི་སངས་རྒྱས་ རྣམས་ལ་དགེ་བའི་རྩ་བ་བསྐྱེད་པ་དེ་དག་རྗེས་སུ་དྲན་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བཀྲ་ཤིས་དམ་པ་གང་ཞིག་གིས། །ཆགས་པ་མེད་པའི་ཟླ་བར་ མཚན་གསོལ་མཚན་བཏགས་པ། །ཕོ་བྲང་མཆོག་ཏུ་རབ་གཤེགས་པ། །དེས་ནི་འདི་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །ཡེ་ཤེས་ མཐའ་ཡས་དབང་ཞེས་བྱ་བར་མཚན་བཏགས་པ། །ཁ་དོག་གསེར་དུ་རབ་གཤེགས་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག། བཀྲ་ཤིས་དམ་པ་གང་ཞིག་ གིས༑ ༑ཀུན་ཏུ་མཐའ་ཡས་སྤྱན་ཞེས་བྱ་བར་མཚན་བཏགས་པ། །པདྨོའི་རྩེ་མོར་རབ་གཤེགས་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་ གིས༑ ༑ཡན་ལག་རིན་པོ་ཆེ་ཞེས་བྱ་བར་མཚན་བཏགས་པ། །རིན་ཆེན་མཛོད་དུ་རབ་གཤེགས་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་ གིས༑ ༑དཔལ་རབ་རྒོལ་བའི་སྟག་ཅེས་བྱ་བར་མཚན་བཏགས་པ། །དབང་པོའི་ཁང་པར་རབ་གཤེགས་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་ གང་ཞིག་གིས། །ཡོན་ཏན་ཐམས་ཅད་སྟོན་པའི་ཉིན་མཚན་བཏགས་པ། །མེ་ཏོག་སྙིང་པོར་རབ་གཤེགས་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག། བཀྲ་ ཤིས་དམ་པ་གང་ཞིག་གིས། །ཡན་ལག་འོད་ཟེར་མཐའ་ཡས་པར་ནི་མཚན་བཏགས་པ། །ཤིང་གིས་བརྒྱན་པར་རབ་གཤེགས་པ། །དེས་ནི་འདིར་ཡང་བཀྲ་ཤིས་ལེགས་ གྱུར་ཅིག། བཀྲ་ཤིས་དམ་པ་གང་ཞིག་གིས། །མགོན་པོ་ཐེ་ཚོམ་འཇོམས་པ་ཆོས་ཀྱི་རྒྱལ་མཚན་དེ། །རིན་ཆེན་ཁང་པར་རབ་གཤེགས་པ། །དེས་ནི་འདིར་ཡང་བཀྲ་ཤིས་ ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །མི་ཡི་སེངྒེ་ཡེ་ཤེས་སྒྲོན་མ་མཐའ་ཡས་པ། །སྤོས་ཀྱི་རྩེ་མོར་རབ་གཤེགས་པ། །དེས་ནི་འདིར་ཡང་བཀྲ་ཤིས་ ༄༅། །ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །སངས་རྒྱས་ཡོན་ཏན་ཀུན་གྱི་འབྱུང་གནས་འོད་མངའ་བ། །ནོར་བུས་བརྒྱན་པར་རབ་ གཤེགས་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །ཇི་ལྟར་ལྷའི་རྒྱལ་པོ་རབ་དགའ་ལྡན་གྱིས་སངས་རྒྱས་ཀྱི་མཐུས་སྔོན་གྱི་ཡང་དག་པར་རྫོགས་པའི་ སངས་རྒྱས་རྣམས་ཀྱི་ཡོན་ཏན་བརྗོད་དེ་གླུའི་དབྱངས་སུ་ཚིགས་སུ་བཅད་པས་རྒྱལ་བ་གཤེགས་པ་མངོན་པར་བསྟོད་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ན་ ཡང་ལྷའི་རྒྱལ་པོ་རབ་དགའ་ལྡན་རྣམས་སངས་རྒྱས་ཀྱི་བྱིན་གྱི་རླབས་ཀྱིས་གླུའི་དབྱངས་སུ་ཚིགས་སུ་བཅད་ཅིང༌། སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ ཀྱི་ཡོན་ཏན་རྗོད་པར་བྱེད་ཅིང༌། རྒྱལ་བ་གཤེགས་པ་ལ་ཡང་མངོན་པར་བསྟོད་པར་གྱུར་ཏོ། །དེ་ནས་བཅོམ་ལྡན་འདས་ཆོས་ཀྱི་སྐུ་ཤིན་ཏུ་རྣམ་པར་དག་པའི་སྐུ་དང༌། འདས་པ་དང༌། མ་བྱོན་པ་དང༌། ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་ཐམས་ཅད་དང་རིགས་གཅིག་ཏུ་གྱུར་པས་རྣམ་པར་འཕྲུལ་པ་དང༌། རྒྱུད་ཀྱི་ཚུལ་ གཅིག་ཏུ་གྱུར་བས་སངས་རྒྱས་ཐམས་ཅད་ཀྱི་རྗེས་སུ་ཐུགས་སུ་ཆུད་པའི་ཐམས་ཅད་མཁྱེན་པ་ཉིད་དང༌། ཆོས་ཐམས་ཅད་ལ་བསྒྲིབས་པ་མེད་པར་ཁྱབ་པའི་སངས་རྒྱས་ ཀྱི་སྤྱན་དང༌། ཆོས་ཀྱི་དབྱིངས་མཐའ་དང་དབུས་མེད་པ་ཐམས་ཅད་དུ་སངས་རྒྱས་ཀྱི་བྱིན་གྱི་རླབས་རྒྱུན་མི་འཆད་པ་དང༌། སེམས་ཅན་འདུལ་བ་ཇི་ལྟ་བ་བཞིན་དུ་ཡོངས་སུ་ཁྱབ་པའི་ སངས་རྒྱས་ཀྱི་ཆོ་འཕྲུལ་དང༌། དེ་བཞིན་གཤེགས་པའི་སྐུ་བསྒྲིབས་པ་མེད་པའི་རྒྱན་གྱིས་ཡང་དག་པར་བརྒྱན་པ་དང༌། དུས་བཞིན་དུ་བྱུང་བའི་ཆོས་བསྟན་པ། བྱང་ཆུབ་སེམས་ དཔའ་བརྗོད་དུ་མེད་པ་སངས་རྒྱས་ཀྱི་ཞིང་སྣ་ཚོགས་ནས་ལྷགས་པའི་འཁོར་གྱི་དཀྱིལ་འཁོར་རྣམ་པར་དག་པ་དང༌། དེ་བཞིན་གཤེགས་པའི་སྐུས་ཡང་དག་པར་སྤྱོད་པ། གཉིས་ སུ་མེད་པའི་ཆོས་ཀྱི་སྐུ་ལ་གནས་པའི་སངས་རྒྱས་ཁྱུ་མཆོག་གི་མཐུ་ཕྱུང་བས། རིན་པོ་ཆེ་ཐམས་ཅད་ཀྱིས་བརྒྱན་པའི་ཁང་པར་གཤེགས་ནས་གདན་བཏིང་བ་ལ་སྐྱིལ་མོ་ཀྲུང་བཅས་ ཏེ་བཞུགས་སོ། །ཇི་ལྟར་བཅོམ་ལྡན་འདས་བཞུགས་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་ཡང་བཞུགས་པར་གྱུར་ཏེ། ཇི་ལྟར་བཅོམ་ལྡན་འདས་རིན་པོ་ཆེ་ཐམས་ ཅད་ཀྱིས་བརྒྱན་པའི་ཁང་པར་གཤེགས་པ་དང༌། བྱོན་པའི་ཚེ་སངས་རྒྱས་ཀྱི་རིམ་གྲོ་དང༌། མཆོད་པ་བྱས་ཤིང་རྒྱན་གྱིས་བརྒྱན་པ་དེ་དག་ཐམས་ཅད་པས། དེ་བཞིན་གཤེགས་ པ་གདན་དེ་ལ་བཞུགས་པའི་ཚེ་གྲངས་མེད་པའི་ཡང་གྲངས་མེད་པའི་རྣམ་པར་ལྷ་རྫས་ལས་འདས་པའི་མེ་ཏོག་དང༌། ཕྲེང་བ་དང༌། བྱུག་པ་དང༌། སྤོས་དང༌། ཕྱེ་མ་དང༌། ན་བཟའ་ ༄༅། །དང༌། གདུགས་དང༌། རྒྱལ་མཚན་དང༌། བ་དན་དང༌། རིན་པོ་ཆེ་དང༌། རོལ་མོ་བརྡུང་པ་དང༌། དཀྲོལ་བ་དང༌། གླུ་དང༌། བསྟོད་པ་དང༌། རྗེ་ས་དང༌། རིམ་གྲོ་དང༌། དད་པ་དང༌། དགའ་བ་དང༌། ཐལ་མོ་སྦྱར་བ་དང༌། ལྷ་རྫས་ལས་འདས་པ་རྣམ་པ་གྲངས་མེད་པའི་རྒྱན་དང༌། ལྷ་རྫས་ལས་འདས་པ་རྣམ་པ་གྲངས་མེད་པའི་བསྟོད་པ་དང༌། ལྷ་རྫས་ ལས་འདས་པ་རྣམ་པ་གྲངས་མེད་པའི་སྤྲིན་གྱི་ཆར་འབབ་པ་དང༌། ལྷ་རྫས་ལས་འདས་པ་རྣམ་པ་གྲངས་མེད་པའི་གདུགས་གཅིག་ནས་གཅིག་ཏུ་བརྒྱུད་དེ་བསྒྲེང་བ་དང༌། ལྷ་ རྫས་ལས་འདས་པ་རྣམ་པ་གྲངས་མེད་པའི་རྒྱལ་མཚན་ལ་བ་དན་དཔྱངས་པ་དང༌། ཤིན་ཏུ་དཔྱངས་པ་གྲངས་མེད་པས་སྦྱར་བ། ལྷ་རྫས་ལས་འདས་པའི་ཡོ་བྱད་ཀྱི་ཚུལ་དང་ བསམ་པ་རྒྱ་ཆེན་པོ་རྣམ་པར་འཕེལ་བས་སངས་རྒྱས་མཉེས་པར་བྱ་བ་དང༌། མཛེས་པའི་རྒྱན་རྣམ་པར་དག་པར་ཐམས་ཅད་ཀྱི་རིན་པོ་ཆེའི་དྲི་ཐམས་ཅད་དང༌། ཕྱོགས་ བརྒྱན་པའི་སྤོས་ཀྱི་སྤྲིན་ཆེན་པོ་དང༌། རིམ་གྲོའི་རྣམ་པ་སྣ་ཚོགས་རྒྱ་ཆེ་ཞིང་ཡིད་དུ་འོང་བས་སངས་རྒྱས་ལ་མཆོད་པ་དང༌། འཇིག་རྟེན་གྱི་ཁམས་ཐམས་ཅད་རིམ་གྲོ་ ལ་བརྩོན་པས་དེ་བཞིན་གཤེགས་པ་གདན་ལ་བཞུགས་པའི་ཚེ་གྲངས་མེད་པའི་རྒྱུན་དུ་མཆོད་པ་བྱས་སོ། །དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་དགའ་ལྡན་ གྱི་གནས་དག་ཏུ་ཡང་མཆོད་པ་བྱས་པར་གྱུར་ཏོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། དེ་བཞིན་གཤེགས་པ་དགའ་ལྡན་དུ་བཞུད་པ་ དང༌། གཤེགས་པ་དང༌། བཞུགས་པའི་རྒྱན་ཅེས་བྱ་བའི་ལེའུ་སྟེ། ཉི་ཤུ་བརྒྱད་པའོ།། །།བམ་པོ་སུམ་ཅུ་གཅིག་པ། དེ་ནས་སངས་རྒྱས་ཀྱི་མཐུས་ཕྱོགས་ བཅུ་ཀུན་ནས་བྱང་ཆུབ་སེམས་དཔའ་བཅུ་མངོན་པར་ལྷགས་ཏེ། བྱང་ཆུབ་སེམས་དཔའ་དེ་དག་སོ་སོ་ནས་འཇིག་རྟེན་གྱི་ཁམས་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཤིན་ ཏུ་ཕྲ་བ་སྙེད་ཀྱི་ཕ་རོལ་ནས་འོངས་པར་གྱུར་པ་དག་སྟེ། བྱང་ཆུབ་སེམས་དཔའ་དེ་དག་རེ་རེ་ཞིང་ཡང་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་ སེམས་དཔའ་དག་དང་ལྷན་ཅིག་ཏུ་ཕྱིན་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་མིང་འདི་ཞེས་བྱ་བ་དག་སྟེ། འདི་ལྟར་རྡོ་རྗེའི་རྒྱལ་མཚན་དང༌། དམ་པའི་རྒྱལ་ མཚན་དང༌། དཔའ་བའི་རྒྱལ་མཚན་དང༌། སྐར་མའི་རྒྱལ་མཚན་དང༌། ཡེ་ཤེས་ཀྱི་རྒྱལ་མཚན་དང༌། རིན་པོ་ཆེའི་རྒྱལ་མཚན་དང༌། རྡུལ་དང་བྲལ་བའི་རྒྱལ་མཚན་ དང༌། དྲི་མ་མེད་པའི་རྒྱལ་མཚན་དང༌། དཔལ་གྱི་རྒྱལ་མཚན་དང༌། ཆོས་ཀྱི་རྒྱལ་མཚན་ཞེས་བྱ་བ་དག་གོ །བྱང་ཆུབ་སེམས་དཔའ་དེ་དག་ཐམས་ཅད་ཀྱང་འཇིག་རྟེན་ ༄༅། །གྱི་ཁམས་མིང་འདི་ཞེས་བྱ་བ་དག་ནས་འོངས་པར་གྱུར་པ་དག་སྟེ། འདི་ལྟར་རིན་པོ་ཆེའི་སྙིང་པོ་དང༌། ཡིད་དུ་འོང་བའི་སྙིང་པོ་དང༌། དངུལ་གྱི་སྙིང་པོ་དང༌། གསེར་གྱི་སྙིང་པོ་དང༌། ནོར་བུའི་སྙིང་པོ་དང༌། རྡོ་རྗེའི་སྙིང་པོ་དང༌། པདྨོའི་སྙིང་པོ་དང༌། ཨུཏྤ་ལའི་སྙིང་པོ་དང༌། ཙནྡན་གྱི་སྙིང་པོ་དང༌། སྤོས་ཀྱི་སྙིང་པོ་ཞེས་བྱ་བ་དག་གོ ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་དེ་བཞིན་གཤེགས་པའི་མཚན་འདི་ཞེས་བྱ་བ་དག་གི་ཞམ་འབྲིང་ན་ཚངས་པར་སྤྱོད་པ་དག་སྟེ། འདི་ལྟར་ཤིན་ཏུ་འཕགས་ པའི་དཔལ་དང༌། གཡོ་བ་མེད་པའི་དཔལ་དང༌། བཅིངས་པ་མེད་པའི་དཔལ་དང༌། སྤྱོད་པའི་དཔལ་དང༌། འོད་ཟེར་གྱི་དཔལ་དང༌། མཐའ་ལས་རྒལ་བའི་དཔལ་དང༌། མཆོག་ གི་དཔལ་དང༌། དབང་ཕྱུག་གི་དཔལ་དང༌། ཚངས་པའི་དཔལ་དང༌། ཤིན་ཏུ་བསགས་པའི་དཔལ་ཞེས་བྱ་བ་དག་གོ །དེ་ནས་བྱང་ཆུབ་སེམས་དཔའ་དེ་དག་བཅོམ་ལྡན་ འདས་ལ་ཕྱག་འཚལ་ནས་ཕྱོགས་བཅུ་རྒྱས་པར་བྱས་ཏེ། གང་ནས་འོངས་པའི་ཕྱོགས་སུ་བརྟེན་ནས་སེངྒེའི་ཁྲི་རིན་པོ་ཆེའི་སྙིང་པོ་ཅན། ནོར་བུ་སྣ་ཚོགས་དང་ལྡན་པ་ དག་མངོན་པར་སྤྲུལ་ཏེ་གསེར་གྱི་དྲ་བས་གཡོགས་པའི་ལུས་དང༌། འོད་ཟེར་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་གཏོང་པ་དང༌། དྲི་མ་མེད་པའི་འོད་གཏོང་པ་ དང༌། ཚད་མེད་པའི་འོད་རབ་ཏུ་བསྐྱེད་པ་དང༌། བསམ་པ་རྣམ་པར་དག་པའི་རིན་པོ་ཆེ་ཡང་དག་པར་འཛིན་པའི་གཟུགས་དང༌། བྱང་ཆུབ་སེམས་དཔའི་བསམ་པ་ཁ་ན་མ་ཐོ་ བ་མེད་པ་ལས་བྱུང་བའི་སྨོན་ལམ་དང༌། འགྲོ་བ་ཐམས་ཅད་ཀྱིས་བལྟ་ན་ཡིད་དུ་འོང་བ་དང༌། བལྟ་ན་དོན་ཡོད་པར་སེམས་ཅན་གདུལ་བ་དང༌། རྣམ་པར་དག་པའི་ཆོས་ཀྱིས་ སངས་རྒྱས་ཀྱི་རྣམ་པར་འཕྲུལ་པ་ཡོངས་སུ་སྟོན་པ་དང༌། འགྲོ་བ་ཐམས་ཅད་ཡོངས་སུ་བསྐྱབ་པར་བྱང་ཆུབ་སེམས་དཔའི་རྩེ་གཅིག་ཏུ་སྨོན་ལམ་བཏབ་པས་སྐྱིལ་མོ་ཀྲུང་ བཅས་ཏེ་འཁོད་དོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་འདི་ལྟ་སྟེ། ཆགས་པ་མེད་པར་སྤྱོད་པས་སངས་རྒྱས་ཀྱི་ཞིང་ཐམས་ཅད་དུ་འགྲོ་བ་དང༌། འདི་ལྟ་སྟེ། གནས་པ་མེད་པའི་ལུས་དང༌། འདི་ལྟ་སྟེ། ཚད་མེད་པའི་ལུས་ཀྱིས་ཀུན་ཏུ་འགྲོ་བའི་ཡེ་ཤེས་ཀྱི་ལུས་ཀྱི་བྱིན་གྱི་རླབས་དང༌། འདི་ལྟ་སྟེ། མཐའ་དང་དབུས་མེད་པའི་སངས་ རྒྱས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པ་ལ་འཇུག་པ་དང༌། འདི་ལྟ་སྟེ། ཐམས་ཅད་མཁྱེན་པའི་སྒོ་འབྱམས་ཀླས་པ་ཚད་མེད་པར་གྱུར་པ་དང༌། འདི་ལྟ་སྟེ། ཆོས་ ལ་མི་འཇིགས་པར་མཁས་པའི་སྣང་བ་མཐའ་ཡས་པ་དང༌། འདི་ལྟ་སྟེ། ཕྱི་མའི་མཐའི་བསྐལ་པར་མི་ཟད་པའི་ཐ་དད་པ་ཡང་དག་པར་ཤེས་པའི་ཚུལ་བཤད་པ་དང༌། ༄༅། །འདི་ལྟ་སྟེ། གཟུགས་ཐམས་ཅད་ཀྱིས་སྣང་བར་བྱས་པའི་ཡེ་ཤེས་ཀྱི་ཕུང་བོ་རབ་ཏུ་རྒྱས་པ་དང༌། འདི་ལྟ་སྟེ། ཆོས་ཀྱི་དབྱིངས་རྒྱས་པར་གྱུར་པའི་ཤེས་ རབ་ཀྱི་མིག་རྣམ་པར་དག་པའི་སྤོབས་པ་དང༌། འདི་ལྟ་སྟེ། ནམ་མཁའི་དབྱིངས་ཀྱིས་ཀླས་པར་ཡེ་ཤེས་ཀྱི་སྤྱོད་ཡུལ་ཡོངས་སུ་གནས་པ་དང༌། མཚམས་མེད་ཅིང་མཐའ་ ཡས་པའི་སངས་རྒྱས་རྣམས་ཀྱི་སྤྱོད་པ་དང་ལྡན་པ་རབ་ཏུ་ཐོབ་པར་གྱུར་པ་དག་གོ། ཇི་ལྟར་གླིང་བཞི་པ་འདིའི་དགའ་ལྡན་གྱི་གནས་སུ་བྱང་ཆུབ་སེམས་དཔའ་འདུས་ པ་གྱུར་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་དང༌། དགའ་ལྡན་གྱི་གནས་དག་ཏུ་ཡང་བྱང་ཆུབ་སེམས་དཔའ་མིང་དེ་སྐད་ཅེས་བྱ་བ་དག་འཇིག་ རྟེན་གྱི་ཁམས་མིང་དེ་སྐད་ཅེས་བྱ་བ་དག་ནས་དེ་བཞིན་གཤེགས་པའི་མཚན་དེ་སྐད་ཅེས་བྱ་བ་དག་གི་ཞམ་རིང་ན་ཚངས་པར་སྤྱོད་པ་ཤ་སྟག་འོངས་པར་གྱུར་ཏོ། ། དེ་ནས་བཅོམ་ལྡན་འདས་ཀྱི་ཞབས་པུས་མོའི་ལྷ་ང་གཉིས་ནས་འོད་ཟེར་བྱེ་བ་ཁྲག་ཁྲིག་བརྒྱ་ཕྲག་སྟོང་བྱུང་སྟེ། ཕྱོགས་བཅུ་ཐམས་ཅད་སྣང་བར་བྱས་ནས་འཇིག་རྟེན་ གྱི་ཁམས་ཐམས་ཅད་བསྟན་ཏོ། །དེ་ནས་བྱང་ཆུབ་སེམས་དཔའ་དེ་དག་གིས་འཇིག་རྟེན་གྱི་ཁམས་དེ་དག་གི་གླིང་བཞི་པ་ཐམས་ཅད་དང༌། དགའ་ལྡན་གྱི་ གནས་ཐམས་ཅད་ན་དེ་བཞིན་གཤེགས་པའི་རྣམ་པར་འཕྲུལ་པ་ཡོད་པར་མཐོང་བར་གྱུར་ཏོ། །བྱང་ཆུབ་སེམས་དཔའ་དེ་དག་ཇི་སྙེད་ཀྱིས་ཕྱོགས་བཅུར་ཆོས་ཀྱི་དབྱིངས་ ཀྱིས་ཀླས་པའི་འཇིག་རྟེན་གྱི་ཁམས་ཀྱི་མཐར་ཐུག་པ་དག་ན་དེ་བཞིན་གཤེགས་པའི་རྣམ་པར་རོལ་པ་མཐོང་བར་གྱུར་པ་དེ་དག་ཐམས་ཅད་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ཀྱི་སྔོན་བྱང་ཆུབ་སེམས་དཔའི་སྤྱོད་པ་ལ་དགེ་བའི་རྩ་བའི་གྲོགས་སུ་གྱུར་པ་དག་སྟེ། འདི་ལྟར་སངས་རྒྱས་ཀྱི་རྣམ་ པར་ཐར་པ་ཟབ་མོས་རྣམ་པར་འཕྲུལ་བ་ལ་མོས་པ་ཤ་སྟག་གོ། ཆོས་ཀྱི་དབྱིངས་ཀྱི་ལུས་ཐ་དད་པ་མེད་པའི་རྗེས་སུ་སོང་བ་ཤ་སྟག་གོ། གནས་མེད་པའི་སངས་རྒྱས་ཀྱི་ ཞིང་དུ་འགྲོ་བའི་རྗེས་སུ་སོང་བས་རབ་ཏུ་ཞུགས་པ་ཤ་སྟག་གོ །སངས་རྒྱས་བསམ་གྱིས་མི་ཁྱབ་པ་ལྟ་བ་ལ་རྗེས་སུ་གཞོལ་བ་ཤ་སྟག་གོ །ཆགས་པ་མེད་པའི་སེམས་ སྐད་ཅིག་གིས་ཆོས་ཀྱི་དབྱིངས་ཁྱབ་པར་བྱེད་པ་ཤ་སྟག་གོ །བསམ་པ་རིན་པོ་ཆེ་རྡུལ་དང་བྲལ་བ་དང་ལྡན་པ་ཤ་སྟག་གོ །བརྗོད་དུ་མེད་པའི་སངས་རྒྱས་མང་པོ་དང་ འགྲོགས་པ་དང་ལྡན་པ་ཤ་སྟག་གོ །སངས་རྒྱས་ཀྱི་བྱིན་གྱི་རླབས་གྲངས་མེད་པ་དང་ལྡན་པ་ཤ་སྟག་གོ། ཡང་དག་པ་སྤྱོད་པའི་མཆོག་གི་ཕ་རོལ་ཏུ་ཕྱིན་པ་ཤ་ ༄༅། །སྟག་གོ །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་དྲན་པ་རྣམ་པར་དག་པ་ལ་གནས་པ་ཤ་སྟག་གོ ། བློ་དང་སེམས་སྐད་ཅིག་ཐམས་ ཅད་ཀྱིས་ཆེར་འཕགས་པ་རབ་ཏུ་ཐོབ་པ་ཤ་སྟག་གོ །ཆུང་ངུར་ཞུགས་ཤིང་ཆེར་གྱུར་པའི་སྤྱོད་པ་ལ་དབང་བ་ཤ་སྟག་གོ ། ཆེར་གྱུར་པ་ལ་ཞུགས་ཤིང་ཆུང་ངུར་འཇུག་ པའི་རྗེས་སུ་ཆུད་ནས་ཡེ་ཤེས་ཀྱི་སྤྱོད་པའི་ཕ་རོལ་ཏུ་ཕྱིན་པ་ཤ་སྟག་གོ །དེ་ལྟ་བུའི་གནས་དང༌། སངས་རྒྱས་ཀྱི་སྐུའི་རང་བཞིན་རྗེས་སུ་རྟོགས་པ་དང༌། དེ་བཞིན་ གཤེགས་པ་དང་འགྲོགས་ཤིང་ཐམས་ཅད་མཁྱེན་པ་ཉིད་ཐོབ་པའི་བྱང་ཆུབ་སེམས་དཔའ་རྣམས་དང༌། རིན་པོ་ཆེ་སྣ་ཚོགས་ལྟར་གྲུབ་པའི་ལུས་དང༌། དེ་བཞིན་ གཤེགས་པར་གྱུར་པའི་སྤྱོད་ཡུལ་ཐམས་ཅད་དུ་འགྲོ་བ་དང༌། ཡེ་ཤེས་ཆེན་པོའི་རྒྱུད་ཀྱི་སྒོ་རྣམ་པར་ཕྱེ་བ་དང༌། ཡེ་ཤེས་ཀྱི་སྟོབས་རྡོ་རྗེའི་རྒྱལ་མཚན་གྱི་མཐུའི་ མཆོག་ཐོབ་པ་དང༌། རྡོ་རྗེ་གཅོད་པའི་ཏིང་ངེ་འཛིན་གྱི་ཚུལ་རབ་ཏུ་ཐོབ་པ་དང༌། སེམས་ཅན་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་རྣམས་ཡོངས་སུ་སྨིན་པར་ གདུལ་བ་ལ་རྨོངས་པ་མེད་པ་དང༌། སངས་རྒྱས་ཀྱི་རྣམ་པར་འཕྲུལ་བ་ཐམས་ཅད་དུ་འགྲོ་བ་གདོན་མི་ཟ་བའི་མཆོག་ཐོབ་པ་དང༌། བགྲང་བ་ཐམས་ཅད་ལ་མངོན་ པར་མ་ཆགས་པ་དང༌། བགྲང་བ་མངོན་པར་སྒྲུབ་པ་ཐམས་ཅད་ཤིན་ཏུ་བསླབ་པ་དང༌། བགྲང་བའི་ཤེས་པ་ཐམས་ཅད་ཀྱིས་མཐར་ཐུག་ཅིང་ཆོས་རྣམ་པར་དགོད་པ་ལ་ མཁས་པ་འདི་དག་དང༌། གཞན་ཡང་ཡོན་ཏན་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ། ཡོན་ཏན་བསྔགས་པ་རྣམ་པར་དག་པ་མི་ཟད་པས་བྱང་ཆུབ་སེམས་དཔའ་ རྣམས་ཀྱི་དུས་གསུམ་གྱི་ཡོན་ཏན་ཚད་མེད་པ་དང་ལྡན་པ་ཤ་སྟག་དེ་བཞིན་གཤེགས་པ་མངོན་སུམ་དུ་བྱ་བ་དང༌། སངས་རྒྱས་འབྱམས་ཀླས་པ་ཐམས་ཅད་བལྟ་བའི་ཕྱིར་ ཀུན་ནས་འདུས་པར་གྱུར་ཏོ། །དེ་ནས་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ་དེའི་ཚེ་ཚིགས་སུ་ བཅད་པ་འདི་དག་སྨྲས་སོ། །ཡང་དག་སངས་རྒྱས་སྐྱེ་བ་མེད། །རྒྱལ་བ་མྱ་ངན་མི་འདའ་སྟེ། །རྒྱུ་མཐུན་པ་ཡི་སྨོན་ལམ་གྱིས། །དེས་ནི་རྣམ་པར་འཕྲུལ་པ་སྣང༌། །འདི་དག་ ཆོས་ནི་བསམ་མི་ཁྱབ། །འདི་དག་སེམས་ཀྱི་སྤྱོད་ཡུལ་མིན། །གང་གིས་ཡེ་ཤེས་ཕ་རོལ་ཕྱིན། །དེས་ནི་སངས་རྒྱས་སྤྱོད་ཡུལ་མཐོང༌། །ལུས་འདི་ཡང་དག་སངས་རྒྱས་ མིན༑ ༑སྒྲ་ཡང་དེ་བཞིན་གཤེགས་པ་མིན། །ལུས་དང་སྒྲ་ལས་གཞན་ན་ཡང༌། །སངས་རྒྱས་རྣམ་པར་འཕྲུལ་མི་མཐོང༌། །སྔོན་གྱི་ལས་རྣམས་མ་གཏོགས་པར། །རང་ ༄༅། །བྱུང་རྣམས་ཀྱི་སྤྱོད་ཡུལ་གྱི། །མཆོག་གི་ཚུལ་རྣམས་ཤེས་པ་ནི། །བློ་ཞན་རྣམས་ཀྱིས་མི་ནུས་སོ། །ཡང་དག་སངས་རྒྱས་རྣམ་འཕྲུལ་འདི། ། གང་དག་ནས་ཀྱང་མ་འོངས་ཏེ། །གང་དུའང་འགྲོ་བར་མི་འགྱུར་རོ། །འདི་དག་རང་བྱུང་སྐུ་ཡིན་ནོ། །ཚད་མེད་ཤིན་ཏུ་འདྲེན་པ་རྣམས། །ཆོས་འདི་རབ་ཏུ་བཤད་ མཛད་ཀྱང༌། །ཆོས་ལ་གནས་པ་གང་ཡང་མེད། །ཞིང་རྣམས་བྱེ་བ་ཀུན་ན་སྣང༌། །མཁྱེན་པ་མཐའ་དང་དབུས་མེད་དེ། །ཆོས་ཀུན་ཐུགས་སུ་ཆུད་ཅིང་རྟོགས། ། ཆོས་ཀྱི་དབྱིངས་ལ་རབ་ཞུགས་ནས། །རྣམ་པར་འཕྲུལ་པ་སྟོན་པ་མཛད། །ཆོས་རྣམས་ཀུན་ལ་ཆགས་པ་མེད། །འགྲོ་ལ་དེ་ནི་བསྒྲིབས་མི་མངའ། །ཚད་མེད་པ་ཡི་ ཡོན་ཏན་གྱིས། །ཞིང་རྣམས་ཀུན་ན་རབ་ཏུ་སྣང༌། །གང་ཞིག་ཡེ་ཤེས་འདི་དག་དང༌། །ཡེ་ཤེས་ཐམས་ཅད་རྟོགས་འདོད་པས། །བསམ་པ་རྣམ་པར་སྦྱངས་བྱས་ཏེ། ། བྱང་ཆུབ་སྤྱོད་པ་སྤྱད་པར་བྱ། །དྲང་སྲོང་ཆེན་པོའི་བྱིན་གྱི་རླབས། །འདི་འདྲ་གང་གིས་མཐོང་གྱུར་ཅིང༌། །དེ་ནི་ཐེ་ཚོམ་མི་བྱེད་ན། །དགེ་བཤེས་མཆོག་ལ་བརྟེན་པ་ ཡིན། །དེ་ནས་བྱང་ཆུབ་སེམས་དཔའ་དམ་པའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་ འདི་དག་སྨྲས་སོ། །ཤིན་ཏུ་ཟབ་སྟེ་བརྗོད་དུ་མེད། །བརྗོད་དུ་ཡོད་ཀྱང་འདའ་བར་དཀའ། །ཚིག་གི་ལམ་ལས་ཤིན་ཏུ་འདས། །ནམ་མཁའ་ལ་ནི་རྒྱལ་བ་སྣང༌། །དེ་བཞིན་ གཤེགས་པའི་བྱིན་རླབས་ཀྱིས། །མི་ཡི་སེངྒེ་མཐོང་བར་འགྱུར། །ཡང་དག་སངས་རྒྱས་རྟོགས་མད་[*MED] ཀྱང༌། །རྒྱལ་བ་རྣམ་པར་རྟོག་པར་སྣང༌། །འཇིག་རྟེན་མགོན་པོས་ཆོས་ ཉིད་དངོས། །ཟབ་མོ་འདི་དག་ཡང་དག་བསྟན། །གང་ཟག་མཚུངས་པ་མེད་པ་ཡི། །དེས་ནི་སྐུ་འདིར་རབ་ཏུ་འབྱུང༌། །ཐམས་ཅད་གཟིགས་ཀྱི་སྤྱོད་ཡུལ་གྱི། །ཡེ་ཤེས་ཆེན་ པོ་འདི་འདྲ་སྟེ། །འདི་ལ་གང་ཞིག་རྟོགས་འདོད་པ། །དེས་ན་རྒྱལ་བ་མངོན་དུ་བྱོས། །ཡིད་ཀྱི་དབང་པོ་རྣམ་དག་པས། །དེ་བཞིན་གཤེགས་པ་བསྙེན་བཀུར་ཞིང༌། །འདི་ཡི་ ཚུལ་ལས་འདའ་བྱེད་ཚེ། །ནམ་ཡང་སྐྱོ་བར་མི་བྱའོ། །མི་ཟད་པ་ཡི་བསོད་ནམས་དང༌། །བྱང་ཆུབ་སེམས་ཀྱིས་བརྟན་པ་རྣམས། །ཐེ་ཚོམ་རྣམ་པར་བཟློག་བྱས་ཏེ། །དེ་ དག་ལ་ནི་སྐྱོ་མེད་ལྟོས། །རྒྱལ་སྲས་གང་གིས་ཆོས་དབྱིངས་ཀྱི། །ཤིན་ཏུ་བསྟན་པའི་མཐར་ཕྱིན་པ། །དེས་ནི་ཀུན་གཟིགས་རྣམ་འཕྲུལ་བ། །འདི་དག་ཤིན་ཏུ་འདའ་ བར་བྱ་༑དད་པ་ཆོས་འདིའི་རྩ་བ་ཞེས། །ཆོས་ཀྱི་ཕུང་པོས་བཤད་མཛད་ཀྱི། །དད་པ་ཤིན་ཏུ་ཆེར་བསྐྱེད་ལ། །བྱང་ཆུབ་སྤྱོད་པ་སྤྱད་པར་གྱིས། །སངས་རྒྱས་བསྟི་སྟང་གང་ ༄༅། །བྱེད་ཅིང༌། །དེ་བཞིན་གཤེགས་ལ་དྲིན་གཟོ་བ། །ཡང་དག་སངས་རྒྱས་དཔལ་ལྡན་ལས། །དེ་དག་རྒྱང་མར་མི་གནས་སོ། །བདག་ཉིད་ཆེ་བ་འདི་ ལྟ་བུ༑ ༑གང་ཞིག་ཐོས་མཐོང་མཁས་པ་རྣམས། །སྤྱོད་ཡུལ་ཐོབ་པར་ཅིར་འགྱུར་བའི། །སྨོན་ལམ་སུ་ཞིག་སྦྱོང་མི་བྱེད། །དེ་ནས་བྱང་ཆུབ་སེམས་དཔའ་དཔའ་བའི་ རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཇི་ལྟར་ཉི་མའི་འོད་སྣང་བས། ། མིག་གིས་གཟུགས་རྣམས་མཐོང་གྱུར་པ། །དེ་བཞིན་སངས་རྒྱས་བྱིན་རླབས་ཀྱིས། །དག་པའི་སེམས་ལྡན་རྒྱལ་བ་མཐོང༌། །ཇི་ལྟར་བརྩོན་འགྲུས་སྟོབས་ལྡན་པ། ། རྒྱ་མཚོ་ལ་ནི་འཇུག་པར་བྱེད། །དེ་བཞིན་ཡེ་ཤེས་སྟོབས་ལྡན་པས། །བསམ་དུ་མེད་པའི་སངས་རྒྱས་མཐོང༌། །ཇི་ལྟར་ས་བོན་རྣམ་པ་དག །ཞིང་བཟང་ལ་ནི་སྐྱེར་འགྱུར་ པ༑ ༑དེ་བཞིན་སེམས་བསམ་རྣམ་དག་ལ། །སངས་རྒྱས་ཆོས་ནི་སྐྱེ་བར་འགྱུར། །ཇི་ལྟར་ནོར་གྱི་ཕུང་པོ་ཡིས། །དབུལ་བ་ཐམས་ཅད་སྤོང་བྱེད་པ། །དེ་བཞིན་སངས་རྒྱས་ ཆོས་རྣམས་ཀྱིས། །བྱང་ཆུབ་སེམས་དཔའ་རྣམ་དག་འགྱུར། །ཇི་ལྟར་དུག་ཏུ་གྱུར་པ་ལ། །ནད་མེད་དུག་སྨན་རྒྱལ་བར་བྱེད། །དེ་བཞིན་ཉོན་མོངས་རྣམ་པ་ལ། །རྣམ་དག་ ཚུལ་ནི་སྤྱོད་ཡུལ་ལོ། །སངས་རྒྱས་ཀྱིས་ནི་གང་བསྔགས་པའི། །དགེ་བའི་བཤེས་ལ་བརྟེན་བྱས་ན། །དེ་ཡི་མཐུས་ནི་སངས་རྒྱས་ཀྱི། །ཆོས་ཉིད་འདི་དག་ཐོས་པར་འགྱུར། །བསྐལ་ པ་བྱེ་བ་གྲངས་མེད་པར། །སྦྱིན་པ་མཆོག་རྣམས་སྦྱིན་བྱས་ཀྱང༌། །འདི་ཡི་ཚུལ་ལ་རབ་སྤྱོད་པའི། །གྲངས་དང་ཆར་ཡང་མི་འགྲོ་འོ། །སངས་རྒྱས་ཡོན་ཏན་མཐའ་ཡས་ཏེ། ། མཚན་གྱིས་ཤིན་ཏུ་རྣམ་པར་བྲིས། །བརྗོད་པས་ཡང་དག་སངས་རྒྱས་རྣམས། །རྒྱལ་བ་ཤེས་པར་མི་ནུས་སོ། །རྫོགས་པའི་སངས་རྒྱས་རྐང་གཉིས་མཆོག །གནས་ནས་ གཡོ་བ་མི་མངའ་བར། །སྐུ་ནི་ཀུན་ཏུ་རྣམ་རྒྱུ་ཞིང༌། །ཆོས་ཀྱི་དབྱིངས་ནི་སྟོན་པ་མཛད། །ཇི་ལྟར་ནམ་མཁའི་ཁམས་འདི་ནི། །ནམ་ཡང་རང་བཞིན་མི་འགྱུར་ཏེ། །དེ་བཞིན་ སངས་རྒྱས་ཆོས་ཉིད་ཀྱང༌། །ངོ་བོ་ཉིད་ལས་འགྱུར་བ་མེད། །དེ་ནས་བྱང་ཆུབ་སེམས་དཔའ་སྐར་མའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་ པར་བལྟས་ཏེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མི་ཡི་འཇིག་རྟེན་འདི་ཀུན་དང༌། །ལྷ་ཡི་གནས་རྣམས་ཐམས་ཅད་དང༌། །འགྲོ་བ་མ་ལུས་ཀུན་ན་ཡང༌། །མི་ཡི་ གཙོ་བོ་ཤིན་ཏུ་སྣང༌། །ཇི་ལྟར་སེམས་དངོས་གཅིག་པུ་ལས། །རྣམ་པ་ཐ་དད་སེམས་བརྗོད་པ། །དེ་བཞིན་སངས་རྒྱས་སྐུ་གཅིག་ལས། །སངས་རྒྱས་ཐམས་ཅད་བརྗོད་པ་ ༄༅། །ཡིན༑ ༑བྱང་ཆུབ་གཉིས་སུ་མེད་པར་བརྗོད། །བྱང་ཆུབ་དེ་ཡང་མཚན་ཉིད་མེད། །མཚན་གྱིས་མངོན་པར་རྣམ་བྲིས་པའི། །སྐུ་རྣམས་གཉིས་སུ་ སྣང་བར་གྱུར། །མཁའ་དང་ཆོས་ཀྱི་དབྱིངས་ལ་ཞུགས། །སྒྱུ་མའི་ས་ཡང་རབ་ཏུ་བསྟན། །དེ་ཕྱིར་སངས་རྒྱས་དེ་དག་གི །སྤྱོད་ཡུལ་ལྟ་བ་ཟད་པ་མེད། །ཡང་དག་ སངས་རྒྱས་ཆོས་ཀྱི་སྐུ། །མགོན་པོ་ཐམས་ཅད་དུས་གསུམ་དུ། །ཇི་ལྟར་འདུལ་བའི་འགྲོ་བ་ལ། །གཟུགས་ཀྱི་སྐུར་ཡང་རབ་ཏུ་སྣང༌། །འདི་འདྲའི་ལུས་སུ་བདག་གྱུར་ཅེས།། སངས་རྒྱས་རྟོག་པར་མི་མཛད་དེ། །སྟོན་ལ་རྣམ་རྟོག་མི་མངའ་ཡང༌། །བྱིན་གྱི་རླབས་ནི་སྟོན་པར་མཛད། །དབྱེར་མེད་པ་ཡི་དབྱིངས་ལ་ཡང༌། །ཆོས་ཀྱི་དབྱིངས་ནི་ཡང་ དག་གནས། །འཇིག་རྟེན་ཁམས་ནི་ཚད་མེད་པར། །ཐུབ་པས་རྣམ་པར་རྟོག་པ་བསྟན། །སྐུ་ནི་སྤྲུལ་པ་མ་ཡིན་ཏེ། །སྤྲུལ་མིན་པ་ཡང་སྐུ་མ་ཡིན། །སྤྲུལ་པ་མེད་པའི་ ཆོས་འདི་ཡིས། །སྤྲུལ་པ་རྣམས་ནི་རབ་ཏུ་བསྟན། །ཡང་དག་སངས་རྒྱས་ཚད་མེད་པ། །ཆོས་ཀྱི་དབྱིངས་ལ་ཤིན་ཏུ་བརྟེན། །མཐའ་དང་དབུས་མེད་རབ་ཏུ་ཟབ། །ཚིག་ གི་ལམ་གྱིས་བཟླ་བར་དཀའ། །ཀུན་ཏུ་འགྲོ་བའི་ཆོས་རྣམས་ལ། །དེ་བཞིན་གཤེགས་པ་དོན་དེས་མཁྱེན། །ཞིང་རྣམས་ཀུན་ལ་ཆགས་མི་མངའ། །ཆོས་ཀྱི་དབྱིངས་ ལ་རྣམ་པར་སྤྱོད། །དེ་ནས་བྱང་ཆུབ་སེམས་དཔའ་ཡེ་ཤེས་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་ དག་སྨྲས་སོ། །ཀུན་མཁྱེན་ཡེ་ཤེས་མ་ཆགས་པ། །དེ་ལ་ཞུགས་པ་གང་གྱུར་པ། །དེ་ཡི་སེམས་ནི་ཚད་མི་ཟིན། །བྱང་ཆུབ་ཀྱི་ནི་སྤྱད་པ་སྤྱོད། །དེ་བཞིན་གཤེགས་པ་མང་པོ་ རྣམས༑ ༑ཡུལ་དང་ཡུལ་དུ་དེ་སྣང་བ། །ཆོས་རྣམས་ཕྱོགས་གཅིག་གང་ལ་ཡང༌། །ཡང་དག་སངས་རྒྱས་གནས་པ་མེད། །འཇིག་རྟེན་སྒྲོན་མ་དེ་དག་གིས། །བྱིན་གྱི་རླབས་ ནི་གང་བསྟན་པ། །བསྐལ་པ་བསམ་གྱིས་མི་ཁྱབ་པར། །འདི་ཡི་མཐའ་ནི་རྙེད་པར་དཀའ། །དུས་གསུམ་རྣམས་ནི་ཇི་སྙེད་པའི། །སེམས་ཅན་རྣམས་ཀྱི་མཐར་ཐུག་པ། །བགྲང་ བའི་མཐར་ནི་ཕྱིན་པར་ནུས། །འདྲེན་པ་ལ་ནི་མཐར་ཐུག་མེད། །དེ་དག་སྐུ་ནི་གཅིག་ཏུ་སྣང༌། །སྐུ་གཉིས་དེ་དག་བསམ་མི་ཁྱབ། །འཇིག་རྟེན་ཁམས་སུ་སྣང་གྱུར་ཀྱང༌། ། སྐུ་ལ་གཉིས་སུ་གྱུར་པ་མེད། །ཇི་ལྟར་ཟླ་བ་ཤར་གྱུར་པ། །ཚད་མེད་པ་ཡི་གཟུགས་བརྙན་རྣམས། །ཆུ་ཡི་སྣོད་དུ་སྣང་གྱུར་ཀྱང༌། །ཟླ་བ་གཉིས་སུ་གྱུར་པ་མེད། །དེ་ བཞིན་ཆགས་མེད་མཁྱེན་ལྡན་རྣམས། །ཆགས་མེད་རྣམ་པར་འཚང་རྒྱ་བ། །ཞིང་རྣམས་ཀུན་ན་རབ་ཏུ་སྣང༌། །སངས་རྒྱས་ལ་ནི་གཉིས་ཀྱང་མེད། །འདི་ལ་གཅིག་ ༄༅། །ཀྱང་ཡོད་མ་ཡིན། །སྐུ་ནི་གཉིས་སམ་གསུམ་དུ་མེད། །ཇི་ལྟར་སེམས་ཅན་བསམ་པ་བཞིན། །ཚད་མེད་པར་ནི་རབ་ཏུ་སྣང༌། །སྐུ་ནི་འདས་པ་མ་ ཡིན་ཏེ༑ ༑མ་འོངས་པ་ཡང་སྐུ་མ་ཡིན། །སྐྱེས་དང་བྱང་ཆུབ་མྱ་ངན་འདས། །སྐད་ཅིག་གིས་ནི་རབ་ཏུ་སྣང༌། །ཇི་ལྟར་སྒྱུ་མར་གྱུར་པའི་གཟུགས། །སྐྱེས་པ་མ་ཡིན་འོངས་ པ་མིན། །དེ་ལྟར་དེ་བཞིན་གཤེགས་པའི་སྐུ། །སྐྱེ་བ་མེད་པར་ཤིན་ཏུ་བསྟན། །དེ་ནས་བྱང་ཆུབ་སེམས་དཔའ་རིན་པོ་ཆེའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་ རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཡང་དག་སངས་རྒྱས་ཚད་མེད་པར། །ཚད་དུ་སྐུ་ཡང་རྣམ་པར་བསྟན། ། ཇི་ལྟར་འདུལ་བའི་སེམས་ཅན་རྣམས། །དེ་བཞིན་འདྲེན་པ་རབ་ཏུ་མཐོང༌། །སྐུ་ལ་ཕྱོགས་ནི་མེད་པར་བརྗོད། །སངས་རྒྱས་ཡུལ་ནི་མ་ལུས་ཁྱབ། །བར་སྣང་ནམ་ མཁའ་ཇི་ལྟ་བ། །དེ་བཞིན་སངས་རྒྱས་བསམ་མི་ཁྱབ། །དེར་ནི་སེམས་ཀྱང་འཕོ་བ་མེད། །སེམས་ལ་སྐྱེ་བའང་ཡོད་མ་ཡིན། །སངས་རྒྱས་རྣམས་ཀྱི་སྤྱོད་ཡུལ་ནི།། སྐྱེ་བ་མེད་ལ་རབ་ཏུ་གནས། །ཇི་ལྟར་རབ་རིབ་ལྡན་པའི་མིག། ནང་ན་མེད་ཅིང་ཕྱི་ནའང་མེད། །དེ་བཞིན་འཇིག་རྟེན་སངས་རྒྱས་དག། ནང་ན་མི་བཞུགས་ཕྱི་ནའང་ མིན༑ ༑འཇིག་རྟེན་ཀུན་གྱི་དོན་གྱི་ཕྱིར། །རྐང་གཉིས་ཀྱི་ནི་མཆོག་བྱུང་སྟེ། །འཇིག་རྟེན་དུ་ནི་མ་བྱུང་ཡང༌། །འཇིག་རྟེན་དག་ཏུ་སྐྱེ་བོས་མཐོང༌། །སངས་རྒྱས་རྣམས་ལ་ཞིང་མི་ གནས༑ ༑རྒྱལ་བ་དག་ལ་ཉིན་མཚན་མེད། །སྐད་ཅིག་མ་ཡིན་ཟླ་བ་མིན། །རྒྱལ་བ་ལ་ནི་ལོ་མི་གནས། །འཇིག་རྟེན་དག་ན་ཇི་སྐད་བརྗོད། །ཉི་མ་ཆེ་གེ་མོ་ཞིག་ཏུ། །རང་ བྱུང་བྱང་ཆུབ་རྒྱལ་བས་ཐོབ། །སངས་རྒྱས་ཉི་མའི་རྗེས་མི་འབྲང༌། །དེ་ལ་བསྐལ་པ་ཡོད་མ་ཡིན། །དུས་ཀྱང་མ་ལུས་མེད་པ་སྟེ། །དུས་གསུམ་ཡང་དག་རྫོགས་སངས་རྒྱས། ། མགོན་པོ་རྣམས་ནི་མངའ་བར་འགྱུར། །ཇི་ལྟར་ཉི་མའི་དཀྱིལ་འཁོར་ནི། །ནམ་ཡང་མཚན་དང་མི་གནས་ཏེ། །ཉིན་མཚན་ཞེས་ཀྱང་རབ་ཏུ་བརྗོད། །དེ་བཞིན་སངས་རྒྱས་ ཆོས་ཉིད་དོ། །བསྐལ་པ་གཅིག་དང་དུས་གསུམ་དུ། །འདྲེན་པ་བཞུགས་པ་མ་ཡིན་ཏེ། །དུས་གསུམ་ཞེས་ཀྱང་རབ་ཏུ་བརྗོད། །སངས་རྒྱས་རྣམས་ཀྱི་ཆོས་ཉིད་ལྟོས། །དེ་ནས་ བྱང་ཆུབ་སེམས་དཔའ་རྡུལ་དང་བྲལ་བའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ།། ཡང་དག་སངས་རྒྱས་སྐུ་གཅིག་སྟེ། །འདྲེན་པ་ཐམས་ཅད་དོན་གཅིག་ཀྱང༌། །ཚད་མེད་གཞན་དང་གཞན་དག་ཏུ། །ཕྱོགས་བཅུ་ཀུན་ན་རབ་ཏུ་སྣང༌། །གང་གིས་མ་ལུས་ཐམས་ ༄༅། །ཅད་ཀྱི༑ ༑ཆོས་ཀྱི་དབྱིངས་རྣམས་ཀུན་ཁྱབ་པ། །སེམས་ཅན་གཙོ་བོ་ཐུབ་པ་ཡི། །སྤྱོད་ཡུལ་རྣམས་ནི་ཅི་འདྲ་ལྟོས། །སངས་རྒྱས་རྣམས་ཀྱི་ཆོས་ཉིད་ ནི༑ ༑ནང་གི་སྐུས་ཀྱང་སྣང་བ་མིན། །དེ་བཞིན་གཤེགས་པའི་བྱིན་གྱི་རླབས། །ཕྱི་རོལ་སྐུས་ཀྱང་མི་སྣང་ངོ༌། །དུས་མང་ཀུན་ཏུ་ལས་རྣམས་ཀྱིས། །ཇི་ལྟར་ལས་རྣམས་ བསགས་པ་བཞིན། །དེ་བཞིན་སོ་སོར་ཕྱེ་བའི་སྐུས། །རིགས་སུ་བྱུང་བར་རབ་ཏུ་བསྟན། །རྒྱལ་བའི་ཆོས་ཉིད་མ་གཏོགས་པར། །སངས་རྒྱས་སྐུ་ནི་འདི་འདྲ་བ། །གྲངས་ སུ་བགྲང་བར་མི་ནུས་ཏེ། །བསམ་པས་ལྟ་ཡང་ཤེས་མི་ནུས། །ཇི་ལྟར་བདག་ཅག་སེམས་ཀྱིས་ལས། །བསམ་གྱིས་མི་ཁྱབ་མི་འབྱུང་བ། །དེ་བཞིན་སངས་རྒྱས་བསམ་ མི་ཁྱབ༑ ༑སེམས་ཀྱི་འཕྲིན་ལས་མི་མངའ་འོ། །ཇི་ལྟར་ཞིང་རྣམས་བསམ་ཡས་པ། །ས་ལ་རྣམ་པར་དག་པས་མཛེས། །དེ་བཞིན་སངས་རྒྱས་བསམ་མི་ཁྱབ། ། འགྲོ་བ་དག་ན་མཛེས་པར་སྣང༌། །ཇི་ལྟར་ལས་རྣམས་འཇུག་པ་ནི། །རྐྱེན་གྱིས་རབ་ཏུ་འབྱུང་འགྱུར་བ། །དེ་བཞིན་རྒྱུ་རྣམས་མཐུན་པ་ལས། །སངས་རྒྱས་ཤིན་ཏུ་མཐོང་ བར་འགྱུར། །ཡིད་བཞིན་ནོར་བུའི་རྒྱལ་པོ་ནི། །ཇི་ལྟར་ཡིད་བསམ་རྫོགས་བྱེད་པ། །དེ་བཞིན་སངས་རྒྱས་ཆོས་ཉིད་ཀྱང༌། །རྟག་ཏུ་སྨོན་ལམ་རྫོགས་པར་སྒྲུབ། ། མཐའ་དང་དབུས་མེད་འཇིག་རྟེན་འདིར། །འཇིག་རྟེན་མགོན་པོ་འདྲེན་པར་འགྱུར། །དེ་ཡི་སྨོན་ལམ་དེ་དག་གིས། །ཕྱོགས་བཅུ་འདི་དག་རྒྱལ་བས་གང༌། །དེ་ནས་བྱང་ཆུབ་ སེམས་དཔའ་དྲི་མ་མེད་པའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་བ་འདི་དག་སྨྲས་སོ། །ཡེ་ཤེས་ དཀྱིལ་འཁོར་སངས་རྒྱས་ཏེ། །འཇིག་རྟེན་ཆོས་རྣམས་རྣམ་པར་སྦྱོང༌། །འཇིག་རྟེན་ཆོས་རྣམས་རྣམ་སྦྱངས་ནས། །སངས་རྒྱས་ཆོས་རྣམས་རབ་ཏུ་བརྗོད། །དེ་སྟེ་སེམས་ཅན་མཉམ་ སངས་རྒྱས། །སེམས་ཅན་ལ་ལས་བསམ་བྱས་ན། །རྒྱལ་བ་དེ་དག་ཐམས་ཅད་མཐོང༌། །སངས་རྒྱས་ལ་ནི་གཤེགས་པ་མེད། །སངས་རྒྱས་ལ་ནི་དམིགས་བྱས་ནས། །སེམས་ ཀྱིས་སངས་རྒྱས་དམིགས་པས་ན། །སེམས་བསྐྱེད་པ་དང་རྒྱལ་མཉམ་པར། །དེ་བཞིན་དེ་དག་རྒྱལ་བ་མཐོང༌། །དཀར་བའི་ཆོས་ཀྱིས་ཉེར་བརྟན་ཅིང༌། །གང་གིས་གྲགས་ པ་རྣམས་སྦྱངས་པ། །དེ་དག་ཐམས་ཅད་སེམས་བསྐྱེད་ལ། །ཤེས་རབ་ལྡན་པ་རབ་ཏུ་བཞུགས། །དམིགས་པ་དག་དང་བྱིན་གྱི་རླབས། །མི་ཡི་གཙོ་བོ་སྟོན་པ་མཛད། །དེ་ ཕྱིར་དམིགས་པ་ཀུན་ཏུ་ཡང༌། །སངས་རྒྱས་རྒྱལ་བ་གཤེགས་པར་བརྗོད། །འཇིག་རྟེན་ཁམས་རྣམས་འདི་དག་ནི། །སངས་རྒྱས་སྐུ་རྣམས་བདག་གི་མེད། །སེམས་ལ་ ༄༅། །བདག་གི་མེད་པ་བསྟན། །བྱང་ཆུབ་རྟོགས་ལ་བདག་གི་མེད། །མི་ཡི་སེངྒེའི་ཆོས་ཉིད་དང༌། །དཔའ་བའི་སྟོབས་ལ་རབ་ཏུ་གནས། །ལུས་དང་ མཚན་ཉིད་མི་འདྲ་སྟེ། །སྣང་བའི་སེམས་དང་མཉམ་པའི་སྐུ། །ཇི་ལྟར་འཇིག་རྟེན་དེ་བཞིན་སྐུ། །ཇི་བཞིན་སྐུར་ཡང་རྒྱལ་བ་སྟེ། །སྐུ་ཡི་རང་བཞིན་ཤེས་པ་ནི། ། སངས་རྒྱས་ཆགས་པ་མེད་ཅེས་བྱ། །སངས་རྒྱས་ཀུན་ཏུ་གཟིགས་པ་སྟེ། །ཆོས་རྣམས་ཐམས་ཅད་རབ་ཏུ་གཟིགས། །སངས་རྒྱས་ཆོས་དང་བྱང་ཆུབ་རྣམས། །གང་ ལའང་དམིགས་པ་མེད་པ་ཡིན། །སངས་རྒྱས་ལ་ནི་གཤེགས་པ་མེད། །སངས་རྒྱས་གང་ནའང་མི་བཞུགས་ཏེ། །ཡང་དག་སངས་རྒྱས་ལོག་པ་མེད། །དེ་བཞིན་ གཤེགས་ལ་ལེན་མི་མངའ། །དེ་ནས་བྱང་ཆུབ་སེམས་དཔའ་དཔལ་གྱི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཐམས་ཅད་ཀུན་ཏུ་ཁྱབ། །ཞིང་གཅིག་ལ་ནི་མི་གནས་ཏེ། །ཐམས་ཅད་དུ་ནི་སངས་རྒྱས་གཤེགས། །ཞིང་ རྣམས་ཀུན་ཏུ་རབ་ཏུ་སྣང༌། །སངས་རྒྱས་སྐུ་ནི་ཐམས་ཅད་དུ། །བྱིན་གྱི་རླབས་དག་རབ་ཏུ་འབྱུང༌། །འཚང་རྒྱ་ཆོས་ཀྱི་འཁོར་ལོ་དང༌། །བསམ་པ་བཞིན་དུ་མྱ་ངན་ འདའ༑ ༑སངས་རྒྱས་ལ་ནི་སུ་ཞིག་སེམས། །ཅི་ཕྱིར་སངས་རྒྱས་བསམ་མི་ཁྱབ། །ཡང་དག་སངས་རྒྱས་སུ་ཡིས་མཐོང༌། །རྒྱལ་བ་སུས་ཀྱང་མཐོང་བར་འགྱུར། །ཇི་ལྟར་ཆོས་ རྣམས་ཆོས་ཉིད་དང༌། །ཇི་ལྟར་སངས་རྒྱས་སྤྱོད་ཡུལ་དུ། །གང་དག་ཆོས་རྣམས་གཅིག་ཙམ་ཡང༌། །དེ་བཞིན་ཉིད་ལ་མི་འཇུག་གོ །འདི་ནི་འཇིག་རྟེན་འདི་རྒྱལ་ཞེས། །འཇིག་ རྟེན་དག་ན་རྣམ་རྟོག་ཡོད། །གང་གིས་ངོ་བོ་ཉིད་ཤེས་ན། །འཇིག་རྟེན་མེད་དེ་རྒྱལ་བའང་མེད། །འཇིག་རྟེན་དད་པར་བྱ་བའི་ཕྱིར། །མགོན་པོ་དག་ནི་མངོན་སུམ་སྟོན། ། དེ་དག་གི་ནི་ལྟ་བ་འདི། །ཤིན་ཏུ་དམིགས་པར་མི་རུང་ངོ༌། །གང་གིས་ཆགས་པ་རྣམ་བཟློག་ཅིང༌། །ཆགས་པ་མེད་ལ་དགའ་བྱེད་པ། །ཆགས་པ་ཐམས་ཅད་རྣམ་བཟློག་ ནས༑ ༑ཆགས་མེད་ཆོས་ཉིད་རྟོགས་པར་འགྱུར། །སངས་རྒྱས་ཞེས་བརྗོད་གང་ཡིན་དང༌། །གང་གི་རྣམ་འཕྲུལ་སྣང་གྱུར་པའི། །ཆོས་ནི་དུས་གསུམ་ཐམས་ཅད་དུ། །རྣམ་པ་ ཀུན་ཏུ་མི་རྙེད་དེ། །གང་གིས་ཆོས་ཉིད་འདི་ཤེས་ཤིང༌། །གང་གིས་འདི་བཞིན་ཡིད་ཆེས་ན། །ཐམས་ཅད་མཁྱེན་ཅིང་ཀུན་གཟིགས་པའི། །དེ་བཞིན་གཤེགས་པར་མྱུར་དུ་ འགྱུར༑ ༑སངས་རྒྱས་ཐམས་ཅད་རྣམ་འཕྲུལ་བ། །འདི་དག་ཐམས་ཅད་ཚིག་གིས་བསྟན། །ཡང་དག་སངས་རྒྱས་ཚིག་ལམ་མེད། །ཚིག་གི་ལམ་གྱིས་རབ་ཏུ་བརྗོད། །དེ་ནས་ ༄༅། །བྱང་ཆུབ་སེམས་དཔའ་ཆོས་ཀྱི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་ འདི་དག་སྨྲས་སོ། །གང་གིས་རྣམ་པར་འཕྲུལ་སྣང་བའི། །སངས་རྒྱས་མཐོང་བ་མེད་པ་བས། །འཇིག་རྟེན་ཁམས་རྣམས་ཐམས་ཅད་ཀྱི། །སྡུག་བསྔལ་ཕུང་པོ་བླངས་ ཀྱང་བླ༑ ༑འགྲོ་བ་གང་གིས་བྱང་ཆུབ་ཏུ། །སེམས་ཅན་ནི་ནམ་ཡང་མ་བསྐྱེད་པ། །དེ་དག་གནས་འདི་ཐོས་གྱུར་ན། །སངས་རྒྱས་བྱང་ཆུབ་འགྲུབ་པར་འགྱུར། །གང་གིས་ བསམ་བ་གཅིག་གིས་ཀྱང༌། །འདི་ལ་མོས་བྱེད་མཁས་པ་ནི། །མི་ཡི་མཆོག་ཏུ་མི་འགྱུར་ཞེས། །དེས་ནི་ཐེ་ཚོམ་མི་བྱའོ། །དེ་ཡི་རྣམ་པར་འཕྲུལ་བ་ནི། །བསྐལ་ པ་བྱེ་བའི་བར་དུ་དཀོན། །སུ་ཞིག་འདི་ལ་མོས་བྱེད་པ། །དེ་དག་བླ་ན་མེད་པར་འགྱུར། །བརྗོད་དུ་མེད་པའི་སངས་རྒྱས་རྣམས། །སྐད་ཅིག་སྐད་ཅིག་བསྙེན་བཀུར་ ཀྱང༌། །འདི་ཡི་ཚུལ་ལ་མི་གནས་ན། །དེ་དག་བསྙེན་བཀུར་བྱས་མ་ཡིན། །གང་ལ་སངས་རྒྱས་བརྗོད་གྱུར་པའི། །ཆོས་འདི་གང་གིས་ཐོས་གྱུར་པ། །དེས་ནི་མི་བདེ་ཀུན་ གྱིས་ཀྱང༌། །སྤྱད་པ་རྣམས་ནི་བླང་བར་བྱ། །ཇི་ཙམ་ཆོས་ཀྱི་དབྱིངས་རྣམས་དང༌། །དུས་གསུམ་གྱི་ནི་མགོན་པོ་ཡི། །སངས་རྒྱས་རྣམས་ནི་རྟེན་པ་ཡི། །ཡེ་ཤེས་ ཆེན་པོ་གཅིག་ཐོས་ནས། །ཕྱི་མའི་བསྐལ་པ་བྱེ་བ་རྣམས། །ཞིང་རྣམས་རེ་རེར་ཟད་བྱས་ཤིང༌། །འདི་ཡི་ཚུལ་ནི་བརྩོན་བྱེད་ན། །དེ་ལ་བྱང་ཆུབ་དཀོན་པ་མེད། །སེམས་ཅན་ རྣམས་ཀྱི་སྔོན་གྱི་མཐའི། །འཁོར་བར་མི་རྣམས་གནས་གྱུར་ཀྱང༌། །དེས་ནི་སངས་རྒྱས་རབ་ཕྱུང་པ། །ཆོས་ཉིད་འདི་ནི་ཤེས་མ་གྱུར། །ཆོས་རྣམས་ཞིག་པར་བྱས་པ་མེད། ། ཆོས་ནི་འཇིག་པར་མི་འགྱུར་ཏེ། །ཀུན་ཏུ་སྣང་ལས་རྣམ་འཕྲུལ་བ། །འཇིག་རྟེན་དེ་དག་ཐམས་ཅད་བསྟན། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་ བྱ་བ་ལས། །དགའ་ལྡན་གྱི་གནས་སུ་བྱང་ཆུབ་སེམས་དཔའ་འདུས་པའི་ཚིགས་སུ་བཅད་པ་བསྟན་པའི་ལེའུ་སྟེ། ཉི་ཤུ་དགུ་པའོ།། །།དེ་ནས་བྱང་ཆུབ་ སེམས་དཔའ་རྡོ་རྗེའི་རྒྱལ་མཚན་དེའི་ཚེ་སངས་རྒྱས་ཀྱི་མཐུས་ཏིང་ངེ་འཛིན་ཡེ་ཤེས་སྣང་བ་ཞེས་བྱ་བ་ལ་སྙོམས་པར་ཞུགས་ཏེ། བྱང་ཆུབ་སེམས་དཔའ་རྡོ་རྗེའི་རྒྱལ་ མཚན་བྱང་ཆུབ་སེམས་དཔའ་ཏིང་ངེ་འཛིན་ཡེ་ཤེས་སྣང་བ་ཞེས་བྱ་བ་དེ་ལ་སྙོམས་པར་ཞུགས་མ་ཐག་ཏུ་དེའི་ཚེ་ན་ཕྱོགས་བཅུའི་ཕྱོགས་རེ་རེར་འཇིག་རྟེན་གྱི་ཁམས་ སངས་རྒྱས་ཀྱི་ཞིང་སྟོང་གི་རྡུལ་ཤིན་ཏུ་ཕྲ་བ་སྙེད་འདས་པའི་ཕ་རོལ་ནས་དེ་བཞིན་གཤེགས་པ་སངས་རྒྱས་ཀྱི་ཞིང་བརྒྱ་ཕྲ་སྟོང་གི་རྡུལ་ཤིན་ཏུ་ཕྲ་བ་སྙེད་ཀྱིས་ཞལ་ ༄༅། །བསྟན་པ་མཐོང་སྟེ། དེ་དག་ཀྱང་འདི་ལྟ་སྟེ། མཚན་རྡོ་རྗེའི་རྒྱལ་མཚན་ཞེས་བྱ་བ་ཤ་སྟག་གོ །ཕྱོགས་གཅིག་ནས་ཇི་ལྟ་བ་ལྟར་ཕྱོགས་བཅུ་ནས་ཀྱང་ དེ་བཞིན་ཏེ། དེ་ལ་སངས་རྒྱས་བཅོམ་ལྡན་འདས་དེ་དག་གིས་འདི་སྐད་ཅེས་ཀྱང་བཀའ་སྩལ་ཏོ། །རྡོ་རྗེའི་རྒྱལ་མཚན། དེ་ལྟར་ཁྱོད་བྱང་ཆུབ་སེམས་དཔའ་ཏིང་ངེ་ འཛིན་ཡེ་ཤེས་སྣང་བ་ལ་སྙོམས་པར་ཞུགས་པ་ལེགས་སོ། །ལེགས་སོ། །འདི་ལྟར་ཡང་རིགས་ཀྱི་བུ། ཁྱོད་ལ་ཕྱོགས་བཅུ་ནས་དེ་བཞིན་གཤེགས་པ་སངས་རྒྱས་ ཀྱི་ཞིང་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཐམས་ཅད་ཀྱང་མཚན་མཐུན་པ་ཤ་སྟག་གིས་འདི་ལྟར་བཅོམ་ལྡན་འདས་རྣམ་པར་སྣང་མཛད་འདིའི་སྔོན་གྱི་ སྨོན་ལམ་དང༌། སྔོན་གྱི་བྱིན་གྱི་རླབས་དང༌། ཁྱོད་ཀྱི་ཡེ་ཤེས་རྣམ་པར་དག་པ་དང༌། བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བས་བརྟན་པའི་ཕྱིར་འདི་ལྟ་ སྟེ༑ བྱང་ཆུབ་སེམས་དཔའི་མི་འཇིགས་པ་རྣམ་པར་དག་པར་བྱ་བ་དང༌། སྤོབས་པ་ཆགས་པ་མེད་པར་བྱ་བ་དང༌། ཡེ་ཤེས་ཀྱིས་བསྒྲིབས་པ་མེད་པའི་སར་འཇུག་པར་ བྱ་བ་དང༌། ཐམས་ཅད་མཁྱེན་པའི་སེམས་ཡངས་པ་ལ་རབ་ཏུ་འཇུག་པར་བྱ་བ་དང༌། དགེ་བའི་རྩ་བ་མི་ཟད་པ་ཕུན་སུམ་ཚོགས་པར་བྱ་བ་དང༌། བསྒྲིབས་པ་མེད་པའི་ ཆོས་དཀར་པོ་ཡོངས་སུ་རྫོགས་པར་བྱ་བ་དང༌། ཆོས་ཀྱི་དབྱིངས་ལ་སྒོ་ཀུན་ནས་འཇུག་པར་བྱ་བ་དང༌། སངས་རྒྱས་ཐམས་ཅད་ཀྱི་ཆོ་འཕྲུལ་བསྟན་པར་བྱ་བ་དང༌། སྔོན་གྱི་ མཐའི་མུར་ཐུག་པའི་ཡེ་ཤེས་དང་དྲན་པར་རྒྱུན་མི་ཆོད་པར་རྣམ་པར་དག་པར་བྱ་བ་དང༌། དབང་པོ་སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་བྱིན་དུ་བརླབ་པར་བྱ་བ་དང་ ཆོས་ཀྱི་སྒོ་མཐའ་ཡས་པར་བསྟན་པར་བྱ་བ་དང༌། ཤེས་པ་ཀུན་ཏུ་གཟུང་བར་བྱ་བ་དང༌། འདི་ལྟ་སྟེ། ཡོངས་སུ་བསྔོ་བ་བཅུ་ཡོངས་སུ་རྫོགས་པར་བསྟན་པ་དང༌། བྱང་ ཆུབ་སེམས་དཔའ་ཐམས་ཅད་ཀྱི་དགེ་བའི་རྩ་བ་གཟུང་བར་བྱ་བ་དང༌། འཇིག་རྟེན་ལས་འདས་པའི་ཚོགས་རྣམས་རབ་ཏུ་བསྟན་པར་བྱ་བ་དང༌། ཐམས་ཅད་མཁྱེན་པའི་ ཡེ་ཤེས་མི་ཆོད་པར་བྱ་བ་དང༌། སྨོན་ལམ་ཆེན་པོའི་སྐབས་དབྱེ་བར་བྱ་བ་དང༌། དོན་ཤིན་ཏུ་བསྟན་པ་ལ་འཇུག་པར་བྱ་བ་དང༌། ཆོས་ཀྱི་དབྱིངས་ཡོངས་སུ་ཤེས་པར་བྱ་ བ་དང༌། བྱང་ཆུབ་སེམས་དཔའ་ཐམས་ཅད་ཀྱི་ཡིད་རབ་ཏུ་དགའ་བར་བྱ་བ་དང༌། སངས་རྒྱས་ཐམས་ཅད་ཀྱི་སྲིད་པ་གསུམ་གྱི་དགེ་བའི་རྩ་བ་མཐུན་པ་ལ་བརྟེན་པར་བྱ་ བ་དང༌། དེ་བཞིན་གཤེགས་པ་ཐམས་ཅད་ཀྱི་རིགས་ཡང་དག་པར་གཟུང་བར་བྱ་བའི་ཕྱིར་བྱིན་གྱིས་བརླབས་པ་མཛད་ཀྱི། ཀྱེ་རིགས་ཀྱི་བུ། ཁྱོད་ཀྱིས་དེ་བཞིན་གཤེགས་ ༄༅། །པའི་མཐུ་དང༌། སངས་རྒྱས་ཀྱིས་བྱིན་གྱིས་བརླབས་པ་དང༌། འཇིག་རྟེན་ལས་འདས་པའི་བསོད་ནམས་ཀྱིས་བརྟན་པ་དང༌། གཟུངས་ཀྱི་སྣང་བ་ལ་ ཞུགས་པ་དང༌། སངས་རྒྱས་ཀྱི་ཆོས་བསྒྲིབས་པ་མེད་པ་ལ་ཞུགས་པ་དང༌། ཆོས་ཀྱི་དབྱིངས་སྣང་བའི་ཆོས་ཉིད་དུ་བྱ་བ་དང༌། ཁ་ན་མ་ཐོ་བ་མེད་པའི་ཆོས་དཀར་པོ་ཡང་ དག་པར་བསྒྲུབ་པར་བྱ་བ་དང༌། ཡེ་ཤེས་ཀྱི་སྤྱོད་ཡུལ་ཡངས་པ་ལ་གནས་པ་དང༌། བསྒྲིབས་པ་མེད་པའི་ཆོས་སྣང་བ་ལ་གནས་པས་ཆོས་བསྟན་པ་འདི་བརྗོད་པ་དང༌། བསྟན་པའི་ཕྱིར་སྤོབས་པར་གྱིས་ཤིག །དེ་ནས་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་གྱི་ཡེ་ཤེས་ཚད་མེད་པ་ཉེ་བར་ སྒྲུབ་པ་མཛད་དོ། །སྤོབས་པ་ཆགས་པ་མེད་པ་དང༌། ཚིག་རབ་ཏུ་དབྱེ་བ་ལ་མཁས་པ་ཉེ་བར་སྒྲུབ་པ་མཛད་དོ། །བསྒྲིབས་པ་མེད་པའི་ཆོས་ཀྱི་སྣང་བ་ཉེ་བར་སྒྲུབ་པ་ མཛད་དོ། །དེ་བཞིན་གཤེགས་པ་རྣམས་ཀྱི་སྐུ་དང་གཅིག་པ་ཉེ་བར་སྒྲུབ་པ་མཛད་དོ། །ཚད་མེད་པའི་དབྱངས་ཀྱི་དཀྱིལ་འཁོར་རྣམ་པར་དག་པ་ཉེ་བར་སྒྲུབ་པ་མཛད་དོ། ། བྱང་ཆུབ་སེམས་དཔའི་ཏིང་ངེ་འཛིན་བསམ་གྱིས་མི་ཁྱབ་པ་རྣམ་པར་དབྱེ་བ་ལ་མཁས་པ་ཉེ་བར་སྒྲུབ་པ་མཛད་དོ། །དགེ་བའི་རྩ་བ་ཐམས་ཅད་ཉམས་པ་མེད་པར་ཡོངས་ སུ་བསྔོ་བའི་ཡེ་ཤེས་ཉེ་བར་སྒྲུབ་པ་མཛད་དོ། །ཆོས་ཐམས་ཅད་ཀྱི་ལྷག་མཐོང་མངོན་པར་བསྐྱེད་པ་ལ་མཁས་པ་ཉེ་བར་སྒྲུབ་པ་མཛད་དོ། །ཆོས་ཐམས་ཅད་བསྟན་པའི་གནས་ རྒྱུན་མི་ཆོད་པ་ཉེ་བར་སྒྲུབ་པ་མཛད་དོ། །དེ་ཅིའི་ཕྱིར་ཞེ་ན། འདི་ལྟར་ཏིང་ངེ་འཛིན་འདི་ཉིད་ཀྱི་དགེ་བའི་རྩ་བའི་གཟི་བརྗིད་ཀྱི་ཕྱིར་རོ། །དེ་ནས་སངས་རྒྱས་བཅོམ་ལྡན་འདས་ དེ་དག་གི་ཕྱག་གཡས་པས་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་གྱི་སྤྱི་བོ་ལ་བྱུག་པ་མཛད་དོ། །སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་རྡོ་རྗེའི་ རྒྱལ་མཚན་ལ་རེག་མ་ཐག་ཏུ་ཏིང་ངེ་འཛིན་དེ་ལས་རྣམ་པར་ལངས་ཏེ། ལངས་ནས་ཀྱང་བྱང་ཆུབ་སེམས་དཔའ་དེ་དག་ལ་སྨྲས་པ། ཀྱེ་རྒྱལ་བའི་སྲས་དག །བྱང་ཆུབ་ སེམས་དཔའི་སྨོན་ལམ་འདི་ལྟ་སྟེ། འགྲོ་བ་ཐམས་ཅད་ཁྱབ་པར་བྱེད་པ། སེམས་ཅན་ཐམས་ཅད་ཡོངས་སུ་སྐྱོབ་པ་འདི་ནི། བསམ་གྱིས་མི་ཁྱབ་པ་སྟེ། ཀྱེ་རྒྱལ་བའི་ སྲས་དག །དེ་ལ་གནས་ཤིང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་བསྔོ་བ་ལ་སློབ་བོ། །མ་ བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་བསྔོ་བ་ལ་སློབ་པར་འགྱུར་རོ། །ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་བསྔོ་བ་ ༄༅། །ལ་སློབ་བོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་གང་ལ་བསམ་སྟེ་དེ་སྐད་དུ་སྨྲས་པ་དེ་ དག་ནི༑ གང༌། ཀྱེ་རྒྱལ་བའི་སྲས་དག །ཡོངས་སུ་བསྔོ་བའི་གྲངས་ནི། དུ་ཞེ་ན། ཀྱེ་རྒྱལ་བའི་སྲས་དག །བསྔོ་བ་བཅུ་པོ་འདི་དག་ནི། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་སོ། །གསུང་ངོ༌། །གསུང་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། སེམས་ཅན་རྣམས་ཀྱི་འདུ་ཤེས་ འགོག་ཅིང་འགྲོ་བ་ཐམས་ཅད་ཡོངས་སུ་སྐྱོབ་པ་ཞེས་བྱ་བ་བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བ་དང་པོ་དང༌། མི་ཕྱེད་པ་དང་ལྡན་པ་ཞེས་བྱ་བ་བྱང་ཆུབ་ སེམས་དཔའ་རྣམས་ཀྱི་ཡོངས་སུ་བསྔོ་བ་གཉིས་པ་དང༌། སངས་རྒྱས་ཐམས་ཅད་ལ་ཡང་དག་པར་བསྐྱེད་པ་ཞེས་བྱ་བ་བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་ བ་གསུམ་པ་དང༌། ཐམས་ཅད་རྗེས་སུ་སོང་བ་ཞེས་བྱ་བ་བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བ་བཞི་པ་དང༌། བསོད་ནམས་ཀྱི་མཛོད་མི་ཟད་པ་ཞེས་བྱ་ བ་བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བ་ལྔ་པ་དང༌། དགེ་བའི་རྩ་བ་ཐམས་ཅད་དང་མཉམ་པ་ཉིད་ཀྱི་རྗེས་སུ་སོང་བ་ཞེས་བྱ་བ་བྱང་ཆུབ་སེམས་དཔའ་ རྣམས་ཀྱི་ཡོངས་སུ་བསྔོ་བ་དྲུག་པ་དང༌། འགྲོ་བ་ཐམས་ཅད་མཉམ་པ་ཉིད་ཀྱི་རྗེས་སུ་སོང་བ་ཞེས་བྱ་བ་བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བ་བདུན་པ་དང༌། དེ་ བཞིན་གཤེགས་པའི་མཚན་ཉིད་ཀྱི་རང་བཞིན་ཞེས་བྱ་བ་བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བ་བརྒྱད་པ་དང༌། ཆགས་པ་མེད་ཅིང་བཅིངས་པ་དང༌། དཀྲོལ་བ་ མེད་པ་ཞེས་བྱ་བ་བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བ་དགུ་པ་དང༌། ཆོས་ཀྱི་དབྱིངས་ཚད་མེད་པའི་རྗེས་སུ་སོང་བ་ཞེས་བྱ་བ་བྱང་ཆུབ་སེམས་དཔའ་རྣམས་ ཀྱི་ཡོངས་སུ་བསྔོ་བ་བཅུ་པ་སྟེ། ཀྱེ་རྒྱལ་བའི་སྲས་དག ། བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བ་བཅུ་པོ་དེ་དག་ནི། འདས་པ་དང༌། མ་བྱོན་པ་དང༌། ད་ལྟར་བྱུང་ བའི་སངས་རྒྱས་བཅོམ་ལྡན་འདས་ཀྱིས་གསུངས་སོ། །གསུང་ངོ༌། །གསུང་བར་འགྱུར་རོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བ་ དང་པོ་སེམས་ཅན་རྣམས་ཀྱི་འདུ་ཤེས་འགོག་ཅིང་འགྲོ་བ་ཐམས་ཅད་ཡོངས་སུ་སྐྱོབ་པ་ཞེས་བྱ་བ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའི་སྦྱིན་ པའི་ཕ་རོལ་ཏུ་ཕྱིན་པ་ལ་རབ་ཏུ་སྦྱོར་བ་འམ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྣམ་པར་སྦྱོང་བའམ། བཟོད་པའི་ཕ་རོལ་ཏུ་ཕྱིན་པ་ལ་སེམས་པའམ། བརྩོན་འགྲུས་ ༄༅། །ཀྱི་ཕ་རོལ་ཏུ་ཕྱིན་པ་ལ་བརྩོན་པའམ། བསམ་གཏན་གྱི་ཕ་རོལ་ཏུ་ཕྱིན་པ་ལ་རྣམ་པར་དཔྱོད་པའམ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་འཇུག་ པའམ། བྱམས་པ་སྒོམ་པ་ཡང་དག་པར་བསྐྱེད་པའམ། སྙིང་རྗེས་སྙིང་བརྩེ་བར་བྱེད་པའམ། དགའ་བ་ལ་རབ་ཏུ་དགའ་བར་བྱེད་པའམ། བཏང་སྙོམས་ལ་ཤིན་ཏུ་ གནས་པར་བྱེད་ཀྱང་རུང་སྟེ། དགེ་བའི་རྩ་བ་རྣམས་ལ་ཤིན་ཏུ་བསམ་ནས་དགེ་བའི་རྩ་བ་དེ་དང༌། དེ་དག་ལ་རབ་ཏུ་སྦྱོར་ཞིང་དགེ་བའི་རྩ་བ་ཚད་མེད་པ་རྣམ་པར་ཕྱེ་ནས་ འདི་ལྟར་དགེ་བའི་རྩ་བ་གང་གིས་སེམས་ཅན་རྣམས་ཀྱི་སེམས་ཅན་དམྱལ་བའི་ངན་སོང་རྒྱུན་ཆད་པར་འགྱུར་བ་དང༌། བྱོལ་སོང་གི་སྐྱེ་གནས་པ་དང༌། གཤིན་རྗེའི་ འཇིག་རྟེན་པ་རྣམས་ཀྱི་སྡུག་བསྔལ་གྱི་ཕུང་པོ་རྣམ་པར་ལྡོག་པར་འགྱུར་བའི་དགེ་བའི་རྩ་བ་འགྲོ་བ་ཐམས་ཅད་ལ་རྣམ་པར་དག་པའི་མཐར་ཕྱིན་པར་ཕན་འདོགས་པ་ གང་ཡིན་ཞེས་སེམས་བསྐྱེད་དོ། །དེ་དེ་ལྟར་དགེ་བའི་རྩ་བ་དེ་དག་ཡང་དག་པར་བསྐྱེད་པ་ན་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སྡུག་བསྔལ་གྱི་ ཕུང་པོ་ཐམས་ཅད་རྣམ་པར་བཟློག་པའི་ཕྱིར་བདག་སེམས་ཅན་ཐམས་ཅད་ཀྱི་གནས་སུ་གྱུར་ཅིག །ཉོན་མོངས་པ་ཐམས་ཅད་ལས་ཡོངས་སུ་དགྲོལ་བའི་ཕྱིར་བདག་ སེམས་ཅན་ཐམས་ཅད་ཀྱི་དཔུང་གཉེན་དུ་གྱུར་ཅིག །འཇིགས་པ་ཀུན་ལས་བསྲུང་བའི་ཕྱིར་བདག་སེམས་ཅན་ཐམས་ཅད་ཀྱི་སྐྱབས་སུ་གྱུར་ཅིག །ཐམས་ཅད་མཁྱེན་པའི་ ས་ཐོབ་པར་བྱ་བའི་ཕྱིར་བདག་སེམས་ཅན་ཐམས་ཅད་ཀྱི་ལམ་དུ་གྱུར་ཅིག །ཤིན་ཏུ་བདེ་བ་དང་ལྡན་པ་ཐོབ་པར་བྱ་བའི་ཕྱིར་བདག་སེམས་ཅན་ཐམས་ཅད་ཀྱི་རྟེན་དུ་གྱུར་ ཅིག །རབ་རིབ་མེད་པའི་ཡེ་ཤེས་ཀྱི་སྣང་བ་ཡང་དག་པར་བསྟན་པའི་ཕྱིར་བདག་སེམས་ཅན་ཐམས་ཅད་ཀྱི་སྣང་བར་གྱུར་ཅིག །མ་རིག་པའི་མུན་པ་རྣམ་པར་བསལ་བའི་ ཕྱིར་བདག་སེམས་ཅན་ཐམས་ཅད་ཀྱི་སྒྲོན་མར་གྱུར་ཅིག །ཤིན་ཏུ་དག་པ་ལ་རབ་ཏུ་དགོད་པའི་ཕྱིར་བདག་སེམས་ཅན་ཐམས་ཅད་ཀྱི་མར་མེར་གྱུར་ཅིག །ཆོས་ཀྱི་ཚུལ་ལ་ གཟུང་བའི་ཕྱིར་བདག་སེམས་ཅན་ཐམས་ཅད་ཀྱི་དོན་གྱི་འདྲེན་པར་གྱུར་ཅིག །བསྒྲིབས་པ་མེད་པའི་ཡེ་ཤེས་ཀྱི་ཕུང་པོ་བསྟབ་པའི་ཕྱིར་བདག་སེམས་ཅན་ཐམས་ཅད་ཀྱི་ ཡོངས་སུ་འདྲེན་པར་གྱུར་ཅིག །ཅེས་དེ་དེ་ལྟར་འགྲོ་བ་ཐམས་ཅད་ཀྱི་དོན་དུ་ཐམས་ཅད་མཁྱེན་པ་ཉིད་ཀྱི་མཐར་ཤིན་ཏུ་ཐུག་པར་དགེ་བའི་རྩ་བ་དེ་དག་ཡོངས་སུ་བསྔོ་སྟེ། ཇི་ལྟར་མཛའ་བ་བསྲུང་བའི་ཕྱིར་ཡོངས་སུ་བསྔོ་བ་དེ་ལྟར་མི་མཛའ་བ་བསྲུང་བའི་ཕྱིར་ཡང་ཡོངས་སུ་བསྔོའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ ༄༅། །ཆེན་པོ་རྣམས་ལ་བདག་ཏུ་བྱ་བའི་བསམ་པས་མི་མཛའ་བ་ནི། གང་ཡང་མེད་དེ། དེ་ཡང་འདི་ལྟར་བྱང་ཆུབ་སེམས་དཔའ་ནི། ཆོས་ཐམས་ཅད་ མཉམ་པ་ཉིད་ལ་ཡང་དག་པར་འབྱུང་བ་སྟེ། དེ་འདི་སྙམ་དུ་བྱང་ཆུབ་སེམས་དཔའ་ལ་མི་མཛའ་བའི་དོན་བྱེད་པ་དེ་དག་ཐམས་ཅད་ནི། བདག་གི་རྒྱུད་ལ་དགོད་དགོད་ པ་ཡིན་ནོ། །ཞེས་ཏེ། དེ་དག་ནི། སེམས་ཅན་ཐམས་ཅད་ཀྱི་ཡུལ་ཐམས་ཅད་ལ་ཞེ་སྡང་བ་མེད་པའི་མིག་གིས་བལྟའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ རྣམས་ནི། འགྲོ་བ་ཐམས་ཅད་ཀྱི་དགེ་བའི་བཤེས་གཉེན་ཏེ། སེམས་ཅན་ཐམས་ཅད་ལ་དགེ་བའི་ཆོས་ཡང་དག་པར་བསྟན་པའི་ཕྱིར་འཇུག་གོ །འདི་ལྟ་སྟེ། དཔེར་ ན༑ རྒྱ་མཚོ་ཆེན་པོ་ནི། དུག་ཐམས་ཅད་ཀྱིས་གདུག་པར་བྱ་བར་མི་ནུས་སོ། །དེ་བཞིན་དུ་བྱང་ཆུབ་སེམས་དཔའ་ཡང་དྲིན་མི་གཟོ་བ་དང༌། བློ་ཞན་པ་དང༌། སེམས་ འཁྲུགས་པ་དང༌། རྙོག་པ་དང༌། མུན་པར་གྱུར་པ་དང༌། རང་བཞིན་སྟོར་བ་དང༌། རློམ་སེམས་དང་ལྡན་པ་དང༌། སྒྲུབ་པ་ཉམས་པ་དང༌། སེམས་དམུས་ལོང་ལྟ་ བུར་གྱུར་པའི་སེམས་ཅན་བྱིས་པ་ཐམས་ཅད་ཀྱིས་སྐྱོན་ཅན་དུ་བྱ་བར་མི་ནུས་སོ། །འདི་ལྟ་སྟེ། དཔེར་ན། ལྷའི་བུ་ཉི་མ་འཆར་བ་དེ་ནི། དམུས་ལོང་གི་སྐྱོན་གྱིས་འཆར་ པ་ལས་ཐོགས་པར་མི་འགྱུར་རོ། །དྲི་ཟའི་གྲོང་ཁྱེར་གྱི་སྐྱོན་གྱིས་ཐོགས་པར་མི་འགྱུར་རོ། །གླིང་བཞི་པའི་འཇིག་རྟེན་གྱི་ཁམས་ཀྱི་སའི་རྡུལ་གྱི་སྐྱོན་གྱིས་ཐོགས་པར་ མི་འགྱུར་རོ། །ལྷ་མ་ཡིན་གྱི་དབང་པོ་སྒྲ་གཅན་གྱི་སྐྱོན་གྱིས་ཐོགས་པར་མི་འགྱུར་རོ། །དུ་བ་འཁྲིགས་པའི་སྐྱོན་གྱིས་ཐོགས་པར་མི་འགྱུར་རོ། །འཛམ་བུའི་གླིང་གི་ ཉེ་བའི་ཉོན་མོངས་པའི་སྐྱོན་གྱིས་ཐོགས་པར་མི་འགྱུར་རོ། །གྲིབ་མ་སྣ་ཚོགས་ཀྱི་སྐྱོན་གྱིས་ཐོགས་པར་མི་འགྱུར་རོ། །དུག་གི་རིའི་སྐྱོན་གྱིས་ཐོགས་པར་མི་འགྱུར་ རོ༑ ༑ཁམས་ཀྱི་ཉེ་བའི་ཉོན་མོངས་པའི་སྐྱོན་གྱིས་ཐོགས་པར་མི་འགྱུར་རོ། །དུས་ཡོངས་སུ་འགྱུར་བའི་སྐྱོན་གྱིས་ཐོགས་པར་མི་འགྱུར་རོ། །དེ་བཞིན་དུ་བྱང་ཆུབ་སེམས་ དཔའ་སེམས་དཔའ་ཆེན་པོ་དྲན་པ་ཅན། ཡང་དག་པར་ཤེས་པ་དང་ལྡན་པ། སེམས་ཀྱི་བདག་ཉིད་ཆེ་བ་ཉིད་ཤིན་ཏུ་ཟབ་ཅིང་ཡངས་པ། ཡིད་ལ་ཡང་དག་པར་རྟོག་པ་ མི་ཞན་པ། ཡོན་ཏན་སྤྱད་པས་ཡེ་ཤེས་ཀྱི་མཐར་གྱུར་པ། ཆོས་ལ་ཤིན་ཏུ་དད་པའི་སེམས་མངོན་པར་སྐྱེས་པ། ཆོས་ཀྱི་སྣང་བའི་འོད་ཀྱིས་རབ་ཏུ་སྣང་བ། དོན་ཐམས་ ཅད་མཐོང་བ། ཆོས་མངོན་པར་ཤེས་པ། ཡེ་ཤེས་རིག་པ། རྩོད་པ་མེད་པ་ལྷུར་བྱེད་པ། སེམས་ཅན་ཐམས་ཅད་དགེ་བའི་ཆོས་སྤྱོད་པ་ལ་རབ་ཏུ་སྦྱོར་རོ། །སེམས་ཅན་ ༄༅། །ཐམས་ཅད་ཀྱིས་ཉེས་པར་སེམས་བསྐྱེད་པ་ལ་འཁྲུལ་པ་མེད་པ་དེ་ཡང་དགེ་བའི་རྩ་བ་དེ་དག་ཡོངས་སུ་བསྔོ་བ་ན་གནོད་པར་བྱེད་པ་ཐམས་ཅད་ ཀྱི་སྐྱོན་གྱིས་ཐོགས་པར་མི་འགྱུར་རོ། །སེམས་ཅན་མི་སྲུན་བའི་ཚུལ་གྱིས་ལྡོག་པར་མི་འགྱུར་རོ། །སེམས་ཅན་གྱི་ལྟ་བའི་རྙོག་པས་དགེ་བའི་རྩ་བ་ཡོངས་སུ་བསྔོ་བ་དང་ འབྲལ་བར་མི་འགྱུར་རོ། །སེམས་ཅན་གྱི་སེམས་འཁྲུག་པས་ལྡོག་པར་མི་འགྱུར་རོ། །སེམས་ཅན་གྱི་སེམས་ཀྱི་རྒྱུད་སྟོར་བས་བྱང་ཆུབ་སེམས་དཔའི་གོ་ཆ་ཆེན་པོ་ བགོས་པ་ལས་རིང་བར་མི་འགྱུར་རོ། །འགྲོ་བ་ཐམས་ཅད་ཡོངས་སུ་བསྐྱབ་པའི་སྨོན་ལམ་དཀྲུག་མའི་རྙོག་པ་ཐམས་ཅད་ཀྱིས་བཅིལ་བར་མི་འགྱུར་རོ། །བྱང་ ཆུབ་སེམས་དཔའི་རྩོམ་པ་ཆེན་པོ་སེམས་ཅན་དྲིན་དུ་མི་གཟོ་བ་མཐོང་བས་ལྷོད་པར་མི་འགྱུར་རོ། །བྱང་ཆུབ་ཏུ་དམིགས་པའི་དགེ་བའི་རྩ་བ་སེམས་ཅན་མི་སྲུན་པའི་ དབང་པོས་ཞུམ་པར་མི་འགྱུར་རོ། །དགེ་བའི་རྩ་བ་ཇི་ལྟ་བ་བཞིན་ལས་བྱིས་པའི་སྐྱེ་བོ་དང་འགྲོགས་པ་ལས་འཕང་བར་མི་འགྱུར་རོ། །སེམས་ཅན་གྱི་སྐྱོན་གྱིས་སྐྱོ་ བར་མི་འགྱུར་རོ། །འཕགས་པ་སངས་རྒྱས་ཕལ་པོ་ཆེ་ཞེས་བྱ་བ་ཐེག་པ་ཆེན་པོའི་མདོ། བམ་པོ་སུམ་ཅུ་རྩ་གཉིས་པ། དེ་ཅིའི་ཕྱིར་ཞེ་ན། དཀྱིལ་འཁོར་འདི་ནི། བསྒྲིབས་པ་མེད་པར་འགྲོ་བ་ཐམས་ཅད་རྣམ་པར་དག་པར་བྱ་བའི་ཕྱིར་འབྱུང་བ་སྟེ། སེམས་ཅན་གཅིག་ལ་དམིགས་ཤིང་བྱང་ཆུབ་སེམས་དཔའ་རྣམས་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཏུ་དགེ་བའི་རྩ་བ་ཡོངས་སུ་བསྔོ་བ་མ་ཡིན། འདི་ལྟ་སྟེ། ཞིང་རྣམ་པར་དག་པར་བྱ་བའི་ཕྱིར་ཞིང་གཅིག་ལ་དམིགས་ཏེ་བྱང་ཆུབ་སེམས་དཔའ་ བྱང་ཆུབ་ཀྱི་སེམས་ལ་མངོན་པར་སྤྲོ་བ་མ་ཡིན། འདི་ལྟ་སྟེ། སངས་རྒྱས་བལྟ་བ་རྣམ་པར་དམིགས་པའི་ཕྱིར་སངས་རྒྱས་གཅིག་ལ་དམིགས་ཏེ་བྱང་ཆུབ་སེམས་དཔའ་ རྣམས་ཀྱི་དད་པ་སྐྱེ་བ་མ་ཡིན། འདི་ལྟ་སྟེ། ཡེ་ཤེས་གཅིག་རྗེས་སུ་རྟོགས་པའི་ཕྱིར་ཡེ་ཤེས་གཅིག་ལ་དམིགས་ནས་བྱང་ཆུབ་སེམས་དཔའ་རྣམས་ཀྱི་སྨོན་ལམ་སྐྱེ་བ་ མ་ཡིན་གྱི། འདི་ལྟར་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་དགེ་བའི་རྩ་བ་རྣམས་ཡོངས་སུ་བསྔོའོ། །ཞིང་ཐམས་ཅད་ཡོངས་སུ་སྦྱང་བའི་ཕྱིར་དགེ་བའི་རྩ་བ་ རྣམས་ཡོངས་སུ་བསྔོའོ། །སངས་རྒྱས་ཐམས་ཅད་ལ་མཆོད་ཅིང་རིམ་གྲོ་བྱ་བའི་ཕྱིར་སངས་རྒྱས་ཐམས་ཅད་བལྟ་བ་ལ་དམིགས་ནས་བྱང་ཆུབ་སེམས་དཔའ་རྣམས་ཀྱི་ དད་པ་སྐྱེའོ། །སངས་རྒྱས་ཐམས་ཅད་ཀྱི་ཆོས་ཀྱི་ཡེ་ཤེས་ཀྱིས་རྗེས་སུ་རྟོགས་པར་བྱ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་ ༄༅། །རྫོགས་པའི་བྱང་ཆུབ་ཏུ་དགེ་བའི་རྩ་བ་ཡོངས་སུ་བསྔོ་བ་རྣམས་ཀྱི་སྨོན་ལམ་སྐྱེའོ། །དེ་ཡང་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་ པོ་སངས་རྒྱས་ཀྱི་སྟོབས་ལ་དམིགས་པ་ལ་སེམས་ཡངས་པ། བསམ་པ་མ་འཁུམས་པ། བསྐལ་པ་ཐམས་ཅད་དུ་ཤིན་ཏུ་དཀོན་པའི་སེམས་རིན་པོ་ཆེ་དང་ལྡན་པ་ རྣམས་ཀྱི་སེམས་ནི། འདི་ལྟ་སྟེ། སངས་རྒྱས་ཐམས་ཅད་དང་མཉམ་པ་ཉིད་ཀྱི་ཕྱིར་རབ་ཏུ་སྐྱེས་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་དགེ་བའི་རྩ་བ་ དེ་དག་ཡང་དག་པར་མཐོང་ནས་སེམས་དད་པ་ཆེན་པོ་རྣམ་པར་དག་པ་དང༌། སྙིང་རྗེ་ཆེན་པོ་བརྟན་པས་བསྔོ་ཞིང་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་ཡོངས་ སུ་བསྔོས་ཏེ། དེ་ཡང་ཚིག་ཙམ་དུ་མ་ཡིན་གྱི། བསམ་པ་ཐག་པས་ཡོངས་སུ་བསྔོའོ། །དེ་ཡང་དགའ་བའི་སེམས་དང༌། རབ་ཏུ་དགའ་བའི་སེམས་དང༌། དད་པའི་སེམས་ དང༌། མོས་པའི་སེམས་དང༌། འབྱམས་པའི་སེམས་དང༌། བྱམས་པའི་སེམས་དང༌། ཉེ་བའི་སེམས་དང༌། སྙིང་བརྩེ་བའི་སེམས་དང༌། ཕན་གདགས་པའི་སེམས་ཀྱིས་ ཡོངས་སུ་བསྔོའོ། །དེ་ཡང་འདི་ལྟར་ཡོངས་སུ་བསྔོ་སྟེ། བདག་གི་དགེ་བའི་རྩ་བ་འདིས་སེམས་ཅན་ཐམས་ཅད་ཀྱི་འགྲོ་བ་རྣམ་པར་དག་པར་གྱུར་ཅིག། སྐྱེ་བ་ཡོངས་སུ་ དག་པར་གྱུར་ཅིག། བསོད་ནམས་ཀྱི་བདག་ཉིད་ཆེ་བ་ཡོངས་སུ་རྫོགས་པར་གྱུར་ཅིག། ཟིལ་གྱིས་མི་ནོན་པར་གྱུར་ཅིག། མི་ཟད་པར་གྱུར་ཅིག། ཐུབ་པར་དཀའ་བའི་སེམས་ སུ་གྱུར་ཅིག། དྲན་པ་ཉམས་པ་མེད་པར་གྱུར་ཅིག། རྟོགས་པ་ངེས་པར་གྱུར་ཅིག། བློ་ཚད་མེད་པར་གྱུར་ཅིག། ལུས་ཀྱི་ལས་དང༌། ངག་གི་ལས་དང༌། ཡིད་ཀྱི་ལས་ཀྱི་ཡོན་ ཏན་གྱི་རྒྱན་ཐམས་ཅད་ཡོངས་སུ་རྫོགས་པར་གྱུར་ཅིག། དགེ་བའི་རྩ་བ་འདིས་སེམས་ཅན་དེ་དག་ཐམས་ཅད་སངས་རྒྱས་ཐམས་ཅད་མཉེས་པར་བྱེད་པར་གྱུར་ཅིག། མཉེས་ པར་བྱས་ནས་ཀྱང་ཐུགས་འབྱུང་བ་མེད་པར་གྱུར་ཅིག། སངས་རྒྱས་བཅོམ་ལྡན་འདས་དེ་དག་ལ་མི་ཕྱེད་པའི་དད་པ་ཡང་ཐོབ་པར་གྱུར་ཅིག། དེ་དག་གིས་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཆོས་བསྟན་པ་ཐོས་པར་གྱུར་ཅིག། ཐོས་ནས་ཀྱང་ཐེ་ཚོམ་དང༌། ཡིད་གཉིས་མེད་པར་གྱུར་ཅིག། ཡང་ དག་པར་འཛིན་ཅིང་ནན་ཏན་གྱིས་སྒྲུབ་པར་གྱུར་ཅིག། སེམས་ཀྱི་དགའ་བ་ཉིད་ཀྱང་ཐོབ་པར་གྱུར་ཅིག། ཁ་ན་མ་ཐོ་བ་མེད་པའི་ལུས་ཀྱི་ལས་ཀྱང་ཡང་དག་པར་གྲུབ་ པར་གྱུར་ཅིག། དགེ་བའི་རྩ་བ་ཆེན་པོ་ལ་བདག་རབ་ཏུ་གཞོག་པར་གྱུར་ཅིག། ཤིན་ཏུ་དབུལ་བ་དང་རྣམ་པར་བྲལ་བར་གྱུར་ཅིག། ནོར་བདུན་ཐོབ་པ་ཡོངས་སུ་ ༄༅། །རྫོགས་པར་གྱུར་ཅིག། སངས་རྒྱས་ཐམས་ཅད་ཀྱི་རྗེས་སུ་ཡང་སློབ་པར་གྱུར་ཅིག། དགེ་བའི་དབང་པོ་འཐོབ་པར་བྱ་བའང་ཐོབ་པར་གྱུར་ ཅིག། མོས་པ་ཆེན་པོའི་མཉམ་པ་ཉིད་ཀྱང་ཡོངས་སུ་རྫོགས་པར་གྱུར་ཅིག། ཐམས་ཅད་མཁྱེན་པའི་ཡེ་ཤེས་ཀྱི་གོ་ཡང་རྙེད་པར་གྱུར་ཅིག། འགྲོ་བ་ཐམས་ཅད་དུ་ ཉམས་པ་མེད་པའི་མིག་ཀྱང་བསྐྱེད་པར་གྱུར་ཅིག། མཚན་གྱིས་བརྒྱན་པའི་ལུས་ཡོངས་སུ་རྫོགས་པ་ཡང་ཐོབ་པར་གྱུར་ཅིག། ཡོན་ཏན་ཐམས་ཅད་ཀྱིས་བརྒྱན་ པའི་ཚིག་རྣམ་པར་དག་པ་ཡང་ཡོངས་སུ་རྫོགས་པར་གྱུར་ཅིག། དབང་པོ་བསྡམས་ཤིང་སྟོབས་བཅུ་དང་ལྡན་པའི་སེམས་དགེ་བ་ཡང་དག་པར་གྲུབ་པར་གྱུར་ཅིག། གནས་མེད་པར་སྤྱོད་པ་ཡོངས་སུ་རྫོགས་པར་གྱུར་ཅིག། སངས་རྒྱས་ཐམས་ཅད་བདེ་བའི་རིམ་གྲོ་གང་དང་ལྡན་པའི་བདེ་བའི་རིམ་གྲོ་དེ་དག་སེམས་ཅན་ཐམས་ཅད་ ཀྱིས་ཐོབ་པར་གྱུར་ཅིག། སངས་རྒྱས་ཀྱི་གནས་རབ་ཏུ་ཐོབ་པས་ཚད་མེད་པའི་གནས་སུ་གྱུར་ཅིག། སེམས་ཅན་དེ་དག་ཐམས་ཅད་ཀྱི་སྡུག་བསྔལ་གྱི་ཕུང་པོ་སྒྲིབ་པའི་ ལས་སྣ་ཚོགས་ལས་བྱུང་བ། སྒྲིབ་པའི་ལས་དེ་དག་གིས་བསྒྲིབས་པ། སངས་རྒྱས་མི་མཐོང་བ་དང༌། ཆོས་མི་ཐོས་པ་དང༌། དགེ་འདུན་མི་ཤེས་པའི་སྒྲིབ་པའི་ལས་རྣམ་ པ་སྣ་ཚོགས་ཀྱིས་བསགས་པའི་སྡུག་བསྔལ་གྱི་ཕུང་པོ་དེ་དག་བདག་གི་ལུས་འདིས་སེམས་ཅན་དམྱལ་བའི་སྐྱེ་གནས་དང༌། ངན་སོང་གི་སའི་གནས་དེ་དང་དེ་དག་ནས་བླང་བར་ བྱའོ༑ ༑སེམས་ཅན་དེ་དག་ཐམས་ཅད་ནི། དགེ་བའི་རྩ་བ་འདིས་དེ་ནས་བཏོན་ཏེ། བདག་གིས་དེ་དག་གི་སྡུག་བསྔལ་དང་ཉོན་མོངས་པ་དེ་དག་བླང་བར་བྱའོ། །སྤྲོ་བར་བྱའོ།། མི་ལྡོག་པར་བྱའོ། །དེ་ལས་མི་འབྲོས་པར་བྱའོ། །མི་སྐྲག་པར་བྱའོ། །མི་འཇིགས་པར་བྱའོ། །ཕྱིར་མི་ལྡོག་པར་བྱའོ། །ཞུམ་པ་མེད་པར་བྱའོ། །མི་སྐྱོ་བར་བྱའོ། །དེ་ཅིའི་ ཕྱིར་ཞེ་ན། བདག་གིས་ནི། སེམས་ཅན་ཐམས་ཅད་བསྒྲལ་བར་སྨོན་ལམ་བཏབ་པས་ན། སེམས་ཅན་ཐམས་ཅད་ཀྱི་ཁུར་བཀུར་དགོས་སོ། །འདི་ལྟར་བདག་གིས་སེམས་ཅན་ ཐམས་ཅད་ཡོངས་སུ་དགྲོལ་བར་བྱའོ། །འདི་ལྟར་བདག་གིས་སེམས་ཅན་ཐམས་ཅད་བསྒྲལ་བར་བྱའོ། །སྐྱེ་བའི་དགོན་པ་དང༌། རྒ་བ་དང༌། ན་བའི་དགོན་པ་དང༌། འཆི་བའི་ དགོན་པ་དང༌། འཆི་འཕོ་བ་དང༌། སྐྱེ་བའི་དགོན་པ་དང༌། ཉོན་མོངས་པ་ཐམས་ཅད་ཀྱི་དགོན་པ་དང༌། མི་ཁོམ་པ་ཐམས་ཅད་ཀྱི་དགོན་པ་དང༌། འཁོར་བ་ཐམས་ཅད་ཀྱི་ དགོན་པ་དང༌། ལྟ་བ་ཐིབས་པོ་ཐམས་ཅད་ཀྱི་དགོན་པ་དང༌། དགེ་བའི་ཆོས་ཐམས་ཅད་གཏོར་བའི་དགོན་པ་དང༌། མི་ཤེས་པ་ལས་བྱུང་བའི་དགོན་པ་དང༌། དགོན་པ་དེ་ ༄༅། །དག་ཐམས་ཅད་ནས་བདག་གིས་སེམས་ཅན་སྲེད་པའི་དྲ་བས་དཀྲིས་པ་དང༌། མ་རིག་པའི་སྒྲིབ་པས་བསྒྲིབས་པ་དང༌། སྲིད་པའི་སྲེད་པ་དང་ལྡན་པ། ཞེན་པའི་མཐར་གྱུར་པ། སྡུག་བསྔལ་གྱི་ཤིང་ཐགས་ཀྱིས་བསྐོར་བ། བདུད་ཀྱི་ལས་ལ་བརྟེན་པ། མི་མཁས་པ། བསོད་ནམས་འགགས་པ། ཐེ་ཚོམ་དུ་གྱུར་པ། རྟག་ཏུ་ ཡིད་གཉིས་དང་ལྡན་པ། མི་བདེ་བ་མཐོང་བ། འབྱུང་བ་ལ་མི་མཁས་པ། ཚུབ་མས་བསྐོར་བའི་ལོ་མ་ལྟ་བུར་འཁོར་ཞིང་འཕྱན་པ་དེ་དག་ཐམས་ཅད་ཡོངས་སུ་ཐར་པར་ བྱའོ༑ ༑ཞེས་དེ་ལ་བྱང་ཆུབ་སེམས་དཔའ་སྙིང་རྗེ་ཆེན་པོས་ཡོངས་སུ་རྒྱས་པའི་སེམས་དང་ལྡན་པས་སེམས་ཅན་གྱི་ཁམས་འཁོར་བའི་འདམ་དུ་བྱིང་བ་མཐོང་ནས་སེམས་ ཅན་དེ་དག་ལ་སྙིང་བརྩེ་བ་ཆེན་པོ་སྐྱེས་པ། ཕན་ཆེར་གདགས་པའི་སེམས་རབ་ཏུ་བསྐྱེད་པ། སེམས་ཅན་རྣམས་ཀྱི་དོན་ཆེན་པོ་བྱ་བར་དགའ་བ། སེམས་ཅན་མང་པོ་རབ་ ཏུ་དགྲོལ་པར་དགེ་བའི་རྩ་བ་ཡོངས་སུ་བསྔོའོ། །ཡོངས་སུ་བསྔོ་བ་ཆེན་པོ་ལ་ཞུགས་པ། འདས་པ་དང༌། མ་འོངས་པ་དང༌། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་ ཀྱི་ཡོངས་སུ་བསྔོ་བ་ལ་རབ་ཏུ་ཞུགས་པ། བསྔོ་བ་ཆེན་པོའི་མདོས་སེམས་ཅན་ཐམས་ཅད་ལ་དགེ་བའི་རྩ་བ་དེ་དག་ཡོངས་སུ་བསྔོ་བ། སེམས་ཅན་ཐམས་ཅད་ཤིན་ཏུ་རྣམ་ པར་དག་པར་བྱ་བར་སེམས་པ། སེམས་ཅན་ཐམས་ཅད་ཀྱི་དགེ་བའི་རྩ་བ་ཀུན་ཐམས་ཅད་མཁྱེན་པ་ཉིད་ཀྱི་མཐར་ཐུག་པར་ཡོངས་སུ་བསྔོ་བ་དེ་སེམས་འདི་ལྟ་བུ་དང་ལྡན་པར་ གྱུར་ཏེ༑ སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཀྱི་རྒྱལ་སྲིད་ལ་རབ་ཏུ་གཞག་པའི་ཕྱིར་བདག་སྤྱོད་དེ། བདག་ནི། བདག་འབའ་ཞིག་ཡོངས་སུ་དགྲོལ་བ་ལ་མངོན་པར་ཞུགས་པ་ མ་ཡིན་གྱི། བདག་གིས་སེམས་ཅན་འདི་དག་ཀུན་ཐམས་ཅད་མཁྱེན་པ་ཉིད་ཀྱི་སེམས་རབ་ཏུ་སྣང་བས་འཁོར་བའི་དགོན་པ་རྒལ་དཀའ་བ་ནས་གདོན་པར་བྱའོ། །གཡང་ས་ཆེན་པོ་ནས་ བླང་བར་བྱའོ། །གནོད་པ་ཐམས་ཅད་ཡོངས་སུ་དགྲོལ་བར་བྱའོ། །འཁོར་བའི་རྒྱུད་ལས་རབ་ཏུ་བསྒྲལ་བར་བྱའོ། །བདག་ཉིད་ཀྱིས་སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་བླང་ པར་སྤྲོ་བར་བྱའོ། །བདག་གིས་སེམས་ཅན་དེ་དག་ཐམས་ཅད་འཁོར་བའི་སྡུག་བསྔལ་ཆེན་པོའི་སའི་འོག་ནས་དྲང་པར་བྱའོ། །འཇིག་རྟེན་གྱི་ཁམས་ཀྱི་མཐར་ཐུག་པ་ཐམས་ཅད་ཀྱི་ངན་ སོང་ཀུན་གྱི་སྡུག་བསྔལ་ཐམས་ཅད་བླངས་ཏེ་ཉམས་སུ་མྱོང་བར་བྱ་བ་ལ་བདག་གི་སྤྲོ་བར་བྱའོ། །བདག་གིས་སེམས་ཅན་ཐམས་ཅད་དགེ་བའི་རྩ་བ་ལས་མི་སྤང་བར་སེམས་ཅན་ཐམས་ཅད་ཡོངས་ སུ་དགྲོལ་བའི་ཕྱིར་བདག་ངན་སོང་གཅིག་ན་ཕྱི་མའི་མཐར་ཐུག་པའི་བསྐལ་པར་གནས་པར་སྤྲོ་བར་བྱའོ། །ངན་སོང་གཅིག་ཏུ་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་གཏོགས་ ༄༅། །པའི་ངན་སོང་ཐམས་ཅད་དུ་གནས་པར་སྤྲོ་བར་བྱའོ། །དེ་ཅིའི་ཕྱིར་ཞེ་ན། ཀྱི་ཧུད་སེམས་ཅན་འདི་དག་ཐམས་ཅད་སྡུག་བསྔལ་གྱི་གནས་སུ་ལྷུང་བ་བས་ནི། བདག་གཅིག་པུ་སྡུག་བསྔལ་མྱོང་ཡང་བླའི། །བདག་གིས་དེར་བདག་ཉིད་གཏར་བཅུག་སྟེ་སེམས་ཅན་དམྱལ་བ་དང༌། བྱོལ་སོང་གི་སྐྱེ་གནས་དང༌། གཤིན་རྗེའི་འཇིག་རྟེན་གྱི་དགོན་པ་ནས་ འགྲོ་བ་ཐམས་ཅད་བླུས་ཏེ་བདག་གིས་སེམས་ཅན་ཐམས་ཅད་ཀྱི་དོན་དུ་སྡུག་བསྔལ་ཚོར་བའི་ཕུང་པོ་འདི་དག་ཐམས་ཅད་བདག་གི་ལུས་འདིས་མྱོང་བར་བྱའོ། །བདག་གིས་ནི། སེམས་ཅན་ རྣམས་ཀྱི་གཉའ་བདེན་པར་སྨྲ་བ་དང༌། ཡིད་ཆེས་ཤིང་མི་བླུ་བར་སྤྲོ་བར་བྱའི། བདག་ལ་ནི། སེམས་ཅན་ཐམས་ཅད་ཀྱིས་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟ་སྟེ། འགྲོ་བ་ཐམས་ཅད་ ཡོངས་སུ་དགྲོལ་བའི་ཕྱིར་བདག་གིས་ཐམས་ཅད་མཁྱེན་པའི་སེམས་སེམས་ཅན་ཐམས་ཅད་ལ་དམིགས་པ་སྐྱེས་ཏེ། བདག་ཉིད་འདོད་པའི་ཕྱིར་ནི། བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་མ་ཞུགས་སོ། །འདོད་པའི་ཡོན་ཏན་ལྔ་ལ་དགའ་ཞིང་སྤྱོད་པའི་ཕྱིར་ཡང་མ་ཡིན་ནོ། །འདོད་པའི་ཡུལ་ལ་བསྙེན་པའི་ཕྱིར་ཡང་མ་ཡིན་ནོ། །འདོད་པའི་ཁམས་སུ་གཏོགས་ པའི་དགའ་བ་མང་པོ་གཞན་བླང་པའི་ཕྱིར་ཡང་བྱང་ཆུབ་ཀྱི་སྤྱོད་པ་ལ་མི་སྤྱོད་དོ། །དེ་ཅིའི་ཕྱིར་ཞེ་ན། འཇིག་རྟེན་གྱི་དགའ་བ་འདི་ཐམས་ཅད་ནི། དགྲ་ཡིན་ནོ། །འདོད་པ་ལ་བརྟེན་ པ་འདི་ནི། བདུད་ཀྱི་ཡུལ་ལོ། །འདོད་པ་ལ་བརྟེན་པ་དེ་ནི། བློ་ངན་པས་བསྟན་པའི་ལམ་མོ། །སངས་རྒྱས་ཐམས་ཅད་ཀྱིས་སྨད་པའི་ཡུལ་ལོ། །དེ་དག་ལ་བརྟེན་པ་དེ་ལས་སྡུག་བསྔལ་ཐམས་ ཅད་འབྱུང་བར་འགྱུར་རོ། །དེ་ལས་སེམས་ཅན་དམྱལ་བ་དང༌། བྱོལ་སོང་གི་སྐྱེ་གནས་དང༌། གཤིན་རྗེའི་འཇིག་རྟེན་འདི་དག་ཐམས་ཅད་ཀྱང་འབྱུང་བར་འགྱུར་རོ། །དེ་ལས་སེམས་ཅན་རྣམས་ འཐབ་པ་དང༌། མཚང་འདྲུ་བ་དང༌། རྩོད་པ་དང༌། གནད་ལ་འབེབས་པ་དང༌། འཁྲུག་པ་དང༌། ཀུན་ཏུ་འཁྲུག་པ་རྣམས་ཀྱང་རབ་ཏུ་འབྱུང་ངོ༌། །སེམས་ཅན་འདི་དག་ནི། འདོད་པ་ལ་བརྟེན་ པས་སངས་རྒྱས་བཅོམ་ལྡན་འདས་རྣམས་ལས་རིང་དུ་གྱུར་པ་སྟེ། འདོད་པ་དེ་དག་ནི། མཐོ་རིས་སུ་སྐྱེ་བ་ལ་ཡང་བར་དུ་གཅོད་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ལྟ་སྨོས་ཀྱང་ ཅི་དགོས་ཏེ། སེམས་ཅན་ཐམས་ཅད་ཀྱི་བདེ་བ་དང༌། དགའ་བ་ཐམས་ཅད་ཀྱི་ཡང་བར་ཆད་དུ་འགྱུར་རོ། །དེ་ལྟར་བདག་གིས་འདོད་པ་ནི། རོ་ཆུང་ཞིང་ཚད་མེད་པའི་ཉེས་པ་ཅན་དུ་མཐོང་ན། ཅི་དེ་ཡང་དེ་དག་སྤྱོད་པའི་ཕྱིར་འཇུག་གམ། དེ་ཅིའི་ཕྱིར་ཞེ་ན། བདག་ནི། དོན་འདི་དག་གི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པ་མ་ཡིན་ནོ། །འདོད་པ་ལ་དགའ་ བའི་ཕྱིར་ཡང་བྱང་ཆུབ་སེམས་དཔའི་སྤྱོད་པ་ལ་མི་སྤྱོད་དེ། དེ་བས་ན། སེམས་ཅན་ཐམས་ཅད་ལ་ཕན་པ་དང༌། བདེ་པར་ཞུགས་པའི་སེམས་བསྐྱེད་དེ། བདག་ནི། འདི་ལྟར་སེམས་ཅན་ཐམས་ ༄༅། །ཅད་ཀྱི་དོན་གྱི་ཕྱིར་དེ་དག་ཉིད་ཀྱི་སྨོན་ལམ་ཡོངས་སུ་རྫོགས་པར་བྱ་བ་དང༌། བསྔོ་ཞིང་བསྒྲུབ་པའི་ཕྱིར་དོན་དེ་ལ་ཞུགས་པ་སྟེ། དེ་བས་ན། བདག་གིས་སེམས་ཅན་སྡུག་ བསྔལ་གྱི་ཞགས་པས་བཅིངས་པ་ཐམས་ཅད་ཀྱི་སྡུག་བསྔལ་གྱི་ཞགས་པ་བཅད་དེ། སྡུག་བསྔལ་ཐམས་ཅད་ལས་ཡོངས་སུ་དགྲོལ་བར་བྱའོ། །སྡུག་བསྔལ་གྱི་རྒྱུད་ལས་རྣམ་པར་ བཟློག་པར་བྱའོ། །བདག་གིས་ཇི་ལྟ་ཇི་ལྟར་སེམས་ཅན་འདི་དག་ཐམས་ཅད་ཤིན་ཏུ་བདེ་བ་དང༌། ཕན་པར་འགྱུར་བའི་བདེ་བ་དང༌། ཚོར་བ་མེད་པའི་བདེ་བ་དང༌། ཞི་བའི་བདེ་བ་དང༌། མི་ གནས་པའི་བདེ་བ་དང༌། མི་གཡོ་བའི་བདེ་བ་དང༌། ཚད་མེད་པའི་བདེ་བ་དང༌། མ་ཉམས་པའི་བདེ་བ་དང༌། མི་འགག་པའི་བདེ་བ་དང༌། ཐམས་ཅད་མཁྱེན་པ་ཉིད་ཀྱི་བདེ་བ་རབ་ ཏུ་ཐོབ་པར་འགྱུར་བ་དེ་ལྟ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོ་བར་བྱའོ། །བདག་ཁ་ལོ་སྒྱུར་བ་དང༌། བདག་མགོན་པོ་དང༌། བདག་མེ་སྒྲོན་འཛིན་པ་དང༌། བདག་ལམ་ བདེ་བ་སྟོན་པ་དང༌། བདག་ཁོམ་པ་རྙེད་པ་དང༌། བདག་ཐབས་ལ་མཁས་པ་དང༌། བདག་དོན་ཤེས་པ་དང༌། བདག་འཁོར་བའི་རྒྱ་མཚོ་ལ་ཐམས་ཅད་མཁྱེན་པའི་གྲུ་བོ་ཆེའི་ མཉན་པར་གྱུར་པ་དང༌། བདག་ཡོངས་སུ་བསྔོ་བ་ལ་མཁས་པ་དང༌། བདག་ཕ་རོལ་སྟོན་པས་དགེ་བའི་རྩ་བ་དེ་དག་ཇི་ལྟ་ཇི་ལྟར་སེམས་ཅན་རྣམས་ཀྱི་སྐྱབས་སུ་འགྱུར་ པ་དང༌། འཁོར་བར་གྱུར་པ་རྣམས་ཡོངས་སུ་རྒལ་བར་འགྱུར་བ་དང༌། དེ་བཞིན་གཤེགས་པ་ཐམས་ཅད་མཉེས་པར་འགྱུར་བ་དང༌། ཐམས་ཅད་མཁྱེན་པ་ཉིད་དུ་བསྒྲིབས་པ་མེད་ པར་འགྱུར་བ་དང༌། བདུད་ཀྱི་ཡུལ་རྣམས་ལ་མི་གནས་པར་འགྱུར་བ་དང༌། སྡིག་པ་མི་དགེ་བའི་གྲོགས་པོ་ཐམས་ཅད་ཡོངས་སུ་སྤོང་བར་འགྱུར་བ་དང༌། དགེ་བའི་བཤེས་གཉེན་ བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ལ་བརྟེན་པར་འགྱུར་བ་དང༌། ལས་རྣམ་པར་དག་པ་ལ་ཁ་ན་མ་ཐོ་བ་མེད་པར་འགྱུར་བ་དང༌། སྤྱད་པ་ཆེན་པོའི་སྨོན་ལམ་ རྣམས་ཡང་དག་པར་སྒྲུབ་པར་འགྱུར་བ་དང༌། དགེ་བའི་རྩ་བ་ཐམས་ཅད་ཁོང་དུ་ཆུད་པར་འགྱུར་བ་དེ་ལྟ་དེ་ལྟར་ཡོངས་སུ་བསྔོའོ། །དེ་ལ་བྱང་ཆུབ་སེམས་དཔའ་དགེ་བའི་རྩ་ བ་དེ་དག་ཡོངས་སུ་བསྔོ་བ་ན་སེམས་འདི་སྙམ་དུ་བསྐྱེད་དེ། ཀྱེ་མ་གླིང་བཞིའི་འཇིག་རྟེན་གྱི་ཁམས་སྣང་བར་བྱ་བའི་ཕྱིར་གླིང་བཞིའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་པ་ དེ་སྙེད་ཀྱི་ཉི་མ་ནི། མི་འཆར་གྱི། གླིང་བཞིའི་འཇིག་རྟེན་སྣང་བར་བྱ་བའི་ཕྱིར་ཉི་མ་འདི་ཉིད་གཅིག་པུ་འཆར་ཏེ། སེམས་ཅན་གླིང་བཞིར་གཏོགས་པ་དེ་དག་རང་རང་གི་ལུས་ ལས་ཀྱང་སྣང་བ་གང་གིས་དེ་དག་གི་ཉི་མའི་གྲངས་ཤེས་པར་འགྱུར་བའམ། རང་གི་དོན་སྒྲུབ་པར་འགྱུར་བའམ། ལོ་ཏོག་ཡོངས་སུ་སྨིན་པར་འགྱུར་བའམ། ཉིན་གཅིག་ ༄༅། །ཉིན་གཅིག་ཅིང་བཟའ་ཤིང་གི་ར་བ་དང༌། གྲོང་ཁྱེར་དག་ཏུ་དགའ་བ་དང༌། རྩེ་བའི་ལོངས་སྤྱོད་མྱོང་བར་འགྱུར་བའམ། ཕྱོགས་སྣང་བར་ འགྱུར་བའམ། གྲོང་དང༌། གྲོང་ཁྱེར་དང༌། ལྗོངས་དང༌། ཕོ་བྲང་འཁོར་དང༌། རྒྱལ་པོའི་གནས་དག་ཏུ་འགྲོ་བ་དང༌། འོང་བར་བྱ་བའམ། སྤྱོད་པའི་དོན་སྦྱར་བར་བྱ་བའི་སྣང་ བ་མི་འབྱུང་སྟེ། སེམས་ཅན་དེ་དག་རང་རང་གི་ལུས་ལ་ཡང་འོད་གང་གིས་དེ་དག་གི་དོན་སྒྲུབ་པའི་འོད་དེ་ལྟ་བུ་མི་གཏོང་སྟེ། འདི་ལྟར་ལྷའི་བུ་ཉི་མའི་དཀྱིལ་འཁོར་གཅིག་ པུ་གཉིས་སུ་མེད་པ་དེ་ནི། གླིང་བཞིའི་འཇིག་རྟེན་གྱི་ཁམས་སུ་སེམས་ཅན་རྣམས་ལ་སྣང་བར་བྱ་བའི་ཕྱིར་འཆར་ཞིང་རབ་ཏུ་འབྱུང་ངོ༌། །དེ་བཞིན་དུ་བྱང་ཆུབ་སེམས་དཔའ་ དགེ་བའི་རྩ་བ་ཡོངས་སུ་བསྔོ་བ་ན་སེམས་འདི་ལྟར་སྐྱེས་ཏེ། སེམས་ཅན་འདི་དག་ཐམས་ཅད་ལ་གང་གིས་དེ་དག་བདག་ཉིད་ཡོངས་སུ་བསྐྱབ་པར་བྱ་བ་དེ་ཉིད་ཀྱང་མེད་ ན༑ གཞན་བསྐྱབ་པ་ལྟ་ཅི་སྨོས་ཀྱི། བདག་ཉིད་གཅིག་པུ་གཉིས་སུ་མེད་པས་སེམས་ཅན་ཐམས་ཅད་ཀྱི་ཕྱིར་འདི་ལྟར་སེམས་ཅན་ཐམས་ཅད་དགྲོལ་བ་དང༌། སེམས་ཅན་ཐམས་ཅད་སྣང་བར་བྱ་བ་དང༌། སེམས་ཅན་ཐམས་ཅད་གསལ་བར་བྱ་བ་དང༌། སེམས་ཅན་ཐམས་ཅད་ཤེས་པར་བྱ་བ་དང༌། སེམས་ཅན་ཐམས་ ཅད་གཟུང་བར་བྱ་བ་དང༌། སེམས་ཅན་ཐམས་ཅད་བསྡུ་བར་བྱ་བ་དང༌། སེམས་ཅན་ཐམས་ཅད་བསྐྱེད་པར་བྱ་བ་དང༌། སེམས་ཅན་ཐམས་ཅད་དད་པར་བྱ་བ་དང་ སེམས་ཅན་ཐམས་ཅད་སིམ་པར་བྱ་བ་དང༌། སེམས་ཅན་ཐམས་ཅད་ཀྱི་ཐེ་ཚོམ་གཅད་པའི་ཕྱིར་དགེ་བའི་རྩ་བའི་རྩ་བ་རྣམས་ཡང་དག་པར་བསྡུའོ། །དགེ་བའི་རྩ་བ་རྣམས་ཡོངས་སུ་ བསྔོ་བར་བྱའོ། །བདག་གིས་ནི། ཉི་མའི་དཀྱིལ་འཁོར་དེ་ལྟ་བུར་བྱ་སྟེ། གཞན་ལས་ཕན་པའི་ལན་རེ་བར་མི་བྱའོ། །གཞན་གྱིས་སྐབས་མི་རྙེད་པར་བྱའོ། །སེམས་ཅན་ཐམས་ཅད་ ཀྱི་ཕྱིར་གོ་ཆ་མི་འདོར་བར་བྱའོ། །སེམས་ཅན་ཐམས་ཅད་ཀྱི་དོན་དུ་སྤྲོ་བ་མི་ལྡོག་པར་བྱའོ། །སེམས་ཅན་ཐམས་ཅད་ཀྱི་བདེ་བ་སྒྲུབ་པའི་ཡོངས་སུ་བསྔོ་བ་ལས་ཕྱིར་ལྡོག་པར་མི་ བྱའོ༑ ༑དགེ་བའི་རྩ་བ་ཆུང་ངུ་ཡང་བསྡུ་བར་བྱ་སྟེ། ཡོངས་སུ་བསྔོ་བ་ཆུང་ངུས་ཡོངས་སུ་བསྔོ་ཞིང་དགའ་བར་མི་བྱའོ། །དགེ་བའི་རྩ་བ་ཕན་པར་མི་འགྱུར་བ་རྣམས་ནི། སེམས་ཅན་ རྣམས་ལ་བསྔོ་བར་མི་བྱ་སྟེ། ཅི་ནས་ཀྱང་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་བདེ་བར་འགྱུར་བ་དེ་ལྟར་བསྔོའོ། །མངོན་པར་ཆགས་པ་མེད་པའི་ཆོས་ཉིད་ལ་བརྟེན་ཏེ་ཡོངས་ སུ་བསྔོ་བར་བྱའོ། །སེམས་ཅན་རྣམས་ཀྱི་ངོ་བོ་ཉིད་དུ་ཡོངས་སུ་བསྔོ་བར་བྱའོ། །ཞེས་ཏེ། དེ་ནི། འཕོ་བའི་ཚུལ་གྱིས་ཡོངས་སུ་བསྔོ་བ་ལ་གནས་པ་མ་ཡིན། སྲིད་པ་ལ་མངོན་པར་ ༄༅། །ཆགས་པའི་ཕྱིར་དགེ་བའི་རྩ་བ་དེ་དག་ལ་མི་གནས་སོ། །མཚན་མའི་ཚུལ་གྱིས་དགེ་བའི་རྩ་བ་དེ་དག་ཡོངས་སུ་མི་བསྔོའོ། །དངོས་པོ་ལ་མངོན་པར་ཆགས་ པའི་ཕྱིར་ལས་ཀྱི་རྣམ་པར་སྨིན་པ་ལ་ཡོངས་སུ་མི་རྟོག་གོ །ཕུང་པོ་རྣམས་ཀྱི་འདུ་ཤེས་ལ་གནས་ཤིང་ཡོངས་སུ་མི་བསྔོའོ། །ཕུང་པོ་འཇིག་པ་ལ་གནས་ཤིང་ཡོངས་སུ་མི་བསྔོའོ། ལས་རྣམ་པར་རྟོག་པ་ལ་གནས་ཤིང་ཡོངས་སུ་མི་བསྔོའོ། །རྣམ་པར་སྨིན་པ་ལ་རེ་བས་མ་ཡིན་ནོ། །རྟེན་པས་སྙེམས་ཤིང་མ་ཡིན་ནོ། །འབྲེལ་པར་འབྱུང་བ་ལ་ཀུན་ཏུ་རྟོག་ པས་མ་ཡིན་ནོ། །གྲགས་པ་ལ་གནས་པས་མ་ཡིན་ནོ། །གནས་ཀྱི་འདུ་ཤེས་ལ་གནས་པས་མ་ཡིན་ནོ། །གནས་སུ་རྟོག་པ་ལ་གནས་བས་མ་ཡིན་ནོ། །ཆོས་ལ་རྣམ་པར་རྟོག་པ་ལ་ གནས་པས་མ་ཡིན་ནོ། །སེམས་ཅན་གྱི་འདུ་ཤེས་ལ་གནས་པས་མ་ཡིན་ཏེ། ཁམས་ཀྱི་ཚུལ་རྣམ་པ་ཐ་དད་པའི་རྗེས་སུ་སོང་བས་ཡོངས་སུ་མི་བསྔོའོ། །སེམས་ཀྱི་ཀུན་ཏུ་རྟོག་པ་ལ་ གནས་ཏེ་ཡོངས་སུ་མི་བསྔོའོ། །སེམས་ཀྱི་ཕྱིན་ཅི་ལོག་ལ་གནས་ཏེ་ཡོངས་སུ་མི་བསྔོའོ། །འདུ་ཤེས་ཀྱི་ཕྱིན་ཅི་ལོག་ལ་གནས་ཏེ་ཡོངས་སུ་མི་བསྔོའོ། །ལྟ་བའི་ཕྱིན་ཅི་ལོག་ལ་གནས་དེ་ ཡོངས་སུ་མི་བསྔོའོ། །ཚིག་གི་ལམ་ལ་གནས་ཏེ་ཡོངས་སུ་མི་བསྔོའོ། །དེ་ནི། འདི་ལྟར་ཆོས་རྣམས་ལ་ཇི་ལྟ་བ་བཞིན་རྣམ་པར་དཔྱོད་ཅིང་ཡོངས་སུ་བསྔོའོ། །སེམས་ཅན་རྣམས་ཀྱི་ མཉམ་པ་ཉིད་ལ་སེམས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཀྱི་རྒྱས་བཏབ་པའི་དགེ་བའི་རྩ་བ་དེ་དག་ཡོངས་སུ་བསྔོའོ། །འདོད་ཆགས་དང་བྲལ་བ་དང་མཉམ་པའི་ཆོས་ཀྱིས་ཡོངས་ སུ་བརྟགས་པའི་དགེ་བའི་རྩ་བ་དེ་དག་ཡོངས་སུ་བསྔོའོ། །ཆོས་ཐམས་ཅད་ལ་སྒྲོ་གདགས་པ་མེད་པར་དགེ་བའི་རྩ་བ་དེ་དག་རྗེས་སུ་རྟོགས་པར་བྱེད་དོ། །གཉིས་སུ་མེད་པའི་ཆོས་ཀྱི་དབྱིངས་ལ་ ཡང་དག་པར་ལྟ་ཞིང་ཡོངས་སུ་བསྔོ་བ་དེ་དག་ལ་རབ་ཏུ་འཇུག་སྟེ། ཆོས་གང་ཡང་སྐྱེ་བའམ། འགག་པར་བྱེད་པ་མེད་དོ། །དེ་བཞིན་དུ་དགེ་བའི་རྩ་བ་དེ་དག་ཡོངས་སུ་བསྔོ་སྟེ། གཉེན་པོས་ ཡོངས་སུ་དག་པས་བསྔོ་བ་དེ་དག་ལ་ཡང་དག་པར་སྤྱོད་དོ། །འཇིག་རྟེན་ལས་འདས་པ་འབྱམས་ཀླས་པའི་རྗེས་སུ་སོང་བའི་དགེ་བའི་རྩ་བ་དེ་དག་མཐོང་སྟེ། གཉིས་ཀྱི་ཚུལ་གྱིས་ནི། དགེ་ བའི་རྩ་བ་དེ་དག་ཐམས་ཅད་ཁོང་དུ་ཆུད་པར་མི་བྱེད་དོ། །ལས་ཀྱིས་ཐམས་ཅད་མཁྱེན་པ་ཉིད་དུ་ཡང་དག་པར་མི་སྤྱོད་དོ། །ལས་ལས་གཞན་དུ་ཡང་ཐམས་ཅད་མཁྱེན་པ་ཉིད་ལ་ཡོངས་སུ་མི་ བསྔོའོ༑ ༑ལས་གང་ཡིན་པ་དེ་ཡང་ཐམས་ཅད་མཁྱེན་པ་ཉིད་ལ་ཡང་དག་པར་རྗེས་སུ་མི་མཐོང་ངོ༌། །ལས་ཀྱི་ལམ་དང་བྲལ་བས་ཀྱང་ཐམས་ཅད་མཁྱེན་པ་ཉིད་ཀྱི་སྨོན་ལམ་ཐོབ་པར་མི་ འགྱུར་ཏེ། ལས་ཀྱི་གཟུགས་བརྙན་གྱིས་རྣམ་པར་སྨིན་པའི་གཟུགས་བརྙན་ཡོངས་སུ་དག་པར་འགྱུར་རོ། །རྣམ་པར་སྨིན་པའི་གཟུགས་བརྙན་ཡོངས་སུ་དག་པས་ཐམས་ཅད་མཁྱེན་ ༄༅། །པའི་ཡེ་ཤེས་ཐོབ་པར་འགྱུར་རོ། །ཡོངས་སུ་བསྔོ་བ་དེ་གཡོ་བ་དང༌། རློམ་སེམས་དང༌། རྣམ་པར་སྤྱོད་པ་དང་བྲལ་བར་ཡང་རབ་ཏུ་ཤེས་སོ། །དེས་ཀྱང་དགེ་ བའི་རྩ་བ་དེ་དག་ཡོངས་སུ་བསྔོའོ། །ཡོངས་སུ་བསྔོ་བ་འདིས་ཡོངས་སུ་བསྔོས་པས་སེམས་ཅན་རབ་ཏུ་དགྲོལ་བ་རྒྱུན་ཆད་པར་མི་འགྱུར་རོ། །དགེ་བའི་རྩ་བ་དེ་དག་ཡོངས་སུ་བསྔོ་བ་འདིས་ ཡོངས་སུ་བསྔོ་བ་ན་ཆོས་ཀྱི་མཚན་ཉིད་ལ་གནས་པའང་མི་གཏོང་སྟེ། ལས་དང་རྣམ་པར་སྨིན་པ་མེད་པའི་ཆོས་ཐམས་ཅད་ལ་ཉོན་མོངས་པ་མེད་པའི་ཡོངས་སུ་བསྔོ་བའི་ཚུལ་གྱིས་ལས་ དང་རྣམ་པར་སྨིན་བ་སྒྲུབ་པ་ལ་མངོན་པར་མཁས་པ་ཡིན་ནོ། །དེ་ལྟར་བྱང་ཆུབ་སེམས་དཔའ་དགེ་བའི་རྩ་བ་དེ་དག་ཡོངས་སུ་བསྔོ་བ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྗེས་ སུ་སྤྱོད་པ་ཁ་ན་མ་ཐོ་བ་མེད་པ་ཡིན་ནོ། །ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་སེམས་ཅན་རྣམས་ཀྱི་འདུ་ཤེས་འགོག་ ཅིང༑ འགྲོ་བ་ཐམས་ཅད་ཡོངས་སུ་སྐྱོབ་པ་ཞེས་བྱ་བ་སྟེ། དང་པོའོ། །དེ་ནས་བྱང་ཆུབ་སེམས་དཔའ་རྡོ་རྗེ་རྒྱལ་མཚན་གྱིས་འཁོར་ཐམས་ཅད་ལ་རྣམ་པར་བལྟས་ཏེ། ཆོས་ཀྱི་དབྱིངས་ ལ་རྣམ་པར་བལྟས་ནས་དོན་དང༌། ཚིག་དང༌། ཡི་གེ་ལ་འཇུག་པར་བྱ་བ་དང༌། སེམས་རྒྱ་ཆེན་པོ་མཐའ་དང་དབུས་མེད་པ་ཡོངས་སུ་སྒོམ་པ་དང༌། འགྲོ་བ་ཐམས་ཅད་སྙིང་རྗེ་ཆེན་པོས་ ཁྱབ་པར་བྱ་བ་དང༌། དུས་གསུམ་གྱི་སངས་རྒྱས་ཀྱི་གདུང་ལ་སེམས་ཡང་དག་པར་འབྲེལ་བར་བྱ་བ་དང༌། སངས་རྒྱས་ཀྱི་ཆོས་དང་ཡོན་ཏན་ཐམས་ཅད་ལ་འཇུག་པར་བྱ་བ་དང༌། སངས་ རྒྱས་ཐམས་ཅད་ཀྱིས་བྱིན་གྱིས་བརླབས་པའི་ལུས་ཡང་དག་པར་བསྐྱེད་པ་དང༌། སེམས་ཅན་ཐམས་ཅད་ཀྱི་བསམ་པ་རབ་ཏུ་དབྱེ་བ་དང༌། དགེ་བའི་རྩ་བ་བསྐྱེད་པའི་དུས་ལ་ཇི་ལྟར་ འབབ་པ་ཡང་དག་པར་བལྟ་བ་དང༌། ཆོས་ཀྱི་ལས་དང་མཐུན་པའི་གཟུགས་ཀྱི་ལུས་ཡོངས་སུ་དག་པ་ཡང་དག་པར་བསྟན་པར་བྱེད་ཅིང༌། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་ བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་ཞིག་བསམ་ཡས་བསྐལ་པར་སྤྱོད་པ་དག །སེམས་ཅན་ཕན་ཕྱིར་རྟག་ཏུ་ཞུགས་པ་སྟེ། །དེ་དག་བརྩོན་ བརྟན་ཆགས་མེད་ཡིད་ལྡན་པ། །སངས་རྒྱས་ཡོན་ཏན་རྟག་ཏུ་སྦྱོར་ཞིང་ཚོལ། །གང་ཞིག་མཚུངས་མེད་སྐྱེས་བུ་འདུལ་དྲུང་དུ། །བསམ་པ་དྲི་མ་མེད་པར་རྣམ་སྦྱངས་ཤིང༌། །ཆོས་མཁས་འགྲོ་ བ་སྐྱོབ་པའི་སེམས་ལྡན་པ། །དེ་དག་ཡོངས་བསྔོ་མཛོད་དུ་ཞུགས་པ་ཡིན། །བརྩོན་འགྲུས་སྟོབས་དང་དེ་དག་ཉེར་ལྡན་ཞིང༌། །ཡེ་ཤེས་སྟོབས་ཀྱིས་རྣམ་དག་ཡིད་གཞུངས་ཏེ། །བཟོད་པའི་ སྟོབས་ལྡན་སྒུལ་བར་མི་ནུས་པ། །དེ་དག་འགྲོ་བ་ཀུན་སྐྱབ་མངོན་པར་བརྩོན། །ཤིན་ཏུ་ཡིད་བརྟན་མཚུངས་པ་མེད་པ་དང༌། །བསམ་པ་རྣམ་དག་དགའ་བའི་བློ་ལྡན་པ། །དེ་དག་ས་དང༌། ༄༅། །འདྲ་བའི་བཟོད་སྟོབས་ཀྱིས། །འགྲོ་བ་ཀུན་ལ་ཕན་ཕྱིར་མངོན་པར་བརྩོན། །བདག་ལ་བདེ་བ་ཚོལ་བར་མི་བྱེད་དེ། །སྙིང་རྗེ་ཅན་གྱི་བསམ་པ་དེ་འདྲའོ། ། འགྲོ་བ་ཐམས་ཅད་ཡོངས་སུ་སྐྱོབ་སེམས་ཅན། །ཆགས་མེད་གྱུར་པར་དེ་དག་ཞུགས་པ་ཡིན། །ཕྱོགས་བཅུའི་སེམས་ཅན་ཇི་སྙེད་གང་ཡང་རུང༌། །འགྲོ་བ་ཀུན་ནས་མ་ལུས་བསྡུ་ བྱས་ཏེ༑ ༑དེ་དག་དོན་དུ་བརྟན་སེམས་ལྡན་པ་རྣམས། །དེ་དག་ཡོངས་སུ་བསྔོ་ཚུལ་བསླབ་པ་ཡིན། །དགའ་བའི་སེམས་ཀྱིས་སྦྱིན་པ་གཏོང་བར་བྱེད། །སྐྱེས་བུ་དམ་པ་ཚུལ་ཁྲིམས་ རྣམ་དག་པ། །བརྩོན་འགྲུས་སྟོབས་ལ་བརྟན་པར་གནས་པའི་སེམས། །དེ་དག་ཡེ་ཤེས་དགེ་བས་ཡོངས་སུ་བསྔོ། །དེ་དག་བློ་གྲོས་ཡངས་ཤིང་མཐའ་ཡས་པ། །བཟོད་པའི་སྟོབས་ ལ་རྟག་པར་རབ་ཏུ་ཞུགས། །བསམ་གཏན་སྟོབས་ལ་རྗེས་སུ་སེམས་པས་ན། །མཁས་པ་དེ་དག་ཤེས་རབ་བསམ་མི་ཁྱབ། །ཕྱོགས་བཅུའི་འཇིག་རྟེན་ཀུན་ན་གང་ཡོད་པའི། །དགེ་ བ་དེ་དག་ཡང་དག་སྒྲུབ་པ་ན། །འགྲོ་བ་ཀུན་ལ་ཕན་དང་བདེ་སེམས་ཀྱིས། །ཡེ་ཤེས་མཁས་ལ་དེ་དག་ཡོངས་སུ་བསྔོ། །དགེ་བ་དེ་དག་གང་ལ་ཚད་མེད་པ། །བརྟན་པ་དེ་དག་ཡོངས་སུ་ སྡུད་པའི་ཚེ། །དེ་ལ་རྟག་བརྩོན་དམ་པའི་བློ་གྲོས་ཅན། །བསམ་ཡས་ཡེ་ཤེས་ལ་མི་རབ་ཏུ་གཞོག །དེ་དག་འགྲོ་བའི་དོན་དུ་མ་ནར་མེད་པར། །བསྐལ་བ་བསམ་གྱིས་མི་ཁྱབ་གནས་པ་ སྤྲོ༑ ༑དེ་དག་ཡིད་ནི་ཞུམ་པར་མི་འགྱུར་ཏེ། །དེ་དག་བསྔོ་རྟོགས་བསམ་པའི་ཡིད་དང་ལྡན། །གཟུགས་ཚོལ་མི་བྱེད་སྒྲ་དང་དྲི་མ་ཡིན། །བྲོ་དང་རེག་པ་དེ་བཞིན་མི་ཚོལ་ཏེ། །འགྲོ་བ་ཐམས་ཅད་ ཡོངས་སུ་དགྲོལ་སེམས་ཀྱིས། །ཡེ་ཤེས་དམ་པའི་སྟོབས་ནི་རྟག་ཏུ་ཚོལ། །མཁས་པ་དེ་དག་ཡེ་ཤེས་མཁའ་འདྲ་བས། །མཐའ་དང་དབུས་མེད་སྤྱད་པ་སྤྱོད་པ་བྱེད། །རྒྱལ་བའི་ཆོས་ཀྱི་ ཆོས་ཉིད་ཅི་འདྲ་བ། །མཐའ་ཡས་གྲགས་བའི་སྤྱོད་པ་དེ་འདྲའོ། །དེ་དག་གང་དང་གང་དུ་འདོང་བྱེད་པ། །འགྲོ་ལ་བདེ་བ་རྒྱ་ཆེར་རབ་ཏུ་སྒྲུབ། །རྟག་ཏུ་མཆོག་བརྩོན་དགའ་བ་བྱེད་པ་སྟེ། ། བྱང་ཆུབ་སྤྱོད་པས་དགའ་བར་ཚོར་བ་མེད། །གདུགས་མེད་སེམས་ལ་གནས་ཤིང་ཞུགས་པ་རྣམས། །ཡེ་ཤེས་དམ་པ་མཆོག་ལ་རྗེས་སུ་སེམས། །དེ་དག་བདག་ལ་བདེ་བར་མི། འདོད་དེ། །འགྲོ་བ་ཀུན་ལ་བདེ་དང་དགའ་ཕྱིར་བརྩོན། །དེ་དག་ཡོངས་སུ་བསྔོ་བ་མཐར་ཕྱིན་དང༌། །བསམ་པ་གདུག་མེད་རྣམ་པར་དག་ཡིད་ཀྱིས། །དུས་གསུམ་རྒྱལ་བ་གང་ན་ བཞུགས་བཞུགས་པའི། །ཆོས་ཀྱི་གྲོང་རྡལ་དེ་ན་རབ་ཏུ་གནས། །གཟུགས་དང་ཚོར་བ་དག་ལ་མི་གནས་ཤིང༌། །འདུ་ཤེས་འདུ་བྱེད་ཡིད་ལའང་མ་ཡིན་ཏེ། །སྲིད་པ་གསུམ་ལས་ ཡོངས་སུ་ཡིད་བསྐྱོད་དེ། །བསོད་ནམས་གཏེར་ལ་དེ་དག་ཡོངས་སུ་བསྔོ། །སེམས་ཅན་ཇི་སྙེད་རྒྱལ་བས་སད་བྱས་པ། །འགྲོ་བ་ཀུན་ནས་མ་ལུས་བསྡུ་བྱས་ཏེ། །སྐྱེས་བུ་དམ་པ་དེ་དག་ ༄༅། །དགྲོལ་བའི་ཕྱིར། །སྤྱོད་པའི་མཆོག་ལ་གང་ཞིག་བརྩོན་བྱེད་པ། །དེ་དག་རྣམ་པ་ཀུན་ཏུ་སེམས་བརྟན་ཏེ། །དེ་དག་བློ་གྲོས་ཡངས་པ་གཞལ་དུ་མེད། །དེ་དག་དྲན་ པའི་དབང་པོ་མ་ཉམས་པ། །དེ་དག་མཉམ་བཞག་བསམ་པ་རྣམ་པར་དག །འཇིག་རྟེན་འདི་ཡི་ནང་དང་ཕྱི་རྣམས་སུ། །གང་དུའང་དེ་དག་གནས་འཆང་མི་བྱེད་དེ། །མཁའ་ལ་རླུང་དང་རླུང་ མར་ཅི་འདྲ་བ། །ཕྱོགས་རྣམས་ཀུན་ཏུ་སེམས་ནི་དེ་བཞིན་ནོ། །དེ་དག་ལུས་ཀྱི་ལས་རྣམས་རྩོམ་བྱེད་པ། །དེས་ནི་རྒྱལ་བ་མངོན་པར་མཉེས་པར་བྱེད། །རྒྱལ་བ་རྣམས་ལ་ངག་ཀྱང་བསྡམས་ པ་སྟེ༑ ༑ཡིད་ཀྱིས་དེ་དག་ཞུགས་པ་གང་ཡང་མེད། །མི་ཡི་དབང་པོ་གང་ན་བཞུགས་པའི་ཞིང༌། །མཐའ་ཡས་ཞིང་དུ་དེ་དག་འདོང་བྱེད་ཅིང༌། །དེ་དག་ཀུན་ཏུ་ཐུགས་རྗེ་རྒྱལ་བ་མཐོང༌། ། རྒྱལ་བ་རིམ་གྲོ་བྱས་ཤིང་དེ་ནས་འདོང༌། །དེ་དག་རྟག་ཏུ་ཁ་ན་མ་ཐོ་མེད། །འགྲོ་བ་ཀུན་ན་དེ་དག་འཇིགས་པ་མེད། །དེ་དག་སྲིད་གསུམ་འདི་ན་མུ་སྟེགས་བྱེད། །དེ་དག་བདེ་གཤེགས་ ལམ་ལ་གནས་པ་ཡིན། །དེ་དག་རྣམ་པར་སྒོམ་ཞིང་མངོན་བརྩོན་པ། །སྐྱེ་དང་འཇིག་པའི་ཚུལ་ལ་རྗེས་སུ་སེམས། །ཆོས་ཀྱི་ངོ་བོ་ཉིད་ལ་རབ་ཏུ་ཞུགས། །ཉོན་མོངས་མེད་པའི་ ཚུལ་ལ་རབ་ཏུ་ཞུགས་པ་ཡིན། །གང་གི་སྤྱོད་པ་རབ་ཏུ་བརྟན་གྱུར་ཅིང༌། །འགྲོ་བ་ཀུན་ལས་ཤེས་པ་མི་ལྡོག་པ། །དེ་འདྲའི་ཆོས་ཉིད་དེ་དག་རྗེས་སུ་སེམས། །དེས་ནི་དུས་ གསུམ་ཆགས་པ་མེད་པར་འགྱུར། །གང་རྣམས་འགྲོ་བ་རྣམ་པར་དག་བྱེད་པ། །དེ་དག་ཡོངས་སུ་བསྔོ་བའི་ཕ་རོལ་ཕྱིན། །དེ་དག་གནས་རྣམས་ཐམས་ཅད་ཕྱིར་བཟློག་པས། །དེ་ཕྱིར་དེ་དག་ སྤྱོད་ལ་མི་གནས་སོ། །འགྲོ་བ་ཀུན་གྱི་ཚིག་ལམ་ཇི་སྙེད་དང༌། །སྐྱེ་རྒུ་ཐམས་ཅད་སྨྲ་ཞིང་མངོན་བརྗོད་པ། །དེ་དག་སྨྲ་ཡང་རློམ་སེམས་མེད་པ་ཡིན། །ཆགས་མེད་ཡིད་ལྡན་སྤྱོད་པ་འདི་ འདྲའོ༑ ༑བསོད་ནམས་ཚུལ་ལ་བློ་གྲོས་མཐའ་ཡས་པ། །དེ་དག་འདི་ལྟར་ཡོངས་སུ་བསྔོ་བ་ན། །ཕྱོགས་བཅུའི་འཇིག་རྟེན་བཞུགས་པ་ཇི་སྙེད་པའི། །མི་ཡི་དབང་པོ་དེ་དག་མཉེས་ པ་ཡིན༑ ༑འགྲོ་བ་ཐམས་ཅད་ཡོངས་སུ་སྐྱོབ་པ་ཞེས་བྱ་བ་སྟེ། ཡོངས་སུ་བསྔོ་བ་དང་པོའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་ བསྔོ་བ་མི་ཕྱེད་པ་དང་ལྡན་པ་ཞེས་བྱ་བ་གཉིས་པ་གང་ཞེ་ན། ཀྱེ་རྒྱལ་བའི་སྲས་དག། འདི་ལ་བྱང་ཆུབ་སེམས་དཔའ་འདི་ལྟ་སྟེ། དེ་བཞིན་གཤེགས་པ་ཐམས་ཅད་མཉེས་པར་བྱ་བའི་ ཕྱིར་སངས་རྒྱས་འདས་པ་དང༌། མ་བྱོན་པ་དང༌། ད་ལྟར་བྱུང་བ་ཐམས་ཅད་ལ་མི་ཕྱེད་པར་དད་པ་ཡིན། འདི་ལྟ་སྟེ། བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་རྩ་བ་དང་རྒྱུད་ཀྱི་ཚུལ་ གཅིག་པར་བྱ་བའི་ཕྱིར་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་གཅིག་ཐོབ་པ་ཡན་ཆད་ཀུན་ལ་ཡང་མི་ཕྱེད་པར་དད་པ་ཡིན། འདི་ལྟ་སྟེ། ལྷག་པའི་བསམ་ ༄༅། །པས་རབ་ཏུ་ཞུགས་པས་སངས་རྒྱས་ཀྱི་ཆོས་ཐམས་ཅད་ལ་མི་ཕྱེད་པར་དད་པ་ཡིན། འདི་ལྟ་སྟེ། དེ་བཞིན་གཤེགས་པ་ཐམས་ཅད་ཀྱི་བསྟན་པ་ཡང་དག་པར་ གཟུང་ཞིང་བསྲུང་བའི་ཕྱིར་དེ་དག་དང་དེ་དག་ཏུ་སྐྱེས་པའི་སངས་རྒྱས་ཐམས་ཅད་ཀྱི་བསྟན་པ་ལ་མི་ཕྱེད་པར་དད་པ་ཡིན། འདི་ལྟ་སྟེ། སྡང་བ་མེད་པའི་མིག་རབ་ཏུ་འཐོབ་པ་དང༌། སེམས་ཅན་ ཐམས་ཅད་ཀྱི་དོན་དུ་དགེ་བའི་རྩ་བ་ཐམས་ཅད་ཡོངས་སུ་བསྔོ་བའི་ཕྱིར་སེམས་ཅན་ཐམས་ཅད་ལ་མི་ཕྱེད་པར་དད་པ་ཡིན། འདི་ལྟ་སྟེ། མཐའ་ཡས་པའི་དགེ་བའི་རྩ་བ་མངོན་པར་འདུ་བྱ་ ཞིང་ཡང་དག་པར་བསྒྲུབ་པའི་ཕྱིར་ཆོས་དཀར་པོ་ཐམས་ཅད་ལ་མི་ཕྱེད་པར་དད་པ་ཡིན། འདི་ལྟ་སྟེ། ལྷག་པའི་བསམ་པ་དང༌། མོས་པ་ཡོངས་སུ་རྫོགས་པར་བྱ་བའི་ཕྱིར་བྱང་ཆུབ་ སེམས་དཔའ་ཐམས་ཅད་ཀྱི་ཡོངས་སུ་བསྔོ་བ་ལ་མི་ཕྱེད་པར་དད་པ་ཡིན། འདི་ལྟ་སྟེ། སྟོན་པའི་འདུ་ཤེས་ཡོངས་སུ་མ་རྒྱས་པ་རྒྱས་པར་བྱ་བའི་ཕྱིར་ཆོས་སྨྲ་བའི་བྱང་ཆུབ་སེམས་ དཔའ་ཐམས་ཅད་ལ་མི་ཕྱེད་པར་དད་པ་ཡིན། འདི་ལྟ་སྟེ། དེ་བཞིན་གཤེགས་པ་བསམ་གྱིས་མི་ཁྱབ་པ་ལ་དད་པར་བྱ་བའི་ཕྱིར་སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་ དང༌། ཆོ་འཕྲུལ་ལ་མི་ཕྱེད་པར་དད་པ་ཡིན། བྱང་ཆུབ་སེམས་དཔའི་ཐབས་མཁས་པའི་སྤྱོད་པ་རྣམ་པ་ཐ་དད་པ་སྣ་ཚོགས་ཀྱིས་ཡང་དག་པར་བཟུང་བ། དམིགས་པ་ཀུན་ ཏུ་རྒྱུ་བ་གཞན་དང་གཞན་ཅན་དེ་དག་ཐམས་ཅད་ལ་མི་ཕྱེད་པར་དད་པ་ཡིན་ཏེ། དེ་ལྟར་མི་ཕྱེད་པའི་གནས་རབ་ཏུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། དགེ་བའི་རྩ་བ་ཅིའང་ རུང་སྟེ༑ སངས་རྒྱས་སམ། བྱང་ཆུབ་སེམས་དཔའམ། ཉན་ཐོས་སམ། རང་སངས་རྒྱས་སམ། སངས་རྒྱས་ཀྱི་བསྟན་པའམ། སེམས་ཅན་རྣམས་ལ་དམིགས་པ་གང་དགེ་བའི་ རྩ་བ་སྣ་ཚོགས་སམ། དགེ་བའི་རྩ་བ་རྣམ་པ་ཐ་དད་པའམ། བྱང་ཆུབ་ཏུ་སེམས་བསྐྱེད་པ་རྣམ་པར་འཕེལ་བར་བྱ་བའམ། བྱམས་པ་སྒོམ་པའི་དགེ་བའི་རྩ་བ་ཡང་དག་པར་བསྐྱེད་ པས་ཀྱང་རུང་སྟེ། སྙིང་རྗེ་ཆེན་པོ་ཡངས་པ་ཚད་མེད་པ་ཡང་དག་པར་མཐོང་བས་བྱང་ཆུབ་ཏུ་སེམས་བསྐྱེད་པ་ཡངས་པར་བྱ་བ་དང༌། སངས་རྒྱས་ཐམས་ཅད་ཀྱི་རྗེས་སུ་བསླབ་པ་དང༌། སངས་རྒྱས་ཐམས་ཅད་ཀྱི་རྗེས་སུ་ནན་ཏན་བྱ་བ་དང༌། དགེ་བའི་རྩ་བ་ཐམས་ཅད་ཡང་དག་པར་བསྡུ་བ་དང༌། དོན་ཤེས་པ་ལ་ཡང་དག་པར་འཇུག་པར་བྱ་བ་དང༌། བསོད་ནམས་ཀྱི་ཚོགས་ ཡང་དག་པར་བསྒྲུབ་པ་དང༌། སྦྱིན་པའི་ཚོགས་རབ་ཏུ་བརྩམ་པ་དང༌། ཡོན་ཏན་ཐམས་ཅད་ཀྱི་ཚོགས་ལ་རབ་ཏུ་འཇུག་པར་བྱ་བ་དང༌། དུས་གསུམ་མཉམ་པ་ཉིད་དུ་རྣམ་པར་དཔྱོད་ པར་བྱེད་ཅིང༌། དེ་དགེ་བའི་རྩ་བ་དེ་དག་ཐམས་ཅད་མཁྱེན་པའི་ཚོགས་བསགས་པའི་ཕྱིར་ཡོངས་སུ་བསྔོའོ། །སངས་རྒྱས་ཐམས་ཅད་བལྟ་བ་དང་མི་འབྲལ་བ་ཡོངས་སུ་རྫོགས་པར་ ༄༅། །བྱ་བ་དང༌། དགེ་བའི་བཤེས་གཉེན་ཐམས་ཅད་དང་མི་འབྲལ་བ་རབ་ཏུ་ཐོབ་པར་བྱ་བ་དང༌། བྱང་ཆུབ་སེམས་དཔའ་ཐམས་ཅད་དང་མི་འབྲལ་བར་འགྲོགས་བ་དང་ ཐམས་ཅད་མཁྱེན་པར་སེམས་བསྐྱེད་པ་ཡིད་ལ་བྱ་བ་དང་མི་འབྲལ་བ་དང༌། སངས་རྒྱས་ཐམས་ཅད་ཀྱི་བསྟན་པ་ཡང་དག་པར་བཟུང་ཞིང་བསྲུང་བ་དང་མི་འབྲལ་བ་དང༌། སེམས་ཅན་གྱི་ ཁམས་ཐམས་ཅད་ཡོངས་སུ་སྨིན་པར་བྱ་བ་དང་མི་འབྲལ་བ་དང༌། འཇིག་རྟེན་ལས་འདས་པར་སེམས་བསྐྱེད་ཅིང་ཡོངས་སུ་བསྔོ་བ་དང་མི་འབྲལ་བ་དང༌། ཆོས་སྨྲ་བ་ཐམས་ཅད་ལ་ཕུ་ དུད་དུ་བྱ་བ་དང་མི་འབྲལ་བ་དང༌། ཆོས་ཀྱི་སྣང་བ་ཐམས་ཅད་ཐོབ་པ་དང་མི་འབྲལ་བ་དང༌། སྨོན་ལམ་ཆེན་པོ་ལ་རབ་ཏུ་བརྩོན་པར་བྱ་བ་དང་མི་འབྲལ་བར་ཡོངས་སུ་བསྔོའོ། །དེ་ལྟར་བྱང་ ཆུབ་སེམས་དཔའ་དགེ་བའི་རྩ་བ་དེ་དག་ཡང་དག་པར་སྒྲུབ་ཅིང་ཡང་དག་པར་སྡུད་པ་དང༌། ཉེ་བར་གསོག་པ་དང༌། མངོན་པར་འདུ་བྱེད་པ་དང༌། སེམས་པ་དང༌། དམིགས་པར་བྱེད་པ་ དང༌། རབ་ཏུ་རྟོག་པ་དང༌། ཡང་དག་པར་སྨོན་པ་དང༌། ཀུན་ཏུ་སྤྱོད་པ་དང༌། ཉེ་བར་སྟོན་པའི་ཚེ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདི་དག་འདི་ལྟར་བསྒྲུབས་པ་ལས་ དགེ་པའི་རྩ་བ་དང་རྒྱུ་མཐུན་པའི་འབྲས་བུ་གང་བྱུང་བའི་དགེ་བའི་རྩ་བ་དང་རྒྱུ་མཐུན་པའི་འབྲས་བུ་དེས་བདག་བྱང་ཆུབ་སེམས་དཔའི་སྤྱད་པ་སྤྱོད་པ་ན། སེམས་ཀྱི་སྐད་ཅིག་རེ་རེ་ ལ་བརྗོད་དུ་མེད་པའི་སངས་རྒྱས་བཅོམ་ལྡན་འདས་རྣམས་མཐོང་བར་གྱུར་ཅིག །དེ་དག་ཀྱང་མཉེས་པར་བྱས་པར་གྱུར་ཅིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་དེ་དག་ལ་ཡང་སངས་རྒྱས་ཀྱི་རིམ་གྲོ་རྒྱ་ཆེན་པོ་བྱས་པར་གྱུར་ཅིག །རིན་པོ་ཆེ་གྲངས་མེད་པ་དང༌། མེ་ཏོག་གྲངས་མེད་པ་དང༌། དྲི་གྲངས་མེད་པ་དང༌། ཕྲེང་བ་ གྲངས་མེད་པ་དང༌། ན་བཟའ་གྲངས་མེད་པ་དང༌། གདུགས་གྲངས་མེད་པ་དང༌། རྒྱལ་མཚན་གྲངས་མེད་པ་དང༌། བ་དན་གྲངས་མེད་པ་དང༌། རྒྱན་གྲངས་མེད་པ་དང༌། ལྷབ་ལྷུབ་ གྲངས་མེད་པ་དང༌། རིམ་གྲོ་གྲངས་མེད་པ་དང༌། བྱུག་པ་གྲངས་མེད་པ་དང༌། རྣམ་པར་བྱུག་པ་གྲངས་མེད་པ་དང༌། མེ་ཏོག་ཐམས་ཅད་ཀྱི་གདན་གྲངས་མེད་པ་དང༌། སྤོས་ཐམས་ ཅད་ཀྱི་གདན་གྲངས་མེད་པ་དང༌། ཕྲེང་བ་ཐམས་ཅད་ཀྱི་གདན་གྲངས་མེད་པ་དང༌། ཙནྡན་བཟང་པོ་ཐམས་ཅད་ཀྱི་གདན་གྲངས་མེད་པ་དང༌། གོས་ཐམས་ཅད་ཀྱི་གདན་གྲངས་མེད་པ་དང༌། རྡོ་ རྗེ་ཐམས་ཅད་ཀྱི་གདན་གྲངས་མེད་པ་དང༌། ནོར་བུ་རིན་པོ་ཆེ་ཐམས་ཅད་ཀྱི་གདན་གྲངས་མེད་པ་དང༌། རིན་པོ་ཆེའི་སྤང་ལེབ་ཐམས་ཅད་ཀྱི་གདན་གྲངས་མེད་པ་དང༌། རིན་པོ་ཆེའི་ཁ་ དོག་གི་གདན་གྲངས་མེད་པ་དང༌། རིན་པོ་ཆེ་ཐམས་ཅད་ཀྱི་འཆག་ས་གྲངས་མེད་པ་དང༌། མེ་ཏོག་ཐམས་ཅད་ཀྱི་འཆག་ས་གྲངས་མེད་པ་དང༌། སྤོས་ཐམས་ཅད་ཀྱི་འཆག་ས་གྲངས་ ༄༅། །མེད་པ་དང༌། ཕྲེང་བའི་རྒྱན་ཐམས་ཅད་ཀྱི་འཆག་ས་གྲངས་མེད་པ་དང༌། གོས་ཐམས་ཅད་ཀྱི་འཆག་ས་གྲངས་མེད་པ་དང༌། རིན་པོ་ཆེ་ཐམས་ཅད་ཀྱིས་སྣ་ ཚོགས་སུ་སྤྲས་པའི་འཆག་ས་གྲངས་མེད་པ་དང༌། རིན་པོ་ཆེ་ཐམས་ཅད་ཀྱི་སྤང་ལེབ་བཏིང་བའི་འཆག་ས་གྲངས་མེད་པ་དང༌། རིན་པོ་ཆེ་ཐམས་ཅད་ཀྱི་ཤིང་ཏ་ལའི་ཕྲེང་བ་བསྒྲེངས་ པའི་འཆག་ས་གྲངས་མེད་པ་དང༌། རིན་པོ་ཆེའི་སྟེགས་བུས་བསྐོར་བའི་འཆག་ས་གྲངས་མེད་པ་དང༌། རིན་པོ་ཆེ་ཐམས་ཅད་ཀྱི་དྲིལ་བུའི་དྲ་བས་ཀུན་ནས་ཡོག་པར་བྱས་པའི་ འཆག་ས་གྲངས་མེད་པ་དང༌། ལྷ་རྫས་ཐམས་ཅད་ལས་ཤིན་ཏུ་འདས་པའི་རིན་པོ་ཆེའི་གཙུག་ལག་ཁང་གྲངས་མེད་པ་དང༌། ལྷ་རྫས་ཐམས་ཅད་ལས་ཤིན་ཏུ་འདས་པའི་ མེ་ཏོག་ཐམས་ཅད་ཀྱི་གཙུག་ལག་ཁང་གྲངས་མེད་པ་དང༌། ལྷ་རྫས་ལས་ཤིན་ཏུ་འདས་པའི་སྤོས་ཐམས་ཅད་ཀྱི་གཙུག་ལག་ཁང་གྲངས་མེད་པ་དང༌། ལྷ་རྫས་ལས་ཤིན་ཏུ་ འདས་པའི་ཕྲེང་བ་ཐམས་ཅད་ཀྱི་གཙུག་ལག་ཁང་གྲངས་མེད་པ་དང༌། ལྷ་རྫས་ལས་ཤིན་ཏུ་འདས་པའི་ཙནྡན་ཐམས་ཅད་ཀྱི་གཙུག་ལག་ཁང་གྲངས་མེད་པ་དང༌། ལྷ་རྫས་ ལས་ཤིན་ཏུ་འདས་པའི་སྤོས་དང་བདུག་པ་མཆོག་དམ་པ་ཐམས་ཅད་ཀྱི་གཙུག་ལག་ཁང་གྲངས་མེད་པ་དང༌། ལྷ་རྫས་ཐམས་ཅད་ལས་ཤིན་ཏུ་འདས་པའི་རྡོ་རྗེའི་གཙུག་ལག་ ཁང་གྲངས་མེད་པ་དང༌། ནོར་བུ་རིན་པོ་ཆེའི་གཙུག་ལག་ཁང་གྲངས་མེད་པ་དང༌། སྤོས་ཀྱི་ཤིང་དང༌། གོས་ཀྱི་ཤིང་དང༌། རོལ་མོའི་ཤིང་དང༌། རིན་པོ་ཆེའི་ཤིང་དང༌། ལྷབ་ལྷུབ་ཀྱི་ཤིང་ དང༌། ཤིང་སྣ་ཚོགས་ཀྱིས་ཀུན་ནས་བསྐོར་བའི་གཙུག་ལག་ཁང་གྲངས་མེད་པ་དང༌། ཡིད་དུ་འོང་བའི་སྒྲ་འབྱུང་བའི་ཤིང་གྲངས་མེད་པ་དང༌། སྣམ་བུ་རིན་པོ་ཆེ་དཔྱངས་པའི་ཤིང་ གྲངས་མེད་པ་དང༌། རིན་པོ་ཆེ་མང་པོའི་ཤིང་གྲངས་མེད་པ་དང༌། མེ་ཏོག་དང༌། ཕྲེང་བ་དང༌། སྤོས་དང༌། བྱུག་པ་དང༌། གདུགས་དང༌། རྒྱལ་མཚན་ཐམས་ཅད་གྲངས་མེད་པ་ དང༌། ཤིང་ཐམས་ཅད་ཀྱིས་བརྒྱན་པའི་གཙུག་ལག་ཁང་གྲངས་མེད་པ་དང༌། བ་གམ་གྱི་རྒྱན་གྲངས་མེད་པ་དང༌། སྐར་ཁུང་གི་རྒྱན་གྲངས་མེད་པ་དང༌། རྟ་བབས་ཀྱི་རྒྱན་ གྲངས་མེད་པ་དང༌། པུ་ཤུའི་རྒྱན་དང༌། ཟླ་གམ་གྱི་རྒྱན་དང༌། ཁང་པ་བརྩེགས་བའི་རྒྱན་དང༌། བླ་རེའི་རྒྱན་གྲངས་མེད་པ་དང༌། གསར་གྱི་དྲ་བའི་ཁབ་གྲངས་མེད་པ་དང༌། སྤོས་ དང༌། བདུག་པའི་དམ་པ་ཐམས་ཅད་ཀྱི་རྒྱན་གྲངས་མེད་པ་དང༌། གོས་ཐམས་ཅད་གདིང་པར་བཏིང་བའི་རྒྱན་གྱིས་ཐམས་ཅད་རབ་ཏུ་བརྒྱན་པའི་གཙུག་ལག་ཁང་གྲངས་མེད་པས་ བསྙེན་བཀུར་བྱས་པར་གྱུར་ཅིག །དེ་ལྟར་མཆོད་པ་རྒྱ་ཆེན་པོ་སྦྱར་ཏེ་སངས་རྒྱས་ཐམས་ཅད་ལ་ཡིད་ཀྱི་དབང་པོ་ཤིན་ཏུ་དད་པས་མཆོད་པ་དང༌། རིམ་གྲོ་རྒྱུན་མི་ཆད་པ་དང༌། སངས་ ༄༅། །རྒྱས་ཕུ་དུད་དུ་བྱ་བ་དང༌། ཕྱིར་མི་ལྡོག་པ་ལས་བྱུང་བས་ཕྱག་འཚལ་ཞིང་མཆོད་པ་དང༌། བསྙེན་བཀུར་བྱས་ཏེ། དེ་བཞིན་གཤེགས་པ་དེ་དག་ ཐམས་ཅད་རིམ་གྲོར་བྱ་བས་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་ཟད་པར་གྱུར་ཅིག། འགྲོ་བ་ཐམས་ཅད་དད་པར་བྱ་བ་དང༌། སེམས་ཅན་ཐམས་ཅད་ཀྱི་ དགེ་བའི་རྩ་བ་ཡང་དག་པར་བསྡུ་བ་དང༌། འགྲོ་བ་ཐམས་ཅད་ཀྱི་སྡུག་བསྔལ་གྱི་ཕུང་པོ་རྣམ་པར་བཟློག་པ་དང༌། སེམས་རྒྱ་ཆེན་པོ་བསྐྱེད་པ་ལ་མོས་པར་བྱ་བ་དང༌། རྒྱན་ ཆེན་པོས་ཡང་དག་པར་བརྒྱན་པ་དང༌། ཚད་མེད་པར་རྣམ་པར་བྲེས་པའི་རྒྱན་དང༌། བརྩམས་པ་མཐར་ཕྱིན་པར་བྱ་བ་དང༌། སངས་རྒྱས་འབྱུང་བ་ཤིན་ཏུ་དཀོན་པ་ བརྗོད་པར་བྱ་བ་དང༌། དེ་བཞིན་གཤེགས་པའི་སྟོབས་ཡོངས་སུ་རྫོགས་པར་བྱ་བ་དང༌། མཆོད་རྟེན་སྣ་ཚོགས་བསྙེན་བཀུར་བར་བྱ་བ་དང༌། སངས་རྒྱས་ཐམས་ཅད་ཀྱི་ བསྟན་པ་ཡང་དག་པར་གཟུང་བའི་ཕྱིར་དེ་བཞིན་གཤེགས་པ་བཞུགས་ཤིང་འཚོ་སྐྱོང་བ་དེ་ལ་དེ་ལྟ་བུའི་རིམ་གྲོ་བྱེད་པ་དང༌། དེ་དག་ཡོངས་སུ་མྱ་ངན་ལས་འདས་ནས་ ཀྱང་སངས་རྒྱས་དེ་དག་ཐམས་ཅད་ཀྱི་སྐུ་གདུང་མཆོད་པ་ལ་རབ་ཏུ་བརྩོན་པར་བྱ་བས་བསྐལ་པ་གྲངས་མེད་པ་ཟད་ཀྱང་དེ་བཞིན་གཤེགས་པ་དེ་དག་མཆོད་པ་དང༌། བསྙེན་ བཀུར་བའི་རྒྱན་དང༌། བརྗོད་པ་ཡོན་ཏན་མཐའ་ཡས་པ་བསྔགས་པས་བསྒྲུབས་པ་དང༌། འགྲོ་བ་ཐམས་ཅད་ཡོངས་སུ་སྨིན་པར་བྱ་བས་བསྒྲུབས་པ་དེ་དག་མཐར་ཐུག་པར་མ་གྱུར་ ཅིག །དེ་ལྟར་རིམ་གྲོ་བྱེད་པ་ལས་ཕྱིར་ལྡོག་པར་མ་གྱུར་ཅིག །རྒྱུན་གཅོད་པར་མ་གྱུར་ཅིག །སེམས་ཡོངས་སུ་སྐྱོ་བ་མེད་པ་ཡང་ཐོབ་པར་གྱུར་ཅིག །མངོན་པར་ཆགས་ པའི་སེམས་འདུ་ཤེས་རྣམ་པར་སྤངས་པ་དང༌། མི་གནས་པའི་ཆོས་ཉིད་དང༌། དགེ་བའི་རྩ་བ་རློམ་སེམས་ཐམས་ཅད་བཅོམ་པས་རློམ་སེམས་མེད་པར་གྱུར་པ་དང༌། ཆོས་ འགྱུར་བ་མེད་པ་ཡང་དག་པ་ཇི་ལྟ་བ་བཞིན་གྱི་རྒྱས་བཏབ་པའི་ཆོས་ཀྱི་སྒོ་དང༌། ཚེ་དང་སྐྱེ་བ་ཐམས་ཅད་དུ་འཁོར་བར་འགྱུར་པའི་སངས་རྒྱས་ཀྱི་སྤྱོད་པ་དང༌། སྐྱེ་བ་མེད་པའི་རང་བཞིན་ལ་ དབྱོད་[*DPYOD?] ཅིང་དམིགས་པའི་ཆོས་ཀྱི་རྒྱས་བཏབ་པའི་སེམས་བསྐྱེད་པ་དང༌། དེ་བཞིན་གཤེགས་པས་བྱིན་གྱིས་བརླབས་པའི་ཡོངས་སུ་བསྔོ་བ་དང༌། ཆོས་ཀྱི་རང་བཞིན་ལ་རབ་ཏུ་བརྩོན་ པའི་ཡོངས་སུ་བསྔོ་བ་མཉམ་པ་ཉིད་དང༌། མངོན་པར་འདུ་བྱ་བ་མེད་པའི་ཚུལ་ལ་ཞུགས་པའི་མངོན་པར་འདུ་བྱ་བ་མེད་པར་སྒྲུབ་པ་དང༌། དངོས་པོ་ཐམས་ཅད་ཀྱི་འདུ་ཤེས་དང་བྲལ་ བའི་བསྔོ་བའི་ཚུལ་དང༌། བསྔོ་བ་ལ་མཁས་པའི་རྣམ་པ་ཚད་མེད་པ་དང༌། བྱང་ཆུབ་སེམས་དཔའི་བསྔོ་བ་སྲིད་པ་ཀུན་ལས་འཕགས་པ་དང༌། སྒོམ་པའི་སྒོ་མཚན་མ་ལ་མཁས་པས་ ༄༅། །གནས་པ་དང༌། བྱང་ཆུབ་སེམས་དཔའི་སྤྱོད་པ་དགེ་བའི་རྩ་བ་ཉེ་བར་ལེན་པའི་བྱིན་གྱི་རླབས་ཅན་དང༌། བྱང་ཆུབ་ཏུ་སེམས་བསྐྱེད་པ་བསྔོ་བ་ཆེན་པོས་ཡོངས་སུ་སྦྱངས་པ་དང༌། དགེ་བའི་ རྩ་བ་ཐམས་ཅད་ལ་གནས་པའི་མོས་པ་ཡོངས་སུ་རྒྱས་པར་གནས་ཐམས་ཅད་ཡང་དག་པར་བཅོམ་པར་གྱུར་ཅིག། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནི། དགེ་བའི་རྩ་ བ་དེ་དག་འདི་ལྟར་ཅི་ནས་ཀྱང་འཁོར་བའི་རྒྱུད་དུ་ཆུད་ཟོས་པར་མི་འགྱུར་བ་དང༌། ཅི་ནས་ཀྱང་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཆུད་ཟོས་པར་མི་འགྱུར་བ་དང༌། ཅི་ནས་ ཀྱང་སྲིད་པའི་འདུ་འཛིས་ཆུད་ཟོས་པར་མི་འགྱུར་པ་དང༌། ཅི་ནས་ཀྱང་སེམས་ཅན་གྱི་ཁམས་ཐམས་ཅད་བསྒྲལ་བ་དང༌། ཅི་ནས་ཀྱང་སྐྱེ་བ་དང༌། འཆི་འཕོས་སྐྱོན་དུ་མི་འགྱུར་བ་དང༌། ཅི་ནས་ཀྱང་ཆགས་པ་མེད་པའི་ཡེ་ཤེས་ཀྱི་སྒོ་སྟོར་བར་མི་འགྱུར་བ་དང༌། ཅི་ནས་ཀྱང་བྱང་ཆུབ་སེམས་དཔའི་སྤྱོད་པ་གཅིག་ནས་གཅིག་ཏུ་བརྒྱུད་པའི་རྒྱུ་ཟད་པར་མི་འགྱུར་བ་དང༌། ཅི་ ནས་ཀྱང་འཇིག་རྟེན་གྱི་ཆོས་ཀྱིས་ཀུན་ཏུ་བླངས་པར་མི་འགྱུར་བ་དང༌། ཅི་ནས་ཀྱང་ཕ་རོལ་ཏུ་ཕྱིན་པ་རྣམས་ཀྱིས་རྣམ་པར་དག་པར་འགྱུར་བ་དང༌། ཅི་ནས་ཀྱང་ཐམས་ཅད་མཁྱེན་པའི་ སྟོབས་ཕུན་སུམ་ཚོགས་པར་འགྱུར་བར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སེམས་བསྐྱེད་པ་མུན་པ་མེད་པ་དང་ལྡན་པ་ནི། ཆོས་དཀར་པོ་སྣང་བར་གྱུར་པས་ཉེ་བར་བརྟན་ཅིང་ཡོངས་སུ་བསྔོ་བའི་མཆོག་སྐྱེས་བུ་དམ་པས་སྤྱད་པ་དང༌། ཡོངས་སུ་ངག་པའི་ཡིད་ཀྱིས་ཡང་དག་པར་རྟོག་པ་དང༌། སེམས་དང་འདྲ་བའི་ ཆོས་ཐམས་ཅད་ལ་ཞུགས་པ་དང༌། སྒྱུ་མ་དང་འདྲ་བའི་ལས་ཡོངས་སུ་ཤེས་པ་དང༌། མིག་ཡོར་ལྟ་བུའི་ལས་ཀྱི་རྣམ་པར་སྨིན་པ་ལ་མོས་པ་དང༌། སྤྲུལ་པ་ལྟ་བུའི་མངོན་པར་ འདུ་བྱེད་པ་ལ་གནས་པ་དང༌། སྒྲ་བརྙན་ལྟ་བུའི་ལས་ལ་བརྟེན་པ་དང༌། གྲིབ་མ་ལྟ་བུའི་བྱང་ཆུབ་སེམས་དཔའི་སྤྱོད་པའི་རྗེས་སུ་སོང་བ་དང༌། ཆགས་པ་མེད་པའི་ཆོས་ཀྱི་མིག་ རབ་ཏུ་སྐྱེས་པ་དང༌། བྱ་བ་མེད་པར་འབྱམས་ཀླས་པའི་རྗེས་སུ་སོང་བ་དང༌། ཞི་བའི་རིགས་རབ་ཏུ་ཐོབ་པ་དང༌། གཉིས་སུ་མེད་པ་དང་ལྡན་པའི་འདུས་བྱས་དང༌། འདུས་མ་བྱས་ ཀྱི་ཆོས་ཐམས་ཅད་ལ་རབ་ཏུ་ཞུགས་པ་དང༌། ཆོས་མ་ནོར་བའི་མཚན་མ་ཐོབ་པར་བྱ་བ་དང༌། བྱང་ཆུབ་སེམས་དཔའི་སྤྱོད་པ་དེ་ཐམས་ཅད་ཀྱི་རྗེས་སུ་སོང་བ་དང༌། མཚན་མ་ ཐམས་ཅད་ལ་ཞེན་པ་མེད་པ་དང༌། ཐུན་མོང་གི་ལས་ལ་མཁས་པའི་རྗེས་སུ་སོང་བ་དང༌། ཆོས་དཀར་པོ་ཐམས་ཅད་རྒྱུན་མ་ཆད་པ་དང༌། ཆགས་པ་ཐམས་ཅད་ཀྱིས་མངོན་ པར་མ་ཞེན་པ་དང༌། ཆགས་པ་མེད་པར་འགྲོ་བ་ལ་བརྟེན་པ་དང་ལྡན་པ་ཡིན་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤིན་ཏུ་བསམ་པའི་བློ་དང་ལྡན་པ། ༄༅། །དགེ་བའི་རྩ་བ་ལ་རྨོངས་པ་མེད་པ། ཆོས་ཐམས་ཅད་དང་འགལ་བ་མེད་པའི་ཆོས་ཅན། རྒྱུ་དང༌། ལས་དང༌། བྱ་བ་དང་འགལ་བ་མེད་པ་ཡང་དག་ པར་མཐོང་བ། ཡོངས་སུ་བསྔོ་བ་ལ་མཁས་པ། ངོ་བོ་ཉིད་ཀྱི་ཆོས་ཀྱི་ཚུལ་དང༌། ལས་རྣམ་པར་སྨིན་པ་མངོན་པར་སྒྲུབ་པའི་ཕ་རོལ་ཏུ་ཕྱིན་པ་ཆོས་ཐམས་ཅད་ལ་རྣམ་པར་ ལྟ་ཞིང༌། རྣམ་པར་དཔྱོད་པའི་ཡེ་ཤེས་དང་ལྡན་པ། ཡོངས་སུ་བསྔོ་བའི་ཡེ་ཤེས་ཆེན་པོ་མངོན་པར་ཤེས་པ་ལས་ཤིན་ཏུ་རིག་པའི་དགེ་བའི་རྩ་བ་དང་ལྡན་པ། མངོན་པར་འདུ་ བྱ་བ་མེད་པར་སྤྱོད་པའི་སེམས་དགེ་བ་དང་ལྡན་པ་དེ་དགེ་བའི་རྩ་བ་དེ་དག་འདི་ལྟར་ཅི་ནས་ཀྱང་འགྲོ་བ་ཐམས་ཅད་ཡོངས་སུ་དགྲོལ་བ་དང༌། སངས་རྒྱས་ཀྱི་རིགས་བདུད་ཀྱི་ ལས་དང་བྲལ་བ། ལས་ཀྱི་རྣམ་པ་ཡོངས་སུ་བྱང་བའི་བདག་ཉིད་ཅན་ཐམས་ཅད་མཁྱེན་པ་ཉིད་དུ་མོས་ཤིང་རྗེས་སུ་སོང་བའི་སེམས་དང་ལྡན་པར་འགྱུར་བར་ཡོངས་སུ་ བསྔོའོ༑ ༑བསྔོ་བ་དེ་ཡང་ཚད་མེད་པའི་ཡེ་ཤེས་ཁོང་དུ་ཆུད་པར་བྱ་བའི་ཕྱིར་ཡང་དག་པར་མཐོང་བར་བྱེད་དེ། དགེ་བའི་རྩ་བ་དེ་དག་འཇིག་རྟེན་གྱི་ཡུལ་དང་རྣམ་པར་བྲལ་བ། ཉོན་མོངས་པ་ཐམས་ཅད་དང་རྣམ་པར་བྲལ་བར་ཡོངས་སུ་བསྔོའོ། །སེམས་ཅན་ཐམས་ཅད་ཤིན་ཏུ་རྣམ་པར་བྱང་བའི་ཕྱིར་ཡང་ཡོངས་སུ་བསྔོ་སྟེ། ཡེ་ཤེས་རྣམ་པར་དག་ པའི་མཐར་ཐུག་པར་ཟབ་པའི་ཚུལ་གྱིས་དགེ་བའི་རྩ་བ་དེ་དག་ཅི་ནས་ཀྱང་འཁོར་བའི་ཆོས་ཀྱིས་མི་བསྐྱོད་ཅིང༌། སངས་རྒྱས་ཀྱི་དགེ་བ་མངོན་པར་འབྱུང་བ་སེམས་བསྐྱེད་པ་དང་ ལྡན་པར་ཡོངས་སུ་བསྔོའོ། །དགེ་བའི་རྩ་བ་དེ་དག་ཡོངས་སུ་བསྔོ་བའི་ཚེའང་བདུད་ཀྱི་ལས་ཐམས་ཅད་ལས་རྣམ་པར་བཟློག་སྟེ་ཆོས་མཉམ་པ་ཉིད་ཀྱི་རྒྱ་ཡོངས་སུ་བསྔོ་བའི་ཡེ་ཤེས་ ཀྱི་རྗེས་སུ་སོང་བ་ལས་རྒྱས་འདེབས་པར་བྱེད་དོ། །དགེ་བའི་རྩ་བ་དེ་དག་ཐམས་ཅད་མཁྱེན་པ་ཉིད་ཀྱི་ལོངས་སྤྱོད་ཀྱི་ཕྱིར་ཡང་ཆོས་ཐམས་ཅད་འཇིག་རྟེན་ལས་འདས་པར་ཁོང་དུ་ ཆུད་པའི་ཡོངས་སུ་བསྔོ་བས་ཡོངས་སུ་བསྔོའོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཡོངས་སུ་བསྔོ་བ་ནི། ཐམས་ཅད་མཁྱེན་པའི་ཐེག་པའི་ དཀྱིལ་འཁོར་ཡོངས་སུ་གྲུབ་པས་འགྱོད་པ་མེད་པའི་དགེ་བའི་རྩ་བ་དང་ལྡན་པ་ཡིན་ཏེ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་ བ་མི་ཕྱེད་པ་དང་ལྡན་པ་ཞེས་བྱ་བ་སྟེ། གཉིས་པའོ། །ཡོངས་སུ་བསྔོ་བ་དེ་དང་ལྡན་པའི་བྱང་ཆུབ་སེམས་དཔའ་ནི། དགེ་བའི་རྩ་བ་ཐམས་ཅད་ཡོངས་སུ་བསྔོ་ཞིང༌། སངས་རྒྱས་ གྲངས་མེད་པ་མངོན་སུམ་དུ་བྱ་བ་ཐོབ་པར་འགྱུར་རོ། །ཆོས་བརྗོད་དུ་མེད་པ་ཡོངས་སུ་དག་པ་ཡང་ཡོངས་སུ་རྫོགས་པར་བྱེད་དོ། །སེམས་ཅན་ཐམས་ཅད་མཉམ་པ་ཉིད་ཀྱང་ཁོང་ ༄༅། །དུ་ཆུད་པར་བྱེད་དོ། །ཆོས་ཐམས་ཅད་ལ་འཇུག་པ་རྨོངས་པ་མེད་པ་ལ་ཡང་རབ་ཏུ་འཇུག་གོ །སངས་རྒྱས་ཐམས་ཅད་ཀྱི་བྱིན་གྱི་རླབས་བདུད་ཀྱི་ ལས་ཐམས་ཅད་རབ་ཏུ་འཇོམས་པ་ཡང་ཡོངས་སུ་སྒྲུབ་བོ། །མངོན་པར་སྐྱེས་པའི་བྱང་ཆུབ་ཀྱི་སེམས་ཀྱང་ཡོངས་སུ་རྫོགས་པར་འགྲུབ་པར་འགྱུར་རོ། །ཆགས་པ་མེད་པ་ ལ་རབ་ཏུ་འཇུག་པའི་ཕྱིར་གཞན་གྱི་དྲིང་མི་འཇོག་པའང་ཡང་དག་པར་འགྲུབ་བོ། །ཆོས་ཐམས་ཅད་ཀྱི་དོན་མཐོང་བ་ཡང་རབ་ཏུ་ཐོབ་བོ། །སངས་རྒྱས་ཀྱི་ཞིང་ཐམས་ཅད་ ཀྱི་རྗེས་སུ་སོང་བའི་འདུ་ཤེས་ཀྱི་གནས་ཀྱང་རབ་ཏུ་རྟོགས་པར་བྱེད་དོ། །འགྲོ་བ་ཐམས་ཅད་ཡོངས་སུ་སྣང་བར་བྱ་བའི་ཡོངས་སུ་དག་པ་ཡང་ཡོངས་སུ་སྒྲུབ་བོ། །དེ་ནས་ བྱང་ཆུབ་སེམས་དཔའ་རྡོ་རྗེའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། ། དེ་དག་ཡིད་ནི་དབྱེ་བ་མེད་བསྒྱུར་ཅིང༌། །ཇི་སྙེད་ལས་རྣམས་ཡང་དག་བརྩོན་བྱེད་ཀུན། །ཅི་ནས་རྒྱལ་བ་མངོན་པར་མཉེས་འགྱུར་བ། །དེ་ལྟར་འཇིག་རྟེན་མཁས་ལ་ཡོངས་ སུ་བསྔོ་བ་བྱེད། །སངས་རྒྱས་བསམ་དུ་མེད་པ་བསྙེན་བཀུར་ཅིང༌། །སྦྱིན་འདུལ་སྡོམ་པ་མཆོག་གི་ཚུལ་ཁྲིམས་རྣམས། །ཅི་ནས་འགྲོ་ཀུན་རྣམ་པར་དག་འགྱུར་བ། །དེ་ལྟར་ འཇིག་རྟེན་ཕན་ཕྱིར་ཡོངས་སུ་བསྔོ། །ཇི་སྙེད་འདི་ན་སྤོས་ཀྱི་གཞལ་མེད་ཁང༌། །མེ་ཏོག་རྣམ་པ་ན་བཟའི་རྣམ་པ་དང༌། །ལྷབ་ལྷུབ་རྣམ་པ་གདུགས་ཀྱི་རྣམ་པ་དག །དེས་ན་ཡེ་ཤེས་ མཁས་ལ་བསྙེན་བཀུར་བྱེད། །དེ་ལྟར་སྐྱེས་བུའི་སེངྒེ་དྲང་སྲོང་རྣམས། །བསྐལ་པ་བསམ་ཡས་བསྙེན་ཅིང་བཀུར་བྱས་ཀྱང༌། །རྒྱལ་བ་སྐྱེས་བུ་འདུལ་བ་མཆོད་བྱས་པས། །ནམ་ ཡང་ངོམས་པར་ཚོར་བར་མི་འགྱུར་རོ། །དེ་དག་རྒྱལ་བ་ཀུན་ལ་མོས་བྱེད་ཅིང༌། །ཕྱོགས་རྣམས་ཀུན་གྱི་འཇིག་རྟེན་སྒྲོན་མ་རྣམས། །མི་ཡི་སེངྒེ་མཚུངས་མེད་ཇི་སྙེད་དུ། ། འཇིག་རྟེན་ཕྱོགས་བཅུ་དག་ན་བཞུགས་པ་མཐོང༌། །བསྐལ་པ་བསམ་གྱིས་མི་ཁྱབ་རྣམ་མང་དུ། །མི་ངོམས་ཡིད་ཀྱིས་སྦྱིན་པ་གཏོང་བྱེད་ཅིང༌། །དགེ་བ་དེ་ལ་རྗེས་སུ་སེམས་ བྱེད་པས། །བསྐལ་པ་བརྒྱར་ཡང་ངོམས་པར་མི་ཚོར་རོ། །འགྲོ་བའི་འདུ་ཤེས་རྣམ་རྟོག་རབ་ཤེས་ཀྱང༌། །དེ་ལ་དེ་ནི་མི་རྟོག་རྣམ་མི་རྟོག །དེ་དག་འགྲོ་བའི་དབང་པོ་མ་ལུས་ ཤེས༑ ༑དེ་དག་ཕན་ཕྱིར་རྟག་ཏུ་འཇུག་པར་བྱེད། །དེ་དག་དགའ་ཞིང་མཉམ་པར་གཞག་པའི་སེམས། །དད་པ་འོད་གསལ་སྲི་ཞུ་ལྡན་པ་རྣམས། །བསམ་ཡས་བསྐལ་པར་ འཇིག་རྟེན་འགྲོ་ཕན་ཕྱིར། །ཡོངས་སུ་དགྲོལ་བའི་སེམས་ཀྱིས་སྤྲོ་བར་བྱེད། །དེ་དག་བདེ་གཤེགས་མྱ་ངན་འདས་པ་ལ། །སྣ་ཚོགས་རྣམ་པ་ཐ་དད་ཡིད་འོང་བའི། །མཆོད་ ༄༅། །རྟེན་བསམ་གྱིས་མི་ཁྱབ་རྩིག་བྱེད་ཅིང༌། །མཆོད་པ་བྱེད་ཀྱང་ནམ་ཡང་ཚིམ་པ་མེད། །མཚུངས་མེད་དེ་དག་སྐུ་གཟུགས་རྣམ་དག་པ། །རབ་ཏུ་འོད་འབར་ གསེར་གྱི་སྙིང་པོ་ཅན། །རྒྱལ་བའི་སྐུ་གཟུགས་རི་རབ་མཉམ་པ་དག །བྱེ་བ་བརྒྱ་ཕྲག་མཐའ་ཡས་རབ་ཏུ་བྱེད། །ཟིལ་མནོན་དམ་པ་རྙེད་པ་དེ་དག་ནི། །བསོད་ནམས་ཡངས་ པའི་སྟོབས་དེ་སྒྲུབ་པ་ན། །དེ་དག་ཡོངས་བསྔོའི་ཤེས་པར་རབ་རྟོགས་ཤིང༌། །དངོས་དང་དངོས་མེད་ཐམས་ཅད་རབ་ཏུ་སྒོམ། །འདི་འདྲའི་ཡེ་ཤེས་ཚུལ་ལ་ཡོངས་བསྔོས་ པས༑ ༑དེ་ཕྱིར་འཁོར་བར་ཟད་པར་མི་འགྱུར་ཏེ། །ཆོས་ཉིད་ཡེ་ཤེས་མཆོག་དང་དམ་པ་དང༌། །དེ་ལ་ཆོས་རྣམས་སྐྱེ་བ་གང་ཡང་མེད། །དེས་ནི་འཇིག་རྟེན་མཁྱེན་པ་རྣམ་ དག་ལྟར། །སེམས་ཀྱང་རབ་ཏུ་རྣམ་པར་དག་པར་འགྱུར། །དེས་ན་མི་ཟད་མཐར་ཕྱིན་ཚུལ་རྟོགས་པའི། །འདུས་བྱས་བསོད་ནམས་ཟད་པར་འགྱུར་བ་མེད། །གང་རྣམས་ བྱང་ཆུབ་སེམས་དང་ལྡན་གྱུར་ཅིང༌། །འཇིག་རྟེན་ཀུན་ལ་གནས་པ་མེད་པ་དག །འགྲོ་བ་ཀུན་ལ་ཆགས་པ་མེད་པ་ཡིན། །ཕྱོགས་རྣམས་ཀུན་ཏུ་འང་མཐའ་ཡས་རབ་ཏུ་འགྲོ། གང་གིས་མི་ཡི་དབང་པོ་ཀུན་འབྱུང་བ། །དེ་འདྲའི་སེམས་སུ་ཡོངས་སུ་བསྔོ་བ་བྱེད། །འགྲོ་བ་ཐམས་ཅད་སེམས་དང་མཉམ་རྟོགས་ཀྱང༌། །འགྲོ་བ་ཀུན་ཏུ་སེམས་ནི་དམིགས་པ་ མེད༑ །དེ་དག་དངོས་པོ་ཐམས་ཅད་མ་ལུས་པར། །ཆོས་རྣམས་དངོས་མེད་ཇི་བཞིན་འཇུག་པར་བྱེད། །ཅི་ནས་འཇིག་རྟེན་ལམ་དུ་ཉམས་མེད་པར། །རྣམ་དག་མིག་ཅན་ཡོངས་སུ་བསྔོ་བ་ བྱེད༑ ༑དེས་ནི་སྲིད་རྣམས་ཡོངས་སུ་དག་པར་བསྔོ། །དངོས་སུ་སྲེད་ལ་རྟོག་པར་མི་བྱེད་དེ། །དངོས་དང་དངོས་མེད་ཚུལ་ནི་ཤེས་བྱེད་ཅིང༌། །འོད་གསལ་དང་བས་སེམས་ཀྱང་ཚིམ་པར་ བྱེད༑ ༑སངས་རྒྱས་ཞིང་གཅིག་གནས་པར་མི་བྱེད་དེ། །ཞིང་རྣམས་མ་ལུས་ཀུན་ཏུ་འང་གནས་མི་འཆའ། །འདུས་བྱས་ཆོས་ཀྱིས་སྙེམས་པར་མི་བྱེད་དེ། །དེ་དག་རང་བཞིན་ལ་ཡང་མི་གནས་ སོ༑ ༑ཅི་ནས་རྒྱལ་བ་ཀུན་གྱི་ཀུན་མཁྱེན་དང༌། །ཅི་ནས་བླ་མེད་སངས་རྒྱས་རྒྱན་ཐོབ་ཅིང༌། །ཅི་ནས་རྒྱལ་བ་ཐམས་ཅད་མཉེས་འགྱུར་བ། །དེ་ལྟར་དེ་དག་ལས་ནི་ཡོངས་སུ་བསྔོ། །ཡེ་ཤེས་དམ་ པའི་རྣམ་པ་ཚུལ་ཤེས་པ། །དེ་དག་རྐང་གཉིས་དམ་པ་དྲན་བྱེད་ཅིང༌། །དེ་འདྲའི་ཆོས་རྣམས་གནས་མེད་རབ་ཤེས་པས། །དེ་འདྲའི་བསོད་ནམས་གནས་པ་མེད་པར་འགྱུར། །དེ་དག་འགྲོ་བ་ ཀུན་གྱི་སྐྱབས་ཡིན་ཏེ། །ལས་ཀྱི་མཐའ་རྣམས་ཐམས་ཅད་རྣམ་པར་སྤོང༌། །འགྲོ་བ་ཀུན་ལ་ཕན་དང་བདེ་སེམས་ཀྱིས། །འཇིག་རྟེན་ཡོངས་སུ་སྤང་བ་གང་ཡང་མེད། །ཆོས་དང་བར་དུ་ མྱ་ངན་འདའ་བ་དག །གང་ཕྱིར་གཞན་མིན་འགྲངས་པའི་ས་ལ་སྲུང༌། །གང་གིས་རྒྱལ་འགྱུར་སངས་རྒྱས་གྱུར་བའི་རྣམས། །དེ་ལྟར་དགེ་བ་དེ་དག་ཡོངས་སུ་བསྔོ། །འཇིག་རྟེན་འགྲོ་ ༄༅། །བའི་རྒྱུད་ལ་རློམ་སེམས་མེད། །འདུས་བྱས་རྣམས་ལའང་དེ་དག་ཆགས་པ་མེད། །ཚིག་གི་ལམ་ལ་དེ་དག་གནས་པ་མེད། །ཚིག་མེད་ལམ་ལའང་ནམ་ ཡང་མི་གནས་སོ། །ཆོས་རྣམས་ཐམས་ཅད་མ་ལུས་བསྡུ་མཛད་དོ། །མི་ཡི་དམ་པ་སངས་རྒྱས་ཇི་སྙེད་པས། །འགྲོ་རྒྱུད་ཐམས་ཅད་རྣམ་པར་ཕྱེ་བས་མཁྱེན། །ཐུགས་ཀྱིས་རྣམ་པར་ དབྱེ་དང་རྟོག་མི་མངའ། །རྒྱན་གཅིག་ལས་ནི་རྒྱན་རྣམས་ཀུན་འབྱིན་ཀྱང༌། །རྣམ་པར་རྟོག་པའི་ཆོས་སུ་མི་བྱེད་དེ། །དེ་དག་ཐམས་ཅད་དངོས་མེད་སྤྱོད་མེད་པར། །འཇིག་རྟེན་རྟོག་པ་མེད་ པར་རབ་ཏུ་ཤེས། །མི་ཕྱེད་པ་དང་ལྡན་པ་ཞེས་བྱ་བ་སྟེ། ཡོངས་སུ་བསྔོ་བ་གཉིས་པའོ། །བམ་པོ་སུམ་ཅུ་རྩ་གསུམ་པ། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་ དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་སངས་རྒྱས་ཐམས་ཅད་ལ་ཡང་དག་པར་བསྐྱེད་པ་ཞེས་བྱ་བ་གསུམ་པ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་ དཔའ་སེམས་དཔའ་ཆེན་པོ་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་བསྔོ་བ་ལ་ཡང་རྗེས་སུ་སློབ་བོ། །མ་བྱོན་པའི་སངས་རྒྱས་བཅོམ་ལྡན་འདས་རྣམས་ ཀྱི་ཡོངས་སུ་བསྔོ་བ་ལ་ཡང་རྗེས་སུ་སློབ་བོ། །ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་བསྔོ་བ་ལ་ཡང་རྗེས་སུ་སློབ་བོ། །དེ་བྱང་ཆུབ་སེམས་དཔའི་ སྤྱད་པ་ལ་སྤྱོད་པའི་ཚེ་མི་མཐུན་པ་མ་ཡིན་ཞིང་ཡིད་དུ་འོང་བའམ། མི་མཐུན་པ་མ་ཡིན་ཞིང་ཡིད་དུ་འོང་བར་རེག་པའམ། མི་མཐུན་པ་མ་ཡིན་ཞིང་ཡིད་དུ་འོང་བའི་ཆོས་སམ། མི་མཐུན་པ་མ་ ཡིན་ཞིང་ཁ་ན་མ་ཐོ་བ། མེད་པ་རྣམ་པར་དག་པ། དགེ་བ། ཡངས་པ། འོད་གསལ་བ་གང་གིས་ཡིད་དགའ་བ་སྐྱེ་ཞིང་བདེ་བར་འགྱུར་བ། དད་པ་སྐྱེ་བ། དགའ་བ་སྐྱེ་བ། རབ་ཏུ་དགའ་བར་ གནས་པ། སྤྲོ་བ་རབ་ཏུ་འབྱུང་བ། ཡིད་མི་བདེ་བ་རྣམ་པར་བཟློག་པ། སེམས་བདེ་བར་འགྱུར་བ། །ཉམས་དགའ་བར་འགྱུར་བ། བསམ་པ་འཇམ་པར་འགྱུར་བ། དབང་པོ་སིམ་པར་འགྱུར་ པའི་གཟུགས་གང་ཇི་སྙེད་ཡོད་པ་དེ་དག་ཐམས་ཅད་མཐོང་བར་གྱུར་ཏེ། དེ་བདེ་བའི་འདུ་ཤེས་དེ་དག་མཐོང་བའི་ཚེ་འདི་ལྟར་ཡོངས་སུ་བསྔོ་སྟེ། བདག་གི་བདེ་བ་ཡོངས་སུ་བསྔོ་བ་འདིས་ སངས་རྒྱས་བཅོམ་ལྡན་འདས་དེ་དག་སངས་རྒྱས་ཀྱི་རྣམ་པར་སྤྱོད་པའི་བདེ་བ་བསམ་གྱིས་མི་ཁྱབ་པ་དང་ཕྱི་ཕྱིར་ཞིང་ཡང་ལྡན་པར་གྱུར་ཅིག །སངས་རྒྱས་ཀྱི་ཏིང་ངེ་འཛིན་གྱི་བདེ་ བ་མཚུངས་པ་མེད་པས་ཡང་དག་པར་གཟུང་བར་གྱུར་ཅིག །སངས་རྒྱས་ཀྱི་ཐུགས་རྗེ་ཆེན་པོའི་བདེ་བ་མཐའ་ཡས་པར་ཕྱིར་ཞིང་ཡང་ཤིན་ཏུ་བརྟན་པར་གྱུར་ཅིག །སངས་རྒྱས་ཀྱི་ རྣམ་པར་ཐར་པའི་བདེ་བ་ཚད་མེད་པ་ཡང་དག་པར་ལྡན་པར་གྱུར་ཅིག །སངས་རྒྱས་ཀྱི་ཆོ་འཕྲུལ་ཚད་མེད་པས་ཤིན་ཏུ་བཟུང་བར་གྱུར་ཅིག །སངས་རྒྱས་ཀྱི་ཁྱུ་མཆོག་གི་མཐུ་ཕྱུང་ ༄༅། །བའི་བདེ་བ་རྙེད་པར་དཀའ་བས་ཤིན་ཏུ་ཁྱབ་པར་གྱུར་ཅིག །སངས་རྒྱས་ཀྱི་སྟོབས་ཀྱི་བདེ་བ་ཚད་མེད་པས་ཤིན་ཏུ་བདེ་བར་གྱུར་ཅིག །ཚོར་བ་ ཐམས་ཅད་ཞི་ཞིང་སྐྱེ་བ་མེད་པའི་བདེ་བས་འགྱུར་བ་མེད་པར་བདེ་བར་གྱུར་ཅིག། ཆགས་པ་མེད་པར་གནས་པ་རྟག་ཏུ་མཉམ་པར་བཞག་པའི་དེ་བཞིན་གཤེགས་པའི་ བདེ་བ་གཉིས་སུ་མེད་ཅིང་ཡང་དག་པར་སྤྱོད་པས་འཁྲུག་པ་མེད་པའི་བདེ་བར་གྱུར་ཅིག། ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་དགེ་བའི་རྩ་བ་དེ་དག་ དེ་བཞིན་གཤེགས་པ་རྣམས་ལ་ཡོངས་སུ་བསྔོས་ནས་བྱང་ཆུབ་སེམས་དཔའ་རྣམས་ལ་ཡོངས་སུ་བསྔོ་བ་བྱེད་དེ། འདི་ལྟར་བསམ་པ་ཡོངས་སུ་མ་རྫོགས་པ་རྣམས་ཀྱི་ བསམ་པ་ཡོངས་སུ་རྫོགས་པར་འགྱུར་བའི་ཕྱིར་ཡོངས་སུ་བསྔོའོ། །ལྷག་པའི་བསམ་པ་ཡོངས་སུ་མ་དག་པ་རྣམས་ཡོངས་སུ་དག་པར་བྱ་བ་དང༌། ཕ་རོལ་ཏུ་ཕྱིན་པ་ཡོངས་སུ་ མ་རྫོགས་པ་ཐམས་ཅད་ཡོངས་སུ་རྫོགས་པར་བྱ་བ་དང༌། བྱང་ཆུབ་ཀྱི་སེམས་རྡོ་རྗེ་ལྟ་བུ་ཤིན་ཏུ་བརྟན་པར་བྱ་བ་དང༌། ཐམས་ཅད་མཁྱེན་པའི་གོ་ཆ་ཕྱིར་མི་ལྡོག་པ་རྒྱུན་མི་ འཆད་པར་བྱ་བ་དང༌། བྱང་ཆུབ་ཏུ་གཞོལ་བའི་དགེ་བའི་རྩ་བ་རྣམས་ཡོངས་སུ་བསྲུང་བ་དང༌། འགྲོ་བ་ཐམས་ཅད་དང་མཉམ་པའི་བྱང་ཆུབ་ཀྱི་སེམས་བསྐྱེད་པའི་སྨོན་ལམ་ཡོངས་ སུ་རྫོགས་པར་བྱ་བ་དང༌། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་སྤྱོད་པ་ཐོབ་པར་བྱ་བ་དང༌། བྱང་ཆུབ་སེམས་དཔའི་དབང་པོ་ཐམས་ཅད་ཀྱི་མངོན་པར་ཤེས་པ་ཤིན་ཏུ་རྣོ་བར་བྱ་བ་ དང༌། བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་རྩ་བ་ཐམས་ཅད་མཁྱེན་པ་ཉིད་དུ་ཐུག་པར་འགྱུར་བར་བྱ་བའི་ཕྱིར་ཡོངས་སུ་བསྔོ་སྟེ། དེ་ལྟར་དགེ་བའི་རྩ་བ་དེ་དག་ཐམས་ཅད་ བྱང་ཆུབ་སེམས་དཔའ་རྣམས་ཀྱི་དོན་དུ་ཡོངས་སུ་བསྔོའོ། །དེ་ཡང་དགེ་བའི་རྩ་བ་ཆུང་དུ་ན་སེ་གོལ་གཏོགས་པ་ཙམ་དུ་སངས་རྒྱས་ཞི་བའི་སྒྲ་ཐོས་སམ། ཆོས་ཉན་ཏམ། འཕགས་ པའི་དགེ་འདུན་བསྙེན་བཀུར་བྱེད་དམ། གང་ཅི་ཡང་རུང་སྟེ། དགེ་བའི་རྩ་བ་དེ་དག་སེམས་ཅན་ཐམས་ཅད་ལ་བར་ཆད་མེད་པར་ཡོངས་སུ་བསྔོའོ། །སངས་རྒྱས་རྗེས་སུ་དྲན་པ་ཡོངས་སུ་ རྫོགས་པར་ཡོངས་སུ་བསྔོའོ། །ཆོས་རྗེས་སུ་དྲན་པ་རབ་ཏུ་སྦྱོར་བར་ཡོངས་སུ་བསྔོའོ། །འཕགས་པའི་དགེ་འདུན་རིམ་གྲོ་བྱ་བར་ཡོངས་སུ་བསྔོའོ། །སངས་རྒྱས་མཐོང་བ་དང་མི་ འབྲལ་བར་ཡོངས་སུ་བསྔོའོ། །སེམས་རྣམ་པར་དག་པར་ཡོངས་སུ་བསྔོའོ། །སངས་རྒྱས་ཀྱི་ཆོས་ཁོང་དུ་ཆུད་པར་ཡོངས་སུ་བསྔོའོ། །ཚད་མེད་པའི་ཡོན་ཏན་ལ་རབ་ཏུ་འཇུག་པའི་ ཕྱིར་ཡོངས་སུ་བསྔོའོ། །མངོན་པར་ཤེས་པ་དང༌། དགེ་བའི་རྩ་བ་རྣམ་པར་དག་པའི་ཕྱིར་ཡོངས་སུ་བསྔོའོ། །ཆོས་ཀྱི་ཐེ་ཚོམ་རྣམ་པར་བསལ་བའི་ཕྱིར་ཡོངས་སུ་བསྔོའོ། །ཇི་ལྟར་ ༄༅། །ཉན་ཐོས་དང༌། རང་སངས་རྒྱས་རྣམ་པར་དག་པ་བསྟན་པ་ལ་སྤྱོད་པའི་སེམས་ཅན་རྣམས་ལ་ཡོངས་སུ་བསྔོ་བ་དེ་བཞིན་དུ་བྱང་ཆུབ་སེམས་དཔའ་སེམས་ དཔའ་ཆེན་པོ་དེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལའང་ཡོངས་སུ་བསྔོ་སྟེ། འདི་ལྟར་སེམས་ཅན་དམྱལ་བའི་ལམ་རྣམ་པར་བཟློག་པའི་ཕྱིར་ཡོངས་སུ་བསྔོའོ། །བྱོལ་ སོང་གི་སྐྱེ་གནས་རྒྱུན་གཅད་པའི་ཕྱིར་ཡོངས་སུ་བསྔོའོ། །གཤིན་རྗེའི་འཇིག་རྟེན་རྩ་བ་ནས་གཅད་པའི་ཕྱིར་ཡོངས་སུ་བསྔོའོ། །ངན་སོང་གི་རྒྱུད་ཐམས་ཅད་མ་ལུས་པར་རྒྱུན་ གཅད་པའི་ཕྱིར་ཡོངས་སུ་བསྔོའོ། །སེམས་ཅན་དེ་དག་ཐམས་ཅད་ཀྱང་བླ་ན་མེད་པའི་བྱང་ཆུབ་ཏུ་མོས་ཤིང་ཕྱིར་མི་ལྡོག་པའི་ཕྱིར་ཡོངས་སུ་བསྔོའོ། །ལྷག་པའི་བསམ་པས་ ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རབ་ཏུ་འཐོབ་པར་བྱ་བའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་ཆོས་ཐམས་ཅད་མི་སྤང་བའི་ཕྱིར་ཡོངས་སུ་བསྔོའོ། །ཐམས་ཅད་ མཁྱེན་པའི་ས་ཤིན་ཏུ་བདེ་བ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཤིན་ཏུ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ ཅད་ཡེ་ཤེས་མཐའ་ཡས་པ་ཁོང་དུ་ཆུད་པར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་སེམས་དཔའ་ནི། དགེ་བའི་རྩ་བ་གང་ཡང་རུང་སྟེ། བྱང་ཆུབ་ཏུ་དམིགས་པ་དང་བྲལ་བའི་ སེམས་དང༌། ཐམས་ཅད་མཁྱེན་པར་དམིགས་པ་ལ་བརྩོན་པའི་ཡིད་ལ་བྱེད་པ་དང༌། བདག་གདུལ་བ་དང༌། ཕ་རོལ་གདུལ་བ་ལ་གཞོལ་བའི་ལྷག་པའི་བསམ་པ་དང༌། བདག་དང་གཞན་ ཡོངས་སུ་སྨིན་པར་སྦྱོར་བའི་ཐབས་མཁས་པ་དང༌། བྱང་ཆུབ་སེམས་དཔའི་ཚུལ་དང༌། ཡེ་ཤེས་ཀྱི་རྗེས་སུ་འབྲང་བས་ཡོངས་སུ་སྨིན་པར་བྱེད་པའི་རྣམ་པར་ཐར་པ་དང༌། སེམས་བསྐྱེད་ པ་གནས་པ་མེད་པ་དང་འགྲོགས་པའི་མཉམ་པར་གཞག་པ་དང༌། སྔོན་སྙིང་རྗེ་ཆེན་པོ་བསྐྱེད་པས་ཁྱིམ་ན་གནས་པ་དང༌། བྱམས་པའི་སེམས་དང་ལྡན་པས་རང་གི་ཆུང་མའི་རྗེས་སུ་ འབྲང་བ་དང༌། སྦྱོར་བ་ཉམས་པ་མེད་པ་དང༌། བྱང་ཆུབ་སེམས་དཔའི་ལམ་ཤིན་ཏུ་རྣམ་པར་དག་པས་རྩོམ་པ་དང༌། ཡང་དག་པར་རྩོམ་པ་དང༌། སྒྲུབ་པ་དང༌། ཡང་དག་པར་སྒྲུབ་ པ་དང༌། སྐྱེད་པ་དང༌། ཡང་དག་པར་སྐྱེད་པ་དང༌། དམིགས་པ་ཆེན་པོས་ཡང་དག་པར་སྡུད་པ་དང༌། གྲུབ་པར་བྱེད་པ་དང༌། རྒྱ་ཆེར་བྱེད་པ་དང༌། ཡོངས་སུ་རྫོགས་པར་བྱེད་པ་དང༌། ཁྱིམ་ ན་གནས་པ་དང༌། བུ་དང་འགྲོགས་ཤིང་གནས་པ་ན་འདི་ལྟར་ཡོངས་སུ་བསྔོ་སྟེ། བྱང་ཆུབ་སེམས་དཔའ་ཁྱིམ་ན་གནས་པའི་ཚེ་གང་ཅི་ཡང་རུང་སྟེ། གོས་དང༌། ཟས་དང༌། མལ་སྟན་དང༌། ནད་ཀྱི་རྐྱེན་སྨན་དང༌། ཡོ་བྱད་དང༌། འགྲོ་བ་དང༌། འོང་བ་དང༌། སྤྱོད་པ་དང༌། ལྡང་བ་དང༌། རྟེན་པ་དང༌། སྐྱེ་མཆེད་འབྱུང་བའི་ལས་དང༌། སྤྱོད་ལམ་ལ་གནས་པ་དང༌། སྤྱོད་ལམ་བརྟུལ་ ༄༅། །བ་དང༌། ལུས་དང་ངག་གི་ལས་སྤྱོད་པ་དང༌། དབང་པོ་དྲུག་བསྡམས་པ་དང༌། རང་གི་ལུས་ཕྱི་བ་དང༌། མཉེ་བ་དང༌། ཁྲུས་བྱེད་པ་དང༌། ཟོས་པ་དང༌། འཐུངས་ པ་དང༌། འཆོས་པ་དང༌། མྱངས་པ་དང༌། བརྐྱང་བ་དང༌། བསྐུམ་པ་དང༌། ལྟ་བ་དང༌། ཀུན་ཏུ་ལྟ་བ་དང༌། ལོག་པ་དང༌། སད་པ་དང༌། རང་གི་ལུས་བརྟན་པར་བྱ་བ་དེ་དག་ཐམས་ ཅད་བྱང་ཆུབ་སེམས་དཔའ་ཐམས་ཅད་མཁྱེན་པའི་སེམས་དང་ལྡན་པ། ཐམས་ཅད་མཁྱེན་པར་དམིགས་པ་ལ་བརྩོན་པ། སེམས་ཅན་ཐམས་ཅད་ལ་ཕན་པ་དང་བདེ་བར་སེམས་ པ༑ བྱང་ཆུབ་ཏུ་སྨོན་ལམ་ཚད་མེད་པ་བཏབ་པ། སེམས་ཚད་མེད་པ་དང་ལྡན་པ། དགེ་བའི་རྩ་བ་རྒྱ་ཆེན་པོ་ཡོངས་སུ་སྡུད་པ། འགྲོ་བ་ཐམས་ཅད་སྐྱོབ་པར་བརྩོན་པ། དགེ་བའི་ རྩ་བ་ལ་རྟག་ཏུ་བརྩོན་པ། རློམ་པ་དང༌། བག་མེད་པ་རྣམ་པར་བཟློག་པ། ཐམས་ཅད་མཁྱེན་པའི་ཆོས་ཉིད་ལ་རབ་ཏུ་བརྟེན་པ། རྣམ་པར་ཤེས་པ་དང༌། སེམས་བསྐྱེད་པ་དང༌། ཡིད་ལ་བྱེད་པ་གཞན་མེད་པ། སངས་རྒྱས་ཐམས་ཅད་ཀྱི་བྱང་ཆུབ་ལ་མངོན་པར་གནས་པ། ཉོན་མོངས་པའི་ཕྱོགས་ཐམས་ཅད་ལས་ཕྱིར་ཕྱོགས་པ། བྱང་ཆུབ་སེམས་དཔའ་ ཐམས་ཅད་ཀྱི་བསླབ་པ་ལ་སློབ་པའི་སེམས་དང་ལྡན་པ། ཐམས་ཅད་མཁྱེན་པའི་ལམ་ཉམས་པ་མེད་པ། ཡེ་ཤེས་ཀྱིས་ལ་བརྟེན་པ། བསྟན་པའི་གནས་དང་ལྡན་པ། དགེ་བའི་ རྩ་བས་ཤེས་རབ་ཆེ་བ། བུང་བ་བཞིན་དུ་དགེ་བའི་རྩ་བའི་ཚོགས་ཆེན་པོ་གསོག་པ། འགྲོ་བ་ཐམས་ཅད་ལས་རྒྱུད་ཤིན་ཏུ་འཕགས་པ། འདུ་བྱེད་ལ་མངོན་པར་ཞེན་པ་མེད་པ། དེ་བཞིན་ གཤེགས་པ་ཐམས་ཅད་ཀྱི་གདམས་ངག་མཐུན་པར་འཛིན་པས་ཐམས་ཅད་མཁྱེན་པ་ཉིད་དུ་མ་བསྔོས་པ་གང་ཡང་མེད་དེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་ན་ གནས་པའི་ཚེ་དགེ་བའི་རྩ་བ་དེ་དག་ཡང་དག་པར་སྡུད་ཅིང་སྒྲུབ་བོ། །ཡོངས་སུ་བསྔོ་སྟེ། དེ་ལྟར་དེ་ཆུང་དུ་ན་ཁྱིའི་ལམ་གྱི་རྒྱུད་དུ་གཏོགས་པ་དང༌། དེ་མ་ཡིན་པའི་བྱོལ་སོང་གི་རིས་སུ་ གཏོགས་པ་ལ་ཟས་སྣ་འགའ་མ། ཁམ་འགའ་ཡོངས་སུ་གཏོང་བ་བྱེད་ཀྱང་དེ་ཐམས་ཅད་དེ་དག་ཉིད་ལ་ཕན་པ་དང༌། དེ་དག་ཉིད་ལ་བདེ་བ་དང༌། བྱོལ་སོང་གི་སྐྱེ་གནས་དེ་དག་སྡུག་ བསྔལ་གྱི་རྒྱ་མཚོ་དེ་དག་དང༌། སྡུག་བསྔལ་གྱི་རྒྱུ་དེ་དག་དང༌། སྡུག་བསྔལ་གྱི་ཕུང་པོ་དེ་དག་དང༌། སྡུག་བསྔལ་གྱི་ཚོར་བ་དེ་དག་དང༌། སྡུག་བསྔལ་བསགས་པ་དེ་དག་དང༌། སྡུག་བསྔལ་ མངོན་པར་འདུ་བྱེད་པ་དེ་དག་དང༌། སྡུག་བསྔལ་གྱི་གཏེར་དེ་དག་དང༌། སྡུག་བསྔལ་གྱི་རྩ་བ་དེ་དག་དང༌། སྡུག་བསྔལ་གྱི་སྐྱེ་མཆེད་དེ་དག་ནས་སེམས་ཅན་དེ་དག་ཡོངས་སུ་སྒྲོལ་ཞིང་རྣམ་ པར་བཟློག་པའི་ཕྱིར་ཡོངས་སུ་བསྔོའོ། །དེ་ལ་དམིགས་པས་སེམས་ཅན་ཐམས་ཅད་མངོན་དུ་བྱེད་དོ། །དམིགས་པར་བྱེད་དོ། །ཡིད་ལ་བྱེད་དོ། །དགེ་བའི་རྩ་བ་དེ་དང་དེ་དག་ལའང་སྔོན་དུ་ ༄༅། །འགྲོ་བར་བྱེད་དེ། འདི་ལྟར་ཐམས་ཅད་མཁྱེན་པ་ཉིད་དུ་ཡོངས་སུ་བསྔོའོ། །བྱང་ཆུབ་ཏུ་སེམས་བསྐྱེད་པས་ཡོངས་སུ་འཛིན་ཏོ། །དགེ་བའི་རྩ་བ་དེ་དག་ལ་ ཉེ་བར་འཇོག་གོ །འཁོར་བའི་དགོན་པ་ལས་རྣམ་པར་བཟློག་གོ །སངས་རྒྱས་ཀྱི་བདེ་བ་བསྒྲིབས་པ་མེད་པ་ཡང་མངོན་དུ་བྱེད་དེ། འཁོར་བའི་རྒྱུད་ལས་འབྱིན་པར་བྱེད་དོ། །སངས་ རྒྱས་ཀྱི་ཆོས་ལ་བརྩོན་པའི་བྱམས་པས་ཀྱང་ཡོངས་སུ་རྒྱས་པར་བྱེད་དོ། །སྙིང་རྗེ་ཆེན་པོས་ཀྱང་དེ་དག་ལ་སྙིང་བརྩེ་བར་བྱེད་དེ། བདེ་བ་རྣམ་པར་དག་པའང་དེ་དག་ལ་ཡོངས་སུ་བསྔོའོ།། དགེ་བའི་རྩ་བ་ཡོངས་སུ་བསྲུང་བར་བྱ་བའི་ཕྱིར་ཡང་རབ་ཏུ་འཇུག་སྟེ། དེ་དག་སངས་རྒྱས་ཀྱི་ཆོས་ལ་ཉེ་བར་སྡུད་དོ། །དེ་དག་བདུད་ཀྱི་ཡུལ་ལས་རྣམ་པར་བཟློག་གོ། དེ་དག་ དེ་བཞིན་གཤེགས་པའི་ཡུལ་ལ་འཇུག་པར་བྱེད་དོ། །དེ་དག་འཇིག་རྟེན་གྱི་རྒྱུད་ཐམས་ཅད་ལས་གྱེན་དུ་སྐྱོད་པར་བྱེད་དོ། །དེ་དག་དེ་བཞིན་གཤེགས་པ་ཐམས་ཅད་ཀྱི་རིགས་ལ་ ཡང་དག་པར་སྒྲུབ་པར་བྱེད་དོ། །དེ་དག་དུས་གསུམ་མཉམ་པ་ཉིད་ལ་རབ་ཏུ་གཞོག་སྟེ། དེ་ལྟར་བྱང་ཆུབ་སེམས་དཔའ་དགེ་བའི་རྩ་བ་གང་ཅི་ཡང་རུང་སྟེ་ཡང་དག་པར་བསྒྲུབས་ པ་དང༌། ཡང་དག་པར་སྒྲུབ་པར་འགྱུར་བ་དེ་དག་ཐམས་ཅད་འདི་ལྟར་ཡོངས་སུ་བསྔོ་སྟེ། འདི་སྙམ་དུ་སེམས་བསྐྱེད་དེ། ཇི་ལྟར་འདས་པའི་སངས་རྒྱས་རྣམས་ཀྱིས་སྔོན་བྱང་ ཆུབ་སེམས་དཔའི་སྤྱད་པ་ལ་སྤྱོད་ཅིང་སངས་རྒྱས་ལ་རིམ་གྲོ་མཛད་པའི་དམིགས་པ་དང༌། དགེ་བའི་རྩ་བ་ཐམས་ཅད་ཀྱི་དམིགས་པ་ལ་བརྩོན་པར་མཛེད་པའི་ཚེ་གཟུགས་ལ་གནས་པ་ མེད་པ་དང༌། ཚོར་བ་ལ་མངོན་པར་མ་ཆགས་པ་དང༌། འདུ་ཤེས་ཀྱི་རྣམ་པ་ཕྱིན་ཅི་ལོག་མེད་པ་དང༌། འདུ་བྱེད་མངོན་པར་འདུ་བྱ་བ་མེད་པ་དང༌། རྣམ་པར་ཤེས་པ་མངོན་པར་ཆགས་ པ་མེད་པ་དང༌། སྐྱེ་མཆེད་དྲུག་ལས་གྱེན་དུ་འཕགས་པ་དང༌། འཇིག་རྟེན་གྱི་ཆོས་དང་མི་འགྲོགས་པ་དང༌། འཇིག་རྟེན་ལས་འདས་པར་ཡོངས་སུ་བསྔོ་བ་དང༌། ནམ་མཁའ་ལྟ་བུའི་ཆོས་ འབྱམས་ཀླས་པ་རབ་ཏུ་མཁྱེན་པ་དང༌། ཆོས་ཐམས་ཅད་གནས་མེད་པར་རབ་ཏུ་རྟོགས་པ་དང༌། ཆོས་ཐམས་ཅད་མ་སྐྱེས་པས་འབྱུང་བ་དང༌། ཆོས་ཐམས་ཅད་མ་འགགས་པར་ གཟིགས་པ་དང༌། མི་བདེན་པའི་ཆོས་ཐམས་ཅད་ལ་མངོན་པར་ཆགས་པ་ལས་གྱེན་དུ་འཕགས་པ་དང༌། ཆོས་ཐམས་ཅད་མི་བརྫུན་ཞིང་བདེན་པར་གཟིགས་པ་དང༌། ཆོས་ཐམས་ ཅད་འཕོ་བ་མེད་པ་ལ་ཤིན་ཏུ་མོས་པ་དང༌། ཆོས་ཐམས་ཅད་ཀྱི་ཡང་དག་པའི་མཐའ་མ་ཉམས་པ་ལ་གནས་པ་དང༌། ཆོས་ཐམས་ཅད་མཚན་ཉིད་མེད་པའི་མཚན་ཉིད་ལས་ ཤིན་ཏུ་འཕགས་པ་དང༌། ཆོས་དེ་ལྟ་བུའི་མཚན་ཉིད་ཅན་ཐམས་ཅད་རང་བཞིན་མེད་པའི་རང་བཞིན་དུ་རྟོགས་པ་དང༌། སྒོ་ཀུན་ནས་དགེ་བའི་རྩ་བ་ཡང་དག་པར་སྒྲུབ་པ་ལ་བརྩོན་པ་ ༄༅། །དང༌། དེ་བཞིན་གཤེགས་པའི་དཀྱིལ་འཁོར་གྱིས་གཟིགས་པ་ཐམས་ཅད་ལ་ཤིན་ཏུ་གཞོལ་བས་དགེ་བའི་རྩ་བ་དེ་དག་ཡོངས་སུ་བསྔོས་པ་དེ་བཞིན་ དུ་བདག་གིས་ཀྱང་ཆོས་ཉིད་དེ་དག་ཁོ་ན་ལ་མོས་པར་བྱས་ཏེ། ཆོས་དེ་ལྟ་བུ་ལ་བརྩོན་པའི་སེམས་བསྐྱེད་པ། ཆོས་ཐམས་ཅད་དང་མི་འགལ་བ། སྒྱུ་མ་ལྟ་བུའི་ཆོས་ལས་ བྱུང་བ་དང༌། མིག་ཡོར་དང༌། ཆུ་ཟླ་ལྟ་བུའི་རྗེས་སུ་སོང་བ་དང༌། མེ་ལོང་གི་དཀྱིལ་འཁོར་ལ་གདོང་གི་དཀྱིལ་འཁོར་ཡོད་པ་ལྟ་བུའི་རྒྱུ་དང་ལྡན་པའི་མཐུ་དང༌། དེ་བཞིན་ གཤེགས་པའི་སའི་མཐར་ཕྱིན་པར་ལས་ཀྱི་རྒྱུད་ཡོངས་སུ་བསྔོའོ། །ཞེས་སེམས་བསྐྱེད་དེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདས་པའི་སངས་ རྒྱས་བཅོམ་ལྡན་འདས་རྣམས་ཀྱི་རྗེས་སུ་སློབ་ཅིང༌། དགེ་བའི་རྩ་བ་དེ་དག་ཡོངས་སུ་བསྔོའོ། །འདས་པ་རྣམས་ལ་ཇི་ལྟ་བ་དེ་བཞིན་དུ་མ་བྱོན་པ་དང༌། དེ་བཞིན་དུ་ད་ལྟར་ བྱུང་བ་དང༌། དེ་བཞིན་དུ་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་བསྔོ་བའི་རྗེས་སུ་བསླབ་སྟེ་དགེ་བའི་རྩ་བ་དེ་ དག་ཡོངས་སུ་བསྔོའོ། །ཡང་འདི་ལྟར་སེམས་བསྐྱེད་དེ། སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་དགེ་བའི་རྩ་བ་འདི་ལྟར་ཡོངས་སུ་བསྔོའོ། ། ཞེས་བྱ་བར་ཐུགས་སུ་ཆུད་པ་དེ་ལྟ་བུའི་བསྔོ་བ་རབ། དམ་པ། མཆོག །བླ་ན་མེད་པ། མཉམ་པ་མེད་པ། མི་མཉམ་པ་དང་མཉམ་པ། འདྲ་བ་མེད་པ། མཚུངས་པ་མེད་པ། གཙོ་ བོར་གྱུར་པ། ཐུ་བོར་གྱུར་པ། ཀུན་ཏུ་སྙོམས་པ། མི་མཉམ་པ་མེད་པ། བདག་ཉིད་ཆེ་བ། ཤིན་ཏུ་ཡངས་པ། དགེ་བ། རྣམ་པར་དག་པ། ཁ་ན་མ་ཐོ་བ་མེད་པ་བརྗོད་དུ་མེད་པས་ཡོངས་སུ་ བསྔོའོ། །སྙམ་དུ་སེམས་བསྐྱེད་དེ། བྱང་ཆུབ་སེམས་དཔའ་དགེ་བའི་རྩ་བ་དེ་ལྟར་ཡོངས་སུ་བསྔོ་བ་ནི་ལུས་ཀྱི་ལས་རྣམ་པར་དག་པས་ལུས་རྣམ་པར་དག་པ་ཡིན། ངག་གི་ལས་རྣམ་ པར་དག་པས་ངག་རྣམ་པར་དག་པ་ཡིན། ཡིད་ཀྱི་ལས་རྣམ་པར་དག་པས་ཡིད་རྣམ་པར་དག་པ་ཡིན། ཁ་ན་མ་ཐོ་བ་མེད་པ་ལ་གནས་པས་བྱང་ཆུབ་སེམས་དཔའི་སྤྱོད་པ་ལ་གནས་པ་ ཡིན༑ ཁ་ན་མ་ཐོ་བ་མེད་པའི་ལས་དང་ལྡན་པས་དགེ་བའི་རྩ་བ་ལ་བརྩོན་པ་ཡིན། ཐམས་ཅད་མཁྱེན་པ་ཉིད་ལ་རབ་ཏུ་བརྩོན་པས་སེམས་ཉམས་པ་མེད་པ་ཡིན། ཆོས་ཐམས་ཅད་ བྱེད་པ་མེད་པར་ཞུགས་པས་ཤིན་ཏུ་ཆེ་བ་ལ་གནས་པ་ཡིན། འཇིག་རྟེན་གྱི་ཆོས་ཀྱིས་མ་གོས་པ་འཇིག་རྟེན་ལས་འདས་པའི་ཆོས་དང་འབྱོར་པ་ཡིན། ཡེ་ཤེས་དང་མངོན་ པར་ཤེས་པའི་ལས་དང་ལྡན་པས་ལས་འབྱམས་ཀླས་པ་མཐའ་དང་དབུས་མེད་པ་ཐམས་ཅད་རབ་ཏུ་ཤེས་པ་ཡིན། གནས་པ་ཐམས་ཅད་ཡང་དག་པར་བཅོམ་པས་ཡོངས་སུ་ ༄༅། །བསྔོ་བ་ལ་མཁས་པ་ཡིན་ཏེ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་གསུམ་པ་སངས་ རྒྱས་ཐམས་ཅད་ལ་ཡང་དག་པར་བསྐྱེད་པ་ཞེས་བྱ་བ་སྟེ། བསྔོ་བ་དེ་ལ་གནས་པའི་སེམས་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། དེ་བཞིན་གཤེགས་ པའི་འཕྲིན་ལས་ཀྱི་ཟིལ་དང་ལྡན་པ་ཡིན། སངས་རྒྱས་ཀྱི་ཕུན་སུམ་ཚོགས་པ་ལ་ཞུགས་པ་ཡིན། ཡེ་ཤེས་ཀྱི་ཡུལ་ལ་ཞུགས་པ་ཡིན། བྱང་ཆུབ་སེམས་དཔའི་ལས་ དང་མ་བྲལ་བ་ཡིན། ཐབས་མཁས་པ་རྣམ་པར་དཔྱོད་པ་ལ་མཁས་པ་ཡིན། ཆོས་ཀྱི་དབྱིངས་ལ་རབ་ཏུ་ཞུགས་པ་ཡིན། བྱང་ཆུབ་སེམས་དཔས་ཡོངས་སུ་སྨིན་པར་ བྱ་བའི་མཚམས་སྦྱོར་བ་ལ་མཁས་པ་དང་ལྡན་པ་ཡིན། དེ་བཞིན་གཤེགས་པ་ཐམས་ཅད་ཀྱི་རིགས་དང་རྒྱུད་དུ་ཆུད་པ་ཡིན། ཆོས་ཐམས་ཅད་ཀྱི་རྒྱུད་མཐའ་དང་དབུས་ མེད་པ་ལ་མཁས་པས་རབ་ཏུ་དབྱེ་བ་ཁོང་དུ་ཆུད་པ་ཡིན། འཇིག་རྟེན་དུ་སྐྱེ་བར་སྣང་ཡང་འཇིག་རྟེན་གྱི་ཆོས་ཀྱིས་མི་བརྗོད་པ་ཡིན་ནོ། །དེ་ནས་བྱང་ཆུབ་སེམས་དཔའ་རྡོ་ རྗེའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་བསྔོ་བ་བསླབ་ལ་བསླབ་པ་ སྟེ༑ ༑སྐྱེས་བུའི་གཙོ་བོ་ཇི་སྙེད་འདས་པ་དང༌། །གང་དག་མ་བྱོན་གང་དག་བཞུགས་པ་རྣམས། །དེ་དག་སྤྱོད་པའི་རྗེས་སུ་དཔའ་བ་སློབ། །བདེ་བ་ཇི་སྙེད་གང་དག་རྒྱུ་བ་དང༌། །སྐྱེས་བུའི་གཙོ་ བོས་གང་དང་རབ་བསྔགས་པ། །མིག་ཏུ་འོང་ཞིང་དག་པ་རྒྱ་ཆེན་རྣམས། །འཇིག་རྟེན་མཁྱེན་པ་རྣམ་པ་ཡོངས་སུ་བསྔོ། །ལུས་ཀྱི་བདེ་བ་གང་དག་གཤེགས་པ་དང༌། །མིག་བདེ་དེ་ བཞིན་རྣ་བའི་བདེ་བ་དང༌། །སྣ་དང་ལྕེ་ཡི་བདེ་བ་མཐའ་ཡས་པ། །དེ་དག་རྒྱལ་བ་ཀུན་ལ་ཡོངས་སུ་བསྔོ། །འགྲོ་བ་ཀུན་ན་དགེ་བ་གང་ཡོད་པ། །སྐྱེས་བུ་འདུལ་བས་ཐུགས་སུ་ཆུད་པ་ རྣམས༑ ༑དེ་དག་ཐམས་ཅད་མ་ལུས་བསྡུ་བྱས་ཏེ། །འཇིག་རྟེན་ཕན་ཕྱིར་དེ་ལ་རྗེས་སུ་དགའ། །འཇིག་རྟེན་མཁྱེན་པའི་དེ་ལ་དགར་བྱས་ནས། །སྐྱེས་བུ་སེངྒེའི་བདེ་བ་གང་མངའ་ བ༑ ༑དེ་འདྲའི་བདེ་དང་འགྲོ་བ་ལྡན་འགྱུར་ཞེས། །འགྲོ་བ་ཀུན་ལ་དེ་དག་བསྔོ་བ་བྱེད། །འཇིག་རྟེན་དག་ན་བདེར་འགྱུར་གང་ཡོད་པ། །སྐྱེས་བུའི་དམ་པས་ཐུགས་སུ་ཆུད་པ་རྣམས། ། བདེ་བ་དེ་དང་འགྲོ་ཀུན་ལྡན་འགྱུར་ཏེ། །འཇིག་རྟེན་སྣོན་མ་བཞིན་དུ་ཀུན་གྱུར་ཅིག །བདེ་བ་དེ་དག་ཡོངས་སུ་བསྔོ་བྱེད་ཀྱང༌། །མཚུངས་མེད་རྟག་ཏུ་འགྲོ་ཕན་བྱེད་པ་དག །སེམས་ཅན་ ཕན་པར་རྟག་ཏུ་ཞུགས་པ་རྣམས། །ཡོངས་སུ་བསྔོ་བས་རློམ་སེམས་ནམ་ཡང་མེད། །དེ་ལྟར་དེ་དག་ཡོངས་སུ་བསྔོ་བ་ན། །ཚེ་རབས་སྐྱེས་བུ་སེངྒེ་ཅི་འདྲ་བ། །དེ་འདྲའི་དམ་པར་བསོད་ ༄༅། །ནམས་འདི་གྱུར་ཅེས། །སྙིང་རྗེ་ཆེན་པོས་སེམས་ཀྱང་ཡོངས་སུ་བསྐྱེད། །འཇིག་རྟེན་འདི་ན་བྱང་ཆུབ་སྤྱད་སྤྱོད་ཅིང༌། །འགྲོ་བ་དག་ཏུ་ཇི་ལྟར་ལས་ བསྒྲུབས་པས། །རྒྱལ་བས་ཇི་ལྟར་མཁྱེན་པ་མཚུངས་མེད་པའི། །བདེ་བ་ཀུན་དང་འབྲལ་བར་མ་གྱུར་ཅིག །གང་ཡང་འགྲོ་བ་ཀུན་ན་ཡོད་པ་ཡི། །སྐྱེ་མཆེད་བསྔམས་[*BSDAMS] པ་ཡང་ དག་སྐྱེས་པ་རྣམས། །ཡེ་ཤེས་ངང་གིས་བསླབ་བྱ་བསླབ་པ་དག །སྐྱེ་རྒུ་ཀུན་ལ་ཕན་ཕྱིར་ཡོངས་སུ་བསྔོ། །ལུས་དང་ངག་དང་ཡིད་ཀྱི་ལས་ཀྱི་རྣམས། །གང་ཡང་རུང་བའི་ ལམ་ན་ཡོད་པ་དག །ཡེ་ཤེས་ངང་གིས་བསླབ་བྱ་བསླབ་པ་རྣམས། །གཏི་མུག་མེད་པས་ཡོངས་སུ་བསྔོ་བ་བྱེད། །ཇི་སྙེད་དེ་དག་རབ་ཏུ་སྤྱོད་པ་རྣམས། །རྒྱལ་སྲས་ རྣམས་ཀྱིས་ཡང་དག་བསྡུ་བྱ་བ། །དེ་ནི་མཚུངས་མེད་རྒྱལ་བའི་རྗེས་སུ་འབྱུང༌། །དེ་དག་ཞི་བའི་ཡིད་ཕྱིར་ཡོངས་སུ་བསྔོ། །འཇིག་རྟེན་ཐམས་ཅད་མ་ལུས་བསྡུ་བྱས་ཏེ། ། འགྲོ་ཡངས་འདི་ན་ཇི་སྙེད་དགེ་ཡོད་པ། །བདེ་བ་དེ་དང་ཡོངས་སུ་ལྡན་པའི་ཕྱིར། །དེ་ལ་དེ་དག་ཡོངས་སུ་བསྔོ་བ་བྱེད། །བདག་ལ་བདེ་བ་ནམ་ཡང་མི་ཚོལ་ཏེ། །བདེ་བ་ཀུན་ལའང་ རྟག་པར་རབ་ཏུ་ཞུགས། །སྤྲོས་པ་རྣམས་ལ་ནམ་ཡང་མོས་པ་མེད། །བདག་མེད་ཆོས་ལའང་རྟག་པར་འཇུག་པ་ཡིན། །རྒྱལ་བ་ཀུན་གྱིས་ཇི་སྙེད་གཟིགས་པ་ཡི། །རྒྱལ་ སྲས་ཇི་སྙེད་ཡོད་པ་དེ་དག་ཕྱིར། །མྱུར་དུ་མ་ལུས་སངས་རྒྱས་གྱུར་ཅིག་ཅེས། །བསོད་ནམས་དེ་དག་ཡོངས་སུ་བསྔོ་བ་བྱེད། །བདག་གིས་ལེགས་བསགས་ལས་ནི་གང་ཡོད་པ། །དེ་ཡིས་ འཇིག་རྟེན་མ་ལུས་ཐམས་ཅད་ཀྱི། །ལམ་རྒྱུད་འགྲོ་བར་གཏོགས་པའི་སེམས་ཅན་རྣམས། །དེ་དག་མ་ལུས་མི་ཡི་གཙོར་གྱུར་ཅིག །སྨོན་ལམ་མང་པོ་ཇི་སྙེད་གང་ཡོད་པ། །མཚུངས་པ་ མེད་པའི་རྒྱལ་བས་བསྟན་པ་རྣམས། །རྒྱལ་སྲས་བསམ་པ་ཡོངས་སུ་གྲུབ་གྱུར་ཏེ། །སྨོན་ལམ་དེ་དག་རྣམ་པར་དག་གྱུར་ཅིག །འཇིག་རྟེན་ཇི་སྙེད་ལས་ཀྱིས་རྣམ་བྲིས་པ། །ཕྱོགས་ན་ ཡོད་པ་ཐམས་ཅད་མཐོང་ནས་ཀྱང༌། །དེ་དག་ཡོངས་བཙལ་བསླབ་བྱ་བསླབ་པ་རྣམས། །མ་ལུས་བསོད་ནམས་ཐམས་ཅད་ཡོངས་སུ་བསྔོ། །གཉིས་ཀྱི་ཆོས་ཀྱིས་འཇལ་བར་མི་བྱེད་དེ། ། གཉིས་མེད་ཆོས་ནི་དེ་དག་མངོན་པར་ཤེས། །གཉིས་སུ་ཡོད་དང་གཉིས་སུ་མེད་པ་ལ། །རྒྱལ་སྲས་དེ་དག་བསམ་པ་མི་སྟོན་ཏོ། །འགྲོ་བའི་འདུ་ཤེས་རྒྱུ་བ་ཇི་སྙེད་པའི། །མ་ལུས་འཇིག་ རྟེན་འདུ་ཤེས་འདུལ་བྱེད་ཀྱང༌། །འགྲོ་བའི་འདུ་ཤེས་རྒྱུ་བ་རབ་རྟོགས་པས། །འདུ་ཤེས་ཡོད་མིན་འདུ་ཤེས་མེད་མི་འགྱུར། །དེ་དག་ལུས་ཀྱིས་ཡོངས་སུ་དག་གྱུར་ཅིང༌། །དེ་དག་ཡིད་ ཀྱང་ཡོངས་སུ་དག་པ་ཡིན། །དེ་དག་ངག་གིས་ཤིན་ཏུ་བསྡམས་བྱས་ཤིང༌། །དེ་དག་ཡིད་ཀྱིས་ཡོངས་སུ་དག་པ་ཡིན། །དེ་དག་བདེ་གཤེགས་མྱ་ངན་འདས་པ་དྲན། །མ་བྱོན་སངས་ ༄༅། །རྒྱས་དེ་དག་རྗེས་སུ་སེམས། །ཕྱོགས་བཅུ་དག་ན་བཞུགས་པའི་སངས་རྒྱས་ཀྱང༌། །དེ་དག་རྗེས་སློབ་ཆོས་རྣམས་སྟོན་པ་བྱེད། །དུས་གསུམ་རྒྱལ་བ་ཡེ་ ཤེས་མཁས་པ་རྣམས། །ཆགས་པ་མེད་པའི་ཐུགས་ཀྱིས་ཇི་ལྟ་བུར། །བྱང་ཆུབ་དོན་ཕྱིར་འཕྲིན་ལས་སྒྲུབ་མཛད་པ། དེ་དག་འཇིག་རྟེན་ཕན་ཕྱིར་ཡོངས་སུ་བསྔོ། །མཆོག་གི་ བློ་དང་ཚུལ་ཁྲིམས་ལྡན་པའི་བློ། །བདེན་པའི་བློ་དང་གཞན་དུ་མི་འགྱུར་བློ། །ཡང་དག་བློ་དང་རྣམ་པར་དག་པའི་བློ། །དེ་འདྲའི་བློ་ཡི་དམ་པས་ཡོངས་སུ་བསྔོ། །སངས་རྒྱས་ཐམས་ ཅད་ལ་ཡང་དག་པར་བསྐྱེད་པ་ཞེས་བྱ་བ་སྟེ། ཡོངས་སུ་བསྔོ་བ་གསུམ་པའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཡོངས་སུ་ བསྔོ་བ་བཞི་པ་ཐམས་ཅད་རྗེས་སུ་སོང་བ་ཞེས་བྱ་བ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་ལ་བརྩོན་པར་ བྱེད་པའི་ཚེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། འདི་ལྟར་ཡང་དག་པའི་མཐའ་ཐམས་ཅད་དུ་རྗེས་སུ་སོང་ཞིང་དངོས་པོ་ཐམས་ཅད་ཀྱི་རྗེས་སུ་སོང་བ་དང༌། འགྲོ་བ་ཐམས་ ཅད་ཀྱི་རྗེས་སུ་སོང་བ་དང༌། སེམས་ཅན་ཐམས་ཅད་ཀྱི་རྗེས་སུ་སོང་བ་དང༌། ཞིང་ཐམས་ཅད་ཀྱི་རྗེས་སུ་སོང་བ་དང༌། ཆོས་ཐམས་ཅད་ཀྱི་རྗེས་སུ་སོང་བ་དང༌། ནམ་མཁའ་ཐམས་ ཅད་ཀྱི་རྗེས་སུ་སོང་བ་དང༌། དུས་གསུམ་ཐམས་ཅད་ཀྱི་རྗེས་སུ་སོང་བ་དང༌། འདུས་བྱས་དང་འདུས་མ་བྱས་ཐམས་ཅད་ཀྱི་རྗེས་སུ་སོང་བ་དང༌། སྤྱོད་པའི་སྒྲ་ཐམས་ཅད་ཀྱི་རྗེས་སུ་སོང་ བ་དེ་བཞིན་དུ་དགེ་བའི་རྩ་བ་འདི་ཡང་དུས་གསུམ་གྱི་སངས་རྒྱས་སྐྱེ་བ་ཐམས་ཅད་དུ་རྒྱས་པར་ཁྱབ་པར་གྱུར་ཅིག །འདས་པའི་དུས་ཀྱི་སངས་རྒྱས་ཐམས་ཅད་མཆོད་ཅིང་བསྙེན་བཀུར་ བའི་རྒྱུར་གྱུར་ཅིག། མ་འོངས་པའི་དུས་ཀྱི་སངས་རྒྱས་ཐམས་ཅད་ཀྱི་སྨོན་ལམ་ཡོངས་སུ་རྫོགས་པའི་རྒྱུར་གྱུར་ཅིག །ད་ལྟར་བྱུང་བའི་དུས་ཀྱི་འཇིག་རྟེན་གྱི་ཁམས་ནམ་མཁའི་ དབྱིངས་ཀྱིས་ཀླས་པ། ཆོས་ཀྱི་དབྱིངས་ཀྱི་མཐས་གཏུགས་པ། ལྷ་རྫས་དང་ལྷ་རྫས་མ་ཡིན་པའི་རིམ་གྲོ་འབྱམས་ཀླས་པ་དང་ལྡན་པ། སངས་རྒྱས་ཐམས་ཅད་མངོན་དུ་གྱུར་བའི་སངས་ རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་གྱི་དེ་བཞིན་གཤེགས་པ་ཐམས་ཅད་ཀྱི་རྒྱན་རྣམ་པར་དགོད་པའི་རྒྱུར་གྱུར་ཅིག །བློ་བདག་ཉིད་ཆེ་བ་ལ་མོས་ཤིང་ཤིན་ཏུ་ཡངས་པའི་དོན་དུ་ སྒྲིབ་པ་མེད་པའི་དགེ་བའི་རྩ་བ་ཐམས་ཅད་རྒྱ་ཆེར་ཡོངས་སུ་བསྔོ་བའི་ཕྱིར་འཇིག་རྟེན་གྱི་ཁམས་མཐའ་དང་དབུས་མེད་པ་ཐམས་ཅད་སེམས་བསྐྱེད་པས་རྒྱས་པར་གྱུར་ཅིག །སངས་རྒྱས་ བཅོམ་ལྡན་འདས་གང་ཇི་སྙེད་ཆོས་ཀྱི་དབྱིངས་མཐའ་དང་དབུས་མེད་པའི་འཇིག་རྟེན་གྱི་ཁམས་དང༌། ནམ་མཁའི་དབྱིངས་འབྱམས་ཀླས་པ་ལ་རབ་ཏུ་གནས་པའི་འཇིག་རྟེན་གྱི་ཁམས་ཀྱི་རྒྱུད་ ༄༅། །དང༌། ལས་གཞན་དང་གཞན་གྱིས་ཤིན་ཏུ་བསྒྲུབས་པའི་ཕྱོགས་འབྱམས་ཀླས་པ་དང༌། འཇིག་རྟེན་གྱི་ཁམས་བརྗོད་དུ་མེད་པར་རྣམ་པར་རྒྱུ་བའི་འཇིག་རྟེན་གྱི་ ཁམས་དང༌། སངས་རྒྱས་ཀྱི་ཞིང་བརྗོད་དུ་མེད་པའི་འཇིག་རྟེན་གྱི་ཁམས་ཀྱི་ཁོངས་མཐའ་ཡས་པ་དང༌། སངས་རྒྱས་ཀྱི་དམིགས་པ་ལ་གནས་པའི་འཇིག་རྟེན་གྱི་ཁམས་དུ་མ་དང༌། འཇིག་རྟེན་གྱི་ཁམས་སྣ་ཚོགས་འབྱམས་ཀླས་པ་དང༌། ས་མཚམས་མེད་པའི་འཇིག་རྟེན་གྱི་འཁོར་དང༌། སྣྲེལ་ཞིར་རྒྱུ་བའི་འཇིག་རྟེན་གྱི་ཁམས་མངོན་པར་གྲུབ་པ་དང༌། སྤྱིའུ་ ཚུགས་སུ་རྒྱུ་བའི་ཕྱོགས་ཀྱི་འཁོར་གྱི་རྒྱུད་ཀྱི་འཇིག་རྟེན་གྱི་ཁམས་འབྱམས་ཀླས་པ་དང༌། སེམས་ཅན་གྱི་འཁོར་མཐའ་དང་དབུས་མེད་པའི་འཇིག་རྟེན་གྱི་ཁམས་འབྱམས་ཀླས་ པ་ཤིན་ཏུ་བསྟན་པ་ཐམས་ཅད་མ་ལུས་པ་དེ་དག་ན་བཞུགས་ཤིང་འཚོ་བ་དང༌། སངས་རྒྱས་ཀྱི་འཕྲུལ་པ་དང༌། ཆོ་འཕྲུལ་ཡང་དག་པར་སྟོན་པ་དང༌། བྱང་ཆུབ་སེམས་དཔའ་དེ་ དག་ཆོས་ཀྱི་དབྱིངས་མ་ལུས་པ་དང༌། ནམ་མཁའི་དབྱིངས་སུ་རྩ་བ་མ་རྙེད་པ་འགྲོ་བ་ཐམས་ཅད་ཡོངས་སུ་གཟུང་བར་སྒྲུབ་པའི་དེ་བཞིན་གཤེགས་པའི་བྱིན་གྱི་རླབས་ཡང་དག་པར་ སྟོན་པ༑ སངས་རྒྱས་ཀྱི་གཟིགས་པ་ཡེ་ཤེས་འབྱམས་ཀླས་པའི་མངོན་པར་ཤེས་པས་ཐུགས་སུ་ཆུད་པ། རབ་ཏུ་བརྗོད་པ་རྣམ་པར་འཕྲུལ་པ་མཐའ་དང་དབུས་མེད་པས་རབ་ཏུ་ བྱུང་བ༑ ཆོས་ཐམས་ཅད་ཀྱི་རང་བཞིན་གྱི་རྗེས་སུ་སོང་བ་ཐ་མི་དད་པའི་ཆོས་ཀྱི་དབྱིངས་གཞི་མཉམ་པ་ལ་རབ་ཏུ་ཞུགས་པ། དེ་བཞིན་གཤེགས་པའི་སྙིང་པོའི་ལུས་སུ་གཅིག་པ། ཆོས་ ཐམས་ཅད་ཀྱི་རབ་ཏུ་ཞུགས་པ་མེད་པ། འགྲོ་བ་ཐམས་ཅད་ལ་ཡང་དག་པར་སྟོན་པས་ན། ཕྱིར་ལྡོག་པ་མེད་པར་འཇིག་རྟེན་གྱི་ཁམས་ཐམས་ཅད་མངོན་པར་སྒྲུབ་པ་ལ་མཁས་པ་ཐུགས་ སུ་ཆུད་པས་ཐམས་ཅད་མངོན་པར་མཁྱེན་པ། ཆོས་ཐམས་ཅད་ཀྱི་རང་བཞིན་གྱིས་ཤིན་ཏུ་འཕགས་པ། སྒྲིབ་པ་མེད་པའི་བྱིན་གྱི་རླབས་ཀྱིས་ཕྱིར་མི་ལྡོག་པ། སངས་རྒྱས་ཀྱི་དགེ་བའི་རྩ་ བ་ཡང་དག་པར་བྱུང་བའི་ཕྱིར་ཆགས་པ་མེད་པར་གཟིགས་པའི་བདག་ཉིད་ཆེ་བ་ཅན་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་མེ་ཏོག་གམ། སྤོས་སམ། ཕྲེང་བའམ། བྱུག་པའམ། གདུགས་སམ། རྒྱལ་མཚན་ནམ། བ་དན་ནམ། རིན་པོ་ཆེའམ། མེ་མར་ གྱིས་དེ་བཞིན་གཤེགས་པའི་སྐུའམ། མཆོད་རྟེན་ཡང་རུང་སྟེ། དམིགས་པ་ཚད་མེད་པས་སྦྱར་བའི་དགེ་བའི་རྩ་བའི་ཚོགས་ཐམས་ཅད་ཀྱིས་དགེ་བའི་རྩ་བ་གང་དང་གང་སྐྱེས་ཀྱང་རུང་སྟེ། འཁྲུག་པ་མེད་པའི་སེམས་དང༌། རྩེ་གཅིག་ཏུ་གྱུར་པའི་སེམས་དང༌། གཡོ་བ་མེད་པའི་སེམས་དང༌། རྨོངས་པ་མེད་པའི་སེམས་དང༌། མི་སྒུལ་བའི་སེམས་དང༌། གནས་མེད་ ༄༅། །པའི་སེམས་དང༌། མི་གནས་པའི་སེམས་དང༌། སྲོག་མེད་པའི་སེམས་དང༌། མི་གཡེང་བའི་སེམས་དང༌། ཞི་བའི་སེམས་སུ་བྱས་ཏེ། འདི་ལྟར་ཡོངས་སུ་ བསྔོ་ཞིང་འདི་སྙམ་དུ་དགེ་བའི་རྩ་བ་འདི་ཆོས་ཀྱི་དབྱིངས་ཤིན་ཏུ་བསྟན་པས་འདུས་པའི་སངས་རྒྱས་ཐམས་ཅད་ཐམས་ཅད་མཁྱེན་པའི་བྱང་ཆུབ་ཀྱིས་འདུས་པའི་མིང་མང་པོ་དང༌། ཚིག་དང་ངེས་པའི་ངག་མཐའ་ཡས་པ་དང༌། དུས་ཐ་དད་པར་མངོན་པར་འཚང་རྒྱ་བའི་དེ་བཞིན་གཤེགས་པ་ཕྱི་མའི་མཐར་ཐུག་པའི་བསྐལ་པར་བྱིན་གྱིས་བརླབས་པའི་སྐུ་ཚེའི་ ཚང་དང༌། མཐའ་དང་དབུས་མེད་པར་ཤིན་ཏུ་བསྟན་པའི་སྔོན་གྱི་མཐའ་དང༌། ཕྱི་མའི་མཐའ་དང༌། ད་ལྟར་བྱུང་བའི་ཡང་དག་པར་རྫོགས་པའི་བྱང་ཆུབ་ཀྱིས་རྒྱས་པ་དང༌། ཆོས་ ཀྱི་དབྱིངས་དེ་བཞིན་གཤེགས་པའི་འབྱུང་གནས་སངས་རྒྱས་ཐམས་ཅད་ཀྱི་སྐུའི་རྒྱན་གྱིས་བརྒྱན་པའི་སངས་རྒྱས་ཀྱི་ཞིང་དང༌། ཆོས་ཀྱི་དབྱིངས་ཡོངས་སུ་གང་བའི་འཁོར་གྱི་ དཀྱིལ་འཁོར་དུ་དུས་ཇི་ལྟ་བ་བཞིན་དུ་ཡང་དག་པར་སྟོན་པའི་སངས་རྒྱས་འབྱུང་བའི་དེ་བཞིན་གཤེགས་པ་དེ་དག་གི་སྤོས་ཀྱི་གདུགས་ཚད་མེད་པ་ཡོངས་སུ་འབྱུང་བར་གྱུར་ཅིག ། སྤོས་ཀྱི་རྒྱལ་མཚན་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་བ་དན་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་གཞལ་མེད་ཁང་ཚད་མེད་པ་ཡོངས་སུ་འབྱུང་ བར་གྱུར་ཅིག །སྤོས་ཀྱི་དྲ་བ་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་སྐུ་གཟུགས་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་འོད་ཚད་མེད་པ་ཡོངས་སུ་འབྱུང་བར་ གྱུར་ཅིག །སྤོས་ཀྱི་འོད་ཟེར་ཚད་མེད་པ་ཡོངས་སུ་འབར་བར་གྱུར་ཅིག །སྤོས་ཀྱི་སྤྲིན་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་གདན་ཚད་མེད་པ་ཡོངས་སུ་འབྱུང་ བར་གྱུར་ཅིག །སྤོས་ཀྱི་འཆགས་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་གཙུག་ལག་ཁང་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་ཞིང་ཚད་མེད་པ་ ཡོངས་སུ་འབྱུང་བར་གྱུར་ཅིག །སྤོས་ཀྱི་རི་རབ་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་རྒྱ་མཚོ་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་ཆུ་ཀླུང་ཚད་མེད་ པ་ཡོངས་སུ་འབྱུང་བར་གྱུར་ཅིག །སྤོས་ཀྱི་ཤིང་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་ན་བཟའ་ཚད་མེད་པ་ཡོངས་སུ་འབྱུང་བར་གྱུར་ཅིག །སྤོས་ཀྱི་པདྨོ་ཚད་མེད་ པ་ཡོངས་སུ་འབྱུང་བར་གྱུར་ཅིག །སྤོས་ཀྱི་ཕོ་བྲང་ཚད་མེད་པ་ཡོངས་སུ་འབྱུང་བར་གྱུར་ཅིག །མེ་ཏོག་གི་གདུགས་དཔག་ཏུ་མེད་པ་ཡོངས་སུ་འབྱུང་བར་གྱུར་ཅིག །ཅེས་བྱ་བ་ནས་ ཚུལ་དེ་བཞིན་དུ་མེ་ཏོག་གི་ཕོ་བྲང་གི་བར་དུ་གྲངས་མེད་པ་ཡོངས་སུ་འབྱུང་བར་གྱུར་ཅིག །ཕྲེང་བའི་གདུགས་གྲངས་མེད་པ་ཡོངས་སུ་འབྱུང་བར་གྱུར་ཅིག །ཅེས་བྱ་བ་ནས་ཕྲེང་བའི་ ༄༅། །ཕོ་བྲང་གི་བར་དུ་གྲངས་མེད་པ་ཡོངས་སུ་འབྱུང་བར་གྱུར་ཅིག །བྱུག་པའི་གདུགས་བསམ་གྱིས་མི་ཁྱབ་པ་ཡོངས་སུ་འབྱུང་བར་གྱུར་ཅིག །ཅེས་བྱ་བ་ནས་ བྱུག་པའི་ཕོ་བྲང་གི་བར་དུ་བསམ་གྱིས་མི་ཁྱབ་པ་ཡོངས་སུ་འབྱུང་བར་གྱུར་ཅིག །ཕྱེ་མའི་གདུགས་མཚུངས་པ་མེད་པ་ཡོངས་སུ་འབྱུང་བར་གྱུར་ཅིག །ཅེས་བྱ་བ་ནས་ཕྱེ་མའི་ ཕོ་བྲང་གི་བར་དུ་མཚུངས་པ་མེད་པ་ཡོངས་སུ་འབྱུང་བར་གྱུར་ཅིག །ན་བཟའི་གདུགས་ཀུན་ཏུ་མཐའ་ཡས་པ་ཡོངས་སུ་འབྱུང་བར་གྱུར་ཅིག །ཅེས་བྱ་བ་ནས་ན་བཟའི་ཕོ་བྲང་ གི་བར་དུ་ཀུན་ཏུ་མཐའ་ཡས་པ་ཡོངས་སུ་འབྱུང་བར་གྱུར་ཅིག །རིན་པོ་ཆེའི་གདུགས་ཀུན་ཏུ་མུ་མེད་པ་ཡོངས་སུ་འབྱུང་བར་གྱུར་ཅིག །ཅེས་བྱ་བ་ནས་རིན་པོ་ཆེའི་ཕོ་བྲང་གི་བར་ དུ་ཀུན་ཏུ་མུ་མེད་པ་ཡོངས་སུ་འབྱུང་བར་གྱུར་ཅིག །མར་མེ་སྣང་བའི་གདུགས་གཞལ་དུ་མེད་པ་ཡོངས་སུ་འབྱུང་བར་གྱུར་ཅིག །ཅེས་བྱ་བ་ནས་མར་མེ་སྣང་བའི་ཕོ་བྲང་གི་བར་དུ་ གཞལ་དུ་མེད་པ་ཡོངས་སུ་འབྱུང་བར་གྱུར་ཅིག །ལྷབ་ལྷུབ་ཀྱི་གདུགས་བརྗོད་དུ་མེད་པ་ཡོངས་སུ་འབྱུང་བར་གྱུར་ཅིག །ཅེས་བྱ་བ་ནས་ལྷབ་ལྷུབ་ཀྱི་ཕོ་བྲང་གི་བར་དུ་བརྗོད་དུ་མེད་ པ་ཡོངས་སུ་འབྱུང་བར་གྱུར་ཅིག །ནོར་བུ་རིན་པོ་ཆེའི་གདུགས་བརྗོད་དུ་མེད་པའི་ཡང་བརྗོད་དུ་མེད་པ་ཡོངས་སུ་འབྱུང་བར་གྱུར་ཅིག །ཅེས་བྱ་བ་ནས་ནོར་བུ་རིན་པོ་ཆེའི་ཕོ་བྲང་གི་བར་ དུ་བརྗོད་དུ་མེད་པའི་ཡང་བརྗོད་དུ་མེད་པ་ཡོངས་སུ་འབྱུང་བར་གྱུར་ཅིག །དེ་བཞིན་དུ་ནོར་བུ་རིན་པོ་ཆེའི་རྒྱལ་མཚན་དང༌། ནོར་བུ་རིན་པོ་ཆེའི་བ་དན་དང༌། ནོར་བུ་རིན་པོ་ཆེའི་བླ་རེ་དང༌། ནོར་ བུ་རིན་པོ་ཆེའི་དྲ་བ་དང༌། ནོར་བུ་རིན་པོ་ཆེའི་སྐུ་གཟུགས་དང༌། ནོར་བུ་རིན་པོ་ཆེའི་འོད་དང༌། ནོར་བུ་རིན་པོ་ཆེའི་འོད་ཟེར་དང༌། ནོར་བུ་རིན་པོ་ཆེའི་སྤྲིན་དང༌། ནོར་བུ་རིན་པོ་ཆེའི་གདན་དང༌། ནོར་བུ་རིན་པོ་ཆེའི་འཆག་ས་དང༌། ནོར་བུ་རིན་པོ་ཆེའི་གཙུག་ལག་ཁང་དང༌། ནོར་བུ་རིན་པོ་ཆེའི་ཞིང་དང༌། ནོར་བུ་རིན་པོ་ཆེའི་རི་རབ་དང༌། ནོར་བུ་རིན་པོ་ཆེའི་རྒྱ་མཚོ་དང༌། ནོར་བུ་རིན་པོ་ ཆེའི་ཆུ་ཀླུང་དང༌། ནོར་བུ་རིན་པོ་ཆེའི་ཤིང་དང༌། ནོར་བུ་རིན་པོ་ཆེའི་ན་བཟའ་དང༌། ནོར་བུ་རིན་པོ་ཆེའི་པདྨོ་དང༌། ནོར་བུ་རིན་པོ་ཆེའི་ཕོ་བྲང་བརྗོད་དུ་མེད་པའི་ཡང་བརྗོད་དུ་མེད་པ་དག་ ཀྱང་ཀུན་ནས་གནས་པར་གྱུར་ཅིག །དམིགས་པ་རེ་རེ་ལ་ཡང་གྲངས་མེད་པའི་རྒྱན་རྣམས་ཀུན་ནས་གནས་པར་གྱུར་ཅིག །གྲངས་མེད་པའི་གཙུག་ལག་ཁང་དག་ཀུན་ནས་གནས་ པར་གྱུར་ཅིག །གྲངས་མེད་པའི་ཁང་པ་བརྩེགས་པ་དག་ཀུན་ནས་གནས་པར་གྱུར་ཅིག །གྲངས་མེད་པའི་རྟ་བབས་དག་ཀུན་ནས་གནས་པར་གྱུར་ཅིག །གྲངས་མེད་པའི་ཟླ་གམ་ དག་ཀུན་ནས་གནས་པར་གྱུར་ཅིག །གྲངས་མེད་པའི་ནོར་བུ་རིན་པོ་ཆེའི་པུ་ཤུ་དག་ཀུན་ནས་གནས་པར་གྱུར་ཅིག །གྲངས་མེད་པའི་རིན་པོ་ཆེའི་སྐར་ཁུང་རྣམ་པ་ཐ་དད་པ་ཀུན་ན་ ༄༅། །གནས་པར་གྱུར་ཅིག །རིན་པོ་ཆེའི་ཁ་དོག་རྣམ་པར་དག་པ་གྲངས་མེད་པ་ཀུན་ནས་གནས་པར་གྱུར་ཅིག །གྲངས་མེད་པའི་རྒྱན་རྣམ་པའི་མཆོག་ཐམས་ ཅད་དང་ལྡན་པ་ཐམས་ཅད་དང་དཔེ་མེད་པ་དག་ཀུན་ནས་གནས་པར་གྱུར་ཅིག །འཇིག་རྟེན་གྱི་ཁམས་ཐམས་ཅད་མ་ལུས་པར་སངས་རྒྱས་ཀྱི་རིམ་གྲོ་དང་རྒྱན་རྣམ་པ་འདི་ལྟ་བུས་ རྣམ་པར་དག་པར་གྱུར་ཅིག །སེམས་ཅན་ཐམས་ཅད་མ་ལུས་པར་སྟོབས་བཅུའི་སར་འབྱུང་བར་གྱུར་ཅིག །སེམས་ཅན་ཐམས་ཅད་ཤེས་པར་བསྟན་པའི་ཕྱིར་ཆོས་ཐམས་ ཅད་མ་ལུས་པ་ལ་ཆོས་ཀྱི་སྣང་བ་བསྒྲིབས་པ་མེད་པ་སྐྱེ་བར་གྱུར་ཅིག །འགྲོ་བ་ཐམས་ཅད་གདུལ་བའི་ཕྱིར་དགེ་བའི་རྩ་བ་ཐམས་ཅད་མ་ལུས་པར་ཡོངས་སུ་བསྔོ་བར་གྱུར་ཅིག ། འཕོ་བ་མེད་པའི་ཆོས་ཉིད་དུ་དུས་ཐམས་ཅད་མ་ལུས་པ་ལ་འཇུག་པར་བྱ་བའི་ཕྱིར་ནམ་མཁའི་དབྱིངས་མ་ལུས་པ་ཐམས་ཅད་དང་འདྲ་བའི་སེམས་ཚད་མེད་པས་ཞིང་ཐམས་ ཅད་ཡོངས་སུ་རྒྱས་པར་གྱུར་ཅིག །འགྲོ་བ་ཐམས་ཅད་ཀྱིས་སངས་རྒྱས་མཐོང་བ་ཡོངས་སུ་རྫོགས་པར་བྱ་བའི་ཕྱིར་དགེ་བའི་རྩ་བ་ཐམས་ཅད་རབ་ཏུ་འདུལ་བར་གྱུར་ཅིག །འགྲོ་ བ་ཐམས་ཅད་ཀྱིས་ཐེག་པ་ཆེན་པོ་ཤིན་ཏུ་གྲུབ་པ་དང༌། ཆོས་ཐམས་ཅད་མ་ལུས་པ་ལ་མངོན་པར་ཆགས་པ་མེད་པར་བྱ་བའི་ཕྱིར་དགེ་བའི་རྩ་བ་མ་ལུས་པ་ལ་གནས་པས་ཀུན་ན་ གནས་པར་གྱུར་ཅིག །སྤྱོད་པ་མཐའ་ཡས་པ་བྱིན་གྱིས་བརླབ་པ་དང༌། ཆོས་ཀྱི་དབྱིངས་མཐའ་དང་དབུས་མེད་པ་ལ་འཇུག་པར་བྱ་བའི་ཕྱིར་དགེ་བའི་རྩ་བ་ཐམས་ཅད་ལ་ཡོངས་སུ་ སྤྱོད་པར་གྱུར་ཅིག །དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་ལ་འཇུག་པར་བྱ་བའི་ཕྱིར་དགེ་བའི་རྩ་བ་ཐམས་ཅད་ཡོངས་སུ་འགྱུར་བར་ཤོག་ཅིག །སེམས་ཅན་ ཐམས་ཅད་ཀྱིས་ཐམས་ཅད་མཁྱེན་པའི་ཡེ་ཤེས་ཁོང་དུ་ཆུད་པར་བྱ་བའི་ཕྱིར་དགེ་བའི་རྩ་བ་འདི་དག་མ་ལུས་པར་རྐྱེན་དུ་གྱུར་པར་ཤོག་ཅིག །ཅི་ནས་ཀྱང་བདག་མེད་པའི་ཆོས་ཀྱི་ དབྱིངས་ལས་ཆོས་ཐམས་ཅད་འདའ་བར་མི་འགྱུར་བར་དགེ་བའི་རྩ་བ་འདི་དག་གིས་སེམས་ཅན་ཐམས་ཅད་སངས་རྒྱས་ཐམས་ཅད་ལ་བསྙེན་བཀུར་ཡོངས་སུ་སྤྱོད་པས་ཡང་དག་པར་ཟིན་ པར་གྱུར་ཅིག །ཆགས་པ་མེད་པ་ལ་འཇུག་པའི་ཕྱིར་ཆོས་ཐམས་ཅད་ཡང་དག་པར་ཟིན་པར་གྱུར་ཅིག །བྱང་ཆུབ་སེམས་དཔའ་ཐམས་ཅད་དགེ་བའི་རྩ་བ་ཐམས་ཅད་ཀྱི་གྲོགས་ གཅིག་ཏུ་མཐུན་པས་ཡང་དག་པར་ཟིན་པར་གྱུར་ཅིག །བྱང་ཆུབ་སེམས་དཔའི་སྤྱོད་པ་ཐམས་ཅད་སྨོན་ལམ་ཡོངས་སུ་རྫོགས་པས་ཡང་དག་པར་ཟིན་པར་གྱུར་ཅིག །བསྒྲིབས་པ་མེད་ པ་ཁོང་དུ་ཆུད་པར་བྱ་བའི་ཕྱིར་བྱང་ཆུབ་སེམས་དཔའི་ཆོས་སྣང་བ་ཐམས་ཅད་ཡང་དག་པར་ཟིན་པར་གྱུར་ཅིག །མཐའ་དང་དབུས་མེད་པ་ལ་མཁས་པར་བྱ་བའི་ཕྱིར་དེ་བཞིན་གཤེགས་ ༄༅། །པ་ཐམས་ཅད་ཀྱི་རྣམ་པར་འཕྲུལ་བས་ཡང་དག་པར་ཟིན་པར་གྱུར་ཅིག །སེམས་ཚད་མེད་པས་ཡོངས་སུ་རྒྱས་པར་བྱ་བའི་ཕྱིར་སངས་རྒྱས་ཐམས་ཅད་ཀྱི་ སྟོབས་དང་མི་བསྙེངས་པས་ཡང་དག་པར་ཟིན་པར་གྱུར་ཅིག །མི་གཉིས་པའི་སྣང་བ་གྲུབ་པས་བྱང་ཆུབ་སེམས་དཔའི་ཏིང་ངེ་འཛིན་དང༌། སྤོབས་པ་དང༌། གཟུངས་ཀྱི་སྒོར་འཇུག་པས་ ཡང་དག་པར་ཟིན་པར་གྱུར་ཅིག །དེ་བཞིན་གཤེགས་པའི་རྣམ་པར་འཕྲུལ་པ་དང༌། ཆོ་འཕྲུལ་ཆེན་པོ་ཤིན་ཏུ་བསྟན་པ་བསྒྲུབ་པའི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཚུལ་ལ་ མཁས་པས་ཡང་དག་པར་ཟིན་པར་གྱུར་ཅིག །སྐྱེ་བ་དང༌། རྣམ་པར་འཚང་རྒྱ་བ་དང༌། འཁོར་ལོ་བསྐོར་བ་དང༌། མྱ་ངན་ལས་འདའ་བ་དང༌། ཉེ་བར་གཤེགས་པ་བསྟན་པ་དང༌། མཆོད་ པ་དང༌། རིམ་གྲོ་དང༌། སེམས་ཅན་གདུལ་བ་ལ་འཇུག་པའི་ཕྱིར་དེ་བཞིན་གཤེགས་པ་དུས་གསུམ་དུ་བྱོན་པ། མཐའ་དང་དབུས་མེད་པ་ཐམས་ཅད་མ་ལུས་པའི་སྐྱེ་བ་དང༌། སངས་ རྒྱས་ཀྱི་བྱང་ཆུབ་ཏུ་མངོན་པར་འཚང་རྒྱ་བས་ཡང་དག་པར་ཟིན་པར་གྱུར་ཅིག །འཇིག་རྟེན་གྱི་ཁམས་ཐམས་ཅད་མ་ལུས་པར་བླ་ན་མེད་པའི་སངས་རྒྱས་ཀྱི་ཞིང་ཡོངས་སུ་དག་པས་ཟིན་ པར་གྱུར་ཅིག །བསྐལ་པ་འབྱམས་ཀླས་པ་མཐའ་དང་དབུས་མེད་པ་ཐམས་ཅད་མ་ལུས་པར་བྱང་ཆུབ་སེམས་དཔའི་སྤྱོད་པ་འབྲེལ་བ་རྒྱུན་མི་འཆད་པས་ཡང་དག་པར་ཟིན་པར་གྱུར་ཅིག ། འཇིག་རྟེན་དུ་སྐྱེ་བའི་ཡུལ་ཐམས་ཅད་མ་ལུས་པར་ཐམས་ཅད་དུ་སྐྱེ་བ་ཤིན་ཏུ་བསྟན་པས་ཡང་དག་པར་ཟིན་པར་གྱུར་ཅིག །སེམས་ཅན་གྱི་ཁམས་ཐམས་ཅད་མ་ལུས་པར་བྱང་ཆུབ་སེམས་ དཔའ་ཀུན་ཏུ་བཟང་པོའི་སྤྱོད་པ་ཡོངས་སུ་སྨིན་པར་བྱ་བས་ཡང་དག་པར་ཟིན་པར་གྱུར་ཅིག །སེམས་ཅན་གྱི་ཉོན་མོངས་པ་དང༌། བག་ལ་ཉལ་བ་དང༌། བག་ཆགས་ཐམས་ཅད་མ་ལུས་ པར་རྙོག་པ་མེད་པའི་ཚུལ་གྱིས་ཡང་དག་པར་ཟིན་པར་གྱུར་ཅིག །སེམས་ཅན་གྱི་དབང་པོ་འབྱམས་ཀླས་པ་ཐམས་ཅད་མ་ལུས་པར་མཐའ་དང་དབུས་མེད་པ་ལ་འཇུག་པས་ཡང་དག་པར་ ཟིན་པར་གྱུར་ཅིག །འགྲོ་བ་ཐམས་ཅད་ཀྱི་མོས་པ་དང༌། ལྷག་པའི་བསམ་པ་ཐམས་ཅད་མ་ལུས་བར་ཉོན་མོངས་པ་མེད་ཅིང༌། ཡོངས་སུ་དག་པས་ཡང་དག་པར་ཟིན་པར་གྱུར་ཅིག ། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་ཐམས་ཅད་མ་ལུས་པར་དུས་ལ་ཇི་ལྟར་འབབ་པ་བཞིན་དུ་ཀུན་ཏུ་བསྟན་པས་ཡང་དག་པར་ཟིན་པར་གྱུར་ཅིག །སེམས་ཅན་ ཐམས་ཅད་མ་ལུས་པར་འགྲོ་བ་ཐམས་ཅད་སྤྲུལ་པ་ལྟ་བུར་ཁོང་དུ་ཆུད་པས་ཡང་དག་པར་ཟིན་པར་གྱུར་ཅིག །དེ་བཞིན་གཤེགས་པའི་རིགས་ཐམས་ཅད་མ་ལུས་པར་སངས་རྒྱས་བྱུང་ པ༑ ཐམས་ཅད་ཀྱི་བསྟན་པ་གཟུང་ཞིང་བསྲུང་བས་ཡང་དག་པར་ཟིན་པར་གྱུར་ཅིག །ཅེས་སེམས་བསྐྱེད་ཅིང༌། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་ ༄༅། །དེ་དག་དམིགས་པ་མེད་པའི་ཚུལ་གྱིས་ཡོངས་སུ་བསྔོ་སྟེ། ལས་ཀྱིས་ནི། རྣམ་པར་སྨིན་པ་ལ་ཡོངས་སུ་རྟོག་པར་མི་བྱེད། རྣམ་པར་སྨིན་པས་ནི། ལས་ལ་ཡོངས་སུ་རྟོག་པར་མི་བྱེད་དེ། ཆོས་ཀྱི་དབྱིངས་རྟོག་པ་མེད་པ་ལ་ཡང་དག་པར་འཇུག་གོ །དགེ་བའི་རྩ་བ་བྱེད་པ་མེད་པས་གནས་པ་ཡིན་ནོ། །ཆོས་ཉིད་གཡེང་ང་མེད་པ་ལའང་ རབ་ཏུ་བརྩོན་པ་ཡིན་ནོ། །དེ་ནི། ཆོས་ཐམས་ཅད་ལ་ཡང་དད་པས་ཡང་དག་པར་འཇུག་སྟེ། ཆོས་གང་རང་བཞིན་གྱིས་ཡོངས་སུ་གྲུབ་པར་བྱེད་པའམ། རྣམ་པར་བྱེད་པ་དེ་ དག་གང་ཡང་མི་མཐོང་ངོ༌། །ཆོས་ཉིད་དབང་པོ་མེད་པའི་མཐར་ཐུག་པ་ལ་ཡང་ཡང་དག་པར་འཇུག་སྟེ། ཆོས་ཀྱི་དབྱིངས་ལྟ་བ་པོ་མེད་པར་ཡང་རབ་ཏུ་ཤེས་ཤིང༌། ཆོས་ཐམས་ ཅད་ཤེས་པ་པོ་མེད་པར་ཡང་རབ་ཏུ་རྟོགས་སོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་དཀྱིལ་འཁོར་ཚད་མེད་པར་རབ་ཏུ་ཤེས་པ་ཆོས་ཐམས་ ཅད་ཀྱི་རྐྱེན་གྱི་གནས་ཁོང་དུ་ཆུད་པས་ཆོས་ཐམས་ཅད་ལུས་མེད་པར་རབ་ཏུ་མཐོང་བ། ཆོས་ཐམས་ཅད་འདོད་ཆགས་དང་བྲལ་བའི་མཐར་ཕྱིན་པར་རྗེས་སུ་ལྟ་བ། འཇིག་ རྟེན་འགྱུར་བ་ཐམས་ཅད་སྤྲུལ་པ་ལྟ་བུར་རྗེས་སུ་རྟོགས་པ། ཆོས་གཅིག་ལ་སེམས་ཅན་ཐམས་ཅད་དུ་རྗེས་སུ་མཐོང་བ། ཆོས་ཀྱི་དབྱིངས་མི་གཉིས་པར་རབ་ཏུ་རིག་པ་ལས་ཀྱི་ དམིགས་པ་དང༌། ཉེ་བར་ལེན་པ་ལ་མཁས་པས་མ་བཏང་བ། འདུས་བྱས་ཀྱི་ཁམས་འདུས་མ་བྱས་སུ་མངོན་པར་བསྒྲུབས་པས་ཞིག་པར་མི་བྱེད་པ། འདུས་མ་བྱས་ཀྱི་ཁམས་འདུས་ བྱས་སུ་སྒྲོ་གདགས་པ་ཐམས་ཅད་ཀྱིས་རྣམ་པར་མི་རྟོག་པ། ཆོས་ཐམས་ཅད་རབ་ཏུ་ཞི་བ་ལ་གཞོལ་བ། དགེ་བའི་རྩ་བ་མངོན་པར་བསྒྲུབ་པ་ཐམས་ཅད་མངོན་པར་བསྒྲུབས་པ། སེམས་ ཅན་ཐམས་ཅད་ཡོངས་སུ་བསྐྱབ་པར་བྱ་བའི་སེམས་དང་ལྡན་པ། ཆོས་རྒྱ་མཚོ་ཐམས་ཅད་མངོན་པར་ཤེས་པ་རྨོངས་པ་མེད་པར་ཆོས་ཉིད་ལ་བརྩོན་པ། དགེ་བའི་རྩ་བ་ནམ་མཁའ་ལྟ་བུ་ ཐམས་ཅད་ཡོངས་སུ་བསྔོ་བ། བསོད་ནམས་ཀྱིས་རྒྱས་པར་འགྲོ་བས་འཇིག་རྟེན་ལས་འདས་པའི་ལམ་དུ་ཞུགས་པ། འཇིག་རྟེན་གྱི་ཆོས་ཀུན་ནས་མི་རྒྱུ་བ་མིག་ལ་རབ་རིབ་མེད་པ། ཡེ་ཤེས་ཀྱི་སྣང་བ་རབ་ཏུ་ཐོབ་པ། ཐབས་མཁས་པས་ཡོངས་སུ་བསྔོ་བའི་ངང་ཚུལ་ཅན་དེ་ཅི་ནས་ཀྱང་སངས་རྒྱས་ཐམས་ཅད་ཀྱི་བྱིན་གྱིས་བརླབ་པ་དང༌། ཅི་ནས་ཀྱང་ཞིང་ཐམས་ཅད་ཡོངས་ སུ་དག་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཡོངས་སུ་སྨིན་པར་འགྱུར་བ་དང༌། ཅི་ནས་ཀྱང་སངས་རྒྱས་ཀྱི་ཆོས་ཐམས་ཅད་ཉེ་བར་བླང་བར་འགྱུར་བ་དང༌། ཅི་ནས་ཀྱང་ འཇིག་རྟེན་ཐམས་ཅད་དུ་བསོད་ནམས་ཀྱི་ཞིང་དམ་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཀྱི་དེད་དཔོན་དུ་ཐོག་མར་འགྲོ་བ་དང༌། ཅི་ནས་ཀྱང་སྣང་བའི་དཀྱིལ་འཁོར་སྐྱེ་ ༄༅། །རྒུ་ཐམས་ཅད་ལ་འཆར་བར་འགྱུར་བ་དང༌། ཅི་ནས་ཀྱང་དགེ་བའི་རྩ་བ་ཐམས་ཅད་ཀྱི་ཆོས་ཀྱི་དབྱིངས་ཐམས་ཅད་རྒྱས་པར་འགྱུར་བ་དང༌། ཅི་ནས་ཀྱང་འགྲོ་ བ་ཐམས་ཅད་ཀྱི་རྟེན་དུ་འགྱུར་བ་དང༌། ཅི་ནས་ཀྱང་ཡོན་ཏན་ཐམས་ཅད་ཀྱི་སེམས་ཅན་གྱི་ཁམས་ཐམས་ཅད་རྣམ་པར་སྦྱོར་བར་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོ་ སྟེ༑ དེ་དེ་ལྟར་ཡོངས་སུ་བསྔོ་བས་སངས་རྒྱས་ཀྱི་རིགས་ཡང་དག་པར་འཛིན་པ་ཡིན། སེམས་ཅན་གྱི་རིགས་ཡོངས་སུ་སྨིན་པར་བྱེད་པ་ཡིན། ཞིང་གི་རིགས་རྣམ་པར་སྦྱོང་ བ་ཡིན༑ ཆོས་ཀྱི་རིགས་འགལ་བར་མི་བྱེད་པ་ཡིན། ལས་ཀྱི་རིགས་ཡོངས་སུ་ཤེས་པ་ཡིན། མི་གཉིས་པའི་རིགས་མཉམ་པར་བྱེད་པ་ཡིན། ཕྱོགས་ཀྱི་རིགས་སུ་ ཁྱབ་པར་འགྲོ་བ་ཡིན། འདོད་ཆགས་དང་བྲལ་བའི་རིགས་ལ་ཡང་དག་པར་རྟོག་པ་ཡིན། ཤིན་ཏུ་མོས་པའི་རིགས་རབ་ཏུ་སྒྲུབ་པ་ཡིན། དབང་པོའི་རིགས་ཤིན་ཏུ་སྣང་ བར་བྱེད་པ་ཡིན་ཏེ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་བཞི་པ་སྟེ། ཐམས་ཅད་དུ་རྗེས་སུ་སོང་བ་ ཞེས་བྱའོ། །དེ་ལ་གནས་ཤིང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དགེ་བའི་རྩ་བ་ཐམས་ཅད་ཡོངས་སུ་བསྔོ་བར་བྱེད་དེ། དེ་དེ་ལྟར་ཡོངས་སུ་བསྔོ་བས་འཇིག་རྟེན་ གྱི་ཁམས་ཐམས་ཅད་དུ་ཡང་དག་པར་བསྟན་པར་བྱ་བའི་ཕྱིར་ཐམས་ཅད་དུ་རྗེས་སུ་སོང་བའི་ལུས་ཀྱི་ལས་རབ་ཏུ་ཐོབ་བོ། །སངས་རྒྱས་ཀྱི་ཞིང་ཐམས་ཅད་དུ་རྣམ་པར་བསྟན་པ་བསྒྲིབས་པ་ མེད་པའི་ཕྱིར་ཐམས་ཅད་དུ་རྗེས་སུ་སོང་བའི་ངག་གི་ལས་རབ་ཏུ་འཐོབ་བོ། །སངས་རྒྱས་ཀྱི་ཆོས་ཐམས་ཅད་བསྟན་ཅིང་གཟུང་བའི་ཕྱིར་ཐམས་ཅད་དུ་རྗེས་སུ་སོང་བའི་ཡིད་ཀྱི་ལས་རབ་ཏུ་ འཐོབ་བོ། །སེམས་ཅན་ཐམས་ཅད་ཀྱི་རྗེས་སུ་འབྲང་བར་བྱ་བའི་ཕྱིར་ཐམས་ཅད་དུ་རྗེས་སུ་སོང་བའི་རྫུ་འཕྲུལ་དང་རྣམ་པར་འཕྲུལ་པ་རབ་ཏུ་འཐོབ་བོ། །ཆོས་ཐམས་ཅད་ལ་ཡང་དག་པར་ འཇུག་པར་བྱ་བའི་ཕྱིར་ཐམས་ཅད་དུ་རྗེས་སུ་སོང་བའི་ཆོས་ཁོང་དུ་ཆུད་པ་རབ་ཏུ་འཐོབ་བོ། །སེམས་ཅན་ཐམས་ཅད་ཀྱི་བསམ་པ་ཚིམ་པར་བྱ་བའི་ཕྱིར་ཐམས་ཅད་ཀྱི་རྗེས་སུ་སོང་བའི་ གཟུངས་དང་སྤོབས་པ་ཐོབ་པར་བྱ་བ་རབ་ཏུ་འཐོབ་བོ། །སྤུའི་སྦུབས་གཅིག་ཏུ་འཇིག་རྟེན་གྱི་ཁམས་ཐམས་ཅད་གཟུང་བར་བྱ་བའི་ཕྱིར་ཐམས་ཅད་དུ་རྗེས་སུ་སོང་བའི་ཆོས་ཀྱི་དབྱིངས་ལ་ འཇུག་པ་རབ་ཏུ་འཐོབ་བོ། །སེམས་ཅན་གཅིག་གི་ལུས་སུ་སེམས་ཅན་ཐམས་ཅད་ཀྱི་ལུས་ཡང་དག་པར་གཞོལ་བར་བྱ་བའི་ཕྱིར་ཐམས་ཅད་ཀྱི་རྗེས་སུ་སོང་བའི་ལུས་ལ་འཇུག་པ་རབ་ ཏུ་འཐོབ་བོ། །བསྐལ་པ་ཐམས་ཅད་དུ་དེ་བཞིན་གཤེགས་པ་མཐོང་བ་དང་མི་འབྲལ་བ་ལ་འཇུག་པའི་ཕྱིར་ཐམས་ཅད་དུ་རྗེས་སུ་སོང་བའི་བསྐལ་པའི་གྲངས་ལ་འཇུག་པ་རབ་ཏུ་འཐོབ་ ༄༅། །པོ༑ ༑སྐད་ཅིག་གཅིག་གིས་དེ་བཞིན་གཤེགས་པ་འབྱུང་བ་ཐམས་ཅད་མངོན་སུམ་དུ་བསྟན་པའི་ཕྱིར་ཐམས་ཅད་དུ་རྗེས་སུ་སོང་བའི་སྐད་ཅིག་ལ་ འཇུག་པ་རབ་ཏུ་འཐོབ་བོ། །དེ་ནས་བྱང་ཆུབ་སེམས་དཔའ་རྡོ་རྗེ་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་ བཅད་པ་འདི་དག་སྨྲས་སོ། །འཇིག་རྟེན་མཐའ་དང་དབུས་མེད་གང་ལ་ཡང༌། །དེ་དག་གནས་འཆའ་གང་ཡང་ཡོད་པ་མིན། །སེམས་ཅན་ཕན་པའི་དོན་ལས་ཕྱིར་མི་ལྡོག །མི་ རབ་དེ་དག་ཡེ་ཤེས་འདི་འདྲའོ། །ཞིང་རྣམས་ལ་ཡང་གནས་པར་མི་བྱེད་དེ། །ཕྱོགས་རྣམས་ལ་ཡང་དེ་དག་གནས་མི་འཆའ། །ཚེ་དང་ཆོས་ཀྱིས་རློམ་སེམས་མི་བྱེད་དེ། །འཇིག་ རྟེན་དག་ལ་རྣམ་པར་རྟོག་མི་བྱེད། །ཕྱོགས་བཅུའི་འཇིག་རྟེན་དག་ན་ཅི་ཡོད་པའི། །འགྲོ་བ་དེ་དག་མ་ལུས་ཀུན་བསྡུས་ཤིང༌། །དངོས་པོ་དངོས་མེད་ཆོས་ལ་དབང་བསྒྱུར་ འཇུག །དེ་དག་ཐམས་ཅད་མ་ལུས་དུས་སུ་བསྔོ། །འདུས་བྱས་འདུས་མ་བྱས་ཀྱི་ཆོས་བླངས་ཤིང༌། །འཇིག་རྟེན་འདི་ལ་རྣམ་པར་རྟོག་མི་བྱེད། །ཇི་ལྟར་འཇིག་རྟེན་དེ་བཞིན་ ཆོས་རྣམས་ཏེ། །དེ་ལྟར་འཇིག་རྟེན་སྒྲོན་མ་རྣམ་པར་དག །ཇི་སྙེད་ལས་རྣམས་ཡང་དག་རྩོམ་པ་གང༌། །རབ་དང་འབྲིང་དང་དེ་བཞིན་ཐ་མ་རྣམས། །དེ་དག་ཕྱོགས་བཅུའི་ འཇིག་རྟེན་མཁྱེན་པ་རྣམས། །ཇི་སྙེད་བཞུགས་ལ་ཡོངས་སུ་བསྔོ་བ་བྱེད། །དེ་དག་ཡོངས་སུ་བསྔོ་བའི་མཐར་ཕྱིན་པ། །སངས་རྒྱས་མཆོག་རྗེས་བསླབ་བྱ་བསླབ་པ་རྣམས། །ཡེ་ཤེས་ དམ་པ་རྗེས་སུ་སེམས་བྱེད་ཅིང༌། །མི་ཡི་དམ་པའི་ཆོས་རྣམས་རབ་ཏུ་འཐོབ། །སེམས་ཅན་ཕན་པའི་དོན་དུ་རྟག་ཞུགས་ཤིང༌། །འགྲོ་བ་ཀུན་ཏུ་འཇིག་རྟེན་སྒྲོན་མ་བཞིན། །ཕྱོགས་ རྣམས་ཀུན་ཏུ་མ་ལུས་གྱུར་ཅིག་ཅེས། །དགེ་བ་དེ་དག་ཡོངས་སུ་བསྔོ་བ་བྱེད། །དེ་དག་སེམས་ཅན་རྣམ་པར་རྟོག་མི་བྱེད། །ཆོས་ལའང་རྣམ་པར་རྟོག་པར་མི་བྱེད་དེ། །འཇིག་རྟེན་གྱིས་ ཀྱང་རློམ་སེམས་མེད་པ་ཡིན། །འགྲོ་བ་ཀུན་ནས་ཕྱིར་ཡང་མི་ལོག་གོ །བརྟན་པ་དེ་དག་ཞི་རབ་རྟག་ཏུ་ཞི། །དེ་དག་མྱ་ངན་འདས་པའི་སྤྱོད་ཡུལ་ཐོབ། །སེམས་ཅན་རྒྱུད་ནའང་མི་སྤྱོད་ མ་ཡིན་ཏེ། །འདི་འདྲའི་ཡེ་ཤེས་དམ་པ་ཁོང་དུ་ཆུད། །དེ་དག་ནམ་ཡང་རྟོག་དང་རྣམ་རྟོག་མེད། །རྣམ་པར་སྨིན་ལའང་དེ་དག་གནས་མི་འཆའ། །འཇིག་རྟེན་ཐམས་ཅད་རྒྱུ་དང་བཅས་ པས་ན༑ ༑ཆོས་རྣམས་རྒྱུད་མེད་པར་ཡང་ལྟ་མ་ཡིན། །དེ་དག་སྤྱོད་ཡུལ་འདི་འདྲ་ཐོབ་པ་སྟེ། །དེ་ལ་རྟོག་དང་རྣམ་པར་རྟོག་པ་མེད། །བློ་མཆོག་དེ་དག་འགྲོ་ཀུན་ཁ་ལོ་སྒྱུར། །ཡེ་ཤེས་ ཚུལ་ལ་མཁས་པས་ཡོངས་སུ་བསྔོ། །ཐམས་ཅད་དུ་རྗེས་སུ་སོང་བ་ཞེས་བྱ་བ་སྟེ། ཡོངས་སུ་བསྔོ་བ་བཞི་པའོ། །བམ་པོ་སུམ་ཅུ་རྩ་བཞི་པ། ཀྱེ་རྒྱལ་བའི་སྲས་དག །བྱང་ཆུབ་སེམས་ ༄༅། །དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་ལྔ་པ་བསོད་ནམས་མི་ཟད་པའི་མཛོད་ཅེས་བྱ་བ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་ སེམས་དཔའ་སེམས་དཔའ་ཆེན་པོ་སྒྲིབ་པའི་ལས་ཐམས་ཅད་ལས་བག་ཡངས་སུ་བྱ་བའི་ཕྱིར་བཤགས་པ་དང་འབྲེལ་བའི་དགེ་བའི་རྩ་བའམ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཐམས་ཅད་དང༌། འདས་པ་དང༌། མ་འོངས་པ་དང༌། ད་ལྟར་བྱུང་བའི་སེམས་ཅན་གྱི་ཁམས་ཐམས་ཅད་ཀྱི་དུས་གསུམ་གྱི་དགེ་བའི་ རྩ་བ་ལ་རྗེས་སུ་ཡི་རང་བས་རྗེས་སུ་ཡི་རང་བ་དང་འབྲེལ་བའི་དགེ་བའི་རྩ་བ་འམ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ལ་ནན་ ཏན་དུ་བྱས་པས་ཕྱག་བྱ་བ་དང་འབྲེལ་བའི་དགེ་བའི་རྩ་བའམ། སངས་རྒྱས་ཀྱི་ཆོས་ཐམས་ཅད་ལ་བརྩོན་པས་སངས་རྒྱས་ཐམས་ཅད་ལ་གསོལ་བ་གདབ་པ་དང་འབྲེལ་བའི་ དགེ་བའི་རྩ་བའམ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་དགེ་བའི་རྩ་བ་མི་ཟད་པ་གང་ལ་བྱང་ཆུབ་སེམས་དཔའ་བརྩོན་པར་བྱ་བའི་ དགེ་བའི་རྩ་བ་འབྱམས་ཀླས་པ་བསམ་གྱིས་མི་ཁྱབ་པ་དེ་དག་ལ་ཡང་དག་པར་འཇུག་པར་བྱེད་པ་འམ། གང་ཡང་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་ འདས་མངོན་པར་བྱང་ཆུབ་པའི་དགེ་བའི་རྩ་བ་དེ་དག་ལ་རྗེས་སུ་ཡི་རང་བར་བྱེད་ཅིང་དགེ་བའི་རྩ་བ་དེ་དག་ལ་གནས་པར་བྱེད་པའམ། སངས་རྒྱས་བཅོམ་ལྡན་འདས་པ་དང༌། མ་བྱོན་ པ་དང༌། ད་ལྟར་བྱུང་བའི་ཆོས་ཀྱི་འཁོར་ལོ་བསྐོར་བས་སེམས་ཅན་མཐའ་དང༌། དབུས་མེད་པ་དུལ་བར་གྱུར་པ་དེ་དག་ལ་རྗེས་སུ་ཡི་རང་བ་དང་ལྡན་པའི་སེམས་བསྐྱེད་པས་ཁོང་དུ་ཆུད་ པར་བྱེད་པའམ། གང་ཡང་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་དེ་དག་དང་པོ་ཐུགས་བསྐྱེད་པ་ནས་བཟུང་སྟེ་བྱང་ཆུབ་སེམས་དཔའི་སྤྱོད་པ་ ཐམས་ཅད་ལ་ཡང་དག་པར་བྱུང་བར་གྱུར་པ་དང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་གྱུར་པ་དང༌། མྱ་ངན་ལས་འདས་པ་ཡང་དག་པར་བསྟན་པའི་བར་ གྱི་དགེ་བའི་རྩ་བ་དེ་དག་ཐམས་ཅད་སངས་རྒྱས་ཐམས་ཅད་དང་རྒྱུད་ཀྱི་ཚུལ་གཅིག་ཏུ་གྱུར་པའི་ཡེ་ཤེས་ཀྱི་བྱིན་རླབས་ཀྱི་རྗེས་སུ་ཡི་རང་བའམ། དེ་བཞིན་གཤེགས་པ་དེ་དག་ཡོངས་ སུ་མྱ་ངན་ལས་འདས་པའི་བསྟན་པ་ཡང་དག་པར་བཟུང་བ་ནས་ཉེ་བར་བཟུང་སྟེ་ཆོས་ཐམས་ཅད་ཀྱི་མཐར་ཐུག་གི་བར་དུ་དགེ་བའི་རྩ་བ་ཇི་སྙེད་ཡང་དག་པར་འགྲུབ་པར་འགྱུར་བའམ། སངས་རྒྱས་ལ་དམིགས་པའི་བསམ་པ་འབྱམས་ཀླས་པ་བརྗོད་དུ་མེད་པ་དང༌། རང་གི་དམིགས་པ་ལ་དགེ་བའི་རྩ་བ་གང་བརྩམས་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ ༄༅། །ཆུབ་ཏུ་བསྒྲིབས་པ་མེད་པར་དམིགས་པས་མཐར་ཕྱིན་པར་བྱེད་པ་ཡང་རུང་སྟེ། དགེ་བའི་རྩ་བ་རྣམ་པར་ཕྱེ་བ་ཚད་མེད་ཅིང་འབྱམས་ཀླས་པ། དམིགས་ པ་རྒྱ་ཆེན་པོ་གྲངས་མེད་པས་བསགས་པ་དེ་དག་ཐམས་ཅད་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་གང་ཡང་དག་པར་བསྒྲུབས་པ་དང༌། གང་མོས་པར་བྱས་པ་དང༌། གང་རྗེས་ སུ་ཡི་རང་བ་དང༌། གང་ཡོངས་སུ་རྫོགས་པར་བྱས་པ་དང༌། གང་ཡོངས་སུ་གྲུབ་པར་བྱས་པ་དང༌། གང་སྤྱད་པ་དང༌། གང་ཐོབ་པར་བྱས་པ་དང༌། གང་སེམས་པ་དང༌། གང་རྩོམ་པ་ དང༌། གང་མཐུ་དང་ལྡན་པར་བྱེད་པའི་དགེ་བའི་རྩ་བ་དེ་དག་གིས་གང་ཇི་སྙེད་དུ་སྔོན་གྱི་འདས་པའི་དུས་ཐམས་ཅད་འབྱམས་ཀླས་པའི་དུས་ལ་འཇུག་པ་དང༌། འཇིག་རྟེན་གྱི་ཁམས་ཤིན་ཏུ་ བསྟན་པ་གྲངས་ལས་འདས་པ་ཐམས་ཅད་དུ་སངས་རྒྱས་ཀྱི་ཞིང་གི་རྒྱན་བྱུང་བ་དང༌། གང་ཇི་སྙེད་དུ་དེ་བཞིན་ཉིད་ཀྱི་གོ་སྐབས་ཐམས་ཅད་ཀྱི་སྔོན་གྱི་མུའི་བསྐལ་པའི་མཐར་གྱུར་པས་ མཚམས་མེད་པའི་སངས་རྒྱས་ཀྱི་རིགས་མཐའ་ཡས་པ་དང༌། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱིས་ཐུགས་སུ་ཆུད་པ་བྱང་ཆུབ་སེམས་དཔའི་བསམ་པས་རྣམ་པར་ཤེས་ པ༑ བྱང་ཆུབ་སེམས་དཔའི་སེམས་ཀྱིས་ཡང་དག་པར་བཟུང་བ་དག་ཏུ་སངས་རྒྱས་ཀྱི་ཞིང་གི་རྒྱན་ཡོངས་སུ་དག་པ་བྱུང་བ་དང༌། གང་ཡང་ལས་དང་རྒྱུ་མཐུན་པའི་འབྲས་བུ་འམ། གང་ ཡང་སྤྱོད་པ་ལས་ཡང་དག་པར་བྱུང་བའམ། གང་ཡང་སེམས་ཅན་བསྒྲལ་བར་བྱ་བའི་ཚོགས་རྣམ་པར་བསྟན་པའམ། གང་ཡང་ཤིན་ཏུ་མོས་པ་རྣམ་པར་དག་པའམ། གང་ཡང་དེ་བཞིན་ གཤེགས་པའི་བྱིན་གྱི་རླབས་ཀྱིས་ཤེས་པར་བྱ་བའམ། གང་ཡང་སངས་རྒྱས་ཀྱི་རྣམ་པར་འཕྲུལ་པ་ཡང་དག་པར་བསྟན་པའམ། གང་ཡང་བྱང་ཆུབ་སེམས་དཔའི་ས་རྣམས་སུ་རྣམ་པར་ རིག་པའམ། གང་ཡང་དེ་བཞིན་གཤེགས་པའི་འཕྲིན་ལས་འཇིག་རྟེན་ལས་འདས་པས་བྱུང་བའམ། གང་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་འབྱམས་ཀླས་པས་བྱུང་བའམ། གང་ཡང་མངོན་པར་འཚང་རྒྱ་བའི་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་རླབས་ཀྱིས་བྱུང་བའམ། ཕྱི་མའི་མཐའི་བསྐལ་པར་མངོན་པར་འཚང་རྒྱ་བ་རྒྱུན་ཆད་པ་མེད་པའི་འཇིག་ རྟེན་གྱི་ཁམས་ཀྱི་ཚུལ་ཐམས་ཅད་ཤིན་ཏུ་བསྟན་པ། ནམ་མཁའི་དབྱིངས་ཀྱིས་ཀླས་པ། ཆོས་ཀྱི་དབྱིངས་ཀྱི་མཐས་གཏུགས་པ། འཇིག་རྟེན་གྱི་ཁམས་ཐམས་ཅད་འབྱམས་ཀླས་པ། མ་འོངས་པའི་དུས་མཐའ་ཡས་པའི་རིགས་སུ་ཤིན་ཏུ་བསྟན་པ། མ་འོངས་པའི་ལམ་གྱི་རྒྱུད་རྣམ་པ་ཐ་དད་པ་གྲངས་མེད་པར་བརྗོད་པ། མ་འོངས་པའི་དུས་རྒྱུན་འཆད་པ་མེད་ཅིང༌། ས་མཚམས་ཀྱི་མཐའ་མེད་པ། དེ་བཞིན་གཤེགས་པའི་ཡེ་ཤེས་ཀྱིས་མངོན་པར་བསྒྲུབས་པས་ཐུགས་སུ་ཆུད་པ། མ་འོངས་པའི་དུས་ཀྱི་སྐད་ཅིག་རྒྱུན་འཆད་པ་མེད་པ། ཆོས་ཀྱི་ ༄༅། །དབྱིངས་དང༌། འཇིག་རྟེན་གྱི་ཁམས་དང༌། བསྐལ་པ་གཅིག་ནས་གཅིག་ཏུ་བརྒྱུད་པ་ཐམས་ཅད་མཐའ་ཡས་པ་དང༌། དེ་བཞིན་གཤེགས་པའི་སྟོབས་ ཀྱིས་མངོན་པར་འཚང་རྒྱ་བ་ཚད་མེད་པར་གྱུར་པ་དང༌། མ་འོངས་པའི་དུས་ས་མཚམས་མེད་ཅིང་རིས་སུ་མི་ཆོད་པ་དག་ཏུ་མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་ཆོས་ཀྱི་དབྱིངས་ཐམས་ཅད་དུ་ཁྱབ་པར་གཤེགས་པའི་སངས་རྒྱས་ཀྱི་ཞིང་གི་ཡོན་ཏན་དང༌། རྒྱན་ཡོངས་སུ་དག་པ་རིན་པོ་ཆེའི་རྒྱན་རྣམ་པར་ བྲེས་པ་དུ་མ་དང༌། སྤོས་ཀྱི་རྒྱན་ཡིད་དུ་འོང་བ་དང་ལྡན་པ་ཐམས་ཅད་དང༌། མེ་ཏོག་ཐམས་ཅད་ཀྱི་རྒྱན་གྱི་ཆར་རབ་ཏུ་འབབ་པ། ན་བཟའ་ཐམས་ཅད་ཀྱི་རྒྱན་གྱི་སྤྲིན་སྣ་ཚོགས་ ཡོན་ཏན་ཐམས་ཅད་ཀྱིས་བརྒྱན་པ། རྣམ་པ་ཐ་དད་པའི་མཛོད་དེ་བཞིན་གཤེགས་པའི་རྒྱན་གྱི་བྱིན་གྱི་རླབས་ཀྱིས་རྣམ་པར་བྲེས་པ། སངས་རྒྱས་ཀྱི་ཞིང་ཐམས་ཅད་ཀྱི་རྒྱན་ རབ་ཏུ་བརྒྱན་པར་བྱ་བ་རྣམ་པ་སྣ་ཚོགས་ཐ་དད་པ་བརྗོད་དུ་མེད་པས་རབ་ཏུ་བརྒྱན་ཅིང་གྲུབ་པ། གྲོགས་བསམ་གྱིས་མི་ཁྱབ་པ་རྣམ་པར་དག་པས་ཡོངས་སུ་བསྒྲུབས་པ། དེ་ བཞིན་གཤེགས་པ་མངོན་པར་འཚང་རྒྱ་བའི་བྱིན་གྱི་རླབས་ཀྱི་རྒྱན་གྱིས་རྣམ་པར་དག་པ་རྣམས་འབྱུང་བར་འགྱུར་བ་དང༌། གང་ཡང་མ་བྱོན་པའི་དེ་བཞིན་གཤེགས་པ་ ཐམས་ཅད་མངོན་པར་འཚང་རྒྱ་བའི་སངས་རྒྱས་ཀྱི་ཞིང་ཡོངས་སུ་དག་པ། བྱང་ཆུབ་སེམས་དཔའི་མིག་འཇིག་རྟེན་ལས་འདས་པ་ཐུན་མོང་མ་ཡིན་པས་རྣམ་པར་མཐོང་བ། བྱང་ཆུབ་ སེམས་དཔའ་མཐུ་ཆེན་པོའི་དགེ་བའི་རྩ་བ་རབ་ཏུ་མྱོང་བར་འགྱུར་བ། ཆོས་ཐམས་ཅད་སྒྱུ་མའི་རྣམ་པ་ལྟ་བུར་ཁོང་དུ་ཆུད་པ། ཆོས་ཐམས་ཅད་ཀྱི་མཐུ་སྤྲུལ་པ་ལྟ་བུས་རྣམ་པར་དག་ པ༑ བྱང་ཆུབ་སེམས་དཔའི་ལས་འབྱམས་ཀླས་པ། མཉམ་པ་ཉིད་ཀྱི་རྗེས་སུ་སོང་བས་རྣམ་པར་དག་པ། བྱང་ཆུབ་སེམས་དཔའི་རྣམ་པར་འཕྲུལ་པ་དང༌། ཏིང་ངེ་འཛིན་གྱི་ཚུལ་ བསམ་གྱིས་མི་ཁྱབ་པ་ལ་ཞུགས་པས་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ། ཡང་དག་པར་རྒྱུ་བ། སངས་རྒྱས་ཀྱི་བླ་ན་མེད་པས་སྣང་བར་བྱས་པས་རྒྱ་ཆེ་བ་སྣ་ཚོགས་ཚད་མེད་པ་ བསམ་གྱིས་མི་ཁྱབ་པ་རྣམས་ཡང་དག་པར་གནས་པར་འགྱུར་བ་དང༌། མ་བྱོན་པའི་སངས་རྒྱས་དེ་དག་ཐམས་ཅད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་འགྱུར་བ་དེ་བཞིན་དུ་ད་ ལྟར་བྱུང་བའི་སངས་རྒྱས་ཐམས་ཅད་ཀྱི་སངས་རྒྱས་ཀྱི་ཞིང་ཡོངས་སུ་དག་པ་རབ་ཏུ་བྱུང་བ། ཤིན་ཏུ་གྲུབ་པ། རྣམ་པར་དག་པ་རྣམ་པ་སྣ་ཚོགས་ཐ་དད་པ། ཀུན་ནས་ཡོན་ཏན་ཅན། བསྔགས་པར་བྱ་བ་ཚད་མེད་པ། དྲི་ཞིམ་པོ་བསམ་གྱིས་མི་ཁྱབ་པ། མཐའ་ཡས་ཤིང་ཚད་མེད་པ་དང་ལྡན་པ། རྒྱན་གྲངས་མེད་པ་ཅན། གཙུག་ལག་ཁང་གྲངས་མེད་པ་དང་ལྡན་པ། ཡིད་ ༄༅། །དུ་འོང་བའི་སྒྲ་གྲངས་མེད་པ་ཡོད་པ། མཐའ་ཡས་པར་ཡང་དག་པར་སྟོན་པ། རྗེས་སུ་སྤྱོད་པའི་གྲོགས་ཚད་མེད་པ་དང་ལྡན་པ། ཡོན་ཏན་སྣ་ཚོགས་ཟད་མི་ཤེས་ པ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། སྤོས་ཐམས་ཅད་ཀྱིས་བརྒྱན་པ། ཕྲེང་བ་ཐམས་ཅད་ཀྱིས་བརྒྱན་པ། ཕྱེ་མ་ཐམས་ཅད་ཀྱིས་བརྒྱན་པ། རིན་པོ་ཆེ་ཐམས་ཅད་ཀྱིས་བརྒྱན་པ། ན་བཟའ་ཐམས་ཅད་ཀྱིས་བརྒྱན་པ། རྒྱལ་མཚན་ཐམས་ཅད་ཀྱིས་བརྒྱན་པ། བ་དན་ཐམས་ཅད་ཀྱིས་བརྒྱན་པ། རིན་པོ་ཆེ་སྣ་ཚོགས་ཀྱི་སྣམ་བུ་ཀུན་ཏུ་བཏིང་བས་བརྒྱན་པ། རིན་པོ་ ཆེ་ཐམས་ཅད་ཀྱི་སྟེགས་བུས་བརྒྱན་པ། གསེར་གྱི་དྲ་བ་གྲངས་མེད་པས་ཀུན་ཏུ་ཡོག་པར་བརྒྱན་པ། ཆུ་ཀླུང་གྲངས་མེད་པའི་རྒྱན་གྱིས་བརྒྱན་པ། གྲངས་མེད་པའི་སྤྲིན་གྱི་ཆར་རབ་ ཏུ་འབབ་པས་བརྒྱན་པ། རོལ་མོ་བརྡུང་བ་དང་དཀྲོལ་བའི་ཚོགས་གྲངས་མེད་པས་ཡིད་དུ་འོང་བ། རྣམ་པར་དག་པ་དེ་དག་དང༌། དེ་བཞིན་དུ་མ་ལུས་པ་ཐམས་ཅད་རབ་ཏུ་བཟུང་སྟེ། སངས་རྒྱས་ཀྱི་ཞིང་གི་ཡོན་ཏན་དང༌། རྒྱན་ཡོངས་སུ་དག་པ་གང་ཇི་སྙེད་པ་གང་དང་གང་སངས་རྒྱས་ཐམས་ཅད་ཀྱིས་རབ་ཏུ་མཁྱེན་པ། འཇིག་རྟེན་གྱི་ཁམས་ཀྱི་རྒྱུད་ཆོས་ཀྱི་དབྱིངས་ ཀྱིས་ཀླས་པ། ནམ་མཁའི་མཐས་གཏུགས་པ། ཞིང་གི་གནས་སུ་གྱུར་པ་ཐམས་ཅད་ཕྱོགས་ཀྱི་འཁོར་མཐའ་ཡས་པར་ཤིན་ཏུ་བསྟན་པས་ཕྱོགས་བཅུར་རྣམ་པར་བཀོད་པ། འཇིག་རྟེན་གྱི་ཁམས་འབྱམས་ཀླས་པ་དང༌། ལས་རྣམ་པ་སྣ་ཚོགས་ཀྱིས་མངོན་པར་འདུས་བྱས་པ། ནམ་མཁའི་ཁམས་དང་འཇིག་རྟེན་གྱི་ཁམས་ཐམས་ཅད་ཀྱིས་ཡོངས་སུ་བསྡུས་པ། འཇིག་ རྟེན་གྱི་ཁམས་ཕྱོགས་གཞན་དང་གཞན་གྱི་རྗེས་སུ་སོང་བར་རབ་ཏུ་གནས་པ་ལ་རྣམ་པ་ཐ་དད་པས་ཤིན་ཏུ་བྱུང་བའི་འཇིག་རྟེན་ཁམས་བརྗོད་དུ་མེད་པར་ཤིན་ཏུ་བསྟན་པ། འཇིག་རྟེན་གྱི་ འབྱུང་གནས་ནམ་མཁའི་གོས་གཏུགས་པ་ཞིང་གི་རྒྱུད་རྣམ་པ་ཐ་དད་པ་བརྗོད་དུ་མེད་པ། འཇིག་རྟེན་གྱི་ཁམས་མཐའ་དང་དབུས་མེད་པའི་ཆོས་ཀྱིས་ཤིན་ཏུ་བསྟན་པ། དེ་ལྟར་མ་ལུས་ པ་ཐམས་ཅད་ཡོངས་སུ་བཟུང་སྟེ་ཆོས་ཀྱི་དབྱིངས་ཐམས་ཅད་ཀྱི་སངས་རྒྱས་ཀྱི་ཞིང་ཐམས་ཅད་ཀྱི་རྒྱན་ལ་འཇུག་པས་རྒྱན་རྣམ་པར་དག་པ་ཐམས་ཅད་དང་ལྡན་པ། སངས་རྒྱས་ཀྱི་ཞིང་ཡོངས་ སུ་དག་པ་ཐམས་ཅད་ཇི་སྐད་དུ་བཤད་པ་དང༌། ཇི་སྐད་དུ་བསྟན་པ་དང༌། ཇི་སྐད་དུ་བརྗོད་པ་དང༌། ཇི་སྐད་དུ་གསལ་བར་བྱས་པ་དང༌། ཇི་སྐད་དུ་སྨོས་པ་དང༌། ཇི་སྐད་དུ་སྨྲས་པ་དང༌། ཇི་ སྐད་དུ་བསླབ་པ་དང༌། ཇི་སྐད་དུ་དཀྲོལ་བ་དང༌། ཇི་ལྟ་བུར་བཏགས་པ་དང༌། ཇི་ལྟ་བུར་རྣམ་པར་བཀོད་པ་དེ་དང་དེ་དག་ཏུ་དེ་བཞིན་གཤེགས་པ་སྐྱེས་པའི་སངས་རྒྱས་ཀྱི་ཞིང་གི་རྒྱན་ དང༌། སངས་རྒྱས་ཀྱི་ཞིང་རྣམ་པར་དག་པ་དང༌། སངས་རྒྱས་ཀྱི་ཞིང་མཉམ་པ་ཉིད་དང༌། སངས་རྒྱས་ཀྱི་ཞིང་དགེ་བ་དང༌། སངས་རྒྱས་ཀྱི་ཞིང་གི་བདག་ཉིད་ཆེ་བ་དང༌། སངས་རྒྱས་ ༄༅། །ཀྱི་ཞིང་ཡངས་པ་དང༌། སངས་རྒྱས་ཀྱི་ཞིང་བདེ་བར་བསྐྱང་བ་དང༌། སངས་རྒྱས་ཀྱི་ཞིང་ཟིལ་གྱིས་མི་ནོན་པ་དང༌། སངས་རྒྱས་ཀྱི་ཞིང་ཟད་མི་ཤེས་པ་དང༌། སངས་ རྒྱས་ཀྱི་ཞིང་ཤིན་ཏུ་ཆེ་བ་དང༌། སངས་རྒྱས་ཀྱི་ཞིང་མི་འཕྲོག་པ་དང༌། སངས་རྒྱས་ཀྱི་ཞིང་མི་འཇིགས་པ་དང༌། སངས་རྒྱས་ཀྱི་ཞིང་འོད་གསལ་བ་དང༌། སངས་རྒྱས་ཀྱི་ཞིང་ཡིད་དུ་ འོད་བ་དང༌། སངས་རྒྱས་ཀྱི་ཞིང་མི་མཐུན་པ་མེད་པ་དང༌། སངས་རྒྱས་ཀྱི་ཞིང་ཀུན་ཏུ་སྣང་བ་དང༌། སངས་རྒྱས་ཀྱི་ཞིང་རབ་ཏུ་སྣང་བ་དང༌། སངས་རྒྱས་ཀྱི་ཞིང་རྣམ་པར་བརྒྱན་ པ་དང༌། སངས་རྒྱས་ཀྱི་ཞིང་རབ་ཏུ་བརྒྱན་པ་དང༌། སངས་རྒྱས་ཀྱི་ཞིང་ཤིན་ཏུ་རྣམ་པར་ཕྱེ་བ་དང༌། སངས་རྒྱས་ཀྱི་ཞིང་མཆོག་དང༌། སངས་རྒྱས་ཀྱི་ཞིང་གཙོ་བོ་དང༌། སངས་རྒྱས་ ཀྱི་ཞིང་རབ་དང༌། སངས་རྒྱས་ཀྱི་ཞིང་ཕུལ་དང༌། སངས་རྒྱས་ཀྱི་ཞིང་དམ་པ་དང༌། སངས་རྒྱས་ཀྱི་ཞིང་གྱ་ནོམ་པ་དང༌། སངས་རྒྱས་ཀྱི་ཞིང་རྨད་དུ་བྱུང་བ་དང༌། སངས་རྒྱས་ཀྱི་ ཞིང་བླ་ན་མེད་པ་དང༌། སངས་རྒྱས་ཀྱི་ཞིང་མཉམ་པ་མེད་པ་དང༌། སངས་རྒྱས་ཀྱི་ཞིང་འདྲ་བ་མེད་པ་དང༌། སངས་རྒྱས་ཀྱི་ཞིང་མཐའ་ཡས་པ་དང༌། དེ་ལྟར་ཡོངས་སུ་བཟུང་སྟེ་འདས་པ་ དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་སངས་རྒྱས་ཀྱི་ཞིང་གི་རྒྱན་རྣམ་པར་དག་པ་གང་ཇི་སྙེད་པའི་རྒྱན་རྣམ་པར་དག་པ་དང༌། དགེ་བའི་རྩ་བ་འདིས་ འཇིག་རྟེན་གྱི་ཁམས་ཐམས་ཅད་རྣམ་པར་དག་པར་གྱུར་ཅིག །སངས་རྒྱས་ཀྱི་ཞིང་ཐམས་ཅད་འདི་ལྟ་བུའི་རྣམ་པར་དག་པ་དང་ལྡན་པར་གྱུར་ཅིག །འཇིག་རྟེན་གྱི་ཁམས་རེ་རེར་ཡང་ འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་སངས་རྒྱས་ཀྱི་ཞིང་གི་རྒྱན་ཇི་སྙེད་པ་དེ་དག་ཐམས་ཅད་ཡང་དག་པར་གནས་པར་གྱུར་ཅིག །གྲུབ་པར་གྱུར་ཅིག། རྣམ་པར་དག་པར་གྱུར་ཅིག །ཡོངས་སུ་དག་པར་གྱུར་ཅིག །ཡང་དག་པར་གྲུབ་པར་གྱུར་ཅིག །རབ་ཏུ་བྱུང་བར་གྱུར་ཅིག །རབ་ཏུ་བརྒྱན་པར་གྱུར་ཅིག །ཀུན་ཏུ་བརྒྱན་པར་གྱུར་ ཅིག །བྱང་ཆུབ་པར་གྱུར་ཅིག །བྱིན་གྱིས་བརླབས་པར་གྱུར་ཅིག །འཇིག་རྟེན་གྱི་ཁམས་གཅིག་ཏུ་ཇི་ལྟ་བདེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་ཡང་མ་ལུས་པར་ཡོངས་ སུ་བཟུང་སྟེ། སངས་རྒྱས་ཀྱི་ཞིང་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐའ་གཏུགས་པ་ཐམས་ཅད་མ་ལུས་པར་དེ་སྙེད་ཀྱི་རྒྱན་གྱིས་ཡོངས་སུ་བརྒྱན་པར་གནས་པར་གྱུར་ ཅིག །སངས་རྒྱས་ཀྱི་ཞིང་ཐམས་ཅད་མ་ལུས་པར་དུས་གསུམ་ཐམས་ཅད་ཀྱི་སངས་རྒྱས་ཀྱི་ཞིང་གི་ཡོན་ཏན་རྣམ་པར་ཕྱེ་བ་དང༌། སངས་རྒྱས་ཀྱི་ཞིང་གི་རྒྱན་དང༌། སངས་རྒྱས་ཀྱི་ཞིང་ གི་བདག་ཉིད་ཆེ་བ་དང༌། སངས་རྒྱས་ཀྱི་ཞིང་བལྟ་ན་མི་ངོམ་པ་དང༌། སངས་རྒྱས་ཀྱི་ཞིང་ཚད་མེད་པ་དང༌། སངས་རྒྱས་ཀྱི་ཞིང་ཡོངས་བ་དང༌། སངས་རྒྱས་ཀྱི་ཞིང་གྲངས་མེད་པ་དང༌། ༄༅། །སངས་རྒྱས་ཀྱི་ཞིང་བསམ་གྱིས་མི་ཁྱབ་པ་དང༌། སངས་རྒྱས་ཀྱི་ཞིང་མཚུངས་པ་མེད་པ་དང༌། སངས་རྒྱས་ཀྱི་ཞིང་མཐའ་ཡས་པ་ཇི་སྙེད་པ་དེ་དག་གི་རྒྱན་གྱིས་ རྣམ་པར་དག་པར་གྱུར་ཅིག །སངས་རྒྱས་ཀྱི་ཞིང་དེ་དག་ཐམས་ཅད་ཀྱང་བྱང་ཆུབ་སེམས་དཔའ་ཡོངས་སུ་རྫོགས་པ་རྗེས་སུ་འཇུག་པ། འཇིག་རྟེན་གྱི་ཁམས་ལ་རབ་ཏུ་འཇུག་པ། ཀུན་ཏུ་སྤྱོད་པ་མང་བ། སེམས་ཅན་གྱི་ཁམས་རྟོགས་པར་བྱ་བ་ཁོང་དུ་ཆུད་པ། ཆོས་ཀྱི་དབྱིངས་ལ་འཇུག་པ་རབ་ཏུ་རྟོགས་པ། ནམ་མཁའི་དབྱིངས་ལ་འཇུག་པ་རྨོངས་པ་མེད་ པ༑ སངས་རྒྱས་རྗེས་སུ་དྲན་པ་རབ་ཏུ་ཐོབ་པ། བསམ་གྱིས་མི་ཁྱབ་པའི་ཆོས་རྗེས་སུ་དྲན་པའི་ཚུལ་ཅན། ཚད་མེད་པའི་དགེ་འདུན་རྗེས་སུ་དྲན་པ་ལ་རབ་ཏུ་ཞུགས་པ། གཏོང་བ་ ལ་ཤིན་ཏུ་མོས་པ། གཏོང་བའི་རྗེས་སུ་དྲན་པ་རབ་ཏུ་ཐོབ་པ། ཡེ་ཤེས་ཀྱི་འོད་ཟེར་དང་ལྡན་པའི་ཆོས་ཀྱི་ཉི་མའི་དཀྱིལ་འཁོར་ཅན། ཆགས་པ་མེད་པར་ལྟ་བ། དམིགས་སུ་ མེད་པ་ལས་རབ་ཏུ་བྱུང་བ། སངས་རྒྱས་ཀྱི་ཆོས་ཀྱི་གནས་སུ་གྱུར་པ། དགེ་བའི་རྩ་བ་དམ་པས་ཐོག་མར་འགྲོ་བ་དང༌། དགེ་བའི་རྩ་བའི་དབང་གིས་སངས་རྒྱས་ཀྱི་བྱང་ཆུབ་ ཏུ་བྱུང་བ། དེ་བཞིན་གཤེགས་པའི་སྟོབས་ཀྱི་རྗེས་སུ་སོང་བ། ཐམས་ཅད་མཁྱེན་པ་ཉིད་ཀྱི་ཡུལ་གྱི་འོད་ཟེར་རབ་ཏུ་འགྱེད་པ། བདུད་ཀྱི་ལས་ཐམས་ཅད་རྣམ་པར་སྦྱངས་ པ༑ སེམས་ཅན་གྱི་ཁམས་ཐམས་ཅད་ཀྱི་རང་བཞིན་ཁོང་དུ་ཆུད་པ། ཕྱིན་ཅི་ལོག་མེད་པས་ཡང་དག་པར་བྱུང་བ། དགེ་བའི་རྩ་བ་དང༌། སྨོན་ལམ་ལ་གཏི་མུག་མེད་པ་ཤ་སྟག་གིས་ ཡོངས་སུ་གང་བར་གྱུར་ཅིག །བྱང་ཆུབ་སེམས་དཔའ་དེ་ལྟ་བུའི་ཚུལ་ཅན། དེ་ལྟ་བུའི་སྤྱོད་པ་ལ་ཞུགས་པ། དེ་ལྟ་བུའི་ཡོན་ཏན་དང་ལྡན་པ། དགེ་བའི་རྩ་བ་མཚུངས་པ་མེད་པ་ ཅན༑ རྟག་ཏུ་སངས་རྒྱས་ཀྱི་འཕྲིན་ལས་ལ་གཞོལ་བ། སངས་རྒྱས་ཀྱི་བྱང་ཆུབ་སྣང་བ་རབ་ཏུ་ཐོབ་པ། མུན་པ་མེད་པའི་ཆོས་ཀྱི་དབྱིངས་ཀྱི་ཡེ་ཤེས་དང་ལྡན་པ། ཆོས་ཀྱི་དབྱིངས་ ཐམས་ཅད་ལུས་གཅིག་གིས་ཁྱབ་པར་བྱེད་པའི་རྣམ་པར་འཕྲུལ་པ་ཆེན་པོ་ཡང་དག་པ་སྟོན་པ། ཡེ་ཤེས་ཆེན་པོ་ཁོང་དུ་ཆུད་པས་ཐམས་ཅད་མཁྱེན་པ་ཉིད་ཀྱི་སྤྱོད་ཡུལ་དང་ལྡན་པ། ཆོས་ཀྱི་དབྱིངས་མཐའ་ཡས་པའི་ཚིག་རབ་ཏུ་དབྱེ་བ་མངོན་པར་སྒྲུབ་པ་ལ་མཁས་པ། ཞིང་ཐམས་ཅད་ཀྱི་རྗེས་སུ་སོང་བ། གནས་མེད་པར་སངས་རྒྱས་ཀྱི་ཞིང་ཐམས་ཅད་ན་གནས་ པ༑ ནམ་མཁའི་དབྱིངས་སུ་མོས་པས་མི་གནས་པའི་ཡིད་དང་ལྡན་པ། ཆོས་ཀྱི་དབྱིངས་ཐམས་ཅད་དུ་རྣམ་པར་ཕྱེ་བའི་བསམ་པ་ཅན། བྱང་ཆུབ་སེམས་དཔའི་ཏིང་ངེ་འཛིན་ བསམ་གྱིས་མི་ཁྱབ་པ་ལ་མཉམ་པར་གཞོག་པ་ལ་མཁས་པ། ཐམས་ཅད་མཁྱེན་པའི་སྤྱོད་ཡུལ་གྱི་སངས་རྒྱས་ཀྱི་ཞིང་ལ་གནས་པ། སངས་རྒྱས་ཐམས་ཅད་ཀྱི་བྱིན་གྱི་ ༄༅། །རླབས་ཤེས་པར་བྱ་བ་ལ་མཁས་པ། ཆོས་གྲངས་མེད་པ་བསྟན་ཅིང་བཤད་པ་ལ་འཇིགས་པ་མེད་པ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་ སངས་རྒྱས་ཐམས་ཅད་ཀྱི་དགེ་བའི་རྗེས་སུ་སོང་བ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་དབྱིངས་ལ་གནས་པ། སངས་རྒྱས་ཐམས་ཅད་ཀྱི་ཆོས་བསྟན་པ་ཡོངས་སུ་འཛིན་ པ༑ སྒྲ་བསམ་གྱིས་མི་ཁྱབ་པ་རྣམ་པར་དབྱེ་ཞིང་མངོན་པར་སྒྲུབ་པ་ལ་མཁས་པས་གྲངས་མེད་པའི་སྐད་རྣམ་པ་ཐ་དད་པ་ཤེས་པ། བླ་ན་མེད་པའི་སངས་རྒྱས་ཀྱི་རྣམ་པར་འཕྲུལ་པའི་ས་ ཁོང་དུ་ཆུད་པ། འཇིག་རྟེན་གྱི་ཁམས་ཐམས་ཅད་ཀྱི་རྗེས་སུ་སོང་ཞིང་ཆགས་པ་མེད་པར་སྤྱོད་པ། ཉོན་མོངས་པ་མེད་པའི་ཆོས་ཀྱི་ཚུལ་ལ་ཆོས་སུ་རྟོགས་པས་གནས་པ་མེད་པ། སེམས་ བསྐྱེད་པ་ཡངས་པ་ཤིན་ཏུ་རྣམ་པར་བསྒོམས་པ་རབ་ཏུ་ཐོབ་པ། ཡེ་ཤེས་གཅིག་ནས་གཅིག་ཏུ་བརྒྱུད་པའི་རྒྱུད་ལ་མཁས་པ། དོན་གཅིག་ནས་གཅིག་ཏུ་བསྟན་པ་རབ་ཏུ་གྲུབ་པ་དེ་ལྟ་བུ་དག་ གིས་འཇིག་རྟེན་གྱི་ཁམས་དེ་དག་ཡོངས་སུ་བརྒྱན་པར་གྱུར་ཅིག །ཡོངས་སུ་གང་བར་གྱུར་ཅིག །རྣམ་པར་མཛེས་པར་གྱུར་ཅིག །རྗེས་སུ་དོང་བར་གྱུར་ཅིག །ཀུན་ཏུ་གནས་པར་ གྱུར་ཅིག །བསྒོམས་པར་གྱུར་ཅིག །ཤིན་ཏུ་བསྒོམས་པར་གྱུར་ཅིག །སྦྱངས་པར་གྱུར་ཅིག །ཤིན་ཏུ་སྦྱངས་པར་གྱུར་ཅིག །ཞི་བར་བྱས་པར་གྱུར་ཅིག །སངས་རྒྱས་ཀྱི་ ཞིང་རེ་རེའི་ཕྱོགས་རེ་རེ་ཞིང་ཡང་བྱང་ཆུབ་སེམས་དཔའ་ཚད་མེད་པ། གྲངས་མེད་བསམ་གྱིས་མི་ཁྱབ་པ། གཞལ་དུ་མེད་པ། མུ་མེད་པ། ས་མཚམས་མེད་པ། དཔག་ཏུ་མེད་པ། བརྗོད་དུ་མེད་པ། བརྗོད་དུ་མེད་པའི་ཡང་བརྗོད་དུ་མེད་པས་ཡོངས་སུ་རྒྱས་པར་གྱུར་ཅིག །ཕྱོགས་གཅིག་ཇི་ལྟ་བ་དེ་བཞིན་དུ་སངས་རྒྱས་ཀྱི་ཞིང་ཆོས་ཀྱི་དབྱིངས་ཀྱིས་ཀླས་པ། ནམ་ མཁའི་མཐས་གཏུགས་པ་མ་ལུས་པ། ལུས་པ་མེད་པ། ལྷག་མ་མེད་པ་ཐམས་ཅད་ཀྱང་བྱང་ཆུབ་སེམས་དཔའ་འདི་ལྟ་བུའི་ཚུལ་ཅན་གྱིས་ཡོངས་སུ་རྒྱས་ཤིང་ཡོངས་སུ་གང་བར་གྱུར་ཅིག ། ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་ཡོངས་སུ་བསྔོ་སྟེ། ཚུལ་དེ་ལྟ་བུས་སངས་རྒྱས་ཀྱི་ཞིང་ཐམས་ཅད་དང༌། ཚུལ་དེ་ལྟ་བུས་འབྱུང་བ་ཐམས་ཅད་དང༌། ཚུལ་དེ་ལྟ་བུས་སེམས་ཅན་གྱི་ཁམས་ཐམས་ཅད་རྣམ་པར་དག་པ་དང༌། ཚུལ་དེ་ལྟ་བུས་སངས་རྒྱས་ཐམས་ཅད་ཀྱི་བྱང་ཆུབ་དང༌། ཚུལ་དེ་ལྟ་བུས་སྨོན་ལམ་ཐམས་ཅད་དང༌། ཚུལ་དེ་ ལྟ་བུས་འཇིག་རྟེན་གྱི་ཁམས་ཐམས་ཅད་དུ་སངས་རྒྱས་སྐྱེས་པ་མཐོང་བ་དང་མི་འབྲལ་བ་དང༌། ཚུལ་དེ་ལྟ་བུས་དེ་བཞིན་གཤེགས་པ་སྐུ་ཚེ་ཚད་མེད་པ་དང༌། ཚུལ་དེ་ལྟ་བུས་ཐོགས་ པ་མེད་པར་ཆོས་ཀྱི་དབྱིངས་ཐམས་ཅད་དུ་ཆོས་ཀྱི་འཁོར་ལོ་བསྐོར་པ་ཕྱིར་མི་ལྡོག་པའི་ཕྱིར་ཡོངས་སུ་བསྔོའོ། །དེ་ལྟར་བྱང་ཆུབ་སེམས་དཔའ་དེ་དགེ་བའི་རྩ་བ་དེ་དག་ཐམས་ཅད་སངས་ ༄༅། །རྒྱས་ཀྱི་ཞིང་ཐམས་ཅད་ཀྱི་རྗེས་སུ་སོང་བའི་སངས་རྒྱས་ཀྱི་ཞིང་ཡོངས་སུ་དག་པ་དང༌། སེམས་ཅན་ཐམས་ཅད་ཀྱི་རྗེས་སུ་སོང་བའི་བྱང་ཆུབ་སེམས་དཔའ་ཡོངས་སུ་ དག་པ་དང༌། སངས་རྒྱས་སྐྱེ་བ་ཐམས་ཅད་ཀྱིས་མ་ལུས་པར་གང་བར་བྱས་པའི་ཆོས་ཀྱི་དབྱིངས་ཡོངས་སུ་དག་པ་དང༌། སངས་རྒྱས་ཀྱི་ཞིང་ཐམས་ཅད་མ་ལུས་པར་ཤིན་ཏུ་བྱུང་བའི་དེ་ བཞིན་གཤེགས་པའི་སྐུ་དང༌། ཐམས་ཅད་མཁྱེན་པར་འབྱུང་བར་བགོ་སྐལ་མེད་པར་ཡོངས་སུ་བསྔོས་པ་དང༌། ནམ་མཁའི་ཁམས་ཚད་མེད་པའི་རྗེས་སུ་སོང་བའི་སེམས་ཀྱི་ས་དང༌། ཡོངས་སུ་བསྔོ་བའི་ཚད་བསམ་གྱིས་མི་ཁྱབ་པའི་རྗེས་སུ་ཞུགས་པ་དང༌། ཡོངས་སུ་བསྔོ་བའི་མཉམ་པ་ཉིད་ལས་ཀྱི་རྣམ་པར་སྨིན་པ་ཐམས་ཅད་ལས་རྣམ་པར་གྲོལ་ཞིང་ཤིན་ཏུ་མོས་པ་ དང༑ ཡོངས་སུ་བསྔོ་བའི་ཁྱད་པར་མཐའ་ཡས་པར་འབྲེལ་བར་བྱས་པ་དང༌། ཡོངས་སུ་བསྔོ་བའི་ཚུལ་ཆོས་ཀྱི་དབྱིངས་ཐམས་ཅད་ཀྱི་རྗེས་སུ་སོང་བས། ཡོངས་སུ་བསྔོ་བའི་ཚེ་བདག་ ལ་མི་རྟོག་གོ། བདག་གི་ལུས་ལ་རྣམ་པར་མི་རྟོག་གོ། སངས་རྒྱས་ལ་མི་རྟོག་གོ །སངས་རྒྱས་ཀྱི་ཆོས་ལ་རྣམ་པར་མི་རྟོག་གོ །ཞིང་ལ་མི་རྟོག་གོ །ཞིང་གི་ཡང་དག་པར་སྤྱོད་པས་རྣམ་པར་ སྤྱོད་པ་ལ་རྣམ་པར་མི་རྟོག་གོ །སེམས་ཅན་ལ་རྣམ་པར་མི་རྟོག་གོ །སེམས་ཅན་གདུལ་བ་ལ་རྣམ་པར་མི་རྟོག་གོ །ལས་ལ་མི་རྟོག་གོ །ལས་ཀྱི་རྣམ་པར་སྨིན་པ་ལ་རྣམ་པར་མི་རྟོག་ གོ་༑སེམས་པ་ལ་ཆགས་པར་མི་བྱེད་དོ། །བསམ་པས་ཀྱང་མངོན་པར་ཆགས་པར་མི་བྱེད་དོ། །རྒྱུ་ཆུད་གཟོན་པར་མི་བྱེད་དོ། །རྒྱུ་དང་འབྲས་བུ་ཆུད་གཟོན་པར་མི་བྱེད་དོ། །དངོས་པོ་ཉེ་བར་ ལེན་པར་མི་བྱེད་དོ། །དངོས་པོའི་ཆོས་ལ་ཆགས་པར་ཡང་མི་བྱེད་དོ། །འཁོར་བའི་རྣམ་པ་ཐ་དད་པ་གཅིག་ཏུ་མི་བྱེད་དོ། །ཞི་བ་རྣམ་པར་བརྟགས་པ་མེད་པས་རློམ་སེམས་མི་བྱེད་དོ། ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡུལ་གྱིས་སྙེམས་པར་མི་བྱེད་དོ། །ཆོས་གང་གིས་ཀྱང་ཆོས་ལ་གནས་པར་མི་བྱེད་དོ། །དེ་ལྟར་བྱང་ཆུབ་སེམས་དཔའ་སེམས་ དཔའ་ཆེན་པོ་དགེ་བའི་རྩ་བ་དེ་དག་ཉེ་བར་སྟོབས་སོ། །ཁོང་དུ་ཆུད་པར་བྱེད་དོ། །ཡོངས་སུ་བསྔོའོ། །ཡོངས་སུ་སྨིན་པར་བྱེད་དོ། །མཉམ་པར་བྱེད་དོ། །སྒྲུབ་བོ། །མཚན་མར་མི་བྱེད་དོ། ། དམིགས་པར་མི་བྱེད་དོ། །མི་འཇལ་ལོ། །མི་རྟོག་གོ །རྣམ་པར་མི་རྟོག་གོ །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཡོངས་སུ་བསྔོ་བ་ནི། འདས་པ་དང༌། མ་བྱོན་པ་དང༌། ད་ ལྟར་བྱུང་བའི་སངས་རྒྱས་ཐམས་ཅད་རྗེས་སུ་དྲན་པས་དགེ་བའི་རྩ་བ་མི་ཟད་པ་ཡིན། བྱང་ཆུབ་སེམས་དཔའ་ཐམས་ཅད་ལ་ཡང་དག་པར་འཇུག་པས་དགེ་བའི་རྩ་བ་ཐམས་ཅད་མི་ཟད་ པ་ཡིན༑ ཞིང་རྣམ་པར་དག་པས་ཡོངས་སུ་བསྔོ་བས་དགེ་བའི་རྩ་བ་མི་ཟད་པ་ཡིན། སེམས་ཅན་གྱི་ཁམས་རྣམ་པར་དག་པ་ལ་རྣམ་པར་དཔྱོད་པས་དགེ་བའི་རྩ་བ་མི་ཟད་པ་ཡིན། ཆོས་ ༄༅། །ཀྱི་དབྱིངས་སུ་འཇུག་པ་ལ་ཞུགས་པས་དགེ་བའི་རྩ་བ་མི་ཟད་པ་ཡིན། ནམ་མཁའི་ཁམས་ལྟར་ཚད་མེད་པའི་སེམས་ལ་ཡོངས་སུ་བསྒོམས་པས་དགེ་ བའི་རྩ་བ་མི་ཟད་པ་ཡིན། སངས་རྒྱས་ཐམས་ཅད་ཀྱི་ཡུལ་ལ་ཤིན་ཏུ་མོས་པས་དགེ་བའི་རྩ་བ་མི་ཟད་པ་ཡིན། བྱང་ཆུབ་སེམས་དཔའ་ཐམས་ཅད་ཀྱི་ལས་ལ་བརྩོན་པས་དགེ་ བའི་རྩ་བ་མི་ཟད་པ་ཡིན། དུས་གསུམ་རབ་ཏུ་རྣམ་པར་འབྱེད་པས་དགེ་བའི་རྩ་བ་མི་ཟད་པ་ཡིན་ཏེ། དེ་ནས་སེམས་ཅན་གྱི་ཁམས་ཐམས་ཅད་ལ་སེམས་ཅན་མེད་པར་རབ་ཏུ་ རྟོག་ཅིང་ཡོངས་སུ་བསྔོའོ། །ཆོས་ཐམས་ཅད་ལ་སྲོག་མེད་པར་ཁོང་དུ་ཆུད་ཅིང་ཡོངས་སུ་བསྔོའོ། །ཆོས་ཐམས་ཅད་ལ་བྱེད་པ་མེད་པར་ཡང་དག་པ་ཇི་ལྟ་བ་བཞིན་དུ་ཤེས་ཤིང་ ཡོངས་སུ་བསྔོའོ། །དགེ་བའི་རྩ་བ་ཐམས་ཅད་ལ་གང་ཟག་མེད་པར་སེམས་ཤིང་ཡོངས་སུ་བསྔོའོ། །ཆོས་ཐམས་ཅད་ཉོན་མོངས་པ་མེད་པར་རབ་ཏུ་རྟོག་ཅིང་ཡོངས་སུ་བསྔོའོ། ། ཆོས་ཐམས་ཅད་ཀྱི་རྟེན་པ་ཡང་དག་པར་མཐོང་ཞིང་ཡོངས་སུ་བསྔོའོ། །དངོས་པོ་ཐམས་ཅད་ལ་མི་གནས་པ་ཡང་དག་པ་ཇི་ལྟ་བ་བཞིན་དུ་ཤེས་ཤིང་ཡོངས་སུ་བསྔོའོ། །ཞིང་ཐམས་ ཅད་ལ་ཡང་དག་པར་མི་གནས་པ་ཉིད་དུ་ཤེས་ཤིང་ཡོངས་སུ་བསྔོའོ། །བྱང་ཆུབ་སེམས་དཔའི་སྤྱོད་པ་ལ་མི་གནས་པ་ཉིད་དུ་ལྟ་ཞིང་ཡོངས་སུ་བསྔོའོ། །དམིགས་པ་ཐམས་ཅད་ ལ་དམིགས་སུ་མེད་པ་ཉིད་དུ་ཤེས་པས་མཐོང་ཞིང་ཡོངས་སུ་བསྔོའོ། །དེ་དེ་ལྟར་ཡོངས་སུ་བསྔོ་བས་ཞིང་གང་ཡང་ཀུན་ནས་ཉོན་མོངས་པ་དང་བཅས་པར་མིག་ལམ་དུ་སྣང་བར་མི་འགྱུར་ རོ༑ ༑ཀུན་ཏུ་ལྟ་ཡང་སེམས་ཅན་གང་ཡང་མི་མཐུན་པ་མཐོང་བར་མི་འགྱུར་རོ། །སྤྱོད་པའི་ཚེ་ཆོས་གང་ཡང་ཡང་དག་པར་མི་མཐོང་ངོ༌། །ཡེ་ཤེས་ཀྱི་འཇུག་པས་གང་ལ་ཡང་འཇུག་པ་མེད་དོ། ། ནམ་མཁའི་དབྱིངས་ཐམས་ཅད་ལའང་རབ་ཏུ་གནས་ཏེ། དེ་ཡང་ཤིན་ཏུ་ཤེས་སོ། །བསོད་ནམས་ཀྱི་སྟོབས་ཚད་མེད་པས། དེ་བཞིན་གཤེགས་པའི་སྐུས་ཆོས་ཐམས་ཅད་གང་བར་ཤིན་ ཏུ་ཤེས་སོ། །སེམས་ཅན་ཐམས་ཅད་ཚིམ་པར་བྱ་བའི་ཕྱིར་དགེ་བའི་རྩ་བ་ཐམས་ཅད་དུ་འགྲོ་བ་ལ་ཡང་དག་པར་སྤྱོད་དོ། །དེའི་སེམས་བསྐྱེད་པ་རེ་རེ་ཞིང་ཡང་སེམས་ཅན་བརྗོད་དུ་མེད་པའི་ ཡང་བརྗོད་དུ་མེད་པ་སྟོབས་བཅུའི་སར་ཡང་དག་པར་གྲུབ་བོ། །དེ་ནས་སེམས་ཅན་ཐམས་ཅད་བསོད་ནམས་ཐམས་ཅད་ཀྱིས་ཡོངས་སུ་གཟུང་ཞིང་ཐོབ་པར་བྱ་བའི་ཕྱིར་དགེ་བའི་རྩ་བ་རྣམ་པར་ དག་པ་བསོད་ནམས་ཐམས་ཅད་ཀྱི་འབྱུང་གནས་དང་ལྡན་པ་ཐམས་ཅད་རབ་ཏུ་སྒྲུབ་བོ། །དེ་ཡོ་བྱད་ཅི་འདོད་པ་ཕུན་སུམ་ཚོགས་པས་བསོད་ནམས་ཀྱི་མཛོད་ཡིད་བཞིན་གྱི་ནོར་བུ་ལྟ་ བུ་དང་ལྡན་པ་ཡིན་ནོ། །དེ་གང་དང་གང་དུ་འགྲོ་བ་དེ་དང་དེ་དག་ཏུ་ཞིང་ཐམས་ཅད་རྣམ་པར་སྦྱོང་ཞིང་འགྲོའོ། །དེ་གང་དང་གང་དུ་སྤྱོད་པ་དེ་དང་དེ་དག་ཏུ་སེམས་ཅན་བརྗོད་དུ་མེད་པའི་ཡང་ ༄༅། །བརྗོད་དུ་མེད་པ་རྣམ་པར་དག་པར་བྱ་བའི་ཕྱིར་བསོད་ནམས་ཀྱི་སྟོབས་ཀྱིས་ཡོངས་སུ་གཟུང་བ་ལ་རབ་ཏུ་གཞོག་ཅིང་ཡང་དག་པར་སྤྱོད་དོ། །དེ་ལྟར་ཡོངས་ སུ་བསྔོ་བ་དེ་ལ་རྣམ་པ་དེ་ལྟ་བུ་དེའི་རྒྱུ་མཐུན་པས་བྱང་ཆུབ་སེམས་དཔའི་སྤྱད་པ་སྤྱོད་པ་ན་གཟུགས་མེད་པ་ཡིན། འཇིག་རྟེན་ཐམས་ཅད་ཀྱིས་ཟིལ་གྱིས་མི་ནོན་པའི་བསོད་ནམས་ ཅན་ཡིན། བདུད་ཐམས་ཅད་ཀྱིས་གཟི་བརྗིད་མི་ཟད་པ་ཡིན། ཕྱིར་རྒོལ་བ་ཐམས་ཅད་ཀྱིས་དགེ་བའི་རྩ་བ་མི་འཕྲོག་པ་ཡིན། ཐམས་ཅད་མཁྱེན་པའི་ཡིད་ཡང་དག་ པར་རྟོགས་པ་དང་ལྡན་པས་སྨོན་ལམ་ཤིན་ཏུ་ཆེ་བ་དང༌། སེམས་རབ་ཏུ་ཡངས་པ་ཡིན། སེམས་བསྐྱེད་པ་གཅིག་གིས་སངས་རྒྱས་ཀྱི་ཞིང་ཚད་མེད་པར་འགྲོ་བ་ཡིན། ཡེ་ ཤེས་ཀྱི་སྟོབས་མཐའ་ཡས་པས་སངས་རྒྱས་ཐམས་ཅད་ཀྱི་ཡུལ་ཡོངས་སུ་ཤེས་པ་ཡིན། སངས་རྒྱས་ཐམས་ཅད་ལ་ཤིན་ཏུ་དད་པ་ཡིན། ཡེ་ཤེས་མཐའ་ཡས་པར་ཤིན་ ཏུ་འཇུག་པ་ལ་རབ་ཏུ་གནས་པ་ཡིན། ནམ་མཁའི་དབྱིངས་ཀྱིས་གླས་པའི་བྱང་ཆུབ་ཀྱི་སེམས་མངོན་པར་བསྒྲུབས་པའི་མཐུས་ནམ་མཁའི་དབྱིངས་ཀྱིས་ཀླས་པར་ཆོས་ཀྱི་དབྱིངས་ ཤིན་ཏུ་ཡངས་པ་ཡིན་ནོ། །ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་ལྔ་པ་བསོད་ནམས་མི་ཟད་པའི་མཛོད་ཅེས་བྱ་བ་སྟེ། དེ་ལ་གནས་པའི་བྱང་ཆུབ་སེམས་དཔའ་ནི། མི་ཟད་པའི་མཛོད་བཅུ་རབ་ཏུ་འཐོབ་བོ། །བཅུ་གང་ཞེ་ན། སྐྲའི་སྦུབས་གཅིག་ཏུ་སངས་རྒྱས་གྲངས་མེད་པ་འབྱུང་བ་ལ་འཇུག་པའི་ཕྱིར་ སངས་རྒྱས་བལྟ་བའི་གཏེར་མི་ཟད་པའི་མཛོད་རབ་ཏུ་འཐོབ་བོ། །ཆོས་ཐམས་ཅད་གཅིག་ཏུ་རབ་ཏུ་གཞོལ་བའི་དེ་བཞིན་གཤེགས་པའི་སྟོབས་དང་ཡེ་ཤེས་ཀྱི་ཕྱིར་ཆོས་ལ་འཇུག་ པའི་གཏེར་མི་ཟད་པའི་མཛོད་རབ་ཏུ་འཐོབ་བོ། །དེ་བཞིན་གཤེགས་པ་ཐམས་ཅད་ཀྱིས་ཆོས་བསྟན་པ་ཡོངས་སུ་བཟུང་ཞིང་ཆུད་མི་ཟོས་པར་བྱ་བའི་ཕྱིར་དྲན་པས་བཟུང་བའི་གཏེར་ མི་ཟད་པའི་མཛོད་རབ་ཏུ་འཐོབ་བོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་དང་དགོངས་པ་ཤིན་ཏུ་བསྟན་པ་ལ་མཁས་པར་བྱ་བའི་ཕྱིར་བློ་གྲོས་རྣམ་པར་ངེས་པའི་གཏེར་ མི་ཟད་པའི་མཛོད་རབ་ཏུ་འཐོབ་བོ། །ཆོས་ཀྱི་ཚུལ་རྣམ་པར་དབྱེ་བ་ལ་མཁས་པར་བྱ་བའི་ཕྱིར་རིགས་པས་འཛིན་པའི་གཏེར་མི་ཟད་པའི་མཛོད་རབ་ཏུ་འཐོབ་བོ། །ནམ་མཁའི་ དབྱིངས་དང་མཉམ་པའི་བློས་དུས་གསུམ་ཐམས་ཅད་ཁྱབ་པར་བྱ་བའི་ཕྱིར་བློ་ཚད་མེད་པའི་གཏེར་མི་ཟད་པའི་མཛོད་རབ་ཏུ་འཐོབ་བོ། །སེམས་ཅན་ཐམས་ཅད་ཚིམ་པར་བྱ་བས་མི་ ཟད་པར་བྱ་བའི་ཕྱིར་བསོད་ནམས་ཀྱི་གཏེར་མི་ཟད་པའི་མཛོད་རབ་ཏུ་འཐོབ་བོ། །སེམས་ཅན་ཐམས་ཅད་ཀྱི་མུན་པ་དང༌། རབ་རིབ་དང༌། ལིང་ཏོག་དང༌། གཏི་མུག་དང༌། མ་རིག་པའི་ ༄༅། །མུན་པ་རྣམ་པར་བསལ་བའི་ཕྱིར་ཡེ་ཤེས་དང་དགའ་བ་དང་བློའི་གཏེར་མི་ཟད་པའི་མཛོད་རབ་ཏུ་འཐོབ་བོ། །སངས་རྒྱས་ཐམས་ཅད་ཀྱི་ཆོས་ཉིད་ཐ་མི་ དད་པ་རབ་ཏུ་བསྟན་པས་སེམས་ཅན་ཐམས་ཅད་ཤེས་པར་བྱ་བའི་ཕྱིར་སྤོབས་པ་རྣམ་པར་ངེས་པའི་གཏེར་རབ་ཏུ་འཐོབ་བོ། །བྱང་ཆུབ་སེམས་དཔའ་སྤྱོད་པ་རྒྱུན་མི་འཆད་ པས་ཐམས་ཅད་མཁྱེན་པ་ཉིད་ཆགས་པ་མེད་པའི་ཐབས་སྐྱོན་མེད་པའི་དབང་བསྐུར་བའི་ཕྱིར་སྟོབས་བཅུ་དང་མི་འཇིགས་པའི་གཏེར་མི་ཟད་པ་རབ་ཏུ་འཐོབ་སྟེ། གཏེར་ མི་ཟད་པའི་མཛོད་བཅུ་པོ་འདི་དག་རབ་ཏུ་འཐོབ་བོ། །དེ་ནས་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་ བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསམ་པས་མཐུ་སྟོབས་རྙེད་པ་དེ་དག་ནི། །མཐའ་ཡས་ཆོས་ལ་ཀུན་ཏུ་དབང་བསྒྱུར་ཅིང༌། །བསོད་ནམས་གཏེར་ ལ་རྗེས་སུ་ཡི་རང་བ། །དེ་དག་ཆགས་མེད་ཚུལ་གྱིས་ཡོངས་སུ་བསྔོ། །དུས་གསུམ་རྒྱལ་བ་སུ་དག་ཇི་སྙེད་པས། །རྣམ་དག་ཞིང་རྣམས་འཇིག་རྟེན་རྣམ་སྦྱངས་པ། །ཡོན་ ཏན་ཀུན་དང་ལྡན་ཞིང་འཕགས་པ་རྣམས། །དེ་འདྲའི་རྣམ་དག་ཞིང་དུ་ཡོངས་སུ་བསྔོ། །དུས་གསུམ་རྒྱལ་བ་ཇི་སྙེད་བཞུགས་པ་ཡི། །ཚུལ་རྣམས་ཀུན་ལ་རྗེས་སུ་སེམས་ བྱེད་ཅིང༌། །ཐམས་ཅད་ལུས་པ་མེད་པར་ངེས་བཟུང་སྟེ། །དེ་འདྲའི་ཞིང་ནི་བརྟན་པ་རྣམས་ཀྱིས་བརྒྱན། །དུས་གསུམ་བསྐལ་པ་ཇི་སྙེད་ཡོད་པ་ཡི། །ཞིང་གཅིག་ཡོན་ཏན་དེ་དག་བླངས་ བྱས་ཀྱང༌། །བསྐལ་པ་ཇི་སྙེད་དེ་དག་ཟད་འགྱུར་གྱི། །ཞིང་གི་ཡོན་ཏན་བསྔགས་པ་ཟད་མི་འགྱུར། །འདི་འདྲའི་ཞིང་རྣམས་ཐམས་ཅད་མ་ལུས་པར། །མི་ཡི་མཆོག་གིས་ཇི་སྙེད་ མཐོང་གྱུར་པ། །ཐམས་ཅད་མ་ལུས་ཞིང་གི་ཡོན་ཏན་གྱིས། །ཇི་སྙེད་འཇིག་རྟེན་དེ་དག་བརྒྱན་པར་སྣང༌། །དེ་དག་ཀུན་ཀྱང་རྣམ་དག་ཡིད་དང་ལྡན། །དེ་དག་རྒྱལ་བའི་གསུང་སྐྱེས་ སྲས་ཡིན་ཏེ། །ཡོན་ཏན་ཀུན་གྱིས་བརྒྱན་པའི་སེམས་དང་ལྡན༑ །ཞིང་གི་ཕྱོགས་རྣམས་རབ་ཏུ་རྒྱས་པར་བྱེད། །དེ་དག་ལུས་ནི་མཚན་གྱིས་ཤིན་ཏུ་བརྒྱན། །དེ་དག་དཔེ་བྱད་བཟང་ པོས་ལུས་ཀྱང་མཛེས། །དེ་དག་མཐའ་ཡས་ཡང་དག་སོ་སོ་ཤེས། །འགྲོ་བའི་རྒྱ་མཚོ་མི་ཟད་ཇི་བཞིན་ནོ། །དེ་དག་སྤྱོད་ཡུལ་དག་དང་ཡང་དག་ལྡན། །ཏིང་འཛིན་ཀུན་ལ་གནས་པ་ རྗེས་སུ་ཐོབ། །མཚུངས་མེད་ཤིན་ཏུ་རྣམ་པར་དག་པའི་ཡིད། །ཐམས་ཅད་ཕྱོགས་རྣམས་སུ་ནི་འོན་ཀྱང་འགྱེད། །འདི་འདྲའི་ཞིང་རྣམས་མ་ལུས་བཟུང་བྱས་ཏེ། །ཉན་ཐོས་སྤྱོད་ ཡུལ་དག་ལ་དད་མེད་པ། །རང་རྒྱལ་ཐམས་ཅད་ཤིན་ཏུ་སྤངས་གྱུར་ཏེ། །མི་ཡི་དམ་པས་ཤིན་ཏུ་གང་གྱུར་ཅིག །དེ་དག་དེ་འདྲའི་ཡོངས་བསྔོ་སེམས་ལྡན་པ། །གང་གིས་མ་ལུས་ ༄༅། །འཇིག་རྟེན་བྱང་ཆུབ་ཏུ། །དུས་གསུམ་རྒྱལ་བས་མངོན་པར་སངས་རྒྱས་པ། །དེ་དང་ལྡན་པར་ཡོངས་སུ་བསྔོ་བར་བྱེད། །ཕྱོགས་བཅུ་ཀུན་ན་ཇི་སྙེད་ཡོད་པ་ཡི། ། བདུད་དང་ཉོན་མོངས་དེ་དག་རབ་ཏུ་འཇོམས། །དཔལ་ལྡན་མཐུ་ཅན་གཞན་གྱིས་ཕམ་མི་ནུས། །རྣམ་པར་ངེས་པས་ཆོས་ཀྱི་དམ་པ་སྤྱོད། །དེ་དག་སྨོན་ལམ་མཐུ་སྟོབས་ཡངས་པ་ ཡིན༑ ༑ཡོངས་སུ་བསྔོ་བ་ཆགས་པ་མེད་གྱུར་ཅིང༌། །བསོད་ནམས་ཟད་མེད་དེ་དག་མཛོད་དུ་ཞུགས། །དེ་ནི་དུས་གསུམ་ཀུན་ཏུ་ཟད་མི་འགྱུར། །དེ་དག་སྤྱོད་པས་ཆོས་ལ་འཇལ་ བར་བྱེད། །དེ་དག་བྱེད་པ་མེད་པའི་ཆོས་ལ་ཞུགས། །གཡོ་མེད་ཆོས་ཀྱང་དེ་དག་རབ་ཏུ་ཤེས། །ལས་ཀྱི་རྣམ་པས་ཡོངས་སུ་མི་སེམས་སོ། །གཟུགས་ནི་མ་ཡིན་འོན་ཀྱང་གཟུགས་ མེད་མིན། །འདུ་ཤེས་ཡོད་མིན་འདུ་ཤེས་མེད་པ་མིན། །དངོས་ཡོད་མ་ཡིན་དངོས་པོ་མེད་པའང་མིན། དངོས་མེད་ཐམས་ཅད་རང་བཞིན་ཁོང་དུ་ཆུད། །ཡོད་པ་མ་ཡིན་མེད་པའང་ མ་ཡིན་ཏེ། །རྒྱུ་ཡི་རྒྱུད་ལ་མངོན་པར་ཆགས་མི་བྱེད། །རྐྱེན་ལའང་འཇུག་པར་དེ་དག་མི་བྱེད་དོ། །ནམ་ཡང་དེ་དག་ཆགས་པར་མི་བྱེད་དོ། །འགྲོ་བ་འདི་ན་སྨྲ་ཚུལ་ཇི་སྙེད་པ། ། དེ་ལ་ནམ་ཡང་ཆགས་པར་མི་བྱེད་དེ། །འདུ་ཤེས་བསམ་པ་བརྔ་ཡང་རབ་ཏུ་ཤེས། །བདག་མེད་ཆོས་ཀྱང་སོ་སོར་ཤིན་ཏུ་རྟོགས། །དེ་དག་སེམས་ཅན་མི་འབྲལ་ཞེས་འགྱུར་ བ༑ ༑དེ་འདྲའི་ཆོས་ཉིད་མཉམ་པ་རབ་ཏུ་རྟོགས། །དེ་འདྲའི་ཞིང་དང་དེ་བཞིན་ལས་ཀྱི་རྣམས། །དུས་གསུམ་ཐམས་ཅད་མ་ལུས་བཟུང་བྱས་ཤིང༌། །ཤེས་པས་དེ་དག་དེ་བཞིན་ ཡོངས་སུ་བསྔོ། །ལས་ཀྱི་རྣམ་པ་གང་གིས་སྐྱེས་ལྡན་ཞིང༌། །རང་བཞིན་གང་དང་མཚན་ཉིད་གང་ཡིན་དང༌། །དེ་ན་ཅི་འདྲའི་ཆོས་ཉིད་ཡོད་པ་དག །དེ་བཞིན་དེ་དག་དག་པར་ཡོངས་སུ་ བསྔོ༑ ༑གང་གི་ཡིད་ཀྱིས་ངོ་བོ་ཉིད་འཇལ་བ། །རང་བཞིན་བྱས་པ་མེད་པར་དེ་དག་ཤེས། །འགྲོ་ལ་དེ་དག་མི་གནས་ལེན་པ་མེད། །འགྲོ་བ་ཀུན་ཕྱིར་ཡོངས་སུ་བསྔོ་བར་གཞོལ། །སྤྱོད་ ཡུལ་མ་ལུས་ཐམས་ཅད་བཟུང་བྱས་ཤིང༌། །འོད་གསལ་ཐམས་ཅད་རྗེས་སུ་སེམས་པར་བྱེད། །མ་ལུས་དེ་བཞིན་ཉིད་ཀྱང་དེ་དག་ཤེས། །གང་གིས་ལྟ་བ་ཐམས་ཅད་མ་ལུས་ཤིང༌། ། བསམ་པའི་སྐྱོན་པོར་རྣམ་པར་སྤངས་པ་རྣམས། །རྟག་ཏུ་དེ་དག་དྲི་མེད་ཀུན་གདུང་མེད། །ཆགས་མེད་ཀུན་གྱི་ཚུལ་ཡང་རྗེས་སུ་རྟོགས། །དེ་དག་གིས་ནི་ཆོས་རྣམས་མ་བཤིག་སྟེ། །ནམ་ ཡང་ཆོས་ཉིད་ཞིག་པར་འགྱུར་བ་མེད། །ཆོས་ལ་ཆགས་པར་དེ་དག་མི་བྱེད་དེ། །དེ་དག་འཇིག་རྟེན་སྒྲ་བརྙན་འདྲ་བ་ཡིན། །གང་གིས་དུས་གསུམ་འཇིག་རྟེན་སྐྱེས་པ་ཡིན། །འགྲོ་བ་རྐྱེན་འབྱུང་ཆོས་ ཀྱང་རབ་ཏུ་ཤེས། །བསམ་པ་དག་དང་བག་ཆགས་ཁོང་དུ་ཆུད། །ཐམས་ཅད་འཇིག་པར་བྱེད་པ་གང་ཡང་མེད། །དེ་དག་ལས་དང་ལས་མིན་རབ་ཏུ་ཤེས། །ལས་དང་རྣམ་པར་འགལ་བར་མི་ ༄༅། །བྱེད་དེ༑ ༑ལས་ཀྱི་རྣམ་པར་སྨིན་པ་ཆུད་མི་གཟོན། །རྒྱུ་ལས་འབྱུང་བའི་ཆོས་ཀྱང་ཤིན་ཏུ་སྟོན། །འདི་ན་སེམས་ཅན་གང་ཡང་འཁོར་བ་མེད། །སེམས་ཅན་ འབྱུང་བར་དེ་དག་མི་བྱེད་དེ། །སེམས་ཅན་རྣམས་ལ་གནས་པ་མེད་པར་སྨྲས། །སེམས་ཅན་རྒྱུད་ཀྱི་བརྡ་ཡང་རབ་ཏུ་རྟོགས། །བསོད་ནམས་མི་ཟད་པའི་མཛོད་ཅེས་བྱ་བ་སྟེ། ཡོངས་ སུ་བསྔོ་བ་ལྔ་པའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་དྲུག་པ་དགེ་བའི་རྩ་བ་ཐམས་ཅད་དང་མཉམ་པ་ཉིད་ཀྱི་རྗེས་ སུ་སོང་བ་ཞེས་བྱ་བ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་པོར་གྱུར་ཏེ་སྲིད་ཆེན་པོ་ཐོབ་ནས་འཚེ་བ་དང༌། ཕྱིར་རྒོལ་བ་བཅོམ་ སྟེ་རྒྱལ་པོ་ཆེན་པོར་གྲགས་པ་དང༌། སྲིད་ཆེན་པོའི་ཁམས་ལ་གནས་ཤིང༌། སྲིད་ཡངས་པ་ལ་དབང་པར་གྱུར་ནས་འཁོན་མེད་ཅིང་ལྟོད་པ་མེད་པར་སྲིད་ལ་གནས་པ། ཆོས་ཀྱི་ རྒྱལ་སྲིད་ཀྱིས་སྐྱོང་བར་བྱེད་པ། ཆོས་དང་མཐུན་པ། ཆོས་ཀྱི་རྗེས་སུ་བསྙེགས་པ། ཕུན་སུམ་ཚོགས་པའི་སྲིད་ཆེན་པོ་ཐོབ་པ། ས་ཆེན་པོ་ལ་གདུགས་གཅིག་ཏུ་གྱུར་པ། འཁོར་ལོ་ ཐོགས་པ་མེད་པས་སྐྱོང་བ། དྲི་མ་མེད་པའི་ཐབས་ཐོབ་པ། སྲིད་པ་ཕ་རོལ་གྱི་སྡེས་གཙོ་བ་མེད་པ། ཆོས་དང་ལྡན་པ། དབྱིག་པ་མེད་པ་དང༌། མཚོན་ཆ་མེད་པས་འགྲོ་བ་རྣམས་ ཤིན་ཏུ་སྐྱོང་བ། ཆོས་ཀྱི་རྗེས་སུ་ཞུགས་ཤིང་བསྡུ་བའི་དངོས་པོ་བཞིས་འགྲོ་བ་སྡུད་པ། འཁོར་ལོས་བསྒྱུར་བའི་རྒྱལ་པོར་གྱུར་པ། འགྲོ་བ་ཐམས་ཅད་ལ་མཛོད་ཀྱིས་ཤིན་ཏུ་སྟོབ་ པ་དེ༑ དབང་ཕྱུག་དེ་ལྟ་བུ་ལ་གནས་ཤིང༌། དེ་ལྟ་བུའི་ཆོས་ལ་གནས་པ། གཡོག་དང་འཁོར་མང་པོ་ཤིན་ཏུ་འདུས་པ། གཟུགས་དང་ལྡན་པ། འགྲོ་བ་ཐམས་ཅད་བལྟ་བས་མི་ ངོམ་པ༑ ཡིད་ལ་ཁ་ན་མ་ཐོ་བ་མེད་པ། བསོད་ནམས་རྣམ་པར་དག་པ་དང་ལྡན་པ། ཟིལ་གྱིས་མི་ནོན་པའི་མཚན་དང་ལྡན་པ། ལུས་ཤིན་ཏུ་རྣམ་པར་ཕྱེ་བ་མཛེས་པ་ དང་ལྡན་པ། བལྟ་ན་བཟང་བ། ཚུལ་དང་མཐུན་པའི་ལུས་དང་ལྡན་པ། སྟོབས་དང་ལྡན་པ། ཐུབ་པ་མེད་པའི་ལུས་དང་ལྡན་པ། སྟོབས་ཆེན་པོ་དང་ལྡན་པ། མཐུ་བོ་ཆེའི་ལུས་ ཀྱིས་བཟུང་བ། རྣམ་པར་དག་པའི་ལུས་དང་ལྡན་པ། བསྒྲིབས་པ་མེད་པའི་ལས་རྣམ་པར་དག་པ་དང་ལྡན་པ་དེ། ཟས་ཡོངས་སུ་གཏོང་བའམ། བཏུང་བའམ། རོའམ། བཞོན་ པའམ༑ གོས་སམ། མེ་ཏོག་གམ། ཕྲེང་བའམ། སྤོས་སམ། བྱུག་པའམ། མལ་ཆའམ། གནས་སམ། རྒྱབ་རྟེན་ནམ། མར་མེའམ། སྒྲོན་མའམ། ནད་ཀྱི་རྐྱེན་ སྨན་དང༌། ཡོ་བྱད་རྣམས་སྦྱིན་པའམ། རིན་པོ་ཆེས་གཞལ་བའི་སྣོད་སྣ་ཚོགས་བཀང་ཞིང་ཡོངས་སུ་གཏོང་བ་དང༌། ཤིང་རྟ་སྣ་ཚོགས་དང༌། ཤིང་རྟ་དུ་མ་བཀང་ཞིང༌། ཚད་ ༄༅། །མེད་པའི་རིན་པོ་ཆེ་དང་ནོར་ཡོངས་སུ་གཏོང་བ་དང༌། གླང་པོ་ཅང་ཤེས་སམ། རྟ་ཅང་ཤེས་རྒྱན་ཐམས་ཅད་ཀྱིས་བརྒྱན་པ་གཏོང་བ་དང༌། སློང་བ་ རྣམས་ལ་ཅི་རིགས་སུ་རྒྱལ་པོའི་སྟན་བཟང་པོ་གཏོང་བའམ། གདུགས་གཏོང་བའམ། རྒྱལ་མཚན་དང་བ་དན་གཏོང་བའམ། རིན་པོ་ཆེ་གཏོང་ཞིང་སྦྱིན་པའམ། རྒྱན་དང་ ལྷབ་ལྷུབ་ཀྱི་སྦྱིན་པ་ཡོངས་སུ་གཏོང་བའམ། ཅོད་པན་ནམ། གཙུག་གི་ནོར་བུ་དག་དབང་ཕྱུག་ལ་སྤྱི་བོ་ནས་དབང་བསྐུར་བས་མཚོན་ཆས་བཅིངས་ཤིང་བཙོན་ར་ན་འདུག་ པའི་སེམས་ཅན་རྣམས་མཐོང་ནས་ནོར་ཐམས་ཅད་ཡོངས་སུ་གཏོང་བ་དང༌། གཡོག་དང་བདག་ཏུ་བཅས་ཏེ་བྱིན་ནས་བཙོན་ར་དེ་དག་ནས་སེམས་ཅན་རྣམས་ཡོངས་སུ་ཐར་པར་ བྱེད་པ། གསད་སར་ཁྲིད་པ་མཐོང་ནས་བདག་གི་ལུས་དང་སྲོག་ཡོངས་སུ་བཏང་སྟེ་གསད་པ་དེ་སླུ་བར་བྱེད་པ། གཙུག་ཕུད་དང་ཐོར་པག་ཏུ་བཅས་པའི་མགོ་བོ་དག་ཀྱང་སློང་བས་ བསླངས་ན་གཏོང་བ་མེད་པའི་སེམས་ཀྱིས་གཏོང་བ། མིག་གཉིས་ཡོངས་སུ་གཏོང་བའམ། རྣ་བ་དང་སྣ་ཡོངས་སུ་གཏོང་བའམ། སོ་དང་ལྕེ་ཡོངས་སུ་གཏོང་བའམ། མགོ་ ཡོངས་སུ་གཏོང་བའམ། རྐང་ལག་ཡོངས་སུ་གཏོང་བའམ། རང་ལུས་ཀྱང་དྲལ་ཞིང་སློང་བ་ལ་ཁྲག་ཡོངས་སུ་གཏོང་བའམ། ཤ་དང་རྐང་ཡོངས་སུ་གཏོང་བའམ། སློང་བ་ ལ་རང་གི་ལུས་ལས་སྙིང་ཕྱུང་སྟེ་ཡོངས་སུ་གཏོང་བའམ། སློང་ཞིང་ལེན་པ་སྣ་ཚོགས་ལ་སྒྱུ་མ་དང༌། མཚེར་པ་དང༌། མཁལ་མ་དང༌། ཕོ་བ་རྣམས་ཡོངས་སུ་གཏོང་བའམ། རང་གི་ལུས་ ལས་ཡན་ལག་དང༌། ཉིང་ལག་དང༌། རུས་པ་བསླངས་ན། དད་པའི་སེམས་ཀྱིས་ཡོངས་སུ་གཏོང་བའམ། སློང་བ་ལ་མོས་པར་ལྟ་བས་པགས་པ་དང་མདོག་ཡོངས་སུ་གཏོང་བའམ། རྐང་ལག་ལས་སོར་མོ་ཡོངས་སུ་གཏོང་བའམ། ཆོས་འདོད་པའི་ཕྱིར་རང་གི་ཤ་དང༌། སེན་མོ་ཡོངས་སུ་གཏོང་བའམ། ཆོས་ཤིན་ཏུ་དཀོན་པ་ཚོལ་ཞིང༌། མེས་གང་བའི་འོབས་ མི་འགྲེང་ལག་བཏགས་བདུན་དུ་མཆོང་བར་བྱེད་པའམ། ཆོས་བསྲུང་བའི་ཕྱིར་སྡུག་བསྔལ་མྱོང་བ་ཐམས་ཅད་ཀྱང་རང་གི་ལུས་ཀྱིས་བཟོད་པར་བྱེད་པའམ། ཆོས་ཚོལ་ཞིང་ཆོས་ཀྱི་ཚིག་ དང་ཡི་གེ་འབྲུ་གཅིག་གི་ཕྱིར་ཡང་རྒྱ་མཚོའི་མཐར་ཐུག་པའི་ས་ཆེན་པོ་ཡོངས་སུ་གཏོང་བའམ། ཆོས་ཐམས་ཅད་ཀྱི་དབང་ཕྱུག་བྱེད་པའམ། མི་དགེ་བའི་ཆོས་ལས་སེམས་ཅན་རྣམས་བཟློག་ སྟེ་དགེ་བའི་ཆོས་ལ་རབ་ཏུ་སྦྱོར་བའམ། སྐྱེས་བུའི་མཚན་གཅོད་པ་མཐོང་ནས་སྡིག་པའི་ལས་དེ་དག་ལས་སེམས་ཅན་དེ་དག་རྣམ་པར་ཟློག་པར་བྱེད་པའམ། དེ་བཞིན་གཤེགས་པ་ མངོན་པར་སངས་རྒྱས་པར་འཇིག་རྟེན་ཐམས་ཅད་དུ་སྒྲོག་ཅིང༌། གཙུག་ལག་ཁང་དང་ཕོ་བྲང་གི་ལོངས་སྤྱོད་ཀྱི་ཕྱིར་ས་དང་ཁམས་ཡོངས་སུ་གཏོང་བའམ། རིམ་གྲོ་བྱ་བའི་ཕྱིར་བྲན་ ༄༅། །དང༌། ལས་བྱེད་པའི་མི་རྣམས་གཏོང་བའམ། སློང་བ་ལ་རིམ་གྲོ་བྱ་བའི་ཕྱིར་བདག་ཉིད་འབུལ་བའམ། ཆོས་ལ་དད་པས་དགའ་ཞིང་མགུ་བའི་སེམས་ རྙེད་ནས་རང་གི་ལུས་ཀྱིས་དེ་བཞིན་གཤེགས་པ་ལ་རིམ་གྲོ་བྱེད་པའམ། བདག་ཉིད་སེམས་ཅན་ཐམས་ཅད་ལ་གཏོང་བའམ། སངས་རྒྱས་ཐམས་ཅད་ལ་རིམ་གྲོ་བྱ་བའི་ཕྱིར་རྒྱལ་ སྲིད་ཡོངས་སུ་གཏོང་བའམ། སློང་བ་རྣམས་ཅི་རིགས་སུ་ཡུལ་དང་མིར་བཅས་པའམ། གྲོང་ཁྱེར་དང་རྒྱལ་པོའི་ཕོ་བྲང་ངམ། རྒྱན་ཐམས་ཅད་ཀྱིས་བརྒྱན་པ་ཡོངས་སུ་གཏོང་བའམ། སློང་བ་ལ་བུ་དང་བུ་མོ་དང་ཆུང་མ་དག་ཡོངས་སུ་གཏོང་བའམ། སློང་བ་རྣམས་ལ་ཅི་རིགས་སུ་ཁྱིམ་ཐམས་ཅད་ཡོངས་སུ་སྦྱིན་ཞིང་གཏོང་བའམ། བཟའ་ཤིང་གི་ར་བ་སྦྱིན་པའམ། སློང་བ་སྣ་ཚོགས་དང༌། ལེན་པ་སྣ་ཚོགས་དང༌། སེམས་ཅན་སྣ་ཚོགས་དང༌། གང་ཟག་སྣ་ཚོགས་སེམས་སྣ་ཚོགས་དང་ལྡན་པ་ལ་ཕྱོགས་ཐ་དད་པ་ནས་འོངས་བ་ཚད་ལས་འདས་ པའི་མི་དང༌། མི་སྣ་ཚོགས་དང༌། སྦྱིན་པའི་གནས་སྣ་ཚོགས་ལ་མཆོད་སྦྱིན་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ་གྲངས་མེད་པ་རྣམས་བྱེད་ཅིང་ཡོངས་སུ་གཏོང་བའམ། དེ་སྦྱིན་པའི་ དམིགས་པའི་དངོས་པོ་ཐམས་ཅད་ཡོངས་སུ་གཏོང་བའི་ཚེ་སེམས་འདི་ལྟར་བསྐྱེད་དེ་ཡོངས་སུ་བསྔོ་ཞིང༌། དགེ་བའི་རྩ་བ་ཐམས་ཅད་ཀྱི་སྙིང་པོའི་རྗེས་སུ་སོང་བས་གཟུགས་ཤིན་ཏུ་ བཟུང་བ། དགེ་བའི་རྩ་བ་ཐམས་ཅད་ཀྱི་སྙིང་པོའི་རྗེས་སུ་སོང་བས་ཚོར་བ་ཤིན་ཏུ་བཟུང་བ། དགེ་བའི་རྩ་བ་ཐམས་ཅད་ཀྱི་སྙིང་པོའི་རྗེས་སུ་སོང་བས་འདུ་ཤེས་ཤིན་ཏུ་བཟུང་བ། དགེ་ བའི་རྩ་བ་ཐམས་ཅད་ཀྱི་སྙིང་པོའི་རྗེས་སུ་སོང་བས་འདུ་བྱེད་ཤིན་ཏུ་བཟུང་བ། དགེ་བའི་རྩ་བ་ཐམས་ཅད་ཀྱི་སྙིང་པོའི་རྗེས་སུ་སོང་བས་རྣམ་པར་ཤེས་པ་ཤིན་ཏུ་བཟུང་བ། དགེ་བའི་རྩ་བ་ ཐམས་ཅད་ཀྱི་སྙིང་པོའི་རྗེས་སུ་སོང་བས་སྲིད་པ་ཐམས་ཅད་ཤིན་ཏུ་བཟུང་བ། དགེ་བའི་རྩ་བ་ཐམས་ཅད་ཀྱི་སྙིང་པོའི་རྗེས་སུ་སོང་བས་འཁོར་ཤིན་ཏུ་བཟུང་བ། དགེ་བའི་རྩ་བ་ཐམས་ ཅད་ཀྱི་སྙིང་པོའི་རྗེས་སུ་སོང་བས་ལོངས་སྤྱོད་ཤིན་ཏུ་བཟུང་བ། དགེ་བའི་རྩ་བ་ཐམས་ཅད་ཀྱི་སྙིང་པོའི་རྗེས་སུ་སོང་བས་སྦྱིན་པ་ཤིན་ཏུ་བཟུང་བ་དེས་དགེ་བའི་རྩ་བ་དེ་དག་འདི་ལྟར་ ཡོངས་སུ་བསྔོ་སྟེ། བླ་ན་མེད་པར་དམིགས་ནས་བཟའ་བ་དང་བཏུང་བ་འདི་དག་འདི་ལྟར་བཏང་བ་དང༌། འདི་ལྟར་བྱིན་པ་དང༌། འདི་ལྟར་ཆགས་པ་མེད་པ་དང༌། འདི་ལྟར་བཅིངས་པ་ མེད་པ་དང༌། འདི་ལྟར་ཉེ་བར་བཏང་བ་དང༌། འདི་ལྟར་མ་བཟུང་བ་དང༌། འདི་ལྟར་ལྷག་པར་བསམ་པ་དང༌། འདི་ལྟར་དངོས་པོ་ཡོངས་སུ་བཏང་བ་དང༌། འདི་ལྟར་དམིགས་པ་ལ་མི་ གནས་པ་དང༌། འདི་ལྟར་གཏོང་བ་དང་ལྡན་པས་སེམས་ཅན་ཐམས་ཅད་ཡེ་ཤེས་ཀྱི་ཁ་ཟས་དང་ལྡན་པ་དང༌། ཆགས་པ་མེད་པ་ལ་བརྩོན་པ། སེམས་ཀྱི་ཟས་ཡོངས་སུ་ཤེས་པ་ ༄༅། །དང༑ ཆགས་པ་མེད་པའི་ཟས་དང༌། དགའ་བའི་ཟས་དང༌། ཟང་ཟིང་མེད་པའི་ཟས་དང༌། ཡེ་ཤེས་ཀྱིས་འཚོ་བ་དང༌། ཆོས་ཀྱིས་བརྟན་པ་དང༌། དགེ་བའི་ རྩ་བས་ཡོངས་སུ་བཟུང་བའི་ཆོས་ཀྱི་སྐུ་དང༌། ཡེ་ཤེས་ཀྱི་སྐུ་ལ་ཡང་དག་པར་སྤྱོད་པ་དང༌། སྦྱིན་པའི་གནས་དང༌། སྙིང་བརྩེ་བའི་ཁ་ཟས་རབ་ཏུ་ལེན་པར་གྱུར་ཅིག །ཅེས་དེ་ ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཟས་སྦྱིན་པ་དེ་དག་ཡོངས་སུ་བསྔོའོ། །བྱང་ཆུབ་སེམས་དཔའ་བཏུང་བའི་སྦྱིན་པ་གཏོང་བའི་ཚེ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཆོས་ཀྱི་བཏུང་བ་འཐུང་བ་ལ་བརྩོན་པ་དང༌། བྱང་ཆུབ་སེམས་དཔའི་ལམ་དང་ལྡན་པ་དང༌། འཇིག་རྟེན་པའི་སྐོམ་པ་རྒྱུན་ཆད་པ་ དང༑ སངས་རྒྱས་ཀྱི་ཡེ་ཤེས་ཀྱི་སྐོམ་པ་ལས་མི་ལྡོག་པ་དང༌། འདོད་པའི་ཡུལ་གྱིས་སྐོམ་པ་ལས་ཕྱིར་ལྡོག་པ་དང༌། ཆོས་ཀྱིས་ཚིམ་པའི་དགའ་བ་རབ་ཏུ་འཐོབ་པ་དང༌། ཆོས་ཀྱི་སྐུ་ཤིན་ཏུ་ཚིམ་པ་དང༌། ཏིང་ངེ་འཛིན་གྱིས་ཚིམ་པར་བྱེད་པའི་སེམས་དང་ལྡན་པ་དང༌། ཤེས་རབ་རྒྱ་མཚོ་ལ་ཞུགས་པ་དང༌། ཆོས་ཀྱི་རི་རབ་དང་ལྡན་པ་དང༌། ཆོས་ ཀྱི་བཏུང་བས་ངོམས་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བཏུང་བའི་སྦྱིན་པ་དེ་དག་ཡོངས་སུ་བསྔོའོ། །བྱང་ཆུབ་སེམས་དཔའ་བྲོ་བའི་སྦྱིན་ པ་སྐྱོན་ཐམས་ཅད་བསལ་ནས་རྣམ་པར་དག་པ་སྐྱུར་བ་དང༌། མངར་བ་དང༌། ཁ་བ་དང༌། བྲོ་བ་དང༌། ཚ་བ་དང༌། བསྐ་བ་སྣ་ཚོགས་ཀྱི་རོ་མཆོག་དང་ལྡན་པ། ཤིན་ཏུ་འཇམ་པའི་རོ་ མཆོག་གི་རྣམ་པ་དང་ལྡན་པ། རོ་སྣ་ཚོགས་བྱེ་བ་ཁྲག་ཁྲིག་བརྒྱ་ཕྲག་སྟོང་བསགས་པ་དང་ལྡན་པ། ཁམས་རྣམས་མཉམ་ཞིང་འཁྲུགས་པ་མེད་པར་གཞོག་པས་ལུས་ཀྱི་སྟོབས་ སྟོན་པར་བྱེད་པ། སེམས་དགའ་བ། དད་ཅིང་མོས་པ་དང༌། སྤྲོ་བ་དང༌། གསལ་བ་བསྐྱེད་པ། ཞིམ་ཞིང་ཚུལ་དང་ལྡན་པའི་རོའི་དམ་པར་གྱུར་པ། ནང་གི་དབང་པོ་རྣམ་པར་དག་པར་ བྱེད་པ༑ ལྟོ་ལ་བདེ་བས་ཡང་དག་པར་སྟོན་པ། སྙོམས་པ་ཐམས་ཅད་སེལ་བར་བྱེད་པ། ནད་ཐམས་ཅད་ཞི་བར་བྱེད་པ། ནད་མེད་པར་བྱེད་པ། རྣམ་པ་འདི་ལྟ་བུའི་རོ་དམ་པ་སྣ་ཚོགས་ བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་སློང་ཞིང་ལེན་པ་སྣ་ཚོགས་ལ་སྦྱིན་ཞིང་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་བདུད་ རྩིའི་རོས་བརྟན་པའི་སེམས་ཀྱིས་རོ་བྲོ་བའི་མཆོག་དང་ལྡན་པར་གྱུར་ཅིག །སེམས་ཅན་ཐམས་ཅད་ཁ་ཟས་ཀྱི་རོ་ཐམས་ཅད་ཀྱི་ལས་ཡོངས་སུ་ཤེས་ཤིང༌། ཆོས་ཀྱི་རོའི་ཡེ་ཤེས་ ལ་རབ་ཏུ་གནས་པར་གྱུར་ཅིག །སེམས་ཅན་ཐམས་ཅད་གནས་པའི་མཐའི་ཆོས་ཀྱི་གྲོང་ཁྱེར་དུ་ཕྱིན་ཏེ། ཆོས་ཀྱི་རོ་དུ་མའི་ཆོས་ཀྱི་དབྱིངས་རབ་ཏུ་རྟོགས་པར་གྱུར་ཅིག །སེམས་ ༄༅། །ཅན་ཐམས་ཅད་ཆོས་ཀྱི་དབྱིངས་ཐམས་ཅད་དུ་རྒྱས་པར་བྱེད་པས་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་ངལ་ཞུགས་ཤིང་ཆོས་ཀྱི་སྤྲིན་ གྱི་ཆར་འབེབས་པར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་ཆོས་ཀྱི་དགའ་བས་རྒྱུད་ཚིམ་པར་གྱུར་ཏེ། ཡེ་ཤེས་མཆོག་གི་རོ་ལ་སེམས་རྣམ་པར་གཞོག་པར་གྱུར་ཅིག །སེམས་ ཅན་ཐམས་ཅད་རོ་ཐམས་ཅད་ཀྱི་མཚན་མ་ལ་མི་འཛིན་པས་སངས་རྒྱས་ཐམས་ཅད་ཀྱི་ཆོས་ལ་བརྩོན་པའི་སེམས་དང་ལྡན་ཞིང༌། རོའི་མཆོག་ཐམས་ཅད་ལ་ཆགས་པ་མེད་པར་གྱུར་ ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་རབ་ཏུ་འཇུག་པས་བྱུང་བས་ཆོས་ཀྱི་རོ་གཅིག་པར་གྱུར་ཅིག །སེམས་ཅན་ཐམས་ཅད་ཐམས་ཅད་མཁྱེན་པའི་ ཐེག་པ་ལས་ཕྱིར་མི་ལྡོག་ཅིང་རོ་མཆོག་གི་ངོ་བོ་ཉིད་ལས་བྱུང་བར་གྱུར་ཅིག །སེམས་ཅན་ཐམས་ཅད་དབང་པོ་ཐམས་ཅད་དབྱེ་བའི་ཡེ་ཤེས་ལ་མངོན་པར་མཁས་པས་སངས་ རྒྱས་ཀྱི་ཆོས་ཀྱི་རོ་ཐ་དད་པ་མེད་པར་གྱུར་ཅིག །སེམས་ཅན་ཐམས་ཅད་བསྒྲིབས་པ་མེད་པའི་སངས་རྒྱས་ཀྱི་ཆོས་ཀྱིས་ཚིམ་པར་སྤྱོད་ཅིང༌། ཆོས་ཀྱི་རོས་ཡིད་རྒྱས་པར་གྱུར་ཅིག ། ཅེས་དེ་ལྟར་རོའི་སྦྱིན་པའི་ཚོགས་ལ་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱི་ཡེ་ཤེས་ཆགས་པ་མེད་པའི་ཕུང་པོ་སྣ་ཚོགས་བསྒྲུབ་པའི་ ཕྱིར་དགེ་བའི་རྩ་བ་དེ་དག་ཡོངས་སུ་བསྔོའོ། །བྱང་ཆུབ་སེམས་དཔའ་བཞོན་པའི་སྦྱིན་པ་གཏོང་བའི་ཚེ་དགེ་བའི་རྩ་བ་རྣམས་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་ཐམས་ ཅད་མཁྱེན་པའི་ཐེག་པ་ལ་ཞོན་པར་གྱུར་ཅིག །ཐེག་པ་ཆེན་པོ་རབ་ཏུ་ཐོབ་ཅིང་རྣམ་པར་ཞིག་པ་མེད་པའི་ཐེག་པ་དང༌། མཆོག་གི་ཐེག་པ་དང༌། དམ་པའི་ཐེག་པ་དང༌། མགྱོགས་པའི་ཐེག་པ་དང༌། སྟོབས་ཆེན་པོའི་ཐེག་པ་དང༌། བསོད་ནམས་དང་ལྡན་པའི་ཐེག་པ་དང༌། འཇིག་རྟེན་ལས་འདས་པའི་ཐེག་པ་དང༌། བྱང་ཆུབ་སེམས་དཔའི་ཐེག་པ་དང༌། མཐའ་ཡས་པའི་ཐེག་པས་བྱུང་སྟེ་ ཡོན་ཏན་ཐམས་ཅད་ཕུན་སུམ་ཚོགས་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བཞོན་པའི་སྦྱིན་པར་གཏོགས་པའི་དགེ་བའི་རྩ་བ་དེ་དག་ཡོངས་སུ་ བསྔོའོ། །བྱང་ཆུབ་སེམས་དཔའ་གོས་ཀྱི་སྦྱིན་པ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་ཁྲེལ་ཡོད་པ་དང༌། ངོ་ཚ་ཤེས་པ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་ བསྔོའོ། །ཆོས་ཀྱིས་རབ་ཏུ་ཡོག་པའི་ལུས་ཀྱི་ཕྱིར་ཡོངས་སུ་བསྔོའོ། །ཆ་བྱད་ངན་པ་ཐམས་ཅད་རྣམ་པར་བཟློག་པར་བྱ་བའི་ཕྱིར་ཡོངས་སུ་བསྔོའོ། །ལུས་སྦ་བར་བྱ་བའི་ཕྱིར་ཡོངས་སུ་ བསྔོའོ། །ལུས་ཀྱིས་འཁྱུད་ན་ལུས་ལ་བདེ་བར་རེག་པར་བྱ་བའི་ཕྱིར་ཡོངས་སུ་བསྔོའོ། །ཁ་དོག་དག་པར་བྱ་བའི་ཕྱིར་ཡོངས་སུ་བསྔོའོ། །ཁ་དོག་འཇམ་པར་བྱ་བའི་ཕྱིར་ཡོངས་ ༄༅། །སུ་བསྔོའོ། །ཁ་དོག་ཤིན་ཏུ་འཇམ་པར་བྱ་བའི་ཕྱིར་ཡོངས་སུ་བསྔོའོ། །བདེ་བར་འགྲོ་བ་རབ་ཏུ་འཐོབ་པར་བྱ་བའི་ཕྱིར་ཡོངས་སུ་བསྔོའོ། །སངས་རྒྱས་ བདེ་བར་བསྙེན་བཀུར་བར་བྱ་བའི་ཕྱིར་ཡོངས་སུ་བསྔོའོ། །བླ་ན་མེད་པའི་ཐམས་ཅད་མཁྱེན་པ་ཉིད་དག་པར་བྱ་བའི་ཕྱིར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་དགེ་ བའི་རྩ་བ་དེ་དག་ཡོངས་སུ་བསྔོ་བར་བྱེད་དོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་མེ་ཏོག་གི་སྦྱིན་པ་བྱེད་པའི་ཚེ་དྲ་སྣ་ཚོགས་ཀྱི་མེ་ཏོག་དང༌། ཁ་དོག་རྣམ་པ་ཐ་ དད་པའི་མེ་ཏོག་དང༌། ཡིད་དུ་འོང་བའི་མེ་ཏོག་དུ་མ་དང༌། མིག་ཏུ་འོང་བའི་མེ་ཏོག་དང༌། མི་མཐུན་པ་མེད་པའི་མེ་ཏོག་དང༌། དུས་ཐམས་ཅད་ན་ཡོད་པའི་མེ་ཏོག་དང༌། ལྷ་ རྫས་དང་མིའི་མེ་ཏོག་དང༌། འོད་མཛེས་པའི་མེ་ཏོག་དང༌། ཤིན་ཏུ་དྲི་ཆེ་ཞིང་ཡིད་དུ་འོང་བར་མཛེས་པའི་མེ་ཏོག་དང༌། འདི་ལྟ་བུའི་མེ་ཏོག་རྣམས་སངས་རྒྱས་བཅོམ་ལྡན་འདས་ མངོན་དུ་གྱུར་པ་དང༌། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མཆོད་རྟེན་རྣམས་ལ་འབུལ་བ་དང༌། ཆོས་དཀོན་མཆོག་ལ་མཆོད་པ་བྱེད་པ་དང༌། དགེ་འདུན་ དཀོན་མཆོག་ལ་འབུལ་བ་དང༌། དགེ་བའི་བཤེས་གཉེན་བྱང་ཆུབ་སེམས་དཔའ་ལ་འབུལ་བ་དང༌། ཉན་ཐོས་དང་རང་སངས་རྒྱས་དང༌། ཕ་དང་མ་རྣམས་ལ་སྦྱིན་པ་བྱེད་པའི་ཚེ་ ཆུང་དུ་ན་བདག་གི་ལུས་དང་དེ་མ་ཡིན་པ་གཞན་བཀྲེན་པ་ཕོངས་པ་སློང་ཞིང་ལེན་པ་སྣ་ཚོགས་ལ་དེ་དང་དེ་དག་སྦྱིན་པར་བྱ་བའི་ཚེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ ཅན་ཐམས་ཅད་ཆོས་ཐམས་ཅད་ཀྱི་མེ་ཏོག་རྒྱས་པའི་སེམས་དང་ལྡན་པས། སངས་རྒྱས་ཀྱི་ཏིང་ངེ་འཛིན་གྱི་མེ་ཏོག་རྒྱས་པ་རབ་ཏུ་མཐོང་བར་གྱུར་ཅིག །སེམས་ཅན་ཐམས་ཅད་སངས་ རྒྱས་ལ་དགའ་བ་རབ་ཏུ་རྙེད་ནས་བལྟ་ན་མི་ངོམས་པར་གྱུར་ཅིག །སེམས་ཅན་ཐམས་ཅད་སེམས་ཅན་ཀུན་གྱི་སེམས་མི་འཁྲུགས་པས་བལྟ་ན་ཡིད་དུ་འོང་བར་གྱུར་ཅིག །སེམས་ ཅན་ཐམས་ཅད་དགེ་བའི་ལས་ལ་ལྟ་ཞིང་ཉེ་བར་སྤྱོད་པས་ལྟ་བ་ཡངས་པར་གྱུར་ཅིག །སེམས་ཅན་ཐམས་ཅད་དགེ་བའི་བཤེས་གཉེན་ཐམས་ཅད་ལ་ལྟ་བ་དང༌། སེམས་མ་ཉམས་ པས་རྗེས་སུ་ལྟ་བའི་དྲན་པ་དང་ལྡན་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གྱི་ཉོན་མོངས་པའི་དུག་བསྲེག་པའི་ཕྱིར་དུག་སྨན་བཟང་པོ་ཉམས་སུ་མྱོང་བ་ལྟ་བུར་གྱུར་ཅིག ། སེམས་ཅན་ཐམས་ཅད་ཡེ་ཤེས་ཀྱི་རྒྱལ་པོ་ཆེན་པོ་ལ་འགྲོ་བ་ཐམས་ཅད་འགོད་པས་སྨོན་ལམ་ཆེན་པོ་མཐོང་བར་གྱུར་ཅིག །སེམས་ཅན་ཐམས་ཅད་སེམས་ཅན་ཀུན་གྱི་རབ་རིབ་དང༌། ཐིང་ཏོག་དང༌། མུན་པ་བསལ་བའི་ཕྱིར་ཉི་མའི་དཀྱིལ་འཁོར་འཆར་བ་མཐོང་བར་གྱུར་ཅིག །སེམས་ཅན་ཐམས་ཅད་བྱང་ཆུབ་ཀྱི་ཟླ་འོད་དགེ་བ་རྣམ་པར་སྤེལ་བའི་ཕྱིར་ཟླ་བ་ལྟ་བུར་ ༄༅། །མཐོང་བར་གྱུར་ཅིག །སེམས་ཅན་ཐམས་ཅད་དགེ་བའི་བཤེས་གཉེན་མཐོང་ཞིང་ཆོས་ཀྱི་རྣམ་པའི་དགེ་བའི་རྩ་བ་ཐམས་ཅད་རབ་ཏུ་ཐོབ་པར་བྱ་བའི་ཕྱིར་ སེམས་ཅན་ཐམས་ཅད་ཀྱིས་རྒྱ་མཚོའི་རིན་པོ་ཆེའི་གླིང་དུ་འཇུག་པ་མཐོང་བར་གྱུར་ཅིག །སེམས་ཅན་ཐམས་ཅད་ཀྱིས་བསྒྲིབས་པ་མེད་པའི་ཡེ་ཤེས་མཐོང་བ་རྣམ་པར་དག་པ་རབ་ ཏུ་འཐོབ་པར་བྱ་བའི་ཕྱིར་བྱང་ཆུབ་སེམས་དཔའ་དགེ་བའི་རྩ་བའི་མེ་ཏོག་ཡོངས་སུ་གཏོང་བར་གཏོགས་པའི་དགེ་བའི་རྩ་བ་དེ་དག་དེ་ལྟར་ཡོངས་སུ་བསྔོའོ། །བྱང་ཆུབ་སེམས་དཔའ་ ཕྲེང་བའི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་སེམས་ཅན་ཐམས་ཅད་བལྟ་ན་མཛེས་པའི་ཕྱིར་ཡོངས་སུ་བསྔོའོ། །བལྟ་ན་ཡིད་དུ་འོང་བའི་ཕྱིར་ཡོངས་སུ་བསྔོའོ། །བལྟ་ན་བཟང་བའི་ ཕྱིར་ཡོངས་སུ་བསྔོའོ། །བལྟ་ན་སྡུག་པའི་ཕྱིར་ཡོངས་སུ་བསྔོའོ། །བལྟ་ན་མངོན་པར་དགའ་བའི་ཕྱིར་ཡོངས་སུ་བསྔོའོ། །བལྟ་ན་མྱ་ངན་མེད་པའི་ཕྱིར་ཡོངས་སུ་བསྔོའོ། །བལྟ་ན་རབ་ ཏུ་དགའ་བའི་ཕྱིར་ཡོངས་སུ་བསྔོའོ། །བལྟ་ན་ཡིད་མི་བདེ་བ་མེད་པའི་ཕྱིར་ཡོངས་སུ་བསྔོའོ། །སངས་རྒྱས་མཐོང་བ་དང་ལྡན་པའི་ཕྱིར་ཡོངས་སུ་བསྔོའོ། །བླ་ན་མེད་པའི་ཐམས་ཅད་ མཁྱེན་པ་མཐོང་བ་རྣམ་པར་དག་པ་འཐོབ་པའི་ཕྱིར་ཡོངས་སུ་བསྔོ་སྟེ། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཕྲེང་བའི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་སེམས་ ཅན་ཐམས་ཅད་ལ་ཡོངས་སུ་བསྔོའོ། །བྱང་ཆུབ་སེམས་དཔའ་སྤོས་ཀྱི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་བསྔོ་སྟེ། སྤོས་ཡོངས་སུ་བཏང་བས་ བསྡུས་པའི་དགེ་བའི་རྩ་བ་འདིས་སེམས་ཅན་ཐམས་ཅད་ཚུལ་ཁྲིམས་ཀྱི་སྤོས་དང་ལྡན་པར་གྱུར་ཅིག །མ་ཉམས་པའི་ཚུལ་ཁྲིམས་དང༌། མ་འདྲེས་པའི་ཚུལ་ཁྲིམས་དང༌། རྙོག་པ་མེད་པའི་ཚུལ་ ཁྲིམས་དང༌། འགྱོད་པ་མེད་པའི་ཚུལ་ཁྲིམས་དང༌། ཀུན་ནས་འཁོར་པ་མེད་པའི་ཚུལ་ཁྲིམས་དང༌། ཡོངས་སུ་གདུང་བ་མེད་པའི་ཚུལ་ཁྲིམས་དང༌། ལོག་པར་མ་ཞུགས་པའི་ཚུལ་ཁྲིམས་ དང༌། མཐའ་ཡས་པའི་ཚུལ་ཁྲིམས་དང༌། འཇིག་རྟེན་ལས་འདས་པའི་ཚུལ་ཁྲིམས་དང༌། བྱང་ཆུབ་སེམས་དཔའ་རྣམས་ཀྱི་ཕ་རོལ་ཏུ་ཕྱིན་པའི་ཚུལ་ཁྲིམས་དང་ལྡན་པར་གྱུར་ཅིག ། ཚུལ་ཁྲིམས་ཀྱི་ཕུང་པོ་གང་དང་སངས་རྒྱས་ཐམས་ཅད་དང་ལྡན་པ་དེའི་ཚུལ་ཁྲིམས་ཡོངས་སུ་དག་པ་དང་སེམས་ཅན་ཐམས་ཅད་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་ དཔའ་ཆེན་པོ་སྤོས་ཀྱི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །བམ་པོ་སུམ་ཅུ་རྩ་ལྔ་པ་། བྱང་ཆུབ་སེམས་དཔའ་བྱུག་པའི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྡོ་སྟེ། བྱུག་པའི་སྦྱིན་པས་ཡོངས་སུ་བཟུང་བའི་དགེ་བའི་རྩ་བ་འདིས་སེམས་ཅན་ཐམས་ཅད་གཏོང་ ༄༅། །པ་ཐམས་ཅད་ཡོངས་སུ་གཏོང་ཞིང་སྦྱིན་པས་བསྒོས་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་ཚུལ་ཁྲིམས་ཀྱིས་ཤིན་ཏུ་རྣམ་པར་དག་ ཅིང་ཚུལ་ཁྲིམས་ཀྱིས་བསྒོས་པར་གྱུར་ཅིག །སེམས་ཅན་ཐམས་ཅད་ཆགས་པ་མེད་པའི་བསམ་པ་རབ་ཏུ་ཐོབ་ཅིང་བཟོད་པས་བསྒོས་པར་གྱུར་ཅིག །སེམས་ཅན་ཐམས་ཅད་བྱང་ ཆུབ་སེམས་དཔའི་ཐེག་པ་ཆེན་པོ་ལ་བརྩོན་འགྲུས་ཀྱི་གོ་ཆ་བགོས་ཤིང་བརྩོན་འགྲུས་ཀྱིས་བསྒོས་པར་གྱུར་ཅིག །སེམས་ཅན་ཐམས་ཅད་ད་ལྟར་བྱུང་བའི་སངས་རྒྱས་མངོན་དུ་བཞུགས་པའི་ ཏིང་ངེ་འཛིན་རབ་ཏུ་ཐོབ་པས་བསམ་གཏན་གྱིས་བསྒོས་པར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཀྱི་རྒྱལ་པོ་ལ་སྐད་ཅིག་གིས་རྣམ་པར་དག་ཅིང་ཤེས་རབ་ཀྱིས་བསྒོས་ པར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་ཆོས་ཀྱི་འཇིགས་པ་མེད་པ་རབ་ཏུ་འཐོབ་ཅིང་ཆོས་ཀྱིས་བསྒོས་པར་གྱུར་ཅིག །སེམས་ཅན་ཐམས་ཅད་ཡོན་ཏན་ཐམས་ཅད་ཀྱི་ཡེ་ ཤེས་རབ་ཏུ་ཐོབ་ཅིང་ཡོན་ཏན་གྱིས་བསྒོས་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་སྟོབས་བཅུའི་ཕ་རོལ་ཏུ་ཕྱིན་པ་ཐོབ་ཅིང་བྱང་ཆུབ་སེམས་དཔའི་ཡོངས་སུ་ བསྔོ་བ་ཐམས་ཅད་ཀྱིས་བསྒོས་པར་གྱུར་ཅིག །སེམས་ཅན་ཐམས་ཅད་མི་དགེ་བའི་ཆོས་ཐམས་ཅད་རབ་ཏུ་སྤངས་ཤིང་ཆོས་དཀར་པོས་བསྒོས་པར་གྱུར་ཅིག །ཅེས་དེ་ལྟར་བྱང་ཆུབ་ སེམས་དཔའ་སེམས་དཔའ་ཆེན་པོ་བྱུག་པའི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་ཡོངས་སུ་བསྔོའོ། །བྱང་ཆུབ་སེམས་དཔའ་མལ་ཆའི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་འདི་ལྟར་ ཡོངས་སུ་བསྔོ་སྟེ། སེམས་ཅན་ཐམས་ཅད་ཤེས་རབ་དང༌། ཡེ་ཤེས་ཆེན་པོ་ཐོབ་པའི་ཕྱིར་ལྷ་རྫས་ཀྱི་མལ་ཆ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སོ་སོའི་སྐྱེ་བོ་མ་ཡིན་ པའི་བྱང་ཆུབ་ཀྱི་སེམས་ཀྱི་གོས་བགོ་བའི་ཕྱིར་འཕགས་པའི་མལ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འཁོར་བའི་སྡུག་བསྔལ་ཐམས་ཅད་ཡོངས་སུ་སྤང་བའི་ཕྱིར་བདེ་བའི་ མལ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་རྣམ་པར་རོལ་བའི་ཆོ་འཕྲུལ་ཡང་དག་པར་མཐོང་བའི་ཕྱིར་རིན་པོ་ཆེ་ལྟ་བུའི་མལ་རབ་ཏུ་ཐོབ་པར་གྱུར་ཅིག། སེམས་ཅན་ཐམས་ཅད་ཆོས་ཐམས་ཅད་ལེགས་པར་བཀོད་པའི་གོས་བགོ་བའི་ཕྱིར་མཉམ་པ་མེད་པའི་མལ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འཇིག་རྟེན་ལས་འདས་ པའི་ཆོས་ཟིལ་གྱིས་མི་ནོན་པ་རྣམ་པར་དག་པས་རྒྱ་ཆེན་པོའི་མལ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་བདེ་བ་དང་ལྡན་པས་དགེ་བའི་མལ་རབ་ཏུ་ཐོབ་པར་གྱུར་ ཅིག །སེམས་ཅན་ཐམས་ཅད་སངས་རྒྱས་ཀྱི་དམིགས་པ་ལ་བརྩོན་པས་ཤིན་ཏུ་དག་པའི་མལ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་དགེ་བའི་བཤེས་གཉེན་གྱིས་ ༄༅། །བསྐྱབས་པ་དང་ལྡན་པས་ཤིན་ཏུ་བརྟན་པའི་མལ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་གཟིམས་པ་ལྟ་བུར་གློ་གཡས་པས་ འབེབས་པ་དང་ལྡན་པས་སེངྒེའི་མལ་རབ་ཏུ་ཐོབ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་དྲན་པ་དང་ཤེས་བཞིན་གྱིས་ཤིན་ཏུ་བསམ་པའི་དབང་པོ་ཡང་དག་པར་རྒྱུ་བ་དང་ལྡན་ པ་མལ་ཆའི་སྦྱིན་པ་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་ཡོངས་སུ་བསྔོའོ། །བྱང་ཆུབ་སེམས་དཔའ་སེམས་དཔའ་ཆེན་པོ་གནས་ཀྱི་སྦྱིན་པ་བྱེད་པའི་ ཚེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཡོན་ཏན་གྱི་གནས་ལ་བརྩོན་ཞིང་ཏིང་ངེ་འཛིན་གྱི་གནས་སྤྱོད་ཡུལ་དུ་གྱུར་པ་དང༌། གནས་ པ་མེད་ཅིང་རྟེན་པ་མེད་པའི་གནས་ནས་མི་གཡོ་བ་དང༌། གནས་ཐམས་ཅད་རྣམ་པར་སྒོམ་པ་དང༌། འཇིག་རྟེན་གྱི་གནས་ནས་རྣམ་པར་འདས་པ་དང༌། ཐམས་ཅད་མཁྱེན་པའི་ གནས་ལ་གནས་པ་དང༌། སངས་རྒྱས་ཀྱི་གནས་ཡོངས་སུ་ཟིན་པ་དང༌། བླ་ན་མེད་པའི་གནས་ཀྱི་མཐར་ཕྱིན་པ་དང༌། བདེ་བའི་གནས་ལ་བརྩོན་པ་དང༌། དགེ་བའི་རྩ་བའི་གནས་ལ་ ཤིན་ཏུ་གནས་པ་དང༌། བླ་ན་མེད་པའི་སངས་རྒྱས་ཀྱི་གནས་དང་མི་འབྲལ་ཞིང་སངས་རྒྱས་ཀྱི་ཞིང་ཡོངས་སུ་དག་པ་ལ་གནས་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་ སེམས་དཔའ་ཆེན་པོ་འཇིག་རྟེན་ཐམས་ཅད་ལ་ཕན་པ་དང༌། བདེ་བར་སེམས་པ། སེམས་ཅན་ཐམས་ཅད་ལ་ཡོངས་སུ་བསྔོ་བས་ཡོངས་སུ་སྐྱོབ་པ་ལ་གནས་ཀྱི་སྦྱིན་པ་ཡོངས་སུ་གཏོང་ བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་དེ་ལྟར་ཡོངས་སུ་བསྔོའོ། །བྱང་ཆུབ་སེམས་དཔའ་རྒྱབ་རྟེན་གྱི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་འགྲོ་བ་ཀུན་ལ་ཕན་པ་དང༌། བདེ་བའི་སེམས་ཀྱིས་ཡེ་ཤེས་ཀྱི་རྟེན་ཆེན་པོ་ལ་སྤྱོད་པ་དང༌། དགེ་བའི་བཤེས་གཉེན་གྱི་རྟེན་ལ་སྤྱོད་པ་དང༌། བླ་མའི་རྟེན་ལ་སྤྱོད་པ་ དང༌། ལེགས་པར་སྤྱོད་པའི་རྟེན་ལ་སྤྱོད་པ་དང༌། བྱམས་པ་ཆེན་པོའི་རྟེན་ལ་སྤྱོད་པ་དང༌། སྙིང་རྗེ་ཆེན་པོའི་རྟེན་ལ་སྤྱོད་པ་དང༌། ཕ་རོལ་ཏུ་ཕྱིན་པ་དྲུག་གི་རྟེན་ལ་སྤྱོད་པ་དང༌། བྱང་ཆུབ་ཀྱི་སེམས་ ཤིན་ཏུ་ཡངས་པའི་རྟེན་ལ་སྤྱོད་པ་དང༌། བྱང་ཆུབ་སེམས་དཔའ་ཐམས་ཅད་ཀྱི་ལམ་གྱི་རྟེན་ལ་སྤྱོད་ཅིང༌། སངས་རྒྱས་ཐམས་ཅད་ཀྱི་རྟེན་ལ་སྤྱོད་པར་གྱུར་ཅིག །ཅེས་ཡོངས་སུ་བསྔོའོ། ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱ་བརྟེན་གྱི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཡོན་ཏན་ཐམས་ཅད་རྣམ་པར་དག་པར་འགྱུར་བ་དང༌། ཤིན་ཏུ་དག་པར་འགྱུར་བ་དང༌། ཡེ་ཤེས་རྣམ་པར་དག་པར་འགྱུར་བ་དང༌། ལམ་རྣམ་པར་དག་པར་འགྱུར་བ་དང༌། ཆོས་རྣམ་པར་དག་པར་འགྱུར་བ་དང༌། བསམ་པ་རྣམ་པར་དག་པར་ ༄༅། །འགྱུར་བ་དང༌། མོས་པ་རྣམ་པར་དག་པར་འགྱུར་བ་དང༌། སྨོན་ལམ་རྣམ་པར་དག་པར་འགྱུར་བ་དང༌། མངོན་པར་ཤེས་པའི་ཡོན་ཏན་དང༌། ཡེ་ཤེས་ རྣམ་པར་དག་པར་འགྱུར་བར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལྟ་སྟེ། ཏིལ་མར་གྱི་མར་མེའམ། མར་གྱི་མར་མེའམ། རིན་ པོ་ཆེའི་མར་མེའམ། ནོར་བུའི་མར་མེའམ། རོའི་མར་མེའམ། མར་མེ་ཆེན་པོའམ། ཨ་ག་རུའི་མར་མེའམ། ཙནྡན་གྱི་མར་མེའམ། སྤོས་ཀྱི་རོ་ཐམས་ཅད་ཀྱི་མར་མེའམ། ཁ་དོག་མཐའ་ཡས་པར་སྣང་བའི་མར་མེའམ། རྣམ་པ་དེ་ལྟ་བུའི་མར་མེ་དག་དེ་ཡོངས་སུ་གཏོང་ཞིང་སྦྱིན་པ་བྱེད་པ་ན། དགེ་བའི་རྩ་བ་དེ་དག་འགྲོ་བ་ཐམས་ཅད་ལ་བདེ་བ་དང༌། འགྲོ་བ་ཐམས་ཅད་བསྡུ་བའི་ཕྱིར་འདི་ལྟར་ཡོངས་སུ་བསྔོ་སྟེ། མར་མེ་སྦྱིན་པས་ཡོངས་སུ་བསྡུས་པའི་དགེ་བའི་རྩ་བ་འདིས་སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ ཆོས་ལ་སྣང་བ་མཐའ་ཡས་པར་གྱུར་ཅིག །སེམས་ཅན་ཐམས་ཅད་འཇིག་རྟེན་ཐམས་ཅད་ཤིན་ཏུ་ཕྲ་བ་དམིགས་པར་བྱ་བའི་ཕྱིར་སྣང་བ་ཤིན་ཏུ་གསལ་ཞིང་དང་བར་གྱུར་ཅིག ། སེམས་ཅན་ཐམས་ཅད་སེམས་ཅན་མེད་པའི་ཁམས་ཡོངས་སུ་ཤེས་ཤིང་སྣང་བ་རབ་རིབ་མེད་པར་གྱུར་ཅིག །སེམས་ཅན་ཐམས་ཅད་འོད་འགྱེད་པའི་ལུས་སུ་མངོན་པར་བྱུང་ཞིང་ སྣང་བ་མཐའ་ཡས་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཆོས་ཐམས་ཅད་ལ་ཕྱིར་མི་ལྡོག་པའི་སེམས་དང་ལྡན་ཞིང་འོད་ཀུན་ཏུ་སྣང་བ་དང་ལྡན་པར་གྱུར་ཅིག ། སེམས་ཅན་ཐམས་ཅད་སངས་རྒྱས་ཀྱི་ཞིང་ཐམས་ཅད་སྣང་བར་བྱེད་པ་དང་ལྡན་ཞིང༌། སངས་རྒྱས་ཀྱི་འོད་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་ཐམས་ཅད་ འོད་གཅིག་གིས་རྒྱས་པར་བྱེད་ཅིང་ཐོགས་པ་མེད་པའི་སྣང་བ་དང་ལྡན་པར་གྱུར་ཅིག །སེམས་ཅན་ཐམས་ཅད་བསམ་གྱིས་མི་ཁྱབ་པའི་ཞིང་དུ་འོད་ཟེར་རབ་ཏུ་འགྱེད་ཅིང་སྣང་བ་དཔག་ཏུ་མེད་པར་ གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་སྐར་མདས་འགྲོ་བ་ཐམས་ཅད་སྣང་བར་བྱེད་པའི་འོད་དང་ལྡན་ཞིང་འོད་སྣང་བའི་སྐར་མདའི་རྒྱལ་པོ་ལྟ་བུར་གྱུར་ཅིག །སེམས་ཅན་ཐམས་ ཅད་ཞིང་ཀུན་ཏུ་འོད་འགྱེད་པའི་རྣམ་པར་འཕྲུལ་པས་བྱུང་ཞིང་སྣང་བ་ཁ་དོག་མཐའ་ཡས་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་མར་མེའི་སྦྱིན་པ་རབ་ཏུ་ གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་ཕན་པ་དང༌། སེམས་ཅན་ཐམས་ཅད་ལ་བདེ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་དགེ་བའི་རྩ་བས་ཡོངས་སུ་ བཟུང་བས་ཡོངས་སུ་འཛིན་ཏོ། །སེམས་ཅན་ཐམས་ཅད་དགེ་བའི་རྩ་བས་ཡང་དག་པར་བཟུང་བས་ཡང་དག་པར་འཛིན་ཏོ། །སེམས་ཅན་ཐམས་ཅད་ལ་དགེ་བའི་རྩ་བའི་སྐལ་པས་བགོ་ ༄༅། །བཤའ་བྱེད་དོ། །སེམས་ཅན་ཐམས་ཅད་ལ་དགེ་བའི་རྩ་བས་སྙིང་བརྩེ་བར་བྱད་དོ། །སེམས་ཅན་ཐམས་ཅད་ལ་དགེ་བའི་རྩ་བའི་སྐལ་བ་སྦྱིན་པར་བྱེད་དོ། ། སེམས་ཅན་ཐམས་ཅད་དགེ་བའི་རྩ་བས་རབ་ཏུ་འཛིན་ཏོ། །སེམས་ཅན་ཐམས་ཅད་དགེ་བའི་རྩ་བས་སྦྱིན་པ་ཡོངས་སུ་རྫོགས་པར་བྱེད་དོ། །སེམས་ཅན་ཐམས་ཅད་དགེ་བའི་རྩ་བས་ དམིགས་པར་བྱེད་དོ། །སེམས་ཅན་ཐམས་ཅད་དགེ་བའི་རྩ་བ་མཉམ་པ་ཉིད་ཀྱིས་མཉམ་པར་བྱེད་དེ། །སེམས་ཅན་ཐམས་ཅད་དགེ་བའི་རྩ་བ་ཤེས་པས་རྣམ་པར་དཔྱོད་པར་བྱེད་ དེ༑ དེ་ལྟར་མར་མེ་སྦྱིན་པས་བསྡུས་པའི་དགེ་བའི་རྩ་བ་དེ་ཅི་ནས་ཀྱང་སེམས་ཅན་ཐམས་ཅད་ལ་དགེ་བའི་རྩ་བ་རྣམས་རབ་ཏུ་དགོད་པའི་ཕྱིར་ཡོངས་སུ་བསྔོ་བ་ཐོགས་པ་མེད་པར་ འགྲོ་པས་དེ་ལྟ་དེ་ལྟར་ཡོངས་སུ་བསྔོའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནད་ཀྱི་རྐྱེན་སྨན་དང༌། ཡོ་བྱད་སྦྱིན་པ་བྱེད་པའི་ཚེ་དགེ་བའི་རྩ་བ་དེ་འདི་ལྟར་ཡོངས་སུ་བསྔོ་སྟེ། དེ་ དགེ་བའི་རྩ་བ་འདིས་སེམས་ཅན་ཐམས་ཅད་དམིགས་པ་ཀུན་ལས་ཤིན་ཏུ་འདས་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་སྐུ་རབ་ཏུ་ཐོབ་ཅིང་ལུས་ནད་མེད་ པར་གྱུར་ཅིག །སེམས་ཅན་ཐམས་ཅད་མི་དགེ་བའི་ནད་ཐམས་ཅད་སོས་པར་གྱུར་ཏེ་སྨན་ལྟ་བུར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའ་ཕྱིར་མི་ལྡོག་པའི་ས་ལ་རབ་ ཏུ་གནས་པའི་ཚུལ་གྱིས་སྨན་ཨ་ག་རུ་ལྟ་བུར་གྱུར་ཅིག །སེམས་ཅན་ཐམས་ཅད་ཉོན་མོངས་པའི་དུག་གི་གསལ་ཤིང་འབྱིན་ཅིང་སངས་རྒྱས་ཀྱི་སྨན་དུ་གྱུར་ཅིག །སེམས་ཅན་ཐམས་ཅད་ ཉོན་མོངས་པ་ཐམས་ཅད་རྣམ་པར་སྦྱོང་བའི་སྤྱོད་པ་དང་ལྡན་ཞིང་ཉེ་བར་བགྲོད་པའི་ངང་ཚུལ་ཅན་དུ་གྱུར་ཅིག །སེམས་ཅན་ཐམས་ཅད་ཤིན་ཏུ་མི་འཁྲུགས་པའི་ཆོས་དང་ལྡན་ཞིང་སྨན་གྱི་ རྒྱལ་པོ་ལྟ་བུར་གྱུར་ཅིག །སེམས་ཅན་ཐམས་ཅད་འགྲོ་བ་ཐམས་ཅད་གསོ་བ་ལ་ཞུགས་ཤིང་སྨན་གྱི་སྡོང་པོ་ལྟ་བུར་གྱུར་ཅིག །སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ཀྱི་སྣང་བ་ རབ་ཏུ་ཐོབ་ཅིང་ནད་ཐམས་ཅད་བྱང་བར་གྱུར་ཅིག །སེམས་ཅན་ཐམས་ཅད་བསམ་པ་ཇི་ལྟ་བ་བཞིན་དུ་སྨན་གྱི་སྦྱོར་བ་ལ་བརྩོན་པས་འགྲོ་བ་ཐམས་ཅད་ཀྱི་སྨན་ལ་མཁས་པར་གྱུར་ཅིག །ཅེས་དེ་ ལྟར་བྱང་ཆུབ་སེམས་དཔའ་སྨན་གྱི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཤིན་ཏུ་གསོ་བའི་ཕྱིར་ཡོངས་སུ་བསྔོའོ། །ཤིན་ཏུ་བདེ་ཞིང་དགའ་བའི་ཕྱིར་ཡོངས་སུ་ བསྔོའོ༑ །སེམས་ཅན་ཐམས་ཅད་ཤིན་ཏུ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་སངས་རྒྱས་སྙུན་མི་མངའ་བ་ལྟ་བུ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་ བསྔོའོ༑ ༑སེམས་ཅན་ཐམས་ཅད་ཀྱི་ཟུག་རྔུ་ཐམས་ཅད་བཟློག་པའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་ལུས་ཉམས་པ་མེད་ཅིང་བརྟན་པའི་ཕྱིར་ཡོངས་སུ་བསྔོའོ། །སེམས་ ༄༅། །ཅན་ཐམས་ཅད་རྡོ་རྗེའི་རི་ཁོར་ཡུག་ལྟ་བུར་གཞོམ་དུ་མི་ཆོམ་པ་དང༌། སྟོབས་དང་ལྡན་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་སྟོབས་ ཐམས་ཅད་ཀྱིས་བརྟན་ཅིང་བསམ་པ་ཤིན་ཏུ་མཐོ་བ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཀྱིས་སངས་རྒྱས་ཀྱི་བདེ་བའི་རྣམ་པ་ཟིལ་གྱིས་མི་ནོན་པ་ཡོངས་སུ་ རྫོགས་པར་འགྱུར་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་ལུས་སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་བརྟན་པའི་ཕྱིར་ཡོངས་སུ་བསྔོའོ། །གཞན་ཡང་བྱང་ཆུབ་ སེམས་དཔའ་སེམས་དཔའ་ཆེན་པོ་སྣོད་སྣ་ཚོགས་དང༌། བྲེ་དང༌། ལྔ་བྲེའི་སྦྱིན་པ་བྱེད་པ་འདི་ལྟ་སྟེ། གསེར་གྱི་སྣོད་དང༌། གསེར་གྱི་བྲེ་དང༌། ལྔ་བྲེ་རིན་པོ་ཆེ་སྣ་ཚོགས་ཀྱིས་ཡོངས་སུ་ བཀང་བ་དང༌། འདི་ལྟ་སྟེ། དངུལ་གྱི་སྣོད་དང༌། དངུལ་གྱི་བྲེ་དང༌། ལྔ་བྲེ་རིན་པོ་ཆེ་སྣ་ཚོགས་ཀྱིས་ཡོངས་སུ་བཀང་བ་དང༌། འདི་ལྟ་སྟེ། བཻ་ཌཱུཪྻའི་སྣོད་དང༌། བཻ་ཌཱུཪྻའི་བྲེ་དང༌། ལྔ་བྲེ་ རིན་པོ་ཆེ་རྣམ་པ་ཐ་དད་པས་ཡོངས་སུ་བཀང་བ་དང༌། འདི་ལྟ་སྟེ། ཤེལ་གྱི་སྣོད་དང༌། ཤེལ་གྱི་བྲེ་དང༌། ལྔ་བྲེ་རིན་པོ་ཆེའི་རྒྱན་རྣམ་པ་ཐ་དད་པས་ཡོངས་སུ་བཀང་བ་དང༌། འདི་ལྟ་སྟེ། མུ་ས་ར་གལ་བའི་སྣོད་དང༌། མུ་ས་ར་གལ་བའི་བྲེ་དང༌། ལྔ་བྲེ་མུ་ཏིག་དམར་པོས་ཡོངས་སུ་བཀང་བ་དང༌། འདི་ལྟ་སྟེ། ཨསྨ་གརྦྷའི་སྣོད་དང༌། ཨསྨ་གརྦྷའི་བྲེ་དང༌། ལྔ་བྲེ་རིན་པོ་ཆེ་བྱི་ རུ་དང༌། ནོར་བུ་རིན་པོ་ཆེ་འོད་ཟེར་སྣང་བས་ཡོངས་སུ་བཀང་བ་དང༌། འདི་ལྟ་སྟེ། རིན་པོ་ཆེ་ཤི་ལའི་སྣོད་དང༌། རིན་པོ་ཆེ་ཤི་ལའི་བྲེ་དང༌། ལྔ་བྲེ་ཁ་ཟས་ཞིམ་པོ་རོའི་མཆོག་སྣ་ཚོགས་ཀྱིས་ ཡོངས་སུ་བཀང་བ་དང༌། འདི་ལྟ་སྟེ། ཙནྡན་གྱི་སྣོད་དང༌། ཙནྡན་གྱི་བྲེ་དང༌། ལྔ་བྲེ་ལྷ་རྫས་ལྟ་བུའི་གོས་ཕྲུགས་ཀྱིས་ཡོངས་སུ་བཀང་བ་དང༌། འདི་ལྟ་སྟེ། རྡོ་རྗེ་སྣོད་དང༌། རྡོ་རྗེའི་བྲེ་དང༌། ལྔ་ བྲེ་སྤོས་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བཀང་བ་དང༌། འདི་ལྟ་སྟེ། སྣོད་སྣ་ཚོགས་དངོས་པོ་རྣམ་པ་ཐ་དད་པའི་ཚོགས་ཀྱིས་བཀང་བ་དང༌། བྲེ་དང་ལྔ་བྲེ་དུ་མ་སྣ་ཚོགས་ བསགས་པར་བྱེ་བ་ཚད་མེད་པ་ནོར་གྱི་དབྱིག་དང༌། དངུལ་དང༌། གསེར་ཕྱེས་ཡོངས་སུ་བཀང་བ་དེ་དག་ཡོན་གྱི་གནས་བསམ་གྱིས་མི་ཁྱབ་པར་མོས་པའི་སེམས་དང་ལྡན་པས་སངས་རྒྱས་ བཅོམ་ལྡན་འདས་རྣམས་ལ་འབུལ་ལམ། དགེ་བའི་བཤེས་གཉེན་ཤིན་ཏུ་དཀོན་པར་སེམས་བསྐྱེད་པས་བྱང་ཆུབ་སེམས་དཔའ་དཀོན་མཆོག་ཐམས་ཅད་ལ་འབུལ་ལམ། སངས་ རྒྱས་ཀྱི་བསྟན་པ་ཤིན་ཏུ་བསྟན་པའི་ཕྱིར་འཕགས་པའི་དགེ་འདུན་ལ་འབུལ་ལམ། འཕགས་པའི་སྐྱེ་བོ་ལ་ཤིན་ཏུ་མོས་པའི་སེམས་ཀྱིས་གང་ཟག་གི་རྣམ་པ་ཉན་ཐོས་དང༌། རང་སངས་ རྒྱས་ལ་འབུལ་ལམ། བླ་མ་ལ་བསྙེན་བཀུར་ཞིང་བཤེས་གཉེན་ལ་རིམ་གྲོ་བྱ་བའི་སེམས་ཀྱིས་ཕ་དང་མ་དག་ལ་སྦྱིན་པ་བྱེད་དམ། དེ་དང་དེ་དག་ཏུ་ཡོན་ཏན་གྱི་ཚོགས་བསགས་པ་དང༌། ༄༅། །གདམས་ངག་དང༌། བསླབ་པ་དང༌། འཕགས་པའི་བསྟན་པ་ལ་གནས་པར་བརྩོན་པས་སློབ་དཔོན་དང༌། བླ་མ་དང༌། སྦྱིན་པའི་གནས་ལ་འབུལ་ལམ། སེམས་ ཅན་ཐམས་ཅད་ལ་ཞེ་མི་སྡང་བའི་མིག་གིས་བྱམས་པ་ཡོངས་སུ་བསྒོམས་ཤིང༌། གཏོང་བའི་སེམས་ཀྱིས་འདས་པ་དང༌། མ་འོངས་པ་དང༌། ད་ལྟར་བྱུང་བའི་བྱང་ཆུབ་སེམས་དཔའ་ ཐམས་ཅད་ཀྱི་དཀྱིལ་འཁོར་གྱི་སྦྱིན་པའི་ཕ་རོལ་ཏུ་ཕྱིན་པ་ལ་གཅིག་ཏུ་ངེས་པར་ཞུགས་པའི་སེམས་ཀྱིས་སྦྱིན་པ་ཐམས་ཅད་བརྩོན་ཞིང་ཚོགས་ཆེན་པོ་གྲངས་མེད་པས་འགྲོ་བ་ཐམས་ ཅད་ཡོངས་སུ་མི་གཏོང་ཞིང་མི་སྤང་བའི་སེམས་ལ་ཤིན་ཏུ་གནས་ཏེ་སྦྱིན་པའི་དངོས་པོ་ཐམས་ཅད་ལ་མངོན་པར་མ་ཆགས་པ་དང༌། ཡོན་གྱི་གནས་ཐམས་ཅད་རབ་ཏུ་བཟུང་བའི་སེམས་ ལ་གནས་པས་བཀྲེས་པ་དང་ཕོངས་པའི་སློང་བ་རྣམས་ལ་སྣོད་སྣ་ཚོགས་དང༌། བྲེ་དང༌། ལྔ་བྲེ་ཡོ་བྱད་ཀྱི་ཚོགས་རྣམ་པ་ཐ་དད་པས་ཡོངས་སུ་བཀང་བ་དེ་དག་སྦྱིན་པ་དང༌། ཡོངས་སུ་གཏོང་ བའི་ཚེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་དྲན་པའི་དབང་པོ་ནམ་མཁའི་དབྱིངས་ལྟར་ཡངས་པ་དང་ལྡན་ཏེ། འཇིག་རྟེན་པ་ དང་འཇིག་རྟེན་ལས་འདས་པའི་སྐད་ཐམས་ཅད་གཟུང་བ་དང༌། བླང་བ་དང༌། ཡིད་ལ་བྱ་བའི་དྲན་པ་རྨོངས་པ་མེད་ཅིང་སྣོད་ཚད་མེད་པའི་སྙིང་པོ་ཅན་དུ་གྱུར་ཅིག །སེམས་ཅན་ཐམས་ཅད་ སངས་རྒྱས་ཀྱི་ཆོས་ཟབ་མོ་རྒྱུན་འཆད་པ་མེད་པའི་ཆོས་ཅན་དུ་གྱུར་ཏེ། སྣོད་བཟང་པོ་རྣམ་པར་དག་པར་གྱུར་ཅིག །སེམས་ཅན་ཐམས་ཅད་འདས་པ་དང༌། མ་བྱོན་པ་དང༌། ད་ལྟར་བྱུང་བའི་ སངས་རྒྱས་ཐམས་ཅད་ཀྱི་ཆོས་ཡང་དག་པར་འཛིན་པའི་ཆོས་ཅན་དུ་འགྱུར་ཏེ། བླ་ན་མེད་པའི་སྣོད་རིན་པོ་ཆེ་ལྟ་བུར་གྱུར་ཅིག །སེམས་ཅན་ཐམས་ཅད་འདས་པ་དང༌། མ་བྱོན་པ་དང༌། ད་ ལྟར་བྱུང་བའི་སངས་རྒྱས་ཐམས་ཅད་ཀྱི་བྱང་ཆུབ་དབྱེར་མེད་པ་ལ་མོས་པས་ཡང་དག་པར་བཟུང་ཞིང་སངས་རྒྱས་ཀྱི་ཆོས་ཡངས་པའི་སྣོད་དུ་གྱུར་ཅིག །སེམས་ཅན་ཐམས་ཅད་བྱང་ཆུབ་ཀྱི་སེམས་བསྐྱེད་ པ་རྒྱ་ཆེ་ཞིང་མཐུ་ཆེ་བ་ལ་ཡང་དག་པར་གཞོལ་བས་རིན་པོ་ཆེའི་སྣོད་རྣམ་པའི་མཆོག་ཐམས་ཅད་དང་ལྡན་པ་ཤིན་ཏུ་བརྒྱན་པ་ལྟ་བུར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཡེ་ ཤེས་མཐའ་དང་དབུས་མེད་པ་ཚད་མེད་པ་ལ་མོས་པ་རྣམ་པར་དག་ཅིང༌། ཡོན་ཏན་ཐམས་ཅད་ཀྱི་སྣོད་དང་འབྱུང་གནས་སུ་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་རྣམ་པར་ཐར་པ་ བསྒྲིབས་པ་མེད་པས་ཐམས་ཅད་མཁྱེན་པའི་ཡེ་ཤེས་ཀྱི་མཐར་གཏུགས་ཏེ་ཐམས་ཅད་མཁྱེན་པའི་ཡེ་ཤེས་ཀྱི་ཁོངས་སུ་ཆུད་པར་གྱུར་ཅིག །སེམས་ཅན་ཐམས་ཅད་སེམས་ཅན་གྱི་ཁམས་ ཐམས་ཅད་མ་ལུས་པར་ཐམས་ཅད་མཁྱེན་པའི་སྟོབས་ལ་རབ་ཏུ་གཞག་པའི་ཕྱིར་ཕྱི་མའི་མཐའ་བསྐལ་པར་བྱང་ཆུབ་སེམས་དཔའི་སྤྱོད་པའི་སྣོད་དུ་གྱུར་ཅིག །སེམས་ཅན་ཐམས་ཅད་སངས་ ༄༅། །རྒྱས་ཐམས་ཅད་ཀྱི་གསུང་གི་ཡན་ལག་གིས་ཆོས་བསྟན་པ་ཡང་དག་པར་འཛིན་པའི་སེམས་དང་ལྡན་པར་གྱུར་ཏེ། ཡོན་ཏན་མཆོག་ཐམས་ཅད་དང༌། དུས་ གསུམ་གྱི་སངས་རྒྱས་ཀྱི་རིགས་ཀྱི་སྣོད་དུ་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་བསྐོར་བ་ལ་གསོལ་བ་འདེབས་པ་དང༌། ཆོས་ཡོངས་སུ་ འདྲི་བ་ལ་སྨྲ་བའི་སྔོན་དུ་འགྲོ་བའི་སྐྱེས་བུར་གྱུར་ཏེ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་འཇིག་རྟེན་གྱི་ཁམས་ནམ་མཁའི་མཐས་གཏུགས་པ་གང་ བར་བྱེད་པ་ཤོད་བའི་སྣོད་དུ་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་དགེ་བའི་རྩ་བ་དེ་དག་ཅི་ནས་ཀྱང་སེམས་ཅན་གྱི་ཁམས་ཐམས་ཅད་བྱང་ཆུབ་སེམས་དཔའ་ཀུན་ཏུ་བཟང་ པོའི་སྤྱོད་པ་དང༌། སྨོན་ལམ་ཡོངས་སུ་རྫོགས་པའི་སྣོད་དུ་གྱུར་པའི་ཕྱིར་ཡོངས་སུ་བསྔོའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཤིང་རྟ་སྣ་ཚོགས་དང༌། ཤིང་རྟ་དུ་མ་དང༌། རིན་པོ་ཆེ་སྣ་ཚོགས་ཀྱི་ཤིང་རྟ་ཚད་མེད་པ་དང༌། སངས་རྒྱས་དང༌། བྱང་ཆུབ་སེམས་དཔའ་གཅིག་ནས་གཅིག་ཏུ་བརྒྱུད་པ་དང༌། བླ་མ་དང༌། སྟོན་པ་དང༌། དགེ་བའི་བཤེས་གཉེན་ དང༌། དགེ་འདུན་དང༌། ཉན་ཐོས་དང༌། རང་སངས་རྒྱས་དང༌། སྦྱིན་པའི་གནས་སྣ་ཚོགས་སློང་ཞིང་ལེན་པ་དང༌། ཕྱོགས་གཞན་ནས་འོངས་པའི་གང་ཟག་སྣ་ཚོགས་དང༌། ཕོངས་པ་ དང༌། བཀྲེན་པ་སློང་བ་དཔག་ཏུ་མེད་པ་དང༌། བྱང་ཆུབ་སེམས་དཔའི་སྒྲ་ཐོས་ཏེ་འོངས་པ་དང༌། བྱང་ཆུབ་སེམས་དཔའ་ཡིད་ཆེས་པས་སྐབས་ཕྱེ་སྟེ་འོངས་པ་དང༌། བྱང་ཆུབ་སེམས་དཔའི་ སྔོན་གྱི་སྨོན་ལམ་དང༌། སྦྱིན་པའི་སྒྲ་ཐོས་ཏེ་འོངས་པ་དང༌། བྱང་ཆུབ་སེམས་དཔའི་སྨོན་ལམ་དང༌། སེམས་ཀྱིས་བོས་ཤིང་བསྟབས་པ་དེ་དག་ལ་སྦྱིན་ཞིང་གཏོང་བ་འདི་ལྟ་སྟེ། ནོར་བུའི་ ཤིང་རྟ་ལ་རྒྱན་གྱིས་ཤིན་ཏུ་མཛེས་པར་བྱས་པ་སྦྱིན་པའམ། གསེར་གྱི་ཤིང་རྟ་ལ་དྲིལ་བུའི་དྲན་བུའི་དྲན་པ་རབ་ཏུ་འཁོར་བས་བརྒྱན་པ་རིན་པོ་ཆེའི་སྲད་བུའི་ལྔ་ལྡི་བཀྱེ་བ་སྦྱིན་པའམ། བཻ་ཌཱུཪྻའི་ ཤིང་རྟ་ལ་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མ་རྣམ་པ་སྣ་ཚོགས་ཀྱིས་ཤིན་ཏུ་སྤྲས་པ་སྦྱིན་པའམ། དངུལ་གྱི་ཤིང་རྟ་ལ་ཤིན་ཏུ་དག་པའི་གསེར་རབ་ཏུ་བཟང་པོའི་དྲ་བས་གཡོགས་ ཤིང་རྟ་ཅང་ཤེས་ལ་བཅས་པ་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མས་བརྒྱན་ཅིང་ཀླུབས་པ་སྦྱིན་པའམ། གསེར་གྱི་ཤིང་རྟ་ལ་རིན་པོ་ཆེའི་དྲ་བ་དང༌། རྒྱན་ཐམས་ཅད་ཕུན་སུམ་ཚོགས་ པས་བརྒྱན་ཅིང་གླང་པོ་ཆེ་ཅང་ཤེས་ལ་བཅས་པ་སྦྱིན་པའམ། ཙནྡན་གྱི་ཤིང་རྟ་ལ་རིན་པོ་ཆེའི་དམ་པ་སྣ་ཚོགས་ཀྱིས་ཤིན་ཏུ་སྤྲས་ཏེ་རིན་པོ་ཆེའི་སེངྒེའི་ཁྲིས་བརྒྱན་པ། ན་ཆུང་བརྒྱ་ ཕྲག་སྟོང་ཞོན་པ་རྒྱན་ཐམས་ཅད་དང༌། རིན་པོ་ཆེ་སྣ་ཚོགས་ཐམས་ཅད་ཀྱི་གདུགས་ཕུན་སུམ་ཚོགས་པ། སྐྱེས་བུ་ཅང་ཤེས་བརྒྱ་སྟོང་དུ་མས་དྲངས་པ་སྦྱིན་པའམ། ཤེལ་གྱི་ཤིང་རྟ་ལ་རིན་ ༄༅། །པོ་ཆེ་དུ་མས་ཁ་དོག་རྣམ་པར་འབྱེད་པར་ཤིན་ཏུ་མཛེས་པར་བྱས་ཤིང༌། ན་ཆུང་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པས་ཡོངས་སུ་གང་བ། རིན་པོ་ཆེའི་བླ་ རེ་ཡོག་པར་བྲེས་པ། རྒྱལ་མཚན་དང༌། བ་དན་སྣ་ཚོགས་ཀྱིས་ཕྱོགས་བཞི་ནས་བརྒྱན་པ་སྦྱིན་པའམ། ཨསྨ་གརྦྷའི་ཤིང་རྟ་ལ་རིན་པོ་ཆེ་སྣ་ཚོགས་དུ་མས་ཤིན་ཏུ་མཛེས་པར་ བྱས་ཏེ་སྤོས་སྣ་ཚོགས་དྲི་ཞིམ་པོས་བདུགས་པ། སྤོས་ཀྱི་དམ་པ་ཐམས་ཅད་ཀྱི་བྱུག་པས་རབ་ཏུ་བྱུགས་པ། མེ་ཏོག་གི་རྒྱན་ཐམས་ཅད་ཀྱིས་ཆལ་པར་བཀང་བ། བུ་མོ་བརྒྱ་ ཕྲག་སྟོང་གིས་རིན་པོ་ཆེའི་སྲད་བུ་ཐོགས་ཏེ་འཁྲུལ་པ་མེད་པར་དྲངས་པ་སྦྱིན་པའམ། དྲི་ཞིམ་པོ་སྣ་ཚོགས་ཀྱི་ཤིང་རྟ་ལ་རས་དང་གོས་སྣ་ཚོགས་ཀྱི་བླ་རེ་བྲེས་པ་རིན་པོ་ཆེའི་དྲ་བས་ ཡོག་པར་ཁེབས་པ། སྤོས་དྲི་ཞིམ་པོ་ཤིན་ཏུ་ཡིད་དུ་འོང་བ་རྣམ་པར་དག་པ་མི་མཐུན་པ་མེད་པ་ཚོར་ན་དགའ་བ་ཤིན་ཏུ་འཐུལ་བ་མཚམས་ཀྱི་ལྷའི་བུས་དྲངས་པ། རིན་པོ་ ཆེའི་འཁོར་ལོ་རིན་པོ་ཆེ་ཐམས་ཅད་ཀྱིས་ཤིན་ཏུ་བརྒྱན་ཅིང་མཛེས་པར་བྱས་པ་སྦྱིན་པའམ། རིན་པོ་ཆེ་ཐམས་ཅད་ཚོགས་པའི་འོད་འབྱུང་བའི་ཤིང་རྟ་ལ་ཁ་དོག་རྣམ་པ་སྣ་ཚོགས་ སུ་སྣང་བའི་རིན་པོ་ཆེ་རྣམ་པ་དུ་མའི་རྒྱན་གྱིས་བརྒྱན་པ། རིན་པོ་ཆེ་སྣ་ཚོགས་ཀྱི་དྲ་བའི་བླ་རེ་བྲེས་པ། རིན་པོ་ཆེ་སྣ་ཚོགས་ཀྱི་ཕྲེང་བ་མཐའ་ཡས་པ་ཀུན་ནས་དབྱངས་པ། བུ་དང་ བུ་མོ་བསྐྱོན་པ། སྤོས་སྣ་ཚོགས་ཀྱི་ཕྱེ་མས་མཐའ་འཁོར་ཤིན་ཏུ་སྦྱངས་པ། སྦྱིན་པ་བྱེད་པ་ན་དེ་དག་ལས་སངས་རྒྱས་བཅོམ་ལྡན་འདས་རྣམས་ལ་ཤིང་རྟ་འབུལ་བའི་ཚེ་དགེ་བའི་ རྩ་བ་དེ་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་སངས་རྒྱས་ལ་ཡོན་ཚད་མེད་པ་འབུལ་བར་དད་ཅིང་སྦྱིན་པའི་གནས་ཀྱི་དམ་པ་ལ་ཤིན་ཏུ་མོས་པར་གྱུར་ཅིག །སེམས་ ཅན་ཐམས་ཅད་སྦྱིན་པའི་གནས་མཐའ་ཡས་པ་རྣམ་པར་དག་པས་སངས་རྒྱས་ལ་རབ་ཏུ་བརྟེན་པར་གྱུར་ཅིག །སེམས་ཅན་ཐམས་ཅད་གཏོང་བ་རྒྱ་ཆེན་པོ་ཡོངས་སུ་གྲུབ་པས་སངས་ རྒྱས་ཐམས་ཅད་ལ་ཡོངས་སུ་གཏོང་བར་མོས་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་རྣམ་པར་ཐར་པ་བསྒྲིབས་པ་མེད་པ་རབ་ཏུ་ཐོབ་ཅིང་ཉན་ཐོས་དང་རང་སངས་རྒྱས་ ཀྱི་སྨོན་ལམ་དང་བྲལ་ཏེ་སངས་རྒྱས་ལ་བསྐྱེད་པའི་ཡོན་ཏན་ཐམས་ཅད་མཁྱེན་པའི་ཡེ་ཤེས་ཀྱིས་མྱོང་བར་གྱུར་ཅིག །སེམས་ཅན་ཐམས་ཅད་མཐའ་ཡས་པའི་ཡེ་ཤེས་ལ་ཤིན་ཏུ་ མོས་ཤིང་སངས་རྒྱས་ལ་ཡོན་གསོལ་བ་ཟད་མི་ཤེས་པར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཀྱི་རྒྱལ་པོས་རྣམ་པར་དག་ཅིང་ཡེ་ཤེས་ཀྱི་མཆོག་ལ་རབ་ཏུ་བརྟེན་ པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་རྫུ་འཕྲུལ་ཐམས་ཅད་དུ་འགྲོ་བ་ཐོབ་སྟེ་གང་དུ་དགའ་བར་འགྲོ་བར་གྱུར་ཅིག །སེམས་ཅན་ཐམས་ཅད་ཡེ་ཤེས་མཐའ་ཡས་པའི་ ༄༅། །འབྱུང་གནས་ལ་རབ་ཏུ་འཁོད་པ་འགྲུབ་པའི་ཕྱིར་ཡེ་ཤེས་ཆེན་པོ་ལ་རབ་ཏུ་བརྟེན་པར་གྱུར་ཅིག །སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ཀྱི་ཞིང་ ལས་རྣམ་པར་སྐྱེ་བའི་ཆོས་ཅན་དུ་གྱུར་ཏེ་བསོད་ནམས་ཀྱི་ཞིང་དམ་པར་གྱུར་ཅིག །སེམས་ཅན་ཐམས་ཅད་དགེ་བའི་རྩ་བ་ཐམས་ཅད་བསྐྱེད་པས་སངས་རྒྱས་ཀྱི་ཡེ་ཤེས་ལ་མོས་ཤིང་ སངས་རྒྱས་ཐམས་ཅད་ལ་མི་དགའ་བ་མེད་པའི་སེམས་སུ་གྱུར་ཅིག །སེམས་ཅན་ཐམས་ཅད་སེམས་ཀྱི་སྐད་ཅིག་གཅིག་གིས་ཆོས་ཀྱི་དབྱིངས་ཐམས་ཅད་དུ་ངལ་བ་མེད་པར་ ཞུགས་ཏེ་སངས་རྒྱས་ཀྱི་ཞིང་ཐམས་ཅད་ཡོངས་སུ་སྒྲུབ་པ་ལྷུན་གྱིས་གྲུབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་སྐྱེ་བ་ཐམས་ཅད་ཀྱི་དྲུང་དུ་ཕྱིན་པས་བྱང་ཆུབ་སེམས་དཔའི་ མངོན་པར་ཤེས་པས་ནམ་མཁའི་དབྱིངས་ཐམས་ཅད་དུ་ཤིན་ཏུ་རྣམ་པར་ཕྱེ་བའི་ལུས་ལ་རབ་ཏུ་ཞུགས་པར་གྱུར་ཅིག །སེམས་ཅན་ཐམས་ཅད་གནས་དཔེ་མེད་པའི་ལུས་རབ་ཏུ་ཐོབ་ པས་ངལ་ཞིང་དུབ་པ་མེད་པར་འཇིག་རྟེན་གྱི་ཁམས་ཐམས་ཅད་དུ་འགྲོ་བར་གྱུར་ཅིག །སེམས་ཅན་ཐམས་ཅད་ཕྱིར་མི་ལྡོག་པའི་ཡིད་ཀྱིས་འགྲོ་བ་དང་ལྡན་ཞིང་ལུས་ཀྱི་མགྱོགས་ པ་ཕུན་སུམ་ཚོགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སེམས་ཀྱི་སྐད་ཅིག་གཅིག་གིས་བསམ་པ་དང་ཁམས་ཁྱབ་པར་བྱེད་པས་སངས་རྒྱས་ཀྱི་རྣམ་པར་འཕྲུལ་བ་ ཐམས་ཅད་ཡང་དག་པར་སྟོན་པའི་སྣང་བ་གཞན་ཞིང་སངས་རྒྱས་ཐམས་ཅད་ཀྱི་བྱིན་གྱི་རླབས་དང༌། ཁྱུ་མཆོག་གི་མཐུ་འབྱིན་པའི་ཕ་རོལ་ཏུ་ཕྱིན་པ་ཐོབ་པར་གྱུར་ཅིག །སེམས་ཅན་ ཐམས་ཅད་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པའི་རྗེས་སུ་འགྲོ་བ་ལ་བདེ་བར་འགྲོ་བས་རབ་ཏུ་བརྩོན་པར་གྱུར་ཅིག །སེམས་ཅན་ཐམས་ཅད་སྟོབས་བཅུའི་ཡེ་ཤེས་ཐམས་ཅད་མ་ ལུས་པའི་མཐར་ཐུག་པར་འགྲོ་བ་ཐོབ་པས་ཤིན་ཏུ་མྱུར་དུ་འགྲོ་བར་གྱུར་ཅིག། སེམས་ཅན་ཐམས་ཅད་ཆོས་ཀྱི་དབྱིངས་ཐམས་ཅད་ཐ་མི་དད་པར་འཇུག་པ་ལ་འཇིག་རྟེན་གྱི་ཁམས་ཀྱི་རྒྱུད་ ཐམས་ཅད་དུ་འགྲོ་བའི་ཕ་རོལ་ཏུ་ཕྱིན་པ་ཐོབ་པར་གྱུར་ཅིག །སེམས་ཅན་ཐམས་ཅད་ཕྱིར་མི་ལྡོག་པའི་ཐམས་ཅད་མཁྱེན་པའི་ཡེ་ཤེས་ཀྱི་སྤྱོད་ཡུལ་དང༌། ཚུལ་ཤེས་ཏེ་བྱང་ཆུབ་སེམས་ དཔའ་ཀུན་ཏུ་བཟང་པོའི་སྤྱོད་པ་ཁོང་དུ་ཆུད་པའི་ཕ་རོལ་ཏུ་ཕྱིན་པ་ཐོབ་པས་འདོད་པར་གྱུར་ཅིག །སེམས་ཅན་ཐམས་ཅད་ཆོས་ཉིད་ཐམས་ཅད་ཀྱི་རྗེས་སུ་སོང་ཞིང་ཆོས་ཇི་ལྟ་བ་བཞིན་དུ་མཐོང་ བས་འདྲ་བ་མེད་པའི་ཡེ་ཤེས་ཀྱི་ཚུལ་ཐོབ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་རྣམས་མངོན་དུ་གྱུར་པའམ། དེ་བཞིན་ གཤེགས་པ་ཡོངས་སུ་མྱ་ངན་ལས་འདས་པའི་མཆོད་རྟེན་ལ་ཤིང་རྟ་འབུལ་པའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་དེ་བཞིན་གཤེགས་པའི་ཐེག་པ་བསྒྲིབས་པ་མེད་པར་ ༄༅། །འབྱུང་བའི་མཐར་ཕྱིན་པར་ཡོངས་སུ་བསྔོའོ། །བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་བཤེས་གཉེན་ལ་ཤིང་རྟ་འབུལ་བའི་ཚེ་དགེ་བའི་རྩ་ བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་བྱས་པའི་དྲིན་མི་གཏོང་བའི་ཕྱིར་དགེ་བའི་བཤེས་གཉེན་མི་གཏོང་ བའི་སེམས་སྟོང་བ་མེད་པར་གྱུར་ཅིག །སེམས་ཅན་ཐམས་ཅད་སྐལ་པ་མཉམ་པའི་དགེ་བའི་རྩ་བ་ཡོངས་སུ་འཛིན་པའི་ཕྱིར་དགེ་བའི་བཤེས་གཉེན་དང་དོན་མཐུན་པར་གྱུར་ཅིག། སེམས་ ཅན་ཐམས་ཅད་གཏོང་བ་དང༌། ཡོངས་སུ་གཏོང་བ་ཐམས་ཅད་ཀྱིས་དགེ་བའི་བཤེས་གཉེན་ལ་ཕན་འདོགས་པའི་ཕྱིར་དགེ་བའི་བཤེས་གཉེན་ལ་བླ་མའི་རིམ་གྲོས་ཆེར་བརྩོན་པར་གྱུར་ཅིག ། སེམས་ཅན་ཐམས་ཅད་དགེ་བའི་བཤེས་གཉེན་དང་ཉེ་བར་བྱས་ཏེ་སྤྱད་པ་བསྒྲུབ་པའི་ཕྱིར་བསམ་པ་དགེ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་དགེ་བའི་བཤེས་གཉེན་དང་མཐུན་ པའི་བསྙེན་བཀུར་ལ་ནན་ཏན་བྱེད་པས་དགེ་བའི་བཤེས་གཉེན་མཐོང་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སེམས་འཁྲུལ་པ་མེད་ཅིང་ཉམས་པ་མེད་པ་དང་འདྲེས་པ་མེད་ ཅིང་རྙོག་པ་མེད་པའི་ཕྱིར་དགེ་བའི་བཤེས་གཉེན་ལ་གྲོལ་བའི་བསམ་པ་ཅན་དུ་གྱུར་ཅིག །སེམས་ཅན་ཐམས་ཅད་ཡོ་བྱད་ཅི་འདོད་པ་རབ་ཏུ་བསྒྲུབ་པའི་ཕྱིར་དགེ་བའི་བཤེས་གཉེན་ལ་ལུས་ ཡོངས་སུ་གཏོང་བར་གྱུར་ཅིག །སེམས་ཅན་ཐམས་ཅད་བྱམས་པ་དང་ལྡན་ཞིང་འཁོན་མེད་པར་རིམ་གྲོ་བྱེད་པའི་ཕྱིར་དགེ་བའི་བཤེས་གཉེན་གྱིས་ཡོངས་སུ་བཟུང་ཞིང་རབ་ཏུ་བརྟན་པར་གྱུར་ ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཀུན་ཏུ་མཐུན་པ་ཡང་དག་པར་མཉམ་པའི་ཕྱིར་དགེ་བའི་བཤེས་གཉེན་དང་མཐུན་པར་གྱུར་ཅིག །སེམས་ཅན་ཐམས་ཅད་སྨོན་ལམ་ གཅིག་པས་བྱང་ཆུབ་སེམས་དཔའི་སྤྱོད་པ་ལས་འབྱུང་བ་དང༌། སྟོབས་ཀྱི་མཐར་གཏུགས་པའི་ཕྱིར་དགེ་བའི་བཤེས་གཉེན་གྱི་དགེ་བའི་རྩ་བ་དང༌། ལས་ཀྱི་རྣམ་པར་སྨིན་པ་ཡོངས་སུ་ དག་པ་དང་མཐུན་ཞིང་གཅིག་པར་གྱུར་ཅིག །སེམས་ཅན་ཐམས་ཅད་ཏིང་ངེ་འཛིན་ཐམས་ཅད་ཀྱི་ཡུལ་ལ་རྣམ་པར་འཕྲུལ་པ་ཡེ་ཤེས་མངོན་པར་ཤེས་པས་ཤེས་རབ་བཟང་པོས་ཆོས་ ཀྱི་བརྩོན་འགྲུས་ལ་ཤིན་ཏུ་བྱུང་བར་གྱུར་ཅིག །སེམས་ཅན་ཐམས་ཅད་ཆོས་ཐམས་ཅད་གཟུང་བའི་ཕ་རོལ་ཏུ་ཕྱིན་པའི་མཐས་གཏུགས་པར་ཁོང་དུ་ཆུད་པས་རིག་པའི་ཕ་རོལ་ཏུ་ཕྱིན་པ་ ཐོབ་པར་གྱུར་ཅིག །སེམས་ཅན་ཐམས་ཅད་ཐོགས་པ་མེད་པའི་ཐེག་པས་ཐམས་ཅད་མཁྱེན་པ་ཉིད་ཀྱི་མཐར་གཏུགས་ཏེ་ཐེག་པ་ཆེན་པོས་མངོན་པར་སྤྱོད་ཅིང་ཡང་དག་པར་གནས་པར་གྱུར་ཅིག། སེམས་ཅན་ཐམས་ཅད་བདེ་བའི་ཕྱོགས་ལས་ཕྱིར་མི་ལྡོག་པའི་ཡིད་དང་ལྡན་ཞིང་འགྲོ་བ་ཐམས་ཅད་ཤེས་པའི་ཡེ་ཤེས་འཛིན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ ༄༅། །ལ་ཇི་ལྟར་ཐོས་པ་བཞིན་དུ་རྨོངས་པ་མེད་པས་ཆོས་ཐམས་ཅད་ལ་རབ་ཏུ་གཞོལ་ཞིང་ཇི་ལྟ་བ་བཞིན་དུ་རྟོགས་པའི་མངོན་པར་ཤེས་པ་དང་ལྡན་པར་གྱུར་ ཅིག །སེམས་ཅན་ཐམས་ཅད་བསྒྲིབས་པ་མེད་པའི་ཡེ་ཤེས་ཀྱིས་ཆོས་ཐམས་ཅད་ལ་འབྱུང་བའི་མཐར་ཐུག་སྟེ་སངས་རྒྱས་ཐམས་ཅད་ཀྱིས་ཡོངས་སུ་བཟུང་བའི་ཡིད་དང་ལྡན་ པར་གྱུར་ཅིག །སེམས་ཅན་ཐམས་ཅད་ཉམས་པ་མེད་པའི་རྫུ་འཕྲུལ་གྱི་རྐང་པ་དཔེ་མེད་པ་རབ་ཏུ་ཐོབ་པས་མགྱོགས་པ་དམ་པའི་ཕ་རོལ་ཏུ་ཕྱིན་པས་འགྲོ་བར་གྱུར་ཅིག ། སེམས་ཅན་ཐམས་ཅད་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། ཐེག་པ་ཆེན་པོས་འདུལ་བ་ལ་རབ་ཏུ་ཞུགས་པས་འགྲོ་ཞིང་འོང་བ་ཕུན་སུམ་ཚོགས་པར་གྱུར་ཅིག ། སེམས་ཅན་ཐམས་ཅད་ཡེ་ཤེས་ཀྱི་ཤིང་རྟས་འགྲོ་བའི་མཐར་ཐུག་པས་གཏི་མུག་མེད་པར་འགྲོ་བར་གྱུར་ཅིག །སེམས་ཅན་ཐམས་ཅད་བསྒྲིབས་པ་མེད་པའི་ཡེ་ཤེས་ཀྱིས་ ཐམས་ཅད་དུ་འགྲོ་བའི་ཚུལ་ཤེས་ཤིང་ཆགས་པ་མེད་པའི་ཤིང་རྟ་བཞོན་པ་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་བཤེས་ གཉེན་ལ་ཤིང་རྟ་འབུལ་བ་དང༌། ཡོངས་སུ་གཏོང་བས་ཡང་དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ ལ་ཚུལ་གྱི་རྒྱུད་གཅིག་ཏུ་གྱུར་པས་བསྙེན་ཅིང་བཀུར་བའི་ཡོངས་སུ་སྒྲུབ་པ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་ཐམས་ཅད་ ལ་ཤིན་ཏུ་བསླབ་པའི་སེམས་དང་ལྡན་པ་ཤེས་རབ་ཀྱིས་ཤིན་ཏུ་རྟོགས་པའི་བསམ་པ་ཅན། ཡོན་ཏན་གྱིས་རྣམ་པར་དག་པའི་ཡིད་དང་ལྡན་པ། མཐུན་པར་ཡོངས་སུ་གཏོང་པའི་བསམ་པ་ ཅན༑ དགེ་འདུན་རིན་པོ་ཆེ་ཤིན་ཏུ་དཀོན་པའི་སེམས་དང་ལྡན་པ། ཚོགས་རིན་པོ་ཆེ་ལ་ཤིན་ཏུ་མོས་པའི་བསམ་པ་ཅན། བསྟན་པ་རབ་ཏུ་གཟུང་བའི་ཡིད་དང་ལྡན་པ། ལྷག་པའི་བསམ་པ་ཤིན་ ཏུ་བརྟན་པའི་བསམ་པ་ཅན། རིམ་གྲོ་བྱེད་པ་དང་ལྡན་པ། མཆོད་སྦྱིན་ཆེན་པོའི་མཆོད་སྦྱིན་ཤིན་ཏུ་བྱས་པ། བསྟན་པའི་ཡོན་ཏན་ཆེན་པོ་བརྗོད་པ། སངས་རྒྱས་ཀྱི་བསྟན་པ་ཡོན་ཏན་ཐ་མི་དད་ པས་འོད་གསལ་ཞིང་རྙོག་པ་མེད་པར་དག་པ་དེ། དེ་བཞིན་གཤེགས་པའི་དགེ་འདུན་དཀོན་མཆོག་ལ་ཤིང་རྟ་འབུལ་བའི་ཚེ་དགེ་འདུན་དཀོན་མཆོག་ལ་ཤིང་རྟ་ཕུལ་བས་ཡང་དག་པར་བཟུང་ བའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་སངས་རྒྱས་ཀྱི་བསྟན་པ་ལ་ཡང་དག་པར་གཞོལ་བས་ཡང་དག་པར་ཟིན་པར་གྱུར་ཅིག །སེམས་ ཅན་ཐམས་ཅད་འཕགས་པའི་སྐྱེ་མཆེད་ལས་ཆོས་གཞན་མེད་པར་ཤིན་ཏུ་གྲུབ་པས་སེམས་ནང་དུ་གཞོལ་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་གཅིག་ནས་གཅིག་ཏུ་ ༄༅། །བརྒྱུད་པས་ཡང་དག་པར་བཟུང་བས་འཕགས་པར་རེད་པར་གྱུར་ཅིག །སེམས་ཅན་ཐམས་ཅད་འཇིག་རྟེན་ཀུན་གྱི་ཤེས་པས་ཡིད་ཆེས་པར་བྱ་བས་གྲངས་སུ་བགྲང་ བར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་མི་གཉིས་པའི་རང་བཞིན་ཤེས་པ་ཁོང་དུ་ཆུད་པས་ཆགས་པ་མེད་པའི་དབྱིངས་ལ་ཡང་དག་པར་གཞོལ་བར་གྱུར་ཅིག །སེམས་ཅན་ ཐམས་ཅད་དེ་བཞིན་གཤེགས་པའི་ཡེ་ཤེས་ཀྱི་སྤྱོད་ཡུལ་གྱིས་ཡང་དག་པར་བྱུང་བས་ཅང་ཤེས་ཀྱི་ཀུན་ནས་བསྐོར་བར་གྱུར་ཅིག །སེམས་ཅན་ཐམས་ཅད་ཉེ་བའི་ཉོན་མོངས་པའི་རྡུལ་ ཐམས་ཅད་དང་བྲལ་བས་ཉོན་མོངས་པ་མེད་པའི་ཆོས་ལ་སྤྱོད་པར་གྱུར་ཅིག །སེམས་ཅན་ཐམས་ཅད་འཕགས་པའི་དགེ་འདུན་སོ་སོའི་སྐྱེ་བོ་མེད་པའི་སས་བླ་ན་མེད་པའི་དགེ་འདུན་ དཀོན་མཆོག་རབ་ཏུ་བརྗོད་པར་གྱུར་ཅིག །སེམས་ཅན་ཐམས་ཅད་ཆགས་པ་མེད་པར་གྱུར་པའི་ཡེ་ཤེས་ལ་ཤིན་ཏུ་བརྩོན་པའི་ཆོས་ཅན་དུ་གྱུར་ཏེ་འཕགས་པའི་ཆོས་དང་ལྡན་པར་གྱུར་ ཅིག །སེམས་ཅན་ཐམས་ཅད་ཁམས་གསུམ་ཐམས་ཅད་ཀྱིས་གོས་པ་མེད་པའི་སེམས་དང་ལྡན་ཞིང་ཚོགས་ཀྱི་རྒྱལ་པོ་དམ་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་ཆོས་ ཀྱི་འཁོར་ལོ་བསྐོར་བ་ལ་མཁས་པས་ལེགས་པར་བཅས་པའི་ཡེ་ཤེས་ཀྱི་བཞོན་པ་དང་ལྡན་པར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཁམས་ཀྱི་རྒྱུད་བརྗོད་དུ་མེད་པའི་ཡང་ བརྗོད་དུ་མེད་པར་ཤིན་ཏུ་འགྲོ་བའི་འགྲོས་ལ་མཁས་པས་སེམས་སྐད་ཅིག་གི་རྫུ་འཕྲུལ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཁམས་ཐམས་ཅད་དུ་ཐོགས་པ་མེད་ པའི་ཡེ་ཤེས་དང་ལྡན་ཞིང་ནམ་མཁའ་ལྟ་བུའི་ལུས་ཀྱི་ཤིང་རྟ་སྒྲུབ་པར་གྱུར་ཅིག །སེམས་ཅན་ཐམས་ཅད་ནམ་མཁའི་དབྱིངས་དང༌། དེ་བཞིན་གཤེགས་པའི་ཆོས་ཀྱི་དབྱིངས་ཀྱི་མཐས་ གཏུགས་པར་ཁྱབ་པར་བྱེད་པས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་འགྲོ་བའི་ཕ་རོལ་ཏུ་ཕྱིན་པའི་མཆོག་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཞིང་ ཐམས་ཅད་མ་ལུས་པར་གང་དུ་དགའ་བར་འགྲོ་ཞིང་རྒྱུ་བ་དང་ལྡན་པས་ལུས་ཡང་བའི་ཁྱད་པར་རྗེས་སུ་རྟོགས་པ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཁམས་ཐམས་ ཅད་དུ་ལུས་ཡང་དག་པར་སྟོན་པའི་ཕྱིར་རྫུ་འཕྲུལ་གྱི་འཁོར་མཐའ་ཡས་པ་ལ་མཁས་པར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཁམས་ཐམས་ཅད་དུ་ལུས་འཕོས་པ་མེད་པར་ འགྲོ་བ་ཡང་དག་པར་སྟོན་པའི་ཕྱིར་རྫུ་འཕྲུལ་ཆེན་པོའི་ཁྱུ་མཆོག་གི་མཐུ་ཕྱུང་བའི་ཕ་རོལ་ཏུ་ཕྱིན་པ་ཐོབ་པར་གྱུར་ཅིག །སེམས་ཅན་ཐམས་ཅད་མིག་ཡོར་ལྟ་བུའི་རྫུ་འཕྲུལ་གྱིས་འགྲོ་བ་མངོན་ པར་སྒྲུབ་པའི་ཡེ་ཤེས་རབ་ཏུ་ཐོབ་པས་སངས་རྒྱས་ཀྱི་ཞིང་ཐམས་ཅད་ལ་མི་གནས་པའི་ལུས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་དུས་ལ་ཇི་ལྟར་བབ་པར་སེམས་ཅན་ཡོངས་སུ་ ༄༅། །སྨིན་པར་བྱེད་ཅིང་འདུལ་བ་མི་གཏོང་བའི་ཕྱིར་བསམ་གྱིས་མི་ཁྱབ་པའི་རྫུ་འཕྲུལ་གྱི་ཁྱུ་མཆོག་གི་མཐུ་ཕྱུང་བ་ཡང་དག་པར་སྟོན་པར་གྱུར་ཅིག །སེམས་ཅན་ ཐམས་ཅད་སྐད་ཅིག་གཅིག་གིས་ཆོས་ཀྱི་དབྱིངས་ཐམས་ཅད་ལ་ཆགས་པ་མེད་ཅིང་བསྒྲིབས་པ་མེད་པའི་ཚུལ་གྱིས་སེམས་སྐད་ཅིག་གཅིག་གིས་ཕྱོགས་ཐམས་ཅད་དུ་འགྲོ་བའི་རྫུ་འཕྲུལ་ ལ་མངོན་པར་མཁས་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་འདུན་ལ་ཤིང་རྟ་འབུལ་ཞིང་ཡོངས་སུ་གཏོང་བས་ཡང་དག་པར་བཟུང་བའི་དགེ་བའི་རྩ་ བ་དེ་དག་དེ་ལྟར་སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཀྱི་ཤིང་རྟ་ལ་གནས་པ་རྣམ་པར་དག་པར་འགྱུར་བ་དང༌། ཆོས་ཀྱི་འཁོར་ལོ་དང༌། ཆོས་ཀྱི་དབྱིངས་ཐམས་ཅད་ཤེས་ པའི་ཡེ་ཤེས་ཀྱི་འཁོར་ལོ་རབ་ཏུ་བསྐོར་བར་འགྱུར་བའི་ཕྱིར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་གནས་ཀྱི་འདུ་ཤེས་ཉེ་བར་གཞག་ པའི་སེམས་དང་ལྡན་པ། རིམ་གྲོ་ཅན། ཞེས་དང་ལྡན་པ། བདག་ཉིད་ཆེ་བའི་ཡོན་ཏན་རྒྱ་མཚོ་གང་ཆེན་མཚོའི་ཚུལ་ལ་མཁས་པ། ཡོན་ཏན་དང་ཡེ་ཤེས་ཀྱི་འབྱུང་གནས་ཀྱི་ རིགས་དང་ལྡན་པ། དེ་བཞིན་གཤེགས་པའི་ཡོན་ཏན་ལ་རྣམ་པར་སེམས་པ། མཐུ་ཆེན་པོར་སྐྱེས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡོངས་སུ་བསྒོམས་པའི་སེམས་དང་ ལྡན་པ༑ བྱང་ཆུབ་སེམས་དཔའི་སྤྱོད་པ་དུས་བརྗོད་དུ་མེད་པ་ཐམས་ཅད་དུ་སྤྱོད་པ་རྣམ་པར་སྤྱད་པ་ལ་རབ་ཏུ་ཞུགས་པ། བདུད་ཀྱི་བཅིངས་པ་ཐམས་ཅད་ལས་སེམས་རབ་ཏུ་གྲོལ་བ། བདུད་ དུ་མའི་སྡེ་དང་བདུད་ཐམས་ཅད་ཀྱི་ཤེས་པའི་སྟོབས་རབ་ཏུ་འཇོམས་པའི་སེམས་དང་ལྡན་པ། གཞལ་དུ་མེད་པའི་ཆོས་ལ་མཁས་པས་སྣང་བར་གྱུར་པ་དེ། ཉན་ཐོས་དང༌། རང་ སངས་རྒྱས་ལ་ཤིང་རྟ་འབུལ་བའི་ཚེ་ཤིང་རྟ་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་བླ་ན་མེད་པའི་ སྦྱིན་པ་ཡོངས་སུ་སྨིན་པ་གྲུབ་པས་སྦྱིན་པའི་གནས་ཀྱི་དམ་པར་ཡིད་ཆེས་པར་གྱུར་ཅིག །སེམས་ཅན་ཐམས་ཅད་གཅིག་ཏུ་སྤྱོད་ཅིང་མི་གཉིས་པར་ཡང་དག་པར་སྤྱོད་པས་འདུ་འཛི་ མེད་པ་ལ་དགའ་བར་གྱུར་ཅིག །སེམས་ཅན་ཐམས་ཅད་འགྲོ་བ་ཐམས་ཅད་བསོད་ནམས་ཀྱིས་ཡང་དག་པར་བསྡུ་བ་ལ་བརྩོན་པས་སྦྱིན་པ་རྣམ་པར་དག་པར་བྱེད་པའི་མཆོག་ཏུ་གྱུར་ཅིག །སེམས་ ཅན་ཐམས་ཅད་དགེ་བའི་རྩ་བ་གྲངས་མེད་པའི་འབྲས་བུ་རབ་ཏུ་གཏོང་བས་ཡེ་ཤེས་ཀྱི་མུ་སྟེགས་ལས་བྱུང་བར་གྱུར་ཅིག །སེམས་ཅན་ཐམས་ཅད་སྦྱིན་པའི་དཀྱིལ་འཁོར་མཆོག་གིས་ རྣམ་པར་དག་པས་བསྒྲིབས་པ་མེད་པར་རྟོགས་པར་ཁོང་དུ་ཆུད་པར་གྱུར་ཅིག །སེམས་ཅན་ཐམས་ཅད་ཆོས་ཐམས་ཅད་ཀྱི་རང་བཞིན་བྱེད་པ་མེད་པར་ཁོང་དུ་ཆུད་པས་ཉོན་མོངས་པ་མེད་པའི་ ༄༅། །ཆོས་ལ་རྣམ་པར་སྤྱོད་པར་གྱུར་ཅིག །སེམས་ཅན་ཐམས་ཅད་བསོད་ནམས་ཀྱི་ཞིང་སྦྱིན་པའི་གནས་འགྲོ་བ་ཐམས་ཅད་དགའ་བར་བྱས་པས་བསོད་ནམས་ཚད་ མེད་པ་ཤིན་ཏུ་བསགས་པར་གྱུར་ཅིག །སེམས་ཅན་ཐམས་ཅད་སྦྱིན་པའི་གནས་སུ་བྱས་ཏེ་ཕན་འདོགས་པ་རྣམ་པར་དག་པས་ཆོ་འཕྲུལ་མཐའ་ཡས་པས་རྣམ་པར་རོལ་བ་ ཡང་དག་པར་སྟོན་པར་གྱུར་ཅིག །སེམས་ཅན་ཐམས་ཅད་སྟོབས་བཅུའི་ཐེག་པ་མཆོག་གི་འབྲས་བུ་ཡོངས་སུ་སྟོབས་པས་སྦྱིན་པའི་གནས་ཡོན་ཏན་ཟད་མི་ཤེས་པར་གྱུར་ ཅིག །སེམས་ཅན་ཐམས་ཅད་བསོད་ནམས་ཀྱི་ཕུང་པོ་མི་ཟད་པས་ཐམས་ཅད་མཁྱེན་པའི་མཐར་ཐུག་པར་གྱུར་ཏེ་སྦྱིན་པའི་གནས་དོན་ཡོད་པའི་འབྲས་བུ་དང་ལྡན་པར་གྱུར་ ཅིག །སེམས་ཅན་ཐམས་ཅད་མ་ཐོས་པའི་སངས་རྒྱས་ཀྱི་ཆོས་ཚིག་དང༌། ཡི་གེ་འཛིན་ཅིང་སྡིག་པའི་ཆོས་རབ་ཏུ་ཞི་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་སྒྲ་ དོན་ཡོད་པ་ཡེ་ཤེས་ཀྱིས་རྣམ་པར་རིག་པས་སངས་རྒྱས་ཀྱི་ཆོས་ཐམས་ཅད་མཉན་པ་ལ་མོས་ཤིང་བརྩོན་པར་གྱུར་ཅིག །སེམས་ཅན་ཐམས་ཅད་ལ་ཐོས་པ་རྗེས་སུ་བསྒྲགས་པའི་ ཆོས་ཅན་དུ་གྱུར་ཏེ་སངས་རྒྱས་ཀྱི་ཆོས་ཐམས་ཅད་ཐོས་པའི་ཕ་རོལ་ཏུ་ཕྱིན་པ་ཐོབ་པར་གྱུར་ཅིག །སེམས་ཅན་ཐམས་ཅད་ཞགས་པ་ཐུབ་པ་དགུ་བཅུ་རྩ་དྲུག་གི་ལྟ་བ་ལས་རྣམ་པར་ འདས་ཏེ་བསྟན་པ་ལ་གནས་པའི་བྱ་བ་ལ་མོས་པར་གྱུར་ཅིག །སེམས་ཅན་ཐམས་ཅད་དགེ་བའི་རྩ་བ་མཆོག་རྣམ་པར་སྤེལ་བར་བྱེད་ཅིང་འཕགས་པ་མཐོང་བ་རབ་ཏུ་ཐོབ་པར་གྱུར་ ཅིག །སེམས་ཅན་ཐམས་ཅད་འཕགས་པ་མཐོང་ཞིང་འགྲོགས་པའི་བདེ་བ་དང་ལྡན་ཞིང་ཡེ་ཤེས་ཀྱིས་སྤྱོད་པའི་གང་ཟག་ལ་མོས་པར་གྱུར་ཅིག །སེམས་ཅན་ཐམས་ཅད་སངས་ རྒྱས་ཀྱི་ལྟ་བ་རྗེས་སུ་ཐོས་པ་ལས་བྱུང་བས་ཐོས་པ་དོན་ཡོད་པར་གྱུར་ཅིག །སེམས་ཅན་ཐམས་ཅད་བསྟན་པ་རབ་ཏུ་གཟུང་བ་དང་ཡོངས་སུ་བསྲུང་བ་ལ་ཞུགས་པས་སངས་རྒྱས་ཀྱི་ བསྟན་པ་ལ་ཡེ་ཤེས་ཀྱི་མཁས་པ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་བསྟན་པ་གསལ་བར་བྱ་བའི་སྣང་བ་རབ་ཏུ་ཐོབ་པས་ཆོས་ཐམས་ཅད་ཐོས་པ་ ཤིན་ཏུ་འཛིན་པ་ལ་ཞུགས་པར་གྱུར་ཅིག །སེམས་ཅན་ཐམས་ཅད་སྦྱིན་པའི་མཛོད་ཀྱིས་དགའ་བར་སྤྱོད་ཅིང་གཏོང་བ་ཤིན་ཏུ་བྱེད་པ་དང༌། མཆོད་སྦྱིན་ཤིན་ཏུ་བྱས་པས་སངས་ རྒྱས་ཀྱི་བསྟན་པ་ལ་ཡོན་ཏན་ཇི་ལྟ་བ་བཞིན་དུ་རྟོགས་པ་ཕུན་སུམ་ཚོགས་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཉན་ཐོས་དང༌། རང་སངས་རྒྱས་ལ་ ཤིང་རྟ་འབུལ་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་ཡེ་ཤེས་དང༌། མངོན་པར་ཤེས་པ་རྣམ་པར་དག་པ་མཆོག་དམ་པ་ཕུལ་རབ་ཏུ་འཐོབ་ཅིང༌། ཅི་ནས་ཀྱང་ ༄༅། །མི་འཇིགས་པ་དང༌། ཐམས་ཅད་མཁྱེན་པའི་སྟོབས་དང༌། མི་འཇིགས་པ་རབ་ཏུ་འཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་ དཔའ་སེམས་དཔའ་ཆེན་པོ་སྦྱིན་པའི་གནས་དང་ལེན་པ་སྣ་ཚོགས་ཕྱོགས་གཞན་དང་གཞན་ནས་འོངས་པའི་གང་ཟག་དང༌། སློང་བ་ཕོངས་པ་དང༌། བཀྲེན་པ་མང་པོ་ཚད་མེད་པ་བྱང་ཆུབ་སེམས་ དཔའི་སྒྲ་ཐོས་ཏེ་འོངས་པ་དང༌། བྱང་ཆུབ་སེམས་དཔའི་སྨོན་ལམ་དང་སེམས་བསྐྱེད་པས་མོས་ཤིང་བསྟབས་པ་ཐམས་ཅད་གཏོང་བས་ཤིན་ཏུ་རེ་བའི་ཡིད་ཅན་དེ་དག་འོངས་པ་མཐོང་ནས་སློང་ བ་ལ་རིམ་གྲོ་བྱ་བས་མི་ངོམས་པའི་སེམས་ཀྱིས་སློང་བ་འོངས་པ་རྣམས་ལ་བཟོད་པ་གསོལ་བའི་སེམས་བསྐྱེད་དེ། འདི་ལྟར་བདག་ཉིད་ཕྱོགས་དེ་དག་ཏུ་ཁྱོད་ཀྱི་དྲུང་དུ་སོང་སྟེ་རིམ་གྲོར་བྱ་བ་ ཞིག་ན། དེ་འདི་ལྟར་ཁྱོད་འདིར་ཕྱིན་ཏེ་ཤིན་ཏུ་ངལ་བར་གྱུར་ཏོ། །ཞེས་སྤྱི་བོས་བཏུད་དེ་བཟོད་པ་གསོལ་བས་སློང་བ་ཐམས་ཅད་བཟོད་པ་བྱས། རིམ་གྲོར་བྱས། ངལ་བ་བསྟིས་ནས་ཅི་འདོད་ པ་སྦྱིན་པ་དེ་དག་གིས་ཤིན་ཏུ་རིམ་གྲོ་བྱེད་དེ། འདི་ལྟར་ནོར་བུའི་ཤིང་རྟ་འཛམ་བུའི་གླིང་གི་ན་ཆུང་བཟང་མོ་རིན་པོ་ཆེས་ཡོངས་སུ་བཀང་བ་དང༌། འདི་ལྟ་སྟེ། གསེར་གྱི་ཤིང་རྟ་ཡུལ་གྱི་ན་ཆུང་ རིན་པོ་ཆེ་ཤིན་ཏུ་རྣམ་པར་དག་པས་ཡོངས་སུ་བཀང་བ་དང༌། འདི་ལྟ་སྟེ། བཻ་ཌཱུཪྻའི་ཤིང་རྟ་ན་ཆུང་མའི་འཁོར་གླུ་དང་རོལ་མོ་བརྡུང་ཞིང་དཀྲོལ་བ་དང་ལྡན་པས་ཡོངས་སུ་བཀང་བ་དང༌། འདི་ལྟ་ སྟེ༑ དངུལ་གྱི་ཤིང་རྟ་ཤིན་ཏུ་མཛེས་པ་བུད་མེད་གཞོན་ནུ་ལྷའི་བུ་མོ་ལྟ་བུས་ཡོངས་སུ་བཀང་བ་དང༌། འདི་ལྟ་སྟེ། རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པའི་རྒྱན་གྱིས་བརྒྱན་པའི་ ཤིང་རྟ་བུད་མེད་ཅང་ཤེས་རིན་པོ་ཆེ་རྒྱན་ཐམས་ཅད་ཀྱིས་བརྒྱན་པ་ཚུལ་མཁས་པས་ཡོངས་སུ་བཀང་བ་དང༌། འདི་ལྟ་སྟེ། ཙནྡན་གྱི་ཤིང་རྟ་བྱང་ཆུབ་སེམས་དཔའ་བཞོན་པར་འོས་པ་ དང༑ འདི་ལྟ་སྟེ། ཤེལ་གྱི་ཤིང་རྟ་བུད་མེད་བཟང་མོ་བཞིན་བཟང་བ། ཆ་བྱད་སྡུག་གུ་ཤིན་ཏུ་བརྒྱན་པ། གཟུགས་མཛེས་པ། བལྟ་ན་སྡུག་ཅིང་མི་མཐུན་པ་མེད་པས་ཡོངས་སུ་བཀང་བ་དང༌། འདི་ལྟ་སྟེ། ཨསྨ་གརྦྷའི་ཤིང་རྟ་དབང་བསྐུར་བས་ཡོངས་སུ་བཀང་བ་དང༌། འདི་ལྟ་སྟེ། སྤོས་དམ་པའི་ཤིང་རྟ་བུ་དང་བུ་མོས་ཡོངས་སུ་བཀང་བ་དང༌། འདི་ལྟ་སྟེ། རིན་པོ་ཆེའི་ཚོགས་ ཐམས་ཅད་ཀྱིས་བརྒྱན་པའི་ཤིང་རྟ་ནང་གི་བཤེས་གཉེན་དབྱེར་མི་ཕྱེད་པས་ཡོངས་སུ་བཀང་བ་དང༌། དེ་རྣམ་པ་འདི་ལྟ་བུའི་ཤིང་རྟ་གྲངས་མེད་པ་རྣམ་པ་སྣ་ཚོགས་སློང་མོ་པ་ཐམས་ཅད་ ལ་སྦྱིན་ཞིང་ཡོངས་སུ་གཏོང་བས། སློང་བ་འདོད་པར་བྱ་བའི་དངོས་པོ་རབ་ཏུ་ཐོབ་པས་ཡིད་ལ་བསམ་པ་ཤིན་ཏུ་རྫོགས་ནས་སློང་བ་དེ་དག་ཐམས་ཅད་སྦྱིན་པ་ཐམས་ཅད་སྦྱིན་པའི་ཚུལ་ གྱིས་ཡང་དག་པར་བཟུང་སྟེ་ཤིན་ཏུ་ཚིམ་པར་བྱས་ཤིང་བསམ་པ་རྫོགས་པར་བྱས་ནས་དགའ་བ་དང༌། མགུ་བ་དང༌། རངས་པ་དང༌། ཡིད་བདེ་བ་སྐྱེས་པར་བྱས་ཏེ་དགེ་བའི་རྩ་བ་དེ་དག་ ༄༅། །འདི་ལྟར་ཡོངས་སུ་བསྔོའོ། །སེམས་ཅན་ཐམས་ཅད་བྱང་ཆུབ་ཀྱི་ཤིང་དྲུང་དུ་བསམ་གྱིས་མི་ཁྱབ་ཅིང་ཐོགས་པ་མེད་པའི་ཤིང་རྟའི་འཁོར་ལོ་ཕྱིར་ མི་ལྡོག་པས་འགྲོ་བ་དང་ལྡན་ཏེ་ཐེག་པ་ཆེན་པོའི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་སྤྱོད་ཅིང་ཕྱི་མའི་མཐའ་ བསྐལ་བའི་མུར་ཐུག་པར་ཕྱིར་མི་ལྡོག་པར་ཆོས་ཀྱི་ཤིང་རྟ་ཅང་ཤེས་ལ་ཞོན་པར་གྱུར་ཅིག །སེམས་ཅན་ཐམས་ཅད་ཆོས་ཐམས་ཅད་ལ་རྣམ་པར་རྟོག་པའི་རློམ་སེམས་མེད་ ཅིང་ཐམས་ཅད་མཁྱེན་པའི་རིགས་ཀྱི་ལམ་ལ་བརྩོན་པས་ཆོས་ཐམས་ཅད་ཅི་ཡང་མ་ཡིན་པའི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་ཐོགས་པ་མེད་པའི་རྫུ་ འཕྲུལ་གྱིས་སངས་རྒྱས་ཀྱི་ཞིང་ཐམས་ཅད་དུ་འགྲོ་བ་ལ་བརྩོན་པས་ཀུན་ཏུ་འགྲོ་བ་དྲི་མ་མེད་པའི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ ཀྱི་ཆོས་ལ་དགའ་བས་མོས་ཤིང་ཡང་དག་པར་འགྲོ་བ་ལ་བརྩོན་པས་ཐམས་ཅད་མཁྱེན་པའི་ཐེག་པའི་ཤིང་རྟ་རྗེས་སུ་མཐུན་པ་ལ་རབ་ཏུ་གནས་པར་གྱུར་ཅིག །སེམས་ཅན་ ཐམས་ཅད་བྱང་ཆུབ་སེམས་དཔའི་འབྱུང་བའི་ལམ་བཅུ་དང༌། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ལ་རབ་ཏུ་དགའ་བའི་ཡིད་དང་ལྡན་ཞིང་བྱང་ཆུབ་སེམས་དཔའི་སྤྱོད་པ་རྣམ་པར་ དག་པའི་ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་ཚུལ་དང་འདྲ་བའི་ཡུལ་ན་གནས་པ་དང་ལྡན་པ་དང༌། སྐྱེས་བུ་དམ་པ་ལ་བརྟེན་པ་ཐོབ་པས་སྔོན་བྱས་པའི་བསོད་ནམས་ཤིན་ཏུ་ བསགས་པ་དང༌། ཡང་དག་པའི་སྨོན་ལམ་ལ་ཤིན་ཏུ་བརྩོན་པ་དང༌། བྱང་ཆུབ་སེམས་དཔའི་ཚངས་པར་སྤྱད་པ་རྣམ་པར་དག་པ་ཡོངས་སུ་རྫོགས་པ་ཕུན་སུམ་ཚོགས་པས་འཁོར་ལོ་བཞི་པའི་ ཤིང་རྟ་ལ་ཞོན་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པ་མ་ལུས་པའི་སྟོབས་དང༌། ཡེ་ཤེས་ལ་བརྩོན་པས་ཕྱོགས་ཐམས་ཅད་ཀྱི་ཆོས་ཀྱི་དབྱིངས་སུ་ཆོས་ཀྱི་སྣང་བ་ གཏོང་བ་ལ་བསླབ་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་ཤིང་རྟས་འབྱུང་བའི་ཕ་རོལ་ཏུ་ཕྱིན་པ་ཐོབ་སྟེ་སངས་རྒྱས་ཀྱི་ཆོས་ཀྱི་ཤིང་རྟ་ལ་ཞོན་པར་གྱུར་ཅིག །སེམས་ཅན་ ཐམས་ཅད་ཕྱོགས་ཐམས་ཅད་དུ་ལེགས་པ་དང༌། བདེ་བ་ཡང་དག་པར་སྟོན་པས་བསོད་ནམས་ཐམས་ཅད་དང༌། དགེ་བའི་རྩ་བ་ཚད་མེད་པ་དང༌། ཆོས་བསམ་གྱིས་མི་ཁྱབ་པའི་ཤིང་རྟ་ལ་མཁས་པར་ གྱུར་ཅིག །སེམས་ཅན་ཐམས་ཅད་འཇུངས་པའི་དྲི་མ་རབ་ཏུ་བྱང་སྟེ་སྦྱིན་པ་གཏོང་བས་འབྱུང་བའི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་མཐའ་དང་དབུས་མེད་པ་མ་ལུས་ པར་ཚུལ་ཁྲིམས་རྣམ་པར་དག་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཡེ་ཤེས་རྣམ་པར་དག་པའི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ཅད་སེམས་འཁྲུགས་པ་མེད་པར་གནས་ ༄༅། །པས་འགྲོ་བ་ཐམས་ཅད་ཀྱི་བསམ་པ་འཁྲུག་པ་མེད་ཅིང་བཟོད་པའི་ཕ་རོལ་ཏུ་ཕྱིན་པའི་ཡེ་ཤེས་ཀྱི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ ཅད་འབྱུང་བའི་ཤིང་རྟས་སྙིང་པོ་བྱང་ཆུབ་ཏུ་འགྲོ་བར་སྤྱོད་པའི་གོ་ཆ་བགོས་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཡེ་ཤེས་ཀྱི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ ཅད་ཤིན་ཏུ་མགྱོགས་པའི་ཤིང་རྟས་སྙིང་པོ་བྱང་ཆུབ་ཏུ་བྱུང་སྟེ་བསམ་གཏན་གྱི་ཕ་རོལ་ཏུ་ཕྱིན་པའི་ཡེ་ཤེས་ཀྱི་ཤིང་རྟ་དང་ལྡན་པར་གྱུར་ཅིག །སེམས་ཅན་ཐམས་ཅད་ཆོས་ ཀྱི་དབྱིངས་ཀྱི་ཤིང་རྟ་ལ་ཤིན་ཏུ་ཞོན་ཞིང་སངས་རྒྱས་ཀྱི་ཡུལ་སྤྲུལ་པས་རྒྱས་པར་བྱེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པའི་ཡེ་ཤེས་ཀྱི་ཤིང་རྟ་དང་ལྡན་པར་གྱུར་ཅིག །སེམས་ ཅན་ཐམས་ཅད་ཆོས་ཡོངས་སུ་གཏོང་བ་ལ་འཇིགས་པ་མེད་པས་ཐམས་ཅད་མཁྱེན་པ་ཉིད་ཀྱི་དོན་དུ་སྦྱིན་པ་གཏོང་བའི་ཕྱིར་ཆོས་ཀྱི་རྒྱལ་པོའི་ཤིང་རྟ་ལ་ཞོན་པར་གྱུར་ཅིག །སེམས་ ཅན་ཐམས་ཅད་ཆོས་ཀྱི་མཚན་ཉིད་དང༌། རང་བཞིན་གྱི་ཕྱོགས་ཐམས་ཅད་ལ་རབ་ཏུ་འཇུག་པ་རྨོངས་པ་མེད་པའི་ཕྱིར་སྨོན་ལམ་ལ་མི་གནས་པའི་ཡེ་ཤེས་ཀྱི་ཤིང་རྟ་དང་ལྡན་པར་ གྱུར་ཅིག །སེམས་ཅན་ཐམས་ཅད་ཐེག་པ་ཆེན་པོ་མནོར་བས་འཇིག་རྟེན་གྱི་ཁམས་ཐམས་ཅད་དུ་སྐྱེ་ཞིང་ལུས་ཡང་དག་པར་བསྟན་པའི་ཕྱིར་སངས་རྒྱས་ཐམས་ཅད་ཀྱི་ཆོས་ཀྱི་ཤིང་རྟ་ལ་ ཞོན་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་སྐྱོ་བ་མེད་པར་ཡོངས་སུ་རྫོགས་པར་བྱ་བ་ཡོངས་སུ་རྫོགས་པར་བྱེད་པའི་ཕྱིར་ཐམས་ཅད་མཁྱེན་ པ་རིན་པོ་ཆེའི་ཤིང་རྟ་ལ་ཞོན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་གནས་དང༌། ལེན་པ་དང༌། སློང་བ་སྣ་ཚོགས་ལ་ཤིང་རྟ་དགའ་བ་དང༌། རབ་ཏུ་དགའ་བ་དང༌། མོས་པ་དང༌། སྤྲོ་བའི་ཡིད་ཀྱི་རྣམ་པར་རྟོག་པས་སྦྱིན་པས་ཡོངས་སུ་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་མཁྱེན་པའི་ཐེག་པ་ལ་ཞོན་ པ་ཤིན་ཏུ་བསྒྲུབས་པས་ཡེ་ཤེས་དང༌། སེམས་ཀྱི་རྣམ་པ་མཐའ་ཡས་པ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །བམ་པོ་སུམ་ཅུ་རྩ་དྲུག་པ། འདི་ལྟར་ཡང་བྱང་ཆུབ་སེམས་ དཔའ་སེམས་དཔའ་ཆེན་པོ་གླང་པོ་ཅང་ཤེས་ཡན་ལག་བདུན་ཤིན་ཏུ་གནས་པ། ལོ་དྲུག་ཅུ་ལོན་པ། མཆེ་བ་དྲུག་དང་ལྡན་པ། ཁ་དོག་པདྨ་ལྟ་བུ། གདོང་རྣམ་པར་དག་པ། དཀར་ཞིང་ དྲི་མ་མེད་པ། གསེར་གྱི་རྒྱལ་མཚན་ཅན། གསེར་གྱི་རྒྱན་དང་ལྡན་པ། གསེར་གྱི་དྲ་བས་ལུས་ཀུན་ནས་ཡོག་པ། སྣ་རིན་པོ་ཆེ་སྣ་ཚོགས་ཀྱི་དྲ་བའི་རྒྱན་དུ་བཅུག་པ། གསེར་ལྟར་ བལྟ་ན་མཛེས་པ། དཔག་ཚད་སྟོང་གིས་ཁྱོན་དུ་ངལ་བ་མེད་པར་འགྲོ་བ་སྦྱིན་ཞིང་གཏོང་བའམ། རྟ་ཅང་ཤེས་གོམ་པ་ཟོ་མདོག་བདེ་བར་འདོང་ཞིང་འདེགས་པ་དང༌། བྱ་ལྟར་མགྱོགས་པ་དང་ ༄༅། །ལྡན་པ༑ རྡོག་མ་ལྕང་ལོར་འཁྲིལ་བ། ནམ་ཙོང་དང་རྨིག་པར་ལྡན་པ། རྨིག་པའི་དབྱིབས་མཐོ་ཞིང་སྐྱོན་མེད་པ། གསེར་གྱི་དྲིལ་བུའི་དྲ་བས་བརྒྱན་པ། རིན་པོ་ཆེ་སྣ་ཚོགས་ཀྱི་ཉི་མའི་དཀྱིལ་འཁོར་དང་ཟླ་བ་དང་ལྡན་པ། གློ་ཀུན་ནས་བརྒྱན་པ། རིན་པོ་ཆེ་སྣ་ཚོགས་ཀྱི་གདོང་རྒྱན་གྱིས་རྣམ་པར་བརྒྱན་པ། ཞོན་ན་བདེ་བ། ལུས་ལ་བྱམས་ པ༑ ཤིན་ཏུ་མགྱོགས་པ། ཕྱོགས་བཞིར་ཡིད་ལྟར་མགྱོགས་པའི་ཤུགས་དང་ལྡན་པ། ལྷ་རྫས་ལྟ་བུའི་ལྷབ་ལྷུབ་ཐམས་ཅད་དང་ལྡན་པ་དེ་ལྟ་བུས་བླ་མའི་སྐྱེ་བོ་དང༌། བླ་མར་ བྱ་བ་དང༌། དགེ་བའི་བཤེས་གཉེན་དང༌། ཕ་དང༌། མ་དང༌། ཕོངས་པ་དང༌། བཀྲེན་པ་དང༌། སློང་བ་དང༌། ལེན་པའི་འགྲོ་བ་ཐམས་ཅད་ལ་སྦྱིན་ཞིང་ཡོངས་སུ་གཏོང་བ་དང༌། སེམས་ཡངས་པས་སྦྱིན་པ་དང༌། སེམས་ལ་ཆགས་པ་མེད་པས་གཏོང་བ་དང༌། རྗེས་སུ་འགྱོད་པ་མེད་པས་ཡིད་མགུ་བར་བྱེད་པ་དང༌། སྙིང་རྗེ་ཆེན་པོས་ཡོངས་སུ་རྒྱས་པའི་བསམ་ པས་གཏང་བ་ཆེན་པོ་རབ་ཏུ་གཏོང་ཞིང་བྱང་ཆུབ་སེམས་དཔའི་ཡོན་ཏན་ཐམས་ཅད་ལ་རབ་ཏུ་བརྩོན་པ་དང༌། བྱང་ཆུབ་སེམས་དཔའི་རིགས་སུ་མངོན་པར་སྐྱེས་པའི་བསམ་པ་ ཡོངས་སུ་སྤྱོང་པའི་ཆེ་དགེ་བའི་རྩ་བདེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་བྱང་ཆུབ་སེམས་དཔའ་ཐམས་ཅད་ཀྱི་ཡོན་ཏན་གྱི་རྒྱན་གྱིས་བྱུང་སྟེ་ཅང་ཤེས་ཀྱི་ ཐེག་པ་ལ་རབ་ཏུ་གནས་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་རྗེས་སུ་འགྲོ་བའི་ཆོས་ཀྱི་ཐེག་པས་བྱུང་སྟེ་ཐེག་པ་བཟང་པོའི་བཞོན་པ་ལ་མངོན་པར་ཞོན་པར་ གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་སྟོབས་བསྒྲིབས་པ་མེད་པའི་ཡེ་ཤེས་ཀྱི་ཐེག་པས་སྣང་བར་གྱུར་ཏེ་ཐེག་པ་ཆེན་པོ་ལ་ཤིན་ཏུ་མོས་པར་གྱུར་ཅིག ། སེམས་ཅན་ཐམས་ཅད་སྨོན་ལམ་ཐམས་ཅད་སྒྲོལ་བ་ལ་རབ་ཏུ་ཞུགས་པས་བརྩམ་པ་ཆེན་པོའི་ཐེག་པ་དང་ལྡན་པར་གྱུར་ཅིག །སེམས་ཅན་ཐམས་ཅད་དགེ་བའི་རྩ་བ་མཉམ་ པར་སྒྲུབ་པ་ཡོངས་སུ་རྫོགས་པར་བྱ་བ་རབ་ཏུ་འཐོབ་པ་ལ་ཕ་རོལ་ཏུ་ཕྱིན་པའི་ཐེག་པ་མཉམ་པ་ཉིད་ཀྱིས་བྱུང་བར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་ཡེ་ཤེས་རིན་པོ་ ཆེ་སངས་རྒྱས་ཐམས་ཅད་ཀྱི་ཆོས་ལ་ཤིན་ཏུ་འབྱུང་བའི་ཆོས་ཅན་དུ་གྱུར་ཏེ་ཐེག་པ་རིན་པོ་ཆེ་ཡོངས་སུ་རྫོགས་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་ཏིང་ངེ་ འཛིན་ཐམས་ཅད་ཀྱི་མེ་ཏོག་རྒྱས་པའི་སེམས་དང་རྒྱུད་དུ་གྱུར་ཏེ་བྱང་ཆུབ་སེམས་དཔའི་སྤྱོད་པའི་རྒྱན་རྣམ་པར་བསགས་པའི་ཐེག་པས་ཤིན་ཏུ་བྱུང་བར་གྱུར་ཅིག །སེམས་ཅན་ཐམས་ ཅད་མཐའ་ཡས་པའི་ཐེག་པ་མྱུར་བ་ལ་མངོན་པར་བརྩོན་པའི་ཡེ་ཤེས་ཀྱི་ཆོས་ཅན་དུ་གྱུར་ཏེ་བསྐལ་པ་གྲངས་མེད་པའི་བྱང་ཆུབ་སེམས་དཔའི་སྤྱོད་པ་རྗེས་སུ་བསམ་པ་རྗེས་སུ་སེམས་ ༄༅། །ཤིང་རྣམ་པར་སྦྱོང་བར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའ་ཐམས་ཅད་ཀྱིས་ཡང་དག་པར་སྒྲུབ་པ་ལ་མཁས་པས་ལོངས་སྤྱོད་ཀྱི་ མཆོག་ཐམས་ཅད་དང༌། ཅང་ཤེས་ཀྱི་ཐེག་པ་ཆེན་པོའི་སྦྱིན་པ་བྱེད་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་ཐམས་ཅད་མཁྱེན་པ་ཉིད་ཀྱི་ལམ་གྱི་མཐར་གཏུགས་པར་ མངོན་པར་གཟུང་བར་བྱ་བའི་ཕྱིར་ཐེག་པ་ཤིན་ཏུ་མཐོ་བར་གནས་ཤིང་རབ་ཏུ་བརྟེན་པ་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གླང་པོ་ཅང་ ཤེས་དང༌། རྟ་ཅང་ཤེས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པའི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཆགས་པ་མེད་པའི་ཐེག་པ་ལ་མངོན་པར་བསྐྱོན་ ཞིང་ཡེ་ཤེས་ཀྱི་བཞོན་པ་ཡོངས་སུ་འགྲུབ་པ་དང༌། དེ་བཞིན་གཤེགས་པའི་ཐེག་པ་བསྒྲིབས་པ་མེད་པས་འབྱུང་བའི་མཐར་ཐུག་པར་ཡོངས་སུ་བསྔོའོ། །འདི་ལྟར་བྱང་ཆུབ་སེམས་ དཔའ་སེམས་དཔའ་ཆེན་པོ་འཁོར་ལོས་བསྒྱུར་བའི་རྒྱལ་པོར་གྱུར་པ། ཆོས་ཀྱི་དབང་བྱེད་པ་སྟན་གྱི་སྦྱིན་པ་བྱེད་ཅིང་རྒྱལ་པོ་བཞུགས་པའི་ཁྲི་སྟན་བཟང་པོ་བཻཌཱུཪྻའི་རྐང་པ་ཅན་སེངྒེའི་ ཁྲི་ལ་གནས་པ་གསེར་གྱི་རྒྱུ་དང༌། རིན་པོ་ཆེའི་དྲི་བས་བླས་པ། སྟན་རེག་ན་བདེ་བ་གྲངས་མེད་པ་དུ་མ་བཏིང་བ། ཉེན་ཀོར་སྤོས་ཀྱི་དམ་པ་ཐམས་ཅད་ཀྱིས་ཤིན་ཏུ་དྲི་ཞིམ་པར་བྱས་པ། ནོར་བུ་རིན་པོ་ཆེ་སྣ་ཚོགས་ཀྱི་རྒྱལ་མཚན་བསྒྲེངས་པ། རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མའི་རྒྱན་གྱིས་བརྒྱན་པ། གསེར་གྱི་དྲ་བའི་བླ་རེ་བྲེས་པ། གསེར་གྱི་དྲིལ་བུའི་དྲ་བ་འཁྲོལ་བའི་སྒྲ་ ཡིད་དུ་འོང་བའི་དབྱངས་འབྱུང་བ། རིན་པོ་ཆེའི་འབྲུ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུས་ཀུན་ནས་བསྐོར་ཏེ་རྣམ་པར་ཕྱེ་བས་ཤིན་ཏུ་འཕགས་ཤིང་བལྟ་ན་མཛེས་པ། སྲོག་ཆགས་བྱེ་བ། ཁྲག་ཁྲིག་བརྒྱ་སྟོང་གྲངས་མེད་པས་ཀུན་ནས་བལྟ་བ། གདུགས་ཁབ་གཅིག་གིས་ས་ཆེན་པོ་ཐམས་ཅད་སྐྱོང་བར་དབང་བསྐུར་བ། རྒྱལ་སྲིད་ཀྱི་དབང་ཕྱུག་ཐམས་ཅད་ལ་དབང་བའི་སྟན་ དུ་བྱ་བ་དེ་ལ་འདུག་ཅིང༌། འཁོར་ལོ་ཐོགས་པ་མེད་པས་བསྐྱང་བ་དང་ཆིས་བྱ་བ་ལ་རྒྱལ་པོའི་བཀའ་ཐམས་ཅད་ཉམས་པ་མེད་པར་ཉན་པ་དཔལ་རྣམ་པར་སྣང་བ་དང༌། ཨིནྡྲ་ནཱི་ལ་དང༌། ནོར་ བུ་རིན་པོ་ཆེའི་སྙིང་པོས་སྤྲས་པ། ཉི་མ་དང༌། ཟླ་བ་དང༌། སྐར་མ་ཆེ་ཕྲ་ལྟ་བུ་རབ་ཏུ་བརྒྱན་པ། རྒྱན་རྣམ་པ་སྣ་ཚོགས་རྨད་དུ་བྱུང་བས་བརྒྱན་པ། རིན་པོ་ཆེ་ཁྱད་པར་དུ་འཕགས་པ་རྒྱ་མཚོས་ སྤྲས་པ༑ རྒྱ་མཚོ་དང༌། རྒྱལ་མཚན་དང༌། བཀྲ་ཤིས་དང༌། བུམ་པ་སྣ་ཚོགས་ཡོངས་སུ་གང་བ་དང༌། དགའ་བ་འཁྱིལ་བའི་རྒྱན་སྣ་ཚོགས་ཀྱིས་རྣམ་པར་བརྒྱན་པ། འཛམ་བུ་ཆུ་ཀླུང་ གི་གསེར་གྱི་གྱིམ་པག་དྲི་མ་མེད་ཅིང་རྡུལ་དང་བྲལ་བས་བཀབ་པ་དེ་ལ་འཛམ་བུའི་གླིང་ཐམས་ཅད་ཀྱི་བདག་པོ་སྤྱི་བོ་ནས་དབང་བསྐུར་བས་མངོན་པར་དབང་བསྐུར་བའི་བསོད་ནམས་ཀྱི་སྟོབས་དང་ ༄༅། །ལྡན་པ༑ བྱམས་པས་དབང་བསྐུར་བ། ཕ་རོལ་གྱི་འཁོར་བཅོམ་པ་དང་ལྡན་པ། བཀའ་ལ་ཟློག་པ་མེད་པ། འདུག་ན་དགའ་བ་དེ་ལྟ་བུའི་སྟན་གྱི་རྣམ་པ་ཚུལ་དེ་འདྲ་བ་སྦྱིན་ཞིང་ ཡོངས་སུ་གཏོང་བ་དང༌། དེ་དང་དེ་དག་གིས་རྒྱལ་པོ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ལ་ཁྲི་སྟན་བཟང་པོའི་རྣམ་པ་དེ་ལྟ་བུའི་སྦྱིན་པ་བྱེད་ཅིང་ཡོངས་སུ་གཏོང་བ་དང༌། ཡང་དག་པར་རྫོགས་པའི་ སངས་རྒྱས་སྦྱིན་པའི་གནས་ཀྱི་དམ་པ་ལ་གསོལ་བའམ། སྐྱེས་བུ་དམ་པ་དགེ་བའི་བཤེས་གཉེན་ནམ། འཕགས་པའི་དགེ་འདུན་དཀོན་མཆོག་གམ། ཆོས་སྨྲ་བའམ། ཆོས་ལ་དགབ་པའི་ ཕྱིར་ཡོངས་སུ་གཡོགས་པའི་སེམས་ཀྱིས་སམ། ཕ་དང༌། མ་དང༌། བླ་མའི་སྐྱེ་བོའམ། ཉན་ཐོས་དང་རང་རྒྱལ་བའི་སྦྱིན་པའི་གནས་སམ། བྱང་ཆུབ་སེམས་དཔའི་ཐེག་པ་ལ་ཡང་དག་པར་ ཞུགས་པ་ཐམས་ཅད་དམ། དེ་བཞིན་གཤེགས་པ་ཐམས་ཅད་ཀྱི་མཆོད་རྟེན་མཆོད་པའི་ཕྱིར་རམ། ཕོངས་པ་དང༌། བཀྲེན་པ་སློང་བ་དཔག་ཏུ་མེད་པ་དག་གམ། སེམས་ཅན་ཐམས་ཅད་ལ་ ཕན་གདགས་པའི་ཕྱིར་ཡང་རུང་སྟེ། སྦྱིན་ཞིང་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་སངས་རྒྱས་ཀྱི་ཆོས་ ཐམས་ཅད་རྣམ་པར་འཚང་རྒྱ་བའི་ཡེ་ཤེས་དང་ལྡན་ཞིང་ཤིན་ཏུ་བྱང་ཆུབ་པའི་སྟན་དང་ལྡན་པར་གྱུར་ཅིག །སེམས་ཅན་ཐམས་ཅད་བདུད་ཀྱི་དཀྲུག་མ་དང་དཔུང་རབ་ཏུ་གཞོམ་པའི་ ཕྱིར་ཆོས་ཀྱི་དབང་ཕྱུག་ཐམས་ཅད་ཀྱི་རྡོ་རྗེའི་རི་རྣམ་པ་ཐམས་ཅད་དུ་ཐུབ་པ་མེད་པའི་ལུས་དང་ལྡན་ཞིང་འགྲོ་བ་ཐམས་ཅད་ལ་དབང་བའི་སྟན་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འགྲོ་ བ་ཐམས་ཅད་ཀྱིས་བལྟ་བར་འོས་ཤིང་སངས་རྒྱས་རྣམ་པར་རོལ་པའི་སེངྒེའི་གདན་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་ལ་ཆོས་ཀྱི་དབང་ཕྱུག་གིས་སྐྱོང་བའི་ཕྱིར་སྟན་ གྱི་རྒྱན་དང་འཁོར་རྣམ་པར་དག་པ་བརྗོད་དུ་མེད་པའི་ཡང་བརྗོད་དུ་མེད་པ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་དགེ་བའི་རྩ་བ་ཚོགས་ཆེན་པོ་རྣམ་པར་དག་པས་ཁམས་གསུམ་ པས་ཟིལ་གྱིས་མི་ནོན་པའི་སྟན་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་བསྐལ་པ་གྲངས་མེད་པར་སངས་རྒྱས་ཀྱི་གདན་གྱི་ཡོན་ཏན་བསྔགས་པ་མཐར་ཐུག་པ་མེད་པ་དང་ལྡན་ ཞིང་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ། སྟན་གྱིས་རྒྱས་པར་བྱེད་པའི་བྱིན་གྱི་རླབས་དང་ལྡན་པར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་ཐམས་ ཅད་ལུས་ཀྱིས་རྒྱས་པར་བྱེད་པའི་ཕྱིར་གཏེར་ཆེན་པོའི་ཚོགས་ཀྱི་སྟན་ལ་གནས་པར་གྱུར་ཅིག །སེམས་ཅན་ཐམས་ཅད་ཇི་ལྟར་དམ་བཅས་པའི་སེམས་ཅན་གྱི་ཁམས་ཐམས་ཅད་ལ་ཆོས་ ཀྱི་སྦྱིན་པས་རིམ་གྲོ་བྱེད་པའི་ཕྱིར་རྒྱན་གྱི་རྣམ་པ་བསམ་གྱིས་མི་ཁྱབ་པ་སྣ་ཚོགས་དང་ལྡན་པའི་སྟན་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་རྫུ་འཕྲུལ་དང་རྣམ་པར་འཕྲུལ་པ་ ༄༅། །ཐམས་ཅད་དང༌། སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་ཡང་དག་པར་སྟོན་པའི་ཕྱིར་དགེ་བའི་སྟན་ལ་རབ་ཏུ་གནས་པར་གྱུར་ཅིག །སེམས་ཅན་ཐམས་ ཅད་དེ་བཞིན་གཤེགས་པའི་ཡེ་ཤེས་ཀྱིས་རྣམ་པར་འཚང་རྒྱ་ཞིང༌། དེ་བཞིན་གཤེགས་པའི་བདག་ཉིད་ཆེ་བ་ཐམས་ཅད་དང་ཁྱུ་མཆོག་གི་མཐུ་ཕྱུང་བ་ཡང་དག་པར་སྟོན་པའི་ཕྱིར་ རིན་པོ་ཆེ་ཐམས་ཅད་ཀྱི་སྟན་དང༌། སྤོས་ཐམས་ཅད་ཀྱི་སྟན་དང༌། མེ་ཏོག་ཐམས་ཅད་ཀྱི་སྟན་དང༌། གོས་ཐམས་ཅད་ཀྱི་སྟན་དང༌། ཕྲེང་བ་ཐམས་ཅད་ཀྱི་སྟན་དང༌། ནོར་བུ་རིན་པོ་ ཆེ་ཐམས་ཅད་ཀྱི་སྟན་དང༌། བཻཌཱུཪྻ་སྣ་ཚོགས་བསམ་གྱིས་མི་ཁྱབ་པའི་སྟན་དང༌། འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་ལྟར་ཚད་མེད་པའི་སྟན་དང༌། འགྲོ་ བ་ཐམས་ཅད་མ་ལུས་པར་རྒྱན་གྱིས་རྣམ་པར་དག་པའི་སྟན་དང༌། རྡོ་རྗེའི་གདན་ཐམས་ཅད་ལ་འཁོད་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སྟན་གྱི་སྦྱིན་པས་ཡང་དག་ པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་འགྲོ་བ་ཐམས་ཅད་ཀྱིས་མགོས་བཏུད་པའི་བྱང་ཆུབ་ཀྱི་སྟན་རབ་ཏུ་འཐོབ་ཅིང་སངས་རྒྱས་ཀྱི་ཆོས་ཐམས་ཅད་རྣམ་པར་འཚང་རྒྱ་ བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གདུགས་ཀྱི་སྦྱིན་པ་བྱེད་ཅིང༌། དབང་ཕྱུག་གི་ལུས་ལ་དགབ་པའི་གདུགས་རིན་པོ་ཆེ་རྒྱན་ཆེན་ པོས་ཤིན་ཏུ་བརྒྱན་པ་བྱེ་བ་ཁྲག་ཁྲིག་བརྒྱ་སྟོང་ཁྱད་པར་འཕགས་ཤིང་དབང་ཆེ་བའི་ཡོ་བྱད་དུ་བྱ་བ། རིན་པོ་ཆེའི་རྩ་བ་ཅན་དྲིལ་བུའི་དྲ་བས་ཀུན་ནས་བསྐོར་བ། རིན་པོ་ཆེའི་སྲད་བུས་གསེར་ གྱི་དྲིལ་བུ་དཔྱངས་པའི་སྒྲ་འབྱུང་བ། རིན་པོ་ཆེ་བཻཌཱུཪྻའི་ཕྲེང་བ་རབ་ཏུ་དཔྱངས་པ། ཉེན་ཀོར་ནས་རྔའི་སྒྲ་དབྱངས་ཡིད་དུ་འོང་བ་འབྱུང་བ། གསེར་གྱི་དྲ་བ་རྣམ་པར་དག་པས་གཡོགས་ ཤིང་བརྒྱན་པ། རིན་པོ་ཆེའི་དྲ་བ་བརྒྱ་ཕྲག་སྟོང་གི་བླ་རེ་བྲེས་པ། ནོར་བུ་རིན་པོ་ཆེའི་འབྲུ་གྲངས་མེད་པས་སྤྲས་པ། རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མས་སྣ་ཚོགས་སུ་བྲེས་ཤིང་ བརྒྱན་པ། ཨ་ག་རུ་དང༌། ཙནྡན་དང༌། སྤོས་ཀྱི་དམ་པ་སྣ་ཚོགས་བྱེ་བ་ཁྲག་ཁྲིག་བརྒྱ་སྟོང་དུ་མས་ཉེན་ཀོར་དྲི་ཞིམ་པར་བསྒོས་ཤིང་བདུགས་པ། འཛམ་བུ་ཆུ་ཀླུང་གི་གསེར་ལྟར་འོད་ གསལ་ཞིང་དག་པ། རྒྱན་བྱེ་བ་ཁྲག་ཁྲིག་བརྒྱ་སྟོང་མཐའ་ཡས་པས་བརྒྱན་པ། དེ་བས་ཀྱང་ཆེས་ལྷག་པའི་གདུགས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་དག་ཁ་ན་མ་ཐོབ་མེད་པའི་སེམས་ ཀྱིས་སྦྱིན་པ་བྱེད་ཅིང༌། སེམས་ཅན་ཐམས་ཅད་ཀྱི་གཙོ་བོ་མངོན་དུ་གྱུར་པའམ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མཆོད་རྟེན་བརྒྱན་པའི་ཕྱིར་རམ། ཆོས་བཙལ་བའི་ ཕྱིར་བྱང་ཆུབ་སེམས་དཔའ་དགེ་བའི་བཤེས་གཉེན་ནམ། བྱང་ཆུབ་སེམས་དཔའ་ཆོས་སྨྲ་བ་བཙུན་པར་བྱ་བ་དག་གམ། ཕ་དང༌། མའམ། དགེ་འདུན་དཀོན་མཆོག་གམ། སངས་རྒྱས་ ༄༅། །ཐམས་ཅད་ཀྱི་བསྟན་པའམ། སྦྱིན་པའི་གནས་ཀྱི་གང་ཟག་སྣ་ཚོགས་སམ། སློབ་དཔོན་དང༌། བླ་མ་དང༌། བྱང་ཆུབ་ཀྱི་ཐེག་པ་གྲུབ་པའམ། དེ་ལ་ ཞུགས་པ་དག་གམ། ཕོངས་པ་དང༌། བཀྲེན་པ་སློང་བ་དང་ལེན་པ་དག་ལ་འབུལ་བ་དང༌། ཡོངས་སུ་གཏོང་བ་དང༌། སྦྱིན་པར་བྱེད་པའི་ཚེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་ སྟེ༑ སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་གཡོགས་པ་རབ་ཏུ་ཐོབ་སྟེ་དགེ་བའི་རྩ་བས་ཡང་དག་པར་ཡོག་པར་གྱུར་ཅིག །སེམས་ཅན་ཐམས་ཅད་ཉོན་མོངས་པ་དང་ཉེ་བའི་ཉོན་ མོངས་པ་ཐམས་ཅད་ལས་ཡོངས་སུ་འདས་ཏེ་ཡོན་ཏན་དང་ཡེ་ཤེས་ཀྱིས་མངོན་པར་བཀབ་པར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་སྡུས་དང༌། མུན་པ་དང༌། ཡོངས་སུ་ གདུང་བ་ཐམས་ཅད་ལས་རྣམ་པར་འདས་ཏེ་ལུས་ཤིན་ཏུ་བཀབ་པར་གྱུར་ཅིག །སེམས་ཅན་ཐམས་ཅད་འགྲོ་བ་ཐམས་ཅད་ཀྱིས་བལྟ་ན་སྡུག་ཅིང་སངས་རྒྱས་ཐམས་ཅད་ལ་མངའ་བའི་ ཡེ་ཤེས་ཀྱི་སྙིང་པོ་ཅན་དུ་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ལ་ལོག་པ་མེད་པར་འཇུག་པར་བརྩོན་པས་མ་འཁྲུགས་པའི་ཆོས་དཀར་པོས་ཤིན་ཏུ་བཀབ་པར་ གྱུར་ཅིག །སེམས་ཅན་ཐམས་ཅད་ཆོས་ཀྱི་ལུས་ཀྱིས་སངས་རྒྱས་ཀྱི་སྐུའི་མཐར་གཏུགས་ཏེ་མངོན་པར་བཀབ་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་འཇིག་རྟེན་ ཀུན་ལ་སྟོབས་བཅུའི་ཡེ་ཤེས་ཀྱི་བླ་རེས་སྐྱོབ་པའི་གདུགས་སུ་རེད་པར་གྱུར་ཅིག །སེམས་ཅན་ཐམས་ཅད་ཁམས་གསུམ་ཐམས་ཅད་ལས་ཤིན་ཏུ་འཕགས་ཤིང་ཆགས་པ་མེད་པའི་ཡེ་ཤེས་ཀྱི་སྙིང་ པོ་དང་ལྡན་པས་ཡེ་ཤེས་ཀྱིས་རྣམ་པར་སྣང་བར་གྱུར་ཅིག །སེམས་ཅན་ཐམས་ཅད་སྦྱིན་པའི་གནས་དམ་པ་ལ་བསོད་ནམས་ཐམས་ཅད་ཀྱིས་མཆོད་པའི་ཕྱིར་གདུགས་སུ་འོས་པར་གྱུར་ཅིག ། སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཀྱི་གདུགས་རྣམ་པར་སངས་རྒྱས་པས་གདུགས་ཀྱི་དམ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གདུགས་ཀྱི་སྦྱིན་ པ་བྱེད་པའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་ཆོས་ལ་དབང་བའི་གདུགས་ཡང་དག་པར་བཟུང་བ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །གདུགས་གཅིག་གིས་ནམ་མཁའ་ ཐམས་ཅད་ཀྱི་དབྱིངས་ཀྱིས་ཀླས་པ། ཆོས་ཀྱི་དབྱིངས་ཀྱི་མཐས་གཏུགས་པའི་འཇིག་རྟེན་གྱི་ཁམས་ཐམས་ཅད་དུ་སངས་རྒྱས་ཐམས་ཅད་ཀྱི་ཁྱུ་མཆོག་གི་མཐུ་ཕྱུང་བ་ཡང་དག་པར་བསྟན་ པ་ལས་ཕྱིར་མི་ལྡོག་པའི་ཕྱིར་ཡོངས་སུ་བསྔོའོ། །ཆོས་ཀྱི་དབྱིངས་ཐམས་ཅད་གདུགས་གཅིག་གིས་བརྒྱན་ཏེ་དེ་བཞིན་གཤེགས་པ་མཆོད་པར་བྱ་བའི་ཕྱིར་ཡོངས་སུ་བསྔོའོ། །གདུགས་ དང༌། རྒྱལ་མཚན་དང༌། བ་དན་ཡིད་དུ་འོང་པས་དེ་བཞིན་གཤེགས་པ་ཐམས་ཅད་ཀྱི་སྐུ་ལ་མངོན་པར་དགབ་པའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་ཞིང་ཐམས་ཅད་མ་ལུས་པ་གདུགས་ ༄༅། །ཀྱི་རྒྱན་གྱིས་ཀུན་ཏུ་ཡོག་པར་བྱ་བའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་མཚན་ལ་མོས་པའི་སེམས་ཅན་ཐམས་ཅད་དང༌། འགྲོ་བའི་ཚོགས་ཐམས་ཅད་ གདུགས་ཐམས་ཅད་ཀྱིས་དགབ་པའི་ཕྱིར་ཡོངས་སུ་བསྔོའོ། །རིན་པོ་ཆེ་ཐམས་ཅད་ཀྱི་གདུགས་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པས་སངས་རྒྱས་གཅིག་ལ་ཕུལ་ བས་སངས་རྒྱས་ཐམས་ཅད་ལ་བརྗོད་དུ་མེད་པའི་གདུགས་ཕུལ་བར་སེམས་ཤིང་ཡོངས་སུ་བསྔོའོ། །སངས་རྒྱས་ཐམས་ཅད་ཀྱི་བྱང་ཆུབ་མངོན་པར་བྱང་ཆུབ་པས་འཕགས་པའི་ གདུགས་ཀྱིས་སངས་རྒྱས་ཐམས་ཅད་དགབ་པའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་སྐུ་ཇི་སྙེད་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་ པ་ཐམས་ཅད་ན་བཞུགས་པ་ཐམས་ཅད་ལ་གདུགས་ཀྱིས་དགབ་པའི་ཕྱིར་ཡོངས་སུ་བསྔོའོ། །ནོར་བུ་རིན་པོ་ཆེ་ཐམས་ཅད་ཀྱིས་བརྒྱན་པའི་གདུགས་དང༌། རིན་པོ་ཆེ་ཐམས་ཅད་ཀྱི་ཕྲེང་ བ་བརྒྱུས་ཤིང་ཀླུབས་པ་དང༌། སྤོས་ཐམས་ཅད་ཀྱི་མཆོག་གི་དྲི་ཞིམ་པོའི་ངད་འབྱུང་བའི་གདུགས་དང༌། རིན་པོ་ཆེ་སྣ་ཚོགས་ཀྱིས་རྣམ་པར་སྤྲས་པའི་གདུགས་དང༌། རྒྱན་མཛེས་ ཤིང་རྣམ་པར་དག་པའི་གདུགས་དང༌། རྒྱན་ཚད་མེད་པར་ཡངས་ཤིང་རྒྱ་ཆེ་བ་དང༌། གསེར་གྱི་དྲ་བས་ཀུན་ནས་ཡོག་པར་བརྒྱན་པ། དྲིལ་བུའི་དྲ་བ་ཀུན་ནས་དབྱངས་པའི་སྒྲ་ཡིད་དུ་འོང་ ཞིང་སྙན་པ་འབྱུང་བའི་གདུགས་དང༌། ཡེ་ཤེས་བསྒྲིབས་པ་མེད་ཅིང་ཆགས་པ་མེད་པའི་གདུགས་དང༌། སངས་རྒྱས་ཐམས་ཅད་ལ་མངོན་པར་དགའ་བའི་གདུགས་ཡོངས་སུ་གཏང་བའི་ཕྱིར་ ཡོངས་སུ་བསྔོའོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གདུགས་ཀྱི་སྦྱིན་པས་ཡང་དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་ཡེ་ཤེས་མཆོག་ གི་གདུགས་ཀྱིས་མངོན་པར་དགབ་པའི་ཕྱིར་ཡོངས་སུ་བསྔོའོ། །སངས་རྒྱས་ཐམས་ཅད་ཀྱི་ཡོན་ཏན་གྱིས་ཀུན་ནས་གཡོགས་ཤིང་རབ་ཏུ་བརྒྱན་པའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་ ཡེ་ཤེས་དང༌། ཡོན་ཏན་དང༌། དགོངས་པ་དམ་པ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །སེམས་རིན་པོ་ཆེ་མཐའ་ཡས་པ་ལ་དབང་བསྒྱུར་བ་རབ་ཏུ་ཐོབ་པར་བྱ་བའི་ཕྱིར་ཡོངས་ སུ་བསྔོའོ། །ཆོས་ཐམས་ཅད་ལ་ཡེ་ཤེས་ཀྱི་དབང་བསྒྱུར་བ་ཀུན་ཏུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །དགེ་བའི་རྩ་བ་ཐམས་ཅད་ཀྱིས་མངོན་པར་གཡོགས་པར་ཡོངས་སུ་བསྔོ་བའི་ དོན་དུ་ཡོངས་སུ་བསྔོའོ། །འགྲོ་བ་ཐམས་ཅད་ཀྱིས་ཡེ་ཤེས་མཆོག་གི་གདུགས་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སངས་རྒྱས་ཐམས་ཅད་ཀྱི་སྟོབས་བཅུས་བླ་རེ་བྲེས་པའི་ གདུགས་སུ་འགྱུར་བར་བྱ་བའི་ཕྱིར་ཡོངས་སུ་བསྔོའོ། །ཆོས་ཀྱི་དབྱིངས་ཐམས་ཅད་སངས་རྒྱས་ཀྱི་ཞིང་གཅིག་གིས་གཡོགས་པར་བྱ་བའི་ཕྱིར་ཡོངས་སུ་བསྔོའོ། །ཆོས་ཐམས་ཅད་ལ་དབང་ ༄༅། །ཕྱུག་ཏུ་དབང་སྒྱུར་བའི་དབང་ཐོབ་པར་བྱ་བའི་ཕྱིར་ཡོངས་སུ་བསྔོའོ། །མཐུ་ཆེན་པོ་དང༌། དབང་ཆེན་པོའི་སེམས་ཀྱི་རྒྱུད་ཐོབ་པར་བྱ་བའི་ཕྱིར་ཡོངས་སུ་བསྔོའོ། ། བློ་ཡངས་པ་དང་སེམས་རྒྱ་ཆེ་བ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །ཡོན་ཏན་ཚད་མེད་པས་འགྲོ་བ་ཐམས་ཅད་མངོན་པར་དགབ་པའི་ཕྱིར་ཡོངས་སུ་བསྔོའོ། །ཡོན་ཏན་ཐམས་ ཅད་ཀྱིས་སེམས་མངོན་པར་དགའ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཀྱིས་འགྲོ་བ་ཐམས་ཅད་མངོན་པར་དགབ་པའི་ཕྱིར་ཡོངས་སུ་བསྔོའོ། །ཡེ་ཤེས་ཆེན་ པོས་མཉམ་པར་དགབ་པ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་བསྔོ་བའི་ཚུལ་མ་ལུས་པར་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སེམས་དང་བསམ་པ་ རྣམ་པར་དག་པར་འགྱུར་བའི་ཕྱིར་ཡོངས་སུ་བསྔོའོ། །བསམ་པ་དགེ་བ་དང༌། ཡིད་ཀྱི་དབང་པོ་རྣམ་པར་དག་པ་དང་ལྡན་པར་བྱ་བའི་ཕྱིར་ཡོངས་སུ་བསྔོའོ། །འགྲོ་བ་ཐམས་ཅད་ཡོངས་ སུ་བསྔོ་བ་ཆེན་པོས་མངོན་པར་དགབ་ཅིང་ཡང་དག་པར་བསྡུ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་མཚན་དང༌། བ་དན་རིན་པོ་ཆེ་ སྣ་ཚོགས་རྣམ་པ་ཐ་དད་པའི་ཡུ་བ་ཅན་རིན་པོ་ཆེའི་དྲིལ་བུའི་དྲ་བ་འཁྲོལ་བའི་སྒྲ་ཡིད་དུ་འོང་བ་འབྱུང་བ། སྣམ་བུ་རིན་པོ་ཆེ་རྣམ་པ་སྣ་ཚོགས་དབྱངས་པ། ཁ་དོག་དང་ཚོན་སྣ་ཚོགས་ ཀྱི་སྣམ་བུས་བརྒྱན་ཅིང་བསྒྲེངས་པ། གསེར་གྱི་དྲ་བས་ཀུན་ནས་དབྱངས་ཤིང་ཀླུབས་པ། གསེར་གྱི་དྲིལ་བུའི་སྒྲ་འབྱུང་བ། དྲིལ་བུ་གཡེར་ཁའི་དྲ་བས་ཤིན་ཏུ་བརྒྱན་པའི་རྒྱལ་མཚན་དང༌། བ་དན་ བྱེ་བ་ཁྲག་ཁྲིག་བརྒྱ་སྟོང་ཁ་དོག་ཐ་དད་པ། ཚོན་ཐ་དད་པ། ཤིན་ཏུ་མཐོ་བ། རིན་པོ་ཆེས་རྣམ་པ་སྣ་ཚོགས་སུ་བརྒྱན་པ། རྒྱལ་མཚན་གྱི་རྩེ་མོ་ཟླ་གམ་གྱིས་མཛེས་པར་བརྒྱན་པ། འཛམ་ བུ་ཆུ་ཀླུང་གི་གསེར་གྱི་ཉི་མའི་དཀྱིལ་འཁོར་བཙུགས་པ། འོད་ཟེར་རྣམ་པ་སྣ་ཚོགས་འབྱུང་བ། རྒྱལ་མཚན་གྱི་རྒྱན་གྱིས་ས་ཐམས་ཅད་ཀུན་ཏུ་ཡོག་པ། རྒྱལ་མཚན་གྱི་རྒྱན་རྣམ་པ་ དུ་མ་འོད་དང་ལྡན་པས་རབ་ཏུ་བརྒྱན་པའི་རྒྱལ་མཚན་རྣམ་པ་སྣ་ཚོགས་བསྒྲེངས་པའི་རྒྱན་དེ་ལྟ་བུ་དག་འཇིག་རྟེན་གྱི་ཁམས་ཐམས་ཅད་ཀྱི་ལས་ཀྱི་རྣམ་པར་སྨིན་པ་ལ་མོས་པའི་རྒྱལ་ མཚན་གྱི་རྒྱན་གྱིས་ཀུན་ཏུ་ཁྱབ་པར་བྱ་བ་དང༌། འཇིག་རྟེན་གྱི་ཁམས་ཆོས་ཀྱི་དབྱིངས་ཐམས་ཅད་ཀྱིས་ཀླས་པ། སངས་རྒྱས་ཀྱི་ཞིང་ནམ་མཁའི་དབྱིངས་ཐམས་ཅད་འབྱམས་ཀླས་པ་ལ་ གནས་པ། ཡངས་པ། ཀུན་ཏུ་རྒྱལ་མཚན་གྱི་སྦྱིན་པ་ཡོངས་སུ་བཏང་བར་མོས་པས་འཇིག་རྟེན་གྱི་ཁམས་ཐམས་ཅད་རྒྱས་པར་བྱ་བ་དང༌། བྱང་ཆུབ་སེམས་དཔའི་བསམ་པ་དང་མོས་པའི་ ཁྱབ་པར་རྣམ་པར་དག་པར་བྱ་བའི་ཕྱིར་སངས་རྒྱས་བཅོམ་ལྡན་འདས་མངོན་དུ་གྱུར་པ་རྣམས་ལ་འབུལ་བའམ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མཆོད་རྟེན་ནམ། ༄༅། །ཆོས་དཀོན་མཆོག་མཆོད་པའམ། དགེ་འདུན་དཀོན་མཆོག་ལ་འབུལ་ལམ། དགེ་བའི་བཤེས་གཉེན་བྱང་ཆུབ་སེམས་དཔའ་རྣམས་སམ། ཉན་ཐོས་དང༌། རང་ སངས་རྒྱས་རྣམས་སམ། འཁོར་གྱི་ཚོགས་སུ་གྱུར་པའམ། གང་ཟག་གི་རྣམ་པ་གཞན་སུ་ཡང་རུང་སྟེ། སློང་བ་ཐམས་ཅད་ལ་རིམ་གྲོར་བྱ་བའི་ཕྱིར་སྦྱིན་ཞིང་ཡོངས་སུ་གཏོང་བ་ན་རྒྱལ་ མཚན་དང༌། བ་དན་སྦྱིན་པས་ཡང་དག་པར་བསྡུས་པའི་དགེ་བའི་རྩ་བ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཡེ་ཤེས་ཀྱི་རྒྱལ་མཚན་དང༌། བ་དན་ལ་ཐུབ་པ་ མེད་པས་དགེ་བའི་རྩ་བ་དང༌། བསོད་ནམས་ཐམས་ཅད་ཡང་དག་པར་སྒྲེང་བའི་རྒྱལ་མཚན་ཅན་དུ་གྱུར་ཅིག །སེམས་ཅན་ཐམས་ཅད་ཆོས་ཀྱི་གོ་འཕང་བྲིས་པ་སྦེད་པའི་ཆོས་ཉིད་ཀྱིས་ཆོས་ ཐམས་ཅད་ལ་དབང་སྒྱུར་བའི་རྒྱལ་མཚན་སྒྲེང་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་བྱང་ཆུབ་ཀྱི་ཆོས་ཡང་དག་པར་འཛིན་པའི་ཆོས་ཅན་དུ་གྱུར་ཏེ་རིན་པོ་ ཆེའི་གཞི་ལ་སངས་རྒྱས་ཀྱི་ཆོས་བྲིས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་ལ་མར་མེ་སྣང་བར་གྱུར་ཏེ་རྒྱལ་མཚན་ཤིན་ཏུ་འཕགས་པར་གྱུར་ཅིག །སེམས་ ཅན་ཐམས་ཅད་བདུད་ཐམས་ཅད་རྣམ་པར་འཇོམས་པའི་ཕྱིར་ཐུབ་པ་མེད་པའི་རྒྱལ་མཚན་དང༌། བ་དན་ཅན་དུ་གྱུར་ཅིག །སེམས་ཅན་ཐམས་ཅད་བདུད་ཐམས་ཅད་ཀྱིས་མི་ཐུབ་པའི་ ཆོས་ཅན་དུ་གྱུར་ཏེ་ཡེ་ཤེས་དང༌། སྟོབས་ཀྱི་རྒྱལ་མཚན་རབ་ཏུ་སྒྲེང་བར་གྱུར་ཅིག །སེམས་ཅན་ཐམས་ཅད་རྒྱལ་མཚན་ཐམས་ཅད་མི་ལྟུང་བའི་སྣང་བ་ཅན་དུ་གྱུར་ཏེ་ཡེ་ཤེས་མཐུ་བོ་ ཆེའི་རྒྱལ་མཚན་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་དཀྱིལ་འཁོར་གྱིས་ཆོས་ཀྱི་དབྱིངས་ཐམས་ཅད་རྣམ་པར་དག་པར་གྱུར་ཏེ་ཡེ་ཤེས་ཀྱི་ཉི་མའི་དཀྱིལ་ འཁོར་འོད་ཟེར་རབ་ཏུ་འགྱེད་པའི་རྒྱལ་མཚན་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་མཆོད་པ་ལ་བརྩོན་ཞིང་རྒྱལ་མཚན་སྣ་ཚོགས་རབ་ཏུ་བསྒྲེངས་པས་སངས་ རྒྱས་ཐམས་ཅད་ཀྱི་ཞིང་བརྗོད་དུ་མེད་པ་རྒྱས་པར་འགེངས་པའི་ཕྱིར་རིན་པོ་ཆེའི་རྒྱལ་མཚན་གྱི་རྒྱན་དང་ལྡན་པར་གྱུར་ཅིག །སེམས་ཅན་ཐམས་ཅད་ཞགས་པ་ཐུབ་པ་དགུ་བཅུ་རྩ་དྲུག་ གི་རྒྱལ་མཚན་གྱིས་དབེན་ཞིང་སེམས་འདོད་ཆགས་དང་བྲལ་བར་གྱུར་ཏེ་སངས་རྒྱས་ཀྱི་རྒྱལ་མཚན་རབ་ཏུ་ཐོབ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ ཆེན་པོ་རྒྱལ་མཚན་དང༌། བ་དན་གྱི་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་རྒྱ་ཆེ་ཞིང་ཡངས་པ་དང༌། ཟབ་མོ་ཐམས་ཅད་དང་ ལྡན་པར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་དང༌། རྣམ་པར་འཕྲུལ་བ་དང༌། འབྱུང་བའི་རྒྱལ་མཚན་དང་ལྡན་ཞིང༌། ཐ་དད་པ་ཡང་དག་པར་ ༄༅། །ཤེས་པ་རྣམ་པར་དག་པ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེ་ཐམས་ཅད་གཏོང་ བ་ལ་མོས་པ་དང༌། སེམས་ཅན་ཐམས་ཅད་ནོར་གྱིས་ཕྱུག་པར་བྱེད་པ་དང༌། རིན་པོ་ཆེའི་མཛོད་ཐམས་ཅད་འབྱེད་པ་དང༌། རིན་པོ་ཆེ་ཐམས་ཅད་གཏོང་བ་དང༌། རིན་པོ་ཆེའི་འབྱུང་ གནས་ཐམས་ཅད་ཡོངས་སུ་གཏོང་བ་དང༌། ནོར་བུ་རིན་པོ་ཆེ་ཐམས་ཅད་ཀྱི་སྦྱིན་པ་བྱེད་པ་དང༌། རིན་པོ་ཆེ་ཀུན་གྱིས་སེམས་ཅན་ཐམས་ཅད་ལ་ཁྱབ་པར་བྱེད་པ་དང༌། རིན་པོ་ཆེའི་ ཚོགས་ཐམས་ཅད་ཕངས་པར་མི་སེམས་པའི་ཡིད་ཀྱིས་གཏོང་བ་དང༌། རིན་པོ་ཆེའི་ཚོགས་ཐམས་ཅད་འཐོར་བའམ། རིན་པོ་ཆེ་ཐམས་ཅད་ཡོངས་སུ་གཏང་བར་སེམས་ བསྐྱེད་པའི་ཚེ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ལ་རིན་པོ་ཆེ་བྱིན་པས་ཡོངས་སུ་བཟུང་བའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་ དྲན་པའི་རྒྱུད་རྨོངས་པ་མེད་ཅིང་སངས་རྒྱས་མཐོང་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཆོས་ཀྱི་མཛོད་འཛིན་པས། ཆོས་དཀོན་མཆོག་གི་ སྣང་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སྦྱིན་པ་དང༌། ཡོངས་སུ་གཏོང་བ་ཤིན་ཏུ་བརྟན་པས་དགེ་འདུན་དཀོན་མཆོག་ཡོངས་སུ་འཛིན་པར་གྱུར་ཅིག །སེམས་ཅན་ ཐམས་ཅད་ཕྱིར་མི་ལྡོག་པའི་བྱང་ཆུབ་ཀྱི་སེམས་རྣམ་པར་དག་པས་ཐམས་ཅད་མཁྱེན་པ་ཉིད་ཀྱི་སེམས་རིན་པོ་ཆེ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ ཐམས་ཅད་ལ་རྨོངས་པ་མེད་པར་གཞོལ་བས་ཡེ་ཤེས་རིན་པོ་ཆེ་ལ་ཞུགས་པར་གྱུར་ཅིག །སེམས་ཅན་ཐམས་ཅད་ཡེ་ཤེས་རིན་པོ་ཆེ་ཚད་མེད་པ་ཡང་དག་པར་བསྟན་པར་བྱ་བའི་ཕྱིར་བྱང་ ཆུབ་སེམས་དཔའི་ཡོན་ཏན་རིན་པོ་ཆེ་གྲངས་མེད་པ་ཕུན་སུམ་ཚོགས་པར་གྱུར་ཅིག །སེམས་ཅན་ཐམས་ཅད་སྟོབས་བཅུའི་ཡེ་ཤེས་རིན་པོ་ཆེ་མངོན་པར་འཚང་རྒྱ་བ་ལ་བརྩོན་པས་ཡོན་ ཏན་རིན་པོ་ཆེ་མཐའ་ཡས་པའི་བསྔགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་རིན་པོ་ཆེ་ཤིན་ཏུ་ཡངས་པའི་མཐར་ཐུག་པས་ཡེ་ཤེས་རིན་པོ་ཆེ་བཅུ་དྲུག་གི་སྙོམས་ པར་འཇུག་པ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་རིན་པོ་ཆེ་ལ་རྣམ་པར་སངས་རྒྱས་པས་རིན་པོ་ཆེའི་དམ་པས་སྦྱིན་པའི་གནས་ཀྱི་ མཆོག་ཏུ་གྱུར་ཅིག །སེམས་ཅན་ཐམས་ཅད་ཐ་དད་པ་ཡང་དག་པར་ཤེས་པ་མི་ཟད་པའི་མཛོད་ཀྱི་ཆོས་རིན་པོ་ཆེ་རབ་ཏུ་སྟོན་པ་ལ་བརྩོན་པས་རིན་པོ་ཆེའི་དབང་པོ་དམ་པར་གྱུར་ཅིག། ཅེས་ དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེ་དེ་དག་ཡོངས་སུ་གཏོང་ཞིང་སྦྱིན་པ་བྱེད་པའི་ཚེ་སེམས་ཅན་ཐམས་ཅད་སངས་རྒྱས་ཀྱི་སྤྱན་རིན་པོ་ཆེ་རྣམ་པར་དག་ཅིང་ཉམས་པ་ ༄༅། །མེད་པས་ཡེ་ཤེས་དམ་པ་རིན་པོ་ཆེ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་དང༌། ཡན་ ལག་དང༌། ཉིང་ལག་ཐམས་ཅད་རྒྱན་སྣ་ཚོགས་ཀྱིས་ཤིན་ཏུ་བརྒྱན་པ། ལུས་བལྟ་ན་སྡུག་པ། རྣམ་པར་དག་ཅིང་མི་མཐུན་པ་མེད་པའི་རྒྱན་གྱིས་ཤིན་ཏུ་བརྒྱན་པ། རིན་པོ་ཆེ་ཐམས་ཅད་ཀྱིས་ རབ་ཏུ་བརྒྱན་པ། རིན་པོ་ཆེའི་རྒྱན་སྣ་ཚོགས་རྣམ་པ་ཐ་དད་པ་བྱེ་བ་ཁྲག་ཁྲིག་བརྒྱ་སྟོང་གིས་ཤིན་ཏུ་བརྒྱན་པ། སེམས་ཅན་ཐམས་ཅད་ཀྱི་ལུས་རྒྱན་གྱིས་བརྒྱན་པར་བརྩོན་པ། སེམས་ཅན་ཐམས་ ཅད་ལ་བུའི་འདུ་ཤེས་ཀྱིས་འཇིག་རྟེན་གྱི་བདེ་བ་དང༌། སངས་རྒྱས་ཀྱི་བདེ་བ་ཐམས་ཅད་སྟོབ་པ། དགའ་བ་སྣ་ཚོགས་ཀྱིས་སེམས་ཅན་རབ་ཏུ་དགའ་བར་བྱེད་པ་དེ། རྒྱན་སྣ་ཚོགས་རྣམ་བ་ཐ་དད་ པ་དག་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། སངས་རྒྱས་ཀྱི་ཆོས་ཐམས་ཅད་ལ་རབ་ཏུ་དགོད་པའི་ཕྱིར་སྦྱིན་ཞིང་ཡོངས་སུ་གཏོང་བའི་ཚོ་རྒྱན་ཡོངས་སུ་བཏང་བས་ཡང་དག་པར་ བསྡུས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་ཡེ་ཤེས་ཀྱི་རྒྱན་རྣམ་པར་དག་པས་ལྷ་དང་བཅས་པའི་འཇིག་རྟེན་གྱི་རྒྱན་དུ་རེད་པར་གྱུར་ཅིག །སེམས་ ཅན་ཐམས་ཅད་བསོད་ནམས་ཀྱི་རྒྱུད་ཀྱི་མཚན་རྣམ་པར་དག་པ་དང་ལྡན་ཞིང༌། མཚན་གྱི་ལུས་ཤིན་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་བསོད་ནམས་བརྒྱ་པའི་མཚན་ དང་ལྡན་པའི་ལུས་ཅན་དུ་རེད་དེ་ལུས་མཚན་གྱིས་ཤིན་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་ལུས་ཀྱི་ཡན་ལག་མཚན་ཀུན་གྱིས་བརྒྱན་པ་དང་ལྡན་ཞིང༌། ལུས་མཚན་གྱིས་ཤིན་ ཏུ་རྣམ་པར་བྲིས་པ་ཕུན་སུམ་ཚོགས་པར་གྱུར་ཅིག །སེམས་ཅན་ཐམས་ཅད་ཐ་དད་པ་ཡང་དག་པར་ཤེས་པ་མི་ཟད་པའི་མཛོད་དང་ལྡན་ཞིང༌། ཚིག་གི་རྒྱན་གྱིས་ཤིན་ཏུ་བརྒྱན་པར་གྱུར་ ཅིག །སེམས་ཅན་ཐམས་ཅད་དབྱངས་ཀྱི་ཡན་ལག་ཡིད་དུ་འོང་ཞིང་རྣམ་པར་དག་པ་དང་ལྡན་ཞིང་ཡོན་ཏན་གྱིས་བརྒྱན་པའི་དབྱངས་དང་ལྡན་པར་གྱུར་ཅིག །སེམས་ཅན་ཐམས་ཅད་ སངས་རྒྱས་ཀྱི་ཆོས་ཀྱི་ཚིག་གི་ཚུལ་རྣམ་པར་དག་པས་འགྲོ་བ་ཀུན་མགུ་བར་བྱེད་ཅིང་སངས་རྒྱས་ཀྱི་ཆོས་ཐམས་ཅད་ཀྱིས་ཚིག་ཡིད་དུ་འོང་བར་བརྒྱན་པ་དང་ལྡན་པར་གྱུར་ཅིག །སེམས་ ཅན་ཐམས་ཅད་སངས་རྒྱས་ཀུན་ལ་ལྟ་བས་སྙོམས་པར་འཇུག་ཅིང་སེམས་ཀྱི་རྒྱན་གྱིས་བརྒྱན་པར་གྱུར་ཅིག །སེམས་ཅན་ཐམས་ཅད་ཆོས་སྣང་བ་ཐམས་ཅད་ཀྱིས་སངས་རྒྱས་ཀྱི་ཆོས་ རབ་ཏུ་ཐོབ་ཅིང་གཟུངས་ཐམས་ཅད་ཀྱི་རྒྱན་གྱིས་རབ་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཡེ་ཤེས་ཀྱིས་རྒྱུད་ཤིན་ཏུ་བརྒྱན་པས་སེམས་ཡེ་ཤེས་ཀྱིས་ཡང་ དག་པར་བརྒྱན་པ་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཀྱི་རྒྱན་དེ་དག་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ ༄༅། །ཅད་ཀྱིས་སངས་རྒྱས་ཀྱི་ཆོས་ཚད་མེད་པ་ཐམས་ཅད་ཀྱི་ཡོན་ཏན་དང༌། ཡེ་ཤེས་ཀྱི་རྒྱན་ཡོངས་སུ་རྫོགས་ཏེ་སེམས་ཅན་ཐམས་ཅད་ཀྱི་རིས་ན་ང་རྒྱལ་དང༌། རྒྱགས་པ་དང༌། དྲེགས་པ་མེད་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དབང་ཕྱུག་ལ་སྤྱི་པོ་ནས་དབང་བསྐུར་བས་མངོན་པར་དབང་ བསྐུར་བ། ཅོད་པན་དང་གཙུག་གི་རིན་པོ་ཆེའི་སྤྱིན་བ་བྱེད་ཅིང་ཡོངས་སུ་གཏོང་བ་དང༌། མངོན་པར་སྟོབ་པ་དང༌། སེམས་ཅན་ཐམས་ཅད་ལ་ཕན་འདོགས་པ་དང༌། ལྟོས་པ་མེད་པར་ ཡོངས་སུ་གཏོང་པའི་སེམས་རྣམ་པར་འཕེལ་བར་བྱེད་པ་དང༌། སྦྱིན་པས་བསྒོས་པའི་རྒྱུད་ཡོངས་སུ་སྒོམ་པ་དང༌། སྦྱིན་པ་ལ་དབང་སྒྱུར་བར་རབ་ཏུ་འཇུག་པ་དང༌། སྦྱིན་པའི་ཡེ་ ཤེས་ལ་རབ་ཏུ་སློབ་པ་དང༌། སྦྱིན་པ་གཏོང་བའི་དབང་པོ་ཡོངས་སུ་སྐྱེད་པ་དང༌། སྦྱིན་པ་གཏོང་བའི་བློ་རྒྱ་ཆེར་བྱེད་པའི་ཚེ་ཅོད་པན་དང༌། གཙུག་གི་རིན་པོ་ཆེ་ཡོངས་སུ་བཏང་བས་ ཡང་དག་པར་བསྡུས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཐམས་ཅད་མཁྱེན་པ་ཉིད་དུ་སངས་རྒྱས་ཀྱི་ཆོས་ཐམས་ ཅད་ཀྱིས་སྤྱི་བོ་ནས་དབང་བསྐུར་བས་དབང་པོ་ཐམས་ཅད་ལ་ཤིན་ཏུ་དབང་བསྐུར་བར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་གཙུག་གི་ཕ་རོལ་ཏུ་ཕྱིན་པ་ཐོབ་པས་སྤྱི་བོ་གཙུག་ ཏོར་ཅན་གྱི་མགོ་དང་ལྡན་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གྱི་ཡོན་ཏན་གྱི་སྤྱི་བོའི་མཐར་ཕྱིན་པས་ཡེ་ཤེས་རིན་པོ་ཆེ་མཆོག་གིས་སེམས་ཅན་ཐམས་ཅད་ཡང་དག་པར་ སྡུད་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གྱི་སྤྱི་བོས་ཕྱག་བྱ་བར་འོས་ཤིང་ཡེ་ཤེས་རིན་པོ་ཆེའི་མཆོག་ལ་ཡང་དག་པར་གནས་པར་གྱུར་ཅིག །སེམས་ཅན་ཐམས་ ཅད་ཆོས་ཀྱི་སྐྱིད་པ་ལ་དབང་བསྒྱུར་བ་རབ་ཏུ་ཐོབ་སྟེ་ཡེ་ཤེས་ཀྱི་ཅོད་པ་ན་ཤིན་ཏུ་བཅིངས་པར་གྱུར་ཅིག །སེམས་ཅན་ཐམས་ཅད་འཇིག་རྟེན་ཀུན་གྱིས་བལྟ་བར་མི་ནུས་པའི་ཆོས་ ཅན་དུ་གྱུར་ཏེ་ཡེ་ཤེས་ཀྱི་ནོར་བུ་རིན་པོ་ཆེས་མགོ་རབ་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་སྤྱི་བོར་གྱུར་པའི་ཡེ་ཤེས་ཀྱིས་སངས་རྒྱས་ཀྱི་ཆོས་ཐམས་ཅད་ལ་རྣམ་ པར་ལྟ་པའི་ཆོས་ཅན་དུ་གྱུར་ཏེ་སྤྱི་བོ་ཤིན་ཏུ་བཙུན་པ་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་རིན་པོ་ཆེའི་རྒྱ་མཚོའི་སྙིང་པོ་རྣམ་པར་དག་པ་དང་ལྡན་ཞིང་སྟོབས་བཅུའི་ རྒྱན་ཅོད་པན་གྱིས་མགོ་རབ་ཏུ་བརྒྱན་པར་གྱུར་ཅིག །སེམས་ཅན་ཐམས་ཅད་འདོད་པའི་ཁམས་ཀྱི་དང་པོ་ནས་བདུད་ཐམས་ཅད་རྣམ་པར་འཇོམས་པའི་ཕྱིར་སའི་དམ་པ་ལ་གནས་པར་ གྱུར་ཅིག །སེམས་ཅན་ཐམས་ཅད་སྟོབས་བཅུའི་མཐར་ཐུག་སྟེ་ཆོས་ཀྱི་ཡེ་ཤེས་ཀྱི་སྤྱི་བོ་རྣམ་པར་དག་པར་གྱུར་ཅིག །སེམས་ཅན་ཐམས་ཅད་ཐམས་ཅད་མཁྱེན་པའི་དབུ་ཟིལ་གྱིས་ ༄༅། །མི་ནོན་པའི་སྣང་བ་རབ་ཏུ་ཐོབ་སྟེ་རྒྱལ་པོའི་མཆོག་དམ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཅོད་པན་དང༌། གཙུག་གི་ རིན་པོ་ཆེ་ཡོངས་སུ་གཏོང་བའི་ཚེ་དགེ་བའི་རྩ་བ་དེས་སེམས་ཅན་ཐམས་ཅད་ཀྱིས་ཡེ་ཤེས་མཆོག་གི་འབྱུང་གནས་རྣམ་པར་དག་པ་དང༌། ཡེ་ཤེས་ཀྱི་ཅོད་པན་དང༌། ནོར་བུ་རིན་ པོ་ཆེ་རབ་ཏུ་ཐོབ་པའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བཙོན་རར་བཅུག་ཅིང་བཙོན་ཆས་བཅིངས་པའི་སེམས་ཅན་ སྡུག་བསྔལ་བ། སྡུག་བསྔལ་གྱི་ཁྱིམ་གྱིས་བསྐོར་བ། ཤིང་སྒྲོག་དང༌། ལྕགས་སྒྲོག་དང༌། ལྟུང་གིས་བཅིངས་པས་ལུས་ལྕགས་ཐག་གིས་བཏགས་པ། བསྡམས་ པ༑ ཤིན་ཏུ་བརྒྱུས་པའི་ལུས་ཅན། མི་བདེ་བས་ལུས་ཤིན་ཏུ་མནར་བ། སྐྱབས་མེད་པར་ལྟུང་བ། བཀྲེས་པ་དང་སྐོམ་པས་ཉེན་པ། གོས་མེད་པ། མུན་པས་ཡོག་ཅིང་ཁེབས་ པ༑ ཤིན་ཏུ་རྐེ་བ། བརླ་ལྕགས་སྒྲོག་གིས་སྒྲོགས་པ་དེ་ལྟ་བུ་དག་མཐོང་ནས་བྱང་ཆུབ་སེམས་དཔའ་སྙིང་རྗེ་ཅན་དང༌། རྒྱལ་པོ་མིག་བཟང་གིས་ཇི་ལྟར་བྱས་པ་བཞིན་དུ་བདག་ དང་འཁོར་དུ་བཅས་པ་ནོར་ཐམས་ཅད་དང་བཅས་པར་ཡོངས་སུ་བཏང་སྟེ་བྱིན་ནས་བཙོན་ར་དེ་ནས་སེམས་ཅན་དེ་དག་ཡོངས་སུ་ཐར་པར་བྱེད་དོ། །དེས་བཙོན་ར་དེ་ནས་སེམས་ ཅན་དེ་དག་ཐར་པར་བྱས་ནས་ཀྱང་ནོར་གྱི་སྦྱིན་པ་ཐམས་ཅད་མངོན་པར་བྱིན་ནས་སྨན་དང༌། སྨན་པ་དང༌། སྔགས་ཀྱི་རྣམ་པས་ལུས་ནད་མེད་པར་བྱས་ཏེ་བདེ་བ་དང༌། ཡིད་དགའ་བ་ལ་རབ་ ཏུ་བཀོད་ནས་ཆོས་རིན་པོ་ཆེ་ཐོས་པར་བྱས་ཏེ་དགའ་བའི་གཏམ་གྱིས་དགེ་བའི་རྩ་བ་ལ་བཀོད་ནས་སངས་རྒྱས་ཀྱི་བསྟན་པ་ལས་མི་ཉམས་པར་བྱེད་དོ། །དེ་དེ་ལྟར་སེམས་ཅན་བཙོན་ར་ ནས་བཀྱེ་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་སྲེད་པའི་བཅིངས་པ་དང༌། ཞགས་པ་ལས་ ཤིན་ཏུ་གྲོལ་བར་གྱུར་ཅིག །སེམས་ཅན་ཐམས་ཅད་ཡེ་ཤེས་མཐོང་བའི་ཕ་རོལ་ཏུ་ཕྱིན་ཅིང་འཁོར་བའི་རྒྱུད་ཤིན་ཏུ་ཆད་པར་གྱུར་ཅིག །སེམས་ཅན་ཐམས་ཅད་བག་ལ་ཉལ་ བ་ཤིན་ཏུ་བཅོམ་སྟེ། ཀུན་ནས་འཁོར་བ་དང་རྣམ་པར་བྲལ་བསམ་རིག་པའི་མུན་པ་དང༌། རབ་རིབ་དང༌། ལིང་ཏོག་རྣམ་པར་བསལ་ཅིང་རབ་རིབ་མེད་པའི་ཡེ་ཤེས་ཡང་དག་པར་ མཐོང་བར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་དགོན་པར་བྱ་བའི་ཡེ་ཤེས་ཀྱི་མཐར་ཐུག་པར་གྱུར་ཏེ་ཁམས་གསུམ་པའི་བཅིངས་པ་ཐམས་ཅད་དང་བྲལ་བར་གྱུར་ཅིག ། སེམས་ཅན་ཐམས་ཅད་ཉོན་མོངས་པ་མེད་པའི་སར་ཡེ་ཤེས་བསྒྲིབས་པ་མེད་པ་མཐོང་བའི་ཕ་རོལ་ཏུ་ཕྱིན་པ་ཐོབ་ཅིང་ཉོན་མོངས་པའི་བཅིངས་པ་ཐམས་ཅད་ཤིན་ཏུ་ཤིགས་པར་ ༄༅། །གྱུར་ཅིག །སེམས་ཅན་ཐམས་ཅད་རློམ་སེམས་ཀྱི་གཡོ་བ་རྣམ་པར་རྒྱུ་བ་ཐམས་ཅད་ཡང་དག་པར་གཞོམ་པའི་ཕྱིར་གཡོ་བ་མེད་པའི་ཡེ་ཤེས་ལ་ཡང་ དག་པར་གཞོལ་ཞིང༌། གཡོ་བ་དང་རློམ་སེམས་ཀྱི་བཅིངས་པ་ཐམས་ཅད་དང་བྲལ་བར་གྱུར་ཅིག །སེམས་ཅན་ཐམས་ཅད་ཁམས་གསུམ་ཐམས་ཅད་དུ་ཆགས་པ་མེད་པར་ གནས་ཤིང་འདོད་པའི་དྲི་མ་ཐམས་ཅད་དང་བྲལ་ཏེ་འདོད་པའི་བཅིངས་པ་ཐམས་ཅད་རྣམ་པར་སྤངས་པར་གྱུར་ཅིག །སེམས་ཅན་ཐམས་ཅད་བསམ་པ་སངས་རྒྱས་ཐམས་ཅད་ལ་ བཏང་བས་ལྷག་པའི་བསམ་པ་ཤིན་ཏུ་གྲོལ་བར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་དག་ཏུ་སེམས་ཆགས་པ་ མེད་པ་དང༌། གྲོལ་ཞིང་བཅིངས་པ་མེད་པར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཁམས་ཐམས་ཅད་དུ་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་དང༌། ཐེག་པ་ཆེན་པོ་ལ་དགོད་པར་བྱ་བའི་ཕྱིར་རྣམ་པར་རྒྱུ་ཞིང༌། བྱང་ཆུབ་སེམས་དཔའི་མངོན་པར་ཤེས་པས་འཇིག་རྟེན་གྱི་ཁམས་ཐམས་ཅད་དུ་འདོད་པར་གྱུར་ཅིག །ཅེས་དེ་ལྟར་ བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་བཙོན་ར་དང༌། བཙོན་ཚ་ནས་བཀྱེ་བས་ཡང་དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ ཅད་ཤིན་ཏུ་གྲོལ་ཞིང༌། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ས་ལ་གནས་པར་འགྱུར་བའི་ཕྱིར་ཡོངས་སུ་བསྔོའོ། །འདི་ལྟར་ཡང་སེམས་ཅན་ལ་ལ་ཞིག་སྲོག་དང་དབྲལ་ བའི་ཕྱིར་གསད་དུ་ཁྲིད་པ། སྡུག་བསྔལ་གྱི་རྣམ་པ་གཞན་དང་གཞན་གྱིས་མི་བཟད་ཅིང་འདར་བ། བཅིང་བ་ལྔས་བཅིངས་པ། སྐྱེ་བོ་བརྒྱ་ཕྲག་སྟོང་གིས་ཀུན་ནས་བསྐོར་ཅིང་ འཛམ་བུ་གླིང་དུ་གཏོགས་པ་སྣ་ཚོགས་ནས་བཤལ་ཞིང་དཀྲི་བ། གཉེན་བཤེས་ཀྱི་རྒྱུད་དང༌། མཛའ་བོའི་རྒྱུད་ཐམས་ཅད་དང་བྲལ་བར་གྱུར་པ། རལ་གྲིས་གཙབ་ཅིང་གཤེག་པ། གསལ་ཤིང་བསྒྲེངས་པ་ལ་བསྐྱོན་པ། ལུས་ཐམས་ཅད་ཀུན་ནས་གླེགས་ཏེ་མེ་འབར་བའི་ནང་དུ་དོར་བའམ། སྡུག་བསྔལ་གྱི་རྣམ་པ་མི་བདེ་བ་ཐམས་ཅད་ཀྱིས་མི་བདེ་བར་བྱ་བ་ གཙེ་བ་སྣ་ཚོགས་ཐམས་ཅད་དུ་བསྒྲེ་བ་ཞིག་བྱང་ཆུབ་སེམས་དཔའ་སེམས་དཔའ་ཆེན་པོས་མཐོང་བར་གྱུར་ན། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་གསད་པར་བྱ་ བདེའི་དོན་དུ་ལུས་ཡོངས་སུ་གཏོང་སྟེ། ཇི་ལྟར་བྱང་ཆུབ་སེམས་དཔའ་མི་ཕམ་པ་དང༌། རྒྱལ་པོ་ཁྱད་པར་དུ་འགྲོ་བས་ཇི་ལྟར་བྱས་པ་དང༌། དེ་མ་ཡིན་པའི་བྱང་ཆུབ་སེམས་དཔའ་ སེམས་དཔའ་ཆེན་པོ་གཞན་རྣམས་ཀྱང་སེམས་ཅན་གསད་པ་བསླུ་བའི་དོན་དུ་ལུས་ཡོངས་སུ་གཏོང་ཞིང༌། སྡུག་བསྔལ་གྱི་ཚོར་བ་ཐམས་ཅད་ཉམས་སུ་ལེན་པ་དེ་བཞིན་དུ་རབ་ཏུ་ ༄༅། །གཏོང་བ་བྱེད་ཅིང་ཚིག་འདི་སྐད་དུ་སྨྲའོ། །ཁྱེད་ཀྱི་མི་བདེ་བ་འདི་དག་བདག་ལ་གྱིས་ཤིག །ལུས་འདི་ཡོངས་སུ་གཏོང་གི །ངའི་སྲོག་གཅད་པར་གྱིས་ཤིག ། ང་ལ་ནི། ཅི་བྱས་སོ་ཅོག་ཀྱང་མི་ཉན་པ་མེད་ཀྱི། ཁྱེད་ཀྱིས་མི་འདི་ལ་ཅི་བྱ་བར་འདོད་པ་དེ་ལས་གྲངས་མེད་པའི་འགྱུར་དུ་སྡུག་བསྔལ་གྱི་རྣམ་པས་གཙེ་བ་ཐམས་ཅད་ཀྱིས་མི་བདེ་ བ་སྣ་ཚོགས་སུ་གྱིས་ཤིག །ཅེས་ཏེ། འདི་ལྟར་བདག་གིས་གསད་པར་བཀྲི་བ་མཐོང་ཡང་བདག་གི་ལུས་དང༌། སྲོག་གིས་མི་བླུ་བ་ནི། བདག་ལ་ཚུལ་དང་མི་འདྲའོ། །དེ་ཅིའི་ ཕྱིར་ཞེ་ན། བདག་གིས་ནི། སེམས་ཅན་ཐམས་ཅད་ལ་དམིགས་ཏེ་འགྲོ་བ་ཐམས་ཅད་བསྲུང་བའི་ཕྱིར་ཐམས་ཅད་མཁྱེན་པ་ཉིད་དུ་སེམས་བསྐྱེད་དོ། །སྙམ་ནས་བདག་གི་ལུས་ དང་སྲོག་ཡོངས་སུ་བཏང་སྟེ་གསད་པར་བྱ་བ་དེ་བླུས་ནས་དགེ་བའི་རྩ་བ་དེ་འདི་ལྟར་ཡོངས་སུ་བསྔོའོ། །སེམས་ཅན་ཐམས་ཅད་གཞན་གྱིས་གཙེ་བའི་སྡུག་བསྔལ་ཉེ་བར་བྱུང་བས་ ལུས་དང་སྲོག་ཤིན་ཏུ་མི་འཕྲོག་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ལས་ཐམས་ཅད་མཁྱེན་པའི་བྱང་ཆུབ་སྟོབས་བཅུར་ལུང་བསྟན་པའི་གནས་རབ་ཏུ་ཐོབ་ པར་གྱུར་ཅིག །སེམས་ཅན་ཐམས་ཅད་ངན་སོང་ཐམས་ཅད་ཀྱི་ལམ་ལས་ཡོངས་སུ་འདས་ཏེ་འཇིགས་པ་ཐམས་ཅད་ལས་རབ་ཏུ་ཐར་པར་གྱུར་ཅིག །སེམས་ཅན་ཐམས་ཅད་ འཆི་བ་མེད་པའི་ཡེ་ཤེས་ཀྱི་དབྱིངས་སུ་ཞུགས་པས་འཚོ་བ་ཐམས་ཅད་ཀྱི་སྐབས་རབ་ཏུ་རྙེད་པར་གྱུར་ཅིག །སེམས་ཅན་ཐམས་ཅད་དགེ་བའི་བཤེས་གཉེན་དེ་བཞིན་གཤེགས་ པས་ཡོངས་སུ་བཟུང་བས་དགྲས་འཇིགས་པ་ཐམས་ཅད་དང་བྲལ་བར་གྱུར་ཅིག །སེམས་ཅན་ཐམས་ཅད་ཁ་ན་མ་ཐོབ་མེད་པའི་ལས་དགེ་བ་ཐམས་ཅད་སྤྱོད་པས་རལ་གྲིས་གཙབ་ པ་ལྟ་བུའི་མི་བདེ་བ་ཐམས་ཅད་ལས་འདས་པར་གྱུར་ཅིག །སེམས་ཅན་ཐམས་ཅད་བྱང་ཆུབ་ཀྱི་ཤིང་དམ་པའི་དྲུང་དུ་ཕྱིན་ཅིང་འཇིགས་པ་མེད་པར་བདུད་ཀྱི་སྡེ་ཐམས་ཅད་རྣམ་པར་ འཐོར་བས་བག་ཚ་བ་དང༌། འཇིགས་ཤིང་སྐྲག་པ་ཐམས་ཅད་དང་བྲལ་བར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་ཆོས་ཀྱི་འཇིགས་པ་མེད་པས་རྣམ་པར་དག་ཅིང་ཁྱུ་ མཆོག་དང༌། སེངྒེའི་ང་རོ་འབྱིན་པས་འཁོར་གྱི་འཇིགས་པ་དང་བག་ཚ་བ་ཐམས་ཅད་དང་བྲལ་བར་གྱུར་ཅིག །སེམས་ཅན་ཐམས་ཅད་ཁ་ན་མ་ཐོ་བ་མེད་པའི་ལས་ལ་ཡང་དག་པར་ སྤྱོད་ཅིང་འགྲོ་བ་ཐམས་ཅད་ཀྱི་ནང་ན་བསྒྲིབས་པ་མེད་པའི་ཡེ་ཤེས་དང་ལྡན་པའི་སེངྒེར་གྱུར་ཅིག །སེམས་ཅན་ཐམས་ཅད་སྐྱེ་བོ་ཀུན་ཡོངས་སུ་སྐྱོང་བའི་སེམས་དང་ལྡན་ཞིང་འགྲོ་བ་ ཀུན་ཏུ་འཇིགས་པ་མེད་པའི་ཁང་པར་ཞུགས་པར་གྱུར་ཅིག །ཅེས་དེ་ལྟར་གསད་པར་གྱུར་བ་དག་བྱང་ཆུབ་སེམས་དཔའ་སེམས་དཔའ་ཆེན་པོས་རང་གི་ལུས་དང་སྲོག་བཏང་སྟེ་བླུས་ ༄༅། །ནས་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་འཁོར་བའི་བཙོན་རའི་སྡུག་བསྔལ་ཀུན་སྤངས་པ་དང༌། སངས་རྒྱས་ཐམས་ཅད་ཀྱི་བདེ་བ་མི་ སྤང་པའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལ་མགོ་ལས་གཙུག་ཕུད་དང་ཐོར་པག་ཏུ་བཅས་པ་བསླངས་ན། རྒྱལ་པོ་ གཙུག་ན་རིན་པོ་ཆེ་དང༌། བྱང་ཆུབ་སེམས་དཔའ་ཡན་ལག་དམ་པ་ཤིན་ཏུ་འཕགས་པ་དང༌། དེ་མ་ཡིན་པའི་བྱང་ཆུབ་སེམས་དཔའ་གཞན་དག་གིས་ཇི་ལྟར་བྱིན་པ་དེ་བཞིན་དུ་ དེས་སློང་བ་དེ་དག་མཐོང་ནས་གཏོང་བར་མོས་པའི་ཚིག་དགེ་བས་ཐོར་པག་དང་གཙུག་ཕུད་དུ་བཅོས་ཏེ་ཁྱེར་ཅིག །ཅེས་སྟོབ་ཅིང༌། ཀྱེ་ཚུར་ཤེག །བདག་གི་མགོ་ལས་གཙུག་ ཕུད་དང༌། ཐོར་པག་ཏུ་བཅས་པ་ལོངས་ཤིག །ཅེས་ནས་བྱང་ཆུབ་སེམས་དཔའ་འཛམ་བུའི་གླིང་ན་བཙུན་པ་མིའི་དམ་པ་དེས་ཡིད་རྩེ་གཅིག་ཏུ་བྱས་ཏེ་ཡིད་མ་འཁྲུགས་པ་ དང༌། ཡིད་མ་འདྲེས་པ་དང༌། ལས་གཞན་ལ་མི་སེམས་པའི་ཡིད་དང༌། འཇིག་རྟེན་ལས་འཕགས་པའི་ཡིད་དང༌། རབ་ཏུ་ཞི་བའི་ཡིད་དང༌། ཐམས་ཅད་མཁྱེན་པ་ཉིད་ཀྱི་ཡིད་ དང༌། དག་པའི་ཡིད་དང༌། དྲང་བའི་ཡིད་དང༌། རིག་པ་ལ་བརྩོན་པའི་ཡིད་ཀྱིས་གཙུག་ཕུད་དང༌། ཐོར་པག་ཏུ་བཅས་པ་དེ་སློང་བ་ལ་གཏོང་བའི་ཚེ་གཙུག་ཕུད་དང༌། ཐོར་པག་ཏུ་བཅས་ པར་ཚོན་གྱིས་ཕོག་སྟེ་མགོ་ལས་ཕབ་ནས་པུས་མོ་གཡས་པའི་ལྷ་ང་ས་ལ་བཅུགས་ཏེ་རིམ་གྲོ་དང་བཅས་པའི་ལུས་ཀྱིས་སོར་མོ་བཅུའི་ཐལ་མོ་སྦྱར་ནས་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་བྱང་ཆུབ་ཀྱི་སྤྱོད་པ་རྗེས་སུ་དྲན་པའི་སེམས་བསྐྱེད་པ་དང༌། དགའ་བས་རྣམ་པར་སྤེལ་བའི་ལྷག་པའི་བསམ་པ་དང༌། ཆོས་ཀྱིས་ཡོངས་སུ་ རྒྱས་པའི་ཡིད་ཀྱི་དབང་དང༌། སྡུག་བསྔལ་གྱི་ཚོར་བས་དེངས་པར་མི་འགྱུར་བའི་ཡིད་ཀྱི་དབང་པོ་དང༌། སྡུག་བསྔལ་གྱི་ཚོར་བ་སྐྱེ་བའི་མཚན་ཉིད་དང་ཐ་དད་པར་ཁོང་དུ་ཆུད་པ་དང༌། ཚོར་བ་གཅིག་ནས་གཅིག་ཏུ་བརྒྱུད་པ་དེ་དག་ཐམས་ཅད་མི་རྟག་གོ །ཞེས་བྱ་བར་རབ་ཏུ་ཤེས་པ་དང༌། བྱང་ཆུབ་སེམས་དཔའ་འདས་པ་དང༌། མ་འོངས་པ་དང༌། ད་ལྟར་བྱུང་བ་ཐམས་ ཅད་དང་རྒྱུད་ཀྱི་ཚུལ་གཅིག་ཏུ་གྱུར་པའི་གཏོང་བའི་སེམས་དང༌། སེམས་ཅན་ཐམས་ཅད་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ལས་ཕྱིར་མི་ལྡོག་པ་དང༌། བྱང་ཆུབ་སེམས་དཔའི་སྤྱོད་པ་ལྷག་པའི་བསམ་ པའི་རྣམ་པས་ཐོབ་པ། གཞན་གྱི་དྲིང་མི་འཇོག་པས་དགེ་བའི་བཤེས་གཉེན་གྱིས་བསྟན་པའི་ཚུལ་ལ་གནས་ཏེ་གཙུག་ཕུད་དང༌། ཐོར་པག་ཏུ་བཅས་པ་མགོ་ལས་ཕོག་སྟེ་ཡོངས་སུ་གཏོང་ པའི་ཚེ་དགེ་བའི་རྩ་བ་དེ་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་བྱང་ཆུབ་སེམས་དཔའི་གཙུག་གི་མཆོད་རྟེན་དུ་གྱུར་ཏེ་གཙུག་གཏོར་བལྟར་མི་སྣང་བར་གྱུར་ཅིག །སེམས་ཅན་ ༄༅། །ཐམས་ཅད་སྐྲ་ཤིན་ཏུ་ཕྲ་བ་དང༌། ཉོན་མོངས་པ་ཐམས་ཅད་རྣམ་པར་བསལ་ཅིང་སྐྲ་རྡོ་རྗེ་ནག་པོའི་དམ་པ་ལྟ་བུར་གྱུར་ཅིག །སེམས་ཅན་ཐམས་ཅད་སྐྲ་སྟུག་ ཅིང་སྐྲ་མཚམས་ལེགས་པ་དང༌། སྐྲ་སྣུམ་པར་གྱུར་ཅིག །སེམས་ཅན་ཐམས་ཅད་མགོ་ལེགས་པ་ལས་ཤིན་ཏུ་ལེགས་པར་སྐྱེས་པའི་སྐྲ་རབ་ཏུ་འཇམ་པ་དང་ལྡན་པར་གྱུར་ཅིག ། སེམས་ཅན་ཐམས་ཅད་སྐྲ་དགའ་བ་འཁྱིལ་བ་ལྟར་གཡས་ཕྱོགས་སུ་འཁྱིལ་ཅིང་དཔལ་གྱི་བེའུ་དང༌། བཀྲ་ཤིས་ཀྱི་སྐྲ་དང་ལྡན་པར་གྱུར་ཅིག །སེམས་ཅན་ཐམས་ཅད་ཉོན་མོངས་ པ་དང༌། ཉེ་བའི་ཉོན་མོངས་པ་ལས་རྣམ་པར་འདས་ཤིན་སངས་རྒྱས་ཀྱི་མཚན་དང་ལྡན་པའི་སྐྲ་ཐོབ་པར་གྱུར་ཅིག །སེམས་ཅན་ཐམས་ཅད་ཕྱོགས་བཅུའི་འཇིག་རྟེན་དུ་འགྲོ་བ་ ཐམས་ཅད་རྒྱས་པར་རང་གི་སྐྲ་ལས་འོད་ཟེར་རབ་ཏུ་འགྱེད་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་དབུ་ཤིན་ཏུ་རྣམ་པར་དག་པ་ལྟར་སྐྲ་ཤིན་ཏུ་མཛེས་པར་ གྱུར་ཅིག །སེམས་ཅན་ཐམས་ཅད་སེམས་མ་ཉམས་ཤིང་སངས་རྒྱས་ཀྱི་དབུ་སྐྲ་དང༌། དབུ་ལྟ་བུར་མཛེས་པ་དང་ལྡན་པས་སྤྱི་བོ་ལ་གཞག་པའི་མཆོད་རྟེན་དུ་འོས་པའི་སྐྲ་དང་ ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་དབུ་ལྟར་ཆགས་པ་མེད་པའི་སྐྲ་མཛེས་པར་སྐྱེས་པས་མུན་པ་དང་རྡུལ་མི་ཆགས་པ་དང་ལྡན་པར་གྱུར་ཅིག །ཅེས་དེ་ ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ཕུད་དང་ཐོར་པག་ཏུ་བཅས་པ་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་ ས་ལྟ་བུར་ཤིན་ཏུ་ཞི་བའི་སེམས་ཡོངས་སུ་རྫོགས་པར་བྱ་བ་དང༌། ཐམས་ཅད་མཁྱེན་པའི་སྟོབས་བཅུའི་མཐས་གཏུགས་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་ བྱང་ཆུབ་སེམས་དཔའ་སེམས་དཔའ་ཆེན་པོ་སློང་བ་རྣམས་ལ་ཇི་ལྟར་བྱང་ཆུབ་སེམས་དཔའ་དགའ་བ་བྱེད་པ་དང༌། རྒྱལ་པོ་ཟླ་འོད་དང༌། དེ་མ་ཡིན་པའི་བྱང་ཆུབ་སེམས་དཔའ་ཚད་ མེད་པ་གཞན་དག་གིས་གཏོང་བའི་མིག་ཡོངས་སུ་སྦྱངས་པའི་སེམས་དང༌། ཡེ་ཤེས་ཀྱི་མིག་ཡོངས་སུ་སྦྱངས་པའི་བློ་དང༌། ཆོས་ཀྱི་སྣང་བ་རབ་ཏུ་ཐོབ་པའི་ཡིད་ཀྱི་གནས་ དང༌། བླ་ན་མེད་པའི་སངས་རྒྱས་མངོན་དུ་གྱུར་པའི་ཡིད་ཀྱི་རྣམ་པ་དང༌། མངོན་པར་ཤེས་པ་ཐམས་ཅད་ཀྱི་མཐར་ཐུག་པའི་ཡོངས་སུ་བསྔོ་བ་དང༌། ཡེ་ཤེས་ཀྱི་སྐྱེ་མཆེད་ལ་ཡང་ དག་པར་བཏང་བའི་སེམས་དང༌། དུས་གསུམ་གྱི་བྱང་ཆུབ་སེམས་དཔའ་དང་མཉམ་པར་བྱས་པའི་སྦྱིན་པ་དང༌། གཏོང་བའི་སེམས་དང༌། ཞེ་སྡང་བ་མེད་པའི་མིག་གིས་དད་པ་ མི་ལྡོག་པའི་དབང་དང༌། སློང་བ་རྣམས་ལ་ཕན་འདོགས་པའི་སེམས་དང༌། སངས་རྒྱས་ཀྱི་སྤྱན་ལ་གཞོལ་བས་བྱང་ཆུབ་སེམས་དཔའི་ཐེག་པ་ཆེན་པོ་དང༌། བྱམས་པ་དང༌། སྙིང་རྗེ་ ༄༅། །ཡོངས་སུ་སྒོམ་པ་དང༌། དབང་པོ་དྲུག་ཤིན་ཏུ་བསྡམས་པས་སློང་བ་རྣམས་ལ་མིག་བྱིན་པ་དེ་བཞིན་དུ། དེ་ཡང་མིག་ཡོངས་སུ་གཏོང་ཞིང་ཆོས་དེ་ ལྟ་བུ་ལ་ཞུགས་པའི་སེམས་ཀྱིས་སློང་བ་དང༌། འདོད་པ་དག་ལ་སྦྱིན་པ་བྱེད་ཅིང་མཆོད་སྦྱིན་གྱི་དོན་ལ་འཇུག་པ་དང༌། ཆོས་ཀྱི་མཐུ་ཤིན་ཏུ་བསྐྱེད་པ་དང༌། འཇིག་རྟེན་ཐམས་ ཅད་ཀྱི་དགའ་བར་ལྟ་བ་དང༌། བག་མེད་པའི་སྲེད་པ་རྣམ་པར་ཟློག་པར་བྱེད་པ་དང༌། འཇིག་རྟེན་གྱི་དགའ་བ་དང༌། འདོད་པ་སྣ་ཚོགས་མཐོང་བས་རང་གི་དགའ་བ་ཁོང་དུ་ཆུད་ པར་བྱེད་པ་དང༌། བྱང་ཆུབ་སེམས་དཔའི་དགའ་བ་མྱོང་བར་བྱེད་པ་དང༌། ཅི་བསླངས་པའི་དངོས་པོས་ཁ་མི་སྟོང་བར་བྱེད་པ་དང༌། མི་གཉིས་པའི་སྦྱིན་པ་རྗེས་སུ་སྲུང་བ་དང༌། རློམ་སེམས་མེད་པས་ཤིན་ཏུ་སྦྱིན་པ་ཡོངས་སུ་གཏོང་བ་དང༌། སློང་བ་རྣམས་ཀྱིས་དངོས་པོ་ཅི་བསླངས་པ་སྦྱིན་པར་བྱེད་པའི་ཚེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་ བའི་རྩ་བ་འདིས་སེམས་ཅན་ཐམས་ཅད་འགྲོ་བ་ཐམས་ཅད་ཀྱི་མིག་ཏུ་གྱུར་ཏེ་མིག་གི་དམ་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་མཛོད་ཤིན་ཏུ་ཡངས་པས་ཉམས་པ་ མེད་པའི་མིག་ཏུ་གྱུར་ཅིག །སེམས་ཅན་ཐམས་ཅད་སྣང་བ་མི་འཕྲོག་པ་དང་ལྡན་ཞིང་ཤའི་མིག་རྣམ་པར་དག་པ་ཡོངས་སུ་གྲུབ་པར་གྱུར་ཅིག །སེམས་ཅན་ཐམས་ཅད་འཆི་འཕོ་ དང་སྐྱེ་བ་ཤེས་ཤིང་ལྷའི་མིག་རྣམ་པར་དག་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་ཀྱི་རྗེས་སུ་འདོང་ཞིང་ཆོས་ཀྱི་མིག་རབ་ཏུ་ཐོབ་པར་གྱུར་ཅིག ། སེམས་ཅན་ཐམས་ཅད་གཏོང་བ་ཐམས་ཅད་རྣམ་པར་སྟོན་པས་ཤེས་རབ་ཀྱི་མིག་ཐོབ་པར་གྱུར་ཅིག །སེམས་ཅན་ཐམས་ཅད་ཆོས་ཐམས་ཅད་མངོན་པར་འཚང་རྒྱ་བའི་ཕྱིར་སངས་ རྒྱས་ཀྱི་སྤྱན་དང་ལྡན་པར་གྱུར་ཅིག །སེམས་ཅན་ཐམས་ཅད་ཆགས་པ་མེད་པའི་མིག་གི་མཐར་ཐུག་སྟེ་ཀུན་ཏུ་ལྟ་བའི་མིག་དང་ལྡན་པར་གྱུར་ཅིག །སེམས་ཅན་ཐམས་ཅད་སེམས་ ཅན་གྱི་ཁམས་ཡོངས་སུ་ཤེས་ཤིང་རབ་རིམ་མེད་པའི་མིག་དང་ལྡན་པར་གྱུར་ཅིག །སེམས་ཅན་ཐམས་ཅད་སྟོབས་བཅུ་མངའ་བའི་དེ་བཞིན་གཤེགས་པར་ཕྱིན་པས་བསྒྲིབས་པའི་ མིག་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་མིག་ཡོངས་སུ་གཏོང་བ་ན་ཐམས་ཅད་མཁྱེན་པའི་ཚད་ཀྱི་མིག་གི་ཆོས་སེམས་ཅན་ཐམས་ ཅད་ཡོངས་སུ་བསྔོ་བ་ལ་ཉེ་བར་འགོད་དོ། །བམ་པོ་སུམ་ཅུ་རྩ་བདུན་པ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་རྒྱལ་པོ་ཁྱད་པར་དུ་འགྲོ་བ་དང༌། བྱང་ཆུབ་ སེམས་དཔའ་མདུད་པ་མེད་པའི་སྤྱི་གཙུག་གིས་ཡོངས་སུ་བཏང་བ་བཞིན་དུ་སློང་བར་ཉེ་བར་འོངས་པ་ལ་བྱང་ཆུབ་སེམས་དཔའི་སྤྱོད་པ་བླངས་པའི་སེམས་དང༌། དེ་བཞིན་གཤེགས་ ༄༅། །པའི་རིགས་སུ་རིགས་དང་ལྡན་པར་བྱུང་བས་སངས་རྒྱས་ཀྱི་རིགས་སུ་བྱུང་བའི་སྦྱིན་པའི་སེམས་དང༌། བྱང་ཆུབ་སེམས་དཔའ་ཐམས་ཅད་རྗེས་སུ་དྲན་ པའི་སྤྱོད་པ་ལ་བརྩོན་པ་དང༌། སངས་རྒྱས་ཀྱི་བྱང་ཆུབ་ཏུ་མཐུན་པར་སྐྱེས་པ་དང༌། དབང་པོ་དང༌། ཡེ་ཤེས་དང༌། ཡོན་ཏན་གྱིས་ཤིན་ཏུ་བཙུན་པ་དང༌། ཁམས་གསུམ་མ་ དག་ཅང་སྙིང་པོ་མེད་པ་ལ་སྙིང་པོར་རབ་ཏུ་རྟོག་པ་དང༌། སངས་རྒྱས་དང༌། བྱང་ཆུབ་སེམས་དཔའ་བལྟ་བ་རབ་ཏུ་ཐོབ་པས་རང་གི་ལུས་ལ་ཆགས་པ་མེད་པའི་སེམས་དང༌། གནས་ མེད་པའི་སངས་རྒྱས་ཀྱི་ཆོས་ཐམས་ཅད་རྗེས་སུ་དྲན་པར་གནས་པ་དང༌། རྡུལ་བ་དང༌། ཞི་བའི་སེམས་དང༌། དབང་པོའི་རྒྱུ་བ་ཤིན་ཏུ་ཞི་བ་དང༌། འགྲོ་བའི་མྱ་ངན་ཐམས་ ཅད་ནས་སེམས་ཅན་ཐམས་ཅད་གདོན་པར་སེམས་པའི་ཡེ་ཤེས་འབྱུང་བའི་ཤེས་རབ་དང༌། བསོད་ནམས་ཀྱི་འབྱུང་གནས་དང༌། རྒྱུད་ཆེད་དུ་བརྗོད་པ་རྒྱ་མཚོས་གཏོང་བའི་ སེམས་ཡངས་པར་བྱས་པ་དང༌། དོན་ལ་རྣམ་པར་ངེས་པའི་ཆོས་དང༌། མགོན་པོ་ཐམས་ཅད་ཀྱི་ལམ་དུ་འཇུག་པ་དང༌། ཆོས་ཀྱི་དབང་ཕྱུག་ལ་ཡེ་ཤེས་ཀྱིས་སྤྱོད་པ་དང༌། རང་གི་ལུས་སྙིང་པོ་མེད་པ་ལས་སྙིང་པོ་བླང་པའི་བློས་ཡོངས་སུ་གཏོང་བའི་ཚེ་རྣ་བ་དང༌། སྣ་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་བ་དེ་འདི་ལྟར་ཡོངས་ སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཆོས་ཐམས་ཅད་ཀྱི་སྒྲ་རྣམ་པར་རིག་པར་བྱ་བ་ལ་ཆགས་པ་མེད་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་ ཀྱིས་སྒྲ་ཐམས་ཅད་སྐད་ཇི་ལྟ་བ་བཞིན་དུ་ཤེས་པར་བྱ་བའི་ཕྱིར་བསྒྲིབས་པ་མེད་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་སྙན་དང་ལྡན་པས་ཐོགས་ པ་མེད་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་རྣ་བའི་སྐྱེ་མཆེད་ཤིན་ཏུ་བསྒོམས་པས་རྣ་བ་རྣམ་པར་དག་པར་གྱུར་ཅིག །སེམས་ཅན་ཐམས་ཅད་རྣམ་པར་ ཤེས་པ་ཞི་བ་སྐྱེ་བའི་ཕྱིར་བསྒྲིབས་པ་མེད་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་གསུང་ཁོང་དུ་ཆུད་པའི་ཕྱིར་ཆོས་ཀྱི་དབྱིངས་ལ་ གཞོལ་བའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་བསྒྲིབས་པ་མེད་པའི་ཆོས་རྣམ་པར་རིག་པར་བྱ་བའི་ཕྱིར་གནས་མེད་པའི་རྣ་བ་དང་ལྡན་པར་གྱུར་ཅིག །སེམས་ ཅན་ཐམས་ཅད་ཕྱིར་རྒོལ་བ་འཇིག་པར་བྱེད་པའི་ཤེས་པ་ལ་མི་ཕྱེད་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་རྣ་བ་ཤིན་ཏུ་དག་པ་ལ་དབང་སྒྱུར་བས་ཀུན་ཏུ་ འཇུག་པའི་རྣ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་སྙན་རང་ཏུ་འཐོབ་པར་བྱ་བ་ཐོབ་པས་ལྷའི་རྣ་བ་རབ་ཏུ་ཐོབ་པར་གྱུར་ཅིག །ཅེས་དེ་ལྟར་བྱང་ཆུབ་ ༄༅། །སེམས་དཔའ་སེམས་དཔའ་ཆེན་པོས་རྣ་བ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་རྣ་བ་རྣམ་ པར་དག་པའི་ཕྱིར་ཡོངས་སུ་བསྔོས་ནས་སྣ་རྣམ་པར་དག་པར་ཡོངས་སུ་བསྔོ་སྟེ། སེམས་ཅན་ཐམས་ཅད་ལེགས་པར་མཐོ་བའི་སྣ་དང༌། དཔེ་བྱད་བཟང་པོའི་སྣ་དང༌། མཚན་ བཟང་པོའི་སྣ་དང༌། ཤིན་ཏུ་ཡིད་དུ་འོང་པའི་སྣ་དང༌། རྣམ་པར་དག་པའི་སྣ་དང༌། རིམ་གྱིས་གཞོལ་བའི་སྣ་དང༌། མཛེས་པར་འཕགས་པའི་སྣ་དང༌། དགྲ་ཐམས་ཅད་རབ་ཏུ་ འདུལ་བའི་སྣ་དང༌། ངོ་བལྟ་ན་སྡུག་པའི་སྣ་དང༌། དེ་བཞིན་གཤེགས་པའི་སངས་རྒྱས་ཀྱི་ཤངས་རབ་ཏུ་འཐོབ་པའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ ངོ་ལ་མི་སྡུག་པ་མེད་པ་དང༌། ཆོས་ཐམས་ཅད་ཀྱི་ངོ་དང༌། ཆགས་པ་མེད་པའི་ངོ་དང༌། བལྟ་ན་སྡུག་པའི་ངོ་དང༌། མི་མཐུན་པ་མེད་པའི་ངོ་དང༌། ཤིན་ཏུ་རྣམ་པར་དག་པའི་ངོ་ དང༌། ཁ་ན་མ་ཐོ་བ་མེད་པའི་ངོ་དང༌། དེ་བཞིན་གཤེགས་པའི་ཞལ་གྱི་དཀྱིལ་འཁོར་ལྟ་བུའི་ངོ་དང༌། ཀུན་ནས་ལྟ་བའི་ངོ་དང༌། ཡིད་དུ་འོང་ཞིང་ཚད་མེད་པའི་ངོ་དང་ལྡན་ པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣ་བ་དང༌། སྣ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ ཅད་ལ་ཡོངས་སུ་བསྔོ་སྟེ། ཅི་ནས་ཀྱང་སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་ལ་རབ་ཏུ་འཇུག་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ ཐམས་ཅད་ཤིན་ཏུ་འདུས་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཐམས་ཅད་ཤིན་ཏུ་ཤེས་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ ཅད་སངས་རྒྱས་ཀྱི་ཆོས་ཐམས་ཅད་ལ་ཤིན་ཏུ་འཇུག་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཀྱིས་དེ་བཞིན་གཤེགས་པ་ཐམས་ཅད་ཤིན་ཏུ་མཐོང་བར་འགྱུར་བ་དང༌། ཅི་ ནས་ཀྱང་སེམས་ཅན་ཐམས་ཅད་ཀྱི་སངས་རྒྱས་ཀྱི་ཆོས་ཀྱི་སྒོ་ཁོང་དུ་ཆུད་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཤིན་ཏུ་ཟིལ་གྱིས་མི་ནོན་པའི་ཡོངས་སུ་དག་པ་ཐོབ་པར་ འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཐམས་ཅད་ལ་སྣང་བ་རབ་ཏུ་འཐོབ་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཀྱིས་སངས་རྒྱས་ ཀྱི་ཞིང་ཐམས་ཅད་ཡོངས་སུ་དག་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པའི་ལུས་དང་ལྡན་པར་འགྱུར་བ་དེ་ལྟ་ དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱིད་པ་ཟིལ་གྱིས་མི་ནོན་པའི་ས་ལ་གནས་ཏེ་ཨུ་དུམ་ཝར་ལྟར་ཤིན་ཏུ་དཀོན་ ༄༅། །པར་སེམས་པའི་སེམས་རྣམ་པར་དག་པ་དང༌། གཏོང་བ་མི་དད་ཅིང་འབྱམས་ཀླས་པ་དང༌། དད་ཅིང་རླུང་སྤྲུགས་ཏེ་བཏང་བའི་སེམས་དང༌། ཡོངས་སུ་ གཏོང་བའི་བློ་མཐའ་ཡས་པ་དང༌། དུལ་བ་དང༌། ཡོངས་སུ་དུལ་བའི་ཡིད་ཀྱིས་གཏོང་བའི་དབང་པོ་དང༌། གཏོང་བ་ཐམས་ཅད་ཡོངས་སུ་གཏོང་བའི་མཐར་ཐུག་པའི་ཐམས་ཅད་ མཁྱེན་པའི་སྨོན་ལམ་དང༌། འགྲོ་བ་ཐམས་ཅད་བདེ་བར་བྱེད་པའི་གཏོང་བའི་འབྲས་བུ་དང༌། གཏོང་བ་ཆེན་པོ་དང༌། ཤིན་ཏུ་གཏོང་བ་དང༌། རབ་ཏུ་གཏོང་བ་དང༌། མཆོག་ ཏུ་གཏོང་བའི་སེམས་ཀྱིས་རང་གི་ལུས་དང༌། ཡན་ལག་དང༌། གདོང་གིས་ཀྱང་ཕན་འདོགས་པ་དང༌། མི་སྨོན་པར་གཏོང་བའི་སེམས་ཀྱིས་རྣམ་པ་དེ་ལྟ་བུའི་ཆོས་ལ་རབ་ཏུ་གནས་ཏེ། ཇི་ལྟར་རྒྱལ་པོ་མེ་ཏོག་སོ་དང༌། གླང་པོའི་རྒྱལ་པོ་མཆེ་བ་དྲུག་པས་སོ་ཇི་ལྟར་བྱིན་པ་དེ་བཞིན་དུ་རང་གི་ལུས་དང༌། ཁ་ནས་སོ་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་འདི་ ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་འགྲོ་བ་ཀུན་གྱིས་མཆོད་རྟེན་དུ་མཆོད་པར་འོས་པར་གྱུར་ཏེ་མཆེ་བ་དཀར་ཞིང་རྣོ་བ་དང་ལྡན་པར་གྱུར་ཅིག །སེམས་ཅན་ཐམས་ ཅད་སངས་རྒྱས་ཀྱི་མཚན་རབ་ཏུ་ཐོབ་པས་སོ་མཉམ་ཞིང་ཐགས་བཟང་བར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ལ་ལེགས་པར་ ཞུགས་ཤིང་དུལ་བའི་སེམས་ཀྱིས་ཉེ་བར་སྤྱོད་པར་གྱུར་ཅིག །སེམས་ཅན་ཐམས་ཅད་གདོང་གི་དཀྱིལ་འཁོར་བལྟ་ན་སྡུག་ཅིང་ཁའི་ནང་དང་སོ་རྣམ་པར་དག་པར་གྱུར་ཅིག །སེམས་ཅན་ ཐམས་ཅད་ཁ་དང་སོ་དཔེ་མེད་པར་རྣམ་པར་དག་ཅིང་བཞིན་དྲན་པའི་རྒྱན་གྱིས་བརྒྱན་པར་གྱུར་ཅིག །སེམས་ཅན་ཐམས་ཅད་སོ་བཟང་པོའི་གསེབ་ནས་སྤོས་ཞིམ་པོའི་མཆོག་གྲངས་མེད་ པ་ཡིད་དུ་འོང་བ་དགའ་བ་སྐྱིད་པའི་ངད་འབྱུང་བས་ཡོངས་སུ་དག་ཅིང་སོ་བཞི་བཅུ་ཚང་བ་དང་ལྡན་པར་གྱུར་ཅིག །སེམས་ཅན་ཐམས་ཅད་ཤིན་ཏུ་དུལ་བའི་སོ་རབ་ཏུ་ཐོབ་ཅིང་བཀྲ་ ཤིས་དང༌། དགའ་བ་འཁྱིལ་བ་དང༌། པདྨོ་སྣ་ཚོགས་ཀྱིས་མཛེས་པར་བྲིས་པའི་སོ་དང་ལྡན་པར་གྱུར་ཅིག །སེམས་ཅན་ཐམས་ཅད་གདོང་གི་དཀྱིལ་འཁོར་ནས་ཚད་མེད་པའི་འོད་ ཟེར་སྣང་བ་འབྱུང་བས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་མཐའ་ཡས་པ་རབ་ཏུ་འབྱུང་བའི་སོ་དང་ལྡན་པར་གྱུར་ཅིག །སེམས་ཅན་ཐམས་ཅད་ཁ་ཟས་ལ་མ་ཆགས་མ་ཞེན་ཅིང་ཁ་ ན་མ་ཐོ་བ་མེད་པར་སྤྱོད་པས་སྦྱིན་པའི་གནས་དམ་པའི་མཐར་ཐུག་པར་གྱུར་ཏེ་སོའི་ཐགས་ལེགས་ཤིང་འབྲས་ཅན་ཁ་ཕྱེ་བ་ལྟ་བུར་གྱུར་ཅིག །སེམས་ཅན་ཐམས་ཅད་བྱང་ཆུབ་ སེམས་དཔའི་དམ་པ་ལུང་སྟོན་ཅིང་སོའི་གསེབ་ཀུན་ནས་འོད་འཕྲོ་བ། ཁ་དོག་མཐའ་ཡས་པའི་སྣང་བ་འབྱུང་བ་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སོའི་ ༄༅། །སྦྱིན་པས་ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་མ་ལུས་པ་ཐམས་ཅད་མཁྱེན་པ་ཉིད་དུ་ཡང་དག་པར་བསྐྱེད་པ་དང༌། ཆགས་པ་ མེད་པའི་རྒྱན་གྱིས་ཆོས་ཐམས་ཅད་ཤེས་པ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ལྕེ་བསླངས་ན། ཇི་ལྟར་ རྒྱལ་པོ་བཞིན་བཟང་དང༌། བྱང་ཆུབ་སེམས་དཔའ་ཕྱིར་མི་ལྡོག་པ་དང༌། དེ་མ་ཡིན་པའི་བྱང་ཆུབ་སེམས་དཔའ་གཞན་དག་གིས་ཀྱང་སྐྱེ་བའི་སྐྱེ་མཆེད་རྣམ་པ་སྣ་ཚོགས་དག་ལ་ གནས་ཤིང་ཚེ་རབས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་དེ་དང་དེ་དག་ཏུ་ཡོངས་སུ་བཏང་བར་གྱུར་པ་དེ་བཞིན་དུ། ངས་ཀྱང་སློང་བ་དེ་དག་རྒྱལ་པོ་ལ་འོས་པའི་སེངྒེའི་གདན་དག་ ལ་བཀོད་ཅིང་སློང་བས་མོས་པའི་སེམས་ཀྱིས་ཡིད་དུ་འོང་ཞིང་འཇམ་པའི་ངག་དང༌། བྱམས་པ་ལ་སྤྱོད་པའི་སེམས་ཀྱིས་རང་གི་ལྕེ་གཏོང་བའི་ཚེ། གཤེ་བ་མེད་པའི་སེམས་དང༌། རྨ་མེད་ པའི་སེམས་དང༌། ཉམས་པ་མེད་པའི་སེམས་དང༌། རིགས་ཆེན་པོའི་རིགས་དང་ལྡན་པའི་སེམས་དང༌། སངས་རྒྱས་ཀྱི་རིགས་སུ་བྱུང་བའི་སེམས་དང༌། བྱང་ཆུབ་ཀྱི་ སེམས་ལ་དགོད་ཅིང་གཞག་པའི་སེམས་དང༌། རྒྱུད་འཁྲུགས་པ་མེད་པའི་སེམས་དང༌། མཐུ་སྟོབས་ཆེན་པོའི་ཤུགས་ཀྱི་སེམས་དང༌། ལུས་ལ་མ་ཆགས་པའི་སེམས་ དང༌། ཚིག་ཏུ་བརྗོད་པ་ལ་ཆགས་པ་མེད་པའི་སེམས་སུ་བྱས་ཏེ་པུས་མོའི་ལྷ་ང་ས་ལ་བཙུགས་ཤིང་བདག་གི་ཁ་ནས་ལྕེ་བྱུང་སྟེ་ལུས་ཐམས་ཅད་ལ་སློང་བ་དབང་བྱེད་དུ་བཅུག་ནས་ ཚིག་མཉེན་ཞིང་འཇམ་པ་དང༌། ཡིད་དུ་འོང་བ་དང༌། བྱམས་པར་སྤྱོད་པས་ཚིག་ཏུ་བརྗོད་ཅིང༌། ཅི་ནས་ཀྱང་ཁྱེད་དགའ་ཞིང་ཡིད་བདེ་བ་དང༌། མགུ་ཞིང་རངས་པར་བདག་གི་ལྕེ་ ལོངས་ལ། གང་དུ་དགོས་པ་དེའི་དགོས་པ་སྒྲུབས་ཤིག །ཅེས་ནས་དེ་ལྕེ་སྦྱིན་ཞིང་ཡོངས་སུ་གཏོང་བའི་ཚེ་ལྕེ་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་བ་དེ་འདི་ལྟར་ ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཚིག་གི་ཚུལ་ཐམས་ཅད་ཀྱིས་ཤེས་པར་བྱེད་པའི་ཕྱིར་ལྕེ་ཤིན་ཏུ་ཡངས་པ་དང་ལྡན་པར་གྱུར་ཅིག །སེམས་ཅན་ ཐམས་ཅད་ཡང་དག་པ་ཇི་ལྟ་བ་བཞིན་གྱི་ཚིག་བདེན་པ་གཉིས་སུ་བྱ་བ་མེད་པ་དང་ལྡན་པར་གྱུར་ཏེ་གདོང་གི་དཀྱིལ་འཁོར་ཁེབས་པའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ ཅད་སངས་རྒྱས་ཐམས་ཅད་ཀྱི་ཆོ་འཕྲུལ་དང༌། རྣམ་པར་འཕྲུལ་པ་ཡང་དག་པར་སྟོན་པའི་ཕྱིར་སངས་རྒྱས་ཀྱི་ཞིང་ཐམས་ཅད་དུ་ཁྱབ་པའི་ལྕེ་དང་ལྡན་པར་གྱུར་ཅིག །སེམས་ཅན་ ཐམས་ཅད་རོ་བྲོ་བའི་མཆོག་ཤིན་ཏུ་རྣམ་པར་དག་པ་དང་ལྡན་ཞིང་ཤིན་ཏུ་བསླབ་པའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གྱི་ཚིག་ཤེས་པས་ཐེ་ཚོམ་ ༄༅། །གཅོད་པའི་ཕྱིར་ངེས་པའི་ཚིག་གི་དབྱིངས་མཐའ་ཡས་པ་ཡོད་པའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་ལྕེའི་མཛོད་ནས་འོད་ཟེར་བྱེ་བ་ ཁྲག་ཁྲིག་བརྗོད་དུ་མེད་པའི་ཡང་བརྗོད་དུ་མེད་པ་འགྱེད་པའི་ཕྱིར་སྣང་བ་མཐའ་ཡས་པ་འབྱུང་བའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་ཆོས་ཐམས་ཅད་རྣམ་པར་ ངེས་པའི་སྤོབས་པའི་ཚོགས་མི་ཟད་པས་སྟོན་ཅིང་བརྗོད་པས་ཚིག་ཤིན་ཏུ་ངེས་པ་བརྗོད་པའི་ལྕེ་དང་ལྡན་པར་གྱུར་ཅིག །སེམས་ཅན་ཐམས་ཅད་སྤྱོད་པ་ཀུན་བརྗོད་པ་ཚད་མེད་ པའི་མཛོད་ཀྱི་ལྕེ་དང་ལྡན་ཞིང་འདུལ་བའི་མཐའ་དང་མཉམ་པར་སེམས་ཅན་ཀུན་གྱི་ཚིག་ཐམས་ཅད་དང༌། སྨྲ་བ་ཐམས་ཅད་རྣམ་པར་འགྲེལ་བའི་ལྕེ་དང་ལྡན་པར་གྱུར་ཅིག ། སེམས་ཅན་ཐམས་ཅད་སྤྱོད་པ་རྗེས་སུ་རྗོད་པའི་ཚིག་གི་རྒྱ་མཚོ་ཐམས་ཅད་ལ་རབ་ཏུ་ཞུགས་པས་དབྱངས་ཀྱི་ཚོགས་དང༌། ཚིག་གི་རྣམ་པར་ཤེས་པའི་ལྕེ་དང་ལྡན་པར་ གྱུར་ཅིག །སེམས་ཅན་ཐམས་ཅད་སྤྱོད་པ་ཐམས་ཅད་མངོན་པར་རྗོད་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ཐོབ་ཅིང་ཆོས་ཐམས་ཅད་ཀྱི་ཚིག་ཐམས་ཅད་ཤིན་ཏུ་སྟོན་པའི་ལྕེ་དང༌། ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་མཁྱེན་པ་ཉིད་དུ་དམིགས་པའི་སྨོན་ལམ་ལ་རབ་ཏུ་བརྩོན་པ་དེ་ལྕེ་ཡོངས་སུ་བཏང་བས་ ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་བསྒྲིབས་པ་མེད་པའི་ཡེ་ཤེས་ཆགས་པ་མེད་པ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །འདི་ ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་དམ་པ་མགོ་ལྟ་བུའི་ཡེ་ཤེས་ལ་འཇུག་ཅིང༌། སེམས་ཅན་ཐམས་ཅད་ཡོངས་སུ་བསྐྱབ་པའི་མགོ་བྱང་ཆུབ་ ཁོང་དུ་ཆུད་པར་བྱེད་པ་དང༌། ཆོས་ཐམས་ཅད་ཀྱི་མཆོག་ཚུལ་གྱི་མགོ་དང་ལྡན་པར་བྱ་བའི་ཕྱིར་ཡང་དག་པར་ལྟ་བ་དང༌། ཡེ་ཤེས་རྣམ་པར་དག་པའི་མགོ་ལ་ཡང་དག་པར་ལྟ་བ་དང༌། བསྒྲིབས་པ་མེད་པའི་མགོ་ཡོངས་སུ་སྒྲུབ་པ་དང༌། ས་དམ་པའི་མགོ་རྗེས་སུ་ལྟ་བ་དང༌། འགྲོ་བ་ཐམས་ཅད་ཀྱི་ཡེ་ཤེས་དམ་པ་མགོ་ལྟ་བུ་འདོད་ཅིང་ཚོལ་བ་དང༌། ཁམས་གསུམ་པ་ ཐམས་ཅད་ཀྱིས་བལྟར་མེད་པའི་ཡེ་ཤེས་ཀྱི་མགོའི་དམ་པ་ཡང་དག་པར་སྒྲུབ་པ་དང༌། ཕྱོགས་ཐམས་ཅད་དུ་ཕྱིན་པའི་ཡེ་ཤེས་ཀྱི་རྒྱལ་པོའི་མགོ་ལ་མངོན་པར་མོས་པར་བྱེད་པ་དང༌། ཆོས་ཐམས་ཅད་ལ་དབང་བྱེད་པ་ཟིལ་གྱིས་མི་ནོན་པའི་མགོ་ཡོངས་སུ་གྲུབ་པར་བྱེད་ཅིང༌། དེ་ལྟ་བུའི་ཆོས་ལ་སྤྱོད་པར་བརྩོན་པའི་བྱང་ཆུབ་སེམས་དཔའ་སངས་རྒྱས་ཀྱི་རིགས་ཐམས་ཅད་ ཀྱི་ཡོངས་སུ་གཏོང་བའི་ཚུལ་ལ་བསླབ་པ། སངས་རྒྱས་ལ་མོས་པ་སྐྱེས་པས་དགེ་བའི་རྩ་བ་རབ་ཏུ་ཐོབ་པ། སློང་བ་མཐའ་ཡས་བས་དགའ་བས་ཡོངས་སུ་རྒྱས་པའི་སེམས་དང་ལྡན་པ་ ༄༅། །ཡིད་ཀྱི་དབང་པོ་ཤིན་ཏུ་གསལ་བ། རྒྱུད་རབ་ཏུ་དྭངས་ཤིང་སེམས་དང་ཡིད་ཤིན་ཏུ་དྭངས་པ། སངས་རྒྱས་ཀྱི་ཆོས་ལ་དགའ་བའི་སྣང་བ་ཐོབ་པ། བྱང་ཆུབ་ཀྱི་ སེམས་བསྐྱེད་པ་ཤིན་ཏུ་རྒྱ་ཆེ་བ་རྒྱུན་མི་འཆད་པར་སེམས་པ། གཏོང་བ་ཆེན་པོ་གཏོང་བ། ཤིན་ཏུ་གཏོང་བས་གཏོང་བའི་ཡིད་དང་ལྡན་པ། དབང་པོ་ཤིན་ཏུ་དགའ་བས་ཉེ་བར་ བརྟན་པའི་ཆོས་ཅན། ལྷག་པའི་བསམ་པ་ཡངས་ཤིང་དགེ་ལ་རྒྱ་ཆེ་བས་སྦྱིན་པ་གཏོང་བར་མངོན་པར་འདོད་པ། དེ་ཇི་ལྟར་བྱང་ཆུབ་སེམས་དཔའ་ཡེ་ཤེས་མཆོག་དང༌། སྐྱེས་ བུ་དམ་པ་ཀ་ཤིའི་རྒྱལ་པོ་དང༌། དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྲངས་མེད་པ་དག་ཀྱང་མགོ་ཡོངས་སུ་གཏོང་བར་གྱུར་པ་དེ་ལྟར་མགོ་གཏོང་བའི་ ཚེ་མགོ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་འདི་ལྟར་སེམས་ཅན་ཐམས་ཅད་ཀྱིས་སངས་རྒྱས་ཀྱི་དབུ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །སྤྱི་ གཙུག་བལྟར་མི་སྣང་བ་དང༌། སྐྱེ་མཆེད་ཟིལ་གྱིས་མི་ནོན་པ་དང༌། ཞིང་ཐམས་ཅད་དུ་མངོན་པར་འཕགས་པ་དང༌། བུམ་པ་རྒྱས་པ་དང༌། དགའ་བ་འཁྱིལ་བ་དང༌། སྐྲ་དང་མགོའི་ འོད་དང༌། འོད་ཟེར་སྣ་ཚོགས་ཀྱིས་རྣམ་པར་བརྒྱན་པ་དང༌། འཇིག་རྟེན་ཐམས་ཅད་དུ་རྨད་དུ་བྱུང་བ་དང༌། དཔལ་གྱི་བེའུས་བརྒྱན་པ་དང༌། སངས་རྒྱས་ཀྱི་དབུ་དང་ལྡན་པ་དང༌། ཡེ་ཤེས་ཀྱི་མགོ་རྟོགས་པར་བྱ་བ་དང༌། འགྲོ་བ་ཐམས་ཅད་ཀྱི་མཆོག་ཏུ་ཕྱིན་པའི་མགོ་དང་ལྡན་པ་དང༌། མགོ་རྣམ་པར་དག་པ་དང༌། ཡེ་ཤེས་ཀྱི་དཀྱིལ་འཁོར་གྱི་མགོ་ཡོངས་སུ་རྫོགས་ པར་བྱ་བའི་ཕྱིར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་མགོ་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་འདི་ལྟར་འགྲོ་བ་ཐམས་ཅད་ཀྱི་ཆོས་ཀྱི་ མཆོག་ཡོངས་སུ་རྫོགས་པ་དང༌། ཡེ་ཤེས་ཀྱི་ཡན་ལག་དམ་པ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སློང་བ་རྣམས་ ལ་དད་པའི་ལག་པ་ཐོག་མར་འགྲོ་བ་དང༌། ཕན་འདོགས་པའི་ཚུལ་དང༌། ཆོས་སྤྱོད་པ་ལ་བརྩོན་པར་འགྲོ་ཞིང་ལྡོག་པ་དང༌། རིན་པོ་ཆེའི་ལག་པ་ཐོག་མར་འགྲོ་བས་ལག་པ་གཏོང་བ་ དང༌། སྤྱོད་པ་དོན་ཡོད་པའི་བྱང་ཆུབ་སེམས་དཔའི་ལམ་ལ་སྤྱོད་པ་དང༌། ལག་ཤིན་ཏུ་བརྐྱང་ཞིང་གཏོང་བའི་སེམས་མ་འཁྲུགས་པ་དང༌། རིམ་པར་སྤྱོད་པའི་ཚུལ་ཤིན་ཏུ་ངེས་པ་དང༌། བྱང་ཆུབ་སེམས་དཔའ་སེངྒེའི་རྩལ་གྱིས་སྤྱོད་ཅིང༌། ལག་པ་ཡངས་པ་གཏོང་བ་ལ་མོས་པས་ལག་པ་ཡོངས་སུ་གཏོང་བ་དང༌། ཚུལ་གྱི་གཞི་ཆེན་པོ་རབ་ཏུ་བརྟན་པ་ལ་སྤྱོད་པའི་བྱང་ཆུབ་ སེམས་དཔའི་ཡི་དམ་དང༌། ཚོར་བས་མ་ཉམས་པའི་བློ་དང་བ་དང༌། འགྲོ་བ་མ་ཡིན་པར་འགྲོ་བ་ལས་ཕྱིར་ལོག་པའི་འགྲོ་བས་བྱང་ཆུབ་ཏུ་འབྱུང་བས་དེ་ཇི་ལྟར་བྱང་ཆུབ་སེམས་དཔའ་རྟག་ཏུ་བརྩོན་ ༄༅། །པ་དང༌། རྒྱལ་པོ་དགའ་ལྡན་དང༌། དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཚད་མེད་པ་དག་ཀྱང་སྐྱེ་བའི་སྐྱེ་གནས་སྣ་ཚོགས་ དག་ན་གནས་ཤིང་ལག་པ་ཡོངས་སུ་གཏོང་བར་གྱུར་པ་དེ་ལྟར་བྱང་ཆུབ་སེམས་དཔའ་སེམས་ཡངས་ཤིང་རྒྱ་ཆེ་བ་ཚད་མེད་པ་དང་ལྡན་པ། སངས་རྒྱས་རྒྱ་མཚོ་མཐོང་བར་གྱུར་པ། ཆོས་ཀྱི་རྒྱུད་ཀྱི་སྒོ་རྣམ་པར་བྱེ་བ། འཇིག་རྟེན་གྱི་ཁམས་ཐམས་ཅད་དུ་ཁྱབ་པར་གཏོང་བའི་ལག་པ་དང་ལྡན་པ། ཐམས་ཅད་མཁྱེན་པའི་བྱང་ཆུབ་ཡང་དག་པར་འཛིན་པའི་སྨོན་ལམ་ ཅན༑ སེམས་བསྐྱེད་པ་རྡུལ་མེད་པ་དང་འགྲོགས་པས་ཀུན་ནས་བསྐོར་བ་མེད་པ། ཡེ་ཤེས་དང་ཆོས་ཀྱི་ལུས་རྒྱུན་མི་འཆད་པ། མི་ཤིགས་མི་ཆོད་པའི་ལུས་དང་ལྡན་པ། བདུད་ ཀྱི་ལས་ཐམས་ཅད་ཀྱིས་མི་སྒྲུབ་པ། དགེ་བའི་བཤེས་གཉེན་གྱིས་ཉེ་བར་བརྟན་པས་སེམས་སྤེལ་བ། བྱང་ཆུབ་སེམས་དཔའ་ཐམས་ཅད་ཀྱིས་སྤྱད་པ་དང་གཅིག་ཏུ་གྱུར་པའི་ གཏོང་བས་བྱུང་བ་དེ། སློང་བ་ལ་རྐང་ལག་གི་སྦྱིན་པ་བྱེད་ཅིང་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། ཐམས་ཅད་མཁྱེན་ པ་ཉིད་དུ་དམིགས་ཏེ་རྐང་ལག་ཡོངས་སུ་བཏང་བ་ཡོངས་སུ་བྱིན་པ་འདི་ལ་དགེ་བའི་རྩ་བ་ཅི་ཡོད་པ་དེ་དག་འདི་ལྟར་སེམས་ཅན་ཐམས་ཅད་ལ་ཡོངས་སུ་བསྔོའོ། །དགེ་བའི་རྩ་བ་ འདིས་སེམས་ཅན་ཐམས་ཅད་རྫུ་འཕྲུལ་གྱི་རྐང་པ་ཐོབ་ཅིང་རིན་པོ་ཆེའི་ལག་པ་དང་ལྡན་པར་གྱུར་ཅིག །དེ་དག་རིན་པོ་ཆེའི་ལག་པ་དེས་སེམས་ཅན་ཐམས་ཅད་ལ་སྦྱིན་པའི་གནས་ཀྱི་ འདུ་ཤེས་རབ་ཏུ་ཐོབ་སྟེ་ཕན་ཚུན་གྱི་ལུས་ལ་རིན་པོ་ཆེས་བརྒྱན་པ་འཐོབ་པར་གྱུར་ཅིག །མངོན་པར་འཐོབ་པར་གྱུར་ཅིག །རབ་ཏུ་འཐོབ་པར་གྱུར་ཅིག །སངས་རྒྱས་ཀྱི་ཞིང་ཐམས་ཅད་ དུ་ཁྱབ་པའི་རིན་པོ་ཆེའི་རྒྱན་གྱི་སྤྲིན་གྱིས་སངས་རྒྱས་ཐམས་ཅད་མཆོད་པར་གྱུར་ཅིག །སེམས་ཅན་དེ་དག་ཐམས་ཅད་ཀྱང་ཕན་ཚུན་དུ་ཞེ་སྡང་བ་མེད་པའི་སེམས་དང་ལྡན་ཞིང་ཕན་ ཚུན་བྱམས་པའི་སེམས་དང་ལྡན་པར་གྱུར་ཅིག །དེ་དག་སངས་རྒྱས་ཀྱི་ཞིང་ཐམས་ཅད་ཀྱི་རྗེས་སུ་དོང་ཞིང་འཇིགས་པ་མེད་པ་ལ་གནས་ཏེ་མངོན་པར་འདུ་བྱ་བ་མེད་པའི་ཕྱིར་ཐམས་ཅད་ ལག་ན་རིན་པོ་ཆེ་ཐོགས་པ་དང༌། ལག་ན་སྤོས་ཐོགས་པ་དང༌། ལག་ན་གོས་ཐོགས་པ་དང༌། ལག་ན་གདུགས་ཐོགས་པ་དང༌། ལག་ན་ཕྲེང་བ་ཐོགས་པ་དང༌། ལག་ན་མེ་ཏོག་ཐོགས་པ་དང༌། ལག་ན་ཕྱེ་མ་ཐོགས་པ་དང༌། ལག་ན་ལྷབ་ལྷུབ་ཐོགས་པ་དང༌། ལག་ན་མེ་ཏོག་མཐའ་ཡས་པ་ཐོགས་པར་གྱུར་ཏེ་ཀུན་ནས་སྒོ་དང་ལྡན་པའི་ཐབས་ལ་གནས་ཤིང་སངས་རྒྱས་ཐམས་ ཅད་ལ་མཆོད་པར་བརྩོན་པའི་སེམས་དང༌། སངས་རྒྱས་ཀྱི་ཞིང་ཀུན་ཏུ་འགྲོ་བའི་རྫུ་འཕྲུལ་དང༌། སངས་རྒྱས་ཀྱི་ཞིང་ཐམས་ཅད་དུ་ཐོགས་པ་མེད་པའི་ལག་པ་དང༌། འགྲོ་བ་ཐམས་ཅད་ ༄༅། །ཡང་དག་པར་འཛིན་པའི་རྫུ་འཕྲུལ་དང༌། ཆོ་འཕྲུལ་གྱི་ལག་པ་མཚན་བཟང་པོ་དང་ལྡན་པའི་ལག་པ་དང༌། འོད་ཟེར་གྱི་མཛོད་མཐའ་ཡས་པའི་དཀྱིལ་འཁོར་ རབ་ཏུ་གཏོང་བའི་ལག་པ་དང༌། འགྲོ་བ་ཐམས་ཅད་ལག་མཐིལ་གཅིག་གིས་ཡོག་པར་བྱེད་པའི་ལག་པ་དང༌། དྲ་བར་འབྲེལ་ཅིང་སེན་མོ་ཟངས་ལྟར་འདུག་པའི་ལག་པ་དང༌། སངས་རྒྱས་ཀྱི་ཕྱག་ཤིན་ཏུ་ཡངས་པ་དང་ལྡན་པས་སངས་རྒྱས་ཐམས་ཅད་ལ་མཆོད་པ་བྱེད་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་ རྒྱ་མཚོ་ཐམས་ཅད་ལ་རབ་ཏུ་ཞུགས་པའི་སེམས་བསྐྱེད་པ་དང༌། ཁས་ལེན་པའི་ངང་ཚུལ་དང༌། སློང་བ་ཐམས་ཅད་ལ་མངོན་པར་མོས་ཤིང་འདོད་པས་དགའ་བ་དང༌། སྤྲོ་བ་དང༌། དད་པ་ཆེན་པོ་རབ་ཏུ་ཐོབ་པ་དང༌། སློང་བ་འབོད་པར་སྟོན་པ་དང༌། སངས་རྒྱས་ཀྱི་ཆོས་རྒྱ་མཚོ་ཐམས་ཅད་ཀྱི་རྗེས་སུ་ཞུགས་པའི་དེ་བཞིན་གཤེགས་པའི་དགེ་བའི་རྩ་བ་ཐམས་ ཅད་དང་རྒྱུད་ཀྱི་ཚུལ་གཅིག་ཏུ་གྱུར་པས་རྐང་ལག་ཡོངས་སུ་གཏོང་བ་བྱེད་ཅིང༌། འགྲོ་བ་ཐམས་ཅད་ཀྱི་བྱང་ཆུབ་ཚོལ་བའི་ཚེ་རྐང་ལག་ཡོངས་སུ་བཏང་བས་ཡང་དག་པར་བསྡུས་ པའི་དགེ་བའི་རྩ་བ་དེ་དག་འདི་ལྟར་ཐམས་ཅད་གཏོང་བའི་དོན་དུ་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་མཁྱེན་པའི་བསམ་པ་ དང༌། སེམས་དང༌། ཡིད་དུ་ལྡན་པ། བྱང་ཆུབ་ཀྱི་སེམས་ཀྱིས་རབ་ཏུ་དགའ་བ། བྱང་ཆུབ་སེམས་དཔའི་སྤྱོད་པ་ལ་མངོན་པར་དད་པའི་སེམས་དང་ལྡན་པ། ཚོར་བས་དེངས་པར་མི་ འགྱུར་བའི་སེམས་དང་ལྡན་པ། སློང་བ་ཐམས་ཅད་ལ་མངོན་པར་མོས་པའི་སེམས་དང་ལྡན་པ། ལེན་པ་ཐམས་ཅད་ལ་ཞེ་མི་སྡང་བའི་སེམས་དང་ལྡན་པ། བྱང་ཆུབ་སེམས་ དཔའ་ཐམས་ཅད་ཀྱི་གཏོང་བའི་ལམ་དུ་རབ་ཏུ་ཞུགས་པའི་སེམས་དང་ལྡན་པ། བྱང་ཆུབ་སེམས་དཔའ་ཐམས་ཅད་ཀྱི་གཏོང་བས་སྦྱིན་པར་བྱ་བའི་རྗེས་སུ་སྲུང་བའི་སེམས་དང་ ལྡན་པ༑ བྱང་ཆུབ་སེམས་དཔའི་སྦྱིན་པ་རྒྱ་ཆེན་པོས་གཏོང་བ་ཤིན་ཏུ་གཏོང་བའི་སེམས་དང་ལྡན་པ། ཕྱིར་མི་ལྡོག་པའི་སེམས་རྒྱུན་མི་འཆད་པ་དང་ལྡན་པ། བདག་གི་ལུས་ ལ་ཕངས་པར་མི་ལྟ་བའི་སེམས་དང་ལྡན་པ། དེ་ཇི་ལྟར་བྱང་ཆུབ་སེམས་དཔའ་ཆོས་ཀྱི་འབྱུང་གནས་དང༌། རྒྱལ་པོ་ཡིད་བདེ་བར་སེམས་པ་དང༌། དེ་མ་ཡིན་པའི་བྱང་ཆུབ་སེམས་ དཔའ་སེམས་དཔའ་ཆེན་པོ་གཞན་གྲངས་མེད་པ་དག་ཀྱང་སྐྱེ་བའི་སྐྱེ་གནས་དེ་དང་དེ་དག་ལ་གནས་ཤིང་ཁྲག་ཡོངས་སུ་གཏོང་བར་གྱུར་པ་དེ་ལྟར་སློང་བ་རྣམས་ལ་རང་གི་ལུས་ཀྱི་ ཁྲག་གཏོང་བའི་ཚེ་ཁྲག་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཆོས་དང་ཡེ་ ༄༅། །ཤེས་ཀྱི་ལུས་དང་ལྡན་ཞིང་བྱང་ཆུབ་སེམས་དཔའི་ལུས་ཕུན་སུམ་ཚོགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་རྡོ་རྗེའི་སྙིང་པོ་དང་ འདྲ་བར་དགེ་སྦྱོང་གི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་ལུས་ཉམས་པ་མེད་ཅིང་དག་པ་དང་ལྡན་ཏེ་ལུས་ལ་རྨ་མེད་པར་གྱུར་ཅིག །སེམས་ཅན་ཐམས་ ཅད་འཇིག་རྟེན་གྱིས་མི་འཕྲོག་པའི་སེམས་དང་ལྡན་ཞིང་སྤྲུལ་པ་ལྟ་བུའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་འོད་དང་བའི་ལུས་ཉམས་པ་མེད་པ་དང་ལྡན་ ཞིང་ཡིད་དུ་འོང་བའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་སྐུ་མི་གནས་པ་དང་ལྡན་ཞིང་ཆོས་ཀྱི་དབྱིངས་སུ་མངོན་པར་སྐྱེས་པའི་ལུས་ དང་ལྡན་པར་གྱུར་ཅིག །སེམས་ཅན་ཐམས་ཅད་གཞན་ཐམས་ཅད་ལུས་ཐམས་ཅད་ལ་རིམ་གྲོ་བྱེད་པའི་ལུས་དང་ལྡན་ཞིང་རིན་པོ་ཆེ་ལྟ་བུའི་འོད་ཡོད་པའི་ལུས་དང་ལྡན་པར་གྱུར་ ཅིག །སེམས་ཅན་ཐམས་ཅད་འཆི་བ་མེད་པའི་དབྱིངས་སུ་ཆོས་ཀྱི་སྐྱིད་པ་ལ་དབང་སྒྱུར་བའི་ལུས་དང་ལྡན་ཞིང་ཡེ་ཤེས་དམ་པའི་ལུས་དང་ལྡན་པར་གྱུར་ཅིག །སེམས་ཅན་ ཐམས་ཅད་འགྲོ་བ་ཀུན་གྱིས་བལྟ་ན་དོན་ཡོད་པར་སྐྱེས་པས་རིན་པོ་ཆེ་རྒྱ་མཚོ་ལྟ་བུའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་འཇིག་རྟེན་ཀུན་གྱི་གཙེ་བས་གོས་པ་མེད་ཅིང་བར་ སྣང་གི་རང་བཞིན་གྱི་ལུས་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རང་གི་ལུས་ལས་ཁྲག་གི་སྦྱིན་པ་བྱེད་པའི་ཚེ་ཡེ་ཤེས་ཀྱི་ཐེག་པ་དང༌། ཐེག་པ་ཆེན་ པོ་ལ་རབ་ཏུ་གཞོལ་བའི་སེམས་ཀྱིས་དགེ་བའི་རྩ་བ་དེ་དག་ཡོངས་སུ་བསྔོའོ། །དག་པའི་ཡིད་ཀྱིས་ཡོངས་སུ་བསྔོའོ། །ཡངས་པའི་ཡིད་ཀྱིས་ཡོངས་སུ་བསྔོའོ། །དགའ་བའི་ཡིད་ཀྱིས་ཡོངས་སུ་བསྔོའོ།། རངས་པའི་ཡིད་ཀྱིས་ཡོངས་སུ་བསྔོའོ། །སྤྲོ་བའི་ཡིད་ཀྱིས་ཡོངས་སུ་བསྔོའོ། །ཞུམ་པ་མེད་པའི་ཡིད་ཀྱིས་ཡོངས་སུ་བསྔོའོ། །བདེ་བའི་ཡིད་ཀྱིས་ཡོངས་སུ་བསྔོའོ། །དང་བའི་ཡིད་ཀྱིས་ཡོངས་སུ་ བསྔོའོ། །མགུ་བའི་ཡིད་དང༌། རབ་ཏུ་དགའ་བའི་ཡིད་དང༌། ཡིད་བདེ་ཞིང་རངས་པ་སྐྱེས་པས་དགེ་བའི་རྩ་བ་འདི་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་ པོ་གཏོང་བའི་སེམས་གཞལ་དུ་མེད་པའི་དགའ་བས་རྣམ་པར་འཕེལ་བ་དང༌། བྱང་ཆུབ་སེམས་དཔའ་དང་མཁས་པའི་སྐྱེ་བོས་བསྟེན་པའི་ཟླ་མེད་པའི་དགེ་བའི་རྩ་བ་དང༌། ལྷག་པའི་བསམ་ པ་དམ་པ་འཇིག་རྟེན་གྱི་དྲི་མ་བསལ་བ་དང༌། སློང་བ་ཐམས་ཅད་ཀྱིས་ཟད་པར་མི་ནུས་པའི་ནང་གི་ལུས་ཉེ་བར་བླངས་པའི་ཡོངས་སུ་གཏོང་བ་དང༌། ཡོན་ཏན་རིན་པོ་ཆེས་ཡང་དག་པར་བླངས་ པའི་དགེ་བ་འབྱམས་ཀླས་པ་དང༌། བྱང་ཆུབ་སེམས་དཔའ་ཐམས་ཅད་ཀྱི་ཡི་དམ་གྱིས་ཉེ་བར་བླངས་པའི་སྦྱིན་པའི་ཚོགས་ཆེན་པོ་དང༌། སློང་བ་ཐམས་ཅད་ཀྱི་ཡིད་ཀྱིས་འདོད་པར་བསམ་པ་ ༄༅། །བཏང་ཡང་འགྱོད་པ་མེད་པའི་སེམས་དང༌། སྦྱིན་པ་ལ་དམིགས་པའི་དངོས་པོས་ཤིན་ཏུ་བརྟགས་པའི་ལས་ཀྱི་རྣམ་པར་སྨིན་པའི་རྟེན་དང༌། ལེན་པ་རྣམས་ ལ་སྦྱིན་པ་ཡོངས་སུ་གཏོང་བའི་སེམས་ཉམས་པ་མེད་པ་དང༌། སངས་རྒྱས་ཐམས་ཅད་མངོན་དུ་གྱུར་པ་ཕ་ལྟ་བུའི་འདུ་ཤེས་སུ་མངོན་པར་འཛིན་པ་དང༌། འགྲོ་བ་ཐམས་ཅད་ལ་མངོན་ དུ་གྱུར་པའི་སེམས་ཅན་ཐམས་ཅད་རྣམ་པར་དག་པ་ལ་གནས་པ་དང༌། འཇིག་རྟེན་གྱི་ཁམས་ཐམས་ཅད་མངོན་དུ་གྱུར་པའི་སངས་རྒྱས་ཀྱི་ཞིང་གི་རྒྱན་ཐམས་ཅད་དང༌། འགྲོ་བ་ཐམས་ ཅད་ལ་མངོན་དུ་གྱུར་པའི་སྙིང་རྗེ་ཆེན་པོས་ཡོངས་སུ་སྐྱོབ་པ་དང༌། སངས་རྒྱས་ཐམས་ཅད་ཀྱི་བྱང་ཆུབ་ལ་མངོན་དུ་གྱུར་པའི་སྟོབས་བཅུ་རྣམ་པར་སྤྱོད་པ་དང༌། འདས་པ་དང༌། མ་ འོངས་པ་དང༌། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་མངོན་དུ་གྱུར་པའི་དགེ་བའི་རྩ་བ་མཐུན་པ་ཡོངས་སུ་རྫོགས་པར་བྱ་བ་དང༌། མི་འཇིགས་པ་ཐམས་ཅད་མངོན་དུ་ གྱུར་པའི་ཁྱུ་མཆོག་དང༌། སེངྒེའི་ང་རོ་བསྒྲགས་པ་དང༌། དུས་གསུམ་མངོན་དུ་གྱུར་པའི་དུས་ཐམས་ཅད་མཉམ་པ་ཉིད་ཀྱི་ཡེ་ཤེས་དང༌། དུས་གསུམ་ཐམས་ཅད་མངོན་དུ་གྱུར་པའི་ ཕྱི་མའི་མཐའི་བསྐལ་པར་ཐུག་པར་ཞེ་ནོན་པའི་བྱང་ཆུབ་སེམས་དཔའི་སྨོན་ལམ་དང༌། ཡོངས་སུ་ཡིད་ཆད་པ་མེད་པས་མངོན་དུ་གྱུར་པའི་སེམས་བསྐྱེད་པ་གྲངས་མེད་པས་དེ་ཇི་ལྟར་ བྱང་ཆུབ་སེམས་དཔའ་ཕན་པ་ཚོལ་བ་དང༌། རྒྱལ་པོ་ཐམས་ཅད་གཏོང་བ་དང༌། དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྲངས་མེད་པ་དག་ཀྱང་སྐྱེ་བའི་སྐྱེ་མཆེད་སྣ་ཚོགས་ དག་ན་གནས་ཤིང་ཤ་དང༌། རྐང་ཡོངས་སུ་གཏོང་བ་དེ་ལྟ་སློང་བ་རྣམས་ལ་ལུས་ལས་ཤ་དང༌། རྐང་ཡོངས་སུ་གཏོང་བའི་ཚེ་ཤ་དང༌། རྐང་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་ རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདི་སེམས་ཅན་ཐམས་ཅད་རྡོ་རྗེའི་སྙིང་པོ་ལྟར་མཁྲེགས་པའི་ཡན་ལག་དང་ལྡན་ཞིང་མི་ཤིགས་པའི་ལུས་དང་ ལྡན་པར་གྱུར་ཅིག །སེམས་ཅན་ཐམས་ཅད་གསོབ་མེད་པའི་ལུས་རབ་ཏུ་ཐོབ་པས་གསོག་མ་ཡིན་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་ཡིད་ཀྱི་རང་བཞིན་གྱི་ལུས་རྣམ་པར་ དག་པ་དང་ལྡན་ཞིང༌། སངས་རྒྱས་ཀྱིས་བརྒྱན་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་མཚན་སུམ་ཅུ་གཉིས་ཀྱིས་ལུས་ཤིན་ཏུ་གྲུབ་པས་བསོད་ནམས་བརྒྱ་པའི་མཚན་གྱི་ལུས་ དང་ལྡན་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་སྟོབས་བཅུ་ཐ་མི་དད་ཅིང་མ་ཉམས་པ་དང་ལྡན་ཏེ་དཔེ་བྱད་བཟང་པོ་བརྒྱད་ཅུས་རྣམ་པར་བྲིས་པའི་ལུས་དང་ལྡན་པར་གྱུར་ ཅིག །སེམས་ཅན་ཐམས་ཅད་དེ་བཞིན་གཤེགས་པའི་སྐུ་རབ་ཏུ་ཐོབ་པས་མཐའ་ལས་འདས་པ་ཚད་མེད་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་བདུད་ཐམས་ཅད་ཀྱི་དཀྲུག་ ༄༅། །མ་རབ་ཏུ་འཇོམས་པས་ཀུན་ཏུ་ཁྱབ་པའི་སྤྱོད་ལམ་དང་ལྡན་ཞིང་ཐུབ་པ་མེད་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་འདས་པ་དང༌། མ་བྱོན་ པ་དང༌། ད་ལྟར་བྱུང་བའི་སངས་རྒྱས་ཐམས་ཅད་དང་ལུས་གཅིག་པར་གྱུར་ཅིག །སེམས་ཅན་ཐམས་ཅད་ནམ་མཁའི་དབྱིངས་ཀུན་ཏུ་ཆོས་ཀྱི་སྐུས་ཁྱབ་པར་བྱེད་པའི་ཕྱིར་ཆགས་པ་མེད་ པའི་ལུས་མངོན་པར་གྲུབ་པར་གྱུར་ཅིག །སེམས་ཅན་ཐམས་ཅད་འགྲོ་བ་ཐམས་ཅད་ཤོང་བའི་ལུས་དང་ལྡན་ཞིང་བྱང་ཆུབ་ཀྱི་ལུས་དམ་པ་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་ སེམས་དཔའ་སེམས་དཔའ་ཆེན་པོ་ཐམས་ཅད་མཁྱེན་པར་དམིགས་པའི་སེམས་དང་ལྡན་པ་སློང་བ་ལ་ཤ་དང་རྐང་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་ སངས་རྒྱས་ཀྱི་སྐུ་མཐའ་ལས་འདས་པ་ཚད་མེད་པ་རྣམ་པར་དག་པ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་རྒྱུད་ ལ་བསླབ་པའི་སེམས་དང་ལྡན་པ། སྦྱིན་པ་ཐམས་ཅད་བྱིན་པས་སྤྱོད་པའི་སེམས་དང་ལྡན་པ། སྦྱིན་པའི་ཕ་རོལ་ཏུ་ཕྱིན་པ་ཆེན་པོ་ཐོབ་པའི་སེམས་དང་ལྡན་པ། ཕ་རོལ་ཏུ་འགྲོ་བའི་ སྦྱིན་པ་གྲུབ་པའི་སེམས་དང་ལྡན་པ། བྱང་ཆུབ་སེམས་དཔའ་ཐམས་ཅད་ཀྱིས་བྱིན་པའི་རྗེས་སུ་བསླབ་པའི་སེམས་དང་ལྡན་པ། སྦྱིན་པ་དང་ཡོངས་སུ་གཏོང་བ་ཐམས་ཅད་ཀྱི་ཟད་མི་ ཤེས་པའི་སེམས་དང་ལྡན་པ། སྦྱིན་པའི་གནས་ཐམས་ཅད་ལ་ཤིན་ཏུ་གནས་པའི་སེམས་དང་ལྡན་པ། བྱང་ཆུབ་སེམས་དཔའ་ཐམས་ཅད་ཀྱི་སྦྱིན་པའི་ལས་པ་རབ་ཏུ་གནས་པ་དེ་སེམས་ དང་ལྡན་པ། སངས་རྒྱས་ཐམས་ཅད་ཡིད་ལ་བྱ་བས་མངོན་དུ་གྱུར་པའི་གཏོང་བའི་སེམས་དང་ལྡན་པ། སློང་བ་ཐམས་ཅད་རྒྱུན་མི་འཆད་པར་རྒྱུ་བ་རབ་ཏུ་མཆོད་དང་སེམས་དང་ལྡན་པ། དེ་ཇི་ལྟར་བྱང་ཆུབ་སེམས་དཔའ་ཡོངས་སུ་སྐྱོ་བ་མེད་པ་དང༌། རྒྱལ་པོ་གཡོ་བ་མེད་པ་དང༌། དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྲངས་མེད་པ་དག་གིས་ཀྱང་ སྙིང་ཡོངས་སུ་བཏང་བར་གྱུར་པ་དེ་ལྟར་སློང་བ་ཀུན་ལས་འོངས་པ་རྣམས་ཀྱིས་བསླངས་ཤིང་རང་གི་ལུས་ལས་སྙིང་ཡོངས་སུ་གཏོང་ཞིང་སྦྱིན་པ་བྱེད་པ་དང༌། སྤོང་བ་དང༌། ཐོབ་པར་བྱེད་པ་དང༌། ལྷག་པའི་བསམ་པ་རྣམ་པར་སྦྱོང་བ་དང༌། འགྲོ་བ་ཐམས་ཅད་རབ་ཏུ་དགྲོལ་བའི་ཕྱིར་སྟོབས་བཅུའི་བྱང་ཆུབ་ལ་དམིགས་པར་བྱེད་པ་དང༌། སྨོན་ལམ་ཆེན་པོས་ནན་ཏན་དུ་བྱེད་པ་དང༌། བྱང་ ཆུབ་སེམས་དཔའི་སྤྱོད་པ་ལ་ཡང་དག་པར་གནས་པ་དང༌། སྨོན་ལམ་ཡོངས་སུ་མི་གཏོང་བས་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་ སྟེ༑ སེམས་ཅན་ཐམས་ཅད་རྡོ་རྗེའི་རང་བཞིན་ལྟ་བུས་ཡོངས་སུ་བཟུང་བའི་སྙིང་དཔལ་གྱི་བེའུས་བརྒྱན་པ་དང་ལྡན་ཞིང་རྡོ་རྗེའི་རི་འཁོར་ཡུག་ཐམས་ཅད་ལྟར་མི་ཤིགས་ཤིང་རྡོ་རྗེའི་སྙིང་པོ་ ༄༅། །ལྟ་བུའི་སྙིང་དང་ལྡན་པ་དང༌། བག་ཚ་བ་མེད་པའི་སྙིང་དང༌། ཐུབ་པར་དཀའ་བའི་སྙིང་དང༌། འཇིག་རྟེན་ཐམས་ཅད་ཀྱིས་མི་འཕྲོག་པའི་སྙིང་དང༌། དཔའ་བའི་ རྒྱལ་མཚན་ཡེ་ཤེས་ཀྱི་སྙིང་པོ་ཅན་གྱི་སྙིང་དང༌། མཐུ་བོ་ཆེ་ཆེན་པོ་དམ་པའི་སེམས་ཀྱི་རྒྱལ་མཚན་ཅན་གྱི་སྙིང་དང༌། འགྲོ་བ་ཐམས་ཅད་ཀྱི་གཙོ་བོ་ལྟ་བུར་མི་འཕྲོག་པའི་སྙིང་དང༌། མཐུ་ བོ་ཆེ་ལྟར་མི་ཤིགས་པའི་སྙིང་པོ་ཅན་གྱི་སྙིང་དང༌། བདུད་ཀྱི་ལས་དང༌། བདུད་ཀྱི་དཔུང་དང༌། བདུད་ཀྱི་སྡེ་རྣམ་པར་འཇོམས་པའི་སྙིང་དང༌། བརྟན་པའི་སྙིང་དང༌། གཟེངས་མཐོ་ བའི་སྙིང་དང༌། དཔའ་བའི་སྙིང་དང༌། རྟུལ་ཕོད་པའི་སྙིང་དང༌། མི་འཇིགས་མི་དངངས་སྐྲག་པར་མི་འགྱུར་བའི་སྙིང་དང༌། རྡོ་རྗེའི་གོ་ཆ་ཆེན་པོ་ཡང་དག་པར་བགོས་པའི་སྙིང་དང༌། ཤིན་ཏུ་བཙུན་པའི་བྱང་ཆུབ་སེམས་དཔའི་སྙིང་དང༌། སངས་རྒྱས་ཀྱི་ཆོས་ཡོངས་སུ་རྫོགས་པས་བྱང་ཆུབ་སྣང་བར་གྱུར་པའི་སྙིང་དང༌། བྱང་ཆུབ་ཀྱི་ཤིང་དྲུང་དུ་འདུག་ནས་སངས་རྒྱས་ཀྱི་ ཆོས་ཐམས་ཅད་རྗེས་སུ་རྟོགས་ཤིང༌། རྨོངས་པ་མེད་པར་ཐམས་ཅད་མཁྱེན་པ་ཉིད་དུ་མངོན་པར་འཚང་རྒྱ་བའི་སྙིང་དང༌། སྟོབས་བཅུ་མངོན་པར་བྱང་ཆུབ་པ་རབ་ཏུ་འཐོབ་པའི་སྙིང་དང་ ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་གི་སྦྱིན་པས་ཡང་དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་འགྲོ་བ་ཐམས་ཅད་ ཀྱིས་གོས་པ་མེད་པའི་སྟོབས་བཅུ་མངའ་བའི་ཐུགས་ཕུན་སུམ་ཚོགས་པ་དང༌། ཡོངས་སུ་རྫོགས་པ་དང་ལྡན་པར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སློང་ བ་མངོན་པར་དང་པར་བྱེད་པའི་ལྟ་བ་དང༌། གསལ་ཞིང་དགའ་བར་བྱེད་པའི་མིག་དང༌། བྱང་ཆུབ་དང་མཉམ་པར་བྱ་བའི་བྱམས་པ་དང༌། ཅི་འདོད་པས་སློང་བ་ཕུ་དུད་དུ་བྱ་བའི་སྦྱིན་པ་དང༌། རྒྱུན་ མི་འཆད་པར་ཡིད་ལ་བྱེད་པའི་གཏོང་བ་དང༌། ལུས་ལ་སྙིང་པོ་མེད་པར་རྟོགས་པས་སྙིང་པོ་བླང་བའི་སེམས་དང་བར་གྱུར་པའི་ལུས་རྗེས་སུ་དྲན་པ་ཡིད་ལ་བྱེད་པ་དང༌། སྤྱང་ཀི་དང༌། ཝ་དང༌། ཁྱིས་བཟའ་བར་འགྱུར་བའི་ལུས་སུ་རབ་ཏུ་རྟོགས་པ་དང༌། གཞན་ལ་རག་ལུས་ཤིང་ལུས་མི་རྟག་པར་ཡིད་ལ་བྱེད་པ་དང༌། ལུས་ཀྱི་རྒྱུས་ཐམས་ཅད་ཁོང་དུ་ཆུད་པ་དང༌། གཞན་ ལ་དད་པའི་སེམས་དང༌། དེ་ལྟ་བུའི་ཆོས་དེ་དག་ཡིད་ལ་བྱ་བ་ལ་བརྩོན་པ་དེ་ཇི་ལྟར་བྱང་ཆུབ་སེམས་དཔའ་ལེགས་པར་བྱིན་པ་དང༌། རྒྱལ་པོ་སྡིག་པ་བསལ་བ་དང༌། དེ་མ་ཡིན་པའི་ བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྲངས་མེད་པ་དག་གིས་ཀྱང་སློང་བ་རྣམས་ལ་རྒྱུ་མ་དང༌། མཆིན་པ་དང༌། མཁལ་མ་དང༌། གློ་བ་ཡོངས་སུ་བཏང་བར་གྱུར་པ་དེ་ ལྟར་རྒྱུ་མ་དང༌། མཆིན་པ་དང༌། མཁལ་མ་དང༌། གློ་བ་ཡོངས་སུ་གཏོང་བའི་ཚེ་བྱང་ཆུབ་སེམས་དཔའ་སློང་བ་དེ་དག་ལ་མི་འགལ་བའི་མིག་གིས་བལྟ་ཞིང་འདི་ལྟར་སེམས་བསྐྱེད་དེ་ ༄༅། །འདི་ལྟར་བདག་གི་ལུས་མི་རྟག་ཅིང་འདི་ལྟར་མི་གཙང་ན། འོན་ཀྱང་རྒྱུ་མ་དང༌། མཆིན་པ་དང༌། མཁལ་མ་དང༌། གློ་བ་ལྟ་བུ་དག་ཀྱང་སློང་བ་དག་ལ་དགོས་ པ་ལྟས་སྦྱིན་པར་བྱའོ། །ཞེས་དེ་ལྟ་བུར་ཡིད་ལ་བྱེད་ཅིང་དགའ་བའི་རྒྱུ་དང༌། དེ་ལྟར་ཆོས་ཉིད་ཤེས་པའི་བསམ་པ་དང༌། སློང་བ་མཐོང་བ་དགེ་བའི་བཤེས་གཉེན་དུ་འདུ་ཤེས་པའི་ བྱིན་གྱི་རླབས་ཀྱིས་ལུས་སྙིང་པོ་མེད་པ་དེ་ལས་སྙིང་པོ་བླང་བར་འདོད་དེ། དེ་ལྟ་བུར་ཡིད་ལ་བྱེད་ཅིང་རབ་ཏུ་རྟོགས་པ་དང་ལྡན་པའི་སེམས་ཀྱིས་རྒྱུ་མ་དང༌། མཆིན་པ་དང༌། མཁལ་མ་ དང༌། གློ་བ་དེ་དག་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། རྒྱུ་མ་དང༌། མཆིན་པ་དང༌། མཁལ་མ་དང༌། གློ་བ་ཡོངས་སུ་ བཏང་བས་ཡང་དག་པར་བསྡུས་པའི་དགེ་བའི་རྩ་བ་འདིས་སེམས་ཅན་ཐམས་ཅད་ཡེ་ཤེས་ཀྱི་སྙིང་པོའི་ལུས་དང་ལྡན་ཞིང་ལུས་ཀྱི་ཕྱི་ནང་ཤིན་ཏུ་གཙང་ཞིང་དག་པར་གྱུར་ཅིག །སེམས་ ཅན་ཐམས་ཅད་ཐམས་ཅད་མཁྱེན་པའི་སྨོན་ལམ་ཡང་དག་པར་འཛིན་པའི་ཕྱིར་ཡེ་ཤེས་ཀྱི་ལྟོ་དང་ཡང་དག་པར་ལྡན་པར་གྱུར་ཅིག །སེམས་ཅན་ཐམས་ཅད་ནང་སྤོས་ཞིམ་པོའི་མཆོག་ ཐམས་ཅད་དང་ལྡན་ཞིང་ཕྱི་རོལ་ཏུ་འོད་ཟེར་རབ་ཏུ་འགྱེད་པས་བལྟ་ན་བཟང་བའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་རིམ་གྱིས་གཞོལ་ཞིང་མཉམ་པའི་ལུས་ཀྱི་ཡན་ ལག་དང་ལྡན་ཏེ་གཞུ་ལྟ་བུའི་ལྟོ་དང་ལྡན་པའི་ལུས་སུ་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཀྱི་དགའ་བས་ལུས་ཤིན་ཏུ་བསྐྱེད་པས་ལུས་ཆོས་ཀྱི་ཟས་དང་ཡེ་ཤེས་ཀྱིས་ གསོ་བར་གྱུར་ཅིག །སེམས་ཅན་ཐམས་ཅད་དགའ་བའི་ལུས་དང་ཆོས་ཀྱི་ལུས་ཀྱིས་ཡང་དག་པར་སྤྱོད་པ་ཟད་མི་ཤེས་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་ཐ་ དད་པ་ཡང་དག་པར་ཤེས་པའི་ཆོས་སྣང་བ་དང་ལྡན་པས་གཟུངས་ཀྱི་སྙིང་པོས་ལུས་ཀྱི་ནང་རྣམ་པར་དག་པར་གྱུར་ཅིག །སེམས་ཅན་ཐམས་ཅད་ནང་གི་བསམ་པའི་རྒྱུད་ཤིན་ཏུ་ སྦྱངས་པས་ལུས་ཡོངས་སུ་དག་པ་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱིས་ངོམ་པར་བྱེད་པའི་ཆོས་ཀྱི་སྤྲིན་གྱི་ཆར་རབ་ཏུ་འབེབས་པས་དེ་བཞིན་གཤེགས་ པའི་སྐུ་དང༌། ཡེ་ཤེས་ཀྱི་རྣལ་འབྱོར་ཁོང་དུ་ཆུད་པར་གྱུར་ཅིག །སེམས་ཅན་ཐམས་ཅད་ཕྱི་རོལ་གྱི་ལུས་འགྲོ་བ་ཐམས་ཅད་ལ་ཡེ་ཤེས་ཀྱི་རྒྱལ་མཚན་མཛེས་ཤིང་སྣང་བར་གྱུར་ པས་ནང་གི་ལུས་དག་ཅིང་ཞི་བར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་རྒྱུ་མ་དང༌། མཆིན་པ་དང༌། མཁལ་མ་དང༌། གློ་བ་དེ་དག་རང་གི་ལུས་ ལས་སློང་བ་རྣམས་ལ་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་ལུས་ཕྱི་ནང་ཡོངས་སུ་དག་ཅིང་བསྒྲིབས་པ་མེད་པའི་ཡེ་ཤེས་ལ་རབ་ཏུ་འཁོད་ ༄༅། །པ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་བྱང་ཆུབ་སེམས་དཔའ་ཆོས་ཀྱི་འབྱུང་ གནས་དང༌། རྒྱལ་པོ་སྐར་མའི་འོད་དང༌། དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་གིས་ཀྱང་ཡན་ལག་དང༌། ཉིང་ལག་དང༌། རུས་པ་སློང་བ་ རྣམས་ལ་ཡོངས་སུ་བཏང་བར་གྱུར་པ་དེ་ལྟར་ཡན་ལག་དང༌། ཉིང་ལག་དང༌། རུས་པ་བསླངས་པ་ན་སློང་བ་རྣམས་ལ་གཏོང་བའི་ཚེ་སློང་བ་མཐོང་མ་ཐག་ཏུ་སེམས་དགའ་བ་ དང༌། སེམས་མོས་པ་དང༌། སེམས་དད་པ་དང༌། སེམས་རབ་ཏུ་སྤྲོ་བ་དང༌། སེམས་འཐད་པ་དང༌། བྱམས་པའི་སེམས་དང༌། ཆགས་པ་མེད་པའི་སེམས་དང༌། དག་པའི་ སེམས་དང༌། སློང་བ་རྣམས་ལ་རིམ་གྲོར་བྱ་བའི་སེམས་རབ་ཏུ་འཐོབ་སྟེ། དེ་ཡན་ལག་དང༌། ཉིང་ལག་དང༌། རུས་པ་དེ་དག་བསླངས་པས་སློང་བ་ལ་ཡོངས་སུ་གཏོང་བའི་ ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། རང་གི་ལུས་ཀྱི་ཡན་ལག་དང༌། ཉིང་ལག་དང༌། རུས་པ་ཡོངས་སུ་བཏང་བས་ཡང་དག་པར་ བསྡུས་པའི་དགེ་བའི་རྩ་བ་འདིས་སེམས་ཅན་ཐམས་ཅད་རུས་པ་དང༌། ཤ་དང༌། ཁྲག་མེད་པའི་ལུས་དང་ལྡན་ཞིང་སྤྲུལ་པ་ལྟ་བུའི་ལུས་ཅན་དུ་གྱུར་ཅིག །སེམས་ཅན་ཐམས་ ཅད་ལུས་ལ་ཐུབ་པ་མེད་ཅིང་ཟིལ་གྱིས་མི་ནོན་པས་རྡོ་རྗེ་ལྟ་བུའི་སྟོབས་ཀྱི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་ཆགས་པ་མེད་ཅིང་གྲོལ་བ་དང༌། བཅིངས་པ་མེད་ པའི་ཡེ་ཤེས་ཀྱི་ལུས་ཀྱིས་བྱུང་སྟེ། ཐམས་ཅད་མཁྱེན་པའི་སྟོབས་དང་ཆོས་སུ་ལྡན་པའི་ལུས་ཕུན་སུམ་ཚོགས་པར་གྱུར་ཅིག །སེམས་ཅན་ཐམས་ཅད་དབང་པོ་ཐ་མི་དད་ཅིང་ གཅད་དུ་མེད་པ་རབ་ཏུ་ཐོབ་པས་ཡེ་ཤེས་ཀྱི་སྟོབས་ཀྱི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་སྟོབས་དང༌། དབང་གི་ཕ་རོལ་ཏུ་ཕྱིན་པ་ཐོབ་པས་ཆོས་ཀྱི་ སྟོབས་ཀྱི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་ལུས་ཤིག་ཤིག་པོ་མེད་པས་ཡན་ལག་ཤིན་ཏུ་བརྟན་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ ཅད་འགྲོ་བ་ཀུན་ཡོངས་སུ་སྨིན་པར་བྱེད་ཅིང་འདུལ་བ་ལ་ཞུགས་པས་འགྲོ་བ་ཐམས་ཅད་ཇི་ལྟར་མོས་པའི་ལུས་དང་ཡན་ལག་གི་བྱིན་གྱི་རླབས་དང་ལྡན་པར་གྱུར་ཅིག །སེམས་ ཅན་ཐམས་ཅད་མཐུ་བོ་ཆེའི་ཡན་ལག་དང༌། ཉིང་ལག་ཡང་དག་པར་ཟིན་པས་སྟོབས་ཆེན་པོ་དང་ལྡན་ཞིང་ཡེ་ཤེས་ལ་གནས་པའི་ལུས་དང་ལྡན་པར་གྱུར་ཅིག །སེམས་ཅན་ ཐམས་ཅད་ཆད་ཅིང་དུབ་པ་མེད་པའི་ལུས་རབ་ཏུ་ཐོབ་པས་ཤིན་ཏུ་བརྟན་པར་ལུས་ཀྱི་རྒྱུད་འབྲེལ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་མཐུ་དང་བརྩོན་འགྲུས་ ༄༅། །ཆེན་པོ་དང་ལྡན་པའི་ལུས་ཀྱིས་ཤིན་ཏུ་བརྟན་ཞིང་སྟོབས་དང་ལྡན་པར་གྱུར་ཅིག །སེམས་ཅན་ཐམས་ཅད་མཐའ་ཡས་པའི་ཡེ་ཤེས་ཀྱི་ཁྱུ་མཆོག་ གི་མཐུ་འབྱིན་པའི་ལུས་དང་ལྡན་ཞིང་ཆོས་ཀྱི་ལུས་ཀྱིས་འགྲོ་བ་ཐམས་ཅད་དུ་རྣམ་པར་བརྒྱན་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་ཁ་ན་མ་ཐོ་བ་ མེད་ཅིང་བལྟ་ན་དོན་ཡོད་པ་དང་ལྡན་ཏེ་བསོད་ནམས་ཀྱི་སྟོབས་ཀྱི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་གནས་མེད་པའི་ཡེ་ཤེས་ཀྱི་མཐར་ཐུག་སྟེ་གནས་ པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་བསམ་པ་བྱིན་གྱིས་བརླབས་པ་དང་ལྡན་ཞིང་སངས་རྒྱས་ཀྱིས་ཡོངས་སུ་བཟུང་བའི་ ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་ཐམས་ཅད་དུ་འགྲོ་བའི་ལམ་གྱི་ལུས་ཀྱི་རྗེས་སུ་སོང་བས་འགྲོ་བ་ཐམས་ཅད་ལ་ཕན་འདོགས་པའི་ལུས་དང་ལྡན་ པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་ལ་ཕྱིར་ཕྱོགས་པ་མེད་ཅིང་མངོན་པར་ལྟ་བའི་སྣང་བས་སྒོ་ཀུན་ནས་ལྟ་བའི་ལུས་དང་ལྡན་པར་ གྱུར་ཅིག །སེམས་ཅན་ཐམས་ཅད་ཐམས་ཅད་མཁྱེན་པའི་ཐེག་པ་ལ་སྤྱོད་པ་བསམ་པ་མཐར་ཕྱིན་པར་བྱ་བ་ལ་བརྩོན་པས་བརྩོན་འགྲུས་དང་ལྡན་པའི་ལུས་ཕུན་སུམ་ཚོགས་ པར་གྱུར་ཅིག །སེམས་ཅན་ཐམས་ཅད་ཡེ་ཤེས་བརྟན་པར་གནས་པ་ཐོབ་པས་ང་རྒྱལ་དང༌། རློམ་པ་དང༌། དྲེགས་པ་ཐམས་ཅད་རྒྱུན་འཆད་ཅིང་རྣམ་པར་དག་པའི་ལུས་དང་ལྡན་ པར་གྱུར་ཅིག །སེམས་ཅན་ཐམས་ཅད་ཐམས་ཅད་མཁྱེན་པའི་ཐེག་པ་ལ་ཡང་དག་པ་ཇི་ལྟ་བ་བཞིན་དུ་ལས་གྲུབ་པར་གྱུར་པས་བརྟུལ་ཞུགས་དམ་པའི་ལུས་དང་ལྡན་པར་གྱུར་ ཅིག་༑སེམས་ཅན་ཐམས་ཅད་འཇིག་རྟེན་དུ་སྐྱེས་པའི་ལུས་ཐམས་ཅད་ལས་རྣམ་པར་འདས་ཤིང་དེ་བཞིན་གཤེགས་པའི་དགེ་བས་བྱུང་བའི་ལུས་སུ་གྱུར་ཅིག །ཅེས་དེ་ལྟར་བྱང་ ཆུབ་སེམས་དཔའ་སེམས་དཔའ་ཆེན་པོ་ཡན་ལག་དང༌། ཉིང་ལག་དང༌། རུས་པ་དེ་དག་སློང་བ་རྣམས་ལ་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ ཀྱིས་ཐམས་ཅད་མཁྱེན་པའི་ཡེ་ཤེས་སྒྲུབ་པར་བྱ་བ་དང༌། ཤིན་ཏུ་རྣམ་པར་དག་པའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རང་གི་ ལུས་ལས་སློང་བ་དག་གིས་མདོག་དང་ལྡན་པའི་པགས་པ་བསླངས་པའི་ཚེ་མཚོན་ཆ་ཐོགས་པའི་སློང་བ་མཐོང་ཡང་དགའ་བར་བྱེད་པའི་དབང་པོས་སློང་བ་ལ་ལྟ་ཞིང་སློང་བ་རྣམས་ ལ་དྲིན་དུ་གཟོ་བའི་འདུ་ཤེས་ཉེ་བར་བཞག་ནས་ལེགས་པར་བཏིང་བའི་སྟན་ལ་སློང་བ་རྣམས་བཀོད་དེ། སློང་བ་རྣམས་ལ་རིམ་གྲོའི་འདུ་ཤེས་ཉེ་བར་གཞོག་པ་དང༌། ལེན་པ་རྣམས་ ༄༅། །ལ་ཤིན་ཏུ་དཀོན་པའི་འདུ་ཤེས་ཡང་དག་པར་སྐྱེད་པ་དང༌། ཐམས་ཅད་མཁྱེན་པའི་གཞིར་གྱུར་པ་སྨོན་པར་བྱ་བ་ཡང་དག་པར་མཐོང་བར་སེམས་ ཤིང་སློང་བ་རྣམས་ལ་ཕན་འདོགས་པའི་སེམས་ཀྱིས་རྟོག་ཅིང་འཛུམ་དང་ལྡན་པར་ལྟ་བས་སློང་བ་རྣམས་ལ་བལྟ་ཞིང་ཚུར་ཤེག །ལོངས་ཤིག་ཅེས་བྱ་བའི་ཚིག་བརྗོད་པ་དང་ སློང་བ་རྣམས་ལ་བདག་ཉིད་ཅི་དགའ་བར་བྱ་བས་གཏོང་བ་དེ་ཇི་ལྟར་བྱང་ཆུབ་སེམས་དཔའ་དག་པའི་སྙིང་པོ་དང༌། རི་དྭགས་ཀྱི་རྒྱལ་པོ་གསེར་གྱི་རྩིབ་ལོགས་ལྟར་མདོག་ དང་ལྡན་པའི་པགས་པ་སློང་བ་རྣམས་ལ་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་དེ་ བཞིན་གཤེགས་པའི་ཡོན་ཏན་གྱིས་མི་ངོམས་ཤིང་རྣམ་པར་དག་པས་ཤིན་ཏུ་འཇམ་པའི་མདོག་དང་ལྡན་པར་གྱུར་ཅིག །སེམས་ཅན་ཐམས་ཅད་རྡོ་རྗེའི་མདོག་ཐུབ་པར་ དཀའ་བའི་ཁ་དོག་དང་ལྡན་ཞིང་མ་འདྲེས་པའི་ཁ་དོག་དང་ལྡན་པར་གྱུར་ཅིག །སེམས་ཅན་ཐམས་ཅད་འཛམ་བུ་ཆུ་ཀླུང་གི་སྙིང་པོ་ལྟར་དག་ཅིང་གསེར་གྱི་མདོག་དང་ལྡན་ པར་གྱུར་ཅིག །སེམས་ཅན་ཐམས་ཅད་བསམ་པ་ཇི་ལྟ་བ་བཞིན་དུ་ཁ་དོག་རྣམ་པར་སྦྱངས་པས་དག་ཅིང་ཁ་དོག་མཐའ་ཡས་པའི་མདོག་དང་ལྡན་པར་གྱུར་ཅིག །སེམས་ ཅན་ཐམས་ཅད་དགེ་སྦྱོང་དེ་བཞིན་གཤེགས་པ་ཤིན་ཏུ་གཞོན་པའི་ཁ་དོག་གིས་རྣམ་པར་དག་ཅིང་རྙོག་པ་མེད་ཅིང་དང་བའི་ཁ་དོག་དང༌། མདོག་གི་མཆོག་དང་ལྡན་པར་གྱུར་ ཅིག །སེམས་ཅན་ཐམས་ཅད་རང་བཞིན་གྱིས་ཁ་དོག་རྣམ་པར་དག་ཅིང༌། ཁ་དོག་དང་མདོག་གི་དམ་པ་དང་ལྡན་པར་གྱུར་ཅིག །སེམས་ཅན་ཐམས་ཅད་མཚན་དང་དཔེ་བྱད་ བཟང་པོས་རྣམ་པར་བྲིས་ཤིང་སངས་རྒྱས་ཀྱི་ཁ་དོག་རྣམ་པར་དག་པས་མདོག་དང་ཁ་དོག་ཤིན་ཏུ་རྣམ་པར་དག་པར་གྱུར་ཅིག །སེམས་ཅན་ཐམས་ཅད་ཁ་དོག་དང་མདོག་བཟང་ པོ་ཕུན་སུམ་ཚོགས་ཤིང་འགྲོ་བ་ཀུན་ཏུ་མདོག་གི་སྣང་བ་རབ་ཏུ་འགྱེད་པར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཁམས་ཐམས་ཅད་དུ་འོད་ཟེར་གྱི་དཀྱིལ་འཁོར་ བརྗོད་དུ་མེད་པ་རྣམ་པར་འགྱེད་པའི་རྒྱལ་མཚན་དང་ལྡན་ཞིང་མདོག་འོད་ཟེར་གྱི་དྲ་བ་ཅན་དང་ལྡན་པར་གྱུར་ཅིག །སེམས་ཅན་ཐམས་ཅད་གཟུགས་ཐམས་ཅད་ཀྱི་ཁ་དོག་རྣམ་ པར་དག་སྟེ། མདོག་དང་ཁ་དོག་ཤིན་ཏུ་སྣུམ་པ་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རང་གི་ལུས་ལས་མདོག་དང་ལྡན་པའི་པགས་པ་ སློང་བ་རྣམས་ལ་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་སངས་རྒྱས་ཀྱི་ཞིང་རྣམ་པར་དག་པར་འགྱུར་བ་དང༌། དེ་བཞིན་གཤེགས་པའི་ཡོན་ཏན་ ༄༅། །ཐམས་ཅད་དང་ལྡན་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ལ་ཕྱིན་ཅི་ལོག་མེད་པ། བཞིན་འཛུམ་པ་ཅན། ཡིད་བདེ་བ་ཐོབ་པ། ཐེག་པ་ཆེན་པོ་ལ་ལེགས་པར་གནས་པ། གྲགས་པ་འདོད་པ་མེད་པའི་སྦྱིན་པ་ཅན། སྙིང་ཐག་པ་ནས་སྦྱིན་པ་ལ་གནས་པ། གཏོང་བ་ཆེན་པོ་ལ་ཡིད་རབ་ཏུ་ཞུགས་པ། འཇུངས་པའི་དྲི་མ་ལ་མི་གནས་པའི་སེམས་དང་ལྡན་པ། ཕྲག་དོག་དང་འཇུངས་པའི་དྲི་མ་དང་བྲལ་བ། དེ་བཞིན་གཤེགས་པའི་ གསུང་ལ་རབ་ཏུ་ཞུགས་པ་དེ་ཇི་ལྟར་བྱང་ཆུབ་སེམས་དཔའ་ལྟ་བའི་བརྩོན་འགྲུས་དང༌། འཛམ་བུ་གླིང་གི་བདག་པོ་གསེར་གྱི་འོད་དང༌། དེ་མ་ཡིན་པའི་བྱང་ཆུབ་སེམས་ དཔའ་ཚད་མེད་པ་གཞན་དག་གིས་ཀྱང་སོར་མོ་རྣམས་ཡོངས་སུ་བཏང་བར་གྱུར་པ་ལྟར་སློང་བ་ལ་རྐང་ལག་གི་སོར་མོ་ཡོངས་སུ་གཏོང་བའི་ཚེ་དགེ་བའི་རྩ་བ་དེ་ དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། སོར་མོ་བྱིན་པ་དང༌། ཅི་བསླངས་པའི་དངོས་པོ་བཏང་བས་ཡང་དག་པར་བསྡུས་པའི་དགེ་བའི་རྩ་བ་འདིས་ སེམས་ཅན་ཐམས་ཅད་སངས་རྒྱས་ཀྱི་ཕྱག་སོར་ཐོབ་པར་གྱུར་ཏེ། སོར་མོ་རིང་བར་གྱུར་ཅིག །སེམས་ཅན་ཐམས་ཅད་སོར་མོ་རིམ་གྱིས་གཞོལ་བར་ལེགས་པར་གྲུབ་ པས་སོར་མོ་ཟླུམ་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སེན་མོ་གང་བའི་སོར་མོ་རྣམ་པར་དག་པ་དང་ལྡན་ཞིང་སེན་མོ་ཟངས་ཀྱི་ཁ་དོག་ལྟ་བུའི་སོར་མོ་དང་ལྡན་ པར་གྱུར་ཅིག །སེམས་ཅན་ཐམས་ཅད་ཆོས་ཐམས་ཅད་འཛིན་པར་བརྩོན་པའི་སོར་མོ་དཔེ་བྱད་བཟང་པོ་དང་ལྡན་ཞིང་སྐྱེས་བུ་དཔའ་བོ་ཐམས་ཅད་མཁྱེན་པའི་སོར་མོ་དང་ལྡན་པར་ གྱུར་ཅིག །སེམས་ཅན་ཐམས་ཅད་སྟོབས་བཅུའི་ཕྱག་སོར་དང་ལྡན་པར་གྱུར་ཏེ། དཔེ་བྱད་བཟང་པོས་གྲུབ་པའི་སོར་མོ་དང་ལྡན་པར་གྱུར་ཅིག །སེམས་ཅན་ཐམས་ཅད་ཤིན་ ཏུ་སྦྱངས་པའི་སོར་མོ་ཚུལ་དང་མཐུན་པར་སྐྱེས་པས་སོར་མོའི་དམ་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སོར་མོའི་ཆོས་ཉིད་ཀྱི་ཡན་ལག་དང༌། བུམ་པ་གང་བ་ དང༌། བཀྲ་ཤིས་ཀྱིས་རྣམ་པར་མཛེས་པ་དང་ལྡན་ཞིང་སོར་མོའི་རྩེ་མོ་ལ་འཁོར་ལོ་ཡོད་པའི་སོར་མོ་དང་ལྡན་པར་གྱུར་ཅིག །སེམས་ཅན་ཐམས་ཅད་སྟོབས་བཅུའི་ཕྱག་སོར་ འཕྲིན་ལས་ཀྱི་རྣམ་པར་སྨིན་པ་རྒྱུ་མཐུན་པར་བྱུང་བ་ལྟ་བུ་དང་ལྡན་ཞིང་པདྨོ་བཟང་པོ་དང་དགའ་བ་འཁྱིལ་བས་སོར་མོ་ཐམས་ཅད་ཀྱི་ཚིགས་དང་ཡན་ལག་ཤིན་ཏུ་བརྒྱན་ཅིང་དཔེ་ བྱད་བཟང་པོས་མཛེས་པར་རྣམ་པར་ཕྱེ་བའི་རྒྱན་གྱིས་བརྒྱན་པའི་སོར་མོ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཞིང་བརྗོད་དུ་མེད་པ་སྣང་བར་བྱ་བ་ལ་ ༄༅། །བརྩོན་ཞིང༌། འོད་ཟེར་གྱི་དྲ་བའི་མཛོད་རབ་ཏུ་འགྱེད་བའི་སོར་མོ་དང་ལྡན་པར་གྱུར་ཅིག །སེམས་ཅན་ཐམས་ཅད་སོར་མོ་ཤིན་ཏུ་མཛེས་པ་དྲ་བས་ ལེགས་པར་འབྲེལ་བ་དང་ལྡན་ཞིང་སོར་མོ་ལེགས་པ་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སོར་མོ་ཡོངས་སུ་གཏོང་བའི་ཚེ་ སེམས་ཅན་ཐམས་ཅད་རྣམ་པར་དག་པར་བྱ་བའི་སེམས་ཀྱིས་དགེ་བའི་རྩ་བ་དེ་དག་ཐམས་ཅད་སེམས་ཅན་རྣམ་ལ་ཡོངས་སུ་བསྔོའོ། །གཞན་ཡང་བྱང་ཆུབ་སེམས་ དཔའ་སེམས་དཔའ་ཆེན་པོ་ཆོས་འདོད་པ་ལ། ལ་ལ་ཞིག་གིས་ཆོས་ཐོབ་པར་བྱ་བར་བསམ་སྟེ་དེས་འདི་སྐད་དུ་གལ་ཏེ་ཁྱོད་ཀྱི་ཤ་དང་བཅས་པའི་སེན་མོ་ང་ལ་བྱིན་ན་ནི། ངས་ ཁྱོད་ལ་ཆོས་བསྟན་པར་བྱའོ། །ཞེས་ཟེར་པ་ཞིག་ཡོད་ན། དེ་ལ་འདི་སྐད་དུ་སྨྲས་ཏེ། བདག་གི་ཤ་དང་བཅས་པའི་སེན་མོ་ཅི་བདེར་ཁྱེར་ལ་བདག་ལ་ཆོས་བསྟན་པར་མཛོད་ཅིག ། ཅེས་ཇི་ལྟར་རྒྱལ་པོ་དབང་ཕྱུག་ཏུ་གྱུར་པ་ལེགས་པར་བཤད་པ་ཆོལ་བ་དང༌། བྱང་ཆུབ་སེམས་དཔའ་ཟད་མི་ཤེས་པ་དང༌། དེ་མ་ཡིན་པའི་བྱང་ཆུབ་སེམས་དཔའ་སེམས་ དཔའ་ཆེན་པོ་གཞན་ཚད་མེད་པ་ཆོས་ཀྱི་ཆོས་བཟང་པོ་ཉིད་ལ་བརྩོན་པ། འགྲོ་བ་ཀུན་ཏུ་ཆོས་ཀྱི་ལོ་ཤིན་ཏུ་ལེགས་པ་ཡང་དག་པར་བསྟན་པའི་ཕྱིར་ཤ་དང་བཅས་པའི་སེན་ མོ་ཡོངས་སུ་བཏང་བར་གྱུར་པ་དེ་ལྟར་སློང་བ་རྣམས་ལ་རང་གི་ཤ་དང་བཅས་པའི་སེན་མོ་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་ སུ་བསྔོ་སྟེ། སེམས་ཅན་ཐམས་ཅད་སངས་རྒྱས་ཀྱི་ཕྱག་སེན་རབ་ཏུ་གྲུབ་ཅིང༌། ཟངས་ཀྱི་ཁ་དོག་ལྟ་བུའི་སེན་མོ་དང་ལྡན་པར་གྱུར་ཅིག །སེམས་ཅན་ཐམས་ཅད་དཔེ་བྱད་བཟང་ པོའི་སེན་མོ་རབ་ཏུ་ཐོབ་ཅིང་མདོག་སྣུམ་པའི་སེན་མོ་དང་ལྡན་པར་གྱུར་ཅིག །སེམས་ཅན་ཐམས་ཅད་སེན་མོའི་དམ་པ་དང་ལྡན་ཞིང་འོད་འཚེར་བའི་སེན་མོ་དང་ལྡན་པར་གྱུར་ཅིག ། སེམས་ཅན་ཐམས་ཅད་སེན་མོ་བཟང་པོ་དང་ལྡན་ཞིང་ཐམས་ཅད་མཁྱེན་པའི་ཕྱག་སེན་མོ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འཇིག་རྟེན་ཐམས་ཅད་ཀྱིས་མི་གོས་ ཤིང་མཚུངས་པ་མེད་པའི་སེན་མོ་དང་ལྡན་པར་གྱུར་ཅིག །སེམས་ཅན་ཐམས་ཅད་འོད་ཀྱིས་སྣང་བར་བྱ་བ་ལ་བརྩོན་ཞིང་ཤིན་ཏུ་བརྒྱན་པའི་སེན་མོ་དང་ལྡན་པར་གྱུར་ཅིག །སེམས་ ཅན་ཐམས་ཅད་ཉམས་པ་མེད་ཅིང་རྣམ་པར་དག་པའི་སེན་མོ་གང་བ་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཆེ་ཞིང་ཡངས་པ་རྣམ་པར་དག་པ་དང་ལྡན་ཞིང༌། སངས་རྒྱས་ཀྱི་ཆོས་ཐམས་ཅད་ཀྱི་རྗེས་སུ་སོང་བའི་མཚན་དང་ལྡན་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་ལས་རྣམ་པར་སྨིན་པས་རྣམ་པར་དག་ཅིང་མཛེས་ ༄༅། །པར་སྐྱེས་པའི་སེན་མོ་དང་ལྡན་པར་གྱུར་ཅིག །སེམས་ཅན་ཐམས་ཅད་འོད་ཟེར་ཁ་དོག་མཐའ་ཡས་པ་རབ་ཏུ་འགྱེད་པའི་མཛོད་དང་ལྡན་ཞིང་མགོན་པོ་ ཐམས་ཅད་མཁྱེན་པའི་ཕྱག་སེན་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འདོད་པའི་ཕྱིར་སེན་མོ་དང་ཤར་བཅས་པ་ཡོངས་སུ་ གཏོང་བའི་ཚེ་དགེ་བའི་རྩ་བ་དེ་དག་སངས་རྒྱས་ཐམས་ཅད་ཀྱི་སྐུ་དང་ཕྱག་སེན་གྱི་རྒྱན་ཡོངས་སུ་རྫོགས་པར་བྱ་བ་དང༌། ཐོགས་པ་མེད་པའི་སྟོབས་ཀྱི་མཐར་ཕྱིན་པར་བྱ་བའི་ ཕྱིར་ཡོངས་སུ་བསྔོའོ།། །།བམ་པོ་སུམ་ཅུ་བརྒྱད་པ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་དོན་དུ་ཆོས་ཚོལ་བ་ལྷུར་ལེན་པ་ཤིན་ཏུ་དཀོན་ པའི་ཆོས་ཚེལ་[*TSOL] བ་ལ་ཞུགས་པ་ལ་ཆོས་སྟོན་པའི་གང་ཟག་ལ་ལས་མེའི་རླུབས་སུ་ལུས་གཞུག་པར་བྱས་ཏེ་འདི་སྐད་དུ། གལ་ཏེ་ཁྱོད་མི་འགྲེང་བདུན་དུ་བརྐོས་པའི་མེའི་ རླུབས་སུ་མཆོང་ཕོད་ན། ངས་ཁྱོད་ལ་ཆོས་ཀྱི་སྦྱིན་པ་བྱའོ། །ཞེ་ན། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲ་དེ་ཐོས་ནས་ཤིན་ཏུ་དགའ་ཞིང་ཡིད་བདེ་བ་དང༌། རབ་ཏུ་ འདུན་པའི་ཡིད་སྐྱེས་ནས་འདི་སྙམ་དུ་སེམས་ཏེ། ངན་སོང་ཐམས་ཅད་དང༌། མནར་མེད་པའི་སྡུག་བསྔལ་ཉམས་སུ་བླངས་པ་དང་ཡང་བསྔོ་ཞིང་བདག་གིས་དམ་པའི་ཆོས་ བཙལ་དགོས་ན། འདི་ལྟར་མེའི་རླུབས་སུ་མཆོད་པ་ཙམ་གྱིས་དམ་པའི་ཆོས་རྙེད་པར་འགྱུར་ན་ལྟ་ཀྱེ་མ་དེ་ལྟར་དཀོན་པའི་སངས་རྒྱས་ཀྱི་ཆོས་དེ་དག་ཀྱང་སེམས་ཅན་དམྱལ་བའི་ སྡུག་བསྔལ་ལྟ་བུ་མེད་པར་མེའི་རླུབས་ཙམ་དུ་མཆོང་བས་རྙེད་པ་འདི་ནི། ངོ་མཚར་ཆེའོ། །སྙམ་ནས་འདི་ལྟར་བདག་གིས་མི་འགྲེང་བདུན་དུ་བརྐོས་པའི་མེའི་རླུབས་སུ་མཆོང་བར་ བགྱིའི༑ ཁྱོད་ཀྱིས་བདག་ལ་སངས་རྒྱས་ཀྱི་ཆོས་བཤད་དུ་གསོལ་ཞེས་ནས་དེ་ཇི་ལྟར་རྒྱལ་པོ་ལེགས་པར་བཤད་པ་ཚོལ་བ་དང༌། བྱང་ཆུབ་སེམས་དཔའ་རྡོ་རྗེ་སེམས་དཔའ་དང༌། དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྲངས་མེད་པ་དག་གིས་ཀྱང་མེའི་རླུབས་སུ་མཆོད་པར་བྱས་པ་དེ་ལྟར་ཆོས་ཀྱི་དོན་དུ་སྡུག་བསྔལ་གྱི་ཚོར་བ་ ཐམས་ཅད་དང་བསྡོ་བའི་ལུས་ཀྱིས་མེའི་རླུབས་སུ་མཆོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཤིན་ཏུ་ཕྱིར་མི་ལྡོག་པའི་ཆོས་ཅན་དུ་གྱུར་ཏེ་ཐམས་ཅད་མཁྱེན་པའི་གནས་དང་ལྡན་པར་གྱུར་ཅིག །སེམས་ཅན་ ཐམས་ཅད་སངས་རྒྱས་ཀྱི་བདེ་བ་ཐམས་ཅད་མྱོང་བར་གྱུར་ཏེ་གཡང་ས་ཐམས་ཅད་ལས་ཕྱིར་ལོག་པར་གྱུར་ཅིག །སེམས་ཅན་ཐམས་ཅད་འཇིགས་ཤིང་སྐྲག་པ་ཐམས་ཅད་དང་ ༄༅། །བྲལ་ཞིང་བག་ཚ་བ་མེད་པའི་སེམས་དང་ལྡན་པར་གྱུར་ཅིག །སེམས་ཅན་ཐམས་ཅད་བདེ་བ་དང༌། ཡིད་བདེ་བ་དང༌། ཆོས་ཐམས་ཅད་ཀྱི་རྒྱན་རབ་ཏུ་ཐོབ་ ཅིང་ཚོལ་བ་ལ་བརྩོན་པར་གྱུར་ཅིག །སེམས་ཅན་ཐམས་ཅད་མེ་གསུམ་རབ་ཏུ་ཞི་བས་གནས་པའི་སེམས་དང་ལྡན་ཞིང་ངན་སོང་གི་ལམ་ཐམས་ཅད་དང་ཤིན་ཏུ་བྲལ་བར་ གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་བདེ་བའི་རྣམ་པ་རབ་ཏུ་ཐོབ་སྟེ་ཡིད་བདེ་བ་ཐམས་ཅད་དང་ལྡན་པར་གྱུར་ཅིག །སེམས་ཅན་ཐམས་ཅད་མེ་གསུམ་དང་བྲལ་ཞིང་ བྱང་ཆུབ་ཀྱི་སེམས་ཀྱིས་འདོད་ཆགས་དང༌། ཞེ་སྡང་དང༌། གཏི་མུག་ཞི་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་མཐོང་བའི་དགའ་བས་ཡང་དག་པར་སྤྱོད་ ཅིང་བྱང་ཆུབ་སེམས་དཔའི་ཏིང་ངེ་འཛིན་གྱི་བདེ་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་མཉམ་པ་མེད་པ་ལ་རབ་ཏུ་གཞོལ་ཞིང་ ཤིན་ཏུ་ཐོས་པའི་ཆོས་ཅན་དུ་གྱུར་ཅིག །སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ཀྱི་རྗེས་སུ་ཤིན་ཏུ་སོང་བའི་ཆོས་དང་ལྡན་ཞིང་བྱང་ཆུབ་སེམས་དཔའི་མངོན་པར་ཤེས་ པས་རྣམ་པར་རོལ་པའི་བདེ་བ་རབ་ཏུ་ཐོབ་པར་གྱུར་ཅིག་ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཚོལ་ཞིང་མེའི་རླུབས་སུ་མཆོང་པས་ཡང་དག་པར་བཟུང་ བའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་སྒྲིབ་པའི་ལས་དང་སྤྱོད་པའི་མཐར་ཕྱིན་ཅིང༌། ཡེ་ཤེས་ཀྱི་མེ་ཤིན་ཏུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་ བྱང་ཆུབ་སེམས་དཔའ་སེམས་དཔའ་ཆེན་པོ་དམ་པའི་ཆོས་ཀྱི་ཕྱིར་སྡུག་བསྔལ་གྱི་ཚོར་བ་ཐམས་ཅད་བདག་གི་ལུས་ཀྱིས་བཟོད་པར་བྱེད་ཅིང༌། དམ་པའི་ཆོས་བརྗོད་པ་དང༌། བྱང་ ཆུབ་སེམས་དཔའི་ལམ་སྟོན་པ་དང༌། སངས་རྒྱས་ཀྱི་བྱང་ཆུབ་གསལ་བར་བྱེད་པ་དང༌། བླ་ན་མེད་པའི་ཡེ་ཤེས་ཀྱི་ཕུང་པོའི་ཚོགས་ཡང་དག་པར་གསོག་པ་དང༌། སྟོབས་བཅུ་ལ་ བརྩོན་པར་བྱེད་ཅིང་ཐམས་ཅད་མཁྱེན་པར་སེམས་བསྐྱེད་པ་ཡངས་པར་བྱེད་པ་དང༌། ཆགས་པ་མེད་པའི་ཡེ་ཤེས་ཀྱི་ཕུང་པོ་ལ་བདག་མངོན་དུ་མཐུན་པར་ཡང་དག་པར་ལྟ་ཞིང་སེམས་ ཅན་ཐམས་ཅད་ཀྱི་རྣམ་པར་དག་པ་དང༌། རྣམ་པར་བྱང་བ་ཡང་དག་པར་སྒྲུབ་པ་དང༌། བྱང་ཆུབ་སེམས་དཔའི་སྤྱོད་ཡུལ་ཐམས་ཅད་ལ་རབ་ཏུ་འཇུག་པ་དང༌། ཡེ་ཤེས་ཆེན་པོ་ལ་ བརྩོན་ཞིང་སངས་རྒྱས་ཀྱི་བྱང་ཆུབ་ཡོངས་སུ་སྲུང་བའི་ཚེ་ཇི་ལྟར་བྱང་ཆུབ་སེམས་དཔའ་ཆོས་བཟང་པོ་ཚོལ་བ་དང༌། རྒྱལ་པོ་ཤུགས་ཆེན་པོ་འཛིན་པ་དང༌། དེ་མ་ཡིན་པའི་བྱང་ཆུབ་ སེམས་དཔའ་གཞན་ཚད་མེད་པ་དག་གིས་ཀྱང་ཇི་ལྟར་སྤྱད་པ་བཞིན་དུ་དེ་སྡུག་བསྔལ་གྱི་རྣམ་པ་གཅིག་མ་ཡིན་པ་ཉམས་སུ་འབབ་པ་དང༌། སྡུག་བསྔལ་གྱི་ཚོར་བའི་གནོད་པ་རྣམ་པ་ ༄༅། །སྣ་ཚོགས་མྱོང་བ་དང༌། སྡུག་བསྔལ་གྱི་གནོད་པ་ཐམས་ཅད་དང་ཕྲད་པ་རང་གི་ལུས་ཀྱིས་ཉེ་བར་ལེན་ཅིང་བཟོད་པར་བྱེད་པ་དང༌། དམ་པའི་ཆོས་སྤོང་ བའི་གང་ཟག་སེམས་གཏུམ་པ་ཅན་སྡིག་པའི་ལས་ཀྱིས་བསྒྲིབས་པ། བདུད་ཀྱི་ལས་ཀྱིས་བྱིན་གྱིས་བརླབས་པ་དག་ལས་སྡུག་བསྔལ་གྱི་གནོད་པ་དེ་དག་ཐམས་ཅད་ཉེ་བར་ ལེན་ཅིང་བཟོད་པར་བྱེད་པའི་ཚེ་དགེ་བའི་རྩ་བ་དེ་དག་འདི་ལྟར་དམ་པའི་ཆོས་ཤེས་པར་བྱ་བའི་ཕྱིར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་བདེ་ བའི་ནན་ཏན་གྱིས་མངོན་པར་ཤེས་པ་མྱུར་བ་དང་ལྡན་ཞིང་སྡུག་བསྔལ་དང༌། མི་བདེ་བ་ཡོངས་སུ་སྤངས་པར་གྱུར་ཅིག །སེམས་ཅན་ཐམས་ཅད་བདེ་བའི་རྣམ་པ་ཐམས་ ཅད་རབ་ཏུ་འཐོབ་པ་ལ་གནས་པར་སྡུག་བསྔལ་གྱི་ཚོར་བ་ཐམས་ཅད་དང་བྲལ་བར་གྱུར་ཅིག །སེམས་ཅན་ཐམས་ཅད་མིག་ཡོར་ལྟ་བུའི་བདེ་བ་རབ་ཏུ་ཐོབ་ཅིང་སྡུག་བསྔལ་གྱི་ ཕུང་པོ་ཐམས་ཅད་འགག་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་སྤྱོད་པའི་མཐར་ཕྱིན་ཏེ་སྡུག་བསྔལ་གྱི་བཙོན་ར་ནས་ཕྱིར་ལོག་པར་གྱུར་ཅིག །སེམས་ཅན་ ཐམས་ཅད་སྡུག་བསྔལ་གྱི་ལམ་རྒྱུད་དང་འཚེ་བ་ཐམས་ཅད་ལས་ཕྱིར་ལོག་ཅིང་བདེ་བའི་ལམ་མཐོང་བར་གྱུར་ཅིག །སེམས་ཅན་ཐམས་ཅད་སྡུག་བསྔལ་ཐམས་ཅད་ཤིན་ ཏུ་རྣམ་པར་ཆད་པས་ཆོས་ཀྱི་དགའ་བ་དང་བདེ་བའི་རྣམ་པས་ཤིན་ཏུ་བརྟན་པར་གྱུར་ཅིག །སེམས་ཅན་ཐམས་ཅད་ཕན་ཚུན་དུ་ཞེ་མི་སྡང་ཞིང་བྱམས་པ་རབ་ཏུ་ཐོབ་པས་སྡུག་བསྔལ་ ལས་གྲོལ་བར་གྱུར་ཅིག །སེམས་ཅན་ཐམས་ཅད་འཁོར་བ་ཐམས་ཅད་ན་ཡོད་པའི་སྡུག་བསྔལ་རབ་ཏུ་བྱང་ཞིང་སངས་རྒྱས་ཐམས་ཅད་ཀྱི་བདེ་བའི་དོན་མཐོང་བར་གྱུར་ཅིག །སེམས་ ཅན་ཐམས་ཅད་སྡུག་བསྔལ་གྱི་ཚོར་བ་ཐམས་ཅད་ཀྱིས་ལུས་ལ་གནོད་པར་འགྱུར་བ་མེད་ཅིང་འདྲ་བ་མེད་པའི་བདེ་བ་རྣམ་པར་དག་པ་དང་ལྡན་པར་གྱུར་ཅིག །སེམས་ཅན་ཐམས་ ཅད་སངས་རྒྱས་ཀྱི་བདེ་བ་བསྒྲིབས་པ་མེད་པའི་མཐར་ཕྱིན་ཏེ་བདེ་བའི་ཁྱད་པར་ཐམས་ཅད་རབ་ཏུ་ཐོབ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ ཅད་མཁྱེན་པའི་ཆོས་ཀྱི་ཕྱིར་སྡུག་བསྔལ་གྱི་རྣམ་པ་ཐམས་ཅད་བཟོད་པར་བྱེད་ཅིང་ཉམས་སུ་ལེན་པའི་ཚེ་དགེ་བའི་རྩ་བ་དེ་དག་འགྲོ་བ་ཐམས་ཅད་གཡང་ས་ལས་བསྲུང་ཞིང་ཐམས་ ཅད་མཁྱེན་པའི་རྣམ་པར་ཐར་པའི་བསྒྲིབས་པ་མེད་པ་ལ་རབ་ཏུ་དགོད་པའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དམ་པའི་ཆོས་བཙལ་ བ་ལ་ཤིན་ཏུ་བརྩོན་པ། ཆོས་ཀྱི་ཚིག་དང་ཡི་གེ་འཁོར་ལྔས་ཡང་དག་པར་ལེན་པ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཀྱི་ཆོས་ཡོངས་སུ་བཙལ་པ་དང་རྗེས་ ༄༅། །སུ་དྲན་པ་ལ་གནས་པ། ཆོས་ཀྱི་དགའ་བས་སྤྲོ་ཞིང་མོས་པའི་སེམས་དང་ལྡན་པ། ཟང་ཟིང་མེད་པའི་ཆོས་རབ་ཏུ་བཙལ་པ་ལ་བརྩོན་པ། འཇིག་རྟེན་པའི་ རྒྱལ་པོའི་སྲིད་དང་སྐྱིད་པའི་ལྗན་ལྗིན་ཐམས་ཅད་ལས་རྣམ་པར་འདས་པ། སངས་རྒྱས་ཀྱི་རྒྱལ་སྲིད་དང༌། ཆོས་ཀྱི་སྐྱིད་པ་ལ་མངོན་པར་མོས་པ། འཇིག་རྟེན་གྱི་དགའ་བ་ཐམས་ ཅད་ཀྱིས་མ་གོས་པའི་ཡིད་ལ་བྱེད་པ་དང་ལྡན་པ། འཇིག་རྟེན་ལས་འདས་པའི་དགའ་བས་སེམས་ཤིན་ཏུ་སྤེལ་བ། འཇིག་རྟེན་གྱི་སྐྱིད་པ་ཟང་ཟིང་དང་བྲལ་བའི་ཡིད་དང་ལྡན་པ། སྤྲོས་པ་མེད་པའི་སངས་རྒྱས་ཀྱི་ཆོས་ལ་གནས་པ་རབ་ཏུ་ཐོབ་པར་མངོན་པར་ཞུགས་པ་དེས་རྒྱ་མཚོའི་མཐར་ཐུག་པའི་ས་ཆེན་པོ་གྲོང་རྡལ་བྱེ་བ་ཁྲག་ཁྲིག་བརྒྱ་སྟོང་དང༌། ཡུལ་དང་ཡུལ་གྲུབ་བྱེ་བ་ཁྲག་ཁྲིག་བརྒྱ་སྟོང་དང༌། སྐྱེ་བོ་དུ་མས་ཡོངས་སུ་གང་བ། བདེ་བའི་རྣམ་པ་ཐམས་ཅད་དང༌། སྐྱེ་བོས་རྒྱས་པའི་ཁྱིམ་གྱིས་གང་བ། བཟའ་ཤིང་གི་ར་ བ་བྱེ་བ་ཁྲག་ཁྲིག་བརྒྱ་སྟོང་རྩེ་ཞིང་དགའ་བར་བྱ་བའི་གཞི་དང་ལྡན་པ། ཆུ་ཀླུང་ཡིད་དུ་འོང་བ་སྣ་ཚོགས་དང༌། གྲིབ་ཤིང་དང༌། བཟའ་ཤིང་མདངས་དགའ་བས་ཤིན་ཏུ་བརྒྱན་ པ༑ འཁྲུག་ལོང་མེད་ཅིང་ཤིན་ཏུ་བདེ་པ། གཞན་གྱི་ཁམས་ཤིན་ཏུ་བཅོམ་པ། བདག་གི་ཁམས་ལ་ཉམས་པ་མེད་པ། གསེར་དང༌། རིན་པོ་ཆེའི་མཛོད་དང༌། བང་བ་བྱེ་བ་ ཁྲག་ཁྲིག་བརྒྱ་སྟོང་གིས་བརྒྱན་པ། བུ་དང༌། བུ་མོ་དང༌། ཆུང་མ་དང༌། འཁོར་སྣ་ཚོགས་དང༌། ཆུང་མའི་འཁོར་སྣ་ཚོགས་ཡོད་པ། གྲོང་ཁྱེར་བྱེ་བ་ཁྲག་ཁྲིག་བརྒྱ་སྟོང་དང་རྒྱལ་ པོའི་ཕོ་བྲང་འཁོར་དང༌། ཕོ་བྲང་ཆེན་པོ་ཡོད་པ་དེ་ལྟ་བུའི་ཆོས་ཀྱི་དོན་དང༌། ཆོས་བཙལ་བའི་ཕྱིར་ཚིག་དང་ཡི་གེའི་འབྲུ་གཅིག་གི་དོན་དུ་ཡང་རྒྱལ་པོའི་སྲིད་སྙིང་པོ་མེད་པ་ལས་སྙིང་ པོ་བསྐྱེད་ཅིང་ཆོས་ལ་དཀོན་པའི་འདུ་ཤེས་རབ་ཏུ་བསྐྱེད་ནས་འགྲོ་བ་ཐམས་ཅད་ཀྱི་དོན་དུ་སངས་རྒྱས་ཀྱི་རྣམ་པར་ཐར་པ་བསྒྲིབས་པ་མེད་པ་དང༌། ཐམས་ཅད་མཁྱེན་པའི་ལམ་རྣམ་ པར་དག་པ་ཚོལ་ཞིང༌། ཇི་ལྟར་བྱང་ཆུབ་སེམས་དཔའ་མཐུ་ཆེན་དཔལ་དང༌། རྒྱལ་པོ་ཁྱད་པར་དཔལ་དང༌། དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ གིས་ཀྱང་ཇི་ལྟར་སྤྱད་པར་གྱུར་པ་དེ་བཞིན་དུ་ཡོངས་སུ་གཏང་བར་བྱ་བའི་ཚེ་ས་ཆེན་པོ་རྒྱ་མཚོའི་མཐར་ཐུག་པ་ཡོངས་སུ་བཏང་སྟེ་ཆོས་བཙལ་བས་ཡང་དག་པར་བསྡུས་པའི་དགེ་ བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ལག་ཤིན་ཏུ་ཆེ་བར་གཏོང་བ་ལ་མངོན་པར་མོས་ཤིང་ཤིན་ཏུ་ཡངས་པའི་གཏོང་བ་དང་ ལྡན་པར་གྱུར་ཅིག །སེམས་ཅན་ཐམས་ཅད་འགྱོད་པ་མེད་པར་སྦྱིན་པའི་བདག་པོར་གྱུར་ཏེ་གཏོང་བ་ཐམས་ཅད་ཡོངས་སུ་གཏོང་བར་གྱུར་ཅིག །སེམས་ཅན་ཐམས་ཅད་ལུས་དང་ ༄༅། །སྲོག་དང་ཡོ་བྱད་ལ་མི་ལྟ་བས་ཆོས་ཚོལ་བ་ལ་ཤིན་ཏུ་བརྩོན་པར་གྱུར་ཅིག །སེམས་ཅན་ཐམས་ཅད་འགྲོ་བ་ཐམས་ཅད་ཀྱི་ཐེ་ཚོམ་གཅོད་པས་ཚིམ་པར་ བྱ་བ་ལ་བརྩོན་ཞིང་ཆོས་ཐོབ་པར་བྱ་བས་ཤིན་ཏུ་དགའ་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ལ་ཡིད་དགའ་བ་རབ་ཏུ་ཐོབ་ཅིང་ཆོས་ལ་མངོན་པར་དགའ་བར་ གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཚོལ་བའི་སེམས་ཆེན་པོས་སྤྱོད་པ་དང༌། བྱང་ཆུབ་ཚད་མེད་པ་རྙེད་པས་ལུས་དང༌། སྲོག་དང༌། འཇིག་རྟེན་གྱི་སྐྱིད་པ་ཡོངས་ སུ་གཏོང་བར་གྱུར་ཅིག །སེམས་ཅན་ཐམས་ཅད་ལུས་དང་སྲོག་ལ་མི་ལྟ་ཞིང་ཆོས་ཀྱི་དགའ་བའི་མཐར་ཐུག་པས་ཆོས་ཀྱི་རིམ་གྲོ་དང༌། སྲི་ཞུ་རབ་ཏུ་ཐོབ་པར་གྱུར་ཅིག །སེམས་ ཅན་ཐམས་ཅད་སངས་རྒྱས་ཀྱི་ཆོས་ཤིན་ཏུ་དཀོན་པ། མཉེན་པ་ལ་བརྩོན་ཞིང་སངས་རྒྱས་ཀྱི་བསྟན་པ་ཡང་དག་པར་འཛིན་པར་གྱུར་ཅིག །སེམས་ཅན་ཐམས་ཅད་བྱང་ཆུབ་ སེམས་དཔའི་སྤྱོད་པ་གཞན་གྱི་དྲིང་མི་འཇོག་པའི་མཐར་ཕྱིན་ཅིང་སངས་རྒྱས་ཀྱི་བྱང་ཆུབ་སྣང་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་རབ་ཏུ་ཤེས་པའི་ཡིད་ཀྱིས་ ཐེ་ཚོམ་གྱི་ཟུག་རྔུ་དང་བྲལ་ཞིང་སངས་རྒྱས་ཀྱི་ཆོས་ཐམས་ཅད་ངེས་པར་རྟོགས་པ་མང་བར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་ དེ་དག་ཐམས་ཅད་སེམས་ཅན་ཐམས་ཅད་ཀྱི་དོན་དུ་ཆོས་བཙལ་བ་དང༌། ཆོས་ཐམས་ཅད་ཀྱི་དོན་དང༌། བདེ་བའི་ལམ་གྱི་ཡེ་ཤེས་མཐོང་བ་ཡོངས་སུ་རྫོགས་པར་བྱ་བའི་ཕྱིར་ ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་ཆེན་པོ་ཆོས་ཀྱི་དབང་ཕྱུག་བྱེད་ཅིང་སྲོག་གཅོད་པ་སྤངས་པ་ལ་སེམས་ཅན་རྣམས་རབ་ཏུ་གཞོག་པ་དང༌། འཛམ་བུའི་གླིང་གི་ གྲོང་དང༌། གྲོང་ཁྱེར་དང༌། ལྗོངས་དང༌། ཕོ་བྲང་འཁོར་དང༌། རྒྱལ་པོའི་གནས་ཐམས་ཅད་ཀྱི་ཤན་པ་དང༌། གསད་པའི་གནས་ཐམས་ཅད་རྣམ་པར་གཅོད་པ་དང༌། རྐང་གཉིས་པ་ དང༑ རྐང་བཞི་པ་དང༌། རི་དྭགས་མང་པོ་ལ་མི་འཇིགས་པའི་སྦྱིན་པ་བྱེད་པ་དང༌། ལྟོད་པ་མེད་པའི་སེམས་ཀྱིས་བྱང་ཆུབ་སེམས་དཔའི་སྤྱོད་པ་ལ་གནས་པ་དང༌། འཁོན་མེད་པའི་ སེམས་ཀྱིས་རྒྱལ་པོའི་སྲིད་ཐམས་ཅད་ལ་གནས་པ་དང༌། སེམས་ཅན་གྱི་མི་བདེ་བ་དང་སྡུག་བསྔལ་ཐམས་ཅད་སེལ་བ་དང༌། འགྲོ་བ་ཐམས་ཅད་ལ་བདེ་བར་བྱེད་པའི་སེམས་རིན་ པོ་ཆེ་བསྐྱེད་པ་དང༌། འགྲོ་བ་ཐམས་ཅད་ནི། རིན་པོ་ཆེ་དང་འདྲ་བའི་བསམ་པ་རིན་པོ་ཆེ་རབ་ཏུ་སྒྲུབ་པ་དང༌། སྡོམ་པ་གསུམ་རྣམ་པར་དག་པ་ལ་བདག་གནས་ཤིང་གཞན་རབ་ཏུ་འཇོག་ པའི་ཚེ་སྲོག་གཅོད་པ་སྤངས་པ་དང༌། བསླབ་པ་ལྔ་ལ་སེམས་ཅན་རབ་ཏུ་བཞག་པས་ཡང་དག་པར་བསྡུས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་ ༄༅། །སེམས་ཅན་ཐམས་ཅད་བྱང་ཆུབ་སེམས་དཔའི་སེམས་སོ་སོར་ཐོབ་ཅིང་སྲོག་གི་དབང་པོ་གཅད་དུ་མེད་པ་དང༌། ཚེ་རིང་ཞིང་ཤེས་རབ་རབ་ཏུ་ཐོབ་པར་གྱུར་ཅིག། སེམས་ཅན་ཐམས་ཅད་སངས་རྒྱས་ཐམས་ཅད་ལ་རིམ་གྲོ་བྱེད་པའི་ཚེ་དང་ལྡན་ཞིང་ཚེ་དཔག་ཏུ་མེད་པར་གྱུར་ཅིག །སེམས་ཅན་ཐམས་ཅད་གཞན་གྱི་གནོད་པས་སྲོག་འགག་པར་ མི་འགྱུར་ཞིང་རྒ་ཤི་མེད་པའི་ཆོས་ལ་རབ་ཏུ་བརྩོན་པར་གྱུར་ཅིག །སེམས་ཅན་ཐམས་ཅད་ཚེ་ཇི་སྲིད་དུ་འདོད་ཅིང་བསམ་པར་གནས་པ་ལ་མཁས་ཤིང་ནད་མེད་པའི་ལུས་དང་ལྡན་ པར་གྱུར་ཅིག །སེམས་ཅན་ཐམས་ཅད་ཕྱི་མའི་མཐའི་བསྐལ་པ་བྱེ་བ་བརྒྱར་བྱང་ཆུབ་སེམས་དཔའི་སྤྱོད་པ་ལ་གནས་ཤིང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་ལ་ཞུགས་ཏེ་ཚེ་འགག་པ་མེད་པར་གྱུར་ཅིག །སེམས་ཅན་ཐམས་ཅད་སྟོབས་བཅུའི་དགེ་བའི་རྩ་བ་ཡང་དག་པར་བསགས་པའི་འབྱུང་གནས་སུ་གྱུར་ཅིག །ཚེའི་དངོས་པོ་ འཛིན་པར་གྱུར་ཅིག །སེམས་ཅན་ཐམས་ཅད་ཚེའི་ཚད་འགག་པ་མེད་པའི་དགེ་བའི་རྩ་བ་དང་སྨོན་ལམ་ཡོངས་སུ་རྫོགས་པས་དགེ་བའི་རྩ་བའི་བསམ་པ་ཐམས་ཅད་ཡོངས་ སུ་རྫོགས་པར་གྱུར་ཅིག །སེམས་ཅན་ཐམས་ཅད་ཚེའི་ཚད་ཟད་མི་ཤེས་པའི་དགེ་བའི་རྩ་བ་ལ་བརྩོན་ཞིང་སངས་རྒྱས་ཐམས་ཅད་མཐོང་བ་དང༌། མཉེས་པར་བྱ་བའི་དུས་དང་ མཉམ་པར་གྱུར་ཅིག །སེམས་ཅན་ཐམས་ཅད་འཕགས་པའི་ཆོས་ལ་དགའ་བ་རབ་ཏུ་ཐོབ་ཅིང་སྲོག་གི་དབང་པོ་འགག་པ་མེད་པ་དང་འཕགས་པའི་སྐྱེ་མཆེད་ལ་བསླབ་པར་བྱ་ བ་ཤིན་ཏུ་བསླབ་པར་གྱུར་ཅིག །སེམས་ཅན་ཐམས་ཅད་མཐུ་སྟོབས་དང་བརྩོན་འགྲུས་ཟད་མི་ཤེས་པ་རབ་ཏུ་ཐོབ་སྟེ། སངས་རྒྱས་ཀྱི་ཡེ་ཤེས་ཀྱིས་དབང་སྒྱུར་བ་ལ་རབ་ཏུ་ འཇོག་པ་དང༌། རྒ་བ་དང་ན་བ་མེད་པའི་ཚེ་ཕུན་སུམ་ཚོགས་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་སེམས་ཅན་ཐམས་ ཅད་ཀྱིས་དེ་བཞིན་གཤེགས་པའི་སྟོབས་བཅུའི་ཡེ་ཤེས་ཤིན་ཏུ་རྫོགས་པར་འགྱུར་བའི་ཕྱིར་སྲོག་གཅོད་པ་སྤངས་པ་དང༌། སྡོམ་པ་གསུམ་རྣམ་པར་དག་པ་ལ་རབ་ཏུ་དགོད་ པའི་ཕྱིར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བྱོལ་སོང་གི་སྐྱེ་གནས་སུ་གྱུར་པ་རྐང་བཞི་པ་དང༌། མིར་གྱུར་པ་རྣམས་ཀྱི་ཕོ་མཚན་ བཅད་པར་གྱུར་ཅིང་སྐྱེས་པའི་རང་བཞིན་དང་བྲལ་བར་གྱུར་བ། སྐྱེས་བུའི་དངོས་པོ་གཞིག་པར་གྱུར་པ། ཉུག་རུམ་གྱི་དངོས་པོ་ལ་བཞག་པར་གྱུར་བ། ལུས་ལ་གནོད་པ་ཤིན་ ཏུ་མི་བཟད་པར་གྱུར་པ་མཐོང་བ་དང༌། སྐྱེས་པའི་དངོས་པོ་ལས་བཟློག་པར་གྱུར་པ་ཕོ་མོ་གཉིས་ཀ་མ་ཡིན་པའི་སྐྱེ་གནས་སུ་བཞག་པར་གྱུར་པ། སྡུག་བསྔལ་གྱི་ཚོར་བས་ ༄༅། །མནར་བར་གྱུར་པ། ལུས་མི་བདེ་བས་ཤིན་ཏུ་གཟིར་བར་གྱུར་བ། སྐྱེས་པར་ཚུལ་གྱིས་དཔག་པ་ཙམ་དུ་གྱུར་པ། བརྟེན་པའི་ལུས་འགག་པར་གྱུར་པ་ དང༌། སེམས་ཅན་རྣམས་ཀྱི་གནོད་པའི་རྣམ་པ་དེ་ལྟ་བུ་དག་བྱང་ཆུབ་སེམས་དཔའ་སེམས་དཔའ་ཆེན་པོས་མཐོང་ན། བྱམས་པ་ཆེན་པོས་སེམས་ཅན་རྣམས་ཡོངས་སུ་སྐྱོབ་ ཅིང་སྙིང་རྗེ་ཆེན་པོ་སྔོན་དུ་བཏང་སྟེ། འགྲོ་བ་ཐམས་ཅད་ལ་ཕན་འདོགས་པས་འཛམ་བུའི་གླིང་གི་སྐྱེས་པ་ལས་ཉམས་པར་འགྱུར་བ་ཐམས་ཅད་རྣམ་པར་ཟློག་གོ །རབ་ཏུ་ རྒྱུན་གཅོད་དོ། །ཡོངས་སུ་སྐྱོབ་བོ། །རྣམ་པར་ཆད་པར་བྱེད་དོ། །ཆོས་དང་མཐུན་པའི་མཛོད་དང༌། བང་བ་བྱེ་བ་ཁྲག་ཁྲིག་བརྒྱ་སྟོང་དག་ཀྱང་གཏོང་ཞིང་ཚིག་འདི་སྐད་དུ་བརྗོད་ དེ༑ ཁྱེད་ཀྱིས་གང་གི་ཕྱིར་སྡིག་པའི་ལས་རྣམ་པ་འདི་ལྟ་བུ་བྱ་བར་གྱུར་པ། དེའི་བདེ་བ་དང་ཕན་པའི་རྣམ་པ་ཐམས་ཅད་ངས་སྦྱར་གྱི། སྡིག་པའི་ལས་ཀྱི་རྣམ་པ་འདི་ལྟ་བུ་ དག་ཚུལ་བཞིན་མ་ཡིན་པ་ལ་འཇུག་པར་སེམས་སྐྱེས་པས་བདེ་བ་མྱོང་བའི་དོན་དུ་ཁྱེད་མ་བྱེད་ཅིག །དེ་ལྟར་ཕ་རོལ་ལ་སྡིག་པའི་ལས་འདི་ལྟ་བུ་དག་བྱས་ཤིང་བདག་གིས་བདེ་ བའི་ཚོར་བ་མྱོང་བར་འགྱུར་བ་འདི་ནི། གནས་མ་ཡིན་ཏེ། དེའི་གནས་མེད་དོ། །འདི་ལྟར་སྡིག་པའི་རྣམ་པ་འདི་ལྟ་བུ་ལ་སྤྱོད་པ་འདི་ནི། སངས་རྒྱས་ཐམས་ཅད་ཀྱིས་སྨད་ པའོ༑ ༑ཞེས་ནས་དེ་མ་ཡིན་པའི་མི་དགེ་བའི་ཆོས་གཞན་དག་བྱེད་པ་མཐོང་ན་ཡང་རྣམ་པར་ཟློག་པར་བྱེད་ཅིང༌། སེམས་ཅན་ཐམས་ཅད་སྦྱིན་པ་ཐམས་ཅད་ཡོངས་སུ་བཏང་བས་ ཡང་དག་པར་སྡུད་དོ། །ཡོ་བྱད་ཐམས་ཅད་ཀྱིས་ཀྱང་མངོན་པར་སྡུད་པར་བྱེད་དོ། །འདི་ལྟ་སྟེ། དབེན་པའི་ཆོས་ལ་ཡིད་ཆེས་པར་བྱེད་པ་དང༌། དགེ་བའི་ལས་ཤིན་ཏུ་བསགས་པ་དང༌། མི་དགེ་བའི་ལས་ཕན་ཚུན་དུ་བྱམས་པའི་སེམས་ཀྱིས་གཅོད་པ་དང༌། ཕན་ཚུན་དུ་མི་གནོད་ཅིང་མི་འཚེ་བའི་ཕྱིར་ལེགས་པར་བཤད་པས་ཀྱང་ཤིན་ཏུ་ངོམ་པར་བྱེད་དོ། །སེམས་ ཅན་དེ་དག་ཀྱང་བྱང་ཆུབ་སེམས་དཔའི་ཚིག་ཐོས་ནས་སྡིག་པའི་ལས་དེ་ལས་ལྡང་ངོ༌། །རྣམ་པར་ལྡོག་གོ །མི་སྤྱོད་དོ། །དེས་དེ་ལྟར་བསྒྲུབས་པའི་དགེ་བའི་རྩ་བ་དེ་དག་ཡོངས་སུ་ བསྔོ་སྟེ༑ སེམས་ཅན་ཐམས་ཅད་སངས་རྒྱས་ཀྱི་མཚན་གསང་བ་སྦུབས་ན་འདུག་པ་དང་ལྡན་ཞིང༌། སྐྱེས་བུ་ཆེན་པོའི་མཚན་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ བརྩོན་འགྲུས་དང༌། ལྷག་པའི་བསམ་པ་དང༌། ཚངས་པའི་སྤྱོད་པ་རྣམ་པར་དག་པས་སྤྱོད་ཅིང་སྐྱེས་བུའི་མཚན་དང་ལྡན་པར་གྱུར་ཅིག །སེམས་ཅན་ཐམས་ཅད་ཆགས་པ་ མེད་པ་དང་དཔའ་བའི་ཡེ་ཤེས་ལ་ཡང་དག་པར་གནས་པ་ལས་ཕྱིར་མི་ལྡོག་ཅིང་ཤིན་ཏུ་བརྟན་པས་དབང་བསྒྱུར་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འདོད་པའི་ ༄༅། །དགའ་བས་མི་ལྡོག་མི་ཆགས་པའི་སེམས་དང་ལྡན་པར་གྱུར་ཅིག །སེམས་ཅན་ཐམས་ཅད་སྨད་པ་མེད་པ་ཐམས་ཅད་མཁྱེན་པར་འབྱུང་བའི་ཡེ་ཤེས་ བཟང་པོ་དང་ལྡན་ཞིང་སྐྱེས་བུ་དམ་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སྟོབས་བཅུས་བྱུང་བའི་དགེ་བའི་རྩ་བ་དང་ལྡན་ཞིང་སྐྱེས་བུ་ཆེན་པོའི་སྟོབས་དང་ལྡན་ པར་གྱུར་ཅིག །སེམས་ཅན་ཐམས་ཅད་རྨད་དུ་བྱུང་བའི་ཚོགས་ལ་གནས་པ་རབ་ཏུ་ཐོབ་ཅིང་དུ་ཐམས་ཅད་སྐྱེས་བུའི་དབང་པོ་ཉམས་པ་མེད་པར་གྱུར་ཅིག །སེམས་ཅན་ཐམས་ ཅད་ཁམས་གསུམ་ཐམས་ཅད་ཀྱི་འདོད་ཆགས་དང་བྲལ་བས་དབང་བསྒྱུར་ཞིང་བྱང་ཆུབ་སེམས་དཔའི་སྤྱོད་པ་ལ་གནས་པ་དང༌། འདོད་པ་ལྔའི་ཡོན་ཏན་གྱི་དགའ་བ་ལ་མ་ཆགས་ པ་དང་གྲོལ་ཞིང་བཅིངས་པ་མེད་པའི་སེམས་དང་ལྡན་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གྱི་ཤེས་ཤིང་ཡིད་ཆེས་པའི་དུལ་བ་དང་ལྡན་ཞིང་སྐྱེས་བུ་ མཁས་པའི་དམ་པར་གྱུར་ཅིག །སེམས་ཅན་ཐམས་ཅད་སྐྱེས་བུའི་དམ་པ་སངས་རྒྱས་ཀྱི་མཁྱེན་པ་ལ་ཞུགས་པའི་ཡེ་ཤེས་དང་ལྡན་ཞིང་བྱང་ཆུབ་སེམས་དཔའི་མཐུ་རྩལ་ དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེས་བུའི་དམ་པ་ཡོངས་སུ་སྲུང་བ་ལ་ཞུགས་པ། སྐལ་བ་དང་ལྡན་པ། འཕགས་པའི་སྐྱེ་ གནས་སུ་སྐྱེ་བ་འཐོབ་པའི་ཡེ་ཤེས་ཀྱི་སྐྱེ་གནས་དང༌། རིགས་ལ་ཡང་དག་པར་བརྩོན་པ་སྐྱེས་བུ་ཁྱད་པར་དུ་འཕགས་པའི་ཚུལ་ཤེས་པས་ཡང་དག་པར་སྤྱོད་པ། སྐྱེས་བུའི་ཚུལ་ བདུན་ཡང་དག་པར་མཐོང་ཞིང་རྟོགས་པ། སྐྱེས་བུའི་མཐུ་རྩལ་དམ་པ་དང༌། སྐྱེས་བུའི་མཐུ་རྩལ་མ་ནོར་བ་དང༌། སངས་རྒྱས་ཀྱི་བསྟན་པའི་སྐྱེས་བུའི་མཐུ་རྩལ་དང༌། དཔའ་ བའི་སྐྱེས་བུའི་མཐུ་རྩལ་དང༌། བརྟན་པའི་སྐྱེས་བུའི་མཐུ་རྩལ་གྱིས་ཡང་དག་པར་བཟུང་བ་དེ། སྐྱེས་བུའི་དབང་པོ་གཅད་པ་མེད་པར་བྱས་པ་དང༌། སྐྱེས་བུའི་དབང་པོ་བརྟན་པར་ བྱས་པས་ཡང་དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་གང་གིས་དེ་བཞིན་གཤེགས་པའི་ཤེས་རབ་ཀྱི་མཐུ་རྩལ་ཡོངས་སུ་དག་པ་རབ་ཏུ་འཐོབ་པར་འགྱུར་ བ་དང༌། མཁྱེན་པ་དང་ལྡན་པའི་སྐྱེས་བུར་འགྲུབ་པར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་མངོན་པར་སངས་རྒྱས་ པ༑ འཇིག་རྟེན་ཐམས་ཅད་དུ་གྲགས་པར་བྱེད་པ་དང༌། ཀྱེ་མ་སངས་རྒྱས་འཇིག་རྟེན་དུ་བྱུང་ངོ༌། །ཀྱེ་མ་སངས་རྒྱས་འཇིག་རྟེན་དུ་བྱུང་ངོ༌། །ཞེས་སངས་རྒྱས་ཀྱི་སྒྲ་སྒྲོག་ཅིང༌། སངས་ རྒྱས་ཀྱི་དབྱངས་ཀུན་ཏུ་གྲགས་པར་བྱེད་པ་དང༌། སེམས་ཅན་གྱི་ང་རྒྱལ་དང༌། བག་མེད་པ་དང༌། སྤྲོས་པ་ཐམས་ཅད་རྣམ་པར་ཟློག་པ་དང༌། སངས་རྒྱས་མཐོང་བར་སེམས་ཅན་ ༄༅། །རྣམས་ཡང་དག་པར་སྟོབ་པ་དང༌། སངས་རྒྱས་རྗེས་སུ་དྲན་པ་ལ་སེམས་ཅན་རྣམས་རབ་ཏུ་གཞོག་པ་དང༌། སེམས་ཅན་ཐམས་ཅད་སངས་རྒྱས་ལ་ གཞོལ་བར་བྱེད་པ་དང༌། སངས་རྒྱས་དམིགས་པ་ལ་བརྩོན་པའི་སེམས་དང་ལྡན་པའི་སེམས་ཅན་ཐམས་ཅད་ལ་རིམ་གྲོ་བྱེད་པ་དང༌། སངས་རྒྱས་རྣམ་པར་རྟོག་པ་སེམས་ ཅན་རྣམས་ལ་སྟོན་པ་དང༌། སངས་རྒྱས་རྗོད་པ་ལ་སེམས་ཅན་རྣམས་ཡང་དག་པར་འཛུད་པ་དང༌། བསྐལ་པ་བྱེ་བར་ཡང་སངས་རྒྱས་བཅོམ་ལྡན་འདས་སྐྱེ་བ་ནི། ཤིན་ཏུ་དཀོན་ནོ། །ཞེས་བྱ་བའི་ཚིག་སེམས་ཅན་རྣམས་ལ་བརྗོད་པ་དང༌། སེམས་ཅན་དེ་དག་གིས་ཀྱང་དེའི་ཕྱིར་སངས་རྒྱས་མཐོང་བར་འགྱུར་བ་དང༌། སངས་ རྒྱས་ལ་རིམ་གྲོ་དང་ཞེ་ས་བྱེད་པ་དང༌། དགའ་བ་དང༌། སྤྲོ་བ་སྐྱེད་པ་དང༌། དེ་བཞིན་གཤེགས་པ་ལས་སངས་རྒྱས་ཐམས་ཅད་ཀྱི་མཚན་ཉན་པ་དང༌། སངས་རྒྱས་ གྲངས་མེད་པ་ལ་ཤིན་ཏུ་བསྐྱེད་པའི་དགེ་བའི་རྩ་བ་གསོག་པ་དང༌། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པའི་སངས་རྒྱས་ཀྱི་གཏེར་རྣམ་པར་སྦྱོང་བ་དང༌། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་དེ་བཞིན་གཤེགས་པ་རྣམས་ཀྱི་དྲུང་དུ་ཡོངས་སུ་སྨིན་པར་བྱེད་པ་དང༌། སེམས་ཅན་དེ་དག་ཀྱང་བྱང་ཆུབ་སེམས་ དཔའི་དགེ་བའི་བཤེས་གཉེན་དམ་པ་རབ་ཏུ་ཤེས་པ་དང༌། བྱང་ཆུབ་སེམས་དཔའ་ལ་ཡིད་ཆེས་པས་སངས་རྒྱས་ཀྱི་ཆོས་ལ་གནས་པར་འགྱུར་བ་དང༌། འཇིག་རྟེན་ཐམས་ ཅད་དུ་བསྐལ་པ་གྲངས་མེད་པར་བསྐྱེད་ཅིང་སྤེལ་བའི་དགེ་བའི་རྩ་བས་སངས་རྒྱས་ཀྱི་འཕྲིན་ལས་ཡང་དག་པར་སྒྲུབ་པའི་ཆེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་ སྟེ༑ དགེ་བའི་རྩ་བ་འདིས་སེམས་ཅན་ཐམས་ཅད་ཀྱིས་སངས་རྒྱས་ཐམས་ཅད་མཉེས་པར་བྱས་ཏེ་མི་མཉེས་པར་མི་བྱེད་པ་དང༌། སངས་རྒྱས་བལྟ་བ་དང་མི་འབྲལ་བར་ གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་བལྟ་བ་ཡིད་ལ་བྱ་བ་དང་མ་བྲལ་ཞིང་སངས་རྒྱས་བལྟ་བར་བརྩོན་པའི་ཡིད་དང་ལྡན་པར་གྱུར་ཅིག །སེམས་ཅན་ ཐམས་ཅད་སངས་རྒྱས་ཀྱི་གསུང་དང་ཆོས་ཀྱི་མཛོད་ཡང་དག་པར་འཛིན་ཅིང་ཡེ་ཤེས་སྒོམ་པ་ཤིན་ཏུ་མང་བར་གྱུར་ཅིག །སེམས་ཅན་ཐམས་ཅད་ཆོས་མཉན་པ་དང་མི་ འབྲལ་ཞིང་བསྐལ་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་ཡང་དག་པར་གནས་པའི་ཕྱིར་སངས་རྒྱས་ཀྱི་ཆོས་ཀྱི་སྒྲ་འབྱིན་པར་གྱུར་ཅིག །སེམས་ཅན་ཐམས་ཅད་ སངས་རྒྱས་འབྱུང་བ་མཐོང་ཞིང་ཡེ་ཤེས་ཡང་དག་པར་གཟུང་བའི་ཕྱིར་དྲན་པ་ཉེ་བར་གཞག་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཡིད་ལ་བྱ་བ་དང༌། མཐོང་བར་ ༄༅། །བྱ་བའི་མཐུ་ལ་བརྩོན་ཞིང་ཡིད་ལ་བྱ་བ་ལས་གཞན་མེད་པར་གྱུར་ཅིག །སེམས་ཅན་ཐམས་ཅད་ནམ་མཁའི་དབྱིངས་ཀུན་ཏུ་སངས་རྒྱས་མཐོང་བའི་ འབྱུང་གནས་ལ་ཞུགས་ཤིང་ཕྱོགས་ཀུན་ཏུ་སངས་རྒྱས་མཐོང་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཁམས་ཀུན་ཏུ་སངས་རྒྱས་བྱུང་བ་ བརྗོད་པ་ལ་བརྩོན་ཞིང་སངས་རྒྱས་ཀྱི་སྐུས་བྱིན་གྱིས་བརླབས་པར་གྱུར་ཅིག །སེམས་ཅན་ཐམས་ཅད་མོས་པ་དང༌། དད་པ་མི་ཤིགས་པ་དང༌། སྙིང་ཐག་པའི་བསམ་ པས་སངས་རྒྱས་ཐམས་ཅད་འགྲོགས་པར་གྱུར་ཏེ། དགེ་བའི་བཤེས་གཉེན་གྱིས་སངས་རྒྱས་ཀྱི་ཆོས་རྫོགས་པར་ཐོས་པར་བྱས་པར་གྱུར་ཅིག །སེམས་ཅན་ཐམས་ཅད་ སངས་རྒྱས་སྐྱེ་བ་དོན་ཡོད་པས་འགྲོ་བ་ཐམས་ཅད་རྣམ་པར་སྦྱང་བའི་ཕྱིར་སངས་རྒྱས་སྐྱེ་བ་ཐམས་ཅད་རབ་ཏུ་བརྗོད་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་ སེམས་དཔའ་ཆེན་པོ་སངས་རྒྱས་སྐྱེ་བ་བརྗོད་པས་ཡང་དག་པར་གཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་སངས་རྒྱས་མཐོང་བ་དང༌། མཉེས་པར་ བྱེད་པ་དང༌། མི་མཉེས་པར་མི་བྱེད་ཅིང༌། སངས་རྒྱས་ཀྱི་ཆོས་བླ་ན་མེད་པ་ཐམས་ཅད་ཡོངས་སུ་དག་པའི་མཐར་ཕྱིན་པར་ཡོངས་སུ་བསྔོའོ། །གཞན་ཡང་བྱང་ཆུབ་ སེམས་དཔའ་སེམས་དཔའ་ཆེན་པོས་སངས་རྒྱས་བཅོམ་ལྡན་འདས་རྣམས་ཀྱི་ཕོ་བྲང་གི་ལོངས་སྤྱོད་དམ། བྱང་ཆུབ་སེམས་དཔའ་དགེ་བའི་བཤེས་གཉེན་རྣམས་ཅི་དགའ་ བའི་ལོངས་སྤྱོད་དམ། འཕགས་པའི་དགེ་འདུན་གྱི་གཙུག་ལག་ཁང་གི་ལོངས་སྤྱོད་དམ། ཕ་མ་གནས་པའི་གནས་སམ། ཉན་ཐོས་དང་རང་སངས་རྒྱས་སམ། གང་ཟག་ གི་རྣམ་པ་སྤྱིན་པའི་གནས་དག་གམ། དེ་མ་ཡིན་པའི་ཕོངས་པ་དང༌། བཀྲེན་པ་སློང་ཞིང་ལེན་པ་དག་གམ། འཁོར་བཞི་ཕོངས་པ་མེད་པར་གནས་པའི་གནས་སམ། དེ་ བཞིན་གཤེགས་པའི་མཆོད་རྟེན་བརྩིགས་པའི་གནས་སམ། ཡོ་བྱད་སྣ་ཚོགས་གཞག་པའི་གནས་ཅི་འདོད་པའི་ལོངས་སྤྱོད་དུ་བྱ་བའམ། འཇིགས་པ་དང་དོགས་པ་མེད་ཅིང་ དགྲ་དང་བྲལ་བ། སྐྱི་གཡའ་བ་མེད་པའི་གནས་ཀྱི་ས་དག་འབུལ་བའི་ཚེ་སའི་སྦྱིན་པ་ཡོངས་སུ་བཏང་བས་ཡུལ་ཅི་འདོད་པར་བྱིན་བས་ཡང་དག་པར་བཟུང་བའི་དགེ་བའི་རྩ་བ་དེ་ དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་ཕ་རོལ་ཏུ་ཕྱིན་པ་ཐོབ་ཅིང་ཐམས་ཅད་མཁྱེན་ པའི་ས་ཡོངས་སུ་དག་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་ཡང་དག་པར་འཛིན་པ་ལ་དྲན་པའི་དབང་པོ་རྨོངས་པ་མེད་ཅིང་ས་ལྟ་བུར་རེད་ ༄༅། །པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་བསྟན་པ་ཐམས་ཅད་སྲུང་བ་ལ་ཞུགས་ཤིང་ཡང་དག་པར་འཛིན་པར་གྱུར་ཅིག །སེམས་ཅན་ཐམས་ ཅད་འགྲོ་བ་ཐམས་ཅད་ལ་ཞེ་སྡང་བ་མེད་ཅིང་དགེ་བའི་རྩ་བ་རྣམ་པར་སྦྱང་བ་ལ་བརྩོན་པས་སེམས་ས་དང་མཉམ་པར་གྱུར་ཅིག །སེམས་ཅན་ཐམས་ཅད་སངས་རྒྱས་གཅིག་ ནས་གཅིག་ཏུ་བརྒྱུད་པ་ཐམས་ཅད་དུ་བྱང་ཆུབ་སེམས་དཔའི་ས་ཐམས་ཅད་ཡང་དག་པར་སྒྲུབ་པ་ལ་མཁས་ཤིང་སངས་རྒྱས་ཐམས་ཅད་ཀྱི་རིགས་ཡང་དག་པར་འཛིན་པ་ལ་ ཞུགས་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་ཡོངས་སུ་སྨིན་པར་བྱ་བ་དང༌། འདུལ་བ་རྣམ་པར་དག་པའི་ལམ་ལ་ཞུགས་ཏེ་གནས་སུ་རེད་པར་གྱུར་ཅིག། སེམས་ཅན་ཐམས་ཅད་སངས་རྒྱས་ཀྱི་སྟོབས་ལ་རབ་ཏུ་དགོད་པར་བརྩོན་ཞིང་སངས་རྒྱས་ལྟ་བུར་འགྲོ་བ་ཐམས་ཅད་ལ་ཕན་འདོགས་པར་གྱུར་ཅིག །སེམས་ཅན་ཐམས་ཅད་ སངས་རྒྱས་ཀྱི་དགའ་བ་བླ་ན་མེད་པ་ལ་རབ་ཏུ་གཞོག་པའི་ཕྱིར་འགྲོ་བ་ཐམས་ཅད་ཀྱི་དགའ་བར་རེད་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་སྟོབས་དང༌། མི་འཇིགས་ པའི་ཆོས་ཀྱི་འབྱུང་གནས་སུ་གྱུར་ཏེ་རབ་ཏུ་དགོད་པ་ལ་མཁས་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཆོས་ཀྱིས་རྣམ་པར་རྩེ་ཞིང་ཡོངས་སུ་སྤྱོད་པ་ ཐོབ་སྟེ་ས་ལྟ་བུའི་ཡེ་ཤེས་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་སའི་སྦྱིན་པ་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་ བ་དེ་དག་ཅི་ནས་ཀྱང་སེམས་ཅན་གྱི་ཁམས་ཐམས་ཅད་ཀྱིས་དེ་བཞིན་གཤེགས་པའི་ས་ཡོངས་སུ་དག་པ་ཐམས་ཅད་རབ་ཏུ་ཐོབ་པར་བྱ་བའི་ཕྱིར་སེམས་ཅན་ཐམས་ཅད་ལ་ཡོངས་ སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་བཅོམ་ལྡན་འདས་བྱུང་བ་རྣམས་ལ་རིམ་འགྲོའི་དོན་དུ་བདག་གི་བྲན་དང༌། ལས་བྱེད་པ་རྣམས་འབུལ་ བའམ༑ བྱང་ཆུབ་སེམས་དཔའ་དགེ་བའི་བཤེས་གཉེན་སངས་རྒྱས་ཀྱི་ཆོས་ཐམས་ཅད་ཡང་དག་པར་སྤེལ་བའི་བརྩོན་པ་རྣམས་སམ། འཕགས་པའི་དགེ་འདུན་དཀོན་མཆོག་ གམ༑ ཕ་དང༌། མ་དང༌། སློབ་དཔོན་དང༌། བླ་མའི་སྦྱིན་པའི་གནས་ལ་བྲན་དང༌། ལས་བྱེད་པའི་མི་འབུལ་བ་དང༌། སེམས་ཅན་ནད་པ་རྣམས་ལ་རིམ་གྲོ་བྱེད་པ་མེད་པས་འཆི་ བར་མི་འགྱུར་བར་རིམ་གྲོ་བྱ་བའི་ཕྱིར་བྲན་དང༌། ལས་བྱེད་པའི་མི་སྦྱིན་པའམ། དེ་མ་ཡིན་པའི་སེམས་ཅན་གཡོག་མེད་པ་ལ་བྲན་དང༌། ལས་བྱེད་པའི་མི་གཏོང་བའམ། ཕོངས་ པ་དང་བཀྲེན་པ་སློང་ཞིང་ལེན་པ་གཞན་དང་གཞན་དག་ལ་བྲན་དང༌། ལས་བྱེད་པའི་མི་གཏོང་བའམ། དེ་བཞིན་གཤེགས་པ་མྱ་ངན་ལས་འདས་པའི་སངས་རྒྱས་ཀྱི་མཆོད་རྟེན་ ༄༅། །བསྲུང་བའི་ཕྱིར་འབུལ་བའམ། དམ་པའི་ཆོས་ཡོངས་སུ་བསྲུང་བའི་ཕྱིར་ཡི་གེ་དང་གྲངས་ལ་ཤིན་ཏུ་བསླབ་པའི་མི་བྱེ་བ་ཁྲག་ཁྲིག་བརྒྱ་སྟོང་མང་པོ་ འབུལ་བ་བྱེད་ཅིང་རིམ་གྲོ་པ་དེ་དག་ཀྱང་མཁས་པ། ཚུལ་ཤེས་པ། ཅང་ཤེས་པ། བརྩོན་པ། ལེ་ལོ་མེད་པ། དྲང་བ། དྲང་པོ་དང་ལྡན་པ། ཕན་པར་སེམས་པ། བདེ་བར་སེམས་ པ༑ བྱམས་པར་སེམས་པ། རིམ་གྲོ་བྱེད་པའི་ངང་ཚུལ་ཅན། འཁོན་མེད་པ། གཅུགས་མེད་པར་ཡོངས་སུ་སྤྱོད་པ། གཟོ་དང་སྒྱུ་རྩལ་སྣ་ཚོགས་དང༌། གྲངས་ལ་ཤིན་ ཏུ་བསླབ་པའི་ཤེས་པ་གསལ་བ་ཅན། རིམ་པའི་ཚུལ་ཤེས་པ་དགའ་བར་བྱེད་ཅིང༌། རིམ་གྲོ་བྱེད་པ་ལ་བརྩོན་ཞིང་གཏོང་བ། བྱང་ཆུབ་སེམས་དཔའི་ལས་ལས་བྱུང་བ་། ཡིད་དུ་འཐད་པ། རིམ་གྲོ་བྱེད་པ། སེམས་ཤིན་ཏུ་དང་བ་དེ་ལྟ་བུའི་རིམ་གྲོ་བ་དག་གནས་གར་འོས་པ་དང༌། ཅི་རིགས་པ་དང༌། ཕན་འདོགས་པ་དེ་དང་དེ་དག་ལ་འབུལ་ཞིང་ ཡོངས་སུ་གཏོང་བ་དང༌། སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། རིམ་གྲོ་བ་ཡང་དག་པར་བཏང་བ་དང་ལྡན་པའི་ དགེ་བའི་རྩ་བ་འདིས་སེམས་ཅན་ཐམས་ཅད་སངས་རྒྱས་ཐམས་ཅད་བསྙེན་བཀུར་བ་དང་རིམ་གྲོ་བྱ་བ་ལ་མཁས་ཤིང་བརྩོན་ཏེ་ཅང་ཤེས་ཀྱི་སེམས་དང་ལྡན་པར་གྱུར་ཅིག ། སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་བཀའ་ཡང་དག་པར་ལེན་ཅིང་སངས་རྒྱས་ཐམས་ཅད་དང་མཐུན་པའི་རིམ་གྲོ་པར་གྱུར་ཅིག །སེམས་ཅན་ཐམས་ཅད་ཡིད་ ལ་བྱ་བ་དང༌། བསམ་པ་དང༌། རྣམ་པར་རྟོག་པ་གཞན་མེད་ཅིང་སངས་རྒྱས་ཐམས་ཅད་ལ་རྟག་ཏུ་སྐབས་ཕྱེ་བར་གྱུར་ཅིག །སེམས་ཅན་ཐམས་ཅད་དགེ་བ་ཐམས་ཅད་ཡང་དག་ པར་སྡུད་པ་ལ་བརྩོན་ཞིང་སངས་རྒྱས་ཐམས་ཅད་ཀྱི་རིགས་ལས་མི་ཉམས་པ་དང༌། སངས་རྒྱས་ཀྱི་རྗེས་སུ་སྙེགས་པར་གྱུར་ཅིག །སེམས་ཅན་ཐམས་ཅད་དོན་ཡོད་པར་དུས་ ཐམས་ཅད་དུ་འཕྲད་ཅིང་སངས་རྒྱས་ཐམས་ཅད་ལ་དུས་དང་མཐུན་པར་རིམ་གྲོ་དང་བསྙེན་བཀུར་བྱེད་པར་གྱུར་ཅིག །སེམས་ཅན་ཐམས་ཅད་ཡི་གེ་རྣམ་པར་དག་པས་མི་འཇིགས་ པར་སྤྱོད་ཅིང་སངས་རྒྱས་ཀྱི་ཆོས་ཀྱི་དོན་འཛིན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ལ་ལུས་དང་སྲོག་ཕུལ་ཞིང་སངས་རྒྱས་ཐམས་ཅད་ལ་ངོམ་མི་ཤེས་པར་ལྟ་ བར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་གནས་ཐམས་ཅད་ཡང་དག་པར་འཇོམས་པས་སངས་རྒྱས་ཐམས་ཅད་ལ་ལྟ་བ་དང་ལྡན་པར་གྱུར་ཅིག །སེམས་ཅན་ཐམས་ ཅད་ངོ་མཚར་དུ་འཛིན་པ་དང༌། དེ་མ་ཡིན་པའི་གནས་གཞན་མེད་ཅིང་སངས་རྒྱས་ཐམས་ཅད་ལ་བརྟེན་པར་འགྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་བླ་ན་མེད་པ་ ༄༅། །མངོན་དུ་གྱུར་པའི་སེམས་དང་ལྡན་པར་གྱུར་ཏེ་སངས་རྒྱས་ཀྱི་རྗེས་སུ་འབྲང་བར་བློ་གྲོས་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་ སེམས་དཔའ་ཆེན་པོ་རིམ་གྲོ་བ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་རྡུལ་མེད་ཅིང་རྡུལ་དང་བྲལ་བ། དྲི་མ་མེད་པ། རྙོག་ པ་མེད་པའི་སར་སངས་རྒྱས་ཀྱི་ཆོས་རྣམ་པར་དག་པ་དང༌། སངས་རྒྱས་ཀྱི་སྐུ་གཞན་ལ་རག་ལུས་པ་མེད་པའི་རྟེན་གྱི་ཚུལ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་དམའ་བར་བྱས་ཤིང༌། ས་ལ་གདིང་བའི་རྡོག་ལམ་དང་འདྲ་བའི་སེམས་སུ་བྱས་ཏེ། ས་དང་འདྲ་བར་སྡུག་བསྔལ་ ཐམས་ཅད་བཟོད་པ། མི་འགྱུར་བ། མི་སྐྱོ་བ། སེམས་ཅན་ཐམས་ཅད་ལ་རིམ་གྲོ་བྱེད་པས་ངལ་བ་མེད་པའི་ཡིད་དང་ལྡན་པ། སེམས་ཅན་ཐམས་ཅད་ཀྱི་སྦྱིན་བདག་དགེ་ བའི་རྩ་བ་ཐམས་ཅད་ཉེ་བར་སྟོབ་པའི་སེམས་དང་ལྡན་པ། འགྲོ་བ་བྱམས་པས་ཉེ་བར་བྱས་པ། ཉམས་སུ་ལེན་ཅིང་རྣ་ལ་གཟོན་པའི་ངང་ཚུལ་ཅན། དགེ་བ་ཤིན་ཏུ་བརྟན་པ་ལ་ བརྩོན་པ། ཡིད་ལ་བྱེད་པ་བཟང་པོས་གནས་པ་ལ་བརྩོན་པ། སེམས་ཅན་གྱི་ཁམས་ཐམས་ཅད་བསྙེན་བཀུར་བའི་སེམས་ཀྱིས་བདག་ཉིད་རིམ་གྲོ་བར་འབུལ་བའི་ཚེ་ དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། ཅི་ནས་ཀྱང་སེམས་ཅན་ཐམས་ཅད་ཤིན་ཏུ་རིམ་གྲོ་བྱས་པ་དང༌། ཅི་ནས་ཀྱང་བྱང་ཆུབ་སེམས་དཔའི་སྤྱོད་པ་རྒྱུན་མི་འཆད་པ་དང༌། ཅི་ ནས་ཀྱང་བྱང་ཆུབ་སེམས་དཔའི་དོན་ཉམས་པ་མེད་པ་དང༌། ཅི་ནས་ཀྱང་བྱང་ཆུབ་སེམས་དཔའི་ལམ་དུ་ལེགས་པར་ཞུགས་པར་འགྱུར་བ་དང༌། ཅི་ནས་ཀྱང་བྱང་ཆུབ་སེམས་དཔའི་ མཉམ་པ་ཉིད་ཁོང་དུ་ཆུད་པར་འགྱུར་བ་དང༌། ཅི་ནས་ཀྱང་དེ་བཞིན་གཤེགས་པའི་རིགས་སུ་བདག་ཉིད་བགྲང་བར་འགྱུར་བ་དང༌། ཅི་ནས་ཀྱང་བྱང་ཆུབ་སེམས་དཔའི་སྤྱོད་པ་བདེན་པའི་ ཚིག་དང་འགྲོགས་པ་རྗེས་སུ་སྲུང་བར་འགྱུར་བ་དང༌། ཅི་ནས་ཀྱང་ཁམས་གསུམ་ཐམས་ཅད་སངས་རྒྱས་ཀྱི་ཆོས་ཀྱིས་རྣམ་པར་དག་པར་འགྱུར་བ་དང༌། ཅི་ནས་ཀྱང་ལྷག་པའི་བསམ་ པས་རྟོགས་པར་སངས་རྒྱས་ཀྱི་ཆོས་ཐམས་ཅད་ཁོང་དུ་ཆུད་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཀྱི་དགེ་བའི་རྩ་བ་སྐྱོན་མེད་ཅིང༌། རྣམ་པར་དག་པར་འགྱུར་བ་ དང༌། ཅི་ནས་ཀྱང་སེམས་ཅན་ཐམས་ཅད་དེ་དག་ཐམས་ཅད་ཡོན་ཏན་ཆེན་པོ་ལ་རབ་ཏུ་ཞུགས་ཏེ་ཐམས་ཅད་མཁྱེན་པའི་མཐར་ཤིན་ཏུ་ཐུག་པར་འགྱུར་བ་དེ་ལྟར་ཡོངས་སུ་བསྔོའོ། ། དེ་འདི་ལྟར་ཡོངས་སུ་བསྔོ་སྟེ། འདི་ལྟར་ལུས་ཀྱི་རིམ་གྲོ་སེམས་ཅན་ཐམས་ཅད་ལ་ཡོངས་སུ་བཏང་བའི་དགེ་བའི་རྩ་བ་གང་བསགས་པ་དེས་སེམས་ཅན་ཐམས་ཅད་ཡོངས་སུ་རྟོགས་ ༄༅། །པའི་ཆོས་ཅན། རབ་ཏུ་འཛིན་པའི་ཆོས་ཅན། ཡང་དག་པར་ལེན་པའི་ཆོས་ཅན། མི་འཁྲུགས་པའི་ཆོས་ཅན། ཆུད་མི་ཟ་བའི་ཆོས་ཅན། མི་ཉམས་པའི་ ཆོས་ཅན། མི་འབྲལ་བའི་ཆོས་ཅན། ཡིད་ཤིན་ཏུ་དུལ་བའི་ཆོས་ཅན། མ་དུལ་བ་འདུལ་བའི་ཆོས་ཅན། ཆོས་ཀྱིས་ཉེ་བར་དུལ་བའི་ཆོས་ཅན་གྱི་རིམ་གྲོ་པ། སངས་རྒྱས་ཐམས་ ཅད་ལ་ཤིན་ཏུ་ཉེ་བར་སེམས་པའི་སེམས་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔས་སངས་རྒྱས་ཐམས་ཅད་ལ་རིམ་གྲོའི་ནན་ཏན་དུ་བྱས་ཏེ། སེམས་ཅན་དེ་ དག་ཐམས་ཅད་དགེ་བའི་རྩ་བ་དེས་མཆོད་རྟེན་གྱི་དམ་པར་འགྱུར་བ་དང༌། འགྲོ་བ་ཐམས་ཅད་བསྙེན་བཀུར་བར་འོས་པར་འགྱུར་བ་དང༌། སེམས་ཅན་ཐམས་ཅད་སངས་རྒྱས་ཀྱི་ ཡེ་ཤེས་རྟོགས་པར་འགྱུར་བའི་ཕྱིར་སྦྱིན་པའི་གནས་དམ་པར་འགྱུར་བ་དང༌། འགྲོ་བ་ཐམས་ཅད་ལ་སྙིང་བརྩེ་བའི་ཕྱིར་ལེན་པའི་དམ་པར་འགྱུར་བ་དང༌། དགེ་བའི་རྩ་བ་ཐམས་ ཅད་ལ་འཇུག་པའི་ཕྱིར་བསོད་ནམས་ཀྱི་དོན་དམ་པ་དང་ལྡན་པར་འགྱུར་བ་དང༌། སྦྱིན་པ་ཚད་མེད་པའི་ཕྱིར་སྦྱིན་སྲེག་དམ་པ་དང་ལྡན་པར་འགྱུར་བ་དང༌། ཁམས་གསུམ་ ཐམས་ཅད་ན་འབྱུང་བའི་དམ་པར་འགྱུར་བ་དང༌། ལམ་ཇི་ལྟ་བ་བཞིན་དུ་ཡང་དག་པར་སྟོན་པའི་ཕྱིར་དེད་དཔོན་དམ་པར་འགྱུར་བ་དང༌། སངས་རྒྱས་ཀྱི་ཆོས་ཐམས་ཅད་ཡང་ དག་པར་བཟུང་བའི་ཕྱིར་གཟུངས་ཀྱི་དམ་པ་རབ་ཏུ་ཐོབ་པར་འགྱུར་བ་དང༌། ནམ་མཁའི་དབྱིངས་ལྟར་ཆགས་པ་མེད་པའི་ལམ་གྱི་འབྱུང་བས་ཆོས་ཀྱི་དབྱིངས་ཚད་མེད་པ་དམ་པར་ འགྱུར་བའི་ཕྱིར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བདག་རིམ་གྲོ་པར་ཕུལ་བས། ཡང་དག་པར་གཟུང་བའི་དགེ་བའི་རྩ་བ་དེ་དག་སེམས་ཅན་ གྱི་ཁམས་ཐམས་ཅད་ཕྱག་བྱ་བར་འོས་པའི་ཡེ་ཤེས་ཀྱི་ཕུང་པོ་དང་ལྡན་པར་བྱ་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །འདི་ལྟར་བྱང་ཆུབ་སེམས་དཔའ་སེམས་དཔའ་ ཆེན་པོ་ཆོས་ལ་དགའ་བ་དང༌། དད་པ་དང༌། རབ་ཏུ་དགའ་ཞིང་དང་བའི་སེམས་ཀྱིས་སངས་རྒྱས་བཅོམ་ལྡན་འདས་རྣམས་ལ་ཆོས་དཀོན་མཆོག་བླ་ན་མེད་པ་ལ་མོས་པའི་བསམ་པ་ དང༌། སངས་རྒྱས་ཐམས་ཅད་ལ་ཕར་སེམས་པའི་སེམས་བསྐྱེད་པ་དང༌། ཆོས་བྱེ་བ་གྲངས་མེད་པར་ཚད་མེད་པའི་ཆོས་ཀྱི་ཁོང་དུ་ཆུད་ཅིང་ཡང་དག་པར་བཟུང་བ་དང༌། ཤེས་རབ་ཆེན་ པོ་རིན་པོ་ཆེ་ལ་ཡང་དག་པར་གཞོལ་བའི་དགེ་བའི་རྩ་བ་མངོན་དུ་གྱུར་པ་དང༌། དེ་བཞིན་གཤེགས་པའི་སྤྱོད་པ་མཐའ་ཡས་པ་རྗེས་སུ་དྲན་པའི་སངས་རྒྱས་ཀྱི་ཡུལ་དང༌། དོན་གྱི་རྗེས་ སུ་འབྲང་བས་དེ་བཞིན་གཤེགས་པའི་ལྡེམ་པོ་དག་ཁོང་དུ་ཆུད་པ་དང༌། དེ་བཞིན་གཤེགས་པའི་ཆོས་ཀྱི་སྤྲིན་ལས་སངས་རྒྱས་ཐམས་ཅད་ཀྱི་ཆོས་ཀྱི་ཆར་མངོན་པར་བབ་པ་དང༌། ༄༅། །རྟུལ་ཕོད་པས་དབང་བསྒྱུར་བ་སེམས་ཀྱི་དཔའ་བས་ཐོབ་པ་དང༌། ཐམས་ཅད་མཁྱེན་པའི་ཐེག་པ་ཕུན་སུམ་ཚོགས་པ་ཐམས་ཅད་མཁྱེན་པ་གང་ཟག་གི་ མཆོག་གི་སར་ཤིན་ཏུ་བསྟན་པ་དང༌། ཆོས་ཆེན་པོ་བྱེ་བ་བརྒྱ་སྟོང་ཚད་མེད་པས་ཤིན་ཏུ་བརྟན་པའི་དབང་པོས་བདག་གི་ལུས་འབུལ་ཞིང་དེ་ལྟར་བྱང་ཆུབ་སེམས་དཔའ་ སེམས་དཔའ་ཆེན་པོ་ཆོས་དེ་ལྟ་བུ་དག་ཉན་པས། དེ་བཞིན་གཤེགས་པ་ལ་དགའ་བ་ཚད་མེད་པ་རྣམ་པར་འཕེལ་བའི་སེམས་དང་ལྡན་པ། ཆོས་སྤྱོད་པ་ལ་ཡང་དག་པར་གནས་ པའི་སེམས་ཅན་དམ་པ་རང་གི་ཐེ་ཚོམ་ཆོད་པ། གཞན་གྱི་ཐེ་ཚོམ་གཅོད་པ་ལ་རབ་ཏུ་ཞུགས་པ། རབ་ཏུ་དག་པའི་མཚན་མས་སེམས་མ་ཉམས་པ། དགེ་བའི་རྩ་བ་ཐམས་ཅད་ དང༌། ཡོན་ཏན་གྱི་འབྱུང་གནས་རབ་ཏུ་ཐོབ་པ། བསམ་པ་ཚད་མེད་པའི་སྤྱོད་པའི་རྗེས་སུ་ཞུགས་པ། སེམས་ཅན་ཐམས་ཅད་ཀྱི་དོན་ལ་བརྩོན་པའི་སེམས་དང་ལྡན་པ། རྡོ་རྗེའི་སྙིང་པོ་ལྟ་བུའི་ཡེ་ཤེས་དམ་པའི་ཁྱད་པར་ཁོང་དུ་ཆུད་པའི་སེམས་བརྟན་ཅིང་ཤིན་ཏུ་གནས་པ། སངས་རྒྱས་ཐམས་ཅད་ཀྱི་ཞབས་ཀྱི་དྲུང་ན་གནས་ཤིང་རྣམ་པར་དག་ པར་བྱེད་པ། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་གནས་པ་ལས་མི་འབྲལ་བ་དེ་ཆོས་ཀྱི་རྣམ་པ་འདི་ལྟ་བུ་དག་ལ་རབ་ཏུ་གནས་ཏེ་རང་གི་ལུས་དེ་བཞིན་ གཤེགས་པ་ལ་མངོན་པར་འབུལ་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་སངས་རྒྱས་ ཐམས་ཅད་ཀྱི་ཡང་དག་པར་བཟུང་བའི་ལུས་དང་ལྡན་ཞིང༌། མི་དམའ་བའི་ལུས་ཡོངས་སུ་རྫོགས་པ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ བལྟ་བ་དང་མི་འབྲལ་བའི་རྗེས་སུ་སོང་བའི་སེམས་དང་ལྡན་པས་སངས་རྒྱས་ཐམས་ཅད་ལ་ཉེ་བར་བརྟེན་ཅིང་སྤྱོད་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་ཡོན་ཏན་དང་ ལྡན་ཞིང་ཉམས་པ་མེད་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་མཉེས་པར་བྱ་བ་ལ་བརྩོན་ཞིང་མི་དམིགས་པས་ཚངས་པའི་སྤྱད་པ་སྤྱོད་ པར་གྱུར་ཅིག །སེམས་ཅན་ཐམས་ཅད་བདག་ཏུ་བྱ་བ་དང༌། བདག་གིར་བྱ་བ་ལས་གྱེན་དུ་འཕགས་ཤིང་བདག་གི་མེད་པའི་ལུས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ ལུས་འཕོས་པ་མེད་པར་ལུས་ཡང་དག་པར་སྟོན་ཅིང་སངས་རྒྱས་ཀྱི་ཞིང་ཐམས་ཅད་དུ་ལུས་རྣམ་པར་བཀྲམ་པར་གྱུར་ཅིག །སེམས་ཅན་ཐམས་ཅད་བདག་གི་མེད་ཅིང་ཡོངས་སུ་ འཛིན་པ་མེད་པར་འགྲོ་བས་གཞན་ལ་རག་ལས་པ་མེད་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་རྒྱུད་ཀྱི་རིགས་དང་ལྡན་ཞིང་སངས་རྒྱས་ཀྱི་སྐུར་ ༄༅། །མངོན་པར་སྐྱེས་པར་གྱུར་ཅིག །སེམས་ཅན་ཐམས་ཅད་བཟོད་པའི་སྟོབས་ཀྱིས་སེམས་ལ་ཐུབ་པ་མེད་ཅིང་ཆོས་ཀྱི་སྟོབས་དང་ལྡན་པའི་ལུས་ཅན་དུ་གྱུར་ ཅིག །སེམས་ཅན་ཐམས་ཅད་དེ་བཞིན་གཤེགས་པའི་སྐུ་རྣམ་པར་དག་པ་ཡོངས་སུ་རྫོགས་པས་འདྲ་བ་མེད་པའི་ལུས་དང་ལྡན་པར་གྱུར་ཅིག །སེམས་ཅན་ཐམས་ཅད་དམིགས་ པ་མེད་པའི་དབྱིངས་སུ་བྱུང་བས་འཇིག་རྟེན་ལས་འདས་པའི་བསོད་ནམས་ཀྱི་ལུས་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ བཞིན་གཤེགས་པ་ལ་རང་གི་ལུས་ཕུལ་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་ཅི་ནས་ཀྱང་སེམས་ཅན་གྱི་ཁམས་ཐམས་ཅད་དུས་གསུམ་གྱི་དེ་བཞིན་གཤེགས་ པའི་རིགས་དང་རྒྱུད་དུ་ཡང་དག་པར་འགྲུབ་པར་འགྱུར་བར་བྱ་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ སེམས་ཅན་ཐམས་ཅད་ལ་འགྲོ་བ་ཀུན་གྱི་དགེ་བའི་རྩ་བ་ལྟར་ཕན་འདོགས་པས་བདག་ཉིད་ཡོངས་སུ་གཏོང་བ་དང༌། སེམས་ཅན་ཐམས་ཅད་ཀྱི་དགེ་བའི་རྩ་བ་ལ་ཡང་དག་ པར་སེམས་པ་དང༌། མར་མེ་ལྟ་བུར་བདག་སེམས་ཅན་རྣམས་ལ་བསྙེན་པ་དང༌། བདེ་བ་ལྟ་བུར་བདག་སེམས་ཅན་ཐམས་ཅད་ལ་བྱིན་གྱིས་རློབ་པ་དང༌། ཆོས་ཀྱི་གཞི་ལྟ་བུར་ བདག་འགྲོ་བ་ཐམས་ཅད་ཡང་དག་པར་འཛིན་པ་དང༌། སྣང་བ་ལྟ་བུར་བདག་སེམས་ཅན་ཐམས་ཅད་ལ་ཡོངས་སུ་གཏོང་བ་དང༌། འགྲོ་བ་ཐམས་ཅད་མིག་ཡོར་ལྟ་བུར་བདག་ སེམས་ཅན་ཐམས་ཅད་ལ་སྣང་བར་བྱེད་པ་དང༌། དགེ་བའི་རྩ་བའི་རྒྱུ་ལྟ་བུར་བདག་འགྲོ་བ་ཐམས་ཅད་ལ་སྟོན་པ་དང༌། དགེ་བའི་བཤེས་གཉེན་ལྟ་བུར་བདག་སེམས་ཅན་ཐམས་ཅད་ ལ་སྟོབ་པ་དང༌། ལམ་ལྟ་བུར་བདག་སེམས་ཅན་ཐམས་ཅད་ལ་ཡང་དག་པར་སྟོན་པ་དང༌། བླ་ན་མེད་པའི་བདེ་བའི་རྣམ་པ་རབ་ཏུ་ཐོབ་པ་ལྟ་བུར་བདག་སེམས་ཅན་ཐམས་ཅད་ལ་ ཡོངས་སུ་སྦྱོང་བ་དང༌། ཉི་མ་ལྟ་བུར་བདག་འགྲོ་བ་ཐམས་ཅད་ལ་སྙོམས་པ་བྱེད་པ་དང༌། དེ་ལྟ་བུའི་ཆོས་དང་ལྡན་པར་བདག་སེམས་ཅན་ཐམས་ཅད་ལ་ཡོངས་སུ་གཏོང་བའི་ཚེ་ བདག་བཏང་བས་བྱུང་བའི་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་སངས་རྒྱས་ཀྱི་ཡེ་ཤེས་ཀྱི་ སར་རབ་ཏུ་ཕྱིན་པར་གྱུར་ཅིག །སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཡེ་ཤེས་དང་ལྡན་པར་གྱུར་ཅིག །སེམས་ཅན་ཐམས་ཅད་དེ་བཞིན་ གཤེགས་པའི་འཁོར་གྱི་དཀྱིལ་འཁོར་དུ་དུལ་བ་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཕྱིར་སྤྱོད་པ་མཁས་ཤིང་སྤྱོད་པ་ཕུན་སུམ་ཚོགས་པ་དང་ལྡན་པར་ ༄༅། །གྱུར་ཅིག །སེམས་ཅན་ཐམས་ཅད་དོན་དང༌། ཆོས་དང༌། ཡེ་ཤེས་དང༌། མངོན་པར་ཤེས་པ་དང་ལྡན་ཞིང་མྱ་ངན་ལས་འདའ་བའི་མཐུ་ཡོད་པར་ གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་རིགས་སུ་བྱུང་བས་རབ་ཏུ་ཚིམ་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་དགོངས་པ་དགེ་ བས་མ་རིག་པའི་བསམ་པ་སྤང་བར་གྱུར་ཅིག །སེམས་ཅན་ཐམས་ཅད་བྱང་ཆུབ་ཀྱི་ཤིང་དྲུང་དུ་དགེ་བའི་རྩ་བ་དང་ལྡན་པས་ཤིན་ཏུ་བྱུང་བར་གྱུར་ཅིག །སེམས་ཅན་ཐམས་ ཅད་འཚེ་བའི་སེམས་བསྐྱེད་པ་དང་བྲལ་ཞིང་ཉོན་མོངས་པའི་དགྲ་ཤིན་ཏུ་ཆོམས་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་བསྟན་པ་ཡང་དག་པར་འཛིན་པའི་ཕྱིར་ ཡོངས་སུ་སྲུང་བ་ཐོབ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ལ་བདག་ཡོངས་སུ་བཏང་བས་ཡང་དག་པར་བསྡུས་པའི་ དགེ་བའི་རྩ་བ་དེ་དག་འགྲོ་བ་ཐམས་ཅད་ལ་ཕན་པ་དང༌། སེམས་ཅན་ཐམས་ཅད་ཀྱིས་བླ་ན་མེད་པའི་བདེ་བ་དང་ལྡན་པ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་ བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཐམས་ཅད་ལ་དྲིན་དུ་གཟོ་བའི་སེམས་བསྐྱེད་པས་སངས་རྒྱས་ཐམས་ཅད་ཀྱི་རིམ་གྲོ་བྱ་བ་དང༌། བུ་ལྟར་བསམ་པ་ དང༌། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཏུ་ལྷག་པའི་བསམ་པ་རྣམ་པར་སྦྱང་བ་དང༌། སངས་རྒྱས་ཀྱི་ཆོས་ཐམས་ཅད་ལ་སེམས་འདི་སྣང་ཞིང་དང་བར་བྱིན་གྱིས་ བརླབ་པ་དང༌། འཇིག་རྟེན་གྱི་འདུ་ཤེས་ལས་བདག་ཕྱིར་ལོག་པར་བྱ་བ་དང༌། བདག་སངས་རྒྱས་ཀྱི་རིགས་སུ་གཏོགས་པར་བགྲང་བ་དང༌། བདག་སངས་རྒྱས་ཐམས་ཅད་དང་མཐུན་ པར་གཟུང་བ་དང༌། བདག་བདུད་ཀྱི་ཡུལ་ལས་རིང་དུ་བྱ་བ་དང༌། བདག་སངས་རྒྱས་ཀྱི་ཡུལ་ལ་མོས་པར་བྱ་བ་དང༌། བདག་སངས་རྒྱས་ཀྱི་ཆོས་ཐམས་ཅད་ཀྱི་སྣོད་དུ་བྱིན་གྱིས་བརླབ་ པ་དང༌། དེ་ལྟ་བུའི་ཆོས་ལ་བརྩོན་པར་བྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཐམས་ཅད་ལ་རིམ་གྲོ་བྱེད་པའི་ཚེ་དགེ་བའི་རྩ་བ་དེ་སེམས་ཅན་ཐམས་ཅད་ལ་ འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་རིན་པོ་ཆེའི་འབྱུང་གནས་སུ་གྱུར་ཏེ། སེམས་ཉེ་བར་བརྟན་པ་རྣམ་པར་ དག་པ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་སྡིག་ཏོའི་ལས་ཐམས་ཅད་ལ་ཞེ་སྡང་ཞིང་ཅང་ཤེས་དང་ཡང་དག་པར་འགྲོགས་པར་གྱུར་ཅིག །སེམས་ཅན་ཐམས་ཅད་ ཤིན་ཏུ་བཟུང་བའི་ཆོས་ཅན་དུ་གྱུར་ཏེ། མི་བྱེད་པའི་གཡོག་དང་ལྡན་པར་གྱུར་ཅིག །སེམས་ཅན་ཐམས་ཅད་དབང་བསྐུར་བའི་བྱང་ཆུབ་སེམས་དཔའི་ས་ཐོབ་སྟེ། དེ་བཞིན་གཤེགས་ ༄༅། །པ་ཐམས་ཅད་ཀྱི་སློབ་མར་གྱུར་ཅིག །སེམས་ཅན་ཐམས་ཅད་མི་དགེ་བ་ཐམས་ཅད་ལས་ཤིན་ཏུ་འདས་ཏེ་སངས་རྒྱས་ཐམས་ཅད་ཀྱིས་ཡོངས་སུ་བཟུང་ བར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་ཆོས་སྐྱོན་མེད་པ་ལ་ཡང་དག་པར་སྤྱོད་ཅིང་སངས་རྒྱས་ཐམས་ཅད་དང་མཐུན་པར་གྱུར་ཅིག །སེམས་ཅན་ཐམས་ ཅད་ཐམས་ཅད་མཁྱེན་པའི་ཡེ་ཤེས་སུ་ལུང་བསྟན་པའི་ཕྱིར་སངས་རྒྱས་ལ་དམིགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་ལ་ དབང་སྒྱུར་ཞིང་སངས་རྒྱས་ཐམས་ཅད་ལ་རག་ལུས་པར་གྱུར་ཅིག །སེམས་ཅན་ཐམས་ཅད་ལེན་པ་མེད་པའི་ལས་མངོན་པར་འདུ་བྱེད་ཅིང་དེ་བཞིན་གཤེགས་པ་ཐམས་ཅད་ཀྱིས་ ཉེ་བར་བཟུང་བར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་སྤྱོད་པས་སངས་རྒྱས་ཐམས་ཅད་མཉེས་པར་བྱ་བ་ལ་བརྩོན་ཞིང་སངས་རྒྱས་ཐམས་ཅད་ལ་བསྙེན་བཀུར་བྱེད་པའི་ དམ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིམ་གྲོ་བྱེད་པས་ཡང་དག་པར་བཟུང་བའི་དགེ་བའི་རྩ་བ་དེ་དག་སངས་རྒྱས་ ཐམས་ཅད་ཀྱི་མངོན་དུ་གྱུར་པས་ཡོངས་སུ་བསྔོའོ། །འཇིག་རྟེན་ཐམས་ཅད་ཡོངས་སུ་བསྐྱབ་པའི་སེམས་ཀྱིས་ཡོངས་སུ་བསྔོའོ། །ཁམས་གསུམ་པ་ཐམས་ཅད་ལས་འབྱུང་བའི་ སེམས་ཀྱིས་ཡོངས་སུ་བསྔོའོ། །གནོད་པ་མེད་པའི་རྒྱུད་ཀྱིས་ཡོངས་སུ་བསྔོའོ། །ཚད་མེད་པའི་བྱང་ཆུབ་ཡངས་པ་ཐོབ་པས་ཡོངས་སུ་བསྔོའོ། །སངས་རྒྱས་ཀྱི་ཆོས་ཀྱིས་སྣང་བར་བྱས་པའི་ ཤེས་པས་ཡོངས་སུ་བསྔོའོ། །སངས་རྒྱས་ཐམས་ཅད་ཀྱིས་ཤིན་ཏུ་བཟུང་བས་ཡོངས་སུ་བསྔོའོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པས་ཡོངས་སུ་བསྔོའོ། ། སངས་རྒྱས་ཐམས་ཅད་ཀྱི་ཆོས་ལ་མོས་པས་ཡོངས་སུ་བསྔོའོ། །འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་དང་དགེ་བའི་རྩ་བ་གཅིག་ཏུ་བྱས་ཏེ་ཡོངས་སུ་ བསྔོའོ༑ ༑ཅི་ནས་ཀྱང་སངས་རྒྱས་ཀྱི་ཆོས་ཐམས་ཅད་ཁོང་དུ་ཆུད་པར་བྱ་བའི་ཕྱིར་འགྱོད་པ་མེད་པའི་སེམས་ཤིན་ཏུ་རྫོགས་པར་འགྱུར་བར་དགེ་བའི་རྩ་བ་དེ་དག་ཡོངས་སུ་བསྔོའོ།། །། བམ་པོ་སུམ་ཅུ་དགུ་པ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་འཛིན་པ་ཐམས་ཅད་ལས་རྣམ་པར་འདས་པ། རྒྱལ་པོའི་སྲིད་ལ་ཞེན་པའི་བསམ་པ་མེད་པ། མ་ཆགས་པའི་སེམས་དང་ལྡན་པ། སྐྱིད་པས་མ་བཅིངས་པ། རྒྱལ་པོའི་སྲིད་ལ་ཡོངས་སུ་འཛིན་པ་མེད་པ། ཡོངས་སུ་གཟུང་བ་ལ་མི་གནས་པ། མ་བཏང་བ་གཏོང་བ། དབང་ཕྱུག་ལ་མ་ ཆགས་པ། གནོད་པ་མེད་པའི་ལས་དང་ལྡན་པ། སེམས་ཅན་ཐམས་ཅད་ལ་ཕན་པ་དང་བདེ་བར་སེམས་པ་དེ་རྒྱལ་པོའི་སྲིད་ཡོངས་སུ་གཏོང་བའི་ཚེ་རྒྱལ་པོའི་སྲིད་བྱིན་པས་ཡང་ ༄༅། །དག་པར་བཟུང་བའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། ཅི་ནས་ཀྱང་ལས་ཀྱི་རྣམ་པར་སྨིན་པ་ལ་ཡེ་རྡམ་[*RNGAM?] པ་མེད་པ་དེ་ལྟར་དགེ་བའི་རྩ་བ་ དེ་དག་ཡོངས་སུ་བསྔོའོ། །ཅི་ནས་ཀྱང་འཇིག་རྟེན་གྱི་ཆོས་ལ་དགའ་བ་མི་སྐྱེ་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སྲིད་པར་སྐྱེ་མཆེད་ལ་མངོན་པར་ ཞེན་པ་མེད་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་འཇིག་རྟེན་གྱི་ཁམས་ཐམས་ཅད་ཀྱི་གནས་ལ་གནས་ཀྱི་འདུ་ཤེས་མི་སྐྱེད་པ་དེ་ལྟར་དགེ་བའི་རྩ་བ་ དེ་དག་ཡོངས་སུ་བསྔོའོ། །ཅི་ནས་ཀྱང་ཕུང་པོ་དང༌། ཁམས་དང༌། སྐྱེ་མཆེད་ལ་མངོན་པར་ཞེན་པ་མེད་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་ཕྱི་ནང་གི་ ཆོས་ཐམས་ཅད་དུ་ལུས་ལ་གནས་པའི་སེམས་མི་སྐྱེ་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་རྨོངས་པར་མི་ འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་དགེ་བའི་བཤེས་གཉེན་ཐམས་ཅད་དང་རིང་དུ་མི་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། ། ཅི་ནས་ཀྱང་བྱང་ཆུབ་སེམས་དཔའི་སྤྱོད་པ་ཆེན་པོའི་སྨོན་ལམ་ཉམས་པར་མི་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་དགེ་བའི་བཤེས་གཉེན་ཐམས་ ཅད་མངོན་པར་མཉེས་པར་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །གཞན་ཡང་འདི་ལྟར་ཡོངས་སུ་བསྔོ་སྟེ། རྒྱལ་པོའི་སྲིད་བྱིན་པས་ཡང་དག་པར་བསྡུས་པའི་དགེ་ བའི་རྩ་བ་འདིས་སེམས་ཅན་ཐམས་ཅད་ཆོས་ཀྱི་དབང་ཕྱུག་གི་དམ་པ་ཐོབ་སྟེ་ཆོས་ཀྱི་རྒྱལ་པོའི་སྲིད་ལ་དབང་བསྒྱུར་བ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་རྒྱལ་པོའི་དཀྲུག་ མ་དང༌། དགྲ་ཐམས་ཅད་རབ་ཏུ་གཞོམ་པའི་ཕྱིར་སངས་རྒྱས་ཀྱི་རྒྱལ་སྲིད་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་ཀྱི་སངས་རྒྱས་ཀྱི་ཆོས་ རབ་ཏུ་བརྗོད་པའི་ཕྱིར་སངས་རྒྱས་ཀྱི་རྒྱལ་སྲིད་ཆེན་པོ་ལ་རབ་ཏུ་གནས་པར་གྱུར་ཅིག །སེམས་ཅན་ཐམས་ཅད་བླ་ན་མེད་པའི་ཆོས་ཀྱི་འཁོར་ལོ་ཐོགས་པ་མེད་པ་བསྐོར་བའི་ཕྱིར་སངས་ རྒྱས་ཐམས་ཅད་ཀྱི་ཡུལ་གྱི་རྒྱལ་སྲིད་ལ་རབ་ཏུ་གཞོལ་བར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབང་ཕྱུག་སངས་རྒྱས་ཀྱི་རིགས་རྒྱུན་མི་འཆད་པར་ཡང་དག་པར་འཛིན་པའི་ ཚུལ་དུ་དེ་བཞིན་གཤེགས་པ་ཐམས་ཅད་ཀྱི་དགེ་བའི་རྩ་བས་མངོན་པར་བྱུང་བར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའ་ཚད་མེད་པ་ཡང་དག་པར་བསྒྲུབ་པའི་ཕྱིར་ སྲིད་ཡངས་ཤིང༌། ཚད་མེད་པ་རྗེས་སུ་སྐྱོང་བར་གྱུར་ཅིག །སེམས་ཅན་ཐམས་ཅད་སངས་རྒྱས་འབྱུང་བ་རྒྱུན་མ་ཆད་པ་དང་ལྡན་ཞིང་ཆོས་ཀྱི་དབྱིངས་ལ་ངེས་པའི་རྒྱལ་སྲིད་དང་ལྡན་ ༄༅། །པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་གདུལ་པ་ལ་ཐོགས་པ་མེད་པར་ཞུགས་པས་སངས་རྒྱས་ཀྱི་ཞིང་ཐམས་ཅད་ཡེ་ཤེས་ཀྱི་དབང་ཕྱུག་ཏུ་ གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཁམས་ཀུན་གྱི་སེམས་ཅན་ཐེག་པ་ཆེན་པོ་ལ་རབ་ཏུ་གཞོག་པའི་ཚུལ་གྱིས་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་དུ་ཆོས་ཀྱི་སྦྱིན་བདག་ཏུ་གྱུར་ཅིག །སེམས་ཅན་ཐམས་ཅད་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ ཅད་དང་དགེ་བའི་རྩ་བའི་རྒྱུད་ཀྱི་ཚུལ་གཅིག་ཏུ་གྱུར་ཏེ་ལྟོད་པ་མེད་པའི་རྒྱལ་སྲིད་རབ་ཏུ་ཐོབ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་པོའི་ སྲིད་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་བ་དེ་དག་ཅི་ནས་ཀྱང་འགྲོ་བ་ཐམས་ཅད་དུ་ཤིན་ཏུ་བདེ་བ་དང༌། ལེགས་པ་འབྱུང་བའི་ཕྱིར་སེམས་ཅན་ཐམས་ཅད་ ལ་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་མི་འཁྲུགས་པ་དང༌། བྱང་ཆུབ་སེམས་དཔའི་སེམས་རྩེ་གཅིག་པ་དང༌། སྨོན་ལམ་ཚད་ མེད་པར་བྱས་ཏེ་སྙིང་རྗེ་ཆེན་པོ་བསྐྱེད་ཅིང་བྱམས་པ་ཆེན་པོའི་སྟོབས་ཉེ་བར་བཞག་སྟེ་བསམ་པ་ཤིན་ཏུ་ཚིམ་པར་བྱས་ནས་སེམས་ཅན་གྱི་དོན་ལ་བདག་རབ་ཏུ་བཞག་སྟེ་ཡེ་ ཤེས་ཆེན་པོ་ལ་ཤིན་ཏུ་མོས་པར་བྱས་ནས་སངས་རྒྱས་ཀྱི་ཆོས་ལ་མཉམ་པའི་སེམས་སུ་བྱས་ཏེ་དགེ་བའི་ཆོས་ཉིད་ལ་རྣམ་པར་དཔྱོད་ཅིང་ཐམས་ཅད་མཁྱེན་པའི་རྒྱལ་སྲིད་ལ་རབ་ ཏུ་གཞོལ་བར་སེམས་བསྐྱེད་པ་དང༌། ཆོས་ཀྱི་དབང་ཕྱུག་ལ་ཤིན་ཏུ་བརྩོན་པའི་བསམ་པ་དང༌། ཡེ་ཤེས་ལ་དབང་སྒྱུར་བ་ཐོབ་པའི་ཡིད་ཀྱི་དབང་པོ་དང༌། ཡོན་ཏན་ཐམས་ཅད་རྣམ་ པར་སྤྱོད་པའི་རབ་ཏུ་འཇུག་པ་དང༌། བློ་བརྟན་པ་དང་ལྡན་པའི་བསམ་པ་ཡངས་པ་དང༌། ཚོགས་སུ་གྱུར་པའི་དགེ་བའི་རྩ་བ་ཐམས་ཅད་དང༌། བརྩམ་པར་སྐབས་ཕྱེ་བ་དང་ལྡན་པའི་ སངས་རྒྱས་ཀྱི་ཆོས་ཀྱི་སྨོན་ལམ་དང༌། གཞན་ལ་རག་ལས་པ་མེད་པའི་ཐམས་ཅད་མཁྱེན་པ་ཉིད་ཀྱི་ཆོས་དང༌། ཤིན་ཏུ་བརྟན་པའི་བྱང་ཆུབ་ཏུ་སེམས་བསྐྱེད་པའི་སྟོབས་དང༌། བརྩམས་ པ་ཐམས་ཅད་མཐར་འབྱིན་པའི་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པའི་སྨོན་ལམ་གྱིས་མི་དང་ཡུལ་དུ་བཅས་པ་དང༌། གྲོང་ཁྱེར་དང་རྒྱལ་པོའི་ཕོ་བྲང་འཁོར་རྒྱན་ཐམས་ཅད་ ཀྱིས་རྣམ་པར་བརྒྱན་པ་ཐམས་ཅད་གཏོང་བར་ཡོངས་སུ་བཏང་བས་སློང་བ་རྣམས་ལ་ཡོངས་སུ་གཏོང་བའི་ཚེ་ཡུལ་དང་མིར་བཅས་པ་དང༌། གྲོང་ཁྱེར་དང་རྒྱལ་པོའི་ཕོ་བྲང་ཡོངས་སུ་ བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་འདི་ལྟར་ཡོངས་སུ་བསྔོ་སྟེ། ཡུལ་དང་མིར་བཅས་པ་དང༌། གྲོང་ཁྱེར་དང་རྒྱལ་པོའི་གནས་རབ་ ༄༅། །ཏུ་བྱིན་པའི་དགེ་བའི་རྩ་བ་འདིས་སེམས་ཅན་ཐམས་ཅད་ཀྱིས་འཇིག་རྟེན་གྱི་ཁམས་ཅད་རྣམ་པར་སྦྱངས་ཏེ་སངས་རྒྱས་ཐམས་ཅད་བཞུགས་ཤིང་ སྤྱོད་པའི་ཕྱིར་སངས་རྒྱས་ཐམས་ཅད་ལ་འབུལ་བར་གྱུར་ཅིག །སེམས་ཅན་ཐམས་ཅད་ཞི་བའི་གནས་རབ་ཏུ་ཐོབ་ཅིང་དགོན་པ་ཤིན་ཏུ་དབེན་པ་ལ་མངོན་པར་མོས་པར་གྱུར་ ཅིག །སེམས་ཅན་ཐམས་ཅད་བླ་ན་མེད་པའི་དབེན་པའི་མཐར་ཐུག་པར་གྲོང་དང༌། གྲོང་ཁྱེར་དང༌། ལྗོངས་དང༌། ཁམས་དང༌། རྒྱལ་པོའི་གནས་ལ་གནས་པ་མེད་པར་གྱུར་ ཅིག །སེམས་ཅན་ཐམས་ཅད་འཇིག་རྟེན་གྱི་སྨྲ་བ་ཐམས་ཅད་ལས་རྣམ་པར་འདས་ཏེ་འདུ་འཛི་མེད་པར་གྱུར་ཅིག །སེམས་ཅན་ཐམས་ཅད་འགྱོད་པ་མེད་པའི་སྦྱིན་བདག་ཏུ་གྱུར་ ཏེ་གཏོང་བའི་སེམས་དང་མི་འབྲལ་བར་གྱུར་ཅིག །སེམས་ཅན་ཐམས་ཅད་གནས་མེད་པའི་བསམ་པ་རབ་ཏུ་ཐོབ་ཅིང་ཁྱིམ་གྱི་གནས་དང་རབ་ཏུ་བྲལ་བར་གྱུར་ཅིག །སེམས་ ཅན་ཐམས་ཅད་གཏོང་བ་ཤིན་ཏུ་གཏོང་བའི་སེམས་དང་ལྡན་ཞིང་གཏང་བར་བྱ་བ་གཏོང་བར་གྱུར་ཅིག །སེམས་ཅན་ཐམས་ཅད་ཁྱིམ་གྱི་གནས་ལ་ཆགས་པ་ལས་རྣམ་པར་ འདས་ཏེ་གནས་པ་ཆུད་ཟ་བ་མེད་པར་གྱུར་ཅིག །སེམས་ཅན་ཐམས་ཅད་གནོད་པ་དང༌། འཚེ་བ་དང༌། འཇིགས་པ་ཐམས་ཅད་ལས་རྣམ་བར་འདས་ཏེ་གཙེ་བ་ཐམས་ཅད་ཀྱིས་ ཡོངས་སུ་གཏོང་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ལ་སངས་རྒྱས་ཀྱི་ཞིང་འབུལ་བས་འཇིག་རྟེན་གྱི་ཁམས་ཐམས་ཅད་རྣམ་པར་སྤྱོད་པར་གྱུར་ཅིག །ཅེས་ དེ་ལྟར་བྱང་ཆུབ་སེམས་དཔའ་ཆེན་པོ་ཡུལ་དང་མིར་བཅས་པ་དང༌། གྲོང་ཁྱེར་དང་རྒྱལ་པོའི་ཕོ་བྲང་འཁོར་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སངས་རྒྱས་ཀྱི་ཞིང་གི་གནས་ ཡོངས་སུ་དག་པར་བྱ་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གཡོག་དང་འཁོར་ལ་དགའ་བའི་མཚན་ མར་མི་འཛིན་ཅིང་ལྟོས་པ་མེད་པའི་སེམས་དང་ལྡན་པ། འཁོར་བ་ཐམས་ཅད་ལ་ཞེན་པ་མེད་པའི་རྒྱུད་ཅན། འདོད་པའི་དགའ་བ་ཐམས་ཅད་ཀྱིས་སེམས་བཅིངས་པ་མེད་པ། གཟུགས་ ཀྱི་རྣམ་པ་ཐམས་ཅད་ལ་མངོན་པར་མ་ཆགས་པའི་སེམས་དང་ལྡན་པ། འདོད་པའི་དགའ་བ་ཐམས་ཅད་ལ་སེམས་མི་བརྐམ་པ། འདོད་པའི་དགའ་བ་སྣ་ཚོགས་སུ་ཡོངས་སུ་སྤྱོད་པ་ ལ་རྟོག་པ་མེད་པར་གནས་པ། འདོད་པའི་སྦྱོར་བ་ཐམས་ཅད་ལ་ཆགས་པ་མེད་པའི་སེམས་དང་ལྡན་པ། བུད་མེད་ཀྱི་དགའ་བ་དང༌། རྩེད་མོའི་དགའ་བ་ཡོངས་སུ་སྤྱོད་པ། ཐམས་ ཅད་ལ་མཚན་མར་མི་འཛིན་པ། བུད་མེད་རིན་པོ་ཆེའི་ཡན་ལག་དང་ཉིང་ལག་ཐམས་ཅད་ལ་མ་ཆགས་པ། འཇིག་རྟེན་གྱི་ཕུན་སུམ་ཚོགས་པ་ཐམས་ཅད་ལས་ཕྱིར་མི་ལྡོག་ ༄༅། །པས་གཡོག་འཁོར་དང༌། ཆུང་མའི་འཁོར་དང་རོལ་མོར་བཅས་པ། གླུ་དང༌། གར་དང༌། རྔ་དང༌། རོལ་མོ་དཀྲོལ་བར་བྱེད་ཅིང་སྤྱོད་པ། བསྙེན་བཀུར་ ཞིང་རིམ་གྲོ་བྱ་བ་ལ་ཤིན་ཏུ་མཁས་པར་གྱུར་པ། གཟོ་དང་སྒྱུ་རྩལ་ཤིན་ཏུ་བསླབ་པ། འཇིག་རྟེན་པའི་ཡོན་ཏན་ཐམས་ཅད་དང་ལྡན་པ། དགའ་བར་བྱེད་པ་ཡིད་དུ་འོང་བའི་ རིམ་གྲོས་རྩེ་བར་བྱེད་པ། བཀུར་སྟིའི་ཚུལ་ལ་མཁས་པ། རོལ་མོ་བརྡུང་བའི་སྒྲ་ཡིད་དུ་འོང་བ་ཤིན་ཏུ་ཕྱུང་བ་དང༌། རོལ་མོ་དཀྲོལ་བ་དང༌། གླུའི་སྒྲ་མི་མཐུན་པ་མེད་པ་དང༌། གར་གྱིས་ཉེ་བར་སྤྱོད་པ་དང་ལྡན་པ། བུད་མེད་ཅང་ཤེས་ཀྱི་ཚོགས་ཀྱིས་ཀུན་ནས་བསྐོར་བ་བཞིན་སྡུག་གུ་དང༌། ཆ་བྱད་སྡུག་གུའི་བུ་མོ་རིན་པོ་ཆེ་དང་ལྡན་པ། ཕྲེང་བ་དང༌། སྤོས་དང༌། རྒྱན་གྱིས་རིམ་གྲོར་བྱེད་པ། བཞད་གད་དང༌། རོལ་མོས་དགའ་བར་རྩེ་ཞིང་བཀུར་སྟི་རྣམ་པ་སྣ་ཚོགས་ཡིད་དུ་འོང་བ་སྟོན་པའི་བུད་མེད་རིན་པོ་ཆེ་འགྲོགས་འགྲོགས་ པ་དག་ཉན་ཅིང་མཐུན་པར་འཛིན་པ། ངེས་པའི་ཚིག་དགའ་བར་བྱེད་ཅིང་རིམ་གྲོར་བྱེད་པ། རྒྱན་བཟང་པོ་རབ་ཏུ་མང་པོས་བལྟ་ན་ཡིད་དུ་འོང་བར་བརྒྱན་པས་ཤིན་ཏུ་རྣམ་པར་ དག་པ༑ རོལ་མོ་བརྡུང་བ་དང་དཀྲོལ་བ་བྱེ་བ་ཁྲག་ཁྲིག་བརྒྱ་སྟོང་དང་ལྡན་པ། བྱང་ཆུབ་སེམས་དཔའ་ལས་ཀྱི་དགེ་བའི་རྩ་བ་དང་རྒྱུ་མཐུན་པར་བྱུང་བ་ལས་ཤེས་ཤིང་བྱང་ཆུབ་ སེམས་དཔའི་དབང་གི་རྗེས་སུ་འབྲང་བ། སེམས་དགའ་བར་བྱེད་པ་དེ་ལྟ་བུ་གཡོག་འཁོར་དང༌། ཆུང་མའི་འཁོར་དང༌། རོལ་མོར་བཅས་པ་ཤིན་ཏུ་བཤེས་པ། དེ་དག་ཐམས་ ཅད་ཡོངས་སུ་གཏོང་ཞིང་སྦྱིན་པ་བྱེད་པའི་ཚེ་དགེ་བའི་རྩ་བ་དེ་དག་འགྲོ་བ་ཐམས་ཅད་ནས་འབྱུང་བའི་སེམས་ཀྱིས་ཡོངས་སུ་བསྔོའོ། །སངས་རྒྱས་ཀྱི་ཆོས་ལ་དགའ་བ་རབ་ཏུ་ཐོབ་པས་ ཡོངས་སུ་བསྔོའོ། །སྙིང་པོ་བླང་བའི་སེམས་ཀྱིས་ཡོངས་སུ་བསྔོའོ། །ཡེ་ཤེས་རྡོ་རྗེའི་དབྱིངས་མི་ཤིགས་པའི་སེམས་ཀྱིས་ཡོངས་སུ་བསྔོའོ། །དེ་བཞིན་གཤེགས་པའི་དཀྱིལ་འཁོར་ རབ་ཏུ་འཐོབ་པས་ཡོངས་སུ་བསྔོའོ། །སྙིང་པོ་ལེན་པར་བྱས་ཏེ་ཡོངས་སུ་བསྔོའོ། །བླ་ན་མེད་པའི་སེམས་དང་ལྡན་པས་ཡོངས་སུ་བསྔོའོ། །ཡེ་ཤེས་ཀྱིས་ཁོང་དུ་ཆུད་པའི་ཆོས་དང་ལྡན་ པས་ཡོངས་སུ་བསྔོའོ། །དགེ་བའི་རྩ་བ་ཐམས་ཅད་ཀྱི་འབྱུང་གནས་སུ་རེད་པར་བྱས་ཏེ་ཡོངས་སུ་བསྔོའོ། །དུས་གསུམ་གྱི་སངས་རྒྱས་ཐམས་ཅད་དང་མི་འགལ་བར་བྱས་ཏེ་ཡོངས་སུ་ བསྔོའོ༑ ༑དེ་ལྟ་བུའི་ཆོས་ལ་རྣམ་པར་སྤྱོད་ཅིང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་དང་ལྡན་པའི་རིགས་ཀྱི་རྒྱུད་དུ་བྱུང་བ། སངས་རྒྱས་ ཀྱི་རིགས་རྣམ་པར་དག་པས་རབ་ཏུ་སྐྱེས་བ། ཐམས་ཅད་མཁྱེན་པའི་ལམ་དུ་སེམས་མངོན་པར་སྐྱེས་པ། བྱང་ཆུབ་སེམས་དཔའི་ལས་དང༌། ཡེ་ཤེས་འབྱམས་ཀླས་པ་ལ་ཞུགས་ ༄༅། །པ༑ འཇིག་རྟེན་གྱི་དྲི་མ་ཐམས་ཅད་རབ་ཏུ་སྤྱོད་པ། སྦྱིན་པའི་སེམས་དང་ལྡན་པ། ཡོན་ཏན་ཆེན་པོའི་དཀྱིལ་འཁོར་གྱིས་སྦྱིན་པའི་གནས་སུ་གྱུར་པ་། འཇིག་རྟེན་ཐམས་ཅད་ཀྱི་གནས་དང་འགྲོ་བ་ཐམས་ཅད་ཀྱི་རྟེན་དུ་གྱུར་བ། སེམས་ཅན་ཐམས་ཅད་རྣམ་པར་དག་པར་བྱ་བ་ལ་ཡང་དག་པར་ཞུགས་པ། དགེ་བའི་རྩ་བ་ཐམས་ཅད་ གཟུང་བ་ལ་ཡང་དག་པར་བརྩོན་པ་དེ་འཁོར་ཐམས་ཅད་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ ཅད་བྱང་ཆུབ་སེམས་དཔའི་ཏིང་ངེ་འཛིན་མི་འཕྲོག་པ་རབ་ཏུ་ཐོབ་སྟེ་ཏིང་ངེ་འཛིན་ཚད་མེད་པའི་འཁོར་གྱིས་བསྐོར་བར་གྱུར་ཅིག །སེམས་ཅན་ཐམས་ཅད་སངས་རྒྱས་མཐོང་ བས་སྤྲོ་བ་དང་དགའ་བ་རབ་ཏུ་ཐོབ་སྟེ་སངས་རྒྱས་ཐམས་ཅད་ཀྱི་ཏིང་ངེ་འཛིན་གྱི་རྒྱན་ལ་མཉམ་པར་གཞོག་པར་གྱུར་ཅིག །སེམས་ཅན་ཐམས་ཅད་ཚད་མེད་པའི་ཏིང་ངེ་འཛིན་ གྱིས་རྣམ་པར་འཕྲུལ་པ་ལ་གནས་ཤིང་བྱང་ཆུབ་སེམས་དཔའི་ཏིང་ངེ་འཛིན་གྱིས་རྣམ་པར་རྩེ་ཞིང་སྤྱོད་པར་གྱུར་ཅིག །སེམས་ཅན་ཐམས་ཅད་སེམས་ལ་འཁྲུག་པ་མེད་ཅིང་ ཆོས་དང་མཐུན་པའི་ཏིང་ངེ་འཛིན་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཏིང་ངེ་འཛིན་ཐམས་ཅད་ལ་དབང་སྒྱུར་ཞིང་བྱང་ཆུབ་སེམས་དཔའི་ཏིང་ངེ་འཛིན་ཟབ་ མོ་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཡང་དག་པར་བྲལ་བའི་ཡིད་རབ་ཏུ་ཐོབ་སྟེ་ཏིང་ངེ་འཛིན་གྱི་འཁོར་དང་ལྡན་པར་གྱུར་ཅིག །སེམས་ཅན་ཐམས་ཅད་ཏིང་ངེ་འཛིན་ གྱི་མཚན་མ་འཛིན་པ་ཤིན་ཏུ་ཐོབ་སྟེ་ཏིང་ངེ་འཛིན་སྣ་ཚོགས་ལ་མཁས་པར་གྱུར་ཅིག །སེམས་ཅན་ཐམས་ཅད་ཏིང་ངེ་འཛིན་ཐམས་ཅད་སྒོམ་པ་ལ་གནས་ཤིང་ཏིང་ངེ་འཛིན་གྱི་ཁྱད་ པར་ཤེས་པར་གྱུར་ཅིག །སེམས་ཅན་ཐམས་ཅད་རྟག་ཏུ་རྒྱུན་མི་འཆད་པའི་སེམས་ཀྱིས་མི་གཉིས་པའི་ཏིང་ངེ་འཛིན་ལ་ཡང་དག་པར་སྤྱོད་ཅིང་ཆགས་པ་མེད་ཅིང་ཏིང་ངེ་འཛིན་རབ་ཏུ་ ཐོབ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་སེམས་དཔའ་ཆེན་པོ་འཁོར་ཐམས་ཅད་ཡོངས་སུ་བཏང་བས་ཡང་དག་པར་བཟུང་བའི་དགེ་བའི་རྩ་བ་དེ་དག་སེམས་ཅན་ཐམས་ ཅད་ཀྱི་འཁོར་གཞན་གྱིས་མི་ཕྱེད་ཅིང་རྣམ་པར་དག་པ་དང༌། བྱང་ཆུབ་སེམས་དཔའི་འཁོར་གྱི་ཚོགས་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་ཏུ་སེམས་བསྐྱེད་པ་ཤིན་ ཏུ་རྣམ་པར་དག་པར་འགྱུར་བ་དང༌། སངས་རྒྱས་ཀྱི་ཆོས་ཡོངས་སུ་རྫོགས་པ་རབ་ཏུ་ཐོབ་པར་འགྱུར་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །ཐམས་ཅད་མཁྱེན་པའི་ ཡེ་ཤེས་ཁོང་དུ་ཆུད་པ་དང༌། ཐམས་ཅད་མཁྱེན་པའི་སྟོབས་ཡོངས་སུ་རྫོགས་པར་འགྱུར་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །སྐལ་པ་མཉམ་པའི་སེམས་ཅན་ ༄༅། །དང་འགྲོགས་པ་དང༌། མཐུན་པའི་གཡོག་འཁོར་རབ་ཏུ་འཐོབ་པར་བྱ་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །ཁ་ན་མ་ཐོ་བ་མེད་པའི་ དགེ་བའི་རྩ་བ་རབ་ཏུ་འགྲུབ་པ་དང༌། ཐམས་ཅད་མཁྱེན་པའི་བསོད་ནམས་ཡོངས་སུ་རྫོགས་པར་འགྱུར་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །སངས་རྒྱས་ ཀྱི་སྐུ་རྣམ་པར་དག་པ་འཐོབ་པ་དང༌། གཡོག་ངེས་པ་དང་ལྡན་པར་བྱ་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོའོ། །སངས་རྒྱས་ཀྱི་ཆོས་ཐམས་ཅད་ཀྱི་མཛོད་ཤིན་ཏུ་ རིགས་པ་ལ་ཞུགས་པས་རབ་ཏུ་སྟོན་པ་དང༌། ཐ་དད་པ་ཡང་དག་པར་ཤེས་པ་གཅིག་ནས་གཅིག་ཏུ་བརྒྱུད་པ་ཐམས་ཅད་འཐོབ་པར་བྱ་བའི་ཕྱིར་སེམས་ཅན་ཐམས་ཅད་ལ་ཡོངས་སུ་ བསྔོའོ༑ ༑འགྲོ་བ་ཐམས་ཅད་ཀྱི་དགེ་བའི་རྩ་བ་ལས་རྣམ་པར་འདས་པ་དང༌། སེམས་ཅན་ཐམས་ཅད་གྲོགས་སུ་འགྱུར་བའི་དགེ་བའི་རྩ་བ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་ བསྔོའོ༑ ༑རྣམ་པར་དག་པའི་ཆོས་ཐམས་ཅད་ཡོངས་སུ་རྫོགས་པར་འགྱུར་བ་དང༌། ཁ་ན་མ་ཐོ་བ་མེད་པའི་ལས་ཡོངས་སུ་རྫོགས་པར་བྱ་བའི་ཕྱིར་སེམས་ཅན་ཐམས་ཅད་ལ་ཡོངས་ སུ་བསྔོའོ། །ཆོས་སྣང་བ་ཐམས་ཅད་ཀྱི་རྒྱན་ཡོངས་སུ་དག་པར་བྱ་བ་དང༌། སངས་རྒྱས་ཀྱི་ཆོས་ཐམས་ཅད་མངོན་སུམ་དུ་རྫོགས་པར་བྱ་བའི་ཕྱིར་སེམས་ཅན་ཐམས་ཅད་ལ་ ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བུ་དང་བུ་མོ་དང་ཆུང་མ་ཡོངས་སུ་གཏོང་ཞིང༌། ཇི་ལྟར་གཞོན་ནུ་ཤིན་ཏུ་སྦྱང་བ་དང༌། རྒྱལ་པོ་རྒྱན་ཐམས་ ཅད་སྟོན་པ་དང༌། དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ཀྱང་ཐམས་ཅད་མཁྱེན་པའི་ལམ་ལ་མངོན་པར་གནས་པ་གཏོང་བ་དང༌། ཡོངས་སུ་གཏོང་ བ་ཐམས་ཅད་རྣམ་པར་འཕེལ་བར་བྱེད་པ། བྱང་ཆུབ་སེམས་དཔའི་གཏོང་བའི་ལམ་རྣམ་པར་སྦྱོང་བ། ཕྱིས་འགྱོད་པ་མེད་པར་གཏོང་བའི་སེམས་རྣམ་པར་སྦྱོང་བ། གཏོང་བ་རིན་པོ་ ཆེ་ཐམས་ཅད་ཀྱིས་ཐམས་ཅད་མཁྱེན་པར་སེམས་བསྐྱེད་པ་ལ་མཉམ་པར་བཞག་པ། འགྲོ་བ་ཐམས་ཅད་རྣམ་པར་དག་པར་བྱེད་པའི་ལྷག་པའི་བསམ་པ་རབ་ཏུ་སྒྲུབ་པ། ལྷག་པའི་ བསམ་པས་དག་པའི་བྱང་ཆུབ་རྣམ་པ་ཐམས་ཅད་དུ་ཡོངས་སུ་རྫོགས་པར་བྱེད་པ། བྱང་ཆུབ་སེམས་དཔའི་ལམ་གྱིས་བདག་མངོན་པར་བསྐྱབ་པར་ཡང་དག་པར་ལྟ་བ། སངས་རྒྱས་ཐམས་ ཅད་ཀྱི་བྱང་ཆུབ་ཏུ་སེམས་མངོན་དུ་གྱུར་པར་བྱིན་གྱིས་རློབ་པ། དེ་བཞིན་གཤེགས་པ་ཐམས་ཅད་ཀྱི་རིགས་ལ་གནས་པའི་སེམས་བསྐྱེད་པ་ཡོངས་སུ་སྒྱུར་བ་རྣམས་ཀྱིས་བུ་དང་བུ་མོ་དང་ ཆུང་མ་ཡོངས་སུ་བཏང་བ་དེ་ལྟར་བུ་དང་བུ་མོ་དང་ཆུང་མ་དེ་དག་བསམ་པ་སྟོབས་དང་ལྡན་པར་བྱས་ཏེ་བཏང་བ་དང༌། བདག་དེ་བཞིན་ཉིད་དུ་མོས་པར་བྱས་ཏེ་སྦྱིན་པར་བྱེད་པ་དང༌། བདག་ ༄༅། །ཉིད་འཇིག་རྟེན་ཐམས་ཅད་ཀྱིས་ཅི་འདོད་པར་སྤྱད་པར་ཡང་དག་པར་ལྟ་བ་དང༌། བདག་སེམས་ཅན་ཐམས་ཅད་ལ་སྦྱིན་པ་ཀུན་གྱི་འབྱུང་གནས་སུ་གྱུར་པར་ བྱིན་གྱིས་རློབ་པ་དང༌། གང་གིས་སེམས་ཅན་དམའ་བར་གྱུར་པ་དེ་དག་གིས་ཡོངས་སུ་རྒྱས་པར་བྱེད་པ་དང༌། དེ་ལྟ་བུའི་ཚུལ་གྱིས་བདག་ཡང་དག་པར་འཛིན་པ་དང་མཆོད་རྟེན་ དམ་པར་འགྱུར་རོ། །ཞེས་འགྲོ་བ་ཐམས་ཅད་བདག་སྤྲོ་བར་བྱེད་པ་དང༌། ཐམས་ཅད་མཁྱེན་པའི་སེམས་ཉིད་འགྲོ་བ་ཐམས་ཅད་ལ་ཤིན་ཏུ་སྒྲུབ་པ་དང༌། བདག་འགྲོ་བ་ཐམས་ ཅད་ལ་ཕན་པའི་མུ་སྟེགས་སུ་ལྟ་བ་དང༌། བདག་འཇིག་རྟེན་ཐམས་ཅད་ཀྱི་འབབས་བདེ་བར་རབ་ཏུ་རྟོགས་པ་དང༌། བདག་འགྲོ་བ་ཐམས་ཅད་ཀྱི་སྦྱིན་བདག་ཏུ་མོས་པར་བྱེད་པ་དང༌། བདག་ཡེ་ཤེས་ཀྱི་ཡིད་དང་ལྡན་པར་བྱས་ཤིང་བདག་བྱང་ཆུབ་སེམས་དཔའི་སྤྱོད་པ་ལ་རབ་ཏུ་བརྩོན་པར་ཡང་དག་པར་ཤེས་པ་དང༌། བདག་ཇི་ལྟར་སྨྲས་པ་དེ་ལྟར་བྱེད་པ་ལ་སྦྱོར་བ་ དང༌། བདག་ཐམས་ཅད་མཁྱེན་པའི་གོ་ཆ་བགོས་པར་རབ་ཏུ་རྟོག་ཅིང་ཡེ་ཤེས་དང་བསོད་ནམས་ཀྱི་ཞིང་ཚོལ་བ་དང༌། འགྲོ་བ་ཐམས་ཅད་ལ་དམ་བཅས་པའི་སེམས་རྗེས་སུ་སྲུང་ བ་དང༌། རབ་ཏུ་ནན་ཏན་བྱེད་པ་ལ་བདག་ཤིན་ཏུ་གཞོག་པ་དང༌། འགྲོ་བ་ཐམས་ཅད་དུ་སྣང་བའི་ཡེ་ཤེས་ཡང་དག་པར་སྐྱེད་པ་དང༌། བྱང་ཆུབ་སེམས་དཔའ་ཐམས་ཅད་ཀྱི་ གཏོང་བའི་སེམས་ཡིད་ལ་བྱེད་པ་དང༌། དེ་བཞིན་གཤེགས་པ་ཐམས་ཅད་མངོན་སུམ་དུ་དམིགས་པར་བྱེད་པའི་ཚེ་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་ དང་ལྡན་ན། སེམས་ཅན་ཐམས་ཅད་ཀྱི་དོན་དུ་ཡེ་ཤེས་དང་བསོད་ནམས་ཀྱི་ཚོགས་བསགས་པ་དེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། བུ་དང་བུ་མོ་དང་ཆུང་མ་ཡོངས་སུ་ བཏང་བས་ཡང་དག་པར་བསྡུས་པའི་དགེ་བའི་རྩ་བ་འདིས་སེམས་ཅན་ཐམས་ཅད་ཆོས་ཐམས་ཅད་ཀྱིས་འཇིག་རྟེན་གྱི་ཁམས་རྒྱས་པར་འགེངས་པའི་ཆོས་ཀྱི་འཁོར་ལོ་ཕྱིར་མི་ལྡོག་ པ་ཡང་དག་པར་བསྐོར་བས་སངས་རྒྱས་ཀྱི་བྱང་ཆུབ་ལ་འཇོག་པར་བྱེད་ཅིང་བདག་གི་ལུས་ཀྱི་སྤྲུལ་པ་རབ་ཏུ་འགྱེད་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཞིང་ཐམས་ ཅད་དུ་སྨོན་ལམ་གྱིས་འདོང་ཞིང་ལུས་ལ་མངོན་པར་ཆགས་པ་མེད་པར་གྱུར་ཅིག །སེམས་ཅན་ཐམས་ཅད་ཀྱི་ཆགས་པ་དང་ཁོང་ཁྲོ་བ་སྤངས་ཤིང་སྡུག་པ་དང་མི་སྡུག་པའི་སེམས་ དང་བྲལ་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་རིགས་ཀྱི་རྗེས་སུ་སྤྱོད་ཅིང་དེ་བཞིན་གཤེགས་པའི་སྲས་སུ་རེད་པར་གྱུར་ཅིག །སེམས་ཅན་ཐམས་ཅད་ཐ་དད་པ་མེད་ པའི་སེམས་ཀྱིས་བྱུང་ཞིང་སངས་རྒྱས་ཐམས་ཅད་ལ་རབ་ཏུ་འདུ་ཤེས་ཐོབ་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཆོས་ཀྱི་སྐུ་ལས་བྱུང་བ་གསུང་ལས་ ༄༅། །སྐྱེས་པར་གྱུར་ཏེ་ངེས་པར་སངས་རྒྱས་ཀྱི་སྲས་སུ་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་ཁོང་དུ་ཆུད་པར་འགྱུར་བའི་ ཕྱིར་གོ་སྐབས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཡང་དག་པར་བྲལ་བའི་མཐར་ཕྱིན་ཏེ་སངས་རྒྱས་ཀྱི་བྱང་ཆུབ་དང་ལྡན་པར་གྱུར་ཅིག །སེམས་ཅན་ཐམས་ ཅད་བླ་ན་མེད་པའི་ཆོས་གཏོང་བ་ལ་བརྩོན་ཞིང་སངས་རྒྱས་ཀྱི་བྱང་ཆུབ་ཡང་དག་པར་འགོད་པ་དང་ལྡན་པར་གྱུར་ཏེ། སེམས་ཅན་ཐམས་ཅད་རྐྱེན་ཐམས་ཅད་ཀྱིས་ཟད་པར་ མི་ནུས་ཤིང་ཤིན་ཏུ་རྟོགས་པར་གཞག་པའི་སེམས་དང་ལྡན་པར་གྱུར་ཅིག །སེམས་ཅན་ཐམས་ཅད་བྱང་ཆུབ་ཀྱི་ཤིང་དྲུང་དུ་རྣམ་པར་མཆོག་ཐམས་ཅད་དང་ལྡན་པ་བླ་ན་མེད་ པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སངས་རྒྱས་ཏེ་ཆོས་ལས་སྐྱེས་པ་དང༌། ཆོས་ལས་བྱུང་བའི་བུ་དང༌། བུ་མོ་དང༌། ཆུང་མ་རབ་ཏུ་འཕྲོ་བར་བྱེད་པར་གྱུར་ཅིག ། ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བུ་དང༌། བུ་མོ་དང༌། ཆུང་མ་ཡོངས་སུ་བཏང་བ་ལས་བྱུང་བའི་དགེ་བའི་རྩ་བ་དེ་དག་བསྒྲིབས་པ་མེད་པའི་ཡེ་ཤེས་རབ་ ཏུ་འཐོབ་པ་དང༌། ཁམས་གསུམ་པ་ཐམས་ཅད་ལ་ཆགས་པ་མེད་པའི་རྣམ་པར་ཐར་པ་ཁོང་དུ་ཆུད་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་ དཔའ་སེམས་དཔའ་ཆེན་པོ་ཁྱིམ་གྱི་དངོས་པོ་ལ་ཆགས་པར་གནས་པའི་རྣམ་པ་ལ་མོས་པ་མེད་པ། ཁྱིམ་གྱི་རྣམ་པར་རྟོག་པས་ཡོངས་སུ་རྟོག་པ་མེད་པ། ཁྱིམ་གྱི་ཡོ་བྱད་ཐམས་ ཅད་ཡོངས་སུ་གཉེར་བ་མེད་པ། ཁྱིམ་གྱི་ཆགས་པ་ཐམས་ཅད་ཀྱི་འདོད་པར་གྱུར་པ་མེད་པ། ཁྱིམ་གྱི་ལོངས་སྤྱོད་ཐམས་ཅད་ལ་རོ་མྱོང་བར་ལྟ་བ་མེད་པ། ཁྱིམ་གྱི་ལོངས་སྤྱོད་ཐམས་ ཅད་ཁོང་དུ་ཆུད་པའི་སེམས་དང་ལྡན་པ། ཁྱིམ་ལ་མངོན་པར་ཆགས་པ་ཐམས་ཅད་ལས་གྱེན་དུ་འཕགས་པའི་སེམས་དང་ལྡན་པ། ཁྱིམ་དང་གནས་ལ་བརྟེན་པ་ཐམས་ཅད་ལ་མངོན་ བར་མོས་པ་མེད་པར་གྱུར་པ། ཁྱིམ་དང་གནས་ལ་བརྟེན་པ་ཐམས་ཅད་ཡུད་ཙམ་གྱི་འདུ་ཤེས་ཀྱི་བྱིན་གྱིས་བརླབས་པ། སངས་རྒྱས་ཀྱི་བསྟན་པ་ལ་ཤིན་ཏུ་འབྱུང་བའི་བསམ་པ་དང་ ལྡན་པ༑ བྱང་ཆུབ་སེམས་དཔའི་གནས་ཐམས་ཅད་ལ་ཞུགས་པའི་སེམས་དང་ལྡན་པ། སངས་རྒྱས་ཀྱི་ཆོས་ཐམས་ཅད་ཀྱིས་བརྒྱན་པའི་སེམས་དང་ལྡན་པ། གཅིག་ནས་གཅིག་ཏུ་ རྗེས་སུ་འགྱོད་པ་མེད་པར་གཏོང་བ། དམིགས་པའི་དངོས་པོ་ཐམས་ཅད་ཀྱི་སྒོ་ནས་སངས་རྒྱས་ཐམས་ཅད་ཀྱིས་ཡང་དག་པར་བསྔགས་པ། འགྱོད་པ་མེད་པར་གཏོང་བའི་སེམས་དང་ ལྡན་པ༑ ཁྱིམ་ཡོངས་སུ་བཟུང་བ་ཤིན་ཏུ་གཏང་བ་ལ་མངོན་པར་ཆགས་པ་མེད་པའི་ཡིད་དང་ལྡན་པ། ཕྱོགས་དང་ཡུལ་ཐམས་ཅད་ལ་གནས་པ་མེད་པར་གནས་པ། ཁྱིམ་དང་གནས་ ༄༅། །ལ་ཆགས་པས་བརྩོན་པ་མེད་པ། ཡོངས་སུ་བཟུང་བ་ཐམས་ཅད་སྦྱིན་པར་ཤིན་ཏུ་བཏང་བས་གཏོང་བ། སློང་བ་ཐམས་ཅད་མཐོང་ན་རབ་ཏུ་དགའ་བ་དང༌། སྤྱོ་བ་དང༌། ཡིད་དགའ་བ་སྐྱེ་བས་སློང་བ་རྣམས་ལ་ཚུལ་དང་ལྡན་པའི་སེམས་ཀྱིས་ཁྱིམ་ནས་ཁྱིམ་གྱི་ཡོ་བྱད་དང་རྒྱན་ཐམས་ཅད་ཡོངས་སུ་གཏོང་བའི་ཚེ་ཁྱིམ་གྱི་སྦྱིན་པ་ ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་དཀོན་མཆོག་དམ་པར་འབྱུང་བ་ལ་མངོན་པར་མོས་ ཤིང་བུ་དང་བུ་མོ་ཤིན་ཏུ་བཏང་བར་གྱུར་ཅིག །སེམས་ཅན་ཐམས་ཅད་ཁྱིམ་མེད་པར་རབ་ཏུ་བྱུང་ཞིང་ཁྱིམ་ལས་རྣམ་པར་གྲོལ་ཏེ་ཡང་དག་པར་རྫོགས་པའི་སངས་རྒྱས་ཀྱི་ བསྟན་པ་ལ་ཚངས་པའི་སྤྱད་པ་སྤྱོད་པར་གྱུར་ཅིག །སེམས་ཅན་ཐམས་ཅད་ཕྱིར་མི་ལྡོག་པའི་སེམས་ཀྱིས་འཇུངས་པ་མེད་པར་གནས་ཤིང་ཐམས་ཅད་ཡོངས་སུ་གཏོང་བ་ལ་ མངོན་པར་མོས་པར་གྱུར་ཅིག །སེམས་ཅན་ཐམས་ཅད་གསོག་པ་མེད་ཅིང་ཆོག་ཤེས་པ་ལ་བརྩོན་པས་ཁྱིམ་གྱི་ཆོས་དང་རབ་ཏུ་བྲལ་བར་གྱུར་ཅིག །སེམས་ཅན་ཐམས་ཅད་ སངས་རྒྱས་ཀྱི་ཕོ་བྲང་དང་གནས་ལ་ཡང་དག་པར་གནས་ཤིང་ཁྱིམ་དང་གནས་ལ་གནས་པ་མེད་པར་གྱུར་ཅིག །སེམས་ཅན་ཐམས་ཅད་ཀྱི་བར་དུ་གཅོད་པའི་ནན་ཏན་ཐམས་ ཅད་འགགས་པར་གྱུར་ཏེ་སྒྲིབ་པའི་ཆོས་ཐམས་ཅད་ཤིན་ཏུ་སྤངས་པར་གྱུར་ཅིག །སེམས་ཅན་ཐམས་ཅད་གོས་པ་མེད་པའི་སེམས་ཀྱི་གནས་ལ་བརྟེན་པས་ལྗན་ལྗིན་མེད་པའི་ཁྱིམ་དང་ ལྡན་པར་གྱུར་ཅིག །སེམས་ཅན་ཐམས་ཅད་ཁྱིམ་ན་གནས་པས་མངོན་པར་རྫོགས་པར་སངས་རྒྱས་པ་མཐོང་བའི་ཡེ་ཤེས་དང་ལྡན་ཞིང་ཡོངས་སུ་སྨིན་པར་བྱ་བ་ལ་མཁས་པར་གྱུར་ ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་གནས་ཀྱི་རྗེས་སུ་སོང་བའི་སེམས་ཀྱི་ཡེ་ཤེས་དང་ལྡན་ཞིང་ཁྱིམ་གྱི་གནས་རྣམ་པར་རིག་པ་རབ་ཏུ་མཐོང་བར་གྱུར་ཅིག །སེམས་ ཅན་ཐམས་ཅད་ཁྱིམ་གྱིས་སངས་རྒྱས་ཀྱི་རྣམ་པར་གཅོད་པ་རབ་ཏུ་ཐོབ་ཅིང་སེམས་ཅན་ཐམས་ཅད་མཐའ་ཡས་པ་སིམ་པར་བྱེད་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་ སེམས་དཔའ་ཆེན་པོ་ཁྱིམ་གྱི་སྦྱིན་པ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའི་སྤྱོད་པ་དང༌། སྨོན་ ལམ་དང༌། རྣམ་པར་འཕྲུལ་པ་སྣ་ཚོགས་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བཟའ་ཤིང་གི་རབ་དགའ་བ་ དང༌། རྩེ་བ་དང༌། ལོངས་སྤྱོད་མང་པོ་སྣ་ཚོགས་ཀྱི་གནས་ཡོངས་སུ་གཏོང་ཞིང་སྦྱིན་པ་དང༌། སྟོབ་པ་དང༌། བདག་སེམས་ཅན་ཐམས་ཅད་ཀྱི་བཟའ་ཤིང་གི་ར་བར་གྱུར་པའོ། །ཞེས་ ༄༅། །ཡང་དག་པར་ལྟ་བ་དང༌། བདག་ཆོས་ཀྱི་དགའ་བར་གྱུར་པར་འཇིག་རྟེན་ཐམས་ཅད་ལ་ཡོངས་སུ་སྟོན་པ་དང༌། བདག་སེམས་ཅན་ཐམས་ཅད་ལ་ཡིད་ བདེ་བའི་སྦྱིན་པ་བྱེད་པར་བྱིན་གྱིས་རློབ་པ་དང༌། བདག་འགྲོ་བ་ཐམས་ཅད་དུ་དགའ་བ་མཐའ་ཡས་པ་ཡང་དག་པར་སྐྱེད་པར་ཤིན་ཏུ་སྟོན་པ་དང༌། བདག་ཁམས་གསུམ་ ཐམས་ཅད་ན་ཆོས་དཀར་པོའི་སྐྱེ་བའི་སྒོར་གྱུར་པར་ཡང་དག་པར་འཛིན་པ་དང༌། བདག་འགྲོ་བ་ཐམས་ཅད་ཀྱི་སེམས་དགའ་བ་རྟག་ཏུ་སྐྱེ་བར་བྱེད་པར་འཇིག་རྟེན་ཐམས་ ཅད་དུ་གནས་པར་བྱེད་པ་དང༌། བདག་སེམས་ཅན་ཐམས་ཅད་ལ་སངས་རྒྱས་ཀྱི་བྱང་ཆུབ་སྟོབ་པར་སྨོན་ལམ་འདེབས་པ་དང༌། བདག་སྐྱེ་རྒུ་ཐམས་ཅད་ཀྱི་ཕ་དང་འདྲ་བར་ནན་ ཏན་བྱེད་པ་དང༌། བདག་ཁམས་གསུམ་ཐམས་ཅད་ན་ཡེ་ཤེས་ཀྱི་འབྱུང་གནས་སུ་གྱུར་པར་རབ་ཏུ་རྟོག་པ་དང༌། བདག་སེམས་ཅན་གྱི་ཁམས་ཐམས་ཅད་ན་ཡོ་བྱད་ཀྱིས་མི་ བྲེལ་བར་བྱེད་པར་རབ་ཏུ་གཞོག་པ་དང༌། བདག་སྨོན་ལམ་ཐམས་ཅད་ཀྱིས་དགེ་བའི་རྩ་བ་ཐམས་ཅད་མ་དང་འདྲ་བར་སྐྱེད་པར་ཡང་དག་པར་སྒྲུབ་པའི་ཚེ་དགེ་བའི་རྩ་བ་དེ་དག་ སེམས་ཅན་ཐམས་ཅད་ཀྱི་སྐྱོན་གྱིས་སྐྱོ་བ་མེད་པར་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་གནོད་པས་འཁྲུལ་པ་མེད་པའི་སེམས་ཀྱིས་ཡོངས་སུ་བསྔོའོ། །འཇིག་རྟེན་གྱི་ གནས་དྲིན་དུ་མི་གཟོ་བས་ཡོངས་སུ་གང་བས་ཡོངས་སུ་ཡི་ཆད་པ་མེད་པས་ཡོངས་སུ་བསྔོའོ། །སེམས་ཅན་ཐམས་ཅད་ལས་འཐོབ་པར་བྱ་བ་ལ་རེ་བ་མེད་པས་ཡོངས་སུ་བསྔོའོ། །འཇིག་རྟེན་ ཐམས་ཅད་ལ་སྨོན་པ་མེད་པའི་སེམས་ཀྱིས་ཡོངས་སུ་བསྔོའོ། །འཇིག་རྟེན་ཐམས་ཅད་ཀྱི་སྡུག་བསྔལ་བསལ་བའི་སེམས་ཀྱིས་འགྲོ་བ་ཐམས་ཅད་ལ་ཡོངས་སུ་བསྔོའོ། །བར་སྣང་དང་ མཉམ་པའི་སེམས་ཀྱིས་འགྲོ་བ་ཐམས་ཅད་གོས་པ་མེད་པར་བྱ་བའི་ཕྱིར་ཡོངས་སུ་བསྔོའོ། །དགེ་བའི་རྩ་བ་ཐམས་ཅད་སྔོན་དུ་འགྲོ་བའི་སེམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ རྟོག་པའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་སྡུག་བསྔལ་བླང་བའི་གོ་ཆ་བགོས་པའི་སེམས་ཀྱིས་སྐྱེ་རྒུ་ཐམས་ཅད་ལ་ཡོངས་སུ་བསྔོའོ། །ལྟ་བའི་རྣམ་པ་ཐམས་ཅད་ ཤིན་ཏུ་ཟློག་པའི་བྱང་ཆུབ་སེམས་དཔའི་སྤྱོད་པ་ཆེན་པོ་དང་སྨོན་ལམ་མཉམ་པ་མེད་པ་ལ་རབ་ཏུ་བརྩོན་པ་དང༌། ཐེག་པ་ཆེན་པོའི་སྨོན་ལམ་གྱིས་སྐྱོ་བ་མེད་པར་ཡོངས་སུ་བསྔོ་སྟེ། དེ་ ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བཟའ་ཤིང་གི་ར་བ་ཡོངས་སུ་བཏང་བས་ཡང་དག་པར་བསྡུས་པའི་དགེ་བའི་རྩ་བ་དེ་དག་ཡོངས་སུ་བསྔོའོ། །དེ་དེ་ལྟར་ཡིད་ལ་བྱེད་པས་ རབ་ཏུ་རྟོག་པའི་སེམས་དང་ལྡན་པར་བྱས་ཤིང་འདི་ལྟར་ཡང་ཡོངས་སུ་བསྔོ་སྟེ། སེམས་ཅན་ཐམས་ཅད་ཀྱིས་གོང་ནས་གོང་དུ་ཡེ་ཤེས་ཀྱི་བཟའ་ཤིང་གི་ར་བ་རབ་ཏུ་ཐོབ་སྟེ་དགེ་བའི་རྩ་ ༄༅། །བ་གསར་པ་དང་གསར་བ་ཡང་དག་པར་འབྱུང་བ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ལ་ལྟ་ཞིང་བསྙེན་བཀུར་བ་ དང་རིམ་གྲོ་བྱེད་པའི་ཕྱིར་འཁྲུག་པ་མེད་པའི་ཆོས་ཅན་དུ་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཞིང་གི་བཟའ་ཤིང་གི་ར་བ་ལ་དགའ་བ་རབ་ཏུ་ཐོབ་སྟེ། ཆོས་ལ་རབ་ ཏུ་དགའ་བས་དགའ་བར་གྱུར་ཅིག །སེམས་ཅན་ཐམས་ཅད་མངོན་པར་དགའ་བའི་བཟའ་ཤིང་གི་ར་བར་སངས་རྒྱས་ཀྱི་ཆོ་འཕྲུལ་ཡང་དག་པར་མཐོང་བའི་ཕྱིར་དགའ་བའི་ སེམས་དང་ལྡན་པར་གྱུར་ཅིག །སེམས་ཅན་ཐམས་ཅད་ཡེ་ཤེས་ཀྱི་ཡུལ་ལ་རྣམ་པར་རྩེ་ཞིང་སྤྱོད་པས་སངས་རྒྱས་ཀྱི་དགྱེས་པ་དང༌། རོལ་བ་ལ་རབ་ཏུ་བརྩོན་པར་གྱུར་ཅིག ། སེམས་ཅན་ཐམས་ཅད་སངས་རྒྱས་ཀྱི་ཞིང་དང༌། དེ་བཞིན་གཤེགས་པའི་འཁོར་གྱི་དཀྱིལ་འཁོར་དང༌། འདུལ་བར་འདོང་བས་དགའ་བ་དང༌། རྩེ་བ་དང༌། ལོངས་སྤྱོད་ལ་རབ་ཏུ་ བརྩོན་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་རྣམ་པར་ཐར་པས་ཕྱི་མའི་མཐར་ཐུག་པའི་བསྐལ་པར་བྱང་ཆུབ་སེམས་དཔའི་སྤྱོད་པས་ཡོངས་སུ་མི་སྐྱོ་ བའི་སེམས་ཀྱིས་གནས་པའི་ཕྱིར་བྱང་ཆུབ་སེམས་དཔའི་རྩེ་བ་དང་ལོངས་སྤྱོད་དང་དགའ་བ་ལ་མོས་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་བཟའ་ཤིང་གི་ར་བ་ སེམས་ཆེན་པོ་བསྐྱེད་པས་དགའ་བ་ལ་བརྟེན་ཅིང་ཆོས་ཀྱི་དབྱིངས་ཐམས་ཅད་སངས་རྒྱས་ཀྱིས་གང་བར་ཆུད་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཞིང་སྣ་ཚོགས་སུ་ སངས་རྒྱས་མཆོད་པ་དང་རིམ་གྲོ་བྱ་བ་ལ་དགའ་ཞིང་སངས་རྒྱས་ཀྱི་ཞིང་ཐམས་ཅད་དུ་འགྲོ་བ་ལ་བརྩོན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཞིང་ཐམས་ཅད་རབ་ཏུ་ བརྒྱན་པར་བྱ་བ་རྣམ་པར་དག་པར་འགྱུར་བའི་ཕྱིར་དགའ་ཞིང་མོས་པའི་སེམས་དང་ལྡན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བཟའ་ཤིང་གི་ར་བ་རྩེ་ བ་དང༌། དགའ་བ་དང༌། ལོངས་སྤྱོད་ཀྱི་གནས་ཡོངས་སུ་གཏོང་བའི་ཚེ་དགེ་བའི་རྩ་བ་དེ་དག་སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་བཟའ་ཤིང་གི་ར་བ་ལ་རོལ་བའི་གནས་སུ་ འདོང་ཞིང་སངས་རྒྱས་ཐམས་ཅད་མཐོང་བ་འགྲུབ་པར་འགྱུར་བར་བྱ་བའི་ཕྱིར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མཆོད་སྦྱིན་བྱེ་བ་ཁྲག་ཁྲིག་བརྒྱ་ སྟོང་གྲངས་མེད་པ་དུ་མ་རུང་བ། སངས་རྒྱས་ཐམས་ཅད་ཀྱིས་བསྔགས་པ། སེམས་ཅན་ཐམས་ཅད་ལ་མི་འཚེ་བར་གཞོལ་བ། འགྲོ་བ་ཐམས་ཅད་རྣམ་པར་དག་པར་བྱ་བ་ལ་བརྩོན་ པ༑ གཏན་པ་མེད་པའི་ལས་ཀྱི་ལམ་གསུམ་ཤིན་ཏུ་དག་པ། ཡེ་ཤེས་ཀྱིས་གྲུབ་པའི་མཆོད་སྦྱིན་ཡོ་བྱད་གྲངས་མེད་པར་གསོག་པ། དམིགས་པ་བྱེ་བ་ཁྲག་ཁྲིག་བརྒྱ་སྟོང་གྲངས་ ༄༅། །མེད་པས་རྣམ་པར་དག་པ། སྦྱིན་པ་རྣམ་པ་ཐ་དད་པའི་ཚུལ་གྱིས་ཡང་དག་པར་བཟུང་བ། ཡོ་བྱད་ཀྱི་རྣམ་པ་དུ་མ་དང་ལྡན་པ། སྦྱིན་པའི་ཚོགས་སྣ་ཚོགས་ བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ཅན་གྱི་མཆོད་སྦྱིན་དུ་བྱེད་པའི་ཚེ་མཆོད་སྦྱིན་བྱས་པའི་སྦྱིན་པ་ཆེན་པོས་ཡང་དག་པར་བཟུང་བའི་དགེ་བའི་རྩ་བ་དེ་དག་བྱང་ཆུབ་ཀྱི་སེམས་ དཀོན་པ་སྦྱིན་པའི་ཚོགས་ཚད་མེད་པས་སེམས་ཅན་ཐམས་ཅད་རྣམ་པར་དག་པར་བྱ་བ་ལ་ཞུགས་པ། དགེ་བ་བརྩམས་པ། ཐོག་མ་དང་བར་མ་དང་ཐ་མར་རྣམ་པར་དག་པ་སྣ་ ཚོགས་དང་ལྡན་པ། མོས་པ་བྱེ་བ་ཁྲག་ཁྲིག་བརྒྱ་སྟོང་གི་བསམ་པ་ཅན། སེམས་ཅན་གྲངས་མེད་པ་མངོན་པར་མགུ་བར་བྱེད་པ། བྱམས་པ་ཚད་མེད་པ་སྒོམ་པ་དང༌། ཡང་དག་ པར་སྤྱོད་པས་ཉེ་བར་གནས་པ། འགྲོ་བ་ཐམས་ཅད་སྙིང་རྗེ་ཆེན་པོས་ཡོངས་སུ་བསྐྱབས་པ་ཤིན་ཏུ་གྲུབ་པ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་ པ་མངོན་པར་མཉེས་པར་བྱེད་པ། སངས་རྒྱས་ཐམས་ཅད་ཀྱི་རིགས་ཀྱི་ཕྱིར་རྗེས་སུ་འགྱོད་པ་མེད་པས་གཏོང་བའི་སེམས་དང་ལྡན་པ། ཕྱིས་མྱ་ངན་དུ་བྱ་བ་མེད་པར་ཡང་དག་ པར་སྤྱོད་པས་ཁྱད་པར་རྣམ་པར་འཕེལ་བར་བྱེད་པ། དད་པའི་དབང་པོ་སེམས་སྐད་ཅིག་གིས་ཚད་མེད་པར་རྣམ་བར་འཕེལ་བར་བྱེད་པས་གཏོང་བ་དང་ལྡན་པ་དེ་འདི་ལྟར་ ཡོངས་སུ་བསྔོ་སྟེ། ཐེག་པ་ཆེན་པོའི་སེམས་བསྐྱེད་པས་གྲུབ་པའི་མཆོད་སྦྱིན་བྱས་པའི་དགེ་བའི་རྩ་བ་འདིས་སེམས་ཅན་ཐམས་ཅད་གཏོང་བ་ཆེན་པོ་དང༌། ཤིན་ཏུ་གཏོང་བ་དང༌། རབ་ ཏུ་གཏོང་བ་དང༌། མཆོག་ཏུ་གཏོང་བ་དང༌། གྱ་ནོམ་པར་གཏོང་བ་དང༌། ཕུལ་དུ་གཏོང་བ་དང༌། བླ་ན་མེད་པར་གཏོང་བ་དང༌། མཉམ་པ་མེད་པར་གཏོང་བ་དང༌། འཇིག་རྟེན་ཐམས་ ཅད་ལས་འཕགས་པའི་གཏོང་བ་དང༌། སངས་རྒྱས་ཐམས་ཅད་ཀྱིས་བསྔགས་པའི་ཆོས་གཏོང་བ་དང་ལྡན་ཞིང་སྦྱིན་བདག་གི་དམ་པ་སེམས་ཅན་གྱི་ཁམས་ཐམས་ཅད་ངན་སོང་ནས་ འདོན་པ། ཡེ་ཤེས་ཀྱི་ལམ་ལ་རབ་ཏུ་གཞོག་པའི་སྨོན་ལམ་མཉམ་པ་མེད་པ་དང་ལྡན་པ། དགེ་བའི་རྩ་བ་ནོར་བ་མེད་པ་དང་ལྡན་པ། བདག་མཉམ་པ་མེད་པའི་ཡེ་ཤེས་རྗེས་སུ་ སངས་རྒྱས་པ་དང་ལྡན་ཞིང་སེམས་ཅན་ཐམས་ཅད་ཞི་བའི་ཡེ་ཤེས་ལ་རབ་ཏུ་གཞོག་པ། མངོན་པར་ཤེས་པའི་ཡེ་ཤེས་ཉམས་པ་མེད་པར་འགྲོ་བ་ཐམས་ཅད་ལ་ཤིན་ཏུ་མཁས་ པར་བྱས་པ། ཡེ་ཤེས་ཀྱི་ས་དང་སངས་རྒྱས་ཀྱི་ཆོས་ལ་གཞོལ་བ། སངས་རྒྱས་ཐམས་ཅད་ཀྱི་རྒྱན་གྱི་ཕ་རོལ་ཏུ་ཕྱིན་པ་དང་ལྡན་པ། སངས་རྒྱས་ཀྱི་ཆོས་ཐམས་ཅད་ཕྱིར་མི་ལྡོག་ པས་རྒྱུན་ཆད་པ་མེད་པར་གྱུར་ཏེ་མཆོད་སྦྱིན་ཤིན་ཏུ་བྱས་པར་གྱུར་ཅིག །སེམས་ཅན་ཐམས་ཅད་འགྲོ་བ་ཀུན་ལ་རིམ་གྲོ་བྱེད་ཅིང་བླ་ན་མེད་པའི་ཡེ་ཤེས་ཀྱི་མཐར་ཐུག་པར་རྒྱུན་ ༄༅། །ཆད་པ་མེད་པས་ཕྱིར་མི་ལྡོག་པའི་མཆོད་སྦྱིན་བྱེད་པར་གྱུར་ཅིག །སེམས་ཅན་ཐམས་ཅད་ཚད་མེད་མཐའ་ཡས་པའི་བསོད་ནམས་བསགས་པའི་ཕ་རོལ་ཏུ་ཕྱིན་ ཅིང་དགེ་བའི་རྩ་བ་ལེགས་པར་བསྐྱེད་པ་དང་ལྡན་པར་གྱུར་ཅིག །སེམས་ཅན་ཐམས་ཅད་བསོད་ནམས་ཀྱི་དཀྱིལ་འཁོར་གྱིས་ཆོས་ཀྱི་དབྱིངས་ཚད་མེད་པར་བླ་ན་མེད་པར་སྣང་བའི་ བདེ་བ་ཡོངས་སུ་གཏོང་ཞིང་སངས་རྒྱས་ཐམས་ཅད་ཀྱིས་བསྔགས་པར་འགྲོ་བ་ཐམས་ཅད་ཀྱི་སྦྱིན་བདག་ཏུ་གྱུར་ཅིག །སེམས་ཅན་ཐམས་ཅད་སེམས་ཅན་གྱི་ཁམས་སུ་སྙོམས་ པར་དགེ་བའི་རྩ་བས་ཡང་དག་པར་འཛིན་པའི་ཕ་རོལ་ཏུ་ཕྱིན་པ་ཐོབ་ཅིང་མཉམ་པའི་སེམས་ཀྱིས་མཆོད་སྦྱིན་བྱེད་པར་གྱུར་ཅིག །སེམས་ཅན་ཐམས་ཅད་ཐེག་པའི་མཆོག་ལ་ འགྲོ་བ་ཐམས་ཅད་རབ་ཏུ་འགོད་བར་བརྩོན་ཞིང་མཆོད་སྦྱིན་གྱི་དམ་པ་བྱེད་པར་གྱུར་ཅིག །སེམས་ཅན་ཐམས་ཅད་དུས་མ་ཡིན་པ་ཐམས་ཅད་ལས་འདས་ཤིང་དུས་མ་ཡིན་པ་ ཐམས་ཅད་ལ་བབ་པའི་མཆོད་སྦྱིན་གྱི་མཐར་ཕྱིན་པར་འགྲོ་བ་ཐམས་ཅད་མཚན་ཉིད་གཅིག་ཏུ་གྱུར་པའི་མཆོད་སྦྱིན་བྱེད་པར་གྱུར་ཅིག །སེམས་ཅན་ཐམས་ཅད་སྐྱེས་བུ་དམ་ པའི་མཆོད་སྦྱིན་ཕུན་སུམ་ཚོགས་པའི་ཕ་རོལ་ཏུ་ཕྱིན་པ་དང་ལྡན་ཞིང་མཆོད་སྦྱིན་ལེགས་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སངས་རྒྱས་ཐམས་ཅད་ཀྱིས་ཉེ་ བར་བསྟན་ཏེ་ཐམས་ཅད་མཁྱེན་པ་ཉིད་ཀྱི་མཐར་ཕྱིན་པ་ལ་བཀོད་དེ་མཆོད་སྦྱིན་གྱི་རྒྱན་མཐའ་ལས་རྒྱལ་བ་རྣམ་པ་སྣ་ཚོགས་ཀྱིས་མཆོད་སྦྱིན་བྱེད་པར་གྱུར་ཅིག །སེམས་ཅན་ཐམས་ ཅད་ཆོས་ཀྱི་དབྱིངས་ཚད་མེད་པར་བསོད་ནམས་ཀྱི་མཆོད་སྦྱིན་བྱེད་པས་མཐའ་དང་དབུས་མེད་པའི་བསོད་ནམས་བསགས་པའི་ཕ་རོལ་ཏུ་ཕྱིན་པ་ཡང་དག་པར་སྒྲུབ་ཅིང་ཐམས་ཅད་ མཁྱེན་པའི་རྣམ་པར་དག་པ་དང་ལྡན་པར་གྱུར་ཅིག །སེམས་ཅན་ཐམས་ཅད་སྨོན་ལམ་ཆེན་པོས་སེམས་ཅན་གྱི་ཁམས་ཐམས་ཅད་སྒྲོལ་ཞིང་དེ་བཞིན་གཤེགས་པའི་གནས་སུ་ གཞོག་པས་འགྲོ་བ་ཀུན་གྱི་མཆོད་སྦྱིན་གྱི་བདག་པོར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་མཆོད་སྦྱིན་བྱས་པའི་བསོད་ནམས་ཆེན་པོ་སྦྱིན་པས་ཡང་ དག་པར་བསྡུས་པའི་དགེ་བའི་རྩ་བ་དེ་དག་ཅི་ནས་ཀྱང་སེམས་ཅན་ཀྱི་ཁམས་ཐམས་ཅད་ཀྱིས་མཆོད་སྦྱིན་ལེགས་པར་བྱས་པར་འགྱུར་བ་དང༌། མཆོད་སྦྱིན་ཆུད་མི་ཟ་བར་འགྱུར་བ་ དང༌། སངས་རྒྱས་ཐམས་ཅད་མངོན་པར་མཉེས་པའི་མཆོད་སྦྱིན་དང་ལྡན་པར་འགྱུར་བ་དང༌། སེམས་ཅན་ཐམས་ཅད་ལ་ཞེ་སྡང་མེད་པའི་མིག་གི་མཆོད་སྦྱིན་དུ་འགྱུར་བ་དང༌། འགྲོ་ བ་ཐམས་ཅད་ཡོངས་སུ་སྐྱོབ་པའི་མཆོད་སྦྱིན་དུ་འགྱུར་བ་དང༌། ཐམས་ཅད་མཁྱེན་པའི་ཡེ་ཤེས་ཀྱིས་གྲུབ་པའི་མཆོད་སྦྱིན་བྱས་པར་འགྱུར་བ་དང༌། སངས་རྒྱས་ཐམས་ཅད་བལྟ་བ་ ༄༅། །དང་མི་འབྲལ་བའི་མཆོད་སྦྱིན་དུ་འགྱུར་བ་དང༌། ཆོ་ག་དང་ཤིན་ཏུ་ལྡན་པའི་མཆོད་སྦྱིན་དུ་འགྱུར་བ་དང༌། བྱང་ཆུབ་སེམས་དཔའི་ཡོན་ཏན་ཐམས་ཅད་ཀྱིས་ ཡོངས་སུ་གྲུབ་པའི་སངས་རྒྱས་ཀྱི་ཡེ་ཤེས་ཀྱི་མཆོད་སྦྱིན་དུ་འགྱུར་བ་དང༌། སེམས་ཅན་ཐམས་ཅད་བླ་ན་མེད་པའི་མཆོད་སྦྱིན་བྱེད་ཅིང་དེ་བཞིན་གཤེགས་པའི་མཆོད་སྦྱིན་གྱི་ མཐར་ཐུག་པར་འགྱུར་བར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡོ་བྱད་ཀྱི་ཚོགས་དང༌། དངོས་པོ་ལ་ཆགས་པ་མེད་པའི་སེམས་དང་ལྡན་ པ༑ མངོན་པར་མ་ཆགས་པའི་སེམས་དང་ལྡན་པ། རྣམ་པར་སྨིན་པ་ལ་མི་རེ་བའི་སེམས་དང༌། འཇིག་རྟེན་གྱི་ཕུན་སུམ་ཚོགས་པ་ཐམས་ཅད་རེ་ཞིང་འདོད་པ་མེད་པའི་སེམས་ དང༌། སྐྱོན་མེད་པའི་སེམས་དང༌། རྨོངས་པ་མེད་པའི་སེམས་དང༌། ཆོས་ལ་རྟོགས་པས་ཤིན་ཏུ་བཙལ་བའི་སེམས་དང༌། སེམས་ཅན་ཐམས་ཅད་དོན་ལ་གཞག་པར་ཡོངས་སུ་ བསྔོ་བའི་སེམས་དང༌། ཆོས་ཐམས་ཅད་ཀྱི་རང་བཞིན་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་པའི་སེམས་དང་ལྡན་པ། ལོངས་སྤྱོད་མཐའ་ཡས་པ་རྣམ་པ་སྣ་ཚོགས་ཐམས་ ཅད་ལ་དམིགས་པ་ཚད་མེད་པའི་རིམ་གྲོ་བྱེད་པའི་ཚུལ་ཅན། སེམས་ཅན་ལ་ཕན་པ་རྣམ་པ་ཐ་དད་པས་རྣམ་པ་སྣ་ཚོགས་དུ་མར་ཡང་དག་པར་སྤྱོད་པ། དངོས་པོའི་རྣམ་པ་ཚད་ མེད་པ་བརྗོད་དུ་མེད་པ་དང༌། མངོན་པར་འདུ་བྱ་བའི་རྐྱེན་མཚན་ཉིད་སྣ་ཚོགས་ཅན་ཐམས་ཅད་སྦྱིན་པའི་ཚོགས་ལ་རབ་ཏུ་བརྩོན་པ། གཏང་བར་བྱ་བ་མཐའ་ཡས་པ་སྟོབ་པས་ གཏོང་བ་ཐམས་ཅད་ཡང་དག་པར་གཏོང་བ་ལ་གཞོལ་བ། ཕྱི་ནང་གི་ཡུལ་ཟད་མི་ཤེས་པའི་དམིགས་པ་ཐམས་ཅད་ཤིན་ཏུ་སྟོན་པས་དེ་དག་གཏོང་བ་དང༌། ཡོངས་སུ་གཏོང་བ་དང༌། སྟོབ་པ་ དང༌། སྤྱིན་པར་བྱེད་པ་དང༌། འབུལ་བ་དང༌། བསམ་པའི་སྟོབས་རྣམ་པར་འཕེལ་བར་བྱེད་པ་དང༌། འགྲོ་བ་ཐམས་ཅད་དུ་ཡོན་ཏན་ཆེན་པོ་ཐོབ་པས་སེམས་རིན་པོ་ཆེ་དང་འགྲོགས་པ་དང༌། ལན་ལ་རེ་བ་མེད་པར་འགྲོ་བ་ཐམས་ཅད་སྙིང་རྗེས་རྗེས་སུ་སྐྱོང་བ་དང༌། འགྲོ་བ་རིན་པོ་ཆེ་ཐམས་ཅད་ཀྱི་བསམ་པ་རིན་པོ་ཆེ་ཤིན་ཏུ་སྒྲུབ་པ་དང༌། འདས་པ་དང༌། མ་བྱོན་པ་དང༌། ད་ལྟར་ བྱུང་བའི་སངས་རྒྱས་ཐམས་ཅད་དང་གཅིག་ཏུ་བགྲང་བའི་དགེ་བའི་རྩ་བས་ཐམས་ཅད་མཁྱེན་པ་ཉིད་རྣམ་པར་འཕེལ་བར་བྱེད་པའི་ཚེ་ཡོ་བྱད་ཐམས་ཅད་ཀྱི་སྦྱིན་པ་ཡོངས་སུ་བཏང་བས་ཡང་ དག་པར་བསྡུས་པའི་དགེ་བའི་རྩ་བ་དེ་དག་སེམས་ཅན་གྱི་ཁམས་ཐམས་ཅད་མ་ལུས་པར་ཡོངས་སུ་སྨིན་པར་བྱ་བ་དང༌། འདུལ་བ་གཅིག་ནས་གཅིག་ཏུ་བརྒྱུད་པ་རྣམ་པར་དག་པར་བྱ་བའི་ ཕྱིར་ཡོངས་སུ་བསྔོའོ། །ཞིང་ཐམས་ཅད་མ་ལུས་པར་གཅིག་ནས་གཅིག་ཏུ་བརྒྱུད་པ་ཉེ་བའི་ཉོན་མོངས་པ་མེད་ཅིང་རྒྱན་རྣམ་པར་དག་པས་རྣམ་པར་དབྱེ་བ་དང༌། རབ་ཏུ་བརྒྱན་པ་ཡོངས་ ༄༅། །སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །ཆོས་ཀྱི་དབྱིངས་ཐམས་ཅད་མ་ལུས་པར་སེམས་གཅིག་གིས་རྒྱས་པར་དགང་བ་དང༌། རྣམ་བར་དག་པར་བྱ་བའི་ ཕྱིར་ཡོངས་སུ་བསྔོའོ། །ནམ་མཁའི་ཁམས་ཐམས་ཅད་མ་ལུས་པའི་མཐར་ཐུག་པར་ཡོངས་སུ་རྒྱས་པར་བྱ་བའི་ཕྱིར་ཡོངས་སུ་བསྔོའོ། །དུས་མཐའ་དང་དབུས་མེད་པ་ཐམས་ཅད་མ་ ལུས་པ་ལ་འཇུག་ཅིང་ཐམས་ཅད་མཁྱེན་པས་འདུལ་བས་དུས་ཐམས་ཅད་དུ་ཆོས་ཀྱི་འཁོར་ལོ་རབ་ཏུ་བསྐོར་བའི་ཕྱིར་ཡོངས་སུ་བསྔོའོ། །ཡེ་ཤེས་ཀྱི་བྱིན་གྱིས་བརླབས་ཐམས་ཅད་མ་ ལུས་པ་ལ་མཁས་པ་ཡང་དག་པར་བསྟན་པས་འགྲོ་བ་ཐམས་ཅད་ལ་ཕན་གདགས་པའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་བྱང་ཆུབ་ཐམས་ཅད་མ་ལུས་པར་མངོན་པར་འཚང་ རྒྱ་བར་བྱ་བས་ཕྱི་མའི་མཐའི་མུར་ཐུག་པའི་བསྐལ་པར་བསྟན་པ། འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་དུ་རྒྱུན་མི་འཆད་པས་སེམས་ཅན་ཀུན་གྱིས་སངས་རྒྱས་ཀྱི་ཆོས་ ཤེས་པར་བྱ་བའི་ཕྱིར་ཡོངས་སུ་བསྔོའོ། །བསྐལ་པའི་གྲངས་ཐམས་ཅད་མ་ལུས་པ་བྱང་ཆུབ་སེམས་དཔའི་སྤྱོད་པས་རྒྱས་པར་དགང་བའི་ཕྱིར་ཡོངས་སུ་བསྔོའོ། །འཇིག་རྟེན་གྱི་ཁམས་ ཀྱི་གྲངས་དང༌། འཇིག་རྟེན་གྱི་ཁམས་ཀྱི་རྒྱུ་དང༌། འཇིག་རྟེན་གྱི་ཁམས་འབྱམས་ཀླས་པ་ཀུན་ནས་ཉོན་མོངས་པ་དང༌། རྣམ་པར་དག་པ་དང༌། ཆེ་བ་དང༌། ཆུང་བ་དང༌། ཕྲ་བ་དང༌། ཡངས་པ་དང༌། སྣྲེལ་ཞིར་རྒྱུ་བ་དང༌། སྤྱིའུ་ཚུགས་སུ་བསྟན་པ་དང༌། རྒྱན་གཅིག་པ་དང༌། རྒྱན་ཐ་དད་པ་དང༌། འཇིག་རྟེན་གྱི་ཁམས་སྣ་ཚོགས་སུ་བགྲང་ཞིང་བསྟན་པ་ཐམས་ཅད་མ་ ལུས་པར་བྱང་ཆུབ་སེམས་དཔའི་སྤྱོད་པས་ཡོངས་སུ་རྒྱས་པར་དགང་བའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་འཕྲིན་ལས་ཐམས་ཅད་མ་ལུས་པ་ལ་དུས་གསུམ་དུ་བརྩོན་པས་སེམས་ སྐད་ཅིག་རེ་རེ་ཞིང་ཐམས་ཅད་མཁྱེན་པར་གདུལ་བ་དང༌། རབ་ཏུ་དགོད་པར་བྱ་བའི་ཕྱིར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་གྱི་ཁམས་ གྲངས་མེད་པ་ཐམས་ཅད་གཟུང་བར་བྱ་བའི་ཕྱིར་སངས་རྒྱས་ཀྱི་ལམ་རྒྱུན་མི་གཅད་པ་ལ་ཞུགས་པ། སྙིང་རྗེ་ཆེན་པོའི་འགྲོ་བ་ཐམས་ཅད་ཡོངས་སུ་སྐྱོབ་ཅིང༌། བྱམས་པ་ཆེན་པོ་ཚད་མེད་ པ་ལ་གནས་པ། བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་རྗེས་སུ་སློབ་པར་ཞུགས་པ། དེ་བཞིན་གཤེགས་པའི་གདམས་ངག་ཐམས་ཅད་ཀྱི་ཚུལ་ལ་གནས་པ། སངས་རྒྱས་ཐམས་ ཅད་ལ་དགེ་བའི་རྩ་བ་རྒྱུན་མི་འཆད་པར་སྐྱེད་པ། དུས་ཐམས་ཅད་དུ་སློང་བ་ལ་སྐྱོ་བ་མེད་པར་རིམ་གྲོ་བྱེད་པའི་སེམས་དང་ལྡན་པ། གཏང་བ་ཐམས་ཅད་བཏང་བས་འགྱོད་པ་མེད་པའི་ སེམས་དང་ལྡན་པ། སྦྱིན་པ་བརྩམས་པ་ཐམས་ཅད་མཁྱེན་པར་ཡོངས་སུ་བསྔོ་བ་ལ་བརྩོན་པ་དེས་སློང་བ་དེ་དང་དེ་དག་འོངས་ཤིང་ཡོ་བྱད་ཀྱི་དངོས་པོ་མཐའ་ཡས་པ་སློང་བ་དང༌། སློང་བ་ ༄༅། །ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པའི་བྱང་ཆུབ་སེམས་དཔའི་སྤྱོད་པའི་དུས་གཞན་དང་གཞན་དུ་སློང་བ་འོངས་པ་དང༌། སློང་པ་དེ་དང༌། དེ་དག་ཡུལ་དེ་དང་དེར་འོངས་ཤིང༌། དུས་གཞན་དང་གཞན་དུ་ཕྱིན་པ་དམིགས་པའི་དངོས་པོ་རྣམ་པ་ཐ་དད་པ་སློང་བ་དང༌། སློང་བའི་སེམས་ཅན་སྣ་ཚོགས་བསམ་པ་མཐུན་པས་ གདོང་དུ་བལྟ་བ་དང༌། སེམས་ཅན་སློང་བ་གྲངས་མེད་པར་འདུས་ཤིང་བྱང་ཆུབ་སེམས་དཔས་སྐབས་ཕྱེ་བ་ལ་གནས་པ་དང༌། སྦྱིན་པ་འཐོབ་པ་ལ་སྡོད་པའི་སློང་བ་སྣ་ཚོགས་དང༌། ལེན་ པ་སྣ་ཚོགས་དང༌། སེམས་ཅན་སྣ་ཚོགས་དང༌། གང་ཟག་གཞན་དང༌། གཞན་སེམས་སྣ་ཚོགས་དང་ལྡན་པ། ཕྱོགས་གཞན་དང་གཞན་ནས་འོངས་པའི་མི་རྣམ་པ་ཐ་དད་པ་གཞན་ དང་གཞན་དུ་གྱུར་པ། སྐྱེ་གནས་ཐ་དད་པས་ཟིན་པ། སྦྱིན་པའི་གནས་གཞན་དང་གཞན་དུ་གྱུར་པ་དེ་ལྟ་བུའི་སློང་བའི་ཚོགས་ཆེན་པོ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་གྲངས་ མེད་པ་ཀུན་ནས་འདུས་པ་མཐོང་ན། སློང་བ་དེ་དག་ཐམས་ཅད་ལ་སེམས་དགའ་བ་དང༌། སེམས་དད་པ་དང༌། སློང་བ་ལ་བྱམས་པ་དང༌། དགེ་བའི་བཤེས་གཉེན་མཐོང་བའི་འདུ་ ཤེས་ཀྱིས་སྙིང་རྗེ་ཆེན་པོས་རིམ་གྲོ་བྱེད་པའི་སེམས་དང༌། ཡིད་རབ་ཏུ་སྤྲོ་བ་དང༌། སེམས་ཤིན་ཏུ་ཚིམ་པ་རབ་ཏུ་ཐོབ་སྟེ་ཕྱིར་ལྡོག་པ་མེད་པའི་དད་པས་གཏོང་བ་རྒྱུན་མི་ཆད་ པར་བྱ་བའི་སེམས་དང༌། སྐྱོ་བ་མེད་ཅིང་ཁྱད་པར་དུ་འཕེལ་བར་གཏོང་བའི་སེམས་ཀྱིས་སློང་བ་ཇི་ལྟར་འོངས་པ་དང༌། དངོས་པོ་ཅི་སློང་བ་དེ་དག་ཡོངས་སུ་ཚིམ་པ་དང༌། ཡོངས་སུ་རྒྱས་ པ་དང༌། ལག་གང་བ་དང༌། སྣོད་གང་བ་དང༌། བསམ་པ་གང་བ་དང༌། ཅི་འདོད་པའི་དངོས་པོ་ཐོབ་པ་དང༌། ཡིད་བདེ་བ་མཐའ་ཡས་པས་རྒྱས་པ་དང༌། དབུལ་བ་བོར་བ་དང༌། ནོར་དང༌། ཡོ་བྱད་ཐམས་ཅད་བསྟུད་པས་བརྟན་པ་དང༌། དངོས་པོ་ཡོངས་སུ་གཏང་བ་ཐམས་ཅད་ཀྱིས་ཤིན་ཏུ་བསྡུད་པ་དང༌། ཅི་བསླངས་པའི་དངོས་པོ་ཐམས་ཅད་ཐོབ་པས་ཡིད་བདེ་སྟེ་སྒྲ་ཆེ་ཞིང་ མཐོ་བ་འབྱིན་པ་དང༌། ཅི་བདེ་བར་འདོང་ཞིང་སྤྱོད་པ་དང༌། བསམ་པ་ཇི་བཞིན་དུ་ཤིན་ཏུ་ཚིམ་པ་དང༌། ཉོན་མོངས་པ་མེད་པར་སྦྱིན་པ་ཐོབ་པ་དང༌། ཆད་ཅིང་དུབ་པ་མེད་པའི་སེམས་ དང་ལྡན་པར་བྱེད་དེ། སློང་བ་དེ་དག་མཐོང་བ་ཙམ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་ཤིན་ཏུ་དགའ་བར་འགྱུར་གྱི། བརྒྱ་བྱིན་གྱི་སྟན་ལ་འདུག་པས་བསྐལ་པ་བྱེ་བ་ཁྲག་ ཁྲིག་བརྒྱ་སྟོང་དུ་གནས་པས་ནི། མ་ཡིན་ནོ། །རབ་མཚེ་མའི་དབང་ཕྱུག་ལ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་གནས་པས་མ་ཡིན་ནོ། །དགའ་ལྡན་དུ་སྐྱེས་ཏེ་སྐྱེ་བ་དང༌། འཆི་འཕོ་བ་ལས་རྣམ་པར་འདས་པས་མ་ཡིན་ནོ། །རབ་འཕྲུལ་དགའི་དབང་ཕྱུག་ལ་བསྐལ་པ་གྲངས་མེད་པར་བདེ་བའི་རྣམ་པ་ཐོབ་པས་མ་ཡིན་ནོ། །དབང་བསྒྱུར་བའི་དབང་གིས་བསྐལ་པ་ ༄༅། །བསམ་གྱིས་མི་ཁྱབ་པར་ཡིད་དུ་འོང་བའི་བུད་མེད་ཀྱི་བདེ་བ་ལ་གནས་པས་མ་ཡིན་ནོ། །ཚངས་པའི་སྟན་ལ་གནས་པས་བསྐལ་པ་བརྗོད་དུ་མེད་པར་ཚངས་ པའི་བདེ་བ་ལ་སྤྱོད་པས་མ་ཡིན་ནོ། །མིར་གྱུར་ཏེ་འཁོར་ལོས་བསྒྱུར་བའི་སྲིད་སྟོང་གསུམ་གྱི་མཐར་ཐུག་པའི་བདེ་བའི་རྣམ་པས་བསྐལ་པ་ས་མཚམས་མེད་ཅིང་ཚད་མེད་པར་དགའ་ བ་དང༌། རྩེ་བ་དང༌། ལོངས་སྤྱོད་ཐོབ་པར་གྱུར་པས་ནི། མ་ཡིན་ནོ། །དགེ་རྒྱས་ཀྱི་ལྷའི་བདེ་བ་ལ་བསྐལ་པ་མཚུངས་པ་མེད་པར་བདེ་བའི་རྣམ་པ་ཟད་མི་ཤེས་པ་དང་འགྲོགས་ པས་མ་ཡིན་ནོ། །གཙང་མའི་གནས་ན་གནས་པས་བསྐལ་པ་མུ་མེད་པར་བདེ་བ་དང་འགྲོགས་པར་གྱུར་པས་མ་ཡིན་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ སློང་བ་སྣ་ཚོགས་མཐོང་ན་དགའ་བར་འགྱུར་རོ། །སྤྲོ་བ་སྐྱེའོ། །མོས་པ་འབྱུང་ངོ༌། །རབ་ཏུ་དགའ་བ་འགྲུབ་བོ། །དད་པ་འཕེལ་ལོ། །བསམ་པ་འབྱུང་ངོ༌། །དབང་པོ་ལས་སུ་རུང་བར་ འགྱུར་རོ། །དགའ་བའི་སེམས་ཡོངས་སུ་རྫོགས་པར་འགྱུར་རོ། །མོས་པ་ཆེན་པོས་བསྐྱེད་པའི་སེམས་ཀྱི་ཤུགས་རྣམ་པར་འཕེལ་ལོ། །སངས་རྒྱས་ཀྱི་བྱང་ཆུབ་རྩ་བ་བརྟན་ཞིང་ རྣམ་པར་འཕེལ་བར་འགྱུར་རོ། །དེ་དགེ་བའི་རྩ་བ་དེ་དག་སློང་བ་དེ་དག་དང་སེམས་ཅན་ཐམས་ཅད་ལ་ཕན་པའི་ཕྱིར་ཡོངས་སུ་བསྔོའོ། །བདེ་བའི་ཕྱིར་ཡོངས་སུ་བསྔོའོ། །དོན་གྱི་ ཕྱིར་ཡོངས་སུ་བསྔོའོ། །རྣམ་པར་དག་པའི་ཕྱིར་ཡོངས་སུ་བསྔོའོ། །བྱང་ཆུབ་ཀྱི་ཕྱིར་ཡོངས་སུ་བསྔོའོ། །མཉམ་པ་ཉིད་ཀྱི་ཕྱིར་ཡོངས་སུ་བསྔོའོ། །ཡིད་བཟང་པོའི་འབྱུང་གནས་སུ་འགྱུར་ བའི་ཕྱིར་ཡོངས་སུ་བསྔོའོ། །ཐེག་པ་ཆེན་པོའི་བཟང་པ་ཉིད་ཀྱི་ཕྱིར་ཡོངས་སུ་བསྔོའོ། །བརྩམས་པ་བཟང་པོ་ཐམས་ཅད་ཤེས་པ་དང༌། འབྱོར་བར་བྱ་བའི་ཕྱིར་ཡོངས་སུ་བསྔོའོ། །བྱང་ ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་ཡོངས་སུ་རྫོགས་པས་སྟོབས་བཅུའི་ཡེ་ཤེས་མངོན་པར་འཚང་རྒྱ་བར་བྱ་བའི་ཕྱིར་ཡོངས་སུ་བསྔོའོ། །དེ་ཡང་སེམས་ ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་ལུས་ཀྱི་ལས་ཀྱི་ཕྱིར་ཡོངས་སུ་བསྔོའོ། །སེམས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་ངག་གི་ལས་ཀྱི་ཕྱིར་ ཡོངས་སུ་བསྔོའོ། །སེམས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་ཡིད་ཀྱི་ལས་ཀྱི་ཕྱིར་ཡོངས་སུ་བསྔོའོ། །དེ་ཡང་སེམས་ཅན་གྱི་འདུ་ཤེས་ཀྱིས་ཡོངས་སུ་བསྔོ་བ་མ་ ཡིན༑ གཞུང་དེ་བཞིན་དུ་སྲོག་གི་འདུ་ཤེས་ཀྱིས་མ་ཡིན། གང་ཟག་གི་འདུ་ཤེས་ཀྱིས་མ་ཡིན། ཤེད་ལས་སྐྱེས་པའི་འདུ་ཤེས་ཀྱིས་མ་ཡིན། ཤེད་བདག་གི་འདུ་ཤེས་ཀྱིས་ མ་ཡིན༑ སྐྱེ་བ་པོའི་འདུ་ཤེས་ཀྱིས་མ་ཡིན། བྱེད་པ་པོའི་འདུ་ཤེས་ཀྱིས་མ་ཡིན་ནོ། །ཚོར་བ་པོའི་འདུ་ཤེས་ཀྱིས་མ་ཡིན། ཡོད་པ་དང་མེད་པའི་འདུ་ཤེས་ཀྱིས་ཡོངས་སུ་བསྔོ་བ་མ་ ༄༅། །ཡིན༑ འཇིག་རྟེན་འདིའི་འདུ་ཤེས་ཀྱིས་མ་ཡིན། འཇིག་རྟེན་ཕ་རོལ་གྱི་འདུ་ཤེས་ཀྱིས་མ་ཡིན། ཤི་འཕོ་བའི་འདུ་ཤེས་ཀྱིས་མ་ཡིན། སྐྱེ་བའི་འདུ་ཤེས་ ཀྱིས་མ་ཡིན། རྟག་པའི་འདུ་ཤེས་ཀྱིས་མ་ཡིན། མི་རྟག་པའི་འདུ་ཤེས་ཀྱིས་མ་ཡིན། སྲེད་པའི་འདུ་ཤེས་ཀྱིས་མ་ཡིན། སྲེད་པ་མེད་པའི་འདུ་ཤེས་ཀྱིས་མ་ཡིན། འདུ་ ཤེས་མེད་པས་ཡོངས་སུ་བསྔོ་བ་མ་ཡིན། འདུ་ཤེས་མེད་པ་མ་ཡིན་པས་ཡོངས་སུ་བསྔོ་བ་མ་ཡིན་ཏེ། དེ་ལ་ཆགས་པ་མེད་པའི་སེམས་ཀྱིས་ཡོངས་སུ་བསྔོའོ། །བཅིངས་པ་མེད་ པའི་སེམས་ཀྱིས་ཡོངས་སུ་བསྔོའོ། །གྲོལ་བ་མེད་པའི་སེམས་ཀྱིས་ཡོངས་སུ་བསྔོ་སྟེ། དེ་ནི། ལས་ཡོངས་སུ་མི་བསྔོའོ། །རྣམ་པར་སྨིན་པ་ཡོངས་སུ་མི་བསྔོའོ། །རྟོག་པ་ ཡོངས་སུ་མི་བསྔོའོ། །རྣམ་པར་རྟོག་པ་ཡོངས་སུ་མི་བསྔོའོ། །སེམས་པ་ཡོངས་སུ་མི་བསྔོའོ། །བསམ་པ་ཡོངས་སུ་མི་བསྔོའོ། །སེམས་ཡོངས་སུ་མི་བསྔོའོ། །སེམས་མེད་པ་ ཡོངས་སུ་མི་བསྔོའོ། །དེ་དེ་ལྟར་ཡོངས་སུ་བསྔོ་བའི་ཚེ་ནང་ལ་མངོན་པར་ཆགས་པ་མེད་དོ། །ཕྱི་རོལ་ལ་མངོན་པར་ཆགས་པ་མེད་དོ། །རྐྱེན་ལ་མངོན་པར་ཆགས་པ་མེད་དོ། ། དམིགས་པ་ལ་མངོན་པར་ཆགས་པ་མེད་དོ། །རྒྱུ་ལ་མངོན་པར་ཆགས་པ་མེད་དོ། །རྒྱུ་འདུས་པ་ལ་མངོན་པར་ཆགས་པ་མེད་དོ། །ཆོས་ལ་མངོན་པར་ཆགས་པ་མེད་དོ། ། ཆོས་ཉིད་ལ་མངོན་པར་ཆགས་པ་མེད་དོ། །སེམས་པ་ལ་མངོན་པར་ཆགས་པ་མེད་དོ། །བསམ་པ་ལ་མངོན་པར་ཆགས་པ་མེད་དོ། །དེ་དེ་ལྟར་ཡོངས་སུ་བསྔོ་བའི་ཚེ་གཟུགས་ལ་ མངོན་པར་ཆགས་པ་མེད་དོ། །གཟུགས་ཉེ་བར་ལེན་པ་ལ་ཆགས་པ་མེད་དོ། །གཟུགས་འགོག་པ་ལ་ཆགས་པ་མེད་དོ། །ཚོར་བ་ལ་ཆགས་པ་མེད་དོ། །ཚོར་བ་ཉེ་བར་ལེན་པ་ལ་ ཆགས་པ་མེད་དོ། །ཚོར་བ་འགོག་པ་ལ་ཆགས་པ་མེད་དོ། །འདུ་ཤེས་ལ་ཆགས་པ་མེད་དོ། །འདུ་ཤེས་ཉེ་བར་ལེན་པ་ལ་ཆགས་པ་མེད་དོ། །འདུ་ཤེས་འགོག་པ་ལ་ཆགས་པ་མེད་ དོ༑ ༑འདུ་བྱེད་ལ་ཆགས་པ་མེད་དོ། །འདུ་བྱེད་ཉེ་བར་ལེན་པ་ལ་ཆགས་པ་མེད་དོ། །འདུ་བྱེད་འགོག་པ་ལ་ཆགས་པ་མེད་དོ། །རྣམ་པར་ཤེས་པ་ལ་ཆགས་པ་མེད་དོ། །རྣམ་པར་ཤེས་ པ་ཉེ་བར་ལེན་པ་ལ་ཆགས་པ་མེད་དོ། །རྣམ་པར་ཤེས་པ་འགོག་པ་ལ་ཆགས་པ་མེད་དོ། །གང་དེ་ལྟ་བུའི་ཆོས་ལ་ཆགས་པ་མེད་པ་དེ་ནི། གཟུགས་ལ་བཅིངས་པ་མེད་དོ། །གཟུགས་ ཀྱི་སྐྱེ་བ་ལ་བཅིངས་པ་མེད་དོ། །གཟུགས་ཀྱི་འགག་པ་ལ་བཅིངས་པ་མེད་དོ། །ཚོར་བ་ལ་བཅིངས་པ་མེད་དོ། །ཚོར་བའི་སྐྱེ་བ་ལ་བཅིངས་པ་མེད་དོ། །ཚོར་བའི་འགག་པ་ལ་བཅིངས་ པ་མེད་དོ། །འདུ་ཤེས་ལ་བཅིངས་པ་མེད་དོ། །འདུ་ཤེས་ཀྱི་སྐྱེ་བ་ལ་བཅིངས་པ་མེད་དོ། །འདུ་ཤེས་ཀྱི་འགག་པ་ལ་བཅིངས་པ་མེད་དོ། །འདུ་བྱེད་ལ་བཅིངས་པ་མེད་དོ། །འདུ་བྱེད་ཀྱི་ ༄༅། །སྐྱེ་བ་ལ་བཅིངས་པ་མེད་དོ། །འདུ་བྱེད་ཀྱི་འགག་པ་ལ་བཅིངས་པ་མེད་དོ། །རྣམ་པར་ཤེས་པ་ལ་བཅིངས་པ་མེད་དོ། །རྣམ་པར་ཤེས་པའི་སྐྱེ་བ་ལ་བཅིངས་པ་ མེད་དོ༑ ༑རྣམ་པར་ཤེས་པའི་འགག་པ་ལ་བཅིངས་པ་མེད་དོ། །གང་ཆོས་དེ་དག་ལ་བཅིངས་པ་མེད་པ་དེ་ནི། ཆོས་ཐམས་ཅད་ལ་ཆགས་པ་མེད་པ་སྟེ། དེ་ཅིའི་ཕྱིར་ཞེ་ན། ཆོས་ གང་ལ་འཛིན་པའམ། ཆོས་གང་ལ་ཆོས་ཀྱིས་ཆགས་པར་འགྱུར་བའི་ཆོས་དེ་ལྟ་བུ་སྐྱེས་པའམ། སྐྱེ་བའམ། སྐྱེ་བར་འགྱུར་བ་གང་ཡང་མེད་དོ། །དེ་ཡང་འདི་ལྟར་ཆོས་ཐམས་ ཅད་ནི༑ འདུ་ཤེས་དང་བྲལ་བའི་ངོ་བོ་ཉིད་ཀྱིས་དངོས་པོ་མེད་པའི་རང་བཞིན་ཏེ། གཅིག་མ་ཡིན་ནོ། །གཉིས་མ་ཡིན་ནོ། །མང་པོ་མ་ཡིན་ནོ། །ཚད་མེད་པ་མ་ཡིན་ནོ། །ཆུང་དུ་མ་ ཡིན་ནོ༑ ༑ཉུང་དུ་མ་ཡིན་ནོ། །དམའ་བ་མ་ཡིན་ནོ། །ཡངས་པ་མ་ཡིན་ནོ། །ཟབ་པ་མ་ཡིན་ནོ། །གསལ་བ་མ་ཡིན་ནོ། །ཞི་བ་མ་ཡིན་ནོ། །སྤྲོས་པ་མ་ཡིན་ནོ། །གནས་མ་ཡིན་ནོ། ། གནས་མེད་པ་མ་ཡིན་ནོ། །ཆོས་མ་ཡིན་ནོ། །ཆོས་མེད་པ་མ་ཡིན་ནོ། །བསྒོམས་པ་མ་ཡིན་ནོ། །བསྒོམས་པ་མེད་པ་མ་ཡིན་ནོ། །ཡོད་པ་མ་ཡིན་ནོ། །མེད་པ་མ་ཡིན་ནོ། །དེ་དེ་ ལྟར་ཆོས་མེད་པའི་ཚུལ་གྱིས་ཆོས་རྣམས་ལ་རྣམ་པར་ལྟ་སྟེ། ཆོས་ཀྱི་ཚིག་གི་ལམ་ལ་གནས་པས་ཆོས་མ་ཡིན་ཞེས་བྱ་བར་ཡང་དག་པར་རྗེས་སུ་མི་མཐོང་ངོ༌། །དེ་ལས་ཀྱི་ ལམ་ཡང་རྒྱུན་གཅོད་པར་མི་བྱེད་དོ། །བྱང་ཆུབ་སེམས་དཔའི་སྤྱོད་པ་ཡང་རྣམ་པར་ཐོགས་པར་མི་བྱེད་དོ། །ཐམས་ཅད་མཁྱེན་པ་ཉིད་ལས་ཀྱང་ཕྱིར་མི་ལྡོག་གོ །རྟེན་པའི་ལས་སྒྱུ་མ་ལྟ་ བུར་ཡང་རབ་ཏུ་ཤེས་སོ། །ཆོས་སྒྲ་བརྙན་དང་འདྲ་བ་ཡང་འཇིག་པར་མི་བྱེད་དོ། །སེམས་ཅད་དུ་སྣང་བས་ཀྱང་རློམ་སེམས་སུ་མི་བྱེད་དོ། །ཆོས་ཐམས་ཅད་སྒྱུ་མ་དང་མཉམ་པར་ཡང་ ཡང་དག་པ་ཇི་ལྟ་བ་བཞིན་དུ་ཤེས་ཏེ། ལས་རྣམས་ཀྱི་རྒྱུའི་མཐུ་དང་ཡང་འགལ་བར་མི་བྱེད་དོ། །ལས་ལ་གཞོལ་བར་ཡང་རབ་ཏུ་འཇུག་སྟེ། ཆོས་རྣམས་མངོན་པར་འདུ་བྱ་བ་མེད་པ་ ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། མངོན་པར་འདུ་བྱ་བ་མེད་པའི་ལམ་ཡང་རྒྱུན་མི་གཅོད་དོ། །དེ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། གང་གི་ཕྱིར་ཐམས་ཅད་ མཁྱེན་པ་ཉིད་ཡུལ་མེད་ཅིང༌། ཐམས་ཅད་མཁྱེན་པ་ཉིད་ཀུན་ཏུ་འགྲོ་བས་ཐམས་ཅད་མཁྱེན་པ་ཉིད་ཐམས་ཅད་དུ་ཡོངས་སུ་བསྔོ་ཞིང་ཐམས་ཅད་ལས་ལྡོག་པར་མི་བྱེད་དོ། །ཅིའི་ཕྱིར་ ཡོངས་སུ་བསྔོ་བ་ཞེས་བྱ་ཞེ་ན། འདི་ནི། འཇིག་རྟེན་ལས་ཕ་རོལ་ཏུ་གྱུར་པས་ན། དེའི་ཕྱིར་ཕ་རོལ་ཅེས་བྱའོ། །ཕུང་པོ་ལས་གཞན་དུ་འགྱུར་བར་བྱེད་པས་ནི། དེའི་ཕྱིར་ཡོངས་སུ་བསྔོ་ བ་ཞེས་བྱའོ། །ཚིག་གི་ལམ་ལས་གཞན་དུ་གྱུར་པས་ན། དེའི་ཕྱིར་ཡོངས་སུ་བསྔོ་བ་ཞེས་བྱའོ། །སེམས་ཅན་གྱི་འདུ་ཤེས་སྣ་ཚོགས་ལས་ཕ་རོལ་ཏུ་གྱུར་པས་ན། དེའི་ཕྱིར་ཡོངས་སུ་ ༄༅། །བསྔོ་བ་ཞེས་བྱའོ། །འཇིག་ཚོགས་མང་པོ་ལས་གཞན་དུ་གྱུར་བས་ན། དེའི་ཕྱིར་ཡོངས་སུ་བསྔོ་བ་ཞེས་བྱའོ། །མངོན་པར་འདུ་བྱེད་པ་ལས་གཞན་དུ་གྱུར་ པས་ན༑ དེའི་ཕྱིར་ཡོངས་སུ་བསྔོ་བ་ཞེས་བྱའོ། །སྲིད་པ་ལས་གཞན་དུ་གྱུར་པས་ན། དེའི་ཕྱིར་ཡོངས་སུ་བསྔོ་བ་ཞེས་བྱའོ། །ཉེ་བར་ལེན་པ་ལས་གཞན་དུ་གྱུར་པས་ན། དེའི་ ཕྱིར་ཡོངས་སུ་བསྔོ་བ་ཞེས་བྱའོ། །འཇིག་རྟེན་གྱི་ཆོས་ལས་གཞན་དུ་གྱུར་པས་ན། དེའི་ཕྱིར་ཡོངས་སུ་བསྔོ་བ་ཞེས་བྱའོ། །དེ་དེ་ལྟར་ཡོངས་སུ་བསྔོ་བས་སངས་རྒྱས་ཀྱི་རྗེས་ སུ་སོང་བ་ཡིན། ཆོས་ཀྱི་རྗེས་སུ་སོང་བ་ཡིན། ཡེ་ཤེས་ཀྱི་རྗེས་སུ་སོང་བ་ཡིན། བྱང་ཆུབ་ཀྱི་རྗེས་སུ་སོང་བ་ཡིན། དོན་གྱི་རྗེས་སུ་སོང་བ་ཡིན། ཡོངས་སུ་བསྔོ་བའི་རྗེས་སུ་ སོང་བ་ཡིན། སྤྱོད་ཡུལ་གྱི་རྗེས་སུ་སོང་བ་ཡིན། སྤྱོད་པའི་རྗེས་སུ་སོང་བ་ཡིན། རང་བཞིན་གྱི་རྗེས་སུ་སོང་བ་ཡིན། རྣམ་པར་དག་པའི་རྗེས་སུ་སོང་བ་ཡིན་ཏེ། དེ་དེ་ལྟར་ ཡོངས་སུ་བསྔོ་བས་ཆོས་ཤེས་པར་བྱ་བ་ཐམས་ཅད་ཁོང་དུ་ཆུད་པར་བྱེད་པ་ཡིན། སངས་རྒྱས་ཐམས་ཅད་མཉས་པར་བྱ་བ་ཡང་ཡོངས་སུ་རྫོགས་པར་བྱེད་དེ། སངས་རྒྱས་ གང་ཡང་ཐུགས་འབྱུང་བར་བྱས་པ་མེད་པ་ཡིན། ཆོས་གང་ལ་ཡང་མི་མཐུན་པར་བྱས་པ་མེད་པ་ཡིན། ཆོས་གང་ཡང་ཆུད་གཟན་པ་མེད་པ་ཡིན། ཆོས་གང་དང་འགལ་བར་ བྱེད་པ་མེད་པ་ཡིན། ཆོས་དངོས་པོ་གང་ཡང་ཉམས་པར་བྱེད་པ་མེད་པ་ཡིན། ཆོས་གང་ཡང་བོར་བ་མེད་པ་ཡིན། རྒྱུ་གང་ཡང་བཤིག་པ་མེད་པ་ཡིན། རྐྱེན་གང་ཡང་ཕྱི་ནང་གི་ཆོས་ ཐམས་ཅད་དང་འགལ་བར་བྱས་པ་མེད་པ་ཡིན། ལས་ཀྱི་འབྲས་བུ་ཡང་རྒྱུན་གཅོད་པར་མི་བྱེད་དེ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ ཀྱི་ཡོངས་སུ་བསྔོ་བ་དྲུག་པ་དགེ་བའི་རྩ་བ་ཐམས་ཅད་དང་མཉམ་པ་ཉིད་ཀྱི་རྗེས་སུ་སོང་བ་ཞེས་བྱ་བ་སྟེ། ཡོངས་སུ་བསྔོ་བ་དེས་ཡོངས་སུ་བསྔོ་བའི་བྱང་ཆུབ་སེམས་དཔའ་སེམས་དཔའ་ ཆེན་པོ་ནི། སངས་རྒྱས་ཚད་མེད་པས་བྱིན་གྱིས་བརླབས་པ་ཡིན་ནོ། །སྙིང་པོ་ཐོབ་པ་ཡིན་ནོ། །ཆོས་ཉིད་ཐོབ་པ་ཡིན་ནོ། །ཐམས་ཅད་མཁྱེན་པ་ལ་བརྩོན་པ་ཡིན་ནོ། །དོན་གྱི་ཆོས་ དང་ལྡན་པ་ཡིན་ནོ། །ཆོས་ཐམས་ཅད་ཀྱི་རང་བཞིན་གྱི་རྗེས་སུ་སོང་བ་ཡིན་ནོ། །དགེ་བའི་རྩ་བ་དམ་པ་ཐམས་ཅད་ཀྱི་རྗེས་སུ་སོང་བ་ཡིན་ནོ། །སྨོན་ལམ་ཆེན་པོ་ཡོངས་སུ་རྫོགས་པར་ བྱ་བའི་རྗེས་སུ་སོང་བ་ཡིན་ནོ། །རྡོ་རྗེ་ལྟར་མི་ཤིགས་པའི་སྙིང་པོའི་རྗེས་སུ་སོང་བ་ཡིན་ནོ། །ཆོས་ཐམས་ཅད་ཀྱི་དབང་ཕྱུག་ལ་དབང་སྒྱུར་བ་རབ་ཏུ་ཐོབ་པ་དམ་པའི་རྗེས་སུ་སོང་བ་ཡིན་ནོ།། །། བམ་པོ་བཞི་བཅུ་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་རྒྱལ་མཚན་གྱིས་ཕྱོགས་བཅུར་རྣམ་པར་བལྟས་ཏེ་འཁོར་ཐམས་ཅད་ལ་བལྟས་ནས་ཆོས་ཀྱི་དབྱིངས་ལ་ལྟ་ ༄༅། །པ་དང༌། དོན་དང༌། ཡི་གེ་དང༌། ཚིག་ལ་འཇུག་པ་དང༌། སེམས་མཐའ་དང་དབུས་མེད་པར་ཡངས་པ་ཡོངས་སུ་སྒོམ་པ་དང༌། འགྲོ་བ་ཐམས་ཅད་སྙིང་རྗེ་ ཆེན་པོས་རྒྱས་པར་བྱ་བ་དང༌། དུས་གསུམ་གྱི་སངས་རྒྱས་ཐམས་ཅད་ཀྱི་རིགས་ཀྱི་སེམས་ཡང་དག་པར་འབྲེལ་བར་བྱ་བ་དང༌། ཡོན་ཏན་ཐམས་ཅད་ལ་འཇུག་པ་དང༌། སངས་ རྒྱས་ཐམས་ཅད་ཀྱིས་བྱིན་གྱིས་བརླབས་པའི་ལུས་སུ་ཡང་དག་པར་ཤེས་པར་བྱ་བ་དང༌། སེམས་ཅན་ཐམས་ཅད་ཀྱི་བསམ་པ་རབ་ཏུ་དབྱེ་བ་དང༌། དགེ་བའི་རྩ་བ་ཇི་ལྟར་བསྐྱེད་ པ་ཐོབ་པ་ཡང་དག་པར་མཐོང་བ་དང༌། ཆོས་ཀྱི་ལུས་ཀྱི་རྗེས་སུ་སོང་བའི་གཟུགས་ཀྱི་ལུས་ཡོངས་སུ་དག་པ་ཡང་དག་པར་སྟོན་པ་དག་བྱེད་ཅིང༌། སངས་རྒྱས་ཀྱི་བྱིན་གྱི་རླབས་ ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་རྒྱལ་པོའི་རིགས་དང་ལྡན་གྱུར་ཅིང༌། །འགྲོ་བ་ཀུན་ན་རྒྱལ་པོ་གང་ཡོད་པ། །དེ་དག་ཟིལ་གནོན་རྒྱལ་པོ་འགྲོ་བའི་མཆོག། ཕན་པའི་དོན་དུ་རྒྱལ་པོ་མཐུ་ཆེན་འགྱུར། །དེ་དག་དང་བའི་ཡིད་དུ་རབ་གྱུར་ཅིང༌། །འགྲོ་བ་ཀུན་ལ་དབང་སྒྱུར་རབ་ཐོབ་སྟེ། །ཆོས་དང་ལྡན་པར་ཆོས་ཀྱིས་རྒྱལ་སྲིད་སྐྱོང༌། །འགྲོ་བ་ རྣམས་ཀྱི་བདེ་བ་རབ་ཏུ་སྐྱེད། །དེ་དག་རྒྱལ་པོའི་རིགས་རྒྱུད་རྣམ་དག་པས། །ཆོས་དང་ལྡན་པར་ཆོས་ཀྱི་འཁོར་ལོ་བསྐོར། །དེ་དག་འཁྲུག་མེད་རྒྱལ་སྲིད་སྐྱོང་བ་བྱེད། །ཕྱོགས་ རྣམས་ཀུན་ནས་འཁོར་ལོ་ཕྱིར་མི་ལྡོག །དེ་དག་ཡོན་ཏན་གཟུགས་དང་རབ་ཏུ་ལྡན། །མཁས་པའི་བློ་དང་ཤེས་རབ་ཡེ་ཤེས་ལྡན། །དེ་དག་ཟིལ་གནོན་མཐུ་ལ་ལྡོག་པ་མེད། །བདུད་ ཀྱི་དཀྲུག་མ་ཐམས་ཅད་རབ་ཏུ་འཇོམས། །དེ་དག་ཚུལ་ཁྲིམས་རྣམ་པར་དག་པ་སྟེ། །བཟོད་པའི་སྟོབས་ལ་སྡོམ་པའི་སེམས་ཀྱིས་གནས། །འཁོན་འཛིན་ཁྲོ་བ་རྣམ་དག་ཡིད་བསལ་ བས༑ ༑རྒྱལ་བ་རྣམས་ཀྱི་ཆོས་འདིར་རྟག་ཏུ་བརྩོན། །དེ་དག་ཟས་དང་སྐོམ་དག་སྦྱིན་བྱེད་ཅིང༌། །བཞོན་དང་ཕྲེང་བ་གོས་དང་སྤོས་མང་དང༌། །མལ་དང་བྱུག་པ་རྒྱབ་རྟེན་མར་མེ་དག །རྣམ་ པ་མཐའ་ཡས་ཇི་སྙེད་གཏོང་བྱེད་ཅིང༌། །ཕན་པའི་སེམས་ཀྱིས་དེ་དག་སྦྱིན་བྱེད་ཚེ། །དེ་ལ་ཤིན་ཏུ་དད་པའི་སེམས་བསྒྱུར་ཅིང༌། །བསམ་པ་དག་པས་དགའ་བ་ཡོངས་བསྐྱེད་དེ། །འཇིག་རྟེན་ བླ་མ་དག་ལ་སྦྱིན་པ་བྱེད། །དེ་དག་དངོས་པོ་ཐམས་ཅད་གཏོང་བྱེད་ཅིང༌། །ཕྱི་དང་ནང་དང་གང་རྣམས་ཇི་སྙེད་བ། །ཀུན་ཀྱང་དང་བའི་ཡིད་ཀྱིས་རབ་ཏུ་གཏོང༌། །ཡིད་ལ་ཞུམ་པར་བྱེད་པ་གང་ ཡང་མེད། །མགོ་ཡང་གཏོང་ཞིང་མིག་ཀྱང་རབ་ཏུ་གཏོང༌། །ལག་པ་གཏོང་ཞིང་དེ་བཞིན་རྐང་པ་གཏོང༌། །ཤ་དག་གཏོང་ཞིང་དེ་བཞིན་རྐང་ཡང་གཏོང༌། །ཐམས་ཅད་ལུས་ཀྱང་མི་ དགའ་མེད་པར་གཏོང༌། །དེ་དག་དབང་ཕྱུག་ཤིན་ཏུ་ཡངས་གྱུར་ཅིང༌། །རིགས་དང་དུས་ལྡན་འགྲོ་བ་མི་ཡི་རྗེ། །ཁ་ནས་ལྕེ་ཡངས་ཤིན་ཏུ་བརྐྱངས་བྱས་ཤིང༌། །སློང་བ་རྣམས་ལ་མ་ ༄༅། །དགའ་མེད་པར་གཏོང༌། །དེ་དག་དབང་ཕྱུག་ཤིན་ཏུ་ཡངས་གྱུར་ཅིང༌། །སློང་བ་རྣམས་ལ་ལྕེ་སྦྱིན་བྱས་ནས་ཀྱང༌། །འདི་ན་འགྲོ་བ་ཡོད་པ་མ་ལུས་ཀུན། །རྒྱལ་ བའི་ལྗགས་ཡངས་ཇི་བཞིན་ཐོབ་འགྱུར་བསྔོ། །རབ་ཏུ་སྤྲོ་བྱས་བུ་ཡང་སྦྱིན་པར་བྱེད། །མི་དགའ་མེད་བྱས་ཆུང་མ་སྦྱིན་པར་བྱེད། །རབ་ཏུ་དགའ་བྱས་རྒྱལ་སྲིད་སྦྱིན་པར་བྱེད། །བདག་ ཀྱང་གཞན་གྱི་བྲན་དུ་སྦྱིན་པར་བྱེད། །ཅི་འདོད་གཏོང་ཞིང་ཐམས་ཅད་གཏོང་བ་བྱེད། །མི་སྐྱོར་གཏོང་ཞིང་དུས་སུ་གཏོང་བར་བྱེད། །ཅི་འདྲའི་དངོས་པོ་བསླངས་པར་གྱུར་པ་རྣམས། ། ཐམས་ཅད་བསམ་པ་བཞིན་དུ་རབ་ཏུ་གཏོང༌། །ཆོས་ཀྱི་དོན་དུ་བདག་ཀྱང་གཏོང་བར་བྱེད། །བྱང་ཆུབ་དོན་དུ་དཀའ་བ་རབ་ཏུ་སྤྱོད། །སེམས་ཅན་དོན་དུ་ཐམས་ཅད་བཟོད་པར་བྱེད། ཡེ་ཤེས་དོན་དུ་ཕྱིར་ལྡོག་མི་འགྱུར་རོ། །རྒྱལ་བ་རྣམས་ལས་ཆོས་རྣམས་མཉན་བྱས་ཤིང༌། །མངོན་པར་གཡོག་ཕྱིར་འབུལ་བར་བྱེད་པའི་ཚེ། །འགྲོ་བ་ཐམས་ཅད་ཡོངས་སུ་ བསྐྱབ་སེམས་ཀྱིས། །རྒྱལ་བ་རྣམས་ལ་དགའ་བ་ཡངས་པ་སྐྱེད། །མི་ཡི་གཙོ་བོ་འདྲེན་པ་མཐོང་ནས་ཀྱང༌། །བྱམས་ལྡན་ཕན་པའི་སེམས་ཀྱིས་རིམ་གྲོ་བྱེད། །དགའ་བར་བྱེད་པའི་ ཡིད་དང་ལྡན་གྱུར་ཅིང༌། །སྣོད་དུ་གྱུར་ཏེ་ཆོས་རྣམས་ལེན་པར་བྱེད། །ཅི་ནས་འཇིག་རྟེན་འདི་དག་བདེར་འགྱུར་ཞིང༌། །ཅི་ནས་ཐམས་ཅད་བསྐྱབས་པར་འགྱུར་བ་དང༌། །ཅི་ནས་འགྲོ་ བ་ཐམས་ཅད་འགྲོལ་འགྱུར་བར། །དེ་དག་འགྲོ་བ་ཀུན་ལ་ཡོངས་སུ་བསྔོ། །གཟུགས་མཛེས་བཞིན་སྡུག་དག་སྙན་ལྡན་བ་དག །མེ་ཏོག་གདུགས་བཏགས་སྤོས་ཞིམ་བསྐུས་པ་རྣམས། ། ཕྲེང་བ་ལྷབ་ལྷུབ་རྒྱན་དང་ལྡན་པ་ཡི། །འཁོར་དང་ལྡན་པར་དེ་དག་རབ་གྱུར་ཅིང༌། །མཁས་ཤིང་ཤེས་པའི་གཡོག་འཁོར་དེ་དག་ཀྱང༌། །ཕན་པར་སེམས་པའི་ཡིད་ཀྱིས་གཏོང་བའི་ཚེ། ། ལྟོས་ཤིང་རེ་བའི་སེམས་ཀྱང་མི་འབྱུང་བར། །སེམས་ཅན་ཕན་ཕྱིར་བྱང་ཆུབ་རབ་ཏུ་ཚོལ། །དགེ་བ་དེ་ལ་རྗེས་སུ་སེམས་བྱེད་ཅིང༌། །སྣ་ཚོགས་ཡངས་ཤིང་རྒྱ་ཆེ་སྣྲེལ་ཞི་ལ། །འགྲོ་བ་ ཀུན་ལ་བརྟན་པ་ཡོངས་སུ་བསྔོ། །ལས་ལ་གནས་སུ་བྱེད་པ་གང་ཡང་མེད། །དེ་དག་རྒྱལ་སྲིད་ཡངས་པ་སྦྱིན་པར་བྱེད། །ཡུལ་དང་མིར་བཅས་གྲོང་ཁྱེར་དམ་པ་དང༌། །རྒྱལ་པོའི་ཕོ་ བྲང་གནས་སུ་གྱུར་པ་དང༌། །ཁྱིམ་དང་བཟའ་ཤིང་རབ་སྦྱིན་པར་བྱེད། །བསྐལ་པ་བརྒྱར་ཡང་སུས་ཀྱང་མ་བྱིན་པའི། །སྦྱིན་པ་འཇིག་རྟེན་མི་ཡི་གཙོ་ལ་དབུལ། །འཇིག་རྟེན་རྣམས་ཀྱི་ ཕ་རོལ་བྱིན་བྱས་ཤིང༌། །འགྲོ་བ་ཀུན་ལ་ཕ་རོལ་སྟོན་པར་བྱེད། །དེ་དག་ཕྱོགས་བཅུའི་སློང་བ་མང་པོ་དག །རྣམ་པ་སྣ་ཚོགས་མཐོང་བར་གྱུར་ནས་ཀྱང༌། །སློང་བ་ཐམས་ཅད་ཤིན་ཏུ་མགུར་ བྱས་ཤིང༌། །ཤིན་ཏུ་དགར་འགྱུར་དེ་བཞིན་སྤྲོ་བར་བྱེད། །དུས་གསུམ་རྒྱལ་བ་ཀུན་གྱིས་ཅིར་བསྔོས་པ། །སྐྱེས་བུ་འདུལ་བ་དེ་དག་སྤྱོད་ཡུལ་ལ། །རབ་ཏུ་བསླབ་སྟེ་ཕ་རོལ་ཕྱིན་བྱས་ ༄༅། །ཤིང༌། །དེ་དག་ལས་དེ་ཡོངས་སུ་བསྔོ་བར་བྱེད། །ཆོས་རྣམས་འདི་ལས་ཀྱེ་མ་སུ་ཞིག་ཞུགས། །གང་ལ་ཞུགས་གྱུར་ཇི་ལྟར་ཞུགས་གྱུར་ཅེས། །དེ་དག་ ཆོས་དངོས་འདི་ལ་རྣམ་ལྟ་ཡང༌། །སྦྱིན་པའི་སེམས་ལ་རྣམ་པར་ཐོགས་པ་མེད། །ཆོས་རྣམས་གང་ལ་ཆོས་ཀྱིས་ཆགས་མེད་པར། །ཡེ་ཤེས་ཚུལ་ཤེས་དེ་དག་ཡོངས་སུ་བསྔོ། །ཆོས་ ཀྱི་ཚུལ་ལ་དེ་དག་ཡོངས་སུ་བསྔོ། །དོན་གྱི་ཚུལ་ཤེས་དེ་དག་ཡོངས་སུ་བསྔོ། །ལས་ལ་ནམ་ཡང་རྣམ་པར་རྟོག་པ་མེད། །རྣམ་པར་སྨིན་ལའང་གནས་པར་མི་བྱེད་དེ། །བྱང་ཆུབ་རྟེན་ པར་རབ་ཏུ་དེས་ཤེས་ཀྱང༌། །ཆོས་ཉིད་དབྱིངས་ལས་འགལ་བར་མི་བྱེད་དོ། །ལུས་ལ་ཆགས་པར་དེ་དག་མི་བྱེད་དེ། །སེམས་ལའང་དེ་དག་གནས་པར་མི་བྱེད་དོ། །ལས་ཀྱིས་ དེ་དག་བློ་འཇུག་མི་བྱེད་དོ། །ལས་ཀྱིས་ཡེ་ཤེས་རྟེན་ལའང་འཇུག་མི་བྱེད། །འདས་པའི་ཆོས་ལ་རྟོག་པར་མི་བྱེད་དེ། །མ་འོངས་ཆོས་ལའང་བློ་ནི་གཏོང་མི་བྱེད། །ད་ལྟར་ཡོད་ ལའང་གནས་པར་མི་བྱེད་དེ། །དུས་གསུམ་ཀུན་ལས་རྣམ་པར་དཔེན་པར་སྐྱེས། །དེ་དག་གཟུགས་ཀྱི་ཕ་རོལ་ཕྱིན་གྱུར་ཅིང༌། །ཚོར་བ་འདུ་ཤེས་འདུ་བྱེད་ཡིད་རྣམས་དང༌། །འཇིག་ རྟེན་ཀུན་གྱི་ཕ་རོལ་ཕྱིན་གྱུར་ཏེ། །དག་པ་དེ་དག་དམའ་བའི་ཡིད་མི་འགྱུར། །ཕུང་པོ་རྣམས་དང་ཁམས་ལ་ཡོངས་བཙལ་ཅིང༌། །སྐྱེ་མཆེད་དེ་བཞིན་ལུས་ཀྱི་རྣམ་པ་དང༌། །སེམས་ ཀྱི་རྣམ་པ་མ་ལུས་རྣམ་གཞིགས་ཀྱང༌། །བྱང་ཆུབ་དངོས་སུ་གང་ཡང་མི་རྙེད་དོ། །རྟག་ལ་ནམ་ཡང་ཆགས་པར་མི་བྱེད་དེ། །ཆད་པ་ལ་ཡང་དེ་དག་སེམས་མི་འཇུག །ཆོས་ཉིད་ཡོད་དང་ མེད་པ་མ་ཡིན་ཏེ། །གཅིག་ནས་གཅིག་བརྒྱུད་ལས་ཀྱང་མ་ལུས་ཤེས། །སེམས་ཀྱི་རྒྱུ་ཡིས་བྱང་ཆུབ་ཐོབ་མི་བྱེད། །ཆོས་ཉིད་ལ་ཡང་དེ་དག་མི་གནས་ཏེ། །ཞིང་ལའང་དེ་དག་གནས་ པ་མ་ཡིན་ནོ། །དུས་གསུམ་ཆོས་རྣམས་ཀུན་ཀྱང་ཡོད་པ་མིན། །དེ་ལྟར་སྤྱོད་པ་ཆོས་འདི་ཀུན་རྟོག་ཅིང༌། །ཇི་ལྟར་རྒྱལ་བ་ཀུན་གྱིས་བརྟག་མཛད་པ། །དེ་ལྟར་དེས་བཙལ་ནམ་ཡང་རྙེད་པ་ མེད༑ ༑སྤྱོད་པ་རྣམས་ལ་མི་ཤེས་རྨོངས་པ་མེད། །བྱ་བའི་ལམ་དང་འགལ་བར་མི་བྱེད་ཅིང༌། །ལས་ཀྱི་ལམ་རྣམས་ཡོངས་སུ་རྗོད་བྱེད་པས། །སེམས་ཅན་ལམ་རྣམས་ཡོངས་སུ་སྤྱོད་བྱེད་ ཅིང༌། །རྒྱུར་བཅས་རྐྱེན་དང་བཅས་པར་དེ་ལ་རྟོག །ཡེ་ཤེས་མཁས་པས་གང་རྣམས་རྗོད་མཛད་པའི། །མཁས་པའི་ལམ་ལ་དེ་དག་སྤྱོད་བྱེད་ཅིང༌། །དོན་གྱི་ཚུལ་ལ་རྗེས་སུ་སེམས་བྱེད་ པས༑ ༑བྱང་ཆུབ་ཚུལ་ནི་མི་ཡི་གཙོ་བོས་རྟོགས། །ཆོས་རྣམས་སྐྱེ་མེད་འཇིག་པ་མེད་པ་སྟེ། །འགྲོ་བ་ཀུན་དུ་གང་ཡང་འཕོ་བ་མེད། །ཆོས་རྣམས་སྐྱེ་དང་ཤི་འཕོ་མེད་པར་ཡང༌། །རྒྱལ་བའི་ ཆོས་ཀྱི་ཚུལ་རྣམས་རབ་ཏུ་རྟོགས། །ཆོས་རྣམས་གང་གི་རང་བཞིན་རྣམ་ཤེས་པ། །དེ་ནི་རང་བཞིན་དངོས་ཡོད་མི་རྟོག་སྟེ། །དངོས་མེད་རྟོག་མེད་དེ་དག་རབ་ཏུ་ཤེས། །བདེ་གཤེགས་ ༄༅། །ཡེ་ཤེས་དེ་དག་རྣམ་པར་མཐོང༌། །འགྲོ་བ་ཀུན་དང་ཆོས་ཉིད་ཐམས་ཅད་དང༌། །སེམས་ཅན་རྣམ་པ་ཞིང་གི་རྣམ་པ་དང༌། །ཆོས་ཀྱི་རྣམ་པ་དུས་རྣམས་མ་ ལུས་པའི། །ཆོས་རྣམས་མཁས་པས་གང་ཡང་བརྗོད་པ་མེད། །ཆོས་རྣམས་མ་ལུས་གཟུང་བར་བྱ་བ་མེད། །ཇི་སྙེད་སེམས་ཅན་རྒྱལ་བས་སངས་རྒྱས་པ། །དེ་ཡི་ཆོས་ལའང་ཆོས་ ཀྱི་དངོས་མེད་དེ། །དེ་ཡང་དུས་དང་ཆོས་སུ་བརྗོད་པ་ཡིན། །ཆོས་ཉིད་ཀུན་ཏུ་འགྲོ་བ་ཅི་འདྲ་བ། །དེ་བཞིན་དེ་དག་ཡོངས་སུ་བསྔོ་བ་བྱེད། །དེས་ཀྱང་འགྲོ་བ་ཀུན་ནས་བསྒྱུར་བྱས་ཏེ།། དེ་ལ་ཀུན་ཏུ་དཔའ་བོ་ཡོངས་སུ་བསྔོ། །དགེ་བའི་རྩ་བ་ཐམས་ཅད་དང་མཉམ་པ་ཉིད་ཀྱི་རྗེས་སུ་སོང་བ་ཞེས་བྱ་བ་སྟེ། ཡོངས་སུ་བསྔོ་བ་དྲུག་པའོ། །ཀྱེ་རྒྱལ་བའི་སྲས་དག །བྱང་ ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་འགྲོ་བ་ཐམས་ཅད་མཉམ་པ་ཉིད་ཀྱི་རྗེས་སུ་སོང་བ་ཞེས་བྱ་བ་བདུན་པ་གང་ཞེ་ན། ཀྱེ་རྒྱལ་བའི་སྲས་ དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་གཏོང་བའི་དམིགས་པ་ལ་བརྩོན་པ། ཚུལ་ཁྲིམས་རྣམ་པར་དག་བ་ལ་རབ་ཏུ་བརྟེན་པ། ལྷག་པའི་ བསམ་པས་བྱང་ཆུབ་སེམས་དཔའ་ཡི་དམ་ཕྱིར་མི་ལྡོག་པའི་བརྩོན་འགྲུས་དང་ལྡན་པ། ཐམས་ཅད་གཏོང་བའི་བཟོད་པ་དང་ལྡན་ཞིང༌། རྣ་ལ་གཟོན་པའི་དང་ཚུལ་ ཅན༑ བསམ་གཏན་འབྱམས་ཀླས་པ་རྣམ་པ་ཐ་དད་པ་ལ་མཁས་པའི་རྗེས་སུ་ཞུགས་པ། ཤེས་རབ་ཀྱི་ཚུལ་དང་ས་རྣམ་པར་དཔྱོད་པ་ལ་མཁས་པ། འགྲོ་བ་ཐམས་ཅད་ཀྱི་སེམས་ ཀྱིས་རྣམ་པར་ཕྱེ་བའི་དགེ་བའི་རྩ་བ་དང་ལྡན་པ། ཡོན་ཏན་མཐའ་ཡས་པ་ཡང་དག་པར་བསྡུ་བའི་དགེ་བའི་རྩ་བ་དང་ལྡན་པ། བྱང་ཆུབ་སེམས་དཔའི་ལས་ལ་རབ་ཏུ་བརྩོན་པར་ཡིད་ ལ་བྱེད་པ་དང་ལྡན་པ། འགྲོ་བ་ཐམས་ཅད་ཀྱི་དགེ་བའི་རྩ་བ་ཐམས་ཅད་ཀྱི་ཕྱོགས་མངོན་པར་སྐྱོབ་པ། དགེ་བའི་རྩ་བ་ཆུང་དུ་ཉེ་བར་གསོག་ཀྱང་རུང༌། དགེ་བའི་རྩ་བ་ཆེན་པོ་ཉེ་བར་ གསོག་ཀྱང་རུང༌། དགེ་བའི་རྩ་བ་ཡངས་པ་ཉེ་བར་གསོག་ཀྱང་རུང༌། དགེ་བའི་རྩ་བ་རྒྱ་ཆེན་པོ་ཉེ་བར་གསོག་ཀྱང་རུང༌། དགེ་བའི་རྩ་བ་ཚད་མེད་པར་ཉེ་བར་གསོག་ཀྱང་རུང༌། དགེ་ བའི་རྩ་བ་སྣ་ཚོགས་མང་པོ་རྡུལ་ཙམ་ཡན་ཆད་ཉེ་བར་གསོག་ཀྱང་རུང༌། དགེ་བའི་རྩ་བ་གཞལ་དུ་མེད་པ་ཉེ་བར་གསོག་ཀྱང་རུང༌། དགེ་བའི་རྩ་བ་བསམ་གྱིས་མི་ཁྱབ་པ་ཉེ་བར་ གསོག་ཀྱང་རུང༌། དགེ་བའི་རྩ་བ་གྲངས་མེད་པ་ཉེ་བར་གསོག་ཀྱང་རུང༌། དགེ་བའི་རྩ་བ་མུ་མེད་པ་ཉེ་བར་གསོག་ཀྱང་རུང༌། སངས་རྒྱས་ལ་དམིགས་པའི་དགེ་བའི་རྩ་བ་ཉེ་བར་ གསོག་ཀྱང་རུང༌། ཆོས་ལ་དམིགས་པའི་དགེ་བའི་རྩ་བ་ཉེ་བར་གསོག་ཀྱང་རུང༌། ཚུལ་དེ་བཞིན་དུ་དགེ་འདུན་ལ་དམིགས་པ་དང༌། དགེ་བའི་བཤེས་གཉེན་ལ་དམིགས་པ་དང༌། ༄༅། །སེམས་ཅན་ཐམས་ཅད་ལ་དམིགས་པ་དང༌། ཐབས་མཁས་པ་ལ་དམིགས་པ་དང༌། ལེགས་པའི་དགེ་བའི་རྩ་བའི་སེམས་སྒོམ་པ་ལ་དམིགས་པ་དང༌། ནང་ལ་དམིགས་པ་དང༌། ཕྱི་རོལ་ལ་དམིགས་པ་དང༌། དགེ་བའི་རྩ་བ་རྣམ་པ་ཐ་དད་པ་མཐའ་ཡས་པའི་ཚོགས་ལ་དམིགས་པའི་དགེ་བའི་རྩ་བ་ཉེ་བར་གསོག་ཀྱང་རུང༌། དགེ་ བའི་རྩ་བ་དེ་དག་ལ་ཡོངས་སུ་སྤྱོད་པ་དང༌། ཉེ་བར་གནས་པ་དང༌། འཇུག་པ་དང༌། ཡང་དག་པར་སྒྲུབ་པ་དང༌། ཉེ་བར་གསོག་པ་དང༌། ཚོགས་སུ་བྱ་བ་དང༌། མོས་པར་བྱ་བ་དང༌། རྣམ་པར་སྦྱོང་བ་དང༌། རྣམ་པར་སྟོན་པ་དང༌། རྒྱ་ཆེར་བྱེད་བའི་ཚེ་བཟོད་པ་རབ་ཏུ་ཐོབ་པའི་སེམས་དང་ལྡན་པ། སེམས་ཅན་དམྱལ་བའི་སྒོ་ཤིན་ཏུ་བཅད་པ། དབང་པོ་རྒྱུ་བ་ཤིན་ ཏུ་བསྡམས་པ། བྱ་བའི་ཚུལ་ལ་རབ་ཏུ་ཞུགས་པ། ཕྱིན་ཅི་ལོག་མེད་པར་འགྲོ་བ། སངས་རྒྱས་ཀྱི་ཆོས་ཐམས་ཅད་ཀྱི་སྣོད་དུ་གྱུར་པ། འགྲོ་བ་ཐམས་ཅད་ཀྱི་བསོད་ནམས་ཀྱི་ ཞིང་དུ་བྱུང་བ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ། དེ་བཞིན་གཤེགས་པའི་དགེ་བའི་རྩ་བ་ཐམས་ཅད་ཀྱིས་ཤིན་ཏུ་གསོས་པ། དགེ་བའི་རྩ་བ་ཐམས་ཅད་ ལས་བྱུང་བ། སངས་རྒྱས་ཐམས་ཅད་ཀྱི་སྨོན་ལམ་གྱི་རྗེས་སུ་སོང་བ། སངས་རྒྱས་ཀྱི་ཆོས་ཐམས་ཅད་ཡོངས་སུ་སྦྱང་བའི་སེམས་དང་ལྡན་པ། དེ་བཞིན་གཤེགས་པ་ཐམས་ ཅད་ཀྱི་འཕྲིན་ལས་ཀྱི་རྗེས་སུ་འབྲང་བ། རང་གི་སེམས་ཀྱི་གོ་སྐབས་རྙེད་པ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་དང་འདྲ་བ། སངས་རྒྱས་ཀྱི་འཁོར་ཐམས་ ཅད་དུ་ཡང་དག་པར་འབྱུང་བ། སངས་རྒྱས་ཐམས་ཅད་ཀྱི་ཕྱག་གི་སྟོབས་ཀྱིས་ཕྱུང་བ། སངས་རྒྱས་ཐམས་ཅད་ཀྱི་ཡོན་ཏན་གྱིས་ཡང་དག་པར་འཕགས་པ། མཐོ་རིས་ལ་ཆགས་པ་མེད་ པ༑ སྐྱིད་པ་ལ་ཡོངས་སུ་འཛིན་པ་མེད་པ། མངོན་པར་འདུ་བྱེད་པ་ལ་ཆགས་པ་མེད་པ། དགེ་བའི་རྩ་བའི་དངོས་པོ་ཐམས་ཅད་ཡོངས་སུ་བསྔོ་བར་བྱེད་པ། འགྲོ་བ་ཐམས་ཅད་ཀྱི་བསོད་ ནམས་ཀྱི་གཏེར་དུ་གྱུར་པ། ཐམས་ཅད་དང་ལྡན་པའི་ནན་ཏན་ལ་རབ་ཏུ་ཞུགས་པ། འགྲོ་བ་ཐམས་ཅད་དགག་པའི་གདུགས་སུ་གྱུར་པ། འགྲོ་བ་ཐམས་ཅད་རབ་ཏུ་རྟེན་པའི་ལམ་ གྱིས་མངོན་པར་འདོན་པ། སེམས་ཅན་ཐམས་ཅད་ཀྱི་དགེ་བའི་རྩ་བ་བརྟན་པར་བྱེད་པ། ཡུལ་ཐམས་ཅད་དུ་ཡོངས་སུ་བསྔོ་བ། ཐམས་ཅད་མཁྱེན་པའི་བྱང་ཆུབ་ཀྱི་སྒོ་རྒྱུན་མི་འཆད་ པར་བྱེད་པ། ཡེ་ཤེས་ཀྱི་རྒྱལ་མཚན་ཡང་དག་པར་གཟུགས་པར་བྱེད་པ། ལམ་ཆེན་པོ་རྣམ་པར་སྦྱོང་བ་ལ་བརྩོན་པ། འགྲོ་བ་ཐམས་ཅད་ཀྱིས་བལྟ་ན་དོན་ཡོད་པ་ལ་ཞུགས་པ། འཇིག་རྟེན་ཐམས་ཅད་ཀྱི་དྲི་མ་སྦྱོང་བ། རབ་ཏུ་སྦྱིན་པའི་སེམས་དང་ལྡན་པ། དེ་བཞིན་གཤེགས་པའི་རིགས་སུ་རིགས་དང་ལྡན་པར་བྱུང་བ། སངས་རྒྱས་རིགས་རྣམ་པར་དག་ ༄༅། །པར་རབ་ཏུ་སྐྱེས་པ། ཡོན་ཏན་གྱི་དཀྱིལ་འཁོར་ཆེན་པོས་སྦྱིན་པའི་གནས་སུ་གྱུར་པ། འཇིག་རྟེན་ཐམས་ཅད་ཀྱི་རྟེན་དུ་གྱུར་པ། འགྲོ་བ་ཐམས་ཅད་ ཀྱི་གནས་སུ་གྱུར་པ། སེམས་ཅན་ཐམས་ཅད་རྣམ་པར་དག་པ་ལ་ཡང་དག་པར་གཞོག་པ། དགེ་བ་ཡོངས་སུ་བསྡུ་བ་ལ་ཡང་དག་པར་བརྩོན་པ། བྱང་ཆུབ་ཏུ་སེམས་བསྐྱེད་ པའི་བྱིན་གྱི་རླབས་དང༌། ལྷག་པའི་བསམ་པ་རྡུལ་མེད་པས་ཡོངས་སུ་བཟུང་བ་དེ། དགེ་བའི་རྩ་བ་དེ་དག་སྤྱོད་པའི་ཚེ་སེམས་འདི་ལྟར་བསྐྱེད་དེ། དགེ་བའི་རྩ་བ་བྱང་ཆུབ་ཏུ་ སེམས་བསྐྱེད་པས་ཡང་དག་པར་བཟུང་བ་དང༌། བྱང་ཆུབ་ཏུ་སེམས་བསྐྱེད་པས་བསམ་པ་དང༌། བྱང་ཆུབ་ཏུ་སེམས་བསྐྱེད་པས་བསྟན་པ་དང༌། བྱང་ཆུབ་ཏུ་སེམས་བསྐྱེད་པའི་ བསམ་པ་ལས་བྱུང་བ་དང༌། བྱང་ཆུབ་ཏུ་སེམས་བསྐྱེད་པས་ཕན་པ་ལ་ཞུགས་པ་དང༌། འགྲོ་བ་ཐམས་ཅད་མ་ལུས་པ་ལ་སྙིང་བརྩེ་བར་བྱེད་པ་དང༌། ཐམས་ཅད་མཁྱེན་པའི་ སྤྱོད་ཡུལ་དུ་ཡང་དག་པར་བསྒྲུབས་པ་དང༌། སྟོབས་བཅུ་ལ་དམིགས་པར་བརྩོན་པ་དང༌། སྟོབས་བཅུའི་དབྱིངས་སུ་ཡང་དག་པར་བསྒྲུབས་པ་དང༌། དགེ་བའི་རྩ་བའི་དབྱིངས་སུ་ མངོན་པར་བསྒྲུབས་པ་དང༌། དགེ་བའི་རྩ་བ་དེ་ལྟར་ཡང་དག་པར་བསྒྲུབས་པ་དེ་དག་ལས་རྣམ་པར་སྨིན་པ་གང་བྱུང་བ་དེ། ཕྱི་མའི་མཐའི་བསྐལ་པའི་མུར་ཐུག་པར་བྱང་ ཆུབ་སེམས་དཔའི་སྤྱོད་པ་ལ་སྤྱོད་པ་དང༌། འགྲོ་བ་ཐམས་ཅད་ལ་ཡོངས་སུ་གཏང་བར་བྱ་བ་ཡོངས་སུ་གཏོང་བའི་ཕྱིར་སེམས་ཅན་ཐམས་ཅད་ལ་ཡོངས་སུ་བསྔོ་སྟེ། སེམས་ཅན་གྱི་ ཁམས་ཐམས་ཅད་ལས་སེམས་ཅན་གཅིག་ཀྱང་མ་ཆུད་པ་མེད་པར་བྱས་ཏེ། སེམས་ཅན་གཅིག་ལ་ཇི་ལྟ་བ་དེ་བཞིན་དུ་སེམས་ཅན་ཐམས་ཅད་མ་ལུས་པ་ལ་ཡང་ཡོངས་སུ་བསྔོ་བར་ བྱེད་དེ་འདི་ལྟར་ཡོངས་སུ་བསྔོའོ། །འཇིག་རྟེན་གྱི་ཁམས་གྲངས་མེད་པ་རིན་པོ་ཆེས་ཡོངས་སུ་རྒྱས་པ་དང༌། རིན་པོ་ཆེ་ཐམས་ཅད་ཀྱིས་ཆལ་བར་གང་བ་དང༌། འཇིག་རྟེན་གྱི་ཁམས་ གྲངས་མེད་པ་གོས་ཀྱིས་རྣམ་པར་དག་ཅིང་གོས་ཀྱིས་ཡོངས་སུ་གང་བ་དང༌། འཇིག་རྟེན་གྱི་ཁམས་གྲངས་མེད་པ་སྤོས་ཐམས་ཅད་ཀྱིས་ཡིད་དུ་འོང་ཞིང་དྲི་ཞིམ་པོས་ཡོངས་སུ་རྒྱས་ པ་དང༌། འཇིག་རྟེན་གྱི་ཁམས་གྲངས་མེད་པ་རྒྱན་ཐམས་ཅད་ཀྱིས་རྣམ་པར་མཛེས་ཤིང་ལྷབ་ལྷུབ་ཀྱིས་ཡོངས་སུ་རྒྱས་པ་ཡོངས་སུ་རྒྱས་པ་དང༌། འཇིག་རྟེན་གྱི་ཁམས་གྲངས་མེད་པ་མེ་ ཆེ་མཐའ་ཡས་པས་ཁྱད་པར་དུ་འཕགས་ཤིང་ནོར་བུ་རིན་པོ་ཆེས་ཡོངས་སུ་རྒྱས་པ་དང༌། འཇིག་རྟེན་གྱི་ཁམས་གྲངས་མེད་པ་མེ་ཏོག་སྣ་ཚོགས་ཀྱི་ཁ་དོག་དུ་མ་དང་ལྡན་པར་གྱུར་ ཅིང་མེ་ཏོག་ཐམས་ཅད་ཀྱིས་ཡོངས་སུ་རྒྱས་པ་དང༌། འཇིག་རྟེན་གྱི་ཁམས་གྲངས་མེད་པ་ཁ་ཟས་ཞིམ་པོ་སྣ་ཚོགས་རྣམ་པ་ཐ་དད་པ་དང་ལྡན་ཞིང་ཁ་ཟས་ཞིམ་པོ་ཡོངས་སུ་ཕུན་ ༄༅། །སུམ་ཚོགས་པ་དང༌། འཇིག་རྟེན་གྱི་ཁམས་གྲངས་མེད་པ་གསེར་དང་དངུལ་དང་ནོར་གྱི་དབྱིག་གིས་དག་ཅིང་ནོར་གྱི་དབྱིག་གིས་ཡོངས་སུ་རྒྱས་པ་དང༌། འཇིག་རྟེན་གྱི་ཁམས་གྲངས་མེད་པ་རིན་པོ་ཆེའི་བ་དན་སྣ་ཚོགས་ཀྱིས་བརྒྱན་ཅིང་ལྷ་རྫས་ཀྱི་གོས་ཐམས་ཅད་ཀྱིས་ཀུན་ནས་ཡོག་སྟེ་གྲངས་པས་ཡོངས་སུ་རྒྱས་པ་དང༌། འཇིག་རྟེན་གྱི་ཁམས་གྲངས་མེད་པ་རིན་པོ་ཆེ་སྣ་ཚོགས་ཀྱི་ཅོད་པན་གྱིས་རྣམ་པ་སྣ་ཚོགས་སུ་ཡོངས་སུ་བརྒྱན་ཅིང་རིན་པོ་ཆེའི་ཅོད་པན་གྱིས་ཡོངས་སུ་རྒྱས་པ་དག་སློང་ བ་རེ་རེ་ལ་ཕྱི་མའི་མཐའི་བསྐལ་པའི་མུར་ཐུག་པར་སྦྱིན་པས་ངོམས་པར་མ་གྱུར་ཅིག །རྒྱུན་གཅོད་པར་མ་གྱུར་ཅིག །སློང་བ་གཅིག་ལ་ཇི་ལྟ་བ་དེ་བཞིན་དུ་སློང་བ་ ཐམས་ཅད་མ་ལུས་པ་ལ་ཡོངས་སུ་གཏོང་ཞིང༌། སློང་བ་རེ་རེ་ལའང་ཕྱི་མའི་མཐའི་བསྐལ་བའི་མུར་ཐུག་པར་ཤིན་ཏུ་ཚིམ་པར་བྱེད་ཀྱང་ཡོངས་སུ་སྐྱོ་བར་མ་གྱུར་ཅིག །ཕྱིར་ ལྡོག་པར་མ་གྱུར་ཅིག །དེ་ཡང་འདི་ལྟར་སྒྱུ་མེད་པའི་སེམས་དང༌། འདོད་ཅིང་སྲེད་པ་མེད་པའི་སེམས་དང༌། གྲགས་པ་འདོད་པ་མེད་པའི་སེམས་དང༌། འགྱོད་པ་མེད་ པའི་སེམས་དང༌། མྱ་ངན་མེད་པའི་སེམས་དང༌། ཐམས་ཅད་མཁྱེན་པའི་ལམ་ལ་ཐེ་ཚོམ་མེད་པའི་སེམས་དང༌། གཏང་བ་ཤིན་ཏུ་གཏོང་བའི་སེམས་དང༌། སྙིང་བརྩེ་ བའི་སེམས་དང༌། ཡོངས་སུ་སྨིན་པར་བྱ་བའི་སེམས་དང༌། ཐམས་ཅད་མཁྱེན་པའི་ཡེ་ཤེས་ལ་རབ་ཏུ་དགོད་པའི་སེམས་ཀྱིས་ཡོངས་སུ་གཏོང་བར་གྱུར་ཅིག །ཅེས་དེ་ལྟར་བྱང་ ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་མ་འོངས་པའི་བསྐལ་པའི་མཐར་གཏོང་བ་དང༌། འདོད་པའི་སྦྱིན་པ་གཏང་བའི་ཕྱིར་ཡོངས་སུ་བསྔོའོ། །གཞན་ཡང་ བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་སེམས་ཅན་གྱི་ཁམས་ལས་སེམས་ཅན་གཅིག་ཀྱང་མ་ཆུད་པ་མེད་པར་བྱས་ཤིང༌། སེམས་ཅན་ཐམས་ཅད་ལ་ འདི་ལྟར་ཡོངས་སུ་བསྔོ་སྟེ། འཇིག་རྟེན་གྱི་ཁམས་གྲངས་མེད་པ་གླང་པོ་ཅན་ཤེས་ཡན་ལག་བདུན་ཤིན་ཏུ་གནས་པ། གསེར་གྱི་རྒྱལ་མཚན་དང༌། གསེར་གྱི་རྒྱན་དང༌། གསེར་ གྱི་དྲ་བས་གཡོགས་པ་དང༌། རིན་པོ་ཆེའི་རྒྱན་ཐམས་ཅད་ཀྱིས་རབ་ཏུ་བརྒྱན་པས་ཡོངས་སུ་གང་བའི་སྦྱིན་པར་བྱེད་པར་གྱུར་ཅིག །འཇིག་རྟེན་གྱི་ཁམས་གྲངས་མེད་པ་རྟའི་རྒྱལ་ པོ་སྤྲིན་ཅེས་བྱ་བ་དང་འདྲ་བ་རྟའི་རྒྱན་ཐམས་ཅད་ཀྱིས་བརྒྱན་པ། རིན་པོ་ཆེའི་རྒྱན་སྡུག་གུ་སྣ་ཚོགས་དང༌། ཡན་ལག་གི་རྒྱན་སྣ་ཚོགས་ཀྱིས་བརྒྱན་པས་ཡོངས་སུ་གང་བའི་སྦྱིན་པ་ བྱེད་པར་གྱུར་ཅིག །འཇིག་རྟེན་གྱི་ཁམས་གྲངས་མེད་པ་བུད་མེད་དང༌། རོལ་མོ་བརྡུང་བ་དང༌། དཀྲོལ་བ་ཡིད་དུ་འོང་བའི་སྐད་དབྱངས་དང་ལྡན་པ་དང་བཅས་པས་ཡོངས་སུ་གང་ ༄༅། །བའི་སྦྱིན་པ་བྱེད་པར་གྱུར་ཅིག །འཇིག་རྟེན་གྱི་ཁམས་གྲངས་མེད་པ་བུ་དང་བུ་མོས་གང་བ་བྱང་ཆུབ་ཀྱི་སེམས་ལ་གནས་ཤིང་ཕྱི་མའི་མཐའི་བསྐལ་པའི་ མུར་ཐུག་པར་སློང་བ་རེ་ལ་ཡང་ཡོངས་སུ་གཏོང་བར་གྱུར་ཅིག །འཇིག་རྟེན་གྱི་ཁམས་གྲངས་མེད་པ་རང་གི་ལུས་ཀྱིས་ཡོངས་སུ་བཀང་སྟེ་བྱང་ཆུབ་ཀྱི་སེམས་ཀྱི་སྟོབས་ཤིན་ ཏུ་བདེ་བའི་ཡིད་ཀྱིས་ཡོངས་སུ་གཏོང་བར་གྱུར་ཅིག །འཇིག་རྟེན་གྱི་ཁམས་གྲངས་མེད་པ་རང་གི་མགོས་ཡོངས་སུ་བཀང་སྟེ་བག་ཡོད་པའི་སེམས་ཀྱིས་ཡོངས་སུ་གཏོང་བར་ གྱུར་ཅིག །འཇིག་རྟེན་གྱི་ཁམས་གྲངས་མེད་པ་རང་གི་ལུས་ལས་བྱུང་བའི་མིག་གིས་ཡོངས་སུ་བཀང་སྟེ་མིག་གི་སྦྱིན་པ་བྱེད་པར་གྱུར་ཅིག །འཇིག་རྟེན་གྱི་ཁམས་གྲངས་མེད་ པ་ཤ་དང་རྐང་གིས་ཡོངས་སུ་བཀང་སྟེ་སྡུག་བསྔལ་གྱིས་ཉམས་པ་མེད་པའི་ཡིད་ཀྱི་དབང་པོས་ཡོངས་སུ་གཏོང་བར་གྱུར་ཅིག །འཇིག་རྟེན་གྱི་ཁམས་གྲངས་མེད་པ་བདག་ དབང་བའི་རྒྱལ་པོའི་སྲིད་དང་སྐྱིད་པས་ཡོངས་སུ་བཀང་སྟེ་སྲིད་ཀྱི་སྦྱིན་པ་བྱེད་པར་གྱུར་ཅིག །འཇིག་རྟེན་གྱི་ཁམས་གྲངས་མེད་པ་བྲན་དང་ལས་བྱེད་པའི་མིས་ཡོངས་སུ་བཀང་ སྟེ་གཏང་བ་ཐམས་ཅད་ཡོངས་སུ་གཏོང་བ་དང༌། མ་འདྲེས་པར་གཏོང་བ་ཆེན་པོའི་སེམས་ལ་གནས་པས་སློང་བ་རེ་རེ་ལ་ཡང་ཡོངས་སུ་གཏོང་བར་གྱུར་ཅིག །དེ་བཞིན་དུ་ སེམས་ཅན་གྱི་ཁམས་ཐམས་ཅད་མ་ལུས་པར་ཡོངས་སུ་བཟུང་སྟེ་སེམས་ཅན་གྱི་ཁམས་ཐམས་ཅད་ལས་གཅིག་ཀྱང་མ་ཆུད་པ་མེད་པར་སློང་བ་གཅིག་ལ་ཇི་ལྟ་བར་སློང་བ་ ཐམས་ཅད་ལའང་དེ་བཞིན་དུ་སེམས་ཅན་རེ་རེ་ཞིང་ཡང་ཕྱི་མའི་མཐའི་བསྐལ་པའི་མུར་ཐུག་པར་ཚིམ་པར་བྱེད་པར་གྱུར་ཅིག །འཇིག་རྟེན་གྱི་ཁམས་གཅིག་ཏུ་ཕྱི་མའི་མཐའི་ བསྐལ་པའི་མུར་ཐུག་པར་བྱང་ཆུབ་སེམས་དཔའི་སྤྱད་པ་སྤྱོད་ཅིང་འཇིག་རྟེན་གྱི་ཁམས་གཅིག་ཏུ་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་ དབྱིངས་ཀྱི་མཐས་གཏུགས་པ་ཐམས་ཅད་དུ་ཡང་སྙིང་རྗེ་ཆེན་པོ་ཡངས་པ་ཡོངས་སུ་རྒྱས་པའི་སེམས་དང༌། སེམས་ཅན་ཐམས་ཅད་ལ་སྙིང་བརྩེ་བས་སེམས་ཅན་ཐམས་ཅད་ལ་རིམ་ གྲོ་བྱེད་པའི་ཚེ་དེའི་རྒྱུས་བདག་གི་སེམས་སྦྱིན་པ་ལས་ཕྱིར་ལྡོག་པར་མ་གྱུར་ཅིག །གཏོང་བའི་སེམས་ཀྱིས་སེ་གོལ་གཏོགས་པ་ཙམ་ཡང་སྐྱོ་བར་མ་གྱུར་ཅིག །དེ་ཡང་འདི་ལྟར་ ཆགས་པ་མེད་པའི་སེམས་དང༌། ཤིན་ཏུ་གཏོང་བའི་སེམས་དང༌། བདག་ཉིད་ཡངས་པའི་སེམས་དང༌། ཟབ་པའི་སེམས་དང༌། ལེགས་པར་ཡོངས་སུ་སྡུད་པའི་སེམས་དང༌། མངོན་པར་མ་ཞེན་པའི་སེམས་དང༌། ཆོས་ལ་སྲོག་མེད་པའི་སེམས་དང༌། ཡིད་ཤིན་ཏུ་ཐུལ་བའི་སེམས་དང༌། མ་འཁྲུགས་པའི་སེམས་དང༌། གཡེང་བ་མེད་པའི་སེམས་དང༌། ༄༅། །རིན་པོ་ཆེའི་རིགས་སྣ་ཚོགས་ཐོབ་པའི་སེམས་དང༌། ལས་ཀྱི་རྣམ་པར་སྨིན་པ་ཐམས་ཅད་ལ་རེ་བ་མེད་པའི་སེམས་དང༌། ཆོས་ཐམས་ཅད་མ་ལུས་ པར་མངོན་པར་འཚང་རྒྱ་བར་བྱ་བའི་སེམས་དང༌། བསྔོ་བ་ཆེན་པོའི་རྗེས་སུ་འབྲང་བའི་སེམས་དང༌། དོན་གྱི་ཆོས་ཤིན་ཏུ་རྟོགས་པའི་སེམས་དང༌། ཡེ་ཤེས་ཆེན་པོའི་ས་ རབ་ཏུ་ཐོབ་པའི་སེམས་དང༌། སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་ལ་དགོད་པའི་སེམས་དང༌། ཆོས་ཀྱི་སྣང་བ་ཆེན་པོ་ཡང་དག་པར་བསྐྱེད་པའི་སེམས་ དང༌། ཐམས་ཅད་མཁྱེན་པའི་ཡེ་ཤེས་ལ་འཇུག་པ་ཡང་དག་པར་བསྒྲུབས་པའི་སེམས་ཀྱིས་སྦྱིན་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་ པོ་སེམས་ཀྱི་སྐད་ཅིག་རེ་རེ་ལ་ཉེ་བར་བསགས་པའི་དགེ་བའི་རྩ་བ་དེ་དག་ཡོངས་སུ་བསྔོ་སྟེ། སེམས་ཅན་དེ་དག་ལོངས་སྤྱོད་ཀྱིས་ཕོངས་པ་མེད་པ་ཡོངས་སུ་རྫོགས་པར་ བྱ་བའི་ཕྱིར་ཡོངས་སུ་བསྔོའོ། །དེ་དག་གི་བསོད་ནམས་མི་ཟད་པ་ཡང་དག་པར་བསྡུ་བའི་ཕྱིར་ཡོངས་སུ་བསྔོའོ། །དེ་དག་གིས་བདེ་བར་གཏོགས་པའི་བདེ་བ་ཐམས་ཅད་རབ་ཏུ་ ཐོབ་པར་བྱ་བའི་ཕྱིར་ཡོངས་སུ་བསྔོའོ། །དེ་དག་གི་བྱང་ཆུབ་སེམས་དཔའ་སེམས་དཔའ་ཆེན་པོའི་ལས་ཀྱི་ཚོགས་ཀྱི་ཕྱིར་ཡོངས་སུ་བསྔོའོ། །དེ་དག་གིས་ཆོས་ཐམས་ཅད་ཀྱི་ཕུང་ པོ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །དེ་དག་ཐེག་པ་ཐམས་ཅད་ལས་ཕྱིར་མི་ལྡོག་པར་བྱ་བའི་ཕྱིར་ཡོངས་སུ་བསྔོའོ། །དེ་དག་གིས་སངས་རྒྱས་ཐམས་ཅད་ མཐོང་ཞིང་མཆོད་པ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །དེ་དག་སེམས་ཅན་གྱི་ཁམས་ཐམས་ཅད་དུ་ཉམས་པ་མེད་པའི་ཕྱིར་ཡོངས་སུ་བསྔོའོ། །དེ་དག་སེམས་ ཅན་ཐམས་ཅད་ལ་སེམས་ཉམས་པས་རྣམ་པར་དག་པར་འགྱུར་བའི་ཕྱིར་ཡོངས་སུ་བསྔོའོ། །དེ་དག་སེམས་ཅན་ཐམས་ཅད་ཀྱི་མི་ཁོམ་བ་རྣམ་པར་སྤོང་ཞིང་ཐམས་ཅད་མཁྱེན་ པའི་ཡེ་ཤེས་ལ་རབ་ཏུ་དགོད་པར་བྱ་བའི་ཕྱིར་ཡོངས་སུ་བསྔོའོ། །དེ་ལྟར་ཡོངས་སུ་བསྔོའོ་བའི་ཚེ་ཡིད་བདེ་ཞིང་སེམས་རབ་ཏུ་དགའ་བས་ཡོངས་སུ་བསྔོ་སྟེ། འདི་ལྟར་སེམས་ཅན་ ཐམས་ཅད་ལ་ཕན་པ་དང་བདེ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ལ་མཉམ་པའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ལ་གཏོང་བའི་ སེམས་ལས་སུ་རུང་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ལ་གཏོང་བ་ཡང་དག་པར་བསྡུས་པའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ མངོན་པར་མགུ་བར་གཏང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་དབུལ་བ་བཟློག་པའི་ཕྱིར་གཏོང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ ༄༅། །ཅན་ཐམས་ཅད་ནོར་ཐམས་ཅད་ཀྱིས་བསྡུ་བའི་ཕྱིར་གཏོང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ལ་ནོར་གྲངས་མེད་པར་ གཏོང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ལ་གཏོང་བ་མཐའ་ཡས་པ་ཐམས་ཅད་ཡོངས་སུ་གཏོང་བའི་སེམས་ལ་གནས་ཏེ་ཡོངས་ སུ་བསྔོའོ། །སེམས་ཅན་ཐམས་ཅད་ལ་ཕྱི་མའི་མཐའི་བསྐལ་པའི་མུར་ཐུག་པར་རྒྱུན་ཆད་པ་མེད་པར་གཏོང་བའི་སེམས་ལ་རྒྱུན་འཆད་པ་མེད་པར་གནས་ཏེ་ཡོངས་སུ་ བསྔོའོ༑ ༑སེམས་ཅན་ཐམས་ཅད་ལ་ནོར་ཐམས་ཅད་འགྱོད་པ་མེད་པར་སྦྱིན་པ་དང༌། མཛོད་ཐམས་ཅད་སྐྱོ་བ་མེད་པར་གཏོང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ ཅན་ཐམས་ཅད་ལ་དངོས་པོ་ཐམས་ཅད་སྦྱིན་ཞིང་གཏོང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་རྗེས་སུ་འགྲོ་བའི་གཏོང་བའི་སེམས་ལ་གནས་ཏེ་ ཡོངས་སུ་བསྔོའོ། །སེམས་ཅན་ཐམས་ཅད་ལ་ཕན་གདགས་པའི་ཕྱིར་གཏོང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ལ་ནོར་མང་པོ་རྒྱ་ཆེ་བ་ཡངས་ པ་གཏང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་རྒྱན་དུ་མས་རིམ་གྲོ་བྱ་བའི་ཕྱིར་གཏོང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ ཐམས་ཅད་ལ་ཐོགས་པ་མེད་པར་གཏོང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ལ་ཐ་བ་མེད་པར་གཏང་བའི་སེམས་ལ་གནས་ཏེ་ཡོངས་སུ་བསྔོའོ། ། སེམས་ཅན་ཐམས་ཅད་ལ་སྟོབས་ཆེན་པོ་ཤིན་ཏུ་བདོ་བ་རྡོ་རྗེས་གཏང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ལ་ཉི་མ་ལྟར་སྙོམས་པའི་འོད་ཟེར་གྱིས་ གཏང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ལ་སངས་རྒྱས་ཀྱི་ཡེ་ཤེས་བསྒྲུབ་པའི་ཕྱིར་གཏོང་བའི་སེམས་ལ་གནས་ཏེ་ཡོངས་སུ་བསྔོའོ། །སེམས་ཅན་ ཐམས་ཅད་ཀྱི་ཐེག་པ་ཆེན་པོའི་དགེ་བའི་རྩ་བ་ཡོངས་སུ་རྫོགས་པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ལ་སངས་རྒྱས་ཀྱི་ཡེ་ཤེས་སྒྲུབ་པའི་དགེ་བའི་རྩ་བ་ མངོན་དུ་གྱུར་པ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་དང་བསམ་པ་ཐ་དད་པ་མེད་པ་ཡོངས་སུ་རྫོགས་པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ ཅད་ཀྱི་དགེ་བའི་རྩ་བ་ཤིན་ཏུ་རྣམ་པར་དག་པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་ཐེ་ཚོམ་ཐམས་ཅད་བསལ་ཞིང་དགག་པ་ལ་གནས་ཏེ་ཡོངས་སུ་ བསྔོའོ། །སེམས་ཅན་ཐམས་ཅད་ཡེ་ཤེས་དང་ཡོན་ཏན་མཉམ་པས་རྣམ་པར་དག་པར་འགྱུར་བར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་བསོད་ནམས་ ༄༅། །ཐམས་ཅད་ཡོངས་སུ་རྫོགས་པར་བྱ་བ་མི་འཕྲོག་པ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱིས་མི་གཡོ་བའི་ཏིང་ངེ་འཛིན་རྣམ་པར་དག་ པ་ཡོངས་སུ་རྫོགས་པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་ཐ་དད་པ་མེད་པ་ལ་ཡོངས་སུ་བསྔོ་བར་བྱ་བ་ལ་གནས་ཏེ་ཡོངས་ སུ་བསྔོའོ། །སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའི་སྤྱོད་པ་དང༌། རྣམ་པར་འཕྲུལ་བ་མཐའ་ཡས་པ་ཡོངས་སུ་རྫོགས་པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ ཅན་ཐམས་ཅད་ཀྱི་དགེ་བའི་རྩ་བ་གནས་མེད་པ་ཡང་དག་པར་སྒྲུབ་པ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱིས་འདས་པ་དང༌། མ་བྱོན་པ་དང༌། ད་ལྟར་བྱུང་བའི་ སངས་རྒྱས་ཐམས་ཅད་རྗེས་སུ་དྲན་པ་རྣམ་པར་དག་པ་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་དགེ་བའི་རྩ་བ་དམ་པ་མངོན་པར་སྐྱེས་པས་རྣམ་པར་དག་ པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་བདུད་ཀྱི་ལས་དང༌། སྒྲིབ་པ་དང༌། བར་དུ་གཅོད་པའི་ཆོས་ཐམས་ཅད་བསལ་ཞིང་དགག་པ་ལ་གནས་ཏེ་ ཡོངས་སུ་བསྔོའོ། །སེམས་ཅན་ཐམས་ཅད་ཀྱི་ཡོན་ཏན་གྱི་སྤྱོད་པ་མཐའ་ཡས་པ་མངོན་པར་སྐྱེས་པ་མཉམ་ཞིང་རྣམ་པར་དག་པ་ཡོངས་སུ་རྫོགས་པར་བྱ་བ་ལ་གནས་ཏེ་ཡོངས་སུ་ བསྔོའོ༑ ༑སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཐུགས་རླབས་པོ་ཆེ་ཡིད་ལ་བྱ་བ་དང་མི་འབྲལ་བར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་སངས་ རྒྱས་ཐམས་ཅད་མཉེས་པར་བྱ་བ་ལ་བརྩོན་པའི་སེམས་དང་མི་འབྲལ་བར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱིས་གོ་སྐབས་རྙེད་ཅིང་དགེ་བའི་རྩ་བ་སྐྱོན་ མེད་པ་དང༌། ཆོས་དཀར་པོ་ཐམས་ཅད་ཀྱི་མཉམ་པ་ཉིད་རྣམ་པར་དག་པ་ཡོངས་སུ་རྫོགས་པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་ཤིན་ཏུ་རྒྱ་ཆེ་ཞིང་ མཐའ་ཡས་པའི་སེམས་དང་བསམ་པ་རླབས་པོ་ཆེ་མཉམ་པ་ཉིད་ཀྱིས་རྣམ་པར་དག་པ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་གཏོང་བའི་སེམས་རྣམ་པར་དག་ ཅིང་མཉམ་པ་ཉིད་དུ་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་སངས་རྒྱས་ཀྱི་ཚུལ་ཁྲིམས་དང༌། ནན་ཏན་མཉམ་པ་ཉིད་ཀྱིས་རྣམ་པར་དག་པར་བྱ་བ་ལ་ གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་བརྩོན་འགྲུས་ཆེན་པོའི་ཕུང་པོ་བརྩོན་འགྲུས་ཐམས་ཅད་མཉམ་པ་ཉིད་དུ་གྱུར་པའི་རྒྱུད་འཚོབ་པར་བྱ་བ་ལ་གནས་ཏེ་ཡོངས་ སུ་བསྔོའོ། །སེམས་ཅན་ཐམས་ཅད་བཟོད་པའི་ཕ་རོལ་ཏུ་ཕྱིན་པ་ཆེན་པོ་རབ་ཏུ་ཐོབ་པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་བསམ་གཏན་མཐའ་ཡས་ ༄༅། །པས་རྣམ་པར་ཕྱེ་བའི་ཡེ་ཤེས་དང༌། མངོན་པར་ཤེས་པ་དང་ལྡན་པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱིས་ཆོས་ཀྱི་སྐུ་ ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་ཆོས་ཀྱི་དབྱིངས་ཀྱི་མཐའ་ཡས་པ་རྣམ་པར་དག་ཅིང་མཉམ་ པ་ཉིད་དུ་ཡོངས་སུ་རྫོགས་པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་ཀྱི་མངོན་པར་ཤེས་པ་ཐམས་ཅད་ཀྱི་དགེ་བའི་རྩ་བ་རྣམ་པར་དག་པ་ཡོངས་སུ་རྫོགས་ པར་བྱ་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་སྤྱོད་པ་མཐུན་པས་ཡང་དག་པར་འབྱུང་ཞིང་ཆོས་ཡང་དག་པར་སྒྲུབ་པ་མཉམ་པ་ཉིད་ཀྱིས་ཡོངས་སུ་རྫོགས་ པར་འགྱུར་བ་ལ་གནས་ཏེ་ཡོངས་སུ་བསྔོའོ། །སེམས་ཅན་ཐམས་ཅད་སངས་རྒྱས་ཐམས་ཅད་ཀྱི་ཡུལ་ལ་འཇུག་པ་ཡོངས་སུ་རྫོགས་པར་བྱ་བ་ལ་གནས་ཏེ་ཡོངས་སུ་བསྔོའོ། །དེ་ ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་འདི་ལྟར་སེམས་ཅན་ཐམས་ཅད་ཀྱི་ལུས་ཀྱི་ལས་མཉམ་ཞིང་རྣམ་པར་དག་པར་འགྱུར་བ་དང༌། སེམས་ ཅན་ཐམས་ཅད་ཀྱི་དག་གི་ལས་མཉམ་ཞིང་རྣམ་པར་དག་པར་འགྱུར་བ་དང༌། སེམས་ཅན་ཐམས་ཅད་ཀྱི་ཡིད་ཀྱི་ལས་མཉམ་ཞིང་རྣམ་པར་དག་པར་འགྱུར་བ་དང༌། སེམས་ ཅན་ཐམས་ཅད་ཀྱི་དགེ་བའི་ལས་རྣམ་པར་སྨིན་པ་མཉམ་ཞིང་རྣམ་པར་དག་པར་འགྱུར་བ་དང༌། སེམས་ཅན་ཐམས་ཅད་ཀྱི་ཆོས་ཁོང་དུ་ཆུད་པ་མཉམ་ཞིང་རྣམ་པར་དག་པར་ འགྱུར་བ་དང༌། སེམས་ཅན་ཐམས་ཅད་ཀྱི་དོན་ཁོང་དུ་ཆུད་པ་རྣམ་པར་དག་པར་འགྱུར་བ་དང༌། སེམས་ཅན་ཐམས་ཅད་ཀྱི་སྤྱོད་པ་ཁོང་དུ་ཆུད་པ་རྣམ་པར་དག་པར་འགྱུར་བ་དང༌། སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའི་སྨོན་ལམ་ཁོང་དུ་ཆུད་པ་རྣམ་པར་དག་པར་འགྱུར་བ་དང༌། སེམས་ཅན་ཐམས་ཅད་ཀྱི་ཡོན་ཏན་ཐམས་ཅད་འཐོབ་པའི་ཡེ་ཤེས་ཁོང་ དུ་ཆུང་པ་རྣམ་པར་དག་པ་འགྱུར་བ་དང༌། སེམས་ཅན་ཐམས་ཅད་ཀྱི་རྒྱུད་གཅིག་ཏུ་གྱུར་པའི་དགེ་བའི་རྩ་བ་ཐམས་ཅད་ཐམས་ཅད་མཁྱེན་པའི་ཐེག་པ་ལས་འབྱུང་བར་ཡོངས་སུ་ བསྔོ་བ་མཉམ་པ་ཉིད་ཀྱིས་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་ཞིང་རྣམ་པར་དག་པ་ཐམས་ཅད་མཐོང་བ་དང༌། འཇུག་པ་དང༌། ཉམས་སུ་མྱོང་བ་ མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱིས་སངས་རྒྱས་ཐམས་ཅད་མཐོང་བ་མཉམ་པ་ཉིད་ཡོངས་སུ་རྫོགས་པ་སྐྱོན་མེད་པར་བྱ་བ་དང༌། སེམས་ ཅན་ཐམས་ཅད་ཀྱིས་མཚན་དང་དཔེ་བྱད་བཟང་པོ་དང༌། བསོད་ནམས་ཀྱི་རྒྱན་རྣམ་པ་སྣ་ཚོགས་ཐམས་ཅད་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ ༄༅། །ཡན་ལག་དྲུག་ཅུ་དང་ལྡན་པའི་དབྱངས་ཀྱི་རྐྱེན་ཕུན་སུམ་ཚོགས་པའི་གསུང་ཡན་ལག་བརྒྱད་སྟོང་ཕྲག་བརྒྱད་ཀྱིས་བརྒྱན་པ་དང༌། གསུང་གི་ཚུལ་ མཐའ་ཡས་པའི་ཡོན་ཏན་དང་ལྡན་པའི་སངས་རྒྱས་ཀྱི་དབྱངས་ཡང་དག་པར་སྒྲུབ་པ་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་སྟོབས་བཅུའི་རྒྱན་ ཆགས་པ་མེད་པའི་སེམས་ཀྱིས་མཉམ་པར་འགྲུབ་པར་བྱ་བ་དང༌། སངས་རྒྱས་ཀྱི་ཆོས་ཀྱི་རྒྱན་མི་འཕྲོག་པ་ཐམས་ཅད་དང༌། ཐ་དད་པ་ཡང་དག་པར་ཤེས་པ་མཉམ་པ་ ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་བླ་ན་མེད་པའི་མི་འཇིགས་པས་ཁྱུ་མཆོག་དང༌། སེངྒེའི་ང་རོ་མཉམ་པ་ཉིད་སྒྲོག་པར་བྱ་བ་དང༌། སེམས་ ཅན་ཐམས་ཅད་ཆོས་ཀྱི་འཁོར་ལོ་ཐོགས་པ་མེད་ཅིང་ཕྱིར་མི་ལྡོག་པ་རབ་ཏུ་བསྐོར་བས་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བ་དང༌། སེམས་ཅན་ཐམས་ཅད་ ཀྱིས་ཆོས་ཐམས་ཅད་མངོན་པར་སྒྲུབ་པ་ལ་འཇུག་པ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱིས་དགེ་བའི་རྩ་བའི་ལས་ཐམས་ཅད་ རྣམ་པར་དག་པས་དུས་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱིས་བླ་ན་མེད་པའི་དེད་དཔོན་ཡོངས་སུ་གྲུབ་ཅིང་རྣམ་པར་དག་པས་ མཉམ་པ་ཉིད་དུ་བྱ་བ་དང༌། སེམས་ཅན་ཐམས་ཅད་ཀྱིས་རྒྱན་གཅིག་དང༌། རྒྱན་མཐའ་ཡས་པ་དང༌། སངས་རྒྱས་ཐམས་ཅད་ཀྱི་རྒྱན་མཉམ་པ་ཉིད་ཡོངས་སུ་རྫོགས་པར་ བྱ་བ་དང༌། སེམས་ཅན་ཐམས་ཅད་ཀྱིས་དུས་ཐམས་ཅད་མཉམ་པས་དུས་གསུམ་གྱི་དཀྱིལ་འཁོར་གྱི་རྗེས་སུ་འགྲོ་བའི་ཡིད་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་སངས་རྒྱས་ཀྱི་ཞིང་ཐམས་ཅད་དུ་འདོད་ཞིང་ཆོས་བསྟན་པ་དོན་དུ་གཉེར་བའི་སྐྱེ་མཆེད་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ ཐམས་ཅད་ཐམས་ཅད་མཁྱེན་པ་ལ་ཕན་པའི་རིམ་གྲོ་རྟག་ཏུ་བྱེད་པར་ཤེས་པའི་རྗེས་སུ་འདོད་པར་བྱ་བ་དང༌། སེམས་ཅན་ཐམས་ཅད་ཀྱིས་ཆོས་ཐམས་ཅད་རྣམ་པར་མཐོང་ བའི་ཡེ་ཤེས་ཀྱིས་ཐམས་ཅད་མཐོང་བ་དང་ལྡན་པ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་མི་གཡོ་བའི་ལས་ཀྱི་ལམ་ཐམས་ཅད་ཀྱི་རྣམ་པར་ སྨིན་པ་སྒྲིབ་པ་མེད་པ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་དབང་པོ་ཐམས་ཅད་ལ་འཇུག་པའི་དབང་པོའི་མངོན་པར་ཤེས་པ་སྣ་ཚོགས་ཀྱིས་ འགྲོ་བ་ཐམས་ཅད་ཀྱི་དབང་པོ་ཤེས་པ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་རྣམ་པར་དབྱེ་བ་མེད་པའི་ཡེ་ཤེས་མཉམ་པ་ཉིད་ཀྱིས་མཉམ་ ༄༅། །པ་ཉིད་གཅིག་ཅིང་རྣམ་པར་དག་པ་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་དགེ་བའི་རྩ་བ་མི་མཐུན་པ་མེད་ཅིང་མཐུན་པ་ ཐམས་ཅད་མཉམ་པ་ཉིད་དུ་རྣམ་པར་ཕྱེ་བ་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའི་རྫུ་འཕྲུལ་དང་ཆོ་འཕྲུལ་ཆེན་པོ་ཅན་གྱི་ རྫུ་འཕྲུལ་ཁོང་དུ་ཆུད་པ་རབ་ཏུ་འཐོབ་པའི་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱིས་སངས་རྒྱས་ཀྱི་ཡོན་ཏན་ཟད་མི་ཤེས་པ་དང༌། ཐམས་ཅད་མཁྱེན་པའི་བསོད་ནམས་གཅིག་ཏུ་མཉམ་པ་རབ་ཏུ་ཐོབ་པར་བྱ་བ་དང༌། སེམས་ཅན་ཐམས་ཅད་ཆོས་ཐམས་ཅད་མཉམ་པ་ཉིད་ཁོང་དུ་ཆུད་པ་དང་མི་ འབྲལ་ཞིང་བྱང་ཆུབ་ཏུ་སེམས་བསྐྱེད་པ་ཡོངས་སུ་ཤེས་པར་བྱ་བ་དང༌། སེམས་ཅན་ཐམས་ཅད་སྦྱིན་པའི་གནས་ཀྱི་དམ་པར་གྱུར་ཏེ་དམ་པའི་ཆོས་མཐོང་བ་ཡོངས་ སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱིས་མཐུ་ཆེན་པོས་སྦྱིན་པ་རྣམ་པར་དག་ཅིང་སྙིང་རྗེ་ཆེན་པོ་མཉམ་པ་ཉིད་རབ་ཏུ་འཐོབ་པར་བྱ་བ་དང༌། སེམས་ ཅན་ཐམས་ཅད་ཀྱི་ཟིལ་གྱིས་མ་ནོན་ཅིང་བཟོད་པར་དཀའ་བའི་གཟི་བརྗིད་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་ཐུབ་པར་དཀའ་ ཞིང་བལྟ་ན་དོན་ཡོད་པ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་ཕམ་པ་མེད་པའི་སེམས་དང༌། ཡིད་དང་བསམ་པ་མཉམ་པ་ཉིད་ཡོངས་སུ་རྫོགས་ པར་བྱ་བ་དང༌། སེམས་ཅན་ཐམས་ཅད་ཀྱི་ཆོས་འབྱམས་ཀླས་པ་ཐམས་ཅད་ལ་དོགས་པ་མེད་པར་ཞུགས་ཏེ་ཁོང་དུ་ཆུད་པར་བྱ་བ་དང༌། སེམས་ཅན་ཐམས་ཅད་འཇིག་རྟེན་གྱི་ཁམས་ཐམས་ ཅད་དུ་འོད་དང་འོད་ཟེར་གཅིག་རབ་ཏུ་གཏོང་བ་མཉམ་པ་ཉིད་ལ་འཇུག་པར་བྱ་བ་དང༌། སེམས་ཅན་ཐམས་ཅད་ཐོགས་པ་མེད་པར་བྱང་ཆུབ་སེམས་དཔའ་ཐམས་ཅད་ཀྱི་བརྩོན་འགྲུས་བརྩམས་པ་མཐར་ཕྱིན་པར་ བྱ་བ་མཉམ་པ་ཉིད་ལ་ནན་ཏན་བྱེད་པར་བྱ་བ་དང༌། སེམས་ཅན་ཐམས་ཅད་ཀྱི་སྤྱོད་པ་གཅིག་པ་དང༌། སྨོན་ལམ་མཐུན་པ་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་བརྗོད་པ་གཅིག་དང༌། འབྱུང་ བ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་བྱང་ཆུབ་སེམས་དཔའ་ཐམས་ཅད་ཀྱི་ལྷག་པའི་བསམ་པ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་ དགེ་བའི་བཤེས་གཉེན་ཐམས་ཅད་མཐོང་ཞིང་མགུ་བར་བྱ་བ་མཉམ་པ་ཉིད་རབ་ཏུ་ཐོབ་པར་བྱ་བ་དང༌། སེམས་ཅན་ཐམས་ཅད་ཀྱི་བྱང་ཆུབ་སེམས་དཔའི་སྤྱོད་པ་ཐམས་ཅད་དང༌། སེམས་ཅན་ཐམས་ཅད་གདུལ་ བ་རྒྱུན་མི་འཆད་པ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་ཐོགས་པ་མེད་པར་ཆོས་བསྟན་པ་དབྱངས་ཀྱི་ཡན་ལག་ཐམས་ཅད་དུ་གྲག་པ་མཉམ་པ་ཉིད་ལ་འཇུག་པ་ཡོངས་སུ་ ༄༅། །རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་སེམས་དང་ཤེས་པ་ཐམས་ཅད་སེམས་དང་ཤེས་པ་གཅིག་ཏུ་ཡོངས་སུ་བསྔོ་བའི་དགེ་བའི་རྩ་བ་མཉམ་པ་ཉིད་ཡོངས་སུ་རྫོགས་པར་བྱ་བ་ དང༌། སེམས་ཅན་ཐམས་ཅད་ཀྱི་རྣམ་པར་བྲལ་བ་མེད་པའི་དགེ་བའི་རྩ་བ་ཐམས་ཅད་ཡང་དག་པར་བསགས་པ་མཉམ་པ་ཉིད་ལ་སེམས་ཅན་ཐམས་ཅད་རབ་ཏུ་དགོད་པར་བྱ་བ་དང་ལྡན་པའི་ཡེ་ཤེས་རྣམ་པར་དག་པར་ བྱ་བ་དང༌། སེམས་ཅན་ཐམས་ཅད་ཀྱི་ཐམས་ཅད་མཁྱེན་པའི་བསོད་ནམས་ཀྱི་ལྷུན་མཉམ་པ་ཉིད་རྣམ་པར་དག་པར་བྱ་བ་དང༌། སེམས་ཅན་ཐམས་ཅད་ཀྱི་རྨོངས་པ་མེད་པར་སེམས་ཅན་ཐམས་ཅད་ཀྱི་དགེ་བའི་རྩ་བ་བསམས་ ཤིང་ཡོངས་སུ་བསྔོ་བ་ཤིན་ཏུ་གྲུབ་པར་འགྱུར་བའི་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱི་ཐམས་ཅད་མཁྱེན་པ་ཉིད་དུ་མངོན་པར་འཚང་རྒྱ་བ་མཉམ་པ་ཉིད་ཡོངས་སུ་འགྲུབ་ཅིང་ཡོངས་སུ་རྫོགས་ པར་བྱ་བ་དང༌། སེམས་ཅན་ཐམས་ཅད་ཀྱི་འབྱུང་བ་ཐམས་ཅད་མི་མཉམ་པ་མེད་པ་དང༌། མངོན་པར་ཤེས་པ་དང༌། ཡེ་ཤེས་ཀྱི་འབྱུང་བ་ཐམས་ཅད་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ ཅན་ཐམས་ཅད་འཁོར་གཅིག་རྣམ་པར་དག་པ་འཁོར་ཐམས་ཅད་རྣམ་པར་དག་པར་བྱེད་པའི་ཡེ་ཤེས་མཉམ་པ་ཉིད་ཀྱིས་བརྒྱན་པ་དང༌། སེམས་ཅན་ཐམས་ཅད་ཀྱི་སངས་རྒྱས་ཀྱི་ཞིང་ཐམས་ཅད་སངས་རྒྱས་ཀྱི་ཞིང་ གཅིག་དང་མཉམ་པ་ཉིད་དུ་མཐོང་བ་དང་ལྡན་པར་བྱ་བ་དང༌། སེམས་ཅན་ཐམས་ཅད་ཀྱི་ལྷབ་ལྷུབ་ཐམས་ཅད་དང༌། ལྷབ་ལྷུབ་བརྗོད་དུ་མེད་པ་དང༌། ལྷབ་ལྷུབ་མཐའ་ཡས་པ་དང༌། ལྷབ་ལྷུབ་མུ་མེད་པ་དང༌། སངས་རྒྱས་ཀྱི་ཞིང་ཐམས་ཅད་རྒྱན་གྱིས་རབ་ཏུ་བརྒྱན་པར་བྱ་བའི་ལྷབ་ལྷུབ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ ཐམས་ཅད་ཀྱིས་ཆོས་ཐམས་ཅད་རྣམ་པར་རྟོགས་ཤིང་མཁས་པ་དང༌། དོན་དམ་པར་རྟོགས་པ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཀྱིས་ སངས་རྒྱས་ཐམས་ཅད་ཀྱི་རྣམ་པར་འཕྲུལ་བ། རྣམ་པའི་མཆོག །རྣམ་པ་དམ་པ། རྣམ་པ་ཐམས་ཅད་དང་ལྡན་པ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ ཐམས་ཅད་ཀྱིས་རྣམ་པ་ཐ་དད་པ་མེད་ཅིང་རྣམ་པ་ཐ་དད་པ་དང་བྲལ་བའི་མངོན་པར་ཤེས་པ་དང༌། བསོད་ནམས་དང་ཡོན་ཏན་མཉམ་པ་ཉིད་རབ་ཏུ་ཐོབ་པར་བྱ་བ་དང༌། སེམས་ཅན་ ཐམས་ཅད་ཀྱིས་ཆོས་མི་མཉམ་པ་མེད་པའི་དགེ་བའི་རྩ་བ་མཉམ་པ་དང་ལྡན་པའི་སངས་རྒྱས་ཐམས་ཅད་ཀྱི་དབང་བསྐུར་བས་དབང་བསྐུར་བ་གཅིག་ཏུ་ལེགས་པར་དབང་བསྐུར་ བ་མཉམ་པ་ཉིད་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་ཚུར་ཟིལ་གྱིས་གནོན་ཅིང་ཕར་ཟིལ་གྱིས་མི་ནོན་པའི་སེམས་ཅན་ཐམས་ཅད་ཀྱི་ཡེ་ཤེས་དང༌། ལུས་ རྣམ་པར་དག་པ་ཡོངས་སུ་རྫོགས་པ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་བརྩེ་བ་དང་ལྡན་པ། ཕན་པར་དགའ་བ། སྙིང་ ༄༅། །རྗེ་ཆེན་པོ་ཅན། སེམས་ཅན་ཐམས་ཅད་རྣམ་པར་དག་པར་བྱ་བ་ལ་ཡང་དག་པར་ཞུགས་པ། ཕྲག་དོག་མེད་པ། སེར་སྣ་མེད་པ། རིགས་དང་ལྡན་པ། རབ་ཏུ་དགེ་བ། ཆེ་བ་ཉིད་དང་ལྡན་པ། ཡངས་པ་ལ་མོས་པ། འཁྲུག་པ་མེད་པ། ཁྲོ་བ་མེད་པ། རྙོག་པ་མེད་པ། རབ་རིབ་མེད་པ། ཁམས་དང་བསམ་པ་ཤིན་ཏུ་གསལ་ བའི་ཡིད་དང་ལྡན་པ། དྲང་པོ། །དྲང་བ། གཡོ་མེད་པ། རྨོངས་པ་མེད་པ། མཆོག་ཏུ་བྱ་བ། མི་ཕྱེད་པ། འདའ་བ་མེད་པར་སྤྱོད་པ། ཕྱིར་མི་ལྡོག་པ། སེམས་ཅན་ཐམས་ ཅད་ལ་སེམས་མཉམ་པ། ཆོས་དཀར་པོའི་སྟོབས་ཀྱི་ཤུགས་དང་ལྡན་པ། མདུད་པ་མེད་པ། ཉམས་པ་མེད་པ། ཆོས་དཀར་པོ་ཐམས་ཅད་ཡོངས་སུ་བསྔོ་བ་ལ་མཁས་པ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་ལ་ཡང་དག་པར་བརྩོན་པ། ལས་ངན་པ་ཐམས་ཅད་འགག་པ། དཀའ་ཐུབ་དང་བརྟུལ་ཞུགས་ཆེན་པོའི་ དགེ་བའི་རྩ་བ་སེམས་ཅན་ཐམས་ཅད་ལ་ཡོངས་སུ་བསྔོ་བ་ལ་མཁས་པ། བརྟུལ་ཞུགས་དང་དཀའ་ཐུབ་ཀྱིས་སེམས་ཅན་ཐམས་ཅད་ཀྱི་དགེ་བའི་རྩ་བ་ཤིན་ཏུ་སྦྱོང་བ། སེམས་ ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་རང་གི་ལུས་ཀྱིས་ལེན་པ། ཡེ་ཤེས་ཆེན་པོའི་མིག་གིས་ཡང་དག་པར་བལྟ་བའི་དགེ་བའི་རྩ་བ་དང་ལྡན་པ། ཡེ་ཤེས་ཀྱི་འབྱུང་གནས་ དགེ་བའི་རྩ་བ་རབ་ཏུ་ཉན་པ། སེམས་ཅན་ཐམས་ཅད་ལ་དགེ་བའི་རྩ་བ་ཡོངས་སུ་བསྔོ་བ། སེམས་ཅན་ཐམས་ཅད་ཡོན་ཏན་རྣམ་པར་དག་པ་ལ་རབ་ཏུ་དགོད་པའི་ཕྱིར་དགེ་བའི་ རྩ་བ་མཉམ་པར་ཡོངས་སུ་བསྔོ་བ། སེམས་ཅན་ཐམས་ཅད་ཀྱི་ཕྱིར་དགེ་བའི་རྩ་བ་ཡོངས་སུ་བསྡུ་བ་ལ་མཁས་པ། དོན་གྱི་རྗེས་སུ་སོང་བའི་ཁམས་ཀྱི་ཡོན་ཏན་མངོན་པར་ཤེས་ བ༑ སེམས་ཅན་ཐམས་ཅད་དང་མཉམ་དུ་དགེ་བའི་རྩ་བ་རྣམ་པར་བྱང་བ་ཡོངས་སུ་བསྔོ་བ། སེམས་ཅན་ཐམས་ཅད་ཀྱི་བསོད་ནམས་ཀྱི་ཞིང་གི་རྣམ་པ་ལ་ཆོས་དཀར་པོའི་ས་བོན་ ལྟ་བུར་གྱུར་པ། དགེ་བའི་རྩ་བ་ཐམས་ཅད་འགྱོད་པ་མེད་པར་ཡོངས་སུ་བསྔོ་བ་དང་ལྡན་པ། སེམས་ཅན་གྱི་ཁམས་ཐམས་ཅད་ཐམས་ཅད་མཁྱེན་པའི་སྐལ་བ་ཡོངས་སུ་བསྔོ་ བས་ཡོངས་སུ་འཛིན་པ། དགེ་བའི་རྩ་བ་ཐམས་ཅད་ཀྱི་སྐལ་བ་དང་ཆོས་ཀྱི་ཆར་འབེབས་པས་དབྱར་གྱི་དུས་སུ་གྱུར་པ། ཡོངས་སུ་བསྔོ་བའི་རིགས་དང་ལྡན་པ་དེ་དགེ་བའི་རྩ་བ་དེ་ དག་འདི་ལྟར་ཡོངས་སུ་བསྔོ་སྟེ། ཅི་ནས་ཀྱང་སེམས་ཅན་ཐམས་ཅད་ཤིན་ཏུ་བདེ་ཞིང་སྐྱིད་པ་དང་ལྡན་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་རྣམ་པར་དག་པར་ འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཤིན་ཏུ་བདེ་བར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཤིན་ཏུ་གྲོལ་བར་འགྱུར་བ་དང༌། ཅི་ནས་ཀྱང་སེམས་ཅན་ ༄༅། །ཐམས་ཅད་མཉམ་པ་ཉིད་དུ་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཤིན་ཏུ་ཤེས་པ་དང་ལྡན་པར་འགྱུར་བ་དང༌། ཅི་ནས་ཀྱང་སེམས་ཅན་ ཐམས་ཅད་ཆོས་དཀར་པོ་ལ་ཤིན་ཏུ་བཀོད་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་ཉམས་པ་མེད་པའི་མིག་དང་ལྡན་པར་འགྱུར་བ་དང༌། ཅི་ནས་ཀྱང་ སེམས་ཅན་ཐམས་ཅད་ཤིན་ཏུ་དུལ་བའི་ཡིད་དང་ལྡན་པར་འགྱུར་བ་དང༌། ཅི་ནས་ཀྱང་སེམས་ཅན་ཐམས་ཅད་སྟོབས་བཅུའི་འདུལ་བ་དང་ལྡན་པར་འགྱུར་བར་ཡོངས་སུ་བསྔོ་ སྟེ༑ དེ་ལྟར་ཡོངས་སུ་བསྔོ་བ་ཡང་ལས་ཀྱི་གནས་སུ་ཡོངས་སུ་མི་བསྔོའོ། །རྣམ་པར་སྨིན་པའི་གནས་སུ་མ་ཡིན་ནོ། །ལུས་ཀྱི་གནས་སུ་མ་ཡིན་ནོ། །དངོས་པོའི་གནས་སུ་ མ་ཡིན་ནོ། །ཞིང་གི་གནས་སུ་མ་ཡིན་ནོ། །ཕྱོགས་ཀྱི་གནས་སུ་མ་ཡིན་ནོ། །སེམས་ཅན་ཐམས་ཅད་ཀྱི་གནས་སུ་ཡོངས་སུ་མི་བསྔོའོ། །སེམས་ཅན་ཐམས་ཅད་ཀྱི་གནས་ ལས་གུད་དུ་འཕགས་པར་ཡང་ཡོངས་སུ་མི་བསྔོའོ། །མངོན་པར་ཞེན་པ་ཐམས་ཅད་ལས་གུད་དུ་འཕགས་པར་ཡང་ཡོངས་སུ་མི་བསྔོ་སྟེ། མངོན་པར་ཞེན་པའི་ཆོས་ཡོངས་ སུ་ཤེས་པར་བྱ་བའི་ཕྱིར་ཡོངས་སུ་བསྔོའོ། །དེ་ལྟར་དགེ་བའི་རྩ་བ་དེ་དག་སེམས་ཅན་ཐམས་ཅད་ལ་ཡོངས་སུ་བསྔོ་ཞིང་སྟོབ་པ། འཇིག་རྟེན་ཐམས་ཅད་ངེས་པར་བྱེད་པ། ། སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བྱེད་པ། བསམ་པ་མཉམ་པས་སེམས་ལས་སུ་རུང་བར་བྱས་པ། ཤིན་ཏུ་དག་པ། ཤིན་ཏུ་བརྟགས་པ། ཤེས་རབ་དང་ཡེ་ཤེས་ དང་ལྡན་པ། ནང་མཉམ་པར་གཞག་པ་དང་ལྡན་པ། ཕྱི་རོལ་གྱི་དམིགས་པ་ཤིན་ཏུ་རྟོགས་པ། འདས་པ་དང༌། མ་འོངས་པ་དང༌། ད་ལྟར་བྱུང་བའི་མཐར་ཕྱིན་པ། སངས་རྒྱས་ ཀྱི་རིགས་ཤིན་ཏུ་གསལ་བ་དང་ལྡན་པ་དེ་ཡོངས་སུ་བསྔོ་བ་དེས་དེ་ལྟར་ཡོངས་སུ་བསྔོ་བའི་ཚེ་ཚུར་ཟིལ་གྱིས་གནོན་ལ་ཕར་ཟིལ་གྱིས་མི་གནོན་པ་ཡིན། ཡོན་ཏན་མི་ཟད་པ་ཡིན། འགྲོ་བ་ཐམས་ཅད་དུ་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་ལ་བརྩོན་པ་ཡིན། ཞིང་ཐམས་ཅད་ན་བཞུགས་པའི་སངས་རྒྱས་ཀྱང་ཚེགས་ཆུང་དུས་མིག་ལམ་དུ་སྣང་བར་མཐོང་ བ་ཡིན༑ འཇིག་རྟེན་གྱི་ཁམས་ཐམས་ཅད་ན་ཡང་བྱང་ཆུབ་སེམས་དཔའི་སྤྱད་པ་སྤྱོད་པར་སྣང་བ་ཡིན་ཏེ། ཚིག་རབ་ཏུ་ཕྱེ་བ་ཐམས་ཅད་ལ་མཁས་པ་དང་ལྡན་པའི་གཟུངས་ཀྱང་ རབ་ཏུ་ཐོབ་ཅིང་ཁོང་དུ་ཆུད་དོ། །ཕྱི་མའི་མཐའི་བསྐལ་པའི་མུར་ཐུག་པར་རྒྱུན་འཆད་པ་མེད་པའི་ཆོས་བསྟན་པའི་དཀྱིལ་འཁོར་གྱིས་སེམས་ཅན་ཐམས་ཅད་དགའ་བར་བྱ་བ་ཡོངས་སུ་ རྫོགས་པར་བྱེད་པས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་ཡོངས་སུ་སྦྱང་བའི་དོན་དུ་སེམས་ཀྱི་སྐད་ཅིག་རེ་རེ་ལ་མིག་ཡོར་སྣང་བའི་ཚུལ་དུ་སྐྱེ་བ་ཡིན། འཇིག་ ༄༅། །རྟེན་གྱི་ཁམས་ཐམས་ཅད་དུ་སངས་རྒྱས་ཀྱི་ཞིང་ཡོངས་སུ་དག་པ་བརྗོད་དུ་མེད་པའི་ཡང་བརྗོད་དུ་མེད་པ་སེམས་ཀྱི་སྐད་ཅིག་རེ་རེ་ལ་ཡོངས་སུ་རྫོགས་ པར་བྱེད་ཀྱང་སངས་རྒྱས་ཀྱི་ཞིང་ཡོངས་སུ་སྦྱང་བར་རྣམ་པར་དཔྱོད་པའི་ཡེ་ཤེས་ཀྱིས་ངོམས་མི་ཤེས་པ་ཡིན། སེམས་ཅན་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་ཡང་ བརྗོད་དུ་མེད་པ་མཉམ་པ་ཉིད་གང་ལ་བདག་ཉིད་གནས་པ་དེ་ལ་ཡོངས་སུ་རྫོགས་པར་བྱེད་པ་ཡིན། ཡོངས་སུ་སྒྲུབ་པ་ཡིན། ཡོངས་སུ་སྦྱོང་བ་ཡིན། ཕ་རོལ་ཏུ་ཕྱིན་པ་ཐམས་ ཅད་ལ་རབ་ཏུ་བརྩོན་པར་བྱེད་ཅིང་སེམས་ཅན་རྣམས་ཡོངས་སུ་སྡུད་པ་ཡིན། ལས་ཇི་ལྟར་རྣམ་པར་དག་པའི་ཚུལ་བཞིན་དུའང་ཡང་དག་པར་འབྱུང་བ་ཡིན། ཐོགས་པ་ མེད་པའི་རྣ་བ་མངོན་པར་སྒྲུབ་པའང་རབ་ཏུ་འཐོབ་པ་ཡིན། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པར་ཆོས་ཀྱི་འཁོར་ལོ་བསྐོར་ཏེ་ཆོས་མཐའ་ཡས་པ་ བསྟན་ཅིང་བརྗོད་པ་ཐོས་ནས་དེ་དག་ཐམས་ཅད་འཛིན་པ་ཡིན་ཏེ། ཆོས་བསྟན་པ་དེ་ལ་རིང་བའི་འདུ་ཤེས་ཉེ་བར་མི་གཞོག་གོ །སེམས་སྐད་ཅིག་གིས་བྱུང་བ། དངོས་པོ་ མེད་པ་ལ་རབ་ཏུ་གནས་པ། རྟེན་པ་མེད་ཅིང་མངོན་པར་འདུ་བྱ་བ་མེད་པ་དང༌། གནས་པ་མེད་པའི་བྱང་ཆུབ་སེམས་དཔའི་རྫུ་འཕྲུལ་ལ་གནས་ཤིང༌། སངས་རྒྱས་ཀྱི་ཞིང་ བརྗོད་དུ་མེད་པར་འགྲོ་བ་དང༌། སངས་རྒྱས་ཀྱི་ཞིང་མང་པོ་རྣམ་པར་ཕྱེ་བ་ཐམས་ཅད་དུ་འགྲོ་བར་བྱ་བ་ལ་སེ་གོལ་གཏོགས་པ་ཙམ་ཡང་དུས་གང་དུའང་ཐོགས་པ་མེད་པ་ཡིན། བྱང་ ཆུབ་སེམས་དཔའི་སྤྱད་པ་སྤྱོད་པའི་ཚེ་ཡང་སྐལ་པ་མཉམ་པའི་བྱང་ཆུབ་སེམས་དཔའ་མཐོང་བ་དང་ལྡན་པ་ཡིན་ཏེ། ཡོན་ཏན་འདི་དག་དང་གཞན་དག་ཀྱང་རྣམ་པར་དག་ཅིང༌། མཐའ་ དང་དབུས་མེད་པའི་དཀྱིལ་འཁོར་བྱང་ཆུབ་སེམས་དཔའི་སྤྱོད་པ་དང་མཐུན་པ་བརྗོད་དུ་མེད་པའི་ཡང་བརྗོད་དུ་མེད་པ་དང༌། ཟད་མི་ཤེས་པའི་ཡོན་ཏན་དང༌། ལེགས་པ་འཐོབ་པར་ འགྱུར་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བའི་ཚེ་འདི་ལྟ་སྟེ། ཞིང་ཐམས་ཅད་རྣམ་པར་དག་པ་མཉམ་པ་ཉིད་དང༌། སེམས་ཅན་ཐམས་ཅད་ རྣམ་པར་དག་པ་མཉམ་པ་ཉིད་དང༌། ལུས་ཐམས་ཅད་རྣམ་པར་དག་པ་མཉམ་པ་ཉིད་དང༌། དབང་པོ་ཐམས་ཅད་རྣམ་པར་དག་པ་མཉམ་པ་ཉིད་དང༌། ལས་ཀྱི་རྣམ་པར་སྨིན་པ་ ཐམས་ཅད་རྣམ་པར་དག་པ་མཉམ་པ་ཉིད་དང༌། འཁོར་གྱི་དཀྱིལ་འཁོར་ཐམས་ཅད་རྣམ་པར་དག་པ་མཉམ་པ་ཉིད་དང༌། སྤྱོད་པ་ཡོངས་སུ་རྫོགས་པར་བྱ་བ་ཐམས་ཅད་རྣམ་ པར་དག་པ་མཉམ་པ་ཉིད་དང༌། ཆོས་ཐམས་ཅད་ཀྱི་ཚུལ་ལ་འཇུག་པ་རྣམ་པར་དག་པ་མཉམ་པ་ཉིད་དང༌། དེ་བཞིན་གཤེགས་པ་ཐམས་ཅད་ཀྱི་སྨོན་ལམ་ཡོངས་སུ་རྫོགས་ ༄༅། །པར་བྱ་བ་རྣམ་པར་དག་པ་མཉམ་པ་ཉིད་དང༌། སངས་རྒྱས་ཐམས་ཅད་ཀྱི་ཡུལ་གྱིས་རྣམ་པར་འཕྲུལ་པ་ཡང་དག་པར་བསྟན་པ་རྣམ་པར་དག་པ་མཉམ་ པ་ཉིད་འཐོབ་པ་ལྟ་ཅི་སྨོས། བམ་པོ་བཞི་བཅུ་གཅིག་པ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་བསྔོ་བ་འདིས་ཡོངས་སུ་བསྔོ་བའི་ཚེ་ཡོན་ཏན་ གྱི་རྒྱུད་ཀྱི་ཚུལ་རྣམ་པར་དག་པར་བྱ་བ་དང༌། ཡོན་ཏན་ཐམས་ཅད་རབ་ཏུ་བརྒྱན་པར་བྱ་བ་ཡོངས་སུ་རྫོགས་པ་རབ་ཏུ་འཐོབ་སྟེ། དེ་དེ་ལྟར་ཡོངས་སུ་བསྔོ་བ་འདིས་ཡོངས་ སུ་བསྔོ་བའི་ཚེ་སེམས་ཅན་རྣམས་ཞིང་དང་འགལ་བར་མི་བྱེད་དོ། །ཞིང་རྣམས་སེམས་ཅན་དང་འགལ་བར་མི་བྱེད་དོ། །ཞིང་རྣམས་སེམས་ཅན་གྱི་ལས་དང་འགལ་བར་ མི་བྱེད་དོ། །སེམས་ཅན་གྱི་ལས་རྣམས་ཞིང་དང་འགལ་བར་མི་བྱེད་དོ། །བསམ་པ་སེམས་དང་འགལ་བར་མི་བྱེད་དོ། །སེམས་བསམ་པ་དང་འགལ་བར་མི་བྱེད་དོ། །བསམ་ པ་དང་སེམས་དམིགས་པ་དང་འགལ་བར་མི་བྱེད་དོ། །དམིགས་པ་བསམ་པ་དང་སེམས་དང་འགལ་བར་མི་བྱེད་དོ། །ལས་ཀྱི་རྣམ་པར་སྨིན་པ་རྟེན་པ་དང་འགལ་བར་མི་ བྱེད་དོ༑ ༑རྟེན་པ་ལས་ཀྱི་རྣམ་པར་སྨིན་པ་དང་འགལ་བར་མི་བྱེད་དོ། །ལས་བྱ་བ་ལམ་དང་འགལ་བར་མི་བྱེད་དོ། །ལམ་ལས་བྱ་བ་དང་འགལ་བར་མི་བྱེད་དོ། །ཆོས་ཉིད་ མཚན་ཉིད་དང་འགལ་བར་མི་བྱེད་དོ། །མཚན་ཉིད་ཆོས་ཉིད་དང་འགལ་བར་མི་བྱེད་དོ། །ཆོས་རྣམས་སྐྱེ་བའི་རང་བཞིན་དང་འགལ་བར་མི་བྱེད་དོ། །སྐྱེ་བའི་རང་བཞིན་ཆོས་ རྣམས་དང་འགལ་བར་མི་བྱེད་དོ། །ཞིང་གི་མཉམ་པ་ཉིད་སེམས་ཅན་གྱི་མཉམ་པ་ཉིད་དང་འགལ་བར་མི་བྱེད་དོ། །སེམས་ཅན་གྱི་མཉམ་པ་ཉིད་ཞིང་གི་མཉམ་པ་ཉིད་དང་ འགལ་བར་མི་བྱེད་དོ། །སེམས་ཅན་གྱི་མཉམ་པ་ཉིད་ཆོས་ཀྱི་མཉམ་པ་ཉིད་དང་འགལ་བར་མི་བྱེད་དོ། །ཆོས་ཐམས་ཅད་མཉམ་པ་ཉིད་སེམས་ཅན་ཐམས་ཅད་མཉམ་པ་ཉིད་ དང་འགལ་བར་མི་བྱེད་དོ། །སེམས་ཅན་ཐམས་ཅད་མཉམ་པ་ཉིད་ཆོས་ཐམས་ཅད་མཉམ་པ་ཉིད་དང་འགལ་བར་མི་བྱེད་དོ། །འདོད་ཆགས་དང་བྲལ་བའི་མཐའ་མཉམ་པ་ཉིད་ སེམས་ཅན་ཐམས་ཅད་ཀྱི་གནས་མཉམ་པ་ཉིད་དང་འགལ་བར་མི་བྱེད་དོ། །སེམས་ཅན་ཐམས་ཅད་ཀྱི་གནས་མཉམ་པ་ཉིད་འདོད་ཆགས་དང་བྲལ་བའི་མཐའི་མཉམ་པ་ཉིད་ དང་འགལ་བར་མི་བྱེད་དོ། །འདས་པ་མ་འོངས་པ་དང་འགལ་བར་མི་བྱེད་དོ། །མ་འོངས་པ་འདས་པ་དང་འགལ་བར་མི་བྱེད་དོ། །མ་འོངས་པ་དང་འདས་པ་དང་ལྟར་བྱུང་བ་དང་འགལ་ བར་མི་བྱེད་དོ། །ད་ལྟར་བྱུང་བ་མ་འོངས་པ་དང་འདས་པ་དང་འགལ་བར་མི་བྱེད་དོ། །དུས་མཉམ་པ་ཉིད་སངས་རྒྱས་མཉམ་པ་ཉིད་དང་འགལ་བར་མི་བྱེད་དོ། །སངས་རྒྱས་མཉམ་ ༄༅། །པ་ཉིད་དུས་མཉམ་པ་ཉིད་དང་འགལ་བར་མི་བྱེད་དོ། །བྱང་ཆུབ་སེམས་དཔའི་སྤྱོད་པ་ཐམས་ཅད་མཁྱེན་པ་ཉིད་དང་འགལ་བར་མི་བྱེད་དོ། །ཐམས་ཅད་མཁྱེན་ པ་ཉིད་བྱང་ཆུབ་སེམས་དཔའི་སྤྱོད་པ་དང་འགལ་བར་མི་བྱེད་དོ། །དེ་དེ་ལྟར་ཡོངས་སུ་བསྔོ་བའི་ཚེ་ལས་མཉམ་པ་ཉིད་དང་ལྡན་པ་ཡིན། རྣམ་པར་སྨིན་པ་མཉམ་པ་ཉིད་དང་ལྡན་པ་ ཡིན༑ ལུས་མཉམ་པ་ཉིད་དང་ལྡན་པ་ཡིན། ཚུལ་མཉམ་པ་ཉིད་དང་ལྡན་པ་ཡིན། སྨོན་ལམ་མཉམ་པ་ཉིད་དང་ལྡན་པ་ཡིན། སེམས་ཅན་ཐམས་ཅད་མཉམ་པ་ཉིད་དང་ལྡན་པ་ ཡིན༑ ཞིང་ཐམས་ཅད་མཉམ་པ་ཉིད་དང་ལྡན་པ་ཡིན། སྤྱོད་པ་ཐམས་ཅད་མཉམ་པ་ཉིད་དང་ལྡན་པ་ཡིན། ཡེ་ཤེས་ཐམས་ཅད་མཉམ་པ་ཉིད་དང་ལྡན་པ་ཡིན། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་མཉམ་པ་ཉིད་དང་ལྡན་པ་ཡིན། སངས་རྒྱས་ཐམས་ཅད་མངོན་པར་མཉེས་པར་བྱེད་པ་ཡིན། བྱང་ཆུབ་སེམས་དཔའ་ ཐམས་ཅད་མངོན་པར་དགའ་བར་བྱེད་པ་ཡིན། དགེ་བའི་རྩ་བ་ཐམས་ཅད་མངོན་པར་འགྲུབ་པར་བྱེད་པ་ཡིན། སྨོན་ལམ་ཐམས་ཅད་མངོན་པར་འགྲུབ་པར་བྱེད་པ་ཡིན། སེམས་ ཅན་ཐམས་ཅད་ཡོངས་སུ་སྨིན་པར་བྱ་བ་མངོན་པར་འགྲུབ་པར་བྱེད་པ་ཡིན། ལས་ཐམས་ཅད་རབ་ཏུ་རྟོགས་པ་མངོན་པར་འགྲུབ་པར་བྱེད་པ་ཡིན། དགེ་བའི་བཤེས་གཉེན་མཐོང་ ཞིང་བསྙེན་བཀུར་བྱེད་པ་མངོན་པར་འགྲུབ་པར་བྱེད་པ་ཡིན། རྣམ་པར་དག་པ་ཐམས་ཅད་ཀྱི་དཀྱིལ་འཁོར་དང་ལྡན་པ་མངོན་པར་འགྲུབ་པར་བྱེད་པ་ཡིན། ཆོས་ཐམས་ཅད་ཀྱི་ཚུལ་ ལ་འཇུག་པ་མངོན་པར་འགྲུབ་པར་བྱེད་པ་ཡིན། ཆོས་དཀར་པོ་ཐམས་ཅད་ཡོངས་སུ་བསྔོ་བ་རྣམ་པར་དག་པའི་དཀྱིལ་འཁོར་མངོན་པར་འགྲུབ་པར་བྱེད་པ་ཡིན་ཏེ། ཀྱེ་རྒྱལ་བའི་སྲས་ དག །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་འགྲོ་བ་ཐམས་ཅད་མཉམ་པ་ཉིད་དུ་རྗེས་སུ་སོང་བ་ཞེས་བྱ་བ་སྟེ། བདུན་པའོ། །ཡོངས་སུ་བསྔོ་ བ་དེ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། འདོད་པ་ཐམས་ཅད་ཀྱི་ཚེར་མ་དང་བྲལ་ཞིང་ཕྱིར་རྒོལ་བ་རབ་ཏུ་བཅོམ་པ་ཡིན། རྒྱུད་ཀྱི་ཚུལ་གཅིག་ཏུ་གྱུར་པས་ ལྟོས་པ་མེད་པར་ཤིན་ཏུ་བྱུང་བ་ཡིན། ཡོན་ཏན་གྱི་རྒྱལ་སྲིད་དང་དབང་རབ་ཏུ་ཐོབ་པས་བསོད་ནམས་ཀྱིས་སྐྱོབ་པའི་མཐུ་ཆེན་པོ་དང་ལྡན་པ་ཡིན། ཞིང་ཐམས་ཅད་དུ་འགྲོ་བ་ལ་ཞུགས་པས་ ཆགས་པ་མེད་པར་སྤྱོད་པ་ཡིན། ལུས་ཐམས་ཅད་དང་ལྡན་པས་ཤིན་ཏུ་རྣམ་པར་ཕྱེ་བ་ཡིན། སྤྱོད་པ་དང་སྨོན་ལམ་ཐམས་ཅད་ཀྱིས་རྣམ་པར་འཕྲུལ་པའི་ཡེ་ཤེས་དང་ལྡན་པས་སྤྱོད་པ་ ཆེན་པོས་བྱུང་བ་ཡིན། སངས་རྒྱས་ཀྱི་ཞིང་ཐམས་ཅད་དུ་རྣ་བའི་ཤེས་པ་ཐོགས་པ་མེད་པར་ཞུགས་པས་ཆོས་ཐམས་ཅད་ཡོངས་སུ་ཤེས་པ་དང་ལྡན་པ་ཡིན། ཤེས་རབ་ཀྱི་མིག་ཤིན་ཏུ་ ༄༅། །དག་པའི་བློ་རབ་ཏུ་ཐོབ་པས་སངས་རྒྱས་ཐམས་ཅད་མཐོང་བ་དང་ལྡན་པ་ཡིན། དགེ་བའི་རྩ་བ་བརྩམས་པ་ཐམས་ཅད་མཐར་ཕྱིན་པར་བྱ་བ་ལ་རྒྱུན་མི་འཆད་ བ་ཡིན་ཏེ། ཆོས་འཐོབ་པར་བྱ་བ་ཐམས་ཅད་ཐོབ་པས་རློམ་སེམས་མེད་པ་ཡིན་ནོ། །དེ་ནས་བྱང་ཆུབ་སེམས་དཔའ་ཆེན་པོ་རྡོ་རྗེའི་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་བསོད་ནམས་རླབས་ཆེན་བྱེད་པ་དང༌། །རྒྱ་ཆེ་ཟབ་མོ་ཕྲ་དང་རགས་བྱེད་ཅིང༌། །སྣ་ཚོགས་ ཆུང་ངུའི་རྣམ་པ་བྱེད་ཀྱང་རུང༌། །ཐམས་ཅད་མཐའ་ཡས་རྣམ་པར་ཡོངས་སུ་བསྔོ། །དེ་དག་དངོས་པོ་ཇི་སྙེད་གང་ཡོད་པ། །རྒྱ་ཆེ་ཡངས་པ་གང་དང་གང་ཡང་རུང༌། །གླང་པོའི་ཤིང་རྟ་ རྟ་ཡི་ཤིང་རྟ་དང༌། །གོས་དང་དབྱིག་དང་གསེར་དང་དངུལ་དག་གིས། །ཕྱོགས་དང་ཞིང་རྣམས་མཐའ་ཡས་ཀུན་བཀང་ཞིང༌། །དེ་དག་མགོ་དང་མིག་དང་ལག་པ་དང༌། །ཤ་དང་རྐང་ དང་དེ་བཞིན་རྐང་པ་དང༌། །རང་གི་ལུས་ཀྱིས་ཀུན་བཀང་སྦྱིན་པར་བསྔོ། །དེ་དག་དེ་ལྟར་ཡོངས་སུ་བསྔོ་བྱས་ནས། །སེམས་ཅན་ཕན་ཕྱིར་ཡོངས་སུ་དགྲོལ་སེམས་ཀྱིས། །མཐའ་དང་ དབུས་མེད་བསྐལ་པར་སྤྱོད་པ་བྱེད། །འགྲོ་བ་ཀུན་ནས་དེ་དག་སེམས་མི་ལྡོག །དེ་དག་འགྲོ་བ་ཀུན་ལ་ཕན་པའི་ཕྱིར། །ལེགས་པར་བྱས་པའི་ལས་ཀྱིས་སྲིད་གསུམ་གྱི། །འགྲོ་ པ་མ་ལུས་ཐམས་ཅད་ཅི་ནས་ཀྱང༌། །བདེ་བར་འགྱུར་ཞིང་བྱང་ཆུབ་ཐོབ་པར་བསྔོ། །དེ་དག་མཉམ་ཞིང་མཚུངས་པར་ཡོངས་སུ་བསྔོ། །ལས་རྣམས་དག་པ་ཇི་ལྟར་ཡོངས་བསྒྲུབས་ པ༑ ༑དེ་དག་འགྲོ་བ་ཀུན་དང་མཉམ་པར་བསྔོ། །དེ་དག་སྨོན་ལམ་འཆིང་བར་འགྱུར་བ་མེད། །འགྲོ་བ་ཀུན་ཏུ་ཅི་ལའང་ཐོགས་མེད་པར། །ཐམས་ཅད་རྗེས་སུ་སྨོན་ལམ་དེ་དག་འགྲོ། །དེ་ དག་འགྲོ་ལ་ཕན་ཕྱིར་བསྔོ་བྱེད་ཀྱང༌། །མཁས་པ་རྣམས་ལ་སྤྲོས་པ་གང་ཡང་མེད། །འགྲོ་བ་ཀུན་ལ་དེ་དག་གཉིས་གྱུར་ཅིང༌། །སྦྱིན་པས་འཕགས་ཏེ་ཚུལ་ཁྲིམས་རྣམ་དག་ལ། །བརྩོན་ འགྲུས་སྟོབས་ཀྱིས་སེམས་ལ་བཅིངས་མེད་པ། །དེ་དག་སྨོན་ལམ་ཕྱིར་ལྡོག་མེད་པ་ཡིན། །དེ་དག་བསྔོ་བའི་ཕ་རོལ་ཕྱིན་པ་དག །ཆོས་ཀྱི་རྒྱུད་ལ་བློ་གྲོས་གཉིས་མཉམ་པ། །དེ་དག་ དོན་ངེས་ཕ་རོལ་ཕྱིན་བྱའི་ཕྱིར། །རྐང་གཉིས་དབང་པོའི་དྲུང་དུ་ཡེ་ཤེས་རྐང་པས་འདོང༌། །དེ་དག་ཆོས་ཀྱི་རྔ་ཡི་མཐར་ཕྱིན་པས། །རྟག་ཏུ་ཡེ་ཤེས་རྣམ་པའི་སྙིང་པོ་འཆང༌། །ཚུལ་བཞིན་ ཆོས་ལ་ཆགས་པ་མེད་པར་ཞུགས། །དེ་བས་དེ་དག་ཡིད་ལ་ཆགས་པ་མེད། །ཆོས་ལ་གཉིས་སུ་བྱེད་པ་མེད་པ་སྟེ། །གཉིས་སུ་མེད་པར་ཆོས་ལ་མི་བྱེད་དོ། །གཉིས་མེད་གཉིས་ལས་ ཡོངས་སུ་གྲོལ་བས་ན། །འགྲོ་བ་ཀུན་གྱི་ཚིག་ལམ་ཐམས་ཅད་ཤེས། །དེ་དག་འཇིག་རྟེན་མཉམ་ཉིད་ཁོང་དུ་ཆུད། །སེམས་དང་སྒྲ་དང་ལས་རྣམས་ཐམས་ཅད་ཀྱང༌། །སྤྲུལ་པ་ལྟ་ ༄༅། །བུར་འགྲོ་བ་ཀུན་ཤེས་ཏེ། །ཀུན་ཀྱང་ལས་ཀྱི་རྣམ་སྨིན་ཚུལ་དུ་འཇུག །འཇིག་རྟེན་ཇི་སྙེད་ཡོད་པ་ལས་རྣམས་ཀྱིས། །བྱིན་གྱིས་བརླབས་ཡིན་ཕྱོགས་རྣམས་ སྒྲ་ཀུན་ཀྱང༌། །ལས་ཀྱི་རྣམ་པར་སྨིན་པར་འཇིག་རྟེན་འདི་ཤེས་ན། །ལས་རྣམས་ཐམས་ཅད་མ་ལུས་འགག་པར་འགྱུར། །དེ་དག་འགྲོ་བ་ཀུན་དང་མཉམ་ཉིད་དུ། །ལུས་དང་ དག་དང་སེམས་རྣམས་མཉམ་ཉིད་ཀྱིས། །འགྲོ་བ་ཀུན་དང་མཉམ་པ་ཉིད་ཕྱིར་བསྔོ། །མཉམ་པ་ཉིད་ཀྱི་གཞུང་ཚུལ་འདི་འདྲའོ། །ཡོངས་སུ་སྤྱོད་པས་འགྲོ་བ་ཐམས་ཅད་ཀྱི། ། གཟུགས་རྣམས་སྦྱངས་ཤིང་དེ་ཡི་ལས་བསྔོ་བ། །སྐྱེས་བུ་འདུལ་བའི་བསོད་ནམས་ཅི་འདྲ་བ། །དེ་འདྲར་འགྲོ་ཀུན་བསོད་ནམས་གཏེར་དུ་བསྔོ། །དེ་དག་འགྲོ་བ་ཐམས་ཅད་ཟིལ་ མནན་ཅིང༌། །བརྩོན་འགྲུས་ལུས་དང་ལྡན་པར་གྱུར་པ་རྣམས། །སྐྱེ་རྒུ་ཀུན་ལ་ཕན་པར་བྱེད་སེམས་ཀྱིས། །བསོད་ནམས་རྒྱ་མཚོ་ཡོངས་སུ་བསྔོ་བར་བྱེད། །བདག་གིས་བསོད་ ནམས་བསྒྲུབས་པ་གང་ཡོད་པ། །དེ་ཡིས་འགྲོ་ཀུན་རྟག་ཏུ་རྣམ་དག་གྱུར། །རྒྱལ་བ་དེ་དག་ཇི་ལྟར་རྣམ་དག་པ། །དེ་ལྟར་འཇིག་རྟེན་རྣམ་དག་ལྡན་གྱུར་ཅིག །མཁས་ཤིང་ དོན་གྱི་ཚུལ་ལ་ཤེས་གྱུར་ནས། །ཡེ་ཤེས་མཁྱེན་ལྡན་ཆོས་རབ་བསྔགས་གྱུར་ཅིང༌། །འགྲོ་ཀུན་སངས་རྒྱས་ཇི་བཞིན་གྱུར་ཅིག་ཅེས། །དགེ་བ་དེ་དག་མཉམ་པ་ཉིད་དུ་བསྔོ། །དེ་ དག་ཆོས་རྣམས་གསོག་ཏུ་འཇལ་བྱེད་དེ། །འགྲོ་བ་ཐམས་ཅད་སྟོང་པར་རྣམ་རིག་ནས། །བྱེད་པ་མེད་ཅིང་བྱེད་པོ་གང་ཡང་མེད། །འགྲོ་བ་རྣམས་ཀྱི་ལས་ཀྱང་ཆུང་མི་ཟ། །ཆོས་རྣམས་ ཞི་ཞིང་འཇིག་རྟེན་མ་ཞི་བར། །རྟོག་མེད་སེམས་ཀྱིས་དེ་ལྟར་འཇལ་བྱེད་ཅིང༌། །འཇིག་རྟེན་དེ་དག་རྣམ་པར་རྟོག་ཤེས་ཀྱང༌། །རྣམ་པར་རྟོག་ཅིང་ཡོངས་སུ་བསྔོ་མི་བྱེད། །བདེ་ གཤེགས་སྐུར་བགྲང་ལུས་དང་ལྡན་པ་རྣམས། །རྒྱལ་བ་རྣམས་ཀྱི་ཆོས་ལས་སྐྱེས་པའི་སྲས། །དེ་དག་འཇིག་རྟེན་འདི་ལ་ཐེ་ཚོམ་མེད། །རྒྱལ་སྲས་དེ་དག་དེ་ལྟར་ཡོངས་སུ་བསྔོ། ། འགྲོ་བ་ཐམས་ཅད་མཉམ་པ་ཉིད་དུ་རྗེས་སུ་སོང་བ་ཞེས་བྱ་བ་སྟེ། ཡོངས་སུ་བསྔོ་བ་བདུན་པའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ ཡོངས་སུ་བསྔོ་བ་དེ་བཞིན་ཉིད་ཀྱི་མཚན་ཉིད་ཀྱི་རང་བཞིན་ཞེས་བྱ་བ་བརྒྱད་པ་གང་ཞེ་ན། ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དཀར་པོ་ སྤྱོད་པ་ལ་རབ་ཏུ་བརྩོན་པའི་སེམས་དང་ལྡན་པ། སྙིང་རྗེ་ཆེན་པོ་ཤིན་ཏུ་གསལ་བར་བྱ་བ་ལ་རབ་ཏུ་ཞུགས་པ། ལྷག་པའི་བསམ་པ་ཆེན་པོ་རིན་པོ་ཆེ་རབ་ཏུ་ཐོབ་པ། སངས་རྒྱས་ཐམས་ ཅད་ཡིད་ལ་བྱ་བ་ལ་བརྩོན་པ། ཆོས་དཀར་པོ་ཐམས་ཅད་ཡོངས་སུ་བསྔོ་བ་རྒྱུན་མི་འཆད་པའི་སེམས་དང་ལྡན་པ། བྱང་ཆུབ་སེམས་དཔའི་ལམ་གྱི་བསམ་པས་དགེ་བའི་རྩ་བ་ ༄༅། །དམ་པ་བཟང་པོ་མངོན་པར་སྒྲུབ་པ་ལ་མཁས་པ། ཡོན་ཏན་དང་ཡེ་ཤེས་ལ་རབ་ཏུ་བརྩོན་པའི་ཡིད་ལ་བྱེད་པ་ཅན། ཁ་ལོ་སྒྱུར་བ། དགེ་བའི་རྩ་བ་ ཐམས་ཅད་ཡེ་ཤེས་ཀྱིས་ཡོངས་སུ་བསྔོ་བའི་ཚུལ་ལ་མཁས་པ། དགེ་བའི་རྩ་བ་ཐམས་ཅད་ལ་ཡང་དག་པར་སེམས་དཔའི་མིག་དང་ལྡན་པ། ཡེ་ཤེས་དང༌། མངོན་པར་ ཤེས་པ་ཤིན་ཏུ་རྒྱ་ཆེ་བ་དང་ལྡན་པ། དྲན་པ་དང་ཤེས་བཞིན་ཅན། བརྟན་ཞིང་མི་གཡོ་བའི་སེམས་དང་ལྡན་པ། རྨོངས་པ་མེད་པ། དྲན་པ་ཉེ་བར་གཞག་པ། ཁོང་ནས་སྙིང་ བརྩེ་བ་དང་ལྡན་པ། ལས་ལ་ཐུབ་པ་མེད་པ། ཡེ་ཤེས་ལ་དམིགས་པ་ཐམས་ཅད་ལས་ཕྱིར་མི་ལྡོག་པ། ཐེག་པ་ཆེན་པོའི་སེམས་ཀྱིས་དཔའ་བ། འགྲོ་བ་ཐམས་ཅད་བདེ་ བར་བྱ་བའི་དགེ་བའི་རྩ་བ་རབ་ཏུ་ཐོབ་པ། དགེ་བའི་རྩ་བ་སྐྱོན་མེད་པ་ཡང་དག་པར་གསོག་ཅིང་དགེ་བའི་རྩ་བ་རྣམ་པ་ཐ་དད་པ་མཐའ་ཡས་པ་ཉེ་བར་སྒྲུབ་པ་དང༌། དམིགས་ པར་བྱེད་པ་དང༌། ཡོངས་སུ་རྫོགས་པར་བྱེད་པ་དང༌། ཡོངས་སུ་དག་པར་བྱེད་པ་དང༌། ནན་ཏན་དུ་བྱེད་པ་དང༌། མངོན་པར་བརྩོན་པར་བྱེད་པ་དང༌། ཡོངས་སུ་སྤྱོད་ཅིང་སེམས་ པ་དང༌། ཡང་དག་པར་སྦྱོང་བ་དང༌། རབ་ཏུ་སྟོན་པའི་ཚེ་དགེ་བའི་རྩ་བ་སྒོ་རྣམ་པ་ཐ་དད་པ་གཞན་དང་གཞན་གྱི་མཚན་ཉིད་སྣ་ཚོགས་དང་ལྡན་པ། དངོས་པོ་གཞན་དང་ གཞན་ལས་བྱུང་བ་རྣམ་པ་སྣ་ཚོགས་སུ་བཀོད་པར་གྱུར་པ། ཡང་དག་པར་སྤྱོད་པ་དུ་མ་དང༌། བརྗོད་པ་མཐའ་ཡས་པའི་ཚུལ་གྱིས་རྣམ་པར་བརྟགས་པ། དགེ་བའི་རྩ་བ་ རྣམ་པ་སྣ་ཚོགས་སུ་ཡང་དག་པར་སྤྱད་ཅིང་ཚད་མེད་པར་རྣམ་པར་ཕྱེ་བ་ལས་བྱུང་བ། སྟོབས་བཅུར་འགྲོ་བའི་སེམས་ཀྱི་བྱིན་གྱིས་བརླབས་པ་དེ་དག་དམིགས་པ་རྣམ་པ་སྣ་ཚོགས་ ལ་རབ་ཏུ་བརྩོན་པ། གཉིས་སུ་མེད་པའི་ཐམས་ཅད་མཁྱེན་པ་ཉིད་ལ་ཚུལ་གྱི་རྒྱུད་གཅིག་ཏུ་གྱུར་པས་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་བྱང་ཆུབ་སེམས་དཔའི་སྤྱོད་ པ་ལ་བརྩོན་པ་རྣམས་ཀྱི་ཆགས་པ་མེད་པའི་ལུས་ཡོངས་སུ་རྫོགས་པར་གྱུར་ཅིག །བྱང་ཆུབ་སེམས་དཔའི་སྤྱོད་པ་ལ་གནས་པ་རྣམས་ཀྱི་ཆགས་པ་མེད་པའི་ངག་ཡོངས་སུ་དག་པར་ གྱུར་ཅིག །ཐེག་པ་ཆེན་པོ་ལ་གནས་པའི་སྤྱོད་པ་ཐོབ་པར་བྱ་བའི་ཕྱིར་ཆགས་པ་མེད་པའི་སེམས་ཡོངས་སུ་གྲུབ་པར་གྱུར་ཅིག །བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་རྣམ་ པར་དག་པའི་ཕྱིར་བསྒྲིབས་པ་མེད་པའི་སེམས་ཡོངས་སུ་རྫོགས་པར་གྱུར་ཅིག །འགྲོ་བ་མཐའ་དང་དབུས་མེད་པ་ཐམས་ཅད་རྒྱས་པར་དགང་བའི་ཕྱིར་སྦྱིན་པ་ཆེན་པོ་མཐའ་ཡས་པའི་ སེམས་བསྐྱེད་པ་རབ་ཏུ་ཐོབ་པར་གྱུར་ཅིག །ཟིལ་གྱིས་མི་ནོན་པའི་སེམས་རབ་ཏུ་འཐོབ་པའི་ཕྱིར་ཆོས་ལ་དབང་བསྒྱུར་བའི་སེམས་ཀྱིས་ཆོས་ཀྱིས་སྣང་བ་ཐམས་ཅད་སྟོན་པར་གྱུར་ཅིག ། ༄༅། །བྱང་ཆུབ་ཏུ་སེམས་བསྐྱེད་པའི་སྣང་བ་རབ་ཏུ་འཐོབ་པའི་ཕྱིར་ཡེ་ཤེས་ཀྱི་འབྱུང་གནས་དང་མངོན་པར་ཤེས་པ་ཐམས་ཅད་རྣམ་པར་དག་པར་གྱུར་ཅིག ། སངས་རྒྱས་རྗེས་སུ་དྲན་པ་རབ་ཏུ་འཐོབ་པའི་ཕྱིར་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་རྗེས་སུ་དྲན་པ་རྣམ་པར་དག་པར་གྱུར་ཅིག །ལྟོས་པ་ མེད་པར་ཡོངས་སུ་འབྱུང་བའི་ཕྱིར་འཁོན་མེད་པར་གནས་པའི་ལྷག་པའི་བསམ་པ་ཡོངས་སུ་རྫོགས་པར་གྱུར་ཅིག །སྟོབས་བཅུའི་ཡེ་ཤེས་ལ་རབ་ཏུ་དགོད་པའི་ཕྱིར་འགྲོ་ བ་ཐམས་ཅད་ཉེ་བར་བླངས་པས་ཁྱབ་པར་བྱ་བ་རྒྱུན་ཆད་པ་མེད་པར་གྱུར་ཅིག །གོས་པ་མེད་པར་འཇིག་རྟེན་གྱི་ཁམས་སུ་གནས་པར་བྱ་བའི་ཕྱིར་འཇིག་རྟེན་གྱི་ཁམས་ཐམས་ ཅད་དུ་རྒྱུ་བའི་ཏིང་ངེ་འཛིན་རབ་ཏུ་ཐོབ་པར་གྱུར་ཅིག །སེམས་ཅན་མཐའ་ཡས་པ་གདུལ་བ་རྒྱུན་ཆད་པ་མེད་པར་བྱ་བའི་ཕྱིར་འཇིག་རྟེན་གྱི་ཁམས་ཐམས་ཅད་དུ་གནས་པར་བྱ་ བས་མི་སྐྱོ་བར་གྱུར་ཅིག །བྱང་ཆུབ་སེམས་དཔའ་བསམ་གྱིས་མི་ཁྱབ་པ་རབ་ཏུ་བསྒྲུབ་པའི་ཕྱིར་བསམ་པའི་རང་བཞིན་མཐའ་དང་དབུས་མེད་པ་མངོན་པར་སྒྲུབ་པ་ལ་མཁས་པར་ གྱུར་ཅིག །རྣམ་པ་ཐ་དད་པའི་ཕྱོགས་སུ་ཡེ་ཤེས་ཀྱིས་འཇུག་པ་ཡོངས་སུ་རྫོགས་པར་བྱ་བའི་ཕྱིར་འཇིག་རྟེན་གྱི་ཁམས་ཐམས་ཅད་ལ་རྨོངས་པ་མེད་པའི་ཡེ་ཤེས་དང་ལྡན་པར་ གྱུར་ཅིག །ཡེ་ཤེས་དང་མངོན་པར་ཤེས་པ་ལ་དབང་བསྒྱུར་བར་བྱ་བའི་ཕྱིར་སེམས་སྐད་ཅིག་གིས་འབྱུང་བས་འཇིག་རྟེན་གྱི་ཁམས་རྣམ་པར་དག་པ་ཐམས་ཅད་ཡོངས་སུ་རྒྱས་པར་ གྱུར་ཅིག །འཇིག་རྟེན་ཐམས་ཅད་མཐོང་བ་རྣམ་པར་དག་པ་རབ་ཏུ་འཐོབ་པར་བྱ་བའི་ཕྱིར་ཆོས་ཐམས་ཅད་ལ་འཇུག་པའི་རང་བཞིན་ཡོངས་སུ་རྫོགས་པར་གྱུར་ཅིག །ཐ་དད་པ་མེད་ པའི་ཡེ་ཤེས་དམ་པ་འཐོབ་པའི་ཕྱིར་ཞིང་གཅིག་ཞིང་ཐམས་ཅད་དུ་རྗེས་སུ་རྟོགས་པའི་ཡེ་ཤེས་དང་ལྡན་པར་གྱུར་ཅིག །སེམས་ཅན་བརྗོད་དུ་མེད་པ་གདུལ་ཞིང་བྱིན་གྱིས་བརླབ་པའི་ ཕྱིར་ཞིང་ཐམས་ཅད་བྱིན་གྱིས་རློབ་པའི་བྱང་ཆུབ་སེམས་དཔའི་བྱིན་གྱི་རླབས་མཐོང་བ་ཡོངས་སུ་རྫོགས་པར་གྱུར་ཅིག །སངས་རྒྱས་ཀྱི་ཞིང་ཐམས་ཅད་ཚད་མེད་པར་བྱ་བའི་ཕྱིར་ཆོས་ ཀྱི་དབྱིངས་ཚད་མེད་པ་སངས་རྒྱས་ཀྱི་ཞིང་གཅིག་ཏུ་མངོན་པར་མོས་པར་གྱུར་ཅིག །སངས་རྒྱས་ཀྱི་ཞིང་ཐམས་ཅད་ཡེ་ཤེས་ཀྱི་མཐོང་བ་དམ་པ་འཐོབ་པར་བྱ་བའི་ཕྱིར་སངས་རྒྱས་ ཀྱི་ཞིང་ཐམས་ཅད་དུ་འགྲོ་བའི་ཡེ་ཤེས་ཀྱི་བྱིན་གྱི་རླབས་རབ་ཏུ་ཐོབ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཞིང་གི་རྣམ་པའི་ ཕྱིར་ཡོངས་སུ་བསྔོའོ། །འགྲོ་བ་ཐམས་ཅད་རྒྱས་པར་དགང་བའི་ཕྱིར་ཡོངས་སུ་བསྔོའོ། །ཡེ་ཤེས་ཀྱིས་རྣམ་པར་སྤྱད་ཅིང་བྱིན་གྱིས་བརླབ་པའི་ཕྱིར་ཡོངས་སུ་བསྔོའོ། །ཇི་ལྟར་བདག་ ༄༅། །གི་ཕྱིར་ཡོངས་སུ་བསྔོ་བ་དེ་ལྟར་སེམས་ཅན་ཐམས་ཅད་ཀྱི་ཕྱིར་ཡང་ཡོངས་སུ་བསྔོ་སྟེ། འདི་ལྟར་སེམས་ཅན་དམྱལ་བའི་ངན་སོང་དགག་པའི་ ཕྱིར་ཡོངས་སུ་བསྔོའོ། །བྱོལ་སོང་གི་སྐྱེ་གནས་ཀྱི་ངན་སོང་མེད་པར་བྱ་བའི་ཕྱིར་ཡོངས་སུ་བསྔོའོ། །གཤིན་རྗེའི་འཇིག་རྟེན་གྱི་ངན་སོང་རྒྱུན་གཅད་པའི་ཕྱིར་ཡོངས་སུ་བསྔོའོ།། སེམས་ཅན་ཐམས་ཅད་ཀྱི་སྒྲིབ་པའི་ལས་རྒྱུན་གཅད་པའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་སེམས་མཉམ་པའི་ཡེ་ཤེས་ཐོབ་པར་བྱ་བའི་ཕྱིར་ཡོངས་སུ་བསྔོའོ། ། དགྲ་ཐམས་ཅད་དང་མཛའ་བ་ཐམས་ཅད་བདེ་བ་ཐམས་ཅད་ལ་གཟུད་པའི་ཡེ་ཤེས་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་མངོན་དུ་གྱུར་པའི་ ཡེ་ཤེས་ཀྱི་སྣང་བ་ཡང་དག་པར་བསྟན་པ་རྣམ་པར་དགེ་བར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་གྱི་དོན་བསམ་གྱིས་མི་ཁྱབ་པའི་ཡེ་ཤེས་རྟོགས་པ་ཡོངས་སུ་རྫོགས་ པར་བྱ་བའི་ཕྱིར་ཡོངས་སུ་བསྔོའོ། །ལྷག་པའི་བསམ་པ་རྡུལ་མེད་པའི་བྱང་ཆུབ་ཀྱི་སེམས་དང་ཡེ་ཤེས་ཚད་མེད་པ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །སེམས་ ཅན་ཐམས་ཅད་བདེ་བའི་ལམ་བསྟན་པར་མཉམ་དུ་ཡོངས་སུ་བསྔོ་བའི་ཕྱིར་ཡོངས་སུ་བསྔོའོ། །ཡང་དག་པའི་སེམས་ལ་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་ པོ་དེ་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་ལ་རྣམ་པར་བྱང་བའི་སྤྲིན་གྱི་ཆར་དབབ་པའི་ཚུལ་དང༌། སེམས་ཅན་ཐམས་ཅད་ལ་བསོད་ནམས་ཀྱི་ཞིང་དུ་དམིགས་ པའི་ཚུལ་དང༌། སེམས་ཅན་ཐམས་ཅད་བྱང་ཆུབ་ཀྱི་སེམས་ཀྱི་ཁོངས་སུ་གཏོགས་པའི་ཡོངས་སུ་བསྔོ་བས་སྲུང་བའི་བྱིན་གྱི་རླབས་ཀྱིས་བསྒྲིབས་པ་ཐམས་ཅད་དང་མི་འགྲོགས་ བར་བྱ་བའི་ཕྱིར་ཡོངས་སུ་བསྔོའོ། །བསྒྲིབས་པ་མེད་པའི་དབྱིངས་ལ་གནས་པར་ཡོངས་སུ་བསྔོའོ། །ཡེ་ཤེས་དང་མངོན་པར་ཤེས་པ་ཆགས་པ་མེད་པས་སེམས་ཅན་ཐམས་ཅད་ཀྱིས་ ཡེ་ཤེས་མཐོང་བ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་ཀྱིས་ལུས་ཀྱི་རྗེས་སུ་འགྲོ་བའི་རྣམ་པར་འཕྲུལ་པ་ཡོངས་སུ་རྫོགས་པར་བྱ་བའི་ཕྱིར་ ཡོངས་སུ་བསྔོའོ། །སེམས་ཅན་ཐམས་ཅད་དོན་ཡོད་པའི་དགེ་བའི་རྩ་བ་རྣམ་པའི་མཆོག་ཐམས་ཅད་དང་ལྡན་པའི་ཡེ་ཤེས་ཀྱིས་ཕན་འདོགས་པར་བྱ་བའི་ཕྱིར་ཡོངས་སུ་བསྔོའོ། །འགྲོ་ བ་ཐམས་ཅད་ཡོངས་སུ་སྡུད་པས་འགྲོ་བ་ཐམས་ཅད་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །ཐམས་ཅད་མཁྱེན་པ་ཉིད་ཀྱི་མཐར་ཐུག་སྟེ་སེམས་ཅན་ཐམས་ཅད་ཀྱིས་ སེམས་སྒྲིབ་པ་མེད་ཅིང་མི་སྒུལ་བ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །གང་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཡུལ་དགའ་དགའ་ལྟར་འདུག་པ་མཐོང་བའམ། ༄༅། །བཟའ་ཤིང་གི་ར་བ་དགའ་དགའ་ལྟར་འདུག་པ་དང༌། ལྗང་བ་དགའ་དགའ་ལྟར་འདུག་པ་དང༌། མེ་ཏོག་དགའ་དགའ་ལྟར་འདུག་པ་དང༌། སྤོས་ཡིད་དུ་འོང་བ་དང༌། ཤིང་ཏོག་དགའ་དགའ་ལྟར་འདུག་པ་དང༌། གོས་ཡིད་དུ་འོང་བ་དང༌། རིན་པོ་ཆེ་དགའ་དགའ་ལྟར་འདུག་པ་དང༌། རྒྱན་དགའ་དགའ་ལྟར་ འདུག་པ་དང༌། ལྡུམ་ར་དགའ་དགའ་ལྟར་འདུག་པ་དང༌། གྲོང་ཁྱེར་དགའ་དགའ་ལྟར་འདུག་པ་དང༌། ལྗོངས་དགའ་དགའ་ལྟར་འདུག་པ་དང༌། རྒྱལ་པོའི་གནས་ དགའ་དགའ་ལྟར་འདུག་པ་དང༌། ཁམས་དགའ་དགའ་ལྟར་འདུག་པ་དང༌། ཡུལ་དགའ་དགའ་ལྟར་འདུག་པ་དང༌། རྒྱལ་པོའི་སྲིད་དགའ་དགའ་ལྟར་འདུག་པ་དང༌། དབང་དགའ་དགའ་ལྟར་བསྒྱུར་བ་དང༌། ཕྱོགས་དགའ་དགའ་ལྟར་འདུག་པ་དང༌། འཁོར་དགའ་དགའ་ལྟར་འདུག་པ་དང༌། འབྲོག་དགའ་དགའ་ལྟར་འདུག་པ་དག་ མཐོང་ན། བྱང་ཆུབ་སེམས་དཔའ་ཐབས་དང་ཡེ་ཤེས་ལ་བརྩོན་པ། བསོད་ནམས་དམ་པས་བྱུང་བ། དགེ་བའི་རྩ་བ་དོན་དུ་གཉེར་བ། འགྲོ་བ་ཀུན་ཏུ་བག་ཡོད་པར་ སྤྱོད་པ། ལེགས་པར་བསྟན་པའི་དགེ་བའི་རྩ་བ་ལ་བརྩོན་པ། རྒྱ་མཚོ་ལྟ་བུ་ཤིན་ཏུ་དབེན་པ། དགེ་བའི་རྩ་བ་ཟད་མི་ཤེས་པ་ཐམས་ཅད་དང་ལྡན་པ། བསོད་ནམས་ཀྱི་ འབྱུང་གནས་དང་ལྡན་པ། དགེ་བའི་རྩ་བ་ཐམས་ཅད་མི་དད་པ་ལ་མཁས་པས་ཡོངས་སུ་བསྔོ་བ། རྣམ་པ་མཐའ་ཡས་པའི་དགེ་བའི་རྩ་བ་ཐམས་ཅད་བསྔོ་བ་མཐོང་བ་དང༌། རྣམ་ པར་སྤྱོད་པའི་ཡེ་ཤེས་དང་ལྡན་པ། སེམས་ཅན་ཐམས་ཅད་ལ་སེམས་པས་དམིགས་པ། ཆུད་མི་ཟ་བའི་དགེ་བའི་རྩ་བ་དང་ལྡན་པ། སེམས་ཅན་ཐམས་ཅད་ཀྱི་ཚད་ཀྱིས་ཀླས་པར་རྒྱུན་ མི་ཆད་ཅིང༌། དེ་བཞིན་ཉིད་དང་མཉམ་པའི་དགེ་བའི་རྩ་བ་དང་ལྡན་པ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ཅན་ཐམས་ཅད་ཆོས་ཉིད་ཇི་ལྟ་བ་བཞིན་དུ་ ཡོངས་སུ་འཛིན་པའི་ཆོས་ཉིད་ཀྱི་ངང་ཚུལ་ཅན་དུ་གྱུར་ཏེ་སངས་རྒྱས་མཐོང་བའི་དགའ་བ་རབ་ཏུ་ཐོབ་ཅིང་སེམས་ཅན་གྲངས་མེད་པ་ཐམས་ཅད་དེ་བཞིན་ཉིད་དང་མཉམ་པར་རྣམ་ པར་དག་པར་གྱུར་ཅིག །ཅེས་དེ་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་དགའ་དགའ་ལྟར་འདུག་པ་མཐོང་བ་དེ་དག་ཐམས་ཅད་སེམས་ཅན་ཐམས་ཅད་ལ་ཡོངས་ སུ་བསྔོས་ནས་སངས་རྒྱས་ཀྱི་ཞིང་ཐམས་ཅད་སངས་རྒྱས་ཐམས་ཅད་བསྙེན་བཀུར་བ་ཡོངས་སུ་རྫོགས་པས་མདངས་དགའ་བ་དང༌། ཞིང་ཐམས་ཅད་ཉེ་བའི་ཉོན་མོངས་པ་མེད་ཅིང་ རྣམ་པར་དག་པས་མདངས་དགའ་བ་དང༌། སེམས་ཅན་ཐམས་ཅད་ལ་སངས་རྒྱས་ཀྱི་ཆོས་ཐམས་ཅད་ཡང་དག་པར་བསྟན་པས་མདངས་དགའ་བ་དང༌། བྱང་ཆུབ་སེམས་དཔའི་སྤྱོད་ ༄༅། །པ་ཐམས་ཅད་ཡོངས་སུ་གཟུང་བ་རབ་ཏུ་ཐོབ་པས་མདངས་དགའ་བ་དང༌། དགེ་བའི་བཤེས་གཉེན་ཐམས་ཅད་ལ་ཞེ་སྡང་མེད་པའི་མིག་གིས་བལྟ་བས་ མདངས་དགའ་བ་དང༌། དངོས་པོ་ཐམས་ཅད་ཡིད་དུ་འཐད་པ་མཐོང་བས་མདངས་དགའ་བ་དང༌། སེམས་ཅན་ཐམས་ཅད་ཡང་དག་པར་གཟུང་བ་རབ་ཏུ་ཐོབ་པས་མདངས་ དགའ་བ་དང༌། སངས་རྒྱས་ཀྱི་ཆོས་ཐམས་ཅད་ལ་ཆོས་ཀྱི་སྣང་བ་ཐམས་ཅད་རབ་ཏུ་ཐོབ་པས་མདངས་དགའ་བ་དང༌། སེམས་ཅན་ཐམས་ཅད་ལ་གཏོང་བའི་སེམས་ཀྱིས་ སྦྱིན་པ་བྱེད་པས་མདངས་དགའ་བ་དང༌། ཆོས་ཐམས་ཅད་འཇིགས་པ་མེད་པར་སེམས་ཅན་ཐམས་ཅད་ལ་རབ་ཏུ་སྟོན་པས་མདངས་དགའ་བ་དང༌། བྱང་ཆུབ་སེམས་ དཔའི་ཏིང་ངེ་འཛིན་ཐམས་ཅད་རབ་ཏུ་ཐོབ་པས་མདངས་དགའ་བ་དང༌། བྱང་ཆུབ་སེམས་དཔའ་ཐམས་ཅད་ཀྱི་གཟུངས་འཛིན་པས་མདངས་དགའ་བ་དང༌། བྱང་ཆུབ་ སེམས་དཔའ་ཐམས་ཅད་ཀྱི་ཡེ་ཤེས་མཐའ་ཡས་པས་རྣམ་པར་སྤྱད་པས་མདངས་དགའ་བ་དང༌། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་འཕྲུལ་བ་ཡང་དག་ པར་སྟོན་པས་མདངས་དགའ་བ་དང༌། དེ་བཞིན་གཤེགས་པའི་དཀྱིལ་འཁོར་ཐམས་ཅད་ཀྱིས་ཤིན་ཏུ་བསྟན་པ་ཡང་དག་པར་སྟོན་པས་མདངས་དགའ་བ་དང༌། ཚིག་ གི་རབ་ཏུ་ཕྱེ་བ་ཐམས་ཅད་ལ་མཁས་པས་བསྟན་པ་ཡང་དག་པར་སྟོན་པས་མདངས་དགའ་བ་དང༌། སྙིང་རྗེ་ཆེན་པོ་རབ་ཏུ་ཐོབ་པས་མདངས་དགའ་བ་དང༌། བྱང་ཆུབ་ཏུ་ སེམས་སྐྱེ་བ་གསར་པ་གསར་པས་དབང་པོ་དགའ་བར་གྱུར་ཏེ་མདངས་དགའ་བ་དང༌། སངས་རྒྱས་ཐམས་ཅད་ཀྱི་རིགས་སུ་ཆུད་པས་མདངས་དགའ་བ་དང༌། སེམས་ཅན་ གྱི་ཁམས་ཐམས་ཅད་འདུལ་བ་རྒྱུན་མི་ཆད་པས་མདངས་དགའ་བ་དང༌། བྱང་ཆུབ་སེམས་དཔའ་ཐམས་ཅད་ཀྱི་སྤོབས་པ་མི་ཟད་པས་ཆོས་ཐམས་ཅད་རབ་ཏུ་སྟོན་པས་མདངས་ དགའ་བ་དང༌། འཇིག་རྟེན་གྱི་ཁམས་རེ་རེ་ཡང་བརྗོད་དུ་མེད་པའི་བསྐལ་པར་གནས་པས་ཡོངས་སུ་མི་སྐྱོ་ཞིང་མདངས་དགའ་བ་དང༌། སངས་རྒྱས་ཀྱི་ཆོས་མཐའ་ཡས་པའི་ཚུལ་ལ་ སྒོ་མཉམ་པས་འཇུག་པས་མདངས་དགའ་བ་དང༌། རྩ་བ་མེད་པའི་ཆོས་ཐམས་ཅད་ཆགས་པ་མེད་པའི་ཚུལ་ལ་རབ་ཏུ་འཇུག་པས་མདངས་དགའ་བ་དང༌། འདོད་ཆགས་མེད་པ་དང་ མཉམ་པའི་ཆོས་ཐམས་ཅད་ཀྱི་སྒྲིབ་པ་ཡོངས་སུ་སྤང་བའི་ཕྱིར་མི་གཉིས་པའི་དབྱིངས་ཁོང་དུ་ཆུད་པས་མདངས་དགའ་བ་དང༌། འདོད་ཆགས་དང་བྲལ་བའི་མཐའ་དང་མཉམ་པའི་ ཆོས་ཐམས་ཅད་ལ་བདེན་པའི་མཐའ་ཇི་ལྟ་བ་བཞིན་དུ་རབ་ཏུ་འཇུག་པས་མདངས་དགའ་བ་དང༌། བྱང་ཆུབ་སེམས་དཔའ་ཐམས་ཅད་ཀྱི་རྩོད་པ་མེད་པ་ཡོངས་སུ་རྫོགས་པས་མདངས་ ༄༅། །དགའ་བ་དང༌། བསམ་པ་རྡོ་རྗེའི་སྙིང་པོ་ལྟ་བུས་ཐམས་ཅད་མཁྱེན་པའི་བརྩོན་འགྲུས་རྣམ་པར་དག་པ་ཡོངས་སུ་རྫོགས་པས་མདངས་དགའ་བ་དང༌། དགེ་ བའི་རྩ་བ་ཐམས་ཅད་ལ་བར་དུ་གཅོད་པའི་དགྲ་རབ་ཏུ་གདུལ་བ་ཡོངས་སུ་རྫོགས་པས་མདངས་དགའ་བ་དང༌། འགྲོ་བ་ཐམས་ཅད་དུ་ཁྱབ་པའི་ཐམས་ཅད་མཁྱེན་པའི་ཚུལ་གྱི་སྒོ་ མངོན་པར་འཚང་རྒྱ་བ་ཡང་དག་པར་བསྟན་པ་ཡོངས་སུ་རྫོགས་པས་མདངས་དགའ་བར་བྱ་བའི་ཕྱིར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ ཀྱི་སྣང་བ་རབ་ཏུ་ཐོབ་པ། དགེ་བའི་བཤེས་གཉེན་གྱིས་ཡོངས་སུ་བཟུང་བ། དེ་བཞིན་གཤེགས་པའི་ཉི་མས་སེམས་ཤིན་ཏུ་སྣང་བར་བྱས་པ། རྨོངས་པ་མེད་པའི་ཆོས་ལ་རབ་ཏུ་ བརྩོན་པ། ཡེ་ཤེས་ཀྱི་ལས་ལ་ཞུགས་པ། ཡེ་ཤེས་ཀྱི་ས་ལ་ཤིན་ཏུ་བསླབ་པ། ཆོས་ཀྱི་དབྱིངས་ཐམས་ཅད་དུ་དགེ་བའི་རྩ་བ་རྣམ་པར་བཀྲམ་པ། ཡོངས་སུ་བསྔོ་བའི་ཡེ་ཤེས་དང་ ལྡན་པ། བྱང་ཆུབ་སེམས་དཔའི་དགེ་བའི་རྩ་བ་རྒྱ་མཚོ་ཐམས་ཅད་ཀྱི་གཏིང་རྙེད་པ། ཡེ་ཤེས་ཀྱི་རིགས་པ་དམ་པ་ལ་ཞུགས་པ། དགེ་བའི་རྩ་བ་རྣམ་པ་ཐ་དད་པ་འབྱམས་ཀླས་པ་ཐམས་ ཅད་ཀྱི་ཡེ་ཤེས་ལ་འཇུག་པ་དང་ལྡན་པ་དེ་འཇིག་རྟེན་ཐམས་ཅད་དུ་གནས་མེད་པར་འགྲོ་བའི་སེམས་དང༌། སེམས་ཅན་གྱི་ཁམས་ཐམས་ཅད་ལ་མངོན་པར་ཆགས་པས་མི་གནས་ པའི་བསམ་པ་དང༌། ཆོས་ཐམས་ཅད་ལ་རློམ་སེམས་མེད་པའི་ཡིད་ལ་བྱེད་པ་དང༌། སངས་རྒྱས་ཐམས་ཅད་ལ་ཉམས་པ་མེད་པའི་ཡེ་ཤེས་དང༌། མངོན་པར་ཤེས་པ་དང༌། འདས་པ་དང༌། མ་ བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་དང་མི་འགལ་བའི་ཡོངས་སུ་བསྔོ་བའི་སྒོས་དགེ་བའི་རྩ་བ་ཉེ་བར་བསགས་པ་དེ་དག་ཐམས་ཅད་ཆོས་ཐམས་ཅད་ཀྱི་མཉམ་པ་ཉིད་ དང་འགལ་བ་མེད་ཅིང༌། དེ་བཞིན་གཤེགས་པའི་མཚན་ཉིད་འཁྲུག་པར་མི་འགྱུར་བ་དང༌། དུས་མཉམ་པ་ཉིད་ལ་རྣམ་པར་དཔྱད་པ་དང༌། སེམས་ཅན་མེད་པར་རྟོགས་པར་ བྱ་བ་དང༌། དེ་བཞིན་གཤེགས་པའི་བྱང་ཆུབ་ཀྱི་རྗེས་སུ་འབྲང་བ་དང༌། ཆོས་རྣམ་པར་དགོད་པ་ཡང་དག་པར་བརྗོད་པ་དང༌། དོན་ཤེས་པ་ཁོང་དུ་ཆུད་པར་བྱ་བ་དང༌། ཟིལ་གྱིས་ གནོན་པའི་ས་ཐམས་ཅད་ཀྱི་རྗེས་སུ་འབྲང་བ་དང༌། ཆོས་ཉིད་ཇི་ལྟ་བ་བཞིན་དུ་རྣམ་པར་དཔྱད་པ་དང༌། ཡེ་ཤེས་ཀྱི་དཀྱིལ་འཁོར་ལ་ཡང་དག་པར་སེམས་པ་དང༌། བསམ་པ་ཤིན་ཏུ་ བརྟན་པ་ཡང་དག་པར་རྫོགས་པར་བྱ་བ་དང༌། ལས་ཐམས་ཅད་ཡང་དག་པར་བསགས་པ་ལ་འཇུག་པ་དང༌། ཆོས་རྣམས་ཀྱི་བདེན་པ་ཉིད་ཡང་དག་པར་བལྟ་བ་དང༌། ཆོས་ཐམས་ ཅད་ཀྱི་སྐྱོན་མེད་པ་ཉིད་དང༌། ཆོས་ཇི་ལྟ་བ་བཞིན་དུ་སྤྲུལ་པའི་རྒྱུད་པ་ལྡན་པ་ལ་རབ་ཏུ་འཇུག་པར་བྱ་བའི་ཕྱིར་ཆོས་ཐམས་ཅད་ཀྱི་རང་བཞིན་དངོས་པོ་མེད་པར་ཁོང་དུ་ཆུད་པར་བྱ་བ་ ༄༅། །དང༑ དོན་ཐམས་ཅད་རྣམ་པ་སྣ་ཚོགས་སུ་འབྱུང་བ་ལ་རྣམ་པར་དཔྱོད་པ་དང༌། བརྗོད་པ་ཐམས་ཅད་ལ་གནས་མེད་པར་ཤིན་ཏུ་བསྒྲུབས་པ་དང༌། གནས་ཐམས་ཅད་རྐྱེན་སྣ་ཚོགས་ཀྱིས་བྱུང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་བྱ་བ་དང༌། ཡོངས་སུ་བསྔོ་བ་རྣམ་པར་དབེན་པ་ལ་རབ་ཏུ་དཔྱོད་པ་ དང༑ ཆོས་ཐམས་ཅད་ཚུལ་གཅིག་ཏུ་ཡང་དག་པར་བལྟ་བ་དང༌། ཚུལ་མཐའ་ཡས་པའི་ཆོས་ཐམས་ཅད་དང་འགལ་བ་མེད་པར་བྱ་བ་དང༌། ཡོངས་སུ་བསྔོ་བ་ལ་ མཁས་པའི་བྱང་ཆུབ་སེམས་དཔའ་ཐམས་ཅད་ལ་འགྲོགས་པས་བསྙེན་པ་དང༌། དགེ་བའི་རྩ་བ་ཐམས་ཅད་ཡོངས་སུ་བསྔོ་བས་འགྲོ་བ་ཐམས་ཅད་ཡང་དག་པར་ གཟུང་བ་དང༌། འདས་པ་དང༌། མ་འོངས་པ་དང༌། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་ཀྱི་ཡོངས་སུ་བསྔོ་བ་ཁོང་དུ་ཆུད་པར་བྱེད་ཅིང་ཡོངས་སུ་བསྔོ་ སྟེ༑ དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་འཇིགས་པ་མེད་པའི་སེམས་ཀྱིས་སངས་རྒྱས་ཀྱི་ཆོས་ཐམས་ཅད་ལ་ཡོངས་སུ་བསྔོའོ། །ཚད་མེད་པའི་ སེམས་ཀྱིས་སེམས་ཅན་ཐམས་ཅད་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །བདག་གིར་བྱ་བ་མེད་པའི་སེམས་ཀྱིས་ཕྱོགས་ཐམས་ཅད་ལ་ཡོངས་སུ་ བསྔོའོ༑ ༑ཁྱད་པར་མེད་པའི་སེམས་ཀྱིས་འཇིག་རྟེན་ཐམས་ཅད་ལ་ཡོངས་སུ་བསྔོ་སྟེ། དགེ་བའི་རྩ་བ་དེ་ཡུལ་དང༌། སྤྱོད་ཡུལ་ཐམས་ཅད་དང༌། འཇིག་རྟེན་ཐམས་ཅད་ཀྱིས་ གོས་པ་མེད་པའི་ཕྱིར་ཡོངས་སུ་བསྔོའོ། །དགེ་བའི་རྩ་བ་དེ་འཇིག་རྟེན་ལས་འདས་པའི་ཆོས་ལ་ཡང་དག་པར་སྤྱོད་པས་ཡོངས་སུ་བསྔོའོ། །དགེ་བའི་རྩ་བ་དེ་འགྲོ་བ་ཐམས་ ཅད་མི་དམིགས་ཤིང་མི་གནས་པས་ཡོངས་སུ་བསྔོའོ། །དགེ་བའི་རྩ་བ་དེ་ཐམས་ཅད་ཟིལ་གྱིས་གནོན་པའི་ནན་ཏན་བསྟན་པས་ཡང་དག་པར་བསྐྱེད་པས་ཡོངས་སུ་བསྔོའོ།། དགེ་བའི་རྩ་བ་དེ་ཆོས་ཀྱི་འབྱུང་གནས་རྣམ་པར་བརྟགས་པ་མེད་པ་མངོན་པར་བསྒྲུབས་པས་ཡོངས་སུ་བསྔོའོ། །དགེ་བའི་རྩ་བ་དེ་དེ་བཞིན་ཉིད་ཀྱི་སྒོ་ཐམས་ཅད་དུ་འགྲོ་ ཞིང༑ མཐའ་དང་དབུས་མེད་པར་འགྲོ་བས་ཡོངས་སུ་བསྔོའོ། །དེ་བཞིན་ཉིད་ཇི་ལྟ་བ་དེ་བཞིན་དུ་དགེ་བའི་རྩ་བ་དེ་དག་ཆོས་ཐམས་ཅད་ཀྱི་དེ་ཁོ་ན་རབ་ཏུ་རྟོགས་པར་བྱ་བའི་ ཕྱིར་ཡོངས་སུ་བསྔོའོ། །དེ་བཞིན་ཉིད་ཀྱི་ངང་ཚུལ་གང་ཡིན་པ་དེའི་ངང་ཚུལ་དུ་གྱུར་པར་དགེ་བའི་རྩ་བ་དེ་དག་ཡོངས་སུ་བསྔོའོ། །དེ་བཞིན་ཉིད་ཀྱི་རང་བཞིན་གང་ཡིན་ པ་དེ་བཞིན་དུ་དགེ་བའི་རྩ་བ་དེ་དག་ཆོས་ཐམས་ཅད་ཀྱི་རང་བཞིན་རང་བཞིན་མེད་པའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཀྱི་མཚན་ཉིད་གང་ཡིན་པ་དེ་བཞིན་དུ་དགེ་ ༄༅། །བའི་རྩ་བ་དེ་དག་མཚན་ཉིད་མེད་པའི་ཆོས་ཐམས་ཅད་མཚན་ཉིད་ཀྱིས་ཡང་དག་པར་དམིགས་པའི་ཕྱིར་ཡོངས་སུ་བསྔོའོ། །ཆོས་ཉིད་གང་ གིས་དེ་བཞིན་ཉིད་རྟོགས་པར་འགྱུར་བ་དེ་བཞིན་དུ་དགེ་བའི་རྩ་བ་དེ་དག་སངས་རྒྱས་ཀྱི་ཆོས་ལས་ཕྱིར་མི་ལྡོག་པའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཀྱི་སྤྱོད་ཡུལ་ གང་ཡིན་པ་དེ་བཞིན་དུ་དགེ་བའི་རྩ་བ་དེ་དག་དེ་བཞིན་གཤེགས་པའི་སྤྱོད་ཡུལ་ཁོང་དུ་ཆུད་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཀྱི་ཡུལ་གང་ཡིན་པ་དེ་ བཞིན་དུ་དགེ་བའི་རྩ་བ་དེ་དག་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཡུལ་ཡུལ་མེད་པའི་རང་བཞིན་དུ་ཁོང་དུ་ཆུད་པ་ཡོངས་སུ་ རྫོགས་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་གང་ལ་གཞོག་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་ཐམས་ཅད་ཀྱི་གནས་སུ་འགྱུར་བའི་ཕྱིར་ ཡོངས་སུ་བསྔོའོ། །དེ་བཞིན་ཉིད་ཇི་ལྟར་རྗེས་སུ་སོང་བ་དེ་བཞིན་དུ་དགེ་བའི་རྩ་བ་དེ་དག་ཕྱི་མའི་མཐར་གྱུར་པའི་བསྐལ་པའི་རྗེས་སུ་འབྲང་ཞིང་རྒྱུན་འཆད་པ་མེད་ པའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཚད་མེད་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་ཐམས་ཅད་ཀྱི་སེམས་ནམ་མཁའི་དབྱིངས་ལྟར་ཚད་མེད་པར་ བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཀྱིས་གང་དུ་ཁྱབ་པ་དེ་བཞིན་དུ་དགེ་བའི་རྩ་བ་དེ་དག་འཇིག་རྟེན་གྱི་ཁམས་ཐམས་ཅད་སེམས་གཅིག་གིས་རྒྱས་པར་དགང་ བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་སྲིད་དུ་རིང་བར་གནས་པ་དེ་བཞིན་དུ་དགེ་བའི་རྩ་བ་དེ་དག་འཇིག་རྟེན་ཐམས་ཅད་དགའ་བ་ཟད་མི་ཤེས་པར་གནས་པར་བྱ་ བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་རྗེས་སུ་འགྲོ་བ་དེ་བཞིན་དུ་དགེ་བའི་རྩ་བ་དེ་དག་སངས་རྒྱས་ཀྱི་ཆོས་དཔེ་མེད་པ་ཐམས་ཅད་ཡོངས་སུ་རྫོགས་པར་བྱ་བའི་ ཕྱིར་ཡོངས་སུ་བསྔོའོ། །དེ་བཞིན་ཉིད་ཀྱི་སྙིང་པོ་གང་ཡིན་པ་དེ་བཞིན་དུ་དགེ་བའི་རྩ་བ་དེ་དག་ཉེ་བའི་ཉོན་མོངས་པ་ཐམས་ཅད་བསལ་བའི་སྙིང་པོ་དང་ལྡན་པར་ཡོངས་སུ་ བསྔོའོ༑ ༑དེ་བཞིན་ཉིད་ཇི་ལྟར་མི་ཤིགས་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་ཐམས་ཅད་མི་མཐུན་པ་མེད་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཀྱི་སྣང་ བ་གང་ཡིན་པ་དེ་བཞིན་དུ་དགེ་བའི་རྩ་བ་དེ་དག་ཐམས་ཅད་དུ་སྣང་བར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཐམས་ཅད་ན་ཡོད་པ་དེ་བཞིན་དུ་དགེ་བའི་རྩ་བ་དེ་དག་ ཐམས་ཅད་དུ་འགྲོ་བར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་དུས་ཐམས་ཅད་ན་ཡོད་པ་དེ་བཞིན་དུ་དགེ་བའི་རྩ་བ་དེ་དག་དུས་ཐམས་ཅད་ཀྱི་རྗེས་སུ་འབྲང་བར་ཡོངས་ ༄༅། །སུ་བསྔོའོ། །དེ་བཞིན་ཉིད་ཇི་ལྟར་རྣམ་པ་ཐམས་ཅད་ལ་ཡོད་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་ཐམས་ཅད་ཀྱི་རྗེས་སུ་འགྲོ་ཞིང་རྣམ་པར་དག་པར་ཡོངས་ སུ་བསྔོའོ། །དེ་བཞིན་ཉིད་ཇི་ལྟར་ཆོས་ཐམས་ཅད་ལ་ཐོགས་པ་མེད་པ་དེ་བཞིན་དུ་དགེ་བའི་རྩ་བ་དེ་དག་སྤྱོད་པ་ཐམས་ཅད་ལ་ཐོགས་པ་མེད་པར་ཡོངས་སུ་བསྔོའོ། །དེ་བཞིན་ ཉིད་ཇི་ལྟར་ཆོས་ཐམས་ཅད་ལ་མིག་ཏུ་གྱུར་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་ཐམས་ཅད་ཀྱི་མིག་ཏུ་གྱུར་པར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་དུབ་པར་ འགྱུར་བ་མེད་པ་དེ་བཞིན་དུ་དགེ་བའི་རྩ་བ་དེ་དག་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་དུབ་པ་མེད་པར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཟབ་པ་དེ་བཞིན་དུ་དགེ་ བའི་རྩ་བ་དེ་དག་ཡོངས་སུ་བསྔོ་བ་ཟབ་མོ་ཉིད་དུ་ཡོངས་སུ་བསྔོའོ། །དེ་བཞིན་ཉིད་ཇི་ལྟར་དངོས་པོ་མེད་པ་དེ་བཞིན་དུ་དགེ་བའི་རྩ་བ་དེ་དག་དངོས་པོ་མེད་པ་ཁོང་དུ་ཆུད་པར་བྱ་བའི་ཕྱིར་ ཡོངས་སུ་བསྔོའོ། །དེ་བཞིན་ཉིད་ཇི་ལྟར་འབྱུང་བ་མེད་པ་དེ་བཞིན་དུ་དགེ་བའི་རྩ་བ་དེ་དག་བསྟན་དུ་མེད་པའི་ཚུལ་གྱིས་ཡོངས་སུ་བསྔོའོ། །དེ་བཞིན་ཉིད་ཇི་ལྟར་རབ་རིབ་མེད་པ་དེ་བཞིན་ དུ་དགེ་བའི་རྩ་བ་དེ་དག་རབ་རིབ་མེད་པའི་མིག་ཐོབ་པར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་འདྲ་བ་མེད་པ་དེ་བཞིན་དུ་དགེ་བའི་རྩ་བ་དེ་དག་བྱང་ཆུབ་སེམས་དཔའི་སྤྱོད་པ་འདྲ་བ་མེད་ པ་བསྒྲུབ་པའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཞི་བ་དེ་བཞིན་དུ་དགེ་བའི་རྩ་བ་དེ་དག་རབ་ཏུ་ཞི་བ་ལ་གཞོལ་བར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་རྩ་བ་མེད་པ་དེ་ བཞིན་དུ་དགེ་བའི་རྩ་བ་དེ་དག་རྩ་བ་མེད་པའི་ཆོས་དམ་པའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་མཐའ་དང་དབུས་མེད་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་མཐའ་དང་དབུས་ མེད་པ་ཐམས་ཅད་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཆགས་པ་མེད་པ་དེ་བཞིན་དུ་དགེ་བའི་རྩ་བ་དེ་དག་ཆགས་པ་མེད་པའི་མཐའ་དང་མུར་ཐུག་པར་ཡོངས་ སུ་བསྔོའོ། །དེ་བཞིན་ཉིད་ཇི་ལྟར་བསྒྲིབས་པ་མེད་པ་དེ་བཞིན་དུ་དགེ་བའི་རྩ་བ་དེ་དག་སྒྲིབ་པ་ཐམས་ཅད་རབ་ཏུ་བསལ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་འཇིག་རྟེན་ན་རྒྱུ་བ་མེད་པ་དེ་བཞིན་དུ་ དགེ་བའི་རྩ་བ་དེ་དག་འཇིག་རྟེན་གྱི་ཆོས་ཐམས་ཅད་རྒྱུ་བ་མེད་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་འཇིག་རྟེན་དུ་མ་གཏོགས་པ་དེ་བཞིན་དུ་དགེ་བའི་རྩ་བ་དེ་དགའ་འཁོར་བ་ཐམས་ཅད་དུ་མ་ གཏོགས་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་མངོན་པར་འདུ་བྱ་བ་མེད་པ་དེ་བཞིན་དུ་དགེ་བའི་རྩ་བ་དེ་དག་མངོན་པར་འདུ་བྱ་བ་ཐམས་ཅད་ལས་གྱེན་དུ་འཕགས་པར་ཡོངས་སུ་བསྔོའོ། །དེ་ བཞིན་ཉིད་ཇི་ལྟར་གནས་པ་དེ་བཞིན་དུ་དགེ་བའི་རྩ་བ་དེ་དག་དེ་བཞིན་ཉིད་དུ་གནས་པར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཆོས་ཐམས་ཅད་དང་འབྱོར་པ་དེ་བཞིན་དུ་དགེ་བའི་རྩ་བ་དེ་དག་སེམས་ཅན་ཐམས་ ༄༅། །ཅད་སྤྱོད་པ་ཐོས་པ་ལ་བརྩོན་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཆོས་ཐམས་ཅད་ལ་ཡོད་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་ཐམས་ ཅད་དང་མཉམ་པའི་སྤྱོད་པ་ཡོངས་སུ་འགྲུབ་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཆོས་ཐམས་ཅད་དང་བྲལ་བ་མེད་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་ ཐམས་ཅད་དང༌། ཕྱི་མའི་མཐའི་མུར་ཐུག་པར་མི་འབྲལ་བར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཆོས་ཐམས་ཅད་ལ་ཟད་པ་མེད་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་ ཐམས་ཅད་ལ་ཡོངས་སུ་བསྔོ་བ་མི་ཟད་པའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཆོས་ཐམས་ཅད་དང་འགལ་བ་མེད་པ་དེ་བཞིན་དུ་དགེ་བའི་རྩ་བ་དེ་དག་འདས་པ་དང༌། མ་ བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་དང་འགལ་བ་མེད་པར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཆོས་ཐམས་ཅད་ཀྱི་མདོ་ཡིན་པ་དེ་བཞིན་དུ་དགེ་བའི་རྩ་བ་ དེ་དག་འགྲོ་བ་ཐམས་ཅད་མ་ལུས་པའི་དགེ་བའི་རྩ་བ་ཡང་དག་པར་བསྡུ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཆོས་ཐམས་ཅད་ལ་རྒྱུད་ཀྱི་ཚུལ་གཅིག་ཏུ་གྱུར་པ་དེ་བཞིན་ དུ་དགེ་བའི་རྩ་བ་དེ་དག་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་དང་རྒྱུད་ཀྱི་ཚུལ་གཅིག་ཏུ་འགྱུར་བར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཆོས་ཐམས་ ཅད་ལས་མ་འདས་པ་དེ་བཞིན་དུ་དགེ་བའི་རྩ་བ་དེ་དག་འཇིག་རྟེན་པ་དང༌། འཇིག་རྟེན་ལས་འདས་པ་ཡང་དག་པར་བསྡུ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཟིལ་གྱིས་མི་ནོན་པ་དེ་ བཞིན་དུ་དགེ་བའི་རྩ་བ་དེ་དག་འགྲོ་བ་ཐམས་ཅད་ཟིལ་གྱིས་མི་ནོན་པའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་མི་སྒུལ་བ་དེ་བཞིན་དུ་དགེ་བའི་རྩ་བ་དེ་དག་བདུད་ཐམས་ཅད་ཀྱི་ལས་ཀྱིས་མི་ སྒུལ་བའི་སེམས་དང་ལྡན་པར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་མ་འཁྲུགས་པ་དེ་བཞིན་དུ་དགེ་བའི་རྩ་བ་དེ་དག་བྱང་ཆུབ་སེམས་དཔའི་སྤྱོད་པ་ཐམས་ཅད་མ་འཁྲུགས་པར་སྤྱད་པའི་ཕྱིར་ ཡོངས་སུ་བསྔོའོ། །དེ་བཞིན་ཉིད་ཇི་ལྟར་གཡོ་བ་མེད་པ་དེ་བཞིན་དུ་དགེ་བའི་རྩ་བ་དེ་དག་སེམས་ཅན་ཐམས་ཅད་གཡོ་བ་མེད་པའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཟད་པ་མེད་པ་དེ་ བཞིན་དུ་དགེ་བའི་རྩ་བ་དེ་དག་འཇིག་རྟེན་གྱི་ཆོས་ཐམས་ཅད་ཀྱིས་མི་ཟད་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་བྱང་ཆུབ་ཡིན་པ་དེ་བཞིན་དུ་དགེ་བའི་རྩ་བ་དེ་དག་ཆོས་ཐམས་ ཅད་རྣམ་པར་འཚང་རྒྱ་བ་མཐོང་བར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཞིག་པ་མེད་པ་དེ་བཞིན་དུ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱི་ལྷག་པའི་བསམ་པ་འཇིག་པ་མེད་ པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་སྣང་བ་ཡིན་པ་དེ་བཞིན་དུ་དགེ་བའི་རྩ་བ་དེ་དག་འགྲོ་བ་ཐམས་ཅད་ཀྱིས་ཡེ་ཤེས་ཀྱི་སྣང་བ་ཆེན་པོ་རབ་ཏུ་ཐོབ་པར་བྱ་བའི་ཕྱིར་ཡོངས་སུ་ ༄༅། །བསྔོའོ༑ ༑དེ་བཞིན་ཉིད་ཇི་ལྟར་བརྗོད་དུ་མེད་པ་དེ་བཞིན་དུ་དགེ་བའི་རྩ་བ་དེ་དག་བརྗོད་པ་ཐམས་ཅད་བརྗོད་དུ་མེད་པར་ཤེས་པར་བྱ་བའི་ཕྱིར་ཡོངས་སུ་བསྔོའོ། ། དེ་བཞིན་ཉིད་ཀྱིས་ཇི་ལྟར་འགྲོ་བ་ཐམས་ཅད་ཡང་དག་པར་གཟུང་བ་དེ་བཞིན་དུ་དགེ་བའི་རྩ་བ་དེ་དག་བྱང་ཆུབ་སེམས་དཔའི་སྤྱོད་པ་ཐམས་ཅད་ཡང་དག་པར་གཟུང་བ་རབ་ཏུ་ཐོབ་པར་ བྱ་བའི་ཕྱིར་ཡོངས་སུ་བསྔོའོ། །ཇི་ལྟར་དེ་བཞིན་ཉིད་སྤྱོད་པ་ཐམས་ཅད་ཀྱི་རྗེས་སུ་སོང་བ་དེ་བཞིན་དུ་དགེ་བའི་རྩ་བ་དེ་དག་བརྗོད་པ་དང་སྤྱོད་པ་ཐམས་ཅད་མ་ལུས་པར་ཡོངས་སུ་ ཤེས་པའི་ཡེ་ཤེས་ཀྱི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་ཆོས་རྣམ་པ་ཐ་དད་པ་ཐམས་ཅད་མ་ལུས་པ་ལ་འགྲོ་བ་དེ་བཞིན་དུ་དགེ་བའི་རྩ་བ་དེ་དག་སངས་རྒྱས་ཀྱི་ཞིང་ ཐམས་ཅད་དུ་མངོན་པར་འཚང་རྒྱ་བས་མངོན་པར་སངས་རྒྱས་ཤིང་རྣམ་པར་འཕྲུལ་བ་ཡང་དག་པར་བསྟན་པ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ ལྟར་རྣམ་པར་རྟོག་པ་མེད་པ་དེ་བཞིན་དུ་དགེ་བའི་རྩ་བ་དེ་དག་འཇིག་རྟེན་ཐམས་ཅད་ཀྱིས་ཡོངས་སུ་རྟོག་པ་རྣམ་པར་རྟོག་པ་མེད་པར་བྱ་བའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ ལྟར་ལུས་ཐམས་ཅད་ལ་ཡོད་པ་དེ་བཞིན་དུ་དགེ་བའི་རྩ་བ་དེ་དག་ཚད་མེད་པའི་ལུས་ཀྱིས་སངས་རྒྱས་ཀྱི་ཞིང་ཐམས་ཅད་རྒྱས་པར་དགང་པའི་ཕྱིར་ཡོངས་སུ་བསྔོའོ། །དེ་བཞིན་ཉིད་ ལྟར་སྐྱེ་བ་མེད་པ་དེ་བཞིན་དུ་དགེ་བའི་རྩ་བ་དེ་དག་སྐྱེ་བ་མེད་པས་སྐྱེ་བ་མངོན་པར་སྒྲུབ་པ་ལ་མཁས་པ་བསྟན་པའི་ཕྱིར་ཡོངས་སུ་བསྔོའོ། །དེ་བཞིན་ཉིད་ཇི་ལྟར་གང་ན་ཡང་མེད་པ་མ་ཡིན་ པ་དེ་བཞིན་དུ་དགེ་བའི་རྩ་བ་དེ་དག་དུས་གསུམ་དུ་གཏོགས་པའི་ལུས་ཐམས་ཅད་ཀྱིས་ཐམས་ཅད་དུ་རྣམ་པར་འཕྲུལ་ཞིང་སངས་རྒྱས་ཀྱི་ཞིང་བྱིན་གྱིས་བརླབས་པ་ཡང་དག་པར་བསྟན་པ་ ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །ཇི་ལྟར་དེ་བཞིན་ཉིད་མཚན་མོ་ལ་ཡོད་པ་དེ་བཞིན་དུ་དགེ་བའི་རྩ་བ་འདིས་དུས་ཐམས་ཅད་དུ་བླ་ན་མེད་པའི་སྣང་བ་ཐོབ་ཅིང་ སངས་རྒྱས་ཀྱི་མཛད་པ་ཡོངས་སུ་རྫོགས་པར་གྱུར་ཅིག །ཇི་ལྟར་དེ་བཞིན་ཉིད་ཉིན་མོ་ལ་ཡོད་པ་དེ་བཞིན་དུ་དགེ་བའི་རྩ་བ་འདིས་འགྲོ་བ་ཀུན་གྱི་ཉིན་མོར་བགྲང་བ་ཐམས་ ཅད་དུ་སངས་རྒྱས་ཀྱི་རྣམ་པར་འཕྲུལ་བ་ཡོངས་སུ་སྟོན་པ། ཕྱིར་མི་ལྡོག་པའི་ཆོས་ཀྱི་འཁོར་ལོ་རབ་ཏུ་དགོད་ཅིང་འགྲོ་བ་ཐམས་ཅད་ཀྱིས་བལྟ་ན་དོན་ཡོད་པ་རྣམ་པར་དག་ པར་གྱུར་ཅིག །ཇི་ལྟར་ཟླ་བ་དང་ཡུད་ཙམ་ལ་དེ་བཞིན་ཉིད་ཡོད་པ་དེ་བཞིན་དུ་དགེ་བའི་རྩ་བ་འདིས་འགྲོ་བ་ཐམས་ཅད་ཀྱིས་དུས་ཐམས་ཅད་སྐད་ཅིག་གཅིག་ཏུ་ཁོང་དུ་ཆུད་ པར་བྱ་བའི་ཕྱིར་དུས་ལ་འཇུག་པར་མཁས་པ་ལ་རབ་ཏུ་གནས་པར་གྱུར་ཅིག །ཇི་ལྟར་དེ་བཞིན་ཉིད་དབྱར་གྱི་དུས་ལ་ཡོད་པ་དེ་བཞིན་དུ་དགེ་བའི་རྩ་བ་འདིས་དབང་པོ་ ༄༅། །རྣམ་པ་ཐ་དད་པ་རབ་ཏུ་ཤེས་པར་བྱ་བའི་ཕྱིར་བསྐལ་པའི་གནས་སྣ་ཚོགས་སུ་དབང་པོ་རྣམ་པར་དག་པ་ཡོངས་སུ་རྫོགས་པར་གྱུར་ ཅིག །ཇི་ལྟར་དེ་བཞིན་ཉིད་འདུ་བ་དང་འཇིག་པའི་བསྐལ་པ་ལ་ཡོད་པ་དེ་བཞིན་དུ་དགེ་བའི་རྩ་བ་འདིས་འགྲོ་བ་ཐམས་ཅད་རྣམ་པར་དག་པར་གདུལ་བའི་ཕྱིར་ བསྐལ་པ་ཐམས་ཅད་དུ་རྣམ་པར་དག་པ་རྣམ་པར་བཀོད་པས་སྐྱེ་བ་མེད་ཅིང་གོས་པ་མེད་པར་གནས་པར་གྱུར་ཅིག །ཇི་ལྟར་དེ་བཞིན་ཉིད་ཕྱི་མའི་མཐའ་ལ་ཡོད་ པ་དེ་བཞིན་དུ་དགེ་བའི་རྩ་བ་འདིས་སྨོན་ལམ་ཆེན་པོ་ལས་ཕྱིར་མི་ལྡོག་པའི་ཕྱིར་ཕྱི་མའི་བསྐལ་པའི་མུར་ཐུག་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ ལ་གནས་པ་རྣམ་པར་དག་པར་གྱུར་ཅིག །ཇི་ལྟར་དེ་བཞིན་ཉིད་འགྲོ་བའི་དུས་ལ་ཡོད་པ་དེ་བཞིན་དུ་དགེ་བའི་རྩ་བ་འདིས་སེམས་ཀྱི་སྐད་ཅིག་གཅིག་ཏུ་ཡང་འབྲལ་ བ་མེད་པར་བྱ་བའི་ཕྱིར་སེམས་ཅན་ཐམས་ཅད་ཀྱི་སེམས་སྐད་ཅིག་གཅིག་གིས་སངས་རྒྱས་ཐམས་ཅད་མཐོང་བ་ཡོངས་སུ་རྫོགས་པར་གྱུར་ཅིག །ཇི་ལྟར་དེ་བཞིན་ ཉིད་ཐམས་ཅད་དུ་འགྲོ་བ་དེ་བཞིན་དུ་དགེ་བའི་རྩ་བ་འདིས་ཁམས་གསུམ་ཐམས་ཅད་རྣམ་པར་དག་པར་འགྱུར་པའི་ཕྱིར་ཐམས་ཅད་ཟིལ་གྱིས་གནོན་པ་ཐོབ་པར་ གྱུར་ཅིག །ཇི་ལྟར་དེ་བཞིན་ཉིད་དངོས་པོ་དང་དངོས་པོ་མེད་པ་ཐམས་ཅད་ཀྱི་རྗེས་སུ་སོང་བ་དེ་བཞིན་དུ་དགེ་བའི་རྩ་བ་འདིས་དངོས་པོ་མེད་པ་ཡོངས་སུ་ཤེས་པའི་ཕྱིར་ དངོས་པོ་ཐམས་ཅད་རྣམ་པར་དག་པར་གྱུར་ཅིག །ཇི་ལྟར་དེ་བཞིན་ཉིད་དག་པ་དེ་བཞིན་དུ་དགེ་བའི་རྩ་བ་འདིས་ཚོགས་ཆེན་པོ་རྒྱུ་ཆེན་པོས་འབྱུང་བའི་ཕྱིར་བྱང་ཆུབ་ སེམས་དཔའ་ཐམས་ཅད་ཀྱི་སྤྱོད་པ་ཡོངས་སུ་དག་པར་གྱུར་ཅིག །དེ་བཞིན་ཉིད་ཇི་ལྟར་འོད་དང་པ་དེ་བཞིན་དུ་དགེ་བའི་རྩ་བ་འདིས་སེམས་ཀྱི་འོད་དང་བའི་ཕྱིར་བྱང་ ཆུབ་སེམས་དཔའི་ཏིང་ངེ་འཛིན་ཐམས་ཅད་རབ་ཏུ་ཐོབ་པར་གྱུར་ཅིག །དེ་བཞིན་ཉིད་ཇི་ལྟར་དྲི་མ་མེད་པ་དེ་བཞིན་དུ་དགེ་བའི་རྩ་བ་འདིས་དྲི་མ་མེད་པའི་སེམས་ཡོངས་སུ་ རྫོགས་ཤིང་དྲི་མ་ཐམས་ཅད་བྱང་བར་གྱུར་ཅིག །ཇི་ལྟར་དེ་བཞིན་ཉིད་བདག་གི་མེད་པ་དེ་བཞིན་དུ་དགེ་བའི་རྩ་བ་འདིས་སངས་རྒྱས་ཀྱི་ཞིང་ཐམས་ཅད་རྒྱས་པར་ འགེངས་པའི་ཕྱིར་ཚད་མེད་པ་ཡོངས་སུ་གཟུང་བར་སེམས་བསྐྱེད་པ་རྣམ་པར་དག་པར་གྱུར་ཅིག །དེ་བཞིན་ཉིད་ཇི་ལྟར་མཉམ་པ་ཉིད་ཡིན་པ་དེ་བཞིན་དུ་དགེ་བའི་ རྩ་བ་འདིས་ཆོས་ཐམས་ཅད་སྣང་ཞིང་རབ་རིབ་མེད་པས་མཉམ་པར་ཡེ་ཤེས་ཀྱི་འབྱུང་གནས་ཐམས་ཅད་རབ་ཏུ་ཐོབ་པར་གྱུར་ཅིག །ཇི་ལྟར་དེ་བཞིན་ཉིད་བགྲང་ ༄༅། །དུ་མེད་པ་དེ་བཞིན་དུ་དགེ་བའི་རྩ་བ་འདིས་འཇིག་རྟེན་གྱི་ཁམས་ཐམས་ཅད་དུ་ཆོས་ཀྱི་སྤྲིན་གྱིས་རྒྱས་པར་དགང་བའི་ཕྱིར་ཐམས་ཅད་ མཁྱེན་པའི་ཐེག་པ་དང༌། སྟོབས་ཀྱི་མཛོད་གྲངས་མེད་པ་ལ་གནས་པར་གྱུར་ཅིག །ཇི་ལྟར་དེ་བཞིན་ཉིད་མཉམ་པ་ཉིད་ཀྱི་གནས་སུ་གྱུར་པ་དེ་བཞིན་དུ་དགེ་བའི་ རྩ་བ་འདིས་བྱང་ཆུབ་སེམས་དཔའི་སྤྱོད་པ་ཐམས་ཅད་ཉེ་བར་བླངས་པ་རབ་ཏུ་ཐོབ་པར་བྱ་བའི་ཕྱིར་ཐམས་ཅད་མཁྱེན་པ་ལ་རབ་ཏུ་འགོད་པར་གྱུར་ཅིག །དེ་བཞིན་ ཉིད་ཇི་ལྟར་སེམས་ཅན་གྱི་ཁམས་རྣམ་པར་ཕྱེ་བ་ཐམས་ཅད་ལ་ཡོད་པ་དེ་བཞིན་དུ་དགེ་བའི་རྩ་བ་འདིས་ཐོགས་པ་མེད་པའི་ཡེ་ཤེས་ཡོངས་སུ་རྫོགས་པས་ སེམས་ཅན་ཐམས་ཅད་མངོན་དུ་རེད་པར་གྱུར་ཅིག །ཇི་ལྟར་དེ་བཞིན་ཉིད་ཤེས་པ་དང༌། བརྗོད་པ་དང༌། རྣམ་པར་བརྗོད་པ་དང༌། བརྡ་དང༌། གང་ཟག་ཐམས་ ཅད་ལ་ཡོད་པ་དེ་བཞིན་དུ་དགེ་བའི་རྩ་བ་འདིས་སྒྲ་གྲགས་པ་ཐམས་ཅད་ཤེས་པས་སེམས་ཅན་གྱི་ཁམས་ཐམས་ཅད་ཤེས་པར་བྱ་བའི་ཕྱིར་སེམས་ཅན་ཐམས་ ཅད་ཀྱི་སྒྲ་སྐད་ཤེས་པའི་མངོན་པར་ཤེས་པ་ཡང་དག་པར་འཛིན་པ་ལ་མཁས་པར་གྱུར་ཅིག །ཇི་ལྟར་དེ་བཞིན་ཉིད་འགྲོ་བ་ཐམས་ཅད་ལས་རྣམ་པར་འདས་ ཤིང༌། འགྲོ་བ་ཐམས་ཅད་ཡོངས་སུ་བསྡུ་བའི་མཐར་ཐུག་པ་དེ་བཞིན་དུ་དགེ་བའི་རྩ་བ་འདིས་སེམས་ཅན་ཐམས་ཅད་དགེ་བའི་རྩ་བ་ལ་རབ་ཏུ་བརྟེན་པར་བྱ་བའི་ ཕྱིར་འགྲོ་བ་ཐམས་ཅད་ལས་འདས་པར་གྱུར་ཅིག །ཇི་ལྟར་དེ་བཞིན་ཉིད་ཡངས་པ་དེ་བཞིན་དུ་དགེ་བའི་རྩ་བ་འདིས་འཁྲུལ་པ་མེད་པར་བྱང་ཆུབ་སེམས་དཔའི་ སྤྱོད་པ་ཐམས་ཅད་ལ་ཤིན་ཏུ་བརྩོན་པས་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཆོས་བསྟན་པ་ཡང་དག་པར་འཛིན་པར་ གྱུར་ཅིག །ཇི་ལྟར་དེ་བཞིན་ཉིད་ནམ་ཡང་ཡལ་བ་མེད་པ་དེ་བཞིན་དུ་དགེ་བའི་རྩ་བ་འདིས་ཡེ་ཤེས་ཆེན་པོ་ལ་སེམས་ཅན་ཐམས་ཅད་རབ་ཏུ་དགོད་པའི་ཕྱིར་བསྐལ་ པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་རབ་ཏུ་བརྩོན་པར་གྱུར་ཅིག །ཇི་ལྟར་དེ་བཞིན་ཉིད་ཆོས་འབྱམས་ཀླས་པ་ཐམས་ཅད་ལ་ཡོད་པ་དེ་ བཞིན་དུ་དགེ་བའི་རྩ་བ་འདིས་ཆགས་པ་མེད་པའི་དྲན་པ་རྣམ་པར་དག་པས་བསོད་ནམས་ཀྱི་རྒྱུད་འབྱམས་ཀླས་པ་གཟུང་བར་གྱུར་ཅིག །ཇི་ལྟར་དེ་བཞིན་ ཉིད་བསྔགས་པ་མཐའ་ཡས་པ་དེ་བཞིན་དུ་དགེ་བའི་རྩ་བ་འདིས་བྱང་ཆུབ་སེམས་དཔའི་སྤྱོད་པ་ཐོབ་པའི་ཕྱིར་ཡེ་ཤེས་བསྔགས་པ་མཐའ་ཡས་པ་ཁོང་ ༄༅། །དུ་ཆུད་པར་གྱུར་ཅིག །ཇི་ལྟར་དེ་བཞིན་ཉིད་ཉེ་བར་ལེན་པ་མེད་པ་དེ་བཞིན་དུ་དགེ་བའི་རྩ་བ་འདིས་འགྲོ་བ་ཐམས་ཅད་ཉེ་བར་བཟུང་པ་ རྣམ་པར་དག་ཅིང་ཆོས་ཐམས་ཅད་ལ་ལེན་པ་མེད་པར་གྱུར་ཅིག །ཇི་ལྟར་དེ་བཞིན་ཉིད་གཡོ་བ་མེད་པ་དེ་བཞིན་དུ་དགེ་བའི་རྩ་བ་འདིས་བྱང་ཆུབ་སེམས་དཔའ་ཀུན་ཏུ་བཟང་ པོའི་སྤྱོད་པ་དང༌། སྨོན་ལམ་ཡོངས་སུ་རྫོགས་པས་མི་གཡོ་ཞིང་བརྟན་པ་དང༌། ཤིན་ཏུ་གནས་པར་གྱུར་ཅིག །ཇི་ལྟར་དེ་བཞིན་ཉིད་སངས་རྒྱས་ཀྱི་ཡུལ་དུ་གྱུར་པ་དེ་བཞིན་དུ་དགེ་ བའི་རྩ་བ་འདིས་ཉོན་མོངས་པ་ཐམས་ཅད་ཀྱི་ཡུལ་ཞི་བར་བྱ་བའི་ཕྱིར་འགྲོ་བ་ཐམས་ཅད་ཀྱིས་ཡེ་ཤེས་ཀྱི་ཡུལ་ཡོངས་སུ་རྫོགས་པར་གྱུར་ཅིག །ཇི་ལྟར་དེ་བཞིན་ཉིད་མི་འཕྲོག་ པ་དེ་བཞིན་དུ་དགེ་བའི་རྩ་བ་འདིས་མུ་སྟེགས་ཅན་གཞན་དང༌། ཕས་ཀྱི་རྒོལ་བ་ཐམས་ཅད་ཚར་གཅད་པའི་ཕྱིར་བདུད་ཀྱི་ལས་ཐམས་ཅད་ཀྱིས་མི་འཕྲོག་པར་གྱུར་ཅིག །ཇི་ ལྟར་དེ་བཞིན་ཉིད་བསྒོམ་པ་ཡང་མ་ཡིན། མི་བསྒོམ་པ་ཡང་མ་ཡིན་པ་དེ་བཞིན་དུ་དགེ་བའི་རྩ་བ་འདིས་རྣམ་པར་རྟོག་པ་ཐམས་ཅད་རབ་ཏུ་སྤང་བའི་ཕྱིར་དངོས་པོ་དང་དངོས་ པོ་མེད་པ་ཐམས་ཅད་ལ་རྣམ་པར་མི་རྟོག་པར་གྱུར་ཅིག །ཇི་ལྟར་དེ་བཞིན་ཉིད་བྱ་བ་མེད་པ་དེ་བཞིན་དུ་དགེ་བའི་རྩ་བ་འདིས་བྱང་ཆུབ་ཀྱི་སེམས་ཀྱི་རྒྱན་ཐམས་ཅད་འཐོབ་ པར་བརྩོན་པའི་ཕྱིར་སངས་རྒྱས་ཐམས་ཅད་མཐོང་བས་དམའ་བ་མེད་པར་གྱུར་ཅིག །ཇི་ལྟར་དེ་བཞིན་ཉིད་འགྲོ་བའི་སྨྲ་བ་ལ་ཡོད་པ་དེ་བཞིན་དུ་དགེ་བའི་རྩ་བ་འདིས་སྐད་ལ་མཁས་ པའི་རྒྱུད་ཀྱིས་ཤིན་ཏུ་འཕགས་པར་འགྱུར་བའི་ཕྱིར་སྐད་རྣམ་པར་ཕྱེ་བ་ཤེས་པ་མངོན་པར་ཤེས་པར་གྱུར་ཅིག །ཇི་ལྟར་དེ་བཞིན་ཉིད་ཆོས་ཐམས་ཅད་ལ་ལྟོས་པ་མེད་པ་དེ་བཞིན་དུ་ དགེ་བའི་རྩ་བ་འདིས་སེམས་ཅན་ཐམས་ཅད་ཀུན་ཏུ་བཟང་པོའི་སྤྱོད་པས་བྱུང་བའི་ཕྱིར་སེམས་ཅན་ཐམས་ཅད་ལྟོས་པ་མེད་པར་གྱུར་ཅིག །ཇི་ལྟར་དེ་བཞིན་ཉིད་ས་ནས་སར་འགྲོ་ བ་དེ་བཞིན་དུ་དགེ་བའི་རྩ་བ་འདིས་ཀུན་ཏུ་བཟང་པོའི་རྒྱན་ཐོབ་པའི་ཕྱིར་སེམས་ཅན་ཐམས་ཅད་ཀྱི་གནས་ཡེ་ཤེས་ཀྱིས་ཐོབ་པར་གྱུར་ཅིག །ཇི་ལྟར་དེ་བཞིན་ཉིད་གཅད་དུ་མེད་པ་ དེ་བཞིན་དུ་དགེ་བའི་རྩ་བ་འདིས་སྤྱོད་པའི་དཀྱིལ་འཁོར་ཐམས་ཅད་ཡང་དག་པར་བསྟན་པའི་ཕྱིར་སེམས་ཅན་ཐམས་ཅད་ཀྱིས་མི་འཇིགས་པ་གཅད་དུ་མེད་པ་རབ་ཏུ་ཐོབ་པར་གྱུར་ ཅིག །ཇི་ལྟར་དེ་བཞིན་ཉིད་ཟག་པ་མེད་པ་དེ་བཞིན་དུ་དགེ་བའི་རྩ་བ་འདིས་ཆོས་ཤེས་པའི་ཚུལ་གྱིས་རྣམ་པར་ཤེས་པའི་ཕྱིར་ཟག་པ་མེད་པའི་དགེ་བའི་རྩ་བ་བྱང་ཆུབ་ཀྱི་སེམས་ ཡོངས་སུ་རྫོགས་པར་གྱུར་ཅིག །ཇི་ལྟར་དེ་བཞིན་ཉིད་ཀྱི་ཆོས་གང་ཡང་འགག་པ་མེད་ཅིང༌། ཆོས་གང་ཡང་མངོན་པར་སངས་རྒྱས་པ་མེད་པ་དེ་བཞིན་དུ་དགེ་བའི་རྩ་བ་འདིས་ཆོས་ ༄༅། །ཀྱི་དབྱིངས་མཐའ་ཡས་པ་སེམས་བསྐྱེད་པས་རྒྱས་པར་དགང་བའི་ཕྱིར་ཆོས་ཐམས་ཅད་མངོན་པར་འཚང་རྒྱ་བར་གྱུར་ཅིག །ཇི་ལྟར་དེ་བཞིན་ཉིད་སྔོན་ གྱི་མཐས་ཟད་པར་མ་གྱུར་པ་དང༌། ཕྱི་མའི་མཐས་རྒྱས་པར་འགྱུར་བ་མེད་ཅིང༌། ད་ལྟར་བྱུང་བས་རྣམ་པ་ཐ་དད་པར་མ་གྱུར་པ་དེ་བཞིན་དུ་དགེ་བའི་རྩ་བ་འདིས་འཁོར་བ་ ཐམས་ཅད་ལས་རྣམ་པར་འདའ་བའི་ཕྱིར་བྱང་ཆུབ་ཀྱི་སེམས་གསར་པ་གསར་བའི་སྨོན་ལམ་གྱིས་འགྲོ་བ་ཐམས་ཅད་རྣམ་པར་དག་པ་དང་ལྡན་པར་གྱུར་ཅིག །ཇི་ལྟར་དེ་ བཞིན་ཉིད་དུས་གསུམ་དུ་རྣམ་པར་རྟོག་པ་མེད་པ་དེ་བཞིན་དུ་དགེ་བའི་རྩ་བ་འདིས་ད་ལྟར་བྱུང་བའི་དུས་ལ་སྐད་ཅིག་རྣམ་པར་དག་པའི་ཕྱིར་སྔོན་གྱི་མཐའ་དང་ཕྱི་མའི་མཐའ་ རྣམ་པར་དག་པར་གྱུར་ཅིག །ཇི་ལྟར་དེ་བཞིན་ཉིད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཡོངས་སུ་འགྲུབ་པའི་རྒྱུ་ཡིན་པ་དེ་བཞིན་དུ་དགེ་བའི་རྩ་བ་འདིས་ཤིན་ཏུ་ བརྩོན་པའི་བརྩོན་འགྲུས་ཐོབ་པའི་ཕྱིར་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཡེ་ཤེས་རབ་ཏུ་གྲུབ་པར་གྱུར་ཅིག །ཇི་ལྟར་དེ་བཞིན་ཉིད་ནམ་ཡང་ཀུན་ནས་ཉོན་མོངས་པར་ མི་འགྱུར་ཞིང་ཤིན་ཏུ་རྣམ་པར་དག་པ་དེ་བཞིན་དུ་དགེ་བའི་རྩ་བ་འདིས་ཐམས་ཅད་མཁྱེན་པ་ཉིད་རྣམ་པར་དག་པ་ཡོངས་སུ་རྫོགས་པར་འགྱུར་བའི་ཕྱིར་འགྲོ་བ་ཐམས་ཅད་ཀྱི་ ཀུན་ནས་ཉོན་མོངས་པ་ཤིན་ཏུ་སྤངས་པར་གྱུར་ཅིག །ཅེས་དེ་ལྟར་ཡོངས་སུ་བསྔོ་བའི་བྱང་ཆུབ་སེམས་དཔའ་ནི། འཇིག་རྟེན་ཐམས་ཅད་ཡོངས་སུ་དག་པར་བྱ་བའི་ཕྱིར་ཞིང་ ཐམས་ཅད་མཉམ་པ་ཉིད་འཐོབ་བོ། །ཆོས་ཀྱི་འཁོར་ལོ་ཐོགས་པ་མེད་ཅིང་ཕྱིར་མི་ལྡོག་པའི་ཕྱིར་འཇིག་རྟེན་ཐམས་ཅད་མཉམ་པ་ཉིད་འཐོབ་བོ། །ཐམས་ཅད་མཁྱེན་པར་སྨོན་པས་ཤིན་ཏུ་ འབྱུང་བའི་ཕྱིར་བྱང་ཆུབ་སེམས་དཔའ་ཐམས་ཅད་དང་མཉམ་པ་ཉིད་འཐོབ་བོ། །དུས་གསུམ་གྱི་སངས་རྒྱས་ཐམས་ཅད་དང་མཉམ་པ་ཉིད་ཀྱི་ཕྱིར་སངས་རྒྱས་ཐམས་ཅད་དང་མཉམ་ པ་ཉིད་འཐོབ་བོ༑ །རང་བཞིན་འཁྲུགས་པ་མེད་པའི་ཕྱིར་ཆོས་ཐམས་ཅད་མཉམ་པ་ཉིད་འཐོབ་བོ། །ཚིག་གི་ཚུལ་ཐམས་ཅད་ལ་མཁས་པའི་རྒྱུས་ཡོངས་སུ་ཤེས་པའི་ཕྱིར་དུས་ ཐམས་ཅད་མཉམ་པ་ཉིད་འཐོབ་བོ། །ཇི་ལྟར་བསྐྱེད་པའི་དགེ་བའི་རྩ་བ་ཡོངས་སུ་བསྔོ་བའི་ཕྱིར་བྱང་ཆུབ་སེམས་དཔའི་སྤྱོད་པ་ཐམས་ཅད་མཉམ་པ་ཉིད་འཐོབ་བོ། །དུས་ ཇི་ལྟ་བ་བཞིན་དུ་སྦྱོར་བའི་སངས་རྒྱས་ཀྱི་འཕྲིན་ལས་རྒྱུན་མི་གཅོད་པའི་ཕྱིར་དུས་ཐམས་ཅད་མཉམ་པ་ཉིད་འཐོབ་བོ། །འཇིག་རྟེན་པ་དང་འཇིག་རྟེན་ལས་འདས་པའི་དགེ་བའི་རྩ་ བ་གོས་པ་མེད་པའི་མཐར་ཐུག་པའི་ཕྱིར་ལས་ཀྱི་རྣམ་པར་སྨིན་པ་ཐམས་ཅད་མཉམ་པ་ཉིད་འཐོབ་བོ། །འཇིག་རྟེན་ཐམས་ཅད་དང་མི་འགལ་བར་སངས་རྒྱས་ཀྱི་མཛད་པ་ཡང་ ༄༅། །དག་པར་བསྟན་པའི་ཕྱིར་སངས་རྒྱས་ཀྱི་རྣམ་པར་འཕྲུལ་བ་དང༌། བྱིན་གྱི་རླབས་མཉམ་པ་ཉིད་འཐོབ་སྟེ། ཀྱེ་རྒྱལ་བའི་སྲས་དག །འདི་ནི། བྱང་ཆུབ་ སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་དེ་བཞིན་ཉིད་ཀྱི་མཚན་ཉིད་ཀྱི་རང་བཞིན་ཞེས་བྱ་བ་སྟེ། བརྒྱད་པའོ། །དེ་ལ་གནས་པའི་བྱང་ཆུབ་སེམས་དཔའ་ སེམས་དཔའ་ཆེན་པོ་ནི། སངས་རྒྱས་ཀྱི་ཁྱུ་མཆོག་དང༌། སེངྒེའི་ང་རོ་འཇིགས་པ་མེད་པར་བསྒྲག་པར་བྱ་བའི་ཕྱིར་ཆོས་ཀྱི་སྒོ་རྣམ་པར་དག་པ་མཐའ་དང་དབུས་མེད་པ་རབ་ཏུ་ འཐོབ་བོ། །དུས་ཐམས་ཅད་དུ་རྒྱུན་མི་འཆད་པའི་ཚུལ་དུ་བྱང་ཆུབ་སེམས་དཔའ་ཐམས་ཅད་ཀྱི་ཡོངས་སུ་སྨིན་པར་བྱ་བ་དང༌། གདུལ་བ་མཐའ་དང་དབུས་མེད་པ་ཡོངས་སུ་རྫོགས་ པ་རབ་ཏུ་འཐོབ་བོ། །འཇིག་རྟེན་གྱི་ཁམས་ཐམས་ཅད་ལུས་གཅིག་གིས་རྒྱས་པར་དགང་བའི་ཕྱིར་དེ་བཞིན་གཤེགས་པའི་སྐུ་མཐའ་དང་དབུས་མེད་པ་ཚད་མེད་པ་རབ་ཏུ་འཐོབ་ བོ༑ ༑དབྱངས་གཅིག་གིས་སེམས་ཅན་གྱི་ཁམས་ཐམས་ཅད་ཤེས་པར་བྱ་བའི་ཕྱིར་དེ་བཞིན་གཤེགས་པའི་གསུང་མཐའ་དང་དབུས་མེད་པ་མངོན་པར་སྒྲུབ་པ་ཡོངས་སུ་རྫོགས་ པ་རབ་ཏུ་འཐོབ་བོ། །འཇིག་རྟེན་གྱི་ཁམས་ཐམས་ཅད་སྐྲའི་སྦུགས་གཅིག་ཏུ་ཡོངས་སུ་འདུ་བར་བྱ་བའི་ཕྱིར་དེ་བཞིན་གཤེགས་པའི་སྟོབས་མཐའ་དང་དབུས་མེད་པ་ཡོངས་སུ་ རྫོགས་པ་རབ་ཏུ་འཐོབ་བོ། །སེམས་ཅན་ཐམས་ཅད་ཀྱི་ལུས་རྡུལ་གཅིག་ལ་རབ་ཏུ་དགོད་པའི་ཕྱིར་དེ་བཞིན་གཤེགས་པའི་རྣམ་པར་འཕྲུལ་བ་མཐའ་དང་དབུས་མེད་པ་ཡོངས་སུ་རྫོགས་ པ་རབ་ཏུ་འཐོབ་བོ། །སེམས་ཅན་གཅིག་གི་ལུས་ལས་སངས་རྒྱས་ཀྱི་ཡུལ་ཐམས་ཅད་མངོན་པར་འཚང་རྒྱ་བ་ཡོངས་སུ་བསྟན་པའི་ཕྱིར་དེ་བཞིན་གཤེགས་པའི་རྣམ་པར་ཐར་པ་མཐའ་ དང་དབུས་མེད་པ་ཐམས་ཅད་རབ་ཏུ་འཐོབ་བོ། །ཏིང་ངེ་འཛིན་གཅིག་ལ་ཏིང་ངེ་འཛིན་ཐམས་ཅད་མངོན་པར་སྒྲུབ་པ་ལ་མཁས་པའི་ཕྱིར་དེ་བཞིན་གཤེགས་པའི་ཏིང་ངེ་འཛིན་མཐའ་ དང་དབུས་མེད་པ་ཐམས་ཅད་ཡོངས་སུ་རྫོགས་པ་རབ་ཏུ་འཐོབ་བོ། །ཕྱི་མའི་མཐའི་མུར་ཐུག་པར་ཆོས་གཅིག་གི་ཚིག་ཤིན་ཏུ་བསྟན་པས་སེམས་ཅན་ཐམས་ཅད་ཀྱི་ཐེ་ཚོམ་གཅད་པ་ ཟད་མི་ཤེས་པའི་ཕྱིར་དེ་བཞིན་གཤེགས་པའི་ཐ་དད་པ་ཡང་དག་པར་ཤེས་པ་མཐའ་དང་དབུས་མེད་པ་ཐམས་ཅད་ཡོངས་སུ་རྫོགས་པ་རབ་ཏུ་འཐོབ་བོ། །སེམས་ཅན་གྱི་ཁམས་མ་ ལུས་པར་སྟོབས་བཅུའི་ཐམས་ཅད་མཁྱེན་པ་ཉིད་མངོན་པར་རྫོགས་པར་འཚང་རྒྱ་བ་བསྟན་པའི་ཕྱིར་དེ་བཞིན་གཤེགས་པའི་དཔའ་བ་རླབས་པོ་ཆེ་མཐའ་དང་དབུས་མེད་པ་ཡོངས་སུ་ རྫོགས་པ་རབ་ཏུ་འཐོབ་བོ། །དེ་ནས་བྱང་ཆུབ་སེམས་དཔའ་རྡོ་རྗེ་རྒྱལ་མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་ ༄༅། །དག་སྨྲས་སོ། །དེ་དག་བསམ་པ་བརྟན་པའི་སེམས་ལྡན་པ། །དྲན་པ་གསལ་བས་རྨོངས་པ་མེད་གྱུར་ཅིང༌། །བརྟན་ཞིང་དེས་ལ་ཡོངས་སུ་གདུང་མེད་པ། ། མཚུངས་མེད་དེ་དག་བསོད་ནམས་ཡང་དག་གསོག །དེ་དག་མི་མཐུན་མེད་པའི་ཡིད་ལྡན་ཞིང༌། །བསམ་པ་ཤིན་ཏུ་རྣམ་པར་དག་པ་རྣམས། །ཇི་སྙེད་སྣ་ཚོགས་འཇིག་རྟེན་སྐྱེ་ བ་ཡི༑ ༑ལས་ཀྱི་རྣམ་པ་ཐམས་ཅད་རྨོངས་མེད་མཁས། །དེ་དག་ལས་ཀྱི་རྣམ་པ་སྣ་ཚོགས་པ། །རྣམ་པ་ཐ་དད་ཡངས་ལ་རྗེས་སུ་སེམས། །དེས་ནི་འཇིག་རྟེན་མ་ལུས་བདེ་བར་ བྱེད༑ ༑དེ་ལ་ཡིད་ཀྱིས་རྟག་ཏུ་མངོན་པར་བརྩོན། །དེ་དག་འགྲོ་བ་ཀུན་དང་འགལ་མེད་ཡིན། །དགའ་བར་བྱེད་པའི་སེམས་དང་ལྡན་པ་སྟེ། །ལས་ཀྱི་རྣམ་པ་ཅི་འདྲར་རྣམ་ཕྱེ་བ། ། དེ་དག་ཡང་དག་སྒྲུབ་པར་མངོན་པར་བརྩོན། །ཁ་ལོ་སྒྱུར་སར་ཐམས་ཅད་གཟུང་སེམས་ལྡན། །ཡོངས་སུ་གདུང་མེད་ཆགས་མེད་ཡིད་དང་ལྡན། །དོན་དང་ཆོས་ཉིད་དེ་དག་ རྗེས་སུ་འཐོབ། །འགྲོ་ལ་ཕན་ཕྱིར་དེ་དག་མངོན་པར་བརྩོན། །དེ་དག་ཡིད་ཀྱིས་དགེ་བ་རྟོགས་གྱུར་ཅིང༌། །གང་དག་རྣམ་པ་ཐ་དད་གྲངས་མང་བ། །དེ་དག་རྒྱུད་དང་ཚུལ་ཡང་ རབ་ཏུ་ཤེས། །དེ་དག་འཇིག་རྟེན་ཕན་ཕྱིར་ཡོངས་སུ་བསྔོ། །ཤིན་ཏུ་ཡངས་པའི་ཚུལ་གྱི་དམ་པ་འདི། །མཉམ་ཡངས་ཡེ་ཤེས་རྟག་ཏུ་ཚུལ་ཤེས་པས། །གནས་རྣམས་ ཐམས་ཅད་མ་ལུས་མཐོང་བྱས་ཤིང༌། །དེ་བཞིན་ཉིད་ལྟར་ཡོངས་སུ་བསྔོ་བ་བྱེད། །གང་ལ་དེ་བཞིན་ཉིད་དེ་ཡོད་པ་ཡི། །རྣམ་པ་ཐམས་ཅད་འཇིག་རྟེན་བླངས་བྱས་ཤིང༌། །འཇིག་ རྟེན་རྒྱུད་རྣམས་ཆགས་པ་མེད་པའི་ཕྱིར། །དེ་འདྲའི་ལས་སུ་བརྟན་པ་ཡོངས་སུ་བསྔོ། །དེ་ནི་ཀུན་ཏུ་འགྲོ་བར་རྟོགས་བྱས་ཤིང༌། །དེ་བཞིན་ཉིད་ཀྱི་ཚུལ་རྒྱུད་གང་ཡིན་དང༌། ། དམིགས་པ་དག་དང་འོན་ཏམ་དམིགས་མེད་པ། །དེ་ལྟར་བསོད་ནམས་ཡིད་དུ་འོང་བ་བསྔོ། །མུན་ལ་ཡོད་དང་ཉིན་ལ་ཡོད་པ་དང༌། །ཡུད་དུ་ཡན་མན་དེ་བཞིན་ཟླ་ཡོད་དང༌། ། ལོ་ལ་ཡོད་དང་བསྐལ་ལ་ཡོད་པའམ། །དེ་བཞིན་ཇི་བཞིན་དེ་བཞིན་ཉིད་བཞིན་བསྔོ། །དུས་ལ་ཡོད་པའམ་ཞིང་ལ་ཡོད་པ་དང༌། །སེམས་ཅན་ཡོད་པའམ་ཆོས་ལ་ཡོད་པ་ དང༌། །ཀུན་ལ་ཡོད་པའམ་ཡོད་པ་མ་ཡིན་པ། །དེ་བཞིན་བསོད་ནམས་མ་ལུས་ཡོངས་སུ་བསྔོ། །དེ་བཞིན་ཉིད་ཀྱི་རང་བཞིན་ཅི་འདྲ་བ། །རང་བཞིན་དེ་འདྲར་སེམས་ཀྱང་ བསྒྱུར་བྱས་ཤིང༌། །ཇི་ལྟར་དེ་བཞིན་ཉིད་དེ་རྗེས་འགྲོ་བ། །དེ་ལྟར་བསོད་ནམས་གཅིག་མིན་ཡོངས་སུ་བསྔོ། །དེ་བཞིན་ཇི་བཞིན་དེ་བཞིན་ཉིད་ཀྱི་དངོས། །དེ་ལ་ཆོས་ཉིད་ ཁང་ཡང་ཡོད་མེད་ཅིང༌། །རང་བཞིན་མི་ལྡན་ཇི་ལྟར་དེ་བཞིན་ཉིད། །དེ་ལྟར་ལས་རྣམས་མཁས་པ་ཡོངས་སུ་བསྔོ། །དེ་བཞིན་ཉིད་ཀྱི་མཚན་ཉིད་ཅི་འདྲ་དང༌། །དེ་བཞིན་ཉིད་ ༄༅། །ཀྱི་དང་ཚུལ་ཅི་འདྲ་དང༌། །དེ་བཞིན་ཉིད་ཀྱི་རང་བཞིན་ཅི་འདྲ་བ། །དེ་འདྲ་ལས་རྣམས་ཀུན་ཀྱང་ཡོངས་སུ་བསྔོ། །དེ་དག་མཐའ་ཡས་ལས་ལ་ རབ་ཞུགས་ཤིང༌། །དེ་བཞིན་ཉིད་དེ་ཇི་ལྟར་མཐའ་ཡས་ཏེ། །དེ་ལ་ཆགས་དང་བཅིངས་པ་མེད་པ་ལྟར། །དེ་ལྟར་ལས་རྣམས་ཤིན་ཏུ་དག་པར་བྱེད། །དེ་ལྟར་རྒྱལ་ སྲས་ཤིན་ཏུ་མཁས་པ་དག །བསམ་པ་མི་གཡོ་ཤིན་ཏུ་བརྟན་ཐོབ་པ། །ཡེ་ཤེས་སྟོབས་ལྡན་ཚུལ་ལ་མཁས་གྱུར་པ། །དེ་དག་རྒྱལ་བའི་མཛོད་ཀྱི་ཚུལ་ལ་ཞུགས། །དེ་ དག་ཚུལ་གྱི་རྒྱལ་པོའི་ཚུལ་ཤེས་པས། །དེ་ལ་ཆགས་དང་བཅིངས་པ་མེད་པའི་ཕྱིར། །ཆགས་མེད་སེམས་ནི་འཇུག་པར་མི་འགྱུར་ཏེ། །འཇུག་པར་བྱེད་པའང་གང་ཡང་ དམིགས་པ་མེད། །ཆོས་ཀྱི་ལུས་ནི་རབ་ཏུ་ཐོབ་བྱས་ཤིང༌། །འགྲོ་བ་ཀུན་ལས་མཚན་ཉིད་ཇི་བཞིན་པ། །ཆོས་ཉིད་དེ་ལ་མཚན་ཉིད་མེད་གསུངས་པ། །དེ་འདྲའི་མཚན་ ཉིད་ཆོས་ལ་རབ་ཏུ་ཞུགས། །དེ་ལྟར་དེ་དག་འགྲོགས་པ་བསམ་མི་ཁྱབ། །དེ་ལ་སེམས་ནི་ལྷག་མ་མེད་པར་བྱེད། །བསམ་ཡས་ཆོས་རྣམས་ཀུན་ལ་རབ་ཏུ་ཞུགས།། སེམས་ནི་སེམས་མིན་རྣམ་པར་དབེན་པ་ཤེས། །དེ་དག་ཆོས་དབེན་ཉིད་ལ་འཇུག་བྱེད་ཅིང༌། །དེ་ལྟར་ཆོས་ཉིད་རྗེས་སུ་སེམས་པ་བྱེད། །གཡོ་དང་རློམ་སེམས་ ཐམས་ཅད་འགག་པ་སྟེ། །དེ་ཕྱིར་ཡོན་ཏན་རྣམ་པར་གྲགས་པ་ཡིན། །དེ་དག་རྣམ་སྨིན་ཐམས་ཅད་མ་ལུས་པར། །ཡེ་ཤེས་རྒྱས་བཏབ་ཟད་པར་མི་འགྱུར་ཏེ། །དེ་ནི་མི་ཟད་ མི་ཟད་ཉིད་ཀྱི་དངོས། །མི་ཟད་མཐའ་ཡི་ཚུལ་དང་འགལ་བ་མེད། །བསམ་པ་ལུས་ཀྱི་ཕྱི་རོལ་ཡོད་པ་མིན། །སེམས་ནི་ནང་ནའང་ཡོད་པ་མ་ཡིན་ཏེ། །དུས་རྣམས་གང་ནའང་ སེམས་ནི་ཡོད་པ་མིན། །རློམ་སེམས་རློམ་ཆོས་མེད་པས་ཞི་བར་འགྱུར། །དེ་འདྲའི་སྨོན་ལམ་ལྡན་པ་རྒྱལ་སྲས་རྣམས། །ཆོས་ཀྱི་རང་བཞིན་བརྩོན་པ་ཞི་བ་སྟོང་པ་སྟེ། །ཆོས་ རྣམས་མ་ལུས་ཐམས་ཅད་གཡོ་བ་མེད། །བདག་ཉིད་རྒྱལ་བས་རྣམ་པར་སངས་རྒྱས་མེད། །དེ་བཞིན་ཉིད་གང་འགྲོ་བ་ཀུན་མཉམ་པའི། །ཆོས་ཉིད་མཚན་ཉིད་རྗེས་སུ་ཤེས་ བྱས་ཤིང༌། །བསམ་ཡས་མཚན་ཉིད་དེ་དག་མཐོང་གྱུར་ནས། །མཚན་ཉིད་མེད་པའི་ཤེས་ལ་རྨོངས་པ་མེད། །དེ་ལྟར་ཟབ་པའི་སྤྱོད་པ་རབ་བརྩོན་པ། །དེ་དག་བྱང་ཆུབ་རྟག་པར་ བརྩོན་པ་སྟེ། །དེ་དག་སྨོན་ལམ་དེ་ཡང་རྟོག་པ་མེད། །འགྲོ་བ་ཀུན་གྱི་དོན་དུ་དེ་དག་བརྩོན། །དེ་དག་འཇིག་རྟེན་རྣམས་ལས་འདས་གྱུར་ཅིང༌། །འཆི་འཕོ་ཡོངས་སུ་རྟོག་པ་མེད་བྱས་ ཏེ༑ ༑སྤྲུལ་པ་འདྲ་བར་སེམས་ཀྱང་རིག་བྱས་ནས། །དེ་དག་འགྲོ་བ་གདུལ་ཕྱིར་རབ་ཏུ་འཇུག །དེ་དག་མཐོང་དང་དྲན་པ་འདི་འདྲ་སྟེ། །ལས་ཀྱི་སྨིན་པས་འཇིག་རྟེན་བྱུང་བ་ཡི། །ཁམས་ ༄༅། །གསུམ་པ་ཡི་སེམས་ཅན་ཐམས་ཅད་ལ། །དེ་དག་ཡོངས་སུ་བསྐྱབ་པར་མངོན་པར་བརྩོན། །འགྲོ་བ་ཀུན་གྱི་འདུ་ཤེས་རྒྱུ་བ་དང༌། །རྣམ་པར་རྟོག་པ་ ཇི་སྙེད་ཐ་དད་པའི། །སྐལ་བ་མི་མཉམ་དེ་དག་དེ་བཞིན་ཤེས། །ངོ་བོ་ཉིད་ལས་ནམ་ཡང་ཕྱིར་མི་ལྡོག །ཤེས་པས་མཁས་པ་ཆོས་རབ་བསྔགས་པ་རྣམས། །འགྲོ་བ་ཀུན་ལ་ སྙིང་བརྩེའི་སེམས་ལྡན་པས། །ཆོས་ཀྱི་ཚུལ་ལ་རྗེས་སུ་སེམས་བྱེད་ཅིང༌། །ཚུལ་མཁས་དེ་དག་དེ་ལྟར་ཡོངས་སུ་བསྔོ། །དེ་བཞིན་ཉིད་ཀྱི་མཚན་ཉིད་ཀྱི་རང་བཞིན་ཞེས་བྱ་ བ་སྟེ༑ ཡོངས་སུ་བསྔོ་བ་བརྒྱད་པའོ།། །། Copyright © 2012 by the Asian Classics Input Project. All rights reserved.