Tibetan Works reader

སངས་རྒྱས་ཕལ་པོ་ཆེ་ཞེས་བྱ་བ་ཤིན་ཏུ་རྒྱས་པ་ཆེན་པོའི་མདོ།

ཕལ་ཆེན།

ག checked, but not manually proofread ༄༅༅། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་ བ༑ བམ་པོ་བཞི་བཅུ་རྩ་གཉིས་པ། ཀྱེ༑ རྒྱལ་བའི་སྲས་དག །བྱང་ཆུབ་སེམས་ དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་ཆགས་པ་མེད་པ་དང༌། གྲོལ་ ཞིང་བཅིངས་པ་མེད་པ་ཞེས་བྱ་བ་དགུ་པ་གང་ཞེ་ན། ཀྱེ༑ རྒྱལ་བའི་སྲས་དག །འདི་ ༄༅༅། །ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་ཐམས་ཅད་ལ་ བརྙས་པ་མེད་པའི་སེམས་དང་ལྡན་པ་ཡིན། འཁོར་བ་བསྒྲུབ་པ་ལ་བརྙས་པ་མེད་པའི་སེམས་དང་ ལྡན་པ་ཡིན། དགེ་བའི་རྩ་བ་ཡང་དག་པར་བསྡུ་བ་ལ་བརྙས་པ་མེད་པའི་སེམས་དང་ལྡན་པ་ཡིན། དགེ་བའི་རྩ་བ་ཐམས་ཅད་ཡོངས་སུ་བཙལ་བ་ལ་བརྙས་པ་མེད་པའི་སེམས་དང་ལྡན་པ་ཡིན། བཤགས་ པའི་ལས་ལ་བརྙས་པ་མེད་པའི་སེམས་དང་ལྡན་པ་ཡིན། རྗེས་སུ་ཡི་རང་བའི་རྩ་བ་ལ་བརྙས་པ་ མེད་པའི་སེམས་དང་ལྡན་པ་ཡིན། འཇིག་རྟེན་གྱི་ཁམས་གཞན་ན་བཞུགས་པའི་དེ་བཞིན་གཤེགས་པ་ལ་ཕྱག་བྱ་བའི་ ལས་ལ་བརྙས་པ་མེད་པའི་སེམས་དང་ལྡན་པ་ཡིན། ཐལ་མོ་སྦྱར་ཞིང་བཏུད་པའི་ལས་ལ་བརྙས་པ་མེད་པའི་སེམས་དང་ ལྡན་པ་ཡིན། མཆོད་རྟེན་ལ་ཕྱག་བྱ་བ་དང༌། བླ་མ་ལ་ཕྱག་བྱ་བའི་ལས་ལ་བརྙས་པ་མེད་པའི་སེམས་དང་ལྡན་པ་ཡིན། འཇིག་རྟེན་གྱི་ཁམས་གཞན་ན་བཞུགས་པའི་དེ་བཞིན་གཤེགས་པ་རྣམས་ལ་གསོལ་བ་གདབ་པའི་ལས་ལ་བརྙས་པ་མེད་པའི་ སེམས་དང་ལྡན་པ་ཡིན་ཏེ། དེ་དགེ་བའི་རྩ་བ་དེ་དག་ལ་རབ་ཏུ་འཇུག་པ་དང༌། དགེ་བའི་རྩ་བ་དེ་དག་གི་གོ་སྐབས་དབྱེ་བར་བྱེད་ པ་དང༌། དགེ་བའི་རྩ་བ་དེ་དག་ལ་ཡིད་ཆེས་པ་བརྟན་པར་བྱེད་པ་དང༌། དགེ་བའི་རྩ་བ་དེ་དག་ལ་བདག་རབ་ཏུ་སྦྱོར་བ་དང༌། ༄༅༅། །དགེ་བའི་རྩ་བ་དེ་དག་སེམས་ཀྱི་བདག་ཉིད་ཆེ་བ་ཉིད་ལ་རབ་ཏུ་གཞོག་པ་དང༌། དགེ་བའི་རྩ་བ་དེ་ དག་གི་ཕྱིར་ཆགས་པ་མེད་པའི་སེམས་ལ་རབ་ཏུ་བརྩོན་པར་བྱེད་པ་དང༌། དགེ་བའི་རྩ་བ་དེ་དག་སྦྱིན་པ་ལ་རག་ལས་པར་ཡང་ དག་པར་སྒྲུབ་པ་དང༌། དགེ་བའི་རྩ་བ་དེ་དག་གི་ཕྱིར་ལྷག་པའི་བསམ་པ་ཉམས་པ་མེད་པ་རབ་ཏུ་སྒྲུབ་པ་དང༌། དགེ་བའི་རྩ་ བ་དེ་དག་དེ་བཞིན་གཤེགས་པས་དམིགས་པའི་ཡུལ་ལ་རབ་ཏུ་སྦྱོར་བ་དང༌། དགེ་བའི་རྩ་བ་དེ་དག་གི་ཕྱིར་སྟོབས་ཀྱི་ཤུགས་ རབ་ཏུ་འཐོབ་པ་ལ་ཡང་དག་པར་ལྟ་བའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། འདི་ལྟར་ཆགས་པ་མེད་པ་ དང༑ གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་ལུས་ཀྱི་ལས་རབ་ཏུ་གྲུབ་པར་གྱུར་ཅིག །ཆགས་པ་མེད་པ་ དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་ངག་གི་ལས་ཕུན་སུམ་ཚོགས་པར་གྱུར་ཅིག། ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་ སེམས་སུ་ཀུན་ཏུ་བཟང་པོའི་ཡིད་ཀྱི་ལས་ཡོངས་སུ་རྫོགས་པར་གྱུར་ཅིག། ཐམས་ཅད་དུ་རབ་ཏུ་བརྩོན་པས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་ སུ་ཀུན་ཏུ་བཟང་པོའི་བརྩོན་པ་ལ་བསྟེན་པར་གྱུར་ཅིག། ཕྱོགས་ཐམས་ཅད་དུ་སོང་ཞིང་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་ དབྱངས་ཆགས་པ་མེད་པའི་གཟུངས་འཐོབ་པར་བྱ་བ་རབ་ཏུ་ཐོབ་པར་གྱུར་ཅིག། སངས་རྒྱས་ཐམས་ཅད་མཐོང་བ་ཡང་དག་པར་འཛིན་ཅིང་ཆགས་པ་མེད་པ་དང༌། གྲོལ་ ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་སངས་རྒྱས་ཐམས་ཅད་མཐོང་བའི་གཟུངས་འཐོབ་པར་བྱ་བ་རབ་ཏུ་ཐོབ་པར་གྱུར་ཅིག །ཆོས་ཀྱི་སྤྲིན་བརྗོད་དུ་ མེད་པ་མ་ལུས་པར་དཀྱིལ་འཁོར་ཐམས་ཅད་དང་ལྡན་པའི་དབྱངས་ཀྱིས་རབ་ཏུ་བསྟན་པའི་ཕྱིར་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ ཏུ་བཟང་པོའི་དབྱངས་ཐམས་ཅད་ལ་མཁས་པའི་གཟུངས་རབ་ཏུ་ཐོབ་པར་གྱུར་ཅིག། འཇིག་རྟེན་གྱི་ཁམས་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་བརྩོན་ཞིང་ ༄༅། །ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ། ཀུན་ཏུ་བཟང་པོའི་སྤྱོད་པ་བསྐལ་པ་ཐམས་ཅད་ཏུ་ཡང་དག་པར་འཛིན་པའི་ གཟུངས་རབ་ཏུ་ཐོབ་པར་གྱུར་ཅིག། ཕྱི་མའི་མཐའི་བསྐལ་པའི་མུར་ཐུག་པ་མ་ལུས་པ་ཐམས་ཅད་དུ་སེམས་ཅན་གཅིག་གི་ལུས་ལ་ཇི་ལྟ་བ་དེ་བཞིན་དུ་སེམས་ཅན་མ་ ལུས་པའི་ལུས་ལ་ཡང་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་བྱང་ཆུབ་སེམས་དཔའི་སྤྱོད་པ་དང༌། རྣམ་པར་འཕྲུལ་པ་དང༌། བྱིན་གྱི་རླབས་ཐམས་ཅད་སེམས་ཅན་གཅིག་གི་ལུས་ལ་བྱིན་གྱིས་རློབ་པར་གྱུར་ཅིག། བྱང་ཆུབ་སེམས་དཔའི་སྤྱོད་པ་ལ་རབ་ཏུ་བརྩོན་ཞིང་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོ་དང་མངོན་སུམ་དུ་འགྱུར་བའི་གནས་སུ། འཁོར་གྱི་དཀྱིལ་འཁོར་ཐམས་ཅད་མཐའ་དག་ལྷག་པ་མེད་ཅིང་མ་ ལུས་པར་གཟུད་པ་བསྟན་པར་བྱིན་གྱིས་བྱིན་དུ་རློབ་པར་གྱུར་ཅིག། སེམས་ཅན་ཐམས་ཅད་འཛུད་པ་ལ་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་ སེམས་སུ་ཀུན་ཏུ་བཟང་པོའི་སྒོ་གཅིག་ནས། སངས་རྒྱས་ཀྱི་རྣམ་པར་འཕྲུལ་པ་བརྗོད་དུ་མེད་པའི་ཡང་བརྗོད་དུ་མེད་པ་མི་ཟད་པ་ཡང་དག་པར་མཐོང་བར་གྱུར་ཅིག། སངས་རྒྱས་ཐམས་ཅད་ཀྱི་སྐུ་མངོན་སུམ་དུ་མཐོང་བའི་ཕྱིར་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་སྒོ་སྣ་ཚོགས་ནས། སངས་རྒྱས་ ཀྱི་རྣམ་པར་འཕྲུལ་བ་བརྗོད་དུ་མེད་པའི་ཡང་བརྗོད་དུ་མེད་པའི་བསྐལ་པར་རྣམ་པར་དགོད་པ་མི་ཟད་པ་ལ་སེམས་ཅན་ཐམས་ཅད་རབ་ཏུ་འཇུག་པར་གྱུར་ཅིག། ཡོངས་སུ་སྐྱོ་བ་ མེད་པའི་སེམས་ལ་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་སྟོབས་བཅུའི་ཡེ་ཤེས་ཀྱི་སྒོ་ལ། སེམས་དུ་གདགས་པ་བརྗོད་དུ་ མེད་པའི་ཡང་བརྗོད་དུ་མེད་པ་ཡང་དག་པར་འཛུད་པ་དང༌། རབ་ཏུ་འགོད་པ་དང༌། སེམས་ཀྱི་སྐད་ཅིག་རེ་རེ་ལ་སྙིང་རྗེ་ཆེན་པོ་ཡང་དག་པར་འབྱུང་བར་གྱུར་ཅིག །ཀུན་ཏུ་བཟང་ པོའི་སྤྱོད་པ་ལ་གནས་པའི་ཚེ་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་སེམས་ཅན་ཐམས་ཅད་ཀྱི་ལུས་ཀྱིས་སངས་རྒྱས་ཀྱི་ཁྱུ་ མཆོག་གི་མཐུ་ཕྱུང་བ་དང༌། རྣམ་པར་འཕྲུལ་པ་ཐམས་ཅད་ཡང་དག་པར་སྟོན་པར་གྱུར་ཅིག། སེམས་ཅན་ཐམས་ཅད་འདུལ་བའི་དབང་ཉེ་བར་བཟུང་སྟེ། སེམས་ཅན་ གཅིག་ལ་ཇི་ལྟ་བ་དེ་བཞིན་དུ་སེམས་ཅན་ཐམས་ཅད་མ་ལུས་པ་ལ་ཡང་དེ་བཞིན་དུ་ཐམས་ཅད་མཁྱེན་པའི་སའི་སྟོབས་ལ་རབ་ཏུ་དགོད་པའི་ཕྱིར། ཆགས་པ་མེད་པ་དང༌། ༄༅། །གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་འགྲོ་བ་ཀུན་གྱི་བརྗོད་པ། སེམས་ཅན་གཅིག་གི་ཚིག་རྣམ་པར་གདགས་པ་ལ་ བྱིན་གྱིས་རློབ་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་སེམས་ཅན་གཅིག་གི་ལུས་ལ། སེམས་ཅན་ཐམས་ཅད་ཀྱི་ལུས་ཡང་དག་པར་གཟུད་པར་བྱིན་གྱིས་བྱིན་དུ་རློབ་ཅིང༌། དེ་དག་ཀྱང་དགེ་བའི་རྩ་བ་དེས་སངས་རྒྱས་ཀྱི་སྐུ་རབ་ཏུ་ཐོབ་པར་རང་རང་གིས་ ཤེས་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་མེ་ཏོག་གཅིག་ལ། འཇིག་རྟེན་གྱི་ ཁམས་ཐམས་ཅད་མ་ལུས་པར་རྣམ་པར་དག་པར་བྱིན་གྱིས་བརླབས་པ་ཡང་དག་པར་ཤེས་པར་གྱུར་ཅིག། སངས་རྒྱས་ཀྱི་ཞིང་ཐམས་ཅད་དུ་སེམས་ཅན་ཐམས་ཅད་ གདུལ་བའི་དབང་ཉེ་བར་བཟུང་སྟེ། རྣམ་པར་བསྟན་པར་བྱ་བའི་ཕྱིར་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་ཆོས་ཀྱི་དབྱིངས་ སུ་སྒྲ་དབྱངས་མངོན་པར་བསྒྲུབ་པ་མངོན་པར་སྒྲུབ་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་ པོའི་སྔོན་གྱི་མཐའི་བསྐལ་བའི་མུར་ཐུག་པ་སེམས་ཀྱི་སྐད་ཅིག་རེ་རེས་ཤིན་ཏུ་སྟོན་ཅིང༌། སངས་རྒྱས་ཀྱི་ཤུགས་ཀྱི་རྒྱན་འཇིག་རྟེན་གྱི་ཁམས་འབྱམས་ཀླས་པར་གཏོགས་ པར་ཐམས་ཅད་དུ་རྗེས་སུ་དྲན་པར་གྱུར་ཅིག། དགེ་བའི་རྩ་བ་འདིས་འཇིག་རྟེན་གྱི་ཁམས་སྣ་ཚོགས་འབྱམས་ཀླས་པ་ཐམས་ཅད་དུ་མ་བྱོན་པའི་སངས་རྒྱས་འབྱུང་བའི་ ཕྱིར་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་བསྐལ་བ་ཕྱི་མའི་མཐའི་མུར་ཐུག་པ། འཇིག་རྟེན་གྱི་ཁམས་ཐམས་ཅད་ཏུ་གཏོགས་པར་ ཤིན་ཏུ་བསྟན་པ་ལ་འཇུག་པར་གྱུར་ཅིག། དགེ་བའི་རྩ་བ་འདིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་བརྩོན་ཞིང་ཆགས་པ་མེད་པ་དང༌། གྲོལ་ཞིང་བཅིངས་ པ་མེད་པའི་སེམས་སུ་ཆོས་ཀྱི་དབྱིངས་ཐམས་ཅད་སྣང་བ་གཅིག་ཏུ་རྒྱས་པར་བཀང་སྟེ། འཇིག་རྟེན་གྱི་ཁམས་ནམ་མཁའི་དབྱིངས་ཀྱི་མཐར་ཐུག་པ་ཐམས་ཅད་སྣང་བ་བྱེད་ པར་གྱུར་ཅིག། དགེ་བའི་རྩ་བ་འདིས་ཀུན་ཏུ་བཟང་པོའི་སྤྱོད་པ་ལ་ཉེ་བར་སྤྱོད་པ་ཐོབ་ཅིང༌། ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་རྒྱུད་མཐའ་ ཡས་པའི་སྤྱོད་པའི་རྒྱུད་སྟོན་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་དེ་བཞིན་གཤེགས་པའི་ཡེ་ཤེས་ལ་ ༄༅། །འཇུག་པའི་ཚེ། བསྐལ་པ་ཐམས་ཅད་དུ་ཟད་པར་གྱུར་ཀྱང་ཡེ་ཤེས་མཐའ་དང་དབུས་མེད་པའི་མཐར་མི་འགྱུར་ཀྱང༌། དེ་བཞིན་གཤེགས་པའི་ཡེ་ ཤེས་ཀྱིས་བྱིན་གྱི་བརླབས་ཀྱང༌། ཀུན་ཏུ་བཟང་པོའི་སྤྱོད་པས་རབ་ཏུ་གྲུབ་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་ སུ་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་ལ་བརྩོན་པར་བྱེད་པའི་ཚེ། ཆོས་ཀྱི་དབྱིངས་མ་ལུས་པ་ན་བཞུགས་པའི་དེ་བཞིན་གཤེགས་པ་ཐམས་ཅད་མ་ལུས་པས་ ཞལ་བསྟན་པ་མཛད་དེ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་ཤིང༌། ཀུན་ཏུ་བཟང་པོའི་སྤྱོད་ཡུལ་ལ་རབ་ཏུ་ཞུགས་པར་བསམ་པས་ལུས་ཀྱི་ལས་དང༌། ངག་ གི་ལས་དང༌། ཡིད་ཀྱི་ལས་ལ་དུབ་པ་མེད་པར་བརྩོན་ཞིང༌། བྱང་ཆུབ་སེམས་དཔའི་སྤྱད་པ་སྤྱོད་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ ཞིང་བཅིངས་པ་མེད་པའི་སེམས་དང་ལྡན་ཞིང༌། ཀུན་ཏུ་བཟང་པོའི་སེམས་དོན་གྱི་ཚོགས་དང་མི་འགལ་བ། ཆོས་ཀྱི་ལུས་མ་ཉམས་པ། ངེས་པའི་ཚིག་གི་སར་རྣམ་ པར་དག་པ། སྤོབས་པ་ཐམས་ཅད་མི་ཟད་པའི་མཛོད། སེམས་ཅན་ཐམས་ཅད་གདུལ་བའི་སར་གྱུར་པས། སངས་རྒྱས་ཐམས་ཅད་ཀྱི་བྱང་ཆུབ་རབ་ཏུ་ཐོབ་པར་གྱུར་ ཅིག༑ དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་བརྩོན་ཞིང༌། འོད་མཐའ་ཡས་པ་ དང༑ སྣང་བ་བསམ་གྱིས་མི་ཁྱབ་པས་ཆོས་ཀྱི་སྒོ་རེ་རེ་ལ་འཇུག་ཅིང༌། དེ་བཞིན་དུ་ཆོས་ཐམས་ཅད་ཀྱི་སྒོ་ནས་འགྲོ་ཞིང་འཇུག་པས། ཐམས་ཅད་མཁྱེན་པའི་སའི་མཐར་ཐུག་པ་རབ་ ཏུ་ཐོབ་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཀུན་ཏུ་བཟང་པོའི་རྒྱན་གྱི་ཕ་རོལ་ཏུ་ཕྱིན་པ་ཐོབ་སྟེ། དམིགས་པ་རེ་རེ་ ཞིང་ཐམས་ཅད་མཁྱེན་པ་ཉིད་ཐམས་ཅད་ལ་ཞུགས་ཀྱང༌། ཐམས་ཅད་མཁྱེན་པའི་ཡེ་ཤེས་མཐར་ཐུག་པར་མི་འགྱུར་བའི་ཚུལ་གྱིས་རྒྱལ་པོ་དེ་ལྟ་བུ་ཐོབ་པར་གྱུར་ཅིག །དགེ་ བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཚེ་འདི་ནས་ཉེ་བར་བཟུང་སྟེ། ཕྱི་མའི་མཐའི་བསྐལ་པའི་མུར་ཐུག་པར་རྨོངས་པ་མེད་ཅིང༌། རྒྱུན་ མི་འཆད་པར་ཆོས་ལ་གཞོལ་ཞིང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པར་གྱུར་པའི་རྒྱུད་བརྗོད་དུ་མེད་པའི་ཐམས་ཅད་མཁྱེན་པ་ཉིད་དུ་རྣམ་པར་འཚང་རྒྱ་བའི་ ཚུལ་ཐོབ་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་རབ་ཏུ་སྣང་བར་ ༄༅། །གྱུར་པའི་སེམས་བསྒྲིབས་པ་མེད་པའི་ཆོས་ཀྱི་སྣང་བ་རབ་ཏུ་ཐོབ་པས། རྒྱུན་མི་འཆད་པའི་ལས་ལ་རབ་ཏུ་བརྩོན་ཅིང༌། བྱང་ཆུབ་སེམས་དཔའ་ཀུན་ ཏུ་བཟང་པོའི་རྣམ་པར་འཕྲུལ་པ་རབ་ཏུ་ཐོབ་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ། བྱང་ཆུབ་སེམས་དཔའ་ ཀུན་ཏུ་བཟང་པོའི་སྤྱོད་པ་ཐོབ་པ་བྱ་བ་ལ་བརྩོན་ཞིང༌། ཐམས་ཅད་ཀྱི་ཚུལ་དང༌། མཐའ་ཡས་པའི་ཚུལ་དང༌། བསམ་གྱིས་མི་ཁྱབ་པའི་ཚུལ་དང༌། བྱང་ཆུབ་སེམས་དཔའི་ ཚུལ་དང༌། ཐམས་ཅད་མཁྱེན་པའི་ཚུལ་དང༌། བྱང་ཆུབ་སེམས་དཔའི་འདུལ་བ་ཐམས་ཅད་ཀྱི་ཚུལ་དང༌། ཆོས་ཀྱི་འཁོར་ལོ་མཐའ་དང་དབུས་མེད་པ་རབ་ཏུ་བསྐོར་བའི་ཚུལ་ དང༑ དུས་བརྗོད་དུ་མེད་པའི་ཚུལ་དང༌། ཆོས་རྣམ་པ་ཐ་དད་པ་བསྟན་པའི་ཚུལ་དང༌། འཇིགས་པ་མེད་པའི་མཛོད་ས་མཚམས་མེད་པའི་ཚུལ་དང༌། ཆོས་ཐམས་ཅད་མ་ལུས་ པར་བསྟན་པའི་ཚུལ་དང༌། ཚུལ་དང་ཚུལ་མ་ཡིན་པ་རྗེས་སུ་རྟོགས་པའི་ཡེ་ཤེས་འཐོབ་པར་བྱ་བ་རབ་ཏུ་ཐོབ་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ ཞིང་བཅིངས་པ་མེད་པའི་སེམས་སུ་ཕྱིར་མི་ལྡོག་པའི་སེམས་ཅན། བྱང་ཆུབ་ཏུ་ཡང་དག་པར་འབྱུང་བ། ཉམས་པ་མེད་པར་བྱ་བ་དང༌། བསྟན་པ་དམ་པའི་དགེ་བའི་རྩ་བས་ སེམས་ཅན་ཐམས་ཅད་རྣམ་པར་དག་པའི་མཐར་ཕྱིན་པར་བྱེད་ཅིང༌། ཀུན་ཏུ་བཟང་པོའི་ལས་ཀྱིས་བསྲལ་པས། འགྲོ་བ་ཐམས་ཅད་དགའ་བར་བྱེད་པའི་ལུས་ཀྱི་ལས་ཡོངས་སུ་ རྫོགས་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་སེམས་ཅན་གྱི་ཁམས་ཐམས་ཅད་དགའ་བར་བྱ་བའི་ཚིག་བརྗོད་དུ་ མེད་པ་ལ་རབ་ཏུ་བརྩོན་ཞིང༌། དག་གི་ལས་ཀྱི་རྒྱན་ཐམས་ཅད་རྣམ་པར་དག་པ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་བྱིན་གྱི་རླབས་ལ་བརྩོན་པས། སེམས་ཅན་ཐམས་ ཅད་ཀྱི་རྣམ་པར་བརྗོད་པ་ཡོངས་སུ་ཤེས་པར་བྱ་བའི་ཡེ་ཤེས་རྣམ་པར་དག་པ་ཡོངས་སུ་ཐོབ་པར་གྱུར་ཅིག། དགེ་བའི་རྩ་བ་འདིས་ཀུན་ཏུ་བཟང་པོའི་སྤྱོད་པའི་སྤྱོད་ཡུལ་རབ་ཏུ་རྟོགས་ ཤིང་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་འགྲོ་བ་འབྱམས་ཀླས་པ་ཐམས་ཅད་དང༌། ཞིང་འབྱམས་ཀླས་པ་ཐམས་ཅད་དང༌། སེམས་ཅན་འབྱམས་ཀླས་ པ་ཐམས་ཅད་དང༌། མངོན་པར་ཤེས་པ་དང༌། ཡེ་ཤེས་བརྗོད་དུ་མེད་པའི་ཡང་བརྗོད་དུ་མེད་པའི་ཆོས་འབྱམས་ཀླས་པ་དང༌། ཆོས་འབྱམས་ཀླས་པའི་རྒྱན་དེ་བཞིན་གཤེགས་ པའི་དཀྱིལ་འཁོར་གྱི་མཛོད་ཐམས་ཅད་ནས་བྱུང་བ་དང༌། ལྷག་པའི་བསམ་པས་རྣམ་པར་དག་པའི་སེམས་ཀྱི་རྒྱུད་མཉམ་པ་ཉིད་ཀྱིས་ཞུགས་པའི་ཡེ་ཤེས་འབྱམས་ཀླས་པ་རབ་ ༄༅། །ཏུ་རྟོགས་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་སངས་རྒྱས་ཐམས་ཅད་ཀྱི་སྐུ་ ལས་བྱུང་བའི་ལུས་རྣམ་པར་དག་པ་དང༌། ལྷག་པའི་བསམ་པ་རྣམ་པར་དག་པས་མོས་པ་རབ་ཏུ་གྲུབ་པ་དང༌། སངས་རྒྱས་ཀྱི་བྱིན་གྱི་རླབས་ལ་བརྩོན་པ་དང༌། སངས་རྒྱས་ ཀྱི་གཟི་བརྗིད་ཀྱིས་ཡོངས་སུ་བཟུང་བ་དང༌། སངས་རྒྱས་ཀྱི་ཡུལ་ལ་ཡང་དག་པར་གནས་པ་དང༌། ཡེ་ཤེས་ཀྱི་རྒྱན་མཐའ་ཡས་པས་སྣང་བར་བྱས་པ་དང༌། བྱང་ཆུབ་སེམས་ དཔའི་ལས་ཀྱིས་མངོན་པར་བྱུང་བ་དང༌། ཚིག་རབ་ཏུ་དབྱེ་བ་ཐམས་ཅད་ལ་མཁས་པ་རྣམ་པར་དག་པ་ཁོང་དུ་ཆུད་པར་བྱ་བ་ལ་རབ་ཏུ་ཞུགས་པ་དང༌། ཐེག་པ་ཆེན་པོ་མཐའ་ ཡས་པའི་རྣམ་པར་འཕྲུལ་པས་རབ་ཏུ་བྱུང་བ་དང༌། འགྲོ་བ་མཐའ་དང་དབུས་མེད་པ་ཐམས་ཅད་མངོན་པར་རྫོགས་པར་འཚང་རྒྱ་བར་བྱ་བ་ཡང་དག་པར་བསྟན་པ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་དང༌། ཡོངས་སུ་བསྔོ་བ་ཡོངས་སུ་རྫོགས་པ་ཐོབ་པར་གྱུར་ཅིག། དགེ་བའི་རྩ་བ་འདིས་མཉམ་པ་ཉིད་ཀྱི་ སྨོན་ལམ་གྱི་དབང་པོས་བརྩོན་ཞིང་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་དབང་པོ་རྣོ་བ་དང༌། དབང་པོ་དགེ་བ་དང༌། ཆོས་ཐམས་ཅད་ལ་དབང་སྒྱུར་བའི་དབང་ པོ་དང༌། མི་ཟད་པའི་དབང་པོ་དང༌། དགེ་བའི་རྩ་བ་ཐམས་ཅད་ལ་བརྩོན་པའི་དབང་པོ་དང༌། སངས་རྒྱས་ཀྱི་ཡུལ་ཐམས་ཅད་ལ་མཉམ་པ་ཉིད་དུ་གྱུར་པའི་དབང་པོ་དང༌། བྱང་ཆུབ་སེམས་ དཔའ་ཐམས་ཅད་ཀྱི་ལུང་བསྟན་པ་ལ་ཕྱིར་མི་ལྡོག་པར་ཤིན་ཏུ་བརྩོན་པའི་དབང་པོ་དང༌། སངས་རྒྱས་ཀྱི་ཆོས་ཐམས་ཅད་ཤིན་ཏུ་ཕུགས་པའི་དབང་པོ་རྡོ་རྗེའི་ཁམས་ལྟ་བུ་དང༌། དེ་ བཞིན་གཤེགས་པ་ཐམས་ཅད་ཀྱི་ཡེ་ཤེས་མཐའ་དང་དབུས་མེད་པའི་སྣང་བར་ཏུ་ཐོབ་པས། རྡོ་རྗེའི་འོད་འཕྲོ་བའི་དབང་པོ་དང༌། དབང་པོ་རབ་ཏུ་དབྱེ་བ་ཐམས་ཅད་མ་ལུས་པ་ ལ་དབང་སྒྱུར་བའི་དབང་པོ་དང༌། སེམས་ཅན་མུ་མེད་པ་ཐམས་ཅད་མཁྱེན་པའི་དབང་པོ་ལ་རབ་ཏུ་དགོད་པའི་ཕྱིར། དབང་པོ་མཐའ་ཡས་པ་འབྱམས་ཀླས་པ་དང༌། དབང་པོ་ཐམས་ ཅད་ཡོངས་སུ་རྫོགས་པར་བྱ་བའི་དབང་པོ་བསྒྲིབས་པ་མེད་ཅིང༌། རྣམ་པར་དག་པ་རབ་ཏུ་ཐོབ་པར་གྱུར་ཅིག། དགེ་བའི་རྩ་བ་འདིས་ཀུན་ཏུ་བཟང་པོའི་སྤྱོད་པ་རབ་ཏུ་བརྩོན་པའི་ སེམས་དང་ལྡན་པ། ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་བྱང་ཆུབ་སེམས་དཔའ་ཐམས་ཅད་ཀྱི་རྫུ་འཕྲུལ་དང༌། ཚད་མེད་པར་འབྱམས་ཀླས་པ། བྱིན་གྱིས་བརླབས་པའི་རྫུ་འཕྲུལ་དང༌། ཡེ་ཤེས་མཐའ་ཡས་པས་ཁྱུ་མཆོག་གི་མཐུ་འབྱིན་པའི་རྫུ་འཕྲུལ་དང༌། ལུས་མ་གཡོས་པར་སངས་རྒྱས་ཀྱི་ཞིང་ཐམས་ཅད་ཀུན་ཏུ་ ༄༅། །བསྟན་པའི་རྫུ་འཕྲུལ་དང༌། བྱང་ཆུབ་སེམས་དཔའི་དབང་ཆགས་པ་མེད་ཅིང༌། ཐོགས་པ་མེད་པའི་རྫུ་འཕྲུལ་དང༌། མ་འོངས་པའི་སངས་རྒྱས་ཀྱི་ ཞིང་བྱིན་གྱིས་བརླབ་ཅིང༌། ཡང་དག་པར་བསྟན་པའི་རྫུ་འཕྲུལ་དང༌། སངས་རྒྱས་ཀྱི་ཞིང་ཐམས་ཅད་ལུས་གཅིག་གིས་རྒྱས་པར་དགང་བའི་རྫུ་འཕྲུལ་དང༌། བྱང་ཆུབ་ སེམས་དཔའི་རྣམ་པར་ཐར་པ་བསྒྲིབས་པ་མེད་པས་རྣམ་པར་རྩེ་བའི་རྫུ་འཕྲུལ་དང༌། མངོན་པར་འདུ་བྱ་བ་མེད་པའི་སེམས་སྐད་ཅིག་གི་རྫུ་འཕྲུལ་དང༌། དངོས་པོ་མེད་ པ་ལ་རབ་ཏུ་གནས་པས་མི་རྟེན་པའི་རྫུ་འཕྲུལ་དང༌། སྐྲའི་སྦུབས་གཅིག་ཏུ་འཇིག་རྟེན་གྱི་ཁམས་བརྗོད་དུ་མེད་པ་རབ་ཏུ་དགོད་པ་དང༌། ཆོས་ཀྱི་དབྱིངས་ཐམས་ཅད་དུ་རྒྱུ་ཞིང་དེ་ བཞིན་གཤེགས་པའི་འཁོར་གྱི་དཀྱིལ་འཁོར་བསྟན་པས། སེམས་ཅན་འབྱམས་ཀླས་པ་ཐམས་ཅད་རྣམ་པར་བསྟན་པའི་ཡེ་ཤེས་ཀྱི་སྒོ་ལ་འཇུག་པའི་རྫུ་འཕྲུལ་རབ་ཏུ་ ཐོབ་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་སངས་རྒྱས་ཀྱི་ཞིང་ཤིན་ཏུ་དག་པ་ལ་རབ་ཏུ་ཞུགས་པའི་ཡེ་ཤེས་ ཀྱིས་འཇུག་པ་དང༌། སངས་རྒྱས་ཀྱི་ཞིང་མཐའ་དང་དབུས་མེད་པར་རབ་ཏུ་ཞུགས་པའི་ཡེ་ཤེས་ཀྱི་ས་དང༌། སྐྱེ་བ་མེད་པ་ལ་བརྩོན་པའི་སེམས་བསྐྱེད་པ་ལ་འཇུག་པ་དང༌། ཀུན་ཏུ་བཟང་པོས་རྟོགས་པའི་སྒོ་ནས་འཇུག་པས་རབ་ཏུ་འབྱུང་བའི་བྱང་ཆུབ་སེམས་དཔའི་སྤྱོད་པ་རབ་ཏུ་ཐོབ་པས། འཇིག་རྟེན་གྱི་ཁམས་བརྗོད་དུ་མེད་པ་རེ་རེར་ལུས་ཀུན་ཏུ་དགྱེ་ བའི་བྱིན་གྱི་རླབས་ཤིན་ཏུ་བསྟན་པས་ཞིང་གི་རྒྱུད་ལ་རབ་ཏུ་ཞུགས་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་སངས་ རྒྱས་ཀྱི་རིགས་སུ་འབྱུང་བའི་བྱང་ཆུབ་སེམས་དཔའི་སྤྱོད་པའི་རྒྱུད་ལ་གནས་ཤིང༌། རྣམ་པའི་ཚུལ་ཐ་དད་པ་བརྗོད་དུ་མེད་པའི་ཡང་བརྗོད་དུ་མེད་པ། བསམ་གྱིས་མི་ཁྱབ་པའི་ལྷག་ པའི་བསམ་པས་རྣམ་པར་ཕྱེ་བ་ཐོབ་སྟེ། ཚད་མེད་པའི་སྨོན་ལམ་ལ་ཡང་དག་པར་བརྩོན་ཞིང་ཆོས་ཀྱི་དབྱིངས་ཐམས་ཅད་དང༌། དུས་གསུམ་གྱི་ཆོས་ཀྱི་དབྱིངས་ཐམས་ཅད་ དུ་རྒྱུན་མི་འཆད་པར་རབ་ཏུ་ཞུགས་པའི་སེམས་སུ་ཀུན་ཏུ་བཟང་པོའི་སྤྱོད་པའི་ཚུལ་ཀུན་ཤེས་པ་དང༌། རབ་ཏུ་ཤེས་པ་དང་རྗེས་སུ་རྟོགས་པའི་ཤེས་རབ་ཀྱི་དབྱིངས་ལ་རབ་ཏུ་ ཞུགས་པར་གྱུར་ཅིག། དགེ་བའི་རྩ་བ་འདིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་སྒོས་རྣམ་པར་དག་པར་བྱས་པའི་མིག་གི་སྒོ་དང་ལྡན་ཞིང༌། ཆགས་པ་མེད་པ་ དང༌། གྲོལ་ཞིང་བཅིངས་པ་མེད་པའི་སེམས་སུ་སྐྲའི་སྦུབས་རེ་རེ་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་ཞིང་རྣམས་ཡང་དག་པར་འཛུད་པ་རབ་ཏུ་ཤེས་པར་གྱུར་ཅིག། དེ་ ༄༅། །བཞིན་དུ་ཆོས་ཀྱི་དབྱིངས་ཐམས་ཅད་ལ་འཇུག་པ་ཉེ་བར་བཟུང་སྟེ། ནམ་མཁའི་དབྱིངས་ཀྱི་མཐར་ཐུག་པ་གྱུར་ཏེ། སྐྲའི་སྦུབས་གཅིག་ཏུ་ཇི་ལྟ་བ་ དེ་བཞིན་དུ་ཆོས་ཀྱི་དབྱིངས་ཐམས་ཅད་ནམ་མཁའི་མཐས་གཏུགས་པའི་སྐྲའི་སྦུབས་ཐམས་ཅད་དུ་འཛུད་པ་ལ་རབ་ཏུ་མཁས་པར་གྱུར་ཅིག། ཤིན་ཏུ་ཤེས་པར་གྱུར་ཅིག ། མངོན་པར་རྟོགས་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་སེམས་ཀྱི་སྐད་ཅིག་གཅིག་ལ་བརྗོད་དུ་མེད་པའི་ཡང་ བརྗོད་དུ་མེད་པའི་བསྐལ་པ་ལྷག་པའི་བསམ་པས་ཡང་དག་པར་སྟོན་པར་བྱེད་ཅིང༌། མཐའ་དང་དབུས་མེད་པ་གཅིག་ནས་གཅིག་ཏུ་བརྒྱུད་པས་མཐོང་བར་གྱུར་ཅིག། རབ་ ཏུ་ཞུགས་པར་གྱུར་ཅིག། དེ་བཞིན་དུ་སེམས་ཅན་གྱི་ཁམས་ཐམས་ཅད་མ་ལུས་པའི་སེམས་ཀྱི་སྐད་ཅིག་ལ་འཇུག་པའི་ཚུལ་དུ། ཚུལ་འདི་ཀུན་ཏུ་བཟང་པོ་ལ་བརྩོན་པའི་ ལྷག་པའི་བསམ་པས་ཡོངས་སུ་ཤེས་པར་གྱུར་ཅིག། རབ་ཏུ་རྟོགས་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་ ཀྱིས་ལུས་རེ་རེར་ཡང་བརྗོད་དུ་མེད་པའི་ཡང་བརྗོད་དུ་མེད་པའི་ལུས་ཡོངས་སུ་འཛུད་པ་མཐོང་བར་གྱུར་ཅིག། རབ་ཏུ་རྟོགས་པར་གྱུར་ཅིག། ལུས་གཅིག་ལ་ཇི་ལྟ་བ་དེ་བཞིན་ དུ་ལུས་འབྱམས་ཀླས་པ་ལ་འཇུག་པ་ཐམས་ཅད་མ་ལུས་པར་ཉེ་བར་བཟུང་སྟེ། སེམས་ཅན་གྱི་ཁམས་ཐམས་ཅད་མ་ཚང་བ་མེད་པ་དང༌། ལྷག་པ་མེད་པར་ཤེས་པའི་སེམས་བསྐྱེད་ པ་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པས་ཡོངས་སུ་བསྔོས་པས། ཚུལ་གྱིས་འདི་ལ་རབ་ཏུ་ཞུགས་པར་གྱུར་ཅིག། དགེ་བའི་ རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ། སངས་རྒྱས་ཐམས་ཅད་རྟོག་པར་བྱ་བ་རབ་ཏུ་རྟོགས་ཤིང༌། ནམ་མཁའི་དབྱིངས་ཐམས་ཅད་དེ་བཞིན་ གཤེགས་པའི་སྐུ་དང་བྲལ་བ་མེད་ཅིང་མཚན་གྱིས་རྣམ་པར་འཕྲུལ་བའི་སྐུ་དང༌། དབྱངས་ཀྱི་ཡན་ལག་རབ་ཏུ་དགྱེ་བ། རྒྱུན་ཆད་པ་མེད་པས་སྣང་བར་མཛད་པས་གང་བ་རབ་ཏུ་ཆུད་པར་ གྱུར་ཅིག། དེ་བཞིན་གཤེགས་པས་གསུངས་པ་དེ་དག་ཀྱང་ཡང་དག་པར་འཛིན་པར་གྱུར་ཅིག། དེ་བཞིན་གཤེགས་པའི་སྐུ་དེ་དག་ཀྱང་ཀུན་ཏུ་བཟང་པོའི་སྨོན་ལམ་ཡངས་པ་རྒྱ་ ཆེན་པོ་དང་འཇིག་རྟེན་ཐམས་ཅད་ཀྱི་འདུ་ཤེས་ཕྱིན་ཅི་ལོག་དང༌། སེམས་ཕྱིན་ཅི་ལོག་དང༌། ལྟ་བ་ཕྱིན་ཅི་ལོག་ལས་འཕགས་པའི་ལྟ་བ་དང༌། ཕྱིན་ཅི་ལོག་ཐམས་ཅད་སྤངས་པའི་ ཚུལ་གྱིས་དམིགས་སུ་མེད་པར་རབ་ཏུ་རྟོགས་པར་གྱུར་ཅིག། དགེ་བའི་རྩ་བ་འདིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་བརྩོན་པའི་བྱང་ཆུབ་སེམས་དཔའི་ས་ལ་གནས་ ༄༅། །ཤིང་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ། སེམས་ཀྱི་སྐད་ཅིག་གཅིག་ལ་མིག་འཕྲུལ་རྣམ་པར་དབྱེ་བའི་ཚུལ་དང༌། ཆོས་ ཀྱི་དབྱིངས་ཐམས་ཅད་གཞི་མཉམ་པས་རྣམ་པར་དབྱེ་བ་དང༌། འཇིག་རྟེན་གྱི་ཁམས་སྣ་ཚོགས་ལ་ཚུལ་གཅིག་ཏུ་འཇུག་པ་དང༌། འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་ དུ་མེད་པ་ལ་རྣམ་པ་དུ་མར་རབ་ཏུ་འཇུག་པ་དང༌། ཆོས་ཀྱི་དབྱིངས་ཐམས་ཅད་ལ་ཚུལ་གཅིག་ཏུ་འཇུག་པ་དང༌། ནམ་མཁའི་དབྱིངས་ཐམས་ཅད་དུ་རྣམ་པ་ཐ་དད་པ་ཀུན་ཏུ་དགྱེ་ དབར་འགལ་བ་མེད་པའི་ཚུལ་ལ་རབ་ཏུ་འཇུག་པས་འཇིག་རྟེན་གྱི་ཁམས་ཀྱི་རྒྱུད་ཐམས་ཅད་དང༌། སྣྲེལ་ཞིར་རྒྱུ་བའི་འཇིག་རྟེན་གྱི་ཁམས་ལ་རབ་ཏུ་འཇུག་པ་དང༌། སྤྱིའི་ཚུགས་ སུ་རྒྱུ་བའི་འཇིག་རྟེན་གྱི་ཁམས་ལ་རབ་ཏུ་འཇུག་པ་དང༌། ཕྱོགས་ཀྱི་དྲ་བ་བརྗོད་དུ་མེད་པའི་ཡང་བརྗོད་དུ་མེད་པའི་རྒྱུད་དང༌། ཞིང་འབྱམས་ཀླས་པ་ཐམས་ཅད་ལ་འཇུག་པ་ཡོངས་ སུ་ཤེས་པར་གྱུར་ཅིག། རབ་ཏུ་རྟོགས་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་སྤྱོད་པའི་ཡེ་ཤེས་རིན་པོ་ཆེས་ འདུ་ཤེས་ཀྱི་རྣམ་པ་ཐམས་ཅད་ལ་འཇུག་པར་བསྒོམས་པའི་ཡེ་ཤེས་ཀྱི་ས་ལ་ཡང་དག་པར་གནས་ཤིང་འདུ་ཤེས་ཀྱི་རྣམ་པ་འདི་ལྟ་སྟེ། སེམས་ཅན་དུ་འདུ་ཤེས་པའི་རྣམ་ པ་དང༌། ཆོས་སུ་འདུ་ཤེས་པའི་རྣམ་པ་དང༌། ཞིང་དུ་འདུ་ཤེས་པའི་རྣམ་པ་དང༌། ཕྱོགས་སུ་འདུ་ཤེས་པའི་རྣམ་པ་དང༌། སངས་རྒྱས་སུ་འདུ་ཤེས་པ་དང༌། དུས་སུ་འདུ་ཤེས་པའི་ རྣམ་པ་དང༌། ལས་སུ་འདུ་ཤེས་པའི་རྣམ་པ་དང༌། སྤྱོད་པར་འདུ་ཤེས་པའི་རྣམ་པ་དང༌། ཁམས་སུ་འདུ་ཤེས་པའི་རྣམ་པ་དང༌། མོས་པར་འདུ་ཤེས་པའི་རྣམ་པ་དང༌། དབང་ པོར་འདུ་ཤེས་པའི་རྣམ་པ་དང༌། དུས་སུ་འདུ་ཤེས་པའི་རྣམ་པ་དང༌། བྱིན་གྱི་རླབས་སུ་འདུ་ཤེས་པའི་རྣམ་པ་དང༌། ཉོན་མོངས་པར་འདུ་ཤེས་པའི་རྣམ་པ་དང༌། རྣམ་པར་བྱང་བར་ འདུ་ཤེས་པའི་རྣམ་པ་དང༌། ཡོངས་སུ་སྨིན་པར་འདུ་ཤེས་པའི་རྣམ་པ་དང༌། སངས་རྒྱས་མཐོང་བར་འདུ་ཤེས་པའི་རྣམ་པ་དང༌། ཆོས་ཀྱི་འཁོར་ལོ་བསྐོར་བར་འདུ་ཤེས་པའི་རྣམ་ པ་དང༌། ཆོས་བཤད་པ་ཀུན་ཤེས་པར་བྱ་བར་འདུ་ཤེས་པའི་རྣམ་པ་དང༌། འདུལ་བར་འདུ་ཤེས་པའི་རྣམ་པ་དང༌། འབྱུང་བ་རྣམ་པ་ཐ་དད་པར་འདུ་ཤེས་པའི་རྣམ་པ་དང༌། ས་ སྣ་ཚོགས་དང༌། ས་དུ་མར་འདུ་ཤེས་པའི་རྣམ་པ་དང༌། བྱང་ཆུབ་སེམས་དཔའི་འཇུག་པར་འདུ་ཤེས་པའི་རྣམ་པ་དང༌། བྱང་ཆུབ་སེམས་དཔའི་གནས་སུ་འདུ་ཤེས་པའི་རྣམ་པ་ དང༑ བྱང་ཆུབ་སེམས་དཔའི་སྙོམས་པར་འཇུག་པར་འདུ་ཤེས་པའི་རྣམ་པ་དང༌། བྱང་ཆུབ་སེམས་དཔའི་སྙོམས་པར་འཇུག་པ་ལས་ལྡང་བར་འདུ་ཤེས་པའི་རྣམ་པ་དང༌། བྱང་ ༄༅། །ཆུབ་སེམས་དཔའི་འཇིག་པར་འདུ་ཤེས་པའི་རྣམ་པ་དང༌། བྱང་ཆུབ་སེམས་དཔའི་འདུ་བར་འདུ་ཤེས་པའི་རྣམ་པ་དང༌། བྱང་ཆུབ་སེམས་དཔའི་འཆི་ འཕོ་བར་འདུ་ཤེས་པའི་རྣམ་པ་དང༌། བྱང་ཆུབ་སེམས་དཔའི་སྐྱེ་བར་འདུ་ཤེས་པའི་རྣམ་པ་དང༌། བྱང་ཆུབ་སེམས་དཔའི་རྣམ་པར་ཐར་པར་འདུ་ཤེས་པའི་རྣམ་པ་དང༌། བྱང་ ཆུབ་སེམས་དཔའི་རྣམ་པར་འཕྲུལ་བར་འདུ་ཤེས་པའི་རྣམ་པ་དང༌། བྱང་ཆུབ་སེམས་དཔའི་བྱིན་གྱི་རླབས་སུ་འདུ་ཤེས་པའི་རྣམ་པ་དང༌། བྱང་ཆུབ་སེམས་དཔའི་ཡུལ་དུ་འདུ་ ཤེས་པའི་རྣམ་པ་དང༌། འཇིག་པ་དང་འདུ་བའི་བསྐལ་པར་འདུ་ཤེས་པའི་རྣམ་པ་དང༌། ཉིན་མཚན་དང༌། རབ་རིབ་མེད་པ་དང༌། སྣང་བར་འདུ་ཤེས་པའི་རྣམ་པ་དང༌། ཟླ་བ་ ཕྱེད་དང༌། ཟླ་བ་གཅིག་དང༌། ལོ་དང་དུས་འགྱུར་བར་འདུ་ཤེས་པའི་རྣམ་པ་དང༌། འགྲོ་བ་དང་འོང་བར་འདུ་ཤེས་པའི་རྣམ་པ་དང༌། འགྲེང་བ་དང་འདུག་པར་འདུ་ཤེས་པའི་ རྣམ་པ་དང༌། འདུ་ཤེས་པའི་རྣམ་པ་དེ་དག་དང༌། འདུ་ཤེས་ཀྱི་རྣམ་པའི་ས་དེ་དག་ཐམས་ཅད་རྣམ་པར་རྟོག་པ་མེད་པའི་སེམས་དང་ལྡན་ཞིང༌། འདུ་ཤེས་ཐམས་ཅད་རྣམ་ བར་སྤངས་པའི་ཡིད་དང༌། ཆགས་པ་ཐམས་ཅད་རྣམ་པར་བཟློག་པའི་སེམས་དང༌། བསྒྲིབས་པ་ཐམས་ཅད་རབ་ཏུ་སྤངས་པའི་ཡིད་ཀྱིས་ཡང་དག་པར་རྟོག་པ་དང་ལྡན་ ཞིང༑ དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་གསལ་བར་བྱས་པའི་ཡེ་ཤེས་དང༌། སངས་རྒྱས་ཀྱི་ཆོས་ཐམས་ཅད་ཀྱིས་མངོན་པར་བརླན་པའི་དགེ་བའི་རྩ་བ་དང༌། དེ་ བཞིན་གཤེགས་པ་ཐམས་ཅད་ཀྱི་སྐུ་ལ་ཡང་དག་པར་གནས་པའི་ཆོས་དཀར་པོ་ཐམས་ཅད་ཡོངས་སུ་གཟུང་བ་དང༌། ཡང་དག་པར་རྫོགས་པའི་སངས་རྒྱས་ཀྱི་སྤྱོད་པའི་ཕ་རོལ་ཏུ་ ཕྱིན་པ་ཐོབ་པ་ཤིན་ཏུ་བརླབས་པ། སེམས་ཅན་ཐམས་ཅད་ཀྱི་གཙོ་བོ་ཀུན་ཏུ་བཟང་པོའི་སྤྱད་པ་སྤྱོད་པས་དབང་བསྐུར་བའི་སྨོན་ལམ་དང་ལྡན་པས་སེམས་ཀྱི་སྐད་ཅིག་གཅིག་ལ་འཇུག་ པར་ཤེས་པར་གྱུར་ཅིག། མཐོང་བར་གྱུར་ཅིག། རབ་ཏུ་ཤེས་པར་གྱུར་ཅིག། ཞུགས་པར་གྱུར་ཅིག། ཤིན་ཏུ་སྒྲུབ་པར་གྱུར་ཅིག། ཡོངས་སུ་རྒྱས་པར་བྱེད་པར་གྱུར་ཅིག། ཡོངས་ སུ་ཤེས་པར་གྱུར་ཅིག །རབ་ཏུ་རྟོགས་པར་གྱུར་ཅིག། རྗེས་སུ་ཐོབ་པར་གྱུར་ཅིག། རབ་ཏུ་འཕེལ་བར་བྱེད་པར་གྱུར་ཅིག། བྱིན་གྱིས་རློབ་པར་བྱེད་པར་གྱུར་ཅིག། དགེ་བའི་རྩ་ བ་འདིས་འགྲོ་བ་ཐམས་ཅད་ལ་རྣམ་པ་བཟང་པོའི་སྤྱོད་པའི་ཡེ་ཤེས་རིན་པོ་ཆེ་དང༌། ཀུན་ཏུ་བཟང་པོའི་འབྱུང་བ་རྩོམ་པ་རླབས་པོ་ཆེ་དང༌། ཆགས་པ་མེད་པ་དང༌། གྲོལ་ཞིང་བཅིངས་ པ་མེད་པའི་སེམས་རེ་རེ་ལ་སེམས་ཚད་མེད་པ་ཡོངས་སུ་འཛུད་པར་བྱེད་ཅིང་ཡང་དག་པར་རྟེན་པ་དང༌། རྣམ་པར་རྟོག་པར་གྱུར་པ་དང༌། རྣམ་པ་སྣ་ཚོགས་སུ་གྱུར་པ་དང༌། མངོན་པར་ ༄༅། །འདུ་བྱ་བ་རྣམ་པ་སྣ་ཚོགས་ཀྱི་ལས་དང༌། ཚད་མེད་པའི་ལས་དང༌། མཚན་ཉིད་ཐ་དད་པའི་ལས་དང༌། སེམས་རྣམ་པ་སྣ་ཚོགས་དང༌། བསམ་པ་ རྣམ་པ་ཐ་དད་པས་བྱུང་ཞིང་ཡང་དག་པར་གཞོལ་བར་གྱུར་པས་རབ་ཏུ་ཤེས་པར་གྱུར་ཅིག། དགེ་བའི་རྩ་བ་འདིས་ཀུན་ཏུ་བཟང་པོའི་སྨོན་ལམ་དང༌། ཡེ་ཤེས་ཆེན་པོ་ རིན་པོ་ཆེ་དང༌། ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་སྐྱེ་མཆེད་རེ་རེ་ཞིང་བརྗོད་དུ་མེད་པའི་སྐྱེ་མཆེད་རབ་ཏུ་གཟུད་པ་དང༌། དེ་བཞིན་དུ་སྐྱེ་ མཆེད་འབྱམས་ཀླས་པ་ལ་རབ་ཏུ་འཇུག་པ་ཤེས་པར་གྱུར་ཅིག། རབ་ཏུ་ཤེས་པར་གྱུར་ཅིག། ཁོང་དུ་ཆུད་པར་གྱུར་ཅིག། ཤིན་ཏུ་རྟོགས་པར་གྱུར་ཅིག །དགེ་བའི་ རྩ་བ་འདིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། ལས་ལ་རབ་ཏུ་བརྩོན་པའི་ཡེ་ཤེས་ཀྱི་ས་དང༌། ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་ སེམས་སུ་ལས་འབྱམས་ཀླས་པ་རེ་རེ་ལ་ལས་མངོན་པར་འདུ་བྱ་བ་བརྗོད་དུ་མེད་པའི་ཡང་བརྗོད་དུ་མེད་པ། རྐྱེན་སྣ་ཚོགས་ཀྱིས་མངོན་པར་འདུ་བྱས་པ་རྣམས་ཡང་དག་ པར་གཟུད་པ་དང༌། ལས་འབྱམས་ཀླས་པ་གཅིག་ལ་ཇི་ལྟ་བ་དེ་བཞིན་དུ་ལས་ཀྱི་མངོན་པར་འདུ་བྱ་བ་ཐམས་ཅད་ཀྱིས་ལས་ཀྱི་ཡུལ་སྣ་ཚོགས་སུ་དམིགས་པ་ལ་བརྩོན་ པར་བྱེད་པ་ཤེས་པར་གྱུར་ཅིག། རབ་ཏུ་ཤེས་པར་གྱུར་ཅིག། ཡེ་ཤེས་ཤིན་ཏུ་ཐོབ་པར་གྱུར་ཅིག། ཡོངས་སུ་རྫོགས་པར་བྱེད་པར་གྱུར་ཅིག །དགེ་བའི་རྩ་བ་འདིས་ཆགས་པ་ མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཆོས་རེ་རེ་ལ་བརྗོད་དུ་མེད་པའི་ཡང་བརྗོད་དུ་མེད་པའི་ཆོས་ཡང་དག་པར་གཟུད་པ་རབ་ཏུ་ཤེས་པར་གྱུར་ཅིག །ཆོས་གཅིག་ པོ་དེ་ཡང་ཆོས་ཐམས་ཅད་དུ་ཡང་དག་པར་གཟུད་པ་རབ་ཏུ་ཤེས་པར་གྱུར་ཅིག། ཆོས་རྣམ་པར་ཕྱེ་བ་ཡང་རབ་ཏུ་ཤེས་པར་གྱུར་ཅིག། མ་ཆགས་པ་དང་འགལ་བ་མེད་པར་ཡང་ ཆུད་པར་གྱུར་ཅིག། དགེ་བའི་རྩ་བ་འདིས་བྱང་ཆུབ་སེམས་དཔའི་སྤྱོད་པ་ཀུན་ཏུ་བཟང་པོའི་ཆགས་པ་མེད་པའི་རྒྱུད་དུ་གྱུར་པ་ལ་གནས་ཤིང་ཐམས་ཅད་ཤེས་པས་ཆགས་པ་མེད་པ་ དང༑ གྲོལ་ཞིང་བཅིངས་པ་མེད་པའི་སེམས་སུ་ཆོས་བསྟན་པ་རེ་རེ་ལ་ཆོས་བསྟན་པ་རྣམ་པར་ཕྱེ་བ་འབྱམས་ཀླས་པ་བརྗོད་དུ་མེད་པའི་ཡང་བརྗོད་དུ་མེད་པ་གཞན་དང༌། གཞན་ ཡོངས་སུ་སྨིན་པར་བྱ་བས་ཡང་དག་པར་བསྡུས་པ། འདུལ་བ་བསམ་གྱིས་མི་ཁྱབ་པས་ཡང་དག་པར་བསྡུས་པ་མཐའ་དང་དབུས་མེད་པའི་དུས་སུ་ཡང་དག་པར་བཤད་པ། དུས་ཐམས་ཅད་དུ་སེམས་ཅན་གྱི་དབང་པོ་དང༌། མོས་པ་ཇི་ལྟ་བ་བཞིན་དུ་གོ་བར་བྱེད་པ། སེམས་ཅན་གྱི་མཐུ་ཇི་བཞིན་དུ་སངས་རྒྱས་ཀྱི་གསུང་གི་དབྱངས་ཀྱིས་རྣམ་པར་རིག་ ༄༅། །པར་བྱེད་པ། སངས་རྒྱས་ཀྱི་གསུང་གཅིག་གིས་བརྗོད་དུ་མེད་པའི་འཁོར་གྱི་དཀྱིལ་འཁོར་གྱི་སེམས་ཅན་འབྱམས་ཀླས་པ་རྣམ་པ་ཐ་དད་པ་མངོན་ པར་དགའ་བར་བྱེད་པ། ཆོས་ཀྱི་དབྱིངས་ཐམས་ཅད་དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་དུ་གྱུར་པའི་བྱང་ཆུབ་སེམས་དཔའི་བསམ་པ་རྒྱ་ཆེར་བྱེད་པ། མཐའ་ དང་དབུས་མེད་པའི་སྤྱོད་པའི་དཀྱིལ་འཁོར་ལ་རབ་ཏུ་གནས་ཤིང་ཀུན་ཏུ་བཟང་པོའི་ས་ལ་རབ་ཏུ་ཞུགས་པའི་སེམས་ཀྱིས་ཡོངས་སུ་ཤེས་པར་གྱུར་ཅིག། རབ་ཏུ་ཤེས་པར་གྱུར་ ཅིག༑ ཁོང་དུ་ཆུད་པར་གྱུར་ཅིག། སེམས་སྐད་ཅིག། སེམས་སྐད་ཅིག་ཅིང་ཁོང་དུ་ཆུད་པའི་ཡེ་ཤེས་ཀྱིས་ཇི་སྐད་དུ་བརྗོད་པའི་ཆོས་འབྱམས་ཀླས་པ་ལ་འཇུག་པས། ཁོང་དུ་ ཆུད་པར་གྱུར་ཅིག། སེམས་ཀྱི་སྐད་ཅིག་བརྗོད་དུ་མེད་པས་རྣམ་པར་སྤེལ་བའི་ཡེ་ཤེས་ཀྱི་ཕུང་པོ་ཆེན་པོས་ཕྱི་མའི་མཐའི་བསྐལ་པ་མཐའ་དང་དབུས་མེད་པའི་མུར་ཕྱིན་པར་ ཞིང་འབྱམས་ཀླས་པ་ཐམས་ཅད་དུ་སྤྱོད་ཅིང་སྟོན་པར་གྱུར་ཅིག ། ཀུན་ཏུ་བཟང་པོའི་དམིགས་པ་ཡེ་ཤེས་ཆེན་པོ་ལ་བརྩོན་པ་དང༌། སྤྱོད་པ་བརྩམས་པ་ཐམས་ཅད་རབ་ཏུ་ འགྲུབ་པར་བྱེད་པའི་ཀུན་ཏུ་བཟང་པོའི་སས། ནམ་མཁའི་དབྱིངས་ཐམས་ཅད་སྤྱོད་པ་ལ་འཇུག་པ་བྲལ་བ་མེད་པས་ཡོངས་སུ་རྒྱས་པར་བྱེད་པར་གྱུར་ཅིག། དགེ་བའི་རྩ་བ་ འདིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་སྒོ་ལ་རབ་ཏུ་བརྩོན་པའི་དབང་པོས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་བྱང་ཆུབ་སེམས་དཔའི་ སྤྱོད་པའི་རྒྱལ་པོ་རབ་ཏུ་ཐོབ་ཅིང་བསམ་པ་བརྗོད་དུ་མེད་པའི་ཡང་བརྗོད་དུ་མེད་པ་རྣམ་པར་ཕྱེ་བ་ལ་གནས་པ་དང༌། དམིགས་པ་བསམ་གྱིས་མི་ཁྱབ་པ་དང༌། སྤྱོད་པ་དགེ་བས་བྱུང་ བས་དབང་པོ་རེ་རེ་ལ་བརྗོད་དུ་མེད་པའི་ཡང་བརྗོད་དུ་མེད་པ་ཡང་དག་པར་གཟུད་པར་ཡོངས་སུ་ཤེས་པར་གྱུར་ཅིག། རབ་ཏུ་ཤེས་པར་གྱུར་ཅིག། ཤིན་ཏུ་རྟོགས་པར་གྱུར་ཅིག ། ཁོང་དུ་ཆུད་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་དང༌། འཇིགས་པ་མེད་པའི་སེམས་དང༌། རྨོངས་པ་མེད་པའི་སེམས་ དང༑ འཁྲུགས་པ་མེད་པའི་སེམས་དང༌། རྣམ་པར་འཁྲུགས་པ་མེད་པའི་སེམས་དང༌། བསླད་པ་མེད་པའི་སེམས་དང༌། དབང་པོ་མི་དམའ་བའི་སེམས་དང༌། རྩེ་གཅིག་པའི་སེམས་ དང༑ ཤིན་ཏུ་མཉམ་པར་བཞག་པའི་སེམས་དང༌། ཆོས་ཤིན་ཏུ་རྣམ་པར་ཕྱེ་བའི་སེམས་དང༌། ཡེ་ཤེས་ཤིན་ཏུ་བསྟན་པའི་སེམས་དང༌། བྱང་ཆུབ་སེམས་དཔའ་ཀུན་ཏུ་ བཟང་པོའི་སྤྱོད་པ་དང༌། ཡོངས་སུ་བསྔོ་བའི་རྗེས་སུ་སོང་བའི་སེམས་ཀྱིས་གཟུགས་ཤིན་ཏུ་ཕྲ་བ་དང༌། ལུས་ཤེས་པ་ཤིན་ཏུ་ཕྲ་བ་དང༌། ཞིང་ཤེས་པ་ཤིན་ཏུ་ཕྲ་བ་དང༌། བསྐལ་ ༄༅། །པ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་ཤེས་པ་ཤིན་ཏུ་ཕྲ་བ་དང༌། ཡུལ་ཤེས་པ་ཤིན་ཏུ་ཕྲ་བ་དང༌། དུས་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་གྲངས་ ཤེས་པ་ཤིན་ཏུ་ཕྲ་བ་དང༌། ལས་ཀྱི་རྣམ་པར་སྨིན་པ་ཤེས་པ་ཤིན་ཏུ་ཕྲ་བ་དང༌། རྣམ་པར་དག་པ་ཤེས་པ་ཤིན་ཏུ་ཕྲ་བ་དང༌། ཤིན་ཏུ་ཕྲ་བ་འདི་དག་ཐམས་ཅད་སེམས་ཀྱི་སྐད་ ཅིག་གཅིག་ཏུ་བརྐྱང་བའི་ཡེ་ཤེས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་རྗེས་སུ་སོང་བས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་གྱུར་ཅིག། ཤིན་ཏུ་རྟོགས་ པར་གྱུར་ཅིག །ཁོང་དུ་ཆུད་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་རག་ལས་པ་མེད་པར་བྱང་ཆུབ་སེམས་ དཔའི་སྤྱོད་པ་ལ་རབ་ཏུ་གནས་ཤིང༌། ཀུན་ཏུ་བཟང་པོའི་སྤྱོད་པ་ལ་བརྩོན་པའི་སྤྱོད་པ་ཆེན་པོ་ལ་དུབ་པ་མེད་པར་གནས་ཤིང༌། སེམས་ཅན་གྱི་རྒྱུད་ཤིན་ཏུ་ཕྲ་བ་དང༌། སེམས་ ཅན་གྱི་ཤི་འཕོ་ཤིན་ཏུ་ཕྲ་བ་དང༌། སེམས་ཅན་སྐྱེ་བ་ཤིན་ཏུ་ཕྲ་བ་དང༌། སེམས་ཅན་གྱི་གནས་ཤིན་ཏུ་ཕྲ་བ་དང༌། སེམས་ཅན་གྱི་རྟེན་ཤིན་ཏུ་ཕྲ་བ་དང༌། སེམས་ཅན་མཐའ་ དང་དབུས་མེད་པའི་རིགས་ཤིན་ཏུ་ཕྲ་བ་དང༌། སེམས་ཅན་གྱི་ཁམས་ཐམས་ཅད་ཀྱི་ཡུལ་ཤིན་ཏུ་ཕྲ་བ་དང༌། སེམས་ཅན་གྱི་འདུ་བྱེད་པ་ཤིན་ཏུ་ཕྲ་བ་དང༌། སེམས་ཅན་བསྟན་ པ་ཤིན་ཏུ་ཕྲ་བ་དང༌། སེམས་ཅན་དམིགས་པ་ཤིན་ཏུ་ཕྲ་བ་ཤིན་ཏུ་ཕྲ་བ་འདི་དག་དང༌། ཤིན་ཏུ་ཕྲ་བ་ལ་འཇུག་པ་ཇི་སྙེད་པ་གང་ཡང་རུང་སྟེ། དེ་དག་ཐམས་ཅད་སེམས་གཅིག་བརྐྱང་བའི་སྤྱོད་པའི་ ཡེ་ཤེས་ཀྱིས་ཤེས་པར་གྱུར་ཅིག། ཁོང་དུ་ཆུད་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་བྱང་ཆུབ་སེམས་དཔའ་ཀུན་ ཏུ་བཟང་པོའི་སྤྱོད་པ་ལ་རབ་ཏུ་བརྩོན་པའི་ལྷག་པའི་བསམ་པས་བྱང་ཆུབ་སེམས་དཔའ་རྣམས་ཀྱི་ཐོག་མ་སེམས་བསྐྱེད་པ་ནས་ཉེ་བར་བཟུང་བའི་བྱང་ཆུབ་སེམས་དཔའི་སྤྱོད་པ་ཤིན་ ཏུ་ཕྲ་བ་དང༌། བྱང་ཆུབ་སེམས་དཔའི་གནས་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་རྣམ་པར་འཕྲུལ་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་སངས་རྒྱས་ཀྱི་ཞིང་ཚད་མེད་ པར་འགྲོ་བ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ཆོས་སྣང་བ་རབ་ཏུ་ཐོབ་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་མིག་རྣམ་པར་དག་པ་ཤིན་ཏུ་ཕྲ་བ་དང༌། བྱང་ཆུབ་སེམས་ དཔའི་ལྷག་པའི་བསམ་པ་ཡོངས་སུ་གྲུབ་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་འགྲོ་བར་ཤིན་ཏུ་ཕྲ་བ་དང༌། བྱང་ཆུབ་ སེམས་དཔའི་གཟུངས་ཀྱི་སྒོ་ཤེས་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་འཇིགས་པ་མེད་པའི་ས་མཐའ་དང་དབུས་མེད་པ། ཐ་དད་པ་ཡང་དག་པར་ཤེས་པ་ཐམས་ཅད་ཀྱི་ ༄༅། །མཛོད་ཀྱི་འོད་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ཏིང་ངེ་འཛིན་མཐའ་དང་དབུས་མེད་པའི་མཚན་མ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ སངས་རྒྱས་ཐམས་ཅད་མཐོང་བའི་ཏིང་ངེ་འཛིན་ཐོབ་པའི་རབ་ཏུ་ཤེས་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ཏིང་ངེ་འཛིན་ཟབ་མོ་མངོན་པར་བསྒྲུབ་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ཏིང་ངེ་འཛིན་རྒྱ་མཚོའི་རྒྱན་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ཆོས་ཀྱི་དབྱིངས་ཀྱི་ཏིང་ངེ་འཛིན་གྱི་ཡེ་ཤེས་ཤིན་ཏུ་ཕྲ་བ་དང༌། བྱང་ཆུབ་སེམས་ དཔའི་ཁྱུ་མཆོག་གི་མཐུ་ཕྱུང་བ་ཆེན་པོའི་རྣམ་པར་འཕྲུལ་བ་དང༌། ཏིང་ངེ་འཛིན་མངོན་པར་བསྒྲུབ་པའི་ཡེ་ཤེས་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ཕྱི་མའི་མཐའི་མུར་ སྤྱོད་པ་ཡང་དག་པར་གཟུང་བའི་ཏིང་ངེ་འཛིན་གྱི་ཡེ་ཤེས་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ཏིང་ངེ་འཛིན་རྣམ་པར་དབྱེ་བ་མཐའ་དང་དབུས་མེད་པ་ཐམས་ཅད་མངོན་པར་ བསྒྲུབ་པའི་ཡེ་ཤེས་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་སངས་རྒྱས་ཐམས་ཅད་དང་མངོན་སུམ་དུ་ཞབས་ཀྱི་དྲུང་ན་འདུག་ཀྱང་སངས་རྒྱས་གཅིག་དང་ཡང་བྲལ་བ་མེད་པའི་ ཏིང་ངེ་འཛིན་མངོན་པར་བསྒྲུབ་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་རྒྱ་ཆེ་ཞིང་ཡངས་པ་དང༌། ཟབ་ཅིང་བསྒྲིབས་པ་མེད་པ་དང༌། ཆགས་པ་ མེད་པ་ལ་རབ་ཏུ་བརྩོན་པས་ཐམས་ཅད་མཁྱེན་པ་ཉིད་ཀྱི་མཐར་ཐུག་པར་སྤྱོད་པ་ཡང་དག་པར་གཟུང་བའི་མཛོད་ཤེས་པའི་ས་ཁོང་དུ་ཆུད་པ་དང༌། མངོན་པར་ཤེས་པའི་ས་རབ་ ཏུ་ཐོབ་པ་དང༌། དོན་གྱི་ས་ཤིན་ཏུ་རྟོགས་པ་དང༌། བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་བསྒྲིབས་པ་མེད་པའི་ཡེ་ཤེས་ཤིན་ཏུ་ཕྲ་བ་ཐམས་ཅད་ཤེས་པར་གྱུར་ཅིག ། རབ་ཏུ་རྟོགས་པར་གྱུར་ཅིག །དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་ཀྱིས་བྱང་ཆུབ་སེམས་དཔའ་ཐམས་ཅད་ཀྱི་བྱང་ཆུབ་སེམས་ དཔའ་རྣམ་པར་དགོད་པའི་ཡེ་ཤེས་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ས་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་སྤྱོད་པ་རྣམ་པ་ཐ་དད་པ་ཤིན་ཏུ་ཕྲ་བ་དང༌། བྱང་ཆུབ་ སེམས་དཔའི་ཡོངས་སུ་བསྔོ་བ་མངོན་པར་བསྒྲུབ་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་སངས་རྒྱས་ཐམས་ཅད་ཀྱི་གཏེར་རབ་ཏུ་ཐོབ་པ་ཤིན་ཏུ་ཕྲ་བ་དང༌། བྱང་ཆུབ་སེམས་ དཔའི་ཡེ་ཤེས་རྣམ་པར་དཔྱད་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་སྨོན་ལམ་རྣམ་པར་འཕྲུལ་བ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་སྙོམས་པར་འཇུག་པ་བསྟན་ པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་རྫུ་འཕྲུལ་གྱི་ཚུལ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ཕྱག་རྒྱ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ཚེ་གཅིག་གིས་ ༄༅། །འཐོབ་པ་ལའང་དབང་བསྒྱུར་བ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་དགའ་ལྡན་གྱི་གནས་སུ་སྐྱེས་པ་ཤིན་ཏུ་ཕྲ་བ་དང༌། བྱང་ཆུབ་སེམས་ དཔའི་ལྷའི་ཕོ་བྲང་གི་གནས་ན་འདུག་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་སངས་རྒྱས་ཀྱི་ཞིང་ཡོངས་སུ་དག་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་མིའི་འཇིག་ རྟེན་ན་དགའ་བར་གནས་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་འོད་ཟེར་གྱི་དྲ་བ་དགྱེ་བ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་རིགས་རྣམ་པར་དབྱེ་བ་ཤིན་ཏུ་ཕྲ་བ་ དང༑ བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྣམ་པར་དབྱེ་བ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་འཇིག་རྟེན་གྱི་ཁམས་ཐམས་ཅད་དུ་རྒྱས་པར་སྐྱེ་བ་ཤིན་ཏུ་ ཕྲ་བ་དང༌། བྱང་ཆུབ་སེམས་དཔའི་ལུས་གཅིག་གིས་ཤི་འཕོས་པ་རྣམ་པར་ཐ་དད་པ་བསྟན་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་མའི་མངལ་དུ་འགྲོ་བ་ཤིན་ཏུ་ཕྲ་བ་ དང༑ བྱང་ཆུབ་སེམས་དཔའི་མངལ་དུ་སོང་ནས་གནས་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་མའི་མངལ་ན་རྣམ་པར་འཕྲུལ་བས། ཆོས་ཀྱི་དབྱིངས་ཐམས་ཅད་ འཁོར་གྱི་དཀྱིལ་འཁོར་གཅིག་པར་མའི་ལྟོར་ཤོང་པའི་ཡེ་ཤེས་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་མའི་མངལ་ན་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་ཐམས་ ཅད་ཡང་དག་པར་བསྟན་པའི་ཡེ་ཤེས་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་ཚེ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་གོམ་པ་བདུན་དུ་སེངྒེའི་སྟབས་སུ་འགྲོ་བའི་ཡེ་ཤེས་ ཤིན་ཏུ་ཕྲ་བ་དང༌། བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་ཐབས་མཁས་པ་ཡང་དག་པར་སྟོན་པའི་ཡེ་ཤེས་ཤིན་ཏུ་ཕྲ་བ་དང༌། བྱང་ཆུབ་སེམས་དཔའི་མངོན་པར་ འབྱུང་བའི་ཚུལ་དང་སྤྱོད་པ་རབ་ཏུ་སྦྱོར་བ་ཤིན་ཏུ་ཕྲ་བ་དང༌། བྱང་ཆུབ་སེམས་དཔའ་བྱང་ཆུབ་ཀྱི་ཤིང་དྲུང་དུ་འདུག་པ་ཤིན་ཏུ་ཕྲ་བ་དང༌། བྱང་ཆུབ་སེམས་དཔས་བདུད་ཀྱི་སྡེ་རབ་ཏུ་ ཕམ་པར་བྱས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་འཚང་རྒྱ་བ་ཤིན་ཏུ་ཕྲ་བ་དང༌། དེ་བཞིན་གཤེགས་པའི་བྱང་ཆུབ་ཀྱི་གདན་ལ་འདུག་སྟེ། འཇིག་རྟེན་ གྱི་ཁམས་ཐམས་ཅད་དུ་འོད་ཟེར་གྱི་དྲ་བ་རབ་ཏུ་དགྱེ་བ་ཤིན་ཏུ་ཕྲ་བ་དང༌། དེ་བཞིན་གཤེགས་པའི་རྣམ་པར་འཕྲུལ་བ་ཡང་དག་པར་བསྟན་པ་ཤིན་ཏུ་ཕྲ་བ་དང༌། དེ་བཞིན་གཤེགས་ པའི་སེང་གེའི་ང་རོ་ཕྱུང་བའི་མྱ་ངན་ལས་འདས་པ་ཆེན་པོ་ཤིན་ཏུ་ཕྲ་བ་དང༌། དེ་བཞིན་གཤེགས་པ་སེམས་ཅན་ཐམས་ཅད་གདུལ་བའི་འཁོར་དུ་ཐོགས་པ་མེད་པ་ཤིན་ཏུ་ཕྲ་བ་ དང༑ དེ་བཞིན་གཤེགས་པའི་རྣམ་པར་འཕྲུལ་བ་བསམ་གྱིས་མི་ཁྱབ་པ་ལ་བྱང་ཆུབ་ཀྱི་སེམས་རྡོ་རྗེ་ལྟ་བུ་ཡོངས་སུ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་ཐམས་ཅད་རྒྱས་པ་ ༄༅། །འགེངས་པའི་དེ་བཞིན་གཤེགས་པའི་བྱིན་གྱི་རླབས་ཡོངས་སུ་བསྟན་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་ པའི་སངས་རྒྱས་ཀྱི་མཛད་པ་ཕྱི་མའི་མཐའི་མུར་ཐུག་པར་རྒྱུན་མི་འཆད་པ་ཤིན་ཏུ་ཕྲ་བ་དང༌། དེ་བཞིན་གཤེགས་པའི་བྱིན་གྱི་རླབས་ཆོས་ཀྱི་དབྱིངས་ཀྱི་མཐར་ཐུག་པར་ཐོགས་ པ་མེད་པ་ཤིན་ཏུ་ཕྲ་བ་དང༌། ནམ་མཁའི་དབྱིངས་ཀྱི་མཐས་གཏུགས་པའི་ཞིང་གི་ཡུལ་ཐམས་ཅད་དུ་སེམས་ཅན་འདུལ་བར་སངས་རྒྱས་སྐྱེ་བ་བསྟན་པ་ཤིན་ཏུ་ཕྲ་བ་དང༌། སངས་རྒྱས་ཀྱི་སྐུ་གཅིག་སངས་རྒྱས་ཀྱི་སྐུ་ཐ་དད་པ་རབ་ཏུ་སྤྲོ་བའི་ཤེས་པ་ཤིན་ཏུ་ཕྲ་བ་དང༌། འདས་པ་དང༌། མ་འོངས་པ་དང༌། ད་ལྟར་བྱུང་བའི་དུས་གསུམ་དུ་གཤེགས་ པའི་དེ་བཞིན་གཤེགས་པ་གང་ཇི་སྙེད་པའི་དཀྱིལ་འཁོར་གྱི་ཁྱུ་མཆོག་གི་མཐུ་དབྱུང་བའི་ཡེ་ཤེས་ཤིན་ཏུ་ཕྲ་བ་གང་ཇི་སྙེད་པ་དེ་དག་ཐམས་ཅད་སེམས་ཀྱི་སྐད་ཅིག་རེ་རེ་ ཞིང་རྣམ་པར་འཕེལ་བའི་ཡེ་ཤེས་ཀྱི་དཀྱིལ་འཁོར་དང༌། བྱང་ཆུབ་སེམས་དཔའི་སྤྱོད་པ་སྦྱོར་བ་ཕྱིར་མི་ལྡོག་ཅིང་རྒྱུན་མི་འཆད་པ་དང༌། ཀུན་ཏུ་བཟང་པོར་རབ་ཏུ་འཕྲོས་ པའི་ཡོངས་སུ་བསྔོ་བའི་ས་དང༌། དེ་བཞིན་གཤེགས་པ་ཐམས་ཅད་ཁོང་ན་ཡང་དག་པར་འཛིན་པའི་བྱང་ཆུབ་སེམས་དཔའི་སྤྱོད་པ་དང༌། འདོད་ཆགས་དང་བྲལ་བ་མེད་ པས་བྱུང་བའི་བྱང་ཆུབ་སེམས་དཔའི་སྒོའི་དཀྱིལ་འཁོར་དང༌། སྤྱོད་པ་འབྱམས་ཀླས་པ་ལ་བརྩོན་པ་ཤིན་ཏུ་རྣམ་པར་སྦྱངས་པ་དང༌། བྱང་ཆུབ་སེམས་དཔའི་སྤྱོད་པ་ལ་དམིགས་པ་ འགྲོ་བ་ཐམས་ཅད་བདེ་བར་བྱ་བ་དང༌། བྱང་ཆུབ་སེམས་དཔའི་སེམས་དང་བསམ་པས་ཆེན་པོར་བསྒྲུབས་པ་དང༌། ཆོས་ཀྱི་དབྱིངས་ཐམས་ཅད་དུ་འདུལ་བའི་དམིགས་པའི་མཛོད་ ཀྱི་ཡོངས་སུ་བསྔོ་བའི་སྒོ་རྡོ་རྗེའི་རྒྱལ་མཚན་དང༌། བྱང་ཆུབ་སེམས་དཔའ་འཇུག་པའི་སྒོ་དེ་བཞིན་གཤེགས་པས་དགོངས་པ་དང༌། ཆོས་བསྟན་པ་འགལ་བ་མེད་པའི་ཚུལ་གྱིས་ ཆོས་ཐམས་ཅད་ཀྱི་དོན་ལ་རབ་ཏུ་བསྟན་པ་དང༌། འགྲོ་བ་ཐམས་ཅད་ཀྱིས་མི་བསྒུལ་བའི་དམ་བཅས་པ་ཤིན་ཏུ་རྒྱ་ཆེ་བ་དང༌། སེམས་སྐད་ཅིག་གིས་མཐར་ཕྱིན་པའི་འཇུག་པ་ དང༑ དམིགས་པའི་མཛོད་སེམས་དང་སེམས་མ་ཡིན་པའི་ས་ཐམས་ཅད་རབ་ཏུ་རྟོགས་པ་དང༌། ཡང་དག་པར་བསྟན་པའི་སྒོ་སེམས་མ་ཡིན་པའི་སེམས་མངོན་པར་བསྒྲུབས་པ་ དང༑ ཡེ་ཤེས་ཀྱིས་ཚིག་གི་ལམ་ཐམས་ཅད་ལས་གྱེན་དུ་འཕགས་པ་དང༌། སྤྱོད་པས་མངོན་པར་འཚང་རྒྱ་བའི་བྱིན་གྱི་རླབས་བྱང་ཆུབ་སེམས་དཔའ་ཐམས་ཅད་དང་རྒྱུད་ཀྱི་ ཚུལ་གཅིག་ཏུ་གྱུར་བ་དང༌། ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ཕྱི་མའི་མཐའི་མུར་རྒྱུན་མི་འཆད་པ་དང༌། སྤྱོད་པ་རྒྱུན་མི་འཆད་པ་དང༌། འཇིག་རྟེན་ཐམས་ཅད་ཀྱི་འགྲོ་ ༄༅། །བའི་རྟོགས་པ་དང༌། འདུ་ཤེས་ཀྱི་རྣམ་པ་དང༌། ཚིག་གི་ལམ་དུ་གདགས་པས་གཏུགས་པའི་བྱིན་གྱི་རླབས་ཁྱད་པར་གྱི་སྨོན་ལམ་ཆེན་པོས་རྣམ་ པར་འཕྲུལ་པས་ཁོང་དུ་ཆུད་པར་གྱུར་ཅིག །རབ་ཏུ་ཤེས་པར་གྱུར་ཅིག །ཤིན་ཏུ་སྒྲུབ་པར་གྱུར་ཅིག །རྣམ་པར་སྤྱོད་པར་གྱུར་ཅིག ། འགྲོ་བ་ཀུན་ཏུ་ཡང་དག་པར་སྟོན་ པར་གྱུར་ཅིག །དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་སེམས་ཅན་གྱི་ཁམས་ཐམས་ཅད་ལ་འཇུག་པར་ཤེས་པ་ཤིན་ཏུ་ཕྲ་བ་ དང༑ སེམས་ཅན་གྱི་ཁམས་རྣམ་པར་དབྱེ་བ་ཤེས་པ་ཤིན་ཏུ་ཕྲ་བ་དང༌། སེམས་ཅན་གྱི་ཁམས་སྣ་ཚོགས་རྟོགས་པར་བསྟན་པ་ཤེས་པ་ཤིན་ཏུ་ཕྲ་བ་དང༌། སེམས་ཅན་གྱི་ ཁམས་དུ་མའི་མངོན་པར་ཞེན་པ་ཤེས་པ་ཤིན་ཏུ་ཕྲ་བ་དང༌། སེམས་ཅན་གྱི་ཁམས་ཀྱི་བྱེ་བྲག་ཐ་དད་པར་ཤེས་པ་ཤིན་ཏུ་ཕྲ་བ་དང༌། སེམས་ཅན་གྱི་ཁམས་སྐལ་བ་མཉམ་ པ་ཤེས་པ་ཤིན་ཏུ་ཕྲ་བ་དང༌། སེམས་ཅན་གྱི་ཁམས་མཐའ་དང་དབུས་མེད་པའི་ལམ་གྱི་རྒྱུད་ཤེས་པ་ཤིན་ཏུ་ཕྲ་བ་དང༌། སེམས་ཅན་གྱི་ཁམས་བསམ་གྱིས་མི་ཁྱབ་པ་ མངོན་པར་འདུ་བྱ་བ་སྣ་ཚོགས་རྣམ་པར་རྟོག་པར་གྱུར་པ་ཤེས་པ་ཤིན་ཏུ་ཕྲ་བ་དང༌། སེམས་ཅན་མཐའ་ཡས་པའི་ཀུན་ནས་ཉོན་མོངས་པ་ཤེས་པ་ཤིན་ཏུ་ཕྲ་བ་དང༌། སེམས་ཅན་གྲངས་མེད་པའི་རྣམ་པར་བྱང་བ་ཤེས་པ་ཤིན་ཏུ་ཕྲ་བ་དང༌། སེམས་ཅན་གྱི་ཁམས་ཀྱི་ཡུལ་ཤེས་པ་ཤིན་ཏུ་ཕྲ་བ་འདི་དག་དང་ཤེས་པ་ཤིན་ཏུ་ཕྲ་བ་གང་ཇི་སྙེད་པ་དེ་དག་ ཐམས་ཅད་སེམས་སྐད་ཅིག་དང་ལྡན་པའི་ཡེ་ཤེས་ཀྱི་ཕུང་པོ་དང༌། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་བྱིན་གྱི་རླབས་དང༌། དུས་ཇི་ལྟ་བ་བཞིན་དུ་བསྟན་པས་འདུལ་བ་ ཡོངས་སུ་བཟུང་བ་དང༌། དུས་ཐམས་ཅད་དུ་ཆོས་ཀྱི་སྒོ་བརྗོད་དུ་མེད་པ་རབ་ཏུ་བསྟན་ཅིང་ཆོས་ཀྱི་འཁོར་ལོ་བསྐོར་བའི་བྱིན་གྱི་རླབས་དང༌། བྱང་ཆུབ་སེམས་དཔའི་སྤྱོད་པ་ལ་རབ་ཏུ་ བརྩོན་པའི་ཡེ་ཤེས་འབྱམས་ཀླས་པ་དང༌། འགྲོ་བ་ཐམས་ཅད་རབ་ཏུ་དགའ་བའི་གནས་སུ་གྱུར་པའི་ལུས་བརྗོད་དུ་མེད་པའི་བྱིན་གྱི་རླབས་ཀྱི་ཁྱུ་མཆོག་གི་མཐུ་ཕྱུང་བ་དང༌། བྱང་ཆུབ་ སེམས་དཔའི་སེམས་ལ་ཞུགས་པ་ཡེ་ཤེས་ཀྱི་ཉི་མས་སྣང་བར་བྱས་པ་དང༌། བྱང་ཆུབ་སེམས་དཔའི་སེམས་མངོན་པར་རྫོགས་པའི་བྱིན་གྱི་རླབས་བྱང་ཆུབ་སེམས་དཔའི་ཡེ་ཤེས་ ཀྱི་ཁྱུ་མཆོག་གི་མཐུ་ཕྱུང་བ་དང༌། ཡེ་ཤེས་ཆེན་པོ་འབྱམས་ཀླས་པ་དང༌། ཀུན་ཏུ་བཟང་པོའི་སྤྱོད་པ་ལ་རབ་ཏུ་བརྩོན་པའི་འཇུག་པས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་ པར་གྱུར་ཅིག། རབ་ཏུ་ཤེས་པར་གྱུར་ཅིག །དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ ༄༅། །ཀླས་པ། ནམ་མཁའི་མཐས་གཏུགས་པ་ཐམས་ཅད་ཤེས་པ་ཤིན་ཏུ་ཕྲ་བ་འདི་ལྟ་སྟེ། འཇིག་རྟེན་གྱི་ཁམས་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ ཁམས་ཆེར་གྱུར་པ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཀུན་ནས་ཉོན་མོངས་པ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་རྣམ་པར་དག་པ་ཤེས་པ་ཤིན་ཏུ་ ཕྲ་བ་དང༌། འཇིག་རྟེན་གྱི་ཁམས་རྒྱ་ཆེན་པོ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་སྣ་ཚོགས་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཡངས་པ་ཤེས་པ་ ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་དོག་པ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཐམས་ཅད་བསྒྲིབས་པ་མེད་པའི་རྒྱན་གྱིས་རབ་ཏུ་བརྒྱན་པ་ཤེས་པ་ཤིན་ཏུ་ ཕྲ་བ་དང༌། འཇིག་རྟེན་གྱི་ཁམས་ཐམས་ཅད་མ་ལུས་པར་སངས་རྒྱས་སྐྱེ་བས་རྒྱས་པར་དགང་བ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཐམས་ཅད་མ་ལུས་པར་རབ་ ཏུ་སྣང་བར་བྱ་བ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཐམས་ཅད་མ་ལུས་པར་ལུས་ཀྱིས་རྒྱས་པར་དགང་བ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཐམས་ ཅད་མ་ལུས་པར་འོད་ཟེར་རབ་ཏུ་དགྱེ་བས་སྣང་བར་བྱ་བ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཐམས་ཅད་མ་ལུས་པར་སངས་རྒྱས་ཐམས་ཅད་ཀྱི་བྱིན་གྱི་རླབས་དང༌། སངས་རྒྱས་ཐམས་ཅད་ཀྱི་རྣམ་པར་འཕྲུལ་བ་དང༌། ཁྱུ་མཆོག་གི་མཐུ་ཕྱུང་བ་ཡང་དག་པར་བསྟན་པ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཐམས་ཅད་མ་ལུས་པར་ དབྱངས་གཅིག་གིས་དབྱངས་ཐམས་ཅད་རྣམ་པར་བསྟན་ཅིང་རྒྱས་པར་དགང་བ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཐམས་ཅད་མ་ལུས་པའི་འཁོར་གྱི་དཀྱིལ་འཁོར་གྱིས་ སངས་རྒྱས་ཀྱི་སྐུ་ཀུན་ནས་བསྐོར་བས་སངས་རྒྱས་ཀྱི་ཞིང་ཐམས་ཅད་ལ་འཇུག་པ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཐམས་ཅད་མ་ལུས་པར་སངས་རྒྱས་ཀྱི་ཞིང་གཅིག་ཏུ་ བྱིན་གྱིས་བརླབས་པ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཐམས་ཅད་མ་ལུས་པའི་སངས་རྒྱས་ཀྱི་ཞིང་གཅིག་སངས་རྒྱས་ཀྱི་ཞིང་ཐམས་ཅད་དུ་བྱིན་གྱིས་བརླབས་པ་ཤེས་པ་ ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཐམས་ཅད་མ་ལུས་པར་རྨི་ལམ་ལྟ་བུར་འཇུག་པ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཐམས་ཅད་མ་ལུས་པར་མིག་ཡོར་ལྟ་ བུར་རྣམ་པར་དམིགས་པས་རྒྱས་པར་དགང་བ་ཤེས་པ་ཤིན་ཏུ་ཕྲ་བ་དང༌། འཇིག་རྟེན་གྱི་ཁམས་ཤེས་པ་ཤིན་ཏུ་ཕྲ་བ་འདི་དག་དང༌། ཤེས་པ་ཤིན་ཏུ་ཕྲ་བ་དེ་དག་ཐམས་ཅད་བྱང་ ཆུབ་སེམས་དཔའི་སྤྱོད་པ་སྒྱུ་མ་ལྟ་བུའི་རྣམ་པར་མངོན་པར་བསྒྲུབས་པ་ལ་ཞུགས་ཤིང་ཁོང་དུ་ཆུད་པ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། རྣམ་པ་ ༄༅། །འཕྲུལ་པ་དང༌། ཡེ་ཤེས་ཁོང་དུ་ཆུད་པས་བྱང་ཆུབ་སེམས་དཔའི་སྤྱོད་པ་ཐམས་ཅད་རྒྱུན་མི་འཆད་པ་ཀུན་ཏུ་བཟང་པོ་སྒྱུ་མ་ལྟ་བུར་མཐོང་བ་དང༌། སངས་རྒྱས་ ཐམས་ཅད་ཀྱི་ཁྱུ་མཆོག་གི་མཐུ་ཕྱུང་བ་དང༌། རྣམ་པར་འཕྲུལ་པ་བྱང་ཆུབ་ཀྱི་སེམས་ཀྱིས་ཡང་དག་པར་བསྐྱེད་པ་དང༌། ལུས་ལ་ཆགས་པ་མེད་པར་བརྩོན་པའི་ཡང་དག་པར་ལྟ་བ་ དང༑ དགེ་བའི་རྩ་བ་ཆགས་པ་མེད་པའི་ཡེ་ཤེས་དང་མ་བྲལ་བ་དང༌། མངོན་པར་ཆགས་པ་མེད་པའི་ཆོས་ཉིད་དང༌། སེམས་ཀྱི་རྒྱུད་དམིགས་པ་མེད་པས་ཡང་དག་པར་འཇུག་པ་ དང༑ མཚན་མ་ལ་འཇུག་པ་མཚན་མ་ཐམས་ཅད་ལ་གྱེན་དུ་འཕགས་པ་དང༌། བྱང་ཆུབ་སེམས་དཔའི་སྤྱོད་པའི་མཚན་མ་ཡོངས་སུ་སྦྱངས་པ་དང༌། འདུ་ཤེས་ཀྱི་རྣམ་པ་ཐམས་ ཅད་དང་བྲལ་བའི་ཏིང་ངེ་འཛིན་ཐམས་ཅད་ཀྱི་རྒྱན་དང༌། འཇིག་རྟེན་གྱི་ཁམས་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་རྣམ་པར་བཀོད་པ་ཁམས་ཐམས་ཅད་ཤེས་པ་དང་ལྡན་ པས་རབ་ཏུ་ཤེས་པར་གྱུར་ཅིག། ཁོང་དུ་ཆུད་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཆོས་ཀྱི་དབྱིངས་མཐའ་ཡས་ པ་ལ་འཇུག་པ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཤིན་ཏུ་བསྟན་པ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཡངས་པ་ལ་འཇུག་པ་ཤེས་པ་ཤིན་ཏུ་ཕྲ་བ་དང༌། ཆོས་ ཀྱི་དབྱིངས་བསམ་གྱིས་མི་ཁྱབ་པ་རྣམ་པར་དབྱེ་བ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཐམས་ཅད་རྣམ་པར་དབྱེ་བ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཐམས་ཅད་ སེམས་གཅིག་གིས་རྒྱས་པར་དབང་བ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཐམས་ཅད་ལ་ཡང་དག་པར་གཞོལ་བ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཐམས་ཅད་ དམིགས་སུ་མེད་པའི་སྤྱོད་ཡུལ་དུ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཐམས་ཅད་ཆགས་པ་མེད་པར་བརྟག་པ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཐམས་ཅད་སྐྱེ་བ་ མེད་པར་ཡོངས་སུ་རིག་པ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་ཐམས་ཅད་དུ་བྱིན་གྱི་རླབས་ཀྱིས་རྣམ་པར་འཕྲུལ་པ་ཤེས་པ་ཤིན་ཏུ་ཕྲ་བ་དང༌། ཆོས་ཀྱི་དབྱིངས་འབྱམས་ ཀླས་པ་ཤེས་པ་ཤིན་ཏུ་ཕྲ་བ་དང༌། འདི་དག་ཐམས་ཅད་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་བྱིན་གྱི་རླབས་ཀྱིས་ཡེ་ཤེས་དང༌། ཆོས་ལ་དབང་བ་སྒྱུར་བ་རབ་ཏུ་ ཐོབ་པ། འགྲོ་བ་ཐམས་ཅད་ཚིམ་པར་བྱེད་པ་ལ་བརྩོན་པ། དོན་གྱི་ལུས་ཡོངས་སུ་མི་གཏོང་ཞིང་ལུས་བལྟ་བ་ལ་བསྒྲིངས་པ་མེད་པའི་ཡེ་ཤེས་མཉམ་པ་མེད་པ་མངོན་པར་བསྒྲུབ་ པའི་རྣམ་པ་རབ་ཏུ་ཐོབ་པ། ཆོས་ཐམས་ཅད་ལ་མི་གནས་པའི་རང་བཞིན་ལས་མ་གཡོས་པ་ཡང་དག་པ་ཇི་ལྟ་བ་བཞིན་ནམ་མཁའ་ལྟར་གོས་པ་མེད་པའི་ཚིག་གི་ལམ་རྣམ་པར་ ༄༅། །བརྗོད་པའི་སྤྱོད་པ་དང་ལྡན་པ་རྣམ་པར་བཀོད་པའི་དོན་གྱི་རང་བཞིན་ཤིན་ཏུ་རྟོགས་པ། རང་བཞིན་གྱིས་ཞི་བ་ཡོངས་སུ་རིག་པའི་ཡེ་ཤེས་ཀྱིས་མི་གནས་ བའི་ཡིད་ཀྱི་ཡང་དག་པར་རྟོགས་པ་དང་ལྡན་པ། དམིགས་པའི་ཚུལ་ལ་རྟེན་པ་མེད་པར་གནས་པ། ཆོས་ཀྱི་དབྱིངས་ཐམས་ཅད་ཀྱི་ཚུལ་ཡངས་པ་ཁོང་དུ་ཆུད་པ། འཇིག་རྟེན་ཐམས་ ཅད་དུ་མི་གནས་པས་ཡང་དག་པར་རྒྱུ་བ་ཆོས་ཐམས་ཅད་ལ་མི་དམིགས་པ། གནས་ཐམས་ཅད་ཡང་དག་པར་བཅོམ་པས་ཀུན་ཏུ་བཟང་པོའི་སྤྱོད་པའི་སྒོ་འདི་དག་ལ་ཞུགས་པའི་ ཡེ་ཤེས་ཀྱིས་ཡང་དག་པར་ཇི་ལྟ་བ་བཞིན་དུ་ཁོང་དུ་ཆུད་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་བསྐལ་པ་གང་ཇི་ སྙེད་པ་ཐམས་ཅད་ཤེས་པ་མངོན་པར་བསྒྲུབ་པ་འདི་ལྟ་སྟེ། བརྗོད་དུ་མེད་པའི་བསྐལ་པ་སེམས་ཀྱི་སྐད་ཅིག་གཅིག་ཏུ་བྱིན་གྱིས་རློབ་པ་ཤེས་པ་ཤིན་ཏུ་ཕྲ་བ་དང༌། སེམས་ཀྱི་སྐད་ ཅིག་གཅིག་ལ་བརྗོད་དུ་མེད་པའི་བསྐལ་པ་ཡང་དག་པར་བསྟན་པ་ཤེས་པ་ཤིན་ཏུ་ཕྲ་བ་དང༌། གྲངས་མེད་པའི་བསྐལ་པ་ལ་ཡང་དག་པར་འཇུག་པ་ཤེས་པ་ཤིན་ཏུ་ཕྲ་བ་དང༌། བསྐལ་པ་གཅིག་གྲངས་མེད་པའི་བསྐལ་པར་ཡང་དག་པར་འཇུག་པ་ཤེས་པ་ཤིན་ཏུ་ཕྲ་བ་དང༌། བསྐལ་པ་རིང་པོ་བསྐལ་པ་ཐུང་ངུར་ཡང་དག་པར་འཇུག་པ་ཤེས་པ་ཤིན་ཏུ་ཕྲ་བ་ དང༑ བསྐལ་པ་ཐུང་ངུ་བསྐལ་པ་རིང་པོར་ཡང་དག་པར་འཇུག་པ་ཤེས་པ་ཤིན་ཏུ་ཕྲ་བ་དང༌། སངས་རྒྱས་དང་བཅས་པའི་བསྐལ་པ་སངས་རྒྱས་མི་བཞུགས་པར་འཇུག་པའི་ཤེས་པ་ཤིན་ཏུ་ཕྲ་ བ་དང༌། བསྐལ་པ་ཐམས་ཅད་མ་ལུས་པའི་གྲངས་ཤེས་པ་ཤིན་ཏུ་ཕྲ་བ་དང༌། བསྐལ་པ་ཐམས་ཅད་མ་ལུས་པར་བསྐལ་པ་མ་ཡིན་པར་ཤིན་ཏུ་བརྟགས་པ་ཤེས་པ་ཤིན་ཏུ་ཕྲ་བ་དང༌། སྔོན་གྱི་མཐའི་མུར་ཐུག་པའི་བསྐལ་པ་དང༌། ཕྱི་མའི་མཐའི་མུར་ཐུག་པའི་བསྐལ་པ་དང༌། ད་ལྟར་བྱུང་བའི་མུ་ལ་ཡོད་པའི་བསྐལ་པ་དང༌། དུས་གསུམ་གྱི་བསྐལ་པ་ཐམས་ཅད་མ་ ལུས་པར་སེམས་ཀྱི་སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པ་ཤེས་པ་ཤིན་ཏུ་ཕྲ་བ་དང༌། བསྐལ་པ་ཤེས་པ་ཤིན་ཏུ་ཕྲ་བ་འདི་དག་དང༌། བསྐལ་པ་མ་ལུས་པའི་ གྲངས་དེ་བཞིན་གཤེགས་པའི་ཡེ་ཤེས་ཀྱིས་ཐུགས་སུ་ཆུད་པ་ཤེས་པ་ཤིན་ཏུ་ཕྲ་བ་དེ་དག་ཐམས་ཅད་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པའི་དཀྱིལ་འཁོར་གྱི་རྒྱལ་པོ་རབ་ ཏུ་ཐོབ་པའི་སེམས་དང་ལྡན་པ། ཀུན་ཏུ་བཟང་པོའི་སྤྱོད་པ་ལ་རབ་ཏུ་ཞུགས་པའི་སེམས་དང་ལྡན་པ། རྟོག་པ་དང་རྣམ་པར་རྟོག་པའི་སྤྲོས་པ་ཐམས་ཅད་རབ་ཏུ་བསལ་བའི་སེམས་ དང་ལྡན་པ། སྐྱོ་བ་མེད་པའི་སྨོན་ལམ་ཆེན་པོས་རྩོམ་པ་རྒྱུན་མི་འཆད་པའི་སེམས་དང་ལྡན་པ། མཐའ་དང་དབུས་མེད་པའི་འཇིག་རྟེན་མང་པོར་སངས་རྒྱས་མང་པོ་ཡང་དག་པར་ ༄༅། །བསྟན་པར་ཡོངས་སུ་རྒྱས་པར་འགེངས་པའི་སེམས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་དགེ་བའི་རྩ་བ་བྱང་ཆུབ་སེམས་དཔའི་སྤྱོད་ པའི་རིགས་ཡང་དག་པར་གཟུང་བའི་སེམས་དང་ལྡན་པ། སེམས་ཅན་ཐམས་ཅད་ཤིན་ཏུ་བག་དྲོ་བར་བྱེད་པའི་སྤྱོད་པའི་རིགས་དང༌། རྣམ་པར་འདྲེས་པའི་སེམས་དང་ལྡན་པ། བསྐལ་པའི་གྲངས་ཐམས་ཅད་དུ་མངོན་པར་རྫོགས་པར་འཚང་རྒྱ་བར་ཡང་དག་པར་བསྟན་པའི་སེམས་དང་ལྡན་པ། འཇིག་རྟེན་གྱི་ཁམས་རེ་རེ་ནས་ཕྱི་མའི་མཐའི་མུར་མི་གཡོ་ བར་སྤྱོད་པ་རྒྱུན་མི་གཅོད་པའི་སེམས་དང་ལྡན་པ། འཇིག་རྟེན་གྱི་ཁམས་ཐམས་ཅད་དུ་དེ་བཞིན་གཤེགས་པའི་སྐུའི་འཕྲིན་ལས་བྱང་ཆུབ་སེམས་དཔའི་ལུས་ཀྱིས་ཡོངས་སུ་ རྒྱས་པར་འགེངས་པའི་སེམས་དང་ལྡན་པས། སེམས་ཀྱི་རྒྱུ་བ་གཅིག་གི་གནས་ཀྱི་ས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་གྱུར་ཅིག། ཡང་དག་པ་ཇི་ལྟ་བ་བཞིན་ དུ་ཁོང་དུ་ཆུད་པར་གྱུར་ཅིག། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་བཅིངས་པ་མེད་པའི་སེམས་སུ་ཆོས་ཤིན་ཏུ་ཕྲ་བ་ཤེས་པ་འདི་ལྟ་སྟེ། ཟབ་མོའི་ཆོས་ ཤིན་ཏུ་ཕྲ་བ་དང༌། ཡངས་པའི་ཆོས་ཤིན་ཏུ་ཕྲ་བ་དང༌། སྣ་ཚོགས་ཀྱི་ཆོས་ཤིན་ཏུ་ཕྲ་བ་དང༌། རྒྱན་རྣམ་པར་དབྱེ་བའི་ཆོས་ཤིན་ཏུ་ཕྲ་བ་དང༌། མཐའ་དང་དབུས་མེད་པའི་ བསྐལ་པ་ཐམས་ཅད་དུ་བསྟན་པ་ཤིན་ཏུ་ཕྲ་བ་དང༌། ཆོས་ཐམས་ཅད་ཆོས་གཅིག་ཏུ་ཡང་དག་པར་འཇུག་པ་ཤིན་ཏུ་ཕྲ་བ་དང༌། ཆོས་གཅིག་ཆོས་ཐམས་ཅད་དུ་ཡང་དག་པར་འཇུག་ པ་ཤིན་ཏུ་ཕྲ་བ་དང༌། ཆོས་ཐམས་ཅད་ཆོས་མ་ཡིན་པར་འཇུག་པ་ཤིན་ཏུ་ཕྲ་བ་དང༌། ཆོས་མ་ཡིན་པར་ཤེས་པ་ཆོས་རྣམ་པར་དགོད་པ་ཐམས་ཅད་དང་མི་འགལ་བ་ཤིན་ཏུ་ཕྲ་བ་དང༌། འདི་ལྟ་སྟེ། སངས་རྒྱས་ཀྱི་ཆོས་ཀྱི་ཚུལ་ཐམས་ཅད་མ་ལུས་པའི་གྲངས་ལ་འཇུག་པ་ཤེས་པ་ཤིན་ཏུ་ཕྲ་བ་འདི་དག་དང༌། འཇིག་རྟེན་གྱི་ཁམས་ཐམས་ཅད་དུ་ཆོས་ཐམས་ཅད་ཀྱི་གྲངས་ རྣམ་པར་བཀོད་པ་དང༌། བསྟན་པ་ཤེས་པ་ཤིན་ཏུ་ཕྲ་བ་དེ་དག་ཐམས་ཅད་ཆགས་པ་མེད་པར་ཤེས་པའི་སེམས་སྤྱོད་པ་གཅིག་གི་ཁྱུ་མཆོག་གི་མཐུ་ཕྱུང་བས་ཡང་དག་པར་བསྐྱེད་ པ་དང༌། མཐའ་དང་དབུས་མེད་པའི་ཆོས་ཀྱི་དབྱིངས་ལ་ཞུགས་པའི་སེམས་དང༌། སྤྱོད་པའི་བྱིན་གྱི་རླབས་ཀྱི་ཆོས་རྣམ་པ་ཐ་དད་པ་ཐམས་ཅད་ཁོང་དུ་ཆུད་པའི་བསམ་པའི་སྟོབས་དང༌། ཤུགས་ཆགས་པ་མེད་པས་རབ་ཏུ་རྟོགས་པ་དང༌། དབང་པོ་ཐམས་ཅད་མཁྱེན་པའི་ཡེ་ཤེས་ཀྱིས་རབ་ཏུ་བརྟེན་པ་དང༌། དྲན་པ་དང༌། ཤེས་པ་དང༌། ཆོས་ལ་མཁས་པ་སངས་རྒྱས་ ཐམས་ཅད་ཀྱི་ཡེ་ཤེས་ཀྱི་ཁོངས་སུ་ཆུད་པ་དང༌། སངས་རྒྱས་མང་པོ་ཆོས་ཀྱི་དབྱིངས་ཐམས་ཅད་ཡོངས་སུ་ཁྱབ་པ་དང༌། བྱང་ཆུབ་སེམས་དཔའི་ལུས་ཡང་དག་པར་བསྟན་པའི་ ༄༅། །ལས་དང༌། དེ་བཞིན་གཤེགས་པ་ཐམས་ཅད་ཀྱི་སྐུར་གཏོགས་པ་དང༌། ཚིག་རྣམ་པར་དགོད་ཅིང་ཤིན་ཏུ་བསྟན་པ་འཇིག་རྟེན་གྱི་ཁམས་ཐམས་ཅད་ དུ་གྲག་པ་དང༌། ཡིད་ཀྱི་ལས་སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་ཡང་དག་པར་བཟུང་བ་དང༌། ཀུན་ཏུ་བཟང་པོའི་སྤྱོད་པ་མངོན་པར་བསྒྲུབ་པའི་ཡེ་ཤེས་ཆོས་མཐའ་ དང་དབུས་མེད་པ་ཐ་དད་པའི་གྲངས་དང༌། ཚུལ་ཐམས་ཅད་མ་ལུས་པའི་ཡེ་ཤེས་ལ་མཁས་པའི་ཐམས་ཅད་མཁྱེན་པ་ཉིད་མངོན་པར་བསྒྲུབས་པས། ཡང་དག་པ་ཇི་ལྟ་བ་ བཞིན་དུ་རབ་ཏུ་ཤེས་པར་གྱུར་ཅིག། ཁོང་དུ་ཆུད་པར་གྱུར་ཅིག། །།བམ་པོ་བཞི་བཅུ་གསུམ་པ། དགེ་བའི་རྩ་བ་འདིས་ཆགས་པ་མེད་པ་དང༌། གྲོལ་ཞིང་ བཅིངས་པ་མེད་པའི་སེམས་སུ་ཞིང་ཐམས་ཅད་མ་ལུས་པར་མངོན་པར་བསྒྲུབ་པ་ཤིན་ཏུ་ཕྲ་བ་དང༌། སེམས་ཅན་ཐམས་ཅད་མ་ལུས་པའི་ཡེ་ཤེས་དང༌། མངོན་པར་ཤེས་ པ་མངོན་པར་བསྒྲུབ་པ་ཤིན་ཏུ་ཕྲ་བ་དང༌། ལས་ཀྱི་རྣམ་པར་སྨིན་པ་ཐམས་ཅད་མ་ལུས་པར་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང༌། འགྲོ་བ་ཐམས་ཅད་མ་ལུས་ པའི་སེམས་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང༌། དུས་ཐམས་ཅད་མ་ལུས་པར་སླེབས་པར་ཆོས་བསྟན་པ་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང༌། ཆོས་ ཀྱི་དབྱིངས་མཐའ་དང་དབུས་མེད་པ་ཐམས་ཅད་མ་ལུས་པར་རབ་ཏུ་རྟོགས་པའི་ཡེ་ཤེས་མངོན་པར་བསྒྲུབ་པ་ཤིན་ཏུ་ཕྲ་བ་དང༌། ནམ་མཁའི་དབྱིངས་ཐམས་ཅད་མ་ལུས་པའི་མཐར་ཐུག་ པ་དང༌། དུས་གསུམ་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང༌། ཚིག་དང་ངག་གི་ལམ་ཐམས་ཅད་མ་ལུས་པར་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང༌། འཇིག་རྟེན་པའི་ ཆོས་ཐམས་ཅད་མ་ལུས་པར་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དང༌། འཇིག་རྟེན་ལས་འདས་པའི་སྤྱོད་པ་ཐམས་ཅད་མ་ལུས་པར་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་ དང༑ ཤེས་པ་མངོན་པར་བསྒྲུབ་པ་འདི་དག་དང༌། དེ་བཞིན་གཤེགས་པ་ཐམས་ཅད་ཀྱི་ལམ་དང༌། བྱང་ཆུབ་སེམས་དཔའ་ཐམས་ཅད་ཀྱི་ལམ་དང༌། འགྲོ་བ་ཐམས་ཅད་ཀྱི་ལམ་ ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བ་དེ་དག་ཐམས་ཅད་བྱང་ཆུབ་སེམས་དཔའི་སྤྱོད་པ་དང་ལྡན་ཞིང་ཀུན་ཏུ་བཟང་པོའི་བྱིན་གྱི་རླབས་ཡང་དག་པར་འཛིན་པས་ཆོས་ཇི་ལྟ་བ་ བཞིན་དང༌། ཡི་གེ་ཇི་ལྟ་བ་བཞིན་དུ་མིག་ཡོར་དང་འདྲ་བའི་ཤེས་པ་མངོན་པར་བསྒྲུབ་པ་དང༌། རྨི་ལམ་དང་འདྲ་བའི་ཤེས་པ་མངོན་པར་བསྒྲུབ་པ་དང༌། སྒྱུ་མ་དང་འདྲ་བའི་ཤེས་ པ་མངོན་པར་བསྒྲུབ་པ་དང༌། སྒྲ་བརྙན་དང་འདྲ་བའི་ཤེས་པ་མངོན་པར་བསྒྲུབ་པ་དང༌། སྤྲུལ་པ་དང་འདྲ་བའི་ཤེས་པ་མངོན་པར་བསྒྲུབ་པ་དང༌། དབེན་པ་དང་མཉམ་པའི་ཤེས་ ༄༅། །པ་མངོན་པར་བསྒྲུབ་པ་དང༌། ཞི་བ་དང་མཉམ་པའི་ཤེས་པ་མངོན་པར་བསྒྲུབ་པ་དང༌། ཆོས་ཀྱི་དབྱིངས་ཐམས་ཅད་ཀྱི་རང་བཞིན་དང་མཉམ་པའི་ཤེས་པ་ མངོན་པར་བསྒྲུབ་པ་དང༌། གནས་མེད་པ་དང་མཉམ་པའི་ཤེས་པ་མངོན་པར་བསྒྲུབ་པ་དང༌། སངས་རྒྱས་ཀྱི་ཆོས་ཐམས་ཅད་དང་མཉམ་པའི་ཤེས་པ་མངོན་པར་བསྒྲུབ་པ་དང༌། ཀུན་ ཏུ་བཟང་པོའི་སྤྱོད་པ་ཉེ་བར་བླང་པ་ལ་གནས་པར་བརྩོན་པའི་ཤེས་པ་མངོན་པར་བསྒྲུབ་པ་ཤིན་ཏུ་ཕྲ་བས་རབ་ཏུ་ཤེས་པར་གྱུར་ཅིག། ཁོང་དུ་ཆུད་པར་གྱུར་ཅིག། ཅེས་ཏེ། དེ་ ཡང་འཇིག་རྟེན་ནམ། འཇིག་རྟེན་གྱི་ཆོས་ལ་མི་རྟོག་པ་དང༌། དེ་ཡང་བྱང་ཆུབ་བམ། བྱང་ཆུབ་སེམས་དཔའ་ལ་མི་རྟོག་པ་དང༌། དེ་ཡང་བྱང་ཆུབ་སེམས་དཔའི་སྤྱོད་པའམ། འབྱུང་ བའི་ལམ་ལ་མི་རྟོག་པ་དང༌། དེ་ཡང་སངས་རྒྱས་དང༌། སངས་རྒྱས་ཀྱི་ཆོས་ཐམས་ཅད་ལ་མི་རྟོག་པ་དང༌། དེ་ཡང་སེམས་ཅན་ཐམས་ཅད་གདུལ་བ་དང༌། མི་གདུལ་བ་ལ་རྣམ་པར་ མི་རྟོག་པ་དང༌། དེ་ཡང་དགེ་བའི་རྩ་བའམ། ཡོངས་སུ་བསྔོ་བ་ལ་རྣམ་པར་མི་རྟོག་པ་དང༌། དེ་ཡང་བདག་གམ་གཞན་ལ་རྣམ་པར་མི་རྟོག་པ་དང༌། དེ་ཡང་དངོས་པོ་དང༌། དམིགས་ པ་ལ་རྣམ་པར་མི་རྟོག་པ་དང༌། དེ་ཡང་བྱང་ཆུབ་སེམས་དཔའི་སྤྱོད་པའམ། མངོན་པར་འཚང་རྒྱ་བ་ལ་རྣམ་པར་མི་རྟོག་པ་དང༌། དེ་ཡང་ཆོས་ཉིད་དམ། ཡོངས་སུ་ཤེས་པར་ བྱ་བ་ལ་རྣམ་པར་མི་རྟོག་པས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་སེམས་དང༌། ཆགས་པ་མེད་ པ་དང་གྲོལ་ཞིང་བཅིངས་པ་མེད་པའི་ལུས་དང༌། ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་སྒྲ་དང༌། ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་ལས་དང༌། ཆགས་པ་ མེད་པ་དང་གྲོལ་ཞིང་བཅིངས་པ་མེད་པའི་རྣམ་པར་སྨིན་པ་དང༌། ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་འཇིག་རྟེན་དང༌། ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་ ཞིང་དང༌། ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་སེམས་ཅན་དང༌། ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་ཆོས་དང༌། ཆགས་པ་མེད་པ་དང་གྲོལ་ཞིང་བཅིངས་པ་ མེད་པའི་ཡེ་ཤེས་ཀྱིས་ཡོངས་སུ་བསྔོ་སྟེ། དེ་དེ་ལྟར་ཡོངས་སུ་བསྔོ་བས་འདས་པའི་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ཀྱི་ཡོངས་སུ་བསྔོ་བ་ཐོབ་པ་ཡིན། མ་བྱོན་པའི་ སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ཀྱི་ཡོངས་སུ་བསྔོ་བ་ཐོབ་པ་ཡིན། ད་ལྟར་བྱུང་བའི་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ཀྱི་ཡོངས་སུ་བསྔོ་བ་ཐོབ་ པ་ཡིན། འདས་པའི་སངས་རྒྱས་ཐམས་ཅད་ཀྱི་ཡོངས་སུ་བསྔོ་བ་ལ་སློབ་པ་ཡིན། མ་བྱོན་པའི་སངས་རྒྱས་ཐམས་ཅད་ཀྱི་ཡོངས་སུ་བསྔོ་བ་འགྲུབ་པར་འགྱུར་བ་ཡིན། ད་ལྟར་བྱུང་ ༄༅། །བའི་སངས་རྒྱས་ཐམས་ཅད་ཀྱི་ཡོངས་སུ་བསྔོ་བ་ལ་རབ་ཏུ་གནས་པ་ཡིན། འདས་པའི་སངས་རྒྱས་ཐམས་ཅད་ཀྱི་ཡོངས་སུ་བསྔོ་བའི་ལམ་ལ་གནས་པ་ ཡིན༑ མ་བྱོན་པའི་སངས་རྒྱས་ཐམས་ཅད་ཀྱི་ཡོངས་སུ་བསྔོ་བའི་ལམ་མི་གཏོང་བ་ཡིན། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཡོངས་སུ་བསྔོ་བའི་ལམ་དང་འགལ་བར་མི་ བྱེད་པ་ཡིན། འདས་པའི་སངས་རྒྱས་ཐམས་ཅད་ཀྱི་གདམས་ངག་ལ་ནན་ཏན་དུ་བྱེད་པ་ཡིན། མ་བྱོན་པའི་སངས་རྒྱས་ཐམས་ཅད་ཀྱི་གདམས་ངག་ལ་ནན་ཏན་བྱེད་པར་འགྱུར་བ་ ཡིན༑ ད་ལྟར་བྱུང་བའི་སངས་རྒྱས་ཐམས་ཅད་ཀྱི་གདམས་ངག་ཁོང་དུ་ཆུད་པར་བྱེད་པ་ཡིན། འདས་པའི་སངས་རྒྱས་ཐམས་ཅད་ཀྱི་མཉམ་པ་ཉིད་ཡོངས་སུ་རྫོགས་པར་བྱེད་ པ་ཡིན། མ་བྱོན་པའི་སངས་རྒྱས་ཐམས་ཅད་ཀྱི་མཉམ་པ་ཉིད་སྒྲུབ་པར་འགྱུར་བ་ཡིན། ད་ལྟར་བྱུང་བའི་སངས་རྒྱས་ཐམས་ཅད་ཀྱི་མཉམ་པ་ཉིད་ལ་ནན་ཏན་བྱེད་པ་ཡིན། འདས་པའི་སངས་རྒྱས་ཐམས་ཅད་ཀྱི་ཡུལ་ལ་ཡོངས་སུ་སྤྱོད་པ་ཡིན། མ་བྱོན་པའི་སངས་རྒྱས་ཐམས་ཅད་ཀྱི་ཡུལ་ལ་རབ་ཏུ་གནས་པ་ཡིན། ད་ལྟར་བྱུང་བའི་སངས་རྒྱས་ ཐམས་ཅད་ཀྱི་ཡུལ་དང་མཉམ་པར་འགྱུར་བ་ཡིན། འདས་པ་དང༑ མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་དང་དགེ་བའི་རྩ་བའི་མཚན་ཉིད་གཅིག་པ་ཡིན། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཀྱི་རིགས་ཐམས་ཅད་དང་མཉམ་པ་ཉིད་དུ་གནས་པ་ཐོབ་བ་ཡིན། འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་ བཞིན་གཤེགས་པ་ཐམས་ཅད་ཀྱི་སྤྱོད་ཡུལ་དང་ཚུལ་གྱི་རྒྱུད་གཅིག་ཏུ་གྱུར་པ་ཡིན། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སེམས་ཅན་གྱི་གཙོ་བོ་ཐམས་ཅད་ཀྱི་ཡུལ་ དང་མི་འགལ་བ་ཐོབ་པ་ཡིན་ཏེ། ཀྱེ༑ རྒྱལ་བའི་སྲས་དག། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་ཆགས་པ་མེད་པ་དང༌། གྲོལ་ཞིང་བཅིངས་ པ་མེད་པའི་སེམས་ཞེས་བྱ་བ་སྟེ། དགུ་པའོ། །ཡོངས་སུ་བསྔོ་བ་དེ་དག་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དགེ་བའི་རྩ་བ་ཐམས་ཅད་དེ་ལྟར་ཡོངས་སུ་བསྔོ་ སྟེ༑ དེ་དེ་ལྟར་ཡོངས་སུ་བསྔོ་བས། ཁོར་ཡུག་རྡོ་རྗེའི་རི་ཐམས་ཅད་ཀྱིས་མི་ཆོམས་པའི་སྟོབས་དང་ལྡན་པ་ཡིན། འགྲོ་བ་ཐམས་ཅད་ཀྱི་གཟུགས་ཐམས་ཅད་མ་ལུས་པ་དང་ལྡན་ ཞིང་ཟིལ་ཀྱིས་མི་ནོན་པ་ཡིན། བདུད་ཀྱི་སྡེ་དང༌། བདུད་ཀྱི་དཔུང༌། བདུད་ཀྱི་ལས་ཐམས་ཅད་རབ་ཏུ་འཇོམས་པ་ཡིན། འཇིག་རྟེན་གྱི་ཁམས་ཐམས་ཅད་དུ་བྱང་ཆུབ་སེམས་དཔའི་ སྤྱོད་པ་མ་ལུས་པ་ཡང་དག་པར་བསྟན་པ་ལ་བརྩོན་པ་ཡིན། འགྲོ་བ་ཐམས་ཅད་ལ་གོ་བར་བྱེད་པའི་སངས་རྒྱས་ཀྱི་ཆོས་ཐམས་ཅད་ཀྱི་ཚིག་དབྱེ་བ་ལ་མཁས་པ་དང་ལྡན་པ་ཡིན། ༄༅། །སངས་རྒྱས་ཀྱི་ཆོས་ཐམས་ཅད་ལ་རྨོངས་པ་མེད་པའི་ཡེ་ཤེས་འབྱམས་ཀླས་པ་དང་ལྡན་པ་ཡིན། གང་དང་གང་དུ་ཤི་འཕོ་བ་དང༌། སྐྱེ་བ་དང༌། འགྲོ་བ་ དང༑ འོང་བ་དང༌། གནས་པ་དང༌། འདུག་པ་ཐམས་ཅད་དུ་མི་ཕྱེད་པའི་གཡོག་འཁོར་དང་ལྡན་པ་ཡིན། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ ཅད་ཀྱི་ཆོས་བསྟན་པ་དང༌། ཆོས་ཀྱི་འབྱུང་གནས་དྲན་པ་ཡང་དག་པར་འཛིན་པ་རྣམ་པར་དག་པ་རབ་ཏུ་ཐོབ་པ་ཡིན། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་ གཟུང་བ་ལ་མི་སྐྱོ་བས་ཕྱི་མའི་མཐའི་བསྐལ་པའི་མུར་ཐུག་པར་སྤྱོད་པ་རྒྱུན་མི་འཆད་པ་ཡིན། གནས་ཐམས་ཅད་ཡང་དག་པར་བཅོམ་པ་ཡང་རབ་ཏུ་ཐོབ་པ་ཡིན། བྱང་ ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་ཡང་དག་པར་བསྐྱེད་པ་ཡང་ཐོབ་པ་ཡིན། ཐམས་ཅད་མཁྱེན་པའི་སངས་རྒྱས་ཀྱི་མཛད་པ་དང༌། བྱིན་གྱི་རླབས་ དང༑ བྱང་ཆུབ་སེམས་དཔའི་སྤྱོད་པ་དང༌། རྣམ་པར་འཕྲུལ་པ་ཐོབ་པར་བྱ་བ་ཡང་རབ་ཏུ་ཐོབ་པ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་རྒྱལ་ མཚན་གྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་ཟིལ་གྱིས་མི་ནོན་འགྱུར་བྱས་ ཤིང༑ ༑འདྲ་མེད་དེ་དག་ཕྱོགས་རྣམས་ཐམས་ཅད་དུ། །ལས་རྣམས་ཅི་འདྲར་ཡོངས་སུ་བསགས་བྱས་པ། །དེ་དག་ཀུན་ལ་བརྙས་པར་ཡོང་མི་བྱེད། །བདག་གིས་བྱས་པའམ་གཞན་གྱིས་བྱས་ པ་ཡི༑ ༑དགེ་བ་གང་ལའང་བརྙས་པར་མི་བྱེད་དེ། །དེ་ལ་ཤིན་ཏུ་མོས་པ་རབ་བསྐྱེད་ཅིང༌། །དེ་དག་སེམས་ཅན་ཕན་ཕྱིར་ཡོངས་སུ་བསྔོ། །དེ་དག་སེམས་ལ་མཐོ་བ་མེད་བྱས་ཤིང༌། ། ཡིད་ལ་དམའ་བའང་འཆང་བ་མེད་བྱས་ཏེ། །རྒྱལ་བ་རྣམས་ཀྱི་སྐུ་ཡི་འཕྲིན་ལས་དང༌། །གསོལ་བ་བཏབ་ལས་ལས་ཡངས་གང་འབྱུང་དང༌། །གང་ཡང་རྣམ་པ་མང་པོ་བྱེད་གྱུར་ ཅིང༑ ༑སེམས་ཅན་ཀུན་ལ་བདེ་དང་ཕན་སེམས་ཀྱིས། །བརྟན་པའི་མོས་དང་བསམ་ལས་བྱུང་བ་དག །སྐྱེས་བུ་དབང་པོར་ཅི་ནས་འགྱུར་བར་བསྔོ། །རྣམ་པ་སྣ་ཚོགས་ཇི་སྙེད་ གང་ཡོད་ཚུལ། །འགྲོ་བ་འདི་ན་ཐ་དད་མི་འདྲ་བ། །རྒྱ་ཆེ་ཡངས་དང་ཕྲ་མོ་ཟབ་མོའི་རྣམས། །དེ་དག་བདག་གིས་ཡོངས་བསགས་ཤེས་པར་བྱ། །ཇི་སྙེད་འཇིག་རྟེན་ཡངས་པའི་ འགྲོ་བ་ཡི། །སྣ་ཚོགས་ལུས་རྣམས་ལུས་སུ་གཞོལ་གཟུད་པ། །དེ་དག་ཤེས་བྱས་སྤྱད་པ་སྤྱོད་པའི་ཚེ། །ཡེ་ཤེས་སྒོ་ལས་ཕྱིར་ལྡོག་མ་གྱུར་ཅིག། གང་ཡང་འཇིག་རྟེན་ཞིང་གི་ སྒོ་མངའ་བ། །ཕྲ་དང་རྒྱ་ཆེ་སྤྱིའུ་ཚུག་སྣྲེལ་ཞི་དག ། སྐྲ་ཡི་སྦུབས་སུ་ཀུན་ཀྱང་བསྡུ་བྱས་ཏེ། །ཡེ་ཤེས་སྒོ་ནས་ཐམས་ཅད་ཤེས་གྱུར་ཅིག །གང་ཡང་སེམས་ཀྱི་ཚུལ་མང་ ༄༅། །གཅིག་མིན་པ། །དེ་དག་སེམས་སུ་ཡང་དག་བསྡུ་བྱས་ཏེ། །ཡེ་ཤེས་སྒོ་ནས་དེ་དག་ཤེས་བྱས་ནས། །སྤྱོད་ལམ་ལྡོག་པ་མེད་པར་སྤྱད་པར་བྱ། །འགྲོ་ བ་ཀུན་གྱི་དབང་པོ་བསམ་པ་དག །རྒྱ་ཆེ་དེ་བཞིན་ཤིན་ཏུ་ཕྲ་བ་དང༌། །ཟབ་མོ་སྣ་ཚོགས་ཇི་སྙེད་བསྡུ་བྱས་ཤིང༌། །ཐམས་ཅད་རང་བཞིན་ཇི་བཞིན་ཤེས་གྱུར་ཅིག །གང་ ཡང་ལས་ཀྱི་རྣམ་པ་སྣ་ཚོགས་པ། །རབ་དང་འབྲིང་དང་དེ་བཞིན་ཐ་མའི་རྣམས། །ཐམས་ཅད་ཡེ་ཤེས་སྒོ་ནས་ཤེས་བྱས་ཏེ། །བདེ་གཤེགས་སྟོབས་ལ་རབ་ཏུ་འཇུག་ གྱུར་ཅིག །བདག་གིས་ལས་གཙང་ཡོངས་སུ་གང་བསགས་པས། །འཇིག་རྟེན་བསྐལ་པ་བསམ་གྱིས་མི་ཁྱབ་པ། །ཇི་སྙེད་དེ་དག་སྐད་ཅིག་སེམས་བཏུད་ཅིང༌། །ཕྱོགས་ རྣམས་ཀུན་ཏུ་དེ་དག་ཤེས་གྱུར་ཅིག །དུས་རྣམས་སྣྲེལ་ཞིར་དུས་གསུམ་གཟུད་བྱས་ཤིང༌། །བསྐལ་པ་མི་མཉམ་ཐ་དད་མཚན་ཤེས་ནས། །དེ་དག་མཉམ་ཉིད་དེ་དང་ འགལ་མེད་དུ། །སྤྱོད་ཅིང་ཀུན་ཏུ་རྨོངས་པར་མེད་གྱུར་ཅིག །འགྲོ་བའི་སྤྱོད་པ་ཇི་སྙེད་གང་ཡང་རུང༌། །འཇིག་རྟེན་དག་ན་བརྐྱང་བསྐུམ་མི་གཡོ་བ། །རྣམ་པ་ཐ་དད་ ཐམས་ཅད་ཤེས་གྱུར་ཀྱང༌། །མཚན་མེད་དངོས་ཀྱི་རློམ་སེམས་མེད་གྱུར་ཅིག །ཕྱོགས་རྣམས་ཀུན་ན་སྐྱེས་དབང་ཇི་སྙེད་པ། །སུ་བཞུགས་དེ་དག་རྣམ་པར་འཕྲུལ་མཛད་ པ༑ ༑ཚུལ་གྱིས་དཀོན་ཞིང་ཤིན་ཏུ་ཡངས་པ་རྣམས། །དེ་དག་ཐམས་ཅད་ཚུལ་བཞིན་ཤེས་གྱུར་ཅིག །དགའ་ལྡན་གནས་ན་རང་བྱུང་གང་བཞུགས་པ། །མི་ཡི་སེངྒེ་འདྲ་མེད་ ཆེན་པོ་དང༌། །ཕྲ་དང་ཡངས་དང་རྣམ་པར་རྒྱ་ཆེ་དག །རང་བཞིན་བཞིན་དུ་ཐམས་ཅད་མཐོང་གྱུར་ཅིག །ཡུམ་གྱི་ཕྱལ་ན་དཔེ་ཟླ་མེད་པ་རྣམས། །རྣམ་པར་འཕྲུལ་པ་ཇི་སྙེད་ མཛད་པ་དང༌། །འཚང་རྒྱ་མྱ་ངན་འདའ་དང་འཁོར་ལོའི་མཆོག །འགྲོ་བ་ཀུན་ཏུ་ལྡོག་པ་མེད་པ་དང༌། །མི་ཡི་སེངྒེ་བལྟམས་པར་གྱུར་པའི་ཚེ། །ལྷ་ཡི་མཆོག་དང་ཚངས་པའི་ མཆོག་རྣམས་དང༌། །ཡེ་ཤེས་མཆོག་དང་ཤེས་ལ་གནས་རྣམས་ཀྱིས། །ལག་པའི་དམ་པས་རིམ་གྲོར་བླངས་པ་དང༌། །དེ་བཞིན་ཆོས་དབྱིངས་མ་ལུས་ཇི་སྙེད་པའི། །ཕྱོགས་ ན་གང་ཡོད་ཐམས་ཅད་བསྡུ་བྱས་ཤིང༌། །སངས་རྒྱས་རྣམ་འཕྲུལ་གཞི་མཐའ་དབུས་མེད་པ། །དེ་དག་ཐམས་ཅད་མཐོང་ཞིང་ཤེས་གྱུར་ཅིག། སྐྱེས་བུ་ཁྱུ་མཆོག་འཇིག་ རྟེན་བྱུང་གྱུར་ཅིང༌། །གཤེགས་ཐབས་བདུན་པོར་གཤེགས་པར་གྱུར་པ་དང༌། །དཔེ་ཟླ་མེད་པས་རྣམ་པར་གཟིགས་པ་དག །ཐམས་ཅད་ཆགས་མེད་སྒོ་ནས་ཤེས་གྱུར་ ཅིག༑ གང་ཡང་སྐྱེས་དབང་བཞད་མོ་བཞད་པ་དང༌། །སྐྱེ་དགུའི་འདི་དག་འདོད་བྱིན་གཟིགས་གྱུར་ཅིང༌། །སེམས་ཅན་འདི་དག་རབ་རིབ་བསྒྲིབས་ལྡོངས་པ། །སྲིད་པའི་སྡུག་ ༄༅། །བསྔལ་ཀུན་ལས་དགྲོལ་བྱ་ཞེས། །སེངྒེའི་ང་རོ་རྣམ་པར་སྒྲོག་མཛད་པ། །བདག་ཅག་འཇིག་རྟེན་འཕགས་པའི་གཙོ་ཡིན་གྱི། །ཡེ་ཤེས་སྒྲོན་མ་ཤིན་ཏུ་ འདིར་བསྟན་ཅིང༌། །འགྲོ་བ་ཀུན་གྱི་སྐྱེ་བ་དགག་པར་བྱ། །གང་ཡང་འོད་ཟེར་བརྒྱ་ཕྲག་མཐའ་ཡས་པ། །མི་ཡི་སེངྒེ་སྐྱེ་ཚེ་རབ་འཕྲོ་བས། །ངན་སོང་ཐམས་ཅད་ཞི་བར་གྱུར་པ་དང༌།། འགྲོ་བ་ཀུན་གྱི་སྡུག་བསྔལ་ཞིར་གྱུར་དང༌། །གང་ཡང་བཙུན་མོའི་འཁོར་གྱི་ཁྲོད་བཞུགས་ཤིང༌། །མི་ཡི་སེངྒེ་རྣམ་པར་འཕྲུལ་མཛད་དང༌། །འགྲོ་བ་ཀུན་ལ་ཕན་དང་བདེ་ཐུགས་ ཀྱིས༑ ༑འཇིག་རྟེན་སྒྲོན་མ་མངོན་པར་བྱུང་བ་དང༌། །འགྲོ་རྒྱུད་འདི་ལས་ཤིན་ཏུ་བྱུང་གྱུར་ཅིང༌། །བྱང་ཆུབ་ཤིང་དྲུང་སྐྱེས་དབང་བཞུགས་གྱུར་ནས། །ས་རྣམས་བསྐྱོད་བྱས་ དཔེ་ཟླ་མེད་པ་ཡི། །འོད་སྣང་ཕྱོགས་བཅུ་ཀུན་ཏུ་བཀྱེ་གྱུར་ཅིང༌། །བདུད་ཀྱི་ཁྱིམ་རྣམས་རབ་ཏུ་ལྡེག་མཛད་དེ། །ཕྱོགས་བཅུའི་འཇིག་རྟེན་ཐམས་ཅད་སྐུལ་མཛད་དང༌། །སྔོན་སྤྱོད་ གང་རྣམས་ཡོངས་སུ་སྨིན་མཛད་ཅིང༌། །གང་དོན་སྐྱེས་དབང་རྣམ་པར་འཚང་རྒྱ་བ། །མ་ལུས་སྐྲ་ཡི་སྦུགས་སུ་བསྡུ་བྱས་ཤིང༌། །ཕྱོགས་རྣམས་ཞིང་རྒྱུད་དེ་བཞིན་བསྡུ་བྱས་ཏེ། ། སེམས་ཅན་མཐའ་ཡས་རྒྱུད་ཀྱང་ཡོངས་བསྡུས་ཤིང༌། །རྒྱལ་བ་རྣམས་ཀྱི་རྣམ་འཕྲུལ་གྲུབ་གྱུར་ཅིག །ཚུལ་རྣམས་འདི་དག་མ་ལུས་ཤེས་བྱ་སྟེ། །འཇིག་རྟེན་མཁྱེན་པའི་ ཡོན་ཏན་བརྗོད་པ་དང༌། །ཡེ་ཤེས་མཁྱེན་པའི་ཡོན་ཏན་མ་བརྗོད་པ། །ཐམས་ཅད་སྤྱོད་ལ་གནས་ཏེ་ཤེས་གྱུར་ཅིག །ཇི་སྙེད་བདུད་ཀྱི་དཀྲུགས་མ་མང་པོ་དང༌། དེ་དག་དཔུང་གིས་སྟོང་ གསུམ་ཁྱབ་གྱུར་ཅིག །བདུད་རྣམས་ཕྱིན་ཅི་ལོག་གཏོང་མང་པོ་དག། ཐམས་ཅད་ཆགས་མེད་སྒོ་ནས་ཐུལ་གྱུར་ཅིག །ཞིང་ན་མི་ཡི་སེངྒེ་གང་བཞུགས་དང༌། །བརྒྱ་བྱིན་གནས་ན་ སྐྱེས་དབང་གང་བཞུགས་དང༌། །ཚངས་པའི་གནས་ན་རང་བྱུང་གང་བཞུགས་པ། །ཆགས་མེད་ཐམས་ཅད་མ་ལུས་མཐོང་གྱུར་ཅིག ། གང་རྣམས་ཆོས་ཀྱི་འཁོར་ལོ་བསྐོར་བ་དང༌། །མི་ ཡི་གཙོ་བོའི་སྐུ་ཆུལ་[*TSUL?] མཐའ་ཡས་པ། །དུས་ཀྱི་དུས་གསུམ་བསྐལ་པ་ཇི་སྙེད་པར། །གང་རྣམས་རྒྱལ་བས་མཐའ་མ་མ་བརྙེས་དང༌། །དཔེ་ཟླ་མེད་པའི་གདན་དུ་གྱུར་པ་རྣམས། །མཐའ་ ཡས་ཕྱོགས་རྣམས་གང་གིས་ཁྱབ་གྱུར་པ། །མཚན་ཉིད་ཐ་དད་རྒྱན་གྱིས་དག་པ་རྣམས། །ཀུན་དུ་རྒྱལ་བ་བསམ་ཡས་བཞུགས་པ་དག ། དེ་དག་རྒྱལ་སྲས་མང་པོས་ཡོངས་བསྐོར་ ཅིང༑ ༑ཆོས་དབྱིངས་མ་ལུས་ཀུན་ཏུ་ཁྱབ་མཛད་ནས། །གང་གིས་སངས་རྒྱས་མ་ལུས་བྱུང་གྱུར་པའི། །བྱང་ཆུབ་སྤྱོད་པ་ཀུན་ཏུ་སྟོན་མཛད་ཅིང༌། །ཡེ་ཤེས་མཁྱེན་པ་རྣམས་ཀྱི་ཚུལ་ གཅིག་གིས། །སངས་རྒྱས་མ་ལུས་ཐམས་ཅད་སྡུད་མཛད་ཅིང༌། །རྒྱལ་བའི་རྒྱན་ཚུལ་རྣམ་པ་སྣ་ཚོགས་ཀྱིས། །གང་གིས་ཆོས་ཀྱི་ཆོས་ཉིད་ཡོངས་ཁྱབ་པ། །དཔེ་ཟླ་མེད་པའི་རྣམ་ ༄༅། །འཕྲུལ་ཇི་སྙེད་དང༌། །རྒྱལ་བ་རྣམས་ཀྱི་སྐུ་ཚུལ་ཇི་སྙེད་དང༌། །གང་ཡང་སྐུ་ཚེ་བཟུང་སྟེ་སྐྱེས་གྱུར་དང༌། །གང་ཡང་བཙུན་མོའི་འཁོར་གྱིས་བསྐོར་བ་དང༌། ། གང་ཡང་མངོན་པར་འབྱུང་བ་བསྟན་པ་དང༌། །མཁས་པས་དབང་པོ་ཤིན་ཏུ་ཕྲ་མཁྱེན་དང༌། །མྱ་ངན་འདས་ནས་རིང་བསྲེལ་ཀུན་བསྡུས་ཏེ། །བགོས་ཤིང་རྒྱལ་བའི་མཆོད་རྟེན་བྱས་ པའི་བར། །འཇིག་རྟེན་དག་ན་ཚད་མེད་མ་ལུས་པའི། །སྤྱོད་པ་མཐའ་ཡས་དེ་དག་རབ་སྤྱོད་ཅིང༌། །རྒྱལ་བའི་སྤྱོད་པ་ཡོངས་སུ་གང་བརྗོད་པ། །དེ་དག་ཀུན་ལ་སྤྱོད་ཡངས་འཇུག་ གྱུར་ཅིག །དེ་ལྟར་ཚུལ་རྣམས་ཀུན་ལ་ཡོངས་བསྔོ་སྟེ། །དགེ་བ་དེ་དག་ཡོངས་སུ་བསྔོ་བས་ན། །བྱང་ཆུབ་སྤྱོད་པ་དེ་དག་རབ་ཏུ་ཤེས། །སྤྱོད་པས་སྐྱོ་བར་ནམ་ཡང་མི་འགྱུར་རོ། ། དེ་དག་རྣམ་པར་འཕྲུལ་བ་ཇི་སྙེད་པ། །རྒྱལ་བ་རྣམས་ཀྱིས་བརྗོད་པ་གང་ཡང་རུང༌། །འགྲོ་བ་འདི་ན་འཇིག་རྟེན་མཁྱེན་པ་ཡི། །གང་ཡོད་ཐམས་ཅད་མ་ལུས་རྟོགས་པར་ཤེས། །དེ་ ལྟར་སྐྱེས་དབང་ཐམས་ཅད་མ་ལུས་པར། །རབ་བྱུང་ཡུལ་རྣམས་རྗེས་སུ་ཐོབ་གྱུར་ཏེ། །དེ་དག་སྐད་ཅིག་གཅིག་གིས་རྟོགས་གྱུར་ཀྱང༌། །བྱང་ཆུབ་སྤྱོད་ལས་རྣམ་པར་ཕྱིར་མི་ ལྡོག༑ གང་ཡང་རྒྱལ་བའི་སྤྱོད་ཡུལ་ཕྲ་མོ་རྣམས། །ཞིང་དང་ཆོས་ཀྱི་རྒྱུད་རྣམས་ཐམས་ཅད་ཀུན། །དེ་དག་སྤྱོད་པ་མཆོག་གི་ཤེས་གྱུར་ཏེ། །ཡོངས་སུ་བསྔོ་བའི་ཕ་རོལ་ཕྱིན་པ་ ཐོབ༑ ༑བསྐལ་པ་ཤིན་ཏུ་ཕྲ་ལ་འཇུག་པ་གང༌། །སྐད་ཅིག་གཅིག་ལ་གྲངས་དང་གྲངས་མེད་ཚུལ། །དེ་དག་བྱང་ཆུབ་ཤེས་པས་རྟོགས་གྱུར་ཀྱང༌། །སྤྱོད་པའི་དམ་པ་དེ་ལས་ཕྱིར་མི་ལྡོག། གང་ཡང་འགྲོ་བ་རྣམས་ཀྱི་ཞིང་ཆེན་དང༌། །ཀུན་ནས་ཉོན་མོངས་དེ་བཞིན་རྣམ་དག་རྣམས། །ཀུན་ཀྱང་ཡེ་ཤེས་སྤྱོད་པས་ཤེས་བྱས་ཤིང༌། །དེ་ལ་ཡིད་གཞུངས་སེམས་ཅན་དམ་པ་ འཁོད། །དུས་ཀྱི་ཚུལ་རྣམས་རྗེས་སུ་སེམས་བྱེད་ཅིང༌། །སྐད་ཅིག་སེམས་ཀྱིས་བསམ་ཡས་བསྐལ་པ་དང༌། །དེ་བཞིན་དུས་གསུམ་མ་ལུས་ཐམས་ཅད་ཀྱང༌། །སྤྱོད་པའི་མཆོག་ལ་ གནས་ཤིང་རབ་ཏུ་ཤེས། །སེམས་ལ་ཡང་དག་གཞོལ་ཞིང་འཇུག་པ་དང༌། །ཆོས་ལ་ཡང་དག་འཇུག་པའི་ཚུལ་རྣམས་དང༌། །ཞིང་ལ་ཡང་དག་འཇུག་པ་མཁས་འདི་ལ། །ཀུན་ ཀྱང་སྤྱོད་པ་དམ་པས་རབ་ཏུ་ཤེས། །ཡེ་ཤེས་མངོན་པར་བསྒྲུབ་པ་གང་ཡོད་དང༌། །སེམས་ཅན་བསྒྲུབ་དང་དེ་བཞིན་ཆོས་བསྒྲུབ་དང༌། །རྣམ་པར་འཕྲུལ་ཐོབ་བྱང་ཆུབ་བསྒྲུབ་པ་ རྣམས། །མཐའ་དབུས་གཞི་མེད་ཐམས་ཅད་མ་ལུས་པ། །འཇུག་པ་ཤིན་ཏུ་ཕྲ་བ་མཐའ་དག་བསྡུ་བྱས་ཤིང༌། །རྣམ་པར་ཕྱེ་བ་ཇི་སྙེད་ཡོད་པ་རྣམས། །བསྐལ་པ་མི་མཐུན་ཐ་དད་མཚན་ ལྡན་པ། །དེ་དག་ཐམས་ཅད་སྤྱོད་པ་ཡངས་པས་ཤེས། །ཕྱོགས་ཀྱི་རྒྱུད་ན་ཞིང་རྣམས་གཅིག་མིན་པ། །འགྲོ་བ་རྣམས་ན་སྣ་ཚོགས་གང་ཡོད་དང༌། །སེམས་ཅན་འགྲོ་རྒྱུད་སྣ་ཚོགས་ ༄༅། །ཐ་དད་པ། སྤྱོད་པའི་སྟོབས་ལ་གནས་ཤིང་ཤེས་པར་བྱེད། །གང་གིས་ཡོངས་སུ་བསྔོ་བ་འདི་ཤེས་པ། །དེ་ནི་ཇི་སྙེད་འདས་པའི་སངས་རྒྱས་དང༌། །གང་ རྣམས་མ་བྱོན་གང་དག་བཞུགས་པ་རྣམས། །དེ་དག་སྤྱོད་དང་མཉམ་པ་ཉིད་འཐོབ་བོ། །རྒྱལ་བ་ཀུན་གྱིས་བསོད་ནམས་འཐོབ་པར་འགྱུར། །རྒྱལ་བ་ཀུན་གྱི་ཡེ་ཤེས་འཐོབ་པར་ འགྱུར། །རྒྱལ་བ་ཀུན་གྱི་སྤྱོད་པའི་རྗེས་བསླབས་ཤིང༌། །ཡོངས་སུ་བསྔོ་བ་འདི་དག་འཐོབ་པར་འགྱུར། །འགྲོ་བ་ཀུན་གྱིས་ཐུབ་པར་དཀར་གྱུར་ཅིང༌། །འཇུག་པ་ཀུན་ཏུ་བསླབ་བྱ་བསླབས་ པ་དག །རྒྱལ་བ་ཀུན་གྱི་རྗེས་སུ་སེམས་དཔའ་རྣམས། །ཐམས་ཅད་འཇིག་རྟེན་སྒྲོན་མ་མཐོང་བར་འགྱུར། །དེ་ཡི་སྤྱོད་ལ་ཚད་གདབ་མི་ནུས་ཏེ། །ཡོན་ཏན་རྣམས་ལའང་ཚད་ཀྱིས་ གཞལ་མི་ནུས། །དཔེ་མེད་དེ་དག་སྤྱོད་ལ་གནས་བཅས་ཤིང༌། །རྒྱལ་བ་ཀུན་གྱི་རྣམ་འཕྲུལ་རབ་ཏུ་ཤེས། །ཆགས་པ་མེད་པ་དང་གྲོལ་ཞིང་བཅིངས་པ་མེད་པའི་སེམས་ཞེས་བྱ་བ་ སྟེ༑ ཡོངས་སུ་བསྔོ་བ་དགུ་པའོ། །ཀྱེ༑ རྒྱལ་བའི་སྲས་དག ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་ཆོས་ཀྱི་དབྱིངས་ཚད་མེད་པ་ཞེས་བྱ་བ་བཅུ་ པ་གང་ཞེ་ན། ཀྱེ༑ རྒྱལ་བའི་སྲས་དག། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྨྲ་བ་ཆེན་པོར་གྱུར་པས་དྲི་མ་མེད་པའི་གོ་འཕང་ཐོབ་པ། ཆོས་ཀྱི་མཛོད་ཀྱི་ སྦྱིན་པ་རབ་ཏུ་བྱིན་ཞིང་སྙིང་རྗེ་ཆེན་པོ་དང་ལྡན་པས་བྱམས་པ་ཆེན་པོ་ཐོབ་ཅིང༌། བྱང་ཆུབ་ཀྱི་སེམས་ལ་སེམས་ཅན་རབ་ཏུ་དགོད་པར་བརྩོན་པ། སེམས་ཅན་གྱི་དོན་ལ་ཞུགས་པས་ བྱང་ཆུབ་ཀྱི་སེམས་རྒྱུན་མི་འཆད་པར་དགེ་བའི་རྩ་བ་ཉེ་བར་གསོག་པ། སེམས་ཅན་ཐམས་ཅད་ཀྱི་ཁ་ལོ་སྒྱུར་བས་འགྲོ་བ་ཐམས་ཅད་ལ་ཐམས་ཅད་མཁྱེན་པའི་ལམ་ཡང་དག་ པར་སྟོན་པ། འགྲོ་བ་ཐམས་ཅད་ལ་ཆོས་ཀྱི་ཉི་མ་དམ་པར་གྱུར་པས། དགེ་བའི་རྩ་བ་ཚད་མེད་པས་འཇིག་རྟེན་ཐམས་ཅད་སྣང་བར་བྱེད་པ། འགྲོ་བ་ཐམས་ཅད་ལ་སེམས་རབ་ཏུ་མཉམ་ པས༑ སེམས་ཅན་ཐམས་ཅད་ཀྱི་དགེ་བའི་རྩ་བ་མངོན་པར་འདུ་བྱེད་པ་རྒྱུན་མི་གཅོད་པ་ཡེ་ཤེས་ལ་དབང་སྒྱུར་ཞིང༌། སེམས་རྣམ་པར་དག་པས་དགེ་བའི་རྩ་བའི་ལས་ཐམས་ཅད་ ཉམས་པ་མེད་པར་སྒྲུབ་པ། ཡེ་ཤེས་ཆེན་པོས་འགྲོ་བ་ཐམས་ཅད་ཀྱི་དེད་དཔོན་དུ་གྱུར་པས། སེམས་ཅན་ཐམས་ཅད་ལ་བདེ་བའི་ལམ་ཡང་དག་པར་སྟོན་པ། དགེ་བའི་རྩ་བའི་ ཆོས་བསྐྱེད་པ་ཐམས་ཅད་ལ་སེམས་ཐམས་ཅད་ཀྱིས་སྔོན་འདྲེན་པ། སེམས་ཅན་ཐམས་ཅད་ཀྱི་དགེ་བའི་རྩ་བ་དབྱེར་མི་ཕྱེད་པར་གྱུར་པས། འགྲོ་བ་ཐམས་ཅད་ཀྱི་དགེ་བའི་ རྩ་བ་སྤེལ་བ་ལ་ཞུགས་པ། དམ་པའི་ཆོས་སྦྱིན་པ་སྔོན་དུ་གཏོང་བས་ཆོས་དཀར་པོ་ཐམས་ཅད་ལ་ཡང་དག་པར་བརྩོན་པ། ཐམས་ཅད་མཁྱེན་པ་ཉིད་དུ་སེམས་བསྐྱེད་པས་ཡོངས་ ༄༅། །སུ་བཟུང་བའི་ལྷག་པའི་བསམ་པས་སྟོབས་དང་ཤུགས་ཀྱི་ཕ་རོལ་ཏུ་ཕྱིན་པ་ཐོབ་པ། ལྷག་པའི་བསམ་པ་ཤིན་ཏུ་བརྟན་པ་ལས་བྱུང་བའི་བྱང་ཆུབ་ཀྱི་ སེམས་བསྐྱེད་པ་ཡང་དག་པར་བསྒྲུབས་པས་ཉེ་བར་སྟོན་པའི་སྤྱོད་པ་མཐུ་ཆེན་པོའི་སེམས་དང་ལྡན་པས། བྱང་ཆུབ་ཏུ་སེམས་བསྐྱེད་པ་ལ་མོས་ཤིང་དགེ་བའི་བཤེས་གཉེན་ ལ་བསྟེན་པའི་སྤྱོད་པ་དང་ལྡན་པ། སྒྱུ་མེད་པར་བྱང་ཆུབ་ཏུ་སེམས་བསྐྱེད་པའི་ལྷག་པའི་བསམ་པ་ཡང་དག་པར་བསྒྲུབས་པས་ཐམས་ཅད་མཁྱེན་པའི་སྒོའི་དམིགས་པ་ མཐའ་དང་དབུས་མེད་པ་ལ་སེམས་པ། དགེ་བའི་རྩ་བ་ལ་དམིགས་ཤིང་ཡོངས་སུ་བསྔོ་བ་རྒྱ་ཆེན་པོས་བསྒྲིབས་པ་མེད་པའི་ཡུལ་ཐམས་ཅད་ཡང་དག་པར་བསྡུ་བ་ལ་ ཞུགས་ཤིང་རབ་ཏུ་བསྒྲུབ་པ་དེ། ཆུང་ངུ་ན་སངས་རྒྱས་ཀྱི་གསུང་ལས་ཚིག་དང་ཡི་གེ་གཅིག་ཐོས་སམ། སྟོན་ཏམ། ཡང་དག་པར་འཛིན་ཀྱང་རུང་སྟེ། སངས་རྒྱས་ ཐམས་ཅད་མངོན་དུ་གྱུར་པའི་འཇིག་རྟེན་གྱི་ཁམས་འབྱམས་ཀླས་པ་དེ་དག་ན། སངས་རྒྱས་བཅོམ་ལྡན་འདས་གང་བཞུགས་ཤིང་འཚོ་སྐྱོང་བ་དེ་དག་དྲན་པས་དམིགས་ ཏེ༑ འདས་པའི་སངས་རྒྱས་རྣམས་ཀྱང་ཡིད་ལ་བྱེད། མ་བྱོན་པའི་སངས་རྒྱས་རྣམས་ཀྱང་ཡིད་ལ་བྱེད། ད་ལྟར་བྱུང་བའི་སངས་རྒྱས་རྣམས་ཀྱང་ཡིད་ལ་བྱེད། འདས་པ་དང༌། མ་ བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱང་ཡིད་ལ་བྱེད་ཅིང༌། བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་ འདིས་སངས་རྒྱས་དེ་དག་ཐམས་ཅད་ཀྱིས་ཡང་དག་པར་དགོངས་ཏེ། འཇིག་རྟེན་གྱི་ཁམས་གཅིག་ཏུ་བྱང་ཆུབ་ཀྱི་སྤྱད་པ་སྤྱོད་པར་གྱུར་ཅིག །འཇིག་རྟེན་གྱི་ཁམས་གཅིག་ཏུ་ཇི་ལྟ་བ་དེ་བཞིན་ དུ་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་མ་ལུས་པ་ཐམས་ཅད་དུ་ཡང་བྱང་ཆུབ་སེམས་དཔའི་སྤྱད་པ་སྤྱོད་པར་གྱུར་ཅིག །ཕྱི་མའི་མཐའི་མུར་ ཐུག་པའི་བསྐལ་བར་སེམས་ཅན་གཅིག་གི་དོན་དུ་བྱང་ཆུབ་སེམས་དཔའི་སྤྱད་པ་ཡང་དག་པར་སྤྱོད་པར་གྱུར་ཅིག །སེམས་ཅན་གཅིག་གི་དོན་དུ་ཇི་ལྟ་བ་དེ་བཞིན་དུ་སེམས་ཅན་གྱི་ཁམས་ མཐའ་དག་མ་ལུས་པ་ལྷག་མ་མ་ལུས་པ་ཐམས་ཅད་ཀྱི་དོན་དུ་སེམས་ཅན་གཅིག་གི་ཕྱིར་ཡང་ཕྱི་མའི་མཐའི་མུར་ཐུགས་པར་གོ་ཆ་བགོས་ཏེ། སེམས་ཅན་གཅིག་གི་ཇི་ལྟ་བ་དེ་བཞིན་ དུ་སེམས་ཅན་ཐམས་ཅད་ཀྱི་ཕྱིར་ཡང་གོ་ཆ་བགོས་ཏེ། བྱང་ཆུབ་སེམས་དཔའི་སྤྱད་པ་ཡང་དག་པར་སྤྱོད་པར་གྱུར་ཅིག །དགེ་བའི་རྩ་བ་འདིས་ནམ་ཡང་སངས་རྒྱས་དང་འབྲལ་བའི་ འདུ་ཤེས་དང༌། དགེ་བའི་བཤེས་གཉེན་དང་འབྲལ་བའི་འདུ་ཤེས་སྐྱེ་བར་མ་གྱུར་ཅིག །འདི་ལྟར་ཡང་སངས་རྒྱས་ཐམས་ཅད་མངོན་དུ་གྱུར་ཏེ། སངས་རྒྱས་སྐྱེ་བ་གཅིག་དང་ཡང་ ༄༅། །མི་འབྲལ་ཞིང༌། སངས་རྒྱས་ཐམས་ཅད་ཀྱིས་བྱང་ཆུབ་སེམས་དཔའི་ཚངས་པར་སྤྱོད་པ་ཡང་དག་པར་བསྟན་པ་དང༌། བརྗོད་པ་དང༌། བསྔགས་པ་དེ་ལ་སྤྱོད་ པར་གྱུར་ཅིག། དེ་དག་ཡོངས་སུ་རྫོགས་པར་བྱེད་པར་གྱུར་ཅིག །ཚངས་པའི་སྤྱད་པ་མ་གོད་པར་སྤྱོད་པར་གྱུར་ཅིག །ཚངས་པའི་སྤྱོད་པ་མ་ཉམས་པར་ཡོངས་སུ་རྫོགས་པར་ བྱེད་པར་གྱུར་ཅིག །ཚངས་པའི་སྤྱོད་པ་མ་འདྲེས་པར་ཡོངས་སུ་སྤྱོད་པར་གྱུར་ཅིག །ཚངས་པའི་སྤྱོད་པ་རྙོག་པ་མེད་པ་གནས་པར་གྱུར་ཅིག །ལྟུང་བ་མེད་པའི་ཚངས་པའི་སྤྱོད་པ་ ལ་རབ་ཏུ་གནས་པར་གྱུར་ཅིག །ཟིལ་གྱིས་མི་ནོན་པའི་ཚངས་པའི་སྤྱོད་པ་ལ་ཡོངས་སུ་སྤྱོད་པར་གྱུར་ཅིག །སངས་རྒྱས་ཀྱིས་བསྔགས་པའི་ཚངས་པའི་སྤྱོད་པ་ལ་ནན་ཏན་དུ་སྤྱོད་ པར་གྱུར་ཅིག །མི་གནས་པའི་ཚངས་པའི་སྤྱོད་པ་ལ་རབ་ཏུ་བསྒྲུབ་པར་གྱུར་ཅིག །མི་དམིགས་ཤིང་བྱང་ཆུབ་ཀྱི་སེམས་ལ་གནས་པའི་ཚངས་པའི་སྤྱོད་པ་རྣམ་པར་སྤྱོད་པར་ གྱུར་ཅིག །འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་སྤྱོད་པའི་རྗེས་སུ་སྤྱོད་པའི་ཚངས་པའི་སྤྱོད་པ་ཁོང་དུ་ཆུད་པར་གྱུར་ཅིག །ཇི་ལྟར་བདག་ ཚངས་པའི་སྤྱོད་པ་དེ་ལ་ནན་ཏན་དུ་བྱེད་པ་དེ་བཞིན་དུ་ཚངས་པའི་སྤྱོད་པ་ཆགས་པ་མེད་པ་དང༌། ཚངས་པར་སྤྱོད་པ་གནས་པ་མེད་པ་དང༌། ཚངས་པར་སྤྱོད་པ་ ཉོན་མོངས་པ་མེད་པ་དང༌། ཚངས་པར་སྤྱོད་པ་ཉམས་པ་མེད་པ་དང༌། ཚངས་པར་སྤྱོད་པ་བསྒྲིབས་པ་མེད་པ་དང༌། ཚངས་པར་སྤྱོད་པ་བརྟན་པ་དང༌། ཚངས་པར་སྤྱོད་པ་གཞན་གྱི་དྲིང་མི་ འཇོག་པ་དང༌། ཚངས་པར་སྤྱོད་པ་མི་བསྒུལ་བ་དང༌། ཚངས་པར་སྤྱོད་པ་མི་གཡོ་བ་དང༌། ཚངས་པར་སྤྱོད་པ་མི་འཁྲུགས་པ་དེ་ལ་སེམས་ཅན་ཐམས་ཅད་ཀྱང་རབ་ཏུ་འགོད་དོ། །སེམས་ ཅན་ཐམས་ཅད་རབ་ཏུ་སྦྱོར་རོ། །སེམས་ཅན་ཐམས་ཅད་ཤིན་ཏུ་བསྒྲུབ་བོ། །སེམས་ཅན་ཐམས་ཅད་རྣམ་པར་སྦྱོང་ངོ༌། །སེམས་ཅན་ཐམས་ཅད་དྲི་མ་མེད་པར་བྱའོ། །སེམས་ཅན་ ཐམས་ཅད་རྣམ་པར་སྣང་བར་བྱའོ། །སེམས་ཅན་ཐམས་ཅད་རྡུལ་མེད་པར་བྱའོ། །སེམས་ཅན་ཐམས་ཅད་རབ་རིབ་མེད་པར་བྱའོ། །སེམས་ཅན་ཐམས་ཅད་ཡོངས་སུ་གདུང་བ་མེད་ པར་བྱའོ། །སེམས་ཅན་ཐམས་ཅད་འབྱུང་བ་ལ་གནས་པར་བྱའོ། །སེམས་ཅན་ཐམས་ཅད་འགྱོད་པ་ཐམས་ཅད་དང་བྲལ་ཞིང་གནོད་སེམས་དང་རྣམ་པར་བྲལ་བའི་ཕ་རོལ་ཏུ་ཕྱིན་པ་ཐོབ་ པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་ཚངས་པར་སྤྱོད་པ་རྣམ་པར་མ་དག་པས་གཞན་གྱི་ཚངས་པར་སྤྱོད་པ་རྣམ་པར་དག་པར་བྱ་བ་མི་ནུས་སོ། །བྱང་ཆུབ་སེམས་དཔའ་ ཚངས་པར་སྤྱོད་པ་ལས་ཕྱིར་ལོག་པས། ཕ་རོལ་བྱང་ཆུབ་སེམས་དཔའི་ཚངས་པར་སྤྱོད་པ་ལ་བསྒྲུབ་པར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་རྒྱུན་ཆད་པས་། ༄༅། །གཞན་བྱང་ཆུབ་སེམས་དཔའི་ཚངས་པར་སྤྱོད་པ་ལ་རྣམ་པར་དག་པར་བྱ་བར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་དང་བྲལ་བས། གཞན་བྱང་ཆུབ་སེམས་དཔའི་ཚངས་པར་སྤྱོད་པ་ལ་ནན་ཏན་དུ་བྱེད་དུ་གཞུག་པར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་ལས་ཉམས་པས། གཞན་བྱང་ ཆུབ་སེམས་དཔའི་ཚངས་པར་སྤྱོད་པ་ལ་སྦྱར་བར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་ལ་མོས་པ་མེད་པས། གཞན་བྱང་ཆུབ་སེམས་དཔའི་ཚངས་པར་སྤྱོད་ པ་ལ་མོས་པར་བྱ་བར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་ལ་རྣམ་པར་མི་གནས་པས། གཞན་བྱང་ཆུབ་སེམས་དཔའི་ཚངས་པར་སྤྱོད་པ་ལ་གནས་པར་ གཞག་པར་མི་ནུས་སོ། །བྱང་ཆུབ་སེམས་དཔའ་ཚངས་པར་སྤྱོད་པ་ལ་མ་ཞུགས་པས། གཞན་བྱང་ཆུབ་སེམས་དཔའི་ཚངས་པར་སྤྱོད་པ་ལ་གཞུག་པར་མི་ནུས་སོ། །བྱང་ ཆུབ་སེམས་དཔའ་ཚངས་པར་སྤྱོད་པ་ལས་གཡོས་པས། གཞན་བྱང་ཆུབ་སེམས་དཔའི་ཚངས་པར་སྤྱོད་པ་མི་གཡོ་བ་ལ་གཞག་པར་མི་ནུས་སོ། །བྱང་ཆུབ་སེམས་དཔའ་ ཚངས་པར་སྤྱོད་པ་མ་སྤྱད་པས། གཞན་བྱང་ཆུབ་སེམས་དཔའི་ཚངས་པར་སྤྱོད་པས་ཡང་དག་པར་གཟུང་བར་མི་ནུས་སོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་ཇི་སྐད་ སྨྲ་བ་དེ་ལྟར་བྱེད་པ་ཡིན། བྱང་ཆུབ་སེམས་དཔའ་ནི་མ་ནོར་བ་ལ་གནས་ཤིང་མ་ནོར་བར་སྨྲ་བ་ཡིན། བྱང་ཆུབ་སེམས་དཔའ་ནི་བདེན་པར་སྨྲ་ཞིང་དེ་བཞིན་དུ་བྱེད་པ་ལ་གནས་པ་ཡིན། བྱང་ ཆུབ་སེམས་དཔའ་ནི་ལུས་ཀྱི་ལས་དང༌། ངག་གི་ལས་དང༌། ཡིད་ཀྱི་ལས་ཡོངས་སུ་དག་ཅིང་ཉོན་མོངས་པ་ཐམས་ཅད་བསལ་བ་ཡིན། བྱང་ཆུབ་སེམས་དཔའ་ནི་བསྒྲིབས་པ་ཐམས་ཅད་ རྣམ་པར་འཐོར་ཞིང་བསྒྲིབས་པ་མེད་པའི་སྤྱོད་ཡུལ་ལ་ཞུགས་པ་ཡིན། བྱང་ཆུབ་སེམས་དཔའ་ནི་ལྷག་པའི་བསམ་པ་དང་ལྡན་ཞིང་གཞན་ལ་ལྷག་པའི་བསམ་པ་དག་པས་ཆོས་སྟོན་ པ་ཡིན། བྱང་ཆུབ་སེམས་དཔའ་ནི་དྲང་བའི་ཚུལ་གྱིས་དགེ་བའི་རྩ་བ་ལ་འཇམ་པའི་སེམས་དང་ལྡན་ཞིང་གཞན་དྲང་པོ་ལ་གཞོག་པ་ཡིན། བྱང་ཆུབ་སེམས་དཔའ་ནི་འགྱོད་པ་དང་བྲལ་ བར་བྱས་ཤིང་གཞན་འགྱོད་པ་ལས་རྣམ་པར་སློང་བ་ཡིན། བྱང་ཆུབ་སེམས་དཔའ་ནི་ཡིད་དང་བར་གྱུར་ཅིང་གཞན་སེམས་དང་བར་དབྱེར་མེད་པ་ལ་ཡང་དག་པར་བསྒྲུབ་པ་ཡིན་། བྱང་ཆུབ་སེམས་དཔའ་ནི་ཆོས་ཡང་དག་པར་བརྗོད་པར་གྱུར་ཅིང་གཞན་ཆོས་ལ་ཉེ་བར་སྟོབས་པ་ཡིན་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་ དག་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྦྱིན་པ་ལ་བརྩོན་པ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་ ༄༅། །ཆོས་ཐམས་ཅད་ཀྱི་སྒོ་མི་ཟད་པ་རབ་ཏུ་ཐོབ་པར་གྱུར་ཅིག །ཆོས་ཐམས་ཅད་ཤིན་ཏུ་བསྟན་པའི་སྒོ་འགྲོ་བ་ཐམས་ཅད་ཚིམ་པར་བྱེད་པ། གཞན་གྱིས་བརྒལ་ བ་ཐམས་ཅད་ལ་རྣམ་པར་འདས་པ་དོར་བ་དང་གཞག་པ་རབ་ཏུ་འགགས་པ་རབ་ཏུ་ཐོབ་པར་གྱུར་ཅིག །དགེ་བའི་རྩ་བ་འདིས་འདས་པ་དང༌། མ་བྱོན་པ་དང༌། ད་ལྟར་བྱུང་བའི་ སངས་རྒྱས་ཐམས་ཅད་ཀྱི་ཆོས་རྒྱ་མཚོ་ཤིན་ཏུ་སྟོན་པར་གྱུར་ཅིག །ཆོས་ཀྱི་གནས་རེ་རེ་དང༌། ཆོས་ཀྱི་ཚུལ་རེ་རེ་དང༌། ཆོས་རྣམ་པར་བརྗོད་པ་རེ་རེ་དང༌། ཆོས་སུ་གདགས་ པ་རེ་རེ་དང༌། ཆོས་སུ་སྨོས་པ་རེ་རེ་དང༌། ཆོས་བརྗོད་པ་རེ་རེ་དང༌། ཆོས་ཀྱི་སྒོ་རེ་རེ་དང༌། ཆོས་ལ་འཇུག་པ་རེ་རེ་དང༌། ཆོས་བསྐྱེད་པ་རེ་རེ་དང༌། ཆོས་རྣམ་པར་དགོད་པ་རེ་རེ་ ལས་ཆོས་མི་ཟད་པ། མཐའ་དང་དབུས་མེད་པའི་མི་འཇིགས་པ་ལ་རབ་ཏུ་བརྩོན་པ་ཐོབ་སྟེ། ཐ་དད་པ་ཡང་དག་པར་ཤེས་པ་ལ་ཞུགས་པས་སྟོན་ཅིང་འགྲོ་བ་ཐམས་ཅད་ ཀྱིས་ཕྱི་མའི་མཐར་ཐུག་པ་མི་ཟད་པ་དང་ལྡན་པ་དང༌། སེམས་ཅན་ཐམས་ཅད་ལ་ལྷག་པའི་བསམ་པས་བསྟན་པ་ཡང་དག་པར་བསྒྲུབས་པའི་ཚིག་ཆགས་པ་མེད་པས་ བྱུང་བ་དང༌། འཁྲུལ་བ་མེད་པའི་སྤོབས་པས་འགྲོ་བ་ཐམས་ཅད་དགའ་བར་བྱེད་པའི་ཆོས་ཤིན་ཏུ་སྟོན་པ་དང༌། འགྲོ་བ་ཐམས་ཅད་དུ་རྗེས་སུ་བསྒྲགས་པའི་ཆོས་ཀྱི་ཚིག་ གི་ཚུལ་དང་ལྡན་པ་དང༌། ཆོས་ཐམས་ཅད་ཀྱི་སྣང་བ་མཐའ་ཡས་པ་རྒྱུན་མི་འཆད་པའི་དགའ་བའི་ཤུགས་ཡང་དག་པར་སྐྱེད་པ་དང༌། སེམས་ཅན་ཐམས་ཅད་དགའ་བ་དང༌། མོས་པས་ ཐམས་ཅད་མཁྱེན་པ་ཉིད་ལ་རབ་ཏུ་བཞག་པར་རྨོངས་པ་མེད་པ་དང༌། ཆོས་སྣང་བའི་སྤོབས་པ་དང་ལྡན་པ་དང༌། ཚིག་ཐམས་ཅད་ཡང་དག་པར་གཟུང་བའི་བྱིན་གྱི་རླབས་ཀྱིས་འཇིག་ རྟེན་གྱི་ཁམས་ཐམས་ཅད་རབ་ཏུ་བརྩོན་པ་དང༌། ཆོས་ཀྱི་དབྱིངས་སུ་ལུས་ཚད་མེད་པས་བྱིན་གྱིས་རློབ་པ་དང༌། ཆོས་ཀྱི་དབྱིངས་སེམས་ཡངས་པ་ཚད་མེད་པས་རྒྱས་པར་འགེངས་པ་ དང༑ ཆོས་ཀྱི་དབྱིངས་སུ་དབྱངས་ཐམས་ཅད་རྣམ་པར་དག་པ་ཚད་མེད་པས་གྲགས་པར་བྱེད་པ་དང༌། ཆོས་ཀྱི་དབྱིངས་སུ་ཚད་མེད་པའི་འཁོར་གྱི་དཀྱིལ་འཁོར་ཡང་དག་པར་སྟོན་པ་དང༌། ཆོས་ཀྱི་དབྱིངས་ཀྱི་བྱང་ཆུབ་སེམས་དཔའི་ལས་ཚད་མེད་པ་ལ་བརྩོན་པ་དང༌། ཆོས་ཀྱི་དབྱིངས་ཀྱི་བྱང་ཆུབ་སེམས་དཔའི་སྤྱོད་པ་ཚད་མེད་པ་རབ་ཏུ་ཐོབ་པ་དང༌། ཆོས་ཀྱི་དབྱིངས་ལ་ ཡང་དག་པར་འཇུག་པ་ཚད་མེད་པ་རབ་ཏུ་རྟོགས་པ་དང༌། ཆོས་ཀྱི་དབྱིངས་སུ་ཆོས་ཚད་མེད་པ་མངོན་པར་བསྒྲུབས་པ་ལ་བསླབ་པ་དང༌། ཆོས་ཀྱི་དབྱིངས་སུ་བྱང་ཆུབ་སེམས་དཔའི་ སྤྱོད་པ་ཚད་མེད་པ་ཡང་དག་པར་སྤྱོད་པ་ལ་གནས་པ་དང༌། ཆོས་ཀྱི་དབྱིངས་ཚད་མེད་པའི་བྱང་ཆུབ་སེམས་དཔའི་སྤྱོད་པའི་ཁོང་དུ་ཆུད་པས་སེམས་ཅན་ཐམས་ཅད་ཀྱི་གཙོ་བོས་ ༄༅། །ཡང་དག་པར་བསྟན་པ་རབ་ཏུ་ཐོབ་པར་གྱུར་ཅིག །ཅེས་དེ་ལྟར་སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་ལ་རབ་ཏུ་དགོད་པ་ཤིན་ཏུ་བསྒྲུབ་པའི་ ཕྱིར་བྱང་ཆུབ་སེམས་དཔའི་དགེ་བའི་རྩ་བ་དེ་དག་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། ཆོས་ཀྱི་དབྱིངས་ཚད་མེད་པའི་སངས་རྒྱས་མཐོང་བ་དང༌། ཆོས་ཀྱི་དབྱིངས་ཚད་མེད་པའི་སེམས་ཅན་གདུལ་བ་དང༌། ཆོས་ཀྱི་དབྱིངས་ཚད་མེད་པའི་སངས་རྒྱས་ཀྱི་ཞིང་བྱིན་གྱིས་ བརླབ་པ་དང༌། ཆོས་ཀྱི་དབྱིངས་ཚད་མེད་པའི་བྱང་ཆུབ་སེམས་དཔའི་ཡེ་ཤེས་ཁོང་དུ་ཆུད་པར་བྱ་བ་དང༌། ཆོས་ཀྱི་དབྱིངས་ཚད་མེད་པའི་མི་འཇིགས་པ་རབ་ཏུ་ཐོབ་པར་བྱ་བ་དང༌། ཆོས་ཀྱི་དབྱིངས་ཚད་མེད་པའི་ཐ་དད་པ་ཡང་དག་པར་ཤེས་པ་རབ་ཏུ་ཐོབ་པར་བྱ་བ་དང༌། ཆོས་ཀྱི་དབྱིངས་ཚད་མེད་པའི་བྱང་ཆུབ་སེམས་དཔའི་གཟུངས་རབ་ཏུ་ཐོབ་པར་བྱ་བ་དང༌། ཆོས་ཀྱི་དབྱིངས་ཚད་མེད་པའི་བྱང་ཆུབ་སེམས་དཔའི་གནས་བསམ་གྱིས་མི་ཁྱབ་པ་རབ་ཏུ་ཐོབ་པར་བྱ་བ་དང༌། ཆོས་ཀྱི་དབྱིངས་ཚད་མེད་པའི་བསོད་ནམས་བསགས་པ་ཡོངས་ སུ་གྲུབ་པར་བྱ་བ་དང༌། ཆོས་ཀྱི་དབྱིངས་ཚད་མེད་པའི་སེམས་ཅན་གྱི་དོན་གྱི་དགེ་བའི་རྩ་བ་ཡོངས་སུ་རྫོགས་པར་བྱ་བ་ཐོབ་པར་གྱུར་ཅིག །དགེ་བའི་རྩ་བ་དེས་ཆོས་འདི་དག་ ཡོངས་སུ་རྫོགས་པར་གྱུར་ཅིག། ཇི་ལྟར་བདག་གིས་ཐོབ་པར་གྱུར་བ་དེ་བཞིན་དུ། སེམས་ཅན་ཐམས་ཅད་ཀྱིས་ཀྱང་ཐོབ་པར་གྱུར་ཅིག །ཐོབ་པ་འདི་དང༌། མཉམ་པ་ཉིད་འདི་དང༌། ཡོངས་ སུ་རྫོགས་པ་འདིས་སེམས་ཅན་ཐམས་ཅད་བདག་དང་སྤྱོད་པ་མཉམ་པར་གྱུར་ཅིག །བསོད་ནམས་མཉམ་པ་དང༌། ཡེ་ཤེས་མཉམ་པ་དང༌། སྟོབས་མཉམ་པ་དང༌། མི་འཇིགས་པ་ མཉམ་པ་དང༌། རྣམ་པར་དག་པ་མཉམ་པ་དང༌། རྣམ་པར་འཕྲུལ་པ་མཉམ་པ་དང༌། མངོན་པར་བྱང་ཆུབ་པ་མཉམ་པ་དང༌། ཆོས་བསྟན་པ་མཉམ་པ་དང༌། དོན་མཉམ་པ་དང༌། རྣམ་ པར་ངེས་པ་མཉམ་པ་དང༌། མངོན་པར་ཤེས་པ་ཐམས་ཅད་མཉམ་པས་མཉམ་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཡོངས་ སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། ཇི་ལྟར་ཆོས་ཀྱི་དབྱིངས་ཚད་མེད་པ་དེ་བཞིན་དུ་དགེ་བའི་རྩ་བ་ དེ་དག་ཚད་མེད་པའི་ཡེ་ཤེས་ཡོངས་སུ་བསྒྲུབ་པའི་ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་མཐའ་དང་དབུས་མེད་པ་དེ་བཞིན་དུ་དགེ་བའི་རྩ་བ་དེ་དག་སངས་རྒྱས་མཐའ་དང་ དབུས་མེད་པ་ཐམས་ཅད་མཐོང་བ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་ལ་མུས་གཅད་པ་མེད་པ་དེ་བཞིན་དུ་དགེ་བའི་རྩ་བ་དེ་དག་སངས་རྒྱས་ ༄༅། །ཀྱི་ཞིང་མུས་གཅད་པ་མེད་པ་ཐམས་ཅད་དུ་འགྲོ་བར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་ས་མཚམས་མེད་པ་དེ་བཞིན་དུ་དགེ་བའི་རྩ་བ་དེ་དག་འཇིག་རྟེན་གྱི་ ཁམས་ས་མཚམས་མེད་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་སྤྱད་པར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་ལ་རིས་སུ་ཆད་པ་མེད་པ་དེ་བཞིན་དུ་དགེ་བའི་རྩ་བ་དེ་དག་ སེམས་ཅན་ཐམས་ཅད་ལ་ཐམས་ཅད་མཁྱེན་པའི་ཡེ་ཤེས་རིས་སུ་ཆད་པ་མེད་པར་བྱ་བའི་ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་རྒྱུད་ཀྱི་ཚུལ་གཅིག་པར་གྱུར་པ་དེ་བཞིན་དུ་ དགེ་བའི་རྩ་བ་དེ་དག་སེམས་ཅན་ཐམས་ཅད་ཡེ་ཤེས་ཀྱི་རྒྱུད་ཀྱི་ཚུལ་གཅིག་ཏུ་འགྱུར་བའི་ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་རང་བཞིན་ཡོངས་སུ་དག་པ་དེ་བཞིན་དུ་དགེ་ བའི་རྩ་བ་དེ་དག་འགྲོ་བ་ཐམས་ཅད་ཤིན་ཏུ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་འགྲོ་བ་ཐམས་ཅད་ཀྱི་རྗེས་སུ་སོང་བ་དེ་བཞིན་དུ་དགེ་བའི་རྩ་ བ་དེ་དག་སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ཡང་དག་པར་བསྡུ་བའི་ཕྱིར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་འགྲོ་བ་ཐམས་ ཅད་ཀྱི་རྒྱན་དུ་གྱུར་པ་དེ་བཞིན་དུ་དགེ་བའི་རྩ་བ་དེ་དག་སེམས་ཅན་ཐམས་ཅད་ཀྱིས་ཀུན་ཏུ་བཟང་པོའི་སྤྱོད་པའི་རྒྱན་རྣམ་པར་དག་པར་ཡོངས་སུ་བསྔོའོ། །ཇི་ལྟར་ཆོས་ཀྱི་དབྱིངས་ ལ་འཇིག་པ་མེད་པ་དེ་བཞིན་དུ་དགེ་བའི་རྩ་བ་དེ་དག་བྱང་ཆུབ་སེམས་དཔའི་སྤྱོད་པ་ཐམས་ཅད་འཇིག་པ་མེད་པའི་ཕྱིར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ ཆེན་པོ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། གང་གིས་ཐམས་ཅད་མཁྱེན་པ་ཉིད་དུ་འགྱུར་བ་དེར་དགེ་བའི་རྩ་བ་དེ་དག་ཡོངས་སུ་བསྔོའོ། །ཐམས་ཅད་མཁྱེན་པ་ཉིད་ནི་ཐམས་ ཅད་དུ་འགྲོ་བས་ན་ཐམས་ཅད་དུ་འགྲོ་བའི་ཕྱིར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་འགྲོ་བ་ཐམས་ཅད་དུ་ཤིན་ཏུ་སྣང་བར་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་ བསྔོའོ། །ཅི་ནས་ཀྱང་སངས་རྒྱས་མཐོང་བ་དང༌། སངས་རྒྱས་ཀྱི་མཛད་པ་ཡོངས་སུ་འཐོབ་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བ་དང༌། སངས་ རྒྱས་ཀྱི་མཛད་པ་ཐོགས་པ་མེད་པར་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བ་སེམས་ཅན་ཐམས་ཅད་རྣམ་པར་དག་པར་བྱ་བ་ལས་ཕྱིར་མི་ ལྡོག་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བ་ཡོངས་སུ་ཤེས་ཤིང་རབ་ཏུ་འཕེལ་བར་བྱེད་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ ནས་ཀྱང་སངས་རྒྱས་མཐོང་བ་གནས་སུ་མི་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བ་ཆགས་པ་མེད་པར་ཁོང་དུ་ཆུད་པར་འགྱུར་བ་དེ་ལྟར་ ༄༅། །དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་ཞིང་ཀུན་ཏུ་བཟང་པོའི་སྤྱོད་པ་ཡང་དག་པར་འགྲུབ་པར་འགྱུར་བ་དེ་ལྟར་དགེ་བའི་རྩ་བ་དེ་ དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་ཞིང་མངོན་སུམ་དུ་བལྟ་བ་རྒྱུན་མི་འཆད་པ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་བས་ བྱང་ཆུབ་སེམས་དཔའི་སྟོབས་དང་ཤུགས་སྐྱེ་བར་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་སངས་རྒྱས་མཐོང་ཞིང་དངོས་པོ་ཉམས་པར་འགྱུར་བ་ཐམས་ ཅད་ལས་འཕགས་པར་འགྱུར་བ་དེ་ལྟར་དགེ་བའི་རྩ་བ་དེ་དག་ཡོངས་སུ་བསྔོའོ། །འདི་ལྟར་ཡང་ཆོས་ཀྱི་དབྱིངས་བྱེད་པ་མེད་པ་དང༌། ཆོས་ཀྱི་དབྱིངས་ཀྱི་རང་བཞིན་དང༌། ཆོས་ཀྱི་ དབྱིངས་ཀྱི་ངོ་བོ་ཉིད་དང༌། ཆོས་ཀྱི་དབྱིངས་གནས་མེད་པ་དང༌། ཆོས་ཀྱི་དབྱིངས་ཉམས་པ་མེད་པ་དང༌། ཆོས་ཀྱི་དབྱིངས་དབེན་པ་དང༌། ཆོས་ཀྱི་དབྱིངས་ཞི་བ་དང༌། ཆོས་ཀྱི་ དབྱིངས་གནས་པ་དང༌། ཆོས་ཀྱི་དབྱིངས་མི་འཕོ་བ་དང༌། ཆོས་ཀྱི་དབྱིངས་ཐ་དད་པ་མེད་པ་བཞིན་དུ་འགྱུར་བར་ཡོངས་སུ་བསྔོའོ། །གཞན་ཡང་བྱང་ཆུབ་སེམས་དཔའ་སེམས་ དཔའ་ཆེན་པོ་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་ཆོས་བསྟན་ཅིང་བརྗོད་པས་ཡང་དག་པར་བཟུང་བ་དང༌། ཆོས་བསྟན་པར་བསྐུལ་བ་དང༌། དེ་ལ་དམིགས་ པ་ལ་བརྩོན་པར་བྱས་པའི་དགེ་བའི་རྩ་བ་དང༌། དེ་དག་ལ་སོགས་པ་དགེ་བ་བརྩམས་པ་གཞན་དང་གཞན་གྱིས་སེམས་ཅན་ཐམས་ཅད་སངས་རྒྱས་ཐམས་ཅད་ཀྱིས་བྱིན་གྱིས་བརླབས་ཤིང་ བྱང་ཆུབ་སེམས་དཔར་གྱུར་ཏེ་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་ཀྱི་ཐམས་ཅད་མཁྱེན་པའི་ཡེ་ཤེས་ལ་སེམས་ཅན་ཐམས་ཅད་འགོད་པའི་ཚུལ་གྱིས་བླ་ན་ མེད་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་འཇིག་རྟེན་ཀུན་གྱིས་ཆོས་ཡོངས་སུ་དྲིས་པས་ཟད་པར་མི་འགྱུར་བས་མི་འཕྲོགས་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ ཅད་ཆོས་ཀྱི་སྣང་བས་བསྒྲིབས་པ་མེད་པ་ཐོབ་པའི་ཕྱིར་ཆགས་པ་མེད་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་ཀྱི་ཚིག་དང་ཡི་གེ་བརྗོད་པ་ལ་ མཁས་ཤིང་ཡེ་ཤེས་ཀྱི་སྙིང་པོའི་ཆོས་སྨྲ་བར་གྱུར་ཅིག། སེམས་ཅན་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་སྟོན་པ་ལ་མཁས་ཤིང་སངས་རྒྱས་ཀྱི་བྱིན་གྱིས་བརླབས་ པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་གཞན་གྱི་དྲིང་མི་འཇོག་ཅིང་ཡང་དག་པ་ཇི་ལྟ་བ་བཞིན་དུ་ཆོས་སྟོན་པས་མིག་དང་འདྲ་བའི་ཆོས་སྨྲ་བར་གྱུར་ཅིག །སེམས་ཅན་ ཐམས་ཅད་རིགས་པས་གཟུང་བའི་ཚིག་དང༌། ཡི་གེ་ཆུད་མ་ཟོས་པར་ཤིན་ཏུ་སྟོན་པས་སངས་རྒྱས་ཀྱི་ཆོས་ཐམས་ཅད་དྲན་པས་ཡང་དག་པར་འཛིན་པའི་ཆོས་སྨྲ་བར་གྱུར་ཅིག ། ༄༅། །སེམས་ཅན་ཐམས་ཅད་མཚན་གྱིས་ཤིན་ཏུ་བརྒྱན་པའི་ལུས་དང་ལྡན་ཞིང༌། འོད་མཐའ་ཡས་པར་འཕྲོ་བའི་ཆོས་ཡང་དག་པར་དཔྱད་པ་ལ་མཁས་པས་ཉེ་བར་ མི་དམིགས་པའི་ལམ་དུ་ཞུགས་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་ཆོས་མི་འཆད་པ་ལ་གནས་ཤིང་སངས་རྒྱས་ཀྱི་ཆོས་ཐམས་ཅད་ཀྱི་ཆར་བསམ་པ་ཐག་པས་ དབབ་པའི་བྱིན་གྱི་རླབས་ཀྱིས་ཆོས་ཀྱི་སྤྲིན་རབ་ཏུ་སྟོན་ཅིག །སངས་རྒྱས་ཀྱི་ཞིང་བརྗོད་དུ་མེད་པ་ལུས་ཀྱིས་རྒྱས་པར་འགེངས་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་ གཞན་གྱིས་ཕམ་པར་མི་ནུས་པའི་རྒྱལ་མཚན་དང་ལྡན་པའི་ཆོས་སྨྲ་བའི་མཛོད་བདོག་པས་ཆོས་རྒྱ་མཚོ་ཐམས་ཅད་དང༌། སངས་རྒྱས་ཀྱི་ཆོས་ཆུད་མི་གཟོན་པའི་ཆོས་སྨྲ་བར་གྱུར་ ཅིག༑ སེམས་ཅན་ཐམས་ཅད་སངས་རྒྱས་ཀྱི་སྤོབས་པ་ལ་བརྩོན་ཞིང་ཆོས་ཐམས་ཅད་ཡང་དག་པར་བརྗོད་པ་ལ་མཁས་པས་ཆོས་ཐམས་ཅད་ཀྱི་དཀྱིལ་འཁོར་གྱི་ཉི་མའི་ཆོས་སྨྲ་ བར་གྱུར་ཅིག །སེམས་ཅན་ཐམས་ཅད་ཆོས་ཀྱི་དབྱིངས་མཐའ་ཡས་པ་ཤིན་ཏུ་བསྟན་པའི་ཆོས་ཀྱི་འབྱུང་གནས་དང་མཛོད་རབ་ཏུ་ཐོབ་ཅིང༌། ཆོས་ཀྱི་འབྱུང་གནས་དང༌། རིགས་ ཀྱི་ཚུལ་དང་ལྡན་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་ཆོས་ཀྱི་མཛོད་རྣམ་པར་ཕྱེ་བའི་ཡེ་ཤེས་མངོན་པར་ཤེས་པ་དང་ལྡན་ཞིང་ཆོས་ཀྱི་སྤྱོད་པའི་ཕ་རོལ་ཏུ་ ཕྱིན་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་དེ་བཞིན་གཤེགས་པས་ཤིན་ཏུ་བསྟན་པའི་ཕ་རོལ་ཏུ་ཕྱིན་པའི་ཡེ་ཤེས་དང་ལྡན་ཞིང་དབྱེ་བ་མེད་པ་དང༌། གནས་པ་མེད་པའི་ ཆོས་ལ་གནས་པ་རབ་ཏུ་ཐོབ་པའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་ཡོན་ཏན་དང་བསྔགས་པ་མུ་མེད་ཅིང་ཟད་མི་ཤེས་པ་དང་ལྡན་ཏེ། ཆོས་ཐམས་ཅད་ཁོང་དུ་ཆུད་པའི་ཆོས་ སྨྲ་བར་གྱུར་ཅིག །སེམས་ཅན་ཐམས་ཅད་བདེན་པའི་མཐའི་ཚུལ་གྱིས་རྗེས་སུ་ཞུགས་པས་འགྲོ་བ་ཐམས་ཅད་ལ་མི་སླུ་བའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་བདུད་ཀྱི་ ལས་ཐམས་ཅད་ཁོང་དུ་ཆུད་པའི་ཡེ་ཤེས་དང་ལྡན་ཞིང་བདུད་ཐམས་ཅད་རྣམ་པར་འཐོར་བའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་བདག་གི་མེད་པ་དང༌། ཡོངས་སུ་ འཛིན་པ་མེད་པའི་སེམས་དང་ལྡན་ཞིང་སངས་རྒྱས་ཐམས་ཅད་ཀྱིས་ཡོངས་སུ་བཟུང་བའི་ཆོས་སྨྲ་བར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་ཆོས་ཀྱི་སྟོབས་ཀྱིས་ སྨོན་ལམ་རབ་ཏུ་ཐོབ་ཅིང༌། འགྲོ་བ་ཐམས་ཅད་བདེ་བར་བྱེད་པའི་ཆོས་སྨྲ་བར་གྱུར་ཅིག །དེ་ཡང་འདི་ལྟར་ཡོངས་སུ་བསྔོ་སྟེ། ཉམས་པ་མེད་པའི་ལས་ཀྱིས་ཡོངས་སུ་བསྔོའོ། །ཉམས་པ་ མེད་པའི་རྣམ་པར་སྨིན་པས་ཡོངས་སུ་བསྔོའོ། །ཉམས་པ་མེད་པའི་སེམས་ཀྱིས་ཡོངས་སུ་བསྔོའོ། །ཉམས་པ་མེད་པའི་ཆོས་ལ་ཡོངས་སུ་བསྔོའོ། །ཉམས་པ་མེད་པའི་དངོས་པོ་ལ་ ༄༅། །ཡོངས་སུ་བསྔོའོ། །ཉམས་པ་མེད་པའི་རྒྱུ་རྣམས་ཀྱིས་ཡོངས་སུ་བསྔོའོ། །ཉམས་པ་མེད་པའི་ཆོས་ཀྱི་ལམ་གྱིས་ཡོངས་སུ་བསྔོའོ། །ཉམས་པ་མེད་པའི་མིང་མང་ པོ་དང༌། ཚིག་མང་པོ་དང༌། ཡི་གེ་མང་པོའི་ཕྱིར་ཡོངས་སུ་བསྔོའོ། །ཉམས་པ་མེད་པའི་ཡོངས་སུ་བསྔོ་བའི་ཕྱིར་ཡོངས་སུ་བསྔོའོ། །ཉམས་པ་མེད་པའི་སེམས་ཅན་གྱི་དོན་བྱ་བའི་ ཕྱིར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་དཔའ་དགེ་བའི་རྩ་བ་དེ་དག་ཡོངས་སུ་བསྔོ་ཡང་གཟུགས་ཀྱི་ཚུལ་ལ་ཆགས་ཤིང་ཡོངས་སུ་མི་བསྔོའོ། །འདོད་པ་ལ་གནས་ པའི་སྒྲའི་དོན་དུ་ཡོངས་སུ་མི་བསྔོའོ། །དྲིའི་ཕྱིར་ཡོངས་སུ་མི་བསྔོའོ། །རོའི་ཕྱིར་ཡོངས་སུ་མི་བསྔོའོ། །རེག་བྱའི་ཕྱིར་ཡོངས་སུ་མི་བསྔོའོ། །འདོད་པ་ལ་གནས་པའི་ཆོས་རྣམས་ ཀྱི་ཕྱིར་ཡང་ཡོངས་སུ་མི་བསྔོའོ། །མཐོ་རིས་སུ་སྐྱེ་བའི་ཕྱིར་ཡང་ཡོངས་སུ་མི་བསྔོའོ། །འདོད་པ་ལ་སྤྱོད་པའི་ཕྱིར་ཡང་ཡོངས་སུ་མི་བསྔོའོ། །འདོད་པའི་ཡུལ་ལ་ཆགས་པས་ཀྱང་ ཡོངས་སུ་མི་བསྔོའོ། །གཡོག་འཁོར་གྱི་ཕྱིར་ཡང་ཡོངས་སུ་མི་བསྔོའོ། །དབང་ཕྱུག་དོན་དུ་གཉེར་བས་ཡོངས་སུ་མི་བསྔོའོ། །འཁོར་བའི་དགའ་བའི་དོན་དུ་ཡོངས་སུ་མི་བསྔོའོ། ། འཆི་འཕོ་དང་སྐྱེ་བ་ལ་གནས་ཤིང་ཡོངས་སུ་མི་བསྔོའོ། །དངོས་པོ་ལ་མངོན་པར་མོས་ཤིང་ཡོངས་སུ་མི་བསྔོའོ། །འདོད་པ་དང་ལྡན་པར་བྱ་བའི་བསམ་པས་ཡོངས་སུ་མི་བསྔོའོ།། ཀུན་གཞི་ལ་མོས་པས་ཡོངས་སུ་མི་བསྔོའོ། །བསྟེན་པའི་སེམས་ཀྱིས་ཡོངས་སུ་མི་བསྔོའོ། །དགེ་བའི་རྩ་བ་གཞིག་པའི་དོན་དུ་ཡོངས་སུ་མི་བསྔོའོ། །ཁམས་གསུམ་པ་ལ་གནས་པས་ ཀྱང་ཡོངས་སུ་མི་བསྔོའོ། །བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པའི་རོལ་ཆགས་པས་ཀྱང་ཡོངས་སུ་མི་བསྔོའོ། །ཉན་ཐོས་དང་རང་སངས་ རྒྱས་ཀྱི་ཐེག་པ་ལ་གནས་ཤིང་ཡོངས་སུ་མི་བསྔོའོ། །འདི་ལྟར་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བའི་དོན་དུ་ཐམས་ཅད་མཁྱེན་པའི་ཡེ་ཤེས་རྫོགས་པར་བྱ་བའི་ ཕྱིར་ཡོངས་སུ་བསྔོའོ། །ཆགས་པ་མེད་པའི་ཡེ་ཤེས་ལ་འཇུག་པའི་ཕྱིར་ཡོངས་སུ་བསྔོའོ། །བསྒྲིབས་པ་མེད་པའི་དགེ་བའི་རྩ་བ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །འགྲོ་ བ་ཐམས་ཅད་འཁོར་བ་ནས་རབ་ཏུ་གདོན་པའི་ཡེ་ཤེས་ཆེན་པོ་ཁོང་དུ་ཆུད་པར་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་ཏུ་སེམས་བསྐྱེད་པ་རྡོ་རྗེ་ལྟ་བུ་དང༌། བསམ་པ་བསྟེན་པ་ ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོའོ། །ཡུན་དུ་འཆི་བ་མེད་པའི་ཆོས་བསྒྲུབ་པའི་ཕྱིར་ཡོངས་སུ་བསྔོའོ། །སངས་རྒྱས་ཀྱི་རིགས་ཀྱིས་བརྒྱན་པའི་རྒྱན་དུ་མ་དང༌། ཐམས་ ཅད་མཁྱེན་པའི་སྤྱོད་པས་རྣམ་པར་འཕྲུལ་བ་ཡང་དག་པར་བསྟན་པའི་ཕྱིར་ཡོངས་སུ་བསྔོའོ། །ཆོས་སྣང་བ་ཐམས་ཅད་ཀྱི་ཡེ་ཤེས་ཀྱི་རྫུ་འཕྲུལ་གྱིས་བྱང་ཆུབ་སེམས་དཔའི་ ༄༅། །རྣམ་པར་འཕྲུལ་པ་གྲུབ་པར་བྱ་བའི་ཕྱིར་ཡོངས་སུ་བསྔོའོ། །ཆོས་ཀྱི་དབྱིངས་ཀྱིས་ཀླས་པ་ནམ་མཁའི་མཐས་གཏུགས་པའི་ཞིང་ཐམས་ཅད་དུ་ བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་གཞི་ཡོངས་སུ་རྫོགས་པ་ཐོབ་ཅིང་ཕྱིར་མི་ལྡོག་པ་དང༌། རྡོ་རྗེ་ལྟ་བུའི་གོ་ཆ་དོན་ཡོད་པས་སེམས་ཅན་ཐམས་ཅད་ཀུན་ཏུ་བཟང་ པོའི་ས་ལ་རབ་ཏུ་དགོད་པ་ལ་གནས་ཤིང་ཡོངས་སུ་བསྔོའོ། །ཕྱི་མའི་མཐའི་བསྐལ་པའི་མུར་ཐུག་པར་སེམས་ཅན་ཐམས་ཅད་རབ་ཏུ་དགྲོལ་བར་བྱ་བ་རྒྱུན་མི་འཆད་པ་དང༌། སངས་ རྒྱས་ཀྱིས་བསྒྲིབས་པ་མེད་པ་ཐམས་ཅད་འཇིག་རྟེན་དུ་ཡང་དག་པར་བསྟན་པའི་སྤྱོད་པ་རྒྱུན་མི་འཆད་པ་ལ་རབ་ཏུ་གནས་པར་བྱ་བའི་ཕྱིར་ཉེ་བར་གནས་ཤིང་ཡོངས་སུ་བསྔོའོ། །དེ་ དེ་ལྟར་ཡོངས་སུ་བསྔོ་བ་ཡང་རང་བཞིན་དང་མཉམ་པའི་སེམས་ཀྱིས་ཡོངས་སུ་བསྔོའོ། །ཆོས་ཉིད་དང་མཉམ་པའི་སེམས་ཀྱིས་ཡོངས་སུ་བསྔོའོ། །འགྲོ་བ་ཚད་མེད་པ་ཐམས་ ཅད་དང་མཉམ་པའི་སེམས་ཀྱིས་ཡོངས་སུ་བསྔོའོ། །ཉོན་མོངས་པ་མེད་པ་དང་མཉམ་པའི་སེམས་ཀྱིས་ཡོངས་སུ་བསྔོའོ། །བྱེད་པ་མེད་པའི་རང་བཞིན་དང་མཉམ་པའི་སེམས་ ཀྱིས་ཡོངས་སུ་བསྔོའོ། །ཆོས་འཁྲུགས་པ་མེད་པ་ཡོངས་སུ་ཤེས་པའི་སེམས་ཀྱིས་ཡོངས་སུ་བསྔོའོ། །དུས་གསུམ་མཉམ་པ་ཉིད་དུ་ཞུགས་པའི་སེམས་ཀྱིས་ཡོངས་སུ་བསྔོའོ།། འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་པའི་རིགས་སུ་བྱུང་བའི་སེམས་ཀྱིས་ཡོངས་སུ་བསྔོའོ། །མངོན་པར་ཤེས་པ་མ་ཉམས་པ་ཐོབ་པའི་སེམས་ཀྱིས་ ཡོངས་སུ་བསྔོའོ། །ཐམས་ཅད་མཁྱེན་པའི་སྤྱོད་པ་ལ་གྲུབ་པའི་སེམས་ཀྱིས་ཡོངས་སུ་བསྔོའོ། །སེམས་ཅན་ཐམས་ཅད་སེམས་ཅན་དམྱལ་བ་ནས་ཕྱིར་བཟློག་པའི་ཕྱིར་ཡོངས་སུ་བསྔོའོ། ། སེམས་ཅན་ཐམས་ཅད་བྱོལ་སོང་གི་སྐྱེ་གནས་སུ་མི་དགོད་པའི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་གཤིན་རྗེའི་འཇིག་རྟེན་ན་གནས་པ་དགག་པའི་ཕྱིར་ཡོངས་སུ་བསྔོའོ། ། སེམས་ཅན་ཐམས་ཅད་ཀྱི་སྒྲིབ་པའི་ཆོས་ཐམས་ཅད་སྤང་བའི་ཕྱིར་ཡོངས་སུ་བསྔོའོ། །འགྲོ་བ་ཐམས་ཅད་ཀྱི་སེམས་དགེ་བའི་རྩ་བས་ཤིན་ཏུ་ཚིམ་པར་བྱ་བའི་ཕྱིར་ཡོངས་སུ་བསྔོའོ།། ཆོས་ཀྱི་འཁོར་ལོ་དུས་ལ་བབ་པར་བསྐོར་བས་དགའ་བར་བྱ་བའི་ཕྱིར་ཡོངས་སུ་བསྔོའོ། །སྟོབས་བཅུའི་འཁོར་ལོ་ལ་སེམས་ཅན་ཐམས་ཅད་གཟུད་པའི་ཕྱིར་ཡོངས་སུ་བསྔོའོ། །བྱང་ ཆུབ་སེམས་དཔའི་ཆོས་དང༌། སྨོན་ལམ་མཐའ་དང་དབུས་མེད་པ་ཐོབ་པར་བྱ་བའམ། རྣམ་པར་དག་པའི་ཆོས་ཅན་དུ་བྱ་བའི་ཕྱིར་ཡོངས་སུ་བསྔོའོ། །བྱང་ཆུབ་ཀྱི་སེམས་ཅང་ཤེས་ བསྒོམ་པ་ཡོངས་སུ་རྫོགས་པར་བྱ་བས་དགེ་བའི་བཤེས་གཉེན་གྲངས་མེད་པ་ཐམས་ཅད་དགའ་བར་བྱ་བའི་སེམས་ཀྱིས་ཡོངས་སུ་བསྔོའོ། །སངས་རྒྱས་ཀྱི་ཆོས་ཟབ་མོ་ལ་གནས་པར་ ༄༅། །བྱ་བའི་ལྷག་པའི་བསམ་པས་སངས་རྒྱས་ཀྱི་ཆོས་ཐམས་ཅད་ཡང་དག་པར་གཟུང་ཞིང༌། ཡེ་ཤེས་ཀྱི་སྣང་བ་ཤིན་ཏུ་འཕགས་པར་བྱ་བའི་ཕྱིར་ཡོངས་སུ་བསྔོའོ།། བྱང་ཆུབ་སེམས་དཔའི་སྤྱོད་པ་ལ་བསྒྲིབས་པ་མེད་པར་མངོན་སུམ་དུ་འགྱུར་བར་བྱ་བའི་ཕྱིར་ཡོངས་སུ་བསྔོའོ། །སངས་རྒྱས་ཐམས་ཅད་མངོན་དུ་ལྟ་བར་མངོན་པར་མོས་པས་ཡོངས་སུ་ བསྔོའོ། །ཆོས་སྣང་བ་ཐམས་ཅད་ལ་མངོན་པར་མོས་པས་ཡོངས་སུ་བསྔོའོ། །དོག་པ་མེད་པའི་བྱང་ཆུབ་ཀྱི་སེམས་ཀྱིས་འཇིགས་པ་མེད་པ་ལ་མངོན་པར་མོས་པས་ཡོངས་སུ་བསྔོའོ། ། བྱང་ཆུབ་སེམས་དཔའི་གནས་བསམ་གྱིས་མི་ཁྱབ་པའི་ཡེ་ཤེས་ལ་མངོན་པར་མོས་པས་ཡོངས་སུ་བསྔོའོ། །སེམས་ཅན་ཐམས་ཅད་སྙིང་རྗེ་ཆེན་པོ་རྣམ་པར་དག་པས་ཡོངས་སུ་ བསྐྱབ་པ་ལ་མངོན་པར་མོས་པས་ཡོངས་སུ་བསྔོའོ། །སངས་རྒྱས་ཀྱི་ཞིང་མཐའ་དག་མ་ལུས་པ་ལྷག་མ་མེད་པ་ཐམས་ཅད་རྣམ་པར་དག་པར་བྱ་བ་དང༌། བརྗོད་དུ་མེད་པའི་རྒྱན་སྣ་ ཚོགས་ཀྱིས་ཐམས་ཅད་བརྒྱན་པར་མངོན་པར་མོས་པས་ཡོངས་སུ་བསྔོའོ། །བདུད་ཀྱི་ལས་དང༌། བདུད་ཀྱི་ཞགས་པ་དང༌། བདུད་ཀྱི་དཀྲུགས་མ་ཐམས་ཅད་རྣམ་པར་གཏོར་བ་ དང༑ རབ་ཏུ་གཞོམ་པར་མངོན་པར་མོས་པས་ཡོངས་སུ་བསྔོའོ། །སངས་རྒྱས་ཀྱི་ཞིང་ཐམས་ཅད་དུ་གནས་མེད་པར་བྱང་ཆུབ་སེམས་དཔའི་སྤྱོད་པ་ལ་གནས་པར་མངོན་པར་མོས་ པས་ཡོངས་སུ་བསྔོའོ། །ཐམས་ཅད་མཁྱེན་པའི་སེམས་རྒྱ་ཆེན་པོས་སངས་རྒྱས་ཐམས་ཅད་ཀྱི་ཆོས་ཀྱི་རྒྱུད་ལ་འཇུག་པར་མངོན་པར་མོས་པས་ཡོངས་སུ་བསྔོའོ། །དྲན་པ་རྣམ་པར་སྦྱངས་ པས་ཡོངས་སུ་བསྔོའོ། །བློ་གྲོས་རྣམ་པར་ངེས་པས་ཡོངས་སུ་བསྔོའོ། །སངས་རྒྱས་ཀྱི་ཆོས་ཐམས་ཅད་རིག་པས་ཤིན་ཏུ་འཛིན་པའི་མངོན་པར་ཤེས་པས་ཡོངས་སུ་བསྔོའོ། །བློ་མཐའ་ དང་དབུས་མེད་ཅིང་ཆགས་པ་མེད་པས་ཡོངས་སུ་བསྔོའོ། །ལྷག་པའི་བསམ་པ་རྣམ་པར་དག་པས་ཡོངས་སུ་བསྔོའོ། །འགྲོ་བ་ཐམས་ཅད་ལ་བྱམས་པ་ཆེན་པོ་སྤྱོད་པས་ཡོངས་སུ་བསྔོའོ། ། སྙིང་རྗེ་ཆེན་པོ་ལ་རབ་ཏུ་བརྩོན་པའི་སེམས་ཀྱིས་ཡོངས་སུ་བསྔོའོ། །དགའ་བའི་སེམས་ཀྱིས་ཡོངས་སུ་བསྔོའོ། །བཏང་སྙོམས་ཀྱིས་གཉིས་ལ་ཆགས་པ་དང་བྲལ་བའི་དགེ་བའི་རྩ་བ་ལ་དབང་ བསྒྱུར་བར་གནས་པས་ཡོངས་སུ་བསྔོའོ། །རྟེན་ཅིང་འབྲེལ་ཏེ་འབྱུང་བའི་ཆོས་བསྔགས་པའི་ལམ་རབ་ཏུ་དབྱེ་བས་ཆོས་རྣམ་པར་དབྱེ་བ་ལ་ཞུགས་པ་དང༌། ཆོས་ཉིད་ལ་ངེས་པར་གཞོག་ པའི་ཡིད་དང་སེམས་ཀྱིས་ཡོངས་སུ་བསྔོའོ། །དཔའ་བའི་རྒྱལ་མཚན་གྱི་སེམས་ཀྱིས་ཡོངས་སུ་བསྔོའོ། །གཞན་གྱིས་མི་ཐུབ་པའི་རྒྱལ་མཚན་དང་ལྡན་པའི་མཛོད་ཀྱི་སེམས་ཀྱིས་ཡོངས་སུ་ བསྔོའོ། །བདུད་ཀྱི་དཀྱིལ་འཁོར་ཐམས་ཅད་རྣམ་པར་གཏོར་བའི་སེམས་ཀྱིས་ཡོངས་སུ་བསྔོའོ། །རྣམ་པར་དག་པ་དང༌། ཆགས་པ་མེད་པ་ཐམས་ཅད་རབ་ཏུ་འཐོབ་པར་བྱ་བའི་སེམས་ ༄༅། །ཀྱིས་ཡོངས་སུ་བསྔོའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱད་པ་ལས་ཕྱིར་མི་ལྡོག་པར་བྱ་བའི་སེམས་ཀྱིས་ཡོངས་སུ་བསྔོའོ། །ཆོས་དམ་པ་དང་ རབ་དང་ཕུལ་ལ་མངོན་པར་མོས་པའི་སེམས་ཀྱིས་ཡོངས་སུ་བསྔོའོ། །ཡོན་ཏན་གྱི་ཆོས་ཐམས་ཅད་ལ་དབང་བསྒྱུར་བའི་ཡེ་ཤེས་ཀྱིས་ཁྱད་པར་དུ་འཕགས་པའི་ཐམས་ཅད་མཁྱེན་པ་ལ་ མོས་ཤིང་དང་བའི་སེམས་ཀྱིས་ཡོངས་སུ་བསྔོའོ། །བསམ་པ་ཐམས་ཅད་ཡོངས་སུ་རྫོགས་པར་བྱ་བ་དང༌། བདུད་ཀྱི་དཀྲུགས་མ་ཐམས་ཅད་རབ་ཏུ་གཞིག་པ་དང༌། ཆགས་པ་མེད་ཅིང་ དྲི་མ་མེད་པའི་ཆོས་ཀྱི་གོ་འཕང་འཐོབ་པ་དང༌། སངས་རྒྱས་ཀྱི་མདས་འགྲོ་བ་ཐམས་ཅད་ལ་ཆོས་ཀྱི་འཁོར་ལོ་བསྐོར་བ་ལས་ཕྱིར་མི་ལྡོག་པའི་སེམས་ཀྱིས་ཡོངས་སུ་བསྔོའོ། །དེ་བཞིན་ གཤེགས་པའི་ཆོས་ཀྱི་ཡེ་ཤེས་ཀྱི་ཉི་མ་རབ་དང་ཕུལ་ཁྱད་པར་དུ་འཕགས་པའི་འོད་ཟེར་བརྒྱ་སྟོང་གིས་བརྒྱན་པའི་ཆོས་ཀྱི་དབྱིངས་ཀྱི་ཡེ་ཤེས་ཆེན་པོའི་སྣང་བ་འགྲོ་བ་ཐམས་ཅད་དུ་ རབ་ཏུ་དགྱེ་བའི་སེམས་ཀྱིས་ཡོངས་སུ་བསྔོའོ། །འགྲོ་བ་ཐམས་ཅད་ཡོངས་སུ་སྨིན་པར་བྱ་ཞིང་གདུལ་བ་དང༌། བསམ་པ་ཇི་ལྟ་བ་བཞིན་དུ་སེམས་ཀྱི་རྒྱུད་ཤིན་ཏུ་ཚིམ་པར་བྱ་བ་ དང༑ སྔོན་གྱི་སྨོན་ལམ་ཆེན་པོ་ནུབ་པ་མེད་པས་ཕྱི་མའི་མཐའི་མུར་སྤྱོད་པ་ཆེན་པོའི་རྒྱུད་རྒྱུན་མི་འཆད་ཅིང་རྣམ་པར་དག་པ་དང༌། སྣང་བ་དྲི་མ་མེད་པས་རྒྱགས་པ་དང༌། དྲེགས་ པ་དང༑ ང་རྒྱལ་ཤིན་ཏུ་གཅད་པ་དང༌། འགྲོ་བ་ཐམས་ཅད་ཀྱི་ཉོན་མོངས་པ་རྣམ་པར་གཏོར་བ་དང༌། སྲེད་པའི་དྲ་བ་ཡང་དག་པར་གཏུབ་པ་དང༌། མ་རིག་པའི་མུན་པ་ཐིབས་པོ་བསལ་བ་ དང༑ བསྒྲིབས་པ་མེད་ཅིང་དྲི་མ་དང་བྲལ་ལ་ཆགས་པ་མེད་པའི་ཆོས་ཀྱི་ལོ་ཤིན་ཏུ་ལེགས་པ་དང༌། འགྲོ་བ་ཐམས་ཅད་དུ་བསྐལ་པའི་གྲངས་རྣམ་པར་འཆད་པ་མེད་པས་ཐམས་ཅད་མཁྱེན་ པའི་ཡེ་ཤེས་རྣམ་པར་འཚང་རྒྱ་བ་དང༌། སྤྱོད་པའི་རྒྱུད་ལས་ཕྱིར་མི་ལྡོག་པས་སེམས་ཅན་གྱི་ཚོགས་སོ་སོར་ཆགས་པ་མེད་པའི་ཡེ་ཤེས་རབ་དམ་པ་མཆོག་རྣམ་པར་འཚང་རྒྱ་བར་བྱ་བ་ དང༑ སེམས་ཅན་རེ་རེ་ལས་སངས་རྒྱས་ཀྱི་སྐུ་ཤིན་ཏུ་བསྟན་པའི་རྣམ་པར་འཕྲུལ་པ་ལས་ཕྱིར་མི་ལྡོག་པར་བྱ་བའི་ཕྱིར་ཡོངས་སུ་བསྔོའོ། །དེ་ལྟར་བྱང་ཆུབ་སེམས་དཔའི་དགེ་བའི་རྩ་ བ་དེ་དག་ཡོངས་སུ་བསྔོ་ཡང་འདོད་པའི་ཡུལ་དང༌། ཁམས་གསུམ་པ་ལ་གནས་ཤིང་ཡོངས་སུ་མི་བསྔོ་སྟེ། དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔས་ནི་དགེ་བའི་རྩ་བ་རྣམས་ འདོད་མ་ཆགས་པས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་ཞེ་མི་སྡང་བས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་ གཏི་མུག་མེད་པས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་གནོད་པ་མེད་པས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་ ༄༅། །རྣམས་ང་རྒྱལ་མེད་པས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་གཡོ་མེད་པས་ཡོངས་སུ་བསྔོ་བར་བྱའོ། །བྱང་ ཆུབ་སེམས་དཔས་ནི་དགེ་བའི་རྩ་བ་རྣམས་དྲང་པོས་ཡོངས་སུ་བསྔོ་བར་བྱའོ། །བྱང་ཆུབ་སེམས་དཔས་ནི་དགེ་བའི་རྩ་བ་རྣམས་རིག་པས་ཡོངས་སུ་བསྔོ་བར་བྱའོ། །བྱང་ཆུབ་ སེམས་དཔས་ནི་དགེ་བའི་རྩ་བ་རྣམས་མངོན་པར་བརྩོན་པས་ཡོངས་སུ་བསྔོ་བར་བྱ་སྟེ། དེ་དེ་ལྟར་ཡོངས་སུ་བསྔོ་བས་སེམས་རབ་ཏུ་དང་བ་འཐོབ་བོ། །བྱང་ཆུབ་སེམས་དཔའི་ སྤྱོད་པ་ལ་གོ་སྐབས་དབྱེ་བ་འཐོབ་བོ། །བྱང་ཆུབ་སེམས་དཔའི་ལམ་རྣམ་པར་དག་པར་འགྱུར་རོ། །དེ་བཞིན་གཤེགས་པའི་རིགས་སུ་འཇུག་པར་འགྱུར་རོ། །སངས་རྒྱས་ཀྱི་ཡེ་ ཤེས་རབ་ཏུ་འགྲུབ་པར་འགྱུར་རོ། །འཇིག་རྟེན་གྱི་ཉེས་པ་ཐམས་ཅད་རབ་ཏུ་སྤོང་ངོ༌། །བདུད་ཀྱི་ལས་ཐམས་ཅད་རབ་ཏུ་སྤོང་ངོ༌། །དགེ་བའི་བཤེས་གཉེན་ཐམས་ཅད་རབ་ཏུ་ དགའ་བར་བྱེད་དོ། །བདག་གི་སྨོན་ལམ་ཆེན་པོ་ཡོངས་སུ་རྫོགས་པར་བྱེད་དོ། །སེམས་ཅན་ཐམས་ཅད་གཉེར་བ་ཆེན་པོས་ཤིན་ཏུ་འབོད་པ་ཡིན་ནོ། །གཞན་ཡང་བྱང་ཆུབ་ སེམས་དཔའ་སེམས་དཔའ་ཆེན་པོ་ཆོས་སྦྱིན་པས་འབྱུང་བ་ལ་སོགས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་སེམས་ཅན་ཐམས་ཅད་ ཀྱིས་ཆོས་ཀྱི་དབྱིངས་རྣམ་པར་དག་པ་ཐོབ་པར་གྱུར་ཅིག། སེམས་ཅན་ཐམས་ཅད་ཀྱིས་དབྱངས་སྙན་པ་དང༌། ཡེ་ཤེས་ཀྱི་རྔའི་དབྱངས་དང༌། ཐམས་ཅད་དུ་བསམ་གྱིས་ཁྱབ་ཅིང་ འཕགས་པའི་དབྱངས་དང༌། ཡིད་དུ་འོང་བའི་དབྱངས་དང༌། དག་པའི་དབྱངས་དང༌། ཞིང་ཐམས་ཅད་དུ་སྒྲས་རྒྱས་པར་འགེངས་པའི་དབྱངས་དང༌། ཡོན་ཏན་བྱེ་བ་བརྒྱ་སྟོང་བརྗོད་ དུ་མེད་པའི་རྒྱན་གྱིས་བརྒྱན་པའི་དབྱངས་དང༌། སྒྲ་མཐོ་བ་དང༌། སྒྲ་ཆེ་བས་རྣམ་པར་འཁྲུག་པ་ཐམས་ཅད་རབ་ཏུ་ཞི་བར་བྱེད་པའི་དབྱངས་དང༌། ཆོས་ཀྱི་དབྱིངས་ཐམས་ཅད་སྒྲས་རྒྱས་ པར་འགེངས་པའི་དབྱངས་དང༌། འགྲོ་བ་ཐམས་ཅད་ཀྱིས་ངག་མཉན་པའི་དབྱངས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་ཀྱིས་སྒྲ་དང་དབྱངས་མཐའ་ཡས་པའི་ཡེ་ཤེས་ རབ་ཏུ་ཐོབ་བར་གྱུར་ཅིག། སྒྲ་དང་དབྱངས་ཐམས་ཅད་རྣམ་པར་དག་པ་རབ་ཏུ་ཐོབ་པར་གྱུར་ཅིག །དབྱངས་ཚད་མེད་པ་དང༌། ཚིག་གི་ལམ་ཐམས་ཅད་ཤེས་པ་རབ་ཏུ་ཐོབ་པར་ གྱུར་ཅིག །དབྱངས་ལ་དབང་བསྒྱུར་བ་ཟིལ་གྱིས་མི་ནོན་པའི་དབྱངས་ཐམས་ཅད་ལ་རབ་ཏུ་འཇུག་པའི་ཡེ་ཤེས་རབ་ཏུ་ཐོབ་པར་གྱུར་ཅིག། དབྱངས་ཐམས་ཅད་ཀྱིས་བརྒྱན་པའི་ དབྱངས་ཀྱི་ཡན་ལག་རྣམ་པར་དག་པའི་དབྱངས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་འགྲོ་བ་ཐམས་ཅད་ཀྱིས་མཉན་ན་མི་ངོམས་པའི་དབྱངས་རབ་ཏུ་ཐོབ་པར་གྱུར་ ༄༅། །ཅིག། སེམས་ཅན་ཐམས་ཅད་ཀྱིས་འགྲོ་བ་ཀུན་མོས་པར་ཉན་པའི་དབྱངས་ཀྱིས་ཕ་རོལ་ཏུ་ཕྱིན་པ་ཐོབ་པར་གྱུར་ཅིག། སེམས་ཅན་ཐམས་ཅད་དད་ པར་བྱེད་པའི་དབྱངས་དང་ལྡན་པར་གྱུར་ཅིག། སེམས་ཅན་ཐམས་ཅད་སངས་རྒྱས་ཀྱི་དབྱངས་སུ་བརྗོད་པས་སྨྲ་བའི་སེམས་རྣམ་པར་དག་པ་རབ་ཏུ་ཐོབ་པར་གྱུར་ཅིག །སེམས་ ཅན་ཐམས་ཅད་སངས་རྒྱས་ཀྱི་ཆོས་ཐམས་ཅད་རྣམ་པར་སྒྲོག་པའི་སྒྲ་རབ་རིབ་མེད་པའི་དབྱངས་ཀྱིས་སྨྲ་བར་གྱུར་ཅིག །སེམས་ཅན་ཐམས་ཅད་ཆོས་ཐམས་ཅད་ཀྱི་གཟུངས་ཀྱི་ རྒྱན་གྱིས་ཆོས་ཐམས་ཅད་རྣམ་པ་དུ་མར་སྟོན་པ་དང༌། ཆོས་ཀྱི་དབྱིངས་ཚད་མེད་པའི་འཁོར་གྱི་དཀྱིལ་འཁོར་ཐོབ་པ་དང༌། བསམ་གྱིས་མི་ཁྱབ་པའི་ཆོས་རྡོ་རྗེའི་ཚིག་གིས་ ཡང་དག་པར་གཟུང་བ་དང༌། ཆོས་ཉིད་ཐམས་ཅད་བརྗོད་པ་རབ་ཏུ་དབྱེ་བ་ཡེ་ཤེས་དང་ལྡན་པ་དང༌། ཚིག་དང་ཡི་གེ་བརྗོད་དུ་མེད་པའི་མཛོད་དང་ལྡན་པ་དང༌། ཆོས་ རྣམ་པ་ཐ་དད་པ་ཐམས་ཅད་ཤིན་ཏུ་བསྟན་པ་ལ་གཞག་པ་དང༌། གནས་པར་བྱ་བ་དང༌། རྒྱུན་མི་འཆད་པར་བྱ་བ་དང༌། ཆོས་སྣང་བ་ཐམས་ཅད་ཀྱིས་འོད་རབ་ཏུ་ཐོབ་པ་ ལ་འཇུག་པ་དང༌། འགྲོ་བ་ཐམས་ཅད་ཐམས་ཅད་མཁྱེན་པ་ཉིད་ཀྱི་རྣམ་པར་དག་པའི་མཐར་ཐུག་པར་བྱེད་པ་དང༌། ཆོས་ཐམས་ཅད་ཀྱིས་ཡང་དག་པར་བསྡུས་པའི་དོན་ དང༑ ཚིག་དང༌། ཡི་གེ་རྣམ་པར་འཕྲུལ་པའི་དབྱངས་ཀྱི་བྱིན་གྱི་རླབས་དང་ལྡན་པ་དང༌། ཆགས་པ་མེད་པའི་དབྱངས་ལ་དབང་བའི་ཕ་རོལ་ཏུ་ཕྱིན་པ་ཐོབ་པ་དང༌། འགྲོ་བ་ ཐམས་ཅད་ཀྱི་ཤེས་པའི་དབྱངས་དང་ལྡན་པར་གྱུར་ཅིག །དགེ་བའི་རྩ་བ་འདིས་སེམས་ཅན་ཐམས་ཅད་མི་དམའ་བའི་དབྱངས་དང༌། བག་ཚ་བ་མེད་པའི་དབྱངས་དང༌། འདོད་ ཆགས་མེད་པའི་ཚིག་གི་དབྱངས་དང༌། ངག་སྙན་པའི་དབྱངས་དང༌། འཁོར་གྱི་དཀྱིལ་འཁོར་ཐམས་ཅད་མངོན་པར་དགའ་བར་བྱེད་པའི་དབྱངས་དང༌། སངས་རྒྱས་ཀྱི་ཆོས་ ཐམས་ཅད་བརྗོད་པའི་དབྱངས་དང༌། འགྲོ་བ་ཐམས་ཅད་ཀྱི་ཐེ་ཚོམ་གཅོད་ཅིང་ཁོང་དུ་ཆུད་པར་བྱེད་པའི་དབྱངས་དང༌། སྤོབས་པས་ལེགས་པར་སྦྱར་བའི་དབྱངས་དང༌། སེམས་ ཅན་གཉིད་ཀྱིས་ལོག་པ་ཐམས་ཅད་སད་པར་བྱེད་པའི་དབྱངས་དམ་པ་ཡངས་པ་དང་ལྡན་པར་གྱུར་ཅིག། ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་ རྩ་བ་དེ་དག་ཡོངས་སུ་བསྔོའོ།། །།བམ་པོ་བཞི་བཅུ་རྩ་བཞི་པ། གཞན་ཡང་བྱང་ཆུབ་སེམས་དཔའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། སེམས་ ཅན་ཐམས་ཅད་ཀྱི་ལུས་རྣམ་པར་དག་ཅིང་ཁ་ན་མ་ཐོ་བ་མེད་པ་དང༌། སེམས་ཅན་ཐམས་ཅད་ཀྱི་བསོད་ནམས་རྣམ་པར་དག་ཅིང་ཁ་ན་མ་ཐོ་བ་མེད་པ་དང༌། སེམས་ཅན་ཐམས་ ༄༅། །ཅད་ཀྱི་མཚན་རྣམ་པར་དག་ཅིང་ཁ་ན་མ་ཐོ་བ་མེད་པ་དང༌། སེམས་ཅན་ཐམས་ཅད་ཀྱི་ལས་དང་རྣམ་པར་སྨིན་པ་རྣམ་པར་དག་ཅིང་ཁ་ན་མ་ཐོ་བ་མེད་པ་ དང༑ སེམས་ཅན་ཐམས་ཅད་ཀྱི་ཐམས་ཅད་མཁྱེན་པ་ཉིད་རྣམ་པར་དག་ཅིང་ཁ་ན་མ་ཐོ་བ་མེད་པ་དང༌། སེམས་ཅན་ཐམས་ཅད་ཀྱི་བྱང་ཆུབ་ཀྱི་སེམས་ཚད་མེད་པ་རྣམ་པར་དག་ ཅིང་ཁ་ན་མ་ཐོ་བ་མེད་པ་དང༌། སེམས་ཅན་ཐམས་ཅད་ཀྱི་དབང་པོའི་ཚུལ་རབ་ཏུ་ཤེས་པ་རྣམ་པར་དག་ཅིང་ཁ་ན་མ་ཐོ་བ་མེད་པ་དང༌། སེམས་ཅན་ཐམས་ཅད་ཀྱི་མོས་པ་རྣམ་ པར་དག་ཅིང་ཁ་ན་མ་ཐོ་བ་མེད་པ་དང༌། སེམས་ཅན་ཐམས་ཅད་ཀྱི་སྤྱོད་པ་ཆགས་པ་མེད་པ་ལ་བརྩོན་པའི་སྨོན་ལམ་རྣམ་པར་དག་ཅིང་ཁ་ན་མ་ཐོ་བ་མེད་པ་དང༌། སེམས་ ཅན་ཐམས་ཅད་ཀྱི་དྲན་པ་དང༌། བློ་གྲོས་དང༌། རིག་པ་དང༌། བློ་དང༌། ཡེ་ཤེས་དམ་པ་དང༌། སྤོབས་པ་རྣམ་པར་དག་ཅིང་ཁ་ན་མ་ཐོ་བ་མེད་པའི་ཕྱིར། བྱང་ཆུབ་སེམས་དཔའ་ སེམས་དཔའ་ཆེན་པོ་དགེ་བའི་རྩ་བ་དེ་དག་ཡོངས་སུ་བསྔོ་སྟེ། སེམས་ཅན་ཐམས་ཅད་ཀྱི་ལུས་རྣམ་པ་དེ་ལྟར་ཡོངས་སུ་དག་ཅིང་ལུས་ཡོངས་སུ་དག་པ་ཤིན་ཏུ་གསལ་བ་ རྙོག་པ་མེད་པ། རྣམ་པར་དང་བ། རྣམ་པར་དག་པ། རྡུལ་མེད་པ། དྲི་མ་དང་བྲལ་བ་འོད་གསལ་ཞིང་དང་བ་ཡིད་དུ་འོང་བ། བསྒྲིབས་པ་མེད་པ་དེ་ལ་འཇིག་རྟེན་གྱི་ཁམས་ ཐམས་ཅད་གཟུགས་བརྙན་གྱི་ཚུལ་དུ་སྣང་བར་གྱུར་ཅིག། མིག་ཡོར་གྱི་རྣམ་པར་དམིགས་པས་འགྲོ་བ་ཐམས་ཅད་སྣང་བར་གྱུར་ཅིག །མིག་ཡོར་གྱི་གནས་ཀྱི་རྣམ་པ་ཐམས་ཅད་སྣང་ བར་གྱུར་ཅིག །འདི་ལྟ་སྟེ། དཔེར་ན། མེ་ལོང་གི་དཀྱིལ་འཁོར་ཤིན་ཏུ་དག་པ་ལ་ཚིགས་སུ་མི་འགྱུར་བར་གདོང་དུ་དམིགས་པ་རྣམ་པར་སྣང་བ་དེ་ལྟ་བུའི་ལུས་ཡོངས་སུ་དག་པ། སེམས་ཅན་ཐམས་ཅད་ཀྱིས་རབ་ཏུ་ཐོབ་པར་གྱུར་ཅིག །སེམས་ཅན་ཐམས་ཅད་བྱང་ཆུབ་སེམས་དཔའི་སྤྱོད་པ་ཡང་དག་པར་སྟོན་པ་དང༌། ཆོས་ཡང་དག་པར་སྟོན་པ་དང༌། ཡོན་ ཏན་ཡང་དག་པར་སྟོན་པ་དང༌། ནན་ཏན་ཡང་དག་པར་སྟོན་པ་དང༌། འགྲུབ་པ་ཡང་དག་པར་སྟོན་པ་དང༌། བྱང་ཆུབ་སེམས་དཔའི་སྤྱོད་ཡུལ་དང༌། སྨོན་ལམ་ཡང་དག་པར་སྟོན་ པ་དང༌། འཇིག་རྟེན་གྱི་ཁམས་གཞན་ན་བཞུགས་པའི་སངས་རྒྱས་ཐམས་ཅད་ཡང་དག་པར་སྟོན་པ་དང༌། སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་དང༌། ཆོ་འཕྲུལ་ཡང་དག་ པར་སྟོན་པ་དང༌། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་བྱིན་གྱི་རླབས་ཡང་དག་པར་སྟོན་པ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་ཡོངས་སུ་རྫོགས་པས་ཐམས་ཅད་མཁྱེན་པ་ཡང་དག་པར་སྟོན་པར་གྱུར་ཅིག །དེ་ལྟར་ཡོངས་སུ་དག་པའི་ལུས་ཀྱི་རྣམ་པས་སེམས་ཅན་ཐམས་ཅད་མ་ལུས་པར་ཡོངས་ ༄༅། །སུ་བཟུང་སྟེ། ཐམས་ཅད་མཁྱེན་པའི་བསོད་ནམས་ཀྱི་སྐུ་ཡོངས་སུ་དག་པ་དང་ལྡན་པར་གྱུར་ཅིག །གཞན་ཡང་བྱང་ཆུབ་སེམས་དཔའ་སེམས་དཔའ་ ཆེན་པོ་ཆོས་ཀྱི་སྦྱིན་པས་འབྱུང་བ་ལ་སོགས་པའི་དགེ་བའི་རྩ་བ་དེ་དག་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་འཇིག་རྟེན་གྱི་ཁམས་ཐམས་ཅད་དུ་རྗེས་སུ་སོང་བའི་ ལུས་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་པར་གྱུར་ཅིག །འགྲོ་བ་ཐམས་ཅད་ཀྱིས་བལྟ་ན་དོན་ཡོད་ཅིང་བྱང་ཆུབ་ཀྱི་སེམས་ལས་ཕྱིར་མི་ལྡོག་པ་དང༌། སེམས་ཅན་ཐམས་ ཅད་ལ་མཐུན་པར་གྱུར་པས་བསམ་པ་མི་འཁྲུགས་པ་དང༌། བསྐལ་པ་ཐམས་ཅད་དུ་སྐྱོ་བ་མེད་པར་བྱང་བས་འཇིག་རྟེན་གྱི་ཁམས་ཐམས་ཅད་དུ་མ་འོངས་པའི་དུས་ཀྱི་ཕྱི་མའི་ མཐའི་མུར་ཐུག་པར་གནས་པ་དང༌། ཆོས་ཀྱི་དབྱིངས་ཚད་མེད་པར་སྙིང་རྗེ་ཆེན་པོ་རྒྱུན་མི་གཅོད་པས། སེམས་ཅན་ཐམས་ཅད་ལ་དུས་ལ་བབ་པར་ཆོས་སྟོན་པ་མི་གཏོང་ བས་དབང་པོ་ཡང་དག་པ་ཇི་ལྟ་བ་བཞིན་དུ་ཤེས་པ་དང༌། དགེ་བའི་བཤེས་གཉེན་དྲན་པའི་ཁོངས་སུ་གཏོགས་པའི་སེམས་དང་ལྡན་པས་སེམས་བསྐྱེད་པ་གཅིག་དང་ཡང་མི་ འབྲལ་བ་དང༌། སངས་རྒྱས་ཐམས་ཅད་འདོད་ཅིང་ཞལ་བལྟ་བའི་སེམས་ཀྱིས་དེ་བཞིན་གཤེགས་པ་ཡིད་ལ་བྱེད་པ་མི་གཏོང་བ་དང༌། དགེ་བའི་རྩ་བ་བརྩམས་པ་ཐམས་ ཅད་རྗེས་སུ་མེད་པར་མི་བྱེད་ཅིང༌། སེམས་ཅན་ཐམས་ཅད་ཐམས་ཅད་མཁྱེན་པའི་སེམས་ལ་རབ་ཏུ་དགོད་པའི་སེམས་ཀྱི་ཕྱིར་མི་ལྡོག་པའི་འཁོར་ལོ་ཐོབ་པར་བྱ་བའི་ཕྱིར། སངས་ རྒྱས་ཀྱི་ཆོས་སྣང་བ་ཐམས་ཅད་ཀྱིས་ཆོས་ཐམས་ཅད་ལ་ལྟ་ཞིང་སེམས་པ་ཡང་དག་པར་ལེན་པས་ཆོས་ཀྱི་སྤྲིན་ཡང་དག་པར་འཛིན་པའི་བྱིན་གྱི་རླབས་ཀྱིས་བྱང་ཆུབ་སེམས་དཔའི་ སྤྱད་པ་སྤྱོད་པར་གྱུར་ཅིག །སེམས་ཅན་ཐམས་ཅད་འཇུག་པ་དང༌། ཞིང་ཐམས་ཅད་ལ་འཇུག་པ་དང༌། ཆོས་ཐམས་ཅད་ལ་འཇུག་པ་དང༌། འཇིག་རྟེན་དང་དུས་ཐམས་ཅད་ལ་འཇུག་ པ་དང༌། སེམས་ཅན་ཐམས་ཅད་ཀྱི་ལས་དང་རྣམ་པར་སྨིན་པ་ཤེས་པ་ལ་འཇུག་པ་དང༌། བྱང་ཆུབ་སེམས་དཔའ་ཐམས་ཅད་ཀྱི་ཐབས་མཁས་པའི་ཡེ་ཤེས་ལ་འཇུག་པ་དང༌། བྱང་ ཆུབ་སེམས་དཔའ་ཐམས་ཅད་ཀྱི་མངོན་པར་བསྒྲུབ་པའི་ཡེ་ཤེས་ལ་འཇུག་པ་དང༌། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་དག་པའི་སྤྱོད་ཡུལ་གྱི་ཡེ་ཤེས་ལ་འཇུག་པ་དང༌། སངས་རྒྱས་ཐམས་ཅད་ཀྱི་བྱིན་གྱི་རླབས་དང༌། ཁྱུ་མཆོག་གི་མཐུ་ལ་འཇུག་པ་དང༌། ཆོས་ཀྱི་དབྱིངས་མཐའ་དང་དབུས་མེད་པ་ཐམས་ཅད་ལ་འཇུག་པ་རབ་ཏུ་ཐོབ་པ་ལ་གནས་ ཤིང་བྱང་ཆུབ་སེམས་དཔའི་སྤྱོད་པ་སྤྱོད་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཡོངས་སུ་བསྔོའོ། །གཞན་ཡང་བྱང་ཆུབ་ ༄༅། །སེམས་དཔའ་སེམས་དཔའ་ཆེན་པོ་དགེ་བའི་ལས་དང༌། ཆོས་ལ་བརྩོན་པ་དགེ་བའི་རྩ་བ་དེ་དག་ཞིང་ཐམས་ཅད་ཡོངས་སུ་དག་པར་བྱ་བའི་ཕྱིར་ འདི་ལྟར་ཡོངས་སུ་བསྔོ་སྟེ། སངས་རྒྱས་ཀྱི་ཞིང་གཅིག་ཀྱང་རྒྱན་དང་ལྷབ་ལྷུབ་བརྗོད་དུ་མེད་པའི་ཡང་བརྗོད་དུ་མེད་པ་དང་ལྡན་ཞིང་ཆོས་ཀྱི་དབྱིངས་ཚད་མེད་པར་ཤིན་ཏུ་ཡངས་ པར་གྱུར་ཏེ། སངས་རྒྱས་ཀྱི་ཞིང་གཅིག་ཇི་ལྟ་བ་དེ་བཞིན་དུ་སངས་རྒྱས་ཀྱི་ཞིང་སངས་རྒྱས་ཀྱི་ཡེ་ཤེས་ཀྱིས་མངོན་པར་སངས་རྒྱས་པ་ཐམས་ཅད་མ་ལུས་པར་དེ་ལྟར་རྣམ་པར་ དག་ཅིང་འོད་གསལ་བ་དང༌། བཟང་ཞིང་བསྒྲིབས་པ་མེད་པར་གྱུར་ཅིག །སངས་རྒྱས་ཀྱི་ཞིང་གཅིག་ཏུ་དམིགས་པ་རྣམ་པར་དག་པ་རྣམས་ཇི་ལྟར་གཟུགས་བརྙན་གྱི་ཚུལ་ གྱིས་ཡོངས་སུ་སྣང་བ་དེ་བཞིན་དུ་སངས་རྒྱས་ཀྱི་ཞིང་མ་ལུས་པ་ཐམས་ཅད་དུའང་ཡོངས་སུ་སྣང་བར་གྱུར་ཅིག །སངས་རྒྱས་ཀྱི་ཞིང་དེ་དག་ཐམས་ཅད་ཀྱང་གཅིག་བཟུང་བས་ ཡོངས་སུ་བཟུང་སྟེ། ཆོས་ཀྱི་དབྱིངས་ཚད་མེད་པར་རྟོགས་པའི་རྣམ་པར་དག་པས་རྣམ་པར་དག་པར་གྱུར་ཅིག །འདི་ལྟ་སྟེ། རིན་པོ་ཆེའི་རྒྱན་གྲངས་མེད་པ་ཀུན་ནས་གནས་ པར་གྱུར་ཅིག །གོས་རིན་པོ་ཆེ་ཐམས་ཅད་བཏིང་ཞིང༌། རིན་པོ་ཆེ་སྣ་ཚོགས་གྲངས་མེད་པ་ཐམས་ཅད་ཀྱི་རིན་པོ་ཆེ་རྣམ་པར་དག་པའི་གདན་ཀུན་ནས་གནས་པར་གྱུར་ཅིག ། རིན་པོ་ཆེ་ཐམས་ཅད་ཀྱི་དྲིལ་བུའི་དྲ་བ་དང་ལྡན་ཞིང༌། རིན་པོ་ཆེའི་བླ་རེ་གྲངས་མེད་པ་ཀུན་ནས་གནས་པར་གྱུར་ཅིག། རིན་པོ་ཆེ་ཐམས་ཅད་གཅིག་ནས་གཅིག་ཏུ་བརྒྱུད་པས་ཡོངས་སུ་བཟུང་ ཞིང༑ རིན་པོ་ཆེའི་གདུགས་གྲངས་མེད་པ་ཀུན་ནས་གནས་པར་གྱུར་ཅིག །ནོར་གྱི་དབྱིག་ཐམས་ཅད་ཀྱི་ཆར་རབ་ཏུ་འབབ་པའི་རིན་པོ་ཆེའི་སྤྲིན་གྲངས་མེད་པ་ཀུན་ནས་གནས་པར་གྱུར་ ཅིག༑ བལྟ་ན་ཡིད་དུ་འོང་བ་རྣམ་པར་དག་པའི་རིན་པོ་ཆེའི་མེ་ཏོག་གྲངས་མེད་པ་ཀུན་ནས་གནས་པར་གྱུར་ཅིག། རིན་པོ་ཆེ་སྣ་ཚོགས་ཀྱིས་སྐར་ཁུང་ཤིན་ཏུ་བརྒྱན་ཅིང༌། རིན་པོ་ ཆེ་ཐམས་ཅད་ཀྱི་སྟེགས་བུ་གྲངས་མེད་པ་ཀུན་ནས་གནས་པར་གྱུར་ཅིག །སངས་རྒྱས་ཀྱི་དབྱངས་ཡིད་དུ་འོང་བ་སེམས་ཅན་ཐམས་ཅད་ཀྱི་ཁམས་སུ་སྒྲོག་ཅིང༌། རིན་པོ་ཆེའི་དྲིལ་ བུ་གྲངས་མེད་པ་ཀུན་ནས་གནས་མེད་པར་གྱུར་ཅིག །སངས་རྒྱས་ཀྱི་བྱང་ཆུབ་ཀྱི་ཡོན་ཏན་གྱིས་སེམས་རྒྱས་ཤིང་གསལ་བས་རིན་པོ་ཆེའི་པདྨོ་གྲངས་མེད་པ་ཀུན་ནས་གནས་པར་ གྱུར་ཅིག །རིན་པོ་ཆེ་ཐམས་ཅད་ཀྱི་མེ་ཏོག་དང་ལྡན་པའི་རིན་པོ་ཆེའི་ཤིང་གྲངས་མེད་པ་ཀུན་ནས་གནས་པར་གྱུར་ཅིག །བྱང་ཆུབ་སེམས་དཔའ་མང་པོའི་གནས་རིན་པོ་ཆེའི་གཙུག་ ལག་ཁང་གྲངས་མེད་པ་ཀུན་ནས་གནས་པར་གྱུར་ཅིག །སངས་རྒྱས་ཐམས་ཅད་ཀྱི་ཞིང་ཐམས་ཅད་དུ་ཡིད་དུ་འོང་བར་རྒྱུ་བའི་རིན་པོ་ཆེའི་ཁང་པ་བརྩེགས་པ་གྲངས་མེད་པ་ཀུན་ནས་ ༄༅། །གནས་པར་གྱུར་ཅིག། རིན་པོ་ཆེའི་རྒྱན་ཆེན་པོས་སྤྲས་པའི་རིན་པོ་ཆེའི་བ་གམ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་རྣམ་ པར་དག་པས་རྣམ་པར་དག་པའི་རིན་པོ་ཆེའི་རྟ་བབས་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་སེ་མོ་དོ་ལས་རབ་ཏུ་བཀྱེ་བའི་རིན་པོ་ཆེའི་འོད་ཟེར་གྱི་སྒོ་ གྲངས་མེད་པ་རྣམས་ཀུན་ནས་གནས་པར་གྱུར་ཅིག །རིན་པོ་ཆེ་སྣ་ཚོགས་ཀྱིས་བརྒྱན་པའི་ཤིང་ཏ་ལ་རིན་པོ་ཆེའི་ཟླ་གམ་གྲངས་མེད་པས་བརྒྱན་པ་ཀུན་ནས་གནས་པར་གྱུར་ཅིག། བསམ་གྱིས་མི་ཁྱབ་པའི་རིན་པོ་ཆེས་རྣམ་པར་དག་པའི་རིན་པོ་ཆེའི་སྐར་ཁུང་རྣམ་པ་སྣ་ཚོགས་གྲངས་མེད་པ་ཀུན་ནས་གནས་པར་གྱུར་ཅིག། དེ་བཞིན་གཤེགས་པའི་འཕྲིན་ལས་ཀྱི་དགེ་ བའི་རྩ་བ་རབ་ཏུ་གྲུབ་པས་རིན་པོ་ཆེའི་རྒྱན་དང༌། ལྷབ་ལྷུབ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་རྒྱན་དང་ལྡན་པའི་རིན་པོ་ཆེའི་སྙིང་པོ་རབ་ཏུ་བརྒྱན་པ་ གྲངས་མེད་པ་ཀུན་ནས་གནས་པར་གྱུར་ཅིག །ཡིད་དུ་འོང་བའི་རིན་པོ་ཆེས་ཤིན་ཏུ་རྣམ་པར་དག་པའི་རིན་པོ་ཆེའི་རྒྱན་དང་ལྷབ་ལྷུབ་སྣ་ཚོགས་གྲངས་མེད་པ་ཀུན་ནས་གནས་པར་ གྱུར་ཅིག །ཆོས་ཐམས་ཅད་ཀྱི་རྒྱུན་ཤིན་ཏུ་རིག་པར་འབབ་པའི་རིན་པོ་ཆེའི་ཆུ་ཀླུང་གྲངས་མེད་པ་རྣམས་ཀུན་ནས་གནས་པར་གྱུར་ཅིག། ཆོས་རྒྱ་མཚོ་ཐམས་ཅད་དང་ལྡན་པའི་ རིན་པོ་ཆེའི་རྒྱ་མཚོ་གྲངས་མེད་པ་ཀུན་ནས་གནས་པར་གྱུར་ཅིག །ཆོས་ཐམས་ཅད་ཀྱི་མེ་ཏོག་པུཎྜ་རི་ཀ་རྗེས་སུ་སྒྲོགས་པའི་རིན་པོ་ཆེའི་མེ་ཏོག་པུཎྜ་རི་ཀ་གྲངས་མེད་པ་ཀུན་ནས་གནས་པར་ གྱུར་ཅིག། ཡེ་ཤེས་ཀྱི་རི་བོ་ཤིན་ཏུ་འཕགས་ཤིང་རྣམ་པར་དག་པའི་རིན་པོ་ཆེའི་རི་བོ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་སྲད་བུ་བྲེས་པའི་རིན་པོ་ཆེས་ མིག་མངས་རིས་སུ་རྣམ་པར་ཕྱེ་བ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་ཆེན་པོའི་འོད་ཟེར་གྱིས་ཆོས་ཀྱི་དབྱིངས་ཐམས་ཅད་དུ་སྣང་བར་བྱེད་པའི་རིན་པོ་ཆེའི་འོད་ཐོགས་ པ་མེད་པར་གསལ་བ་གྲངས་མེད་པ་ཀུན་ནས་གནས་པར་གྱུར་ཅིག། ཡིད་དུ་འོང་བའི་སྒྲ་སྙན་པར་སྒྲོགས་པའི་རིན་པོ་ཆེའི་དྲིལ་བུ་རབ་ཏུ་དཀྲོལ་བ་གྲངས་མེད་པ་ཀུན་ནས་གནས་པར་གྱུར་ ཅིག༑ བྱང་ཆུབ་ཀྱི་སེམས་རིན་པོ་ཆེ་དང་ལྡན་པས་རིན་པོ་ཆེ་རྣམ་པར་དག་པས་རྣམ་པར་དཔྱང་བ་གྲངས་མེད་པ་ཀུན་ནས་གནས་པར་གྱུར་ཅིག། རིན་པོ་ཆེའི་ཁ་དོག་བསམ་གྱིས་མི་ཁྱབ་ ཅིང་རྣམ་པར་དག་པའི་སྣམ་བུ་རིན་པོ་ཆེ་རབ་ཏུ་དཔྱང་པ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེའི་ཟླ་གམ་གྱི་རྒྱལ་མཚན་གྱིས་རྣམ་པར་མཛེས་པའི་རིན་པོ་ཆེའི་རྒྱལ་ མཚན་བསྒྲེང་བ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་བ་དན་གྱི་སྤྲིན་གྱི་ཆར་མངོན་པར་འབབ་པའི་རིན་པོ་ཆེའི་བ་དན་གྲངས་མེད་པ་ཀུན་ནས་གནས་ ༄༅། །པར་གྱུར་ཅིག །བར་སྣང་གི་རྒྱན་སྣ་ཚོགས་ཀྱི་སྣམ་བུ་རིན་པོ་ཆེའི་ལྡ་ལྡི་མངོན་པར་བྲེས་པ་གྲངས་མེད་པ་ཀུན་ནས་གནས་པར་གྱུར་ཅིག། རིན་པོ་ཆེ་སྣ་ ཚོགས་རེག་ན་བདེ་བའི་རིན་པོ་ཆེའི་གདིང་བ་ཡོངས་སུ་བཏིང་བ་གྲངས་མེད་པ་ཀུན་ནས་གནས་པར་གྱུར་ཅིག །བྱང་ཆུབ་སེམས་དཔའ་ཐམས་ཅད་ཡང་དག་པར་སྟོན་ཅིང༌། ཐམས་ ཅད་མཁྱེན་པའི་སྤྱན་རྣམ་པར་སྦྱོང་བའི་རིན་པོ་ཆེའི་ཀློང་གྲངས་མེད་པ་ཀུན་ནས་གནས་པར་གྱུར་ཅིག །བྱང་ཆུབ་སེམས་དཔའི་ཚོགས་བརྒྱ་སྟོང་ཐམས་ཅད་ཀྱིས་མཛེས་པར་གྱུར་ པའི་རིན་པོ་ཆེའི་སེན་མོ་དོ་རབ་ཏུ་དཔྱང་པ་གྲངས་མེད་པ་ཀུན་ནས་གནས་པར་གྱུར་ཅིག །གནས་པ་དང་མི་གནས་པ་ཐམས་ཅད་ལས་ཤིན་ཏུ་འདས་པས་རིན་པོ་ཆེའི་ཁང་པ་དང༌། གནས་གྲངས་མེད་པ་ཀུན་ནས་གནས་པར་གྱུར་ཅིག། རྡོ་རྗེ་རིན་པོ་ཆེས་མཛེས་པར་གྱུར་ཅིག། རིན་པོ་ཆེའི་རྒྱན་གྱིས་རབ་ཏུ་བརྒྱན་པ་གྲངས་མེད་པ་ཀུན་ནས་གནས་པར་གྱུར་ཅིག། གྲངས་མེད་པར་མཐོང་བ་ཐམས་ཅད་རྣམ་པར་དག་ཅིང་རིན་པོ་ཆེ་སྣ་ཚོགས་ཀྱིས་ཤིན་ཏུ་བརྒྱན་པ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཁྱད་པར་དུ་འཕགས་པ་ ཐམས་ཅད་དང་ལྡན་ཞིང༌། རིན་པོ་ཆེ་རྣམ་པར་དག་པས་རྣམ་པར་དཔྱང་པ་གྲངས་མེད་པ་ཀུན་ནས་གནས་པར་གྱུར་ཅིག །ཆགས་པ་མེད་པའི་ལུས་ཀྱི་ཚུལ་རྣམ་པར་དག་ པས་རིན་པོ་ཆེའི་ཁོར་ཡུག་གིས་ཀུན་ནས་བསྐོར་བ་གྲངས་མེད་པ་ཀུན་ནས་གནས་པར་གྱུར་ཅིག། འཇིག་རྟེན་གྱི་ཁམས་ཐམས་ཅད་དུ་དྲི་ཞིམ་པོ་རྗེས་སུ་སོང་ཞིང༌། རིན་པོ་ཆེའི་ སྤོས་གྲངས་མེད་པ་ཀུན་ནས་གནས་པར་གྱུར་ཅིག། སྤྲུལ་པ་རེ་རེ་ཞིང་ཆོས་ཀྱི་དབྱིངས་ཀྱི་ཚད་དང་མཉམ་པས་རིན་པོ་ཆེའི་འཕྲུལ་བ་ཤིན་ཏུ་སྤྲུལ་པ་གྲངས་མེད་པ་ཀུན་ནས་གནས་ པར་གྱུར་ཅིག །སྣང་བ་རེ་རེ་ལས་སྣང་བ་ཐམས་ཅད་སྟོན་ཅིང༌། རིན་པོ་ཆེའི་སྣང་བ་གྲངས་མེད་པ་ཀུན་ནས་གནས་པར་གྱུར་ཅིག། ཆོས་ཀྱི་ཡེ་ཤེས་ཀྱི་འོད་རྣམ་པར་དག་པའི་ རིན་པོ་ཆེའི་འོད་གྲངས་མེད་པ་ཀུན་ནས་གནས་པར་གྱུར་ཅིག། འོད་ཟེར་རེ་རེས་ཀྱང་ཆོས་ཀྱི་དབྱིངས་ཐམས་ཅད་དུ་ཁྱབ་པར་འགྱུར་བའི་རིན་པོ་ཆེའི་འོད་ཟེར་ཉམས་པ་མེད་ པ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེའི་འབྱུང་གནས་ཐམས་ཅད་དང་ལྡན་པའི་རིན་པོ་ཆེའི་འབྱུང་བ་གྲངས་མེད་པ་ཀུན་ནས་གནས་པར་གྱུར་ཅིག ། ཆོས་རིན་པོ་ཆེའི་དབྱིག་ཐམས་ཅད་སྦྱིན་པའི་རིན་པོ་ཆེའི་མཛོད་གྲངས་མེད་པ་ཀུན་ནས་གནས་པར་གྱུར་ཅིག །དེ་བཞིན་གཤེགས་པའི་རྒྱལ་མཚན་ཤིན་ཏུ་འཕགས་ པའི་རིན་པོ་ཆེའི་དཔལ་གྲངས་མེད་པ་ཀུན་ནས་གནས་པར་གྱུར་ཅིག ། ཡེ་ཤེས་བཟང་པོ་ཆེན་པོ་རྣམ་པར་དག་པའི་རིན་པོ་ཆེ་བཟང་པོ་གྲངས་མེད་པ་ཀུན་ནས་གནས་པར་ ༄༅། །གྱུར་ཅིག །བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་ལ་དགའ་ཞིང་རྩེ་བའི་རིན་པོ་ཆེའི་བཟའ་ཤིང་གི་ར་བ་ཤིན་ཏུ་བརྒྱན་ པ་གྲངས་མེད་པ་ཀུན་ནས་གནས་པར་གྱུར་ཅིག །དེ་བཞིན་གཤེགས་པའི་དབྱངས་ཀྱིས་འགྲོ་བ་ཐམས་ཅད་རྣམ་པར་བསྟན་པའི་རིན་པོ་ཆེའི་དབྱངས་གྲངས་མེད་ པ་ཀུན་ནས་གནས་པར་གྱུར་ཅིག། རིན་པོ་ཆེ་ཐམས་ཅད་ཀྱི་འབྲུ་ལས་ཆོས་ཀྱི་འོད་ཟེར་རབ་ཏུ་འགྱེད་པའི་རིན་པོ་ཆེའི་གཟུགས་གྲངས་མེད་པ་ཀུན་ནས་གནས་པར་ གྱུར་ཅིག །མཚན་ཐམས་ཅད་མཚན་མ་ཡིན་པས་བརྒྱན་པའི་རིན་པོ་ཆེ་འདྲ་བ་མེད་པ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་རིམ་ གྲོ༑ བྱང་ཆུབ་སེམས་དཔའི་དགའ་བ་བསྐྱེད་པའི་རིན་པོ་ཆེའི་རིམ་གྲོ་གྲངས་མེད་པ་ཀུན་ནས་གནས་པར་གྱུར་ཅིག། རིན་པོ་ཆེ་ཐམས་ཅད་ཀྱིས་ལྷུན་ལེགས་ པར་བརྩིགས་པའི་རིན་པོ་ཆེ་ལས་བསྒྲུབས་པ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱིས་ཤིན་ཏུ་བརྟན་པར་བརྒྱན་པའི་རིན་པོ་ ཆེའི་གནས་གྲངས་མེད་པ་རྣམས་ཀུན་ནས་གནས་པར་གྱུར་ཅིག། བྱང་ཆུབ་སེམས་དཔའི་ཏིང་ངེ་འཛིན་གཞལ་དུ་མེད་པའི་གོས་བདེ་བར་བགོ་བ་རབ་ཏུ་ཐོབ་ པའི་རིན་པོ་ཆེའི་གོས་དང་ལྡན་པ་གྲངས་མེད་པ་ཀུན་ནས་གནས་པར་གྱུར་ཅིག །སེམས་བསྐྱེད་མ་ཐག་ཏུ་ཤིན་ཏུ་མཐོང་བའི་གཟུངས་རབ་ཏུ་ཐོབ་ཅིང་ཆོས་གོས་དང་ལྡན་པ་གྲངས་མེད་ པ་ཀུན་ནས་གནས་པར་གྱུར་ཅིག །ལུས་རིན་པོ་ཆེ་ཐམས་ཅད་རྣམ་པར་སྨིན་པ་ངེས་པར་རྟོགས་ཤིང་རྣམ་པར་དག་པའི་རིན་པོ་ཆེས་བསྒོས་པ་གྲངས་མེད་པ་ཀུན་ནས་གནས་པར་གྱུར་ ཅིག༑ མཐོང་མ་ཐག་ཏུ་ཆོས་ཐམས་ཅད་ཀྱི་ཚུལ་ཤེས་པའི་མིག་རྣམ་པར་དག་ཅིང་ཉམས་པ་མེད་པར་བལྟ་བའི་རིན་པོ་ཆེ་གྲངས་མེད་པ་ཀུན་ནས་གནས་པར་གྱུར་ཅིག། ཡེ་ཤེས་ཀྱི་ ཕུང་པོས་གྲུབ་པའི་རིན་པོ་ཆེའི་འོད་ཀྱི་ཕུང་པོ་གྲངས་མེད་པ་ཀུན་ནས་གནས་པར་གྱུར་ཅིག །དེ་བཞིན་གཤེགས་པའི་སེང་གེའི་གཟིམས་ཀྱི་ང་རོས་རྣམ་པར་དག་པའི་རིན་པོ་ཆེའི་ མལ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་ཀྱི་མར་མེ་ཡོངས་སུ་གྲུབ་པའི་རིན་པོ་ཆེའི་མར་མེ་གྲངས་མེད་པ་མང་པོ་ཀུན་ནས་གནས་པར་གྱུར་ཅིག། ཤིང་ཏ་ལ་གཅིག་ དང་གཉིས་ལ་རིན་པོ་ཆེའི་སྲད་བུས་མིག་མངས་རིས་སུ་བྲིས་པ་ཤིན་ཏུ་རྣམ་པར་དག་པའི་རིན་པོ་ཆེའི་ཤིང་ཏ་ལ་གྲངས་མེད་པ་མང་པོ་ཀུན་ནས་གནས་པར་གྱུར་ཅིག། རིན་པོ་ཆེའི་ ཡལ་གས་ཤིན་ཏུ་རྣམ་པར་དག་པའི་རིན་པོ་ཆེའི་སྡོང་པོ་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་སྣ་ཚོགས་ཀྱི་ཡལ་ག་དང་ལྡན་པའི་རིན་པོ་ཆེའི་ཤིང་ལོ་གྲངས་མེད་པ་ ༄༅། །ཀུན་ནས་གནས་པར་གྱུར་ཅིག །བསམ་གྱིས་མི་ཁྱབ་པའི་བྱ་མང་པོ་ཆོས་ཀྱི་རྒྱུན་སྒྲོག་པས་བརྒྱན་པའི་རིན་པོ་ཆེའི་ནགས་ཚལ་གྲངས་མེད་པ་ཀུན་ནས་གནས་ བར་གྱུར་ཅིག །ཡེ་ཤེས་ཀྱི་སྣང་བ་ཀུན་ཏུ་གཏོང་བའི་རིན་པོ་ཆེའི་ལོ་མ་དང་ལྡན་པ་གྲངས་མེད་པ་ཀུན་ནས་གནས་པར་གྱུར་ཅིག། བྱང་ཆུབ་སེམས་དཔའ་བསམ་གྱིས་མི་ཁྱབ་པ་མེ་ཏོག་ གཅིག་ལ་གནས་ཤིང༌། ཆོས་ཀྱི་དབྱིངས་ཐམས་ཅད་དུ་རྒྱུ་བའི་རིན་པོ་ཆེའི་མེ་ཏོག་དང་ལྡན་པ་གྲངས་མེད་པ་ཀུན་ནས་གནས་པར་གྱུར་ཅིག། ཐམས་ཅད་མཁྱེན་པའི་ཡེ་ཤེས་ཆེན་པོ་ ལས་ཕྱིར་མི་ལྡོག་པའི་འབྲས་བུ་རབ་ཏུ་ཐོབ་པའི་རིན་པོ་ཆེའི་འབྲས་བུ་དང་ལྡན་པ་གྲངས་མེད་པ་ཀུན་ནས་གནས་པར་གྱུར་ཅིག །གྲོང་གི་ཆོས་ཐམས་ཅད་ཡོངས་སུ་སྤངས་པར་གནས་ པའི་རིན་པོ་ཆེའི་གྲོང་གྲངས་མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱིས་ཡོག་པའི་སེམས་ཅན་གྱིས་གང་ཞིང་རིན་པོ་ཆེའི་འབྱུང་གནས་གྲངས་མེད་པ་ཀུན་ ནས་གནས་པར་གྱུར་ཅིག །མཐུ་བོ་ཆེ་དཔའ་བོ་ཆོས་ཀྱི་གོ་ཆ་བརྟན་པ་བགོས་པས་བྱང་ཆུབ་སེམས་དཔའི་སེམས་ཕྱིར་མི་ལྡོག་པ་དང་ལྡན་པའི་རྒྱལ་པོའི་གནས་རིན་པོ་ཆེ་གྲངས་ མེད་པ་ཀུན་ནས་གནས་པར་གྱུར་ཅིག །སེམས་ཀྱི་གནས་ཐམས་ཅད་ལས་རྣམ་པར་འདས་པས་རབ་ཏུ་གང་བའི་རིན་པོ་ཆེའི་གནས་གྲངས་མེད་པ་ཀུན་ནས་གནས་པར་གྱུར་ ཅིག་༑ཡོངས་སུ་ཤེས་པའི་གོས་ཐམས་ཅད་རབ་ཏུ་བགོ་བའི་གོས་རིན་པོ་ཆེ་གྲངས་མེད་པ་ཀུན་ནས་གནས་པར་གྱུར་ཅིག །ཁྱིམ་མེད་པར་རབ་ཏུ་བྱུང་བའི་བྱང་ཆུབ་སེམས་དཔས་ ཡོངས་སུ་གང་ཞིང་རིན་པོ་ཆེའི་འབྱུང་གནས་ཀྱི་གནས་གྲངས་མེད་པ་ཀུན་ནས་གནས་པར་གྱུར་ཅིག། བལྟ་ན་ཡིད་དུ་འོང་བ་རིན་པོ་ཆེ་དང་ལྡན་པའི་མཐུན་པའི་རིན་པོ་ཆེ་གྲངས་མེད་པ་ ཀུན་ནས་གནས་པར་གྱུར་ཅིག །བསམ་གྱིས་མི་ཁྱབ་པའི་ཡེ་ཤེས་ཀྱི་འོད་འཕྲོ་བ་རབ་ཏུ་གཏོང་བའི་ཆོས་ཀྱི་འཁོར་ལོ་ཤིན་ཏུ་སྤྲུལ་པ་རབ་ཏུ་བསྐོར་བའི་རིན་པོ་ཆེའི་འཁོར་ལོ་གྲངས་ མེད་པ་ཀུན་ནས་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་ཤིང་རྣམ་པར་དག་པ་མིག་འཕྲུལ་གྱི་རྣམ་པ་ཤིན་ཏུ་དག་པའི་རིན་པོ་ཆེའི་ཤིང་གྲངས་མེད་པ་ཀུན་ནས་གནས་པར་ གྱུར་ཅིག །བལྟ་ན་བསམ་གྱིས་མི་ཁྱབ་པའི་རིན་པོ་ཆེ་ཤིན་ཏུ་རྣམ་པར་བཀྲམ་པའི་རིན་པོ་ཆེའི་ས་རྣམ་པར་དག་པ་གྲངས་མེད་པ་ཀུན་ནས་གནས་པར་གྱུར་ཅིག །ཡིད་དུ་འོང་བའི་ དབྱངས་ཆོས་ཀྱི་དབྱིངས་ཐམས་ཅད་དུ་སྒྲོག་པའི་རིན་པོ་ཆེའི་རོལ་མོ་བརྡུང་བ་གྲངས་མེད་པ་ཀུན་ནས་གནས་པར་གྱུར་ཅིག། ཕྱི་མའི་མཐའི་བསྐལ་པའི་མུར་བྱིན་གྱི་རླབས་རྒྱུན་མི་ འཆད་པའི་རིན་པོ་ཆེའི་རོལ་མོ་དཀྲོལ་བ་གྲངས་མེད་པ་ཀུན་ནས་གནས་པར་གྱུར་ཅིག །ཆོས་རིན་པོ་ཆེ་རྣམས་ཡོངས་སུ་འཛིན་པའི་སེམས་ཅན་རིན་པོ་ཆེ་གྲངས་མེད་པ་ཀུན་ནས་གནས་ ༄༅། །པར་གྱུར་ཅིག །བསོད་ནམས་རིན་པོ་ཆེ་དང་ལྡན་པའི་ལུས་རིན་པོ་ཆེ་རྣམ་པར་དག་པ་གྲངས་མེད་པ་ཀུན་ནས་གནས་པར་གྱུར་ཅིག །ཆོས་རིན་པོ་ཆེ་རབ་ཏུ་བརྗོད་ པའི་རྣམ་པར་དག་པའི་ངག་རིན་པོ་ཆེ་གྲངས་མེད་པ་ཀུན་ནས་གནས་པར་གྱུར་ཅིག །ཐམས་ཅད་མཁྱེན་པར་སྨོན་པའི་བསམ་པ་རིན་པོ་ཆེ་རབ་ཏུ་ཐོབ་པའི་སེམས་ཡོངས་སུ་བྱང་བ་རིན་པོ་ ཆེ་གྲངས་མེད་པ་ཀུན་ནས་གནས་པར་གྱུར་ཅིག །ཐམས་ཅད་མཁྱེན་པའི་ཡེ་ཤེས་རིན་པོ་ཆེའི་སྟོབས་རྨོངས་པ་མེད་པ་ལ་རྟེན་པའི་དྲན་པ་རིན་པོ་ཆེ་ཡོངས་སུ་དག་པ་གྲངས་མེད་པ་ ཀུན་ནས་གནས་པར་གྱུར་ཅིག །སངས་རྒྱས་ཐམས་ཅད་ཀྱི་ཆོས་རིན་པོ་ཆེ་བཟུང་བ་དང༌། ཡང་དག་པར་བཅང་བའི་བྱིན་གྱི་རླབས་ཡོད་པའི་རིག་པ་རིན་པོ་ཆེ་རྣམ་པར་དག་པ་གྲངས་མེད་ པ་ཀུན་ནས་གནས་པར་གྱུར་ཅིག །སངས་རྒྱས་ཐམས་ཅད་ཀྱི་ཆོས་ཀྱི་མཛོད་ངེས་པར་རྟོགས་པའི་བྱང་ཆུབ་སེམས་དཔའི་བློ་གྲོས་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་ གནས་པར་གྱུར་ཅིག །ཐམས་ཅད་མཁྱེན་པའི་རིན་པོ་ཆེ་ཤིན་ཏུ་ཡངས་པས་རྒྱས་པར་འགེངས་པའི་བློ་རིན་པོ་ཆེ་ཚད་མེད་པ་གྲངས་མེད་པ་ཀུན་ནས་གནས་པར་གྱུར་ཅིག ། སྟོབས་བཅུ་རིན་པོ་ཆེ་ཐམས་ཅད་ཉམས་པ་མེད་པའི་མིག་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །ཆོས་ཀྱི་དབྱིངས་མཐའ་དང་དབུས་མེད་པ་ ཐམས་ཅད་དུ་མཉན་པ་རྣམ་པར་དག་པའི་རྣ་བ་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །མཐུན་པའི་དྲི་རིན་པོ་ཆེ་རྣམ་པར་དག་པའི་སྣ་རིན་པོ་ཆེ་ཡོངས་སུ་ དག་པ་གྲངས་མེད་པ་ཀུན་ནས་གནས་པར་གྱུར་ཅིག །མཐའ་དང་དབུས་མེད་པའི་ཚིག་གི་ཚུལ་ཐམས་ཅད་རྣམ་པར་སྟོན་པའི་ལྕེ་ཡངས་པ་རིན་པོ་ཆེ་གྲངས་མེད་པ་ཀུན་ནས་གནས་པར་ གྱུར་ཅིག། འཇིག་རྟེན་གྱི་ཁམས་ཐམས་ཅད་དུ་ཐོགས་པ་མེད་པར་འགྲོ་བའི་ལུས་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །ཀུན་ཏུ་བཟང་པོའི་སྤྱོད་པ་ དང༌། སྨོན་ལམ་ལ་བརྩོན་པའི་ཡིད་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །དབྱངས་རིན་པོ་ཆེ་རྣམ་པར་དག་པས་འཇིག་རྟེན་གྱི་ཁམས་ཐམས་ཅད་ དུ་རྒྱས་པར་འགེངས་པའི་དབྱངས་རིན་པོ་ཆེ་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག །ཡེ་ཤེས་རིན་པོ་ཆེ་སྔོན་དུ་འགྲོ་བའི་ལུས་ཀྱི་ལས་རིན་པོ་ཆེ་གྲངས་མེད་པ་ཀུན་ ནས་གནས་པར་གྱུར་ཅིག། ཡེ་ཤེས་རིན་པོ་ཆེ་བསྒྲིབས་པ་མེད་པ་ལ་བརྩོན་པས་ངག་གི་ལས་རིན་པོ་ཆེ་ཡང་དག་པར་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག ། ཆགས་པ་མེད་པའི་ཡེ་ཤེས་རིན་པོ་ཆེའི་མཐར་ཐུག་པའི་ཡིད་ཀྱི་ལས་རིན་པོ་ཆེ་ཡངས་ཤིང་ཡོངས་སུ་དག་པ་གྲངས་མེད་པ་ཀུན་ནས་གནས་པར་གྱུར་ཅིག། སངས་རྒྱས་ཀྱི་ཞིང་དེ་དག་ ༄༅། །ཐམས་ཅད་ལ་སངས་རྒྱས་ཀྱི་ཞིང་གཅིག་དང༌། ཡུལ་གཅིག་དང༌། ཕྱོགས་གཅིག་དང༌། སྐྲའི་མཆོག་མའི་རྩེ་མོ་རེ་རེ་ཞིང་ཡང་དེ་ལྟར་སྐྱེ་མཆེད་ཀྱི་ཡེ་ ཤེས་རྣམ་པར་དག་པའི་བྱང་ཆུབ་སེམས་དཔའ་ཚད་མེད་པ་ནས། བྱང་ཆུབ་སེམས་དཔའ་བརྗོད་དུ་མེད་པའི་ཡང་བརྗོད་དུ་མེད་པ་གྲངས་དང༌། བགྲང་བ་ལས་འདས་པས་ཀུན་ཏུ་གང་ བར་གྱུར་ཅིག །ཕྱོགས་གཅིག་ཏུ་ཇི་ལྟ་བ་བཞིན་དུ་ཆོས་ཀྱི་དབྱིངས་ཀྱི་མཐས་གཏུགས་པ། ནམ་མཁའི་དབྱིངས་ཀྱི་ཁོངས་སུ་གཏོགས་པའི་སངས་རྒྱས་ཀྱི་ཞིང་མ་ལུས་པ་ཐམས་ཅད་ ཀྱང་ཡོངས་སུ་གང་བར་གྱུར་ཅིག །དེ་ལྟར་བྱང་ཆུབ་སེམས་དཔའ་དགེ་བའི་རྩ་བ་དེ་དག་རིན་པོ་ཆེའི་དམིགས་པས། སངས་རྒྱས་ཀྱི་ཞིང་ཡོངས་སུ་དག་པའི་ཕྱིར་ཡོངས་སུ་བསྔོའོ། ། སངས་རྒྱས་ཀྱི་ཞིང་དེ་དག་ཐམས་ཅད་ཀྱང་སངས་རྒྱས་ཀྱི་ཞིང་གཅིག་བཟུང་བས་བསྡུས་ཏེ། སྤོས་རྣམ་པ་སྣ་ཚོགས་ཐམས་ཅད་ཀྱི་སྤོས་ཀྱི་རྒྱན་ཚད་མེད་པ་ཀུན་ནས་གནས་པར་གྱུར་ ཅིག །གཞུང་དེ་ལྟར་རིན་པོ་ཆེ་ཇི་ལྟ་བ་དེ་བཞིན་དུ་སྤོས་སུ་བསྔོ་བ་ཡང་ཁོང་དུ་ཆུད་པར་བྱས་ཏེ། ཡེ་ཤེས་ཀྱི་སྤོས་ཆགས་པ་མེད་པའི་མཐར་ཐུག་པའི་སྤོས་ཀྱི་ཡིད་ཀྱི་ལས་རྒྱ་ཆེན་ པོ་ཡོངས་སུ་དག་པ། ཚད་མེད་པའི་བར་དུ་ཀུན་ནས་གནས་པར་གྱུར་ཅིག །དེ་བཞིན་དུ་མེ་ཏོག་སྣ་ཚོགས་ཐམས་ཅད་ཀྱི་མེ་ཏོག་གི་རྒྱན་བསམ་གྱིས་མི་ཁྱབ་པ་ཀུན་ནས་གནས་པར་གྱུར་ ཅིག །ཅེས་བྱ་བ་ནས་ཡེ་ཤེས་ཀྱི་མེ་ཏོག་ཆགས་པ་མེད་པའི་མཐར་ཐུག་པའི་ཡིད་ཀྱི་ལས་མེ་ཏོག་རྒྱ་ཆེ་ཞིང་ཡོངས་སུ་དག་པ་བསམ་གྱིས་མི་ཁྱབ་པ་ཀུན་ནས་གནས་པར་གྱུར་ཅིག །ཕྲེང་བ་ དང༌། བྱུག་པ་སྣ་ཚོགས་ཐམས་ཅད་ཀྱི་ཕྲེང་བ་དང༌། བྱུག་པའི་རྒྱན་མཚུངས་པ་མེད་པ་ཀུན་ནས་གནས་པར་གྱུར་ཅིག །ཅེས་བྱ་བ་ནས་ཡེ་ཤེས་ཀྱི་ཕྲེང་བ་དང༌། བྱུག་པ་ཆགས་པ་མེད་པའི་མཐའ་ ཐུག་པའི་ཡིད་ཀྱི་ལས་ཀྱི་ཕྲེང་བ་དང༌། བྱུག་པའི་རྒྱན་རྣམ་པར་དག་པ་མཚུངས་པ་མེད་པའི་བར་དུ་ཀུན་ནས་གནས་པར་གྱུར་ཅིག །ཕྱེ་མ་དང༌། བདུག་པ་སྣ་ཚོགས་ཐམས་ཅད་ཀྱི་ཕྱེ་མ་དང་ བདུག་པའི་རྒྱན་ས་མཚམས་མེད་པ་ཀུན་ནས་གནས་པར་གྱུར་ཅིག །ཅེས་བྱ་བ་ནས་ཡེ་ཤེས་ཀྱི་ཕྱེ་མ་དང༌། བདུག་པ་ཆགས་པ་མེད་པའི་མཐར་ཐུག་པའི་ཡིད་ཀྱི་ལས་ཀྱི་ཕྱེ་མ་དང༌། བདུག་ པ་ཡོངས་སུ་དག་པ་ས་མཚམས་མེད་པའི་བར་དུ་ཀུན་ནས་གནས་པར་གྱུར་ཅིག །གོས་དང༌། ཆོས་གོས་སྣ་ཚོགས་ཐམས་ཅད་ཀྱི་གོས་དང༌། ཆོས་གོས་ཀྱི་རྒྱན་མུ་མེད་པ་ཀུན་ནས་གནས་ པར་གྱུར་ཅིག །ཅེས་བྱ་བ་ནས་ཡེ་ཤེས་ཀྱི་གོས་དང༌། ཆོས་གོས་ཀྱི་རྒྱན་ཆགས་པ་མེད་པའི་མཐར་ཐུག་པའི་ཡིད་ཀྱི་ལས་ཁྲེལ་ཡོད་པ་དང༌། ངོ་ཚ་ཤེས་པའི་གོས་དང༌། ཆོས་གོས་ཡོངས་སུ་ དག་པ་མུ་མེད་པའི་བར་དུ་ཀུན་ནས་གནས་པར་གྱུར་ཅིག །ཞིང་ཐམས་ཅད་དུ་གདུགས་སྣ་ཚོགས་ཡང་དག་པར་བཙུགས་པའི་གདུགས་ཀྱི་རྒྱན་ས་མཚམས་མེད་པ་ཀུན་ནས་གནས་པར་ ༄༅། །གྱུར་ཅིག །ཅེས་བྱ་བ་ནས་ཡེ་ཤེས་ཀྱི་གདུགས་ཀྱི་རྒྱན་ཆགས་པ་མེད་པའི་མཐར་ཐུག་པའི་ཡིད་ཀྱི་ལས་ཡེ་ཤེས་ཀྱིས་ཡང་དག་པར་ཁྱབ་པ་ཡོངས་སུ་དག་པ་ ས་མཚམས་མེད་པའི་བར་དུ་ཀུན་ནས་གནས་པར་གྱུར་ཅིག །རྒྱལ་མཚན་དང༌། བ་དན་སྣ་ཚོགས་ཐམས་ཅད་ཀྱི་རྒྱལ་མཚན་དང༌། བ་དན་གྱི་རྒྱན་ཚད་མེད་པ་ཀུན་ནས་གནས་པར་གྱུར་ ཅིག །ཅེས་བྱ་བ་ནས་ཡེ་ཤེས་ཀྱི་རྒྱལ་མཚན་དང༌། བ་དན་ཆགས་པ་མེད་པའི་མཐར་ཐུག་པའི་ཡིད་ཀྱི་ལས་ཀྱི་ཡེ་ཤེས་ཀྱི་རྒྱལ་མཚན་དང༌། བ་དན་གྱི་རྒྱན་ཡོངས་སུ་དག་པ་ཚད་མེད་ པའི་བར་དུ་ཀུན་ནས་གནས་པར་གྱུར་ཅིག །ལྷབ་ལྷུབ་སྣ་ཚོགས་ཐམས་ཅད་ཀྱི་ལྷབ་ལྷུབ་ཀྱི་རྒྱན་བརྗོད་དུ་མེད་པའི་ཡང་བརྗོད་དུ་མེད་པ་ཀུན་ནས་གནས་པར་གྱུར་ཅིག །ཅེས་བྱ་བ་ནས་ ཡེ་ཤེས་ཀྱི་ལྷབ་ལྷུབ་ཀྱི་རྒྱན་གྱི་མཐར་ཐུག་པའི་ཡིད་ཀྱི་ལས་ཀྱི་ཡེ་ཤེས་ཀྱི་ལྷབ་ལྷུབ་ཀྱི་རྒྱན་གྱིས་བརྒྱན་པ་རྣམ་པར་དག་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཀུན་ནས་ གནས་པར་གྱུར་ཅིག །དེ་ལྟར་ཚུལ་དེ་བཞིན་དུ་ཐམས་ཅད་དུ་ཡང་ཤེས་པར་བྱ་སྟེ། སངས་རྒྱས་ཀྱི་ཞིང་དེ་དག་ལས་སངས་རྒྱས་ཀྱི་ཞིང་གཅིག་བཟུང་བས་བསྡུས་ཏེ། ནོར་བུ་རིན་པོ་ ཆེ་སྣ་ཚོགས་ཐམས་ཅད་ཀྱི་ནོར་བུ་རིན་པོ་ཆེའི་རྒྱན་བརྗོད་དུ་མེད་པའི་ཡང་བརྗོད་དུ་མེད་པ་ཀུན་ནས་གནས་པར་གྱུར་ཅིག། ཅེས་བྱ་བ་ནས་ནོར་བུ་རིན་པོ་ཆེ་ཐམས་ཅད་ཀྱི་ཤིང་ཀུན་ཏུ་ བྲེས་པའི་ནོར་བུ་རིན་པོ་ཆེའི་གདན་རྣམ་པར་དག་པ་བརྗོད་དུ་མེད་པའི་ཡང་བརྗོད་དུ་མེད་པ་ཀུན་ནས་གནས་པར་གྱུར་ཅིག །དེ་ལྟར་ཚུལ་དེ་བཞིན་དུ་ཀུན་ཏུ་བྱས་ཏེ་དམིགས་པ་རེ་རེ་ཞིང་ལན་ བརྒྱར་བཟླས་པར་བྱའོ། །ཡེ་ཤེས་ཀྱི་ནོར་བུ་རིན་པོ་ཆེ་ཆགས་པ་མེད་པའི་མཐར་ཐུག་པའི་ཡིད་ཀྱི་ལས་ཀྱི་ཡེ་ཤེས་ཀྱི་ནོར་བུ་རིན་པོ་ཆེ་རྣམ་པར་དག་པ་བརྗོད་དུ་མེད་པའི་ཡང་བརྗོད་དུ་མེད་ པའི་བར་དུ་གནས་པར་གྱུར་ཅིག །ཅེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་སྦྱིན་པ་ལ་སོགས་པའི་དགེ་བའི་རྩ་བ་དེ་དག་དགེ་བའི་རྩ་བ་ཐམས་ཅད་ཀྱིས་བསྒྲུབས་པའི་ སངས་རྒྱས་ཀྱི་ཞིང་ཡོངས་སུ་དག་པར་ཡོངས་སུ་བསྔོའོ། །སེམས་ཅན་ཐམས་ཅད་ཡོངས་སུ་དག་པ་མཉམ་པ་ཉིད་ཀྱི་ཕྱིར་ཡོངས་སུ་བསྔོའོ། །སེམས་ཅན་ཐམས་ཅད་མཉམ་པ་ཉིད་ མི་འཁྲུགས་པ་ཡོངས་སུ་དག་པ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར་སངས་རྒྱས་ཀྱི་ཆོས་ཟབ་མོ་ལ་འཇུག་པ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། བསོད་ནམས་ཀྱི་སྟོབས་ཐུབ་པ་མེད་པ་རྣམ་པར་དག་པ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། བསོད་ནམས་ཀྱི་མཚན་ཉིད་རྣམ་པར་དག་པ་ཟིལ་གྱིས་མ་ནོན་པ་ བསྟན་པ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། མི་ཟད་པའི་ཡེ་ཤེས་ཀྱི་སྟོབས་ཀྱིས་སེམས་ཅན་ཐམས་ཅད་སངས་རྒྱས་ཀྱི་ཆོས་ལ་གཟུད་པ་དང༌། སེམས་ཅན་ཐམས་ ༄༅། །ཅད་མཉམ་པ་ཉིད་ཀྱི་ཕྱིར། ཚིག་གི་རྣམ་པ་གྲངས་མེད་པ་ཤིན་ཏུ་དག་པའི་དབྱངས་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། ཐོགས་པ་ མེད་པའི་མིག་གིས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཤེས་པར་བྱ་བ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། སྔོན་གྱི་མཐའི་ མུར་ཐུག་པའི་བསྐལ་པའི་འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་རྗེས་སུ་དྲན་པ་རྣམ་པར་དག་པ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། བསྒྲིབས་ པ་མེད་པའི་བློ་གྲོས་ཆེན་པོས་ཆོས་ངེས་པར་རྟོགས་པའི་མཛོད་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། བྱང་ཆུབ་མཐའ་དང་དབུས་མེད་པས་ཆོས་ཀྱི་ དབྱིངས་རྒྱས་པར་དགང་བ་ལ་ཆགས་པ་མེད་པར་ཡང་དག་པར་གཞོལ་བ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། དགེ་བའི་རྩ་བ་ཐམས་ཅད་རྒྱུད་ཀྱི་ཚུལ་གཅིག་ ཏུ་གྱུར་པས་རྣམ་པར་དབྱེ་བ་མེད་པ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། རྒྱུད་ཀྱི་ཚུལ་གཅིག་ཏུ་གྱུར་པའི་ལུས་ཀྱི་ལས་དང༌། ངག་གི་ལས་དང༌། ཡིད་ཀྱི་ ལས་ཡོན་ཏན་ཐམས་ཅད་ཀྱི་རྒྱན་དང་ལྡན་པ་རྣམ་པར་དག་པ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། ཀུན་ཏུ་བཟང་པོའི་སྤྱོད་པ་རྒྱུད་ཀྱི་ཚུལ་གཅིག་ཏུ་ གྱུར་པས་འབྱུང་བ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། སངས་རྒྱས་ཀྱི་ཞིང་ཐམས་ཅད་རྒྱུད་ཀྱི་ཚུལ་གཅིག་ཅིང་རྣམ་པར་དག་པ་ལ་འཇུག་པ་དང༌། གོམས་པར་བྱ་བ་ དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། ཤེས་པ་ཐམས་ཅད་རྣམ་པར་དཔྱད་པ་ལ་འཇུག་པ་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ ཕྱིར། མི་མཉམ་པ་མེད་པར་དགེ་བའི་རྩ་བ་ཐམས་ཅད་ཡོངས་སུ་བསྔོ་བ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། ལྷག་པའི་བསམ་པ་གཅིག་ནས་གཅིག་ཏུ་བརྒྱུད་པ་རྣམ་ པ་ཐ་དད་པས་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱ་བ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། དཀར་པོའི་ཕྱོགས་ཐམས་ཅད་བསྒྲུབ་ཅིང་བརྟན་ པར་བྱ་བ་དང༌། སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར། སྐད་ཅིག་གཅིག་གིས་ཐམས་ཅད་མཁྱེན་པ་ཉིད་དུ་མངོན་པར་འཚང་རྒྱ་བའི་མཐར་ཐུག་པར་བྱ་བ་དང༌། སེམས་ ཅན་ཐམས་ཅད་མཉམ་པ་ཉིད་ཀྱི་ཕྱིར། ནན་ཏན་གྱི་རྣམ་པ་ཐམས་ཅད་ཡོངས་སུ་རྫོགས་པ་རྣམ་པར་དག་པ་ཡོངས་སུ་བསྒྲུབ་པའི་ཕྱིར་ཡོངས་སུ་བསྔོ་སྟེ། དེ་ལྟར་བྱང་ཆུབ་སེམས་ དཔའ་སེམས་དཔའ་ཆེན་པོས་དགེ་བའི་རྩ་བ་དེ་དག་སེམས་ཅན་ཐམས་ཅད་མཉམ་པ་ཉིད་ཀྱི་ཕྱིར་ཡོངས་སུ་བསྔོས་ནས། ཆོས་ཐམས་ཅད་ཡོངས་སུ་དག་པར་ཆོས་བསྟན་པའི་ ༄༅། །ཚུལ་གྱིས་ཆོས་ཉིད་ཀྱི་སྟོབས་མཉམ་པ་ཉིད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་སྟེ། དགེ་བའི་རྩ་བ་འདིས་ཆོས་རྒྱ་མཚོ་བརྗོད་དུ་མེད་ པའི་ཡང་བརྗོད་དུ་མེད་པ་ཐོབ་པ་རྣམ་པར་དག་པའི་སྤྱོད་པའི་བྱིན་གྱི་རླབས་དང་ལྡན་པར་གྱུར་ཅིག །ཅེས་ཡོངས་སུ་བསྔོའོ། །ཆོས་རྒྱ་མཚོ་དེ་དག་ལས་ཆོས་རྒྱ་མཚོ་རེ་རེ་ ཞིང་ཡང་ཆོས་ཀྱི་དབྱིངས་ཚད་མེད་པའི་ཡེ་ཤེས་ཀྱི་སྣང་བ་རྣམ་པར་དག་པར་བྱ་བའི་ཕྱིར་ཡོངས་སུ་བསྔོའོ། །ཚིག་ཐམས་ཅད་རབ་ཏུ་དབྱེ་བས་ཤིན་ཏུ་བསྟན་པ་མངོན་པར་ བསྒྲུབ་པ་ཡང་དག་པར་བསྟན་པའི་ཕྱིར་ཡོངས་སུ་བསྔོའོ། །ཆོས་འབྱམས་ཀླས་པ་མཐའ་དབུས་མེད་པ་ཐམས་ཅད་དང༌། ཆོས་ཀྱི་སྣང་བ་ཐམས་ཅད་ཀྱི་ཏིང་ངེ་འཛིན་རབ་ཏུ་ ཐོབ་པར་བྱ་བའི་ཕྱིར་ཡོངས་སུ་བསྔོའོ། །དུས་གསུམ་དང་མི་འགལ་བའི་སངས་རྒྱས་ཐམས་ཅད་ཀྱི་སྤོབས་པ་ཐོབ་པར་བྱ་བའི་ཕྱིར་ཡོངས་སུ་བསྔོའོ། །དགེ་བའི་རྩ་བ་དེ་འདས་ པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པའི་ལུས་ཐོབ་པར་བྱ་བའི་ཕྱིར་ཡོངས་སུ་བསྔོའོ། །དགེ་བའི་རྩ་བ་དེ་སངས་རྒྱས་ལ་ དགའ་བ་དང༌། ཆོས་ལ་དགའ་བ་དང༌། སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར། སྙིང་རྗེ་ཆེན་པོ་ལ་དགའ་བ་ལས་ཕྱིར་མི་ལྡོག་པ་ཡོངས་སུ་རྫོགས་པར་བྱ་བའི་ཕྱིར་ ཡོངས་སུ་བསྔོའོ། །དགེ་བའི་རྩ་བ་དེ་ལས་ཀྱི་རྣམ་པ་བསམ་གྱིས་མི་ཁྱབ་པ་ལ་བསྒྲིབས་པ་མེད་པའི་ཡེ་ཤེས་ཀྱིས་ཡང་དག་པར་གཞོལ་བར་བྱ་བ་དང༌། འཁོར་གྱི་དཀྱིལ་འཁོར་རྣམ་ པར་དག་པ་ཐམས་ཅད་ཀྱི་སེམས་དང་དབང་པོ་དང་བར་བྱ་བ་དང༌། དགའ་བར་བྱ་བའི་ཕྱིར་ཡོངས་སུ་བསྔོའོ། །དགེ་བའི་རྩ་བ་དེ་ཞིང་གི་རྒྱུད་སྣྲེལ་ཞི་དང༌། སྤྱིའུ་ཚུགས་སུ་རྒྱུ་བ་ཐམས་ཅད་ ཤིན་ཏུ་བསྟན་པ་དང༌། ཕྲ་བ་དང༌། རྒྱ་ཆེ་བ་དང༌། ཡངས་པ་དང༌། དོག་པ་དང༌། ཐ་གྲུ་ཆེ་བ་སྣ་ཚོགས་དང༌། རྣམ་པར་དག་པ་དང༌། ཀུན་ནས་ཉོན་མོངས་པ་ཐམས་ཅད་དུ་ཆོས་ཀྱི་ འཁོར་ལོ་རྒྱུན་མི་འཆད་པར་མཉམ་པ་ཉིད་དུ་ཡང་དག་པར་བསྐོར་བའི་ཕྱིར་ཡོངས་སུ་བསྔོའོ། །དགེ་བའི་རྩ་བ་དེ་སེམས་བསྐྱེད་པའི་སྐད་ཅིག་རེ་རེ་དང༌། མི་འཇིགས་པ་གཞན་དང་ གཞན་ཐ་དད་པ་ཡང་དག་པར་ཤེས་པ་མི་ཟད་པས་ཆོས་སྣང་བ་གསར་པ། གསར་བ་རབ་ཏུ་ཐོབ་ཅིང་བསྟན་པ་དང་བཤད་པའི་ཕྱིར་ཡོངས་སུ་བསྔོའོ། །དགེ་བའི་རྩ་བ་དེ་དགེ་བའི་རྩ་བ་ ཐམས་ཅད་ཚོལ་བ་ལ་ལྷག་པའི་བསམ་པ་དང༌། དབང་པོ་མ་འཁྲུགས་ཤིང་མི་དམའ་བས། ཆོས་འབྱམས་ཀླས་པ་ཐམས་ཅད་མ་ལུས་པར་མངོན་པར་ཤེས་པའི་ཡེ་ཤེས་དང༌། ཆོས་ ཀྱི་རྫུ་འཕྲུལ་ཐོབ་པས་སེམས་ཅན་གྱི་འཁོར་གྱི་དཀྱིལ་འཁོར་འབྱམས་ཀླས་པ་ཐམས་ཅད་མངོན་པར་དགའ་བ་དང༌། ཚིམ་པར་ཆོས་ཐམས་ཅད་རབ་ཏུ་བསྟན་པའི་ཕྱིར་ཡོངས་སུ་ ༄༅། །བསྔོའོ། །དགེ་བའི་རྩ་བ་དེ་ཆོས་ཀྱི་དབྱིངས་ཚད་མེད་པ་ཐམས་ཅད་དུ་སོང་བའི་ཡོངས་སུ་བསྔོ་བ་ལ་གནས་ཤིང་འདི་ལྟར་ཡོངས་སུ་བསྔོ་སྟེ། ཆོས་ཀྱི་ དབྱིངས་ཚད་མེད་པར་སོང་བའི་ལུས་ཀྱི་ལས་ཀྱིས་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་ངག་གི་ལས་ཀྱིས་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་ པར་སོང་བའི་ཡིད་ཀྱི་ལས་ཀྱིས་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་གཟུགས་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་ མེད་པར་སོང་བའི་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་ཕུང་ པོ་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་ཁམས་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་ མེད་པར་སོང་བའི་སྐྱེ་མཆེད་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་ནང་མཉམ་པ་ཉིད་ལ་གནས་ཤིང་ཡོངས་སུ་ བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་ཕྱི་རོལ་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་བརྩམས་པ་མཉམ་ པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་བསམ་པ་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་ བའི་སྦྱོར་བ་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་མོས་པ་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ ཚད་མེད་པར་སོང་བའི་དབང་པོ་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་སྔོན་གྱི་མཐའ་དང༌། ཕྱི་མའི་མཐའ་དང༌། ད་ལྟར་བྱུང་བ་ མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་ལས་ཀྱི་རྣམ་པར་སྨིན་པ་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ ཚད་མེད་པར་སོང་བའི་ཀུན་ནས་ཉོན་མོངས་པ་དང༌། རྣམ་པར་བྱང་བ་རྣམ་པར་དག་པ་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་ སེམས་ཅན་ཐམས་ཅད་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་ཞིང་ཐམས་ཅད་མཉམ་པ་ཉིད་ལ་གནས་ཤིང་ཡོངས་སུ་བསྔོའོ།། ཆོས་ཀྱི་དབྱིངས་ཚད་མེད་པར་སོང་བའི་ཆོས་ཐམས་ཅད་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་འགྲོ་བ་ཐམས་ཅད་དུ་སྣང་བ་ ༄༅། །མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་བྱང་ཆུབ་སེམས་དཔའ་ཐམས་ཅད་མཉམ་པ་ཉིད་ལ་གནས་ ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་བྱང་ཆུབ་སེམས་དཔའི་སྤྱོད་པ་དང༌། སྨོན་ལམ་ཐམས་ཅད་མཉམ་པ་ཉིད་ལ་གནས་ཤིང་ཡོངས་སུ་བསྔོའོ།། ཆོས་ཀྱི་དབྱིངས་ཚད་མེད་པར་སོང་བའི་བྱང་ཆུབ་སེམས་དཔའི་འབྱུང་བ་ཐམས་ཅད་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་ བྱང་ཆུབ་སེམས་དཔའི་ཡོངས་སུ་སྨིན་པར་བྱ་བ་དང༌། འདུལ་བ་ཐམས་ཅད་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་བྱང་ཆུབ་ སེམས་དཔའི་འཁོར་ཐམས་ཅད་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་ཆོས་ཐམས་ཅད་མི་གཉིས་པའི་དབྱིངས་མཉམ་པ་ཉིད་ ལ་གནས་ཤིང་ཡོངས་སུ་བསྔོའོ། །ཆོས་ཀྱི་དབྱིངས་ཚད་མེད་པར་སོང་བའི་དེ་བཞིན་གཤེགས་པའི་དཀྱིལ་འཁོར་ཐམས་ཅད་མཉམ་པ་ཉིད་ལ་གནས་ཤིང་ཡོངས་སུ་བསྔོའོ། ། དེ་དེ་ལྟར་ཡོངས་སུ་བསྔོ་བས། ཆོས་ཀྱི་དབྱིངས་ཚད་མེད་པ་དང་མཉམ་པའི་ལུས་ཡོངས་སུ་དག་པ་ཀུན་ནས་གནས་པར་འགྱུར་རོ། །ཆོས་ཀྱི་དབྱིངས་ཚད་མེད་པ་དང་མཉམ་ པའི་དགྲ་ཡོངས་སུ་དག་པ་ཀུན་ནས་གནས་པར་འགྱུར་རོ། །ཆོས་ཀྱི་དབྱིངས་ཚད་མེད་པ་དང་མཉམ་པའི་སེམས་ཡོངས་སུ་དག་པར་ཀུན་ནས་གནས་པར་འགྱུར་རོ། །ཆོས་ཀྱི་ དབྱིངས་ཚད་མེད་པ་དང་མཉམ་པའི་བྱང་ཆུབ་སེམས་དཔའི་སྤྱོད་པ་དང༌། སྨོན་ལམ་ཡོངས་སུ་དག་པ་ཀུན་ནས་གནས་པར་འགྱུར་རོ། །ཆོས་ཀྱི་དབྱིངས་ཚད་མེད་པ་དང་མཉམ་ བའི་འཁོར་གྱི་དཀྱིལ་འཁོར་ཡོངས་སུ་དག་པ་ཀུན་ནས་གནས་པར་འགྱུར་རོ། །ཆོས་ཀྱི་དབྱིངས་ཚད་མེད་པ་དང་མཉམ་པའི་ཆོས་ཐམས་ཅད་བསྟན་པ་དང་བརྗོད་པས་བྱང་ཆུབ་ སེམས་དཔའ་ཐམས་ཅད་གོ་བར་བྱ་བ་ཡོངས་སུ་དག་པ་ཀུན་ནས་གནས་པར་འགྱུར་རོ། །ཆོས་ཀྱི་དབྱིངས་ཚད་མེད་པ་དང་མཉམ་པའི་འཇིག་རྟེན་གྱི་ཁམས་ཐམས་ཅད་མ་ལུས་ པར་ཆོས་ཀྱི་དབྱིངས་ལ་ཡང་དག་པར་གཞོལ་བའི་ཚུལ་གྱིས་ལུས་འབྱམས་ཀླས་པ་རྗེས་སུ་འགྲོ་བར་ཀུན་ནས་གནས་པར་འགྱུར་རོ། །ཆོས་ཀྱི་དབྱིངས་ཚད་མེད་པ་དང་མཉམ་པའི་ ཆོས་སྣང་བ་མཐའ་དང་དབུས་མེད་པ་ཐམས་ཅད་དང༌། མི་འཇིགས་པ་རྣམ་པར་དག་པའི་ཚིག་གཅིག་བརྗོད་པས་སེམས་ཅན་གྱི་ཁམས་མ་ལུས་པ་ཐམས་ཅད་ཀྱི་ཐེ་ཚོམ་ གཅོད་ཅིང༌། སེམས་དང༌། དབང་པོ་དང༌། བསམ་པ་ཁོང་དུ་ཆུད་པར་བྱེད་པས་ཚིམ་པར་བྱེད་པ་དང༌། བླ་ན་མེད་པ་ཐམས་ཅད་མཁྱེན་པའི་སྟོབས་དང༌། མི་འཇིགས་པ་དང༌། དེ་ ༄༅། །བཞིན་གཤེགས་པའི་རྣམ་པར་འཕྲུལ་པ་དང༌། སངས་རྒྱས་ཀྱི་ཆེ་བ་ཉིད་དང༌། ཡེ་ཤེས་ལ་འཇུག་པ་ཤིན་ཏུ་འཕགས་པ་དང༌། ཆོས་མངོན་པར་ ཤེས་པ་ལ་གནས་པར་བྱ་བ་ཀུན་ནས་གནས་པར་འགྱུར་ཏེ། ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོངས་སུ་བསྔོ་བ་ཆོས་ ཀྱི་དབྱིངས་ཚད་མེད་པ་ཞེས་བྱ་བ་བཅུ་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་སྦྱིན་པ་ལ་སོགས་པའི་དགེ་བའི་རྩ་བ་ཐམས་ཅད་བསྔོ་བ་དེས་ཡོངས་སུ་ བསྔོས་ན། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་མཐའ་དང་དབུས་མེད་པ་ཡོངས་སུ་རྫོགས་པ་ཐོབ་པར་འགྱུར་རོ། །འཇིག་རྟེན་གྱི་ཁམས་ཐམས་ ཅད་ཀྱི་སངས་རྒྱས་ཀྱི་ཞིང་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐའ་གཏུགས་པ་ཐམས་ཅད་ཡོངས་སུ་དག་པ་ཐོབ་པར་འགྱུར་རོ། །སེམས་ཅན་ཐམས་ཅད་ཀྱིས་ཀྱང་ རབ་ཏུ་ཐོབ་པར་བྱ་བ་ལ་བརྩོན་པར་བྱེད་པར་འགྱུར་རོ། །ཆོས་ཐམས་ཅད་ལ་འཇུག་པའི་ཡེ་ཤེས་མཐའ་དང་དབུས་མེད་པ་ཐམས་ཅད་ཡོངས་སུ་འགྲུབ་པར་འགྱུར་རོ། །སེམས་ བསྐྱེད་པ་མཐའ་དང་དབུས་མེད་པ་ཐམས་ཅད་ཀྱི་སྐད་ཅིག་རེ་རེ་ལ་སངས་རྒྱས་བསྐྱེད་པ་ཐམས་ཅད་མཐོང་བ་རབ་ཏུ་ཐོབ་ཅིང་ཁོང་དུ་ཆུད་པར་འགྱུར་རོ། །དེ་བཞིན་གཤེགས་ པ་ཐམས་ཅད་ཀྱི་རྣམ་པར་འཕྲུལ་པ་དང༌། རྒྱ་ཆེན་པོའི་རྣམ་པར་འཕྲུལ་པ་དང༌། བསྒྲིབས་པ་མེད་པའི་རྣམ་པར་འཕྲུལ་པ་དང༌། བསམ་གྱིས་མི་ཁྱབ་པའི་རྣམ་པར་འཕྲུལ་པ་དང༌། འགྲོ་བ་ཐམས་ཅད་རྣམ་པར་དག་པར་བྱེད་པའི་རྣམ་པར་འཕྲུལ་པ་དང༌། འཇིག་རྟེན་གྱི་ཁམས་ཐམས་ཅད་བྱིན་གྱིས་བརླབ་ཅིང་བརྟན་པར་བྱེད་པའི་རྣམ་པར་འཕྲུལ་པ་དང༌། ཤིན་ཏུ་བསྟན་པ་བརྗོད་དུ་མེད་པའི་རྣམ་པར་འཕྲུལ་པ་དང༌། དུས་ཐམས་ཅད་དུ་རྣམ་པར་འཕྲུལ་པའི་མངོན་པར་ཤེས་པ་དང༌། ཡེ་ཤེས་དང་ཕྱིར་མི་ལྡོག་པའི་བྱིན་གྱི་རླབས་ ཀྱིས་ཆོས་ཀྱི་དབྱིངས་མཐའ་དང་དབུས་མེད་པ་ཐམས་ཅད་མ་ལུས་པར་རྒྱས་པར་འགེངས་པ་ལ་འཇུག་ཅིང་ཁོང་དུ་ཆུད་པར་འགྱུར་རོ། །ཀུན་ཏུ་བཟང་པོའི་མིག་མཐའ་དང་དབུས་ མེད་པ་མངོན་པར་བསྒྲུབས་པ་ཡོངས་སུ་རྫོགས་པ་ཐོབ་པར་འགྱུར་རོ། །དེ་མཐའ་དང་དབུས་མེད་པའི་ཆོས་བསྟན་པ་ཆགས་པ་མེད་པའི་རྣ་བའི་ཡེ་ཤེས་ཁོང་དུ་ཆུད་པ་ཡང་ དག་པར་འཛིན་པར་འགྱུར་རོ། །ཆོས་ཀྱི་དབྱིངས་མཐའ་དང་དབུས་མེད་པ་ཐམས་ཅད་ལུས་ཀྱི་སྐྱིལ་མོ་ཀྲུང་གཅིག་གིས་ཡོངས་སུ་རྒྱས་པར་བྱིན་གྱིས་རློབ་ཀྱང་སེམས་ཅན་ ཐམས་ཅད་ལ་གནོད་པ་མེད་པར་བྱེད་པར་འགྱུར་རོ། །དུས་གསུམ་མཐའ་དང་དབུས་མེད་པ་ཐམས་ཅད་ལ་འཇུག་པའི་ཡེ་ཤེས་འབྱམས་ཀླས་པ་ཡོངས་སུ་རྫོགས་པ་ཐོབ་ཅིང་ ༄༅། །ཁོང་དུ་ཆུད་པར་འགྱུར་རོ། །བློ་མཐའ་དང་དབུས་མེད་པ་ཐམས་ཅད་རྣམ་པར་དག་པ་དང༌། སེམས་ཅན་ཐམས་ཅད་རྣམ་པར་དག་པ་དང༌། ཆོས་ ཐམས་ཅད་རྣམ་པར་དག་པ་དང༌། སྐྱེ་མཆེད་ཡོངས་སུ་ཤེས་པའི་ཡེ་ཤེས་ཐམས་ཅད་རྣམ་པར་དག་པ་དང༌། ནམ་མཁའི་དབྱིངས་མཐའ་དང་དབུས་མེད་པ་ཐམས་ཅད་ ལ་འཇུག་ཅིང་རྒྱས་པར་འགེངས་པའི་ཡེ་ཤེས་རྣམ་པར་དག་པ་དང༌། སེམས་ཅན་གྱི་རིས་དང༌། སྐྱེ་གནས་རྣམ་པ་སྣ་ཚོགས་སུ་གྱུར་པ་ཐམས་ཅད་ནས་བྱུང་བའི་སྒྲ་དང༌། སྨྲ་ བ་དང༌། སྐད་ཐམས་ཅད་མ་ལུས་པ་ལ་མངོན་སུམ་གྱི་ཡེ་ཤེས་རྣམ་པར་དག་པ་དང༌། འཇིག་རྟེན་གྱི་ཁམས་ཐམས་ཅད་མ་ལུས་པར་རྣམ་པ་མཐའ་ཡས་པའི་འོད་ཟེར་དང༌། འོད་ཀྱི་དཀྱིལ་འཁོར་རབ་ཏུ་གཏོང་ཞིང་མཐའ་དང་དབུས་མེད་པ་སྣང་བར་བྱེད་པ་རྣམ་པར་དག་པ་དང༌། དུས་གསུམ་ཐམས་ཅད་ཀྱི་བྱང་ཆུབ་སེམས་དཔའི་སྤྱོད་པ་མ་ལུས་པར་ མངོན་པར་བསྒྲུབ་པའི་ཡེ་ཤེས་རྣམ་པར་དག་པ་དང༌། འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་པའི་དཀྱིལ་འཁོར་མཐའ་དང་དབུས་མེད་པ་མ་ ལུས་པ་ཐམས་ཅད་ལ་སྐད་ཅིག་གཅིག་ཏུ་འཇུག་པའི་ཡེ་ཤེས་རྣམ་པར་དག་པ་དང༌། སེམས་ཅན་ཐམས་ཅད་ཀྱི་མངོན་པར་འདུ་བྱ་བ་ཐམས་ཅད་མ་ལུས་པ་ལ་འཇུག་ པས་འགྲོ་བ་མཐའ་དང་དབུས་མེད་པ་རྣམ་པར་དག་པར་བྱ་བ་རབ་ཏུ་ཐོབ་པར་འགྱུར་རོ། །ཡོངས་སུ་རྫོགས་པར་བྱེད་པའོ། །རབ་ཏུ་སྒྲུབ་བོ། །རྣམ་པར་དག་པར་བྱེད་དོ། །མཉམ་པར་བྱེད་ དོ༑ ༑མངོན་སུམ་དུ་བྱེད་དོ། །རབ་ཏུ་རྟོགས་པར་བྱེད་དོ། །ཁོང་དུ་ཆུད་པར་བྱེད་དོ། །ཡང་དག་པར་སེམས་པར་བྱེད་དོ། །རྣམ་པར་དག་པ་ཐམས་ཅད་ཀྱི་ཕ་རོལ་ཏུ་ཕྱིན་པ་ཐོབ་པར་ བྱ་བ་རྗེས་སུ་ཐོབ་པར་བྱེད་དོ། །དེ་ནས་དེའི་ཚེ་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུའི་འཇིག་རྟེན་གྱི་ཁམས་སུ་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ ཀྱི་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས་ཏེ། གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ། །རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ །རབ་ཏུ་ལྡེག་གོ། ཀུན་ཏུ་ལྡེག་གོ །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར། རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག །རབ་ཏུ་ཤིག་ཤིག །ཀུན་ཏུ་ཤིག་ཤིག་གོ །སངས་ རྒྱས་ཀྱི་མཐུ་དང༌། ཆོས་ཉིད་རབ་ཏུ་ཐོབ་པས་ལྷ་རྫས་ཀྱི་མེ་ཏོག་གི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་ཕྲེང་བའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་ཕྱེ་མའི་སྤྲིན་གྱི་ ཆར་མངོན་པར་བབ་བོ། །ལྷ་རྫས་ཀྱི་གོས་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་རིན་པོ་ཆེའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་ལྷབ་ལྷུབ་ཀྱི་སྤྲིན་གྱི་ཆར་མངོན་པར་ ༄༅། །བབ་བོ། །ལྷ་རྫས་ཀྱི་སྤོས་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་ནོར་བུ་རིན་པོ་ཆེའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་དུས་དང་མཐུན་པའི་ ཙནྡན་གྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་སྦྲུལ་གྱི་སྙིང་པོའི་ཙནྡན་མཆོག་གི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་གདུགས་དང༌། རྒྱལ་མཚན་དང༌། བ་ དན་ཁ་དོག་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་ལྷའི་ལུས་གྲངས་མེད་པའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་དབྱངས་ཀྱི་ཡན་ལག་བརྒྱ་སྟོང་ བརྗོད་དུ་མེད་པའི་ཚིག་དང༌། བརྗོད་པ་ལ་རྟོག་པ་བསམ་གྱིས་མི་ཁྱབ་པ་དང་ལྡན་པ་ཡིད་དུ་འོང་བར་སྤྱོད་པའི་ཆོས་ཆེན་པོའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་དེ་བཞིན་ གཤེགས་པས་བསྟོད་པའི་སངས་རྒྱས་བསྔགས་པ་བསམ་གྱིས་མི་ཁྱབ་པའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་ལེགས་སོ། །ཞེས་བྱ་བ་དང༌། ལྷུང་ལྷུང་ལྡེགས་ཀྱི་སྒྲ་ འབྱིན་པ་དང༌། དགའ་བར་བྱེད་པའི་དབྱངས་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་ལྷའི་ལུས་བྱེ་བ་ཁྲག་ཁྲིག་བརྒྱ་སྟོང་གྲངས་མེད་ཅིང་བརྗོད་དུ་མེད་པས་རབ་ཏུ་བཏུད་དོ། ། ལྷ་ཡུལ་གྱི་ལྷ་གྲངས་མེད་པ་སངས་རྒྱས་རྗེས་སུ་དྲན་པ་ལ་བརྩོན་པར་ཡིད་ལ་བྱེད་ཅིང་དེ་བཞིན་གཤེགས་པ་ལ་ཤིན་ཏུ་དད་པའི་སེམས་ཀྱི་རྒྱུད་དང་ལྡན་པ། སངས་རྒྱས་ཀྱི་ ཡོན་ཏན་དང་མི་འབྲལ་བའི་སེམས་ཀྱིས་མངོན་པར་གནས་སོ། །ལྷ་རྫས་ཀྱི་རོལ་མོ་བརྡུང་བ་དང༌། དཀྲོལ་བའི་སྒྲ་ལྷའི་གླུའི་དབྱངས་ཀྱི་ཚུལ་གྲངས་མེད་པར་གྲག་པ་དེ་བཞིན་གཤེགས་ པ་མཆོད་ཅིང་ཡིད་ལ་བྱ་བ་ལ་བརྩོན་པ་རྣམས་ཀྱང་རབ་ཏུ་བསྒྲགས་སོ། །ལྷ་རྫས་ལས་ཤིན་ཏུ་འདས་པའི་འོད་ཟེར་བརྒྱ་སྟོང་གྲངས་མེད་པས་ཀྱང་འཇིག་རྟེན་གྱི་ཁམས་ཆོས་ཀྱི་དབྱིངས་ ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་ཀྱི་སངས་རྒྱས་ཀྱི་ཞིང་གི་ཐ་གྲུ་ཐམས་ཅད་རབ་ཏུ་སྣང་བས་ཁྱབ་པར་བྱས་སོ། །ལྷ་རྫས་ལས་འདས་པའི་སྤྲུལ་པ་དང༌། སངས་རྒྱས་ཀྱི་ ཡུལ་གྲངས་མེད་པ་བསྟན་པ་དང༌། དེ་བཞིན་གཤེགས་པའི་སྐུའི་ཆོ་འཕྲུལ་རྣམས་ཀྱང་ཡང་དག་པར་བསྟན་པར་གྱུར་ཏོ། །གླིང་བཞི་པ་འདི་དགའ་ལྡན་གྱི་གནས་སུ་ལྷའི་དབང་པོ་ རབ་དགའ་ལྡན་གྱི་ཁང་པ་ན་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་ཡང་ཕྱོགས་བཅུ་རྒྱས་པར་བཀང་ཞིང་ཆོས་བསྟན་པ་འདི་ཉིད་ཀུན་ཏུ་བྱུང་ངོ༌། །སངས་རྒྱས་ཀྱི་ མཐུས་ཕྱོགས་བཅུའི་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་ཀྱི་ཕ་རོལ་དག་ནས་ཀྱང༌། སངས་རྒྱས་ཀྱི་ཞིང་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་ བ་སྙེད་ཀྱི་བྱང་ཆུབ་སེམས་དཔའ་ལྷགས་ནས་ཕྱོགས་བཅུ་བཀང་སྟེ་འདི་སྐད་ཟེར་རོ། །ཀྱེ༑ རྒྱལ་བའི་སྲས། དེ་ལྟར་ཁྱོད་ཀྱིས་ཡོངས་སུ་བསྔོ་བའི་ཆོས་ཉིད་འདི་བཤད་པ་ལེགས་ ༄༅། །སོ༑ ༑ལེགས་སོ། །ཀྱེ། རྒྱལ་བའི་སྲས། བདག་ཅག་ཀུན་ཀྱང་མིང་རྡོ་རྗེ་རྒྱལ་མཚན་ཞེས་བྱ་བ་ཤ་སྟག་སྟེ། འཇིག་རྟེན་གྱི་ཁམས་ཀྱི་མིང་རྡོ་རྗེའི་འོད་ཅེས་ བྱ་བ་དག་ན་དེ་བཞིན་གཤེགས་པའི་མཚན་རྡོ་རྗེ་དཔལ་ཞེས་བྱ་བ་བཞུགས་པ་དག་གིས་དྲུང་ནས་འདིར་ཕྱིན་ཏེ། ཀུན་ན་ཡང་སངས་རྒྱས་ཀྱི་བྱིན་གྱི་རླབས་ཀྱིས་འཁོར་གྱི་རྣམ་ པ་འདི་ལྟ་བུ་དག་ན། ཚིག་འདི་དག་དང༌། ཡི་གེ་འདི་དག་དང༌། གོ་བར་བྱ་བ་འདི་དག་གིས་དོན་འདི་ཉིད་ལྷག་པ་མེད་ཅིང་ཆད་པ་མེད་པར་བརྗོད་དེ། ཆོས་འདི་ཉིད་སྟོན་ཏོ། །ཀྱེ། རྒྱལ་བའི་སྲས། བདག་ཅག་ཀྱང་དེ་ལྟར་ཕྱོགས་བཅུའི་འཇིག་རྟེན་གྱི་ཁམས་རེ་རེའི་གླིང་བཞི་པ་དག་གི་དགའ་ལྡན་གྱི་གནས་ཀྱི་ལྷའི་རྒྱལ་པོ་རབ་དགའ་ལྡན་གྱི་ཁང་པ་རིན་པོ་ ཆེ་ཐམས་ཅད་ཀྱི་རྒྱན་ཅེས་བྱ་བ་དག་ཏུ་སངས་རྒྱས་ཀྱི་ཞིང་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་རྣམས་ཕྱིན་པ་མངོན་དུ་མཐོང་བ་ཤ་སྟག་ སངས་རྒྱས་ཀྱི་བྱིན་གྱི་རླབས་ཀྱིས་འཁོར་འདིར་ཕྱིན་ཏོ། །དེ་ནས་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་གྱིས་ཕྱོགས་བཅུར་བལྟས་ཏེ། འཁོར་ཐམས་ཅད་ལ་བལྟས་ ནས་ཆོས་ཀྱི་དབྱིངས་ལ་རྣམ་པར་བལྟ་བ་དང༌། དོན་དང་ཚིག་དང་ཡི་གེ་ལ་རབ་ཏུ་འཇུག་པ་དང༌། སེམས་བསྐྱེད་པ་མཐའ་དང་དབུས་མེད་པར་ཡངས་པ་ཡོངས་སུ་སྒོམ་ པ་དང༌། འགྲོ་བ་ཐམས་ཅད་ལ་སྙིང་རྗེ་ཆེན་པོས་ཁྱབ་པར་བྱ་བ་དང༌། དུས་གསུམ་གྱི་སངས་རྒྱས་ཀྱི་རིགས་སུ་སེམས་ཡང་དག་པར་འབྲེལ་བར་བྱ་བ་དང༌། སངས་རྒྱས་ཐམས་ ཅད་ཀྱི་ཡོན་ཏན་ལ་འཇུག་པ་དང༌། སངས་རྒྱས་ཐམས་ཅད་ཀྱི་བྱིན་གྱིས་བརླབས་པའི་ལུས་ཡང་དག་པར་བསྐྱེད་པ་དང༌། སེམས་ཅན་ཐམས་ཅད་ཀྱི་བསམ་པ་ཡང་དག་པར་ཤེས་ པར་བྱ་བ་དང༌། དགེ་བའི་རྩ་བ་ཇི་ལྟར་བསྐྱེད་པའང་ཇི་ལྟར་དུས་ལ་བབ་པ་ལ་ཡང་དག་པར་བལྟ་བ་དང༌། ཆོས་ཀྱི་ལུས་ཀྱི་རྗེས་སུ་སོང་བའི་གཟུགས་ཀྱི་ལུས་ཡང་དག་པར་བསྟན་ པར་བྱེད་ཅིང༌། སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་ཆོས་ལ་རབ་ཏུ་མཁས་གྱུར་ཅིང༌། །ཆོས་རྒྱུད་མཐའ་ཡས་རྣམ་པར་དག་བྱས་ ནས༑ ༑ཆོས་ཀྱི་འོད་བྱེད་ཆོས་ལ་ཁ་ལོ་སྒྱུར། །ཆོས་རྣམས་རབ་རྟོགས་ཆགས་པ་མེད་པ་ཐོབ། །དེ་དག་ཆོས་ཀྱི་ཁ་ལོ་སྒྱུར་གྱུར་ཏེ། །ཤིན་ཏུ་དཀོན་པའི་ཆོས་རྣམས་སྟོན་བྱེད་ ཅིང༑ །ཆོས་ཀྱི་སྒོ་ལ་རབ་ཏུ་གཞག་བྱ་བར། །སེམས་ཅན་མཐའ་ཡས་ཕྱོགས་སུ་གོ་བར་བྱེད། །དེ་དག་ཆོས་ཀྱི་གངས་ཆེན་མཚོ་འཐུང་ཞིང༌། །ཆོས་ཉིད་སྤྲིན་ཆར་ཕྱོགས་སུ་ རབ་ཏུ་འབེབས། །འཇིག་རྟེན་ཁམས་སུ་ཆོས་ཉིད་ཉི་ཤར་ཅིང༌། །སེམས་ཅན་ཕན་ཕྱིར་ཆོས་རྣམས་སྟོན་པར་བྱེད། །དེ་དག་ཤིན་ཏུ་དཀོན་པའི་སྦྱིན་བདག་སྟེ། །ཆོས་ཀྱི་རྣམ་ ༄༅། །ཚུལ་ཤེས་པ་རྗེས་སུ་ཐོབ། །ཆོས་ཀྱི་སྣང་བས་རབ་ཏུ་སེམས་གསལ་བ། །འཇིགས་མེད་འཇིག་རྟེན་དག་ཏུ་ཆོས་རབ་སྟོན། །ཤིན་ཏུ་དྲི་མེད་ཆོས་ ཀྱི་སེམས་དང་ལྡན། །ཆོས་ཀྱི་སྒོ་ལ་དེ་དག་རབ་ཏུ་གནས། །ཆོས་རྣམས་རྒྱ་མཚོ་དེ་དག་ཤིན་ཏུ་འཕགས། །འཇིག་རྟེན་དག་ཏུ་ཆོས་ཉིད་རྔ་ཡང་བརྡུང༌། །དེ་དག་ཤིན་ཏུ་ དཀོན་པའི་ཆོས་བརྗོད་ཅིང༌། །ཆོས་ཉིད་བསོད་ནམས་ཡང་དག་གསོག་པར་བྱེད། །ཆོས་ཉིད་བསམ་པ་ཡོངས་སུ་དག་བྱེད་ཅིང༌། །ཆོས་ཀྱི་གཏེར་རྣམས་འགྲོ་བ་ཀུན་ ལ་སྟོན། །ཆོས་ཀྱི་ཁང་བར་རྒྱལ་བས་དབང་བསྐུར་བ། །ཆོས་ཉིད་ཡེ་ཤེས་སྙིང་པོའི་ལུས་དང་ལྡན། །ཆོས་ཀྱི་མཚན་གཞི་རྟོགས་པའི་ཡེ་ཤེས་ཅན། །དེ་དག་ཆོས་ཉིད་ བཟང་པོའི་ཆོས་ལ་གནས། །རྒྱལ་བ་ཀུན་གྱིས་གང་ལ་བསྟོད་མཛད་དང༌། །རབ་ཀྱི་ཕུལ་གྱིས་གང་ཞིག་གནང་གྱུར་ཅིང༌། །སྐྱེས་དབང་ཐམས་ཅད་གང་གིས་བསྐྱེད་གྱུར་ པའི༑ ༑སྦྱིན་པ་དམ་པ་དེ་དག་སྦྱིན་པར་བྱེད། །དེ་དག་ཆོས་ཀྱི་ལུས་ལྡན་ཤེས་དང་ལྡན། །འཇིག་རྟེན་མཁས་པས་ཆོས་ཉིད་སྤྲུལ་མཛད་པས། །ཆོས་ཀྱི་སྒྲོན་མ་འགྲོ་ལ་ ཕན་པའི་ཕྱིར། །དམའ་བ་མེད་པར་མཐའ་ཡས་ཆོས་སྟོན་ཏེ། །དེ་དག་ཆོས་བཟང་དམ་པ་སྦྱིན་བྱས་ནས། །དགེ་རྩ་དེ་དག་རྗེས་སུ་སེམས་བྱེད་ཅིང༌། །འཇིག་རྟེན་དག་ ཏུ་དགེ་བ་གང་བྱས་པ། །དེ་དག་ཡོངས་བསྔོའི་ཤེས་དང་ལྡན་པ་ཡིན། །རང་བྱུང་ཐམས་ཅད་གང་གིས་བསྐྱེད་གྱུར་པའི། །དགེ་རྩ་དེ་དག་འགྲོ་བའི་དོན་དུ་ཤེས། །ཐམས་ཅད་ རྣམ་ཕྱེ་རྣམ་པར་དག་གྱུར་ཅིག །སངས་རྒྱས་རྒྱན་གྱི་ཕ་རོལ་ཕྱིན་པར་བྱེད། །ཞིང་གི་རྒྱན་མང་ཤིན་ཏུ་རྒྱ་ཆེ་ཞིང༌། །ཕྱོགས་རྣམས་ཀུན་ཏུ་དེ་ལ་ཚད་མེད་པས། །འཇིག་རྟེན་ ཀུན་ཏུ་བསམ་ཡས་རྒྱན་ལྡན་པ། །དེ་འདྲར་ཞིང་རྣམས་མ་ལུས་ཀུན་གྱུར་ཅིག །སྐྱེས་བུ་འདུལ་བའི་ཡེ་ཤེས་ཇི་ཙམ་པ། །དེ་འདྲར་སེམས་ཅན་རྣམ་དག་ལྡན་གྱུར་ཏེ། །རྒྱལ་བའི་ སྲས་པོ་བཟང་པོ་ཇི་བཞིན་དུ། །ཡོན་ཏན་ཀུན་གྱིས་སེམས་བརྒྱན་ལྡན་གྱུར་ཅིག །དེ་དག་རྣམ་འཕྲུལ་ཤིན་ཏུ་རྣམ་ཡངས་པ། །གང་གིས་འཇིག་རྟེན་མ་ལུས་རྒྱས་གང་བ། །དེ་ཡི་ སྤྱོད་ལ་ཤེས་རབ་བཟང་གནས་པར། །སེམས་ཅན་ཐམས་ཅད་མ་ལུས་འགྱུར་བར་ཤོག །ཇི་སྙེད་འཇིག་རྟེན་མ་ལུས་གང་ཡང་རུང༌། །ཕྱོགས་སུ་རྒྱལ་བ་ཀུན་གྱིས་སངས་རྒྱས་པ། །ཀུན་ ཀྱང་ཀུན་ཏུ་བཟང་པོ་ཇི་བཞིན་དུ། །ལེགས་སྤྱོད་དམ་པ་མཆོག་དང་ལྡན་གྱུར་ཅིག །ཡོན་ཏན་རྒྱུད་རྣམས་ཇི་སྙེད་གང་ཡང་རུང༌། །རྒྱལ་སྲས་རྣམས་དང་རྒྱལ་བས་ཐུགས་ཆུད་པའི། ། ཡོན་ཏན་གང་ལ་མཐའ་དང་དབུས་མེད་པ། །ཡོན་ཏན་དེ་འདྲར་སེམས་ཅན་ཀུན་གྱུར་ཅིག །གང་ཡང་རྫུ་འཕྲུལ་སྟོབས་དང་ལྡན་པ་རྣམས། །འཇུག་པ་ཀུན་ལ་བསླབ་པ་ཀུན་ ༄༅། །བསླབས་པ། །རྣམ་འཕྲུལ་ཐམས་ཅད་ཡང་དག་སྟོན་པ་རྣམས། །ཕྱོགས་རྣམས་ཐམས་ཅད་རྒྱས་པར་འདོད་གྱུར་ཅིག །སེམས་ཀྱི་སྐད་ཅིག་གཅིག་གིས་ རང་བྱུང་རྣམས། །འདྲེན་པ་སེམས་ཅན་ཀུན་དང་མཉམ་མཐོང་སྟེ། །ཆོས་རྣམས་ཐམས་ཅད་མ་ལུས་བསྡུ་བྱས་ཤིང༌། །སྐྲ་རྩེ་གཅིག་ཏུ་མི་མགོན་སྡུད་གྱུར་ཅིག །འཇིག་རྟེན་འདི་ན་འགྲོ་ བ་གང་རྒྱུ་བ། །གང་རྣམས་མི་ཡི་དམ་པས་མཁྱེན་གྱུར་པ། །དེ་དང་མཉམ་པ་ཐམས་ཅད་མ་ལུས་པའི། །འཇིག་རྟེན་མཁྱེན་ལ་མཆོད་པ་བྱེད་གྱུར་ཅིག །སྤོས་ཀྱི་རྒྱུད་དང་དེ་བཞིན་མེ་ ཏོག་དང༌། །གོས་ཀྱི་རྒྱུད་དང་དེ་བཞིན་གདུགས་རྣམས་ཀྱིས། །ཆོས་དབྱིངས་མ་ལུས་རྒྱས་པར་གང་བྱས་ཤིང༌། །འཇིག་རྟེན་ཀུན་ཏུ་ཡིད་ཀྱིས་འགེངས་གྱུར་ཅིག །སངས་རྒྱས་མཚན་ གྱི་རྣམ་པ་བསམ་ཡས་པ། །སྐྲ་རྩེ་གཅིག་ཏུ་ཐམས་ཅད་བསྡུ་བ་ཡིས། །ལྷག་མ་མེད་པར་ལམ་རྣམས་ཀུན་བསྡུས་ཤིང༌། །འཇིག་རྟེན་སྒྲོན་ལ་ཕྱག་འཚལ་གྱུར་པར་ཤོག །རྒྱལ་བ་ དེ་དག་ཀུན་ལ་ཕྱག་འཚལ་ཏེ། །ཐམས་ཅད་ལུས་ཀྱིས་ཚུལ་གྱིས་འདུད་བྱེད་ཅིང༌། །ཕྱོགས་རྣམས་ཀུན་ཏུ་རྒྱལ་བ་ཀུན་སྟོན་པས། །ཕྱི་མའི་བསྐལ་ཀུན་ཟད་པར་བྱེད་གྱུར་ཅིག །སེམས་ ཅན་སྙེད་ཀྱི་ཡིད་ཀྱི་རྣམ་པ་ཡིས། །རྒྱལ་བ་གཅིག་ལའང་མཆོད་པ་བྱེད་གྱུར་ཅིག །ཇི་ལྟར་རྒྱལ་བ་གཅིག་མཆོད་དེ་བཞིན་དུ། །སྐྱེས་དབང་མ་ལུས་ཀུན་ལའང་མཆོད་གྱུར་ཅིག ། དེ་དག་མཆོད་པའི་ཡོན་ཏན་བརྗོད་བྱེད་པས། །འགྲོ་བ་ཀུན་དུ་བསྐལ་བ་ཟད་གྱུར་ཀྱང༌། །སྐྱེས་བུ་འདུལ་བ་དཔེ་ཟླ་མེད་པ་ཡི། །རྒྱལ་བ་མཆོད་པའི་མཐར་ཐུག་མེད་གྱུར་ཅིག །འགྲོ་བ་ཀུན་ ན་བསྐལ་མང་ཇི་སྙེད་པ། །དེ་སྙེད་བསྐལ་པ་སྤྱད་པ་སྤྱོད་བྱེད་ཅིང༌། །རྒྱལ་བ་གཅིག་ལ་རིམ་གྲོ་བྱ་བས་ཀྱང༌། །བསྐལ་པ་ཐམས་ཅད་མ་ལུས་ཟད་གྱུར་ཅིག །རྒྱལ་བ་གཅིག་ལ་ཇི་ ཙམ་བརྗོད་གྱུར་པ། །རྒྱལ་བ་ཀུན་ལའང་བསྐལ་པ་དེ་སྙེད་དེ། །བསྐལ་པའི་གྲངས་ཀྱི་མཐར་ཐུག་མ་གྱུར་ཅིག །རྒྱལ་བའི་སྤྱོད་པས་སྐྱོ་བ་མེད་གྱུར་ཅིག །ཇི་ལྟར་ཆོས་དབྱིངས་རྣམ་པར་ དག་པ་དང༌། །ཇི་ཙམ་རྒྱ་ཆེན་ཡོངས་སུ་མཐའ་ཡས་པ། །དེ་སྙེད་རྒྱ་ཆེན་མེ་ཏོག་བཟང་པོ་རྣམས། །ཐུབ་མང་སེམས་ཅན་སྙེད་ལ་འབུལ་གྱུར་ཅིག །དྲི་ཞིམ་ལྡན་པའི་དེ་བཞིན་ཕྱེ་མ་ དག །གཙང་ཞིང་རྣམ་དག་རྣམ་པ་སྣ་ཚོགས་ལ། །འགྲོ་བ་ཀུན་ན་དཔེ་ཟླ་དམིགས་མེད་པ། །དེ་འདྲས་རྒྱལ་བ་མཆོད་པ་བྱེད་གྱུར་ཅིག །ཞིང་རྣམས་དུ་མ་སེམས་ཅན་མཉམ་པ་ཡི། ། རྒྱལ་བ་གཅིག་ལ་གདུགས་རྣམས་འབུལ་བྱེད་ཅིང༌། །རྒྱལ་བ་ཀུན་ལའང་དེ་བཞིན་དགབ་བྱ་བས། །རྒྱལ་བ་རྣམས་ལ་གདུགས་མཆོད་བྱེད་གྱུར་ཅིག །བྱུག་པ་དམ་པ་མཆོག་ཏུ་གྱུར་ པ་རྣམས། །འགྲོ་བ་འདི་ན་གང་ལ་དཔེ་མེད་པ། །དེ་ཡིས་སངས་རྒྱས་མཆོད་བྱེད་སྤྱོད་པ་ཡིས། །བསྐལ་མང་སེམས་ཅན་མཉམ་པ་ཟད་གྱུར་ཅིག །དེ་བཞིན་བྱུང་དང་སྤོས་ཀྱི་ཕྱེ་མ་ ༄༅། །དང༌། །མེ་ཏོག་བདུག་པ་ན་བཟའ་སྤོས་རྣམས་དང༌། །རིན་ཆེན་ལྷབ་ལྷུབ་མཆོད་པ་མཐའ་ཡས་པའི། །རིམ་གྲོ་སྐྱེ་བ་མེད་པར་བྱེད་གྱུར་ཅིག །འཇིག་རྟེན་ སྒྲོན་མ་སེམས་ཅན་མཉམ་པ་དག །སྐད་ཅིག་རེ་རེར་བྱང་ཆུབ་འཚང་རྒྱ་བ། །དེ་དག་ཡོན་ཏན་མཐའ་ཡས་རྗོད་བྱེད་ཅིང༌། །སྐྱེས་བུ་འདུལ་ལ་མཆོད་པ་བྱེད་གྱུར་ཅིག །སེམས་ཅན་ མཉམ་པའི་འཇིག་རྟེན་མཁྱེན་པ་ལ། །སེམས་ཅན་མཉམ་པའི་བསྐལ་པ་བགྲང་བྱས་ཤིང༌། །བློ་མཆོག་ལྡན་པ་མཆོད་པ་བྱེད་པ་ནི། །རྒྱལ་བས་བཤད་ཀྱང་ཟད་པར་མ་གྱུར་ ཅིག་༑རྒྱལ་བ་རྣམས་ལ་འདི་འདྲའི་མཆོད་བྱེད་ཅིང༌། །སངས་རྒྱས་རྣམས་འཕྲུལ་ཀུན་ཏུ་འགེངས་བྱེད་པས། །བཟང་དང་ལྡན་པའི་སྤྱོད་ལ་གནས་བཅས་ཤིང༌། །སངས་རྒྱས་མ་ ལུས་ཐམས་ཅད་མཐོང་གྱུར་ཅིག །འགྲོ་ཀུན་དགེ་བ་ཇི་སྙེད་ཡོད་པ་དང༌། །བྱས་དང་བྱེད་གྱུར་དེ་བཞིན་བྱེད་པ་དག །བཟང་པོ་ཅི་བཞིན་དེ་འདྲའི་ས་དག་ལ། །ཀུན་ཀྱང་ཀུན་ནས་ བཟང་པོར་རེད་གྱུར་ཅིག །འཇིག་རྟེན་ཐམས་ཅད་མ་ལུས་སེམས་ཅན་རྣམས། །ཇི་སྙེད་རྒྱལ་བ་ཀུན་གྱིས་ཐུགས་ཆུད་པ། །ཀུན་ཀྱང་མཁས་པ་ཀུན་གྱིས་བསྔགས་པ་ཡི། །ཀུན་ཏུ་ བཟང་པོ་དེ་བཞིན་འགྱུར་བར་ཤོག །ཕྱོགས་རྣམས་མ་ལུས་ཀུན་ཏུ་ཅི་བྱས་པ། །སྐྱེས་བུ་དམ་པ་དེ་ལྟར་ཡོངས་སུ་བསྔོ། །རྡོ་རྗེའི་རྒྱལ་མཚན་རྒྱལ་བས་གང་གསུངས་པ། ཡོངས་བསྔོ་དམ་པ་མཆོག་དང་ཕུལ་ཡང་ཡིན། །དེ་བཞིན་ཞིང་རྣམས་ཐམས་ཅད་མ་ལུས་པར། །རྒྱུན་བཞིན་ཀུན་ཀྱང་ཁོང་དུ་ཆུད་བྱ་སྟེ། །སེམས་ཅན་ཇི་སྙེད་ཐམས་ཅད་མ་ལུས་པ། །དེ་དག་ ཀུན་ཀྱང་ཀུན་ཏུ་བཟང་གྱུར་ཅིག །སྦྱིན་པས་ཡོངས་བསྔོ་ཇི་བཞིན་རེད་གྱུར་ཅིག །ཚུལ་ཁྲིམས་ཀྱིས་ཀྱང་བསྔོ་བཞིན་རེད་གྱུར་ཅིག །བརྩོན་འགྲུས་སྟོབས་ཀྱིས་བསྐལ་པར་མི་ལྡོག་ཅིང༌།། བཟོད་པས་འཁྲུགས་པ་མེད་པའི་ཡིད་གྱུར་ཅིག །བསམ་གཏན་གྱིས་ཀྱང་རྩེ་གཅིག་ཡིད་ལྡན་ཞིང༌། །ཏིང་འཛིན་ཀུན་གྱི་སྤྱོད་ཡུལ་ཤེས་གྱུར་ཅིག །ཤེས་རབ་དུས་རྣམས་གསུམ་པོ་ཐམས་ ཅད་དུ། །འཇིག་རྟེན་དག་ཏུ་མཐར་དམིགས་མེད་གྱུར་ཅིག །ལུས་དང་ངག་དང་ཡིད་རྣམས་ཐམས་ཅད་ཀྱང༌། །རྣམ་པ་ཀུན་ཏུ་རྣམ་དག་མཁས་གྱུར་ཅིག །སྤྱོད་པ་དེ་དག་ཐམས་ཅད་མ་ ལུས་པར། །ཀུན་ཀྱང་ཀུན་ཏུ་བཟང་པོར་རེད་གྱུར་ཅིག །ཇི་ལྟར་ཆོས་དབྱིངས་རློམ་པའི་སེམས་མེད་ཅིང༌། །དེ་ལ་སྤྲོས་དང་ཆགས་པ་མེད་པ་དང༌། །མྱ་ངན་འདའ་དང་བསྒྲིབས་པ་མེད་པ་ ལྟར། །དེ་བཞིན་སེམས་ལ་རློམ་སེམས་མེད་གྱུར་ཅིག །ཆོས་མཁས་ཡོངས་སུ་བསྔོ་བ་གང་བརྗོད་པ། །དེ་ནི་རྒྱལ་བས་གསུངས་པའི་བསྔོ་བ་སྟེ། །མཁས་པའི་སྤྱོད་པ་ཅི་ནས་ འགྲུབ་འགྱུར་བར། །དགེ་བ་ཡོངས་པ་དེ་ཡིས་ཡོངས་སུ་བསྔོ། །རྒྱལ་བའི་སྲས་ཀྱིས་འདི་ལ་བསླབས་བྱས་ཏེ། །ཇི་སྙེད་གང་ཡོད་ཐམས་ཅད་མ་ལུས་པར། །ཁམས་རྣམས་ཀུན་ཀྱང་ ༄༅། །ཡོངས་སུ་བསྡུ་བྱས་ཏེ། །ཅི་ནས་བདེ་གཤེགས་སྟོབས་ལ་འཇུག་པར་བསྔོ། །ཡངས་པ་ཇི་སྙེད་རྒྱལ་བས་གསུངས་པ་དང༌། །ཀུན་ཏུ་བཟང་ཞེས་གང་ལ་ གདགས་པ་ཡི། །རྒྱལ་བའི་སྲས་རྣམས་གང་ལ་གནས་གྱུར་པའི། །སྤྱོད་པ་དམ་པ་དེ་དག་སུ་འདོད་པས། །སེམས་ཅན་མ་ལུས་ཐམས་ཅད་བགྲང་བར་ནུས། །དུས་གསུམ་ སེམས་ཀྱང་མ་ལུས་ཀུན་བགྲང་ནུས། །གང་ལ་ཀུན་ཏུ་བཟང་པོར་མིང་གདགས་པ། །རྒྱལ་སྲས་དེ་ཡི་ཡོན་ཏན་མཐའ་མེད་དོ། །ནམ་མཁའ་སྤུ་རྩེས་བགྲང་བར་ནུས་ཀྱང་སྲིད། ། ཞིང་རྣམས་ཀུན་གྱི་རྡུལ་ཀྱང་བགྲང་བར་ནུས། །གང་ལ་རྒྱལ་སྲས་དྲང་སྲོང་ཆེ་གནས་པའི། །སྤྱོད་པ་དེ་དག་བགྲང་བར་མི་ནུས་སོ། །ཆོས་ཀྱི་དབྱིངས་ཚད་མེད་པ་ཞེས་བྱ་བ་སྟེ། ཡོངས་ སུ་བསྔོ་བ་བཅུ་པའོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། རྡོ་རྗེ་རྒྱལ་མཚན་གྱིས་ཡོངས་སུ་བསྔོ་བའི་ལེའུ་སྟེ་སུམ་ཅུའོ།། །། བམ་པོ་བཞི་བཅུ་རྩ་ལྔ་པ། དེ་ནས་བཅོམ་ལྡན་འདས་ལྷའི་རྒྱལ་པོ་དབང་སྒྱུར་གྱི་གནས་ཀྱི་ནོར་བུ་རིན་པོ་ཆེ་དམ་པའི་ཁང་པ་ན། བྱང་ཆུབ་སེམས་དཔའི་དགེ་འདུན་ཆེན་པོ་ཐམས་ ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་འཇིག་རྟེན་གྱི་ཁམས་གཞན་དང༌། གཞན་ནས་འདུས་པ་ཤ་སྟག་ཀུན་ཀྱང་བྱང་ཆུབ་སེམས་ དཔའི་ཡེ་ཤེས་ཀྱི་ཡུལ་དང་སྤྱོད་ཡུལ་ཐམས་ཅད་རབ་ཏུ་ཐོབ་པས་གནས་པ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཡུལ་ལ་འཇུག་ཅིང་གཞོལ་བའི་སྤྱོད་ཡུལ་མ་གཏང་ བ༑ འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བར་བྱ་བའི་དུས་བཞིན་དུ་ཐོགས་པ་མེད་པའི་བྱིན་གྱི་རླབས་རྣམ་པ་ཐ་དད་པས་བྱ་བ་ཐམས་ཅད་ཡང་དག་པར་སྟོན་པ་ ལ་མཁས་པ། བྱང་ཆུབ་སེམས་དཔའི་སྨོན་ལམ་ཐམས་ཅད་མངོན་པར་བསྒྲུབ་ཅིང་བསྐལ་པ་དང༌། ཞིང་དང༌། དུས་སུ་སྤྱོད་པ་ལ་གནས་པའི་རྒྱུན་མི་གཅོད་པ། བྱང་ཆུབ་སེམས་ དཔའི་བསོད་ནམས་དང༌། ཡེ་ཤེས་དང༌། རྫུ་འཕྲུལ་གྱི་ཚོགས་ཡོངས་སུ་རྫོགས་ཤིང་འགྲོ་བ་ཐམས་ཅད་ཉེ་བར་འཚོ་བ་མི་ཟད་པ་ལ་རབ་ཏུ་ཞུགས་པ། བྱང་ཆུབ་སེམས་དཔའི་ཤེས་ རབ་དང༌། ཐབས་ཐམས་ཅད་ཀྱི་ཕ་རོལ་ཏུ་ཕྱིན་པ་དམ་པ་ཐོབ་པ། བྱང་ཆུབ་སེམས་དཔའི་སྤྱོད་པས་འཁོར་བ་དང༌། མྱ་ངན་ལས་འདས་པའི་སྒོ་ཡང་དག་པར་བསྟན་ཅིང༌། ཤིན་ཏུ་ བསྒྲུབ་པའི་རྒྱུན་མི་གཅོད་པ། བྱང་ཆུབ་སེམས་དཔའི་བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པ་དང༌། མངོན་པར་ཤེས་པ་དང༌། རིག་པ་ དང༌། ཡེ་ཤེས་ལ་རྣམ་པར་རོལ་པའི་མངོན་པར་ཤེས་པས་བྱ་བ་ཐམས་ཅད་ཡང་དག་པར་སྟོན་པ་ལ་མཁས་པ། བྱང་ཆུབ་སེམས་དཔའི་རྫུ་འཕྲུལ་དང༌། སྟོབས་དང༌། དབང་ཐམས་ ༄༅། །ཅད་ཐོབ་ཅིང་མངོན་པར་འདུ་བྱ་བ་མེད་པའི་སེམས་སྐད་ཅིག་གིས། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་འདོང་བ་ལ་སྔོན་དུ་ འདྲེན་པའི་གཏམ་གྱི་སྐྱེས་བུ་དམ་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་ཡང་དག་པར་གཟུང་བ་དང༌། སངས་རྒྱས་ལ་མཆོད་པ་དང༌། རིམ་གྲོ་རྒྱ་ཆེན་པོ་ བྱ་བའི་དོན་དུ་མངོན་པར་བརྩོན་པ། བྱང་ཆུབ་སེམས་དཔའི་ལས་ཐམས་ཅད་ཡང་དག་པར་བླང་བ་མཉམ་པ་ཉིད་ཀྱིས་སྦྱོར་བས། འཇིག་རྟེན་གྱི་ཁམས་ཐམས་ཅད་དུ་ལུས་ཀྱི་ གཟུགས་བརྙན་རབ་ཏུ་འབྱུང་བ། ཆོས་ཀྱི་དབྱིངས་ཐམས་ཅད་དུ་ཆགས་པ་མེད་པའི་དབྱངས་རབ་ཏུ་སྒྲོག་པས། དུས་གསུམ་ཐམས་ཅད་དུ་ཆགས་པ་མེད་པའི་སེམས་དང་ཡེ་ ཤེས་ཀྱི་ཡུལ་རྒྱས་པར་འགེངས་པ། བྱང་ཆུབ་སེམས་དཔའི་ཡོན་ཏན་དང༌། ནན་ཏན་ཡོངས་སུ་རྫོགས་པ་ཐམས་ཅད་བསྐལ་པ་བརྗོད་དུ་མེད་པར་རྒྱུན་མི་འཆད་པར་ཡང་ དག་པར་བསྟན་པ་ལ་ཡོན་ཏན་བསྔགས་ཤིང༌། བརྗོད་པ་ཟད་མི་ཤེས་པ་ཤ་སྟག་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང༌། བྱང་ཆུབ་སེམས་ དཔའ་སེམས་དཔའ་ཆེན་པོ་རིན་པོ་ཆེའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་པདྨོའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་ གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་པདྨོ་དཔལ་གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་སྙིང་པོ་དང༌། བྱང་ཆུབ་སེམས་དཔའ་ སེམས་དཔའ་ཆེན་པོ་གཙང་བའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བ་དྲི་མ་མེད་པའི་སྙིང་པོ་ དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱན་རྣམ་པར་དགོད་པ་ཐམས་ཅད་རབ་ཏུ་སྣང་བར་སྟོན་པའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ ཤེས་རྣམ་པར་སྣང་བའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་ཡིད་དུ་འོང་བའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཙན་དན་དཔལ་ གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་མེ་ཏོག་དཔལ་གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་མེ་ཏོག་རྒྱས་པའི་དཔལ་གྱི་སྙིང་ པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་ལྷའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་དཔལ་གྱི་སྙིང་པོ་དང༌། བྱང་ཆུབ་ སེམས་དཔའ་སེམས་དཔའ་ཆེན་པོ་བསྒྲིབས་པ་མེད་པའི་ཡེ་ཤེས་རྣམ་པར་དག་པ་དཔལ་གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་དཔལ་གྱི་སྙིང་ ༄༅། །པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་དཔལ་གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་ པའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་དང་བྲལ་བའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་སྣ་ཚོགས་ རྒྱན་གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཟེར་གྱི་དྲ་བ་ཆེན་པོ་རབ་ཏུ་སྣང་བའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་ པོ་འོད་དྲི་མ་མེད་པའི་དཔལ་གྱི་གཟི་བརྗིད་བཟང་པོའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་གསེར་བཟང་པོ་དྲི་མ་མེད་པའི་དབྱིག་གིས་སྤྲས་པའི་ གཟི་བརྗིད་མཛེས་པའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་མཚན་ཐམས་ཅད་ཀྱིས་བརྒྱན་པས་རྣམ་པར་དག་པའི་དཔལ་གྱི་སྙིང་པོ་དང༌། བྱང་ཆུབ་ སེམས་དཔའ་སེམས་དཔའ་ཆེན་པོ་དཔལ་གྱི་བེའུ་རྡོ་རྗེ་འོད་འཕྲོ་བས་བརྒྱན་པའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་འོད་འབར་ཞིང་འཕྲོ་བའི་ དཔལ་གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མའི་རྒྱལ་པོ་འོད་རབ་ཏུ་སྣང་བའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ ནམ་མཁའི་མཛོད་ཡེ་ཤེས་བསྒྲིབས་པ་མེད་པའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དབྱངས་ཀྱི་དཀྱིལ་འཁོར་བསྒྲིབས་པ་མེད་ཅིང་ང་རོ་སྙན་པའི་སྙིང་ པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཀྱི་སྙིང་པོ་ཡོན་ཏན་གྱིས་འགྲོ་བ་ཐམས་ཅད་ཀྱི་སྨོན་ལམ་ཡང་དག་པར་འཛིན་པའི་སྙིང་པོ་དང༌། བྱང་ཆུབ་སེམས་ དཔའ་སེམས་དཔའ་ཆེན་པོ་རྒྱ་མཚོའི་རྒྱན་གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རི་རབ་དཔལ་གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ ཆེན་པོ་ཡོན་ཏན་ཐམས་ཅད་རྣམ་པར་དག་པའི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྙིང་པོ་དང༌། བྱང་ཆུབ་སེམས་དཔའ་སེམས་ དཔའ་ཆེན་པོ་སངས་རྒྱས་དཔལ་གྱི་སྙིང་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་གྲོལ་བའི་ཟླ་བ་དང༌། དེ་དག་ལ་སོགས་པ་བྱང་ཆུབ་སེམས་དཔའ་སེམས་ དཔའ་ཆེན་པོ་ཚད་མེད་པ། གཞལ་དུ་མེད་པ། གྲངས་མེད་པ། བསམ་གྱིས་མི་ཁྱབ་པ། མཚུངས་པ་མེད་པ། དཔག་ཏུ་མེད་པ། ཀུན་ཏུ་མཐའ་ཡས་པ། མུ་མེད་པ། ས་མཚམས་ མེད་པ། བརྗོད་དུ་མེད་པའི་ཡང་བརྗོད་དུ་མེད་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་སོགས་པའི་སངས་རྒྱས་ཀྱི་ཞིང་སྣ་ཚོགས་ནས་འདུས་པ་ཤ་ ༄༅། །སྟག་དང་ཐབས་གཅིག་ཏུ་ཞུགས་སོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་སངས་རྒྱས་ཀྱི་མཐུས་ཐེག་པ་ཆེན་པོ་ རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས། བྱང་ཆུབ་སེམས་དཔའ་ཏིང་ངེ་འཛིན་ཐེག་ པ་ཆེན་པོ་རབ་ཏུ་སྣང་བ་དེ་ལ་མཉམ་པར་བཞག་མ་ཐག་ཏུ། དེ་ནས་དེའི་ཚེ་ཕྱོགས་བཅུའི་འཇིག་རྟེན་གྱི་ཕྱོགས་རེ་རེའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བྱེ་བ་ཕྲག་ བཅུའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་ནས། སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་མཚན་རྡོ་རྗེའི་སྙིང་པོ་ཞེས་བྱ་ བར་མཐུན་པ་ཤ་སྟག་གིས་ཞལ་མངོན་པར་བསྟན་ཏེ། སངས་རྒྱས་བཅོམ་ལྡན་འདས་དེ་དག་གིས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེ་ལྟར་ཁྱོད་བྱང་ཆུབ་སེམས་ དཔའི་ཏིང་ངེ་འཛིན་ཐེག་པ་ཆེན་པོ་རབ་ཏུ་སྣང་བ་ལ་སྙོམས་པར་ཞུགས་པ་ལེགས་སོ། །ལེགས་སོ། །འདི་ལྟར་རིགས་ཀྱི་བུ་ཁྱོད་ལ་ཕྱོགས་བཅུའི་སངས་རྒྱས་བཅོམ་ལྡན་ འདས། སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་མཚན་རྡོ་རྗེའི་སྙིང་པོ་ཞེས་བྱ་བར་མཐུན་པ་ཤ་སྟག་གིས། བཅོམ་ལྡན་འདས་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་འདིའི་སྔོན་གྱི་སྨོན་ལམ་གྱི་བྱིན་གྱི་རླབས་དང༌། ཁྱོད་ཉིད་ཀྱི་ཡེ་ཤེས་ཀྱི་ཁྱད་པར་གྱིས་བྱང་ཆུབ་སེམས་ དཔའ་ཐམས་ཅད་ལ་སངས་རྒྱས་ཀྱི་ཆོས་སྣང་བ་བསམ་གྱིས་མི་ཁྱབ་པ་རབ་ཏུ་བརྗོད་ཅིང༌། ཡེ་ཤེས་ཀྱི་ས་ལ་འཇུག་པར་བྱ་བ་དང༌། དགེ་བའི་རྩ་བ་ཐམས་ཅད་ཡང་དག་པར་བསྡུ་བ་ དང༑ སངས་རྒྱས་ཀྱི་ཆོས་ཐམས་ཅད་རབ་ཏུ་དབྱེ་བ་ལ་མཁས་པར་བྱ་བ་དང༌། ཆོས་ཐམས་ཅད་ལ་ཡེ་ཤེས་ཤིན་ཏུ་ཡངས་པར་བྱ་བ་དང༌། ཤིན་ཏུ་ལེགས་པར་གནས་པའི་ཆོས་ རབ་ཏུ་བསྟན་པ་དང༌། ཡེ་ཤེས་ཐ་མི་དད་པ་རྣམ་པར་སྦྱང་བ་དང༌། འཇིག་རྟེན་གྱི་ཆོས་ཐམས་ཅད་ཀྱིས་གོས་པ་མེད་པར་བྱ་བ་དང༌། འཇིག་རྟེན་ལས་འདས་པའི་དགེ་བའི་རྩ་བ་ ཡོངས་སུ་དག་པར་བྱ་བ་དང༌། ཡེ་ཤེས་བསམ་གྱིས་མི་ཁྱབ་པའི་ཡུལ་ཁོང་དུ་ཆུད་པར་བྱ་བ་ནས་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་གྱི་བར་དུ་ཁོང་དུ་ཆུད་པར་བྱ་བ་དང༌། འདི་ ལྟར་བྱང་ཆུབ་སེམས་དཔའི་ས་བཅུ་བརྩམས་པ་རབ་ཏུ་ཐོབ་པར་བྱ་བ་དང༌། བྱང་ཆུབ་སེམས་དཔའི་ས་མ་ནོར་བར་རྣམ་པར་དགོད་པ་ཤིན་ཏུ་བསྟན་པ་དང༌། སངས་རྒྱས་ཀྱི་ཆོས་ཐམས་ ཅད་ལ་ཡང་དག་པར་དམིགས་པར་བྱ་བ་དང༌། ཟག་པ་མེད་པའི་ཆོས་ཀྱི་བྱེ་བྲག་རྣམ་པར་བསྒོམ་པ་དང༌། རྣམ་པར་དབྱེ་བ་ཤིན་ཏུ་རྣམ་པར་ཕྱེ་བའི་ཤེས་རབ་ཀྱི་སྣང་བ་ཆེན་པོ་ལ་ ༄༅། །མཁས་པའི་ཡེ་ཤེས་ཀྱི་རྒྱན་ཐོབ་པར་བྱ་བ་དང༌། ཤིན་ཏུ་བརྟགས་པའི་ཡེ་ཤེས་ཀྱི་སྒོ་ལ་འཇུག་པར་བྱ་བ་དང༌། གནས་ཀྱི་རྣམ་པ་ཅི་རིགས་སུ་བརྗོད་པ་ དང༌། སྤོབས་པའི་སྣང་བ་དམའ་བ་མེད་པར་ཐོབ་པར་བྱ་བ་དང༌། ཐ་དད་པ་ཡང་དག་པར་ཤེས་པ་ཆེན་པོའི་ས་ཤིན་ཏུ་རྟོགས་པར་བྱ་བ་དང༌། བྱང་ཆུབ་ཀྱི་སེམས་ལ་དྲན་པ་ཉམས་ པ་མེད་པར་བྱ་བ་དང༌། སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བ་དང༌། ཐམས་ཅད་དུ་སོང་བའི་བློ་རྣམ་པར་གདོན་མི་ཟ་བ་ལ་མཁས་པ་རབ་ཏུ་ཐོབ་པར་བྱ་བའི་ ཕྱིར་བྱིན་གྱིས་བརླབ་པ་མཛད་དོ། །དེ་བས་ན་རིགས་ཀྱི་བུ་ཁྱོད་ཀྱིས་ཆོས་ཀྱི་སྒོ་རབ་ཏུ་དབྱེ་བ་ལ་མཁས་པར་འགྱུར་བའི་ཆོས་ཀྱི་རྣམ་གྲངས་འདི་ལ་སངས་རྒྱས་ཀྱི་མཐུ་དང༌། དེ་བཞིན་གཤེགས་པའི་ཡེ་ཤེས་སྣང་བའི་བྱིན་གྱི་རླབས་ཀྱིས་རང་གི་དགེ་བའི་རྩ་བ་ཡོངས་སུ་དག་པར་བྱ་བ་དང༌། ཆོས་ཀྱི་དབྱིངས་ཤིན་ཏུ་སྦྱངས་པ་དང༌། སེམས་ཅན་ གྱི་ཁམས་ཐམས་ཅད་ལ་ཕན་གདགས་པ་དང༌། ཆོས་ཀྱི་སྐུའི་ཡེ་ཤེས་ཀྱི་ལུས་ལ་འཇུག་པར་བྱ་བ་དང༌། སངས་རྒྱས་ཐམས་ཅད་ཀྱིས་དབང་བསྐུར་བ་ཡང་དག་པར་བླང་བ་དང༌། འཇིག་རྟེན་གྱི་ཁམས་ཐམས་ཅད་དུ་ཤིན་ཏུ་འཕགས་པའི་ལུས་འབྱུང་བར་བྱ་བ་དང༌། འཇིག་རྟེན་གྱི་ལམ་གྱི་རྒྱུད་ཐམས་ཅད་ལས་ཡང་དག་པར་འདའ་བར་བྱ་བ་དང༌། འཇིག་རྟེན་ལས་འདས་པའི་ཆོས་ཀྱི་ཚུལ་ཡོངས་སུ་དག་པར་བྱ་བ་དང༌། ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར་སྤོབས་པ་སྐྱེད་ཅིག །དེ་ནས་སངས་རྒྱས་ བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་ཟིལ་གྱིས་མི་ནོན་པའི་ལུས་ཉེ་བར་བསྒྲུབ་པ་མཛད་དོ། །ཐོགས་པ་མེད་པའི་སྤོབས་པས་ཤིན་ཏུ་སྟོན་པ་ཉེ་ བར་བསྒྲུབ་པ་མཛད་དོ། །ཤིན་ཏུ་སྦྱངས་པའི་ཡེ་ཤེས་རྣམ་པར་ཕྱེ་བ་ལ་འཇུག་པ་ཉེ་བར་བསྒྲུབ་པ་མཛད་དོ། །དྲན་པ་ཉམས་པ་མེད་པའི་བྱིན་གྱི་རླབས་ཉེ་བར་བསྒྲུབ་པ་མཛད་དོ། །བློ་ གྲོས་ཤིན་ཏུ་ངེས་པར་རྟོགས་པས་མཁས་པ་ཉེ་བར་བསྒྲུབ་པ་མཛད་དོ། །ཐམས་ཅད་ཀྱི་རྗེས་སུ་སོང་བའི་བློའི་རྗེས་སུ་འགྲོ་བ་ཉེ་བར་བསྒྲུབ་པ་མཛད་དོ། །ཡང་དག་པར་རྫོགས་པའི་ སངས་རྒྱས་ཀྱི་སྟོབས་ཐུབ་པ་མེད་པ་ཉེ་བར་བསྒྲུབ་པ་མཛད་དོ། །དེ་བཞིན་གཤེགས་པའི་མི་འཇིགས་པ་ཆེ་ཞིང་ཞུམ་པ་མེད་པ་ཉེ་བར་བསྒྲུབ་པ་མཛད་དོ། །ཐམས་ཅད་མཁྱེན་པའི་ ཡེ་ཤེས་དང་ཐ་དད་པ་ཡང་དག་པར་མཁྱེན་པས་རྣམ་པར་དབྱེ་བའི་ཆོས་ཀྱི་ཚུལ་ཤིན་ཏུ་རྟོགས་པར་བྱ་བ་ཉེ་བར་བསྒྲུབ་པ་མཛད་དོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་ དང་ཐུགས་ཀྱི་རྒྱན་ཤིན་ཏུ་རྣམ་པར་ཕྱེ་བ་མངོན་པར་བསྡུ་བ་ཉེ་བར་བསྒྲུབ་པ་མཛད་དོ། །དེ་ཅིའི་ཕྱིར་ཞེ་ན། དེ་ནི་ཏིང་ངེ་འཛིན་དེ་ཉིད་ཀྱི་ཆོས་ཉིད་རབ་ཏུ་ཐོབ་པ་དང༌། སྔོན་གྱི་སྨོན་ ༄༅། །ལམ་གྱིས་མངོན་པར་བསྒྲུབས་པ་དང༌། ལྷག་པའི་བསམ་པ་ཤིན་ཏུ་རྣམ་པར་སྦྱངས་པ་དང༌། ཡེ་ཤེས་ཀྱི་དཀྱིལ་འཁོར་ཤིན་ཏུ་སྦྱངས་པ་དང༌། ཚོགས་ ཤིན་ཏུ་བསགས་པ་དང༌། ཡོངས་སུ་སྦྱངས་པ་ཤིན་ཏུ་བྱས་པ་དང༌། དྲན་པའི་སྣོད་ཚད་མེད་པ་དང༌། མོས་པ་རྣམ་པར་དག་ཅིང་འོད་ཤིན་ཏུ་གསལ་བ་དང༌། གཟུངས་ཀྱི་སྒོ་ཐ་དད་པ་ མེད་པར་ཐོབ་པ་དང༌། ཆོས་ཀྱི་དབྱིངས་ཀྱི་ཡེ་ཤེས་ཀྱི་ཕྱག་རྒྱས་ཤིན་ཏུ་བཏབ་པའི་ཕྱིར་རོ། །དེ་ནས་སངས་རྒྱས་བཅོམ་ལྡན་འདས་དེ་དག་གིས་དེ་དག་ན་བཞུགས་བཞིན་དུ་ རྫུ་འཕྲུལ་གྱིས་མཐུས་སོ་སོ་ནས་ཕྱག་གཡས་པ་བརྐྱང་སྟེ། བྱང་ཆུབ་སེམས་དཔའ་རྡོ་རྗེའི་སྙིང་པོའི་མགོ་ལ་བྱུག་པ་མཛད་དོ། །སངས་རྒྱས་བཅོམ་ལྡན་འདས་དེ་དག་གིས་ བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་རེག་མ་ཐག་ཏུ་དེ་ཉིད་ཀྱི་ཚེ་ཏིང་ངེ་འཛིན་དེ་ལས་ལངས་ནས། བྱང་ཆུབ་སེམས་དཔའ་དེ་དག་ལ་སྨྲས་པ། ཀྱེ༑ རྒྱལ་བའི་སྲས་དག ། བྱང་ཆུབ་སེམས་དཔའི་སྨོན་ལམ་འདི་ནི་ཤིན་ཏུ་རྣམ་པར་གདོན་མི་ཟ་བ་སྟེ། ཐ་མི་དད་པ། ལྟར་མེད་པ། ཆོས་ཀྱི་དབྱིངས་ཀྱིས་ཀླས་པར་ཡངས་པ། ནམ་མཁའི་དབྱིངས་ཀྱི་ མཐར་ཐུག་པ། ཕྱི་མའི་མཐའི་མུར་ཐུག་པ་སངས་རྒྱས་ཀྱི་ཞིང་ཐམས་ཅད་དང༌། སེམས་ཅན་གྱི་ཁམས་ཐམས་ཅད་དུ་རྒྱས་པར་ཁྱབ་པ། འགྲོ་བ་ཐམས་ཅད་ཡོངས་སུ་སྐྱོབ་ པ༑ དེ་བཞིན་གཤེགས་པ་ཐམས་ཅད་ཀྱིས་བྱིན་གྱི་བརླབས་པ་སྟེ། ཀྱེ༑ རྒྱལ་བའི་སྲས་དག །དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདས་པའི་སངས་རྒྱས་བཅོམ་ ལྡན་འདས་རྣམས་ཀྱི་ཡེ་ཤེས་ཀྱི་ས་ལ་ཡང་རབ་ཏུ་འཇུག་པར་འགྱུར་རོ། །མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ཀྱི་ས་ལ་ཡང་རབ་ཏུ་འཇུག་པར་འགྱུར་རོ། །ད་ ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ཀྱི་ས་ལ་ཡང་རབ་ཏུ་འཇུག་པར་འགྱུར་རོ། །ཀྱེ༑ རྒྱལ་བའི་སྲས་དག །དེ་ལ་བཅུ་པོ་འདི་དག་ནི་བྱང་ཆུབ་སེམས་དཔའ་ རྣམས་ཀྱི་ཡེ་ཤེས་ཀྱི་ས་རྣམས་ཏེ། གང་ལ་བསམས་ཏེ་བདག་གིས་དེ་སྐད་དུ་སྨྲས་པ་དེ་དག་ནི་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ ཀྱིས་གསུངས་སོ། །གསུང་ངོ༌། །གསུང་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། རབ་ཏུ་དགའ་བ་ཞེས་བྱ་བ་བྱང་ཆུབ་སེམས་དཔའི་ས་དང་པོ་དང༌། དྲི་མ་དང་བྲལ་བ་ཞེས་བྱ་བ་བྱང་ཆུབ་ སེམས་དཔའི་ས་གཉིས་པ་དང༌། འོད་བྱེད་པ་ཞེས་བྱ་བ་བྱང་ཆུབ་སེམས་དཔའི་ས་གསུམ་པ་དང༌། འོད་འཕྲོ་བ་ཅན་ཞེས་བྱ་བ་བྱང་ཆུབ་སེམས་དཔའི་ས་བཞི་པ་དང༌། རྒྱལ་བར་ དཀའ་བ་ཞེས་བྱ་བ་བྱང་ཆུབ་སེམས་དཔའི་ས་ལྔ་པ་དང༌། མངོན་སུམ་པ་ཞེས་བྱ་བ་བྱང་ཆུབ་སེམས་དཔའི་ས་དྲུག་པ་དང༌། རིང་དུ་སོང་བ་ཞེས་བྱ་བ་བྱང་ཆུབ་སེམས་དཔའི་ས་བདུན་ ༄༅། །པ་དང༌། མི་གཡོ་བ་ཞེས་བྱ་བ་བྱང་ཆུབ་སེམས་དཔའི་ས་བརྒྱད་པ་དང༌། ལེགས་པའི་བློ་གྲོས་ཞེས་བྱ་བ་བྱང་ཆུབ་སེམས་དཔའི་ས་དགུ་པ་དང༌། ཆོས་ཀྱི་ སྤྲིན་ཅེས་བྱ་བ་བྱང་ཆུབ་སེམས་དཔའི་ས་བཅུ་པ་སྟེ། ཀྱེ༑ རྒྱལ་བའི་སྲས་དག །དེ་རྣམས་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ས་བཅུ་སྟེ། དེ་ནི་འདས་པ་ དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་སོ། །གསུང་ངོ༌། །གསུང་བར་འགྱུར་རོ། །ཀྱེ༑རྒྱལ་བའི་སྲས་དག །བདག་གིས་ནི་སངས་ རྒྱས་ཀྱི་ཞིང་གང་ནའང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་བྱང་ཆུབ་སེམས་དཔའི་ས་བཅུ་པོ་འདི་དག་མི་གསུང་བ་དེ་ལྟ་བུ་མ་ མཐོང་ངོ༌། །དེ་ཅིའི་ཕྱིར་ཞེ་ན། ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ལམ་ཡོངས་སུ་སྦྱོང་བའི་ཆོས་སྣང་བའི་ སྒོ་འདི་ནི་ཡང་དག་ཕུལ་ཞེས་བྱ་བ་ཡིན་ཏེ། འདི་ལྟར་བྱང་ཆུབ་སེམས་དཔའི་ས་རྣམ་པར་དགོད་པ་ཤིན་ཏུ་བསྟན་པའོ། །ཀྱེ༑ རྒྱལ་བའི་སྲས་དག །གནས་འདི་ནི་བསམ་གྱི་མི་ ཁྱབ་པ་སྟེ། འདི་ལྟར་བྱང་ཆུབ་སེམས་དཔའ་རྣམས་ཀྱིས་ཤེས་པའོ། །དེ་ནས་དེ་ལྟར་བྱང་ཆུབ་སེམས་དཔའ་རྡོ་རྗེའི་སྙིང་པོས། བྱང་ཆུབ་སེམས་དཔའི་ས་བཅུ་པོ་འདི་དག་ མིང་ཙམ་ཞིག་བརྗོད་དེ། ཅང་མི་ཟེར་བར་འདུག་ནས་དེ་ལས་རབ་ཏུ་ཕྱེ་སྟེ་མ་བཤད་པ་དང༌། དེ་ནས་བྱང་ཆུབ་སེམས་དཔའི་འཁོར་དེ་དག་ཐམས་ཅད་བྱང་ཆུབ་སེམས་དཔའི་ས་བཅུ་ པོ་དེ་དག་གི་མིང་ཙམ་ཞིག་ཐོས་ནས། རབ་ཏུ་ཕྱེ་སྟེ་མ་བརྗོད་པས་སྐོམ་པར་གྱུར་ནས། དེ་དག་འདི་སྙམ་དུ་སེམས་ཏེ། དེ་ལྟར་བྱང་ཆུབ་སེམས་དཔའ་རྡོ་རྗེའི་སྙིང་པོས་བྱང་ཆུབ་སེམས་ དཔའི་ས་བཅུ་པོ་དེ་དག་གི་མིང་ཙམ་ཞིག་བརྗོད་དེ་ཅང་མི་ཟེར་བར་འདུག་ན། དེ་ལས་རབ་ཏུ་ཕྱེ་ཞིང་མི་སྟོན་པ་དེ་ལ་རྒྱུ་ནི་གང༌། རྐྱེན་ནི་ཅི་ཞིག་ཡོད་སྙམ་པ་དང༌། དེའི་ཚེ་བྱང་ཆུབ་ སེམས་དཔའ་འཁོར་འདུས་པ་དེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་གྲོལ་བའི་ཟླ་བ་ཞེས་བྱ་བ་འདུས་ཤིང་འདུག་འདུག་སྟེ། དེ་ནས་བྱང་ཆུབ་སེམས་དཔའ་ རྣམ་པར་གྲོལ་བའི་ཟླ་བས་བྱང་ཆུབ་སེམས་དཔའི་འཁོར་དེ་དག་གི་སེམས་ཀྱི་ཡོངས་སུ་རྟོག་པ་སེམས་ཀྱིས་ཡོངས་སུ་ཤེས་ནས། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་གླུའི་ དབྱངས་ཀྱིས་ཚིགས་སུ་བཅད་དེ་དོན་དེ་དྲིས་སོ། །ཅི་ཕྱིར་རྟོག་པ་རྣམ་དག་ཅིང༌། །དྲན་དང་ཡེ་ཤེས་ལྡན་པ་ཡིས། །ས་ཡི་མཆོག་ནི་བརྗོད་བྱས་ཏེ། །མཁས་པས་རྣམ་པར་ཕྱེ་མི་ བཤད། །འདི་ཀུན་ངེས་པར་རྟོགས་པ་སྟེ། །བྱང་ཆུབ་སེམས་དཔའ་གྲགས་ཆེན་ཡིན། །ཅི་ཕྱིར་ཁྱོད་ནི་ས་བརྗོད་དེ། །རབ་ཏུ་ཕྱེ་བ་བཤད་མི་བགྱི། །རྒྱལ་སྲས་འཇིགས་མེད་འདི་དག་ ༄༅། །ནི༑ ༑ཀུན་ཀྱང་ཤིན་ཏུ་ཉན་པར་འདོད། །ས་ཡི་དོན་ཚུལ་ཡང་དག་ཏུ། །རྣམ་པར་ཕྱེ་སྟེ་བཤད་པར་མཛོད། །འཁོར་འདི་ཤིན་ཏུ་རྣམ་དང་སྟེ། །ལེ་ལོ་མེད་ཅིང་ དགེ་དང་ལྡན། །དག་པའི་མཆོག་ལ་གནས་པ་སྟེ། །ཡོན་ཏན་ཡེ་ཤེས་ལྡན་པ་ཡིན། །ཕན་ཚུན་གཅིག་ལ་གཅིག་ལྟ་ཞིང༌། །ཀུན་ཀྱང་རིམ་གྲོ་བཅས་པར་གནས། །སྦྲང་རྩི་ཇི་ལྟར་ སྤང་མིན་པ། །དེ་ལྟར་བདུད་རྩི་མཆོག་ཀྱང་འདོད། །རྡོ་རྗེའི་སྙིང་པོ་འཇིགས་མེད་པ། །ཤེས་རབ་ཆེན་པོས་དེ་ཐོས་ནས། །འཁོར་རྣམས་དགའ་བར་བྱ་བའི་ཕྱིར། །བདེ་བར་གཤེགས་ པའི་སྲས་ལ་སྨྲས། །སངས་རྒྱས་སྐུ་རབ་ཡང་དག་འབྱུང་བས་ན། །བྱང་ཆུབ་སེམས་དཔའི་སྤྱོད་པ་རབ་བསྟན་ཅིང༌། །ས་རྒྱུ་དམ་པ་རྣམ་པར་དབྱེ་བྱ་བ། །དེ་ནི་རྨད་བྱུང་མཆོག་ ཏུ་དགའ་བ་ཡིན། །ཕྲ་ཞིང་བལྟ་དཀའ་རྣམ་པར་རྟོག་པ་སྤངས། །སེམས་ཀྱི་ས་དང་བྲལ་བས་བསྒྲུབ་པར་དགའ། །མཁས་པ་རྣམས་ཀྱི་ཟག་མེད་སྤྱོད་ཡུལ་ཏེ། །འགྲོ་བ་རྣམས་ ཀྱིས་དེ་ཐོས་མོས་པར་འགྱུར། །རྡོ་རྗེ་ལྟ་བུར་བསམ་པ་རབ་བཞག་སྟེ། །སངས་རྒྱས་ཡེ་ཤེས་མཆོག་ལ་མོས་བྱས་ཤིང༌། །བདག་མེད་པ་ཡི་སེམས་ཀྱི་ས་ཤེས་ན། །ཡེ་ཤེས་ དམ་པ་འདི་གཟོད་མཉན་པར་ནུས། །ཇི་ལྟར་བར་སྣང་ཚོན་རིས་བྲི་བ་དང༌། །ནམ་མཁའི་དབྱིངས་ལ་རླུང་གནས་ཇི་བཞིན་དུ། །དེ་ལྟར་ཡེ་ཤེས་ཟག་པ་མེད་པ་ཡང༌། །ཤིན་ཏུ་ ལྟ་དཀའ་ཐུབ་པས་རྣམ་པར་ཕྱེ། །དེ་ལ་བདག་གི་སེམས་ནི་འདི་སྙམ་བྱེད། །སངས་རྒྱས་ཡེ་ཤེས་དམ་པ་བསམ་ཡས་ལ། །འགྲོ་བ་གང་རྣམས་དང་བར་བྱེད་དཀོན་ཞེས། །དེ་ཡི་ཕྱིར་ན་མ་ སྨྲས་མ་བཤད་དོ། །དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་འདི་སྐད་ཅེས་སྨྲས་སོ། །ཀྱེ༑ རྒྱལ་བའི་སྲས་། འཁོར་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འདི་དག་ལ་བསམ་པ་ཤིན་ཏུ་སྦྱངས་པ། ཀུན་ཏུ་རྟོག་པ་ཡོངས་སུ་སྦྱངས་པ། སྤྱད་པར་བྱ་བ་ཤིན་ཏུ་སྤྱད་པ། ཚོགས་ ཤིན་ཏུ་བསགས་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཤིན་ཏུ་བསྙེན་བཀུར་བ། ཡོན་ཏན་དང་ཡེ་ཤེས་ཚད་མེད་པ་དང་ལྡན་པ། ཐེ་ཚོམ་དང་ནེམ་ནུར་མེད་པ། ཉོན་མོངས་པ་དང༌། བྲལ་བ། མོས་པ་དང་ལྷག་པའི་བསམ་པ་ལ་རབ་ཏུ་གནས་པ། གཞན་གྱི་དྲིང་མི་འཇོག་པ་ཤ་སྟག་ཚོགས་པས་ཡོངས་སུ་དག་པ་ཡིན་གྱི། ཀྱེ༑ རྒྱལ་བའི་སྲས། དེ་བཞིན་གཤེགས་ པའི་བྱིན་གྱིས་ལེགས་པར་བཤད་པ་མཛོད་ཅིག་དང༌། བྱང་ཆུབ་སེམས་དཔའ་འདི་དག་ཐམས་ཅད་ནི་རྣམ་པར་འདི་ལྟ་བུའི་གནས་ཟབ་མོ་ལ་མངོན་སུམ་དུ་གནས་པ་ཤ་སྟག་གོ །དེ་ནས་ བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་དོན་འདི་ཉིད་གསལ་བར་བཟླས་པའི་ཕྱིར། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་ཚིགས་སུ་བཅད་དེ་སྨྲས་པ། བྱང་ཆུབ་སེམས་ ༄༅། །དཔའི་སྤྱོད་པ་བླ་མེད་པ། །ས་རྣམས་རབ་ཕྱེ་རྣམ་དགོད་བརྟགས་པ་ཡི། །ཡེ་ཤེས་སྦྱོང་ཞིང་བྱང་ཆུབ་འཐོབ་བྱེད་པ། །མཆོག་དང་དམ་པ་ཞི་བའི་ཆོས་ རྣམས་ཤོད། །འཁོར་འདི་དག་པ་ཉོན་མོངས་མེད་པའི་མཆོག །མོས་དང་བསམ་པ་ཤིན་ཏུ་སྦྱངས་པ་སྟེ། །སངས་རྒྱས་བྱེ་བ་མང་ལ་སྤྱོད་པ་སྤྱད། །ས་འདི་བརྟག་ལ་ཡིད་ཆེས་ ལྡན་པ་ཡིན། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བ་ལ་འདི་སྐད་ཅེས་སྨྲས་སོ། །ཀྱེ༑ རྒྱལ་བའི་སྲས། འཁོར་འདི་ལྟར་ བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་པ་འདི་ལྟ་བུའི་གནས་ཟབ་མོ་ལ་བསམ་པ་ཤིན་ཏུ་སྦྱངས་པ། ཀུན་ཏུ་རྟོག་པ་ཡོངས་སུ་སྦྱངས་པ། སྤྱོད་པ་ཤིན་ཏུ་སྤྱད་ པ༑ ཚོགས་ཤིན་ཏུ་བསགས་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ་དགེ་བའི་རྩ་བ་ཤིན་ཏུ་བསགས་པ། ཡོན་ཏན་དང་ཡེ་ཤེས་ཚད་མེད་པ་དང་ལྡན་པ། ཐེ་ཚོམ་དང་ནེམ་ནུར་ མེད་པ། ཉོན་མོངས་པ་དང་བྲལ་བ། མོས་པ་དང་ལྷག་པའི་བསམ་པ་ལ་རབ་ཏུ་གནས་པ། གཞན་གྱི་དྲིང་མི་འཇོག་པ་ཤ་སྟག་ཚོགས་པས་ཤིན་ཏུ་དག་པ་ཡང་ཡིན་ན། འོན་ ཀྱང་སེམས་ཅན་མོས་པ་ཆུང་ངུ་གཞན་དག་གིས་ཟབ་མོའི་རྣམ་པ་འདི་ལྟ་བུ་བསམ་གྱིས་མི་ཁྱབ་པའི་གནས་དག་ཐོས་པར་གྱུར་ལ། ཐོས་ནས་ཀྱང་ཐེ་ཚོམ་དང་ཡིད་གཉིས་སུ་གྱུར་ ན༑ དེ་དག་ལ་ཡུན་རིང་པོར་གནོད་པ་དང༌། དོན་མེད་པ་དང༌། མི་བདེ་བའི་རྒྱུར་འགྱུར་བས། འདི་ལྟ་ཞིག་ཏུ་སྙིང་བརྩེ་བའི་ཕྱིར། བདག་ནི་ཅང་མི་ཟེར་བར་འདུག་པ་ཉིད་དུ་མོས་སོ། །དེ་ནས་བྱང་ ཆུབ་སེམས་དཔའ་རྡོ་རྗེའི་སྙིང་པོས་དོན་འདི་ཉིད་གསལ་བར་བསྟན་པའི་ཕྱིར་ཚིགས་སུ་བཅད་པ་འདི་དག་སྨྲས་སོ། །འཁོར་འདི་རྣམ་དག་ཤེས་རབ་ཡངས་པ་སྟེ། །ཟབ་ཅིང་གསལ་བའི་ སྤྱོད་ལྡན་རྟོགས་ཤེས་ཤིང༌། །གཞན་དྲིང་མི་འཇོག་རི་རྒྱལ་བཞིན་མི་གཡོ། །བསམ་རྟོག་མི་འཁྲུག་རྒྱ་མཚོ་ཆེན་པོ་འདྲ། །འོན་ཀྱང་མ་རྟོགས་མི་ཤེས་མ་སྤྱད་པ། །རྣམ་ཤེས་ཡུལ་གནས་ དོན་ལ་ཤེས་མེད་པས། །ཐོས་ཤིང་མ་ཆེས་འཕྲལ་དུ་ངན་སོང་ལྷུང༌། །དེ་དག་སྙིང་བརྩེས་ཡེ་ཤེས་ས་མ་བཤད། །དེ་ནས་བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས། ཡང་བྱང་ ཆུབ་སེམས་དཔའ་རྡོ་རྗེའི་སྙིང་པོ་ལ་གསོལ་བ་བཏབ་པ། །ཀྱེ༑རྒྱལ་བའི་སྲས། ལེགས་པར་བཤད་པ་མཛོད་ཅིག་དང༌། དེ་བཞིན་གཤེགས་པའི་བྱིན་གྱིས་རྣམ་པ་འདི་ལྟ་བུ་བསམ་ གྱིས་མི་ཁྱབ་པའི་གནས་འདི་དག་ཀྱང་གཞན་དུ་མི་འགྱུར་བ་དང༌། ལེགས་པར་ཡིད་ཆེས་པར་འགྱུར་རོ། །དེ་ཅིའི་ཕྱིར་ཞེ་ན། ཀྱེ༑ རྒྱལ་བའི་སྲས། དོན་འདི་ལྟར་ས་ཤིན་ཏུ་བསྟན་པ་ འདི་བཤད་པའི་ཚེ་ཆོས་ཉིད་རབ་ཏུ་ཐོབ་པས། སངས་རྒྱས་ཐམས་ཅད་ཀྱིས་ཀྱང་དགོངས་པར་འགྱུར། བྱང་ཆུབ་སེམས་དཔའ་ཐམས་ཅད་ཀྱང་ཡེ་ཤེས་ཀྱི་ས་འདི་ཡོངས་སུ་བསྲུང་ ༄༅། །བའི་དོན་དུ་རབ་ཏུ་བརྩོན་པར་བྱེད་དོ། །དེ་ཡང་ཅིའི་ཕྱིར་ཞེ་ན། འདི་ནི་སྤྱོད་པའི་ས་དང་པོ་སྟེ། འདི་ནི་སངས་རྒྱས་ཀྱི་ཆོས་ཐམས་ཅད་ཡང་དག་པར་འགྲུབ་ པའི་གཞི་ཡིན་ནོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། ཡི་གེ་དང་འབྲུ་འགྲངས་པ་ཇི་སྙེད་དུ་བསྟན་པ་དེ་དག་ཐམས་ཅད་ཀྱི་སྔོན་དུ་འགྲོ་བའང་ཡི་གེའི་ཕྱི་མོའོ། །ཐ་མར་ ཡང་ཡི་གེའི་ཕྱི་མོ་ལ་ཐུག་སྟེ། ཡི་གེའི་ཕྱི་མོ་བསྟན་པས་མ་ཁྱབ་པ་དེ་ལྟ་བུའི་ཡི་གེ་དང་འབྲུ་འགྲངས་པ་བསྟན་པ་ནི་གང་ཡང་མེད་དོ། །ཀྱེ༑ རྒྱལ་བའི་སྲས། དེ་བཞིན་དུ་སངས་ རྒྱས་ཀྱི་ཆོས་ཐམས་ཅད་ཀྱང་སྤྱོད་པས་རབ་ཏུ་འགྲུབ་པས་ས་སྔོན་དུ་འགྲོའོ། །རང་བྱུང་གི་ཡེ་ཤེས་ཀྱི་མཐར་ཐུག་པར་འགྱུར་བས་སའི་མཐར་ཐུག་པའོ། །དེ་བས་ན། །ཀྱེ༑ རྒྱལ་བའི་ སྲས། ཤོད་ཅིག་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་ཡོངས་སུ་བསྲུང་བའི་ཕྱིར་བྱིན་གྱིས་རློབ་པ་མཛད་དོ། །དེ་ནས་ བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་དོན་འདི་ཉིད་གསལ་བར་བཟླས་པའི་ཕྱིར། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་ཚིགས་སུ་བཅད་དེ་སྨྲས་པ། ས་དང་ སྤྱོད་འཇུག་བྱང་ཆུབ་འགྱུར་བ་ཡེ་ཤེས་སྒྲུབ་བྱེད་པ། །སྤྱོད་པ་རྣམ་དག་ཐམས་ཅད་མཁྱེན་པའི་སྲས་ཀྱིས་ལེགས་པར་ཤོད། །ཕྱོགས་བཅུའི་རྒྱལ་བ་བདེ་གཤེགས་ཀུན་མགོན་ འདྲེན་པ་ཇི་སྙེད་པ། །ཁྱུ་མཆོག་དེ་ཀུན་ཡེ་ཤེས་འབྱུང་གནས་སྟོན་ལ་དགོངས་པ་མཛད། །འདི་ནི་དང་པོ་ཞུགས་པའི་ཤེས་སྤྱོད་འདི་ཡི་མཐར་ཐུག་སྟེ། རྒྱལ་བའི་ཆེས་རབ་གཞལ་ཡས་ ཇི་སྙེད་དེ་དག་འབྱུང་གནས་འདི། །ཡི་གེ་འགྲངས་པའི་ཕྱི་མོའི་རྗེས་འགྲོ་སྔོན་དུ་དེ་འགྲོ་ལྟར། །དེ་བཞིན་ས་མཆོག་བློ་ཡི་ཡུལ་དུ་ཐ་མ་ཐུག་པར་འདོད། །དེ་ནས་བྱང་ཆུབ་སེམས་དཔའ་ དེ་དག་ཐམས་ཅད་ཀྱིས་དབྱངས་ཀྱི་ང་རོ་གཅིག་ཏུ་གླུའི་དབྱངས་ཀྱིས་ཚིགས་སུ་བཅད་དེ། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་དོན་འདི་ཉིད་ཀྱི་ཕྱིར་གསོལ་བ་བཏབ་པ། བློ་ཡངས་ དམ་པའི་ཕུལ་མངའ་བ། །སྤོབས་པ་མཐའ་ཡས་རྣམ་པར་དབྱེ་བ་རྟོགས་མཁྱེན་པས། །ཡིད་དུ་འོང་བའི་གསུང་དབྱངས་ཀྱིས། །ཀུན་ལ་ཕན་དོན་དམ་པ་བཤད་པ་མཛོད། །དྲན་དང་དགའ་ བས་སྤྱོད་དག་པ། །སྟོབས་བཅུའི་སྟོབས་ཀྱི་ཤུགས་སོགས་ཡོན་ཏན་ལྡན་པ་ཡི། །ས་ཡི་དམ་པ་མཆོག་གི་རྣམས། །ཐ་དད་ཡང་དག་དོན་མཁྱེན་སྤྱོད་པས་ཤོད། །ཞི་སྡོམ་བསྒྲུབ་ པའི་ཡིད་ལྡན་པ། །ང་རྒྱལ་དྲེགས་དང་ལྟ་བའི་ཉོན་མོངས་ཞིར་གྱུར་པས། །འཁོར་འདིར་ཐེ་ཚོམ་བྲལ་བ་སྟེ། །ཁྱོད་ཀྱིས་ལེགས་པར་བཤད་དུ་རེ་ཞིང་སྡོད། །སྐོམ་པ་བསིལ་བའི་ཆུ་ འདོད་བཞིན། །བཀྲེས་པ་ཁ་ཟས་ནད་པ་སྨན་རབ་འདོད་པ་དང༌། །བུང་བ་སྦྲང་རྩི་འདོད་པ་ལྟར། །དེ་བཞིན་འཁོར་འདི་ཁྱོད་ཀྱི་ཚིག་ལ་སྡོད། །དེ་བས་ཤིན་ཏུ་བློ་ཡངས་པས། །རྡུལ་ ༄༅། །མེད་རྣམས་ལ་ས་ཡི་དམ་པར་འཇུག་པ་ཤོད། །ཆགས་མེད་སྟོབས་བཅུའི་ཚོགས་གྱུར་པ། །བདེ་གཤེགས་སྤྱོད་པ་མ་ལུས་བཤད་པར་མཛོད། །དེ་ནས་ དེའི་ཚེ་བཅོམ་ལྡན་འདས་ཤཱཀྱ་ཐུབ་པའི་མཛོད་སྤུ་ནས་བྱང་ཆུབ་སེམས་དཔའི་སྟོབས་སྣང་བ་ཞེས་བྱ་བའི་འོད་ཟེར་འཁོར་གྱི་འོད་ཟེར་བརྒྱ་སྟོང་གྲངས་མེད་པ་དང་ལྡན་པ་བྱུང་ ངོ༑ ༑དེ་བྱུང་ནས་ཕྱོགས་བཅུ་ཐམས་ཅད་ཀྱི་འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་མ་ལུས་པར་སྣང་བར་བྱས་ནས། སེམས་ཅན་ཐམས་ཅད་ཀྱི་ངན་སོང་གི་སྡུག་ བསྔལ་ཐམས་ཅད་རྩེ་ཟིལ་བར་བྱས་ཏེ། བདུད་ཀྱི་ཁྱིམ་ཐམས་ཅད་ཟིལ་གྱིས་མནན་ནས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་སྣང་བར་བྱས་ཏེ། སངས་ རྒྱས་ཀྱི་ཡུལ་གྱི་རྣམ་པ་བསམ་གྱི་མི་ཁྱབ་པའི་མཐུ་བསྟན་ནས། ཕྱོགས་བཅུ་ཐམས་ཅད་ཀྱི་འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་དུ་དེ་བཞིན་གཤེགས་པ་ཐམས་ ཅད་ཀྱི་འཁོར་གྱི་དཀྱིལ་འཁོར་དུ་ཆོས་བསྟན་པའི་བྱིན་གྱི་རླབས་ཀྱིས་བྱིན་དུ་བརླབས་པའི་བྱང་ཆུབ་སེམས་དཔའི་ལུས་སྣང་བར་བྱས་ཏེ། སངས་རྒྱས་ཀྱི་རྣམ་པར་འཕྲུལ་པ་ བསམ་གྱིས་མི་ཁྱབ་པ་བསྟན་ནས་སྟེང་གི་བར་སྣང་ལ་འོད་ཟེར་སྟུག་པོའི་སྤྲིན་གྱི་དྲ་བའི་ཁང་པ་བརྩེགས་པ་ཆེན་པོར་བྱས་ཏེ་འདུག་གོ །དེ་བཞིན་དུ་སངས་རྒྱས་བཅོམ་ལྡན་ འདས་དེ་དག་གི་མཛོད་སྤུ་དག་ནས་ཀྱང༌། བྱང་ཆུབ་སེམས་དཔའི་འོད་སྣང་བ་ཞེས་བྱ་བའི་འོད་ཟེར་འཁོར་གྱི་འོད་ཟེར་གྲངས་མེད་པ་དང་ལྡན་པ་དག་བྱུང་བར་གྱུར་ཏོ། །བྱུང་ནས་ ཀྱང་དེ་དག་གིས་ཕྱོགས་བཅུ་ཐམས་ཅད་དུ་འཇིག་རྟེན་གྱི་ཁམས་འབྱམས་ཀླས་པ་ཀུན་ཏུ་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ཆོས་བསྟན་པའི་བྱིན་གྱིས་བྱིན་དུ་ བརླབས་པའི་བྱང་ཆུབ་སེམས་དཔའ་རྣམས་སྣང་བར་བྱས་ཏེ། སངས་རྒྱས་ཀྱི་རྣམ་པར་འཕྲུལ་བ་བསམ་གྱིས་མི་ཁྱབ་པ་བསྟན་ནས། འཇིག་རྟེན་གྱི་ཁམས་མི་མཇེད་འདི་ ཡང་སྣང་བར་བྱས། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པའི་འཁོར་གྱི་དཀྱིལ་འཁོར་འདི་ཡང་སྣང་བར་བྱས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་ རྗེའི་སྙིང་པོའི་ལུས་ཀྱང་སྣང་བར་བྱས་ནས། སྟེང་གི་བར་སྣང་ལ་དེ་བཞིན་དུ་འོད་ཟེར་སྟུག་པོའི་སྤྲིན་གྱི་དྲ་བའི་ཁང་པ་བརྩེགས་པ་ཆེན་པོར་བྱས་ཏེ་འཁོད་དོ། །དེ་ནས་འོད་ཟེར་སྟུག་ པོའི་སྤྲིན་གྱི་དྲ་བའི་ཁང་པ་བརྩེགས་པ་ཆེན་པོ་དེ་དག་ནས་སངས་རྒྱས་ཀྱི་བྱིན་གྱིས་སྒྲའི་རྣམ་པ་འདི་ལྟ་བུ་འདི་བྱུང་ངོ༌། །མི་མཉམ་མཉམ་དང་མཉམ་པ་མཁའ་དང་མཉམ་པ་དག ། སྟོབས་བཅུའི་ཁྱུ་མཆོག་མཐུ་ལྡན་ཚད་མེད་ཡོན་ཏན་ཅན། །འཇིག་རྟེན་ཀུན་མཆོག་མི་ཡི་དམ་པ་ཕུལ་གྱི་རྣམས། །ཤཱཀྱ་སེང་གེའི་ཆོས་ལ་བྱིན་རླབས་དམ་པ་མཛད། །བདེ་གཤེགས་ ༄༅། །སྲས་པོ་འདྲེན་པའི་བྱིན་གྱིས་བཤད་པར་གྱིས། །ཆོས་རྒྱལ་ཁྱུ་མཆོག་རྣམས་ཀྱི་མཛོད་ཀྱི་དམ་པ་ཕྱེ། །ས་ཡི་ཡེ་ཤེས་རྣམ་ཕྱེ་སྤྱོད་མཆོག་རབ་ཡངས་ པ༑ ༑སྟོབས་བཅུའི་བྱིན་གྱིས་མ་ཐོགས་མྱུར་དུ་བསྟན་པ་གྱིས། །གང་གིས་རྣ་ལམ་བསམ་པར་ཆོས་དམ་རིན་ཆེན་འདི། །སོང་བར་གྱུར་པ་དེ་དག་བདེ་གཤེགས་བྱིན་གྱིས་བརླབས།། རྡུལ་མེད་ས་ཀུན་རིམ་གྱིས་རབ་ཏུ་རྫོགས་བྱས་ནས། །སྟོབས་བཅུ་ལྡན་པའི་རྒྱལ་བ་དམ་པར་འགྲུབ་པར་འགྱུར། །རྒྱ་མཚོའི་ཆུ་བྱུང་གྱུར་ཅིང་བསྐལ་པའི་མེས་གདུངས་ཀྱང༌། །གལ་ ཏེ་སྣོད་གྱུར་སེམས་ཅན་དེ་དག་འདི་ལ་ཉན། །གང་རྣམས་ཐེ་ཚོམ་ཟ་ཞིང་ཡིད་གཉིས་བྱེད་པ་ནི། །དེ་དག་རྣ་བས་རྣམ་པ་ཀུན་ཏུ་ཐོས་མི་འགྱུར། །དེ་ཕྱིར་ས་ཡི་ཡེ་ཤེས་ལམ་ མཆོག་བསྟན་པར་གྱིས། །གནས་དང་རྒྱུད་དང་འཕྲོ་བ་རིམ་གྱིས་རབ་ཏུ་ཤོད། །སྤྱོད་དང་ཡུལ་དང་ཆོས་དང་ཡེ་ཤེས་ཚུལ་རྣམས་ཀྱི། །ཆོས་ཀྱི་ཚུལ་ཡང་འགྲོ་བ་ཀུན་ལ་ཕན་ཕྱིར་ ཤོད། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་ཕྱོགས་བཅུར་བལྟས་ནས་འཁོར་ཐམས་ཅད་དེ་བས་ཀྱང་དད་པར་བྱ་བའི་ཕྱིར། དེའི་ཚེ་ཚིགས་སུ་བཅད་པ་འདི་དག་སྨྲས་ སོ༑ ༑ཕྲ་ལ་ཤེས་དཀའ་དྲང་སྲོང་ཆེན་པོའི་ལམ། །མི་རྟོག་རྟོག་ཡུལ་མ་ཡིན་བལྟ་བར་དཀའ། །རང་བཞིན་ཞི་ཞིང་འགག་མེད་འབྱུང་བ་མེད། །མཁས་གསལ་ཤེས་པས་ཁོང་དུ་ ཆུད་པ་ཡིན། །ངོ་བོ་ཉིད་སྟོང་ཞི་ཞིང་སྡུག་བསྔལ་ཟད། །རྒྱུད་ལས་རྣམ་གྲོལ་མཉམ་པར་མྱ་ངན་འདས། །མཐའ་དང་དབུས་མེད་ཚིག་གིས་བརྗོད་དུ་མེད། །དུས་གསུམ་གྲོལ་བ་ནམ་མཁའ་ འདྲ་ཞིང་མཚུངས། །བདེ་གཤེགས་སྤྱོད་ཡུལ་ཞི་ཞིང་ཉེ་བར་ཞི། །སྨྲ་བའི་ལམ་རྣམས་ཀུན་གྱིས་བརྗོད་པར་དཀའ། །དེ་དག་ས་དང་སྤྱོད་པ་དེ་འདྲ་བས། །སྨྲ་བར་དཀའ་ན་བསྟན་པར་ག་ ལ་ནུས། །དེ་ནི་བསམ་ཡས་སེམས་ལམ་རྣམ་པར་སྤངས། །ཡེ་ཤེས་མངོན་བསྒྲུབས་རྒྱལ་བའི་སྤྱོད་ཡུལ་ཏེ། །ཕུང་པོ་སྐྱེ་མཆེད་ཁམས་ཀྱིས་བསྐྱེད་པ་མིན། །སེམས་ཀྱིས་མི་ ཤེས་ཡིད་ཀྱིས་རྣམ་མ་བརྟགས། །ཇི་ལྟར་བར་སྣང་གནས་ཀྱི་བྱ་ཡི་རྗེས། །ཤིན་ཏུ་སྨྲ་དཀའ་བསྟན་པར་མི་ནུས་པ། །དེ་ལྟར་བདེ་གཤེགས་སྲས་ཀྱི་ས་རྣམས་ཀྱང༌། །ཡིད་དང་སེམས་ཀྱི་ ཡུལ་གྱིས་ཤེས་མི་ནུས། །འོན་ཀྱང་བྱམས་དང་སྙིང་རྗེའི་སྨོན་ལམ་གྱིས། །དེ་ལས་ཕྱོགས་ཙམ་རིམ་པའི་ཚུལ་བཞིན་དུ། །བཤད་པར་བྱ་སྟེ་སེམས་ཀྱི་སྤྱོད་ཡུལ་མིན། །ཡེ་ཤེས་ཚུལ་ གྱིས་རྫོགས་པར་བྱ་བའོ། །དེ་འདྲའི་སྤྱོད་ཡུལ་ཕྲ་ཞིང་བལྟ་དཀའ་བ། །རང་རིག་ཡིན་པས་བརྗོད་པར་མ་ནུས་ཀྱང༌། །འོན་ཀྱང་བདེ་བར་གཤེགས་པའི་མཐུས་བརྗོད་ཀྱི། །ཐམས་ཅད་མཐུན་ པར་ནན་ཏན་གྱིས་ཏེ་ཉོན། །ཡེ་ཤེས་ས་དང་སྤྱོད་འཇུག་ཅི་འདྲ་བ། །བསྐལ་པ་བྱེ་བར་ཟད་པར་མི་ནུས་ཏེ། །ཡང་དག་དོན་དངོས་གཞན་མིན་གནས་པ་ལས། །མདོ་ཙམ་བཤད་ཀྱི་དེ་དག་ ༄༅། །མཉན་པར་གྱིས། །མཐུན་ཞིང་ནན་ཏན་ཡོད་པར་སྟ་གོན་གནས། །བདེ་གཤེགས་བྱིན་གྱིས་བདག་གིས་བཤད་པར་བྱ། །དཔེ་ལྡན་འཐད་ལ་ཡི་གེ་མཉམ་པ་ ཡི༑ ༑ཆོས་སྒྲ་དམ་པ་བདག་གིས་བརྗོད་པར་བྱ། །འདི་ནི་ཚིག་གིས་བརྗོད་པར་ཤིན་ཏུ་དཀའ། །དེ་ལྟར་ཚད་མེད་བདེ་གཤེགས་མཐུ་དག་ལས། །ཆུ་ཐིགས་གཅིག་འདྲ་བདག་གི་ལུས་འདི་ ལ༑ ༑དེ་རིང་ཞུགས་ཀྱི་བཤད་པ་མཉན་པར་གྱིས། །ཀྱེ༑ རྒྱལ་བའི་སྲས་དག །དེ་ལ་སེམས་ཅན་དགེ་བའི་རྩ་བ་ཤིན་ཏུ་བསགས་པ། སྤྱད་པ་ཤིན་ཏུ་སྤྱོད་པ། ཚོགས་ཤིན་ཏུ་བསགས་ པ༑ ༑སངས་རྒྱས་བྱུང་བ་ཤིན་ཏུ་བསྙེན་བཀུར་བ། ཆོས་དཀར་པོ་ཤིན་ཏུ་བསྡུས་པ། དགེ་བའི་བཤེས་གཉེན་གྱིས་ཤིན་ཏུ་བཟུང་བ། བསམ་པ་ཡོངས་སུ་དག་པ། ལྷག་པའི་བསམ་ པ་ཤིན་ཏུ་རྒྱ་ཆེན་པོ་ཅན། མོས་པ་རྒྱ་ཆེན་པོ་དང་ལྡན་པ། སྙིང་རྗེ་དང་སྙིང་བརྩེ་བ་མངོན་དུ་གྱུར་པ། སངས་རྒྱས་ཀྱི་ཡེ་ཤེས་ལ་མངོན་པར་མོས་པ་རྣམས་རྣམ་པ་ཐམས་ཅད་ མཁྱེན་པའི་ཡེ་ཤེས་ལ་མོས་པ་དང༌། སྟོབས་བཅུའི་སྟོབས་ཐོབ་པར་བྱ་བ་དང༌། མི་འཇིགས་པ་ཆེན་པོ་ཐོབ་པར་བྱ་བ་དང༌། སངས་རྒྱས་ཀྱི་ཆོས་མཉམ་པ་ཉིད་ཐོབ་པར་བྱ་བ་ དང༌། འགྲོ་བ་ཐམས་ཅད་ཡོངས་སུ་བསྐྱབ་པར་བྱ་བ་དང༌། སྙིང་བརྩེ་བ་དང་སྙིང་རྗེ་ཆེན་པོ་ཡོངས་སུ་དག་པར་བྱ་བ་དང༌། ཕྱོགས་བཅུ་མ་ལུས་པར་ཐོགས་པ་མེད་པའི་ཡེ་ཤེས་ མངོན་དུ་འགྱུར་བ་བྱ་བ་དང༌། སངས་རྒྱས་ཀྱི་ཞིང་མ་ལུས་པ་ཐམས་ཅད་ཐོགས་པ་མེད་པར་ཡོངས་སུ་སྦྱང་བར་བྱ་བ་དང༌། དུས་གསུམ་ཐམས་ཅད་སྐད་ཅིག་གཅིག་གིས་ཁོང་དུ་ཆུད་ པར་བྱ་བ་དང༌། ཆོས་ཀྱི་འཁོར་ལོ་ཆེན་པོ་རབ་ཏུ་བསྐོར་བ་ལ་ཁྱུ་མཆོག་གི་མཐུ་དབྱུང་བ་རྒྱ་ཆེན་པོ་ཐོབ་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་སྙིང་རྗེ་ཆེན་པོ་ སྔོན་དུ་འགྲོ་བ། ཤེས་རབ་དང་ཡེ་ཤེས་ཀྱི་དབང་དུ་གྱུར་པ། ཐབས་མཁས་པས་ཡོངས་སུ་བཟུང་བ། བསམ་པ་དང་ལྷག་པའི་བསམ་པས་རབ་ཏུ་བརྟན་པ། དེ་བཞིན་གཤེགས་ པའི་སྟོབས་ཚད་མེད་པ་དང་ལྡན་པ། སེམས་ཅན་གྱི་སྟོབས་དང༌། བློའི་སྟོབས་རྣམ་པར་དབྱེ་བར་བྱ་བ། ཤིན་ཏུ་རྣམ་པར་ཕྱེ་བ། ཆགས་པ་མེད་པའི་ཡེ་ཤེས་མངོན་དུ་གྱུར་པ། རང་བྱུང་གི་ཡེ་ཤེས་དང་མཐུན་པ། སངས་རྒྱས་ཐམས་ཅད་ཀྱི་ཆོས་ལ་ཤེས་རབ་དང༌། ཡེ་ཤེས་ཀྱི་མན་ངག་ཡང་དག་པར་ཚོལ་བ། སངས་རྒྱས་བྱུང་བ་ཐམས་ཅད་ལས་གདམས་ ངག་ཡང་དག་པར་བླངས་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐར་ཐུག་པར་གནས་པ། ཕྱི་མའི་མཐའི་མུར་ཐུག་པར་སྐྱེ་བར་འགྱུར་ཏེ། སེམས་བསྐྱེད་པ་དེ་བསྐྱེད་མ་ ཐག་ཏུ། བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོའི་སྐྱེ་བོའི་ས་ལས་རབ་ཏུ་འདས་པ་ཡིན། བྱང་ཆུབ་སེམས་དཔའི་སྐྱོན་མེད་པ་ཤིན་ཏུ་ནོན་པ་ཡིན། དེ་བཞིན་གཤེགས་ ༄༅། །པའི་རིགས་སུ་སྐྱེས་པ་ཡིན། རིགས་བརྗོད་པ་ལ་ཁ་ན་མ་ཐོ་བ་མེད་པ་ཡིན། འཇིག་རྟེན་གྱི་ལམ་ཐམས་ཅད་ལས་ཕྱིར་ལོག་པ་ཡིན། འཇིག་རྟེན་ ལས་འདས་པའི་ལམ་ཤིན་ཏུ་ནོན་པ་ཡིན། བྱང་ཆུབ་སེམས་དཔའི་ཆོས་ཉིད་ལ་གནས་པ་ཡིན། བྱང་ཆུབ་སེམས་དཔའི་རྣམ་པར་དགོད་པ་ལ་རབ་ཏུ་གནས་པ་ཡིན། དུས་ གསུམ་མཉམ་པ་ཉིད་ཀྱི་རྗེས་སུ་སོང་བ་ཡིན། རྫོགས་པའི་བྱང་ཆུབ་ལ་ཤིན་ཏུ་གཞོལ་བས་དེ་བཞིན་གཤེགས་པའི་རིགས་སུ་ངེས་པ་ཡིན། ཀྱེ༑ རྒྱལ་བའི་སྲས་དག །ཆོས་ ཀྱི་རྣམ་པ་འདི་ལྟ་བུ་ལ་གནས་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་ས་རབ་ཏུ་དགའ་བ་ལ་མི་གཡོ་བའི་ཚུལ་གྱིས་རབ་ཏུ་གནས་སོ། །ཀྱེ༑ རྒྱལ་བའི་སྲས་དག ། དེ་ལ་བྱང་ཆུབ་སེམས་དཔའི་ས་རབ་ཏུ་དགའ་བ་ལ་གནས་པའི་བྱང་ཆུབ་སེམས་དཔའ་ནི་རབ་ཏུ་དགའ་བ་མང་བ་ཡིན། ཡིད་བདེ་བ་མང་བ་ཡིན། མོས་པ་མང་བ་ཡིན། རངས་ པ་མང་བ་ཡིན། མགུ་བ་མང་བ་ཡིན། སྤྲོ་བ་མང་བ་ཡིན། འཚེ་བ་མེད་པ་མང་བ་ཡིན། ཁྲོ་བ་མེད་པ་མང་བ་ཡིན། ཀྱེ༑ རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའི་ས་རབ་ ཏུ་དགའ་བ་ལ་གནས་པའི་བྱང་ཆུབ་སེམས་དཔའ་ནི་སངས་རྒྱས་བཅོམ་ལྡན་འདས་རྣམས་རྗེས་སུ་དྲན་ཞིང་རབ་ཏུ་དགའ་བ་ཡིན། སངས་རྒྱས་ཀྱི་ཆོས་རྣམས་རྗེས་སུ་དྲན་ཞིང་རབ་ ཏུ་དགའ་བ་ཡིན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྗེས་སུ་དྲན་ཞིང་རབ་ཏུ་དགའ་བ་ཡིན། བྱང་ཆུབ་སེམས་དཔའི་སྤྱོད་པ་རྗེས་སུ་དྲན་ཞིང་རབ་ཏུ་དགའ་བ་ཡིན། ཕ་ རོལ་ཏུ་ཕྱིན་པ་རྣམ་པར་དག་པ་རྗེས་སུ་དྲན་ཞིང་རབ་ཏུ་དགའ་བ་ཡིན། བྱང་ཆུབ་སེམས་དཔའི་སའི་ཁྱད་པར་རྗེས་སུ་དྲན་ཞིང་རབ་ཏུ་དགའ་བ་ཡིན། བྱང་ཆུབ་སེམས་དཔའི་སྤྱོད་ཡུལ་ མི་འཕྲོགས་པ་རྗེས་སུ་དྲན་ཞིང་རབ་ཏུ་དགའ་བ་ཡིན། དེ་བཞིན་གཤེགས་པའི་གདམས་ངག་དང་ལུང་རྗེས་སུ་དྲན་ཞིང་རབ་ཏུ་དགའ་བ་ཡིན། སེམས་ཅན་གྱི་དོན་རབ་ཏུ་ཐོབ་པར་ བྱ་བ་རྗེས་སུ་དྲན་ཞིང་རབ་ཏུ་དགའ་བ་ཡིན། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལ་འཇུག་པའི་ཐབས་རྗེས་སུ་དྲན་ཞིང་རབ་ཏུ་དགའ་བ་ཡིན། ཡང་དེ་འདི་སྙམ་དུ་སེམས་ ཏེ༑ བདག་ནི་འགྲོ་བ་ཐམས་ཅད་ཀྱི་ཡུལ་ལས་ཕྱིར་ལོག་གོ་ཞེས་རབ་ཏུ་དགའ་བ་བསྐྱེད་དོ། །བདག་ནི་སངས་རྒྱས་ཀྱི་ས་དང་ཉེ་བར་གྱུར་ཏོ་ཞེས་རབ་ཏུ་དགའ་བ་བསྐྱེད་དོ། །བདག་ ནི་བྱིས་པའི་ས་ལས་རིང་དུ་གྱུར་ཏོ་ཞེས་རབ་ཏུ་དགའ་བ་བསྐྱེད་དོ། །བདག་ནི་ཡེ་ཤེས་ཀྱི་ས་དང་ཉེ་བར་གྱུར་ཏོ་ཞེས་རབ་ཏུ་དགའ་བ་བསྐྱེད་དོ། །བདག་ནི་ངན་སོང་དང་ངན་འགྲོའི་ འཇིགས་པ་ཐམས་ཅད་རྒྱུན་ཆད་དོ་ཞེས་རབ་ཏུ་དགའ་བ་བསྐྱེད་དོ། །བདག་ནི་སེམས་ཅན་ཐམས་ཅད་ཀྱི་གནས་སུ་གྱུར་ཏོ་ཞེས་རབ་ཏུ་དགའ་བ་བསྐྱེད་དོ། །བདག་ནི་དེ་ ༄༅། །བཞིན་གཤེགས་པ་ཐམས་ཅད་མཐོང་བར་འགྱུར་བ་དང་ཉེ་བར་གྱུར་ཏོ་ཞེས་རབ་ཏུ་དགའ་བ་བསྐྱེད་དོ། །བདག་ནི་དེ་བཞིན་གཤེགས་པ་ཐམས་ཅད་ཀྱི་ཡུལ་ ལ་ཡང་དག་པར་འབྱུང་ངོ་ཞེས་རབ་ཏུ་དགའ་བ་བསྐྱེད་དོ། །བདག་ནི་བྱང་ཆུབ་སེམས་དཔའ་ཐམས་ཅད་ཀྱི་མཉམ་པ་ཉིད་དང་ལྡན་པར་གྱུར་ཏོ་ཞེས་རབ་ཏུ་དགའ་བ་བསྐྱེད་དོ། ། བདག་ནི་འཇིགས་པ་དང༌། བག་ཚ་བ་དང༌། དངངས་པ་དང༌། སྐྱི་གཡའ་བ་ཐམས་ཅད་དང་བྲལ་ལོ་ཞེས་རབ་ཏུ་དགའ་བ་བསྐྱེད་དོ། །དེ་ཅིའི་ཕྱིར་ཞེ་ན། ཀྱེ༑ རྒྱལ་བའི་སྲས་ དག །འདི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ས་རབ་ཏུ་དགའ་བ་འདི་ཐོབ་མ་ཐག་ཏུ་འཇིགས་པའི་རྣམ་པ་འདི་དག་འདི་ལྟ་སྟེ། འཚོ་བ་མེད་པས་འཇིགས་ པའམ། མི་བསྔགས་པས་འཇིགས་པའམ། འཆི་བས་འཇིགས་པའམ། ངན་སོང་གིས་འཇིགས་པའམ། འཁོར་དུ་བག་ཚ་བས་འཇིགས་པ་དེ་དག་ཐམས་ཅད་དེ་ལ་མེད་ པ་ཡིན། དེ་ཅིའི་ཕྱིར་ཞེ་ན། འདི་ལྟར་དེ་ནི་བདག་གི་འདུ་ཤེས་དང་བྲལ་བས། དེ་ལ་བདག་ཕངས་པར་སེམས་པའང་མེད་ན། ཡོ་བྱད་ཐམས་ཅད་ལ་ཕངས་པར་སེམས་ བ་ལྟ་ག་ལ་ཡོད་དེ། དེའི་ཕྱིར་དེ་ལ་འཚོ་བ་མེད་པས་འཇིགས་པ་མེད་དོ། །དེ་ནི་སུ་ལས་ཀྱང་རིམ་གྲོར་བྱ་བ་ཅུང་ཟད་ཙམ་ཡང་རེ་བ་མེད་ལ། གཞན་དུ་ན་བདག་ཉིད་ཀྱིས་ སེམས་ཅན་དེ་དག་ལ་ཡོ་བྱད་མང་པོ་ཐམས་ཅད་ཀྱིས་བསྟུད་པར་བྱའོ་སྙམ་དུ་སེམས་པས་དེའི་ཕྱིར་དེ་ལ་མི་བསྔགས་པའི་འཇིགས་པ་མེད་དོ། །དེ་བདག་ཏུ་ལྟ་བ་དང་བྲལ་ བས་དེ་ལ་བདག་གི་འདུ་ཤེས་མེད་དེ། དེའི་ཕྱིར་དེ་ལ་འཆི་བའི་འཇིགས་པ་མེད་དོ། །བདག་ཤི་ནས་ཀྱང་གདོན་མི་ཟ་བར་སངས་རྒྱས་དང་བྱང་ཆུབ་སེམས་དཔའ་དག་དང་མི་ འབྲལ་བར་འགྱུར་རོ་ཞེས་དེའི་ཕྱིར་དེ་ལ་ངན་སོང་གིས་འཇིགས་པ་མེད་དོ། །དེ་འདི་སྙམ་དུ་སེམས་ཏེ། བདག་གི་བསམ་པ་དང་འཇིག་རྟེན་ན་མཚུངས་པའང་སུ་ཡང་མེད་ན། ལྷག་པ་ ལྟ་ག་ལ་ཡོད་ཅེས་དེའི་ཕྱིར་དེ་ལ་འཁོར་དུ་བག་ཚ་བ་མེད་དོ། །ཀྱེ༑ རྒྱལ་བའི་སྲས་དག །དེ་ལྟར་འཇིགས་པ་དང༌། དངངས་པ་དང༌། བག་ཚ་བ་དང༌། སྐྱི་གཡའ་བ་མེད་པའི་བྱང་ ཆུབ་སེམས་དཔའ་ནི་སྙིང་རྗེ་ཆེན་པོ་སྔོན་དུ་འགྲོ་བས་ལྷག་པའི་བསམ་པ་མ་ཉམས་ཤིང་མི་དམའ་བས་དེ་བས་ཀྱང་དགེ་བའི་རྩ་བ་ཐམས་ཅད་ཡང་དག་པར་བསྡུ་བའི་ཕྱིར་རབ་ ཏུ་བརྩོན་པར་བྱེད་དོ། །ཀྱེ༑ རྒྱལ་བའི་སྲས་དག །དེ་དད་པ་ལ་དབང་སྒྱུར་བ་དང༌། མོས་པ་མང་བ་དང༌། ཡིད་ཆེས་པ་ཤིན་ཏུ་རྣམ་པར་དག་པ་དང༌། རྟོག་པ་མང་བ་དང༌། སྙིང་ བརྩེ་བ་དང༌། སྙིང་རྗེས་མངོན་པར་སྒྲུབ་པ་དང༌། བྱམས་པ་ཆེན་པོ་དང་ལྡན་པ་དང༌། ཡིད་སྐྱོ་བ་མེད་པ་དང༌། ངོ་ཚ་ཤེས་པ་དང༌། ཁྲེལ་ཡོད་པའི་རྒྱན་དང༌། བཟོད་ཅིང་ངེས་པ་ ༄༅། །དང་ལྡན་པ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བསྟན་པ་ལ་རིམ་གྲོ་དང༌། བཀུར་སྟི་དང༌། རི་མོ་ཡོད་པ་དང༌། ཉིན་མཚན་དུ་མི་ངོམས་པར་དགེ་བའི་རྩ་བ་གསོག་པ་དང༌། དགེ་བའི་བཤེས་གཉེན་ལ་བསྟེན་པ་དང༌། ཆོས་ཀྱི་དགའ་བས་དགའ་བར་གནས་པ་དང༌། མི་ངོམས་པར་མང་དུ་ཐོས་པ་ཚོལ་བ་དང༌། ཇི་སྐད་དུ་ཐོས་པའི་ཆོས་ལ་ཚུལ་བཞིན་དུ་རྟོག་པ་དང༌། གནས་མེད་པའི་ཡིད་དང༌། འཐོབ་པ་དང༌། བཀུར་སྟི་དང༌། བསྔགས་ པ་ལ་ཆགས་པ་མེད་པ་དང༌། ཡོ་བྱད་ཐམས་ཅད་ལ་ཕངས་པར་སེམས་ཤིང་ཆགས་པ་མེད་པ་དང༌། སེམས་བསྐྱེད་པ་རིན་པོ་ཆེ་ལྟ་བུས་ངོམས་པ་མེད་པར་མངོན་པར་ བསྒྲུབ་པ་དང༌། ཐམས་ཅད་མཁྱེན་པ་ཉིད་ཀྱི་ས་ལ་མངོན་པར་མོས་པ་དང༌། དེ་བཞིན་གཤེགས་པའི་སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་མ་འདྲེས་ པ་ལ་དམིགས་པ་དང༌། ཕ་རོལ་ཏུ་ཕྱིན་པའི་ཚོགས་ཡོངས་སུ་ཚོལ་བ་དང༌། སྒྱུ་དང་གཡོ་ཡོངས་སུ་སྤངས་པ་དང༌། ཇི་སྐད་དུ་སྨྲས་པ་དེ་ལྟར་བྱེད་པ་དང༌། རྟག་ཏུ་རྒྱུན་ མི་འཆད་པར་བདེན་པའི་ཚིག་གི་རྗེས་སུ་སྲུང་བ་དང༌། དེ་བཞིན་གཤེགས་པའི་རིགས་ལ་སྐྱོན་དུ་འགྱུར་བར་མི་བྱེད་པ་དང༌། བྱང་ཆུབ་སེམས་དཔའི་བསླབ་པ་མི་གཏོང་ པ་དང༌། རིའི་དབང་པོའི་རྒྱལ་པོ་ཆེ་པོ་ལྟར་ཐམས་ཅད་མཁྱེན་པ་ཉིད་ཀྱི་སེམས་མི་སྒུལ་བ་དང༌། འཇིག་རྟེན་གྱི་བྱ་བ་ཐམས་ཅད་ལ་མངོན་པར་དགའ་བ་མེད་པ་དང༌། འཇིག་རྟེན་ལས་ འདས་པའི་དགེ་བའི་རྩ་བའི་ལམ་དང་ལྡན་པ་དང༌། མི་ངོམས་པར་བྱང་ཆུབ་ཀྱི་ཡན་ལག་གི་ཚོགས་རབ་ཏུ་བསགས་པ་དང༌། རྟག་ཏུ་རྒྱུན་མི་ཆད་པར་གོང་ནས་གོང་དུ་ཁྱད་པར་དུ་འབོགས་ པའི་ལམ་ཚོལ་བ་དང༌། ས་ཡོངས་སུ་སྦྱོང་བའི་ཆོས་ཀྱི་རྣམ་པ་འདི་ལྟ་བུ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། བྱང་ཆུབ་སེམས་དཔའི་ས་རབ་ཏུ་དགའ་ བ་ལ་གནས་པ་ཡིན་ཏེ། དེ་བྱང་ཆུབ་སེམས་དཔའི་ས་རབ་ཏུ་དགའ་བ་དེ་ལ་ཤིན་ཏུ་གནས་ཤིང༌། རྣམ་པ་འདི་ལྟ་བུའི་སྨོན་ལམ་ཆེན་པོ་དང༌། བརྩོན་པ་ཆེན་པོ་དང༌། མངོན་པར་ བསྒྲུབ་པ་ཆེན་པོ་འདི་དག་མངོན་པར་སྒྲུབ་སྟེ། འདི་ལྟར་སངས་རྒྱས་ཐམས་ཅད་མ་ལུས་པ་ལྷག་མ་མེད་པ་མཐའ་དག་ལ་མཆོད་ཅིང་རིམ་གྲོ་བྱ་བའི་ཕྱིར། རྣམ་པའི་མཆོག་ཐམས་ ཅད་དང་ལྡན་པ། མོས་པ་རྒྱ་ཆེན་པོས་རྣམ་པར་དག་པ། ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ་བསྐལ་པ་ འགྲངས་པ་ཐམས་ཅད་དུ་སངས་རྒྱས་སྐྱེ་བ་འགྲངས་པ་ལ་རིམ་གྲོ་དང༌། མཆོད་པ་ཆེན་པོ་བྱ་བ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། དེ་བཞིན་གཤེགས་ ༄༅། །པ་ཐམས་ཅད་ཀྱིས་གསུངས་པའི་ཆོས་ཀྱི་ཚུལ་ཡང་དག་པར་གཟུང་བ་དང༌། སངས་རྒྱས་ཐམས་ཅད་ཀྱི་བྱང་ཆུབ་ཡང་དག་པར་བླང་བ་དང༌། ཡང་དག་ པར་རྫོགས་པའི་སངས་རྒྱས་ཐམས་ཅད་ཀྱི་བསྟན་པ་ཡང་དག་པར་བསྲུང་བའི་ཕྱིར། ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ་ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་ མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་ཀྱི་སངས་རྒྱས་འབྱུང་བ་འགྲངས་པའི་དམ་པའི་ཆོས་ཡོངས་སུ་གཟུང་བ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་ སྒྲུབ་བོ། །འདི་ལྟ་སྟེ། འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་མ་ལུས་པའི་སངས་རྒྱས་སྐྱེ་བ་ཐམས་ཅད་ཀྱི་དགའ་ལྡན་གྱི་ཕོ་བྲང་དམ་པ་ན་བཞུགས་པ་ལ་སོགས་ཏེ། འཕོ་བ་དང༌། གཤེགས་པ་དང༌། དཀུ་ན་བཞུགས་པ་དང༌། སྐྱེ་བ་དང༌། གཞོན་ནུའི་རོལ་པ་དང༌། བཙུན་མོའི་འཁོར་གྱི་ནང་ན་བཞུགས་པ་དང༌། མངོན་པར་འབྱུང་བ་དང༌། དཀའ་ བ་སྤྱད་པ་དང༌། སྙིང་པོ་བྱང་ཆུབ་ཏུ་གཤེགས་པ་དང༌། བདུད་གདུལ་བ་དང༌། མངོན་པར་འཚང་རྒྱ་བ་དང༌། གསོལ་བ་གདབ་པ་དང༌། ཆོས་ཀྱི་འཁོར་ལོ་ཆེན་པོ་བསྐོར་བ་དང༌། མྱ་ ངན་ལས་འདས་པ་ཆེན་པོ་སྟོན་པའི་དྲུང་དུ་འགྲོ་ཞིང་མཆོད་པ་དང༌། རིམ་གྲོ་བྱ་བ་དང༌། དམ་པའི་ཆོས་ཡང་དག་པར་གཟུང་བའི་སྦྱོར་བ་ལ་སོགས་པ་ཐམས་ཅད་དུས་གཅིག་ཏུ་ མངོན་པར་བསྒྲུབ་པའི་ཕྱིར། ཆོས་ཀྱི་དབྱིངས་ཀྱི་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ་བསྐལ་པ་འགྲངས་པ་ཐམས་ཅད་དུ་སངས་ རྒྱས་འབྱུང་བ་འགྲངས་པའི་དྲུང་དུ་འགྲོ་བ་ནས། མྱ་ངན་ལས་འདས་པ་ཆེན་པོའི་བར་གྱི་དྲུང་དུ་འགྲོ་བ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། བྱང་ ཆུབ་སེམས་དཔའི་སྤྱོད་པ་རྒྱ་ཆེན་པོ་ཤིན་ཏུ་ཡངས་པ། ཚད་མེད་པ། མི་འཕྲོགས་པ། ཐ་མི་དད་པ། ཕ་རོལ་ཏུ་ཕྱིན་པ་ཐམས་ཅད་ཀྱིས་ཡང་དག་པར་བསྡུས་པ། ས་ཡོངས་སུ་སྦྱང་ བའི་ཡན་ལག་དང༌། ཉེ་བའི་ཡན་ལག་ཏུ་བཅས་པ་མངོན་པར་བསྒྲུབ་པ་དང༌། མཚན་ཉིད་དང༌། བྱེ་བྲག་གི་མཚན་ཉིད་དུ་བཅས་པ་དང༌། འགྲུབ་པ་དང༌། འཇིག་པ་དང༌། བྱང་ཆུབ་ སེམས་དཔའི་སྤྱོད་པར་གཏོགས་པ་ཐམས་ཅད་དང༌། ས་ཇི་ལྟ་བ་བཞིན་དང༌། ཇི་ལྟ་བུར་བསྟན་པ་དང༌། ཕ་རོལ་ཏུ་ཕྱིན་པ་ཡོངས་སུ་སྦྱང་བ་ལ་གདམས་ངག་དང༌། མན་ངག་སྦྱིན་ པས་ཉེ་བར་བརྟན་པའི་སེམས་བསྐྱེད་པ་མངོན་པར་བསྒྲུབ་པའི་ཕྱིར། ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ་ བསྐལ་པ་འགྲངས་པ་ཐམས་ཅད་དུ་སྤྱོད་པ་འགྲངས་པ་སེམས་བསྐྱེད་པས་མངོན་པར་བསྒྲུབ་པ། རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། སེམས་ ༄༅། །ཅན་གྱི་ཁམས་ཐམས་ཅད་མ་ལུས་པ། ལྷག་མ་མེད་པ་མཐའ་དག་གཟུགས་ཡོད་པ་དང༌། གཟུགས་མེད་པ་དང༌། འདུ་ཤེས་ཡོད་པ་དང༌། འདུ་ཤེས་ མེད་པ་དང༌། འདུ་ཤེས་ཡོད་པའང་མ་ཡིན་པ་དང༌། འདུ་ཤེས་མེད་པའང་མ་ཡིན་པ་དང༌། སྒོ་ང་ལས་སྐྱེས་པ་དང༌། མངལ་ནས་སྐྱེས་པ་དང༌། དྲོད་གཤེར་ལས་སྐྱེས་པ་ དང༌། རྫུས་ཏེ་བྱུང་བ་ཁམས་གསུམ་དུ་གཏོགས་པ། འགྲོ་བ་དྲུག་ཏུ་འདུས་པ། སྐྱེ་བ་ཐམས་ཅད་དུ་གཏོགས་པའི་སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་ བྱ་བ་དང༌། སངས་རྒྱས་ཀྱི་ཆོས་ལ་གཟུད་པ་དང༌། ལམ་གྱི་རྒྱུད་འགྲངས་པ་ཐམས་ཅད་རྒྱུན་གཅད་པ་དང༌། ཐམས་ཅད་མཁྱེན་པའི་ཡེ་ཤེས་ལ་དགོད་པའི་ཕྱིར། ཆོས་ཀྱི་ དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་དང༌། སེམས་ཅན་འགྲངས་པ་ཐམས་ ཅད་དུ་སེམས་ཅན་གྱི་ཁམས་ཡོངས་སུ་སྨིན་པར་བྱ་བ་ལ་རྒྱུན་མི་འཆང་པའི་སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། འཇིག་རྟེན་གྱི་ཁམས་ཡངས་པ་དང༌། དོགས་པ་དང༌། རྒྱ་ཆེན་པོ་དང༌། ཚད་མེད་པ་དང༌། ཕྲ་བ་དང༌། ཆེ་བ་དང༌། སྣྲེལ་ཞི་དང༌། སྤྱིའུ་ཚུགས་སུ་རྒྱུ་བ་ཐམས་ཅད་མ་ལུས་པ་ལྷག་མ་མེད་པ། མཐའ་དག་གཞི་མཉམ་ པར་ཡང་དག་པར་འཇུག་པ་ཁོང་དུ་ཆུད་པར་བྱ་བ་དང༌། མིག་འཕྲུལ་གྱི་རྣམ་པ་ལྟར་ཕྱོགས་བཅུའི་རྣམ་པ་ཐ་དད་པ་མ་ལུས་པའི་རྣམ་པ་ལ་འཇུག་པ། རྣམ་པར་ཕྱེ་བའི་ཡེ་ཤེས་ཁོང་ དུ་ཆུད་ཅིང༌། མངོན་དུ་འགྱུར་བར་བྱ་བའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ ཅད་དུ་འཇིག་རྟེན་གྱི་ཁམས་འགྲངས་པར་འཇིག་རྟེན་གྱི་ཁམས་ཐམས་ཅད་ལ་འཇུག་ཅིང༌། ཡོངས་སུ་དག་པར་བྱ་བའི་ཕྱིར། སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། ཞིང་ཐམས་ཅད་ཞིང་གཅིག་ཏུ་ཡང་དག་པར་གཞོལ་བར་བྱ་བ་དང༌། ཞིང་གཅིག་ཞིང་ཐམས་ཅད་དུ་ཡང་དག་པར་གཞོལ་བར་བྱ་བ་དང༌། ཡོངས་སུ་སྦྱང་བ་དང༌། སངས་རྒྱས་ཀྱི་ཞིང་ ཚད་མེད་པ་འོད་མང་པོའི་རྒྱན་གྱིས་རབ་ཏུ་བརྒྱན་པར་བྱ་བ་དང༌། ཀུན་ནས་ཉོན་མོངས་པ་ཐམས་ཅད་བསལ་བས་ཡོངས་སུ་དག་པའི་ལམ་དང་ལྡན་པ་དང༌། སེམས་ཅན་ཡེ་ཤེས་ ཀྱི་འབྱུང་གནས་ཚད་མེད་པས་ཡོངས་སུ་གང་བའི་སངས་རྒྱས་ཀྱི་ཡུལ་རྒྱ་ཆེན་པོ་ལ་ཡང་དག་པར་གཞོལ་ཞིང་ཁོང་དུ་ཆུད་པར་བྱ་བ་དང༌། བསམ་པའི་ཚུལ་བཞིན་དུ་སེམས་ཅན་ རྣམས་ལ་ཡང་དག་པར་བསྟན་ཅིང་ཤིན་ཏུ་ཚིམ་པར་བྱ་བའི་ཕྱིར། ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། ༄༅། །བསྐལ་པ་འགྲངས་པ་ཐམས་ཅད་དུ་ཞིང་འགྲངས་པར་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་ལ་རྒྱུན་མི་འཆད་པའི་སྨོན་ལམ་ཆེན་པོ་མངོན་ པར་སྒྲུབ་བོ། །འདི་ལྟ་སྟེ། བྱང་ཆུབ་སེམས་དཔའ་ཐམས་ཅད་དང་བསམ་པ་གཅིག་པའི་སྦྱོར་བ་དང༌། ལྟོད་པ་མེད་པའི་དགེ་བའི་རྩ་བ་ཐམས་ཅད་བསགས་པ་དང༌། བྱང་ཆུབ་ སེམས་དཔའ་ཐམས་ཅད་དང་དམིགས་པ་གཅིག་ཅིང་མཉམ་པ་དང༌། བྱང་ཆུབ་སེམས་དཔའ་དང་རྟག་ཏུ་རྒྱུན་མི་འཆད་པར་འགྲོགས་ཤིང་མི་འབྲལ་བ་དང༌། སངས་རྒྱས་ འབྱུང་བ་ཅི་དགར་བསྟན་པ་དང༌། རང་གི་སེམས་བསྐྱེད་པས་དེ་བཞིན་གཤེགས་པ་ཐམས་ཅད་ཀྱི་ཡུལ་དང༌། མཐུ་དང༌། ཡེ་ཤེས་ཁོང་དུ་ཆུད་པར་བྱ་བ་དང༌། མ་ཉམས་ ཤིང་རྗེས་སུ་འབྲང་བའི་མངོན་པར་ཤེས་པ་རབ་ཏུ་ཐོབ་པར་བྱ་བ་དང༌། འཇིག་རྟེན་གྱི་ཁམས་ཐམས་ཅད་དུ་རྣམ་པར་རྒྱུ་བར་བྱ་བ་དང༌། སངས་རྒྱས་ཐམས་ཅད་ཀྱི་འཁོར་གྱི་ དཀྱིལ་འཁོར་དུ་གཟུགས་བརྙན་འབྱུང་བ་ཡང་དག་པར་བསྟན་པ་དང༌། སྐྱེ་བའི་སྐྱེ་གནས་ཐམས་ཅད་དུ་རང་གི་ལུས་རྗེས་སུ་འགྲོ་བར་བྱ་བ་དང༌། ཐེག་པ་ཆེན་པོ་བསམ་གྱིས་ མི་ཁྱབ་པ་དང་ལྡན་པའི་བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱད་པ་རྒྱུན་མི་འཆད་པའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་ པ༑ ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་དུ་སྤྱོད་པ་འགྲངས་པར་ཐེག་པ་ཆེན་པོ་མངོན་པར་བསྒྲུབ་པ་ལ་རྒྱུན་མི་འཆད་པའི་སྨོན་ལམ་ཆེན་པོ་མངོན་ པར་སྒྲུབ་བོ། །འདི་ལྟ་སྟེ། ཕྱིར་མི་ལྡོག་པའི་འཁོར་ལོ་ལ་ཡང་དག་པར་གནས་ཤིང༌། བྱང་ཆུབ་སེམས་དཔའི་སྤྱོད་པ་སྤྱད་པ་དང༌། ལུས་དང་ངག་དང་ཡིད་ཀྱི་ལས་དོན་ཡོད་པར་ བྱ་བ་དང༌། མཐོང་མ་ཐག་ཏུ་སངས་རྒྱས་ཀྱི་ཆོས་གདོན་མི་ཟ་བར་ཐོབ་པར་བྱ་བ་དང༌། དབྱངས་བརྗོད་མ་ཐག་ཏུ་ཡེ་ཤེས་ཁོང་དུ་ཆུད་པར་བྱ་བ་དང༌། དད་པར་གྱུར་མ་ཐག་ཏུ་ཉོན་མོངས་ པ་ཕྱིར་མི་ལྡོག་པར་བྱ་བ་དང༌། བསམ་པ་སྨན་གྱི་རྒྱལ་པོ་ཆེན་པོ་ལྟ་བུར་རབ་ཏུ་ཐོབ་པར་བྱ་བ་དང༌། ལུས་ཡིད་བཞིན་གྱི་ནོར་བུ་ལྟ་བུ་ཐོབ་པར་བྱ་བ་དང༌། བྱང་ཆུབ་སེམས་དཔའ་ སྤྱོད་པ་ཐམས་ཅད་སྤྱད་པའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་ དུ་ཕྱིར་མི་ལྡོག་པའི་འཁོར་ལོ་འགྲངས་པར་སྤྱོད་པ་ཐམས་ཅད་འབྲས་བུ་ཡོད་པ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། འཇིག་རྟེན་གྱི་ཁམས་ ཐམས་ཅད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དང༌། སྐྲའི་སྦུབས་གཅིག་དང་ཐ་མི་དད་པའི་སྐྲའི་སྦུབས་ཐམས་ཅད་དུ་ཚེ་དང༌། སྐྱེ་བ་དང༌། ༄༅། །གཞོན་ནུ་རོལ་པ་དང༌། བཙུན་མོའི་འཁོར་གྱི་ནང་ན་བཞུགས་པ་དང༌། མངོན་པར་འབྱུང་བ་དང༌། རྣམ་པར་འཕྲུལ་པ་དང༌། སྙིང་པོ་བྱང་ཆུབ་ཏུ་ གཤེགས་པ་དང༌། བདུད་འདུལ་བ་དང༌། མངོན་པར་འཚང་རྒྱ་བ་དང༌། གསོལ་བ་གདབ་པ་དང༌། ཆོས་ཀྱི་འཁོར་ལོ་ཆེན་པོ་བསྐོར་བ་དང༌། ཡོངས་སུ་མྱ་ངན་ལས་འདའ་བ་ ཆེན་པོ་བསྟན་པ་དང༌། སངས་རྒྱས་ཀྱི་ཡུལ་དང་མཐུ་དང་ཡེ་ཤེས་ཆེན་པོ་ཁོང་དུ་ཆུད་པར་བྱ་བ་དང༌། སེམས་ཅན་གྱི་ཁམས་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་སངས་ རྒྱས་འབྱུང་བ་དང༌། སྐད་ཅིག་གཅིག་ཏུ་མངོན་པར་འཚང་རྒྱ་བ་དང༌། རབ་ཏུ་ཞི་བ་ཐོབ་པར་བྱ་བ་ཡང་དག་པར་བསྟན་པ་དང༌། མངོན་པར་འཚང་རྒྱ་བ་གཅིག་གིས་ཆོས་ཀྱི་ དབྱིངས་ཐམས་ཅད་འཕྲུལ་བས་རྒྱས་པར་དགང་བ་དང༌། དབྱངས་གཅིག་བརྗོད་པས་སེམས་ཅན་གྱི་ཁམས་ཐམས་ཅད་ཀྱི་སེམས་དང༌། བསམ་པ་ཤིན་ཏུ་ཚིམ་པར་ བྱ་བ་དང༌། མྱ་ངན་ལས་འདས་པ་ཆེན་པོ་ཡོངས་སུ་བསྟན་པ་དང༌། སྤྱོད་པ་རྣམས་རྒྱུན་མི་འཆད་པར་བྱ་བ་དང༌། ཐེག་པ་ཆེན་པོའི་ས་ལ་ཆོས་ཐམས་ཅད་རྣམ་པར་དགོད་ པ་ཡང་དག་པར་བསྟན་པ་དང༌། ཆོས་ཤེས་པའི་རྫུ་འཕྲུལ་གྱི་སྒྱུ་དང༌། མངོན་པར་ཤེས་པ་དང༌། དབང་གིས་ཆོས་ཀྱི་དབྱིངས་ཐམས་ཅད་སྤྲུལ་བས་རྣམ་པར་དགང་བའི་ ཕྱིར། ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་བ་འགྲངས་པ་ཐམས་ཅད་དུ་མངོན་པར་འཚང་རྒྱ་བ་འགྲངས་ པར་ཡེ་ཤེས་ཆེན་པོའི་མངོན་པར་ཤེས་པ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །ཀྱེ༑ རྒྱལ་བའི་སྲས་དག །དེ་ལྟར་རྣམ་པ་འདི་ལྟ་བུའི་སྨོན་ལམ་ཆེན་པོ་དང༌། བརྩོན་འགྲུས་ཆེན་པོ་དང༌། མངོན་པར་བསྒྲུབ་པ་ཆེན་པོའི་སྨོན་ལམ་གྱི་སྒོ་བཅུ་པོ་འདི་དག་ལ་སོགས་པ། སྨོན་ལམ་བརྒྱ་སྟོང་གྲངས་མེད་པ་ཕྲག་བཅུ་ཚང་བ་དག །བྱང་ཆུབ་སེམས་དཔའི་ ས་རབ་ཏུ་དགའ་བ་ལ་གནས་པའི་བྱང་ཆུབ་སེམས་དཔས་ཐོབ་བོ། །མངོན་པར་སྒྲུབ་བོ། །སྨོན་ལམ་དེ་དག་ཀྱང་མཐར་ཐུག་པའི་གནས་བཅུས་མངོན་པར་སྒྲུབ་སྟེ། བཅུ་གང་ཞེ་ན། འདི་ ལྟ་སྟེ། སེམས་ཅན་གྱི་ཁམས་ཀྱི་མཐར་ཐུག་པ་དང༌། འཇིག་རྟེན་གྱི་ཁམས་ཀྱི་མཐར་ཐུག་པ་དང༌། ནམ་མཁའི་ཁམས་ཀྱི་མཐར་ཐུག་པ་དང༌། ཆོས་ཀྱི་ཁམས་ཀྱི་མཐར་ཐུག་པ་དང༌། མྱ་ངན་ལས་འདས་པའི་ཁམས་ཀྱི་མཐར་ཐུག་པ་དང༌། སངས་རྒྱས་འབྱུང་བའི་ཁམས་ཀྱི་མཐར་ཐུག་པ་དང༌། དེ་བཞིན་གཤེགས་པའི་ཡེ་ཤེས་ཀྱི་ཁམས་ཀྱི་མཐར་ཐུག་པ་དང༌། སེམས་ཀྱི་དམིགས་པའི་ཁམས་ཀྱི་མཐར་ཐུག་པ་དང༌། ཡེ་ཤེས་མངོན་པར་བསྒྲུབ་པའི་ཁམས་ཀྱི་མཐར་ཐུག་པ་དང༌། འཇིག་རྟེན་གྱི་རྒྱུད་དང༌། ཆོས་ཀྱི་རྒྱུད་དང༌། ཡེ་ཤེས་ཀྱི་རྒྱུད་ ༄༅། །ཀྱི་ཁམས་ཀྱི་མཐར་ཐུག་པ་དག་གོ། །།བམ་པོ་བཞི་བཅུ་དྲུག་པ། དེ་ལྟར་སྨོན་ལམ་ཆེན་པོ་འདི་དག་སེམས་ཅན་གྱི་ཁམས་ཀྱི་མཐའ་གང་ དུ་ཐུག་པ་དེའི་མཐར་ཐུག་པར་གྱུར་ཅིག །སྨོན་ལམ་ཆེན་པོ་འདི་དག་འཇིག་རྟེན་གྱི་ཁམས་ཀྱི་མཐའ་གང་དུ་ཐུག་པ་དང༌། ནམ་མཁའི་ཁམས་དང༌། ཆོས་ཀྱི་ཁམས་དང༌། མྱ་ངན་ ལས་འདས་པའི་ཁམས་དང༌། སངས་རྒྱས་འབྱུང་བའི་ཁམས་དང༌། དེ་བཞིན་གཤེགས་པའི་ཡེ་ཤེས་ཀྱི་ཁམས་དང༌། སེམས་ཅན་གྱི་དམིགས་པའི་ཁམས་དང༌། ཡེ་ཤེས་ མངོན་པར་བསྒྲུབ་པའི་ཁམས་དང༌། འཇིག་རྟེན་གྱི་རྒྱུད་དང༌། ཆོས་ཀྱི་རྒྱུད་དང༌། ཡེ་ཤེས་ཀྱི་རྒྱུད་ཀྱི་ཁམས་ཀྱི་མཐའ་གང་དུ་ཐུག་པ་དེའི་མཐར་ཐུག་པར་གྱུར་ཅིག །འདི་ལྟར་སེམས་ ཅན་གྱི་ཁམས་མཐར་ཐུག་པ་མེད་པ་དང༌། འཇིག་རྟེན་གྱི་ཁམས་དང༌། ནམ་མཁའི་ཁམས་དང༌། ཆོས་ཀྱི་ཁམས་དང༌། མྱ་ངན་ལས་འདས་པའི་ཁམས་དང༌། སངས་རྒྱས་འབྱུང་ བའི་ཁམས་དང༌། དེ་བཞིན་གཤེགས་པའི་ཡེ་ཤེས་ཀྱི་ཁམས་དང༌། སེམས་ཀྱི་དམིགས་པའི་ཁམས་དང༌། ཡེ་ཤེས་མངོན་པར་བསྒྲུབ་པའི་ཁམས་དང༌། འཇིག་རྟེན་གྱི་རྒྱུད་ དང༌། ཆོས་ཀྱི་རྒྱུད་དང༌། ཡེ་ཤེས་ཀྱི་རྒྱུད་ཀྱི་ཁམས་མཐར་ཐུག་པ་མེད་པ་དེ་བཞིན་དུ་སྨོན་ལམ་ཆེན་པོ་འདི་དག་ཀྱང་མཐར་ཐུག་པ་མེད་པར་གྱུར་ཏེ། བདག་གི་དགེ་བའི་རྩ་བ་ འདི་དག་ཀྱང་མཐར་ཐུག་པ་མེད་པར་གྱུར་ཅིག །ཅེས་དེ་ལྟར་སྨོན་ལམ་ཤིན་ཏུ་བསྒྲུབས་ཤིང༌། ཕན་པའི་སེམས་དང་ལྡན་པ། འཇམ་པའི་སེམས་དང་ལྡན་པ། ལས་སུ་རུང་བའི་ སེམས་དང་ལྡན་པ། ཞི་བའི་སེམས་དང་ལྡན་པ། དུལ་བའི་སེམས་དང་ལྡན་པ། ཉེ་བར་ཞི་བའི་སེམས་དང་ལྡན་པ། གཉེན་པའི་སེམས་དང་ལྡན་པ། བྱམས་པའི་སེམས་དང་ལྡན་ པ༑ འཁྲུགས་པ་མེད་པའི་སེམས་དང་ལྡན་པ། གློང་བ་མེད་པའི་སེམས་དང་ལྡན་པ་དེ་ནི་ལེགས་པར་རྟོག་པ་མང་ཞིང་དད་པ་དང་ལྡན་པ་ཡིན་ཏེ། དེ་ནི་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྔོན་གྱི་མཐའི་སྤྱོད་པ་མངོན་པར་བསྒྲུབས་པའི་རྒྱུད་ལ་ཡིད་ཆེས་པ་ཡིན། ཕ་རོལ་ཏུ་ཕྱིན་པ་ཡང་དག་པར་བསྡུ་བ་ལ་ ཡིད་ཆེས་པ་ཡིན། ས་ཡང་དག་པར་བསྒྲུབ་པ་དང༌། ཁྱད་པར་དུ་འགྱུར་བ་ལ་མངོན་པར་ཡིད་ཆེས་པ་ཡིན། སྟོབས་ཡོངས་སུ་འགྲུབ་པ་ལ་མངོན་པར་ཡིད་ཆེས་པ་ཡིན། མི་ འཇིགས་པ་ཡོངས་སུ་རྫོགས་པར་འགྱུར་བ་ལ་མངོན་པར་ཡིད་ཆེས་པ་ཡིན། སངས་རྒྱས་ཀྱི་ཆོས་མ་འདྲེས་པ་མི་འཕྲོགས་པ་ལ་མངོན་པར་ཡིད་ཆེས་པ་ཡིན། སངས་རྒྱས་ ཀྱི་ཆོས་བསམ་གྱིས་མི་ཁྱབ་པ་ལ་མངོན་པར་ཡིད་ཆེས་པ་ཡིན། སངས་རྒྱས་ཀྱི་ཡུལ་མཐའ་དང་དབུས་མེད་པ་མངོན་པར་བསྒྲུབ་པ་ལ་མངོན་པར་ཡིད་ཆེས་པ་ཡིན། དེ་ ༄༅། །བཞིན་གཤེགས་པའི་སྤྱོད་ཡུལ་ཚད་མེད་པའི་རྗེས་སུ་སོང་བའི་རྗེས་སུ་འཇུག་པ་ལ་མངོན་པར་ཡིད་ཆེས་པ་ཡིན། འབྲས་བུ་ཡོངས་སུ་གྲུབ་པ་ལ་ མངོན་པར་ཡིད་ཆེས་པ་ཡིན། མདོར་བསྡུ་ན་བྱང་ཆུབ་སེམས་དཔའི་སྤྱོད་པ་ཐམས་ཅད་དང༌། དེ་བཞིན་གཤེགས་པ་ས་དང༌། ཡེ་ཤེས་ཀྱི་བར་དུ་ཤིན་ཏུ་བསྟན་པའི་བྱིན་གྱི་ རླབས་ལ་མངོན་པར་ཡིད་ཆེས་པ་ཡིན་ནོ། །ཡང་དེ་འདི་སྙམ་དུ་སེམས་ཏེ། སངས་རྒྱས་ཀྱི་ཆོས་འདི་དག་དེ་ལྟར་རྒྱ་ཆེ་ཞིང་དེ་ལྟར་ཟབ་ལ་དེ་ལྟར་དབེན་ཞིང་དེ་ལྟར་ ཞི་བ་སྟེ། དེ་ལྟར་སྟོང་ལ་དེ་ལྟར་མཚན་མ་མེད་ཅིང༌། དེ་ལྟར་སྨོན་པ་མེད་ལ། དེ་ལྟར་ཆགས་པ་མེད་དེ། དེ་ལྟར་གོས་པ་མེད་ཅིང༌། དེ་ལྟར་ཚད་མེད་ལ། སངས་རྒྱས་ ཀྱི་ཆོས་དེ་དག་དེ་ལྟར་རླབས་ཆེ་ན་འོན་ཀྱང་བྱིས་པ་སོ་སོའི་སྐྱེ་བོ་འདི་དག་ལྟ་བ་ངན་པར་ལྷུང་བའི་རྒྱུད་དང༌། མ་རིག་པའི་མུན་ནག་དང༌། རབ་རིབ་ཀྱི་ཐིབས་པོས་ཀུན་ནས་ ཁེབས་པའི་ཡིད་དང༌། ང་རྒྱལ་གྱི་རྒྱལ་མཚན་ཤིན་ཏུ་བསྒྲེང་བའི་ཡོངས་སུ་རྟོག་པ་དང༌། སྲེད་པའི་དྲ་བས་མངོན་པར་ཡེ་རྔམ་པའི་ཡིད་ལ་བྱ་བ་དང༌། སྒྱུ་དང་གཡོའི་ ཐིབས་པོ་ལ་རྗེས་སུ་སྤྱོད་པའི་སེམས་དང༌། བསམ་པ་དང༌། ཕྲག་དོག་དང༌། འཇུངས་པ་ཅན་གྱི་ཀུན་ནས་འཁོར་བས་ལམ་གྱི་རྒྱུད་དུ་སྐྱེ་བའི་ཀུན་ཏུ་འབྲེལ་བ་དང༌། འདོད་ཆགས་དང༌། ཞེ་སྡང་དང༌། གཏི་མུག་ལ་སྤྱོད་པའི་ལས་ཤིན་ཏུ་བསགས་པ་དང༌། ཁྲོ་བ་དང༌། ཁོན་དུ་འཛིན་པས་འབར་བ་བྱས་པའི་སེམས་ཀྱི་མེ་ལྕེ་དང༌། ཕྱིན་ཅི་ལོག་ དང་བཅས་པའི་ལས་མངོན་པར་བསྒྲུབ་པ་དང༌། འདོད་པ་དང༌། སྲིད་པའི་མ་རིག་པ་དང༌། ལྟ་བ་དང༌། ཀུན་ཏུ་ཟག་པའི་བག་ཆགས་མཚམས་འབྲེལ་བའི་སེམས་དང༌། ཡིད་ དང་རྣམ་པར་ཤེས་པའི་ས་བོན་གྱིས་འདི་ལྟ་སྟེ། ཁམས་གསུམ་དུ་མིང་དང་གཟུགས་ལྷན་ཅིག་ཏུ་སྐྱེས་ཤིང་ཐ་མི་དད་པར་བྱུང་བའི་ཡང་སྐྱེ་བའི་སྡུག་བསྔལ་གྱི་མྱུ་གུ་མངོན་པར་ བསྐྱེད་དོ། །མིང་དང་གཟུགས་དེ་རྣམ་པར་འཕེལ་ནས། སྐྱེ་མཆེད་དྲུག་གི་ཚོགས་འབྱུང་བར་འགྱུར་རོ། །སྐྱེ་མཆེད་རྣམས་བྱུང་བས་ཕན་ཚུན་རེག་པ་དང༌། ཕྲད་ཅིང་འདུས་པས་ ཚོར་བ་མངོན་པར་འབྱུང་ངོ༌། །ཚོར་བ་མྱོང་བ་དེ་ཉིད་ལ་ཡང་དང་ཡང་མངོན་པར་དགའ་བས་སྲེད་པ་དང༌། ཉེ་བར་ལེན་པ་རྣམ་པར་འཕེལ་ལོ། །ཉེ་བར་ལེན་པ་རྣམ་པར་འཕེལ་བས་ སྲིད་པ་ཀུན་ཏུ་འབྱུང་ངོ༌། །སྲིད་པ་ཀུན་ཏུ་བྱུང་བས་སྐྱེ་བ་དང༌། རྒ་ཤི་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་ ཀྱང་འབྱུང་བར་འགྱུར་ཏེ། དེ་ལྟར་སེམས་ཅན་དེ་དག་གི་སྡུག་བསྔལ་གྱི་ཕུང་པོ་བདག་དང་བདག་གི་མེད་པ། གསོབ། གསོག། སྟོང་པ། བྱེད་པ་མེད་པ། སེམས་མེད་པ། རྩྭ་ ༄༅། །དང༌། ཤིང་དང༌། རྩིག་པ་དང༌། སྒང་སྒོང་དང༌། མིག་གཡོར་ལྟ་བུ་མངོན་པར་འབྱུང་ཡང་དེ་ལྟར་ཁོང་དུ་མི་ཆུད་དོ། །ཅེས་དེ་ལ་བྱང་ཆུབ་སེམས་དཔས་ སེམས་ཅན་དེ་དག་དེ་ལྟར་སྡུག་བསྔལ་གྱི་ཕུང་པོ་དང་འབྲལ་མི་མྱོང་བ་མཐོང་ནས། དེའི་ཕྱིར་དེའི་སྙིང་རྗེ་ཆེན་པོ་རྒྱས་པ་འབྱུང་སྟེ། སེམས་ཅན་འདི་དག་ནི་བདག་གིས་ཡོངས་ སུ་བསྐྱབ་པར་བྱ་བ་དག་གོ །ཡོངས་སུ་དགྲོལ་བར་བྱ་བ་དག་གོ །ཤིན་ཏུ་བདེ་བ་ལ་དགོད་པར་བྱ་བ་དག་གོ་སྙམ་སྟེ། དེའི་ཕྱིར་དེའི་བྱམས་པ་ཆེན་པོ་རྒྱས་པ་འབྱུང་ངོ༌། །ཀྱེ། རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་སྙིང་རྗེ་དང༌། བྱམས་པ་དེ་ལྟ་བུའི་རྣམ་པ་དང་ལྡན་པའི་ལྷག་པའི་བསམ་པས་བྱང་ཆུབ་སེམས་དཔའི་ས་དང་ པོ་ལ་གནས་པའི་ཚེ། དངོས་པོ་ཐམས་ཅད་ལ་ཕངས་པར་སེམས་པའི་སེམས་ཡོངས་སུ་སྤངས་ནས། སངས་རྒྱས་ཀྱི་ཡེ་ཤེས་ལ་མོས་པ་དང༌། དད་པ་རླབས་པོ་ཆེའི་ བློས་སྦྱིན་པ་ཆེན་པོ་ལ་རབ་ཏུ་བརྩོན་པར་བྱེད་དེ། དེ་འདི་ལྟར་འདི་ལྟ་སྟེ། ནོར་དང་འབྲུའི་མཛོད་དང༌། བང་བ་ཡོངས་སུ་གཏང་བར་བྱ་བ་དག་གམ། གསེར་དང༌། ནོར་བུ་ དང༌། མུ་ཏིག་དང༌། བཻ་ཌཱུཪྻ་དང༌། རིན་པོ་ཆེ་ཤཱི་ལ་དང༌། བྱི་རུ་དང༌། དངུལ་དང༌། ས་ལེ་སྦྲམ་ཡོངས་སུ་གཏང་བར་བྱ་བ་དང༌། རིན་པོ་ཆེའི་རྒྱན་དང་ལྷབ་ལྷུབ་ཡོངས་སུ་ གཏང་བའམ། རྟ་དང༌། གླང་པོ་དང༌། ཤིང་རྟ་དང༌། རྐང་ཐང་དང༌། བཞོན་པ་ཡོངས་སུ་གཏང་བའམ། བྲན་ཕོ་དང་བྲན་མོ་ཡོངས་སུ་གཏང་བའམ། གྲོང་དང་གྲོང་ཁྱེར་དང༌། ལྗོངས་དང༌། ཕོ་བྲང་འཁོར་དང༌། རྒྱལ་པོའི་གནས་ཡོངས་སུ་གཏང་བའམ། བཟའ་ཤིང་གི་ར་བ་དང༌། དཀའ་ཐུབ་ཀྱི་ནགས་ཚལ་དང༌། གཙུག་ལག་ཁང་ཡོངས་སུ་གཏང་བའམ། ཆུང་མ་དང༌། བུ་དང་བུ་མོ་ཡོངས་སུ་གཏང་བའམ། སྡུག་ཅིང་ཡིད་དུ་འོང་བའི་དངོས་པོ་ཐམས་ཅད་ཡོངས་སུ་གཏང་བའམ། མགོ་དང༌། རྣ་བ་དང༌། རྐང་ལག་དང༌། མིག་དང༌། ཡན་ ལག་གི་དམ་པ་དང༌། ལུས་ཐམས་ཅད་ཡོངས་སུ་གཏང་བའམ། གཏང་བར་བྱ་བའི་དངོས་པོ་དེ་དག་ཐམས་ཅད་ལ་ཆགས་པ་མེད་པར་བྱས་ནས། སངས་རྒྱས་ཀྱི་ཡེ་ཤེས་ལ་དད་ པ་དང༌། མོས་པའི་བློས་ཡོངས་སུ་གཏོང་སྟེ། དེ་ལྟར་དེ་བྱང་ཆུབ་སེམས་དཔའི་ས་དང་པོ་འདི་ལ་གནས་པའི་ཚེ། གཏོད་པ་ཆེན་པོ་རབ་ཏུ་བྱེད་དོ། །དེ་དེ་ལྟར་བྱམས་པ་དང༌། སྙིང་ རྗེ་དང༌། གཏོང་བའི་བསམ་པ་དང་ལྡན་པས་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་ཡང་དང་ཡང་འཇིག་རྟེན་པ་དང༌། འཇིག་རྟེན་ལས་འདས་པའི་དོན་ཡོངས་སུ་ཚོལ་ ཞིང་དོན་དུ་གཉེར་ཏོ། །དེ་དེ་ལྟར་ཡོངས་སུ་ཚོལ་ཞིང་དོན་དུ་གཉེར་བའི་ཚེ་ཡོངས་སུ་སྐྱོ་བའི་སེམས་མི་སྐྱེ་སྟེ། དེའི་ཕྱིར་དེའི་ཡོངས་སུ་མི་སྐྱོ་བའི་སེམས་མངོན་པར་འབྱུང་ངོ༌། ། ༄༅། །ཡོངས་སུ་སྐྱོ་བ་མེད་པས་གཙུག་ལག་ཐམས་ཅད་ལ་འཇིགས་པ་མེད་པ་ཡིན། དེའི་ཕྱིར་གཙུག་ལག་ཐམས་ཅད་ལ་རབ་ཏུ་ཤེས་པ་ཡིན་ཏེ། དེ་དེ་ ལྟ་བུའི་གཙུག་ལག་དང་ལྡན་པས་བྱ་བ་དང༌། མི་བྱ་བ་ཤིན་ཏུ་རྟོགས་པའི་བློས་སེམས་ཅན་རབ་དང༌། འབྲིང་དང༌། ཐ་མ་ལ་དད་པའི་ཚུལ་ཇི་ལྟ་བ་དང༌། ཅི་འོས་པས་ཅི་ནུས་སུ་སྙིང་ ཐག་པ་ནས་ཡང་དག་པ་ཉིད་ཐོབ་པར་བྱ་བའི་ཕྱིར་བརྩོན་པར་བྱེད་དོ། །ནན་ཏན་དུ་བྱེད་དོ། །དེའི་ཕྱིར་དེ་འཇིག་རྟེན་ཤེས་པ་ཡིན་ཏེ། འཇིག་རྟེན་ཤེས་པས་དུས་དང་ཚོད་དུ་རན་པར་ སྤྱོད་ཅིང་ངོ་ཚ་ཤེས་པ་དང༌། ཁྲེལ་ཡོད་པས་བསམ་པ་ཤིན་ཏུ་བརྒྱན་པས། བདག་དང་གཞན་གྱི་དོན་དུ་རབ་ཏུ་བརྩོན་པར་བྱེད་དེ། དེའི་ཕྱིར་ངོ་ཚ་ཤེས་ཤིང་ཁྲེལ་ཡོད་པ་ཡིན། སྦྱོར་བ་དེ་དག་ལའང་འབྱུང་བར་སྤྱོད་པ་ཡིན། ཕྱིར་མི་ལྡོག་ཅིང་ཕྱིར་མི་ལྡོག་པའི་བརྩོན་འགྲུས་དང༌། སྟོབས་ཀྱིས་ཤུགས་ཀྱང་རབ་ཏུ་ཐོབ་པ་ཡིན་ཏེ། དེ་ལྟར་དེ་དགའ་བའི་སྟོབས་ དང་ཤུགས་ཡོངས་སུ་སྐྱེས་པ་ཡིན། དགའ་བའི་སྟོབས་དང་ཤུགས་རབ་ཏུ་ཐོབ་པས། དེ་བཞིན་གཤེགས་པ་མཆོད་ཅིང་རིམ་གྲོར་བྱ་བ་ལ་རབ་ཏུ་བརྩོན་ཞིང་བསྟན་པ་ལའང་ནན་ ཏན་ཤིན་ཏུ་བྱེད་དོ། །དེ་ལྟར་དེའི་ས་ཡོངས་སུ་སྦྱོང་བའི་ཆོས་འདི་ལྟ་སྟེ། དད་པ་དང༌། སྙིང་རྗེ་དང༌། བྱམས་པ་དང༌། གཏོང་བ་དང༌། སྐྱོ་བ་མེད་པ་དང༌། གཙུག་ལག་ཤེས་པ་ དང༌། འཇིག་རྟེན་ཤེས་པ་དང༌། ཁྲེལ་ཡོད་ཅིང་ངོ་ཚ་ཤེས་པ་དང༌། དགའ་བའི་སྟོབས་ཀྱི་ཤུགས་དང༌། དེ་བཞིན་གཤེགས་པ་མཆོད་ཅིང་རིམ་གྲོ་བྱ་བའི་ནན་ཏན་ཡོངས་སུ་སྐྱེས་ པ་ཡིན་ནོ། །དེ་དེ་ལྟར་བྱང་ཆུབ་སེམས་དཔའི་ས་རབ་ཏུ་དགའ་བ་འདི་ལ་གནས་པའི་ཚེ། ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་རབ་ཏུ་སྣང་བར་ འགྱུར་ཏེ། ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང༌། སངས་རྒྱས་སྟོང་ཕྲག་མང་པོ་དང༌། སངས་རྒྱས་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་མང་པོ་དང༌། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང༌། སངས་རྒྱས་ཁྲག་ཁྲིག་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་རབ་ཏུ་སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་དེ་དག་མཐོང་ནས། བསམས་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང༌། བསོད་ སྙོམས་དང༌། གཟིམས་ཆ་དང༌། སྙུན་གྱི་རྐྱེན་སྨན་དང༌། ཡོ་བྱད་དག་ཀྱང་འབུལ་ཞིང༌། བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། དགེ་ ༄༅། །འདུན་གྱི་ཚོགས་རྣམས་ལ་ཡང་ཡང་དག་པར་མཆོད་པར་བྱེད་དེ། དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་ སུ་བསྔོའོ། །དེ་ལྟར་དེས་སངས་རྒྱས་བཅོམ་ལྡན་འདས་དེ་དག་མཆོད་པས་སེམས་ཅན་ཡོངས་སུ་སྨིན་པར་བྱ་བ་མངོན་པར་འགྲུབ་པ་ཡིན། དེ་བསྡུ་བའི་དངོས་པོ་སྦྱིན་ པ་དང༌། ངག་སྙན་པ་གཉིས་ཀྱི་ཤས་ཆེ་བས་སེམས་ཅན་རྣམས་ཡོངས་སུ་སྨིན་པར་བྱེད་དོ། །དེའི་མོས་པའི་ཤུགས་དང༌། སྟོབས་ཀྱིས་བསྡུ་བའི་དངོས་པོ་གོང་མ་གཉིས་ཀྱང་ ཡོངས་སུ་འགྲུབ་པར་འགྱུར་ཏེ། མ་ལུས་པར་ཁོང་དུ་ཆུད་པར་ནི་མ་ཡིན་ནོ། །དེའི་ཕ་རོལ་ཏུ་ཕྱིན་པ་བཅུ་ལས་སྦྱིན་པའི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ ཀྱང་ཅི་ཚུལ་ཅི་ནུས་སུ་ཡང་དག་པར་མི་སྒྲུབ་པ་མ་ཡིན་ནོ། །དེ་ཇི་ལྟ་ཇི་ལྟར་སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱེད་ཅིང༌། སེམས་ཅན་ཡོངས་སུ་སྨིན་པར་བྱ་བ་ ལ་བརྩོན་པ་དང༌། ས་ཡོངས་སུ་སྦྱོང་བའི་ཆོས་འདི་དག་ཡང་དག་པར་བླངས་ཏེ་གནས་པ་དེ་ལྟ་དེ་ལྟར་དེའི་དགེ་བའི་རྩ་བ་ཐམས་ཅད་མཁྱེན་པ་ཉིད་དུ་ཡོངས་སུ་བསྡོས་པ། དེ་ དག་དེ་བས་ཀྱང་ཤས་ཆེར་ཤིན་ཏུ་བྱང་བ་དང༌། ཡོངས་སུ་དག་པ་དང༌། ལས་སུ་རུང་བར་འགྱུར་རོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། མགར་བ་མཁས་པས་ གསེར་གྱི་ས་ལེ་སྦྲམ་ཇི་ལྟ་ཇི་ལྟར་མེར་བསྲེགས་པ་དེ་ལྟ་དེ་ལྟར་ཤིན་ཏུ་བྱང་ཞིང་ཡོངས་སུ་དག་པ་དང༌། ཅི་དགར་ལས་སུ་རུང་བར་འགྱུར་རོ། །ཀྱེ། རྒྱལ་བའི་སྲས་དག །དེ་བཞིན་ དུ་བྱང་ཆུབ་སེམས་དཔའ་རྣམས་ཇི་ལྟ་ཇི་ལྟར་སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱེད་ཅིང༌། སེམས་ཅན་ཡོངས་སུ་སྨིན་པར་བྱ་བ་ལ་བརྩོན་པར་བྱེད་པ་དང༌། ས་ཡོངས་སུ་སྦྱོང་བའི་ཆོས་ཀྱི་རྣམ་པ་འདི་ལྟ་བུ་དག་ཡང་དག་པར་བླངས་ཏེ་གནས་པ་དེ་ལྟ་དེ་ལྟར་དེའི་དགེ་བའི་རྩ་བ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པ་དེ་ དག་ཤིན་ཏུ་བྱང་བ་དང༌། ཡོངས་སུ་དག་པ་དང༌། ཅི་དགར་ལས་སུ་རུང་བར་འགྱུར་རོ། །ཀྱེ༑ རྒྱལ་བའི་སྲས་དག །གཞན་ཡང་ས་དང་པོ་ལ་གནས་པའི་བྱང་ཆུབ་སེམས་དཔའ་ སེམས་དཔའ་ཆེན་པོས། བྱང་ཆུབ་སེམས་དཔའི་ས་དང་པོ་ཉིད་ཀྱི་རྣམ་པ་དང༌། འཐོབ་པར་བྱ་བ་དང༌། རྒྱུ་མཐུན་པའི་འབྲས་བུ་སངས་རྒྱས་དང༌། བྱང་ཆུབ་སེམས་དཔའ་ དང༌། དགེ་བའི་བཤེས་གཉེན་ལས་ཡོངས་སུ་བཙལ་ཞིང་ཡོངས་སུ་དྲི་བར་བྱའོ། །སའི་ཡན་ལག་ཡོངས་སུ་བསྒྲུབ་པའི་ཕྱིར་ཡང་ངོམས་མི་ཤེས་པར་བྱས་ཏེ། དེས་བྱང་ ཆུབ་སེམས་དཔའི་ས་དང་པོ་འདི་ལ་གནས་པའི་ཚེ། བྱང་ཆུབ་སེམས་དཔའི་ས་གཉིས་པ་དང༌། གསུམ་པ་དང༌། བཞི་པ་དང༌། ལྔ་པ་དང༌། དྲུག་པ་དང༌། བདུན་པ་དང༌། ༄༅། །བརྒྱད་པ་དང༌། དགུ་པ་དང༌། བཅུ་པའི་རྣམ་པ་དང༌། འཐོབ་བར་བྱ་བ་དང༌། རྒྱུ་མཐུན་པའི་འབྲས་བུ་སངས་རྒྱས་དང༌། བྱང་ཆུབ་སེམས་དཔའ་དང༌། དགེ་བའི་བཤེས་གཉེན་ལས་ཡོངས་སུ་བཙལ་ཞིང་ཡོངས་སུ་དྲི་བར་བྱའོ། །སའི་ཡན་ལག་ཡོངས་སུ་བསྒྲུབ་པའི་ཕྱིར་ཡང་ངོམས་མི་ཤེས་པར་བྱའོ། །དེས་སའི་ཕྱོགས་ དང་མི་མཐུན་པའི་ཕྱོགས་ལ་མཁས་པར་བྱའོ། །ས་འགྲུབ་པ་དང༌། འཇིག་པ་ལ་མཁས་པར་བྱའོ། །སའི་རྣམ་པ་དང༌། རྒྱུ་མཐུན་པའི་འབྲས་བུ་ལ་མཁས་པར་བྱའོ། ། ས་འཐོབ་པར་བྱ་བ་དང༌། རྣམ་པར་བསྒོམ་པ་ལ་མཁས་པར་བྱའོ། །སའི་རྣམ་པ་ཡོངས་སུ་སྦྱང་བ་ལ་མཁས་པར་བྱའོ། །ས་ནས་སར་འཕར་བ་ལ་མཁས་པར་བྱའོ། །ས་ དང་ས་ལ་རྣམ་པར་གནས་པ་ལ་མཁས་པར་བྱའོ། །ས་ནས་སའི་གནས་གཞན་དུ་འཕོ་བར་བྱ་བ་ལ་མཁས་པར་བྱའོ། །ས་ནས་སར་ཡོངས་སུ་སྦྱང་བའི་ཁྱད་པར་གྱི་ ཡེ་ཤེས་ལ་མཁས་པར་བྱའོ། །ས་ནས་ས་ཐོབ་ནས་ཕྱིར་མི་ལྡོག་པའི་ཡེ་ཤེས་ལ་མཁས་པར་བྱའོ། །བྱང་ཆུབ་སེམས་དཔའི་ས་ཡོངས་སུ་སྦྱང་བས། དེ་བཞིན་གཤེགས་ པའི་ས་གནན་པ་ལ་མཁས་པར་བྱའོ། །ཀྱེ༑ རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སའི་རྣམ་པ་མངོན་པར་བསྒྲུབ་པ་ལ་མཁས་པ་ ནི་ས་དང་པོ་ལས་གྱེན་དུ་མ་བསྐྱོད་པར་ས་བཅུའི་བར་དུ་གནན་ཅིང་འཐབ་པར་བྱ་བ་ཐོགས་པ་མེད་དེ། ཐོགས་པ་མེད་པར་འགྲོ་བ་དང༌། སའི་ཡེ་ཤེས་སྣང་བས་སངས་རྒྱས་ཀྱི་ཡེ་ ཤེས་སྣང་བའང་རབ་ཏུ་ཐོབ་བོ། །ཀྱེ། རྒྱལ་བའི་སྲས་དག །འདི་ལྟ་སྟེ། དཔེར་ན། དེད་དཔོན་ཆེན་པོ་མཁས་པས་ལམ་གྲོགས་ཡོངས་སུ་གདོན་པའི་བསམ་པ་དང་ལྡན་པ། གྲོང་རྡལ་ཆེན་པོའི་སར་ཕྱིན་པར་བྱ་བར་འདོད་པ་ནི་ཐོག་མ་ནས་ལམ་དང་ལམ་གྱི་ཡོན་ཏན་དང༌། ལམ་ལས་གོལ་བའི་ཉེས་པ་དང༌། ལམ་གྱི་བར་ལམ་གྱི་ཁྱད་པར་དང༌། ལམ་གྱི་བར་ལམ་འཁྲུལ་ན་ཉེས་པར་འགྱུར་བ་དང༌། ལམ་དུ་བྱ་མི་བྱ་དང༌། བརྒྱགས་བཤམས་པ་ཡོངས་སུ་ཚོལ་ཞིང་ཀུན་ཏུ་འདྲིའོ། །ཐོག་མའི་ལམ་གྱི་བར་ལམ་ནས་མ་ འཕགས་པ་ནས་གྲོང་རྡལ་དུ་ཕྱིན་གྱི་བར་དུ་ཤིན་ཏུ་མཁས་པ་ཡིན་ཏེ། ལམ་གྱི་བར་ལམ་དེ་ནས་མ་འཕགས་པར་དེ་ཉིད་ནས་ཤེས་པས་ཤིན་ཏུ་བརྟགས་པའི་བློ་དང༌། བརྒྱགས་ཀྱི་ཚོགས་ཆེན་པོ་ཕུན་སུམ་ཚོགས་པས་ལམ་གྲོགས་མང་པོ་རྣམས་ཉམ་ཉེས་མེད་པར་གྲོང་རྡལ་ཆེན་པོ་དེར་ཕྱིན་པར་བྱེད་དེ། མྱ་ངན་དང་དགོན་པའི་ཉེས་ པས་བདག་དང་ལམ་གྲོགས་རྣམས་ལ་གནོད་པར་མི་འགྱུར་བར་བྱེད་དོ། །ཀྱེ༑ རྒྱལ་བའི་སྲས་ངག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དེད་དཔོན་ ༄༅། །མཁས་པ་ཡང་གང་གི་ཚེ། བྱང་ཆུབ་སེམས་དཔའི་ས་དང་པོ་ལ་གནས་ཤིང༌། སའི་ཕྱོགས་དང༌། མི་མཐུན་པའི་ཕྱོགས་ལ་མཁས་པ་དང༌། ས་ འགྲུབ་པ་དང༌། འཇིག་པ་ལ་མཁས་པ་དང༌། སའི་རྣམ་པ་དང༌། རྒྱུ་མཐུན་པའི་འབྲས་བུ་ལ་མཁས་པ་དང༌། ས་འཐོབ་པར་བྱ་བ་དང༌། རྣམ་པར་བསྒོམ་པ་ལ་མཁས་པ་ དང༌། སའི་ཡན་ལག་ཡོངས་སུ་སྦྱང་བ་ལ་མཁས་པ་དང༌། ས་ནས་སར་འཕར་བ་ལ་མཁས་པ་དང༌། ས་ནས་སར་རྣམ་པར་གནས་པ་ལ་མཁས་པ་དང༌། ས་ནས་སར་ ཁྱད་པར་དུ་འགྱུར་བའི་ཡེ་ཤེས་ལ་མཁས་པ་དང༌། ས་ནས་ས་ཐོབ་པ་ལས་ཕྱིར་མི་ལྡོག་པ་ལ་མཁས་པ་དང༌། བྱང་ཆུབ་སེམས་དཔའི་ས་ཐམས་ཅད་ཡོངས་སུ་སྦྱང་ བས་དེ་བཞིན་གཤེགས་པའི་ས་གནོན་པ་ལ་མཁས་པར་གྱུར་པ་དེའི་ཚེ་བསོད་ནམས་ཀྱི་ཚོགས་ཆེན་པོའི་བརྒྱགས་ཡོངས་སུ་བཟུང་བ་དང༌། ཡེ་ཤེས་ཀྱི་ཚོགས་ཆེན་པོ་ ལ་རྣམ་པར་དབྱེ་བ་ཤིན་ཏུ་བྱས་པ་དང༌། སེམས་ཅན་གྱི་ལམ་གྲོགས་མང་པོ་ཡོངས་སུ་གདོན་པའི་བསམ་པ་དང་ལྡན་པས་ཐམས་ཅད་མཁྱེན་པའི་གྲོང་རྡལ་ཆེན་ པོར་ཕྱིན་པར་བྱ་བར་འདོད་ཅིང་ཐོག་མ་ནས་སའི་ལམ་དང༌། སའི་ལམ་གྱི་ཡོན་ཏན་དང༌། སའི་ལམ་གོལ་བའི་ཉེས་པ་དང༌། སའི་ལམ་གྱི་བར་ལམ་གྱི་ཁྱད་པར་ དང༌། སའི་ལམ་གྱི་བར་ལམ་འཁྲུལ་ན་ཉེས་པར་འགྱུར་བ་དང༌། བསོད་ནམས་ཀྱི་ཚོགས་ཆེན་པོའི་བརྒྱགས་བཤམས་ཤིང་གསོག་པ་དག་ཀྱང༌། སངས་རྒྱས་དང༌། བྱང་ཆུབ་སེམས་ དཔའ་དག་དང༌། དགེ་བའི་བཤེས་གཉེན་དག་ལས་ཡོངས་སུ་ཚོལ་ཞིང་ཡོངས་སུ་འདྲི་སྟེ། དེ་ལམ་གྱི་བར་ལམ་དང་པོ་ནས་གྱེན་དུ་འཕགས་པར་ཐམས་ཅད་མཁྱེན་པའི་གྲོང་རྡལ་ ཆེན་པོར་ཕྱིན་པར་བྱ་བའི་བར་དུ་མཁས་པ་ཡིན། དེ་དེ་ལྟར་ཡེ་ཤེས་ཀྱིས་རྣམ་པར་རྟོགས་པའི་བློ་དང༌། བསོད་ནམས་དང༌། ཡེ་ཤེས་ཀྱི་ཚོགས་ཆེན་པོའི་བརྒྱགས་ཕུན་སུམ་ཚོགས་ པས་སེམས་ཅན་གྱི་ལམ་གྲོགས་ཀྱི་ཚོགས་ཆེན་པོ་ཡོངས་སུ་སྨིན་པའི་ཚུལ་བཞིན་དུ་འཁོར་བའི་མྱ་ངན་དང༌། དགོན་པ་བ་རྒལ་དཀའ་བ་ལས་བསྒྲལ་ཏེ། ཐམས་ཅད་མཁྱེན་ པའི་ཡེ་ཤེས་ཀྱི་གྲོང་རྡལ་ཆེན་པོའི་བར་དུ་ཕྱིན་པར་བྱེད་ཅིང༌། འཁོར་བའི་མྱ་ངམ་དང༌། དགོན་པའི་ཉེས་པས་སེམས་ཅན་ལམ་གྲོགས་སམ། བདག་ལ་གནོད་པར་ཡང་མི་ འགྱུར་བར་བྱེད་དོ། །ཀྱེ༑ རྒྱལ་བའི་སྲས་དག །དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་སྐྱོ་བ་མེད་པའི་ཡིད་ཀྱིས་ས་ཡོངས་སུ་སྦྱང་བའི་ཁྱད་ པར་ལ་བརྩོན་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ས་གནོན་པའི་བར་དུ་ཡང་མཁས་པར་བྱའོ། །ཀྱེ། རྒྱལ་བའི་སྲས་དག །འདི་ནི་བྱང་ཆུབ་སེམས་ ༄༅། །དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བའི་སྒོར་འཇུག་པ་མདོར་བསྡུས་ཏེ་བསྟན་པའོ། །རྒྱ་ཆེར་ནི་ ཤིན་ཏུ་བསྟན་པ་བརྒྱ་སྟོང་གྲངས་མེད་པ་ལ་རྣམ་པའི་མུར་ཐུག་པ་མེད་པ་སྟེ། བསྐལ་པ་གྲངས་མེད་པའི་མཐར་ཐུག་པར་ཤིན་ཏུ་བསྟན་པའི་ཚུལ་གྱི་ཁོང་དུ་ཆུད་པར་བྱའོ།། དེ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕལ་ཆེར་འཛམ་བུའི་གླིང་གི་རྒྱལ་པོར་འགྱུར་ཏེ། སྲིད་ཆེན་པོ་ལ་དབང་སྒྱུར་བ་རབ་ཏུ་ཐོབ་ཅིང་ཆོས་ཀྱིས་ ཡོངས་སུ་བསྐྱང་བ་དང༌། སེམས་ཅན་རྣམས་སྦྱིན་པ་ཆེན་པོས་ཡོངས་སུ་བསྡུ་བ་ལ་མཁས་ཤིང་མཐུ་ཡོད་པ་ཡིན། སེམས་ཅན་རྣམས་ཀྱིས་འཇུངས་པའི་དྲི་མ་བཟློག་པ་ ལ་མཁས་པ་ཡིན། སྦྱིན་པ་ཆེན་པོ་རྩོམ་པས་ཡོངས་སུ་དུབ་པར་མི་འགྱུར་བ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་ རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། རྣམ་པར་འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས། རྣམ་པ་ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་ འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང༌། ཆོས་ཡིད་ལ་བྱ་བ་དང༌། དགེ་འདུན་ཡིད་ལ་བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་དང༌། བྱང་ཆུབ་སེམས་དཔའི་སྤྱོད་པ་ ཡིད་ལ་བྱ་བ་དང༌། བྱང་ཆུབ་སེམས་དཔའི་ས་ཡིད་ལ་བྱ་བ་དང༌། ཕ་རོལ་ཏུ་ཕྱིན་པ་ཡིད་ལ་བྱ་བ་དང༌། སྟོབས་ཡིད་ལ་བྱ་བ་དང༌། མི་འཇིགས་པ་ཡིད་ལ་བྱ་བ་དང༌། སངས་རྒྱས་ ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན། དེ་འདོད་ན་ སྐད་ཅིག་ཡུད་ཙམ་ཐང་ཅིག་ཏུ། ཁྱིམ་དང༌། ཆུང་མ་དང༌། སྲིད་ཐམས་ཅད་ཡོངས་སུ་སྤངས་ཏེ། དེ་བཞིན་གཤེགས་པའི་བསྟན་པ་ལ་རབ་ཏུ་འབྱུང་བ་དང༌། རབ་ཏུ་བྱུང་ནས་ཀྱང་ སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་བརྒྱ་རབ་ཏུ་འཐོབ་ཅིང་སྙོམས་པར་འཇུག་པ་དང༌། སངས་རྒྱས་བརྒྱ་མཐོང་བ་དང༌། དེ་དག་གི་བྱིན་གྱི་རླབས་ཀྱང་ཡང་དག་པར་ ཤེས་པ་དང༌། འཇིག་རྟེན་གྱི་ཁམས་བརྒྱ་བསྐྱོད་པ་དང༌། སངས་རྒྱས་ཀྱི་ཞིང་བརྒྱར་འགྲོ་བ་དང༌། འཇིག་རྟེན་གྱི་ཁམས་བརྒྱ་སྣང་བར་བྱ་བ་དང༌། སེམས་ཅན་བརྒྱ་ཡོངས་ སུ་སྨིན་པར་བྱ་བ་དང༌། བསྐལ་པ་བརྒྱར་གནས་པར་བྱ་བ་དང༌། སྔོན་གྱི་མཐའ་དང་ཕྱི་མའི་མཐའི་བསྐལ་པ་བརྒྱ་ལ་རབ་ཏུ་འཇུག་པ་དང༌། ཆོས་ཀྱི་སྒོ་བརྒྱ་རྣམ་པར་འབྱེད་ ༄༅། །པ་དང༌། ལུས་བརྒྱ་ཡོངས་སུ་བསྟན་པ་དང༌། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་བརྒྱ་ཡང་དག་པར་བསྟན་པར་བྱ་བའི་བརྩོན་འགྲུས་ ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཆད་བྱང་ཆུབ་སེམས་དཔའི་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དམ། རྫུ་འཕྲུལ་ལམ། མིག་གམ། སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ ཀྱང་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ མས་ཀྱང་བགྲང་བར་དཀའོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང༌། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་ པ་འདི་དག་སྨྲས་སོ། །དེ་དག་དཀར་བོའི་ཆོས་བསགས་དགེ་བ་ཕུན་ལྡན་ཞིང༌། །བདེ་གཤེགས་ཡོངས་སུ་བསྙེན་བཀུར་སྙིང་རྗེ་བྱམས་ལྡན་ལ། །དད་པ་རྒྱ་ཆེ་དགེ་སེམས་དང་ ཚུལ་དག་ལྡན་པ། །རྒྱལ་བའི་ཡེ་ཤེས་དོན་དུ་རླབས་ཆེན་སེམས་ཀྱང་བསྐྱེད། །རྒྱལ་བའི་ཆོས་རྫོགས་འགྲོ་བ་ཡོངས་སུ་བསྐྱབ་དོན་དུ། །ཐམས་ཅད་མཁྱེན་པ་སངས་རྒྱས་ སྟོབས་སྦྱོང་བརྟན་མཐུ་ཅན། །བརྩེ་རབ་ཆེན་པོས་ཆོས་ཀྱི་འཁོར་ལོ་བསྐོར་བྱ་བས། །རྒྱལ་བའི་ཞིང་སྦྱོང་སེམས་ཀྱི་དམ་པ་རབ་ཏུ་བསྐྱེད། །འགྲོ་བར་རྣམ་པ་སྣ་ཚོགས་ དུས་རྣམས་བསྟན་པའི་ཕྱིར། །འདྲེན་པ་ཀུན་གྱི་ཡོན་ཏན་ཐམས་ཅད་འདོད་ཚོལ་ཞིང༌། །དུས་གསུམ་སྐད་ཅིག་གཅིག་ཏུ་མི་རྟོག་ཤེས་བྱེད་པའི། །མཁའ་འདྲ་ཤིན་ཏུ་ ཡངས་པའི་སེམས་དང་ལྡན་པར་བྱེད། །ཤེས་རབ་དབང་སྒྱུར་སྙིང་རྗེ་སྔོན་འགྲོ་ཐབས་ལྡན་ཞིང༌། །མོས་དང་བསམ་པ་རྣམ་དག་སྟོབས་ཀྱིས་ཚད་མེད་ལ། །ཆགས་ མེད་མངོན་གྱུར་གཞན་གྱི་དྲིང་ལ་མི་འཇོག་པ། །བདེ་གཤེགས་རྣམས་དང་མཉམ་གྱུར་སེམས་ཀྱི་དམ་པ་བསྐྱེད། །བདེ་གཤེགས་སྲས་སེམས་རིན་ཆེན་ཡང་དག་སྐྱེས་ འཕྲལ་དུ། །བྱིས་པའི་སྤྱོད་བྲལ་སངས་རྒྱས་རྣམས་ཀྱི་སྤྱོད་དང་ལྡན། །སྟོབས་བཅུ་མངའ་རིགས་ཁ་ན་མ་ཐོ་མེད་པར་སྐྱེས། །བདེ་གཤེགས་མཉམ་ཉིད་རྗེས་རྟོགས་བྱང་ ཆུབ་མཆོག་ཏུ་ངེས། །འདི་འདྲའི་སེམས་དང་ས་ཐོབ་ལྷན་ཅིག་མངོན་པར་སྐྱེས། །བསམ་པ་མི་གཡོ་རི་ཡི་རྒྱལ་པོ་འདྲ་བར་གནས། །རབ་ཏུ་དགའ་ཞིང་སྤྲོ་མང་དད་དང་ ལྡན་པ་སྟེ། །མོས་པའི་ཤུགས་ཡངས་རྟག་པར་སེམས་ཀྱི་མཆོག་དང་ལྡན། །འཁྲུག་དང་འཚེ་བ་མེད་ཅིང་ཁྲོ་བ་མེད་པ་སྟེ། །ངོ་ཚ་ཤེས་ཤིང་སྲིད་ཞུ་དྲང་ལྡན་ཤིན་ཏུ་ ༄༅། །བསྡམས། །འགྲོ་བ་ཡོངས་སུ་བསྐྱབ་པའི་མཚུངས་མེད་ཡེ་ཤེས་དྲན་གྱུར་ཅིང༌། །འདོད་པར་བྱ་བའི་གནས་དང་ལྡན་གྱུར་དགའ་བ་བསྐྱེད། །ས་ ཐོབ་གྱུར་མ་ཐག་ཏུ་འཇིགས་པ་ལྔ་དང་བྲལ། །འཚོ་བ་མེད་དང་འཆི་དང་མི་བསྔགས་ངན་འགྲོ་དང༌། །འཁོར་གྱི་འཇིགས་བྲལ་དེ་ལ་བག་ཚའི་རྣམ་པ་མེད། །ཅིའི་ཕྱིར་ཞེ་ན་དེ་ ལ་བདག་གི་གནས་མེད་དོ། །དེ་དག་བག་ཆགས་བྲལ་ཞིང་སྙིང་རྗེ་བྱམས་དང་ལྡན། །བསྟི་སྟང་དང་ལྡན་དགའ་བ་ཕུན་སུམ་ཡོན་ཏན་མང༌། །ཉིན་དང་མཚན་དུ་ དགེ་བའི་ཕྱོགས་ལ་སྟེན་བྱེད་ཅིང༌། །སེམས་ཅན་དོན་དུ་ཆོས་བརྩོན་འདོད་བསྐྱེད་ཕྱིར་མ་ཡིན། །དགེ་བའི་ཆོས་ཐོས་བསམ་ལ་མཁས་ཤིང་གནས་མེད་སྤྱོད། །ཐོབ་ སེམས་སྲེད་བྲལ་བྱང་ཆུབ་སེམས་ལ་རྟག་པར་དགའ། །བདེ་གཤེགས་ཡེ་ཤེས་འདོད་ཅིང་གཞན་དུ་སེམས་པ་མེད། །ཕ་རོལ་ཕྱིན་པ་ཚོལ་ཞིང་སྒྱུ་དང་གཡོ་ཡང་ སྤངས། །ཅི་སྨྲས་དེ་བཞིན་བྱེད་པས་བདེན་པའི་ཚིག་ལ་གནས། །རྒྱལ་བའི་རིགས་སྐྱོན་མི་འགྱུར་བྱང་ཆུབ་སློབ་ལ་སྤྱོད། །འཇིག་རྟེན་ལས་ཀྱི་བསམ་བྲལ་འགྲོ་བའི་ དོན་དུ་བརྩོན། །དཀར་པོས་ངོམས་པ་མེད་པར་ཕྱིར་ཞིང་གོང་དུ་རྩོལ། །དེ་དག་འདི་འདྲའི་ཆོས་བརྩོན་ཡོན་ཏན་དོན་དང་ལྡན། །རྒྱལ་བ་བལྟ་བའི་དོན་དུ་སྨོན་ལམ་ མངོན་པར་སྒྲུབ། །དམ་ཆོས་ཡོངས་སུ་གཟུང་ཞིང་དྲང་སྲོང་དྲུང་འགྲོ་དང༌། །སྤྱོད་པ་མཆོག་གི་དོན་དུ་སྨོན་ལམ་མངོན་པར་སྒྲུབ། །སེམས་ཅན་ཡོངས་སུ་སྨིན་བྱ་སངས་ རྒྱས་ཞིང་སྦྱངས་ཏེ། །དེ་ཡི་ཞིང་མཆོག་རྒྱལ་སྲས་ཀུན་གྱིས་གང་འགྱུར་ཞིང༌། །རྒྱལ་སྲས་རྣམས་དང་བསམ་པ་གཅིག་ཅིང་དོན་མཐུན་ཕྱིར། །སྐྲ་སྦུབས་ཀུན་ཏུ་དོན་གྱི་དམ་ པ་མངོན་འཚང་རྒྱ། །དེ་དག་སྨོན་ལམ་དུ་མ་མངོན་པར་སྒྲུབ་པ་བྱེད། །དེ་དག་མཐའ་ཡས་ཡངས་ཤིང་མཐར་ཐུག་མེད་དང་ལྡན། །ནམ་མཁའི་ཁམས་དང་ཆོས་ཉིད་མྱ་ ངན་འདས་ཁམས་དང༌། །འཇིག་རྟེན་མཐར་ཐུག་རྒྱལ་བ་འབྱུང་དང་ཡེ་ཤེས་ས། །སེམས་ཀྱི་ཡུལ་དང་ཡེ་ཤེས་འཇུག་པའི་མཐར་ཐུག་དང༌། །རྣམ་གསུམ་རྒྱུད་རྣམས་མཐར་ ཐུག་འགྲོ་བའི་མུར་ཐུག་པ། །རྣམ་པ་དེ་ཚུལ་བདག་སྨོན་མཐར་ཡང་ཐུག་གྱུར་ཅིང༌། །དེ་དག་མཐར་ཐུག་ཇི་བཞིན་བདག་སྤྱོད་དེ་འདྲར་ཤོག །དེ་ལྟར་མངོན་བསྒྲུབས་འཇམ་ ཞིང་བྱམས་པའི་སེམས་ལྡན་པ། །སངས་རྒྱས་ཡོན་ཏན་ཡིད་ཆེས་སེམས་ཅན་རྣམ་པར་ལྟ། །སེམས་ཅན་སྡུག་བསྔལ་ཉོན་མོངས་བདག་གིས་བསྐྱབ་ཅེས་ཏེ། །རྟེན་ འབྲེལ་འབྱུང་འཇུག་སྙིང་རྗེ་བྱམས་དང་ལྡན་པ་ནི། །དེ་དག་དོན་དུ་སྣ་ཚོགས་སྦྱིན་པ་ཡང་དུ་རྩོམ། །རྒྱལ་སྲིད་མཆོག་དང་རིན་ཆེན་སྣ་ཚོགས་གླང་པོ་རྟ། །མགོ་དང་ ༄༅། །རྐང་ལག་མིག་དང་དེ་བཞིན་བདག་གི་ཤ། ཐམས་ཅད་ཡོངས་སུ་གཏོང་ཡང་ཞུམ་པའི་ཡིད་མེད་དོ། །གཙུག་ལག་སྣ་ཚོགས་ཚོལ་ ཡང་ཡོངས་སུ་སྐྱོ་བ་མེད། །གཙུག་ལག་འཇིག་རྟེན་སྤྱོད་པའི་རྗེས་ཀྱང་རབ་ཏུ་སྙོགས། །འཇིག་རྟེན་ཤེས་དང་ལྡན་ཞིང་ཁྲེལ་ཡོད་དགའ་དང་ལྡན། །བདེ་གཤེགས་ གཅིག་མིན་རིམ་གྲོ་རྗེས་སུ་མཆོད་པ་བྱེད། །དེ་ལྟར་མཁས་པ་ཉིན་མཚན་རྟག་ཏུ་བརྩོན་པ་ཡི། །དགེ་བ་མེར་བཅུག་གསེར་བཞིན་ཤིན་ཏུ་དག་པར་འགྱུར། །དེ་དག་ ས་རྣམས་བཅུ་པོ་འདི་ལ་སྦྱངས་བྱས་ཤིང༌། །ཐོགས་པ་མེད་པར་ཆགས་མེད་རབ་ཏུ་ཐོབ་པར་འགྱུར། །ཇི་ལྟར་དེད་དཔོན་ལམ་གྲོགས་མང་ལ་ཕན་བརྩོན་པ། །ལམ་ གྱི་ཡོན་ཏན་དྲིས་ཤིང་བདེ་བའི་གྲོང་དུ་སྐྱེལ། །དེ་བཞིན་བྱང་ཆུབ་སེམས་དཔའ་དང་པོའི་ས་གནས་པ། །འགྲོ་བའི་དོན་བཤམས་ཆགས་མེད་ས་བཅུ་རབ་ཏུ་འཐོབ། །འདི་ གནས་ཡོན་ཏན་ལྡན་པ་མི་ཡི་དབང་པོར་འགྱུར། །བྱམས་པའི་སེམས་ཀྱིས་ས་རྣམས་མ་ལུས་ཡོངས་སུ་སྐྱོང༌། །འཛམ་བུའི་རྒྱལ་མཚན་སྲིད་ཀུན་རབ་ཏུ་སྐྱོང་བྱེད་ ཅིང༌། །སྦྱིན་པས་འགྲོ་བ་སངས་རྒྱས་ཡེ་ཤེས་མཆོག་ལ་འགོད། །ཁྱུ་མཆོག་དམ་པ་འདོད་ན་རྒྱལ་སྲིད་རབ་ཏུ་གཏོང༌། །རྒྱལ་བའི་བསྟན་པར་རབ་ཏུ་བྱུང་ཞིང་བརྩོན་ འགྲུས་རྩོམ། ཏིང་འཛིན་བརྒྱ་དང་སངས་རྒྱས་བརྒྱ་རྣམས་མཐོང་བར་བྱེད། །ཞིང་བརྒྱ་བསྐྱོད་ཅིང་རབ་ཏུ་སྣང་བྱེད་ཀུན་ཏུ་འགྲོ་།སེམས་ཅན་བརྒྱ་སྦྱོང་ཆོས་ཀྱི་སྒོ་ལ་འགོད་པ་ བྱེད། །བསྐལ་པ་བརྒྱར་འཇུག་ལུས་བརྒྱ་རབ་ཏུ་སྟོན་པ་བྱེད། །རྒྱལ་བའི་སྲས་ཀྱང་བརྒྱ་ཡི་གྲངས་ཚང་ཡོངས་སུ་སྟོན། །དེ་ཡི་གོང་ན་སྨན་མཆོག་སྟོབས་ལྡན་ཚད་ཀྱང་མེད། ། བདག་གིས་དོན་དུ་མདོར་སྡུས་ཏེ། །ས་རྣམས་ཁྱེད་ལ་བཤད་པ་བྱས། །རྒྱ་ཆེར་བསྐལ་པ་བྱེ་བར་ཡང༌། །ཐམས་ཅད་ཟད་པར་མི་ནུས་སོ། །དེ་ལྟར་ས་ཡི་དང་པོ་འདི། །འཇིག་ རྟེན་ཀུན་ལ་ཕན་སེམས་པའི། །བྱང་ཆུབ་སེམས་དཔའ་མཆོག་རྣམས་ལ། །རྒྱལ་བའི་སྲས་ཀྱིས་བསྟན་པ་ཡིན། །རབ་ཏུ་དགའ་བ་ཞེས་བྱ་སྟེ། །བྱང་ཆུབ་སེམས་དཔའི་ས་ དང་པོ། །ས་མཆོག་ཡིད་དུ་འོང་བ་འདིའི། །གནས་ཀྱི་དམ་པ་ཐོས་གྱུར་ནས། །བདེ་བར་གཤེགས་པའི་སྲས་ཀྱི་རྣམས། །ཡིད་རྟོག་དང་ཞིང་རབ་ཏུ་དགའ། །ཀུན་ཀྱང་བསྟན་ ལས་འདས་གྱུར་ཏེ། །ནམ་མཁའི་དབྱིངས་ལ་མངོན་འཕགས་ནས། །མེ་ཏོག་སིལ་མ་རབ་ཏུ་འཐོར། །ལེགས་ཞེས་བྱ་བའི་ཚིག་ཀྱང་བརྗོད། །རྡོ་རྗེའི་སྙིང་པོ་འཇིགས་མེད་པ། །ཤེས་ རབ་ཆེན་པོ་ལེགས་སོ་ལེགས། །བྱང་ཆུབ་སེམས་དཔའི་སྤྱོད་པ་སྟེ། །ས་འདི་ཁྱོད་ཀྱིས་ལེགས་པར་བཤད། །འཁོར་འདི་རྣམ་པར་དང་ཞིང་གསལ། །རྣམ་གྲོལ་ཟླ་བ་འདི་ཡང་འདྲི།། ༄༅། །རྒྱལ་བའི་སྲས་ཀྱི་གོང་དུ་ཡང༌། །ས་གཉིས་རབ་ཏུ་བརྗོད་པ་མཇོད་[*MDZOD?]། །ཡིད་ཀྱི་རྟོག་པ་ཅི་འདྲ་བས། །ས་གཉིས་པ་ནི་འཐོབ་འགྱུར་བ། །ཤེས་རབ་ཆེན་ པོས་བཤད་པར་མཛོད། །རྒྱལ་བའི་སྲས་རྣམས་ཉན་པར་འདོད། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་ དཔའ་ས་དང་པོ་ལ་ཡོངས་སུ་སྦྱང་བ་བྱས་པ་དེ་ས་གཉིས་པ་ལ་མངོན་པར་མོས་པ་ཡིན་ཏེ། དེའི་སེམས་ཀྱི་བསམ་པ་བཅུ་འབྱུང་ངོ༌། །བཅུ་གང་ཞེ་ན། འདི་ལྟ་ སྟེ༑ དྲང་པོའི་བསམ་པ་དང༌། འཇམ་པའི་བསམ་པ་དང༌། ལས་སུ་རུང་བའི་བསམ་པ་དང༌། དུལ་བའི་བསམ་པ་དང༌། ཞི་བའི་བསམ་པ་དང༌། དགེ་བའི་བསམ་ པ་དང༌། མ་འདྲེས་པའི་བསམ་པ་དང༌། མི་ལྟོས་པའི་བསམ་པ་དང༌། རླབས་པོ་ཆེའི་བསམ་པ་དང༌། བདག་ཉིད་ཆེ་བའི་བསམ་པ་དང༌། སེམས་ཀྱི་བསམ་པ་བཅུ་ པོ་འདི་དག་འབྱུང་སྟེ། དེ་དག་གིས་བྱང་ཆུབ་སེམས་དཔའི་ས་གཉིས་པ་དྲི་མ་དང་བྲལ་བ་ལ་གནས་པ་ཡིན། ཀྱེ༑ རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ ས་དྲི་མ་དང་བྲལ་བ་ལ་གནས་པའི་བྱང་ཆུབ་སེམས་དཔའ་ནི་རང་བཞིན་གྱིས་སྲོག་གཅོད་པ་དང་བྲལ་བ་ཡིན་ཏེ། དབྱིག་པ་སྤངས། མཚོན་ཆ་སྤངས། ཁོན་དུ་འཛིན་ པ་སྤངས་ཤིང་ངོ་ཚ་དང་ལྡན་པས་སྲོག་ཆགས་སུ་གྱུར་པ་ཐམས་ཅད་ལ་ཕན་པ་དང༌། བདེ་བས་ཕན་འདོགས་ཤིང་བྱམས་པའི་སེམས་དང་ལྡན་པ་ཡིན་ཏེ། དེ་ཡིད་ཀྱི་ ཡོངས་སུ་རྟོག་པ་ཙམ་གྱིས་ཀྱང་སྲོག་ཆགས་ལ་འཚེ་བ་མི་བྱེད་ན་སེམས་ཅན་གཞན་ལ་སེམས་ཅན་དུ་འདུ་ཤེས་ཤིང་ཆེད་དུ་བསམས་ཏེ་ལུས་ལ་གཙེ་བ་ཆེན་པོ་བྱ་བ་ལྟ་ ཅི་སྨོས། བདག་གིས་ལོངས་སྤྱོད་ཀྱིས་ཆོག་ཤེས་ཤིང་གཞན་གྱི་ལོངས་སྤྱོད་ལ་རེ་བ་མེད་པས་མ་བྱིན་པ་ལེན་པ་དང་བྲལ་བ་ཡིན་ཏེ། དེ་གཞན་གྱིས་ཡོངས་སུ་བཟུང་བའི་ དངོས་པོ་ལ་གཞན་གྱིས་ཡོངས་སུ་བཟུང་བར་འདུ་ཤེས་ཤིང་རྐུ་སེམས་ཉེ་བར་བཞག་སྟེ། ཆུང་ངུ་ན་རྩྭ་དང་ལོ་མ་ཡང་མ་བྱིན་པར་མི་ལེན་ན། འཚོ་བའི་ཡོ་བྱད་གཞན་ལྟ་ཅི་ སྨོས། བདག་གི་ཆུང་མས་ཆོག་ཤེས་ཤིང་གཞན་གྱི་ཆུང་མ་ལ་རེ་བ་མེད་པས་འདོད་པས་ལོག་པར་གཡེམ་པ་དང་བྲལ་བ་ཡིན་ཏེ། དེ་གཞན་གྱིས་ཡོངས་སུ་བཟུང་བའི་བུད་མེད་ གཞན་གྱི་ཆུང་མ་རུས་དང༌། མཚན་མ་དང༌། ཆོས་ཀྱིས་བསྲུང་བ་རྣམས་ལ་ཆགས་སེམས་ཀྱང་མི་སྐྱེད་ན་གཉིས་ཀྱིས་གཉིས་ཕྲད་པར་བྱ་བ་ལྟ་ཅི་སྨོས། ཡང་དག་པར་ སྨྲ་ཞིང་བདེན་པར་སྨྲ་བ་དང༌། དུས་སུ་སྨྲ་བ་དང༌། ཚོད་དུ་སྨྲ་བ་ལ་ཇི་སྐད་དུ་སྨྲས་པ་དེ་བཞིན་དུ་བྱེད་པས། རྫུན་དུ་སྨྲ་བ་དང་བྲལ་བ་ཡིན་ཏེ། དེ་ཆུང་ངུ་ན་རྨི་ལམ་དུ་ཡང་ ༄༅། །རྫུན་གྱི་ཚིག་མི་པ་རྗོད་[*BRJOD?] ན་ཆེད་དུ་བསམས་ཏེ་བརྗོད་པ་ལྟ་ཅི་སྨོས། དེ་སེམས་ཅན་གྱི་དབྱེན་མི་བྱེད་ཅིང་མི་འཚེ་བ་ལ་ཞུགས་པས་ཕྲ་མའི་ ཚིག་དང་བྲལ་བ་ཡིན་ཏེ། དེ་དེ་དག་དབྱེ་བའི་ཕྱིར། ཚུ་བི་ལས་ཐོས་ཤིང་ཕ་པིར་སྙོད་པ་མ་ཡིན། ཕ་བི་ལས་ཐོས་ནས་ཚུ་བིར་སྙོད་པ་མ་ཡིན་ཏེ། འདུམ་པ་རྣམས་ དབྱེ་བར་མི་བྱེད། བྱེ་བ་རྣམས་ལ་དཔར་བས་མི་རྣོན་ཏེ། མི་འདུམ་པ་ལ་དགའ་ཞིང་མི་འདུམ་པ་ལ་མོས་པ་མ་ཡིན་པས། བདེན་ནམ་རྫུན་ཡང་རུང་མི་འདུམ་བར་ བྱ་བའི་ཚིག་མི་སྨྲའོ། །ཞེ་གཅོད་པའི་ཚིག་དང་བྲལ་བ་ཡིན་ཏེ། རྙོགས་པ་དང༌། བརླང་བ་དང༌། རྩུབ་པ་དང༌། གཞན་ལ་གནོད་པ་དང༌། ཞེ་སྣད་པར་འགྱུར་བ་དང༌། ཉེས་པ་ངོར་བརྗོད་པ་དང༌། ཉེས་པ་ངོར་བརྗོད་པ་ལ་གཞོལ་བ་དང༌། གྲོང་མིའི་ཚིག་དང༌། མ་རབས་ཀྱི་ཚིག་དང༌། གཟུངས་སུ་བཟུང་བ་མ་ཡིན་པ་དང༌། རྣར་མི་ སྙན་པ་དང༌། ཁྲོ་བ་དང༌། གཤེ་བ་ལས་བྱུང་བ་དང༌། སྙིང་ན་བར་བྱེད་པ་དང༌། ཡིད་ཡོངས་སུ་གདུང་བར་བྱེད་པ་དང༌། མི་སྙན་པ་དང༌། ཡིད་དུ་མི་འོང་བ་དང༌། བདག་ དང་གཞན་གྱི་སེམས་མ་རུང་བར་བྱེད་པའི་ཚིག་གི་རྣམ་པ་དེ་ལྟ་བུ་སྤངས་ཏེ། གང་འདི་འཇམ་པ་དང༌། ཡིད་དུ་འོང་བ་དང༌། སྙན་པ་དང༌། གཟུངས་སུ་བཟུང་བ་ དང༌། རྣར་འོང་བ་དང༌། སྙིང་དུ་སྡུག་པ་དང༌། ཕོ་བྲང་འཁོར་གྱི་ཚིག་དང༌། གཙིགས་པ་དང༌། གསལ་བ་དང༌། འགོ་བ་དང༌། མཉན་པར་འོས་པ་དང༌། མི་གནས་པ་དང༌། སྐྱེ་ བོ་མང་པོ་དགའ་བར་འགྱུར་བ་དང༌། སྐྱེ་བོ་མང་པོའི་ཡིད་དུ་འོང་བ་དང༌། མཁས་པས་བསྔགས་པ་དང༌། སེམས་ཅན་ཐམས་ཅད་ལ་ཕན་ཞིང་བདེ་བར་འགྱུར་བ་དང༌། ཡིད་ བདེ་བར་བྱེད་པ་དང༌། ཡིད་སིམ་པར་བྱེད་པ་དང༌། བདག་དང་གཞན་གྱི་སེམས་དང་བར་བྱེད་པ་དང༌། འདོད་ཆགས་དང༌། ཞེ་སྡང་དང༌། གཏི་མུག་དང༌། ཉོན་མོངས་པ་ ཐམས་ཅད་ཞི་བར་བྱེད་པའི་ཚིག་གི་རྣམ་པ་དེ་ལྟ་བུ་དག་བརྗོད་དོ། །ཚིག་ཀྱལ་བ་སྤངས་པ་ཡིན་ཏེ། ལེགས་པར་ལན་གློན་པའི་ཚིག་དང༌། དུས་སུ་སྨྲ་བ་དང༌། བདེན་ པར་སྨྲ་བ་དང༌། དོན་དུ་སྨྲ་བ་དང༌། ཆོས་སུ་སྨྲ་བ་དང༌། རིག་པར་སྨྲ་བ་དང༌། དུལ་བར་སྨྲ་བ་དང༌། དུས་ལ་བབ་པར་ཤིན་ཏུ་གོ་བའི་གཏན་ཚིགས་དང་བཅས་པར་སྨྲ་ བས། དེ་ཆུང་ངུ་ན་བཞད་གད་དུ་བྱ་བ་ཙམ་གྱི་ཚིག་ལའང་ཡོངས་སུ་སྤང་པར་བྱ་བ་ཡོངས་སུ་སྤོང་ན་དགོས་པ་དོན་དུ་གཉེར་ཅིང་ཚིག་གིས་རྣམ་པར་འཁྲུག་པ་ལྟ་ཅི་སྨོས་ ཆགས་སེམས་མེད་པ་ཡིན་ཏེ། དེ་གཞན་གྱི་ནོར་དང༌། གཞན་གྱི་འདོད་པ་དང༌། གཞན་དབང་བའི་ཡོ་བྱད་གཞན་གྱིས་ཡོངས་སུ་བཟུང་བ་ལ་ཇི་ལྟར་ན་གང་གཞན་ ༄༅། །གྱི་ཡིན་པ་དེ་དག་བདག་གིར་འགྱུར་ཞེས་ཏེ། ཆགས་སེམས་མི་སྐྱེད་མི་རེ་མི་སྨོན་ཅིང་འདོད་པའི་སེམས་མི་སྐྱེད་དོ། །གནོད་སེམས་དང་བྲལ་ བ་ཡིན་ཏེ། སེམས་ཅན་ཐམས་ཅད་ལ་བྱམས་པའི་སེམས་དང༌། ཕན་པའི་སེམས་དང༌། སྙིང་བརྩེ་བའི་སེམས་དང༌། བདེ་བའི་སེམས་དང༌། འཇམ་པའི་སེམས་ དང༌། འགྲོ་བ་ཐམས་ཅད་ལ་ཕན་གདགས་པའི་སེམས་དང༌། འབྱུང་པོ་ཐམས་ཅད་ལ་ཕན་ཞིང་སྙིང་བརྩེ་བའི་སེམས་དང་ལྡན་པས། གང་འདི་ཁྲོ་བ་དང༌། མདུད་པར་འཛིན་པ་ དང༌། ཐ་བ་དང༌། དྲི་མ་དང༌། གནོད་སེམས་དང༌། ཁྲོང་ཁྲོ་བ་ལ་སོགས་པ་དེ་དག་སྤངས་ཏེ། གང་འདི་ཕན་པ་དང་ལྡན་པ། བྱམས་པ་དང་ལྡན་པ། སེམས་ཅན་ཐམས་ ཅད་ལ་ཕན་པ་དང་བདེ་བར་བྱ་བའི་ཕྱིར་རྣམ་པར་རྟོག་ཅིང་རྣམ་པར་དཔྱོད་པ་དེ་དག་ལ་རྣམ་པར་རྟོག་པ་ཡིན། ཡང་དག་པར་ལྟ་བ་དང་ལྡན་ཞིང་ངོ་མཚར་དང༌། བཀྲ་ཤིས་ དང༌། ངང་ཚུལ་ངན་པའི་ལྟ་བ་སྣ་ཚོགས་དང་བྲལ་བ་ཡིན་ཏེ། ལྟ་བ་དྲང་ཞིང་གཡོ་མེད་ལ་སྒྱུ་མེད་པས། སངས་རྒྱས་དང་ཆོས་དང་དགེ་འདུན་ལ་བསམ་པ་ངེས་པ་ཡིན། དེ་དགེ་བ་བཅུའི་ལས་ཀྱི་ལམ་འདི་དག་རྟག་ཏུ་རྒྱུན་མི་ཆད་པར་སྲུང་ཞིང་འདི་ལྟར་སེམས་ཀྱི་བསམ་པ་མངོན་པར་སྒྲུབ་སྟེ། སེམས་ཅན་རྣམས་ཀྱི་ངན་སོང་དང༌། ངན་ འགྲོ་དང༌། ལོག་པར་ལྟུང་བ་ཡོད་པ་གང་ཡང་རུང་སྟེ། དེ་དག་ཐམས་ཅད་མི་དགེ་བ་བཅུའི་ལམ་ཡོངས་སུ་བླངས་པའི་རྒྱུ་ལས་བྱུང་གི །བདག་གིས་ནི་འདི་ལྟར་བདག་ཉིད་ཡང་ དག་པའི་ནན་ཏན་ལ་གནས་ཏེ། གཞན་ཡང་ཡང་དག་པའི་ནན་ཏན་ལ་དགོད་པར་བྱའོ། །ཡང་དག་པའི་ནན་ཏན་ལ་གནས་པར་བསྟན་ཏོ། །དེ་ཅིའི་ཕྱིར་ཞི་ན། བདག་ལོག་པའི་ ནན་ཏན་ལ་གནས་ཤིང༌། གཞན་ཡང་དག་པའི་ནན་ཏན་ལ་དགོད་པར་བྱ་བ་འདི་ནི་གནས་མེད་སྐབས་མེད་པ་སྟེ། འདི་ནི་མི་སྲིད་དོ་ཞེས་ནས་ཡང་དེ་འདི་ལྟར་རྣམ་པར་ དཔྱོད་དེ། མི་དགེ་བ་བཅུའི་ལས་ཀྱི་ལམ་འདི་དག་ཡོངས་སུ་བཟུང་བའི་རྒྱུས་སེམས་ཅན་དམྱལ་བ་དང༌། བྱོལ་སོང་གི་སྐྱེ་གནས་དང༌། གཤིན་རྗེའི་འཇིག་རྟེན་གྱི་ལམ་གྱི་ རྒྱུད་དུ་སྐྱེ་བ་རྣམས་ཡོད་པར་གྱུར་ཏོ། །དགེ་བ་བཅུའི་ལས་ཀྱི་ལམ་ཡོངས་སུ་བཟུང་བས་ནི་མིར་སྐྱེ་བ་ལ་སོགས་པ་སྲིད་པའི་རྩེ་མོའི་བར་དུ་སྐྱེ་བ་ཡོད་པར་གྱུར་ཏོ། །དེའི་ གོང་དུ་དགེ་བ་བཅུའི་ལས་ཀྱི་ལམ་འདི་དག་ཉི་ཚེ་བའི་སེམས་དང༌། ཁམས་གསུམ་པས་སྐྲག་པའི་ཡིད་དང༌། སྙིང་རྗེ་ཆེན་པོ་མེད་པ་དང༌། གཞན་ལས་ཐོས་པའི་སྒྲའི་ རྗེས་སུ་འབྲང་བས་ཤེས་རབ་ཀྱི་རྣམ་པར་ཡོངས་སུ་བསྒོམས་ན། ཉན་ཐོས་ཀྱི་ཐེག་པ་ཡོངས་སུ་སྒྲུབ་བོ། །དེའི་གོང་དུ་གཞན་གྱི་དྲིང་མི་འཇོག་པ་དང༌། རང་མངོན་པར་ ༄༅། །འཚང་རྒྱ་བ་དང༌། སྙིང་རྗེ་ཆེན་པོ་དང༌། ཐབས་མཁས་པ་མེད་པ་དང༌། རྟེན་ཅིང་འབྲེལ་བར་འབྱུང་བ་ཟབ་པར་ཁོང་དུ་ཆུད་པས་ཡོངས་སུ་སྦྱངས་ན། རང་སངས་རྒྱས་ཀྱི་ཐེག་པ་ཡོངས་སུ་སྒྲུབ་བོ། །དེའི་གོང་དུ་ཡངས་ཤིང་ཚད་མེད་པའི་སེམས་དང༌། སྙིང་བརྩེ་ཞེང་སྙིང་རྗེ་ལྡན་པ་དང༌། ཐབས་མཁས་པས་ཡང་དག་ པར་བཟུང་བ་དང༌། སྨོན་ལམ་ཆེན་པོ་ཤིན་ཏུ་བཏབ་པ་དང༌། སེམས་ཅན་ཐམས་ཅད་ཡོངས་སུ་མི་གཏོང་བ་དང༌། སངས་རྒྱས་ཀྱི་ཡེ་ཤེས་རྒྱ་ཆེན་པོ་ལ་དམིགས་ པས་ཡོངས་སུ་སྦྱངས་ན། བྱང་ཆུབ་སེམས་དཔའི་ས་ཡོངས་སུ་དག་པ་དང༌། ཕ་རོལ་ཏུ་ཕྱིན་པ་རྣམ་པར་དག་པའི་སྤྱོད་པ་རྒྱ་ཆེན་པོ་ཡོངས་སུ་སྒྲུབ་པར་འགྱུར་རོ། ། དེའི་གོང་དུ་དགེ་བ་བཅུའི་ལས་ཀྱི་ལམ་འདི་དག་ཉིད་རྣམ་པའི་མཆོག་ཐམས་ཅད་དང་ལྡན་པར་ཡོངས་སུ་སྦྱངས་པས་སྟོབས་བཅུའི་སྟོབས་ཐོབ་པར་འགྱུར་བ་དང༌། མི་ འཇིགས་པ་བཞི་ཐོབ་པ་ནས་རྣམ་པའི་མཆོག་ཐམས་ཅད་དང་ལྡན་པའི་སངས་རྒྱས་ཀྱི་ཆོས་ཐམས་ཅད་ཡོངས་སུ་འགྲུབ་པ་ཡང་དག་པར་སྒྲུབ་བོ། །དེ་ལྟ་བས་ན་ བདག་གིས་དགེ་བ་བཅུའི་ལས་མངོན་པར་བསྒྲུབ་ཏུ་འདྲ་བ་ལ་རྣམ་པ་ཐམས་ཅད་དུ་ཡོངས་སུ་སྦྱང་ཞིང་མངོན་པར་བསྒྲུབ་པ་ལ་བརྩོན་པར་བྱའོ་ཞེས་ནས་དེ་འདི་ ལྟར་ཡང་དག་པར་སློབ་སྟེ། མི་དགེ་བ་བཅུའི་ལས་ཀྱི་ལམ་འདི་དག་བསྟེན་པ་དང༌། བསྒོམས་པ་དང༌། མང་དུ་བྱས་པའི་ཤས་ཆེ་བས་ནི་སེམས་ཅན་དམྱལ་བའི་རྒྱུར་འགྱུར་རོ། ། འབྲིང་གིས་བྱོལ་སོང་གི་སྐྱེ་གནས་ཀྱི་རྒྱུར་འགྱུར་རོ། །ཐ་མས་ནི་གཤིན་རྗེའི་འཇིག་རྟེན་གྱི་རྒྱུར་འགྱུར་ཏེ། དེ་ལ་སྲོག་གཅོད་པས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་ སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་བསྒྲུབ་པ་འདི་ལྟ་སྟེ། ཚེ་ཐུང་བ་དང༌། ནད་མང་ བའོ། །མ་བྱིན་པར་ལེན་པས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་ པར་སྨིན་པ་གཉིས་མངོན་པར་བསྒྲུབ་པ་འདི་ལྟ་སྟེ། ལོངས་སྤྱོད་ཆུང་བ་དང༌། ཐུན་མོང་གི་ལོངས་སྤྱོད་དུ་འགྱུར་བའོ། །འདོད་པས་ལོག་པར་གཡེམ་པས་ནི་སེམས་ཅན་ དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་བསྒྲུབ་པ་ འདི་ལྟ་སྟེ། ལྟོད་པ་དང་བཅས་པའི་ཆུང་མ་དང༌། གཡོག་འཁོར་མི་སྲུན་པའོ། །བརྫུན་དུ་སྨྲ་བས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། ། ༄༅། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་བསྒྲུབ་པ་འདི་ལྟ་སྟེ། སྐུར་པ་མང་བ་ དང༌། གཞན་གྱིས་བསླུ་བའོ། །ཕྲ་མས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་ སྐྱེས་ན་ཡང་རྣམ་པར་སྨིན་པ་གཉིས་མངོན་པར་བསྒྲུབ་པ་འདི་ལྟ་སྟེ། གཡོག་མི་འདུམས་པ་དང༌། གཡོག་ངན་པར་འགྱུར་བའོ། །ཞེ་གཅོད་པའི་ཚིག་གིས་ནི་ སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་ མངོན་པར་བསྒྲུབ་པ་འདི་ལྟ་སྟེ། ཡིད་དུ་མི་འོང་བ་ཐོས་པ་དང༌། འཐབ་མོའི་ཚིག་གོ །ཚིག་ཀྱལ་པས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་ གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་བསྒྲུབ་པ་འདི་ལྟ་སྟེ། ཚིག་མི་བཙུན་པ་ དང༌། སྤོངས་པ་མ་བརྟགས་པའོ། །ཆགས་སེམས་ཀྱིས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་ དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་བསྒྲུབ་པ་འདི་ལྟ་སྟེ། ཆོག་མི་ཤེས་པ་དང༌། འདོད་པ་ཆེ་བའི། །གནོད་སེམས་ཀྱིས་ནི་སེམས་ ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་བསྒྲུབ་པ་ འདི་ལྟ་སྟེ། གནོད་པར་གླགས་ལྟ་བ་དང༌། ཕ་རོལ་གྱིས་མནར་བའོ། །ལོག་པར་ལྟ་བས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་ རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་བསྒྲུབ་པ་འདི་ལྟ་སྟེ། ལྟ་བ་ངན་པར་ལྟུང་བ་དང༌། གཡོ་སྒྱུ་ཅན་ནོ། །དེ་ ལྟར་ན་མི་དགེ་བ་བཅུའི་ལས་ཀྱི་ལམ་འདི་དག་ནི་སྡུག་བསྔལ་གྱི་ཕུང་པོ་ཆེ་ཞིང་ཚད་མེད་པ་སྡུད་པར་འགྱུར་གྱི། མི་དགེ་བ་བཅུའི་ལས་ཀྱི་ལམ་འདི་དག་བདག་ གིས་སྤངས་ཏེ། ཆོས་ལ་དགའ་ཞིང་མོས་པས་དགའ་བར་གནས་པར་བྱའོ་ཞེས་ཏེ། དེ་མི་དགེ་བ་བཅུའི་ལས་ཀྱི་ལམ་འདི་དག་སྤངས་ནས་དགེ་བ་བཅུའི་ལས་ཀྱི་ལམ་ ལ་གནས་ཤིང་གཞན་ཡང་དེ་ཉིད་ལ་རབ་ཏུ་གཞོག་གོ །དེ་སེམས་ཅན་རྣམས་ལ་སྔོན་པས་ཀྱང་ཕན་པའི་སེམས་དང༌། བདེ་བའི་སེམས་དང༌། བྱམས་པའི་སེམས་དང༌། ༄༅། །སྙིང་རྗེའི་སེམས་དང༌། སྙིང་བརྩེ་བའི་སེམས་དང༌། ཕན་གདགས་པའི་སེམས་དང༌། ཡོངས་སུ་བསྲུང་བའི་སེམས་དང༌། སློབ་དཔོན་གྱི་ སེམས་དང༌། སྟོན་པའི་སེམས་དང༌། མཉམ་པའི་སེམས་བསྐྱེད་ཅིང༌། དེ་འདི་སྙམ་དུ་སེམས་ཏེ། ཀྱེ་མ། སེམས་ཅན་འདི་དག་ནི་ལྟ་བ་ངན་པར་ལྷུང་བ་ དག་སྟེ། བློ་གྲོས་མི་མཉམ་ཞིང་བསམ་པ་མི་མཉམ་པ་ལོག་པའི་ལམ་ཐིབས་པོར་རྒྱུ་བ་ཡིན་གྱི། དེ་དག་བདག་གིས་བདེན་པའི་ལམ་ཡང་དག་པར་ལྟ་བའི་ ལམ། དེ་བཞིན་ཉིད་ཇི་ལྟ་བ་བཞིན་ལ་རབ་ཏུ་དགོད་པར་བྱའོ། །ཨེ་མའོ། །སེམས་ཅན་འདི་དག་ནི་མི་མཐུན་ཞིང་རྩོད་པ་དང༌། འཐབ་པ་ལ་ཞུགས་པ། རྟག་ ཏུ་རྒྱུན་མི་འཆད་པར་ཁྲོ་བ་དང༌། ཁོན་དུ་འཛིན་པས་ཤིན་ཏུ་འབར་བར་གྱུར་པ་ཡིན་གྱི། དེ་དག་བདག་གིས་བླ་ན་མེད་པའི་བྱམས་པ་ཆེན་པོ་རབ་ཏུ་ཉེ་བར་བསྒྲུབ་ པ་ལ་རབ་ཏུ་དགོད་པར་བྱའོ། །ཀྱེ་མ། སེམས་ཅན་འདི་དག་ནི་ཆོག་མི་ཤེས་ཤིང་གཞན་གྱིས་ནོར་ལ་མངོན་པར་ཞེན་ཏེ། ཤིན་ཏུ་མི་བཟད་པར་འཚོ་བས་རྗེས་སུ་ སྤྱོད་པ་ཡིན་གྱི། དེ་དག་བདག་གིས་ལུས་དང༌། ངག་དང༌། ཡིད་ཀྱི་ལས་ཡོངས་སུ་དག་པས་འཚོ་བ་ལ་རབ་ཏུ་དགོད་པར་བྱའོ། །ཀྱེ་མ། སེམས་ཅན་འདི་དག་ནི་ འདོད་ཆགས་དང༌། ཞེ་སྡང་དང༌། གཏི་མུག་དང༌། སྲེད་པའི་གཞི་དང་ལྡན་ཞིང༌། ཉོན་མོངས་པ་སྣ་ཚོགས་ཀྱི་མེ་ལྕེ་རྟག་ཏུ་རྒྱུད་མི་འཆད་པར་ཀུན་ཏུ་འབར་བར་གྱུར་ཀྱང་འདི་ལས་ འབྱུང་བའི་ཐབས་ཡོངས་སུ་མི་ཚོལ་བ་ཡིན་གྱི། དེ་དག་བདག་གིས་ཉོན་མོངས་པ་ཐམས་ཅད་ཤིན་ཏུ་ཞི་ཞིང་གཙེ་བ་མེད་པའི་མྱ་ངན་ལས་འདས་པ་ལ་རབ་ཏུ་དགོད་པར་ བྱའོ། །ཀྱེ་མ། སེམས་ཅན་འདི་དག་ནི་གཏི་མུག་གི་མུན་པ་དང༌། རབ་རིབ་ཀྱི་ལིང་ཐོག་གིས་བསྒྲིབས་ཤིང་མུན་པ་ཆེན་པོ་ཐིབས་པའི་ནང་དུ་སོང་བས་ཤེས་རབ་ཀྱི་སྣང་བ་དང་ རིང་དུ་གྱུར་ཏེ། འཁོར་བའི་མྱ་ངམ་ཆེན་པོར་ལས་ཤིང་ལྟ་བ་ངན་པའི་མྱ་ངམ་ལ་གཞོལ་བར་གྱུར་པ་ཡིན་གྱི། དེ་དག་བདག་གིས་ཅི་ནས་ཀྱང་ཆོས་ཐམས་ཅད་ཀྱི་ཡིད་ཡང་དག་པ་ཇི་ ལྟ་བ་ཉིད་བསྒྲིབས་པ་མེད་པ་ཁོང་དུ་ཆུད་པར་འགྱུར་བ་དང༌། གཞན་གྱི་དྲིང་མི་འཇོག་པ་ཐོབ་པར་འགྱུར་བར་ཤེས་རབ་ཀྱི་མིག་བསྒྲིབས་པ་མེད་པ་ཡོངས་སུ་སྦྱང་བར་བྱའོ།། ཀྱེ་མ། སེམས་ཅན་འདི་དག་ནི་འཁོར་བའི་མྱ་ངམ་དང་དགོན་པ་ཆེན་པོར་ལས་ཤིང༌། སེམས་ཅན་དམྱལ་བ་དང༌། བྱོལ་སོང་གི་སྐྱེ་གནས་དང༌། གཤིན་རྗེའི་འཇིག་རྟེན་གྱི་ གཡང་ས་ལ་མངོན་དུ་བལྟས་པ། ལྟ་བ་ངན་པ་མི་བཟད་པའི་དྲ་བས་ཀུན་ནས་འཁོར་བ། གཏི་མུག་ཐིབས་པོས་ཀུན་ནས་ཡོག་པ། ལོག་པའི་ལམ་གོལ་བར་ཞུགས་པ། ལོང་བར་ ༄༅། །གྱུར་པ། དགེ་བའི་མགོན་མེད་པ། འབྱུང་བ་མ་ཡིན་པ་ལ་འབྱུང་བར་ལྟ་བ། བདུད་ཀྱི་ཞགས་པས་བཅིངས་པ། ཡུལ་གྱི་རྐུན་པོས་ཟིན་པ། བདུད་ཀྱི་ བསམ་པ་ཐིབས་པོར་ནུབ་པ། སངས་རྒྱས་ཀྱི་བསམ་པ་དང་རིང་དུ་གྱུར་པ་ཡིན་གྱི། དེ་དག་བདག་གིས་རྣམ་པ་དེ་ལྟ་བུའི་འཁོར་བའི་དགོན་པ་དང༌། མྱ་ངམ་བརྒལ་ དཀའ་བ་ལས་བསྒྲལ་ཏེ། འཇིགས་པ་མེད་པའི་གནས་ཐམས་ཅད་མཁྱེན་པའི་གྲོང་རྡལ་ཆེན་པོ་གཙེ་བ་མེད་པར་རབ་ཏུ་དགོད་པར་བྱའོ། །ཀྱེ་མ། སེམས་ཅན་འདི་དག་ནི་ ཆུ་བོ་ཆེན་པོའི་ཀློང་དུ་བྱིང་ཞིང་འདོད་པ་དང༌། སྲིད་པའི་མ་རིག་པ་དང༌། ལྟ་བའི་ཆུ་བོ་ལ་རབ་ཏུ་གཞོལ་བ། འཁོར་བའི་རྒྱུད་དུ་འབྲང་བ། སྲེད་པའི་ཆུ་ཀླུང་གིས་ཁྱེར་ཞིང་དབའ་ རླབས་ཆེན་པོས་གཡེངས་པ། སྲེད་པའི་འདོད་ཆགས་ཀྱི་མཐུས་ཤིན་ཏུ་བཅོམ་པ། བརྟག་པའི་མཐུ་མེད་པ། འདོད་པ་དང༌། གནོད་སེམས་དང༌། འཚེ་བ་དང༌། རྣམ་པར་རྟོག་པ་མང་པོའི་རྗེས་སུ་སྤྱོད་པ། འཇིག་ཚོགས་ལ་ལྟ་བའི་ཆུའི་སྲིན་པོས་ཁྲིད་པ། འདོད་པའི་ཡོན་ཏན་ཐིབས་པོའི་གླིང་དུ་ཞུགས་པ། སྨོན་པའི་འདོད་ ཆགས་ཀྱི་འདམ་དུ་ཐོགས་པ། ངའི་ང་རྒྱལ་གྱི་གཡེ་བ་ཆེན་པོར་འཁྱམས་པ། རྟེན་མེད་པ། སྐྱེ་མཆེད་ཀྱི་གྲོང་རྡལ་ནས་མ་འཕགས་པ། དགེ་བའི་སྒྲོལ་བ་མེད་པ་ ཡིན་གྱི། དེ་དག་བདག་གིས་སྙིང་རྗེ་ཆེན་པོ་དང༌། དགེ་བའི་རྩ་བའི་སྟོབས་ཀྱིས་ཤུགས་ཀྱིས་བཏོན་ཏེ། ཐམས་ཅད་མཁྱེན་པའི་རིན་པོ་ཆེའི་གླིང་གཙེ་བ་མེད་པ། རྡུལ་མེད་ པ༑ ཞི་བ། བདེ་བ། འཇིགས་པ་མེད་པ་ལ་རབ་ཏུ་དགོད་པར་བྱའོ། །ཀྱེ་མ། སེམས་ཅན་འདི་དག་ནི་ཁམས་གསུམ་གྱི་སྡུག་བསྔལ་དང༌། ཡིད་མི་བདེ་བ་དང༌། འཁྲུག་པ་མང་པོ་ ཅན་ཆགས་པ་དང༌། ཁོང་ཁྲོ་བ་དང༌། སྡུག་པ་དང༌། མི་སྡུག་པས་རྣམ་པར་བཅིངས་པ་དང༌། མྱ་ངན་དང་སྨྲེ་སྔགས་འདོན་པའི་རྗེས་སུ་སྤྱོད་པ། སྲེད་པའི་སྒྲོག་གིས་བཅིངས་ པ༑ མ་རིག་པའི་ཐིབས་པོས་ཀུན་ནས་ཡོག་པའི་ནང་ན་མི་མཐུན་པར་གྱུར་པ་ཡིན་གྱི། དེ་དག་བདག་གིས་ཁམས་གསུམ་པའི་གནས་ཐམས་ཅད་ལས་དབེན་པའི་མྱ་ ངན་ལས་འདས་པ་བསྒྲིབས་པ་མེད་པ་ལ་རབ་ཏུ་དགོད་པར་བྱའོ། །ཀྱེ་མ། སེམས་ཅན་འདི་དག་ནི་བདག་དང་བདག་གི་ལ་མངོན་པར་ཞེན་ཅིང༌། ཕུང་པོའི་གནས་ ལས་མ་འཕགས་པ། ཕྱིན་ཅི་ལོག་བཞི་ལ་རབ་ཏུ་ཞུགས་པ། སྐྱེ་མཆེད་དྲུག་གི་གྲོང་སྟོང་པ་ལ་ཤིན་ཏུ་གནས་པ། འབྱུང་བ་ཆེན་པོ་བཞིའི་སྦྲུལ་གྱིས་གཙེ་བ། ཕུང་ པོའི་གཤེད་མ་དང་ཆོམ་པོས་ཤིན་ཏུ་བཅོམ་པ། གཞལ་དུ་མེད་པའི་སྡུག་བསྔལ་མྱོང་བར་གྱུར་པ་ཡིན་གྱི། དེ་དག་བདག་གིས་བདེ་བའི་དམ་པ་གནས་ཐམས་ཅད་ ༄༅། །དང་བྲལ་བ་འདི་ལྟ་སྟེ། བསྒྲིབས་པ་མེད་པ་ཐམས་ཅད་མཁྱེན་པའི་མྱ་ངན་ལས་འདས་པ་ལ་རབ་ཏུ་དགོད་པར་བྱའོ། །ཀྱེ་མ། སེམས་ཅན་འདི་དག་ནི་ དམའ་བ་དང༌། ཞན་པ་དང༌། ཞུམ་པ་ལ་མོས་ཤིང་ཐམས་ཅད་མཁྱེན་པའི་ཡེ་ཤེས་དམ་པའི་སེམས་མི་བདོག་པས། ཐེག་པ་ཆེན་པོའི་འབྱུང་བ་ཡོད་ཀྱང་ཉན་ཐོས་དང་རང་ སངས་རྒྱས་ཀྱི་བློ་ཅན་ཡིན་གྱི། དེ་དག་བདག་གིས་སངས་རྒྱས་ཀྱི་ཆོས་རྒྱ་ཆེན་པོའི་བློ་གྲོས་དང༌། བསམ་པ་ཡངས་པའི་ཐེག་པ་ཆེན་པོ་བླ་ན་མེད་པ་ལ་ཐམས་ཅད་མཁྱེན་ པའི་ཡེ་ཤེས་ཡོངས་སུ་བསྟན་པས་རབ་ཏུ་དགོད་པར་བྱའོ་སྙམ་མོ། །ཀྱེ༑ རྒྱལ་བའི་སྲས་དག །དེ་ལྟར་ཚུལ་ཁྲིམས་ཀྱི་སྟོབས་དང༌། མཐུ་དེ་ལྟ་བུ་དང་ལྡན་པའི་བྱང་ཆུབ་ སེམས་དཔའ་སྙིང་རྗེ་དང༌། བྱམས་པ་མངོན་པར་བསྒྲུབ་པ་ལ་མཁས་པ། སེམས་ཅན་ཐམས་ཅད་ཀྱིས་མ་བཅོལ་བའི་བཤེས་གཉེན་དུ་གྱུར་པ། སེམས་ཅན་ཐམས་ ཅད་ཡོངས་སུ་མ་བཏང་བ། བྱ་བ་དང་མི་བྱ་བ་མངོན་པར་བསྒྲུབ་པ་ལ་མཁས་པ། བྱང་ཆུབ་སེམས་དཔའི་ས་དྲི་མ་མེད་པ་ལ་གནས་པ་དེའི་ལྟ་བ་རྒྱ་ཆེན་པོ་དང༌། སྨོན་ ལམ་གྱི་སྟོབས་ཀྱིས་སངས་རྒྱས་མང་པོ་རབ་ཏུ་སྣང་བར་གྱུར་ཏེ། ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང༌། སངས་རྒྱས་སྟོང་ ཕྲག་མང་པོ་དང༌། སངས་རྒྱས་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་མང་པོ་དང༌། སངས་རྒྱས་ཁྲག་ཁྲིག་བརྒྱ་ཕྲག་ མང་པོ་དང༌། སངས་རྒྱས་ཁྲག་ཁྲིག་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་རབ་ཏུ་སྣང་ བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས། བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། ། བསྟི་སྟང་བྱེད་དོ། །མཆོད་པར་བྱེད་དོ། །ན་བཟའ་དང༌། བསོད་སྙོམས་དང༌། གཟིམས་ཆ་དང༌། སྙུན་གྱི་རྐྱེན་སྨན་དང༌། ཡོ་བྱད་དག་ཀྱང་འབུལ་ཞིང༌། བྱང་ཆུབ་སེམས་དཔའི་ བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་ཚོགས་རྣམས་ལ་ཡང་དག་པར་མཆོད་པ་བྱེད་དོ། །དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་ པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལས་དགེ་བ་བཅུའི་ལས་ཀྱི་ལམ་འདི་ དག་ཀྱང་རིམ་གྲོ་ཆེན་པོས་རབ་ཏུ་འཛིན་ཏེ། ཇི་ལྟར་བཟུང་བ་དེའང་བར་མ་དོར་ཆུད་ཟོས་པར་མི་བྱེད་དོ། །དེ་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་ ༄༅། །པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་ཕྲག་དུ་མ་དང༌། བསྐལ་ པ་ཁྲག་ཁྲིག་བརྒྱ་ཕྲག་དུ་མ་དང༌། བསྐལ་པ་ཁྲག་ཁྲིག་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་ སྟོང་ཕྲག་དུ་མར་སེར་སྣའི་སྐྱོན་དང༌། ཚུལ་ཁྲིམས་ངན་པའི་དྲི་མ་མེད་པས་གཏོང་བ་དང༌། ཚུལ་ཁྲིམས་རྣམ་པར་དག་པ་ལ་ཡང་དག་པར་འབྱུང་ཞིང་གནས་ སོ༑ ༑ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། གསེར་གྱི་ས་ལེ་སྦྲམ་དེ་ཉིད་ནག་མཚུར་དུ་བཅུག་ན། དེ་བས་ཀྱང་དྲི་མ་ཐམས་ཅད་དང་བྲལ་བར་འགྱུར་ རོ༑ ༑ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་དྲི་མ་དང་བྲལ་བ་འདི་ལ་གནས་པའི་བྱང་ཆུབ་སེམས་དཔའ་ཡང་བསྐལ་པ་དུ་མ་ནས་བསྐལ་ པ་བྱེ་བ་ཁྲག་ཁྲིག་བརྒྱ་སྟོང་དུ་མའི་བར་དུ་སེར་སྣའི་ཉེས་པ་དང༌། ཚུལ་ཁྲིམས་ངན་པའི་དྲི་མ་མེད་པས་གཏོང་བ་དང༌། ཚུལ་ཁྲིམས་རྣམ་པར་དག་པ་ལ་ཡང་དག་ འབྱུང་ཞིང་གནས་སོ། །དེའི་བསྡུ་བའི་དངོས་པོ་བཞི་ལས་ངག་སྙན་པ་ཤས་ཆེ་བ་ཡིན། ཕ་རོལ་ཏུ་ཕྱིན་པ་བཅུ་ལས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཤས་ཆེ་ བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་སྒྲུབ་པ་མ་ཡིན་ནོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ས་དྲི་མ་མེད་པ་ཞེས་བྱ་ བ་སྟེ། བྱང་ཆུབ་སེམས་དཔའི་ས་གཉིས་པ་མདོར་བསྟན་པའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་འཁོར་ལོས་བསྒྱུར་བའི་རྒྱལ་པོ་གླིང་བཞི་ལ་དབང་ བར་འགྱུར་ཏེ། ཆོས་ཀྱིས་དབང་བསྒྱུར་བ་རབ་ཏུ་ཐོབ་ཅིང་རིན་པོ་ཆེ་སྣ་བདུན་དང་ལྡན་པ། སེམས་ཅན་ཐམས་ཅད་ཀྱི་སེར་སྣའི་སྐྱོན་དང༌། ཚུལ་ཁྲིམས་ངན་པའི་དྲི་མ་བཟློག་ པར་བྱ་བ་ལ་མཁས་ཤིང་མཐུ་ཡོད་པ་དང༌། སེམས་ཅན་རྣམས་དགེ་བ་བཅུའི་ལས་ཀྱི་ལམ་ལ་རབ་ཏུ་དགོད་པར་བྱ་བར་ཤིན་ཏུ་མཁས་པ་དང༌། སྦྱིན་པ་ཆེན་པོ་རྩོམ་པས་ཐུབ་པ་ མེད་པ་ཡིན་ཏེ། སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། རྣམ་པར་འདྲེན་ པར་འགྱུར། ཡོངས་སུ་འདྲེན་པར་འགྱུར་བ་ནས་ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང༌། ཆོས་ཡིད་ ༄༅། །ལ་བྱ་བ་དང༌། དགེ་འདུན་ཡིད་ལ་བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་དང༌། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང༌། བྱང་ཆུབ་ སེམས་དཔའི་ས་ཡིད་ལ་བྱ་བ་དང༌། ཕ་རོལ་ཏུ་ཕྱིན་པ་ཡིད་ལ་བྱ་བ་དང༌། སྟོབས་ཡིད་ལ་བྱ་བ་དང༌། མི་འཇིགས་པ་ཡིད་ལ་བྱ་བ་དང༌། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་ བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ནོ། །དེ་འདོད་ན་སྐད་ཅིག་ཡུད་ཙམ་ཐང་ཅིག་ ཏུ་ཁྱིམ་དང༌། ཆུང་མ་དང༌། སྲིད་ཐམས་ཅད་ཡོངས་སུ་སྤངས་ཏེ། དེ་བཞིན་གཤེགས་པའི་བསྟན་པ་ལ་རབ་ཏུ་འབྱུང་བ་དང༌། དེ་རབ་ཏུ་བྱུང་ནས་ཀྱང་སྐད་ཅིག་ཡུད་ཙམ་ཐང་ཅིག་ ཏུ་ཏིང་ངེ་འཛིན་སྟོང་རབ་ཏུ་འཐོབ་ཅིང་དེ་དག་ལ་སྙོམས་པར་འཇུག་པ་དང༌། སངས་རྒྱས་སྟོང་མཐོང་བ་དང༌། དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང༌། འཇིག་རྟེན་གྱི་ཁམས་སྟོང་སྐྱོད་པ་དང༌། སངས་རྒྱས་ཀྱི་ཞིང་སྟོང་དུ་འགྲོ་བ་དང༌། འཇིག་རྟེན་གྱི་ཁམས་སྟོང་སྣང་བར་བྱེད་པ་དང༌། སེམས་ཅན་སྟོང་ཡོངས་སུ་སྨིན་པར་བྱེད་ པ་དང༌། བསྐལ་པ་སྟོང་དུ་གནས་པ་དང༌། སྔོན་གྱི་མཐའ་དང༌། ཕྱི་མའི་མཐའི་བསྐལ་པ་སྟོང་ལ་རབ་ཏུ་འཇུག་པ་དང༌། ཆོས་ཀྱི་སྒོ་སྟོང་རྣམ་པར་འབྱེད་པ་དང༌། ལུས་སྟོང་ ཡོངས་སུ་བསྟན་པ་དང༌། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་སྟོང་ཡང་དག་པར་བསྟན་པར་བྱ་བའི་བརྩོན་འགྲུས་དེ་ལྟ་བུ་རྩོམ་མོ། །དེ་ཡན་ཆད་བྱང་ཆུབ་སེམས་དཔའ་ སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དམ། རྫུ་འཕྲུལ་ལམ། མིག་གམ། སྤྱོད་ཡུལ་ལམ། དབྱངས་སམ། སྤྱོད་ པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་ པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མའི་བར་གྱིས་ཀྱང་བགྲང་བར་དཀའོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་ པར་བྱ་བ་དང༌། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་གཉེན་དྲང་ལས་རུང་འཇམ་པའི་སེམས་ལྡན་ཞིང༌། བསམ་པ་དག་དང་བསམ་པ་ཞི་ དང་ལྡན་པ་རྣམས། །འདུ་འཛིའི་དམིགས་བྲལ་རླབས་ཆེན་བློ་དང་ལྡན་པ་ཡིན། །ཆེ་ཉིད་སེམས་ལྡན་མཁས་པ་དེ་དག་གཉིས་ལ་འཕར། །དེ་གནས་ཡོན་ཏན་འཆང་ཞིང་དགེ་བ་ཕུན་ ལྡན་པ། །གཙེ་མེད་སེམས་ལྡན་སྲོག་གཅོད་རྣམ་པར་ཀུན་སྤངས་ཤིང༌། །མ་བྱིན་ལེན་དང་གཞན་གྱི་ཆུང་མ་དེ་བཞིན་སྤངས། །བདེན་དང་ལྡན་ཞིང་ཕྲ་མ་མི་སྨྲ་ཞེ་གཅོད་མེད། །གཞན་ ༄༅། །གྱི་ལོངས་སྤྱོད་འདོད་སེམས་བྲལ་ཞིང་བྱམས་སེམས་ལྡན། །དྲང་ཞིང་གཡོ་མེད་ཡང་དག་ལམ་དུ་རབ་ཏུ་ཞུགས། །གཡོ་མེད་ཐིབས་པོ་མེད་ ཅིང་ཤིན་ཏུ་ངེས་པ་སྟེ། །རྟག་ཏུ་བག་ཡོད་སྟོན་པའི་སྤྱོད་པ་ཡོངས་སུ་སྲུང༌། །སེམས་དམྱལ་བྱོལ་སོང་སྐྱེ་གནས་སྡུག་བསྔལ་ཇི་སྙེད་དང༌། །གཤིན་རྗེའི་རིས་ན་ཡི་དྭགས་རྟག་ ཏུ་ལུས་འབར་བ། །དེ་དག་སྡིག་བློས་དགེ་བ་མིན་ལ་བརྩོན་པས་བྱུང༌། །དེ་བས་དེ་སྤངས་བདེན་པའི་ཆོས་དང་ལྡན་པར་བྱ། །མི་ཡི་ནང་དུ་སྐྱེ་བ་ཡིད་དུ་འོང་ལ་སོགས། །སྲིད་རྩེའི་ བར་གྱི་ལྷ་ཡི་བསམ་གཏན་བདེ་བ་དང༌། །རང་རྒྱལ་ཐེག་པ་དེ་བཞིན་ཉན་ཐོས་ཐེག་པ་དག །ཀུན་ཀྱང་དཀར་ལམ་བཅུ་པོས་བྱུང་བ་ཡིན་ཞེས་ཏེ། །དེ་ལྟར་ཤེས་ཤིང་རྟག་པར་ མཁས་པ་བག་ཡོད་པ། །ཤིན་ཏུ་བསྡམས་པའི་ཡིད་ཀྱིས་ཕ་རོལ་ཚུལ་ལ་འགོད། །སེམས་ཅན་སྡུག་བསྔལ་ཤེས་ཤིང་སྙིང་བརྩེ་བསྐྱེད་བྱས་ནས། །དེ་བས་གོང་དུ་སྙིང་རྗེའི་ སེམས་དང་ལྡན་པར་བྱེད། །ཀྱེ་མ་བྱིས་པའི་བློ་ཅན་འདི་དག་ལྟ་ངན་ལྷུང༌། །ཁྲོ་ཞིང་ཤར་གཉེར་གནོད་པ་ཀུན་སེམས་རྩོད་པ་ཅན། །རྟག་ཏུ་མི་ངོམས་ཡུལ་ལ་ཡང་དང་ཡང་ དུ་སྨོན། །གཞི་གསུམ་འབྲེལ་བ་དེ་དག་ཡོངས་སུ་དགྲོལ་བར་བྱ། །གཏི་མུག་མུན་པ་ཆེན་པོས་ཀུན་ནས་ཡོག་པ་རྣམས། །ལྟ་བའི་དྲ་མང་མྱ་ངམ་ལམ་དུ་ལྷུང་འགྱུར་བ། ། འཁོར་བའི་ཤིང་ཐགས་ནང་ན་རྟག་ཏུ་དགྲས་གཙེ་ཞིང༌། །བདུད་ཀྱི་ཆོམ་པོའི་ནང་གནས་དེ་དག་བདག་གིས་དགྲོལ། །ཉོན་མོངས་རླབས་ཀྱིས་གཡེངས་ཤིང་ཆུ་བོ་བཞིར་ནུབ་པ། ། ཁམས་གསུམ་སྡུག་བསྔལ་བརྒྱ་ཡིས་ཡོངས་སུ་གདུངས་པ་རྣམས། །ཕུང་པོའི་གནས་ལ་རྟེན་ཅིང་བདག་ཏུ་འདུ་ཤེས་པ། །དེ་དག་སྡུག་བསྔལ་དགྲོལ་དོན་བདག་གིས་བརྩོན་པར་ བྱ༑ ༑སངས་རྒྱས་ཡེ་ཤེས་དམ་པ་རྨད་བྱུང་ཕུལ་སྤངས་ཤིང༌། །འབྱུང་བ་ཡོད་བཞིན་དམའ་བའི་བློ་གྲོས་སྐྱེད་བྱེད་པ། །དེ་དག་དེ་བཞིན་གཤེགས་པའི་ཡེ་ཤེས་ཡང་དགོད་ ཅེས༑ ༑རྒྱལ་བའི་ཡེ་ཤེས་དོན་དུ་བརྩོན་འགྲུས་ཡངས་པ་རྩོམ། །འདི་གནས་ཡོན་ཏན་བརྒྱ་བསགས་དྲང་སྲོང་ཆེན་པོ་རྣམས། །བདེ་གཤེགས་དུ་མ་མཐོང་ཞིང་མཆོད་པའང་རབ་ ཏུ་བྱེད། །དགེ་བ་དེ་དག་བསྐལ་པ་བྱེ་བར་ཕྱིར་ཞིང་སྦྱོང༌། །གསེར་གྱི་དམ་པ་ནག་མཚུར་ནང་དུ་བཅུག་པ་བཞིན། །འདི་གནས་རྒྱལ་སྲས་འཁོར་ལོས་བསྒྱུར་བའི་རྒྱལ་པོར་འགྱུར།། དགེ་བ་བཅུ་ལ་སེམས་ཅན་རབ་ཏུ་དགོད་པ་བྱེད། །དགེ་ཚོགས་གང་ཡང་རུང་སྟེ་གསོག་པར་བྱེད་པ་རྣམས། །སྟོབས་བཅུ་ལྡན་ཞིང་འགྲོ་བའི་སྐྱབས་འགྱུར་དོན་དུ་གསོག །འདོད་ན་ རྒྱལ་པོའི་སྲིད་ཀྱང་རྣམ་པར་སྤངས་བྱས་ཤིང༌། །བརྟན་པ་རྣམས་ནི་བསྟན་པའི་མཆོག་ལ་རབ་བྱུང་ནས། །བརྩོན་འགྲུས་ལྡན་ཞིང་ཏིང་འཛིན་དམ་པ་མཆོག་ཀྱང་འཐོབ། །སངས་ ༄༅། །རྒྱས་སྟོང་ཚང་སྐད་ཅིག་གཅིག་གིས་མཐོང་བར་བྱེད། །འདི་འདྲའི་ཚུལ་གྱིས་བགྲང་བས་གཞན་ཡང་གཅིག་མིན་པ། །ཁྱུ་མཆོག་ས་འདི་གནས་ པ་རབ་ཏུ་སྟོན་པར་བྱེད། །དེ་ཡི་གོང་ནས་ཡེ་ཤེས་སྨོན་ལམ་མཆོག་ལྡན་པ། །རྣམ་པར་འཕྲུལ་པ་རྣམ་པ་དུ་མས་སེམས་ཅན་འདུལ། །དེ་ལྟར་ས་མཆོག་གཉིས་པ་འདི། ། འཇིག་རྟེན་ཀུན་ལ་ཕན་འདོད་པའི། །བྱང་ཆུབ་སེམས་དཔའི་མཆོག་རྣམས་ལ། །བདེ་བར་གཤེགས་པའི་སྲས་ཀྱིས་བསྟན། །དྲི་མ་དང་བྲལ་བ་ཞེས་བྱ་བ་སྟེ། བྱང་ཆུབ་སེམས་ དཔའི་ས་གཉིས་པའོ།། །།བམ་པོ་བཞི་བཅུ་བདུན་པ། བྱང་ཆུབ་སེམས་དཔའི་སྤྱོད་ཡུལ་བསམ་ཡས་པ། །ས་མཆོག་སྤྱོད་པ་དེ་སྐད་ཐོས་གྱུར་ནས། ། རྒྱལ་བའི་སྲས་རྣམས་རབ་ཏུ་དགའ་ཞིང་བསྟི་སྟང་དུ། །མེ་ཏོག་སྤྲིན་ཆར་ཀུན་ནས་མངོན་པར་འབེབས། །རི་ཡི་རྒྱལ་པོར་བོད་པ་ལེགས་སོ་ལེགས། །སེམས་ཅན་ཀུན་ལ་ སྙིང་བརྩེ་བསམ་པ་ཡིས། །ས་མཆོག་དམ་པའི་སྤྱོད་ཡུལ་དེ་འདྲ་དང༌། །མཁས་པའི་ཚུལ་ཁྲིམས་སྡོམ་པ་ཁྱོད་ཀྱིས་བཤད། །ཡང་དག་དེ་དངོས་མ་ནོར་གཞན་མིན་ པའི༑ ༑བྱང་ཆུབ་སེམས་དཔའི་སྤྱོད་པ་ཡིད་འོང་ཞིང༌། །སེམས་ཅན་ཀུན་ལ་ཕན་དང་བདེ་བར་རབ་སེམས་པ། །ཕུལ་དུ་འོད་གསལ་ཁྱོད་ཀྱིས་བསྟན་པ་བྱས། །ད་དུང་ ད་ཆུད་ལྷ་དང་མིས་མཆོད་ཅིང༌། །ཆོས་ཀྱི་ཡེ་ཤེས་རིགས་པར་བརྗོད་མཁས་པ། །དེ་དག་སྤྱོད་ཡུལ་ཚུལ་ནི་ཇི་བཞིན་དུ། །ས་ཡི་དམ་པ་གསུམ་པ་བརྗོད་པར་མཛོད། །དྲང་སྲོང་ ཆེན་པོའི་སྦྱིན་ཚུལ་སྤྱོད་པ་དང༌། །བཟོད་པ་བརྩོན་འགྲུས་ཞི་བ་ཤེས་རབ་ཐབས། །བྱམས་པའི་མཆོག་དང་སྙིང་རྗེ་ལམ་གྱི་རྣམས། །རྒྱལ་སྲས་སྤྱོད་པ་རྣམ་སྦྱང་བསྟན་མཛོད་ ཅིག་༑རྡོ་རྗེའི་སྙིང་པོ་འཇིགས་མེད་ལ། །རྣམ་གྲོལ་ཟླ་བས་ཡང་སྨྲས་པ། །གསུམ་ལ་ཡང་དག་འཕར་འགྱུར་བའི། །བསམ་པ་མཁས་པས་བཤད་པ་མཛོད། །བྱང་ཆུབ་སེམས་ དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་སྨྲས་པ། ཀྱེ། རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་ས་གཉིས་པ་ལ་བསམ་པ་ཤིན་ཏུ་སྦྱངས་པ་ནི། ས་གསུམ་པ་ཡོངས་ སུ་གནོན་ཏོ། །དེ་སེམས་ཀྱི་བསམ་པ་ཡིད་ལ་བྱ་བ་བཅུས་ཡོངས་སུ་གནོན་ཏོ། །བཅུ་གང་ཞེ་ན། འདི་ལྟ་སྟེ། དག་པའི་སེམས་ཀྱི་བསམ་པ་ཡིད་ལ་བྱ་བ་དང༌། མི་གཡོ་བའི་སེམས་ཀྱི་ བསམ་པ་ཡིད་ལ་བྱ་བ་དང༌། སྐྱོ་བའི་སེམས་ཀྱི་བསམ་པ་ཡིད་ལ་བྱ་བ་དང༌། འདོད་ཆགས་དང་བྲལ་བའི་སེམས་ཀྱི་བསམ་པ་ཡིད་ལ་བྱ་བ་དང༌། ཕྱིར་མི་ལྡོག་པའི་སེམས་ཀྱི་བསམ་ པ་ཡིད་ལ་བྱ་བ་དང༌། བརྟན་པའི་སེམས་ཀྱི་བསམ་པ་ཡིད་ལ་བྱ་བ་དང༌། སྦྱངས་པའི་སེམས་ཀྱི་བསམ་པ་ཡིད་ལ་བྱ་བ་དང༌། རློམ་སེམས་ཀྱི་བསམ་པ་ཡིད་ལ་བྱ་བ་དང༌། རླབས་པོ་ ༄༅། །ཆེའི་སེམས་ཀྱི་བསམ་པ་ཡིད་ལ་བྱ་བ་དང༌། བདག་ཉིད་ཆེ་བའི་སེམས་ཀྱི་བསམ་པ་ཡིད་ལ་བྱ་བའོ། །ཀྱེ། རྒྱལ་བའི་སྲས་དག །བྱང་ཆུབ་སེམས་དཔའ་ བྱང་ཆུབ་སེམས་དཔའི་ས་གསུམ་པ་ལ་གནས་པ་ནི་འདུ་བྱེད་ཀྱི་རྣམ་པ་ཐམས་ཅད་ལ་མི་རྟག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོག་གོ །སྡུག་བསྔལ་བ་དང༌། བདག་ མེད་པ་དང༌། མི་སྡུག་པ་དང༌། ཡིད་བརྟན་དུ་མི་རུང་བ་དང༌། རྣམ་པར་འཇིགས་པ་དང༌། རིང་དུ་མི་གནས་པ་དང༌། སྐད་ཅིག་ཏུ་འབྱུང་ཞིང་འགག་པ་དང༌། མི་ཟད་ཅིང་མི་ སྐྱེ་མི་འགག་པ་དང༌། སྔོན་གྱི་མཐའ་ཀུན་ནས་མ་བྱུང་བ་དང༌། ཕྱི་མའི་མཐའ་འཕོ་བ་མེད་པ་དང༌། ད་ལྟར་བྱུང་བ་མི་གནས་པར་རབ་ཏུ་རྟོག་གོ །འདུ་བྱེད་ཀྱི་རྣམ་པ་དེ་ལྟ་ བུ་ལ་རབ་ཏུ་རྟོག་པའི་ཚེ། མངོན་པར་འཇིག་པ་དང༌། མྱ་ངན་ཅན། སྨྲེ་སྔགས་འདོན་པ་ཅན། འཁྲུག་པ་ཅན། ཡིད་དུ་འོང་བ་དང༌། ཡིད་དུ་མི་འོང་བས་རྣམ་པར་བཅིངས་པ། སྡུག་བསྔལ་དང་ཡིད་མི་བདེ་བ་མང་བ། བསགས་པ་མེད་པ་ལས་བྱུང་བ། འདོད་ཆགས་དང༌། ཞེ་སྡང་དང༌། གཏི་མུག་གི་མེ་རབ་ཏུ་འབར་བ། ནད་དུ་མས་རྣམ་པར་སྐྱེད་པ། སྒྱུ་མའི་རང་བཞིན་ལྟ་བུར་མཐོང་ནས། དེ་དེ་བས་ཀྱང་འདུ་བྱེད་ཐམས་ཅད་ལས་སེམས་གྱེན་དུ་སྐྱོད་ཅིང་དེ་བཞིན་གཤེགས་པའི་ཡེ་ཤེས་ལ་རབ་ཏུ་གཏོང་སྟེ། དེས་དེ་བཞིན་ གཤེགས་པའི་ཡེ་ཤེས་བསམ་གྱིས་མི་ཁྱབ་པའང་རྗེས་སུ་མཐོང་སྟེ། མཚུངས་པ་མེད་པ་དང༌། གཞལ་དུ་མེད་པ་དང༌། རྙེད་པར་དཀའ་བ་དང༌། མ་འདྲེས་པ་དང༌། གནོད་པ་ མེད་པ་དང༌། འཁྲུག་པ་མེད་པ་དང༌། མི་འཇིགས་པའི་གྲོང་རྡལ་དུ་འགྲོ་བ་དང༌། ཕྱིར་མི་ལྡོག་པ་དང༌། འགྲོ་བ་མང་པོ་ཡོངས་སུ་སྐྱོབ་པ་ཡང་ཡང་དག་པར་རྗེས་སུ་མཐོང་ངོ༌། ། དེས་དེ་བཞིན་གཤེགས་པའི་ཡེ་ཤེས་དེ་ལྟར་ཚད་མེད་པ་མཐོང་སྟེ། འདུ་བྱེད་ཀྱི་རྣམ་པ་དེ་ལྟར་སྡུག་བསྔལ་མང་པོས་གཙེས་པར་མཐོང་ནས། སེམས་ཅན་ཐམས་ཅད་ལ་དེ་ བས་ཀྱང་ཤས་ཆེར་སེམས་ཀྱི་བསམ་པ་བཅུ་ཉེ་བར་གཞོག་སྟེ། བཅུ་གང་ཞེ་ན། འདི་ལྟ་སྟེ། མགོན་མེད་པ་དང༌། སྐྱབས་མེད་པ་དང༌། རྟེན་མེད་པའི་སེམས་ཀྱི་བསམ་པ་དང༌། རྟག་ ཏུ་ཕོངས་པའི་སེམས་ཀྱི་བསམ་པ་དང༌། འདོད་ཆགས་དང༌། ཞེ་སྡང་དང༌། གཏི་མུག་གི་མེ་ཀུན་ནས་འབར་བའི་སེམས་ཀྱི་བསམ་པ་དང༌། སྲིད་པའི་བཙོན་རས་བཟུང་བའི་སེམས་ཀྱི་ བསམ་པ་དང༌། རྟག་ཏུ་རྒྱུན་མི་འཆད་པར་ཉོན་མོངས་པའི་ཐིབས་པོས་བསྒྲིབས་པའི་སེམས་ཀྱི་བསམ་པ་དང༌། བརྟག་པའི་མཐུ་མེད་པའི་སེམས་ཀྱི་བསམ་པ་དང༌། དགེ་བའི་ ཆོས་ལ་མོས་པ་མེད་པའི་སེམས་ཀྱི་བསམ་པ་དང༌། སངས་རྒྱས་ཀྱི་ཆོས་ཐམས་ཅད་ལས་ཤིན་ཏུ་གོལ་བའི་སེམས་ཀྱི་བསམ་པ་དང༌། འཁོར་བའི་རྒྱུད་ཀྱི་རྗེས་སུ་འབབ་པའི་སེམས་ ༄༅། །ཀྱི་བསམ་པ་དང༌། ཐར་པའི་ལམ་གྱིས་དངངས་པའི་སེམས་ཀྱི་བསམ་པ་དང༌། སེམས་ཀྱི་བསམ་པ་འདི་བཅུ་ཉེ་བར་གཞོག་གོ །དེས་དེ་ ལྟར་སེམས་ཅན་གྱི་ཁམས་གཙེ་བ་མང་པོ་ཅན་མཐོང་ནས་བརྩོན་འགྲུས་འདི་ལྟར་རྩོམ་སྟེ། སེམས་ཅན་འདི་དག་ནི་བདག་གིས་བསྐྱབ་པར་བྱ་བ། ཡོངས་སུ་དགྲོལ་བར་བྱ་བ། ཡོངས་སུ་སྦྱང་བར་བྱ་བ། ཤིན་ཏུ་གདོན་པར་བྱ་བ། རབ་ཏུ་དགོད་པར་བྱ་བ། ཤིན་ཏུ་བརྟན་པར་བྱ་བ། ཡོངས་སུ་ཚིམ་པར་བྱ་བ། གནས་སུ་ཕྱིན་པར་བྱ་བ། རྣམ་པར་གདུལ་ བར་བྱ་བ། ཡོངས་སུ་མྱ་ངན་ལས་འདའ་བར་བྱ་བ་ཡིན་ནོ། །ཞེས་ནས་དེ་དེ་ལྟར་འདུ་བྱེད་ཀྱི་རྣམ་པ་ཐམས་ཅད་ལས་སྐྱོ་བའི་རྗེས་སུ་སོང་ཞིང་སེམས་ཅན་ཐམས་ཅད་ལ་རབ་ ཏུ་ལྟ་བའི་རྗེས་སུ་སོང་བ་དང༌། ཐམས་ཅད་མཁྱེན་པའི་ཡེ་ཤེས་ལ་ཐམས་ཅད་མཁྱེན་པའི་ཡེ་ཤེས་ཀྱི་རྗེས་སུ་སོང་ཞིང༌། དེ་བཞིན་གཤེགས་པའི་ཡེ་ཤེས་ལ་རབ་ཏུ་བརྟེན་པས་ སེམས་ཅན་ཐམས་ཅད་ཡོངས་སུ་བསྐྱབ་པར་བྱ་བ་ལ་བརྩོན་པ་དེ་འདི་ལྟར་ཡོངས་སུ་རྟོག་སྟེ། རྒྱུ་དང༌། གཞི་དང༌། ཚུལ་དང༌། ཐབས་གང་ཞིག་གི་འདི་ལྟ་བུར་སྡུག་བསྔལ་ དང༑ ཉེ་བའི་ཉོན་མོངས་པར་ལྷུང་བའི་སེམས་ཅན་འདི་དག་མངོན་པར་གདོན་པར་ནུས། རྒྱུ་དང༌། གཞི་དང༌། ཚུལ་དང༌། ཐབས་གང་ཞིག་གིས་ནི་ཤིན་ཏུ་བདེ་བའི་མྱ་ངན་ ལས་འདས་པར་དགོད་པར་ནུས་སྙམ་ནས། དེ་ལ་བྱང་ཆུབ་སེམས་དཔའ་འདི་སྙམ་དུ་སེམས་ཏེ། བསྒྲིབས་པ་མེད་པའི་ཡེ་ཤེས་རྣམ་པར་ཐར་པའི་གནས་མ་གཏོགས་པར་གཞན་ གྱིས་མི་ནུས་སོ། །བསྒྲིབས་པ་མེད་པའི་ཡེ་ཤེས་རྣམ་པར་ཐར་པའི་གནས་དེ་ཡང་ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་མ་གཏོགས་པར་གཞན་གྱིས་ཐོབ་པར་ མི་ནུས་སོ། །ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་ཡང་རྒྱུ་བ་མེད་ཅིང་སྐྱེ་བ་མེད་པ་ལ་སྤྱོད་པའི་ཤེས་རབ་མ་གཏོགས་པར་གཞན་གྱིས་ཁོང་དུ་ཆུད་པར་མི་ ནུས་སོ། །ཤེས་རབ་ཀྱི་སྣང་བ་དེ་ཡང་བསམ་གཏན་ལ་མཁས་ཤིང་རྟོགས་པའི་བློས་རབ་ཏུ་རྟོག་པ་མེད་པར་གཞན་གྱིས་ཐོབ་པར་མི་རུང་ངོ༌། །བསམ་གཏན་ལ་མཁས་ཤིང་ རྟོག་པའི་བློས་རབ་ཏུ་རྟོག་པ་དེ་ཡང་ཐོས་པས་མཁས་པ་མེད་པར་མི་འབྱུང་ངོ༌། །ཞེས་དེ་དེ་ལྟར་ཤིན་ཏུ་བརྟག་པའི་ཤེས་པ་དང་ལྡན་པས། དེ་བས་ཀྱང་ཤེས་ཆེར་དམ་པའི་ཆོས་ ཚོལ་བ་ལ་མངོན་པར་བརྩོན་པར་གནས་ཏེ། ཉིན་མཚན་དུ་ཆོས་མཉན་པ་དོན་དུ་གཉེར་བ་ཡིན། སངས་རྒྱས་ཀྱི་ཆོས་བཙལ་བའི་དོན་དུ་ཆོས་ལ་མོས་ཤིང་ངོམས་མི་ཤེས་ལ་རྒྱུན་ མི་འཆད་པ་ཡིན། ཆོས་ལ་དགའ་ཞིང་སྤྲོ་བ་དང་ཆོས་ལ་རབ་ཏུ་འཇུག་པ་ཡིན། ཆོས་ལ་གཞོལ་ཞིང་ཆོས་ལ་འབབ་པ་དང༌། ཆོས་ལ་བབ་པ་ཡིན། ཆོས་ལ་རྟེན་ཅིང་ཆོས་ལ་ ༄༅། །སྐྱབས་ཚོལ་བ་དང༌། ཆོས་ལ་མཐུ་ཚོལ་བ་ཡིན། ཆོས་དང་གཉེར་བའི་ཆོས་ལ་མངོན་པར་བརྩོན་པ་ཡིན་ཏེ། དེ་དེ་ལྟར་ཆོས་ཚོལ་བ་ལ་མངོན་ པར་བརྩོན་པས་རིན་པོ་ཆེའི་རྣམ་པའམ། དབྱིག་གི་རྣམ་པའམ། ནོར་དང་འབྲུའི་མཛོད་དང༌། བང་བ་གང་ཡང་རུང་སྟེ། ཡོངས་སུ་མི་གཏོང་བ་དེ་ལྟ་བུ་གང་ཡང་མེད་དོ། ། ཆོས་སྨྲ་བའི་གང་ཟག་དེ་འབའ་ཞིག་ལ་དཀའ་བའི་འདུ་ཤེས་སུ་གྱུར་པ་ལས་ཕར། དེ་དག་གཞན་ལ་ཅུང་ཟད་ཀྱང་དགའ་བའི་འདུ་ཤེས་མི་སྐྱེད་དོ། །དེ་ནི་ཆོས་ཀྱི་དོན་དུ་ ཕྱི་རོལ་གྱི་དངོས་པོ་ཉེ་བར་བཟུང་བ་ཡོངས་སུ་མི་གཏོང་བ་དེ་གང་ཡང་མེད་དོ། །ནང་གི་དངོས་པོ་ཡོངས་སུ་མི་གཏོང་བར་བྱ་བ་དེ་ལྟ་བུའང་ཅུང་ཟད་ཀྱང་མེད་དོ། །གང་འདི་ དག་འདི་ལྟ་སྟེ། གཡོག་འཁོར་ཡོངས་སུ་གཏང་བའམ། རྒྱལ་སྲིད་ཡོངས་སུ་གཏང་བའམ། ལོངས་སྤྱོད་ཡོངས་སུ་གཏང་བའམ། ནོར་དང༌། འབྲུ་དང༌། ནོར་བུ་དང༌། གསེར་གྱི་མཛོད་དང༌། བང་བ་ཡོངས་སུ་གཏང་བ་དང༌། རྟ་དང༌། གླང་པོ་དང༌། ཤིང་རྟ་དང༌། བཞོན་པ་ཡོངས་སུ་གཏང་བའམ། རིན་པོ་ཆེའི་རྒྱན་དང༌། ལྷབ་ལྷུབ་ ཡོངས་སུ་གཏང་བ་དང༌། ཆུང་མ་དང༌། བུ་དང༌། བུ་མོ་ཡོངས་སུ་གཏང་བའམ། མགོ་དང༌། རྐང་ལག་དང༌། ཡན་ལག་གི་དམ་པ་ཡོངས་སུ་གཏང་བའམ། ལུས་ཐམས་ཅད་ ཡོངས་སུ་གཏང་བར་བྱ་བ་ཡང་རུང་སྟེ། དེ་དག་ཐམས་ཅད་ཆོས་ཀྱི་དོན་དུ་ཡོངས་སུ་མི་གཏོང་བ་གང་ཡང་མེད་དོ། །བླ་མ་ལ་བསྙེན་བཀུར་དང༌། རིམ་གྲོར་བྱ་བ་གང་ཡང་རུང་སྟེ་ ཉམས་སུ་མི་ལེན་པ་གང་ཡང་མེད་དོ། །ང་རྒྱལ་དང་ལྷག་པའི་ང་རྒྱལ་ཡོངས་སུ་གཏང་བས་ང་རྒྱལ་མེད་པ་ལ་སྦྱང་བ་གང་ཡང་རུང་སྟེ། ཉམས་སུ་མི་ལེན་པ་གང་ཡང་མེད་དོ།། ལུས་ཀྱི་གནོད་པ་གང་ཡང་རུང་སྟེ། ཉམས་སུ་མི་ལེན་པ་གང་ཡང་མེད་དོ། །དེ་མ་ཐོས་པའི་ཆོས་ཀྱི་ཚིག་གཅིག་ཐོས་པ་ནོར་ཆེ་བར་འཛིན་གྱི། སྟོང་གསུམ་གྱི་སྟོང་ཆེན་ པོའི་འཇིག་རྟེན་གྱི་ཁམས་ཡོངས་སུ་གང་བའི་རིན་པོ་ཆེའི་ཕུང་པོ་ཐོབ་པས་ནི་མ་ཡིན་ནོ། །ལེགས་པར་བཤད་པའི་ཚིགས་སུ་བཅད་པ་གཅིག་ཐོས་པས་སེམས་དགའ་བར་ འགྱུར་གྱི། བརྒྱ་བྱིན་དང༌། ཚངས་པ་དང༌། འཁོར་ལོས་བསྒྱུར་བའི་རྒྱལ་པོའི་སྲིད་ལ་བསྐལ་པ་བརྒྱ་སྟོང་མང་པོའི་མཐར་ཐུག་པར་གནས་པས་ནི་མ་ཡིན་ནོ། །དེ་ལ་ལ་ལ་ ཞིག་བརྒྱ་ལ་འདི་སྐད་དུ་ཟེར་ཏེ། གལ་ཏེ་ཁྱོད་ཀྱིས་མེའི་དོང་ཆེན་པོར་ལུས་པོར་ཏེ། སྡུག་བསྔལ་གྱི་ཚོར་བའི་ཕུང་པོ་ཆེན་པོ་རང་གི་ལུས་ཀྱིས་ཉམས་སུ་བླང་བར་ནུས་ན། ངས་ ཁྱོད་ལ་ཆོས་ཀྱི་ཚིག་ཡང་དག་པར་རྫོགས་པའི་སངས་རྒྱས་ཀྱིས་བསྟན་པ། བྱང་ཆུབ་སེམས་དཔའི་སྤྱོད་པ་ཡོངས་སུ་སྤྱད་པ་འདི་བཤད་པར་བྱའོ། །ཞེས་ན་ཡང་དེ་འདི་ ༄༅། །སྙམ་དུ་སེམས་ཏེ། ཆོས་ཀྱི་ཚིག་ཡང་དག་པར་རྫོགས་པའི་སངས་རྒྱས་ཀྱིས་བསྟན་པ་བྱང་ཆུབ་སེམས་དཔའི་སྤྱོད་པ་ཡོངས་སུ་སྦྱོང་བའི་དོན་དུ་ ནི༑ སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མེས་གང་བར་ཡང་ཚངས་པའི་འཇིག་རྟེན་ནས་བདག་གིས་བདག་དོར་བར་མོས་ན། མེའི་དོང་ཐ་མལ་པ་འདི་ལྟ་ བུ་ཞིག་ཏུ་བདག་དོར་བ་ལྟ་ཅི་སྨོས་ཀྱི། དེ་བས་སེམས་ཅན་དམྱལ་བའི་སྡུག་བསྔལ་ཐམས་ཅད་ཉམས་སུ་བབ་པས་ཀྱང་བདག་གིས་ཆོས་བཙལ་བར་བྱའི། མེའི་སྡུག་བསྔལ་ དང་འགྲོགས་པ་ལྟ་ཁྱད་དུ་གསད་དོ། །ཞེས་ནས་དེ་རྣམ་པ་དེ་ལྟ་བུའི་བརྩོན་འགྲུས་རྩོམ་པས་ཆོས་ཡོངས་སུ་ཚོལ་ལོ། །ཇི་སྐད་དུ་ཐོས་པའི་ཆོས་རྣམས་ལ་ཡང་ཚུལ་བཞིན་ དུ་རབ་ཏུ་རྟོག་པའི་ངང་ཚུལ་ཅན་ཡིན་ཏེ། དེ་ཆོས་དེ་དག་ཐོས་ནས་ཀྱང༌། རྗེས་ལ་རང་གི་སེམས་རྟོག་པར་བཞག་པས་གཅིག་པུ་དབེན་པ་ན་འདུག་ཅིང་འདི་ལྟར་རྟོག་གོ ། ཆོས་དང་གཉེར་བའི་ཆོས་ལ་ནན་ཏན་དུ་བྱ་བས་སངས་རྒྱས་ཀྱི་ཆོས་ཁོང་དུ་ཆུད་པར་བྱ་བའི་ཚིག་གི་ལམ་ཡོངས་སུ་དག་པ་འབའ་ཞིག་གིས་མ་ཡིན་ནོ། །ཞེས་ཏེ། བྱང་ཆུབ་ སེམས་དཔའ་དེ་བྱང་ཆུབ་སེམས་དཔའི་ས་འོད་བྱེད་པ་ལ་གནས་ཤིང་འདོད་པ་རྣམས་ལས་དབེན། སྡིག་ཏོ་དང་མི་དགེ་བའི་ཆོས་རྣམས་ལས་དབེན་ཞིང་རྣམ་པར་རྟོག་པ་ ཅན༑ རྣམ་པར་དཔྱོད་པ་ཅན། དབེན་པ་ལས་སྐྱེས་པའི་དགའ་བ་དང་བདེ་བའི་བསམ་གཏན་དང་པོ་ལ་ཉེ་བར་བསྒྲུབས་ཏེ་གནས་སོ། །དེ་རྣམ་པར་རྟོག་པ་དང༌། རྣམ་པར་དཔྱོད་ པ་རྣམ་པར་ཞི་སྟེ། ནང་ཤིན་ཏུ་དང་ཞིང་སེམས་ཀྱི་རྒྱུད་གཅིག་ཏུ་གྱུར་པས། རྣམ་པར་རྟོག་པ་དང༌། རྣམ་པར་དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང༌། བདེ་ བ་ཅན་བསམ་གཏན་གཉིས་པ་ལ་ཉེ་བར་བསྒྲུབས་ཏེ་གནས་སོ། །དེ་དགའ་བ་ལས་འདོད་ཆགས་དང་བྲལ་ཏེ་བཏང་སྙོམས་སུ་གནས་པས་དྲན་པ་དང་ལྡན་ཞིང་རབ་ཏུ་ ཤེས་པར་བདེ་བ་ཡང་ལུས་ཀྱིས་རབ་ཏུ་ཚོར་ཏེ། འཕགས་པ་རྣམས་ཀྱིས་བཏང་སྙོམས་པ་དྲན་པ་ཅན་དགའ་བ་མེད་ལ་བདེ་བ་ལ་གནས་པའོ་ཞེས་བྱ་བར་བསམ་གཏན་གསུམ་པ་ལ་ ཉེ་བར་བསྒྲུབས་ཏེ་གནས་སོ། །དེ་བདེ་བ་ཡང་སྤངས། སྡུག་བསྔལ་ཡང་སྤངས་ལ་བདེ་བའི་ཡིད་དང༌། ཉམ་ང་བའི་ཡིད་ཀྱང་སྔར་ནུབ་པས་སྡུག་བསྔལ་ཡང་མེད། བདེ་བ་ཡང་ མེད་པའི་བཏང་སྙོམས་དྲན་པས་ཡོངས་སུ་དག་པའི་བསམ་གཏན་བཞི་པ་ལ་ཉེ་བར་བསྒྲུབས་ཏེ་གནས་སོ། །དེ་གཟུགས་སུ་འདུ་ཤེས་པ་ལས་རྣམ་པ་ཐམས་ཅད་དུ་འདས་ནས། ཐོགས་པའི་འདུ་ཤེས་རྣམ་པ་ནུབ་སྟེ། འདུ་ཤེས་སྣ་ཚོགས་ཡིད་ལ་མི་བྱེད་པས་མཐའ་ཡས་ནམ་མཁའ་ཞེས་ཏེ། ནམ་མཁའ་མཐའ་ཡས་པའི་སྐྱེ་མཆེད་ལ་ཉེ་བར་བསྒྲུབས་ ༄༅། །ཏེ་གནས་སོ། །དེ་ནམ་མཁའ་མཐའ་ཡས་པའི་སྐྱེ་མཆེད་ལས་རྣམ་པ་ཐམས་ཅད་དུ་འདས་ནས་མཐའ་ཡས་རྣམ་ཤེས་ཞེས་ཏེ། རྣམ་པར་ཤེས་པ་ མཐའ་ཡས་པའི་སྐྱེ་མཆེད་ལ་ཉེ་བར་བསྒྲུབས་ཏེ་གནས་སོ། །དེ་རྣམ་པར་ཤེས་པའི་སྐྱེ་མཆེད་ལས་རྣམ་པ་ཐམས་ཅད་དུ་འདས་ནས་མ་ཡོད་ཅུང་ཟད་ཅེས་ཏེ། ཅུང་ཟད་ཀྱང་ མེད་པའི་སྐྱེ་མཆེད་ལ་ཉེ་བར་བསྒྲུབས་ཏེ་གནས་སོ། །དེ་ཅུང་ཟད་ཀྱང་མེད་པའི་སྐྱེ་མཆེད་ལས་རྣམ་པ་ཐམས་ཅད་དུ་འདས་ནས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ལ་ ཉེ་བར་བསྒྲུབས་ཏེ་གནས་སོ། །དེ་ཆོས་དང་གཉེར་བའི་ཆོས་ལ་ནན་ཏན་དུ་བྱས་པ་མ་གཏོགས་པར་དེ་ཡང་མངོན་པར་དགའ་བའི་གནས་དང་རྟེན་མ་ཡིན་པས། དེ་བྱམས་པ་དང་ ལྡན་པའི་སེམས་ཡངས་པ། རྒྱ་ཆེ་བ། གཉིས་སུ་མེད་པ། ཚད་མེད་པ། ཁོ་ན་མེད་པ། ལྟོད་པ་མེད་པ། བསྒྲིབས་པ་མེད་པ། གནོད་པ་མེད་པ་ཐམས་ཅད་དུ་ཁྱབ་པས་འཇིག་ རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་རྒྱས་པར་བཀང་ནས་ཉེ་བར་བསྒྲུབས་ཏེ་གནས་སོ། །དེ་བཞིན་དུ་སྙིང་རྗེ་དང་ལྡན་ པ་དང༌། དགའ་བ་དང་ལྡན་པ་དང༌། བཏང་སྙོམས་དང་ལྡན་པའི་སེམས་ཡངས་པ། རྒྱ་ཆེ་བ། གཉིས་སུ་མེད་པ། ཚད་མེད་པ། ཁོན་མེད་པ། ལྟོད་པ་མེད་པ། བསྒྲིབས་པ་ མེད་པ། གནོད་པ་མེད་པ། ཐམས་ཅད་དུ་ཁྱབ་པས་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་རྒྱས་པར་བཀང་ནས་ཉེ་བར་ བསྒྲུབས་ཏེ་གནས་སོ། །དེ་རྫུ་འཕྲུལ་གྱི་རྣམ་པ་དུ་མ་མྱོང་བར་བྱེད་དེ། ས་འདི་ཡང་གཡོ་བར་བྱེད་དོ། །གཅིག་ཏུ་གྱུར་ནས་མང་པོར་འགྱུར་རོ། །མང་པོར་གྱུར་ནས་གཅིག་ཏུ་འགྱུར་རོ།། སྣང་བ་དང་མི་སྣང་བ་ལའང་རབ་ཏུ་སྤྱོད་དེ། རྩིག་པ་ལ་ཐགས་ཐོགས་མེད་པ་དང༌། ར་བ་ལ་ཐགས་ཐོགས་པ་མེད་པ་དང༌། རི་ལ་ཡང༌། དཔེར་ན། ནམ་མཁའ་བཞིན་དུ་ཐགས་ཐོགས་ མེད་ཅིང་ཆགས་པ་མེད་པར་འགྲོའོ། །དཔེར་ན། ནམ་མཁའ་ལ་ལྡིང་བའི་བྱ་བཞིན་དུ་ནམ་མཁའ་ལའང་སྐྱིལ་མོ་ཀྲུང་གིས་གནས་པར་བྱེད་དོ། །ཆུ་བཞིན་དུ་ས་ལ་ཡང་ནུབ་ཅིང་ འབྱུང་བར་སྟོན་ཏོ། །ས་བཞིན་དུ་ཆུ་ལ་ཡང་འབྱིན་པ་མེད་པར་འགྲོའོ། །མེའི་ཕུང་པོ་ཆེན་པོ་བཞིན་དུ་དུ་བ་འཐུལ་ལོ། །མེ་ལྕེ་འབར་རོ། །སྤྲིན་ཆེན་པོ་བཞིན་དུ་ལུས་ལས་ ཆར་འབེབས་སོ། །ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་ལ། འདི་ལྟར་དབང་ཆེ་བར་གྲགས་པ་དག་ཀྱང་ལག་པས་ཉུག་ཅིང་རེག་པར་བྱེད་དོ། །ཚངས་ པའི་འཇིག་རྟེན་གྱི་བར་དུ་ཡང་ལུས་ཀྱིས་དབང་བསྒྱུར་ཏེ། དེ་ལྷའི་རྣ་བའི་ཁམས་རྣམ་པར་དག་པ་མི་ལས་འདས་པས་ལྷ་དང་མིའི་སྒྲ་གཉིས་ཀ་ཡང་ཉན་ཏོ། །རིང་ཡང་རུང༌། ༄༅། །ཉེ་ཡང་རུང་སྟེ། ཆུང་ངུ་ན་སྦྲང་བུ་དང༌། ཤ་སྦྲང་དང༌། བུང་བ་དང༌། སྲིན་བུའི་སྒྲ་ཡང་ཐོས་སོ། །དེ་སེམས་ཅན་ཕ་རོལ་དང༌། གང་ཟག་ཕ་རོལ་གྱི་ སེམས་ཀྱང་སེམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་ཞེས་ཡང་དག་པ་ཇི་ ལྟ་བ་བཞིན་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེ་སྡང་ དང་བཅས་པ་དང༌། ཞེ་སྡང་དང་བྲལ་བ་དང༌། གཏི་མུག་དང་བཅས་པ་དང༌། གཏི་མུག་དང་བྲལ་བ་དང༌། ཉོན་མོངས་དང་བཅས་པ་དང༌། ཉོན་མོངས་དང་བྲལ་བ་དང༌། ཆེ་བ་ དང༑ ཆུང་བ་དང༌། ཡངས་པ་དང༌། དོག་པ་དང༌། མཉམ་པར་བཞག་པ་དང༌། མཉམ་པར་མ་བཞག་པ་དང༌། རྣམ་པར་གྲོལ་བ་དང༌། རྣམ་པར་མ་གྲོལ་བ་དང༌། སྐྱོན་ཅན་དང༌། སྐྱོན་མེད་པ་དང༌། སེམས་རྒྱ་ཆེན་པོ་ལ་སེམས་རྒྱ་ཆེན་པོའོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །སེམས་རྒྱ་ཆུང་ངུ་ལ་སེམས་རྒྱ་ཆུང་ངུའོ་ཞེས་ཡང་དག་པ་ ཇི་ལྟ་བ་བཞིན་དུ་རབ་ཏུ་ཤེས་ཏེ། དེ་ལྟར་ན་སེམས་ཅན་ཕ་རོལ་དང༌། གང་ཟག་ཕ་རོལ་གྱི་སེམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་རྣམ་པ་ དུ་མར་སྔོན་གྱི་གནས་རྗེས་སུ་དྲན་ཏེ། ཚེ་རབས་གཅིག་ཀྱང་རྗེས་སུ་དྲན་ནོ། །གཉིས་དང༌། གསུམ་དང༌། བཞི་དང༌། ལྔ་དང༌། བཅུ་དང༌། ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་དང༌། ཚེ་རབས་བརྒྱ་ཡང་རྗེས་སུ་དྲན་ནོ། །ཚེ་རབས་བརྒྱ་ཕྲག་དུ་མ་དང༌། ཚེ་རབས་སྟོང་ཕྲག་དུ་མ་དང༌། ཚེ་རབས་བརྒྱ་སྟོང་ཕྲག་དུ་མ་དང༌། ཚེ་རབས་བྱེ་བ་བརྒྱ་སྟོང་ ཕྲག་དུ་མ་ནས། ཚེ་རབས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་བར་དུ་རྗེས་སུ་དྲན་ནོ། །འདུ་བའི་བསྐལ་པ་དུ་མ་དང༌། འཇིག་པའི་བསྐལ་པ་དུ་མ་དང༌། འདུ་བ་དང༌། འཇིག་ པའི་བསྐལ་པ་དུ་མ་ཡང་རྗེས་སུ་དྲན་ནོ། །བསྐལ་པ་བརྒྱ་ཡང་རྗེས་སུ་དྲན་ནོ། །བསྐལ་པ་སྟོང་དང༌། བསྐལ་པ་སྟོང་ཕྲག་བརྒྱ་དང༌། བསྐལ་པ་བྱེ་བ་སྟོང་ཕྲག་བརྒྱ་ནས་བསྐལ་ པ་བྱེ་བ་བརྒྱ་སྟོང་དུ་མའི་བར་དུ་རྗེས་སུ་དྲན་ནོ། །བསྐལ་པ་ཁྲག་ཁྲིག་དང༌། བསྐལ་པ་ཁྲག་ཁྲིག་བརྒྱ་དང༌། བསྐལ་པ་ཁྲག་ཁྲིག་སྟོང་དང༌། བསྐལ་པ་ཁྲག་ཁྲིག་སྟོང་ཕྲག་བརྒྱ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ནས། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མའི་བར་དུ་རྗེས་སུ་དྲན་ཏེ། བདག་ནི་ཆེ་གེ་མོ་ཞིག་ན་འདུག་འདུག་གོ །མིང་ནི་འདི་ཞེས་བྱའོ། ། རིགས་ནི་འདི་ཡིན་ནོ། །རུས་ནི་འདི་ཡིན་ནོ། །ཁ་ཟས་ནི་འདི་ལྟ་བུ་ཞིག་ཟོས་སོ། །ཚེ་ནི་འདི་ཙམ་ཞིག་ཏུ་གྱུར་ཏོ། །འདི་སྲིད་གཅིག་ཏུ་རིང་དུ་གནས་སོ། །བདེ་བ་དང་ཉོན་མོངས་ ༄༅། །པ་ནི་འདི་ལྟ་བུ་ཞིག་མྱོང་ངོ༌། །དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་འདི་ལྟ་བུ་ཞིག་ཏུ་སྐྱེས་སོ། །ཞེས་ས་ ཚིགས་དང་བཅས། མཚན་མ་དང་བཅས། དོན་རྟགས་དང་བཅས་པར་རྣམ་པ་དུ་མར་སྔོན་གྱི་གནས་རྗེས་སུ་དྲན་ནོ། །དེས་ལྷའི་མིག་རྣམ་པར་དག་ཅིང་མི་ལས་འདས་པས་ སེམས་ཅན་རྣམས་ཤི་འཕོ་བ་དང༌། སྐྱེ་བ་དང༌། ཁ་དོག་སྡུག་པ་དང༌། བདེ་བའི་ལམ་དུ་ཕྱིན་པ་དང༌། ངན་སོང་དུ་སོང་བ་དང༌། ངན་པ་དང༌། བཟང་པོ་ཐམས་ཅད་རབ་ཏུ་མཐོང་ངོ༌། །ལས་ཇི་ལྟ་བ་བཞིན་རྗེས་སུ་འབྲང་བའི་སེམས་ཅན་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སེམས་ཅན་འདི་དག་ ནི་ལུས་ཀྱིས་ངན་དུ་སྤྱོད་པ་དང་ལྡན་པ། ངག་གིས་ངན་དུ་སྤྱོད་པ་དང་ལྡན་པ། ཡིད་ཀྱིས་ངན་དུ་སྤྱོད་པ་དང་ལྡན་པ། འཕགས་པ་རྣམས་ལ་སྐུར་པ་འདེབས་པ་། ལོག་པར་ལྟ་བ་ཅན་དག་སྟེ། ལོག་པར་ལྟ་བའི་ལས་རབ་ཏུ་བླངས་པའི་རྒྱུས་ལུས་ཞིག་སྟེ། ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ། སེམས་ཅན་དམྱལ་བར་ སྐྱེའོ་ཞེས་བྱ་བ་དང༌། སེམས་ཅན་འདི་དག་ནི་ལུས་ཀྱིས་ལེགས་པར་སྤྱོད་པ་དང་ལྡན་པ། ངག་གིས་ལེགས་པར་སྤྱོད་པ་དང་ལྡན་པ། ཡིད་ཀྱིས་ལེགས་པར་སྤྱོད་པ་ དང་ལྡན་པ། འཕགས་པ་ལ་སྐུར་པ་མི་འདེབས་པ། ཡང་དག་པའི་ལྟ་བ་ཅན་དག་སྟེ། ཡང་དག་པའི་ལྟ་བའི་ལས་རབ་ཏུ་བླངས་པའི་རྒྱུས་ལུས་ཞིག་སྟེ། ཤི་བའི་འོག་ཏུ་ བདེ་འགྲོ་མཐོ་རིས་ཀྱི་འཇིག་རྟེན་དུ་ལྷར་སྐྱེའོ་ཞེས་བྱ་བར་རབ་ཏུ་ཤེས་ཏེ། དེ་ལྟར་ན་ལྷའི་མིག་རྣམ་པར་དག་པ་མི་ལས་འདས་པས་སེམས་ཅན་འཆི་བ་དང༌། སྐྱེ་བ་དང༌། ཁ་ དོག་སྡུག་པ་དང༌། ཁ་དོག་མི་སྡུག་པ་དང༌། བདེ་འགྲོར་སོང་བ་དང༌། ངན་སོང་དུ་སོང་བ་དང༌། ངན་པ་དང༌། བཟང་པོ་ཐམས་ཅད་ས་ཚིགས་དང་བཅས། མཚན་མ་དང་བཅས། དན་རྟགས་དང་བཅས་པར་རབ་ཏུ་མཐོང་སྟེ། ལས་ཇི་ལྟ་བ་བཞིན་དུ་རྗེས་སུ་འབྲང་བའི་སེམས་ཅན་རྣམས་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་བསམ་གཏན་ དང༑ རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པ་འདི་དག་ལ་སྙོམས་པར་འཇུག་ཅིང་རྣམ་པར་ལྡང་ཡང་གང་དུ་བྱང་ཆུབ་ཀྱི་ཡན་ལག་རྣམས་ཡོངས་ སུ་རྫོགས་པར་འགྱུར་བའི་གནས་མ་གཏོགས་པར་དེ་དག་གི་དབང་གིས་མི་སྐྱེའོ། །བྱང་ཆུབ་སེམས་དཔའི་ས་འོད་བྱེད་པ་འདི་ལ་གནས་པའི་ཚེ། དེའི་ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་ཏེ། ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང༌། སངས་རྒྱས་སྟོང་ ༄༅། །ཕྲག་མང་པོ་དང༌། སངས་རྒྱས་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་མང་པོ་དང༌། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང༌། སངས་རྒྱས་ཁྲག་ཁྲིག་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་ཁྲག་ ཁྲིག་བརྒྱ་སྟོང་མང་པོ་རབ་ཏུ་སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་ནས་བསམ་པ་རྒྱ་ཆེན་པོས་ རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང༌། བསོད་སྙོམས་དང༌། གཟིམས་ཆ་དང༌། སྙུན་གྱི་རྐྱེན་སྨན་དང༌། ཡོ་བྱད་དག་ ཀྱང་འབུལ་ཞིང་བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་ཚོགས་རྣམས་ལ་ཡང་ཡང་དག་པར་མཆོད་པ་བྱེད་དེ། དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་དེ་དག་ལ་བསྙེན་བཀུར་བྱེད་ཅིང་དེ་དག་ལས་རིམ་གྲོར་ཆོས་ཉན་ཏོ། །ལེན་ཏོ། །འཛིན་ཏོ། །ཐོས་ནས་ཀྱང་ཅི་ཚུལ་དུ་ནན་ཏན་གྱི་ཡང་དག་པར་བསྒྲུབ་སྟེ། དེ་ཆོས་ཐམས་ཅད་ལ་འཕོ་བ་མེད་པ་དང༌། འཇིག་པ་མེད་པ་དང༌། རྟེན་ཅིང་འབྲེལ་པར་འབྱུང་བ་ཤེས་པས་རབ་ཏུ་ལྟ་ཞིང་རྟོག་པས་ཀྱང་འདོད་པའི་བཅིངས་པ་ཐམས་ཅད་བསྲབས་ པར་འགྱུར་རོ། །སྲིད་པའི་བཅིངས་པ་ཐམས་ཅད་བསྲབས་པར་འགྱུར་རོ། །མ་རིག་པའི་བཅིངས་པ་ཐམས་ཅད་བསྲབས་པར་འགྱུར་རོ། །ལྟ་བ་ལས་བྱུང་བའི་བཅིངས་པ་རྣམས་ ནི་སྔ་ནས་ཀྱང་བྱང་བ་ཡིན་ཏེ། བྱང་ཆུབ་སེམས་དཔའི་ས་འོད་བྱེད་པ་འདི་ལ་གནས་པའི་བྱང་ཆུབ་སེམས་དཔའི་ལོག་པའི་འདོད་ཆགས་ནི་བསྐལ་པ་དུ་མ་དང༌། བསྐལ་པ་ བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་ཕྲག་དུ་མ་དང༌། བསྐལ་ པ་ཁྲག་ཁྲིག་བརྒྱ་ཕྲག་དུ་མ་དང༌། བསྐལ་པ་ཁྲག་ཁྲིག་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ སྤངས་ཤིང་མི་གསོག་པར་གནས་སོ། །ལོག་པའི་ཞེ་སྡང་སྤངས་ཤིང་མི་གསོག་པར་གནས་སོ། །ལོག་པའི་གཏི་མུག་སྤངས་ཤིང་མི་གསོག་པར་གནས་ཏེ། དགེ་བའི་ རྩ་བ་དེ་དག་ཀྱང་ཡོངས་སུ་བྱང་བ་དང༌། ཡོངས་སུ་དག་པ་དང༌། ལས་སུ་རུང་བར་གྱུར་པར་གནས་སོ། །ཀྱེ། རྒྱལ་པའི་སྲས་དག །འདི་ལྟ་སྟེ། དཔེར་ན། གསེར་གྱི་ས་ལེ་སྦྲམ་ ༄༅། །དེ་ཉིད་མགར་བ་མཁས་པའི་ལག་ན་སྤྱོད་ན་སྲང་གྲངས་ཅི་ཡོད་པའི་ཚད་བཞིན་དུ་འདུག་གོ །ཀྱེ། རྒྱལ་པའི་སྲས་དག །དེ་བཞིན་དུ་བྱང་ཆུབ་ སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ས་འོད་བྱེད་པ་འདི་ལ་གནས་པའི་ལོག་པའི་འདོད་ཆགས་ཀྱང་འགྲིབ་པ་མེད་པར་འབྱང་བར་འགྱུར་རོ། ། ལོག་པའི་ཞེ་སྡང་ཡང་འགྲིབ་པ་མེད་པར་འབྱང་བར་འགྱུར་རོ། །ལོག་པའི་གཏི་མུག་ཀྱང་འགྲིབ་པ་མེད་པར་འབྱང་བར་འགྱུར་རོ། །དགེ་བའི་རྩ་བ་དེ་དག་ཀྱང་རབ་ཏུ་འབྱང་ ཞིང་ཡོངས་སུ་དག་པ་དང༌། ལས་སུ་རུང་བར་འགྱུར་རོ། །དེ་བཟོད་པ་དང་ངེས་པ་ཡང་དེ་བས་ཀྱང་ཡོངས་སུ་དག་པར་འགྱུར་རོ། །གྲོགས་ལ་བདེ་ཞིང་ངེས་པའི་བསམ་པ་ དང༑ མི་འཁྲུགས་པའི་བསམ་པ་དང༌། གློང་བ་མེད་པའི་བསམ་པ་དང༌། རྙོག་པ་མེད་པའི་བསམ་པ་དང༌། མཐོ་དམན་མེད་པའི་བསམ་པ་དང༌། སེམས་ཅན་ལ་ཕན་ འདོགས་པས་ལན་མི་རེ་བའི་བསམ་པ་དང༌། ཕན་བཏགས་པ་ལ་ཕྱིར་ལན་གློན་པའི་བསམ་པ་དང༌། གཡོ་མེད་ཅིང་སྒྱུ་མེད་པའི་བསམ་པ་དང༌། ཐིབས་པོ་མེད་པའི་བསམ་ པ་ཡང་ཡོངས་སུ་དག་པར་འགྱུར་ཏེ། དེའི་བསྡུ་བའི་དངོས་པོ་བཞི་ལས་དོན་གྲུབ་པའི་ཤས་ཆེ་བ་ཡིན། ཕ་རོལ་ཏུ་ཕྱིན་པ་བཅུ་ལས་བཟོད་པའི་ཕ་རོལ་ཏུ་ཕྱིན་པ་ཤས་ཆེ་ བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་སྒྲུབ་པ་མ་ཡིན་ཏེ། ཀྱེ། རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ས་འོད་བྱེད་པ་ཞེས་བྱ་སྟེ་། བྱང་ཆུབ་སེམས་དཔའི་ས་གསུམ་པའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་ལྷའི་རྒྱལ་པོའི་དབང་པོ་འགྱུར་ཏེ། སེམས་ཅན་རྣམས་ཀྱི་འདོད་པའི་འདོད་ ཆགས་རྣམ་པར་བཟློག་པའི་ཐབས་ཉེ་བར་བསྒྲུབས་པ་ལ་མཁས་ཤིང་མཐུ་ཡོད་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་ རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར་། བླ་ན་མེད་པར་འགྱུར། འདྲེན་པར་འགྱུར། རྣམ་པར་འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས་ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང༌། ཆོས་ཡིད་ལ་བྱ་བ་དང༌། དགེ་འདུན་ཡིད་ལ་བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་དང༌། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་ དང༑ བྱང་ཆུབ་སེམས་དཔའི་ས་ཡིད་ལ་བྱ་བ་དང༌། ཕ་རོལ་ཏུ་ཕྱིན་པ་ཡིད་ལ་བྱ་བ་དང༌། སྟོབས་ཡིད་ལ་བྱ་བ་དང༌། མི་འཇིགས་པ་ཡིད་ལ་བྱ་བ་དང༌། སངས་རྒྱས་ཀྱི་ཆོས་མ་ ༄༅། །འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་ བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་བརྒྱ་སྟོང་རབ་ཏུ་ཐོབ་ཅིང་དེ་དག་ལ་སྙོམས་པར་འཇུག་པ་དང༌། སངས་རྒྱས་བརྒྱ་སྟོང་མཐོང་བ་དང༌། དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང༌། འཇིག་རྟེན་གྱི་ཁམས་བརྒྱ་སྟོང་སྐྱོད་པ་དང༌། སངས་རྒྱས་ཀྱི་ཞིང་བརྒྱ་སྟོང་དུ་འགྲོ་བ་དང༌། འཇིག་རྟེན་གྱི་ ཁམས་བརྒྱ་སྟོང་སྣང་བར་བྱ་བ་དང༌། སེམས་ཅན་བརྒྱ་སྟོང་ཡོངས་སུ་སྨིན་པར་བྱ་བ་དང༌། བསྐལ་པ་བརྒྱ་སྟོང་དུ་གནས་པར་བྱ་བ་དང༌། སྔོན་གྱི་མཐའ་དང༌། ཕྱི་མའི་མཐའི་ བསྐལ་པ་བརྒྱ་སྟོང་ལ་རབ་ཏུ་འཇུག་པ་དང༌། ཆོས་ཀྱི་སྒོ་བརྒྱ་སྟོང་རྣམ་པར་འབྱེད་པ་དང༌། ལུས་བརྒྱ་སྟོང་ཡོངས་སུ་བསྟན་པ་དང༌། ལུས་རེ་རེ་ལ་ཡང་བྱང་ཆུབ་སེམས་ དཔའི་འཁོར་བརྒྱ་སྟོང་ཡང་དག་པར་བསྟན་པར་བྱ་བའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཆད་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས་ སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དམ། རྫུ་འཕྲུལ་ལམ། མིག་གམ། སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ ཏམ༑ བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་ པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་བར་གྱིས་བགྲང་བར་དཀའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་ སྙིང་པོས་དོན་འདི་ཉིད་ཡང་བརྟག་པ་དང་བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་ཡོན་ཏན་འབྱུང་གནས་བསམ་དག་སེམས་དེས་པ།། སྐྱོ་ཞིང་འདོད་ཆགས་བྲལ་ཏེ་འཚེ་མེད་སེམས་དང་ལྡན། །སེམས་བསྐྱེད་བསྟན་པ་དགའ་ལྡན་རྒྱ་ཆེན་ཤུགས་ཅན་རྣམས། །མཁས་པ་བདག་ཉིད་ཆེ་བའི་སེམས་ལྡན་ གསུམ་པ་གནོན། །འོད་བྱེད་ས་ཕྱོགས་འདི་ལ་གནས་པའི་མཁས་པ་ནི། །སྡུག་བསྔལ་མི་རྟག་མི་སྡུག་རབ་ཏུ་འཇིག་ཆོས་དང༌། །རིང་པོར་མི་གནས་སྐད་ཅིག་སྙིང་པོ་མེད་ པར་ནི། །འདུས་བྱས་རྣམ་པ་འོང་བ་མེད་ལ་རབ་ཏུ་རྟོག །ནད་དུ་གྱུར་པ་མྱ་ངན་སྨྲེ་སྔགས་འདོན་དང་བཅས། །གནོད་དང་འཁྲུག་དང་སྡུག་དང་མི་སྡུག་རྗེས་འབྲང་བ། །སྡུག་ བསྔལ་ཡིད་བློང་ཕུང་པོ་འབར་བའི་མེ་འདྲ་བར། །འདུས་བྱས་མཐའ་ཡས་ཀུན་ནས་འབར་མཐོང་དེ་ལས་སྐྱོད། །སྲིད་པ་གསུམ་པོ་ཀུན་ལས་སྐྱོ་ཞིང་ལྟོས་སེམས་མེད། །བདེ་ ༄༅། །གཤེགས་ཡེ་ཤེས་འདོད་ཅིང་བློ་གཞན་མེད་པ་སྟེ། །བསམ་དུ་མེད་ཅིང་གཞལ་ཡས་ཕ་རོལ་མཐའ་ཡས་པའི། །རྒྱལ་པའི་ཡེ་ཤེས་གནོད་ མེད་དེ་དག་རབ་ཏུ་མཐོང༌། །དེ་དག་སངས་རྒྱས་ཡེ་ཤེས་གནོད་མེད་མཐོང་གྱུར་ནས། །སྐྱབས་མེད་མགོན་དང་བྲལ་པ་རབ་ཏུ་དགྲོལ་བའི་ཕྱིར། །རྟག་ཏུ་དབུལ་ཞིང་མེ་ གསུམ་ཀུན་ནས་འབར་གྱུར་དང༌། །སྲིད་པའི་བཙོན་རར་སྡུག་བསྔལ་སྣ་བརྒྱས་སེམས་བསྐོར་ཅིང༌། །ཉོན་མོངས་བསྒྲིབས་དང་རྣམ་པར་ལྟ་དང་འདོད་ཉམས་པ། །བདེ་ གཤེགས་ཆོས་ཀྱི་དགའ་བ་སྟོར་བའི་བྱིས་པ་རྣམས། །འཁོར་བའི་རྒྱུད་དུ་འབབ་ཅིང་ཐར་པས་དངངས་གྱུར་པ། །བདག་གིས་བསྐྱབས་པ་ཡིན་ཞེས་བརྩོན་འགྲུས་དམ་དུ་ རྩོམ༑ ༑ཡེ་ཤེས་འདོད་པས་ལྟོས་པ་མེད་པར་འགྲོ་དོན་བྱེད། །གང་རྒྱུས་རྣམ་ཐར་ལམ་གྱི་རྒྱུད་ནི་གང་ཞེས་རྟོག །བདེ་གཤེགས་ཡེ་ཤེས་བསྒྲིབས་པ་མེད་ལས་གཞན་ མེད་ན། །བདེ་གཤེགས་ཡེ་ཤེས་དེ་ཡང་ཤེས་རབ་མཐུས་འབྱུང་སྟེ། །ཤེས་རབ་ཐོས་ལས་འབྱུང་བར་བྱང་ཆུབ་སེམས་དཔའ་རྟོག །དེ་ལྟར་ཤེས་ནས་ཐོས་དོན་སྤྱད་ པར་བརྩོན་འགྲུས་རྩོམ། །ཉིན་མཚན་ཉན་པའི་རྒྱུར་སྤྱོད་བྱ་བ་གཞན་མེད་པར། །ཆོས་ཀྱི་དོན་གཉེར་ཆོས་ལ་རབ་ཏུ་རྟེན་པ་ཡིན། །ནོར་བུ་མུ་ཏིག་རིན་ཆེན་ཚོགས་དང་ མཛའ་གཉེན་དང༌། །སྲིད་ལོངས་དུ་མ་ཕོ་བྲང་ཕུན་ལྡན་དམ་པ་དང༌། །ཆུང་མ་དག་དང་བུ་དང་མཐུན་པར་སྤྱོད་བའི་འཁོར། །ལྟོས་མེད་སེམས་ཀྱིས་མཁས་པ་ཆོས་ཀྱི་དོན་དུ་ གཏོང༌། །མགོ་དང་རྐང་ལག་མིག་དང་དེ་བཞིན་བདག་གི་ཤ་།ལྕེ་དང་མཆེ་བ་རྣ་བ་སྣ་དང་ཁྲག་རྣམས་དང༌། །ཕངས་པའི་རྐང་དང་སྙིང་ཕྱུང་ཡོངས་སུ་གཏོང་བར་བྱེད། །འདི་ ནི་དཀའ་བར་མི་རྩི་ཐོས་པ་དེ་དཀར་རྩི། །ལ་ལ་དེ་དྲུང་འོངས་ཤིང་དེ་སྐད་སྨྲར་གྱུར་ཏེ། །དེ་སྟེ་མེ་ལྕེ་མི་བཟད་འབར་དོང་མཆོང་ཕོད་ན། །བདེ་གཤེགས་བསྟན་ཆོས་རིན་ ཆེན་བཤད་དོ་ཞེས་ན་ཡང༌། །ཐོས་ནས་མི་དམའི་ཡིད་ཀྱིས་ཡོན་ཏན་དོན་དུ་མཆོད། །ཆོས་ཀྱི་ཚིག་གཅིག་དོན་དུ་རི་རབ་བརྩེས་བཏགས་པར། །སྟོང་གསུམ་མེས་བཀང་ ཚངས་རིས་ཡུལ་ནས་མཆོངས་གྱུར་ཀྱང༌། །ད་དུང་རྒྱལ་བའི་བྱང་ཆུབ་ཡངས་པ་ཐོབ་དཀའ་ན། །དེ་སྟེ་ཐ་མལ་མི་བདེས་རྙེད་འགྱུར་ཤིན་ཏུ་བདེ། །དྲང་སྲོང་མཆོག་གི་ཡེ་ ཤེས་འཐོབ་འགྱུར་ཇི་སྲིད་པ། །དེ་སྲིད་བར་དུ་མནར་མེད་སྡུག་བསྔལ་བཟོད་བྱ་ན། །མི་ཡི་སྡུག་བསྔལ་ཕུང་པོ་སྣ་ཚོགས་ཅི་སྨོས་ཀྱི། །ཆོས་རབ་མཉམ་པའི་དོན་དུ་བདག་ གིས་ཉམས་བླང་ཞེས། །ཆོས་རྣམས་ཐོས་པར་གྱུར་ནས་ཚུལ་བཞིན་སེམས་པར་བྱེད། །བསམ་གཏན་ཚད་མེད་དེ་བཞིན་གཟུགས་མེད་རྣམ་པ་བཞི། །མངོན་པར་ཤེས་པའི་ ༄༅། །དམ་པ་ལྔ་པོ་མངོན་སྒྲུབ་ཀྱང༌། །དེ་དག་དབང་གིས་སྐྱེ་བར་དེ་དག་འགྱུར་བ་མིན། །ལེགས་ལྡན་འདི་གནས་སངས་རྒྱས་ཁྲག་ཁྲིག་མང་ པོ་ལ། །མཆོད་པར་བྱེད་ཅིང་དེས་རྟོགས་ཡིད་ཀྱིས་ཆོས་ཀྱང་ཉན། །བསྲབས་པར་གྱུར་ཅིང་ལོག་བྲལ་ཡོངས་སུ་དག་པར་འགྱུར། །སྐྱོན་མེད་གསེར་སྦྲམ་ཇི་ལྟར་སྲང་ ལ་གཅལ་བ་བཞིན། །དེ་གནས་ཡོན་ཏན་ལྡན་པ་ལྷ་ཡི་བདག་པོ་སྟེ། །དབང་སྒྱུར་དོན་བྱེད་འདོད་པའི་ནད་ཀྱི་རྣམ་པ་སེལ། །ལྷ་མང་སྣ་ཚོགས་དུ་མ་དགེ་བའི་ལམ་ལ་ དགོད། །སངས་རྒྱས་ཡོན་ཏན་མངོན་འདོད་བསམ་པ་གཞན་ཡང་མེད། །འདི་ལ་གནས་པའི་རྒྱལ་སྲས་བརྩོན་འགྲུས་རབ་རྩོམ་སྟེ། །བརྒྱ་ཕྲག་སྟོང་ལས་མི་ཉུང་ཏིང་ འཛིན་ཐོབ་པ་ཡིན། །མཚན་རབ་སྐུ་བརྒྱན་སངས་རྒྱས་རྣམས་ཀྱང་རབ་ཏུ་མཐོང༌། །ཡན་ཆད་སྨོན་ལམ་རབ་ལྡན་ཡོན་ཏན་བསམ་མི་ཁྱབ། །དེ་ལྟར་ས་མཆོག་གསུམ་ པ་འདི། །འཇིག་རྟེན་ཀུན་ལ་ཕན་བརྩོན་པའི། །བྱང་ཆུབ་སེམས་དཔའི་མཆོག་རྣམས་ལ། །རྒྱལ་བའི་སྲས་ཀྱིས་བསྟན་པ་ཡིན། །འོད་བྱེད་པ་ཞེས་བྱ་བ་སྟེ། །བྱང་ ཆུབ་སེམས་དཔའི་ས་གསུམ་པའོ། །ས་མཆོག་དམ་པ་ཡིད་འོང་ཕུལ་གྱི། །སྤྱོད་པ་ཡངས་པ་འདི་འདྲ་ཐོས་ནས། །རྒྱལ་སྲས་ཡིད་དགའ་ཤིན་ཏུ་མགུ་གྱུར། །རྒྱལ་བ་ལ་ནི་ མེ་ཏོག་མངོན་འཐོར། །ཆོས་འདི་ཤིན་ཏུ་བསྟན་ཅིང་བརྗོད་པས། །ལན་ཚྭའི་གངས་ཆེན་མཚོ་ཡང་གཡོས་འགྱུར། །ལྷ་ཡི་བུ་མོ་ཡིད་འོང་སྙན་པའི། །གླུ་ཡི་དབྱངས་སུ་ཆོས་ རབ་དབྱངས་ལེན། །དབང་སྒྱུར་ལྷ་དབང་ཤིན་ཏུ་ཡིད་དགའ། །བདེ་གཤེགས་རིན་ཆེན་ལྷ་རྫས་ནོར་འཐོར། །དོན་འགྲུབ་ཡོན་ཏན་ཕ་རོལ་ཕྱིན་པའི། །རྒྱལ་བ་དེ་ཚེ་གསུང་རབ་ སྒྲོག་མཛད། །ཅི་ཕྱིར་ཞེ་ན་ཆོས་ཀྱི་དམ་པ། །རྫོགས་པའི་བྱང་ཆུབ་སེམས་དཔའི་སྤྱོད་རབ། །དེ་རིང་འདིར་ཐོས་མཁས་པའི་ས་དེ། །བསྐལ་པ་བརྒྱ་ཡང་ཐོས་པར་རབ་དཀའ།། རྒྱལ་སྲས་མཁས་ལ་སྤྱོད་པའི་དམ་པ། །ལྷ་དང་མི་ལ་ཕན་པས་ཡང་ཤོད། །ས་དོན་ངེས་པ་མ་ནོར་ལམ་འདི། །ལྷ་མ་ང་འདི་དག་ཡིད་དགའ་ཉན་འགྱུར། །བདེ་བར་གཤེགས་པའི་ སྲས་པོ་ལ། །རྣམ་ཐར་ཟླ་བས་ཡང་སྨྲས་པ། །བཞི་པོར་ཡང་དག་འབར་བ་ཡི། །སྤྱོད་ཡུལ་མཁས་པས་བཤད་པར་མཛོད། །བྱང་ཆུབ་སེམས་དཔའ་རྡོ་རྗེའི་སྙིང་པོས་ སྨྲས་པ། ཀྱེ༑ རྒྱལ་བའི་སྲས་དང༌། །དེ་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་ས་གསུམ་པ་ལ་སྣང་བ་ཤིན་ཏུ་སྦྱངས་པ་ནི་བྱང་ཆུབ་སེམས་དཔའི་ས་བཞི་པ་ ཡོངས་སུ་གནོན་ཏོ། །དེ་ཆོས་སྣང་བ་ལ་འཇུག་པ་བཅུ་ཡོངས་སུ་གནོན་ཏེ། བཅུ་གང་ཞེ་ན། འདི་ལྟ་སྟེ། སེམས་ཅན་གྱི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང༌། ༄༅། །འཇིག་རྟེན་གྱི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང༌། ཆོས་ཀྱི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང༌། ནམ་མཁའི་ ཁམས་རྣམ་པར་སྤྱད་པ་སྣང་བ་ལ་འཇུག་པ་དང༌། རྣམ་པར་ཤེས་པའི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང༌། འདོད་པའི་ཁམས་རྣམ་པར་དཔྱད་པ་སྣང་ བ་ལ་འཇུག་པ་དང༌། གཟུགས་ཀྱི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང༌། གཟུགས་མེད་པའི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང༌། བསམ་པ་དང་ མོས་པ་ཡངས་པའི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང༌། བདག་ཉིད་ཆེ་བའི་བསམ་པ་དང༌། མོས་པའི་ཁམས་རྣམ་པར་དཔྱད་པ་སྣང་བ་ལ་འཇུག་པ་ དང༑ ཆོས་སྣང་བ་ལ་འཇུག་པ་བཅུ་པོ་འདི་དག་གིས་ཡོངས་སུ་གནོན་ཏོ། །ཀྱེ༑ རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ས་འོད་འཕྲོ་བ་ཅན་ཐོབ་པའི་བྱང་ ཆུབ་སེམས་དཔའ་ནི་དེ་བཞིན་གཤེགས་པའི་རིགས་སུ་དེའི་བདག་ཉིད་ཀྱི་ཆོས་རབ་ཏུ་འཐོབ་པའི་ཕྱིར་ཡེ་ཤེས་ཡོངས་སུ་སྨིན་པར་བྱེད་པའི་ཆོས་བཅུས་ཡང་དག་ པར་འབྱུང་བ་ཡིན། བཅུ་གང་ཞེ་ན། འདི་ལྟ་སྟེ། ཕྱིར་མི་ལྡོག་པའི་བསམ་པ་དང༌། དཀོན་མཆོག་གསུམ་ལ་དད་པ་མི་ཕྱེད་པ་རབ་ཏུ་ཐོབ་པའི་མཐར་ཐུག་པ་དང༌། འདུ་བྱེད་སྐྱེ་བ་དང༌། འཇིག་པར་རྣམ་པར་བསྒོམ་པ་དང༌། རང་བཞིན་གྱིས་མ་སྐྱེས་པ་རྣམ་པར་བསྒོམ་པ་དང༌། འཇིག་རྟེན་རྒྱུ་ཞིང་ལྡོག་པ་རྣམ་པར་བསྒོམ་པ་དང༌། ལས་ཀྱི་ སྲིད་པར་སྐྱེ་བ་རྣམ་པར་བསྒོམ་པ་དང༌། འཁོར་བ་དང་མྱ་ངན་ལས་འདས་པ་རྣམ་པར་བསྒོམ་པ་དང༌། སེམས་ཅན་གྱི་ཞིང་དང་ལས་རྣམ་པར་བསྒོམ་པ་དང༌། སྔོན་གྱི་མཐའ་ དང་ཕྱི་མའི་མཐའ་རྣམ་པར་བསྒོམ་པ་དང༌། མེད་པའི་མཐའ་དང་ཟད་པའི་མཐའ་རྣམ་པར་བསྒོམ་པ་སྟེ། ཀྱེ༑ རྒྱལ་བའི་སྲས་དག། ཡེ་ཤེས་ཡོངས་སུ་སྨིན་པར་བྱེད་པའི་ ཆོས་བཅུ་པོ་འདི་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་བཞིན་གཤེགས་པའི་རིགས་སུ་དེའི་བདག་ཉིད་ཀྱི་ཆོས་རབ་ཏུ་འཐོབ་པའི་ཕྱིར་ཡང་ དག་པར་བྱུང་བ་ཡིན། ཀྱེ༑ རྒྱལ་བའི་སྲས་དག། བྱང་ཆུབ་སེམས་དཔའི་ས་འོད་འཕྲོ་བ་ཅན་ལ་གནས་པའི་བྱང་ཆུབ་སེམས་དཔའ་དེ་ནི་ཡོངས་སུ་སྦྱོང་བ་དང་ལྡན་ཞིང༌། ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང༌། ཡིད་མི་བདེ་བ་རྣམ་པར་སྤངས་ཏེ། ནང་གི་ལུས་ལ་ལུས་ཀྱི་རྗེས་སུ་ལྟ་བར་གནས་སོ། །ཡོངས་སུ་ སྦྱོང་བ་དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང་ཡིད་མི་བདེ་བ་རྣམ་པར་སྤད་[?] ཏེ། ཕྱིའི་ལུས་ལ་ལུས་ཀྱི་རྗེས་སུ་ལྟ་བར་གནས་སོ། །སྤྱོད་པ་ ༄༅། །དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང་ཡིད་མི་བདེ་བ་རྣམ་པར་སྤངས་ཏེ། ཕྱི་ནང་གི་ལུས་ལ་ ལུས་ཀྱི་རྗེས་སུ་ལྟ་བར་གནས་སོ། །དེ་བཞིན་དུ་ནང་གི་ཚོར་བ་དང༌། ཕྱི་རོལ་གྱི་ཚོར་བ་དང༌། ཕྱི་ནང་གི་ཚོར་བ་དང༌། དེ་བཞིན་དུ་ནང་གི་སེམས་དང༌། ཕྱི་རོལ་གྱི་སེམས་ དང༌། ཕྱི་ནང་གི་སེམས་ལ་ལྟ་སྟེ། སྦྱོང་བ་དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང༌། ཡིད་མི་བདེ་བ་རྣམ་པར་སྤངས་ཏེ། ནང་གི་ཆོས་ལ་ཆོས་ཀྱི་རྗེས་སུ་ལྟ་བར་གནས་སོ། །ཡོངས་སུ་སྦྱོང་བ་དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང་ཡིད་མི་བདེ་བ་ རྣམ་པར་སྤངས་ཏེ། ཕྱི་རོལ་གྱི་ཆོས་ལ་ཆོས་ཀྱི་རྗེས་སུ་ལྟ་བར་གནས་སོ། །ཡོངས་སུ་སྦྱོང་བ་དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་ སེམས་དང༌། ཡིད་མི་བདེ་བ་རྣམ་པར་སྤངས་ཏེ། ཕྱི་ནང་གི་ཆོས་ལ་ཆོས་ཀྱི་རྗེས་སུ་ལྟ་བར་གནས་སོ། །དེ་སྡིག་ཏོ་དང་མི་དགེ་བའི་ཆོས་མ་སྐྱེས་པ་རྣམས་མི་སྐྱེ་བའི་ཕྱིར་ དད་པ་བསྐྱེད་དོ། །རྩོལ་ལོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏེ། །སྨོན་ལམ་ཡང་དག་པར་འདེབས་སོ། །སྡིག་ཏོ་དང་མི་དགེ་བའི་ཆོས་སྐྱེས་པ་རྣམ་པར་ སྤང་བའི་ཕྱིར་དད་པ་བསྐྱེད་དོ། །རྩོལ་ལོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །སྨོན་ལམ་ཡང་དག་པར་འདེབས་སོ། །དགེ་བའི་ཆོས་མ་སྐྱེས་པ་རྣམས་སྐྱེ་བར་ འགྱུར་བར་དད་པ་བསྐྱེད་དོ། །རྩོལ་ལོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །སྨོན་ལམ་ཡང་དག་པར་འདེབས་སོ། །དགེ་བའི་ཆོས་སྐྱེས་པ་རྣམས་གནས་པ་དང༌། མི་ཉམས་པ་དང༌། རྒྱ་ཆེར་འགྱུར་བ་དང༌། དེ་བས་ཀྱང་འཕེལ་བར་འགྱུར་བ་དང༌། བསྒོམ་པ་དང༌། ཡོངས་སུ་རྫོགས་པར་འགྱུར་བའི་ཕྱིར་དད་པ་བསྐྱེད་དོ། །རྩོལ་ལོ། །བརྩོན་ འགྲུས་རྩོམ་མོ། །སེམས་རབ་ཏུ་འཛིན་ཏོ། །སྨོན་ལམ་ཡང་དག་པར་འདེབས་སོ། །དེ་མོས་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་ གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །བརྩོན་འགྲུས་ཀྱི་ཏིང་ངེ་འཛིན་སྤོང་ བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་ གྲུབ་པ་ཡོངས་སུ་སྒོམ་མོ། །སེམས་ཀྱི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། ༄༅། །འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་ རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །། དད་པའི་དབང་པོ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། ། བརྩོན་འགྲུས་ཀྱི་དབང་པོ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། ། དྲན་པའི་དབང་པོ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། ། ཏིང་ངེ་འཛིན་གྱི་དབང་པོ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། ། ཤེས་རབ་ཀྱི་དབང་པོ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། ། དད་པའི་སྟོབས་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །བརྩོན་ འགྲུས་ཀྱི་སྟོབས་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དྲན་ པའི་སྟོབས་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཏིང་ངེ་ འཛིན་གྱི་སྟོབས་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཤེས་ རབ་ཀྱི་སྟོབས་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དྲན་པ་ཡང་ དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཆོས་ རྣམ་པར་དབྱེ་བ་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་ ༄༅། །པ་ཡོངས་སུ་སྒོམ་མོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་ པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དགའ་བ་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །བག་ཡོད་པ་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ་། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །བཏང་སྙོམས་ཡང་ དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་ མོ༑ ༑ཡང་དག་པའི་ལྟ་བ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་ མོ༑ ༑ཡང་དག་པའི་རྟོག་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། །རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། ། ཡང་དག་པའི་དག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཡང་ དག་པའི་ལས་ཀྱི་མཐའ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། ། ཡང་དག་པའི་འཚོ་བ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། ། ཡང་དག་པའི་རྩོལ་བ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། ། ཡང་དག་པའི་དྲན་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཡང་ དག་པའི་ཏིང་ངེ་འཛིན་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། ། ༄༅། །དེ་དག་ཀྱང་སེམས་ཅན་ཐམས་ཅད་ལ་ལྟ་བ་དང༌། སྔོན་གྱི་སྨོན་ལམ་མངོན་པར་བསྒྲུབས་པས་ཉེ་བར་བརྟན་པ་དང༌། སྙིང་རྗེ་ཆེན་པོ་སྔོན་དུ་བཏང་བ་དང༌། བྱམས་ པ་ཆེན་པོ་དང་ལྡན་པར་བྱ་བ་དང༌། ཐམས་ཅད་མཁྱེན་པའི་ཡེ་ཤེས་ལ་དམིགས་པ་དང༌། སངས་རྒྱས་ཀྱི་ཞིང་བསྒྲུབ་ཅིང་རྒྱན་མངོན་པར་གྲུབ་པར་བྱ་བ་དང༌། དེ་བཞིན་ གཤེགས་པའི་སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་མ་འདྲེས་པ་དང༌། གཟུགས་དང༌། མཚན་དང༌། དཔེ་བྱད་བཟང་པོ་དང༌། དབྱངས་ཀྱི་ཡན་ལག་དང༌། གསུང་ཕུན་སུམ་ཚོགས་པ་མངོན་པར་བསྒྲུབ་པ་དང༌། གོང་ནས་གོང་དུ་ཁྱད་པར་དུ་འགྱུར་བའི་ཆོས་ཡོངས་སུ་བཙལ་བ་དང༌། སངས་རྒྱས་ཀྱི་རྣམ་པར་ཐར་པ་ཟབ་མོ་ ཐོས་པ་ཁོང་དུ་ཆུད་པར་བྱ་བ་དང༌། ཤེས་རབ་དང་ཐབས་ལ་ཤིན་ཏུ་མཁས་པས་རྣམ་པར་སྤྱོད་པའི་ཕྱིར་རོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའི་ས་འོད་ འཕྲོ་བ་ཅན་འདི་ལ་གནས་པའི་བྱང་ཆུབ་སེམས་དཔའ་ནི་གང་འདི་ལ་འཇིག་ཚོགས་ལ་ལྟ་བ་ལ་སོགས་པ་བདག་ཏུ་མངོན་པར་ཆགས་པ་དང༌། སེམས་ཅན་དུ་མངོན་པར་ ཆགས་པ་དང༌། སྲོག་དང༌། གསོ་བ་དང༌། གང་ཟག་དང༌། ཤེད་བདག་དང༌། ཤེད་ལས་སྐྱེས་པ་ལ་མངོན་པར་ཆགས་པ་དང༌། ཕུང་པོ་དང༌། ཁམས་དང༌། སྐྱེ་མཆེད་ ལ་མངོན་པར་ཆགས་པ་ལས་བྱུང་བ། བརྐྱང་བ་དང༌། བསྐུམ་པ་དང༌། རྣམ་པར་བརྟགས་པ་དང༌། རྣམ་པར་དཔྱད་པ་དང༌། དྲན་པ་དང༌། བདག་གིར་བྱས་པ་དང༌། ནོར་དུ་ བྱས་པ་དང༌། བརྟན་པའི་གནས་སུ་གྱུར་པ་དེ་དག་ཐམས་ཅད་ཀྱི་ཐམས་ཅད་དུ་རབ་ཏུ་ཤེས་སོ། །རབ་ཏུ་སྤོང་ངོ༌། །དེ་འདི་ལྟར་ལས་གང་བྱ་བའི་མི་ཆ་བ་ཡང་དག་པར་རྫོགས་པའི་ སངས་རྒྱས་ཀྱིས་སྨད་པ། ཀུན་ནས་ཉོན་མོངས་པ་དང་ལྡན་པ་དེ་དག་ཐམས་ཅད་ཀྱི་ཐམས་ཅད་དུ་སྤོང་ངོ༌། །ལས་གང་བྱ་བའི་རིགས་པ་ཡང་དག་པར་རྫོགས་པའི་སངས་རྒྱས་ཀྱིས་ བསྔགས་པ། བྱང་ཆུབ་ཀྱི་ལམ་གྱི་ཚོགས་དང་མཐུན་པ། དེ་དག་ཡང་དག་པར་བླངས་ཤིང་གནས་ཏེ། དེ་ཕྱིར་ཞིང་ཇི་ལྟ་ཇི་ལྟར་ཐབས་དང་ཤེས་རབ་ཀྱིས་མངོན་པར་བསྒྲུབས་ པའི་ལམ་ཡང་དག་པར་བསྒྲུབ་པའི་ཕྱིར་ལམ་གྱི་ཡན་ལག་རྣམས་སྒོམ་པ། དེ་ལྟ་དེ་ལྟར་འཇམ་པའི་སེམས་དང་ལྡན་པ་ཡིན། མཉེན་པའི་སེམས་དང་ལྡན་པ་ཡིན། ལས་སུ་ རུང་བའི་སེམས་དང་ལྡན་པ་ཡིན། ཕན་པ་དང་བདེ་བ་སྐྱེད་པའི་སེམས་དང་ལྡན་པ་ཡིན། ཀུན་ནས་ཉོན་མོངས་པ་མེད་པའི་སེམས་དང་ལྡན་པ་ཡིན། གོང་ནས་གོང་དུ་ཁྱད་པར་ཡོངས་ སུ་ཚོལ་བའི་སེམས་དང་ལྡན་པ་ཡིན། ཡེ་ཤེས་ཀྱི་ཁྱད་པར་ལ་མོས་པའི་སེམས་དང་ལྡན་པ་ཡིན། འགྲོ་བ་ཐམས་ཅད་ཡོངས་སུ་བསྐྱབ་པའི་སེམས་དང་ལྡན་པ་ཡིན། བླ་མ་ལ་ ༄༅། །རིམ་གྲོ་བྱ་བ་དང་མཐུན་པའི་སེམས་དང་ལྡན་པ་ཡིན། ཇི་སྐད་དུ་ཐོས་པའི་ཆོས་ལ་ནན་ཏན་དུ་བྱེད་པའི་སེམས་དང་ལྡན་པ་ཡིན་ཏེ། དེ་ནི་བྱས་པ་ ཤེས་པས་དྲིན་དུ་གཟོ་བ་ཡིན། འགྲོགས་ན་བདེ་ཞིང་དེས་པ་ཡིན། འཇམ་ཞིང་མཉེན་པ་ཡིན། སྒྱུ་མེད་ཅིང་ང་རྒྱལ་མེད་པ་ཐིབས་པོ་མེད་པར་སྤྱོད་པ་ཡིན། མཐུན་པར་ འཛིན་ཅིང་ང་ལོ་བདེ་བ་ཡིན་ཏེ། དེ་དེ་ལྟར་བཟོད་པ་དང་ལྡན། དེ་ལྟར་དུལ་བ་དང་ལྡན། དེ་ལྟར་ཞི་བ་དང་ལྡན་ཏེ། དེ་ལྟར་བཟོད་ཅིང་དུལ་བ་ཞི་བ་དང་ལྡན་པས། གོང་ དུ་ས་ཡོངས་སུ་སྦྱོང་བའི་ལས་རྣམས་ཡིད་ལ་བྱེད་ཅིང་ཡང་དག་པར་སྤྱོད་པས་ཕྱིར་མི་ལྡོག་པའི་བརྩོན་འགྲུས་དང་ལྡན་པ་ཡིན། རྒྱུན་མ་ཆད་པའི་བརྩོན་འགྲུས་དང་ལྡན་པ་ ཡིན༑ ཀུན་ནས་ཉོན་མོངས་པ་མེད་པའི་བརྩོན་འགྲུས་དང་ལྡན་པ་ཡིན། ཟློག་པར་མི་ནུས་པའི་བརྩོན་འགྲུས་དང་ལྡན་པ་ཡིན། སྐྱོ་བ་མེད་པའི་བརྩོན་འགྲུས་དང་ལྡན་པ་ ཡིན། ཡངས་པའི་བརྩོན་འགྲུས་དང་ལྡན་པ་ཡིན། མཐའ་ཡས་པའི་བརྩོན་འགྲུས་དང་ལྡན་པ་ཡིན། ཤིན་ཏུ་སྦྱངས་པའི་བརྩོན་འགྲུས་དང་ལྡན་པ་ཡིན། མི་མཉམ་པ་དང་ མཉམ་པའི་བརྩོན་འགྲུས་དང་ལྡན་པ་ཡིན། མི་འཕྲོགས་པའི་བརྩོན་འགྲུས་དང་ལྡན་པ་ཡིན། སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་བརྩོན་འགྲུས་དང་ལྡན་པ་ ཡིན༑ ཚུལ་དང་མི་ཚུལ་བ་བྱེ་བྲག་ཕྱེད་པའི་བརྩོན་འགྲུས་དང་ལྡན་པ་ཡིན་ཏེ། ཕྱིར་ཞིང་དེའི་བསམ་པའི་ཁམས་ཡོངས་སུ་དག་པར་འགྱུར་རོ། །ལྷག་པའི་བསམ་པའི་ཁམས་ དང་རྣམ་པར་མི་འབྲལ་ལོ། །མོས་པའི་ཁམས་ཀྱང་ཤིན་ཏུ་བྱང་བར་འགྱུར་རོ། །དགེ་བའི་རྩ་བ་རྣམ་པར་འཕེལ་བ་དང་ཡོངས་སུ་སྐྱེའོ། །འཇིག་རྟེན་གྱི་དྲི་མའི་རྙོག་པ་དང་ཡང་ བྲལ་བར་འགྱུར་རོ། །ཐེ་ཚོམ་དང༌། ཡིད་གཉིས་དང༌། ནེམ་ནུར་ཡང་རྒྱུན་ཆད་པར་འགྱུར་རོ། །ནེམ་ནུར་མེད་པ་ལ་མངོན་སུམ་དུ་གྱུར་པ་ཡང་ཡོངས་སུ་རྫོགས་པར་འགྱུར་རོ། ། དགའ་བ་དང་བག་ཡངས་ཀྱང་ཡང་དག་པར་འབྱུང་ངོ༌། །དེ་བཞིན་གཤེགས་པ་ལ་དད་པ་རླབས་པོ་ཆེ་ཡང་མངོན་སུམ་དུ་འགྱུར་རོ། །སེམས་ཀྱི་བསམ་པ་ཚད་མེད་པ་ཡང་ ཡང་དག་པར་སྐྱེའོ། །དེ་བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པའི་ཚེ་ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་ཏེ། ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང༌། སངས་རྒྱས་སྟོང་ཕྲག་མང་པོ་དང༌། སངས་རྒྱས་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་ བརྒྱ་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་མང་པོ་དང༌། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང༌། སངས་རྒྱས་ཁྲག་ཁྲིག་སྟོང་ཕྲག་མང་པོ་དང༌། སངས་རྒྱས་ཁྲག་ ༄༅། །ཁྲིག་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ ཡང་དག་པར་རྫོགས་པའི་སངས་རྒྱས་དེ་དག་མཐོང་ནས། བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང༌། བསོད་སྙོམས་དང༌། གཟིམས་ཆ་དང༌། སྙུན་གྱི་རྐྱེན་སྨན་དང༌། ཡོ་བྱད་དག་ཀྱང་འབུལ་ཞིང༌། བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། ། དགེ་འདུན་གྱི་ཚོགས་རྣམས་ལ་ཡང་ཡང་དག་པར་མཆོད་པ་བྱེད་དེ། དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་བསྙེན་བཀུར་བྱེད་ཅིང༌། དེ་དག་གིས་ཆོས་བསྟན་པ་ཡང་རིམ་གྲོར་ཉན་ཅིང་ལེན་ཏོ། །འཛིན་ ཏོ༑ ༑ཐོས་ནས་ཀྱང་ཅི་ཚུལ་དུ་ནན་ཏན་གྱིས་ཡང་དག་པར་སྒྲུབ་བོ། །དེ་དག་ལས་ཕལ་ཆེར་དེ་བཞིན་གཤེགས་པ་དེ་དག་གི་བསྟན་པ་ལ་རབ་ཏུ་འབྱུང་སྟེ། ཕྱིར་ཞིང་དེའི་ བསམ་པ་དང༌། ལྷག་པའི་བསམ་པ་དང༌། མོས་པ་མཉམ་པ་ཉིད་ཀྱང་རྣམ་པར་དག་པར་འགྱུར་ཏེ། བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པའི་བྱང་ ཆུབ་སེམས་དཔའ་དེ་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་བརྒྱ་སྟོང་ཕྲག་དུ་ མ་དང༌། བསྐལ་པ་ཁྲག་ཁྲིག་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང༌། བསྐལ་པ་ཁྲག་ཁྲིག་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་ དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཁྲག་དུ་མར་བསམ་པ་དང༌། ལྷག་པའི་བསམ་པ་དང༌། མོས་པའི་བསམ་པ་མཉམ་པ་ཉིད་རབ་ཏུ་གནས་སོ། །དེ་དགེ་བའི་རྩ་བ་དེ་ དག་ཐམས་ཅད་ཡོངས་སུ་དག་ཅིང་ཤིན་ཏུ་འོད་གསལ་བར་འགྱུར་རོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། གསེར་གྱིས་ལེ་སྦྲམ་དེ་ཉིད་མགར་བ་མཁས་པས་ རྒྱན་དུ་བྱས་པ་ནི། དེ་མ་ཡིན་པའི་གསེར་གྱི་ས་ལེ་སྦྲམ་གཞན་རྒྱན་དུ་མ་བྱས་པས་མི་འཕྲོགས་ཤིང་མི་ཐུབ་པ་ཡིན། ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་ སེམས་དཔའ་ཆེན་པོ་བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པའི་དགེ་བའི་རྩ་བ་དེ་དག་ཀྱང་དེ་མ་ཡིན་པའི་བྱང་ཆུབ་སེམས་དཔའི་ས་འོག་མ་རྣམས་ལ་ གནས་པའི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བས་མི་འཕྲོགས་ཤིང་མི་ཐུབ་པ་ཡིན། ཀྱེ༑ རྒྱལ་བའི་སྲས་དག། འདི་ལྟ་སྟེ། དཔེར་ན། ནོར་བུ་རིན་པོ་ཆེ་འོད་དང་ ༄༅། །ལྡན་པ། འོད་ཟེར་གྱི་དཀྱིལ་འཁོར་ཡོངས་སུ་དག་པ་ཅན། སྣང་བ་རབ་ཏུ་གཏོང་པ་ནི་དེ་མ་ཡིན་པའི་རིན་པོ་ཆེའི་རྣམ་པས་མི་འཕྲོགས་ ཤིང་མི་ཐུབ་པ་ཡིན། རླུང་ལངས་པ་དང༌། ཆུ་དང༌། ཆར་བབ་པས་འོད་མི་ཆོད་པ་ཡིན། ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ ཆེན་པོ། བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པའང་དེ་མ་ཡིན་པའི་ས་འོག་མ་ལ་གནས་པའི་བྱང་ཆུབ་སེམས་དཔའ་རྣམས་ཀྱིས་མི་འཕྲོགས་ཤིང་ མི་ཐུབ་པ་ཡིན། བདུད་དང་ཉོན་མོངས་པའི་རྒྱུད་རྣམས་ཀྱིས་ཡེ་ཤེས་མི་ཆོད་པ་ཡིན། དེའི་བསྡུ་བའི་དངོས་པོ་བཞི་ལས། དོན་མཐུན་པའི་ཤས་ཆེ་བ་ཡིན། ཕ་རོལ་ ཏུ་ཕྱིན་པ་བཅུ་ལས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་སྒྲུབ་པ་མ་ཡིན་ནོ། །ཀྱེ། རྒྱལ་བའི་ སྲས་དག། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ས་བཞི་པ་སྟེ། འོད་འཕྲོ་བ་ཅན་ཞེས་བྱའོ། །དེ་ལ་གནས་པའི་བྱང་ ཆུབ་སེམས་དཔའ་སེམས་དཔའ་ཆེན་པོ་ནི་ཕལ་ཆེར་ལྷའི་རྒྱལ་པོ་རབ་མཚེ་མར་འགྱུར་ཏེ། སེམས་ཅན་རྣམས་ཀྱི་འཇིག་ཚོགས་ལ་ལྟ་བ་མང་པོ་ཡང་དག་པར་གཞོམ་ པ་ལ་མཁས་ཤིང་མཐུ་ཡོད་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན། སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་ པར་འགྱུར་བ་ནས་ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང༌། ཆོས་ཡིད་ལ་བྱ་བ་དང༌། དགེ་འདུན་ཡིད་ལ་བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་དང༌། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང༌། བྱང་ཆུབ་སེམས་དཔའི་ས་ཡིད་ལ་བྱ་བ་དང༌། ཕ་རོལ་ཏུ་ཕྱིན་པ་ཡིད་ལ་བྱ་བ་དང༌། སྟོབས་ཡིད་ལ་བྱ་བ་དང༌། མི་ འཇིགས་པ་ཡིད་ལ་བྱ་བ་དང༌། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་ བྱ་བ་དང་མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་ཁྲག་ཁྲིག་རབ་ཏུ་ཐོབ་ཅིང་དེ་དག་ལ་སྙོམས་པར་འཇུག་པ་དང༌། སངས་རྒྱས་ཁྲག་ཁྲིག་ མཐོང་ཞིང་དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང༌། འཇིག་རྟེན་གྱི་ཁམས་ཁྲག་ཁྲིག་སྤྱོད་པ་དང༌། སངས་རྒྱས་ཀྱི་ཞིང་ཁྲག་ཁྲིག་ཏུ་འགྲོ་བ་དང༌། འཇིག་ ༄༅། །རྟེན་གྱི་ཁམས་ཁྲག་ཁྲིག་སྣང་བར་བྱ་བ་དང༌། སེམས་ཅན་ཁྲག་ཁྲིག་ཡོངས་སུ་སྨིན་པར་བྱ་བ་དང༌། བསྐལ་པ་ཁྲག་ཁྲིག་ཏུ་གནས་པར་བྱ་བ་ དང༑ སྔོན་གྱི་མཐའ་དང༌། ཕྱི་མའི་མཐའི་བསྐལ་པ་ཁྲག་ཁྲིག་ལ་རབ་ཏུ་འཇུག་པ་དང༌། ཆོས་ཀྱི་སྒོ་ཁྲག་ཁྲིག་རྣམ་པར་འབྱེད་པ་དང༌། ལུས་ཁྲག་ཁྲིག་ཡོངས་སུ་བསྟན་ པ་དང༌། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་ཁྲག་ཁྲིག་ཡང་དག་པར་བསྟན་པར་བྱ་བའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཆད་བྱང་ཆུབ་ སེམས་དཔའི་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དམ། རྫུ་འཕྲུལ་ལམ། མིག་གམ། སྤྱོད་ཡུལ་ ལམ༑ དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའོ། །དེ་ནས་བྱང་ཆུབ་ སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང༌། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ས་གསུམ་འོད་བྱེད་པ་ ལ་ཤིན་ཏུ་སྦྱངས་བྱས་ཤིང༌། །ནམ་མཁའི་ཁམས་དང་ཡིད་ཀྱི་ཁམས་དང་ཁམས་གསུམ་དང༌། །སེམས་ཅན་སྤྱོད་དང་ཆོས་དང་འཇིག་རྟེན་དཔྱོད་བྱེད་ཅིང༌། །མོས་དང་བསམ་ པ་རྣམ་པར་དག་པ་ཡང་དག་གནོན། །འོད་འཕྲོ་ཡོད་པའི་ས་ཐོབ་འཕྲལ་དུ་མཐུ་ཆེན་རྣམས། །སྟོན་པའི་རིགས་སུ་ཡང་དག་སྐྱེས་པས་ཕྱིར་མི་ལྡོག །སངས་རྒྱས་ཆོས་དང་དགེ་ འདུན་དཀོན་མཆོག་དད་མི་ཕྱེད། །སྐྱེ་ཞིང་འཇིག་དང་གནས་མ་བྱེད་པ་མེད་པར་ལྟ། །འཇིག་རྟེན་རྒྱུ་བའི་ལས་དང་བྱེད་དང་སྲིད་སྐྱེ་དང༌། །མྱ་ངན་འདས་འཁོར་ཞིང་དང་སེམས་ ཅན་རྣམ་པར་སྒོམ། །སྔོན་དང་ཕྱི་མཐའ་ཟད་དང་སྐྱེ་མེད་གྲུབ་པ་དང༌། །ལས་ལ་སྟོན་པའི་རིགས་ཀྱི་རྗེས་སུ་འབྲང་ཞིང་སྒོམ། །དེ་དག་འདི་འདྲའི་ཆོས་ལྡན་ཕན་དང་བདེར་ སེམས་པ། །ལུས་དང་དྲན་པ་ཚོར་བ་སེམས་དང་ཆོས་སྒོམ་སྟེ། །དྲན་པ་ཉེར་གཞག་བསྒོམ་པ་རྟེན་པ་རྣམས་སྤངས་པ། །ཕྱི་དང་ནང་གི་གཉིས་ཀའི་རྣམ་པར་མཁས་པ་སྒོམ་ སྡིག་ཏོ་ཟད་ཅིང་དགེ་ཆོས་རྣམ་པར་འཕེལ་འགྱུར་བའི། །ཡང་དག་སྤོང་བ་བཞི་ལའང་མཁས་པ་སྒོམ་པར་བྱེད། །རྫུ་འཕྲུལ་རྐང་པ་བཞི་དང་སྟོབས་དང་དབང་པོ་དང༌། བྱང་ཆུབ་ཡན་ལག་རིན་ཆེན་ལམ་རབ་ཡིད་འོང་སྒོམ། །དེ་དག་ཀུན་ཀྱང་འགྲོ་ལ་ལྟ་བའི་བློ་སྒོམ་སྟེ། །སྙིང་བརྩེ་བྱམས་པ་སྔོན་འགྲོ་སྨོན་ལམ་ཉེ་བར་རྟོན། །སྟོབས་ཀྱི་དམ་ ༄༅། །པ་གོ་འཕང་མཆོག་གི་རྗེས་སེམས་ཤིང༌། །ཐམས་ཅད་མཁྱེན་པའི་ཡེ་ཤེས་སངས་རྒྱས་ཞིང་ལ་སྨོན། །སྟོན་པའི་འཇིགས་མེད་རྣམས་དང་ ཆོས་རྣམས་འཕྲོགས་མེད་དང༌། །སངས་རྒྱས་གསུང་གི་མཆོག་ལ་བརྟེན་པ་སྨོན་བྱེད་ཅིང༌། །རིན་ཆེན་ལམ་ཟབ་རྣམ་པར་ཐར་པའི་གནས་རྣམས་དང༌། །ཆེ་བའི་ཐབས་ རྣམས་ཡང་དག་བསྒྲུབ་ཕྱིར་སྒོམ་པར་བྱེད། །འཇིག་ཚོགས་ལྟ་མེད་ལྟ་བ་དྲུག་ཅུ་གཉིས་ཀྱང་མེད། །བདག་དང་བདག་གི་མེད་ཅིང་སྲོག་ཏུ་དམིགས་པ་མེད། ཕུང་ པོ་སྐྱེ་མཆེད་རྣམས་དང་ཁམས་ཀྱི་གནས་དང་རྟེན། །ཀུན་ཀྱང་མཁས་པས་བཞི་པའི་ས་ལ་རབ་ཏུ་སྤངས། །དེས་ནི་གང་དང་གང་རྣམས་རྒྱལ་བས་སྨད་མཛད་པའི། ། ལས་དང་ཉོན་མོངས་བཅས་པ་དོན་དུ་མི་འགྱུར་རྣམས། །དེ་དག་ཡོངས་སུ་སྤངས་ཤིང་མཁས་པ་ཁོང་ནས་དག །འགྲོ་བ་བསྐྱབ་པའི་དོན་དུ་ལས་རབ་དགེ་བ་བརྩོན།། མཁས་པ་དེ་ནི་བྱམས་པའི་སེམས་ལྡན་བག་ཀྱང་ཡོད། །གཉེན་འཇམ་སེམས་ལྡན་ཕན་དང་བདེ་བྱེད་དྲན་དང་ལྡན། །དམ་པའི་དོན་རྣམས་ཐམས་ཅད་སྐྱོན་མེད་ཡོངས་ སུ་ཚོལ། །ཡེ་ཤེས་དབང་བསྐུར་མངོན་མོས་འགྲོ་བའི་དོན་ཀྱང་བྱེད། །བླ་མ་རིམ་གྲོར་བྱེད་དང་ལྡན་ཞིང་ནན་ཏན་བརྩོན། །དྲིན་བཟོ་ཁྲོ་བ་མེད་ཅིང་ང་ལོ་བདེ་དང་ལྡན།། སྒྱུ་མེད་ཐིབས་པོ་མེད་ཅིང་ཤིན་ཏུ་ངེས་པ་སྟེ། །ཡང་དག་སྒྲུབ་བྱེད་བརྩོན་འགྲུས་ཕྱིར་ལྡོག་མེད་པ་ཡིན། །ཡིད་དུ་འོང་བའི་ས་འདི་ལ་ནི་དེ་གནས་ཚེ། །ལྷག་པའི་བསམ་པ་ ཉིད་དང་བསམ་དགའ་ཐོབ་པར་འགྱུར། །མོས་པ་རབ་ཏུ་འབྱུང་འགྱུར་དགེ་ཆོས་རྣམ་པར་འཕེལ། །དྲི་མ་རྙོག་པ་ཐེ་ཚོམ་ཡིད་གཉིས་ཐམས་ཅད་བསལ། །འདི་ལ་གནས་པའི་ མི་རབ་ཁྱུ་མཆོག་རྒྱལ་བའི་སྲས། །བདེ་གཤེགས་བྱེ་བ་དུ་མ་མངོན་པར་མཆོད་པ་བྱེད། །ཆོས་ཀྱང་ཉན་བྱེད་བསྟན་པ་དེ་ལ་རབ་ཏུ་འབྱུང༌། །རྒྱན་དུ་བྱས་པའི་གསེར་ལྟར་མི་ འཕྲོགས་ཐུབ་པ་མེད། །མཁས་པ་འདི་ལ་གནས་པའི་ཡོན་ཏན་བསམ་པ་དང༌། །ཡེ་ཤེས་ཐབས་དང་སྤྱོད་པ་རྣམ་དག་ལམ་ལ་ཡང༌། །རྣམ་པར་བཟློག་པར་བདུད་རྣམས་ བྱེ་བས་མི་ནུས་ཏེ། །རིན་ཆེན་འོད་ལ་རླུང་གིས་ཆོད་པར་མི་འགྱུར་བཞིན། །མི་དང་ལྷས་མཆོད་འོས་པ་འདི་ལ་གནས་པ་ཡི། །དབང་ཕྱུག་མཚེ་མའི་དམ་པ་ཆོས་ལ་སྤྱོད་པར་ འགྱུར། །ལྟ་བའི་ཐིབས་པོ་རྣམས་ལས་སེམས་ཅན་རྣམ་པར་བཟློག །རྒྱལ་བའི་ཡེ་ཤེས་དོན་དུ་དགེ་བའི་རབ་ཏུ་བརྩོམ། །བརྩོན་འགྲུས་ལྡན་པས་མི་ཡི་ཁྱུ་མཆོག་ཁྲག་ ཁྲིག་བརྒྱ། །གཞན་དུ་མི་སེམས་ཤིན་ཏུ་མཉམ་པར་བཞག་པས་མཐོང༌། །ཡན་ཆད་སྨོན་ལམ་དམ་པ་ཡོན་ཏན་དོན་སྤྱོད་པ། །ཡེ་ཤེས་འབྱུང་གནས་བསྐལ་པ་མང་པོར་ ༄༅། །མངོན་པར་སྒྲུབ། །དེ་ལྟར་ས་མཆོག་བཞི་པ་འདི། །རྣམ་དག་དག་པའི་སྤྱོད་ལྡན་ཞིང༌། །ཡོན་ཏན་ཡེ་ཤེས་དོན་ལྡན་པ། །བདེ་བར་གཤེགས་ པའི་སྲས་ཀྱིས་བསྟན། །འོད་འཕྲོ་ཅན་ཞེས་བྱ་བ་སྟེ། །བྱང་ཆུབ་སེམས་དཔའི་ས་བཞི་པའོ།། །།བམ་པོ་བཞི་བཅུ་བརྒྱད་པ། མཁས་པ་རྣམས་ཀྱི་ས་མཆོག་ སྤྱོད་པ་ཐོས་གྱུར་ནས། །ཆོས་ཀྱི་ཤེས་པས་རྒྱལ་སྲས་རྣམས་ནི་མགུ་ཞིང་དགའ། །དགའ་བའི་ཡིད་ཀྱིས་མཁའ་ལས་མེ་ཏོག་ཆར་ཡང་འབེབས། །བདག་ཉིད་ཆེ་བའི་ བདེ་གཤེགས་སྲས་པོ་དགེ་ཞེས་བརྗོད། །ལྷ་ཡི་བདག་པོ་དབང་སྒྱུར་ལྷ་ཡི་ཚོགས་རྣམས་དང༌། །དགའ་བས་མཁའ་ལ་འཕགས་ཏེ་བདེ་གཤེགས་མཆོད་པའི་ཕྱིར། ། མེ་ཏོག་སྣ་ཚོགས་སྤྲིན་ཆེན་མདོག་སྡུག་ཡིད་འོང་བ། །དགའ་ཞིང་མོས་པས་བདེ་བར་གཤེགས་ལ་མངོན་པར་གཏོར། །གླུ་དབྱངས་སྙན་པ་ཡིད་འོང་སིལ་སྙན་རྔ་ཡི་སྒྲ། ལྷ་ཚོགས་མང་པོས་རྒྱལ་བ་མཆོད་པའི་དོན་དུ་བྱས། །རྒྱལ་བ་དེ་ཚེ་རབ་ཏུ་འཕྲུལ་བའི་སྐུ་ཡང་སྟོན། །སྒྲ་དབྱངས་རྣམ་པ་ཀུན་ལས་འདི་འདྲའི་སྒྲ་བྱུང་ངོ༌། །ཡུན་རིང་མཆོག་ གིས་ཐུབ་པའི་དགོངས་པ་རྫོགས། །ཡུན་རིང་མཆོག་གིས་ཐུབ་པས་བྱང་ཆུབ་བརྙེས། །ལྷ་མི་ཕན་པ་ཡུན་རིང་མཆོག་གིས་མཐོང༌། །ལྷ་ཡི་གནས་སུ་ཤཱཀྱ་ཐུབ་པ་ གཤེགས། །ཡུན་རིང་མཆོག་གིས་རྒྱ་མཚོའི་ཆུ་ཡང་གཡོས། །ཡུན་རིང་མཆོག་གིས་འོད་བཟང་ཐུབ་པས་བཀྱེ། །ཡུན་རིང་མཆོག་གིས་སེམས་ཅན་བདེ་བར་འགྱུར། །ཐུགས་ རྗེ་ཆེ་གསུང་ཡུན་རིང་མཆོག་གིས་ཐོས། །ཡུན་རིང་མཆོག་གིས་ཐུབ་པ་ཆེ་དང་ཕྲད། །ཡོན་ཏན་ཀུན་གྱི་མཐའ་ཕྱིན་ད་བྱོན་ཏོ། །ང་རྒྱལ་དྲེགས་སྙེམས་མུན་པ་ཀུན་སྤངས་ཏེ། ། མཚུངས་མེད་མཆོད་པར་འོས་ལ་མཆོད་པར་གྱིས། །དེ་ལ་མཆོད་བྱས་བདེ་འགྲོའི་ལམ་དུ་འགྲོ་།དེ་ལ་མཆོད་བྱས་བདེ་བ་རྣམ་པ་མང༌། །དེ་ལ་མཆོད་བྱས་སྡུག་བསྔལ་ཐམས་ ཅད་འབྱང༌། །དེ་ལ་མཆོད་བྱས་རྒྱལ་བའི་ཡེ་ཤེས་འཐོབ། །རྒྱལ་བ་མཁའ་ལྟར་རྣམ་པར་དག་པ་སྟེ། །འགྲོ་བས་མི་གོས་པདྨོའི་ཆུ་དང་འདྲ། །ཤིན་ཏུ་འཕགས་པ་རྒྱ་མཚོའི་རི་རབ་ བཞིན། །སྤྲོ་བའི་སེམས་ཀྱིས་རྒྱལ་བ་མཆོད་གྱིས་ཤིག །དེ་སྐད་དབྱངས་སུ་བརྗོད་བྱས་ནས། །ལྷ་ཡི་བུ་མོ་བརྒྱ་མང་བ། །དགའ་བས་རྒྱས་པས་རབ་ཏུ་ལྟ། །ཤིན་ཏུ་དགའ་བས་ རིམ་གྲོར་བྱེད། །དེ་ནས་རྡོ་རྗེའི་སྙིང་པོ་ལ། །རྣམ་ཐར་ཟླ་བས་སྨྲས་པ་ནི། །ས་ལྔའི་རྣམ་པ་ཅི་འདྲ་བ། །རྒྱལ་བའི་སྲས་ཀྱིས་བཤད་པར་མཛོད། །བྱང་ཆུབ་སེམས་དཔའ་རྡོ་རྗེའི་ སྙིང་པོས་སྨྲས་པ། ཀྱེ༑ རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ། བྱང་ཆུབ་སེམས་དཔའི་ས་བཞི་པ་ལ་སའི་ལམ་ཡོངས་སུ་རྫོགས་པ་ནི། བྱང་ཆུབ་སེམས་དཔའི་ ༄༅། །ས་ལྔ་པ་ལ་འཇུག་སྟེ། དེ་སེམས་ཀྱི་བསམ་པ་རྣམ་པར་དག་པ་མཉམ་པ་ཉིད་བཅུས་འཇུག་གོ །བཅུ་གང་ཞེ་ན། འདི་ལྟ་སྟེ། འདས་པའི་སངས་ རྒྱས་ཀྱི་ཆོས་ཀྱིས་བསམ་པ་རྣམ་པར་དག་པ་མཉམ་པ་ཉིད་དང༌། མ་བྱོན་པའི་སངས་རྒྱས་ཀྱི་ཆོས་ཀྱིས་བསམ་པ་རྣམ་པར་དག་པ་མཉམ་པ་ཉིད་དང༌། ད་ལྟར་བྱུང་བའི་ སངས་རྒྱས་ཀྱི་ཆོས་ཀྱིས་བསམ་པ་རྣམ་པར་དག་པ་མཉམ་པ་ཉིད་དང༌། ཚུལ་ཁྲིམས་ཀྱིས་བསམ་པ་རྣམ་པར་དག་པ་མཉམ་པ་ཉིད་དང༌། །སེམས་ཀྱིས་བསམ་པ་རྣམ་ པར་དག་པ་མཉམ་པ་ཉིད་དང༌། ལྟ་བ་དང༌། ནེམ་ནུར་དང༌། དོགས་པ་བསལ་བས་བསམ་པ་རྣམ་པར་དག་པ་མཉམ་པ་ཉིད་དང༌། ལམ་དང་ལམ་ཡིན་པ་ཤེས་པས་བསམ་ པ་རྣམ་པར་དག་པ་མཉམ་པ་ཉིད་དང༌། ནན་ཏན་དང་སྤོང་བ་ཤེས་པས་བསམ་པ་རྣམ་པར་དག་པ་མཉམ་པ་ཉིད་དང༌། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་གོང་ནས་ གོང་དུ་རྣམ་པར་བསྒོམ་པས་བསམ་པ་རྣམ་པར་དག་པ་མཉམ་པ་ཉིད་དང༌། སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་རྣམ་པར་དག་པ་མཉམ་པ་ ཉིད་དེ། ཀྱེ༑ རྒྱལ་བའི་སྲས་དག །སེམས་ཀྱི་བསམ་པ་རྣམ་པར་དག་པ་བཅུ་པོ་འདི་དག་གིས་དེ་ལ་འཇུག་སྟེ། ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའི་ས་ལྔ་ ཐོབ་པའི་བྱང་ཆུབ་སེམས་དཔའ་དེ་ནི་བྱང་ཆུབ་ཀྱི་ཕྱོགས་དང༌། ལམ་གྱི་ཡན་ལག་དེ་དག་ཉིད་ལ་སྦྱང་བ་ཤིན་ཏུ་བྱས་ཤིང་ལྷག་པའི་བསམ་པ་ཤིན་ཏུ་སྦྱངས་པས་དེའི་གོང་དུ་ ལམ་གྱི་ཁྱད་པར་ཚོལ་ཞིང༌། དེ་བཞིན་ཉིད་ཀྱི་རྗེས་སུ་ཞུགས་པ་དང༌། སྨོན་ལམ་གྱི་མཐུ་དང༌། ཤུགས་དང༌། སྙིང་རྗེ་དང༌། བྱམས་པས་སེམས་ཅན་ཡོངས་སུ་མི་གཏོང་བ་དང༌། བསོད་ནམས་དང་ཡེ་ཤེས་ཀྱི་ཚོགས་རབ་ཏུ་བསགས་པ་དང༌། ཡོངས་སུ་རྒྱུན་ཆད་པ་མེད་པ་དང༌། ཐབས་ལ་མཁས་པས་མངོན་པར་བསྒྲུབ་པ་དང༌། གོང་ནས་གོང་དུ་སའི་སྣང་ བ་བལྟ་བ་དང༌། དེ་བཞིན་གཤེགས་པའི་བྱིན་གྱི་རླབས་བཙལ་བ་དང༌། དྲན་པ་དང༌། བློ་གྲོས་དང༌། རིག་པ་དང༌། བློའི་སྟོབས་དང་ཤུགས་ཀྱི་ས་ཡིད་ལ་བྱ་བའི་ཕྱིར་མི་ཟློག་པར་ བྱས་ཏེ། འདི་ནི་སྡུག་བསྔལ་འཕགས་པའི་བདེན་པ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདི་ནི་སྡུག་བསྔལ་ཀུན་འབྱུང་བ། འདི་ནི་སྡུག་བསྔལ་འགོག་པ། འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། དེ་ཀུན་རྫོབ་ཀྱི་བདེན་པ་ལ་མཁས་པ་ཡིན། དོན་ དམ་པའི་བདེན་པ་ལ་མཁས་པ་ཡིན། མཚན་ཉིད་ཀྱི་བདེན་པ་ལ་མཁས་པ་ཡིན། རྣམ་པར་དབྱེ་བའི་བདེན་པ་ལ་མཁས་པ་ཡིན། བརྟག་པའི་བདེན་པ་ལ་མཁས་པ་ཡིན། དངོས་ ༄༅། །པོའི་བདེན་པ་ལ་མཁས་པ་ཡིན། འབྱུང་བའི་བདེན་པ་ལ་མཁས་པ་ཡིན། བྱང་ཞིང་མི་སྐྱེ་བའི་བདེན་པ་ལ་མཁས་པ་ཡིན། ལམ་གྱི་ཡེ་ཤེས་ལ་ འཇུག་པའི་བདེན་པ་ལ་མཁས་པ་ཡིན། བྱང་ཆུབ་སེམས་དཔའི་སའི་རིམ་པ་མཚམས་སྦྱར་བ་གྲུབ་པར་བྱ་བས་དེ་བཞིན་གཤེགས་པའི་ཡེ་ཤེས་ཡང་དག་པར་བསྐྱེད་པའི་ བར་དུ་མཁས་པ་ཡིན་ཏེ། དེ་སེམས་ཅན་གཞན་དང་གང་ཟག་གཞན་ལ་བསམ་པ་ཇི་ལྟ་བ་བཞིན་དུ་ཤིན་ཏུ་དགའ་བར་བྱེད་པས་ཀུན་རྫོབ་ཀྱི་བདེན་པ་ཡང་རབ་ཏུ་ཤེས་སོ། ། ཐེག་པ་གཅིག་ཏུ་ཡང་དག་པར་གཞོལ་བས་དོན་དམ་པའི་བདེན་པ་ཡང་རབ་ཏུ་ཤེས་སོ། །ཆོས་ཀྱི་རང་གི་མཚན་ཉིད་ཁོང་དུ་ཆུད་པས་མཚན་ཉིད་ཀྱི་བདེན་པ་ཡང་རབ་ཏུ་ཤེས་ སོ༑ ༑ཆོས་ཀྱི་བྱེ་བྲག་རྣམ་པར་དགོད་པ་ཁོང་དུ་ཆུད་པས་རྣམ་པར་དབྱེ་བའི་བདེན་པ་ཡང་རབ་ཏུ་ཤེས་སོ། །ཕུང་པོ་དང་ཁམས་དང་སྐྱེ་མཆེད་རྣམ་པར་དགོད་པས་རྟོག་བའི་ བདེན་པ་ཡང་རབ་ཏུ་ཤེས་སོ། །ལུས་དང་སེམས་ལ་གནོད་པ་ཉམས་སུ་འབབ་པས་དངོས་པོའི་བདེན་པ་ཡང་རབ་ཏུ་ཤེས་སོ། །འགྲོ་བའི་རྒྱུད་ཀྱི་མཚམས་སྦྱོར་བས་འབྱུང་ བའི་བདེན་པ་ཡང་རབ་ཏུ་ཤེས་སོ། །རིམས་དང་ཡོངས་སུ་གདུང་བ་ཐམས་ཅད་ཤིན་ཏུ་ཞི་བས་བྱང་ཞིང་མི་སྐྱེ་བའི་བདེན་པ་ཡང་རབ་ཏུ་ཤེས་སོ། །མི་གཉིས་པས་མངོན་ པར་བསྒྲུབ་པས་ལམ་གྱི་ཡེ་ཤེས་ལ་འཇུག་པའི་བདེན་པ་ཡང་རབ་ཏུ་ཤེས་སོ། །རྣམ་པ་ཐམས་ཅད་དུ་མངོན་པར་འཚང་རྒྱ་བ་དང༌། བྱང་ཆུབ་སེམས་དཔའི་ས་རིམ་པ་ཐམས་ཅད་ མཚམས་སྦྱར་བ་རབ་ཏུ་བསྒྲུབ་པས་དེ་བཞིན་གཤེགས་པའི་ཡེ་ཤེས་ཡང་དག་པར་འབྱུང་བའི་བདེན་པ་ཡང་རབ་ཏུ་ཤེས་སོ། དེ་འང་མོས་པས་ཤེས་པའི་སྟོབས་དང༌། ཤུགས་ ཀྱིས་ཏེ་ལྷག་མ་མ་ལུས་པར་ཡེ་ཤེས་ཁོང་དུ་ཆུད་པས་ནི་མ་ཡིན་ནོ། །དེ་དེ་ལྟར་བདེན་པ་ལ་མཁས་པ་མངོན་པར་བསྒྲུབས་པའི་བློས་འདུས་བྱས་ཐམས་ཅད་གསོབ་གསོག་རྫུན་པ་ བསླུ་བའི་ཆོས་ཅན་དཀུ་བྱེད་པ། བྱིས་པ་འདྲིད་པར་ཡང་དག་པར་ཇི་ལྟ་བ་བཞིན་དུ་རབ་ཏུ་ཤེས་ཏེ། དེ་སྔོན་པས་ཀྱང་སེམས་ཅན་ཐམས་ཅད་ལ་སྙིང་རྗེ་མངོན་དུ་འགྱུར་རོ། །བྱམས་ པ་ཆེན་པོའི་སྣང་བ་ཡང་རབ་ཏུ་འབྱུང་སྟེ། དེ་དེ་ལྟར་ཡེ་ཤེས་ཀྱི་སྟོབས་དང་ཤུགས་རབ་ཏུ་ཐོབ་ཅིང་སེམས་ཅན་ཐམས་ཅད་ལ་ལྟ་བ་དང༌། སངས་རྒྱས་ཀྱི་ཡེ་ཤེས་ལ་མངོན་པར་ མོས་པས་འདུ་བྱེད་ཀྱི་རྣམ་པ་ཐམས་ཅད་ཀྱི་སྔོན་གྱི་མཐའ་དང༌། ཕྱི་མའི་མཐའ་རབ་ཏུ་རྟོག་སྟེ། འདི་ལྟར་སྔོན་གྱི་མཐའི་མ་རིག་པ་དང༌། སྲིད་པ་དང༌། སྲེད་པ་ལས་རབ་ཏུ་བྱུང་ བའི་སེམས་ཅན་འཁོར་བའི་རྒྱུད་དུ་འབབ་པ། ཕུང་པོའི་གནས་ལས་མ་འཕགས་པ། སྡུག་བསྔལ་གྱི་ཕུང་པོ་ཆེན་པོ། བདག་མེད་པ། སེམས་ཅན་མེད་པ། སྲོག་མེད་པ། གསོ་ ༄༅། །བ་མེད་པ། གང་ཟག་མེད་པ། བདག་དང་བདག་གི་དང་བྲལ་བ། རྣམ་པར་འཕེལ་ལོ་ཞེས་དེའང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདི་ ལྟར་ཕྱི་མའི་མཐའ་མེད་པ་ལ་རྨོངས་པའི་འདོད་པ་འདི་ཉིད་རྒྱུན་གཅད་པ་དང༌། མཐར་དབྱུང་བ་དང༌། འབྱུང་བར་བྱ་བ་དང༌། ཡོད་པ་དང་མེད་པ་དེ་ཡང་ཡང་དག་པ་ཇི་ལྟ་བ་ བཞིན་དུ་རབ་ཏུ་ཤེས་ཏེ། དེ་འདི་སྙམ་དུ་སེམས་སོ། །དེ་ལྟར་ལུས་གྲངས་མེད་པ་ཞིག་འགགས་ལ་འགག་པར་འགྱུར་ཞིང་འགག་བཞིན་ཏེ། འདི་ལྟར་རྒུད་པར་འགྱུར་ ཡང་ལུས་ལ་སྐྱོ་བ་མི་སྐྱེད་ཅིང༌། སྡུག་བསྔལ་གྱི་འཁྲུལ་འཁོར་ཇེ་བས་ཇེ་འཕེལ་དུ་བྱེད་པ་དང༌། འཁོར་བའི་རྒྱུད་ལས་ཕྱིར་མི་ལྡོག་ཅིང༌། ཕུང་པོའི་གནས་མི་གཏོང་བ་དང༌། ཁམས་ཀྱི་སྦྲུལ་གྱིས་སྐྱོ་བར་མི་འགྱུར་བ་དང༌། ང་རྒྱལ་དང་ལྟ་བའི་ཟུག་རྔུ་མི་འབྱིན་ཅིང༌། འདོད་ཆགས་དང༌། ཞེ་སྡང་དང༌། གཏི་མུག་གི་མེ་ལྕེ་འབར་བ་ཞི་བར་མི་བྱེད་པ་ དང༑ མ་རིག་པའི་མུན་པ་ཆེན་པོ་མི་སེལ་ཅིང༌། སྲིད་པའི་མཚོ་མི་སྐེམ་ལ། སྟོབས་བཅུའི་དེད་དཔོན་མི་ཚོལ་ཞིང༌། བདུད་ཀྱི་བསམ་པ་ཐིབས་པོའི་རྗེས་སུ་སོང་སྟེ། འཁོར་ བའི་རྒྱ་མཚོ་རྣམ་པར་རྟོག་པ་སྣ་ཚོགས་ཀྱི་ཆུ་སྲིན་གྱིས་དཀྲུགས་པས་ཡོངས་སུ་གཡེང་བར་འཁོད་ཅིང༌། བྱིས་པ་སོ་སོའི་སྐྱེ་བོ་དེ་དག་དེ་ལྟར་མི་ཤེས་ཤིང་རྨོངས་པ་ནི་ངོ་ མཚར་ཆེའི། མ་ལ། བདག་གིས་སེམས་ཅན་དེ་ལྟར་སྡུག་བསྔལ་གྱིས་མནར་བ། མགོན་མེད་པ། དཔུང་གཉེན་མེད་པ། སྐྱབས་མེད་པ། གནས་མེད་པ། གཞི་མེད་པ། རྟེན་མེད་པ། ལོང་བར་གྱུར་པ། མ་རིག་པའི་སྒོ་ངའི་སྦུབས་དང༌། པྲིས་ཡོག་པ། མུན་པས་ཁེབས་པ་དེ་དག་གི་དོན་དུ་བདག་གཅིག་པུ་གཉིས་སུ་མེད་པས་བསོད་ནམས་དང༌། ཡེ་ ཤེས་ཀྱི་ཚོགས་ཀྱི་རྣམ་པར་བསགས་པར་བྱ་བ། ཇི་ལྟ་བུར་བསགས་པས་སེམས་ཅན་དེ་དག་ཤིན་ཏུ་རྣམ་པར་དག་པ་ཐོབ་པར་འགྱུར་བ་དང༌། སྟོབས་བཅུའི་སྟོབས་ཀྱི་ཡེ་ ཤེས་ཆགས་པ་མེད་པའི་བར་གྱི་མཐར་ཐུག་པ་ཐོབ་པར་འགྱུར་བའི་རྣམ་པ་དེ་ལྟ་བུའི་བསོད་ནམས་དང༌། ཡེ་ཤེས་ཀྱི་ཚོགས་བསགས་པར་བྱའམ་ཅི་སྙམ་སྟེ། དེ་དེ་ལྟར་ཤིན་ ཏུ་བརྟགས་པའི་ཡེ་ཤེས་ཀྱིས་མངོན་པར་བསྒྲུབས་པའི་བློས་དགེ་བའི་རྩ་བ་གང་ཅི་རྩོམ་ཡང་དེ་དག་ཐམས་ཅད་སེམས་ཅན་ཐམས་ཅད་ཡོངས་སུ་བསྐྱབ་པ་དང༌། སེམས་ཅན་ ཐམས་ཅད་ལ་ཕན་པ་དང༌། སེམས་ཅན་ཐམས་ཅད་ལ་བདེ་བ་དང༌། སེམས་ཅན་ཐམས་ཅད་ལ་སྙིང་བརྩེ་བ་དང༌། སེམས་ཅན་ཐམས་ཅད་ལ་གཙེ་བ་མེད་པ་དང༌། སེམས་ཅན་ ཐམས་ཅད་ཡོངས་སུ་དགྲོལ་བ་དང༌། སེམས་ཅན་ཐམས་ཅད་དྲང་བ་དང༌། སེམས་ཅན་ཐམས་ཅད་དད་པར་བྱ་བ་དང༌། སེམས་ཅན་ཐམས་ཅད་གདུལ་བ་དང༌། སེམས་ཅན་ཐམས་ ༄༅། །ཅད་ཡོངས་སུ་མྱ་ངན་ལས་བཟླ་བའི་ཕྱིར་རབ་ཏུ་རྩོམ་སྟེ། བྱང་ཆུབ་སེམས་དཔའི་ས་ལྔ་པ་ཤིན་ཏུ་ཁྱབ་པར་དགའ་བ་འདི་ལ་གནས་པའི་བྱང་ཆུབ་ སེམས་དཔའ་དེ་ནི། དེ་བས་ཀྱང་ཉམས་པར་མི་འགྱུར་བའི་ཆོས་ཉིད་ཀྱིས་དྲན་པ་དང་ལྡན་པ་ཡིན། ཤིན་ཏུ་ངེས་པར་རྟོགས་པའི་ཡེ་ཤེས་ཀྱིས་བློ་གྲོས་དང་ལྡན་པ་ཡིན། མདོའི་དོན་དང༌། ཚུལ་དང༌། ལྡེམ་པོ་དག་ཁོང་དུ་ཆུད་པས་རིག་པ་དང་ལྡན་པ་ཡིན། བདག་དེ་གཞན་གྱི་སེམས་རྗེས་སུ་སྲུང་བས་ངོ་ཚ་ཤེས་ཤིང་ཁྲེལ་ཡོད་པ་ཡིན། སྡོམ་ པ་དང་ཚུལ་མ་བོར་བས་དགའ་བ་དང་ལྡན་པ་ཡིན། གནས་དང་གནས་པ་མ་ཡིན་པ་ལ་མཁས་ཤིང་ཤིན་ཏུ་བརྟགས་པས་བློ་དང་ལྡན་པ་ཡིན། གཞན་གྱི་དྲིང་མི་འཇོག་ པས་ཡེ་ཤེས་དང་ལྡན་པ་ཡིན། དོན་དང་དོན་མ་ཡིན་པའི་ཚིག་ཡང་དག་པར་དབྱེ་བ་ལ་མཁས་པས་ཤེས་རབ་དང་ལྡན་པ་ཡིན། བསྒོམ་པ་མངོན་པར་བསྒྲུབ་པ་ལ་ མཁས་པས་མངོན་པར་ཤེས་པ་བསྒྲུབ་པ་ཐོབ་པ་ཡིན། འཇིག་རྟེན་གྱི་རྗེས་སུ་འབྲང་བས་ཐབས་ལ་མཁས་པ་ཡིན། བསོད་ནམས་ཀྱི་ཚོགས་ཉེ་བར་གསོག་པས་ངོམ་ མི་ཤེས་པ་ཡིན། ཡེ་ཤེས་ཀྱི་ཚོགས་ཡོངས་སུ་ཚོལ་བས་བརྩོན་འགྲུས་རྒྱུན་མི་འཆད་པ་ཡིན། བྱམས་པ་དང་སྙིང་རྗེ་ཆེན་པོའི་ཚོགས་ཡང་དག་པར་གསོག་པས་ སྐྱོ་བ་མེད་པའི་བསམ་པ་དང་ལྡན་པ་ཡིན། དེ་བཞིན་གཤེགས་པའི་སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་མ་འདྲེས་པ་ཡོངས་སུ་ཚོལ་བས་སྙོམ་ ལས་མེད་པར་ཡོངས་སུ་ཚོལ་བ་ལ་བརྩོན་པ་ཡིན། སངས་རྒྱས་ཀྱི་ཞིང་བསྒྲུབ་པ་དང༌། རྒྱན་མངོན་པར་ཤོམ་པས་མངོན་པར་བསྒྲུབ་པའི་ཡིད་དང་ལྡན་པ་ཡིན། མཚན་ དང་དཔེ་བྱད་བཟང་པོ་ཡང་དག་པར་བསྒྲུབ་པས་དགེ་བ་རྣམ་པ་སྣ་ཚོགས་ལ་བརྩོན་པ་ཡིན། དེ་བཞིན་གཤེགས་པའི་སྐུ་དང་གསུང་དང་ཐུགས་ཀྱི་རྒྱན་ཡོངས་སུ་ཚོལ་ བས་རྟག་ཏུ་རྒྱུན་མི་འཆད་པར་བརྩོན་པ་ཡིན། བྱང་ཆུབ་སེམས་དཔའ་དང༌། ཆོས་སྨྲ་བ་ཐམས་ཅད་ལ་རིམ་གྲོ་བྱེད་པས་བསྙེན་བཀུར་དང༌། སྲི་ཞུ་ཆེན་པོའི་ངང་ཚུལ་ ཅན་ཡིན། བྱང་ཆུབ་ཀྱི་སེམས་དང་ཐབས་མཁས་པ་ཆེན་པོའི་ངང་ཚུལ་དང་ལྡན་པར་འཇིག་རྟེན་དུ་རྒྱུ་བས་ཁོང་ཁྲོ་བ་མེད་པའི་སེམས་དང་ལྡན་པ་ཡིན། སེམས་ཅན་ ཐམས་ཅད་ཡོངས་སུ་སྨིན་པར་བྱ་བ་ལ་མངོན་པར་བརྩོན་པས་ཉིན་མཚན་དུ་གཞན་དུ་སེམས་པའི་ཡིད་ཡོངས་སུ་སྤངས་པ་ཡིན་ཏེ། དེ་དེ་ལྟར་མངོན་པར་བརྩོན་པས་ སྦྱིན་པས་ཀྱང་སེམས་ཅན་ཡོངས་སུ་སྨིན་པར་བྱེད་དོ། །ངག་སྙན་པ་དང༌། དོན་བསྒྲུབ་པ་དང༌། དོན་མཐུན་པ་དང༌། གཟུགས་ཀྱི་ལུས་ཀུན་ཏུ་བསྟན་པ་དང༌། ཆོས་བཤད་ ༄༅། །པ་དང༌། བྱང་ཆུབ་སེམས་དཔའི་སྤྱོད་པ་བརྗོད་པ་དང༌། དེ་བཞིན་གཤེགས་པའི་ཆེ་བ་ཉིད་སྨོས་པ་དང༌། འཁོར་བའི་ཉེས་པ་བསྟན་པ་ དང༑ སངས་རྒྱས་ཀྱི་ཡེ་ཤེས་ཀྱི་ཡོན་ཏན་ཡོངས་སུ་གྲགས་པར་བྱ་བ་དང༌། རྫུ་འཕྲུལ་དང༌། རྣམ་པར་འཕྲུལ་པ་ཆེན་པོ་མངོན་པར་བསྒྲུབ་པ་དང༌། བྱ་བ་དང༌། ཐབས་ རྣམ་པ་སྣ་ཚོགས་ཀྱིས་སྦྱོར་བས་སེམས་ཅན་ཡོངས་སུ་སྨིན་པར་བྱེད་དོ། །དེ་ལྟར་སེམས་ཅན་ཡོངས་སུ་སྨིན་པར་བྱ་བ་ལ་མངོན་པར་བརྩོན་པ་དང་ལྡན་ཞིང༌། སངས་ རྒྱས་ཀྱི་ཡེ་ཤེས་ཀྱི་རྗེས་སུ་སོང་བའི་བསམ་པ་ཅན། དགེ་བའི་རྩ་བ་ཕྱིར་མི་ལྡོག་པའི་སྦྱོར་བ་དང་ལྡན་པ། ཁྱད་པར་ཅན་གྱི་ཆོས་ཡོངས་སུ་བཙལ་བ་ལ་མངོན་པར་ བརྩོན་པ་དེ་གང་འདི་འཇིག་རྟེན་ན་ཡོད་པའི་ཡི་གེ་དང༌། གཙུག་ལག་དང༌། ལག་བརྡ་དང༌། གྲངས་དང༌། རྩིས་དང༌། ཤོད་ཐབས་ལ་སོགས་པ་དང༌། ཁམས་ཀྱི་ཆོ་ག་ དང༑ གསོ་བའི་ཆོ་ག་དང༌། སྐེམ་པ་དང༌། བརྗེད་བྱེད་དང༌། འབྱུང་པོའི་གདོན་བསལ་པ་དང༌། དུག་དང་རོ་ལངས་ཀྱི་སྦྱོར་བ་བསལ་བ་དང༌། རང་བཟོ་དང༌། གར་གྱི་ཆོ་ ག་དང༌། གཏམ་དང༌། རོལ་མོ་དང༌། སྒྲུང་གཏམ་ལ་དགའ་བསྐྱེད་པ་དང༌། གྲོང་དང་གྲོང་ཁྱེར་དང༌། བཟའ་ཤིང་གི་ར་བ་དང༌། ཆུ་ཀླུང་དང༌། མཚེའུ་དང༌། ལྟེང་ཀ་དང༌། རྫིང་བུ་དང༌། མེ་ཏོག་དང༌། ཤིང་ཏོག་དང༌། རྩི་དང༌། ནགས་ཚལ་མངོན་པར་བསྒྲུབ་པ་དང༌། གསེར་དང༌། དངུལ་དང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། རིན་པོ་ཆེ་ཤཱི་ལ་དང༌། བྱི་རུ་དང༌། རིན་པོ་ཆེ་རྣམས་ཀྱི་འབྱུང་གནས་བསྟན་པ་དང༌། ཉི་མ་དང༌། ཟླ་བ་དང༌། གཟའ་དང༌། རྒྱུ་སྐར་དང༌། ས་གཡོ་བ་དང༌། རི་དྭགས་ཀྱི་ལྟས་དང༌། རྨི་ ལམ་དང་ལྟས་བསྟན་པ་ལ་འཇུག་པ་དང༌། ཡན་ལག་དང༌། ཉིང་ལག་གི་མཚན་དང༌། སྤྱོད་པའི་མཚན་དང༌། སྡོམ་པ་དང༌། ཚུལ་དང༌། བསམ་གཏན་དང༌། མངོན་པར་ཤེས་ པ་དང༌། ཚད་མེད་པ་དང༌། གཟུགས་མེད་པའི་གནས་རྣམས་དང༌། གཞན་ཡང་གང་སེམས་ཅན་ལ་འཚེ་བར་མི་འགྱུར་བའི་སྦྱོར་བ་དང༌། སེམས་ཅན་ཐམས་ཅད་ལ་ཕན་པ་ དང༑ བདེ་བར་འགྱུར་བ་ཡོད་དགུ་དེ་དག་ཐམས་ཅད་འཇིག་རྟེན་ལ་སྙིང་བརྩེ་བས་རིམ་གྱིས་སངས་རྒྱས་ཀྱི་ཆོས་ལ་རབ་ཏུ་དགོད་པའི་ཕྱིར་མངོན་པར་སྒྲུབ་བོ། །བྱང་ཆུབ་སེམས་ དཔའི་ས་ཤིན་ཏུ་རྒྱལ་བར་དཀའ་བ་འདི་ལ་གནས་པའི་བྱང་ཆུབ་སེམས་དཔའི་ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་ཏེ། ལྟ་ བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང༌། སངས་རྒྱས་སྟོང་ཕྲག་མང་པོ་དང༌། སངས་རྒྱས་བརྒྱ་སྟོང་ཕྲག་མང་པོ་དང༌། སངས་རྒྱས་ ༄༅། །བྱེ་བ་བརྒྱ་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་མང་པོ་དང༌། སངས་རྒྱས་ཁྲིག་ཁྲིག་བརྒྱ་ཕྲག་མང་པོ་དང༌། སངས་རྒྱས་ཁྲག་ཁྲིག་ སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་སྣང་བར་འགྱུར་རོ། །དེས་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས་བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། ། ན་བཟའ་དང༌། བསོད་སྙོམས་དང༌། གཟིམས་ཆ་དང༌། སྙུན་གྱི་རྐྱེན་སྨན་དང༌། ཡོ་བྱད་དག་ཀྱང་འབུལ་ཞིང་བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ ལོ༑ ༑དགེ་འདུན་གྱི་ཚོགས་རྣམས་ལའང་ཡང་དག་པར་མཆོད་པ་བྱེད་དེ། དགེ་བའི་རྩ་བ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་རིམ་གྲོ་བྱེད་ཅིང་དེ་དག་ལས་རིམ་གྲོ་དང༌། ཞེ་ས་དང༌། བསྟི་སྟང་དུ་ཆོས་བསྟན་པ་ ཉན་ཏོ། །ལེན་ཏོ། །འཛིན་ཏོ། །ཐོས་ནས་ཀྱང་ཅི་ཚུལ་དུ་ནན་ཏན་གྱིས་ཡང་དག་པར་སྒྲུབ་སྟེ། དེ་དག་ལས་ཕལ་ཆེར་དེ་བཞིན་གཤེགས་པ་དེ་དག་གི་བསྟན་པ་ལ་རབ་ཏུ་ འབྱུང་ངོ༌། །རབ་ཏུ་བྱུང་ནས་ཀྱང་ཐོས་པ་འཛིན་པའི་གཟུངས་རབ་ཏུ་ཐོབ་པའི་ཆོས་སྨྲ་བར་འགྱུར་བ་ཡིན། དེ་ལྟར་བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་འདི་ལ་ གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་དེ་དག་བསྐལ་པ་དུ་མར་ཤིན་ཏུ་བྱང་བ་དང༌། ཡོངས་སུ་དག་པ་དང༌། འོད་རབ་ཏུ་གསལ་བར་གནས་སོ། །བསྐལ་པ་བརྒྱ་ ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་དུ་མ་དང༌། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་ཕྲག་དུ་མ་དང༌། བསྐལ་པ་ཁྲག་ ཁྲིག་བརྒྱ་ཕྲག་དུ་མ་དང༌། བསྐལ་པ་ཁྲག་ཁྲིག་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་དགེ་བའི་ རྩ་བ་དེ་དག་ཤིན་ཏུ་བྱང་བ་དང༌། ཡོངས་སུ་དག་པ་དང༌། རབ་ཏུ་འོད་གསལ་བར་གནས་སོ། །ཀྱེ༑ རྒྱལ་བའི་སྲས་དག །གསེར་གྱི་ས་ལེ་སྦྲམ་དེ་ཉིད་རིན་པོ་ཆེ་མུ་ས་ར་གལ་བས་བཏབ་ ན༑ དེ་བས་ཀྱང་ཡོངས་སུ་འཚེར་རོ། །ཡོངས་སུ་དག་པར་འགྱུར་རོ། །འོད་ཤིན་ཏུ་གསལ་ཞིང་དང་བར་འགྱུར་རོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ ས་ཤིན་ཏུ་རྒྱལ་བར་དཀའ་བ་འདི་ལ་གནས་པའི་བྱང་ཆུབ་སེམས་དཔའི་དགེ་བའི་རྩ་བ་ཐབས་དང་ཤེས་རབ་ཀྱིས་རྣམ་པར་སྤྱད་པ་ཡང་དེ་བས་ཀྱང་ཤིན་ཏུ་བྱང་བ་དང༌། ༄༅། །ཡོངས་སུ་དག་པ་དང༌། རབ་ཏུ་འོད་གསལ་ཞིང་དང་བ་ཡིན། ཡེ་ཤེས་ཀྱི་སྦྱོར་བའི་ཡོན་ཏན་མངོན་པར་བསྒྲུབས་པ་དང་ལྡན་པ་ཡིན། མི་ འཕྲོགས་ཤིང་ཤིན་ཏུ་བརྟགས་པ་ཡིན། ཀྱེ༑ རྒྱལ་བའི་སྲས་དག ། འདི་ལྟ་སྟེ། དཔེར་ན། ཉི་མ་དང༌། ཟླ་བ་དང༌། སྐར་མ་དང༌། རྒྱུ་སྐར་གྱི་གཞལ་མེད་ཁང་གི་འོད་སྣང་བ་ནི་ རླུང་གི་དཀྱིལ་འཁོར་གྱིས་མི་འཕྲོགས་ཤིང༌། རླུང་དང་ཐུན་མོང་དུ་མི་སྤྱོད་པ་ཡིན། ཀྱེ༑ རྒྱལ་བའི་སྲས་དག། དེ་བཞིན་དུ་བྱང་ཆུབ་སེམས་དཔའི་ས་ཤིན་ཏུ་རྒྱལ་བར་ དཀའ་བ་འདི་ལ་གནས་པའི་དགེ་བའི་རྩ་བ་ཐབས་དང༌། ཤེས་རབ་དང༌། ཡེ་ཤེས་དང༌། སེམས་ཀྱིས་ཤིན་ཏུ་བརྟགས་པ་དང་ལྡན་པ་ཡང་ཉན་ཐོས་དང་རང་སངས་རྒྱས་ ཀྱིས་མི་འཕྲོགས་པ་ཡིན། འཇིག་རྟེན་པ་དང་ཐུན་མོང་དུ་མི་སྤྱོད་པ་ཡིན། དེའི་ཕ་རོལ་ཏུ་ཕྱིན་པ་བཅུ་ལས་བསམ་གཏན་གྱི་ཕ་རོལ་ཏུ་ཕྱིན་པ་ཤས་ཆེ་བ་ཡིན་ཏེ། ལྷག་མ་ རྣམས་ཀྱང་ཅི་ཚུལ་ཅི་ནུས་སུ་མི་སྒྲུབ་པ་མ་ཡིན་ནོ། །ཀྱེ༑ རྒྱལ་བའི་སྲས་དག། འདི་ནི་བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་ཞེས་བྱ་བ། བྱང་ཆུབ་སེམས་ དཔའི་ས་ལྔ་པ་མདོར་བསྟན་པའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་ལྷའི་རྒྱལ་པོ་རབ་དགའ་ལྡན་དུ་འགྱུར་ཏེ། སེམས་ཅན་ཐམས་ཅད་ཀྱི་མུ་སྟེགས་ ཀྱི་གནས་ཐམས་ཅད་རྣམ་པར་བཟློག་པ་ལ་མཁས་ཤིང་མཐུ་ཡོད་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་རྩ་བ་གང་ཅི་ རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས། ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང༌། ཆོས་ཡིད་ལ་ བྱ་བ་དང༌། དགེ་འདུན་ཡིད་ལ་བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་དང༌། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང༌། བྱང་ཆུབ་སེམས་དཔའི་ས་ཡིད་ལ་ བྱ་བ་དང༌། ཕ་རོལ་ཏུ་ཕྱིན་པ་ཡིད་ལ་བྱ་བ་དང༌། སྟོབས་ཡིད་ལ་བྱ་བ་དང༌། མི་འཇིགས་པ་ཡིད་ལ་བྱ་བ་དང༌། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་ཁྲག་ཁྲིག་ ཕྲག་སྟོང་རབ་ཏུ་འཐོབ་ཅིང༌། དེ་དག་ལ་སྙོམས་པར་འཇུག་པ་དང༌། སངས་རྒྱས་ཁྲག་ཁྲིག་ཕྲག་སྟོང་མཐོང་ཞིང་དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང༌། འཇིག་ ༄༅། །རྟེན་གྱི་ཁམས་ཁྲག་ཁྲིག་ཕྲག་སྟོང་སྐྱོད་པ་དང༌། སངས་རྒྱས་ཀྱི་ཞིང་ཁྲག་ཁྲིག་ཕྲག་སྟོང་དུ་འགྲོ་བ་དང༌། འཇིག་རྟེན་གྱི་ཁམས་ཁྲག་ ཁྲིག་ཕྲག་སྟོང་དུ་སྣང་བར་བྱ་བ་དང༌། སེམས་ཅན་ཁྲག་ཁྲིག་ཕྲག་སྟོང་ཡོངས་སུ་སྨིན་པར་བྱ་བ་དང༌། བསྐལ་པ་ཁྲག་ཁྲིག་ཕྲག་སྟོང་དུ་གནས་པར་བྱ་བ་དང༌། སྔོན་ གྱི་མཐའ་དང་ཕྱི་མིའི་མཐའི་བསྐལ་པ་ཁྲག་ཁྲིག་ཕྲག་སྟོང་ལ་རབ་ཏུ་འཇུག་པ་དང༌། ཆོས་ཀྱི་སྒོ་ཁྲག་ཁྲིག་ཕྲག་སྟོང་རྣམ་པར་འབྱེད་པ་དང༌། ལུས་ཁྲག་ཁྲིག་ཕྲག་ སྟོང་ཡོངས་སུ་བསྟན་པ་དང༌། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་ཁྲག་ཁྲིག་ཕྲག་སྟོང་ཡང་དག་པར་བསྟན་པར་བྱ་བའི་ཕྱིར་བརྩོན་འགྲུས་ཀྱི་རྣམ་པ་ དེ་ལྟ་བུ་རྩོམ་མོ། །དེ་ཡན་ཆད་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ་དེ་དག་གི་ལུས་སམ། འོད་དམ། རྫུ་འཕྲུལ་ལམ། མིག་གམ། སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པ་འམ། མངོན་པར་འདུ་བྱེད་པ་དག་ཀྱང་བསྐལ་ པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཀྱང་བགྲང་ པར་དཀའོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང་བསྟན་པར་བྱ་བའི་ཕྱིར། དེའི་ཚེ་ཚིགས་སུ་བཅད་པ་འདི་དག་སྨྲས་སོ། ། རྒྱལ་བའི་སྤྱོད་པ་བཞི་པོ་དེ་ལྟར་རྣམ་སྦྱངས་ཏེ། །དུས་གསུམ་མཉམ་པ་ཉིད་ཀྱི་རྗེས་སུ་སེམས་བྱེད་ཅིང༌། །ཚུལ་ཁྲིམས་སེམས་དང་ནན་ཏན་ལམ་རྣམས་རྣམ་དག་པས། །ནེམ་ནུར་ མེད་པའི་མཁས་པ་ལྔ་པ་ཡོངས་སུ་གནོན། །དྲན་པའི་གཞུ་དང་དབང་པོ་མདའ་རྣོ་ཕྱིར་མི་ལྡོག །ཡང་དག་སྤོང་བ་རྟ་ཡིན་གཞོན་པ་རྫུ་འཕྲུལ་རྐང༌། །སྟོབས་ལྔ་གོ་ཆ་དགྲ་ རྣམས་ཀུན་གྱིས་ཚུགས་མི་ནུས། །དཔའ་བས་མི་ལྡོག་མཁས་པ་ལྔ་པ་ཡོངས་སུ་གནོན། །ངོ་ཚ་ཁྲེལ་ཡོད་གོས་ཡིན་མཁས་པའི་ཚུལ་གཙང་སྤོས། །བྱང་ཆུབ་ཡན་ལག་ཕྲེང་བ་ བྱུག་པ་བསམ་གཏན་མཆོག །ཤེས་རབ་རྣམ་པར་དཔྱང་དང་ཐབས་མཆོག་རྒྱན་ཡིན་ཏེ། །བཟའ་ཤིང་ར་བ་ཏིང་འཛིན་དགའ་ལྡན་ཡང་དག་གནོན། །རྫུ་འཕྲུལ་བཞི་པོ་ རྐང་པ་དྲན་པ་རྣམ་དག་མགྲིན། །བྱམས་བརྩེ་རྣམ་དག་མིག་ཡིན་ཤེས་རབ་མཆེ་བ་མཆོག །བདག་མེད་ང་རོས་ཉོན་མོངས་དགྲ་རྣམས་རབ་ཏུ་འཇོམས། །མཁས་པ་མི་ཡི་སེང་ གེ་ས་ལྔ་ཡོངས་སུ་གནོན། །དེ་དག་ས་མཆོག་ལྔ་པའི་ཕྱོགས་སུ་ཕྱིན་གྱུར་ནས། །ཡོངས་སུ་དག་པའི་ལམ་རྣམ་ཕྱིར་ཞིང་གོང་དུ་སྦྱོང༌། །བསམ་དག་མཁས་པ་རྒྱལ་བ་འཐོབ་ ༄༅། །པར་བྱ་དོན་དུ། །སྐྱོ་བ་མེད་པར་སྙིང་རྗེ་བྱམས་པའི་རྗེས་སུ་སེམས། །བསོད་ནམས་ཚོགས་བསགས་དེ་བཞིན་ཡེ་ཤེས་རབ་ལྡན་པ། །ས་རྣམས་ སྣང་བར་བྱ་ཕྱིར་གཅིག་མིན་ཐབས་རྟོག་ཅིང༌། །སངས་རྒྱས་བྱིན་གྱིས་དྲན་དང་བློ་གྲོས་བློ་ཐོབ་པས། །བདེན་པ་བཞི་པོ་མ་ལུས་ཡང་དག་ཁོང་དུ་ཆུད། །དོན་དམ་བདེན་པ་ དེ་བཞིན་ཀུན་རྫོབ་མཚན་བདེན་དང༌། །རྣམ་པར་དབྱེ་བའི་བདེན་པ་དེ་བཞིན་བརྟག་བདེན་དང༌། །འབྱུང་ཞིང་འཇུག་དང་དངོས་པོ་བཞི་ལམ་བདེན་པ་ནས། །སྒྲིབ་མེད་བདེན་པའི་ བར་དུ་ཡང་དག་རབ་ཏུ་རྟོགས། །དེ་ལྟར་བདེན་པས་ཡོངས་སུ་སྦྱངས་པའི་བློ་ཕྲ་ཡང༌། །རྣམ་ཐར་དམ་པ་སྒྲིབ་མེད་དེ་ནི་ཐོབ་པ་མིན། །ཡེ་ཤེས་མོས་ཡངས་ཡོན་ཏན་ རྣམས་ཀྱི་འབྱུང་གནས་ཏེ། །འགྲོ་ཀུན་དགྲ་བཅོམ་རང་རྒྱལ་རྣམས་ནི་ཟིལ་གྱིས་གནོན། །དེ་དག་བདེན་པས་དེ་ལྟར་རང་གི་བློས་བསྒྲུབས་པས། །འདུས་བྱས་རྫུན་ཞིང་ རང་བཞིན་སྙིང་པོ་མེད་པར་ཤེས། །སེམས་ཅན་དོན་དུ་བདེ་གཤེགས་ཡེ་ཤེས་ཚོལ་བའི་ཚེ། །བདེ་གཤེགས་ཐུགས་བརྩེ་བྱམས་པ་སྣང་བ་རབ་ཏུ་འཐོབ། །འདུས་བྱས་སྔོན་ དང་ཕྱི་མཐའ་མཁས་པ་རབ་ཏུ་ལྟ། །གཏི་མུག་མུན་གནག་མུན་པས་འཁྲུགས་ཤིང་སྲེད་ཆགས་པའི། །འགྲོ་རྣམས་སྡུག་བསྔལ་ཕུང་པོ་ལྟ་བ་བདག་མེད་ཅིང༌། །སྲོག་ བྲལ་རྩྭ་ཤིང་འདྲ་བ་མངོན་པར་སེལ་བ་བྱེད། །ཉོན་མོངས་རྗེས་འགྲོ་འདི་དག་འདས་དང་མ་འོངས་པའི། །སྡུག་བསྔལ་རྒྱུན་གཅོད་མཐར་ཕྱིན་གཞལ་བར་ཡོང་མི་བྱེད། །ཀྱི་ཧུད་ འགྲོ་བ་དེ་ལྟར་འཁྱམས་ཞེས་སྙིང་རྗེ་སྐྱེ། །གཏི་མུག་འཁྲུལ་པས་འཁོར་བའི་རྒྱུད་དུ་ཕྱིར་མི་ལྡོག །ཕུང་པོའི་གནས་དང་ཁམས་སྤྲུལ་ལྟ་བུའི་ཟུག་རྔུ་ཅན། །མེས་གདུངས་ཡིད་ ཅན་སྒྲིབ་པའི་མུན་པས་བསྒྲིབས་གྱུར་པ། །དོན་རྣམས་རྣམ་པར་མ་བརྟགས་སྲེད་པའི་མཚོར་ལྷུང་ཞིང༌། །རྒྱལ་བའི་དེད་དཔོན་བྲལ་བ་སྡུག་བསྔལ་རྒྱ་མཚོར་གནས། །དེ་ལྟར་ རིག་ནས་བག་ཡོད་ཕྱིར་ཞིང་རབ་ཏུ་རྩོམ། །ཅི་རྩོམ་ཀུན་ཀྱང་འགྲོ་བ་རྣམ་ཐར་དོན་དུ་སྟེ། །ཕྱིར་ཞིང་དྲན་ལྡན་བློ་གྲོས་རིག་དང་ལྡན་པ་ཡིན། །ཁྲེལ་ཡོད་དགའ་ལྡན་མཁས་པ་བློ་ལྡན་ ཤེས་རབ་ལྡན། །བསོད་ནམས་བསགས་དང་ཡེ་ཤེས་དམ་པས་མི་ངོམས་ཤིང༌། །རྟག་ཏུ་སྐྱོ་མེད་ལེ་ལོ་མེད་པར་ཐོས་པ་ཚོལ། །ཞིང་སྒྲུབ་རྒྱལ་བའི་མཚན་དང་སངས་རྒྱས་ གསུང་ཚོལ་ཞིང༌། །སེམས་ཅན་ཕན་པར་བརྩོན་པའི་བྱ་བས་ངོམས་མི་ཤེས། །འགྲོ་བ་སྨིན་བྱའི་དོན་དུ་མཁས་པས་བཟོ་ཡི་གནས། །ཡི་གེ་ལག་བརྡ་གྲངས་དང་རྩིས་དང་གསོ་ བའི་ཐབས། །འབྱུང་པོའི་གདོན་དང་ལས་རྣམས་སྣ་ཚོགས་བསལ་བའི་ཕྱིར། །སྙིང་བརྩེ་བྱམས་པའི་བློ་གསལ་གཙུག་ལག་ཀུན་ལ་གཞོལ། །རང་བཟོ་མཆོག་དང་གར་སྡུག་ ༄༅། །སྣ་ཚོགས་དགའ་བྱེད་དང༌། །ཆུ་ཀླུང་ར་བ་ཤིང་ཏོག་མེ་ཏོག་འདུག་གནས་དང༌། །བྱ་བ་སྣ་ཚོགས་སྒྲུབ་བྱེད་སེམས་ཅན་བདེ་དོན་དུ། །རིན་ཆེན་འབྱུང་ གནས་དུ་མའང་ཉེ་བར་སྟོན་པ་བྱེད། །ས་གཡོ་ཉི་ཟླ་གཟའ་སྐར་ཀུན་ཀྱང་དེ་བཞིན་དུ། །སེམས་ཅན་ཡན་ལག་མཚན་མའི་དཔྱད་དང་རྒྱལ་སྲིད་གནས། །གཟུགས་མེད་ བསམ་གཏན་མངོན་ཤེས་མཆོག་དང་ཚད་མེད་པ། །འགྲོ་ལ་བདེ་དང་ཕན་པའི་དོན་འདོད་མངོན་པར་བསྒྲུབ། །ཤིན་ཏུ་རྒྱལ་དཀའ་འདི་ཐོབ་ཤེས་རབ་མཆོག་སྤྱོད་པ།། སངས་རྒྱས་བྱེ་བ་མཆོད་བྱེད་ཆོས་རྣམས་ཉན་པར་བྱེད། །དེ་དག་དགེ་དང་བསམ་པ་ཕྱིར་ཞིང་དག་པར་འགྱུར། །གསེར་སྦྲམ་ཇི་ལྟར་མུ་སར་གལ་བས་བཏབ་པ་བཞིན། ། ཇི་ལྟར་བར་སྣང་གཟའ་ཡི་རིན་ཆེན་གཞལ་མེད་ཁང༌། །རླུང་ལ་རྒྱུ་སྟེ་འོན་ཀྱང་རླུང་གིས་འཕྲོགས་པ་མིན། །དེ་ལྟར་འགྲོ་བའི་དོན་སྤྱོད་འཇིག་རྟེན་ཆོས་སྤྱོད་ཀྱང༌། །ཇི་ལྟར་པདྨོ་ ཆུས་མི་ཆགས་བཞིན་འཕྲོགས་པ་མིན། །འདི་ལ་གནས་པ་དགའ་ལྡན་དབང་པོ་མཁས་པར་འགྱུར། །མུ་སྟེགས་སྤྱོད་དང་ལྟ་བ་མང་པོའི་གནས་ཀྱང་སེལ། །སྟོབས་ རྣམས་བཅུ་པོ་སེམས་ཅན་བསྐྱབ་པར་བྱའོ་ཞེས། །དགེ་བ་དེ་དག་རྒྱལ་བའི་ཡེ་ཤེས་དོན་དུ་རྩོམ། །འདི་ན་ས་གོང་དུ་བརྩོན་འགྲུས་རྩོམ་བྱེད་མཐུ་ཐོབ་པ། །ཁྲག་ཁྲིག་ བྱེ་བ་སྟོང་གི་བདེ་གཤེགས་མཆོད་པ་བྱེད། །ཏིང་འཛིན་ཐོབ་ནས་ཁྲག་ཁྲིག་ཞིང་ཡངས་མཁས་པས་བསྐྱོད། །ཡན་ཆད་སྨོན་ལམ་ཁྱད་པར་ཡོན་ཏན་འབྱུང་གནས་སོ། །དེ་ལྟར་ས་མཆོག་ ལྔ་པ་འདི། །ཐབས་ཀྱི་རྣམ་པ་ཁྲག་ཁྲིག་གིས། །སེམས་ཅན་གཙོ་ལ་ཡང་དག་ཏུ། །རྒྱལ་བའི་སྲས་ཀྱིས་བསྟན་པ་ཡིན། །ཤིན་ཏུ་རྒྱལ་བར་དཀའ་བ་ཞེས་བྱ་བ་སྟེ། བྱང་ཆུབ་སེམས་ དཔའི་ས་ལྔ་པའོ། །མཁས་པ་རྣམས་ཀྱིས་མཆོག་སྤྱོད་པ་རབ་ཐོབ་ནས། །རྒྱལ་སྲས་དགའ་ཞིང་མཁའ་ལས་མེ་ཏོག་ཆར་འབེབས་སོ། །ནོར་བུ་རིན་ཆེན་རྣམ་དག་འོད་གསལ་རྒྱ་ ཆེན་འབྱུང་བ་དག །བདེ་བར་གཤེགས་ལ་མངོན་འཐོར་དགེ་ཞེས་རྣམ་པར་བརྗོད། །ལྷ་རྣམས་བརྒྱ་ཕྲག་སྟོང་གྲངས་དགའ་ཞིང་བར་སྣང་ལས། །ལྷ་རྫས་ཡིད་འོང་རིན་ཆེན་ སྣ་ཚོགས་ཕྱེ་མའི་རྣམས། །བདེ་བར་གཤེགས་ལ་མངོན་འཐོར་བྱུག་པ་ཕྲེང་བ་སྤོས། །གདུགས་དང་རྒྱལ་མཚན་བ་དན་སེ་མོ་དོ་ཡང་འབུལ། །ལྷ་ཡི་དབང་པོ་དབང་སྒྱུར་ལྷ་ཚོགས་མང་ པོ་དང༌། །སྟེང་གི་ནམ་མཁའ་ལ་འཁོད་ཅིང་རིན་ཆེན་སྤྲིན་ཡངས་པ། །རྒྱལ་བ་མཆོད་པའི་དོན་དུ་བདེ་བར་གཤེགས་ལ་འཐོར། །དགའ་བའི་སེམས་ཀྱིས་རྒྱལ་སྲས་ལེགས་ཞེས་རྣམ་པར་ བརྗོད། །བར་སྣང་གནས་ལས་ལྷ་ཡི་བུ་མོ་སྟོང་གིས་ཀྱང༌། །གླུ་དབྱངས་ཡིད་འོང་རོལ་མོའི་སྒྲ་དབྱངས་སྙན་པ་ཕྱུང༌། །སྒྲ་རྣམས་ཀུན་གྱི་དབྱངས་ལས་འདི་སྐད་ཚིག་ཀྱང་བྱུང༌། ། ༄༅། །རྒྱལ་བའི་གསུང་ནི་ཡིད་འོང་ཉོན་མོངས་གདུང་བ་སེལ། །ཆོས་རྣམས་ཐམས་ཅད་སྟོང་ཞིང་དངོས་ཞི་མཚན་མ་མེད། །ནམ་མཁའི་དབྱིངས་དང་ མཚུངས་མཉམ་རྣམ་དག་རྣམ་མི་རྟོག །འགྲོ་དང་གནས་ལས་རྣམ་འདས་མ་ལུས་སྤྲོས་པ་མེད། །དེ་བཞིན་ཉིད་དུ་ཆོས་རྣམས་ཡང་དག་མཉམ་མི་རྟོག །ཆོས་རྣམས་ ཀུན་ལ་སྣང་བ་ཁོང་དུ་སུས་ཆུད་པ། །དེ་ལ་དངོས་དང་དངོས་མེད་གཡོ་བ་གང་ཡང་མེད། །སྙིང་རྗེ་བརྩེ་བས་འགྲོ་བ་དགྲོལ་ཕྱིར་བརྩོན་པ་ནི། །དེ་དང་དེ་དག་རྒྱལ་སྲས་ཆོས་ ཀྱི་སྐུ་སྐྱེས་པའོ། །མཚན་མ་ཐམས་ཅད་སྤངས་ཤིང་སྦྱིན་པའི་སྤྱད་པ་སྤྱོད། །ཚུལ་ཁྲིམས་ཤིན་ཏུ་སེམས་དམ་སྔོན་ནས་ཞི་ཞིང་དུལ། །འགྲོ་བའི་དོན་དུ་ཆོས་ཀྱི་ཡེ་ཤེས་མ་ ཉམས་བཟོད། །བརྩོན་འགྲུས་སྟོབས་དང་ལྡན་ཞིང་ཆོས་རྣམས་ཀུན་གྱིས་དབེན། །ཉོན་མོངས་བསལ་ཅིང་རྣམ་དག་བསམ་གཏན་ཚུལ་ལ་ཞུགས། །དངོས་པོ་ཐམས་ ཅད་སྔ་ནས་ཞི་ཞིང་རྣམ་པར་ཕྱེ། །ཡེ་ཤེས་སྤྱོད་དང་སྟོབས་ཕྱུག་རྟག་ཏུ་འགྲོ་དོན་བརྩོན། །རྒྱལ་སྲས་དེ་དག་སྡིག་ཞི་ཆེ་བ་ཉིད་དང་ལྡན། །དེ་སྐད་སྒྲ་དབྱངས་སྙན་པ་ སྟོང་གྲངས་བརྗོད་བྱས་ནས། །ལྷ་ཡི་བུ་མོ་མི་སྨྲ་དད་པར་ཐུབ་ལ་ལྟ། །རྡོ་རྗེའི་སྙིང་པོ་འཇིགས་མེད་ལ། །ཐར་པའི་ཟླ་བས་ཡང་སྨྲས་པ། །ས་མཆོག་ལྔ་ཡི་གོང་མ་ དེ༑ ༑རྣམ་པ་ཅི་འདྲས་འགྲུབ་པར་འགྱུར། །བྱང་ཆུབ་སེམས་དཔའ་རྡོ་རྗེ་སྙིང་པོས་སྨྲས་པ། ཀྱེ༑ རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའི་ས་ལྔ་པ་ལ་སའི་ལམ་ ཡོངས་སུ་རྫོགས་པའི་བྱང་ཆུབ་སེམས་དཔའ་དེ་ནི། བྱང་ཆུབ་སེམས་དཔའ་ས་དྲུག་པ་ལ་འཇུག་གོ །དེ་ཆོས་མཉམ་པ་ཉིད་བཅུས་འཇུག་སྟེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་མཚན་མ་མེད་པ་མཉམ་པ་ཉིད་དང༌། ཆོས་ཐམས་ཅད་མཚན་ཉིད་མེད་པ་མཉམ་པ་ཉིད་དང༌། ཆོས་ཐམས་ཅད་མི་སྐྱེ་བ་མཉམ་པ་ཉིད་དང༌། ཆོས་ཐམས་ཅད་ མ་བྱུང་བ་མཉམ་པ་ཉིད་དང༌། ཆོས་ཐམས་ཅད་དབེན་པ་མཉམ་པ་ཉིད་དང༌། ཆོས་ཐམས་ཅད་སྔ་ནས་རྣམ་པར་དག་པ་མཉམ་པ་ཉིད་དང༌། ཆོས་ཐམས་ཅད་སྤྲོས་པ་མེད་པ་མཉམ་ པ་ཉིད་དང༌། ཆོས་ཐམས་ཅད་བླང་བ་མེད་པ་དང༌། དོར་བ་མེད་པ་མཉམ་པ་ཉིད་དང༌། ཆོས་ཐམས་ཅད་སྒྱུ་མ་དང༌། རྨི་ལམ་དང༌། མིག་ཡོར་དང༌། སྒྲ་བརྙན་དང༌། ཆུའི་ཟླ་བ་དང༌། གཟུགས་བརྙན་དང༌། སྤྲུལ་པ་དང་མཚུངས་པ་མཉམ་པ་ཉིད་དང༌། ཆོས་ཐམས་ཅད་དངོས་པོ་ཡོད་པ་དང༌། དངོས་པོ་མེད་པ་དང༌། གཉིས་ཀ་མ་ཡིན་པ་མཉམ་པ་ཉིད་དེ། ཀྱེ༑ རྒྱལ་བའི་སྲས་དག །ཆོས་མཉམ་པ་ཉིད་བཅུ་པོ་འདི་དག་གིས་བྱང་ཆུབ་སེམས་དཔའི་ས་དྲུག་པ་ལ་འཇུག་གོ །དེ་ཆོས་ཐམས་ཅད་ལ་རང་བཞིན་དེ་འདྲ་བར་རབ་ཏུ་རྟོག་ཅིང་སྤྱོད་ ༄༅། །པ་དང་མཐུན་པར་སེམས་ཤིང་མི་མཐུན་པར་མི་བྱེད་པས་བྱང་ཆུབ་སེམས་དཔའི་ས་དྲུག་པ་མཐུན་པའི་བཟོད་པ་རྣོན་པོས་འཐོབ་སྟེ། འོན་ ཀྱང་ད་དུང་མི་སྐྱེ་བའི་ཆོས་ལ་བཟོད་པ་མངོན་དུ་གྱུར་པ་ནི་ཐོབ་པ་མ་ཡིན་ནོ། །དེ་ཆོས་ཐམས་ཅད་ལ་རང་བཞིན་དེ་ལྟར་རྟོག་པའི་ཚེ། དེ་བས་ཀྱང་སྙིང་རྗེ་ཆེན་པོ་སྔོན་དུ་འགྲོ་བ་ དང༑ སྙིང་རྗེ་ཆེན་པོ་ལ་དབང་བསྒྱུར་བས་སྙིང་རྗེ་ཆེན་པོ་ཡོངས་སུ་རྫོགས་པར་བྱ་བའི་ཕྱིར། འཇིག་རྟེན་འབྱུང་བ་དང༌། འཇིག་པ་ལ་རྣམ་པར་ལྟའོ། །དེ་འཇིག་རྟེན་འབྱུང་ བ་དང༌། འཇིག་པ་ལ་ལྟ་བའི་ཚེ། འདི་སྙམ་སྟེ། འཇིག་རྟེན་ཀུན་ཏུ་རྒྱུ་བའི་སྐྱེ་བ་ཇི་སྙེད་ཡོད་པ་དེ་དག་ཐམས་ཅད་བདག་ཏུ་མངོན་པར་ཤེས་པ་ལས་འབྱུང་སྟེ། བདག་ཏུ་མངོན་ པར་ཞེན་པ་དང་བྲལ་ན་འབྱུང་བ་ཡང་མེད་པར་འགྱུར་རོ། །བྱིས་པའི་བློ་ཅན་བདག་ཏུ་མངོན་པར་ཞེན་པ། མི་ཤེས་པའི་རབ་རིབ་ཀྱིས་བསྒྲིབས་པ་ཡོད་པ་དང་མེད་པ་ལ་ མངོན་པར་མོས་པ། ཚུལ་བཞིན་མ་ཡིན་པ་ཡིད་ལ་བྱེད་པ་ལ་གཞོལ་བ། ཡང་དག་པ་མ་ཡིན་པར་རབ་ཏུ་ཞུགས་པ། ལོག་པའི་རྗེས་སུ་འབྲང་བ་དེ་དག་ནི་བསོད་ནམས་དང་ བསོད་ནམས་མ་ཡིན་པའི་འདུ་བྱེད་ཉེ་བར་གསོག་སྟེ། འདུ་བྱེད་དེ་དག་གིས་ཡོངས་སུ་བསྒོས་པའི་སེམས་ཀྱི་ས་བོན་ཟག་པ་དང་བཅས་པ། ཉེ་བར་ལེན་པ་དང་བཅས་པ་ནི། མ་འོངས་པའི་སྐྱེ་བ་དང༌། རྒ་ཤི་དང༌། ཡང་སྲིད་པ་མངོན་པར་འགྲུབ་པ་འབྱུང་བ་ཉེ་བར་སོང་བ་ཡིན་ཏེ། ལས་ཀྱི་ཞིང་གི་གཞི་དང༌། མ་རིག་པའི་མུན་པ་དང༌། སྲེད་པའི་སྣུམ་ དང༑ ངའི་ང་རྒྱལ་གྱིས་བརླན་པའི་ལྟ་བའི་རྣམ་པ་དང༌། དྲ་བ་རབ་ཏུ་འཕེལ་བས་མིང་དང་གཟུགས་ཀྱི་མྱུ་གུ་འབྱུང་སྟེ། བྱུང་ནས་རྣམ་པར་འཕེལ་ལོ། །མིང་དང་གཟུགས་ཀྱི་མྱུ་གུ་ རྣམ་པར་འཕེལ་ནས། དབང་པོ་ལྔ་འབྱུང་བར་འགྱུར་རོ། །དབང་པོ་ལྔ་བྱུང་ནས། ཕན་ཚུན་འདུས་ཤིང་ཕྲད་པས་རེག་པར་འགྱུར་རོ། །རེག་པ་འདུས་པས་ཚོར་བ་འབྱུང་ངོ༌། །ཚོར་ བ་དེའི་རྗེས་སུ་མངོན་པར་སྨོན་པས་སྲེད་པ་འབྱུང་ངོ༌། །སྲེད་པ་ནི་ཉེ་བར་ལེན་པ་རྣམ་པར་འཕེལ་བར་བྱེད་དོ། །ཉེ་བར་ལེན་པ་རྣམ་པར་འཕེལ་བ་ལས་སྲིད་པ་འབྱུང་བར་འགྱུར་ རོ༑ ༑སྲིད་པ་བྱུང་ནས་ཕུང་པོ་ལྔ་པོ་འབྱུང་བར་འགྱུར་ཏེ། ཕུང་པོ་ལྔ་བྱུང་ནས་ལམ་གྱི་རྒྱུད་ལྔར་རིམ་གྱིས་དེངས་པར་འགྱུར་རོ། །དེངས་ནས་འབྲལ་བར་འགྱུར་ཏེ། དེངས་ ཤིང་བྲལ་བས་མི་དགའ་ཞིང་ཡོངས་སུ་གདུང་བར་འགྱུར་རོ། །མི་དགའ་བ་དང་ཡོངས་སུ་གདུང་བའི་རྒྱུས་མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་ མི་བདེ་བ་དང༌། འཁྲུག་པ་འབྱུང་བར་འགྱུར་ཡང་དེ་དག་ལས་སུ་ཡང་འབྱུང་བར་བྱེད་པ་མེད་དོ། །རང་བཞིན་དང་ལྷུན་གྱིས་གྲུབ་པར་འཇིག་པར་འགྱུར་ཡང་དེ་དག་ལ་འཇིག་ ༄༅། །པར་བྱེད་པ་སུ་ཡང་མེད་དོ། །ཞེས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལུགས་སུ་མཐུན་པར་རྟེན་ཅིང་འབྲེལ་བར་འབྱུང་བ་ ལ་རབ་ཏུ་རྟོག་གོ །དེ་འདི་སྙམ་དུ་སེམས་ཏེ། བདེན་པ་མངོན་པར་མི་ཤེས་པ་ནི་ཡང་དག་པར་མ་རིག་པ་སྟེ། མ་རིག་པས་བྱས་པའི་ལས་ཀྱི་རྣམ་པར་སྨིན་པ་ནི་འདུ་བྱེད་ རྣམས་སོ། །འདུ་བྱེད་ལ་གནས་པའི་སེམས་དང་པོ་ནི་རྣམ་པར་ཤེས་པའོ། །རྣམ་པར་ཤེས་པ་དང་ལྷན་ཅིག་ཏུ་སྐྱེས་པའི་ཉེ་བར་ལེན་པའི་ཕུང་པོ་བཞི་ནི་མིང་དང་གཟུགས་ སོ༑ ༑མིང་དང་གཟུགས་རྣམ་པར་འཕེལ་བ་ནི་སྐྱེ་མཆེད་དྲུག་གོ །དབང་པོ་དང་ཡུལ་དང་རྣམ་པར་ཤེས་པ་གསུམ་ཕྲད་པ་ཟག་པ་དང་བཅས་པ་ནི་རེག་པའོ། །རེག་པའི་ རྗེས་ལས་སྐྱེས་པ་ནི་ཚོར་བའོ། །ཚོར་བ་ལ་ཆགས་པ་ནི་སྲེད་པའོ། །སྲེད་པ་རྣམ་པར་འཕེལ་བ་ནི་ཉེ་བར་ལེན་པའོ། །ཉེ་བར་ལེན་པ་ལས་བྱུང་བའི་ལས་ཟག་པ་དང་བཅས་ པ་ནི་སྲིད་པའོ། །ལས་དང་རྒྱུ་མཐུན་པའི་འབྲས་བུ་ནི་སྐྱེ་བའོ། །སྐྱེ་བ་ནི་ཕུང་པོ་འབྱུང་བའོ། །ཕུང་པོ་ཡོངས་སུ་སྨིན་པ་ནི་རྒ་བའོ། །རྒས་ནས་ཕུང་པོ་འཇིག་པ་ནི་འཆི་ བའོ༑ ༑འཆི་ཞིང་འབྲལ་བའི་ཚེ་མྱོས་ཤིང་ཆགས་པར་འགྱུར་བའི་སེམས་ལ་ཡོངས་སུ་གདུང་བ་ནི་མྱ་ངན་ཏོ། །མྱ་ངན་ལས་བྱུང་བའི་ཚིག་ཏུ་བརྗོད་པ་ནི་སྨྲེ་སྔགས་འདོན་ པའོ༑ ༑དབང་པོ་ལྔའི་ཉམས་སུ་བབ་པ་ནི་སྡུག་བསྔལ་ལོ། །ཡིད་ཀྱིས་ལྟ་བའི་ཉམས་སུ་བབ་ནི་ཡིད་མི་བདེ་བའོ། །སྡུག་བསྔལ་དང་ཡིད་མི་བདེ་བ་མང་པོ་བྱུང་བ་ནི་འཁྲུག་ པ་སྟེ༑ དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་དང༌། སྡུག་བསྔལ་གྱི་སྡོང་པོ་འབའ་ཞིག་བྱེད་པ་པོ་དང༌། ཚོར་བ་པོ་མེད་པ་མངོན་པར་གྲུབ་པར་འགྱུར་རོ། །དེ་འདི་སྙམ་དུ་སེམས་ ཏེ༑ བྱེད་པ་པོ་ལ་མངོན་པར་ཆགས་པས་ལས་རྣམས་ཡོད་པར་གྱུར་ཏེ། གང་ན་བྱེད་པ་པོ་མེད་པ་དེ་ན་དོན་དམ་པར་ན་ལས་ཀྱང་མི་དམིགས་སོ། །དེ་འདི་སྙམ་དུ་སེམས་ཏེ། འདི་ལྟར་ཁམས་གསུམ་པ་འདི་ནི་སེམས་ཙམ་སྟེ། གང་འདི་སྲིད་པའི་ཡན་ལག་བཅུ་གཉིས་དེ་བཞིན་གཤེགས་པས་རབ་ཏུ་ཕྱེ་སྟེ་བཀའ་སྩལ་བ་དེ་དག་ཐམས་ཅད་ ཀྱང་སེམས་གཅིག་ལ་གནས་པ་དག་གོ །དེ་ཅིའི་ཕྱིར་ཞེ་ན། དངོས་པོ་གང་ལ་འདོད་ཆགས་དང་ལྡན་པའི་སེམས་སྐྱེས་པ་དེ་ནི་རྣམ་པར་ཤེས་པའོ། །དངོས་པོ་ནི་འདུ་བྱེད་དོ། ། འདུ་བྱེད་ལ་མགོ་རྨོངས་པ་ནི་མ་རིག་པའོ། །མ་རིག་པའི་སེམས་དང་ལྷན་ཅིག་སྐྱེས་པ་ནི་མིང་དང་གཟུགས་སོ། །མིང་དང་གཟུགས་རྣམ་པར་འཕེལ་བ་ནི་དྲུག་གི་སྐྱེ་མཆེད་དོ།། དགྲུ་གི་སྐྱེ་མཆོད་དང་འབྲེལ་བ་ནི་རེག་པའོ། །རེག་པ་དང་ལྷན་ཅིག་སྐྱེས་པ་ནི་ཚོར་བའོ། །ཚོར་བས་མི་ངོམས་པ་ནི་སྲེད་པའོ། །སྲེད་པས་མནར་ཏེ་སྡུག་ཅིང་མི་གཏོང་བ་ནི་ཉེ་ ༄༅། །བར་ལེན་པའོ། །སྲིད་པའི་ཡན་ལག་འབྱུང་བ་འདི་དག་ནི་སྲིད་པའོ། །སྲིད་པ་འབྱུང་བ་ནི་སྐྱེ་བའོ། །སྐྱེ་བ་ཡོངས་སུ་སྨིན་པ་ནི་རྒ་བའོ། །རྒ་བ་ དང་བྲལ་བ་ནི་འཆི་བའོ། །དེ་ལ་མ་རིག་པ་ནི་བྱ་བ་གཉིས་སུ་ཉེ་བར་གནས་པ་ཡིན་ཏེ། སེམས་ཅན་རྣམས་ཀྱང་དམིགས་པ་ལ་རྨོངས་པར་བྱེད་དོ། །འདུ་བྱེད་མངོན་པར་ བསྒྲུབ་པའི་རྒྱུ་ཡང་འབྱིན་ཏོ། །འདུ་བྱེད་རྣམས་ཀྱང་བྱ་བ་གཉིས་སུ་ཉེ་བར་གནས་པ་ཡིན་ཏེ། མ་འོངས་པའི་རྣམ་པར་སྨིན་པ་ཡང་མངོན་པར་འགྲུབ་པར་བྱེད་དོ། །རྣམ་ པར་ཤེས་པ་མངོན་པར་འགྲུབ་པའི་རྒྱུ་ཡང་འབྱིན་ཏོ། །རྣམ་པར་ཤེས་པའང་བྱ་བ་གཉིས་སུ་ཉེ་བར་གནས་པ་ཡིན་ཏེ། སྲིད་པའི་ཉིང་གི་མཚམས་ཀྱང་སྦྱོར་རོ། །མིང་ དང་གཟུགས་མངོན་པར་འགྲུབ་པའི་རྒྱུ་ཡང་འབྱིན་ཏོ། །མིང་དང་གཟུགས་ཀྱང་བྱ་བ་གཉིས་སུ་ཉེ་བར་གནས་པ་ཡིན་ཏེ། ཕན་ཚུན་ཉེ་བར་རྟོན་པར་ཡང་བྱེད་དོ། །སྐྱེ་མཆེད་ དྲུག་མངོན་པར་འགྲུབ་པའི་རྒྱུ་ཡང་འབྱིན་ཏོ། །དྲུག་གི་སྐྱེ་མཆེད་ཀྱང་བྱ་བ་གཉིས་སུ་ཉེ་བར་གནས་པ་ཡིན་ཏེ། རང་གི་ཡུལ་རྣམ་པར་ཕྱེ་བ་ཡང་སྟོན་ཏོ། །རེག་པ་ མངོན་པར་འགྲུབ་པའི་རྒྱུ་ཡང་འབྱིན་ཏོ། །རེག་པ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། དམིགས་པ་ལ་རེག་པར་ཡང་བྱེད་དོ། །ཚོར་བ་མངོན་པར་འགྲུབ་ པའི་རྒྱུ་ཡང་འབྱིན་ཏོ། །ཚོར་བ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། ཡིད་དུ་འོང་བ་དང༌། ཡིད་དུ་མི་འོང་བ་དང༌། གཉིས་ཀ་མ་ཡིན་པར་ཚོར་བ་ཡང་སྐྱེད་དོ། ། སྲེད་པ་མངོན་པར་འགྲུབ་པའི་རྒྱུ་ཡང་འབྱིན་ཏོ། །སྲེད་པ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། ཆགས་པར་འགྱུར་བའི་དངོས་པོ་ལ་མངོན་པར་ཆགས་པར་ཡང་ བྱེད་དོ། །ཉེ་བར་ལེན་པ་མངོན་པར་འགྲུབ་པའི་རྒྱུ་ཡང་འབྱིན་ཏོ། །ཉེ་བར་ལེན་པ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། ཀུན་ནས་ཉོན་མོངས་པས་འཆིང་བར་ ཡང་བྱེད་དོ། །སྲིད་པ་མངོན་པར་འབྱུང་བའི་རྒྱུ་ཡང་འབྱིན་ཏོ། །སྲིད་པ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། སྲིད་པའི་རྒྱུད་གཞན་དུ་ཡང་གནས་པར་བྱེད་དོ། །སྐྱེ་ བ་མངོན་པར་འགྲུབ་པའི་རྒྱུ་ཡང་འབྱིན་ཏོ། །སྐྱེ་བ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། ཕུང་པོ་འབྱུང་བར་ཡང་བྱེད་དོ། །རྒ་བ་མངོན་པར་འགྲུབ་པའི་རྒྱུ་ཡང་ འབྱིན་ཏོ། །རྒ་བ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། དབང་པོ་ཡོངས་སུ་འགྱུར་བར་ཡང་བྱེད་དོ། །འཆི་བར་འགྱུར་བའི་རྒྱུ་ཡང་འབྱིན་ཏོ། །འཆི་བ་ཡང་བྱ་བ་ གཉིས་སུ་ཉེ་བར་གནས་པ་ཡིན་ཏེ། འདུ་བྱེད་འཇིག་པར་ཡང་བྱེད་དོ། །ཡོངས་སུ་མ་ཤེས་པ་རྒྱུན་མི་འཆད་པའི་རྒྱུ་ཡང་འབྱིན་ཏོ། །དེ་ལ་མ་རིག་པའི་རྐྱེན་གྱིས་འདུ་བྱེད་ ༄༅། །རྣམས་སོ་ཞེས་བྱ་བ་ནི། མ་རིག་པའི་རྐྱེན་གྱིས་འདུ་བྱེད་རྣམས་རྒྱུན་མི་འཆད་ཅིང་རྟོན་པའོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པའོ་ཞེས་བྱ་ བ་ནི༑ འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་རྒྱུན་མི་འཆད་ཅིང་རྟོན་པའོ། །རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་ནི། རྣམ་པར་ཤེས་པའི་རྐྱེན་ གྱིས་མིང་དང་གཟུགས་རྒྱུན་མི་འཆད་ཅིང་རྟོན་པའོ། །མིང་དང་གཟུགས་ཀྱི་རྐྱེན་གྱིས་དྲུག་གི་སྐྱེ་མཆེད་ཅེས་བྱ་བ་ནི། མིང་དང་གཟུགས་ཀྱི་རྐྱེན་གྱིས་དྲུག་གི་སྐྱེ་མཆེད་རྒྱུན་མི་ འཆད་ཅིང་རྟོན་པའོ། །དྲུག་གི་སྐྱེ་མཆེད་ཀྱི་རྐྱེན་གྱིས་རེག་པའོ་ཞེས་བྱ་བ་ནི། དྲུག་གི་སྐྱེ་མཆེད་ཀྱི་རྐྱེན་གྱིས་རེག་པ་རྒྱུན་མི་འཆད་ཅིང་རྟོན་པའོ། །རེག་པའི་རྐྱེན་གྱིས་ ཚོར་བའོ་ཞེས་བྱ་བ་ནི། རེག་པའི་རྐྱེན་གྱིས་ཚོར་བ་རྒྱུན་མི་འཆད་ཅིང་རྟོན་པའོ། །ཚོར་བའི་རྐྱེན་གྱིས་སྲེད་པའོ་ཞེས་བྱ་བ་ནི། ཚོར་བའི་རྐྱེན་གྱིས་སྲེད་པ་རྒྱུན་མི་འཆད་ ཅིང་རྟོན་པའོ། །སྲེད་པའི་རྐྱེན་གྱིས་ཉེ་བར་ལེན་པའོ་ཞེས་བྱ་བ་ནི། སྲེད་པའི་རྐྱེན་གྱིས་ཉེ་བར་ལེན་པ་རྒྱུན་མི་འཆད་ཅིང་རྟོན་པའོ། །ཉེ་བར་ལེན་པའི་རྐྱེན་གྱིས་སྲེད་པའོ་ཞེས་ བྱ་བ་ནི། ཉེ་བར་ལེན་པའི་རྐྱེན་གྱིས་སྲིད་པ་རྒྱུན་མི་འཆད་ཅིང་རྟོན་པའོ། །སྲིད་པའི་རྐྱེན་གྱིས་སྐྱེ་བའོ་ཞེས་བྱ་བ་ནི། སྲིད་པའི་རྐྱེན་གྱིས་སྐྱེ་བ་རྒྱུན་མི་འཆད་ཅིང་རྟོན་ པའོ༑ ༑སྐྱེ་བའི་རྐྱེན་གྱིས་རྒ་ཤིའོ་ཞེས་བྱ་བ་ནི། སྐྱེ་བའི་རྐྱེན་གྱིས་རྒ་ཤི་རྒྱུན་མི་འཆད་ཅིང་རྟོན་པའོ། །མ་རིག་པ་འགགས་པས་འདུ་བྱེད་རྣམས་འགག་གོ་ཞེས་བྱ་བ་དེ་ནི། མ་ རིག་པའི་རྐྱེན་མེད་པས་འདུ་བྱེད་རྣམས་ཉེ་བར་ཞི་ཞིང་རྟོན་པ་མེད་པའོ། །འདུ་བྱེད་འགགས་པས་རྣམ་པར་ཤེས་པ་འགག་གོ་ཞེས་བྱ་བ་ནི། འདུ་བྱེད་ཀྱི་རྐྱེན་མེད་པས་ རྣམ་པར་ཤེས་པ་ཉེ་བར་ཞི་ཞིང་རྟོན་པ་མེད་པའོ། །རྣམ་པར་ཤེས་པ་འགགས་པས་མིང་དང་གཟུགས་འགག་གོ་ཞེས་བྱ་བ་ནི། རྣམ་པར་ཤེས་པའི་རྐྱེན་མེད་པས་མིང་དང་ གཟུགས་ཉེ་བར་ཞི་ཞིང་རྟོན་པ་མེད་པའོ། །མིང་དང་གཟུགས་འགགས་པས་དྲུག་གི་སྐྱེ་མཆེད་འགག་གོ་ཞེས་བྱ་བ་ནི། མིང་དང་གཟུགས་ཀྱི་རྐྱེན་མེད་པས་དྲུག་གི་སྐྱེ་ མཆེད་ཉེ་བར་ཞི་ཞིང་རྟོན་པ་མེད་པའོ། །དྲུག་གི་སྐྱེ་མཆེད་འགགས་པས་རེག་པ་འགག་གོ་ཞེས་བྱ་བ་ནི། དྲུག་གི་སྐྱེ་མཆེད་ཀྱི་རྐྱེན་མེད་པས་རེག་པ་ཉེ་བར་ཞི་ཞིང་རྟོན་པ་ མེད་པའོ། །རེག་པ་འགགས་པས་ཚོར་བ་འགག་གོ་ཞེས་བྱ་བ་ནི། རེག་པའི་རྐྱེན་མེད་པས་ཚོར་བ་ཉེ་བར་ཞི་ཞིང་རྟོན་པ་མེད་པའོ། །ཚོར་བ་འགགས་པས་སྲེད་པ་འགག་གོ་ ཞེས་བྱ་བ་ནི། ཚོར་བའི་རྐྱེན་མེད་པས་སྲེད་པ་ཉེ་བར་ཞི་ཞིང་རྟོན་པ་མེད་པའོ། །སྲེད་པ་འགགས་པས་ལེན་པ་འགག་གོ་ཞེས་བྱ་བ་ནི། སྲེད་པའི་རྐྱེན་མེད་པས་ལེན་པ་ཉེ་ ༄༅། །བར་ཞི་ཞིང་རྟོན་པ་མེད་པའོ། །ཉེ་བར་ལེན་པ་འགགས་པས་སྲིད་པ་འགག་གོ་ཞེས་བྱ་བ་ནི། ཉེ་བར་ལེན་པའི་རྐྱེན་མེད་པས་སྲིད་པ་ཉེ་བར་ཞི་ཞིང་ རྟོན་པ་མེད་པའོ། །སྲིད་པ་འགགས་པས་སྐྱེ་བ་འགག་གོ་ཞེས་བྱ་བ་ནི། སྲིད་པའི་རྐྱེན་མེད་པས་སྐྱེ་བ་ཉེ་བར་ཞི་ཞིང་རྟོན་པ་མེད་པའོ། །སྐྱེ་བ་འགགས་པས་རྒ་ཤི་འགག་ གོ་ཞེས་བྱ་བ་ནི། སྐྱེ་བའི་རྐྱེན་མེད་པས་རྒ་ཤི་ཉེ་བར་ཞི་ཞིང་རྟོན་པ་མེད་པའོ། །དེ་ལ་མ་རིག་པ་དང༌། སྲེད་པ་དང༌། ཉེ་བར་ལེན་པ་ནི། ཉོན་མོངས་པའི་ལམ་གྱི་རྒྱུན་མི་འཆད་ པའོ༑ ༑འདུ་བྱེད་དང༌། སྲིད་པ་ནི། ལས་ཀྱི་ལམ་གྱི་རྒྱུན་མི་འཆད་པའོ། །ལྷག་མ་རྣམས་ནི། སྡུག་བསྔལ་གྱི་ལམ་གྱི་རྒྱུན་མི་འཆད་པའོ། །རབ་ཏུ་རྣམ་པར་ཕྱེ་བས་སྔོན་ གྱི་མཐའ་དང༌། ཕྱི་མའི་མཐའ་འགགས་པས་ལམ་གྱི་རྒྱུན་མི་འཆད་པའོ། །དེ་ལྟར་ལམ་འདི་གསུམ་ནི་བདག་མེད་ཅིང་བདག་དང་བདག་གི་དང་བྲལ་བར་འབྱུང་ཞིང་ འཇིག་པ་སྟེ། རང་བཞིན་གྱིས་མདུད་ཁྱིམ་ལྟ་བུའོ། །དེ་ལྟར་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་འདི་ནི། སྔོན་གྱི་མཐའ་ལ་བལྟས་པའོ། །རྣམ་པར་ཤེས་ པ་དང༌། མིང་དང་གཟུགས་དང༌། དྲུག་གི་སྐྱེ་མཆེད་དང༌། རེག་པ་དང༌། ཚོར་བ་འདི་དག་ནི། ད་ལྟར་བྱུང་བ་ལ་བལྟས་པའོ། །སྲེད་པ་དང༌། ཉེ་བར་ལེན་པ་དང༌། སྲིད་པ་དང༌། སྐྱེ་བ་ཞེས་བྱ་བ་འདི་ནི། ཕྱི་མའི་མཐའ་ལ་བལྟས་པ་སྟེ། དེ་ཕན་ཆད་དུ་ཡང་དེ་དག་རྒྱུན་དུ་འབྱུང་ངོ༌། །མ་རིག་པ་འགགས་པས་འདུ་བྱེད་རྣམས་འགག་ཅེས་བྱ་བ་འདི་ནི་བལྟ་ བ་རྒྱུན་ཆད་པ་སྟེ། ལྷག་མ་རྣམས་ཀྱང་དེ་བཞིན་ནོ། །ཡང་འདི་ལྟར་སྲིད་པའི་ཡན་ལག་བཅུ་གཉིས་པོ་འདི་དག་གི་རྒྱུས་སྡུག་བསྔལ་གསུམ་འབྱུང་སྟེ། དེ་ལ་མ་རིག་པ་དང༌། འདུ་བྱེད་དང༌། རྣམ་པར་ཤེས་པ་དང༌། མིང་དང་གཟུགས་དང༌། དྲུག་གི་སྐྱེ་མཆེད་ཅེས་བྱ་བ་འདི་ནི་འདུ་བྱེད་ཀྱི་སྡུག་བསྔལ་ལོ། །རེག་པ་དང༌། ཚོར་བ་ཞེས་བྱ་བ་འདི་ནི་སྡུག་བསྔལ་གྱི་ ཡང་སྡུག་བསྔལ་ལོ། །སྲེད་པ་དང༌། ཉེ་བར་ལེན་པ་དང༌། སྲིད་པ་དང༌། སྐྱེ་བ་ནས་འཁྲུག་པ་ཞེས་བྱ་བའི་བར་འདི་ནི་འགྱུར་བའི་སྡུག་བསྔལ་ལོ། །མ་རིག་བ་འགགས་པས་འདུ་བྱེད་ རྣམས་འགག་ཅེས་བྱ་བ་འདི་ནི་སྡུག་བསྔལ་གསུམ་གྱི་རྒྱུན་འཆད་པའོ། །མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་ནི་འདུ་བྱེད་རྣམས་རྒྱུ་དང་རྐྱེན་ལས་བྱུང་བ་སྟེ་། ལྷག་མ་རྣམས་ཀྱང་དེ་བཞིན་ནོ། །མ་རིག་པ་འགགས་པས་འདུ་བྱེད་འགག་ཅེས་བྱ་བ་ནི་འདུ་བྱེད་རྣམས་མེད་པ་སྟེ། ལྷག་མ་རྣམས་ཀྱང་དེ་བཞིན་ནོ། །མ་རིག་པའི་རྐྱེན་གྱིས་ འདུ་བྱེད་རྣམས་ཞེས་བྱ་བ་ནི་སྐྱེ་བ་རྣམ་པར་འབྲེལ་བ་སྟེ། ལྷག་མ་རྣམས་ཀྱང་དེ་བཞིན་ནོ། །མ་རིག་པ་འགགས་པས་འདུ་བྱེད་འགག་ཅེས་བྱ་བ་ནི་འཇིག་པ་རྣམ་པར་འབྲེལ་ ༄༅། །བ་སྟེ། ལྷག་མ་རྣམས་ཀྱང་དེ་བཞིན་ནོ། །མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་ནི་སྲིད་པ་ལུགས་སུ་མཐུན་པར་བརྟག་པ་སྟེ། ལྷག་ མ་རྣམས་ཀྱང་དེ་བཞིན་ནོ། །མ་རིག་པ་འགགས་པས་འདུ་བྱེད་འགག་ཅེས་བྱ་ནི་ཟད་པ་དང༌། འཇིག་པའི་ལུགས་སུ་མཐུན་པར་བརྟག་པ་སྟེ། ལྷག་མ་རྣམས་ཀྱང་དེ་ བཞིན་ནོ་ཞེས་དེ་ལྟར་རྟེན་ཅིང་འབྲེལ་བར་འབྱུང་བ་ལ་ལུགས་སུ་མཐུན་པ་དང༌། མི་མཐུན་པའི་ཚུལ་དུ་རབ་ཏུ་རྟོག་སྟེ། འདི་ལྟར་སྲིད་པའི་ཡན་ལག་རྗེས་སུ་འབྲེལ་པ་དང༌། སེམས་གཅིག་ཏུ་ཡང་དག་པར་འདུ་བ་དང༌། རང་གི་ལས་མ་འདྲེས་པ་དང༌། ཆེད་དུ་བྱེད་པ་མེད་པ་དང༌། ལམ་གསུམ་གྱི་རྒྱུད་དུ་འབྲང་བ་དང༌། སྔོན་གྱི་མཐའ་དང༌། ད་ ལྟར་བྱུང་བ་དང༌། ཕྱི་མའི་མཐའ་ལ་བལྟ་བ་དང༌། སྡུག་བསྔལ་གསུམ་འབྱུང་བ་དང༌། རྒྱུ་དང་རྐྱེན་ལས་བྱུང་བ་དང༌། སྐྱེ་བ་དང་འཇིག་པ་རྣམ་པར་འབྲེལ་བ་དང༌། སྲིད་ པའི་ལུགས་སུ་མཐུན་པ་དང༌། ཟད་པར་འགྱུར་བར་རབ་ཏུ་རྟོག་པའོ། །དེ་དེ་ལྟར་རྟེན་ཅིང་འབྲེལ་བར་འབྱུང་བ་ལ་རྣམ་པ་བཅུར་རབ་ཏུ་རྟོག་ཅིང་བདག་མེད་པ་དང༌། སྲོག་མེད་པ་དང༌། གང་ཟག་མེད་པ་དང༌། ངོ་བོ་ཉིད་ཀྱིས་སྟོང་པ་དང༌། རང་བཞིན་གྱིས་བྱེད་པ་པོ་དང༌། ཚོར་བ་པོ་མེད་པར་རབ་ཏུ་རྟོག་པའི་ཚེ། སྟོང་པ་ཉིད་ཀྱི་རྣམ་པར་ ཐར་པའི་སྒོ་སྐྱེས་པ་ཡིན། སྲིད་པའི་ཡན་ལག་འདི་དག་གི་རང་བཞིན་འགགས་ཤིང་རྣམ་པར་ཐར་པ་ལ་ཤིན་ཏུ་ཉེ་བར་གནས་པས་ཆོས་ཀྱི་མཚན་མ་གང་ཡང་མི་སྐྱེ་སྟེ། དེས་ དེའི་མཚན་མ་མེད་པའི་རྣམ་པར་ཐར་པའི་སྒོ་སྐྱེས་པ་ཡིན། དེ་ལྟར་དེ་སྟོང་པ་ཉིད་དང༌། མཚན་མ་མེད་པ་ལ་ཞུགས་པས་སྙིང་རྗེ་ཆེན་པོ་སྔོན་དུ་གཏོང་ཞིང་སེམས་ཅན་ཡོངས་ སུ་སྨིན་པར་བྱ་བ་མ་གཏོགས་པར་འདོད་པ་གང་ཡང་མི་སྐྱེ་སྟེ། དེས་དེའི་སྨོན་པ་མེད་པའི་རྣམ་པར་ཐར་པའི་སྒོ་སྐྱེས་པ་ཡིན། དེ་རྣམ་པར་ཐར་པའི་སྒོ་གསུམ་པོ་འདི་དག་སྒོམ་ པས༑ བདག་དང་ཕ་རོལ་གྱི་འདུ་ཤེས་དང་བྲལ་བ་དང༌། བྱེད་པ་པོ་དང༌། ཚོར་བ་པོའི་འདུ་ཤེས་དང་བྲལ་བ་དང༌། ཡོད་པ་དང༌། མེད་པའི་འདུ་ཤེས་དང་བྲལ་བས་བྱང་ཆུབ་ཀྱི་ ཡན་ལག་ཡོངས་སུ་མ་ཚོགས་པ་རྣམས་ཡོངས་སུ་རྫོགས་པར་བྱ་བའི་ཕྱིར་སྙིང་རྗེ་ཆེན་པོ་སྔོན་དུ་བཏང་སྟེ། དེ་བས་ཀྱང་ཤིན་ཏུ་བརྩོན་པར་བྱེད་དོ། །དེ་འདི་སྙམ་དུ་སེམས་ཏེ། འདུ་བ་ཡོད་པས་ནི་འདུས་བྱས་འཕེལ་བར་འགྱུར་རོ། །འདུ་བ་དང་བྲལ་བས་ནི་འཕེལ་བ་མེད་དོ། །རྒྱུ་རྐྱེན་དང་ལྡན་པས་ནི་འདུ་བྱེད་འཕེལ་བར་འགྱུར་རོ། །རྒྱུ་རྐྱེན་དང་མི་ ལྡན་པས་ནི་འཕེལ་བ་མེད་དོ། །དེ་ལྟ་བས་ན་བདག་གིས་དེ་ལྟ་བུ་འདུས་བྱས་ཉེས་པ་མང་པོའི་སྐྱོན་ཅན་ཤེས་པར་བྱ་སྟེ། འདུ་བ་དང༌། རྒྱུ་རྐྱེན་དང་ལྡན་པ་འདི་དག་རྒྱུན་གཅད་པར་ ༄༅། །བྱའོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་འདུ་བྱེད་རྣམས་ཤིན་ཏུ་ཞི་བའང་མངོན་དུ་མི་བྱའོ་ཞེས་ཏེ། ཀྱེ༑རྒྱལ་བའི་སྲས་དག །དེ་དེ་ལྟར་ འདུ་བྱེད་ཀྱི་རྣམ་པ་དེ་ལྟར་ཉེས་པ་མང་པོའི་སྐྱོན་ཅན། སྙིང་པོ་དང༌། རང་བཞིན་མེད་པ། སྐྱེ་བ་མེད་པ། འགག་པ་མེད་པའི་རང་བཞིན་དུ་རབ་ཏུ་རྟོག་པ་དང༌། སྙིང་རྗེ་ ཆེན་པོར་རབ་ཏུ་སྒྲུབ་པ་དང༌། སེམས་ཅན་ཡོངས་སུ་མི་གཏོང་བས་ཆགས་པ་མེད་པའི་ཡེ་ཤེས་མངོན་སུམ་ཞེས་བྱ་བ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་སྣང་བའི་ ཚུལ་དུ་མངོན་སུམ་དུ་འགྱུར་རོ། །དེ་དེ་ལྟ་བུ་ཡེ་ཤེས་དང་ལྡན་ཞིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པས་སྣང་བར་གྱུར་ནས་ཀྱང༌། བྱང་ཆུབ་ཀྱི་ཡན་ལག་ཡོངས་སུ་ སྡུད་པའི་རྐྱེན་ཉེ་བར་གསོག་ཅིང་ཡང་དག་པར་སྡུད་དོ། །འདུས་བྱས་དང་འགྲོགས་པར་ཡང་མི་གནས་སོ། །འདུ་བྱེད་རྣམས་རང་བཞིན་གྱིས་ཞི་བའང་རབ་ཏུ་རྟོག་གོ །འོན་ ཀྱང་བྱང་ཆུབ་ཀྱི་ཡན་ལག་རྣམས་མ་རྫོགས་པའི་ཕྱིར་དེ་ལ་མི་གནས་ཏེ། དེ་བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་ཚེ། འཇུག་པ་སྟོང་པ་ཞེས་བྱ་བའི་ ཏིང་ངེ་འཛིན་སྐྱེ་བར་འགྱུར་རོ། །རང་བཞིན་སྟོང་པ་ཉིད་དང༌། དོན་དམ་པ་སྟོང་པ་ཉིད་དང༌། ཆེན་པོ་སྟོང་པ་ཉིད་དང༌། འདུ་བ་སྟོང་པ་ཉིད་དང༌། མངོན་པར་སྒྲུབ་པ་སྟོང་པ་ ཉིད་དང༌། ཡང་དག་པ་ཇི་ལྟ་བ་བཞིན་དུ་རྣམ་པར་རྟོག་པའི་སྟོང་པ་ཉིད་དང༌། ལྟོས་པ་སྟོང་པ་ཉིད་དང༌། ཐ་དད་པ་དང༌། ཐ་དད་པ་མེད་པ་སྟོང་པ་ཉིད་ཅེས་བྱ་བའི་ཏིང་ངེ་འཛིན་ཀྱང་སྐྱེ་ བར་འགྱུར་ཏེ། དེ་དག་ལ་སོགས་པ་སྟོང་པ་ཉིད་ཀྱི་སྒོའི་ཏིང་ངེ་འཛིན་བརྒྱ་སྟོང་ཕྲག་བཅུ་དེ་ལ་མངོན་སུམ་དུ་འགྱུར་རོ། །དེ་བཞིན་དུ་མཚན་མ་མེད་པའི་སྒོའི་ཏིང་ངེ་འཛིན་བརྒྱ་སྟོང་ ཕྲག་བཅུ་དང༌། སྨོན་པ་མེད་པའི་སྒོའི་ཏིང་ངེ་འཛིན་བརྒྱ་སྟོང་ཕྲག་བཅུ་མངོན་སུམ་དུ་འགྱུར་རོ། །དེ་ལྟར་བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་བྱང་ཆུབ་སེམས་ དཔའ་དེ་ཕྱིར་ཞིང་མི་ཕྱེད་པའི་བསམ་པ་ཡོངས་སུ་རྫོགས་པ་འཐོབ་བོ། །ངེས་པའི་བསམ་པ་དང༌། དགེ་བའི་བསམ་པ་དང༌། ཟབ་པའི་བསམ་པ་དང༌། ཕྱིར་མི་ལྡོག་པའི་བསམ་པ་ པ་དང༌། རྒྱུན་མི་འཆད་པའི་བསམ་པ་དང༌། དྲི་མ་མེད་པའི་བསམ་པ་དང༌། མཐའ་ཡས་པའི་བསམ་པ་དང༌། ཡེ་ཤེས་ལ་མངོན་པར་མོས་པའི་བསམ་པ་དང༌། ཐབས་དང་ཤེས་ རབ་ཏུ་ལྡན་པའི་བསམ་པ་ཡོངས་སུ་རྫོགས་པ་འཐོབ་སྟེ། བྱང་ཆུབ་སེམས་དཔའི་བསམ་པ་འདི་བཅུ་ནི་དེ་བཞིན་གཤེགས་པའི་བྱང་ཆུབ་ཀྱི་རྗེས་སུ་སོང་བ་ཡིན། ཕས་ཀྱི་རྒོལ་ བ་ཐམས་ཅད་ཀྱིས་ཕྱིར་མི་ལྡོག་པ་ཡིན། ཡེ་ཤེས་ཀྱི་ས་ལ་ཡང་དག་པར་གཞོལ་བ་ཡིན། ཉན་ཐོས་དང་རང་སངས་རྒྱས་ཀྱི་ས་ལས་རྣམ་པར་ལོག་པ་ཡིན། སངས་རྒྱས་ཀྱི་ཡེ་ ༄༅། །ཤེས་མངོན་དུ་བྱ་བ་ལ་ཤིན་ཏུ་ངེས་པ་ཡིན། བདུད་དང་ཉོན་མོངས་པ་ཀུན་ནས་རྒྱུ་བ་ཐམས་ཅད་ཀྱིས་མི་འཕྲོགས་པ་ཡིན། བྱང་ཆུབ་སེམས་དཔའི་ སྣང་བ་ལ་ཤིན་ཏུ་གནས་པ་ཡིན། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའི་ཆོས་ཡང་དག་པར་སྤྱད་པ་ཡོངས་སུ་བསྒོམས་པ་ཡིན། ཐབས་དང་ཤེས་རབ་ དང་ཡེ་ཤེས་རྣམ་པར་དཔྱད་པ་དང་ལྡན་པ་ཡིན། བྱང་ཆུབ་ཀྱི་ཕྱོགས་ཀྱི་ཆོས་མངོན་པར་བསྒྲུབ་པ་དང་རྣམ་པར་འདྲེས་པ་ཡིན། དེ་ལྟར་དེ་བྱང་ཆུབ་སེམས་དཔའི་ས་མངོན་ སུམ་འདི་ལ་གནས་པའི་ཚེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་ཤས་ཆེ་བ་ཡིན། ཆོས་དེ་དག་ལ་ཚུལ་བཞིན་དུ་མཐུན་པར་བྱེད་ཅིང་མི་མཐུན་པར་མི་བྱེད་པས། མཐུན་པའི་བཟོད་པ་གསུམ་པ་རབ་ཏུ་རྣོ་བ་རབ་ཏུ་སྐྱེས་པ་ཡིན། དེ་ལྟར་དེ་བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་ཚེ། དེའི་ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་ཏེ། ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང༌། སངས་རྒྱས་སྟོང་ ཕྲག་མང་པོ་དང༌། སངས་རྒྱས་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་མང་པོ་དང༌། སངས་རྒྱས་ཁྲག་ཁྲིག་ བརྒྱ་ཕྲག་མང་པོ་དང༌། སངས་རྒྱས་ཁྲག་ཁྲིག་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས། བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་ སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང༌། བསོད་སྙོམས་དང༌། གཟིམས་ཆ་དང༌། སྙུན་གྱི་རྐྱེན་སྨན་དང༌། ཡོ་བྱད་དག་ཀྱང་འབུལ་ཞིང་བྱང་ཆུབ་སེམས་ དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་ཚོགས་རྣམས་ལ་ཡང་ཡང་དག་པར་མཆོད་པ་བྱེད་དེ། དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་བསྙེན་བཀུར་བྱེད་ཅིང་རིམ་གྲོ་དང༌། བཀུར་སྟིས་ནན་ཏན་དུ་ཆོས་ཉན་ཅིང་ལེན་ཏོ། །འཛིན་ཏོ། །ཐོས་ནས་ཀྱང་ཡང་དག་པ་ཇི་ལྟ་བ་བཞིན་དུ་སྙོམས་པར་འཇུག་པ་དང༌། ཤེས་རབ་དང་ཡེ་ཤེས་ཀྱི་སྣང་བས་ རབ་ཏུ་བརྩོན་པར་བྱེད་དོ། །ནན་ཏན་གྱིས་ཡོངས་སུ་འཛིན་པས་དེ་སྔོན་པས་ཀྱང་དེ་བཞིན་གཤེགས་པའི་ཆོས་ཀྱི་མཛོད་རབ་ཏུ་ཐོབ་པ་ཡིན། དེ་ལྟར་དེ་བྱང་ཆུབ་སེམས་ ༄༅། །དཔའི་ས་མངོན་སུམ་འདི་ལ་གནས་པའི་ཚེ། དགེ་བའི་རྩ་བ་དེ་དག་ཀྱང་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་ཕྲག་དུ་མ་ དང༑ བསྐལ་པ་ཁྲག་ཁྲིག་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་སྔོན་པས་ཀྱང་ཆེས་བྱང་བ་ དང༑ ཆེས་འོད་གསལ་ཞིང་དང་བར་གནས་སོ། །ཀྱེ༑ རྒྱལ་བའི་སྲས་དག། འདི་ལྟ་སྟེ། དཔེར་ན། གསེར་གྱི་ས་ལེ་སྦྲམ་དེ་ཉིད་བཻཌཱུཪྻས་བཏབ་ན་སྔོན་པས་ཀྱང་ཤིན་ཏུ་ འཚེར་ལ་འོད་གསལ་ཞིང་དྭངས་པར་འགྱུར་རོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་བྱང་ཆུབ་སེམས་དཔའི་ དགེ་བའི་རྩ་བ་དེ་དག་ཀྱང་ཤེས་རབ་དང་ཡེ་ཤེས་ཀྱིས་ཤིན་ཏུ་བརྟགས་པས་སྔོན་པས་ཀྱང་ཤིན་ཏུ་བྱང་ལ་འོད་གསལ་ཞིང་དྭངས་པ་ཡིན་ཏེ། ཕྱི་ཕྱིར་ཞིང་ཡང་རབ་ཏུ་ཞི་ བས་མི་འཕྲོགས་པར་འགྱུར་རོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། ཟླ་བའི་འོད་ནི་སེམས་ཅན་གྱི་ལུས་ཀྱང་སིམ་པར་བྱེད་ལ། རླུང་གི་དཀྱིལ་འཁོར་ ཆེན་པོ་བཞིས་ཀྱང་མི་འཕྲོགས་པ་ཡིན། ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ས་མངོན་སུམ་འདི་ལ་ གནས་པའི་དགེ་བའི་རྩ་བ་དེ་དག་སྔོན་པས་ཀྱང་སེམས་ཅན་དུ་མའི་བསམ་པའི་ཉོན་མོངས་པ་འབར་བ་ཡང་ཞི་ཞིང་སིམ་པར་བྱེད་ལ། བདུད་ཀྱི་ལམ་གྱི་རྒྱུད་བཞིས་ཀྱང་མི་འཕྲོགས་ པ་ཡིན། དེའི་ཕ་རོལ་ཏུ་ཕྱིན་པ་བཅུ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་སྒྲུབ་པ་མ་ཡིན་ནོ། །ཀྱེ་༑རྒྱལ་ བའི་སྲས་དག །འདི་ནི་བྱང་ཆུབ་སེམས་དཔའི་ས་མངོན་སུམ་ཞེས་བྱ་བ་སྟེ། བྱང་ཆུབ་སེམས་དཔའི་ས་དྲུག་པའོ། །དེ་ལ་གནས་པའི་བྱང་ཆུབ་སེམས་དཔའ་ཕལ་ཆེར་ལྷའི་ རྒྱལ་པོ་རབ་འཕྲུལ་དགར་འགྱུར་ཏེ། སེམས་ཅན་ཐམས་ཅད་ཀྱི་ལྷག་པའི་ང་རྒྱལ་ཞི་བར་བྱ་བ་ལ་མཁས་ཤིང་མཐུ་ཡོད་པ་ཡིན། ཉན་པ་ཐམས་ཅད་ཀྱི་ཡོངས་སུ་དྲི་ བས་མི་འཕྲོགས་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པ་ས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་ ༄༅། །འགྱུར་བ་ནས། ཐམས་ཅད་མཁྱེན་པའི་ཡེ་ཤེས་ལ་བརྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང༌། ཆོས་ཡིད་ལ་བྱ་བ་དང༌། དགེ་འདུན་ཡིད་ལ་བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་དང༌། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང༌། བྱང་ཆུབ་སེམས་དཔའི་ས་ཡིད་ལ་བྱ་བ་དང༌། ཕ་རོལ་ཏུ་ཕྱིན་པ་ཡིད་ལ་བྱ་བ་དང༌། སྟོབས་ཡིད་ལ་བྱ་བ་དང༌། མི་འཇིགས་པ་ཡིད་ལ་བྱ་བ་དང༌། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་ མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་ ཁྲག་ཁྲིག་བརྒྱ་སྟོང་རབ་ཏུ་འཐོབ་ཅིང་དེ་དག་ལ་མཉམ་པར་གཞོག་པ་དང༌། སངས་རྒྱས་ཁྲག་ཁྲིག་བརྒྱ་སྟོང་མཐོང་བ་དང༌། དེ་དག་གི་བྱིན་གྱི་རླབས་ཀྱང་ཡང་དག་པར་ ཤེས་པ་དང༌། འཇིག་རྟེན་གྱི་ཁམས་ཁྲག་ཁྲིག་བརྒྱ་སྟོང་སྐྱོད་པ་དང༌། སངས་རྒྱས་ཀྱི་ཞིང་ཁྲག་ཁྲིག་བརྒྱ་སྟོང་དུ་འགྲོ་བ་དང༌། འཇིག་རྟེན་གྱི་ཁམས་ཁྲག་ཁྲིག་བརྒྱ་ སྟོང་སྣང་བར་བྱ་བ་དང༌། སེམས་ཅན་ཁྲག་ཁྲིག་བརྒྱ་སྟོང་ཡོངས་སུ་སྨིན་པར་བྱ་བ་དང༌། བསྐལ་པ་ཁྲག་ཁྲིག་བརྒྱ་སྟོང་དུ་གནས་པར་བྱ་བ་དང༌། སྔོན་གྱི་མཐའ་དང༌། ཕྱི་མའི་མཐའི་བསྐལ་པ་ཁྲག་ཁྲིག་བརྒྱ་སྟོང་ལ་རབ་ཏུ་འཇུག་པ་དང༌། ཆོས་ཀྱི་སྒོ་ཁྲག་ཁྲིག་བརྒྱ་སྟོང་རྣམ་པར་འབྱེད་པ་དང༌། ལུས་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་བསྟན་ པ་དང༌། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་ཁྲག་ཁྲིག་བརྒྱ་སྟོང་ཡང་དག་པར་བསྟན་པར་བྱ་བའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཆད་བྱང་ ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དམ། རྫུ་འཕྲུལ་ལམ། མིག་གམ། སྤྱོད་ ཡུལ་ལམ། དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང༌། བསྐལ་པ་བརྒྱ་ཕྲག་ དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའོ། །དེ་ནས་ བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང༌། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མཁས་པས་ ལམ་གྱི་སྤྱོད་པ་ལྔ་པོར་ཡོངས་རྫོགས་ནས། །ཆོས་རྣམས་མཚན་མེད་མཚན་ཉིད་མེད་དང་མ་སྐྱེས་དང༌། །མ་བྱུང་སྔ་ནས་ཡོངས་སུ་ཞི་ཞིང་སྤྲོས་མེད་པ། །ཡོངས་སུ་སྒོམ་ ༄༅། །པས་ཡེ་ཤེས་བློ་ཅན་དྲུག་པ་གནོན། །ཆོས་རྣམས་དབེན་ཞིང་ལེན་མེད་རྣམ་པར་རྟོག་མེད་དང༌། །སྒྱུ་མའི་རང་བཞིན་གཉིས་ཀྱི་དངོས་ལས་ རྣམ་གྲོལ་བས། །ཆོས་ཀྱི་ཚུལ་ལ་འགལ་མེད་རྗེས་སུ་མཐུན་བྱེད་ཅིང༌། །ཡེ་ཤེས་ལྡན་པའི་དམ་པ་དྲུག་པ་ཡོངས་སུ་གནོན། །མཐུན་པ་རྣོ་ལ་གནས་ཤིང་ཡེ་ཤེས་སྟོབས་ ལྡན་པ། །འཇིག་རྟེན་ཀུན་གྱི་འབྱུང་དང་འཇིག་ལ་རབ་ཏུ་རྟོག །གཏི་མུག་མུན་པས་འགྲོ་བ་འབྱུང་བ་ཀུན་ཏུ་བསྐྱེད། །གཏི་མུག་དེ་ཉིད་བྲལ་བས་འབྱུང་བ་མེད་པ་ཡིན། ། རྐྱེན་གྱི་རྣམ་པ་དོན་དམ་སྟོང་པར་རྣམ་པ་འབྱེད། །བྱ་བ་མི་འགལ་རྒྱུ་རྐྱེན་བྱེད་པ་མཉམ་པར་ཤེས། །ཡང་དག་ཇི་བཞིན་བྱེད་པ་མེད་པར་ལས་ཤེས་ནས། །འདུས་བྱས་ སྤྲིན་སྡུག་ལྟ་བུར་བྱེད་པ་མེད་པར་ཤེས། །བདེན་པ་མི་ཤེས་དེ་ནི་ཡང་དག་མ་རིག་པ། །ལས་ནི་སེམས་ཀྱི་སྟོབས་ཀྱིས་མགོ་རྨོངས་བྱུང་བར་འགྱུར། །སེམས་ལ་རྟེན་ཏེ་ ལྷན་ཅིག་བྱུང་བ་མིང་དང་གཟུགས། །དེ་ལྟར་སྡུག་བསྔལ་ཕུང་པོ་ཆེན་པོའི་བར་དུ་འབྱུང༌། །ཁམས་གསུམ་སེམས་ཀྱི་རྒྱུ་ལས་བྱུང་བ་དེར་འཇུག་སྟེ། །སྲིད་པའི་ཡན་ ལག་བཅུ་གཉིས་འདི་དག་སེམས་གཅིག་རྟེན། །འདོད་ཆགས་སྐྱེས་པ་དེ་ལས་སེམས་སུ་བརྗོད་པ་ཡིན། །དེ་བཞིན་སྲིད་པའི་དངོས་པོ་སེམས་ཀྱི་རྣམ་པའོ། །མ་རིག་བྱ་བ་ གཉིས་བྱེད་རྨོངས་བྱའི་དངོས་པོ་ལ། །རྨོངས་པར་བྱས་ཤིང་དེ་ནས་སེམས་པའི་རྒྱུ་ཡང་འབྱིན། །དེ་བཞིན་རྒ་བ་ཕུང་པོ་གཞིག་བྱ་འཇིག་བྱེད་པར། །དེ་ལས་སྡུག་བསྔལ་མིང་ ཐོགས་ཐམས་ཅད་མི་ཟད་འབྱུང༌། །མ་རིག་རྐྱེན་གྱིས་ཆད་པར་འགྱུར་བ་ཡོད་པ་མིན། །རྣམ་པར་ཆད་ཅིང་རྒྱུ་རྐྱེན་བྲལ་བས་ཡོད་པ་འགག །གཏི་མུག་སྲེད་པ་ཉེར་ལེན་ ཉོན་མོངས་ལམ་ཡིན་ཏེ། །ལས་དང་སྲིད་པ་སེམས་པ་ལྷག་མ་སྡུག་བསྔལ་ཡིན། །གཏི་མུག་སྐྱེ་མཆེད་བར་དུ་འདུས་བྱས་སྡུག་བསྔལ་ཏེ། །རེག་དང་ཚོར་བ་དེ་དག་སྡུག་ བསྔལ་སྡུག་བསྔལ་ཡིན། །ཡན་ལག་ལྷག་མར་འགྱུར་བའི་སྡུག་བསྔལ་རྣམ་འཕེལ་བ། །བདག་མེད་ཤེས་པས་སྡུག་བསྔལ་གསུམ་པོ་འཆད་པར་འགྱུར། །མུན་པ་སེམས་ དང་འདུས་བྱས་འདི་ནི་སྔོན་བལྟས་ཡིན། །རྣམ་པར་ཤེས་ནས་ཚོར་བའི་རྒྱུད་དུ་ད་ལྟར་བྱུང༌། །སྲེད་དང་སྲིད་པར་སྡུག་བསྔལ་འབྱུང་བ་ཕྱི་མའི་མཐའ། །འགགས་ཤིང་ཟད་པ་ དེ་དག་ལྟ་བ་ཆད་པ་ཡིན། །གཏི་མུག་རྐྱེན་གྱིས་དེ་དག་རྣམ་པར་འབྲེལ་པ་འབྱུང༌། །ཟད་པས་བྱང་ཆུབ་རྐྱེན་རྣམས་རྣམ་པར་འབྲེལ་པ་ཡིན། །རྒྱུ་ལས་རྒྱུ་འབྱུང་མེད་ན་རྒྱུ་ཡི་ རྒྱུན་ཆད་འགྱུར། །བདེ་ཕན་ཤེས་ལྡན་རང་བཞིན་སྟོང་པ་དེ་ལྟར་རྟོག །རྒྱུད་དུ་མཐུན་པ་གཏི་མུག་མུན་པས་བྱུང་བ་ཡིན། །མི་མཐུན་བཟློག་པ་གཏི་མུག་ཟད་པས་མི་འབྱུང་བའོ། ། ༄༅། །ཟད་པའི་རྐྱེན་དང་དེ་དག་ཡོད་དང་མེད་པ་ལས། །གནས་པ་མེད་བློ་རྣམ་པ་བཅུར་ནི་དེ་ལྟར་རྟོག །སྲིད་པའི་ཡན་ལག་མཚམས་དང་སེམས་ གཅིག་ལས་མཐུན་དང༌། །ཆེད་དུ་མི་བྱེད་རྒྱུད་གསུམ་རྗེས་འབྲང་སྔོན་མཐའ་དང༌། །སྡུག་བསྔལ་གསུམ་དང་རྒྱུས་བྱུང་སྐྱེ་དང་འཇིག་པ་དང༌། །སྲིད་པའི་མཐར་ཕྱིན་ཟད་ དང་རྐྱེན་གྱི་ལུགས་མཐུན་པར། ༑དེ་ལྟར་རྟེན་འབྲེལ་འབྱུང་ལ་ཡང་དག་འཇུག་བྱེད་པས། །སྒྱུ་འདྲ་ཡང་དག་མ་ཡིན་ཚོར་བར་བྱེད་མེད་ཅིང༌། །རྨི་ལམ་འདྲ་བ་དེ་བཞིན་ མིག་ཡོར་འདྲ་བ་སྟེ། །བྱིས་པ་སླུ་བའི་སྨིག་རྒྱུ་རང་བཞིན་མཆུངས་[*MTSUNGS?] མཉམ་པ། །དེ་ལྟར་བསྒོམ་པ་མཁས་པའི་སྟོང་པ་ཉིད་ཀྱི་སྒོ། །རྐྱེན་རྣམས་མེད་པ་དེ་ནི་མཚན་མ་ མེད་པ་སྟེ། །ལོག་པར་ཤེས་པས་ནམ་ཡང་སྨོན་པ་མེད་པ་ཡིན། །གཞན་དུ་སེམས་ཅན་སྙིང་བརྩེའི་དོན་དུ་སྐྱེ་བ་འཛིན། །དེ་འདྲའི་རྣམ་ཐར་སྒོ་ལ་སྒོམ་བྱེད་མཐུ་ཆེ་ བ༑ ༑སྙིང་བརྩེ་བ་ཡི་བློ་ལྡན་སངས་རྒྱས་ཡོན་ཏན་མངོན་འདོད་ཅིང༌། །འདུས་བྱས་འདུས་པ་མཁས་པ་ཡོངས་སུ་རྟོག་བྱེད་པས། །བསམ་པ་ངེས་ཤིང་གཅིག་མིན་ལེགས་ དང་ལྡན་པ་ཡིན། །སྟོང་ཉིད་ཏིང་འཛིན་སྟོང་ཕྲག་བཅུ་རྣམས་ཡོངས་སུ་རྒྱས། །དེ་བཞིན་བརྟན་པ་མཚན་མ་མེད་དང་སྨོན་མེད་ལྡན། །ཤེས་རབ་ཤས་ཆེ་མཐུན་པའི་བཟོད་ པ་མཆོག་ཅན་ཏེ། །མཁས་པའི་རྣམ་ཐར་ཡེ་ཤེས་ཆགས་པ་མེད་དང་ལྡན། །དེ་འདྲའི་བསམ་པས་དྲང་སྲོང་ཆེ་མང་མཆོད་བྱེད་པས། །རྒྱལ་བའི་བསྟན་པ་འདི་ལ་ཤིན་ཏུ་ བསྔགས་པ་ཡིན། །དེ་ནི་སངས་རྒྱས་མཛོད་ཐོབ་ཁོང་དུ་ཆུད་པས་ན། །བཻ་ཌཱུཪྻས་བཏབ་གསེར་མདོག་བཞིན་དུ་སྔོན་པས་གསལ། །ཟླ་བའི་འོད་ནི་འགྲོ་བའི་ལུས་ལ་སིམ་པར་བྱེད། ། རླུང་བཞི་ལངས་པས་ཡོངས་སུ་འཕྲོགས་པར་མི་ནུས་སོ། །རྒྱལ་སྲས་འོད་ཀྱང་བདུད་ཀྱི་ལམ་ལས་ཤིན་ཏུ་འདས། །ཉོན་མོངས་ཡོངས་སུ་གདུང་དང་སྡུག་བསྔལ་ནད་ཀྱང་སེལ།། ས་འདི་ཕྱོགས་སུ་ཕྱིན་པ་ལྷ་ཡི་བདག་པོར་འགྱུར། །འཕྲུལ་དགའི་དམ་པ་ལྷག་པའི་ང་རྒྱལ་སེལ་ལ་མཁས། །ཡེ་ཤེས་ལམ་དང་ལྡན་པ་དེ་ནི་ཅི་རྩོམ་ཡང༌། །ཉན་ཐོས་ལམ་ ལས་འདས་ཏེ་བརྟན་ཞིང་མི་འཕྲོགས་པའོ། །བདེ་གཤེགས་སྲས་པོ་བརྩོན་འགྲུས་ལྡན་པ་འདོད་གྱུར་ན། །ཏིང་འཛིན་བྱེ་བ་བརྒྱ་སྟོང་ཚང་པ་འཐོབ་པར་བྱེད། །སྐད་ཅིག་གཅིག་ཏུ་ ཕྱོགས་བཅུར་སངས་རྒྱས་མང་པོ་ལྟ། །དཔྱིད་ཀྱི་ཉི་མ་གསལ་ཞིང་ལྷན་པར་བྱེད་པ་བཞིན། །ཟབ་ཅིང་བལྟ་དཀའ་ཕྲ་བ་སྟེ། །ཉན་ཐོས་རང་རྒྱལ་ཤེས་མི་ནུས། །བདག་ཉིད་ཆེ་ ལ་ས་དྲུག་པ། །རྒྱལ་བའི་སྲས་ཀྱིས་བཤད་པ་ཡིན། །མངོན་སུམ་ཞེས་ནི་བྱ་བ་སྟེ། །བྱང་ཆུབ་སེམས་དཔའི་ས་དྲུག་པའོ།། །།བམ་པོ་བཞི་བཅུ་རྩ་དགུ་པ། དེ་ནས་ ༄༅། །སྣ་ཚོགས་ཡིད་འོང་སྤྲིན། །ལྷ་ཚོགས་མང་པོ་མཁའ་ལ་གནས་ཤིང་མངོན་པར་མཐོང༌། །ཚིག་སྙན་རྣམ་པར་རྗོད་པ་བྱེད། །དགའ་བའི་དམ་ པ་མཆོག་གིས་ཡོངས་སུ་རྒྱས། །དགེའོ་དོན་དམ་སེམས་མཛད་ཅིང༌། །ཡོན་ཏན་བརྒྱ་དང་ཡན་ལག་ལྡན་ཞིང་དབང་སྒྱུར་བ། །མི་ཡི་པུཎྜ་རི་ཀ་ཡིན། །འགྲོ་ལ་ཕན་པའི་ སྤྱོད་རབ་ཡང་དག་བཤད། །ཡིད་འོང་འོད་མཆོག་ལྡན་ཁྱོད་དང༌། །མི་ཡི་གཙོ་བོ་མྱ་ངན་ཡོངས་སུ་སེལ་མཛད་ལ། །དབང་ཕྱུག་ཆེན་པོ་མཁའ་གནས་ཤིང༌། །སྤོས་སྤྲིན་ཡིད་ འོང་དམ་པ་མངོན་པར་འཐོར། །ཚིག་སྙན་རབ་ཏུ་རྗོད་པ་བྱེད། །ལྷ་ཚོགས་མང་པོ་མཁའ་ལས་དགར་འགྱུར་དབྱངས་སྒྲོག་ཅིང༌། །གང་གིས་ས་བསྟན་འདི་ཐོས་པ། །དེ་ དག་ཐོབ་པ་བཟང་པོ་ཐོབ་ཅེས་ཟེར། །རོལ་མོ་བརྡུང་དཀྲོལ་དབྱངས་སྙན་པ། །བརྒྱ་མང་ལྷ་ཡི་བུ་མོས་དགའ་བར་བྱས། །བདེ་བར་གཤེགས་དང་ཁྱོད་མཐུ་ཡིས། །ཚིག་ རབ་འདི་འདྲ་རབ་ཏུ་བརྗོད་པར་འགྱུར། །ཞི་དང་ངེས་སྤྱོད་དམ་པ་ཅན། །མ་དུལ་འདུལ་མཛད་འཇིག་རྟེན་ཀུན་གྱིས་མཆོད་བྱས་པ། །འཇིག་རྟེན་ཀུན་ལས་འདས་པ་ ཡི༑ ༑འཇིག་རྟེན་སྤྱོད་པ་ཤིན་ཏུ་ཕྲ་བ་བསྟན། །སྣ་ཚོགས་ལུས་ཀྱང་རབ་ཏུ་བསྟན། །ལུས་དང་ལུས་ལ་ཆོས་ཉིད་ཕུན་སུམ་ཚོགས་ཤིང་ལྡན། །རྣམ་དཔྱོད་ཞི་གནས་མཐུས་ བཅིལ་པས། །དབྱངས་སུ་སྒྲོག་ཀྱང་ཡི་གེ་བརྗོད་མི་བྱེད། །ཞིང་རྣམས་བརྒྱར་ཡང་འདོད་བྱེད་ཅིང༌། །མགོན་པོ་མཆོད་པར་འོས་ལ་མཆོད་པར་བྱེད། །ཞིང་རྒྱལ་བདག་ཏུ་འདུ་ཤེས་ པ༑ ༑ཡེ་ཤེས་དབང་སྒྱུར་མཆོག་གི་རབ་ཏུ་སེལ། །སེམས་ཅན་ཡོངས་སུ་སྨིན་བྱེད་ཀྱང༌། །བདག་དང་གཞན་གྱི་འདུ་ཤེས་རྣམ་པ་ཀུན་ཏུ་མེད། །དགེ་བ་ཡངས་པ་ཡང་དག་ གསོག །འོན་ཀྱང་དགེ་བ་གསོག་ལ་གནས་པ་མེད། །འདོད་ཆགས་ཞེ་སྡང་གཏི་མུག་གིས། །འཇིག་རྟེན་ཐམས་ཅད་རབ་ཏུ་འབར་བར་མཐོང་གྱུར་ཅིང༌། །འདུ་ཤེས་ཐམས་ཅད་ རྣམ་སྤངས་ནས། །སྙིང་བརྩེ་ལྡན་པར་བརྩོན་འགྲུས་རབ་ཏུ་རྩོམ། །ལྷ་མང་ལྷ་ཡི་བུ་མོ་ཡིས། །གསུང་བའི་མཆོག་ལ་མཆོད་བྱས་ནས། །ཀུན་ཀྱང་མི་སྨྲ་དགར་གྱུར་ཏེ། །དྲང་སྲོང་ ཆེ་ལ་ལྟ་ཞིང་གནས། །ཐར་པའི་ཟླ་བས་ཡང་སྨྲས་པ། །འཁོར་རྣམས་ཤིན་ཏུ་རྣམ་པར་དང༌། །ས་བདུན་པ་ཡི་རྣམ་པ་དག །རྒྱལ་བའི་སྲས་ཀྱིས་བཤད་པ་མཛོད། །བྱང་ཆུབ་ སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའི་ས་དྲུག་པ་ལ་དེ་ལྟར་སའི་ལམ་ཡོངས་སུ་རྫོགས་པའི་བྱང་ཆུབ་སེམས་དཔའ་ནི་། བྱང་ཆུབ་སེམས་དཔའི་ས་བདུན་པ་ཡོངས་སུ་གནོན་ཏོ། །དེ་ཐབས་དང་ཤེས་རབ་ཀྱིས་མངོན་པར་བསྒྲུབས་པའི་ལམ་བརྩམ་པའི་ཁྱད་པར་བཅུས་ཡོངས་སུ་གནོན་ཏེ། བཅུ་ ༄༅། །གང་ཞེ་ན། འདི་ལྟ་སྟེ། སྟོང་པ་ཉིད་དང༌། མཚན་མ་མེད་པ་དང༌། སྨོན་བ་མེད་པའི་ཏིང་ངེ་འཛིན་ཤིན་ཏུ་བསྒོམས་པའི་ཡིད་དང་ཡང་ལྡན་ལ། བསོད་ ནམས་དང༌། ཡེ་ཤེས་ཀྱི་ཚོགས་ཆེན་པོ་ཡང་ཡང་དག་པར་གསོག་པ་ཡིན། བདག་མེད་པ་དང༌། གསོ་བ་མེད་པ་དང༌། གང་ཟག་མེད་པའི་ཆོས་ལའང་རབ་ཏུ་འཇུག་ལ། ཚད་མེད་པ་བཞི་མངོན་པར་སྒྲུབ་པ་ཡང་ཡོངས་སུ་མི་གཏོང་བ་ཡིན། བསོད་ནམས་ཀྱི་ཚོགས་ཀྱིས་ཤིན་ཏུ་མཐོ་བའི་ཕ་རོལ་ཏུ་ཕྱིན་པ་མངོན་པར་བསྒྲུབ་པའང་མངོན་པར་ སྒྲུབ་ལ། ཆོས་གང་ལ་ཡང་མངོན་པར་ཆགས་པ་མེད་པ་ཡིན། ཁམས་གསུམ་པ་ལས་དབེན་པར་གྱུར་པའང་ཐོབ་ལ་ཁམས་གསུམ་པ་བསྡུ་བ་དང༌། རྒྱན་མངོན་པར་ བསྒྲུབ་པའང་མངོན་པར་སྒྲུབ་པ་ཡིན། ཉོན་མོངས་པ་འབར་བ་ཐམས་ཅད་ཤིན་ཏུ་ཞི་ཞིང་རབ་ཏུ་ཞི་སྟེ། ཉེ་བར་ཞི་བ་ཡང་ཡིན་ལ། སེམས་ཅན་ཐམས་ཅད་ཀྱི་འདོད་ ཆགས་དང༌། ཞེ་སྡང་དང༌། གཏི་མུག་དང༌། ཉོན་མོངས་པའི་མེ་ལྕེ་རབ་ཏུ་ཞི་བར་མངོན་པར་བསྒྲུབ་པའང་མངོན་པར་སྒྲུབ་པ་ཡིན། སྒྱུ་མ་དང༌། རྨི་ལམ་དང༌། མི་ཡོར་ དང༑ སྒྲ་བརྙན་དང༌། ཆུའི་ཟླ་བ་དང༌། གཟུགས་བརྙན་དང༌། སྤྲུལ་པའི་རང་བཞིན་ལྟ་བུར་ཡོད་པ་དང༌། མེད་པ་དང༌། གཉིས་ཀ་མ་ཡིན་པ་ཐམས་ཅད་ཀྱང་ཁོང་དུ་ཆུད་ ལ༑ ལས་དང་བྱ་བ་རྣམ་པར་ཕྱེ་བ་ཚད་མེད་པའི་བསམ་པ་ཡང་མངོན་པར་སྒྲུབ་པ་ཡིན། ཞིང་གི་ཐ་གྲུ་ནམ་མཁའ་དང་མཉམ་པར་ཤིན་ཏུ་བསྒོམས་པའི་ཡིད་དང་ལྡན་ ལ༑ སངས་རྒྱས་ཀྱི་ཞིང་ཡོངས་སུ་སྦྱོང་ཞིང་བསྒྲུབ་པ་དང༌། རྒྱན་ཀྱང་མངོན་པར་སྒྲུབ་པ་ཡིན། སངས་རྒྱས་ཐམས་ཅད་ཀྱི་རང་བཞིན་དང༌། ཆོས་དང༌། སྐུ་ནམ་མཁའ་ ལྟ་བུར་ཡང་རབ་ཏུ་འཇུག་ལ། གཟུགས་དང༌། མཚན་དང༌། དཔེ་བྱད་བཟང་པོ་བསྡུ་ཞིང་རྒྱན་མངོན་པར་བསྒྲུབ་པ་ཡང་མངོན་པར་སྒྲུབ་པ་ཡིན། དེ་བཞིན་གཤེགས་ པའི་གསུང་རང་བཞིན་གྱིས་ཞི་ཞིང་བརྗོད་དུ་མེད་པའི་སྒྲ་དབྱངས་དང་ལྡན་པར་ཡང་ཡིད་ཆེས་ལ། སེམས་ཅན་ཐམས་ཅད་ཀྱི་དབྱངས་ཀྱི་ཡན་ལག་རྣམ་པར་ཕྱེ་བའི་རྒྱན་ མངོན་པར་བསྒྲུབ་པ་ཡང་མངོན་པར་སྒྲུབ་པ་ཡིན། སངས་རྒྱས་བཅོམ་ལྡན་འདས་རྣམས་ཀྱིས་སྐད་ཅིག་གཅིག་ཏུ་དུས་གསུམ་ཐུགས་སུ་ཆུད་པར་ཡང་ཁོང་དུ་ཆུད་ལ། དུས་དང་བསྐལ་པའི་གྲངས་མཚན་ཉིད་ཐ་དད་པ་ལའང་སེམས་ཅན་གྱི་བསམ་པ་རྣམ་པར་བསྒོམ་པའི་ཕྱིར་རྗེས་སུ་འཇུག་པ་ཡིན་ཏེ། ཀྱེ༑ རྒྱལ་བའི་སྲས་དག །ཐབས་ དང་ཤེས་རབ་ཀྱིས་མངོན་པར་བསྒྲུབས་པའི་ལམ་བརྩམ་པའི་ཁྱད་པར་འདི་བཅུས་བྱང་ཆུབ་སེམས་དཔའ་ས་དྲུག་པ་ལ་རྣམ་པར་དབྱེ་བ་ཤིན་ཏུ་བྱས་པ་ས་བདུན་ཡོངས་སུ་ ༄༅། །གནོན་ཏོ། །ཀྱེ༑ རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལམ་གྱི་ཚོགས་ཐབས་དང་ཤེས་རབ་ཀྱིས་ མངོན་པར་བསྒྲུབས་པའི་ཁྱད་པར་སྣང་བར་གྱུར་པ་འདི་དག་མངོན་པར་བསྒྲུབས་པས་བྱང་ཆུབ་སེམས་དཔའི་ས་བདུན་ཡོངས་སུ་གནོན་ཅེས་བྱ་སྟེ། དེ་ལྟར་བྱང་ཆུབ་ སེམས་དཔའི་ས་བདུན་པ་ལ་གནས་པའི་བྱང་ཆུབ་སེམས་དཔའ་དེ་ནི་སེམས་ཅན་གྱི་ཁམས་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་སེམས་ ཅན་ཡོངས་སུ་སྨིན་པར་མཛད་པ་དང༌། འདུལ་བའི་འཕྲིན་ལས་ཚད་མེད་པ་ལ་འཇུག་གོ། འཇིག་རྟེན་གྱི་ཁམས་མང་པོ་ཚད་མེད་པ་ལ་འཇུག་གོ །སངས་རྒྱས་བཅོམ་ ལྡན་འདས་རྣམས་ཀྱི་སངས་རྒྱས་ཀྱི་ཞིང་རྣམ་པར་དག་པ་ཚད་མེད་པ་ལ་འཇུག་གོ །ཆོས་ཐ་དད་པ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་ ཡེ་ཤེས་མངོན་པར་འཚང་རྒྱ་བ་ཚད་མེད་པ་ལ་འཇུག་གོ །བསྐལ་པའི་གྲངས་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་དུས་གསུམ་ཐུགས་སུ་ཆུད་ པ་ཚད་མེད་པ་ལ་འཇུག་གོ །སེམས་ཅན་གྱི་མོས་པའི་ཁྱད་པར་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་མཚན་དང༌། སྐུ་གཟུགས་དང༌། སྐུ་སྣ་ཚོགས་སྟོན་པ་ཚད་མེད་པ་ལ་འཇུག་གོ། སེམས་ཅན་རྣམས་ཀྱི་བསམ་པ་དང༌། དབང་པོ་ཐ་དད་པ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ ཀྱི་གསུང་བརྗོད་པས་སེམས་ཅན་ཡོངས་སུ་སྨིན་པར་མཛད་པ་ཚད་མེད་པ་ལ་འཇུག་གོ །སེམས་ཅན་རྣམས་ཀྱི་སེམས་དང་སྤྱོད་པ་ཚད་མེད་པ་ལ་འཇུག་གོ །སངས་རྒྱས་ བཅོམ་ལྡན་འདས་རྣམས་ཀྱི་ཡེ་ཤེས་འབྱམས་ཀླས་པས་ཐུགས་སུ་ཆུད་པ་ཚད་མེད་པ་ལ་འཇུག་གོ །ཉན་ཐོས་ཀྱི་ཐེག་པས་འབྱུང་བ་ལ་མོས་པ་ཚད་མེད་པ་ལ་འཇུག་གོ། སངས་ རྒྱས་བཅོམ་ལྡན་འདས་རྣམས་ཀྱི་ལམ་ཤིན་ཏུ་བསྟན་པའི་ཡེ་ཤེས་ལ་འཇུག་པ་ཚད་མེད་པ་ལ་འཇུག་ཅིང་མོས་པར་བྱེད་དོ། །རང་སངས་རྒྱས་ཀྱི་ཡེ་ཤེས་ཡང་དག་པར་ བསྒྲུབ་པ་ཤིན་ཏུ་རྫོགས་པར་བྱ་བ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ཟབ་མོའི་སྒོར་འཇུག་པ་བསྟན་པ་ཚད་མེད་པ་ལ་འཇུག་ གོ་༑བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པའི་སྦྱོར་བ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་ཐེག་པ་ཆེན་པོ་ཡང་ དག་པར་བསྒྲུབ་པ་ལ་འཇུག་པ་ཤིན་ཏུ་བསྟན་པ་ཚད་མེད་པ་ལ་འཇུག་གོ །དེ་འདི་སྙམ་དུ་སེམས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ ༄༅། །སངས་རྒྱས་རྣམས་ཀྱི་སྤྱོད་ཡུལ་ནི་དེ་ལྟར་ཚད་མེད་པ་སྟེ། དེ་ནི་བསྐལ་པ་བརྒྱ་ཕྲག་ཁྲག་ཁྲིག་དང༌། བསྐལ་པ་སྟོང་ཕྲག་ཁྲག་ཁྲིག་ དང༑ བསྐལ་པ་བརྒྱ་སྟོང་ཕྲག་ཁྲག་ཁྲིག་ནས་དེ་སྙེད་ཀྱི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གིས་ཀྱང་བགྲང་བར་དཀའ་སྟེ། སངས་རྒྱས་བཅོམ་ལྡན་འདས་རྣམས་ཀྱི་སྤྱོད་ ཡུལ་དེ་བདག་གིས་ལྷུན་གྱིས་གྲུབ་པར་བསྒྲུབ་པར་བྱའོ། །རྟོག་པ་མེད་པ་དང༌། རྣམ་པར་རྟོག་པ་མེད་པར་ཡོངས་སུ་རྫོགས་པར་བྱའོ་ཞེས་དེ་དེ་ལྟར་ཤིན་ཏུ་ བརྟགས་པའི་ཡེ་ཤེས་དང༌། མངོན་པར་ཤེས་པ་དང་ལྡན་ཞིང༌། རྟག་ཏུ་རྒྱུན་མི་འཆད་པར་མངོན་པར་བརྩོན་པ་ནི་ཐབས་དང་ཤེས་རབ་ཀྱིས་ཡོངས་སུ་བསྒོམས་ པའི་ལམ་གྱི་ཚོགས་རྒྱ་ཆེན་པོའི་ཡེ་ཤེས་ལ་མི་གཡོ་བའི་ཚུལ་གྱིས་ཡོངས་སུ་གནས་པ་ཡིན། དེ་སྐད་ཅིག་གཅིག་ཏུ་ཡང་ལམ་མངོན་པར་བསྒྲུབ་པ་ལས་ལྡང་བར་ མི་བྱེད་དེ། དེ་འགྲོ་ཡང་དེ་ལྟ་བུའི་ཡེ་ཤེས་མངོན་པར་བསྒྲུབ་པ་ཡིན། འགྲེང་བ་དང༌། འདུག་པ་དང༌། ཉལ་བ་དང༌། རྨི་ལམ་དག་ཏུ་ཡང་སྒྲིབ་པ་མེད་ཅིང༌། སྤྱོད་ལམ་ ཐམས་ཅད་ལ་གནས་ཀྱང་རྣམ་པ་འདི་ལྟ་བུའི་འདུ་ཤེས་ཡིད་ལ་བྱ་བ་དང་མི་འབྲལ་བ་ཡིན། དེའི་སེམས་བསྐྱེད་པ་རེ་རེ་ལ་ཡང༌། བྱང་ཆུབ་སེམས་དཔའི་ཕ་རོལ་ཏུ་ ཕྱིན་པ་བཅུ་དང༌། བྱང་ཆུབ་སེམས་དཔའི་ས་བཅུ་ཡང་དག་པར་བསྒྲུབ་པ་ཡང་དག་པར་འབྱུང་ངོ༌། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་ པོ་དེ་སྙིང་རྗེ་ཆེན་པོ་སྔོན་དུ་བཏང་བའི་སེམས་བསྐྱེད་པ་བྱུང་བ་རེ་རེ་ཞིང་ཡང༌། སངས་རྒྱས་ཀྱི་ཆོས་ཡང་དག་པར་བསྒྲུབ་པ་དང༌། དེ་བཞིན་གཤེགས་པའི་ཡེ་ཤེས་ཀྱི་དོན་ དུ་ཡོངས་སུ་བསྔོ་བས། དེ་ལ་གང་སངས་རྒྱས་ཀྱི་ཡེ་ཤེས་ཡོངས་སུ་ཚོལ་ཞིང༌། སེམས་ཅན་རྣམས་ལ་དགེ་བའི་རྩ་བ་ཡོངས་སུ་གཏོང་བ་འདི་ནི་དེའི་སྦྱིན་པའི་ཕ་རོལ་ཏུ་ཕྱིན་ པའོ༑ ༑གང་ཉོན་མོངས་པའི་ཡོངས་སུ་གདུང་བ་ཐམས་ཅད་རབ་ཏུ་ཞི་བ་འདི་ནི་དེའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །གང་སྙིང་རྗེ་དང་བྱམས་པ་སྔོན་དུ་འགྲོ་བས་སེམས་ ཅན་ཐམས་ཅད་ལ་འཚིག་པ་མེད་པ་འདི་ནི་དེའི་བཟོད་པའི་ཕ་རོལ་ཏུ་ཕྱིན་པའོ། །གང་གོང་ནས་གོང་དུ་དགེ་བའི་ཆོས་ཚོལ་པས་མི་ངོམས་པར་དམ་འཆའ་བ་འདི་ནི་དེའི་ བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །གང་ཐམས་ཅད་མཁྱེན་པའི་ཡེ་ཤེས་མངོན་དུ་བྱ་བའི་ཕྱིར་འགྱོད་པ་མེད་པའི་ལམ་དང་ལྡན་པ་འདི་ནི་དེའི་བསམ་གཏན་གྱི་ཕ་རོལ་ ཏུ་ཕྱིན་པའོ། །གང་རང་བཞིན་གྱིས་མ་སྐྱེས་པ་མངོན་དུ་གྱུར་པ་འདི་ནི་དེའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །གང་ཡེ་ཤེས་ཚད་མེད་པ་མངོན་པར་བསྒྲུབ་པ་འདི་ནི་དེའི་ ༄༅། །ཐབས་མཁས་པའི་ཕ་རོལ་ཏུ་ཕྱིན་པའོ། །གང་གོང་ནས་གོང་དུ་ཡེ་ཤེས་ལ་དམིགས་ཤིང་མངོན་པར་བསྒྲུབ་པ་འདི་ནི་དེའི་སྨོན་ལམ་གྱི་ཕ་ རོལ་ཏུ་ཕྱིན་པའོ། །གང་ཕས་ཀྱི་རྒོལ་བ་ཐམས་ཅད་དང༌། བདུད་ཀྱི་ཚོགས་ཐམས་ཅད་ཀྱིས་ལམ་ཡོངས་སུ་མི་ཆོད་པ་འདི་ནི་དེའི་སྟོབས་ཀྱི་ཕ་རོལ་ཏུ་ཕྱིན་པའོ། །གང་ ཆོས་ཐམས་ཅད་ལ་ཡང་དག་པ་ཇི་ལྟ་བ་བཞིན་དུ་རྟོག་པ་འདི་ནི་དེའི་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །ཀྱེ༑ རྒྱལ་བའི་སྲས་དག །དེ་ལྟར་ན་བྱང་ཆུབ་སེམས་དཔའི་ས་ རིང་དུ་སོང་བ་འདི་ལ་གནས་པའི་བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་བཅུ་པོ་དེ་དག་དེ་ལྟར་ཡོངས་སུ་རྫོགས་པར་འགྱུར་ཏེ། བསྡུ་བའི་དངོས་པོ་བཞི་ཡང་ཡོངས་སུ་རྫོགས་ པར་འགྱུར་རོ། །བྱིན་གྱི་རླབས་བཅུ་དང༌། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང༌། རྣམ་པར་ཐར་པའི་སྒོ་གསུམ་དང༌། མདོར་བསྡུ་ན་བྱང་ཆུབ་ཀྱི་ཡན་ལག་གི་ཆོས་ ཐམས་ཅད་སྐད་ཅིག་སྐད་ཅིག་ཏུ་ཡོངས་སུ་རྫོགས་པར་འགྱུར་རོ། །དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་བྱང་ཆུབ་སེམས་དཔའ་སེམས་ དཔའ་ཆེན་པོ་རྡོ་རྗེའི་སྙིང་པོ་ལ་འདི་སྐད་ཅེས་སྨྲས་སོ། །ཀྱེ༑རྒྱལ་བའི་སྲས། ཅི་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ས་བདུན་པ་འདི་ ལ་གནས་པ་འབའ་ཞིག་གིས་བྱང་ཆུབ་ཀྱི་ཡན་ལག་ཐམས་ཅད་སྐད་ཅིག་སྐད་ཅིག་ཏུ་ཡོངས་སུ་རྫོགས་པར་འགྱུར་རམ། འོན་ཏེ་མ་ཡིན་གྱི། ས་བཅུ་པོ་ཐམས་ཅད་ལའང་དེ་བཞིན་ དུ་ཡོངས་སུ་རྫོགས་པར་འགྱུར། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པས། ཀྱེ༑ རྒྱལ་བའི་སྲས། ས་བཅུ་པོ་ཀུན་ལ་ཡང་བྱང་ཆུབ་སེམས་དཔའི་བྱང་ཆུབ་ཀྱི་ཡན་ ལག་ཐམས་ཅད་སྐད་ཅིག་སྐད་ཅིག་ཏུ་ཡོངས་སུ་རྫོགས་པར་ལྟ་འགྱུར་ཏེ། བྱང་ཆུབ་སེམས་དཔའི་ས་བདུན་པ་འདི་ལ་ནི་དེ་དག་པས་ལྷག་པར་ཡོངས་སུ་རྫོགས་པར་འགྱུར་རོ།། དེ་ཅིའི་ཕྱིར་ཞེ་ན། ཀྱེ༑ རྒྱལ་བའི་སྲས། བྱང་ཆུབ་སེམས་དཔའི་ས་འདི་ནི་ནན་ཏན་དུ་བྱ་བའི་སྤྱོད་པ་ཡོངས་སུ་རྫོགས་པར་བྱེད་པ་ཡེ་ཤེས་དང༌། མངོན་པར་ཤེས་པའི་སྤྱོད་པ་ ཡོངས་སུ་གནོན་པ་སྟེ། དེ་ལྟར། ཀྱེ༑ རྒྱལ་བའི་སྲས། བྱང་ཆུབ་སེམས་དཔའི་ས་དང་པོ་ལ་ནི་སྨོན་ལམ་ཐམས་ཅད་ལ་ལྷག་པར་དམིགས་པས་བྱང་ཆུབ་སེམས་དཔའི་བྱང་ཆུབ་ ཀྱི་ཡན་ལག་ཐམས་ཅད་ཡོངས་སུ་རྫོགས་པར་འགྱུར་རོ། །གཉིས་པ་ལ་སེམས་ཀྱི་དྲི་མ་ཐམས་ཅད་གསལ་བས། གསུམ་པ་ལ་སྨོན་ལམ་རྣམ་པར་འཕེལ་བ་དང༌། ཆོས་ཀྱི་སྣང་བ་ ཐོབ་པས། བཞི་པ་ལ་ལམ་ལ་འཇུག་པས། ལྔ་པ་ལ་འཇིག་རྟེན་གྱི་སྤྱོད་པའི་རྗེས་སུ་འབྲང་བས། དྲུག་པ་ལ་ཆོས་ཟབ་མོའི་སྒོར་འཇུག་པས་བྱང་ཆུབ་ཀྱི་ཡན་ལག་ཐམས་ཅད་ ༄༅། །ཡོངས་སུ་རྫོགས་པར་འགྱུར་ཏེ༑ བྱང་ཆུབ་སེམས་དཔའི་ས་བདུན་པ་འདི་ལ་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་སྒྲུབ་པས་བྱང་ཆུབ་ཀྱི་ ཡན་ལག་ཐམས་ཅད་སྐད་ཅིག་སྐད་ཅིག་ཏུ་ཡོངས་སུ་གྲུབ་པར་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་ས་དང་པོ་ནས་བཟུང་སྟེ། བྱང་ཆུབ་སེམས་དཔའི་ས་ བདུན་པའི་བར་དུ་བྱང་ཆུབ་སེམས་དཔས་མངོན་པར་བསྒྲུབས་པའི་ཡེ་ཤེས་མངོན་པར་སྒྲུབ་པའི་སྦྱོར་བའི་ཡན་ལག་དེ་དག་བྱང་ཆུབ་སེམས་དཔའ་ས་བརྒྱད་པ་ཡན་ཆད་ ལྷུན་གྱིས་གྲུབ་པར་ཡོངས་སུ་འགྲུབ་བོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། ཀུན་ནས་ཉོན་མོངས་ཤིང་རྣམ་པར་དག་པའི་འཇིག་རྟེན་གྱི་ཁམས་དང༌། ཤིན་ཏུ་དག་པའི་འཇིག་རྟེན་ གྱི་ཁམས་དག་གི་འཇིག་རྟེན་གྱི་ཁམས་གཉིས་ཀྱི་འཇིག་རྟེན་གྱི་ཁམས་ཀྱི་བར་ནི་སྨོན་ལམ་དང༌། ཐབས་དང༌། ཤེས་རབ་དང༌། མངོན་པར་ཤེས་པའི་སྟོབས་དང༌། ཤུགས་ ཆེན་པོ་མ་གཏོགས་པར་འདོད་འདོད་བརྒལ་བར་མི་ནུས་སོ། །ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་སྤྱོད་པ་འདྲེས་པ་དང༌། ཡོངས་སུ་དག་པའི་བར་ཡང་སྨོན་ ལམ་དང༌། ཐབས་དང༌། ཤེས་རབ་དང༌། མངོན་པར་ཤེས་པ་དང༌། ཡེ་ཤེས་ཀྱི་སྟོབས་དང༌། ཤུགས་ཆེན་པོ་མ་གཏོགས་པར་འདོད་འདོད་བརྒལ་བར་མི་ནུས་སོ། །བྱང་ ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ༑རྒྱལ་བའི་སྲས། འོ་ན་ཅི་བྱང་ཆུབ་སེམས་དཔའི་ས་བདུན་རྣམས་ལ། བྱང་ཆུབ་སེམས་དཔའི་སྤྱོད་པ་ཉོན་མོངས་ པའི་སྤྱོད་པས་ཀུན་ནས་ཉོན་མོངས་པར་ཡིད་ཆེས་པར་བྱ་བ་ཡིན་ནམ། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ༑རྒྱལ་བའི་སྲས། བྱང་ཆུབ་སེམས་དཔའི་ས་དང་པོ་རབ་ཏུ་ དགའ་བ་ཉིད་བཟུང་བ་ཡན་ཆད་དུ་བྱང་ཆུབ་སེམས་དཔའི་སྤྱོད་པ་ཐམས་ཅད་བྱང་ཆུབ་ཏུ་ཡོངས་སུ་བསྔོས་པའི་དབང་གིས་ཉོན་མོངས་པའི་རྙོག་པ་དང་བྲལ་བར་གར་འོས་པའི་ཚུལ་གྱིས་ ལམ་མཉམ་པ་ཉིད་ཀྱིས་ཡིད་ཆེས་པར་བྱ་སྟེ། དེ་ཙམ་གྱིས་ས་བདུན་པོ་རྣམས་སུ་ཉོན་མོངས་པའི་སྤྱོད་པ་ལས་ཡང་དག་པར་འདས་ཞེས་མི་བྱའོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། འཁོར་ལོས་བསྒྱུར་བའི་རྒྱལ་པོ་ནི་ལྷ་རྫས་ཀྱི་གླང་པོ་རིན་པོ་ཆེ་ལ་ཞོན་ཞིང་གླིང་བཞི་དག་ཏུ་འང་འགྲོ། མིའི་སྡུག་བསྔལ་དང༌། ཕོངས་པ་དང༌། ཀུན་ནས་ཉོན་མོངས་པའི་ ཉེས་པ་རྣམས་ཀྱང་རབ་ཏུ་ཤེས་ཏེ། འོན་ཀྱང་ཉེས་པ་དེ་དག་གིས་གོས་པར་མི་འགྱུར་རོ། །དེ་ཙམ་གྱིས་མིའི་ལུས་ལས་ཡོངས་སུ་འདས་པའང་མ་ཡིན་ཏེ། ནམ་མིའི་ལུས་སྤངས་ཏེ་ ཚངས་པའི་འཇིག་རྟེན་དུ་སྐྱེས་པར་གྱུར་པ་དེའི་ཚེ་ནི་ཚངས་པའི་གཞལ་མེད་ཁང་ན་གནས་ཤིང༌། སྟོང་གི་འཇིག་རྟེན་གྱི་ཁམས་ཀྱང་མཐོང༌། དེ་དག་དུའང་འགྲོ། ཚངས་པའི་གཟུགས་ ༄༅། །བརྙན་ཡང་ཀུན་ཏུ་སྟོན་ཏེ། མི་ཞེས་ཀྱང་མི་བརྗོད་དོ། །ཀྱེ། རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་དང་པོ་བཟུང་བ་ཡན་ཆད། བྱང་ ཆུབ་སེམས་དཔའི་ཕ་རོལ་ཏུ་ཕྱིན་པའི་ཐེག་པ་ལ་ཞོན་ཞིང་འགྲོ་བ་ཐམས་ཅད་དུ་རྒྱུ་བའི་ཚེ། ཀུན་ནས་ཉོན་མོངས་པའི་ཉེས་པ་རྣམས་ཀྱང་རབ་ཏུ་ཤེས་ཏེ། ཡང་དག་པའི་ལམ་དུ་ ཞུགས་པས་ཀུན་ནས་ཉོན་མོངས་པ་དེ་དག་གིས་གོས་པར་ཡང་མི་འགྱུར་རོ། །འོན་ཀྱང་དེ་ཙམ་གྱིས་ས་བདུན་པོ་རྣམས་ལ། ཉོན་མོངས་པའི་ཉེས་པ་རྣམས་ལས་ཡང་དག་པར་འདས་ ཞེས་ནི་མི་བྱ་སྟེ། ནམ་སྦྱོར་བ་ཅན་གྱི་སྤྱོད་པ་ཐམས་ཅད་སྤངས་ཏེ། ས་བདུན་པོ་ནས་ས་བརྒྱད་པ་ཡོངས་སུ་ནོན་པར་གྱུར་ཏེ། བྱང་ཆུབ་སེམས་དཔའི་ཐེག་པ་ཡོངས་སུ་དག་པ་ལ་ ཞོན་ཞིང་འགྲོ་བ་ཐམས་ཅད་དུ་རྒྱུ་བའི་ཚེ། ཀུན་ནས་ཉོན་མོངས་པའི་ཉེས་པ་ཐམས་ཅད་ཀྱང་རབ་ཏུ་ཤེས་ཏེ། འཇིག་རྟེན་གྱི་བྱ་བ་ཀུན་ལས་འདས་པས་ཉེས་པ་དེ་དག་གིས་ཀུན་ནས་ ཉོན་མོངས་པར་གྱུར་ཅེས་མི་བྱའོ། །ཀྱེ། རྒྱལ་བའི་སྲས། བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་འདོད་ཆགས་ལ་སོགས་པའི་ཉོན་མོངས་ པ་མང་པོ་ཐམས་ཅད་ལས་ཀྱང་ཤིན་ཏུ་ཤས་ཆེ་བར་འདའ་སྟེ། བྱང་ཆུབ་སེམས་དཔའི་ས་བདུན་པ་འདི་ལ་སྤྱོད་པའི་བྱང་ཆུབ་སེམས་དཔའ་དེ་ནི་ཉོན་མོངས་པ་ཅན་ཞེས་ཀྱང་མི་ བྱ༑ ཉོན་མོངས་པ་མེད་པ་ཞེས་ཀྱང་མི་བྱའོ། །དེ་ཅིའི་ཕྱིར་ཞེ་ན། ཉོན་མོངས་པ་ཐམས་ཅད་རྒྱུ་བ་མེད་པས་ཉོན་མོངས་པ་ཅན་ཞེས་མི་བྱའོ། །དེ་བཞིན་གཤེགས་པའི་ཡེ་ཤེས་མངོན་པར་ འདོད་ཅིང་བསམ་པ་ཡོངས་སུ་མ་རྫོགས་པས་ཉོན་མོངས་པ་མེད་པ་ཞེས་ཀྱང་མི་བྱའོ། །དེ་ལྟར་བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་ལྷག་ པའི་བསམ་པས་ཡོངས་སུ་དག་པའི་ལུས་ཀྱི་ལས་དང་ལྡན་པ་ཡིན། ལྷག་པའི་བསམ་པས་ཡོངས་སུ་དག་པས་ངག་གི་ལས་དང་ལྡན་པ་ཡིན། ལྷག་པའི་བསམ་པས་ཡོངས་སུ་དག་པའི་ ཡིད་ཀྱི་ལས་དང་ལྡན་པ་ཡིན། དེ་ནི་འདི་ལྟར་མི་དགེ་བའི་ལས་ཀྱི་ལམ་དེ་བཞིན་གཤེགས་པས་སྨད་པ་ཀུན་ནས་ཉོན་མོངས་པ་དང་བཅས་པ་དེ་དག་ལས་ཐམས་ཅད་ཀྱི་ཐམས་ཅད་དུ་ཡང་དག་ པར་འདས་པ་ཡིན། གང་འདི་དག་དགེ་བའི་ལམ་ཡང་དག་པར་རྫོགས་པའི་སངས་རྒྱས་ཀྱིས་བསྔགས་པ་དེ་དག་གི་རྗེས་སུ་རྟག་ཏུ་རྒྱུན་མི་འཆད་པར་འབྲང་བ་ཡིན། གང་ཡང་བྱང་ཆུབ་ སེམས་དཔའི་ས་ལྔ་པ་ལ་བཟོའི་གནས་དང༌། ལས་ཀྱི་གནས་ཇི་ལྟར་མངོན་པར་བསྒྲུབས་པ་དེ་དག་ཐམས་ཅད་ཀྱང་ལྷུན་གྱིས་གྲུབ་པ་རབ་ཏུ་འབྱུང་ངོ༌། །དེ་ནི་སྟོང་གསུམ་གྱི་སྟོང་ཆེན་པོའི་ འཇིག་རྟེན་གྱི་ཁམས་ན་སློབ་དཔོན་དུ་བྱ་བ་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང༌། བྱང་ཆུབ་སེམས་དཔའི་ས་བརྒྱད་པ་ཡན་ཆད་ཀྱི་ ༄༅། །བྱང་ཆུབ་སེམས་དཔའ་མ་གཏོགས་པར་སུ་ཡང་དེ་དང་བསམ་པའམ་སྦྱོར་བས་མཉམ་པ་མེད་དེ༑ འདི་ལྟར་ཡང་གང་འདི་དག་བསམ་གཏན་རྣམས་ དང༑ ཏིང་ངེ་འཛིན་དག་དང༌། སྙོམས་པར་འཇུག་པ་རྣམས་དང༌། མངོན་པར་ཤེས་པ་དག་དང༌། རྣམ་པར་ཐར་པ་རྣམས་ཀྱང་ཐམས་ཅད་ཀྱི་ཐམས་ཅད་དུ་བསྒོམ་པ་མངོན་པར་ བསྒྲུབ་པའི་སྒོའི་ཚུལ་གྱིས་མངོན་དུ་འགྱུར་ཏེ། འོན་ཀྱང་ད་དུང་བྱང་ཆུབ་སེམས་དཔའི་ས་བརྒྱད་པ་ལ་ཇི་ལྟར་དེ་བཞིན་དུ་ནི་རྣམ་པར་སྨིན་པས་ཡོངས་སུ་རྫོགས་པ་མ་ཡིན་ནོ། །དེ་ ལྟར་བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའི་སེམས་བསྐྱེད་པ་ཐམས་ཅད་ལ་ཤེས་རབ་དང་ཐབས་དང་བསྒོམ་པའི་སྟོབས་ཡོངས་སུ་རྫོགས་ པར་འགྱུར་ཏེ། སྔོན་པས་ཀྱང་བྱང་ཆུབ་ཀྱི་ཡན་ལག་ཐམས་ཅད་ཡོངས་སུ་རྫོགས་པ་རབ་ཏུ་འཐོབ་བོ། །དེ་དེ་ལྟར་བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་ཚེ། བྱང་ ཆུབ་སེམས་དཔའི་ཏིང་ངེ་འཛིན་རྣམ་པར་དབྱེ་བ་ཤིན་ཏུ་རྣམ་པར་ཕྱེ་བ་ཞེས་བྱ་བ་ལ་མཉམ་པར་གཞོག་སྟེ། བྱང་ཆུབ་སེམས་དཔའི་ཏིང་ངེ་འཛིན་དོན་ཤིན་ཏུ་བསམ་པ་ཞེས་བྱ་ བ་དང༌། ཁྱད་པར་གྱི་བློ་གྲོས་ཞེས་བྱ་བ་དང༌། རབ་ཏུ་ཕྱེ་བའི་དོན་གྱི་མཛོད་ཅེས་བྱ་བ་དང༌། ཆོས་ཇི་ལྟ་བ་བཞིན་དུ་རྣམ་པར་འབྱེད་པ་ཞེས་བྱ་བ་དང༌། རྩ་བ་ཤིན་ཏུ་གནས་པས་ བསྟན་པ་ཞེས་བྱ་བ་དང༌། ཡེ་ཤེས་དང་མངོན་པར་ཤེས་པའི་སྒོ་ཞེས་བྱ་བ་དང༌། ཆོས་ཀྱི་དབྱིངས་ཡོངས་སུ་སྦྱངས་པ་ཞེས་བྱ་བ་དང༌། དེ་བཞིན་གཤེགས་པའི་ཡོན་ཏན་ཞེས་བྱ་བ་ དང༑ དོན་སྣ་ཚོགས་ཀྱི་མཛོད་འཁོར་བ་དང་མྱ་ངན་ལས་འདས་པའི་སྒོ་ཞེས་བྱ་བ་ལ་ཡང་མཉམ་པར་གཞོག་སྟེ། དེ་དག་ལ་སོགས་པ་མངོན་པར་ཤེས་པ་དང༌། ཡེ་ཤེས་ཆེན་པོ་སྒོའི་ ཏིང་ངེ་འཛིན་ས་ཡོངས་སུ་སྦྱོང་བར་བྱེད་པ་བརྒྱ་སྟོང་ཕྲག་བཅུ་ཚང་བ་ལ་སྙོམས་པར་འཇུག་གོ །དེ་ཐབས་དང་ཤེས་རབ་ཀྱིས་ཡོངས་སུ་སྦྱང་བའི་ཏིང་ངེ་འཛིན་དེ་དག་རབ་ཏུ་ཐོབ་པ་དང༌། སྙིང་རྗེ་དང་སྙིང་བརྩེ་བའི་མཐུས་ཉན་ཐོས་ཀྱི་ས་ལས་འདས་པ་ཡིན། རང་སངས་རྒྱས་ཀྱི་ས་ལས་འདས་པ་ཡིན། ཤེས་རབ་དང་ཡེ་ཤེས་ཀྱིས་རྣམ་པར་དཔྱད་པའི་ས་མངོན་སུམ་དུ་གྱུར་ པ་ཡིན། དེ་ལྟར་དེ་བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་ཚེ། ལུས་ཀྱི་ལས་ཚད་མེད་པ་མཚན་མ་དང་བྲལ་བར་རབ་ཏུ་འབྱུང་ངོ༌། །ངག་གི་ལས་ཚད་མེད་པ་མཚན་ མ་དང་བྲལ་བ་རབ་ཏུ་འབྱུང་ངོ༌། །ཡིད་ཀྱི་ལས་ཚད་མེད་པ་མཚན་མ་དང་བྲལ་བ་ཤིན་ཏུ་རྣམ་པར་སྦྱངས་པ་མི་སྐྱེ་བའི་ཆོས་ཀྱི་བཟོད་པས་སྣང་བར་གྱུར་པ་ཚད་མེད་པ་རབ་ཏུ་འབྱུང་ངོ༌། བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ། རྒྱལ་བའི་སྲས། དེ་ལྟ་གོ། བྱང་ཆུབ་སེམས་དཔའི་ས་དང་པོ་ལ་གནས་པའི་ཚེའང་བྱང་ཆུབ་སེམས་དཔའི་ལུས་དང༌། ༄༅། །ངག་དང་ཡིད་ཀྱི་ལས་ཚད་མེད་པ་ཉན་ཐོས་དང༌། རང་སངས་རྒྱས་ཀྱི་སྤྱོད་པ་ལས་ཡང་དག་པར་འདས་ན་ཅི་རོབ། བྱང་ཆུབ་སེམས་དཔའ་རྡོ་རྗེའི་སྙིང་ པོས་སྨྲས་པ། ཀྱེ། རྒྱལ་བའི་སྲས། དེ་ལྟའང་མ་ཡིན་ཏེ། དེ་ནི་སངས་རྒྱས་ཀྱི་ཆོས་ལ་དམིགས་པའི་མཐུར་ཟད་ཀྱི་རང་གི་བློས་རྣམ་པར་དཔྱད་པ་ནི་མ་ཡིན་ནོ། །བྱང་ཆུབ་སེམས་ དཔའི་ས་བདུན་པ་འདི་ལ་ནི་རང་གི་བློའི་སྤྱོད་ཡུལ་རྣམ་པར་དཔྱོད་པ་རབ་ཏུ་ཐོབ་པས་ཉན་ཐོས་དང༌། རང་སངས་རྒྱས་ཐམས་ཅད་ཀྱིས་མི་འཕྲོགས་པ་ཡིན། ཀྱེ། རྒྱལ་བའི་སྲས། འདི་ལྟ་སྟེ། དཔེར་ན། རྒྱལ་པོའི་རིགས་སུ་སྐྱེས་པའི་རྒྱལ་པོའི་མཚན་དང་ལྡན་པ་ནི་བཙས་མ་ཐག་ཏུ་རྒྱལ་པོའི་བྱིན་གྱིས་བློན་པོའི་ཚོགས་ཐམས་ཅད་ཟིལ་གྱིས་གནོན་གྱི་། རང་གི་བློས་རྣམ་པར་དཔྱད་པས་ནི་མ་ཡིན་ནོ། །ནམ་ནར་སོན་པར་གྱུར་པ་དེའི་ཚེ་རང་གི་བློའི་མཐུས་བློན་པོ་ཐམས་ཅད་ཀྱི་བྱེད་པའི་ཚུལ་ལས་ཤིན་ཏུ་འདས་པ་ཡིན། ཀྱེ། རྒྱལ་བའི་ སྲས༑ དེ་བཞིན་དུ་བྱང་ཆུབ་སེམས་དཔའང་སེམས་བསྐྱེད་མ་ཐག་ཏུ་ལྷག་པའི་བསམ་པའི་བདག་ཉིད་ཆེན་པོས་ཉན་ཐོས་དང༌། རང་སངས་རྒྱས་ཐམས་ཅད་ཟིལ་གྱིས་གནོན་ཏེ།། རང་གི་བློས་རྣམ་པར་བརྟགས་པས་ནི་མ་ཡིན་ནོ། །བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་རང་གི་ཡུལ་གྱི་ཡེ་ཤེས་ཀྱི་སྟོབས་ཀྱིས་ཤུགས་ ཀྱིས་ཉན་ཐོས་དང༌། རང་སངས་རྒྱས་ཀྱི་བྱེད་པའི་ཚུལ་ལས་ཤིན་ཏུ་འདས་པ་ཡིན་ནོ། །ཀྱེ། རྒྱལ་བའི་སྲས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་ དཔའི་ས་བདུན་པ་འདི་ལ་གནས་པའི་ཚེ། ལུས་དང་ངག་དང་ཡིད་ཀྱི་ལས་ཟབ་ཅིང་དབེན་ལ། རྒྱུ་བ་མེད་པ་དང་ལྡན་པའང་རབ་ཏུ་ཐོབ་པ་ཡིན་ཏེ། ཁྱད་པར་གོང་དུ་བཙལ་བའི་ བརྩོན་འགྲུས་ཀྱང་ཡོངས་སུ་མི་གཏོང་ངོ༌། །ཡོངས་སུ་བཙལ་བའི་བརྩོན་འགྲུས་དེས་ཀྱང་ཡང་དག་པའི་མཐར་གནས་པ་ལའང་ཁྱད་པར་གོང་མ་ཤིན་ཏུ་ཐོབ་པར་བྱ་བའི་ཕྱིར་ཡང་ དག་པའི་མཐའ་མངོན་དུའང་མི་བྱེད་དོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ། རྒྱལ་བའི་སྲས། བྱང་ཆུབ་སེམས་དཔའི་ས་གང་ཡན་ཆད་དུ་བྱང་ཆུབ་ སེམས་དཔའི་འགོག་པ་ལ་སྙོམས་པར་འཇུག །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ། རྒྱལ་བའི་སྲས། བྱང་ཆུབ་སེམས་དཔའི་ས་དྲུག་པ་ཡན་ཆད་བྱང་ཆུབ་ སེམས་དཔའི་འགོག་པ་ལ་སྙོམས་པར་འཇུག་སྟེ། བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་སེམས་སྐད་ཅིག་རེ་རེ་ལ་ཡང་འགོག་པ་ ལ་སྙོམས་པར་འཇུག་སྟེ། འགོག་པ་མངོན་དུ་བྱས་ཞེས་ནི་མི་བྱའོ། །དེ་བས་ན་དེ་ནི་བསམ་གྱིས་མི་ཁྱབ་པའི་ལུས་དང་ངག་དང་ཡིད་ཀྱི་ལས་དང་ལྡན་ཞེས་བྱ་བ་ཡིན་ནོ། །ཀྱེ། ༄༅། །རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་ཡང་དག་པའི་མཐའ་ལ་གནས་པས་ཀྱང་གནས་ལ། ཡང་དག་པའི་མཐའ་མངོན་དུ་ཡང་མི་ བྱེད་པ་ནི་ངོ་མཚར་ཆེའོ། །ཀྱེ། རྒྱལ་བའི་སྲས། འདི་ལྟ་སྟེ། དཔེར་ན། མི་ལ་ལ་ཞིག་རྒྱ་མཚོ་ཆེན་པོའི་གྲུ་ཆེན་པོར་ཞུགས་ཏེ། རྒལ་བའི་ཐབས་ལ་མཁས་ཤིང་རླུང་ལ་མཁས་ པ་དང༌། ཆུ་ལ་མཁས་པ་ནི། རྒྱ་མཚོ་ཆེན་པོའི་ཆུའི་ཉེས་པས་མི་གོས་སོ། །ཀྱེ། རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ ས་བདུན་པ་འདི་ལ་གནས་ཤིང་ཕ་རོལ་ཏུ་ཕྱིན་པའི་གྲུ་ཆེན་པོར་ཞུགས་པ་ཡང་ཡང་དག་པའི་མཐའ་ལ་གནས་པས་ཀྱང་གནས་ལ། ཡང་དག་པའི་མཐའ་མངོན་དུ་ཡང་མི་བྱེད་དོ། །དེ་ ལྟར་དེ་ཡེ་ཤེས་ཀྱི་སྟོབས་དང་ཤུགས་ཐོབ་པ་ནི་ཏིང་ངེ་འཛིན་དང༌། ཡེ་ཤེས་ཀྱི་སྟོབས་དང་ཤུགས་ཀྱིས་མངོན་པར་བསྒྲུབས་པའི་བློ་དང༌། ཐབས་དང་ཤེས་རབ་ཀྱི་སྟོབས་དང༌། ཤུགས་ ཆེན་པོས་འཁོར་པའི་སྒོ་ཡང་སྟོན་ལ། མྱ་ངན་ལས་འདས་པའི་བསམ་པ་དང་ཡང་མི་འབྲལ་བ་ཡིན། འཁོར་མང་པོས་ཀུན་ནས་བསྐོར་བར་སྣང་ཡང་རྟག་ཏུ་རྒྱུན་མི་འཆད་པར་སེམས་ཀྱི་ དབེན་པའང་རབ་ཏུ་ཐོབ་པ་ཡིན། ཁམས་གསུམ་དུ་སྐྱེ་བ་ཡང་སྨོན་ལམ་གྱི་དབང་གིས་མངོན་པར་སྒྲུབ་ལ། འཇིག་རྟེན་གྱི་ཉེས་པས་ཀྱང་མི་གོས་པ་ཡིན། ཞི་ཞིང་རབ་ཏུ་ཞི་བ་ཡིན་ ལ༑ ཐབས་ཀྱིས་རབ་ཏུ་འབར་ཏེ། དེ་ལྟར་འབར་ཡང་ཚིག་པར་མི་འགྱུར་བ་ཡིན། སངས་རྒྱས་ཀྱི་ཡེ་ཤེས་ལའང་ཡོངས་སུ་འཇུག་ལ། ཉན་ཐོས་དང་རང་སངས་རྒྱས་ཀྱིས་ལས་ཀྱང་ཕྱིར་མི་ལྡོག་ པ་ཡིན། སངས་རྒྱས་ཀྱི་ཡུལ་གྱི་མཐིལ་དུ་ཡང་ཕྱིན་ལ། བདུད་ཀྱི་ཡུལ་ནའང་འདུག་པར་སྣང་བ་ཡིན། བདུད་ཀྱི་ལམ་བཞི་ལས་ཀྱང་ཡང་དག་པར་འདས་ལ་བདུད་ཀྱི་ཡུལ་དང་སྤྱོད་ཡུལ་ཡང་ ཡང་དག་པར་སྟོན་པ་ཡིན། མུ་སྟེགས་ཅན་གྱི་གནས་ཐམས་ཅད་ནའང་འདུག་པར་སྣང་ལ། སངས་རྒྱས་ཀྱི་མུ་སྟེགས་ཀྱི་གནས་ཀྱི་བསམ་པ་ཡང་མི་གཏོང་བ་ཡིན། འཇིག་རྟེན་གྱི་བྱ་ པ་ཐམས་ཅད་དང་ཡང་ལྡན་པར་སྣང་ལ། འཇིག་རྟེན་ལས་འདས་པའི་ཚུལ་ལ་ཡང་ཡང་དག་པར་གཞོལ་བ་ཡིན། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མི་འམ་ཅི་དང༌། མི་དང༌། མི་མ་ཡིན་པ་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་གྱི་མགོན་པོ་ཐམས་ཅད་ལས་ལྷག་པའི་རྒྱན་དང༌། ལྷབ་ལྷུབ་ཤིན་ཏུ་ བསྒྲུབ་པའང་རབ་ཏུ་ཐོབ་ལ། ཆོས་ལ་དགའ་བ་ཡིད་ལ་བྱ་བའང་མི་སྤོང་བ་ཡིན། དེ་ལྟར་དེ་ལྟ་བུའི་ཡེ་ཤེས་དང་ལྡན་པར་བྱང་ཆུབ་སེམས་དཔའི་ས་རིང་དུ་སོང་བ་འདི་ལ་གནས་པའི་བྱང་ ཆུབ་སེམས་དཔའ་དེའི་ལྟ་བ་རྒྱ་ཆེན་པོ་དང༌། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་ཏེ། ལྟ་བ་རྒྱ་ཆེན་པོ་དང་སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་ ༄༅། །དང༑ སངས་རྒྱས་སྟོང་ཕྲག་མང་པོ་དང༌། སངས་རྒྱས་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་ མང་པོ་དང༌། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང༌། སངས་རྒྱས་ཁྲག་ཁྲིག་སྟོང་ཕྲག་མང་པོ་དང༌། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང༌། སངས་རྒྱས་བྱེ་བ་ཁྲག་ ཁྲིག་བརྒྱ་སྟོང་ཕྲག་མང་པོ་སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས། བསམ་པ་རྒྱ་ཆེན་པོས་རིམ་གྲོ་ བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པར་བྱེད་དོ། །ན་བཟའ་དང༌། བསོད་སྙོམས་དང༌། གཟིམས་ཆ་དང༌། སྙུན་གྱི་རྐྱེན་སྨན་དང༌། ཡོ་བྱད་དག་ཀྱང་འབུལ་ཞིང༌། བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་ཚོགས་རྣམས་ལ་ཡང་ཡང་དག་པར་མཆོད་པ་བྱེད་དེ། དགེ་བའི་རྩ་བ་དེ་དག་ཀྱང་བླ་ ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་ལྟར་དེ་བཞིན་གཤེགས་པ་དེ་དག་ལ་བསྙེན་བཀུར་བྱེད་ཅིང༌། དེ་དག་ལས་རྗེ་ས་དང༌། རིམ་གྲོས་ནན་ཏན་དུ་ ཆོས་བསྟན་པ་ཉན་ཅིང་ལེན་ཏོ། །འཛིན་ཏོ། །ཐོས་ནས་ཀྱང་མ་ནོར་བའི་སྙོམས་པར་འཇུག་པ་དང༌། ཤེས་རབ་དང་ཡེ་ཤེས་ཀྱི་སྣང་བས་རབ་ཏུ་བརྩོན་པར་བྱེད་ཅིང་ནན་ཏན་གྱིས་ ཡོངས་སུ་འཛིན་ཏོ། །སངས་རྒྱས་བཅོམ་ལྡན་འདས་དེ་དག་གི་བསྟན་པ་ཡང་ཡང་དག་པར་འཛིན་ཏོ། །ཉན་ཐོས་དང་རང་སངས་རྒྱས་ཀྱི་མངོན་པར་རྟོགས་པ་ཡོངས་སུ་དྲི་བས་ ཀྱང་མི་འཕྲོགས་པ་ཡིན་ཏེ། དེ་སྔོན་པས་ཀྱང་སེམས་ཅན་ལ་ཕན་འདོགས་པའི་ཆོས་ཀྱི་བཟོད་པ་རྣམ་པར་དག་པར་འགྱུར་བ་ཡིན། དེ་ལྟར་བྱང་ཆུབ་སེམས་དཔའི་ས་རིང་དུ་ སོང་བ་འདི་ལ་གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་དེ་དག་སྔོན་པས་ཀྱང་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང༌། བསྐལ་པ་ཁྲག་ཁྲིག་ སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ཤིན་ཏུ་དག་ཅིང་ཡོངས་སུ་བྱང་བར་གནས་སོ། །ཀྱེ། རྒྱལ་ བའི་སྲས། འདི་ལྟ་སྟེ། དཔེར་ན། གསེར་གྱི་ས་ལེ་སྤྲམ་དེ་ཉིད་རིན་པོ་ཆེ་ཐམས་ཅད་ཀྱིས་རབ་ཏུ་སྤྲས་པ་ནི་སྔོན་པས་ཀྱང་རྒྱན་གྱི་རྣམ་པ་གཞན་དང་གཞན་གྱིས་མི་ཐུབ་པ་དང༌། ཆེས་འོད་གསལ་ཞིང་དང་བར་འགྱུར་རོ། །ཀྱེ། རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ས་རིང་དུ་སོང་བ་འདི་ལ་གནས་པའི་ ༄༅། །ཐབས་དང་ཤེས་རབ་ཀྱིས་བསྒྲུབས་པའི་དགེ་བའི་རྩ་བ་དེ་དག་སྔོན་པས་ཀྱང་ཆེས་ཤིན་ཏུ་བྱང་བ་དང༌། ཆེས་འོད་གསལ་ཞིང་དང་བར་འགྱུར་རོ། ། ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་མི་འཕྲོགས་པ་ཡིན། ཀྱེ། རྒྱལ་བའི་སྲས། འདི་ལྟ་སྟེ། དཔེར་ན། ཉི་མའི་འོད་ནི་སྐར་མའི་ཚོགས་དང༌། ཟླ་བའི་འོད་ ཀྱིས་མི་འཕྲོགས་ཤིང་འཛམ་བུའི་གླིང་ན་རླན་གྱི་བག་ཡོད་པ་ཐམས་ཅད་ཀྱང་ཤིན་ཏུ་སྐམ་པར་བྱེད་དོ། །ཀྱེ། རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་རིང་དུ་ སོང་བ་འདི་ལ་གནས་པའི་བྱང་ཆུབ་སེམས་དཔའི་དགེ་བའི་རྩ་བ་དེ་དག་ཀྱང་སྔོན་པས་ཀྱང་ཉན་ཐོས་དང༌། རང་སངས་རྒྱས་ཐམས་ཅད་ཀྱིས་མི་འཕྲོགས་པ་ཡིན། ཕྱིན་ཅི་ལོག་ བཞི་དང་ལྡན་པའི་ཉོན་མོངས་པའི་རླན་གྱི་རྣམ་པ་ཐམས་ཅད་ཀྱང་ཡོངས་སུ་སྐེམ་མོ། །དེའི་ཕ་རོལ་ཏུ་ཕྱིན་པ་བཅུ་ལས་ཐབས་མཁས་པའི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་མི་སྒྲུབ་པ་མ་ཡིན་ནོ། །ཀྱེ། རྒྱལ་བའི་སྲས། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་རིང་དུ་སོང་བ་ཞེས་བྱ་ བ་སྟེ། བྱང་ཆུབ་སེམས་དཔའི་ས་བདུན་པ་མདོར་བསྟན་པའོ། །དེ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕལ་ཆེར་ལྷའི་རྒྱལ་པོ་དབང་སྒྱུར་དུ་འགྱུར་ཏེ། སེམས་ཅན་རྣམས་ལ་མངོན་པར་རྟོགས་པའི་ཡེ་ཤེས་ཡང་དག་པར་བསྟན་པ་ལ་མཁས་ཤིང་མཐུ་མེད་པ་སྟེ། ཉན་ཐོས་དང་རང་སངས་རྒྱས་ཐམས་ཅད་ཀྱིས་ཡོངས་སུ་དྲི་བས་ མི་ཟད་པ་ཡིན། སེམས་ཅན་སྐྱོན་མེད་པར་ཤིན་ཏུ་བསླབ་པར་བྱ་བ་ལའང་མཁས་པ་ཡིན་ཏེ། སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་ རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་ མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས་ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང༌། ཆོས་ ཡིད་ལ་བྱ་བ་དང༌། དགེ་འདུན་ཡིད་ལ་བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་དང༌། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང༌། བྱང་ཆུབ་སེམས་དཔའི་ས་ཡིད་ལ་ བྱ་བ་དང༌། ཕ་རོལ་ཏུ་ཕྱིན་པ་ཡིད་ལ་བྱ་བ་དང༌། སྟོབས་ཡིད་ལ་བྱ་བ་དང༌། མི་འཇིགས་པ་ཡིད་ལ་བྱ་བ་དང༌། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་དང༌། རྣམ་པའི་ མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་བྱེ་བ་ ༄༅། །ཁྲག་ཁྲིག་བརྒྱ་སྟོང་རབ་ཏུ་ཐོབ་ཅིང་དེ་དག་ལ་སྙོམས་པར་འཇུག་པ་དང༌། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མཐོང་བ་དང༌། དེ་དག་གི་བྱིན་ གྱི་རླབས་ཀྱང་ཡང་དག་པར་ཤེས་པ་དང༌། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་སྣང་བར་བྱ་བ་དང༌། སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་སྨིན་པར་ བྱ་བ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་གནས་པར་བྱ་བ་དང༌། སྔོན་གྱི་མཐའ་དང་ཕྱི་མའི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་རབ་ཏུ་འཇུག་པ་དང༌། ཆོས་ཀྱི་སྒོ་བྱེ་བ་ཁྲག་ཁྲིག་བརྒྱ་སྟོང་རྣམ་པར་འབྱེད་པ་དང༌། ལུས་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་བསྟན་པ་དང༌། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་ བྱེ་བ་ཁྲག་ཁྲིག་བརྒྱ་སྟོང་ཡང་དག་པར་བསྟན་པར་བྱ་བའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཆད་བྱང་ཆུབ་སེམས་དཔའི་སྨོན་ལམ་གྱི་མཐུ་ཅན་རྣམས་སྨོན་ ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དམ། རྫུ་འཕྲུལ་ལམ། མིག་གམ། སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་ པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ ཡང་བརྟག་པར་བྱ་བ་དང༌། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཡེ་ཤེས་ཟབ་མོ་དོན་དམ་ཚིག་གིས་རྗེས་སྙེགས་ཤིང༌། །ས་དྲུག་རྟོགས་པའི་ ཡིད་ལྡན་བདག་ཉིད་མཉམ་བཞག་པ། །ཤེས་རབ་ཐབས་གཉིས་ཟུང་དུ་འབྲེལ་པ་མངོན་པར་སྒྲུབ། །མཁས་པས་ས་བདུན་སྤྱོད་པ་དམ་པ་ཡོངས་སུ་གནོན། །སྟོང་པ་མཚན་མེད་མི་ སྨོན་སྙིང་རྗེ་བྱམས་དང་ལྡན། །ཆོས་ཉིད་མཉམ་པའི་རྗེས་འགྲོ་སངས་རྒྱས་མཆོད་པར་བྱེད། །ཤེས་པས་ཤེས་བྱས་བསོད་ནམས་སྟོབས་ཀྱིས་མི་ངོམས་པས། །དེ་ཕྱིར་མཁས་ པ་བདུན་པའི་ས་ཕྱོགས་ཡོངས་སུ་གནོན། །ཁམས་གསུམ་མངོན་པར་སྒྲུབ་བྱེད་ཤིན་ཏུ་དབེན་པ་ཐོབ། །ཉོན་མོངས་སྟོབས་རྣམས་ཞི་ཞིང་འགྲོ་བ་ཞི་ལ་མོས། །མིག་ཡོར་སྒྱུ་མ་ རྨི་ལམ་མི་གཉིས་ཆོས་སྤྱོད་ཀྱང༌། །སྙིང་རྗེ་ལས་སྤྱོད་སྟོན་པ་མཁས་པས་བདུན་པ་གནོན། །ནམ་མཁའི་བསམ་པས་ཞིང་རྣམས་ཡོངས་སྤྱོད་རྣམ་མི་རྟོག །རྒྱལ་བའི་མཚན་ དང་ལྡན་ཞིང་མི་གཡོ་ཆོས་དང་ལྡན། །བརྗོད་པའི་དབྱངས་བྲལ་འགྲོ་བ་དགར་བྱ་དོན་དུ་གཉེར། །སྐད་ཅིག་སེམས་ཀྱི་རྒྱལ་བས་ཀུན་མཁྱེན་ཡང་དག་གཞོལ། །ཆོས་རྣམས་འདི་ ༄༅། །དག་སྤྱད་པས་སྣང་བ་ཐོབ་གྱུར་པས། །འགྲོ་བའི་དོན་འདོད་ས་མཆོག་ཡོངས་སུ་མནན་ཅེས་བྱ། །དེ་དག་ས་འདིར་གནས་ཤིང་མཐའ་ཡས་སེམས་ཅན་སྤྱོད། ། བདེ་གཤེགས་ཚད་མེད་ལས་མཁྱེན་རྣམ་པར་སྤྱོད་པ་བྱེད། །ཞིང་དང་བསྐལ་པ་ཆོས་གྲངས་སྣ་ཚོགས་དུ་མ་དང༌། །མོས་དང་བསམ་པ་སེམས་དང་སྤྱོད་པ་སྣ་ཚོགས་དང༌། ། ཐེག་པ་གསུམ་པོ་བསྟན་པ་ཚད་མེད་ཡང་དག་འཇུག །བདག་གིས་སེམས་ཅན་དེ་དག་ཡོངས་སུ་སྨིན་བྱ་ཞེས། །དེ་དག་དེ་ལྟར་རྣམ་ཕྱེ་ཤེས་རབ་ལམ་ལྡན་པ། །སྤྱོད་ལམ་ བཞི་པོར་མངོན་པར་བརྩོན་ཞིང་ཐབས་དང་ལྡན། །སེམས་ཀྱི་སྐད་ཅིག་ཀུན་ལ་བྱང་ཆུབ་ཡོན་ཏན་སྒྲུབ། །ཕ་རོལ་ཕྱིན་པ་བཅུར་འཇུག་ཡོངས་སུ་རྫོགས་པར་བྱེད། །སེམས་སྐྱེས་ འགྲོ་ལ་ཡོངས་བསྔོ་དེ་ནི་སྦྱིན་པའོ། །ཚུལ་ཁྲིམས་ཉོན་མོངས་ཞི་བ་བཟོད་པ་མི་འཚིག་པ། །བརྩོན་འགྲུས་དེ་ནས་ཁྱད་པར་གོང་དུ་རྩོམ་པ་སྟེ། །ལམ་ལས་མི་སྒུལ་དེ་ནི་ལེགས་ ལྡན་བསམ་གཏན་ནོ། །མི་སྐྱེའི་བཟོད་པ་རྡུལ་མེད་མཁས་པའི་ཤེས་རབ་མཆོག །ད་དུང་མངོན་འདོད་བསྔོ་བ་དེ་ཡི་སྨོན་ལམ་སྟེ། །མི་ཐུབ་སྟོབས་ཡིན་ཤིན་ཏུ་རྟོགས་པ་ཡེ་ཤེས་ སོ༑ ༑དེ་ལྟར་བྱང་ཆུབ་ཡོན་ཏན་ཐམས་ཅད་སྐད་ཅིག་ལྡན། །དང་པོར་དམིགས་པས་ཡོན་ཏན་ཡོངས་སུ་རྫོགས་པར་འགྱུར། །གཉིས་ལ་དྲི་མ་བསལ་ཕྱིར་གསུམ་ལ་བགེགས་ བསལ་བས། །བཞི་ལ་ལམ་གྱིས་ལྔ་ལ་མཉམ་པ་ཉིད་ཀྱིས་ཏེ། །མི་སྐྱེའི་སྣང་བས་མཁས་པའི་དྲུག་པ་རྣམ་པར་འཕེལ། །བདུན་པ་འདིར་ཕྱིན་ཡོན་ཏན་མཐའ་དག་ཀུན་རྫོགས་པར། ། སྨོན་ལམ་དུ་མ་སྣ་ཚོགས་མངོན་པར་སྒྲུབ་པ་བྱེད། །ཅི་ཕྱིར་ཞེ་ན་ཡེ་ཤེས་སྤྱོད་པ་འདིར་གྲུབ་པ། །དེ་ནི་བརྒྱད་པ་ཡན་ཆད་ཀུན་ཏུ་རྣམ་དག་འགྱུར། །འདའ་དཀའ་ཕྱིན་དཀའ་ཡེ་ཤེས་ མང་པོའི་ལས་ཀྱིས་འགྲུབ། །ཞིང་གཉིས་བར་མཚམས་ཇི་ལྟར་ཡོངས་སུ་བརྒལ་དཀའ་བཞིན། །བདུན་ལ་སྤྱོད་པ་རྒྱལ་པོ་ཆགས་མེད་ཇི་བཞིན་ཏེ། །ལམ་ལ་གནས་པ་ཡིན་གྱི་ ཐམས་ཅད་བརྟན་མ་འདས། །བརྒྱད་པའི་ཡེ་ཤེས་ས་དང་གང་ཚེ་ལྡན་གྱུར་པ། །དེ་ཚེ་སེམས་ཀྱི་ཡུལ་འདས་ཡེ་ཤེས་ལས་ལ་གནས། །ཚངས་པ་འགྲོ་བ་ལྟ་ཡང་མི་ཡི་བདག་ཉིད་མིན།། དེ་བཞིན་མཁས་པ་པད་མོ་བཞིན་དུ་མི་ཆགས་སྤྱོད། །འདི་ལ་གནས་པ་ཉོན་མོངས་སྣ་ཚོགས་རབ་ཏུ་འདའ། །དེ་དག་ཉོན་མོངས་སྤྱོད་མེད་བྱང་བའང་ཐོབ་པ་མིན། །ལམ་ལ་གནས་ཀྱང་ དེ་འདྲའི་ཉོན་མོངས་སྤྱོད་མེད་མིན། །རྒྱལ་བའི་ཡེ་ཤེས་མངོན་འདོད་དེ་བས་ཟད་པ་མིན། །འཇིག་རྟེན་བཟོ་དང་ལས་གནས་རྣམ་པ་སྣ་ཚོགས་དག །མཁས་པས་གཙུག་ལག་རྒྱུས་ལ་གནས་ ཏེ་ཤེས་བྱས་དང༌། །བསམ་གཏན་མངོན་ཤེས་སྟོབས་སྒོམ་ལྡན་པར་གྱུར་པ་རྣམས། །དེ་བས་གསལ་འགྱུར་ཏིང་འཛིན་སྣ་ཚོགས་མངོན་པར་སྒྲུབ། །ཉན་ཐོས་རང་རྒྱལ་སྤྱོད་ལས་ཡོངས་ ༄༅། །སུ་འདས་པ་སྟེ། །བདུན་པའི་བྱང་ཆུབ་སེམས་དཔའི་སྤྱོད་ལ་མཁས་པ་གནས། །སྔོན་ཆད་བསམ་པས་ཡིན་གྱི་འདི་ལ་ཡེ་ཤེས་ཀྱིས། །ནར་སོན་མཐུ་ དང་ལྡན་པའི་རྒྱལ་པོའི་བུ་བཞིན་ནོ། །ཤིན་ཏུ་ཟབ་དང་ལྡན་པས་གོང་དུ་རྩོམ་བྱེད་དེ། །འགོག་པའི་སེམས་དང་ལྡན་ཡང་མངོན་པར་མི་བྱེད་དོ། །ཇི་ལྟར་རྒྱ་མཚོར་ཕྱིན་ཅིང་ གྲུ་ཆེན་ཞུགས་གྱུར་པ། །ཆུ་ཚུལ་ཐམས་ཅད་མངོན་གྱུར་གྲུ་ལ་སྐྱོན་མི་གྱུར། །དེ་དག་སྔོན་པས་ཐབས་དང་ཤེས་རབ་མཆོག་དང་ལྡན། །ཤེས་དཀའ་འགྲོ་བ་ཀུན་ཏུ་ཤེས་ སྤྱོད་ཡོན་ཏན་མང༌། །སངས་རྒྱས་བྱེ་བ་མང་དུ་བསམ་པ་དག་པས་མཆོད། །གསེར་སྦྲམ་དེ་ཉིད་རིན་ཆེན་མང་པོས་སྨྲས་པ་བཞིན། །འདི་ལ་གནས་པའི་མཁས་པའི་ཤེས་རབ་ མཆོག་གི་འོང༌། །སྲེད་པའི་ཆུ་རྣམས་ཇི་ལྟར་ཉི་བཞིན་ཡོངས་སུ་སྐེམ། །ས་མཆོག་འདི་ལ་གནས་པ་དབང་སྒྱུར་རྒྱལ་པོར་འགྱུར། །ཡེ་ཤེས་དམ་པའི་འབྲས་བུ་སྟོན་ལ་མཐུ་ཡོད་ མཁས། །འདོད་ན་བརྩོན་འགྲུས་དམ་པའི་སྟོབས་དང་ལྡན་གྱུར་པ། །སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚང་བདག །ཕྱོགས་རྣམས་ཀུན་ཏུ་ཤིན་ཏུ་མཉམ་པར་བཞག་པས་མཐོང༌། ཡན་ཆད་སྨོན་ལམ་ཡོན་ཏན་མཆོག་ཅན་ཚད་ཀྱང་མེད། །འདི་ནི་ས་མཆོག་བདུན་པ་སྟེ། །རང་རྒྱལ་དབང་ལ་སྤྱོད་པ་དང༌། །འཇིག་རྟེན་ཀུན་གྱིས་ཤེས་པར་དཀའ། །ཐབས་དང་ ཤེས་རབ་སྦྱོར་བའོ། །རིང་དུ་སོང་བ་ཞེས་བྱ་བ་སྟེ། བྱང་ཆུབ་སེམས་དཔའི་ས་བདུན་པའོ།། །།བམ་པོ་ལྔ་བཅུ་པ། མཁས་པའི་སྤྱོད་པ་དེ་འདྲ་དམ་པ་ཐོས་ནས། །ལྷ་ཡི་ ཚོགས་དང་ལྷ་ཡི་དབང་པོ་ཀུན་དགའ། །བྱང་ཆུབ་སེམས་དཔའ་འགྲོ་ཕན་བརྩོན་པ་མང་པོ། །བདེ་བར་གཤེགས་དང་རྒྱལ་སྲས་རྣམས་ལ་མཆོད་བྱེད། །མེ་ཏོག་ཕྲེང་བ་རྒྱལ་མཚན་ བ་དན་ཡིད་འོང༌། །སྤོས་དང་ཕྱེ་མ་རིན་ཆེན་ན་བཟའ་རྒྱན་པ། །དབྱིག་གིས་སྤྲས་པའི་གདུགས་རབ་ཁྲག་ཁྲིག་དུ་མ། །ཕྲེང་བའི་སྤྲིན་གྱི་དམ་པའི་ཆར་ཡང་མངོན་འབེབས། །ལྷ་ཡི་ བུ་མོས་ཡིད་དུ་འོང་བའི་སྒྲ་དབྱངས། །དུ་མའི་སིལ་སྙན་གར་གྱི་མཆོག་དང་ལྡན་བྱས། །བདེ་བར་གཤེགས་དང་རྒྱལ་སྲས་མཆོད་པའི་དོན་དུ། །ཐུབ་པའི་ཡོན་ཏན་རྨད་དུ་བྱུང་བརྗོད་ བྱེད༑ ༑ཐམས་ཅད་གཟིགས་པ་རྐང་གཉིས་ཁྱུ་མཆོག་གཙོ་བོ། །སངས་རྒྱས་སྤྱོད་ཡུལ་འགྲོ་ལ་ཕན་ཕྱིར་སྟོན་མཛད། །དབྱངས་སྤྲིན་ཡིད་དུ་འོང་བ་རབ་ཏུ་འབྱུང་བའི། །རྔ་དང་སིལ་སྙན་ སྣ་ཚོགས་རྣམས་ལ་འདི་བྱུང༌། །སྐྲ་ཡི་རྩེ་ལ་བདེ་གཤེགས་བརྒྱ་ཕྲག་སྟོང་སྙེད། །གངྒཱ་ཁྲག་ཁྲིག་བྱེ་བའི་རྡུལ་བས་དེ་མང༌། །ཞིང་མཆོག་དམ་པ་མཉམ་པ་མེད་པ་དག་ན། །ཁྱུ་མཆོག་ རྣམས་ནི་རྡུལ་བྲལ་ཆོས་རྣམས་སྟོན་མཛད། །སྤུ་གཅིག་རྩེ་ལ་འབྱམས་ཀླས་དམ་པའི་ཞིང་མང༌། །གླིང་བཞི་དུ་མ་རྒྱ་མཚོ་མཚོ་ཆེན་ཀུན་ནས། །ཁོར་ཡུག་བྱེ་བ་དེ་བཞིན་རི་རབ་ ༄༅། །ཐམས་ཅད། །སོ་སོའི་ཚུལ་དང་ལྡན་པར་ཀུན་ཀྱང་སྣང་གྱུར། །སྐྲ་ཡི་རྩེ་མོ་དེ་ལ་འགྲོ་རྒྱུད་དྲུག་པོ། །ཡི་དྭགས་བྱོལ་སོང་མི་དང་སེམས་དམྱལ་ལྷ་ དང༑ ༑གནོད་སྦྱིན་སྲིན་པོ་ཀླུ་དང་ལྷ་མིན་མང་པོ། །སྣ་ཚོགས་ལས་ཀྱི་ཡུལ་ལ་ཀུན་ཀྱང་སྤྱོད་བྱེད། །རྡུལ་བྲལ་ཀུན་གྱི་ཞིང་གི་སྤྱོད་ཡུལ་ཀུན་ཏུ། །འཁོར་ལོ་དམ་པའི་མཆོག་ ཀྱང་དེ་ཚེ་འཁོར་གྱུར། །འགྲོ་བའི་འདུ་ཤེས་སེམས་དང་དེ་བཞིན་སྤྱོད་པ། །བདེ་གཤེགས་གསུང་གི་དམ་པ་ཀུན་ཀྱང་བསྟན་བྱས། །སེམས་ཅན་ལུས་ལ་བདེ་གཤེགས་ཞིང་ མར་སྣ་ཚོགས། །ཞིང་ལ་སེམས་ཅན་རྨད་སྙེད་ལུས་ཀྱང་དེ་བཞིན། །ལྷ་དང་མི་ཡི་ལམ་རྒྱུད་དེ་བཞིན་སྣ་ཚོགས། །མཁྱེན་ནས་བདེ་བར་གཤེགས་པ་ཆོས་རྣམས་ཀུན་སྟོན།། ཤིན་ཏུ་ཡངས་པའི་ཞིང་ལ་འདུ་ཤེས་ཕྲར་གྱུར། །རྡུལ་གྱི་མཚན་མ་དག་ལ་འདུ་ཤེས་ཡངས་གྱུར། །དེ་ལ་སོགས་པ་བདེ་བར་གཤེགས་པའི་རྫུ་འཕྲུལ། །འཇིག་རྟེན་ཀུན་གྱིས་ བརྗོད་ཀྱང་ཟད་པར་མི་འགྱུར། །ཆེ་བ་ཉིད་དབྱངས་དེ་སྐད་དུ། །སྙན་པའི་དབྱངས་སུ་གྲག་གྱུར་ནས། །འཁོར་རྣམས་རབ་ཏུ་དགའ་ཞིང་ཞི། །གསུང་བའི་མཆོག་ལ་ལྟ་ཞིང་ གནས། །འཁོར་རྣམས་ཞི་བར་ཤེས་གྱུར་ནས། །རྣམ་གྲོལ་ཟླ་བས་ཡང་སྨྲས་པ། །ས་བརྒྱད་པ་ཡི་རྣམ་པ་དང༌། །དེ་ལྟ་འཇུག་པ་བསྟན་པར་མཛོད། །བྱང་ཆུབ་སེམས་ དང་འ་རྡོ་རྗེའི་སྙིང་པོས་སྨྲས་པ། ཀྱེ༑ རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་ས་བདུན་པ་ལ་རྣམ་པར་དབྱེ་བ་ཤིན་ཏུ་བྱས་པ་ ཐབས་དང་ཤེས་རབ་ཀྱིས་ལམ་ཤིན་ཏུ་སྦྱངས་པ། ཚོགས་ཤིན་ཏུ་བསགས་པ། སྨོན་ལམ་ཆེན་པོ་ཤིན་ཏུ་བཏབ་པའི་སྟོབས་དང་ཤུགས་ཅན་དེ་བཞིན་གཤེགས་པའི་བྱིན་གྱི་རླབས་ཀྱིས་ བྱིན་ཏུ་བརླབས་པ་རང་གི་དགེ་བའི་རྩ་བའི་སྟོབས་དང་ཤུགས་ཐོབ་པ། དེ་བཞིན་གཤེགས་པའི་སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་དང་ ལྡན་པ། བསམ་པ་དང༌། ལྷག་པའི་བསམ་པས་ཡོངས་སུ་སྦྱང་བའི་སེམས་དང་ལྡན་པ། བསོད་ནམས་དང་ཡེ་ཤེས་ཀྱི་སྟོབས་ཀྱིས་མངོན་པར་འཕགས་པ། སྙིང་རྗེ་དང་སྙིང་བརྩེ་ བ་ཆེན་པོས་སེམས་ཅན་གྱི་ཁམས་ཐམས་ཅད་ཡོངས་སུ་མི་གཏོང་བའི་སྦྱོར་བ་དང་ལྡན་པ། ཡེ་ཤེས་ཀྱི་ལམ་ཚད་མེད་པའི་རྗེས་སུ་སོང་བ་དེ་ཆོས་ཐམས་ཅད་ཐོག་མ་ནས་མ་བྱུང་ བ་ཉིད་ལ་ཡང་དག་པ་ཇི་ལྟ་བ་བཞིན་དུ་འཇུག་གོ །མ་སྐྱེས་པ་དང༌། མཚན་ཉིད་མེད་པ་དང༌། སྐྱེ་བ་མེད་པ་དང༌། འཇིག་པ་མེད་པ་དང༌། ཐུག་པ་མེད་པ་དང༌། མི་རྒྱུ་བ་དང༌། མི་ལྡོག་ པ་དང༌། དངོས་པོ་མེད་པའི་རང་བཞིན་དང༌། ཐོག་མ་དང༌། ཐ་མ་དང༌། དབུས་མཉམ་པ་ཉིད་དང༌། དེ་བཞིན་ཉིད་ཀྱིས་རྣམ་པར་མི་རྟོག་པའི་ཐམས་ཅད་མཁྱེན་པའི་ཡེ་ཤེས་ལའང་ ༄༅། །ཡང་དག་པ་ཇི་ལྟ་བ་བཞིན་དུ་འཇུག་སྟེ། དེས་རྣམ་པ་ཐམས་ཅད་དུ་སེམས་དང༌། ཡིད་དང༌། རྣམ་པར་ཤེས་པའི་རྣམ་པར་རྟོག་པ་དང༌། འདུ་ཤེས་ དང་བྲལ་ཞིང་ཐོགས་པ་མེད་ལ་ནམ་མཁའ་དང་འདྲ་ཞིང༌། ནམ་མཁའི་རང་བཞིན་དུ་ཁོང་དུ་ཆུད་པས་མི་སྐྱེ་བའི་ཆོས་ལ་བཟོད་པ་ཐོབ་ཅེས་བྱའོ། །ཀྱེ༑ རྒྱལ་བའི་སྲས་དག་ དེ་ལ་དེ་ལྟ་བུའི་བཟོད་པ་དང་ལྡན་པའི་བྱང་ཆུབ་སེམས་དཔའ་ནི། བྱང་ཆུབ་སེམས་དཔའི་ས་མི་གཡོ་བ་ཐོབ་མ་ཐག་ཏུ་བྱང་ཆུབ་སེམས་དཔའི་གནས་ཟབ་མོ་ཤེས་པར་དཀའ་ བ་ཐ་མི་དད་པ་མཚན་མ་ཐམས་ཅད་དང་བྲལ་བ། འདུ་ཤེས་ཀྱི་བགེགས་ཐམས་ཅད་ལས་ཕྱིར་ལོག་པ་ཚད་མེད་པ། ཉན་ཐོས་དང་རང་སངས་རྒྱས་ཐམས་ཅད་ཀྱིས་མི་འཕྲོགས་པ་དབེན་ པ་ཐམས་ཅད་མངོན་དུ་གྱུར་པ་ཤིན་ཏུ་ཐོབ་པ་ཡིན། ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། དགེ་སློང་རྫུ་འཕྲུལ་དང་ལྡན་པ། སེམས་ཅན་ཐམས་ཅད་ལ་དབང་ཐོབ་པ་། མཐར་གྱིས་འགོག་པའི་བར་དུ་མཉམ་པར་བཞག་པ་ནི་རྒྱུ་བ་དང༌། སེམས་པ་དང༌། གཡོ་བའི་རྣམ་པར་རྟོག་པ་དང༌། འདུ་ཤེས་ཐམས་ཅད་དང་བྲལ་བ་ཡིན། ཀྱེ༑ རྒྱལ་བའི་ སྲས་དག །དེ་བཞིན་དུ་བྱང་ཆུབ་སེམས་དཔའ་ཡང་བྱང་ཆུབ་སེམས་དཔའི་ས་བརྒྱད་པ་མི་གཡོ་བ་འདི་ཐོབ་མ་ཐག་ཏུ་ཆེད་དུ་བྱ་བ་ཐམས་ཅད་དང་བྲལ་ཏེ། ལྷུན་གྱིས་གྲུབ་པའི་ཆོས་ ཉིད་ཐོབ་ཅིང་ལུས་དང༌། ངག་དང༌། སེམས་ཀྱི་རྩོལ་བ་ཐམས་ཅད་དང་བྲལ་ཏེ། ཤིན་ཏུ་དབེན་པའི་ཆོས་ཉིད་ལ་གནས་པ་ཡིན། ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། མི་ལ་ལ་ ཞིག་གཉིད་ཀྱིས་ལོག་པའི་རྨི་ལམ་དུ་བདག་ཆུ་ཀླུང་ཆེན་པོས་ཁྱེར་བ་སྙམ་བྱེད་ལ། དེ་དེ་ནས་ཅི་ཕྱིན་དུ་འབད་ཅིང་རྩོལ་བ་ཆེན་པོ་རྩོམ་རྩོམ་པ་ལས་དེ་འབད་ཅིང་རྩོལ་བ་ཆེན་པོ་དེ་ཉིད་ ཀྱིས་སད་པར་གྱུར་ན། དེ་སད་མ་ཐག་ཏུ་འབད་ཅིང་རྩོལ་བ་ཐམས་ཅད་དང་བྲལ་བར་འགྱུར་རོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་ཡང་ཉོན་མོངས་པའི་ ཆུ་ཀླུང་ཆེན་པོ་བཞིར་སེམས་ཅན་མང་པོ་དོད་བར་ཤེས་ནས་འབད་ཅིང་རྩོལ་བ་ཡོངས་སུ་རྩོམ་མོ། །དེ་བརྩོན་འགྲུས་ཆེན་པོ་དང་ལྡན་པས་བྱང་ཆུབ་སེམས་དཔའི་ས་མི་གཡོ་བ་འདི་ཐོབ་ མ་ཐག་ཏུ་ཆེད་དུ་བྱ་བ་ཐམས་ཅད་བྲལ་བ་ཡིན་ཏེ། དེའི་གཉིས་པོ་རྒྱུ་བ་འམ་མཚན་མ་རྒྱུ་བ་དག་ཀྱང་ཐམས་ཅད་ཀྱི་ཐམས་ཅད་དུ་མི་སྣང་བར་འགྱུར་རོ། །ཀྱེ༑ རྒྱལ་བའི་སྲས་དག །འདི་ ལྟ་སྟེ། དཔེར་ན། ཚངས་པའི་འཇིག་རྟེན་དུ་སྐྱེས་ཤིང་གནས་པ་ནི། འདོད་པ་ལ་སྤྱོད་པའི་ཉོན་མོངས་པ་རྣམས་ཡོངས་སུ་མི་རྒྱུ་བ་ཡིན་ཏེ། ཀྱེ༑ རྒྱལ་བའི་སྲས་དག །དེ་བཞིན་དུ་ བྱང་ཆུབ་སེམས་དཔའི་ས་མི་གཡོ་བ་ལ་གནས་པའི་བྱང་ཆུབ་སེམས་དཔའ་ཡང་སེམས་དང༌། ཡིད་དང༌། རྣམ་པར་ཤེས་པའི་ཡོངས་སུ་རྒྱུ་བ་རྣམས་ཐམས་ཅད་ཀྱི་ཐམས་ཅད་དུ་ ༄༅། །ཡོངས་སུ་མི་རྒྱུ་བ་ཡིན་ཏེ། དེ་སངས་རྒྱས་ལ་ཡོངས་སུ་རྒྱུ་བའམ། བྱང་ཆུབ་ལ་ཡོངས་སུ་རྒྱུ་བའམ། བྱང་ཆུབ་སེམས་དཔའ་ལ་ཡོངས་སུ་རྒྱུ་བའམ། རང་ སངས་རྒྱས་ལ་ཡོངས་སུ་རྒྱུ་བའམ། ཉན་ཐོས་ལ་ཡོངས་སུ་རྒྱུ་བའམ། མྱ་ངན་ལས་འདས་པ་ལ་ཡོངས་སུ་རྒྱུ་བའམ། དགྲ་བཅོམ་པ་ལ་ཡོངས་སུ་རྒྱུ་བའམ། ཕྱིར་མི་འོང་བ་ལ་ ཡོངས་སུ་རྒྱུ་བའམ། ལན་གཅིག་ཕྱིར་འོང་བ་ལ་ཡོངས་སུ་རྒྱུ་བའམ། རྒྱུན་དུ་ཞུགས་པ་ལ་ཡོངས་སུ་རྒྱུ་བ་ཡང་ཡོངས་སུ་མི་རྒྱུན་འཇིག་རྟེན་པའི་ཡོངས་སུ་རྒྱུ་བ་ཡོངས་སུ་མི་རྒྱུ་བ་ ལྟ་ཅི་སྨོས། ཀྱེ༑ རྒྱལ་བའི་སྲས་དག །དེ་ལྟར་མི་གཡོ་བའི་ས་ལ་གནས་པའི་བྱང་ཆུབ་སེམས་དཔའ་སྔོན་གྱི་སྨོན་ལམ་གྱི་སྟོབས་དང་ཤུགས་ལ་གནས་པ་དེའི་ཆོས་ཀྱི་སྒོའི་རྒྱུད་དེ་ལ་ སངས་རྒྱས་བཅོམ་ལྡན་འདས་རྣམས་དེ་བཞིན་གཤེགས་པའི་ཡེ་ཤེས་ཀྱིས་ཉེ་བར་བསྒྲུབ་པ་མཛད་དེ། དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ལེགས་སོ། །ལེགས་སོ། ། སངས་རྒྱས་ཀྱི་ཆོས་རྗེས་སུ་རྟོགས་པར་བྱ་བ་ལ་འདི་ནི་དོན་དམ་པའི་བཟོད་པ་ཡང་ཡིན་ན། འོན་ཀྱང༌། རིགས་ཀྱི་བུ། ངེད་ཀྱི་སྟོབས་བཅུ་དང༌། མི་འཇིགས་པ་བཞི་དང༌། སངས་རྒྱས་ཀྱི་ཆོས་ ཕུན་སུམ་ཚོགས་པ་དེ་ཁྱོད་ལ་མེད་ཀྱི། སངས་རྒྱས་ཀྱི་ཆོས་ཕུན་སུམ་ཚོགས་པ་དེ་དག་ཡོངས་སུ་བཙལ་བའི་ཕྱིར་བརྩོན་འགྲུས་རྩོམས་ཤིག །བཟོད་པའི་སྒོ་འདི་ཉིད་ཀྱང་མ་གཏོང་ཞིག། རིགས་ཀྱི་བུ། འདི་ལྟ་སྟེ། ཁྱོད་ཀྱིས་དེ་ལྟར་ཞི་བའི་རྣམ་པར་ཐར་པ་ཐོབ་ཀྱང་བྱིས་པ་སོ་སོའི་སྐྱེ་བོ་འདི་དག་ཞི་བ་མ་ཡིན། རབ་ཏུ་ཞི་བ་མ་ཡིན་ཏེ། ཉོན་མོངས་པ་སྣ་ཚོགས་ཡོངས་སུ་རྒྱུ་ བར་གྱུར་ན། དེ་ལྟར་རྣམ་པར་རྟོག་པ་རྣམ་པ་སྣ་ཚོགས་ཀྱིས་ཡོངས་སུ་མནར་བ་ལ་སོམས། འདི་ལྟར་ཡང༌། རིགས་ཀྱི་བུ་ཁྱོད་ཀྱི་སྔོན་གྱི་སྨོན་ལམ་སེམས་ཅན་གྱི་དོན་ཡོངས་སུ་ འགྲུབ་པར་བྱ་བར་བཏབ་པ་དང༌། ཡེ་ཤེས་ཀྱི་སྒོ་བསམ་གྱིས་མི་ཁྱབ་པ་དྲན་པར་གྱིས་ཤིག །འདི་ལྟར་ཡང༌། རིགས་ཀྱི་བུ། འདི་ནི་ཆོས་རྣམས་ཀྱི་ཆོས་ཉིད་དེ། དེ་བཞིན་གཤེགས་པ་རྣམས་ བྱུང་ཡང་རུང༌། མ་བྱུང་ཡང་རུང༌། ཆོས་ཀྱི་དབྱིངས་དང༌། ཆོས་ཀྱི་གནས་ཉིད་འདི་ནི་དེ་བཞིན་དུ་འདུག་པ་སྟེ། འདིས་ནི་དེ་བཞིན་གཤེགས་པ་རྣམས་ཉི་ཚེ་བརྗོད་པར་བྱ་བ་མ་ཡིན་ཏེ། ཉན་ ཐོས་དང་རང་སངས་རྒྱས་ཐམས་ཅད་ཀྱང་རྣམ་པར་མི་རྟོག་པའི་ཆོས་ཉིད་འདི་འཐོབ་བོ། །རིགས་ཀྱི་བུ་ཁྱོད་ངེད་ཀྱི་ལུས་ཚད་མེད་པ་དང༌། ཡེ་ཤེས་ཚད་མེད་པ་དང༌། སངས་རྒྱས་ཀྱི་ཞིང་ ཚད་མེད་པ་དང༌། ཡེ་ཤེས་མངོན་པར་བསྒྲུབས་པ་ཚད་མེད་པ་དང༌། འོད་ཀྱི་དཀྱིལ་འཁོར་ཚད་མེད་པ་དང༌། དབྱངས་ཀྱི་ཡན་ལག་རྣམ་པར་དག་པ་ཚད་མེད་པ་ལ་ལྟོས། ཁྱོད་ཀྱིས་ ཀྱང་དེ་བཞིན་ཏུ་མངོན་པར་བསྒྲུབ་པར་བྱ་དགོས་སོ། །འདི་ལྟར། རིགས་ཀྱི་བུ། གང་དེ་ལྟར་ཆོས་ཐམས་ཅད་ལ་རྣམ་པར་མི་རྟོག་པ་དེ་ནི་ཁྱོད་ཀྱི་སྣང་བ་གཅིག་པུར་ཟད་དེ། རིགས་ཀྱི་ ༄༅། །བུ༑ དེ་བཞིན་གཤེགས་པ་རྣམས་ཀྱི་ཆོས་སྣང་བ་ནི་འདི་འདྲ་སྟེ། ཡོངས་སུ་མཐའ་ཡས་པར་སོང་ལ་ཡོངས་སུ་མཐའ་ཡས་པར་བསྒྲུབས་པ་སྟེ། དེ་སྙེད་ ཀྱི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གིས་ཀྱང་བགྲང་བར་དཀའ། དེ་དག་ཐོབ་པར་བྱ་བའི་ཕྱིར་མངོན་པར་བསྒྲུབ་པ་སྐྱེད་ཅིག །འདི་ལྟར་ཡང༌། རིགས་ཀྱི་བུ། ཕྱོགས་བཅུའི་ཞིང་ ཚད་མེད་པ་དང༌། སེམས་ཅན་ཚད་མེད་པ་དང༌། ཆོས་རྣམ་པར་ཕྱེ་བ་ཚད་མེད་པ་ལ་ལྟོས་ཏེ། དེ་དག་ཐམས་ཅད་མ་ནོར་བར་བགྲང་བར་གྱིས་ཤིག །ཅེས་ཏེ། ཀྱེ༑ རྒྱལ་བའི་སྲས་ དག༑ དེ་ལྟར་དེ་ལྟ་བུའི་ཡེ་ཤེས་དང་ལྡན་པའི་བྱང་ཆུབ་སེམས་དཔའ་ལ་སངས་རྒྱས་བཅོམ་ལྡན་འདས་དེ་དག་ཡེ་ཤེས་མངོན་པར་བསྒྲུབ་པའི་སྒོ་དེ་དག་ལ་སོགས་པ་གང་གིས་བྱང་ ཆུབ་སེམས་དཔའ་ཡེ་ཤེས་རྣམ་པར་ཕྱེ་བའི་ཚུལ་མངོན་པར་བསྒྲུབ་པའི་ལས་ཚད་མེད་པ་ཡོངས་སུ་རྫོགས་པར་བྱེད་པ། གཞལ་དུ་མེད་པ་དག་ཉེ་བར་བསྒྲུབ་པ་མཛད་དོ། །ཀྱེ༑ རྒྱལ་ བའི་སྲས་དག །ཁྱེད་ཀྱིས་ཡིད་ཆེས་པ་དང༌། ཁོང་དུ་ཆུད་པར་བྱ་ན། གལ་ཏེ་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་དེ་མངོན་པར་བསྒྲུབ་པའི་སྒོར་གཞུག་ པ་མཛད་དུ་ཟིན་ན། དེ་ཉིད་དེའི་མཐའ་ལས་བརྒལ་བའི་མྱ་ངན་ལས་འདས་པར་འགྱུར་ཏེ། སེམས་ཅན་ཐམས་ཅད་ཀྱིས་དགོས་པའང་རྒྱུན་བཅད་པར་འགྱུར་རོ། །དེ་ལྟར་སངས་རྒྱས་ བཅོམ་ལྡན་འདས་དེ་དག་ནི་བྱང་ཆུབ་སེམས་དཔའ་དེ་ལ་ཡེ་ཤེས་མངོན་པར་བསྒྲུབ་པའི་ལས་གང་གིས་སྐད་ཅིག་གཅིག་ཏུ་མངོན་པར་བསྒྲུབས་པས་ཀྱང་ཐོག་མ་སེམས་བསྐྱེད་པ་ ཕྱིན་ཆད་ས་བདུན་ལ་ཞུགས་ཤིང་རྗེས་སུ་སོང་བ་ཡོངས་སུ་རྩོམ་པའི་བར་སྔ་མ་དེ་དག་གིས་བརྒྱའི་ཆར་ཡང་ཉེ་བར་མི་འགྲོ་།སྟོང་གི་ཆ་དང༌། ཁྲག་ཁྲིག་གི་ཆ་དང༌། ཁྲག་ཁྲིག་ བརྒྱའི་ཆ་དང༌། ཁྲག་ཁྲིག་སྟོང་གི་ཆ་དང༌། ཁྲག་ཁྲིག་བརྒྱ་ཕྲག་སྟོང་གི་ཆ་དང༌། བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཆར་ཡང་ཉེ་བར་མི་འགྲོའོ། །གྲངས་དང༌། ཆ་དང༌། བགྲང་བ་དང༌། དཔེ་དང༌། རྒྱུར་ཡང་ཉེ་བར་མི་འགྲོ་བ་ནས། བསྒྲུན་པ་ཙམ་གྱི་བར་དུའང་མི་ཆོག་པ་དེ་སྙེད་དུ་ཚད་མེད་པའི་ཡེ་ཤེས་མངོན་པར་བསྒྲུབ་པ་ལས་ཉེ་བར་བསྒྲུབ་པ་མཛད་དོ། །ཀྱེ༑ རྒྱལ་ བའི་སྲས་དག །དེ་ཅིའི་ཕྱིར་ཞེ་ན། སྔོན་ཆད་ལུས་གཅིག་གིས་མངོན་པར་བསྒྲུབ་པས་སྤྱོད་པ་མངོན་པར་བསྒྲུབ་པར་གྱུར་གྱི། འདི་ལ་གནས་པའི་བྱང་ཆུབ་སེམས་དཔའ་རྣམས་ནི་ ལུས་རྣམ་པར་ཕྱེ་བ་ཚད་མེད་པས། བྱང་ཆུབ་སེམས་དཔའི་སྤྱོད་པའི་མཐུ་ཡོངས་སུ་སྡུད་དེ། དབྱངས་མངོན་པར་བསྒྲུབ་པ་ཚད་མེད་པ་དང༌། ཡེ་ཤེས་མངོན་པར་བསྒྲུབ་པ་ཚད་མེད་ པ་དང༌། སྐྱེ་བ་མངོན་པར་བསྒྲུབ་པ་ཚད་མེད་པ་དང༌། ཞིང་ཡོངས་སུ་སྦྱོང་བ་ཚད་མེད་པ་དང༌། སེམས་ཅན་ཡོངས་སུ་སྨིན་པར་བྱ་བ་ཚད་མེད་པ་དང༌། སངས་རྒྱས་མཆོད་ཅིང་བསྙེན་བཀུར་ ༄༅། །བ་ཚད་མེད་པ་དང༌། ཆོས་ཀྱི་ཚུལ་ཁོང་དུ་ཆུད་པ་ཚད་མེད་པ་དང༌། མངོན་པར་ཤེས་པ་མངོན་པར་བསྒྲུབ་པའི་སྟོབས་དང་ཤུགས་ཚད་མེད་པ་དང༌། འཁོར་ གྱི་དཀྱིལ་འཁོར་ཚད་མེད་པ་རྣམ་པར་ཕྱེ་བ་དང༌། ཚད་མེད་པའི་རྗེས་སུ་སོང་བའི་ལུས་དང༌། ངག་དང༌། ཡིད་ཀྱི་ལས་ཀྱིས་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་མཐུ་མི་སྒུལ་བའི་ ཚུལ་གྱིས་ཡང་དག་པར་སྒྲུབ་བོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། རྒྱ་མཚོ་ཆེན་པོར་འགྲོ་བའི་གྲུ་ནི་རྒྱ་མཚོ་ཆེན་པོར་མ་ཕྱིན་གྱི་བར་དུ་ཆེད་དུ་བསྐྱོད་ཅིང་འགྲོ་ བར་བྱ་བ་ཡིན་ཏེ། རྒྱ་མཚོ་ཆེན་པོ་ལ་ཞེན་མ་ཐག་ཏུ་རླུང་གི་དཀྱིལ་འཁོར་གྱིས་བསུ་བས་ཆེད་དུ་བསྐྱོད་མི་དགོས་པ་ཡིན། དེས་རྒྱ་མཚོ་ཆེན་པོ་ལ་ཉིན་གཅིག་གིས་ཅི་ཆོད་པ་དེ་ནི་ སྔོན་དུ་བསྐྱོད་ཅིང་འགྲོ་བས་ལོ་བརྒྱར་ཡང་དེ་ལྟར་ཚད་མེད་པར་ཕྱིན་པར་མི་ནུས་སོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་པའི་ རྩ་བ་ཆེན་པོའི་ཚོགས་ཡང་དག་པར་བསགས་པ་ཐེག་པ་ཆེན་པོའི་གྲུར་ཞུགས་པ་ཡང་བྱང་ཆུབ་སེམས་དཔའི་སྤྱོད་པའི་རྒྱ་མཚོར་ཕྱིན་ནས་ཡུད་ཙམ་གཅིག་ཏུ་ལྷུན་གྱིས་གྲུབ་པའི་ཡེ་ ཤེས་ཀྱིས་ཐམས་ཅད་མཁྱེན་པའི་ཡེ་ཤེས་ཇི་ཙམ་ཡང་དག་པར་གནོན་པ་དེ་ནི་སྔོན་གྱི་ཆེད་དུ་བྱ་བའི་ལས་ཀྱིས་བསྐལ་པ་བརྒྱ་སྟོང་དུ་ཡང་ཡང་དག་པར་ནོན་པར་མི་ནུས་སོ། །ཀྱེ༑ རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ས་བརྒྱད་པ་འདི་ཐོབ་པའི་བྱང་ཆུབ་སེམས་དཔའ་ནི་ཐབས་མཁས་པའི་ཡེ་ཤེས་ཀྱིས་བསྒྲུབ་པ་ལྷུན་གྱིས་གྲུབ་པ་ལ་ཤིན་ཏུ་ ཞུགས་པའི་བྱང་ཆུབ་སེམས་དཔའི་བློས་ཐམས་ཅད་མཁྱེན་པའི་ཡེ་ཤེས་ལ་རྣམ་པར་དཔྱོད་ཅིང་འཇིག་རྟེན་གྱི་ཁམས་འབྱུང་བ་ཡང་རྣམ་པར་སྤྱོད་དོ། །འཇིག་རྟེན་གྱི་ཁམས་འཇིག་ པའང་རྣམ་པར་སྤྱོད་དོ། །དེ་འཇིག་རྟེན་ཇི་ལྟར་འབྱུང་བ་དེ་ཡང་རབ་ཏུ་ཤེས་སོ། །འཇིག་རྟེན་ཇི་ལྟར་འཇིག་པ་དེ་ཡང་རབ་ཏུ་ཤེས་སོ། །ལས་གང་བསགས་པས་འཇིག་རྟེན་འབྱུང་བར་ འགྱུར་བ་དེ་ཡང་རབ་ཏུ་ཤེས་སོ། །ལས་གང་བསགས་པས་འཇིག་རྟེན་འཇིག་པར་འགྱུར་བ་དེ་ཡང་རབ་ཏུ་ཤེས་སོ། །དུས་ཇི་སྲིད་ཀྱིས་འཇིག་རྟེན་འབྱུང་བར་འགྱུར་བ་དེ་ཡང་རབ་ཏུ་ཤེས་ སོ༑ ༑དུས་ཇི་སྲིད་ཀྱིས་འཇིག་རྟེན་འཇིག་པར་འགྱུར་བ་དེ་ཡང་རབ་ཏུ་ཤེས་སོ། །དུས་ཇི་སྲིད་དུ་འཇིག་རྟེན་བྱུང་ནས་གནས་པ་དེ་ཡང་རབ་ཏུ་ཤེས་སོ། །དུས་ཇི་སྲིད་དུ་འཇིག་རྟེན་ཞིག་ པར་གནས་པ་དེ་ཡང་རབ་ཏུ་ཤེས་སོ། །དེ་སའི་ཁམས་ཤིན་ཏུ་ཆུང་བ་ཡང་རབ་ཏུ་ཤེས་སོ། །སའི་ཁམས་ཤིན་ཏུ་ཆེ་བ་ཡང་རབ་ཏུ་ཤེས་སོ། །སའི་ཁམས་ཚད་མེད་པའང་རབ་ཏུ་ཤེས་ སོ༑ ༑སའི་ཁམས་རྣམ་པར་ཕྱེ་བ་ཡང་རབ་ཏུ་ཤེས་སོ། །དེ་ཆུའི་ཁམས་ཤིན་ཏུ་ཆུང་བའང་རབ་ཏུ་ཤེས་སོ། །ཆུའི་ཁམས་ཤིན་ཏུ་ཆེ་བའང་རབ་ཏུ་ཤེས་སོ། །ཆུའི་ཁམས་ཚད་མེད་པ་ ༄༅། །ཡང་རབ་ཏུ་ཤེས་སོ། །ཆུའི་ཁམས་རྣམ་པར་ཕྱེ་བ་ཡང་རབ་ཏུ་ཤེས་སོ། །དེ་མེའི་ཁམས་ཤིན་ཏུ་ཆུང་བའང་རབ་ཏུ་ཤེས་སོ། །མེའི་ཁམས་ ཤིན་ཏུ་ཆེ་བའང་རབ་ཏུ་ཤེས་སོ། །མེའི་ཁམས་ཚད་མེད་པ་ཡང་རབ་ཏུ་ཤེས་སོ། །མེའི་ཁམས་རྣམ་པར་ཕྱེ་བ་ཡང་རབ་ཏུ་ཤེས་སོ། །དེ་རླུང་ཁམས་ཤིན་ཏུ་ཆུང་བའང་རབ་ཏུ་ ཤེས་སོ། །རླུང་གི་ཁམས་ཤིན་ཏུ་ཆེ་བའང་རབ་ཏུ་ཤེས་སོ། །རླུང་གི་ཁམས་ཚད་མེད་པ་ཡང་རབ་ཏུ་ཤེས་སོ། །རླུང་གི་ཁམས་རྣམ་པར་ཕྱེ་བ་ཡང་རབ་ཏུ་ཤེས་སོ། ། དེ་ཤིན་ཏུ་ཕྲ་བའི་རྡུལ་ཕྲ་བ་ཉིད་ཀྱང་རབ་ཏུ་ཤེས་སོ། །ཤིན་ཏུ་ཕྲ་བའི་རྡུལ་ཡངས་པ་ཡང་རབ་ཏུ་ཤེས་སོ། །ཤིན་ཏུ་ཕྲ་བའི་རྡུལ་ཚད་མེད་པ་ཡང་རབ་ཏུ་ཤེས་སོ། །ཤིན་ཏུ་ ཕྲ་བའི་རྡུལ་རྣམ་པར་ཕྱེ་བ་ཡང་རབ་ཏུ་ཤེས་སོ། །འཇིག་རྟེན་གྱི་ཁམས་གང་ན་སའི་ཁམས་ཀྱི་རྡུལ་ཤིན་ཏུ་ཕྲ་བ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །ཆུའི་ཁམས་ཀྱི་རྡུལ་ ཤིན་ཏུ་ཕྲ་བ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །མེའི་ཁམས་ཀྱི་རྡུལ་ཤིན་ཏུ་ཕྲ་བ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །རླུང་གི་ཁམས་ཀྱི་རྡུལ་ཤིན་ཏུ་ཕྲ་བ་ཇི་སྙེད་པ་ དེ་དག་ཀྱང་རབ་ཏུ་ཤེས་སོ། །རིན་པོ་ཆེ་རྣམ་པར་ཕྱེ་བ་ཇི་སྙེད་པ་ཡོད་པ་དང༌། རིན་པོ་ཆེའི་རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་དག་ཀྱང་རབ་ཏུ་ཤེས་སོ། །སེམས་ཅན་གྱི་ལུས་ ལ་རྡུལ་ཇི་སྙེད་ཡོད་པ་དེ་དག་ཀྱང་རབ་ཏུ་ཤེས་སོ། །ཞིང་གི་ལྷུན་ལ་རྡུལ་ཤིན་ཏུ་ཕྲ་བ་སྙེད་ཡོད་པ་དེ་དག་ཀྱང་རབ་ཏུ་ཤེས་སོ། །དེ་སེམས་ཅན་གྱི་ལུས་ཆེ་བ་དང༌། ལུས་ཡངས་པ་ དང༑ ལུས་ཕྲ་བ་དང༌། ལུས་རྣམ་པར་ཕྱེ་བའང་རབ་ཏུ་ཤེས་སོ། །སེམས་ཅན་དམྱལ་བ་པའི་ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དང༌། བྱོལ་སོང་གི་སྐྱེ་གནས་པའི་ ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དང༌། གཤིན་རྗེའི་འཇིག་རྟེན་པའི་ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དང༌། ལྷ་མ་ཡིན་གྱི་འཇིག་རྟེན་པའི་ལུས་རྡུལ་ཤིན་ཏུ་ཕྲ་ བ་ཇི་སྙེད་ཀྱིས་བྱུང་བ་དང༌། ལྷའི་འཇིག་རྟེན་པའི་ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དང༌། མིའི་རིས་སུ་གཏོགས་པའི་ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དེ་དག་ཀྱང་ རབ་ཏུ་ཤེས་སོ། །དེ་དེ་ལྟར་རྡུལ་ཤིན་ཏུ་ཕྲ་བ་རབ་ཏུ་དབྱེ་བ་ལ་ཞུགས་པ་ནི་འདོད་པའི་ཁམས་འཇིག་པའང་རབ་ཏུ་ཤེས་སོ། །གཟུགས་ཀྱི་ཁམས་འཇིག་པ་ཡང་རབ་ཏུ་ཤེས་ སོ༑ ༑གཟུགས་མེད་པའི་ཁམས་འཇིག་པ་ཡང་རབ་ཏུ་ཤེས་སོ། །འདོད་པའི་ཁམས་འདུ་བ་ཡང་རབ་ཏུ་ཤེས་སོ། །གཟུགས་ཀྱི་ཁམས་འདུ་བ་ཡང་རབ་ཏུ་ཤེས་སོ། །གཟུགས་ མེད་པའི་ཁམས་འདུ་བ་ཡང་རབ་ཏུ་ཤེས་སོ། །འདོད་པའི་ཁམས་ཆུང་བ་ཡང་རབ་ཏུ་ཤེས་སོ། །འདོད་པའི་ཁམས་ཆེ་བའང་རབ་ཏུ་ཤེས་སོ། །འདོད་པའི་ཁམས་ཚད་མེད་ ༄༅། །པའང་རབ་ཏུ་ཤེས་སོ། །འདོད་པའི་ཁམས་རྣམ་པར་ཕྱེ་བའང་རབ་ཏུ་ཤེས་སོ། །གཟུགས་ཀྱི་ཁམས་དང༌། གཟུགས་མེད་པའི་ཁམས་ཆུང་བའང་ རབ་ཏུ་ཤེས་སོ། །ཆེ་བའང་རབ་ཏུ་ཤེས་སོ། །ཚད་མེད་པའང་རབ་ཏུ་ཤེས་སོ། །རྣམ་པར་ཕྱེ་བ་ཡང་རབ་ཏུ་ཤེས་སོ། །དེ་ཁམས་གསུམ་རྣམ་པར་སྤྱད་པའི་ཡེ་ཤེས་ཁོང་ དུ་ཆུད་པ་མངོན་པར་བསྒྲུབས་པའི་ཡེ་ཤེས་ཀྱི་སྣང་བ་དང་ལྡན་ལ། སེམས་ཅན་གྱི་ལུས་རབ་ཏུ་དབྱེ་བ་ལ་མཁས་ཤིང་ཞིང་གི་ལྷུན་རྣམ་པར་དབྱེ་བའི་ཡེ་ཤེས་ལ་མཁས་པས་སྐྱེ་ བའི་སྐྱེ་མཆེད་ཐམས་ཅད་མངོན་པར་བསྒྲུབ་པ་ལ་བློ་ཤིན་ཏུ་གཏོང་སྟེ། དེ་ནི་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར། སེམས་ཅན་རྣམས་ཀྱི་སྐྱེ་བ་དང༌། ཡོངས་སུ་ གྲུབ་པ་ཅི་འདྲ་བ་དེ་ལྟ་བུར་རང་གི་ལུས་བྱིན་གྱིས་རློབ་བོ། །དེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་བཀང་ཞིང་སེམས་ཅན་གྱི་མོས་པ་ཇི་ལྟ་བ་དེ་བཞིན་དུ་རང་ གི་ལུས་མིག་ཡོར་ལྟ་བུའི་ཡེ་ཤེས་ཀྱི་རྗེས་སུ་འབྲང་བས་སྐྱེ་བར་བྱ་བའི་ཕྱིར་མངོན་པར་སྒྲུབ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཉིས་སམ། གསུམ་མམ། བཞིའམ། ལྔའམ། བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུ་དག་ནས་བརྗོད་དུ་མེད་པའི་ཡང་བརྗོད་དུ་མེད་པའི་བར་དག་རྒྱས་པར་བཀང་སྟེ། སེམས་ཅན་ གྱི་མོས་པ་ཇི་ལྟ་བ་དེ་བཞིན་དུ་རང་གི་ལུས་མིག་ཡོར་ལྟ་བུའི་ཡེ་ཤེས་ཀྱི་རྗེས་སུ་འབྲང་བས་སྐྱེ་བར་བྱ་བའི་ཕྱིར་མངོན་པར་བསྒྲུབ་བོ། །དེ་དེ་ལྟ་བུའི་ཡེ་ཤེས་དང་ལྡན་པས་སངས་རྒྱས་ཀྱི་ ཞིང་གཅིག་ནས་ཀྱང་མི་གཡོ་ལ། སངས་རྒྱས་ཀྱི་ཞིང་བརྗོད་དུ་མེད་པ་དག་གི་དེ་བཞིན་གཤེགས་པའི་འཁོར་གྱི་དཀྱིལ་འཁོར་དག་ཏུ་ཡང་སྣང་བར་ཕྱིན་པ་ཡིན། དེ་སེམས་ཅན་རྣམས་ཀྱི་ ལུས་རྣམ་པར་ཕྱེ་བ་དང༌། མོས་པ་དང༌། བསམ་པ་ཇི་ལྟ་བ་བཞིན་དུ་ཞིང་དེ་དང་དེ་དག་དང༌། འཁོར་གྱི་དཀྱིལ་འཁོར་དེ་དང་དེ་དག་ཏུ་དེ་ལྟ་དེ་ལྟར་རང་གི་ལུས་སྟོན་ཏེ། དེ་དགེ་སྦྱོང་གི་ འཁོར་གྱི་དཀྱིལ་འཁོར་དུ་དགེ་སྦྱོང་གི་ཁ་དོག་དང་གཟུགས་སྟོན་ཏོ། །བྲམ་ཟེའི་འཁོར་གྱི་དཀྱིལ་འཁོར་དུ་བྲམ་ཟེའི་ཁ་དོག་དང་གཟུགས་སྟོན་ཏོ། །རྒྱལ་རིགས་ཀྱི་འཁོར་གྱི་དཀྱིལ་འཁོར་དུ་ རྒྱལ་རིགས་ཀྱི་ཁ་དོག་དང་གཟུགས་སྟོན་ཏོ། །རྗེའུ་རིགས་ཀྱི་འཁོར་གྱི་དཀྱིལ་འཁོར་དུ་རྗེའུ་རིགས་ཀྱི་ཁ་དོག་དང་གཟུགས་སྟོན་ཏོ། །ཁྱིམ་བདག་གི་འཁོར་གྱི་དཀྱིལ་འཁོར་དུ་ཁྱིམ་བདག་གི་ཁ་དོག་ དང་གཟུགས་སྟོན་ཏོ། །རྒྱལ་པོ་ཆེན་པོ་བཞིའི་རིས་ཀྱི་འཁོར་གྱི་དཀྱིལ་འཁོར་དུ་རྒྱལ་པོ་ཆེན་པོ་བཞིའི་ཁ་དོག་དང་གཟུགས་སྟོན་ཏོ། །སུམ་ཅུ་རྩ་གསུམ་པའི་འཁོར་གྱི་དཀྱིལ་འཁོར་དུ་སུམ་ཅུ་ རྩ་གསུམ་པའི་ཁ་དོག་དང་གཟུགས་སྟོན་ཏོ། །དེ་བཞིན་དུ་མཚེ་མའི་འཁོར་གྱི་དཀྱིལ་འཁོར་དང༌། དགའ་ལྡན་གྱི་འཁོར་གྱི་དཀྱིལ་འཁོར་དང༌། འཕྲུལ་དགའི་འཁོར་གྱི་དཀྱིལ་འཁོར་དང༌། ༄༅། །གཞན་འཕྲུལ་དབང་བྱེད་ཀྱི་འཁོར་གྱི་དཀྱིལ་འཁོར་དང༌། ཚངས་པའི་འཁོར་གྱི་དཀྱིལ་འཁོར་ནས། འོག་མིན་གྱི་འཁོར་གྱི་དཀྱིལ་འཁོར་གྱི་བར་དུ་དེ་ལྟ་དེ་ལྟ་ བུའི་ཁ་དོག་དང་གཟུགས་སྟོན་ཏོ། །དེ་ཉན་ཐོས་ཀྱིས་འདུལ་བའི་སེམས་ཅན་རྣམས་ལ་ཉན་ཐོས་ཀྱི་ལུས་དང་ཁ་དོག་དང་གཟུགས་སྟོན་ཏོ། །རང་སངས་རྒྱས་ཀྱི་འདུལ་བའི་སེམས་ ཅན་རྣམས་ལ་རང་སངས་རྒྱས་ཀྱི་ལུས་དང་ཁ་དོག་དང་གཟུགས་སྟོན་ཏོ། །བྱང་ཆུབ་སེམས་དཔས་འདུལ་བའི་སེམས་ཅན་རྣམས་ལ་བྱང་ཆུབ་སེམས་དཔའི་ལུས་དང་ཁ་དོག་དང༌། གཟུགས་སྟོན་ཏོ། །དེ་བཞིན་གཤེགས་པས་འདུལ་བའི་སེམས་ཅན་རྣམས་ལ་དེ་བཞིན་གཤེགས་པའི་སྐུ་དང་ཁ་དོག་དང་སྐུ་གཟུགས་སྟོན་ཏོ། །ཀྱེ༑ རྒྱལ་བའི་སྲས་དག། དེ་ལྟར་སངས་ རྒྱས་ཀྱི་ཞིང་རྗོད་དུ་མེད་པ་ཇི་སྙེད་པ་དེ་དག་གི་སེམས་ཅན་རྣམས་ཀྱི་མོས་པ་རབ་ཏུ་མང་བ་དེ་དག་ཐམས་ཅད་དུ་རང་གི་ལུས་དེ་ལྟ་དེ་ལྟར་རྣམ་པར་ཕྱེ་བ་ཡོངས་སུ་སྟོན་ཏོ། །དེ་ལུས་ཀྱི་རྣམ་ པར་རྟོག་པ་དང༌། འདུ་ཤེས་ཐམས་ཅད་དང་རྣམ་པར་བྲལ་བ་སྟེ། ལུས་མཉམ་པ་ཉིད་ཐོབ་པས་སེམས་ཅན་གྱི་ལུས་རབ་ཏུ་ཤེས་སོ། །ཞིང་གི་ལུས་དང༌། ལས་ཀྱི་རྣམ་པར་སྨིན་པའི་ ལུས་དང༌། ཉན་ཐོས་ཀྱི་ལུས་དང༌། རང་སངས་རྒྱས་ཀྱི་ལུས་དང༌། བྱང་ཆུབ་སེམས་དཔའི་ལུས་དང༌། དེ་བཞིན་གཤེགས་པའི་སྐུ་དང༌། ཡེ་ཤེས་ཀྱི་ལུས་དང༌། ཆོས་ཀྱི་ལུས་དང༌། ནམ་མཁའི་ལུས་ཀྱང་རབ་ཏུ་ཤེས་སོ། །དེས་སེམས་ཅན་རྣམས་ཀྱི་སེམས་དང་བསམ་པ་མངོན་པར་བསྒྲུབ་པ་ཡོངས་སུ་ཤེས་པས་འདོད་ན། སེམས་ཅན་གྱི་ལུས་ནམ་མཁའི་ལུས་སུ་བྱིན་ གྱིས་རློབ་བོ། །དེ་བཞིན་དུ་ཞིང་གི་ལུས་དང༌། ལས་རྣམ་པར་སྨིན་པའི་ལུས་དང༌། ཉན་ཐོས་ཀྱི་ལུས་དང༌། རང་སངས་རྒྱས་ཀྱི་ལུས་དང༌། བྱང་ཆུབ་སེམས་དཔའི་ལུས་དང༌། དེ་བཞིན་ གཤེགས་པའི་སྐུ་དང༌། ཡེ་ཤེས་ཀྱི་ལུས་དང༌། ཆོས་ཀྱི་ལུས་ཀྱང་ནམ་མཁའི་ལུས་སུ་བྱིན་གྱིས་རློབ་བོ། །དེས་སེམས་ཅན་རྣམས་ཀྱི་སེམས་དང་བསམ་པ་མངོན་པར་བསྒྲུབ་པ་ཡོངས་སུ་ ཤེས་པས་སེམས་ཅན་གྱི་ལུས་རང་གི་ལུས་སུ་བྱིན་གྱིས་རློབ་བོ། །དེ་བཞིན་དུ་ཞིང་གི་ལུས་དང༌། ལས་རྣམ་པར་སྨིན་པའི་ལུས་དང༌། ཉན་ཐོས་ཀྱི་ལུས་དང༌། རང་སངས་རྒྱས་ཀྱི་ལུས་ དང༑ བྱང་ཆུབ་སེམས་དཔའི་ལུས་དང༌། དེ་བཞིན་གཤེགས་པའི་སྐུ་དང༌། ཡེ་ཤེས་ཀྱི་ལུས་དང༌། ཆོས་ཀྱི་ལུས་དང༌། ནམ་མཁའི་ལུས་ཀྱང་རང་གི་ལུས་སུ་བྱིན་གྱིས་རློབ་བོ། །དེས་སེམས་ ཅན་རྣམས་ཀྱི་སེམས་དང་བསམ་པ་མངོན་པར་བསྒྲུབ་པ་ཡོངས་སུ་ཤེས་པས། ལུས་གང་དང་གང་ལུས་གང་དང་གང་དུ་འདོད་པ་དེ་དང་དེའི་ལུས་སུ་ལུས་དེ་དང་དེ་དག་བྱིན་གྱིས་རློབ་བོ། །དེ་ སེམས་ཅན་གྱི་ལུས་ཀྱི་ལུས་རྣམས་ཀྱི་ལས་ཀྱི་ལུས་ཀྱང་རབ་ཏུ་ཤེས་སོ། །རྣམ་པར་སྨིན་པའི་ལུས་དང༌། ཉོན་མོངས་པའི་ལུས་དང༌། གཟུགས་ཀྱི་ལུས་དང༌། གཟུགས་མེད་པའི་ལུས་ ༄༅། །ཀྱང་རབ་ཏུ་ཤེས་སོ། །ཞིང་གི་ལུས་རྣམས་ཀྱིས་ཆུང་བའི་རང་བཞིན་ཡང་རབ་ཏུ་ཤེས་སོ། །ཆེ་བ་དང༌། ཚད་མེད་པ་དང༌། ཀུན་ནས་ཉོན་མོངས་པ་དང༌། རྣམ་པར་དག་པ་དང༌། སྣྲེལ་ཞི་དང༌། སྤྱིའུ་ཚུགས་དང༌། གཞི་མཉམ་པར་ཡང་དག་པར་འཇུག་པ་དང༌། ཕྱོགས་ཀྱི་དྲ་བ་རྣམ་པར་དབྱེ་བ་ཡང་རབ་ཏུ་ཤེས་སོ། །ལས་རྣམ་པར་ སྨིན་པའི་ལུས་རྣམ་པར་ཕྱི་བའི་བརྡ་ཡང་རབ་ཏུ་ཤེས་སོ། །དེ་བཞིན་དུ་ཉན་ཐོས་ཀྱི་ལུས་རྣམ་པར་ཕྱེ་བའི་བརྡ་དང༌། རང་སངས་རྒྱས་ཀྱི་ལུས་རྣམ་པར་ཕྱེ་བའི་བརྡ་དང༌། བྱང་ཆུབ་ སེམས་དཔའི་ལུས་རྣམ་པར་ཕྱེ་བའི་བརྡ་ཡང་རབ་ཏུ་ཤེས་སོ། །དེ་བཞིན་གཤེགས་པའི་སྐུ་རྣམས་ཀྱི་མངོན་པར་འཚང་རྒྱ་བའི་ལུས་ཀྱང་རབ་ཏུ་ཤེས་སོ། །སྨོན་ལམ་གྱི་ལུས་ དང༑ སྤྲུལ་པའི་ལུས་དང༌། བྱིན་གྱི་རླབས་ཀྱི་ལུས་དང༌། གཟུགས་དང༌། མཚན་དང༌། དཔེ་བྱད་བཟང་པོའི་རྒྱན་གྱི་ལུས་དང༌། འོད་ཀྱི་ལུས་དང༌། ཡིད་ཀྱི་རང་བཞིན་གྱི་ལུས་དང༌། བསོད་ནམས་ཀྱི་ལུས་དང༌། ཡེ་ཤེས་ཀྱི་ལུས་དང༌། ཆོས་ཀྱི་ལུས་ཀྱང་རབ་ཏུ་ཤེས་སོ། །ཡེ་ཤེས་ཀྱི་ལུས་རྣམས་ཀྱི་ཤིན་ཏུ་རྣམ་པར་དཔྱད་པ་ཉིད་ཀྱང་རབ་ཏུ་ཤེས་སོ། །ཡང་དག་ པ་ཇི་ལྟ་བ་བཞིན་དུ་བརྟགས་པ་ཡང་རབ་ཏུ་ཤེས་སོ། །འབྲས་བུའི་སྦྱོར་བས་ཡང་དག་པར་བཟུང་བ་དང༌། འཇིག་རྟེན་པ་དང༌། འཇིག་རྟེན་ལས་འདས་པ་རྣམ་པར་ཕྱེ་བ་དང༌། ཐེག་ པ་གསུམ་རྣམ་པར་དགོད་པ་དང༌། ཐུན་མོང་དང༌། ཐུན་མོང་མ་ཡིན་པ་དང༌། འབྱུང་བ་དང༌། མ་འབྱུང་བ་དང༌། སློབ་པ་དང༌། མི་སློབ་པ་ཡང་རབ་ཏུ་ཤེས་སོ། །ཆོས་ཀྱི་ལུས་རྣམས་ཀྱི་མཉམ་ པ་ཉིད་ཀྱང་རབ་ཏུ་ཤེས་སོ། །འཁྲུལ་པ་མེད་པ་ཡང་རབ་ཏུ་ཤེས་སོ། །གནས་དང༌། བརྡ་དང༌། ཀུན་རྫོབ་རྣམ་པར་དགོད་པ་དང༌། སེམས་ཅན་དང་སེམས་ཅན་མ་ཡིན་པའི་ཆོས་རྣམ་པར་ དགོད་པ་དང༌། སངས་རྒྱས་དང༌། ཆོས་དང༌། འཕགས་པའི་དགེ་འདུན་རྣམ་པར་དགོད་པ་ཡང་རབ་ཏུ་ཤེས་སོ། །ནམ་མཁའི་ལུས་རྣམས་ཀྱི་ཚད་མེད་པ་ཉིད་ཀྱང་རབ་ཏུ་ཤེས་སོ། །ཐམས་ ཅད་ཀྱི་རྗེས་སུ་སོང་བ་དང༌། ལུས་མེད་པ་དང༌། ནོར་བ་མེད་ཅིང༌། མཐའ་ཡས་པ་དང༌། གཟུགས་མང་པོ་མངོན་ཞིང་གསལ་བར་བྱེད་པ་ཡང་རབ་ཏུ་ཤེས་སོ། །དེས་ལུས་ཀྱི་ཡེ་ཤེས་མངོན་ པར་བསྒྲུབ་པ་དེ་ལྟ་བུ་རབ་ཏུ་ཐོབ་པས་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་ཚེ་བྱིན་གྱིས་བརླབས་པའི་ཕྱིར་ཚེའི་དབང་རབ་ཏུ་འཐོབ་བོ། །ཏིང་ངེ་འཛིན་ཤིན་ཏུ་རྟོགས་པའི་ཡེ་ཤེས་ ལ་འཇུག་པར་བྱ་བའི་ཕྱིར་སེམས་ཀྱི་དབང་རབ་ཏུ་འཐོབ་བོ། །འཇིག་རྟེན་གྱི་ཁམས་ཐམས་ཅད་རྒྱན་དུ་མས་རབ་ཏུ་བརྒྱན་ཅིང་ཤིན་ཏུ་ཀླུབས་པའི་བྱིན་གྱི་རླབས་ཡང་དག་པར་བསྟན་པའི་ ཕྱིར་ཡོ་བྱད་ཀྱི་དབང་རབ་ཏུ་འཐོབ་བོ། །ལས་ཀྱི་རྣམ་པར་སྨིན་པའི་བྱིན་གྱི་རླབས་དུས་བཞིན་དུ་མ་ནོར་བར་བསྟན་པའི་ཕྱིར་ལས་ཀྱི་དབང་རབ་ཏུ་འཐོབ་བོ། །འཇིག་རྟེན་གྱི་ཁམས་ཐམས་ ༄༅། །ཅད་དུ་སྐྱེ་བ་ཡོངས་སུ་བསྟན་པའི་ཕྱིར་སྐྱེ་བའི་དབང་རབ་ཏུ་འཐོབ་བོ། །སངས་རྒྱས་ཀྱི་ཞིང་དང༌། དུས་གང་དུ་ཅི་དགའ་བར་མངོན་པར་འཚང་རྒྱ་བ་ ཡང་དག་པར་བསྟན་པའི་ཕྱིར་སྨོན་ལམ་གྱི་སྟོབས་རབ་ཏུ་འཐོབ་བོ། །འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱིས་རབ་ཏུ་གང་བ་ཡང་དགེ་བར་བསྟན་པའི་ཕྱིར་མོས་པའི་ དབང་རབ་ཏུ་འཐོབ་བོ། །སངས་རྒྱས་ཀྱི་ཞིང་ཐམས་ཅད་དུ་རྫུ་འཕྲུལ་དང༌། རྣམ་པར་འཕྲུལ་བ་ཡང་དག་པར་བསྟན་པའི་ཕྱིར་རྫུ་འཕྲུལ་གྱི་སྟོབས་རབ་ཏུ་འཐོབ་བོ། །དེ་བཞིན་ གཤེགས་པའི་སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་མ་འདྲེས་པ་དང༌། མཚན་དང་དཔེ་བྱད་བཟང་པོ་དང༌། མངོན་པར་འཚང་རྒྱ་བ་ཡང་དག་པར་བསྟན་པའི་ཕྱིར་ ཡེ་ཤེས་ཀྱི་དབང་རབ་ཏུ་འཐོབ་བོ། །མཐའ་དང་དབུས་མེད་པའི་ཆོས་ཀྱི་སྒོ་སྣང་བ་ཡང་དག་པར་བསྟན་པའི་ཕྱིར་ཆོས་ཀྱི་དབང་རབ་ཏུ་འཐོབ་བོ། །དེ་བྱང་ཆུབ་སེམས་དཔའི་དབང་ བཅུ་པོ་འདི་དག་ཐོབ་མ་ཐག་ནས་བསམ་གྱིས་མི་ཁྱབ་པའི་ཡེ་ཤེས་དང་ལྡན་པ་ཡིན། ཚད་མེད་པའི་ཡེ་ཤེས་དང་ལྡན་པ་ཡིན། ཡངས་པའི་ཡེ་ཤེས་དང་ལྡན་པ་ཡིན། མི་འཕྲོགས་ པའི་ཡེ་ཤེས་དང་ལྡན་པ་ཡིན། དེས་དེ་ལྟ་བུ་རྗེས་སུ་སོང་ཞིང་དེ་ལྟ་བུའི་ཡེ་ཤེས་དང་ལྡན་པས་ལུས་ཀྱི་ལས་ཁ་ན་མ་ཐོ་བ་ཤིན་ཏུ་མེད་པ་ཡང་དག་པར་རྒྱུ་ཞིང་འབྱུང་བ་ཡིན། ངག་གི་ ལས་ཁ་ན་མ་ཐོ་བ་ཤིན་ཏུ་མེད་པ་ཡང་དག་པར་རྒྱུ་ཞིང་འབྱུང་བ་ཡིན། ཡིད་ཀྱི་ལས་ཁ་ན་མ་ཐོ་བ་ཤིན་ཏུ་མེད་ཅིང་ཡེ་ཤེས་སྔོན་དུ་འགྲོ་བ་ཡེ་ཤེས་རྗེས་སུ་འབྲང་བ། ཤེས་རབ་ཀྱི་ཕ་ རོལ་ཏུ་ཕྱིན་པས་དབང་བསྒྱུར་བ། སྙིང་རྗེ་ཆེན་པོ་སྔོན་དུ་འགྲོ་བའི་ཐབས་མཁས་པས་ཤིན་ཏུ་རྣམ་པར་ཕྱེ་བ། སྨོན་ལམ་གྱིས་ཤིན་ཏུ་མངོན་པར་བསྒྲུབས་པ། དེ་བཞིན་གཤེགས་ པའི་བྱིན་གྱིས་ཤིན་ཏུ་བརླབས་པ། སེམས་ཅན་གྱི་དོན་བྱ་ཞིང་སྦྱོར་བ་རྒྱུན་མ་ཆད་པ། འཇིག་རྟེན་གྱི་ཁམས་ཐམས་ཅད་དུ་རྣམ་པར་ཕྱེ་བ་ཡང་དག་པར་རྒྱུ་ཞིང་འབྱུང་ངོ༌། །ཀྱེ༑ རྒྱལ་བའི་ སྲས་དག །དེ་ལ་མདོར་བསྡུ་ན། བྱང་ཆུབ་སེམས་དཔའི་ས་མི་གཡོ་བ་འདི་ཐོབ་པའི་བྱང་ཆུབ་སེམས་དཔའི་ལུས་དང་ངག་དང་ཡིད་ཀྱི་ལས་ནི་སངས་རྒྱས་ཀྱི་ཆོས་ཐམས་ཅད་ཡང་ དག་པར་སྡུད་པའི་ཕྱིར་ཡང་དག་པར་རྒྱུ་ཞིང་འབྱུང་ངོ༌། །དེ་ལྟར་དེས་བྱང་ཆུབ་སེམས་དཔའི་ས་མི་གཡོ་བ་འདི་ཐོབ་པས་ཉོན་མོངས་པའི་རྒྱུ་བ་ཐམས་ཅད་དང་བྲལ་བའི་ཕྱིར་བསམ་ པའི་སྟོབས་ཤིན་ཏུ་བརྟན་པ་ཡིན། ལམ་དང་མི་འབྲལ་བའི་ཕྱིར་ལྷག་པའི་བསམ་པ་ཤིན་ཏུ་བརྟན་པ་ཡིན། སེམས་ཅན་གྱི་དོན་ཡོངས་སུ་མི་གཏོང་བའི་ཕྱིར་སྙིང་རྗེ་ཆེན་པོའི་སྟོབས་ ཤིན་ཏུ་བརྟན་པ་ཡིན། འགྲོ་བ་ཐམས་ཅད་ཡོངས་སུ་སྐྱོབ་པའི་ཕྱིར་བྱམས་པ་ཆེན་པོའི་སྟོབས་ཤིན་ཏུ་བརྟན་པ་ཡིན། ཉམས་པ་མེད་པའི་ཆོས་དང་ལྡན་པའི་ཕྱིར་གཟུངས་ཀྱི་སྟོབས་ཤིན་ ༄༅། །ཏུ་བརྟན་པ་ཡིན། སངས་རྒྱས་ཀྱི་ཆོས་ཐམས་ཅད་རབ་ཏུ་དབྱེ་བའི་བྱེ་བྲག་ལ་མཁས་པའི་ཕྱིར་སྤོབས་པའི་སྟོབས་ཤིན་ཏུ་བརྟན་པ་ཡིན། འཇིག་རྟེན་གྱི་ ཁམས་མཐའ་ཡས་པར་སྤྱོད་པའི་རྣམ་པ་ལ་མཁས་པས་མངོན་པར་ཤེས་པའི་སྟོབས་ཤིན་ཏུ་བརྟན་པ་ཡིན། བྱང་ཆུབ་སེམས་དཔའི་བྱ་བ་ཐམས་ཅད་ཡོངས་སུ་མི་གཏོང་བས་སྨོན་ ལམ་གྱི་སྟོབས་ཤིན་ཏུ་བརྟན་པ་ཡིན། སངས་རྒྱས་ཀྱི་ཆོས་ཐམས་ཅད་ཡང་དག་པར་བསྒྲུབ་པའི་ཕྱིར་ཕ་རོལ་ཏུ་ཕྱིན་པའི་སྟོབས་ཤིན་ཏུ་བརྟན་པ་ཡིན། ཐམས་ཅད་མཁྱེན་པའི་ ཡེ་ཤེས་རྣམ་པ་ཐམས་ཅད་དུ་མངོན་དུ་གྱུར་པས་དེ་བཞིན་གཤེགས་པའི་བྱིན་གྱི་རླབས་ཀྱི་སྟོབས་ཤིན་ཏུ་བརྟན་པ་ཡིན་ཏེ། དེ་དེ་ལྟ་བུའི་སྟོབས་ཀྱི་ཤུགས་དང་ལྡན་པས་བྱ་ བ་ཐམས་ཅད་ཀྱང་ཡང་དག་པར་སྟོན་ལ། བྱ་བ་ཐམས་ཅད་ལ་ཁ་ན་མ་ཐོ་བའང་མེད་པ་ཡིན། ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ཡེ་ཤེས་ཀྱི་ས་བརྒྱད་པ་སྟེ། མི་འཕྲོགས་པའི་ཕྱིར་མི་གཡོ་བ་ཞེས་བྱའོ། །ཡེ་ཤེས་མི་ཟློག་པའི་ཕྱིར་མི་འགྱུར་བ་ཞེས་བྱའོ། །འགྲོ་བ་ཐམས་ཅད་ཀྱིས་ཤེས་པར་དཀའ་བས་ན་ཐོབ་པར་དཀའ་བའི་ས་ཞེས་ བྱའོ༑ ༑ཁ་ན་མ་ཐོ་བ་མེད་པའི་ཕྱིར་གཞོན་ནུའི་ས་ཞེས་བྱའོ། །བསམ་པ་ཇི་ལྟ་བ་བཞིན་དབང་བསྒྱུར་བས་སྐྱེ་བའི་ས་ཞེས་བྱའོ། །གཟོད་བྱ་བ་མེད་པས་ཡོངས་སུ་རྫོགས་པའི་ས་ ཞེས་བྱའོ། །ཡེ་ཤེས་ཀྱིས་རྣམ་པར་དབྱེ་བ་ཤིན་ཏུ་བྱས་པས་མཐར་ཐུག་པའི་ས་ཞེས་བྱའོ། །སྨོན་ལམ་ཤིན་ཏུ་མངོན་པར་བསྒྲུབས་པས་མྱ་ངན་ལས་འདས་པའི་ས་ཞེས་བྱའོ། །གཞན་ གྱིས་རྣམ་པར་མི་འཁྲུགས་པས་བྱིན་གྱི་རླབས་ཀྱིས་ཞེས་བྱའོ། །སྔོན་གྱི་མཐའ་མངོན་པར་བསྒྲུབས་པས་ལྷུན་གྱིས་གྲུབ་པའི་ས་ཞེས་བྱའོ། །ཀྱེ༑ རྒྱལ་བའི་སྲས་དག །དེ་ལྟར་བྱང་ཆུབ་ སེམས་དཔའ་དེ་ལྟ་བུའི་ཡེ་ཤེས་མངོན་པར་བསྒྲུབས་པ་དང་ལྡན་ཞིང༌། སངས་རྒྱས་ཀྱི་རིགས་ཀྱི་རྗེས་སུ་སོང་བ། སངས་རྒྱས་ཀྱི་ཡོན་ཏན་གྱིས་ཤིན་ཏུ་གསལ་བར་གྱུར་བ། དེ་བཞིན་ གཤེགས་པའི་སྤྱོད་ལམ་དང་སྤྱོད་པ་དང་ཚུལ་གྱི་རྗེས་སུ་སོང་བ། སངས་རྒྱས་ཀྱི་ཡུལ་ལ་མངོན་དུ་གྱུར་པ་དེ་ནི་རྟག་ཏུ་རྒྱུན་མི་འཆད་པར་དེ་བཞིན་གཤེགས་པའི་བྱིན་གྱིས་ཤིན་ཏུ་བརླབས་ པ་ཡིན། བརྒྱ་བྱིན་དང༌། ཚངས་པ་དང༌། འཇིག་རྟེན་གྱི་མགོན་པོས་རབ་ཏུ་བསུ་བ་ཡིན། ལག་ན་རྡོ་རྗེ་རྟག་པར་རྗེས་སུ་འབྲང་བ་ཡིན། ཏིང་ངེ་འཛིན་གྱི་སྟོབས་ཡོངས་སུ་མ་བཏང་བ་ཡིན་། ལུས་རྣམ་པར་ཕྱེ་བ་ཚད་མེད་པ་མངོན་པར་གྲུབ་པ་ཡིན། ལུས་ཀྱི་སྤྱོད་པའི་སྟོབས་ཐམས་ཅད་དང་ལྡན་པ་ཡིན། མངོན་པར་ཤེས་པ་ཆེན་པོའི་རྣམ་པར་སྨིན་པ་ཡོངས་སུ་རྫོགས་པ་ཡིན། ཏིང་ངེ་འཛིན་མཐའ་ཡས་པ་ལ་དབང་བསྒྱུར་བ་ཡིན། ལུང་བསྟན་པ་ཚད་མེད་པ་ཡང་དག་པར་ནོད་པ་ཡིན། ཡོངས་སུ་སྨིན་པའི་ཚུལ་བཞིན་དུ་འགྲོ་བ་རྣམས་ལ་མངོན་པར་འཚང་ ༄༅། །རྒྱ་བ་ཡོངས་སུ་སྟོན་པ་ཡིན་ཏེ། དེ་དེ་ལྟ་བུའི་ས་དང་ལྡན་ཞིང་ཐེག་པ་ཆེན་པོའི་དཀྱིལ་འཁོར་ལ་རབ་ཏུ་ཞུགས་པ་ཤིན་ཏུ་རྣམ་པར་དཔྱད་པའི་ཡེ་ ཤེས་མངོན་པར་ཤེས་པ་ཆེན་པོ་དང་ལྡན་པ་རྟག་ཏུ་རྒྱུན་མི་འཆད་པར་ཤེས་རབ་སྣང་བའི་འོད་ཟེར་གཏོང་བ། ཆོས་ཀྱི་དབྱིངས་ཆགས་པ་མེད་པའི་ལམ་དུ་ཞུགས་པ། འཇིག་རྟེན་ གྱི་ཁམས་ཀྱི་ལམ་རྣམ་པར་དབྱེ་བ་ལ་མཁས་པ། ཡོན་ཏན་གྱི་རྣམ་པ་ཐམས་ཅད་ཡང་དག་པར་སྟོན་པ་རང་གི་སེམས་བསྐྱེད་པ་ལ་དབང་བསྒྱུར་བ། སྔོན་གྱི་མཐའ་དང་ཕྱི་མའི་ མཐའ་ཤིན་ཏུ་རྟོགས་པའི་ཡེ་ཤེས་ཅན། བདུད་ཀྱི་ལམ་ཐམས་ཅད་ཡོངས་སུ་བཟློག་པའི་ཡེ་ཤེས་དང་ལྡན་པ། དེ་བཞིན་གཤེགས་པའི་ཡུལ་དང་སྤྱོད་ཡུལ་གྱི་རྗེས་སུ་ཞུགས་ པ་ནི་འཇིག་རྟེན་གྱི་ཁམས་འབྱམས་ཀླས་ཤིང་མུ་མེད་པ་དག་ཏུ་བྱང་ཆུབ་སེམས་དཔའི་སྤྱོད་པ་ཕྱིར་མི་ལྡོག་པའི་ཚུལ་གྱིས་སྤྱོད་པས་དེའི་ཕྱིར་བྱང་ཆུབ་སེམས་དཔའ་དེ་ནི་བྱང་ ཆུབ་སེམས་དཔའི་ས་མི་གཡོ་བ་ཐོབ་པ་ཡིན་ཞེས་བྱའོ། །ཀྱེ༑ རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ས་མི་གཡོ་བ་ཐོབ་པའི་བྱང་ཆུབ་སེམས་དཔའ་ནི་ཏིང་ངེ་འཛིན་ གྱི་སྟོབས་ཀྱིས་མངོན་པར་བསྒྲུབས་པས་རྟག་ཏུ་རྒྱུན་མི་འཆད་པར་དེ་བཞིན་གཤེགས་པ་མཐའ་ཡས་པ་མཐོང་བ་དང་མི་འབྲལ་བ་ཡིན། སངས་རྒྱས་མཐོང་བ་མཆོད་ཅིང་བསྙེན་ བཀུར་བ་རྒྱ་ཆེན་པོ་ཡང་ཡོངས་སུ་མི་གཏོང་སྟེ། དེ་བསྐལ་པ་རེ་རེ་དང༌། འཇིག་རྟེན་གྱི་ཁམས་འབྱམས་ཀླས་པ་རེ་རེ་དག་ཏུ་ཡང་སངས་རྒྱས་དུ་མ་དང༌། སངས་རྒྱས་བརྒྱ་ཕྲག་དུ་མ་དང༌། སངས་རྒྱས་སྟོང་ཕྲག་དུ་མ་དང༌། སངས་རྒྱས་བརྒྱ་སྟོང་ཕྲག་དུ་མ་དང༌། སངས་རྒྱས་བྱེ་བ་བརྒྱ་སྟོང་ཕྲག་དུ་མ་དང༌། སངས་རྒྱས་ཁྲག་ཁྲིག་དུ་མ་དང༌། སངས་རྒྱས་ཁྲག་ཁྲིག་བརྒྱ་ཕྲག་ དུ་མ་དང༌། སངས་རྒྱས་ཁྲག་ཁྲིག་སྟོང་ཕྲག་དུ་མ་དང༌། སངས་རྒྱས་ཁྲག་ཁྲིག་བརྒྱ་སྟོང་ཕྲག་དུ་མ་དང༌། སངས་རྒྱས་བྱེ་བ་ཁྲག་ཁྲིག་བརྒྱ་ཕྲག་དུ་མ་ལ་རིམ་གྲོ་བྱེད་དོ། །བཀུར་སྟི་བྱེད་ དོ༑ ༑བསྟི་སྟང་བྱེད་དོ། །མཆོད་པ་བྱེད་དོ། །མཆོད་པ་མངོན་པར་བསྒྲུབ་པའི་རྣམ་པ་ཐམས་ཅད་ཀྱང་ཡང་དག་པར་འབུལ་ལོ། །དེ་བཞིན་གཤེགས་པ་དེ་དག་ལ་བསྙེན་བཀུར་བྱེད་ཅིང་ འཇིག་རྟེན་གྱི་ཁམས་རྣམ་པར་དབྱེ་བ་སྔོན་དུ་འགྲོ་བའི་ཆོས་སྣང་བ་ཉེ་བར་བསྒྲུབ་པ་ཡང་ཡང་དག་པར་ལེན་ཏོ། །དེ་སྔོན་པས་ཀྱང་དེ་བཞིན་གཤེགས་པའི་ཆོས་ཀྱི་མཛོད་རབ་ཏུ་ཐོབ་པས་ འཇིག་རྟེན་གྱི་ཁམས་རྣམ་པར་ཕྱེ་བ་ཡོངས་སུ་དྲིས་པ་ཤིན་ཏུ་བསྟན་པས་མི་འཕྲོགས་པ་ཡིན། དེའི་དགེ་བའི་རྩ་བ་དེ་དག་ཀྱང་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་ པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་དུ་མ་དང༌། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང༌། བསྐལ་ ༄༅། །པ་ཁྲག་ཁྲིག་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ཤིན་ཏུ་བྱང་བ་དང༌། ཡོངས་སུ་དག་པ་དང༌། ཤིན་ཏུ་འོད་གསལ་ཞིང་དང་བར་གནས་པ་ཡིན། ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། གསེར་གྱི་ས་ལེ་སྦྲམ་དེ་ཉིད་མགར་བ་མཁས་པ་དེས་ ཡོངས་སུ་ཟིན་པར་གྱུར་ནས། འཛམ་བུའི་གླིང་གི་བདག་པོའི་མགུལ་ལམ། མགོ་ལ་བཏགས་ན་སེམས་ཅན་འཛམ་བུའི་གླིང་པ་ཐམས་ཅད་ཀྱི་རྒྱན་གྱི་རྣམ་པ་ཀུན་གྱིས་མི་ཐུབ་མི་ འཕྲོགས་པ་ཡིན། ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་མི་གཡོ་བ་འདི་ལ་གནས་པའི་བྱང་ཆུབ་སེམས་དཔའི་དགེ་བའི་རྩ་བ་དེ་དག་ཉན་ཐོས་དང༌། རང་སངས་རྒྱས་ཐམས་ཅད་ནས་བྱང་ཆུབ་སེམས་དཔའི་ས་བདུན་པ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་བར་གྱིས་ཀྱང་མི་འཕྲོགས་པ་ཡིན། བྱང་ཆུབ་སེམས་དཔའི་ས་ འདི་དང་ལྡན་པའི་བྱང་ཆུབ་སེམས་དཔའི་ཡེ་ཤེས་ཀྱི་སྒོ་ཤིན་ཏུ་རྣམ་པར་ཕྱེ་བས་སེམས་ཅན་རྣམས་ཀྱི་ཉོན་མོངས་པའི་མུན་པ་རབ་ཏུ་སེལ་ཏོ། །ཀྱེ༑ རྒྱལ་བའི་སྲས་དག །འདི་ ལྟ་སྟེ༑ དཔེར་ན། སྟོང་ལ་དབང་བའི་ཚངས་པ་ནི་སྟོང་གི་འཇིག་རྟེན་གྱི་ཁམས་བྱམས་པས་བཀང་ཞིང་འོད་ཀྱིས་སྣང་བར་བྱེད་དོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་ སེམས་དཔའི་ས་མི་གཡོ་བ་འདི་ལ་གནས་པའི་བྱང་ཆུབ་སེམས་དཔའ་ཡང་སངས་རྒྱས་ཀྱི་ཞིང་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བར་གྱི་འཇིག་རྟེན་གྱི་ཁམས་སྣང་ བས་རྒྱས་པར་བཀང་ཞིང་སེམས་ཅན་རྣམས་ཀྱི་ཉོན་མོངས་པའི་ཡོངས་སུ་གདུང་བ་མཐར་གྱིས་ཞི་བར་བྱེད་དོ། །ལུས་ཀྱང་ཤིན་ཏུ་ཚིམ་པར་བྱེད་དོ། །དེའི་ཕ་རོལ་ཏུ་ཕྱིན་པ་བཅུ་ ལས་སྨོན་ལམ་གྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་སྒྲུབ་པ་མ་ཡིན་ནོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་ སེམས་དཔའི་ས་མི་གཡོ་བ་ཞེས་བྱ་བ་སྟེ། བྱང་ཆུབ་སེམས་དཔའི་ས་བརྒྱད་པ་མདོར་བསྟན་པའོ། །རྒྱ་ཆེར་ནི་བསྐལ་པ་མུ་མེད་པས་བསྟན་པའི་མཐར་ཐུག་པར་ཤེས་པར་བྱའོ།། དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་སྟོང་གི་བདག་པོ་ཚངས་པ་ཆེན་པོར་འགྱུར་ཏེ། གཞན་ཟིལ་གྱིས་གནོན་ཅིང༌། གཞན་གྱིས་ཟིལ་གྱིས་མི་ནོན་པ་དང༌། དོན་ མཐོང་ཞིང་དབང་ཐོབ་པར་འགྱུར་ཏེ། སེམས་ཅན་རྣམས་ལ་ཉན་ཐོས་དང༌། རང་སངས་རྒྱས་དང་བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་སྟོན་པ་ལ་མཁས་ཤིང་མཐུ་ཡོད་པ་ ཡིན༑ འཇིག་རྟེན་གྱི་ཁམས་རྣམ་པར་ཕྱེ་བ་ཡོངས་སུ་དྲིས་པས་མི་འཕྲོགས་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་རྩ་བ་ ༄༅། །གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་ འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འཛིན་པར་འགྱུར་བ་ནས་ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་ སྙམ་སྟེ། སངས་རྒྱས་ཡིད་ལ་བྱ་བ་དང༌། ཆོས་ཡིད་ལ་བྱ་བ་དང༌། དགེ་འདུན་ཡིད་ལ་བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་དང༌། བྱང་ཆུབ་སེམས་དཔའི་སྤྱོད་ པ་ཡིད་ལ་བྱ་བ་དང༌། བྱང་ཆུབ་སེམས་དཔའི་ས་ཡིད་ལ་བྱ་བ་དང༌། ཕ་རོལ་ཏུ་ཕྱིན་པ་ཡིད་ལ་བྱ་བ་དང༌། སྟོབས་ཡིད་ལ་བྱ་བ་དང༌། མི་འཇིགས་པ་ཡིད་ལ་བྱ་བ་དང༌། སངས་ རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། དེ་ འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་འཐོབ་ཅིང༌། དེ་དག་ལ་སྙོམས་པར་འཇུག་པ་དང༌། སངས་རྒྱས་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་མཐོང་བ་དང༌། དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང༌། འཇིག་རྟེན་གྱི་ཁམས་སྟོང་ གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སྐྱོད་པ་དང༌། སངས་རྒྱས་ཀྱི་ཞིང་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དུ་འགྲོ་བ་དང༌། འཇིག་རྟེན་གྱི་ཁམས་སྟོང་ གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སྣང་བར་བྱ་བ་དང༌། སེམས་ཅན་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྨིན་པར་བྱ་བ་དང༌། བསྐལ་ པ་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དུ་གནས་པར་བྱ་བ་དང༌། སྔོན་གྱི་མཐའ་དང༌། ཕྱི་མའི་མཐའི་བསྐལ་པ་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་ བ་སྙེད་ལ་རབ་ཏུ་འཇུག་པ་དང༌། ཆོས་ཀྱི་སྒོ་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རྣམ་པར་འབྱེད་པ་དང༌། ལུས་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་ བ་སྙེད་ཡོངས་སུ་བསྟན་པ་དང༌། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡང་དག་པར་བསྟན་པར་བྱ་བའི་ཕྱིར་བརྩོན། འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཆད་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དམ། རྫུ་ འཕྲུལ་ལམ། མིག་གམ། སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང༌། ༄༅། །བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའོ། །དེ་ནས་བྱང་ཆུབ་སེམས་དཔའ་ རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང༌། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་ས་བདུན་ཤེས་རབ་ཐབས་ཀྱིས་ལམ་སྦྱངས་ ཤིང༑ །ཤིན་ཏུ་ཚོགས་བསགས་སྨོན་ལམ་ཆེན་པོ་རབ་བཏབ་པ། །མི་ཡི་དམ་པས་བྱིན་བརླབས་དགེ་བའི་རྩ་ལྡན་ཞིང༌། །ཡེ་ཤེས་མངོན་འདོད་མཁས་པ་བརྒྱད་པ་ཡོངས་སུ་གནོན། ། བསོད་ནམས་ཡེ་ཤེས་ཉེར་བསགས་སྙིང་རྗེ་བྱམས་ལྡན་ཞིང༌། །ཚད་མེད་སེམས་ཀྱི་རྗེས་སྲོང་མཁས་དང་འདྲ་བའི་བློ། །དྲང་སྲོང་ཆེན་པོ་ཆོས་ཐོས་རྟོགས་པའི་སྟོབས་ལྡན་པ། །མི་ སྐྱེ་བ་ཡི་བཟོད་པ་ཕྲ་ཞིང་ཞི་བ་རབ་ཏུ་འཐོབ། །སྔ་ནས་མ་སྐྱེས་མི་སྐྱེ་མཚན་ཉིད་མེད་པ་དང༌། །མ་བྱུང་འཇིག་པ་མེད་ཅིང་རྒྱུ་བ་མེད་པ་དང༌། །དངོས་པོ་སྐྱེ་འཇིག་མེད་པའི་དེ་ཉིད་རྟོག་ མེད་པ། །ཡིད་དང་སེམས་ཀྱི་རྒྱུ་བ་མེད་ཅིང་ནམ་མཁའ་འདྲ། །དེ་དག་འདི་འདྲའི་བཟོད་ལྡན་སྤྲོས་པ་མེད་གྱུར་པའི། །མཁས་པ་ཟབ་སྤྱོད་ཞི་བའི་གནས་རབ་ཐོབ་པ་ཡིན། །དགྲ་བཅོམ་ རང་རྒྱལ་འགྲོ་བ་ཀུན་གྱི་ཤེས་པར་དཀའ། །མཚན་མ་སྣ་ཚོགས་འཛིན་པའི་འདུ་ཤེས་རྣམ་པར་བསལ། །དེ་ལྟར་གནས་པའི་ཡིད་དང་སེམས་དང་རྟོག་པ་མེད། །དགེ་སློང་འགོག་ དང་ལྡན་ལྟར་རྣམ་པར་མི་རྟོག་ཐོབ། །རྨི་ལམ་ཆུས་ཁྱེར་གཉིད་སད་བཞིན་དུ་རྩོལ་དང་བྲལ། །ཚངས་པའི་གནས་ཀྱི་འདོད་པ་ཇི་བཞིན་གཉིས་ཀྱང་མེད། །སྔོན་གྱི་བྱིན་གྱིས་བདེ་ གཤེགས་ཡང་དག་བསྐུལ་བ་མཛད། །འདི་ནི་བདེ་གཤེགས་དབང་བསྐུར་བཟོད་པ་དམ་པ་སྟེ། །ངེད་ཀྱི་ཡེ་ཤེས་སྟོབས་ཡངས་སངས་རྒྱས་ཆོས་ཀྱི་རྣམས། །དེ་དག་ཁྱོད་ལ་མེད་ཀྱི་ དེ་ལ་བརྩོན་འགྲུས་རྩོམ། །ཅི་ཕན་ཁྱད་ཀྱི་ཉོན་མོངས་འབར་བ་ཀུན་ཞི་ཡང༌། །འཇིག་རྟེན་ཉོན་མོངས་མེས་ཚིག་དེ་དག་མི་ལྟའམ། །སེམས་ཅན་ཕན་ཕྱིར་སྤྱད་པའི་སྔོན་གྱི་སྨོན་ ལམ་སོམས། །འགྲོ་བ་མཐར་རྒྱུར་ཡེ་ཤེས་དོན་ཞུགས་ཤེས་པར་གྱིས། །ཆོས་ཉིད་དེ་བཞིན་ཉིད་འདི་མི་རྟོག་རྟག་ཏུ་འདུག །ས་འདི་རྒྱལ་བ་ཉན་ཐོས་རང་རྒྱལ་ཀུན་གྱི་སྟེ། །འདིས་ ནི་འཇིག་རྟེན་དག་ཏུ་སྟོབས་བཅུ་མི་བརྗོད་དོ། །གཞན་དུ་ཡེ་ཤེས་ཡངས་པ་དུས་གསུམ་ཚད་ཀྱིས་བརྗོད། །དེ་ལྟར་དེ་ལ་མཚུངས་མེད་ལྷ་དང་མིས་མཆོད་པ། །ཡེ་ཤེས་སྒོ་མོ་རྣམ་ མང་ཉེ་བར་བསྒྲུབ་པ་མཛད། །རྒྱལ་བའི་ཆོས་སྒྲུབ་ཕ་རོལ་མཐའ་ཡས་གཞུག་མཛད་པ། །དེ་ལ་སྔོན་གྱི་བྱང་ཆུབ་སྤྱོད་པས་ཆར་མི་འགྲོ། །ཁྱུ་མཆོག་དེ་དག་ཡེ་ཤེས་ས་མཆོག་འདི་ཐོབ་ ནས༑ ༑ཕྱོགས་རྣམས་ཀུན་ཏུ་སྐད་ཅིག་གཅིག་གིས་རྒྱས་འགེངས་པ། །ཡེ་ཤེས་ཞུགས་དང་ལྡན་ཞིང་མངོན་ཤེས་མཆོག་ཐོབ་པས། །རྒྱ་མཚོ་ཆེར་ཕྱིན་གྲུ་ཆེན་རླུང་གིས་བཀུར་བ་ ༄༅། །བཞིན། །ཆེད་དུ་བསྐྱོད་སེམས་བྲལ་ཞིང་ཡེ་ཤེས་ལས་ལ་གནས། །ཞིང་རྣམས་འབྱུང་ཞིང་གནས་པ་རྣམ་པར་དཔྱོད་པ་བྱེད། །ཁམས་རྣམས་ བཞི་པོ་ཁ་དོག་ཐ་དད་ཡངས་པ་དང༌། །ཕྲ་ཞིང་ཆེ་དང་རྣམ་པར་ཕྱེ་ལ་ཡང་དག་འཇུག །སྟོང་གསུམ་ཤིན་ཏུ་རྡུལ་ཕྲ་ཀུན་ལ་འཇུག་བྱེད་དེ། ཁམས་བཞི་འགྲོ་བའི་ལུས་རྣམས་ རྣམ་པར་ཕྱེ་བ་དང༌། །རྒྱུད་དྲུག་རིན་ཆེན་རྣམ་པར་ཕྱེ་བའི་རྡུལ་ཕྲན་རྣམས། །རྣམ་པར་ཕྱེ་ཞིང་ཡེ་ཤེས་ཡུལ་གྱིས་མ་ལུས་འབྲང༌། །ཡེ་ཤེས་རྣམ་བསྒོམས་ཡིད་ལྡན་ལུས་རྣམས་ ཐམས་ཅད་དུ། །འགྲོ་བའི་དོན་ཕྱིར་རང་གི་ལུས་རྣམས་གཟུད་པར་བྱེད། །སྟོང་གསུམ་ཐམས་ཅད་སྣ་ཚོགས་གཟུགས་ཀྱིས་ཁྱབ་བྱས་ཤིང༌། །འཇིག་རྟེན་མཐའ་ཡས་དག་ཏུ་སྣ་ཚོགས་ ལུས་ཀྱང་སྟོན། །བར་སྣང་མཁའ་ལ་ཉི་ཟླ་རླུང་གི་རྒྱུ་འགྲོ་ཡང༌། །སོ་སོའི་དཀྱིལ་འཁོར་གཟུགས་བརྙན་ཆུ་དཀྱིལ་རབ་ཏུ་སྣང༌། །དེ་བཞིན་མི་གཡོའི་ཆོས་ལ་ཡེ་ཤེས་དམ་པས་ རྒྱུ༑ ༑བསམ་དག་འགྲོ་བ་རྣམས་ལ་མཁས་པའི་གཟུགས་བརྙན་སྣང༌། །འགྲོ་བའི་བསམ་པ་བཞིན་དུ་ལུས་ཀྱི་རྣམ་ཕྱེ་བ། །མི་དང་ལྷ་ཡི་འཁོར་རྣམས་ཀུན་ཏུ་སྟོན་པར་བྱེད། །ཉན་ཐོས་ རང་རྒྱལ་བདེ་གཤེགས་སྲས་ཀྱི་ལུས་རྣམས་དང༌། །བདེ་བར་གཤེགས་སྐུ་ཡན་ལག་བརྒྱད་པ་རབ་ཏུ་སྟོན། །སེམས་ཅན་ཞིང་དང་དེ་བཞིན་ལས་ཀྱི་རྣམ་སྨིན་ལུས། །འཕགས་ལུས་ སྣ་ཚོགས་དེ་བཞིན་ཆོས་དང་ཡེ་ཤེས་ལུས། །ནམ་མཁའི་ལུས་དང་མཉམ་པ་ཉིད་དུ་ཁྱུ་མཆོག་ལྡན། །རྫུ་འཕྲུལ་སྣ་ཚོགས་འགྲོ་བ་ཚིམ་པར་བྱ་ཕྱིར་སྟོན། །དབང་བཅུ་དྲི་མ་མེད་ པའི་ཡེ་ཤེས་དཔྱོད་པ་ཐོབ། །ཡེ་ཤེས་སྤྱོད་དང་ལས་རྣམས་སྙིང་རྗེ་མཐུན་པའང་ཐོབ། །ལས་རྣམས་ཇི་སྙེད་རྒྱལ་བའི་ཆོས་རྣམས་ཡོངས་སུ་བསྒྲུབ། །སྡོམ་པ་གསུམ་ལ་གནས་ཤིང་མི་ གཡོ་རི་རབ་བཞིན། །རྒྱལ་སྲས་རྣམས་ཀྱི་སྟོབས་བཅུ་བསྐྱོད་པར་མི་ནུས་པ། །དེ་དག་ཀུན་ནས་བདུད་རྣམས་ཀུན་གྱི་ཡོང་མི་ཟློག །སངས་རྒྱས་བྱིན་བརླབས་བརྒྱ་བྱིན་ཚངས་པས་ཕྱག་ཀྱང་བྱ། ། ལག་ན་རྡོ་རྗེའི་དཔུང་རྣམས་རྟག་ཏུ་ཕྱི་བཞིན་འབྲང༌། །ས་ཕྱོགས་འདི་ལ་གནས་པའི་ཡོན་ཏན་མཐའ་ཡས་ཏེ། །དེ་དག་བསྐལ་པ་ཁྲག་ཁྲིག་སྟོང་གིས་ཟད་མི་ནུས། །དེ་དག་སངས་རྒྱས་ བྱེ་བ་བསྙེན་བཀུར་ཡང་བྱེད་པས། །རྒྱལ་པོའི་མགོ་ལ་འདུག་པའི་རྒྱན་བཞིན་ཤིན་ཏུ་གསལ། །ས་ཕྱོགས་འདི་གནས་བྱང་ཆུབ་སེམས་དཔའ་ཤེས་ལྡན་པ། །སྟོང་གི་བདག་པོ་ཚངས་ ཆེན་ཡོན་ཏན་མང་པོར་འགྱུར། །ཐེག་པ་གསུམ་སྟོན་ཡོངས་སུ་མི་འཁྲུགས་མི་འཕྲོགས་ཏེ། །འོད་བཟང་བྱམས་པའི་བསམ་པས་འགྲོ་བའི་ཉོན་མོངས་སེལ། །སྐད་ཅིག་གཅིག་ཏུ་སྟོང་ཕྲག་ བཅུ་ཡི་ཞིང་རྣམས་ཀྱི། །རྡུལ་ཁམས་ཇི་སྙེད་དེ་སྙེད་ཏིང་འཛིན་ལྡན་པ་ཐོབ། །ཕྱོགས་བཅུའི་སེམས་ཅན་གཙོ་བོ་དེ་སྙེད་མང་པོ་མཐོང༌། །ཡན་ཆད་སྨོན་ལམ་མཆོག་གི་རྒྱན་ཅན་ ༄༅། །གཅིག་མིན་ནོ། །འདི་ནི་མདོར་བསྡུས་རྒྱལ་སྲས་ཀྱི། །ས་བརྒྱད་ཤིན་ཏུ་བསྟན་པ་སྟེ། །རྒྱ་ཆེན་བསྐལ་པ་བྱེ་བར་ཡང༌། །ཐམས་ཅད་མཐར་ཕྱིན་མི་ ནུས་སོ། །བྱང་ཆུབ་སེམས་དཔའི་ས་བརྒྱད་པ་སྟེ། མི་གཡོ་བ་ཞེས་བྱ་བའོ།། །།བམ་པོ་ལྔ་བཅུ་རྩ་གཅིག་པ། ས་ཡི་དམ་པ་འདི་བཤད་ཚེ། །དེ་བཞིན་གཤེགས་ པའི་བྱིན་རླབས་ཀྱིས། །ཚད་མེད་བསམ་གྱིས་མི་ཁྱབ་པའི། །བྱེ་བའི་ཞིང་རྣམས་གཡོས་པར་འགྱུར། །ཐམས་ཅད་གཟིགས་པའི་སྐུ་ལས་ཀྱང༌། །འོད་ཟེར་ཡིད་དུ་འོང་བ་བཀྱེ། །དེས་ ནི་ཞིང་རྣམས་སྣང་བར་བྱས། །སེམས་ཅན་རྣམས་ཀྱང་བདེ་བར་གྱུར། །བྱང་ཆུབ་སེམས་དཔའ་སྟོང་སྙེད་ཀྱང༌། །བར་སྣང་གནས་ལ་འཁོད་གྱུར་ཏེ། །ལྷ་རྫས་ལྷག་པའི་མཆོད་ པ་ཡིས། །གསུང་བའི་མཆོག་ལ་མཆོད་པ་བྱེད། །ལྷ་ཡི་རྒྱལ་པོ་དབང་ཕྱུག་དང༌། །དབང་སྒྱུར་རྣམས་ཀྱང་དགའ་བར་གྱུར། །མཆོད་པ་རྣམ་པ་སྣ་ཚོགས་ཀྱིས། །ཡོན་ཏན་རྒྱ་མཚོ་ མཆོད་པ་བྱེད། །དེ་ནས་ལྷ་ཡི་བུ་མོ་སྟོང༌། །དགའ་ཞིང་དབང་པོ་བདེར་གྱུར་པས། །སྦྱར་ལེགས་སྙན་པའི་གླུ་ཡི་དབྱངས། །སྟོན་པ་མཆོད་པའི་དོན་དུ་ལེན། །རོལ་མོའི་སྒྲ་དབྱངས་དེ་ དག་ལས། །དྲང་སྲོང་ཆེན་པོའི་བྱིན་རླབས་ཀྱིས། །འདི་འདྲའི་སྒྲ་དབྱངས་སྟོང་སྙེད་དུ། །སྙན་པའི་དབྱངས་སུ་གྲགས་པར་གྱུར། །ཞི་དུལ་རབ་ཞི་དྲི་མ་ཐམས་ཅད་མེད་གྱུར་ཅིང༌། །ས་ཡི་ མཆོག་དང་ལྡན་པས་སྤྱོད་པ་ལེགས་སྤྱོད་པ། །ཕྱོགས་བཅུར་འགྲོ་ལ་ཕན་པར་སྤྱོད་པའི་ཁྱུ་མཆོག་རྣམས། །མཁའ་དབྱིངས་འདྲ་བའི་ཡིད་ཀྱིས་རྒྱལ་བའི་སྤྱོད་པ་སྟོན། །མི་ཡི་གནས་དང་ ལྷ་ཡི་གནས་དང་ཀླུ་གནས་སུ། །ཕྱོགས་བཅུར་བསོད་ནམས་སྟོབས་ཀྱིས་རྒྱན་རྣམས་མང་པོ་བྱུང༌། །དེ་ལས་ཡང་དུ་རྒྱལ་སྲས་ཡེ་ཤེས་ལ་མོས་པ། །རྒྱལ་བའི་ཡོན་ཏན་བསྔགས་པ་ རྒྱ་ཆེན་རབ་ཏུ་སྟོན། །ཞིང་གཅིག་མ་གཡོས་རྡུལ་མེད་ཞིང་རྣམས་ཐམས་ཅད་དུ། །འགྲོ་ལ་ཕན་བྱེད་ཟླ་བ་ལྟ་བུའི་འོད་ལྡན་པ། །ཐམས་ཅད་དབྱངས་སུ་འདུ་ཤེས་སེམས་ཞི་ཡིད་རབ་ ཀྱིས༑ ༑སོ་སོ་སྐད་བཞིན་སྒྲ་སྐད་བརྒྱ་ཡང་རྣམ་པར་བརྗོད། །སེམས་ཅན་གང་རྣམས་བློ་ཞན་སེམས་ཡིད་དམར་གྱུར་པ། །དེ་ལ་མཁས་པ་ཁྱུ་མཆོག་ཉན་ཐོས་སྤྱོད་པ་སྟོན། །སེམས་ ཅན་གང་རྣམས་སེམས་རྣོ་རང་རྒྱལ་ཐེག་བརྩོན་པ། །དེ་ལ་རྡུལ་མེད་རང་རྒྱལ་ཐེག་པའི་ཡེ་ཤེས་སྟེན། །སེམས་ཅན་གང་རྣམས་ཕན་སེམས་སྙིང་རྗེ་བརྩེ་ཡིད་ཅན། །དེ་ལ་དེ་དག་ རྒྱལ་སྲས་སྤྱོད་པའི་མཆོག་ཀྱང་སྟོན། །སེམས་ཅན་གང་རྣམས་བློ་མཆོག་དམ་པའི་ཡིད་མོས་པ། །དེ་ལ་མཁས་པ་ཚད་མེད་སངས་རྒྱས་སྐུ་སྟོན་ཏོ། །ཇི་ལྟར་སྒྱུ་མཁན་འགྲོ་བ་རྣམས་ ལ་སྒྱུ་སྟོན་པ། །ལུས་མང་བྱེ་བ་སྣ་ཚོགས་དེ་དག་དངོས་པོ་མེད། །དེ་བཞིན་རྒྱལ་སྲས་མཁས་པ་ཡེ་ཤེས་སྒྱུ་མཁས་པ། །སྤྱོད་པ་ཐམས་ཅད་སྟོན་ཀྱང་དེ་དག་དངོས་པོ་མེད། །འདི་འདྲའི་ ༄༅། །སྒྲ་སྐད་བརྒྱ་སྟོང་དུ། །སྙན་པའི་དབྱངས་སུ་བརྗོད་བྱས་ནས། །ལྷ་ཡི་བུ་མོ་མི་སྨྲ་བར། །ཞི་ལ་མོས་པས་རྒྱལ་བ་ལྟ། །འཁོར་རྣམས་རྣམ་པར་དང་བས་ན། བདེ་གཤེགས་སྲས་ལ་ཡང་སྨྲས་པ། །དམ་ཆོས་སྤྱོད་པའི་སྤྱོད་པ་རྣམས། །བརྒྱད་པའི་གོང་དུ་ཡང་གསུངས་ཤིག །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ༑ རྒྱལ་བའི་སྲས་ དག༑ དེ་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་ས་བརྒྱད་པ་ལ་གནས་པ་ནི་དེ་ལྟ་བུའི་བློ་ཚད་མེད་པའི་ཡེ་ཤེས་ཀྱིས་རྣམ་པར་དཔྱད་པས་དེ་ནས་གོང་དུ་རྣམ་པར་ཐར་པ་ཞི་བ་ ལ་མོས་པར་ཞེ་ནོན་ཅིང༌། དེ་ནས་གོང་དུ་དེ་བཞིན་གཤེགས་པའི་ཡེ་ཤེས་ཤིན་ཏུ་རྫོགས་པ་རྣམ་པར་དཔྱད་པ་དང༌། དེ་བཞིན་གཤེགས་པའི་གསང་བའི་རྗེས་སུ་འཇུག་པར་བྱ་བ་ལ་ འཇུག་པ་དང༌། ཡེ་ཤེས་བསམ་གྱིས་མི་ཁྱབ་པའི་ཆེ་བ་ཉིད་རྣམ་པར་དབྱེ་བ་དང༌། གཟུངས་དང་ཏིང་ངེ་འཛིན་རབ་ཏུ་དབྱེ་བ་ཡོངས་སུ་སྦྱང་བ་དང༌། མངོན་པར་ཤེས་པ་རྒྱ་ཆེན་པོ་མངོན་ པར་བསྒྲུབ་པ་དང༌། འཇིག་རྟེན་གྱི་ཁམས་རྣམ་པར་དབྱེ་བ་ཁོང་དུ་ཆུད་པར་བྱ་བ་དང༌། དེ་བཞིན་གཤེགས་པའི་སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་མ་འདྲེས་ པ་ཡོངས་སུ་མི་འཕྲོགས་པ་སྦྱང་བར་བྱ་བ་དང༌། དེ་བཞིན་གཤེགས་པའི་ཆོས་ཀྱི་འཁོར་ལོ་བསྐོར་བ་དང༌། ཁྱུ་མཆོག་གི་མཐུ་ཕྱུང་བའི་རྗེས་སུ་འབྲང་བར་བྱ་བ་དང༌། སྙིང་རྗེ་ཆེན་ པོའི་མཐུ་ཕྱུང་བ་ཡོངས་སུ་མི་གཏོང་བར་བྱེད་པས་བྱང་ཆུབ་སེམས་དཔའི་ས་དགུ་པ་ཡོངས་སུ་གནོན་ཏེ། དེ་བྱང་ཆུབ་སེམས་དཔའི་ས་འདི་ལ་གནས་པའི་ཚེ། དགེ་བ་དང༌། མི་དགེ་བ་ དང༑ ལུང་དུ་མ་བསྟན་པའི་ཆོས་མངོན་པར་འདུ་བྱ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཟག་པ་དང་བཅས་པ་དང༌། ཟག་པ་མེད་པའི་ཆོས་མངོན་པར་འདུ་བྱ་བ་དང༌། འཇིག་རྟེན་པ་དང༌། འཇིག་རྟེན་ལས་འདས་པའི་ཆོས་མངོན་པར་འདུ་བྱ་བ་དང༌། བསམ་པ་དང༌། བསམ་དུ་མེད་པའི་ཆོས་མངོན་པར་འདུ་བྱ་བ་དང༌། ངེས་པ་དང༌། མ་ངེས་པའི་ཆོས་ མངོན་པར་འདུ་བྱ་བ་དང༌། ཉན་ཐོས་དང༌། རང་སངས་རྒྱས་ཀྱི་ཆོས་མངོན་པར་འདུ་བྱ་བ་དང༌། བྱང་ཆུབ་སེམས་དཔའི་སྤྱོད་པའི་ཆོས་མངོན་པར་འདུ་བྱ་བ་དང༌། དེ་བཞིན་གཤེགས་པའི་ སའི་ཆོས་མངོན་པར་འདུ་བྱ་བ་དང༌། འདུས་བྱས་ཀྱི་ཆོས་མངོན་པར་འདུ་བྱ་བ་དང༌། འདུས་མ་བྱས་ཀྱི་ཆོས་མངོན་པར་འདུ་བྱ་བ་ཡང་ཡང་དག་པར་ཇི་ལྟ་བ་བཞིན་དུ་རབ་ཏུ་ཤས་[*SHES?] སོ། ། དེ་དེ་ལྟ་བུའི་ཤེས་པར་བྱ་བ་ཁོང་དུ་ཆུད་པའི་བློས་སེམས་ཅན་ཐམས་ཅད་ཀྱི་སེམས་ཐིབས་པོ་རབ་ཏུ་རྒྱུ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཉོན་མོངས་པ་ཐིབས་པོ་རབ་ཏུ་ རྒྱུ་བ་དང༌། ལས་ཐིབས་པོ་རབ་ཏུ་རྒྱུ་བ་དང༌། དབང་པོ་ཐིབས་པོ་རབ་ཏུ་རྒྱུ་བ་དང༌། མོས་པ་ཐིབས་པོ་རབ་ཏུ་རྒྱུ་བ་དང༌། ཁམས་ཐིབས་པོ་རབ་ཏུ་རྒྱུ་བ་དང༌། བསམ་པ་དང་བག་ལ་ ༄༅། །ཉལ་བའི་ཐིབས་པོ་རབ་ཏུ་རྒྱུ་བ་དང༌། སྐྱེ་བ་ཐིབས་པོ་རབ་ཏུ་རྒྱུ་བ་དང༌། བག་ཆགས་ཀྱི་མཚམས་སྦྱོར་བ་ཐིབས་པོ་རབ་ཏུ་རྒྱུ་བ་དང༌། ཕུང་པོ་གསུམ་དུ་རྣམ་ པར་གནས་པ་ཐིབས་པོ་རབ་ཏུ་རྒྱུ་བ་ཡང་དག་པར་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་སེམས་ཅན་རྣམས་ཀྱི་སེམས་རྣམ་པ་ཐ་དད་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སེམས་རྣམ་པ་སྣ་ཚོགས་དང༌། སེམས་སྐད་ཅིག་ཏུ་མྱུར་དུ་འགྱུར་ཞིང་འཇིག་པ་དང༌། མི་འཇིག་པ་དང༌། སེམས་ལུས་མེད་པ་དང༌། སེམས་མཐའ་ཡས་ཤིང་ཐམས་ཅད་དུ་དབང་ བྱེད་པ་དང༌། སེམས་འོད་གསལ་ཞིང་དང་བ་དང༌། སེམས་ཉོན་མོངས་པ་དང་བཅས་པ་དང༌། སེམས་ཉོན་མོངས་པ་མེད་པ་དང༌། སེམས་བཅིངས་པ་དང༌། རྣམ་པར་གྲོལ་བ་ དང༑ སེམས་སྒྱུ་མ་ལྟ་བུར་རྣམ་པར་བསྒྲུབ་པ་དང༌། སེམས་འགྲོ་བའི་རྒྱུད་ཇི་ལྟ་བ་བཞིན་དུ་ཉེ་བར་གནས་པ་ནས། སེམས་རྣམ་པ་སྣ་ཚོགས་སྟོང་ཕྲག་དུ་མའི་བར་དུ་ཡང་དག་ པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་ཉོན་མོངས་པ་རྣམས་རིང་དུ་སོང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སྦྱོར་བ་མཐའ་ཡས་པ་དང༌། ལྷན་ཅིག་སྐྱེས་ཤིང་ཐ་ མི་དད་པ་དང༌། བག་ལ་ཉལ་བ་དང༌། ཀུན་ནས་འཁོར་བའི་གནས་གཅིག་པ་དང༌། སེམས་དང་ལྡན་པ་དང༌། མི་ལྡན་པ་དང༌། སྐྱེ་བའི་མཚམས་སྦྱོར་བ་དང༌། ལམ་གྱི་རྒྱུད་ ཇི་ལྟ་བ་བཞིན་དུ་ཉེ་བར་གནས་པ་དང༌། ཁམས་གསུམ་རྣམ་པར་ཕྱེ་བ་དང༌། སྲེད་པ་དང༌། མ་རིག་པ་དང༌། ལྟ་བའི་ཟུག་རྔུ་དང༌། ང་རྒྱལ་དང༌། གཏི་མུག་གི་ཁ་ན་མ་ཐོ་བ་ཆེན་པོ་དང༌། ལས་རྣམ་པ་གསུམ་གྱི་གཞི་རྒྱུན་མི་འཆད་པ་ནས་མདོར་བསྡུ་ན་ཉོན་མོངས་པའི་རྒྱུད་སྟོང་ཕྲག་བརྒྱད་ཅུ་རྩ་བཞིའི་བར་དུ་རྗེས་སུ་འཇུག་པར་བྱ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ ཤེས་སོ། །དེ་ནི་ལས་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །རྣམ་པར་དམིགས་པ་དང༌། རྣམ་པར་མི་དམིགས་པ་དང༌། སེམས་དང་ལྷན་ཅིག་ཏུ་སྐྱེས་ཤིང་ཐ་མི་དད་པ་དང༌། རང་གི་ངང་གིས་སྐད་ཅིག་ཏུ་རྒྱུས་འབྱུང་ཞིང་འཇིག་ལ་འབྲས་བུ་ཆུད་མི་ཟ་བར་མཚམས་སྦྱོར་བ་དང༌། རྣམ་པར་སྨིན་པ་ཡོད་པ་ དང༑ རྣམ་པར་སྨིན་པ་མེད་པ་དང༌། ནག་པོ་དང༌། དཀར་པོ་དང༌། མི་དཀར་བ་དང༌། མི་གནག་པ་དང༌། ཕྱོགས་དུ་མའི་ལས་ཡོངས་སུ་ལེན་པ་རྣམ་པ་ཐ་དད་པ་དང༌། ལས་ཀྱི་ཞིང་ ཚད་མེད་པ་དང༌། འཕགས་པ་དང༌། འཇིག་རྟེན་པ་རྣམ་པར་ཕྱེ་བ་དང༌། འཇིག་རྟེན་ལས་འདས་པའི་ཆོས་རྣམ་པར་དགོད་པ་དང༌། ཉེ་བར་ལེན་པ་དང་བཅས་པ་དང༌། ཉེ་བར་ལེན་པ་ མེད་པ་དང༌། འདུས་བྱས་དང༌། འདུས་མ་བྱས་པ་དང༌། ཚེ་འདི་དང༌། སྐྱེ་བ་དང༌། རྒྱུད་གཞན་དུ་ཚོར་བར་འགྱུར་བ་དང༌། ཐེག་པ་དང་ཐེག་པ་མ་ཡིན་པར་ངེས་པ་དང་མ་ངེས་པ་ནས། ༄༅། །ལས་རྣམ་པ་ཐ་དད་པ་སྟོང་ཕྲག་བརྒྱད་ཅུ་རྩ་བཞིའི་བར་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་དབང་པོ་ཞན་པ་དང༌། འབྲིང་དང༌། རབ་ རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སྔོན་གྱི་མཐའ་དང༌། ཕྱི་མའི་མཐར་ཐ་དད་པ་དང༌། ཐ་མི་དད་པ་དང༌། ཡངས་པ་དང༌། འབྲིང་དང༌། ཐ་མ་དང༌། ཉོན་མོངས་པ་ དང༑ ལྷན་ཅིག་ཏུ་སྐྱེས་ཤིང་ཐ་མི་དད་པ་དང༌། ཐེག་པ་དང༌། ཐེག་པ་མ་ཡིན་པར་ངེས་པ་དང༌། མ་ངེས་པ་དང༌། ཡོངས་སུ་སྨིན་པའི་ཚུལ་བཞིན་དུ་འདུལ་བ་དང༌། དབང་པོའི་དྲ་ བའི་རྗེས་སུ་འབྲང་ཞིང་མྱུར་དུ་འཇིག་པ་དང༌། མཚན་མར་འཛིན་པ་དང༌། དབང་པོའི་དབང་གཞན་གྱིས་མི་ཐུབ་པ་དང༌། དབང་པོའི་རྣམ་པ་ཕྱིར་བཟློག་ཏུ་རུང་བ་དང༌། ཕྱིར་བཟློག་ ཏུ་མ་རུང་བ་དང༌། རིང་དུ་སོང་བ་དང༌། ལྷན་ཅིག་སྐྱེས་པ་རྣམ་པ་སྣ་ཚོགས་ཐ་དད་པ་ནས། དབང་པོ་རྣམ་པ་ཐ་དད་པ་སྟོང་ཕྲག་བརྒྱད་ཅུ་རྩ་བཞིའི་བར་དུ་ཡང་དག་པ་ཇི་ལྟ་བ་བཞིན་ དུ་རབ་ཏུ་ཤེས་སོ། །དེ་ནི་མོས་པ་ཞན་པ་དང༌། འབྲིང་དང༌། རབ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་ནས། དབང་པོའི་ཚུལ་བཞིན་དུ་མོས་པ་རྣམ་པ་ཐ་དད་པ་སྟོང་ ཕྲག་བརྒྱད་ཅུ་རྩ་བཞིའི་བར་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་ཁམས་ཐ་མ་དང༌། འབྲིང་དང༌། རབ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་ནས། ཁམས་རྣམ་པ་ཐ་དད་པ་སྟོང་ཕྲག་བརྒྱད་ཅུ་རྩ་བཞིའི་བར་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་བསམ་པ་ཐ་མ་དང༌། འབྲིང་དང༌། རབ་རྣམས་ཡང་དག་པ་ཇི་ལྟ་བ་བཞིན་ དུ་རབ་ཏུ་ཤེས་པ་ནས། བསམ་པ་རྣམ་པ་ཐ་དད་པ་སྟོང་ཕྲག་དུ་མའི་བར་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་བག་ལ་ཉལ་བ་རྣམས་བསམ་པ་དང་ལྷན་ཅིག་སྐྱེས་པ་དང༌། སེམས་དང་ལྷན་ཅིག་སྐྱེས་པ་དང༌། སེམས་དང་ལྡན་པ་དང༌། སེམས་དང་མི་ལྡན་པ་དང༌། རིང་དུ་སོང་བ་དང༌། ཐོག་མ་མེད་པ་ནས་གུད་དུ་མ་བསྐྱོད་པ་དང༌། བསམ་གཏུན་དང༌། རྣམ་ པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པ་དང༌། མངོན་པར་ཤེས་པ་བཟོད་པར་དཀའ་བ་དང༌། ཁམས་གསུམ་པའི་མཚམས་ཤིན་ཏུ་སྦྱོར་བ་དང༌། ཐོག་མ་མེད་པའི་ དུས་ཀྱི་སེམས་ཀྱི་རྒྱུད་ཀུན་ཏུ་རྒྱུ་བར་བྱེད་པ་དང༌། སྐྱེ་བའི་སྒོ་ཀུན་ནས་འབྱུང་བ་རྣམ་པར་དམིགས་པར་བྱེད་པ་དང༌། གཉེན་པོ་ཐོབ་པས་དངོས་པོར་མི་འགྱུར་བ་དང༌། སའི་སྐྱེ་མཆེད་དང་ ཕྲད་པ་དང༌། མི་འཕྲད་པ་དང༌། འཕགས་པའི་ལམ་ཐ་དད་པ་མེད་པས་ཡང་དག་པར་བསལ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་སྐྱེ་བ་རྣམ་པ་ཐ་དད་པ་ཡང་དག་ པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ལས་ཇི་ལྟ་བ་བཞིན་དུ་སྐྱེ་བ་དང༌། སེམས་ཅན་དམྱལ་བ་དང༌། བྱོལ་སོང་དང༌། ཡི་དྭགས་དང༌། ལྷ་མ་ཡིན་དང༌། མི་དང༌། ལྷའི་གནས་རྣམ་པར་ ༄༅། །དགོད་པ་དང༌། གཟུགས་དང༌། གཟུགས་མེད་པར་སྐྱེ་བ་དང༌། འདུ་ཤེས་ཡོད་པ་དང༌། འདུ་ཤེས་མེད་པར་སྐྱེ་བ་དང༌། ལས་ཀྱི་ཞིང་དང༌། སྲེད་པའི་རླན་དང༌། མ་རིག་པའི་མུན་པ་དང༌། རྣམ་པར་ཤེས་པའི་ས་བོན་གྱིས་ཡང་སྲིད་པ་རབ་ཏུ་འབྱུང་བ་དང༌། མིང་དང་གཟུགས་ལྷན་ཅིག་སྐྱེས་ཤིང་ཐ་མི་དད་པ་དང༌། སྲིད་བར་མགོ་ཡུད་ཁྱེར་ཞིང་སྲེད་ པས་མངོན་པར་མོས་པའི་མཚམས་སྦྱོར་བ་དང༌། སྤྱོད་པར་འདོད་པ་དང༌། འབྱུང་བར་འདོད་པ་དང༌། སེམས་ཅན་ལ་མོས་པ་དང༌། ཐོག་མ་དང༌། ཐ་མ་མེད་པ་དང༌། ཁམས་ གསུམ་པ་ཡོངས་སུ་འཛིན་པ་དང༌། སྲིད་པ་ཉིད་ཀྱི་མཚམས་སྦྱོར་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་བག་ཆགས་རྣམས་རྒྱུ་བ་དང༌། མི་རྒྱུ་བ་ཡང་དག་པ་ཇི་ལྟ་ བ་བཞིན་དུ་རབ་ཏུ་ཤེས་ཏེ། ལམ་གྱི་རྒྱུད་གང་དང་ཇི་ལྟར་འབྲེལ་བའི་བག་ཆགས་ཀྱིས་བསྒོས་པ་དང༌། སེམས་ཅན་སྤྱད་པ་སྤྱོད་པ་ཇི་ལྟ་བ་བཞིན་དུ་བསྒོས་པ་དང༌། ལས་དང་ ཉོན་མོངས་པ་ལ་གོམས་པ་ཇི་ལྟ་བ་བཞིན་དུ་བསྒོས་པ་དང༌། དགེ་བ་དང༌། མི་དགེ་བ་དང༌། ལུང་དུ་མ་བསྟན་པའི་ལས་ལ་གོམས་པས་བསྒོས་པ་དང༌། ཡང་སྲིད་པར་འགྲོ་བར་ བསྒོས་པ་དང༌། མཐར་གྱིས་བསྒོས་པ་དང༌། རིང་དུ་སོང་ཞིང་རྒྱུན་མི་འཆད་པ་དང༌། ཉོན་མོངས་པ་བསལ་བས་བསྒོས་པ་དང༌། དངོས་པོར་གྱུར་པ་དང༌། དངོས་པོར་མ་གྱུར་ པས་བསྒོས་པ་དང༌། ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་དང༌། དེ་བཞིན་གཤེགས་པ་མཐོང་ཞིང་ཐོས་པས་བསྒོས་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ ཤེས་སོ། །དེ་ནི་སེམས་ཅན་གྱི་ཕུང་པོ་ཡང་དག་པར་ངེས་པ་དང༌། ལོག་པར་ངེས་པ་དང༌། གཉིས་ཀར་མ་ངེས་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཡང་དག་པར་ལྟ་བས་ ཡང་དག་པར་ངེས་པ་དང༌། ལོག་པར་ལྟ་བས་ལོག་པར་ངེས་པ་དང༌། དེ་གཉིས་ཀ་དང་བྲལ་བས་མ་ངེས་པ་དང༌། མཚམས་མེད་པ་ལྔ་ལས་གང་ཡང་རུང་བར་ལོག་པར་ངེས་པ་དང༌། དབང་པོ་ལྔར་ཡང་དག་པར་ངེས་པ་དང༌། དེ་གཉིས་ཀ་དང་བྲལ་བས་མ་ངེས་པ་དང༌། ལོག་པ་བརྒྱད་དུ་ལོག་པར་ངེས་པ་དང༌། ཡང་དག་པ་ལ་ཡང་དག་པར་ངེས་པ་དང༌། ཕྱིས་བྱར་ མེད་པ་དང༌། དེ་གཉིས་ཀ་དང་བྲལ་བས་མ་ངེས་པ་དང༌། སེར་སྣ་དང༌། ཕྲག་དོག་དང༌། སྙིང་མི་བརྩེ་བ་ལ་ཉེ་བར་སྤྱོད་པ་མ་བཏང་བས་ལོག་པར་ངེས་པ་དང༌། འཕགས་པ་བླ་ན་མེད་ པའི་ལམ་བསྒོམས་པས་ཡང་དག་པར་ངེས་པ་དང༌། དེ་གཉིས་ཀ་དང་བྲལ་བས་མ་ངེས་པའི་ཕུང་པོར་བསྟན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཀྱེ༑ རྒྱལ་བའི་སྲས་ དག་༑དེ་ལྟར་དེ་ལྟ་བུའི་ཡེ་ཤེས་དང་ལྡན་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་ས་ལེགས་པའི་བློ་གྲོས་ལ་རབ་ཏུ་གནས་པ་ཞེས་བྱ་སྟེ། བྱང་ཆུབ་སེམས་དཔའི་ས་ ༄༅། །ལེགས་པའི་བློ་གྲོས་འདི་ལ་གནས་པའི་བྱང་ཆུབ་སེམས་དཔའ་དེ་ནི་སེམས་ཅན་གྱི་སྤྱོད་པ་རྣམ་པ་ཐ་དད་པ་དེ་ལྟ་བུ་དག་ཡོངས་སུ་ཤེས་ནས། དེའི་ཚུལ་བཞིན་ དུ་ཐར་པ་ཉེ་བར་བསྒྲུབས་པ་ཉེ་བར་བསྒྲུབ་བོ། །དེ་སེམས་ཅན་ཡོངས་སུ་སྨིན་པར་བྱ་བ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སེམས་ཅན་གདུལ་བ་དང༌། ཉན་ཐོས་ཀྱི་ ཐེག་པ་བསྟན་པ་དང༌། རང་སངས་རྒྱས་ཀྱི་ཐེག་པ་བསྟན་པ་དང༌། བྱང་ཆུབ་སེམས་དཔའི་ཐེག་པ་བསྟན་པ་དང༌། དེ་བཞིན་གཤེགས་པའི་ས་བསྟན་པ་ཡང་དག་པ་ཇི་ལྟ་བ་བཞིན་དུ་ རབ་ཏུ་ཤེས་སོ། །དེས་དེ་ལྟར་ཤེས་ནས་སེམས་ཅན་རྣམས་ལ་ཡང་དག་པ་ཇི་ལྟ་བ་བཞིན་དུ་ཆོས་སྟོན་ཏེ་བསམ་པ་རྣམ་པར་དབྱེ་བའི་ཚུལ་ཇི་ལྟ་བ་དང༌། བག་ལ་ཉལ་བ་རྣམ་པར་ དབྱེ་བའི་ཚུལ་ཇི་ལྟ་བ་དང༌། དབང་པོ་རྣམ་པར་དབྱེ་བའི་ཚུལ་ཇི་ལྟ་བ་དང༌། མོས་པ་རྣམ་པར་དབྱེ་བའི་ཚུལ་ཇི་ལྟ་བ་དང༌། སྤྱོད་ཡུལ་རྣམ་པར་དབྱེ་བའི་ཚུལ་ཇི་ལྟ་བ་བཞིན་དུ་ཡེ་ ཤེས་ཉེ་བར་བསྒྲུབ་པ་དང༌། སྤྱོད་ཡུལ་ཐམས་ཅད་ཀྱི་རྒྱུས་ཁོང་དུ་ཆུད་པ་དང༌། ཁམས་ཐིབས་པོ་ཡོངས་སུ་རྒྱུ་བའི་ཚུལ་ཇི་ལྟ་བ་བཞིན་དུ་རྗེས་སུ་འབྲང་བར་བྱ་བ་དང༌། སྐྱེ་བ་དང་ཉོན་ མོངས་པའི་ལས་ཀྱི་བག་ཆགས་རྣམ་པ་གང་དང་གང་ཡོད་པ་ཕྱིར་བཟློག་པར་བྱ་བ་དང༌། ཕུང་པོ་རྣམ་པར་དགོད་པའི་ཚུལ་ཇི་ལྟ་བ་བཞིན་དུ་ཚུལ་དང་སྦྱར་བ་དང༌། ཐེག་པ་གང་ལ་ མོས་པའི་རྣམ་པར་ཐར་པ་ཐོབ་པར་བྱ་བས་ཆོས་སྟོན་ཏེ། དེ་ལྟར་བྱང་ཆུབ་སེམས་དཔའི་ས་ལེགས་པའི་བློ་གྲོས་འདི་ལ་གནས་པའི་བྱང་ཆུབ་སེམས་དཔའ་ནི་ཆོས་སྨྲ་བ་ཆེན་པོའི་གོ་ འཕང་ལ་གནས་ཤིང༌། དེ་བཞིན་གཤེགས་པའི་ཆོས་ཀྱི་མཛོད་ཡོངས་སུ་སྲུང་བ་ཡིན། དེ་ཆོས་སྨྲ་བའི་ཆོས་དང་ལྡན་པས་ཡེ་ཤེས་ལ་མཁས་པ་ཚད་མེད་པའི་རྗེས་སུ་སོང་ཞིང་ཐ་དད་པ་ཡང་ དག་པར་ཤེས་པ་བཞིས་མངོན་པར་བསྒྲུབས་པའི་བྱང་ཆུབ་སེམས་དཔའི་ཚིག་གིས་ཆོས་སྟོན་ཏེ། དེ་ལ་བྱང་ཆུབ་སེམས་དཔའ་ཐ་དད་པ་ཡང་དག་པར་ཤེས་པ་བཞི་རྟག་ཏུ་རྒྱུན་མི་འཆད་ ཅིང་མ་འདྲེས་པར་ཡང་དག་པར་འབྱུང་ངོ༌། །བཞི་གང་ཞེ་ན། འདི་ལྟ་སྟེ། ཆོས་ཐ་དད་པ་ཡང་དག་པར་ཤེས་པ་དང༌། དོན་ཐ་དད་པ་ཡང་དག་པར་ཤེས་པ་དང༌། ངེས་པའི་ཚིག་ཐ་དད་པ་ ཡང་དག་པར་ཤེས་པ་དང༌། སྤོབས་པ་ཐ་དད་པ་ཡང་དག་པར་ཤེས་པའོ། །དེ་ཆོས་ཐ་དད་པ་ཡང་དག་པར་ཤེས་པས་ཆོས་རྣམས་ཀྱི་རང་གི་མཚན་ཉིད་རབ་ཏུ་ཤེས་སོ། །དོན་ཐ་དད་པ་ ཡང་དག་པར་ཤེས་པས་ཆོས་རྣམས་ཀྱི་རྣམ་པར་དབྱེ་བ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་ཆོས་རྣམས་མ་འདྲེས་པར་བསྟན་པ་རབ་ཏུ་ཤེས་སོ། ། སྤོབས་པ་ཐ་དད་པ་ཡང་དག་པར་ཤེས་པས་ཆོས་རྣམས་མཐུན་པར་རྗེས་སུ་མཚམས་སྦྱར་བ་རྒྱུན་མི་འཆད་པ་རབ་ཏུ་ཤེས་སོ། །གཞན་ཡང་ཆོས་ཐ་དད་པ་ཡང་དག་པར་ཤེས་ ༄༅། །པས་ཆོས་རྣམས་ཀྱི་རང་བཞིན་མེད་པ་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་ཆོས་རྣམས་ཀྱི་འབྱུང་བ་དང༌། འཇིག་པ་རབ་ཏུ་ཤེས་སོ། །ངེས་ པའི་ཚིག་ཐ་དད་པ་ཡང་དག་པར་ཤེས་པས་ཆོས་ཐམས་ཅད་རྣམ་པར་དགོད་པ་རྒྱུན་ཆད་པ་མེད་པར་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་ཇི་ལྟར་རྣམ་པར་ དགོད་པ་བཞིན་དུ་འཁྲུགས་པ་མེད་པ་མཐའ་ཡས་པས་ཆོས་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས་ད་ལྟར་བྱུང་བའི་ཆོས་རྣམ་པར་དབྱེ་བ་རབ་ཏུ་ཤེས་སོ། །དོན་ ཐ་དད་པ་ཡང་དག་པར་ཤེས་པས་འདས་པ་དང༌། མ་འོངས་པའི་ཆོས་རྣམ་པར་དབྱེ་བ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས། འདས་པ་དང༌། མ་འོངས་ པ་དང༑ ད་ལྟར་འབྱུང་བ་མ་འདྲེས་པར་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་དུས་རེ་རེ་ཞིང་ཆོས་ཀྱི་སྣང་བ་མུ་མེད་པར་ཆོས་སྟོན་ཏོ། །གཞན་ཡང་ཆོས་ཐ་དད་པ་ ཡང་དག་པར་ཤེས་པས་ཆོས་ཀྱི་བྱེ་བྲག་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་དོན་གྱི་བྱེ་བྲག་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་ སྐད་ཇི་ལྟ་བ་བཞིན་དུ་བསྟན་པས་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་བསམ་པ་ཇི་ལྟ་བ་བཞིན་དུ་ཤེས་པས་ཆོས་སྟོན་ཏོ། །གཞན་ཡང་ཆོས་ཐ་དད་པ་ཡང་ དག་པར་ཤེས་པས་ཆོས་ཀྱི་རྒྱུས་རྣམ་པར་དབྱེ་བ་མ་འདྲེས་པ་མཁས་པས་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་རྗེས་སུ་འགྲོ་བའི་ཡེ་ཤེས་དེ་བཞིན་ཉིད་རྣམ་པར་དགོད་ པ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་ཀུན་རྫོབ་ཀྱི་རྒྱུས་ཡང་དག་པར་བསྟན་པས་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་དོན་དམ་པའི་ རྒྱུས་ལ་མཁས་པས་ཆོས་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས་ཆོས་རྣམས་ཚུལ་གཅིག་ལས་མི་འགྱུར་བ་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་ པས་ཕུང་པོ་དང༌། ཁམས་དང༌། སྐྱེ་མཆེད་དང༌། རྟེན་ཅིང་འབྲེལ་བར་འབྱུང་བ་མཁས་པར་ཁོང་དུ་ཆུད་པར་བྱ་བ་ལ་ཡང་དག་པར་འཇུག་གོ །ངེས་པའི་ཚིག་ཐ་དད་པ་ཡང་དག་པར་ ཤེས་པས་འགྲོ་བ་ཐམས་ཅད་མངོན་པར་སྨོན་པའི་སྒྲ་དབྱངས་ཤིན་ཏུ་སྙན་པའི་ཚིག་གིས་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་ཕྱི་ཕྱིར་ཞིང་དྲན་པ་མཐའ་ཡས་ པས་ཆོས་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས་ཐེག་པ་གཅིག་ལ་ཡང་དག་པར་གཞོལ་བ་ཐ་དད་པ་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་ཐེག་ པ་རབ་ཏུ་རྣམ་པར་ཕྱེ་བའི་རྣམ་པ་ཐ་དད་པ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་ཐེག་པ་ཐམས་ཅད་ཐ་དད་པ་མེད་པར་ཤིན་ཏུ་སྟོན་ཏོ། །སྤོབས་པ་ཐ་དད་པ་ ༄༅། །ཡང་དག་པར་ཤེས་པས་ཐེག་པ་རེ་རེ་ལ་ཡང་ཆོས་ཀྱི་སྣང་བ་མུ་མེད་པར་ཤིན་ཏུ་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས་བྱང་ཆུབ་ སེམས་དཔའི་སྤྱོད་པ་དང༌། ཡེ་ཤེས་ཀྱི་སྤྱོད་པ་དང༌། ཆོས་ཀྱི་སྤྱོད་པ་ཐམས་ཅད་ཡེ་ཤེས་ཀྱིས་ཁོང་དུ་ཆུད་པར་བྱ་བ་ལ་རབ་ཏུ་འཇུག་གོ །དོན་ཐ་དད་པ་ཡང་དག་པར་ཤེས་པས་ས་ བཅུ་རྣམ་པར་དགོད་ཅིང་ཤིན་ཏུ་བསྟན་པ་རྣམ་པར་ཕྱེ་བ་ལ་ཡང་དག་པར་འཇུག་གོ །ངེས་པའི་ཚིག་ཐ་དད་པ་ཡང་དག་པར་ཤེས་པས་སའི་ལམ་ཇི་ལྟ་བ་བཞིན་དུ་ཉེ་བར་བསྒྲུབ་པ་ ཐ་མི་དད་པར་ཡང་དག་པར་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་ས་རེ་རེ་ཞིང་རྣམ་པ་མུ་མེད་པ་ཡང་དག་པར་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ ཤེས་པས་དེ་བཞིན་གཤེགས་པ་ཐམས་ཅད་མཚན་ཉིད་གཅིག་ཏུ་ཁོང་དུ་ཆུད་པར་བྱ་བ་ལ་རབ་ཏུ་འཇུག་གོ །དོན་ཐ་དད་པ་ཡང་དག་པར་ཤེས་པས་དུས་དང༌། དངོས་པོ་དང༌། མཚན་ ཉིད་རྣམ་པར་ཕྱེ་བ་སྣ་ཚོགས་ཁོང་དུ་ཆུད་པར་བྱ་བ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་ཁོང་དུ་ཆུད་པ་རྣམ་པར་ཕྱེ་བ་བཞིན་དུ་བསྟན་པས་ཆོས་སྟོན་ ཏོ༑ ༑སྤོབས་པ་ཐ་དད་པ་ཡང་དག་པར་ཤེས་པས་ཆོས་ཀྱི་ཚིག་རེ་རེ་ལ་ཡང་བསྐལ་པ་མཐའ་ཡས་པར་རྒྱུན་མི་འཆད་པར་ཆོས་སྟོན་ཏོ། །གཞན་ཡང་ཆོས་ཐ་དད་པ་ཡང་དག་ པར་ཤེས་པས་དེ་བཞིན་གཤེགས་པ་ཐམས་ཅད་ཀྱི་གསུང་དང༌། སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་དང༌། བྱམས་པ་ཆེན་པོ་དང༌། ཐུགས་རྗེ་ཆེན་པོ་དང༌། ཐ་ དད་པ་ཡང་དག་པར་མཁྱེན་པའི་ཚུལ་དང༌། ཆོས་ཀྱི་འཁོར་ལོ་བསྐོར་བ་དང༌། ཐམས་ཅད་མཁྱེན་པའི་ཡེ་ཤེས་རྟོག་པར་བྱ་བ་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་ སེམས་ཅན་གྱི་སྤྱོད་པ་སྟོང་ཕྲག་བརྒྱད་ཅུ་རྩ་བཞི་དང༌། བསམ་པ་ཇི་ལྟ་བ་དང༌། དབང་པོ་ཇི་ལྟ་བ་དང༌། མོས་པ་ཇི་ལྟ་བ་བཞིན་དུ་དེ་བཞིན་གཤེགས་པའི་གསུང་རབ་ཏུ་ཤེས་སོ། ། ངེས་པའི་ཚིག་ཐ་དད་པ་ཡང་དག་པར་ཤེས་པས་སེམས་ཅན་ཐམས་ཅད་ཀྱི་སྤྱོད་པ་དང༌། མ་འདྲེས་པའི་དེ་བཞིན་གཤེགས་པའི་གསུང་རྗེས་སུ་བསྒྲགས་པས་ཆོས་སྟོན་ཏོ། །སྤོབས་ པ་ཐ་དད་པ་ཡང་དག་པར་ཤེས་པས་དེ་བཞིན་གཤེགས་པའི་ཡེ་ཤེས་འོད་གསལ་བ་དང༌། སྤྱོད་པའི་དཀྱིལ་འཁོར་ལ་མོས་པས་ཆོས་སྟོན་ཏོ། །ཀྱེ༑ རྒལ་བའི་སྲས་དག །དེ་ལྟར་ཐ་ དད་པ་ཡང་དག་པར་ཤེས་པའི་ཡེ་ཤེས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་དེ་བཞིན་གཤེགས་པའི་ཆོས་ཀྱི་མཛོད་ཐོབ་ཅིང༌། བྱང་ཆུབ་སེམས་དཔའི་ས་དགུ་པ་ལ་གནས་པ་ ཆོས་སྨྲ་བ་ཆེན་པོའི་གོ་འཕང་ལ་གནས་པའི་ཚེ། དོན་དང་ལྡན་པའི་གཟུངས་རབ་ཏུ་ཐོབ་པ་ཡིན། ཆོས་དང་ལྡན་པའི་གཟུངས་རབ་ཏུ་ཐོབ་པ་ཡིན། ཡེ་ཤེས་མངོན་པར་བསྒྲུབ་པ་ ༄༅། །དང་ལྡན་པའི་གཟུངས་རབ་ཏུ་ཐོབ་པ་ཡིན། སྣང་བ་དང་ལྡན་པའི་གཟུངས་རབ་ཏུ་ཐོབ་པ་ཡིན། བློ་གྲོས་བཟང་པོ་དང་ལྡན་པའི་གཟུངས་དང༌། དབྱིག་དང་ ལྡན་པའི་གཟུངས་དང༌། གྲགས་པ་དང་ལྡན་པའི་གཟུངས་དང༌། གཟི་བརྗིད་དང་ལྡན་པའི་གཟུངས་དང༌། ཆགས་པ་མེད་པའི་སྒོའི་གཟུངས་དང༌། མཐའ་ཡས་པ་དང་ལྡན་པའི་ གཟུངས་དང༌། དོན་སྣ་ཚོགས་ཀྱི་མཛོད་དང་ལྡན་པའི་གཟུངས་རབ་ཏུ་ཐོབ་པ་ཡིན། དེ་གཟུངས་དེ་དག་ལ་སོགས་པ་གཟུངས་ཀྱི་སྒོ་བརྒྱ་སྟོང་གྲངས་མེད་པ་ཕྲག་བཅུ་ཡོངས་སུ་ཚང་ བར་ཐོབ་སྟེ། གཟུངས་ཀྱི་སྒོ་བརྒྱ་སྟོང་གྲངས་མེད་པ་ཕྲག་བཅུ་དང་ལྡན་པའི་དབྱངས་ཀྱི་ཡན་ལག་ལ་མཁས་པས་དེ་སྙེད་དུ་ཚད་མེད་པ་ཉིད་དང་ལྡན་པའི་སྤོབས་པ་རྣམ་པར་ཕྱེ་བའི་ སྒོས་ཆོས་སྟོན་ཏོ། །དེ་དེ་ལྟར་ཚད་མེད་པའི་གཟུངས་ཀྱི་སྒོ་བརྒྱ་སྟོང་གྲངས་མེད་པས་ཚད་མེད་པའི་སངས་རྒྱས་བཅོམ་ལྡན་འདས་རྣམས་ལས་ཆོས་ཉན་ཅིང་ཐོས་ནས་ཀྱང་བརྗོད་ པར་མི་བྱེད་དེ། ཇི་སྐད་དུ་ཐོས་པ་ཡང་ཚད་མེད་པར་རྣམ་པར་ཕྱེ་བས་ཤིན་ཏུ་སྟོན་ཏོ། །དེ་ནི་དེ་བཞིན་གཤེགས་པ་གཅིག་ལས་གཟུངས་ཀྱི་སྒོ་བརྒྱ་སྟོང་གྲངས་མེད་པ་ཕྲག་བཅུས་ ཆོས་ཁོང་དུ་ཆུད་པར་བྱེད་དེ། དེ་བཞིན་གཤེགས་པ་གཅིག་ལས་ཇི་ལྟ་བ་དེ་བཞིན་དུ་ཡང་དག་པར་རྫོགས་པའི་སངས་རྒྱས་མཐའ་ཡས་པ་ལས་གཟུངས་ཀྱི་སྒོ་བརྒྱ་སྟོང་གྲངས་ མེད་པ་ཕྲག་བཅུས་ཆོས་ཁོང་དུ་ཆུད་པར་བྱེད་དོ། །དེ་སྨོན་པ་ཙམ་གྱིས་ཀྱང་ཡང་དག་པར་རྫོགས་པའི་སངས་རྒྱས་རྣམས་ལས་ཆོས་ཀྱི་སྒོ་སྣང་བ་ཆེས་མང་དུ་ཡང་དག་པར་འཛིན་གྱི། ཉན་ཐོས་ཤིན་ཏུ་མང་དུ་ཐོས་པ་དང་ལྡན་པ་ཐོས་པ་འཛིན་པའི་གཟུངས་རབ་ཏུ་ཐོབ་པ་རྣམས་ཀྱིས་ནི་བསྐལ་པ་བརྒྱ་ཕྲག་སྟོང་དུ་ཡང་གཟུང་བའི་བྱིན་གྱི་རླབས་ཀྱིས་དེ་ལྟར་མི་ཟིན་ཏོ། ། དེ་ལྟར་དེ་ལྟ་བུའི་གཟུངས་ཐོབ་ཅིང་སྤོབས་པ་ཐོབ་པས་ཆོས་ཀྱི་གཏམ་བྱ་བའི་ཕྱིར་འདུག་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། ཆོས་ ཀྱི་སྟན་ལ་འདུག་ཅིང་སེམས་ཅན་རྣམས་ལ་བསམ་པ་ཇི་ལྟ་བ་བཞིན་དུ་རྣམ་པར་ཕྱེ་ཞིང་ཆོས་སྟོན་ཏོ། །དེའི་ཆོས་ཀྱི་སྟན་ཡང་དེ་བཞིན་གཤེགས་པ་དག་དང༌། བྱང་ཆུབ་སེམས་དཔའ་ དབང་བསྐུར་བའི་ས་ཐོབ་པ་མ་གཏོགས་པར་ཐམས་ཅད་ལས་འཕགས་ཤིང་སྣང་བ་ཚད་མེད་པ་དང་ལྡན་པ་ཡིན། དེ་འདོད་ན་ཆོས་ཀྱི་སྟན་ལ་འདུག་ཅིང་དབྱངས་གཅིག་གིས་འཁོར་ ཐམས་ཅད་དུ་སྒྲ་སྐད་སྣ་ཚོགས་རྣམ་པ་ཐ་དད་པས་ཡང་དག་པར་གོ་བར་བྱེད་དོ། །འདོད་ན་སྒྲ་སྐད་སྣ་ཚོགས་དང༌། དབྱངས་ཀྱི་ཡན་ལག་ཐ་དད་པ་རྣམ་པར་ཕྱེ་བས་འཁོར་ཐམས་ ཅད་མངོན་པར་གོ་བར་བྱེད་དོ། །འདོད་ན་འོད་ཟེར་གྱི་སྒོ་ཉེ་བར་བསྒྲུབས་པས་ཆོས་ཀྱི་སྒོ་ཤིན་ཏུ་བརྗོད་དོ། །འདོད་ན་བ་སྤུའི་བུ་ག་ཐམས་ཅད་ནས་དབྱངས་རྣམ་པར་ཕྱེ་བ་ཤིན་ཏུ་བརྗོད་ ༄༅། །དོ༑ ༑འདོད་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གཟུགས་སུ་སྣང་བ་ཇི་སྙེད་ཡོད་པའི་གཟུགས་སུ་སྣང་བ་དེ་དག་ལས་ཆོས་ཀྱི་སྒྲ་འབྱུང་ བར་བྱེད་དོ། །འདོད་ན་དབྱངས་ཀྱི་ཡན་ལག་གཅིག་གི་སྒྲས་ཆོས་ཀྱི་དབྱིངས་ཐམས་ཅད་ཁོང་དུ་ཆུད་པར་བྱེད་དོ། །འདོད་ན་སྒྲ་དང་དབྱངས་ཐམས་ཅད་ཆོས་ཀྱི་སྒྲར་བྱིན་གྱིས་རློབ་བོ། ། འདོད་ན་འཇིག་རྟེན་གྱི་ཁམས་ཐམས་ཅད་ན་ཡོད་པའི་གླུ་དང༌། རོལ་མོ་བརྡུང་བ་དང༌། དཀྲོལ་བའི་སྒྲ་ཐམས་ཅད་ལས་ཆོས་ཀྱི་སྒྲ་འབྱུང་བར་བྱེད་དོ། །འདོད་ན་ཡི་གེ་གཅིག་གི་སྒྲ་ ལས་ཆོས་ཐམས་ཅད་ཀྱི་ཚིག་རབ་ཏུ་ཕྱེ་བའི་སྒྲ་འབྱུང་བར་བྱེད་དོ། །འདོད་ན་འཇིག་རྟེན་གྱི་ཁམས་མཐའ་ཡས་ཤིང་བརྗོད་དུ་མེད་པའི་ས་དང༌། ཆུ་དང༌། མེ་དང༌། རླུང་གི་ཕུང་པོ་ རྡུལ་ཤིན་ཏུ་ཕྲ་རབ་རྣམ་པར་ཕྱེ་བའི་རྡུལ་ཤིན་ཏུ་ཕྲ་བ་རེ་རེ་ལས་ཆོས་ཀྱི་སྒོ་བརྗོད་དུ་མེད་པ་འབྱུང་བར་བྱེད་དོ། །གལ་ཏེ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ སུ་གཏོགས་པའི་སེམས་ཅན་རྣམས་འོངས་ཏེ། སྐད་ཅིག་ཡུད་ཙམ་ཐང་གཅིག་ཏུ་དྲི་བ་ཡོངས་སུ་འདྲི་ཞིང༌། དེ་དག་རེ་རེས་ཀྱང་སྒྲ་རྣམ་པ་ཐ་དད་པ་ཚད་མེད་པས་ཡོངས་སུ་དྲིས་ པར་གྱུར་ལ། གཅིག་གིས་གང་དྲིས་པ་དེ་གཞན་མི་འདྲི་བར་གྱུར་ན་ཡང༌། དེ་ལ་བྱང་ཆུབ་སེམས་དཔའ་དེས་སེམས་ཅན་དེ་དག་ཐམས་ཅད་ཀྱི་སྒྲ་ཚིག་སོ་སོ་དང༌། ཡི་གེའི་འབྲུ་ ཡན་ཆད་མ་ལུས་པར་བཟུང་སྟེ། བཟུང་ནས་ཀྱང་ཚིག་གཅིག་མངོན་པར་བརྗོད་པས་སེམས་ཅན་དེ་དག་ཐམས་ཅད་ཀྱི་སེམས་དང་བསམ་པ་ཚིམ་པར་བྱེད་པ་ནས། འཇིག་རྟེན་གྱི་ ཁམས་བརྗོད་དུ་མེད་པའི་བར་དུ་གཏོགས་པའི་སེམས་ཅན་ཐམས་ཅད་ཀྱིས་སྐད་ཅིག་ཐང་གཅིག་ཡུད་ཙམ་དུ་དྲི་བ་ཡོངས་སུ་དྲིས་ཏེ། དེ་དག་རེ་རེ་ཞིང་ཡང་སྒྲ་རྣམ་པ་ཐ་དད་པ་ཚད་མེད་ པས་འདྲི་བར་གྱུར་ལ། གཅིག་གིས་ཅི་དྲིས་པ་དེ་གཞན་མི་འདྲི་བར་གྱུར་ན་ཡང༌། དེ་དག་ཐམས་ཅད་བྱང་ཆུབ་སེམས་དཔའ་དེས་སྐད་ཅིག་ཡུད་ཙམ་ཐང་ཅིག་ཏུ་མ་ལུས་པར་བཟུང་སྟེ། སྒྲ་གཅིག་བརྗོད་པས་དེ་དག་ཐམས་ཅད་ཁོང་དུ་ཆུད་པར་བྱེད་དོ། །དེ་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་བར་དག་ཀྱང་རྒྱས་པར་བཀང་ཞིང་སེམས་ཅན་རྣམས་ ལ་བསམ་པ་དང༌། དབང་པོ་དང༌། མོས་པ་ཇི་ལྟ་བ་བཞིན་དུ་ཆོས་སྟོན་ཏོ། །ཆོས་ཀྱི་གཏམ་ལ་ཞུགས་པའི་ཚེའང་དེ་བཞིན་གཤེགས་པའི་བྱིན་གྱི་རླབས་ལེན་ཅིང་སངས་རྒྱས་ཀྱི་མཛད་ པ་ཐམས་ཅད་ཀྱི་སེམས་ཅན་ཐམས་ཅད་ལ་ཉེ་བར་གནས་པ་ཡིན། ཡང་དེ་འདི་ལྟ་བུའི་ཡེ་ཤེས་སྣང་བས་འཛིན་པ་ཡོངས་སུ་རྩོམ་སྟེ། གལ་ཏེ་སྐྲའི་རྩེ་མོའི་གོ་གཅིག་ལ་འཇིག་རྟེན་གྱི་ ཁམས་བརྗོད་དུ་མེད་པའི་རྡུལ་ཤིན་ཏུ་ཕྲ་བ་ཇི་སྙེད་པ་དེ་སྙེད་ཀྱི་དེ་བཞིན་གཤེགས་པ་བཞུགས་པ་དེ་སྙེད་དུ་ཚད་མེད་པར་གྱུར་པའི་འཁོར་གྱི་དཀྱིལ་འཁོར་དུ་ཆོས་བསྟན་ཏེ། དེ་བཞིན་ ༄༅། །གཤེགས་པ་དེ་དག་རེ་རེས་ཀྱང༌། དེ་སྙེད་ཀྱི་སེམས་ཅན་ཚད་མེད་པ་ལ་ཆོས་རྣམ་པ་ཐ་དད་པར་ཤིན་ཏུ་བསྟན་ཏེ། སེམས་ཅན་གྱི་བསམ་པའི་རྒྱུད་རེ་རེ་ལ་ཡང་ དེ་སྙེད་དུ་ཆོས་ཉེ་བར་བསྒྲུབ་པ་ཚད་མེད་པར་ཉེ་བར་བསྒྲུབ་པར་གྱུར་ལ། དེ་བཞིན་གཤེགས་པ་གཅིག་གིས་ཇི་ལྟ་བ་དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱིས་ འཁོར་གྱི་དཀྱིལ་འཁོར་ཐམས་ཅད་དུ་སྟེ། སྐྲའི་རྩེ་མོའི་གོ་གཅིག་ལ་ཇི་ལྟ་བ་དེ་བཞིན་དུ་ཆོས་ཀྱི་དབྱིངས་ཐམས་ཅད་དུ་དེ་ལྟར་གྱུར་ཀྱང་དེ་དག་ཐམས་ཅད་ཟིན་པར་འགྱུར་ན། འཇིག་ རྟེན་གྱི་ཁམས་དེ་ཙམ་དག་གི་སེམས་ཅན་རྣམས་ཀྱི་ལྟ་སྨོས་ཀྱང་ཅི་དགོས། དེ་དེ་ལྟར་བྱང་ཆུབ་སེམས་དཔའི་ས་ལེགས་པའི་བློ་གྲོས་འདི་ཐོབ་པའི་བྱང་ཆུབ་སེམས་དཔའ་ནི་ཉིན་ མཚན་དུ་ཡིད་ལ་བསམ་པ་གཞན་མེད་པར་སངས་རྒྱས་ཀྱི་སྤྱོད་ཡུལ་ལ་ཞུགས་པས་དེ་བཞིན་གཤེགས་པ་དང་འགྲོགས་པ་རབ་ཏུ་ཐོབ་ཅིང་བྱང་ཆུབ་སེམས་དཔའི་རྣམ་པར་ ཐར་པ་ཟབ་མོ་རབ་ཏུ་ཐོབ་པ་ཡིན། དེ་དེ་ལྟ་བུའི་ཡེ་ཤེས་དང་ལྡན་ཞིང་མཉམ་པར་བཞག་ཀྱང་དེ་བཞིན་གཤེགས་པ་བལྟ་བ་ཡོངས་སུ་མི་སྤོང་སྟེ། བསྐལ་པ་རེ་རེ་ཞིང་སངས་ རྒྱས་དུ་མ་ནས། སངས་རྒྱས་བརྒྱ་སྟོང་བྱེ་བ་ཁྲག་ཁྲིག་ལྟ་ཞིང་མཐོང་ནས་ཀྱང་རིམ་གྲོ་དང༌། བཀུར་སྟི་དང༌། བསྟི་སྟང་དང༌། མཆོད་པ་བྱེད་དེ། སངས་རྒྱས་མཐོང་ཞིང་མཆོད་ པ་བྱ་བ་རྒྱ་ཆེན་པོ་ཡོངས་སུ་མི་གཏོང་ངོ༌། །དེ་བཞིན་གཤེགས་པ་དེ་དག་ལ་ཞུ་བ་ཡོངས་སུ་ཞུ་བ་ཡང་བྱེད་དེ། ཆོས་ཀྱི་གཟུངས་རབ་ཏུ་བསྟན་པ་ལས་ཤིན་ཏུ་བྱུང་བ་ཡིན། དེའི་དགེ་བའི་ རྩ་བ་དེ་དག་སྔོན་པས་ཀྱང་ཤིན་ཏུ་བྱང་ཞིང་མི་འཕྲོགས་པར་འགྱུར་ཏེ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། གསེར་གྱི་ས་ལེ་སྦྲམ་དེ་ཉིད་མགར་བ་མཁས་པས་རྒྱན་དུ་ བྱས་ཏེ། ཡོངས་སུ་ཟིན་པ་འཁོར་ལོས་བསྒྱུར་བའི་རྒྱལ་པོའི་ཡན་ལག་གི་དམ་པ་མགོ་འམ་མགུལ་དུ་བཏགས་ན། ཁམས་ཀྱི་རྒྱལ་པོ་ཐམས་ཅད་དང༌། གླིང་བཞི་པའི་སེམས་ཅན་ ཐམས་ཅད་ཀྱི་རྒྱན་གྱི་རྣམ་པས་མི་ཐུབ་ཅིང་མི་འཕྲོགས་པ་ཡིན་ནོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་ལེགས་པའི་བློ་གྲོས་འདི་ལ་གནས་པའི་བྱང་ སེམས་དཔའི་དགེ་བའི་རྩ་བ་དེ་དག་ཀྱང༌། ཉན་ཐོས་དང༌། རང་སངས་རྒྱས་དང༌། ས་འོག་མ་ལ་གནས་པའི་བྱང་ཆུབ་སེམས་དཔའ་ཐམས་ཅད་ཀྱིས་མི་འཕྲོགས་ཤིང་མི་ཐུབ་པ་ཡིན། དེའི་དགེ་བའི་རྩ་བ་སྣང་བ་དེས་ནི་སེམས་ཅན་རྣམས་ཀྱི་ཉོན་མོངས་པ་དང༌། སེམས་ཀྱི་ཐིབས་པོ་སྣང་བར་བྱས་ཏེ་དེ་ཉིད་ནས་ཕྱིར་ལྡོག་གོ །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ ན༑ སྟོང་གཉིས་ལ་དབང་བའི་ཚངས་པ་ཆེན་པོ་ནི་སྟོང་གཉིས་ཀྱི་འཇིག་རྟེན་གྱི་ཁམས་ཐམས་ཅད་ཀྱི་ཐིབས་པོ་དམའ་བར་གཞོལ་བ་ཡོངས་སུ་སྣང་བར་བྱེད་དོ། །ཀྱེ༑ རྒྱལ་བའི་སྲས་དག། ༄༅། །དེ་བཞིན་དུ་བྱང་ཆུབ་སེམས་དཔའི་ས་ལེགས་པའི་བློ་གྲོས་འདི་ལ་གནས་པའི་བྱང་ཆུབ་སེམས་དཔའི་དགེ་བའི་རྩ་བའི་སྣང་བ་དེ་ཡང་སེམས་ཅན་རྣམས་ཀྱི་ ཉོན་མོངས་པ་དང༌། སེམས་ཀྱི་ཐིབས་པོ་སྣང་བར་བྱས་ཏེ། དེ་ཉིད་ནས་ཕྱིར་ལྡོག་གོ །དེའི་ཕ་རོལ་ཏུ་ཕྱིན་པ་བཅུ་ལས་སྟོབས་ཀྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ ཀྱང་ཅི་ཚུལ་ཅི་ནུས་སུ་ཡང་དག་པར་མི་སྒྲུབ་པར་ནི་མ་ཡིན་ནོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ས་ལེགས་པའི་བློ་གྲོས་ཞེས་བྱ་བ་སྟེ། བྱང་ཆུབ་སེམས་དཔའི་ ས་དགུ་པ་མདོར་བསྟན་པའོ། །རྒྱ་ཆེར་ནི་བསྐལ་པ་མུ་མེད་པའི་བསྟན་པའི་མཐར་ཐུག་པར་ཤེས་པར་བྱའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་ཚངས་པ་ཆེན་པོར་ གྱུར་ཏེ། སྟོབས་དང་མཐུ་ཆེན་པོ་ཐོབ་པ། སྟོང་གཉིས་ལ་དབང་ཞིང་ཟིལ་གྱིས་གནོན་ལ་གཞན་གྱིས་ཟིལ་གྱིས་མི་ནོན་པ། མཐུན་པའི་དོན་མཐོང་བ། དབང་ཤིན་ཏུ་ཐོབ་པ། སེམས་ཅན་རྣམས་ལ་ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཐམས་ཅད་སྟོན་པ་ལ་མཁས་ཤིང་མཐུ་ཡོད་པ་སྟེ། སེམས་ཅན་གྱི་བསམ་ པ་ཡོངས་སུ་དྲིས་པ་བསྟན་པས་མི་འཕྲོགས་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ ཐམས་ཅད་ཇི་ལྟར་ན། སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས་ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང༌། ཆོས་ཡིད་ལ་བྱ་བ་དང༌། དགེ་འདུན་ཡིད་ལ་ བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་དང༌། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང༌། བྱང་ཆུབ་སེམས་དཔའི་ས་ཡིད་ལ་བྱ་བ་དང༌། ཕ་རོལ་ཏུ་ཕྱིན་པ་ཡིད་ལ་བྱ་ བ་དང༌། སྟོབས་ཡིད་ལ་བྱ་བ་དང༌། མི་འཇིགས་པ་ཡིད་ལ་བྱ་བ་དང༌། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་ བའི་རྡུལ་ཤིན་ཏུ་ཕྲ་བ་སྙེད་རབ་ཏུ་ཐོབ་ཅིང་དེ་དག་ལ་སྙོམས་པར་འཇུག་པ་དང༌། སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་མཐོང་བ་དང༌། དེ་ དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང༌། འཇིག་རྟེན་གྱི་ཁམས་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་སྐྱོད་པ་དང༌། སངས་ ༄༅། །རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་དུ་འགྲོ་བ་དང༌། འཇིག་རྟེན་གྱི་ཁམས་སངས་རྒྱས་ཀྱི་ཞིང་གྲངས་མེད་ པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་སྣང་བར་བྱ་བ་དང༌། སེམས་ཅན་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་ཡོངས་ སུ་སྨིན་པར་བྱ་བ་དང༌། བསྐལ་པ་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་དུ་གནས་པར་བྱ་བ་དང༌། སྔོན་གྱི་མཐའ་དང༌། ཕྱི་མའི་ མཐའི་བསྐལ་པ་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་ལ་རབ་ཏུ་འཇུག་པ་དང༌། ཆོས་ཀྱི་སྒོ་སངས་རྒྱས་ཀྱི་ཞིང་གྲངས་མེད་པ་བརྒྱ་ སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་རྣམ་པར་འབྱེད་པ་དང༌། ལུས་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་ཡོངས་སུ་ བསྟན་པ་དང༌། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་ཡང་དག་པར་བསྟན་ པའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཆད་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས། སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ ལུས་སམ། འོད་དམ། རྫུ་འཕྲུལ་ལམ། མིག་གམ། སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་ བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཀྱང་ བགྲང་བར་དཀའོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང༌། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་ སོ༑ ༑དེ་དག་ཚད་མེད་སྟོབས་ཀྱི་བློ་ཡིས་རྣམ་དཔྱོད་ཅིང༌། །ཡེ་ཤེས་ཕྲ་བའི་དམ་པ་འགྲོ་བས་ཤེས་དཀའ་བ། །དེ་བཞིན་བདེ་གཤེགས་གསང་བའི་གནས་ལ་ཡང་དག་འཇུག །འགྲོ་ བའི་དོན་བྱེད་དེ་དག་ས་དགུ་ཡོངས་སུ་གནོན། །དེ་དག་གཟུངས་མཆོག་ཏིང་འཛིན་ཆེ་བ་ཉིད་མཆོག་དང༌། །མངོན་ཤེས་ཡངས་དང་དེ་བཞིན་ཞིང་འཇུག་མཐའ་ཡས་དང༌། །སྟོབས་ དང་རྟོགས་པའི་ཡེ་ཤེས་རྒྱལ་བའི་བརྟེན་གནས་དང༌། །སྨོན་ལམ་སྙིང་རྗེའི་བསམ་པས་མཁས་པ་དགུ་ལ་འཇུག །ས་དགུ་ལྡན་པ་དེ་དག་རྒྱལ་བའི་མཛོད་འཛིན་ཅིང༌། །དགེ་བའི་ ཆོས་དང་མི་དགེ་ལུང་དུ་མ་བསྟན་དང༌། །ཟག་དང་བཅས་དང་འཇིག་རྟེན་པ་དང་འཕགས་པ་དང༌། །བསམ་དུ་རུང་དང་བསམ་དུ་མི་རུང་མཁས་པས་ཤེས། །ངེས་པའི་ཆོས་དང་མ་ངེས་ ༄༅། །ཆོས་ཀྱང་རབ་ཏུ་རྟོགས། །ཐེག་གསུམ་ཕུན་སུམ་ཚོགས་པའི་བྱ་བ་ཡོངས་སུ་འཇལ། །འདུས་བྱས་རྣམ་པར་ཕྱེ་དང་གྲངས་དང་རྒྱུ་བ་དང༌། །འཇིག་རྟེན་ཇི་ལྟར་ མངོན་བྱེད་དེ་ལ་རབ་ཏུ་འཇུག །དེ་དག་དེ་འདྲའི་ཤེས་ལྡན་བློ་མཆོག་ཕྲ་ལྡན་པ། །སེམས་ཅན་སེམས་ཀྱི་ཐིབས་པོ་ཡོངས་སུ་རྟོག་པ་བྱེད། །རྣམ་ཤེས་སྣ་ཚོགས་མྱུར་དུ་འགྱུར་ ཞིང་ལྡོག་པ་དང༌། །རྣམ་ཤེས་མཐའ་ཡས་འབྱུང་ལ་རྟག་ཏུ་མཁས་པ་འཇུག །ཉོན་མོངས་མཐའ་ཡས་སྦྱོར་དང་གྲོགས་སུ་འགྱུར་བ་དང༌། །ཀུན་ནས་འཁོར་དང་བག་ཉལ་འགྲོ་ རྒྱུད་མཚམས་སྦྱོར་དང༌། །ལས་རྣམས་སྣ་ཚོགས་རྣམ་པར་ཕྱེ་ལའང་དེ་བཞིན་འཇུག །རྒྱུ་དང་འགོག་དང་དེ་བཞིན་འབྲས་བུ་འཇིག་པའང་ཡང་དག་འཇུག །དབང་པོ་རྣོ་དང་ཐ་ མ་འབྲིང་དང་ཡངས་པ་དང༌། །ཐ་དང་སྔོན་དང་ཕྱི་མའི་མཐའ་ལའང་ཡང་དག་འཇུག །མོས་པ་དགེ་དང་མི་དགེ་སྣ་ཚོགས་དུ་མ་དག །སྟོང་ཕྲག་བརྒྱད་ཅུ་རྩ་བཞི་ཀུན་ལ་ཡང་དག་ འཇུག །ཁམས་ཀྱི་རྣམ་པ་ཉོན་མོངས་ལྟ་བ་སྲིད་པ་རྣམས། །ཐིབས་པོར་གྱུར་བ་སྔ་ཕྱི་མེད་ཅིང་འཆད་མེད་དང༌། །བག་ཉལ་བསམ་པ་ལྷན་ཅིག་སྐྱེས་པའི་རྒྱུད་རྣམས་ཀྱི། །སེམས་ རྣམས་ཀུན་རྒྱུ་འབྲེལ་ཅིང་རྒྱུན་ཆད་མི་འགྱུར་བ། །བསམ་པ་བག་ཉལ་རྒྱུད་ཡོད་དངོས་པོ་མ་ཡིན་ཏེ། །ཡུལ་ལ་མི་གནས་བསམ་པ་ཡོངས་སུ་འབྲལ་མི་འགྱུར། །ཤེས་པ་དཀའ་ བའི་བསམ་གཏན་ཡུལ་ལས་ཕྱིར་མི་ལྡོག །རྡོ་རྗེ་ལྟ་བུའི་ལམ་གྱིས་ཆོད་འགྱུར་གཞན་གྱིས་མིན། །རྒྱུད་དྲུག་སྐྱེ་བ་རྣམ་པར་ཕྱེ་ལ་རབ་ཏུ་འཇུག །སྲེད་རླན་མ་རིག་མུན་པ་དེ་བཞི་ལས་ཀྱི་ ཞིང༑ ༑རྣམ་ཤེས་ས་བོན་ཅན་འབྱུང་མྱུ་གུ་མིང་དང་གཟུགས། །ཁམས་གསུམ་སྔོན་མཐའ་མེད་པར་དེ་དག་རབ་ཏུ་འཇུག །དེ་དག་བག་ཆགས་ཚུལ་དང་ཉོན་མོངས་ལས་དང་སེམས། ། འདོད་ཆགས་བྲལ་བས་ལམ་གྱི་རྒྱུད་དུ་འབྱུང་བ་མིན། །སེམས་ཅན་ཕུང་པོ་གསུམ་དུ་ངེས་པ་ཡང་དག་ཤེས། །ལྟ་བར་བྱིང་བ་ཤེས་པའི་ལམ་དང་དེ་དག་ལྡན། །དེ་འདྲའི་ཤེས་ལྡན་ས་ མཆོག་འདི་ལ་གནས་པ་སྟེ། །སེམས་ཅན་བསམ་པ་མོས་པ་དབང་པོའི་ཚུལ་བཞིན་དུ། །ཆོས་རྣམས་རྣམ་པར་ཕྱེ་ཞིང་ཤིན་ཏུ་སྟོན་པ་བྱེད། །ཐ་དད་ཡང་དག་དོན་ཤེས་ངེས་ཚིག་སྤོབས་ པ་ཡིས། །དེ་དག་ཆོས་སྨྲའི་ཚུལ་ལ་གནས་པ་རབ་ཏུ་ཐོབ། །སེང་གེ་ཁྱུ་མཆོག་དཔེ་འདྲ་རི་ཡི་རྒྱལ་པོ་འདྲ། །བདུད་རྩི་སྤྲིན་ཆེན་ཞིམ་པའི་ཆར་ཡང་རབ་ཏུ་འབབས། །ཀླུ་ཡི་དབང་པོས་རྒྱ་མཚོ་ རྒྱས་པ་བྱེད་པ་བཞིན། །དོན་གྱི་དོན་ཤེས་དེ་བཞིན་ཆོས་ཉིད་རབ་ཏུ་ཤེས། །ངེས་ཚིག་རྗེས་སུ་སོང་ཞིང་སྤོབས་པ་རབ་ཏུ་ཐོབ། །དེ་དག་གྲངས་མེད་སྟོང་ཕྲག་བཅུ་ཡི་གཟུངས་ཐོབ་བས། ། ཆོས་རྣམས་འཛིན་པ་རྒྱ་མཚོ་སྤྲིན་ཆེན་ཆར་འཛིན་བཞིན། །དེ་དག་དེ་འདྲའི་ཏིང་འཛིན་གཟུངས་གསལ་ཐོབ་གྱུར་པས། །སྐད་ཅིག་གཅིག་གིས་སངས་རྒྱས་མང་པོ་སྟོང་ཡང་མཐོང༌། །རིན་ ༄༅། །ཆེན་ཆོས་རྣམས་ཐོས་ནས་ཡང་དུ་སྟོན་བྱེད་དེ། །ཚིག་གི་དཀྱིལ་འཁོར་རྣམ་དག་དབྱངས་ཀྱི་ཡན་ལག་ལྡན། །འདོད་ན་སྟོང་གསུམ་འཇིག་རྟེན་ཁམས་སུ་ གཏོགས་པ་ཡི། །སེམས་ཅན་བསམ་སེམས་སྣ་ཚོགས་ཚུལ་བཞིན་སྨིན་བྱེད་ཅིང༌། །ཐམས་ཅད་བསམ་པ་དབང་པོ་ཇི་བཞིན་ཚིམ་པར་བྱེད། །གླིང་བཞི་རྒྱ་མཚོའི་སྤྲིན་བཞིན་ ཡང་དག་རབ་ཏུ་འཇུག །དེ་བས་གོང་དུ་ལེགས་ལྡན་བརྩོན་འགྲུས་རབ་ཐོབ་པ། །སྐྲ་རྩེའི་གོ་གཅིག་བསམ་གྱིས་མི་ཁྱབ་སེམས་པ་བྱེད། །སེམས་ཅན་སྣ་ཚོགས་མང་ལ་བདེ་གཤེགས་ ཆོས་སྟོན་པ། །ཐོས་ནས་ས་བོན་ཀུན་འཛིན་ས་བཞིན་ཡོངས་སུ་འཛིན། །ཕྱོགས་རྣམས་བཅུ་པོའི་སེམས་ཅན་མང་པོ་ཇི་སྙེད་པ། །དེ་དག་ཐམས་ཅད་འཁོར་གཅིག་འདུས་པར་འཁོད་ གྱུར་ཀྱང༌། །དེ་དག་བསམ་པ་སྐད་ཅིག་གཅིག་གིས་བསམ་བྱས་ཤིང༌། །སྒྲ་སྐད་གཅིག་གིས་དེ་དག་ཐམས་ཅད་ཚིམ་པར་བྱེད། །འདི་ལ་གནས་པ་ཆོས་རྒྱལ་ལྷ་མི་མཆོག་ཏུ་འགྱུར། ། རྒྱལ་བའི་སྲས་པོ་ཆོས་ཀྱིས་ཡོངས་སུ་སྐྱོང་བ་ཡིན། །ཉིན་མཚན་ཀུན་ཏུ་རྒྱལ་བ་རྣམས་དང་རྟག་པར་འགྲོགས། །ཟབ་ཡངས་ཡེ་ཤེས་རྣམ་པར་ཐར་པ་ལྡན་པར་གནས། །དེ་དག་ཡང་ དུ་སངས་རྒྱས་ཁྲག་ཁྲིག་བསྙེན་བཀུར་བྱེད། །འཁོར་ལོས་བསྒྱུར་བའི་རྒྱན་བཟང་ཡོངས་སུ་བྱང་བ་བཞིན། །དེ་ཡི་འོད་ཀྱང་ཉོན་མོངས་ཐིབས་པོ་སྣང་བ་བྱེད། །ཚངས་པའི་འོད་ཀྱིས་སྟོང་ གཉིས་འཇིག་རྟེན་ཇི་བཞིན་ནོ། །འདི་ལ་གནས་པ་ལེགས་ལྡན་ཚངས་ཆེན་འཇིག་རྟེན་དུ། །སྐྱེ་འགྱུར་ཐེག་གསུམ་སྟོན་ལ་མཁས་ཤིང་མཐུ་ཡོད་པ། །འགྲོ་བ་ཀུན་ལ་ཕན་ཕྱིར་ཅི་ཙམ་ གང་ཡང་རུང༌། །ཡོན་ཏན་ཤེས་ལྡན་བདེ་གཤེགས་ཡེ་ཤེས་ལྡན་པ་བསྔོ། །གྲངས་མེད་ཞིང་དུ་གཏོགས་པའི་རྡུལ་ཕྲན་དུ་ཡོད་པ། །དེ་སྙེད་ཏིང་འཛིན་སྐད་ཅིག་གཅིག་ཏུ་བརྟན་པས་ ཐོབ༑ ༑ཕྱོགས་རྣམས་ཀུན་གྱི་རྒྱལ་བ་མཐོང་ཞིང་གསུང་ཡང་ཉན། །ཡན་ཆད་སྨོན་ལམ་ལྡན་པ་ཚད་མེད་རྣམ་པར་འཕྲུལ། །འདི་ནི་ས་རབ་དགུ་པ་སྟེ། །ཡེ་ཤེས་ཆེན་པོས་རྣམ་པར་ སྤྱོད༑ ༑ཟབ་ཅིང་བལྟ་དཀའ་ཤིན་ཏུ་ཕྲ། །རྒྱལ་བའི་སྲས་ཀྱིས་བསྟན་པ་ཡིན། །ལེགས་པའི་བློ་གྲོས་ཞེས་བྱ་བ་སྟེ། བྱང་ཆུབ་སེམས་དཔའི་ས་དགུ་པའོ།། །བམ་པོ་ ལྔ་བཅུ་གཉིས་པ། སྤྱོད་པ་བླ་ན་མེད་པ་འདི་ཐོས་ནས། །གཙང་གནས་ལྷ་རྣམས་བྱེ་བ་རབ་ཏུ་དགའ། །དབང་པོ་ཚིམ་པར་བར་སྣང་མཁའ་ལ་གནས། །བདེ་བར་གཤེགས་ལ་རྗེ་ སར་མཆོད་པ་བྱེད། །བྱང་ཆུབ་སེམས་དཔའ་བྱེ་བ་བསམ་ཡས་པ། །བར་སྣང་མཁའ་གནས་རབ་ཏུ་དགའ་གྱུར་ཅིང༌། །སྤོས་སྤྲིན་ཚད་མེད་ཡིད་དུ་འོང་བ་དག །འགྲོ་བའི་ཉོན་མོངས་ སེལ་བ་དྲི་ཞིམ་བདུག་པ་བྱེད། །ལྷ་ཡི་དབང་པོ་དབང་སྒྱུར་རབ་དགའ་ཞིང༌། །བར་སྣང་གནས་ལས་ལྷ་འཁོར་ཁྲག་ཁྲིག་དང༌། །རིམ་གྲོ་བཅས་པར་གོས་རྣམས་འདོར་བར་བྱེད། ། ༄༅། །ཡིད་འོང་གོས་བརྒྱ་ཡོངས་སུ་བསྐོར་བ་བྱས། །ལྷ་ཡི་བུ་མོ་མང་པོ་ཤིན་ཏུ་དགའ། །བདེ་བར་གཤེགས་ལ་རྗེས་ས་མཆོད་པ་བྱེད། །རོལ་མོ་བརྡུང་བ་བྱེ་བ་ ཁྲག་ཁྲིག་བྱེད། །འདི་འདྲའི་སྒྲ་དབྱངས་ཀུན་ལས་བྱུང་བར་གྱུར། །ཞིང་མཆོག་གཅིག་ན་བདེ་བར་གཤེགས་པ་བཞུགས། །ཞིང་རྣམས་ཀུན་ཏུ་སྐུ་གཟུགས་རབ་ཏུ་བསྟན། །སྐུ་ གཟུགས་ཁྲག་ཁྲིག་སྣ་ཚོགས་ཡིད་དུ་འོང༌། །ཆོས་དབྱིངས་རྒྱ་ཆེན་ཡོངས་སུ་རྒྱས་པར་གང༌། །སྤུ་གཅིག་རྩེ་ནས་བདེ་གཤེགས་འོད་བཀྱེ་བ། །འགྲོ་བའི་ཉོན་མོངས་ཡོངས་སུ་ ཞི་བར་འཕྲོ། །ཞིང་གི་རྡུལ་ཁམས་ཟད་པར་ནུས་འགྱུར་གྱི། །དེ་དག་བགྲང་བས་ཤེས་པར་མི་ནུས་སོ། །ལ་ལས་སངས་རྒྱས་མཚན་རབ་མངའ་བར་མཐོང༌། །འཁོར་ལོས་བསྒྱུར་ བའི་དམ་པར་ལ་ལས་མཐོང༌། །ཞིང་རྣམས་ལ་ལར་སྤྱོད་པ་མཆོག་མཛད་ཅིང༌། །དག་ཅིང་ཞི་བར་རྐང་གཉིས་དམ་པ་མཐོང༌། །དགའ་ལྡན་གནས་ན་མགོན་པོ་བཞུགས་པ་དང༌། ། འཕོ་དང་གཤེགས་པར་དེ་བཞིན་རབ་ཏུ་སྣང༌། །ཞིང་རྣམས་བྱེ་བར་ཡུམ་གྱི་སྐུར་བཞུགས་དང༌། །ཞིང་རྣམས་ལ་ལར་སྐྱེ་བ་དེ་བཞིན་སྣང༌། །འགྲོ་བའི་དོན་དུ་མགོན་པོ་འབྱུང་མཛད་ དང༑ ༑བྱང་ཆུབ་དམ་པ་མཆོག་ཏུ་འཚང་རྒྱ་བའི། །ཆོས་ཀྱི་འཁོར་ལོ་མྱ་ངན་འདའ་བ་དག །ཞིང་མང་ཁྲག་ཁྲིག་ཀུན་ན་དེ་བཞིན་སྣང༌། །སྒྱུ་མའི་མཁན་པོ་མཁས་པར་ལོབས་གྱུར་པ། ། ཇི་ལྟར་འཚོ་ཕྱིར་གཟུགས་མང་སྟོན་པ་བཞིན། །དེ་བཞིན་སྟོན་པ་ཡེ་ཤེས་མཆོག་མཁྱེན་པ། །སྐུ་གཟུགས་ཀུན་ཏུ་འགྲོ་བ་རྣམས་ལ་སྟོན། །སྟོང་པ་ཞི་བ་རང་བཞིན་མཚན་ཉིད་མེད། ། ཆོས་ཉིད་བར་སྣང་མཁའ་དང་མཉམ་པར་ཡང༌། །སངས་རྒྱས་སྟོན་པ་དོན་དམ་དེ་ཉིད་དུ། །སངས་རྒྱས་སྤྱོད་ཡུལ་མཆོག་གིས་ཡང་དག་བསྟན། །བདེ་གཤེགས་སྤྱོད་ཡུལ་རང་བཞིན་ ཅི་འདྲ་བ། །སེམས་ཅན་ཀུན་གྱི་ཆོས་ཉིད་དེ་འདྲ་སྟེ། །མཚན་དང་མཚན་གཞི་མཉམ་པ་ཉིད་ཀྱིས་འདྲ། །མཚན་ཉིད་མེད་པ་ཆོས་རྣམས་ཀུན་གྱི་མཆོག །བདེ་གཤེགས་ཡེ་ཤེས་དོན་དུ་ སུ་གཉེར་བས། །རྟོག་དང་རྣམ་རྟོག་ཡོངས་རྟོག་ཡོངས་སུ་སྤངས། །དངོས་དང་དངོས་མེད་མཉམ་ཉིད་ཤེས་པར་གྱིས། །མྱུར་དུ་མི་ཡི་གཙོ་བོ་མཆོག་ཏུ་འགྱུར། །འདི་འདྲའི་སྒྲ་སྐད་སྟོང་ སྙེད་དུ། །སྙན་པའི་དབྱངས་སུ་བརྗོད་བྱས་ནས། །ལྷ་ཡི་བུ་མོ་མི་སྨྲ་ཞིང༌། །ཞི་ལ་དགའ་བར་བདེ་གཤེགས་ལྟ། །འཁོར་རྣམས་ཞི་བར་ཤེས་གྱུར་ནས། །རྣམ་ཐར་ཟླ་བ་འཇིགས་མེད་པས། ། རྡོ་རྗེའི་སྙིང་པོ་འཇིགས་མེད་པ། །རྒྱལ་སྲས་དེ་ལ་ཡང་སྨྲས་པ། །བཅུ་པར་ཡང་དག་འཕར་བ་ཡི། །རྣམ་པ་ཡོན་ཏན་སྤྱོད་ཡུལ་དང༌། །མཚན་མ་དག་དང་ཆོ་འཕྲུལ་རྣམས། །མཁས་པས་ ཀུན་ཀྱང་བསྟན་པར་མཛོད། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ༑ རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་ས་དགུ་པའི་བར་དུ་ཤེས་ ༄༅། །པར་བྱ་བ་ཚད་མེད་པ་ཡོངས་སུ་བརྟགས་པའི་བློས་རྣམ་པར་དབྱེ་བ་ཤིན་ཏུ་རྣམ་པར་ཕྱེ་བ། ཆོས་དཀར་པོ་ཤིན་ཏུ་རྫོགས་པ་བསགས་པར་བྱ་བའི་ཚོགས་མཐའ་ཡས་ པ་ཤིན་ཏུ་བསགས་པ། བསོད་ནམས་དང་ཡེ་ཤེས་ཀྱིས་ཚོགས་ཡོངས་སུ་ཟིན་པ། སྙིང་རྗེ་ཆེན་པོ་ཤིན་ཏུ་ཡངས་པ་ཐོབ་པ། འཇིག་རྟེན་གྱི་ཁམས་རྣམ་པར་ཕྱེ་བ་རྣམ་པ་ཐ་དད་པ་ལ་ མཁས་པ། སེམས་ཅན་གྱི་ཁམས་ཐིབས་པོས་ཉེ་བར་སྤྱོད་པ་ལ་རབ་ཏུ་ཞུགས་པ། དེ་བཞིན་གཤེགས་པའི་སྤྱོད་ཡུལ་ལ་འཇུག་པ་དང་ལྡན་པའི་འདུ་ཤེས་དང༌། ཡིད་ལ་བྱེད་པ་ ཅན་སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་ལ་ལྷག་པར་དམིགས་པའི་རྗེས་སུ་སོང་བ་ནི། རྣམ་པ་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་ལ་དབང་བསྐུར་ བའི་ས་ཐོབ་པ་ཞེས་བྱའོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་ཡེ་ཤེས་དེ་ལྟ་བུ་དང་ལྡན་ཞིང་དབང་བསྐུར་བའི་ས་ཐོབ་པ་དེ་ལ་བྱང་ཆུབ་སེམས་དཔའི་ཏིང་ངེ་འཛིན་དྲི་མ་ མེད་པ་ཞེས་བྱ་བ་མངོན་དུ་འགྱུར་རོ། །བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་རྣམ་པར་ཕྱེ་བ་ལ་འཇུག་པ་ཞེས་བྱ་བ་དང༌། སྙིང་པོ་བྱང་ཆུབ་ཀྱི་རྒྱན་རྣམ་པར་ཕྱེ་བ་ཞེས་བྱ་ བ་དང༑ འོད་ཟེར་གྱི་མེ་ཏོག་རྣམ་པ་ཐམས་ཅད་ཅེས་བྱ་བ་དང༌། རྒྱ་མཚོའི་སྙིང་པོ་ཞེས་བྱ་བ་དང༌། རྒྱ་མཚོའི་རྒྱ་ཞེས་བྱ་བ་དང༌། ནམ་མཁའི་དབྱིངས་ལྟར་ཡངས་པ་ཞེས་བྱ་བ་དང༌། ཆོས་ ཐམས་ཅད་ཀྱི་རང་བཞིན་རྣམ་པར་འབྱེད་པ་ཞེས་བྱ་བ་དང༌། སེམས་ཅན་ཐམས་ཅད་ཀྱི་སེམས་དང་སྤྱོད་པའི་རྗེས་སུ་སོང་བ་ཞེས་བྱ་བ་དང༌། ད་ལྟར་བྱུང་བའི་སངས་རྒྱས་ཐམས་ ཅད་མངོན་སུམ་དུ་བཞུགས་པ་ཞེས་བྱ་བ་མངོན་དུ་འགྱུར་ཏེ། དེ་ལ་དེ་དག་ལ་སོགས་པ་ཏིང་ངེ་འཛིན་བརྒྱ་སྟོང་ཕྲག་གྲངས་མེད་པ་ཕྲག་བཅུ་མངོན་དུ་འགྱུར་རོ། །དེ་ཏིང་ངེ་འཛིན་དེ་དག་ ཐམས་ཅད་ལ་མཉམ་པར་གཞོག་ཅིང་རྣམ་པར་ལྡང་ངོ༌། །དེ་ཏིང་ངེ་འཛིན་ལ་མཁས་པ་དང་ལྡན་པ་ཡིན་ཏེ། ཏིང་ངེ་འཛིན་གྱི་དགོས་པ་དེ་དག་ཐམས་ཅད་ལའང་རབ་ཏུ་སྤྱོད་དོ། །ཏིང་ངེ་ འཛིན་བརྒྱ་སྟོང་གྲངས་མེད་པ་ཕྲག་བཅུའི་ཐ་མ་ལ་ཐམས་ཅད་མཁྱེན་པའི་ཡེ་ཤེས་ཀྱི་ཁྱད་པར་གྱིས་མངོན་པར་དབང་བསྐུར་བ་ཞེས་བྱ་བའི་བྱང་ཆུབ་སེམས་དཔའི་ཏིང་ངེ་འཛིན་མངོན་དུ་ འགྱུར་ཏེ། དེ་མངོན་དུ་གྱུར་མ་ཐག་ཏུ་སྟོང་གསུམ་བརྒྱ་སྟོང་ཕྲག་བཅུའི་ཐ་གྲུ་དང་མཉམ་པའི་རིན་པོ་ཆེའི་པདྨོ་ཆེན་པོ་རིན་པོ་ཆེ་ཐམས་ཅད་ཀྱིས་རྣམ་པ་ཐམས་ཅད་དུ་སྤྲས་ཤིང་བརྒྱན་ པ༑ འཇིག་རྟེན་ཐམས་ཅད་ཀྱི་སྤྱོད་ཡུལ་ལས་འདས་པ། འཇིག་རྟེན་ལས་འདས་པའི་དགེ་བའི་རྩ་བས་བྱུང་བ། སྒྱུ་མའི་རང་བཞིན་དང་སྤྱོད་ཡུལ་གྱིས་ཡོངས་སུ་གྲུབ་པ། ཆོས་ཀྱི་ དབྱིངས་ལ་ཤིན་ཏུ་གནས་པར་སྣང་བ། ལྷ་རྫས་ཀྱི་ཡུལ་ལས་ཤིན་ཏུ་འདས་པ། ནོར་བུ་རིན་པོ་ཆེ་བཻ་ཌཱུ་ཪྻའི་ཆུ་བ་ཆེན་པོ་ཅན། ཙན་དན་གྱི་རྒྱལ་པོ་མཚུངས་པ་མེད་པའི་སྙིང་པོ་ཅན། ༄༅། །ཨསྨ་གརྦྷ་རབ་ཀྱི་ཟེ་བ་ཅན། འཛམ་བུ་ཆུ་ཀླུང་གིས་གསེར་ལྟར་སྣང་བའི་ལོ་མ་ཅན། འོད་ཟེར་ཚད་མེད་པས་ཤིན་ཏུ་རྒྱས་པའི་ལྷུན་ཅན། རིན་པོ་ཆེ་ ཐམས་ཅད་ཀྱི་ནང་ཡོངས་སུ་སྤྲས་པ། རིན་པོ་ཆེ་མུ་མེད་པའི་དྲ་བས་ཀུན་ནས་ཡོག་པ། སྟོང་གསུམ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་ཀྱི་རིན་པོ་ཆེའི་པདྨོ་ཆེན་ པོའི་འཁོར་དང་ལྡན་པ་འབྱུང་བར་འགྱུར་ཏེ། བྱང་ཆུབ་སེམས་དཔའ་དེའི་ལུས་ཀྱང་དེ་དང་རྐྱེན་དུ་འཚམ་ཞིང༌། དེའི་ཚུལ་དང་མཐུན་པར་གནས་སོ། །དེ་ཐམས་ཅད་མཁྱེན་པའི་ ཡེ་ཤེས་ཀྱི་ཁྱད་པར་གྱིས་དབང་བསྐུར་བ་དང་ལྡན་པའི་ཏིང་ངེ་འཛིན་ཐོབ་མ་ཐག་ཏུ་རིན་པོ་ཆེའི་པདྨོའི་རྒྱལ་པོ་ཆེན་པོ་དེ་ལ་འདུག་པར་སྣང་སྟེ། རིན་པོ་ཆེའི་པདྨོའི་རྒྱལ་པོ་ཆེན་པོ་དེ་ལ་བྱང་ ཆུབ་སེམས་དཔའ་དེ་འདུག་མ་ཐག་ཏུ་རིན་པོ་ཆེའི་པདྨོའི་རྒྱལ་པོ་ཆེན་པོ་དེའི་འཁོར་རིན་པོ་ཆེའི་པདྨོ་ཇི་སྙེད་བྱུང་བ་དེ་སྙེད་ཀྱི་བྱང་ཆུབ་སེམས་དཔས་བྱང་ཆུབ་སེམས་དཔའ་དེ་ ཡོངས་སུ་བསྐོར་ཏེ། རིན་པོ་ཆེའི་པདྨོ་ཆེན་པོ་དེ་དག་ལ་འཁོད་ནས། བྱང་ཆུབ་སེམས་དཔའ་དེ་ཉིད་ལ་ལྟ་ཞིང༌། དེ་དག་རེ་རེ་ཡང་ཏིང་ངེ་འཛིན་བརྒྱ་སྟོང་ཕྲག་བཅུ་བཅུ་ལ་སྙོམས་ པར་འཇུག་གོ །བྱང་ཆུབ་སེམས་དཔའ་དེ་དང༌། བྱང་ཆུབ་སེམས་དཔའ་དེ་དག་གིས་མཉམ་པར་བཞག་མ་ཐག་ཏུ་འཇིག་རྟེན་གྱི་ཁམས་མ་ལུས་པར་གཡོ་བར་འགྱུར་རོ། །ངན་ སོང་ཐམས་ཅད་རྩེ་ཞིལ་བར་འགྱུར་རོ། །ཆོས་ཀྱི་དབྱིངས་ཐམས་ཅད་སྣང་བས་རྒྱས་པར་འགྱུར་རོ། །འཇིག་རྟེན་གྱི་ཁམས་ཐམས་ཅད་ཡོངས་སུ་དག་པར་འགྱུར་རོ། །ཞིང་ཐམས་ ཅད་དུ་སངས་རྒྱས་ཀྱི་སྒྲ་གྲག་པར་འགྱུར་རོ། །སྐལ་བ་དང་སྤྱོད་པ་མཐུན་པའི་བྱང་ཆུབ་སེམས་དཔའ་ཐམས་ཅད་ཀྱང་འདུ་བར་འགྱུར་རོ། །འཇིག་རྟེན་གྱི་ཁམས་ཐམས་ཅད་ ཀྱི་ལྷ་དང་མིའི་རོལ་མོ་བརྡུང་བ་དང༌། དཀྲོལ་བའི་སྒྲ་ཡང་འབྱུང་བར་འགྱུར་རོ། །སེམས་ཅན་ཐམས་ཅད་ཀྱི་བདེ་བ་ཡང་སྐྱེ་བར་འགྱུར་རོ། །ཡང་དག་པར་རྫོགས་པའི་སངས་ རྒྱས་ཐམས་ཅད་ལ་བསམ་གྱིས་མི་ཁྱབ་པའི་མཆོད་པ་དང༌། རིམ་གྲོ་ཡང་རབ་ཏུ་འབྱུང་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཀྱང་རྣམ་ པར་དམིགས་པར་འགྱུར་ཏེ། དེ་ཅིའི་ཕྱིར་ཞེ་ན། ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་དེ་ནི་རིན་པོ་ཆེའི་པདྨོའི་རྒྱལ་པོ་དེ་ལ་འདུག་མ་ཐག་ཏུ་རྐང་པའི་མཐིལ་གཉིས་ ཀྱི་འོག་ནས་འོད་ཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་ངོ༌། །བྱུང་ནས་ཀྱང་ཕྱོགས་བཅུར་མནར་མེད་པའི་སེམས་ཅན་དམྱལ་བ་ཆེན་པོ་ཡན་ཆད་སྣང་བར་བྱས་ཏེ། སྡུག་བསྔལ་ རྣམས་ཀྱང་རབ་ཏུ་ཞི་བར་བྱེད་དོ། །པུས་མོའི་ལྷ་ང་གཉིས་ནས་འོད་ཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་བྱོལ་སོང་གི་སྐྱེ་གནས་ཀྱི་གནས་ ༄༅། །ཐམས་ཅད་སྣང་བར་བྱས་ནས། སྡུག་བསྔལ་རྣམས་ཀྱང་རབ་ཏུ་ཞི་བར་བྱེད་དོ། །ལྟེ་བའི་དཀྱིལ་འཁོར་ནས་འོད་ཟེར་བརྒྱ་སྟོང་གྲངས་མེད་པ་ཕྲག་ བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་གཤིན་རྗེའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་ནས། སྡུག་བསྔལ་རྣམས་ཀྱང་རབ་ཏུ་ཞི་བར་བྱེད་དོ། །གཡས་གཡོན་ གྱི་རྩིབ་ལོགས་གཉིས་ནས་འོད་ཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་མིའི་གནས་རྣམས་སྣང་བར་བྱས་ཏེ། སྡུག་བསྔལ་རྣམས་ཀྱང་ རབ་ཏུ་ཞི་བར་བྱེད་དོ། །ལག་པའི་མཐིལ་གཉིས་ནས་འོད་ཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་ལྷ་དང་ལྷ་མ་ཡིན་གྱི་གནས་རྣམས་ སྣང་བར་བྱས་ནས། སྡུག་བསྔལ་རྣམས་ཀྱང་རབ་ཏུ་ཞི་བར་བྱེད་དོ། །ཕྲག་པ་གཉིས་ནས་འོད་ཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་ ཉན་ཐོས་ཀྱི་ཐེག་པ་པ་རྣམས་ཀྱི་གནས་སྣང་བར་བྱས་ནས། ཆོས་སྣང་བའི་སྒོ་ཡང་ཉེ་བར་བསྒྲུབ་བོ། །རྒྱབ་དང་མགུལ་ནས་འོད་ཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་ སྟེ༑ བྱུང་ནས་ཀྱང་རང་སངས་རྒྱས་ཀྱི་གནས་ཐམས་ཅད་སྣང་བར་བྱས་ནས། ཞི་བའི་ཏིང་ངེ་འཛིན་གྱི་ཚུལ་གྱི་སྒོའང་ཉེ་བར་སྒྲུབ་བོ། །ཁའི་སྒོ་ནས་འོད་ཟེར་བརྒྱ་སྟོང་གྲངས་ མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་བྱང་ཆུབ་སེམས་དཔའ་སེམས་དང་པོ་བསྐྱེད་པ་ནས་བཟུང་བ་ཡན་ཆད་ས་དགུ་པ་ཐོབ་པའི་བར་དག་སྣང་བར་བྱས་ནས། ཤེས་ རབ་དང་ཐབས་ཀྱི་ཚུལ་གྱི་སྒོ་ཡང་ཉེ་བར་བསྒྲུབ་བོ། །སྨིན་མཚམས་ཀྱི་མཛོད་སྤུ་ནས་འོད་ཟེར་བརྒྱ་སྟོང་གྲངས་མེད་པ་ཕྲག་བཅུར་འབྱུང་སྟེ། བྱུང་ནས་ཀྱང་ཕྱོགས་བཅུར་བདུད་ཀྱི་གནས་ ཐམས་ཅད་ཟིལ་གྱི་མནན་ཏེ། དབང་བསྐུར་བའི་ས་ཐོབ་པའི་བྱང་ཆུབ་སེམས་དཔའ་རྣམས་སྣང་བར་བྱས་ནས་དེ་དག་གི་ལུས་སུ་ནུབ་པར་འགྱུར་རོ། །ཡན་ལག་དམ་པའི་སྤྱི་གཙུག་ ནས་འོད་ཟེར་སྟོང་གསུམ་བརྒྱ་སྟོང་གྲངས་མེད་པ་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་འབྱུང་སྟེ། བྱུང་ནས་ཀྱང་ཕྱོགས་བཅུར་དེ་བཞིན་གཤེགས་པའི་འཁོར་གྱི་དཀྱིལ་ འཁོར་ཐམས་ཅད་སྣང་བར་བྱས་ཏེ། འཇིག་རྟེན་ལན་བཅུར་བསྐོར་བ་བྱས་ནས་སྟེང་གི་ནམ་མཁའི་དབྱིངས་ལ་འདུག་སྟེ། འོད་ཟེར་གྱི་དྲ་བའི་དཀྱིལ་འཁོར་དུ་བྱས་ནས། དེ་ བཞིན་གཤེགས་པ་ལ་མཆོད་ཅིང་རིམ་གྲོ་བྱ་བ་འོད་ཤིན་ཏུ་གསལ་བ་ཞེས་བྱ་བ་རབ་ཏུ་བྱེད་དོ། །མཆོད་པ་དང་རིམ་གྲོ་དེ་ལ་སེམས་དང་པོ་བསྐྱེད་པ་ཉེ་བར་བཟུང་བ་ཡན་ཆད་ས་ དགུ་པ་ཐོབ་ཀྱི་བར་དུ་དེ་བཞིན་གཤེགས་པ་མཆོད་ཅིང་རིམ་གྲོ་བྱས་པས་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང༌། བརྒྱ་སྟོང་གི་ཆ་དང༌། ཁྲག་ཁྲིག་གི་ཆ་དང༌། ཁྲག་ ༄༅། །ཁྲིག་བརྒྱའི་ཆ་དང༌། ཁྲག་ཁྲིག་སྟོང་གི་ཆ་དང༌། ཁྲག་ཁྲིག་བརྒྱ་སྟོང་གི་ཆ་དང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོའོ། །གྲངས་ དང༑ ཆ་དང༌། བགྲང་བ་དང༌། དཔེ་དང༌། རྒྱུར་ཡང་ཉེ་བར་མི་འགྲོ་བ་ནས། བསྒྲུན་པ་ཙམ་གྱི་བར་དུའང་མི་ཆོག་གོ །འོད་ཟེར་གྱི་དྲ་བའི་དཀྱིལ་འཁོར་ཆེན་པོ་དེ་ལས་ ཕྱོགས་བཅུ་ན་མེ་ཏོག་ཏུ་གདགས་པ་དང༌། སྤོས་དང༌། བདུག་པ་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། བ་དན་དང༌། རིན་པོ་ཆེའི་རྒྱན་དང༌། ནོར་བུ་རིན་པོ་ཆེར་གདགས་པ་ཅི་ཡོད་པ་དེ་དག་ཐམས་ཅད་ལས་ལྷག་ཅིང་འཇིག་རྟེན་གྱི་ཡུལ་ཐམས་ཅད་ལས་འདས་པའི་དགེ་བའི་ རྩ་བའི་དབང་གིས་གྲུབ་པ་དག་སྤྲིན་ཆེན་པོའི་ཆར་བཞིན་དུ་མངོན་པར་འབབ་བོ། །མཆོད་པ་དེ་དག་སེམས་ཅན་གང་གིས་མཐོང་བ་དེ་དག་ཐམས་ཅད་ཀྱང་བླ་ན་མེད་པ་ ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །མཆོད་པ་དང་རིམ་གྲོའི་རྣམ་པ་དེ་ལྟ་བུ་དག་བྱས་ནས་ཀྱང་འོད་ཟེར་དེ་དག་གིས་དེ་བཞིན་གཤེགས་པའི་ འཁོར་གྱི་དཀྱིལ་འཁོར་ཐམས་ཅད་སྣང་བར་བྱས་ནས། འཇིག་རྟེན་ལན་བཅུར་བསྐོར་བ་བྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ རྣམས་ཀྱི་ཞབས་ཀྱི་མཐིལ་གྱི་འོག་ཏུ་ནུབ་པར་འགྱུར་ཏེ། དེ་ནས་དེ་བཞིན་གཤེགས་པ་དེ་དག་དང༌། བྱང་ཆུབ་སེམས་དཔའ་དེ་དག་གིས་འཇིག་རྟེན་གྱི་ཁམས་འབྱམས་ཀླས་པ་ ཆེ་གེ་མོ་ཞིག་ཏུ་དེ་ལྟ་བུའི་སྤྱོད་པ་དང་ལྡན་པའི་བྱང་ཆུབ་སེམས་དཔའ་དབང་བསྐུར་བའི་དུས་ལ་བབ་པར་ཐུགས་སུ་ཆུད་དོ། །ཀྱེ༑རྒྱལ་བའི་སྲས་དག །དེར་ཕྱོགས་བཅུ་ནས་བྱང་ ཆུབ་སེམས་དཔའི་ས་དགུ་ལ་གནས་པའི་བར་གྱི་བྱང་ཆུབ་སེམས་དཔའ་མཐའ་ཡས་པ་འོངས་ཏེ། བྱང་ཆུབ་སེམས་དཔའ་དེ་ལ་ཀུན་ནས་བསྐོར་ནས་མཆོད་པ་ཆེན་པོ་བྱས་ཏེ། བྱང་ཆུབ་སེམས་དཔའ་དེ་ཉིད་ལ་ལྟ་ཞིང་ཏིང་ངེ་འཛིན་སྟོང་ཕྲག་བཅུ་བཅུ་ལ་སོ་སོ་ནས་མཉམ་པར་གཞོག་གོ །བྱང་ཆུབ་སེམས་དཔའ་དབང་བསྐུར་བའི་ས་ཐོབ་པ་རྣམས་ཀྱི་དཔལ་ གྱི་བེའུ་དང༌། རྡོ་རྗེ་དང༌། བཀྲ་ཤིས་ལས་བདུད་ཀྱི་དགྲ་ལས་རྣམ་པར་རྒྱལ་བ་ཞེས་བྱ་བའི་འོད་ཟེར་ཆེན་པོ་གཅིག་འོད་ཟེར་གྱི་འཁོར་བརྒྱ་སྟོང་གྲངས་མེད་པ་ཕྲག་བཅུ་དང་ལྡན་པར་འབྱུང་སྟེ། བྱུང་ ནས་ཀྱང་ཕྱོགས་བཅུ་སྣང་བར་བྱས་ནས། ཆོ་འཕྲུལ་མུ་མེད་པར་ཡང་དག་པར་བསྟན་ཏེ། བྱང་ཆུབ་སེམས་དཔའ་དེའི་དཔལ་གྱི་བེའུ་དང༌། རྡོ་རྗེ་དང༌། བཀྲ་ཤིས་སུ་ནུབ་པར་ འགྱུར་རོ། །འོད་ཟེར་དེ་དག་དེར་ནུབ་མ་ཐག་ཏུ་བྱང་ཆུབ་སེམས་དཔའ་དེའི་སྟོབས་དང༌། མཐུ་ཡང་བརྒྱ་ཕྲག་སྟོང་གྱུར་པས་ཀྱང་ལྷག་པར་མངོན་པར་འཕེལ་བར་སྣང་ངོ༌། ། ༄༅། །ཀྱེ༑ རྒྱལ་བའི་སྲས་དག །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་སྨིན་མཚམས་ཀྱི་མཛོད་སྤུ་ནས་ ཐམས་ཅད་མཁྱེན་པའི་མངོན་པར་ཤེས་པ་དང་ལྡན་པ་ཞེས་བྱ་བའི་འོད་ཟེར་གྱི་འཁོར་གྲངས་མེད་པ་དང་ལྡན་པ་འབྱུང་སྟེ། དེ་དག་གིས་ཕྱོགས་བཅུ་ཐམས་ཅད་ དུ་འཇིག་རྟེན་གྱི་ཁམས་ཐམས་ཅད་མ་ལུས་པར་སྣང་བར་བྱས་ནས། འཇིག་རྟེན་ལན་བཅུར་བསྐོར་ཏེ། དེ་བཞིན་གཤེགས་པའི་རྣམ་པར་འཕྲུལ་པ་ཆེན་པོ་བསྟན་ ནས༑ བྱང་ཆུབ་སེམས་དཔའ་བརྒྱ་སྟོང་བྱེ་བ་ཁྲག་ཁྲིག་མང་པོ་ཡང་དག་པར་བསྐུལ་ནས། སངས་རྒྱས་ཀྱི་ཞིང་འབྱམས་ཀླས་པ་ཐམས་ཅད་རྣམ་པ་དྲུག་ཏུ་བསྐྱོད་དེ་། ངན་སོང་ཐམས་ཅད་ཀྱི་ལམ་གྱི་རྒྱུད་དང༌། སྐྱེ་བ་དང༌། ཤི་འཕོ་རབ་ཏུ་ཞི་བར་བྱས་ནས། བདུད་ཀྱི་གནས་ཐམས་ཅད་ཟིལ་གྱིས་མནན་ཏེ། དེ་བཞིན་གཤེགས་པ་ ཐམས་ཅད་མངོན་པར་འཚང་རྒྱ་བར་རྣམ་པར་སངས་རྒྱས་པའི་སངས་རྒྱས་ཀྱི་གདན་ཡང་དག་པར་བསྟན་ནས། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་ བརྒྱན་པའི་མཐུ་རབ་ཏུ་བསྟན་ཏེ། འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་སྣང་བར་བྱས་ནས་ཕྱིར་ལོག་སྟེ་ བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཀྱི་སྟེང་ནས་བསྐོར་བ་བྱས་ཏེ། རྒྱན་ཆེན་པོ་བསྟན་ནས་འོད་ཟེར་དེ་དག་བྱང་ཆུབ་སེམས་དཔའ་དེའི་ཡན་ལག་གི་དམ་ པར་ནུབ་བོ། །དེའི་འཁོར་གྱི་འོད་ཟེར་རྣམས་ཀྱང་དེ་ལྟར་ཚོགས་པའི་བྱང་ཆུབ་སེམས་དཔའ་རྣམས་ཀྱི་མགོར་ནུབ་པར་འགྱུར་རོ། །འོད་ཟེར་དེ་དག་གིས་ཕོག་མ་ཐག་ཏུ་བྱང་ཆུབ་ སེམས་དཔའ་དེ་དག་གིས་སྔན་ཆད་མ་ཐོབ་པའི་ཏིང་ངེ་འཛིན་སྟོང་ཕྲག་བཅུ་བཅུ་རབ་ཏུ་ཐོབ་བོ། །འོད་ཟེར་དེ་དག་ཀྱང་དུས་གཅིག་ཏུ་བྱང་ཆུབ་སེམས་དཔའ་དེའི་ཡན་ཆད་དམ་པ་ ལ་འཆར་བར་འགྱུར་ཏེ། བྱང་ཆུབ་སེམས་དཔའ་དེ་ཡང་ཡང་དག་པར་རྫོགས་པའི་སངས་རྒྱས་ཀྱི་ཡུལ་ལ་མངོན་པར་དབང་བསྐུར་བ་ཞེས་བྱའོ། །སྟོབས་བཅུ་ཡོངས་སུ་རྫོགས་ ནས་ནི་ཡང་དག་པར་རྫོགས་པའི་སངས་རྒྱས་སུ་བགྲང་བ་ཡང་འཐོབ་པར་འགྱུར་རོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། འཁོར་ལོས་བསྒྱུར་བའི་རྒྱལ་པོའི་བུ་ཐུ་ བོ་གཞོན་ནུ་བཙུན་མོ་དམ་པ་ལས་བཙས་པ། རྒྱལ་པོའི་མཚན་དང་ལྡན་པ་དེ་འཁོར་ལོས་བསྒྱུར་བའི་རྒྱལ་པོས་ལྷའི་གླང་པོ་རིན་པོ་ཆེ་ལ་གསེར་གྱི་ཁྲི་དམ་པའི་སྟེང་དུ་བཞག་ སྟེ༑ སྟེང་དུ་བླ་རེ་བྲེས་ཤིང་གདུགས་དང༌། རྒྱལ་མཚན་དང༌། བ་དན་དང༌། རོལ་མོ་བརྡུང་བ་དང༌། དཀྲོལ་བ་དང༌། གླུའི་དབྱངས་ལ་སོགས་པའི་རྒྱན་ཆེན་པོ་བྱས་ཏེ། རྒྱ་མཚོ་ ༄༅། །ཆེན་པོ་བཞི་ལས་ཆུ་བླངས་པ་གསེར་གྱི་བུམ་པས་བཅུས་ཏེ། ཆུ་དེས་གཞོན་ནུ་དེའི་སྤྱི་བོ་ནས་མངོན་པར་དབང་བསྐུར་ན་དབང་བསྐུར་མ་ཐག་ཏུ་ དེ་ནི་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་པ་ཞེས་བྱ་བའི་གྲངས་སུ་འགྲོའོ། །དགེ་བ་བཅུའི་ལས་ཀྱི་ལམ་ཡོངས་སུ་རྫོགས་ནས་ནི་འཁོར་ལོས་བསྒྱུར་བར་བགྲང་བ་ རབ་ཏུ་འཐོབ་བོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་ཡང་སངས་རྒྱས་བཅོམ་ལྡན་འདས་དེ་དག་གིས་དབང་བསྐུར་མ་ཐག་ཏུ་ཡེ་ཤེས་ཀྱི་ དབང་མངོན་པར་བསྐུར་བས་མངོན་པར་དབང་བསྐུར་བ་ཞེས་བྱའོ། །སྟོབས་བཅུ་ཡོངས་སུ་རྫོགས་ནས་ནི་ཡང་དག་པར་རྫོགས་པའི་སངས་རྒྱས་ཀྱི་གྲངས་སུ་འགྲོའོ། །ཀྱེ༑ རྒྱལ་བའི་སྲས་དག །འདི་ནི་གང་གི་དོན་དུ་བྱང་ཆུབ་སེམས་དཔའ་དཀའ་བ་བརྒྱ་སྟོང་དུ་མ་རྩོམ་པའི་བྱང་ཆུབ་སེམས་དཔའི་མངོན་པར་དབང་བསྐུར་བའོ། །དེ་དེ་ལྟར་མངོན་ པར་དབང་བསྐུར་ཞིང་ཡོན་ཏན་དང་ཡེ་ཤེས་རྣམ་པར་འཕེལ་བ་ནི། བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པ་ཞེས་བྱའོ། །ཀྱེ༑ རྒྱལ་བའི་སྲས་དག །དེ་ལ་བྱང་ཆུབ་ སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔའ་ནི་ཆོས་ཀྱི་ཁམས་ཡང་དག་པར་བསྒྲུབ་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདོད་པའི་ཁམས་ ཡང་དག་པར་བསྒྲུབ་པ་དང༌། གཟུགས་ཀྱི་ཁམས་ཡང་དག་པར་བསྒྲུབ་པ་དང༌། གཟུགས་མེད་པའི་ཁམས་ཡང་དག་པར་བསྒྲུབ་པ་དང༌། འཇིག་རྟེན་གྱི་ཁམས་ཡང་དག་པར་ བསྒྲུབ་པ་དང༌། སེམས་ཅན་གྱི་ཁམས་ཡང་དག་པར་བསྒྲུབ་པ་དང༌། རྣམ་པར་ཤེས་པའི་ཁམས་ཡང་དག་པར་བསྒྲུབ་པ་དང༌། འདུས་བྱས་དང༌། འདུས་མ་བྱས་ཀྱི་ཁམས་ ཡང་དག་པར་བསྒྲུབ་པ་དང༌། ནམ་མཁའི་ཁམས་ཡང་དག་པར་བསྒྲུབ་པ་དང༌། ཡང་དག་པ་དང༌། ཡང་དག་པ་མ་ཡིན་པའི་ཁམས་བསྟན་པ་ཡང་དག་པར་བསྒྲུབ་པ་དང༌། མྱ་ངན་ ལས་འདས་པའི་ཁམས་ཡང་དག་པར་བསྒྲུབ་པ་དང༌། ལྟ་བའི་རྣམ་པ་དང༌། ཉོན་མོངས་པ་ཡང་དག་པར་བསྒྲུབ་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འཇིག་རྟེན་གྱི་ཁམས་ འཇིག་པ་དང་འདུ་བ་ཡང་དག་པར་བསྒྲུབ་པ་དང༌། ཉན་ཐོས་ཀྱི་སྤྱོད་པ་ཡང་དག་པར་བསྒྲུབ་པ་དང༌། རང་སངས་རྒྱས་ཀྱི་སྤྱོད་པ་ཡང་དག་པར་བསྒྲུབ་པ་དང༌། བྱང་ཆུབ་སེམས་དཔའི་སྤྱོད་ པ་ཡང་དག་པར་བསྒྲུབ་པ་དང༌། དེ་བཞིན་གཤེགས་པའི་སྟོབས་དང༌། མི་འཇིགས་པ་དང༌། གཟུགས་ཀྱི་སྐུ་དང༌། ཆོས་ཀྱི་སྐུ་ཡང་དག་པར་བསྒྲུབ་པ་དང༌། རྣམ་པ་ཐམས་ཅད་དུ་ཐམས་ ཅད་མཁྱེན་པའི་ཡེ་ཤེས་ཡང་དག་པར་བསྒྲུབ་པ་དང༌། མངོན་པར་རྫོགས་པར་འཚང་རྒྱ་བ་དང༌། ཆོས་ཀྱི་འཁོར་ལོ་བསྐོར་བ་དང༌། བཟློག་པ་བསྟན་པ་ཡང་དག་པར་བསྒྲུབ་པ་དང༌། མདོར་བསྡུ་ ༄༅། །ན་ཆོས་ཐམས་ཅད་རྣམ་པར་ཕྱེ་བ་ལ་འཇུག་ཅིང་ཤིན་ཏུ་བརྟག་པ་ཡང་དག་པར་བསྒྲུབ་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་དེ་ལྟ་བུའི་ཡེ་ ཤེས་དང་ལྡན་པའི་བློས་གོང་དུ་སེམས་ཅན་རྣམས་ཀྱི་སྤྲུལ་པའི་ལས་ཡང་དག་པར་ཇི་ལྟ་བ་བཞིན་དུ་རབ་ཏུ་ཤེས་སོ། །ཉོན་མོངས་པའི་སྤྲུལ་པ་དང༌། ལྟ་བའི་རྣམ་པའི་སྤྲུལ་པ་དང༌། འཇིག་རྟེན་གྱི་ཁམས་ཀྱི་སྤྲུལ་པ་དང༌། ཆོས་ཀྱི་ཁམས་ཀྱི་སྤྲུལ་པ་དང༌། ཉན་ཐོས་ཀྱི་སྤྲུལ་པ་དང༌། རང་སངས་རྒྱས་ཀྱི་སྤྲུལ་པ་དང༌། བྱང་ཆུབ་སེམས་དཔའི་སྤྲུལ་པ་དང༌། དེ་བཞིན་ གཤེགས་པའི་སྤྲུལ་པ་དང༌། སྤྲུལ་པ་ཐམས་ཅད་ཀྱི་རྣམ་པར་དགོད་པ་དང༌། རྣམ་པར་མི་དགོད་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་སངས་རྒྱས་ཀྱི་བྱིན་གྱི་རླབས་ཀྱང་ ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཆོས་ཀྱི་བྱིན་གྱི་རླབས་དང༌། དགེ་འདུན་གྱི་བྱིན་གྱི་རླབས་དང༌། ལས་ཀྱི་བྱིན་གྱི་རླབས་དང༌། ཉོན་མོངས་པའི་བྱིན་གྱི་རླབས་དང༌། དུས་ ཀྱི་བྱིན་གྱི་རླབས་དང༌། སྨོན་ལམ་གྱི་བྱིན་གྱི་རླབས་དང༌། མཆོད་པའི་བྱིན་གྱི་རླབས་དང༌། སྤྱོད་པའི་བྱིན་གྱི་རླབས་དང༌། བསྐལ་པའི་བྱིན་གྱི་རླབས་དང༌། ཡེ་ཤེས་ཀྱི་བྱིན་གྱི་རླབས་ ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གང་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཕྲ་བ་ལ་འཇུག་པའི་ཡེ་ཤེས་འདི་ལྟ་སྟེ། སྤྱོད་པ་ཕྲ་བ་ལ་འཇུག་པའི་ཡེ་ཤེས་སམ། སྐྱེ་བ་དང་འཕོ་བ་ཕྲ་བ་ལ་འཇུག་པའི་ཡེ་ཤེས་སམ། སྐུ་ཚེ་ཕྲ་བ་ལ་འཇུག་པའི་ཡེ་ཤེས་སམ། མངོན་པར་འབྱུང་བ་ཕྲ་བ་ལ་འཇུག་པའི་ཡེ་ཤེས་ སམ༑ མངོན་པར་བྱང་ཆུབ་པ་ཕྲ་བ་ལ་འཇུག་པའི་ཡེ་ཤེས་སམ། རྣམ་པར་འཕྲུལ་པ་ཕྲ་བ་ལ་འཇུག་པའི་ཡེ་ཤེས་སམ། ཆོས་ཀྱི་འཁོར་ལོ་བསྐོར་བ་ཕྲ་བ་ལ་འཇུག་པའི་ཡེ་ཤེས་སམ། སྐུ་ཚེའི་ཚད་བྱིན་གྱི་རླབས་པ་ཕྲ་བ་ལ་འཇུག་པའི་ཡེ་ཤེས་སམ། ཡོངས་སུ་མྱ་ངན་ལས་འདའ་བ་ཕྲ་བ་ལ་འཇུག་པའི་ཡེ་ཤེས་སམ། བསྟན་པ་གནས་པ་ཕྲ་བ་ལ་འཇུག་པའི་ཡེ་ཤེས་ དེ་དག་ཐམས་ཅད་ཡང་དག་པ་ཇི་ལྟ་བ་བཞིན་དུ་དེས་རབ་ཏུ་ཤེས་སོ། །གང་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་གསང་བ་ ལ་འཇུག་པའི་གནས་འདི་ལྟ་ཏེ། སྐུའི་གསང་བའམ། གསུང་གི་གསང་བའམ། ཐུགས་ཀྱི་གསང་བའམ། དུས་དང་དུས་མ་ཡིན་པ་ཐུགས་སུ་ཆུད་པའི་གསང་བའམ། བྱང་ཆུབ་སེམས་དཔའ་ལུང་བསྟན་པའི་གསང་བའམ། སེམས་ཅན་བསྡུ་བ་དང༌། ཚར་གཅད་པ་གསང་བའམ། ཐེག་པ་ཐ་དད་པ་གསང་བའམ། སེམས་ཅན་གྱི་སྤྱོད་པ་དང༌། དབང་ པོ་རྣམ་པར་ཕྱེ་བ་གསང་བའམ། ལས་དང་བྱ་བ་ལ་འཇུག་པ་གསང་བའམ། སྤྱོད་པ་དང་མངོན་པར་འཚང་རྒྱ་བའི་རང་བཞིན་བརྗོད་པ་ཐུགས་སུ་ཆུད་པ་གསང་བ་དེ་དག་ཐམས་ ༄༅། །ཅད་ཡང་དག་པ་ཇི་ལྟ་བ་བཞིན་དུ་དེས་རབ་ཏུ་ཤེས་སོ། །གང་འདི་དག་བསྐལ་པ་ལ་འཇུག་པའི་ཡེ་ཤེས་འདི་ལྟ་སྟེ། བསྐལ་པ་གཅིག་ལ་བསྐལ་པ་ གྲངས་མེད་པར་ཡང་དག་པར་འཇུག་པ་དང༌། གྲངས་མེད་པའི་བསྐལ་པ་ལ་བསྐལ་པ་གཅིག་ཏུ་ཡང་དག་པར་འཇུག་པ་དང༌། བསྐལ་པ་གྲངས་མེད་པ་ལ་བསྐལ་པ་གྲངས་ མེད་པར་ཡང་དག་པར་འཇུག་པ་དང༌། བསྐལ་པ་གཅིག་ལ་བསྐལ་པ་དང༌། བསྐལ་པ་ལ་སྐད་ཅིག་ཏུ་ཡང་དག་པར་འཇུག་པ་དང༌། བསྐལ་པ་ལ་བསྐལ་པ་མ་ཡིན་པར་ཡང་ དག་པར་འཇུག་པ་དང༌། བསྐལ་པ་མ་ཡིན་པ་ལ་བསྐལ་པར་ཡང་དག་པར་འཇུག་པ་དང༌། སངས་རྒྱས་དང་བཅས་པའི་བསྐལ་པ་སངས་རྒྱས་མེད་པའི་བསྐལ་པར་ཡང་ དག་པར་འཇུག་པ་དང༌། སངས་རྒྱས་མེད་པའི་བསྐལ་པ་སངས་རྒྱས་དང་བཅས་པའི་བསྐལ་པར་ཡང་དག་པར་འཇུག་པ་དང༌། འདས་པ་དང༌། མ་འོངས་པ་དང༌། ད་ལྟར་ བྱུང་བ་ལ་ད་ལྟར་བྱུང་བ་དང༌། འདས་པ་དང༌། མ་འོངས་པའི་བསྐལ་པར་འཇུག་ཅིང༌། མ་འོངས་པ་དང༌། འདས་པ་དང༌། ད་ལྟར་བྱུང་བའི་བསྐལ་པར་ཡང་དག་པར་ འཇུག་པ་དང༌། བསྐལ་པ་རིང་པོ་ལ་བསྐལ་པ་ཐུང་ངུར་ཡང་དག་པར་འཇུག་པ་དང༌། བསྐལ་པ་ཐུང་ངུ་ལ་བསྐལ་པ་རིང་པོར་ཡང་དག་པར་འཇུག་པ་དང༌། བསྐལ་པ་ཐམས་ ཅད་ལ་མིང་དུ་བཏགས་པར་ཡང་དག་པར་འཇུག་པ་དེ་དག་ཐམས་ཅད་ཀྱང་ཡང་དག་པ་ཇི་ལྟ་བ་བཞིན་དུ་དེས་རབ་ཏུ་ཤེས་སོ། །གང་འདི་དག་དེ་བཞིན་གཤེགས་པ་རྣམས་ཀྱིས་ཐུགས་ སུ་ཆུད་པའི་ཡེ་ཤེས་འདི་ལྟ་སྟེ། སྐྲའི་རྩེ་མོ་ལ་འཇུག་པའི་ཡེ་ཤེས་སམ། རྡུལ་ཤིན་ཏུ་ཕྲ་བ་ལ་འཇུག་པའི་ཡེ་ཤེས་སམ། ཞིང་མང་པོ་མངོན་པར་འཚང་རྒྱ་བ་ལ་འཇུག་པའི་ཡེ་ ཤེས་སམ། སེམས་ཅན་གྱི་ལུས་དང༌། སེམས་མངོན་པར་འཚང་རྒྱ་བ་ལ་འཇུག་པའི་ཡེ་ཤེས་སམ། ཐམས་ཅད་དུ་ཁྱབ་པ་མངོན་པར་འཚང་རྒྱ་བ་ལ་འཇུག་པའི་ཡེ་ཤེས་ སམ༑ སྣྲེལ་ཞིའི་སྤྱོད་པ་ལ་འཇུག་པ་ཡང་དག་པར་སྟོན་པའི་ཡེ་ཤེས་སམ། ལུགས་དང་མཐུན་པའི་སྤྱོད་པ་ཡང་དག་པར་བསྟན་པ་ལ་འཇུག་པའི་ཡེ་ཤེས་སམ། ལུགས་དང་ མི་མཐུན་པའི་སྤྱོད་པ་ཡང་དག་པར་བསྟན་པ་ལ་འཇུག་པའི་ཡེ་ཤེས་སམ། འཇིག་རྟེན་བསམ་དུ་རུང་བ་དང༌། བསམ་དུ་མི་རུང་བ་དང༌། རྣམ་པར་ཤེས་པར་རུང་བ་དང༌། རྣམ་ པར་ཤེས་པར་མི་རུང་བའི་སྤྱོད་པ་ཡང་དག་པར་བསྟན་པ་ལ་འཇུག་པའི་ཡེ་ཤེས་སམ། ཉན་ཐོས་ཀྱིས་ཤེས་པར་བྱ་བ་དང༌། རང་སངས་རྒྱས་ཀྱིས་ཤེས་པར་བྱ་བ་དང༌། བྱང་ཆུབ་ སེམས་དཔས་ཤེས་པར་བྱ་བ་དང༌། དེ་བཞིན་གཤེགས་པས་མཁྱེན་པར་བྱ་བའི་སྤྱོད་པ་ཡང་དག་པར་བསྟན་པ་ལ་འཇུག་པའི་ཡེ་ཤེས་དེ་དག་ཐམས་ཅད་ཀྱང་ཡང་དག་པ་ཇི་ལྟ་བ་ ༄༅། །བཞིན་དུ་དེས་རབ་ཏུ་ཤེས་སོ། །ཀྱེ༑ རྒྱལ་བའི་སྲས་དག །དེ་ལྟར་ན་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ཤིན་ཏུ་ཡངས་པ་ཚད་མེད་པས་ ས་འདི་ལ་གནས་པའི་བྱང་ཆུབ་སེམས་དཔས་ཁོང་དུ་ཆུད་པའི་ཡེ་ཤེས་ཀྱང་ཚད་མེད་དོ། །ཀྱེ༑ རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་ས་འདི་དང་ལྡན་པའི་བྱང་ཆུབ་ སེམས་དཔའ་དེ་བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པ་ཞེས་བྱ་བ་རབ་ཏུ་འཐོབ་བོ། །བསྒྲིབས་པ་མེད་པ་ཞེས་བྱ་བ་དང༌། རྣམ་པར་དག་པ་རབ་ཏུ་འབྱེད་པ་ ཞེས་བྱ་བ་དང༌། སྒོ་ཀུན་ཏུ་སྣང་བ་ཞེས་བྱ་བ་དང༌། དེ་བཞིན་གཤེགས་པའི་མཛོད་ཅེས་བྱ་བ་དང༌། འཁོར་ལོ་ཐོགས་པ་མེད་པ་དང་ལྡན་པ་ཞེས་བྱ་བ་དང༌། དུས་གསུམ་གྱི་རྗེས་ སུ་སོང་བ་ཞེས་བྱ་བ་དང༌། ཆོས་ཀྱི་དབྱིངས་ཀྱི་སྙིང་པོ་ཞེས་བྱ་བ་དང༌། རྣམ་པར་ཐར་པའི་དཀྱིལ་འཁོར་སྣང་བ་ཞེས་བྱ་བ་དང༌། ཡུལ་མ་ལུས་པ་ཞེས་བྱ་བའི་བྱང་ཆུབ་སེམས་དཔའི་ རྣམ་པར་ཐར་པ་རབ་ཏུ་འཐོབ་བོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། བྱང་ཆུབ་སེམས་དཔའི་རྣམ་པར་ཐར་པ་བཅུ་པོ་དེ་དག་ལ་སོགས་པ་རྣམ་པར་ཐར་པའི་སྒོ་བརྒྱ་སྟོང་ གྲངས་མེད་པ། བྱང་ཆུབ་སེམས་དཔའི་ས་བཅུ་པ་འདི་ལ་གནས་པའི་བྱང་ཆུབ་སེམས་དཔས་རབ་ཏུ་ཐོབ་སྟེ། དེ་བཞིན་དུ་ཏིང་ངེ་འཛིན་བརྒྱ་ཕྲག་སྟོང་དང༌། གཟུངས་བརྒྱ་ཕྲག་ སྟོང་དང༌། མངོན་པར་ཤེས་པ་མངོན་པར་བསྒྲུབ་པ་བརྒྱ་ཕྲག་སྟོང་ཡང་རབ་ཏུ་འཐོབ་བོ། །དེ་ཡེ་ཤེས་དེ་ལྟ་བུ་དང་ལྡན་པའི་བློ་དང༌། ཚད་མེད་པའི་རྗེས་སུ་སོང་བའི་དྲན་པ་མཁས་པ་ དང་ལྡན་པ་ཡིན། དེ་ཕྱོགས་བཅུའི་སངས་རྒྱས་བཅོམ་ལྡན་འདས་གྲངས་མེད་པ་ལས་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་ཚད་མེད་པ་དང༌། ཆོས་ཀྱི་འོད་ཆེན་པོ་དང༌། ཆོས་ཀྱི་སྤྲིན་ཆེན་པོ་ཡང་དག་པར་འཛིན་ཏོ། །མོས་པར་བྱེད་དོ། །ཡང་དག་པར་ལེན་ཏོ། །བདག་གིར་བྱེད་དོ། །ཀྱེ༑ རྒྱལ་བའི་སྲས་དག། འདི་ལྟ་སྟེ། དཔེར་ན། རྒྱ་མཚོའི་ཀླུའི་རྒྱལ་ པོའི་སྤྲིན་ལས་རྣམ་པར་བཀྱེ་བའི་ཆུའི་ཕུང་པོ་ཆེན་པོ་ནི་རྒྱ་མཚོ་ཆེན་པོ་མ་གཏོགས་པར་སའི་ཕྱོགས་གཞན་གྱིས་བཟོད་པའམ། བདག་གིར་བྱ་བ་དང༌། བླང་བའམ། གཟུང་བར་མི་ནུས་ སོ༑ ༑ཀྱེ༑ རྒྱལ་བའི་སྲས་དག །དེ་བཞིན་དུ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་གསང་བ་ལ་འཇུག་པ་དང༌། ཆོས་ཀྱི་སྣང་བ་ཆེན་པོ་དང༌། ཆོས་ཀྱི་འོད་ཆེན་ པོ་དང༌། ཆོས་ཀྱི་སྤྲིན་ཆེན་པོ་དེ་དག་ནི་སེམས་ཅན་ཐམས་ཅད་དང༌། ཉན་ཐོས་དང༌། རང་སངས་རྒྱས་ཐམས་ཅད་དང༌། ས་དང་པོ་ཉེ་བར་བཟུང་བ་ཡན་ཆད་ས་དགུ་པའི་བར་ལ་ གནས་པའི་བྱང་ཆུབ་སེམས་དཔའ་དེ་དག་གིས་ཀྱང་བཟོད་པའམ། བླང་བའམ། ཡང་དག་པར་གཟུང་བའམ། བདག་གིར་བྱ་བར་སླ་བ་མ་ཡིན་ཏེ། བྱང་ཆུབ་སེམས་དཔའི་ ༄༅། །ས་ཆོས་ཀྱི་སྤྲིན་འདི་ལ་གནས་པའི་བྱང་ཆུབ་སེམས་དཔའ་ནི་དེ་དག་ཐམས་ཅད་ལ་མོས་པར་བྱེད་དོ། །ཡང་དག་པར་ལེན་ཏོ། །ཡང་དག་པར་འཛིན་ ཏེ༑ ༑བདག་གིར་བྱེད་དོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི་ཀླུའི་རྒྱལ་པོ་ཆེན་པོ་གཅིག་གི་སྤྲིན་ཆེན་པོ་ཡང་བཟོད་དོ། །ལེན་ཏོ། །འཛིན་ཏོ། ། བདག་གིར་བྱེད་དོ། །ཀླུའི་རྒྱལ་པོ་ཆེན་པོ་གཉིས་དང༌། གསུམ་ནས་ཚད་མེད་པའི་བར་གྱི་སྤྲིན་ཆེན་པོ་དག་ཀྱང་སྐད་ཅིག་ཡུད་ཙམ་ཐང་ཅིག་གིས་བཟོད་དོ། །ལེན་ཏོ། །འཛིན་ ཏོ༑ ༑བདག་གིར་བྱེད་དོ། །དེ་ཅིའི་ཕྱིར་ཞེ་ན། རྒྱ་མཚོ་ཆེན་པོ་དེ་ཚད་མེད་པར་རྒྱ་ཆེ་ཞིང་ཡངས་པའི་ཕྱིར་རོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་ ཆོས་ཀྱི་སྤྲིན་འདི་ལ་གནས་པའི་བྱང་ཆུབ་སེམས་དཔའ་ཡང་དེ་བཞིན་གཤེགས་པ་གཅིག་ལས་ཀྱང་སྐད་ཅིག་ཡུད་ཙམ་ཐང་ཅིག་ཏུ་ཆོས་སྣང་བ་ཆེན་པོ་དང༌། ཆོས་ཀྱི་འོད་ ཆེན་པོ་དང༌། ཆོས་ཀྱི་སྤྲིན་ཆེན་པོ་ཚད་མེད་པ་རྣམས་བཟོད་དོ། །ཡང་དག་པར་ལེན་ཏོ། །ཡང་དག་པར་འཛིན་ཏོ། །བདག་གིར་བྱེད་དོ། །དེ་བཞིན་གཤེགས་པ་གཉིས་དང༌། གསུམ་ནས་ཚད་མེད་པའི་བར་དག་ལས་ཀྱང་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་དང༌། ཆོས་ཀྱི་འོད་ཆེན་པོ་དང༌། ཆོས་ཀྱི་སྤྲིན་ཆེན་པོ་ཚད་མེད་པ་བཟོད་ དོ༑ ༑ཡང་དག་པར་འཛིན་ཏོ། །ཡང་དག་པར་ལེན་ཏོ། །བདག་གིར་བྱེད་དོ། །དེ་ཅིའི་ཕྱིར་ཞེ་ན། ས་འདི་ཡང་ཆོས་ཀྱི་སྤྲིན་ཅེས་བྱའོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་ བས་སྨྲས་པ། ཀྱེ༑ རྒྱལ་བའི་སྲས། དེ་བཞིན་གཤེགས་པ་ཇི་སྙེད་ཅིག་ལས་བྱང་ཆུབ་སེམས་དཔའ་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་དང༌། ཆོས་ཀྱི་འོད་ཆེན་པོ་ དང༑ ཆོས་ཀྱི་སྤྲིན་ཆེན་པོ་བཟོད་པར་བྱེད་པ་དང༌། ཡང་དག་པར་འཛིན་པ་དང༌། ཡང་དག་པར་ལེན་ཅིང་བདག་གིར་བྱེད་པ་དེ་དག་བགྲང་བར་ནུས་སམ། བྱང་ཆུབ་སེམས་དཔའ་རྡོ་ རྗེའི་སྙིང་པོས་སྨྲས་པ། ཀྱེ༑ རྒྱལ་བའི་སྲས། དེ་བཞིན་གཤེགས་པ་འདི་སྙེད་ཅིག་ལས་བྱང་ཆུབ་སེམས་དཔའ་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་དང༌། ཆོས་ཀྱི་ འོད་ཆེན་པོ་དང༌། ཆོས་ཀྱི་སྤྲིན་ཆེན་པོ་བཟོད་ཅིང་ཡང་དག་པར་ལེན་པ་དང༌། ཡང་དག་པར་འཛིན་ཅིང་བདག་གིར་བྱེད་དོ། །ཞེས་གྲངས་ཀྱིས་ཤིན་ཏུ་བསྟན་པའི་ཚུལ་དུ་བགྲང་བར་ སླ་བ་མ་ཡིན་ཏེ། འོན་ཀྱང་དཔེ་ཙམ་དུ་བསྟན་པར་བྱའོ། །ཀྱེ༑རྒྱལ་བའི་སྲས། འདི་ལྟ་སྟེ། དཔེར་ན། ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་ པ༑ བྱེ་བ་ཁྲག་ཁྲིག་བརྒྱ་སྟོང་གི་རྡུལ་ཤིན་ཏུ་ཕྲ་བ་སྙེད་ན། སེམས་ཅན་གྱི་ཁམས་མ་ལུས་པའི་ཚུལ་དུ་ཇི་སྙེད་ཅིག་ཡོད་པ་དེ་དག་ལས་སེམས་ཅན་གཅིག་ཅིག་ཐོས་པ་ ༄༅། །འཛིན་པའི་གཟུངས་རབ་ཏུ་ཐོབ་པར་གྱུར་ཏོ། །འདི་ལྟ་སྟེ། དཔེར་ན། བཅོམ་ལྡན་འདས་རྡོ་རྗེ་པདྨོའི་བླ་མ་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་ཀྱི་དགེ་སློང་རྣམ་པར་རྒྱལ་བ་ཆེན་པོ་ཞེས་བྱ་བ་བཞིན་དུ་དེ་བཞིན་གཤེགས་པའི་ཞམ་རིང་བ་ཉན་ཐོས་ཆེན་པོ་ཐོས་པ་འཛིན་པའི་མཆོག་ཏུ་ཕྱིན་པར་ གྱུར་ལ༑ རྣམ་པ་དེ་ལྟ་བུའི་ཐོས་པ་འཛིན་པའི་སྟོབས་ཀྱི་ཤུགས་དང༌། སེམས་ཅན་གཅིག་པོ་དེ་ལྡན་པར་གྱུར་ཏེ། སེམས་ཅན་གཅིག་པོ་དེ་ཅི་འདྲ་བ་དེ་བཞིན་དུ་འཇིག་རྟེན་གྱི་ ཁམས་དེ་དག་ཐམས་ཅད་ཀྱི་སེམས་ཅན་ཐམས་ཅད་དང་ལྡན་པར་གྱུར་ལ། གཅིག་གིས་གང་བཟུང་བ་དེ་བཞིན་གྱིས་བཟུང་ན། ཀྱེ༑ རྒྱལ་བའི་སྲས། དེ་ལ་ཇི་སྙམ་དུ་སེམས། སེམས་ ཅན་དེ་དག་གི་ཐོས་པ་འཛིན་པའི་ཤེས་པ་དེ་དག་ཚད་མེད་ཅིང་མང་བ་ཡིན་མོད། བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ༑ རྒྱལ་བའི་སྲས། སེམས་ཅན་ དེ་དག་གི་ཐོས་པ་འཛིན་པའི་ཤེས་པ་དེ་ནི་མང་སྟེ། ཚད་ཀྱང་མེད་དོ། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ༑རྒྱལ་བའི་སྲས། ཁྱོད་ཀྱིས་ཁོང་དུ་ཆུད་པ་དང་ཡིད་ ཆེས་པར་བྱ་ན། དེ་ལྟར་བྱང་ཆུབ་སེམས་དཔའི་ས་ཆོས་ཀྱི་སྤྲིན་འདི་ལ་གནས་པའི་བྱང་ཆུབ་སེམས་དཔའ་ནི་དེ་བཞིན་གཤེགས་པ་གཅིག་ལས་ཀྱང་སྐད་ཅིག་ཡུད་ཙམ་ཐང་ཅིག་ ཏུ་ཆོས་ཀྱི་སྣང་བ་དང༌། འོད་དང༌། སྤྲིན་ཆེན་པོ་ཆོས་ཀྱི་དབྱིངས་དུས་གསུམ་གྱི་མཛོད་ཅེས་བྱ་བ་བཟོད་ཅིང་ཡང་དག་པར་ལེན་ཏོ། །ཡང་དག་པར་འཛིན་ཏོ། །བདག་གིར་བྱེད་དོ། ། ཆོས་ཀྱི་སྣང་བ་དང༌། འོད་དང༌། སྤྲིན་ཆེན་པོ་ཡང་དག་པར་འཛིན་པའི་ཤེས་པ་དེ་ལ་ཐོས་པ་འཛིན་པའི་ཤེས་པ་སྔ་མས་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང༌། བརྒྱ་ཕྲག་སྟོང་ གི་ཆ་དང༌། བྱེ་བའི་ཆ་དང༌། བྱེ་བ་བརྒྱའི་ཆ་དང༌། བྱེ་བ་སྟོང་གི་ཆ་དང༌། བྱེ་བ་བརྒྱ་སྟོང་གི་ཆ་དང༌། བྱེ་བ་ཁྲག་ཁྲིག་བརྒྱ་སྟོང་གི་ཆ་དང༌། གྲངས་དང༌། ཆ་དང༌། བགྲང་བ་དང༌། དཔེ་ དང༑ རྒྱུར་ཡང་ཉེ་བར་མི་འགྲོ་བ་ནས། བསྒྲུན་པ་ཙམ་གྱི་བར་དུ་ཡང་མི་ཆོག་གོ །དེ་བཞིན་གཤེགས་པ་གཅིག་ལས་ཇི་ལྟ་བ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་སྔ་མ་ དག་ན་རྡུལ་ཤིན་ཏུ་ཕྲ་བ་ཇི་སྙེད་པ་དེ་སྙེད་ཀྱི་ཡང་དག་པར་རྫོགས་པའི་སངས་རྒྱས་རྣམས་དང༌། དེ་དག་པས་ཀྱང་ཆེས་མང་ཞིང་ཚད་མེད་པའི་དེ་བཞིན་གཤེགས་པ་རྣམས་ལས་སྐད་ ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་དང༌། འོད་དང༌། སྤྲིན་ཆེན་པོ་ཆོས་ཀྱི་དབྱིངས་དུས་གསུམ་གྱི་མཛོད་ཅེས་བྱ་བ་བཟོད་ཅིང་ཡང་དག་པར་ལེན་ཏོ། །ཡང་དག་པར་འཛིན་ ཏོ༑ ༑བདག་གིར་བྱེད་དོ། །དེ་བས་ན་ས་འདི་ཡང་ཆོས་ཀྱི་སྤྲིན་ཅེས་བྱའོ། །ཀྱེ༑ རྒྱལ་བའི་སྲས། གཞན་ཡང་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་ ༄༅། །དཔའ་ནི་རང་གི་སྨོན་ལམ་གྱི་སྟོབས་དང་ཤུགས་ཀྱིས་སྙིང་བརྩེ་བ་དང༌། སྙིང་རྗེ་ཆེན་པོའི་སྤྲིན་ཆོས་ཀྱི་སྣང་བ་ཆེན་པོ་རབ་ཏུ་སྒྲོག་པའི་འབྲུག་སྒྲ་ཤིན་ཏུ་ སྒྲོག་པ་མངོན་པར་ཤེས་པ་དང༌། རིག་པ་དང༌། མི་འཇིགས་པའི་གློག་རྣམ་པར་འགྱུར་བ་འོད་ཟེར་ཆེན་པོའི་རླུང་གིས་ཤིན་ཏུ་བསྐྱོད་པ། བསོད་ནམས་དང་ཡེ་ཤེས་ཀྱི་སྤྲིན་གྱི་དྲ་བ་ སྟུག་པོས་ཀུན་ནས་ཁེབས་པ། ལུས་སྣ་ཚོགས་ཀྱི་སྤྲིན་གྱི་གློག་ཡང་དག་པར་སྟོན་པ། ཆོས་ཀྱི་སྒྲ་ཆེན་པོ་རབ་ཏུ་སྒྲོག་པ་བདུད་ཀྱི་འཁོར་ཐམས་ཅད་ཤིན་ཏུ་ཚར་གཅོད་པ་ཡོངས་སུ་ བསླང་སྟེ། སྐད་ཅིག་ཡུད་ཙམ་ཐང་ཅིག་ཏུ་ཕྱོགས་བཅུའི་འཇིག་རྟེན་སྔ་མ་དེ་དག་ན་རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་སྙེད་ཀྱི་འཇིག་རྟེན་གྱི་ཁམས་ཀྱང་བྱེ་བ་ཁྲག་ཁྲིག་བརྒྱ་སྟོང་ དང༑ དེ་དག་པས་ཀྱང་ཆེས་མང་ཞིང་ཚད་མེད་པའི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་རྒྱས་པར་བཀང་སྟེ། དགེ་བའི་བདུད་རྩིའི་རྒྱུན་གྱི་ཆར་ཆེན་པོས་བསམ་པ་ཇི་ ལྟ་བ་བཞིན་དུ་སེམས་ཅན་རྣམས་ཀྱི་མི་ཤེས་པ་ལས་ལངས་པའི་ཉོན་མོངས་པའི་རྡུལ་གྱི་མེ་ལྕེ་ཐམས་ཅད་རབ་ཏུ་ཞི་བར་བྱེད་དོ། །དེ་བས་ན་ས་འདིའང་ཆོས་ཀྱི་སྤྲིན་ཅེས་བྱའོ། །ཀྱེ༑ རྒྱལ་བའི་སྲས། གཞན་ཡང་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔའ་ནི། འཇིག་རྟེན་གྱི་ཁམས་གཅིག་ཏུ་ཡང་དགའ་ལྡན་གྱི་གནས་ན་ བཞུགས་པ་ནས་བཟུང་སྟེ། འཕོ་བ་དང༌། ཡུམ་གྱི་སྐུར་བཞུད་པ་དང༌། སྐུ་ན་བཞུགས་པ་དང༌། ཚེ་དང༌། མངོན་པར་འབྱུང་བ་དང༌། མངོན་པར་འཚང་རྒྱ་བ་དང༌། གསོལ་བ་གདབ་ པ་དང༌། ཆོས་ཀྱི་འཁོར་ལོ་ཆེན་པོ་བསྐོར་བ་དང༌། མྱ་ངན་ལས་འདས་པ་ཆེན་པོ་བསྟན་པའི་བར་དུ་སེམས་ཅན་གྱི་བསམ་པའི་ཚུལ་དང༌། འདུལ་བའི་ཚུལ་ཇི་ལྟ་བ་བཞིན་དུ་དེ་བཞིན་ གཤེགས་པའི་འཕྲིན་ལས་ཐམས་ཅད་བྱིན་གྱིས་རློབ་བོ། །དེ་བཞིན་དུ་འཇིག་རྟེན་གྱི་ཁམས་གཉིས་ནས་འཇིག་རྟེན་གྱི་ཁམས་སྔ་མ་དེ་དག་ན་རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་དག་ པས་ཀྱང་ཆེས་མང་བའི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པའི་བར་དག་ཏུ་ཡང་དགའ་ལྡན་གྱི་གནས་ན་བཞུགས་པ་ནས་བཟུང་སྟེ། ཡོངས་སུ་མྱ་ངན་ལས་འདས་ པ་ཆེན་པོ་བསྟན་པའི་བར་དུ་སེམས་ཅན་རྣམས་ཀྱི་བསམ་པའི་ཚུལ་དང༌། འདུལ་བའི་ཚུལ་ཇི་ལྟ་བ་བཞིན་དུ་དེ་བཞིན་གཤེགས་པའི་འཕྲིན་ལས་ཐམས་ཅད་བྱིན་གྱིས་རློབ་བོ། །དེ་དེ་ ལྟ་བུའི་ཡེ་ཤེས་དང་ལྡན་ཞིང་ཤིན་ཏུ་བརྟགས་པའི་མངོན་པར་ཤེས་པ་ཆེན་པོ་ཐོབ་པས། འདོད་ན་འཇིག་རྟེན་གྱི་ཁམས་དོག་པ་ཡངས་པར་བྱིན་གྱིས་རློབ་བོ། །ཡངས་པ་ཡང་དོག་ པར་བྱིན་གྱིས་རློབ་བོ། །འདོད་ན་ཀུན་ནས་ཉོན་མོངས་པ་རྣམ་པར་དག་པར་བྱིན་གྱིས་རློབ་བོ། །རྣམ་པར་དག་པ་ཀུན་ནས་ཉོན་མོངས་པར་བྱིན་གྱིས་རློབ་བོ། །དེ་བཞིན་དུ་རྒྱ་ཆེན་པོ་དང༌། ༄༅། །ཤིན་ཏུ་ཡངས་པ་དང༌། ཚད་མེད་པ་དང༌། ཕྲ་བ་དང༌། ཐ་གྲུ་ཆེན་པོ་དང༌། སྣྲེལ་ཞི་དང༌། སྤྱིའུ་ཚུགས་དང༌། གཞི་མཉམ་པ་ལ་སོགས་པའི་འཇིག་ རྟེན་གྱི་ཁམས་ཐམས་ཅད་ཀྱང་ཁྱུ་མཆོག་གི་མཐུ་ཕྱུང་བས་མངོན་པར་བསྒྲུབ་པ་དེ་དང་དེར་བྱིན་གྱིས་རློབ་བོ། །དེ་འདོད་ན་རྡུལ་ཤིན་ཏུ་ཕྲ་བ་གཅིག་ལ་འཇིག་རྟེན་གྱི་ཁམས་ཁོར་ ཡུག་གི་འོབས་དང་བཅས་པ་རྣམ་པ་ཐམས་ཅད་དང་ལྡན་པ་གཅིག་ཀྱང་བྱིན་གྱིས་རློབ་སྟེ། རྡུལ་ཤིན་ཏུ་ཕྲ་བ་དེ་ཡང་མི་འཕེལ་ལ། བྱ་བ་དེ་དག་ཀྱང་ཡོངས་སུ་རྟོན་ཏོ། །རྡུལ་ཤིན་ཏུ་ ཕྲ་བ་གཅིག་ལ་འཇིག་རྟེན་གྱི་ཁམས་གཉིས་དང༌། གསུམ་དང༌། བཞི་དང༌། ལྔ་ནས་འཇིག་རྟེན་གྱི་ཁམས་བརྗོད་དུ་མེད་པའི་བར་དུ་ཐམས་ཅད་ཀྱང་ཁོར་ཡུག་གི་འོབས་དང་བཅས་ པ་རྣམ་པ་ཐམས་ཅད་དང་ལྡན་པར་བྱིན་གྱིས་རློབ་སྟེ། རྡུལ་ཤིན་ཏུ་ཕྲ་བ་དེ་ཡང་མི་འཕེལ་ལ། བྱ་བ་དེ་དག་ཀྱང་ཡོངས་སུ་སྟོན་ཏོ། །འདོད་ན་འཇིག་རྟེན་གྱི་ཁམས་གཅིག་ ཏུ་འཇིག་རྟེན་གྱི་ཁམས་གཉིས་ཀྱི་རྒྱན་ཡོངས་སུ་སྟོན་ཏོ། །འདོད་ན་འཇིག་རྟེན་གྱི་ཁམས་བརྗོད་དུ་མེད་པའི་བར་གྱི་རྒྱན་ཡོངས་སུ་སྟོན་ཏོ། །འདོད་ན་འཇིག་རྟེན་གྱི་ཁམས་ གཅིག་གི་རྒྱན་འཇིག་རྟེན་གྱི་ཁམས་གཉིས་སུ་ཡོངས་སུ་སྟོན་ཏོ། །འདོད་ན་འཇིག་རྟེན་གྱི་ཁམས་བརྗོད་དུ་མེད་པ་དག་ཏུ་ཡང་ཡོངས་སུ་སྟོན་ཏོ། །འདོད་ན་འཇིག་རྟེན་གྱི་ཁམས་ བརྗོད་དུ་མེད་པ་དག་ན། སེམས་ཅན་གྱི་ཁམས་ཇི་སྙེད་ཡོད་པ་དེ་དག་ཐམས་ཅད་འཇིག་རྟེན་གྱི་ཁམས་གཅིག་ཏུ་སྡུད་དེ། སེམས་ཅན་དེ་དག་ལ་ཡང་གནོད་པར་མི་འགྱུར་རོ། །འདོད་ ན་འཇིག་རྟེན་གྱི་ཁམས་གཅིག་ན། སེམས་ཅན་གྱི་ཁམས་ཇི་སྙེད་པ་དེ་དག་འཇིག་རྟེན་གྱི་ཁམས་བརྗོད་དུ་མེད་པར་སྡུད་དེ། སེམས་ཅན་དེ་དག་ལ་ཡང་གནོད་པར་མི་འགྱུར་རོ། ། འདོད་ན་སྐྲའི་རྩེ་མོ་གཅིག་ལ་སངས་རྒྱས་ཀྱི་ཡུལ་གྱི་རྒྱན་རྣམ་པ་ཐམས་ཅད་དང་ལྡན་པ་གཅིག་སྟོན་ཏོ། །འདོད་ན་སངས་རྒྱས་ཀྱི་ཡུལ་གྱི་རྒྱན་རྣམ་པ་ཐམས་ཅད་དང་ལྡན་པ་བརྗོད་དུ་ མེད་པའི་བར་དུ་སྟོན་ཏོ། །འདོད་ན་འཇིག་རྟེན་གྱི་ཁམས་བརྗོད་དུ་མེད་པ་དག་ན། རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་སྙེད་ཀྱི་ལུས་སྐད་ཅིག་ཡུད་ཙམ་ཐར་ཅིག་ཏུ་ཤིན་ཏུ་སྤྲུལ་པ་ བྱེད་དོ། །ལུས་རེ་རེ་ལ་ཡང་དེ་སྙེད་ཀྱི་ལག་པ་ཡོངས་སུ་སྟོན་ཏོ། །ལག་པ་དེ་དག་གིས་ཀྱང་ཕྱོགས་བཅུར་སངས་རྒྱས་མཆོད་པ་རབ་ཏུ་བྱེད་དེ། ལག་པ་རེ་རེས་ཀྱང་མེ་ཏོག་གི་ཕུང་ པོ་ཆུ་ཀླུང་གངྒཱའི་བྱེ་མ་སྙེད་སངས་རྒྱས་བཅོམ་ལྡན་འདས་དེ་དག་ལ་མངོན་པར་འཐོར་རོ། །མེ་ཏོག་ཇི་ལྟ་བ་བཞིན་དུ་སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། བ་དན་དང༌། དེ་བཞིན་དུ་རྒྱན་ཐམས་ཅད་ཀྱང་ཡོངས་སུ་འབུལ་ལོ། །ལུས་རེ་རེ་ལ་ཡང་དེ་སྙེད་ཀྱི་མགོ་བྱིན་གྱིས་རློབ་ ༄༅། །ཅིང༑ མགོ་རེ་རེ་ལ་ཡང་དེ་སྙེད་ཀྱི་ལྕེ་བྱིན་གྱིས་བརླབས་ཏེ། དེ་དག་གིས་ཀྱང་སངས་རྒྱས་བཅོམ་ལྡན་འདས་དེ་དག་གི་ཡོན་ཏན་ཤིན་ཏུ་རྗོད་པ་བྱེད་ དོ༑ ༑སེམས་བསྐྱེད་པ་རེ་རེ་ལ་ཡང་ཕྱོགས་བཅུ་རྒྱས་པར་ཁྱབ་པར་འགྲོ་སྟེ། སེམས་བསྐྱེད་པ་ཙམ་གྱིས་ཀྱང་མངོན་པར་རྫོགས་པར་བྱང་ཆུབ་པ་ཚད་མེད་པ་ནས་མྱ་ངན་ ལས་འདས་པ་ཆེན་པོའི་རྒྱན་གྱི་བར་དུ་བྱིན་གྱིས་རློབ་བོ། །དུས་གསུམ་གྱི་ལུས་ཚད་མེད་པ་ཡང་བྱིན་གྱིས་རློབ་སྟེ། རང་གི་ལུས་ལ་སངས་རྒྱས་བཅོམ་ལྡན་འདས་ཚད་མེད་ པ་རྣམས་ཀྱི་སངས་རྒྱས་ཀྱི་ཞིང་གི་ཡོན་ཏན་དང་རྒྱན་ཚད་མེད་པ་བྱིན་གྱིས་རློབ་བོ། །འཇིག་རྟེན་གྱི་ཁམས་འཇིག་པ་དང༌། འདུ་བ་ཐམས་ཅད་ཀྱང་རང་གི་ལུས་ལ་བྱིན་གྱིས་ རློབ་བོ། །རླུང་གི་དཀྱིལ་འཁོར་ཐམས་ཅད་ཀྱང་བ་སྤུའི་ཁུང་བུ་གཅིག་ནས་གཏོང་སྟེ། སེམས་ཅན་རྣམས་ལ་ཡང་གནོད་པར་མི་བྱེད་དོ། །འདོད་ན་ཆུའི་ཕུང་པོ་ཡན་ཆད་ འཇིག་རྟེན་གྱི་ཁམས་གཅིག་བྱིན་གྱིས་རློབ་བོ། །དེར་ཡང་པད་མོ་ཆེན་པོ་བྱིན་གྱིས་རློབ་བོ། །པད་མོ་ཆེན་པོ་དེའི་འོད་རྣམ་པར་ཕྱེ་བས་ཀྱང་འཇིག་རྟེན་གྱི་ཁམས་མུ་མེད་པ་རྒྱས་ པར་གང་བར་བྱེད་དེ། དེ་ལ་ཡང་བྱང་ཆུབ་ཀྱི་ཤིང་ཆེན་པོ་ཡོངས་སུ་སྟོན་པ་ནས་རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་བར་དུ་ཡང་དག་པར་ སྟོན་ཏོ། །རང་གི་ལུས་ལ་ཕྱོགས་བཅུའི་ནོར་བུ་དང༌། གློག་དང༌། ཉི་ཟླའི་འོད་བྱིན་གྱིས་རློབ་པ་ནས། སྣང་བ་དང་འོད་ཐམས་ཅད་ཀྱི་བར་དུ་བྱིན་གྱིས་རློབ་བོ། །ཁའི་དབུགས་ཀྱིས་ ཀྱང་ཕྱོགས་རེ་རེའི་འཇིག་རྟེན་གྱི་ཁམས་མཐའ་ཡས་པ་གཡོ་བར་བྱེད་དེ། སེམས་ཅན་རྣམས་འཇིགས་པར་ཡང་མི་བྱེད་དོ། །ཕྱོགས་བཅུར་རླུང་གིས་འཇིག་པ་དང༌། མེས་འཇིག་ པ་དང༌། ཆུས་འཇིག་པ་ཡང་བྱིན་གྱིས་རློབ་ལ། འདོད་ན་སེམས་ཅན་ཐམས་ཅད་བསམ་པ་བཞིན་དུ་གཟུགས་ཀྱི་ལུས་དང༌། གནས་ཡོངས་སུ་བརྒྱན་པར་བྱིན་གྱིས་རློབ་བོ། །རང་ གི་ལུས་ལ་དེ་བཞིན་གཤེགས་པའི་སྐུ་བྱིན་གྱིས་རློབ་སྟེ། དེ་བཞིན་གཤེགས་པའི་སྐུ་ལ་རང་གི་ལུས་བྱིན་གྱིས་རློབ་བོ། །དེ་བཞིན་གཤེགས་པའི་སྐུ་ལ་རང་གི་སངས་རྒྱས་ཀྱི་ཞིང་ བྱིན་གྱིས་རློབ་བོ། །རང་གི་སངས་རྒྱས་ཀྱི་ཞིང་དུ་དེ་བཞིན་གཤེགས་པའི་སྐུ་བྱིན་གྱིས་རློབ་བོ། །ཀྱེ༑ རྒྱལ་བའི་སྲས། དེ་ལྟར་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་ བྱང་ཆུབ་སེམས་དཔའ་ནི་རྫུ་འཕྲུལ་དང༌། རྣམ་པར་འཕྲུལ་པ་འདི་དག་དང༌། གཞན་ཡང་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་ཡོངས་སུ་སྟོན་ཏོ། །དེ་ནས་འཁོར་དེའི་བྱང་ཆུབ་ སེམས་དཔའ་ལ་ལ་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་གྱི་མགོན་པོ་དང༌། དབང་ ༄༅། །ཕྱུག་ཆེན་པོ་དང༌། གཙང་མའི་གནས་སུ་གཏོགས་པ་ཁ་ཅིག་འདི་སྙམ་དུ་སེམས་ཏེ་དེ་ལྟར་དེ་སྟེ། བྱང་ཆུབ་སེམས་དཔའི་རྫུ་འཕྲུལ་མངོན་པར་འདུ་བྱ་ བའི་སྤྱོད་ཡུལ་ཡང་དེ་ལྟར་ཚད་མེད་ན། དེ་བཞིན་གཤེགས་པ་རྣམས་ཀྱི་རྫུ་འཕྲུལ་གྱི་རྣམ་པ་ཅི་འདྲ་བ་ཞིག་ཡོད་སྙམ་པ་དང༌། དེ་ནས་བྱང་ཆུབ་སེམས་དཔའ་རྣམ་པར་གྲོལ་ བའི་ཟླ་བས་འཁོར་དེ་དག་གི་སེམས་དང་བསམ་པའི་རྒྱུད་ཤེས་ནས། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་འདི་སྐད་ཅེས་སྨྲས་སོ། །ཀྱེ། རྒྱལ་བའི་སྲས། འཁོར་འདི་དག་ ཐེ་ཚོམ་དུ་གྱུར་ན། དེ་དག་གི་ཐེ་ཚོམ་གཅོད་པའི་ཕྱིར་བྱང་ཆུབ་སེམས་དཔའི་ཆོ་འཕྲུལ་རྣམ་པར་ཕྱེ་བ་ཅུང་ཟད་ཅིག་མི་བསྟན་ཏམ།། །།བམ་པོ་ལྔ་བཅུ་གསུམ་པ། དེ་ནས་ བྱང་ཆུབ་སེམས་དཔའ་རྡོ་རྗེའི་སྙིང་པོ་དེའི་ཚེ། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཀྱི་ལྷུན་དང༌། རང་བཞིན་ཡང་དག་པར་སྟོན་པ་ཞེས་བྱ་ བ་ལ་སྙོམས་པར་ཞུགས་སོ། །དེ་ལྟར་བྱང་ཆུབ་སེམས་དཔའ་རྡོ་རྗེའི་སྙིང་པོ། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཀྱི་ལྷུན་དང༌། རང་བཞིན་ ཡང་དག་པར་སྟོན་པ་ལ་སྙོམས་པར་ཞུགས་མ་ཐག་ཏུ་དེ་ནས་དེ་ཉིད་ཀྱི་ཚེ། བྱང་ཆུབ་སེམས་དཔའི་འཁོར་དེ་དག་ཐམས་ཅད་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་གྱི་མགོན་པོ་དང༌། དབང་ཕྱུག་ཆེན་པོ་དང༌། གཙང་མའི་གནས་ཀྱི་རིས་སུ་གཏོགས་པའི་འཁོར་དེ་དག་ཐམས་ ཅད༑ བྱང་ཆུབ་སེམས་དཔའ་རྡོ་རྗེའི་སྙིང་པོའི་ལུས་ཀྱི་ནང་ན་འཁོད་པར་རང་རང་གིས་ཤེས་པར་གྱུར་ཏེ། དེར་སངས་རྒྱས་ཀྱི་ཞིང་མངོན་དུ་གྲུབ་པར་ཤེས་སོ། །སངས་རྒྱས་ཀྱི་ཞིང་ དེའི་རྣམ་པ་དང༌། རྒྱན་ཇི་སྙེད་པ་དེ་དག་ཀྱང་བསྐལ་པ་ཁྲག་ཁྲིག་ཚང་བས་ཀྱང་བརྗོད་པར་མི་ནུས་པར་མཐོང་སྟེ། དེར་བྱང་ཆུབ་ཀྱི་ཤིང་སྟོང་གསུམ་བརྒྱ་སྟོང་ཕྲག་བཅུར་ཁྱབ་ པའི་ལྷུན་ཅན། སྟོང་གསུམ་ཁྲག་ཁྲིག་ཡོངས་སུ་ཚང་བ་ཙམ་དུ་ཡངས་ཤིང་ཚད་མེད་པའི་ཡལ་ག་ཅན་རྩེ་མོ་ཤིན་ཏུ་མཐོ་བ་བྱུང་སྟེ། དེ་དང་རྐྱེན་དུ་འབབ་པར་དེའི་དྲུང་གི་སྙིང་ པོ་བྱང་ཆུབ་ལ་སེང་གེའི་ཁྲི་རྒྱ་ཆེན་པོ་བྱུང་ནས། དེ་ལ་དེ་བཞིན་གཤེགས་པ་མངོན་པར་ཤེས་པའི་བློ་གྲོས་ཐམས་ཅད་ཀྱི་རྒྱལ་པོ་ཞེས་བྱ་བ་སྙིང་པོ་བྱང་ཆུབ་ཏུ་གཤེགས་ ཏེ་བཞུགས་པ་མཐོང་ངོ༌། །དེ་ལྟར་དེ་ན་རྒྱན་ཇི་སྙེད་སྣང་བར་གྱུར་པ་དེ་དག་ནི་བསྐལ་པ་ཁྲག་ཁྲིག་ཡོངས་སུ་ཚང་བས་ཀྱང་བརྗོད་པར་དཀའོ། །དེས་ཆོ་འཕྲུལ་ཆེན་པོ་འདི་བསྟན་ ནས། བྱང་ཆུབ་སེམས་དཔའི་འཁོར་དེ་དག་ཐམས་ཅད་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་གྱི་ ༄༅། །མགོན་པོ་དང༌། དབང་ཕྱུག་ཆེན་པོ་དང༌། གནས་གཙང་མའི་རིས་སུ་གཏོགས་པའི་འཁོར་དེ་དག་ཐམས་ཅད་སོ་སོའི་གནས་ཇི་བཞིན་དུ་བཀོད་པ་དང༌། དེ་ནས་འཁོར་དེ་དག་ཐམས་ཅད་ངོ་མཚར་དང༌། རྨད་དུ་གྱུར་ནས་མི་སྨྲ་བར་བྱང་ཆུབ་སེམས་དཔའ་རྡོ་རྗེའི་སྙིང་པོ་དེ་ཉིད་ལ་སེམས་ཤིང་འཁོད་པར་གྱུར་ཏོ། །དེ་ནས་བྱང་ཆུབ་སེམས་ དཔའ་རྣམ་པར་གྲོལ་བའི་ཟླ་བས། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་འདི་སྐད་ཅེས་སྨྲས་སོ། །ཀྱེ༑ རྒྱལ་བའི་སྲས། ཏིང་ངེ་འཛིན་འདིའི་མཐུ་རྣམ་པར་བཀོད་པ་དེ་ནི་རྨད་དུ་ བྱུང་བར་ངོ་མཚར་ཆེ་ན། ཀྱེ༑ རྒྱལ་བའི་སྲས། ཏིང་ངེ་འཛིན་དེའི་མིང་ཅི་ཞེས་བྱ། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ༑ རྒྱལ་བའི་སྲས། ཏིང་ངེ་འཛིན་འདི་ ནི་སངས་རྒྱས་ཀྱི་ཞིང་ཐམས་ཅད་ཀྱི་ལྷུན་དང་རང་བཞིན་ཡང་དག་པར་སྟོན་པ་ཞེས་བྱའོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ༑ རྒྱལ་བའི་སྲས། འོ་ན་ཏིང་ངེ་འཛིན་འདིའི་སྤྱོད་ཡུལ་དང༌། ཡུལ་དང༌། རྒྱན་ཇི་ལྟ་བུ་ཡིན། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ༑རྒྱལ་བའི་སྲས། བྱང་ཆུབ་སེམས་དཔའི་ཏིང་ ངེ་འཛིན་འདི་ལ་ཤིན་ཏུ་གོམས་པ་ནི། འདོད་ན་སངས་རྒྱས་ཀྱི་ཞིང་འདི་འདྲ་བ་འཇིག་རྟེན་གྱི་ཁམས་ཆུ་ཀླུང་གངྒཱའི་བྱེ་མ་སྙེད་དམ། དེ་བས་ཀྱང་མང་དུ་རང་གི་ལུས་ལ་སྟོན་ཏོ།། ཀྱེ༑ རྒྱལ་བའི་སྲས། བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔས་ནི། བྱང་ཆུབ་སེམས་དཔའི་ཏིང་ངེ་འཛིན་འདི་འདྲ་བ་བརྒྱ་སྟོང་ཤིན་ཏུ་མང་པ་རབ་ཏུ་ འཐོབ་སྟེ། དེ་བས་བྱང་ཆུབ་སེམས་དཔའ་དེའི་ལུས་སམ། ལུས་ཀྱི་ལས་ནི་བྱང་ཆུབ་སེམས་དཔའ་རྒྱལ་ཚབ་ཀྱི་གོ་འཕང་ཐོབ་ཅིང༌། བྱང་ཆུབ་སེམས་དཔའི་ས་ལེགས་པའི་བློ་ གྲོས་ལ་གནས་པ་དག་གིས་ཀྱང་ཤེས་པར་སླ་བ་མ་ཡིན་ནོ། །ངག་གམ། ངག་གི་ལས་ཀྱང་ཤེས་པར་སླ་བ་མ་ཡིན་ནོ། །ཡིད་དམ། ཡིད་ཀྱི་ལས་ཀྱང་ཤེས་པར་སླ་བ་མ་ཡིན་ནོ། །རྫུ་ འཕྲུལ་ཤེས་པར་སླ་བ་མ་ཡིན་ནོ། །དུས་གསུམ་ལ་རྣམ་པར་ལྟ་བ་ཤེས་པར་སླ་བ་མ་ཡིན་ནོ། །ཏིང་ངེ་འཛིན་གྱི་སྤྱོད་ཡུལ་ལ་འཇུག་པ་ཤེས་པར་སླ་བ་མ་ཡིན་ནོ། །ཡེ་ཤེས་ཀྱི་ ཡུལ་ཤེས་པར་སླ་བ་མ་ཡིན་ནོ། །རྣམ་པར་ཐར་པས་རྣམ་པར་རོལ་པ་ཤེས་པར་སླ་བ་མ་ཡིན་ནོ། །འཕྲུལ་པའི་ལས་ཤེས་པར་སླ་བ་མ་ཡིན་ནོ། །བྱིན་གྱི་རླབས་ཀྱི་ལས་ཤེས་པར་ སླ་བ་མ་ཡིན་ནོ། །མཐའི་ལས་ཤེས་པར་སླ་བ་མ་ཡིན་པ་ནས། མདོར་བསྡུ་ན་གོམ་པ་འདོར་ཞིང་འདེགས་པའི་ལས་ཀྱི་བར་དུ་ཡང་བྱང་ཆུབ་སེམས་དཔའ་རྒྱལ་ཚབ་ཀྱི་གོ་ འཕང་ཐོབ་ཅིང༌། བྱང་ཆུབ་སེམས་དཔའི་ས་ལེགས་པའི་བློ་གྲོས་ལ་གནས་པ་རྣམས་ཀྱིས་ཀྱང་ཤེས་པར་སླ་བ་མ་ཡིན་ཏེ། ཀྱེ༑ རྒྱལ་བའི་སྲས། བྱང་ཆུབ་སེམས་དཔའི་ས་ ༄༅། །ཆོས་ཀྱི་སྤྲིན་འདི་ནི་མདོར་བསྡུས་ཏེ་བསྟན་ན་ཡང་དེ་ལྟར་ཚད་མེད་པ་སྟེ། རྒྱ་ཆེར་ནི་བསྐལ་པ་བརྒྱ་སྟོང་གྲངས་མེད་པས་ཀྱང་བསྟན་པའི་མཐར་ཐུག་པར་ མི་འགྱུར་བར་ཤེས་པར་བྱའོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ། རྒྱལ་བའི་སྲས། བྱང་ཆུབ་སེམས་དཔའ་རྣམས་ཀྱི་སྤྱོད་པའི་ཡུལ་དང༌། བྱིན་ གྱི་རླབས་ཀྱང་དེ་ལྟར་ཚད་མེད་ན། དེ་བཞིན་གཤེགས་པ་རྣམས་ཀྱི་སྤྱོད་ཡུལ་དང༌། ཡུལ་གྱི་རྒྱུད་ཅི་འདྲ་བ་ཞིག་ཡོད། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ། རྒྱལ་བའི་སྲས། འདི་ལྟ་སྟེ། དཔེར་ན། མི་ལ་ལ་ཞིག་གིས་གླིང་བཞི་པའི་འཇིག་རྟེན་གྱི་ཁམས་ནས་རྡེའུ་རྒྱ་ཤུག་གི་ཚིག་གུ་ཙམ་གཉིས་སམ། གསུམ་ཞིག་བླངས་ཏེ། འཇིག་རྟེན་གྱི་ཁམས་མཐའ་ཡས་པ་དག་ན། སའི་ཁམས་ཇི་སྙེད་ཡོད་པ་རྡོ་བ་འདི་ལས་ཇི་ཙམ་ཞིག་གིས་ལྷག་པར་འཕགས་ཤིང་ལྷག་པར་ཚད་མེད་ཅེས་ཟེར་བ་ཞིག་ ཡོད་ན། ཀྱེ། རྒྱལ་བའི་སྲས། དེ་ལྟར་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་ཚད་མེད་པ་མངའ་བ་རྣམས་ཀྱི་ཆོས་ ཉིད་བྱང་ཆུབ་སེམས་དཔའི་ཆོས་ཉིད་ཀྱིས་འཇལ་བ་ནི། ཁྱོད་ཀྱི་ཚིག་འདི་དེ་དང་འདྲ་བར་བདག་གིས་དཔགས་སོ། །ཀྱེ། རྒྱལ་བའི་སྲས། ཇི་ལྟར་གླིང་བཞི་པའི་འཇིག་ རྟེན་གྱི་ཁམས་ནས་གང་བླངས་པའི་སའི་ཁམས་ཅུང་ཟད་ལ་ལྷག་མ་ལས་ཚད་མེད་པ་དེ་བཞིན་དུ། ཀྱེ། རྒྱལ་བའི་སྲས། བྱང་ཆུབ་སེམས་དཔའི་ས་ཆོས་ཀྱི་སྤྲིན་འདི་ཁོ་ན་ཡང་ བསྐལ་པ་གྲངས་མེད་པར་ཤིན་ཏུ་བསྟན་ཀྱང་ཕྱོགས་ཙམ་ཞིག་བསྟན་དུ་ཟད་ན། དེ་བཞིན་གཤེགས་པའི་ས་ལྟ་སྨོས་སུ་འང་ག་ལ་ཡོད། ཀྱེ། རྒྱལ་བའི་སྲས། ཁྱོད་ཀྱིས་ ཁོང་དུ་ཆུད་པ་དང༌། ཡིད་ཆེས་པར་བྱ་ན། དེ་བཞིན་གཤེགས་པ་འདི་བདག་གི་མདུན་ན་དབང་དུ་བཞུགས་ཏེ། ཀྱེ། རྒྱལ་བའི་སྲས། གལ་ཏེ་ཕྱོགས་བཅུའི་ཕྱོགས་རེ་རེའི་ སངས་རྒྱས་ཀྱི་ཞིང་འཇིག་རྟེན་གྱི་ཁམས་མུ་མེད་པའི་རྡུལ་ཤིན་ཏུ་ཕྲ་བ་ཇི་སྙེད་ཅིག་ས་འདི་ལྟ་བུ་ཐོབ་པའི་བྱང་ཆུབ་སེམས་དཔའ་རྣམས་ཀྱིས་བུ་རམ་ཤིང་གི་ཚལ་ལམ། སྨིག་ མའི་ཚལ་ལམ། འོད་མའི་ཚལ་ལམ། ཏིལ་གྱི་ཞིང་ཐིབས་པོ་བཞིན་དུ། ཡོངས་སུ་གང་བར་གྱུར་ཀྱང༌། བྱང་ཆུབ་སེམས་དཔའི་སྤྱོད་པ་མངོན་པར་བསྒྲུབ་པ། བསྐལ་པ་མུ་ མེད་པར་མངོན་པར་བསྒྲུབས་པ་དེ་དག་གིས་ནི་དེ་བཞིན་གཤེགས་པའི་ཡེ་ཤེས་སྐད་ཅིག་ཡུད་ཙམ་ཐང་ཅིག་ཏུ་བྱུང་བའི་དེ་བཞིན་གཤེགས་པའི་ཡུལ་གྱི་བརྒྱའི་ཆར་ ཡང་ཉེ་བར་མི་འགྲོའོ། །སྟོང་གི་ཆ་དང༌། བརྒྱ་སྟོང་གི་ཆ་དང༌། བྱེ་བའི་ཆ་དང༌། བྱེ་བ་བརྒྱའི་ཆ་དང༌། བྱེ་བ་སྟོང་གི་ཆ་དང༌། བྱེ་བ་བརྒྱ་སྟོང་གི་ཆ་དང༌། བྱེ་བ་ཁྲག་ཁྲིག་བརྒྱ་ ༄༅། །སྟོང་གི་ཆར་ཡང་ཉེ་བར་མི་འགྲོ་བ་ནས། གྲངས་དང༌། ཆ་དང༌། བགྲང་བ་དང༌། དཔེ་དང༌། རྒྱུ་དང༌། བསྒྲུན་པ་ཙམ་དུ་ཡང་ཉེ་བར་མི་འགྲོའོ། །ཀྱེ༑ རྒྱལ་ བའི་སྲས། དེ་ལྟར་ཡེ་ཤེས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་དེ་བཞིན་གཤེགས་པའི་སྐུ་དང༌། གསུང་དང༌། ཐུགས་དང་གཉིས་སུ་མེད་པ་ནི། བྱང་ཆུབ་སེམས་ དཔའི་ཏིང་ངེ་འཛིན་གྱི་སྟོབས་ཀྱང་ཡོངས་སུ་མི་གཏོང་ལ། སངས་རྒྱས་བལྟ་བ་དང༌། མཆོད་པ་དང༌། རིམ་གྲོ་ཡང་རབ་ཏུ་བྱེད་དེ། བསྐལ་པ་རེ་རེ་ལ་ཡང་དེ་བཞིན་གཤེགས་ པ་མཐའ་ཡས་པ་ལ་མཆོད་པ་རྣམ་པ་ཐམས་ཅད་དུ་མངོན་པར་བསྒྲུབ་པའི་མཆོད་པ་རྒྱ་ཆེན་པོའི་རྗེས་སུ་སོང་བས་མཆོད་པ་བྱེད་དོ། །སངས་རྒྱས་བཅོམ་ལྡན་འདས་དེ་ དག་གི་བྱིན་གྱི་རླབས་ཀྱི་སྣང་བ་ཡང་ཡང་དག་པར་འཛིན་ཏོ། །དེ་ནི་སྔོན་པས་ཀྱང་བསྐལ་པ་དུ་མ་དང༌། བསྐལ་པ་བརྒྱ་ཕྲག་དུ་མ་དང༌། བསྐལ་པ་སྟོང་ཕྲག་དུ་མ་དང༌། བསྐལ་པ་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་དུ་མ་དང༌། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང༌། བསྐལ་པ་ཁྲག་ ཁྲིག་སྟོང་ཕྲག་དུ་མ་དང༌། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ཆོས་ཀྱི་དབྱིངས་ཡོངས་སུ་དྲིས་པ་ཤིན་ཏུ་བསྟན་ པས་མི་འཕྲོགས་པར་གནས་སོ། །ཀྱེ༑ རྒྱལ་བའི་སྲས་དག། འདི་ལྟ་སྟེ། དཔེར་ན། ལྷ་རྫས་ཀྱི་རྒྱན་གྱི་རྣམ་པ་མགར་བས་མ་བརྡུངས་པ་རིན་པོ་ཆེའི་དམ་པས་སྤྲས་པ། ལྷའི་རྒྱལ་ པོ་དབང་སྒྱུར་གྱི་ཡན་ལག་གི་དམ་པ་མགོའམ། མགུལ་དུ་བཏགས་ན། དེ་མ་ཡིན་པའི་ལྷ་དང༌། མིའི་རྒྱན་གྱི་རྣམ་པ་གཞན་གྱིས་མི་འཕྲོགས་ཤིང་མི་ཐུབ་པ་ཡིན། ཀྱེ༑ རྒྱལ་ བའི་སྲས། དེ་བཞིན་དུ་བྱང་ཆུབ་སེམས་དཔའི་ས་བཅུ་པ་ཆོས་ཀྱི་སྤྲིན་འདི་ཐོབ་པའི་བྱང་ཆུབ་སེམས་དཔའི་ཡེ་ཤེས་ཀྱི་རྒྱུད་དེ་དག་ཀྱང་སེམས་ཅན་ཐམས་ཅད་དང༌། ཉན་ ཐོས་དང༌། རང་སངས་རྒྱས་ཐམས་ཅད་དང༌། བྱང་ཆུབ་སེམས་དཔའི་ས་དང་པོ་ཉེ་བར་བཟུང་བ་ཡན་ཆད་བྱང་ཆུབ་སེམས་དཔའི་ས་དགུ་པ་ཐོབ་པའི་བར་གྱི་བྱང་ཆུབ་སེམས་ དཔའ་རྣམས་ཀྱིས་ཀྱང་མི་འཕྲོགས་པ་ཡིན། བྱང་ཆུབ་སེམས་དཔའི་ས་འདི་ལ་གནས་པའི་ཡེ་ཤེས་སྣང་བ་ནི་སེམས་ཅན་རྣམས་ཐམས་ཅད་མཁྱེན་པའི་ཡེ་ཤེས་ལ་གཟུད་ པའི་རྒྱུ་ཡིན་ཏེ། དེ་མ་ཡིན་པའི་ཡེ་ཤེས་སྣང་བ་གཞན་གྱིས་མི་འཕྲོགས་སོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། ལྷའི་རྒྱལ་པོ་དབང་ཕྱུག་ཆེན་པོའི་འོད་ཀྱིས་ནི་ སྐྱེ་བའི་སྐྱེ་མཆེད་ཐམས་ཅད་དུའང་ཁྱབ་ལ། སེམས་ཅན་རྣམས་ཀྱི་ལུས་ཀྱང་སིམ་པར་བྱེད་དོ། །ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་བཅུ་པ་འདི་ ༄༅། །ལ་གནས་པའི་བྱང་ཆུབ་སེམས་དཔའི་ཡེ་ཤེས་སྣང་བ་ཡང་ཉན་ཐོས་དང༌། རང་སངས་རྒྱས་ཐམས་ཅད་དང༌། བྱང་ཆུབ་སེམས་དཔའི་ས་དང་པོ་ཉེ་བར་བཟུང་ བ་ཡན་ཆད་བྱང་ཆུབ་སེམས་དཔའི་ས་དགུ་པ་ལ་གནས་པའི་བར་གྱི་བྱང་ཆུབ་སེམས་དཔའ་རྣམས་ཀྱིས་ཀྱང་མི་འཕྲོགས་པ་ཡིན། ཐམས་ཅད་མཁྱེན་པའི་ཡེ་ཤེས་ཀྱི་བར་གྱི་ ཆོས་ཉིད་ལ་ཡང་སེམས་ཅན་རྣམས་རབ་ཏུ་གཞོག་གོ། ཀྱེ༑ རྒྱལ་བའི་སྲས། བྱང་ཆུབ་སེམས་དཔའི་ཡེ་ཤེས་དེ་ལྟ་བུ་དང་ལྡན་པ་ལ་ནི། སངས་རྒྱས་བཅོམ་ལྡན་འདས་ རྣམས་ཀྱིས་དུས་གསུམ་གྱི་ཡེ་ཤེས་ཡང་དག་པར་བསྟན་ཏོ། །ཆོས་ཀྱི་དབྱིངས་རབ་ཏུ་ཕྱེ་བའི་ཡེ་ཤེས་དང༌། འཇིག་རྟེན་གྱི་ཁམས་ཐམས་ཅད་རྒྱས་པར་དགང་བ་དང༌། འཇིག་རྟེན་གྱི་ཁམས་ཐམས་ཅད་དུ་སྣང་བར་བྱིན་གྱིས་བརླབ་པ་དང༌། སེམས་ཅན་ཐམས་ཅད་དང༌། ཞིང་གི་ཆོས་ཡོངས་སུ་ཤེས་པར་བྱ་བ་དང༌། སེམས་ཅན་ཐམས་ཅད་ ཀྱི་སེམས་དང༌། སྤྱོད་པ་ལ་འཇུག་པའི་ཡེ་ཤེས་ནས། མདོར་བསྡུ་ན་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་བར་དུ་ཡང་དག་པར་བསྟན་ཏོ། །དེའི་ཕ་རོལ་ཏུ་ཕྱིན་ པ་བཅུ་ལས་ཡེ་ཤེས་ཀྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ཀྱེ༑ རྒྱལ་བའི་སྲས། འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་སྤྲིན་ཅེས་བྱ་བ། བྱང་ཆུབ་སེམས་ དཔའི་ས་བཅུ་པ་མདོར་བསྟན་པའོ། །རྒྱ་ཆེར་ནི་བསྐལ་བ་གྲངས་མེད་པ་མུ་མེད་པས་བསྟན་པའི་མཐར་ཐུག་པར་ཤེས་པར་བྱའོ། །དེ་ལ་གནས་པའི་བྱང་ཆུབ་སེམས་དཔའ་ནི་ ཕལ་ཆེར་ལྷའི་རྒྱལ་པོ་དབང་ཕྱུག་ཆེན་པོར་འགྱུར་ཏེ། སེམས་ཅན་རྣམས་ལ་ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་བསྟན་པ་ལ་མཁས་ཤིང་ མཐུ་ཡོད་པ་ཡིན། ཆོས་ཀྱི་དབྱིངས་རྣམ་པར་ཕྱེ་བ་ཡོངས་སུ་དྲིས་པ་བསྟན་པས་མི་འཕྲོགས་པ་ཡིན། སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་ བའི་རྩ་བ་གང་ཇི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས། ཐམས་ཅད་མཁྱེན་པའི་ཡེ་ཤེས་ལ་བརྟེན་པའི་བར་དུ་འགྱུར་སྙམ་ཏེ། སངས་རྒྱས་ཡིད་ལ་བྱ་ བ་དང༌། ཆོས་ཡིད་ལ་བྱ་བ་དང༌། དགེ་འདུན་ཡིད་ལ་བྱ་བ་དང༌། བྱང་ཆུབ་སེམས་དཔའ་ཡིད་ལ་བྱ་བ་དང༌། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང༌། བྱང་ཆུབ་ སེམས་དཔའི་ས་ཡིད་ལ་བྱ་བ་དང༌། ཕ་རོལ་ཏུ་ཕྱིན་པ་ཡིད་ལ་བྱ་བ་དང༌། སྟོབས་ཡིད་ལ་བྱ་བ་དང༌། མི་འཇིགས་པ་ཡིད་ལ་བྱ་བ་དང༌། སངས་རྒྱས་ཀྱི་ཆོས་མ་འདྲེས་པ་ཡིད་ལ་ ༄༅། །བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། དེ་འདོད་ན་ སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་སངས་རྒྱས་ཀྱི་ཞིང་བརྗོད་དུ་མེད་པ་བྱ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་འཐོབ་ཅིང༌། དེ་དག་ལ་ སྙོམས་པར་འཇུག་པ་དང༌། སངས་རྒྱས་སངས་རྒྱས་ཀྱི་ཞིང་བརྗོད་དུ་མེད་བ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་མཐོང་བ་དང༌། དེ་དག་གི་བྱིན་གྱི་ རླབས་ཀྱང་ཡང་དག་པར་ཤེས་པ་དང༌། འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སྐྱོད་པ་ དང༌། སངས་རྒྱས་ཀྱི་ཞིང་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དུ་འགྲོ་བ་དང༌། འཇིག་རྟེན་གྱི་ཁམས་ སངས་རྒྱས་ཀྱི་ཞིང་བརྗོད་དུ་མེད་པ་བྱེད་པ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སྣང་བར་བྱ་བ་དང༌། སེམས་ཅན་སངས་རྒྱས་ཀྱི་ཞིང་བརྗོད་དུ་མེད་པ་ བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྨིན་པར་བྱ་བ་དང༌། བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དུ་གནས་པར་བྱ་བ་དང༌། སྔོན་གྱི་མཐའ་དང༌། ཕྱི་མའི་མཐའི་བསྐལ་བ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ བཅུའི་རྡུལ་ཤིན་ཏུ་ཕྲ་བ་ལ་རབ་ཏུ་འཇུག་པ་དང༌། ཆོས་ཀྱི་སྒོ་སངས་རྒྱས་ཀྱི་ཞིང་བརྗོད་དུ་མེད་པ་བྱེད་པ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རྣམ་པར་དབྱེ་ བར་བྱ་བ་དང༌། ལུས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་བསྟན་པ་དང༌། ལུས་རེ་རེ་ལ་ཡང་བྱང་ཆུབ་ སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡང་དག་པར་བསྟན་པའི་བརྩོན་འགྲུས་ཀྱི་རྣམ་པ་དེ་ལྟ་ བུ་རྩོམ་མོ། །དེ་ཡང་ཆད་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དམ། རྫུ་ འཕྲུལ་ལམ། མིག་གམ། སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་ དུ་མ་དང༌། བསྐལ་བ་བརྒྱ་ཕྲག་དུ་མ་དང༌། བསྐལ་བ་སྟོང་ཕྲག་དུ་མ་དང༌། བསྐལ་བ་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའོ། །ཀྱེ༑ རྒྱལ་བའི་སྲས། བྱ་ ༄༅། །ཆུབ་སེམས་དཔའི་ས་བཅུ་པ་དེ་དག་ནི། རིམ་གྱིས་མངོན་དུ་གཞོལ་བས་ཐམས་ཅད་མཁྱེན་པའི་ཡེ་ཤེས་ལ་རྣམ་པ་ཐམས་ཅད་རྗེས་སུ་སོང་བར་ བལྟའོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། མཚོ་ཆེན་པོ་མ་དྲོས་པ་ལས་བྱུང་བའི་འབབ་ཆུ་ནི་ཆུ་ཀླུང་ཆེན་པོའི་རྒྱུད་ཀྱི་སྒོ་བཞིས་འཛམ་བུའི་གླིང་ཡོངས་སུ་ ངོམས་པར་བྱས་ནས་མི་ཟད་པར་བྱས་ཏེ། གོང་དུ་རྣམ་པར་འཕེལ་བ་དང༌། རྒྱ་མཚོ་ཆེན་པོའི་བར་དུ་ཞེན་པར་འགྱུར་ཏེ། ཆུ་དེ་ནི་ཐོག་མ་ནས་ཀྱང་རྒྱ་མཚོ་ཆེན་པོ་ལ་ མངོན་པར་གཞོལ་བ་ཡིན་ཏེ། ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་ཀྱི་སེམས་ལས་བྱུང་བའི་དགེ་བའི་རྩ་བའི་ཆུ་འབབ་པ་ཡང་སྨོན་ལམ་ཆེན་པོའི་ཆུ་ཀླུང་གི་ རྒྱུན་གྱི་སྒོ་ནས་བསྡུ་བའི་དངོས་པོ་བཞིས་སེམས་ཅན་གྱི་ཁམས་ངོམས་པར་བྱས་ཏེ། མི་ཟད་པར་བྱས་ནས་གོང་དུ་རྣམ་པར་འཕེལ་བ་དང༌། རྣམ་པ་ཐམས་ཅད་དུ་ཐམས་ ཅད་མཁྱེན་པའི་ཡེ་ཤེས་ཀྱི་བར་གྱི་རྒྱ་མཚོ་ཆེན་པོ་ལ་ཞེན་པར་འགྱུར་ཏེ། དགེ་བའི་རྩ་བའི་ཆུ་དེ་ནི་ཐོག་མ་ནས་ཀྱང་ཐམས་ཅད་མཁྱེན་པ་ཉིད་ཀྱི་རྒྱ་མཚོ་ཆེན་པོ་ལ་མངོན་ པར་གཞོལ་བ་ཡིན། ཀྱེ༑ རྒྱལ་བའི་སྲས། བྱང་ཆུབ་སེམས་དཔའི་ས་བཅུ་པོ་དེ་དག་ནི། སངས་རྒྱས་ཀྱི་ཡེ་ཤེས་ཀྱི་གཞི་ལས་ཡོད་པར་འགྱུར་ཏེ། ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། ས་ཆེན་པོའི་གཞི་ལས་རིའི་རྒྱལ་པོ་ཆེན་པོ་བཅུ་ཡོད་པར་གྱུར་པ་འདི་ལྟ་སྟེ། རིའི་རྒྱལ་པོ་ཆེན་པོ་ཁ་བ་ཅན་དང༌། རིའི་རྒྱལ་པོ་ཆེན་པོ་སྤོས་ཀྱི་ངད་ཅན་དང་ རིའི་རྒྱལ་པོ་ཆེན་པོ་རྣམ་པར་འདལ་བ་དང༌། རིའི་རྒྱལ་པོ་ཆེན་པོ་དྲང་སྲོང་རི་དང༌། རིའི་རྒྱལ་པོ་ཆེན་པོ་གཉའ་ཤིང་འཛིན་དང༌། རིའི་རྒྱལ་པོ་ཆེན་པོ་རྟ་རྣ་རི་དང༌། རིའི་རྒྱལ་ པོ་ཆེན་པོ་ས་འཛིན་དང༌། རིའི་རྒྱལ་པོ་ཆེན་པོ་ཁོར་ཡུག་དང༌། རིའི་རྒྱལ་པོ་ཆེན་པོ་དཔལ་ཅན་དང༌། རིའི་རྒྱལ་པོ་ཆེན་པོ་རི་རབ་བོ། །ཀྱེ། རྒྱལ་བའི་སྲས། དེ་ལ་འདི་ལྟ་སྟེ། དཔེར་ན། རིའི་རྒྱལ་པོ་ཆེན་པོ་ཁ་བ་ཅན་ནི། སྨན་གྱི་རྣམ་པ་ཐམས་ཅད་ཀྱི་འབྱུང་གནས་ཏེ། སྨན་སྣ་ཚོགས་ཐམས་ཅད་བླང་བས་མཐར་ཐུག་པ་མེད་དོ། །ཀྱེ༑ རྒྱལ་བའི་ སྲས༑ དེ་བཞིན་དུ་བྱང་ཆུབ་སེམས་དཔའི་ས་རབ་ཏུ་དགའ་བ་ལ་གནས་པའི་བྱང་ཆུབ་སེམས་དཔའ་ཡང་འཇིག་རྟེན་པའི་གཙུག་ལག་དང༌། ཚིག་དང༌། སྔགས་དང༌། རིག་ པའི་གནས་ཀྱི་འབྱུང་གནས་ཡིན་ཏེ། འཇིག་རྟེན་པའི་གཙུག་ལག་དང༌། ཚིག་དང༌། སྔགས་དང༌། རིག་པའི་གནས་བསྟན་པས་མཐར་ཐུག་པ་མེད་དོ། །ཀྱེ༑ རྒྱལ་བའི་ སྲས། འདི་ལྟ་སྟེ། དཔེར་ན། རིའི་རྒྱལ་པོ་ཆེན་པོ་སྤོས་ཀྱི་ངད་ཅན་ནི། སྤོས་ཀྱི་རྣམ་པ་ཐམས་ཅད་ཀྱི་འབྱུང་གནས་ཡིན་ཏེ། སྤོས་ཀྱི་རྣམ་པ་སྣ་ཚོགས་བླང་པས་མཐར་ཐུག་ ༄༅། །པ་མེད་དོ། །ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་དྲི་མ་དང་བྲལ་བ་ལ་གནས་པའི་བྱང་ཆུབ་སེམས་དཔའ་ཡང་བྱང་ཆུབ་སེམས་ དཔའི་ཚུལ་ཁྲིམས་དང༌། སྡོམ་པ་དང༌། ཚུལ་ཐམས་ཅད་ཀྱི་འབྱུང་གནས་ཡིན་ཏེ། བྱང་ཆུབ་སེམས་དཔའི་ཚུལ་ཁྲིམས་དང༌། སྡོམ་པ་དང༌། ཚུལ་རྣམ་པ་སྣ་ཚོགས་ཀྱི་ སྤོས་ཀྱི་མཐར་ཐུག་པ་མེད་དོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། རིའི་རྒྱལ་པོ་རྣམ་པར་འདལ་བ་ནི། རིན་པོ་ཆེའི་རང་བཞིན་ཤིན་ཏུ་དག་པ། རིན་པོ་ཆེའི་ རྣམ་པ་ཐམས་ཅད་ཀྱི་འབྱུང་གནས་ཡིན་ཏེ༑ རིན་པོ་ཆེ་རྣམ་པ་སྣ་ཚོགས་ཐམས་ཅད་བླང་བས་ཟད་པ་མེད་དོ། །ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ ས་འོད་བྱེད་པ་ལ་གནས་པའི་བྱང་ཆུབ་སེམས་དཔའ་ཡང་འཇིག་རྟེན་བའི་བསམ་གཏན་དང༌། མངོན་པར་ཤེས་པ་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་ པར་འཇུག་པ་རྣམས་ཀྱི་འབྱུང་གནས་ཡིན་ཏེ། འཇིག་རྟེན་པའི་བསམ་གཏན་དང༌། མངོན་པར་ཤེས་པ་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་ འཇུག་པ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། རིའི་རྒྱལ་པོ་ཆེན་པོ་དྲང་སྲོང་རི་ནི། རིན་པོ་ཆེའི་རང་བཞིན་རྣམ་པར་ དག་པ། དྲང་སྲོང་མངོན་པར་ཤེས་པ་ལྔ་དང་ལྡན་པའི་འབྱུང་གནས་ཡིན་ཏེ། མངོན་པར་ཤེས་པ་ལྔ་དང་ལྡན་པའི་དྲང་སྲོང་བགྲང་བས་ཟད་པ་མེད་དོ། །ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་འོད་འཕྲོ་བ་ཅན་གནས་པའི་བྱང་ཆུབ་སེམས་དཔའ་ཡང་ལམ་དང་ལམ་མ་ཡིན་པའི་ཁྱད་དང༌། བྱེ་བྲག་ཤེས་པ་ཐམས་ཅད་ཀྱི་འབྱུང་ གནས་ཡིན་ཏེ། ལམ་དང་ལམ་མ་ཡིན་པའི་ཁྱད་དང༌། བྱེ་བྲག་གི་རྒྱུད་ཡོངས་སུ་དྲིས་པ་ཡོངས་སུ་བསྟན་པས་ཟད་པར་མི་འགྱུར་རོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། རིའི་རྒྱལ་པོ་ཆེན་པོ་གཉའ་ཤིང་འཛིན་ནི། རིན་པོ་ཆེའི་རང་བཞིན་རྣམ་པར་དག་པ། གནོད་སྦྱིན་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་གནས་ཡིན་ཏེ། གནོད་སྦྱིན་རྫུ་འཕྲུལ་ཆེན་པོ་ཅན་བགྲང་བས་ཟད་པ་མེད་དོ། །ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་ལ་གནས་པའི་བྱང་ ཆུབ་སེམས་དཔའ་ཡང་མངོན་པར་ཤེས་པ་དང༌། རྫུ་འཕྲུལ་དང༌། རྣམ་པར་འཕྲུལ་པ་དང༌། ཆོ་འཕྲུལ་ཐམས་ཅད་ཀྱི་འབྱུང་གནས་ཡིན་ཏེ། མངོན་པར་ཤེས་པ་དང༌། རྫུ་ འཕྲུལ་དང༌། རྣམ་པར་འཕྲུལ་བ་དང༌། ཆོ་འཕྲུལ་ཡོངས་སུ་དྲིས་པ་བསྟན་པ་ཟད་པ་མེད་དོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། རིའི་རྒྱལ་པོ་ཆེན་པོ་རྟ་རྣ་རི་ནི། ༄༅། །རིན་པོ་ཆེའི་རང་བཞིན་རྣམ་པར་དག་པ། ཤིང་ཏོག་གི་རྣམ་པ་ཐམས་ཅད་ཀྱི་འབྱུང་གནས་ཡིན་ཏེ། ཤིང་ཏོག་རྣམ་པ་སྣ་ཚོགས་ཐམས་ཅད་བླང་ བས་ཟད་པར་མི་འགྱུར་རོ། །ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་མངོན་སུམ་ལ་གནས་པའི་བྱང་ཆུབ་སེམས་དཔའ་ཡང་རྟེན་ཅིང་འབྲེལ་བར་ འབྱུང་བ་ལ་འཇུག་པ་ཤིན་ཏུ་བསྟན་པའི་འབྱུང་གནས་ཡིན་ཏེ། ཉན་ཐོས་ཀྱི་འབྲས་བུ་མངོན་པར་ཁོང་དུ་ཆུད་པར་བྱ་བ་ཡོངས་སུ་དྲིས་པ་བསྟན་པས་ཟད་པ་མེད་དོ། ། ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། རིའི་རྒྱལ་པོ་ཆེན་པོ་ས་འཛིན་ནི། རིན་པོ་ཆེའི་རང་བཞིན་རྣམ་པར་དག་པ། ཀླུ་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་ གནས་ཡིན་ཏེ། ཀླུ་རྫུ་འཕྲུལ་ཆེན་པོ་ཅན་བགྲང་བས་ཟད་པ་མེད་དོ། །ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་རིང་དུ་སོང་བ་ལས་གནས་པའི་བྱང་ཆུབ་ སེམས་དཔའ་ཡང་ཐབས་དང་ཤེས་རབ་ཤིན་ཏུ་བསྟན་པའི་འབྱུང་གནས་ཡིན་ཏེ། རང་སངས་རྒྱས་ཀྱི་འབྲས་བུ་མངོན་པར་ཁོང་དུ་ཆུད་པར་བྱ་བ་ཡོངས་སུ་དྲིས་པ་བསྟན་ པས་ཟད་པ་མེད་དོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། རིའི་རྒྱལ་པོ་ཆེན་པོ་ཁོར་ཡུག་ནི། རིན་པོ་ཆེ་ཆེན་པོའི་རང་བཞིན་རྣམ་པར་དག་པ། དབང་དུ་གྱུར་ པ་རྣམས་ཀྱི་འབྱུང་གནས་ཡིན་ཏེ། དབང་དུ་གྱུར་པ་བགྲང་བས་ཟད་པ་མེད་དོ། །ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་མི་གཡོ་བ་ལ་གནས་པའི་བྱང་ཆུབ་སེམས་ དཔའ་ཡང་བྱང་ཆུབ་སེམས་དཔའི་དབང་མངོན་པར་སྒྲུབ་པ་ཡོངས་སུ་དྲིས་པ་ཤིན་ཏུ་བསྟན་པའི་འབྱུང་གནས་ཡིན་ཏེ། འཇིག་རྟེན་གྱི་ཁམས་རྣམ་པར་ཕྱེ་བ་ཡོངས་སུ་དྲིས་ པ་བསྟན་པས་ཟད་པ་མེད་དོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། རིའི་རྒྱལ་པོ་དཔལ་དང་ལྡན་པ་ནི། རིན་པོ་ཆེའི་རང་བཞིན་རྣམ་པར་དག་པ། ལྷ་མ་ཡིན་རྫུ་ འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་གནས་ཡིན་ཏེ། ལྷ་མ་ཡིན་རྫུ་འཕྲུལ་ཆེན་པོ་ཅན་བགྲང་བས་ཟད་པ་མེད་དོ། །ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་ དཔའ་ས་ལེགས་པའི་བློ་གྲོས་ལ་གནས་པའི་བྱང་ཆུབ་སེམས་དཔའ་ཡང་སེམས་ཅན་འབྱུང་བ་དང༌། འཇིག་པ་ཤེས་པའི་རྒྱུད་ཐམས་ཅད་ཀྱི་འབྱུང་གནས་ཡིན་ཏེ། འགྲོ་ བ་ཐམས་ཅད་འབྱུང་བ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ༑ རྒྱལ་བའི་སྲས། འདི་ལྟ་སྟེ། དཔེར་ན། རིའི་རྒྱལ་པོ་ཆེན་པོ་རི་རབ་ནི། རིན་པོ་ཆེའི་རང་བཞིན་ རྣམ་པར་དག་པ། ལྷ་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་གནས་ཡིན་ཏེ། ལྷ་རྫུ་འཕྲུལ་ཆེན་པོ་ཅན་བགྲང་བས་ཟད་པ་མེད་དོ། །ཀྱེ༑ རྒྱལ་བའི་སྲས། དེ་བཞིན་ ༄༅། །དུ༑ བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔའ་ཡང་དེ་བཞིན་གཤེགས་པའི་སྟོབས་དང༌། མི་འཇིགས་པ་ དང༌། སངས་རྒྱས་ཀྱི་ཆོས་མ་འདྲེས་པ་རྣམས་ཀྱི་འབྱུང་གནས་ཡིན་ཏེ། སངས་རྒྱས་ཀྱི་འཕྲིན་ལས་ཡང་དག་པར་བསྟན་པ་ཡོངས་སུ་དྲིས་པ་བསྟན་པས་ཟད་པ་མེད་དོ། ། ཀྱེ༑ རྒྱལ་བའི་སྲས། ཇི་ལྟར་རིན་པོ་ཆེའི་རི་ཆེན་པོ་དེ་དག་རྒྱ་མཚོ་ཆེན་པོ་ལས་བྱུང་ཞིང༌། རྒྱ་མཚོ་ཆེན་པོ་ལས་སྨོས་པ་དེ་བཞིན་དུ། ཀྱེ༑ རྒྱལ་བའི་སྲས། བྱང་ཆུབ་ སེམས་དཔའི་ས་བཅུ་པོ་འདི་དག་ཀྱང་ཐམས་ཅད་མཁྱེན་པ་ཉིད་ལས་བྱུང་བའོ། །ཐམས་ཅད་མཁྱེན་པ་ཉིད་ལས་སྨོས་པའོ། །ཀྱེ༑ རྒྱལ་པའི་སྲས། འདི་ལྟ་སྟེ། དཔེར་ ན༑ རྒྱ་མཚོ་ཆེན་པོ་ནི་རྣམ་པ་བཅུས་མི་འཕྲོགས་པའི་ཕྱིར་རྒྱ་མཚོའི་གྲངས་སུ་འགྲོ་སྟེ། བཅུ་གང་ཞེ་ན། འདི་ལྟ་སྟེ། རིམ་གྱིས་གཞོལ་བ་དང༌། ཤི་བའི་རོ་དང་ མི་འགྲོགས་པ་དང༌། ཆུ་གཞན་གྱི་གྲངས་ཡོངས་སུ་སྤངས་པ་དང༌། རོ་གཅིག་པ་དང༌། རིན་པོ་ཆེ་མང་བ་དང༌། ཟབ་ཅིང་གཏིང་རིང་བ་དང༌། ཡངས་ཤིང་ཚད་མེད་ པ་དང༌། འབྱུང་པོ་མང་པོའི་གནས་སུ་གྱུར་པ་དང༌། དབྲེས་ཀྱི་ཚུལ་ལས་མི་འདའ་བ་དང༌། སྤྲིན་ཆེན་པོའི་ཆར་ཐམས་ཅད་ཡོངས་སུ་འཛིན་པས་མི་ངོམས་པའོ།། ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའ་ཡང་སྤྱོད་པའི་རྣམ་པ་བཅུས་མི་འཕྲོགས་པའི་གྲངས་སུ་འགྲོའོ། །བཅུ་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའི་ ས་རབ་ཏུ་དགའ་བ་ལ་སྨོན་ལམ་ཆེན་པོ་རིམ་གྱིས་མངོན་པར་བསྒྲུབ་པས་གཞོལ་བ་དང༌། བྱང་ཆུབ་སེམས་དཔའི་ས་དྲི་མ་དང་བྲལ་བ་ལ་ཚུལ་ཁྲིམས་ངན་པའི་རོ་དང་མི་ འགྲོགས་པ་དང༌། བྱང་ཆུབ་སེམས་དཔའི་ས་འོད་བྱེད་པ་ལ་འཇིག་རྟེན་པ་རྣམ་པར་གདགས་པའི་གྲངས་ཡོངས་སུ་སྤངས་པ་དང༌། བྱང་ཆུབ་སེམས་དཔའི་ས་འོད་ འཕྲོ་བ་ཅན་ལ་སངས་རྒྱས་ལ་མོས་པ་མི་ཕྱེད་པའི་རོ་གཅིག་པ་དང༌། བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་ལ་ཐབས་དང༌། མངོན་པར་ཤེས་པ་ཚད་ མེད་པས་འཇིག་རྟེན་གྱི་བྱ་བ་མངོན་པར་བསྒྲུབ་པའི་རིན་པོ་ཆེ་མང་བ་དང༌། བྱང་ཆུབ་སེམས་དཔའི་ས་མངོན་སུམ་ལ་རྟེན་ཅིང་འབྲེལ་པར་འབྱུང་བ་རབ་ཏུ་བརྟག་པས་ ཤིན་ཏུ་ཟབ་པ་དང༌། བྱང་ཆུབ་སེམས་དཔའི་ས་རིང་དུ་སོང་བ་ལ་བློ་དང༌། རྣམ་པར་འབྱེད་པ་དང༌། མཁས་པ་ཡངས་ཤིང་ཚད་མེད་པ་དང༌། བྱང་ཆུབ་སེམས་དཔའི་ ས་མི་གཡོ་བ་ལ་རྒྱན་ཆེན་པོ་མངོན་པར་བསྒྲུབ་པ་ཡང་དག་པར་བསྟན་པའི་འབྱུང་པོ་མང་པོ་གནས་པ་དང༌། བྱང་ཆུབ་སེམས་དཔའི་ས་ལེགས་པའི་བློ་གྲོས་ལ་རྣམ་ ༄༅། །པར་ཐར་པ་ཟབ་མོ་དང༌། འགྲོ་བ་ཐམས་ཅད་ཀྱི་སྤྱོད་པ་ཇི་ལྟ་བ་བཞིན་དུ་ཁོང་དུ་ཆུད་པའི་ཚུལ་གྱིས་དབྲེས་ལས་མི་འདའ་བ་དང༌། བྱང་ཆུབ་སེམས་ དཔའི་ས་ཆོས་ཀྱི་སྤྲིན་ལ་དེ་བཞིན་གཤེགས་པ་ཐམས་ཅད་ཀྱི་ཆོས་སྣང་བའི་སྤྲིན་ཆེན་པོའི་ཆར་ཡང་དག་པར་བཟུང་བས་མི་ངོམས་པའོ། །ཀྱེ༑ རྒྱལ་བའི་སྲས་། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ནི། རིན་པོ་ཆེའི་མཁན་པོ་མཁས་པས་ཤིན་ཏུ་བསྲེགས། ཤིན་ཏུ་བསྒྲུབས། ཤིན་ཏུ་སྦྱངས། ཤིན་ཏུ་དག་པར་བྱས། །ལེགས་པར་ ཕུག །རིན་པོ་ཆེའི་སྲད་བུས་ལེགས་པར་བཏགས། རིན་པོ་ཆེ་བཻ་ཌཱུཪྻའི་རྩ་བའི་རྒྱལ་མཚན་གྱི་རྩེ་མོ་ལ་བཞག་སྟེ། འོད་ཐམས་ཅད་འབྱུང་བར་གྱུར་ལ་རྒྱལ་པོས་བསྔགས་ པར་གྱུར་ཏེ། རིན་པོ་ཆེའི་རིགས་བཅུ་ལས་འདས་ཤིང་ཤིན་ཏུ་འཕགས་པར་གྱུར་པ་དེའི་ཚེ། སེམས་ཅན་ཐམས་ཅད་ལ་རིན་པོ་ཆེས་ཕན་གདགས་པའི་དོན་དུ་ཉེ་ བར་གནས་པ་ཡིན། ཀྱེ༑ རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ཐམས་ཅད་མཁྱེན་པ་ཉིད་ཀྱི་སེམས་རིན་པོ་ཆེ་བསྐྱེད་པ་ཡང་སྦྱངས་པའི་ཡོན་ཏན་ གྱི་སྡོམ་པ་དང༌། ཚུལ་ཁྲིམས་དང༌། བརྟུལ་ཞུགས་དང༌། དཀའ་ཐུབ་ཀྱིས་ཤིན་ཏུ་བསྲེགས། བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པས་ཤིན་ཏུ་བསྒྲུབས། ལམ་གྱི་ཡན་ལག་གི་རྣམ་པས་ཤིན་ཏུ་སྦྱངས། ཐབས་དང་མངོན་པར་ཤེས་པས་ཤིན་ཏུ་དག་པར་བྱས། རྟེན་ཅིང་འབྲེལ་བར་ འབྱུང་བས་ཤིན་ཏུ་ཕུག། ཐབས་དང་ཤེས་རབ་རིན་པོ་ཆེ་སྣ་ཚོགས་ཀྱི་སྲད་བུས་ཤིན་ཏུ་བཏགས། དབང་གི་རིན་པོ་ཆེ་བཻ་ཌཱུཪྻའི་ཡུ་བའི་རྒྱལ་མཚན་གྱི་རྩེ་མོ་ལ་བཞག ། སེམས་ཅན་གྱི་སྤྱོད་པ་རབ་ཏུ་བརྟགས་པ་དང༌། ཐོས་པའི་ཡེ་ཤེས་ཀྱི་འོད་རབ་ཏུ་འབྱུང་བར་འགྱུར་ཏེ། ཆོས་ཀྱི་རྒྱལ་པོ་དེ་བཞིན་གཤེགས་པས་ཡང་དག་པར་རྫོགས་པའི་ སངས་རྒྱས་ཀྱི་ཡེ་ཤེས་ཀྱི་མངོན་པར་དབང་བསྐུར་བས་དབང་བསྐུར་བར་གྱུར་པ་དེའི་ཚེ། སེམས་ཅན་ཐམས་ཅད་ལ་སངས་རྒྱས་ཀྱི་འཕྲིན་ལས་རིན་པོ་ཆེ་ཆེན་པོ་ཐམས་ ཅད་ཀྱིས་ཡང་དག་པར་ཕན་གདགས་པའི་དོན་དུ་ཉེ་བར་གནས་པ་ཡིན་ཏེ། དེའི་ཚེ་ཐམས་ཅད་མཁྱེན་པ་ཞེས་ཀྱང་བྱའོ། །ཀྱེ༑ རྒྱལ་བའི་སྲས། བྱང་ཆུབ་སེམས་དཔའི་ སྤྱོད་པ་ཡང་དག་པར་བསྒྲུབ་ཅིང༌། རྣམ་པ་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་དང༌། ཡོན་ཏན་ཡང་དག་པར་བསགས་པའི་ཆོས་ཀྱི་སྒོའི་རྒྱུད་འདི་ནི། སེམས་ ཅན་དགེ་བའི་རྩ་བ་མ་བསྐྱེད་པ་རྣམས་ཀྱི་རྣ་ལམ་དུ་གྲག་པར་མི་འགྱུར་རོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ༑ རྒྱལ་བའི་སྲས། འོ་ན་རྣམ་པ་ཐམས་ ༄༅། །ཅད་དུ་ཐམས་ཅད་མཁྱེན་པའི་ཡེ་ཤེས་དང༌། ཡོན་ཏན་ཡང་དག་པར་བསགས་པའི་ཆོས་ཀྱི་སྒོའི་རྒྱུད་འདི་གང་གི་རྣ་ལམ་དུ་གྲག་པར་གྱུར་པ་དེ་ དག་བསོད་ནམས་ཀྱི་ཚོགས་ཅི་ཙམ་ཞིག་དང་ལྡན་པར་འགྱུར། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ༑ རྒྱལ་བའི་སྲས། ཐམས་ཅད་མཁྱེན་པའི་ཡེ་ ཤེས་ཀྱི་མཐུ་ཇི་ཙམ་པ་དེ་སྙེད་ཀྱི་བསོད་ནམས་ཀྱི་ཚོགས་ནི་ཐམས་ཅད་མཁྱེན་པ་ཉིད་དུ་སེམས་བསྐྱེད་ཅིང་བསྒྲུབ་པར་དམིགས་པ་ལ་ཡོད་དེ། ཆོས་ཀྱི་སྒོའི་རྒྱུད་ འདི་གྲག་ཅིང་མངོན་པར་གྱུར་པའི་བསོད་ནམས་ཀྱི་ཚོགས་ཀྱང་དེ་ཙམ་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། ཀྱེ༑ རྒྱལ་བའི་སྲས། རྣམ་པ་ཐམས་ཅད་དུ་ཐམས་ཅད་ མཁྱེན་པའི་ཡེ་ཤེས་དང༌། ཡོན་ཏན་ཡང་དག་པར་བསགས་པའི་ཆོས་ཀྱི་རྒྱུད་འདི་ནི། བྱང་ཆུབ་སེམས་དཔའ་མ་ཡིན་པས་མཉན་པའམ། མོས་པར་བྱ་བའམ། གཟུང་བར་ཡང་མི་ནུས་ན་བསྒོམ་པའི་རྣམ་པར་སྦྱོར་བས་བརྩོན་པར་མི་ནུས་པ་ལྟ་ཅི་སྨོས། དེ་བས་ན། ཀྱེ༑ རྒྱལ་བའི་སྲས། གང་གིས་ཆོས་ཀྱི་སྒོའི་རྒྱུད་འདི་ཐོས་ཏེ། ཐོས་ནས་མོས་པར་བྱེད་པ་དང༌། མོས་པར་བྱས་ཤིང་འཛིན་པ་དང༌། བསྒོམ་པའི་རྣམ་པས་བརྩོན་པར་བྱེད་ན། སེམས་ཅན་དེ་དག་ནི་ཐམས་ཅད་མཁྱེན་པའི་ཡེ་ཤེས་ ཀྱི་སྒོ་དང་ལྡན་པར་ཤེས་པར་བྱའོ། །དེ་ནས་དེའི་ཚེ་སངས་རྒྱས་ཀྱི་མཐུ་དང༌། ཆོས་ཉིད་ཐོབ་པས་ཕྱོགས་བཅུར་འཇིག་རྟེན་གྱི་ཁམས་སངས་རྒྱས་ཀྱི་ཞིང་ཁྲག་ཁྲིག་ཕྲག་བཅུའི་ རྡུལ་ཤིན་ཏུ་ཕྲ་བ་སྙེད་རྣམ་པ་དྲུག་དང༌། ལྟས་ཆེན་པོ་བཅོ་བརྒྱད་དུ་གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ། །རབ་ཏུ་འགུལ་ཏོ། །ཀུན་ཏུ་འགུལ་ཏོ།། ལྡག་གོ། རབ་ཏུ་ལྡེག་གོ །ཀུན་ཏུ་ལྡེག་གོ། ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར། རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག། རབ་ཏུ་ཤིག་ ཤིག། ཀུན་ཏུ་ཤིག་ཤིག་གོ། སངས་རྒྱས་ཀྱི་མཐུ་དང་ཆོས་ཉིད་རབ་ཏུ་ཐོབ་པས་ལྷ་རྫས་ཀྱི་ཕྲེང་བའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་གོས་ཀྱི་སྤྲིན་གྱི་ཆར་ མངོན་པར་བབ་བོ། །ལྷ་རྫས་ཀྱི་རིན་པོ་ཆེའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་གདུགས་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་རྒྱལ་མཚན་གྱི་སྤྲིན་གྱི་ ཆར་མངོན་པར་བབ་བོ། །ལྷ་རྫས་ཀྱི་བ་དན་གྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་རོལ་མོ་བརྡུང་བ་དང༌། དཀྲོལ་བ་དང༌། གླུའི་དབྱངས་ཀྱི་སྤྲིན་གྱི་སྒྲ་མངོན་པར་ སྒྲོག་གོ། ལྷ་རྫས་ལས་འདས་པའི་ཐམས་ཅད་མཁྱེན་པའི་ས་ལ་མངོན་པར་བསྟོད་པའི་གླུའི་དབྱངས་ཀྱི་སྤྲིན་གྱི་སྒྲ་མངོན་པར་སྒྲོག་གོ། ཇི་ལྟར་གླིང་བཞི་པའི་འཇིག་རྟེན་ ༄༅། །གྱི་ཁམས་འདིའི་གཞན་འཕྲུལ་དབང་བྱེད་ཀྱི་གནས་སུ་ལྷའི་རྒྱལ་པོ་དབང་སྒྱུར་གྱི་གཞལ་མེད་ཁང་ནོར་བུ་རིན་པོ་ཆེའི་སྙིང་པོར་ཇི་ལྟ་བ་དེ་བཞིན་ དུ་འཇིག་རྟེན་གྱི་ཁམས་ཐམས་ཅད་དུ་ཡང་ཕྱོགས་བཅུ་རྒྱས་པར་གང་ཞིང༌། ཆོས་བསྟན་པ་འདི་ཡང་ཐམས་ཅད་དུ་བྱུང་བར་གྱུར་ཏོ། །སངས་རྒྱས་ཀྱི་མཐུས་ཕྱོགས་བཅུ་ ནས་བྱང་ཆུབ་སེམས་དཔའ་སངས་རྒྱས་ཀྱི་ཞིང་ཁྲག་ཁྲིག་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཕྱོགས་བཅུ་རྒྱས་པར་བྱེད་ཅིང་ལྷགས་ཏེ། དེ་དག་ཕྱིན་ནས་ཀྱང་འདི་སྐད་ ཅེས་ཟེར་རོ། །ཀྱེ༑ རྒྱལ་བའི་སྲས། དེ་ལྟར་ཁྱོད་ཀྱིས་བྱང་ཆུབ་སེམས་དཔའི་ཆོས་ཉིད་འདི་བརྗོད་པ་ལེགས་སོ། །ལེགས་སོ། །ཀྱེ། རྒྱལ་བའི་སྲས། བདག་ཅག་ཀྱང་ རྡོ་རྗེའི་སྙིང་པོ་ཞེས་བྱ་བ་མིང་མཐུན་པ་ཤ་སྟག་སྟེ། འཇིག་རྟེན་གྱི་ཁམས་རྡོ་རྗེའི་དཔལ་ཞེས་བྱ་བ་ནས། དེ་བཞིན་གཤེགས་པ་མཚན་རྡོ་རྗེའི་རྒྱལ་མཚན་ཞེས་བྱ་ བ་དག་གི་དྲུང་ནས་འདིར་ལྷགས་ཏེ། འཇིག་རྟེན་གྱི་ཁམས་དེ་དག་ཐམས་ཅད་ན་ཡང་ཆོས་བསྟན་པ་འདི་ཉིད་སངས་རྒྱས་ཀྱི་མཐུས་འཁོར་གྱི་རྣམ་པ་འདི་འདྲ་བ་ དག་ལ་ཚིག་འདི་དག་ཉིད་དང༌། ཡི་གེ་འདི་དག་ཉིད་དང༌། ཁོང་དུ་ཆུད་པར་བྱ་བ་འདི་དག་ཉིད་དང༌། དོན་འདི་ཉིད་ལྷག་ཆད་མེད་པར་མངོན་པར་བརྗོད་དེ་འབྱུང་ བར་གྱུར་ཏོ། །ཀྱེ༑ རྒྱལ་བའི་སྲས། བདག་ཅག་ཀྱང་དབང་དུ་གྱུར་པ་ཤ་སྟག །སངས་རྒྱས་ཀྱི་མཐུས་འཁོར་འདིར་ཕྱིན་ཏོ། །ཀྱེ༑ རྒྱལ་བའི་སྲས། འཇིག་རྟེན་གྱི་ཁམས་འདིར་ བདག་ཅག་ཇི་ལྟར་ཕྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པའི་འཇིག་རྟེན་གྱི་ཁམས་རེ་རེའི་གཞན་འཕྲུལ་དབང་བྱེད་ཀྱི་གནས་ཀྱི་ ལྷའི་རྒྱལ་པོ་དབང་སྒྱུར་གྱི་གཞལ་མེད་ཁང་ནོར་བུ་རིན་པོ་ཆེའི་སྙིང་པོར་ཡང་སངས་རྒྱས་ཀྱི་ཞིང་ཁྲག་ཁྲིག་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་ རྣམས་ཕྱིན་པར་གྱུར་ཏོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་ཕྱོགས་བཅུར་བལྟས་ཏེ། འཁོར་གྱི་དཀྱིལ་འཁོར་ཐམས་ཅད་ལ་བལྟས་ནས་ཆོས་ཀྱི་དབྱིངས་ལ་རྣམ་ པར་ལྟ་བ་དང༌། ཐམས་ཅད་མཁྱེན་པའི་ཡེ་ཤེས་ཀྱི་སེམས་བསྐྱེད་པ་ཡང་དག་པར་བརྗོད་པ་དང༌། བྱང་ཆུབ་སེམས་དཔའི་ཡུལ་ཡང་དག་པར་བསྟན་པ་དང༌། སྤྱོད་པའི་ སྟོབས་ཡོངས་སུ་སྦྱངས་པ་དང༌། རྣམ་པ་ཐམས་ཅད་མཁྱེན་པ་ཡང་དག་པར་བསྒྲུབ་པ་བརྗོད་པ་དང༌། འཇིག་རྟེན་གྱི་དྲི་མ་སེལ་བ་དང༌། ཐམས་ཅད་མཁྱེན་པའི་ཡེ་ ཤེས་ཉེ་བར་བསྒྲུབ་པ་དང༌། བསམ་གྱིས་མི་ཁྱབ་པའི་ཡེ་ཤེས་ཀྱི་རྒྱན་ཡོངས་སུ་བསྟན་པ་དང༌། བྱང་ཆུབ་སེམས་དཔའ་ཐམས་ཅད་ཀྱི་ཡོན་ཏན་རབ་ཏུ་རྗོད་པ་བྱེད་ ༄༅། །ཅིང༑ སའི་དོན་འདི་ཡང་བརྟག་པར་བྱ་བ་དང༌། བསྟན་པའི་ཕྱིར་སངས་རྒྱས་ཀྱི་མཐུས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞི་དང་དུལ་ དགའ་ཞི་ཞིང་དུལ་བའི་ཡིད་ལྡན་ལ། །ནམ་མཁའི་དབྱིངས་འདྲ་བར་སྣང་མཁའ་དང་མཚུངས་འདྲ་ཞིང༌། །ཐ་བའི་དྲི་མ་རྣམ་སྦྱངས་ལམ་རྣམས་ཤེས་གནས་པའི། །བྱང་ ཆུབ་སེམས་དཔའི་སྤྱོད་པའི་ཁྱད་པར་རབ་ལ་ཉོན། །བསྐལ་པ་བྱེ་བར་དགེ་བ་བརྒྱ་སྟོང་རབ་བསགས་ཤིང༌། །སངས་རྒྱས་བརྒྱ་སྟོང་དྲང་སྲོང་ཆེན་པོ་མཆོད་བྱས་ཏེ། །དབང་ སྒྱུར་རྣམས་དང་རང་རྒྱལ་མཐའ་ཡས་མཆོད་བྱས་ནས། །འགྲོ་བ་ཀུན་ལ་ཕན་ཕྱིར་བྱང་ཆུབ་སེམས་སྐྱེའོ། །བརྟུལ་ཞུགས་དཀའ་ཐུབ་དཀའ་སྤྱད་དུལ་བཟོད་ལྡན་གྱུར་ ལ༑ ༑ཁྲེལ་ཡོད་དཔལ་གྱི་སྤྱོད་ལྡན་ཡེ་ཤེས་དགེ་འཕགས་ཤིང༌། །བློ་གྲོས་རིག་ཡངས་སངས་རྒྱས་ཡེ་ཤེས་སེམས་ལྡན་གྱི། །བྱང་ཆུབ་སེམས་དཔའ་རྒྱལ་བའི་ སྟོབས་དང་མཉམ་འདྲ་སྐྱེ། །དུས་གསུམ་རྒྱལ་བ་ཇི་སྙེད་མཆོད་རབ་མཆོད་པའི་ཕྱིར། །ནམ་མཁའི་དབྱིངས་ཚད་ཞིང་རྣམས་ཐམས་ཅད་ཡོངས་སུ་སྦྱོང༌། །ཆོས་རྣམས་ ཐམས་ཅད་ཇི་སྙེད་དེ་དག་མཉམ་རྟོགས་པས། །འགྲོ་བ་དགྲོལ་བའི་དོན་དུ་བྱང་ཆུབ་སེམས་སྐྱེའོ། །གཞལ་ཡས་སེམས་སྐྱེས་ས་མཆོག་རབ་ཏུ་ཐོབ་གྱུར་ནས། །སྡིག་ པ་ཐམས་ཅད་བསལ་ཕྱིར་རྡུལ་མེད་རབ་ཏུ་དགའ། །སྨོན་ལམ་སྟོབས་དཔྱད་དཀར་ཆོས་ཡང་དག་བསགས་བྱས་ནས། །སྙིང་རྗེ་བརྩེ་ལྡན་ས་ཡི་གོང་མ་ཡོངས་སུ་གནོན། །འགྲོ་ཕྱིར་ བྱམས་སེམས་ཚུལ་ཁྲིམས་ཐོས་དང་ཡོན་ཏན་ལྡན། །དྲི་མེད་དྲི་བྲལ་རང་བཞིན་ཡོངས་དག་བསམ་པ་ཡིས། །འཇིག་རྟེན་ཐམས་ཅད་མེ་གསུམ་འབར་བར་མཐོང་གྱུར་ནས། །གསུམ་ པ་རྣམས་ཡངས་བློ་ཡིས་འགྲོ་བའི་དོན་དུ་གནོན། །སྡུག་བསྔལ་མི་རྟག་ནད་པ་ཟུག་རྔུས་མི་བདེ་བའི། །ཁམས་གསུམ་རྟག་ཏུ་སྡུག་བསྔལ་བརྒྱ་ཡི་མེ་འབར་བས། །འདུས་ བྱས་ཉེས་མཐོང་རྒྱལ་བའི་ལེགས་པ་མངོན་མོས་ཤིང༌། །ཡེ་ཤེས་འོད་འཕྲོ་ཡངས་ལྡན་འོད་འཕྲོ་ཡོད་པ་གནོན། །དྲན་དང་བློ་ལྡན་ལམ་གྱི་ཡེ་ཤེས་ཐོབ་གྱུར་ཅིང༌། །ས་ མཆོག་དེ་ལ་སངས་རྒྱས་བརྒྱ་སྟོང་བསྙེན་བཀུར་ནས། །མི་ཡི་གཙོ་བོའི་ཡོན་ཏན་རྟག་ཏུ་དྲན་བྱེད་ཅིང༌། །འགྲོ་བ་ཀུན་གྱིས་ཐུབ་དཀའ་རྒྱལ་བར་དཀའ་བ་གནོན། །ཡེ་ཤེས་བློ་ གྲོས་ཐབས་དང་ཤེས་རབ་བློ་དཔྱོད་པས། །འགྲོ་དོན་མཐའ་ཡས་སྣ་ཚོགས་བྱ་བ་བསྟན་བྱས་ཤིང༌། །སྟོབས་བཅུའི་མཆོད་པ་སེམས་ཅན་དོན་རྣམས་བསྒྲུབ་བྱས་ཏེ། །མི་ སྐྱེ་མངོན་སུམ་མཐའ་ཡས་ས་དྲུག་ཡོངས་སུ་གནོན། །འཇིག་རྟེན་ཀུན་ཏུ་འགྲོ་བས་ཤེས་དཀའ་སྤྱོད་བྱེད་ཅིང༌། །བདག་བྲལ་བྱེད་མེད་ཡོད་དང་མེད་པ་རྣམ་བསལ་བའི། ། ༄༅། །རང་བཞིན་སྟོང་ཆོས་ཡན་ལག་བཅུ་གཉིས་རབ་འབྱུང་ཞེས། །ཕྲ་ཞིང་རྣོ་བའི་སེམས་ལྡན་བདུན་པ་ཡོངས་སུ་གནོན། །ཐབས་དང་ཤེས་རབ་སེམས་ ཡངས་རབ་ཏུ་ཐོབ་གྱུར་ཅིང༌། །རིང་དུ་སོང་བ་གདུལ་དཀའ་རིང་དུ་སོང་བ་གནོན། །རང་བཞིན་དུལ་ཞིང་ཞི་ཕྱིར་དུ་མའི་སེམས་སྤངས་ཏེ། །དེ་ནས་ནམ་མཁའ་འདྲ་བའི་ མི་གཡོ་ཡོངས་སུ་གནོན། །དེ་ལ་མཁས་པའི་ཡེ་ཤེས་ལས་རྣམས་སྣ་ཚོགས་ཕྱིར། །ཞི་བ་དེ་ལས་བསླང་ཞིང་མི་ཡི་མཆོག་ཏུ་བསྣམས། །དབང་བཅུ་ལྡན་ཞིང་འཇིག་ རྟེན་ཡང་དག་ཉིད་དཔྱོད་པའི། །རང་བཞིན་ཆེན་པོ་འགྲོ་ཕྱིར་ལེགས་པའི་བློ་གྲོས་གནོན། །འདི་ལ་ཤིན་ཏུ་ཕྲ་བར་འཇིག་རྟེན་ཀུན་དཔྱད་ཅིང༌། །སེམས་ཅན་ཐིབས་ པོའི་སྤྱོད་ལྡན་ཉོན་མོངས་ལས་དཔྱད་དེ། །དེ་དག་གདུལ་བའི་སྤྱོད་པས་ཡོན་ཏན་མང་པོ་གནོན། །བདེ་གཤེགས་མཛོད་ཐོབ་དོན་གྱི་དམ་པ་རབ་ཏུ་སྟོན། །དཀར་ ཆོས་རིམ་གྱིས་དེ་འདྲའི་སྤྱོད་པ་ལྡན་གྱུར་པས། །ས་དགུའི་བར་དུ་བསོད་ནམས་ཡེ་ཤེས་ཚོགས་ཐོབ་ཅིང༌། །རྒྱལ་བ་རྣམས་ཀྱི་སྟོབས་མཆོག་དོན་དམ་མངོན་འདོད་ པ༑ ༑ཡེ་ཤེས་ཡོན་ཏན་དབང་བསྐུར་སངས་རྒྱས་ཀུན་ལས་འཐོབ། །བརྒྱ་སྟོང་ཕྲག་བཅུའི་ཏིང་འཛིན་གྲངས་མེད་གང་ཡོད་པ། །སྤྱོད་ཡུལ་ཤེས་པས་ཆོས་ཉིད་ཤེས་ ཡངས་ཐོབ་གྱུར་ནས། །དེ་ཡི་རྗེས་ལ་ཐམས་ཅད་མཁྱེན་པར་དབང་བསྐུར་འཐོབ། །ཡུལ་ཡངས་ཏིང་འཛིན་དེ་དག་ཐོབ་པས་དེ་མི་སྒུལ། །གང་ཚེ་དེ་ཡིས་ཀུན་མཁྱེན་དབང་བསྐུར་ ཐོབ་པའི་ཚེ། །པདྨོ་རྒྱ་ཆེན་རིན་ཆེན་ཀུན་གྱིས་བརྒྱན་པ་འབྱུང༌། །དེ་ཡི་ཚུལ་མཐུན་ལུས་ཀྱི་དབུས་སུ་གནས་པར་འགྱུར། །རྒྱལ་བའི་སྲས་ཀྱིས་ཡོངས་བསྐོར་དེ་ལ་ལྟ་ཞིང་གནས། ། དེ་ཡི་འོད་ཟེར་ཁྲག་ཁྲིག་མཐའ་ཡས་སྟོང་ཕྲག་མང༌། །ཕྱོགས་བཅུའི་འགྲོ་བའི་སྡུག་བསྔལ་ཀུན་ཀྱང་ཞི་བར་བྱེད། །མགོ་ཡི་གཙུག་ནས་འོད་ཟེར་བྱེ་བ་སྟོང་བྱུང་ཞིང༌། །ཕྱོགས་ རྣམས་ཀུན་གྱི་མི་ཡི་གཙོ་བོའི་འཁོར་དུ་རྒྱུ། །སྟེང་གི་ནམ་མཁའི་དབྱིངས་ལ་འོད་ཟེར་དྲ་བར་གནས། །སངས་རྒྱས་མཆོད་ཕྱིར་བརྩོན་པར་རྒྱལ་བའི་ཞབས་སུ་འདོང༌། །དེ་ཚེ་རྒྱལ་ བ་རྣམས་དང་རྒྱལ་སྲས་རྣམས་ཀྱིས་ཀྱང༌། །ཆོས་རབ་དོན་དུ་རྒྱལ་སྲས་དབང་བསྐུར་ཐོབ་པར་མཁྱེན། །མཆོད་པའི་དོན་དུ་རྒྱལ་སྲས་མཐའ་ཡས་ཀུན་ཀྱང་འོང༌། །དེའི་ཚེ་ ཀུན་མཁྱེན་དབང་བསྐུར་མི་མཆོག་མཛོད་སྤུ་ནས། །དབང་བསྐུར་འོད་ཟེར་དམ་པ་མང་པོ་འབྱུང་བར་འགྱུར། །འོད་ཟེར་མཆོག་གིས་བསྐོར་ཅིང་སྤྱི་བོའི་གཙུག་ཏུ་ནུབ། ། གང་ཚེ་རྒྱལ་མཆོག་བུ་ཡི་ཐུ་བོ་སྲིད་མཆོག་ལ། །དབང་བསྐུར་ཞིང་དུ་སངས་རྒྱས་ཀུན་གྱིས་དབང་བསྐུར་ཚེ། །ཕྱོགས་བཅུའི་འཇིག་རྟེན་ཐམས་ཅད་ཀུན་ནས་གཡོ་བར་ ༄༅། །འགྱུར། །མནར་མེད་བར་གྱི་སྡུག་བསྔལ་དེ་ཚེ་ཞི་ཞིང་འདུག །གང་ཚེ་ཀུན་མཁྱེན་དབང་གིས་མངོན་པར་དབང་བསྐུར་བ། །དེ་ཕྱིར་མཁས་ པས་ཆོས་སྤྲིན་ས་མཆོག་ཐོབ་ཅེས་བྱ། །མཁས་པ་འདི་ལ་གནས་པའི་ཤེས་རྒྱུད་ཚད་མེད་དེ། །ས་རབ་འདི་ལ་གནས་པ་འགྲོ་ཀུན་གཙོ་ཡིན་ནོ། །གཟུགས་དང་ གཟུགས་མེད་དེ་བཞིན་འདོད་པའི་ཁམས་ཡངས་དང༌། །སེམས་ཅན་ཁམས་དང་ཞིང་དང་ཆོས་ཁམས་ཡངས་པ་དང༌། །གྲངས་དང་གྲངས་མེད་ནམ་མཁའི་ཁམས་ ཀྱི་བར་དུ་སྟེ། །ཆོས་དབྱིངས་ཡངས་པ་ཐམས་ཅད་མ་ནོར་ཁོང་དུ་ཆུད། །འདི་ལ་གནས་པ་མཐུ་ཆེན་སྤྲུལ་པའི་ལས་ཀུན་དང༌། །དེ་བཞིན་བྱིན་རླབས་རྒྱལ་བའི་ཡེ་ ཤེས་ཕྲ་བ་དང༌། །མི་མཆོག་གསང་བ་བསྐལ་པའི་གྲངས་རྣམས་ཤེས་བྱ་དང༌། །སྐྲ་རྩེ་གཅིག་ཏུ་འཇིག་རྟེན་ཁམས་རྣམས་གཟུང་བ་དང༌། །མི་ཡི་གཙོ་བོ་འབྱུང་ དང་སྐུ་ཚེ་འཚང་རྒྱ་དང༌། །འཁོར་ལོ་དམ་པ་བསྐོར་དང་མྱ་ངན་འདའ་བའི་རྣམས། །ཐམས་ཅད་རབ་ཤེས་གོང་དུ་རྣམ་ཐར་ཞི་བ་དག །སྔན་ཆད་མ་ཐོབ་ཀུན་ཀྱང་ དེ་ཚེ་རབ་ཏུ་འཐོབ། །འདི་ལ་གནས་པའི་མཐུ་ཆེ་རྒྱལ་བའི་ཆོས་ཀྱི་སྤྲིན། །ཐམས་ཅད་ཁོང་དུ་ཆུད་བྱེད་དྲན་པས་ཀུན་ཀྱང་འཛིན། །ཀླུ་རྣམས་ཀུན་གྱི་སྤྲིན་ཆར་རྒྱ་ མཚོ་འཛིན་པ་ལྟར། །དེ་བཞིན་རྒྱལ་བའི་ཆོས་སྤྲིན་ཆར་ཆེན་ཀུན་ཀྱང་འཛིན། །རྒྱལ་བ་གཅིག་ལས་ཆོས་གང་མཐུ་ཆེན་ངེས་ཐོབ་པ། །དེ་ལ་ཕྱོགས་བཅུ་མཐའ་ཡས་ཞིང་གི་ སེམས་ཅན་རྣམས། །ཐམས་ཅད་བདེ་གཤེགས་ཉན་ཐོས་ཐོས་པ་འཛིན་གྱུར་ཀྱང༌། །བྱང་ཆུབ་སེམས་དཔའ་ཐོས་པའི་གྲངས་ཆར་ཉེར་མི་འགྲོ་།ཡེ་ཤེས་སྤྱོད་པའི་སྟོབས་ ཀྱིས་སྔན་ཆད་སྤྱད་པའི་མཐུས། །སྐད་ཅིག་ཡུད་ཙམ་གཅིག་ཏུ་ཁྲག་ཁྲིག་ཞིང་བཀང་ཞིང༌། །བདུད་རྩིའི་ཆར་འབེབས་ཉོན་མོངས་ཀུན་ཀྱང་ཞི་བར་བྱེད། །དེ་ཕྱིར་རྒྱལ་བས་ འདི་མིང་ཆོས་ཀྱི་སྤྲིན་ཅེས་གསུངས། །འདི་གནས་མཐུ་ཆེན་ལྷ་ཡི་འཇིག་རྟེན་གཙོར་གྱུར་པའི། །ཕྱོགས་རྣམས་ཀུན་ཏུ་མི་ཡི་གཙོ་བོའི་ཡུལ་ཡང་སྟོན། །རྣམ་འཕྲུལ་ ཁྲག་ཁྲིག་སྟོང་ཕྲག་དུ་མ་ཡང་སྟོན་ཏེ། །བྱང་ཆུབ་སྤྱོད་པ་དེ་སེམས་འགྲོ་བ་མྱོས་པར་འགྱུར། །མཁས་པ་ལེགས་ལྡན་འདི་གནས་གོམ་པ་བོར་བ་ཙམ། །ས་དགུའི་བར་ དུ་གནས་པས་ཤེས་པར་མི་ནུས་ན། །སེམས་ཅན་གཞན་གྱིས་ཤེས་པར་མི་འགྱུར་སྨོས་ཅི་དགོས། །དུས་གསུམ་ཉན་ཐོས་རང་རྒྱལ་ཀུན་གྱིས་དེ་བཞིན་ནོ། །འདི་གནས་ ཐམས་ཅད་མཁྱེན་པར་འགྲོ་བ་ཀུན་ལ་སྟོན། །ཤེས་པ་དུས་གསུམ་ཀུན་ཏུ་ཐོགས་མེད་ཞི་ཆོས་ཅན། །ཞིང་རྣམས་ཀུན་ཏུ་རྒྱས་བཀང་ཆོས་རྣམས་ཀུན་གྱི་བར། །རྒྱལ་ ༄༅། །བ་ཀུན་གྱི་ཡོན་ཏན་བརྗོད་ཅིང་སྟོན་པར་བྱེད། །མཁས་པ་འདི་ལ་གནས་པ་སངས་རྒྱས་མཆོད་བྱེད་ཅིང༌། །ཕྱོགས་རྣམས་ཀུན་ཏུ་ཞིང་དང་ཆོས་ཀྱི་ དབྱིངས་བཀང་སྟེ། །རྒྱལ་བ་མངོན་དུ་མཆོད་པས་མཆོད་བྱེད་འཕྲོགས་པ་མེད། །ཡོན་ཏན་ཀུན་ལྡན་ས་ཡི་ལྷ་ཡི་ལྷ་ཞེས་བྱ། །མཁས་པ་འདི་གནས་ཤེས་རབ་སྣང་བས་ འགྲོ་ཀུན་གྱི། །མུན་པ་ཀུན་བསལ་ཆོས་ཀྱི་ཚུལ་ཡང་རབ་ཏུ་སྟོན། །དབང་ཕྱུག་དམ་པའི་མཐུ་ཡིས་འགྲོ་བའི་འདོད་ཆགས་སེལ། །དེ་བས་རྒྱལ་སྲས་ཉོན་མོངས་སེལ་ ལ་མཁས་ཞེས་བྱ། །འདི་ལ་གནས་པ་དེ་དག་ཁམས་གསུམ་དབང་ཕྱུག་འགྱུར། །ཡེ་ཤེས་ཚུལ་ཤེས་ཐེག་པ་གསུམ་པོ་སྟོན་ལ་མཁས། །སྐད་ཅིག་ཡུད་ཙམ་གཅིག་ གིས་ཏིང་འཛིན་གཅིག་མིན་འཐོབ། །ཕྱོགས་བཅུ་ཀུན་ཏུ་རྒྱལ་བའི་དམ་པ་གཅིག་མིན་སྟོན། །འདི་ནི་བདག་གིས་རྒྱལ་སྲས་ས་རྣམས་མདོར་བསྟན་གྱི། །རྒྱ་ཆེར་ བསྐལ་པ་བརྒྱ་ཕྲག་སྟོང་གིས་བསྟན་མི་ནུས། །ཡོན་ཏན་འདི་འདྲའི་སངས་རྒྱས་ཡེ་ཤེས་ས་འདི་ལ། །གནས་པ་རྟག་ཏུ་རི་ཡི་རྒྱལ་པོ་བཞིན་མི་གཡོ། །རྒྱལ་སྲས་ཐོག་ མ་གཙུག་ལག་ཀུན་གྱིས་མི་གཡོ་སྟེ། །སྨན་གྱི་རྣམ་པ་ཀུན་གནས་རི་རྒྱལ་གངས་བཞིན་ནོ། །ཚུལ་ཁྲིམས་ཐོས་པས་གཉིས་པ་སྤོས་ངད་སྤོས་དང་འདྲ། །རྣམ་འདལ་ མེ་ཏོག་ཇི་བཞིན་གསུམ་པ་ཤེས་པར་བྱ། །ལམ་ལ་མོས་བཞིན་མི་འཁྲུགས་འོད་འཕྲོ་ཐོབ་པ་སྟེ། །དྲང་སྲོང་གནས་བཞིན་མཁས་པ་རྣམས་ཀྱི་རྟེན་གྱུར་པའོ། །གནོད་སྦྱིན་གཉའ་ ཤིང་འཛིན་བཞིན་བསམ་ཡས་ལྔ་པ་ཐོབ། །རྟ་རྣའི་ཤིང་ཏོག་འདྲ་བར་དྲུག་པའི་འབྲས་བུ་སྟེ། །བདུན་པས་འཛིན་ཀླུ་བཞིན་ཤེས་རབ་ཆེན་པོས་ཐོབ། ཁོར་ཡུག་དབང་ལྡན་ བཞིན་དུ་བརྒྱད་པ་དབང་ཅན་འཐོབ། །དགུ་པ་དྲི་མ་སེལ་བ་དཔལ་ཅན་ལྷ་མིན་བཞིན། །བཅུ་པ་རྒྱལ་བའི་ལེགས་ལྡན་རི་རབ་ལྷ་གནས་འདྲ། །དང་པོ་སྨོན་ལམ་སྔོན་འགྲོ་ གོང་མ་ཚུལ་ཁྲིམས་ཚོགས། །གསུམ་པ་སྤྱོད་པའི་ཡོན་ཏན་བཞི་པ་གཅིག་གི་དངོས། །ལྔ་པ་དགེ་མང་དྲུག་པ་ཤིན་ཏུ་ཟབ་པའི་དངོས། །བརྒྱད་པ་བློ་གྲོས་ཡངས་པ་ཀུན་ཏུ་ གཅིག་མིན་རྒྱན། །དགུ་པ་མཁས་པ་ཡེ་ཤེས་ཕྲ་ཞིང་ཟབ་དང་ལྡན། །འགྲོ་རྒྱུད་ཐམས་ཅད་ཡེ་ཤེས་ལྡན་པས་རབ་ཏུ་གནོན། །བཅུ་པ་རྒྱལ་བ་རྣམས་ལས་ཡང་དག་ཆོས་ འཛིན་ཏེ། །རྒྱལ་སྲས་སྤྱོད་པ་མི་སྒུལ་རྒྱ་མཚོ་དེ་འདྲའོ། །སྤྱོད་པ་བཅུ་འདས་ཐོག་མའི་སེམས་རབ་སྐྱེ་བར་འགྱུར། །དཀའ་ཐུབ་བརྟུལ་བས་གཉིས་པ་གསུམ་པ་བསམ་གཏན་ གྱིས། །དག་པས་བཞི་པ་ཤིན་ཏུ་བྱང་བས་ལྔ་པའོ། །དྲུག་པ་རྣོན་པོས་རྟོགས་པ་བདུན་པ་མི་ཕྱེད་ས། །བརྒྱད་པ་མཐུ་ཆེན་རྡོ་རྗེའི་རྒྱལ་མཚན་ལྡན་པ་ཡིན། །དགུ་ལ་ཡེ་ཤེས་ ༄༅། །ལྡན་པས་ཐིབས་པོའི་སྤྱོད་པ་ཤེས། །བཅུ་ལ་རྒྱལ་བས་དབང་བསྐུར་རྒྱལ་པོ་དབང་ཐོབ་བཞིན། །ཡོན་ཏན་རིན་ཆེན་དག་པས་དེ་བཞིན་རིམ་དུ་འཕར།། ཕྱོགས་རྣམས་ཀུན་གྱི་ཞིང་རྣམས་བཤིག་སྟེ་བགྲང་བར་ནུས། །རྣམ་ཤེས་གཅིག་གིས་འགྲོ་བ་ཀུན་སེམས་ཤེས་པར་རུང༌། །ནམ་མཁའི་དབྱིངས་ཀུན་སྐྲ་ཡིས་གཞལ་ བར་ནུས་སྲིད་ཀྱི། །རྒྱལ་བའི་ཡོན་ཏན་བསྐལ་པ་ཁྲག་ཁྲིག་བཤད་མི་ནུས། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་མངོན་ པར་གནང་སྟེ། ཡིད་དགའ་བར་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་དེ་སྐད་ཅེས་སྨྲས་པ་དང༌། བཅོམ་ལྡན་འདས་གཞན་འཕྲུལ་དབང་ བྱེད་ཀྱི་ལྷའི་ནང་ན་བཞུགས་ཤིང་མངོན་པར་སངས་རྒྱས་ནས་རིང་པོར་མ་ལོན་ཏེ། ཞག་བདུན་པ་གཉིས་ལ་བབ་པའི་ཚེ། ལྷའི་རྒྱལ་པོ་དབང་བྱེད་ཀྱི་གཞལ་མེད་ ཁང་ནོར་བུ་རིན་པོ་ཆེའི་སྙིང་པོ་ཅན་ན་བཞུགས་པས། བྱང་ཆུབ་སེམས་དཔའ་རྡོ་རྗེའི་སྙིང་པོས་བཤད་པ་ལ་མངོན་པར་དགྱེས་པ་མཛད་དོ། །བྱང་ཆུབ་སེམས་དཔའི་ འཁོར་དེ་དག་ཐམས་ཅད་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་གྱི་མགོན་པོ་དང༌། དབང་ཕྱུག་ཆེན་པོ་དང༌། གཙང་མའི་རིས་སུ་གཏོགས་པའི་འཁོར་ཐམས་ཅད་ཀྱང་མངོན་པར་དགའོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། ས་བཅུའི་ལེའུ་སྟེ། སུམ་ཅུ་རྩ་གཅིག་པའོ།། །།བམ་པོ་ལྔ་བཅུ་རྩ་བཞི་པ། བཅོམ་ལྡན་འདས་དེ་བཞིན་གཤེགས་པའི་བྱིན་གྱི་རླབས་ལ། བྱང་ཆུབ་ སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་སོགས་པ་ཐམས་ཅད་ཀྱང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་གནས་པ། སངས་རྒྱས་ཀྱི་ཞིང་ བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་དང་ཐབས་གཅིག་ཏུ་བཞུགས་ཏེ། དེའི་ཚེ་འཁོར་གྱི་དཀྱིལ་འཁོར་དེ་ཉིད་དུ་ཕྱོགས་བཅུ་ནས་བྱང་ ཆུབ་སེམས་དཔའ་སེམས་དཔའ་ཆེན་པོ་སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འཁོད་པ་བཅུ་འཐོན་པར་གྱུར་ཏེ། བྱང་ཆུབ་སེམས་དཔའ་དེ་དག་རེ་རེ་ཞིང་ ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འཁོད་པ། སངས་རྒྱས་ཀྱི་ཞིང་བརྗོད་དུ་མེད་པའི་ཡང་ བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་པ་ཤ་སྟག་གོ །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ ༄༅། །དག་ཐམས་ཅད་ཀྱང་མིང་འདི་ཞེས་བྱ་བ་དག་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཛོད་ཀྱི་སྙིང་པོས་བྱུང་ བ་ཞེས་བྱ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཟབ་མོའི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ དཔལ་གྱི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་སྒྲ་ཟབ་མོ་རྣམ་པ་ཐ་དད་པའི་མཛོད་ཀྱི་སྙིང་ པོས་བྱུང་བ་ཞེས་བྱ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་མི་ཕྱེད་པའི་གཙུག་གི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང༌། བྱང་ཆུབ་སེམས་ དཔའ་སེམས་དཔའ་ཆེན་པོ་ངག་གི་ལམ་མི་གཡོ་བར་ཀུན་ཏུ་འགྲོ་བའི་འོད་ཟེར་སྣང་བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང༌། བྱང་ཆུབ་སེམས་དཔའ་ སེམས་དཔའ་ཆེན་པོ་གྲགས་པ་སྙན་པར་ཀུན་ཏུ་རྣམ་པར་གྲགས་པའི་འོད་ཀྱི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང༌། བྱང་ཆུབ་སེམས་དཔའ་ སེམས་དཔའ་ཆེན་པོ་རིའི་རྒྱལ་པོ་མི་གཡོ་བའི་འོད་ཟེར་སྣང་བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང༌། བྱང་ཆུབ་སེམས་དཔའ་སེམས་ དཔའ་ཆེན་པོ་ཀུན་ནས་བལྟ་བའི་གཟུགས་རྣམ་པར་དམིགས་པའི་འོད་ཟེར་གྱི་རྒྱལ་པོ་སྣང་བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དང༌། བྱང་ཆུབ་སེམས་དཔའ་སེམས་ དཔའ་ཆེན་པོ་སྟོབས་བཅུ་རྣམ་པར་དག་པ་ཐུབ་པ་མེད་པའི་འོད་ཟེར་སྣང་བའི་གཟི་བརྗིད་ཀྱི་མཛོད་ཀྱི་སྙིང་པོས་བྱུང་བ་ཞེས་བྱ་བ་དག་སྟེ། བྱང་ཆུབ་སེམས་དཔའ་སེམས་དཔའ་ ཆེན་པོ་དེ་དག་དེ་ལྟར་འཐོན་མ་ཐག་ཏུ་དེའི་མོད་ལ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་མ་གཏོགས་པར་བྱང་ཆུབ་སེམས་དཔའི་འཁོར་དེ་དག་ ཐམས་ཅད་ཀྱང་ལངས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོའི་འོད་མ་གཏོགས་པར་འོད་ཐམས་ཅད་ཀྱང་མི་སྣང་བར་གྱུར་ཏེ། ཐམས་ ཅད་ཀྱང་ཟིལ་གྱིས་ནོན་པར་གྱུར་ཏོ། །སངས་རྒྱས་ཀྱི་མཆོད་པ་བསམ་གྱིས་མི་ཁྱབ་པ་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་མང་པོའང་མངོན་པར་བྱུང་བར་གྱུར་ཏེ། འདི་ལྟར་སྤོས་ཀྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པར་བྱེད་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །མེ་ཏོག་གི་སྤྲིན་ཆོས་ཀྱི་དབྱིངས་ཐམས་ ཅད་རྒྱས་པར་ཁྱབ་པ་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་ཆར་མངོན་པར་བབ་པར་གྱུར་ཏོ། །བྱུག་པའི་སྤྲིན་ཆོས་ཀྱི་དབྱིངས་ཐམས་ ༄༅། །ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །གདུགས་ཀྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་ པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །གོས་ཀྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་ བབ་པར་གྱུར་ཏོ། །རིན་པོ་ཆེའི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །རྒྱལ་མཚན་གྱི་སྤྲིན་ ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །བ་དན་གྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་ བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །འཇིག་རྟེན་གྱི་ཁམས་ཡོངས་སུ་དག་པའི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པར་བྱེ་བ་ཁྲག་ ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །འོད་ཟེར་གྱི་དྲ་བ་སྣང་བ་ཆེན་པོའི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་ མངོན་པར་བབ་པར་གྱུར་ཏོ། །རིན་པོ་ཆེ་སྣ་ཚོགས་ཀྱི་གཞལ་མེད་ཁང་གི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་ པར་གྱུར་ཏོ། །སྙིང་པོ་བྱང་ཆུབ་ཀྱི་རྒྱན་རྣམ་པར་ཕྱེ་བའི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །དེ་བཞིན་ གཤེགས་པའི་གཟུགས་བརྙན་སྣང་བའི་གོས་ཀྱི་སྤྲིན་ཆོས་ཀྱི་དབྱིངས་ཐམས་ཅད་རྒྱས་པར་ཁྱབ་པ་བྱེ་བ་ཁྲག་ཁྲིག་བརྒྱ་སྟོང་གི་ཆར་མངོན་པར་བབ་པར་གྱུར་ཏོ། །བྱང་ཆུབ་ སེམས་དཔའ་སེམས་དཔའ་ཆེན་པོ་དེ་དག་གི་སེང་གེའི་ཁྲི་མང་པོ་དེ་དག་ལས། བྱང་ཆུབ་སེམས་དཔའ་རེ་རེའི་སེང་གེའི་ཁྲིའི་རྒྱན་རིན་པོ་ཆེ་རྣམ་པར་དག་པ་རེ་རེ་དང༌། དམིགས་པ་མང་པོ་དེ་དག་ཐམས་ཅད་ལས་དམིགས་པ་རེ་རེ་ལས་ཀྱང་འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་ཡོངས་སུ་སྣང་བར་གྱུར་ཏོ། །དམིགས་པ་མང་པོ་ དེ་དག་ཐམས་ཅད་ལས་དམིགས་པ་རེ་རེ་ཞིང་ཡང་སེམས་ཅན་གྱི་ཁམས་འབྱམས་ཀླས་པ་ཐམས་ཅད་ཡོངས་སུ་སྣང་བར་གྱུར་ཏོ། །དམིགས་པ་མང་པོ་དེ་དག་ཐམས་ཅད་ ལས་དམིགས་པ་རེ་རེ་ཞིང་ཡང་དེ་བཞིན་གཤེགས་པ་འབྱམས་ཀླས་པ་ཐམས་ཅད་ཡོངས་སུ་སྣང་བར་གྱུར་ཏོ། །དམིགས་པ་མང་པོ་དེ་དག་ཐམས་ཅད་ལས་དམིགས་པ་ ༄༅། །རེ་རེ་ཞིང་ཡང་བྱང་ཆུབ་སེམས་དཔའ་འབྱམས་ཀླས་པ་ཐམས་ཅད་ཡོངས་སུ་སྣང་བར་གྱུར་ཏོ། །དམིགས་པ་མང་པོ་དེ་དག་ཐམས་ཅད་ལས་དམིགས་ པ་རེ་རེ་ཞིང་ཡང་དུས་འབྱམས་ཀླས་པ་ཐམས་ཅད་ཡོངས་སུ་སྣང་བར་གྱུར་ཏེ། །དམིགས་པ་མང་པོ་དེ་དག་ལས་དམིགས་པ་རེ་རེ་ཞིང་ཡང་འཇིག་རྟེན་གྱི་ཁམས་ཐམས་ ཅད་ཀྱི་འདས་པའི་འཇིག་རྟེན་གྱི་ཁམས་འབྱམས་ཀླས་པ་བརྗོད་དུ་མེད་པའི་ཡང་བརྗོད་དུ་མེད་པ་སངས་རྒྱས་འབྱུང་བ་དང་བཅས་པ། ཆོས་ཀྱི་འཁོར་ལོ་བསྐོར་བ་དང་ བཅས་པ། དེ་བཞིན་གཤེགས་པའི་འཁོར་གྱི་དཀྱིལ་འཁོར་དང་བཅས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པ། སེམས་ཅན་འདུལ་བ་ དང་བཅས་པ། མིང་གི་འཁོར་ལོ་དང་བཅས་པ་མང་པོ་ཡོངས་སུ་སྣང་བར་གྱུར་ཏོ། །བྱང་ཆུབ་སེམས་དཔའ་དེ་དག་གིས་སྔོན་གྱི་མཐའི་མུར་ཐུག་པའི་དུས་དག་ཏུ་ འཇིག་རྟེན་གྱི་ཁམས་གང་དང་གང་དུ་བྱང་ཆུབ་སེམས་དཔའི་སྤྱོད་པ་སྤྱད་པར་གྱུར་པ་དེ་དག་ཀྱང་ཡོངས་སུ་སྣང་བར་གྱུར་ཏོ། །དེ་བཞིན་གཤེགས་པ་དེ་དག་གི་ཞབས་ ཀྱི་དྲུང་ན་འཁོད་ཅིང༌། ཕ་རོལ་ཏུ་ཕྱིན་པ་དེ་དག་ཐམས་ཅད་ཡོངས་སུ་སྦྱོང་བ་ཡང་ཡོངས་སུ་སྣང་བར་གྱུར་ཏོ། །དམིགས་པ་མང་པོ་དེ་དག་ཐམས་ཅད་ལས་ དམིགས་པ་རེ་རེ་ཞིང་ཡང་ཕྱི་མའི་མཐའི་མུར་ཐུག་པའི་དུས་ཀྱི་འཇིག་རྟེན་གྱི་ཁམས་འབྱམས་ཀླས་པ་བརྗོད་དུ་མེད་པའི་ཡང་བརྗོད་དུ་མེད་པ། སངས་རྒྱས་སྐྱེ་བ་དང་བཅས་པ། ཆོས་ཀྱི་འཁོར་ལོ་དང་བཅས་པ། དེ་བཞིན་གཤེགས་པའི་འཁོར་གྱི་དཀྱིལ་འཁོར་དང་བཅས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པ། སེམས་ ཅན་འདུལ་བ་དང་བཅས་པ། མིང་གི་འཁོར་ལོ་དང་བཅས་པ་མང་པོ་ཡོངས་སུ་སྣང་བར་གྱུར་ཏོ། །བྱང་ཆུབ་སེམས་དཔའ་དེ་དག་ཕྱི་མའི་མཐའི་མུར་ཐུག་པའི་དུས་དག་ ཏུ་འཇིག་རྟེན་གྱི་ཁམས་གང་དུ་བྱང་ཆུབ་སེམས་དཔའི་སྤྱོད་པ་སྤྱད་པར་གྱུར་པ་དེ་དག་ཀྱང་ཡོངས་སུ་སྣང་བར་གྱུར་ཏོ། །དེ་བཞིན་གཤེགས་པ་དེ་དག་གི་ཞབས་ཀྱི་དྲུང་ ན་འཁོད་ཅིང༌། ཕ་རོལ་ཏུ་ཕྱིན་པ་ཡོངས་སུ་སྦྱོང་བ་བྱེད་པ་དག་ཀྱང་ཡོངས་སུ་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་དེ་དག་འདི་སྙམ་དུ་གྱུར་ཏེ། བྱང་ཆུབ་སེམས་ དཔའ་འདི་དག་འཇིག་རྟེན་གྱི་ཁམས་འབྱམས་ཀླས་པ་ན་གང་དང་གང་ནས་ལྷགས་།དེ་བཞིན་གཤེགས་པ་ནི་གང་དང་གང་གི་ཞབས་ཀྱི་དྲུང་ནས་ཕྱིན་སྙམ་སྟེ། བྱང་ ཆུབ་སེམས་དཔའི་འཁོར་གྱི་དཀྱིལ་འཁོར་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ༑ རྒྱལ་ ༄༅། །བའི་སྲས། བྱང་ཆུབ་སེམས་དཔའ་འདི་དག་ལྷགས་ན་གང་ནས་ལྷགས། འཇིག་རྟེན་གྱི་ཁམས་འབྱམས་ཀླས་པ་ནི་གང་ཤེད་ནས། དེ་བཞིན་ གཤེགས་པ་ནི་གང་ཞིག་གི་ཞབས་ཀྱི་དྲུང་ནས་འདིར་ཕྱིན། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བྱང་ཆུབ་སེམས་དཔའི་འཁོར་གྱི་ དཀྱིལ་འཁོར་དེ་དག་ཐམས་ཅད་ལ་འདི་སྐད་ཅེས་སྨྲས་སོ། །ཀྱེ༑རྒྱལ་བའི་སྲས་དག། དེ་བས་ན་ཁྱེད་ཉིད་ཀྱིས་བྱང་ཆུབ་སེམས་དཔའ་འདི་དག་འཇིག་རྟེན་གྱི་ཁམས་ ནི་གང་ནས་ལྷགས། དེ་བཞིན་གཤེགས་པ་ནི་གང་ཞིག་གི་ཞབས་ཀྱི་དྲུང་ནས་ཕྱིན་པ་ཡོངས་སུ་བརྟགས་པ་དང༌། ཡོངས་སུ་དཔྱད་པ་གྱིས་ཤིག། དེ་ནས་བྱང་ཆུབ་སེམས་ དཔའ་ཆགས་པ་མེད་པའི་མིག་གིས་ཀུན་ཏུ་འགྲོ་བ་ཞེས་བྱ་བའི་ཏིང་ངེ་འཛིན་དང༌། ཐམས་ཅད་ཀྱི་རྗེས་སུ་སོང་བ་ཞེས་བྱ་བ་དང༌། ཆོས་ཀྱི་དབྱིངས་ཤིན་ཏུ་རྣམ་པར་ ཕྱེ་བ་ཞེས་བྱ་བ་དང༌། མངོན་པར་ཤེས་པ་ཐམས་ཅད་དང་ལྡན་པ་ཞེས་བྱ་བ་དང༌། དམིགས་པ་ཐམས་ཅད་ཤིན་ཏུ་རྣམ་པར་ཕྱེ་བའི་སྙིང་པོ་ཞེས་བྱ་བ་དང༌། སེམས་ ཅན་ཐམས་ཅད་ཀྱི་ལུས་མངོན་པར་ཤེས་པ་དང་ལྡན་པ་ཞེས་བྱ་བ་དང༌། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཀྱི་གཞི་རབ་ཏུ་རྟོགས་ པ་ཞེས་བྱ་བ་དག་ལ་མཉམ་པར་གཞག་གོ། དེ་ལྟར་དེ་དག་ལ་སོགས་པ་བྱང་ཆུབ་སེམས་དཔའི་ཏིང་ངེ་འཛིན་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ལ་བྱང་ཆུབ་ སེམས་དཔའ་རེ་རེས་ཀྱང་མཉམ་པར་བཞག་སྟེ། ཀུན་གྱིས་བྱང་ཆུབ་སེམས་དཔའི་ཏིང་ངེ་འཛིན་གཞན་དང༌། གཞན་ཤ་སྟག་ལ་སྙོམས་པར་བཞག་ཀྱང་འཇིག་རྟེན་གྱི་ཁམས་ འབྱམས་ཀླས་པ་དེ་དག་ཀྱང་མ་མཐོང༌། དེ་བཞིན་གཤེགས་པ་གང་གི་ཞབས་ཀྱི་དྲུང་ན་བྱང་ཆུབ་སེམས་དཔའ་དེ་དག་ཚངས་པའི་སྤྱད་པ་སྤྱོད་པ་དེ་དག་ཀྱང་མ་མཐོང་ནས། ཏིང་ངེ་འཛིན་དེ་དག་ལས་ལངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ༑རྒྱལ་བའི་སྲས། བདག་ཅག་བྱང་ཆུབ་ སེམས་དཔའ་རེ་རེས་ཀྱང་བྱང་ཆུབ་སེམས་དཔའི་ཏིང་ངེ་འཛིན་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ལ་མཉམ་པར་བཞག་ཀྱང་འཇིག་རྟེན་གྱི་ཁམས་འབྱམས་ ཀླས་པ་དེ་དག་ཀྱང་མ་མཐོང༌། བྱང་ཆུབ་སེམས་དཔའ་དེ་དག་སངས་རྒྱས་བཅོམ་ལྡན་འདས་གང་གི་ཞབས་ཀྱི་དྲུང་ན་ཚངས་པར་སྤྱོད་པའི་དེ་བཞིན་གཤེགས་པ་དེ་དག་ ཀྱང་མ་མཐོང་ངོ༌། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་ཡང་བྱང་ཆུབ་སེམས་དཔའ་འཁོར་གྱི་དཀྱིལ་འཁོར་དེ་དག་ལ་སྨྲས་པ། ཀྱེ༑ ༄༅། །རྒྱལ་བའི་སྲས་དག། ད་དུང་དུ་བྱང་ཆུབ་སེམས་དཔའ་དེ་དག་འཇིག་རྟེན་གྱི་ཁམས་འབྱམས་ཀླས་པ་གང་ནས་ལྷགས་པ་དང༌། དེ་བཞིན་གཤེགས་ པ་གང་ཞིག་གི་ཞབས་ཀྱི་དྲུང་ནས་ལྷགས་པ་བརྟགས་པར་གྱིས་ཤིག། དཔྱད་པར་གྱིས་ཤིག །འཇིག་རྟེན་གྱི་ཁམས་འབྱམས་ཀླས་པ་དེ་དག་ནི་མཐོང་བར་དཀའོ། ། སངས་རྒྱས་བཅོམ་ལྡན་འདས་གང་གི་ཞབས་ཀྱི་དྲུང་ན་བྱང་ཆུབ་སེམས་དཔའ་འདི་དག་ཚངས་པའི་སྤྱད་པ་སྤྱོད་པའི་དེ་བཞིན་གཤེགས་པ་དེ་དག་ཀྱང༌། དེ་བས་ ཀྱང་ཤིན་ཏུ་མཐོང་བར་དཀའོ། །དེ་ནས་བྱང་ཆུབ་སེམས་དཔའ་དེ་དག་ལས་བྱང་ཆུབ་སེམས་དཔའ་རེ་རེས་ཀྱང༌། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ ཞིང་བཅུའི་རྡུལ་ཤིན་ཏུ་ཕྲ་བ་སྙེད་ལ་མཉམ་པར་བཞག་གོ། དེ་ལྟར་མཉམ་པར་བཞག་ཀྱང་བྱང་ཆུབ་སེམས་དཔའ་དེ་དག་གིས་འཇིག་རྟེན་གྱི་ཁམས་འབྱམས་ཀླས་ པ་དེ་དག་ཀྱང་མ་མཐོང༌། སངས་རྒྱས་བཅོམ་ལྡན་འདས་གང་གི་ཞབས་ཀྱི་དྲུང་ན། བྱང་ཆུབ་སེམས་དཔའ་དེ་དག་ཚངས་པའི་སྤྱད་པ་སྤྱོད་པའི་དེ་བཞིན་གཤེགས་ པ་དེ་དག་ཀྱང་མ་མཐོང་ངོ༌། །དེ་ནས་བྱང་ཆུབ་སེམས་དཔའ་དེ་དག་ཏིང་ངེ་འཛིན་དེ་དག་ལས་ལངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ ལ་འདི་སྐད་ཅེས་སྨྲས་སོ། །ཀྱེ༑ རྒྱལ་བའི་སྲས། བདག་ཅག་བྱང་ཆུབ་སེམས་དཔའ་རེ་རེས་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་ སྙེད་ལ་མཉམ་པར་བཞག་ཀྱང༌། འཇིག་རྟེན་གྱི་ཁམས་འབྱམས་ཀླས་པ་དེ་དག་ཀྱང་མ་མཐོང་ངོ༌། །གང་གི་ཞབས་ཀྱི་དྲུང་ན་བྱང་ཆུབ་སེམས་དཔའ་དེ་དག་ཚངས་པའི་སྤྱད་ པ་སྤྱོད་པའི་དེ་བཞིན་གཤེགས་པ་དེ་དག་ཀྱང་མ་མཐོང་ངོ༌། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་སྟན་དེ་ལས་ནམ་མཁའི་དབྱིངས་སུ་འཕགས་ ཏེ༑ བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ལ་འདི་སྐད་ཅེས་སྨྲས་སོ། ། ཀྱེ༑ རྒྱལ་བའི་སྲས་དག། དེ་བཞིན་གཤེགས་པའི་སྐུ་ཆགས་པ་མི་མངའ་བའི་རྒྱན་དང་ལྡན་པ་དུས་གསུམ་མཚུངས་པར་མཉམ་པ། འཇིག་རྟེན་གྱི་ཁམས་འབྱམས་ ཀླས་པ་ཐམས་ཅད་ཀུན་ཏུ་ཁྱབ་པ་ཆོས་ཀྱི་དབྱིངས་ཀྱི་ཁོངས་སུ་ཆུད་པ། འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་རྣམ་པར་དམིགས་པ་འདི་ལ་ལྟོས་ཤིག་དང༌། དེ་ལ་འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་ཀྱང་གཟུགས་བརྙན་དུ་གྱུར་པར་སྣང་ངོ༌། །དེ་བཞིན་གཤེགས་པ་འབྱམས་ཀླས་པ་ཐམས་ཅད་ཀྱང་གཟུགས་ ༄༅། །བརྙན་དུ་གྱུར་བར་སྣང་ངོ༌། །བྱང་ཆུབ་སེམས་དཔའ་འབྱམས་ཀླས་པ་ཐམས་ཅད་ཀྱང་གཟུགས་བརྙན་དུ་གྱུར་པར་སྣང་ངོ༌། །སེམས་ཅན་གྱི་ཁམས་ འབྱམས་ཀླས་པ་ཐམས་ཅད་ཀྱང་གཟུགས་བརྙན་དུ་གྱུར་པར་སྣང་ངོ༌། །ལམ་གྱི་རྒྱུད་འབྱམས་ཀླས་པ་ཐམས་ཅད་ཀྱང་གཟུགས་བརྙན་དུ་གྱུར་བར་སྣང་ངོ༌། །ཀྱེ། རྒྱལ་བའི་ སྲས་དག། དེ་བས་ན་ཁྱེད་ཀྱིས་རང་གི་ལུས་ཀུན་ཏུ་ལྟ་བའི་མིག་དང་ལྡན་པར་བྱིན་གྱིས་རློབས་ལ། ཤེས་རབ་ཀྱི་མིག་ནམ་མཁའི་དབྱིངས་ཀྱིས་ཀླས་པར་བྱིན་གྱིས་ རློབ་སྟེ། ཡེ་ཤེས་ཡངས་པའི་མིག་དམིགས་པ་ཐམས་ཅད་ཀྱི་རྗེས་སུ་སོང་བ་ཁོང་དུ་ཆུད་པར་གྱིས་ལ། ཕྱོགས་འབྱམས་ཀླས་པ་ཐམས་ཅད་དུ་དེ་བཞིན་གཤེགས་ པ་ཐམས་ཅད་བྱིན་གྱིས་རློབས་ཏེ། དེ་བཞིན་གཤེགས་པའི་སྐུ་ཐམས་ཅད་དུ་མི་གནས་པ་འདི་ལ་གནས་པ་ཐམས་ཅད་ཡོངས་སུ་བསལ་བའི་ལྟ་བས་ལྟོས་ཤིག་ མངོན་པར་ཞེན་པ་ཐམས་ཅད་ལས་གྱེན་དུ་འཕགས་པ་དང༌། སྲིད་པ་ཐམས་ཅད་ལ་མངོན་པར་ཞེན་པ་མེད་པ་དང༌། ཤིན་ཏུ་ཕྲ་བའི་ཚུལ་གྱིས་སྟོབས་བཅུའི་སྟོབས་ ཡོངས་སུ་ནོན་པ་དང༌། དམིགས་པ་ཆུང་ངུ་ལ་རྒྱ་ཆེན་པོར་འཇུག་པའི་ལྟ་བས་ལྟོས་ཤིག །དེ་ནས་བྱང་ཆུབ་སེམས་དཔའ་དེ་དག་གིས་བྱང་ཆུབ་སེམས་དཔའ་ སེམས་དཔའ་ཆེན་པོ་ཀུན་ཏུ་བཟང་པོའི་གདམས་ངག་བཞིན་དུ་ཐལ་མོ་སྦྱར་ཏེ། བཅོམ་ལྡན་འདས་ལ་ཕྱག་འཚལ་ནས་སེམས་ཤིང་རྟོག་པ་དང༌། བཅོམ་ལྡན་འདས་ཀྱི་ཞབས་ ཀྱི་མཐིལ་གཉིས་ཀྱི་འཁོར་ལོ་རྩིབས་སྟོང་ཡོད་པ་ལ་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱི་འཁོར་ལོ་ཞེས་བྱ་བ་ཡོད་པ་མཐོང་བར་གྱུར་ཏེ། འཇིག་རྟེན་གྱི་ཁམས་དེ་ན་དེ་ བཞིན་གཤེགས་པ་ཆོས་ཀྱི་དབྱིངས་ཀྱི་རྒྱན་གྱི་རྒྱལ་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ༌། །ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས། བྱང་ཆུབ་སེམས་དཔའ་ཀུན་ཏུ་སྣང་ བ་མཛོད་ཀྱི་སྙིང་པོས་བྱུང་བ་ཞེས་བྱ་བ། བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ། བཅོམ་ལྡན་འདས་ཀྱི་ཞབས་བྱིན་པ་རི་ དྭགས་ཨེ་ན་ཡའི་བྱིན་པ་ལྟ་བུ་གཉིས་ལ་འཇིག་རྟེན་གྱི་ཁམས་ཆགས་པ་མེད་པའི་སྙིང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་འོད་རྒྱ་མཚོ་ཆགས་པ་མེད་ ཅིང་དྲི་མ་མེད་པའི་སྙིང་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ༌། །ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཟབ་མོའི་ཆོས་མཛོད་ཀྱི་སྙིང་པོས་ ༄༅། །བྱུང་བ་ཞེས་བྱ་བ། བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ། དེ་བཞིན་གཤེགས་པའི་ཞབས་ པུས་མོ་གཉིས་ཀྱི་ལྷ་ང་ལ་འཇིག་རྟེན་གྱི་ཁམས་ས་ལ་[*LE?]སྦྲམ་ཡོད་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་གསེར་འབར་བ་དམ་པ་ཞེས་བྱ་བ་བཞུགས་ཤིང་ འཚོ་སྐྱོང་ངོ༌། །ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་དཔལ་གྱི་གཟི་བརྗིད་མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་ འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་དུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ ནས། སེང་གེའི་ཁྲི་ཆགས་པ་མེད་པའི་སྙིང་པོ་ཅན་ལ་འདུག་གོ། བཅོམ་ལྡན་འདས་ཀྱི་སྐུ་སྟ་ཟུར་གྱི་དཀྱིལ་འཁོར་ལ་འཇིག་རྟེན་གྱི་ཁམས་རིན་པོ་ཆེ་སྣ་ཚོགས་ཀྱི་ རྒྱན་གྱི་སྙིང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགེ་བ་སྣ་ཚོགས་ཀྱི་སྙིང་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ༌། །ཆོས་སྟོན་ཏོ། །དེའི་སངས་རྒྱས་ཀྱི་ ཞིང་ནས་བྱང་ཆུབ་སེམས་དཔའི་སྤྲིན་སྒྲ་ཟབ་མོ་རྣམ་པ་ཐ་དད་པའི་མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་ པོ་ཅན་ལ་འདུག་གོ། བཅོམ་ལྡན་འདས་ཀྱི་སྐུ་ལྟེ་བའི་དཀྱིལ་འཁོར་ན་འཇིག་རྟེན་གྱི་ཁམས་རྣམ་པར་སྣང་བའི་སྙིང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་རྣམ་ པར་སྣང་མཛད་གཟི་བརྗིད་ཀྱི་རྒྱལ་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ༌། །ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་རྡོ་རྗེ་མི་ཕྱེད་པའི་གཙུག་གི་ མཛོད་ཀྱི་སྙིང་པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་ བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་མེད་པའི་སྙིང་པོ་ཅན་ལ་འདུག་གོ། བཅོམ་ལྡན་འདས་ཀྱི་ཐུགས་ཀ་ན་འཇིག་རྟེན་གྱི་ཁམས་ དཔལ་གྱི་འོད་ཟེར་སྙིང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དཔལ་གྱི་བེའུ་རྒྱན་གྱིས་བརྒྱན་པའི་སྙིང་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ༌། །ཆོས་སྟོན་ ༄༅། །ཏོ༑ ༑དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ངག་གི་ལམ་མི་གཡོ་བར་ཀུན་ཏུ་འགྲོ་བའི་འོད་ཟེར་སྣང་བའི་གཟི་བརྗིད་ཀྱི་མཛོད་ཀྱི་སྙིང་ པོས་བྱུང་བ་ཞེས་བྱ་བ་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་ སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ། བཅོམ་ལྡན་འདས་ཀྱི་སྐུ་ཕྲག་པའི་ལྷུན་གཉིས་ ལ་འཇིག་རྟེན་གྱི་ཁམས་གསར་ཡོད་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་གསེར་འབར་བའི་སྙིང་པོ་ཞེས་བྱ་བ་བཞུགས་ཤིང་འཚོ་སྐྱོང་ངོ༌། །ཆོས་སྟོན་ ཏོ༑ ༑དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་གྲགས་པ་སྙན་པར་ཀུན་ཏུ་རྣམ་པར་གྲགས་པའི་འོད་ཀྱི་གཟི་བརྗིད་མཛོད་ཀྱི་སྙིང་པོས་བྱུང་བ་ཞེས་བྱ་བ་། བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་མེད་པའི་རྒྱན་གྱིས་སྙིང་པོ་ཅན་ལ་འདུག་གོ། བཅོམ་ལྡན་འདས་རྣམ་པར་སྣང་མཛད་ཀྱི་ཞལ་གྱི་གསུང་ གི་དབྱངས་ལ་འཇིག་རྟེན་གྱི་ཁམས་རིན་པོ་ཆེ་སྣ་ཚོགས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་འོད་ཟེར་དཔག་ཏུ་མེད་པའི་གཟི་བརྗིད་ཀྱིས་རབ་ཏུ་བརྒྱན་པའི་རྒྱལ་པོ་ ཞེས་བྱ་བ་བཞུགས་ཤིང་འཚོ་སྐྱོང་ངོ༌། །ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས། བྱང་ཆུབ་སེམས་དཔའ་རིའི་རྒྱལ་པོ་མི་གཡོ་བའི་འོད་ཟེར་སྣང་བའི་གཟི་བརྗིད་མཛོད་ཀྱི་ སྙིང་པོས་བྱུང་བ་ཞེས་བྱ་བ། བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་ བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ཅན་ལ་འདུག་གོ། བཅོམ་ལྡན་འདས་རྣམ་པར་སྣང་མཛད་ཀྱི་སྨིན་ མཚམས་ན་འཇིག་རྟེན་གྱི་ཁམས་ཆོས་ཀྱི་དབྱིངས་མི་ཟད་པའི་མཛོད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཡེ་ཤེས་དུས་གསུམ་དུ་མི་ཟད་པའི་མཛོད་ཅེས་བྱ་བ་ བཞུགས་ཤིང་འཚོ་སྐྱོང་ངོ༌། །ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཀུན་ནས་བལྟ་བའི་གཟུགས་རྣམ་པར་དམིགས་པའི་འོད་ཟེར་གྱི་ རྒྱལ་པོ་སྣང་བའི་གཟི་བརྗིད་མཛོད་ཀྱི་སྙིང་པོས་བྱུང་བ་ཞེས་བྱ་བ། བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་ ༄༅། །བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་མེད་པའི་རྒྱན་གྱི་སྙིང་པོ་ ཅན་ལ་འདུག་གོ། བཅོམ་ལྡན་འདས་རྣམ་པར་སྣང་མཛད་ཀྱི་དབུ་ལ་འཇིག་རྟེན་གྱི་ཁམས་གཞི་སྤྱིའུ་ཚུགས་ཀྱི་ལྷུན་ཡོངས་སུ་འཛིན་པ་ཞེས་བྱ་བ་ཡོད་དེ། དེ་ན་དེ་ བཞིན་གཤེགས་པ་རིན་པོ་ཆེའི་མེ་ཏོག་བརྩེགས་པ་ཞེས་བྱ་བ་བཞུགས་ཤིང་འཚོ་སྐྱོང་ངོ༌། །ཆོས་སྟོན་ཏོ། །དེའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་སྟོབས་ བཅུ་རྣམ་པར་དག་པ་ཐུབ་པ་མེད་པའི་འོད་ཟེར་སྣང་བའི་གཟི་བརྗིད་མཛོད་ཀྱི་སྙིང་པོས་བྱུང་བ་ཞེས་བྱ་བ། བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་ མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ་འོངས་ནས། སེང་གེའི་ཁྲི་ཆགས་པ་ མེད་པའི་རྒྱན་གྱི་སྙིང་པོ་ཅན་ལ་འདུག་གོ། དེ་ནས་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་འཇིག་རྟེན་གྱི་ཁམས་རྒྱ་མཚོ་དེ་དག་དང༌། དེ་བཞིན་གཤེགས་ པའི་འཁོར་གྱི་དཀྱིལ་འཁོར་དེ་དག་དང༌། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དེ་དག་དང༌། སངས་རྒྱས་ཀྱི་རྣམ་པར་འཕྲུལ་པ་དེ་དག་མཐོང་བར་གྱུར་ ནས༑ བྱང་ཆུབ་སེམས་དཔའ་དེ་དག་ཐམས་ཅད་ལས་བྱང་ཆུབ་སེམས་དཔའ་རེ་རེས་ཀྱང་ཏིང་ངེ་འཛིན་ཆོས་ཀྱི་དབྱིངས་ཀྱི་སྙིང་པོ་ལ་སོགས་པ་ཏིང་ངེ་འཛིན་སངས་རྒྱས་ཀྱི་ཞིང་ བཅུའི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏོ། །བྱང་ཆུབ་སེམས་དཔའ་རེ་རེས་ཀྱང་གཟུངས་ཆོས་ཐམས་ཅད་ཀྱི་ས་ལ་སོགས་པ་གཟུངས་སངས་རྒྱས་ཀྱི་ཞིང་བཅུའི་རྡུལ་ཤིན་ ཏུ་ཕྲ་བ་སྙེད་ཐོབ་པར་གྱུར་ཏེ། བྱང་ཆུབ་སེམས་དཔའ་རེ་རེས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་རྡུལ་དང་བྲལ་བའི་སྙིང་པོ་ལ་སོགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སངས་ རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ལས་བྱང་ཆུབ་སེམས་དཔའ་རེ་རེས་ཀྱང་སྟོབས་ཀྱི་གློག་ལ་སོགས་ པ་ཐམས་ཅད་མཁྱེན་པ་ཉིད་ཀྱི་གློག་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏོ། །ཀྱེ༑ རྒྱལ་བའི་སྲས་དག། ཆོས་ཀྱི་སྒོ་འདི་དག་ནི་བསམ་པ་རྡོ་རྗེ་དམ་ པ་ལྟ་བུར་བྱས་ཏེ་ཡོངས་སུ་ཆུབ་པར་བྱའོ། །རིམ་གྲོ་ཆེན་པོ་དང་ལྡན་པའི་བསམ་པས་ཡོངས་སུ་བསྲུང་བར་བྱའོ། །ཀྱེ༑ རྒྱལ་བའི་སྲས་དག། ཆོས་ཀྱི་སྒོ་འདི་དག་ནི་། བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་བཤེས་གཉེན་གྱིས་ཡོངས་སུ་ཟིན་པ་ཀུན་ཏུ་བཟང་པོའི་སྤྱོད་པ་ལ་ཞུགས་པ་རྣམས་མ་གཏོགས་པར་གཞན་གྱི་ ༄༅། །རྣ་ལམ་དུ་འགྲོ་བར་མི་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་དེ་སྐད་ཅེས་སྨྲས་པ་དང༌། བྱང་ཆུབ་སེམས་ དཔའ་སེམས་དཔའ་ཆེན་པོ་དེ་དག་ཡིད་དགའ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་སྨྲས་པ་ལ་མངོན་པར་དགའོ། །ཤིན་ཏུ་རྒྱས་ པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། ཀུན་ཏུ་བཟང་པོས་བསྟན་པའི་ལེའུ་ཞེས་བྱ་བ་སྟེ། སུམ་ཅུ་རྩ་གཉིས་པའོ།། །།བམ་ པོ་ལྔ་བཅུ་རྩ་ལྔ་པ། བཅོམ་ལྡན་འདས་ཐོག་མ་མངོན་པར་སངས་རྒྱས་པ་ཕོ་བྲང་འོད་ཐམས་ཅད་ཀྱི་སྙིང་པོ་ཅན་ན་དེ་བཞིན་དུ་མཉམ་པར་བཞག་པར་བཅོམ་ལྡན་ འདས་བསམ་གཏན་ཁྲག་ཁྲིག་བརྒྱའི་ཏིང་ངེ་འཛིན་དང༌། ཐམས་ཅད་ཀྱིས་མི་ཕྱེད་པའི་ལྷག་པའི་བསམ་པས་ཐོབ་པའི་ཐམས་ཅད་མཁྱེན་པའི་སྟོབས་དང༌། དེ་བཞིན་ གཤེགས་པའི་སྐུ་ཤིན་ཏུ་དག་པ་དང༌། གནས་མེད་པ་ལ་རྟེན་པའི་སངས་རྒྱས་ཀྱི་སྐུ་དང༌། མི་གཉིས་པའི་ཞི་གནས་དང་ཡང་དག་པར་ལྡན་པ་དང༌། ཚད་མེད་པར་ཁྱབ་ པའི་སངས་རྒྱས་ཀྱི་ཆེ་བ་ཉིད་དང༌། མི་གནས་པའི་བསམ་གཏན་གྱི་རྒྱུད་དང༌། འགྲོ་བ་ཐམས་ཅད་ཀྱིས་རྣམ་པར་དམིགས་པའི་དེ་བཞིན་གཤེགས་པ་ལྟ་བ་དང༌། དུས་ལ་བབ་པའི་སངས་རྒྱས་འབྱུང་བ་དང༌། སྐད་ཅིག་གཅིག་གིས་བྱུང་བའི་མཚན་ཉིད་མེད་པ་ལ་སྤྱོད་པས་བཞུགས་ཏེ། བྱང་ཆུབ་སེམས་དཔའི་དབང་བསྐུར་བ་བྱང་ཆུབ་སེམས་ དཔའི་རྣམ་པར་དགོད་པ་ལ་རབ་ཏུ་གནས་པ། མཐའ་དང་དབུས་མེད་པའི་ཆོས་ཀྱི་དབྱིངས་ཀྱིས་བྱང་ཆུབ་སེམས་དཔའི་ཡོངས་སུ་དག་པ་དང་ལྡན་པ། བྱང་ཆུབ་སེམས་དཔའི་ ཏིང་ངེ་འཛིན་ཀུན་ཏུ་ལྟ་བ་རབ་ཏུ་ཐོབ་པ། འགྲོ་བ་ཐམས་ཅད་བདེ་བར་བྱེད་པའི་སྙིང་རྗེ་ཆེན་པོ་རབ་ཏུ་ཐོབ་པ། བདུད་ཀྱི་དཔུང་ཐམས་ཅད་རབ་ཏུ་འཇོམས་པ། ཐམས་ཅད་ མཁྱེན་པའི་ཡེ་ཤེས་ཡང་དག་པར་བསྒྲུབས་པ། འགྲོ་བ་ཐམས་ཅད་དུ་རབ་ཏུ་ཞི་བར་གནས་པས་བྱང་ཆུབ་སེམས་དཔའི་རྣམ་པར་ཐར་པ་མི་གནས་པ་ལ་གནས་པ། སངས་ རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང་ཐབས་གཅིག་སྟེ། འདི་ལྟར་བྱང་ཆུབ་སེམས་དཔའ་རྡོ་རྗེའི་གཙུག་དང༌། གཞལ་དུ་མེད་པའི་བློ་གྲོས་དང༌། ཞི་བའི་བློ་གྲོས་ དང༌། གཏོང་བའི་བློ་གྲོས་དང༌། ཀླུའི་བློ་གྲོས་དང༌། ཐོབ་པའི་བློ་གྲོས་དང༌། སྤྱིན་པའི་བློ་གྲོས་དང༌། སྟོབས་ཀྱི་བློ་གྲོས་དང༌། བསམ་གྱིས་མི་ཁྱབ་པའི་བློ་གྲོས་དང༌། ཆགས་པ་མེད་པའི་བློ་གྲོས་དང༌། མཆོག་གི་བློ་གྲོས་དང༌། ལྷའི་བློ་གྲོས་དང༌། མཆོད་སྦྱིན་བྱས་པའི་བློ་གྲོས་དང༌། མཐུའི་བློ་གྲོས་དང༌། དོན་གྱི་བློ་གྲོས་དང༌། ཆོས་ ༄༅། །ལ་དབང་པོའི་བློ་གྲོས་དང༌། ཆོས་ཀྱི་བློ་གྲོས་དང༌། ཞི་བའི་བློ་གྲོས་དང༌། ནམ་མཁའི་བློ་གྲོས་དང༌། སྐད་ཅིག་གཅིག་གི་བློ་གྲོས་དང༌། ལེགས་པའི་བློ་གྲོས་དང༌། སྡོམ་པའི་བློ་གྲོས་དང༌། ནམ་མཁའི་བློ་གྲོས་དང༌། སྟོབས་ཀྱི་བློ་གྲོས་དང༌། གླང་པོའི་བློ་གྲོས་དང༌། སངས་རྒྱས་ཀྱི་མཐུའི་བློ་ གྲོས་དང༌། དོན་རྣམ་པར་དམིགས་པའི་བློ་གྲོས་དང༌། དམ་པའི་བློ་གྲོས་དང༌། ཡེ་ཤེས་སྣང་བའི་བློ་གྲོས་དང༌། འཕགས་པའི་བློ་གྲོས་དང༌། དྲན་པའི་རྒྱན་དང༌། དངོས་པོ་མེད་པའི་མཐར་ཕྱིན་པ་དང༌། རང་བཞིན་གྱི་རྒྱན་དང༌། ཡུལ་ཟབ་མོ་དང༌། གནས་དང་གནས་མ་ཡིན་པ་ལ་མཁས་པ་དང༌། ཀླུའི་འོད་དང༌། སྣང་བ་ འཛིན་པ་དང༌། སངས་རྒྱས་ཀྱི་རིམ་གྲོ་ལ་བརྩོན་པ་དང༌། སེམས་ཀྱི་རྒྱལ་པོ་དང༌། སྤྱོད་པ་གཅིག་པ་དང༌། མངོན་པར་ཤེས་པ་མ་ཉམས་པ་དང༌། ཡེ་ཤེས་ཀྱི་ ཚོགས་དང༌། ཡོན་ཏན་འབྱུང་གནས་དང༌། ཆོས་ཀྱི་སྒྲོན་མ་དང༌། འགྲོ་བའི་བདག་པོ་དང༌། འགྲོ་བ་འཛིན་པ་དང༌། བདེ་བ་བྱེད་པ་དང༌། མཆོག་ཏུ་གྱུར་པ་ དང༌། བླ་ན་མེད་པ་དང༌། མཉམ་པ་མེད་པ་དང༌། འདྲ་བ་མེད་པ་དང༌། འོད་ཐོགས་པ་མེད་པ་དང༌། འོད་རབ་ཏུ་སྣང་བ་དང༌། གྲགས་པའི་འོད་དང༌། ཤིན་ཏུ་ རྣམ་པར་སྣང་བ་དང༌། ལེགས་པ་བརྟན་པ་དང༌། ཆོས་ཀྱི་ཆར་པ་དང༌། ཐིག་ལེ་དམ་པ་དང༌། ཡེ་ཤེས་ཀྱི་མིག་དང༌། ཆོས་ཀྱི་མིག་དང༌། ཤེས་རབ་ཀྱི་སྤྲིན་དང༌། སའི་རྒྱལ་པོ་ དང༌། སྨོན་ལམ་ཁྱད་པར་དུ་ཐོགས་པ་མེད་པས་འགྲོ་བ་དང༌། ཡེ་ཤེས་ཀྱི་སྙིང་པོ་དང༌། བསམ་པའི་རྒྱལ་པོ་དང༌། ནང་གི་བློ་གྲོས་ཡང་དག་པར་གྲུབ་པ་དང༌། ཐམས་ཅད་ མཁྱེན་པའི་སྤྱོད་ཡུལ་དང༌། སའི་སྟབས་ཀྱིས་རྣམ་པར་གནོན་པ་དང༌། ས་དང༌། སྟོབས་དང༌། མི་འཇིགས་པ་འཛིན་པ་དང༌། ཟླ་བ་བཟང་པོ་དང༌། རི་བོ་ཆེན་པོའི་དཔལ་དང༌། རིན་པོ་ཆེ་ཆེན་པོའི་དཔལ་དང༌། བར་སྣང་གི་རྒྱུད་དང༌། ཁམས་ཆེན་པོའི་རྒྱལ་པོ་དང༌། དཀྱིལ་འཁོར་མཉམ་པ་ཁོང་དུ་ཆུད་པ་དང༌། གཟི་བརྗིད་གཞན་གྱིས་མི་ཕམ་པ་ དང༑ ཀླུ་ཆེན་པོའི་ལྟ་བའི་དཔལ་དང༌། མཉམ་པ་ཉིད་ཀྱི་ངང་ཚུལ་དང༌། ཕྱིར་མི་ལྡོག་པའི་བརྩོན་འགྲུས་དང༌། སངས་རྒྱས་ཀྱི་འཁོར་ལོ་ཡང་དག་པར་འཛིན་པའི་དཔལ་ དང༑ དྲན་པའི་ཡུལ་ཉམས་པ་མེད་པ་དང༌། བསམ་གྱིས་མི་ཁྱབ་པའི་བློ་གྲོས་ཀྱིས་རྣམ་པར་རྟོགས་པ་དང༌། མཐའ་དང་དབུས་མེད་པའི་བློས་རྣམ་པར་རོལ་པ་དང༌། མཛོད་ཟད་མི་ཤེས་པ་དང༌། ཡེ་ཤེས་ཉི་མའི་དཔལ་དང༌། ཆོས་ཀྱི་ཉི་མ་དང༌། ཡེ་ཤེས་ཕུན་སུམ་ཚོགས་པའི་སྙིང་པོ་དང༌། བློ་དམ་པའི་ཆར་འབེབས་པ་དང༌། ཀུན་ ༄༅། །ཏུ་བལྟ་བ་དང༌། བལྟ་ན་དོན་ཡོད་པ་དང༌། རྡོ་རྗེའི་མངོན་པར་ཤེས་པ་དང༌། ཡེ་ཤེས་རྡོ་རྗེའི་བློ་གྲོས་དང༌། ཀུན་ཏུ་མིག་གི་དཔལ་དང༌། སངས་རྒྱས་ཀྱི་ དོན་གྱི་ཉི་མ་དང༌། སངས་རྒྱས་ཀྱི་རྡོ་རྗེ་ཡང་དག་པར་གཟུང་བའི་བསམ་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་མིག་གི་ཡུལ་ཀུན་ཏུ་ཡེ་ཤེས་ཀྱི་རྒྱན་དང༌། དེ་དག་ལ་སོགས་པ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང༌། སྔོན་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་ མཛད་ཀྱི་བྱང་ཆུབ་སེམས་དཔའི་སྤྱོད་པ་དང༌། དགེ་བའི་རྩ་བ་ལ་གྲོགས་སུ་གྱུར་པ་ཤ་སྟག་དང་ཐབས་གཅིག་གོ། དེ་ནས་བྱང་ཆུབ་སེམས་དཔའ་ཀུན་ཏུ་མིག་དེའི་ཚེ། སངས་རྒྱས་ཀྱི་མཐུས་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེར་ཐལ་ མོས་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་བདག་གིས་ཞུས་ནས་ཞུས་པའི་ལུང་བསྟན་པར་བཅོམ་ལྡན་འདས་ཀྱིས་སྐབས་དབྱེ་བར་ གནང་ན། བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་གཅིག་ཅིག་ཞུའོ། །དེ་སྐད་ཅེས་གསོལ་བ་དང༌། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་མིག་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་མིག་ཁྱོད་ཀྱིས་དེ་བཞིན་གཤེགས་པ་ལ་ཅི་དང་ཅི་འདོད་ པ་དྲིས་ཤིག་དང༌། ངས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་ཚིམ་པར་བྱའོ། །དེ་སྐད་ཅེས་བཀའ་སྩལ་པ་དང༌། བྱང་ཆུབ་སེམས་དཔའ་ཀུན་ཏུ་མིག་གིས་བཅོམ་ ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཏིང་ངེ་འཛིན་དང༌། རྣམ་པར་ཐར་པ་དུ་དང་ལྡན་པའི་བྱང་ཆུབ་སེམས་དཔའ་ཀུན་ཏུ་བཟང་པོའི་སྒོ་ དང༌། ཀུན་ཏུ་བཟང་པོའི་སྤྱོད་པ་དང༌། སྨོན་ལམ་དུ་ལྡན་པ་རྣམས་ཏིང་ངེ་འཛིན་དང༌། རྣམ་པར་ཐར་པ་ལ་སྙོམས་པར་འཇུག་ཅིང་རྣམ་པར་ལྡང་བ་ལགས། ཏིང་ངེ་འཛིན་ གྱི་ཁྱད་པར་གྱི་གནས་འཐོབ་པ་ལགས། བྱང་ཆུབ་སེམས་དཔའི་ཏིང་ངེ་འཛིན་བསམ་གྱིས་མི་ཁྱབ་པ་ལ་སྙོམས་པར་འཇུག་པ་དང༌། རྣམ་པར་ལྡང་བ་ལ་མཁས་པ་རྒྱུན་ མི་འཆད་པ་འཐོབ་པ་ལགས། ཏིང་ངེ་འཛིན་ཐམས་ཅད་ཀྱི་ཁྱུ་མཆོག་གི་མཐུ་དང་རྣམ་པར་འཕྲུལ་པ་དང་ལྡན་པ་ལགས། དེ་སྐད་ཅེས་གསོལ་བ་དང༌། བཅོམ་ལྡན་འདས་ ཀྱིས་བྱང་ཆུབ་སེམས་དཔའ་ཀུན་ཏུ་མིག་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་མིག་ཁྱོད་ཀྱིས་དེ་ལྟར་འདས་པ་དང༌། མ་འོངས་པ་དང༌། ད་ལྟར་བྱུང་བའི་བྱང་ཆུབ་ ༄༅། །སེམས་དཔའི་དཀྱིལ་འཁོར་ཐམས་ཅད་དང༌། དེ་བཞིན་གཤེགས་པའི་དཀྱིལ་འཁོར་ཐམས་ཅད་ཀྱི་དོན་དུ་དེ་བཞིན་གཤེགས་པ་ལ་དོན་འདྲི་བར་ བསམས་པ་ལེགས་སོ། །ལེགས་སོ། །ཀུན་ཏུ་མིག། དེ་བས་ན་བྱང་ཆུབ་སེམས་དཔའ་ཀུན་ཏུ་བཟང་པོ་བསམ་གྱིས་མི་ཁྱབ་པའི་བྱང་ཆུབ་སེམས་དཔའི་རྣམ་པར་འཕྲུལ་པ་ དང་ལྡན་པ། བྱང་ཆུབ་སེམས་དཔའི་ཁྱུ་མཆོག་གི་མཐུ་བསྒྲུབ་པར་དཀའ་བ་དང་ལྡན་པ། བྱང་ཆུབ་སེམས་དཔའི་སྤྱོད་པ་ལ་འཇུག་པ་ཚད་མེད་པས་མངོན་པར་བྱུང་བ། བྱང་ཆུབ་སེམས་དཔའི་ཆོ་འཕྲུལ་དང་རྣམ་པར་འཕྲུལ་པ་ལ་ཤིན་ཏུ་བསླབས་པ། བྱང་ཆུབ་སེམས་དཔའི་སྨོན་ལམ་སྒྲུབ་པར་དཀའ་བས་རྣམ་པར་སྦྱངས་པ། བྱང་ཆུབ་ སེམས་དཔའི་འབྱུང་བའི་ཕྱིར་མི་ལྡོག་པ་དང་ལྡན་པ། ཕ་རོལ་ཏུ་ཕྱིན་པའི་ཚུལ་མཐའ་ཡས་པས་རྣམ་པར་སྦྱངས་པ། གཟུངས་འཐོབ་པར་བྱ་བ་མུ་མེད་པ་དང་ལྡན་པ། ཐ་དད་ པ་ཡང་དག་པར་ཤེས་པ་ཟད་མི་ཤེས་པས་ཐོགས་པ་མེད་པར་རྣམ་པར་དག་པ། འགྲོ་བ་ཐམས་ཅད་ལ་སྐྱོ་བ་མེད་པ་ཐོབ་པའི་སྙིང་རྗེ་ཆེན་པོས་ཕྱི་མའི་མཐའི་མུར་ཐུག་པའི་ སྨོན་ལམ་དང་ལྡན་པ་འདི་འཁོར་འདིར་འདུས་ཏེ། འདུག་པ་ཡིན་གྱི། དེ་ལ་དྲིས་ཤིག་དང༌། ཏིང་ངེ་འཛིན་དང༌། རྣམ་པར་འཕྲུལ་པ་སྟོན་ཏོ། །དེ་ནས་བྱང་ཆུབ་སེམས་དཔའི་ འཁོར་དེ་དག་གིས་བྱང་ཆུབ་སེམས་དཔའ་ཀུན་ཏུ་བཟང་པོའི་མིང་ཐོས་མ་ཐག་ཏུ་བྱང་ཆུབ་སེམས་དཔའི་ཏིང་ངེ་འཛིན་བསམ་གྱིས་མི་ཁྱབ་པ་མངོན་དུ་གྱུར་ཏོ། །ཆགས་པ་མེད་པའི་ སེམས་རྣམ་པར་ཕྱེ་བས་ཀྱང་བྱིན་གྱིས་བརླབས་པར་གྱུར་ཏོ། །ཡེ་ཤེས་བསམ་གྱིས་མི་ཁྱབ་པར་འཇུག་པར་བྱ་བ་ལའང་རབ་ཏུ་གཞོལ་བར་གྱུར་ཏོ། །ཡེ་ཤེས་མི་འཕྲོགས་ པའི་སྤྱོད་ཡུལ་ཡང་རབ་ཏུ་བྱུང་ངོ༌། །དེ་བཞིན་གཤེགས་པ་གྲངས་མེད་པ་མཐོང་ཞིང་རྣམ་པར་དམིགས་པ་ཡང་མངོན་དུ་གྱུར་ཏོ། །དེ་བཞིན་གཤེགས་པའི་སྟོབས་ཚད་ མེད་པ་ཡང་ཁོང་དུ་ཆུད་པར་གྱུར་ཏོ། །དེ་བཞིན་གཤེགས་པ་དང་རྒྱུད་ཀྱི་ཚུལ་གཅིག་པ་ཡང་རྗེས་སུ་རྟོགས་པར་གྱུར་ཏོ། །དུས་གསུམ་མཐའ་ཡས་པ་ལ་འཇུག་པ་ཡང་ ཁོང་དུ་ཆུད་པར་གྱུར་ཏོ། །བསོད་ནམས་ཟད་མི་ཤེས་པའི་བྱིན་ཀྱང་ཐོབ་པར་གྱུར་ཏོ། །རྣམ་པར་འཕྲུལ་པ་བཟང་པོ་ཡོངས་སུ་རྫོགས་པར་བྱ་བའང་ཁོང་དུ་ཆུད་པར་གྱུར་ནས། དེ་དག་ཐམས་ཅད་ཀྱིས་རིམ་གྲོ་དང་བཅས་ཤིང་རྗེས་དང་བཅས་པས་དེ་བཞིན་གཤེགས་པའི་འཁོར་གྱི་དཀྱིལ་འཁོར་ཐམས་ཅད་དུ་ལྟ་བར་གྱུར་ན། དེ་བཞིན་གཤེགས་ པའི་བྱིན་གྱི་རླབས་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་རྫུ་འཕྲུལ་གྱི་ཁྱུ་མཆོག་གི་མཐུས་བྱང་ཆུབ་སེམས་དཔའ་ཀུན་ཏུ་བཟང་པོ་ཡང་མ་མཐོང༌། བྱང་ཆུབ་ ༄༅། །སེམས་དཔའ་ཀུན་ཏུ་བཟང་པོའི་ལུས་ཀྱང་མ་མཐོང༌། བྱང་ཆུབ་སེམས་དཔའ་ཀུན་ཏུ་བཟང་པོ་གང་ན་གནས་པའི་སྟན་ཡང་མ་མཐོང་ངོ༌། །དེ་ནས་ བྱང་ཆུབ་སེམས་དཔའ་ཀུན་ཏུ་མིག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་ཀུན་ཏུ་བཟང་པོ་ད་ལྟར་ག་ལ་མཆིས། བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་མིག །འཁོར་འདི་ཉིད་ན་ངའི་ཞབས་ཀྱི་དྲུང་ན་འཇུག་གོ །ངའི་ཞབས་ཀྱི་དྲུང་ན་སྤྱོད་དོ། །ངའི་ཞབས་ཀྱི་དྲུང་ནས་མ་གཡོས་ སོ༑ ༑དེ་ནས་བྱང་ཆུབ་སེམས་དཔའ་ཀུན་ཏུ་མིག་དང༌། བྱང་ཆུབ་སེམས་དཔའི་འཁོར་དེ་དག་ཐམས་ཅད་ཀྱིས་ཡང་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་ བལྟས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཀུན་ཏུ་བཟང་པོ་དེ་མ་མཐོང་ངོ༌། །དེའི་ལུས་ཀྱང་མ་མཐོང་ངོ༌། ། དེའི་སྟན་ཡང་མ་མཐོང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག །ཁྱེད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་མ་མཐོང་ཞིང༌། སྟན་མ་མཐོང་བ་ནི་དེ་དེ་བཞིན་ཏེ་ཡུས་སོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ཀུན་ཏུ་བཟང་པོ་དེ་ནི་བརྗོད་དུ་མེད་ཅིང་ཟབ་པ་ལ་གནས་པ་སྟེ། འདི་ ལྟར་ཡེ་ཤེས་ཀྱི་དབྱིངས་མཐའ་ཡས་པར་འཇུག་པ་ལ་ཞུགས་པའོ། །སེང་གེ་རྣམ་པར་བསྒྱིངས་པའི་ཏིང་ངེ་འཛིན་རབ་ཏུ་ཐོབ་པའོ། །སངས་རྒྱས་ཀྱི་ཆོ་འཕྲུལ་བླ་ན་མེད་པ་རབ་ཏུ་ ཐོབ་པའོ། །ཆགས་པ་མེད་པའི་མཐས་རྣམ་པར་དག་པའི་དེ་བཞིན་གཤེགས་པའི་སྟོབས་བཅུས་གྲུབ་པའོ། །ཆོས་ཀྱི་དབྱིངས་དམ་པའི་ལས་དང་ལྡན་པའོ། །སངས་རྒྱས་ ཐམས་ཅད་ཀྱི་བྱིན་གྱི་རླབས་ལ་གནས་པའོ། །འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་དང༌། ཡེ་ཤེས་ཐ་མི་དད་པའི་རྒྱན་དང་ལྡན་པའོ། །འདི་ལྟ་ སྟེ༑ བྱང་ཆུབ་སེམས་དཔའ་ཀུན་ཏུ་བཟང་པོ་འདི་ནི། སེམས་སྐད་ཅིག་གི་མཐའི་རྗེས་སུ་འབྲང་བའོ། །དེ་ནས་བྱང་ཆུབ་སེམས་དཔའ་ཀུན་ཏུ་མིག་གིས་དེ་བཞིན་གཤེགས་ པ་ལས་ཀུན་ཏུ་བཟང་པོའི་ཡོན་ཏན་རྣམ་པར་དག་པ་ཐོས་མ་ཐག་ཏུ། བྱང་ཆུབ་སེམས་དཔའི་ཏིང་ངེ་འཛིན་གྲངས་མེད་པ་བརྒྱ་སྟོང་ཕྲག་བཅུ་ལ་མཉམ་པར་བཞག་སྟེ། བྱང་ ཆུབ་སེམས་དཔའ་ཀུན་ཏུ་བཟང་པོ་མངོན་པར་འདོད་ཅིང༌། མཐོང་བར་བྱ་བ་དང༌། གསོལ་བ་གདབ་པའི་བསམ་པས་ཚོལ་ལོ། །ཡོངས་སུ་ཚོལ་ལོ། །རབ་ཏུ་རྟོག་གོ། ཤིན་ཏུ་ ཞིབ་ཅིང་བརྟགས་པར་རྣམ་པར་དཔྱོད་དོ། །རྗེས་སུ་རྟོག་གོ །རྣམ་པར་བལྟའོ། །འོན་ཀྱང་བྱང་ཆུབ་སེམས་དཔའ་ཀུན་ཏུ་མིག་གིས་བྱང་ཆུབ་སེམས་དཔའ་ཀུན་ཏུ་བཟང་ ༄༅། །པོ་མ་མཐོང་ངོ༌། །བྱང་ཆུབ་སེམས་དཔའི་འཁོར་དེ་དག་ཐམས་ཅད་ཀྱིས་ཀྱང་མཐོང་པར་མ་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་མིག་ ཏིང་ངེ་འཛིན་དེ་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཏིང་ངེ་འཛིན་གྲངས་མ་མཆིས་པ་སྟོང་ཕྲག་བཅུ་ལ་མཉམ་པར་བཞག་ སྟེ༑ རྣམ་པར་བལྟས་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོ་མ་མཐོང་ངོ༌། །དེའི་ལུས་ཀྱི་ལས་ཀྱང་མ་མཐོང་ངོ༌། །དེའི་ངག་དང་ངག་གི་ལས་ཀྱང་མ་ཐོས་སོ། །དེའི་ཡིད་ དང་ཡིད་ཀྱི་ལས་ཀྱང་མ་མཐོང་ངོ༌། །དེའི་སྟན་ཡང་མ་མཐོང་ངོ༌། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དེ་གང་ན་མཆིས་པ་དང༌། སྤྱོད་པའི་ཕྱོགས་ དེ་ཡང་མ་མཐོང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་མིག །དེ་ནི་དེ་བཞིན་ཏེ། ཁྱོད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་དེ་མི་མཐོང་ངོ༌། ། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པ་ལ་ཤིན་ཏུ་བསླབས་པ་ནི། བྱང་ཆུབ་སེམས་དཔའ་ཀུན་ཏུ་བཟང་པོའོ། །ཀུན་ ཏུ་མིག །དེ་ལ་ཇི་སྙམ་དུ་སེམས། སྒྱུ་མའི་གཟུགས་ཀྱི་རྣམ་པ་སྣ་ཚོགས་མང་པོ་སྒྱུ་མའི་སྔགས་ཀྱི་ཡི་གེ་གང་ལ་གནས་པ་དམིགས་པར་ནུས་སམ། བཙུན་པ་ བཅོམ་ལྡན་འདས། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་མིག། སྒྱུ་མའི་སྔགས་ཀྱི་གཟུགས་ཀྱི་རྣམ་པ་དེ་དག་ཀྱང་དམིགས་ཤིང་བསྟན་པར་མི་ ནུས་ན། བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ཀྱི་སྤྱོད་ཡུལ་གསང་བ་དང༌། ངག་གི་སྤྱོད་ཡུལ་གསང་བ་དང༌། ཡིད་ཀྱི་སྤྱོད་ཡུལ་གསང་བ་ལ་འཇུག་པར་མི་ནུས་ པ་དང༌། མཐོང་བར་མི་ནུས་པ་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཀུན་ཏུ་བཟང་པོ་ནི་ཟབ་ཅིང་བསམ་གྱིས་མི་ཁྱབ་པར་རྣམ་པར་སྤྱོད་པའོ། ། བྱང་ཆུབ་སེམས་དཔའ་ཀུན་ཏུ་བཟང་པོ་ནི་ཚད་མེད་ཅིང་ཚད་ལས་འདས་པ་སྟེ། ཡེ་ཤེས་རྡོ་རྗེའི་བློ་དང་ལྡན་པའོ། །ཆོས་ཀྱི་དབྱིངས་མཐའ་དང་དབུས་མེད་པ་ལ་ཡང་དག་ པར་གནས་པའོ། །འཇིག་རྟེན་གྱི་ཁམས་ཐམས་ཅད་དུ་གནས་མེད་པར་སྤྱོད་ཅིང༌། སེམས་ཅན་ཐམས་ཅད་ཀྱི་ལུས་དང་གཟུགས་ཀྱི་རྗེས་སུ་ཞུགས་པའོ། །བླང་བ་མེད་ པའི་ཆོས་ཀྱི་ཚུལ་དང་ལྡན་པའོ། །མི་ཟད་ཅིང་ཐ་མི་དད་པའི་རྫུ་འཕྲུལ་དང༌། ཁྱུ་མཆོག་གི་མཐུ་ལ་ལྷུན་གྱིས་གྲུབ་པར་གནས་པའི་མཐར་ཕྱིན་པའོ། །བྱང་ཆུབ་སེམས་ དཔའ་ཀུན་ཏུ་བཟང་པོ་ནི་ཆོས་ཀྱི་དབྱིངས་ཁོང་དུ་ཆུད་པ་དང་ལྡན་པའོ། །དེ་ལྟར། རིགས་ཀྱི་བུ། བྱང་ཆུབ་སེམས་དཔའ་ཀུན་ཏུ་བཟང་པོ་ནི་བལྟ་ན་དོན་ཡོད་པའོ། །མཉན་ ༄༅། །པ་དོན་ཡོད་པའོ། །བསྙེན་བཀུར་བྱེད་པ་དོན་ཡོད་པའོ། །བསམ་པ་དོན་ཡོད་པའོ། །རྗེས་སུ་དྲན་པ་དོན་ཡོད་པའོ། །དེ་ལ་དད་པར་བྱས་པ་དོན་ཡོད་ པའོ། །བྱང་ཆུབ་སེམས་དཔའ་ཀུན་ཏུ་བཟང་པོ་དེ་ནི་མཐོང་བ་དོན་ཡོད་པའོ། །ཐོས་པ་དོན་ཡོད་པའོ། །བསྙེན་བཀུར་བ་དོན་ཡོད་པའོ། །བསམ་པ་དོན་ཡོད་པའོ། །རྗེས་ སུ་དྲན་པར་བྱས་པ་དོན་ཡོད་པའོ། །དེ་ལ་མོས་པར་བྱས་པ་དོན་ཡོད་པའོ། །བལྟ་བ་དོན་ཡོད་པའོ། །བརྟགས་པ་དོན་ཡོད་པའོ། །བཙལ་བ་དོན་ཡོད་པའོ། །བྱང་ཆུབ་ སེམས་དཔའ་ཀུན་ཏུ་བཟང་པོ་ནི་རྗེས་སུ་སྨོན་ལམ་གདབ་པ་དོན་ཡོད་པའོ། །དེ་ནས་བྱང་ཆུབ་སེམས་དཔའ་ཀུན་ཏུ་མིག་དང༌། བྱང་ཆུབ་སེམས་དཔའི་འཁོར་དེ་དག་ ཐམས་ཅད། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་འདོད་ཅིང་ཐལ་མོ་སྦྱར་ཏེ། བཅོམ་ལྡན་འདས་དང༌། བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་ འཚལ་ཞིང་ཚིག་འདི་སྐད་བརྗོད་དོ། །སངས་རྒྱས་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚལ་ལོ། །སངས་རྒྱས་ཐམས་ ཅད་ལ་བཏུད་དེ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་བཟང་པོ་ལ་བཏུད་དེ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ ཀུན་ཏུ་མིག་དང༌། བྱང་ཆུབ་སེམས་དཔའི་འཁོར་ཆེན་པོ་དེ་དག་ལ་བཀའ་སྩལ་པ། རིགས་ཀྱི་བུ་དག། བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚོལ་ལ་གསོལ་བ་ ཐོབ་ཅིག། ཕྱོགས་ཐམས་ཅད་དུ་མངོན་དུ་གྱིས་ལ་ཀུན་ཏུ་མིག་གི་ལུས་སུ་བྱིན་གྱིས་རློབ་སྟེ། བྱང་ཆུབ་སེམས་དཔའ་ཀུན་ཏུ་བཟང་པོ་ལ་དམིགས་པ་གྱིས་ལ་ཆོས་ཀྱི་དབྱིངས་ ཐམས་ཅད་མངོན་དུ་བྱ་བའི་སེམས་ཀྱིས་བྱིན་གྱིས་བརླབས་པར་གྱིས་ཏེ། ཆོས་ཐམས་ཅད་འདོད་ཆགས་དང་བྲལ་བར་ཁོང་དུ་ཆུད་པར་གྱིས་ལ། བྱང་ཆུབ་སེམས་དཔའ་ ཀུན་ཏུ་བཟང་པོ་དང༌། སྨོན་ལམ་གཅིག་པར་བྱུང་སྟེ། གཉིས་སུ་མེད་པ་ལ་མཉམ་པར་ཞོག་ལ། འཇིག་རྟེན་གྱི་ཁམས་ཐམས་ཅད་ལུས་ལས་མངོན་པར་བྱུང་བར་བྱིན་ གྱིས་རློབ་སྟེ། དབང་པོ་ཐ་མི་དད་པའི་རྗེས་སུ་འབྲང་བར་གྱིས་ལ་ཀུན་ཏུ་བཟང་པོའི་སྨོན་ལམ་ཀུན་ཏུ་འགྲོ་བ་ཡོངས་སུ་སྦྱང་བར་གྱིས་ཤིག་དང༌། བྱང་ཆུབ་སེམས་དཔའ་ ཀུན་ཏུ་བཟང་པོ་མཐོང་བར་འགྱུར་རོ། །དེ་ནས་བྱང་ཆུབ་སེམས་དཔའ་ཀུན་ཏུ་མིག་གིས་བཅོམ་ལྡན་འདས་ཀྱིས་བཀའ་སྩལ་པ་དེ་སྐད་ཐོས་ནས་བྱང་ཆུབ་སེམས་དཔའི་ འཁོར་དེ་དག་དང་བཅས་པས་སྤྱི་བོས་གཏུགས་ཏེ་ཕྱག་འཚལ་ནས། བྱང་ཆུབ་སེམས་དཔའ་ཀུན་ཏུ་བཟང་པོ་ལ་གསོལ་བ་བཏབ་བོ། །བྱང་ཆུབ་སེམས་དཔའ་དེ་དག་ ༄༅། །གིས་གསོལ་བ་བཏབ་མ་ཐག་ཏུ། དེའི་ཚེ་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པའི་རྣམ་པར་འཕྲུལ་བ་གང་གིས། བྱང་ཆུབ་ སེམས་དཔའ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་དེ་བཞིན་གཤེགས་པའི་ཞབས་ཀྱི་དྲུང་ན་གནས་ཤིང༌། པདྨོའི་སྟན་ལ་འདུག་པར་མཐོང་ བར་འགྱུར་བ་དང༌། འཁོར་དེའི་བྱང་ཆུབ་སེམས་དཔའ་རྣམས་ཀྱི་ལུས་ལས་ཀྱང་འབྱུང་བར་སྣང་བ་དང༌། འཇིག་རྟེན་གྱི་ཁམས་ཀྱི་རྒྱུད་འབྱམས་ཀླས་པ་དག་ནས་ ཀྱང་འོང་བར་སྣང་བ་དང༌། སངས་རྒྱས་གཅིག་ནས་གཅིག་ཏུ་བརྒྱུད་པ་ཐམས་ཅད་ཡང་དག་པར་སྟོན་པ་དང༌། སངས་རྒྱས་ཐམས་ཅད་ཀྱི་འཕྲིན་ལས་འཇིག་རྟེན་གྱི་ ཁམས་ཐམས་ཅད་དུ་རབ་ཏུ་བརྗོད་པ་དང༌། བྱང་ཆུབ་སེམས་དཔའི་སྤྱོད་པ་ཐམས་ཅད་རབ་ཏུ་སྟོན་པ་དང༌། ཐམས་ཅད་མཁྱེན་པའི་ཡེ་ཤེས་ཀྱི་ལམ་སྣང་བར་བྱེད་ པ་དང༌། བྱང་ཆུབ་སེམས་དཔའི་རྣམ་པར་འཕྲུལ་བ་ཐམས་ཅད་ཡང་དག་པར་སྟོན་པ་དང༌། བྱང་ཆུབ་སེམས་དཔའི་ཁྱུ་མཆོག་གི་མཐུ་ཕྱུང་བ་ཐམས་ཅད་ཡང་ དག་པར་བརྗོད་པ་དང༌། དེ་བཞིན་གཤེགས་པ་ཚད་མེད་པའི་དུས་གསུམ་རབ་ཏུ་སྟོན་པ་དེ་ལྟ་བུའི་རྣམ་པར་ཐར་པའི་རྣམ་པར་འཕྲུལ་པ་ཀུན་ཏུ་བསྟན་ཏོ། །དེ་ ནས་བྱང་ཆུབ་སེམས་དཔའ་ཀུན་ཏུ་མིག་དང༌། བྱང་ཆུབ་སེམས་དཔའི་འཁོར་དེ་དག་ཐམས་ཅད་ཀྱིས་རྣམ་པར་འཕྲུལ་པ་དེ་དག་མཐོང་ནས་དགའ་ཞིང་མགུ་སྟེ། ཡི་རངས་ ནས་རབ་ཏུ་དགའ་ཞིང་བདེ་བ་དང༌། ཡིད་དགའ་བ་སྐྱེས་ནས། དམིགས་པ་ཐམས་ཅད་ཀྱིས་བཏུད་པའི་རྗེས་སུ་བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚལ་ཏོ། ། དེའི་ཚེ་སངས་རྒྱས་ཀྱི་བྱིན་གྱི་རླབས་དང༌། བྱང་ཆུབ་སེམས་དཔའ་དེ་དག་གི་མོས་པ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྔོན་གྱི་དགེ་བའི་རྩ་བས་སྤྲིན་གྱི་ཆར་ སྟོང་ཕྲག་བཅུ་མངོན་པར་བབ་པར་གྱུར་པ་འདི་ལྟ་སྟེ། མེ་ཏོག་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །ཕྲེང་བ་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །སྤོས་སྣ་ ཚོགས་ཀྱི་སྤྲིན་གྱི་ཆར་མངོན་པར་བབ་བོ། །སྤོས་ཀྱི་ཕྱེ་མ་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །གདུགས་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །ན་བཟའ་སྣ་ ཚོགས་ཀྱི་སྤྲིན་གྱི་ཆར་མངོན་པར་བབ་བོ། །རྒྱན་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །རིན་པོ་ཆེ་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །སྤོས་སྣ་ཚོགས་ཀྱི་ སྤྲིན་གྱི་ཆར་མངོན་པར་བབ་བོ། །སྣམ་བུ་རིན་པོ་ཆེའི་སྤྲིན་གྱི་ཆར་མངོན་པར་བབ་བོ། །འཇིག་རྟེན་གྱི་ཁམས་བརྗོད་དུ་མེད་པ་རྣམ་པ་དྲུག་ཏུ་གཡོས་སོ། །རོལ་མོ་བརྡུང་ ༄༅། །བ་དང༌། དཀྲོལ་བ་ཐམས་ཅད་ཀྱི་སྒྲ་མང་པོ་བྱུང་ངོ༌། །ལྷའི་ང་རོ་སྙན་པ་མང་པོ་རབ་ཏུ་བྱུང་ངོ༌། །འཇིག་རྟེན་གྱི་ཁམས་བརྗོད་དུ་མེད་པའི་ཡང་ བརྗོད་དུ་མེད་པ་སྣང་བ་ཆེན་པོས་ཁྱབ་པར་སྣང་ངོ༌། །འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་སེམས་ཅན་རྣམས་རྣམ་པར་དག་པར་གྱུར་ཏོ། ། ངན་སོང་གི་ལམ་གྱི་རྒྱུད་གསུམ་རྣམ་པར་ཞི་བར་གྱུར་ཏོ། །འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་རྣམ་པར་དག་པར་གྱུར་ཏོ། །བྱང་ཆུབ་ སེམས་དཔའ་བརྗོད་དུ་མེད་པའི་ཡང་བརྗོད་དུ་མེད་པ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ཞུགས་པར་གྱུར་ཏོ། བྱང་ཆུབ་སེམས་དཔའ་བརྗོད་དུ་ མེད་པའི་ཡང་བརྗོད་དུ་མེད་པ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ཡོངས་སུ་གྲུབ་པར་གྱུར་ཏོ། །བྱང་ཆུབ་སེམས་དཔའ་བརྗོད་དུ་མེད་པའི་ཡང་ བརྗོད་དུ་མེད་པ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་སྨོན་ལམ་ཡོངས་སུ་རྫོགས་པར་བྱས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ མངོན་པར་སངས་རྒྱས་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་མིག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ ཆུབ་སེམས་དཔའ་ཀུན་ཏུ་བཟང་པོ་ནི་བདག་ཉིད་ཆེ་བ་ལ་རྣམ་པར་སྤྱོད་པའོ། །མཚུངས་པ་མ་མཆིས་པ་ལ་རྣམ་པར་སྤྱོད་པའོ། །ཡོངས་སུ་མི་ཆོད་པ་ལ་རྣམ་པར་སྤྱོད་པའོ། །སླར་ མི་ལྡོག་པ་ལ་རྣམ་པར་སྤྱོད་པའོ། །མཉམ་པ་ཉིད་རྗེས་སུ་རྟོགས་པ་ལ་རྣམ་པར་སྤྱོད་པའོ། །གཞན་གྱིས་མི་ཟློག་པ་ལ་རྣམ་པར་སྤྱོད་པའོ། །ཆོས་ཐམས་ཅད་ཐ་མི་དད་པ་ལ་ རྣམ་པར་སྤྱོད་པའོ། །ཆོས་ཐམས་ཅད་དང་མ་འདྲེས་པར་རྣམ་པར་སྤྱོད་པའོ། །སེམས་ཅན་ཐམས་ཅད་ཀྱི་སེམས་ཀྱི་བྱིན་གྱིས་རླབས་མཁས་པ་ལ་རྣམ་པར་སྤྱོད་པའོ། །བཅོམ་ ལྡན་འདས། བྱང་ཆུབ་སེམས་དཔའ་ཀུན་ཏུ་བཟང་པོ་ནི་ཆོས་ཐམས་ཅད་ཀྱི་དབང་དང༌། ཏིང་ངེ་འཛིན་དང༌། རྣམ་པར་ཐར་པ་ལ་རྣམ་པར་སྤྱོད་པའོ། །བཅོམ་ལྡན་འདས་ཀྱིས་ བཀའ་སྩལ་པ། ཀུན་ཏུ་མིག །དེ་ཁྱོད་ཀྱིས་ཇི་སྐད་དུ་སྨྲས་པ་དེ་བཞིན་ཏེ། བྱང་ཆུབ་སེམས་དཔའ་ཀུན་ཏུ་བཟང་པོ་ནི་ཡོན་ཏན་གྲངས་མེད་པས་རྣམ་པར་དག་པའོ། ། ཡོན་ཏན་མཚུངས་པ་མེད་པས་རྣམ་པར་བརྒྱན་པའོ། །ཡོན་ཏན་ཚད་མེད་པས་རིན་པོ་ཆེ་དང་ལྡན་པའོ། །ཡོན་ཏན་བསམ་གྱིས་མི་ཁྱབ་པའི་འབྱུང་གནས་རྒྱ་མཚོའོ། ། ཡོན་ཏན་དཔག་ཏུ་མེད་པའི་མཚན་ཉིད་དོ། །ཡོན་ཏན་མུ་མེད་པའི་སྤྲིན་ཏོ། །ཡོན་ཏན་ས་མཚམས་མེད་པས་བསྔགས་ཤིང་བསྟོད་པའོ། །ཆོས་རིན་པོ་ཆེ་ཟད་མི་ཤེས་ ༄༅། །པའོ༑ ༑བྱང་ཆུབ་སེམས་དཔའ་ཀུན་ཏུ་བཟང་པོ་ནི། སངས་རྒྱས་ཐམས་ཅད་ཀྱིས་ཡོན་ཏན་བརྗོད་ཅིང་བསྔགས་པ་མི་ཟད་པའོ། །དེ་ནས་བཅོམ་ལྡན་ འདས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་བཟང་པོ་ཁྱོད་ཀྱིས་བྱང་ཆུབ་སེམས་དཔའ་ཀུན་ཏུ་མིག་དང༌། བྱང་ཆུབ་སེམས་ དཔའི་འཁོར་ཐམས་ཅད་ལ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་ཡོངས་སུ་རྫོགས་པ་དང་ལྡན་པའི་བྱང་ཆུབ་སེམས་དཔའ་སེམས་ དཔའ་ཆེན་པོ་རྣམས་ཀྱི་ཏིང་ངེ་འཛིན་ཤིན་ཏུ་བསྟན་པ་གང་གིས་འདས་པ་དང༌། མ་འོངས་པ་དང༌། ད་ལྟར་བྱུང་བའི་བྱང་ཆུབ་སེམས་དཔའི་སྤྱོད་པ་བྱུང་བ་དང༌། འབྱུང་བ་དང༌། འབྱུང་བར་འགྱུར་བའི་ཏིང་ངེ་འཛིན་བཅུ་ཤིན་ཏུ་བསྟན་པ་ལ་མཁས་པས། ཏིང་ངེ་འཛིན་རྒྱ་ཆེན་པོ་བཅུ་ཤིན་ཏུ་བསྟན་པ་སྤོབས་པར་གྱིས་ཤིག། བཅུ་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའི་ཏིང་ངེ་འཛིན་རྒྱ་ཆེན་པོ་ལ་མཁས་པ་རབ་ཏུ་ཐོབ་པ་དང༌། རྗེས་སུ་འགྲོ་བ་སྣང་བ་ཞེས་བྱ་བ་དང༌། འདི་ལྟ་ སྟེ༑ བྱང་ཆུབ་སེམས་དཔའི་ཏིང་ངེ་འཛིན་རྒྱ་ཆེན་པོ་རབ་ཏུ་ཐོབ་པ་ཡིད་དུ་འོང་བ་ཞེས་བྱ་བ་དང༌། འདི་ལྟ་སྟེ། ཞིང་འབྱམས་ཀླས་པ་གཅིག་ནས་གཅིག་ཏུ་ བརྒྱུད་པའི་རྗེས་སུ་སོང་བ་དང༌། འདི་ལྟ་སྟེ། ལྷག་པའི་བསམ་པ་གཙང་མས་སྤྱོད་པ་ཞེས་བྱ་བ་དང༌། འདི་ལྟ་སྟེ། འདས་པའི་རྒྱན་གྱི་སྙིང་པོ་ཞེས་བྱ་བ་དང༌། འདི་ལྟ་སྟེ། ཡེ་ ཤེས་རྣམ་པར་སྣང་བའི་སྙིང་པོ་ཞེས་བྱ་བ་དང༌། འདི་ལྟ་སྟེ། སངས་རྒྱས་ཐམས་ཅད་ཀྱིས་རྣམ་པར་བཀོད་པའི་འཇིག་རྟེན་གྱི་ཁམས་ཀྱི་རྒྱན་ཅེས་བྱ་བ་དང༌། འདི་ལྟ་སྟེ། སེམས་ཅན་གྱི་ལུས་ཐ་མི་དད་པ་ཞེས་བྱ་བ་དང༌། འདི་ལྟ་སྟེ། སེམས་ཅན་གྱི་ཁམས་ལ་དབང་བ་ཞེས་བྱ་བ་དང༌། འདི་ལྟ་སྟེ། བྱང་ཆུབ་སེམས་དཔའི་ཏིང་ངེ་འཛིན་རྒྱ་ཆེན་པོ་ ལ་མཁས་པ་རབ་ཏུ་ཐོབ་པ་བཅུ་པ་ཆགས་པ་མེད་པའི་དཀྱིལ་འཁོར་ཅེས་བྱ་བ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་འདི་བཅུ་ ནི་འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱིས་གསུངས་སོ། །གསུང་ངོ༌། །གསུང་བར་འགྱུར་རོ། །བྱང་ཆུབ་སེམས་དཔའ་ གང་གིས་ཏིང་ངེ་འཛིན་བཅུ་པོ་འདི་དག་ལ་བསྟེན་ཅིང་བསྒོམས་ཏེ། མང་དུ་བྱས་པ་དང༌། དངོས་པོར་བྱས་པ་དང༌། ཤེས་པར་བྱས་པ་དང༌། མངོན་དུ་བྱས་པ་དང༌། མདུན་ དུ་བྱས་པ་དང༌། མཉམ་པར་གཞག་པ་དང༌། ཤིན་ཏུ་བརྩམས་པ་དེ་དག་ཀྱང་བྱང་ཆུབ་སེམས་དཔའི་ཏིང་ངེ་འཛིན་བཅུ་པོ་འདི་དག་དང་ལྡན་པས་བྱང་ཆུབ་སེམས་དཔའ་ ༄༅། །ཡིན་ཡང་སངས་རྒྱས་ཞེས་བྱའོ། །དེ་བཞིན་གཤེགས་པ་ཞེས་བྱའོ། །སྟོབས་བཅུ་པ་ཞེས་བྱའོ། །འདྲེན་པ་ཞེས་བྱའོ། །རྣམ་པར་འདྲེན་ པ་ཞེས་བྱའོ། །ཐམས་ཅད་མཁྱེན་པ་ཞེས་བྱའོ། །ཐམས་ཅད་གཟིགས་པ་ཞེས་བྱའོ། །ཆགས་པ་མེད་པ་ལ་གནས་པ་ཞེས་བྱའོ། །བསྒྲིབས་པ་མེད་པའི་སྤྱོད་ཡུལ་ ཅན་ཞེས་བྱའོ། །ཆོས་ཐམས་ཅད་ཀྱི་དབང་ཕྱུག་ཅེས་བྱའོ། །བྱང་ཆུབ་སེམས་དཔའ་གང་གིས་ཏིང་ངེ་འཛིན་འདི་དག་ཐོབ་པ་དེ་ནི་འཇིག་རྟེན་གྱི་ཁམས་ཐམས་ཅད་ དུ་རྗེས་སུ་སོང་བ་ཡང་ཡིན་ལ། འཇིག་རྟེན་གྱི་ཁམས་ཐམས་ཅད་ནས་ཕྱིར་ལོག་པ་ཡང་ཡིན། སེམས་ཅན་ཐམས་ཅད་ཀྱི་ཁམས་སུ་རབ་ཏུ་སོང་བའང་ཡིན་ལ། སེམས་ཅན་མེད་པའི་མཐའ་ཡང་ཁོང་དུ་ཆུད་པ་ཡིན། ཆགས་པ་མེད་པའི་ལུས་ཀྱི་སྙིང་པོའི་རྗེས་སུ་སོང་བའང་ཡིན་ལ། ཆོས་ཀྱི་དབྱིངས་ཐམས་ཅད་ལ་ཡང་ འཇུག་པར་སྤྱོད་པ་ཡིན་ནོ། །ཆོས་ཀྱི་དབྱིངས་མཐའ་དང་དབུས་མེད་པས་ཀྱང་རྣམ་པར་དག་ལ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་ གཤེགས་པ་ཐམས་ཅད་ཀྱི་ཡང་རྗེས་སུ་འབྲང་བ་ཡིན། དེ་བཞིན་གཤེགས་པ་ཐམས་ཅད་ཀྱི་ཆོས་རྣམ་པར་མཐོང་བ་ཡང་ཡིན་ལ། སྤྱོད་པ་ཐམས་ཅད་ཀྱི་ ཡང་རྗེས་སུ་སོང་བ་ཡིན། དབྱངས་ཀྱི་ཡན་ལག་དང༌། ཡི་གེ་ལ་རབ་ཏུ་སྤོབས་ཤིང༌། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་རྫོགས་པས་རྣམ་པར་དག་པའང་ཡིན་ ལ༑ བྱང་ཆུབ་སེམས་དཔའི་སྤྱོད་པ་རྣམ་པར་ཕྱེ་བ་ཡོངས་སུ་རྫོགས་པར་བྱ་བ་ལའང་རབ་ཏུ་གནས་པ་ཡིན། རྟག་པར་དུས་གསུམ་སྐད་ཅིག་ཏུ་ཞུགས་པའང་ཡིན་ལ། དུས་ གསུམ་ཐམས་ཅད་ཡོངས་སུ་ཤེས་པར་བྱ་བའི་ཕྱིར་ཡང་དག་པར་གཞོལ་བའང་ཡིན། སངས་རྒྱས་ཐམས་ཅད་ཀྱི་ཆོས་སྟོན་པའང་ཡིན་ལ། ཐབས་ཀྱིས་ཆོས་ཐམས་ཅད་ཀྱི་ འཁོར་ལོ་བསྐོར་བ་ལས་ཕྱིར་མི་ལྡོག་པའི་ལུས་དང་ཡང་ལྡན་པ་ཡིན། འདས་པ་དང༌། མ་འོངས་པ་དང༌། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་རྣམ་ པར་འཚང་རྒྱ་བར་བྱ་བའི་ཚུལ་ལ་ཡང་རབ་ཏུ་ཞུགས་ལ། སངས་རྒྱས་གཅིག་མངོན་པར་སངས་རྒྱས་པས་སངས་རྒྱས་ཐམས་ཅད་དུའང་ཤིན་ཏུ་སྟོན་པ་ཡིན་ཏེ། འདི་ དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་རྣམ་པའི་ཚུལ་ལོ། །འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་རྣམ་པར་སྦྱང་བའི་ཚུལ་ལོ། །ཐམས་ཅད་ མཁྱེན་པའི་རྒྱལ་མཚན་གཞན་གྱིས་མི་ཕམ་པའི་ཚུལ་ལོ། །བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་གྱི་ཚུལ་ལོ། བྱང་ཆུབ་སེམས་ ༄༅། །དཔའི་མངོན་པར་ཤེས་པ་རྣོན་པོ་དང་འགྲོགས་པའི་ཚུལ་ལོ། །གཟུངས་དང་སྤོབས་པ་ཐམས་ཅད་ཀྱི་ཚུལ་ལོ། །དུས་གསུམ་ཐ་མི་དད་པའི་ཚུལ་ ལོ༑ ༑འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཚུལ་ལོ། །སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ལ་རབ་ཏུ་དགོད་པའི་ ཚུལ་ལོ། །འདི་དག་ནི་བྱང་ཆུབ་སེམས་དཔའ་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་ཡོངས་སུ་དག་པར་བྱ་བའི་ཁྱུ་མཆོག་གི་མཐུ་བསྟན་པའི་ཚུལ་ལོ། ། བྱང་ཆུབ་སེམས་དཔའི་ཏིང་ངེ་འཛིན་འདི་དག་ཐོབ་པའི་བྱང་ཆུབ་སེམས་དཔའ་རྣམས་ནི་མཐུ་མི་ཟད་པའི་ཕྱིར་ཆོས་ཀྱི་དབྱིངས་ཀྱི་སྟོབས་ཐོབ་པ་ཡིན། འཕོ་བ་ མེད་པའི་མཐར་ཐུག་པར་འགྱུར་བའི་ཕྱིར་ནམ་མཁའི་དབྱིངས་ལྟར་ཚད་མེད་པ་ཡིན། ཆོས་ཀྱི་རྒྱལ་སྲིད་ལ་འགྲོ་བ་དབང་བསྐུར་བའི་ཕྱིར་དབང་མཐའ་ཡས་ པར་བསྒྱུར་བ་ཡིན། སྟོབས་བཅུ་ཤིན་ཏུ་ཡངས་པའི་ཚུལ་ཐོབ་པའི་ཕྱིར་འགྲོ་བ་ཐམས་ཅད་དུ་ཚད་མེད་པའི་ཡེ་ཤེས་ཐོབ་པ་ཡིན། རབ་ཏུ་ཞི་བའི་མཐའ་ལ་ ཞུགས་པས་ཉོན་མོངས་པ་མེད་པའི་སེམས་རབ་ཏུ་བསྒོམས་པ་ཡིན། ཤུགས་དང་ལྡན་པའི་རྩལ་བ་དོག་པས་སྙིང་རྗེ་ཆེན་པོའི་སེང་གེ་ཡིན། ཡོན་ཏན་དང་ བསྔགས་པ་ཐམས་ཅད་དང་ལྡན་པས་ཆོས་ཀྱི་སྒྲོན་མ་ལ་ཡང་དག་པར་གཞོལ་ཞིང་མི་ཟད་པ་ཡིན། ཉན་ཐོས་དང་རང་སངས་རྒྱས་ཐམས་ཅད་ཀྱིས་བསམ་གྱིས་མི་ཁྱབ་པ་ཡིན། ཆོས་ཤེས་ཤིང་ཁོང་དུ་ཆུད་པས་གནས་ཀྱི་མཐར་ཕྱིན་པ་ཡིན། སྤྱོད་པ་དང༌། རྣམ་པར་གདགས་པ་དང༌། བརྡ་ཐམས་ཅད་ལ་སྣ་ཚོགས་སུ་ཤིན་ཏུ་བསྟན་པ་བྱེད་པར་མཁས་ པ་ཡིན། ཆོས་ཐམས་ཅད་མཚན་མ་མེད་པ་མཁས་པ་ལ་ཞུགས་པས་མཚན་མ་མེད་པ་ལ་མོས་པ་ཡིན། དེ་བཞིན་གཤེགས་པའི་མངའ་ཆེན་པོས་རྣམ་པར་དག་པས་ རིགས་དང་རྒྱུད་རྣམ་པར་དག་པ་ཡིན། གཞི་མེད་པ་ལ་འཇུག་པའི་ཡེ་ཤེས་ཀྱིས་ཆོས་ཀྱི་གཞི་རབ་ཏུ་དབྱེ་བའི་སྙིང་པོའི་རྗེས་སུ་སོང་བ་ཡིན། ཆོས་ཡོངས་སུ་གཏོང་ བ་ལ་བརྩོན་པས་དུས་ཐམས་ཅད་དུ་མཁས་པ་དང་ལྡན་པ་ཡིན། ཤེས་པར་བྱ་བ་ཐམས་ཅད་ཁོང་དུ་ཆུད་པས། སེམས་ཅན་གྱི་ནང་ན་མཁས་པ་ཡིན། སྐྱེ་དགུ་ཐམས་ ཅད་ཤིན་ཏུ་དག་པར་བྱེད་པས་མཐའ་ཡས་པ་རྣམ་པར་སྤྱོད་པ་ཡིན། སངས་རྒྱས་ཀྱི་བྱང་ཆུབ་རྣམ་པར་སངས་རྒྱས་པ་དང༌། འཚང་རྒྱ་བར་བྱ་བའི་སྤྱོད་པ་ཡང་དག་པར་སྟོན་ པས་བྱང་ཆུབ་སེམས་དཔའི་དཀྱིལ་འཁོར་གྱི་ཐབས་ལ་མཁས་པ་ཡིན། བྱང་ཆུབ་སེམས་དཔའི་སྤྱོད་པའི་བྱིན་གྱི་རླབས་ཀྱིས་ཟད་མི་ཤེས་པ་ཡིན། ཐམས་ཅད་ ༄༅། །མཁྱེན་པའི་ཡུལ་རྣམ་པར་འཚང་རྒྱ་བར་བྱ་བ་ལ་མཁས་པས་ཆོ་འཕྲུལ་ཆེན་པོ་སྟོན་པ་ཡིན་གྱི། དེ་བས་ན་ཀུན་ཏུ་བཟང་པོ་བྱང་ཆུབ་སེམས་དཔའི་ ཏིང་ངེ་འཛིན་བཅུ་བོ་འདི་དག་རྒྱ་ཆེར་སྤྲོས་ཏེ་བཤད་པས་བསྟན་པར་གྱིས་ཤིག །བྱང་ཆུབ་སེམས་དཔའི་འཁོར་འདི་དག་ཐམས་ཅད་ཉན་པར་འདོད་དོ། །དེ་ནས་བྱང་ ཆུབ་སེམས་དཔའ་ཀུན་ཏུ་བཟང་པོས་བཅོམ་ལྡན་འདས་ཀྱིས་བཀའ་སྩལ་པ་དང༌། བྱང་ཆུབ་སེམས་དཔའ་དེ་དག་གིས་ཀྱང་གསོལ་བ་བཏབ་པར་ཤེས་ནས། བྱང་ཆུབ་ སེམས་དཔའ་ཀུན་ཏུ་མིག་དང༌། བྱང་ཆུབ་སེམས་དཔའི་ཚོགས་ཐམས་ཅད་ལ་སྨྲས་པ། ཀྱེ༑ རྒྱལ་བའི་སྲས་དག། བཅུ་བོ་འདི་རྣམས་ནི་བྱང་ཆུབ་སེམས་དཔའ་ སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ཆོས་མ་ལུས་པར་མཐར་ཐུག་པ་སྟེ། བཅུ་གང་ཞེ་ན། འདི་ལྟ་སྟེ། སངས་རྒྱས་སྐྱེ་བ་ཁོང་དུ་ཆུད་པའི་ཡེ་ཤེས་ དང༌། སེམས་ཅན་དྲི་མ་མེད་པ་མངོན་པར་བསྒྲུབས་པར་བྱ་བའི་ཡེ་ཤེས་དང༌། འཇིག་རྟེན་གྱི་ཁམས་མིག་ཡོར་ལྟ་བུར་ཤེས་པའི་ཡེ་ཤེས་དང༌། ཆོས་ཀྱི་དབྱིངས་ཀྱི་ རྗེས་སུ་འཇུག་པའི་ཡེ་ཤེས་དང༌། བྱང་ཆུབ་སེམས་དཔའ་རབ་ཏུ་གཟུང་བ་ལ་མཁས་པའི་ཡེ་ཤེས་དང༌། ཕྱིར་མི་ལྡོག་པའི་བྱང་ཆུབ་སེམས་དཔའི་ཐབས་ཡོངས་ སུ་གནོན་པའི་ཡེ་ཤེས་དང༌། དོན་ཐམས་ཅད་དང་ལྡན་པའི་ཆོས་ཀྱི་ལྷག་མཐོང་ལ་མཁས་པའི་ཡེ་ཤེས་དང༌། བྱང་ཆུབ་ཀྱི་སེམས་ཀྱི་མཐུའི་རྗེས་སུ་སོང་བའི་ཡེ་ཤེས་དང༌། སངས་ རྒྱས་ཀྱི་ཆོས་ཐམས་ཅད་ཤེས་པའི་ཡེ་ཤེས་དང༌། ཐམས་ཅད་མཁྱེན་པའི་སྨོན་ལམ་དང་བྱིན་གྱི་རླབས་ཀྱི་ཡེ་ཤེས་ཏེ། ཀྱེ༑ རྒྱལ་བའི་སྲས་དག །དེ་དག་ནི་བྱང་ཆུབ་སེམས་ དཔའ་རྣམས་ཀྱི་བྱང་ཆུབ་སེམས་དཔའི་ཆོས་མ་ལུས་པར་མཐར་ཐུག་པའོ། །ཀྱེ༑ རྒྱལ་བའི་སྲས་དག །བཅུ་པོ་འདི་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ རྣམས་ཀྱི་སེམས་བསྐྱེད་པ་མཐའ་དང་དབུས་མེད་པ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཉེ་བར་གཟུང་བ་དང༌། ཡོངས་སུ་དགྲོལ་བའི་ཕྱིར་སེམས་བསྐྱེད་ པ་མཐའ་དང་དབུས་མེད་པ་དང༌། འདི་ལྟ་སྟེ། སངས་རྒྱས་ཀྱི་ཆོས་ཐམས་ཅད་ཡོངས་སུ་བསྒྲུབ་པའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང༌། འདི་ལྟ་སྟེ་། སངས་རྒྱས་ཐམས་ཅད་བསྙེན་བཀུར་ཞིང་མཆོད་པའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང༌། འདི་ལྟ་སྟེ། སངས་རྒྱས་ཐམས་ཅད་མཐོང་བར་བྱ་བའི་མིག་ཚད་ མེད་པ་ཡང་དག་པར་བསྒྲུབ་པའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང༌། འདི་ལྟ་སྟེ། སངས་རྒྱས་ཐམས་ཅད་ཀྱི་གསུང་དང༌། དབྱངས་དང༌། བཀའ་ཡང་དག་ ༄༅། །པར་གཟུང་ཞིང་ཉམས་པ་མེད་པར་བྱ་བའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང༌། འདི་ལྟ་སྟེ། སངས་རྒྱས་ཐམས་ཅད་ཀྱི་རྣམ་ པར་འཕྲུལ་བའི་བྱེ་བྲག་ཐ་དད་པ་རྣམ་པར་དབྱེ་བ་ལ་མཁས་པར་ཁོང་དུ་ཆུད་པ་བསྐྱེད་པའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང༌། འདི་ལྟ་སྟེ། དེ་བཞིན་ གཤེགས་པ་རྣམས་ཀྱི་བྱང་ཆུབ་ཀྱི་མཚམས་སྦྱར་བའི་སྟོབས་ལ་འཇུག་པར་བྱ་བའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང༌། འདི་ལྟ་སྟེ། ཐམས་ཅད་མཁྱེན་ པའི་སྟོབས་མཐའ་ཡས་པས་ཤིན་ཏུ་ཕྲ་བར་དམིགས་ཤིང་ཡོངས་སུ་མནན་པའི་སངས་རྒྱས་ཀྱི་ཆོས་རབ་ཏུ་བསྟན་པའི་ཕྱིར་སེམས་བ་སྐྱེད་པ་མཐའ་དང་དབུས་མེད་ པ་དང༌། འདི་ལྟ་སྟེ། སངས་རྒྱས་ཀྱི་ཁྱུ་མཆོག་གི་མཐུ་བསམ་གྱིས་མི་ཁྱབ་ཅིང༌། འབྱམས་ཀླས་པ་ལ་འཇུག་པ་དང༌། ཁོང་དུ་ཆུད་པར་བྱ་བའི་ཕྱིར་སེམས་བསྐྱེད་པ་ མཐའ་དང་དབུས་མེད་པ་དང༌། འདི་ལྟ་སྟེ། སངས་རྒྱས་ཀྱི་ཐ་དད་པ་ཡང་དག་པར་མཁྱེན་པ་མངོན་དུ་བྱ་བར་ལྷག་པའི་བསམ་པ་ཡང་དག་པར་གཏང་ཞིང༌། སངས་ རྒྱས་ཀྱི་ཆོས་ཐམས་ཅད་ཡང་དག་པར་བླང་བའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང༌། འདི་ལྟ་སྟེ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་ དཀྱིལ་འཁོར་དུ་འཇུག་ཅིང་ལུས་སྣ་ཚོགས་ཀྱི་བྱིན་གྱི་རླབས་ཡང་དག་པར་བསྟན་པའི་ཕྱིར་སེམས་བསྐྱེད་པ་མཐའ་དང་དབུས་མེད་པ་སྟེ། ཀྱེ༑ རྒྱལ་བའི་སྲས་དག །བཅུ་པོ་དེ་ དག་ནི། བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་མཐའ་དང་དབུས་མེད་པའོ། །ཀྱེ༑ རྒྱལ་བའི་སྲས་དག །བཅུ་པོ་འདི་རྣམས་ནི། བྱང་ཆུབ་སེམས་དཔའ་སེམས་ དཔའ་ཆེན་པོ་རྣམས་ཀྱི་ཏིང་ངེ་འཛིན་གྱི་བྱེ་བྲག་ལ་འཇུག་པའི་ཡེ་ཤེས་ཏེ། བཅུ་གང་ཞེ་ན། འདི་ལྟར་ཤར་ཕྱོགས་སུ་སྙོམས་པར་ཞུགས་ཏེ། ནུབ་ཕྱོགས་ནས་རྣམ་པར་ལྡང་ བ་དང༌། ནུབ་ཕྱོགས་སུ་སྙོམས་པར་ཞུགས་ཏེ། ཤར་ཕྱོགས་ནས་རྣམ་པར་ལྡང་བ་དང༌། ཤར་དང་བྱང་གི་མཚམས་སུ་སྙོམས་པར་ཞུགས་ཏེ། ལྷོ་དང་ནུབ་ཀྱི་མཚམས་ ནས་རྣམ་པར་ལྡང་བ་དང༌། ལྷོ་དང་ནུབ་ཀྱི་མཚམས་སུ་སྙོམས་པར་ཞུགས་ཏེ། ཤར་དང་བྱང་གི་མཚམས་ནས་རྣམ་པར་ལྡང་བ་དང༌། ལྷོ་ཕྱོགས་སུ་སྙོམས་པར་ཞུགས་ ཏེ༑ བྱང་ཕྱོགས་ནས་རྣམ་པར་ལྡང་བ་དང༌། བྱང་ཕྱོགས་སུ་སྙོམས་པར་ཞུགས་ཏེ། ལྷོ་ཕྱོགས་ནས་རྣམ་པར་ལྡང་བ་དང༌། ནུབ་དང་བྱང་གི་མཚམས་སུ་སྙོམས་པར་ ཞུགས་ཏེ། ཤར་དང་ལྷོའི་མཚམས་ནས་རྣམ་པར་ལྡང་བ་དང༌། ཤར་དང་ལྷོའི་མཚམས་སུ་སྙོམས་པར་བཞུགས་ཏེ། ནུབ་དང་བྱང་གི་མཚམས་ནས་རྣམ་པར་ལྡང་བ་ ༄༅། །དང༌། འོག་གི་ཕྱོགས་སུ་སྙོམས་པར་ཞུགས་ཏེ། སྟེང་གི་ཕྱོགས་ནས་རྣམ་པར་ལྡང་བ་དང༌། སྟེང་གི་ཕྱོགས་སུ་སྙོམས་པར་ཞུགས་ཤིང༌། འོག་གི་ ཕྱོགས་ནས་རྣམ་པར་ལྡང་བ་སྟེ། ཀྱེ༑ རྒྱལ་བའི་སྲས་དག། བཅུ་པོ་འདི་རྣམས་ནི། བྱང་ཆུབ་སེམས་དཔའ་སེམས་དཔའ་ཆེན་པོ་དག་གི་ཏིང་ངེ་འཛིན་གྱི་བྱེ་བྲག་ལ་ འཇུག་པའི་ཡེ་ཤེས་སོ། །ཀྱེ༑ རྒྱལ་བའི་སྲས་དག །བཅུ་པོ་འདི་རྣམས་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོར་བྱ་བ་ལ་ མཁས་པ་སྟེ། བཅུ་གང་ཞེ་ན། འདི་ལྟ་སྟེ། ཀྱེ༑ རྒྱལ་བའི་སྲས་དག། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སྟོང་གསུམ་གྱི་སྟོང་ཆེན་པོའི་འཇིག་ རྟེན་གྱི་ཁམས་པད་མོ་གཅིག་ཏུ་བྱིན་གྱིས་བརླབས་ཏེ། པདྨོ་གཅིག་པོ་དེ་རང་གི་སྐྱིལ་མོ་ཀྲུང་གིས་རྒྱས་པར་ཁྱབ་པར་བྱིན་གྱིས་རློབ་བོ། །རང་གི་ལུས་དེ་ལས་ཀྱང་ སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྟོན་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེར་ཡང་གླིང་བཞི་པ་ཁྲག་ཁྲིག་ཕྲག་བརྒྱ་སྟོན་ ཏོ༑ ༑གླིང་བཞི་པ་ཁྲག་ཁྲིག་བརྒྱ་པོ་རེ་རེ་ཞིང་ཡང་བདག་གི་ལུས་རེ་རེ་བྱིན་གྱིས་རློབ་སྟེ། ལུས་དེ་དག་རེ་རེ་ལའང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ ཁྲག་ཁྲིག་བརྒྱ་བརྒྱ་སྟོན་ཏོ། །འཇིག་རྟེན་གྱི་ཁམས་དེ་དག་གི་གླིང་བཞི་པ་རེ་རེར་ཡང་བྱང་ཆུབ་སེམས་དཔའི་སྤྱོད་པ་ཁྲག་ཁྲིག་བརྒྱ་བརྒྱ་ཡང་དག་པར་སྟོན་ཏེ། བྱང་ཆུབ་ སེམས་དཔའི་སྤྱོད་པ་དེ་དག་རེ་རེ་ལ་ཡང་མོས་པ་བྱེ་བ་ཁྲག་ཁྲིག་བརྒྱ་བརྒྱ་མངོན་པར་བསྒྲུབ་བོ། །མོས་པ་དེ་དག་རེ་རེ་ལའང་དབང་པོ་སྣ་ཚོགས་རྣམ་པར་ཕྱེ་བ་ཁྲག་ཁྲིག་ ཕྲག་བརྒྱ་བརྒྱ་ཡོངས་སུ་རྫོགས་པ་རབ་ཏུ་འཐོབ་པར་བྱ་བ་ཡོངས་སུ་རྫོགས་པར་བྱེད་དོ། །དབང་པོ་སྣ་ཚོགས་རྣམ་པར་ཕྱེ་བ་དེ་དག་རེ་རེ་ལ་ཡང་བྱང་ཆུབ་སེམས་དཔའ་ཁྲག་ ཁྲིག་བརྒྱ་བརྒྱ་ཕྱིར་མི་ལྡོག་པའི་ལམ་གྱིས་བྱང་ཆུབ་སེམས་དཔའི་ཆོས་ལ་རབ་ཏུ་གཞོག་གོ །འོན་ཀྱང་ལུས་མང་པོའམ། ལྷག་པར་འཕེལ་བར་མི་བྱེད་དེ། མཉམ་པར་ བཞག་པའང་ཉམས་པར་འགྱུར་བ་མེད་དོ། །ཀྱེ༑ རྒྱལ་བའི་སྲས་དག། འདི་ལྟ་སྟེ། དཔེར་ན། ལྷ་མ་ཡིན་གྱི་དབང་པོ་སྒྲ་གཅན་ཞེས་བྱ་བ་ཡོད་དེ། དེའི་རང་བཞིན་ གྱི་ལུས་ནི་དཔག་ཚད་བདུན་བརྒྱའོ། །དེའི་སྤྲུལ་བའི་ལུས་ནི་དཔག་ཚད་བརྒྱ་སྟོང་ཕྲག་དྲུག་ཅུ་རྩ་བརྒྱད་དེ། དེའི་ལུས་ཕྱེད་རྒྱ་མཚོ་ཆེན་པོའི་ནང་ན་འདུག་ཀྱང་ལུས་ཀྱི་ སྟོད་གྱེན་དུ་འཕགས་པ་རི་རབ་ཀྱི་རྩེ་མོ་དང་མཉམ་པ་དང༌། ཀྱེ༑ རྒྱལ་བའི་སྲས་དག །ལྷ་མ་ཡིན་གྱི་དབང་པོ་སྒྲ་གཅན་དེ་སྤྲུལ་པའི་ལུས་དཔག་ཚད་བརྒྱ་སྟོང་ཕྲག་དྲུག་ ༄༅། །ཅུ་རྩ་བརྒྱད་པ་དེས་སྔོན་གྱི་ལུས་འཇིག་པར་མི་བྱེད་དོ། །སྔོན་སྐྱེས་པའི་ཕུང་པོ་དང༌། ཁམས་དང༌། སྐྱེ་མཆེད་ཀྱང་ཡོངས་སུ་ཉམས་པར་མི་འགྱུར་ རོ༑ ༑ལུས་ཆེན་པོ་དེ་ཡོད་པས་ཀྱང་སྤྲུལ་པའི་ལུས་ལ་གཞན་དུ་འདུ་ཤེས་པར་མི་འགྱུར་ཏེ། ལུས་སྔ་མ་ཤི་འཕོས་པའི་འདུ་ཤེས་ཀྱང་མེད་ལ། གསར་དུ་སྐྱེས་པའི་ ལུས་ཀྱིས་ཀྱང་ཉམས་དགའ་བ་རབ་ཏུ་ཐོབ་པ་ཡིན་ཏེ། སྤྲུལ་པའི་ལུས་དེས་མཐུ་དང་དབང་བྱེད་པར་དབང་སྒྱུར་བར་ཡང་ཡང་དག་པར་སྟོན་པ་ན་རྨོངས་ཤིང་འཁྲུལ་བར་ འགྱུར་བའང་མེད་དེ། ལྷ་མ་ཡིན་གྱི་དབང་པོ་སྒྲ་གཅན་དེ་ནི། འདོད་ཆགས་ཅན། ཞེ་སྡང་ཅན། གཏི་མུག་ཅན་ཏེ། ང་རྒྱལ་དང༌། དྲེགས་པ་དང་ལྡན་ཡང་རྒྱ་མཚོའི་ ནང་ན་གནས་ཤིང༌། རྒྱ་མཚོའི་ནང་གི་ཁྱིམ་ན་འདུག་བཞིན་དུ་རྣམ་པ་དེ་ལྟ་བུའི་སྤྲུལ་པའི་ལུས་ཀྱིས་མངོན་པར་འཕགས་ན། བྱང་ཆུབ་སེམས་དཔའ་སེམས་ དཔའ་ཆེན་པོ་ཆོས་ཐམས་ཅད་སྒྱུ་མའི་རྣམ་པར་རབ་ཏུ་རྟོགས་པ་འཇིག་རྟེན་ཐམས་ཅད་ན་དཔེ་མེད་པ་མིག་ཡོར་དང་མཉམ་པར་རབ་ཏུ་ཞུགས་པ་འཇིག་རྟེན་གྱི་ ཁམས་ཐམས་ཅད་སངས་རྒྱས་སྐྱེས་པའི་སྤྲུལ་པ་རྣམ་པར་དམིགས་པ་ལྟ་བུར་ཁོང་དུ་ཆུད་པ་སྒྲ་དབྱངས་རྣམ་པར་དམིགས་པ་ཐམས་ཅད་རིའི་བྲག་ཅ་ལྟ་བུར་ ཤེས་པ་ཡང་དག་པའི་ཆོས་རབ་ཏུ་མཐོང་བ། ཆོས་ཇི་ལྟ་བ་བཞིན་གྱི་ལུས་དང་ལྡན་པ། རང་བཞིན་གྱིས་འོད་གསལ་ཞིང་དང་བའི་ཆོས་ལ་ཞུགས་པ། སེམས་ཀྱི་རང་བཞིན་ དངོས་པོ་མེད་པར་རབ་ཏུ་རྟོགས་པ། ལུས་ཀྱི་ཡུལ་ཚད་མེད་པ་ལ་གནས་པ། སངས་རྒྱས་ཀྱི་ཡེ་ཤེས་སྣང་བས་བྱང་ཆུབ་ཀྱི་སྤྱོད་པ་རྣམ་པར་སྦྱངས་པ་ལྟ་སྨོས་ཀྱང་ཅི་དགོས་ ཏེ༑ དེ་ཏིང་ངེ་འཛིན་ཆེན་པོ་དེ་ལ་གནས་པས་ཅུང་ཟད་དུ་འཁྲུལ་པའང་མེད་ན། བློང་ཞིང་རྨོངས་པར་འགྱུར་བ་མེད་པ་ལྟ་ཅི་སྨོས། དེ་ལུས་ཀྱི་སྟོད་ལྷའི་འཇིག་རྟེན་དུ་འཕགས་ པར་བྱིན་གྱིས་རློབ་ཅིང་ལུས་ཀྱི་སྨད་འདོད་པའི་ཁམས་ན་འདུག་པར་བྱིན་གྱིས་རློབ་ཀྱང་ཤིན་ཏུ་མཉམ་པར་བཞག་པས་རབ་ཏུ་སྦྱར་བའི་ཏིང་ངེ་འཛིན་གྱི་དཀྱིལ་འཁོར་ཆེན་ པོ་དེས། ལྷ་མ་ཡིན་གྱི་དབང་པོ་སྒྲ་གཅན་དེ་ཡང་རང་གི་ལུས་ཀྱི་ནང་དུ་རླག་པ་དེས་ལུས་ཆེན་པོ་སྟོན་ཅིང་སྤྱོམས་པའི་སྐྱེ་བ་དང༌། རྫུ་འཕྲུལ་ཐམས་ཅད་ཀྱང་ལུས་ཀྱི་ནང་དུ་ རླག་པར་བྱིན་གྱིས་རློབ་བོ། །ཀྱེ། རྒྱལ་བའི་སྲས་དག །འདི་ལྟ་སྟེ། དཔེར་ན། མི་སྡུག་པ་བསྒོམས་པ་ལ་གནས་པའི་དགེ་སློང་ནི་མི་སྡུག་པའི་མཚན་མར་རྣམ་པར་ལྟ་ ཞིང༑ ནང་གི་ལུས་ལ་རྟོག་པ་ལ་མངོན་པར་བརྩོན་པ་ཡིན། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ལུས་སུ་འཇིག་རྟེན་གྱི་ཁམས་ཐམས་ཅད་ ༄༅། །ཆུད་པར་བྱ་བའི་ཕྱིར། ཆོས་ཀྱི་ལུས་ལ་བརྟག་པར་མངོན་པར་བརྩོན་པ་ཡིན་ཏེ། ལུས་དེ་ལ་འཇིག་རྟེན་དང༌། འཇིག་རྟེན་གྱི་ཆོས་མཐོང་ཡང་འདི་ལྟ་སྟེ། བྱང་ཆུབ་སེམས་དཔའི་ཁྱུ་མཆོག་གི་མཐུ་དང༌། རྣམ་པར་འཕྲུལ་པ་དང༌། ཏིང་ངེ་འཛིན་རབ་ཏུ་ཐོབ་པས་ལུས་ལ་འཇིག་རྟེན་དང༌། འཇིག་རྟེན་གྱི་ཆོས་ཀྱིས་ཆགས་པ་མེད་དོ།། ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་རྗེས་སུ་འགྲོ་བ་སྣང་བ་ཞེས་ བྱའོ༑ ༑ཀྱེ༑ རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་ བ་སྙེད་ཀྱི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམས་སྟོང་གི་འཇིག་རྟེན་གྱི་ཁམས་རེ་རེ་ལ་བྱིན་གྱིས་རློབ་སྟེ། འཇིག་རྟེན་གྱི་ཁམས་དེ་དག་རེ་རེ་ཡང་ལུས་ རྣམ་པར་དམིགས་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཡང་དག་པར་སྟོན་ཏོ། །ལུས་དེ་དག་རེ་རེ་ལས་ཀྱང་འོད་ཟེར་གྱི་དཀྱིལ་ འཁོར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་རབ་ཏུ་འགྱེད་དོ། །འོད་ཟེར་རེ་རེ་ལ་ཡང་ཁ་དོག་སྟོང་གསུམ་གྱི་སྟོང་ཆེན་པོའི་འཇིག་ རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཡང་དག་པར་སྟོན་ཏེ། ཁ་དོག་དེ་དག་རེ་རེས་ཀྱང་འཇིག་རྟེན་གྱི་ཁམས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་ སྙེད་སྣང་བར་བྱེད་དོ། །སྣང་བ་དེ་དག་རེ་རེས་ཀྱང་སེམས་ཅན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྨིན་པར་བྱེད་དོ། །དེ་ལ་ཡང་ བྱང་ཆུབ་སེམས་དཔའ་དེས་འཇིག་རྟེན་གྱི་ཁམས་རབ་ཏུ་ཤེས་སོ། །འཇིག་རྟེན་གྱི་ཁམས་རྣམ་པར་ཕྱེ་བ་རབ་ཏུ་ཤེས་སོ། །འཇིག་རྟེན་གྱི་ཁམས་ཀུན་ནས་ཉོན་མོངས་པ་རབ་ཏུ་ ཤེས་སོ། །འཇིག་རྟེན་གྱི་ཁམས་རྣམ་པར་དག་པ་རབ་ཏུ་ཤེས་སོ། །འཇིག་རྟེན་གྱི་ཁམས་སུ་འགྲོ་བ་རབ་ཏུ་ཤེས་སོ། །འཇིག་རྟེན་གྱི་ཁམས་བྱིན་གྱིས་བརླབ་པ་རབ་ཏུ་ཤེས་སོ། ། འཇིག་རྟེན་གྱི་ཁམས་སུ་གནས་པར་བྱ་བ་རབ་ཏུ་ཤེས་སོ། །འཇིག་རྟེན་གྱི་ཁམས་སྣང་བར་བྱ་བ་རབ་ཏུ་ཤེས་སོ། །འཇིག་རྟེན་གྱི་ཁམས་ནས་འགྲོ་བའང་རབ་ཏུ་ཤེས་སོ། །དེ་ ལྟར་བྱང་ཆུབ་སེམས་དཔའ་འཇིག་རྟེན་གྱི་ཁམས་ལ་དེ་ལྟར་འཇུག་ཀྱང༌། འཇིག་རྟེན་གྱི་ཁམས་ཇི་ལྟ་བ་དེ་བཞིན་དུ་བྱང་ཆུབ་སེམས་དཔའ་ལ་འཇུག་སྟེ། འཇིག་རྟེན་གྱི་ ཁམས་རྣམ་པར་དམིགས་པས་འཇིག་རྟེན་གྱི་ཁམས་སྤྲོ་བར་ཡང་མི་བྱེད་དོ། །ཆོས་ཀྱི་རང་བཞིན་ལས་ཀྱང་འཇིག་རྟེན་གྱི་ཁམས་འཇིག་པར་མི་བྱེད་དོ།། །། ༄༅། །བམ་པོ་ལྔ་བཅུ་དྲུག་པ། ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། ལྷའི་བུ་ཉི་མ་འཆར་བའི་ཚེ་རི་རབ་རིའི་རྒྱལ་པོ་འཁོར་བར་གནས་པའི་ རིན་པོ་ཆེའི་རི་བདུན་ལ་འཆར་བར་འགྱུར་ཏེ། རི་བདུན་པོ་དེ་དག་ལ་ཤར་ནས་རི་མཚམས་ཀྱི་གནས་བདུན་པོ་ཤིན་ཏུ་རུབ་པ་དེ་དག་ཏུའང་སྣང་བའི་ཚུལ་གྱིས་ཀུན་ཏུ་ འཆར་རོ། །དེ་ཡང་རིན་པོ་ཆེའི་རི་བདུན་པོ་གསེར་གྱི་མདོག་ཅན་དེ་དག་ལ་ཉི་མའི་གཟུགས་བརྙན་སྣང་བས་རི་བདུན་གྱི་ཉི་མའི་གཟུགས་བརྙན་རི་མཚམས་བདུན་པོ་ དེ་དག་ཏུ་སྣང་བའི་ཚུལ་གྱིས་འཆར་བར་འགྱུར་ཏེ། རི་མཚམས་བདུན་པོ་དེ་དག་ཀྱང་གསེར་གྱི་མདོག་ཏུ་འདུག་པས། དེ་དག་ལས་ཀྱང་རི་བདུན་པོ་དེ་དག་ལ་གཟུགས་ བརྙན་གྱི་ཚུལ་དུ་ཉི་མའི་འོད་འཆར་ཞིང་རྣམ་པར་དམིགས་པར་འགྱུར་རོ། །དེ་ལྟར་ན་གཅིག་གིས་གཅིག་སྣང་བར་བྱ་བའི་ཚུལ་དུ་རི་མཚམས་དེ་དག་ཏུ་ཉི་མའི་ གཟུགས་བརྙན་ཤར་ཅིང༌། རིན་པོ་ཆེའི་རི་དེ་དག་ལ་ཉི་མའི་གཟུགས་བརྙན་འབྱུང་བས། དེའི་ཕྱིར་རིན་པོ་ཆེའི་རི་རྣམས་ལས་ཉི་མ་འཆར་ཞེས་བྱའོ། །དེ་ལྟར་ གཅིག་ནས་གཅིག་ཏུ་སྣང་བ་རྣམ་པར་དམིགས་པ་བརྒྱུད་པས་ཉི་མའི་དཀྱིལ་འཁོར་གྱི་མཐར་ཐུག་པ་མེད་དེ། དེ་ལྟར་སྣང་བ་ཡང་དངོས་པོ་ཡང་མ་ཡིན། དངོས་ པོ་མ་ཡིན་པ་ཡང་མ་ཡིན། ཡོད་པ་ཡང་མ་ཡིན། མེད་པ་ཡང་མ་ཡིན། རི་རྣམས་ལ་གནས་པ་ཡང་མ་ཡིན། ནང་དུ་ཕྱིན་པ་ཡང་མ་ཡིན། ཕྱི་རོལ་ན་གནས་པ་ཡང་མ་ཡིན། དེ་དག་དང་བྲལ་བར་གནས་པ་ཡང་མ་ཡིན་ནོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ཏིང་ངེ་འཛིན་ འདི་ལ་གནས་པ་ཡང་འཇིག་རྟེན་གྱི་ཁམས་རྣམ་པར་དམིགས་པ་འཇིག་པར་ཡང་མི་བྱེད་དོ། །ཆོས་རྣམས་ཀྱི་རང་བཞིན་ཡང་ཡོངས་སུ་མི་སྤོང་ངོ༌། །བྱང་ཆུབ་སེམས་དཔའ་ དེ་ཉིད་འཇིག་རྟེན་གྱི་ཁམས་ཀྱི་ནང་དུ་ཕྱིན་པའང་མ་ཡིན་ནོ། །བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་ལ་རྣམ་པར་དམིགས་པའི་ཕྱི་རོལ་ན་འདུག་པའང་མ་ཡིན་ ནོ༑ ༑བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་ལ་ཡང་མི་རྟོག་སྟེ། བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་ལ་རྣམ་པར་རྟོག་པའང་མ་ཡིན་ནོ། །བྱང་ཆུབ་ སེམས་དཔའ་དེ་འཇིག་རྟེན་གྱི་ཁམས་ཀྱི་མཚན་མ་རྣམ་པར་འཇིག་པར་བྱེད་པ་མ་ཡིན་ནོ། །ཆོས་ཐམས་ཅད་ཀྱི་མཚན་ཉིད་གཅིག་པོ་ཡང་མཚན་ཉིད་མེད་པ་ལས་ རྣམ་པར་མི་ཟློག་སྟེ། བྱང་ཆུབ་སེམས་དཔའ་དེ་ཡང་ཆོས་རྣམ་པར་དབྱེ་བ་འཁྲུག་པར་མི་བྱེད་དོ། །བྱང་ཆུབ་སེམས་དཔའ་དེ་དེ་བཞིན་ཉིད་ཀྱི་རང་བཞིན་གནས་པ་དེ་ ༄༅། །ལས་ཀྱང་ཕྱིར་མི་ལྡོག་གོ །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། སྒྱུ་མའི་གཙུག་ལག་མིག་འཕྲུལ་ཞེས་བྱ་བ་འཇིག་རྟེན་ན་ཡོད་དེ། སྒྱུ་མའི་མཁན་པོ་སྒྱུ་མའི་གཙུག་ལག་དེ་ལ་ཤིན་ཏུ་བསླབས་ཤིང་ནན་ཏན་དུ་བྱེད་བྱེད་པ་རྣམས་ལམ་ཕོ་ཆེའི་བཞི་མདོ་དག་ཏུ་འཁོད་ཅིང་འགྲོ་བའི་ཚོགས་ཆེན་པོ་ འདུས་པ་དག་གི་མདུན་དུ་སྐད་ཅིག་ཡུད་ཙམ་དུ་ཉི་མ་གཅིག་དང༌། ཉིན་ཞག་བདུན་དང༌། ཟླ་བ་ཕྱེད་དང༌། ཟླ་བ་གཅིག་ཀྱང་སྟོན་ཏོ། །ལོ་གཅིག་ཀྱང་སྟོན་ཏོ། །ལོ་བརྒྱ་ཡང་ སྟོན་ཏོ། །གྲོང་ཡང་སྟོན་ཏོ། །ཡུལ་ཡང་སྟོན་ཏོ། །ཆུ་ཀླུང་གི་རྒྱུན་ཀྱང་སྟོན་ཏོ། །རྒྱ་མཚོ་ཡང་སྟོན་ཏོ། །སྤྲིན་ཡོངས་སུ་སྡུད་པ་ཡང་སྟོན་ཏོ། །སྤྲིན་ཆེན་པོ་ལས་ཆར་འབབ་པ་ ཡང་སྟོན་ཏོ། །གནམ་སྟོང་པ་ལས་ཆར་འབབ་པ་ཡང་སྟོན་ཏོ། །འཇིག་རྟེན་གྱི་གནས་རྣམ་པ་སྣ་ཚོགས་ཀྱང་སྟོན་ཏོ། །དེ་ལྟར་བསྟན་པས་ཉི་མ་གཅིག་པོ་འཇིག་པར་མི་ འགྱུར་རོ། །ཉི་མ་གཅིག་པོས་ཀྱང་ཉིན་ཞག་དང༌། ཟླ་བ་དང༌། ལོ་དེ་དག་འཇིག་པར་མི་འགྱུར་རོ། །ཡུན་རིང་པོས་ཀྱང་སྒྱུ་མི་སྟོན་ཅིང་སྒྲུབ་པ་ཟད་པར་མི་འགྱུར་ཏེ། སྒྱུ་མ་བསྟན་པའི་དུས་ཀྱིས་ཀྱང་ཡུན་རིང་པོ་རྣམ་པར་དམིགས་པ་ཟད་པར་མི་འགྱུར་རོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་ དཔའ་ཆེན་པོ། ཏིང་ངེ་འཛིན་འདི་ལ་མཉམ་པར་བཞག་པ་ཡང་འཇིག་རྟེན་གྱི་ཁམས་གཅིག་ཏུ་འཇིག་རྟེན་གྱི་ཁམས་གྲངས་མེད་པ་ལ་འཇུག་པ་རབ་ཏུ་སྟོན་ཏོ། །རླུང་གི་ཕུང་ པོ་དང༌། མེའི་ཕུང་པོ་དང༌། ཆུའི་ཕུང་པོ་དང༌། སའི་ཕུང་པོར་བཅས་པ་དང༌། རྒྱ་མཚོ་དང༌། གླིང་དུ་བཅས་པ་དང༌། རིན་པོ་ཆེའི་རི་དང༌། རི་རབ་དང༌། ཁོར་ཡུག་དང༌། བཏང་ བཟུང་དང༌། ཁོར་ཡུག་ཆེན་པོས་ཡོངས་སུ་བསྐོར་བར་བཅས་པ་དང༌། མིའི་འཇིག་རྟེན་དང༌། གྲོང་རྡལ་དང༌། ཡུལ་གྲུ་དང༌། གྲོང་གིས་གང་བར་བཅས་པ་དང༌། བཟའ་ ཤིང་གི་ར་བ་དང༌། ཆུ་ཀླུང་དང༌། མཚོ་དང༌། ལྟེང་ཀ་དང་བཅས་པ་དང༌། ལྷའི་གནས་དང༌། རྒྱན་དུ་བཅས་པ་དང༌། ཀླུའི་གནས་སུ་བཅས་པ་དང༌། གནོད་སྦྱིན་གྱི་གནས་ སུ་བཅས་པ་དང༌། དྲི་ཟའི་གནས་སུ་བཅས་པ་དང༌། ལྷ་མ་ཡིན་གྱི་གནས་སུ་བཅས་པ་དང༌། ནམ་མཁའ་ལྡིང་གི་གནས་སུ་བཅས་པ་དང༌། མིའམ་ཅིའི་གནས་སུ་བཅས་པ་ དང༑ མིའི་རྒྱན་དང་གནས་སུ་བཅས་པ་དང༌། འདོད་པའི་ཁམས་ཀྱི་ཡུལ་དང་བཅས་པ་དང༌། གཟུགས་ཀྱི་ཁམས་ཀྱི་ཡུལ་དང་བཅས་པ་དང༌། གཟུགས་མེད་པའི་ཁམས་ཀྱི་ ཡུལ་དང་བཅས་པ་དང༌། འཇིག་རྟེན་གྱི་ཁམས་བྱུར་བུར་བཅས་པ་དང༌། འཇིག་རྟེན་གྱི་ཁམས་སྟོང་དུ་བཅས་པ་དང༌། འཇིག་རྟེན་གྱི་ཁམས་སྟོང་གསུམ་དུ་བཅས་པ་དང༌། ༄༅། །ལས་དང་རྣམ་པར་སྨིན་པར་བཅས་པ་དང༌། ཤི་འཕོ་དང་སྐྱེ་བར་བཅས་པ་དང༌། སེམས་ཅན་དུ་བཅས་པ་དང༌། ཡུན་རིང་པོར་བཅས་པ་དང༌། ཡུད་ ཙམ་ཐང་ཅིག་ཏུ་བཅས་པ་དང༌། ཉི་མར་བཅས་པ་དང༌། དུས་མཚམས་སུ་བཅས་པ་དང༌། ཟླ་བ་དང༌། ལོ་དང༌། ལོ་བརྒྱར་བཅས་པ་དང༌། བསྐལ་པ་དང༌། འཇིག་པ་དང༌། འདུ་བར་བཅས་པ་དང༌། ཀུན་ནས་ཉོན་མོངས་པ་དང༌། རྣམ་པར་དག་པ་དང༌། ཡངས་པ་དང༌། ཕྲ་བ་དང༌། རྒྱ་ཆེ་བ་དང༌། ཚད་མེད་པར་བཅས་པ་དང༌། སངས་རྒྱས་སྐྱེ་བར་ བཅས་པ་དང༌། བྱང་ཆུབ་སེམས་དཔའི་འཁོར་དུ་བཅས་པ་དང༌། འདུལ་བའི་སེམས་ཅན་དུ་བཅས་པ་དང༌། སངས་རྒྱས་རྣམ་པར་འཕྲུལ་བའི་ཡུལ་དང༌། ཐམས་ཅད་དུ་ བྱིན་གྱིས་བརླབ་པ་དང༌། སངས་རྒྱས་ཀྱི་ཞིང་རྣམ་པར་དག་པར་བཅས་པ་དང༌། ཡུལ་དང༌། ཕྱོགས་དང༌། གཞི་སྣ་ཚོགས་དང༌། གནས་སྣོད་དུ་མས་གང་བ་དང༌། འགྲོ་ བའི་རྒྱུད་སྣ་ཚོགས་དང༌། སེམས་ཅན་གྱི་རིས་བསམ་གྱིས་མི་ཁྱབ་པར་བཅས་པ་དང༌། སྔོན་གྱི་མཐའ་དང༌། ཕྱི་མའི་མཐའ་དང༌། དེ་ལྟར་བྱུང་བ་དང༌། རིན་པོ་ཆེ་སྣ་ ཚོགས་དང༌། རིན་པོ་ཆེ་དུ་མ་དང༌། ལས་དང་རྣམ་པར་སྨིན་པ་སྣ་ཚོགས་རྣམ་པར་དག་པར་བཅས་པ་དང༌། འཇིག་རྟེན་གྱི་ཁམས་དེ་དག་ལ་འཇིག་རྟེན་གྱི་ཁམས་གཅིག་ཏུ་ འཇུག་པའི་ཚེ། འཇིག་རྟེན་ན་ཡོད་པ་དང༌། འཇིག་རྟེན་དུ་གཏོགས་པའི་སེམས་ཅན་དེ་དག་ཐམས་ཅད་ཀྱང་སྟོན་ཏོ། །མཐོང་བར་བྱེད་དོ། །ཤེས་པར་བྱེད་དོ། །རྣམ་པར་དཔྱོད་དོ། ། རྟོགས་པར་བྱེད་དོ། །རབ་ཏུ་ཤེས་པར་བྱེད་དོ། །ཁོང་དུ་ཆུད་པར་བྱེད་དོ། །དེ་ལ་ཡང་དག་པར་འཇུག་པ་ཡང་མི་ཟད་པའི་ཡེ་ཤེས་ཀྱིས་ཐོབ་པར་གྱུར་པར་ཡང་དག་པ་ཇི་ལྟ་བ་ བཞིན་དུ་མ་ནོར་བར་ལྟའོ། །འཇིག་རྟེན་གྱི་ཁམས་ཀྱི་གྲངས་དེ་དག་གིས་ཀྱང་འཇིག་རྟེན་གྱི་ཁམས་འདི་དག་རྣམ་པར་འཇིག་པར་མི་བྱེད་དེ། འཇིག་རྟེན་གྱི་ཁམས་འདི་དག་གིས་ འཇིག་རྟེན་གྱི་ཁམས་དེ་དག་རྣམ་པར་འཇིག་པར་མི་བྱེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི། ཆོས་ཐམས་ཅད་ལ་སྲོག་མེད་པའི་ཆོས་ལ་ཡོངས་སུ་རབ་ཏུ་ཞུགས་ པ་སྟེ༑ བྱང་ཆུབ་སེམས་དཔའ་ནི། བྱེད་པ་མེད་པའི་ཆོས་ལ་རབ་ཏུ་ཞུགས་པས་སྤྱོད་པ་ཐམས་ཅད་ལ་རློམ་སེམས་མེད་དོ། །བྱང་ཆུབ་སེམས་དཔའ་ནི། འཇིག་རྟེན་ཐམས་ ཅད་ཉོན་མོངས་པ་མེད་པའི་ཆོས་ལ་བརྩོན་པས་བདག་མེད་པ་ལ་སྤྱོད་པ་ཡིན། བྱང་ཆུབ་སེམས་དཔའ་ནི། ལུས་ཐམས་ཅད་ལ་རྟེན་ཅིང་འབྲེལ་བར་འབྱུང་བའི་ཆོས་ སུ་ཡང་དག་པ་ཇི་ལྟ་བ་བཞིན་དུ་ལྟ་བས་སེམས་ཅན་མེད་པ་ལ་སྤྱོད་པ་ཡིན། བྱང་ཆུབ་སེམས་དཔའ་ནི། སྐྱེ་བ་དང་འཇིག་པ་ཐམས་ཅད་ཆོས་ཀྱི་རྒྱུད་ཀྱི་རྒྱུ་ལས་བྱུང་ ༄༅། །བའི་ཆོས་སུ་རྟོགས་པས་གང་ཟག་མེད་པ་ལ་སྤྱོད་པ་ཡིན། བྱང་ཆུབ་སེམས་དཔའ་ནི། ཆོས་ཀྱི་རང་བཞིན་ཡང་དག་པར་བླང་བ་ལ་ཞུགས་པས་ ཤེད་ཅན་དང༌། ཤེད་ལས་སྐྱེས་པ་མེད་པ་ལ་གནས་པ་ཡིན། བྱང་ཆུབ་སེམས་དཔའ་ནི། ཆོས་ཐམས་ཅད་རང་བཞིན་གྱིས་དབེན་པས་བྱེད་པ་པོ་མེད་པ་ལ་སྤྱོད་པ་ཡིན། བྱང་ཆུབ་སེམས་དཔའ་ནི། ཆོས་ཐམས་ཅད་ལ་དེ་བཞིན་གཤེགས་པའི་སྤྱོད་པ་རྣམ་པར་ཕྱེ་བ་གཅིག་གིས་སྤྱོད་པས་རྣམ་པར་མི་རྟོག་པ་ལ་སྤྱོད་པ་ཡིན། བྱང་ཆུབ་ སེམས་དཔའ་ནི། ཆོས་ཀྱི་དབྱིངས་དབྱེར་མེད་པའི་ཆོས་ཉིད་ཀྱིས་བསམ་གྱིས་མི་ཁྱབ་པ་ལ་གནས་པ་ཡིན། བྱང་ཆུབ་སེམས་དཔའ་ནི། ཐབས་ཀྱི་རྣམ་གྲངས་ལ་ མཁས་ཤིང༌། སེམས་ཅན་གདུལ་བ་ལ་བརྩོན་པས་སྙིང་རྗེ་ཆེན་པོ་ལ་སྤྱོད་པ་ཡིན་ཏེ། དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཁམས་ གཅིག་རྣམ་པར་གཞོག་པས། འཇིག་རྟེན་གྱི་ཁམས་རྣམ་པར་དགོད་པ་གྲངས་མེད་པ་ལ་འཇུག་གོ །བསྐལ་པ་གྲངས་མེད་པའི་རྒྱུད་རབ་ཏུ་ཤེས་སོ། །བྱང་ཆུབ་སེམས་ དཔའི་འཇུག་པ་གྲངས་མེད་པ་ཡང་དག་པར་མཐོང་ངོ༌། །སངས་རྒྱས་གྲངས་མེད་པའི་རྗེས་སུ་ཡང་དག་པར་འབྲང་ངོ༌། །དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་དེ་དག་གིས་ཆོས་བསྟན་པ་ཡང་དག་པར་འཛིན་ཏོ། །བྱང་ཆུབ་སེམས་དཔའི་སྤྱོད་པ་དེ་ལ་བདག་ཡང་དག་པར་སྤྱོད་པར་མཐོང་སྟེ། འདི་ནས་ཀྱང་བདག་ གུད་དུ་གཡོ་བ་མེད་དོ། །དེ་དག་དང་བདག་ཏུ་ཐ་དད་པ་མེད་པར་ཡང་རབ་ཏུ་ཤེས་ཏེ། ཆོས་ཀྱི་དབྱིངས་ལ་འཇུག་པས་ཀྱང་རྒྱུན་ཆད་པ་མེད་པར་རབ་ཏུ་འཇུག་གོ། ཡེ་ཤེས་ཀྱི་ རྗེས་སུ་འཇུག་ཅིང་ཕྱིར་མི་ལྡོག་པའང་རབ་ཏུ་ཤེས་ཏེ། དཔེར་ན། སྒྱུ་མའི་མཁན་པོ་དེས་འདི་ལ་གནས་ཤིང་སྒྱུ་མ་ཐམས་ཅད་སྟོན་ཀྱང་སྒྱུ་མའི་སྤྲུལ་པ་དེས། ས་འདི་སྐྱོན་ ཅན་དུའང་མི་འགྱུར་ལ། སྒྱུ་མའི་སྤྲིན་དེ་དག་གིས་ཀྱང་ས་འདི་རླན་པར་མི་འགྱུར་ཏེ། སྒྱུ་མའི་ཉི་མ་དེས་མུན་པའི་གྲངས་སུ་བྱ་བ་འདི་དག་བསལ་བར་ཡང་མི་འགྱུར་རོ། ། དེ་བཞིན་དུ་བྱང་ཆུབ་སེམས་དཔའ་ཡང་སངས་རྒྱས་ཀྱི་ཞིང་གི་ཡུལ་ལ་ཞིང་དུ་འཇུག་པའང་བྱེད། འཇིག་རྟེན་མ་ཡིན་པའི་ཡུལ་ལ་འཇིག་རྟེན་ཡང་རབ་ཏུ་ཤེས། གཟུགས་ མེད་པའི་ཡུལ་ལ་གཟུགས་སུ་བྱིན་གྱིས་རློབ་པ་ཡང་ཤིན་ཏུ་སྟོན་ཏེ། གཅིག་གིས་གཉིས་པ་འཇིག་པར་མི་བྱེད་དོ། །གཉིས་པས་ཀྱང་གཅིག་འཇིག་པར་མི་བྱེད་དོ། །དེ་ ནི་དེས་འཇིག་རྟེན་གྱི་ཆོས་ཐམས་ཅད་སྒྱུ་མའི་དྲ་བར་ཆོས་ཀྱི་རང་བཞིན་ལ་འཇུག་པས་རབ་ཏུ་ཤེས་ཤིང༌། ཁོང་དུ་ཆུད་པ་དང༌། ཡེ་ཤེས་ཀྱི་རང་བཞིན་ལ་འཇུག་པ་ ༄༅། །དང༑ ལས་ཀྱི་རང་བཞིན་ལ་འཇུག་པས་ཁོང་དུ་ཆུད་པ་དང༌། ལས་ཀྱི་རང་བཞིན་ཡེ་ཤེས་ཀྱི་རང་བཞིན་དུ་རབ་ཏུ་བསྒྲུབ་པ་དང༌། ཡེ་ཤེས་ཀྱི་རང་ བཞིན་དུ་ལས་ཐམས་ཅད་རབ་ཏུ་སྤྱོད་པས་དེའི་ཕྱིར་རབ་ཏུ་ཤེས་སོ། །འདི་ལྟ་སྟེ། དཔེར་ན། སྒྱུ་མའི་མཁན་པོ་དེ་ནི་སྒྱུ་མའི་རྣམ་པ་སྟོན་ན་ས་མེད་པར་ཡོངས་སུ་སྟོན་པ་མ་ ཡིན། སྐྱེ་བོའི་ཚོགས་སྣ་ཚོགས་མེད་པར་ཡོངས་སུ་སྟོན་པ་ཡང་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་ཡང་ནམ་མཁའི་རང་བཞིན་མེད་པར་འཇིག་རྟེན་ཐམས་ ཅད་ལ་ཡོངས་སུ་འཇུག་པའང་མ་ཡིན། འཇིག་རྟེན་གྱི་རྣམ་པ་མེད་པར་ནམ་མཁའི་རང་བཞིན་ལ་འཇུག་པའང་མ་ཡིན་ནོ། །དེ་ཅིའི་ཕྱིར་ཞེ་ན། ནམ་མཁའི་རང་བཞིན་ ཡང་འཇིག་རྟེན་དང་ཐ་མི་དད། འཇིག་རྟེན་གྱི་རྣམ་པ་ཡང་ནམ་མཁའི་རང་བཞིན་དང་ཐ་མི་དད་དེ། བྱང་ཆུབ་སེམས་དཔའ་དེ་ནི་ནམ་མཁའི་རང་བཞིན་དེ་ལ་འཇིག་ རྟེན་གྱི་ཡུལ་དང༌། ལས་སྣ་ཚོགས་ཀྱི་རྒྱན་རྣམ་པ་སྣ་ཚོགས་ལ་རབ་ཏུ་འཇུག་གོ། མངོན་པར་སྒྲུབ་བོ། །ཡང་དག་པར་ལྟའོ། །རྣམ་པར་ལྟའོ། །ཁོང་དུ་ཆུད་པར་བྱེད་ དོ༑ ༑རྟོག་པར་བྱེད་དོ། །གོམས་པར་བྱེད་དོ། །རྗེས་སུ་སྒོམ་མོ། །རབ་ཏུ་རྟོག་གོ །རྣམ་པར་དཔྱོད་དོ། །སེམས་སྐད་ཅིག་གིས་འཇིག་རྟེན་གྱི་ཁམས་གྲངས་མེད་པའི་ འཇིག་པ་དང༌། འདུ་བའི་རྣམ་པ་ཡང་རབ་ཏུ་ཤེས་སོ། །བསྐལ་པ་གཅིག་ནས་གཅིག་ཏུ་བརྒྱུད་པའི་རྣམ་པ་ལ་བརྩོན་པར་བྱ་བའང་རབ་ཏུ་ཤེས་སོ། །སྐད་ཅིག་གཅིག་གིས་ བསྐལ་པ་དེ་དག་གཅིག་ནས་གཅིག་ཏུ་བརྒྱུད་པའི་དུས་ཐམས་ཅད་དབང་དུ་བྱེད་དོ། །སེམས་ཀྱི་སྐད་ཅིག་རེ་རེ་ལ་བསྐལ་པ་དང༌། དུས་རྣམ་པར་དམིགས་པས་མང་དུ་བྱེད་པ་ དེ་ཡང་ལུས་ལས་གཞན་དུ་མི་བྱེད་དེ། དེ་ཡང་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པའི་རྣམ་པར་ཐར་པ་སྒྱུ་མ་ལ་བྱང་ཆུབ་སེམས་དཔའ་རབ་ཏུ་སློབ་ཅིང་ ཡོངས་སུ་གྲུབ་པའི་ཕ་རོལ་ཏུ་ཕྱིན་པས་ཡེ་ཤེས་སྒྱུ་མའི་མཐར་ཕྱིན་པ་དང༌། འཇིག་རྟེན་སྒྱུ་མའི་གྲངས་ཀྱི་རྗེས་སུ་ཞུགས་པ་དང༌། ཆོས་ཐམས་ཅད་སྒྱུ་མའི་རང་བཞིན་དུ་ རྟོགས་པ་དང༌། འཇིག་རྟེན་དང་འགལ་བ་མེད་པའི་ཡེ་ཤེས་སྒྱུ་མའི་མཐར་ཕྱིན་པ་དང༌། དུས་གསུམ་སྒྱུ་མ་ཐ་མི་དད་པར་ཁོང་དུ་ཆུད་པ་དང༌། མངོན་པར་ཤེས་པ་སྒྱུ་ མ་ངེས་པར་རྟོགས་པ་དང༌། སེམས་སྒྱུ་མ་མཐའ་ཡས་ཤིང་མུ་མེད་པ་ལ་རབ་ཏུ་ཞུགས་པ་དང༌། སངས་རྒྱས་ཐམས་ཅད་སྒྱུ་མའི་རང་བཞིན་དུ་ཡང་དག་པར་མོས་པར་ བྱས་པའི་ཕྱིར་ཏེ། དེ་ལྟར་བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་ལ་རབ་ཏུ་འཇུག་ཅིང་རྣམ་པར་སྤྱོད་ཀྱང་ཐམས་ཅད་དུ་ཆགས་པ་མེད་དེ། ཀུན་ ༄༅། །ལའང་རློམ་སེམས་མེད་དོ། །འདི་ལྟ་སྟེ། དཔེར་ན། སྒྱུ་མ་བྱེད་པ་ནི་མིག་འཕྲུལ་དང༌། སྒྱུ་མ་ཐམས་ཅད་སྟོན་ཀྱང་ཡོངས་སུ་སྟོན་པ་ཡང་མེད་དོ། དེ་ ལ་རྨོངས་པར་ཡང་མི་འགྱུར་རོ། །དེ་བཞིན་དུ། བྱང་ཆུབ་སེམས་དཔའ་རྣམས་ཀྱང་ཆོས་ཐམས་ཅད་ལ་འཇུག་པའི་ཕ་རོལ་ཏུའང་ཕྱིན་ལ་ཆོས་ལ་ཞུགས་པས་རློམ་བ་ ཡང་མེད་དོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་ཡིད་དུ་འོང་ བ་ཞེས་བྱ་བ་སྟེ་གཉིས་པའོ། །ཀྱེ༑ རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དག། ཤར་ཕྱོགས་ལོགས་སུ་འཇིག་རྟེན་གྱི་ཁམས་ གྲངས་མེད་པ་འདས་ཤིང་དེར་སངས་རྒྱས་ཀྱི་ཞིང་འབྱམས་ཀླས་པ་གཅིག་ནས་གཅིག་ཏུ་བརྒྱུད་པའི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་འཇུག་ གོ་༑འཇིག་རྟེན་གྱི་ཁམས་དེ་དག་ཇི་སྙེད་འདས་པ་དེ་སྙེད་ཀྱི་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་འདས་ནས། འཇིག་རྟེན་གྱི་ཁམས་ དེ་དག་ཏུའང་འཇིག་རྟེན་གྱི་ཁམས་ལ་ལར་ཉི་མ་རངས་པར་སྙོམས་པར་འཇུག་གོ །ལ་ལར་སྔ་དྲོའི་དུས། ལ་ལར་ཉི་མ་གུང་གི་དུས། ལ་ལར་ཕྱི་དྲོའི་དུས། ལ་ལར་སྔ་ དྲོའི་ཐུན་གྱི་དུས། ལ་ལར་ཉི་མ་གུང་གི་ཐུན་གྱི་དུས། ལ་ལར་ཕྱི་དྲོའི་ཐུན་གྱི་དུས། ལ་ལར་སྐད་ཅིག་གཅིག་གི་དུས། ལ་ལར་ཡུད་ཙམ་གཅིག་གི་དུས། ལ་ལར་ཐང་གཅིག་ གི་དུས། ལ་ལར་སྲོད་ཀྱི་དུས། ལ་ལར་ཡུད་དུ་ཡན་མན་གྱི་དུས། ལ་ལར་ཟླ་བ་གཅིག་གི་དུས། ལ་ལར་ལོའི་དུས། ལ་ལར་ལོ་བརྒྱ་སྟོང་གི་དུས། ལ་ལར་ལོ་བྱེ་ པ་བརྒྱ་སྟོང་གི་དུས། ལ་ལར་ལོ་བྱེ་བ་ཁྲག་ཁྲིག་བརྒྱ་སྟོང་གི་དུས། ལ་ལར་བསྐལ་པ་གཅིག་གི་དུས། ལ་ལར་བསྐལ་པ་བརྒྱའི་དུས། ལ་ལར་བསྐལ་པ་སྟོང་གི་དུས། ལ་ལར་བསྐལ་པ་བརྒྱ་ཕྲག་སྟོང་གི་དུས། ལ་ལར་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གི་དུས། ལ་ལར་བསྐལ་པ་ཚད་མེད་པའི་དུས། ལ་ལར་བསྐལ་པ་དཔག་ཏུ་མེད་པའི་ དུས༑ ལ་ལར་བསྐལ་པ་མུ་མེད་པའི་དུས། ལ་ལར་བསྐལ་པ་མཐའ་ཡས་པའི་དུས། ལ་ལར་བསྐལ་པ་གྲངས་མེད་པའི་དུས། ལ་ལར་བསྐལ་པ་བསམ་གྱིས་མི་ཁྱབ་ པའི་དུས། ལ་ལར་བསྐལ་པ་གཞལ་དུ་མེད་པའི་དུས། ལ་ལར་བསྐལ་པ་བགྲང་དུ་མེད་པའི་དུས། ལ་ལར་བསྐལ་པ་ས་མཚམས་མེད་པའི་དུས། ལ་ལར་བསྐལ་པ་ བརྗོད་དུ་མེད་པའི་དུས་སུ་སྙོམས་པར་འཇུག་ཀྱང༌། བྱང་ཆུབ་སེམས་དཔའ་དེས་ཆོས་སྒྱུ་མ་དེ་དག་རིང་དུ་གནས་པར་སེམས་པར་མི་འགྱུར་རོ། །དུས་གཞན་དུ་རྗེས་ ༄༅། །སུ་འབྲང་བར་ཡང་མི་སེམས་ཏེ། བྱང་ཆུབ་སེམས་དཔའ་དེ་དུས་རྣམ་པ་ཐ་དད་པ་སྣ་ཚོགས་དེ་དག་ལ་མངོན་པར་ཆགས་པར་ཡང་མི་བྱེད་དོ། །མངོན། པར་ཞེན་པ་ཡང་མི་བྱེད་དོ། །དབང་དུ་ཡང་མི་བྱེད་དོ། །མི་རྟོག་གོ །རྣམ་པར་མི་རྟོག་གོ། ཆོས་ཐམས་ཅད་ལ་ཉམས་པ་མེད་པར་གཞོལ་བས་བྱམས་པའི་མངོན་ པར་ཤེས་པ་དང་ལྡན་པ་ཡིན། ཏིང་ངེ་འཛིན་གྱི་མངོན་པར་ཤེས་པས་ལྡན་པ་ཡིན། ཀྱེ༑ རྒྱལ་བའི་སྲས་དག། འདི་ལྟ་སྟེ། དཔེར་ན། ལྷའི་བུ་ཉི་མ་ནི་ཉིན་པར་ སྣང་བར་བྱེད་ཅིང་འགྲོ་ཡང་ཉིན་པར་དང་ཡང་འགྲོགས་པ་མེད། མཚན་མོ་དང་ཡང་མི་འགྲོགས་སོ། །འགྲོ་བའི་ཚེ་ཡང་ཉིན་མོར་སྣང་ལ། ནུབ་ནས་ཀྱང་མཚན་མོར་ སྣང་ངོ༌། །འོན་ཀྱང་ཉིན་པར་ཡང་སྐྱེད་པ་མེད་ལ། མཚན་མོ་ཡང་བཤིག་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཇིག་རྟེན་གྱི་ ཁམས་གྲངས་མེད་པ་དག་ཏུ་སྙོམས་པར་ཞུགས་ཤིང་གྲངས་སུ་བརྗོད་པས་རྣམ་པར་སྟོན་ཏོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་ཞིང་འབྱམས་ཀླས་པ་གཅིག་ནས་གཅིག་ཏུ་བརྒྱུད་པའི་རྗེས་སུ་སོང་བ་ཞེས་བྱ་བ་སྟེ་གསུམ་པའོ། །ཀྱེ༑ རྒྱལ་བའི་སྲས་དག། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། སེམས་ཅན་གྱི་ལུས་སངས་རྒྱས་ཀྱི་སྐུར་མངོན་པར་མོས་པར་བྱེད་དེ། དེས་དེ་བཞིན་གཤེགས་ བ་ཤིན་ཏུ་མང་པོས་མཐོང་བས། འཇིག་རྟེན་གྱི་ཁམས་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་དེ་བཞིན་གཤེགས་པ་དེ་དག་ལ་སྤོས་ཀྱི་རྣམ་པའི་མཆོག་ཐམས་ཅད་ཀྱིས་མཆོད་ པ་བྱེད་དོ། །མེ་ཏོག་སྣ་ཚོགས་ཡིད་དུ་འོང་བ་ཐམས་ཅད་ཀྱིས་མཆོད་པ་བྱེད་དོ། །ཞིང་ཡངས་པའི་རྣམ་པ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་མཆོད་ པ་བྱེད་དོ། །རྒྱན་གྱི་རྣམ་པ་འགྲོ་བ་ཐམས་ཅད་ལས་ཤིན་ཏུ་འདས་པ་ཐམས་ཅད་ཀྱིས་མཆོད་པ་བྱེད་དོ། །འགྲོ་བ་ཐམས་ཅད་ཀྱི་རིན་པོ་ཆེ་སྣ་ཚོགས་ཚད་མེད་པས་ཀུན་ཏུ་ཡོག་ པའི་རྣམ་པ་ཐམས་ཅད་ཀྱིས་མཆོད་པ་བྱེད་དོ། །རྒྱན་རྣམ་པར་ཕྱེ་བའི་ཚོགས་ཀྱི་རྣམ་པ་ཐམས་ཅད་ཀྱིས་མཆོད་པ་བྱེད་དོ། །ནོར་བུ་རིན་པོ་ཆེ་སྣ་ཚོགས་དམ་པའི་གཙུག་ལག་ ཁང་གི་རྣམ་པ་གྲངས་མེད་པ་ཐམས་ཅད་ཀྱིས་མཆོད་པ་བྱེད་དོ། །ལྷ་རྫས་ལས་ཀྱང་འདས་པའི་མནབ་སྩལ་དང༌། ཞལ་ཟས་སངས་རྒྱས་ཀྱི་བྱིན་གྱིས་བརླབས་པའི་རྣམ་པ་ དམ་པ་ཐམས་ཅད་ཀྱིས་མཆོད་པ་བྱེད་དོ། །སངས་རྒྱས་ཀྱི་ཞིང་ཐམས་ཅད་རྣམ་པར་དག་པར་བྱ་བའི་རྒྱན་སྣ་ཚོགས་རྣམ་པ་ཐ་དད་པ་མ་ལུས་པ་སངས་རྒྱས་བསྙེན་བཀུར་ ༄༅། །བ་དང༌། མཆོད་པའི་རྣམ་པར་གཏོགས་པས་སངས་རྒྱས་ཐམས་ཅད་ལ་རིམ་གྲོ་བྱ་བའི་ཚུལ་དང་ལྡན་པར་མཆོད་པ་བྱེད་དོ། །དེ་བཞིན་གཤེགས་ པ་དེ་དག་གི་ཞབས་ལའང་ཕྱག་འཚལ་ཞིང་ལུས་ཐམས་ཅད་ཀྱིས་རབ་ཏུ་འབེབས་སོ། །རྗེ་སར་ཞུ་བ་རྣམས་ཀྱང་བྱེད་དེ། སངས་རྒྱས་ཀྱི་ཆོས་ཀྱང་ཤིན་ཏུ་རྟོགས་པར་ བྱེད་དོ། །སངས་རྒྱས་ཀྱི་བསྟན་པ་ཡང་རབ་ཏུ་འཛིན་ཏོ། །སངས་རྒྱས་ཀྱི་ཆེ་བ་ཉིད་ཀྱང་ཁོང་དུ་ཆུད་པར་བྱེད་དོ། །དེ་བཞིན་ཉིད་ལ་ཡང་ཡང་དག་པར་འཇུག་པས་རབ་ ཏུ་འཇུག་གོ །སྙིང་རྗེ་ཆེན་པོའི་རྗེས་སུ་འབྲང་བའང་རབ་ཏུ་བྱེད་དོ། །ཆགས་པ་མེད་པའི་སྟོབས་རབ་ཏུ་སྤེལ་བ་ལའང་མངོན་པར་མོས་ཤིང༌། སངས་རྒྱས་ཀྱི་ ཆོས་ཐམས་ཅད་ཀྱང་ཡོངས་སུ་འཐོབ་པར་བྱེད་དོ། །སེམས་ཅན་ཐམས་ཅད་ཀྱི་གཙོ་བོའི་རྗེས་སུ་ཡང་རབ་ཏུ་འབྲང་སྟེ། སྐད་ཅིག་གཅིག་གིས་མཐར་ཡང་རབ་ཏུ་ འཇུག་གོ །དེ་བཞིན་གཤེགས་པ་དེ་དག་འབྱུང་བའི་ཚེའང་སྐྱེ་བ་མི་དམིགས་སོ། །དེ་བཞིན་གཤེགས་པ་དེ་དག་མྱ་ངན་ལས་འདས་པའི་ཚེའང་འཇིག་པ་ མི་དམིགས་སོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། གཡེང་བའི་སེམས་ཀྱིས་ཡུལ་རྣམ་པར་དམིགས་པ་ནི། གཟུགས་ལས་ཀྱང་མ་བྱུང༌། དམིགས་ པ་གང་ལས་ཀྱང་མ་བྱུང་ངོ༌། །སེམས་རྣམ་པར་མི་དམིགས་པའི་ཚེ་ཡང་དམིགས་པ་གང་ལས་ཀྱང་འགག་པར་མི་འགྱུར་རོ། །ཀྱེ༑རྒྱལ་བའི་སྲས་དག །དེ་བཞིན་དུ་བྱང་ ཆུབ་སེམས་དཔས་ཀྱང་དེ་བཞིན་གཤེགས་པ་དེ་དག་འབྱུང་བའི་ཚེ། འབྱུང་བར་མི་དམིགས་སོ། །དེ་བཞིན་གཤེགས་པ་དེ་དག་མྱ་ངན་ལས་འདའ་པའི་ཚེ་ཡང་འཇིག་ པར་མི་དམིགས་སོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། ཉི་མའི་གུང་ལ་སྨིག་རྒྱུ་བ་སྣང་བ་ནི་སྤྲིན་ལས་བྱུང་བའང་མ་ཡིན། མཚོ་ལས་བྱུང་བའང་མ་ ཡིན༑ སྤྲིན་ལ་གནས་པ་ཡང་མ་ཡིན། ས་ལ་གནས་པ་ཡང་མ་ཡིན། ཕྱོགས་ནས་བྱུང་བའང་མ་ཡིན། དགེ་བ་ཡང་མ་ཡིན། མི་དགེ་བ་ཡང་མ་ཡིན། དང་བ་ཡང་མ་ཡིན། རྙོག་པ་ཅན་ཡང་མ་ཡིན། བཏུང་བ་ཡང་མ་ཡིན། དབོ་བ་ཡང་མ་ཡིན། དངོས་པོ་ཡོད་པ་ཡང་མ་ཡིན། དངོས་པོ་མེད་པ་ཡང་མ་ཡིན། རོ་དང་ལྡན་པ་ཡང་མ་ཡིན། རྣམ་ པར་དམིགས་པ་དང༌། རྣམ་པར་མི་དམིགས་པའི་གྲངས་སུ་ཡང་མི་ཆུད་ན། དེའི་རྐྱེན་གྱིས་རྣམ་པར་ཤེས་པར་གདགས་པ་ཡང་ཡོད་དེ། སྨིག་རྒྱུ་བའི་རྒྱུད་ཇི་ལྟ་བ་དེ་ བཞིན་དུ་ཆུ་ཀླུང་གི་འདུ་ཤེས་སྐྱེ་སྟེ། རྒྱང་རིང་པོ་ནས་འདུ་ཤེས་དང༌། རྣམ་པར་ཤེས་པ་སྐྱེའོ། །ཉེ་བར་བསྙེན་ན་འཇིག་ཅིང་སྨིག་རྒྱུ་བར་རྣམ་པར་དམིགས་པ་ཡང་མེད་དོ། ། ༄༅། །ཀྱེ༑ རྒྱལ་བའི་སྲས་དག། དེ་བཞིན་དུ་བྱང་ཆུབ་སེམས་དཔས་ཀྱང་དེ་བཞིན་གཤེགས་པ་དེ་དག་སྐྱེ་བའི་ཚེ་ཡང་སྐྱེ་བར་མི་དམིགས་སོ། །དེ་ བཞིན་གཤེགས་པ་དེ་དག་མྱ་ངན་ལས་འདའ་བའི་ཚེའང་འཇིག་པར་མི་དམིགས་ཀྱང༌། མཚན་ཡོད་པས་སངས་རྒྱས་ལ་སངས་རྒྱས་ཀྱི་འདུ་ཤེས་ཀྱིས་རྣམ་པར་དམིགས་ སོ༑ ༑མཚན་མེད་པས་མཚན་མེད་པའི་མཚན་མས་མི་དམིགས་ཏེ། ཀྱེ༑རྒྱལ་བའི་སྲས་དག། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་ འཛིན་ལྷག་པའི་བསམ་པ་གཙང་མས་སྤྱོད་པ་ཞེས་བྱ་བ་སྟེ། དེ་ལ་སྙོམས་པར་ཞུགས་ཤིང༌། རྣམ་པར་ལངས་ཀྱང་དེ་ནི་འཇིག་པ་མེད་དོ། །ཀྱེ༑ རྒྱལ་བའི་སྲས་དག། འདི་ལྟ་སྟེ། དཔེར་ན། མི་གཉིད་ཀྱིས་ལོག་པའི་རྨི་ལམ་རྨིས་ནས་སད་དེ་མཚན་མ་ཡིད་ཀྱིས་ཟིན་ལ་དྲན་ཞིང་རྨི་ལམ་ལ་བསྒྲིབས་པ་མེད་པར་དམིགས་པ་ནི་སད་ཀྱང་ རྨི་ལམ་རྗེས་སུ་དྲན་པས་ཡོངས་སུ་དྲན་ནོ། །ཀྱེ༑ རྒྱལ་བའི་སྲས་དག། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་སངས་རྒྱས་མཐོང་བའི་ མཚན་མ་ཡང་ཡོངས་སུ་འཇིག་པར་མི་བྱེད་དོ། །སངས་རྒྱས་ཀྱི་ཆོས་བླངས་པ་རྣམས་ཀྱང་ཡང་དག་པར་འཛིན་ཏོ། །དེ་བཞིན་གཤེགས་པ་དེ་དག་གི་འཁོར་གྱི་དཀྱིལ་འཁོར་ རྣམ་པར་དག་པ་ཡང་བསམ་པ་ཇི་ལྟ་བ་བཞིན་དུ་རྣམ་པར་དམིགས་སོ། །སངས་རྒྱས་ཀྱི་ཞིང་གི་རྒྱན་ཀྱང་རྗེས་སུ་འཐོབ་པར་བྱེད་དོ། །དོན་གྱི་ཚུལ་ཡང་རྣམ་པར་འཕེལ་བར་བྱེད་དོ། །ཆོས་ ཐམས་ཅད་ཀྱི་ཚུལ་ཡང་རྣམ་པ་དུ་མར་ཡོངས་སུ་སྦྱོང་ངོ༌། །ཡེ་ཤེས་ཀྱི་སྒྲོན་མ་ཡང་ཤིན་ཏུ་ཡངས་པར་བྱེད་དོ། །སངས་རྒྱས་ཀྱི་རིགས་ཀྱང་རྣམ་པར་འཕེལ་བར་བྱེད་དོ། །མི་འཇིགས་པ་ ཡོངས་སུ་དག་པ་ཡང་རབ་ཏུ་བརྗོད་དོ། །ཐ་དད་པ་ཡང་དག་པར་ཤེས་པ་མི་ཟད་པའང་རབ་ཏུ་སྟོན་ཏོ། །ཀྱེ༑ རྒྱལ་བའི་སྲས་དག། འདི་ནི་བྱང་ཆུབ་སེམས་དཔའ་སེམས་དཔའ་ཆེན་ པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་བཞི་པའོ། །ཀྱེ༑ རྒྱལ་བའི་སྲས་དག། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། སངས་རྒྱས་ བཅོམ་ལྡན་འདས་པ་རྣམས་ཀྱི་འོད་ལ་རབ་ཏུ་འཇུག་གོ། བསྐལ་པ་གཅིག་ནས་གཅིག་ཏུ་བརྒྱུད་པས་ཞིང་གཅིག་ནས་གཅིག་ཏུ་བརྒྱུད་པ་ཁོང་དུ་ཆུད་པར་བྱེད་དོ། །ཞིང་གཅིག་ ནས་གཅིག་ཏུ་བརྒྱུད་པས་སངས་རྒྱས་གཅིག་ནས་གཅིག་ཏུ་བརྒྱུད་པར་རབ་ཏུ་ཤེས་སོ། །སངས་རྒྱས་གཅིག་ནས་གཅིག་ཏུ་བརྒྱུད་པས་ཆོས་བསྟན་པ་གཅིག་ནས་གཅིག་ཏུ་ བརྒྱུད་པ་རབ་ཏུ་ཤེས་སོ། །ཆོས་གཅིག་ནས་གཅིག་ཏུ་བརྒྱུད་པས་བསམ་པ་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་སོ། །བསམ་པ་གཅིག་ནས་གཅིག་ཏུ་བརྒྱུད་པས་ ༄༅། །དབང་པོ་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་སོ། །དབང་པོ་གཅིག་ནས་གཅིག་ཏུ་བརྒྱུད་པས་འདུལ་བ་གཅིག་ནས་གཅིག་ཏུ་བརྒྱུད་པ་རབ་ཏུ་ ཤེས་སོ། །འདུལ་བ་གཅིག་ནས་གཅིག་ཏུ་བརྒྱུད་པས་དེ་བཞིན་གཤེགས་པ་རྣམས་ཀྱི་སྐུ་ཚེ་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་སོ། །སྐུ་ཚེ་གཅིག་ནས་གཅིག་ཏུ་ བརྒྱུད་པས་ལོ་གྲངས་བྱེ་བ་ཁྲག་ཁྲིག་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་ཏེ། དེ་ལྟར་དེ་བཞིན་གཤེགས་པ་རྣམས་ཀྱི་ཡེ་ཤེས་མཐའ་ཡས་པ་འདབ་ཆགས་པར་རབ་ཏུ་ ཤེས་སོ། །དེ་བཞིན་དུ་འདས་པའི་ཞིང་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་ཆོས་ཀྱི་རྣམ་གྲངས་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་ དུ་འདས་པའི་བསྐལ་པ་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་ཆོས་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་སེམས་ཅན་རྣམས་ འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་མོས་པ་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་སེམས་ཅན་གྱི་སྤྱོད་པ་རྣམས་འདབ་ཆགས་པར་ བར་ཏུ་ཤེས་སོ། །དེ་བཞིན་དུ་འདས་པའི་ཉོན་མོངས་པ་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་བག་ཆགས་རྣམས་འདབ་ཆགས་པར་རབ་ཏུ་ཤེས་སོ།། དེ་བཞིན་དུ་འདས་པའི་རྣམ་པར་བྱང་བ་རྣམ་པར་དག་པ་རྣམས་འདབ་ཆགས་པར་རབ་ཏུ་ཤེས་སོ། །དེ་དག་ཏིང་ངེ་འཛིན་འདས་པ་རྣམ་པར་དག་པའི་སྙིང་པོ་ཞེས་བྱ་བ་ལ་སྙོམས་པར་འཇུག་ སྟེ༑ སེམས་བསྐྱེད་པ་གཅིག་གིས་བསྐལ་པ་བརྒྱ་ཕྲག་སྟོང་ལ་འཇུག་གོ། དེ་དང་འདབ་ཆགས་པའི་སེམས་མཐའ་ཡས་པས་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་ལ་འཇུག་གོ་༑ བསྐལ་པ་ཚད་མེད་པ་ལ་འཇུག་གོ། བསྐལ་པ་དཔག་ཏུ་མེད་པ་ལ་འཇུག་གོ། བསྐལ་པ་གཞལ་དུ་མེད་པ་ལ་འཇུག་གོ། བསྐལ་པ་མུ་མེད་པ་ལ་འཇུག་གོ། བསྐལ་པས་མཚམས་ མེད་པ་ལ་འཇུག་གོ །བསྐལ་པ་གྲངས་མེད་པ་ལ་འཇུག་གོ །བསྐལ་པ་བསམ་གྱིས་མི་ཁྱབ་པ་ལ་འཇུག་གོ། བསྐལ་པ་དཔག་གིས་མི་ཁྱབ་པ་ལ་འཇུག་གོ། བསྐལ་པ་བརྗོད་དུ་མེད་པའི་ ཡང་བརྗོད་དུ་མེད་པ་ལ་འཇུག་གོ། དེ་དག་ཏིང་ངེ་འཛིན་ད་ལྟར་བྱུང་བ་འགག་པ་མེད་པ་འདས་པ་མ་སྐྱེས་ཤིང་བསྒྲིབས་པ་མེད་པ་ཞེས་བྱ་བ་ལ་སྙོམས་པར་འཇུག་སྟེ། ཏིང་ངེ་འཛིན་ དེ་ལ་དེ་དག་ཆོས་བཅུས་དབང་བསྐུར་བ་ཡིན། དེ་དག་དེ་ལས་ལངས་ནས་ཀྱང་དེ་བཞིན་གཤེགས་པ་རྣམས་ལ་དབང་བསྐུར་བའི་ཆོས་བཅུ་པོ་དེ་དག་ལ་བསམ་གྱིས་མི་ཁྱབ་པར་ཡང་ དག་པར་འཇུག་གོ། རབ་ཏུ་འཐོབ་པར་བྱེད་དོ། །ཤིན་ཏུ་བརྩོན་པར་བྱེད་དོ། །ཡོངས་སུ་རྫོགས་པར་བྱེད་དོ། །ཐོགས་པ་མེད་པ་ཡོངས་སུ་ཁོང་དུ་ཆུད་པར་བྱེད་དོ། །རྟོགས་པར་བྱེད་དོ། ༄༅། །རྗེས་སུ་འཐོབ་པར་བྱེད་དོ། །ཡོངས་སུ་རྒྱས་པར་བྱེད་དོ། །ཡོངས་སུ་འཛིན་ཏོ། །འཁོར་གསུམ་ལ་རབ་ཏུ་ཞུགས་པས་མཉམ་པ་ཉིད་དུ་འཛིན་པར་བྱེད་དོ། །བཅུ་ གང་ཞེ་ན། འདི་ལྟ་སྟེ། དོན་ཐ་དད་པ་ཡང་དག་པར་ཤེས་པ་དང༌། ངེས་པའི་ཚིག་ཐ་དད་པ་ཡང་དག་པར་ཤེས་པས་ཆུད་མི་ཟ་བ་དང༌། འཕྲལ་དུ་བསྒྲུབས་པ་མ་ཡིན་པའི་སྤོབས་ པ་ཐ་དད་པ་ཡང་དག་པར་ཤེས་པ་དང༌། གཅད་དུ་མེད་པའི་ཆོས་ཐ་དད་པ་ཡང་དག་པར་ཤེས་པ་དང༌། མི་འཇིགས་པ་རྣམས་ལ་རང་བྱུང་བ་དང༌། སེམས་ཅན་མེད་པའི་ ཚིག་ལ་རབ་ཏུ་རྟེན་པ་དང༌། སེམས་ཅན་ཐམས་ཅད་ཀྱི་འཇུག་པའི་ཚུལ་དང༌། ཁམས་གསུམ་བའི་དམ་པ་དང༌། དགེ་བའི་རྩ་བ་བླ་ན་མེད་པ་དང༌། དེ་བཞིན་གཤེགས་ པའི་སྐུ་རྡུལ་གཅིག་གི་ཚད་དུ་སྟོན་པ་སྟེ། དེས་དེ་བཞིན་གཤེགས་པའི་སྐུ་རྡུལ་བརྒྱའི་བར་གྱི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་རྡུལ་སྟོང་གི་ཚད་དུ་རབ་ ཏུ་མཐོང་ངོ༌། །དེ་བཞིན་གཤེགས་པའི་སྐུ་རྒྱང་གྲགས་ཙམ་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་དཔག་ཚད་ཕྱེད་ཙམ་དུ་རབ་ཏུ་མཐོང་ངོ༌། །དེ་བཞིན་གཤེགས་ པའི་སྐུ་དཔག་ཚད་གཅིག་ཙམ་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་དཔག་ཚད་བཅུ་ཙམ་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་དཔག་ཚད་ བརྒྱ་ཙམ་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་དཔག་ཚད་སྟོང་ཙམ་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཛམ་བུའི་གླིང་ཙམ་དུ་རབ་ཏུ་མཐོང་ངོ༌། །དེ་ བཞིན་གཤེགས་པའི་སྐུ་གླིང་བཞིའི་འཇིག་རྟེན་གྱི་ཁམས་ཙམ་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་སྟོང་གི་འཇིག་རྟེན་གྱི་ཁམས་ཙམ་དུ་རབ་ཏུ་མཐོང་ ངོ༑ ༑དེ་བཞིན་གཤེགས་པའི་སྐུ་སྟོང་གཉིས་པའི་འཇིག་རྟེན་གྱི་ཁམས་ཙམ་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ ཁམས་ཙམ་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བརྒྱའི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་ སྟོང་གི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བརྒྱ་ཕྲག་སྟོང་གི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་ འཇིག་རྟེན་གྱི་ཁམས་བྱེ་བ་བརྒྱ་སྟོང་གི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་ཚད་མེད་པའི་ཚད་དུ་རབ་ཏུ་མཐོང་ངོ༌། །དེ་བཞིན་ གཤེགས་པའི་སྐུ་འཇིག་རྟེན་གྱི་ཁམས་དཔག་ཏུ་མེད་པའི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་གྲངས་མེད་པའི་ཚད་ ༄༅། །དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་མཐའ་ཡས་པའི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་ པའི་སྐུ་འཇིག་རྟེན་གྱི་ཁམས་མུ་མེད་པའི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བསམ་གྱིས་མི་ཁྱབ་པའི་ཚད་དུ་རབ་ཏུ་མཐོང་ ངོ༑ ༑དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་གཞལ་དུ་མེད་པའི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་དཔག་ཏུ་ མེད་པའི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བགྲང་དུ་མེད་པའི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་ རྟེན་གྱི་ཁམས་མཚམས་མེད་པའི་ཚད་དུ་རབ་ཏུ་མཐོང་ངོ༌། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བརྗོད་དུ་མེད་པའི་ཚད་དུ་རབ་ཏུ་མཐོང་ངོ༌། །དེ་བཞིན་ གཤེགས་པའི་སྐུ་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་ཚད་དུ་རབ་ཏུ་མཐོང་ངོ༌། །དེ་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་ པའི་སྐུ་དེ་ལྟ་བུའི་ཁ་དོག་ཚད་མེད་པར་རབ་ཏུ་མཐོང་ངོ༌། །དེ་ལྟ་བུའི་སྐུ་གཟུགས་ཚད་མེད་པར་རབ་ཏུ་མཐོང་ངོ༌། །དེ་ལྟ་བུའི་མཚན་ཚད་མེད་པར་རབ་ཏུ་མཐོང་ ངོ༑ ༑དེ་ལྟ་བུའི་འོད་ཚད་མེད་པར་རབ་ཏུ་མཐོང་ངོ༌། །དེ་ལྟ་བུའི་འོད་ཟེར་གྱི་དྲ་བ་སྣང་བ་ཚད་མེད་པར་རབ་ཏུ་མཐོང་ངོ༌། །ཆོས་ཀྱི་དབྱིངས་ཚད་མེད་པ་རབ་ཏུ་མཐོང་ངོ༌། །ཆོས་ཀྱི་ དབྱིངས་མཐའ་དང་དབུས་མེད་པ་རབ་ཏུ་མཐོང་ངོ༌། །ཆོས་ཀྱི་དབྱིངས་ཐམས་ཅད་ཡེ་ཤེས་ཀྱི་ཁོང་དུ་ཆུད་པ་རབ་ཏུ་མཐོང་ངོ༌། །ཆགས་པ་མེད་པའི་ལུས་རབ་ཏུ་མཐོང་ངོ༌། །བསྒྲིབས་ པ་མེད་པའི་རྣམ་པར་དག་པ་རབ་ཏུ་མཐོང་ངོ༌། །དེ་ལྟར་བྱང་ཆུབ་སེམས་དཔའ་དེ་བཞིན་གཤེགས་པའི་སྐུ་རབ་ཏུ་མཐོང་ཡང༌། དེ་བཞིན་གཤེགས་པའི་སྐུ་དེ་རྣམ་པར་འཕེལ་ བར་ཡང་མི་བྱེད། འགྲིབ་པར་ཡང་མི་བྱེད་དོ། །ཀྱེ༑ རྒྱལ་བའི་སྲས་དག། འདི་ལྟ་སྟེ། དཔེར་ན། ནམ་མཁའ་ནི་ཡུངས་ཀར་སྲིན་བུས་ཟོས་པའི་སྦུབས་ཀྱིས་ཆུང་དུ་བྱས་པ་ ཡང་མ་ཡིན། འཇིག་རྟེན་གྱི་ཁམས་གྲངས་མེད་པ་དང༌། འཇིག་རྟེན་གྱི་ཁམས་ཀྱི་མཚམས་དེ་དག་གིས་ཡངས་པར་བྱས་པ་ཡང་མ་ཡིན་ནོ། །ཀྱེ༑ རྒྱལ་བའི་སྲས་དག། དེ་བཞིན་དུ་དེ་བཞིན་ གཤེགས་པའི་སྐུ་ཡང་ལྟ་བ་རྒྱ་ཆེན་པོས་ཡངས་པར་བྱས་པ་ཡང་མ་ཡིན། ལྟ་བ་རྒྱ་ཆུང་དུས་བལྟས་པས་ཆུང་དུ་བྱས་པའང་མ་ཡིན་ནོ། །ཀྱེ༑ རྒྱལ་བའི་སྲས་དག། འདི་ལྟ་སྟེ། དཔེར་ ན༑ ཟླ་བའི་དཀྱིལ་འཁོར་ནི་འཛམ་བུའི་གླིང་ནས་བལྟ་བས་ཆུང་ངུ་བྱས་པའང་མ་ཡིན། ཟླ་བའི་དཀྱིལ་འཁོར་ལ་གནས་ཏེ་བལྟ་བས་ཆེར་བྱས་པ་ཡང་མ་ཡིན་ནོ། །ཀྱེ༑ རྒྱལ་བའི་སྲས་ ༄༅། །དག་༑དེ་བཞིན་དུ་བྱང་ཆུབ་སེམས་དཔའ་དེ་དག་ཏིང་ངེ་འཛིན་འདི་ལ་གནས་ཤིང༌། སངས་རྒྱས་དེ་དག་མཐོང་བར་ཡང་འགྱུར་ལ། དེ་བཞིན་གཤེགས་ པའི་སྤྲུལ་པ་དེ་དག་ཀྱང་འཇིག་པར་མི་བྱེད་དོ། །བསམ་པ་ཇི་ལྟ་བ་བཞིན་དུ་ཡང་སངས་རྒྱས་མཐོང་བར་བྱེད་དོ། །སངས་རྒྱས་ཀྱི་གསུང་དེ་བཞིན་གཤེགས་པའི་དབྱངས་ ཀྱིས་ཆོས་ཇི་སྙེད་དུ་བརྗོད་ཅིང་བསྟན་པ་དེ་དག་ཐམས་ཅད་ཀྱང་རབ་ཏུ་འཛིན་ཅིང་ཤེས་པར་བྱེད་པ་ཡིན། རབ་ཏུ་ཤེས་པར་བྱེད་པ་ཡིན། ཉམས་པ་མེད་པའི་ཆོས་ལའང་ རབ་ཏུ་རྟེན་པ་ཡིན། ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། སེམས་ཅན་རྣམས་ཀྱི་འཆི་འཕོ་དང༌། སྐྱེ་བ་ནི་སེམས་ལ་གསོལ་བ་གདབ་པ་མེད་དོ། །དེ་བཞིན་དུ་ བྱང་ཆུབ་སེམས་དཔའ་ཏིང་ངེ་འཛིན་འདི་ལ་གནས་པའི་འཇིག་རྟེན་གྱི་ཁམས་ཀྱི་རྒྱན་དང༌། སངས་རྒྱས་རྣམ་པར་དམིགས་པ་ཡང་ནན་ཏན་བྱ་མི་དགོས་པར་རྣམ་པར་དག་ སྟེ༑ བྱང་ཆུབ་སེམས་དཔའ་དེ་ནི་མྱུར་བ་བཅུ་དང་ལྡན་པ་ཡིན། བཅུ་གང་ཞེ་ན། འདི་ལྟ་སྟེ། སྤྱོད་པ་ལ་ཡང་དག་པར་བྱུང་བས་ཡོངས་སུ་རྫོགས་པར་བྱ་བ་མྱུར་དུ་ཡོངས་ སུ་རྫོགས་པར་བྱེད་པ་ཡིན། སངས་རྒྱས་ཀྱི་ཆོས་སྣང་བས་འཇིག་རྟེན་མྱུར་དུ་སྣང་བར་བྱེད་པ་ཡིན། ཆོས་ཀྱི་འཁོར་ལོའི་ཐབས་མཁས་པས་སེམས་ཅན་མྱུར་དུ་ཡོངས་ སུ་སྨིན་པར་བྱེད་པ་ཡིན། ལས་ཇི་ལྟ་བ་བཞིན་དུ་སེམས་ཅན་རྣམ་པར་དམིགས་པས་སངས་རྒྱས་ཀྱི་ཞིང་མྱུར་དུ་ཡོངས་སུ་སྤྱོད་པ་ཡིན། སྟོབས་བཅུ་མཉམ་པ་ཉིད་ཀྱི་ཡེ་ཤེས་ མྱུར་དུ་གནོན་པ་ཡིན། དེ་བཞིན་གཤེགས་པ་ཐམས་ཅད་དང་མྱུར་དུ་འགྲོགས་པ་ཡིན། བྱམས་པ་ཆེན་པོའི་སྟོབས་ཀྱིས་བདུད་ཀྱི་དཀྲུགས་མ་མྱུར་དུ་འཇོམས་པ་ཡིན། ཐེ་ཚོམ་ ཡོངས་སུ་གཅོད་པས་སེམས་ཅན་ཐམས་ཅད་མྱུར་དུ་ཚིམ་པར་བྱེད་པ་ཡིན། མོས་པ་དང་འདུལ་བ་ཇི་ལྟ་བ་བཞིན་དུ་རྣམ་པར་འཕྲུལ་བ་མྱུར་དུ་ཡང་དག་པར་སྟོན་པ་ཡིན། འཇིག་རྟེན་ གྱི་ཁམས་ཐམས་ཅད་དུ་སྒྲ་སྐད་སྣ་ཚོགས་རྣམ་པར་དག་པར་འགྱུར་བའི་ཕྱིར་ཆོས་ཐམས་ཅད་ཀྱི་རང་བཞིན་དང་མྱུར་དུ་ལྡན་པར་འགྱུར་བ་ཡིན། བྱང་ཆུབ་སེམས་དཔའ་དེ་ནི་ ཆོས་ཐམས་ཅད་ལ་བྱང་ཆུབ་སེམས་དཔའི་རྒྱ་བཅུས་བཏབ་པ་ཡིན་ཏེ། བཅུ་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་དེ་ནི་འདས་པ་དང༌། མ་བྱོན་པ་དང༌། ད་ལྟར་བྱུང་ པའི་སངས་རྒྱས་ཐམས་ཅད་དང་དགེ་བའི་རྩ་བ་གཅིག་པ་ཡིན། བྱང་ཆུབ་སེམས་དཔའ་དེ་ནི་མཐའ་དང་དབུས་མེད་པའི་ལུས་ཀྱིས་ཡེ་ཤེས་ཀྱི་རང་བཞིན་གཅིག་པ་ཡིན། བྱང་ ཆུབ་སེམས་དཔའ་དེ་ནི་དེ་བཞིན་གཤེགས་པ་ཐམས་ཅད་ལ་མཆོད་པས་སྤྱོད་པ་གཅིག་པ་ཡིན། བྱང་ཆུབ་སེམས་དཔའ་དེ་ནི་གཉིས་སུ་མེད་པ་ཡང་དག་པར་བླང་བ་ལ་རྟོགས་པར་ ༄༅། །བཞག་པས་དཀྱིལ་འཁོར་ཚད་མེད་པ་ཡིན། བྱང་ཆུབ་སེམས་དཔའ་དེ་ནི་ཆོས་ཀྱི་དབྱིངས་ཡོངས་སུ་ཤེས་པས་ཆགས་པ་མེད་པའི་ཡུལ་དང་ལྡན་པ་ ཡིན༑ བྱང་ཆུབ་སེམས་དཔའ་དེ་ནི་སྟོབས་བཅུའི་སྣང་བ་ཐོབ་པས་བསྒྲིབས་པ་མེད་པའི་སྤྱོད་ཡུལ་དང་ལྡན་པ་ཡིན། བྱང་ཆུབ་སེམས་དཔའ་དེ་ནི་མི་གཉིས་པ་ལ་ཡང་དག་པར་ སྤྱོད་པས་དགང་སླ་བ་ཡིན། བྱང་ཆུབ་སེམས་དཔའ་དེ་ནི་འགྲོ་བ་ཐམས་ཅད་འདུལ་བའི་ཕྱིར་ཡོངས་སུ་རྒྱུན་ཆད་པ་མེད་པ་ཡིན། བྱང་ཆུབ་སེམས་དཔའ་དེ་ནི་དོན་ཤེས་ཤིང་ མཁས་པར་བྱ་བ་ལ་ཤིན་ཏུ་རྟོགས་པར་བཞག་པ་ཡིན། བྱང་ཆུབ་སེམས་དཔའ་དེ་ནི་སངས་རྒྱས་ཐམས་ཅད་དང་མི་གཉིས་པ་ཡིན་ཏེ། ཀྱེ༑ རྒྱལ་བའི་སྲས་དག །འདི་ནི་བྱང་ ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་ཀྱི་ཚུལ་སངས་རྒྱས་ཐམས་ཅད་ཀྱིས་རྣམ་པར་བཀོད་པའི་འཇིག་རྟེན་གྱི་ཁམས་ ཀྱི་རྒྱན་ཅེས་བྱ་བ་སྟེ། ཏིང་ངེ་འཛིན་དེ་དང་ལྡན་པའི་བྱང་ཆུབ་སེམས་དཔའ་ནི། སངས་རྒྱས་ཀྱི་ཆོས་ཐམས་ཅད་ལ་སློབ་དཔོན་མེད་པ་ཡིན། འགྲོ་བ་ཐམས་ཅད་དུ་འགྲོ་བའི་རྩ་ རྩལ་ཡོད་པས་གཞན་གྱི་དྲིང་མི་འཇོག་པ་ཡིན། སེམས་ཀྱི་རང་བཞིན་འོད་གསལ་ཞིང་དག་པ་དང་ལྡན་པས་ཤིན་ཏུ་དག་པ་ཡིན། འཇིག་རྟེན་ཐམས་ཅད་ཡོངས་སུ་འགྲེལ་བ་ ཞུགས་པས་ཐུ་བོ་དམ་པ་ཡིན། སྐྱེ་དགུ་ཐམས་ཅད་བསམ་པ་ཐག་པ་ནས་ཕན་པ་ཡིན། མ་འོངས་པའི་སངས་རྒྱས་ཀྱི་རིགས་རབ་ཏུ་སྒྲུབ་པ་ཡིན། ཐམས་ཅད་མཁྱེན་པའི་སྒོ་ལ་ རབ་ཏུ་གཞོག་པ་ཡིན། གཉིས་སུ་མེད་པར་སྨྲ་ཞིང་ནོར་པ་མེད་པར་ཁོང་དུ་ཆུད་པར་སྟོན་པས་དེ་ཁོ་ན་ཉིད་ལ་མཁས་པ་ཡིན། སངས་རྒྱས་ཀྱི་ཆོས་ཐམས་ཅད་ཀྱི་ཆོས་ཀྱི་མཛོད་ རབ་ཏུ་བཏང་བ་ཡིན། སེམས་ཅན་གྱི་རིས་སེམས་སུ་བསམ་པ་ཇི་ལྟ་བ་བཞིན་དུ་ཆོས་ཀྱི་སྤྲིན་གྱི་ཆར་འབེབས་པ་ཡིན། ཀྱེ་རྒྱལ་བའི་སྲས་དག་འདི་ལྟ་སྟེ། དཔེར་ན། བརྒྱ་ བྱིན་མངོན་པར་དགའ་བའི་ནོར་བུ་རིན་པོ་ཆེ་ནི་ལྷའི་རྒྱལ་པོའི་སྤྱི་བོ་ལ་བཏགས་ན། ནོར་བུ་དེའི་བྱིན་གྱིས་ལྷའི་དབང་པོ་བརྒྱ་བྱིན་འོད་དང་ལྡན་པར་འགྱུར་བ་སྟེ། ནོར་བུ་རིན་ པོ་ཆེ་དེ་བདོག་པས་ལྷའི་རྒྱལ་པོ་བརྒྱ་བྱིན་ཆོས་བཅུས་སུམ་ཅུ་རྩ་གསུམ་པའི་ལྷ་ཐམས་ཅད་ཟིལ་གྱིས་གནོན་ཏོ། །བཅུ་གང་ཞེ་ན། སུམ་ཅུ་རྩ་གསུམ་རིས་ཀྱི་ལྷའི་བུ་གཞན་ ཐམས་ཅད་ཀྱི་ལྷ་རྫས་ལས་འདས་པའི་མདོག་དང༌། ལྷ་རྫས་ལས་འདས་པའི་གཟུགས་དང༌། ལྷ་རྫས་ལས་འདས་པའི་བལྟ་ན་མཛེས་པ་དང༌། ལྷ་རྫས་ལས་འདས་པའི་ འཁོར་དང༌། ལྷ་རྫས་ལས་འདས་པའི་ལོངས་སྤྱོད་དང༌། ལྷ་རྫས་ལས་འདས་པའི་རྫུ་འཕྲུལ་དང༌། ལྷ་རྫས་ལས་འདས་པའི་དབང་ཆེན་པོ་དང༌། ལྷ་རྫས་ལས་འདས་པའི་སྤྱོད་ ༄༅། །པ་དང༌། ལྷ་རྫས་ལས་འདས་པའི་བློ་གྲོས་དང༌། ལྷ་རྫས་ལས་འདས་པའི་ཤེས་རབ་སྟེ། དེ་ནི་ལྷ་རྫས་ལས་འདས་པའི་བསོད་ནམས་རབ་ཏུ་གྲུབ་ པས་ནོར་བུ་རིན་པོ་ཆེ་དེ་ཐོབ་པའི་ཕྱིར་རོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་དེ་ཡང་ཏིང་ངེ་འཛིན་འདི་ཐོབ་པས་ཡེ་ཤེས་ཀྱི་ཚོགས་ཆེན་པོ་ཡངས་ པའི་གཏེར་ཆེན་པོ་བཅུ་འཐོབ་བོ། །བཅུ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཞིང་ཐམས་ཅད་སྣང་བར་བྱ་བའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། སེམས་ཅན་གྱི་ ཁམས་ཐམས་ཅད་དུ་སྐྱེ་ཞིང་འབྱུང་བའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། དུས་གསུམ་དུ་སྤྲུལ་པའི་བྱིན་གྱིས་བརླབས་པའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ་། སངས་རྒྱས་ཐམས་ཅད་ཀྱི་སྐུའི་བྱིན་གྱིས་བརླབས་པའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། ཆོས་ཐམས་ཅད་རྟོགས་པར་རིག་པའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། ཆོས་ཐམས་ཅད་ཉེ་བར་སྟོན་པའི་ ཆོས་ཤིན་ཏུ་བརྗོད་པའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། འགྲོ་བ་ཐམས་ཅད་ཁོངས་སུ་ཆུད་པའི་ཆོས་ཀྱི་ལུས་ཀྱི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། ཆོས་ཐམས་ཅད་མངོན་དུ་གྱུར་ཅིང་ཀུན་ཏུ་ མཐོང་བའི་མིག་གི་ཡེ་ཤེས་རྣམ་པར་དག་པ་རབ་ཏུ་འཐོབ་བོ། །འདི་ལྟ་སྟེ། དབང་ཐམས་ཅད་ཀྱི་ཕ་རོལ་ཏུ་ཕྱིན་པའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། ཆོས་འབྱམས་ ཀླས་པ་ཐམས་ཅད་མ་ལུས་པར་ཁོང་དུ་ཆུད་པ་རབ་ཏུ་འཐོབ་བོ། །ཏིང་ངེ་འཛིན་འདི་ཐོབ་མ་ཐག་ཏུ་བྱང་ཆུབ་སེམས་དཔའ་དེ་རྣམ་པར་དམིགས་པ་ཐམས་ཅད་དུ་འཇིག་རྟེན་གྱི་ཁམས་ ཐམས་ཅད་རྣམ་པར་བརྒྱན་པར་བྱ་བའི་ཕྱིར་དག་པའི་ལུས་བཅུ་འཐོབ་བོ། །བཅུ་གང་ཞེ་ན། འདི་ལྟ་སྟེ། འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་སྣང་བར་བྱ་ བའི་ཕྱིར། འོད་ཀྱི་དཀྱིལ་འཁོར་བརྗོད་དུ་མེད་པའི་ཡང་བརྗོད་དུ་མེད་པ་རབ་ཏུ་འགྱེད་དོ། །འདི་ལྟ་སྟེ། འཇིག་རྟེན་གྱི་ཁམས་རྣམ་པར་དག་པར་བྱ་བའི་ཕྱིར། ཁ་དོག་དུ་མ་དང༌། ཁ་ དོག་སྣ་ཚོགས་དང༌། འོད་ཀྱི་འཁོར་ལོ་བརྗོད་དུ་མེད་པའི་ཡང་བརྗོད་དུ་མེད་པ་བྱིན་གྱིས་རློབ་བོ། །འདི་ལྟ་སྟེ། སེམས་ཅན་བྱིན་གྱིས་བརླབ་ཅིང་གདུལ་བའི་ཕྱིར། འོད་ཟེར་གྱི་དཀྱིལ་ འཁོར་བརྗོད་དུ་མེད་པའི་ཡང་བརྗོད་དུ་མེད་པ་རབ་ཏུ་འགྱེད་དོ། །འདི་ལྟ་སྟེ། སངས་རྒྱས་ཐམས་ཅད་ཀྱི་སྤྱན་སྔར་འགྲོ་བའི་ཕྱིར་ལུས་བརྗོད་དུ་མེད་པའི་ཡང་བརྗོད་དུ་མེད་པ་ བྱིན་གྱིས་རློབ་བོ། །འདི་ལྟ་སྟེ། སངས་རྒྱས་ཐམས་ཅད་བསྙེན་བཀུར་བར་བྱ་བའི་ཕྱིར་སྤོས་དང༌། མེ་ཏོག་སྣ་ཚོགས་ཡིད་དུ་འོང་བའི་སྤྲིན་དུ་མ་བརྗོད་དུ་མེད་པའི་ཡང་བརྗོད་དུ་མེད་ པའི་ཆར་མངོན་པར་འབེབས་སོ། །འདི་ལྟ་སྟེ། སངས་རྒྱས་བསྙེན་བཀུར་བ་དང༌། སེམས་ཅན་གདུལ་བའི་ཕྱིར། བ་སྤུའི་ཁུང་བུ་རེ་རེར་ཡང་རོལ་མོ་བརྡུང་བ་དང༌། དཀྲོལ་བ་བརྒྱ་ ༄༅། །ཕྲག་དུ་མ་ཡིད་དུ་འོང་ཞིང་རྒྱ་ཆེ་བ་བརྗོད་དུ་མེད་པའི་ཡང་བརྗོད་དུ་མེད་པ་བྱིན་གྱིས་རློབ་བོ། །འདི་ལྟ་སྟེ། སེམས་ཅན་རྣམས་མོས་པའི་ཚུལ་བཞིན་དུ་ ཡོངས་སུ་སྨིན་པར་བྱ་བའི་ཕྱིར། སྤྲུལ་པའི་རྒྱུད་རྣམ་པ་སྣ་ཚོགས་རྣམ་པར་དག་པ་དང༌། ཁྱུ་མཆོག་གི་མཐུ་དང༌། རྣམ་པར་འཕྲུལ་པའི་སྤྲུལ་པ་དུ་མ་བརྗོད་དུ་མེད་པའི་ཡང་ བརྗོད་དུ་མེད་པ་ལ་རབ་ཏུ་རྟེན་ཏོ། །འདི་ལྟ་སྟེ། ཕྱོགས་བཅུར་སངས་རྒྱས་ཀྱི་ཆོས་རྣམ་པ་ཐ་དད་པ་སྣ་ཚོགས་ཡོངས་སུ་བྲི་བའི་ཕྱིར། གོམ་པ་རེ་རེས་འཇིག་རྟེན་གྱི་ཁམས་ བརྗོད་དུ་མེད་པའི་ཡང་བརྗོད་དུ་མེད་པ་ཡོངས་སུ་འདའ་བར་བྱེད་དོ། །འདི་ལྟ་སྟེ། མཐོང་བ་དང༌། ཐོས་པ་དང༌། མཆོད་པ་ཐམས་ཅད་དོན་ཡོད་པར་བྱ་བའི་ཕྱིར། སྤྱི་ གཙུག་ལྟར་མི་སྣང་བའི་ལུས་རྣམ་པར་དག་པ་དང༌། གཟུགས་དང༌། མཚན་སྣ་ཚོགས་རྣམ་པར་དག་པ་བརྗོད་དུ་མེད་པའི་ཡང་བརྗོད་དུ་མེད་པ་རབ་ཏུ་འཐོབ་བོ། །འདི་ ལྟ་སྟེ༑ སྒྲ་སྐད་སྣ་ཚོགས་དང༌། སྒྲ་སྐད་དུ་མས་འགྲོ་བ་རྣམས་རྣམ་པར་བསྟན་པའི་ཕྱིར། སྒྲ་དང༌། སྐད་དང༌། ང་རོ་དང༌། དབྱངས་ཀྱི་ཡན་ལག་བརྗོད་དུ་མེད་པའི་ཡང་བརྗོད་ དུ་མེད་པ་རབ་ཏུ་བརྗོད་དོ། །དེ་ལྟར་བྱང་ཆུབ་སེམས་དཔའ་ལུས་ཀྱི་གཟི་བརྗིད་ཕུན་སུམ་ཚོགས་ཤིང་རྣམ་པར་དག་པ་བཅུ་རབ་ཏུ་འཐོབ་བོ། །བྱང་ཆུབ་སེམས་དཔའ་དེ་ནི། སེམས་ཅན་བྱིན་གྱིས་བརླབ་པ་ཡོངས་སུ་རྫོགས་པར་བྱ་བ་བཅུ་རབ་ཏུ་འཐོབ་སྟེ། བཅུ་གང་ཞེ་ན། འདི་ལྟ་སྟེ། སངས་རྒྱས་མཐོང་ཞིང་རྣམ་པར་དམིགས་པར་བྱ་བའི་ཕྱིར། སེམས་ ཅན་རྣམས་བྱིན་གྱིས་རློབ་བོ། །འདི་ལྟ་སྟེ། སངས་རྒྱས་ལ་དད་པ་རབ་ཏུ་འཐོབ་པར་བྱ་བའི་ཕྱིར། སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། ཆོས་ཉན་ཅིང་ཁོང་དུ་ཆུད་པར་ བྱ་བའི་ཕྱིར། སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། སངས་རྒྱས་དང་བཅས་པའི་འཇིག་རྟེན་གྱི་ཁམས་བསྟན་པའི་ཕྱིར། སེམས་ཅན་རྣམས་བྱིན་གྱིས་རློབ་བོ། །འདི་ ལྟ་སྟེ། སངས་རྒྱས་ཀྱི་རྣམ་པར་འཕྲུལ་པ་ཡང་དག་པར་བསྟན་པའི་ཕྱིར། སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། ལས་ཇི་ལྟར་བསགས་པ་བཞིན་དུ་རྗེས་སུ་དྲན་པར་ བྱ་བའི་ཕྱིར། སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། རྩེ་གཅིག་ཏུ་འགྱུར་བ་ཡོངས་སུ་རྫོགས་པར་བྱ་བའི་ཕྱིར། སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། སངས་རྒྱས་ཀྱི་ཆ་བྱད་རྣམ་པར་དག་པར་བྱ་བའི་ཕྱིར། སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། བྱང་ཆུབ་ཀྱི་སེམས་ལ་ཡང་དག་པར་འཇུག་པར་བྱ་བའི་ཕྱིར་། སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར། སེམས་ཅན་རྣམས་བྱིན་གྱིས་རློབ་བོ། །ཀྱེ༑ རྒྱལ་བའི་སྲས་ ༄༅། །དག༑ དེ་ལྟར་བྱང་ཆུབ་སེམས་དཔའ་དེ་སེམས་ཅན་བྱིན་གྱིས་བརླབ་པ་བཅུ་ཡོངས་སུ་རྫོགས་པར་བྱེད་དོ། །ཀྱེ༑ རྒྱལ་བའི་སྲས་དག །དེ་ལྟར་བྱང་ ཆུབ་སེམས་དཔའ་སེམས་ཅན་བྱིན་གྱིས་བརླབ་པ་བཅུ་ཡོངས་སུ་རྫོགས་པར་བྱས་ནས། སེམས་ཅན་རྣམས་ལ་སངས་རྒྱས་ཀྱི་མཛད་པ་བཅུ་བྱེད་དེ། བཅུ་གང་ཞེ་ན། འདི་ ལྟར་བྱང་ཆུབ་སེམས་དཔའ་ནི་ཐོས་པས་ཀྱང་སེམས་ཅན་རྣམས་ཡོངས་སུ་སྨིན་པར་བྱེད་པས། སེམས་ཅན་རྣམས་ལ་སངས་རྒྱས་ཀྱི་མཛད་པ་བྱེད་པ་ཡིན། འདི་ལྟ་སྟེ་། བྱང་ཆུབ་སེམས་དཔའ་ནི་མཐོང་བས་ཀྱང་སེམས་ཅན་འདུལ་བའི་ཕྱིར། སངས་རྒྱས་ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་རྗེས་སུ་དྲན་པས་ཀྱང༌། སེམས་རྣམ་ པར་དག་པར་འགྱུར་བས། སངས་རྒྱས་ཀྱི་མཛད་པ་བྱེད་པ་ཡིན་བྱང་ཆུབ་སེམས་དཔའ་ནི་འཇིག་རྟེན་གྱི་ཁམས་སྐྱོད་པས་ཀྱང་ངན་སོང་གསུམ་རྣམ་པར་ཟློག་པའི་ ཕྱིར༑ སངས་རྒྱས་ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་བྱིན་གྱི་རླབས་ཀྱིས་ཀྱང་སེམས་ཅན་རྣམས་ཀྱི་དྲན་པ་ཉམས་པར་མི་འགྱུར་བའི་ཕྱིར། སངས་རྒྱས་ ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་རྨི་ལམ་དུ་མཐོང་བས་ཀྱང་སེམས་ཅན་རྣམས་ཀྱི་དྲན་པ་ཉམས་པར་མི་འགྱུར་བའི་ཕྱིར། སངས་རྒྱས་ཀྱི་མཛད་པ་བྱེད་པ་ ཡིན༑ བྱང་ཆུབ་སེམས་དཔའ་ནི་འོད་ཀྱི་དཀྱིལ་འཁོར་འགྱེད་པས་ཀྱང་སེམས་ཅན་རྣམས་ཀྱི་དྲན་པ་ཉམས་པར་མི་འགྱུར་བའི་ཕྱིར། སངས་རྒྱས་ཀྱི་མཛད་པ་བྱེད་པ་ཡིན། བྱང་ ཆུབ་སེམས་དཔའ་ནི་བྱང་ཆུབ་སེམས་དཔའི་སྤྱོད་པ་ཡང་དག་པར་སྟོན་པས་ཀྱང་སེམས་ཅན་རྣམས་སྨོན་ལམ་གྱི་ཁྱད་པར་ལ་རབ་ཏུ་གཞོག་པས། སངས་རྒྱས་ཀྱི་མཛད་པ་ བྱེད་པ་ཡིན། བྱང་ཆུབ་སེམས་དཔའ་ནི་མངོན་པར་འཚང་རྒྱ་བས་ཀྱང་སེམས་ཅན་རྣམས་ཆོས་ཁོང་དུ་ཆུད་པར་རྟོགས་པར་འགྱུར་བའི་ཕྱིར། སངས་རྒྱས་ཀྱི་མཛད་པ་བྱེད་ པ་ཡིན། བྱང་ཆུབ་སེམས་དཔའ་ནི་མྱ་ངན་ལས་འདས་པ་སྟོན་པས་ཀྱང་སེམས་ཅན་མི་དགའ་བ་བསྟན་པས་ཤིན་ཏུ་རྟོགས་པར་བྱེད་པའི་ཕྱིར། སངས་རྒྱས་ཀྱི་མཛད་པ་བྱེད་ པ་ཡིན་ཏེ། ཀྱེ༑ རྒྱལ་བའི་སྲས་དག །འདི་དག་ནི་བྱང་ཆུབ་སེམས་དཔའ་སེམས་ཅན་རྣམས་ལ་སངས་རྒྱས་ཀྱི་མཛད་པ་བཅུ་བྱེད་པའོ། །ཀྱེ༑ རྒྱལ་བའི་སྲས་དག །གཞན་ཡང་ བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཏིང་ངེ་འཛིན་ཆེན་པོ་ལུས་ཡང་དག་པར་འདྲེས་པ་ཞེས་བྱ་བ་ལ་སྙོམས་པར་འཇུག་སྟེ། ལུས་ཡང་དག་པར་འདྲེས་པ་དེས་མི་ གནས་པ་བཅུ་ཡོངས་སུ་རྫོགས་པར་བྱེད་དོ། །བཅུ་གང་ཞེ་ན། འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་ལ་མི་གནས་པ་དང༌། ཕྱོགས་ཐམས་ཅད་ལ་མི་གནས་པ་དང༌། ༄༅། །བསྐལ་པ་ཐམས་ཅད་ལ་མི་གནས་པ་དང༌། སེམས་ཅན་ཐམས་ཅད་ལ་མི་གནས་པ་དང༌། ཆོས་ཐམས་ཅད་ལ་མི་གནས་པ་དང༌། བྱང་ཆུབ་སེམས་ དཔའི་སྤྱོད་པ་ཐམས་ཅད་ལ་མི་གནས་པ་དང༌། བྱང་ཆུབ་སེམས་དཔའི་སྨོན་ལམ་ཐམས་ཅད་ལ་མི་གནས་པ་དང༌། ཏིང་ངེ་འཛིན་ཐམས་ཅད་ལ་མི་གནས་པ་དང༌། སངས་ རྒྱས་ཐམས་ཅད་ལ་མི་གནས་པ་དང༌། ས་ཐམས་ཅད་ལ་མི་གནས་པ་སྟེ། བྱང་ཆུབ་སེམས་དཔའ་ལུས་ཡང་དག་པར་འདྲེས་པའི་ཏིང་ངེ་འཛིན་ལ་གནས་པའི་ཚེ། གནས་ མེད་པ་བཅུ་པོ་འདི་དག་རབ་ཏུ་འཐོབ་བོ།། །།བམ་པོ་ལྔ་བཅུ་རྩ་བདུན་པ། ཇི་ལྟར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་ལུས་ཡང་དག་པར་ འདྲེས་པ་ལ་མཉམ་པར་གཞོག་ཅེ་ན། ཀྱེ༑ རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་ནང་གི་ལུས་སུ་སྙོམས་པར་ཞུགས་ཤིང༌། ཕྱི་རོལ་གྱི་ལུས་ལས་རྣམ་ པར་ལྡང་ངོ༌། །ཕྱི་རོལ་གྱི་ལུས་སུ་སྙོམས་པར་ཞུགས་ཤིང༌། ནང་གི་ལུས་ལས་རྣམ་པར་ལྡང་ངོ༌། །ལུས་གཅིག་ཏུ་སྙོམས་པར་ཞུགས་ཤིང༌། ལུས་ཐ་དད་པ་ལས་ རྣམ་པར་ལྡང་ངོ༌། །ལུས་ཐ་དད་པ་ལ་སྙོམས་པར་ཞུགས་ཤིང༌། མིའི་ལུས་ལས་རྣམ་པར་ལྡང་ངོ༌། །མིའི་ལུས་སུ་སྙོམས་པར་ཞུགས་ཤིང༌། གནོད་སྦྱིན་གྱི་ལུས་ ལས་རྣམ་པར་ལྡང་ངོ༌། །གནོད་སྦྱིན་གྱི་ལུས་སུ་སྙོམས་པར་ཞུགས་ཤིང༌། ཀླུའི་ལུས་ལས་རྣམ་པར་ལྡང་ངོ༌། །ཀླུའི་ལུས་སུ་སྙོམས་པར་ཞུགས་ཤིང༌། ལྷ་མ་ཡིན་གྱི་ལུས་ ལས་རྣམ་པར་ལྡང་ངོ༌། །ལྷ་མ་ཡིན་གྱི་ལུས་སུ་སྙོམས་པར་ཞུགས་ཤིང༌། ལྷའི་ལུས་ལས་རྣམ་པར་ལྡང་ངོ༌། །ལྷའི་ལུས་སུ་སྙོམས་པར་ཞུགས་ཤིང༌། ཚངས་པའི་ལུས་ལས་རྣམ་ པར་ལྡང་ངོ༌། །ཚངས་པའི་ལུས་སུ་སྙོམས་པར་ཞུགས་ཤིང༌། འདོད་པའི་ཁམས་ནས་རྣམ་པར་ལྡང་ངོ༌། །འདོད་པའི་ཁམས་ནས་སྙོམས་པར་ཞུགས་ཤིང༌། མཐོ་རིས་ཀྱི་འཇིག་ རྟེན་ནས་རྣམ་པར་ལྡང་ངོ༌། །མཐོ་རིས་ཀྱི་འཇིག་རྟེན་དུ་སྙོམས་པར་ཞུགས་ཤིང༌། སེམས་ཅན་དམྱལ་བ་ནས་རྣམ་པར་ལྡང་ངོ༌། །སེམས་ཅན་དམྱལ་བར་སྙོམས་པར་ཞུགས་ཤིང༌། མིའི་ཁམས་ནས་རྣམ་པར་ལྡང་ངོ༌། །མིའི་ཁམས་ནས་སྙོམས་པར་ཞུགས་ཤིང༌། དེ་མ་ཡིན་པའི་ལམ་གྱི་རྒྱུད་གཞན་ནས་རྣམ་པར་ལྡང་ངོ༌། །དེ་མ་ཡིན་པའི་ལམ་གྱི་རྒྱུད་ལ་སྙོམས་ པར་ཞུགས་ཤིང༌། ལུས་སྟོང་ལས་རྣམ་པར་ལྡང་ངོ༌། །ལུས་སྟོང་ལ་སྙོམས་པར་ཞུགས་ཤིང༌། ལུས་གཅིག་ལས་རྣམ་པར་ལྡང་ངོ༌། །ལུས་གཅིག་ལ་སྙོམས་པར་ཞུགས་ཤིང༌། ལུས་བྱེ་བ་ལས་རྣམ་པར་ལྡང་ངོ༌། །ལུས་བྱེ་བ་ལ་སྙོམས་པར་ཞུགས་ཤིང༌། ལུས་གཅིག་ལས་རྣམ་པར་ལྡང་ངོ༌། །ལུས་གཅིག་ལ་སྙོམས་པར་ཞུགས་ཤིང༌། ལུས་ཁྲག་ཁྲིག་ལས་ ༄༅། །རྣམ་པར་ལྡང་ངོ༌། །ལུས་ཁྲག་ཁྲིག་ལ་སྙོམས་པར་ཞུགས་ཤིང༌། འཛམ་བུའི་གླིང་དུ་གཏོགས་པའི་སེམས་ཅན་ལས་རྣམ་པར་ལྡང་ངོ༌། །འཛམ་བུའི་ གླིང་དུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། ནུབ་ཀྱི་བ་གླང་སྤྱོད་དུ་གཏོགས་པའི་སེམས་ཅན་ལས་རྣམ་པར་ལྡང་ངོ༌། །ནུབ་ཀྱི་བ་གླང་སྤྱོད་དུ་གཏོགས་པའི་ སེམས་ཅན་ལ་སྙོམས་པར་ཞུགས་ཤིང༌། བྱང་གི་སྒྲ་མི་སྙན་དུ་གཏོགས་པའི་སེམས་ཅན་ལས་རྣམ་པར་ལྡང་ངོ༌། །བྱང་གི་སྒྲ་མི་སྙན་དུ་གཏོགས་པའི་སེམས་ཅན་ལ་སྙོམས་པར་ ཞུགས་ཤིང༌། ཤར་གྱི་ལུས་འཕགས་པོར་གཏོགས་པའི་སེམས་ཅན་ལས་རྣམ་པར་ལྡང་ངོ༌། །ཤར་གྱི་ལུས་འཕགས་པོར་གཏོགས་པའི་སེམས་ཅན་ལ་སྙོམས་པར་ཞུགས་ ཤིང༑ གླིང་གསུམ་དུ་གཏོགས་པའི་སེམས་ཅན་ལས་རྣམ་པར་ལྡང་ངོ༌། །གླིང་གསུམ་དུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། གླིང་གཉིས་སུ་གཏོགས་ པའི་སེམས་ཅན་ལས་རྣམ་པར་ལྡང་ངོ༌། །གླིང་གཉིས་སུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། གླིང་བཞིར་གཏོགས་པའི་སེམས་ཅན་ལས་རྣམ་པར་ལྡང་ ངོ༑ ༑གླིང་བཞིར་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། རྒྱ་མཚོར་གཏོགས་པའི་སེམས་ཅན་ལས་རྣམ་པ་ལྡང་ངོ༌། །རྒྱ་མཚོར་གཏོགས་པའི་སེམས་ ཅན་ལ་སྙོམས་པར་ཞུགས་ཤིང༌། རྒྱ་མཚོའི་ལྷའི་ལུས་ལས་རྣམ་པར་ལྡང་ངོ༌། །རྒྱ་མཚོའི་ལྷའི་ལུས་སུ་སྙོམས་པར་ཞུགས་ཤིང༌། རྒྱ་མཚོར་གཏོགས་པའི་ཆུའི་ཕུང་པོ་ལས་རྣམ་པར་ ལྡང་ངོ༌། །རྒྱ་མཚོར་གཏོགས་པའི་ཆུའི་ཕུང་པོ་ལ་སྙོམས་པར་ཞུགས་ཤིང༌། རྒྱ་མཚོར་གཏོགས་པའི་སའི་ཕུང་པོ་ལས་རྣམ་པར་ལྡང་ངོ༌། །རྒྱ་མཚོར་གཏོགས་པའི་སའི་ཕུང་པོ་ལ་སྙོམས་ པར་ཞུགས་ཤིང༌། རྒྱ་མཚོར་གཏོགས་པའི་མེའི་ཕུང་པོ་ལས་རྣམ་པར་ལྡང་ངོ༌། །རྒྱ་མཚོར་གཏོགས་པའི་མེའི་ཕུང་པོ་ལ་སྙོམས་པར་ཞུགས་ཤིང༌། རྒྱ་མཚོར་གཏོགས་པའི་རླུང་གི་ཕུང་ པོ་ལས་རྣམ་པར་ལྡང་ངོ༌། །རྒྱ་མཚོར་གཏོགས་པའི་རླུང་གི་ཕུང་པོ་ལ་སྙོམས་པར་ཞུགས་ཤིང༌། འབྱུང་བ་ཆེན་པོ་བཞི་ལས་རྣམ་པར་ལྡང་ངོ༌། །འབྱུང་བ་ཆེན་པོ་བཞི་ལ་སྙོམས་ པར་ཞུགས་ཤིང༌། ཆོས་འབྱུང་བ་མེད་པ་ལས་རྣམ་པར་ལྡང་ངོ༌། །ཆོས་འབྱུང་བ་མེད་པ་ལ་སྙོམས་པར་ཞུགས་ཤིང༌། རི་རབ་ལས་རྣམ་པར་ལྡང་ངོ༌། །རི་རབ་ལ་སྙོམས་པར་ཞུགས་ ཤིང༑ རིན་པོ་ཆེའི་རི་བདུན་ལས་རྣམ་པར་ལྡང་ངོ༌། །རིན་པོ་ཆེའི་རི་བདུན་ལ་སྙོམས་པར་ཞུགས་ཤིང༌། རིན་པོ་ཆེའི་རྒྱན་བདུན་ལས་རྣམ་པར་ལྡང་ངོ༌། །རིན་པོ་ཆེ་རྒྱན་བདུན་ལ་སྙོམས་ པར་ཞུགས་ཤིང༌། ས་བོན་དང༌། ལོ་ཏོག་དང༌། ས་དང༌། ཤིང་དང༌། རི་ནག་པོ་སྣ་ཚོགས་ལས་རྣམ་པར་ལྡང་ངོ༌། །ས་བོན་དང༌། ལོ་ཏོག་དང༌། ས་དང༌། ཤིང་དང༌། རི་ནག་པོ་སྣ་ཚོགས་ ༄༅། །ལ་སྙོམས་པར་ཞུགས་ཤིང༌། མེ་ཏོག་བཟང་པོ་དང༌། དྲི་ཞིམ་པོ་དང༌། རིན་པོ་ཆེའི་རྒྱན་གྱིས་བརྒྱན་པའི་རི་ལས་རྣམ་པར་ལྡང་འོ། །མེ་ཏོག་བཟང་པོ་ དང༑ དྲི་ཞིམ་པོ་དང༌། རིན་པོ་ཆེའི་རྒྱན་གྱིས་བརྒྱན་པའི་རི་ལ་སྙོམས་པར་ཞུགས་ཤིང༌། གླིང་བཞི་པར་གཏོགས་པའི་བླ་དང༌། འོག་ཐམས་ཅད་དང༌། སེམས་ཅན་རྣམ་པར་ ཕྱེ་བ་ཐམས་ཅད་ཀྱི་སྐྱེ་གནས་ལས་རྣམ་པར་ལྡང་ངོ༌། །གླིང་བཞི་པར་གཏོགས་པའི་བླ་དང༌། འོག་ཐམས་ཅད་དང༌། སེམས་རྣམ་པར་ཕྱེ་བ་ཐམས་ཅད་ཀྱི་སྐྱེ་གནས་ལ་སྙོམས་ པར་ཞུགས་ཤིང༌། སྟོང་གི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལས་རྣམ་པར་ལྡང་ངོ༌། །སྟོང་གི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལ་སྙོམས་པར་ ཞུགས་ཤིང༌། སྟོང་གཉིས་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལས་རྣམ་པར་ལྡང་ངོ༌། །སྟོང་གཉིས་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལ་ སྙོམས་པར་ཞུགས་ཤིང༌། སྟོང་གསུམ་གྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལས་རྣམ་པར་ལྡང་ངོ༌། །སྟོང་གསུམ་གྱི་འཇིག་རྟེན་གྱི་ཁམས་སུ་གཏོགས་པའི་སེམས་ ཅན་ལ་སྙོམས་པར་ཞུགས་ཤིང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལས་རྣམ་པར་ལྡང་ངོ༌། །སྟོང་གསུམ་གྱི་སྟོང་ཆེན་པོའི་འཇིག་རྟེན་ གྱི་ཁམས་སུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྲག་ཁྲིག་ཕྲག་བརྒྱར་གཏོགས་པའི་སེམས་ཅན་ལས་རྣམ་པར་ལྡང་ ངོ༑ ༑སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྲག་ཁྲིག་ཕྲག་བརྒྱར་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། བྱེ་བ་བརྒྱ་ཕྲག་སྟོང་དུ་གཏོགས་པའི་སེམས་ཅན་ ལས་རྣམ་པར་ལྡང་ངོ༌། །འཇིག་རྟེན་གྱི་ཁམས་བྱེ་བ་བརྒྱ་ཕྲག་སྟོང་དུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། འཇིག་རྟེན་གྱི་ཁམས་ཚད་མེད་པར་གཏོགས་པའི་སེམས་ཅན་ལས་ རྣམ་པར་ལྡང་ངོ༌། །འཇིག་རྟེན་གྱི་ཁམས་ཚད་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་ལས་རྣམ་ པར་ལྡང་ངོ༌། །འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། སངས་རྒྱས་ཀྱི་ཞིང་དཔག་ཏུ་མེད་པར་གཏོགས་པའི་སེམས་ཅན་ལས་རྣམ་ པར་ལྡང་ངོ༌། །སངས་རྒྱས་ཀྱི་ཞིང་དཔག་ཏུ་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། སངས་རྒྱས་ཀྱི་ཞིང་མཐའ་ཡས་པར་གཏོགས་པའི་སེམས་ཅན་ལས་རྣམ་པར་ ལྡང་ངོ༌། །སངས་རྒྱས་ཀྱི་ཞིང་མཐའ་ཡས་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། སངས་རྒྱས་ཀྱི་ཞིང་མུ་མེད་པར་གཏོགས་པའི་སེམས་ཅན་ལས་རྣམ་པར་ལྡང་ངོ༌། ། ༄༅། །སངས་རྒྱས་ཀྱི་ཞིང་མུ་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། འཇིག་རྟེན་གྱི་ཁམས་གཞལ་དུ་མེད་པར་གཏོགས་པའི་སེམས་ཅན་ ལས་རྣམ་པར་ལྡང་ངོ༌། །འཇིག་རྟེན་གྱི་ཁམས་གཞལ་དུ་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། འཇིག་རྟེན་གྱི་ཁམས་བསམ་གྱིས་མི་ཁྱབ་པར་ གཏོགས་པའི་སེམས་ཅན་ལས་རྣམ་པར་ལྡང་ངོ༌། །འཇིག་རྟེན་གྱི་ཁམས་བསམ་གྱིས་མི་ཁྱབ་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། འཇིག་རྟེན་གྱི་ཁམས་ དཔག་གིས་མི་ལང་བར་གཏོགས་པའི་སེམས་ཅན་ལས་རྣམ་པར་ལྡང་ངོ༌། །འཇིག་རྟེན་གྱི་ཁམས་དཔག་གིས་མི་ལང་བར་གཏོགས་པའི་སེམས་ཅན་ལ་སྙོམས་པར་ཞུགས་ཤིང༌། འཇིག་རྟེན་གྱི་ཁམས་བརྗོད་དུ་མེད་པའི་སེམས་ཅན་ལས་རྣམ་པར་ལྡང་ངོ༌། །འཇིག་རྟེན་གྱི་ཁམས་བརྗོད་དུ་མེད་པའི་སེམས་ཅན་ལ་སྙོམས་པར་ཞུགས་ཤིང༌། འཇིག་རྟེན་གྱི་ ཁམས་བརྗོད་དུ་མེད་པའི་ཡང་བརྗོད་དུ་མེད་པར་གཏོགས་པའི་སེམས་ཅན་ལས་རྣམ་པར་ལྡང་ངོ༌། །འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པར་གཏོགས་པའི་ སེམས་ཅན་ལ་སྙོམས་པར་ཞུགས་ཤིང༌། ཀུན་ནས་ཉོན་མོངས་པའི་སེམས་ཅན་ལས་རྣམ་པར་ལྡང་ངོ༌། །ཀུན་ནས་ཉོན་མོངས་པའི་སེམས་ཅན་ལ་སྙོམས་པར་ཞུགས་ཤིང༌། རྣམ་པར་བྱང་བའི་སེམས་ཅན་ལས་རྣམ་པར་ལྡང་ངོ༌། །རྣམ་པར་བྱང་བའི་སེམས་ཅན་ལ་སྙོམས་པར་ཞུགས་ཤིང༌། མིག་གི་སྐྱེ་མཆེད་ལས་རྣམ་པར་ལྡང་ངོ༌། །མིག་གི་སྐྱེ་མཆེད་ལ་ སྙོམས་པར་ཞུགས་ཤིང༌། རྣ་བའི་སྐྱེ་མཆེད་ལས་རྣམ་པར་ལྡང་ངོ༌། །རྣ་བའི་སྐྱེ་མཆེད་ལ་སྙོམས་པར་ཞུགས་ཤིང༌། སྣའི་སྐྱེ་མཆེད་ལས་རྣམ་པར་ལྡང་ངོ༌། །སྣའི་སྐྱེ་མཆེད་ལ་ སྙོམས་པར་ཞུགས་ཤིང༌། ལྕེའི་སྐྱེ་མཆེད་ལས་རྣམ་པར་ལྡང་ངོ༌། །ལྕེའི་སྐྱེ་མཆེད་ལ་སྙོམས་པར་ཞུགས་ཤིང༌། ལུས་ཀྱི་སྐྱེ་མཆེད་ལས་རྣམ་པར་ལྡང་ངོ༌། །ལུས་ཀྱི་སྐྱེ་མཆེད་ལ་ སྙོམས་པར་ཞུགས་ཤིང༌། རེག་གི་སྐྱེ་མཆེད་ལས་རྣམ་པར་ལྡང་ངོ༌། །རེག་གི་སྐྱེ་མཆེད་ལ་སྙོམས་པར་ཞུགས་ཤིང༌། རོའི་སྐྱེ་མཆེད་ལས་རྣམ་པར་ལྡང་ངོ༌། །རོའི་སྐྱེ་མཆེད་ལ་སྙོམས་ པར་ཞུགས་ཤིང༌། དྲིའི་སྐྱེ་མཆེད་ལས་རྣམ་པར་ལྡང་ངོ༌། །དྲིའི་སྐྱེ་མཆེད་ལ་སྙོམས་པར་ཞུགས་ཤིང༌། སྒྲའི་སྐྱེ་མཆེད་ལས་རྣམ་པར་ལྡང་ངོ༌། །སྒྲའི་སྐྱེ་མཆེད་ལ་སྙོམས་པར་ཞུགས་ ཤིང༑ གཟུགས་ཀྱི་སྐྱེ་མཆེད་ལས་རྣམ་པར་ལྡང་ངོ༌། །གཟུགས་ཀྱི་སྐྱེ་མཆེད་ལ་སྙོམས་པར་ཞུགས་ཤིང༌། རྡུལ་ཤིན་ཏུ་ཕྲ་བ་གཅིག་ལས་རྣམ་པར་ལྡང་ངོ༌། །རྡུལ་ཤིན་ཏུ་ཕྲ་བ་གཅིག་ ལ་སྙོམས་པར་ཞུགས་ཤིང༌། འཇིག་རྟེན་གྱི་ཁམས་གྲངས་མེད་པའི་རྡུལ་ཤིན་ཏུ་ཕྲ་བ་རྣམ་པར་ཕྱེ་བ་ལས་རྣམ་པར་ལྡང་ངོ༌། །འཇིག་རྟེན་གྱི་ཁམས་གྲངས་མེད་པའི་རྡུལ་ཤིན་ཏུ་ཕྲ་ ༄༅། །བ་རྣམ་པར་ཕྱེ་བ་ལ་སྙོམས་པར་ཞུགས་ཤིང༌། ཉན་ཐོས་ལས་རྣམ་པར་ལྡང་ངོ༌། །ཉན་ཐོས་ལ་སྙོམས་པར་ཞུགས་ཤིང༌། རང་སངས་རྒྱས་ལས་རྣམ་པར་ལྡང་ ངོ༑ ༑རང་སངས་རྒྱས་ལ་སྙོམས་པར་ཞུགས་ཤིང༌། རང་གི་ལུས་ལས་རྣམ་པར་ལྡང་ངོ༌། །རང་གི་ལུས་ལ་སྙོམས་པར་ཞུགས་ཤིང༌། སངས་རྒྱས་ཀྱི་སྐུ་ལས་རྣམ་པར་ལྡང་ངོ༌། ། སངས་རྒྱས་ཀྱི་སྐུ་ལ་སྙོམས་པར་ཞུགས་ཤིང༌། སེམས་ཀྱི་སྐད་ཅིག་གཅིག་ལས་རྣམ་པར་ལྡང་ངོ༌། །སེམས་ཀྱི་སྐད་ཅིག་གཅིག་ལ་སྙོམས་པར་ཞུགས་ཤིང༌། བསྐལ་པ་བྱེ་ བ་ལས་རྣམ་པར་ལྡང་ངོ༌། །བསྐལ་པ་བྱེ་བ་ལ་སྙོམས་པར་ཞུགས་ཤིང༌། སྔོན་གྱི་མཐའ་ལས་རྣམ་པར་ལྡང་ངོ༌། །སྔོན་གྱི་མཐའ་ལ་སྙོམས་པར་ཞུགས་ཤིང༌། ཕྱི་མའི་མཐའ་ ལས་རྣམ་པར་ལྡང་ངོ༌། །ཕྱི་མའི་མཐའ་ལ་སྙོམས་པར་ཞུགས་ཤིང༌། ད་ལྟར་བྱུང་བའི་མཐའ་ལས་རྣམ་པར་ལྡང་ངོ༌། །ད་ལྟར་བྱུང་བའི་མཐའ་ལ་སྙོམས་པར་ཞུགས་ཤིང༌། དུས་གསུམ་ལས་རྣམ་པར་ལྡང་ངོ༌། །དུས་གསུམ་ལ་སྙོམས་པར་ཞུགས་ཤིང༌། སྐད་ཅིག་གི་མཐའ་ལས་རྣམ་པར་ལྡང་ངོ༌། །སྐད་ཅིག་གི་མཐའ་ལ་སྙོམས་པར་ཞུགས་ཤིང༌། དུས་གསུམ་ལས་རྣམ་པར་ལྡང་ངོ༌། །དུས་གསུམ་ལ་སྙོམས་པར་ཞུགས་ཤིང༌། ཕྱོགས་བཅུ་ནས་རྣམ་པར་ལྡང་ངོ༌། །ཕྱོགས་བཅུར་སྙོམས་པར་ཞུགས་ཤིང༌། ངག་གི་ལམ་ ལས་རྣམ་པར་ལྡང་ངོ༌། །ངག་གི་ལམ་ལ་སྙོམས་པར་ཞུགས་ཤིང༌། ཕྱོགས་བཅུ་ནས་རྣམ་པར་ལྡང་ངོ༌། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། འབྱུང་པོའི་གནོད་སྦྱིན་ ཕྱིས་ནོན་པའི་མི་ནི་གནོད་སྦྱིན་གྱི་དབང་གིས་ལུས་དེ་དང་དེར་གྱུར་ཅིང་འཕྱན་ཏེ། རང་ལ་དབང་མེད་དོ། །འབྱུང་པོའི་གནོད་སྦྱིན་དེ་ཡང་གཞན་གྱི་ལུས་ཀྱི་དབང་གིས་འགྲོ་སྟེ། བདག་ གི་ལུས་མི་སྟོན་ཏོ། །ཀྱེ༑ རྒྱལ་བའི་སྲས་དག །དེ་བཞིན་དུ་ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའ་ཡང་ནང་དུ་སྙོམས་པར་ཞུགས་ཤིང༌། ཕྱི་རོལ་ལས་རྣམ་པར་ལྡང་ ངོ༑ ༑ཕྱི་རོལ་དུ་སྙོམས་པར་ཞུགས་ཤིང༌། ནང་ནས་རྣམ་པར་ལྡང་ངོ༌། །འདི་ལྟ་སྟེ། དཔེར་ན། ཤི་བའི་རོ་སྔགས་ཀྱིས་བྱིན་གྱིས་བརླབས་པ་ནི་འགྲོ་ཞིང་རྒྱུའོ། །གང་གི་ཕྱིར་ཡོངས་ སུ་བསླང་བ་དེ་ལ་ཡང་ཅི་དགའ་ཐོབ་པར་བྱེད་དེ། ཤི་བའི་རོ་དེ་དང༌། སྔགས་སུ་ཡང་གཅིག་པ་མ་ཡིན་ནོ། །ཀྱེ༑ རྒྱལ་བའི་སྲས་དག །དེ་བཞིན་དུ་ཏིང་ངེ་འཛིན་འདི་ཐོབ་པའི་བྱང་ ཆུབ་སེམས་དཔའ་ཡང་དམིགས་པ་སྐལ་བ་མཉམ་པར་སྙོམས་པར་ཞུགས་ཤིང༌། སྐལ་བ་མི་མཉམ་པའི་དམིགས་པ་ལས་རྣམ་པར་ལྡང་ངོ༌། །སྐལ་བ་མི་མཉམ་པའི་དམིགས་ པ་ལ་སྙོམས་པར་ཞུགས་ཤིང༌། སྐལ་བ་མཉམ་པའི་དམིགས་པ་ལས་རྣམ་པར་ལྡང་ངོ༌། །ཀྱེ༑ རྒྱལ་བའི་སྲས་དག །འདི་ལྟ་སྟེ། དགེ་སློང་དབང་ཐོབ་པ་ནི་གཅིག་ཏུ་གྱུར་ཅིང་མང་ ༄༅། །པོར་འགྱུར་རོ། །མང་པོར་གྱུར་ཅིང་གཅིག་ཏུ་འགྱུར་རོ། །ལུས་གཅིག་ནས་ཤི་འཕོས་ཏེ། དེའི་ཚེ་ལུས་མང་པོ་དེ་དག་ཏུ་སྐྱེས་པའང་མ་ཡིན། ལུས་མང་ པོ་དེ་དག་ལས་ཤི་འཕོས་ཏེ། དེའི་ཚེ་ལུས་གཅིག་ཏུ་སྐྱེས་པ་ཡང་མ་ཡིན་ནོ། །གཅིག་ཏུ་གྱུར་པ་ལས་ཤི་འཕོས་ཏེ། མང་པོར་སྐྱེས་པ་ཡང་མ་ཡིན། མང་པོར་གྱུར་པ་ལས་ཤི་ འཕོས་ཏེ། གཅིག་ཏུ་གྱུར་པ་ཡང་མ་ཡིན་ནོ། །ཀྱེ༑ རྒྱལ་བའི་སྲས་དག། དེ་བཞིན་དུ་བྱང་ཆུབ་སེམས་དཔའ་ཡང་ལུས་གཅིག་ཏུ་སྙོམས་པར་ཞུགས་ཤིང༌། ལུས་མང་པོ་ལས་ རྣམ་པར་ལྡང་ངོ༌། །ལུས་མང་པོར་སྙོམས་པར་ཞུགས་ཤིང༌། ལུས་གཅིག་ལས་རྣམ་པར་ལྡང་ངོ༌། །འདི་ལྟ་སྟེ། དཔེར་ན། ས་གཅིག་གི་རོ་ནི་རྣམ་པ་གཅིག་པ་སྟེ། ལོ་ཏོག་ མང་པོ་དང༌། འབྱུང་བ་མང་པོ་སྣ་ཚོགས་སུ་རང་གི་རོ་ཀུན་ཏུ་གཏོང་ཡང༌། སའི་རོ་དུས་དུས་སུ་རྣམ་པ་ཐ་དད་པར་འགྱུར་བ་ཡིན་ནོ། །དེ་བཞིན་དུ་བྱང་ཆུབ་སེམས་དཔའི་ཏིང་ངེ་ འཛིན་འདི་ཐོབ་པ་ཡང༌། རྣམ་པ་གཅིག་ལ་སྙོམས་པར་ཞུགས་ཤིང༌། རྣམ་པ་མང་པོ་ལས་རྣམ་པར་ལྡང་ངོ༌། །རྣམ་པ་མང་པོ་ལ་སྙོམས་པར་ཞུགས་ཤིང༌། རྣམ་པ་གཅིག་ལས་ རྣམ་པར་ལྡང་ངོ༌། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ཏིང་ངེ་འཛིན་སེམས་ཅན་རྣམས་ཀྱི་ཁམས་ཐ་ མི་དད་པ་ཞེས་བྱ་བ་སྟེ་བརྒྱད་པའོ། །དེ་ལ་གནས་པའི་བྱང་ཆུབ་སེམས་དཔའ་ནི་རབ་ཏུ་བསྔགས་པའི་ཆོས་བཅུས་རབ་ཏུ་བསྔགས་པ་ཡིན། བཅུ་གང་ཞེ་ན། འདི་ལྟ་སྟེ། དེ་བཞིན་ཉིད་ལ་ མཉམ་པར་བཞག་པའི་ཚུལ་གྱིས་དེ་བཞིན་གཤེགས་པ་ཞེས་བྱ། སངས་རྒྱས་ཀྱི་ཆོས་ཐམས་ཅད་ཁོང་དུ་ཆུད་པར་རྟོགས་པས་སངས་རྒྱས་ཞེས་བྱ། འཇིག་རྟེན་ཐམས་ཅད་ལ་རབ་ཏུ་ སྟོན་པས་སྟོན་པ་ཞེས་བྱ། ཆོས་ཐམས་ཅད་ཤེས་པར་གྱུར་པས་ཐམས་ཅད་མཁྱེན་པ་ཞེས་བྱ། འགྲོ་བ་ཐམས་ཅད་ཀྱི་རྟེན་དུ་གྱུར་པས་མགོན་ཞེས་བྱ། ཆོས་ཐམས་ཅད་ཀྱི་ཚུལ་རྗེས་ སུ་རྟོགས་པས་འདྲེན་པ་ཞེས་བྱ། སེམས་ཅན་ཐམས་ཅད་ལ་ཐམས་ཅད་མཁྱེན་པའི་ཡེ་ཤེས་ཀུན་ཏུ་ཕྱིན་པར་བྱེད་པས་རྣམ་པར་འདྲེན་པ་ཞེས་བྱ། འགྲོ་བ་ཐམས་ཅད་དུ་སྣང་བའི་ སྒྲོན་མར་གྱུར་པས་སྣང་བ་ཞེས་བྱ། དོན་གྲུབ་སྟེ་བྱ་བ་བྱས་ལ་ཆོས་ཐམས་ཅད་རབ་ཏུ་ཕྱེ་བ་ཤེས་ཤིང་ཚོགས་པ་མེད་པ་ལ་སྤྱོད་པ་ཡོངས་སུ་རྫོགས་པས་སྟོབས་བཅུ་མངའ་བ་ཞེས་ བྱ༑ ཆོས་ཀྱི་འཁོར་ལོ་ཐམས་ཅད་ལ་དབང་བའི་ཕ་རོལ་ཏུ་ཕྱིན་པ་ཐོབ་པས་ཐམས་ཅད་གཟིགས་པ་ཞེས་བྱ་སྟེ། ཀྱེ། རྒྱལ་བའི་སྲས་དག །བྱང་ཆུབ་སེམས་དཔའ་དེ་ནི་རབ་ཏུ་བསྔགས་ པའི་ཆོས་འདི་བཅུས་རབ་ཏུ་བསྔགས་པ་ཡིན། བྱང་ཆུབ་སེམས་དཔའ་དེ་ནི་སྣང་བ་བཅུས་སྣང་བར་བྱས་པ་ཡིན་ཏེ། བཅུ་གང་ཞེ་ན། འདི་ལྟ་སྟེ། སངས་རྒྱས་ཐམས་ཅད་ཀྱི་སྣང་བ་དང༌། ༄༅། །སེམས་ཅན་གྱི་ཁམས་ཡང་དག་པར་བླངས་ཏེ་རྣམ་པར་བརྒྱན་ཅིང་བྱིན་གྱིས་བརླབས་པའི་སྣང་བ་དང༌། གདུལ་ཞིང་བྱིན་གྱིས་བརླབས་པའི་སྣང་བས་ སེམས་ཅན་ཐམས་ཅད་ཀྱི་སྣང་བ་དང༌། ཆོས་ཀྱི་དབྱིངས་ཀྱི་དཀྱིལ་འཁོར་ཐམས་ཅད་དུ་སྟོན་པས་མི་འཇིགས་པ་ཚད་མེད་པའི་སྣང་བ་དང༌། ཆོས་ཐམས་ཅད་ལ་ཐ་དད་པར་བྱེད་པ་ མེད་པས་ཐ་དད་པར་བྱེད་པ་མེད་པའི་སྣང་བ་དང༌། ཆོས་ཐམས་ཅད་འདོད་ཆགས་དང་བྲལ་བར་ཁོང་དུ་ཆུད་པས་ཚུལ་ལ་འཇུག་པའི་སྣང་བ་དང༌། ཆོས་ཐམས་ཅད་འདོད་ཆགས་ དང་བྲལ་བ་མཉམ་པ་ཉིད་ཀྱིས་ཐ་དད་པར་བྱ་བ་མེད་པ་ལ་འཇུག་པའི་སྣང་བ་དང༌། སངས་རྒྱས་ཐམས་ཅད་ཀྱི་བྱིན་གྱི་རླབས་རྒྱུན་མི་འཆད་པས་འགྲོ་བ་ཐམས་ཅད་ཀྱི་སྐྱབས་སུ་རྣམ་ པར་འཕྲུལ་པའི་སྣང་བ་དང༌། སངས་རྒྱས་ཐམས་ཅད་ཀྱི་ཁྱུ་མཆོག་གི་མཐུ་ཕྱུང་བ་ཕ་རོལ་ཏུ་ཕྱིན་པ་ཐོབ་པས་མུན་པ་ཤིན་ཏུ་བསལ་བའི་སྣང་བ་དང༌། ཐམས་ཅད་ལ་གནས་པར་ ཤིན་ཏུ་བསྟན་པ་ལ་མཁས་ཤིང་གཞོལ་བས་ཆོས་ཐམས་ཅད་ཀྱི་དེ་བཞིན་ཉིད་ཀྱི་སྣང་བ་སྟེ། སྣང་བ་འདི་བཅུས་བྱང་ཆུབ་སེམས་དཔའ་དེ་སྣང་བར་བྱས་པ་ཡིན། བྱང་ཆུབ་ སེམས་དཔའ་དེ་ཐམས་ཅད་དུ་མངོན་པར་འདུ་བྱ་བ་མེད་པ་བཅུས་ཤིན་ཏུ་བསླབས་པ་ཡིན། བཅུ་གང་ཞེ་ན། འདི་ལྟ་སྟེ། མངོན་པར་འདུས་མ་བྱས་པའི་ལུས་ཀྱི་ལས་དང༌། མངོན་ པར་འདུས་མ་བྱས་པའི་ངག་གི་ལས་དང༌། མངོན་པར་འདུས་མ་བྱས་པའི་ཡིད་ཀྱི་ལས་དང༌། དངོས་པོ་མེད་པ་ལ་གནས་ཤིང་མངོན་པར་འདུས་མ་བྱས་པའི་རྫུ་འཕྲུལ་དང༌། མ་ཉམས་ ཤིང་མངོན་པར་འདུས་མ་བྱས་པའི་ཆོས་ཉིད་དང༌། ཐ་མི་དད་པའི་ཡེ་ཤེས་དང༌། མ་སྐྱེས་པའི་ཡེ་ཤེས་དང༌། མ་འགགས་པའི་ཆོས་ཉིད་དང༌། བསྟན་པའི་ཚིག་རབ་ཏུ་ཤེས་པ་དང༌། དོན་ཉམས་པ་མེད་པ་སྟེ། ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་དེ་ཐམས་ཅད་དུ་མངོན་པར་འདུས་མ་བྱས་པའི་ཚིག་བཅུ་པོ་འདི་དག་གིས་ཤིན་ཏུ་བསླབས་པ་ཡིན། ཀྱེ༑ རྒྱལ་བའི་སྲས་དག །དེ་ལྟར་ན་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྣམ་པ་ཐ་དད་པའི་དམིགས་པ་རྣམས་ཀྱིས་གཅིག་དང༌། མང་པོ་ལ་ སྙོམས་པར་འཇུག་ཅིང༌། རྣམ་པར་ལྡང་བ་དང༌། སྐལ་བ་མི་མཉམ་པ་དང༌། སྐལ་བ་མཉམ་པ་དང༌། སྐལ་བ་མཉམ་པ་དང༌། སྐལ་བ་མི་མཉམ་པ་དང༌། ཡངས་པ་དང༌། ཕྲ་བ་ དང༑ ཕྲ་བ་དང༌། ཡངས་པ་དང༌། ཆུང་བ་དང༌། ཆེ་བ་དང༌། ཆེ་བ་དང༌། ཆུང་བ་དང༌། རྗེས་སུ་འགྲོ་བ་དང༌། རྣམ་པར་ཕྱེ་བ་དང༌། རྣམ་པར་ཕྱེ་བ་དང༌། རྗེས་སུ་འགྲོ་བ་དང༌། ལུས་མེད་པ་དང༌། ལུས་དང་བཅས་པ་དང༌། ལུས་དང་བཅས་པ་དང༌། ལུས་མེད་པ་དང༌། རྣམ་པར་ལྡང་བ་དང༌། སྙོམས་པར་ཞུགས་པ་དང༌། སྙོམས་པར་མ་ཞུགས་པ་དང༌། རྣམ་པར་ལྡང་བ་དང༌། རྣམ་ ༄༅། །པར་དམིགས་པ་དང༌། དམིགས་པ་མེད་པ་དང༌། དམིགས་པ་མེད་པ་དང༌། རྣམ་པར་དམིགས་པས་ཏིང་ངེ་འཛིན་འདི་ནི་ཆོ་འཕྲུལ་ཐམས་ཅད་ཀྱི་ཡུལ་ ལོ༑ ༑ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། རིག་སྔགས་ཅན་ཆེན་པོའི་རིག་སྔགས་ཀྱིས་བསྒྲུབ་པ་ནི་གཟུགས་རྣམ་པ་སྣ་ཚོགས་བསྟན་པའི་འབྱུང་གནས་སུ་རབ་ཏུ་གྲུབ་ པར་འགྱུར་ཡང༌། སྔགས་དེ་ཡང་གཞན་ལ། སྒྱུ་མའི་གཟུགས་ཀྱི་རྣམ་པར་སྣང་བ་དག་ཀྱང་གཞན་ནོ། །དེ་ལྟར་ཡིན་ཡང་སྒྱུ་མའི་རྣམ་པ་དེ་དག་ནི་སྔགས་ཀྱི་སྒྲའི་མཐར་ཐུག་པ་ ཡིན་ཏེ། མིག་གི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་གཟུགས་ཀྱི་རྣམ་པ་དང༌། སྒྱུ་མ་དང༌། རྣ་བའི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་སྒྲ་དང༌། སྒྱུ་མ་ དང༑ སྣའི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་དྲི་དང༌། སྒྱུ་མ་དང༌། ལྕེའི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་རོ་དང༌། སྒྱུ་མ་དང༌། ལུས་ཀྱི་རྣམ་པར་ཤེས་ པས་ཤེས་པར་བྱ་བའི་སྒྱུ་མའི་རེག་བྱ་དང༌། སྒྱུ་མ་དང༌། ཡིད་ཀྱི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་རྣམ་པ་དང༌། སྤྲུལ་པ་མང་པོས་ཆོ་འཕྲུལ་ཞིང་རྣམ་པར་འགྱུར་པ་ དག་ཀྱང་དེ་བཞིན་ནོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་ཡང་སྐལ་བ་མཉམ་པར་སྙོམས་པར་ཞུགས་ཤིང༌། སྐལ་བ་མི་མཉམ་པ་ལས་རྣམ་ པར་ལྡང་བར་སྟོན་ཏོ། །སྐལ་བ་མི་མཉམ་པ་ལ་སྙོམས་པར་ཞུགས་ཤིང༌། སྐལ་བ་མཉམ་པ་ལས་རྣམ་པར་ལྡང་བར་སྟོན་ཏོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། ལྷ་དང་ ལྷ་མ་ཡིན་གཡུལ་དུ་ལྷགས་པའི་ཚེ། ལྷ་རྣམས་རྒྱལ་ཞིང་ལྷ་མ་ཡིན་ཕམ་པར་གྱུར་ན། དེའི་ཚེ་ལྷའི་དབང་པོ་དཔག་ཚད་བརྒྱའི་ལུས་མིག་སྟོང་དང་ལྡན་པ་དཔུང་གི་ཚོགས་ཡན་ལག་ བཞིས་ཡོངས་སུ་བསྐོར་ཅིང༌། ལྷ་མ་ཡིན་རྣམ་པར་འཐོར་ཏེ། དེའི་ཚེ་ལྷ་མ་ཡིན་གྱི་དབང་པོ་དེ་ལྷ་མ་ཡིན་གྱི་སྒྱུ་ལ་ཤིན་ཏུ་མཁས་པས། སུམ་ཅུ་རྩ་གསུམ་པའི་ལྷའི་སྡེ་ཀུན་ཏུ་འབྱེར་བ་ དང༑ རྫིང་བདེ་བ་འབྱུང་བའི་དྲུང་གི་ཁུང་ནས་ལྷ་མ་ཡིན་ཤིང་རྟ་དང༌། བཞོན་པ་དང༌། དཔུང་དུ་བཅས་པ་མང་པོ་འབྱུང་བར་སྟོན་ཏོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་ སེམས་དཔའ་སེམས་དཔའ་ཆེན་པོ་ཡང་སྒྱུ་མ་ལྟ་བུའི་ཡེ་ཤེས་ལ་གནས་པ་ཡོངས་སུ་གྲུབ་པའི་ཕྱིར། ཐ་མི་དད་པའི་ཆོས་ལ་སྙོམས་པར་ཞུགས་ཤིང༌། ཐ་དད་པའི་ཆོས་ལས་རྣམ་ པར་ལྡང་བ་སྟོན་ཏོ། །ཀྱེ༑ རྒྱལ་བའི་སྲས་དག །འདི་ལྟ་སྟེ། དཔེར་ན། ས་བོན་མང་པོ་དང༌། འབྱུང་བ་མང་པོ་དག་ལས་ས་བོན་ས་ལ་བཏབ་ན་ས་བོན་ནི་འོག་ཏུ་འགྲོ་།འབྲས་བུ་ ནི་སྟེང་དུ་འབྱུང་བ་ཡིན། ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་ཡང་ཏིང་ངེ་འཛིན་གྱི་རྒྱུད་ཀྱི་ཚུལ་གཅིག་པར་སྙོམས་པར་ཞུགས་ཤིང་ཚུལ་གྱི་རྣམ་པ་ཐ་དད་ ༄༅། །པ་ལས་རྣམ་པར་ལྡང་བ་སྟོན་ཏོ། །འདི་ལྟ་སྟེ། དཔེར་ན། བུད་མེད་སྐྱེས་པ་དང་ཕྲད་པར་གྱུར་བའི་ཁྲག་རྡུས་པ་ལས་བུར་འགྱུར་ཏེ། རྡུས་པ་དེ་མའི་ཁོང་ན་ གནས་ཤིང་རིམ་གྱིས་སྐྱེས་པ་དང༌། ཟླ་བ་བཅུ་ལ་ལས་ཡོངས་སུ་དག་པ་ནི། ཡན་ལག་དང་ཉིང་ལག་ཐམས་ཅད་དང་ལྡན་པ་དབང་པོ་ཚང་ཞིང་རྣམ་པར་དག་པར་སྐྱེ་ཡང་ཁྲག་རྡུས་ པ་དེ་ཡང་གཞན། དབང་པོ་དྲུག་རྣམས་ཀྱང་གཞན་ནོ། ཁྲག་རྡུས་པ་དེ་ལ་ཡང་དབང་པོ་དྲུག་ཕྲ་བའི་ཚུལ་དུ་མེད་པ་མ་ཡིན་ཏེ། སྲིད་པའི་ཡན་ལག་གི་མཚན་ཉིད་དང་ལྡན་ལ་ ལས་གཅིག་ནས་གཅིག་ཏུ་བརྒྱུད་པས་བསྐྱེད་ཅིང་རླུང་དང་ལྡན་ན་ལས་ཀྱི་རྣམ་པར་སྨིན་པ་ཇི་ལྟ་བ་བཞིན་དུ་ཡན་ལག་མ་ཉམས་པར་སྐྱེའོ། །དེ་བཞིན་དུ་བྱང་ཆུབ་སེམས་དཔའ་ཡང་ཐམས་ ཅད་མཁྱེན་པའི་དངོས་པོའི་ཚུལ་དུ་སྙོམས་པར་ཞུགས་ཤིང༌། དངོས་པོ་མེད་པའི་ཚུལ་ལས་རྣམ་པར་ལྡང་ངོ༌། །འདི་ལྟ་སྟེ། དཔེར་ན། ཀླུའི་གནས་ནི་ས་ལ་རྟེན་མོད་ཀྱི། བར་སྣང་ གནས་ལ་སྤྲིན་ཀྱང་སྐྱེད་ལ་བར་སྣང་གནས་ལ། ཀླུའི་གནས་དང༌། ཁྱིམ་མེད་ཀྱང་སྤྲིན་གྱི་ཆར་འདོད་པའི་མི་རྣམས་གྱེན་དུ་ལྟ་ཞིང་ཀླུའི་སྤྲུལ་པ་བར་སྣང་གི་གནས་ལ་ཡོད་པ་ ལ་ལྟ་སྟེ། གནས་འོག་ན་འདུག་ཀྱང་སྤྲིན་བླ་ན་ལྡིང་བར་སྣང་ངོ༌། །དེ་བཞིན་དུ་ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའ་ཡང་མཚན་ཉིད་མེད་པ་ལ་སྙོམས་པར་ཞུགས་ ཤིང༌། མཚན་ཉིད་ལས་རྣམ་པར་ལྡང་ངོ༌། །འདི་ལྟ་སྟེ། དཔེར་ན། ཚངས་པ་ཡིད་དུ་འོང་བ་ཞེས་བྱ་བའི་ཚངས་པའི་གཞལ་མེད་ཁང་ཆེན་པོ་རྣམ་དག་ཕུལ་ཞེས་བྱ་བ་ཡོད་དེ། གཞལ་མེད་ཁང་ཆེན་པོ་དེ་ལ་སྟོང་གི་འཇིག་རྟེན་ཐམས་ཅད་སྣང་ངོ༌། །སྟོང་ཕྲག་བཅུའི་འཇིག་རྟེན་ཐམས་ཅད་སྣང་ངོ༌། །སྟོང་ཕྲག་བརྒྱའི་འཇིག་རྟེན་ཐམས་ཅད་སྣང་ངོ༌། །སྟོང་ གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལྷའི་གནས་དང་བཅས་པ། ཀླུའི་གནས་དང་བཅས་པ། གནོད་སྦྱིན་གྱི་གནས་དང་བཅས་པ། དྲི་ཟའི་གནས་དང་བཅས་པ། ལྷ་མ་ ཡིན་གྱི་གནས་དང་བཅས་པ། ནམ་མཁའ་ལྡིང་གི་གནས་དང་བཅས་པ། མིའམ་ཅིའི་གནས་དང་བཅས་པ། ལྟོ་འཕྱེ་ཆེན་པོའི་གནས་དང་བཅས་པ། མིའི་འཇིག་རྟེན་དང་བཅས་པ། ངན་ སོང་གི་རྒྱུད་གསུམ་དང་བཅས་པ། རི་རབ་དང་བཅས་པ། ཁོར་ཡུག་དང་བཅས་པ། རིན་པོ་ཆེའི་རི་དང་བཅས་པ། བཏང་བཟུང་དང་བཅས་པ། རྒྱ་མཚོ་དང་བཅས་པ། གླིང་བཞི་མ་འདྲེས་པ་འཁོར་དང་ བཅས་པ། གྲོང་ཁྱེར་དང༌། གྲོང་རྡལ་དང༌། ཕོ་བྲང་འཁོར་དང༌། རྒྱལ་པོའི་གནས་དང་བཅས་པ། རི་དང༌། བྲག་དང༌། ཤིང་མང་པོ་སྣ་ཚོགས་དང་བཅས་པ། རིན་པོ་ཆེའི་རྒྱན་ དང་བཅས་པ། སྨན་དང༌། ནགས་ཚལ་དང༌། རྫིང་དང༌། ལུ་མའི་རྒྱུན་དང༌། ཆུ་ཀླུང་དང༌། ཆུ་ཀླུང་ཆེན་པོ་དང༌། ཁོར་ཡུག་ཆེན་པོའི་མཐར་ཐུག་པ་ཐམས་ཅད་སྣང་སྟེ། དེ་ ༄༅། །ཡང་དེ་ཙམ་དུ་ཟད་ཀྱི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་གཏོགས་པ་ལས་ཆུང་ངུ་ན་རྡུལ་ཤིན་ཏུ་ཕྲ་བའི་གཟེགས་མ་པར་ སྣང་གནས་ལ་འཕྱོ་བ་ལྟ་བུར་ཕྲ་བ་དང༌། ར་བ་དང༌། ཆུ་ཀླུང་ཡོངས་པ་དེ་དག་ཐམས་ཅད་ཀྱང༌། ཚངས་པའི་གཞལ་མེད་ཁང་འགྲོ་བ་ཐམས་ཅད་ན་ཕུལ་དུ་གྱུར་ཅིང༌། རྣམ་ པར་དག་པའི་ལྷུན་ལ་གཟུགས་བརྙན་གྱི་ཚུལ་དུ་སྣང་ཞིང་རྣམ་པར་དམིགས་ལ་མཐོང་བར་གྱུར་ཀྱང༌། དེ་དག་ལ་ཐགས་ཐོགས་གང་ཡང་མེད་དོ། །དེ་ཡང་འདི་ལྟར་།དཔེར་ ན༑ མེ་ལོང་གི་དཀྱིལ་འཁོར་ལ་བཞིན་གྱི་གཟུགས་བརྙན་གྱི་སྣང་བ་བཞིན་དུ་གཞལ་མེད་ཁང་ཆེན་པོ་དེ་ལ་ཐམས་ཅད་ཀྱང་སྣང༌། ཐམས་ཅད་ཀྱང་གསལ། ཐམས་ཅད་ ཀྱང་དམིགས་ཏེ། ཐམས་ཅད་ཀྱི་གཟུགས་བརྙན་དམིགས་པར་ཡོད་དོ། །དེ་བཞིན་དུ་བྱང་ཆུབ་སེམས་དཔའ་ཡང་སེམས་ཀྱི་ཁམས་ཐ་མི་དད་པ་ཞེས་བྱ་བའི་ཏིང་ངེ་འཛིན་ འདིས་ཞིང་གི་རྒྱུད་ཀྱང་རབ་ཏུ་ཤེས་སོ། །སངས་རྒྱས་ཀྱི་རྒྱུད་ཀྱང་རབ་ཏུ་ཤེས་སོ། །སེམས་ཅན་གྱི་རྒྱུད་ཀྱང་རབ་ཏུ་ཤེས་སོ། །ཆོས་ཀྱི་རྒྱུད་ཀྱང་རབ་ཏུ་ཤེས་སོ། །སྤྱོད་པའི་ རྒྱུད་ཀྱང་རབ་ཏུ་སྒྲུབ་བོ། །མོས་པའི་རྒྱུད་ཀྱང་ཡོངས་སུ་རྫོགས་པར་བྱེད་དོ། །ཏིང་ངེ་འཛིན་གྱི་རྒྱུད་ལ་ཡང་རྣམ་པར་འཕྲུལ་པར་བྱེད་དོ། །རྣམ་པར་ལྡང་བའི་རྒྱུད་ཀྱང་ ཡོངས་སུ་སྟོན་ཏོ། །ཡེ་ཤེས་ཀྱི་རྒྱུད་ཀྱང་རབ་ཏུ་འཐོབ་བོ། །སྐད་ཅིག་གི་མཐའི་རྒྱུད་ལ་རབ་ཏུ་གནས་སོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་དེ་ནི་རྣམ་པར་འཕྲུལ་ པ་བཅུས་ཀྱང་མཆོག་ཏུ་གྱུར་པ་ཡིན་ཏེ། བཅུ་གང་ཞེ་ན། འདི་ལྟར་སངས་རྒྱས་ཀྱི་རྣམ་པར་འཕྲུལ་པ་ནམ་མཁའི་དབྱིངས་ཀྱིས་ཀླས་པ་ཆོས་ཀྱི་དབྱིངས་ཀྱི་མཐས་གཏུགས་པ་དང༌། བྱང་ཆུབ་སེམས་དཔའི་རྣམ་པར་འཕྲུལ་པ་ཐ་དད་པ་མེད་པའི་མཐར་ཐུག་པ་ཐ་མི་དད་པའི་དབང་དམ་པའི་ཕ་རོལ་ཏུ་ཕྱིན་པ་དང༌། བྱང་ཆུབ་སེམས་དཔའི་སྤྱོད་པ་དང༌། སྨོན་ལམ་ ཆེན་པོའི་རྣམ་པར་འཕྲུལ་པ་དེ་བཞིན་ཉིད་ལ་ཞུགས་ཤིང༌། སངས་རྒྱས་ཀྱི་མཛད་པའི་ཕ་རོལ་ཏུ་ཕྱིན་པ་ཐོབ་པ་དང༌། འཇིག་རྟེན་གྱི་ཁམས་རྣམ་པར་འཕྲུལ་པ་དམིགས་པ་ཐམས་ ཅད་དོན་ཡོད་ཅིང་རྣམ་པར་དག་པས་འཇིག་རྟེན་གྱི་ཁམས་ཐམས་ཅད་རབ་ཏུ་སྣང་བར་བྱ་བའི་བྱིན་གྱི་རླབས་ཅན་དང༌། སེམས་ཅན་ཐམས་ཅད་རྣམ་པར་འཕྲུལ་པ་བསམ་གྱིས་མི་ ཁྱབ་པའི་ལས་རྣམ་པར་སྨིན་པ་སྒྱུ་མ་ལྟ་བུ་ལ་འཇུག་པ་དང༌། ཡེ་ཤེས་དང༌། ཏིང་ངེ་འཛིན་གྱི་རྣམ་པར་འཕྲུལ་པ་ཡངས་པ་དང་ཕྲ་བའི་ཏིང་ངེ་འཛིན་གྱི་མཚན་མ་དང༌། ཏིང་ངེ་འཛིན་ ལས་ལྡང་བ་ཤེས་པ་དང༌། འདི་ལྟ་སྟེ། བྱང་ཆུབ་སེམས་དཔའི་མཐུ་དང༌། བྱང་ཆུབ་སེམས་དཔའི་ཁོང་དུ་ཆུད་པས་དེ་བཞིན་གཤེགས་པའི་ཡུལ་ལ་འཇུག་ཅིང་འབྱུང་བ་དང༌། ༄༅། །དེ་བཞིན་གཤེགས་པའི་སྐུ་སྟོན་པའི་རྣམ་པར་འཕྲུལ་པ་དང༌། གཞན་ཡང་བྱང་ཆུབ་སེམས་དཔའ་སངས་རྒྱས་སྤྲུལ་པ་དང༌། སངས་རྒྱས་སུ་བྱིན་གྱིས་ བརླབས་པ་དང༌། ཆོས་ཀྱི་འཁོར་ལོ་སྤྲུལ་པ་དང༌། འདུལ་བ་བྱིན་གྱིས་བརླབ་པ་བྱེད་ཅིང༌། དེ་བཞིན་གཤེགས་པའི་རིགས་དང་རྒྱུད་དུ་སྐྱེ་བ་དང༌། སངས་རྒྱས་ཀྱི་སྒྲ་གྲག་པར་ བྱ་བ་རབ་ཏུ་སྒྲུབ་པའི་རྫུ་འཕྲུལ་དང༌། རྣམ་པར་འཕྲུལ་པ་སེམས་ལྟར་མགྱོགས་པའི་ཕ་རོལ་ཏུ་ཕྱིན་པ་ཡིན། གཞན་ཡང་བྱང་ཆུབ་སེམས་དཔའ་སངས་རྒྱས་བརྗོད་པ་མེད་པའི་ བསྟན་པ་དང༌། ལྡེམ་པོ་དག་རབ་ཏུ་ཤེས་ཏེ། ཆོས་ཀྱི་སྒོ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་ཡང་བརྗོད་དུ་མེད་པས་ཆོས་ཀྱི་འཁོར་ལོ་རྣམ་པར་འཕྲུལ་པ་དག་སྟོན་པར་ བྱེད་དོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཉིན་ཞག་གི་གྲངས་དང༌། ཡུད་དུ་ཡན་མན་དང༌། ཟླ་བའི་གྲངས་དང༌། ལོ་དང༌། བསྐལ་པའི་གྲངས་རབ་ཏུ་ ཤེས་ཏེ། སྐད་ཅིག་གཅིག་དང་ལྡན་པའི་ཡེ་ཤེས་ཀྱི་དུས་གསུམ་མངོན་པར་བསྒྲུབ་པའི་རྣམ་པར་འཕྲུལ་པ་ཡང་དག་པར་སྟོན་ཏེ། བྱང་ཆུབ་སེམས་དཔའ་སྤྱོད་པ་རྣམ་པར་ འཕྲུལ་པ་བཅུ་པོ་འདི་དག་ལའང་ཕ་རོལ་ཏུ་ཕྱིན་པ་ཐོབ་པ་ཡིན་ཏེ། ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་ པོ་ལ་མཁས་པའི་ཡེ་ཤེས་སེམས་ཅན་གྱི་ཁམས་ཐ་མི་དད་པ་ཞེས་བྱ་བ་སྟེ་བརྒྱད་པའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བདག་གི་ལུས་དང༌། མིག་ གི་སྐྱེ་མཆེད་ནས། ཡིད་ཀྱི་སྐྱེ་མཆེད་ཀྱི་མཐར་ཐུག་པའི་བར་དུ་བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ལ་དབང་བསྒྱུར་བ་ཞེས་བྱ་བ་ལ་སྙོམས་པར་འཇུག་སྟེ། བདག་གི་བ་སྤུའི་ཁུང་བུ་རེ་རེར་ཡང་བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ལ་དབང་བསྒྱུར་བ་ལ་སྙོམས་པར་འཇུག་གོ །དེའི་རང་བཞིན་གྱི་ཆོས་ཉིད་ཀྱང་དེར་ བྱིན་གྱིས་རློབ་སྟེ། དེ་ཉིད་ནས་འཇིག་རྟེན་ཡང་རབ་ཏུ་ཤེས་སོ། །འཇིག་རྟེན་གྱི་ཆོས་ཀྱང་རབ་ཏུ་ཤེས་སོ། །འཇིག་རྟེན་གྱི་ཁམས་ཀྱང་རབ་ཏུ་ཤེས་སོ། །འཇིག་རྟེན་གྱི་ཁམས་བྱེ་ བ་ཁྲག་ཁྲིག་བརྒྱ་སྟོང་ཡང་རབ་ཏུ་ཤེས་སོ། །འཇིག་རྟེན་གྱི་ཁམས་གྲངས་མེད་པ་ཡང་རབ་ཏུ་ཤེས་སོ། །འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ ཕྲ་བ་སྙེད་ཀྱང་རབ་ཏུ་ཤེས་སོ། །འཇིག་རྟེན་གྱི་ཁམས་དེ་དག་ཀྱང་བྱང་ཆུབ་སེམས་དཔའི་ཡོན་ཏན་ཡོངས་སུ་རྫོགས་ཤིང་དག་པས་རྣམ་པར་དག་ལ་འོད་གསལ་ཤིང་རྒྱན་བཟང་ བོ་ཤིན་ཏུ་མང་བས་རྣམ་པ་དུ་མར་བརྒྱན་ཅིང༌། རིན་པོ་ཆེ་བཟང་པོ་སྣ་ཚོགས་ཀྱིས་ཤིན་ཏུ་གང་བར་མཐོང་སྟེ། དེ་ན་བསྐལ་པ་བརྒྱར་ཡང་བྱང་ཆུབ་ཀྱི་སྤྱད་པ་སྤྱོད་ཅིང་གནས་ ༄༅། །སོ༑ ༑བསྐལ་པ་སྟོང་དང༌། བསྐལ་པ་ཁྲག་ཁྲིག་དང༌། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དང༌། བསྐལ་པ་ཚད་མེད་པ་དང༌། བསྐལ་པ་གྲངས་མེད་ པ་དང༌། བསྐལ་པ་དཔག་ཏུ་མེད་པ་དང༌། བསྐལ་པ་མུ་མེད་པ་དང༌། བསྐལ་པ་བགྲང་དུ་མེད་པ་དང༌། བསྐལ་པ་མཐའ་ཡས་པ་དང༌། བསྐལ་པ་མཚུངས་པ་མེད་པ་དང༌། བསྐལ་པ་བསམ་གྱིས་མི་ཁྱབ་པ་དང༌། བསྐལ་པ་གཞལ་དུ་མེད་པ་དང༌། བསྐལ་པ་བརྗོད་དུ་མེད་པ་དང༌། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་དང༌། བསྐལ་པ་ སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དུ་བྱང་ཆུབ་སེམས་དཔའི་སྤྱད་པ་སྤྱོད་ཅིང་གནས་སོ། །ཡོངས་སུ་རྒྱུན་མི་གཅོད་དོ། །དེ་ན་ དེ་ལྟར་བྱང་ཆུབ་སེམས་དཔའ་དེ་མཉམ་པར་བཞག་པས་སྙོམས་པར་འཇུག་གོ །རྣམ་པར་ལྡང་ངོ༌། །དེ་དེ་ལྟར་ཏིང་ངེ་འཛིན་དེ་ལ་སྙོམས་པར་ཞུགས་ཤིང༌། རྣམ་པར་ ལྡང་བ་དང༌། འཇིག་རྟེན་གྱི་ཁམས་མངོན་པར་བསྒྲུབ་པ་དག་ཀྱང་རབ་ཏུ་སྤྱོད་དོ། །དེར་ཡང་སེམས་ཅན་གྱི་ཁམས་ཡོངས་སུ་སྨིན་པར་བྱེད་དོ། །ཆོས་ཀྱི་དབྱིངས་ཁོང་དུ་ ཆུད་པར་བྱེད་དོ། །དུས་ཤེས་པར་བྱ་བ་རབ་ཏུ་རྟོགས་པར་བྱེད་དོ། །ཆོས་བསྟན་པ་ཤིན་ཏུ་བྱིན་གྱིས་རློབ་བོ། །ཆགས་པ་མེད་ཅིང་ཐོགས་པ་མེད་པའི་རྒྱུད་ཡོངས་སུ་རྫོགས་ པར་བྱེད་དོ། །ཆོས་ཀྱི་དབྱིངས་ཀྱི་དབང་གིས་མིག་ཐ་དད་པ་མེད་པའང་ཁོང་དུ་ཆུད་པ་ཡིན། རྣ་བ་ཐ་དད་པ་མེད་པའི་དམ་པའི་ཕ་རོལ་ཏུ་ཕྱིན་པ་ཡིན། སྣ་ཐ་དད་པ་མེད་པ་ལ་མཁས་ པར་གྱུར་པ་ཡིན། ལྕེ་ཐ་དད་པ་མེད་པའི་བསླབ་པ་ཡིན། ལུས་ཐ་དད་པ་མེད་པ་ཤིན་ཏུ་གྲུབ་པ་ཡིན། སེམས་ཐ་དད་པ་མེད་པའི་རྗེས་སུ་སོང་ཞིང་ཁོང་དུ་ ཆུད་པ་ཡིན་ཏེ། དེ་དེ་ལྟ་བུའི་ཡེ་ཤེས་དང་ལྡན་པས་གཟུངས་ཁྲག་ཁྲིག་སྟོང་ཕྲག་བཅུའི་ཆོས་སྣང་བ་འབྱུང་ངོ༌། །སྤྱོད་པ་ཡོངས་སུ་དག་པ་ཁྲག་ཁྲིག་སྟོང་ཕྲག་བཅུ་ཡོངས་སུ་ འགྲུབ་བོ། །དབང་པོ་ཐམས་ཅད་མངོན་པར་ཤེས་པ་ཁྲག་ཁྲིག་སྟོང་ཕྲག་བཅུ་རབ་ཏུ་གནོན་ཏོ། །མངོན་པར་ཤེས་པ་ཁྲག་ཁྲིག་སྟོང་ཕྲག་བཅུ་ཡོངས་སུ་རྫོགས་པར་འགྱུར་རོ། ། ཏིང་ངེ་འཛིན་ཁྲག་ཁྲིག་སྟོང་ཕྲག་བཅུ་ཡོངས་སུ་གནོན་ཏོ། །རྫུ་འཕྲུལ་ཁྲག་ཁྲིག་སྟོང་ཕྲག་བཅུ་ཡོངས་སུ་འགྲུབ་བོ། །སྟོབས་ཁྲག་ཁྲིག་སྟོང་ཕྲག་བཅུ་རྣམ་པར་འཕེལ་ལོ། །བསམ་ པ་ཁྲག་ཁྲིག་སྟོང་ཕྲག་བཅུ་ཡོངས་སུ་རྫོགས་པར་འགྱུར་རོ། །བྱིན་གྱི་རླབས་ཁྲག་ཁྲིག་སྟོང་ཕྲག་བཅུ་ཡང་དག་པར་སྟོན་ཏོ། །རྣམ་པར་འཕྲུལ་པ་ཁྲག་ཁྲིག་སྟོང་ཕྲག་བཅུ་མངོན་ སུམ་དུ་འགྱུར་རོ། །བྱང་ཆུབ་སེམས་དཔའི་ཆགས་པ་མེད་པ་ཁྲག་ཁྲིག་སྟོང་ཕྲག་བཅུ་ཡང་དག་པར་འགྲུབ་བོ། །བྱང་ཆུབ་སེམས་དཔའི་ཚོགས་ཁྲག་ཁྲིག་སྟོང་ཕྲག་བཅུ་ ༄༅། །ཡོངས་སུ་རྫོགས་པར་འགྱུར་རོ། །བྱང་ཆུབ་སེམས་དཔའི་རིགས་ཁྲག་ཁྲིག་སྟོང་ཕྲག་བཅུས་ཡོངས་སུ་སྦྱོར་ཞིང་ཀུན་ཏུ་འགྲོའོ། །བྱང་ཆུབ་སེམས་ དཔའི་ཚུལ་ཁྲག་ཁྲིག་སྟོང་ཕྲག་བཅུས་ཡོངས་སུ་སྣང་བར་འགྱུར་རོ། །དོན་ཁྲག་ཁྲིག་སྟོང་ཕྲག་བཅུ་ཤིན་ཏུ་སྟོན་ཏོ། །སྨོན་ལམ་ཁྲག་ཁྲིག་སྟོང་ཕྲག་བཅུ་དང་ཡང་དག་པར་ལྡན་ ནོ༑ ༑ཡོངས་སུ་བསྔོ་བ་ཁྲག་ཁྲིག་སྟོང་ཕྲག་བཅུ་ཤིན་ཏུ་སྟོན་ཏོ། །བྱང་ཆུབ་སེམས་དཔའི་སྐྱོན་མེད་པ་ཁྲག་ཁྲིག་སྟོང་ཕྲག་བཅུ་ཡོངས་སུ་དག་པར་བྱེད་དོ། །ཆོས་ཀྱི་སྒོ་ཁྲག་ཁྲིག་ སྟོང་ཕྲག་བཅུ་རབ་ཏུ་སྣང་བར་བྱེད་དོ། །བྱང་ཆུབ་སེམས་དཔའི་བསྟན་པ་ཁྲག་ཁྲིག་སྟོང་ཕྲག་བཅུ་ཡོངས་སུ་རྫོགས་པར་བྱེད་དོ། །བྱང་ཆུབ་སེམས་དཔའི་རྣམ་པར་དག་པ་ཁྲག་ ཁྲིག་སྟོང་ཕྲག་བཅུ་རྣམ་པར་དག་པར་བྱེད་དེ༑ བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ལ་དབང་བསྒྱུར་བ་འདི་ལ་གནས་པའི་བྱང་ཆུབ་སེམས་དཔའ་སེམས་ དཔའ་ཆེན་པོ་ནི་ཡོན་ཏན་གྱི་ཚོགས་དུ་མ་དང་ལྡན་པ་ཡིན། ཡོན་ཏན་གྱི་ཚོགས་ཚད་མེད་པ་དང་ལྡན་པ་ཡིན། ཡོན་ཏན་གྱི་ཚོགས་མཐའ་ཡས་པ་དང་ལྡན་པ་ཡིན། ཡོན་ཏན་ གྱི་ཚོགས་བསམ་གྱིས་མི་ཁྱབ་པ་དང་ལྡན་པ་ཡིན། ཡོན་ཏན་གྱི་ཚོགས་མཚུངས་པ་མེད་པ་དང་ལྡན་པ་ཡིན། ཡོན་ཏན་གྱི་ཚོགས་གཞལ་དུ་མེད་པ་དང་ལྡན་པ་ཡིན། ཡོན་ ཏན་གྱི་ཚོགས་བརྗོད་དུ་མེད་པ་དང་ལྡན་པ་ཡིན། ཡོན་ཏན་གྱི་ཚོགས་ཟད་མི་ཤེས་པ་དང་ལྡན་པ་ཡིན། ཡོན་ཏན་གྱི་ཚོགས་ཀུན་ཏུ་མཐའ་ཡས་པ་དང་ལྡན་པ་ཡིན། ཡོན་ཏན་གྱི་ ཚོགས་དེ་དག་གིས་བྱང་ཆུབ་སེམས་དཔའ་ཤིན་ཏུ་སྦྱངས་པ་ཡིན། ཡང་དག་པར་བྱང་བར་བྱས་པ་ཡིན། རབ་ཏུ་བརྒྱན་པ་ཡིན། ཡོངས་སུ་བཟུང་བ་ཡིན། ཡང་དག་པར་གྲུབ་ པར་བྱས་པ་ཡིན། ཡང་དག་པར་བརྗོད་པ་ཡིན། ཉེ་བར་བརྟན་པ་ཡིན། མཐུན་པའི་འབྲས་བུ་དང་ལྡན་པར་བྱས་པ་ཡིན། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ ལ་དབང་བསྒྱུར་བ་འདི་ལ་གནས་པའི་བྱང་ཆུབ་སེམས་དཔའ་དེ་ལ་ནི། ཤར་ཕྱོགས་ལོགས་ཀྱི་སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་དེ་ བཞིན་གཤེགས་པ་མཚན་མཐུན་པའི་མཚན་གཅིག་ལ་ཡང་རྣམ་པར་བརྟག་ཅིང༌། རྣམ་པར་དབྱེ་བའི་རྣམ་པ་སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ཤིན་ཏུ་ཕྲ་ བ་སྙེད་མངའ་ཞིང་མཚན་གཅིག་ལ་ཇི་ལྟ་བ་དེ་བཞིན་དུ་མཚན་རེ་རེ་ལས་རྣམ་པར་བརྟག་ཅིང༌། རྣམ་པར་དབྱེ་བའི་རྣམ་པ་སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ ཤིན་ཏུ་ཕྲ་བ་སྙེད་མངའ་བ་ཤ་སྟག་གིས་བྱིན་གྱིས་བརླབ་པ་མཛད་དོ། །ཤར་ཕྱོགས་སུ་ཇི་ལྟ་བ་དེ་བཞིན་དུ་ལྷོ་ཕྱོགས་དང༌། དེ་བཞིན་དུ་ནུབ་ཕྱོགས་དང༌། དེ་བཞིན་དུ་བྱང་ཕྱོགས་ ༄༅། །དང༑ དེ་བཞིན་དུ་བྱང་ཤར་གྱི་ཕྱོགས་མཚམས་དང༌། དེ་བཞིན་དུ་ཤར་ལྷོའི་ཕྱོགས་མཚམས་དང༌། དེ་བཞིན་དུ་ལྷོ་ནུབ་ཀྱི་ཕྱོགས་མཚམས་དང༌། དེ་ བཞིན་དུ་ནུབ་བྱང་གི་ཕྱོགས་མཚམས་དང༌། དེ་བཞིན་དུ་འོག་གི་ཕྱོགས་དང༌། དེ་བཞིན་དུ་སྟེང་གི་ཕྱོགས་ཀྱི་སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་ སྙེད་ཀྱི་དེ་བཞིན་གཤེགས་པ་མཚན་རྣམ་པར་དགོད་པ་གཅིག་ཏུ་མཐུན་པ་ཤ་སྟག །བྱང་ཆུབ་སེམས་དཔའ་དེ་ལ་བྱིན་གྱིས་རློབ་པ་མཛད་ཅིང་ཞལ་མངོན་པར་སྟོན་ཏོ། ། བྱང་ཆུབ་སེམས་དཔའ་དེའི་སངས་རྒྱས་ཀྱི་ཞིང་རྣམ་པར་དག་པ་ཡང་བྱིན་གྱིས་རློབ་པ་མཛད་དོ། །དེ་བཞིན་གཤེགས་པའི་སྲས་ཀྱི་ཐུ་བོར་བརྗོད་པའི་ཕྱིར་ལུས་ཚད་མེད་པ་ ཡང་རབ་ཏུ་བརྗོད་པ་མཛད་དོ། །དེ་བཞིན་གཤེགས་པའི་སྤྱན་བསམ་གྱིས་མི་ཁྱབ་པའང་རབ་ཏུ་བསྟན་ཏོ། །དེ་བཞིན་གཤེགས་པའི་སྙན་ཚད་མེད་པའང་ཤིན་ཏུ་བརྗོད་དོ།། དེ་བཞིན་གཤེགས་པའི་ཤངས་མི་བསྙེངས་པའི་དགོངས་པ་དང་ལྡན་པ་ཡང་རབ་ཏུ་བསྟན་ཏོ། །དེ་བཞིན་གཤེགས་པའི་སྲས་ཀྱི་ཐུ་བོའི་ཡོན་ཏན་ཕུན་སུམ་ཚོགས་པ་ཡང་ ཡང་དག་པར་བསྟན་ཏོ། །དེ་བཞིན་གཤེགས་པའི་རྫུ་འཕྲུལ་རྗེས་སུ་བསྒྲགས་པ་ཡང་རབ་ཏུ་བཤད་དོ། །དེ་བཞིན་གཤེགས་པའི་བྱང་ཆུབ་མཐའ་དང་དབུས་མེད་པ་ཡང་ དག་པར་སྦྱང་བ་མཛད་དོ། །དེ་བཞིན་གཤེགས་པའི་གསུང་དགོངས་པས་རྣམ་པར་དག་པའང་ཐོབ་པར་མཛད་དོ། །དེ་བཞིན་གཤེགས་པའི་ཆོས་ཀྱི་འཁོར་ལོ་ཕྱིར་མི་ལྡོག་པ་ཡང་ ཡང་དག་པར་སྟོན་ཏོ། །དེ་བཞིན་གཤེགས་པའི་འཁོར་མཐའ་ཡས་པ་ཡང་རྣམ་པར་དམིགས་པ་མཛད་དོ། །དེ་བཞིན་གཤེགས་པའི་ཆོས་ལྡེམ་པོ་དག་མཐའ་ཡས་པ་ལའང་རབ་ཏུ་ གཞུག་པ་མཛད་དོ། །དེ་བཞིན་གཤེགས་པའི་དགེ་བའི་རྩ་བ་ཡང་ཡང་དག་པར་བརྗོད་དོ། །དེ་བཞིན་གཤེགས་པའི་མཉམ་པ་ཉིད་ལའང་ཡང་དག་པར་ཞུགས་པ་མཛད་དོ། །དེ་ བཞིན་གཤེགས་པའི་རིགས་དང་རྒྱུད་དུས་ཀྱི་ཚད་དང་མཉམ་པ་ཡང་རབ་ཏུ་བརྗོད་དོ། །དེ་བཞིན་གཤེགས་པའི་ཆོས་ཀྱི་རྣམ་པ་དང་བྱེ་བྲག་ཐམས་ཅད་ཀྱང་ཤིན་ཏུ་བསྟན་ཏོ། ། དེ་བཞིན་གཤེགས་པའི་ཆོས་ཀྱི་བྱིན་གྱི་རླབས་རྣམ་པར་དམིགས་པར་བྱ་བའང་རབ་ཏུ་བརྗོད་དོ། །དེ་བཞིན་གཤེགས་པའི་ཞིང་བསྟན་པ་ཡང་བྱིན་གྱིས་བརླབ་པ་མཛད་དོ། །དེ་ བཞིན་གཤེགས་པའི་གསུང་ཆོས་ཀྱི་སྤྲིན་གྱི་ཆར་ཡང་རབ་ཏུ་འབེབས་སོ། །སངས་རྒྱས་ཀྱི་ཞིང་ཐམས་ཅད་རྣམ་པར་དམིགས་པར་བྱ་བ་ཡང་ཡོངས་སུ་བསྟན་ཏོ། །སངས་རྒྱས་ ཐམས་ཅད་ཀྱི་སྙོམས་པར་འཇུག་པ་ཡང་རབ་ཏུ་བརྗོད་དོ། །སངས་རྒྱས་ཐམས་ཅད་ཀྱི་འཁོར་ཀུན་ནས་འདུས་པ་གཅིག་ནས་གཅིག་ཏུ་བརྒྱུད་པ་ཡང་རྣམ་པར་དམིགས་པ་མཛད་དོ།། ༄༅། །སངས་རྒྱས་ཐམས་ཅད་ཀྱི་ཆོས་བསམ་གྱིས་མི་ཁྱབ་པའང་བྱིན་གྱིས་བརླབ་པར་མཛད་དོ། །ཆོས་ཐམས་ཅད་མཉམ་པ་ཉིད་ཀྱང་ཡང་དག་པར་བསྟན་ ཏོ༑ ༑ཆོས་ཐམས་ཅད་མི་འཕོ་ཞིང་རྒྱུན་འཆད་པ་མེད་པ་ཡང་ཁོང་དུ་ཆུད་པར་མཛད་དོ། །ཆོས་ཀྱི་དཀྱིལ་འཁོར་ཐམས་ཅད་ཀྱི་རྗེས་སུ་འགྲོ་བ་ཡང་རབ་ཏུ་རྫོགས་པར་མཛད་ དོ༑ ༑དེ་བཞིན་གཤེགས་པའི་ཡོན་ཏན་ཚད་མེད་པ་ཡང་ཡོངས་སུ་བསྟན་ཏོ། །ཏིང་ངེ་འཛིན་གྱི་དཀྱིལ་འཁོར་ཐམས་ཅད་སྦྱང་བ་ཡང་ཁོང་དུ་ཆུད་པར་མཛད་དོ། །སེམས་སྒྱུ་ མ་ལྟ་བུ་མཐར་ཐུག་པ་མེད་པ་ཡང་རབ་ཏུ་བསྒྲུབ་པ་མཛད་དོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ལ་དབང་བསྒྱུར་བ་འདི་ལ་ གནས་པའི་བྱང་ཆུབ་སེམས་དཔའ་ནི། སངས་རྒྱས་བཅོམ་ལྡན་འདས་མཚན་ཐ་དད་པ། མཚན་རེ་རེ་ཞིང་ཡང་རྣམ་པར་དབྱེ་བའི་བྱེ་བྲག་སངས་རྒྱས་ཀྱི་ཞིང་གྲངས་མེད་པ་ སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་མངའ་བ་མཚན་དེ་དག་རེ་རེའི་རྣམ་པར་དབྱེ་བའི་རྣམ་གྲངས་ཀྱང༌། སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ཤིན་ཏུ་ ཕྲ་བ་སྙེད་མངའ་བ་དག་གིས་མཐའ་དང་དབུས་མེད་པའི་ཚུལ་དུ་ལུས་ཀྱང་བྱིན་གྱིས་བརླབ་པ་མཛད་དོ། །ཆགས་པ་མེད་པའི་ཚུལ་དུ་སེམས་ཀྱང་བྱིན་གྱིས་བརླབ་པ་མཛད་ དོ༑ ༑ཆོས་ཐམས་ཅད་ཉམས་པ་མེད་པ་ལ་གཞོལ་བར་དྲན་པའང་བྱིན་གྱིས་བརླབ་པ་མཛད་དོ། །ཆོས་ཐམས་ཅད་རྟོགས་པར་ཁོང་དུ་ཆུད་པར་བློ་གྲོས་ཀྱང་བྱིན་གྱིས་བརླབ་པ་ མཛད་དོ། །ཆོས་ཐམས་ཅད་ཤིན་ཏུ་འཛིན་པར་རིག་པའང་བྱིན་གྱིས་བརླབ་པ་མཛད་དོ། །ཆོས་ཐམས་ཅད་ཡངས་ཤིང་འབྱམས་ཀླས་པའི་ཚུལ་དུ་བློ་ཡང་བྱིན་གྱིས་བརླབ་པ་ མཛད་དོ། །མངོན་པར་ཤེས་པ་རྣོན་པོས་ཆོས་ཐ་མི་དད་པ་མཁས་པས་ཁོང་དུ་ཆུད་པར་དབང་པོ་ཚད་མེད་པའང་བྱིན་གྱིས་བརླབ་པ་མཛད་དོ། །བྱིན་གྱི་རླབས་ཀྱིས་ཆོས་ཀྱི་དབྱིངས་ ཁོང་དུ་ཆུད་པའི་ཚུལ་དུ་སྤྱོད་ཡུལ་ཐོགས་པ་མེད་པ་ཡང་བྱིན་གྱིས་བརླབ་པ་མཛད་དོ། །བསྒྲིབས་པ་མེད་པའི་ཡེ་ཤེས་རྣམ་པར་དག་པར་ཡེ་ཤེས་ལ་འཇུག་པའང་བྱིན་གྱིས་བརླབ་ པ་མཛད་དོ། །འཇིག་རྟེན་གྱི་ཁམས་ཐམས་ཅད་དུ་རྣམ་པར་འཕྲུལ་པ་ཡང་དག་པར་སྟོན་པར་མངོན་པར་འཚང་རྒྱ་བའང་བྱིན་གྱིས་བརླབ་པ་མཛད་དོ། །ཀྱེ༑ རྒྱལ་བའི་སྲས་དག ། དེ་ལྟར་བྱང་ཆུབ་སེམས་དཔའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་རྒྱ་མཚོའི་སྒོ་བཅུ་ལ་ཤིན་ཏུ་རྟོགས་པ་ཡིན་ཏེ། བཅུ་གང་ཞེ་ན། འདི་ལྟར་སངས་རྒྱས་རྒྱ་ མཚོ་མཐོང་བས་རྟོགས་པ་ཡིན། སེམས་ཅན་རྒྱ་མཚོ་མིང་གིས་ཁོང་དུ་ཆུད་པ་ཡིན། ཆོས་རྒྱ་མཚོ་ཡེ་ཤེས་ཀྱིས་རབ་ཏུ་རྟོགས་པ་ཡིན། ཞིང་རྒྱ་མཚོ་ལ་དངོས་པོ་མེད་པར་ ༄༅། །གནས་ཤིང༌། མངོན་པར་འདུས་མ་བྱས་པའི་བསམ་པས་རྗེས་སུ་འབྲང་བ་ཡིན་ཏེ། ཡོན་ཏན་རྒྱ་མཚོ་ཕུན་སུམ་ཚོགས་པས་རབ་ཏུ་རྟོགས་པ་ཡིན། ཡེ་ ཤེས་ཀྱི་རྣམ་པར་འཕྲུལ་པ་རྒྱ་མཚོ་རྣམ་པར་དམིགས་པས་ཁོང་དུ་ཆུད་པ་ཡིན། དབང་པོ་རྒྱ་མཚོ་རྣམ་པར་ཕྱེ་བ་ལ་མཁས་པའི་སའི་ཡེ་ཤེས་ཀྱིས་ཁོང་དུ་ཆུད་པ་ཡིན། སེམས་ རྒྱ་མཚོ་སེམས་ཅན་གྱི་རིས་ཐམས་ཅད་ཀྱི་སེམས་ཐ་དད་པ་དང༌། སེམས་ཡངས་པ་དང༌། སེམས་ཚད་མེད་པ་ཡོངས་སུ་ཤེས་པས་ཁོང་དུ་ཆུད་པ་ཡིན། སྤྱོད་པ་རྒྱ་མཚོ་སྨོན་ལམ་གྱིས་ ཡོངས་སུ་རྫོགས་པར་བྱེད་པ་ཡིན། སྨོན་ལམ་རྒྱ་མཚོ་མཐའ་ལས་བརྒལ་བར་འབྱུང་བ་རྣམ་པར་དག་པས་ཡོངས་སུ་གྲུབ་པར་བྱེད་པ་ཡིན་ཏེ། འདི་དག་ནི་བྱང་ཆུབ་སེམས་དཔའ་ དེ་རྒྱ་མཚོའི་སྒོ་བཅུ་ལ་ཤིན་ཏུ་རྟོགས་པ་རྣམས་སོ། །བྱང་ཆུབ་སེམས་དཔའ་དེ་ནི་མཆོག་ཏུ་བྱ་བ་བཅུ་འཐོབ་པ་ཡིན་ཏེ། བཅུ་གང་ཞེ་ན། འདི་ལྟར་སེམས་ཅན་ཐམས་ཅད་ཀྱི་ཕུལ་དུ་ བྱ་བ་འཐོབ་པ་ཡིན། ལྷ་ཐམས་ཅད་ཀྱི་མཆོག་ཏུ་བྱ་བ་འཐོབ་པ་ཡིན། ཚངས་པ་ཁྱུ་མཆོག་ཐམས་ཅད་ཀྱི་ནང་ན་ཆགས་པ་མེད་པ་འཐོབ་པ་ཡིན། འཇིག་རྟེན་ཐམས་ཅད་ཀྱིས་མི་ འཕྲོགས་པ་འཐོབ་པ་ཡིན། འགྲོ་བ་ཐམས་ཅད་ཀྱིས་མི་ཐུབ་པ་འཐོབ་པ་ཡིན། འགྲོ་བ་ཐམས་ཅད་དང་ཐ་མི་དད་པ་འཐོབ་པ་ཡིན། ལམ་གྱི་རྒྱུད་ཐམས་ཅད་ནས་འབྱུང་བ་འཐོབ་ པ་ཡིན། སྐྱེ་བ་ཐམས་ཅད་དུ་དབང་ཕྱུག་འཐོབ་པ་ཡིན། སངས་རྒྱས་ཀྱི་ཆོས་ཐམས་ཅད་ལ་དབང་འཐོབ་པ་ཡིན། འབྱུང་བའི་རྣམ་པར་འཕྲུལ་པ་ཐམས་ཅད་ལ་སྟོབས་དང་ཤུགས་ འཐོབ་པ་ཡིན། འདི་དག་ནི་བྱང་ཆུབ་སེམས་དཔས་མཆོག་ཏུ་བྱ་བ་བཅུ་འཐོབ་པའོ། །བྱང་ཆུབ་སེམས་དཔའ་དེ་ནི་སྟོབས་བཅུས་སེམས་ཅན་གྱི་ཁམས་སུ་ནན་ཏན་བྱེད་པ་ཡིན་ཏེ། བཅུ་ གང་ཞེ་ན། འདི་ལྟར་འགྲོ་བ་ཐམས་ཅད་འདུལ་བའི་སྟོབས་ཀྱིས་འབྱུང་བའི་དེད་དཔོན་དུ་འགྱུར་བ་དང༌། བརྩོན་འགྲུས་ཀྱི་སྟོབས་ཀྱིས་ཕྱིར་མི་ལྡོག་པ་དང༌། ཆགས་པ་མེད་པའི་སྟོབས་ ཀྱིས་དྲི་མ་མེད་པ་དང༌། ཞི་བའི་སྟོབས་ཀྱིས་སྒྲིབ་པ་མེད་པ་དང༌། སེམས་ཀྱི་རྒྱུད་ཡོངས་སུ་བསྒྱུར་བའི་སྟོབས་ཀྱིས་ཆོས་ཐམས་ཅད་ལ་དབང་བསྒྱུར་བ་དང༌། རང་བཞིན་གྱི་ཆོས་ཀྱི་ སྟོབས་ཀྱིས་དོན་གྱི་དབང་དང༌། བསྒྲིབས་པ་མེད་པའི་ཆོས་ཀྱིས་ཤེས་རབ་ཆེ་བ་དང༌། མི་འཇིགས་པའི་སྟོབས་ཀྱིས་ཆོས་སྟོན་པ་དང༌། ཐ་དད་པ་ཡང་དག་པར་ཤེས་པའི་སྟོབས་ ཀྱིས་བྱིན་གྱིས་རློབ་པའི་ཆོས་ཉིད་དང༌། རང་བྱུང་གི་སྟོབས་ཀྱི་མཐའ་ཡས་པའི་ཡེ་ཤེས་རྣམ་པར་སྟོན་པ་སྟེ། སྟོབས་ཆེན་པོ། སྟོབས་འཕགས་པ། སྟོབས་དཔེ་མེད་པ། སྟོབས་ ཚད་མེད་པ། སྟོབས་ཤིན་ཏུ་བསྒྲུབས་པ། སྟོབས་མི་གཡོ་བ། སྟོབས་ཤིན་ཏུ་བརྟན་པ། སྟོབས་འཁྲུགས་པ་མེད་པ། སྟོབས་ཡེ་ཤེས་ཀྱི་བློ་གྲོས་ཅན། སྟོབས་ལེགས་པར་བསྒྲུབས་ ༄༅། །པ༑ སྟོབས་མཉམ་པར་བཞག་པ། སྟོབས་ཡོངས་སུ་དག་པ། སྟོབས་ཆོས་ཀྱི་ལུས་ཅན། སྟོབས་ཆོས་སྣང་བ་ཅན། སྟོབས་ཆོས་ཀྱི་སྒྲོན་མ་ཅན། སྟོབས་ ཆོས་ཀྱི་ཚུལ་ཅན། སྟོབས་ཟིལ་གྱིས་མི་ནོན་པ། སྟོབས་ཤིན་ཏུ་མཉམ་པར་བཞག་པ། རྩལ་དམ་པ་དང་ལྡན་པའི་སྟོབས། སྐྱེས་བུ་དམ་པའི་སྟོབས། སྐྱེས་བུ་དམ་པས་བསྟེན་པའི་ སྟོབས། ཡང་དག་པར་རྫོགས་པའི་སངས་རྒྱས་ཀྱི་བྱིན་གྱིས་བརླབས་པའི་སྟོབས། རྣམ་པ་ཐམས་ཅད་དུ་དགེ་བའི་རྩ་བ་ལ་བསྟེན་པའི་སྟོབས། དགེ་བའི་རྩ་བ་ཚད་མེད་པ་ལ་ གནས་པའི་སྟོབས། དེ་བཞིན་གཤེགས་པའི་སྟོབས་ལ་ཞུགས་པའི་སྟོབས། སེམས་རྟོགས་པར་བཞག་པའི་སྟོབས། བྱང་ཆུབ་སེམས་དཔའི་དགའ་བ་རྣམ་པར་འཕེལ་བའི་ སྟོབས། བྱང་ཆུབ་སེམས་དཔའི་དད་པ་རབ་ཏུ་བསྐྱེད་པའི་སྟོབས། བྱང་ཆུབ་སེམས་དཔའི་ཤུགས་ཤིན་ཏུ་འཕེལ་བར་བྱེད་པའི་སྟོབས། བྱང་ཆུབ་སེམས་དཔའི་སེམས་ཀྱི་ རྒྱུ་མཐར་ཕྱིན་པའི་སྟོབས། བྱང་ཆུབ་སེམས་དཔའ་ལྷག་པའི་བསམ་པ་རྣམ་པར་དག་པར་བྱེད་པའི་སྟོབས། བྱང་ཆུབ་སེམས་དཔའི་དགེ་བའི་རྩ་བ་ལ་ཡོངས་སུ་གནས་པ་ དང་རྒྱུ་མཐུན་པའི་སྟོབས། ཆོས་ལ་ཤིན་ཏུ་གཞོལ་བའི་སྟོབས། ལུས་ལ་ཐོགས་པ་མེད་པའི་སྟོབས། ཐབས་མཁས་པའི་ཚུལ་ལ་ཞུགས་པའི་སྟོབས། ཆོས་ཐམས་ཅད་ འོད་དང་ཞིང་རྣམ་པར་སྣང་བའི་སྟོབས། འགྲོ་བ་ཐམས་ཅད་དུ་གཡོ་བ་མེད་པ་ཕུན་སུམ་ཚོགས་པའི་སྟོབས། སེམས་ཅན་ཐམས་ཅད་ཀྱིས་མི་འཕྲོགས་ཤིང་མི་སྒུལ་བའི་སྟོབས་ བཅུས་སེམས་ཅན་གྱི་ཁམས་སུ་ནན་ཏན་དུ་བྱེད་པ་སྟེ། བྱང་ཆུབ་སེམས་དཔའ་དེའི་ཡོན་ཏན་དེ་ལྟར་ཚད་མེད་པ་དང༌། ཆོས་ཀྱི་བསྔགས་པ་དེ་ལྟར་ཚད་མེད་པ་ཡོངས་སུ་རྫོགས་པར་ འགྱུར་རོ། །མངོན་པར་སྣང་བར་འགྱུར་རོ། །འབྱུང་བར་འགྱུར་རོ། །འཕེལ་བར་འགྱུར་རོ། །རབ་ཏུ་སྐྱེད་པར་འགྱུར་རོ། །རབ་ཏུ་རྟོན་པར་འགྱུར་རོ། །ཡང་དག་པར་འཕེལ་བར་འགྱུར་ རོ༑ ༑རྣམ་པར་དག་པར་འགྱུར་ཞིང་ཡོངས་སུ་དག་པར་འགྱུར་ཏེ། ཡོན་ཏན་དེ་དག་ལ་མཐའ་མེད་དོ། །བདེན་པ་ཤེས་པ་ལ་མཐའ་མེད་དོ། །བྱང་ཆུབ་སེམས་དཔའི་སྤྱོད་པ་དེ་དག་ ལ་མཐའ་མེད་དོ། །བྱང་ཆུབ་སེམས་དཔའི་ཚུལ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་ཁྱུ་མཆོག་གི་མཐུ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་དཀའ་བ་ སྤྱོད་པ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་མངོན་པར་གྲུབ་པ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་རྣམ་པར་དག་པ་དེ་དག་ལ་མཐའ་མེད་དོ། །བྱང་ཆུབ་སེམས་ དཔའི་འབྱུང་བ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་ལས་ལ་དབང་བསྒྱུར་བ་དེ་དག་གི་མཐའ་ནི་བསྐལ་པ་བརྗོད་དུ་མེད་པས་ཀྱང་བརྗོད་པར་མི་ནུས་ཏེ། དེ་དག་ནི་བྱང་ ༄༅། །ཆུབ་སེམས་དཔའ་དེས་འཐོབ་བོ། །དེ་དག་ནི་བྱང་ཆུབ་སེམས་དཔའ་དེས་འགྲུབ་བོ། །དེ་དག་ནི་བྱང་ཆུབ་སེམས་དཔའ་དེས་གནོན་ཏོ། །དེ་དག་ནི་བྱང་ཆུབ་ སེམས་དཔའ་དེ་ལ་མངོན་སུམ་དུ་དད་པར་འགྱུར་རོ། །དེ་དག་ནི་བྱང་ཆུབ་སེམས་དཔའ་དེ་ལ་རབ་ཏུ་སྣང་ངོ༌། །དེ་དག་ནི་བྱང་ཆུབ་སེམས་དཔའ་དེས་ཡོངས་སུ་ཤེས་སོ། །དེ་དག་ནི་ བྱང་ཆུབ་སེམས་དཔའ་དེའི་ཆོས་ཀྱི་ཚུལ་དུ་འབྱུང་ངོ༌། །དེ་དག་ནི་བྱང་ཆུབ་སེམས་དཔའ་དེའི་རྣམ་པར་དགོད་པའི་ཡེ་ཤེས་སུ་འགྲོའོ།། །།བམ་པོ་ལྔ་བཅུ་བརྒྱད་ པ༑ ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་ཏིང་ངེ་འཛིན་ཚད་མེད་པ། གྲངས་མེད་པ། གཞལ་དུ་མེད་པ། མུ་མེད་པ། ཀུན་ཏུ་མཐའ་ཡས་པ། དཔག་ཏུ་མེད་ པ༑ བསམ་གྱིས་མི་ཁྱབ་པ། མཚུངས་པ་མེད་པ། བརྗོད་དུ་མེད་པའི་ཡང་བརྗོད་དུ་མེད་པ་དག་ལ་དམིགས་པ་རེ་རེ་ནས་འཇུག་པས་སྙོམས་པར་འཇུག་གོ །རྣམ་པར་ལྡང་ ངོ༑ ༑ཏིང་ངེ་འཛིན་དེ་དག་དང༌། ཏིང་ངེ་འཛིན་གྱི་ཁྱད་པར་ཡང་རབ་ཏུ་ཤེས་སོ། །ཏིང་ངེ་འཛིན་གཞལ་དུ་མེད་པ་ཡང་རབ་ཏུ་ཤེས་སོ། །ཏིང་ངེ་འཛིན་ཤིན་ཏུ་ཡངས་པ་ཡང་ རབ་ཏུ་ཤེས་སོ། །ཏིང་ངེ་འཛིན་ལ་རྣམ་པར་སྤྱད་པའང་རབ་ཏུ་ཤེས་སོ། །ཏིང་ངེ་འཛིན་གྱི་མཚན་མ་ཡང་རབ་ཏུ་ཤེས་སོ། །ཏིང་ངེ་འཛིན་བསྟན་པ་ཡང་རབ་ཏུ་ཤེས་ སོ༑ ༑ཏིང་ངེ་འཛིན་གྱི་སྤྱོད་ཡུལ་ཡང་རབ་ཏུ་ཤེས་སོ། །ཏིང་ངེ་འཛིན་གྱི་རྒྱུ་མཐུན་པའི་འབྲས་བུའང་རབ་ཏུ་ཤེས་སོ། །ཏིང་ངེ་འཛིན་དབེན་པའང་རབ་ཏུ་ཤེས་སོ། །ཏིང་ངེ་འཛིན་གྱི་རང་ བཞིན་ཡང་རབ་ཏུ་ཤེས་སོ། །ཏིང་ངེ་འཛིན་གྱི་འབྱུང་བའང་རབ་ཏུ་ཤེས་སོ། །འདི་ལྟ་སྟེ། དཔེར་ན། ཀླུའི་རྒྱལ་པོ་ཆེན་པོ་མ་དྲོས་པའི་གནས་ནས་ཆུ་ཀླུང་ཆེན་པོ་མ་དྲོས་པ་རྙོག་པ་མེད་ པ༑ དང་བ་འོད་གསལ་བ། དྲི་མ་མེད་པ་དག་པ། ནམ་མཁའ་ལྟ་བུ་དྲི་མ་དང་བྲལ་བ་བཞི་འབབ་སྟེ། དེ་དག་ཀྱང་ཁ་གཅིག་དང༌། གཉིས་དང༌། གསུམ་དང༌། བཞིའི་སྒོ་ནས་འབབ་སྟེ། འདི་ལྟར་ཆུ་ཀླུང་ཆེན་པོ་གངྒཱ་ནི་གླང་པོ་ཆེའི་ཁ་ནས་འབབ་བོ། །ཆུ་ཀླུང་ཆེན་པོ་སི་ཏ་ནི་སེང་གེའི་ཁ་ནས་འབབ་བོ། །ཆུ་ཀླུང་ཆེན་པོ་སིནྡྷུ་ནི་གླང་གི་ཁ་ནས་འབབ་བོ། །ཆུ་ཀླུང་ཆེན་པོ་པཀྵུ་ནི་ རྟའི་ཁ་ནས་འབབ་བོ། །དེ་དག་དེ་ལྟར་ཕྱོགས་བཞི་ནས་ཁའི་སྒོ་བཞི་ནས་འབབ་སྟེ། ཆུ་ཀླུང་གངྒཱ་ནི་དངོ་ནས་དངུལ་གྱི་བྱེ་མ་འདྲེན་ཅིང་འབབ་སྟེ། དངུལ་གྱི་བྱེ་མ་ལ་གནས་སོ། །ཆུ་ ཀླུང་སི་ཏ་ནི་དངོ་ནས་རྡོ་རྗེའི་བྱེ་མ་འདྲེན་ཅིང་འབབ་སྟེ། །རྡོ་རྗེའི་བྱེ་མ་ལ་གནས་སོ། །ཆུ་ཀླུང་ཆེན་པོ་སིནྡྷུ་ནི་དངོ་ནས་གསེར་གྱི་བྱེ་མ་འདྲེན་ཅིང་འབབ་སྟེ། གསེར་གྱི་བྱེ་མ་ལ་གནས་སོ། །ཆུ་ཀླུང་ ཆེན་པོ་པཀྵུ་ནི་དངོ་ནས་བཻ་ཌཱུཪྻའི་སྔོན་པོའི་བྱེ་མ་འདྲེན་ཅིང་འབབ་སྟེ། བཻ་ཌཱུཪྻ་སྔོན་པོའི་བྱེ་མ་ལ་གནས་སོ། །ཆུ་ཀླུང་ཆེན་པོ་གངྒཱ་ནི་ལྷ་རྫས་ཀྱི་དངུལ་གྱི་ཁ་དོག་ལྟ་བུའི་སྒོ་ནས་འབབ་ ༄༅། །བོ༑ ༑ཆུ་ཀླུང་ཆེན་པོ་སི་ཏ་ནི་ལྷ་རྫས་ཀྱི་རྡོ་རྗེའི་ཁ་དོག་ལྟ་བུའི་སྒོ་ནས་འབབ་བོ། །ཆུ་ཀླུང་ཆེན་པོ་སིནྡྷུ་ནི་ལྷ་རྫས་ཀྱི་གསེར་གྱི་ཁ་དོག་ལྟ་བུའི་སྒོ་ནས་འབབ་བོ།། ཆུ་ཀླུང་ཆེན་པོ་པཀྵུ་ནི་ལྷ་རྫས་ཀྱི་བཻ་ཌཱུཪྻ་སྔོན་པོའི་ཁ་དོག་ལྟ་བུའི་སྒོ་ནས་འབབ་བོ། །ཆུ་ཀླུང་ཆེན་པོ་དེ་བཞི་ཆར་ཡང་ཁའི་སྒོ་དཔག་ཚད་ཙམ་གྱི་ཚད་ནས་འབབ་སྟེ། དེ་དག་འབབ་པའི་ཚེ་ རེ་རེས་ཀྱང་མཚོ་ཆེན་པོ་ལ་ལན་བདུན་བདུན་དུ་གཡས་ཕྱོགས་སུ་བསྐོར་ཏེ་ཕྱོགས་བཞིར་འབབ་ཅིང༌། རྒྱ་མཚོ་ཆེན་པོ་གངས་ཆེན་མཚོ་ལ་ཞེན་པར་འདོང་ངོ༌། །དེ་ལྟར་ཆུ་ཀླུང་ཆེན་པོ་ རྣམས་ཀྱིས་ལན་བདུན་དུ་གཡས་ཕྱོགས་སུ་བསྐོར་བའི་བར་གྱི་གླིང་དེ་དག་ཀྱང༌། མེ་ཏོག་ཨུཏྤ་ལ་དང༌། པད་མོ་དང༌། ཀུ་མུ་ད་དང༌། པུཎྜ་རི་ཀ་དང༌། ལྷ་རྫས་ཀྱི་རིན་པོ་ཆེའི་རང་ བཞིན་ལས་གྲུབ་པ། ཡིད་དུ་འོང་བ་དྲི་ཞིམ་པ། མཐའི་རྒྱན་དུ་སྡུག་པ། མདོག་གསལ་བ། རིན་པོ་ཆེ་སྣ་ཚོགས་ཀྱི་ཁ་དོག་ལྟར་འདུག་པ། འོད་དང་ཞིང་གསལ་བ། གཅིག་གིས་ གཟུགས་བརྙན་གཅིག་ཏུ་སྣང་བ། མདངས་དགའ་བ། བལྟ་ན་ཡིད་དུ་འོང་བ། རང་བཞིན་དང་ཞིང་ཤིན་ཏུ་རྣམ་པར་དག་པས་བརྒྱན་པ་སྟེ། བལྟ་ན་ཁ་དོག་འོད་གསལ་བ། མུན་ བསལ་ཅིང་སྣང་བ་འབྱིན་པ། བལྟ་ན་གཏིང་མི་བྲ་ཞིང་ཤིན་ཏུ་རྣམ་པར་ཕྱེ་བར་བརྒྱན་པ། ཁ་དོག་སྣ་ཚོགས་སུ་མེ་ཏོག་གིས་ཀུན་ནས་ཡོགས་པ། འདབ་མ་སྣ་ཚོགས་དང་ལྡན་ ཞིང༑ སྙིང་པོ་ཁ་དོག་སྣ་ཚོགས་ཅན། ཟེ་བ་མདོག་དུ་མར་སྣང་བའི་མེ་ཏོག་གིས་ཡོངས་སུ་བརྒྱན་པ་སྟེ། མཚོ་ཆེན་པོ་དེའི་ནང་དང༌། མཚོའི་དཀྱིལ་འཁོར་ནི་རྒྱར་དཔག་ཚད་ལྔ་བཅུ་ཡོད་ དེ༑ ཟབས་སུ་དཔག་ཚད་ལྔ་བཅུ་ཡོད་དོ། །དེའི་གཞི་ནི་རིན་པོ་ཆེའི་གསེག་མ་བདལ་བ་སྟེ། རིན་པོ་ཆེ་སྣ་ཚོགས་ཁ་དོག་དུ་མ་དང་ལྡན་པས་ཤིན་ཏུ་བརྒྱན་པར་གནས་པའོ། །དེའི་ངོགས་ ནི་རིན་པོ་ཆེ་སྣ་ཚོགས་ཕ་གུ་བརྩིགས་པ་ལྟར་འདུག་པས་ཀུན་ནས་འཁོར་བའོ། །དེའི་དྲི་ནི་ཙན་དན་བཟང་པོའི་བསུང་ལྟ་བུ་སྟེ། མེ་ཏོག་ཁ་དོག་དུ་མ་ཅན་ལས་བསུང་གི་ངད་རྣམ་པ་དུ་མ་ ལངས་པ་དང་ལྡན་པ་ཡིན། མེ་ཏོག་ཨུཏྤ་ལ་དང༌། པད་མོ་དང༌། ཀུ་མུ་ད་དང༌། པུཎྜ་རི་ཀས་ཀུན་ནས་ཡོགས་པ། རིན་པོ་ཆེའི་ཤིང་མེ་ཏོག་རབ་ཏུ་རྒྱས་པས་ཀུན་ནས་འཁོར་བ་སྟེ། ནམ་ ལྷའི་བུ་ཉི་མ་འཆར་བའི་ཚེ་ཉི་མའི་འོད་ཟེར་དེ་དག་མཚོའི་རིན་པོ་ཆེ་དང༌། གསེག་མ་དང༌། མེ་ཏོག་དང༌། ཆུ་ཀླུང་གི་རྒྱུད་གྱི་བྱེ་མ་དང༌། དངོའི་ཁ་དང༌། ཆུ་ཀླུང་གི་གཡས་ཕྱོགས་ སུ་བསྐོར་བའི་མཚོ་དང༌། རིན་པོ་ཆེའི་ཤིང་གི་ལྷུན་དང༌། ཡལ་ག་དང༌། ལོ་མ་དང༌། མེ་ཏོག་ལ་བབ་པར་གྱུར་ན། དེའི་ཚེ་འོད་ཟེར་རེ་རེས་ཕོག་ཀྱང་རིན་པོ་ཆེའི་འབྱུང་གནས་སྣ་ ཚོགས་ཀྱི་དབྱིངས་ན་གནས་པའི་འོད་ཟེར་གྱི་དྲ་བ་བྱེ་བ་ཁྲག་ཁྲིག་བརྒྱ་སྟོང་གིས་ཀུན་ནས་ཡོག་པ་ལྟ་བུར་སྣང་སྟེ། ཐམས་ཅད་ཀྱང་འོད་ཀྱི་མདོག་དམ་པ་དེས་འཇམ་འཇམ་ལྟར་ ༄༅། །འདུག་པས་མཚོ་ཆེན་པོ་མ་དྲོས་པ་རྣམ་པའི་མཆོག་ཐམས་ཅད་དང་ལྡན་པར་སྣང་ངོ༌། །མཚོ་ཆེན་པོ་མ་དྲོས་པ་དེའི་འཁོར་ན་རིན་པོ་ཆེ་རྒྱན་དུ་འཁོད་པ། ཡིད་དུ་འོང་ཞིང་ཆལ་པར་རྒྱས་ལ་རྒྱ་ཆེར་འདལ་བ་དེ་དག་ཐམས་ཅད་ཀྱང་ཉི་མའི་དཀྱིལ་འཁོར་ལྟ་བུར་གྱུར་པར་སྣང་སྟེ། རིན་པོ་ཆེ་དམ་པ་སྣ་ཚོགས་ཤིན་ཏུ་ཕྲ་བ་ཐམས་ ཅད་དང༌། རིན་པོ་ཆེའི་བྱེ་མ་ཀུན་ཏུ་བདལ་བ་དང༌། རིན་པོ་ཆེའི་རྒྱན་སྣ་ཚོགས་ཤིན་ཏུ་ཕྲ་བ་དང༌། རིན་པོ་ཆེའི་རྡུལ་ཤིན་ཏུ་ཕྲ་བ་དང༌། རིན་པོ་ཆེའི་རྡུལ་ཤིན་ཏུ་ཕྲ་བའི་བྱེ་མ་དེ་ ལྟར་ཕྲ་བ་དག་ལའང་ཕན་ཚུན་དུ་གཟུགས་བརྙན་སྣང་ན་ཆུང་ཞེས་དོག་པའམ། ཆེ་ཞེས་ཡངས་པ་མེད་པར་དངོས་པོ་ཇི་ལྟ་བ་བཞིན་དུ་མ་ནོར་བར་སྣང་ངོ༌། །ཆུ་ཀླུང་ཆེན་པོ་ དེ་དག་ཇི་ལྟར་མཚོ་ཆེན་པོ་མ་དྲོས་པ་ལས་ཁ་བཞི་ནས་འབབ་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའི་ཐ་དད་པ་ཡང་དག་པར་ཤེས་པ་བཞིའི་ཆུ་ཀླུང་ཆེན་ པོའི་འབབ་པ་ཡང་ཐམས་ཅད་མཁྱེན་པ་ཉིད་ཀྱི་རྒྱ་མཚོ་ལ་ཞེན་པར་འདོང་ངོ༌། །ཇི་ལྟར་ཆུ་ཀླུང་ཆེན་པོ་གངྒཱ་གླང་པོའི་ཁ་དངུལ་གྱི་ཁ་དོག་ཏུ་འདུག་པ་ནས་དངུལ་གྱི་བྱེ་མ་འདྲེན་ ཅིང་འབབ་པ་དེ་བཞིན་དུ། བྱང་ཆུབ་སེམས་དཔའ་ཆོས་དཀར་པོ་དག་པར་བྱེད་པའི་སྒོ་ནས་དོན་ཐ་དད་པ་ཡང་དག་པར་ཤེས་པ། དེ་བཞིན་གཤེགས་པའི་ཚུལ་ཐམས་ཅད་ ཡོངས་སུ་སྦྱོང་བ། དོན་གྱི་ཚུལ་ཐམས་ཅད་ཤིན་ཏུ་དག་པར་བྱེད་པ་ཡང་ཆོས་ཐམས་ཅད་ཀྱི་སྣང་བ་རྣམ་པར་གསལ་བར་བྱེད་ཅིང་འབབ་སྟེ། བསྒྲིབས་པ་མེད་པའི་རྒྱ་མཚོའི་མཐར་ ཐུག་པར་འགྲོའོ། །ཇི་ལྟར་ཆུ་ཀླུང་ཆེན་པོ་སི་ཏ་སེང་གེའི་ཁ་རྡོ་རྗེའི་ཁ་དོག་ཏུ་འདུག་པ་ནས་རྡོ་རྗེའི་བྱེ་མ་འདྲེན་ཅིང་འབབ་པ་དེ་བཞིན་དུ། བྱང་ཆུབ་སེམས་དཔའི་ཆོས་ཐ་དད་པ་ཡང་ དག་པར་ཤེས་པ། སངས་རྒྱས་ཀྱི་རྡོ་རྗེའི་ཚིག་བརྗོད་པ་དང༌། འགྲོ་བ་ཐམས་ཅད་ལ་སྣང་བར་བྱ་བ་དང༌། ཡེ་ཤེས་ཀྱི་རྡོ་རྗེའི་ཚིག་རབ་ཏུ་འདྲེན་ཅིང་འབབ་སྟེ། ཆགས་པ་མེད་ པའི་རྒྱ་མཚོ་ལ་ཞེན་པར་འགྲོའོ། །ཇི་ལྟར་ཆུ་ཀླུང་ཆེན་པོ་སིནྡྷུ་གླང་གི་ཁ་གསེར་གྱི་ཁ་དོག་ཏུ་འདུག་པ་ནས་གསེར་གྱི་བྱེ་མ་འདྲེན་ཅིང་འབབ་པ་དེ་བཞིན་དུ། བྱང་ཆུབ་སེམས་དཔའི་ ངེས་པའི་ཚིག་ཐ་དད་པ་ཡང་དག་པར་ཤེས་པ། སེམས་ཅན་གྱི་ཚོགས་ཐམས་ཅད་ཁོང་དུ་ཆུད་པར་བྱེད་ཅིང་འགལ་བ་མེད་པ་དང༌། འགྲོ་བ་ཐམས་ཅད་ཚིམ་པར་བྱེད་པ། ཤིན་ཏུ་ འགྲོ་བ་ཡང་ཚུལ་རྣམ་པར་དག་པའི་ཡན་ལག་གིས་ཡོངས་སུ་སྨིན་པར་བྱ་བ་དང༌། འདུལ་བ་ལ་རྟག་ཏུ་བརྩོན་པར་འབབ་སྟེ། རྟེན་ཅིང་འབྲེལ་བར་འབྱུང་བའི་ཚུལ་གྱི་རྒྱ་མཚོ་ལ་ཞེན་ པར་འགྲོའོ། །ཇི་ལྟར་ཆུ་ཀླུང་ཆེན་པོ་པཀྵུ་རྟའི་ཁ་བཻ་ཌཱུཪྻ་སྔོན་པོའི་ཁ་དོག་ཏུ་འདུག་པ་ནས་བཻ་ཌཱུཪྻ་སྔོན་པོའི་བྱེ་མ་འདྲེན་ཅིང་འབབ་པ་དེ་བཞིན་དུ། བྱང་ཆུབ་སེམས་དཔའི་སྤོབས་ ༄༅། །པ་ཐ་དད་པ་ཡང་དག་པར་ཤེས་པ་མི་ཟད་པ་ཡང་ཆོས་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་རབ་ཏུ་སྣང་བར་བྱ་བ་དང༌། དམ་པའི་ཆོས་ཀྱི་ཆུ་ཀླུང་རྒྱུན་ དུ་འབབ་པར་བྱ་བའི་ཀླུང་རབ་ཏུ་སྐྱེད་པར་བྱེད་ཅིང་ཆོས་ཐམས་ཅད་ཀྱི་རྒྱ་མཚོ་ལ་གཞོལ་བར་འབབ་སྟེ། བྱང་ཆུབ་སེམས་དཔའ་ཐམས་ཅད་ཀྱི་ཆོས་རྒྱ་མཚོ་ལ་ཞེན་པར་འགྲོའོ།། ཇི་ལྟར་ཆུ་ཀླུང་ཆེན་པོ་བཞི་པོ་དེ་དག་གིས་མཚོ་ཆེན་པོ་མ་དྲོས་པ་ལ་གཡས་ཕྱོགས་སུ་བསྐོར་བ་བྱས་ཏེ། ཕྱོགས་བཞི་ནས་རྒྱ་མཚོ་ལ་ཞེན་པར་འདོང་བ་དེ་བཞིན་དུ། བྱང་ཆུབ་ སེམས་དཔའ་ཡང་ལུས་ཀྱི་ལས་མཐུན་པ་དང་ལྡན་པ་ཡིན། ངག་གི་ལས་མཐུན་པ་དང་ལྡན་པ་ཡིན། ཡིད་ཀྱི་ལས་མཐུན་པ་དང་ལྡན་པ་ཡིན། མཐུན་པའི་ཡེ་ཤེས་སྔོན་དུ་ འགྲོ་བ་དང་ལྡན་པ་ཡིན། ཇི་ལྟར་དེ་དག་ཕྱོགས་བཞི་ནས་རྒྱ་མཚོ་ཆེན་པོ་ལ་ཞེན་པར་འདོང་བ་དེ་བཞིན་དུ། བྱང་ཆུབ་སེམས་དཔའ་ཡང་ཕྱོགས་བཞི་ནས་ཐམས་ཅད་མཁྱེན་ པའི་ཡེ་ཤེས་ཀྱི་རྒྱ་མཚོ་ལ་ཞེན་པར་འགྲོ་བ་ཡིན་ཏེ། བཞི་གང་ཞེ་ན། འདི་ལྟ་སྟེ། སངས་རྒྱས་རྣམ་པར་དམིགས་པས་སངས་རྒྱས་ཐམས་ཅད་མཐོང་བའི་ཕྱོགས་དང༌། འདི་ལྟ་ སྟེ༑ ལུས་ཀྱི་ལས་ངེས་པ་དང༌། གཟུངས་བརྗེད་པ་མེད་པས་ཡོངས་སུ་འཛིན་པས་ཆོས་ཐམས་ཅད་སྣང་བའི་ཕྱོགས་དང༌། འདི་ལྟ་སྟེ། བྱང་ཆུབ་སེམས་དཔའི་སྤྱོད་པ་ཐམས་ ཅད་ཡོངས་སུ་རྫོགས་པར་བྱ་བའི་ཕྱིར་ཕ་རོལ་ཏུ་ཕྱིན་པའི་ཕྱོགས་དང༌། ཆོས་ཀྱི་འཁོར་ལོ་བསྐོར་བས་སེམས་ཅན་ཐམས་ཅད་དགའ་བར་བྱ་བ་ཡོངས་སུ་རྫོགས་པར་བྱ་བའི་ཕྱིར་སྙིང་ རྗེ་ཆེན་པོའི་ཕྱོགས་སོ། །ཇི་ལྟར་ཆུ་ཀླུང་ཆེན་པོ་དེ་དག་གིས་ལན་བདུན་དུ་བསྐོར་བའི་བར་གྱི་གླིང་རྣམས། མེ་ཏོག་ཨུཏྤ་ལ་དང༌། པད་མོ་དང༌། ཀུ་མུ་ད་དང༌། པུཎྜ་རི་ཀས་ཀུན་ནས་ ཡོག་པ་དེ་བཞིན་དུ། བྱང་ཆུབ་སེམས་དཔའ་བར་མ་དོར་འདུལ་བར་མ་གྱུར་བའི་སེམས་ཅན་རྣམས་ལ་བཏང་སྙོམས་སུ་གཞོག་པ་ཡང་ཏིང་ངེ་འཛིན་བྱེ་བ་ཁྲག་ཁྲིག་བརྒྱ་ཕྲག་སྟོང་གིས་ ཀུན་ཏུ་ཁྱབ་པའོ། །སངས་རྒྱས་མཐོང་བས་རྣམ་པ་སྣ་ཚོགས་སུ་བརྒྱན་པའོ། །སངས་རྒྱས་ཀྱི་ཞིང་ཡོངས་སུ་དག་ཅིང་རྡུལ་མེད་པས་ཡིད་དུ་འོང་བའོ། །ཇི་ལྟར་མཚོ་ཆེན་པོ་མ་དྲོས་པ་ རིན་པོ་ཆེའི་ཤིང་གིས་ཡོངས་སུ་འཁོར་བ་དེ་བཞིན་དུ། བྱང་ཆུབ་སེམས་དཔའ་ཡང་བྱང་ཆུབ་ཏུ་མངོན་པར་འཚང་རྒྱ་བ་སྟོན་ན། སངས་རྒྱས་ཀྱི་ཞིང་གིས་ཀུན་ནས་འཁོར་ཅིང་བརྒྱན་ པ་ཡིན། ཇི་ལྟར་མཚོ་ཆེན་པོ་མ་དྲོས་པའི་ནང་དཔག་ཚད་ལྔ་བཅུ་ཡོད་ལ་དང་ཞིང་རྙོག་པ་མེད་པ་དང་གསལ་བ་དེ་བཞིན་དུ། བྱང་ཆུབ་སེམས་དཔའ་མངོན་པར་འཚང་རྒྱ་བའི་སེམས་ ཀྱང་དགེ་བའི་རྩ་བ་ཐམས་ཅད་ཀྱིས་ཡོངས་སུ་རྒྱས་པས་དང་ཞིང་རྙོག་པ་མེད་ལ་གསལ་བ་དང༌། མཐའ་དང་དབུས་མེད་པ་ཡིན། ཇི་ལྟར་མཚོ་ཆེན་པོ་མ་དྲོས་པ་རིན་པོ་ཆེའི་ཕ་གུས་ ༄༅། །བརྩིགས་པས་མཐའ་བསྐོར་ཅིང༌། ཙན་དན་དྲི་ཞིམ་པོའི་བསུང་དང་ལྡན་པ་དེ་བཞིན་དུ། བྱང་ཆུབ་སེམས་དཔའ་མངོན་པར་འཚང་རྒྱ་བའི་སེམས་ཀྱང་ ཡེ་ཤེས་རིན་པོ་ཆེ་ཁྲག་ཁྲིག་སྟོང་ཕྲག་བཅུས་ཤིན་ཏུ་བརྒྱན་ཅིང་ཁྱད་པར་དུ་འཕགས་པའི་སྨོན་ལམ་གྱི་ཡེ་ཤེས་དང་ལྡན་ལ་དགེ་བའི་རྩ་བ་དྲི་ཞིམ་པོ་ཐམས་ཅད་དང་ལྡན་ པའོ༑ ༑ཇི་ལྟར་མཚོ་ཆེན་པོ་མ་དྲོས་པའི་ནང་རིན་པོ་ཆེ་ཐམས་ཅད་ཀྱི་གྲམ་བུས་ཡོངས་སུ་བརྒྱན་ཅིང༌། ནོར་བུ་རིན་པོ་ཆེ་རྣམ་པ་སྣ་ཚོགས་ཀྱིས་མཛེས་པར་གྱུར་པ་དེ་བཞིན་དུ། བྱང་ཆུབ་སེམས་དཔའི་ཡེ་ཤེས་ཕྲ་བས་ཁོང་དུ་ཆུད་པའི་དྲན་པ་ཡང་བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་རིན་པོ་ཆེས་རྣམ་པར་བརྒྱན་ཅིང༌། དེ་ལྟར་བྱུང་བའི་ཆོས་ཐམས་ཅད་ལ་ཐོགས་པ་མེད་པའི་སངས་རྒྱས་ཐམས་ཅད་ཀྱི་གནས་ལ་རྣམ་པར་སྤྱོད་པས་ཚུལ་དང་དུས་ཤེས་པར་བྱ་བ་ཐམས་ཅད་ལ་ཞུགས་པ་ ཡིན༑ ཇི་ལྟར་ཀླུའི་རྒྱལ་པོ་ཆེན་པོ་མ་དྲོས་པ་གཙེ་བ་དང༌། མི་བདེ་བ་ཐམས་ཅད་ལས་རྣམ་པར་འདས་པ་དེ་བཞིན་དུ། བྱང་ཆུབ་སེམས་དཔའ་ཡང་འཇིག་རྟེན་གྱི་གཙེ་བ་ དང༑ འཇིགས་པ་ཐམས་ཅད་དང་བྲལ་བ་ཡིན་ཏེ། འཇིག་རྟེན་ཐམས་ཅད་དུ་སྣང་བར་གནས་ཀྱང་འཇིག་རྟེན་ཐམས་ཅད་ཀྱིས་མི་གོས་པ་ཡིན། ཇི་ལྟར་ཆུ་ཀླུང་ཆེན་པོ་བཞི་ པོ་དེ་དག་གིས་འཛམ་བུའི་གླིང་མངོན་པར་བརླན་ཅིང་ཡོངས་སུ་བརླན་ནས་རྒྱ་མཚོ་ཆེན་པོ་ལ་ཞེན་པར་འདོང་བ་དེ་བཞིན་དུ། བྱང་ཆུབ་སེམས་དཔའ་ཡང་ཡེ་ཤེས་ཀྱི་ཆུ་ཀླུང་ཆེན་པོ་ བཞིས་ལྷ་དང་འཇིག་རྟེན་དུ་བཅས་པ། ཚངས་པར་བཅས་པ། དགེ་སྦྱོང་དང་བྲམ་ཟེའི་སྐྱེ་དགུར་བཅས་པ་མངོན་པར་བརླན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ ཡེ་ཤེས་རྒྱ་མཚོ་སྟོབས་བཅུས་རྣམ་པར་བརྒྱན་པ་ལ་ཞེན་པར་འགྲོའོ། །བཞི་གང་ཞེ་ན། འདི་ལྟ་སྟེ། སྨོན་པའི་ཡེ་ཤེས་ཀྱི་ཆུ་ཀླུང་འགྲོ་བ་ཐམས་ཅད་བསྐྱབ་པ་དང༌། འགྲོ་བ་ཐམས་ ཅད་གདུལ་བའི་ཕྱིར་རྒྱུན་མི་འཆད་པར་འགྲོ་བ་དང༌། འདི་ལྟ་སྟེ། ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ཆུ་ཀླུང་བྱང་ཆུབ་སེམས་དཔའི་སྤྱོད་པ་རྣམ་པར་དག་པས་རབ་ཏུ་དང་བ། སེམས་ཅན་གྱི་ཁམས་ཐམས་ཅད་ལ་ཕན་འདོགས་ཤིང༌། མི་ཟད་པའི་རྒྱུན་གྱི་མཐར་ཐུག་པས་དུས་གསུམ་གྱི་ཡེ་ཤེས་རྒྱ་མཚོ་ལ་ཞེན་པར་འབབ་པ་དང༌། འདི་ལྟ་སྟེ། བྱང་ཆུབ་ སེམས་དཔའི་མཉམ་པ་མེད་པའི་ཡེ་ཤེས་ཀྱི་ཆུ་ཀླུང་ཏིང་ངེ་འཛིན་རིན་པོ་ཆེ་གྲངས་མེད་པས་བརྒྱན་པ། སངས་རྒྱས་ཐམས་ཅད་ལྟ་ཞིང་སངས་རྒྱས་ཐམས་ཅད་ཀྱི་ཡེ་ཤེས་རྒྱ་མཚོ་ ལ་ཞེན་པར་འབབ་པ་དང༌། འདི་ལྟ་སྟེ། སྙིང་རྗེ་ཆེན་པོའི་ཡེ་ཤེས་ཀྱི་ཆུ་ཀླུང་བྱམས་པ་ཆེན་པོའི་དབང་དུ་འགྱུར་བ་འགྲོ་བ་ཐམས་ཅད་ནས་ཕྱིར་མི་ལྡོག་ཅིང་འགྲོ་བ་ཐམས་ཅད་ཉེ་བར་ ༄༅། །གཟུང་བའི་ཕྱིར། ཐབས་མཁས་པའི་མཚམས་སྦྱོར་བ་གྲངས་མེད་པས་ཡོངས་སུ་གདུང་བ་ཞི་བར་བྱེད་ཅིང་སྟོབས་བཅུ་རྒྱ་མཚོ་ལ་ཞེན་པར་འབབ་པའོ། ། ཇི་ལྟར་ཆུ་ཀླུང་ཆེན་པོ་བཞི་པོ་དེ་དག་མཚོ་ཆེན་པོ་མ་དྲོས་པ་ནས་མི་ཟད་པའི་རྒྱ་མཚོ་ལ་ཞེན་པར་འདོང་བ་དེ་བཞིན་དུ། བྱང་ཆུབ་སེམས་དཔའ་ཡང་ཁྱད་པར་དུ་འཕགས་པའི་སྨོན་ ལམ་དང་ལྡན་པའི་བྱང་ཆུབ་སེམས་དཔའི་སྤྱོད་པས་ཐམས་ཅད་མཁྱེན་པའི་ཡེ་ཤེས་ཟད་མི་ཤེས་པའི་མཐར་ཐུག་པར་འགྲོ་ཞིང་རྣམ་པར་འཚང་རྒྱ་བར་རྣམ་པར་རོལ་པས་རྣམ་ པར་འཚང་རྒྱ་བ་ཡིན། ཇི་ལྟར་ཆུ་ཀླུང་ཆེན་པོ་བཞི་པོ་དེ་དག་རྒྱ་མཚོ་ཆེན་པོ་ཞེན་པར་འདོང་ཞིང་ཕྱིར་མི་ལྡོག་པ་དེ་བཞིན་དུ། བྱང་ཆུབ་སེམས་དཔའ་སྨོན་ལམ་གྱི་རྒྱུན་མ་ ཆད་པར་བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་ལ་རབ་ཏུ་བརྩོན་པ་ཡང་ཐམས་ཅད་མཁྱེན་པ་ཉིད་དུ་མངོན་པར་བསྒྲུབ་པ་ལས་ཕྱིར་མི་ལྡོག་ཅིང༌། སངས་རྒྱས་ཀྱི་ བྱང་ཆུབ་ཆོས་ཐམས་ཅད་ལ་བསྒྲིབས་པ་མེད་པ་དང༌། ཆགས་པ་མེད་པ་ལ་གནས་པའི་དེ་བཞིན་གཤེགས་པའི་ཡེ་ཤེས་རྒྱ་མཚོ་ཞེན་པར་འགྲོའོ། །ཇི་ལྟར་ཆུ་ཀླུང་ཆེན་པོ་བཞི་ པོ་དེ་དག་བསྐལ་པར་གནས་ཤིང་སྐྱོ་བ་དང༌། ཡོངས་སུ་སྐྱོ་བ་མེད་པར་རྒྱ་མཚོ་ལ་ཞེན་པར་འདོང་བ་དེ་བཞིན་དུ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ ལམ་ལ་བརྩོན་པའི་བྱང་ཆུབ་སེམས་དཔའ་ཡང་ཕྱི་མའི་མཐའ་མུར་ཐུག་པའི་བསྐལ་པར་བྱང་ཆུབ་སེམས་དཔའི་སྤྱད་པ་སྤྱོད་པས་ཡོངས་སུ་མི་སྐྱོ་བར་དེ་བཞིན་གཤེགས་པ་ཐམས་ ཅད་ཀྱི་ཡེ་ཤེས་རྒྱ་མཚོར་རྒྱུན་མ་ཆད་པར་རྗེས་སུ་གཞོལ་ཞིང་ཞེན་པར་འགྲོ་བ་ཡིན། ཇི་ལྟར་མཚོ་ཆེན་པོ་མ་དྲོས་པ་དེ་རིན་པོ་ཆེ་སྣ་ཚོགས་ཀྱི་མདོག་ལྟར་འདུག་ཅིང༌། དངུལ་གྱི་བྱེ་ མའི་མདོག་ཏུ་སྣང་བ་དང༌། གསེར་གྱི་བྱེ་མའི་མདོག་ཏུ་སྣང་བ་དང༌། རྡོ་རྗེའི་བྱེ་མའི་མདོག་ཏུ་སྣང་བ་དང༌། བཻ་ཌཱུཪྻའི་བྱེ་མའི་མདོག་ཏུ་སྣང་བ་དང༌། ཉི་མའི་འོད་ཟེར་གྱིས་ཕོག་ན་ཉི་མའི་ དཀྱིལ་འཁོར་རྣམ་པ་ཐམས་ཅད་དང་ལྡན་པའི་གཟུགས་སུ་མངོན་ཞིང་སྣང་བ་དང༌། ཉི་མའི་འོད་ཟེར་དང་ཕྲད་ན་མཚོ་ཆེན་པོ་མ་དྲོས་པ་དེ་དམིགས་པ་ཐམས་ཅད་ཀྱི་གཟུགས་སུ་ གྱུར་པར་སྣང་ཡང་ལུས་ཀྱི་གཟུགས་སུ་སྣང་བ་དང༌། རིན་པོ་ཆེ་སྣ་ཚོགས་ཀྱི་རྣམ་པ་སྣང་བར་གྱུར་པ་དེ་དག་གཅིག་གིས་གཅིག་བདོ་ཞིང་ཕན་ཚུན་དུ་གནོད་པར་འགྱུར་བ་མེད་དོ།། དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་ལ་དབང་བསྒྱུར་བའི་ཏིང་ངེ་འཛིན་འདི་ལ་གནས་པས་རང་གི་ལུས་ཀྱི་བ་སྤུའི་ཁུང་བུ་རེ་རེར་ཡང་དེ་བཞིན་གཤེགས་ པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རབ་ཏུ་མཐོང་ངོ༌། །སངས་རྒྱས་ཀྱི་ཞིང་ཡང་མཐོང་ངོ༌། །འཁོར་གྱི་དཀྱིལ་འཁོར་དུའང་ ༄༅། །འཇུག་གོ །ཆོས་བསྟན་པའང་ཉན་ཏོ། །དེ་དག་ཐམས་ཅད་ཀྱང་མཉེས་པར་བྱེད་དོ། །དེ་བཞིན་གཤེགས་པའི་སྐུ་ཚད་མེད་པ་ལའང་ཡིད་ཆེས་ཤིང༌། ཁོང་དུ་ ཆུད་པར་བྱེད་དོ། །སངས་རྒྱས་ཀྱི་ཞིང་དེ་དག་ན་དེ་བཞིན་གཤེགས་པ་རྣམས་ལ་བསྙེན་བཀུར་བྱེད་ཅིང༌། ཆོས་ཉན་པས་ཀྱང་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་ པའི་བྱེ་བ་ཁྲག་ཁྲིག་འདའ་བར་བྱེད་ཀྱང་ཡུན་རིང་པོའི་འདུ་ཤེས་ཀྱང་མི་སྐྱེ། ཡུན་ཐུང་ངུའི་འདུ་ཤེས་ཀྱང་མི་སྐྱེའོ། །བ་སྤུའི་བུ་ག་དེ་དག་ཏུའང་དེའི་ལུས་ལ་མི་བདེ་པ་ མེད་ཅིང༌། འཇིག་རྟེན་གྱི་ཁམས་དེ་དག་དང༌། དེ་བཞིན་གཤེགས་པ་བཞུགས་པ་དེ་དག་དང༌། འཁོར་གྱི་དཀྱིལ་འཁོར་དེ་དག་དང༌། སེམས་ཅན་གྱི་ཁམས་སྣ་ཚོགས་ འཁོད་པ་དེ་དག་ལའང་གནོད་པ་མེད་དོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་ཆོས་ཀྱི་དབྱིངས་ལ་འཇུག་པ་དེ། སེམས་ཤིན་ཏུ་ཕྲ་བས་མཐའ་དང་དབུས་མེད་པ། ལས་ཀྱི་ རྣམ་པར་སྨིན་པ། དཔེ་མེད་པའི་ཚུལ་ལ་འཇུག་པ། ཏིང་ངེ་འཛིན་བསམ་གྱིས་མི་ཁྱབ་པའི་ཡུལ་རྟོགས་པར་གནས་པ། བསམ་གྱིས་མི་ཁྱབ་པའི་ཡུལ་སངས་རྒྱས་ཐམས་ ཅད་ཀྱི་ཡུལ་རྣམ་པར་སྒྲུབ་པ། སངས་རྒྱས་ཐམས་ཅད་ཀྱི་བྱིན་གྱི་རླབས་བསམ་གྱིས་མི་ཁྱབ་པ། སངས་རྒྱས་ཀྱི་རྣམ་པར་འཕྲུལ་པ་ཚད་མེད་པ་བསྒྲུབ་པར་དཀའ་བ། བཟོད་པར་དཀའ་བ། དེ་བཞིན་གཤེགས་པའི་སྟོབས་བཅུ་ཡོངས་སུ་འཛིན་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། དམིགས་པ་ཡོངས་སུ་རྫོགས་པར་ བྱེད་པ། སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་ལ་འཇུག་པས་སྐྱོ་བ་མེད་པའི་ཕྱིར་རོ། །དེ་ལྟར་བྱང་ཆུབ་སེམས་དཔའ་དེ་སེམས་སྐད་ཅིག་ལ་སྙོམས་པར་ཞུགས་ཤིང༌། རྣམ་པར་ལྡང་ཡང་ཡུན་རིང་པོ་ཡང་འཇིག་པར་མི་བྱེད། མངོན་པར་ཞེན་པར་ཡང་མི་ལྟུང༌། དམིགས་པ་ཐམས་ཅད་ལའང་གནས་པ་མེད་།དེ་དངོས་པོ་ཐམས་ཅད་ལ་ཡང་ མི་གནས་སོ། །སྐད་ཅིག་གི་རྒྱུད་ལ་ཡང་རབ་ཏུ་འཇུག་གོ །སེམས་ཅན་གྱི་དོན་ཡང་ཡང་དག་པར་སྒྲུབ་བོ། །སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་མཐོང་བས་ཀྱང་ངོམས་པར་མི་བྱེད་ དོ༑ ༑ཆོས་ཀྱི་དབྱིངས་ཀྱི་མཐར་དབྱུང་བས་ཀྱང་སྒྱིད་ལུག་པར་མི་བྱེད་དེ། དེ་ལ་གཞག་པར་བྱ་བ་ཡང་གང་ཡང་མེད་དོ། །ཐམས་ཅད་མཁྱེན་པའི་ཡེ་ཤེས་མངོན་པར་བསྒྲུབས་ བའི་རྗེས་སུ་ཡང་རབ་ཏུ་འཇུག་གོ །ཡེ་ཤེས་ཀྱི་སྦྲུལ་པ་ཡང་བྱིན་གྱིས་རློབ་བོ། །སེམས་ཅན་གྱི་རིས་ལ་འཇུག་པར་ཡང་མཐའ་དང་དབུས་མེད་པར་འཇུག་གོ །འཇུག་རྟེན་གྱི་ ཁམས་ཐམས་ཅད་རྣམ་པར་དག་པ་ཡང་ཡོངས་སུ་རྫོགས་པར་བྱེད་དོ། །འཇིག་རྟེན་གྱི་ཕྱིན་ཅི་ལོག་ཐམས་ཅད་རྣམ་པར་རྟོག་པ་མེད་པས་རབ་ཏུ་ཤེས་སོ། །རྟོག་པའི་ས་ཐམས་ ༄༅། །ཅད་ལས་ཀྱང་ཡོངས་སུ་འདའོ། །མཚན་མ་སྣ་ཚོགས་ཡོངས་སུ་ཤེས་པ་ཡང་མི་སྤོང་ངོ༌། །བྱང་ཆུབ་སེམས་དཔའི་ཡེ་ཤེས་དང་ཐབས་ལ་མཁས་ པ་ཡང་ཡོངས་སུ་རྫོགས་པར་བྱེད་དོ། །ཤིན་ཏུ་རྣམ་པར་དག་པ་ལའང་རྟོག་པར་མི་བྱེད་དོ། །ཐམས་ཅད་ཟིལ་གྱིས་གནོན་པའི་ས་ཡང་རབ་ཏུ་འཐོབ་པར་བྱེད་དོ། །འདི་ལྟ་སྟེ། དཔེར་ན། ནམ་མཁའི་རང་བཞིན་ནི་དངོས་པོ་ཐམས་ཅད་ཀྱི་རྗེས་སུ་སོང་བའང་ཡིན་ལ། དངོས་པོ་ཐམས་ཅད་ལས་ཀྱང་རྣམ་པར་འདས་པའོ། །དེ་བཞིན་དུ་བྱང་ཆུབ་སེམས་ དཔའ་ཡང་འཇིག་རྟེན་གྱི་ཁམས་ཐམས་ཅད་དུའང་རྒྱུ་ལ། འཇིག་རྟེན་གྱི་ཁམས་ཐམས་ཅད་ལས་ཀྱང་རྣམ་པར་འདས་པ་ཡིན། སེམས་ཅན་གྱི་ཁམས་ཡོངས་སུ་དགྲོལ་བ་ ལའང་བརྩོན་ལ། སེམས་ཅན་གྱི་འདུ་ཤེས་ཐམས་ཅད་ཀྱང་མེད་པ་ཡིན། ཆོས་ཀྱི་དབྱིངས་ཐམས་ཅད་ཀྱང་ཡེ་ཤེས་ཀྱི་སྤྱོད་ཡུལ་དུ་གྱུར་ལ། ཆོས་ཐམས་ཅད་ཀྱིས་སྙེམས་ པའི་སེམས་ཀྱང་མེད་པ་ཡིན། སངས་རྒྱས་ཐམས་ཅད་བལྟ་བས་ཀྱང་མི་ངོམས་ལ། སངས་རྒྱས་ཐམས་ཅད་ལ་བལྟ་བའི་གནས་ཀྱང་ཡོངས་སུ་བསལ་བ་ཡིན། ཏིང་ངེ་འཛིན་ གྱི་རྣམ་པ་ཐམས་ཅད་ལ་མཁས་པར་བྱ་བའང་ཁོང་དུ་ཆུད་ལ་ཆོས་ཐམས་ཅད་ཀྱི་དེ་བཞིན་ཉིད་ཁོང་དུ་ཆུད་པས་ཆགས་པ་ཡང་མེད་པ་ཡིན། ཆོས་ཀྱི་ཚིག་རྣམ་པར་ཤེས་པ་ མཐའ་ཡས་པའི་སྤོབས་པ་དང་ཡང་ལྡན་ལ། ཚིག་མེད་ཅིང་ཡི་གེ་མེད་པ་ཡང་ཁོང་དུ་ཆུད་པ་ཡིན། བརྗོད་དུ་མེད་པ་ལ་ཡང་ཤིན་ཏུ་སྤྱོད་ལ། དབྱངས་ཀྱི་ཡན་ལག་རྣམ་པར་དག་པ་ དང་ཡང་ལྡན་པ་ཡིན། ཆོས་ཐམས་ཅད་ཀྱི་ཡང་མཐར་ཕྱིན་ལ། གཟུགས་སྣ་ཚོགས་ཀྱིས་འདུལ་བ་རྣམས་ཀྱང་ཡུལ་དུ་བྱེད་པ་ཡིན། ཆོས་ཐམས་ཅད་ཀྱི་རང་བཞིན་གྱི་མཐར་ ཡང་རབ་ཏུ་ཐུག་ལ། སྙིང་རྗེ་ཆེན་པོས་སེམས་ཅན་གྱི་ཁམས་ཐམས་ཅད་ཡོངས་སུ་དགྲོལ་ཞིང་གདུལ་བ་ལ་ཡང་རབ་ཏུ་བརྩོན་པ་ཡིན། སེམས་ཅན་གྱི་ཁམས་འཕེལ་བ་དང་ འགྲིབ་པ་མེད་པ་ཡང་རབ་ཏུ་ཤེས་ལ། ཆོས་ཀྱི་དབྱིངས་ཀུན་ཏུ་ཁྱབ་པ་ཁོང་དུ་ཆུད་པ་ལས་ཀྱང་མི་གཡོ་བ་ཡིན། འགྲོ་བ་ཐམས་ཅད་གདུལ་བ་ཡང་རྒྱུན་མི་གཅོད་ལ། དེ་བཞིན་ གཤེགས་པའི་སྤྱོད་པ་འཁོར་གསུམ་ཡོངས་སུ་དག་པར་ཁོང་དུ་ཆུད་པ་ཡིན། ཆོས་རྣམ་པ་སྣ་ཚོགས་ལའང་རྣམ་པར་མི་རྟོག་ལ། བསྟན་པ་སྣ་ཚོགས་ལ་འཇིགས་པ་མེད་པས་ཆོས་ བསྟན་པའི་ཆོས་ཀྱི་འཁོར་ལོ་ཡང་རྒྱུན་མི་འཆད་པ་ཡིན། ཀྱེ༑རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་ཆོས་ ཀྱི་དབྱིངས་ལ་དབང་བསྒྱུར་བ་ཞེས་བྱ་བ་སྟེ་དགུ་པའོ། །ཀྱེ༑རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ ༄༅། །ཤེས་བཅུ་པ་གང་ཞེ་ན། ཀྱེ༑ རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་ཏིང་ངེ་འཛིན་ཆགས་པ་ མེད་ཅིང༌། དྲི་མ་མེད་པ་ཞེས་བྱ་བ་ལ་སྙོམས་པར་འཇུག་པ་སྟེ། ཏིང་ངེ་འཛིན་དེ་ལ་སྙོམས་པར་ཞུགས་པའི་ཚེ། ལུས་ཀྱི་ལས་ཆགས་པ་མེད་པར་ཡང་དག་པར་གནས་སོ། །ངག་ གི་ལས་ཆགས་པ་མེད་པར་ཡང་དག་པར་གནས་སོ། །ཡིད་ཀྱི་ལས་ཆགས་པ་མེད་པར་ཡང་དག་པར་གནས་སོ། །སངས་རྒྱས་ཀྱི་ཞིང་མཉམ་པ་ཉིད་ཆགས་པ་མེད་པར་ཡང་ དག་པར་གནས་སོ། །སེམས་ཅན་ཡོངས་སུ་སྨིན་པར་བྱ་བའི་ཡེ་ཤེས་ཆགས་པ་མེད་པ་ལ་ཡང་དག་པར་འཇུག་གོ །སེམས་ཅན་འདུལ་བའི་ཡེ་ཤེས་ཆགས་པ་མེད་པར་ཡང་ དག་པར་གནས་སོ། །འོད་ཟེར་ཀུན་ཏུ་དགྱེ་བ་ཆགས་པ་མེད་པ་རབ་ཏུ་འགྱེད་དོ། །འོད་ཀྱི་དཀྱིལ་འཁོར་ཆགས་པ་མེད་པ་རབ་ཏུ་གཏོང་ངོ༌། །སྤྲུལ་པ་མང་པོ་ཆགས་པ་མེད་པ་རབ་ཏུ་ འགྱེད་དོ། །ཆོས་ཀྱི་འཁོར་ལོ་ཆགས་པ་མེད་པ་རབ་ཏུ་བསྐོར་རོ། །བྱང་ཆུབ་སེམས་དཔའི་ཁྱུ་མཆོག་གི་མཐུ་ཕྱུང་བའང་རབ་ཏུ་འཐོབ་པར་བྱེད་དོ། །སངས་རྒྱས་ཀྱི་སྟོབས་རྣམས་ ལ་ཡང་ཡང་དག་པར་འཇུག་གོ །སངས་རྒྱས་ཀྱི་ཡེ་ཤེས་ཀྱང་རབ་ཏུ་འཐོབ་པར་བྱེད་དོ། །སངས་རྒྱས་ཀྱི་བཞེངས་པས་རྣམ་པར་ལྡང་ངོ༌། །སངས་རྒྱས་ཀྱི་རྣམ་པར་འཕྲུལ་བ་སྣང་ བས་ཉེ་བར་སྤྱོད་དོ། །བྱང་ཆུབ་སེམས་དཔའ་དེ་ཏིང་ངེ་འཛིན་འདི་ལ་གནས་པའི་ཚེ། ཐམས་ཅད་མཁྱེན་པ་ཉིད་ལ་རབ་ཏུ་རྟོག་གོ །ཐམས་ཅད་མཁྱེན་པ་ཉིད་ལ་ཡོངས་སུ་བལྟའོ། །ཐམས་ ཅད་མཁྱེན་པ་ཉིད་ཁོང་དུ་ཆུད་པར་བྱེད་དོ། །ཐམས་ཅད་མཁྱེན་པ་ཉིད་རྟོགས་པར་བྱེད་དོ། །ཐམས་ཅད་མཁྱེན་པ་ཉིད་དམིགས་པར་བྱེད་དོ། །ཐམས་ཅད་མཁྱེན་པ་ཉིད་ལ་རབ་ཏུ་ ལྟའོ༑ ༑ཐམས་ཅད་མཁྱེན་པ་ཉིད་ལ་རྗེས་སུ་བལྟའོ། །ཐམས་ཅད་མཁྱེན་པ་ཉིད་ལ་རྣམ་པར་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ། བྱང་ཆུབ་སེམས་དཔའ་ཀུན་ཏུ་ བཟང་པོའི་སྨོན་ལམ་ཆེན་པོ་དང༌། བྱང་ཆུབ་སེམས་དཔའི་སེམས་ཆེན་པོ་དང༌། བྱང་ཆུབ་སེམས་དཔའི་སྤྱོད་པ་ཆེན་པོ་དང༌། བྱང་ཆུབ་སེམས་དཔའི་ཁོང་དུ་ཆུད་པ་ཆེན་པོ་དང༌། བྱང་ཆུབ་སེམས་དཔའི་རྟོགས་པ་ཆེན་པོ་དང༌། བྱང་ཆུབ་སེམས་དཔའི་སྣང་བ་ཆེན་པོ་དང༌། བྱང་ཆུབ་སེམས་དཔའི་སྐྱེ་བ་ཆེན་པོ་དང༌། བྱང་ཆུབ་སེམས་དཔའི་བྱིན་གྱི་རླབས་ཆེན་པོ་ དང༑ བྱང་ཆུབ་སེམས་དཔའི་སྤྲུལ་པ་ཆེན་པོ་དང༌། བྱང་ཆུབ་སེམས་དཔའི་རྒྱུན་ཆེན་པོ་ཡོངས་སུ་མི་གཅོད་དོ། །ལྡོག་པར་མི་བྱེད་དོ། །སྐྱོ་བར་མི་བྱེད་དོ། །གཏོང་བར་མི་བྱེད་དོ། ། འགྱེད་པར་མི་བྱེད་དོ། །སྒྱིད་ལུག་པར་མི་བྱེད་དོ། །གཞོག་པར་མི་བྱེད་དོ། །བྱང་ཆུབ་སེམས་དཔའི་རྒྱུན་མཐར་ཕྱིན་པར་མི་བྱེད་དོ། །དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའི་ཆོས་ ༄༅། །ལ་སྨོན་ལམ་ཆེན་པོས་རབ་ཏུ་གྲུབ་པ་དང༌། ཡང་དག་པར་འཇུག་པའི་འབྱུང་གནས་ཆེན་པོ་དང༌། འཇིགས་པའི་པ་མེད་པའི་སངས་རྒྱས་ཀྱི་ཆོས་རྒྱ་མཚོ་ ཆེན་པོ་ཤིན་ཏུ་བསླབས་པས། བྱང་ཆུབ་སེམས་དཔའི་སྨོན་ལམ་ཁྱད་པར་དུ་འཕགས་པ་དང་ལྡན་པའི་ཕྱིར་རོ། །བྱང་ཆུབ་སེམས་དཔའི་སྤྱོད་པ་ཁྱད་པར་ཅན་དང་ལྡན་པའི་ ཕྱིར་རོ། །ཐབས་མཁས་པའི་ཡེ་ཤེས་སྣང་བ་ལ་ཤིན་ཏུ་བསླབས་པའི་ཕྱིར་རོ། །བྱང་ཆུབ་སེམས་དཔའི་སྤྲུལ་པ་ཡོངས་སུ་ཤེས་པའི་ཕྱིར་རོ། །སེམས་ཅན་ཐམས་ཅད་ཀྱི་ གཙོ་བོས་བྱིན་གྱིས་བརླབས་པའི་ཕྱིར་རོ། །འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཐུགས་རྗེ་ཆེན་པོའི་རྗེས་སུ་སྙེགས་པའི་ཕྱིར་རོ། ། སངས་རྒྱས་ཀྱི་ཆོས་འགྱུར་བ་མེད་པ་ཡོངས་སུ་བསྒྲུབ་པའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟ་སྟེ། དཔེར་ན། མི་ལ་ལ་ཞིག་གིས་ནོར་བུ་རིན་པོ་ཆེ་སྣ་ཚོགས་ཚོན་གྱིས་བསྒྱུར་ པའི་གོས་ཀྱི་སྟེང་དུ་བཞག་ན། ནོར་བུ་རིན་པོ་ཆེ་དེ་ཡང་ཁོང་ནས་ཚོན་གྱིས་གྱུར་པར་སྣང་སྟེ། ནོར་བུ་རིན་པོ་ཆེའི་རང་བཞིན་ནི་འགྱུར་བ་མེད་དོ། །དེ་བཞིན་དུ་བྱང་ཆུབ་སེམས་དཔའ་ ཡང་ཏིང་ངེ་འཛིན་རིན་པོ་ཆེ་ཐོབ་པའི་ཡེ་ཤེས་ཀྱི་སྒོས་ཐམས་ཅད་མཁྱེན་པ་ཉིད་ལ་ཡོངས་སུ་ལྟ་ཞིང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའང་རྒྱུན་མི་གཅོད་དོ། ། ཇི་ལྟར་ནོར་བུ་རིན་པོ་ཆེ་དེ་ཁ་དོག་ཐམས་ཅད་སྟོན་ཀྱང་ནོར་བུའི་རང་བཞིན་ཡོངས་སུ་མི་སྤོང་བ་དེ་བཞིན་དུ། བྱང་ཆུབ་སེམས་དཔའ་ཡང་བྱང་ཆུབ་སེམས་དཔའི་སྤྱོད་པའི་རང་བཞིན་ ཐམས་ཅད་མཁྱེན་པའི་ཡོན་ཏན་ཅན་ཡོངས་སུ་མི་སྤོང་ངོ༌། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེ་ནི་འགྲོ་བ་ཐམས་ཅད་ཀྱི་དོན་དུ་ཡང་དག་པར་ཞུགས་པའི་ཕྱིར་རོ། ། འགྲོ་བ་ཐམས་ཅད་དགྲོལ་བར་སྨོན་པའི་ཕྱིར་རོ། །སངས་རྒྱས་ཐམས་ཅད་མཉེས་པར་བྱེད་པ་ལས་ཕྱིར་མི་ལྡོག་པའི་ཕྱིར་རོ། །འཇིག་རྟེན་གྱི་ཁམས་ཐམས་ཅད་རྣམ་པར་སྦྱོང་བས་ སྒྱིད་ལུག་པ་མེད་པའི་ཕྱིར་རོ། །འགྲོ་བ་ཐམས་ཅད་དུ་རྒྱུན་མི་འཆད་པར་སྤྱོད་པས་སྐྱོ་བ་མེད་པའི་ཕྱིར་རོ། །ཆོས་རྒྱ་མཚོ་མཐའ་དང་དབུས་མེད་ཅིང་ཚད་མེད་པས་ཡོངས་སུ་ཡི་ འཆད་པ་མེད་པའི་ཕྱིར་རོ། །སེམས་ཅན་རྣམ་པར་དག་པར་བྱ་བའི་དམིགས་པས་རྣམ་པར་འཕེལ་བ་ཐམས་ཅད་སྟོན་པའི་ལས་ཕྱིར་འགྱོད་པ་མེད་པའི་ཕྱིར་རོ། །འགྲོ་བ་ཐམས་ཅད་ ལ་རིམ་གྲོ་བྱ་བས་སྙོམས་པ་མེད་ཅིང་སྒྱིད་ལུག་པ་མེད་པའི་ཕྱིར་རོ། །འགྲོ་བ་ཐམས་ཅད་སྣང་བར་བྱ་བས་སྐྱོ་བ་མེད་པའི་ཕྱིར་རོ། །ཆོས་ཀྱི་སྒོ་མཐའ་ཡས་པ་ལ་འཇུག་པ་ལས་ཕྱིར་མི་ ལྡོག་ཅིང་ཡོངས་སུ་སྐྱོ་བ་མེད་པའི་ཕྱིར་རོ། །འདི་ལྟ་སྟེ། དཔེར་ན། ནམ་མཁའི་རང་བཞིན་ནི་འཇིག་རྟེན་གྱི་ཁམས་ཐམས་ཅད་ཡོངས་སུ་འཛིན་ཅིང་རྟེན་ཀྱང་ངལ་བ་མེད་ཅིང་དུབ་པ་མེད་ལ་ ༄༅། །ཉམ་ཆུང་བར་མི་འགྱུར་ཞིང༌། རྒ་བར་མི་འགྱུར། འཇིག་པར་མི་འགྱུར། འགྱེས་པར་མི་འགྱུར། བྱང་བར་མི་འགྱུར། རྣམ་པ་ཐ་དད་པར་མི་འགྱུར། རྣམ་ པ་གཞན་དུ་མི་འགྱུར། དངོས་པོ་གཞན་དུ་མི་འགྱུར། རང་བཞིན་རྣམ་པར་མི་སྤོང་ངོ༌། །དེ་ཅིའི་ཕྱིར་ཞེ་ན། དེ་ནི་ནམ་མཁའི་རང་བཞིན་ཆོས་ཉིད་ཀྱི་ངོ་བོ་ཉིད་ཀྱང་ཕྱིར་རོ། །དེ་བཞིན་ དུ་བྱང་ཆུབ་སེམས་དཔའ་ཡང་སྨོན་ལམ་ཆེན་པོ་རྒྱ་ཆེ་ཞིང་ཡངས་ལ་ཚད་མེད་པ་དང་ལྡན་པས། སེམས་ཅན་ཐམས་ཅད་དགྲོལ་བ་ལ་ཉེ་བར་གནས་པའི་སྒོས་སྐྱོ་ཞིང་དུབ་པའི་ སེམས་མི་སྐྱེད་དོ། །འདི་ལྟ་སྟེ། དཔེར་ན། མྱ་ངན་ལས་འདས་པ་ནི་དུས་གསུམ་གྱི་སེམས་ཅན་མཐའ་དང་དབུས་མེད་པ་དེ་སྙེད་ཅིག་ཡོངས་སུ་མྱ་ངན་ལས་ཟློ་ཡང་བར་འགའ་ཙམ་ ཡང་སྐྱོ་བ་མེད་ཅིང་སྒྱིད་ལུག་པ་མེད་དེ། ཡོངས་སུ་ཡི་ཆད་པ་མེད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། མྱ་ངན་ལས་འདས་པའི་མཐར་ཐུག་པ་འདི་ནི་ཆོས་ཐམས་ཅད་ཀྱི་དབེན་པ་ ཉིད་དེ། དེ་བས་ན་གང་ལས་ཀྱང་ཕྱིར་ནུར་བར་བྱ་བ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་འགྲོ་བ་ཐམས་ཅད་གདོན་པའི་ཕྱིར། འཇིག་རྟེན་དུ་སྐྱེས་པས་སེམས་ཅན་ ཐམས་ཅད་ཡོངས་སུ་དགྲོལ་བ་ལ་སྐྱོ་བའི་སེམས་མི་སྐྱེད་དོ། །འདི་ལྟ་སྟེ། དཔེར་ན། ཐམས་ཅད་མཁྱེན་པ་ཉིད་ལ་བྱང་ཆུབ་སེམས་དཔའ་དེ་སྙེད་ཅིག་བྱང་ཆུབ་ཀྱི་དོན་དུ་གནས་ ཀྱང་སྐྱོ་བ་དུབ་པ་མེད་དེ། འདས་པ་དང༌། མ་འོངས་པ་དང༌། ད་ལྟར་བྱུང་བ་རྣམས་སངས་རྒྱས་ཀྱི་མངའ་བསྒྱུར་བ་ལ་བསྒྲུབས་སོ། །སྒྲུབ་བོ། །བསྒྲུབ་པར་འགྱུར་རོ། །དེ་ཅིའི་ཕྱིར་ཞེ་ན། དེ་ ནི་ཟད་པ་མེད་པའི་ཆོས་ཉིད་ཐོབ་པའི་ཕྱིར་ཏེ། དེ་ལས་གཞན་དུ་འགྱུར་བ་མེད་ཅིང༌། འདུལ་བའི་ཆོས་ལ་མངོན་པར་ཆགས་པ་མེད་པས་ཕྱིར་ནུར་བ་མེད་དོ། །དེ་བཞིན་དུ་བྱང་ཆུབ་སེམས་ དཔའ་ཡང་ཐམས་ཅད་མཁྱེན་པ་ཉིད་ཀྱི་ཏིང་ངེ་འཛིན་མང་པོ་བདག་གིས་ཐོབ་པར་བྱེད་ཅིང་ཁོང་དུ་ཆུད་པར་བྱེད་དོ། །དེ་ལྟར་བྱང་ཆུབ་སེམས་དཔའ་དེའི་ཏིང་ངེ་འཛིན་དེ་ནི། འོད་ཕྱོགས་ ཐམས་ཅད་ཀྱི་མཐས་ཀླས་པར་འདལ་བ། འཇིག་རྟེན་གྱི་ཁམས་ཐམས་ཅད་དུ་འོད་ཟེར་ཐོགས་པ་མེད་པ། ཡོན་ཏན་སྣ་ཚོགས་དུ་མའི་སྙིང་པོ་ཅན་གོས་བརྗོད་དུ་མེད་པ་ཡོངས་སུ་འབྱུང་ བ༑ རིན་པོ་ཆེ་བརྗོད་དུ་མེད་པ་ཡོངས་སུ་འབྱུང་བ། སྤོས་བརྗོད་དུ་མེད་པ་ཡོངས་སུ་འབྱུང་བ། རྒྱན་དང་ལྷབ་ལྷུབ་དུ་མ་དང་ལྡན་པ། གསེར་གྱི་དྲ་བ་རྒྱ་ཆེན་པོས་ཀུན་ནས་ཡོགས་པ་། དྲིལ་བུའི་དྲ་བའི་སྒྲ་ཀུན་ནས་འབྱུང་བ། བལྟ་ན་བཟང་ཞིང་ཡིད་དུ་འོང་བ་རིན་པོ་ཆེ་སྣ་ཚོགས་བརྗོད་དུ་མེད་པའི་མཛོད་དང་ལྡན་པ། རིན་པོ་ཆེ་སྣ་ཚོགས་མང་པོ་སྟོན་པས་དག་ཅིང་ བཟང་པོ་སྤྱོད་པ། གནས་ཤིན་ཏུ་བསྟན་པ་ཐམས་ཅད་མཁྱེན་པ་ཉིད་ཀྱི་སྒོ་སྟོན་པའི་ཡོན་ཏན་ཅན། དེ་བཞིན་གཤེགས་པ་མང་པོས་བྱིན་གྱིས་བརླབས་པ། དགེ་བའི་རྩ་བ་དག་པ་ཐམས་ ༄༅། །ཅད་ཀྱིས་ཡང་དག་པར་བྱུང་བས་རྣམ་པར་སྣང་བ། དེ་བཞིན་གཤེགས་པ་ཐམས་ཅད་ཀྱི་དཔལ་གྱི་བྱིན་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ བྱིན་གྱི་རླབས་ལས་བྱུང་བ། ལུས་གཅིག་ཏུ་གནས་ཀྱང་ཕྱོགས་བཅུ་བརྗོད་དུ་མེད་ཅིང༌། ཚད་མེད་པར་བྱང་ཆུབ་སེམས་དཔའ་འབྱུང་བའི་གོ་འཕང་དང༌། ཡོན་ཏན་ཚད་མེད་པ་ གྲངས་མེད་པ་བརྒྱ་སྟོང་རྣམ་པར་དག་པ། ཕུན་སུམ་ཚོགས་པ་ཐམས་ཅད་མཁྱེན་པ་ཉིད་དུ་མཐུན་ཞིང་གནས་སུ་གྱུར་པ། སངས་རྒྱས་ཐམས་ཅད་མཁྱེན་པ་ཉིད་དུ་ མཐུན་ཞིང་གནས་སུ་གྱུར་པས། སངས་རྒྱས་ཐམས་ཅད་ཀྱི་སྣང་བ་འབྱུང་བར་བྱེད་པ། འགྲོ་བ་ཐམས་ཅད་ཀྱི་མཆོད་རྟེན་དུ་གྱུར་པ། འཇིག་རྟེན་ཐམས་ཅད་ཀྱི་ཕྱག་བྱ་ ཞིང་མདུན་དུ་བྱ་བར་འོས་པ། ཆོས་ཉིད་སྒྱུ་མ་ལྟ་བུའི་མཐུན་པའི་འབྲས་བུ་སྤྲུལ་པ་ཀུན་ཏུ་འགྱེད་པ། འགྲོ་བ་ཐམས་ཅད་ཀྱི་དཔེ་དང་དཔེ་མེད་པའི་ཡོན་ཏན་ཅན་ཏེ། དེ་ལ་ གནས་པའི་ཚེ་བྱང་ཆུབ་སེམས་དཔའ་སྐྱིལ་མོ་ཀྲུང་གཅིག་ཏུ་གནས་ཤིང༌། དེའི་བདག་ཉིད་ཡོངས་སུ་རྫོགས་པར་བྱེད་པའི་ཚེ། འཇིག་རྟེན་གྱི་ཁམས་ཐམས་ཅད་མ་ ལུས་པར་བྱང་ཆུབ་སེམས་དཔའི་སྐྱིལ་མོ་ཀྲུང་གཅིག་གིས་ཡོངས་སུ་ཁྱབ་པར་འགྱུར་ཏེ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་སྟེ་དེ་ལྟར་གནས་པའི་ ཚེ་བ་སྤུའི་ཁུང་བུ་གཅིག་ནས་ཀྱང་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འོད་ཟེར་འབྱུང་སྟེ། བ་སྤུའི་ཁུང་བུ་གཅིག་ ནས་ཇི་ལྟ་བ་དེ་བཞིན་དུ་བ་སྤུའི་ཁུང་བུ་ཐམས་ཅད་ནས་ཀྱང་འོད་ཟེར་གྱི་སྒོ་དེ་སྙེད་དེ་སྙེད་འབྱུང་ངོ༌། །འོད་ཟེར་གྱི་སྒོ་དེ་དག་རེ་རེ་ལས་ཀྱང་སངས་རྒྱས་ཀྱི་ཞིང་བྱེ་བ་ཁྲག་ཁྲིག་ བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་ནོར་བུ་རིན་པོ་ཆེ་རྣམ་པར་སྣང་བའི་སྙིང་པོ་ཅན་ཁ་དོག་དུ་མར་སྣང་བ། རྒྱན་སྣ་ཚོགས་དང་ལྡན་པ། ཡོན་ཏན་གྱི་རྣམ་པ་ དུ་མ་དང་ལྡན་པ། རིན་པོ་ཆེའི་དྲ་བ་རྒྱ་ཆེན་པོས་ཀུན་ནས་ཁེབས་པ། མེ་ཏོག་གི་དྲ་བ་རྒྱ་ཆེན་པོས་ཡོངས་སུ་ཁེབས་པ། སྤོས་རིན་པོ་ཆེ་ཁྲག་ཁྲིག་བརྒྱ་སྟོང་ཀུན་ཏུ་གཏོང་བ། རིན་པོ་ཆེའི་རྒྱན་ཡིད་དུ་འོང་བ་སྣ་ཚོགས་ཀྱི་སྙིང་པོ་ཅན། རིན་པོ་ཆེའི་གདུགས་བསམ་གྱིས་མི་ཁྱབ་པས་བཀབ་པ་འབྱུང་སྟེ། རིན་པོ་ཆེ་དེ་དག་རེ་རེ་ལས་ཀྱང་ཁང་པ་བརྩེགས་ པ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ༌། །ཁང་པ་བརྩེགས་པ་དེ་དག་རེ་རེ་ལས་ཀྱང་སེང་གེའི་ཁྲི་པདྨོའི་སྙིང་པོ་ཅན་སངས་རྒྱས་ ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ༌། །སེང་གེའི་ཁྲི་པདྨོའི་སྙིང་པོ་ཅན་དེ་དག་རེ་རེ་ལས་ཀྱང་འོད་སངས་རྒྱས་ཀྱི་ཞིང་བྱེ་བ་ ༄༅། །ཁྲག་ཁྲིག་བརྒྱ་སྟོང་གྲངས་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ༌། །འོད་དེ་དག་རེ་རེ་ལས་ཀྱང་ཁ་དོག་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་ སྟོང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་འབྱུང་ངོ༌། །ཁ་དོག་དེ་དག་རེ་རེ་ལས་ཀྱང་སྣང་བའི་དཀྱིལ་འཁོར་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་ བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ༌། །སྣང་བའི་དཀྱིལ་འཁོར་དེ་དག་རེ་རེ་ལས་ཀྱང་ནོར་བུ་རིན་པོ་ཆེ་རྣམ་པར་སྣང་བ་སྣ་ཚོགས་ཀྱི་མེ་ཏོག་སངས་རྒྱས་ཀྱི་ཞིང་བྱེ་བ་ཁྲག་ཁྲིག་ བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ༌། །མེ་ཏོག་དེ་དག་རེ་རེ་ལས་ཀྱང་རིན་པོ་ཆེ་ཐམས་ཅད་ཀྱི་རྒྱན། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྗོད་དུ་མེད་པ་ ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ༌། །རྒྱན་དེ་དག་རེ་རེ་ལས་ཀྱང་ཁྱུ་མཆོག་གི་མཐུ་ཕྱུང་བ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ ཤིན་ཏུ་ཕྲ་བ་སྙེད་འབྱུང་ངོ༌། །ཁྱུ་མཆོག་གི་མཐུ་ཕྱུང་བ་དེ་དག་རེ་རེ་ལས་ཀྱང་སངས་རྒྱས་ཀྱི་ཆོས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་ ཆར་རབ་ཏུ་འབབ་བོ། །ཆོས་ཀྱི་ཚིག་རྣམ་པར་ཕྱེ་བའི་ཆར་དེ་དག་ལས་ཀྱང་ཆོས་ཁོང་དུ་ཆུད་པར་བྱ་བར་མདོའི་ཚུལ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་རྒྱ་སྟོང་ཕྲག་བཅུའི་རྡུལ་ཤིན་ ཏུ་ཕྲ་བ་སྙེད་ཡོངས་སུ་བརྗོད་དོ། །མདོའི་ཚུལ་ཡོངས་སུ་བརྗོད་པ་དེ་དག་རེ་རེ་ལས་ཀྱང་ཆོས་ཀྱི་སྒོ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ ཕྲ་བ་སྙེད་རབ་ཏུ་སྟོན་ཏོ། །ཆོས་ཀྱི་སྒོ་རབ་ཏུ་བསྟན་པ་དེ་དག་རེ་རེ་ཞིང་ཡང་ཡེ་ཤེས་རྡོ་རྗེ་ལྟ་བུས་གཏན་ལ་ཕེབས་པའི་ཆོས་ཀྱི་འཁོར་ལོ། ཆོས་ཀྱི་རྣམ་གྲངས་སྣ་ཚོགས་དང་ལྡན་པ་ བསྟན་པ་རྒྱ་ཆེན་པོ་ཅན། ཆོས་ཀྱི་ཚིག་རྣམ་པ་ཐ་དད་པ་དང་ལྡན་པར་འཁོར་བ། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་བསྐོར་རོ།། ཆོས་ཀྱི་འཁོར་ལོ་བསྐོར་བ་དེ་དག་རེ་རེ་ཞིང་ཡང་སེམས་ཅན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྨིན་ པར་བྱེད་དོ། །སེམས་ཅན་གྱི་ཁམས་ཡོངས་སུ་སྨིན་པར་བྱ་བ་འབྱམས་ཀླས་པ་དེ་དག་རེ་རེ་ཞིང་ཡང་སེམས་ཅན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་ མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སངས་རྒྱས་ཀྱི་ཆོས་ལ་འདུལ་ཏེ། དེ་ལྟར་སྙོམས་པར་ཞུགས་ཤིང་རྣམ་པར་འཕྲུལ་པ་རྒྱ་ཆེན་པོ་སྟོན་པ། ཏིང་ངེ་འཛིན་གྱི་ཡུལ་ཟིལ་ གྱིས་མི་ནོན་པ་སྤྲུལ་པའི་སྒྱུ་མ་སྣ་ཚོགས་ལ་མངོན་པར་ཞེན་པ་མེད་པ། རང་བཞིན་ཚད་མེད་པ། མཐའ་དང་དབུས་མེད་པ། བརྗོད་དུ་མེད་པ་དང་ལྡན་པ། ཆོས་ཀྱི་དབྱིངས་རྡུལ་མེད་ ༄༅། །པའི་རང་བཞིན་ཅན། ཡང་དག་པའི་མཐའི་མཚན་ཉིད་ཅན། དེ་བཞིན་གཤེགས་པའི་རིགས་ལ་སྤྱོད་པ། ཆགས་པ་མེད་པའི་མཐར་ཐུག་པ། གནས་མེད་པ། ལེན་པ་མེད་པ། རྩ་བ་མེད་པ། ཟབ་པ། གཏིང་དཔག་དཀའ་བ། མངོན་སུམ་དུ་ཁོང་དུ་ཆུད་པས་རབ་ཏུ་རྟོག་པ། ཚད་མེད་པ། རྨོངས་པ་མེད་པ། གཞི་མེད་པ། ཆོས་ཀྱི་དབྱིངས་ཀྱི་གནས་ གཞི་མེད་པ་དང་ལྡན་པ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱིས་བསྔགས་པ། དེ་བཞིན་གཤེགས་པའི་སྟོབས་དང་རྒྱུ་མཐུན་པའི་འབྲས་བུ་ ཅན༑ སངས་རྒྱས་ཀྱི་ཡུལ་གྱི་རྗེས་སུ་སྙེགས་པ། བྱང་ཆུབ་སེམས་དཔའི་ཚེ་གཅིག་པའི་མངོན་སུམ་དུ་གྱུར་པ། བྱང་ཆུབ་སེམས་དཔའི་མིག་རྡུལ་མེད་པ་དང་ལྡན་པ། ཤེས་རབ་ཀྱི་ མིག་ཀུན་ཏུ་སྤྱོད་པ་ཅན། ཤའི་མིག་རྡུལ་དང་བྲལ་ཞིང་རྡུལ་མེད་པར་ཡང་དག་པར་སྐྱེས་པ། སངས་རྒྱས་ཀྱི་སྤྱན་ཀུན་ཏུ་སྣང་བ་ཅན། ཡེ་ཤེས་ཀྱི་མིག་ཅེས་བྱ་བའི་དོན་གྱི་ཡུལ་དང༌། རྣམ་པ་རབ་ཏུ་སྟོན་པ་ཅན་ཆོས་ཀྱི་སྒོ་འབྱེད་པའི་སྐྱེས་བུ་དམ་པ་ཡང་དག་པར་ཞུགས་པའི་བྱང་ཆུབ་ཀྱི་སེམས་ཡོངས་སུ་རྫོགས་པ། ཡུལ་ལ་ཐོགས་པ་མེད་པ། ཡེ་ཤེས་ཀྱི་རྣམ་ པའི་འབྱུང་གནས་སུ་གྱུར་པ། འཇིག་རྟེན་ཐམས་ཅད་ལས་མངོན་པར་འཕགས་པ། སྐྱེ་བ་མེད་པ་ཡང་དག་པར་བྱུང་བ། རྣམ་པར་འཕྲུལ་པས་སྐྱེ་བ་ཀུན་ཏུ་སྟོན་པ། བྱིན་གྱི་རླབས་ མི་ཡུལ་ལ་མཁས་པ། ཡོན་ཏན་མཆོག་གིས་རྣམ་པར་དག་པ། བསམ་པ་འོད་གསལ་བའི་སྙིང་པོ་ཅན། མོས་པ་ཤིན་ཏུ་དག་པས་ཡེ་ཤེས་ནམ་མཁའི་དབྱིངས་ཀུན་ནས་ཁེབས་པ་དང་ ལྡན་པ། འཕགས་པའི་ཚོགས་ཀྱིས་བལྟ་བར་འོས་པ། སྨོན་ལམ་མངོན་དུ་གྱུར་པ། འདོད་པ་ཡོངས་སུ་རྫོགས་པ། ཡོན་ཏན་བསྔགས་པ་ཟད་མི་ཤེས་པ། སངས་རྒྱས་ཐམས་ཅད་ཀྱི་ ལྷག་མཐོང་གི་མཛོད་དུ་གྱུར་པ། སངས་རྒྱས་ཀྱི་བྱང་ཆུབ་ཀྱི་འབྱུང་གནས་རྒྱ་མཚོར་གྱུར་པ་ཡེ་ཤེས་རིན་པོ་ཆེ་ཐམས་ཅད་ཀྱིས་ཤིན་ཏུ་བརྒྱན་པ། ཡེ་ཤེས་ཀྱི་སྐྱེས་བུ་པུཎྜ་རི་ཀར་བྱུང་ བ༑ སེམས་ཅན་གྱི་དོན་མཐའ་དང་དབུས་མེད་པར་རབ་ཏུ་སྒྲུབ་པ། སངས་རྒྱས་ཀྱི་ཡེ་ཤེས་མུ་མེད་པ་ལ་ཞུགས་པའི་འོད་ཟེར་གྱིས་སྣང་བར་གྱུར་པ། ཡེ་ཤེས་ཀྱི་འོད་ཡོངས་སུ་སྣང་ བ༑ ཆོས་རྣམ་པར་དག་པ་སྣང་བས་ཀུན་ཏུ་སྤྱོད་པ། ཤིན་ཏུ་དབེན་པའི་སྒོར་གྱུར་པ། སངས་རྒྱས་ཀྱི་ཆོས་ཐམས་ཅད་ལ་ཐོགས་པ་མེད་པར་དམིགས་པའི་ཡེ་ཤེས་ཀྱི་མཐར་ཐུག་པ་། སངས་རྒྱས་ཐམས་ཅད་ཀྱི་བྱང་ཆུབ་ཀྱི་ཐབས་དང་ལྡན་པ། ཡོན་ཏན་གྱི་སྤྱོད་པ་ལས་བྱུང་བ། སྐྱེས་བུ་དམ་པ་བྱང་ཆུབ་སེམས་དཔའི་ཚུལ་རབ་ཏུ་ཤེས་པ། བྱང་ཆུབ་སེམས་དཔའི་ བཅུན་སྤུ་ལ་རབ་ཏུ་གནས་པ། སངས་རྒྱས་ཐམས་ཅད་ཀྱིས་ཡང་དག་པར་དགོངས་པས་རབ་ཏུ་ཞུགས་པ། སངས་རྒྱས་ཀྱི་ཆོས་ཀྱི་སྐུའི་བྱིན་དང༌། སྙིང་པོ་ཅན། དྲན་པ་བསམ་གྱིས་མི་ ༄༅། །ཁྱབ་པ་རྩེ་གཅིག་ཏུ་གྱུར་པ། དམིགས་པ་མེད་པའི་ཡུལ་དང་མཚན་མ་སྟོན་པ། ཤིན་ཏུ་ཡངས་པ་ལས་ཡང་དག་པར་བྱུང་བའི་རྒྱུད་ཅན། ཆགས་པ་མེད་ པའི་སྤྱོད་ཡུལ་དུ་ཁོང་དུ་ཆུད་པའི་ཆོས་ཀྱི་དབྱིངས་ཀྱིས་བྱང་ཆུབ་ཚད་མེད་པ་ནམ་མཁའི་དབྱིངས་ལྟར་ཡངས་ཤིང་ས་མཚམས་མེད་པའི་སངས་རྒྱས་ཀྱི་ཡུལ་གྱིས་འཇིག་རྟེན་ཐམས་ ཅད་དུ་སེམས་ཅན་གྱི་དོན་བྱེད་པ། ཐམས་ཅད་མཁྱེན་པའི་དགེ་བའི་རྩ་བ་དང་རྒྱུ་མཐུན་པའི་ཡེ་ཤེས་ཚད་མེད་པའི་ཡུལ་རྣམ་པར་ནོན་པ། དག་ཅིང་དྲག་ཤུལ་ཆེ་བའི་ཡེ་ཤེས་ ཀྱིས་གྲུབ་པ། བྱང་ཆུབ་སེམས་དཔའི་བསམ་པ་དང་ཡང་དག་པར་འགྲོགས་པ། བྱང་ཆུབ་སེམས་དཔའ་ཐམས་ཅད་ཀྱི་རིགས་དག་པར་བྱེད་པ་དེ་བཞིན་གཤེགས་པའི་བྱང་ ཆུབ་ཡིད་དུ་འོང་བ་དང་ལྡན་པ། སངས་རྒྱས་དང་བྱང་ཆུབ་སེམས་དཔའི་ཆོས་ཐམས་ཅད་ཀྱིས་ཁ་ན་མ་ཐོ་བ་མེད་པའི་ཚུལ་ཤིན་ཏུ་ཕྲ་བའི་ཐབས་ཤེས་པ། རྟོགས་པ་རྡོ་རྗེ་ལྟ་ བུའི་སྟོབས་དང་མཐུས་བྱུང་བ། སངས་རྒྱས་ཀྱི་བྱིན་གྱི་རླབས་ཀྱིས་རྟོགས་པར་གྱུར་པ། སེམས་ཅན་གྱིས་ཐོས་པར་དཀའ་བ། མི་གཉིས་པའི་སྒོར་ཞུགས་པ། ཆོས་ཀྱི་ཚུལ་མཚན་ ཉིད་མེད་པ་ལ་གཞོལ་བ། མཚན་མའི་རྒྱུད་ཀྱིས་ཆོས་སྟོན་པ་ཐམས་ཅད་ལས་ཤིན་ཏུ་འཕགས་པ། སེམས་ཅན་བསམ་པ་བཞིན་དུ་འདུལ་བ་ཡང་དག་པར་སྟོན་པ། དད་པ་ཇི་ ལྟ་བ་བཞིན་དུ་འགྲོ་བ་ཚིམ་པར་བྱེད་པ། ཆོས་ཀྱི་དབྱིངས་ཐ་མི་དད་པའི་རང་བཞིན་ཅན་ཡེ་ཤེས་མི་ཟད་པའི་ཡུལ་ཤིན་ཏུ་ནོན་པ། བྱང་ཆུབ་སེམས་དཔའི་མཐུ་ཆེན་པོས་བྱུང་བ། བྱང་ཆུབ་སེམས་དཔའི་མཉམ་པ་ཉིད་ཐུབ་པ་མེད་པ་རབ་ཏུ་ཐོབ་པ། དེ་བཞིན་གཤེགས་པ་མཐོང་བའི་ཡོན་ཏན་ལ་འཇུག་པ་ཐམས་ཅད་ཀྱི་མཐའི་རྗེས་སུ་འགྲོ་བ་རྣམ་པར་ཕྱེ་བ་ ཐམས་ཅད་ལ་མཁས་པའི་ཡེ་ཤེས་དང་ལྡན་པ། ཆོས་ཀྱི་རྣམ་གྲངས་ཡོངས་སུ་སྟོན་པ། ཞིང་ཐམས་ཅད་རྣམ་པར་དམིགས་པར་བྱ་བ་ལ་རབ་ཏུ་གཞོལ་བ། ཞིང་དག་པར་བྱ་ པར་དགང་བ་ཐམས་ཅད་ཀྱི་རྒྱན་དུ་གྱུར་པ། སངས་རྒྱས་ཀྱི་ཆོས་སྣང་བ་ཐམས་ཅད་ཡང་དག་པར་སྟོན་པ། བྱང་ཆུབ་སེམས་དཔའི་གནས་ཀྱིས་བྱུང་བ། འདས་པ་དང༌། མ་བྱོན་པ་ དང༑ ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཆོས་རབ་ཏུ་བརྗོད་པ། འཇིག་རྟེན་ཐམས་ཅད་ལ་རྣམ་པར་ལྟ་བ། དགེ་བ་མཐའ་དང་མུ་མེད་པས་ཡང་དག་པར་བྱུང་བ། འཇིག་ རྟེན་གྱི་རྩོམ་པ་ཐམས་ཅད་ལས་རྣམ་པར་འདས་པ། སངས་རྒྱས་ཀྱི་འཇིག་རྟེན་ལས་འདས་པ་ཤིན་ཏུ་བྱུང་བ། མཚུངས་པ་མེད་པ་དང་འདྲ་བ་མེད་པའི་དབང་གིས་ཤེས་པར་གྱུར་ པ༑ མཁས་པས་ཁོང་དུ་ཆུད་པ། སྐྱེས་བུ་དམ་པས་ཡང་དག་པར་བསུ་བ། མ་བྱོན་པའི་སངས་རྒྱས་ཐམས་ཅད་ཀྱི་རྒྱུད་ཡོངས་སུ་འཛིན་པ། བྱང་ཆུབ་སེམས་དཔའི་དགེ་བའི་བཤེས་ ༄༅། །གཉེན་གྱིས་བྱུང་བ། ལྷག་པའི་བསམ་པ་རྣམ་པར་དག་པས་འབྲས་བུ་ཡོངས་སུ་གྲུབ་པ། ལྷག་པའི་བསམ་པ་ཆེ་བ་ཉིད་ལ་གནས་པ་རབ་ཏུ་ཐོབ་པ། མཉམ་ པ་དང་བསྟན་པའི་དགེ་བའི་རྩ་བ་ཐོབ་པར་བྱ་བ་རབ་ཏུ་ཐོབ་པ། ཆོས་ཐམས་ཅད་ལ་ཆགས་པ་མེད་པར་གནས་པའི་མཐའི་དཀྱིལ་འཁོར་དང་ལྡན་པ། གཡོ་བ་མེད་པར་ཀུན་ཏུ་སྤྱོད་ པ༑ རློམ་སེམས་ཐམས་ཅད་རྣམ་པར་འཇིག་པ། གཡོ་བ་ཐམས་ཅད་ལས་ཡང་དག་པར་ལངས་པ། ཆོས་ལ་གནས་པས་ཡེ་ཤེས་རྣམ་པར་སྣང་བ་དང་ལྡན་པ། མུན་པ་མེད་ པ་ལ་ཞུགས་པ། སངས་རྒྱས་ཀྱི་ཆོས་ཐམས་ཅད་ལ་ཡང་དག་པར་ཞུགས་པས་སྣང་བ་ཐོབ་པ། འགགས་པ་མེད་པར་སྲིད་པ་ཐམས་ཅད་ལས་ཤིན་ཏུ་འཕགས་པ། སྲིད་པ་ཐམས་ ཅད་ཁོང་དུ་ཆུད་པ། འདུས་བྱས་ཐམས་ཅད་ཡུལ་དུ་གྱུར་པའི་ཐ་དད་པ་ཡང་དག་པར་ཤེས་པ་དང་ལྡན་པ། མངོན་པར་འདུ་བྱ་བ་མེད་པའི་རང་བཞིན་དང་ངོ་བོ་ཉིད་ཅན། ལུས་ ཀྱི་ལས་མཐའ་ཡས་པ་དང་ལྡན་པ། ངག་གིས་ལས་མུ་མེད་པ་དང་ལྡན་པ། ཡིད་ཀྱི་ལས་མཐའ་དང་དབུས་མེད་པ་དང་ལྡན་པ། ཐ་སྙད་དང་ཡི་གེའི་རྒྱུད་བརྗོད་དུ་མེད་པ་དང་ལྡན་ པ༑ སངས་རྒྱས་ཀྱི་ཡོན་ཏན་རྒྱ་མཚོ་ལ་ཞུགས་པ། འདུ་ཤེས་ཀྱི་རྣམ་པ་ཐམས་ཅད་ཁོང་དུ་ཆུད་པས་ཆགས་པ་མེད་ཅིང་བཅིངས་པ་མེད་པ། འདུ་ཤེས་ཐམས་ཅད་དང་བྲལ་བའི་ ཡུལ་ལ་ཤིན་ཏུ་བསྒོམས་པ། ཆོས་ཀྱི་དབྱིངས་གཟུགས་མེད་པ། ནམ་མཁའི་རང་བཞིན་ལྟ་བུས་ཡང་དག་པར་བྱུང་བ། ཆོས་ཐམས་ཅད་ནམ་མཁའ་ལྟ་བུར་རྣམ་པར་བསྒོམས་པ་ལ་ རབ་ཏུ་ཞུགས་པ། ཆོས་ཀྱི་དབྱིངས་བསྟན་པ་ལ་ཡེ་ཤེས་དབང་དུ་གྱུར་པ་ཐམས་ཅད་མཁྱེན་པའི་ཡུལ་མ་འདྲེས་པའི་སྒོ་མངོན་པར་སྒྲུབ་པ་སྟོབས་བཅུའི་སར་ཤེས་པར་བྱ་བ་ཤིན་ཏུ་ བསླབས་པ། ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་སྟེགས་དང་ལྡན་པ། ཆོས་ཐམས་ཅད་ལ་ལྷག་མཐོང་གི་ཡེ་ཤེས་དང་ལྡན་པ། བྱང་ཆུབ་སེམས་དཔའི་ཆོས་དེ་དང་དེ་དག་རྣམ་ པར་དགོད་པའི་དོན་ཁོང་དུ་ཆུད་པར་བྱ་བ་ལ་ཡེ་ཤེས་ཀྱི་མིག་གིས་ཞི་གནས་ཀྱིས་ཡང་དག་པར་ནོན་ཅིང༌། ཡེ་ཤེས་ཆེན་པོ་བསྒོམ་པས་རྣམ་པར་སྣང་བར་གྱུར་པའི་ཁྱད་པར་ཅན་གྱི་ སྨོན་ལམ་དང་ལྡན་པ་རབ་ཏུ་སྟོན་པ། སངས་རྒྱས་ཐམས་ཅད་ཀྱི་དེ་བཞིན་གཤེགས་པའི་མཐུ་ཐ་དད་པ་མེད་པ་སྟོན་པ་སྟེ། དེ་ཉིད་ཆགས་པ་མེད་པའི་སྒོའི་ཚུལ་ལོ། །དེ་ཉིད་བྱང་ཆུབ་ སེམས་དཔའ་མང་པོའི་འབྱུང་བའོ། །དེ་ཉིད་བྱང་ཆུབ་སེམས་དཔའི་མཐུས་ཐམས་ཅད་མཁྱེན་པའི་བརྩོན་འགྲུས་ལ་འཇུག་པ་སྟེ། ཆགས་པ་མེད་པ་ལ་གནས་པར་བྱ་བའི་ཕྱིར་ ཞིང་རྣམས་ཀྱི་ཞིང་ངོ༌། །སེམས་ཅན་མེད་པའི་མཐའ་ལ་གནས་པར་བྱ་བའི་ཕྱིར། སེམས་ཅན་གྱི་ཁམས་རྣམས་འདུལ་བའོ། །དམིགས་པ་ཐམས་ཅད་མི་དམིགས་པར་བྱ་བའི་ཕྱིར་ ༄༅། །སངས་རྒྱས་ཀྱི་ཆོས་ཐམས་ཅད་རབ་ཏུ་སྟོན་པའོ། །རྟོག་པ་ཐམས་ཅད་ལས་རབ་ཏུ་དབེན་པར་བྱ་བའི་ཕྱིར་གཉིས་སུ་མེད་པ་ཤིན་ཏུ་སྟོན་པའོ། །གཉིས་སུ་ མེད་པའི་དོན་དུ་མངོན་པར་འདུ་བྱ་བ་མེད་པ་ཐམས་ཅད་ཀྱི་མངོན་པར་འདུ་བྱེད་པ་རབ་ཏུ་བརྗོད་པའོ། །གཟུགས་སུ་དམིགས་པ་མེད་ཀྱང་གཟུགས་ཀྱི་གྲངས་སུ་བསྟན་པ་དང༌། ཚོར་བའི་ཡུལ་མེད་ཀྱང་ཚོར་བའི་ཡུལ་དུ་བརྗོད་པའི་ཕྱིར་སངས་རྒྱས་ཐམས་ཅད་ཀྱི་བདག་ཉིད་ཆེད་དུ་བརྗོད་པའོ། །ཕྱིན་ཅི་ལོག་ཐམས་ཅད་ཀྱང་བྱང་ལ། འདུ་ཤེས་ཀྱི་ གནས་ཐམས་ཅད་ཀྱང་ཡོངས་སུ་སྟོན་པའོ། །མངོན་པར་འདུ་བྱ་བ་མེད་པར་ཡང་སྟོན་ལ། འདུ་བྱེད་ཐམས་ཅད་ཀྱང་རབ་ཏུ་བརྗོད་པའོ། །འདུ་བྱེད་ཐམས་ཅད་ཀྱང་རྣམ་ པར་མི་དམིགས་ལ། ཆོས་ཐམས་ཅད་རྣམ་པར་ཤེས་པར་ཡང་རབ་ཏུ་བརྗོད་པའོ། །ཆོས་ཀྱི་འཁོར་ལོ་ཡང་བྱིན་གྱིས་རློབ་ལ། ཆོས་ཐམས་ཅད་བརྗོད་དུ་མེད་པར་ཡང་ རབ་ཏུ་སྟོན་པའོ། །ཆོས་ཐམས་ཅད་ལའང་རྒྱུ་བ་མེད་ལ། ཆོས་ཀྱི་འཁོར་ལོ་ཡང་ཤིན་ཏུ་བསྐོར་བའོ། །ཆོས་ཐམས་ཅད་ལའང་རྣམ་པ་ཐ་དད་པ་མེད་ལ། རྣམ་པར་དབྱེ་བ་ ཡང་ཡོངས་སུ་སྟོན་པའོ། །ཆོས་ཐམས་ཅད་ལ་སྐྱེ་བ་མེད་པར་ཡང་སྟོན་ལ། གཟུགས་རྣམས་འཇིག་པའི་མཚན་ཉིད་དུའང་བརྗོད་པའོ། །ཆོས་ཐམས་ཅད་ཤིན་ཏུ་ཕྲ་བར་ ཡང་ཁོང་དུ་ཆུད་ལ། ཕྲ་བ་རྣམས་ཤིན་ཏུ་ཡངས་པར་ཡང་སྟོན་པའོ། །བླ་ན་མེད་པའི་ཆོས་ཀྱང་སྦྱིན་པར་བྱེད་ལ། གོང་མའི་གོ་འཕང་ཤེས་པར་བྱ་བའང་རབ་ཏུ་སྟོན་པའོ། །ཆོས་ཐམས་ ཅད་བརྗོད་དུ་མེད་པར་ཡང་བརྗོད་པ། བརྗོད་པའི་ཚིག་དང་ཡི་གེའི་རྒྱན་རྣམ་པར་དག་པ་ཡང་རབ་ཏུ་སྟོན་པའོ། །ཕྱི་དང་ནང་གི་ཆོས་མེད་པར་བསྟན་པ་ལའང་ཤིན་ཏུ་མཁས་ལ། ཆོས་ ཐམས་ཅད་སེམས་མེད་ཅིང་བཏགས་པའི་རྒྱུད་ཇི་ལྟ་བ་བཞིན་དུའང་རབ་ཏུ་སྟོན་པའོ། །ཡོངས་སུ་འགྲུབ་པ་ཚད་མེད་པས་འབྱུང་བ་ཡང་ཁོང་དུ་ཆུད་ལ། བྱང་བའི་མཐར་ཕྱིན་པས་ཆོས་ ཐམས་ཅད་ཟག་པ་ཟད་པར་ཡང་རབ་ཏུ་སྟོན་པའོ། །ཆོས་ཐམས་ཅད་ལ་ཉོན་མོངས་པ་མེད་པར་ཡང་ཁོང་དུ་ཆུད་ལ། རང་འབྱུང་གི་འདུ་ཤེས་ཀྱང་རབ་ཏུ་བརྗོད་པའོ། །ཆོས་ཐམས་ ཅད་ལ་སློབ་དཔོན་མེད་པར་ཡང་ཤིན་ཏུ་སྟོན་ལ། བླ་མ་ལ་བརྟེན་ཅིང་སྟེན་པར་ཡང་རབ་ཏུ་སྟོན་པའོ། །ཆོས་ཐམས་ཅད་གཞན་གྱི་དྲིང་མི་འཇོག་པར་ཡང་ཤེས་ལ། དགེ་བའི་བཤེས་ གཉེན་གྱི་སྤྱོད་ཡུལ་ཡང་རབ་ཏུ་བརྗོད་པའོ། །ཆོས་ཐམས་ཅད་རྒྱུ་བ་མེད་པར་ཡང་བརྗོད་ལ། ཆོས་ཀྱི་འཁོར་ལོ་བསྐོར་བའང་ཤིན་ཏུ་སྟོན་པའོ། །ཆོས་ཐམས་ཅད་འབྱུང་བ་མེད་པར་ ཡང་རབ་ཏུ་ཤེས་ལ། རྒྱུ་ལས་འབྱུང་བའང་ཡོངས་སུ་མི་གཏོང་བའོ། །ཆོས་ཐམས་ཅད་ཐོག་མ་མེད་པར་ཡང་རབ་ཏུ་བརྗོད་ལ། སྔོན་གྱི་མཐའི་མུ་ཡང་རབ་ཏུ་སྦྱོང་བའོ། །ཆོས་ ༄༅། །ཐམས་ཅད་འོང་བ་མེད་པར་ཡང་ཁོང་དུ་ཆུད་ལ། འོང་བའི་མཐའ་ཡང་རབ་ཏུ་བརྗོད་པའོ། །ཆོས་ཐམས་ཅད་མ་འོངས་པ་དང༌། ད་ལྟར་བྱུང་བ་མེད་ པར་ཡང་རབ་ཏུ་སྟོན་ལ། ད་ལྟར་བྱུང་བར་ཡང་ཤིན་ཏུ་སྟོན་པའོ། །བྱ་བ་མེད་པའི་ལམ་ཡང་ཡོངས་སུ་བརྗོད་ལ། བྱ་བའི་ལམ་ཡང་ཤིན་ཏུ་སྟོན་པའོ། །ཆོས་ཐམས་ཅད་ རྒྱུ་མེད་པར་ཡང་རབ་ཏུ་ཤེས་ལ། རྒྱུ་བསགས་པར་ཡང་རབ་ཏུ་བརྗོད་པའོ། །ཆོས་ཐམས་ཅད་མཉམ་པ་མེད་པར་ཡང་སྟོན་ལ། མཉམ་པ་ཉིད་ཀྱི་ལམ་གྱི་ལམ་གོལ་ བའང་རབ་ཏུ་བརྗོད་པའོ། །ཆོས་ཐམས་ཅད་ཚིག་གི་ལམ་དང་བྲལ་བར་ཡང་སྟོན་ལ། དུས་གསུམ་ཤིན་ཏུ་བསྟན་པའང་ཤིན་ཏུ་རྟོགས་པར་བྱེད་པའོ། །ཆོས་ཐམས་ ཅད་གནས་པ་མེད་པར་ཡང་སྟོན་ལ། གནས་ཤིན་ཏུ་གཞོམ་པ་ལ་རབ་ཏུ་མཁས་པའོ། །ཆོས་ཐམས་ཅད་ལུས་མེད་ཀྱང་འདས་པ་དང༌། མ་བྱོན་པ་དང༌། ད་ལྟར་བྱུང་བའི་ སངས་རྒྱས་ཐམས་ཅད་ཀྱི་སྐུ་ཡང་རབ་ཏུ་ཐོབ་པར་བྱེད་པའོ། །འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱང་ཤིན་ཏུ་སྟོན་ལ། སངས་རྒྱས་ གཅིག་པར་བསྟན་པ་ཡང་རབ་ཏུ་སྟོན་ཏོ། །ཆོས་ཐམས་ཅད་ལ་བརྗོད་པ་མེད་པར་ཡང་ཁོང་དུ་ཆུད་ལ། ཆོས་ཐམས་ཅད་ཡོངས་སུ་བརྗོད་པའང་རབ་ཏུ་སྟོན་ཏོ། །ཆོས་ ཐམས་ཅད་བལྟར་མེད་པར་ཡང་སྟོན་ལ། ལྟ་བའང་རབ་ཏུ་བརྗོད་པའོ། །ཆོས་ཐམས་ཅད་ལ་མཐའ་མེད་པར་ཡང་སྟོན་ལ། ཆོས་བསྟན་པའི་རྣམ་པས་ཀྱང་རབ་ཏུ་བརྗོད་པའོ།། ཆོས་ཐམས་ཅད་ལ་ཡུལ་མེད་ཀྱང་ཡེ་ཤེས་ཀྱི་ཡུལ་དུ་རབ་ཏུ་བརྗོད་པའོ། །ཆོས་ཀྱི་རྣམ་གྲངས་ཐམས་ཅད་ཁྱད་པར་མེད་ཀྱང་འབྲས་བུའི་ཁྱད་པར་རྣམ་པར་སྦྱང་བ་རབ་ཏུ་སྟོན་ པའོ༑ ༑ཆོས་ཐམས་ཅད་ལ་འབྱུང་བ་མེད་ཀྱང་སྤྱོད་པས་འབྱུང་བའི་ཁྱད་པར་རབ་ཏུ་སྟོན་པའོ། །ཆོས་ཐམས་ཅད་ཀུན་ཏུ་ཁྱབ་པ་ཡིན་ཡང་མདོས་ཡོངས་སུ་བརྗོད་པ་ཤིན་ཏུ་སྟོན་པའོ། ། ཆོས་ཐམས་ཅད་ལ་སྣང་བ་མེད་ཀྱང་སྣང་བ་ཡོངས་སུ་བརྗོད་པའི་ཕྱིར་རྣམ་པར་སྣང་བར་བྱེད་པ་སྟེ། དེ་ལྟར་རྒྱ་ཆེ་བའི་ཏིང་ངེ་འཛིན་གྱི་ཡེ་ཤེས་ཀྱི་དཀྱིལ་འཁོར་ཆེན་པོ་ལ་བྱང་ ཆུབ་སེམས་དཔའ་རྣམས་འཇུག་གོ །ཁོང་དུ་ཆུད་པར་བྱེད་དོ། །ཐོབ་པར་བྱེད་དོ། །རྗེས་སུ་སྙེགས་པར་བྱེད་དོ། །ཤིན་ཏུ་སྒྲུབ་པར་བྱེད་དོ། །ཡོངས་སུ་རྫོགས་པར་བྱེད་དོ། །ཤིན་ཏུ་ གསོག་གོ །ཡོངས་སུ་སྦྱོང་ངོ༌། །སྙོམས་པར་འཇུག་གོ །ཆོས་ཐམས་ཅད་དེའི་ཆོས་ཉིད་དང༌། རང་བཞིན་དང༌། ཡེ་ཤེས་ཀྱི་སྙིང་པོའི་ཚུལ་གྱིས་སངས་རྒྱས་ཐམས་ཅད་ཀྱི་ཆོས་ཁོང་དུ་ ཆུད་པར་བྱེད་ཀྱང༌། བྱང་ཆུབ་སེམས་དཔའ་དེ་ནི་འདི་སྙམ་དུ་མི་སེམས་ཏེ། བྱང་ཆུབ་སེམས་དཔའ་ནི་འདི་སྙེད་གཅིག་གོ །བྱང་ཆུབ་སེམས་དཔའི་ཆོས་ནི་འདི་སྙེད་གཅིག་གོ །བྱང་ཆུབ་ ༄༅། །སེམས་དཔའི་མཐར་ཐུག་པ་ནི་འདི་ཙམ་ཞིག་གོ །སྤྲུལ་པའི་བྱིན་གྱིས་རླབས་ནི་འདི་ཙམ་ཞིག་གོ །མངོན་པར་ཤེས་པ་བསྒྲུབ་པ་ནི་འདི་སྙེད་ཅིག་གོ །ཡེ་ཤེས་ ནི་འདི་ཙམ་ཞིག་གོ །ངེས་པར་རྟོགས་པར་བྱ་བ་ནི་འདི་ཙམ་ཞིག་གོ །རྗེས་སུ་སྙེགས་པ་ནི་འདི་ཙམ་ཞིག་གོ །འཇུག་པར་བྱ་བ་ནི་འདི་ཙམ་ཞིག་གོ །བྱང་ཆུབ་སེམས་དཔའི་ཡུལ་ནི་ འདི་ཙམ་ཞིག་གོ་སྙམ་དུ་སེམས་པ་མེད་དོ།། །།བམ་པོ་ལྔ་བཅུ་དགུ་པ། དེ་ཅིའི་ཕྱིར་ཞེ་ན། དེ་ནི་འདི་ལྟར་བྱང་ཆུབ་སེམས་དཔའི་ཏིང་ངེ་འཛིན་རྣམས་ནི་རྣམ་པ་དེ་ལྟ་བུ་ སྟེ༑ དེ་ལྟར་ཚད་མེད་པའི་ཕྱིར་རོ། །བྱང་ཆུབ་སེམས་དཔའི་ཏིང་ངེ་འཛིན་རྣམས་ནི་དེ་ལྟ་བུའི་ཁྱད་པར་དང་ལྡན་པའི་ཕྱིར་རོ། །དེ་དག་ནི་གཞན་དང་གཞན་གྱིས་བསྐྱེད་པ། གཞན་ དང་གཞན་དུ་བྱིན་གྱིས་བརླབས་པ། གཞན་དང་གཞན་དུ་རྒྱུ་བ། ཆོས་རྣམ་པ་སྣ་ཚོགས་ཀྱི་སྒོ་ཅན་ཡེ་ཤེས་ཀྱི་སྒོ་བརྗོད་དུ་མེད་པ། བློས་རྣམ་པར་བརྟག་ཅིང་རྣམ་པ་དབྱེ་བས་ཁྱད་ པར་གྱི་མཐའ་མེད་པ་ངེས་པར་རྟོགས་པ་གྲངས་མེད་པས་ཁོང་དུ་ཆུད་པ། ཡེ་ཤེས་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པས་རྒྱ་ཆེ་བ། སངས་རྒྱས་མཐོང་བ་སྣ་ཚོགས་ཀྱི་མཛོད་ དུ་གྱུར་པས། མཐའ་དང་དབུས་མེད་པ་མོས་པས་རྣམ་པར་དག་པ། དབང་པོ་ཤིན་ཏུ་ཡངས་པ། མངོན་པར་ཤེས་པ་རབ་ཏུ་རྣོ་བ། བསགས་པ་མེད་པའི་སྤྱོད་ཡུལ་ཅན། ཀུན་ ཏུ་ལྟ་བས་རབ་ཏུ་ཐོབ་པ། སངས་རྒྱས་ཐམས་ཅད་ལྟ་བས་གྲུབ་པ། ཀུན་ཏུ་བཟང་པོའི་ལྷག་པའི་བསམ་པས་བསྒྲུབས་པ། ཡེ་ཤེས་ཀྱི་རྒྱལ་པོའི་སྐུ་ལས་བྱུང་བ། དེ་བཞིན་གཤེགས་ པས་བསྟན་པའི་ཡེ་ཤེས་ཚད་མེད་པ་རྣམ་པར་འཕྲུལ་བའི་རྣམ་པར་ཕྱེ་བ་མཐའ་དང་དབུས་མེད་པ། སངས་རྒྱས་ཐམས་ཅད་ཀྱི་ཡེ་ཤེས་ཟད་མི་ཤེས་པ་ལས་གོལ་བ་མེད་པའི་སྒོ་ ཅན༑ སངས་རྒྱས་ཀྱི་ཡུལ་ཐམས་ཅད་མངོན་སུམ་དུ་གྱུར་པ། བྱང་ཆུབ་སེམས་དཔའ་ཀུན་ཏུ་བཟང་པོའི་ཡེ་ཤེས་ཀྱི་ཁྱུ་མཆོག་གི་མཐུ་ཕྱུང་བས་རྣམ་པར་སྤྱང་བ། སྒོ་ཐམས་ཅད་ ཀྱི་དཀྱིལ་འཁོར་རབ་ཏུ་སྐྱེས་པས་དཔེ་མེད་པར་བརྗོད་པ། དམིགས་པ་ཤིན་ཏུ་ཕྲ་བས་ཆོས་ཀྱི་དབྱིངས་ཐམས་ཅད་ལ་ཡང་དག་པར་གཞོལ་བ། ཆོས་ཀྱི་དབྱིངས་ཐམས་ཅད་མ་ལུས་ པར་དམིགས་པ་ཤིན་ཏུ་ཕྲ་བར་བྱིན་གྱིས་རློབ་པ། འཕགས་པར་གསུང་བའི་ཐམས་ཅད་མཁྱེན་པས་ཤིན་ཏུ་སྣང་བར་བྱས་པ། དབང་གི་དམིགས་པ་ཐམས་ཅད་མངོན་པར་བསྒྲུབ་ པ༑ ཆོས་ཀྱི་སྒོ་ཐམས་ཅད་ཀྱི་མཐར་ཕྱིན་པའི་ཐ་དད་པ་ཡང་དག་པར་ཤེས་པ་ཅན། ཆོས་ཀྱི་དབྱིངས་ཀྱིས་ཀླས་པའི་ཡེ་ཤེས་ཀྱི་ལུས་དང་ལྡན་པ། ཐམས་ཅད་དུ་འགྲོ་བའི་ལམ་གྱིས་ གྲུབ་པ། ཏིང་ངེ་འཛིན་ཐམས་ཅད་མཁས་པར་ཁོང་དུ་ཆུད་པ། སེམས་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་དག་སྟེ། སེམས་སྐད་ཅིག་རེ་རེ་ལ་བྱང་ཆུབ་སེམས་དཔའ་ ༄༅། །ཀུན་ཏུ་བཟང་པོའི་སྤྱོད་པ་ལ་གནས་ཏེ། ཏིང་ངེ་འཛིན་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཕྲག་བརྒྱ་ལ་སྙོམས་པར་ཞུགས་ཀྱང༌། བྱང་ཆུབ་སེམས་ དཔའ་ཀུན་ཏུ་བཟང་པོའི་ཏིང་ངེ་འཛིན་དང་ཡུལ་གྱི་རྒྱན་གྱི་སྣང་བས་ཡོངས་སུ་སྣང་བར་བྱ་བ་རྣམས་ཀྱིས་མཐའ་དམིགས་པར་མི་རུང་ངོ༌། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་ བྱིན་གྱི་རླབས་ཀྱིས་བྱིན་དུ་བརླབས་པ་སྟེ། ཐམས་ཅད་ཀྱང་ཁོང་དུ་ཆུད་པར་བྱའོ། །ཞིང་རྣམས་ནི་མུ་མེད་པ་སྟེ། ཐམས་ཅད་ཀྱང་ཁོང་དུ་ཆུད་པར་བྱའོ། །སེམས་ཅན་གྱི་ཁམས་ ཐམས་ཅད་ནི་བསམ་གྱིས་མི་ཁྱབ་པ་སྟེ། དེ་དག་ནི་རྡོ་རྗེའི་ཚིག་ཁོང་དུ་ཆུད་པར་བྱ་བའོ། །དེ་དག་གིས་ཁྱད་པར་ཐམས་ཅད་ཀྱང་ཁོང་དུ་ཆུད་པར་བྱ་བའོ། །སྔོན་གྱི་མཐའ་ནི་ཐོག་མ་ དང་ཐ་མ་མེད་པ་སྟེ། དེ་དག་ཀྱང་ཐམས་ཅད་ཁོང་དུ་ཆུད་པར་བྱ་བའོ། །ཕྱི་མའི་མཐའ་ནི་མུ་མེད་པ་སྟེ། དེ་དག་ཀྱང་ལྷག་མ་མ་ལུས་པར་ཁོང་དུ་ཆུད་པར་བྱ་བའོ། །ད་ལྟར་བྱུང་ བའི་དུས་ནི་མཐའ་དང་དབུས་མེད་པ་སྟེ། ནམ་མཁའ་དབྱིངས་ཀྱིས་ཀླས་པ། ཆོས་ཀྱི་དབྱིངས་ཀྱི་མཐས་གཏུགས་པ་སྟེ། དེ་ཡང་མ་ལུས་པར་ཁོང་དུ་ཆུད་པར་བྱ་བའོ། །སངས་ རྒྱས་ཀྱི་ཡུལ་ནི་བསམ་གྱིས་མི་ཁྱབ་པའི་ཡུལ་ཏེ། དེ་དག་ཀྱང་ཐམས་ཅད་ཁོང་དུ་ཆུད་པར་བྱའོ། །བྱང་ཆུབ་སེམས་དཔའི་སྤྱོད་པ་ནི་གྲངས་མེད་པ་སྟེ། དེ་དག་ཀྱང་ཐམས་ཅད་ ཁོང་དུ་ཆུད་པར་བྱ་བའོ། །སངས་རྒྱས་ཀྱིས་ཐུགས་སུ་ཆུད་པ་དང་དགོངས་པ་ནི་ཡུལ་མཐའ་ཡས་པ། ཡུལ་བརྗོད་དུ་མེད་པ་སྟེ། དེ་དག་ཀྱང་ཐམས་ཅད་ཁོང་དུ་ཆུད་པར་བྱ་བའོ། །ཆོས་ སུ་དམིགས་པ་ཐམས་ཅད་ནི། སེམས་ཀྱི་རང་བཞིན་མཐར་ཕྱིན་པ་མེད་པ་སྟེ། དེ་དག་ཀྱང་ཐམས་ཅད་ལྷག་མ་མེད་པར་ཁོང་དུ་ཆུད་པར་བྱའོ། །དེ་ཅིའི་ཕྱིར་ཞེ་ན། འདི་ལྟ་སྟེ་། དཔེར་ན། ཡིད་བཞིན་གྱི་ནོར་བུ་ལས་ནི་ཇི་བསམ་པ་ཐམས་ཅད་འབྱུང་ཡང་དེ་སྙེད་དུ་མངོན་པར་འདུ་བྱེད་པས་སྟོངས་པར་མི་འགྱུར་ཞིང༌། བསམ་པ་ཐམས་ཅད་ཡོངས་སུ་རྫོགས་ པར་འགྱུར་ཡང་རྒྱུན་ཆད་པ་མེད་དོ། །ཟད་པར་འགྱུར་བ་མེད་དོ། །ཡིད་བཞིན་གྱི་ནོར་བུ་དེ་ཡང་རྒྱུན་གཅོད་པར་སེམས་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་ སེམས་སྒྱུ་མ་ལྟ་བུ་ལ་ཞུགས་པས། ཆོས་ཀྱི་དམིགས་པ་ཐམས་ཅད་མངོན་པར་བསྒྲུབ་ཀྱང་མཐར་ཕྱིན་པའི་སེམས་མི་སྐྱེད་དེ། ཏིང་ངེ་འཛིན་དེ་དང་དེ་དག་གི་རྒྱུན་ཡོངས་སུ་མི་གཅོད་ དོ༑ ༑དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ནི་སྒྱུ་མའི་དཀྱིལ་འཁོར་ཡངས་ཤིང་རྒྱ་ཆེ་བ་ཚད་མེད་པ་ལ་ཞུགས་པས། ཀུན་ཏུ་བཟང་པོའི་སྤྱོད་པ་དོན་ཡོད་པ་། ངེས་པར་རྟོགས་པ་ལ་གནས་པ་དང༌། མངོན་པར་བསྒྲུབ་པ་ཁོང་དུ་ཆུད་པའི་ཡེ་ཤེས་ཀྱི་སྒོ་དང་ལྡན་པས་དེ་ལ་རྒྱས་པར་འགྱུར་བའམ། འབྲི་བར་འགྱུར་བ་མེད་དོ། །འདི་ལྟ་སྟེ། ༄༅། །དཔེར་ན། བྱིས་པ་སོ་སོའི་སྐྱེ་བོ་རྣམས་ནི། སེམས་ཀྱི་སྒོ་མུ་མེད་པ་སྟེ། དེ་དག་གི་སེམས་ནི་མ་སྐྱེས། མི་སྐྱེ། སྐྱེ་བར་མི་འགྱུར་བ་ཡིན་ཡང་དེ་དག་གི་ སེམས་སྐྱེ་བ་དང༌། སྐྱེ་བར་འགྱུར་བའམ། སྐྱེས་པ་མཐའ་མེད་པ་སྟེ། ཐུག་པ་མེད་པའོ། །ཟད་པར་མི་འགྱུར་བའོ། །སེམས་ཀྱི་རྒྱུད་ཡོངས་སུ་རྒྱུན་ཆད་པ་མེད་དེ། བསམ་གྱིས་ མི་ཁྱབ་པའོ། །དེ་བཞིན་དུ་བྱང་ཆུབ་སེམས་དཔའ་ཏིང་ངེ་འཛིན་གྱི་རྣམ་པ་སྒྱུ་མའི་སྒོ་མང་པོ་ཀུན་དང་ལྡན་པ། འདི་ལྟ་བུ་ལ་སྙོམས་པར་ཞུགས་པ་ལའང་མུར་ཐུག་པ་མེད་དོ།། ཚད་ཀྱིས་གཅལ་བ་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཀུན་ཏུ་བཟང་པོས་དེ་སྙེད་དུ་ཚད་མེད་པའི་ཆོས་ཀྱི་ཚུལ་གྱི་སྒོ་ཁོང་དུ་ཆུད་པའི་ཕྱིར་རོ། །འདི་ལྟ་སྟེ། དཔེར་ན། ཀླུའི་རྒྱལ་པོ་རྒྱ་མཚོ་དང༌། དགའ་བོ་དང༌། བསྙེན་དགའ་བོ་དང༌། ཡིད་དུ་འོང་བ་དང༌། ཀླུའི་རྒྱལ་པོ་ཆེན་པོ་དེ་མ་ཡིན་པ་དག་གིས་ཆར་ཕབ་ན། ཆར་པའི་ཐིགས་ པ་རེ་རེ་ཞིང༌། བ་རུ་རའི་འབྲས་བུ་ཙམ་གྱི་རྒྱུན་དུ་ཕབ་ཀྱང་ཆར་པ་དེ་ལ་ཟད་ཅེས་བྱ་བ་མེད་དོ། །སྔར་བབ་པ་དེ་ཉིད་ཕྱིར་འབབ་ཅེས་བྱ་བ་མེད་དོ། །སྤྲིན་གྱི་མངོན་པར་འདུ་བྱ་ བ་ལ་ཟད་ཅེས་བྱ་བ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་ངེ་འཛིན་གྱི་སྒོ་དང༌། ཡེ་ཤེས་ཀྱི་སྒོ་དང༌། ཆོས་ཀྱི་སྒོ་དང༌། སངས་རྒྱས་ལྟ་བའི་སྒོ་ དང༑ ཕྱོགས་སུ་འགྲོ་བའི་སྒོ་དང༌། སེམས་ཀྱི་དབང་གི་རྗེས་སུ་འགྲོ་བའི་སྒོ་དང༌། བྱིན་གྱི་རླབས་ཀྱི་སྒོ་དང༌། ཆོ་འཕྲུལ་གྱི་སྒོ་དང༌། རྣམ་པར་འཕྲུལ་པའི་སྒོ་དང༌། མྱ་ངན་ལས་འདའ་ བའི་ཚུལ་གྱི་སྒོ་དང༌། ཆོས་ཀྱི་ཚུལ་གྱི་སྒོ་དང༌། བྱང་ཆུབ་སེམས་དཔའི་ཚོགས་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པ་ཡོངས་སུ་རྫོགས་པར་བྱ་བའི་སྒོ་དང༌། དེ་བཞིན་གཤེགས་ པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་མངོན་པར་སངས་རྒྱས་པའི་དྲུང་དུ་འགྲོ་བའི་སྒོ་དང༌། དབང་པོའི་དྲ་བ་བརྗོད་དུ་མེད་པའི་ཡང་ བརྗོད་དུ་མེད་པ་ལ་འཇུག་ཅིང་ཁོང་དུ་ཆུད་པར་བྱ་བའི་སྒོ་དང༌། འཇིག་རྟེན་གྱི་ཁམས་ཀྱི་རྒྱུད་ཐ་དད་པའི་བྱེ་བྲག་བརྗོད་དུ་མེད་པའི་ཡང་བརྗོད་དུ་མེད་པའི་སེམས་ཀྱི་ཚད་ཀྱིས་ཁོང་ དུ་ཆུད་པར་བྱ་བ་དང༌། སངས་རྒྱས་ཀྱི་ཞིང་འབྱམས་ཀླས་པའི་སྒོ་དང༌། འཇིག་རྟེན་གྱི་ཁམས་དངོས་པོ་ཡོད་པ་དང༌། དངོས་པོ་མེད་པ་བརྗོད་དུ་མེད་པའི་ཡང་བརྗོད་དུ་མེད་ པའི་སྒོ་དང༌། སེམས་ཅན་གྱི་འདུ་ཤེས་ཁོང་དུ་ཆུད་པར་བྱ་བ་དང༌། རྗེས་སུ་བསྙེགས་པ་བརྗོད་དུ་མེད་པའི་ཡང་བརྗོད་དུ་མེད་པའི་སྒོ་དང༌། དུས་རྣམ་པ་ཐ་དད་ཅིང་བསྐལ་པ་མི་ མཐུན་པ་ཁོང་དུ་ཆུད་པར་བྱ་བ་དང༌། བསྟན་པ་བརྗོད་དུ་མེད་པའི་ཡང་བརྗོད་དུ་མེད་པའི་སྒོ་དང༌། འཇིག་རྟེན་གྱི་ཁམས་ཀྱི་རྒྱུད་འབྱུང་བ་དང༌། འཇིག་པ་བརྗོད་དུ་མེད་པའི་ཡང་ ༄༅། །བརྗོད་དུ་མེད་པ་ཡང་དག་པ་ཇི་ལྟ་བ་བཞིན་དུ་ཤེས་པས་ཁོང་དུ་ཆུད་པའི་སྒོ་དང༌། སངས་རྒྱས་ཀྱི་ཞིང་སྤྱིའུ་ཚུགས་བརྗོད་དུ་མེད་པའི་ཡང་བརྗོད་དུ་ མེད་པ་དང༌། སྣྲེལ་ཞིར་རྒྱུ་བ་བརྗོད་དུ་མེད་པའི་ཡང་བརྗོད་དུ་མེད་པ་དག་ཏུ་སེམས་ཀྱི་སྐད་ཅིག་གཅིག་གིས་བྱང་ཆུབ་ཏུ་རྣམ་པར་འཚང་རྒྱ་བར་བྱ་བའི་སྒོ་ལ་མཐའ་མེད་ དོ༑ ༑ཟད་པ་མེད་དོ། །ས་མཚམས་མེད་དོ། །མུ་མེད་དོ། །སྐྱོ་བ་མེད་དོ། །ཡོངས་སུ་ཡི་འཆད་པ་མེད་དོ། །ཐུག་པ་མེད་དོ། །རྒྱུན་འཆད་པ་མེད་དོ། །ཕྱིར་ལྡོག་པ་མེད་དོ། ། ཆུད་ཟ་བ་མེད་དོ། །འོན་ཀྱང་བྱང་ཆུབ་སེམས་དཔའ་དེ་ཆོས་ཀྱི་སྒོས་ཐུག་པ་མེད་པར་མི་འགྱུར་རོ། །ངེས་པར་རྟོགས་པར་བྱ་བས་ཡོངས་སུ་ཡི་འཆད་པར་འགྱུར་བ་མེད་ དོ༑ ༑ཐམས་ཅད་མཁྱེན་པའི་སྒོ་ཟད་པར་འགྱུར་བ་མེད་དོ། །སངས་རྒྱས་ཀྱི་ཞིང་འབྱམས་ཀླས་པའི་འཇིག་རྟེན་གྱི་ཁམས་ཐམས་ཅད་སྣང་བར་བྱ་བ་ལས་ཕྱིར་ལྡོག་པ་ མེད་དོ། །ཆོས་ཀྱི་འཁོར་ལོ་བརྗོད་དུ་མེད་པའི་ཡང་བརྗོད་དུ་མེད་པ་རབ་ཏུ་བསྐོར་བ་ལ་བཏང་སྙོམས་སུ་བྱེད་པ་མེད་དོ། །སངས་རྒྱས་ཀྱི་དགོངས་པ་ཡོངས་སུ་དྲི་བ་ལ་ཟད་པར་ འགྱུར་བ་མེད་དོ། །སངས་རྒྱས་ཀྱི་བྱང་ཆུབ་བལྟ་བ་ལ་མཐར་ཐུག་པ་མེད་དོ། །སེམས་ཅན་གྱི་ཁམས་ཐམས་ཅད་འདུལ་བར་བྱ་བ་ཡོངས་སུ་གཏོང་བ་མེད་དོ། །ཀུན་ཏུ་ བཟང་པོའི་སྤྱོད་པ་དང༌། སྨོན་ལམ་གྱིས་འབྱུང་བ་རྒྱུན་ཆད་པར་འགྱུར་བ་མེད་དོ། །ཁ་དོག་མཐའ་ཡས་པའི་ལུས་ཚད་མེད་པ་བརྗོད་དུ་མེད་པའི་ཡང་བརྗོད་དུ་མེད་པ་ཡོངས་སུ་བསྟན་ པས་ས་མཚམས་སུ་འགྱུར་བ་མེད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། དཔེར་ན། མེ་ནི་ཇི་སྲིད་དུ་ཤིང་ཡོད་པ་དེ་སྲིད་དུ་འབར་ཏེ། མེ་འབར་བ་ལ་མཐར་ཐུག་པ་མེད་དོ། །དེ་བཞིན་དུ་ བྱང་ཆུབ་སེམས་དཔའ་ཡང་ཇི་ཙམ་དུ་སེམས་ཅན་གྱི་ཁམས་ལ་རྣམ་པར་དཔྱོད་པ་དང༌། ཇི་ཙམ་དུ་ཆོས་ཀྱི་དབྱིངས་ལ་འཇུག་པ་དང༌། ཇི་ཙམ་དུ་འཇིག་རྟེན་གྱི་ཁམས་སུ་རྒྱུ་བ་དང༌། ཇི་ཙམ་དུ་ནམ་མཁའི་རང་བཞིན་གྱི་ཚད་མི་དམིགས་པ་དང༌། ཇི་ཙམ་དུ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་ གཅིག་ནས་གཅིག་ཏུ་བརྒྱུད་པའི་སེམས་ཀྱི་སྐད་ཅིག་རེ་རེ་ལ་འཇུག་ཅིང་ཁོང་དུ་ཆུད་པར་བྱ་བ་དང༌། ཇི་ཙམ་དུ་ཐམས་ཅད་མཁྱེན་པའི་ཡེ་ཤེས་དང༌། སངས་རྒྱས་ཀྱི་ཞིང་འབྱམས་ ཀླས་པ་བརྗོད་དུ་མེད་པའི་ཡང་བརྗོད་དུ་མེད་པ་དག་གི །ཆོས་ཀྱི་བྱེ་བྲག་རྣམ་པར་ཕྱེ་བ་ལ་འཇུག་པ་དང༌། ཇི་ཙམ་དུ་སེམས་ཅན་གྱི་ཁམས་ཀྱི་རྒྱུད་བརྗོད་དུ་མེད་པའི་ཡང་བརྗོད་ དུ་མེད་པ་དགེ་བའི་རྩ་བ་ལ་གཞོག་ཅིང་ཉེ་བར་འཚོ་བར་བྱེད་པ་དང༌། ཉེ་བར་རྟོན་པ་དང༌། ཤིན་ཏུ་རྣམ་པར་དག་པར་བྱེད་པ་དང༌། ཇི་ཙམ་དུ་བྱང་ཆུབ་སེམས་དཔའི་དགེ་བའི་རྩ་བ་ ༄༅། །དམ་པ་བརྗོད་དུ་མེད་པའི་ཡང་བརྗོད་དུ་མེད་པ་ཡང་དག་པར་མཐོང་ཞིང༌། སྨོན་ལམ་གཅིག་ཏུ་ངེས་པ་མེད་པ་ཀུན་ཏུ་བཟང་པོའི་སྤྱོད་པ་དང༌། སྨོན་ ལམ་ལ་ངེས་པར་བྱ་བ་དང༌། ཀུན་ཏུ་བཟང་པོའི་སྤྱོད་ཡུལ་གྱི་ཡེ་ཤེས་ཀྱི་སྒོ་ལ་གཞོག་པ་དང༌། ཇི་ཙམ་དུ་དུས་གསུམ་ལ་འཇུག་པའི་རྒྱུད་བརྗོད་དུ་མེད་པའི་ཡང་བརྗོད་དུ་མེད་ པ་འབྱམས་ཀླས་པ་དང༌། སྙོམས་ཤིང་རྣམ་པར་རྟོག་པའི་དུས་ལ་འཇུག་པས་མཐའ་དང་དབུས་མེད་པའི་ཚུལ་དུ་འཇུག་པ་དང༌། ཇི་ཙམ་དུ་འཇིག་རྟེན་གྱི་ཁམས་འབྱུང་བ་ དང༑ འཇིག་པ་དང༌། གནས་པ་བརྗོད་དུ་མེད་པའི་ཡང་བརྗོད་དུ་མེད་པ་རྣམ་པར་རྟོག་པའི་དམིགས་པ་ཀུན་ཏུ་རྒྱུ་བ་འབྱུང་ཞིང་རྒྱུན་མི་འཆད་པ་དེ་ཙམ་དུ་ཡེ་ཤེས་ཀྱི་ དམིགས་པ། སྙིང་རྗེ་ཆེན་པོ་ལས་བྱུང་བ། སྨོན་ལམ་ཆེན་པོས་སྤྲུལ་པ། འགྲོ་བ་ཐམས་ཅད་མ་ལུས་པར་འདུལ་བ་ལ་བརྩོན་པ་ཡང་མཐར་ཐུག་ཅེས་བྱ་བ་མེད་དོ། །དེ་ ཅིའི་ཕྱིར་ཞེ་ན། འདི་ལྟར་དེ་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་ཡོངས་སུ་རྫོགས་པར་བྱ་བའི་ཕྱིར། བྱང་ཆུབ་སེམས་དཔའ་ཀུན་ཏུ་བཟང་ པོའི་སྤྱོད་པའི་ཁྱད་པར་ཡེ་ཤེས་ཀྱིས་བསྒྲུབས་པས། འགྲོ་བ་ཐམས་ཅད་ཡོངས་སུ་དགྲོལ་བར་བྱ་བ་ལ་བརྩོན་པའི་ཕྱིར་རོ། །དེ་བས་ན་བྱང་ཆུབ་སེམས་དཔའ་ཏིང་ངེ་འཛིན་ གྱི་རྣམ་པ་འདི་ལྟ་བུ་དང༌། དེ་ལྟ་བུའི་ཡུལ་དེ་ལྟར་རྒྱ་ཆེ་བ་དང༌། དེ་ལྟར་ཡངས་པ་དང༌། དེ་ལྟར་ཚད་མེད་པ་དང༌། དེ་ལྟར་བསམ་གྱིས་མི་ཁྱབ་པ་དང༌། དེ་ལྟར་འོད་ཀུན་ཏུ་མཐའ་ ཡས་པ་དང༌། དེ་ལྟར་སངས་རྒྱས་ཐམས་ཅད་མངོན་དུ་གྱུར་པ་དང༌། དེ་ལྟར་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་དང༌། དེ་ལྟར་དགེ་བའི་རྩ་བ་ཐམས་ ཅད་ཀྱིས་ཡོངས་སུ་གྲུབ་པ་དང༌། དེ་ལྟར་མི་འཁྲུགས་པའི་སེམས་དང་ལྡན་པ་ལ་མངོན་པར་བརྩོན་པར་བྱའོ། །ཡོངས་སུ་ཡི་འཆད་པ་མེད་པས་བརྟན་པར་བྱའོ། །སྐྱོ་བ་མེད་ པའི་སེམས་ཀྱིས་བསྒྲུབ་པར་བྱའོ། །བསམ་པ་ཕྱིར་མི་ལྡོག་པ་བསྐྱེད་པར་བྱའོ། །གདོན་མི་ཟ་བར་འབྱུང་བས་སྦྱར་བར་བྱའོ། །རྩོམ་པའི་ནན་ཏན་གྱིས་མཐུན་པར་སྤྱད་པར་བྱའོ།། བསམ་གྱིས་མི་ཁྱབ་པའི་ཡེ་ཤེས་ཡོངས་སུ་གནོན་པར་བྱའོ། །སྒྱུའི་ས་ལ་མངོན་པར་ཞེན་པ་མེད་པར་བྱའོ། །འཇིག་རྟེན་གྱི་ཡུལ་ཐམས་ཅད་ལ་མི་གནས་པར་བྱའོ། །ཆོས་ ཐམས་ཅད་ལ་ཆགས་པ་མེད་པར་བྱའོ། །རློམ་སེམས་ཐམས་ཅད་ཡང་དག་པར་བསལ་བར་བྱའོ། །དངོས་པོ་ཐམས་ཅད་ལ་ཆགས་པ་མེད་པར་བྱའོ། །དམིགས་པ་ཐམས་ ཅད་ལ་རྟོག་པ་མེད་པར་བྱའོ། །ཆོས་ཁོང་དུ་ཆུད་པར་བྱ་བ་ལ་ཚོད་འཛིན་པ་མེད་པར་བྱའོ། །ཆོས་ཀྱི་ཡེ་ཤེས་རྟོགས་པར་ཁོང་དུ་ཆུད་པར་བྱའོ། །ཐམས་ཅད་མཁྱེན་པའི་གདན་ ༄༅། །ལ་སངས་རྒྱས་སུ་བྱང་ཆུབ་པས་རྨོངས་པ་མེད་པར་བྱའོ། །ཆོས་ཀྱི་སྣང་བ་ཡོངས་སུ་བསྒྲུབ་པར་བྱའོ། །འགྲོ་བ་ཐམས་ཅད་དགེ་བའི་རྩ་བས་ཡོངས་སུ་བསྡུ་ པར་བྱའོ། །བདུད་ཀྱི་ཡུལ་ལས་སེམས་ཅན་ཡོངས་སུ་བསྐྱོད་པར་བྱའོ། །ཆོས་ཀྱི་ཡུལ་ལ་སེམས་ཅན་རབ་ཏུ་དགོད་པར་བྱའོ། །སངས་རྒྱས་ཀྱི་ཡུལ་ལ་རབ་ཏུ་གཟུད་པར་བྱའོ། ། སྨོན་ལམ་གྱི་ཡུལ་ལས་ཕྱིར་ལྡོག་པ་མེད་པར་བྱའོ། །འབྱུང་བའི་ཡུལ་ལ་རྟོགས་པས་གཞག་པར་བྱའོ། །རྣམ་པར་དག་པའི་ཡུལ་ལ་རབ་ཏུ་ཞེན་པར་བྱའོ། །ཕ་རོལ་ཏུ་ཕྱིན་ པའི་ཡུལ་ཁོང་དུ་ཆུད་པར་བྱའོ། །སངས་རྒྱས་ཐམས་ཅད་ལ་ཤིན་ཏུ་མོས་པར་བྱའོ། །ཆོས་ཐམས་ཅད་ལ་དངོས་པོ་མེད་པའི་བདག་ཉིད་དུ་ཡང་དག་པར་འཇུག་པར་བྱའོ།། ཆོས་ཐམས་ཅད་རང་བཞིན་མེད་པ་ཁོང་དུ་ཆུད་པར་བྱའོ། །འཇིག་རྟེན་གྱི་རང་བཞིན་སྣང་བར་བྱའོ། །ཆོས་ཀྱི་འཐད་པ་རབ་ཏུ་བརྗོད་པར་བྱའོ། །ཡེ་ཤེས་ཀྱི་རང་བཞིན་ཡང་ དག་པར་བསྟན་པར་བྱའོ། །གོ་ཆའི་དམ་པ་བགོས་པ་ཡོངས་སུ་མི་སྤང་བར་བྱའོ། །སྐལ་བ་མཉམ་པར་སྤྱོད་པ་རྣམས་དང་ལྷན་ཅིག་གནས་པར་བྱའོ། །སངས་རྒྱས་ཐམས་ཅད་ རྗེས་སུ་དྲན་པ་ལ་སེམས་ལྷོད་པ་མེད་པར་བྱའོ། །དེ་བཞིན་གཤེགས་པ་ཐམས་ཅད་ལ་རྣམ་པར་རྟོག་པ་མེད་པར་བྱའོ། །ཆོས་ཀྱི་དབྱིངས་ཐ་དད་པ་མེད་པ་ལ་བདག་རབ་ཏུ་སྦྱར་ བར་བྱའོ། །སེམས་སྒྱུ་མ་ལྟ་བུར་རབ་ཏུ་ཤེས་པར་བྱའོ། །འཇིག་རྟེན་གྱི་རྒྱུད་ཐམས་ཅད་རྨི་ལམ་ལྟ་བུར་ཁོང་དུ་ཆུད་པར་བྱའོ། །སྨོན་ལམ་དང་སངས་རྒྱས་བལྟ་བར་བྱ་བ་ཐམས་ཅད་ མིག་ཡོར་ལྟ་བུར་ཤེས་པར་བྱའོ། །སློབ་པ་མེད་པའི་ཆོས་འབྱམས་ཀླས་པ་ཐམས་ཅད་སྤྲུལ་པ་ལྟ་བུར་ཤེས་པར་བྱའོ། །ཚིག་གི་ལམ་ཐམས་ཅད་སྒྲ་བརྙན་ལྟ་བུར་ཁོང་དུ་ཆུད་པར་བྱའོ།། ཆོས་ཐམས་ཅད་སྒྱུ་མ་ལྟ་བུར་རྟོགས་པར་བྱའོ། །ཤི་འཕོ་དང༌། སྐྱེ་བ་ཐམས་ཅད་འཁྲུལ་འཁོར་ལྟ་བུར་ཤེས་པར་བྱའོ། །སངས་རྒྱས་ཀྱི་ཞིང་དུ་འགྲོ་བ་ཐམས་ཅད་ལུས་མེད་པར་ཁོང་ དུ་ཆུད་པར་བྱའོ། །དེ་བཞིན་གཤེགས་པ་ཐམས་ཅད་ལ་སངས་རྒྱས་ཀྱི་ཆོས་དྲི་བས་ཡོངས་སུ་སྐྱོ་བ་མེད་པར་བྱའོ། །འཇིག་རྟེན་གྱི་ཆོས་ཐམས་ཅད་འཇིག་པར་བསྟན་པའི་ས་དང༌། གདམས་ ངག་དང༌། མན་ངག་ཏུ་བྱ་བ་ལ་བཏང་སྙོམས་མེད་པར་བྱའོ། །གདུལ་བར་བྱ་བ་དུས་ལ་བབ་པའི་སེམས་ཅན་རྣམས་ཡོངས་སུ་སྨིན་པར་བྱའོ་ཞེས་དེ་ལྟར་བྱང་ཆུབ་སེམས་དཔའ་དེ། བྱང་ ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ནན་ཏན་དུ་བྱེད་པ་དང༌། དེ་ལྟར་བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ཡོངས་སུ་སྒྲུབ་པ་དང༌། དེ་ལྟར་བྱང་ཆུབ་སེམས་དཔའི་ འབྱུང་བ་ལ་རབ་ཏུ་བརྩོན་པ་དང༌། དེ་ལྟར་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཀྱི་ཆོས་ཡོངས་སུ་འཛིན་པ་དང༌། དེ་ལྟར་ཆོས་ཉིད་འཁྲུགས་པ་མེད་ ༄༅། །པར་རྣམ་པར་འབྱེད་པ་དང༌། དེ་ལྟར་སངས་རྒྱས་ཀྱི་ཞིང་འབྱམས་ཀླས་པ་རྣམ་པར་སྦྱོང་བ་དང༌། དེ་ལྟར་དེ་བཞིན་གཤེགས་པ་ཐམས་ཅད་ལ་མོས་པར་ བྱེད་པ་དང༌། དེ་ལྟར་སངས་རྒྱས་ཀྱི་སྟོབས་འབྱམས་ཀླས་པ་ཁོང་དུ་ཆུད་པར་བྱེད་པ་དང༌། དེ་ལྟར་ཆགས་པ་མེད་པའི་སེམས་ཀྱིས་རབ་ཏུ་འབྱེད་པ་དང༌། ཕྱོགས་མཚམས་ མེད་པ་བརྗོད་དུ་མེད་པའི་ཡང་བརྗོད་དུ་མེད་པ་རྣམ་པ་ཐ་དད་པ་དག་ཏུ་སྐལ་བ་མཉམ་པར་རྣམ་པར་དགོད་པ་ལ་འགྲོ་བ་རྣམས་རབ་ཏུ་དགོད་པའི་ཚེ། སངས་རྒྱས་ཀྱི་ཞིང་ དེ་བཞིན་གཤེགས་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཐམས་ཅད་མ་ལུས་པ་དེ་དག་གི་ཕྱོགས་གཅིག་གི་དེ་ བཞིན་གཤེགས་པ་མཚན་ཐ་དད་པ་དང༌། མཚན་གཅིག་པ་ཐམས་ཅད་དང༌། ཕྱོགས་གཅིག་ནས་ཇི་ལྟ་བ་བཞིན་དུ་ཕྱོགས་བཅུའི་ཕྱོགས་འབྱམས་ཀླས་པའི་རྒྱུད་ཐམས་ཅད་ ནས་ཀྱང་དེ་བཞིན་ཏེ། ཕྱོགས་འབྱམས་ཀླས་པའི་རྒྱུད་གཅིག་ནས་ཇི་ལྟ་བ་དེ་བཞིན་དུ་ཕྱོགས་ཀྱི་རྒྱུད་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་ སྙེད་ཐམས་ཅད་ནས་ཀྱང་དེ་བཞིན་ཏེ། ཕྱོགས་རེ་རེ་ནས་ཀྱང་མཚན་རེ་རེའི་སྒོས། དེ་བཞིན་གཤེགས་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ ཏུ་ཕྲ་བ་སྙེད་ཀྱིས་ཞལ་མངོན་པར་བསྟན་ཏོ། །དེ་བཞིན་དུ་ཆོས་ཀྱི་དབྱིངས་ཀྱི་མཐས་ཀླས་པའི་ཕྱོགས་བཅུ་མ་ལུས་པར་རྫོགས་པའི་སངས་རྒྱས་ཀྱི་ཞིང་ཐམས་ཅད་ནས་ཀྱང༌། དེ་བཞིན་ གཤེགས་པ་ཀུན་གྱིས་ཞལ་མངོན་པར་བསྟན་ཏེ། བྱང་ཆུབ་སེམས་དཔའ་དེ་ཡེ་ཤེས་ཆེན་པོའི་ཏིང་ངེ་འཛིན་དང༌། སྙོམས་པར་འཇུག་པ་ཀུན་ཏུ་བཟང་པོའི་སྤྱོད་ཡུལ་ལ་ཡང་དག་ པར་གནས་པའི་རྣམ་པ་དེ་ལྟ་བུ་དང༌། དེ་བཞིན་གཤེགས་པའི་ཡུལ་ལ་རྨོངས་པ་མེད་ཅིང༌། ཆོས་ཐམས་ཅད་ལ་རབ་ཏུ་གཞོལ་བར་བྱ་བའི་ཕྱིར། དེ་བཞིན་གཤེགས་པའི་བློ་ གྲོས་ཉེ་བར་བསྒྲུབ་པ་མཛད་དོ། །ཐམས་ཅད་མཁྱེན་པ་ཉིད་དུ་ཡང་དག་པར་གཞོལ་ཞིང་ཆོས་རྣམ་པ་ཐ་དད་པ་ཐམས་ཅད་ཀྱི་དོན་ཁོང་དུ་ཆུད་པར་བྱ་བའི་ཕྱིར་བློ་གྲོས་ཉེ་བར་བསྒྲུབ་ པ་མཛད་དོ། །ཆགས་པ་མེད་པ་ལ་རྟོགས་པར་གཞོག་པས་སངས་རྒྱས་ཀྱི་ཆོས་ཐམས་ཅད་ཡོངས་སུ་འཛིན་པར་བྱ་བའི་ཕྱིར། རིག་པ་ཉེ་བར་བསྒྲུབ་པ་མཛད་དོ། །ཡེ་ཤེས་འབྱམས་ ཀླས་པས་ཁོང་དུ་ཆུད་པར་བྱ་བ་དང༌། བློ་གྲོས་རྣམ་པར་སངས་རྒྱས་པའི་ཆོས་ཀྱི་དབྱིངས་ཀྱི་ཡུལ་གྱི་མཐས་ཀླས་པ་ཐམས་ཅད་ལ་སངས་རྒྱས་ཀྱི་བྱང་ཆུབ་ཉེ་བར་བསྒྲུབ་པ་མཛད་དོ། ། བྱང་ཆུབ་སེམས་དཔའ་དེ་ཆོས་ཀྱི་སྣང་བ་དང༌། འོད་ཐམས་ཅད་ཀྱིས་མུན་པ་མེད་པའི་ཡེ་ཤེས་འབྱམས་ཀླས་པ་ལས་ཕྱིར་མི་ལྡོག་པར་བྱ་བའི་ཕྱིར་ཤེས་རབ་ཉེ་བར་བསྒྲུབ་པ་མཛད་དོ། །བྱང་ ༄༅། །ཆུབ་སེམས་དཔའ་དེ་ཐབས་མཁས་པ་འཇིག་རྟེན་ཐམས་ཅད་ལས་འཕགས་པས་སེམས་ཅན་འདུལ་བ་ལ་བསྒྲིབས་པ་མེད་པར་བྱ་བའི་ཕྱིར། ཡེ་ཤེས་ཉེ་བར་བསྒྲུབ་པ་ མཛད་དོ། །བྱང་ཆུབ་སེམས་དཔའ་དེ་ཆོས་ཀྱི་རྒྱུད་མཐའ་ཡས་པ་བརྗོད་པ་ལ་ཟད་མི་ཤེས་པ་ཐ་དད་པ་ཡང་དག་པར་ཤེས་པ་བསྐྱེད་པའི་ཕྱིར་སྤོབས་པ་ཉེ་བར་བསྒྲུབ་པ་མཛད་དོ། ། བྱང་ཆུབ་སེམས་དཔའ་དེ་འགྲོ་བ་ཐམས་ཅད་དུ་ལུས་བརྗོད་དུ་མེད་པའི་ཡང་བརྗོད་དུ་མེད་པའི་རྒྱུད་དང༌། ཁ་དོག་མཐའ་ཡས་པ་རྣམ་པ་ཐ་དད་པ་རྣམ་པར་སྟོན་པར་བྱ་བའི་ཕྱིར། སྤྲུལ་པ་ ཉེ་བར་བསྒྲུབ་པ་མཛད་དོ། །བྱང་ཆུབ་སེམས་དཔའ་དེ་སེམས་ཅན་སྣ་ཚོགས་ཐམས་ཅད་ལ་དབྱངས་ཀྱི་ཡན་ལག་དང་ལྡན་པའི་སྒྲ་དབྱངས་དང་སྐད་སྣ་ཚོགས་སྟོན་པར་བྱ་བའི་ཕྱིར། ལྕེ་ ཡངས་པ་ཉེ་བར་བསྒྲུབ་པ་མཛད་དོ། །བྱང་ཆུབ་སེམས་དཔའ་དེ་མཐོང་མ་ཐག་ཏུ་སྟོན་པ་དང༌། ཐོས་པར་བྱེད་པས་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་རྨོངས་པ་མེད་པར་བྱ་ བའི་ཕྱིར། རྨོངས་པ་མེད་པར་ཉེ་བར་བསྒྲུབ་པ་མཛད་དོ། །དེས་བྱང་ཆུབ་སེམས་དཔའ་དེ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ཡོངས་སུ་གྲུབ་པ་ཡིན། ཡོངས་སུ་ གྲུབ་ནས་ཀྱང་ཐམས་ཅད་མཁྱེན་པའི་སྒོ་ཡོངས་སུ་རྫོགས་པར་བྱ་བས། དེ་བཞིན་གཤེགས་པའི་རིགས་ལ་འཇུག་གོ །འབྱུང་བའི་སྒོ་ཡོངས་སུ་དག་པར་བྱེད་དོ། །ཆགས་པ་མེད་ པའི་སྒོས་ཡོངས་སུ་འབྱུང་བར་བྱེད་དོ། །སེམས་ཅན་ཐམས་ཅད་འབྱུང་བའི་སྒོ་ཡོངས་སུ་རྩོམ་ཞིང་བྱིན་གྱིས་རློབ་བོ། །ཆོས་ཐམས་ཅད་ཀྱི་རྣམ་པར་འཕྲུལ་པའི་སྒོ་ཡང་དག་པར་སྟོན་ཏོ། །ཆོ་འཕྲུལ་གྱི་སྒོ་ ཆོས་མེད་པས་སེམས་ཅན་འདུལ་བ་ལ་རབ་ཏུ་འཇུག་གོ །བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་རྣམ་པ་ལ་རབ་ཏུ་མཁས་པར་སྦྱོང་ངོ༌། །སངས་རྒྱས་ཐམས་ཅད་ཀྱི་ཁྱུ་མཆོག་གི་མཐུ་ཕྱུང་བ་ལ་བྱང་ཆུབ་ སེམས་དཔའ་ཀུན་ཏུ་བཟང་པོའི་སྤྱོད་པས་ཡང་དག་པར་འབྱུང་ངོ༌། །ཕྱི་མའི་མཐའི་མུར་ཐུག་པའི་འགྲོ་བ་ཐམས་ཅད་འདུལ་བའི་ཕྱིར། སངས་རྒྱས་ཀྱི་ཆོས་ཐམས་ཅད་རྣམ་པར་ཕྱེ་བའི་ཆོས་ཀྱི་འཁོར་ལོ་རབ་ ཏུ་བསྐོར་བ་འགྲོ་བ་ཐམས་ཅད་འདུལ་བའི་མཐར་ཐུག་པའི་བྱིན་གྱི་རླབས་ཀྱིས་བྱིན་དུ་རློབ་བོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་སྨོན་ལམ་གྱི་ཁྱད་པར་དེ་ལྟ་བུ་དང་ལྡན་པས་ཡོངས་སུ་གྲུབ་བམ། མ་གྲུབ་ན་འཇིག་རྟེན་ཐམས་ཅད་ཀྱི་སློབ་དཔོན་དུ་འགྱུར་བ་ཡིན། ཆོས་ཀྱི་ཉི་མ་འཇིག་རྟེན་དུ་ཤར་བ་ཡིན། ཡེ་ཤེས་ཀྱི་ཟླ་བ་འཇིག་རྟེན་ཐམས་ཅད་དུ་སྣང་བར་བྱུང་བ་ཡིན། ཡེ་ཤེས་དམ་པའི་རི་རབ་མི་གཡོ་ པ་འཇིག་རྟེན་ཐམས་ཅད་ལས་མངོན་པར་འཕགས་པ་ཡིན། ཡེ་ཤེས་ཀྱི་རྒྱ་མཚོ་ཚད་མེད་པ་འཇིག་རྟེན་ཐམས་ཅད་དུ་ཡང་དག་པར་གནས་པ་ཡིན། བསྒྲུབ་པ་རྒྱུན་མི་འཆད་པས་འཇིག་རྟེན་ཐམས་ཅད་དུ་ ཆོས་ཀྱི་ནན་ཏན་བྱེད་པ་ཡིན། འཇིག་རྟེན་གྱི་ཁམས་ས་མཚམས་མེད་པ་ཐམས་ཅད་དུ་རབ་ཏུ་སྣང་བ་ཡིན། རྣམ་པར་དག་པ་ཡངས་ཤིང་མཐའ་ཡས་པ་འགྲོ་བ་ཐམས་ཅད་བརྗོད་པ་ཡིན། སེམས་ཅན་གྱི་ཁམས་ ༄༅། །མཐའ་དང་དབུས་མེད་པ་དགེ་བའི་རྩ་བ་དང༌། བསོད་ནམས་ཀྱི་རྒྱུད་དང༌། ཐམས་ཅད་མཁྱེན་པ་ཉིད་དང་ལྡན་པའི་སྨོན་ལམ་ཆེན་པོ་ལ་རབ་ཏུ་བརྩོན་པར་གཞོག་པ་ཡིན། ཀུན་ཏུ་ བཟང་པོའི་སྤྱོད་པའི་བརྩོན་འགྲུས་ཡངས་པ་རྒྱ་ཆེན་པོའི་སྨོན་ལམ་ཆེན་པོ་ལ་རབ་ཏུ་གཞོག་པ་ཡིན། སྤྱོད་པ་ཆེན་པོ་དང་ཏིང་ངེ་འཛིན་ཡངས་པའི་རྣམ་པར་འཕྲུལ་པ་བརྗོད་དུ་མེད་པའི་ཡང་ བརྗོད་དུ་མེད་པ་ལ་སེམས་ཅན་གྱི་ཁམས་ཡང་དག་པར་གཞོག་ཅིང་རབ་ཏུ་སྦྱོར་རོ། །དེ་ལྟར་བྱང་ཆུབ་སེམས་དཔའ་དེ་ལྟ་བུའི་ངང་ཚུལ་ཅན། དེ་ལྟ་བུའི་ཡེ་ཤེས་ཅན། དེ་ལྟ་བུའི་ཆོས་ཐོབ་ པར་གྱུར་པ། དེ་ལྟ་བུའི་ཆོས་ཀྱི་སྣང་བར་གྱུར་པ། དེ་ལྟ་བུའི་ཆོས་ལ་གནས་པ། ཆོས་དེ་ལྟ་བུ་མཐོང་བར་གྱུར་པ། མངོན་པར་ཤེས་པ་དེ་ལྟ་བུའི་ཡིད་དང་ལྡན་པ། ཆོ་འཕྲུལ་དམ་པ་དེ་ལྟ་ བུ་དང་ལྡན་པ། ཆོ་འཕྲུལ་མཆོག་ཏུ་བྱ་བ། ཕུལ་དུ་བྱུང་བ་དེ་ལྟ་བུས་ཡང་དག་པར་གྲུབ་པ། རྟག་ཏུ་བརྩོན་པའི་སྙིང་རྗེ་ཆེན་པོས་མངོན་པར་འཕགས་པ། ཆོས་ཀྱི་དོན་བཟང་པོ་ལ་རྟག་ཏུ་ རྒྱུན་མི་འཆད་པར་བརྩོན་པ། བདེ་བའི་ལམ་ཡང་དག་པར་སྟོན་པ། བསོད་ནམས་ཆེན་པོ་དང༌། ཡེ་ཤེས་ཡངས་པའི་འོད་ཟེར་གྱི་རྒྱལ་མཚན་དུ་གྱུར་པ། རྣམ་པར་ཐར་པ་བསམ་གྱིས་མི་ཁྱབ་ པ་ཤིན་ཏུ་ཐོབ་པ། ཐམས་ཅད་མཁྱེན་པའི་ཡུལ་ལ་དོན་ཡོད་པར་རྗེས་སུ་སོང་བ། སངས་རྒྱས་ཀྱི་རྣམ་པར་ཐར་པའི་ཕ་རོལ་ཏུ་ཕྱིན་པ་ཐོབ་པ། རྣམ་པར་ཐར་པའི་ཚུལ་ཤིན་ཏུ་ཕྲ་བ་བསམ་ གྱིས་མི་ཁྱབ་པ་རབ་ཏུ་བསྒོམས་པ། ཆོས་ཀྱི་དབྱིངས་ཀྱི་རྒྱུད་དང༌། ཚུལ་རྨོངས་པ་མེད་པར་ཁོང་དུ་ཆུད་པ་ཀུན་ཏུ་བཟང་པོའི་ཏིང་ངེ་འཛིན་བརྗོད་དུ་མེད་པའི་ཡང་བརྗོད་དུ་མེད་པ་ལ་རྣམ་པར་རྩེ་ཞིང་སྤྱོད་པ། སེང་གེ་ བསྒྱིངས་པའི་ཡེ་ཤེས་ཀྱི་གྲུབ་པ་ལ་ཤིན་ཏུ་གནས་པ། སེམས་དང་ཡིད་དང་རྣམ་པར་ཤེས་པ་ལ་ཆགས་པ་མེད་པ་རྣམས་ཀྱི་ཆོས་ཀྱི་བསམ་པ་དང་ལྷག་པའི་བསམ་པ་རབ་ཏུ་ཡངས་པ་ ཆེན་པོ་བཅུ་འབྱུང་ངོ༌། །བཅུ་གང་ཞེ་ན། འདི་ལ་བྱང་ཆུབ་སེམས་དཔའ་སངས་རྒྱས་ཐམས་ཅད་རྗེས་སུ་དྲན་པས་གནས་པ་ཡིན། ཆོས་ཐམས་ཅད་ཀྱི་དེ་བཞིན་ཉིད་ཚད་མེད་པས་ གནས་པ་ཡིན། སེམས་ཅན་ཐམས་ཅད་གདུལ་བའི་སྙིང་རྗེ་ཆེན་པོས་གནས་པ་ཡིན། ཞིང་རྣམ་པར་དག་པའི་གནས་བསམ་གྱིས་མི་ཁྱབ་པའི་ཕྱིར་གནས་པ་རྣམ་པར་དག་པས་གནས་ པ་ཡིན། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཡུལ་ལ་མོས་པ་རྣམ་པར་དག་པས་གནས་པ་ཡིན། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ བྱང་ཆུབ་ཐ་དད་པར་མི་བྱེད་པས་གནས་པ་ཡིན། ཆགས་པ་མེད་པའི་མཐའ་བསྒྲིབས་པ་མེད་པས་ཆོས་ཐམས་ཅད་ཀྱི་ངོ་བོ་ཉིད་དང༌། རང་བཞིན་མཚན་ཉིད་མེད་པས་གནས་པ་ཡིན། དེ་བཞིན་གཤེགས་ པ་ཐམས་ཅད་ཀྱི་དགེ་བའི་རྩ་བ་འདས་པ་དང༌། མ་བྱུང་བ་དང༌། ད་ལྟར་བྱུང་བ་ཐམས་ཅད་དང་རྒྱུད་ཀྱི་ཚུལ་གཅིག་ཏུ་གྱུར་པས་གནས་པ་ཡིན། དེ་བཞིན་གཤེགས་པ་ཐམས་ཅད་ཀྱི་སྐུའི་འཕྲིན་ལས་ ༄༅། །དང༑ གསུང་གི་འཕྲིན་ལས་དང༌། ཐུགས་ཀྱི་འཕྲིན་ལས་འདས་པ་དང༌། མ་བྱུང་བ་དང༌། ད་ལྟར་བྱུང་བ་ཆགས་པ་མེད་པའི་ཆོས་ཀྱི་དབྱིངས་ཤིན་ཏུ་སྟོན་པའི་ཡེ་ཤེས་ སྔོན་དུ་འགྲོ་བས་གནས་པ་ཡིན། དེ་བཞིན་གཤེགས་པ་འདས་པ་དང༌། མ་བྱོན་པ་དང༌། ད་ལྟར་བྱུང་བ་ཐམས་ཅད་ཀྱི་སྐྱེ་བ་དང༌། མངོན་པར་འབྱུང་བ་དང༌། སྙིང་པོ་བྱང་ཆུབ་ཏུ་ གཤེགས་པ་དང༌། མངོན་པར་འཚང་རྒྱ་བ་དང༌། ཆོས་ཀྱི་འཁོར་ལོ་བསྐོར་བ་དང༌། ཡོངས་སུ་མྱ་ངན་ལས་འདས་པ་དུས་གསུམ་མཉམ་པ་ཉིད་ཐུགས་སུ་ཆུད་པ་སྐད་ཅིག་གཅིག་ གིས་མཐར་འཇུག་པས་གནས་པ་ཡིན་ཏེ། དེ་ལྟར་བྱང་ཆུབ་སེམས་དཔའི་ལྷག་པའི་བསམ་པ་དེ་དག་ནི་ཚད་མེད་པ། ཤིན་ཏུ་ཡངས་པ། བགྲང་དུ་མེད་པ། གཞལ་དུ་མེད་པ། ཟད་མི་ ཤེས་པ། བརྗོད་པར་དཀའ་བ། བསམ་གྱིས་མི་ཁྱབ་པ། བརྗོད་དུ་མེད་པ། བཟོད་པར་དཀའ་བ། འགྲོ་བ་ཐམས་ཅད་ཀྱིས་མི་འཕྲོགས་པ་དག་སྟེ། ཆོས་ཐམས་ཅད་ཀྱི་ཡེ་ཤེས་རབ་ཏུ་ བསྒྲུབ་པའི་ཕྱིར། བྱང་ཆུབ་སེམས་དཔའ་དེ་ལྷག་པའི་བསམ་པ་དེ་ལྟ་བུས་གནས་སོ། །དེ་དག་གིས་བྱང་ཆུབ་སེམས་དཔའ་དེ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་ཕ་རོལ་ ཏུ་ཕྱིན་པ་ཐོབ་པ་ཡིན་ཏེ། ཆོས་རྣམ་པར་དག་པ་ཡང་རབ་ཏུ་ཐོབ་བོ། །བསམ་པའི་སྟོབས་ཀྱང་རྣམ་པར་འཕེལ་བར་བྱེད་དོ། །སེམས་ཅན་རྣམས་ལ་དགེ་བའི་རྩ་བ་ཚད་མེད་པ་ཡང་ཡང་ དག་པར་སྟོན་ཏོ། །བྱང་ཆུབ་སེམས་དཔའི་སྟོབས་ཀྱང་རྣམ་པར་འཕེལ་བར་བྱེད་དོ། །བྱང་ཆུབ་སེམས་དཔའི་ཡོན་ཏན་མི་ཁོམ་པ་ཁོམ་པར་བྱེད་པ་ཐམས་ཅད་ཀྱང་ཡོངས་སུ་རྫོགས་པར་བྱེད་དོ།། ཤིན་ཏུ་འབྱུང་བར་བྱ་བའི་ཕྱིར། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་གྲུབ་པ་ཡང་རབ་ཏུ་འཐོབ་བོ། །སངས་རྒྱས་ཐམས་ཅད་ཀྱི་ཆོས་ཀྱི་གཟུངས་ཀྱིས་འདས་པ་དང༌། མ་བྱོན་པ་དང༌། ད་ལྟར་ བྱུང་བའི་སངས་རྒྱས་ཐམས་ཅད་ཀྱི་བསྟན་པ་ཡང་དག་པར་འཛིན་ཏོ། །འདོད་ཆགས་དང་བྲལ་བའི་མཐར་སེམས་ཅན་གྱི་ཁམས་ཐམས་ཅད་ལ་ཡང་དག་པར་ལྟའོ། །ཚིག་གི་ལམ་གྱི་རྒྱུད་ཀྱིས་སེམས་ ཅན་ཐམས་ཅད་འདུལ་བ་ཡོངས་སུ་སྟོན་ཏོ། །དེ་ཅིའི་ཕྱིར་ཞེ་ན། དེ་ནི་ཏིང་ངེ་འཛིན་རྒྱ་ཆེན་པོ་དེ་ལྟ་བུ་ཐོབ་པའི་བྱང་ཆུབ་སེམས་དཔའ་རྣམས་ཀྱི་ཆོས་ཉིད་དེ། དེས་བྱང་ཆུབ་སེམས་དཔའ་དེ་སངས་རྒྱས་ཀྱི་ཡེ་ཤེས་ འབྱམས་ཀླས་པ་ཐམས་ཅད་ལ་མཆོག་ཏུ་བྱ་བ་རབ་ཏུ་འཐོབ་བོ། །དེའི་ཕྱིར་ཆོས་འབྱམས་ཀླས་པ་ཐམས་ཅད་སྟོན་པ་ལ་མཁས་པའི་ཐ་དད་པ་ཡང་དག་པར་ཤེས་པ་རབ་ཏུ་འཐོབ་བོ། །དེའི་ཕྱིར་འཇིག་རྟེན་ ཐམས་ཅད་དུ་ཆོས་ཀྱི་དམ་པ་འཇིགས་པ་མེད་པར་རྣམ་པར་དག་པ་རབ་ཏུ་འཐོབ་བོ། །དེའི་ཕྱིར་ཏིང་ངེ་འཛིན་ཐམས་ཅད་ཀྱི་རྗེས་སུ་འགྲོ་བའི་ཡེ་ཤེས་རབ་ཏུ་འཐོབ་བོ། །དེའི་ཕྱིར་བྱང་ཆུབ་སེམས་དཔའི་ཚུལ་ ཐམས་ཅད་ལ་མཁས་པའི་དམ་པ་རབ་ཏུ་འཐོབ་བོ། །དེའི་ཕྱིར་ཚུལ་ཐམས་ཅད་ཀྱི་རྒྱན་རབ་ཏུ་འཐོབ་བོ། །དེའི་ཕྱིར་འཇིག་རྟེན་ཐམས་ཅད་དུ་ཆོས་ཀྱི་དབུགས་ཕྱིན་པའི་ཕ་རོལ་ཏུ་ཕྱིན་པ་དང་ལྡན་པར་འགྱུར་རོ།། ༄༅། །དེའི་ཕྱིར་སེམས་ཅན་ཐམས་ཅད་ཀྱི་དུས་དང་དུས་མ་ཡིན་པ་རབ་ཏུ་ཤེས་སོ། །དེའི་ཕྱིར་འཇིག་རྟེན་གྱི་ཁམས་ཐམས་ཅད་སྣང་བར་བྱ་བ་རབ་ཏུ་ཤེས་སོ། །དེའི་ཕྱིར་སེམས་ཅན་ ཐམས་ཅད་ལ་བསྒྲིབས་པ་མེད་པའི་ཡེ་ཤེས་ཁོང་དུ་ཆུད་པར་འགྱུར་རོ། །དེའི་ཕྱིར་དོན་ཐམས་ཅད་བསྒྲུབ་པར་ཡོན་ཏན་ཐམས་ཅད་ལ་ཡན་ལག་རབ་ཏུ་གནས་པར་འགྱུར་རོ། །དེའི་ཕྱིར་ཐེག་པའི་ དམ་པ་རབ་ཏུ་བརྩོན་པར་བྱས་ཏེ། སེམས་ཅན་ཐམས་ཅད་ལ་མཉམ་པར་གཞག་པ་རྣམ་པར་དག་པ་རབ་ཏུ་བརྗོད་དོ། །དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའ་སེམས་ཅན་གྱི་དོན་ལ་གནས་ པ། སྙིང་རྗེ་ཆེན་པོ་དེ་ལྟ་བུ་རྣམ་པར་འཕེལ་བར་བྱེད་པ། དགེ་བའི་བཤེས་གཉེན་དང་བསྟེན་པར་འདོད་པ། སངས་རྒྱས་ཐམས་ཅད་བལྟ་བར་འདོད་པ། ཆོས་ཐམས་ཅད་སྣང་བར་བྱ་བར་འདོད་ པ༑ ཞིང་ཐམས་ཅད་དུ་འགྲོ་བར་འདོད་པ། ཕྱོགས་ཐམས་ཅད་དུ་རྒྱུ་བར་འདོད་པ། དུས་གསུམ་མཉམ་པ་ཉིད་ཁོང་དུ་ཆུད་པར་འདོད་པ། ཆོས་ཐམས་ཅད་མཉམ་པ་ཉིད་མངོན་པར་འཚང་ རྒྱ་བར་འདོད་པ། སངས་རྒྱས་མཉམ་པ་ཉིད་ལ་རབ་ཏུ་གནས་པར་འདོད་པ། ཡེ་ཤེས་མཉམ་པ་ཉིད་ལ་འདུག་པར་འདོད་པས་ཆོས་འདི་དག་ལ་ལས་དེ་ལྟ་བུར་བརྩོན་ཞིང་ལས་གཞན་ མེད་པ་དང༌། ངོམས་མི་ཤེས་པ་དང༌། སེམས་མ་འཁྲུགས་པ་དང༌། ཡིད་རྩེ་གཅིག་ཏུ་གྱུར་པ་དང༌། དེ་ལྟར་གནས་པ་ལ་བརྩོན་པ་དང༌། དེ་ལྟར་ཁོང་དུ་ཆུད་པའི་ཡིད་དང༌། དེ་ལྟར་མཉམ་ པའི་སེམས་དང༌། དེ་ལྟ་བུའི་ཡིད་བདེ་བ་དང༌། དེ་ལྟར་ལས་སུ་རུང་བ་དང༌། དེ་ལྟར་བརྩོན་པ་དང༌། དེ་ལྟར་མཐར་འབྱིན་པ་དང༌། དེ་ལྟར་རྣམ་པར་སྤྱོད་པས་ནན་ཏན་དུ་བྱ་ཞིང་མངོན་པར་བསྒྲུབ་ པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་ནི་ལོག་པར་སྨྲ་བ་མ་ཡིན། བྱང་ཆུབ་སེམས་དཔའ་རྣམས་ནི་གཞན་དུ་སྨྲ་བ་མ་ཡིན་ཏེ། བྱང་ཆུབ་སེམས་དཔའ་རྣམས་ནི་ཇི་སྐད་ དུ་སྨྲས་པ་དེ་བཞིན་དུ་བྱེད་པའོ། །དེ་ཅིའི་ཕྱིར་ཞེ་ན། འདི་ལྟ་སྟེ། དཔེར་ན། རྡོ་རྗེ་ནི་གཅིག་ཏུ་མི་རུང་བར་བརྗོད་པ་སྟེ། མི་ཚོགས་པའི་རང་བཞིན་ཡོངས་སུ་མི་གཏོང་ངོ༌། །དེ་བཞིན་དུ་བྱང་ཆུབ་ སེམས་དཔའ་ཡང་ཆོས་འདི་དག་ལས་བརྗོད་པ་སྟེ། འདི་ལྟ་བུའི་ཆོས་ལ་གནས་པ་ཡོངས་སུ་མི་གཏོང་ངོ༌། །འདི་ལྟ་སྟེ། དཔེར་ན། གསེར་ནི་ཁ་དོག་ཤིན་ཏུ་བཟང་བར་བརྗོད་པ་སྟེ། གསེར་གྱི་ཁ་ དོག་བཟང་པོ་རྣམ་པར་དག་པ་ཡོངས་སུ་མི་གཏོང་ངོ༌། །དེ་བཞིན་དུ་བྱང་ཆུབ་སེམས་དཔའ་ཡང་དེ་ལྟར་དགེ་ཞིང་བཟང་བའི་ཆོས་ཀྱིས་བརྗོད་པ་སྟེ། དེ་ལྟར་དགེ་ཞིང་བཟང་བའི་ཆོས་ལ་གནས་ པ་ཡོངས་སུ་མི་གཏོང་ངོ༌། །འདི་ལྟ་སྟེ། དཔེར་ན། ལྷའི་བུ་ཉི་མ་ནི་སྣང་བའི་དཀྱིལ་འཁོར་གྱིས་བརྗོད་པ་སྟེ། སྣང་བ་ཡོངས་སུ་མི་གཏོང་ངོ༌། །དེ་བཞིན་དུ་བྱང་ཆུབ་སེམས་དཔའ་ཡང་འགྲོ་བ་ཐམས་ ཅད་དུ་སྣང་བས་བརྗོད་པ་སྟེ། བྱང་ཆུབ་སེམས་དཔའི་སྣང་བ་ཡོངས་སུ་མི་གཏོང་ངོ༌། །འདི་ལྟ་སྟེ། དཔེར་ན། རིའི་རྒྱལ་པོ་རི་རབ་ནི་རིན་པོ་ཆེ་བཞིའི་ཕུང་པོས་རྒྱ་མཚོ་ལས་ཤིན་ཏུ་འཕགས་པར་ ༄༅། །བརྗོད་པ་སྟེ། རྒྱ་མཚོ་ལས་ཤིན་ཏུ་འཕགས་པ་ཡོངས་སུ་མི་གཏོང་ངོ༌། །དེ་བཞིན་དུ་བྱང་ཆུབ་སེམས་དཔའ་ཡང་འཇིག་རྟེན་ཐམས་ཅད་ལས་དགེ་བའི་རྩ་བས་ཤིན་ཏུ་འཕགས་ པར་བརྗོད་པ་སྟེ། འཇིག་རྟེན་ཐམས་ཅད་ལས་ཤིན་ཏུ་འཕགས་པ་ཡོངས་སུ་མི་གཏོང་ངོ༌། །འདི་ལྟ་སྟེ། དཔེར་ན། ས་ཆེན་པོ་ནི་འགྲོ་བ་ཐམས་ཅད་ཡོངས་སུ་རྟོན་པར་བརྗོད་པ་སྟེ། རྟོན་པའི་རང་བཞིན་ ཡོངས་སུ་མི་གཏོང་ངོ༌། །དེ་བཞིན་དུ་བྱང་ཆུབ་སེམས་དཔའ་ཡང་འགྲོ་བ་ཐམས་ཅད་ཡོངས་སུ་འགྲེལ་བར་བརྗོད་པ་སྟེ། སྙིང་རྗེ་ཆེན་པོ་ཡོངས་སུ་མི་གཏོང་ངོ༌། །འདི་ལྟ་སྟེ། དཔེར་ན། རྒྱ་མཚོ་ ཆེན་པོ་ནི་རིན་པོ་ཆེ་ཐམས་ཅད་ཀྱི་འབྱུང་གནས་སུ་བརྗོད་པ་སྟེ། རྒྱ་མཚོའི་ཆུ་ཡོངས་སུ་མི་གཏོང་ངོ༌། །དེ་བཞིན་དུ་བྱང་ཆུབ་སེམས་དཔའ་ཡང་དགེ་བའི་རྩ་བ་ཐམས་ཅད་ཀྱི་འབྱུང་གནས་སུ་ བརྗོད་པ་སྟེ། སེམས་ཅན་ཐམས་ཅད་ཡོངས་སུ་དགྲོལ་བའི་སྨོན་ལམ་ཡོངས་སུ་མི་གཏོང་ངོ༌། །འདི་ལྟ་སྟེ། དཔེར་ན། འཕོང་གི་སློབ་དཔོན་ནི་མདའ་གཞུ་དང་འཕོང་ལ་ཟོ་བདོག་བདེ་བས་ཇི་སྲིད་ དུ་མདའ་གཞུ་དང་ལྡན་ཞིང་མདའ་གཞུ་ལ་བརྩོན་པས་བརྗོད་པར་བྱ་བ་སྟེ། འཕོང་གི་ཚུལ་དུ་བྱ་བ་ཡོངས་སུ་མི་གཏོང་ངོ༌། །དེ་བཞིན་དུ་བྱང་ཆུབ་སེམས་དཔའ་ཡང་ཇི་ཙམ་དུ་ཏིང་ངེ་འཛིན་གྱི་སྒོ་ དང༑ ཡུལ་གྱི་རྣམ་པ་འདི་ལྟ་བུ་ལ་མངོན་པར་བརྩོན་ཞིང་ཡོངས་སུ་སྒྲུབ་པ་དེ་ཙམ་དུ་ཐམས་ཅད་མཁྱེན་པའི་ཡེ་ཤེས་ཀྱིས་སྣང་བར་འགྱུར་བ་ཡིན། འདི་ལྟ་སྟེ། དཔེར་ན། འཁོར་ལོས་བསྒྱུར་བའི་ རྒྱལ་པོ་ནི་ཇི་ཙམ་དུ་ཚེ་རིང་བ་དེ་ཙམ་དུ་བདེ་བ་མྱོང་བ་ཡིན། དེ་བཞིན་དུ་བྱང་ཆུབ་སེམས་དཔའ་ཡང་ཇི་ཙམ་དུ་བྱང་ཆུབ་སེམས་དཔའི་སྤྱད་པ་སྤྱོད་ཅིང་རྣམ་པ་འདི་ལྟ་བུའི་ཏིང་ངེ་འཛིན་ཆེན་པོ་ལ་ སྙོམས་པར་འཇུག་པ་དེ་ཙམ་དུ་སེམས་ཅན་གྱི་ཁམས་རྣམ་པར་དག་པར་འགྱུར་རོ། །ཤིན་ཏུ་རྣམ་པར་དག་པ་ཡང་རབ་ཏུ་འཐོབ་བོ། །འདི་ལྟ་སྟེ། དཔེར་ན། ཇི་ཙམ་དུ་ས་བོན་བཏབ་པ་དེ་ཙམ་དུ་རྣམ་ པར་འཕེལ་ལོ། །དེ་བཞིན་དུ་བྱང་ཆུབ་སེམས་དཔའ་ཡང་ཇི་ཙམ་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་བརྩོན་པ་དེ་ཙམ་དུ་སེམས་ཅན་གྱི་ཁམས་རྣམས་དགེ་བའི་རྩ་བ་རྣམ་པར་དག་ པར་འགྱུར་རོ། །འདི་ལྟ་སྟེ། དཔེར་ན། སྤྲིན་ཆེན་པོ་ནི་ཇི་ཙམ་དུ་ཆར་འབེབས་པ་དེ་ཙམ་དུ་དབྱར་གྱི་དུས་ལ་ས་བོན་རྣམ་པར་འཕེལ་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་ཇི་ཙམ་དུ་ཆོས་ ཀྱི་སྤྲིན་གྱི་ཆར་འབེབས་ཤིང༌། བྱང་ཆུབ་སེམས་དཔའི་སྤྱད་པ་སྤྱོད་པ་དང༌། རྣམ་པ་འདི་ལྟ་བུའི་ཏིང་ངེ་འཛིན་ཆེན་པོ་ལ་སྙོམས་པར་འཇུག་པ་དེ་ཙམ་དུ་སེམས་ཅན་རྣམས་ཤིན་ཏུ་རྣམ་པར་དག་པར་ འགྱུར་ཏེ། ཤིན་ཏུ་མཐར་ཐུག་པར་འགྱུར་བ་དང༌། ཤིན་ཏུ་བདེ་བ་ཕུན་སུམ་ཚོགས་པ་དང་ལྡན་པ་དང༌། མཆོག་ཏུ་བྱ་བ་ཤིན་ཏུ་འཐོབ་པ་དང༌། ཤིན་ཏུ་ཕ་རོལ་ཏུ་ཕྱིན་པ་དང༌། འཇིག་རྟེན་ཐམས་ཅད་ ཤིན་ཏུ་ཚིམ་པར་བྱེད་པ་དང༌། སྐྱེ་དགུ་ཐམས་ཅད་ཀྱི་བྱ་བ་ཐམས་ཅད་ལ་ཐེ་ཚོམ་ཤིན་ཏུ་གཅོད་པ་དང༌། སྦྱིན་བསྲེག་ཡོངས་སུ་བཟུང་ཞིང་སྦྱིན་པ་ཡོངས་སུ་སྦྱོང་བས་བསོད་ནམས་རྨད་དུ་བྱུང་བ་དང༌། ཕྱིར་ ༄༅། །མི་ལྡོག་པའི་འཁོར་ལོ་ལ་རབ་ཏུ་གཞོག་པའི་ཕྱིར། ཐམས་ཅད་མཁྱེན་པ་ཉིད་དུ་སྐལ་པ་ཤིན་ཏུ་མཉམ་པར་འགྱུར་བ་དང༌། སེམས་ཅན་ཐམས་ཅད་ཁམས་གསུམ་ལས་བསྒྲལ་བའི་ ཕྱིར། ཡེ་ཤེས་ཤིན་ཏུ་རྣམ་པར་དག་པར་བྱེད་པ་ཡིན། ཐམས་ཅད་མཁྱེན་པའི་ཡེ་ཤེས་ལ་སེམས་ཅན་རྣམས་དགོད་པའི་ཕྱིར། ཆོས་ཀྱི་འཁོར་ལོས་བསྒྱུར་བ་དམ་པར་འགྱུར་བ་ཡིན། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་རང་བཞིན་གྱི་མཆོས་ཀྱི་དབྱིངས་རྣམ་པར་ཕྱེ་བ་སྟེ། བསམ་གྱིས་མི་ཁྱབ་པའོ། །ཚད་མེད་པའོ། །བྱང་ཆུབ་སེམས་དཔའི་སྤྱོད་པ་རྣམ་པར་སྦྱོང་བའོ། །ཐམས་ཅད་མཁྱེན་པ་ཉིད་ཀྱི་ ཕྱིར་ཡེ་ཤེས་སྦྱོང་བའོ། །ཡོངས་སུ་འདུལ་བས་སེམས་ཅན་སྦྱོང་བའོ། །ཡོངས་སུ་བསྔོ་བས་ཞི་བ་སྦྱོང་བའོ། །རབ་ཏུ་གཞོག་པས་ཆོས་སྦྱོང་བའོ། །ཞུམ་པ་མེད་པས་མི་འཇིགས་པ་སྦྱོང་བའོ། །རབ་ཏུ་ བསྟན་པས་ཐ་དད་པ་ཡང་དག་པར་ཤེས་པ་སྦྱོང་བའོ། །ཤིན་ཏུ་བསྟན་པ་མཆོས་སྦྱོང་བའོ། །ཆོས་ཐམས་ཅད་ལས་ཕྱིར་མི་ལྡོག་པར་གཟུངས་སྦྱོང་བའོ། །སངས་རྒྱས་ཀྱི་འབྱུང་བ་ཐམས་ཅད་ཀྱི་ དོན་དུ་སངས་རྒྱས་ཀྱི་བསྟན་པ་སྦྱོང་བའོ། །དེ་ལྟར་བྱང་ཆུབ་སེམས་དཔའ་ཏིང་ངེ་འཛིན་འདི་ལ་གནས་པ་ནི་ཡོན་ཏན་འདི་དག་དང༌། གཞན་ཡང་ཡོངས་སུ་དག་པ་བརྗོད་དུ་མེད་པའི་ཡང་བརྗོད་དུ་མེད་པ་བྱེ་ བ་ཁྲག་ཁྲིག་བརྒྱ་སྟོང་རབ་ཏུ་འཐོབ་བོ། །ཏིང་ངེ་འཛིན་ཆེན་པོའི་དཀྱིལ་འཁོར་འདི་དག་གི་དབང་དང༌། སངས་རྒྱས་ཐམས་ཅད་ཀྱི་བྱིན་གྱི་རླབས་དང༌། རང་གི་དགེ་བའི་རྩ་བའི་རྒྱུའི་སྟོབས་དང༌། ཡེ་ཤེས་ ཀྱི་སའི་སྒྲོལ་བའི་མཐུ་དང༌། དགེ་བའི་བཤེས་གཉེན་གྱི་ཉེ་བར་བསྟན་པའི་སྟོབས་དང༌། བདུད་ཀྱི་ལས་ཐམས་ཅད་རབ་ཏུ་འཇོམས་པའི་མཐུ་དང༌། དགེ་བའི་ལས་སྐལ་བ་མཉམ་པ་རྣམས་ཀྱི་གཞུང་གཅིག་ པའི་མཐུ་དང༌། སྨོན་ལམ་རྣམས་ཀྱི་དག་པའི་སྟོབས་དང༌། ཇི་ལྟར་བསྐྱེད་པའི་དགེ་བའི་རྩ་བ་ཡོངས་སུ་གྲུབ་པའི་སྟོབས་དང༌། འཇིག་རྟེན་ལས་འདས་པའི་བསོད་ནམས་ཐུབ་པ་མེད་ཅིང་ཟད་མི་ཤེས་པའི་མཐུས་ དེ་ལྟར་སྙོམས་པར་འཇུག་པ་ལ་གནས་པ་ནི་ཡོན་ཏན་མཚུངས་པ་མཉམ་པ་བཅུས་སངས་རྒྱས་འདས་པ་དང༌། མ་བྱོན་པ་དང༌། ད་ལྟར་བྱུང་བ་ཐམས་ཅད་དང་མཚུངས་པ་མཉམ་པ་ཡིན་ཏེ། བཅུ་གང་ཞེ་ན་། འདི་ལྟར་གཟུགས་དང༌། མཚན་དང༌། དཔེ་བྱད་བཟང་པོ་སྣ་ཚོགས་ཀྱིས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། འོད་དང་འོད་ཟེར་གྱི་དྲ་བ་རབ་ཏུ་འགྱེད་པ་རྣམ་པར་དག་པས་བྱང་ཆུབ་སེམས་ དཔའ་མཚུངས་པ་མཉམ་པ་ཡིན། རྫུ་འཕྲུལ་དང༌། རྣམ་པར་འཕྲུལ་པ་དང༌། སྤྲུལ་པ་སེམས་ཅན་འདུལ་བའི་ཚུལ་བཞིན་དུ་སྟོན་པས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། ལུས་ཚད་མེད་ པ་དང༌། ཁ་དོག་མཐའ་ཡས་པ་དང༌། དབྱངས་ཐམས་ཅད་རྣམ་པར་དག་པས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། སངས་རྒྱས་ཀྱི་ཞིང་རྣམ་པར་དག་པ་བྱིན་གྱིས་རློབ་ཅིང་སེམས་ ཅན་གྱི་ལས་དང་སྤྱོད་པ་ཇི་ལྟ་བ་བཞིན་དུ་རྣམ་པར་དམིགས་པ་ཡང་དག་པར་སྟོན་པས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། སེམས་ཅན་ཐམས་ཅད་ཀྱི་ཐ་སྙད་གཟུངས་དམ་པས་འཛིན་ ༄༅། །པའི་མཐུ་དང༌། དྲན་པ་ཉམས་པ་མེད་པའི་མཐར་ཐུག་པར་གནས་པས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། ཐ་དད་པ་ཡང་དག་པར་ཤེས་པ་མི་ཟད་པས་ སེམས་ཅན་ཐམས་ཅད་ཀྱི་སྒྲ་སྐད་ཤེས་པས་སྟོན་ཅིང༌། ཆོས་ཀྱི་འཁོར་ལོ་བསྐོར་བས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། མི་འཇིགས་པས་བག་ཚ་བ་མེད་པ་སེངྒེ་ང་རོ་ སྒྲོག་ཅིང༌། ཆོས་དང་མཐུན་པར་སེམས་ཅན་ཐམས་ཅད་ཁོང་དུ་ཆུད་པར་བྱེད་པས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། དུས་གསུམ་གྱི་ཚིག་གི་ལམ་ལ་འཇུག་པ་ སྐད་ཅིག་གི་མཐར་འཇུག་པར་བྱེད་པས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། སངས་རྒྱས་ཀྱི་སྟོབས་དང་དེ་བཞིན་གཤེགས་པའི་ཡུལ་རྣམ་པར་ཕྱེ་བ་སེམས་ཅན་རྣམས་ལ་ ཡང་དག་པར་སྟོན་པས་བྱང་ཆུབ་སེམས་དཔའ་དེ་བཞིན་གཤེགས་པ་ཐམས་ཅད་དང་མཚུངས་པ་མཉམ་པ་ཡིན། དེ་ནས་བྱང་ཆུབ་སེམས་དཔའ་ཀུན་ཏུ་མིག་གིས་བྱང་ཆུབ་སེམས་དཔའ་ ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ༑ རྒྱལ་བའི་སྲས། དེ་ལྟར་བྱང་ཆུབ་སེམས་དཔའ་དེ་རྣམ་པ་དེ་ལྟ་བུ་དེ་དག་དང་ལྡན་པས་དེ་བཞིན་གཤེགས་པ་ཐམས་ཅད་དང་མཚུངས་པ་ མཉམ་པ་ཡིན་ན། ཅིའི་ཕྱིར་སངས་རྒྱས་མ་ཡིན། ཅིའི་ཕྱིར་སྟོབས་བཅུ་མ་ཡིན། ཅིའི་ཕྱིར་ཐམས་ཅད་མཁྱེན་པ་མ་ཡིན། ཅིའི་ཕྱིར་ཀུན་ཏུ་གཟིགས་པ་མ་ཡིན། ཅིའི་ཕྱིར་ཆོས་ཐམས་ཅད་ཀྱི་ དཀྱིལ་འཁོར་ལ་བསྒྲིབས་པ་མི་མངའ་བ་གཟིགས་པ་མ་ཡིན། ཅིའི་ཕྱིར་ཆོས་ཐམས་ཅད་མངོན་པར་སངས་རྒྱས་པ་མ་ཡིན། ཅིའི་ཕྱིར་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ ཐམས་ཅད་དང་མི་གཉིས་པར་སྤྱོད་པ་མ་ཡིན། ཅིའི་ཕྱིར་གནས་པའི་མཐར་གྱུར་པའི་ཡེ་ཤེས་དང་ལྡན་པ་མ་ཡིན། ཅིའི་ཕྱིར་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་ རྒྱུན་གཅོད་པ་མ་ཡིན། ཅིའི་ཕྱིར་ཆོས་ཀྱི་དབྱིངས་ཀྱི་མཐར་ཐུག་པ་མ་ཡིན། ཅིའི་ཕྱིར་བྱང་ཆུབ་སེམས་དཔའི་རྒྱུད་ཉེ་བར་ལེན་པ་བཏང་སྙོམས་སུ་མི་གཞོག །དེ་ནས་བྱང་ཆུབ་སེམས་དཔའ་ཀུན་ ཏུ་བཟང་པོས། བྱང་ཆུབ་སེམས་དཔའ་ཀུན་ཏུ་མིག་ལ་འདི་སྐད་ཅེས་སྨྲས་སོ། །ཀྱེ༑ རྒྱལ་བའི་སྲས། ཁྱོད་དེ་སྐད་དུ་གལ་ཏེ་བྱང་ཆུབ་སེམས་དཔའ་དེ་དེ་བཞིན་གཤེགས་པ་ཐམས་ཅད་དང་མཚུངས་པ་ མཉམ་པ་ཡིན་ན། ཅིའི་ཕྱིར་སངས་རྒྱས་མ་ཡིན་ཅེས་ཟེར་བ་དེ་ཇི་སྐད་སྨྲས་པ་དེ་བཞིན་ཏེ། ལེགས་སོ། །ལེགས་སོ། ཀྱེ༑ རྒྱལ་བའི་སྲས། ནམ་བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་དང༌། འདས་པ་ དང༌། མ་འོངས་པ་དང༌། ད་ལྟར་བྱུང་བའི་སྨོན་ལམ་ཐ་མི་དད་པར་ཞུགས་པས་ཡང་དག་པར་སྐྱེས་པའི་ཡུལ་ཐོབ་པར་གྱུར་པ་དེའི་ཚེ་སངས་རྒྱས་ཞེས་བྱའོ། །དེ་བཞིན་གཤེགས་པའི་དོན་དུ་བྱང་ཆུབ་སེམས་ དཔའི་སྤྱད་པ་སྤྱོད་པ་རྒྱུན་མ་བཅད་པས་དེ་བྱང་ཆུབ་སེམས་དཔའ་ཞེས་བྱའོ། །ནམ་དེ་བཞིན་གཤེགས་པ་རྣམས་ཀྱི་སྟོབས་བཅུ་ལ་ཞུགས་པར་གྱུར་པ་དེའི་ཚེ་སྟོབས་བཅུ་ཞེས་བྱའོ། །དེ་བཞིན་ ༄༅། །གཤེགས་པའི་སྟོབས་བསྒྲུབ་ཅིང༌། བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པས་བྱང་ཆུབ་སེམས་དཔའ་ཞེས་བྱའོ། །ནམ་ཆེད་དུ་བྱ་བ་མེད་པར་ཆོས་ཀྱི་དབྱིངས་ཤིན་ཏུ་ བསྟན་པ་ཐམས་ཅད་རྟོགས་པར་གྱུར་པ་དེའི་ཚེ་ཐམས་ཅད་མཁྱེན་པ་ཞེས་བྱའོ། །ཆོས་ཀྱི་དབྱིངས་ཐམས་ཅད་ཤིན་ཏུ་བསྟན་པ་ཐ་དད་པ་ལ་འཇུག་པ་རིག་པར་སྤྱོད་ཅིང་མཁས་པར་བྱ་ བ་ལས་ཕྱིར་མི་ལྡོག་པས་དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེ་ཆོས་ཐམས་ཅད་མི་གཉིས་པར་ཡང་དག་པར་སྤྱོད་པ་ཡོངས་སུ་ཤེས་པར་ གྱུར་པ་དེའི་ཚེ། སངས་རྒྱས་ཀྱི་ཆོས་ཐམས་ཅད་རྣམ་པར་སངས་རྒྱས་པའི་བློ་མངའ་བ་ཞེས་བྱའོ། །བྱང་ཆུབ་སེམས་དཔའ་དེ་ཆོས་ཐམས་ཅད་གཉིས་པ་དང༌། གཉིས་མ་ཡིན་པ་ལ་ མཁས་པས་རྣམ་པ་ཐ་དད་པའི་རྒྱུད་ལ་འཇུག་ཅིང་ཆོས་གཅིག་ནས་གཅིག་ཏུ་བརྒྱུད་པ་མཁས་པ་ལ་གནས་པས་དེ་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་ དེ་ཀུན་ཏུ་གཟིགས་པའི་ཡུལ་ཡེ་ཤེས་ཀྱི་སྒོས་ཁོང་དུ་ཆུད་པར་གྱུར་པ་དེའི་ཚེ་ཀུན་ཏུ་གཟིགས་པ་ཞེས་བྱའོ། །བྱང་ཆུབ་སེམས་དཔའ་དེ་ཀུན་ཏུ་གཟིགས་པའི་ཡུལ་མངོན་པར་སྒྲུབ་ ཅིང་སེམས་དང་ཡེ་ཤེས་སེམས་སྐད་ཅིག་ཏུ་རྣམ་པར་འཕེལ་བས་ཡོངས་སུ་སྐྱོ་བར་མི་བྱེད་པས་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེ་ཆོས་སྣང་བའི་སྒོ་ཐམས་ ཅད་ཀྱིས་སྣང་བར་བྱེད་ཅིང༌། མུན་པ་མེད་པའི་ས་ལ་གནས་པ་དེའི་ཚེ་བསྒྲིབས་པ་མེད་པར་གཟིགས་པ་ཞེས་བྱའོ། །བྱང་ཆུབ་སེམས་དཔའ་དེ་བསྒྲིབས་པ་མེད་པའི་ཡེ་ཤེས་སྟོན་པའི་དོན་ དུ་སངས་རྒྱས་རྗེས་སུ་དྲན་པས་དེ་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱི་ཚུལ་མངོན་པར་ཁོང་དུ་ཆུད་པར་གྱུར་ པ་དེའི་ཚེ། ཆོས་ཐམས་ཅད་མངོན་པར་སངས་རྒྱས་པ་ཞེས་བྱའོ། །བྱང་ཆུབ་སེམས་དཔའ་དེ་དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱི་ཚུལ་མངོན་པར་སངས་རྒྱས་པ་ལ་སྤྱོད་ཅིང་རྟོག་ ལ་ཁོང་དུ་ཆུད་པས་དེ་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེ་དེ་བཞིན་གཤེགས་པའི་གནས་ལ་སྤྱོད་ཅིང༌། དེ་བཞིན་གཤེགས་པ་ཐམས་ཅད་དང་མི་གཉིས་ པར་གྱུར་པ་དེའི་ཚེ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་དང་མི་གཉིས་པ་ཞེས་བྱའོ། །བྱང་ཆུབ་སེམས་དཔའ་དེ་དེ་བཞིན་གཤེགས་པའི་སྐུ་ཐོབ་པར་ བྱ་བའི་ཕྱིར་བདག་ཡོངས་སུ་སྦྱོང་ཞིང་རྣམ་པར་སྒོམ་པས་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེ་འགྲོ་བ་ཐམས་ཅད་དུ་གནས་པའི་ཡང་དག་པའི་མཐའ་ ཁོང་དུ་ཆུད་པར་གྱུར་པ་དེའི་ཚེ། ཡང་དག་པའི་མཐའ་མཁྱེན་པ་ཞེས་བྱའོ། །བྱང་ཆུབ་སེམས་དཔའ་དེ་གནས་པའི་ཡང་དག་པའི་མཐའ་ལ་རྟོགས་པར་གཞོག་ཅིང་ཡང་དག་པའི་མཐའ་མངོན་དུ་མི་ ༄༅། །བྱེད་ཅིང༌། ཆོས་ཐམས་ཅད་རབ་ཏུ་དབྱེ་བའི་རྒྱུད་ལ་བཏང་སྙོམས་རབ་ཏུ་ཐོབ་པ་ཡང་མ་ཡིན་པས། དེ་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་ དཔའ་དེ་ལེན་པ་མེད་ཅིང་འདོར་པ་མེད་ལ། རྟོག་པ་མེད་ཅིང་རྣམ་པར་རྟོག་པ་མེད་པར་གྱུར་པ་དེའི་ཚེ་སྨོན་ལམ་ཡོངས་སུ་བཏང་བ་ཞེས་བྱའོ། །བྱང་ཆུབ་སེམས་དཔའ་དེ་བྱང་ཆུབ་སེམས་ དཔའི་སྤྱོད་པ་ཡོངས་སུ་རྫོགས་པར་བྱེད་ཅིང་ཤིན་ཏུ་ཡངས་པར་བྱེད་པ་དང༌། རྣམ་པར་སྤྱོང་བ་དང༌། ཕྱིར་མི་ལྡོག་པར་བྱེད་པས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་རྒྱུན་མ་བཅད་པ་ཞེས་བྱའོ། །ནམ་བྱང་ཆུབ་སེམས་དཔའ་དེ་ཆོས་ཀྱི་དབྱིངས་སྣང་བར་བྱ་བའི་ཚུལ་གྱིས་ཆོས་ཀྱི་དབྱིངས་མཐའ་དང་དབུས་མེད་པ་རབ་ཏུ་ཤེས་ཤིང་མཚན་ ཉིད་གཅིག་གིས་ཆོས་ཐམས་ཅད་ཀྱི་མཚན་ཉིད་རབ་ཏུ་ཤེས་པར་གྱུར་པ་དེའི་ཚེ། ཆོས་ཀྱི་དབྱིངས་ཀྱི་མཐར་ཐུག་པ་ཞེས་བྱའོ། །ནམ་བྱང་ཆུབ་སེམས་དཔའ་དེ་ཕྱིར་མི་ལྡོག ། པའི་བཏང་སྙོམས་དང་ལྡན་པར་གྱུར་པ་དེའི་ཚེ། བྱང་ཆུབ་སེམས་དཔའི་རྒྱུད་ཉེ་བར་ལེན་པ་ལ་བཏང་སྙོམས་པ་ཞེས་བྱའོ། །བྱང་ཆུབ་སེམས་དཔའ་དེ་ཆོས་ཀྱི་དབྱིངས་ལ་འཇུག་ པ་རབ་ཏུ་ཤེས་པའི་ཚུལ་གྱིས་ཆོས་ཀྱི་དབྱིངས་མཐའ་དང་དབུས་མེད་པ་རབ་ཏུ་ཤེས་ཤིང༌། ཆོས་ཐམས་ཅད་མཚན་ཉིད་ཐ་དད་པའི་ཚུལ་གྱིས་མཚན་ཉིད་སྣ་ཚོགས་རབ་ཏུ་ཤེས་ལ། ཕྱི་ མའི་མཐའི་མུར་ཐུག་པའི་བསྐལ་པར་སྐྱོ་བ་མེད་ཅིང་ཡོངས་སུ་ཡི་འཆད་པ་མེད་དེ། འགྲོ་བ་ཐམས་ཅད་སྙིང་རྗེ་ཆེན་པོས་ཡོངས་སུ་བསྐྱབ་པའི་སེམས་ཀྱིས་སེམས་ཅན་ཐམས་ཅད་ཡོངས་སུ་ འགྲེལ་ཅིང་འདུལ་བས་དེའི་ཕྱིར། བྱང་ཆུབ་སེམས་དཔའ་ཀུན་ཏུ་བཟང་པོ་ཞེས་བྱའོ། །ཀྱེ༑ རྒྱལ་བའི་སྲས་དག། འདི་ལྟ་སྟེ། དཔེར་ན། གླང་པོའི་རྒྱལ་པོ་ཤུགས་དང་ལྡན་པ་ཞེས་བྱ་བ་ནི། རི་གསེར་གྱི་ལོགས་ ཞེས་བྱ་བའི་རིན་པོ་ཆེ་བདུན་གྱི་རང་བཞིན་གྱི་ལུང་པ་རིན་པོ་ཆེའི་ར་བ་བདུན་གྱིས་བསྐོར་བ། རིན་པོ་ཆེའི་ཤིང་ཐགས་ཀྱི་དྲ་བ་བདུན་གྱིས་བསྐོར་བ། རིན་པོ་ཆེའི་དྲ་བས་ཀུན་ནས་ཡོག་པ་ན་གནས་ ཏེ༑ གླང་པོའི་རྒྱལ་པོ་ཤུགས་དང་ལྡན་པ་དེ་ཡང་ཐམས་ཅད་དུ་དཀར་བ་གངས་ཀྱི་མདོག་ལྟར་འདུག་པ། གསེར་གྱི་རྒྱལ་མཚན་ཅན། གསེར་གྱི་རྒྱན་གྱིས་བརྒྱན་པ། གསེར་གྱི་ཕྱང་ཕྲུལ་གྱིས་ཀླུབས་ པ༑ གསེར་གྱི་དྲ་བས་བཀབ་པ། དྲིལ་བུའི་དྲ་བ་བརྒྱུས་པ། རིན་པོ་ཆེ་ཐམས་ཅད་ཀྱི་དྲ་བས་སྣ་ཀུན་ནས་བཀབ་པ། རིན་པོ་ཆེའི་དྲིལ་བུའི་ཕྲེང་བ་ཀུན་ནས་བརྒྱུས་པ། ཡན་ལག་བདུན་ཤིན་ཏུ་གནས་ པ༑ མཆེ་བ་དྲུག་དང་ལྡན་པ། ཡིད་དུ་འོང་བ། གཟུགས་དང་ཁ་དོག་མི་མཐུན་པ་མེད་པ། བལྟ་ན་སྐྱོ་མི་ཤེས་བར་སྡུག་པ། རྣམ་པར་དག་པ། རིགས་དང་ལྡན་པ། ཅང་ཤེས་པ། ཡིད་བཞིན་དུ་བྱེད་པ་སྟེ། དེ་ ནི་ལྷའི་དབང་པོ་སུམ་ཅུ་རྩ་གསུམ་གྱི་བདག་པོ་བརྒྱ་བྱིན་གྱིས་བསྒོ་ན། གསེར་གྱི་ལོགས་ཀྱི་རི་ལུང་པ་ནས་མི་སྣང་བར་གྱུར་ཏེ། སུམ་ཅུ་རྩ་གསུམ་དུ་ལྷའི་རྒྱལ་པོ་བརྒྱ་བྱིན་ལ་རིམ་གྲོ་བྱ་བའི་ ༄༅། །ཕྱིར་འོང་ངོ༌། །དེ་ནས་ལྷའི་རྒྱལ་པོ་བརྒྱ་བྱིན་གྱིས་གླང་པོའི་རྒྱལ་པོ་ཤུགས་དང་ལྡན་པ་ལ་ཞོན་པར་གྱུར་པ་ན། དེའི་ཚེ་གླང་པོའི་རྒྱལ་པོ་ཤུགས་ དང་ལྡན་པ་དེ། རྫུ་འཕྲུལ་གྱི་རྣམ་པ་སྣ་ཚོགས་སྟོན་ཏེ། མགོ་སུམ་ཅུ་རྩ་གསུམ་མངོན་པར་སྤྲུལ་པ་བྱེད་དོ། །མགོ་རེ་རེ་ལ་ཡང་མཆེ་བ་དྲུག་དྲུག་མངོན་པར་སྤྲུལ་པ་བྱེད་དོ། ། སོ་རེ་རེ་ལ་ཡང་རྫིང་བུ་བདུན་བདུན་མངོན་པར་སྤྲུལ་པ་བྱེད་དོ། །རྫིང་བུ་རེ་རེ་ཞིང་ཡང་པདྨོ་བདུན་བདུན་མངོན་པར་སྤྲུལ་པ་བྱེད་དོ། །པདྨོ་རེ་རེ་ལ་ཡང་ལྷའི་བུ་མོ་བརྒྱ་ཕྲག་ བདུན་བདུན་མངོན་པར་སྤྲུལ་པ་བྱེད་དོ། །ལྷའི་བུ་མོ་དེ་དག་ཐམས་ཅད་ཀྱང་ལྷ་རྫས་ཀྱི་རོལ་མོ་སྟོང་ཕྲག་དུ་མའི་སྒྲ་འབྱིན་པས་ལྷའི་དབང་པོ་བརྒྱ་བྱིན་ལ་རིམ་གྲོར་བྱེད་དོ། །ལྷའི་ དབང་པོ་བརྒྱ་བྱིན་ཡང་ཤུགས་དང་ལྡན་པའི་རིམ་གྲོ་དང༌། སྤྲུལ་པ་ལ་ལོངས་སྤྱོད་པའི་ཕྱིར་ཆུ་ཀླུང་ཕྱོགས་མཚམས་ཞེས་བྱ་བའི་ངོགས་ནས་པུཎྜ་རི་ཀ་གཅིག་གིས་ཁེབས་པ་ཞེས་ བྱ་བའི་བཟའ་ཤིང་གི་ར་བར་འགྲོའོ། །དེ་ནས་ལྷའི་དབང་པོ་བརྒྱ་བྱིན་པུཎྜ་རི་ཀ་གཅིག་གིས་ཁེབས་པའི་བཟའ་ཤིང་གི་ར་བར་ཕྱིན་ནས་གླང་པོའི་རྒྱལ་པོ་ཤུགས་དང་ལྡན་པ་ ལས་བབས་ཏེ། ཁང་པ་རིན་པོ་ཆེ་ཐམས་ཅད་ཀྱི་རྒྱན་དང༌། སྙིང་པོ་ཅན་ན་གནས་ཤིང་ལྷའི་བུ་མོ་མཐའ་ཡས་པ་དང་རྩེའོ། །དེ་ནས་གླང་པོའི་རྒྱལ་པོ་ཤུགས་དང་ལྡན་པས་ ལུས་སྣ་ཚོགས་ཀྱི་རྫུ་འཕྲུལ་བརྟུལ་ཏེ། སུམ་ཅུ་རྩ་གསུམ་པའི་ལྷ་རྣམས་དང་པུཎྜ་རི་ཀ་གཅིག་གིས་ཁེབས་པའི་བཟའ་ཤིང་གི་ར་བ་དེ་ན། ལྷ་མོ་རྣམས་དང་ལྷན་ཅིག་རྩེ་དགའ་ཞིང་དགའ་ བར་སྤྱོད་དོ། །དེ་ལྟར་གླང་པོའི་རྒྱལ་པོ་ཤུགས་དང་ལྡན་པ་རྩེ་དགའ་ཞིང་དགའ་བར་སྤྱོད་པའི་ཚེ། སུམ་ཅུ་རྩ་གསུམ་པའི་ལྷ་དང་ལུས་མཚུངས་པར་གནས་པས། སུམ་ཅུ་རྩ་གསུམ་ པའི་ལྷ་དང༌། གླང་པོའི་རྒྱལ་པོ་ཤུགས་དང་ལྡན་པའི་ལུས་ཞེས་ལུས་ཀྱི་ཁྱད་པར་མེད་དོ། །གཟུགས་ཞེས་གཟུགས་ཀྱི་ཁྱད་པར་མེད་དོ། །ཁ་དོག་ཅེས་ཁ་དོག་གི་ཁྱད་པར་མེད་དོ། །གཟི་ བརྗིད་ཅེས་གཟི་བརྗིད་ཀྱི་ཁྱད་པར་མེད་དོ། །འོད་དང༌། རྒྱན་དང༌། གོས་དང༌། རྩེད་མོ་དང༌། ལོངས་སྤྱོད་དང༌། བལྟ་བ་དང༌། ཚུལ་གྱིས་ཀྱང་ཁྱད་པར་གང་ཡང་མེད་དོ། །གླང་པོའི་རྒྱལ་ པོ་ཤུགས་དང་ལྡན་པ་དང༌། སུམ་ཅུ་རྩ་གསུམ་པའི་ལྷ་རྣམས་སུ་འདི་དག་ནི་སུམ་ཅུ་རྩ་གསུམ་པའི་ལྷའོ། །འདི་དག་ནི་གླང་པོའི་རྒྱལ་པོ་ཤུགས་དང་ལྡན་པའོ་ཞེས་བྱ་བར་རྣམ་པར་བརྟག་ ཏུ་མེད་དོ། །སུམ་ཅུ་རྩ་གསུམ་པའི་ལྷ་རྣམས་དང༌། གླང་པོའི་རྒྱལ་པོ་ཤུགས་དང་ལྡན་པར་འདྲའོ། །གླང་པོའི་རྒྱལ་པོ་ཤུགས་དང་ལྡན་པ་དང༌། སུམ་ཅུ་རྩ་གསུམ་པའི་ལྷ་རྣམས་སུ་ འདྲའོ༑ ༑ཀྱེ། རྒྱལ་བའི་སྲས་དག །དེ་ལྟར་གླང་པོའི་རྒྱལ་པོ་ཤུགས་དང་ལྡན་པ། གསེར་གྱི་ལོགས་ཀྱི་རི་རིན་པོ་ཆེ་བདུན་གྱི་རང་བཞིན་གྱི་ལུང་པ་ནས་དགའ་བ་སྣ་ཚོགས་མངོན་པར་ ༄༅། །སྤྲུལ་པ་བྱས་ཏེ། སུམ་ཅུ་རྩ་གསུམ་པའི་ལྷའི་ནང་དུ་ལྷའི་དབང་པོ་བརྒྱ་བྱིན་གྱི་ལོངས་སྤྱོད་ཀྱི་དོན་དུ་འོངས་ནས། ལྷའི་དབང་པོ་བརྒྱ་བྱིན་ལ་མཆོད་ པ་དང༌། རིམ་གྲོ་བྱ་བ་དང༌། བཀུར་སྟི་བྱ་བ་དང༌། ཕུ་དུད་བྱ་བའི་ཕྱིར་སུམ་ཅུ་རྩ་གསུམ་པའི་ལྷ་དང་ཐ་མི་དད་པའི་ཚུལ་གྱིས་ལྷའི་དགའ་བ་ལ་སྤྱོད་པ་དེ་བཞིན་དུ། བྱང་ཆུབ་ སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། །སྨོན་ལམ་ལ་བརྩོན་པ། བྱང་ཆུབ་སེམས་དཔའི་ཏིང་ངེ་འཛིན་རིན་པོ་ཆེའི་རྒྱན་ གྱིས་བརྒྱན་པ། བྱང་ཆུབ་སེམས་དཔའི་ཡོན་ཏན། བྱང་ཆུབ་ཀྱི་ཡན་ལག་བདུན་ཤིན་ཏུ་གནས་པ། འོད་ཟེར་ཀུན་ཏུ་འགྱེད་པའི་ལུས་དང་ལྡན་པ། ཆོས་ཀྱི་དྲིལ་གྱི་ སྒྲ་ཀུན་ཏུ་སྒྲོག་པའི་དབྱངས་དང་ལྡན་པ། ཆོས་ཀྱི་རྒྱལ་མཚན་རབ་ཏུ་བསྒྲེང་བའི་རྒྱལ་མཚན་ཅན། སྙིང་རྗེའི་ལུང་པའི་གནས་ན་འདུག་པ་མཐུ་བོ་ཆེའི་སྟོབས་ཀྱི་ལུས་ ཀྱི་ཁྱད་པར་ཅན། ཐེག་པ་ཆེན་པོའི་སྨོན་ལམ་གྱི་མཆེ་བ་དང་ལྡན་པ། དྲག་ཤུལ་གྱི་སེངྒེས་བག་ཚ་བ་མེད་པ། ཡེ་ཤེས་ཀྱི་རྒྱུད་ཀྱི་ཆོས་ཀྱི་ཅོད་པ་ན་བཏགས་པ། གསང་ བའི་གནས་ཐམས་ཅད་ནས་རབ་ཏུ་བྱུང་བ། བྱང་ཆུབ་སེམས་དཔའི་སྤྱོད་པ་དང༌། སྨོན་ལམ་གྱིས་སྐྱོ་བ་མེད་པའི་བྱང་ཆུབ་ཀྱི་ཤིང་དྲུང་ན་མོས་ཤིང་སྤྱོད་པ་དང༌། སྨོན་ལམ་ གྱི་རྒྱུན་མི་གཅོད་པ། བྱང་ཆུབ་ཀྱི་ཤིང་དྲུང་དུ་འདུག་ཅིང༌། ཐམས་ཅད་མཁྱེན་པ་ཉིད་ཀྱི་རྫིང་བུ་ཐ་དད་པ་མེད་པར་མངོན་པར་འཚང་རྒྱ་བར་མངོན་སུམ་དུ་གྱུར་པ། བྱང་ཆུབ་སེམས་ དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་རྒྱ་ཆེན་པོ་རྣམ་པར་འཕེལ་བར་བྱེད་པ་དང༌། བློ་རྣམ་པར་སངས་རྒྱས་པ། བྱང་ཆུབ་སེམས་དཔའི་སྨོན་ལམ་མངོན་པར་སྒྲུབ་ཅིང་ རྒྱུན་མི་གཅོད་པ། ལྷོད་པར་མི་བྱེད་པ། ཕྱིར་ལྡོག་པར་མི་བྱེད་པ། སྙིང་རྗེ་ཆེན་པོ་མཐའ་དང་དབུས་མེད་པ་རྣམ་པར་འཕེལ་བར་བྱེད་པ། སྨོན་ལམ་ཆེན་པོའི་ཐེག་པས་སེམས་ ཅན་ཐམས་ཅད་ཀྱི་རིས་ན་ཀུན་ཏུ་བཟང་པོའི་སྤྱོད་པ་ལ་མངོན་པར་གནས་ཤིང༌། བརྩོན་འགྲུས་ཡོངས་སུ་མི་གཏོང་བ། ཕྱི་མའི་མཐའི་མུར་ཐུག་པར་སེམས་ཅན་ཐམས་ཅད་ཀྱི་ སྡུག་བསྔལ་ཡོངས་སུ་བསལ་བའི་ཕྱིར། བྱང་ཆུབ་སེམས་དཔའ་ཀུན་ཏུ་བཟང་པོའི་ལམ་ཡོངས་སུ་ཆད་པར་མི་བྱེད་ཀྱང༌། བྱང་ཆུབ་ཏུ་མངོན་པར་འཚང་མི་རྒྱ་སྟེ། རྫོགས་པར་ བྱང་ཆུབ་པའི་སྒོ་བརྗོད་དུ་མེད་པའི་ཡང་བརྗོད་དུ་མེད་པ་དང༌། ཆོས་ཀྱི་འཁོར་ལོ་བསྐོར་བའི་སྒོ་བརྗོད་དུ་མེད་པའི་ཡང་བརྗོད་དུ་མེད་པ་དང༌། བསྒོམ་པའི་བསམ་པ་སྣ་ཚོགས་ཀྱི་སྒོ་ བརྗོད་དུ་མེད་པའི་ཡང་བརྗོད་དུ་མེད་པ་དང༌། ཞིང་འབྱམས་ཀླས་པ་སྣ་ཚོགས་ཀྱི་གནས་སུ་མྱ་ངན་ལས་འདའ་བ་དང༌། རྣམ་པར་འཕྲུལ་པ་དང༌། མངོན་པར་འཚང་རྒྱ་བའི་སྒོ་ ༄༅། །བརྗོད་དུ་མེད་པའི་ཡང་བརྗོད་དུ་མེད་པས་འཇིག་རྟེན་གྱི་ཁམས་སྣ་ཚོགས་འབྱམས་ཀླས་པ་བརྗོད་དུ་མེད་པའི་ཡང་བརྗོད་དུ་མེད་པ་དག་ཏུ་སྐྱེ་བར་སྣང་ ངོ༑ ༑བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱད་པ་སྤྱོད་པར་སྣང་ངོ༌། །དེ་བཞིན་གཤེགས་པ་བྱང་ཆུབ་ཀྱི་ཤིང་དྲུང་དུ་མངོན་པར་སངས་རྒྱས་པ་བརྗོད་དུ་མེད་པའི་ཡང་བརྗོད་དུ་ མེད་པ། བྱང་ཆུབ་སེམས་དཔའི་ཚོགས་བརྗོད་དུ་མེད་པའི་ཡང་བརྗོད་དུ་མེད་པས་ཀུན་ནས་བསྐོར་བ་དག་གི་ཞབས་ཀྱི་དྲུང་དུ་འགྲོ་བར་སྣང་ངོ༌། །ཕྱོགས་འབྱམས་ཀླས་པ་དང༌། ཕྱོགས་མཚམས་འབྱམས་ཀླས་པའི་སངས་རྒྱས་ཀྱི་ཞིང་མང་པོ་རྒྱ་མཚོ་དག་ཏུ་མངོན་པར་སངས་རྒྱས་ནས། སྐད་ཅིག་གཅིག་ལོན་པ་དང༌། མངོན་པར་སངས་རྒྱས་ནས་ཡུད་ཙམ་ཞིག་ ལོན་པ་དང༌། མངོན་པར་སངས་རྒྱས་ནས་དུས་གཞན་དུ་གྱུར་པ་དང༌། མངོན་པར་སངས་རྒྱས་ནས་ཉི་མ་གཅིག་ལོན་པ་དང༌། མངོན་པར་སངས་རྒྱས་ནས་ཟླ་བ་ཕྱེད་ལོན་པ་དང༌། མངོན་ པར་སངས་རྒྱས་ནས་ལོ་གཅིག་ལོན་པ་དང༌། མངོན་པར་སངས་རྒྱས་ནས་ལོ་གྲངས་མེད་པ་ལོན་པ་དང༌། མངོན་པར་སངས་རྒྱས་ནས་བསྐལ་པ་གཅིག་ལོན་པ་དང༌། མངོན་པར་ སངས་རྒྱས་ནས་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་སྙེད་ལོན་པའི་དེ་བཞིན་གཤེགས་པ་དག་གི་ཞབས་ཀྱི་དྲུང་དུ་ཉེ་བར་འགྲོའོ། །དེ་བཞིན་དུ་ཤར་ཕྱོགས་ཀྱི་སངས་ རྒྱས་ཀྱི་ཞིང་གི་སངས་རྒྱས་ཐམས་ཅད་ལ་རིམ་གྲོ་བྱེད་དོ། །མཆོད་པ་བྱེད་དོ། །ཕྱག་འཚལ་ལོ། །རབ་ཏུ་འདུད་དོ། །སངས་རྒྱས་རྣམས་ལ་ཞུ་བ་བྱེད་དོ། །རྣམ་པར་འཕེལ་བའི་སྒྱུ་ མའི་དཀྱིལ་འཁོར་གྱི་ཞིང་ཡོངས་སུ་སྦྱོང་ཞིང༌། བྱང་ཆུབ་སེམས་དཔའི་སྤྱོད་པ་རྣམ་པར་དག་པ་མཐའ་ཡས་པ་དང༌། ཡེ་ཤེས་བརྗོད་དུ་མེད་པའི་ཡང་བརྗོད་དུ་མེད་པ་དང༌། བྱང་ཆུབ་སེམས་དཔའི་ རྣམ་པར་འཕྲུལ་པ་བརྗོད་དུ་མེད་པའི་ཡང་བརྗོད་དུ་མེད་པས། བྱང་ཆུབ་སེམས་དཔའི་ཁྱུ་མཆོག་གི་མཐུ་ཕྱུང་བ་སྣ་ཚོགས་དང༌། བྱང་ཆུབ་སེམས་དཔའི་ཡེ་ཤེས་ཡངས་པ་སྣ་ ཚོགས་དང༌། བྱང་ཆུབ་སེམས་དཔའི་སྤྱོད་ཡུལ་སྣ་ཚོགས་དང༌། བྱང་ཆུབ་སེམས་དཔའི་རྫུ་འཕྲུལ་སྣ་ཚོགས་དང༌། བྱང་ཆུབ་སེམས་དཔའི་མངོན་པར་བསྒྲུབ་པའི་ཁྱུ་མཆོག་གི་ མཐུ་མཐའ་དང་དབུས་མེད་པ་སྣ་ཚོགས་དང༌། བྱང་ཆུབ་སེམས་དཔའི་རྣམ་པར་ཐར་པ་ལ་རྣམ་པར་རྩེ་བ་སྣ་ཚོགས་དང༌། བྱང་ཆུབ་སེམས་དཔའི་ཆོས་སྣང་བ་རྣམ་པར་དག་ པའི་ཚུལ་སྣ་ཚོགས་ཀྱི་བྱང་ཆུབ་སེམས་དཔའི་སྤྱོད་པ་དང༌། སྨོན་ལམ་གྱིས་ཐམས་ཅད་དུ་སྤྱོད་པར་སྣང་ངོ༌། །བྱང་ཆུབ་སེམས་དཔའ་ཀུན་ཏུ་བཟང་པོའི་རྫུ་འཕྲུལ་དང༌། ཁྱུ་ མཆོག་གི་མཐུ་ཕྱུང་བའི་ཚུལ་གྱིས་སྔོན་གྱི་མཐའ་ཡང་འཇིག་པར་མི་བྱེད་དེ། འཁོར་བའི་འཁོར་ལོ་རྒྱུན་བཅད་པ་དང༌། འཇིག་རྟེན་གྱི་ཁམས་ཀྱི་རྒྱུད་འབྱམས་ཀླས་པ་རྣམ་ ༄༅། །པར་དག་པར་བྱ་བ་དང༌། དེ་བཞིན་གཤེགས་པའི་རྒྱུད་དང༌། སངས་རྒྱས་ཐམས་ཅད་མཐོང་བར་བྱ་བ་དང༌། སངས་རྒྱས་ཀྱི་ཆོས་ཐམས་ཅད་ལ་འཇུག་ ཅིང་ཁོང་དུ་ཆུད་པར་བྱ་བ་དང༌། དུས་གསུམ་གྱི་རྒྱུད་ཀྱི་སངས་རྒྱས་ཀྱི་ཚུལ་རྗེས་སུ་དྲན་པར་བྱ་བ་དང༌། ཐམས་ཅད་མཁྱེན་པའི་ཡེ་ཤེས་ཀྱི་རྒྱུད་རྣམ་པ་ཐ་དད་པའི་སྒྲ་དང༌། ཆོས་ ཐམས་ཅད་ཀྱི་རྒྱུ་ཕྱོགས་ཀྱི་རྒྱུད་དང༌། ཆོས་ཀྱི་ལུས་ཐམས་ཅད་ཀྱི་རྗེས་སུ་འབྲང་བར་བྱ་བ་དང༌། བྱང་ཆུབ་སེམས་དཔའི་སྤྱོད་པ་ཐམས་ཅད་ཡང་དག་པར་གཟུང་བའི་རྒྱུད་ཁོང་དུ་ ཆུད་ཅིང་ཡོངས་སུ་རྫོགས་པར་བྱ་བ་དང༌། ཀུན་ཏུ་བཟང་པོའི་རྒྱུད་ཀྱིས་ཐམས་ཅད་མཁྱེན་པའི་ཡེ་ཤེས་དང༌། ཁྱུ་མཆོག་གི་མཐུ་མངོན་པར་འཚང་རྒྱ་བར་བྱ་བའི་ཕྱིར་སེམས་ ཅན་བརྗོད་དུ་མེད་པའི་ཡང་བརྗོད་དུ་མེད་པ་རྣམ་པར་དག་པར་བྱེད་དོ། །ཀྱེ། རྒྱལ་བའི་སྲས་དག །ལྟོས་དང༌། དེ་ལྟར་ཀུན་ཏུ་བཟང་པོའི་སྤྱོད་པ་རྒྱུན་མི་འཆད་པ་དང༌། བྱང་ཆུབ་ སེམས་དཔའི་སྤྱོད་པ་ཡོངས་སུ་ཆད་པ་མེད་པ་དང༌། ཐམས་ཅད་མཁྱེན་པ་ཉིད་ཀྱི་སྣང་བ་ཉམས་པ་མེད་པ་དང༌། སངས་རྒྱས་ཐམས་ཅད་ཡོངས་སུ་བལྟ་བའི་ཕྱིར། ཀུན་ ཏུ་བཟང་པོའི་སྤྱོད་པ་རྒྱ་ཆེན་པོ་འབྱུང་ཞིང༌། ཐམས་ཅད་མཁྱེན་པའི་ཁྱུ་མཆོག་གི་མཐུ་ཕྱུང་པ་མྱོང་བར་བྱེད་པ་ངོ་མཚར་མི་ཆེའམ། ཀྱེ༑ རྒྱལ་བའི་སྲས་དག །གླང་པོའི་ རྒྱལ་པོའི་ཤུགས་དང་ལྡན་པ་དེ་ནི་གླང་པོའི་གནས་ནས་ཀྱང་འཕོ་བ་མེད་ལ། སུམ་ཅུ་རྩ་གསུམ་གྱི་སྐྱེ་བའི་སྐྱེ་མཆེད་དུ་ཡང་རབ་ཏུ་སྐྱེའོ། །བཞོན་པའི་དངོས་པོར་ཡང་རྣམ་ པར་སྤྱོད་དོ། །ལྷའི་རྩེ་བ་ལ་ཡང་ཡོངས་སུ་སྤྱོད་དོ། །རིམ་གྲོ་བྱ་བའི་ཚུལ་ཡང་ཡོངས་སུ་མི་སྤོང་ངོ༌། །ལྷའི་བུ་མོ་རྣམས་དང་ཡང་ཀུན་ཏུ་རྩེའོ། །ལྷ་རྣམས་དང་ཡང་མཚུངས་ ཤིང་མཉམ་སྟེ། རྣམ་པ་ཐ་དད་པ་མེད་དོ། །ཀྱེ༑ རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་ཡང་ཀུན་ཏུ་བཟང་པོའི་སྤྱོད་པ་ཐེག་པ་ཆེན་པོ་ཡང་ཡོངས་སུ་མི་ གཏོང་ཞིང་ཤི་འཕོ་བ་ཡང་མེད་ལ། སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་ལ་ཡང་རབ་ཏུ་སྤྱོད་དོ། །ཐམས་ཅད་མཁྱེན་པ་ཉིད་ལ་ཡང་རྣམ་པར་རྩེའོ། །སངས་རྒྱས་ཀྱི་རྣམ་ པར་ཐར་པ་ཡང་རབ་ཏུ་ཤེས་སོ། །ཆགས་པ་མེད་པ་ཉིད་ཀྱང་མངོན་པར་སྒྲུབ་བོ། །ཆགས་པ་མེད་ཅིང་བསྒྲིབས་པ་མེད་པ་ཡང་རྣམ་པར་དག་པར་བྱེད་དོ། །ཞིང་རྣམས་ལ་ ཡང་གནས་པ་མེད་དོ། །སངས་རྒྱས་ཀྱི་ཆོས་རྣམས་ལ་ཡང་རློམ་སེམས་མེད་ཅིང་མི་རྟོག་རྣམ་པར་མི་རྟོག་གོ །ཆོས་ཐམས་ཅད་ཀྱང་མཉམ་པ་ཉིད་དུ་བྱེད་དོ། །མི་གཉིས་ པ་དང་ཡང་འགལ་བར་མི་བྱེད་དོ། །སངས་རྒྱས་ཀྱི་ཞིང་ཡོངས་སུ་མི་སྤོང་སྟེ། དེ་ལྟར་ན་བྱང་ཆུབ་སེམས་དཔའ་དེ་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་ ༄༅། །རྒྱས་ཐམས་ཅད་དང་ཡང་མཚུངས་ཤིང་མཉམ་ལ་བྱང་ཆུབ་སེམས་དཔའི་སྤྱོད་པ་ཡང་རྒྱུན་མི་གཅོད་པ་ཡིན། ཀྱེ༑ རྒྱལ་བའི་སྲས་དག །གླང་ པོའི་རྒྱལ་པོ་ཤུགས་དང་ལྡན་པ་དེ་གླང་པོའི་ཡུལ་ན་ཡང་སྣང་ལ། ལྷའི་ཡུལ་ན་ཡང་སྤྱོད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་འདི་ལྟ་བུའི་ཆོས་ རྒྱ་ཆེན་པོ་དང་ལྡན་པ་ཡང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་ལ་རབ་ཏུ་གནས་པའི་བྱང་ཆུབ་སེམས་དཔའི་ལྷག་པའི་བསམ་པ་རྣམ་པར་དག་ བས་ཡང་དག་པར་གནས་པ་ཡིན། ཀྱེ༑ རྒྱལ་བའི་སྲས་དག །འདི་ནི་ཏིང་ངེ་འཛིན་གྱི་དཀྱིལ་འཁོར་རྒྱ་ཆེན་པོ། ཚད་མེད་པ། བྱང་ཆུབ་སེམས་དཔའ་ཉེ་བར་སྤྱོད་པ། ལྷག་ པའི་བསམ་པས་རབ་ཏུ་ཐོབ་པ། ཡེ་ཤེས་ཆེན་པོ་ལ་ཞུགས་པ་བཅུ་པ་སྟེ། ཀྱེ༑ རྒྱལ་བའི་སྲས་དག །འདི་དག་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་ངེ་འཛིན་རྒྱ་ཆེན་ པོའི་དཀྱིལ་འཁོར་བཅུ་རྣམས་སོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། ཏིང་ངེ་འཛིན་བཅུའི་ལེའུ་སྟེ། སུམ་ཅུ་རྩ་གསུམ་པའོ།། །། བམ་པོ་དྲུག་ཅུ་ཐམ་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་ཡང་བྱང་ཆུབ་སེམས་དཔའ་དེ་དག་ལ་སྨྲས་པ། ཀྱེ༑ རྒྱལ་བའི་སྲས་ དག༑ བཅུ་པོ་འདི་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་མངོན་པར་ཤེས་པ་སྟེ། བཅུ་གང་ཞེ་ན། ཀྱེ༑རྒྱལ་བའི་སྲས་དག །འདི་ལ་བྱང་ཆུབ་ སེམས་དཔའ་སེམས་དཔའ་ཆེན་པོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་ཏུ་སེམས་ཅན་ཇི་སྙེད་སྐྱེས་པ་དེ་དག་ཐམས་ཅད་ཀྱི་སེམས་དང་བསམ་པའི་ རྒྱུད་རབ་ཏུ་ཤེས་སོ། །སེམས་བསྐྱེད་པ་རབ་ཏུ་ཤེས་སོ། །དགེ་བ་དང༌། མི་དགེ་བ་དང༌། ཡངས་པ་དང༌། དོག་པ་དང༌། རྒྱ་ཆེན་པོ་དང༌། རྒྱ་ཆུང་ངུ་དང༌། འཁོར་བའི་རྗེས་སུ་འགྲོ་ བ་དང༌། འཁོར་བ་ལས་ལྡོག་པ་དང༌། ཡིད་བསལ་བ་དང༌། ཉན་ཐོས་ཀྱི་སེམས་དང༌། རང་སངས་རྒྱས་ཀྱི་སེམས་དང༌། བྱང་ཆུབ་སེམས་དཔའི་སེམས་དང༌། ཉན་ཐོས་ཀྱི་སྤྱོད་ པ་དང༌། རང་སངས་རྒྱས་ཀྱི་སྤྱོད་པ་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་ དང་མི་མ་ཡིན་པ་དང༌། སེམས་ཅན་དམྱལ་བ་དང༌། བྱོལ་སོང་གི་སྐྱེ་གནས་དང༌། གཤིན་རྗེའི་འཇིག་རྟེན་དང༌། ཡི་དྭགས་དང༌། མི་ཁོམ་པར་སྐྱེ་བ་རྣམས་ཀྱི་སེམས་དང་ སྤྱོད་པ་ཡང་རབ་ཏུ་ཤེས་ཏེ། སེམས་ཅན་གྱི་རིས་སྣ་ཚོགས་དང༌། སེམས་ཅན་གྱི་རིས་དུ་མ་རྣམ་པར་དབྱེ་བ་དང༌། རྣམ་པར་གདགས་པ་འབྱམས་ཀླས་པ་མང་པོ་དག་གི་སེམས་ ༄༅། །ཅན་རྣམས་ཀྱི་བསམ་པ་སེམས་ཀྱིས་རབ་ཏུ་ཤེས་སོ། །དེ་བཞིན་དུ་འཇིག་རྟེན་གྱི་ཁམས་བརྒྱ་དང༌། འཇིག་རྟེན་གྱི་ཁམས་སྟོང་དང༌། འཇིག་རྟེན་ གྱི་ཁམས་བརྒྱ་སྟོང་དང༌། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ནས། གཞུང་དེ་བཞིན་དུ་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་དང༌། འཇིག་ རྟེན་གྱི་ཁམས་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་དུ་སྐྱེས་པའི་སེམས་ཅན་དེ་དག་གི་བསམ་པ་སེམས་ཀྱིས་རབ་ཏུ་ཤེས་ཏེ། ཀྱེ༑ རྒྱལ་བའི་སྲས་དག ། འདི་ནི་བྱང་ཆུབ་སེམས་དཔའ་རྣམས་ཀྱི་སེམས་ལ་མཁས་ཤིང་ཤེས་པ་ཞེས་བྱ་བ་སྟེ། ཡེ་ཤེས་ཀྱི་མངོན་པར་ཤེས་པ་དང་པོའོ། །ཀྱེ༑རྒྱལ་བའི་སྲས་དག །གཞན་ཡང་ བྱང་ཆུབ་སེམས་དཔས་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་བར་དག་ན། སེམས་ཅན་ཤི་འཕོ་བ་དང༌། སྐྱེ་བར་འགྱུར་བ་འདི་ ལྟ་སྟེ། བདེ་བའི་ལམ་དང༌། ངན་སོང་དང༌། ཁ་དོག་སྡུག་པ་དང༌། ཁ་དོག་མི་སྡུག་པ་དང༌། ངན་པ་དང༌། བཟང་པོ་དང༌། ཀུན་ནས་ཉོན་མོངས་པ་དང༌། ཀུན་ནས་ཉོན་མོངས་པ་ མེད་པ་དང༌། རྣམ་པར་བྱང་བ་དང༌། རྣམ་པར་མ་བྱང་བ་དང༌། དེ་ལྟར་སེམས་ཅན་གྱི་རིགས་དུ་མ་དང༌། ལྷའི་རིས་དང༌། ཀླུའི་རིས་དང༌། གནོད་སྦྱིན་གྱི་རིས་དང༌། དྲི་ཟའི་རིས་ དང༑ ལྷ་མ་ཡིན་གྱི་རིས་དང༌། ནམ་མཁའ་ལྡིང་གི་རིས་དང༌། མིའམ་ཅིའི་རིས་དང༌། ལྟོ་འཕྱེ་ཆེན་པོའི་རིས་དང༌། མིའི་རིས་དང༌། མི་མ་ཡིན་པའི་རིས་དང༌། དོག་པའི་རིས་ དང༑ ཡངས་པའི་རིས་དང༌། ཆུང་བའི་རིས་དང༌། ཆེ་བའི་རིས་དང༌། རྣམ་པར་དགོད་པ་སྣ་ཚོགས་ཀྱི་རིས་ཀྱི་སྐྱེ་བ་དང་ཤི་འཕོ་རབ་ཏུ་ཤེས་ཏེ། དེ་ལྷའི་མིག་ཐོགས་པ་མེད་ ཅིང་དག་ལ་རྣམ་པར་དག་པས་སེམས་ཅན་རྣམས་ལས་ཇི་ལྟར་བསགས་པའི་ཚུལ་བཞིན་དུ་ཡང་དག་པར་མཐོང་སྟེ། བདེ་བ་དང་སྡུག་བསྔལ་རྣམ་པ་ཇི་ལྟ་བུ་མྱོང་བ་དང༌། ལས་ཇི་ ལྟ་བུར་བསགས་པ་དང༌། ལས་ཀྱི་མངོན་པར་འདུ་བྱ་བ་རྣམ་པ་ཇི་ལྟ་བུ་དང་ལྡན་པ་དང༌། བསམ་པའི་རྣམ་པ་ཇི་ལྟ་བུ་ཡིན་པ་དང༌། རྟོག་པ་ཇི་ལྟ་བུ་དང་ལྡན་པ་དང༌། ལྟ་བ་ཇི་ལྟ་བུ་ དང་ལྡན་པ་དང༌། སྤོབས་པ་ཇི་ལྟ་བུ་དང་ལྡན་པ་དང༌། རྒྱུ་ཇི་ལྟ་བུ་དང་ལྡན་པ་དང༌། ལས་ཇི་ལྟ་བུ་དང་ལྡན་པ་དང༌། དམིགས་པ་ཇི་ལྟ་བུ་དང་ལྡན་པ་དང༌། རྣམ་པ་ཇི་ལྟ་བུས་རྒྱུ་བ་ དེ་དག་ཐམས་ཅད་ཀྱང་རབ་ཏུ་མཐོང་ངོ༌། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལྷའི་མིག་སྟེ། ཡེ་ཤེས་ཀྱི་མངོན་པར་ཤེས་ པ་གཉིས་པའོ། །ཀྱེ༑ རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔས་བདག་དང༌། སེམས་ཅན་གཞན་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་ ༄༅། །དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་བར་དག་ཏུ་གཏགས་པ་རྣམས་ཀྱི་སྔོན་གྱི་གནས་རྗེས་སུ་དྲན་ཞིང་རབ་ཏུ་ཤེས་ཏེ། བདག་གི་སྔོན་གྱི་གནས་ ཀྱང་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རྗེས་སུ་དྲན་ནོ། །སེམས་ཅན་གཞན་གྱི་སྔོན་གྱི་གནས་ཀྱང་བསྐལ་ པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རྗེས་སུ་དྲན་ཞིང་རབ་ཏུ་ཤེས་སོ། །བདག་ནི་སྔོན་ཆེ་གེ་མོ་ཞིག་ན་འདུག་འདུག་སྟེ། མིང་ནི་འདི་ཞེས་བྱའོ། །རུས་ནི་འདི་ཞེས་བྱའོ། །རིགས་ནི་འདི་ཞེས་བྱའོ། །ཁ་ཟས་ནི་འདི་ཟ་ཟའོ། །བདེ་བ་དང་སྡུག་བསྔལ་ནི་འདི་ལྟ་བུ་ཞིག་མྱོང་བར་གྱུར་ཏོ། །ཞེས་ བྱ་བར་བདག་གི་སྔོན་གྱི་གནས་རྗེས་སུ་དྲན་ཞིང་རབ་ཏུ་ཤེས་སོ། །སེམས་ཅན་འདི་ནི་སྔོན་ཆེ་གེ་མོ་ཞིག་ན་འདུག་འདུག་སྟེ། མིང་ནི་འདི་ཞེས་བྱའོ། །རུས་ནི་འདི་ཞེས་བྱའོ། །རིགས་ ནི་འདི་ཞེས་བྱའོ། ཁ་ཟས་ནི་འདི་ཟའོ། །བདེ་བ་དང་སྡུག་བསྔལ་ནི་འདི་ལྟ་བུ་ཞིག་མྱོང་བར་གྱུར་ཏོ། །ཞེས་བྱ་བར་སེམས་ཅན་གཞན་འཇིག་རྟེན་གྱི་ཁམས་སངས་རྒྱས་ཀྱི་ཞིང་ བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་བར་དག་ཏུ་གཏོགས་པ་རྣམས་ཀྱི་སྔོན་གྱི་གནས་རྗེས་སུ་དྲན་ཞིང་རབ་ཏུ་ཤེས་སོ། །སེམས་ཅན་དེ་དག་རེ་རེ་ཞིང་ ཡང་ཚེའི་རྒྱུད་གཅིག་ནས་གཅིག་ཏུ་བརྒྱུད་པའི་སྲིད་པའི་རྒྱུད་རྒྱུ་དང་བཅས། རྐྱེན་དང་བཅས་པ་དང༌། ཚེའི་རྒྱུད་དུ་གནས་ཤིང་འདུག་འདུག་པའི་རྣམ་པ་སྔོན་གྱི་མཐའ་རྣམ་པ་སྣ་ ཚོགས་སུ་གནས་གནས་པ་དང༌། འཇིག་རྟེན་གྱི་རྒྱུད་དང༌། བྱུང་བའི་རྒྱུད་གཅིག་ནས་གཅིག་ཏུ་བརྒྱུད་པ་དང༌། མཚན་ཉིད་ཐ་དད་པའི་ལུས་རྣམ་པ་ཐ་དད་པ་སྣ་ཚོགས་ཐམས་ཅད་ ལས་རྣམ་པ་ཐ་དད་པ་སྣ་ཚོགས་བསགས་པས་སྐྱེ་བའི་སྒོ་སྣ་ཚོགས་ཀྱི་སྐྱེ་གནས་སུ་གྱུར་པ་དང༌། བག་ལ་ཉལ་བ་དང༌། ལས་དང་ལྟ་བ་སྣ་ཚོགས་ཀྱིས་སེམས་རྣམ་པ་ཐ་དད་པ་སྣ་ ཚོགས་བསྐྱེད་པ་དང༌། རྒྱུ་དང་རྐྱེན་སྣ་ཚོགས་གཞན་གྱིས་འབྱུང་བ་རྣམ་པ་ཐ་དད་པའི་ལས་ཀྱིས་རྒྱུད་རྣམ་པ་སྣ་ཚོགས་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་ ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རྗེས་སུ་དྲན་ཞིང་རབ་ཏུ་ཤེས་སོ། །འཇིག་རྟེན་གྱི་ཁམས་ཀྱི་རྒྱུད་གཅིག་གི་སེམས་ཅན་རྣམས་ཀྱི་ལས་ཇི་ལྟར་ཤེས་པ་དེ་བཞིན་དུ་། འཇིག་རྟེན་གྱི་ཁམས་ཀྱི་རྒྱུད་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སེམས་ཅན་རྣམས་ཀྱི་སྔོན་གྱི་གནས་ན་འདུག་ཅིང་སྤྱོད་སྤྱོད་བ་ རྗེས་སུ་དྲན་ཞིང་རབ་ཏུ་ཤེས་སོ། །སྔོན་གྱི་མཐའི་བསྐལ་པ་དེ་དང་དེ་དག་གི་འཇིག་རྟེན་གྱི་ཁམས་དེ་དང་དེ་དག་ཏུ་སངས་རྒྱས་བཅོམ་ལྡན་འདས། སངས་རྒྱས་ཀྱི་ཞིང་བརྗོད་དུ་མེད་ ༄༅། །པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་བ་རྣམས་མཚན་ནི་འདི་ཞེས་བྱའོ། །བྱུང་ནི་འདི་ལྟར་བྱུང་ངོ༌། །འཁོར་གྱི་རྣམ་པ་ནི་འདི་ ལྟ་བུའོ། །ཡབ་དང་ཡུམ་གྱི་མཚན་ནི་འདི་སྐད་ཅེས་བྱའོ། །ཞམ་འབྲིང་བའི་མིང་ནི་འདི་སྐད་ཅེས་བྱའོ། །ཉན་ཐོས་མཆོག་གི་ཟུང་དང་བཟང་པོའི་ཟུང་གི་མིང་ནི་འདི་སྐད་ཅེས་ བྱའོ༑ ༑རིགས་ནི་འདི་ཞེས་བྱའོ། །རྒྱལ་པོའི་ཕོ་བྲང་ནི་མིང་འདི་ཞེས་བྱ་བ་ནས་མངོན་པར་བྱུང་སྟེ། བྱང་ཆུབ་ཀྱི་ཤིང་མིང་འདི་ཞེས་བྱ་བའི་དྲུང་དུ་བརྟེན་ནས། བླ་ན་མེད་པ་ ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། གནས་ཀྱི་མིང་འདི་ཞེས་བྱ་བ་དག་ན་བཞུགས་ཤིང་མདོ་འདི་སྙེད་ཅིག་ཡང་དག་པར་བསྟན་ཏོ། །སེམས་ ཅན་འདི་སྙེད་ཅིག་གི་དོན་མཛད་དོ། །སྐུ་ཚེའི་ཚད་འདི་ཙམ་ཞིག་གིས་སངས་རྒྱས་ཀྱི་མཛད་པ་ཡང་དག་པར་བསྟན་ཏེ། ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་ སུ་ཡོངས་སུ་མྱ་ངན་ལས་འདས་སོ། །མྱ་ངན་ལས་འདས་ནས་ཀྱང་དེ་དག་གི་ཆོས་ནི་འདི་སྲིད་ཅིག་ཏུ་གནས་པར་གྱུར་ཏོ། །ཞེས་མཚན་རྣམ་པར་དགོད་པ་སངས་རྒྱས་ཀྱི་ཞིང་ བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང༌། མཚན་དེ་དག་རེ་རེའི་རྣམ་པ་ཡང་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ ཏུ་ཕྲ་བ་སྙེད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་བྱང་ཆུབ་ཏུ་ཐུགས་བསྐྱེད་བ་དང་བཅས། སྨོན་ལམ་དང་བཅས། སྤྱོད་པ་དང་ བཅས། འབྱུང་བ་དང་བཅས། སངས་རྒྱས་མཆོད་པ་དང་བཅས། སེམས་ཅན་ཡོངས་སུ་སྨིན་པར་མཛད་པ་དང་བཅས། འཁོར་གྱི་དཀྱིལ་འཁོར་དང་བཅས། ཆོས་ཀྱི་འཁོར་ལོ་དང་བཅས། དུས་གང་དུ་བྱུང་བ་དང་བཅས། སྐུ་ཚེ་ཇི་སྲིད་པ་དང་བཅས། སངས་རྒྱས་ཀྱི་ཆོ་འཕྲུལ་དང་བཅས། སངས་རྒྱས་ཀྱི་རྣམ་པར་འཕྲུལ་བ་ཡང་དག་པར་བསྟན་པ་དང་བཅས། ཡོངས་སུ་མྱ་ ངན་ལས་འདའ་བ་དང་བཅས། ཆོས་འབར་བར་གནས་པ་དང་བཅས། མཆོད་རྟེན་རྣམ་པར་ཕྱེ་བའི་རྒྱན་དང་བཅས། སེམས་ཅན་གྱི་དགེ་བའི་རྩ་བ་བསྐྱེད་པ་དང་བཅས་པར་རྗེས་ སུ་དྲན་ཞིང་རབ་ཏུ་ཤེས་སོ། །ཀྱེ༑ རྒྱལ་བའི་སྲས། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྔོན་གྱི་གནས་རྗེས་སུ་དྲན་པ་ཞེས་བྱ་བ་ཡེ་ཤེས་ཀྱི་མངོན་པར་ ཤེས་པས་སྔོན་གྱི་མཐའི་མུར་གྱུར་པའི་བསྐལ་པ་ལ་འཇུག་པ་སྟེ། གསུམ་པའོ། །ཀྱེ༑ རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་ཕྱི་མའི་མཐའི་མུར་གྱུར་པའི་ བསྐལ་པ་ལ་འཇུག་སྟེ། འཇིག་རྟེན་གྱི་ཁམས་རེ་རེ་ཞིང་ཡང་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ལ་རབ་ཏུ་འཇུག་ ༄༅། །གོ་༑བསྐལ་པ་གྲངས་མེད་པ་དེ་དང་དེ་དག་ལ་སེམས་ཅན་གྱི་ལམ་གྱི་རྒྱུད་ཇི་སྙེད་བྱུང་བ་དང༌། སེམས་ཅན་ཤི་འཕོ་བར་གྱུར་པ་ཇི་སྙེད་པ་དང༌། སེམས་ཅན་སྐྱེ་བ་ཇི་སྙེད་པ་དང༌། སེམས་ཅན་གྱི་སྲིད་པའི་རྒྱུད་གཅིག་ནས་གཅིག་ཏུ་བརྒྱུད་པ་ཇི་སྙེད་པ་དང༌། སེམས་ཅན་གྱི་ལས་ཇི་སྙེད་པ་དང༌། རྣམ་པར་སྨིན་པ་ཇི་སྙེད་པ་དང༌། དགེ་བའམ། མི་དགེ་བའམ། འབྱུང་བའམ། མི་འབྱུང་བའམ། ངེས་པའམ། མ་ངེས་པའམ། ལོག་པར་ངེས་པའམ། ཡང་དག་པར་ངེས་པའམ། བག་ལ་ཉལ་བ་དང་བཅས་ པའི་དགེ་པའི་རྩ་བའམ། བག་ལ་ཉལ་བ་མེད་པའི་དགེ་བའི་རྩ་བའམ། ཕུན་སུམ་ཚོགས་པའི་དགེ་བའི་རྩ་བའམ། རྒུད་པར་གྱུར་པའི་དགེ་བའི་རྩ་བའམ། དགེ་བས་ཡོངས་ སུ་བཟུང་བའམ། མི་དགེ་བས་ཡོངས་སུ་བཟུང་བའམ། ཡང་དག་པར་བླངས་པའི་དགེ་བའི་རྩ་བའམ། ཡང་དག་པར་མ་བླངས་པའི་དགེ་བའི་རྩ་བའམ། མངོན་པར་བསྒྲུབས་ པའི་སྡིག་པའི་ཆོས་སམ། མངོན་པར་མ་བསྒྲུབས་པའི་སྡིག་པའི་ཆོས་ཀྱང་རུང་སྟེ། དེ་དག་ཐམས་ཅད་རབ་ཏུ་ཤེས་སོ། །དེ་དག་རེ་རེ་ལ་ཡང་འཇིག་རྟེན་གྱི་ཁམས་སངས་ རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དུ་ཕྱི་མའི་མཐའི་མུར་ཐུག་པའི་བསྐལ་པར་འཇུག་གོ །འཇིག་རྟེན་གྱི་ཁམས་ཀྱི་རྒྱུད་དེ་དག་རེ་རེ་ ཞིང་ཡང་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་གཅིག་ནས་གཅིག་ཏུ་བརྒྱུད་པ་ལ་རབ་ཏུ་འཇུག་གོ །སངས་རྒྱས་བཅོམ་ལྡན་ འདས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་མཚན་འདི་ཞེས་བྱ་བ་དག་འབྱུང་བར་འགྱུར་རོ། །ཞེས་བྱ་བ་ནས་མཚན་རྣམ་པར་ཕྱེ་བ་ སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། སངས་ རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་པོ་ཐུགས་བསྐྱེད་པ་དང་བཅས། སྨོན་ལམ་དང་བཅས། སྤྱོད་པ་དང་བཅས། འབྱུང་བ་དང་ བཅས༑ སངས་རྒྱས་མཆོད་ཅིང་རིམ་གྲོ་མཛད་པ་དང་བཅས། སེམས་ཅན་ཡོངས་སུ་སྨིན་པར་མཛད་པ་དང་བཅས། ཆོས་ཀྱི་འཁོར་ལོ་དང་བཅས། འཁོར་གྱི་དཀྱིལ་འཁོར་ དང་བཅས། དུས་ཇི་ལྟ་བ་དང་བཅས། སྐུ་ཚེའི་ཚད་ཇི་ལྟ་བ་དང་བཅས། སངས་རྒྱས་ཀྱི་ཆོ་འཕྲུལ་དང་བཅས། སངས་རྒྱས་ཀྱི་རྣམ་པར་འཕྲུལ་བ་ཡང་དག་པར་བསྟན་པ་དང་ བཅས༑ ཡོངས་སུ་མྱ་ངན་ལས་འདས་པ་དང་བཅས། ཆོས་འབར་བར་གནས་པ་དང་བཅས། མཆོད་རྟེན་རྣམ་པར་ཕྱེ་བའི་རྒྱན་དང་བཅས། སེམས་ཅན་གྱི་དགེ་བའི་རྩ་བ་བསྐྱེད་ ༄༅། །པ་དང་བཅས་པར་རྗེས་སུ་དྲན་ཞིང་ཁོང་དུ་ཆུད་དོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་རྣམས་ཀྱི་ཕྱི་མའི་མཐའི་མུར་ གྱུར་པའི་བསྐལ་པ་ཤེས་པ་ལ་འཇུག་པ་སྟེ། ཡེ་ཤེས་ཀྱི་མངོན་པར་ཤེས་པ་བཞི་པའོ། །ཀྱེ༑ རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་ཆགས་ པ་མེད་པའི་རྣ་བ་རྣམ་པར་དག་པ་མངོན་པར་སྒྲུབ་ཅིང་རྣམ་པར་སྦྱོང༌། ཡོངས་སུ་སྦྱོང༌། ཡོངས་སུ་རྫོགས་པར་བྱེད། ཡངས་པར་བྱེད། ཚད་མེད་པར་བྱེད། འཐོབ་ པར་བྱེད། མངོན་དུ་བྱེད། འོད་གསལ་བར་བྱེད། བསྒྲིབས་པ་མེད་པར་བྱེད། ཁོང་དུ་ཆུད་པར་བྱེད་དེ། དེ་ཆགས་པ་མེད་པའི་རྣ་བ་མངོན་པར་བསྒྲུབ་པ་དང་ ལྡན་པས། སྒྲ་ཇི་སྙེད་མཉན་པར་འདོད་པ་དེ་དག་རབ་ཏུ་ཉན་ཏོ། །གང་མི་འདོད་པ་དེ་དག་ནི་མི་ཉན་ཏོ། །དེ་ཤར་ཕྱོགས་ཀྱི་སངས་རྒྱས་བཅོམ་ལྡན་འདས་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་བཤད་པ་དེ་དག་རབ་ ཏུ་ཉན་ཏོ། །ཤར་ཕྱོགས་ན་སངས་རྒྱས་བཅོམ་ལྡན་འདས་དེ་དག་སྟོན་པ་དང༌། གསུང་བ་དང༌། འཆད་པ་དང༌། བརྗོད་པ་དང༌། རྣམ་པར་དགོད་པ་མཛད་པ་དང༌། ཇི་ སྙེད་དུ་སྨིན་པར་མཛད་པ་དང༌། ཇི་སྙེད་དུ་འདུལ་བ་དང༌། ཇི་སྙེད་དུ་དྲན་པར་བསྐུལ་པ་དང༌། ཇི་སྙེད་དུ་ཆོས་སྟོན་པ་ཟབ་ཅིང་ཡངས་ལ་རྣམ་པར་ཕྱེ་བ་སྣ་ཚོགས་དང་ལྡན་པ་ཐབས་ཀྱི་ ཚུལ་མཐའ་ཡས་ཤིང་རྣམ་པར་དག་ལ། ཚད་མེད་པ་ལ་མཁས་པ་དང་ལྡན་པ་དེ་དག་ཐམས་ཅད་རབ་ཏུ་འཛིན་ཏོ། །དོན་བཟང་པོ་དང༌། ཡི་གེ་བཟང་པོ་འཁོར་གྱི་དཀྱིལ་འཁོར་ དུ་ངེས་པའི་ཚིག་དང་བཅས་པ་ཇི་ལྟར་ཤེས་པར་བྱས་པ། ཇི་ལྟར་ཁོང་དུ་ཆུད་པར་བྱས་པ། ཇི་ལྟར་འདུལ་བར་གྱུར་པ། ཇི་ལྟར་དམིགས་པར་གྱུར་བ། ཇི་ལྟར་བརྟེན་པར་ གྱུར་པ། ཇི་ལྟར་འབྱུང་བར་འགྱུར་བ་དེ་དག་ཐམས་ཅད་རབ་ཏུ་འཛིན་ཏོ། །ཡང་དག་པར་འཛིན་ཏོ། །ཆུད་ཟོས་པར་མི་བྱེད་དོ། །ཞིག་པར་མི་བྱེད་དོ། །ཐོགས་པར་མི་བྱེད་ དོ༑ ༑ལྡོག་པར་མི་བྱེད་དོ། །འཕྲུལ་པར་མི་བྱེད་དོ། །རྨོངས་པར་མི་བྱེད་དོ། །གཞན་ལ་རབ་ཏུ་སྟོན་ཅིང་གཞན་གྱིས་ཁོང་དུ་ཆུད་པར་བྱེད་ཀྱང་དེ་ལ་ཚིག་གཅིག་གམ། ཡི་གེ་ གཅིག་ཀྱང་འཁྲུལ་པར་མི་བྱེད་དོ། །དེ་དེ་ལྟར་ཡི་གེ་དང༌། ཚིག་ཡན་ཆད་དུ་ཆགས་པ་མེད་པའི་རྣ་བའི་རྣམ་པར་ཤེས་པས་འཛིན་ཏེ། ཇི་ལྟར་ཤར་ཕྱོགས་ཀྱི་སངས་རྒྱས་བཅོམ་ལྡན་ འདས་དེ་དག་གི་ལེགས་པར་གསུངས་པ་དེ་དག་ཉན་པ་དེ་བཞིན་དུ། ལྷོ་ཕྱོགས་དང༌། དེ་བཞིན་དུ་ནུབ་ཕྱོགས་དང༌། དེ་བཞིན་དུ་བྱང་ཕྱོགས་དང༌། དེ་བཞིན་དུ་བྱང་ཤར་གྱི་ ༄༅། །ཕྱོགས་མཚམས་དང༌། དེ་བཞིན་དུ་ཤར་ལྷོའི་ཕྱོགས་མཚམས་དང༌། དེ་བཞིན་དུ་ལྷོ་ནུབ་ཀྱི་ཕྱོགས་མཚམས་དང༌། དེ་བཞིན་དུ་ནུབ་བྱང་གི་ ཕྱོགས་མཚམས་དང༌། དེ་བཞིན་དུ་འོག་གི་ཕྱོགས་དང༌། དེ་བཞིན་དུ་སྟེང་གི་ཕྱོགས་ཀྱི་ཕྱོགས་རེ་རེ་ཞིང་ཡང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་གསུངས་པ་རབ་ཏུ་ཉན་ཏོ། །ཀྱེ༑ རྒྱལ་བའི་སྲས་དག །འདི་ནི་ བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐོགས་པ་མེད་པའི་རྣ་བ་རྣམ་པར་དག་པ་ཞེས་བྱ་བ་སྟེ། ཡེ་ཤེས་ཀྱི་མངོན་པར་ཤེས་པ་ལྔ་པའོ། །ཀྱེ༑ རྒྱལ་བའི་ སྲས་དག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དངོས་པོ་མེད་པ་ལ་གནས་ཤིང༌། མངོན་པར་འདུས་མ་བྱས་པའི་རྫུ་འཕྲུལ་ཐོབ་པ་ཡིན་ཏེ། མཚན་ ཉིད་ཐོབ་པ་ཡིན། མཉམ་པ་ཉིད་ཐོབ་པ་ཡིན། རྒྱ་ཆེན་པོ་ཐོབ་པ་ཡིན། ཚད་མེད་པ་ཐོབ་པ་ཡིན། མི་གནས་པ་ཐོབ་པ་ཡིན། སེམས་ལྟར་མགྱོགས་པ་ཐོབ་པ་ཡིན། ཐུབ་པ་མེད་པ་ཐོབ་པ་ཡིན། ལྡོག་པ་མེད་པ་ཐོབ་པ་ཡིན། མི་གཡོ་བ་ཐོབ་པ་ཡིན། རྣམ་པར་འཕེལ་བ་ཐོབ་པ་ཡིན། རྗེས་སུ་འགྲོ་བ་ཐོབ་པ་ཡིན། དེ་འཇིག་རྟེན་གྱི་ཁམས་ ཇི་སྲིད་དུ་རིང་ཡང་རུང་སྟེ། དེ་དག་ན་བཞུགས་པའི་སངས་རྒྱས་བཅོམ་ལྡན་འདས་དེ་དག་གི་གསུང་ཐོས་ཏེ། འཇིག་རྟེན་གྱི་ཁམས་ཐམས་ཅད་ན་བཞུགས་པ་དང༌། འཇིག་རྟེན་ གྱི་ཁམས་ཚད་མེད་པ་ན་བཞུགས་པ་དང༌། འཇིག་རྟེན་གྱི་ཁམས་གྲངས་མེད་པ་ན་བཞུགས་པ་དང༌། འཇིག་རྟེན་གྱི་ཁམས་དཔག་ཏུ་མེད་པ་ན་བཞུགས་པ་དང༌། འཇིག་རྟེན་གྱི་ ཁམས་མཚུངས་པ་མེད་པ་ན་བཞུགས་པ་དང༌། འཇིག་རྟེན་གྱི་ཁམས་བསམ་གྱིས་མི་ཁྱབ་པ་ན་བཞུགས་པ་དང༌། འཇིག་རྟེན་གྱི་ཁམས་གཞལ་དུ་མེད་པ་ན་བཞུགས་པ་དང༌། འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ན་བཞུགས་པ་དེ་དག་ཐམས་ཅད་ཀྱི་གསུང་ཉན་ཏོ། །ཐོས་ནས་ཀྱང་ འཇིག་རྟེན་གྱི་ཁམས་དེར་བདག་ཉིད་ཕྱིན་པར་བྱེད་དེ། དེ་ཡང་གང་ན་སངས་རྒྱས་སྐྱེ་བ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཡོད་པའི་འཇིག་རྟེན་གྱི་ཁམས་དེ་དང་དེ་དག་ གཅིག་ནས་གཅིག་ཏུ་བརྒྱུད་པའི་ཕྱོགས་བཅུའི་རྒྱུད་ཕྱོགས་རྣམ་པ་ཐ་དད་པར་གནས་པ་དང༌། ཕྱོགས་ཅི་འདྲ་བའི་འཁོར་སྣ་ཚོགས་སྤྱིའུ་ཚུགས་སུ་རྒྱུ་བའི་ཕྱོགས་ཀྱི་ཚུལ་དང༌། སྨྲེལ་ ཞིར་རྒྱུ་བའི་ཕྱོགས་ཀྱི་ཚུལ་དང༌། ཕྱོགས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕྱོགས་ལ་འཇུག་པ་རྣམ་པ་སྣ་ཚོགས་དང༌། ༄༅། །ཕྱོགས་ཀྱི་མཚན་ཉིད་ཐ་དད་པར་རྗེས་སུ་འབྲང་བར་བྱ་བར་སངས་རྒྱས་མུ་མེད་པ་སྐྱེ་བ་དང་ལྡན་པ། སངས་རྒྱས་ཀྱི་ཞིང་རྣམ་པ་ཐ་དད་པ་ཡོངས་ སུ་དག་པ་སངས་རྒྱས་སྐྱེ་བ་དང་ལྡན་པ། འཇིག་རྟེན་གྱི་ཁམས་ཀྱི་རྒྱན་གཞན་དང་གཞན་ཡོད་པ་ཡོན་ཏན་བྱེ་བ་སྣ་ཚོགས་ཀྱིས་རྣམ་པར་སྦྱངས་པ། ཡོན་ཏན་ཚད་མེད་པས་ ཡོངས་སུ་རྒྱས་པའི་སངས་རྒྱས་ཀྱི་ཞིང་རྣམ་པར་དག་པ་དག་ཏུ་རྣམ་པར་འཕྲུལ་པ་སྣ་ཚོགས་ཀྱིས་རྣམ་པར་འཕྲུལ་པ་དང༌། དེ་བཞིན་གཤེགས་པའི་མཚན་ཡོངས་སུ་རྗོད་ པ་བྱེད་ཅིང༌། དེ་དག་ཏུ་བདག་ཕྱིན་པར་བྱེད་པས། དེ་བཞིན་གཤེགས་པ་དག་གི་ཞབས་ཀྱི་དྲུང་ན་འདུག་ཀྱང་འདི་ནས་ཀྱང་གཡོས་པ་མེད་དོ། །དེར་སོང་བའང་མེད་ལ་། དེར་ཡང་བདག་ཕྱིན་པར་རབ་ཏུ་སྟོན་ཅིང༌། དེ་བཞིན་གཤེགས་པ་དེ་དག་གི་ཞལ་བལྟའོ། །དེ་དག་ལ་ཕྱག་འཚལ་ལོ། །དེ་དག་ལ་འདུད་པ་བྱེད་དོ། །དེ་དག་ལ་མཆོད་ པ་བྱེད་དོ། །དེ་དག་ལ་རིམ་གྲོ་བྱེད་དོ། །དེ་དག་ལ་བསྙེན་བཀུར་བྱེད་དོ། །བྱང་ཆུབ་སེམས་དཔའི་ཆོས་ཀྱང་ཡོངས་སུ་འདྲིའོ། །སངས་རྒྱས་ཀྱི་ཡེ་ཤེས་མངོན་པར་སྒྲུབ་ པ་ལ་ཡང་རབ་ཏུ་འཇུག་གོ །སངས་རྒྱས་བཅོམ་ལྡན་འདས་དེ་དག་གི་འཁོར་གྱི་དཀྱིལ་འཁོར་གྱིས་མཚན་མ་ཡང་རབ་ཏུ་ཤེས་སོ། །ཆོས་བསྟན་པའི་མཚན་མ་ཡང་ རབ་ཏུ་ཤེས་སོ། །སངས་རྒྱས་ཀྱི་ཞིང་གི་མཚན་མ་ཡང་རབ་ཏུ་ཤེས་སོ། །དེ་དག་ལ་མངོན་པར་ཆགས་པ་ཡང་མེད་དེ། དེ་དག་ལ་ཡང་ཕ་རོལ་ཏུ་ཕྱིན་པ་ཤིན་ཏུ་ཐོབ་པ་ཡིན། སངས་ རྒྱས་ཀྱི་ཞིང་དུ་འགྲོ་བ་དང༌། སངས་རྒྱས་ཀྱི་ཞིང་ལ་དམིགས་པས་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་འགྲོ་ཡང་འགྲོ་བ་ དང༑ སངས་རྒྱས་བལྟ་བའི་རྣམ་པར་དམིགས་པ་མཐར་ཐུག་པ་མེད་དོ། །སངས་རྒྱས་ཀྱི་ཞིང་གཅིག་ནས་གཅིག་ཏུ་བརྒྱུད་པ་ལས་ཕྱིར་ལྡོག་པ་མེད་དོ། །དེ་བཞིན་གཤེགས་ པའི་ཞལ་བལྟ་བའི་རྒྱུན་གཅོད་པ་མེད་དོ། །དེ་བཞིན་གཤེགས་པའི་འཁོར་གྱི་དཀྱིལ་འཁོར་མི་དམིགས་པར་བྱེད་པ་མེད་དོ། །ཤུགས་ལ་ཉམས་པ་མེད་དོ། །སངས་རྒྱས་ཀྱི་ཆོས་ ཡོངས་སུ་དྲི་བའི་རྒྱུན་གཅོད་པ་མེད་དོ། །སངས་རྒྱས་ཀྱི་ཆོས་བཙལ་བས་ཡོངས་སུ་ཡི་འཆད་པ་མེད་དོ། །སྨོན་ལམ་གྱི་ཁྱད་པར་དང་ལྡན་པའི་བྱང་ཆུབ་སེམས་དཔའི་སྤྱོད་པ་ཀུན་ ཏུ་བཟང་པོའི་སྨོན་ལམ་གྱི་ཡོངས་སུ་རྫོགས་པར་བྱ་བ་སངས་རྒྱས་ཀྱི་རིགས་འབྱམས་ཀླས་པ་ཚད་མེད་པའི་དོན་དུ་ཞུགས་པ་ལས་ཕྱིར་ལྡོག་པ་མེད་དོ། །ཕྱོགས་ཐམས་ཅད་ཀྱི་སངས་ རྒྱས་ཀྱི་ཞིང་དེ་བཞིན་གཤེགས་པས་ཐུགས་སུ་ཆུད་པ་དག་ཏུ་འགྲོ་ཞིང་ཡང་དག་པར་གཞོལ་བར་བྱ་བ་ལ་ཐོགས་པ་མེད་དོ། །ཀྱེ༑རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་ ༄༅། །སེམས་དཔའ་ཆེན་པོ་རྣམས་ཀྱི་དངོས་པོ་མེད་པ་ལ་གནས་ཤིང་མངོན་པར་འདུས་མ་བྱས་པའི་རྫུ་འཕྲུལ་ཞེས་བྱ་བ་སངས་རྒྱས་ཀྱི་ཞིང་ཐམས་ཅད་ དུ་འགྲོ་བའི་ཡེ་ཤེས་ཀྱི་མངོན་པར་ཤེས་པ་སྟེ་དྲུག་པའོ། །ཀྱེ༑རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཁམས་སངས་ རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དུ་སྐྱེས་པའི་སེམས་ཅན་རྣམས་ཀྱི་སྐད་སྣ་ཚོགས་རབ་ཏུ་ཤེས་ཏེ། འཕགས་པའི་སྐད་ཤེས་སོ། ། འཕགས་པ་མ་ཡིན་པའི་སྐད་ཤེས་སོ། །ལྷའི་སྐད་ཤེས་སོ། །ཀླུའི་སྐད་ཤེས་སོ། །གནོད་སྦྱིན་གྱི་སྐད་ཤེས་སོ། །ལྷ་མ་ཡིན་གྱི་སྐད་ཤེས་སོ། །ནམ་མཁའ་ལྡིང་གི་སྐད་ ཤེས་སོ། །མིའམ་ཅིའི་སྐད་ཤེས་སོ། །ལྟོ་འཕྱེ་ཆེན་པོའི་སྐད་ཤེས་སོ། །མིའི་སྐད་ཤེས་སོ། །མི་མ་ཡིན་པའི་སྐད་ཤེས་པ་ནས། སེམས་ཅན་གྱི་རིས་བརྗོད་དུ་མེད་པའི་ཡང་ བརྗོད་དུ་མེད་པའི་བར་གྱི་སེམས་ཅན་གྱི་སྐད་རྣམ་པ་སྣ་ཚོགས་ཤེས་པ་དང༌། སྒྲ་དང༌། ཚིག་དང༌། བརྡ་རྣམས་རབ་ཏུ་ཤེས་ཏེ་། རྣམ་པར་དགོད་པའི་མཁས་པ་ཐམས་ཅད་ ལ་རབ་ཏུ་འཇུག་གོ །བརྡ་ལ་འཇུག་པ་ཐམས་ཅད་རབ་ཏུ་ཤེས་སོ། །སྤྱོད་པ་རྣམ་པར་དགོད་པ་ཐམས་ཅད་རབ་ཏུ་ཤེས་སོ། །སྐད་རྣམ་པར་དབྱེ་བ་ཐམས་ཅད་རབ་ཏུ་ཤེས་ སོ༑ ༑སྐད་རྣམ་པ་ཐ་དད་པ་རྒྱ་མཚོ་ཐམས་ཅད་ལ་རབ་ཏུ་འཇུག་སྟེ། དེ་ཇི་ལྟ་ཇི་ལྟར་འཇིག་རྟེན་གྱི་ཁམས་ལ་འཇུག་པ་དེ་ལྟ་དེ་ལྟར་སེམས་ཅན་གྱི་ཁམས་ལ་འཇུག་གོ །ཇི་ལྟ་ཇི་ ལྟར་སེམས་ཅན་གྱི་ཁམས་ལ་འཇུག་པ་དེ་ལྟ་དེ་ལྟར་སྐད་རྣམ་པར་ཕྱེ་བ་ཐམས་ཅད་ཁོང་དུ་ཆུད་པར་བྱེད་དེ། དེ་ལ་སེམས་ཅན་གཞན་གྱི་སྐད་ཀྱིས་རྨོངས་པར་འགྱུར་བ་མེད་དོ།། འདི་ལྟ་སྟེ། དཔེར་ན། ལྷའི་བུ་ཉི་མ་ནི་ཤར་མ་ཐག་ཏུ་གཟུགས་རྣམ་པར་ཕྱེ་བའི་རྒྱུད་ཐམས་ཅད་སྣང་བར་བྱེད་དོ། །དེ་ནས་མིག་དང་ལྡན་པ་རྣམས་གཟུགས་དེ་དང་དེ་དག་མཐོང་ པས་མཚན་མ་ཡོངས་སུ་འཛིན་ཏོ། །དེ་བཞིན་དུ་བྱང་ཆུབ་སེམས་དཔའ་ཡང་སྐད་ཀྱི་སྤྲིན་རྣམ་པར་ཕྱེ་བ་ཐམས་ཅད་ལ་འཇུག་སྟེ། སྐད་ཐམས་ཅད་མངོན་པར་ཤེས་པའི་ཡེ་ ཤེས་ཀྱིས་སྐད་དང་དབྱངས་ཀྱི་ཚུལ་མཁས་པ་ལ་འཇུག་ཅིང༌། ཁོང་དུ་ཆུད་པར་བྱེད་དོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྐད་ ཀྱི་ཚུལ་ཐམས་ཅད་ལ་མཁས་པ་ཞེས་བྱ་བ་སྟེ། ཡེ་ཤེས་ཀྱི་མངོན་པར་ཤེས་པ་བདུན་པའོ། །ཀྱེ༑ རྒྱལ་བའི་སྲས་དང༌། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་ པོ༑ ཆོས་ཐམས་ཅད་ཁ་དོག་དང་བྲལ་བར་རབ་ཏུ་ཤེས་ཏེ། ཐ་མི་དད་པའི་ཁ་དོག་དང༌། རྣམ་པ་མེད་པའི་ཁ་དོག་དང༌། བྱེ་བྲག་མེད་པའི་ཁ་དོག་དང༌། རྣམ་པར་དབྱེ་བ་མེད་པའི་ ༄༅། །ཁ་དོག་དང༌། སྔོན་པོ་མེད་པའི་ཁ་དོག་དང༌། སེར་པོ་མེད་པའི་ཁ་དོག་དང༌། དཀར་པོ་མེད་པའི་ཁ་དོག་དང༌། ནག་པོ་མེད་པའི་ཁ་དོག་དང༌། དམར་ པོ་མེད་པ་ཡང་རབ་ཏུ་ཤེས་ཏེ། དེ་དེ་བས་ཀྱང་ཆོས་ཀྱི་དབྱིངས་ལ་འཇུག་པར་བྱེད་པའི་ཚེ། རང་གི་ལུས་ཁ་དོག་སྣ་ཚོགས་དང་ལྡན་པར་བྱིན་གྱིས་རློབ་སྟེ། མཐའ་ཡས་ པའི་ཁ་དོག་དང༌། ཚད་མེད་པའི་ཁ་དོག་དང༌། རྣམ་པར་དག་པའི་ཁ་དོག་དང༌། ཤིན་ཏུ་བརྒྱན་པའི་ཁ་དོག་དང༌། ཐམས་ཅད་དང་ལྡན་པའི་ཁ་དོག་དང༌། དཔེ་མེད་ པའི་ཁ་དོག་དང༌། ཀུན་ཏུ་སྣང་བའི་ཁ་དོག་དང༌། ཡིད་དུ་འོང་བའི་ཁ་དོག་དང༌། མི་སྡུག་པ་མེད་པའི་ཁ་དོག་དང༌། ཟད་མི་ཤེས་པའི་ཁ་དོག་དང༌། ཤིན་ཏུ་གསལ་བའི་ ཁ་དོག་དང༌། ཁ་ན་མ་ཐོ་བ་མེད་པའི་ཁ་དོག་དང༌། མཐུ་ཆེན་པོ་དང་ལྡན་པའི་ཁ་དོག་དང༌། ཐུབ་པར་དཀའ་བའི་ཁ་དོག་དང༌། ཉམས་པར་མི་འགྱུར་བའི་ཁ་དོག་དང༌། ཤིན་ཏུ་བསྒྲུབས་པའི་ཁ་དོག་དང༌། ཤིན་ཏུ་མཛེས་པའི་ཁ་དོག་དང༌། དཔག་ཏུ་མེད་པའི་ཁ་དོག་དང༌། ཤིན་ཏུ་བསྲུངས་པའི་ཁ་དོག་དང༌། ཤིན་ཏུ་བསགས་པའི་ཁ་ དོག་དང༌། ཡོངས་སུ་སྨིན་པར་བྱེད་པའི་ཁ་དོག་དང༌། འདུལ་བ་ཇི་ལྟ་བ་བཞིན་དུ་བསྒྲུབས་པའི་ཁ་དོག་དང༌། ཐོགས་པ་མེད་པའི་ཁ་དོག་དང༌། ཤིན་ཏུ་དང་བའི་ཁ་ དོག་དང༌། རྙོག་པ་མེད་པའི་ཁ་དོག་དང༌། རབ་ཏུ་གསལ་བའི་ཁ་དོག་དང༌། མདངས་དང་ལྡན་པའི་ཁ་དོག་དང༌། བསམ་གྱིས་མི་ཁྱབ་པའི་ཚུལ་དང་ལྡན་པའི་ཁ་དོག་དང༌། ཟིལ་གྱིས་གནོན་པའི་ཁ་དོག་དང༌། ཐམས་ཅད་ཟིལ་གྱིས་གནོན་པའི་ཁ་དོག་དང༌། ཐམས་ཅད་ཟིལ་དུ་བརླག་པའི་ཁ་དོག་དང༌། ཐམས་ཅད་ཟིལ་དུ་རློག་པར་བྱེད་པའི་ ཁ་དོག་དང༌། རབ་རིབ་མེད་པའི་ཁ་དོག་དང༌། མུན་པ་མེད་པའི་ཁ་དོག་དང༌། ཤིན་ཏུ་མཉམ་པར་གཞག་པའི་ཁ་དོག་དང༌། སེམས་བདེ་བའི་ཁ་དོག་དང༌། མཚན་སྣ་ཚོགས་ དང་ལྡན་པའི་ཁ་དོག་དང༌། དཔེ་བྱད་བཟང་པོ་སྣ་ཚོགས་དང་ལྡན་པའི་ཁ་དོག་དང༌། ཆེ་བ་ཉིད་དང་ལྡན་པའི་ཁ་དོག་དང༌། སྤྱོད་ཡུལ་དང་ལྡན་པའི་ཁ་དོག་དང༌། ཡང་དག་ པར་བསྒྲུབས་པའི་ཁ་དོག་དང༌། བསམ་པ་རྣམ་པར་དག་པའི་ཁ་དོག་དང༌། ཤིན་ཏུ་སྦྱངས་པའི་ཁ་དོག་དང༌། མཆོག་ཏུ་བྱུང་ཞིང་རྒྱ་ཆེ་བའི་ཁ་དོག་དང༌། ཐུབ་པ་མེད་པའི་ ཁ་དོག་དང༌། གནས་པ་མེད་པའི་ཁ་དོག་དང༌། ཀུན་ཏུ་མཐའ་ཡས་པའི་ཁ་དོག་དང༌། སངས་རྒྱས་ཀྱི་ཞིང་བརྗོད་དུ་མེད་པར་རབ་ཏུ་འདལ་བའི་ཁ་དོག་དང༌། རྣམ་པར་ འཕེལ་བའི་ཁ་དོག་དང༌། སྙིང་པོ་བཟུང་བའི་ཁ་དོག་དང༌། ཡོན་ཏན་མཆོག་དང་ལྡན་པའི་ཁ་དོག་དང༌། ཡིད་བཞིན་གྱི་ཁ་དོག་དང༌། མོས་པ་རྣམ་པར་སྦྱོང་བའི་ཁ་དོག་དང༌། ༄༅། །ཚོགས་ཤིན་ཏུ་བསགས་པའི་ཁ་དོག་དང༌། ཆོས་བསྒྲིབས་པ་མེད་པར་ཤིན་ཏུ་རྟོགས་པའི་ཁ་དོག་དང༌། ནམ་མཁའ་ལྟར་འོད་དང་བའི་ཁ་དོག་ དང༌། རྣམ་པར་དག་པས་བརྒྱན་པའི་ཁ་དོག་དང༌། དྲི་མ་མེད་པའི་ཁ་དོག་དང༌། རྡུལ་དང་བྲལ་བའི་ཁ་དོག་དང༌། རྡུལ་མེད་པའི་ཁ་དོག་དང༌། དྲི་མ་མེད་པའི་ཁ་དོག་དང༌། མཚུངས་ པ་མེད་པའི་ཁ་དོག་དང༌། བལྟ་ན་བཟང་བའི་ཁ་དོག་དང༌། ཀུན་ནས་བལྟ་བའི་ཁ་དོག་དང༌། དུས་བཞིན་དུ་ཡང་དག་པར་སྟོན་པའི་ཁ་དོག་དང༌། རབ་ཏུ་ཞི་བའི་ཁ་དོག་དང༌། འདོད་ཆགས་དང་བྲལ་བའི་ཁ་དོག་དང༌། འོད་ཤིན་ཏུ་གསལ་བའི་ཁ་དོག་དང༌། བསོད་ནམས་ཀྱི་ཞིང་དུ་གྱུར་པའི་ཁ་དོག་དང༌། བདེ་བར་བྱེད་པའི་ཁ་དོག་དང༌། འཇིགས་པ་ མེད་པར་བྱེད་པའི་ཁ་དོག་དང༌། གཏི་མུག་མེད་པར་སྤྱོད་པའི་ཁ་དོག་དང༌། ཡེ་ཤེས་ཀྱིས་རྣམ་པར་གནོན་པའི་ཁ་དོག་དང༌། ཆགས་པ་མེད་པའི་ལུས་ཀྱི་ཁ་དོག་དང༌། ལུས་ཀྱི་ རྒྱན་ཀུན་ཏུ་མཐའ་ཡས་པའི་ཁ་དོག་དང༌། དོན་ཡོད་པའི་ཁ་དོག་དང༌། བྱམས་པ་ཆེན་པོས་ཡང་དག་པར་འཕགས་པའི་ཁ་དོག་དང༌། སྙིང་རྗེ་ཆེན་པོས་བྱིན་གྱིས་ བརླབས་པའི་ཁ་དོག་དང༌། ཚུལ་མཐུན་པར་འབྱུང་བའི་ཁ་དོག་དང༌། བསོད་ནམས་ཀྱི་སྟོབས་དང་ལྡན་པའི་ཁ་དོག་དང༌། རྗེས་སུ་དྲན་པར་བྱ་བའི་ཁ་དོག་དང༌། རིན་ པོ་ཆེ་ན་མཐའ་ཡས་པའི་ཁ་དོག་དང༌། རིན་པོ་ཆེའི་དམ་པ་རྣམ་པར་སྣང་བའི་ཁ་དོག་དང༌། འགྲོ་བ་ཐམས་ཅད་དད་པར་བྱེད་པའི་ཁ་དོག་དང༌། ཐམས་ཅད་མཁྱེན་པ་ཉིད་ལ་མངོན་དུ་ གྱུར་པའི་ཁ་དོག་དང༌། བཞིན་འཛུམ་པའི་ཁ་དོག་དང༌། རིན་པོ་ཆེའི་རྒྱན་གྱི་དམ་པ་ཐམས་ཅད་དང་ལྡན་པའི་ཁ་དོག་དང༌། སེམས་མི་གནས་པའི་ཁ་དོག་དང༌། གནས་མེད་ པའི་ཁ་དོག་དང༌། བྱིན་གྱི་རླབས་ཀྱིས་རྣམ་པར་འཕྲུལ་པའི་ཁ་དོག་དང༌། རྫུ་འཕྲུལ་རྣམ་པ་དུ་མས་ཁྱུ་མཆོག་གི་མཐུ་ཕྱུང་བའི་ཁ་དོག་དང༌། དེ་བཞིན་གཤེགས་པའི་རིགས་ སུ་ཡང་དག་པར་བྱུང་བའི་ཁ་དོག་དང༌། འདྲི་བ་མེད་པའི་ཁ་དོག་དང༌། ཆོས་ཀྱི་དབྱིངས་སུ་འདལ་བའི་ཁ་དོག་དང༌། འཁོར་ཇི་ལྟ་བ་བཞིན་དུ་འགྲོ་བའི་ཁ་དོག་དང༌། རྣམ་པ་ སྣ་ཚོགས་ཀྱི་ཁ་དོག་དང༌། ཤིན་ཏུ་གྲུབ་པའི་ཁ་དོག་དང༌། ཤིན་ཏུ་སྦྱངས་པས་རབ་ཏུ་བྱུང་བའི་ཁ་དོག་དང༌། འདུལ་བ་ཇི་ལྟ་བ་བཞིན་དུ་སྤྱོད་པ་ལམ་སྟོན་པའི་ཁ་དོག་དང༌། བལྟ་ན་མི་ངོམས་པའི་ཁ་དོག་དང༌། རྣམ་པ་སྣ་ཚོགས་སུ་འོད་གསལ་བའི་ཁ་དོག་དང༌། འོད་ཟེར་གྱི་དྲ་བ་གྲངས་མེད་པ་རབ་ཏུ་འགྱེད་པའི་ཁ་དོག་དང༌། འོད་སྣ་ཚོགས་བརྗོད་ དུ་མེད་པའི་ཁ་དོག་དང༌། དྲི་ཞིམ་པོ་དང་འོད་བསམ་གྱིས་མི་ཁྱབ་པས་ཁམས་གསུམ་ལས་ཡང་དག་པར་འདའ་བའི་ཁ་དོག་དང༌། ཉི་མའི་དཀྱིལ་འཁོར་ལྟ་བུའི་འོད་ཟེར་ ༄༅། །གྱིས་ཚད་མེད་པར་སྣང་བའི་ཁ་དོག་དང༌། འཁོར་ལོ་དཔེ་མེད་པའི་གཟུགས་བྱིན་གྱིས་རློབ་པའི་ཁ་དོག་དང༌། མེ་ཏོག་གི་སྤྲིན་ཡིད་དུ་འོང་ བ་མཐའ་ཡས་པ་རབ་ཏུ་འཐོར་པའི་ཁ་དོག་དང༌། ཕྲེང་བའི་སྤྲིན་གྱི་པདྨོ་སྣ་ཚོགས་སུ་བསྒྲུབས་པས་ཡང་དག་པར་བརྒྱན་པའི་ཁ་དོག་དང༌། འགྲོ་བ་ཐམས་ཅད་ལས་ ཤིན་ཏུ་འདས་པའི་ཁ་དོག་དང༌། སྤོས་ཞིམ་པོ་ཐམས་ཅད་ཀྱི་གསུང་འབྱུང་བས་སྤོས་འཕྲོ་བ་འགྱེད་པའི་ཁ་དོག་དང༌། དེ་བཞིན་གཤེགས་པ་ཐམས་ཅད་ཀྱི་མཛོད་སྤུ་ ནས་བྱུང་བའི་ཁ་དོག་དང༌། སྒྲ་དབྱངས་བརྗོད་དུ་མེད་པས་ཆོས་ཐམས་ཅད་བསྟན་པ་ཡང་དག་པར་སྟོན་པའི་ཁ་དོག་དང༌། རྣམ་པའི་མཆོག་ཐམས་ཅད་དང་ལྡན་པའི་ ཀུན་ཏུ་བཟང་པོའི་ཁ་དོག་ཏུ་བདག་གི་ལུས་བྱིན་གྱིས་རློབ་སྟེ། ཀྱེ་༑ རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཁ་དོག་མེད་ པའི་ཆོས་ཀྱི་དབྱིངས་ལ་ཞུགས་པས་མཐོང་བས་འདུལ་བ་དང༌། རྗེས་སུ་དྲན་པས་འདུལ་བ་དང༌། ཆོས་ཀྱི་འཁོར་ལོས་འདུལ་བ་དང༌། དུས་ཀྱིས་འདུལ་བ་དང༌། སྐད་ཅིག་གིས་འདུལ་བ་དང༌། བསྙེན་བཀུར་བས་འདུལ་བ་དང༌། ཁོང་དུ་ཆུད་པར་བྱ་བས་འདུལ་བ་དང༌། རྫུ་འཕྲུལ་གྱིས་འདུལ་བ་དང༌། རྣམ་པར་འཕྲུལ་པ་སྣ་ ཚོགས་ཀྱིས་འདུལ་བ་དང༌། ཆོ་འཕྲུལ་བསམ་གྱིས་མི་ཁྱབ་པས་འདུལ་བ་རྣམས་ལ་རྣམ་པ་དེ་ལྟ་བུའི་ཁ་དོག་ཏུ་རང་གི་ལུས་བྱིན་གྱིས་རློབ་བོ། །ཀྱེ༑ རྒྱལ་བའི་སྲས་དག །འདི་ ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཁ་དོག་གྲངས་མེད་པའི་ལུས་མངོན་པར་སྒྲུབ་པའི་རྒྱན་ཅེས་བྱ་བ། མངོན་པར་ཤེས་པའི་ཡེ་ཤེས་འགྲོ་བ་ཐམས་ཅད་ ཡོངས་སུ་འགྲེལ་བ་ལ་བརྩོན་པ་སྟེ་བརྒྱད་པའོ། །ཀྱེ༑ རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་བདག་མེད་པར་རབ་ཏུ་ཤེས་ སོ༑ །ཆོས་ཐམས་ཅད་རིགས་མེད་པར་རབ་ཏུ་ཤེས་སོ། །ཆོས་ཐམས་ཅད་འོང་བ་མེད་པར་རབ་ཏུ་ཤེས་སོ། །ཆོས་ཐམས་ཅད་འབྲལ་བ་མེད་པར་རབ་ཏུ་ཤེས་སོ། །ཆོས་ཐམས་ ཅད་བྱེ་བྲག་མེད་པར་རབ་ཏུ་ཤེས་སོ། །ཆོས་ཐམས་ཅད་ཐ་དད་པ་མེད་པར་རབ་ཏུ་ཤེས་སོ། །ཆོས་ཐམས་ཅད་གཉིས་སུ་བྱར་མེད་པར་རབ་ཏུ་ཤེས་སོ། །ཆོས་ཐམས་ཅད་མི་ གཉིས་པ་དང༌། མི་གཉིས་པ་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་བདག་ཉིད་མེད་པར་རབ་ཏུ་ཤེས་སོ། །ཆོས་ཐམས་ཅད་འདྲ་བ་མེད་པར་རབ་ཏུ་ཤེས་སོ། །ཆོས་ ཐམས་ཅད་འགྲོ་བ་མེད་པར་རབ་ཏུ་ཤེས་སོ། །ཆོས་ཐམས་ཅད་མ་སྐྱེས་པར་རབ་ཏུ་ཤེས་སོ། །ཆོས་ཐམས་ཅད་མ་འགགས་པར་རབ་ཏུ་ཤེས་སོ། །ཆོས་ཐམས་ཅད་འཕོ་བ་མེད་ ༄༅། །པར་རབ་ཏུ་ཤེས་སོ། །ཆོས་ཐམས་ཅད་འཇིག་པ་མེད་པར་རབ་ཏུ་ཤེས་སོ། །ཆོས་ཐམས་ཅད་བདེན་པ་མེད་པར་རབ་ཏུ་ཤེས་སོ། །ཆོས་ཐམས་ཅད་ རྫུན་པ་མེད་པར་རབ་ཏུ་ཤེས་སོ། །ཆོས་ཐམས་ཅད་མཚན་ཉིད་མེད་པས་མཚན་ཉིད་གཅིག་པར་རབ་ཏུ་ཤེས་སོ། །ཆོས་ཐམས་ཅད་ཡོད་པའང་མ་ཡིན་པར་རབ་ཏུ་ཤེས་སོ། ། ཆོས་ཐམས་ཅད་མེད་པའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་ཆོས་ཀྱང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་ཆོས་མ་ཡིན་པའང་མ་ཡིན་པར་རབ་ཏུ་ ཤེས་སོ། །ཆོས་ཐམས་ཅད་སྤྱོད་པ་ལ་གཞོལ་བའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་སྤྱོད་པ་ལ་མི་གཞོལ་བའང་མ་ཡིན་པར་རབ་ཏུ་ཤེས་སོ། །ཆོས་ཐམས་ ཅད་ལས་ཀྱང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་ལས་མ་ཡིན་པའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་རྣམ་པར་སྨིན་པ་མ་ཡིན་པར་རབ་ཏུ་ ཤེས་སོ། །ཆོས་ཐམས་ཅད་རྣམ་པར་སྨིན་པ་མ་ཡིན་པའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་མངོན་པར་འདུ་བྱ་བ་མེད་པར་ཡང་རབ་ཏུ་ཤེས་སོ། །ཆོས་ཐམས་ ཅད་མངོན་པར་འདུ་བྱ་བ་མེད་པའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་བརྡ་ཡང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་བརྡ་མ་ཡིན་པའང་མ་ཡིན་ པར་རབ་ཏུ་ཤེས་སོ། །ཆོས་ཐམས་ཅད་དོན་དམ་པའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་དོན་དམ་པ་མ་ཡིན་པའང་མ་ཡིན་པར་རབ་ཏུ་ཤེས་སོ། །ཆོས་ཐམས་ ཅད་འབྱུང་བའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་མི་འབྱུང་བའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་འབྱིན་པའང་མ་ཡིན་པར་རབ་ཏུ་ཤེས་སོ། །ཆོས་ ཐམས་ཅད་མི་འབྱིན་པ་ཡང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་ཚད་མེད་པར་ཡང་རབ་ཏུ་ཤེས་སོ། །ཆོས་ཐམས་ཅད་ཚད་མེད་པ་མ་ཡིན་པར་ཡང་རབ་ཏུ་ཤེས་ སོ། །ཆོས་ཐམས་ཅད་འཇིག་རྟེན་པའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་འཇིག་རྟེན་ལས་འདས་པའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་རྒྱུ་ལས་ བྱུང་བའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་རྒྱུ་ལས་མ་བྱུང་བའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་ཁ་དོག་ངེས་པ་མེད་པར་ཡང་རབ་ཏུ་ཤེས་སོ། ། ཆོས་ཐམས་ཅད་ཁ་དོག་ངེས་པ་མེད་པའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་ཁ་དོག་ཡོངས་སུ་གྲུབ་པ་ཡང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་ཁ་དོག་ ཡོངས་སུ་མ་གྲུབ་པའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་བྱུང་བའང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་བྱུང་བ་མ་ཡིན་པའང་མ་ཡིན་པར་རབ་ ༄༅། །ཏུ་ཤེས་སོ། །ཆོས་ཐམས་ཅད་རྣམ་པར་བརྟགས་པ་ཡང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་རྣམ་པར་མ་བརྟགས་པའང་མ་ཡིན་ པར་རབ་ཏུ་ཤེས་སོ། །ཆོས་ཐམས་ཅད་ཚུལ་ཡང་མ་ཡིན་པར་རབ་ཏུ་ཤེས་སོ། །ཆོས་ཐམས་ཅད་ཚུལ་མ་ཡིན་པའང་མ་ཡིན་པར་རབ་ཏུ་ཤེས་སོ། །དེ་ནི་སྤྱོད་པ་ལ་མངོན་ པར་ཆགས་པ་མེད་དོ། །དོན་དམ་པ་ལ་གནས་པ་མེད་དོ། །ཆོས་ལ་རབ་ཏུ་རྟོག་པ་མེད་དོ། །ཡི་གེ་ཡོངས་སུ་སྒྲུབ་པ་མེད་དོ། །ཞི་བའི་རྗེས་སུ་ཤིན་ཏུ་འབྲང་ངོ༌། །སྨོན་ལམ་ ཡོངས་སུ་མི་གཏོང་ངོ༌། །དོན་གྱི་ཚུལ་ལ་རྣམ་པར་ལྟའོ། །ཆོས་ཀྱི་ཚུལ་ལ་རབ་ཏུ་འཇུག་གོ །ཆོས་ཀྱི་སྤྲིན་ཀུན་ནས་སློང་ངོ༌། །ཆོས་ཡོངས་སུ་འབབ་པའི་ཡི་གེའི་ཆར་མངོན་པར་ འཕེབས་[*'BEBS?] སོ། །ཚུལ་བརྗོད་དུ་མེད་པ་ལ་འཇུག་གོ །ཐ་དད་པ་ཡང་དག་པར་ཤེས་པ་ཟད་མི་ཤེས་པ་དོན་གྱི་ཚུལ་རབ་ཏུ་བརྗོད་ཅིང༌། ཆོས་ཀྱི་ཚུལ་མངོན་པར་སྟོན་པས་ཆོས་ཐམས་ ཅད་ཀྱི་ངེས་པའི་ཚིག་ལ་མཁས་པ་དང༌། ཆོས་ཐམས་ཅད་སྤོབས་པས་ཐབས་མཁས་པའི་ཚུལ་བརྗོད་དུ་མེད་པའི་ཡང་བརྗོད་དུ་མེད་པ་ལ་རབ་ཏུ་འཇུག་གོ །བྱམས་པ་ཆེན་པོ་རྣམ་ པར་དག་པ་དང་ལྡན་ཞིང༌། སྙིང་རྗེ་ཆེན་པོ་རབ་ཏུ་ཐོབ་པ་ཡི་ག་མེད་པའི་ཡུལ་དང་ལྡན་པ་ཡི་གེས་མངོན་པར་བསྒྲུབས་པའི་དོན་ལ་བརྩོན་ཞིང༌། འགལ་བ་མེད་པ་རང་བཞིན་གྱིས་ ཆོས་ལ་བརྩོན་པ་ཆོས་ཐམས་ཅད་རྟེན་ཅིང་འབྲེལ་པར་བྱུང་པར་སྟོན་པས་གོས་པ་མེད་པ། བརྗོད་པ་ཐམས་ཅད་ཀྱི་རྗེས་སུ་སོང་བའི་སྤོབས་པ་དང་ལྡན་པ། དེ་ཆོས་ཐམས་ཅད་ ཟད་མི་ཤེས་པའི་སྤོབས་པས་སྟོན་ཏོ། །བརྗོད་དོ། །རྣམ་པར་འགོད་དོ། །ཡང་དག་པར་སྟོན་ཏོ། །འགྲེལ་ཏོ། །རྣམ་པར་འབྱེད་དོ། །འབྱིན་ཏོ། །ཁོང་དུ་ཆུད་པར་བྱེད་དོ། །རབ་ ཏུ་སྟོན་ཏོ། །རྟོགས་པར་བྱེད་དོ། །རབ་ཏུ་སྒྲུབ་བོ། །རྣམ་པར་སྦྱོང་ངོ༌། །ཐེ་ཚོམ་སེལ་ཏོ། །དོགས་པ་གཅོད་དོ། །དེ་ཁོ་ན་སྟོན་ཏོ། །རང་བཞིན་བརྗོད་དོ། །འགྲོ་བ་ལ་ཕན་འདོགས་ སོ༑ ༑ཆོས་ཉིད་ལས་མི་ཉམས་སོ། །མི་གཉིས་པ་ལ་འཇུག་གོ །ཆགས་པ་མེད་པའི་སྒོ་སྟོན་ཏོ། །དབྱངས་ཀྱི་ཡན་ལག་ཐམས་ཅད་ཡང་དག་པར་བསྒྲུབས་པས་རབ་ཏུ་འཇོམས་ པའི་སྒྲས་སྒྲའི་ཆར་ཡང་བསམ་པ་ཇི་ལྟ་བའི་དུས་ལས་ཡོལ་བར་མི་བྱེད་པར་མངོན་པར་འབེབས་སོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ ཆེན་པོ་རྣམས་ཀྱི་ཆོས་ཐམས་ཅད་ཤེས་པའི་ཡེ་ཤེས་ཀྱི་མངོན་པར་ཤེས་པ་སྟེ་དགུ་པའོ། །ཀྱེ༑ རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་ པོ་སེམས་སྐད་ཅིག་རེ་རེ་ཞིང་ཆོས་ཐམས་ཅད་འགོག་པའི་ཏིང་ངེ་འཛིན་ལ་སྙོམས་པར་འཇུག་ཀྱང༌། བྱང་ཆུབ་སེམས་དཔའི་ལམ་གྱི་རྒྱུད་མི་གཅོད་དོ། །བྱང་ཆུབ་སེམས་དཔའི་ལས་ ༄༅། །ཀྱང་ཐོགས་པར་མི་བྱེད་དོ། །བྱང་ཆུབ་སེམས་དཔའི་བྱམས་པ་ཆེན་པོ་ལས་ཀྱང་རྣམ་པར་མི་འདྲའོ། །སྙིང་རྗེ་ཆེན་པོ་ལས་ཀྱང་ཕྱིར་མི་ལྡོག་གོ །ཕ་ རོལ་ཏུ་ཕྱིན་པ་རྣམས་ཀྱང་རྒྱུན་མི་གཅོད་དོ། །ཞིང་ཐམས་ཅད་རབ་ཏུ་དབྱེ་ཞིང་མཁས་པར་བྱ་བས་ཀྱང་སྐྱོ་བར་མི་བྱེད་དོ། །འགྲོ་བ་ཐམས་ཅད་ཡོངས་སུ་དགྲོལ་བའི་སྨོན་ལམ་ ཡང་རྒྱུན་མི་གཅོད་དོ། །ཆོས་ཀྱི་འཁོར་ལོ་ཡང་ཐོགས་པར་མི་བྱེད་དོ། །སེམས་ཅན་ཡོངས་སུ་སྨིན་པར་བྱ་བ་དང༌། འདུལ་བར་བྱ་བ་ཡང་རིང་དུ་མི་སྤོང་ངོ༌། །སངས་རྒྱས་མཆོད་ ཅིང་རིམ་གྲོ་བྱ་བའང་རྒྱུན་མི་གཅོད་དོ། །ཆོས་ཐམས་ཅད་ལ་དབང་བསྒྱུར་བའི་སྒོ་ལས་ཀྱང་ཕྱིར་མི་ལྡོག་གོ །སངས་རྒྱས་མཐོང་བའི་སྐལ་པ་མེད་པར་ཡང་མི་འགྱུར་རོ། ། ཆོས་ཐམས་ཅད་ཡོངས་སུ་དྲི་བ་ལས་ཀྱང་ཕྱིར་མི་ལྡོག་གོ །མཉམ་པ་ཉིད་དང་བསྟོད་པ་ཡང་རབ་ཏུ་ཤེས་སོ། །བསྒྲིབས་པ་མེད་པ་ཡང་མངོན་པར་སྒྲུབ་བོ། །སངས་རྒྱས་ ཀྱི་ཆོས་ཐམས་ཅད་ལ་ཁྱད་པར་གྱི་སྨོན་ལམ་མཉམ་པ་ཉིད་ཀྱང་ཡོངས་སུ་རྫོགས་པར་བྱེད་དོ། །ཞིང་ཐམས་ཅད་ཀྱི་གཞི་དང་དབྱིངས་ཐ་དད་པའི་རྗེས་སུའང་རབ་ཏུ་འཇུག་ སྟེ༑ སངས་རྒྱས་ཀྱི་རིགས་ཐམས་ཅད་ཀྱི་ཕ་རོལ་ཏུ་ཕྱིན་པའང་ཐོབ་པ་ཡིན། འཇིག་རྟེན་གྱི་ཁམས་ཀྱི་རྒྱུད་དེ་དང༌། དེ་དག་ཏུ་ཆོས་ཐམས་ཅད་སྤྲུལ་པ་ལྟ་བུར་བསླབ་ པའང་ཤིན་ཏུ་བསླབས་པ་ཡིན། ཆོས་ཐམས་ཅད་མཚན་མ་མེད་པར་ཞུགས་པས། ཆོས་ཐམས་ཅད་རྟེན་ཅིང་འབྲེལ་པར་འབྱུང་བ་ལ་མཁས་པ་དང་ལྡན་པ་ཡིན། ཆོས་ ཐམས་ཅད་ལུས་མེད་པའི་ཚུལ་དང༌། ཆོས་ཐམས་ཅད་ཀྱི་རང་བཞིན་གྱི་ཚུལ་དང༌། སྤྱོད་པའི་ཚུལ་ཁོང་དུ་ཆུད་པ་དང་ཡང་ལྡན་པ་ཡིན། ཆོས་ཐམས་ཅད་ཀྱི་རྗེས་སུ་འབྲང་ བ་ལ་མི་གནས་པ་ཡིན། ཆོས་ཀྱི་ཚུལ་ཐམས་ཅད་རབ་ཏུ་རྟོགས་ཤིང་བསམ་པ་དང༌། དབང་པོ་ཇི་ལྟ་བའང་རབ་ཏུ་རྟོགས་པ་ཡིན། དེ་འདོད་ན་བསྐལ་པ་དང༌། བསྐལ་ པ་གཅིག་དང༌། བསྐལ་པ་བརྒྱ་དང༌། བསྐལ་པ་སྟོང་དང༌། བསྐལ་པ་ཁྲག་ཁྲིག་དང༌། བསྐལ་པ་ཁྲག་ཁྲིག་བརྒྱ་དང༌། བསྐལ་པ་ཁྲག་ཁྲིག་སྟོང་དང༌། བསྐལ་པ་བྱེ་བ་ ཁྲག་ཁྲིག་བརྒྱ་དང༌། བསྐལ་པ་བྱེ་བ་ཁྲག་ཁྲིག་སྟོང་དང༌། བསྐལ་པ་ཚད་མེད་པ་དང༌། དཔག་ཏུ་མེད་པ་དང༌། གྲངས་མེད་པ་དང༌། བསམ་གྱིས་མི་ཁྱབ་པ་དང༌། མཚུངས་ པ་མེད་པ་དང༌། གཞལ་དུ་མེད་པ་དང༌། ཀུན་ཏུ་མཐའ་ཡས་པ་དང༌། མུ་མེད་པ་དང༌། ས་མཚམས་མེད་པ་དང༌། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་ཆོས་ ཐམས་ཅད་འགོག་པའི་ཏིང་ངེ་འཛིན་གཅིག་ལ་སྙོམས་པར་ཞུགས་ཀྱང་དེའི་ལུས་འཇིག་པར་མི་འགྱུར་རོ། །ཉམ་ཆུང་པར་མི་འགྱུར་རོ། །སྐལ་བ་ཞན་པར་མི་འགྱུར་ ༄༅། །རོ༑ ༑ཆུད་མི་ཟའོ། །རྣམ་པར་ཆུད་མི་ཟའོ། །ཞུམ་པར་མི་འགྱུར་རོ། །རྣམ་པར་ཞུམ་པར་མི་འགྱུར་རོ། །ཟད་པར་མི་འགྱུར་རོ། །དངོས་པོ་ཡོད་པ་ དང་མེད་པར་མི་འགྱུར་ཏེ། བྱང་ཆུབ་སེམས་དཔའི་བྱ་བའང་ཡོངས་སུ་རྫོགས་པར་བྱེད་དོ། །བྱང་ཆུབ་སེམས་དཔའི་ཆོས་ཉིད་ཀྱང་བརྗོད་དོ། །སེམས་ཅན་གྱི་དུས་ཀྱང་ཡོངས་སུ་མི་ སྤོང་ངོ༌། །སེམས་ཅན་འདུལ་བའི་དུས་ལ་བབ་པ་ཡང་ཐོགས་པར་མི་བྱེད་དོ། །སངས་རྒྱས་ཀྱི་ཆོས་ཉིད་ཀྱང་རྣམ་པར་འཕེལ་བར་བྱེད་དོ། །བྱང་ཆུབ་སེམས་དཔའི་མཉམ་ པ་ཉིད་ཀྱང་ཡོངས་སུ་རྫོགས་པར་བྱེད་དོ། །སེམས་ཅན་ཐམས་ཅད་ཀྱི་དོན་ཀྱང་ཡོངས་སུ་མི་གཏོང་ངོ༌། །སྤྲུལ་པའི་རྒྱུད་ཀྱང་རྒྱུན་མི་གཅོད་དོ། །མི་གཡར་ལྟ་བུའི་ཆོས་ཀྱི་ ཚུལ་ལས་ཀྱང་ལྡོག་པར་མི་བྱེད་དོ། །བསམ་གཏན་དང༌། ཏིང་ངེ་འཛིན་གྱི་ས་ལས་ཀྱང་མི་གཡོའོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ ཆེན་པོ་རྣམས་ཀྱི་ཆོས་ཐམས་ཅད་འགོག་པ་ཞེས་བྱ་བ་སྟེ། ཡེ་ཤེས་ཀྱི་མངོན་པར་ཤེས་པ་བཅུ་པའོ། །དེ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ལྷ་ དང་འཇིག་རྟེན་དུ་བཅས་པས་བསམ་གྱིས་མི་ཁྱབ་པ་ཡིན། འགྲོ་བ་ཐམས་ཅད་ཀྱིས་བསམ་གྱིས་མི་ཁྱབ་པ་ཡིན། ཉན་ཐོས་ཐམས་ཅད་ཀྱིས་བསམ་གྱིས་མི་ཁྱབ་པ་ཡིན། རང་ སངས་རྒྱས་ཐམས་ཅད་ཀྱིས་བསམ་གྱིས་མི་ཁྱབ་པ་ཡིན། ས་འོག་མ་ལ་གནས་པའི་བྱང་ཆུབ་སེམས་དཔའ་ཐམས་ཅད་ཀྱིས་བསམ་གྱིས་མི་ཁྱབ་པ་ཡིན། ལུས་ཀྱི་ལས་བསམ་ གྱིས་མི་ཁྱབ་པ་ཡིན། ངག་གི་ལས་བསམ་གྱིས་མི་ཁྱབ་པ་ཡིན། ཡིད་ཀྱི་ལས་བསམ་གྱིས་མི་ཁྱབ་པ་ཡིན། ཏིང་ངེ་འཛིན་རྣམ་པར་འཕྲུལ་པ་ལ་འཇུག་པ་བསམ་གྱིས་མི་ཁྱབ་པ་ཡིན། ཡེ་ ཤེས་ཀྱི་སྤྱོད་ཡུལ་བསམ་གྱིས་མི་ཁྱབ་པ་ཡིན་ཏེ། སངས་རྒྱས་བཅོམ་ལྡན་འདས་རྣམས་ཀྱིས་བྱང་ཆུབ་སེམས་དཔའ་དེ་དག་བསྟན་པར་མཛད་ཅིང་བཤད་པ་དང༌། གནས་དེ་དག་ དགོད་པར་མཛད་དེ་ཁོང་དུ་ཆུད་པར་མཛད་པ་དང༌། མངོན་པར་ཤེས་པ་དེ་ལྟ་བུ་ཐོབ་པའི་བྱང་ཆུབ་སེམས་དཔའ་བསྟན་པ་དང༌། བརྗོད་པ་དང༌། བཤད་པ་དང༌། རབ་ཏུ་བཀོད་པ་དང༌། བསྔགས་པ་དང༌། བརྗོད་པ་དང༌། བསྟོད་པ་དང༌། བཀྲལ་བ་དང༌། རབ་ཏུ་བསྟན་པ་དང༌། ཡོངས་སུ་བརྗོད་པ་ནི་གཏོགས་སོ། །ཀྱེ༑ རྒྱལ་པའི་སྲས་དག །བཅུ་པོ་དེ་དག་ནི་བྱང་ཆུབ་ སེམས་དཔའ་རྣམས་ཀྱིས་མངོན་པར་ཤེས་པ་སྟེ། དེ་དག་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། དུས་གསུམ་ཐམས་ཅད་ཀྱི་ཡེ་ཤེས་ཀྱི་མངོན་ པར་ཤེས་པ་བསྒྲིབས་པ་མེད་པ་རབ་ཏུ་འཐོབ་བོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། མངོན་པར་ཤེས་པའི་ལེའུ་སྟེ། སུམ་ཅུ་རྩ་བཞི་པའོ།། །། ༄༅། །བམ་པོ་དྲུག་ཅུ་རྩ་གཅིག་པ། དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས། ཡང་བྱང་ཆུབ་སེམས་དཔའ་དེ་དག་ལ་སྨྲས་པ། ཀྱེ༑ རྒྱལ་བའི་ སྲས་དག །བཅུ་པོ་འདི་རྣམས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བཟོད་པ་ཐོབ་པ་སྟེ། བཟོད་པ་ཐོབ་པ་དེ་དག་དང་ལྡན་པའི་བྱང་ཆུབ་སེམས་དཔའ་ ནི། བཟོད་པ་ཐམས་ཅད་ཀྱིས་བསྒྲིབས་པ་མེད་པ་ཐོབ་པས་སངས་རྒྱས་ཀྱི་ཆོས་ཟད་མི་ཤེས་པ། བསྒྲིབས་པ་མེད་པ་ཐམས་ཅད་ཐོབ་པར་འགྱུར་པ་དག་གོ །བཅུ་གང་ ཞེ་ན༑ འདི་ལྟ་སྟེ། སྒྲ་ཁོང་དུ་ཆུད་པའི་བཟོད་པ་དང༌། མཐུན་པའི་བཟོད་པ་དང༌། མི་སྐྱེ་བའི་ཆོས་ཀྱི་བཟོད་པ་དང༌། སྒྱུ་མ་ལྟ་བུའི་བཟོད་པ་དང༌། སྨིག་རྒྱུ་ལྟ་བུའི་ བཟོད་པ་དང༌། རྨི་ལམ་ལྟ་བུའི་བཟོད་པ་དང༌། སྒྲ་བརྙན་ལྟ་བུའི་བཟོད་པ་དང༌། གཟུགས་བརྙན་ལྟ་བུའི་བཟོད་པ་དང༌། སྤྲུལ་པ་ལྟ་བུའི་བཟོད་པ་དང༌། ནམ་ མཁའ་ལྟ་བུའི་བཟོད་པའོ། །ཀྱེ༑ རྒྱལ་བའི་སྲས་དག །བཅུ་པོ་དེ་རྣམས་ནི་བྱང་ཆུབ་སེམས་དཔའ་རྣམས་ཀྱི་བཟོད་པ་ཐོབ་པ་སྟེ། འདས་པ་དང༌། མ་བྱོན་པ་དང༌། ད་ལྟར་ བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་སོ། །གསུང་ངོ༌། །གསུང་བར་འགྱུར་རོ། །ཀྱེ༑ རྒྱལ་བའི་སྲས་དག །དེ་ལ་བཟོད་པ་དང་པོ་སྒྲ་ཁོང་དུ་ཆུད་པ་གང་ཞེ་ན། འདི་ལྟ་སྟེ། ཆོས་དེ་དག་ཐོས་ནས་མི་འཇིགས། མི་སྐྲག །སྐྲག་པར་མི་འགྱུར་ཞིང༌། དད་པ་དང༌། ཡིད་ཆེས་པ་དང༌། མོས་པ་དང༌། སྤྲོ་བ་དང༌། འཇུག་པ་དང༌། རྗེས་སུ་འབྲང་བ་ དང༑ དེའི་རང་བཞིན་དུ་གནས་ཤིང་ཁོང་དུ་ཆུད་པར་བྱེད་པ་སྟེ། ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྒྲ་ཁོང་དུ་ཆུད་པའི་བཟོད་ པ་ཐོབ་པ་སྟེ་དང་པོའོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་མཐུན་པའི་བཟོད་པ་ཐོབ་པ་གཉིས་པ་གང་ཞེ་ན། ཀྱེ༑ རྒྱལ་བའི་སྲས་ དག༑ འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འདི་དག་ནི་མཐུན་པ་ཞེས་བྱ་བར་རྟོག་གོ །དཔྱོད་དོ། །མཉམ་པར་བྱེད་དོ། །མི་འགལ་བར་བྱེད་དོ། །ཆོས་དེ་དག་ ལ་ཇི་ལྟར་མཐུན་པར་འཇུག་པར་བྱ་བ་དེ་ལྟར་རྣམ་པར་སྒོམ་མོ། །བསམ་པ་རྣམ་པར་དག་པར་བྱེད་དོ། །མཉམ་པར་བྱེད་དོ། །བརྩོན་པར་བྱེད་དོ། །རྟོགས་པར་བྱེད་དོ། །རབ་ ཏུ་སྒྲུབ་བོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་མཐུན་པའི་བཟོད་པ་ཐོབ་པ་སྟེ་གཉིས་པའོ། །ཀྱེ༑ རྒྱལ་བའི་སྲས་དག ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་མི་སྐྱེ་བའི་ཆོས་ཀྱ་[*KYI?] བཟོད་པ་ཐོབ་པ་གསུམ་པ་གང་ཞེ་ན། ཀྱེ༑ རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་ ༄༅། །དཔའ་ཆེན་པོ་རྡུལ་ཙམ་གྱི་ཆོས་ཀྱང་གང་ཡང་སྐྱེས་པར་མཐོང་བ་མེད་དོ། །ཆོས་གང་ཡང་འགག་པར་མཐོང་བ་མེད་དོ། །དེ་ཅིའི་ཕྱིར་ཞེ་ན། གང་མ་ སྐྱེས་པ་དེ་ནི་མ་འགགས་པའོ། །གང་མ་འགགས་པ་དེ་ནི་མི་ཟད་པའོ། །གང་མི་ཟད་པ་དེ་ནི་རྡུལ་མེད་པའོ། །གང་རྡུལ་མེད་པ་དེ་ནི་ཐ་མི་དད་པའོ། །གང་ཐ་མི་དད་པ་དེ་ནི་གཞི་ མེད་པའོ། །གང་གཞི་མེད་པ་དེ་ནི་ཞི་བའི་སའོ། །གང་ཞི་བའི་ས་ཡིན་པ་དེ་ནི་འདོད་ཆགས་དང་བྲལ་བའོ། །གང་འདོད་ཆགས་དང་བྲལ་བ་དེ་ནི་མངོན་པར་འདུ་བྱ་བ་མེད་པའོ།། གང་མངོན་པར་འདུ་བྱ་བ་མེད་པ་དེ་ནི་སྨོན་པ་མེད་པའོ། །གང་སྨོན་པ་མེད་པ་དེ་ནི་གནས་པ་མེད་ཅིང་ལེན་པ་མེད་པ་སྟེ། ཀྱེ༑རྒྱལ་བའི་སྲས་དག །འདི་ནི་བྱང་ཆུབ་སེམས་ དཔའ་སེམས་དཔའ་ཆེན་པོ་རྣམས་ཀྱི་མི་སྐྱེ་བའི་ཆོས་ཀྱི་བཟོད་པ་ཐོབ་པ་སྟེ་གསུམ་པའོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ སྒྱུ་མ་ལྟ་བུའི་བཟོད་པ་ཐོབ་པ་བཞི་པ་གང་ཞེ་ན། ཀྱེ༑ རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་རྟེན་ཅིང་འབྲེལ་བར་ འབྱུང་བའི་ཚུལ་གྱི་སྒྱུ་མ་ལྟ་བུར་འཇུག་སྟེ། ཆོས་ཀྱི་རྣམ་པ་གཅིག་ལ་རྣམ་པ་མང་པོར་མོས་པར་བྱེད་དོ། །ཆོས་རྣམ་པ་མང་པོ་ལ་ཆོས་ཀྱི་རྣམ་པ་གཅིག་ཏུ་མོས་པར་བྱེད་དོ། །དེ་ནི་ ཆོས་དེ་དག་ལ་སྒྱུ་མའི་ཚུལ་གྱིས་ཞིང་དུ་ཡང་སྒོམ་པར་བྱེད་དོ། །སེམས་ཅན་དུའང་ཁོང་དུ་ཆུད་པར་བྱེད་དོ། །ཆོས་ཀྱི་དབྱིངས་སུའང་རྟོགས་པར་བྱེད་དོ། །འཇིག་རྟེན་གྱི་ཁམས་ སུའང་མཉམ་པར་བྱེད་དོ། །སངས་རྒྱས་སྐྱེ་བར་ཡང་མཚུངས་པར་བྱེད་དོ། །འཇུག་ཏུ་མེད་པའི་ཚུལ་གྱིས་ཀྱང་རྗེས་སུ་འཇུག་གོ །བྱིན་གྱི་རླབས་ཀྱི་ཚུལ་གྱིས་ཀྱང་མངོན་པར་ སྒྲུབ་བོ། །འདི་ལྟ་སྟེ། དཔེར་ན། སྒྱུ་མ་ནི་གླང་པོའི་ལུས་ལ་ཡང་མི་གནས་སོ། །རྟའི་ལུས་ལའང་མི་གནས་སོ། །ཤིང་རྟའི་ལུས་ལའང་མི་གནས་སོ། །རྐང་ཐང་གི་ལུས་ ལའང་མི་གནས་སོ། །བུད་མེད་ལའང་མི་གནས་སོ། །སྐྱེས་པ་ལའང་མི་གནས་སོ། །རོགས་པོ་ལའང་མི་གནས་སོ། །བུ་མོ་ལའང་མི་གནས་སོ། །ཤིང་ལའང་མི་གནས་སོ། །ལོ་ མ་ལའང་མི་གནས་སོ། །མེ་ཏོག་ལའང་མི་གནས་སོ། །འབྲས་བུ་ལའང་མི་གནས་སོ། །ས་དང་ཆུ་དང་མེ་དང་རླུང་ལའང་མི་གནས་སོ། །ཉིན་ཞག་དང༌། ཡུད་དུ་ཡན་མན་ དང༑ ཟླ་བ་དང༌། ལོ་ལའང་མི་གནས་སོ། །ལོ་བརྒྱ་ལའང་མི་གནས་སོ། །ཟླ་བ་དང་ཉི་མ་ལའང་མི་གནས་སོ། །བསྐལ་པ་ལའང་མི་གནས་སོ། །ཞི་བ་དང་རབ་ཏུ་ཞི་བ་ལའང་ མི་གནས་སོ། །སྣ་ཚོགས་དང་རྣམ་པ་སྣ་ཚོགས་ལའང་མི་གནས་སོ། །གཅིག་པ་དང་ཐ་དད་པ་ལའང་མི་གནས་སོ། །ཡངས་པ་དང་དོག་པ་ལའང་མི་གནས་སོ། །རྒྱ་ཆེན་པོ་ ༄༅། །དང་རྒྱ་ཆུང་ངུ་ལའང་མི་གནས་སོ། །ཚད་ཡོད་པ་དང་ཚད་མེད་པ་ལའང་མི་གནས་སོ། ཕྲ་བ་དང་རིགས་པ་ལའང་མི་གནས་སོ། །འཁོར་སྣ་ཚོགས་ ལའང་མི་གནས་སོ། །འཁོར་ཀྱང་སྒྱུ་མ་ལ་མི་གནས་སོ། །སྒྱུ་མའང་འཁོར་ལ་མི་གནས་ཏེ། སྒྱུ་མ་ཀུན་ཏུ་བསྟན་པ་དང༌། སྣ་ཚོགས་ཀྱི་སྒྱུ་མ་རྣམ་པ་ཐ་དད་པ་བསྟན་པའི་གྲངས་ སུ་བགྲང་བ་ཡང་ཡོད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཇིག་རྟེན་ཐམས་ཅད་ལ་སྒྱུ་མ་ལྟ་བུར་འཇུག་ཅིང་ལས་ཀྱི་འཇིག་རྟེན་དང༌། ཉོན་མོངས་ པའི་འཇིག་རྟེན་དང༌། ཞིང་གི་འཇིག་རྟེན་དང༌། ཆོས་ཀྱི་འཇིག་རྟེན་དང༌། དུས་ཀྱི་འཇིག་རྟེན་དང༌། རྒྱུད་ཀྱི་འཇིག་རྟེན་དང༌། ལྡན་པའི་འཇིག་རྟེན་དང༌། མི་ལྡན་པའི་འཇིག་རྟེན་ དང༑ འཇུག་པའི་འཇིག་རྟེན་དང༌། མངོན་པར་འདུ་བྱ་བའི་འཇིག་རྟེན་ལ་འཇུག་པའི་ཚེ། བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་ཐམས་ཅད་ལ་སྒྱུ་མའི་རྣམ་ པར་འཇུག་པས་སེམས་ཅན་རྣམས་སྐྱེ་བར་མི་བྱེད་དོ། །འཇིག་པར་མི་བྱེད་དོ། །ཞིང་རྣམས་སྐྱེ་བར་མི་བྱེད་དོ། །འཇིག་པར་མི་བྱེད་དོ། །ཆོས་རྣམས་སྐྱེ་བར་མི་བྱེད་དོ། ། འཇིག་པར་མི་བྱེད་དོ། །འདས་པ་ལ་མི་རྟོག་གོ །འདས་པ་ལ་རྣམ་པར་མི་རྟོག་གོ །མ་འོངས་པ་ལ་མངོན་པར་འདུ་མི་བྱེད་དོ། །མ་འོངས་པ་འབྱུང་བར་མི་བྱེད་དོ། །ད་ལྟར་ བྱུང་བ་ལ་གནས་པ་མེད་དོ། །ད་ལྟར་བྱུང་བ་ལ་ཆགས་པ་མེད་དོ། །བྱང་ཆུབ་ལ་སྤྱོད་པ་མེད་དོ། །བྱང་ཆུབ་ལ་ཡོངས་སུ་རྟོགས་པ་མེད་དོ། །སངས་རྒྱས་འབྱུང་བར་མི་བྱེད་དོ། །སངས་ རྒྱས་ཡོངས་སུ་མྱ་ངན་ལས་འདའ་བར་མི་བྱེད་དོ། །སྨོན་ལམ་ལ་གནས་པར་མི་བྱེད་དོ། །སྐྱོན་མེད་པ་ལ་ཆགས་པར་མི་བྱེད་དོ། །མཉམ་པ་ཉིད་མི་ལེན་ཏོ། །ཆགས་པ་མེད་པ་མི་ འདོར་རོ། །ཞིང་ལ་ཆགས་པ་མེད་དོ། །ཐ་དད་པ་མེད་པར་ཡང་ཁོང་དུ་ཆུད་དོ། །སེམས་ཅན་གྱི་ཁམས་ཀྱང་མངོན་པར་སྒྲུབ་སྟེ། སེམས་ཅན་གྱི་ཁམས་ཐ་དད་པའང་རབ་ཏུ་ཤེས་སོ། ། ཆོས་ཀྱི་དབྱིངས་ཀྱང་ཁོང་དུ་ཆུད་དེ། གནས་པའི་ཆོས་ཉིད་ལས་ཀྱང་མི་གཡོའོ། །དུས་མཉམ་པ་ཉིད་ལའང་རབ་ཏུ་འཇུག་སྟེ། དུས་ལ་རྣམ་པར་རྟོག་པས་ཀྱང་འགལ་བར་མི་བྱེད་ དོ༑ ༑ཕུང་པོ་དང་སྐྱེ་མཆེད་རྣམས་ཀྱང་མངོན་པར་སྒྲུབ་སྟེ། གནས་ཡང་དག་པར་གཞོམ་པ་ཡང་ཁོང་དུ་ཆུད་པར་བྱེད་དོ། །སེམས་ཅན་རྣམས་ཀྱང་ཡོངས་སུ་སྨིན་པར་མི་བྱེད་ དེ༑ ཆོས་ཀྱི་དབྱིངས་མཉམ་པ་ཉིད་ཐ་དད་པ་མེད་པར་ཡང་རབ་ཏུ་ཤེས་སོ། །ཆོས་ཐམས་ཅད་བརྗོད་དུ་མེད་ཅིང་ཡི་གེ་མེད་པར་ཡང་རབ་ཏུ་ཤེས་ཏེ། ཐ་དད་པ་ཡང་དག་པར་ཤེས་ པས་ཀྱང་ཐོགས་པ་མེད་དོ། །སེམས་ཅན་ཐམས་ཅད་དགྲོལ་བའི་དོན་དུ་འདོད་པ་ལའང་ཆགས་པར་མི་བྱེད་དོ། །སྙིང་རྗེ་ཆེན་པོས་ཀྱང་འདུལ་བའི་སེམས་ཅན་རྣམས་ལ་ཆོས་ཀྱི་ ༄༅། །འཁོར་ལོ་བསྐོར་རོ། །སེམས་ཅན་ལ་ལྟ་བའི་ཕྱིར་སྙིང་རྗེ་ཆེན་པོ་ཡང་བྱིན་གྱིས་རློབ་སྟེ། སྙིང་རྗེ་ཆེན་པོའི་ཕྱོགས་ལའང་སེམས་ཅན་ཐམས་ཅད་ ཡོངས་སུ་འགྲེལ་ཏོ། །སྔོན་གྱི་རྒྱུའང་རབ་ཏུ་བརྗོད་དོ། །རྒྱུ་འཕོ་བ་མེད་པའང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་ སེམས་དཔའ་སེམས་དཔའ་ཆེན་པོ་རྣམས་ཀྱི་སྒྱུ་མ་ལྟ་བུའི་བཟོད་པ་ཐོབ་པ་སྟེ་བཞི་པའོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ ཀྱི་སྨིག་རྒྱུ་ལྟ་བུའི་བཟོད་པ་ཐོབ་པ་ལྔ་པ་གང་ཞེ་ན། ཀྱེ༑རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་ཐམས་ཅད་སྨིག་རྒྱུ་ལྟ་བུར་ རབ་ཏུ་ཤེས་ཏེ། འདི་ལྟ་སྟེ། དཔེར་ན། སྨིག་རྒྱུ་ནི་ཡུལ་ནའང་མི་གནས། ཕྱོགས་ནའང་མི་གནས་སོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ ཡུལ་ན་ཡང་མི་གནས། ཕྱོགས་ནའང་མི་གནས་པའི་ཆོས་ཉིད་རབ་ཏུ་ཤེས་སོ། །འཇིག་རྟེན་ནང་ན་ཡང་མི་གནས། ཕྱི་རོལ་ན་ཡང་མི་གནས་པ་དང༌། ཡོད་པ་ཡང་ མ་ཡིན། མེད་པ་ཡང་མ་ཡིན་པ་དང༌། རྟག་པ་ཡང་མ་ཡིན། ཆད་པ་ཡང་མ་ཡིན་པར་རྣམ་པར་རིག་པར་གྱུར་པ་རབ་ཏུ་ཤེས་སོ། །ཡང་དག་པ་ཇི་ལྟ་བ་བཞིན་དུ་རབ་ཏུ་ ཤེས་སོ། །ནང་ཞེས་བྱ་བ་ནང་ན་གནས་པ་མ་ཡིན་པ་དང༌། ནང་ཞེས་བྱ་བ་ཕྱི་རོལ་ན་གནས་པ་མ་ཡིན་པ་དང༌། ཁ་དོག་གཅིག་པ་མ་ཡིན་པ་དང༌། ཁ་དོག་ཐ་དད་པ་མ་ཡིན་པ་ ཡང་རབ་ཏུ་ཤེས་སོ། །ཆོས་ཐམས་ཅད་ཁ་དོག་མེད་པའི་ས་ཐོབ་པར་བྱ་བ་ཡང་ཡོངས་སུ་རྫོགས་པར་བྱེད་དོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་ དཔའ་ཆེན་པ་རྣམས་ཀྱི་སྨིག་རྒྱུ་ལྟ་བུའི་བཟོད་པ་ཐོབ་པ་སྟེ་ལྔ་པའོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྨི་ལམ་ལྟ་བུའི་བཟོད་ པ་ཐོབ་པ་དྲུག་པ་གང་ཞེ་ན། ཀྱེ༑ རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་ཐམས་ཅད་རྨི་ལམ་ལྟ་བུར་རབ་ཏུ་ཤེས་ཏེ། འདི་ ལྟ་སྟེ༑ དཔེར་ན། རྨི་ལམ་ནི་འཇིག་རྟེན་ལས་བྱུང་བ་ཡང་མ་ཡིན། འཇིག་རྟེན་ལས་འདས་པ་ཡང་མ་ཡིན། རྨི་ལམ་ནི་འདོད་པའི་ཁམས་ཀྱང་མ་ཡིན། གཟུགས་ཀྱི་ཁམས་ཀྱང་ མ་ཡིན། གཟུགས་མེད་པའི་ཁམས་ཀྱང་མ་ཡིན་ནོ། །རྨི་ལམ་ནི་ཤི་འཕོ་བ་ཡང་མ་ཡིན། སྐྱེ་བ་ཡང་མ་ཡིན་ནོ། །རྨི་ལམ་ནི་ཀུན་ནས་ཉོན་མོངས་པའང་མ་ཡིན། རྣམ་པར་བྱང་ བའང་མ་ཡིན་ནོ། །རྨི་ལམ་ནི་ལྟ་བའང་མ་ཡིན། རྣམ་པར་དག་པའང་མ་ཡིན་ཏེ། རྨི་ལམ་སྣང་བ་ཡང་མེད་པའང་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་ ༄༅། །པོ་ཡང་འཇིག་རྟེན་ཐམས་ཅད་འཁྲུག་པ་མེད་པའི་ཚུལ་གྱིས་རྨི་ལམ་གྱི་ངོ་བོ་ཉིད་དང༌། ཚུལ་དང༌། རྨི་ལམ་ལ་མངོན་པར་ཆགས་པ་དང༌། རྨི་ལམ་ རབ་ཏུ་དབེན་པ་དང༌། རྨི་ལམ་གྱི་རང་བཞིན་དང༌། རྨི་ལམ་གྱི་བྱིན་གྱི་རླབས་དང༌། རྨི་ལམ་ཐ་མི་དད་པ་དང༌། རྨི་ལམ་གྱི་འདུ་ཤེས་དང༌། རྣམ་པར་རྟོག་པ་དང༌། རྨི་ལམ་ གྱི་འཇིག་རྟེན་ཁོང་དུ་ཆུད་པ་ལྟ་བུར་རབ་ཏུ་ཤེས་ཏེ། ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྨི་ལམ་ལྟ་བུའི་བཟོད་ པ་ཐོབ་པ་སྟེ་དྲུག་པའོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྒྲ་བརྙན་ལྟ་བུའི་བཟོད་པ་ཐོབ་པ་བདུན་པ་གང་ཞེ་ན་། ཀྱེ༑ རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པའི་ཆོས་ཀྱི་ཕ་རོལ་ཏུ་ཕྱིན་པ་ནི་ཆོས་ཉིད་མངོན་པར་བསྒྲུབ་པའི་བསླབ་པ་ ལ་ཤིན་ཏུ་བསླབས་པ་ཡིན་ཏེ། འདི་ལྟ་སྟེ། དཔེར་ན། སྒྲ་བརྙན་ནི་སྒྲ་སྣ་ཚོགས་གྲགས་པར་བྱེད་ཀྱང་འཕོ་བ་མེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ ཆེན་པོ་ཡང་དེ་བཞིན་གཤེགས་པའི་གསུང་ནང་ན་བརྗོད་པ་ཡང་མ་ཡིན་པར་རབ་ཏུ་ཤེས་སོ། །དེ་བཞིན་གཤེགས་པའི་གསུང་ཕྱི་རོལ་ན་བརྗོད་པ་ཡང་མ་ཡིན་པར་རབ་ཏུ་ཤེས་ སོ༑ ༑དེ་ལྟར་ཤེས་པ་དེ་ཡང་ནང་ནས་ཤེས་པའང་མ་ཡིན་པར་རབ་ཏུ་ཤེས་སོ། །ཕྱི་རོལ་ནས་ཤེས་པའང་མ་ཡིན་པར་རབ་ཏུ་ཤེས་སོ། །ཕྱི་ནང་ནས་ཤེས་པའང་མ་ཡིན་པར་རབ་ ཏུ་ཤེས་ཏེ། འོན་ཀྱང་བསྟན་པ་མངོན་པར་བསྒྲུབ་པའང་རབ་ཏུ་ཤེས་སོ། །བྱིན་གྱི་རླབས་ལ་མཁས་པས་འཇུག་པའང་རབ་ཏུ་ཤེས་སོ། །ཚིག་ཀྱང་རབ་ཏུ་ཤེས་སོ། །སྒྲ་བརྙན་ ལྟ་བུར་རྟེན་ཅིང་འབྲེལ་བར་འབྱུང་བས་གྲག་པར་གྱུར་བའི་ཆོས་ཉིད་ཀྱང་འཁྲུག་པར་མི་བྱེད་དེ། སྒྲོ་འདོགས་པར་ཡང་མི་བྱེད་ལ། དབྱངས་ཀྱི་ཡན་ལག་རྣམ་པ་ཐ་དད་པ་ལ་ འཇུག་ཅིང་བསླབ་པ་ལའང་ཤིན་ཏུ་བསླབས་པ་ཡིན། འདི་ལྟ་སྟེ། དཔེར་ན། ལྷའི་དབང་པོ་བརྒྱ་བྱིན་གྱིས་ལྷའི་བུད་མེད་འགྲོགས་མའི་ཁའི་དབུགས་ཀྱིས་ལན་གཅིག་བུས་ པས༑ ཁའི་དབུགས་ཡན་ལག་སྟོང་དང་ལྡན་པ་འབྱུང་ངོ༌། །ཁའི་དབུགས་ལ་རྣམ་པར་རྟོག་པ་མེད་ཀྱང་དབྱངས་ཀྱི་ཡན་ལག་རྣམ་པ་སྟོང་དུ་སྒྲོག་གོ །དེ་བཞིན་དུ་བྱང་ཆུབ་ སེམས་དཔའ་སེམས་དཔའ་ཆེན་པོ་ཡང་རྣམ་པར་མི་རྟོག་པ་དང་ལྡན་པའི་དབྱིངས་ལ་འཇུག་པའི་ཚེ། དབྱངས་ཀྱི་ཡན་ལག་མཐའ་ཡས་པ་རྣམ་པར་བསྒོམ་པ་ལ་མཁས་པས་འཇིག་ རྟེན་གྱི་ཁམས་མཐའ་དང་དབུས་མེད་པར་འགྲོ་བ་ཐམས་ཅད་ལ་ཕྱིར་མི་ལྡོག་པའི་ཆོས་ཀྱི་འཁོར་ལོ་བསྐོར་བ་ལ་རབ་ཏུ་འཇུག་ཅིང་འཁོར་རྣམས་ལའང་རྒྱ་ཆེར་ཡང་དག་པར་སྟོན་ཏོ། ། ༄༅། །ལྕེ་ཤིན་ཏུ་ཡངས་པ་ཡང་བྱིན་གྱིས་རློབ་སྟེ། དབྱངས་ཆགས་པ་མེད་པ་ཡང་རབ་ཏུ་བརྗོད་དོ། །ཞིང་ཐམས་ཅད་དུ་འགེངས་པའི་དབྱངས་ ཀྱང་བྱིན་གྱིས་རློབ་བོ། །སེམས་ཅན་རྣམས་ཀྱིས་མཐའ་ཡས་པར་ཁོང་དུ་ཆུད་པར་ཡང་བྱིན་གྱིས་རློབ་བོ། །ཆོས་རྣམ་པར་ཕྱེ་བ་འབྱམས་ཀླས་པ་ཡང་རབ་ཏུ་སྣང་བར་བྱེད་ དོ༑ ༑དབྱངས་ཐམས་ཅད་ལ་འཇུག་པ་མེད་པ་ཡང་རབ་ཏུ་ཤེས་སོ། །སྒྲ་རྣམ་པར་དམིགས་པ་ཡང་རྣམ་པར་དམིགས་པ་མེད་པར་རབ་ཏུ་ཤེས་སོ། །དབྱངས་སྣ་ཚོགས་ཀྱང་ རྣམ་པར་འགོད་དོ། །དབྱངས་ཀྱི་ཡན་ལག་གི་དཀྱིལ་འཁོར་ཁོང་དུ་ཆུད་པས་ཀྱང་རབ་ཏུ་སྤྱོད་དེ། ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་ པོ་རྣམས་ཀྱི་སྒྲ་བརྙན་ལྟ་བུའི་བཟོད་པ་ཐོབ་པ་སྟེ་བདུན་པའོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཟུགས་བརྙན་ ལྟ་བུའི་བཟོད་པ་ཐོབ་པ་བརྒྱད་པ་གང་ཞེ་ན། ཀྱེ༑ རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་ནས་ཤི་འཕོ་བ་མེད་དོ། །འཇིག་ རྟེན་དུ་སྐྱེ་བ་མེད་དོ། །འཇིག་རྟེན་གྱི་ནང་ན་མི་གནས་སོ། །འཇིག་རྟེན་གྱི་ཕྱི་རོལ་ན་མི་གནས་སོ། །འཇིག་རྟེན་དུ་རྒྱུ་བ་མེད་དོ། །འཇིག་རྟེན་དུ་རྒྱུན་ཆད་པ་མེད་དོ། །འཇིག་ རྟེན་དང་འདྲེས་པ་མེད་དོ། །འཇིག་རྟེན་དང་ཐ་དད་པ་མེད་དོ། །འཇིག་རྟེན་དུ་འགྲོ་བ་མེད་དེ། །འཇིག་རྟེན་ལས་གྲོལ་བར་འགྲོ་བ་མེད་དོ། །འཇིག་རྟེན་དུ་གཞོལ་བར་འགྲོ་ བ་མེད་དོ། །འཇིག་རྟེན་ལས་ལྡོག་པ་མེད་དོ། །བྱང་ཆུབ་སེམས་དཔའ་དེ་ཉིད་ཀྱང་འཇིག་རྟེན་མ་ཡིན་ཏེ། འཇིག་རྟེན་ལས་འདས་པའང་མ་ཡིན་ནོ། །བྱང་ཆུབ་སེམས་དཔའ་ སྤྱད་པ་སྤྱོད་པའང་མ་ཡིན་ཏེ། སྨོན་ལམ་ཆེན་པོ་རྒྱུན་གཅོད་པའང་མ་ཡིན་ནོ། །མང་བ་ཡང་མ་ཡིན། ཉུང་བ་ཡང་མ་ཡིན་ཏེ། སངས་རྒྱས་ཀྱི་ཆོས་ཐམས་ཅད་རྫོགས་པར་འཐོབ་པར་ བྱ་བ་ལའང་དོན་ཡོད་པ་སྤྱོད་དོ། །འཇིག་རྟེན་གྱི་བྱ་བ་ཐམས་ཅད་ཀྱང་ཡོངས་སུ་རྫོགས་པར་བྱེད་དོ། འཇིག་རྟེན་གྱི་རྒྱུད་ཀྱི་རྗེས་སུ་འབྲང་བའང་མ་ཡིན་ནོ། །ཆོས་ཀྱི་རྒྱུད་ཐོགས་ པར་བྱེད་པའང་མ་ཡིན་ནོ། །འདི་ལྟ་སྟེ། དཔེར་ན། གཟུགས་བརྙན་ནི་ཉི་མའམ། ཟླ་བའམ། བུད་མེད་དམ། སྐྱེས་པའམ། ཤིང་ངམ། རིའམ། གནས་སམ། རྩིག་པའམ། སའམ། ཆུ་ཀླུང་གི་རྒྱུད་དམ། དངོས་པོ་སྣ་ཚོགས་མཐའ་ཡས་པ་ཚད་མེད་པ་རྣམས་ཀྱི་གཟུགས་གང་དང་གང་ཡོད་པ་དེ་དག་ཐམས་ཅད་རྣམ་པར་དམིགས་པར་བྱེད་དེ། ཆུའམ། ཏིལ་མར་རམ། ནོར་བུའམ། མཆིང་བུའམ། མེ་ལོང་ངམ། གཞན་ཡང་ཡོ་བྱད་ཁ་དོག་དང་བ། མདོག་གསལ་བ་གང་ཡང་རུང་སྟེ། དེ་དག་ཤིན་ཏུ་དང་བའི་ཕྱིར་དེ་དག་ཏུ་ ༄༅། །གཟུགས་བརྙན་རྣམ་པར་དམིགས་པར་བྱེད་ཀྱང་གཟུགས་བརྙན་ནི་ཤིན་ཏུ་དང་བའི་དབྱིངས་དེ་དང་འདྲེས་པ་ཡང་མེད་དོ། །གཟུགས་བརྙན་ དེ་དེ་ལས་གུད་ན་འདུག་པ་ཡང་མ་ཡིན་ནོ། །གཟུགས་བརྙན་དེ་དེ་ལྟར་རྣམ་པར་དམིགས་པ་དང་ཡང་འགྲོགས་བ་མེད་དོ། །དང་པའི་དངོས་པོ་དེ་ཡང་གཟུགས་བརྙན་གྱིས་དང་ འགྲོགས་པ་མེད་དོ། །གཟུགས་བརྙན་དེ་ཆུ་ཀླུང་གི་རྒྱུན་གྱིས་ཀྱང་ཁྱེར་བར་མི་ནུས་སོ། །གཟུགས་བརྙན་དེ་ཆུ་བོའི་རྒྱ་མཚོར་འཆི་བར་ཡང་མི་འགྱུར་རོ། །དང་བ་སྣ་ཚོགས་དེ་དག་ གིས་ཀྱང་གཟུགས་བརྙན་དེ་ལ་གོས་པར་མི་འགྱུར་ཏེ། དེ་དག་ཏུ་གཟུགས་བརྙན་རྣམ་པར་དམིགས་པའང་ཡོད་ཅིང༌། དེ་དག་གིས་གཟུང་བ་འདྲ་ཡང་གཟུགས་བརྙན་གང་དུ་དམིགས་པར་ གྱུར་པ་དེས་དེའི་ཚེ་གཟུང་བ་མེད་དོ། །གཟུགས་བརྙན་དེ་ནི་རིང་བར་ཡང་སྣང་ཉེ་བར་ཡང་སྣང་སྟེ། དེ་ལྟར་རིང་བ་དང་ཉེ་བར་ཡང་མེད་དོ། །དེ་བཞིན་དུ་བྱང་ཆུབ་སེམས་ དཔའ་སེམས་དཔའ་ཆེན་པོ་ཡང་རང་གི་ཡེ་ཤེས་ཀྱི་དཀྱིལ་འཁོར་གཞན་གྱི་རྒྱུད་ཀྱི་ཡུལ་དུ་སྣང་བར་བྱེད་ཀྱང༌། འདི་ནི་གཞན་གྱི་རྒྱུད་དོ། །འདི་ནི་བདག་གི་ཡེ་ཤེས་ཀྱི་རྒྱུད་དོ། །འདི་ནི་ བདག་གི་ཡེ་ཤེས་ཀྱི་དཀྱིལ་འཁོར་ཏོ་ཞེས་གཉིས་སུ་མི་བྱེད་དོ། །བདག་གི་ཡུལ་དང་གཞན་གྱི་ཡུལ་རྣམ་པར་དབྱེ་བའང་རབ་ཏུ་ཤེས་སོ། །འདི་ལྟ་སྟེ། དཔེར་ན། ས་བོན་དུ་གྱུར་པ་ནི་ཤིན་ཏུ་ འཕེལ་ཞིང་སྐྱེ་བ་ཡིན་ཏེ། ཆུ་བ་དང༌། ལོ་མ་དང༌། སྦུ་གུའི་གནས་སུ་གྱུར་ནས་རྣམ་པར་དབྱེ་བའང་ཡོད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཆོས་ཉིད་མི་ གཉིས་པ་ལ་གཉིས་ཀྱིས་མཚན་ཉིད་མི་མཐུན་པའི་ཡེ་ཤེས་ལ་ཆགས་པ་མེད་པའི་མཐའི་ཚུལ་གྱིས་རབ་ཏུ་འཇུག་གོ །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་ སེམས་དཔའ་ཆེན་པོ་རྣམས་ཀྱི་གཟུགས་བརྙན་ལྟ་བུའི་བཟོད་པ་ཐོབ་པ་སྟེ་བརྒྱད་པའོ། །བཟོད་པ་དེ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སངས་རྒྱས་ ཀྱི་ཞིང་བསམ་གྱིས་མི་ཁྱབ་པ་དག་ཏུ་འགྲོ་བ་ཡང་མེད་ལ། སངས་རྒྱས་ཀྱི་ཞིང་བརྗོད་དུ་མེད་པ་དག་ཏུའང་སྣང་ངོ༌། །འཇིག་རྟེན་གྱི་ཁམས་གང་ནས་ཀྱང་གཡོ་བ་མེད་ཅིང༌། འཇིག་ རྟེན་གྱི་ཁམས་གང་དུའང་འགྲོ་བ་མེད་ལ། ལུས་ཀྱི་དཀྱིལ་འཁོར་གཟུགས་བརྙན་དུ་གྱུར་པ་ཡང་ཀུན་ཏུ་རྣམ་པར་དམིགས་པར་བྱེད་དེ། རྗེས་སུ་སོང་བའི་ལུས་ཀྱང་འཇིག་རྟེན་ ཐམས་ཅད་དུ་ཕྱིན་པར་བྱེད་དོ། །ལུས་རྣམ་པར་ཕྱེ་བ་ཆགས་པ་མེད་པས་སྤྱོད་པའང་རབ་ཏུ་ཤེས་སོ། །གང་ཡང་འཇིག་རྟེན་ན་འཇིག་རྟེན་གྱི་མཚན་མ་དང༌། འཇིག་རྟེན་དོང་ སྐོམ་ཡོད་པ་དེ་དག་འདྲེས་པའང་མ་ཡིན། ཐ་དད་པ་ཡང་མ་ཡིན་པར་རབ་ཏུ་ཤེས་སོ། །དེ་བཞིན་གཤེགས་པའི་རིགས་སུ་རིགས་དང་ལྡན་པར་བྱུང་བའི་ལུས་དང་ངག་དང་ཡིད་ ༄༅། །རྣམ་པར་དག་པ་ཡང་རབ་ཏུ་འཐོབ་བོ། །ཁ་དོག་མཐའ་ཡས་པའི་ལུས་ཐམས་ཅད་རྣམ་པར་དག་པ་ཡང་རབ་ཏུ་ཐོབ་བོ། །ཀྱེ༑རྒྱལ་བའི་སྲས་ དག༑ བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྲུལ་པ་ལྟ་བུའི་བཟོད་པ་ཐོབ་པ་གང་ཞེ་ན། ཀྱེ༑ རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་ དཔའ་ཆེན་པོ་འཇིག་རྟེན་ཐམས་ཅད་སྤྲུལ་པ་ལྟ་བུར་རབ་ཏུ་འཇུག་སྟེ། སེམས་ཅན་ཐམས་ཅད་ཀྱི་བསམ་པས་སྤྲུལ་པ་དང༌། བསམས་ཏེ་སྤྲུལ་པ་དང༌། འཇིག་རྟེན་གྱི་ ཁམས་མངོན་པར་འདུ་བྱེད་པས་སྤྲུལ་པ་དང༌། རྣམ་པར་རྟོག་པས་སྤྲུལ་པ་དང༌། བདེ་བ་དང་སྡུག་བསྔལ་ཐམས་ཅད་ཀྱི་ཕྱིན་ཅི་ལོག་གིས་སྤྲུལ་པ་དང༌། སྒྲོ་བཏགས་པས་སྤྲུལ་ པ་དང༌། འཇིག་རྟེན་གྱི་ཆོས་ཐམས་ཅད་མེད་པས་སྤྲུལ་པ་དང༌། ཚིག་གི་ལམ་གྱི་བྱིན་གྱི་རླབས་ཀྱིས་སྤྲུལ་པ་དང༌། ཉོན་མོངས་པ་ཐམས་ཅད་ཀྱི་ཡོངས་སུ་རྟོག་པས་སྤྲུལ་ པ་དང༌། འདུ་ཤེས་ཀྱིས་སྤྲུལ་པ་དང༌། འདི་ལྟ་སྟེ། འདུལ་བ་རྣམ་པར་བྱང་བར་བྱ་བ་དང༌། རྣམ་པར་དག་པར་བྱ་བའི་ཡོངས་སུ་རྟོག་པས་སྤྲུལ་པ་དང༌། འདི་ལྟ་སྟེ། དུས་གསུམ་ དུ་ཕྱིར་མི་ལྡོག་པས་སྤྲུལ་པ་མཉམ་པ་ཉིད་ཀྱིས་བྱུང་བ་མེད་པ་དང༌། འདི་ལྟ་སྟེ། བྱང་ཆུབ་སེམས་དཔའི་སྨོན་ལམ་གྱིས་སྤྲུལ་པ་སྤྱོད་པས་ཡངས་པར་བྱས་པ་དང༌། འདི་ལྟ་སྟེ། དེ་བཞིན་གཤེགས་པའི་ཐུགས་རྗེ་ཆེན་པོས་སྤྲུལ་པ་དང༌། འགྲོ་བ་ཐམས་ཅད་ལ་བསྟབས་པར་རྣམ་པར་བཀོད་པ་དང༌། འདི་ལྟ་སྟེ། ཆོས་ཀྱི་འཁོར་ལོ་དང༌། ཐབས་མཁས་ པའི་ཡེ་ཤེས་ཀྱིས་སྤྲུལ་པ་མི་འཇིག་པ་དང༌། ཐ་དད་པ་ཡང་དག་པར་ཤེས་པའི་ཡེ་ཤེས་ཀྱིས་འཇུག་པར་རབ་ཏུ་ཤེས་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་ པོ་འཇིག་རྟེན་པ་དང༌། འཇིག་རྟེན་ལས་འདས་པའི་སྤྲུལ་པ་རབ་ཏུ་ཤེས་པར་བྱེད་དོ། །ཁོང་དུ་ཆུད་པར་བྱེད་དོ། །རྟོགས་པར་བྱེད་དོ། །ཡངས་པར་བྱེད་དོ། །མཐའ་དང་ དབུས་དང༌། མུ་མེད་པར་ཇི་ལྟར་བསྐྱེད་པ་བཞིན་དུ་ཐོབ་པར་བྱེད་དོ། །གྲུབ་པར་བྱེད་དོ། །དབང་དུ་བྱེད་དོ། །དེ་ཁོ་ན་ཉིད་དུ་ཤེས་སོ། །ཡང་དག་པ་ཉིད་ལས་མི་གཡོ་བར་ བྱེད་དོ། །ཡང་དག་པར་ལྟའོ། །ཇི་ལྟར་སྤྱོད་པ་བཞིན་དུ་ཆུད་མི་ཟ་བར་བྱེད་དོ། །འདི་ལྟ་སྟེ། དཔེར་ན། སྤྲུལ་པ་ནི་སེམས་ལས་མི་འབྱུང་སྟེ། སེམས་ཀྱི་ཆོས་ལས་མ་བྱུང༌། ལས་ཀྱིས་བསྒྲུབས་པ་མ་ཡིན་།རྣམ་པར་སྨིན་པའི་རྗེས་སུ་འབྲང་བ་མ་ཡིན། འཇིག་རྟེན་དུ་སྐྱེས་པ་མ་ཡིན། འཇིག་རྟེན་དུ་འགག་པ་མ་ཡིན། ཆོས་ཀྱི་རྗེས་སུ་སྙེགས་པ་མ་ ཡིན་༑ཆོས་ཐོབ་པར་བྱེད་པ་མ་ཡིན། རིང་དུ་གནས་པ་མ་ཡིན། ཡུད་ཙམ་དུ་གནས་པ་མ་ཡིན། འཇིག་རྟེན་ན་སྤྱོད་པ་མ་ཡིན། འཇིག་རྟེན་ལས་འདས་པ་མ་ཡིན། ཕྱོགས་ ༄༅། །སུ་འགྲོ་བ་མ་ཡིན། ཕྱོགས་ལ་གཞོལ་བ་མ་ཡིན། ཚད་ཡོད་པ་མ་ཡིན། ཚད་མེད་པ་མ་ཡིན། སྐྱོ་བ་མ་ཡིན། སྐྱོ་བ་མེད་པ་མ་ཡིན། རྒྱུན་ཆད་ པ་མ་ཡིན། རྒྱུན་མི་འཆད་པ་མ་ཡིན། འཕགས་པ་མ་ཡིན། སོ་སོའི་སྐྱེ་བོ་མ་ཡིན། ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་མ་ཡིན། ཤི་འཕོས་པ་མ་ཡིན། སྐྱེས་ པ་མ་ཡིན། ཤེས་པ་མ་ཡིན། མི་ཤེས་པ་མ་ཡིན། སྣང་བ་མ་ཡིན། འཇིག་པ་མ་ཡིན། འཇིག་རྟེན་ལ་གནས་པ་མ་ཡིན། ཆོས་ཀྱི་དབྱིངས་ལ་གཞོལ་བ་མ་ཡིན་། མཁས་པ་མ་ཡིན། ཤེས་རབ་འཆལ་པ་ཅན་མ་ཡིན། ཉེ་བར་ལེན་པ་མ་ཡིན། ཉེ་བར་མི་ལེན་པ་མ་ཡིན། འཁོར་བ་མ་ཡིན། མྱ་ངན་ལས་འདས་པ་མ་ཡིན། ཡོད་ པ་མ་ཡིན། མེད་པ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཕྲུལ་པའི་བྱིན་གྱིས་རླབས་ལ་མཁས་པས། འཇིག་རྟེན་ན་བྱང་ཆུབ་སེམས་ དཔའི་སྤྱད་པ་སྤྱོད་དེ། འཇིག་རྟེན་གྱི་ཆོས་ལ་ལྟ་ཞིང༌། བདག་མངོན་པར་སྤྲུལ་པ་བྱེད་ཀྱང་འཇིག་རྟེན་གྱི་སྤྲུལ་པ་ལ་མངོན་པར་ཆགས་པ་མེད་དོ། །བདག་གི་སྤྲུལ་པ་མངོན་ པར་ཆགས་པ་མེད་དོ། །བདག་དང་འཇིག་རྟེན་གྱི་མངོན་པར་སྤྲུལ་པ་ལ་ཡོངས་སུ་རྟོག་པ་མེད་དོ། །འཇིག་རྟེན་ལ་གནས་པ་མེད་དོ། །འཇིག་རྟེན་རྒྱུན་གཅོད་པ་མེད་དོ། ། ཆོས་ལ་གནས་པ་མེད་དོ། །ཆོས་ཀྱི་དབང་དུ་འགྲོ་བ་མ་ཡིན་ནོ། །སེམས་ཅན་གྱི་ཁམས་ཀྱང་རྡུལ་ཙམ་ཡང་འདུལ་བ་མེད་དོ། །སེམས་ཅན་གྱི་ཁམས་སྨོན་ལམ་ལས་ཡོངས་ སུ་སྤོང་བ་མེད་དོ། །ཆོས་དེ་དག་ལ་རྟོག་པ་མེད་དོ། །རྣམ་པར་རྟོག་པ་མེད་དོ། །ཆོས་དེ་དག་ལ་ལེན་པ་མེད་དོ། །ཆོས་དེ་དག་ལ་འདོར་བ་མེད་དོ། །སངས་རྒྱས་ཀྱི་ཆོས་ཡོད་པ་མ་ ཡིན་པ་དེ་དག་ཀྱང་ཡོངས་སུ་རྫོགས་པར་བྱེད་དེ། ཆོས་དེ་དག་ཀྱང་ཡོད་པའང་མ་ཡིན། མེད་པ་ཡང་མ་ཡིན་ནོ། །ཇི་ལྟར་སྤྲུལ་པ་དེ་ཡོད་པ་ཡང་མ་ཡིན། མེད་པ་མ་ཡིན་པ་དེ་ བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་སྤྲུལ་པ་ལྟ་བུའི་བཟོད་པ་ལ་གནས་ཤིང༌། སངས་རྒྱས་ཐམས་ཅད་ཀྱི་བྱང་ཆུབ་ཀྱང་ཡོངས་སུ་རྫོགས་པར་བྱེད་དོ། །སེམས་ ཅན་གྱི་དོན་ཀྱང་རབ་ཏུ་བྱེད་དོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྲུལ་པ་ལྟ་བུའི་བཟོད་པ་ཐོབ་པ་སྟེ་དགུ་པའོ། །བཟོད་པ་ དེ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སངས་རྒྱས་ཀྱི་ཞིང་ཐམས་ཅད་ལ་མི་གནས་པ་ཡིན་ཏེ། ཇི་ལྟར་སྤྲུལ་པ་དེ་འཇིག་རྟེན་གྱི་ཁམས་ཐམས་ཅད་ལ་མི་གནས་ པར་སྤྱོད་ཅིང་སངས་རྒྱས་ཀྱི་ཆོས་ཐམས་ཅད་ལ་རྣམ་པར་རྟོག་པ་མེད་པར་སྤྱོད་པ་དང༌། ཇི་ལྟར་སྤྲུལ་པ་དེ་སངས་རྒྱས་ཀྱི་བྱང་ཆུབ་དང༌། བྱང་ཆུབ་སེམས་དཔའི་སྤྱོད་པ་ཐམས་ཅད་ལ་དུབ་ ༄༅། །པ་མེད་པར་སྤྱོད་པ་དང༌། ཇི་ལྟར་སྤྲུལ་པ་དེ་ཕྱིན་ཅི་ལོག་མེད་ཅིང་ལུས་སུ་དམིགས་པ་ཐམས་ཅད་ལ་ལུས་མེད་པར་སྤྱོད་པ་དང༌། ཇི་ལྟར་སྤྲུལ་ པ་དེ་བྱིན་གྱི་རླབས་ཀྱིས་གཟུགས་ཀྱི་རྣམ་པ་ཐམས་ཅད་ཀྱི་གཟུགས་ལ་མི་གནས་པར་སྤྱོད་པ་དང༌། ཇི་ལྟར་སྤྲུལ་པ་དེ་རང་བཞིན་སྣང་བའི་ཚུལ་དུ་ཡང་དག་པའི་མཐའ་ མཉམ་པ་ཉིད་ཡོངས་སུ་རྫོགས་པར་བྱེད་པ་དང༌། ཇི་ལྟར་སྤྲུལ་པ་དེ་ཆོས་ཐམས་ཅད་ལ་རྣམ་པར་གྲོལ་བའི་ཆོས་གནས་མེད་པར་སྤྱོད་པ་དང༌། ཇི་ལྟར་སྤྲུལ་པ་དེ་གནས་མེད་ པའི་རང་བཞིན་དང༌། ཆོས་ཐམས་ཅད་ཀྱི་ཚུལ་གྱི་རྣམ་པར་བྱང་བ་ལ་སྤྱོད་པ་དང༌། ཇི་ལྟར་སྤྲུལ་པ་དེ་དེ་བཞིན་གཤེགས་པ་ཐམས་ཅད་ཀྱི་འཁོར་དུ། ཆོ་འཕྲུལ་གྱིས་ཉེ་བར་ འགྲོ་ཞིང་འགྲོ་བ་མེད་པར་སྤྱོད་པ་དང༌། ཇི་ལྟར་སྤྲུལ་པ་དེ་ཁོར་ཡུག་དང༌། རི་རབ་ཐམས་ཅད་ལ་སྣང་བ་བཞིན་ནོ། །ཀྱེ༑ རྒྱལ་བའི་སྲས་དག །བྱང་ཆུབ་སེམས་དཔའ་སེམས་ དཔའ་ཆེན་པོ་རྣམས་ཀྱི་ནམ་མཁའ་ལྟ་བུའི་བཟོད་པ་ཐོབ་པ་བཅུ་གང་ཞེ་ན། ཀྱེ༑ རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་ཇི་ལྟ་བ་དེ་ ལྟར་མཚན་ཉིད་མེད་པའི་ཚུལ་གྱིས་ཆོས་ཀྱི་དབྱིངས་ཐམས་ཅད་ལ་འཇུག་གོ །ནམ་མཁའ་ཇི་ལྟ་བ་དེ་ལྟར་ཞིང་ཐམས་ཅད་བསྒྲུབ་པ་མེད་པའི་ཚུལ་གྱིས་འཇིག་རྟེན་གྱི་ཁམས་ ཐམས་ཅད་ལ་འཇུག་གོ །ནམ་མཁའ་ཇི་ལྟ་བ་དེ་ལྟར་གཉིས་སུ་མེད་པའི་ཚུལ་གྱིས་ཆོས་ཐམས་ཅད་ལ་འཇུག་གོ །ནམ་མཁའ་ཇི་ལྟ་བ་དེ་ལྟར་འཇུག་པ་མེད་པའི་ཚུལ་གྱིས་སེམས་ ཅན་ཐམས་ཅད་ཀྱི་སྤྱོད་པ་ལ་འཇུག་གོ །ནམ་མཁའ་ཇི་ལྟ་བ་དེ་ལྟར་རྣམ་པར་དབྱེ་བ་མེད་པའི་ཚུལ་གྱིས་སངས་རྒྱས་ཐམས་ཅད་ལ་འཇུག་གོ །ནམ་མཁའ་ཇི་ལྟ་བ་དེ་ལྟར་ཐ་དད་ པ་མེད་པའི་ཚུལ་གྱིས་དེ་བཞིན་གཤེགས་པ་རྣམས་ཀྱི་སྟོབས་ཐམས་ཅད་ལ་འཇུག་གོ །ནམ་མཁའ་ཇི་ལྟ་བ་དེ་ལྟར་སྔོན་གྱི་མཐའ་དང༌། ཕྱི་མའི་མཐའ་དང༌། ད་ལྟར་བྱུང་བའི་ ཚུལ་གྱིས་བསམ་གཏན་ཐམས་ཅད་ལ་རབ་ཏུ་འཇུག་གོ །ནམ་མཁའ་ཇི་ལྟ་བ་དེ་ལྟར་བརྗོད་དུ་མེད་པའི་ཚུལ་གྱིས་ཆོས་ཐམས་ཅད་ཡང་དག་པར་བསྟན་པ་ལ་འཇུག་གོ །ནམ་ མཁའ་ཇི་ལྟ་བ་དེ་ལྟར་ཆགས་པ་མེད་ཅིང་བསྒྲིབས་པ་མེད་པའི་ཚུལ་གྱིས་དེ་བཞིན་གཤེགས་པ་ཐམས་ཅད་ཀྱི་སྐུ་ལ་འཇུག་གོ །ནམ་མཁའ་ཇི་ལྟ་བ་དེ་ལྟར་ནམ་མཁའི་དབྱིངས་ ཀྱི་ཚུལ་གྱིས་ཆོས་ཐམས་ཅད་བསལ་བ་མེད་པ་ལ་འཇུག་གོ །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་ལྟ་བུའི་ཆོས་ཐམས་ཅད་ལ་དེ་ལྟ་བུའི་བཟོད་པ་ ལས་བྱུང་བའི་ཡེ་ཤེས་ཀྱིས་འཇུག་པའི་ཚེ། ལུས་ནམ་མཁའ་ལྟ་བུར་རབ་ཏུ་འཐོབ་བོ། །ནམ་མཁའ་ལྟ་བུའི་ལུས་ཀྱི་ལས་རབ་ཏུ་འཐོབ་བོ། །ནམ་མཁའ་ལྟ་བུའི་ངག་རབ་ཏུ་ ༄༅། །འཐོབ་བོ། །ནམ་མཁའ་ལྟ་བུའི་ངག་གི་ལས་རབ་ཏུ་འཐོབ་བོ། །ནམ་མཁའ་ལྟ་བུའི་ཡིད་རབ་ཏུ་འཐོབ་བོ། །ནམ་མཁའ་ལྟ་བུའི་ཡིད་ཀྱི་ལས་ རབ་ཏུ་འཐོབ་བོ། །འདི་ལྟ་སྟེ། དཔེར་ན། ནམ་མཁའ་ནི་ཆོས་ཐམས་ཅད་དང་ལྡན་ཏེ། འཆི་འཕོ་བ་ཡང་མེད་དོ། །སྐྱེ་བ་ཡང་མེད་དོ། །དེ་བཞིན་དུ་བྱང་ཆུབ་སེམས་ དཔའ་སེམས་དཔའ་ཆེན་པོ་ཡང་ཆོས་ཐམས་ཅད་ཀྱི་ལུས་དང་ལྡན་ཏེ། འཆི་འཕོ་བ་ཡང་མེད་དོ། །སྐྱེ་བ་ཡང་མེད་དོ། །འདི་ལྟ་སྟེ། དཔེར་ན། ནམ་མཁའ་ནི་གཞི་མེད་ དོ༑ ༑ཐ་དད་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཆོས་ཐམས་ཅད་ཤེས་པས་གཞི་མེད་དོ། སངས་རྒྱས་ཐམས་ཅད་ཀྱི་སྟོབས་ རྣམས་དང༌། ཐ་མི་དད་དོ། །འདི་ལྟ་སྟེ། དཔེར་ན། ནམ་མཁའ་ནི་འཇིག་རྟེན་ཐམས་ཅད་ཀྱི་གཞི་སྟེ། རང་བཞིན་མེད་པ་དང༌། ཡུལ་མེད་པས་གཞིའང་མ་ཡིན་ནོ། །དེ་བཞིན་ དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཆོས་ཐམས་ཅད་ཀྱི་གཞི་ཡིན་ཏེ། ཆོས་ཐམས་ཅད་ཀྱི་རང་བཞིན་མེད་པས་གཞིའང་མ་ཡིན་ནོ། །འདི་ལྟ་སྟེ་།དཔེར་ ན༑ ནམ་མཁའ་ནི་སྐྱེ་བ་མེད་ཅིང༌། འགག་པ་མེད་ཀྱང་འཇིག་རྟེན་ཐམས་ཅད་ཀྱི་སྐྱེ་བ་དང༌། འགག་པ་འཛིན་ཏོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ ཆེན་པོ་ཡང་འཇུག་པ་ཡང་མེད། ཡོངས་སུ་རྫོགས་པ་ཡང་མེད་དེ། འཇིག་རྟེན་ཐམས་ཅད་ཀྱི་རྣམ་པར་དག་པ་ཡང་རབ་ཏུ་སྟོན་ཏོ། །འདི་ལྟ་སྟེ། དཔེར་ན། ནམ་མཁའ་ནི་ཕྱོགས་ ཀྱང་མ་ཡིན། ཕྱོགས་མཚམས་ཀྱང་མ་ཡིན་ཏེ། ཕྱོགས་རྒྱ་མཚོ་མཐའ་ཡས་པ་ལའང་ཡང་དག་པར་གཞོལ་ལོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ ལས་ཀྱང་མ་ཡིན། རྣམ་པར་སྨིན་པ་ཡང་མ་ཡིན་ཏེ། ལས་དང་རྣམ་པར་སྨིན་པ་རྒྱ་མཚོ་ཡང་ཡོངས་སུ་སྟོན་ཏོ། །འདི་ལྟ་སྟེ། དཔེར་ན། ནམ་མཁའ་ནི་ལྡང་བ་མེད་ཅིང་འདུག་པ་ མེད་དེ། རྣམ་པར་ཕྱེ་བ་མཐའ་ཡས་པའང་ཡོངས་སུ་སྟོན་ཏོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང༌། སྤྱོད་པ་ཡང་མེད། གནས་པ་ཡང་མེད་དེ། སྤྱོད་ པ་རྣམ་པར་ཕྱེ་བ་ཡང་ཡོངས་སུ་སྟོན་ཏོ། །འདི་ལྟ་སྟེ། དཔེར་ན། ནམ་མཁའ་ནི་ཁ་དོག་ཀྱང་མ་ཡིན། ཁ་དོག་མེད་པ་ཡང་མ་ཡིན་ཏེ། ཁ་དོག་གི་རྣམ་པའང་ཡོངས་སུ་སྟོན་ཏོ། །དེ་ བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཇིག་རྟེན་གྱི་ཁ་དོག་ཀྱང་མ་ཡིན། འཇིག་རྟེན་ལས་འདས་པའི་ཁ་དོག་ཀྱང་མ་ཡིན་ཏེ། ཁ་དོག་མཐའ་ཡས་པའང་ ཡོངས་སུ་སྟོན་ཏོ། །འདི་ལྟ་སྟེ། དཔེར་ན། ནམ་མཁའ་ནི་རིང་དུ་གནས་པའང་མ་ཡིན། ཡུད་ཙམ་གཅིག་ཏུ་གནས་པ་ཡང་མ་ཡིན་ཏེ། གནས་པ་དང་ཡོངས་སུ་གནས་པའང་ ༄༅། །རབ་ཏུ་སྟོན་ཏོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་རིང་དུ་གནས་པ་ཡང་མ་ཡིན། ཡུད་ཙམ་གཅིག་ཏུ་གནས་པ་ཡང་མ་ ཡིན་ཏེ་།བྱང་ཆུབ་སེམས་དཔའི་སྤྱོད་པ་ལ་གནས་པ་དང༌། ཡོངས་སུ་གནས་པ་ཡང་རབ་ཏུ་སྟོན་ཏོ། །འདི་ལྟ་སྟེ། དཔེར་ན། ནམ་མཁའ་ནི་ཀུན་ནས་ཉོན་མོངས་པས་ཉོན་མོངས་པར་ གྱུར་པའང་མེད་ལ། རྣམ་པར་བྱང་བས་རྣམ་པར་བྱང་བར་གྱུར་པའང་མེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཇིག་རྟེན་ལ་འཇུག་པས་བསྒྲིབས་ པ་ཡང་མེད། རྣམ་པར་དག་ཅིང་གསལ་བར་གྱུར་པའང་མེད་དོ། །འདི་ལྟ་སྟེ། དཔེར་ན། ནམ་མཁའ་ནི་འཇིག་རྟེན་ཐམས་ཅད་ཀྱི་མངོན་སུམ་དུ་གྱུར་པ་ཡིན་ཏེ། འཇིག་རྟེན་ ཐམས་ཅད་ནི་ནམ་མཁའི་མངོན་སུམ་དུ་གྱུར་པ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཆོས་ཐམས་ཅད་ལ་མངོན་སུམ་དུ་གྱུར་པ་སྟེ་། བྱང་ཆུབ་སེམས་དཔའ་ནི་ཆོས་ཐམས་ཅད་ཀྱི་མངོན་དུ་གྱུར་པ་མ་ཡིན་ནོ། །འདི་ལྟ་སྟེ། དཔེར་ན། ནམ་མཁའ་ནི་གནས་ཐམས་ཅད་ལ་རབ་ཏུ་གཞོལ་བ་ཡིན་ཏེ། ནམ་མཁའི་ མཐའ་ནི་ཡོད་པ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཆོས་ཀྱི་གནས་ཐམས་ཅད་ལ་གནས་ཏེ། བྱང་ཆུབ་ཀྱི་སེམས་ནི་མཐའ་ཡོད་པ་མ་ ཡིན་ནོ། །དེ་ཅིའི་ཕྱིར་ཞེ་ན། དེ་ནི་བདག་ཉིད་ནམ་མཁའ་དང་མཉམ་པར་བྱས་ཏེ་ཡོངས་སུ་བསྒོམས་པ་དང༌། རྣམ་པར་སྦྱངས་པ་དང༌། ཤིན་ཏུ་བསྒྲུབས་པ་དང༌། མཉམ་ པ་ཉིད་དུ་བྱས་པ་དང༌། རྒྱུད་ཀྱི་ཚུལ་གཅིག་ཏུ་བྱས་པ་དང༌། རོ་གཅིག་ཏུ་བྱས་པ་དང༌། ཚད་གཅིག་ཏུ་བྱས་པ་དང༌། ནམ་མཁའ་ལྟ་བུར་དག་པའི་ཁ་དོག་ཏུ་བྱས་པ་དང༌། ཐམས་ ཅད་དུ་འགྲོ་བར་བྱས་པའི་ཕྱིར་རོ། །ཆོས་ཐམས་ཅད་ལ་ཡང་དག་པར་སེམས་པ་དང༌། ཁོང་དུ་ཆུད་པར་བྱེད་པ་དང༌། ཆོས་ཐམས་ཅད་ཐ་མི་དད་པ་རབ་ཏུ་འཐོབ་པར་བྱེད་པ་ དང༑ ཞིང་ཐམས་ཅད་དུ་འགྲོ་བར་བསྒྲུབ་པ་དང༌། ལུས་ཐམས་ཅད་ལ་གནས་པ་མེད་པ་ཡོངས་སུ་རྫོགས་པར་བྱེད་པ་དང༌། ཕྱོགས་ཐམས་ཅད་ལ་རྨོངས་པ་མེད་པ་ཁོང་དུ་ཆུད་ པར་བྱེད་པ་དང༌། སྟོབས་ཐམས་ཅད་ཐ་མི་དད་པར་སྒྲུབ་པ་དང༌། ཡོན་ཏན་ཐམས་ཅད་ཡུལ་མཐའ་ཡས་པར་ཡོངས་སུ་རྫོགས་པར་བྱེད་པ་དང༌། ཆོས་ཐམས་ཅད་ཀྱི་འབྱུང་གནས་རབ་ཏུ་ ཐོབ་པར་བྱེད་པ་དང༌། དཔག་ཏུ་མེད་པ་ཐོབ་པར་བྱེད་པ་དང༌། རྡོ་རྗེ་ལྟར་བརྟན་པ་ལ་རབ་ཏུ་གཞོལ་བ་དང༌། དབྱངས་ཀྱི་ཡན་ལག་ཚད་མེད་པ་ཐམས་ཅད་མངོན་པར་སྒྲུབ་པ་དང༌། འཇིག་རྟེན་ ཐམས་ཅད་དུ་ཕྱིན་ཅིང་ཆོས་ཀྱི་འཁོར་ལོ་ཡོངས་སུ་མི་གཏོང་བའི་ཕྱིར་རོ། །ཀྱེ༑ རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ནམ་མཁའ་ལྟ་བུའི་ ༄༅། །བཟོད་པ་ཐོབ་པ་སྟེ་བཅུ་པའོ། །བཟོད་པ་དེ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། འགྲོ་བ་མེད་པའི་ཚུལ་དུ་འགྲོ་བ་མེད་ པའི་ལུས་རབ་ཏུ་འཐོབ་བོ། །འགག་པ་མེད་པའི་ཚུལ་དུ་སྐྱེ་བ་མེད་པའི་ལུས་རབ་ཏུ་འཐོབ་བོ། །འཇིག་པ་མེད་པའི་ཚུལ་དུ་འཕོ་བ་མེད་པའི་ལུས་རབ་ཏུ་འཐོབ་བོ། །ཇི་ལྟར་ མཐོང་བ་མ་ཡིན་པའི་ཚུལ་དུ་བདེན་པ་མེད་པའི་ལུས་རབ་ཏུ་འཐོབ་བོ། །མཚན་ཉིད་མེད་པའི་ཚུལ་དུ་མཚན་ཉིད་གཅིག་པའི་ལུས་རབ་ཏུ་འཐོབ་བོ། །སངས་རྒྱས་ཀྱི་སྟོབས་ ཚད་མེད་པའི་ཚུལ་དུ་ཚད་མེད་པའི་ལུས་རབ་ཏུ་འཐོབ་བོ། །དེ་བཞིན་ཉིད་ཀྱི་མཚན་ཉིད་ཀྱི་ཚུལ་དུ་མཉམ་པ་ཉིད་ཀྱི་ལུས་རབ་ཏུ་འཐོབ་བོ། །དུས་གསུམ་མཉམ་པ་ཉིད་ཁོང་ དུ་ཆུད་ཅིང་བཟོད་པའི་ཚུལ་དུ་ཐ་མི་དད་པའི་ལུས་རབ་ཏུ་འཐོབ་བོ། །མཉམ་པ་ཉིད་ཀྱི་མིག་རྣམ་པར་དག་པས་བསྒྲིབས་པ་མེད་པའི་ཚུལ་དུ་ཐམས་ཅད་དུ་འགྲོ་བའི་ལུས་རབ་ ཏུ་འཐོབ་བོ། །ཆོས་ཐམས་ཅད་ལྡན་པ་དང་མི་ལྡན་པ་མེད་པའི་ཚུལ་དུ་འདོད་ཆགས་དང་བྲལ་བའི་མཐའི་ལུས་རབ་ཏུ་འཐོབ་བོ། །བསོད་ནམས་ཟད་མི་ཤེས་པའི་ཚུལ་དུ་ ནམ་མཁའ་ལྟར་མཐའ་དང་མུ་མེད་པ་རབ་ཏུ་འཐོབ་བོ། །ཆོས་ཐམས་ཅད་ནམ་མཁའི་རང་བཞིན་གྱི་མཚན་ཉིད་ཀྱིས་མཚན་ཉིད་གཅིག་པའི་ཚུལ་དུ་ཆོས་ཉིད་མཉམ་པ་ཉིད་ ཐོབ་པས་ཟད་མི་ཤེས་ཤིང་ཐོགས་པ་མེད་པ་རབ་ཏུ་འཐོབ་བོ། །ནམ་མཁའ་ལྟར་ཐོགས་པ་མེད་པའི་ཚུལ་དུ་དབྱངས་མཐའ་ཡས་ཤིང་ཚད་མེད་པ་རབ་ཏུ་འཐོབ་བོ། །ནམ་མཁའ་ ལྟར་ཐམས་ཅད་ལ་ཐོགས་པ་མེད་པའི་ཚུལ་དུ་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་མཁས་པ་ཡོངས་སུ་རྫོགས་ཤིང་རྣམ་པར་དག་པ་རབ་ཏུ་འཐོབ་བོ། །ནམ་མཁའ་ལྟར་རྒྱུན་ ཆད་པ་མེད་པའི་ཚུལ་དུ་སངས་རྒྱས་ཀྱི་ཆོས་རྒྱ་མཚོ་གཅིག་ནས་གཅིག་ཏུ་བརྒྱུད་པ་ཚད་མེད་པ་ཐམས་ཅད་རབ་ཏུ་འཐོབ་བོ། །ནམ་མཁའ་ལྟར་ཚད་མེད་ཅིང་མཐར་ཐུག་པ་མེད་པའི་ ཚུལ་དུ་སངས་རྒྱས་ཀྱི་ཞིང་ཐམས་ཅད་ཚད་མེད་པའི་ཞིང་དུ་བྱིན་གྱིས་རློབ་པ་རབ་ཏུ་འཐོབ་བོ། །ནམ་མཁའ་རྒྱ་མཚོའི་ཚུལ་དུ་ཆོས་ཐམས་ཅད་ཀྱི་རྣམ་པར་འཕྲུལ་པ་རྒྱུན་མི་འཆད་ པར་ཡང་དག་པར་སྟོན་པ་ཡང་ཡོངས་སུ་རྫོགས་པར་འགྱུར་རོ། །ནམ་མཁའ་ལྟར་འཇིག་རྟེན་ཐམས་ཅད་འཛིན་པའི་ཚུལ་དུ་ལུས་ཐམས་ཅད་འཇིག་པ་མེད་ཅིང་ཤིན་ཏུ་བརྟེན་པ་ ཡོངས་སུ་རྫོགས་པར་འགྱུར་རོ། །འཇིག་རྟེན་གྱི་གདུང་བ་ཐམས་ཅད་ཀྱིས་ནམ་མཁའ་འཚིག་པར་མི་འགྱུར་བའི་ཚུལ་དུ་རྡོ་རྗེ་ལྟར་སྲ་ཞིང་བརྟན་ལ་རྣོ་བའི་དབང་པོ་ཡོངས་སུ་ འགྲུབ་པར་འགྱུར་རོ། །ནམ་མཁའ་ལྟ་བུའི་ཡེ་ཤེས་ཀྱི་བྱིན་གྱི་རླབས་ཀྱི་ཚུལ་དུ་འཇིག་རྟེན་ཐམས་ཅད་རབ་ཏུ་འཛིན་པའི་སྟོབས་ལ་ཡང་དག་པར་འབྱུང་ངོ༌། །ཀྱེ༑ རྒྱལ་བའི་ ༄༅། །སྲས་དག །འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བཟོད་པ་ཐོབ་པ་བཅུའོ། །དེ་ནས་བྱང་ཆུབ་སེམས་དཔའ་སེམས་ དཔའ་ཆེན་པོ་ཀུན་ཏུ་བཟང་པོས་དོན་འདི་ཉིད་དེ་བས་ཀྱང་གསལ་བར་བསྟན་པའི་ཕྱིར། བྱང་ཆུབ་སེམས་དཔའ་དེ་དག་ལ་ཚིགས་སུ་བཅད་དེ་སྨྲས་པ། ཇི་ལྟར་སྐྱེས་བུ་ལ་ ལ་ཞིག །རིན་ཆེན་འབྱུང་གནས་ཐོས་གྱུར་ནས། །ནོར་ཚོགས་ཆེན་པོ་བསགས་དོན་དུ། །རབ་ཏུ་དགའ་བ་སྐྱེ་བ་ཡིན། །དེ་བཞིན་ཤེས་རབ་ཆེ་ལྡན་པའི། །བྱང་ཆུབ་སེམས་དཔའ་ རྒྱལ་སྲས་རྣམས། །དེ་བཞིན་གཤེགས་པའི་ཆོས་ཀྱི་མཚན། །ཟབ་ཅིང་ཞི་བ་རབ་ཏུ་ཉན། །ཟབ་པའི་ཆོས་ནི་ཐོས་གྱུར་ཅིང༌། །དེ་དག་ཡིད་ནི་འཇིགས་མི་འགྱུར། །དེ་དག་ སེམས་ལ་སྡང་བ་མེད། །སྐྲག་པ་སྐྱེ་བར་མི་འགྱུར་རོ། །རྒྱ་ཆེན་དབྱངས་ནི་ཐོས་གྱུར་ནས། །བཟོད་པའི་དབྱངས་ཀྱིས་བྱང་ཆུབ་ཏུ། །ཤེས་རབ་ཆེན་པོ་ཡང་དག་འཇུག །དེ་ ལ་ཐེ་ཚོམ་སྐྱེ་བ་མེད། །བདག་ནི་ཐམས་ཅད་མཁྱེན་པར་བྱ། །བདག་ནི་མི་ཡི་མགོན་དུ་བྱ། །ཆོས་རབ་ཤིན་ཏུ་ཟབ་པ་རྣམས། །བདག་གིས་སྒྲ་ཡི་སྒོ་ནས་ཐོས། །སྒྲ་ཡི་རྗེས་ སུ་འབྲང་བས་ནི། །དགའ་བའི་དམ་པ་མི་འཐོབ་ཅེས། །དེ་བཞིན་གཤེགས་པའི་ཆོས་དོན་དུ། །དེ་ཡི་མོས་པ་བརྟན་པ་སྐྱེ། །བསམ་པ་བྱང་ཆུབ་སེམས་རབ་ཀྱིས། །འདུས་ཤིང་ ཡོངས་སུ་སྒོམ་པ་བྱེད། །ཆོས་རྣམས་འཁྲུག་པར་མི་བྱེད་དེ། །དེ་ཡི་དད་པ་རྣམ་པར་འཕེལ༑ །དེས་ནི་སྒྲ་རྗེས་འགྲོ་བ་ཡི། །བཟོད་པ་རབ་ཏུ་འཐོབ་པར་འགྱུར། །སྤྱོད་ལ་ཤིན་ཏུ་བརྩོན་བྱེད་ ཅིང༑ ༑དབྱངས་ཀྱི་བཟོད་ལ་རབ་ཏུ་གནས། །ཆོས་ཀྱི་འབྱུང་གནས་ཡིན་པས་ན། །ཤིན་ཏུ་བརྩོན་པ་རབ་ཏུ་ཚོལ། །བརྩོན་འགྲུས་ལྡོག་པར་མི་བྱེད་དེ། །སངས་རྒྱས་བྱང་ཆུབ་སྒྲུབ་པ་ བྱེད༑ ༑དབྱངས་ཙམ་གྱིས་ནི་གནས་བྱེད་པས། །བྱང་ཆུབ་སེམས་དཔའ་བག་ཚ་མེད། །དབྱངས་ཀྱིས་མོས་པ་རབ་ཏུ་འཐོབ། །དེས་ནི་རྒྱལ་བ་མཉེས་པར་བྱེད། །སྐྱེས་བུ་ལ་ལ་བསོད་ནམས་ རྒྱས་གྱུར་པས། །གསེར་གྱི་འབྱུང་གནས་ཆེན་པོ་རྙེད་གྱུར་ནས། །བརྒྱན་པའི་གནས་ཀྱི་རྒྱན་དུ་རབ་སྦྱངས་ནས། །དེ་དག་ལུས་དང་མཐུན་པའི་རྒྱན་དུ་བྱེད། །དེ་བཞིན་མཁས་པས་ཆོས་ཀྱི་ ཕུལ་ཐོས་ན། །སེམས་དང་བློ་ཡངས་རྒྱ་མཚོར་བསྒྱུར་བྱས་ཤིང༌། །ཇི་ལྟར་སྔོན་ཐོས་ཆོས་རྣམས་རྟོག་པར་བྱེད། །མི་མཐུན་ཚུལ་དུ་ཆོས་ལ་ཚོལ་མི་བྱེད། །དེ་དག་རྟོགས་ནས་ཤིན་ཏུ་ མཐུན་པར་སྤྱོད། །རྣམ་པར་མི་སྒོམ་ཆོས་ནི་གང་ཡང་མེད། །དེ་དག་ཆོས་རྣམས་ཇི་བཞིན་མཐུན་བྱེད་ཅིང༌། །དེ་བཞིན་དེ་ནི་ཆོས་རྣམས་ཁོང་དུ་ཆུད་པར་བྱེད། །མཁས་པའི་སེམས་ནི་ རྣམ་དག་སྐྱེར་འགྱུར་ཏེ། །དགའ་བའི་སེམས་ཡིད་རྣམ་དག་གསལ་བ་སྐྱེ། །ཆོས་ཀྱི་ཡིད་ལ་བདག་ཉིད་ཆེ་བ་བརྩོན། །རྟེན་ཅིང་འབྲེལ་འབྱུང་ཆོས་ལ་རབ་ཏུ་འཇུག །ཆོས་རྣམས་ ༄༅། །མཉམ་པ་ཉིད་ལ་དེ་བརྩོན་ཏེ། །དངོས་པོ་རྣམ་པར་བསྒོམ་ལ་མངོན་པར་བརྩོན། །རྒྱལ་བའི་མཛོད་དང་འགལ་བར་མི་བྱེད་དེ། །ཆོས་རྣམས་མི་ མཉམ་མེད་པར་རབ་ཏུ་ཤེས། །དེ་ནི་བསམ་པ་མཐར་ཐུག་རབ་བརྟན་པས། །རྒྱལ་བའི་བྱང་ཆུབ་ཇི་བཞིན་རབ་ཏུ་སྤྱོད། །རི་རབ་བཞིན་དུ་མི་གཡོ་བརྟན་པ་ཡིས། །དེ་ཡི་བསམ་པ་བྱང་ ཆུབ་མཆོག་ལ་རྟེན། །མཉམ་གཞག་སེམས་དང་ལྡན་པས་དེ་བརྩོན་ཏེ། །བརྩོན་འགྲུས་ལྡན་པའི་ཡིད་ཀྱིས་རབ་ཏུ་སྤྱོད། །བསྐལ་པ་སྟོང་དུ་སྤྱད་པ་སྤྱོད་བྱེད་ཀྱང༌། །དེ་ཡི་བརྩོན་ འགྲུས་འཇིག་པར་མི་འགྱུར་རོ། །འདི་དག་ཆོས་ལ་ཡང་དག་དེ་འཇུག་སྟེ། །རྒྱལ་བའི་རྟོགས་བྱའི་གཏིང་ཡང་རབ་ཏུ་རྙེད། །ཆོས་ཉིད་ཞི་བ་རབ་ཏུ་ཐོབ་གྱུར་པས། །དེ་ལ་ འཇུམས་པའི་ཡིད་བྱེད་གང་ཡང་མེད། །དཔེ་ཟླ་མེད་པས་ཇི་སྐད་གསུངས་པ་ལྟར། །དེ་ནི་ཆོས་རྣམས་མཉམ་པ་ཉིད་དུ་བྱེད། །མི་མཉམ་ཚུལ་དུ་བཟོད་པ་མི་སྐྱེད་དེ། །ཡེ་ཤེས་ མཉམ་ཉིད་ཡོངས་སུ་རྫོགས་པར་སྒྲུབ། །བདེ་བར་གཤེགས་པས་མཐུན་པར་གང་གསུངས་པ། །དེ་དག་བཟོད་པའི་སྒོ་ནས་རབ་ཏུ་འགྲུབ། །ཆོས་རྣམས་འཇིག་དང་ལྡན་པ་མ་ ཡིན་ཏེ། །ཆོས་ཉིད་ཇི་བཞིན་དེ་འདྲ་རབ་ཏུ་ཤེས། །ལྷ་གནས་འདི་ལྷའི་བུ་རྣམས་འདིར་འདུས་དང༌། །སུམ་ཅུ་རྩ་གསུམ་གནས་སུ་ལྷ་རྣམས་སྐྱེས་གྱུར་པ། །དེ་དག་ཟིལ་ མངར་སྣ་ཚོགས་རྣམ་པ་གཞན་དང་གཞན། །དེ་དག་འཁོར་བའི་སྣད་གཅིག་མངོན་སྤྱོད་ཟད་གྱུར་ན། །ཟིལ་མངར་ཞིམ་པ་དེ་དག་འོངས་པ་མ་ཡིན་ཏེ། ཕྱོགས་བཅུ་ཀུན་ནས་ཟིལ་མངར་སྟོབས་ པ་མེད། །ལས་རྣམས་ཇི་ལྟ་ཇི་བཞིན་ལྷ་རྣམས་དེ་ལྟར་ཟ། །དེ་ལ་སྐྱེ་བ་མེད་དེ་བཟའ་བ་མེད་པ་མིན། །དེ་བཞིན་བྱང་ཆུབ་སེམས་དཔའི་སེམས་རབ་མངོན་སྐྱེས་ཀྱང༌། །དེ་ལ་རྡུལ་ཆའི་ཆོས་ཀྱང་ སྐྱེས་པར་གྱུར་པ་མེད། །མ་སྐྱེས་གང་ཡིན་ཆོས་དེ་ནམ་ཡང་འགག་པ་མེད། །དམ་པའི་ཆོས་ཀྱི་རྐྱེན་བརྟེན་མཁས་པ་རབ་ཏུ་བཞུགས། །མ་འགགས་གང་ཡིན་མི་ཟད་ཆོས་རྒྱུད་དེ་དང་དེ། །ཆོས་ ཉིད་འདི་ཡི་ཚུལ་ལ་རབ་ཏུ་གནས་པ་ཡིན། །ཐ་དད་མེད་པའི་ཆོས་དབྱིངས་འདི་ལ་རབ་ཏུ་འཇུག །འཇིག་རྟེན་ཐ་དད་མེད་པའི་རྒྱུད་ཀྱི་ཚུལ་ཡང་ཤེས། །དེ་བཞིན་ཉིད་མཉམ་འཇིག་རྟེན་ ཞི་བའི་གཞིར་གྱུར་པ། །གཞི་མེད་ཐ་དད་མེད་པའི་ཡང་དག་མཐའ་ཤེས་ཏེ། སྨོན་ལམ་རྡོ་རྗེའི་རང་བཞིན་འགྲོ་ལ་ཕན་ཕྱིར་འདེབས། །རྒྱལ་སྲས་དེ་ནི་བདེ་གཤེགས་མཁྱེན་ལའང་མངོན་ ཆགས་མེད། །དེ་ནི་དབེན་གཞོལ་སངས་རྒྱས་ཆོས་རྣམས་སྟོན་པ་བྱེད། །ཆོས་ཀྱི་ཤུགས་ལས་འོན་ཀྱང་གཡོ་བར་འགྱུར་བ་མེད། །བརྡ་དང་གྲངས་ཀྱི་ཚུལ་གྱིས་མངོན་པར་འདུ་བྱེད་དེ། ། འཇིག་རྟེན་སྙིང་བརྩེར་སྨོན་ལམ་དམ་པ་རབ་ཏུ་འདེབས། །སྨོན་ལམ་འདེབས་ལ་གནས་ཀྱང་སྟོབས་བཅུ་ལྡན་པ་སྟེ། །འགྲོ་བ་མ་ལུས་ཀུན་ལ་དེ་ནི་གནས་པ་མེད། །མཁས་པའི་ཡེ་ཤེས་ ༄༅། །ཡོངས་སུ་ལེན་དང་འདོར་བ་སྤངས། །ཆོས་དང་ཆོས་ཀྱི་མན་ངག་རྣམ་པའི་ཚུལ་ལ་མཁས། །འདི་ནི་བཟོད་པའི་དམ་པ་མ་སྐྱེས་ཆོས་ཅན་ཏེ། །དེས་ ནི་ཆོས་རྣམས་ཟད་མེད་ཟད་པར་མི་འགྱུར་རོ། །མི་སྐྱེའི་ཚུལ་གྱིས་ཡོངས་སུ་གདམས་བྱའི་ཆོས་ཀྱི་དབྱིངས། །དེ་བཞིན་ཉིད་ལས་བརྟན་པ་རྣམ་པར་འགྱུར་བ་མེད། །རྒྱལ་སྲས་ བྱང་ཆུབ་དོན་དུ་བཟོད་པ་འདི་གནས་པ། །དེ་ལ་ཕྱོགས་ཀུན་སངས་རྒྱས་མཐའ་ཡས་ལུང་ཡང་སྟོན། །རྒྱལ་སྲས་དེ་ལ་སངས་རྒྱས་མཁྱེན་པས་དབང་བསྐུར་མཛད། །ཕྱོགས་ བཅུ་ཀུན་ནས་རབ་ཏུ་སྣང་བར་མངོན་དུ་གནས། །དེ་དག་ཆོས་ཀུན་རབ་ཞི་རྟག་ཏུ་ཞི་བའི་སེམས། །མངོན་པར་སྒྲུབ་ཅིང་དགེ་བ་ཀུན་ལ་འགྲོ་བ་འགོད། །དུས་གསུམ་ཆོས་རྣམས་ ཀུན་གྱི་མཚན་ཉིད་དེ་འདྲ་བས། །མཚན་རྣམས་ཡོངས་སུ་དག་བྱས་སེམས་ཅན་འདུལ་བ་བྱེད། །སྒྱུ་མ་ལྟ་བུའི་ཆོས་རྣམས་ངེས་པར་སུས་རྟོགས་པ། །དེ་དག་འཇིག་རྟེན་སྣ་ ཚོགས་དུ་མ་རྟོགས་བྱེད་ཅིང༌། །འཇིག་རྟེན་སྣ་ཚོགས་སྒྱུ་ཚུལ་ཡང་དག་རྟོགས་བྱས་ནས། །ལས་ཡངས་ཤིན་ཏུ་བསགས་པས་རྣམ་པ་སྣ་ཚོགས་པ། །སེམས་ལས་ལས་ ཀྱི་རྣམ་པ་དུ་མ་འབྱུང་བར་འགྱུར། །དེ་བས་འཇིག་རྟེན་སེམས་དེ་སྒྱུ་མ་ལྟ་བུར་བསྟན། །དེ་དག་རྣམ་བརྟགས་སྒྱུ་མ་འདྲ་བས་ནུབ་པར་འགྱུར། །སྲིད་པའི་ལམ་རྒྱུད་མ་ལུས་སྒྱུ་འདྲ་ ཡང་དག་མིན། །ཇི་ལྟར་སྒྱུ་མའི་རྣམ་པ་བྱིན་རླབས་བྱས་པའི་གཟུགས། །ལམ་གྱི་བཞི་མདོར་འཇིག་རྟེན་ཕལ་གྱི་ནང་བསྟན་པ། །འགྲོ་བས་མཐོང་ན་དེ་ལ་ཀུན་ཀྱང་མོས་པ་སྐྱེད། ། སྒྱུ་མས་འཇིག་རྟེན་ལས་ནི་གང་ཡང་འགྲུབ་མི་འགྱུར། །དེ་བཞིན་འགྲོ་བ་ཇི་སྙེད་གང་རྣམས་ཡོད་པ་དག །སྒྱུ་མའི་རང་བཞིན་ལྟ་བུ་མ་སྐྱེས་ཆོས་ཉིད་དེ། །དངོས་ཡོད་དངོས་མེད་དེ་ བཞིན་ཡོད་དང་མེད་པ་དང༌། །སྐལ་པ་མི་མཉམ་ཚུལ་གྱིས་གྲོ་རྒྱུད་རབ་ཏུ་སྟོན། །སྒྱུ་མའི་ཚུལ་རྣམས་ཤེས་ནས་སེམས་ཅན་ཡོངས་སུ་འགྲེལ། །སྒྱུ་མ་ལྟ་བུའི་ཡིན་པར་སེམས་ཅན་ཁོང་ དུ་ཆུད། །སེམས་ཅན་སྒྱུ་འདྲ་དེ་བཞིན་སྒྱུ་མ་སེམས་ཅན་འདྲ། །སེམས་ཅན་མེད་ཅིང་སྒྱུ་མ་འདྲ་བར་འཇིག་རྟེན་ཤེས། །སེམས་ཅན་ཞིང་དང་ཆོས་དང་དེ་བཞིན་དུས་གསུམ་དང༌། །འཇིག་ རྟེན་ཐམས་ཅད་སྒྱུ་མའི་རྣམ་པར་རབ་ཏུ་འབྱེད། །སྒྱུ་མའི་རྣམ་པ་ལྟ་བུར་ཆོས་རྣམས་རབ་རྟོགས་པས། །འཇིག་རྟེན་མ་ལུས་འདི་དག་སྒྱུ་མའི་རྣམ་པར་ཤེས། །སྐྱེས་པ་དག་དང་དེ་ བཞིན་བུད་མེད་རོགས་པ་དང༌། །བུ་མོ་དེ་བཞིན་རྣམ་པར་དུལ་བ་ཉེ་བར་རྟོན། །གླང་པོ་རྟ་དང་བ་ལང་ཕྱུགས་དང་ཤིང་རྣམས་དང༌། །མེ་ཏོག་འབྲས་བུ་བཟང་དང་ལྡན་པའི་མཚོ་ཡང་ སྟོན། །ཐབས་ཀྱི་རྣམ་པ་སྣ་ཚོགས་མང་བར་སྒྱུ་མའི་སེམས། །སྣ་ཚོགས་གནས་ལའང་སྒྱུ་མ་ཡོངས་སུ་གནས་པ་མེད། །སྒྱུ་མ་དབེན་ལ་གཞོལ་ཞིང་ཤིན་ཏུ་ཞི་བ་ཡང༌། །འཇིག་ ༄༅། །རྟེན་རྣམ་པར་རྟོག་པ་སྣ་ཚོགས་མང་པོ་སྟོན། །དེ་བཞིན་རྒྱལ་སྲས་བཙུན་པ་རིགས་དང་ལྡན་པ་རྣམས། །འཇིག་རྟེན་སྒྱུ་མ་སྣ་ཚོགས་ཇི་བཞིན་སྟོན་ པར་བྱེད། །སྒོམ་དང་རྣམ་པར་སྒོམ་པའི་དངོས་པོའི་སེམས་ཀྱང་མེད། །དངོས་པོ་དངོས་མེད་སྒྱུ་མ་ཇི་བཞིན་རབ་ཏུ་ཤེས། །ཞིང་དང་སེམས་ཅན་ཆོས་ཀྱི་རྣམ་པ་མང་པོར་ བཅས༑ ༑ལས་རྣམས་སྣ་ཚོགས་རྣམ་པས་ཡོངས་སུ་བསགས་པ་ལ། །གནས་པར་མི་བྱེད་མངོན་པར་ཆགས་པ་དེ་བཞིན་མེད། །ཆགས་མེད་མཐའ་ཡི་སྒྱུ་མའི་ཚུལ་ནི་ དེས་ཤེས་སོ། །དེ་ལྟར་རྒྱལ་སྲས་མཁས་པ་རྣམས། །རབ་ཏུ་ཞི་ལ་དགའ་ཞིང་སྤྲོས་པ་མེད་པ་སྟེ། །གནས་མེད་ས་དང་ཡང་དག་ལྡན། །ཆོས་དབྱིངས་གནས་ལ་དེ་དག་རབ་ ཏུ་ཞུགས། །དེ་ན་ཆོས་ཉིད་རྟོགས་པ་སྟེ། །བརྟན་པ་དེ་དག་རྒྱལ་བའི་སྐུ་སྐྱེས་སྲས་ཡིན་ནོ། །འདུ་ཤེས་རྒྱུ་ལ་མཁས་པ་སྟེ། །འགྲོ་བ་ཐམས་ཅད་འདུ་ཤེས་འདྲ་བར་ཤེས།། སྨིག་རྒྱུའི་འདུ་ཤེས་འདྲ་བ་སྟེ། །འགྲོ་བ་ཐམས་ཅད་དེ་ལྟར་འདུ་ཤེས་ཕྱིན་ཅི་ལོག །འདུ་ཤེས་རྣམ་ཕྱེ་མཁས་པ་སྟེ། །དེ་ནི་འགྲོ་ཀུན་འདུ་ཤེས་སྤངས་པ་ཡིན། །སེམས་ ཅན་སྣ་ཚོགས་ཁོང་དུ་ཆུད། །འཇིག་རྟེན་ཀུན་གྱི་སྣ་ཚོགས་རྣམ་པ་ཀུན་དང་བྲལ། །འཇིག་རྟེན་འདུ་ཤེས་རབ་ཏུ་ཤེས་སོ། །འཇིག་རྟེན་འདུ་ཤེས་མེད་མིན་འདུ་ཤེས་ལྡན། ། ཕྱོགས་རྣམས་འདུ་ཤེས་འདྲ་བ་སྟེ། །སེམས་ཅན་མཐའ་ཡས་འདུ་ཤེས་རྣམ་པ་སྣ་ཚོགས་ཡིན། །མ་ནོར་མིག་དང་ལྡན་པ་རྣམས། །འཇིག་རྟེན་སྣ་ཚོགས་འདུ་ཤེས་རབ་ཏུ་ མཐོང༑ ༑འཇིག་རྟེན་སྨིག་རྒྱུ་འདྲ་བ་སྟེ། །འདུ་ཤེས་སྣ་ཚོགས་རྣམ་པས་འཇིག་རྟེན་རྣམ་པར་བཀོད། །འཇིག་རྟེན་འདུ་ཤེས་གནས་པ་སྟེ། །དེ་དག་ཕྱིན་ཅི་ལོག་གསུམ་རྣམ་ པར་སྤངས། །ཇི་ལྟར་སྨིག་རྒྱུའི་ཚོགས་ཀྱི་རྣམས། །འགྲོ་བ་རྣམས་ལ་ཆུ་ཡི་རྣམ་པ་དམིགས་པར་སྣང༌། །དེ་ལ་ཆུ་ནི་ཡོད་མིན་ཡང༌། །ཆུ་ཡི་འདུ་ཤེས་རྣམ་པར་རབ་ཏུ་ བསླུ༑ ༑དེ་བཞིན་འཇིག་རྟེན་ཐམས་ཅད་ཀྱང༌། ཁམས་གསུམ་ལམ་རྒྱུད་རྣམ་པ་སྣ་ཚོགས་མཐའ་ཡས་ཏེ། །འདུ་ཤེས་རྣམ་པ་སྨིག་རྒྱུ་བཞིན། །ཆགས་མེད་ཡིད་ལྡན་ སྤྱོད་ཡུལ་མཐའ་ཡས་སོ། །འདུ་ཤེས་ཐམས་ཅད་རྣམ་པར་སྤངས། །ཆགས་མེད་ཡེ་ཤེས་ལྡན་ཞིང་སྤྲོས་པ་མེད་པ་རྣམས། །འགྲོ་བ་འདུ་ཤེས་ཆགས་གྱུར་པ། །འདུ་ཤེས་བསླུས་ ལས་བརྟེན་པ་འགྲེལ་པར་བྱེད། །ང་རྒྱལ་རློམ་དང་དྲེགས་པ་སྤངས། །འདུ་ཤེས་ཐམས་ཅད་བསལ་ཅིང་འཇིག་རྟེན་འདྲེན་པ་བྱེད། །མི་ཟད་ཟད་པ་རྟོགས་པ་རྣམས། །བདེན་པ་ ཟད་མི་ཤེས་ཀྱི་ཚུལ་འདི་ཡིན། །འཇིག་རྟེན་འདི་དག་ཐམས་ཅད་རྨི་ལམ་ལྟ་བུར་ཁོང་དུ་ཆུད། །ཆོས་རྣམས་ཐམས་ཅད་རྨི་ལམ་ངོ་བོ་ཉིད་དུ་རབ་ཏུ་རྟོགས། །རྨི་ལམ་དེ་དག་ ༄༅། །ཡུལ་ལ་མི་གནས་ཕྱོགས་ལའང་མི་གནས་ཏེ། །རྨི་ལམ་ལྟ་བུར་འཇིག་རྟེན་རབ་ཏུ་ཞི་ལ་དེ་དག་གཞོལ། །རྨི་ལམ་རང་བཞིན་མཁས་ཤིང་རྣམ་པར་རྟོག་ མེད་ཆོས་དང་ལྡན། །རྨི་ལམ་རྟོགས་པའི་ཡིད་ལྡན་སེམས་ལ་འགྱུར་བ་གང་ཡང་མེད། །འཇིག་རྟེན་ཀུན་ཏུ་རྨི་ལམ་ལྟ་བུར་ཤིན་ཏུ་རྒྱུ་ཞིང་སྤྱོད། །དུས་གསུམ་མ་ལུས་ཐམས་ ཅད་སྒྱུ་མ་ལྟ་བུའི་ཚུལ་དུ་རྟོགས། །རྨི་ལམ་ཤི་འཕོར་འགྱུར་བ་མེད་ཅིང་སྐྱེ་བ་དེ་བཞིན་མེད། །རྨི་ལམ་ཕྱོགས་རྣམས་ཀུན་ན་ཡོད་པ་མ་ཡིན་མེད་པ་མིན། །ཁམས་གསུམ་རྨི་ ལམ་ལྟ་བུ་འདི་ལ་རྣམ་རྟོག་མེད་བྱས་ཤིང༌། །རྨི་ལམ་ཤིན་ཏུ་རྟོགས་མཁས་དེ་དག་སེམས་ལ་བཅིངས་པ་མེད། །འགྲོ་བ་རྨི་ལམ་རང་བཞིན་འདྲ་ལ་དེ་དག་མི་གནས་ཏེ། །འཇིག་ རྟེན་འགྲོ་བ་རྣམ་པར་དབེན་ལ་དེ་དག་བརྟེན་པ་མེད། །འཇིག་རྟེན་རྣམ་ལ་མི་རྟོག་དེ་བཞིན་རྣམ་པ་རྟོག་པ་མེད། །རྨི་ལམ་རྟོགས་ཤིང་མཁས་པའི་བཟོད་པའི་ས་ནི་འདི་ཡིན་ ནོ༑ ༑རྨི་ལམ་འགྲོ་བ་རྣམས་ནི་རྣམ་པ་སྣ་ཚོགས་དུ་མ་སྣང༌། །ཐ་དད་རྣམ་པ་གཞན་དང་གཞན་དུ་བྱེ་བྲག་རྣམ་པ་མང༌། །དེ་བཞིན་ཡེ་ཤེས་ཟླ་བས་འགྲོ་བ་ཐམས་ཅད་རྣམ་ པར་མཐོང༌། །རྨི་ལམ་སྒྲ་དང་འདྲ་བར་དེ་དག་རྣམ་པར་རྟོག་པ་མེད། །རྨི་ལམ་ལྟ་བུའི་ཚུལ་གྱིས་རྣམ་པ་བརྟན་པས་རབ་ཏུ་རྟོགས། །དེ་དག་རྨི་ལམ་མཚན་ཉིད་རྣམ་འདས་ སྐལ་པ་མཉམ་པ་མིན། །རྨི་ལམ་དེ་དག་གཅིག་པ་མ་ཡིན་ནམ་ཡང་མང་པ་མིན། །རྨི་ལམ་རྣམ་བཀོད་རྣམ་པར་འགྲོ་བ་ཐམས་ཅད་རབ་ཏུ་ཤེས། །དེ་དག་སེམས་ཅན་ཐམས་ ཅད་རྨི་ལམ་འདྲ་བའི་ཆོས་ཅན་དང༌། །ཞིང་རྣམས་ཐམས་ཅད་རྨི་འདྲ་དེ་བཞིན་ཆོས་རྣམས་རྨི་འདྲ་ཀུན། །ཇི་ལྟར་ཉོན་མོངས་དེ་བཞིན་རྣམ་པར་བྱང་བ་རབ་ཏུ་ཤེས། །འཇིག་ རྟེན་རྨི་འདྲ་དེ་ལ་རྣམ་པར་རྟོག་པ་གང་ཡང་མེད། །རྨི་ལམ་ལྟ་བུའི་སྤྱོད་པས་ཡང་དག་གྲུབ་པར་གྱུར་པ་རྣམས། །རྨི་ལམ་ལྟ་བུའི་སྨོན་ལམ་རྣམ་པས་གནས་པ་མེད་པ་དག ། རྨི་ལམ་ལྟ་བུའི་ཆོས་རྣམས་ཀུན་ལ་གནས་འཆའ་མི་བྱེད་དེ། །འཇིག་རྟེན་རྨི་ལམ་འདྲ་ལ་ཁྱབ་པར་བྱེད་པ་གང་ཡང་མེད། །འཇིག་རྟེན་འདི་དག་རྨི་ལམ་ལྟ་བུར་བྱུང་བར་ ཤེས་ཤིང་དག །རྨི་ལམ་ཚུལ་རྟོགས་འགྲོ་བ་ཀུན་ཏུ་མི་འཇིགས་ཆོས་དང་ལྡན། །རྨི་ལམ་བཞིན་སྤྱོད་ལྡན་པས་འཇིག་རྟེན་ཀུན་ཏུ་ཆུད་མི་ཟ། །རིང་ཐུང་ཀུན་ཀྱང་རྨི་ ལམ་བརྒྱུད་བཞིན་དེ་དག་རབ་ཏུ་ཤེས། །འདི་ནི་རྨི་ལམ་ལྟ་བུའི་ཡིད་ལྡན་རྣམས་ཀྱི་བཟོད་པ་སྟེ། །རྨི་ལམ་ལྟ་བུས་འཇིག་རྟེན་སེམས་ཅན་རབ་ཏུ་འདྲེན་པར་བྱེད། །སེམས་ ཅན་རྣམས་ཀྱི་བསམ་པ་རྟོགས་བྱས་ཆགས་མེད་ཡེ་ཤེས་ཅན། །སེམས་ལ་བཅིངས་མེད་འགྲོ་བ་ཁྲག་ཁྲིག་ཡོངས་སུ་འགྲེལ་བ་བྱེད། །དེ་ལྟར་བྱང་ཆུབ་སེམས་དཔའི་སྤྱོད་པ་ ༄༅། །རྒྱ་ཆེ་མཐའ་ཡས་པ། །ཆོས་རྣམས་མངོན་རབ་བསྒྲུབ་པ་ཡངས་པ་ཁོང་དུ་ཆུད་བྱེད། །ཆོས་ཀྱི་ཆོས་ཉིད་དུ་མའི་ཚུལ་རྣམས་ཁོང་དུ་དེས་ ཆུད༑ ༑ཆོས་ཚུལ་རྣམ་པ་ཐ་དད་ཀུན་ལ་ཆགས་པའི་སེམས་མེད། །འགྲོ་ཀུན་དབྱངས་ཀྱི་ཡན་ལག་རྣམ་པ་ཇི་སྙེད་ཡོད་པ། །དེ་དག་སྒྲ་དབྱངས་སྒྲ་སྙན་བཞིན་དུ་ཁོང་དུ་ དེས་ཆུད། །སྒྲར་བརྗོད་དེ་དག་ནང་ན་མེད་པར་རབ་ཏུ་ཤེས་ཏེ། །སྒྲ་རྣམས་ཐམས་ཅད་ཕྱི་ནང་མེད་པར་རབ་ཏུ་དེ་ཤེས། །སྒྲ་བརྙན་ཇི་ལྟར་རྣམ་པ་སྣ་ཚོགས་སྒྲ་ཚུལ་གྲག་སྟེ། ། རྣམ་རྟོག་དབྱངས་དང་འདྲ་ཡང་རྣམ་རྟོག་མེད་པའི་སྒྲ་ཡིན། །སྒྲ་རྣམས་རྣམ་པ་སྣ་ཚོགས་ཐམས་ཅད་དེ་བཞིན་རབ་ཤེས། །སྒྲ་ལ་མངོན་པར་ཆགས་མེད་དེ་བཞིན་རློམ་པའི་ སེམས་མེད། །སེམས་ཅན་ཀུན་གྱི་གཙོ་བོ་ཐམས་ཅད་དེ་མཐོང་གྱུར་ཅིང༌། །འཇིག་རྟེན་མགོན་པོ་ཆོས་རྣམས་གསུང་ཞིང་དབྱངས་སྒྲོག་མཛད་པས། །མདོ་མང་བརྗོད་དུ་ མེད་པ་རབ་ཏུ་གསུང་ཞིང་སྟོན་ཀྱང༌། །རྒྱལ་བའི་གསུང་དབྱངས་དེ་ལ་དེ་ནི་གནས་པར་མི་བྱེད། །སྒྲ་བརྙན་དེ་དག་ཇི་ལྟར་སྒྲ་ཡི་རྣམ་པར་གྲག་ཀྱང༌། །སྒྲ་བརྙན་རྣམ་པ་ དག་ལ་སྒྲ་རྣམས་གང་ཡང་ཡོད་མིན། །དེ་ལྟར་དབྱངས་ཀྱི་བྱེ་བྲག་རྗེས་འབྲང་ཆོས་ཀྱི་རྣམ་པ། །ཆོས་ཉིད་འཇིག་མེད་ལྡན་པ་རྣམ་ཕྱེ་ཆོས་ལ་རབ་མཁས། །དེ་དག་སྒྲ་ དབྱངས་ཐམས་ཅད་རྣམ་པར་རབ་ཏུ་སྒོམ་སྟེ། སྒྲ་རྣམས་རྣམ་པར་དབྱེ་ལ་མཁས་པས་སྒྲ་རྣམས་སེལ་བྱེད། །འགྲོ་བ་ཀུན་དབྱངས་དབྱངས་ཚུལ་མིན་པར་རབ་ཏུ་ཤེས་ཏེ། །དབྱངས་ཀྱི་ ཡན་ལག་དག་པ་དེ་དག་དབྱངས་ཀུན་རབ་ཤེས། །ཆོས་རྣམས་དེ་དག་ཀུན་ལ་སྒྲ་མེད་སྒྲར་འཇུག་བྱེད་དེ། །བརྗོད་པ་ཁྲག་ཁྲིག་སྣ་ཚོགས་རྣམས་ཀྱི་རྗེས་སུ་ཞུགས་ཤིང༌། །འགྲོ་བ་ཐམས་ ཅད་སྒྲ་བརྙན་བཞིན་དུ་མངོན་པར་སྟོན་བྱེད། །འགྲོ་བ་མ་ལུས་ཀུན་གྱི་སྒྲ་ཡང་དེ་བཞིན་རབ་ཤེས། །དེ་དག་ཚིག་ཚུལ་རྗེས་སུ་འགྲོ་བའི་ཤེས་བྱ་རྟོགས་ལྡན། །འཇིག་རྟེན་འདི་དག་ ཐམས་ཅད་སྒྲ་བརྙན་ཡན་ལག་འདྲར་ཤེས། །དབྱངས་ཀྱི་རང་བཞིན་རྣམ་པར་དག་པས་ཁོང་དུ་ཆུད་དེ། །སྒྲ་ཡི་མཚན་ཉིད་ཇི་བཞིན་འཇིག་རྟེན་དེ་བཞིན་ཤེས་སོ། །ཇི་ལྟར་སྒྲ་ རྣམས་ཆོས་རྣམས་དུ་མ་རྣམ་པར་སྟོན་བྱེད། །སྒྲ་ཡི་རྣམ་རྟོག་སྣ་ཚོགས་དབྱངས་ཀྱི་ཡན་ལག་ཀུན་ལྡན། །འཇིག་རྟེན་མ་ལུས་ཀུན་དབྱངས་མཚན་ཉིད་ཅི་འདྲ་དེ་བཞིན། ། འགྲོ་བ་ཀུན་གྱི་མཚན་ཉིད་རྒྱལ་བའི་སྲས་ཀྱིས་རབ་ཤེས། །བཟོད་པ་འདི་འདྲའི་སྟོབས་ཀྱིས་མཁས་གྱུར་དཔའ་བོ་དེ་དག། སྒྲ་དབྱངས་སྣ་ཚོགས་འཇིག་རྟེན་ཀུན་ཏུ་ཡོངས་སུ་སྦྱོང་ སྟེ༑ ༑དུས་གསུམ་ཤེས་པའི་བློ་དང་ལྡན་པས་སྒྲ་ཡི་ཚུལ་ཤེས། །འོན་ཀྱང་རྣམ་རྟོག་གནས་ལ་དེ་དག་གནས་མི་འཆའོ། །ཞི་བའི་ཡིད་ལྡན་འདི་ལྟར་བྱང་ཆུབ་བརྩོན། ། ༄༅། །འཇིག་རྟེན་ཕན་པའི་དོན་དུ་བྱང་ཆུབ་ཚོལ། །ཆོས་ཉིད་རབ་ཏུ་ཞི་ལ་རྟག་ཏུ་འཇུག །བརྟན་པ་འཇིག་རྟེན་རྣམས་ལ་རྟོག་མི་བྱེད། །མི་སྒུལ་ མཐུ་ཅན་ཡེ་ཤེས་སྟོབས་ལྡན་པས། །ཆོས་ཉིད་དངོས་མེད་ཞི་བ་ཇི་བཞིན་དུ། །འཇིག་རྟེན་ཐམས་ཅད་མ་ལུས་དེ་ཤེས་ཏེ། །དེ་ལ་གཞོལ་ཞིང་ཕན་པར་དེ་སྤྱོད་དོ།། འགྲོ་བ་ཀུན་ལ་ནམ་ཡང་མི་གནས་ཏེ། །འགྲོ་བ་ཀུན་དང་འབྲལ་བར་བྱེད་མ་ཡིན། །འགྲོ་བ་ཀུན་ལ་དེ་ནི་གནས་མི་འཆའ། །དེ་ལ་གནས་པ་གང་ཡང་ཡོད་པ་མིན། ། འགྲོ་བ་ཆོས་ཉིད་རང་བཞིན་ལྡན་པར་ཤེས། །རང་བཞིན་དེ་ལའང་གནས་པར་མི་བྱེད་དེ། །འགྲོ་བ་འདི་ལའང་དེ་ནི་རྟེན་མི་བྱེད། །འགྲོ་བའི་གནས་ལས་ཡོངས་སུ་ གྲོལ་བ་ཡིན། །འཇིག་རྟེན་གནས་པ་ཇི་སྙེད་གང་ཡང་རུང༌། །དེ་དག་རང་བཞིན་ཚུལ་རྣམས་ཀུན་ཤེས་ཏེ། །གཉིས་མེད་ཆོས་ཀྱང་བརྟན་པས་རབ་ཏུ་ཤེས། །གཉིས་ མེད་དེ་ལའང་དེ་ནི་གནས་མི་འཆའ། །དེ་ནི་འཇིག་རྟེན་རྣམས་དང་ལྡན་གྱུར་ཀྱང༌། །འཇིག་རྟེན་ལམ་ལ་གནས་པའི་སེམས་མེད་དེ། །འཇིག་རྟེན་ཕྱི་རོལ་སྤྱད་པ་སྤྱོད་ པ་མིན། །ཆོས་ཀུན་ཡེ་ཤེས་རང་བཞིན་ཡིན་པར་ཤེས། །ཆུ་ལ་གཟུགས་བརྙན་ཇི་ལྟར་སྣང་བ་རྣམས། །ནང་ན་མི་འདུག་ཕྱི་ན་མི་གནས་པ། །དེ་བཞིན་བརྟན་པ་ བྱང་ཆུབ་དོན་དུ་སྤྱོད། །འཇིག་རྟེན་རྣམ་སྒོམ་འཇིག་རྟེན་ཡོད་པ་མིན། །འཇིག་རྟེན་སྐྱེ་མེད་གྲོལ་བ་མ་ཡིན་ཏེ། །འཇིག་རྟེན་བརྗོད་པར་མི་ནུས་གྱུར་པ་མིན། །འཇིག་རྟེན་ཕྱི་ རོལ་རྒྱུ་བའང་མ་ཡིན་ཏེ། །འགྲོ་བ་འདི་ནི་གཟུགས་བརྙན་ཇི་བཞིན་ནོ། །དེ་ལྟར་ཟབ་པའི་ཚུལ་ལས་བྱུང་བས་ན། །དག་ཅིང་འོད་གསལ་དྲི་མེད་སེམས་དང་ལྡན། །ཡེ་ ཤེས་གཞོལ་བས་ཆོས་ཀྱི་སྒྲོན་མ་སྟེ། །སྨོན་ལམ་ཀུན་ལས་ཡོངས་ཀྱང་ལྡོག་པ་མེད། །དེ་ནི་འཇིག་རྟེན་གསོག་པར་མི་བྱེད་དེ། །ཡེ་ཤེས་མཐར་ཐུག་མཐའ་ཡང་མི་ དམིགས་སོ། །སྐྱེ་དགུ་མཐའ་ཡས་ཀུན་ལ་བདེ་བྱེད་དེ། །འགྲོ་བ་ཀུན་ལས་ཆགས་པ་རྣམ་པར་བཟློག །དཔེ་མེད་རྣམས་ཀྱི་ཟབ་པ་ཉིད་ལ་ལྟོས། །འགྲོ་བ་ཀུན་གྱི་དོན་ དུ་རབ་ཏུ་བརྩོན། །བཟོད་པ་འདི་ནི་ཡེ་ཤེས་གཞོལ་བ་སྟེ། །དེ་ལ་གནས་ཤིང་སྤྱད་པ་དེ་འདྲ་སྤྱོད། །ཆོས་གནས་རྣམ་པར་དབྱེན་ལ་རབ་ཏུ་ཞུགས། །སྤྲུལ་པ་དེ་འདྲ་ཀུན་ དང་ལྡན་གྱུར་ཅིག །སྤྲུལ་པའི་དངོས་ལ་སྤྱོད་པར་རྗེས་སོང་བས། །སྤྲུལ་པའི་དངོས་པོ་ནམ་ཡང་གཏོང་བ་མེད། །དེ་ནི་བྱང་ཆུབ་སྤྱོད་པའི་ས་མཆོག་ཏུ། །སྤྲུལ་པའི་ དངོས་ལྡན་རྗེས་སུ་སྤྱད་པས་ན། །སྤྲུལ་པ་ཅི་འདྲར་རྣམ་པ་ཀུན་ཞི་བ། །སྤྲུལ་པ་དེ་འདྲའི་ཚུལ་ལ་རྣམ་པར་གནས། །དེ་བས་འགྲོ་ཀུན་སྤྲུལ་པ་རབ་ཏུ་ཤེས། །སྐྱེ་དགུའི་ ༄༅། །ལས་ཀྱི་རྣམ་པ་མཐའ་ཡས་པས། །སྤྲུལ་པའི་དངོས་དང་མཉམ་པ་ཉིད་ཀྱིས་མཉམ། །སྤྲུལ་པའི་མཐའ་རྟོགས་ཤིན་ཏུ་རྣམ་པར་དབེན། ། མི་ཡི་མགོན་པོ་ཐམས་ཅད་སྤྲུལ་པར་ཤེས། །དུས་གསུམ་སངས་རྒྱས་ཇི་སྙེད་གང་བཞུགས་པ། །སྨོན་ལམ་གང་བཏབ་སྤྱོད་པ་སྤྱད་པའི་རྒྱུ། །དེས་ནི་མི་གཙོ་ཐམས་ཅད་ སྤྲུལ་པ་ཡིན། །གང་གིས་སེམས་ཅན་རྣམ་དག་སྤྲུལ་པ་ཡིས། །བྱམས་དང་སྙིང་རྗེ་ཆེན་པོ་ཤིན་ཏུ་ཡངས། །དེ་ལྟར་སྤྲུལ་པ་རྣམ་ཕྱེ་ཤེས་པ་ནི། །དེ་དག་བྱིན་རླབས་འཕྲུལ་ སྣང་བྱེད་པའོ། །དེ་དག་འཇིག་རྟེན་རྣམ་པར་རྟོག་པ་མེད། །སྤྲུལ་པའི་དངོས་ཚུལ་འགྲོ་བ་ཐམས་ཅད་ཤེས། །འགྲོ་བའི་ལས་ཀྱི་རྣམ་པ་གང་ཡོད་པའི། །འཇིག་རྟེན་ དེ་དག་སྤྲུལ་པའི་སས་བསྒྲུབས་པའོ། །སྤྲུལ་པའི་མཛོད་མང་རྣམ་པར་ཕྱེ་བ་ལ། །ཞུགས་ཤིང་བྱང་ཆུབ་སྤྱད་པ་སྤྱོད་བྱས་པ། །དེ་དག་སྣ་ཚོགས་བྱེ་བྲག་རྣམ་པ་མང༌། ། འཇིག་རྟེན་ལས་ཀྱི་རྣམ་པས་བྱས་པ་བཞིན། །སྤྲུལ་པ་རྣམ་པར་རྟོག་པ་མེད་པ་སྟེ། །སྤྲུལ་པ་ནམ་ཡང་ཡོངས་སུ་རྟོག་པ་མེད། །རྟོག་དང་རྣམ་པར་རྟོག་པས་ཡིད་དབེན་ པ༑ ༑སྤྲུལ་པ་བཞིན་དུ་དེ་དག་སྤྱོད་པ་ཡིན། །སྤྲུལ་པ་རྒྱ་མཚོ་ཤེས་པས་ཁོང་དུ་ཆུད། །སྤྲུལ་པའི་དངོས་པོས་འཇིག་རྟེན་རྒྱས་ཀྱང་འདེབས། །སྤྲུལ་པའི་མི་གནས་འགྲོ་ བ་མེད་པ་སྟེ། །སྤྲུལ་པ་ཇི་བཞིན་དེ་བཞིན་ཡེ་ཤེས་སོ། །དེ་ནི་ནམ་མཁའ་གནས་མེད་ཇི་བཞིན་དུ། །བཟོད་པ་བཅུ་པའི་ཚུལ་ལ་རབ་ཏུ་འཇུག །དེ་ནི་མཁའ་འདྲར་ཆོས་རྣམས་ ཀུན་བྱས་ཤིང༌། །སེམས་ཅན་སེམས་ཅན་མེད་པར་ནམ་མཁའ་ཤེས། །དེ་ནི་ནམ་མཁའ་ལྟ་བུའི་ཤེས་ལྡན་ཏེ། །དེ་ལ་ཆགས་པ་གང་ཡང་ཡོད་པ་མིན། །ཇི་ལྟར་ནམ་མཁའ་ སྣ་ཚོགས་མ་ཡིན་པ། །དེ་ལྟར་འཇིག་རྟེན་ཆགས་མེད་རབ་ཏུ་ཤེས། །དེ་ནི་བཟོད་པ་མཁའ་འདྲའི་མཐུ་ལྡན་པས། །མི་ཟད་ནམ་མཁའ་བཞིན་དུ་ཟད་པ་མེད། །དེ་ནི་ མཁའ་འདྲའི་སྤྱོད་ཡུལ་ཐོབ་གྱུར་ཀྱང༌། །མཁའ་ལ་རྣམ་པར་རྟོག་པར་མི་བྱེད་དོ། །ནམ་མཁའ་ལ་ནི་ངོ་བོ་ཉིད་མེད་དེ། །ནམ་མཁའི་ས་མཚམས་ནམ་ཡང་ཆད་པ་མེད། ། མཁའ་ལ་བྱེ་བྲག་ཐ་དད་ཡོད་པ་མིན། །དེ་ནི་མཁའ་འདྲའི་བློ་ཡི་སྟོབས་དང་ལྡན། །མཁའ་ལ་མཐར་ཐུག་རྩ་བ་མེད་པ་སྟེ། །ནམ་མཁའ་ལ་ནི་མཐའ་དབུས་ཡོད་པ་མིན། ། མཁའ་ལ་རྣམ་པ་ཐ་དད་དེ་བཞིན་མེད། །ཡེ་ཤེས་སྟོབས་ཀྱང་ནམ་མཁའ་དེ་དང་འདྲ། །བརྟན་པས་དེ་འདྲའི་ཆོས་ཉིད་རབ་ཤེས་ཏེ། །ཇི་ལྟར་ནམ་མཁའ་སྐྱེས་པ་མེད་པ་དང༌། ། ཇི་ལྟར་མཁའ་ལ་འགག་པ་མེད་ཚུལ་དུ། །དེ་འདྲའི་ཆོས་ཉིད་དམ་པ་དེས་ཐོབ་བོ། །ནམ་མཁའ་འདྲ་བའི་ཆོས་ལ་དེ་གནས་ཤིང༌། །ཕྱོགས་རྣམས་ཀུན་གྱི་འགྲོ་བ་ཀུན་སྟོན་ཏོ། ། ༄༅། །བདུད་ཀྱི་དཀྲུགས་མ་ཐམས་ཅད་བཅོམ་བྱས་ཤིང༌། །མཁའ་འདྲའི་བཟོད་པའི་ཚུལ་ལ་ཤིན་ཏུ་བརྟན། །དེས་ནི་མཁའ་འདྲར་མཚན་ཉིད་མེད་པ་ ཀུན༑ ༑འཇིག་རྟེན་ཇི་སྙེད་མཚན་ཉིད་ཐ་དད་པ། །མཚན་ཉིད་མཚན་འདས་མཚན་མ་མེད་ཚུལ་དུ། །ཀུན་ཀྱང་ཡང་དག་མཁའ་དང་འདྲ་བར་བྱེད། །གང་ལ་དུས་གསུམ་ ཐམས་ཅད་གནས་པ་ཡིན། །ཆོས་ཉིད་མཁའ་འདྲ་དེས་ནི་ཤེས་བྱས་ཤིང༌། །དེ་ནི་རྣམ་པར་ཕྱེ་བ་གཅིག་ཚུལ་གྱིས། །འགྲོ་བ་ཐམས་ཅད་ནམ་མཁའི་ཚུལ་དུ་ཤེས། ། དེ་ནི་ནམ་མཁའ་ལྟ་བུའི་ཡེ་ཤེས་ལུས། །དེ་ནི་ནམ་མཁའ་ལྟ་བུའི་སྒྲ་དབྱངས་ལྡན། །དེ་ནི་ནམ་མཁའི་རང་བཞིན་ལུས་ཅན་ཏེ། །ཡེ་ཤེས་ནམ་མཁའ་ལྟ་བུར་ཞི་བས་ གནས། །རྒྱལ་བའི་སྲས་ཀྱི་སྤྱད་པ་སྤྱོད་པའི་ཚེ། །བཟོད་པ་བཅུ་པོ་འདི་དག་དེ་དག་གི །བཟོད་པའི་སྟོབས་ལ་དེ་དག་རབ་གནས་པ། །འཇིག་རྟེན་ཕན་པའི་དོན་དུ་བཤད་ ཅིང་བསྟན། །འདི་ཡི་ཚུལ་ལ་བརྟན་པ་བསླབས་པ་རྣམས། །ཡེ་ཤེས་འདི་ལ་ཤིན་ཏུ་མཐུ་ཆེ་སྟེ། །ཆོས་ཀྱི་མཐུ་དང་ཡེ་ཤེས་མཐུར་ཡང་ལྡན། །བྱང་ཆུབ་ཚུལ་རྗེས་བསམ་ པའི་སེམས་དང་ལྡན། །བཟོད་པ་འདི་ཡི་ཚུལ་ལ་ཞུགས་པ་ནི། །ཡེ་ཤེས་སྟོབས་ཀྱིས་ཆགས་པ་མེད་ལ་འཇུག །འཇིག་རྟེན་ལྷར་བཅས་དེ་ཡི་ཟིལ་གྱིས་མནོན། །འཇིག་རྟེན་ དག་ཏུ་འཁོར་ལོ་བླ་མེད་བསྐོར། །དེ་དག་སྤྱོད་ཚུལ་ཤིན་ཏུ་རྒྱ་ཆེ་བས། །དེ་དག་ཚད་ནི་འཇིག་རྟེན་ཀུན་ན་མེད། །སྐྱེས་བུ་འདུལ་བ་དཔེ་ཟླ་མེད་པ་ཡི། །ཡེ་ཤེས་རྒྱ་མཚོའི་ཚུལ་ ལ་དེ་དག་ཞུགས། །བདག་མེད་སེམས་ཀྱིས་འཇིག་རྟེན་སྤྱོད་པའི་ཚེ། །ཆོས་ཀྱིས་རྣམ་དག་གྱུར་པའི་ཡིད་ལྡན་པས། །བསྟན་པ་དེ་དག་འདི་འདྲའི་ཆོས་ལ་འཇུག །ཆོས་ཉིད་ དེས་ཀྱང་འཇིག་རྟེན་ཚིམ་པར་བྱེད། །འགྲོ་བའི་ཚད་ནི་ཐམས་ཅད་ཤེས་པར་ནུས། །སེམས་ཅན་མ་ལུས་ཐམས་ཅད་བགྲང་བར་ནུས། །རྡུལ་གཅིག་རྩེ་ལ་མ་ལུས་ཞིང་བགྲང་ ནུས༑ ༑མཁས་པའི་ཡོན་ཏན་དེ་དག་མཐའ་ཡས་སོ། །སངས་རྒྱས་སྲས་པོ་སྐྱེས་བུ་ཆེན་པོ་ལ། །བཟོད་པ་བཅུ་པོ་འདི་དག་ཡོད་པ་ནི། །ཡེ་ཤེས་སྤྱོད་ཡུལ་སྒོར་ཡང་འགྲོ་ཀུན་ གྱིས༑ ༑ཚད་དུ་བགྲང་བར་ནུས་པ་ཡོད་པ་མིན། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། བཟོད་པའི་ལེའུ་སྟེ། སུམ་ཅུ་རྩ་ལྔ་པའོ།། །། བམ་པོ་དྲུག་ཅུ་རྩ་གཉིས་པ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་ཀྱི་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། གྲངས་མ་མཆིས་པ་ ཤིན་ཏུ་བསྟན་པ་ཞེས་བགྱི་བ་དང༌། གྲངས་མ་མཆིས་པའི་གྲངས་མ་མཆིས་པ་ཞེས་བགྱི་བ་དེ། བཅོམ་ལྡན་འདས། ཇི་ལྟར་ན་གྲངས་མ་མཆིས་པ་བསྟན་པ་ལགས། ཚད་མ་ ༄༅། །མཆིས་པ་དང༌། མུ་མ་མཆིས་པ་དང༌། ཀུན་ཏུ་མཐའ་ཡས་པ་དང༌། བགྲང་དུ་མི་རུང་བ་དང༌། མཚུངས་པ་མ་མཆིས་པ་དང༌། བསམ་གྱིས་མི་ ཁྱབ་པ་དང༌། གཞལ་དུ་མ་མཆིས་པ་དང༌། བརྗོད་དུ་མ་མཆིས་པའི་ཡང་བརྗོད་དུ་མ་མཆིས་པ་ལགས་ན་ཇི་ལྟར་བསྟན་པར་འགྱུར། དེ་སྐད་ཅེས་གསོལ་པ་དང༌། བཅོམ་ ལྡན་འདས་ཀྱིས་བྱང་ཆུབ་སེམས་དཔའ་སེམས་ཀྱི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་དམ་པ། ལེགས་སོ། །ལེགས་སོ། །སྐྱེས་བུ་དམ་པ། དེ་ལྟར་ཁྱོད་ ཀྱིས་འཇིག་རྟེན་ཐམས་ཅད་གྲངས་ཀྱི་རྗེས་སུ་འཇུག་པར་བྱ་བའི་ཕྱིར། སངས་རྒྱས་ཀྱི་ཡེ་ཤེས་ཀྱིས་མཁྱེན་པའི་དོན་འདི། དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་ལ་ཞུ་བར་བསམ་པ་ལེགས་སོ། །ལེགས་སོ། །དེ་བས་ན་སྐྱེས་བུ་དམ་པ་ལེགས་པར་ཉོན་ལ་རབ་ཏུ་ཡིད་ལ་གཟུང་ཞིག་དང་བསྟན་པར་བྱའོ།། བཅོམ་ལྡན་འདས། དེ་ལྟར་བགྱིའོ་ཞེས་གསོལ་ནས། བྱང་ཆུབ་སེམས་དཔའ་སེམས་ཀྱི་རྒྱལ་པོ་བཅོམ་ལྡན་འདས་ལ་ཕྱིར་ཉན་ཏོ། །བཅོམ་ལྡན་འདས་ཀྱིས་དེ་ལ་འདི་སྐད་ ཅེས་བཀའ་སྩལ་ཏོ། །སྐྱེས་བུ་དམ་པ། དེ་ལ་འདི་སྐད་ཅེས་བྱ་སྟེ། བརྒྱ་སྟོང་ཕྲག་བརྒྱ་ན་བྱེ་བའོ། །བྱེ་བ་བྱེ་བ་ན་ཁོད་ཁོད་དོ། །ཁོད་ཁོད་ཁོད་ཁོད་ན་ཐད་དགུའོ། །ཐད་ དགུ་ཐད་དགུ་ན་ཁྲིག་ཁྲིག་གོ །ཁྲིག་ཁྲིག་ཁྲིག་ཁྲིག་ན་ཐམས་ཐམས་སོ། །ཐམས་ཐམས་ཐམས་ཐམས་ན་མྱད་མྱིད་དོ། །མྱད་མྱིད་མྱད་མྱིད་ན་གང་ཡའོ། །གང་ཡ་གང་ཡ་ན་ བན་བུན་ནོ། །བན་བུན་བན་བུན་ན་ཕྱར་ཕྱུར་རོ། །ཕྱར་ཕྱུར་ཕྱར་ཕྱུར་ན་ལྕག་ལྕིག་གོ །ལྕག་ལྕིག་ལྕག་ལྕིག་ན་བྱང་བྱིང་ངོ༌། །བྱང་བྱིང་བྱང་བྱིང་ན་ཆེམ་ཆེམ་མོ། །ཆེམ་ཆེམ་ཆེམ་ ཆེམ་ན་ཕྱལ་ཕྱོལ་ལོ། །ཕྱལ་ཕྱོལ་ཕྱལ་ཕྱོལ་ན་ཁྱུད་ཁྱུད་དོ། །ཁྱུད་ཁྱུད་ཁྱུད་ཁྱུད་ན་ཟར་ཟེར་རོ། །ཟར་ཟེར་ཟར་ཟེར་ན་ཁྲིབ་ཁྲིབ་བོ། །ཁྲིབ་ཁྲིབ་ཁྲིབ་ཁྲིབ་ན་ཡ་གངས་སོ།། ཡ་གངས་ཡ་གངས་ན་ཆོ་མའོ། །ཆོ་མ་ཆོ་མ་ན་ཁྲམ་ཁྲིམ་མོ། །ཁྲམ་ཁྲིམ་ཁྲམ་ཁྲིམ་ན་ནབ་ནུབ་བོ། །ནབ་ནུབ་ནབ་ནུབ་ན་སང་སང་ངོ༌། །སང་སང་སང་སང་ན་བརྒྱུད་ཡས་ སོ༑ ༑བརྒྱུད་ཡས་རྒྱུད་ཡས་ན་གཏང་ཡས་སོ། །གཏང་ཡས་གཏང་ཡས་ན་བཀྲ་ཡར་རོ། །བཀྲ་ཡར་བཀྲ་ཡར་ན་གསའ་ཡས་སོ། །གསའ་ཡས་གསའ་ཡས་ན་མཚུངས་ མེད་དོ། །མཚུངས་མེད་མཚུངས་མེད་ན་ལམ་ལུམ་མོ། །ལམ་ལུམ་ལམ་ལུམ་ན་ཡལ་ཡོལ་ལོ། །ཡལ་ཡོལ་ཡལ་ཡོལ་ན་ཁྲལ་ཁྲུལ་ལོ། །ཁྲལ་ཁྲུལ་ཁྲལ་ཁྲུལ་ན་ཐུད་ ཐུད་དོ། །ཐུད་ཐུད་ཐུད་ཐུད་ན་བསམ་ཕྱོད་དོ། །བསམ་ཕྱོད་བསམ་ཕྱོད་ན་བྲང་བྲེང་ངོ༌། །བྲང་བྲེང་བྲང་བྲེང་ན་བགྲོད་ཡས་སོ། །བགྲོད་ཡས་བགྲོད་ཡས་ན་བསྔོ་ཡས་སོ། །བསྔོ་ ༄༅། །ཡས་བསྔོ་ཡས་ན་ཟང་ཡག་གོ །ཟང་ཡག་ཟང་ཡག་ན་འཕྲོ་བཀྱེའོ། །འཕྲོ་བཀྱེ་འཕྲོ་བཀྱེ་ན་རྩེ་འཕྱོའོ། །རྩེ་འཕྱོ་རྩེ་འཕྱོ་ན་ཡོང་ཏན་ནོ། །ཡོང་ ཏན་ཡོང་ཏན་ན་འབྲུག་གཡོས་སོ། །འབྲུག་གཡོས་འབྲུག་གཡོས་ན་སང་ཡལ་ལོ། །སང་ཡལ་སང་ཡལ་ན་ཐིག་ཡུག་གོ །ཐིག་ཡུག་ཐིག་ཡུག་ན་ཡིད་འཕྱོའོ། །ཡིད་འཕྱོ་ ཡིད་འཕྱོ་ན་ནབ་ནེབ་བོ། །ནབ་ནེབ་ནབ་ནེབ་ན་ཁྲིག་ཐམས་སོ། །ཁྲིག་ཐམས་ཁྲིག་ཐམས་ན་ཡལ་ཡལ་ལོ། །ཡལ་ཡལ་ཡལ་ཡལ་ན་བགྲང་ཡས་སོ། །བགྲང་ཡས་བགྲང་ ཡས་ན་ཐུག་ཡལ་ལོ། །ཐུག་ཡལ་ཐུག་ཡལ་ན་ཤང་ཤང་ངོ༌། །ཤང་ཤང་ཤང་ཤང་ན་ཡག་ཡག་གོ །ཡག་ཡག་ཡག་ཡག་ན་ཐམ་ཐིམ་མོ། །ཐམ་ཐིམ་ཐམ་ཐིམ་ན་རློམ་ བསྙལ་ལོ། །རློམ་བསྙལ་རློམ་བསྙལ་ན་གཞལ་འཕྱོས་སོ། །གཞལ་འཕྱོས་གཞལ་འཕྱོས་ན་གཞལ་ཡལ་ལོ། །གཞལ་ཡས་གཞལ་ཡས་ན་གཞལ་མེད་དོ། །གཞལ་ མེད་གཞལ་མེད་ན་གཞལ་འཁོར་ཏོ། །གཞལ་འཁོར་གཞལ་འཁོར་ན་གཞལ་ཐིམ་མོ། །གཞལ་ཐིམ་གཞལ་ཐིམ་ན་གར་གཞལ་ལོ། །གར་གཞལ་གར་གཞལ་ན་ གཞལ་སངས་སོ། །གཞལ་སངས་གཞལ་སངས་ན་གཞལ་ཐག་གོ །གཞལ་ཐག་གཞལ་ཐག་ན་གཞལ་ཕུལ་ལོ། །གཞལ་ཕུལ་གཞལ་ཕུལ་ན་གཞལ་ཞིའོ། ། གཞལ་ཞི་གཞལ་ཞི་ན་འཕྱོ་འགྱུར་རོ། །འཕྱོ་འགྱུར་འཕྱོ་འགྱུར་ན་ཉར་ཉེར་རོ། །ཉར་ཉེར་ཉར་ཉེར་ན་ཕྱག་ཕྱིག་གོ །ཕྱག་ཕྱིག་ཕྱག་ཕྱིག་ན་ཟལ་ཟུལ་ལོ། །ཟལ་ཟུལ་ཟལ་ཟུལ་ན་སལ་ སལ་ལོ། །སལ་སལ་སལ་སལ་ན་གཡོ་ལྡེག་གོ །གཡོ་ལྡེག་གཡོ་ལྡེག་ན་ཕན་ཕུན་ནོ། །ཕན་ཕུན་ཕན་ཕུན་ན་བརྣང་ཡའོ། །བརྣང་ཡ་བརྣང་ཡ་ན་རེམ་འདྲོལ་ལོ། །རེམ་འདྲོལ་རེམ་ འདྲོལ་ན་རྫི་ངད་དོ། །རྫི་ངད་རྫི་ངད་ན་རྫི་རྡུལ་ལོ། །རྫི་རྡུལ་རྫི་རྡུལ་ན་ཕུན་ཡོལ་ལོ། །ཕུན་ཡོལ་ཕུན་ཡོལ་ན་ངད་ངད་དོ། །ངད་ངད་ངད་ངད་ན་བགྲང་བརྩིའོ། །བགྲང་བརྩི་བགྲང་ བརྩི་ན་ཟབ་བགྲང་ངོ༌། །ཟབ་བགྲང་ཟབ་བགྲང་ན་དགའ་རྐྱང་ངོ༌། །དགའ་རྐྱང་དགའ་རྐྱང་ན་གཞུང་འདལ་ལོ། །གཞུང་འདལ་གཞུང་འདལ་ན་ཁྲུག་ཕྱད་དོ། །ཁྲུག་ཕྱད་ཁྲུག་ཕྱད་ན་ འོལ་ཕྱོད་དོ། །འོལ་ཕྱོད་འོལ་ཕྱོད་ན་གདབ་ཡས་སོ། །གདབ་ཡས་གདབ་ཡས་ན་གཅལ་ཡས་སོ། །གཅལ་ཡས་གཅལ་ཡས་ན་བགྲང་ཡས་སོ། །བགྲང་ཡས་བགྲང་ཡས་ན་བྱིམ་ འཕྱོའོ། །བྱིམ་འཕྱོ་བྱིམ་འཕྱོ་ན་ཡམ་མེ་འོ། །ཡམ་མེ་ཡམ་མེ་ན་བསྙལ་ཡས་སོ། །བསྙལ་ཡས་བསྙལ་ཡས་ན་ལྡབ་ལྡེབ་བོ། །ལྡབ་ལྡེབ་ལྡབ་ལྡེབ་ན་འཕན་ཆད་དོ། །འཕན་ཆད་ འཕན་ཆད་ན་ཕང་ཕུང་ངོ༌། །ཕང་ཕུང་ཕང་ཕུང་ན་ཁེའུ་ཚང་ངོ༌། །ཁེའུ་ཚང་ཁེའུ་ཚང་ན་ཞུང་ཟུང་ངོ༌། །ཞུང་ཟུང་ཞུང་ཟུང་ན་མཆོག་ཡལ་ལོ། །མཆོག་ཡལ་མཆོག་ཡལ་ན་མཐའ་ ༄༅། །རྡུལ་ལོ། །མཐའ་རྡུལ་མཐའ་རྡུལ་ན་ཡུན་འགྱངས་སོ། །ཡུན་འགྱངས་ཡུན་འགྱངས་ན་བུན་ལོབ་བོ། །བུན་ལོབ་བུན་ལོབ་ན་ལམ་ལོམ་མོ། །ལམ་ ལོམ་ལམ་ལོམ་ན་བསྙད་ཡས་སོ། །བསྙད་ཡས་བསྙད་ཡས་ན་ལང་ལིང་ངོ༌། །ལང་ལིང་ལང་ལིང་ན་ལྗབ་ལྗིབ་བོ། །ལྗབ་ལྗིབ་ལྗབ་ལྗིབ་ན་མི་བརྩལ་ཏོ། །མི་བརྩལ་ མི་བརྩལ་ན་འབྱམས་ཡས་སོ། །འབྱམས་ཡས་འབྱམས་ཡས་ན་ང་འགྲང་ངོ༌། །ང་འགྲང་ང་འགྲང་ན་སྨོས་ཡལ་ལོ། །སྨོས་ཡལ་སྨོས་ཡལ་ན་བཀྲ་ཆལ་ལོ། །བཀྲ་ ཆལ་བཀྲ་ཆལ་ན་ལོ་རྒྱས་སོ། །ལོ་རྒྱས་ལོ་རྒྱས་ན་འབུམ་རྡིབ་བོ། །འབུམ་རྡིབ་འབུམ་རྡིབ་ན་གམ་གུམ་མོ། །གམ་གུམ་གམ་གུམ་ན་ལ་ལོའོ། །ལ་ལོ་ལ་ལོ་ན་ བགྲང་འཕྱོས་སོ། །བགྲང་འཕྱོས་བགྲང་འཕྱོས་ན་བགྲང་འཕྱོས་ལ་བསྒྲེས་པའོ། །བགྲང་འཕྱོས་ལ་བསྒྲེས་པ་བགྲང་འཕྱོས་ལ་བསྒྲེས་ན་དཔག་ཡས་སོ། །དཔག་ཡས་དཔག་ ཡས་ན་དཔག་ཡས་ལ་བསྒྲེས་པའོ། །དཔག་ཡས་ལ་བསྒྲེས་པ་དཔག་ཡས་ལ་བསྒྲེས་ན་ཡལ་ཕྱོང་ངོ༌། །ཡལ་ཕྱོང་ཡང་ཕྱོང་ན་ཡལ་ཕྱོང་ལ་བསྒྲེས་པའོ། །ཡལ་ཕྱོང་ལ་ བསྒྲེས་པ་ཡལ་ཕྱོང་ལ་བསྒྲེས་ན་མུ་ཡལ་ཏོ། །མུ་ཡལ་མུ་ཡལ་ན་མུ་ཡལ་བསྒྲེས་པའོ། །མུ་ཡལ་ལ་བསྒྲེས་པ་མུ་ཡལ་ལ་བསྒྲེས་ན་བགྲང་ཡོལ་ལོ། །བགྲང་ཡོལ་བགྲང་ ཡོལ་ན་བགྲང་ཡོལ་ལ་བསྒྲེས་པའོ། །བགྲང་ཡོལ་ལ་བསྒྲེས་པ་བགྲང་ཡོལ་ལ་བསྒྲེས་ན་མི་འཇལ་ཏོ། །མི་འཇལ་མི་འཇལ་ན་མི་འཇལ་ལ་བསྒྲེས་པའོ། །མི་འཇལ་ལ་བསྒྲེས་ པ་མི་འཇལ་ལ་བསྒྲེས་ན་བསམ་ཕྱོད་དོ། །བསམ་ཕྱོས་བསམ་ཕྱོས་ན་བསམ་ཕྱོས་ལ་བསྒྲེས་པའོ། །བསམ་ཕྱོས་ལ་བསྒྲེས་པ་བསམ་ཕྱོས་ལ་བསྒྲེས་ན་མཐའ་འབྱམས་སོ། ། མཐའ་འབྱམས་མཐའ་འབྱམས་ན་དཔག་ཐག་གོ །དཔག་ཐག་དཔག་ཐག་ན་དཔག་ཐག་ལ་བསྒྲེས་པའོ། །དཔག་ཐག་ལ་བསྒྲེས་པ་དཔག་ཐག་ལ་བསྒྲེས་ན་བརྗོད་དུ་མེད་ པའོ༑ ༑བརྗོད་དུ་མེད་པ་བརྗོད་དུ་མེད་པ་ན་བརྗོད་དུ་མེད་པ་ལ་བསྒྲེས་པའོ། །བརྗོད་དུ་མེད་པ་ལ་བསྒྲེས་པ་བརྗོད་དུ་མེད་པ་ལ་བསྒྲེས་ན་བརྗོད་དུ་མེད་པའི་ཡང་བརྗོད་དུ་མེད་པ་ ལ་བསྒྲེས་པ་ཤིན་ཏུ་བསྟན་པའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་ཀྱི་རྒྱལ་པོ་ལ་ཚིགས་སུ་བཅད་དེ་བཀའ་སྩལ་པ། བརྗོད་དུ་མེད་པའི་བརྗོད་དུ་ མེད་པ་ནི། །བརྗོད་དུ་མེད་པས་ཐམས་ཅད་འཚང་བར་འགྱུར། །བརྗོད་དུ་མེད་པ་བསྐལ་པར་བརྗོད་བྱས་ཀྱང༌། །བརྗོད་དུ་མེད་ལ་མཐར་ཐུག་གང་ཡང་མེད། །བརྗོད་དུ་ མེད་པའི་སངས་རྒྱས་ཞིང་གི་རྣམས། །ཐམས་ཅད་བཤིག་སྟེ་རྡུལ་དུ་ཀུན་བླགས་ཤིང༌། །གཅིག་རྩེ་ལའང་གཅིག་པོ་བརྗོད་མེད་པར། །ཐམས་ཅད་བརྗོད་དུ་མེད་པར་རབ་ ༄༅། །ཏུ་འཇུག །ཞིང་རྣམས་བརྗོད་དུ་མེད་པའི་བརྗོད་མེད་པ། །སྐད་ཅིག་སེམས་ཀྱིས་ཀུན་ཀྱང་རབ་ཏུ་འཇིག །སྐད་ཅིག་རེ་རེ་འཇིག་པ་བརྗོད་དུ་ མེད༑ ༑འཇིག་པས་བསྐལ་པ་མང་པོ་ཟད་པར་བྱེད། །དབྱེ་བའི་བྱེ་བྲག་དབྱེ་བ་བརྗོད་དུ་མེད། །རྡུལ་ལ་འཇུག་པ་བརྗོད་དུ་མེད་པ་སྟེ། །བགྲང་བའི་ཚུལ་གྱིས་ བརྗོད་དུ་མེད་པ་ཡིས། །བསྐལ་པ་བརྗོད་དུ་མེད་པ་ཟད་པར་བྱེད། །རྡུལ་དང་རྡུལ་ལ་མཚན་ཉིད་བརྗོད་དུ་མེད། །བརྗོད་དུ་མེད་པའི་རྡུལ་རྣམས་ཀུན་བཟུང་སྟེ། ། བསྐལ་པར་ཀུན་ཏུ་བཟང་པོ་བསྟོད་བྱས་ཀྱང༌། །ཀུན་ཏུ་བཟང་པོ་དེ་བསྔགས་མཐར་མི་ཐུག །བརྗོད་དུ་མེད་པའི་ཀུན་ཏུ་བཟང་པོ་རྣམས། །སྐྲ་རྩེ་རེ་རེ་ཀུན་ལ་ཡང་ དག་འཇུག །སྐྲ་རྩེ་གཅིག་བཞིན་ཡུལ་རྣམས་ཀུན་ལ་སྟེ། །ཆོས་དབྱིངས་མ་ལུས་ཇི་སྙེད་དེ་བཞིན་ནོ། །སྐྲ་རྩེ་རེ་རེ་ཞིང་གི་ཁམས་ཀྱི་རྣམས། །བརྗོད་དུ་མེད་པར་ ཡང་དག་འཛུད་པར་བྱེད། །མཁའ་དབྱིངས་སྐྲ་ཡི་རྩེ་མོས་གཞལ་དུ་རུང༌། །ཞིང་རྣམས་ཐམས་ཅད་བརྗོད་དུ་མེད་པའོ། །སྐྲ་རྩེ་དེ་ལས་སངས་རྒྱས་ཞིང་གི་རྣམས། །རྣམ་ པ་སྣ་ཚོགས་རྣམ་པར་ཕྱེ་བ་མང༌། །བསྐལ་པ་མི་མཐུན་ཞིང་རྣམས་བརྗོད་དུ་མེད། །བསྐལ་པ་མཐུན་པའི་ཞིང་ཡང་བརྗོད་དུ་མེད། །སྐྲ་རྩེ་གཅིག་པོ་དེ་ལ་བརྗོད་མེད་པའི།། ཞིང་རྣམས་དག་པ་བརྗོད་དུ་མེད་པ་དང༌། །སྣ་ཚོགས་རྒྱན་རྣམས་བརྗོད་དུ་མེད་པ་འགོད། །རྣམ་པ་དུ་མ་ཐ་དད་བརྗོད་དུ་མེད། །མིང་གི་ཚོགས་ཀྱང་བརྗོད་དུ་མེད་པ་སྟེ། །སྐྲ་ རྩེ་གཅིག་ལ་ཐམས་ཅད་རབ་ཏུ་གཞོལ། །དེ་བཞིན་གཤེགས་པའི་མཚན་རྣམས་རེ་རེར་ཡང༌། །བརྗོད་དུ་མེད་པའི་བརྗོད་དུ་མེད་པ་ཡིན། །སངས་རྒྱས་རེ་རེར་བརྗོད་ དུ་མེད་པ་ཡི། །སྐུ་རྣམས་བ་སྤུའི་ཁུང་བུར་བྱིན་གྱིས་རློབ། །སྤུ་གཅིག་ནས་ཀྱང་བརྗོད་དུ་མེད་པ་ཡི། །ཁ་དོག་སྣ་ཚོགས་མང་པོ་རབ་ཏུ་འབྱུང༌། །སྤུ་གཅིག་ནས་ཀྱང་བརྗོད་དུ་ མེད་པ་ཡི། །འོད་ཟེར་བརྗོད་དུ་མེད་པ་རབ་ཏུ་འགྱེད། །འོད་ཟེར་རེ་རེ་ལས་ཀྱང་བརྗོད་མེད་པའི། །པད་མོ་བརྗོད་དུ་མེད་པ་མང་པོ་འབྱུང༌། །པད་མོ་རེ་རེ་ལ་ཡང་བརྗོད་མེད་པའི། ། ལོ་མ་བརྗོད་དུ་མེད་པ་མང་པོ་འབྱུང༌། །བརྗོད་དུ་མེད་པའི་བརྗོད་དུ་མེད་པ་ཡི། །ལོ་མ་ཁ་དོག་བརྗོད་དུ་མེད་པ་སྟེ། །ཁ་དོག་རེ་རེ་དེ་བཞིན་བརྗོད་དུ་མེད། །པད་མོ་རེ་རེ་ལོ་མ་ བརྗོད་དུ་མེད། །ལོ་མ་རེ་རེའི་འོད་ཟེར་བརྗོད་དུ་མེད། །ཁ་དོག་ཐ་དད་རྣམ་པ་བརྗོད་དུ་མེད། །ཁ་དོག་རེ་རེ་བརྗོད་མེད་དེ་དག་ལས། །འོད་ཟེར་མང་པོ་བརྗོད་དུ་མེད་པ་འབྱུང༌། ། འོད་ཟེར་ཀུན་ལས་བརྗོད་མེད་ཟླ་བ་འབྱུང༌། །ཟླ་བ་ལས་ཀྱང་ཟླ་བ་བརྗོད་དུ་མེད། །ཟླ་བ་རེ་རེ་ལས་ཀྱང་བརྗོད་མེད་པའི། །ཁ་དོག་མཐའ་ཡས་ལྡན་པའི་འོད་མང་འབྱུང༌། །ཁ་དོག་ ༄༅། །རེ་རེ་ལས་ཀྱང་བརྗོད་མེད་པའི། །ཉི་མ་ཀུན་ཏུ་སྣང་བ་བརྗོད་དུ་མེད། །ཉི་མ་རེ་རེ་ལས་ཀྱང་བརྗོད་མེད་པའི། །ཁ་དོག་བརྗོད་དུ་མེད་པ་སྣ་ ཚོགས་འབྱུང༌། །ཁ་དོག་རེ་རེ་ལས་ཀྱང་བརྗོད་མེད་པའི། །འོད་ཟེར་བརྗོད་དུ་མེད་པ་རབ་ཏུ་འབྱུང༌། །འོད་ཟེར་རེ་རེ་ལ་ཡང་བརྗོད་མེད་པའི། །སེང་གེའི་ཁྲི་མང་བརྗོད་ མེད་སྣ་ཚོགས་གནས། །སེང་གེའི་ཁྲི་མང་སྣ་ཚོགས་རེ་རེ་ལས། །འོད་གསལ་བརྗོད་དུ་མེད་པའི་བརྗོད་མེད་འབྱུང༌། །ཁ་དོག་སྣ་ཚོགས་བརྗོད་དུ་མེད་པ་དང༌། །དག་ པ་སྣ་ཚོགས་བརྗོད་དུ་མེད་པ་འབྱུང༌། །འོད་གསལ་རེ་རེ་ལས་ཀྱང་བརྗོད་མེད་པའི། །རྣམ་པར་སྣང་བ་སྣ་ཚོགས་རབ་ཏུ་འབྱུང༌། །རྣམ་པར་སྣང་བ་སྣ་ཚོགས་རེ་རེ་ ལས༑ ༑བརྗོད་དུ་མེད་པའི་བརྗོད་དུ་མེད་པ་ཡི། །བརྗོད་དུ་མེད་པ་བསྒྲེས་པའི་གྲངས་སྙེད་ཀྱི། །རི་རབ་པད་མོའི་མཆོག་དང་ལྡན་པ་འབྱུང༌། །རི་རབ་རེ་རེའི་ཚད་ ཀྱང་འདི་ཙམ་སྟེ། །བརྗོད་དུ་མེད་པའི་བརྗོད་དུ་མེད་པ་ཡི། །ཞིང་རྣམས་བརྗོད་དུ་མེད་པ་ཡོད་པའི་རྣམས། །རི་རབ་གཅིག་གིས་ཡོངས་སུ་རྒྱས་པ་སྟེ། །བརྗོད་དུ་མེད་པའི་བརྗོད་དུ་མེད་ པ་ཡི༑ ༑རི་རབ་ལྷག་མ་རྣམས་ཀྱང་དེ་ཙམ་མོ། །དེ་དག་བཤིག་སྟེ་རྡུལ་ཕྲན་ཆར་བླགས་ན། །ཡོན་ཏན་ལེགས་པ་བརྗོད་མེད་དེ་སྙེད་ལྡན། །དེ་བཞིན་བྱེ་བྲག་ཁྱད་ པར་བཟུང་བྱས་ཀྱང༌། །བརྗོད་དུ་མེད་པའི་བརྗོད་དུ་མེད་པ་སྟེ། །བརྗོད་དུ་མེད་ལ་བསྒྲེས་པ་ཡོངས་བཟུང་ཞིང༌། །འོད་ཟེར་བརྗོད་དུ་མེད་པ་རབ་ཏུ་འབྱུང༌། །ཚིགས་བཅད་ བརྗོད་དུ་མེད་པ་གསལ་བའི་རྣམས། །རྣམ་པར་དབྱེ་བ་བརྗོད་དུ་མེད་པ་འབྱུང༌། །བརྗོད་དུ་མེད་པའི་འཇིག་རྟེན་ཁམས་སུ་རྒྱུ། །དེ་བཞིན་སངས་རྒྱས་བརྗོད་དུ་མེད་པ་འབྱུང༌། །བརྗོད་ དུ་མེད་པའི་བརྗོད་དུ་མེད་པ་ཡི། །སྐད་ཅིག་རེ་རེ་བདེན་པ་བརྗོད་དུ་མེད། །ཕྱི་མའི་མཐའ་ཡི་མུ་མཐར་བསྟོད་བྱས་ཀྱང༌། །དེ་བཞིན་གཤེགས་པ་དེ་དག་མུ་མེད་དོ། །སངས་རྒྱས་རེ་ རེ་ཞིང་ཡང་བརྗོད་མེད་པ། །བརྗོད་དུ་མེད་ལ་བསྒྲེས་པ་གསལ་དག་པའི། །དབྱངས་ཀྱི་ཡན་ལག་བརྗོད་མེད་གསལ་དག་པར། །འཁོར་ལོ་བརྗོད་དུ་མེད་པ་རབ་ཏུ་བསྐོར། །འཁོར་ ལོ་རེ་རེ་བསྐོར་བས་བརྗོད་མེད་པའི། །མདོ་སྡེ་བརྗོད་དུ་མེད་པ་མང་པོ་འབྱུང༌། །མདོ་སྡེ་བརྗོད་དུ་མེད་པ་རེ་རེ་ལས། །ཆོས་ཀྱི་རྣམ་གྲངས་བརྗོད་དུ་མེད་པ་འབྱུང༌། །ཆོས་རྣམས་བརྗོད་དུ་ མེད་པ་རེ་རེ་ལས། །ཤིན་ཏུ་བསྟན་འཆོས་བརྗོད་དུ་མེད་པ་འབྱུང༌། །ཤིན་ཏུ་བསྟན་པ་བརྗོད་མེད་རེ་རེ་ཡང༌། །སེམས་ཅན་བརྗོད་དུ་མེད་པ་རྣམ་པར་འདུལ། །དེ་དག་སྐྲ་རྩེ་གཅིག་ལ་ འཇུག་པ་སྟེ། །སྐྲ་གཅིག་ཇི་བཞིན་དེ་བཞིན་མ་ལུས་ཀུན། །བརྗོད་དུ་མེད་པའི་བརྗོད་དུ་མེད་པ་སྟེ། །བསྐལ་པ་བརྗོད་དུ་མེད་པ་ཟད་པར་བྱེད། །ཆགས་མེད་སེམས་ཀྱང་བརྗོད་དུ་ ༄༅། །མེད་པ་སྟེ། །དེ་དག་སངས་རྒྱས་བརྗོད་དུ་མེད་སྤྲུལ་པ། །སངས་རྒྱས་རེ་རེ་བརྗོད་དུ་མེད་པ་ལས། །བསྒྲེས་པའི་ཚུལ་དུ་སྤྲུལ་པ་ཀུན་ཏུ་འབྱུང༌། ། ཕྱོགས་རྣམས་བརྗོད་དུ་མེད་པ་ཀུན་ཏུ་འདོང༌། །དེ་དག་སྐུ་ཡང་བརྗོད་དུ་མེད་པ་སྟེ། །རྣམ་པར་ཕྱེ་སྐུ་དེ་བཞིན་བརྗོད་དུ་མེད། །ཁ་དོག་སྣ་ཚོགས་རྣམ་པ་གྲངས་མེད་དོ། ། སངས་རྒྱས་ཞིང་ཚད་བརྗོད་དུ་མེད་པར་ཡང༌། །སེམས་ཅན་བརྗོད་མེད་རྣམ་པར་སྟོན་པར་བྱེད། །རྣམ་པར་བསྟན་པ་དེ་དག་རེ་རེ་ཞིང༌། །སེམས་ཅན་བརྗོད་དུ་མེད་པ་ ཡོངས་སུ་སྦྱོང༌། །དེ་དག་རྒྱན་བཟང་རྣམ་ཕྱེ་བརྗོད་དུ་མེད། །དེ་དག་རྫུ་འཕྲུལ་མང་པོའང་བརྗོད་དུ་མེད། །རྣམ་དག་དབང་ཡང་བརྗོད་དུ་མེད་པ་སྟེ། །ཆོ་འཕྲུལ་རྣམས་ ཀྱང་བརྗོད་དུ་མེད་པ་འབྱུང༌། །རྣམ་པར་འཕྲུལ་པ་བརྗོད་དུ་མེད་པ་སྟེ། །སྤྱོད་ཡུལ་རྣམས་ཀྱང་དེ་བཞིན་བརྗོད་དུ་མེད། །དེ་དག་བྱིན་གྱི་རླབས་ཀྱང་བརྗོད་དུ་མེད་དེ། ། འཇིག་རྟེན་བརྗོད་དུ་མེད་པའི་ཁམས་སུ་འབྱུང༌། །ཆོས་ཚུལ་རྣམ་དག་བརྗོད་དུ་མེད་པ་སྟེ། །ཚུལ་གྱི་མདོ་ཡང་བརྗོད་དུ་མེད་པ་འབྱུང༌། །མདོ་སྡེ་རེ་རེ་ལས་ཀྱང་བརྗོད་ མེད་པའི། །བརྗོད་དུ་མེད་ཆོས་ཡང་དག་རབ་ཏུ་འབྱུང༌། །ཆོས་རྣམས་རེ་རེ་ལས་ཀྱང་བརྗོད་མེད་པའི། །ཤིན་ཏུ་བསྟན་པ་བརྗོད་དུ་མེད་པ་འབྱུང༌། །བསྟན་པ་རེ་རེ་ ཞིང་ཡང་བརྗོད་མེད་པའི། །རྟོགས་པར་ཤེས་པ་བརྗོད་དུ་མེད་པ་འབྱུང༌། །རྟོགས་པར་ཤེས་པ་རེ་རེས་བརྗོད་མེད་པའི། །སེམས་ཅན་བརྗོད་དུ་མེད་པ་རྣམ་པར་འདུལ། ། ཚུལ་མཐུན་ཆོས་ཀྱང་བརྗོད་དུ་མེད་པ་སྟེ། །ཚུལ་མཐུན་སེམས་ཀྱང་བརྗོད་དུ་མེད་པ་འབྱུང༌། །མི་མཐུན་ཆོས་ཀྱང་བརྗོད་དུ་མེད་པ་སྟེ། །མི་མཐུན་སེམས་ཀྱང་དེ་བཞིན་ བརྗོད་དུ་མེད། །དབང་པོ་མི་མཐུན་བརྗོད་དུ་མེད་པ་སྟེ། །ཚིག་གི་རྣམ་པ་མི་མཐུན་བརྗོད་དུ་མེད། །དེ་དག་བརྗོད་དུ་མེད་པ་རྣམ་པར་འདུལ། །སྐད་ཅིག་རེ་རེར་སྤྱོད་ཡུལ་ གྱུར་པ་ལ། །བརྗོད་དུ་མེད་པའི་རྣམ་པར་འཕྲུལ་པ་སྟོན། །དེ་བས་དེ་དག་བརྗོད་དུ་མེད་པ་ཡིན། །དེ་ལ་དུས་ཀྱང་བརྗོད་དུ་མེད་པ་སྟེ། །བསྐལ་པ་ཐ་དད་བརྗོད་དུ་མེད་ པ་འབྱུང༌། །བསྟན་པ་དེ་དག་བརྗོད་དུ་མེད་པ་འཇུག །གྲངས་ཀྱི་ཚུལ་གྱིས་དེ་དག་བརྗོད་དུ་མེད། །སྐྲ་རྩེ་གཅིག་ལ་བརྗོད་དུ་མེད་པ་ཡི། །ཡངས་དང་དོག་པ་རྣམ་པ་མང་པོ་ གནས། །ངག་དང་ཉོན་མོངས་བརྗོད་དུ་མེད་པ་སྟེ། །རྒྱ་ཆེ་ཕྲ་བ་དེ་བཞིན་བརྗོད་དུ་མེད། །ཞིང་གཅིག་ལ་ཡང་བརྗོད་དུ་མེད་པ་ཡི། །བྱེ་བྲག་རྣམ་པར་འཕྲོ་བས་ཞིང་མི་མཐུན། ། ཚད་དང་གྲངས་སུ་དེ་དག་བརྗོད་དུ་མེད། །སྐྲ་རྩེ་རེ་རེ་ལ་ཡང་ཡང་དག་གཞོལ། །སངས་རྒྱས་ཞིང་རྣམས་བརྗོད་དུ་མེད་གནས་ཀྱང༌། །སྐྲ་རྩེ་གཅིག་ཏུ་དོག་པར་མི་འགྱུར་ཏེ། །དེ་ ༄༅། །ན་གནོད་པའི་རྣམ་པ་གཅིག་མེད་པ། །བརྗོད་དུ་མེད་པར་ཡང་དག་རབ་ཏུ་གཞོལ། །ཞིང་རྣམས་དེ་དག་འདྲེ་བར་མི་འགྱུར་ཏེ། །འདྲེ་བའི་ཉེས་ པ་དེ་དག་ཀུན་ལ་མེད། །གཅིག་ཀྱང་བརྗོད་མེད་ཤིན་ཏུ་ཡངས་པ་སྟེ། །ཞིང་གཅིག་ཇི་བཞིན་དེ་བཞིན་ཐམས་ཅད་ཞིང༌། །སྐྲ་རྩེ་གཅིག་བཟུང་བརྗོད་དུ་མེད་པ་ཡིས།། མཁས་པས་མཁའ་དབྱིངས་གཞལ་དུ་རུང་སྲིད་ཀྱི། །སྐྲ་རྩེ་གཅིག་གི་ཞིང་རྣམས་མང་པོ་དག །ཤིན་ཏུ་བསྟན་པས་བརྗོད་དུ་མེད་པ་ཡིན། །སྐྲ་རྩེ་གཅིག་ ཏུའང་དེ་བཞིན་སྐྲ་འཇུག་སྟེ། །བརྗོད་དུ་མེད་པ་གཅིག་ནས་གཅིག་བརྒྱུད་པའི། །སྐྲ་རྩེ་བཟུང་བ་བརྗོད་དུ་མེད་པ་སྟེ། །སྐྲ་རྩེ་དེ་དག་མཐར་ཐུག་གང་ཡང་མོད། ། བསྐལ་པ་གཅིག་ནས་གཅིག་ཏུ་བརྒྱུད་པ་ཡི། །ཡུན་རིང་བརྗོད་དུ་མེད་པ་བཟུང་བྱས་ཤིང༌། །ཚུལ་འདིར་བརྗོད་དུ་མེད་པ་འཛུད་པ་བྱེད། །བསྐལ་པ་ཀུན་ཀྱང་དེ་ བཞིན་བརྗོད་དུ་མེད། །མཐའ་དང་དབུས་མེད་ཚུལ་འདི་བཟུང་བྱས་ཤིང༌། །བསྟན་པ་བརྗོད་དུ་མེད་པའི་སྤྱོད་ཡུལ་གྱིས། །དེ་དག་བརྗོད་དུ་མེད་པར་རབ་ཏུ་འཇུག་ བརྗོད་དུ་མེད་པའི་འཇུག་ཚུལ་འདི་ཡིན་ནོ། །ཡིད་ཀྱི་དབང་པོ་བརྗོད་དུ་མེད་པ་དང༌། །རྣམ་པར་གནོན་པ་བརྗོད་དུ་མེད་པ་དང༌། །རྣམ་པར་འཕྲུལ་པ་བརྗོད་ དུ་མེད་པ་ཡིས། །ཕྱོགས་རྣམས་བརྗོད་དུ་མེད་པ་ཀུན་ཏུ་འགྲོ། །དེ་དག་སེམས་ཀྱང་བརྗོད་དུ་མེད་པ་སྟེ། །རྒྱ་ཆེ་ཡངས་པ་བརྗོད་དུ་མེད་པས་ན། །དེ་དག་དམིགས་པ་བརྗོད་ དུ་མེད་པ་སྟེ། །དེས་ནི་བརྗོད་མེད་ཀུན་གྱི་མཐར་ཕྱིན་བྱེད། །དེ་བཞིན་ལུས་ཀྱི་ལས་ཀྱང་བརྗོད་མེད་དེ། །ངག་གི་ལས་ཀྱང་བརྗོད་དུ་མེད་པ་ཡིན། །དེ་བཞིན་སེམས་ཀྱང་ བརྗོད་དུ་མེད་པ་འབྱུང༌། །མོས་པ་དག་པ་དག་ཀྱང་བརྗོད་དུ་མེད། །དེ་དག་རྣམ་ཤེས་དག་པ་བརྗོད་དུ་མེད། །དེ་དག་ཤེས་རབ་གསལ་བ་བརྗོད་དུ་མེད། །བརྗོད་དུ་མེད་ པའི་ཚུལ་རྣམས་ཡོངས་སུ་གནོན། །ཐེ་ཚོམ་བརྗོད་དུ་མེད་པ་རབ་ཏུ་གཅོད། །དེ་དག་འབྱུང་བ་བརྗོད་དུ་མེད་པ་དང༌། །ཡོངས་སུ་གནོན་པ་བརྗོད་དུ་མེད་པ་ཡིས། །དེ་ དག་ཏིང་འཛིན་བརྗོད་དུ་མེད་པ་སྟེ། །དེས་ནི་བརྗོད་མེད་ཐམས་ཅད་འདའ་བར་བྱེད། །སེམས་ཅན་ཐམས་ཅད་བརྗོད་དུ་མེད་པ་སྟེ། །ཞིང་རྣམས་ཀུན་ཀྱང་དེ་བཞིན་བརྗོད་ དུ་མེད། །སེམས་ཅན་ལུས་རྣམས་བརྗོད་དུ་མེད་པ་སྟེ། །དེ་དག་བསམ་པ་བརྗོད་དུ་མེད་པ་ཡིན། །དེ་དག་ལས་ཀྱི་རྣམ་སྨིན་བརྗོད་མེད་དེ། །དེ་དག་མོས་པ་དེ་བཞིན་ བརྗོད་དུ་མེད། །ཁམས་ཀྱི་རྣམ་པ་ཐ་དད་བརྗོད་དུ་མེད། །དེ་དག་བྱེ་བྲག་ཁྱད་པར་བརྗོད་དུ་མེད། །དེ་དག་ལུས་མང་བརྗོད་དུ་མེད་པ་སྟེ། །གང་དུ་འབྱུང་བ་དེ་དག་ ༄༅། །བརྗོད་དུ་མེད། །ཇི་ལྟར་འབྱུང་བའང་བརྗོད་དུ་མེད་པ་སྟེ། །འདི་ལས་འབྱུང་བའང་བརྗོད་དུ་མེད་པ་ཡིན། །ཡང་དག་འཇུག་པ་བརྗོད་དུ་མེད་ པ་ཤེས། །དེ་དག་ཚུལ་གྱིས་ལམ་ཡང་བརྗོད་དུ་མེད། །དེ་དག་རབ་ཏུ་སྟོན་པའང་བརྗོད་དུ་མེད། །དུས་རྣམས་བརྗོད་དུ་མེད་པར་ཤིན་ཏུ་འབྱུང༌། །བདག་ཉིད་ཆེ་བ་འདི་ འདྲའི་སྙིང་རྗེ་ཅན། །བརྗོད་དུ་མེད་པ་འཇིག་རྟེན་དག་ན་རྒྱུ། །དེ་དག་ལུས་རྣམས་བརྗོད་དུ་མེད་པ་ཡིས། །བརྗོད་དུ་མེད་པ་རྣམས་ལ་ཡང་དག་འཇུག། སེམས་ཅན་གཙོ་ བོ་བརྗོད་དུ་མེད་པ་རྣམས། །མཐོང་ཞིང་ཤེས་རབ་བརྗོད་དུ་མེད་པ་ཡིས། །ཆོས་རྣམས་བརྗོད་དུ་མེད་པ་ཞི་བར་བྱེད། །སངས་རྒྱས་དེ་དག་བརྗོད་དུ་མེད་པ་སྟོན། །དེ་ དག་ལུས་རྣམས་བརྗོད་དུ་མེད་པ་ཡིས། །དེ་ནས་ཞིང་རྣམས་བརྗོད་དུ་མེད་པར་འདོད། །རྣམ་པར་འཕྲུལ་པ་བརྗོད་དུ་མེད་པ་ཡིས། །ཞིང་རྣམས་བརྗོད་དུ་མེད་པ་ཀུན་ཏུ་འདོང༌།། དེ་དག་ལུས་རྣམས་བརྗོད་དུ་མེད་པ་ཡིས། །སྐྱེས་བུ་ཁྱུ་མཆོག་བརྗོད་དུ་མེད་པ་ལ། །རྣམ་པ་ཐ་དད་བརྗོད་དུ་མེད་པ་ཡིས། །མཆོད་པ་བརྗོད་དུ་མེད་པ་རབ་ཏུ་བྱེད། །རིན་ཆེན་དག་ པ་བརྗོད་དུ་མེད་པ་དང༌། །མེ་ཏོག་སྣ་ཚོགས་དེ་བཞིན་བརྗོད་མེད་དང༌། །སྤོས་དང་ཕྲེང་མཆོག་བརྗོད་དུ་མེད་པ་ཡིས། །རྒྱལ་བ་བརྗོད་དུ་མེད་པ་བསྙེན་བཀུར་བྱེད། །དེ་དག་དད་པ་ བརྗོད་དུ་མེད་པ་སྟེ། །མོས་པ་དག་པའང་བརྗོད་དུ་མེད་པ་ཡིན། །བསམ་པ་དེ་བཞིན་བརྗོད་དུ་མེད་པ་ཡིས། །སངས་རྒྱས་བརྗོད་དུ་མེད་ལ་ཕྱག་ཀྱང་འཚལ། །སྤྱིན་ཞིང་གཏོང་བ་ བརྗོད་དུ་མེད་པ་སྟེ། །མི་དམའི་སེམས་ཀྱང་དེ་བཞིན་བརྗོད་དུ་མེད། །ཡོངས་སུ་གཏོང་བ་བརྗོད་དུ་མེད་པ་སྟེ། །ཐམས་ཅད་གཏོང་བ་དེ་བཞིན་བརྗོད་དུ་མེད། །ཚུལ་ཁྲིམས་ རྣམ་པར་དག་པར་བརྗོད་དུ་མེད། །ཡིད་གསལ་དད་པ་དེ་བཞིན་བརྗོད་དུ་མེད། །རྒྱལ་བ་བསྔགས་ཤིང་བསྟོད་པ་བརྗོད་མེད་དེ། །ཞི་བའི་ས་ཡང་དེ་བཞིན་བརྗོད་དུ་མེད། །དེ་ དག་བཟོད་པ་བརྗོད་དུ་མེད་པ་སྟེ། །མི་སྐྱེའི་ཆོས་ཀྱང་དེ་བཞིན་བརྗོད་དུ་མེད། །རབ་ཏུ་ཞི་བའི་བརྗོད་དུ་མེད་དང་ལྡན། །ཞི་བའི་ས་ཡང་དེ་བཞིན་བརྗོད་དུ་མེད། །བརྩོན་འགྲུས་ ཕུང་པོ་བརྗོད་དུ་མེད་པ་སྟེ། །ཞུམ་མེད་སེམས་ཀྱང་བརྗོད་དུ་མེད་པ་ཡིན། །ཕྱིར་མི་ལྡོག་པའང་བརྗོད་དུ་མེད་པ་སྟེ། །མི་སྒུལ་སེམས་ཀྱང་བརྗོད་དུ་མེད་པའོ། །བསམ་གཏན་ མཛོད་ནི་བརྗོད་དུ་མེད་པ་སྟེ། །རྟོགས་པར་གཞོག་ཆོས་དེ་བཞིན་བརྗོད་དུ་མེད། །བསམ་གཏན་ཞི་ཡིད་བརྗོད་དུ་མེད་པ་སྟེ། །བརྗོད་དུ་མེད་པའི་བསམ་གཏན་རབ་ཏུ་ཤེས། །དེ་ དག་ཤེས་རབ་བརྗོད་དུ་མེད་ལ་ཞུགས། །དེ་བས་ཏིང་འཛིན་བརྗོད་དུ་མེད་པ་སྟེ། །རབ་ཏུ་དབེན་ཆོས་བརྗོད་དུ་མེད་དང་ལྡན། །སངས་རྒྱས་བརྗོད་དུ་མེད་ལ་མངོན་པར་འཇུག །སྤྱོད་ ༄༅། །པའི་སྒོ་ནི་བརྗོད་དུ་མེད་པ་སྟེ། །དེ་དག་སྨོན་ལམ་བརྗོད་དུ་མེད་པ་ཡིན། །དེ་དག་སྤྱོད་ཡུལ་བརྗོད་དུ་མེད་པས་ན། །ཆོས་སྒོ་དག་པ་བརྗོད་དུ་མེད་པ་ ཡིན༑ ༑དེ་དག་ཆོས་སྟོབས་བརྗོད་དུ་མེད་པ་སྟེ། །ཆོས་ལ་གནས་པའང་བརྗོད་དུ་མེད་པ་ཡིན། །དེ་དག་ཆོས་ཀྱི་དྲན་པ་བརྗོད་དུ་མེད། །དེ་དག་ཆོས་ཀྱི་དབྱིངས་ཀྱང་བརྗོད་ དུ་མེད། །དེ་དག་ཡེ་ཤེས་བརྗོད་དུ་མེད་དང་ལྡན། །ཡེ་ཤེས་བརྗོད་དུ་མེད་ལ་ཤིན་ཏུ་བསླབས། །དེ་དག་ཕུང་པོ་ཁམས་ཀྱང་བརྗོད་དུ་མེད། །དེ་དག་བརྗོད་མེད་ཡེ་ཤེས་ མཐར་ཡང་ཐུག །དེ་དག་ཆོས་ཀྱི་འཁོར་ལོ་བརྗོད་དུ་མེད། །དེ་དག་ཆོས་ཀྱི་ཆར་འབེབས་བརྗོད་དུ་མེད། །དེ་དག་ཆོས་ཀྱི་ཡེ་ཤེས་བརྗོད་དུ་མེད། །དེ་དག་ཆོས་ཀྱི་སྤྲིན་ཀྱང་བརྗོད་ དུ་མེད། །དེ་དག་རྫུ་འཕྲུལ་རྣམ་པར་བརྗོད་མེད་དེ། །ཚུལ་དབྱིངས་བརྗོད་དུ་མེད་པ་ཁོང་དུ་ཆུད། །དངོས་མེད་ཡེ་ཤེས་བརྗོད་དུ་མེད་པ་སྟེ། །སེམས་ཀྱི་སྐད་ཅིག་དེ་དག་བརྗོད་དུ་ མེད༑ ༑བརྗོད་མེད་ཚད་དུ་རྣམ་པ་ཐ་དད་པ། །སྐད་ཅིག་སེམས་ཀྱིས་བརྗོད་དུ་མེད་པ་ཤེས། །ཞིང་རྣམས་རྒྱ་མཚོ་བརྗོད་དུ་མེད་པ་སྟེ། །བསྟན་པ་དེ་དག་བརྗོད་དུ་མེད་པ་གནོན། ། ཞིང་རྣམས་རྣམ་ཕྱེ་བརྗོད་དུ་མེད་པ་སྟེ། །རྒྱན་ཀྱང་དེ་བཞིན་བརྗོད་དུ་མེད་པ་ཡིན། །གཟུགས་དང་དབྱིབས་ཀྱང་བརྗོད་དུ་མེད་པ་སྟེ། །ཁ་དོག་མདོག་ཀྱང་དེ་བཞིན་བརྗོད་དུ་ མེད༑ ༑ཁྱད་པར་སྣ་ཚོགས་བརྗོད་དུ་མེད་པ་སྟེ། །རྣམ་པ་ཐ་དད་དེ་བཞིན་བརྗོད་དུ་མེད། །དགེ་དང་ཉོན་མོངས་བརྗོད་དུ་མེད་པ་སྟེ། །རྣམ་པ་མི་མཐུན་ཡེ་ཤེས་བརྗོད་དུ་མེད། ། སེམས་ཅན་བརྗོད་དུ་མེད་པ་རབ་ཏུ་ཤེས། །སེམས་ཅན་ཁམས་ཀྱང་བརྗོད་དུ་མེད་པ་སྟེ། །དེ་དག་ལས་ཀྱང་དེ་བཞིན་བརྗོད་དུ་མེད། །སེམས་ཅན་དེ་དག་སྤྱོད་པའང་བརྗོད་ དུ་མེད། །དབང་པོ་དག་ཀྱང་བརྗོད་དུ་མེད་པ་སྟེ། །དེ་དག་སེམས་ཀྱང་བརྗོད་དུ་མེད་པ་ཡིན། །ཁམས་ཀྱི་རྣམ་པ་དེ་དག་བརྗོད་དུ་མེད། །དེ་དག་མོས་པའང་དེ་བཞིན་བརྗོད་ དུ་མེད། །དེ་དག་རྣམ་པར་སྤྱོད་པ་བརྗོད་མེད་དེ། །ཀུན་ནས་ཉོན་མོངས་དེ་བཞིན་བརྗོད་དུ་མེད། །རྣམ་པར་བྱང་བའང་བརྗོད་དུ་མེད་པ་སྟེ། །འདུལ་བ་དེ་བཞིན་བརྗོད་དུ་ མེད་པ་འབྱུང༌། །ལུས་ཀྱི་རྣམ་པ་བརྗོད་དུ་མེད་པ་དག །བརྗོད་དུ་མེད་པ་མངོན་པར་སྤྲུལ་བྱས་ཤིང༌། །བརྟན་པ་བརྗོད་དུ་མེད་པའི་ནན་ཏན་བྱེད། །སེམས་ཅན་བརྗོད་དུ་ མེད་པ་ཡོངས་སུ་འགྲེལ། །དེ་དག་རྣམ་པར་འཕྲུལ་པ་བརྗོད་དུ་མེད། །འོད་རྣམས་བརྗོད་དུ་མེད་པ་རབ་ཏུ་འགྱེད། །ཁ་དོག་སྣ་ཚོགས་དེ་བཞིན་བརྗོད་དུ་མེད། །སེམས་ ཅན་བརྗོད་དུ་མེད་པ་རྣམ་པར་སྦྱོང༌། །འོད་ཟེར་དྲ་བ་དེ་བཞིན་བརྗོད་དུ་མེད། །བ་སྤུ་རེ་རེ་ནས་ཀྱང་བརྗོད་མེད་པའི། །བརྗོད་དུ་མེད་པ་མང་པོ་རབ་ཏུ་འབྱུང༌། །ཞིང་རྣམས་ ༄༅། །བརྗོད་དུ་མེད་པ་སྣང་བར་བྱེད། །ཡོངས་སུ་གནོན་པ་བརྗོད་དུ་མེད་པ་དང༌། །དེ་བཞིན་འབྱུང་བ་བརྗོད་དུ་མེད་པ་དང༌། །རྣམ་པར་གནོན་པ་བརྗོད་ དུ་མེད་པ་ཡིས། །འཇིག་རྟེན་བརྗོད་དུ་མེད་པ་རྣམ་པར་འདུལ། །དེ་དག་ལུས་ཀྱི་ལས་ཀྱང་བརྗོད་དུ་མེད། །རྣམ་དག་ཚིག་ཀྱང་དེ་བཞིན་བརྗོད་དུ་མེད། །མཐའ་ཡས་ ཡིད་ཀྱང་བརྗོད་དུ་མེད་པ་སྟེ། །སྤྱོད་པའི་ཁྱད་པར་དེ་བཞིན་བརྗོད་དུ་མེད། །ཡེ་ཤེས་བརྒྱུད་ཀྱང་བརྗོད་དུ་མེད་པ་སྟེ། །ཁམས་རྣམས་བརྗོད་དུ་མེད་པ་ཁོང་དུ་ཆུད། ། བརྟན་པ་གཟུངས་རྣམས་བརྗོད་དུ་མེད་པ་ལ། །ཤིན་ཏུ་བསླབ་པ་བརྗོད་མེད་བྱས་པ་ཡིན། །སྒྲ་དབྱངས་བརྗོད་དུ་མེད་པ་ཤེས་པ་སྟེ། །རྣམ་དག་དབྱངས་ཀྱང་བརྗོད་དུ་ མེད་པ་ཡིན། །དེ་དག་བདེན་པ་དྲན་པ་བརྗོད་དུ་མེད། །འགྲོ་བ་བརྗོད་དུ་མེད་པ་ཤེས་པར་བྱེད། །དེ་དག་སྤྱོད་ལམ་བརྗོད་དུ་མེད་པ་སྟེ། ནན་ཏན་རྣམ་དག་དེ་བཞིན་བརྗོད་ དུ་མེད། །བག་ཚ་མེད་པ་བརྗོད་དུ་མེད་པ་སྟེ། །འཇིག་རྟེན་བརྗོད་དུ་མེད་པ་རབ་ཏུ་འདུལ། །དེ་བཞིན་གཤེགས་སྲས་བརྗོད་དུ་མེད་པ་ཡི། །རྣམ་དག་སྤྱོད་པ་བརྗོད་མེད་ འདི་འདྲ་སྟེ། །དེ་དག་ཡོན་ཏན་ལེགས་པ་བརྗོད་དུ་མེད། །དེ་དག་ཟད་པ་མེད་པའང་བརྗོད་དུ་མེད། །འཇིག་རྟེན་མགོན་པོ་བརྗོད་དུ་མེད་པ་རྣམས། །ཡོན་ཏན་ལེགས་ པ་བརྗོད་དུ་མེད་པ་གསུང༌། །རྫོགས་པའི་བྱང་ཆུབ་སེམས་དཔའ་བརྗོད་དུ་མེད། །ཡོན་ཏན་རྣམ་དག་དེ་བཞིན་བརྗོད་དུ་མེད། །བརྟན་པ་གང་ལ་གནས་པ་བརྗོད་དུ་མེད། །གང་གནས་ ཡེ་ཤེས་དེ་ཡང་བརྗོད་དུ་མེད། །བསྐལ་པ་ཇི་སྙེད་ཟད་འགྱུར་བརྗོད་དུ་མེད། །དེ་དག་མཐར་ཐུག་མེད་པ་བརྗོད་དུ་མེད། །སངས་རྒྱས་ཤེས་བྱེད་ཡིད་འོང་བརྗོད་དུ་མེད། །ཡང་ དག་འཇུག་པའི་ཡེ་ཤེས་བརྗོད་དུ་མེད། །དེ་དག་བརྗོད་དུ་མེད་པའི་ཆོས་ལ་འཇུག །དེ་དག་ཆགས་པ་མེད་པའང་བརྗོད་དུ་མེད། །དུས་གསུམ་བསམ་པ་བརྗོད་དུ་མེད་པ་སྟེ། །དེ་ལ་ ཚད་བཟུང་བརྗོད་དུ་མེད་པ་ཡིན། །འབྱུང་བའི་ཡེ་ཤེས་བརྗོད་དུ་མེད་པ་སྟེ། །མི་གནས་གནས་པའང་དེ་བཞིན་བརྗོད་དུ་མེད། །སྤྱོད་པའི་ཁྱད་པར་བརྗོད་དུ་མེད་པ་སྟེ། །སྨོན་ ལམ་ཁྱད་པར་དེ་བཞིན་བརྗོད་དུ་མེད། །སྨོན་ལམ་རྣམ་དག་བརྗོད་དུ་མེད་པ་སྟེ། །བྱང་ཆུབ་སྒྲུབ་པའང་དེ་བཞིན་བརྗོད་དུ་མེད། །སངས་རྒྱས་བྱང་ཆུབ་བརྗོད་དུ་མེད་པ་ལ། །དེ་དག་ ཡེ་ཤེས་བརྗོད་དུ་མེད་པས་བྱུང༌། །དོན་རྣམས་བརྗོད་དུ་མེད་པ་ཤེས་པར་བྱེད། །ཐམས་ཅད་མཁྱེན་ཆོས་དེ་བཞིན་བརྗོད་དུ་མེད། །རྣམ་དག་ཞིང་ཡང་བརྗོད་དུ་མེད་པ་སྟེ། །དེ་ དག་སྤྱོད་པའི་སྟོབས་ཀྱང་བརྗོད་དུ་མེད། །དེ་དག་བརྗོད་དུ་མེད་པར་བསྒོམ་བྱས་ནས། །སྐད་ཅིག་གཅིག་ཏུ་བརྗོད་མེད་མངོན་འཚང་རྒྱ། །དེ་དག་བརྗོད་དུ་མེད་པའི་རྣམ་འཕྲུལ་ ༄༅། །པ༑ ༑སངས་རྒྱས་བརྗོད་དུ་མེད་པ་རབ་ཏུ་སྟོན། །དེ་དག་ཆོ་འཕྲུལ་བརྗོད་དུ་མེད་པ་ཡིས། །འཇིག་རྟེན་བརྗོད་དུ་མེད་པ་རབ་ཏུ་སྟོན། །བརྟན་པ་ཆོས་ཀྱི་ འཁོར་ལོ་བརྗོད་མེད་པ། །དེ་དག་བརྗོད་དུ་མེད་པར་རབ་ཏུ་སྐོར། །དེ་དག་སྟོན་པའང་བརྗོད་དུ་མེད་པ་སྟེ། །འཇིག་རྟེན་ཕན་འདོགས་བརྗོད་དུ་མེད་པ་བྱེད། །བསྐལ་པ་ བརྗོད་དུ་མེད་པ་ཐམས་ཅད་ཀྱང༌། །ཟད་པར་འགྱུར་གྱི་ཡོན་ཏན་བརྗོད་དུ་མེད། །ཡོན་ཏན་དང་ནི་ལེགས་པ་བརྗོད་མེད་པས། །ཟད་པར་མི་ནུས་དེ་བཞིན་བརྗོད་དུ་མེད། ། དེ་དག་མགོན་པོ་བརྗོད་དུ་མེད་པ་ལ། །ཚིག་དང་དབང་པོ་བརྗོད་དུ་མེད་པ་ཡིས། །བསྐལ་པ་བརྗོད་དུ་མེད་པར་བསྟོད་བྱས་ཀྱང༌། །དེ་བཞིན་གཤེགས་པའི་ཡོན་ཏན་མཐར་ ཐུག་མེད། །ཕྱོགས་བཅུའི་སེམས་ཅན་ཇི་སྙེད་ཡོད་པ་རྣམས། །མ་ལུས་ཐམས་ཅད་བདེ་བར་གཤེགས་གྱུར་ཏེ། །སངས་རྒྱས་གཅིག་ལའང་བརྗོད་དུ་མེད་པ་ཡི། །སྐུ་མངའ་ ཐམས་ཅད་བརྗོད་དུ་མེད་གྱུར་ལ། །སྐུ་རྣམས་རེ་རེ་བརྗོད་དུ་མེད་པ་ཡིས། །བརྗོད་དུ་མེད་པའི་དབུ་རྣམས་མངར་གྱུར་ལ། །དབུ་རྣམས་རེ་རེ་བརྗོད་དུ་མེད་པ་ཡི། །བརྗོད་ དུ་མེད་པའི་ལྗགས་ཡངས་མངར་གྱུར་ལ། །ལྗགས་ཡངས་རེ་རེ་བརྗོད་དུ་མེད་པ་ཡི། །གསུང་ཟབ་བརྗོད་དུ་མེད་པ་བརྗོད་མཛད་དེ། །དབྱངས་གཅིག་གིས་ཀྱང་ཡོན་ཏན་བརྗོད་ མེད་པར། །བསྐལ་པ་བརྗོད་དུ་མེད་པར་བསྟོད་བྱས་ལ། །སངས་རྒྱས་གཅིག་བཞིན་སངས་རྒྱས་ཐམས་ཅད་དེ། །སྐུ་གཅིག་ཇི་བཞིན་དེ་བཞིན་ཐམས་ཅད་སྐུ། །དབུ་གཅིག་ཇི་བཞིན་ དེ་བཞིན་ཐམས་ཅད་དབུ། །ལྗགས་གཅིག་ཇི་བཞིན་དེ་བཞིན་ཐམས་ཅད་ལྗགས། །དབྱངས་ཀྱི་ཡན་ལག་ལྡན་པས་ལེགས་བརྗོད་ཀྱང༌། །བསྐལ་པ་རྣམ་པ་སྣ་ཚོགས་མཐའ་ ཡས་པའི། །བསྐལ་པ་མཐའ་ཡས་མུར་ཐུག་ཟད་པར་འགྱུར། །ལེགས་པ་ཆགས་མེད་དེ་དག་མཐར་ཐུག་མི་འགྱུར་རོ། །རྡུལ་རྩེ་གཅིག་ལ་བརྗོད་དུ་མེད་པ་ཡི། །པད་མོའི་ དཔལ་ཞེས་བྱ་བ་བརྗོད་དུ་མེད། །དེ་བཞིན་གཤེགས་པ་བཟང་པོ་ཞེས་བྱ་བའི། །ཞིང་རྣམས་བརྗོད་དུ་མེད་ལ་རབ་ཏུ་འཇུག །རྡུལ་རྩེ་གཅིག་ལ་ཇི་སྙེད་ཡོད་པ་ཡི། །ཆོས་དབྱིངས་ ཇི་ཙམ་ཐམས་ཅད་མ་ལུས་པར། །རྡུལ་གྱི་ཞིང་རྣམས་བརྗོད་དུ་མེད་པ་དག །འབྱུང་བར་འགྱུར་ཞིང་གཞན་ཡང་འཇིག་པར་འགྱུར། །རྡུལ་རྩེ་གཅིག་ལ་མཐའ་དང་དབུས་མེད་ པའི༑ ༑ཞིང་རྣམས་དུ་མར་བསྟན་པ་ཡང་དག་འཇུག །ཕྱོགས་རྣམས་རྣམ་པར་དབྱེ་བ་བརྗོད་དུ་མེད། །ཞིང་རྣམས་རྒྱ་མཚོ་དེ་བཞིན་བརྗོད་དུ་མེད། །ཞིང་རྣམས་རེ་རེར་དེ་བཞིན་གཤེགས་ པ་རྣམས། །བརྗོད་དུ་མེད་པ་རྣམ་པར་བརྟག་བྱས་ཏེ། །ཞིང་གཅིག་ཇི་བཞིན་དེ་བཞིན་ཞིང་ཀུན་ཏུ། །དེ་དག་བརྗོད་དུ་མེད་པའི་ལུས་སུ་འབྱུང༌། །དེ་དག་སྤྱོད་པའི་མཐུ་ནི་བརྗོད་དུ་མེད་པ་ ༄༅། །སྟེ༑ ཁྱད་པར་འཕགས་ཆོས་དེ་བཞིན་བརྗོད་དུ་མེད། །དེ་དག་རྫུ་འཕྲུལ་བརྗོད་དུ་མེད་པ་སྟེ། །ཆགས་མེད་ཉིད་ཀྱང་དེ་བཞིན་བརྗོད་དུ་མེད། །སྐྲ་ལ་འཇུག་ པ་བརྗོད་དུ་མེད་པ་སྟེ། །སྐྲ་ལ་བརྟེན་པ་དེ་བཞིན་བརྗོད་དུ་མེད། །དེ་དག་སྟོབས་བཅུ་བརྗོད་དུ་མེད་པ་སྟེ། །བྱང་ཆུབ་འཚང་རྒྱ་དེ་བཞིན་བརྗོད་དུ་མེད། །རྟོགས་པ་དག་ལ་ བརྗོད་དུ་མེད་པ་སྟེ། །ཆོས་དབྱིངས་ཡོངས་སུ་གནོན་པ་བརྗོད་དུ་མེད། །དེ་དག་བརྗོད་ཤེས་བརྗོད་དུ་མེད་པ་སྟེ། །དེ་དག་ཉིད་ཀྱང་བརྗོད་དུ་མེད་པ་ཡིན། །ཚད་དང་གྲངས་ཀྱང་བརྗོད་དུ་ མེད་པ་སྟེ། །བརྟན་པ་དེ་དག་ཚུལ་བཞིན་རྟོགས་པར་བྱེད། །མགོན་པོའི་ཚུལ་རྣམས་བརྗོད་དུ་མེད་པ་དག །རྣམ་པ་ཚད་མེད་བརྟན་པ་ཡོངས་སུ་གནོན། །ཏིང་འཛིན་ཐ་དད་རྣམ་ པ་སྣ་ཚོགས་རྣམས། །བརྗོད་དུ་མེད་པ་དེ་དག་རབ་ཏུ་འཇུག །སྤྱོད་པ་རྣམ་དག་བརྗོད་དུ་མེད་པ་སྟེ། །བརྗོད་དུ་མེད་པའི་རྒྱལ་བ་མངོན་དུ་འགྱུར། །ཆགས་མེད་སེམས་ཀྱང་བརྗོད་ དུ་མེད་པ་སྟེ། །བརྗོད་དུ་མེད་པའི་གནས་ཀྱང་རྣམ་པར་གནོན། །སྤྱོད་པ་མཐའ་ཡས་བརྗོད་དུ་མེད་པ་སྟེ། རྫུ་འཕྲུལ་བརྗོད་དུ་མེད་པའང་རབ་ཏུ་སྟོན། །ཞིང་རྣམས་བརྗོད་དུ་མེད་པ་ ཤིན་ཏུ་ཤེས། །དེ་ཕྱིར་སངས་རྒྱས་བརྗོད་དུ་མེད་པ་མཐོང༌། །སྤྱོད་པའི་མཐུ་ནི་བརྗོད་དུ་མེད་པ་ཡིས། །ཡེ་ཤེས་བརྗོད་དུ་མེད་པ་ཁོང་དུ་ཆུད། །དེ་ལ་འགྲོ་བ་མེད་ཅིང་ཕྱིར་ལྡོག་མེད་པ་སྟེ། བརྗོད་དུ་མེད་པའི་ཡུལ་ལའང་རབ་ཏུ་འཇུག། བརྗོད་དུ་མེད་པའི་ཞིང་དུ་རྣམ་པར་རྒྱུ། །བརྗོད་དུ་མེད་བའི་བསྐལ་པ་ཟད་པར་བྱེད། །ཚུལ་གྱི་རྣམ་བ་བརྗོད་དུ་མེད་པ་སྟེ། །བརྗོད་དུ་མེད་ པའི་དེ་བཞིན་ཉིད་ཀྱང་ཐོབ། །ཡེ་ཤེས་བརྗོད་དུ་མེད་པ་རབ་ཏུ་འབྱུང༌། །སྐད་ཅིག་རེ་རེར་བརྗོད་དུ་མེད་བ་སྟོན། །རེ་རེའི་ཚིག་གིས་བརྗོད་དུ་མེད་པ་ཡི། །སངས་རྒྱས་བརྗོད་དུ་མེད་པ་ རབ་ཏུ་ཤེས། །བྱང་ཆུབ་དུས་གཅིག་མངོན་པར་སངས་རྒྱས་པ། །ཐ་དད་དུས་སུ་ཁོང་དུ་ཆུད་པར་བྱེད། །དེ་དག་སྐྲ་རྩེར་འཇུག་པ་བརྗོད་དུ་མེད། །ཤིན་ཏུ་སྐྲ་ལ་འཇུག་པའང་བརྗོད་དུ་ མེད༑ ༑རབ་ཏུ་རྒྱ་ཆེའི་རྒྱུད་ཀྱང་བརྗོད་དུ་མེད། །སངས་རྒྱས་རྣམ་པར་མཐོང་བའང་བརྗོད་དུ་མེད། །སངས་རྒྱས་རིགས་ལ་གང་ཞུགས་དེ་དག་གི །ཚུལ་གཅིག་ཉིད་ཀྱང་བརྗོད་ དུ་མེད་པ་སྟེ། །དེ་བས་ཞིང་རྒྱུད་བརྗོད་དུ་མེད་པ་ལ། །རྫོགས་པར་འཚང་རྒྱའི་དོན་དུ་ཀུན་ཏུ་འཇུག །ཞིང་དང་སེམས་ཅན་དེ་བཞིན་གཤེགས་པ་རྣམས། །ཐ་དད་ཁམས་བསྒྱུར་ བརྗོད་དུ་མེད་པ་དག །བརྟན་པས་ཤེས་པ་བརྗོད་དུ་མེད་པ་སྟེ། །དུས་གསུམ་འཛིན་པ་བརྗོད་དུ་མེད་པ་ཡིན། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་ བྱ་བ་ལས། སེམས་ཀྱི་རྒྱལ་པོས་དྲིས་ནས་གྲངས་ལ་འཇུག་པ་བསྟན་པའི་ལེའུ་སྟེ། སུམ་ཅུ་རྩ་དྲུག་པའོ།། །།དེ་ནས་བྱང་ཆུབ་སེམས་དཔའ་སེམས་ཀྱི་ ༄༅། །རྒྱལ་པོས་བྱང་ཆུབ་སེམས་དཔའ་དེ་དག་ལ་སྨྲས་པ། །ཀྱེ༑ རྒྱལ་བའི་སྲས་དག །གང་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་ སངས་རྒྱས་ཀྱི་ཞིང་འཇིག་རྟེན་གྱི་ཁམས་མི་མཇེད་འདི་ཡི་བསྐལ་པ་ཇི་ཙམ་པ་དེ་ནི། དེ་བཞིན་གཤེགས་པ་ཚེ་དཔག་ཏུ་མེད་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ བདེ་བ་ཡོད་པའི་ཉིན་ཞག་གཅིག་གོ །ཀྱེ༑ རྒྱལ་བའི་སྲས་དག །འཇིག་རྟེན་གྱི་ཁམས་བདེ་བ་ཡོད་པའི་བསྐལ་པ་ཇི་ཙམ་པ་དེ་ནི། དེ་བཞིན་གཤེགས་པ་རྡོ་རྗེས་རབ་ཏུ་ འཇོམས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ངུར་སྨྲིག་རྒྱལ་མཚན་གྱི་ཉིན་ཞག་གཅིག་གོ །ཀྱེ༑ རྒྱལ་བའི་སྲས་དག །འཇིག་རྟེན་གྱི་ཁམས་ངུར་སྨྲིག་རྒྱལ་མཚན་གྱི་བསྐལ་ པ་ཇི་ཙམ་པ་དེ་ནི། དེ་བཞིན་གཤེགས་པ་སྐུ་པད་མོ་ཤིན་ཏུ་རྒྱས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཕྱིར་མི་ལྡོག་པའི་འཁོར་ལོ་རབ་ཏུ་སྒྲོག་པའི་ཉིན་ཞག་གཅིག་ གོ་༑ཀྱེ༑ རྒྱལ་བའི་སྲས་དག །འཇིག་རྟེན་གྱི་ཁམས་འཁོར་ལོ་རབ་ཏུ་སྒྲོག་པའི་བསྐལ་པ་ཇི་ཙམ་པ་དེ་ནི། བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་རྒྱལ་མཚན་ གྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རྡུལ་མེད་པའི་ཉིན་ཞག་གཅིག་གོ །ཀྱེ༑ རྒྱལ་བའི་སྲས་དག །འཇིག་རྟེན་གྱི་ཁམས་རྡུལ་མེད་པའི་བསྐལ་པ་ཇི་ཙམ་པ་དེ་ནི། བཅོམ་ ལྡན་འདས་དེ་བཞིན་གཤེགས་པ་སེང་གེའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་སྒྲོན་མ་བཟང་པོའི་ཉིན་ཞག་གཅིག་གོ །ཀྱེ༑ རྒྱལ་བའི་སྲས་དག །འཇིག་རྟེན་གྱི་ ཁམས་སྒྲོན་མ་བཟང་པོའི་བསྐལ་པ་ཇི་ཙམ་པ་དེ་ནི། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་བའི་སྙིང་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་འོད་བཟང་ པོའི་ཉིན་ཞག་གཅིག་གོ །ཀྱེ༑ རྒྱལ་བའི་སྲས་དག །འཇིག་རྟེན་གྱི་ཁམས་འོད་བཟང་པོའི་བསྐལ་པ་ཇི་ཙམ་པ་དེ་ནི། བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འོད་ ཟེར་གྱིས་སྐུའི་པད་མོ་ཤིན་ཏུ་རྒྱས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་འདའ་བར་དཀའ་བའི་ཉིན་ཞག་གཅིག་གོ །ཀྱེ༑རྒྱལ་བའི་སྲས་དག །འཇིག་རྟེན་གྱི་ཁམས་ འདའ་བར་དཀའ་བའི་བསྐལ་པ་ཇི་ཙམ་པ་དེ་ནི། བཅོམ་ལྡན་འདས་དེ་བཞིན་གཤེགས་པ་མངོན་པར་མཁྱེན་པ་ཐམས་ཅད་ཀྱི་འོད་ཟེར་གྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ རྒྱན་དང་ལྡན་པའི་ཉིན་ཞག་གཅིག་གོ །ཀྱེ༑ རྒྱལ་བའི་སྲས་དག །འཇིག་རྟེན་གྱི་ཁམས་རྒྱན་དང་ལྡན་པའི་བསྐལ་པ་ཇི་ཙམ་པ་དེ་ནི། བཅོམ་ལྡན་འདས་དེ་བཞིན་གཤེགས་ པ་ཐུགས་ཟླ་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མེ་ལོང་གི་དཀྱིལ་འཁོར་མདོག་གི་ཉིན་ཞག་གཅིག་གོ །ཀྱེ༑ རྒྱལ་བའི་སྲས་དག །དེ་ལྟར་བསྐལ་པ་བགྲང་བ་ལ་འཇུག་ ༄༅། །པའི་ཚུལ་འདིས་འཇིག་རྟེན་གྱི་ཁམས་གྲངས་མེད་པ་བརྒྱ་སྟོང་ཕྲག་བཅུ་འདས་པ་ནི། དེའི་ཕ་རོལ་ན། བཅོམ་ལྡན་འདས་དེ་བཞིན་གཤེགས་པ་ དཔལ་བཟང་པོ་བཞུགས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་པད་མོའི་དཔལ་གྱི་ཉིན་ཞག་གཅིག་གོ །བགྲང་བའི་ཚུལ་འདིས་འཇིག་རྟེན་གྱི་ཁམས་ཐམས་ཅད་ བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་ལྡན་པས་ཡོངས་སུ་གང་ངོ༌།། །།ཤིན་ཏུ་རྒྱས་པ་ཆེན་པོའི་མདོ་།སངས་རྒྱས་ཕལ་པོ་ཆེ་ཞེས་བྱ་བ་ ལས༑ ཚེའི་ཚད་ཀྱི་ལེའུ་ཞེས་བྱ་བ་སྟེ། སུམ་ཅུ་བདུན་ནོ།། །།དེ་ནས་ཡང་བྱང་ཆུབ་སེམས་དཔའི་སེམས་ཀྱི་རྒྱལ་པོས་ཡང་བྱང་ཆུབ་སེམས་དཔའ་དེ་དག་ལ་ སྨྲས་པ། ཀྱེ༑ རྒྱལ་བའི་སྲས་དག །ཤར་ཕྱོགས་ལོགས་ན་སྔོན་ཆད་བྱང་ཆུབ་སེམས་དཔའ་བཞུགས་བཞུགས་པའི་རི་དྲང་སྲོང་འབྱུང་བ་ཞེས་བྱ་བ་ཡོད་དེ། དེ་ལ་བྱང་ཆུབ་སེམས་ དཔའ་རྡོ་རྗེ་དཔལ་ཞེས་བྱ་བ། བྱང་ཆུབ་སེམས་དཔའི་འཁོར་སུམ་བརྒྱ་དང་ལྡན་པ་ཆོས་སྟོན་ཏོ། །ཀྱེ༑ རྒྱལ་བའི་སྲས་དག །ལྷོ་ཕྱོགས་ལོགས་ན་སྔོན་བྱང་ཆུབ་སེམས་དཔའ་ བཞུགས་བཞུགས་པའི་རི་དཔལ་གྱི་ཕུང་པོ་ཞེས་བྱ་བ་ཡོད་དེ། དེ་ལ་བྱང་ཆུབ་སེམས་དཔའ་ཆོས་ཀྱི་བློ་གྲོས་ཞེས་བྱ་བ། བྱང་ཆུབ་སེམས་དཔའི་འཁོར་ལྔ་བརྒྱ་དང་ལྡན་པ་ཆོས་ སྟོན་ཏོ། །ཀྱེ༑ རྒྱལ་བའི་སྲས་དག །ནུབ་ཕྱོགས་ལོགས་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་རི་རྡོ་རྗེ་འོད་འཕྲོ་བ་ཅན་ཞེས་བྱ་བ་ཡོད་དེ། དེ་ལ་བྱང་ཆུབ་སེམས་དཔའ་ སེང་གེའི་འགྲོས་སུ་འགྲོ་བ་ཞེས་བྱ་བ། བྱང་ཆུབ་སེམས་དཔའི་འཁོར་སུམ་བརྒྱ་དང་ལྡན་པ་ཆོས་སྟོན་ཏོ། །ཀྱེ༑ རྒྱལ་བའི་སྲས་དག །བྱང་ཕྱོགས་ལོགས་ན་སྔོན་བྱང་ཆུབ་སེམས་ དཔའ་བཞུགས་བཞུགས་པའི་རི་སྤོས་ཀྱི་ཕུང་པོ་ཞེས་བྱ་བ་ཡོད་དེ། དེ་ལ་བྱང་ཆུབ་སེམས་དཔའ་སྤོས་ཀྱི་གླང་པོ་ཞེས་བྱ་བ། བྱང་ཆུབ་སེམས་དཔའི་འཁོར་སྟོང་ཕྲག་གསུམ་དང་ལྡན་ པ་ཆོས་སྟོན་ཏོ། །ཀྱེ༑ རྒྱལ་བའི་སྲས་དག །བྱང་ཕྱོགས་ལོགས་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་རི་སྤོང་རི་ཞེས་བྱ་བ་ཡོད་དེ། དེ་ལ་བྱང་ཆུབ་སེམས་དཔའ་ འཇམ་དཔལ་ཞེས་བྱ་བ། བྱང་ཆུབ་སེམས་དཔའི་འཁོར་སྟོང་ཕྲག་བཅུ་དང་ལྡན་པ་ཆོས་སྟོན་ཏོ། །ཀྱེ༑ རྒྱལ་བའི་སྲས་དག །བྱང་དང་ཤར་གྱི་ཕྱོགས་མཚམས་ལོགས་ན་སྔོན་ བྱང་ཆུབ་སེམས་དཔའ་བཞུགས་བཞུགས་པའི་རི་རྒྱ་མཚོ་ཆེན་པོ་བཞིའི་གནས་རྡོ་རྗེའི་རི་ཞེས་བྱ་བ་ཡོད་དེ། དེ་ལ་བྱང་ཆུབ་སེམས་དཔའ་ཆོས་ཀྱིས་འཕགས་པ་ཞེས་བྱ་བ། བྱང་ ཆུབ་སེམས་དཔའི་འཁོར་བརྒྱ་ཕྲག་བཅུ་གཉིས་དང་ལྡན་པ་ཆོས་སྟོན་ཏོ། །ཀྱེ༑ རྒྱལ་བའི་སྲས་དག །ཤར་དང་ལྷོའི་ཕྱོགས་མཚམས་ལོགས་ན་སྔོན་བྱང་ཆུབ་སེམས་དཔའ་ ༄༅། །བཞུགས་བཞུགས་པའི་རི་མཆོད་རྟེན་ཞེས་བྱ་བ་ཡོད་དེ། དེ་ལ་བྱང་ཆུབ་སེམས་དཔའ་ལྷའི་ཕུང་པོ་ཞེས་བྱ་བ། བྱང་ཆུབ་སེམས་དཔའི་འཁོར་སྟོང་དང་ ལྡན་པ་ཆོས་སྟོན་ཏོ། །ཀྱེ༑ རྒྱལ་བའི་སྲས་དག །ལྷོ་དང་ནུབ་ཀྱི་ཕྱོགས་མཚམས་ལོགས་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་རི་སྐར་མའི་འོད་ཅེས་བྱ་བ་ ཡོད་དེ། དེ་ལ་བྱང་ཆུབ་སེམས་དཔའ་བཟང་པོའི་དཔལ་ཞེས་བྱ་བ། བྱང་ཆུབ་སེམས་དཔའི་འཁོར་སྟོང་ཕྲག་གསུམ་དང་ལྡན་པ་ཆོས་སྟོན་ཏོ། །ཀྱེ༑ རྒྱལ་བའི་སྲས་ དག་༑ནུབ་དང་བྱང་གི་ཕྱོགས་མཚམས་ལོགས་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་རི་སྤོས་ཀྱི་ངད་ཅན་ཞེས་བྱ་བ་ཡོད་དེ། དེ་ལ་བྱང་ཆུབ་སེམས་དཔའ་ སྤོས་ཀྱི་འོད་ཟེར་རབ་ཏུ་འགྱེད་པ་ཞེས་བྱ་བ། བྱང་ཆུབ་སེམས་དཔའི་འཁོར་སྟོང་ཕྲག་ལྔ་དང་ལྡན་པ་ཆོས་སྟོན་ཏོ། །ཀྱེ༑རྒྱལ་བའི་སྲས་དག །རྒྱ་མཚོ་ཆེན་པོའི་ནང་ན་སྔོན་ བྱང་ཆུབ་སེམས་དཔའ་བཞུགས་བཞུགས་པའི་གནས་ཕུག་བཟང་པོ་ཞེས་བྱ་བ་ཡོད་དོ། །ཀྱེ༑ རྒྱལ་བའི་སྲས་དག །ཡུལ་ཤིན་ཏུ་ཡངས་པའི་ལྷོ་ཕྱོགས་ལོགས་ན་སྔོན་ བྱང་ཆུབ་སེམས་དཔའ་བཞུགས་བཞུགས་པའི་གནས་རྩ་བ་ཤིན་ཏུ་བསྟན་པ་ཞེས་བྱ་བ་ཡོད་དོ། །ཡུལ་པ་ཊ་ལའི་བུ་ཞེས་བྱ་བ་ན་སྔོན་བྱང་ཆུབ་སེམས་དཔའ་བཞུགས་ བཞུགས་པའི་དགེ་འདུན་གྱི་ཀུན་དགའ་ར་བ་གསེར་གྱི་གླིང་ཞེས་བྱ་བ་ཡོད་དོ། །ཡུལ་མ་ཐུ་ར་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་གནས་ཚིམ་པར་བྱེད་པའི་ཕུག་ ཅེས་བྱ་བ་ཡོད་དོ། །ཡུལ་རིལ་བ་གཏོང་བ་ཞེས་བྱ་བ་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་གནས་ཆོས་ཀྱི་སྟན་ཞེས་བྱ་བ་ཡོད་དོ། །ཡུལ་དགེ་བའི་ཕུལ་དུ་ཕྱིན་པ་ ཞེས་བྱ་བ་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་གནས་བཏང་བཟུང་གི་ཕུག་ཅེས་བྱ་བ་ཡོད་དོ། །ཡུལ་བེའུ་ར་ཞེས་བྱ་བ་ན་སྔོན་བྱང་ཆུབ་སེམས་དཔའ་བཞུགས་ བཞུགས་པའི་གནས་ཐུབ་ཅེས་བྱ་བ་ཀླུས་བཙུགས་པ་ཡོད་དོ། །ཡུལ་ཀམ་པོ་ཙ་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་གནས་བྱམས་པས་འཕགས་པ་ཞེས་བྱ་ བ་ཡོད་དོ། །རྒྱའི་གནས་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་གནས་མཐུ་བོ་ཐུའི་ཕུག་ཅེས་བྱ་བ་ཡོད་དོ། །ཡུལ་ཁ་ཤ་ན་སྔོན་བྱང་ཆུབ་སེམས་དཔའ་ བཞུགས་བཞུགས་པའི་གནས་པ་ལང་གི་མགོ་བོ་ཞེས་བྱ་བ་ཡོད་དོ། །ཁ་ཆེའི་ཡུལ་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་གནས་ཤིན་ཏུ་སྟོན་པ་ཞེས་བྱ་བ་ ཡོད་དོ། །ཡུལ་དགའ་བ་འཕེལ་བ་ཞེས་བྱ་བ་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་གནས་གནས་བརྟན་གྱི་ཕུག་ཅེས་བྱ་བ་ཡོད་དོ། །ཡུལ་ཆུ་འཛིན་ཞེས་བྱ་ ༄༅། །བ་ན་སྔོན་བྱང་ཆུབ་སེམས་དཔའ་བཞུགས་བཞུགས་པའི་གནས་ཁྱོར་བོ་སྟོན་པ་ཞེས་བྱ་བ་ཡོད་དོ། །ཡུལ་ས་འཛིན་གྱི་དཀྱིལ་འཁོར་ན་ བྱང་ཆུབ་སེམས་དཔའ་བཞུགས་བཞུགས་པའི་གནས་བརྒྱགས་ཀྱི་ཕུག་ཅེས་བྱ་བ་ཡོད་དོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་ བ་ལས། བྱང་ཆུབ་སེམས་དཔའི་གནས་ཀྱི་ལེའུ་ཞེས་བྱ་བ་སྟེ། སུམ་ཅུ་རྩ་བརྒྱད་པའོ།། །། Copyright © 2012 by the Asian Classics Input Project. All rights reserved.