Tibetan Works reader

སངས་རྒྱས་ཕལ་པོ་ཆེ་ཞེས་བྱ་བ་ཤིན་ཏུ་རྒྱས་པ་ཆེན་པོའི་མདོ།

ཕལ་ཆེན།

ཆ checked, but not manually proofread ༄༅༅། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ལས། སྡོང་ པོས་བརྒྱན་པའི་ལེའུ་སྟེ། བམ་པོ་བརྒྱ་གཅིག་པ། དེ་ནས་ཚོང་དཔོན་གྱི་བུ་ནོར་བཟང་ མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་བྱང་ཆུབ་སེམས་ དཔའི་རྣམ་པར་ཐར་པའི་འཇིག་རྟེན་ཐམས་ཅད་མངོན་དུ་གྱུར་པས་འགྲོ་བ་རྣམ་པར་འདུལ་ ༄༅༅། །བ་དེ་ལ་ཡོངས་སུ་བསྒོམ་ཞིང་ཁོང་དུ་ཆུད་པར་བྱ་བ་དང༌། ཡིད་ཆེས་པར་བྱ་བ་དང༌། འཇུག་ པར་བྱ་བ་དང༌། ཤིན་ཏུ་རྒྱས་པར་བྱ་བ་དང༌། ཡོངས་སུ་ཁྱབ་པར་བྱ་བ་དང༌། རབ་ཏུ་མཆོད་པར་བྱ་བ་དང༌། དབང་དུ་བྱ་བ་དང༌། སྣང་བར་བྱ་བ་དང༌། ཡང་དག་པར་གཞོལ་བར་བྱ་བ་བྱེད་ཅིང༌། མཚན་མོའི་ལྷ་མོ་སྒྲ་རྒྱ་ མཚོ་རབ་ཏུ་ཞི་བ་དང་ལྡན་པ་གང་ན་བ་དེར་ཕྱིན་ཏེ་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་རྐང་ པ་གཉིས་ལ་སྤྱི་བོས་ཕྱག་འཚལ་ཏེ་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ་ལན་བརྒྱ་སྟོང་ དུ་མར་གཡས་ཕྱོགས་སུ་བསྐོར་བ་བྱས་ནས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་མདུན་དུ་འདུག་སྟེ་ཐལ་མོ་ སྦྱར་ནས་འདི་སྐད་ཅེས་སྨྲས་སོ། །འཕགས་མ་ལྷ་མོ། བདག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དུ་ཡང་དག་ པར་ཞུགས་པ་སྟེ། བདག་ནི། དགེ་བའི་བཤེས་གཉེན་གྱི་རྟེན་གྱིས་བྱང་ཆུབ་སེམས་དཔའི་སྤྱོད་པ་ལ་སློབ་ཅིང་བྱང་ཆུབ་སེམས་ དཔའི་སྤྱོད་པ་ལ་ཞུགས་ཏེ་བྱང་ཆུབ་སེམས་དཔའི་སྤྱོད་པ་ལ་ནན་ཏན་དུ་བགྱི་བ་དང༌། བྱང་ཆུབ་སེམས་དཔའི་སྤྱོད་པ་ལ་རབ་ ཏུ་གནས་པས་ཐམས་ཅད་མཁྱེན་པ་ཉིད་དུ་འབྱུང་བར་འཚལ་ན། འཕགས་མ་ལྷ་མོ། ཇི་ལྟར་བྱང་ཆུབ་སེམས་དཔས་བྱང་ ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། དེ་ནས་མཚན་ ༄༅༅། །མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། ། རིགས་ཀྱི་བུ། དེ་ལྟར་ཁྱོད་དགེ་བའི་བཤེས་གཉེན་གྱི་རྟེན་གྱིས་བྱང་ཆུབ་སེམས་དཔའི་སྤྱོད་པ་ཡོངས་སུ་ཚོལ་བ་ལེགས་སོ། ། ལེགས་སོ། །རིགས་ཀྱི་བུ། ཁོ་མོ་ནི། བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ ཀྱི་སྐད་ཅིག་རྣམ་པར་བརྒྱན་པ་ཐོབ་པའོ། །ནོར་བཟང་གིས་སྨྲས་པ། འཕགས་མ། ཁྱོད་ནི། འཕྲིན་ལས་ཅི་མཛད། ཡུལ་གང་ དང་ལྡན། སྦྱོར་བ་གང་དང་ལྡན། ཅི་ལ་རྣམ་པར་དཔྱོད། བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་ འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་དེའི་ཡུལ་ནི། ཇི་ལྟ་བུ་ཞིག་མཆིས། དེས་སྨྲས་པ། རིགས་ཀྱི་བུ། ཁོ་མོ་ནི། སེམས་དང་བསམ་པ་རྒྱ་མཚོ་ཡོངས་སུ་དག་པའི་མཉམ་པ་ཉིད་དུ་ཞུགས་པ་སྟེ། འཇིག་རྟེན་གྱི་རྡུལ་དང་དྲི་མ་ཐམས་ཅད་རྣམ་པར་བསལ་བའི་མི་ཕྱེད་པས་བརྒྱན་ པའི་བསམ་པ་ལ་ཞུགས་པའོ། །བརྩམས་པ་ལས་མི་ལྡོག །མི་ལྡོག་པའི་སེམས་དང་ལྡན་པའོ། །རིན་པོ་ཆེའི་རི་བོ་ལྟར་ཡོན་ཏན་གྱིས་བརྒྱན་པའི་སེམས་མི་སྒུལ་ བ་དང་ལྡན་པའོ། །མི་གནས་མི་རྟེན་པའི་སེམས་དང་ལྡན་པའོ། །འགྲོ་བ་ཐམས་ཅད་ཡོངས་སུ་བསྐྱབ་པ་ལ་མངོན་པར་ཕྱོགས་པའི་སེམས་ཅན་དང་ལྡན་པའོ། །སངས་རྒྱས་རྒྱ་མཚོ་ ཐམས་ཅད་མཐོང་བས་མི་ངོམས་པའི་སེམས་དང་ལྡན་པའོ། །བྱང་ཆུབ་སེམས་དཔའ་ཐམས་ཅད་ཀྱི་སྟོབས་ཀྱི་བསམ་པ་རྣམ་པར་དག་པའི་སེམས་དང་ལྡན་པའོ། །དྲན་ པའི་རྒྱ་མཚོ་ཡེ་ཤེས་ཀྱི་སྣང་བ་ཆེན་པོས་བརྒྱན་པ་ལ་ཡང་དག་པར་གནས་པའི་སེམས་དང་ལྡན་པའོ། །སེམས་ཅན་ཐམས་ཅད་མྱ་ངན་གྱི་དགོན་པ་ལས་ཡང་དག་པར་ བཟླ་བ་ལ་ཞུགས་པའོ། །སེམས་ཅན་ཐམས་ཅད་སྡུག་བསྔལ་དང༌། ཡིད་མི་བདེ་བ་ལས་རྣམ་པར་ཟློག་པ་ལ་མངོན་པར་བརྩོན་པའོ། །སེམས་ཅན་ཐམས་ཅད་ཀྱི་ཡིད་དུ་མི་ འོང་བའི་གཟུགས་དང༌། སྒྲ་དང༌། དྲི་དང༌། རོ་དང༌། རེག་ཡོངས་སུ་རྒྱུ་བ་རྣམ་པར་ཟློག་པ་ལ་ཞུགས་པའོ། །སེམས་ཅན་ཐམས་ཅད་ཀྱི་སྡུག་པ་དང་མི་སྡུག་པ་དང་བྲལ་ ༄༅། །ཞིང་ཕྲད་པའི་སྡུག་བསྔལ་རབ་ཏུ་ཞི་བར་བྱ་བ་ལ་ཞུགས་པའོ། །སེམས་ཅན་ཐམས་ཅད་ཀྱི་ཡུལ་གྱི་རྐྱེན་ལས་བྱུང་བས་མགོ་རྨོངས་པའི་སྡུག་བསྔལ་ རྣམ་པར་ཟློག་པ་ལ་རབ་ཏུ་བརྩོན་པའོ། །ལོག་པར་ལྟུང་བའི་སེམས་ཅན་ཐམས་ཅད་ཀྱི་རྟེན་དུ་གྱུར་པའོ། །སེམས་ཅན་ཐམས་ཅད་འཁོར་བའི་གནས་ཀྱི་སྡུག་བསྔལ་ལས་ འབྱུང་བ་ཡང་དག་པར་སྟོན་པ་ལ་མངོན་པར་བརྩོན་པའོ། །སེམས་ཅན་ཐམས་ཅད་ཀྱི་རྒ་ཤི་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་ མི་བདེ་བ་དང༌། འཁྲུག་པ་རྣམ་པར་ཟློག་པ་ལ་ཞུགས་པའོ། །སེམས་ཅན་ཐམས་ཅད་ལ་དེ་བཞིན་གཤེགས་པའི་བདེ་བ་བླ་ན་མེད་པ་ཡོངས་སུ་སྒྲུབ་པར་ཞུགས་པ་སྟེ། གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་དང༌། ཁམས་དང༌། རྒྱལ་པོའི་གནས་ན་འཁོད་པའི་སེམས་ཅན་ཐམས་ཅད་བདེ་བར་རིམ་གྲོར་བྱ་བས་ཉམས་དགའ་བར་ འགྱུར་ཞིང༌། དེ་དག་ལ་ཆོས་དང་མཐུན་པར་བསྲུང་བ་དང༌། བསྐྱབ་པ་དང༌། རིམ་གྲོ་བྱ་བ་ཡང་ལེགས་པར་བྱེད་དེ། དེ་དག་རིམ་པས་ཐམས་ཅད་མཁྱེན་པ་ཉིད་དུ་ ཡོངས་སུ་སྨིན་པར་བྱེད་དོ། །འདི་ལྟ་སྟེ། ཁང་ཁྱིམ་དང༌། གཞལ་མེད་ཁང་ན་གནས་པའི་སེམས་ཅན་རྣམས་ཀྱི་མངོན་པར་ཆགས་པ་མེད་པ་ཡོངས་སུ་སྐྱེད་དོ། །ཡིད་ མི་བདེ་བ་དེ་དང་དེ་དག་ཀྱང་རྣམ་པར་སེལ་ཏོ། །མངོན་པར་ཞེན་པ་ཐམས་ཅད་རྒྱུན་གཅད་པ་དང༌། ཆོས་ཐམས་ཅད་ཀྱི་རང་བཞིན་ཡོངས་སུ་ཤེས་པར་བྱ་བའི་ཕྱིར་ཆོས་སྟོན་ ཏོ༑ ༑ཕ་མ་དང༌། ཕུ་ནུ་དང༌། སྲིང་མོ་དང༌། གཉེན་བཤེས་དང༌། འགྲོགས་པའི་སེམས་ཅན་ཡུན་རིང་པོ་ནས་བཤེས་ཤིང་མཛའ་བར་གྱུར་པ་དག་ལས་སངས་རྒྱས་དང་ བྱང་ཆུབ་སེམས་དཔའ་དང་འཕྲད་པར་བྱ་བའི་ཕྱིར་ཆོས་སྟོན་ཏོ། །བུ་སྨད་དང་འགྲོགས་པའི་སེམས་ཅན་རྣམས་ལ་འཁོར་བའི་སྲེད་པ་ཐམས་ཅད་རབ་ཏུ་སྤང་བ་དང༌། སེམས་ ཅན་ཐམས་ཅད་ལ་མཉམ་པ་ཉིད་ཀྱི་སེམས་སུ་བྱ་བ་དང༌། སྙིང་རྗེ་ཆེན་པོ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཚོང་འདུས་ཀྱི་དབུས་ན་འཁོད་པའི་སེམས་ཅན་རྣམས་ ལ་འཕགས་པའི་དགེ་འདུན་དང༌། དེ་བཞིན་གཤེགས་པ་མཐོང་བར་བྱ་བ་ལ་ཡང་དག་པར་གཞོལ་བར་བྱ་བའི་ཕྱིར་ཆོས་སྟོན་ཏོ། །ལོངས་སྤྱོད་ཀྱི་དྲེགས་པས་མྱོས་པའི་ སེམས་ཅན་རྣམས་ལ་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར་ཆོས་སྟོན་ཏོ། །གླུ་དང༌། གར་དང༌། རོལ་མོ་ལ་མངོན་པར་དགའ་བའི་སེམས་ཅན་རྣམས་ ལ་ཆོས་ཀྱི་དགའ་བ་ལ་མོས་པར་བྱ་བའི་ཕྱིར་ཆོས་སྟོན་ཏོ། །ཡུལ་གྱི་དགའ་བ་ལ་ཆགས་པའི་སེམས་ཅན་རྣམས་ལ་དེ་བཞིན་གཤེགས་པའི་ཡུལ་ལ་ཡང་དག་པར་གཞོལ་ ༄༅། །བར་བྱ་བའི་ཕྱིར་ཆོས་སྟོན་ཏོ། །ཁྲོ་བས་ཡོངས་སུ་ནོན་པའི་སེམས་ཅན་རྣམས་ལ་བཟོད་པའི་ཕ་རོལ་ཏུ་ཕྱིན་པ་ལ་རབ་ཏུ་དགོད་པར་བྱ་བའི་ཕྱིར་ཆོས་ སྟོན་ཏོ༑ ༑སེམས་ཅན་ལེ་ལོ་ཅན་རྣམས་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པར་བྱ་བའི་ཕྱིར་ཆོས་སྟོན་ཏོ། །སེམས་རྣམ་པར་མྱོས་པའི་སེམས་ཅན་རྣམས་ ལ་དེ་བཞིན་གཤེགས་པའི་བསམ་གཏན་གྱི་ཕ་རོལ་ཏུ་ཕྱིན་པ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ལྟ་བའི་རྣམ་པ་ཐིབས་པོར་ཞུགས་པའི་སེམས་ཅན་མ་རིག་པའི་ མུན་ནག་ཏུ་འཐོམ་པ་རྣམས་ལ་ལྟ་བའི་རྣམ་པ་ཐིབས་པོ་དང༌། མ་རིག་པའི་མུན་པ་རྣམ་པར་བསལ་བའི་ཕྱིར་ཆོས་སྟོན་ཏོ། །ཤེས་རབ་འཆལ་བ་ཅན་གྱི་སེམས་ཅན་རྣམས་ ལ་ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཁམས་གསུམ་པ་ལ་མངོན་པར་ཞེན་པའི་སེམས་ཅན་རྣམས་ལ་འཁོར་བ་ལས་འབྱུང་བར་ བྱ་བའི་ཕྱིར་ཆོས་སྟོན་ཏོ། །དམན་པ་ལ་མོས་པའི་སེམས་ཅན་རྣམས་ལ་དེ་བཞིན་གཤེགས་པའི་བྱང་ཆུབ་ཏུ་སྨོན་ལམ་ཡོངས་སུ་རྫོགས་པར་བྱ་བའི་ཕྱིར་ཆོས་སྟོན་ཏོ། ། བདག་ལ་ཕན་པར་བརྩོན་པའི་སེམས་ཅན་རྣམས་ལ་སེམས་ཅན་ཐམས་ཅད་ལ་ཕན་པར་བྱ་བའི་སྨོན་ལམ་ཡོངས་སུ་རྫོགས་པར་འགྱུར་བར་བྱ་བའི་ཕྱིར་ཆོས་སྟོན་ཏོ། ། བསམ་པ་ཉམ་ཆུང་བའི་སེམས་ཅན་རྣམས་ལ་བྱང་ཆུབ་སེམས་དཔའི་སྟོབས་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །མ་རིག་པའི་མུན་པས་སེམས་བློང་ བའི་སེམས་ཅན་རྣམས་ལ་བྱང་ཆུབ་སེམས་དཔའི་ཡེ་ཤེས་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །གཟུགས་མི་སྡུག་པ་དང་ལྡན་པའི་སེམས་ཅན་ རྣམས་ལ་དེ་བཞིན་གཤེགས་པའི་གཟུགས་ཀྱི་སྐུ་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །ལུས་ཀྱི་དབྱིབས་མི་མཛེས་པ་དང་ལྡན་པའི་སེམས་ཅན་རྣམས་ལ་ཆོས་ཀྱི་སྐུ་ བླ་ན་མེད་པ་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །ཁ་དོག་མི་སྡུག་པ་དང་ལྡན་པའི་སེམས་ཅན་རྣམས་ལ་དེ་བཞིན་གཤེགས་པའི་སྐུ་མདོག་གསེར་གྱི་ཁ་དོག་ལྟ་བུ་དང༌། ཤིན་ཏུ་འཇམ་ཞིང་ཀ་ཙ་ལིནད་ཀ་ལྟར་རེག་ན་བདེ་བའི་ལུས་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །སྡུག་བསྔལ་བའི་སེམས་ཅན་རྣམས་ལ་དེ་བཞིན་གཤེགས་པའི་བདེ་ བ་དམ་པ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །བདེ་བའི་སེམས་ཅན་རྣམས་ལ་ཐམས་ཅད་མཁྱེན་པ་ཉིད་ཀྱི་བདེ་བ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ནད་པ་ན་བའི་ སེམས་ཅན་རྣམས་ལ་བྱང་ཆུབ་སེམས་དཔའི་ལུས་གཟུགས་བརྙན་ལྟ་བུ་ཡོངས་སུ་གྲུབ་པར་བྱ་བའི་ཕྱིར་ཆོས་སྟོན་ཏོ། །དགའ་བ་སྣ་ཚོགས་ལ་བརྩོན་པའི་སེམས་ཅན་ ༄༅། །རྣམས་ལ་བྱང་ཆུབ་སེམས་དཔའི་སྤྱོད་པའི་དགའ་བ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཕོངས་པའི་སེམས་ཅན་རྣམས་ལ་བྱང་ཆུབ་སེམས་ དཔའི་ཆོས་ཀྱི་གཏེར་དང་མཛོད་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །བཟའ་ཤིང་གི་ར་བ་ན་གནས་པའི་སེམས་ཅན་རྣམས་ལ་སངས་རྒྱས་ཀྱི་ཆོས་ཡོངས་སུ་བཙལ་ བ་ལ་མངོན་པར་བརྩོན་པའི་རྒྱུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ལམ་དུ་ཞུགས་པའི་སེམས་ཅན་རྣམས་ལ་ཐམས་ཅད་མཁྱེན་པའི་ལམ་དུ་འཇུག་པར་བྱ་བའི་ཕྱིར་ཆོས་ སྟོན་ཏོ། །གྲོང་ན་གནས་པའི་སེམས་ཅན་རྣམས་ལ་ཁམས་གསུམ་པ་ཐམས་ཅད་ལས་འབྱུང་བར་བྱ་བའི་ཕྱིར་ཆོས་སྟོན་ཏོ། །ཡུལ་གྱི་འདབས་ན་གནས་པའི་སེམས་ཅན་ རྣམས་ལ་ཉན་ཐོས་དང་རྣག་བྱང་ཆུབ་ཀྱི་ལམ་ལས་ཡང་དག་པར་འདའ་བར་བྱ་བ་དང༌། དེ་བཞིན་གཤེགས་པའི་ས་ལ་རབ་ཏུ་དགོད་པར་བྱ་བའི་ཕྱིར་ཆོས་སྟོན་ཏོ། །གྲོང་ རྡལ་ན་འཁོད་པའི་སེམས་ཅན་རྣམས་ལ་ཆོས་ཀྱི་རྒྱལ་པོའི་ཕོ་བྲང་དུ་གནས་པར་འགྱུར་བའི་ཕྱིར་ཆོས་སྟོན་ཏོ། །ཕྱོགས་མཚམས་ན་འཁོད་པའི་སེམས་ཅན་རྣམས་ལ་དུས་ གསུམ་མཉམ་པ་ཉིད་ཀྱི་ཡེ་ཤེས་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཕྱོགས་ན་གནས་པའི་སེམས་ཅན་རྣམས་ལ་ཆོས་ཐམས་ཅད་ཀྱི་ཡེ་ཤེས་མངོན་པར་ཤེས་ པར་བྱ་བའི་ཕྱིར་ཆོས་སྟོན་ཏོ། །འདོད་ཆགས་ལ་གཅིག་ཏུ་དགའ་བའི་སེམས་ཅན་རྣམས་ལ་མི་སྡུག་པའི་སྒོས་འཁོར་བའི་སྲེད་པ་རྣམ་པར་བཟློག་པའི་ཕྱིར་ཆོས་སྟོན་ཏོ། །ཞེ་སྡང་ ལ་སྤྱོད་པའི་སེམས་ཅན་རྣམས་ལ་བྱམས་པ་ཆེན་པོའི་ཚུལ་རྒྱ་མཚོ་ལ་འཇུག་པར་བྱ་བའི་ཕྱིར་ཆོས་སྟོན་ཏོ། །གཏི་མུག་ལ་སྤྱོད་པའི་སེམས་ཅན་རྣམས་ལ་ཆོས་ཐམས་ཅད་ཀྱི་སྒོ་ རྒྱ་མཚོ་རབ་ཏུ་འབྱེད་པའི་ཡེ་ཤེས་མངོན་པར་ཤེས་པར་བྱ་བའི་ཕྱིར་ཆོས་སྟོན་ཏོ། །ཆ་མཉམ་པ་ལ་སྤྱོད་པའི་སེམས་ཅན་རྣམས་ལ་ཐེག་པ་ཐམས་ཅད་ཀྱི་སྨོན་ལམ་གྱི་ཚུལ་ རྒྱ་མཚོས་ཁྱད་པར་དུ་འགྲོ་བར་བྱ་བའི་ཕྱིར་ཆོས་སྟོན་ཏོ། །འཁོར་བའི་ཡུལ་གྱི་དགའ་བའི་བསམ་པ་ཅན་གྱི་སེམས་ཅན་རྣམས་ལ་འཁོར་བའི་ཡུལ་དགའ་བ་རྣམ་པར་བཟློག་ པའི་ཕྱིར་ཆོས་སྟོན་ཏོ། །འཁོར་བའི་སྡུག་བསྔལ་ཐམས་ཅད་ཀྱིས་གཙེས་པའི་སེམས་ཅན་རྣམས་ལ་འཁོར་བའི་སྡུག་བསྔལ་ཐམས་ཅད་ཀྱིས་ཉེ་བར་ཉོན་མོངས་པ་མེད་པར་ བྱ་བའི་ཕྱིར་ཆོས་སྟོན་ཏོ། །དེ་བཞིན་གཤེགས་པས་འདུལ་བའི་སེམས་ཅན་རྣམས་ལ་མི་སྐྱེ་བའི་གནས་ཡང་དག་པར་བསྟན་པའི་ཕྱིར་ཆོས་སྟོན་ཏོ། །ཕུང་པོ་ལ་གནས་པའི་ བསམ་པ་ཅན་གྱི་སེམས་ཅན་རྣམས་ལ་གཞི་མེད་པའི་ཆོས་ཀྱི་སྤྱོད་ཡུལ་ལ་རྣམ་པར་སྤྱོད་པར་བྱ་བའི་ཕྱིར་ཆོས་སྟོན་ཏོ། །བསམ་པ་ཞུམ་པའི་སེམས་ཅན་རྣམས་ལ་ལམ་གྱི་ ༄༅། །རྒྱན་གྱི་ཁྱད་པར་ཡང་དག་པར་བསྟན་པར་བྱ་བའི་ཕྱིར་ཆོས་སྟོན་ཏོ། །མཐོ་བའི་ང་རྒྱལ་ཅན་གྱི་སེམས་ཅན་རྣམས་ལ་ཆོས་ཐམས་ཅད་མཉམ་པ་ཉིད་ཀྱི་ བཟོད་པ་ཡང་དག་པར་བསྟན་པའི་ཕྱིར་ཆོས་སྟོན་ཏོ། །གཡོ་སྒྱུའི་ཡུལ་གྱི་བསམ་པ་དང་ལྡན་པའི་སེམས་ཅན་རྣམས་ལ་བྱང་ཆུབ་སེམས་དཔའི་བསམ་པ་ཡོངས་སུ་དག་ པར་བྱ་བའི་ཕྱིར་ཆོས་སྟོན་ཏོ། །དེ་ལྟར་རིགས་ཀྱི་བུ། ཁོ་མོ་ནི། སེམས་ཅན་ཐམས་ཅད་ཆོས་ཀྱི་སྦྱིན་པས་ཡོངས་སུ་བསྡུས་ཤིང་ངན་སོང་གི་ལམ་གྱི་རྒྱུད་སྡུག་བསྔལ་བ་ ཐམས་ཅད་ནས་རྣམ་པར་བཟློག་པ་དང༌། ལྷ་དང་མིའི་ཕུན་སུམ་ཚོགས་པ་དང༌། བདེ་བ་ཡོངས་སུ་བསྟན་པ་དང༌། ཁམས་གསུམ་པ་ལས་གྱེན་དུ་བསྐྱེད་པ་དང༌། ཐམས་ ཅད་མཁྱེན་པ་ཉིད་ལ་རབ་ཏུ་དགོད་པ་དང༌། ཐབས་སྣ་ཚོགས་ཀྱིས་ཡོངས་སུ་སྨིན་པར་བྱེད་བྱེད་པས་དགའ་བ་ཆེན་པོའི་ཤུགས་རྒྱ་མཚོ་སྣང་བ་རབ་ཏུ་ཐོབ་པས་དགའ་ཞིང་ སྤྲོ་ལ་ཡིད་བདེ་བར་གྱུར་པའོ། །གཞན་ཡང་རིགས་ཀྱི་བུ། ཁོ་མོ་ནི། ཕྱོགས་དང་ཕྱོགས་མཚམས་ཀྱི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ལ་རྣམ་པར་ ལྟ་ཞིང་སྨོན་ལམ་རྒྱ་མཚོ་ལ་སྤྱོད་པའི་བྱང་ཆུབ་སེམས་དཔའ་ལུས་སྣ་ཚོགས་རྣམ་པར་དག་པ་འོད་ཀྱི་དཀྱིལ་འཁོར་སྣ་ཚོགས་ཀྱི་རྒྱན་དང་ལྡན་པ། འོད་ཟེར་དང་འོད་ཀྱི་ དཀྱིལ་འཁོར་ཁ་དོག་མཐའ་ཡས་པ་རབ་ཏུ་འགྱེད་པ། ཐམས་ཅད་མཁྱེན་པ་ཉིད་ཀྱི་ཚུལ་རྒྱ་མཚོ་སྣ་ཚོགས་ལ་ཞུགས་པའི་ཡེ་ཤེས་སྣང་བ་ཅན། ཏིང་ངེ་འཛིན་རྒྱ་མཚོ་སྣ་ཚོགས་ལ་ཞུགས་ པ༑ རྣམ་པར་འཕྲུལ་པ་སྣ་ཚོགས་ཀྱི་ཡུལ་དང་ལྡན་པ། དབྱངས་ཀྱི་ཡན་ལག་དང༌། སྐད་རྒྱ་མཚོ་སྣ་ཚོགས་ཀྱི་དབྱངས་དང་ལྡན་པ། རྒྱན་སྣ་ཚོགས་ཀྱིས་རྣམ་པར་ཀླུབས་པའི་ལུས་ཅན། དེ་བཞིན་གཤེགས་པའི་ཚུལ་སྣ་ཚོགས་ལ་ཞུགས་པ། ཞིང་རྒྱ་མཚོ་འབྱམས་ཀླས་པ་སྣ་ཚོགས་སུ་ཞུགས་པའི་ལུས་དང་ལྡན་པ། སངས་རྒྱས་རྒྱ་མཚོ་སྣ་ཚོགས་ལ་ཞུགས་པ། ཐ་ དད་པ་ཡང་དག་པར་ཤེས་པ་རྒྱ་མཚོ་སྣ་ཚོགས་ལ་ཞུགས་པ། དེ་བཞིན་གཤེགས་པའི་རྣམ་པར་ཐར་པ་དང༌། ཡེ་ཤེས་ཀྱི་ཡུལ་སྣ་ཚོགས་ཀྱིས་སྣང་བར་གྱུར་པ། ཡེ་ཤེས་རྒྱ་མཚོ་ སྣ་ཚོགས་ཀྱི་སྣང་བ་རབ་ཏུ་ཐོབ་པ། ཏིང་ངེ་འཛིན་རྒྱ་མཚོ་སྣ་ཚོགས་ཀྱི་ཚུལ་ལ་རྣམ་པར་སྤྱོད་པ། ཆོས་སྣ་ཚོགས་ཀྱི་རྣམ་པར་ཐར་པའི་གཞལ་མེད་ཁང་རྣམ་པར་རྩེ་བའི་ཡུལ་ དང་ལྡན་པ། ཐམས་ཅད་མཁྱེན་པ་ཉིད་ཀྱི་སྒོ་སྣ་ཚོགས་ལེ་མངོན་དུ་གནས་པ། ཆོས་ཀྱི་དབྱིངས་སྣ་ཚོགས་ཀྱི་ནམ་མཁའི་རྒྱན་དང་ལྡན་པ། རྒྱན་སྣ་ཚོགས་ཀྱི་སྤྲིན་གྱིས་ནམ་མཁའ་ རྒྱས་པར་འགེངས་པ། འཁོར་གྱི་དཀྱིལ་འཁོར་རྒྱ་མཚོ་སྣ་ཚོགས་ལ་རྣམ་པར་ལྟ་བ། འཇིག་རྟེན་གྱི་ཁམས་སྣ་ཚོགས་ནས་འདུས་པ། སངས་རྒྱས་ཀྱི་ཞིང་སྣ་ཚོགས་འབྱམས་ ༄༅། །ཀླས་པར་རྗེས་སུ་འདོང་ངོ༌། །ཕྱོགས་རྒྱ་མཚོ་སྣ་ཚོགས་ནས་ཡོངས་སུ་འདུས་པ། དེ་བཞིན་གཤེགས་པ་ཐ་དད་པས་བཀྱེ་བ། དེ་བཞིན་གཤེགས་ པ་ཐ་དད་པའི་ཞབས་ཀྱི་དྲུང་ནས་ལྷགས་པ། བྱང་ཆུབ་སེམས་དཔའི་ཚོགས་སྣ་ཚོགས་ཀྱི་འཁོར་དང་ལྡན་པ། རྒྱན་སྣ་ཚོགས་ཀྱི་སྤྲིན་གྱི་ཆར་རབ་ཏུ་འབེབས་པ། དེ་བཞིན་ གཤེགས་པའི་ཚུལ་སྣ་ཚོགས་ལ་ཞུགས་པ། དེ་བཞིན་གཤེགས་པའི་ཆོས་རྒྱ་མཚོ་སྣ་ཚོགས་ལ་རྣམ་པ་སྤྱོད་པ། ཡེ་ཤེས་སྣ་ཚོགས་རྒྱ་མཚོ་ལ་ཞུགས་པ། རྒྱན་གྱི་ སྙིང་པོ་སྣ་ཚོགས་ཅན་གྱི་སྟན་ལ་འཁོད་པ་རྣམས་ཀྱི་དགའ་བ་སྣ་ཚོགས་ཀྱི་ཤུགས་རྒྱ་མཚོ་ཡོངས་སུ་བསྐྱེད་དེ། དེ་དག་དགའ་བ་སྣ་ཚོགས་ཀྱི་ཤུགས་རྒྱ་མཚོ་ཡོངས་ སུ་སྐྱེས་ནས་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོར་འདོང་སྟེ། དེ་དག་དེ་བཞིན་གཤེགས་པའི་སྟོབས་ཚད་མེད་པ་རྗེས་སུ་སེམས་པས་ཀྱང་དགའ་ བའི་ཤུགས་ཆེན་པོ་རྒྱ་མཚོ་ཡོངས་སུ་འབྱུང་བར་འགྱུར་རོ། །རིགས་ཀྱི་བུ། གཞན་ཡང་ཁོ་མོ་ནི། བཅོམ་ལྡན་འདས་རྣམ་པར་སྣང་མཛད་ཀྱི་གཟུགས་ཀྱི་སྐུ་ཡོངས་སུ་ དག་པ་མཚན་གྱིས་རབ་ཏུ་བརྒྱན་པ་བསམ་གྱིས་མི་ཁྱབ་པ་མཐོང་ནས་དགའ་བ་ཆེན་པོ་དང༌། མོས་ཤིང་ཉམས་བདེ་བ་རབ་ཏུ་འཐོབ་སྟེ། སེམས་ཀྱི་སྐད་ཅིག་རེ་རེ་ ལའང་འོད་ཀྱི་དཀྱིལ་འཁོར་ཆོས་ཀྱི་དབྱིངས་ལྟར་ཡངས་པ། ཁ་དོག་རྒྱ་མཚོ་མཐའ་དང་དབུས་མེད་པར་སྣང་བ་ལ་ལྟ་ཞིང༌། སེམས་ཀྱི་སྐད་ཅིག་རེ་རེ་ལ་དགའ་བ་ཆེན་པོའི་ ཤུགས་རྒྱ་མཚོ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་བ་སྤུའི་སྒོ་རེ་རེ་ནས་ཀྱང་འོད་ཟེར་ཆེན་པོ་སངས་རྒྱ་ཀྱི་ཞིང་ མཐའ་དང་དབུས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། འོད་ཟེར་རེ་རེ་ཞིང་ཡང་འོད་ཟེར་རྒྱ་མཚོ་སངས་རྒྱས་ཀྱི་ཞིང་མཐའ་ཡས་པའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་ དང་ལྡན་པས་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པ་དང༌། སེམས་ཅན་ཐམས་ཅད་ཀྱི་སྡུག་བསྔལ་རབ་ཏུ་ཞི་བར་མཛད་པ་མཐོང་ཞིང་སེམས་ཀྱི་སྐད་ཅིག་རེ་རེ་ ལ་དགའ་བ་ཆེན་པོའི་ཤུགས་རྒྱ་མཚོ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་དབུ་དང༌། སྐུ་ཕྲག་པ་གཉིས་ཀྱི་ལྷུན་ལས་ སེམས་ཀྱི་སྐད་ཅིག་རེ་རེ་ལ་རིན་པོ་ཆེ་ཐམས་ཅད་ཀྱི་འོད་འཕྲོ་བའི་རིའི་སྤྲིན། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་འབྱུང་ཞིང་ཆོས་ཀྱི་དབྱིངས་རྒྱ་མཚོ་ཐམས་ ཅད་རྒྱས་པར་འགེངས་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ ༄༅། །ཀྱི་སྐུའི་བ་སྤུའི་སྒོ་རེ་རེ་ནས་སེམས་ཀྱིས་སྐད་ཅིག་རེ་རེ་ལ་ཁ་དོག་དྲི་ཞིམ་པོ་དང༌། འོད་ཟེར་སྣ་ཚོགས་ཅན་གྱི་སྤྲིན། སངས་རྒྱས་ཀྱི་ཞིང་ཐམས་ཅད་ཀྱི་ རྡུལ་ཤིན་ཏུ་ཕྲ་བ་སྙེད་འབྱུང་ཞིང་སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། ། རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་མཚན་རེ་རེ་ནས་དེ་བཞིན་གཤེགས་པའི་སྐུ་ གཟུགས་མཚན་གྱིས་རབ་ཏུ་བརྒྱན་པའི་སྤྲིན། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་བྱུང་སྟེ་འཇིག་རྟེན་གྱི་ཁམས་རྒྱ་མཚོ་ཐམས་ཅད་རྒྱས་པར་འགེངས་ པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པ་སྣང་མཛད་ཀྱི་སྐུའི་དཔེ་བྱད་བཟང་ པོ་རེ་རེ་ལས་སེམས་ཀྱི་སྐད་ཅིག་རེ་རེ་ལ་དེ་བཞིན་གཤེགས་པའི་སྤྲུལ་པའི་སྐུ་དཔེ་བྱད་བཟང་པོ་བརྒྱད་ཅུས་ཤིན་ཏུ་འབར་བའི་སྤྲིན། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ ཤིན་ཏུ་ཕྲ་བ་སྙེད་བྱུང་སྟེ་སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་ཤིང༌། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་དབྱངས་སུ་སྒྲོག་པའི་འབྲུག་ སྒྲ་འབྱིན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་ རྣམ་པར་བལྟས་ནས། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་ཐམས་ཅད་ནས་སངས་རྒྱས་རྣམ་པར་འཕྲུལ་པའི་སྐུ་དང་པོ་བྱང་ཆུབ་ཏུ་ཐུགས་བསྐྱེད་པ་དང་བཅས། ཕ་རོལ་ཏུ་ ཕྱིན་པའི་ལམ་རྣམ་པར་དག་པའི་རྒྱན་དང་བཅས། བྱང་ཆུབ་སེམས་དཔའི་ས་ཡོངས་སུ་གནོན་པའི་རྣམ་པར་འཕྲུལ་པ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་ རྡུལ་ཤིན་ཏུ་ཕྲ་བ་སྙེད་འབྱུང་བ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་ སྣང་མཛད་ཀྱི་སྐུ་ལས་སེམས་ཀྱི་སྐད་ཅིག་རེ་རེ་ལ་ལྷའི་དབང་པོའི་ལུས་ཀྱི་སྤྲིན། ལྷའི་དབང་པོའི་རྣམ་པར་འཕྲུལ་པ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ ཤིན་ཏུ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ་ལྷའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ ༄༅། །ལས་སེམས་ཀྱི་སྐད་ཅིག་རེ་རེ་ལ་ཀླུའི་དབང་པོའི་ལུས་ཀྱི་སྤྲིན། ཀླུའི་དབང་པོའི་རྣམ་པར་འཕྲུལ་པ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ ཤིན་ཏུ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ་ཀླུའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་ཐམས་ཅད་ནས་གནོད་སྦྱིན་གྱི་དབང་པོའི་ལུས་ཀྱི་སྤྲིན། གནོད་སྦྱིན་གྱི་དབང་པོའི་རྣམ་པར་འཕྲུལ་པ་དང་ བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ་གནོད་སྦྱིན་གྱི་ལུས་ཡོངས་སུ་བསྟན་པས་འདུལ་ བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་ བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་ཐམས་ཅད་ནས་དྲི་ཟའི་དབང་པོའི་ལུས་ཀྱི་སྤྲིན། དྲི་ཟའི་ དབང་པོའི་རྣམ་པར་འཕྲུལ་པ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ་དྲི་ཟའི་དབང་པོའི་ ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ།། རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་ལྷ་མ་ཡིན་གྱི་དབང་པོའི་ལུས་ ཀྱི་སྤྲིན༑ ལྷ་མ་ཡིན་གྱི་དབང་པོའི་རྣམ་པར་འཕྲུལ་པ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་ པར་བཀང་སྟེ་ལྷ་མ་ཡིན་གྱི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་པར་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་ རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་ སྤུའི་སྒོ་རེ་རེ་ནས་ནམ་མཁའ་ལྡིང་གི་དབང་པོའི་ལུས་ཀྱི་སྤྲིན། ནམ་མཁའ་ལྡིང་གི་དབང་པོའི་རྣམ་པ་འཕྲུལ་བ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ ༄༅། །ཏུ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ་ནམ་མཁའ་ལྡིང་གི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །གཞན་ཡང་རིགས་ཀྱི་བུ། བཅོམ་ལྡན་ འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་མི་འམ་ཅིའི་དབང་པོའི་ལུས་ཀྱི་སྤྲིན། མི་འམ་ཅིའི་དབང་པོའི་རྣམ་པར་ འཕྲུལ་པ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ་མི་འམ་ཅིའི་དབང་པོའི་ལུས་ ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་ བོ༑ ༑རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་ལྟོ་འཕྱེ་ཆེན་པོའི་ལུས་ ཀྱི་སྤྲིན། ལྟོ་འཕྱེ་ཆེན་པོའི་རྣམ་པར་འཕྲུལ་པ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་ བཀང་སྟེ་ལྟོ་འཕྱེ་ཆེན་པོའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་ མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པ་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་ སྒོ་རེ་རེ་ནས་མིའི་དབང་པོའི་ལུས་ཀྱི་སྤྲིན། མིའི་དབང་པོའི་རྣམ་པར་འཕྲུལ་པ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་ དབྱིངས་ཐམས་ཅད་རྒྱས་པར་བཀང་སྟེ་མིའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་འཐོབ་བོ། །རིགས་ཀྱི་བུ། གཞན་ཡང་བཅོམ་ལྡན་འདས་རྣམ་པ་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ ཅིག་རེ་རེ་ལ་བ་སྤུའི་སྒོ་རེ་རེ་ནས་ཚངས་པའི་དབང་པོའི་ལུས་ཀྱི་སྤྲིན། ཚངས་པའི་དབང་པོའི་རྣམ་པར་འཕྲུལ་པའི་ཡུལ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་ རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ་ཚངས་པའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་ ༄༅། །གནས་ཤིང་ཚངས་པའི་སྒྲ་སྐད་དང༌། དབྱངས་ཀྱིས་ཆོས་སྟོན་པ་མཐོང་ནས་སེམས་ཀྱི་སྐད་ཅིག་རེ་རེ་ལ་ཐམས་ཅད་མཁྱེན་པ་ཉིད་དང་ལྡན་པའི་དགའ་ བ་ཆེན་པོའི་ཤུགས་རྒྱ་མཚོ་ཆོས་ཀྱི་དབྱིངས་ལྟར་རྒྱ་ཆེ་ཞིང་ཤིན་ཏུ་ཡངས་པ་རབ་ཏུ་འཐོབ་སྟེ། སྔོན་ཐོབ་པར་གྱུར་པ་འཐོབ་པར་འགྱུར་བ་མ་ཡིན་ནོ། །སྔོན་ཁོང་དུ་ཆུད་པ་ ཁོང་དུ་ཆུད་པར་འགྱུར་བ་མ་ཡིན་ནོ། །སྔོན་ཞུགས་པ་ལ་འཇུག་པར་འགྱུར་བ་མ་ཡིན་ནོ། །སྔོན་ཁྱབ་པར་གྱུར་པ་ཁྱབ་པར་འགྱུར་བ་མ་ཡིན་ནོ། །སྔོན་མཐོང་བ་མཐོང་བར་ འགྱུར་བ་མ་ཡིན་ནོ། །སྔོན་ཐོས་པ་ཐོས་པར་འགྱུར་བ་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཀྱི་རང་བཞིན་གྱི་མཚན་ཉིད་ཡོངས་སུ་ཤེས་པ་ལྟར་ན། ཆོས་ཐམས་ཅད་མཚན་ ཉིད་གཅིག་པའང་ཅི་རོབ་མ་ཡིན་ཏེ། དུས་གསུམ་གྱི་ཚུལ་འཇུག་པའི་སྒོར་ཞུགས་ན། ཆོས་ཐམས་ཅད་ཀྱང་མཐའ་དང་དབུས་མེད་པར་བསྟན་དུ་ཡོད་པ་སྟེ། འདི་ནི། རིགས་ ཀྱི་བུ༑ བྱང་ཆུབ་སེམས་དཔའི་རྣམ་པར་ཐར་པའི་ཚུལ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པའི་ཚུལ་རྒྱ་མཚོའི་སྣང་བ་སྟེ། རིགས་ ཀྱི་བུ༑ རྣམ་པར་ཐར་པ་འདི་ནི། ཆོས་ཀྱི་དབྱིངས་ཀྱི་ཚུལ་རྒྱ་མཚོ་ལ་འཇུག་པའི་ཕྱིར་མཐའ་དང་དབུས་མེད་པའོ། །རྣམ་པར་ཐར་པ་འདི་ནི། ཐམས་ཅད་མཁྱེན་པ་ཉིད་དུ་སེམས་ བསྐྱེད་པ་དང་ཐ་མི་དད་པས་ཟད་མི་ཤེས་པའོ། །རྣམ་པར་ཐར་པ་འདི་ནི། བྱང་ཆུབ་སེམས་དཔའི་ཡེ་ཤེས་ཀྱི་མིག་གིས་རྣམ་པར་ཤེས་པར་བྱ་བ་ཡིན་པས་མུ་མེད་པའོ། །རྣམ་ པར་ཐར་པ་འདི་ནི། ཆོས་ཀྱི་དབྱིངས་ཐ་མི་དད་པའི་ཚུལ་གྱིས་གཏན་དུ་རྒྱས་པར་འགེངས་པས་གཏིང་མེད་བའོ། །རྣམ་པར་ཐར་པ་འདི་ནི། དམིགས་པ་གཅིག་ཏུ་རྣམ་པར་ འཕྲུལ་པ་ཐམས་ཅད་ཡོངས་སུ་འདུ་བར་བྱེད་པས་སྒོ་ཐམས་ཅད་དང་ལྡན་པའི། །རྣམ་པར་ཐར་པ་འདི་ནི། ཆོས་ཐམས་ཅད་ཀྱི་ལུས་དང་མི་གཉིས་པར་སྤྱོད་པས་དོན་ཡོད་ པའོ༑ ༑རྣམ་པར་ཐར་པ་འདི་ནི། སྒྱུ་མ་ལྟ་བུར་ཡོངས་སུ་སྤྱོད་པས་མ་སྐྱེས་པའོ། །རྣམ་པར་ཐར་པ་འདི་ནི། ཐམས་ཅད་མཁྱེན་པ་ཉིད་ཀྱི་སྨོན་ལམ་གྱི་གཟུགས་བརྙན་དུ་བྱུང་ བས་གཟུགས་བརྙན་ལྟ་བུའོ། །རྣམ་པར་ཐར་པ་འདི་ནི། བྱང་ཆུབ་སེམས་དཔའི་སྤྱོད་པས་ཤིན་ཏུ་སྤྲུལ་པའི་ཕྱིར་སྤྲུལ་པ་ལྟ་བུའོ། །རྣམ་པར་ཐར་པ་འདི་ནི། འགྲོ་བ་ཐམས་ ཅད་ཀྱི་རྟེན་དུ་གྱུར་པས་ས་ཆེན་པོ་ལྟ་བུའོ། །རྣམ་པར་ཐར་པ་འདི་ནི། འགྲོ་བ་ཐམས་ཅད་སྙིང་རྗེ་ཆེན་པོས་མངོན་པར་རླན་པར་བྱེད་པས་ཆུའི་ཕུང་པོ་ལྟ་བུའོ། །རྣམ་པར་ཐར་པ་ འདི་ནི༑ སེམས་ཅན་ཐམས་ཅད་ཀྱི་སྲེད་པའི་རླན་ཡོངས་སུ་སྐེམ་པས་མེའི་ཕུང་པོ་ལྟ་བུའོ། །རྣམ་པ་ཐར་པ་འདི་ནི། སེམས་ཅན་ཐམས་ཅད་ཐམས་ཅད་མཁྱེན་པ་ཉིད་དུ་ ༄༅། །རབ་ཏུ་སྟོན་པའི་ཕྱིར་རླུང་གི་ཕུང་པོ་ལྟ་བུའོ། །རྣམ་པར་ཐར་པ་འདི་ནི། འགྲོ་བ་ཐམས་ཅད་ཀྱི་ཡོན་ཏན་གྱི་རྒྱན་གྱི་གཞི་ཡིན་པས་རྒྱ་མཚོ་ལྟ་བུའོ།། རྣམ་པར་ཐར་པ་འདི་ནི། ཆོས་ཐམས་ཅད་ཀྱི་ཡེ་ཤེས་རིན་པོ་ཆེ་རྒྱ་མཚོ་ལས་མངོན་པར་འཕགས་པས་རི་རབ་རིའི་རྒྱལ་པོ་ལྟ་བུའོ། །རྣམ་པར་ཐར་པ་འདི་ནི། ཆོས་ ཐམས་ཅད་ཀྱི་རྣམ་པར་ཐར་པའི་གཞལ་མེད་ཁང་རྣམ་པར་སྐྱོད་པའི་ཕྱིར་རྣམ་པར་སྐྱོད་པའི་རླུང་གི་དཀྱིལ་འཁོར་ལྟ་བུའོ། །རྣམ་པར་ཐར་པ་འདི་ནི། དུས་གསུམ་དུ་ བྱུང་བའི་དེ་བཞིན་གཤེགས་པའི་རྣམ་པར་འཕྲུལ་པ་ཐམས་ཅད་ཀྱི་གོ་འབྱེད་པས་ནམ་མཁའ་ལྟ་བུའོ། །རྣམ་པར་ཐར་པ་འདི་ནི། སེམས་ཅན་ཐམས་ཅད་ལ་ཆོས་ ཀྱི་སྤྲིན་གྱི་ཆར་མངོན་དུ་འབེབས་པས་སྤྲིན་ཆེན་པོ་ལྟ་བུའོ། །རྣམ་པར་ཐར་པ་འདི་ནི། སེམས་ཅན་ཐམས་ཅད་ཀྱི་མི་ཤེས་པའི་མུན་ནག་རྣམ་པར་སེལ་པས་ཉི་མ་ལྟ་ བུའོ༑ ༑རྣམ་པར་ཐར་པ་འདི་ནི། བསོད་ནམས་དང་ཡེ་ཤེས་ཀྱི་རྒྱ་མཚོ་ཆེན་པོས་ཤིན་ཏུ་སྒྲུབ་པའི་ཕྱིར་ཟླ་བ་ལྟ་བུའོ། །རྣམ་པར་ཐར་པ་འདི་ནི། ཐམས་ཅད་དུ་སོང་བའི་ ཕྱིར་དེ་བཞིན་ཉིད་ལྟ་བུའོ། །རྣམ་པར་ཐར་པ་འདི་ནི། ལས་ཀྱི་ཆོས་ཀྱིས་ཤིན་ཏུ་སྤྲུལ་པའི་ཕྱིར་རང་གི་གྲིབ་མ་ལྟ་བུའོ། །རྣམ་པར་ཐར་པ་འདི་ནི། སེམས་ཅན་གྱི་ མོས་པ་ཇི་ལྟ་བ་བཞིན་དུ་ཆོས་ཀྱི་སྒྲ་རབ་ཏུ་སྒྲོག་པས་བྲག་ཅ་ལྟ་བུའོ། །རྣམ་པར་ཐར་པ་འདི་ནི། བསམ་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱིས་རྣམ་པར་དམིགས་པར་བྱེད་ པའི་ཕྱིར་གཟུགས་བརྙན་ལྟ་བུའོ། །རྣམ་པར་ཐར་པ་འདི་ནི། སངས་རྒྱས་ཐམས་ཅད་ཀྱི་རྣམ་པར་འཕྲུལ་པའི་མེ་ཏོག་ཤིན་ཏུ་རྒྱས་པའི་ཕྱིར་ཤིང་གི་རྒྱལ་པོ་ལྟ་བུའོ། །རྣམ་པར་ ཐར་པ་འདི་ནི། མི་ཤིགས་པའི་ཆོས་ཅན་ཡིན་པས་རྡོ་རྗེ་ལྟ་བུའོ། །རྣམ་པར་ཐར་པ་འདི་ནི། རྣམ་པར་འཕྲུལ་པ་མཐའ་དང་དབུས་མེད་པ་རྒྱ་མཚོ་མངོན་པར་སྒྲུབ་པས་ནོར་བུ་ཡིད་ བཞིན་རིན་པོ་ཆེའི་རྒྱལ་པོ་ལྟ་བུའོ། །རྣམ་པར་ཐར་པ་འདི་ནི། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་རྣམ་པར་དམིགས་པར་བྱ་བ་ལ་སྒྲིབ་པ་ མེད་པས་རིན་པོ་ཆེའི་རྒྱལ་པོ་དྲི་མ་མེད་པའི་སྙིང་པོ་ལྟ་བུའོ། །རྣམ་པར་ཐར་པ་འདི་ནི། སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་མཉམ་པ་ཉིད་དུ་སྒྲོག་པས་ནོར་བུ་རིན་པོ་ཆེ་དགའ་ བའི་རྒྱལ་མཚན་ལྟ་བུ་སྟེ། རིགས་ཀྱི་བུ། བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་ཤིན་ཏུ་ཡངས་པ་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་ པ་འདི་ནི། དཔེ་ཚད་མེད་པ་རྣམ་པར་དགོད་པའི་རྗེས་སུ་འབྲང་བས་བསྟན་པར་བྱའོ། །དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་པ་དང་ལྡན་ ༄༅། །པ་ལ་འདི་སྐད་ཅེས་སྨྲས་སོ། །འཕགས་མ་ལྷ་མོ། ཇི་ལྟར་ནན་ཏན་དུ་བགྱིས་ན། བྱང་ཆུབ་སེམས་དཔས་དེ་ལྟ་བུའི་རྣམ་པར་ཐར་པ་དེ་ཡོངས་སུ་ འགྲུབ་པར་འགྱུར། སྨྲས་པ། རིགས་ཀྱི་བུ། བཅུ་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་ཚོགས་ཆེན་པོ་ཆོས་ཡངས་པ་དང་ལྡན་པ། རྣམ་པར་རྒྱ་ཆེན་པོ། གསལ་བ་ཆེན་པོ། སྣང་བ་ཆེན་པོ། འོད་ཆེན་པོ། བྱིན་ཆེན་པོ། རྣམ་པར་དབྱེ་བ་ཆེན་པོ། འབྱུང་བ་ཆེན་པོ། ཕུན་སུམ་ཚོགས་པ་ཆེན་པོ་སྟེ། དེ་དག་ལ་ནན་ཏན་དུ་ བྱེད་པའི་བྱང་ཆུབ་སེམས་དཔའ་རྣམས་ཀྱི་རྣམ་པར་ཐར་པ་འདི་ལྟ་བུ་ཕུན་སུམ་ཚོགས་པར་འགྱུར་བ་དག་གོ། བཅུ་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའི་ སྦྱིན་པ་སེམས་ཅན་རྒྱ་མཚོ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཡོངས་སུ་ཚིམ་པར་བྱེད་པ་ལ་ཞུགས་པ་ནི། རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་ཚུལ་ ཁྲིམས་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་པའི་ནན་ཏན་ལ་ཞུགས་པ་ནི། རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་བཟོད་པ་ཆོས་ཐམས་ཅད་ཀྱི་ རང་བཞིན་ངེས་པར་རྟོགས་པར་བྱ་བ་ལ་ཞུགས་པ་ནི། རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་བརྩོན་འགྲུས་ཐམས་ཅད་མཁྱེན་པ་ཉིད་དུ་ཡང་དག་པར་བརྩམས་ པ་ལས་ཕྱིར་མི་ལྡོག་པ་ལ་ཞུགས་པ་ནི། རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་བསམ་གཏན་སེམས་ཅན་ཐམས་ཅད་ཀྱི་ཉོན་མོངས་པའི་གདུང་བ་རབ་ཏུ་ཞི་བར་ བྱ་བ་ལ་ཞུགས་པ་ནི། རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་ཤེས་རབ་ཆོས་རྒྱ་མཚོ་ཐམས་ཅད་ཡོངས་སུ་ཤེས་པར་བྱ་བ་ལ་ཞུགས་པ་ནི་།རྒྱ་ཆེན་པོའི་ཆོས་སོ།། བྱང་ཆུབ་སེམས་དཔའི་ཐབས་སེམས་ཅན་རྒྱ་མཚོ་ཐམས་ཅད་ཡོངས་སུ་སྨིན་པར་བྱ་བ་དང་གདུལ་བ་ལ་ཞུགས་པ་ནི། རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་སྨོན་ ལམ་ཕྱི་མའི་མཐའི་མུར་ཐུག་པའི་བསྐལ་པར་སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་སྤྱད་པའི་ཕྱིར་ཞིང་རྒྱ་མཚོ་ཐམས་ཅད་ལ་ཞུགས་པ་ནི། རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་སྟོབས་སངས་རྒྱས་ཀྱི་ཞིང་ཐམས་ཅད་དུ་སྐད་ཅིག་རེ་རེ་ལ་མངོན་པར་རྫོགས་པར་འཚང་རྒྱ་བར་ཡོངས་སུ་བསྟན་པ་རྒྱུན་ མི་གཅད་པའི་ཕྱིར་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ལ་ཞུགས་པ་ནི། རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་ཡེ་ཤེས་དུས་གསུམ་གྱི་ཆོས་ཐམས་ ཅད་ལ་སྒྲིབ་པ་མེད་པའི་ཡེ་ཤེས་ཐོབ་པར་བྱ་བའི་ཕྱིར་དེ་བཞིན་གཤེགས་པའི་སྟོབས་ལ་ཞུགས་པ་ནི། རྒྱ་ཆེན་པོའི་ཆོས་སོ། །རིགས་ཀྱི་བུ། བཅུ་པོ་དེ་དག་ནི། བྱང་ ༄༅། །ཆུབ་སེམས་དཔའ་རྣམས་ཀྱི་རྒྱ་ཆེན་པོའི་ཆོས་ཚོགས་ཆེན་པོ་དང་ལྡན་པ་རྣམས་ཏེ། དེ་དག་ལ་གནས་པའི་བྱང་ཆུབ་སེམས་དཔའ་རྣམས་ ཀྱིས་རྣམ་པར་ཐར་པ་དེ་ལྟ་བུ་ཕུན་སུམ་ཚོགས་པར་འགྱུར་རོ། །རྣམ་པར་དག་པར་འགྱུར་རོ། །ཡོངས་སུ་འབྱུང་བར་འགྱུར་རོ། །ཡང་དག་པར་འཕེལ་བར་འགྱུར་ རོ༑ ༑ཀུན་ནས་འབྱུང་བར་འགྱུར་རོ། །རབ་ཏུ་སྐྱེ་བར་འགྱུར་རོ། །ཡོངས་སུ་འགྲུབ་པར་འགྱུར་རོ། །ཤིན་ཏུ་བརྟན་པར་འགྱུར་རོ། །རྣམ་པར་ཡངས་པར་འགྱུར་རོ། ། ཡོངས་སུ་རྫོགས་པར་འགྱུར་རོ། །ཡོངས་སུ་གནས་པར་འགྱུར་རོ། །ནོར་བཟང་གིས་སྨྲས་པ། འཕགས་མ་ལྷ་མོ། ཁྱོད་ཡུན་རིང་པོ་ཇི་སྲིད་ཅིག་ནས་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཏུ་ཞུགས། དེས་སྨྲས་པ། རིགས་ཀྱི་བུ། འཇིག་རྟེན་གྱི་ཁམས་རྒྱ་མཚོ་གཞི་མེ་ཏོག་གི་སྙིང་པོའི་རྒྱན་གྱིས་བརྒྱན་པ་འདིའི་ཤར་ ཕྱོགས་ལོགས་སུ་འཇིག་རྟེན་གྱི་ཁམས་རྒྱ་མཚོ་སྟོང་ཕྲག་བཅུ་འདས་པའི་ཕ་རོལ་ན་འཇིག་རྟེན་གྱི་ཁམས་རྒྱ་མཚོ་རིན་པོ་ཆེ་ཐམས་ཅད་ཀྱིས་དྲི་མ་མེད་པའི་འོད་དུ་རྣམ་ པར་བརྒྱན་པ་ཞེས་བྱ་བ་ཡོད་དོ། །དེའི་དབུས་ན་འཇིག་རྟེན་གྱི་ཁམས་ཀྱི་རྒྱུད་དེ་བཞིན་གཤེགས་པ་ཐམས་ཅད་ཀྱི་འོད་དང༌། སྨོན་ལམ་གྱི་དབྱངས་ཞེས་བྱ་བ་ཡོད་ དོ༑ ༑དེའི་དབུས་ན་འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱི་སྤྲིན་སྣ་ཚོགས་དང་ལྡན་པ། འཇིག་རྟེན་གྱི་འོག་གི་མཚམས་ནས་རིན་པོ་ཆེ་ཐམས་ཅད་ཀྱི་ཕྲེང་བའི་དྲ་བ་རྒྱ་མཚོས་ བརྟན་པ། རིན་པོ་ཆེའི་རྒྱལ་པོ་སྤོས་ཀྱི་རྡོ་རྗེ་ཐམས་ཅད་ཀྱི་རྒྱན་གྱི་ལྷུན་དང་ལྡན་པ། ཁང་པ་བརྩེགས་པ་རྒྱའི་དབྱིབས་སུ་འདུག་པ། རྣམ་པར་དག་ཅིང་ཀུན་ནས་ཉོན་མོངས་ པ༑ ལྷ་རྫས་ཀྱི་གཞལ་མེད་ཁང་དང་གནས་ཀྱི་སྤྲིན་གྱིས་ཀུན་ཏུ་གང་བ། གསེར་ལྟར་དྲི་མ་མེད་པའི་འོད་ཀྱི་རྒྱན་ཅེས་བྱ་བ་ཡོད་པ་དེར་བསྐལ་པ་ཀུན་ཏུ་སྣང་བའི་རྒྱལ་མཚན་ ཞེས་བྱ་བ་བྱུང་སྟེ། འཇིག་རྟེན་གྱི་ཁམས་དེ་ན་སྙིང་པོ་བྱང་ཆུབ་རིན་པོ་ཆེ་ཐམས་ཅད་ཀྱི་སྙིང་པོ་འོད་སྣ་ཚོགས་ཅན་ཞེས་བྱ་བ་ཡོད་དེ། དེར་བཅོམ་ལྡན་འདས་དེ་བཞིན་ གཤེགས་པ་ཕྱིར་མི་ལྡོག་པའི་ཆོས་ཀྱི་དབྱིངས་ཀྱི་དབྱངས་ཞེས་བྱ་བ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། དེའི་ཚེ་དེའི་དུས་ན་ཁོ་ མོ་ཡང་སྙིང་པོ་བྱང་ཆུབ་ཀྱི་ལྷ་མོ་བསོད་ནམས་སྒྲོན་མ་ཕུན་སུམ་ཚོགས་པ་ཀུན་ནས་དཔལ་གྱི་འོད་ཅེས་བྱ་བ་ཞིག་ཏུ་གྱུར་ཏེ། བྱང་ཆུབ་ཀྱི་ཤིང་དེ་ལ་འདུག་འདུག་ནས་ དེར་ཁོ་མོས་དེ་བཞིན་གཤེགས་པ་དེ་མངོན་པར་འཚང་རྒྱ་བའི་རྣམ་པར་འཕྲུལ་པ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ ༄༅། །བཞིན་གཤེགས་པ་དེ་མཐོང་ནས་ཀྱང་ཁོ་མོས་དེ་བཞིན་གཤེགས་པའི་ཡོན་ཏན་རྒྱ་མཚོའི་འོད་ཅེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་འཇིག་ རྟེན་གྱི་ཁམས་དེ་ཉིད་ཀྱི་རྒྱལ་པོའི་གནས་ཀུན་ནས་ཡོངས་སུ་རྒྱས་པའི་དཔལ་གྱི་སྙིང་པོ་ཞེས་བྱ་བར་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་ཀྱི་སྡོང་པོ་རི་བོ་གཟི་ བརྗིད་ཅེས་བྱ་བ་མངོན་པར་སངས་རྒྱས་སོ། །ཁོ་མོས་ནི། དེ་ནས་ཤི་འཕོས་ཏེ་སྙིང་པོ་བྱང་ཆུབ་དེ་ཉིད་དུ་ཡེ་ཤེས་ཕུན་སུམ་ཚོགས་པའི་བསོད་ནམས་འོད་ཅེས་བྱ་བའི་མཚན་ མོའི་ལྷ་མོ་ཞིག་ཏུ་གྱུར་ཅིང་འདུག་འདུག་སྟེ། ཁོ་མོས་དེར་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་སྡོང་པོ་རི་བོ་གཟི་བརྗིད་དེས་ཆོས་ཀྱི་འཁོར་ལོ་བསྐོར་བའི་རྣམ་ པར་འཕྲུལ་པ་མཐོང་ནས་འགྲོ་བ་ཐམས་ཅད་དུ་ཡོངས་སུ་སྟོན་པའི་མཉམ་པ་ཉིད་ཀྱི་འོད་ཀྱི་ཡུལ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ ཉིད་དུ་དེ་བཞིན་གཤེགས་པ་ཆོས་ཀྱི་རྒྱ་མཚོ་ཐམས་ཅད་ཀྱི་གསུང་གི་རྒྱལ་པོ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཆོས་ཐམས་ཅད་ཀྱི་ཡང་ དག་པར་འཕེལ་བར་བྱེད་པའི་གནས་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་རིན་པོ་ཆེའི་འོད་ཟེར་སྒྲོན་མའི་ རྒྱལ་མཚན་རྒྱལ་པོ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་སངས་རྒྱས་རྒྱ་མཚོ་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། ། དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་ཀྱི་སྤྲིན་སྒྲའི་རྒྱལ་པོ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ ཁོ་མོས་ཆོས་རྒྱ་མཚོ་ཐམས་ཅད་ཀྱི་སྒྲོན་མ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོ་ལྷའི་བུ་མོ་ཞིག་ཏུ་གྱུར་ཏེ་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་ པ་ཡེ་ཤེས་སྐར་མདའ་སྣང་བའི་རྒྱལ་པོ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་སེམས་ཅན་ཐམས་ཅད་ཀྱི་སྡུག་བསྔལ་རབ་ཏུ་ཞི་ པར་བྱེད་པའི་སྒྲོན་མ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་རྣམ་པར་འཕྲུལ་པའི་ཤུགས་ཀྱི་ རྒྱལ་མཚན་དཔལ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་དུས་གསུམ་གྱི་དེ་བཞིན་གཤེགས་པ་ཐམས་ཅད་ཡང་དག་པར་འཇུག་ པའི་སྙིང་པོའི་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་ཀྱི་སྒྲོན་མ་ཡེ་ཤེས་ཀྱི་རྣམ་པར་གནོན་པ་ ༄༅། །ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་འཇིག་རྟེན་གྱི་ཁམས་ཐམས་ཅད་དུ་ཡེ་ཤེས་ཐོགས་པ་མེད་པའི་འཁོར་ལོ་ སྣང་བའི་གཟི་བརྗིད་ཅེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཡེ་ཤེས་ཀྱི་སྟོབས་ཀྱི་རི་བོ་གཟི་བརྗིད་ཅེས་ བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་དུས་གསུམ་གྱི་སེམས་ཅན་གྱི་སྤྱོད་པ་དང༌། དབང་པོ་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ ཐོབ་བོ༑ ༑རིགས་ཀྱི་བུ། དེ་ལྟར་ཁོ་མོས་འཇིག་རྟེན་གྱི་ཁམས་གསེར་ལྟར་དྲི་མ་མེད་པའི་འོད་དེར་བསྐལ་པ་ཀུན་ཏུ་སྣང་བའི་རྒྱལ་མཚན་ལ་དེ་བཞིན་གཤེགས་པ་ སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏེ། ལ་ལ་ནི། ལྷའི་དབང་པོར་གྱུར་ཏེ་བསྙེན་བཀུར་ཏོ། །ལ་ལ་ནི། ཀླུའི་དབང་པོར་གྱུར་ཏེ་བསྙེན་བཀུར་ ཏོ༑ ༑ལ་ལ་ནི། གནོད་སྦྱིན་གྱི་དབང་པོར་གྱུར་པས། ལ་ལ་ནི། དྲི་ཟའི་དབང་པོར་གྱུར་པས། ལ་ལ་ནི། ལྷ་མ་ཡིན་གྱི་དབང་པོར་གྱུར་པས། ལ་ལ་ནི། ནམ་མཁའ་ ལྡིང་གི་དབང་པོར་གྱུར་པས། ལ་ལ་ནི། མི་འམ་ཅིའི་དབང་པོར་གྱུར་པས། ལ་ལ་ནི། ལྟོ་འཕྱེ་ཆེན་པོའི་དབང་པོར་གྱུར་པས། ལ་ལ་ནི། མིའི་དབང་པོར་གྱུར་པས། ལ་ལ་ནི། ཚངས་པའི་དབང་པོར་གྱུར་པས། ལ་ལ་ནི། ལྷར་གྱུར་པས། ལ་ལ་ནི། མིར་གྱུར་པས། ལ་ལ་ནི། བུད་མེད་དུ་གྱུར་པས། ལ་ལ་ནི། སྐྱེས་པར་གྱུར་པས། ལ་ལ་ནི། ཁྱེའུར་གྱུར་པས། ལ་ལ་ནི། བུ་མོར་གྱུར་པས་བསྙེན་བཀུར་ཏེ། དེ་བཞིན་གཤེགས་པ་དེ་དག་ཐམས་ཅད་ཀྱང་ཁོ་མོས་མཆེད་པའི་ཡོ་བྱད་ཅི་བདོག་པས་མཆོད་དོ། །དེ་བཞིན་ གཤེགས་པ་དེ་དག་ཐམས་ཅད་ཀྱང་རིམ་གྲོར་བྱས་སོ། །དེ་བཞིན་གཤེགས་པ་དེ་དག་ཐམས་ཅད་ཀྱི་ཆོས་བསྟན་པ་ཡང་ཐོས་སོ། །དེ་ནས་ཁོ་མོ་ཤི་འཕོས་ནས་འཇིག་རྟེན་ གྱི་ཁམས་དེ་ཉིད་དུ་བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཅིག་ཏུ་བྱང་ཆུབ་སེམས་དཔའི་སྤྱོད་པ་སྤྱད་དོ། །དེ་ནས་ཤི་འཕོས་ནས་འཇིག་རྟེན་གྱི་ཁམས་རྒྱ་ མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདིའི་འཇིག་རྟེན་གྱི་ཁམས་མི་མཇེད་དུ་སྐྱེས་ཏེ། ཁོ་མོས་བཅོམ་ལྡན་འདས་དེ་བཞིན་གཤེགས་པ་ལོག་པར་དད་སེལ་ བསྙེན་བཀུར་ཏོ། །དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་མུན་པའི་རྡུལ་ཐམས་ཅད་དང་བྲལ་བས་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ ཁོ་མོས་དེ་བཞིན་གཤེགས་པ་གསེར་ཐུབ་བསྙེན་བཀུར་ཏོ། །དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་ཞིང་རྒྱ་མཚོ་ཐམས་ཅད་སྣང་བ་རྗེས་སུ་འཕྲོ་བར་བྱ་བས་ ༄༅། །རྒྱས་པར་འགེངས་པ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་དེ་བཞིན་གཤེགས་པ་བསོད་སྐྱབས་བསྙེན་བཀུར་ཏེ། དེ་བཞིན་ གཤེགས་པ་དེ་མཐོང་མ་ཐག་ཏུ་ཁོ་མོས་སེམས་ཅན་ཐམས་ཅད་ཀྱི་སྐད་རྒྱ་མཚོ་འབྲུག་སྒྲ་སྒྲོག་པའི་སྒྲ་དབྱངས་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་ བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་འདི་བསྙེན་བཀུར་ཏེ། དེ་སྙིང་པོ་བྱང་ཆུབ་ལ་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ པའི་རྣམ་པར་འཕྲུལ་པའི་སྒོ་རྒྱ་མཚོ་སེམས་ཀྱི་སྐད་ཅིག་རེ་རེ་ལ་ཡོངས་སུ་སྟོན་པ་མཛད་པ་མཐོང་ནས་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་ པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཐོབ་བོ། །དེ་ཐོབ་མ་ཐག་ཏུ་ཆོས་ཀྱི་དབྱིངས་ཀྱི་ཚུལ་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་ བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ལ་ཞུགས་པར་གྱུར་ཏོ། །ཆོས་ཀྱི་དབྱིངས་ཀྱི་ཚུལ་རྒྱ་མཚོ་དེ་དག་ཐམས་ཅད་དུ་གཏོགས་པའི་སངས་རྒྱས་ཀྱི་ཞིང་ཇི་སྙེད་ པ་དེ་དག་ལ་རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་དག་ཐམས་ཅད་ཀྱི་རྡུལ་ཤིན་ཏུ་ཕྲ་བ་རེ་རེ་ལ་ཡང་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་ བ་སྙེད་ཀྱི་སངས་རྒྱས་ཀྱི་ཞིང་ལ་ཞུགས་ཏེ་མཐོང་བར་གྱུར་ཏོ། །སངས་རྒྱས་ཀྱི་ཞིང་དེ་དག་ཐམས་ཅད་ལས་སངས་རྒྱས་ཀྱི་ཞིང་རེ་རེ་ན་ཡང་བཅོམ་ལྡན་འདས་རྣམ་པར་སྣང་ མཛད་སྙིང་པོ་བྱང་ཆུབ་ཏུ་གཤེགས་ཏེ་སེམས་ཀྱི་སྐད་ཅིག་རེ་རེ་ལ་མངོན་པར་རྫོགས་པར་སངས་རྒྱས་པའི་རྣམ་པར་འཕྲུལ་པ་ཡོངས་སུ་སྟོན་པར་མཛད་ཅིང༌། མངོན་པར་ རྫོགས་པར་འཚང་རྒྱ་བའི་རྣམ་པར་འཕྲུལ་པ་རེ་རེས་ཀྱང་ཆོས་ཀྱི་དབྱིངས་ཀྱི་ཚུལ་རྒྱ་མཚོ་རྒྱས་པར་འགེངས་པ་མཛད་པ་མཐོང་ངོ༌། །དེ་བཞིན་གཤེགས་པ་དེ་དག་ཐམས་ཅད་ ལས་དེ་བཞིན་གཤེགས་པ་རེ་རེའི་ཞབས་ཀྱི་དྲུང་ན་ཡང་བདག་མངོན་དུ་འདུག་པར་ཤེས་པར་གྱུར་ཏོ། །འཇིག་རྟེན་གྱི་ཁམས་དེ་དག་ཏུ་དེ་བཞིན་གཤེགས་པ་སྙིང་པོ་བྱང་ཆུབ་ ལ་བཞུགས་པ་དེ་དག་གིས་ཆོས་བསྟན་པ་དེ་དག་ཐམས་ཅད་ཀྱང་ཐོས་པར་གྱུར་ཏོ། །དེ་བཞིན་གཤེགས་པ་དེ་དག་ཐམས་ཅད་ཀྱི་བ་སྤུའི་སྒོ་ཐམས་ཅད་ནས་སྤྲུལ་པ་རྒྱ་མཚོ་ བྱུང་སྟེ་ཆོས་ཀྱི་སྤྲིན་རྒྱ་མཚོ་རབ་ཏུ་སྒྲོག་པ་དང༌། རྣམ་པར་འཕྲུལ་པ་སྣ་ཚོགས་ཡོངས་སུ་སྟོན་པ་མཛད་ཅིང༌། ཆོས་ཀྱི་དབྱིངས་ཀྱི་ཕྱོགས་རྒྱ་མཚོ་ཐམས་ཅད་དུ་གཏོགས་པའི་ ཞིང་རྒྱ་མཚོ་ཐམས་ཅད་དང༌། འཇིག་རྟེན་གྱི་ཁམས་ཀྱི་རྒྱུད་ཐམས་ཅད་དང༌། འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་ཀྱི་སེམས་ཅན་འབྱམས་ཀླས་པ་ཐམས་ཅད་ ༄༅། །འགྲོ་བའི་རྒྱུད་སྣ་ཚོགས་སུ་སྐྱེས་པ་དག་གི་ནང་ན་སེམས་ཅན་གྱི་བསམ་པའི་དབང་དུ་འདུ་ཤེས་ཀྱི་རྣམ་པ་སྣ་ཚོགས་ཀྱིས་ཆོས་ཀྱི་འཁོར་ལོ་ བསྐོར་བ་དེ་དག་ཐམས་ཅད་ཀྱང་ཡོངས་སུ་འཛིན་ཏོ། །ཁོང་དུ་ཆུད་པར་བྱེད་དོ། །ངེས་པར་རྟོགས་པར་བྱེད་དོ། །དོན་དང༌། ཚིག་དང༌། ཡི་གེ་འཛིན་པའི་ཤུགས་ཀྱིས་རྣམ་ པར་གནོན་པའི་གཟུངས་ཀྱི་མཐུས་ཡོངས་སུ་འཛིན་ཏོ། །ཆོས་ཀྱི་དཀྱིལ་འཁོར་ཐམས་ཅད་རྣམ་པར་དག་པའི་སྙིང་པོ་ཁོང་དུ་ཆུད་པའི་ཤེས་རབ་ཀྱིས་ཡོངས་སུ་སྦྱོང་ངོ༌། ། ཆོས་རྒྱ་མཚོ་ཐམས་ཅད་རྣམ་པར་འབྱེད་པ་ལ་མཁས་པའི་རིགས་པས་ཁོང་དུ་ཆུད་པར་བྱེད་དོ། །དུས་གསུམ་ལྟར་རྣམ་པར་ཡངས་པའི་བློས་རྒྱས་པར་འགེངས་སོ། །དེ་ བཞིན་གཤེགས་པ་དང་མཉམ་པ་ཉིད་ཀྱི་རྗེས་སུ་འགྲོ་བའི་ཤེས་རབ་ཀྱིས་མཉམ་པར་བྱེད་ཅིང་ཆོས་ཀྱི་ཚུལ་ཐམས་ཅད་མངོན་པར་སྒྲུབ་བོ། །ཚུལ་ཐམས་ཅད་ལ་མདོ་སྡེའི་ སྤྲིན་མངོན་པར་སྒྲུབ་བོ། །མདོ་སྡེའི་སྤྲིན་ཐམས་ཅད་ལས་ཆོས་རྒྱ་མཚོ་ཡོངས་སུ་གཞོག་པར་བྱེད་དོ། །ཆོས་རྒྱ་མཚོ་ཐམས་ཅད་ལ་ཆོས་ཀྱི་རྒྱུད་ཐམས་ཅད་ཡང་དག་པར་ གཞོལ་བར་བྱེད་དོ། །ཆོས་ཀྱི་རྒྱུད་ཐམས་ཅད་ལ་ཆོས་ཀྱི་སྤྲིན་ཡོངས་སུ་ཤེས་པར་བྱེད་དོ། །ཆོས་ཀྱི་སྤྲིན་ཐམས་ཅད་ལ་ཆོས་ཀྱི་རླབས་ཡོངས་སུ་སྐྱེད་དོ། །ཆོས་ཀྱི་རླབས་ ཐམས་ཅད་ལ་ཆོས་ཀྱི་དགའ་བའི་ཤུགས་རྒྱ་མཚོ་རབ་ཏུ་ཐོབ་པར་བྱེད་དོ། །ཆོས་ཀྱི་དགའ་བའི་ཤུགས་རྒྱ་མཚོ་ཐམས་ཅད་ལས་རབ་ཏུ་ཐོབ་པར་བྱ་བའི་ཤུགས་མངོན་པར་ སྒྲུབ་བོ༑ ༑སའི་ཤུགས་ཐམས་ཅད་ལ་ཏིང་ངེ་འཛིན་རྒྱ་མཚོའི་ཤུགས་མངོན་པར་སྒྲུབ་བོ། །ཏིང་ངེ་འཛིན་རྒྱ་མཚོའི་སྤྲིན་ཐམས་ཅད་ལ་སངས་རྒྱས་མཐོང་བ་རྒྱ་མཚོ་རབ་ཏུ་ཐོབ་ པར་བྱེད་དོ། །སངས་རྒྱས་མཐོང་བ་རྒྱ་མཚོ་ཐམས་ཅད་ལ་སྣང་བ་རྒྱ་མཚོ་རབ་ཏུ་ཐོབ་པར་བྱེད་དོ། །སྣང་བ་རྒྱ་མཚོ་ཐམས་ཅད་ལ་དུས་གསུམ་གྱི་ཡེ་ཤེས་ཀྱི་དཀྱིལ་འཁོར་གྱིས་ ཡོངས་སུ་གཞོག་པར་བྱེད་དོ། །ཕྱོགས་རྒྱ་མཚོ་མཐའ་དང་དབུས་མེད་པ་རྒྱས་པར་དགང་བའི་ཚུལ་དང༌། དེ་བཞིན་གཤེགས་པའི་སྔོན་གྱི་མཐའི་སྤྱོད་པ་རྒྱ་མཚོ་ཚད་མེད་པ་ ལ་འཇུག་པའི་ཚུལ་དང༌། དེ་བཞིན་གཤེགས་པའི་སྔོན་གྱི་སྦྱོར་བ་རྒྱ་མཚོ་ཚད་མེད་པའི་ཡེ་ཤེས་སྣང་བའི་ཚུལ་དང༌། དེ་བཞིན་གཤེགས་པའི་དཀའ་བ་ཚད་མེད་པ་ཡོངས་ སུ་བཏང་བའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང༌། དེ་བཞིན་གཤེགས་པའི་ཚུལ་ཁྲིམས་ཀྱི་དཀྱིལ་འཁོར་ཚད་མེད་པ་ཡོངས་སུ་དག་པ་སྣང་བར་བྱ་བའི་ཚུལ་དང༌། དེ་བཞིན་གཤེགས་པའི་བཟོད་པའི་ས་ཚད་མེད་པ་ཡོངས་སུ་སྦྱང་བའི་ཚུལ་དང༌། དེ་བཞིན་གཤེགས་པའི་བརྩོན་འགྲུས་ཆེན་པོའི་ཤུགས་ཚད་མེད་པ་རྣམ་པར་འཕེལ་བར་ ༄༅། །བྱ་བའི་མཐུའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང༌། དེ་བཞིན་གཤེགས་པའི་བསམ་གཏན་གྱི་དཀྱིལ་འཁོར་དང༌། བསམ་ གཏན་གྱི་ཡན་ལག་རྒྱ་མཚོ་ཚད་མེད་པ་ཡོངས་སུ་དག་པར་བྱ་བའི་སྦྱོར་བས་སྣང་བ་རབ་ཏུ་ཐོབ་པར་བྱ་བའི་ཚུལ་དང༌། དེ་བཞིན་གཤེགས་པའི་ཤེས་རབ་ཀྱི་ཕ་རོལ་ ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ཡོངས་སུ་དག་པར་བྱ་བ་དང༌། རྣམ་པར་དམིགས་པ་སྣང་བར་བྱ་བའི་ཚུལ་དང༌། དེ་བཞིན་གཤེགས་པའི་ཐབས་མཁས་པའི་ ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ལ་འཇུག་པར་བྱ་བའི་ཚུལ་དང༌། དེ་བཞིན་གཤེགས་པའི་སྨོན་ལམ་གྱི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ལ་འཇུག་ པར་བྱ་བའི་ཚུལ་དང༌། དེ་བཞིན་གཤེགས་པའི་བསོད་ནམས་དང༌། ཡེ་ཤེས་ཀྱི་སྟོབས་ཀྱི་ཕ་རོལ་ཏུ་ཕྱིན་པ་ཚད་མེད་པ་ལ་གནས་པར་བྱ་བ་དང༌། ཡོངས་སུ་འཕེལ་བར་ བྱ་བའི་ཡེ་ཤེས་རབ་ཏུ་ཐོབ་པར་བྱ་བའི་ཚུལ་དང༌། དེ་བཞིན་གཤེགས་པའི་ཡེ་ཤེས་ཀྱི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ལ་རྣམ་པར་སྤྱད་པ་རབ་ཏུ་ཐོབ་པར་ བྱ་བའི་ཡེ་ཤེས་ཡོངས་སུ་སྒྲུབ་པའི་ཚུལ་དང༌། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་ས་ཡོངས་སུ་གནོན་པ་མཛད་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ ཚུལ་དང༌། དེ་བཞིན་གཤེགས་པའི་ས་ཡོངས་སུ་གནོན་པའི་མཚམས་ཀྱི་རྣམ་པར་འཕྲུལ་བ་ཚད་མེད་པས་བསྐལ་པ་རྒྱ་མཚོར་གནས་པར་བྱ་བའི་ཚུལ་དང༌། དེ་བཞིན་ གཤེགས་པའི་སྔོན་གྱི་བྱང་ཆུབ་སེམས་དཔའི་སའི་དཀྱིལ་འཁོར་ཚད་མེད་པ་ཡོངས་སུ་གནོན་པའི་ཚུལ་དང༌། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་ས་ ཚད་མེད་པ་ལ་གནས་པར་བྱ་བའི་ཚུལ་དང༌། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་ས་ཚད་མེད་པ་ཡོངས་སུ་དག་པར་བྱ་བའི་ཚུལ་དང༌། དེ་བཞིན་གཤེགས་ པའི་ས་ཚད་མེད་པ་ཡེ་ཤེས་རྒྱ་མཚོས་རྣམ་པར་དཔྱད་པའི་ཚུལ་དང༌། དེ་བཞིན་གཤེགས་པའི་སའི་ཡེ་ཤེས་སྣང་བ་ཚད་མེད་པ་རབ་ཏུ་ཐོབ་པར་བྱ་བའི་ཚུལ་དང༌། དེ་བཞིན་ གཤེགས་པ་བྱང་ཆུབ་སེམས་དཔར་གྱུར་པས་སྔོན་གྱི་སངས་རྒྱས་མ་ལུས་པར་གཟིགས་པ་དང༌། རྗེས་སུ་འབྲང་བ་མཛད་པ་ཚད་མེད་པ་རྣམ་པར་དམིགས་པར་བྱ་བའི་ཚུལ་ དང༌། དེ་བཞིན་གཤེགས་པ་བྱང་ཆུབ་སེམས་དཔར་གྱུར་པས་སྔོན་གྱི་སངས་རྒྱས་རྒྱ་མཚོ་མ་ལུས་པར་གཟིགས་ཤིང་བསྐལ་པ་རྒྱ་མཚོར་བཞུགས་བཞུགས་པ་ཚད་མེད་པའི་ ཚུལ་དང༌། དེ་བཞིན་གཤེགས་པ་སྔོན་བྱང་ཆུབ་སེམས་དཔར་གྱུར་པས་ཞིང་རྒྱ་མཚོ་མ་ལུས་པ་རྒྱས་པར་དགང་བའི་སྐུ་མངོན་པར་སྒྲུབ་པ་ཚད་མེད་པའི་ཡེ་ཤེས་སྣང་བ་རབ་ ༄༅། །ཏུ་ཐོབ་པར་བྱ་བའི་ཚུལ་དང་དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་སྤྱོད་པ་ཚད་མེད་པས་ཆོས་ཀྱི་དབྱིངས་མ་ལུས་པ་རྒྱས་པར་དགའ་བའི་ ཚུལ་དང༌། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་སྤྱོད་པ་ཐབས་སྣ་ཚོགས་ཀྱི་སྒོ་དང་ལྡན་པས་སེམས་ཅན་ཐམས་ཅད་ཡོངས་སུ་སྨིན་པར་མཛད་པ་ དང༌། རྣམ་པར་གདུལ་བར་མཛད་པ་ཚད་མེད་པ་ཡོངས་སུ་བསྟན་པའི་ཚུལ་དང༌། དེ་བཞིན་གཤེགས་པའི་འོད་ཕྱོགས་རྒྱ་མཚོ་མ་ལུས་པ་ཐམས་ཅད་དུ་རབ་ཏུ་འཕྲོ་བ་ ཚད་མེད་པས་རྒྱས་པར་དགང་བར་བྱ་བའི་ཚུལ་དང༌། དེ་བཞིན་གཤེགས་པ་སེམས་ཅན་ཐམས་ཅད་ལ་མངོན་དུ་གྱུར་པ་རྣམ་པར་འཕྲུལ་པ་ཚད་མེད་པ་ཡོངས་སུ་ བསྟན་པའི་ཚུལ་དང༌། དེ་བཞིན་གཤེགས་པའི་ཡེ་ཤེས་ཀྱི་ས་ཚད་མེད་པ་ཡོངས་སུ་གནོན་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང༌། དེ་བཞིན་གཤེགས་ པའི་མངོན་པར་རྫོགས་པར་བྱང་ཆུབ་པའི་རྣམ་པར་འཕྲུལ་པ་ཚད་མེད་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང༌། དེ་བཞིན་གཤེགས་པའི་ཆོས་ཀྱི་འཁོར་ ལོ་རབ་ཏུ་འཁོར་བ་དང༌། ཆོས་ཀྱི་སྤྲིན་ཚད་མེད་པ་ཐམས་ཅད་མ་ལུས་པར་ཡང་དག་པར་བླངས་ཤིང་ཡོངས་སུ་བཟུང་བའི་ཚུལ་དང༌། དེ་བཞིན་གཤེགས་པའི་མཚན་རྒྱ་ མཚོ་ཚད་མེད་པ་རྣམ་པར་དམིགས་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང༌། དེ་བཞིན་གཤེགས་པའི་སྐུ་རྒྱ་མཚོའི་རྒྱུད་ཚད་མེད་པ་རྣམ་པར་དམིགས་པའི་ སྣང་བ་རབ་ཏུ་ཐོབ་པར་བྱ་བའི་ཚུལ་དང༌། དེ་བཞིན་གཤེགས་པའི་ཡུལ་ཤིན་ཏུ་ཡངས་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་གྱིས་དེ་བཞིན་གཤེགས་པ་དེ་ དག་གི་ཐོག་མ་ཐུགས་བསྐྱེད་པ་ནས་དམ་པའི་ཆོས་ནུབ་པར་མ་གྱུར་པའི་བར་དེ་དག་ཐམས་ཅད་ལའང་འཇུག་ཅིང་ཁོང་དུ་ཆུད་པར་བྱེད་དོ། །དེ་སྐད་དུ་ཁྱོད་ཀྱིས་བྱང་ཆུབ་ སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཐོབ་ནས་ཇི་སྲིད་ཅིག་ལོན་ཞེས་ཟེར་བ་ནི། དེ་ལྟར་ཁོ་ མོས་བསྐལ་པ་སངས་རྒྱས་ཀྱི་ཞིང་གཉིས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་གསེར་ལྟར་དྲི་མ་མེད་པའི་འོད་དུ་བྱང་ཆུབ་ཀྱི་ཤིང་གི་ལྷ་མོ་བསོད་ ནམས་སྒྲོན་མ་ཕུན་སུམ་ཚོགས་པ་ཀུན་ནས་དཔལ་གྱི་འོད་ཅེས་བྱ་བར་གྱུར་ཏེ། དེ་བཞིན་གཤེགས་པ་ཕྱིར་མི་ལྡོག་པའི་ཆོས་ཀྱི་དབྱིངས་ཀྱིས་ཆོས་བསྟན་པ་ཐོས་ནས་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། བསྐལ་པ་སངས་རྒྱས་ཀྱི་ཞིང་གཉིས་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་ཏུ་བྱང་ཆུབ་སེམས་དཔའི་ ༄༅། །སྤྱོད་པ་སྤྱད་ནས་མི་མཇེད་ཀྱི་འཇིག་རྟེན་གྱི་ཁམས་འདིར་སྐྱེས་ཏེ། ལོག་པར་དད་སེལ་ལ་སོགས་པ་ཐ་མ་ཤཱཀྱ་ཐུབ་པའི་བར་གྱི་དེ་བཞིན་གཤེགས་པ་ བསྐལ་པ་བཟང་པོ་པ་དག་ཀྱང་བསྙེན་བཀུར་ཏེ། མ་བྱོན་པའི་སངས་རྒྱས་རྣམས་ཀྱང་བསྙེན་བཀུར་རོ། །འཇིག་རྟེན་གྱི་ཁམས་འདིར་ཇི་ལྟ་བ་དེ་བཞིན་དུ་འཇིག་རྟེན་གྱི་ ཁམས་ཐམས་ཅད་དུའང་སངས་རྒྱས་ཀྱི་རྒྱུད་མ་བྱོན་པ་རྣམས་ཡོངས་སུ་བསྙེན་ཅིང་བཀུར་རོ། །མཆོད་དོ། །རིགས་ཀྱི་བུ། ད་དུང་དུའང་འཇིག་རྟེན་གྱི་ཁམས་གསེར་ ལྟར་དྲི་མ་མེད་པའི་འོད་དེ་ཡང་ཡོད་ལ། སངས་རྒྱས་ཀྱི་རིགས་ཀྱང་རྒྱུན་མ་ཆད་ཀྱི། དེ་བས་ན། རིགས་ཀྱི་བུ། ཚུལ་འདི་ལ་བྱང་ཆུབ་སེམས་དཔའི་རྣམ་པར་གནོན་ པ་ཆེན་པོས་བརྩོན་པར་གྱིས་ཤིག །དེ་ནས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པས་དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་ པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཉིད་བརྣན་ཏེ་བསྟན་པར་བྱ་བའི་ཕྱིར་ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་ པ༑ རྣམ་ཐར་དགེ་འདི་ཇི་ལྟར་ཐོབ་གྱུར་པ། །ཁོ་མོའི་ཚིག་འདི་ནོར་བཟང་ཁྱོད་ཉོན་ཅིག །ཐོས་ནས་དགའ་བའི་སྟོབས་ཀྱང་ཡོངས་བསྐྱེད་དེ། །རྣམ་ཐར་ཚུལ་འདི་ལ་ ནི་འཇུག་པར་གྱིས། །བདག་གི་སེམས་དང་བསམ་པ་ཡོངས་སྦྱོང་ཞིང༌། །མོས་པའི་ཤུགས་ཡངས་ཡོངས་སུ་བསྐྱེད་བྱས་ཏེ། །ཐམས་ཅད་མཁྱེན་པའི་ཡེ་ཤེས་གྲོང་འདུན་ པས༑ ༑བསྐལ་པ་རྒྱ་མཚོ་མང་པོར་སྔོན་སྤྱད་དོ། །བདེ་གཤེགས་དུས་གསུམ་བྱུང་བ་ཐོས་ནས་ཀྱང༌། །དེ་དག་ཀུན་ལ་མོས་པ་ཡངས་བསྐྱེད་དོ། །བསྐལ་པ་བརྒྱ་ཕྲག་མང་པོར་ སྒོ་ཀུན་ཏུ། །དེ་དག་འཁོར་དང་བཅས་པར་ཁོ་མོས་བཀུར། །སྔོན་གྱི་བདེ་གཤེགས་ཁོ་མོས་མཐོང་གྱུར་ནས། །འགྲོ་ལ་ཕན་ཕྱིར་ཡུན་རིང་མཆོད་བྱས་ཏེ། །སྤྲོ་བའི་སྟོབས་ནི་ རྣམ་ཡངས་ཡོངས་བསྐྱེད་ནས། །བདག་གིས་གདུང་བ་མེད་པའི་ཆོས་ཀྱང་ཐོས། །རྣམ་པར་ཐར་པ་འདི་ལ་འཇུག་པ་ན། །ཕ་དང་མ་དང་བླ་མའི་སྐྱེ་བོ་ལ། །དེ་ཚེ་བདག་གིས་ཕན་ བདེས་བསྟི་སྟང་བྱས། །བསྙེན་བཀུར་སྲི་ཞུར་གནས་པ་ཀུན་ཀྱང་བྱས། །རྒས་པ་ནད་པ་ནོར་མེད་མི་རྣམས་དང༌། །དབང་པོ་མ་ཚང་སྡུག་བསྔལ་མགོན་མེད་པ། །མང་པོ་བདག་ གིས་བྱམས་སེམས་བདེ་བཀོད་ནས། །ཚེ་རབས་བརྒྱར་ཡང་ནོར་ཕྱུག་མགོན་ཡོད་བྱས། །རྒྱལ་པོ་མེ་དང་རྐུན་ཆོམ་རྐྱེན་གྱུར་དང༌། །སེངྒེ་གླང་པོ་ཕ་རོལ་དགྲས་འཇིགས་དང༌། སྲིད་པའི་རྒྱ་མཚོའི་འཇིགས་དངོས་སྣ་ཚོགས་ལས། །སྔོན་ཚེ་སྤྱོད་པའི་དུས་ན་བདག་གིས་བསྐྱབས། །རྟག་ཏུ་སྲིད་གསུམ་ཉོན་མོངས་གདུངས་གྱུར་ཏེ། །ལས་ཀྱིས་རབ་གདུངས་ ༄༅། །དེ་བཞིན་མི་དགེ་བས། །འཁོར་བའི་རི་གཟར་གཡང་དུ་ལྷུང་བ་ཡི། །སྐྱེ་བོ་འགྲོ་བའི་རྒྱུད་དུ་བདག་གིས་བསྐྱབས། །སྡུག་བསྔལ་ངན་སོང་ གཡང་སས་འཇིགས་པ་དག །རྟག་ཏུ་མི་བདེ་ཤིན་ཏུ་མི་བཟད་དང༌། །སྐྱེ་རྒ་ན་ཞིང་འཆི་བའི་འཇིགས་མང་ཀུན། །བདག་གིས་འཇིག་རྟེན་སྤྱོད་ཚེ་ཞི་བར་བྱས། །འཁོར་ བའི་སྡུག་བསྔལ་ཞི་བར་བྱ་བ་དང༌། །སེམས་ཅན་ཀུན་གྱི་བདེ་བ་ཡོངས་བསྐྱེད་ཅིང༌། །སངས་རྒྱས་བདེ་བ་དམ་པ་བསྐྱེད་པ་ནི། །བསྐལ་པ་ཕྱི་མར་ཁོ་མོའི་སྨོན་ལམ་ མོ༑ ༑རིགས་ཀྱི་བུ། ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཤེས་པར་ཟད་ ན༑ ཁོ་མོས་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ལ་ཞུགས་པ། ཕྱི་ནང་གི་སྡུག་བསྔལ་མ་ལུས་པ་ལས་རྣམ་པར་གྲོལ་བ། བསྐལ་པའི་ མིང་དུ་བྱ་བ་ཐམས་ཅད་ཤེས་པར་གྱུར་པ། འཇིག་རྟེན་གྱི་ཁམས་རྒྱ་མཚོ་ཐམས་ཅད་འབྱུང་བ་དང༌། འཇིག་པའི་རྒྱུས་ལ་མཁས་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ། སྙིང་པོ་བྱང་ཆུབ་འདི་ཉིད་ན་བཅོམ་ལྡན་འདས་རྣམ་པར་སྣང་མཛད་ཀྱི་འཁོར་གྱི་དཀྱིལ་འཁོར་ན་མཚན་མོའི་ ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་ཞེས་བྱ་བ་འདུག་གི །དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ ལ་བསླབ་པར་བྱ་བ་དང༌། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ་ཚུལ་དང་འདྲ་ པའི་ཚིགས་སུ་བཅད་པ་འདི་དག་སྨྲས་སོ། །དགེ་བའི་བཤེས་ཀྱིས་མ་ནོར་མཐུན་བསྟན་པས། །ལྷ་མོ་ཁྱོད་ཀྱི་དྲུང་དུ་ཉེ་བར་མཆིས། །མཐའ་དང་དབུས་མི་མངའ་བའི་སྐུ་ཚུལ་ དུ༑ ༑ཁྱོད་ནི་གདན་ལ་བཞུགས་པ་བདག་གིས་མཐོང༌། །ཁ་དོག་དབྱིབས་དང་མཚན་མའི་སྤྱོད་ཡུལ་བ། །སྲིད་ལ་གནས་དང་དངོས་པོར་འདུ་ཤེས་དང༌། །འདུ་ཤེས་དམའ་དང་ ལོག་པར་ལྟ་བ་ཡིས། །ཁྱོད་ཀྱི་སྤྱོད་ཡུལ་འཚལ་བར་མི་ནུས་སོ། །ཁྱོད་ཀྱི་སྐུ་གཟུགས་བལྟ་ན་མཐའ་ཡས་པས། །ཁྱོད་ཀྱི་སྐུ་གཟུགས་མདོག་གི་མཚན་མིན། །བསྐལ་པ་ མཐའ་ཡས་དག་ཏུ་ཡོངས་བརྟགས་ཀྱང༌། །ལྷ་དང་འཇིག་རྟེན་བཅས་པས་ཤེས་མི་ནུས། །ལྷ་མོ་ཁྱོད་ནི་ཕུང་པོའི་གནས་ལས་འཕགས། །སྐྱེ་མཆེད་རྣམས་ལའང་དེ་བཞིན་མི་ གནས་ཏེ། །འཇིག་རྟེན་རྣམ་པར་འདས་པས་ཐེ་ཚོམ་བྲལ། །འཇིག་རྟེན་དག་ཏུ་རྣམ་པར་འཕྲུལ་བ་མཛད། །གཡོ་བ་མི་མངའ་སྐྱོན་བྲལ་ཆགས་པ་མེད། །ཁྱོད་ཀྱིས་ཡེ་ཤེས་སྤྱན་ ༄༅། །ནི་རྣམ་སྦྱངས་པས། །རྡུལ་གྱི་གོ་ལ་ཐམས་ཅད་རྡུལ་ཚད་དུ། །སངས་རྒྱས་རྣམ་པར་འཕྲུལ་པ་མང་པོ་གཟིགས། །ཁྱོད་ཀྱི་སྐུ་ནི་ཆོས་སྐུའི་སྙིང་ པོ་ཅན༑ ༑ཁྱོད་ཀྱི་ཐུགས་ཀྱང་ཡེ་ཤེས་ཆགས་པ་མེད། །ཁྱོད་ནི་ཀུན་ཏུ་འོད་ཀྱིས་སྣང་མཛད་པས། །འཇིག་རྟེན་སྐྱེ་བོ་རྣམས་ལ་མཐའ་ཡས་སྣང༌། །སེམས་ལས་མཐའ་ ཡས་ལས་རྣམས་ཡོངས་སུ་འབྱུང༌། །འཇིག་རྟེན་ཐམས་ཅད་ལས་ཀྱིས་རྣམ་པར་བྲིས། །འགྲོ་བ་སེམས་ཀྱི་དངོས་སུ་མཁྱེན་གྱུར་པས། །རང་གི་སྐུ་ཡང་འགྲོ་བ་སྙེད་དུ་ བསྟན༑ ༑འཇིག་རྟེན་དུ་ནི་རྨི་ལམ་འདྲར་མཁྱེན་ནས། །སངས་རྒྱས་ཀུན་ཀྱང་གཟུགས་བརྙན་ལྟ་བུ་དང༌། །མ་ལུས་ཆོས་རྣམས་སྒྲ་བརྙན་འདྲར་མཁྱེན་པས། །ཆགས་ པ་མི་མངའ་འགྲོ་བ་ཀུན་ཏུ་སྤྱོད། །དུས་གསུམ་གནས་པའི་འགྲོ་བ་ཐམས་ཅད་ལ། །སྐད་ཅིག་རེ་རེར་རང་གི་སྐུ་སྟོན་ཀྱང༌། །ཁྱོད་ཀྱི་ཐུགས་ལ་གཉིས་སུ་མི་རྒྱུ་སྟེ། །ཕྱོགས་ རྣམས་ཀུན་ཏུ་ཆོས་ཀྱང་རབ་ཏུ་བསྟན། །རྡུལ་ལ་འགྲོ་བ་རྒྱ་མཚོ་མཐའ་ཡས་དང༌། །དེ་བཞིན་སེམས་ཅན་མཚོ་ཆེན་དཔག་ཡས་དང༌། །མཐའ་དབུས་མེད་པའི་བདེ་ གཤེགས་གང་ཆེན་མཚོ། །ཀུན་ཀྱང་ཁྱོད་ཀྱི་རྣམ་ཐར་དམ་པའི་ཡུལ། །དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ་ ཚུལ་དང་འདྲ་བའི་ཚིགས་སུ་བཅད་པ་དེ་དག་གིས་མངོན་པར་བསྟོད་དེ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ་མཚན་མོའི་ལྷ་མོ་ སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་དྲུང་ནས་སོང་ངོ༌། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། སྡོང་པོས་བརྒྱན་པའི་ལེའུ་སྟེ།། ༈ །།བམ་པོ་ བརྒྱ་གཉིས་པ། དེ་ནས་ཚོང་དཔོན་གྱི་བུ་ནོར་བཟང་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་དེ་ ནི༑ སྒོམ་པ་དང༌། རྗེས་སུ་སྒོམ་པ་དང༌། ཡང་དག་པར་སྒོམ་པ་དང༌། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་གདམས་ངག་རྗེས་སུ་བསྟན་པ་ལ་ནི། རྗེས་སུ་ འབྲང་བར་བྱ་བ་དང༌། རྗེས་སུ་དྲན་པར་བྱ་བ་དང༌། ཁོང་དུ་ཆུད་པར་བྱེད། ཚིག་དང་ཡི་གེ་རེ་རེ་ལ་ནི། ཚུལ་དུ་མ་དང་བསམ་པ་ཚད་མེད་པས་ཆོས་ཉིད་ཀྱི་ཚུལ་ཤེས་པ་རྗེས་ སུ་དྲན་པར་བྱེད་ཅིང༌། དྲེན་པས་རྗེས་སུ་འབྲང་བར་བྱ་བ་དང༌། བློ་གྲོས་ཀྱིས་རྣམ་པར་དབྱེ་བ་དང༌། རིགས་པས་ཁོང་དུ་ཆུད་པར་བྱ་བ་དང༌། བློས་ཤིན་ཏུ་ཡངས་པར་བྱ་བ་དང༌། ལུས་ཀྱིས་རེག་པར་བྱས་ཏེ་རྣམ་པར་སྤྱད་པ་དང༌། རྗེས་སུ་འཇུག་པ་བྱེད་ཅིང༌། མཐར་གྱིས་མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་གང་ ༄༅། །ན་བ་དེར་ཕྱིན་པ་དང༌། མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་པདྨོའི་ཁྲི་ཆེན་པོ་ནོར་བུ་རིན་པོ་ཆེའི་རྒྱལ་པོ་གྲོང་ ཁྱེར་དང༌། གནས་ཐམས་ཅད་རབ་ཏུ་སྣང་བར་བྱེད་པའི་སྙིང་པོ་ཅན་ལ་ཕྱོགས་ཐམས་ཅད་དང༌། འགྲོ་བ་ཐམས་ཅད་ལ་མངོན་དུ་གྱུར་པའི་ལུས་དང༌། འགྲོ་བ་ཐམས་ཅད་ ཀྱི་གཟུགས་དང་མཉམ་པའི་ལུས་དང༌། སེམས་ཅན་ཐམས་ཅད་ལ་མངོན་དུ་གྱུར་པའི་ལུས་དང༌། འགྲོ་བ་ཐམས་ཅད་ཀྱིས་མ་གོས་པའི་ལུས་དང༌། འགྲོ་བ་ཐམས་ ཅད་དང་རང་བཞིན་མཉམ་པའི་ལུས་དང༌། འགྲོ་བ་ཐམས་ཅད་ལས་མངོན་པར་འཕགས་པའི་ལུས་དང༌། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་ ལ་མཐུན་པའི་ལུས་དང༌། འགྲོ་བ་ཐམས་ཅད་དུ་སྒྲ་རབ་ཏུ་སྒྲོག་པའི་ལུས་དང༌། འགྲོ་བ་ཐམས་ཅད་དུ་འཕོ་བ་མེད་པའི་ལུས་དང༌། སྒྲིབ་པ་ཐམས་ཅད་ཤིན་ཏུ་བཅོམ་ པའི་ལུས་དང༌། དེ་བཞིན་ཉིད་ཀྱི་རང་བཞིན་གྱི་ལུས་དང༌། འགྲོ་བ་ཐམས་ཅད་གདུལ་བ་མཐར་ཕྱིན་པར་བྱེད་པའི་ལུས་སུ་འདུག་ཅིང༌། མཚན་མོའི་ལྷ་མོ་བརྗོད་དུ་མེད་ པའི་འཁོར་གྱིས་བསྐོར་ཏེ་འདུག་པ་མཐོང་ནས་དགའ་རངས་ཏེ་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས་མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་ འབྱུང་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་ བསྐོར་བ་བྱས་ནས་མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་གྱི་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །ལྷ་མོ། ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ན། ལྷ་མོ། །ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་རྗེས་སུ་བསླབ་ན་ སེམས་ཅན་ལ་སྨན་པར་འགྱུར་བ་ལགས། ཇི་ལྟར་ན། སེམས་ཅན་བླ་ན་མེད་པ་ཡོངས་སུ་བསྡུ་བས་ཡོངས་སུ་སྡུད་པར་འགྱུར། ཇི་ལྟར་ན། བྱང་ཆུབ་སེམས་དཔའ་དེ་བཞིན་ གཤེགས་པས་གནང་བའི་བྱང་ཆུབ་སེམས་དཔའི་ལས་ལ་བརྩོན་པ་ལགས། ཇི་ལྟར་བརྩོན་པར་བགྱིས་ན། བྱང་ཆུབ་སེམས་དཔའ་ཆོས་ཀྱི་རྒྱལ་པོར་ཉེ་བར་འགྱུར་བ་ བདག་ལ་བཤད་དུ་གསོལ། དེ་སྐད་ཅེས་སྨྲས་པ་དང༌། མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་གྱིས་ཚོང་དཔོན་གྱི་བུ་ནོར་བཟང་ལ་ འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་དེ་ལྟར་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། རྣམ་པར་གདུལ་བའི་མཐར་ཕྱིན་པར་བྱ་བ་དང༌། དེ་བཞིན་གཤེགས་ ༄༅། །པ་ཐམས་ཅད་ཀྱི་རིགས་ཡང་དག་པར་བཟུང་བའི་སྦྱོར་བ་མཐར་ཕྱིན་པར་བྱ་བ་དང༌། ཕྱོགས་འབྱམས་ཀླས་པ་ཐམས་ཅད་རྒྱས་པར་དགང་བའི་ཡེ་ ཤེས་རབ་ཏུ་སྦྱར་བ་དང༌། ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ལ་འཇུག་པ་མངོན་དུ་འགྱུར་བ་དང༌། ཤེས་བྱ་ནམ་མཁའི་དབྱིངས་དང་མཉམ་པ་མཐའ་ཡས་ པ་རྒྱས་པར་དགང་བ་དང༌། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་རབ་ཏུ་བླང་ཞིང་ཡོངས་སུ་གཟུང་བའི་ཕྱིར་འགྲོ་བ་རྒྱ་མཚོ་ཐམས་ཅད་ཀྱི་བསམ་པ་ཇི་ ལྟ་བ་བཞིན་དུ་ཆོས་ཀྱི་སྤྲིན་གྱི་ཆར་མངོན་པར་དབབ་པའི་སྤྱོད་པའི་ཚུལ་ཡོངས་སུ་འདྲི་བ་ལེགས་[?] སོ། །ལེགས་སོ། །རིགས་ཀྱི་བུ། ཁོ་མོ་ནི། བྱང་ཆུབ་སེམས་དཔའི་ རྣམ་པར་ཐར་པ་སྒྲ་ཡིད་དུ་འོང་བ་དང༌། རྣམ་པར་འགྲུལ་བ་ཟབ་མོ་ལ་འཇུག་པ་ཐོབ་པ་སྟེ། དེ་ལྟར་ཁོ་མོ་རྣམ་པར་ཐར་པ་དེ་དང་ལྡན་པས་ཆོས་སྨྲ་བ་ཆེན་པོའི་གོ་འཕང་ ཐོགས་པ་མེད་པ་ལ་དམིགས་པའི་སྦྱོར་བ་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་མཛོད་ཡོངས་སུ་བཏང་བའི་སྨོན་ལམ་དང་ལྡན་པ། སྙིང་རྗེ་ཆེན་པོ་ དང་ལྡན་པ། བྱམས་པ་ཆེན་པོའི་སྟོབས་རབ་ཏུ་ཐོབ་པ། སེམས་ཅན་ཐམས་ཅད་བྱང་ཆུབ་ཀྱི་སེམས་ལ་དགོད་པའི་ཕྱིར་སེམས་ཅན་ཐམས་ཅད་ཀྱི་དོན་བྱ་བ་ལ་ཞུགས་ པ༑ བྱང་ཆུབ་ཀྱི་སེམས་ཀྱི་དགེ་བའི་རྩ་བ་དང༌། ཚོགས་རབ་ཏུ་བསགས་པ་རྒྱུན་མི་གཅད་པའི་ཕྱིར་འགྲོ་བ་ཐམས་ཅད་ཁ་ལོ་སྒྱུར་བའི་ས་ལ་ཡང་དག་པར་གནས་པ། སེམས་ ཅན་ཐམས་ཅད་ཐམས་ཅད་མཁྱེན་པ་ཉིད་ཀྱི་ལམ་ལ་རབ་ཏུ་དགོད་པའི་ཕྱིར་འཇིག་རྟེན་གྱི་ཆོས་ཀྱི་སྤྲིན་ཐམས་ཅད་ལས་ཆོས་ཀྱི་ཉི་མ་ཡོངས་སུ་དབྱུང་བའི་སྦྱོར་བ་དང་ལྡན་པ་ དགེ་བའི་རྩ་བ་ཚད་མེད་པ་བསྐྱེད་པས་འཇིག་རྟེན་ཐམས་ཅད་སྣང་བར་བྱ་བའི་ཕྱིར་འགྲོ་བ་ཐམས་ཅད་ལ་མཉམ་པའི་སེམས་སུ་འཇུག་པ་རྒྱུན་མི་འཆད་པ། འགྲོ་བ་ཐམས་ ཅད་ཀྱི་དགེ་བའི་རྩ་བ་མངོན་པར་འདུ་བྱ་བ་ཡོངས་སུ་སྒྲུབ་པའི་སྦྱོར་བ་ཤེས་པར་བྱ་བའི་ཕྱིར་སེམས་རྣམ་པར་དག་པའི་སྦྱོར་བ་དང་ལྡན་པ། དགེ་བའི་ལས་ཀྱི་ལམ་ཐམས་ ཅད་མཐུན་པར་སྒྲུབ་པས་སེམས་ཅན་ཐམས་ཅད་ཀྱི་དེད་དཔོན་དུ་ཞུགས་པ། མི་དགེ་བའི་ལས་ཀྱི་ལམ་ཐམས་ཅད་རབ་ཏུ་སྤངས་པ། སེམས་ཅན་ཐམས་ཅད་དགེ་བའི་ཆོས་ ལ་རབ་ཏུ་དགོད་པའི་སྦྱོར་བ་དང་ལྡན་པ། སེམས་ཅན་ཐམས་ཅད་ལ་ལམ་བདེ་བ་ཡོངས་སུ་སྟོན་པའི་སྦྱོར་བ་དང་ལྡན་པ། སེམས་ཅན་ཐམས་ཅད་ཀྱི་ཐེག་པའི་རྒྱན་གྱི་ཐོག་ མར་འདྲེན་པ་ལ་ཞུགས་པ། དགེ་བའི་ཆོས་ཀྱི་སྤྱོད་པ་ཐམས་ཅད་ལ་སེམས་ཅན་ཐམས་ཅད་རབ་ཏུ་དགོད་པའི་སྦྱོར་བ་དང་ལྡན་པ། དགེ་བའི་བཤེས་གཉེན་ཐམས་ཅད་ལ་མི་ ༄༅། །ཕྱེད་པར་བསྙེན་བཀུར་དང་རིམ་གྲོ་བྱེད་པ་ལ་ཞུགས་པ། སེམས་ཅན་ཐམས་ཅད་དེ་བཞིན་གཤེགས་པའི་བསྟན་པ་ལ་རབ་ཏུ་དགོད་པའི་སྦྱོར་བ་ དང་ལྡན་པ། ཆོས་ཀྱི་སྦྱིན་པའི་སྔོན་འདེན་ཅིང་ཆོས་དཀར་པོ་ཐམས་ཅད་ཡང་དག་པར་བརྩམས་པའི་སྦྱོར་བ་དང་ལྡན་པ། ཐམས་ཅད་མཁྱེན་པ་ཉིད་ཀྱི་སེམས་བསྐྱེད་ པས་མངོན་པར་བྱུང་བས་བསམ་པ་བརྟེན་ཞིང་མི་ཤིགས་པ། རྡོ་རྗེ་མཐུ་བོ་ཆེ་ལྟར་བརྟན་ཞིང་སྲ་བས་སངས་རྒྱས་ཀྱི་སྟོབས་ལ་དམིགས་པའི་སེམས་རྒྱ་ཆེན་པོའི་དཀྱིལ་ འཁོར་དང་ལྡན་པར་དགེ་བའི་བཤེས་གཉེན་ལ་བརྟེན་ཅིང་རྣམ་པར་སྤྱོད་དེ། ཁོ་མོ་ནི། ཉོན་མོངས་པ་དང༌། ལས་ཀྱི་སྒྲིབ་པ་ཐམས་ཅད་ཀྱི་རི་རྣམ་པར་གཏོར་བའི་ སེམས་དང་ལྡན་པའོ། །ཐམས་ཅད་མཁྱེན་པ་ཉིད་ཀྱི་ཚོགས་ཡང་དག་པར་རྩོམ་པའོ། །དཀར་པོའི་ཆོས་ཐམས་ཅད་ཡང་དག་པར་སྒྲུབ་པའི་སྦྱོར་བ་དང་ལྡན་པའོ། །ཐམས་ ཅད་མཁྱེན་པ་ཉིད་མཐའ་དང་དབུས་མེད་པ་ལ་མངོན་པར་འདུན་ཅིང་དམིགས་པའི་སེམས་ཀྱི་སྦྱོར་བ་ལ་བརྩོན་པའོ། །རིགས་ཀྱི་བུ། དེ་ལྟར་ཁོ་མོ་ཆོས་སྣང་བའི་སྒོ་ སེམས་ཅན་ཐམས་ཅད་ལ་ཡོངས་སུ་སྟོན་པ་རྣམ་པ་དེ་ལྟ་བུ་ཡོངས་སུ་སྦྱོང་ཞིང་དགེ་པའི་རྩ་བ་བསགས་པའི་ཚོགས་ལ་སྟ་གོན་དུ་གནས་པས་རྣམ་པ་བཅུས་ཆོས་ཀྱི་ དབྱིངས་ལ་རྣམ་པར་ལྟ་ཞིང་ཁོང་དུ་ཆུད་པ་དང༌། རྗེས་སུ་གཞལ་བར་བྱེད་དོ། །བཅུ་གང་ཞེ་ན། འདི་ལྟ་སྟེ། ཡེ་ཤེས་སྣང་བ་ཤིན་ཏུ་ཡངས་པ་ཐོབ་པས་ཆོས་ཀྱི་དབྱིངས་ནི། ཚད་ མེད་པ་ཁོང་དུ་ཆུང་པར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་བ་རྣམ་པར་དམིགས་པར་བྱ་བའི་ཕྱིར་ཆོས་ཀྱི་དབྱིངས་ནི། མཐའ་དང་དབུས་མེད་པར་ ཁོང་དུ་ཆུད་པར་བྱེད་དོ། །སངས་རྒྱས་ཀྱི་ཞིང་ཐམས་ཅད་ཡོངས་སུ་གནན་པ་དང༌། དེ་བཞིན་གཤེགས་པ་མཆོད་ཅིང་རིམ་གྲོར་བྱ་བའི་ཕྱིར་ཆོས་ཀྱི་དབྱིངས་ནི། མུ་མེད་པར་ཁོང་ དུ་ཆུད་པར་བྱེད་དོ། །འཇིག་རྟེན་གྱི་ཁམས་རྒྱ་མཚོ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ཡོངས་སུ་བསྟན་པའི་ཕྱིར་ཆོས་ཀྱི་དབྱིངས་ནི། ས་མཚམས་མེད་པར་ཁོང་དུ་ ཆུད་པར་བྱེད་དོ། །དེ་བཞིན་གཤེགས་པའི་ཡེ་ཤེས་ཀྱི་དཀྱིལ་འཁོར་ཐ་མི་དད་པ་ལ་འཇུག་པར་བྱ་བའི་ཕྱིར་ཆོས་ཀྱི་དབྱིངས་ནི། རིས་ཚད་མེད་པར་ཁོང་དུ་ཆུད་པར་བྱེད་དོ། ། བསམ་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱིས་རྣམ་པར་དམིགས་པའི་དེ་བཞིན་གཤེགས་པའི་གསུང་གི་དཀྱིལ་འཁོར་ལ་འཇུག་པར་བྱ་བའི་ཕྱིར་ཆོས་ཀྱི་དབྱིངས་ ནི། རྒྱུད་ཀྱི་ཚུལ་གཅིག་ཏུ་གྱུར་པར་ཁོང་དུ་ཆུད་པར་བྱེད་དོ། །འགྲོ་བ་ཐམས་ཅད་རྣམ་པར་གདུལ་བའི་མཐར་ཕྱིན་པས་དེ་བཞིན་གཤེགས་པའི་སྔོན་གྱི་སྨོན་ལམ་གྱི་མཐ་ ༄༅། །ཐུག་པ་ལ་འཇུག་པར་བྱ་བའི་ཕྱིར་ཆོས་ཀྱི་དབྱིངས་ནི། རང་བཞིན་གྱིས་རྒྱ་ཆེ་བར་ཁོང་དུ་ཆུད་པར་བྱེད་དོ། །བྱང་ཆུབ་སེམས་དཔའ་ཀུན་ཏུ་བཟང་ པོའི་སྤྱོད་པ་འབྱམས་ཀླས་པ་ལ་འཇུག་པར་བྱ་བའི་ཕྱིར་ཆོས་ཀྱི་དབྱིངས་ནི། འགྲོ་བ་ཐམས་ཅད་ལ་མཉམ་པ་ཉིད་དུ་གྱུར་པར་ཁོང་དུ་ཆུད་པར་བྱེད་དོ། །ཀུན་ཏུ་བཟང་པོའི་ སྤྱོད་པའི་རྣམ་པར་འཕྲུལ་པའི་རྒྱན་ལ་འཇུག་པར་བྱ་བའི་ཕྱིར་ཆོས་ཀྱི་དབྱིངས་ནི། རྒྱན་གཅིག་ཏུ་གྱུར་པར་ཁོང་དུ་ཆུད་པར་བྱེད་དོ། །དགེ་བ་ཐམས་ཅད་ཀྱིས་ཆོས་ཀྱི་དབྱིངས་ རྒྱས་པར་དགང་ཞིང་རྣམ་པར་དག་པར་བྱ་བ་ཆུད་མི་ཟ་བའི་ཆོས་ཅན་དུ་བྱ་བའི་ཕྱིར་ཆོས་ཀྱི་དབྱིངས་ནི། ཐུག་པ་མེད་པར་ཁོང་དུ་ཆུད་པར་བྱེད་དོ། །རིགས་ཀྱི་བུ། དེ་ལྟར་ ཁོ་མོ་རྣམ་པ་བཅུ་པོ་དེ་དག་གིས་དགེ་བའི་རྩ་བ་དང༌། ཚོགས་ཐམས་ཅད་ཡོངས་སུ་བསགས་པ་དང༌། སངས་རྒྱས་ཀྱི་བདག་ཉིད་ཆེ་བ་ཉིད་ལ་འཇུག་པར་བྱ་བ་དང༌། སངས་ རྒྱས་ཀྱི་ཡུལ་བསམ་གྱིས་མི་ཁྱབ་པ་རྗེས་སུ་རྟོགས་པར་བྱ་བའི་ཕྱིར་ཆོས་ཀྱི་དབྱིངས་ཐམས་ཅད་ལ་རྣམ་པར་བལྟའོ། །ཁོང་དུ་ཆུད་པ་དང༌། རྗེས་སུ་གཞོལ་བར་བྱེད་ དོ༑ ༑རིགས་ཀྱི་བུ། གཞན་ཡང་ཁོ་མོ་དེ་ལྟར་དེ་བཞིན་གཤེགས་པའི་བདག་ཉིད་ཆེ་བ་ཉིད་ཀྱི་རྗེས་སུ་འབྲང་བའི་ཡིད་ལ་བྱ་བ་དང་ལྡན་པས་གཟུངས་ཀྱི་དཀྱིལ་འཁོར་ གྱི་རྒྱུད་སྟོང་ཕྲག་བཅུས་སེམས་ཅན་རྣམས་ལ་ཆོས་སྟོན་ཏེ། བཅུ་གང་ཞེ་ན། འདི་ལྟར་ཆོས་རྒྱ་མཚོ་ཐམས་ཅད་ཡང་དག་པར་འདུ་བ་ཞེས་བྱ་བའི་གཟུངས་ཀྱི་དཀྱིལ་འཁོར་དང༌། ཆོས་ཐམས་ཅད་བྱིན་གྱིས་རློབ་པའི་གཟུངས་ཀྱི་དཀྱིལ་འཁོར་དང༌། ཆོས་ཀྱི་སྤྲིན་ཐམས་ཅད་ཡོངས་སུ་འཛིན་པའི་གཟུངས་ཀྱི་དཀྱིལ་འཁོར་དང༌། དེ་བཞིན་གཤེགས་པ་ ཐམས་ཅད་ཀྱི་དགོངས་པ་སྒྲོན་མའི་གཟུངས་ཀྱི་དཀྱིལ་འཁོར་དང༌། སེམས་ཅན་ཐམས་ཅད་ཀྱི་ལས་རྒྱ་མཚོ་རབ་ཏུ་སྣང་བར་བྱེད་པའི་སྙིང་པོའི་གཟུངས་ཀྱི་དཀྱིལ་འཁོར་དང༌། ཐེག་པའི་ཚུལ་རྒྱ་མཚོ་དྲི་མ་མེད་པ་ཐམས་ཅད་ལ་ཡང་དག་པར་གཞོལ་བའི་གཟུངས་ཀྱི་དཀྱིལ་འཁོར་དང༌། སངས་རྒྱས་རྒྱ་མཚོ་ཐམས་ཅད་ཀྱི་སྒྲོན་མའི་སྙིང་པོའི་གཟུངས་ ཀྱི་དཀྱིལ་འཁོར་དང༌། དེ་བཞིན་གཤེགས་པ་ཐམས་ཅད་ཀྱི་མཚན་གྱི་འཁོར་ལོའི་གློང་རབ་ཏུ་སྒྲོག་པའི་གཟུངས་ཀྱི་དཀྱིལ་འཁོར་དང༌། དུས་གསུམ་གྱི་སངས་རྒྱས་ཀྱི་སྔོན་གྱི་ སྨོན་ལམ་རྒྱ་མཚོ་བསྟན་པ་ལ་ཡང་དག་པར་གཞོལ་བའི་གཟུངས་ཀྱི་དཀྱིལ་འཁོར་དང༌། ཆོས་ཐམས་ཅད་ལ་མངོན་པར་འཁྱིལ་བའི་ཤུགས་དྲག་པོའི་གཟུངས་ཀྱི་དཀྱིལ་འཁོར་ དང༌། ཐམས་ཅད་མཁྱེན་པ་ཉིད་ཀྱི་ཤུགས་རབ་ཏུ་འབྱུང་བ་ཞེས་བྱ་བའི་གཟུངས་ཀྱི་དཀྱིལ་འཁོར་དང༌། རིགས་ཀྱི་བུ། གཟུངས་ཀྱི་དཀྱིལ་འཁོར་བཅུ་པོ་དེ་དག་ལ་སོགས་པ་ ༄༅། །གཟུངས་ཀྱི་དཀྱིལ་འཁོར་གྱི་རྒྱུད་སྟོང་ཕྲག་བཅུས་སེམས་ཅན་རྣམས་ལ་ཆོས་སྟོན་ཏོ། །རིགས་ཀྱི་བུ། གཞན་ཡང་ཁོ་མོ་ནི། ཐོས་པའི་ཤེས་རབ་ཀྱིས་ སེམས་ཅན་རྣམས་ལ་ཆོས་སྟོན་ཏོ། །བསམ་པའི་ཤེས་རབ་དང༌། བསྒོམས་པའི་ཤེས་རབ་ཀྱིས་སེམས་ཅན་རྣམས་ལ་ཆོས་སྟོན་ཏེ། སྲིད་པའི་རྒྱུད་གཅིག་ལས་ཀྱང་བརྩམས་ ཤིང་སེམས་ཅན་རྣམས་ལ་ཆོས་སྟོན་ཏོ། །སྲིད་པའི་རྒྱུད་རྒྱ་མཚོ་ཐམས་ཅད་ལས་ཀྱང་བརྩམས་ཤིང་སེམས་ཅན་རྣམས་ལ་ཆོས་སྟོན་ཏོ། །དེ་བཞིན་གཤེགས་པ་གཅིག་ གི་མཚན་གྱི་འཁོར་ལོ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་མཚན་གྱི་འཁོར་ལོ་རྒྱ་མཚོ་ལས་ཀྱང་བརྩམས་ཤིང་ཆོས་ སྟོན་ཏོ༑ ༑འཇིག་རྟེན་གྱི་ཁམས་རྒྱ་མཚོ་གཅིག་ལས་ཀྱང་བརྩམས་ཤིང་ཆོས་སྟོན་ཏོ། །འཇིག་རྟེན་གྱི་ཁམས་རྒྱ་མཚོ་ཐམས་ཅད་ལས་ཀྱང་བརྩམས་ཤིང་ཆོས་སྟོན་ཏོ། །སངས་ རྒྱས་གཅིག་གིས་ལུང་བསྟན་པ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱིས་ལུང་བསྟན་པ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ ཏོ༑ ༑དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་ འཁོར་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་གཅིག་གི་ཆོས་ཀྱི་འཁོར་ལོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ ཐམས་ཅད་ཀྱི་ཆོས་ཀྱི་འཁོར་ལོ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །མདོ་སྡེ་གཅིག་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ ཆོས་ཀྱི་འཁོར་ལོ་ལ་ཡང་དག་པར་གཞོལ་བའི་མདོ་སྡེ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་ཀུན་ནས་འདུས་པ་ ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཀུན་ནས་འདུས་པ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །ཐམས་ ཅད་མཁྱེན་པ་ཉིད་ཀྱི་སེམས་གཅིག་ལས་ཀྱང་བརྩམས་ཤིང་ཆོས་སྟོན་ཏོ། །བྱང་ཆུབ་ཀྱི་སེམས་ཀྱི་ཡན་ལག་རྒྱ་མཚོ་ཐམས་ཅད་ལས་ཀྱང་བརྩམས་ཤིང་ཆོས་སྟོན་ཏོ། །ཐེག་པ་ གཅིག་ལས་ཀྱང་བརྩམས་ཤིང་ཆོས་སྟོན་ཏོ། །ཐེག་པ་ཐམས་ཅད་ཀྱི་འབྱུང་བ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །རིགས་ཀྱི་བུ། དེ་ལྟར་ཁོ་མོས་བསྟན་པའི་ཚུལ་ མངོན་པར་སྒྲུབ་པ་བརྗོད་དུ་མེད་པས་སེམས་ཅན་རྣམས་ལ་ཆོས་སྟོན་ཏེ། རིགས་ཀྱི་བུ། དེ་ལྟར་ཁོ་མོ་ཆོས་ཀྱི་དབྱིངས་ཀྱི་ཚུལ་ཐ་མི་དད་པའི་དེ་བཞིན་གཤེགས་པ་རྒྱ་མཚོ་ལ་ ༄༅། །འཇུག་ཅིང་སེམས་ཅན་ཐམས་ཅད་ལ་ཆོས་སྟོན་པས་བླ་ན་མེད་པའི་ཡོངས་སུ་བསྡུ་བ་བྱེད་ཅིང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ཕྱི་ མའི་མཐའི་མུར་ཐུག་པའི་བསྐལ་པ་རྒྱ་མཚོར་གནས་པར་བྱ་བས་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང༌། རྣམ་པར་འཕྲུལ་པ་ཟབ་མོ་ལ་འཇུག་པ་ འདི་ལ་སེམས་ཀྱི་སྐད་ཅིག་རེ་རེ་ཞིང་རྣམ་པར་འཕེལ་བའི་རྣམ་པར་ཐར་པའི་ཡུལ་སྒོམ་པའི་ཚུལ་གྱིས་ཡོངས་སུ་སྒོམ་སྟེ། རྣམ་པར་ཐར་པའི་ཡུལ་སྒོམ་པའི་ཚུལ་རེ་ རེས་ཀྱང་སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་ཐམས་ཅད་དུ་རྒྱས་པར་འགེངས་སོ། །ནོར་བཟང་གིས་སྨྲས་པ། ལྷ་མོ། བྱང་ཆུབ་སེམས་དཔའི་རྣམ་པར་ཐར་པ་དེ་ དེ་ལྟར་ཟབ་པ་ངོ་མཚར་ཆེན། འཕགས་མ། ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་འདི་བརྙེས་ནས་ཇི་སྲིད་ཅིག་ལགས། སྨྲས་པ། རིགས་ཀྱི་བུ། སྔོན་འདས་ པའི་དུས་བསྐལ་བ་འཇིག་རྟེན་གྱི་རྒྱུད་ཀྱི་རྡུལ་ཤིན་ཏུ་ཕྲ་བ་སྙེད་འདས་པའི་ཕ་རོལ་ཅིག་ཏུ་འཇིག་རྟེན་གྱི་ཁམས་ཆོས་ཀྱི་འོད་འཕྲོ་བའི་གྲོང་ཁྱེར་དཔལ་གྱི་སྤྲིན་ཅེས་བྱ་ བ་རིན་པོ་ཆེའི་སྤོས་ཐམས་ཅད་དང་ལྡན་པ། གླིང་བཞི་པའི་འཇིག་རྟེན་གྱི་ཁམས་རྡུལ་ཤིན་ཏུ་ཕྲ་བ་སྙེད་ཀྱི་སྤྲིན་ལ་བླངས་པ། དེ་བཞིན་གཤེགས་པ་ཐམས་ཅད་ཀྱི་སྔོན་གྱི་ སྨོན་ལམ་དབྱངས་སུ་སྒྲོག་པའི་པདྨོས་མཚམས་རྣམ་པར་བརྒྱན་པ། ལྷུན་སེམས་ཅན་ཐམས་ཅད་ཀྱི་ལས་རྒྱ་མཚོས་བྱུང་བའི་ནོར་བུ་རིན་པོ་ཆེའི་རྒྱལ་པོ་རྒྱ་མཚོ་ལས་གྲུབ་ པ། པདྨོ་ཆེན་པོའི་དབྱིབས་སུ་འདུག་པ། རྣམ་པར་དག་ཅིང་ཀུན་ནས་ཉོན་མོངས་པ། མེ་ཏོག་གི་ཁོར་ཡུག་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་བསྐོར་བ། སྤོས་ཀྱི་ རིན་པོ་ཆེ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་རྒྱན་རི་རབ་ལྟར་མངོན་པར་འཕགས་པ་དང་ལྡན་པ། གླིང་བཞི་པ་ཆེན་པོ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་རྒྱན་དང་ལྡན་པ། གླིང་ བཞི་པ་རེ་རེ་ཞིང་ཡང་གྲོང་རྡལ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་ཡང་བརྗོད་དུ་མེད་པ་དང་ལྡན་པ་བྱུང་ངོ༌། །རིགས་ཀྱི་བུ། འཇིག་རྟེན་གྱི་ཁམས་དེའི་བསྐལ་པ་མདོག་དྲི་ མ་མེད་པའི་འོད་ཅེས་བྱ་བ་བྱུང་སྟེ། བསྐལ་པ་དེ་ལ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་བྱུང་ངོ༌། །འཇིག་རྟེན་གྱི་ཁམས་ཆོས་ཀྱི་འོད་འཕྲོ་བའི་གྲོང་ཁྱེར་དཔལ་ གྱི་སྤྲིན་གྱི་གླིང་བཞི་པ་དབུ་མ་རྒྱལ་མཚན་སྣ་ཚོགས་ཞེས་བྱ་བ་བྱུང་སྟེ། དེའི་དབུས་ན་རྒྱལ་པོའི་གནས་རིན་ཆན་མེ་ཏོག་ཀུན་ཏུ་སྣང་བ་ཞེས་བྱ་བ་ཡོད་པར་གྱུར་ཏེ། རྒྱལ་པོའི་ གནས་དེ་དང་ཧ་ཅང་ཡང་མི་རིང་བ་ཞིག་ན་སྙིང་པོ་བྱང་ཆུབ་ཆོས་ཀྱི་རྒྱལ་པོའི་ཕོ་བྲང་རབ་ཏུ་སྣང་བ་ཞེས་བྱ་བ་ཡོད་དེ། སྙིང་པོ་བྱང་ཆུབ་དེ་ལ་དེ་བཞིན་གཤེགས་པ་རི་རབ་ཀྱི་ ༄༅། །རྡུལ་ཤིན་ཏུ་ཕྲ་བ་སྙེད་པོ་དེ་དག་གི་བསྐལ་པའི་དང་པོ་ལ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོ་ཞེས་བྱ་བ་བྱུང་སྟེ། དེའི་ཚེ་འཁོར་ལོས་བསྒྱུར་བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པ་ཞེས་བྱ་བ་བྱུང་ནས་དེས་བཅོམ་ལྡན་འདས་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ ཀྱི་དབྱངས་འོད་ཀྱི་རྒྱལ་པོ་ལས་མདོ་སྡེ་ཆོས་ཐམས་ཅད་ཀྱི་གློང་རྒྱ་མཚོ་ཞེས་བྱ་བ་ཡོངས་སུ་བཟུང་སྟེ། བཟུང་ནས་ཀྱང་ཆོས་ཀྱི་འཁོར་ལོ་རྗེས་སུ་བསྐོར་ཏོ། །ཡོངས་སུ་མྱ་ ངན་ལས་འདས་ནས་ཀྱང་རབ་ཏུ་བྱུང་སྟེ་བསྟན་པ་ཡོངས་སུ་བཟུང་ངོ༌། །བསྟན་པ་ནུབ་ཏུ་ཆ་སྟེ། བསྟན་པ་ཡང་སྟོང་དུ་གྱེས། ཆོས་བསྟན་པ་ཤིན་ཏུ་བསྟན་པའི་ཚུལ་ནི། བརྒྱ་ ཕྲག་བཅུར་གྱུར། རྙོག་པའི་བསྐལ་པ་བར་མ་ནི། ཉེ་བར་གནས་པར་གྱུར་པའི་ཆེ་སེམས་ཅན་ལས་དང་ཉོན་མོངས་པའི་སྒྲིབ་པས་བསྒྲིབས་པ། འཐབ་མོ་དང༌། རྩོད་པ་ དང༌། དཀྲུགས་མ་ལ་ཞུགས་པར་གྱུར་པ་དང༌། དགེ་སློང་སངས་རྒྱས་ཀྱི་བསྟན་པའི་ཡོན་ཏན་དོན་དུ་མི་གཉེར་ཅིང་ཡུལ་གྱི་དགའ་བ་ལྷུར་ལེན་པར་གྱུར་པ། རྒྱལ་པོ་དང་ རྐུན་པོའི་གཏམ་ལ་ཞུགས་པ། བུད་མེད་དང༌། ཡུལ་དང༌། རྒྱ་མཚོའི་གཏམ་ལ་མོས་པ། འཇིག་རྟེན་རྒྱང་པན་པའི་ཚིག་ལ་ཞུགས་པ་རྣམས་ཡོངས་སུ་སྐྱོ་བ་བསྐྱེད་པའི་ཕྱིར་ ཀྱེ་མའོ༑ ༑བསྐལ་པ་དུ་མར་ཡོངས་སུ་བསྒྲུབས་པའི་ཆོས་ཀྱི་སྒྲོན་མ་ཆེན་པོ་ནི། ནུབ་པར་གྱུར་མ་ཁད་དོ། །ཞེས་ཆོས་དང་ལྡན་པའི་འོ་དོད་བོས་ཏེ་ཡོངས་སུ་སྐྱོ་བར་འགྱུར་བའི་ གཏམ་བྱས་ནས་དེ་སྟེང་གི་ནམ་མཁའི་དབྱིངས་སུ་ཏ་ལ་བདུན་ཙམ་དུ་མངོན་པར་འཕགས་ནས་འོད་འཕྲོ་བ་ཁ་དོག་མཐའ་ཡས་པའི་སྤྲིན་རབ་ཏུ་བཀྱེ་སྟེ། འོད་ཟེར་གྱི་དྲ་བའི་རྒྱན་ ཆེན་པོ་ཁ་དོག་སྣ་ཚོགས་དང་ལྡན་པ་བཀྱེ་ནས་འོད་ཁ་དོག་དུ་མ་དང་ལྡན་པས་འཇིག་རྟེན་གྱི་ཉོན་མོངས་པའི་གདུང་བ་ཞི་བར་བྱས་ཏེ་སེམས་ཅན་མཐའ་དང་དབུས་མེད་པ་དག་ཀྱང་ བྱང་ཆུབ་ལ་རབ་ཏུ་བཀོད་དོ། །དེ་བཞིན་གཤེགས་པའི་བསྟན་པ་དེ་ཡང་ཕྱིར་གསལ་བར་བྱས་ཏེ་ལོ་སྟོང་ཕྲག་དྲུག་ཅུར་གནས་པར་གྱུར་ཏོ། །དེའི་ཚེ་འཁོར་ལོས་བསྒྱུར་བའི་རྒྱལ་ པོ་ཉི་མ་ལྟར་བཞིན་མདོག་དྲི་མ་མེད་པ་དེ་ཉིད་ཀྱི་བུ་མོ་དགེ་སློང་མ་ཆོས་ཀྱི་འཁོར་ལོས་སྤྲུལ་པའི་འོད་ཅེས་བྱ་བ་དགེ་སློང་མ་བརྒྱ་ཕྲག་སྟོང་གི་འཁོར་དང་ལྡན་པ་བྱུང་སྟེ། དེས་ ཡོངས་སུ་སྐྱོ་བར་འགྱུར་བའི་སྒྲ་དེ་ཐོས་ནས་ཆོ་འཕྲུལ་ཆེན་པོ་དེ་མཐོང་སྟེ། འཁོར་དང་བཅས་པས་བྱང་ཆུབ་ཏུ་སེམས་བསྐྱེད་ནས་དགེ་སློང་མ་བརྒྱ་ཕྲག་སྟོང་པོ་དེ་དག་ཀྱང་བླ་ན་མེད་ པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱས་ཏེ། དེ་བཞིན་གཤེགས་པ་མངོན་དུ་འགྱུར་བ་ལ་ཡང་དག་པར་གཞོལ་བ་ཞེས་བྱ་བའི་ཏིང་ངེ་འཛིན་ཀྱང་རབ་ཏུ་ ༄༅། །ཐོབ་པར་གྱུར་ཏེ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོས་སྤྲུལ་པའི་འོད་ཅེས་བྱ་བའི་གཟུངས་ཀྱང་རབ་ཏུ་ཐོབ་བོ། །ཆོས་རྒྱ་མཚོའི་ ཚུལ་ཐམས་ཅད་ལ་འཇུག་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་རབ་ཏུ་ཐོབ་པར་གྱུར་ཏོ། །དགེ་སློང་མཆོས་ཀྱི་འཁོར་ལོས་སྤྲུལ་པའི་འོད་ཀྱིས་ཀྱང་དེ་བཞིན་ གཤེགས་པ་ཐམས་ཅད་ཀྱི་བསྟན་པ་ལས་བྱུང་བའི་འོད་ཀྱི་སྒྲོན་མ་ཞེས་བྱ་བའི་ཏིང་ངེ་འཛིན་དང༌། བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང༌། རྣམ་ པར་འཕྲུལ་པ་ཟབ་མོ་ལ་འཇུག་པ་འདི་ཡང་ཤིན་ཏུ་ཕྲ་ཞིང་འཇམ་པའི་ཚུལ་དུ་རབ་ཏུ་ཐོབ་པར་གྱུར་ཏེ། དེ་ཐོབ་པས་དེ་ལ་དེ་བཞིན་གཤེགས་པ་ཆོས་རྒྱ་མཚོ་ཐམས་ ཅད་ཀྱི་དབྱངས་འོད་ཀྱི་རྒྱལ་པོའི་རྣམ་པར་འཕྲུལ་པ་དེ་དག་ཐམས་ཅད་ཀྱང་མངོན་དུ་གྱུར་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་འཁོར་ལོས་བསྒྱུར་ བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པ་ཞེས་བྱ་བ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོའི་བསྟན་པ་ལ་རབ་ཏུ་བྱུང་སྟེ་ཆོས་ཀྱི་ འཁོར་ལོ་རྗེས་སུ་བསྐོར་བ་དང༌། ཡོངས་སུ་མྱ་ངན་ལས་འདས་ནས་ཀྱང་བསྟན་པ་ནུབ་ཏུ་ཆ་བའི་ཆེ་དང་དུས་ན་བསྟན་པ་ཡོངས་སུ་འཛིན་ཅིང་ཆོས་ཀྱི་སྒྲོན་མ་ཆེན་པོ་འབར་ བར་བྱེད་པ་དེ་གཞན་ཞིག་ཡིན་པ་སྙམ་དུ་སེམས་ན་ནི། རིགས་ཀྱི་བུ། ཁྱོད་ཀྱིས་དེ་ལྟ་མི་བལྟ་སྟེ། བྱང་ཆུབ་སེམས་དཔའ་ཀུན་ཏུ་བཟང་པོ་ནི། དེའི་ཚེ་དེའི་དུས་ན་འཁོར་ལོས་བསྒྱུར་ བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པ་ཞེས་བྱ་བར་གྱུར་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་ཉི་མ་ལྟར་བཞིན་ མདོག་དྲི་མ་མེད་པའི་བུ་མོ་དགེ་སློང་མ་ཆོས་ཀྱི་འཁོར་ལོ་སྤྲུལ་པའི་འོད་ཅེས་བྱ་བ། དགེ་སློང་མ་བརྒྱ་ཕྲག་སྟོང་གི་འཁོར་དང་ལྡན་པ་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ ན་ནི༑ དེ་ལྟར་མི་བལྟ་སྟེ། ཁོ་མོ་ནི། དེའི་ཚེ་དེའི་དུས་ན། དགེ་སློང་མ་ཆོས་ཀྱི་འཁོར་ལོས་སྤྲུལ་པའི་འོད་ཅེས་བྱ་བར་གྱུར་ཏེ། དེ་ལྟར་ཁོ་མོས་དེ་བཞིན་གཤེགས་པ་ཆོས་རྒྱ་མཚོ་ ཐམས་ཅད་ཀྱི་དབྱངས་འོད་ཀྱི་རྒྱལ་པོའི་བསྟན་པའང་ཡོངས་སུ་བཟུང་ངོ༌། །དགེ་སློང་མ་བརྒྱ་ཕྲག་སྟོང་པོ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ ལྡོག་པར་བྱས་ཏེ། དེ་བཞིན་གཤེགས་པ་མངོན་དུ་གྱུར་པ་ལ་ཡང་དག་པར་གཞོལ་བའི་ཏིང་ངེ་འཛིན་ལའང་རབ་ཏུ་བཀོད་དོ། །དེ་བཞིན་གཤེགས་པ་ཐམས་ཅད་ཀྱི་འཁོར་ ལོས་སྤྲུལ་པའི་འོད་ཀྱི་གཟུངས་དང༌། ཆོས་རྒྱ་མཚོའི་ཚུལ་ཐམས་ཅད་ལ་འཇུག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལའང་རབ་ཏུ་བཀོད་དོ། །དེ་བཞིན་གཤེགས་པ་དེའི་འོག་ཏུ་ ༄༅། །ཁོ་མོས་དེ་བཞིན་གཤེགས་པ་ཆོས་དྲི་མ་མེད་པའི་རི་བོ་ཡེ་ཤེས་ཀྱི་རྩེ་མོའི་འོད་ཅས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ ཀྱི་དཀྱིལ་འཁོར་གྱི་འོད་རབ་ཏུ་སྣང་བའི་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཉི་མ་དཔལ་གྱི་སྤྲིན་ཅེས་བྱ་བ་བསྙེན་བཀུར་ ཏོ༑ ༑དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོ་ཤིན་ཏུ་བསྟན་པའི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཉི་མའི་དཀྱིལ་ འཁོར་ཡེ་ཤེས་ཀྱི་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་མེ་ཏོག་དཔལ་གྱི་རྒྱལ་མཚན་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་ འོག་ཏུ་དེ་བཞིན་གཤེགས་པ་ཆོས་ཀྱི་འོད་འཕྲོ་རི་བོ་དཔལ་གྱི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཚུལ་ཟབ་མོ་དཔལ་གྱི་ཟླ་བ་ ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཡེ་ཤེས་ཡང་དག་པར་བྱུང་བ་ཀུན་ཏུ་སྣང་བའི་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་ དེ་བཞིན་གཤེགས་པ་ཡེ་ཤེས་འབྱུང་གནས་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིའི་དབང་པོ་དཔལ་གྱི་སྙིང་པོའི་རྒྱལ་པོ་ཞེས་བྱ་ བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྒོ་ཀུན་ནས་མཁྱེན་པའི་རི་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཐམས་ཅད་ཀྱི་ བརྩོན་འགྲུས་དྲག་པོའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རིན་པོ་ཆེའི་མེ་ཏོག་དཔལ་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ ཏུ་དེ་བཞིན་གཤེགས་པ་འོད་ཟབ་མོ་ཞི་བ་བརྩེགས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་གྱི་ཚུལ་རབ་ཏུ་སྣང་བའི་འོད་ཀྱི་ཟླ་བ་ཞེས་བྱ་བ་ བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་འོད་འཕྲོ་དཔལ་གྱི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀུན་ཏུ་བཟང་ པོའི་དཀྱིལ་འཁོར་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྤྱིའུ་ཚུགས་ཀྱི་ཕྱོགས་ཡེ་ཤེས་ཀྱི་སྣང་བར་མཛད་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། ། དེའི་འོག་ཏུ་དེ་བཞིན་གཤེགས་པ་འོད་ཟེར་གྱི་མེ་ཏོག་ཀུན་ཏུ་རྒྱས་པའི་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་སེངྒེའི་དཔལ་གྱི་རྒྱལ་ མཚན་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཉི་མ་ཀུན་ཏུ་སྣང་བའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ ༄༅། །མཚན་རིན་པོ་ཆེས་རྣམ་པར་བརྒྱན་པའི་རི་བོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཉི་མ་རྣམ་པར་གནོན་པས་ཀུན་ ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དྲ་བ་རྣམ་པར་སངས་རྒྱས་པའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་ བཞིན་གཤེགས་པ་ཆོས་ཀྱི་པདྨོ་རབ་ཏུ་རྒྱས་པའི་དཔལ་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་གྱི་ཉི་མའི་འཁོར་ལོ་ཀུན་ཏུ་སྣང་བ་ ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མི་བསྙེངས་པའི་རྡོ་རྗེ་སེངྒེ་མཐུ་བོ་ཆེ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ ཤེས་རྒྱལ་མཚན་ཀུན་ཏུ་དཔའ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྐུ་ཆོས་ཀྱི་པདྨོའི་མེ་ཏོག་ཤིན་ཏུ་རྒྱས་པ་ཞེས་བྱ་བ་བསྙེན་བཀུར་ཏོ། ། དེའི་འོག་ཏུ་དེ་བཞིན་གཤེགས་པ་ཡོན་ཏན་མེ་ཏོག་དཔལ་གྱི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དབྱིག་རི་བོ་སྣང་བའི་ཕུང་ པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་སྤོས་འོད་འཕྲོ་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྒོ་ཀུན་ནས་ ཆོས་སྟོན་པའི་རི་བོའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྙིང་པོ་བྱང་ཆུབ་རྣམ་པར་སངས་རྒྱས་པའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་ འོག་ཏུ་དེ་བཞིན་གཤེགས་པ་ཆོས་ཀྱི་སྒྲོན་མ་རབ་ཏུ་འབར་བའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གཟུགས་བརྙན་ཀུན་ཏུ་སྣང་བའི་ གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྤྲིན་གྱི་རྒྱལ་མཚན་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་ པ་རྡོ་རྗེ་ལྟར་བརྟན་པའི་རྒྱལ་མཚན་རྒྱ་མཚོའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གྲགས་པའི་རི་བོ་དཔལ་གྱི་སྤྲིན་ཅེས་བྱ་བ་བསྙེན་བཀུར་ ཏོ༑ ༑དེའི་འོག་ཏུ་དེ་བཞིན་གཤེགས་པ་ཙནྡན་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་དཔལ་གྱི་མེ་ཏོག་ཀུན་ནས་རྒྱས་པའི་གཟི་བརྗིད་ སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སེམས་ཅན་ཐམས་ཅད་དུ་སྣང་བའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་ པ་ཡོན་ཏན་པདྨོ་དཔལ་གྱི་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྤོས་ཀྱི་འོད་འཕྲོ་བ་རབ་ཏུ་སྣང་བའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ ༄༅། །ཏུ་དེ་བཞིན་གཤེགས་པ་རྒྱུ་པདྨོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་གྱི་རི་བོ་རྣམ་པར་སྣང་བ་ཞེས་བྱ་བ་བསྙེན་ བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྙན་པ་ཀུན་ཏུ་རྣམ་པར་གྲགས་པའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ ཤེས་ཀུན་ཏུ་སྣང་བའི་རི་བོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་གྲོང་ཁྱེར་རབ་ཏུ་སྣང་བའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ ཏུ་དེ་བཞིན་གཤེགས་པ་ཤིང་གི་རི་བོ་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་དཔལ་ཀུན་ཏུ་རྣམ་པར་སྣང་བའི་དཔལ་ཞེས་བྱ་བ་བསྙེན་ བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོའི་ང་རོ་རབ་ཏུ་སྒྲོག་པའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཐམས་ཅད་ཀྱི་ གནས་བསྒྲུབ་པ་ཡོངས་སུ་སྒྲུབ་པའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀུན་ཏུ་སྣང་བའི་དམ་པ་ཞེས་བྱ་བ་བསྙེན་ བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་དམ་པའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྟོབས་ཀྱིས་དཔའ་བའི་ རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འཁོར་ལོ་འོད་ཀྱི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ འོད་ཟེར་ཡོན་ཏན་བྱ་བ་[?] དཔན་ཡེ་ཤེས་དང་ཤེས་རབ་ཀྱི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འཁོར་ལོ་ཟླ་བས་འཕགས་པའི་དཔལ་ ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་པདྨོ་རྣམ་པར་སྣང་བས་རྣམ་པར་སངས་རྒྱས་པའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་ བཞིན་གཤེགས་པ་རིན་ཆེན་པདྨོ་སྣང་བའི་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་དཔལ་གྱི་རྩེ་མོའི་སྤྲིན་རབ་ཏུ་སྣང་བ་ཞེས་བྱ་བ་བསྙེན་ བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀྱི་མེ་ཏོག་ཀུན་ནས་རྣམ་པར་དག་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་དཔལ་གྱི་རི་ པོའི་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་དཀྱིལ་འཁོར་སྤོའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ བསོད་ནམས་སྣ་ཚོགས་ཀྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་རི་བོ་རྒྱལ་མཚན་གྱི་སྤྲིན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་ ༄༅། །བཞིན་གཤེགས་པ་ཡོན་ཏན་རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཉི་མའི་སྤྲིན་རབ་ཏུ་སྣང་བ་ཞེས་ བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྤྲིན་སྙན་པ་རྣམ་པར་གྲགས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ དཀྱིལ་འཁོར་ན་བུན་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་བྱང་ཆུབ་རྣམ་པར་སངས་རྒྱས་པའི་ཡེ་ཤེས་གཟི་བརྗིད་ཅེས་བྱ་བ་བསྙེན་བཀུར་ཏོ། ། དེའི་འོག་ཏུ་དེ་བཞིན་གཤེགས་པ་ཆོས་ཀྱི་དཀྱིལ་འཁོར་རྣམ་པར་སངས་རྒྱས་པའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གསེར་རིན་ པོ་ཆེའི་རི་བོ་གཟི་བརྗིད་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་དཔལ་གྱི་རི་བོ་གཟི་བརྗིད་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་ དེ་བཞིན་གཤེགས་པ་ཤེས་རབ་ཀྱི་སྒྲ་ཀུན་ནས་འབྱུང་བའི་སྤྲིན་ཅས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྟོབས་ཀྱི་དཔལ་བརྩེགས་པ་ཞེས་བྱ་ བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྤོས་འོད་འབྲོ་བའི་སྤྲིན་ཕུན་སུམ་ཚོགས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་ པ་གསེར་རིན་པོ་ཆེའི་རིའི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གཙུག་ཏོར་གྱི་མཛོད་ཆོས་ཐམས་ཅད་ཀྱི་དཀྱིལ་འཁོར་གྱི་སྤྲིན་ཅེས་བྱ་བ་ བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འཁོར་ལོ་རབ་ཏུ་འབར་བའི་གཟི་བརྗིད་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ རྩེ་མོ་མངོན་པར་འཕགས་པའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་བརྩོན་འགྲུས་ཀྱི་སྒྲོན་མ་ཀུན་ཏུ་སྣང་བའི་སྤྲིན་ཅེས་བྱ་བ་བསྙེན་ བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཏིང་ངེ་འཛིན་གྱི་ཕྱག་རྒྱ་ཤིན་ཏུ་ཡངས་པའི་ཅོད་པན་ཤེས་རབ་ཀྱི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་ པ་རིན་པོ་ཆེ་ཡིད་དུ་འོང་བའི་དཔལ་གྱི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྒྲོན་མ་རིན་ཆེན་བླ་རེའི་དབྱངས་ཞེས་བྱ་བ་བསྙེན་བཀུར་ཏོ། ། དེའི་འོག་ཏུ་དེ་བཞིན་གཤེགས་པ་ཆོས་ཀྱི་ནམ་མཁའ་ལ་སེངྒེའི་འོད་ཤིན་ཏུ་མཛེས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་གྱིས་རྣམ་པར་བརྒྱན་ པའི་རྒྱལ་མཚན་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་གྱི་རི་བོ་རྣམ་པར་སྣང་བའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་ ༄༅། །གཤེགས་པ་ཆོས་ཀྱི་ནམ་མཁའ་སྒྲིབ་པ་མེད་པའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་ཡིད་དུ་འོང་བའི་མེ་ ཏོག་གི་ཡན་ལག་ཤིན་ཏུ་རྒྱས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འཇིག་རྟེན་གྱི་དབང་པོ་དམ་པའི་འོད་ཀྱི་དབྱངས་ཞེས་བྱ་བ་བསྙེན་ བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཐམས་ཅད་ཏིང་ངེ་འཛིན་གྱི་འོད་ཀྱི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྒོའི་ དབྱངས་མང་པོའི་མཛོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་འབར་བའི་འོད་འཕྲོ་རྒྱ་མཚོའི་དབྱངས་ཞེས་བྱ་བ་བསྙེན་བཀུར་ཏོ། ། དེའི་འོག་ཏུ་དེ་བཞིན་གཤེགས་པ་དུས་གསུམ་གྱི་མཚན་རབ་ཏུ་སྣང་བའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དཀྱིལ་ འཁོར་དཔལ་གྱི་རི་བོ་སྣང་བའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དབྱིངས་ཀྱི་སེངྒེའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ ཏུ་དེ་བཞིན་གཤེགས་པ་རྣམ་པར་སྣང་མཛད་དཔལ་གྱི་རི་རབ་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཏིང་ངེ་འཛིན་རྒྱ་མཚོ་ཐམས་ཅད་སྣང་བར་ མཛད་པའི་སེངྒེ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀྱི་འོད་ཀུན་ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ ཤེས་རབ་ཀྱི་འོད་ཀུན་ཏུ་གསལ་བ་ཆོས་ཀྱི་གྲོང་ཁྱེར་རབ་ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེ་ལྟར་རིགས་ཀྱི་བུ་། སངས་རྒྱས་བརྒྱ་པོ་འདི་དག་ལ་སོགས་པ་བསྐལ་པ་ མདོག་དྲི་མ་མེད་པའི་འོད་ཅེས་བྱ་བ་ལ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཅིག་བྱུང་སྟེ། རིགས་ཀྱི་བུ། དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་ བ་སྙེད་པོ་དེ་དག་ཐམས་ཅད་ཀྱི་ཐ་མར་དེ་བཞིན་གཤེགས་པ་ཆོས་ཀྱི་དབྱིངས་ཀྱི་གྲོང་ཁྱེར་ཡེ་ཤེས་ཀྱི་འོད་ཀྱིས་རབ་ཏུ་སྣང་བའི་རྒྱལ་པོ་ཞེས་བྱ་བ་བྱུང་བར་གྱུར་ཏེ། དེ་ལྟར་རིགས་ ཀྱི་བུ༑ ཁོ་མོས་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་ལས་ཆོས་ཀྱི་རྒྱ་མཚོ་ཐམས་ཅད་ཀྱི་དབྱིངས་ཀྱི་འོད་ཀྱི་རྒྱལ་པོ་ཞེས་བྱ་བ་ལ་སོགས་པ་ཐ་མ་ ཆོས་ཀྱི་དབྱིངས་ཀྱི་གྲོང་ཁྱེར་ཡེ་ཤེས་ཀྱིས་རབ་ཏུ་སྣང་བའི་བར་དེ་དག་ཐམས་ཅད་ཁོ་མོས་མཆོད་དོ། །དེ་བཞིན་གཤེགས་པ་དེ་དག་ཐམས་ཅད་ལ་ཁོ་མོས་རིམ་གྲོར་བྱས་སོ།། ཐམས་ཅད་ཀྱི་ཆོས་བསྟན་པ་ཡང་ཐོས་སོ། །དེ་བཞིན་གཤེགས་པ་དེ་དག་ཐམས་ཅད་ཀྱི་བསྟན་པ་ལ་ཡང་ཁོ་མོ་རབ་ཏུ་བྱུང་ངོ༌། །དེ་བཞིན་གཤེགས་པ་དེ་དག་ཐམས་ཅད་ཀྱི་ ༄༅། །བསྟན་པ་ཡང་ཁོ་མོས་ཡོངས་སུ་བཟུང་ངོ༌། །བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང༌། རྣམ་པར་འཕྲུལ་པ་ཟབ་མོ་ལ་འཇུག་ པ་འདི་ཡང་དེ་བཞིན་གཤེགས་པ་དེ་དག་ཐམས་ཅད་ལས་ཐོབ་པའི་ཚུལ་རྣམ་པ་སྣ་ཚོགས་ཀྱིས་རབ་ཏུ་ཐོབ་བོ། དེ་བཞིན་གཤེགས་པ་དེ་དག་ཐམས་ཅད་ཀྱི་ཞབས་ཀྱི་ དྲུང་དུའང་ཁོ་མོས་སེམས་ཅན་རྒྱ་མཚོ་མཐའ་དང་དབུས་མེད་པ་ཡོངས་སུ་སྨིན་པར་བྱས་སོ། །དེ་ཚུན་ཆད་དུ་བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ལ་དེ་ བཞིན་གཤེགས་པ་ཇི་སྙེད་ཅིག་བྱུང་བར་གྱུར་པ་དེ་དག་ཐམས་ཅད་ནི། ཁོ་མོས་ཆོས་ཀྱི་ནན་ཏན་གྱིས་མཆོད་པ་བྱས་ཏེ། རིགས་ཀྱི་བུ། དེ་ཕྱིན་ཆད་དུ་ཁོ་མོས་སེམས་ ཅན་འཁོར་བའི་མུན་པ་ན་འཁོད་ཅིང་མི་ཤེས་པའི་གཉིད་ཀྱིས་ལོག་པ་རྣམས་ཀྱི་མེལ་ཚེ་བྱས་སོ། །དེ་དག་གི་སེམས་ཀྱི་གྲོང་ཁྱེར་ཡང་ཡོངས་སུ་བསྲུངས་སོ། །དེ་དག་ ཁམས་གསུམ་གྱི་གྲོང་ཁྱེར་ནས་གྱེན་དུ་བསྐྱོད་ཅིང་ཐམས་ཅད་མཁྱེན་པ་ཉིད་ཀྱི་གྲོང་རྡལ་དུའང་རབ་ཏུ་བཀོད་དོ། །རིགས་ཀྱི་བུ། ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་ སྒྲ་ཡིད་དུ་འོང་བ་དང༌། རྣམ་པར་འཕྲུལ་པ་ཟབ་མོ་ལ་འཇུག་པ་འཇིག་རྟེན་གྱི་ཚིག་ཀྱལ་བ་རྣམ་པར་ཟློག་པ། གཉིས་སུ་སྨྲ་བ་མེད་པ་ལ་རབ་ཏུ་འགོད་པ། བདེན་པ་ལ་རབ་ ཏུ་གཞོག་པའི་མཐར་ཕྱིན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་དག་གི་ལམ་གྱི་རང་བཞིན་ཐམས་ཅད་ཐོགས་པ་མེད་པར་ཤེས་པ། སེམས་ཀྱི་སྐད་ཅིག་ རེ་རེ་ལ་ཆོས་ཐམས་ཅད་མངོན་པར་འཚང་རྒྱ་བར་དབང་བསྒྱུར་བ། སེམས་ཅན་ཐམས་ཅད་ཀྱི་སྒྲ་སྐད་དང་ཚིག་རྒྱ་མཚོ་ལ་ཞུགས་པ། སྐད་རྒྱ་མཚོ་ཐམས་ཅད་མངོན་པར་འདུ་ བྱ་བ་ལ་མཁས་པ། ཆོས་ཐམས་ཅད་ཀྱི་གྲངས་དང༌། མིང་རྒྱ་མཚོའི་ཚུལ་དང་ཆོག་ལ་མཁས་པ། ཆོས་ཐམས་ཅད་ལ་ཡང་དག་པར་གཞོལ་བའི་གཟུངས་རྒྱ་མཚོ་ལ་དབང་ བསྒྱུར་བ། སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཆོས་ཀྱི་སྤྲིན་མངོན་པར་སྒྲུབ་པ་ལ་མཁས་པ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་གདུལ་ བར་སྤྱོད་པའི་མཐར་ཕྱིན་པར་བྱེད་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པའམ། སེམས་ཅན་ཐམས་ཅད་ཡོངས་སུ་སྡུད་པའི་ནན་ཏན་ཤེས་པར་བྱ་བའམ། བྱང་ ཆུབ་སེམས་དཔའི་ལམ་བླ་ན་མེད་པར་བརྩམས་པའི་སྦྱོར་བའམ། བྱང་ཆུབ་སེམས་དཔའི་ཡེ་ཤེས་ཤིན་ཏུ་ཕྲ་བ་ཁོང་དུ་ཆུད་པའམ། བྱང་ཆུབ་སེམས་དཔའི་ཆོས་ཀྱི་གཏེར་དང༌། མཛོད་རྣམ་པར་འབྱེད་པའི་ཁྱུ་མཆོག་གི་མཐུའམ། བྱང་ཆུབ་སེམས་དཔའི་ཆོས་ཀྱི་གཏམ་ལ་སེངྒེའི་ཁྲི་ཡོངས་སུ་གནན་པར་བྱ་བ་ཤེས་པར་ནུས་རེ་སྐ་ན། དེ་ཅིའི་ཕྱིར་ཞེ་ན། ༄༅། །སྐྱེས་བུ་དམ་པ་དེ་དག་ནི། ཆོས་ཐམས་ཅད་ཀྱི་སའི་དཀྱིལ་འཁོར་གྱི་གཟུངས་ཡོངས་སུ་གནོན་པ་ཤ་སྟག་གོ །སོང་རིགས་ཀྱི་བུ། བཅོམ་ལྡན་འདས་རྣམ་ པར་སྣང་མཛད་ཀྱི་ཞབས་ཀྱི་དྲུང་འདི་ཉིད་དུ་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པ་ཞེས་བྱ་བ་འདུག་སྟེ། ཁོ་མོ་དང་རྒྱང་མི་རིང་བ་ཞིག་ན་འདུག་ གི །དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པ་ཉིད་དུ་སློབ་པ་དང༌། ཇི་ལྟར་ནན་ཏན་དུ་བྱེད་ཅིང༌། སེམས་ཅན་ཐམས་ཅད་ཐམས་ཅད་མཁྱེན་ པ་ཉིད་དུ་འགོད་པར་བྱེད་པ་དྲིས་ཤིག །དེ་ནས་མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་གྱིས་དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་ སྒྲ་ཡིད་དུ་འོང་བ་དང༌། རྣམ་པར་འཕྲུལ་བ་ཟབ་མོ་ལ་འཇུག་པ་འདི་ཉིད་བརྣན་ཏེ་བསྟན་པའི་ཕྱིར་ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་པ། རྣམ་ཐར་གང་གིས་ དུས་གསུམ་རྒྱལ་བ་མ་ལུས་དང༌། །ཆོས་དབྱིངས་ཀུན་ཏུ་འབྱམས་ཀླས་མཐའ་དང་དབུས་མེད་པ། །ཤེས་བྱེད་མཚན་ཉིད་ཀུན་གྱི་གཞིར་ཐུག་རྟོགས་པ་ཡི། །རྒྱལ་སྲས་རྣམས་ ཀྱི་རྣམ་ཐར་ཟབ་ཅིང་བལྟ་བར་དཀའ། །ཚོགས་ལས་བྱུང་བའི་རྣམ་ཐར་ཚུལ་ནི་མཐའ་ཡས་ཏེ། །ཆོས་ཉིད་ཐོབ་པས་ཚད་མེད་བསམ་དུ་མེད་པ་ཡིན། །ཡོངས་སུ་འཕེལ་ཞིང་ ཀུན་ཏུ་ཆགས་མེད་ཤུགས་དྲག་པར། །དུས་གསུམ་བྱམས་པའི་ཚུལ་གྱི་ལམ་ལ་འཇུག་པར་གྱིས། །འདི་ལྟར་སངས་རྒྱས་ཞིང་རྒྱུད་རྡུལ་ཕྲན་རབ་སྙེད་ཀྱི། །བསྐལ་པ་འདས་ པའི་སྔ་རོལ་སྔོན་གྱི་ཞིང་བྱུང་བ། །འཇིག་རྟེན་ཁམས་ནི་ཆོས་འོད་སྤྲིན་གྱི་གྲོང་ཁྱེར་དཔལ། །བསྐལ་པ་བྱུང་བ་དྲི་མེད་མདོག་ཏུ་འོད་ཆེན་ནོ། །བསྐལ་པ་དེ་གཅིག་རྒྱལ་བའི་ གདུང་ནི་རྒྱུད་མ་ཆད། །སངས་རྒྱས་རི་རབ་རྡུལ་ཕྲན་རབ་སྙེད་བྱུང་བར་གྱུར། །བདེ་གཤེགས་ཆོས་ཀྱི་རྒྱ་མཚོ་འོད་དབྱངས་རྒྱལ་པོ་ནི། །ཐོག་མར་བྱུང་སྟེ་དེ་དག་བསྐལ་པ་དང་པོ་ པ༑ ༑རྒྱལ་བ་ཆོས་སྤྲིན་གྲོང་ཁྱེར་འོད་སྣང་རྒྱལ་པོ་ནི། །བདེ་གཤེགས་དེ་དག་ཀུན་གྱི་ཐ་མར་འཇིག་རྟེན་བྱུང༌། །དེ་དག་ཀུན་གྱི་སྤྱན་སྔར་ཕྱིན་ཏེ་ཁོ་མོས་མཆོད། །དེ་དག་ཀུན་ལས་ ཆོས་ཀྱང་དགའ་བ་ཆེན་པོས་ཐོས། །ཁོ་མོས་ཐོག་མར་མཐོང་བ་གསེར་མདོག་འོད་མངའ་བ། །རྒྱ་མཚོའི་ཆོས་འོད་སྒྲོག་པའི་གསུང་གི་རྒྱལ་པོ་སྟེ། །མཚན་རབ་སུམ་ཅུ་གཉིས་ ཀྱིས་ཡོངས་བརྒྱན་རི་བོ་འདྲ། །མཐོང་ནས་བདག་ནི་བདེ་གཤེགས་འགྱུར་སྙམ་བློ་གྲོས་གྱུར། །དེ་བཞིན་གཤེགས་པ་དེ་ནི་ཁོ་མོས་མཐོང་མོད་ལ། །ཐམས་ཅད་མཁྱེན་ཉིད་འབྱམས་ ཀླས་འབྱུང་བའི་རྒྱུ་རྐྱེན་གྱིས། །མཁའ་དབྱིངས་རྣམ་ཡངས་དེ་བཞིན་ཉིད་ཀྱི་རང་བཞིན་ཅན། །རྒྱལ་བའི་སེམས་ཀྱི་དང་པོ་སྟོབས་ལྡན་རབ་ཏུ་སྐྱེས། །སྙིང་རྗེ་བདུད་རྩི་རྒྱ་མཚོ་ཆེ་ལས་ ༄༅། །བྱུང་བ་དེས། །དུས་གསུམ་གཤེགས་པའི་བདེ་བར་གཤེགས་པ་ཐམས་ཅད་ཀུན། །རྒྱལ་སྲས་རྒྱ་མཚོས་བསྐོར་བ་མ་ལུས་ཐམས་ཅད་དང༌། །སེམས་ ཅན་རྒྱ་མཚོར་བཅས་པའི་རྒྱ་མཚོའི་ཞིང་ཡང་རྒྱས། །ལུས་ཀྱིས་ཞིང་རྣམས་ཐམས་ཅད་མ་ལུས་ཁྱབ་བྱ་དང༌། །འགྲོ་བ་ཀུན་གྱི་བསམ་པ་བཞིན་དུ་ལུས་བསྟན་ཕྱིར། །ཞིང་ རྣམས་མ་ལུས་བསྐྱོད་ཅིང་སྣང་བར་བྱ་བ་དང༌། །འགྲོ་བ་སྨིན་བྱའི་དོན་དུ་བདག་གིས་སེམས་ཀྱང་བསྐྱེད། །རྒྱལ་བ་གཉིས་པའི་སྤྱན་སྔར་ཁོ་མོ་ཕྱིན་ནས་ཀྱང༌། །ཞིང་རྣམས་རྒྱ་ མཚོ་བཅུ་བཞུགས་རྒྱལ་བའི་དབང་པོ་མཐོང༌། །རྒྱལ་བ་ཐ་མ་མཐོང་ནས་ཞིང་གི་རྒྱ་མཚོ་རྣམས། །རྒྱ་མཚོའི་ཞིང་གི་རྡུལ་ཕྲན་རབ་སྙེད་བཞུགས་པ་མཐོང༌། །དེ་ཡི་ཚུ་རོལ་བསྐལ་ པ་ཞིང་རྒྱུད་རྡུལ་སྙེད་དུ། །རྒྱལ་བ་འགྲོ་བའི་སྒྲོན་མ་ཇི་སྙེད་སྐྱེས་གྱུར་པ། །དེ་དག་ཐམས་ཅད་སྤྱན་སྔར་ཁོ་མོ་ཕྱིན་གྱུར་ཏེ། །རྣམ་ཐར་རྒྱ་མཚོའི་ཚུལ་འདི་སྦྱོང་ཚེ་མཆོད་པ་བྱས།། དེ་ནས་ཚོང་དཔོན་གྱི་བུ་ནོར་བཟང་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང༌། རྣམ་པར་འཕྲུལ་པ་ཟབ་མོ་ལ་འཇུག་པ་ཐོབ་པ། ཏིང་ངེ་འཛིན་གྱི་སྒོ་རྒྱ་མཚོ་ མཐའ་དང་དབུས་མེད་པ་ལ་ཞུགས་པ། གཟུངས་ཀྱི་སྒོ་རྒྱ་མཚོ་རྒྱ་ཆེན་པོ་ལས་བྱུང་བའི་སེམས་དང་ལྡན་པ། བྱང་ཆུབ་སེམས་དཔའི་མངོན་པར་ཤེས་པའི་སྣང་བ་ཆེན་པོ་ རབ་ཏུ་ཐོབ་པ། ཐ་དད་པ་ཡང་དག་པར་ཤེས་པ་ཆེན་པོ་རྒྱ་མཚོ་ལ་ཞུགས་པ། དགའ་བའི་ཤུགས་རྒྱ་མཚོ་ཤིན་ཏུ་ཡངས་པ་རྣམ་པར་འཕེལ་བའི་སེམས་དང་ལྡན་པ་ངེས་མཚན་ མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་ལ་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཁྱོད་ཀྱི་ཤེས་རབ་ཆོས་ཡངས་ རྒྱ་མཚོ་ཀུན་ལ་སྤྱོད། །སྲིད་པའི་རྒྱ་མཚོ་མཐའ་དབུས་མེད་པར་ཁྱོད་ཀྱིས་སྤྱད། །ཡེ་ཤེས་ལུས་མཆོག་སྙིང་པོ་ཚེ་རིང་སྙུན་བྲལ་བ། །ལྷ་མོ་ཁྱོད་ནི་འཁོར་འདིར་བྱོན་ཅིང་རྣམ་པར་ མཛེས༑ ༑ཆོས་ཀྱི་རང་བཞིན་ནམ་མཁའ་ལྟ་བུར་ཐུགས་ཆུད་དེ། །དུས་གསུམ་ཀུན་གྱི་ཚུལ་ཡང་ཆགས་མེད་ཐུགས་ཆུད་མཛད། །ཐུགས་ཀྱི་སྐད་ཅིག་གཅིག་ལ་ཚད་མེད་བསམ་ ཡས་པའི། །དམིགས་པ་ཐམས་ཅད་རྟོག་པ་མི་མངར་འཇལ་བ་མཛད། །ཡེ་ཤེས་སྤྱན་མངའ་ཆོས་ཉིད་སེམས་ཅན་མེད་གཟིགས་ཀྱང༌། །སེམས་ཅན་རྒྱ་མཚོ་མཐའ་ཡས་ཐུགས་ རྗེས་གཟིགས་པ་མཛད། །ཐུགས་ཀྱི་རྣམ་ཐར་ཤིན་ཏུ་ཡངས་ལ་འཇུག་མཛད་ཅིང༌། །སེམས་ཅན་ཚད་མེད་འདུལ་ཞིང་ཡོངས་སུ་སྨིན་པར་མཛད། །ཁྱོད་ནི་ཆོས་ཀྱི་དཀྱིལ་འཁོར་རྣམ་ དཔྱད་ཚུལ་མཁྱེན་ཏེ། །ཆོས་ཀྱི་རང་བཞིན་ཤེས་བྱའི་ཚུལ་ལ་རྣམ་སངས་རྒྱས། །འཕགས་ལམ་དྲི་མ་མེད་པ་ཐམས་ཅད་ཡོངས་བསྒོམས་ཏེ། །འགྲོ་བ་མ་ལུས་རྣམ་པར་སྦྱོང་ཞིང་ ༄༅། །ཡོངས་སུ་འབྱུང༌། །ཐམས་ཅད་མཁྱེན་པའི་ཡེ་ཤེས་དྲི་མེད་རྟོགས་མཛད་པས། །ཁྱོད་ནི་སེམས་ཅན་རྒྱ་མཚོའི་མཆོག་ལས་མངོན་པར་སྐྱེས། །ཁྱོད་ནི་ ཆོས་དབྱིངས་ཁོང་ཆུད་སེམས་ཅན་ཀུན་ཁྱབ་པར། །ཆོས་རབ་བསྟན་ཅིང་འཇིག་རྟེན་འཇིགས་པ་ཞི་བར་མཛད། །ཁྱོད་ནི་རྣམ་པར་སྣང་མཛད་སྨོན་ལམ་ལམ་ཚུལ་གྱིས། །ཡང་ དག་བཞུད་ཅིང་ཆགས་མེད་བློ་ཡངས་དྲི་མེད་ལྡན། །ཐམས་ཅད་བགོད་པའི་རྒྱལ་བའི་སྟོབས་ནི་ཐུགས་ཆུད་ཅིང༌། །ཞིང་རྣམས་ཀུན་གྱི་རྒྱལ་བ་རྣམ་པར་འཕྲུལ་པ་གཟིགས། ། ཁྱོད་ཀྱི་ཐུགས་ནི་མཁའ་འདྲ་ཐུབ་པར་དཀའ་བ་སྟེ། །ཉོན་མོངས་ཀུན་གྱི་དྲི་མས་མ་གོས་སྔ་ནས་དག །དེར་ནི་དུས་གསུམ་བྱུང་བའི་ཞིང་རྣམས་ཐམས་ཅད་དང༌། །སངས་རྒྱས་སྲས་ དང་བཅས་པ་སེམས་ཅན་ཀུན་བཅས་འདུས། །སྐད་ཅིག་གཅིག་གིས་ཉིན་མཚན་ཡུད་དུ་ཟླ་བ་དང༌། །སྐད་ཅིག་ཡུད་ཙམ་ལོ་དང་འདུ་འཇིག་བསྐལ་པ་དང༌། །བསྐལ་པ་རྒྱ་ མཚོ་མིང་གྲངས་རྒྱ་མཚོར་བཅས་པ་དང༌། །འགྲོ་བ་རྣམས་ཀྱི་འདུ་ཤེས་རྒྱ་མཚོའང་ཐུགས་སུ་ཆུད། །ཕྱོགས་རྣམས་ཀུན་གྱི་སེམས་ཅན་སྐྱེ་འཆི་ཇི་སྙེད་དང༌། །གཟུགས་ཡོད་ པ་དང་གཟུགས་མེད་འདུ་ཤེས་ཡོད་མེད་ཀྱི། །རྣམ་སྤྱོད་བདེན་པའི་ཚུལ་ནི་ཐུགས་སུ་ཆུད་མཛད་ཅིང༌། །དེ་དག་ལམ་བསྟན་བྱང་ཆུབ་མཆོག་ཏུ་འགོད་པ་མཛད། །རྣམ་པར་ སྣང་མཛད་སྨོན་ལམ་དྲ་བའི་རིགས་ལས་བྱུང༌། །བདེ་གཤེགས་ཀུན་གྱི་སྐུ་གཅིག་ཚུལ་ལས་ཡང་དག་འཁྲུངས། །ཁྱོད་ནི་ཆོས་སྐུ་ཡོངས་དག་ཐུགས་ལ་ཆགས་མི་མངའ། ། འཇིག་རྟེན་ཀུན་ཏུ་སྐུ་གཟུགས་ཡིད་བཞིན་སྟོན་པ་མཛད། །དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་ ལ་ཚུལ་དང་འདྲ་བའི་ཚིགས་སུ་བཅད་པ་དེ་དག་གིས་མངོན་པར་བསྟོད་དེ། མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་གྱི་རྐང་པ་གཉིས་ལ་ སྤྱི་བོས་ཕྱག་འཚལ་ནས་མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ་ཡང་དང་ཡང་ བལྟས་ནས་མཚན་མོའི་ལྷ་མོ་གྲོང་ཁྱེར་ཐམས་ཅད་སྲུང་བ་འབྱུང་བའི་གཟི་བརྗིད་དཔལ་གྱི་དྲུང་ནས་སོང་ངོ༌། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་ བ་ལས༑ སྡོང་པོས་བརྒྱན་པའི་ལེའུ་སྟེ། བམ་པོ་བརྒྱ་གསུམ་པ། དེ་ནས་ཚོང་དཔོན་གྱི་བུ་ནོར་བཟང་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང༌། རྣམ་པར་ འཕྲུལ་པ་ཟབ་མོ་ལ་འཇུག་པ་དེ། དེ་བས་ཀྱང་རྒྱ་ཆེར་སྒོམ་པ་དང༌། ཡིད་ཆེས་པར་བྱ་བ་དང༌། ཤིན་ཏུ་རྒྱས་པར་བྱེད་ཅིང༌། མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་ ༄༅། །པས་བདེ་བར་གནས་པ་གང་ན་བ་དེར་ཕྱིན་ནས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པ་སྤོས་རིན་པོ་ཆེ་ཐམས་ཅད་ཀྱི་ ཤིང་གི་ཡལ་གའི་ཁང་པ་བརྩེགས་པ་ཞིག་ན་སེངྒེའི་ཁྲི་རིན་པོ་ཆེའི་ཤིང་གི་མྱུ་གུའི་སྙིང་པོ་ཅན་ཞིག་ལ་འདུག་སྟེ། མཚན་མོའི་ལྷ་མོ་སྟོང་ཕྲག་བཅུས་ཀུན་ནས་བསྐོར་ ཅིང་འདུག་པ་མཐོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པའི་རྐང་པ་གཉིས་ལ་སྤྱི་བོས་ ཕྱག་འཚལ་ཏེ་མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །ལྷ་མོ། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱད་པ་སྤྱོད་པ་དང༌། ཇི་ལྟར་སློབ་པ་དང༌། ཇི་ལྟར་སྤྱོད་ཇི་ལྟར་སློབ་ཅིང་ཐམས་ཅད་མཁྱེན་པ་ཉིད་དུ་འབྱུང་བ་ བདག་ལ་བཤད་དུ་གསོལ། དེ་སྐད་ཅེས་སྨྲས་པ་དང༌། མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པས་ཚོང་དཔོན་གྱི་བུ་ནོར་བཟང་ལ་འདི་སྐད་ ཅེས་སྨྲས་སོ། །རིགས་ཀྱི་བུ། ཁོ་མོའི་མཐུས་ནི། མི་མཇེད་ཀྱི་འཇིག་རྟེན་གྱི་ཁམས་ན་ཉི་མ་ནུབ་ཏུ་ཆ་བའི་ཚེ་པདྨོ་ཤིན་ཏུ་རྒྱས་པ་རྣམས་ཀྱང་རྣམ་པར་འཛུམ་པར་འགྱུར་རོ།། སྐྱེས་པ་དང་བུད་མེད་བཟའ་ཤིང་གི་ར་བ་ན་གནས་ཤིང་དགའ་བར་རྩེ་བ་ལ་བརྩོན་པ་དག་ཀྱང་ཁྱིམ་དུ་འདོང་པའི་བློ་སྐྱེད་དོ། །ལམ་དང་སྲང་ན་རྒྱུ་བའི་སེམས་ཅན་རྣམས་ཀྱང་ཞག་ གི་གནས་སེམས་ཤིང་ཚོལ་ཏེ། འགྲོ་བའི་གནས་ཐམས་ཅད་དུ་མངོན་པར་གཞོལ་བར་འགྱུར་རོ། །ནགས་ཚལ་དང༌། གསེབ་དང༌། ཕུག་ལ་བརྟེན་པའི་སེམས་ཅན་རྣམས་ཀྱང་ ནགས་ཚལ་དང༌། གསེབ་དང༌། ཕུག་ཏུ་འདོང་ངོ༌། །ཤིང་ལ་གནས་པའི་སེམས་ཅན་རྣམས་ཀྱང་ཤིང་གི་གནས་ལ་བརྟེན་པར་མངོན་པར་གཞོལ་ལོ། །ཁུང་ན་གནས་པའི་སེམས་ ཅན་རྣམས་ཀྱང་ཁུང་དུ་འདོང་ངོ༌། །གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་ལ་གནས་པའི་སེམས་ཅན་རྣམས་ཀྱང་གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་དུ་འདོང་ངོ༌།། ཆུ་ན་གནས་པའི་སེམས་ཅན་རྣམས་ཀྱང་ཆུར་འདོང་ངོ༌། །ཕྱོགས་གཞན་གྱི་ཡུལ་དུ་ཕྱིན་པའི་སེམས་ཅན་རྣམས་ཀྱང་ནུབ་མོ་བདེ་ཞིང་དགའ་བར་གནས་པའི་དོན་དུ་རང་རང་གི་ཡུལ་ གྱི་ཕྱོགས་ཀྱི་བསམ་པ་སྐྱེད་དོ། །རིགས་ཀྱི་བུ། གཞན་ཡང་ཁོ་མོ་ནི། སྐྱེས་པ་དང༌། བུད་མེད་གཞོན་ནུ་དར་ལ་བབ་པ། དར་བའི་ཉམས་དྲོད་ཀྱིས་མྱོས་པ་དང༌། གླུ་དང༌། གར་དང༌། རོལ་མོའི་དགའ་བས་མྱོས་པ་དང༌། འདོད་པའི་ཡོན་ཏན་ལ་དགའ་ཞིང་བརྩོན་པ་རྣམས་ལ་སྐྱེ་བ་དང༌། རྒ་ཤི་དང༌། གཏི་མུག་གི་མུན་པ་ཆེན་པོས་འཇིགས་པའི་གཉེན་པོར་དག་ ༄༅། །བའི་རྩ་བ་ཡོངས་སུ་བསྐྱེད་པའི་ཕྱིར་བརྩོན་འགྲུས་ཀྱི་ལེགས་པའི་བསྔགས་པ་བྱེད་དོ། །སེམས་ཅན་སེར་སྣ་དང་ལྡན་པ་རྣམས་ནི། སྦྱིན་པ་ལ་ རབ་ཏུ་སྦྱོར་རོ། །སེམས་ཅན་ཚུལ་ཁྲིམས་ངན་པ་ཅན་རྣམས་ནི། ཚུལ་ཁྲིམས་ལ་རབ་ཏུ་འགོད་དོ། །ངན་སེམས་དང་ལྡན་པའི་སེམས་ཅན་རྣམས་ལ་ནི། བྱམས་པའི་ ལེགས་པ་རྗོད་པར་བྱེད་དོ། །སེམས་འཁྲུགས་པའི་སེམས་ཅན་རྣམས་ནི། བཟོད་པ་ལ་རབ་ཏུ་འགོད་དོ། །ལེ་ལོ་ཅན་གྱི་སེམས་ཅན་རྣམས་ནི། བྱང་ཆུབ་སེམས་ དཔའི་བརྩོན་འགྲུས་བརྩམ་པ་ལ་རབ་ཏུ་འགོད་དོ། །སེམས་རྣམ་པར་མྱོས་པའི་སེམས་ཅན་རྣམས་ནི། བསམ་གཏན་ལ་རབ་ཏུ་འགོད་དོ། །ཤེས་རབ་འཆལ་བ་ཅན་གྱི་ སེམས་ཅན་རྣམས་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཡོངས་སུ་སྦྱོར་རོ། །ཐེག་པ་དམའ་བ་ལ་མོས་པའི་སེམས་ཅན་རྣམས་ནི། ཐེག་པ་ཆེན་པོ་ལ་རབ་ཏུ་འགོད་དོ། ། ཁམས་གསུམ་ལ་མངོན་པར་ཞེན་པའི་སེམས་ཅན་རྣམས་ནི། བྱང་ཆུབ་སེམས་དཔའི་སྨོན་ལམ་གྱི་ཕ་རོལ་ཏུ་ཕྱིན་པ་སྲིད་པའི་ལམ་གྱི་རྒྱུད་མཐར་ཕྱིན་པའི་དཀྱིལ་འཁོར་ ལ་སྤྱོད་པ་ལ་རབ་ཏུ་འགོད་དོ། །དམིགས་པའི་དབང་དུ་གྱུར་པའི་སེམས་ཅན་ལས་དང་ཉོན་མོངས་པས་རབ་ཏུ་མནར་བ། བསོད་ནམས་དང་ཡེ་ཤེས་ཀྱི་སྟོབས་མེད་པ་རྣམས་ ནི༑ བྱང་ཆུབ་སེམས་དཔའི་སྟོབས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འགོད་དོ། །མི་ཤེས་པའི་མུན་ནག་གིས་ཁེབས་པའི་སེམས་ཅན་བདག་ཏུ་བྱ་བ་དང༌། བདག་གིར་བྱ་བས་ མ་རིག་པའི་མུན་ནག་ཏུ་འཐོམ་པ་རྣམས་ནི། བྱང་ཆུབ་སེམས་དཔའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འགོད་དོ། །རིགས་ཀྱི་བུ། གཞན་ཡང་ཁོ་མོ་ནི། བྱང་ཆུབ་ སེམས་དཔའི་རྣམ་པར་ཐར་པ་དགའ་བའི་འོད་སྤྲོ་བ་ཡངས་པ་ཡང་དག་པར་འབྱུང་བ་ཐོབ་པའོ། །ནོར་བཟང་གིས་སྨྲས་པ། ལྷ་མོ། བྱང་ཆུབ་སེམས་དཔའི་རྣམ་པར་ཐར་པ་ དགའ་བའི་འོད་སྤྲོ་བ་ཡངས་པ་ཡང་དག་པར་འབྱུང་བ་དེའི་ཡུལ་ཇི་ལྟ་བུ་ཞིག་མཆིས། སྨྲས་པ། རིགས་ཀྱི་བུ། རྣམ་པར་ཐར་པ་དེ་ནི། དེ་བཞིན་གཤེགས་པའི་བསོད་ནམས་ ཀྱིས་སེམས་ཅན་ཡོངས་སུ་སྡུད་པའི་ཡེ་ཤེས་དང་ཐབས་སྣང་བ་དང་ལྡན་པ་སྟེ། དེ་ཅིའི་ཕྱིར་ཞེ་ན། རིགས་ཀྱི་བུ། སེམས་ཅན་རྣམས་ཀྱི་བདེ་བ་ཉམས་སུ་མྱོང་བ་ཇི་སྙེད་ཅིག་ ཡོད་པ་དེ་དག་ཐམས་ཅད་ནི། དེ་བཞིན་གཤེགས་པའི་བསོད་ནམས་ཀྱི་མཐུས་བྱུང་བའོ། །དེ་བཞིན་གཤེགས་པའི་གདམས་ངག་གི་ཚུལ་གྱིས་བྱུང་བའོ། །དེ་བཞིན་གཤེགས་ པའི་གསུང་ལ་ནན་ཏན་དུ་བྱས་པས་བྱུང་བའོ། །དེ་བཞིན་གཤེགས་པའི་རྗེས་སུ་བསླབ་པས་བྱུང་བའོ། །དེ་བཞིན་གཤེགས་པའི་བྱིན་གྱི་རླབས་ཀྱིས་བྱུང་བའོ། །དེ་བཞིན་ ༄༅། །གཤེགས་པས་བསྟན་པའི་ལམ་ལ་ནན་ཏན་དུ་བྱས་པས་བྱུང་བའོ། །དེ་བཞིན་གཤེགས་པ་དང་ཚུལ་འདྲ་བའི་དགེ་བའི་རྩ་བ་བསྐྱེད་པས་བྱུང་བའོ། །དེ་ བཞིན་གཤེགས་པས་ཆོས་བསྟན་པའི་མཐུན་པའི་རྒྱུས་བྱུང་བའོ། །དེ་བཞིན་གཤེགས་པའི་ཡེ་ཤེས་ཀྱི་ཉི་མ་སྣང་བས་བྱུང་བའོ། །རིགས་ཀྱི་བུ། དེ་བཞིན་གཤེགས་པའི་ རིགས་ཀྱི་ཆོས་དཀར་པོའི་དཀྱིལ་འཁོར་གྱི་སྣང་བས་ནི། སེམས་ཅན་རྣམས་ཀྱི་བདེ་བ་ཡོངས་སུ་འབྱུང་སྟེ། དེ་ཅིའི་ཕྱིར་ཞེ་ན། འདི་ལྟར་རིགས་ཀྱི་བུ། ཁོ་མོས་བྱང་ཆུབ་ སེམས་དཔའི་རྣམ་པར་ཐར་པ་དགའ་བའི་འོད་སྤྲོ་བ་ཡངས་པ་ཡང་དག་པར་འབྱུང་བ་འདི་ལ་འཇུག་པའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་རྣམ་པར་སྣང་མཛད་ཀྱི་སྔོན་གྱི་བྱང་ཆུབ་སེམས་དཔའི་སྤྱོད་པ་རྒྱ་མཚོ་རྗེས་སུ་དྲན་པར་བྱེད་ཅིང༌། འཇུག་པ་དང་ཁོང་དུ་ཆུད་པར་བྱེད་པའི་ ཚེ་འདི་ལྟར་བཅོམ་ལྡན་འདས་སྔོན་བྱང་ཆུབ་སེམས་དཔའི་ས་ལ་བཞུགས་པས་སེམས་ཅན་བདག་ཏུ་བྱ་བ་དང༌། བདག་གིར་བྱ་བ་ལ་མངོན་པར་ཞེན་པ། མ་རིག་པའི་ མུན་པས་འཐོམ་པ། ལྟ་བ་ཐིབས་པོའི་ལྟ་བས་དགོན་པར་འཁྱམས་པ། སྲེད་པའི་དབང་དུ་གྱུར་པ། འདོད་ཆགས་ཀྱི་བཅིངས་པས་གླགས་པ། ཞེ་སྡང་གིས་ཁོང་ཁྲོ་ བའི་སེམས་དང་ལྡན་པ། གཏི་མུག་གིས་སེམས་ཀྱི་རྒྱུད་འཁྲུགས་པར་གྱུར་པ། ཕྲག་དོག་དང་སེར་སྣ་ཀུན་ནས་འཁོར་བ། ཉོན་མོངས་པས་རབ་ཏུ་དཀྲུགས་པའི་སེམས་དང་ ལྡན་པ༑ འཁོར་བའི་སྡུག་བསྔལ་ཆེན་པོ་ཉམས་སུ་མྱོང་བར་གྱུར་པ། འཁོར་བ་ན་ཕོངས་པའི་སྡུག་བསྔལ་གྱིས་རབ་ཏུ་གཟིར་བ། སངས་རྒྱས་བལྟ་བ་ལས་ཕྱིར་ཕྱོགས་ པར་གྱུར་པ་ཐམས་ཅད་གཟིགས་ནས་ཐུགས་རྗེ་ཆེན་པོའི་ཐུགས་སྐྱེས་པར་གྱུར་ཏོ། །སེམས་ཅན་ཐམས་ཅད་ཀྱི་དོན་དུ་འགྲོ་བ་ཐམས་ཅད་ལ་ཡོ་བྱད་དང་རིན་པོ་ཆེས་ཡོངས་ སུ་བསྡུ་ཞིང་ཡོངས་སུ་སྡུད་པའི་ཐུགས་དང༌། སེམས་ཅན་ཐམས་ཅད་ཀྱི་འཁོར་བའི་ཡོ་བྱད་ཡོངས་སུ་སྒྲུབ་པའི་ཐུགས་དང༌། དངོས་པོ་ཐམས་ཅད་ལ་ཆགས་པ་མི་མངའ་བའི་ ཐུགས་དང༌། ཡུལ་ཐམས་ཅད་ལ་ཡེ་རྔམ་པ་མི་མངའ་བའི་ཐུགས་དང༌། དགའ་བ་ཐམས་ཅད་ལ་ཆགས་པ་མི་མངའ་བའི་ཐུགས་དང༌། ལོངས་སྤྱོད་ཐམས་ཅད་ལ་ཡོངས་ སུ་མ་ཞེན་པའི་ཐུགས་དང༌། སྦྱིན་པ་ཐམས་ཅད་ལ་རྣམ་པར་སྨིན་པ་ལ་རེ་བ་མེད་པའི་ཐུགས་དང༌། འཇིག་རྟེན་གྱི་ཕུན་སུམ་ཚོགས་པ་ཐམས་ཅད་ལ་བཞེད་པ་མི་མངའ་བའི་ ཐུགས་དང༌། རྒྱུ་དང་རྐྱེན་ལ་མ་རྨོངས་པའི་ཐུགས་དང༌། ལེགས་པར་བཙལ་བའི་ཆོས་ལ་ཡང་དག་པ་ཇི་ལྟ་བ་བཞིན་དུ་མཁྱེན་པའི་ཐུགས་དང༌། སེམས་ཅན་ཐམས་ཅད་ཀྱི་ ༄༅། །དོན་ལ་གཞོལ་བར་བྱ་བ་མངོན་པར་སྒྲུབ་པའི་ཐུགས་ཡང་དག་པར་སྐྱེས་པར་གྱུར་ཏོ། །དེ་དེ་ལྟར་ཆོས་ཐམས་ཅད་ཀྱི་རང་བཞིན་ལ་ཡང་དག་པར་ ཞུགས་པའི་ཐུགས་དང་ལྡན་པ། སེམས་ཅན་གྱི་ཁམས་ཐམས་ཅད་དུ་བྱམས་པ་ཆེན་པོས་སྙོམས་པར་ཞུགས་པ། འགྲོ་བ་ཐམས་ཅད་ཐུགས་རྗེ་ཆེན་པོའི་སྤྲིན་གྱིས་རྒྱས་ པར་དགང་བའི་སྦྱོར་བ་མངའ་བ། སེམས་ཅན་གྱི་འཇིག་རྟེན་ཐམས་ཅད་ཀུན་ནས་ཁེབས་པའི་ཆོས་ཀྱི་གདུགས་ཆེན་པོའི་དཀྱིལ་འཁོར་མངའ་བ། སེམས་ཅན་ཐམས་ཅད་ ཀྱི་ཉོན་མོངས་པའི་རི་རྣམ་པར་འཇོམས་པའི་ཡེ་ཤེས་རྡོ་རྗེའི་མཚོན་ཆ་མངའ་བ། འགྲོ་བ་ཐམས་ཅད་ཀྱི་བདེ་བ་ཡོངས་སུ་སྒྲུབ་པས་དགྱེས་པའི་ཤུགས་རྣམ་པར་འཕེལ་བའི་ ཐུགས་མངའ་བ། སེམས་ཅན་ཐམས་ཅད་ལ་བདེ་བ་ཕུལ་དུ་ཕྱིན་པར་མངོན་པར་སྒྲུབ་པའི་སྨོན་ལམ་གྱི་ཐུགས་མངའ་བ། བསམ་པ་དང་སྨོན་པ་ཇི་ལྟ་བ་བཞིན་དུ་སེམས་ ཅན་ཐམས་ཅད་ལ་ནོར་གྱི་ཆར་རབ་ཏུ་དབབ་པའི་ཐུགས་མངའ་བ། སེམས་ཅན་ཐམས་ཅད་ཡོངས་སུ་མི་གཏོང་ཞིང་སྙོམས་པར་སྦྱོར་བའི་ཐུགས་མངའ་བ། འཕགས་པའི་ ནོར་གྱིས་སེམས་ཅན་ཐམས་ཅད་ཚིམ་པར་མཛད་པའི་ཐུགས་མངའ་བ། སྟོབས་བཅུའི་ཡེ་ཤེས་རིན་པོ་ཆེ་ཕུལ་དུ་དྲི་མ་མེད་པ་ཐོབ་པར་མཛད་པའི་ཐུགས་མངའ་བ། བྱང་ ཆུབ་སེམས་དཔའི་མངོན་པར་ཤེས་པ་ཆེན་པོའི་སྟོབས་དང་ཤུགས་རབ་ཏུ་བརྙེས་པ་དེ། བྱང་ཆུབ་སེམས་དཔའི་རྣམ་པར་འཕྲུལ་པ་སྣ་ཚོགས་ཀྱི་སྤྲིན་ཆེན་པོས་སེམས་ཅན་གྱི་ ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་རྒྱས་པར་བཀང་སྟེ་སེམས་ཅན་ཐམས་ཅད་ལ་མངོན་པར་གྱུར་པར་བཞུགས་ཤིང་སྦྱིན་པའི་ དམིགས་པ་ཐམས་ཅད་ཀྱི་སྤྲིན་གྱི་ཆར་ཆེན་པོ་རྣམ་པ་ཐམས་ཅད་དུ་དབབ་པ་དང༌། རིན་པོ་ཆེའི་རྒྱན་ཐམས་ཅད་ཀྱི་སྤྲིན་ཆེན་པོའི་ཆར་མངོན་པར་འབེབས་པ་མཛད་དེ། འདི་ལྟར་ སེམས་ཅན་ཐམས་ཅད་སོ་སོའི་ཚུལ་དང་ཇི་ལྟར་མཐུན་པས་ལོངས་སྤྱོད་པར་བྱ་བའི་ཕྱིར་དངོས་པོ་རྣམ་པ་ཐ་དད་པ་མཐའ་ཡས་པ་དང༌། ཡོ་བྱད་རྣམ་པ་ཐ་དད་པ་ཚད་མེད་པ་ལ་ སྤྱད་པར་བྱ་བ་དང༌། སྦྱིན་པ་རྣམ་པ་སྣ་ཚོགས་ཐམས་ཅད་ཀྱིས་ཡོངས་སུ་བསྡུ་བའི་ཚུལ་དང༌། དངོས་པོ་ཡོངས་སུ་གཏང་བ་རྣམ་པ་དུ་མ་ལ་ཡོངས་སུ་སྤྱད་པ་དང༌། ཡོ་བྱད་ཀྱི་རྣམ་ པ་དང༌། རྒྱན་གྱི་འདུ་བྱེད་བརྗོད་དུ་མེད་པ་དང༌། སྦྱིན་པའི་ཚོགས་རྣམ་པ་སྣ་ཚོགས་མཚན་ཉིད་སྣ་ཚོགས་དང་ལྡན་པ། སེམས་ཅན་རྣམས་བསམ་པ་ཇི་ལྟ་བ་བཞིན་དུ་ཡོངས་སུ་ ཚིམ་པར་བྱ་བའི་སྦྱིན་པའི་ཚུལ་མཐའ་ཡས་པ་ཐུགས་སུ་ཆུད་པས་སེམས་ཅན་གྱི་བསམ་པ་ཇི་ལྟ་བ་བཞིན་དུ་ཡོངས་སུ་ཚིམ་པར་བྱ་བ། མངོན་པར་བསྒྲུབས་པའི་དངོས་པོ་ ༄༅། །ཐམས་ཅད་གཏང་བ་དང༌། ཡོངས་སུ་གཏང་བ་དང༌། སྦྱིན་པ་བྱ་བ་དང༌། འགྲོ་བ་ཐམས་ཅད་ཀྱི་འདུ་བྱེད་ཀྱི་སྡུག་བསྔལ་རྒྱུན་མི་འཆད་པ་ལས་ཡོངས་སུ་ བསྐྱབ་པའི་ཚུལ་དུ་བྱ་བ་རྣམས་སེམས་ཅན་ཐམས་ཅད་ལ་ལན་ལ་རེ་བ་མི་མངའ་བ་དང༌། འགྲོ་བ་ཐམས་ཅད་ལ་མཉམ་པ་ཉིད་དུ་འབྱུང་བའི་ཐུགས་མངའ་བས་འགྲོ་བ་ ཐམས་ཅད་ཀྱི་སེམས་རིན་པོ་ཆེ་ཡོངས་སུ་སྦྱོང་བ་མཛད་ཅིང༌། སངས་རྒྱས་ཐམས་ཅད་ཀྱི་དགེ་བའི་རྩ་བ་རྒྱ་མཚོ་གཅིག་ཏུ་གྱུར་པ་ལས་བྱུང་བའི་ཡོངས་སུ་བསྡུ་བའི་ཚུལ་ འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཡོ་བྱད་ཀྱི་ཆར་དབབ་པ། འགྲོ་བ་ཐམས་ཅད་ལ་ཐམས་ཅད་མཁྱེན་པའི་བསོད་ནམས་རྒྱ་མཚོའི་ཤུགས་རྣམ་པར་ འཕེལ་བར་མཛད་པས་ཐུགས་ཀྱི་སྐད་ཅིག་རེ་རེ་ལ་སེམས་ཅན་མ་ལུས་པ་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་གཅིག་ནས་གཅིག་ཏུ་བརྒྱུད་པ་རྣམ་ པར་དག་པར་བྱ་བའི་ཕྱིར་མངོན་པར་སྒྲུབ་པ་མཛད་པ་དང༌། ཐུགས་ཀྱི་སྐད་ཅིག་རེ་རེ་ཞིང་གཅིག་ནས་གཅིག་ཏུ་བརྒྱུད་པ་མ་ལུས་པ་ཐམས་ཅད་སངས་རྒྱས་ཀྱི་ཞིང་ཉེ་བར་ ཉོན་མོངས་པ་མེད་ཅིང་བླ་ན་མེད་པའི་རྒྱན་རྣམ་པར་དག་པས་རྣམ་པར་ཀླུབས་ཤིང་རབ་ཏུ་བརྒྱན་པ་ཡོངས་སུ་རྫོགས་པར་བྱ་བ་དང༌། ཐུགས་ཀྱི་སྐད་ཅིག་རེ་རེ་ལ་ཆོས་ཀྱི་ ཚུལ་རྒྱ་མཚོ་མ་ལུས་པ་ཐམས་ཅད་རྒྱས་པར་དགང་བར་རྣམ་པར་དག་པར་བྱ་བ་དང༌། ཐུགས་ཀྱི་སྐད་ཅིག་རེ་རེ་ལ་ནམ་མཁའི་དབྱིངས་ཀྱི་གཏོས་མ་ལུས་པ་ཐམས་ཅད་རྒྱས་པར་དགང་ བའི་ཡེ་ཤེས་ཀྱི་ཚུལ་ཡོངས་སུ་རྫོགས་པར་བྱ་བ་དང༌། ཐུགས་ཀྱི་སྐད་ཅིག་རེ་རེ་ལ་སེམས་ཅན་དང་དུས་མ་ལུས་པ་ཐམས་ཅད་ལ་འཇུག་པའི་ཡེ་ཤེས་ཀྱི་ཚུལ་རྣམ་པར་དག་པར་བྱ་ བ་དང༌། ཐུགས་ཀྱི་སྐད་ཅིག་རེ་རེ་ལ་འགྲོ་བ་མ་ལུས་པ་ཐམས་ཅད་རྣམ་པར་འདུལ་བའི་ཡེ་ཤེས་ཀྱི་ཚུལ་སྣང་བ་རབ་ཏུ་ཐོབ་པར་བྱ་བ་དང༌། ཐུགས་ཀྱི་སྐད་ཅིག་རེ་རེ་ལ་དུས་མ་ ལུས་པ་ཐམས་ཅད་དུ་ཆོས་ཀྱི་འཁོར་ལོ་བསྐོར་བ་ལས་ཕྱིར་མི་ལྡོག་པར་བྱ་བ་དང༌། ཐུགས་ཀྱི་སྐད་ཅིག་རེ་རེ་ལ་ཐམས་ཅད་མཁྱེན་པའི་ཡེ་ཤེས་ཀྱི་བྱིན་གྱི་རླབས་ལ་མཁས་ པ་མ་ལུས་པར་ཡོངས་སུ་བསྟན་པས་འགྲོ་བ་ཐམས་ཅད་ལ་ཕན་ཐོགས་པར་བྱ་བ་དང༌། ཐུགས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་མ་ལུས་པའི་གྲངས་སུ་བྱ་བའི་རྒྱུད་ དང་ལྡན་པ། འཇིག་རྟེན་གྱི་ཁམས་རྒྱ་མཚོ་ཐམས་ཅད་མངོན་པར་བསྟན་པ། འཇིག་རྟེན་གྱི་ཁམས་རྒྱ་མཚོ་ཐམས་ཅད་ཡོངས་སུ་འདུ་བ། འཇིག་རྟེན་གྱི་ཁམས་འབྱམས་ཀླས་ པ་སྣ་ཚོགས་བརྗོད་དུ་ཡོད་པ། འཇིག་རྟེན་གྱི་ཁམས་ཀྱི་རྒྱུད་རྣམ་པར་གནས་པ་སྣ་ཚོགས་ཀྱིས་མཚམས་རྣམ་པར་འདུལ་བ། གཞི་སྣ་ཚོགས་དང༌། ལྷུན་དུ་མར་བརྗོད་དུ་ ༄༅། །ཡོད་པ། རྣམ་པར་ཕྱེ་བ་སྣ་ཚོགས་ཀྱི་བསྐལ་པ་རྣམ་པ་ཐ་དད་པ་བསྟན་དུ་ཡོད་པ། ཀུན་ནས་ཉོན་མོངས་ཤིང་རྣམ་པར་དག་པ་དང༌། རྣམ་པར་དག་ ཅིང་ཀུན་ནས་ཉོན་མོངས་པ་དང༌། གཅིག་ཏུ་ཡོངས་སུ་དག་པ་དང༌། གཅིག་ཏུ་ཀུན་ནས་ཉོན་མོངས་པ་དང༌། ཆེ་བ་དང༌། ཡངས་པ་དང༌། ཚད་མེད་པ་དང༌། དོག་པ་དང༌། ཕྲ་བ་དང༌། རྒྱ་ཆེ་བ་དང༌། གཞི་མཉམ་པ་དང་སྣྲེལ་ཞི་དང༌། སྤྱིའུ་ཚུགས་དང༌། ཕྱོགས་དང་ཕྱོགས་མཚམས་སུ་མངོན་པར་བལྟས་པ་དང༌། ཕྱོགས་རྒྱ་མཚོ་སྣ་ཚོགས་སུ་ཡོངས་སུ་ གཞོལ་བ། སྒོ་སྣ་ཚོགས་ནས་བསྟན་ཅིང་སྒོ་མཐའ་ཡས་པའི་དབྱིབས་རྣམ་པ་སྣ་ཚོགས་སུ་འདུག་པའི་རྣམ་པར་ཕྱེ་བ་སྣ་ཚོགས་དང་ལྡན་པའི་འཇིག་རྟེན་གྱི་ཁམས་རྒྱ་མཚོ་ ཐམས་ཅད་དུ་བྱང་ཆུབ་སེམས་དཔའི་སྤྱོད་པ་སྤྱོད་དེ། བྱང་ཆུབ་སེམས་དཔའི་སྐྱོན་མེད་པ་ཡོངས་སུ་མནན་ནས་བྱང་ཆུབ་སེམས་དཔའི་སྤྱོད་པ་དང༌། རྣམ་པར་འཕྲུལ་ པས་རྒྱས་པར་དགང་བར་བྱ་བ་དང༌། ཐུགས་ཀྱི་སྐད་ཅིག་རེ་རེ་ལ་དུས་གསུམ་གྱི་སངས་རྒྱས་ཀྱི་འཕྲིན་ལས་མ་ལུས་པ་ཐམས་ཅད་སེམས་ཅན་ཕ་རོལ་གྱི་སེམས་དང་བསམ་ པས་རྣམ་པར་དམིགས་པར་བྱ་བའི་ཕྱིར་འགྲོ་བ་ཐམས་ཅད་ལ་ཐམས་ཅད་མཁྱེན་པའི་བསོད་ནམས་རྒྱ་མཚོའི་ཤུགས་རྣམ་པར་འཕེལ་བར་མཛད་དེ། མངོན་པར་སྒྲུབ་ པ་མཛད་པར་གྱུར་པས་མངོན་པར་ཤེས་སོ། །རྗེས་སུ་དྲན་ནོ། །རིགས་ཀྱི་བུ། དེ་ལྟར་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་སྔོན་བྱང་ཆུབ་སེམས་དཔའི་ སྤྱོད་པ་མཛད་པའི་ཚེ་འཇིག་རྟེན་གནས་པ་བསོད་ནམས་དང་ཡེ་ཤེས་ཀྱི་ཚོགས་དང་བྲལ་བ། སེམས་ཅན་བྱས་པ་དྲིན་དུ་མི་གཟོ་བས་ཡོངས་སུ་གང་བ། མི་ཤེས་པའི་མུན་པས་ ཆོད་པ༑ བདག་ཏུ་བྱ་བ་དང༌། བདག་གིར་བྱ་བ་ལ་མངོན་པར་ཞེན་པ། མ་རིག་པའི་མུན་པ་རབ་རིབ་ཀྱིས་བསྒྲིབས་པ། ཚུལ་བཞིན་མ་ཡིན་པར་རྣམ་པར་རྟོག་པ་ལ་ཞུགས་ པ༑ ལྟ་བ་ཐིབས་པོ་བས་དགོན་པར་མགོ་བརླགས་པ། རྒྱུ་དང་འབྲས་བུ་ལ་མགོ་རྨོངས་པ། ཉོན་མོངས་པ་དང་ལས་ཀྱི་དབང་དུ་གྱུར་པ། འཁོར་བའི་མྱ་ངམ་ཆེན་པོའི་སྡུག་བསྔལ་ གྱི་སའི་འོག་ཏུ་ལྷུང་བ། ཕོངས་པའི་སྡུག་བསྔལ་སྣ་ཚོགས་ཉམས་སུ་མྱོང་བར་གྱུར་པ་རྣམས་ལ་ཐུགས་རྗེ་ཆེན་པོ་བསྐྱེད་དེ། ཕ་རོལ་ཏུ་ཕྱིན་པ་སྦྱང་བའི་སྤྲིན་ཆེན་པོ་ མངོན་པར་བསྒྲུབས་ཏེ་དགེ་བའི་རྩ་བ་ལ་བརྟེན་པར་གནས་པ། ཡོངས་སུ་བསྔགས་པ་དང་སེམས་ཅན་ཐམས་ཅད་ཀྱི་འཁོར་བའི་ཕོངས་པའི་སྡུག་བསྔལ་རྣམ་པར་བཟློག་པ་ དང༌། བསོད་ནམས་དང་ཡེ་ཤེས་ཀྱི་ཚོགས་ཆེན་པོ་ལ་མངོན་པར་མོས་པར་བྱ་བ་དང༌། རྒྱུའི་དཀྱིལ་འཁོར་གྱི་ཕྱོགས་མངོན་པར་བསྟན་པ་དང༌། ལས་དང་ཆོས་སུ་མི་འགལ་ ༄༅། །བའི་ཕྱོགས་རབ་ཏུ་བརྗོད་པ་དང༌། སངས་རྒྱས་ཀྱི་ཆོས་ཀྱི་དཀྱིལ་འཁོར་ཡོངས་སུ་བསྡུ་བའི་ཕྱོགས་སྣང་བར་བྱ་བ་དང༌། སེམས་ཅན་ཐམས་ཅད་ ཀྱི་མོས་པའི་ཕྱོགས་རབ་ཏུ་བརྗོད་པར་བྱ་བ་དང༌། སེམས་ཅན་ཐམས་ཅད་ཀྱི་ཞིང་ཡོངས་སུ་སྒྲུབ་པའི་ཕྱོགས་ལེགས་པར་བསྟན་པ་དང༌། དེ་བཞིན་གཤེགས་པ་ཐམས་ ཅད་ཀྱི་རིགས་མི་གཅད་པའི་ཕྱོགས་ཀྱི་རྗེས་སུ་འབྲང་བར་བྱ་བ་དང༌། སངས་རྒྱས་ཐམས་ཅད་ཀྱི་བསྟན་པའི་ཕྱོགས་ཡོངས་སུ་གཟུང་བ་དང༌། མི་དགེ་བའི་ཆོས་ཐམས་ཅད་ ཀྱི་ཕྱོགས་རྣམ་པར་བཟློག་པ་དང༌། ཐམས་ཅད་མཁྱེན་པ་ཉིད་ཀྱི་ཚོགས་ཀྱི་ཕྱོགས་ཡོངས་སུ་བརྗོད་པ་མཛད་དེ། ཕ་རོལ་ཏུ་ཕྱིན་པའི་སྤྲིན་ཆེན་པོས་སེམས་ཅན་གྱི་ཁམས་ ཐམས་ཅད་རྒྱས་པར་བཀང་སྟེ་མངོན་པར་བསྒྲུབས་ནས་བསམ་པ་ཇི་ལྟ་བ་བཞིན་དུ་སེམས་ཅན་ཚིམ་པར་འགྱུར་བར་ཆོས་ཀྱིས་ཤིན་ཏུ་བསྡུ་བ་ལ་སེམས་ཅན་རབ་ཏུ་ དགོད་པར་མཛད་དོ། །ཐམས་ཅད་མཁྱེན་པ་ཉིད་ཀྱི་ཚོགས་ལ་ཡང་དག་པར་བསྐུལ་ཏོ། །བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཆེན་པོ་ལ་རབ་ཏུ་བཙུད་དོ། །འཕགས་ པའི་ནོར་ཐམས་ཅད་རབ་ཏུ་ཐོབ་པར་བྱ་བས་ཉེ་བར་བསྟན་ཏོ། །ཐམས་ཅད་མཁྱེན་པ་ཉིད་དུ་འདུན་པའི་ཤུགས་ཀྱིས་སེམས་ཅན་རྣམས་དགེ་བའི་རྩ་བ་རྒྱ་མཚོ་རྣམ་པར་ འཕགས་པར་མཛད་དོ། །དེ་བཞིན་གཤེགས་པ་རྣམ་པར་འཕྲུལ་པའི་སྒོར་ཡང་དེ་དག་རབ་ཏུ་བཙུད་དེ། ཕུང་པོ་ཤིན་ཏུ་ཞི་བའི་བདེ་བས་ཡོངས་སུ་བསྡུ་བ་བསྡུས་ཏེ། དེ་བཞིན་ གཤེགས་པའི་བདག་ཉིད་ཆེ་བ་ལ་མངོན་དུ་མོས་པར་བྱས་ནས་བྱང་ཆུབ་སེམས་དཔས་ཡོངས་སུ་བཟུང་བའི་ཡེ་ཤེས་ལ་རབ་ཏུ་བཀོད་དོ། །ནོར་བཟང་གིས་སྨྲས་པ། འཕགས་མ་ ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས་ཇི་སྲིད་ཅིག་ལགས། སྨྲས་པ། རིགས་ཀྱི་བུ། གནས་འདི་ནི། ཡིད་ཆེས་པར་དཀའ་བ་སྟེ། ཤེས་ པར་དཀའ་བའོ། །མོས་པར་དཀའ་བའོ། །འཇུག་པར་དཀའ་བའོ། །བརྗོད་པར་དཀའ་བའོ། །ཁོང་དུ་ཆུད་པར་དཀའ་བ་སྟེ། ལྷ་དང་བཅས་པའི་འཇིག་རྟེན་དང༌། ཉན་ཐོས་དང་རང་ སངས་རྒྱས་ཐམས་ཅད་ཀྱིས་ཀྱང་ཁོང་དུ་ཆུད་པར་མི་ནུས་སོ། །གཞན་དུ་ན་དེ་བཞིན་གཤེགས་པའི་བྱིན་གྱི་རླབས་དང༌། དགེ་བའི་བཤེས་གཉེན་གྱིས་ཡོངས་སུ་བཟུང་བ་མ་ གཏོགས་ཏེ། གནས་འདི་ནི། སེམས་ཅན་འཁོར་བའི་བདེ་བ་ཐམས་ཅད་ལ་མངོན་པར་འདོད་པ་མེད་པ། དེ་བཞིན་གཤེགས་པའི་བདེ་བ་ལ་ལྷག་པར་དམིགས་པ། སེམས་ ཅན་ཐམས་ཅད་ཀྱི་སྡུག་བསྔལ་དང་ཡིད་མི་བདེ་བ་རབ་ཏུ་ཞི་བར་བྱ་བ་ལ་ཞུགས་པ། དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་པའི་ནན་ཏན་ལ་མངོན་པར་མོས་པ། ༄༅། །ཆོས་ཐམས་ཅད་ཀྱི་རང་བཞིན་ངེས་པར་རྟོགས་པ། ནམ་མཁའི་སྤྱོད་ཡུལ་དང་ལྡན་པ། མོས་པ་ཡངས་པའི་ལམ་གྱིས་རྣམ་པར་དག་པ། འཁོར་བའི་རྒྱུན་ལས་ཕྱིར་ཕྱོགས་པ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་རྒྱ་མཚོ་ལ་མངོན་པར་མོས་པ། ཆོས་ཀྱི་གྲོང་ཁྱེར་དུ་འགྲོ་བར་གཅིག་ཏུ་ཆད་པ། དེ་བཞིན་གཤེགས་པའི་ཡུལ་ཡོངས་སུ་གནོན་པའི་བརྩོན་འགྲུས་ཅན། སངས་རྒྱས་ཀྱི་སའི་རྒྱུད་རྣམ་པར་གནོན་པ། ཐམས་ཅད་མཁྱེན་པའི་སྟོབས་ཡོངས་སུ་རྫོགས་ པར་བྱ་བ་ལ་མངོན་པར་མོས་པ། སྟོབས་བཅུ་རབ་ཏུ་ཐོབ་པར་བྱ་བའི་མཐར་ཐུག་པ་རྣམས་ཀྱིས་བསོད་ནམས་དང༌། ཡེ་ཤེས་ཀྱི་ཚོགས་ཡངས་པས་ཉེ་བར་བསྟེན་པའི་ སེམས་དང༌། བསམ་པ་རྣམ་པར་དག་པ་དང་མ་ཞུམ་པ། ཉོན་མོངས་པ་མེད་པ་དང་མ་ཡོ་བ་དང༌། མ་ཉམས་པ་དང༌། མ་འཆུམས་པ་དང༌། མུན་པ་མེད་པའི་སེམས་དང༌། ཡེ་ཤེས་ཀྱི་སྣང་བ་ཀུན་ཏུ་སྣང་བས་སྣང་བར་གྱུར་པའི་སེམས་དང༌། སེམས་ཅན་ཐམས་ཅད་ལ་ཕན་པ་དང་བདེ་བར་བྱ་བར་ཤིན་ཏུ་འདུན་པའི་སེམས་དང༌། བདུད་ཀྱི་ འཁོར་དང་ཉོན་མོངས་པ་ཐམས་ཅད་ཀྱིས་མི་ཐུབ་པའི་སེམས་དང༌། ཐམས་ཅད་མཁྱེན་པ་ཉིད་ཀྱི་ཡེ་ཤེས་ཐོབ་པར་བྱ་བར་སྐབས་ཕྱེ་བའི་སེམས་ཀྱིས་ཀྱང་ཁོང་དུ་ ཆུད་པ་དང༌། འཇུག་པ་དང༌། ཡིད་ཆེས་པར་བྱ་བ་དང༌། གཟུང་བ་དང༌། རྗེས་སུ་འབྲང་བར་བྱ་བའམ། ཤེས་པར་བྱ་བ་མི་ནུས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ། གནས་ འདི་ནི། དེ་བཞིན་གཤེགས་པའི་ཡེ་ཤེས་ཀྱི་ཡུལ་ཏེ། བྱང་ཆུབ་སེམས་དཔའ་ཐམས་ཅད་ཀྱིས་ཡོངས་སུ་མ་ནོན་ན། སེམས་ཅན་གཞན་ཐམས་ཅད་ཀྱིས་ལྟ་ཅི་ཞིག་སྨོས། འོན་ཀྱང་སེམས་ཅན་ཅང་ཤེས་རྣམས་ཀྱི་བསམ་པ་ཕུན་སུམ་ཚོགས་པ་རྣམ་པར་དག་པར་བྱ་བ་དང༌། དགེ་བའི་རྩ་བ་ལ་སྤྱོད་པའི་སེམས་ཅན་རྣམས་ཀྱི་ལྷག་པའི་བསམ་ པ་དབང་དུ་འགྱུར་བར་བྱ་བ་དང༌། ཁྱོད་ཀྱིས་བསམ་པ་ཐག་པ་ནས་ཡོངས་སུ་དྲིས་པའི་ལུང་བསྟན་པའི་ཆོས་ཉིད་རབ་ཏུ་འབྱུང་བ་ཐོབ་པར་བྱ་བའི་ཕྱིར་དེ་བཞིན་གཤེགས་ པའི་བྱིན་གྱིས་བསྟན་ཏོ། །དེ་ནས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པས་དེའི་ཚེ་དོན་དེ་ཉིད་བརྣན་ཏེ་བསྟན་པའི་ཕྱིར་དུས་གསུམ་དུ་ བྱུང་བའི་དེ་བཞིན་གཤེགས་པའི་ཡུལ་ལ་རྣམ་པར་བལྟས་ཏེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྲས་པོ་ཁྱོད་ཀྱིས་གང་དྲིས་པ། །དེ་ནི་བསམ་ཡས་ཟབ་ མོ་སངས་རྒྱས་ཡུལ། །བསམ་ཡས་ཞིང་གི་རྡུལ་ཕྲན་རབ་སྙེད་ཀྱི། །བསྐལ་པ་མང་པོས་དེ་ཀུན་བརྗོད་མི་ནུས། །སེམས་ཅན་འདོད་པའི་སེམས་ལྡན་སྡང་བ་དང༌། །དེ་བཞིན་ ༄༅། །གཏི་མུག་མུན་པས་བསྒྲིབས་པ་དང༌། །འཆབ་དང་དྲེགས་པས་བསམ་པ་ཉམས་གྱུར་པས། །རྒྱལ་བའི་ཆོས་ཉིད་ཞི་བ་ཤེས་མི་ནུས། །ཕྲག་དོག་ འཇུངས་པའི་དབང་གི་རྗེས་འབྲང་དང༌། །གཡོ་སྒྱུས་བསམ་པ་རྙོག་པར་གྱུར་པ་དང༌། །ཉོན་མོངས་ལས་ཀྱི་སྒྲིབ་པས་བསྒྲིབས་པ་ཡིས། །སངས་རྒྱས་ཡུལ་འདི་ཤེས་ པར་མི་ནུས་སོ། །ཕུང་པོ་ཁམས་དང་སྐྱེ་མཆེད་གནས་པ་དང༌། །འཇིག་ཚོགས་མང་ལ་གནས་པར་གྱུར་པ་དང༌། །ལྟ་སེམས་འདུ་ཤེས་ཕྱིན་ཅི་ལོག་གྱུར་པས། །ཞི་བའི་ ས་འདི་ཤེས་པར་མི་ནུས་སོ། །རྒྱལ་བའི་ཡུལ་ནི་ཤེས་དཀའ་ཞི་བ་སྟེ། །རང་བཞིན་དྲི་མེད་རྣམ་པར་རྟོག་པ་མེད། །སྲིད་པར་བརྟེན་ཅིང་འཁོར་ལ་ཆགས་པ་ཡིས། ། ཆོས་འདི་ཡང་དག་ཤེས་པར་མི་ནུས་སོ། །སངས་རྒྱས་རིགས་སུ་རིགས་ལྡན་གང་སྐྱེས་པ། །དེ་བཞིན་གཤེགས་པ་ཀུན་གྱིས་བྱིན་བརླབས་ཤིང༌། །ཆོས་ཀྱི་རྒྱལ་པོའི་ གདུང་རབས་ཡོངས་འཛིན་པ། །དྲང་སྲོང་དེ་དག་ཡུལ་ནི་འདི་ཡིན་ནོ། །དཀར་ཆོས་རྒྱ་མཚོས་མི་ངོམས་སེམས་ལྡན་ཞིང༌། །གང་རྣམས་དགེ་བའི་བཤེས་ཀྱིས་ཡོངས་ བཟུང་སྟེ། །ཐུབ་པའི་སྟོབས་ལ་དམིགས་པའི་སེམས་སྤྲིན་ཅན། །དེ་དག་འདི་ཐོས་བཟོད་པ་ཐོབ་པར་འགྱུར། །གང་རྣམས་བསམ་པ་དྲི་མེད་རྣམས་རྟོག་མེད། །བར་སྣང་ མཁའ་བཞིན་ཕྱོགས་དང་ཕྱོགས་མཚམས་སུ། །མུན་པ་རྣམ་བསལ་བློ་གྲོས་སྒྲོན་མའི་སྤྲིན། །དྲི་མེད་དེ་དག་སྤྱོད་ཡུལ་འདི་ཡིན་ནོ། །སྙིང་རྗེའི་བསམ་པས་འགྲོ་བ་རྒྱ་མཚོ་རྣམས། ། དུས་གསུམ་བྱུང་བ་གང་རྣམས་རྒྱས་བྱེད་ཅིང༌། །སེམས་ཅན་མ་ལུས་རྗེས་འབྲང་བྱམས་པ་ཅན། །དེ་དག་རྒྱལ་བའི་ཚུལ་འདིར་འཇུག་པར་འགྱུར། །གང་རྣམས་འཛིན་མེད་དགའ་ བའི་སེམས་ལྡན་ཞིང༌། །རྟག་པར་བདོག་པ་ཐམས་ཅད་སྦྱིན་བརྩོན་ལ། །སེམས་ཅན་ཀུན་ལ་མཉམ་པར་ཞུགས་གྱུར་པ། །ཆགས་མེད་དེ་དག་སྤྱོད་ཡུལ་ས་འདི་ཡིན། །ཉོན་མོངས་ མེད་སེམས་བསྐྱོད་མེད་སྤྱོད་ལྡན་ཞིང༌། །གང་རྣམས་འགྱོད་པ་རྣམས་བསལ་ལ་སེམས་ལྡན་ཏེ། །སངས་རྒྱས་གདམས་ངག་ནན་ཏན་བྱེད་ལྡན་པ། །དྲི་མེད་དེ་དག་སྤྱོད་ཡུལ་འདི་ ཡིན་ནོ༑ ༑གང་རྣམས་མི་སྒུལ་སེམས་ལྡན་མི་བསྐྱོད་སེམས། །ཆོས་ཀྱི་རང་བཞིན་རྟོགས་པའི་སེམས་ལྡན་ཞིང༌། །ལས་ཀྱི་རྒྱ་མཚོར་མི་འགལ་སེམས་ལྡན་པ། །མི་བཟད་དེ་ དག་རྣམ་ཐར་འདི་ཡིན་ནོ། །གང་རྣམས་མི་སྐྱོའི་སེམས་དང་མི་ལྡོག་སེམས། །བརྩོན་འགྲུས་མཐུ་དང་རྩལ་དུ་ལྡན་པ་རྣམས། །ཐམས་ཅད་མཁྱེན་ཚོགས་བརྩོན་འགྲུས་ མཐའ་ཡས་པ། །བརྟུལ་ཞུགས་བཟང་ལྡན་དེ་དག་ཡུལ་འདི་ཡིན། །ཞི་བའི་སེམས་ལྡན་མཉམ་པར་བཞག་པ་གང༌། །ཤིན་ཏུ་ཞིར་གྱུར་རིམ་དང་བྲལ་བ་རྣམས། །ཀུན་ ༄༅། །མཁྱེན་བསམ་གཏན་ཡན་ལག་མཆོར་སྤྱོད་པ། །རབ་ཏུ་ཞི་བ་དེ་དག་ཚུལ་འདི་ཡིན། །གང་རྣམས་ཆགས་པ་ཀུན་ལས་སེམས་གྲོལ་ཞིང༌། ། ཆོས་ཀྱི་རང་བཞིན་ཁོང་དུ་ཆུད་སེམས་ཅན། །རྒྱལ་བའི་ཆོས་དབྱིངས་རྟོགས་པར་ཁོང་ཆུད་པ། །ཤེས་རབ་སྒྲོན་མ་དེ་དག་ཚུལ་འདི་ཡིན། །སེམས་ཅན་རང་བཞིན་རྟོགས་ སེམས་ལྡན་གྱུར་ཅིང༌། །གང་རྣམས་སྲིད་པའི་མཚོ་ལ་ཆགས་མེད་སེམས། །སེམས་ཅན་སེམས་ལ་གཟུགས་བརྙན་ཟླ་འཆར་བ། །ལམ་མཁན་དེ་དག་རྣམ་ཐར་འདི་ ཡིན་ནོ༑ ༑དུས་གསུམ་བྱུང་བའི་རྒྱལ་བ་རྒྱ་མཚོ་རྣམས། །སྨོན་ལམ་གང་ཆེན་མཚོ་རྒྱུད་སྐྱེས་པ་ཡི། །ཞིང་རྣམས་ཀུན་ཏུ་ཕྱི་མའི་མཐར་སྤྱོད་པ། །ཀུན་ཏུ་བཟང་པོ་དེ་ དག་ཚུལ་འདི་ཡིན། །གང་རྣམས་ཆོས་དབྱིངས་ཚུལ་རྣམས་རྒྱ་མཚོ་ཡིས། །འགྲོ་བ་རྒྱ་མཚོ་འདུ་དང་འཇིག་པ་ཡི། །བསྐལ་པར་བཅས་པ་ཁོང་དུ་ཆུད་པ་རྣམས། །རྟོག་ མེད་དེ་དག་རྣམ་ཐར་འདི་ཡིན་ནོ། །ཞིང་རྣམས་ཀུན་གྱི་རྡུལ་ཕྲན་ཐམས་ཅད་ལ། །སངས་རྒྱས་གྲངས་མེད་ཤིང་རྒྱལ་དྲུང་བཞུགས་ཤིང༌། །བྱང་ཆུབ་འཚང་རྒྱ་འགྲོ་འདུལ་ མཐོང་བ་ཡི། །ཆགས་མེད་དམིགས་ཅན་དེ་དག་ཚུལ་འདི་ཡིན། །ཁྱོད་ནི་བསྐལ་པ་རྒྱ་མཚོ་རྒྱ་ཆེན་དུ། །དགེ་བའི་བཤེས་གཉེན་མང་པོ་བསྙེན་བཀུར་ཏེ། །ཆོས་ འདོད་ཆོས་ཚོལ་མི་སྐྱོ་འདིར་ཕྱིན་པས། །ཐོས་ནས་དེ་ནི་ཡོངས་སུ་གཟུང་བར་ནུས། །ཁྱོད་ཀྱི་བསམ་པ་ཡོངས་སུ་སྦྱང་བའི་ཕྱིར། །བདེ་གཤེགས་བྱིན་རླབས་བསམ་གྱིས་ མི་ཁྱབ་པས། །རྣམ་པར་སྣང་མཛད་ཚད་མེད་ཡུལ་འདི་ཡང༌། །ཁོ་མོའི་ཚིག་ལས་ཆགས་པ་མེད་པར་འབྱུང༌། །རིགས་ཀྱི་བུ། སྔོན་བྱུང་བའི་དུས་བསྐལ་པ་འཇིག་རྟེན་གྱི་ ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་དེའི་ཡང་ཕ་སྔ་ཞིག་ཏུ་འཇིག་རྟེན་གྱི་ཁམས་རྒྱ་མཚོ་གསེར་རིན་པོ་ཆེའི་རི་སྤོས་རྣམ་པར་སྣང་བ་ཞེས་བྱ་བ་བྱུང་སྟེ། རིགས་ཀྱི་བུ། འཇིག་རྟེན་གྱི་ཁམས་རྒྱ་མཚོ་གསེར་རིན་པོ་ཆེའི་རི་སྤོས་རྣམ་པར་སྣང་བ་དེར་དེ་བཞིན་གཤེགས་པ་ཡེ་ཤེས་རི་བོའི་འོད་ཆོས་ཀྱི་དབྱིངས་སུ་སྣང་བའི་གཟི་བརྗིད་རྒྱལ་པོ་ཞེས་ བྱ་བ་བྱུང་སྟེ། དེ་བཞིན་གཤེགས་པ་ཡེ་ཤེས་ཀྱི་རི་བོའི་འོད་ཆོས་ཀྱི་དབྱིངས་སུ་སྣང་བའི་གཟི་བརྗིད་རྒྱལ་པོ་དེ། སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་འཇིག་ རྟེན་གྱི་ཁམས་རྒྱ་མཚོ་གསེར་རིན་པོ་ཆེའི་རི་སྤོས་རྣམ་པར་སྣང་བ་ཞེས་བྱ་བ། འཇིག་རྟེན་གྱི་ཁམས་རྒྱ་མཚོའི་ས་དང་རི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་འབྱམས་ ཀླས་པ་བསྟན་དུ་ཡོད་པ་དང་ལྡན་པ། འཇིག་རྟེན་གྱི་ཁམས་ཀྱི་རྒྱུད་རེ་རེ་ཞིང་ཡང་བསྐལ་པའི་གྲངས་ཤིན་ཏུ་བསྟན་པ་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་ ༄༅། །ལྡན་པ༑ བསྐལ་པ་རེ་རེ་ཞིང་ཡང་བསྐལ་པ་བར་མ་ཤིན་ཏུ་བསྟན་པ་དུ་མ་དང་ལྡན་པ། བསྐལ་པ་བར་མ་རེ་རེ་ཞིང་ཡང་འཇིག་རྟེན་གྱི་ཁམས་རྣམ་ པ་ཐ་དད་དུ་བྱ་བ་བསྟན་པ་དུ་མ་དང་ལྡན་པ། དེ་བཞིན་གཤེགས་པ་འབྱུང་བ་དང༌། རྫུ་འཕྲུལ་སྣ་ཚོགས་བསྟན་དུ་ཡོད་པ། དེ་བཞིན་གཤེགས་པ་བྱུང་བ་རེ་རེ་ཞིང་ཡང་ མདོ་སྡེ་ཡང་དག་པར་བསྟན་པ་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་བརྗོད་དུ་ཡོད་པ། མདོ་སྡེ་རེ་རེ་ལ་ཡང་བྱང་ཆུབ་སེམས་དཔའི་ལུང་བསྟན་པ་འཇིག་རྟེན་གྱི་ ཁམས་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བསྟན་དུ་ཡོད་པ། སེམས་ཅན་འདུལ་བ་མཐའ་དང་དབུས་མེད་པ་ཤིན་ཏུ་བསྟན་པ་ཐ་དད་པའི་ཚུལ་གྱིས་བསྒྲུབས་པ། སངས་རྒྱས་ཀྱི་རྣམ་པར་འཕྲུལ་པ་དང༌། ཆོ་འཕྲུལ་སྣ་ཚོགས་ཀྱིས་རྣམ་པར་འདུལ་བ་དང་ལྡན་པ་ཡོངས་སུ་སྦྱངས་ཏེ། རིགས་ཀྱི་བུ། འཇིག་རྟེན་གྱི་ཁམས་རྒྱ་མཚོ་གསེར་ རིན་པོ་ཆེའི་རི་སྤོས་རྣམ་པར་སྣང་བ་དེར་འཇིག་རྟེན་གྱི་ཁམས་བར་མའི་རྒྱུད་ཕྱོགས་ཀུན་ཏུ་མངོན་པར་བལྟས་པའི་སྒོ་རྒྱལ་མཚན་གྱིས་རྣམ་པར་བརྒྱན་པ་ཞེས་བྱ་བ་ བྱུང་སྟེ༑ རིགས་ཀྱི་བུ། འཇིག་རྟེན་གྱི་ཁམས་བར་མའི་རྒྱུད་ཕྱོགས་ཀུན་ཏུ་སྒོ་མངོན་པར་བལྟས་པ་རྒྱལ་མཚན་གྱིས་རྣམ་པར་བརྒྱན་པ་དེར་འཇིག་རྟེན་གྱི་ཁམས་རིན་ པོ་ཆེ་ཐམས་ཅད་ཀྱི་མདོག་ཀུན་ཏུ་སྣང་བའི་དཔལ་ཡོན་བྱ་བ་འཇིག་རྟེན་གྱི་ཁམས་ཀྱི་གཞི་དང༌། མཚམས་ཀྱི་རྒྱན་རིན་པོ་ཆེའི་རྒྱལ་པོ་དེ་བཞིན་གཤེགས་པ་ཐམས་ཅད་ ཀྱི་སྙིང་པོ་བྱང་ཆུབ་རབ་ཏུ་སྣང་བ་ལས་བྱས་པ། རིན་པོ་ཆེ་སྣ་ཚོགས་ཀྱི་མེ་ཏོག་རྒྱ་མཚོ་ལ་གནས་པ། ལྷུན་རིན་པོ་ཆེའི་རྒྱལ་པོ་དེ་བཞིན་གཤེགས་པ་ཐམས་ཅད་ཀྱི་སྤྲུལ་ པའི་གཟུགས་བརྙན་རབ་ཏུ་སྟོན་པ་ལས་བསྒྲུབས་པ། ལྷའི་གྲོང་ཁྱེར་གྱི་དབྱིབས་སུ་འདུག་པ། རྣམ་པར་དག་ཅིང་ཀུན་ནས་ཉོན་མོངས་པ་བྱང་བར་གྱུར་ཏེ། འཇིག་རྟེན་གྱི་ ཁམས་དེར་གླིང་བཞི་པའི་འཇིག་རྟེན་གྱི་ཁམས་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་བྱུང་བར་གྱུར་ཏོ། །གླིང་བཞི་པའི་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་གི་གླིང་བཞི་པ་ དབུ་མ་རིན་པོ་ཆེ་སྣ་ཚོགས་ཀྱི་རྩེ་མོའི་རྒྱལ་མཚན་ཞེས་བྱ་བ་བྱུང་སྟེ། གླིང་བཞི་པའི་འཇིག་རྟེན་གྱི་ཁམས་རིན་པོ་ཆེ་སྣ་ཚོགས་ཀྱི་རྩེ་མོའི་རྒྱལ་མཚན་དེར་གླིང་མཆུ་ཞང་དུ་ དཔག་ཚད་བརྒྱ་ཕྲག་སྟོང་ཡོད་པ་བཞི་བྱུང་ནས་གླིང་རེ་རེ་ལ་ཡང་གྲོང་ཁྱེར་ཆེན་པོ་སྟོང་ཕྲག་རེ་རེ་བྱུང་ངོ༌། །གླིང་བཞི་པ་དེའི་གླིང་གི་དབུས་སུ་རྒྱལ་པོའི་གནས་རིན་པོ་ཆེའི་གནས་ རིན་པོ་ཆེའི་ས་ལས་རྣམ་པར་བརྒྱན་པ་སྤྲིན་གྱི་སྒྲོན་མ་ཞེས་བྱ་བ་གྲོང་ཁྱེར་སྟོང་ཕྲག་བཅུའི་འཁོར་དང་ལྡན་པར་བྱུང་ངོ༌། །དེའི་ཚེ་འཛམ་བུའི་གླིང་དེའི་མི་རྣམས་ཀྱང་ཚེའི་ཚད་ལོ་ ༄༅། །སྟོང་ཕྲག་བཅུ་ཐུབ་པར་གྱུར་ཏོ། །རྒྱལ་པོའི་གནས་རིན་པོ་ཆེའི་ས་ལས་རྣམ་པར་བརྒྱན་པ་སྤྲིན་གྱི་སྒྲོན་མ་དེར་འཁོར་ལོས་བསྒྱུར་བའི་རྒྱལ་པོ་ཆོས་ ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ཞེས་བྱ་བ་བྱུང་སྟེ། འཁོར་ལོས་བསྒྱུར་བའི་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ ཏུ་སྒྲོག་པ་དེའི་བློན་པོ་ནི། ལྔ་བརྒྱ་བྱུང་ངོ༌། །བཙུན་མོ་ནི། སྟོང་ཕྲག་དྲུག་བྱུང་ངོ༌། །སྲས་ནི། ཀུན་ཀྱང་དཔའ་བ། རྟུལ་ཕོད་པ། ཡན་ལག་དམ་པའི་གཟུགས་དང་ ལྡན་པ༑ བལྟ་ན་སྡུག་པ། གཟི་བརྗིད་ཆེ་བ། སྟོབས་ཆེ་བ་བརྒྱ་ཕྲག་བདུན་བྱུང་ངོ༌། །རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེའི་ ཚེ་ལ་ཛམྦུའི་གླིང་ཐམས་ཅད་ཀྱང་གདུགས་གཅིག་གིས་བསྐྱངས་པར་གྱུར་ཏེ་ཕ་རོལ་གྱི་འཁོར་དང་དགྲ་ཐམས་ཅད་ཀྱང་ཤིན་ཏུ་ཆོམ་པར་གྱུར་ཏོ། །དེའི་ཚེ་འཇིག་རྟེན་གྱི་ ཁམས་དེར་བསྐལ་པ་བར་མ་ནི། ཟད་དུ་ཆ། རྙོག་པ་ལྔ་འཇིག་རྟེན་དུ་བྱུང༌། དགེ་བ་བཅུའི་ལས་ཀྱི་ལམ་ནི། ནུབ་པར་གྱུར་ནས་སེམས་ཅན་མི་དགེ་བ་བཅུའི་ལམ་ལ་ སྤྱོད་པ་ཕལ་ཆེར་ངན་སོང་དུ་ཡང་འདོང་བར་གྱུར་ཏོ། །དེ་དག་མི་དགེ་བ་བཅུའི་ལས་ཀྱི་ལམ་ཡོངས་སུ་འཛིན་པའི་རྒྱུས་ཚེ་ཐུང་བ་དང༌། ལོངས་སྤྱོད་ཆུང་བ་དང༌། གཟུགས་ མ་ལེགས་པ་དང༌། ཁ་དོག་མི་སྡུག་པ་དང༌། ལུས་མ་ལེགས་པ་དང༌། བདེ་བའི་རྣམ་པ་ཉུང་བ་དང༌། སྡུག་བསྔལ་ཉམས་སུ་མྱོང་བའི་རྣམ་པ་མང་བ་དང༌། ཕན་ཚུན་སླུ་ཞིང་ འདྲིད་པའི་རང་བཞིན་ཅན་དང༌། ཕན་ཚུན་དབྱེ་བ་ལ་ཞུགས་པ་དང༌། ཞེ་གཅོད་པའི་ཚིག་ལ་སྤྱོད་པ་དང༌། འཆལ་བའི་ཚིག་ཏུ་སྨྲ་བ་དང༌། འདོད་པ་མི་བཟད་པས་ཟིལ་གྱིས་ ནོན་པ་དང༌། ཞེ་སྡང་བའི་ཡིད་ཀྱི་རྟོག་པ་དང་ལྡན་པ། ལྟ་བའི་ཐིབས་པོ་སྣ་ཚོགས་ཀྱི་མྱ་ངན་དུ་འཁྱམས་པར་གྱུར་ནས་དེ་དག་ཆོས་མ་ཡིན་པའི་འདོད་ཆགས་ལ་ཞེན་ཅིང་ འདོད་པ་མི་བཟད་པས་ཟིལ་གྱིས་ནོན་ལ། ལོག་པའི་ཆོས་ཀྱིས་ཀུན་ནས་འཁོར་བས་ས་ལ་ཤིང་རྩི་དང༌། ལོ་ཟས་སྐྱེ་བར་འགྱུར་བའི་ཆར་ཡང་དུས་སུ་མི་འབབ་པར་འགྱུར་ཏེ། སེམས་ཅན་དེ་དག་ཀྱང་རྩྭ་དང༌། གེལ་བ་དང༌། སྨན་དང༌། ནགས་ཚལ་དང༌། བཟའ་ཤིང་གི་ར་བ་དང༌། སྡོང་པོ་དག་ཀྱང་བསྐམས་པར་གྱུར་ནས་ནད་སྣ་ཚོགས་ཀྱིས་ཐེབས་ཤིང་ ཕྱོགས་དང་ཕྱོགས་མཚམས་སུ་སྐྱབས་མེད་པས་ཕན་ཚུན་ཁོད་མི་མྱོང་ཞིང་གཡེན་སྤྱོ་བར་གྱུར་ཏེ། དེ་དག་ཀུན་ཀྱང་གཅིག་ཏུ་འདུས་ནས་རྒྱལ་བའི་གནས་རིན་པོ་ཆེའི་ས་ ལས་རྣམ་པར་བརྒྱན་པ་སྤྲིན་གྱི་སྒྲོན་མ་གང་ན་བ་དེར་དོང་སྟེ་ཀུན་ཏུ་བསྐོར་ནས་ལ་ལ་ནི། ལག་པ་གྱེན་ཏུ་བསྒྲེང༌། ལ་ལ་ནི། ཐལ་མོ་སྦྱོར། ལ་ལ་ནི། ལུས་ཤིན་ཏུ་འདར། ༄༅། །ལ་ལ་ནི། གྱེད། ལ་ལ་ནི། བུབ། ལ་ལ་ནི། ལུས་ཐམས་ཅད་ཀྱིས་ཕབ་ཅིང་ཕྱག་འཚལ། ལ་ལ་ནི། པུས་མོ་ས་ལ་འཛུགས། ལ་ལ་ནི། ལག་པ་ནམ་ མཁའི་དབྱིངས་སུ་གཡོ་བ། ལ་ལ་ནི། གོས་མེད་ཅིང་སྒྲེན་མོར་འཁོད། ལ་ལ་ནི། ཁ་མིག་མི་སྡུག་པར་གྱུར་ཅིང་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་ འཁོར་རབ་ཏུ་སྒྲོག་པ་ལ་མངོན་དུ་བལྟས་ཤིང༌། སྙིང་རྗེ་རྗེ་སྐད་དུ་འོ་དོད་ཆེན་པོ་འབོད་དེ། ལྷ་ཆེན་པོ། བདག་ཅག་ནི། ཉམ་ཐག་གོ །བཀྲེས་པ་དང་སྐོམ་པའི་སྡུག་བསྔལ་ གྱིས་རབ་ཏུ་གཟིར་ཏོ། །འཇིགས་པ་སྣ་ཚོགས་ཀྱིས་གཡེན་སྤྱོའོ། །བདག་ཅག་ལ་སྐྱབས་སུ་ཡང་མ་མཆིས་སོ། །བདག་ཅག་ལ་མགོན་དང་དཔུང་གཉེན་མ་མཆིས་སོ། ། སྡུག་བསྔལ་གྱི་ཤིང་ཐགས་ཀྱིས་འཁོར་ཏོ། །སྲོག་ཆད་ལ་ཐུག་གོ །འཆི་བར་གྱུར་མ་ཁད་དོ། །ཞེས་ཏེ། སྨྲེ་སྔགས་སྣ་ཚོགས་སུ་བླ་ཞིང་དབྱངས་ཀྱི་རྣམ་པ་སྣ་ཚོགས་ དང༌། ཚིག་སྣ་ཚོགས་ཀྱིས་ཁ་གདོང་མི་སྡུག་པར་གྱུར་པར་འདུ་ཤེས་དང༌། ཚིག་སྣ་ཚོགས་ཀྱི་ཐ་སྙད་དང༌། ཆོ་འབྲང་དང༌། སྐད་ཀྱི་གདངས་དོན་སྣ་ཚོགས་རྗོད་པའི་ཚིག་ དང༌། ངག་གིས་འོ་དོད་བོས་སོ། །རྒྱལ་པོའི་གནས་དེའི་སྐྱེས་པ་དང༌། བུད་མེད་དང༌། ཁྱེའུ་དང༌། བུ་མོ་བཀྲེས་པ་དང༌། སྐོམ་པས་མནར་བ། ལུས་ལ་རྒྱན་མེད་པ། སྒྲེན་ མོ་གོས་མེད་པ། ཁ་དོག་མི་སྡུག་པ། ལུས་གས་ཤིང་རྩུབ་པ། སྡུག་བསྔལ་ཞིང་ཡིད་མི་བདེ་ལ་མི་དགའ་བ་དེ་དག་ཐམས་ཅད་ཀྱང་བདེ་བ་ནི། མངོན་པར་འདོད། སྡུག་བསྔལ་ གྱི་འཇིགས་པས་ནི། བརླ་ཁྱེར་ནས་རྒྱལ་པོ་ཤེས་པའི་སྐྱེས་བུ་ཆེན་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེ་ལ་བདེ་བ་ཐམས་ཅད་ཐོབ་པར་བྱ་བའི་ འདུ་ཤེས་དང༌། སྡུག་བསྔལ་ཐམས་ཅད་དང་མི་འགྲོགས་པར་བྱ་བའི་འདུ་ཤེས་དང༌། འཚོ་བའི་བསམ་པ་དང་ལྡན་ཞིང་གཏེར་ཐོབ་པར་བྱ་བའི་འདུ་ཤེས་དང༌། མུ་སྟེགས་ མཐོང་བར་བྱ་བའི་འདུ་ཤེས་དང༌། ལམ་ཆེན་པོ་ལ་ནན་ཏན་དུ་བྱ་བའི་འདུ་ཤེས་དང༌། གྲུ་ཆེན་པོའི་འདུ་ཤེས་དང༌། ཡེ་ཤེས་ཀྱི་གླིང་ཆེན་པོའི་འདུ་ཤེས་དང༌། དོན་ཆེན་པོ་རབ་ཏུ་ ཐོབ་པར་བྱ་བའི་འདུ་ཤེས་དང༌། མཐོ་རིས་ཀྱི་དགའ་བ་དང༌། བདེ་བ་ཐམས་ཅད་རབ་ཏུ་ཐོབ་པར་བྱ་བའི་འདུ་ཤེས་ཀྱིས་མགོན་དང་སྐྱབས་ཚོལ་བར་གྱུར་ཏོ། །རྒྱལ་པོ་ཆོས་ཐམས་ ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་འཁོར་ཀུན་ནས་སློང་བ་མང་པོ་སྙིང་རྗེ་རྗེ་སྐད་དུ་འབོད་པའི་འོ་དོད་ཆེན་པོ་དེ་ཐོས་ནས་དེ་སྙིང་རྗེ་ཆེན་པོའི་སྒོ་བརྒྱ་སྟོང་གྲངས་ མེད་པ་ཕྲག་བཅུ་ལ་ཞུགས་པར་གྱུར་ཏོ། །དེ་སྙིང་རྗེ་ཆེན་པོའི་ཚུལ་ཡིད་ལ་བབ་པའི་སེམས་སུ་གྱུར་ནས་ཡུད་ཙམ་ཞིག་རྩེ་གཅིག་ཏུ་བསམ་སྟེ་སྙིང་རྗེ་ཆེན་པོ་དང་ལྡན་པའི་ཚིག་ ༄༅། །བཅུ་བརྗོད་དོ། །བཅུ་གང་ཞེ་ན། ཀྱི་ཧུད་ཀྱེ་སེམས་ཅན་འདི་དག་ནི། འཁོར་བའི་གཡང་ས་ཆེན་པོར་ལྷུང་ཡང་སྐྱབས་མེད་པ་ལྟ་ན། བདག་ནམ་ཞིག་ འཁོར་བའི་གཡང་ས་ཆེན་པོར་ལྷུང་བའི་སེམས་ཅན་རྣམས་དེ་བཞིན་གཤེགས་པའི་ས་ལ་འགོད་པས་གནས་སུ་འགྱུར། ཀྱི་ཧུད་ཀྱི་སེམས་ཅན་འདི་དག་ནི། ཉོན་མོངས་པའི་ གནོད་པས་གཙེས་ཤིང་སྐྱབས་མེད་པ་ལྟ་ན། ནམ་ཞིག་བདག་སེམས་ཅན་ཉོན་མོངས་པ་སྣ་ཚོགས་ཀྱི་འཇིགས་པ་དང་གནོད་པས་གཙེས་ཏེ་སྐྱབས་མེད་པ་རྣམས་ཁ་ན་མ་ ཐོ་བ་མེད་པའི་ལས་ཀྱི་མཐའ་ལ་འགོད་པས་སྐྱབས་སུ་འགྱུར། ཀྱི་ཧུད་ཀྱེ་སེམས་ཅན་འདི་དག་ནི། འཇིག་རྟེན་ན་རྒ་ཤིའི་འཇིགས་པས་ཚར་ཆོད་ཅིང་མགོན་མེད་པ་ལྟ་ན། ནམ་ ཞིག་བདག་སེམས་ཅན་མགོན་མེད་པ་རྣམས་ཀྱི་འཁོར་བའི་འཇིགས་པ་ཐམས་ཅད་རྣམ་པར་སེལ་བས་མགོན་དུ་འགྱུར། ཀྱི་ཧུད་ཀྱེ་སེམས་ཅན་འདི་དག་ནི། འཇིག་རྟེན་གྱི་ འཇིགས་པ་སྣ་ཚོགས་ཀྱིས་གཙེས་ཏེ་རྟེན་མེད་པ་ལྟ་ན། ནམ་ཞིག་བདག་སེམས་ཅན་འཇིག་རྟེན་གྱི་འཇིགས་པ་སྣ་ཚོགས་ཀྱིས་གཙེས་པ་རྣམས་ཤིན་ཏུ་བདེ་ཞིང་སྐྱོན་མེད་ པའི་ཐམས་ཅད་མཁྱེན་པའི་ལམ་ལ་དགོད་པས་རྟེན་དུ་འགྱུར། ཀྱི་ཧུད་ཀྱེ་སེམས་ཅན་འདི་དག་ནི། མ་རིག་པའི་མུན་པར་འཐོམ་སྟེ་ཐེ་ཚོམ་དང༌། ཡིད་གཉིས་ཀྱི་རབ་ རིབ་ཀྱིས་བསྒྲིབས་པ་ལྟ་ན། ནམ་ཞིག་བདག་སེམས་ཅན་ཐམས་ཅད་ཀྱི་མ་རིག་པའི་མུན་པ་རྣམ་པར་སེལ་བས་སྒྲོན་མར་འགྱུར། ཀྱི་ཧུད་ཀྱེ་སེམས་ཅན་འདི་དག་ནི། སྣང་བ་དང་ བྲལ་བ་ལྟ་ན། ནམ་ཞིག་བདག་ཡེ་ཤེས་ཀྱི་སྒོ་རབ་རིབ་མེད་པ་ཡོངས་སུ་སྟོན་པས་ཡེ་ཤེས་ཆེན་པོའི་སྣང་བ་འབྱིན་པར་འགྱུར། ཀྱི་ཧུད་ཀྱེ་སེམས་ཅན་འདི་དག་ནི། ཕྲག་དོག་དང༌། འཇུངས་བ་དང༌། གཡོ་དང༌། སྒྱུའི་རྙོག་པས་བསམ་པ་རྙོག་པ་ཅན་དུ་གྱུར་ཏེ་ཡེ་ཤེས་ཀྱི་མདོག་གསལ་བ་མེད་པ་ལྟ་ན། ནམ་ཞིག་བདག་སེམས་ཅན་ཐམས་ཅད་ཤིན་ཏུ་དག་ པ་ལ་རབ་ཏུ་གསལ་བར་བྱེད་པར་འགྱུར། ཀྱི་ཧུད་ཀྱེ་སེམས་ཅན་འདི་དག་ནི། འཁོར་བ་རྒྱ་མཚོའི་ཡུལ་གྱི་རྒྱུད་དུ་ཞུགས་ཤིང་འདྲེན་པ་མེད་པ་ལྟ་ན། ནམ་ཞིག་བདག་སེམས་ ཅན་ཆོས་ཐམས་ཅད་ཆོས་རྒྱ་མཚོའི་ཚུལ་ལ་འཛུད་པར་གྱུར་ཅིང་འདྲེན་པར་འོང༌། ཀྱི་ཧུད་ཀྱེ་སེམས་ཅན་འདི་དག་ནི། མ་དུལ་ཞིང་རྣམ་པར་འདྲེན་པ་མེད་པ་ལྟ་ན། ནམ་ཞིག་བདག་ སེམས་ཅན་ཐམས་ཅད་རྣམ་པ་ཐམས་ཅད་དུ་ཡོངས་སུ་སྨིན་པར་བྱ་བ་དང༌། རྣམ་པར་གདུལ་བ་ལ་དེ་བཞིན་གཤེགས་པའི་བྱིན་གྱི་རླབས་ཀྱིས་དུས་ལས་མི་འདའ་ཞིང་རྣམ་པར་ འདྲེན་པར་འོང༌། ཀྱི་ཧུད་ཀྱེ་སེམས་ཅན་འདི་དག་ནི། དམུས་ལོང་དུ་གྱུར་ཏེ་ཡོངས་སུ་འདྲེན་པ་མེད་པ་ལྟ་ན། ནམ་ཞིག་བདག་སེམས་ཅན་ཐམས་ཅད་སྒྲིབ་པ་མེད་པའི་ཐམས་ ༄༅། །ཅད་མཁྱེན་པའི་ཡེ་ཤེས་ཀྱི་ཚུལ་ལ་འཛུད་ཅིང་ཡོངས་སུ་འདྲེན་པར་འགྱུར། དེ་སྐད་དུ་དེས་སྙིང་རྗེ་ཆེན་པོ་དང་ལྡན་པའི་ཚིག་རྣམ་པ་བཅུ་བརྗོད་ནས་ རྒྱལ་པོའི་གནས་དེར་དྲིལ་ཆེན་པོ་བརྡུངས་ཏེ་གཏོང་བ་ཆེན་པོའི་རྔ་བོ་ཆེའང་ཡོངས་སུ་བརྡུངས་ནས་སུ་ཅི་འདོད་པ་དེ་ལ་དེ་སྦྱིན་གྱི། འགྲོ་བ་ཐམས་ཅད་ཀྱང་ཡོངས་སུ་ཚིམ་པར་ བྱའོ༑ ༑ཞེས་སྒྲ་བརྗོད་ནས་དེས་འཛམ་བུའི་གླིང་ཐམས་ཅད་ཀྱི་རྒྱལ་པོའི་གནས་ཐམས་ཅད་དང༌། གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་དང༌། གྲོང་རྡལ་ཐམས་ཅད་ དུ་ཡོ་བྱད་ཐམས་ཅད་ཀྱི་མཛོད་ཕྱེ་སྟེ། ལམ་གྱི་མདོ་དང༌། ལམ་གྱི་སུམ་མདོ་དང༌། སྲང་ཐམས་ཅད་དུའང་ཡོ་བྱད་སྣ་ཚོགས་ཀྱི་རྣམ་པ་མང་པོ་བཀོད་དེ། འགྲོ་བ་ཐམས་ ཅད་ཉེ་བར་འཚོ་བར་བསྟབས་སོ། །མཛོད་དང་བང་བ་ཐམས་ཅད་ཀྱང་ཕྱེ་སྟེ། རིན་པོ་ཆེའི་གཏེར་ཆེན་པོ་དང༌། ཚོགས་ཀྱང་ཡོངས་སུ་བསྟན་ཏོ། །རིན་པོ་ཆེ་རྣམ་པ་སྣ་ཚོགས་ ཀྱི་ཕུང་པོ་དུ་མ་ཡང་སྤུངས་སོ། །ཟས་དང༌། སྐོམ་དང༌། གོས་དང༌། བཞེན་པ་དང༌། མེ་ཏོག་དང༌། ཕྲེང་བ་དང༌། བདུག་པ་དང༌། བྱུག་པ་དང༌། ཕྱེ་མ་དང༌། གོས་རིན་པོ་ཆེ་ ཁ་དོག་སྣ་ཚོགས་ཀྱི་མཛོད་ཕྱེ་ནས་ཁང་པ་དང༌། གཞལ་མེད་ཁང་དང༌། ཁྱིམ་མང་པོ་མལ་ཆ་དང༌། སྟན་དང༌། གོས་ཀྱིས་ཡོངས་སུ་བརྒྱན་ཏེ་ནོར་དང་དབྱིག་ཐམས་ཅད་ ཕུན་སུམ་ཚོགས་པར་བྱས་ནས་ནོར་བུ་རིན་པོ་ཆེའི་རྒྱལ་པོ་སྣང་བའི་གཟི་བརྗིད་རྣམ་པར་བཀོད་པས་མུན་པ་རྣམ་པར་སེལ་བ་བཤམས་ནས་དེས་སེམས་ཅན་དེ་དག་ཅི་འདོད་པའི་ བསམ་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཁྱིམ་དེ་དག་རེ་རེར་ཡང་རང་གི་ལུས་དང་འདྲ་བའི་སྤྲུལ་པའི་ལུས་མངོན་པར་སྤྲུལ་ཏེ་ཀུན་ཏུ་བཀོད་དོ། །སེམས་ཅན་ཐམས་ ཅད་ཀྱི་ནད་ཐམས་ཅད་གསོ་བའི་ཕྱིར་སྨན་པ་དང༌། སྨན་དང༌། རིམ་གྲོ་པ་དང༌། འཚོ་བའི་ཡོ་བྱད་སྣ་ཚོགས་ཀྱི་རྐྱེན་ཕུན་སུམ་ཚོགས་པ་ཡོངས་སུ་བཤམས་སོ། །རིན་པོ་ཆེ་སྣ་ཚོགས་ ཀྱི་སྣོད་རྣམ་པ་ཐ་དད་པ་ཡོ་བྱད་སྣ་ཚོགས་ཀྱིས་ཅི་རིགས་སུ་བཀང་པ་དག་ཀྱང་ཉེ་བར་བཀོད་དེ། འདི་ལྟར་རིན་པོ་ཆེ་རྡོ་རྗེའི་སྣོད་ནི། སྤོས་ཀྱི་ནོར་བུ་རིན་པོ་ཆེ་སྣ་ཚོགས་ཀྱིས་ཡོངས་ སུ་བཀང༌། སྤོས་ཀྱི་ནོར་བུ་རིན་པོ་ཆེ་སྣ་ཚོགས་ཀྱི་སྣོད་ནི། གོས་ཁ་དོག་དམ་པ་སྣ་ཚོགས་ཀྱིས་ཡོངས་སུ་བཀང་ངོ༌། །ཤིང་རྟ་མང་པོ་དབྱིབས་དང་མདོག་སྣ་ཚོགས་སུ་འདུག་པ། རིན་ པོ་ཆེ་སྣ་ཚོགས་ཀྱིས་རབ་ཏུ་བརྒྱན་པ། རྟ་དང་གླང་པོ་དང་བ་ལང་ཅང་ཤེས་ལ་བཅས་པ། རིན་པོ་ཆེའི་ཤིང་རྟ་སྣ་ཚོགས་རྒྱལ་པོའི་རྐྱེན་དུ་རུང་བ། རིན་པོ་ཆེ་ཐམས་ཅད་ཀྱི་རྒྱན་གྱི་ལོངས་ སྤྱོད་དང་ལྡན་པ། སྟན་སྣ་ཚོགས་བཏིང་བ། རིན་པོ་ཆེ་སྣ་ཚོགས་ཀྱིས་རྣམ་པར་བརྒྱན་པ། བླ་རེ་སྣ་ཚོགས་བྲེས་པ། རིན་པོ་ཆེའི་དྲིལ་བུའི་དྲ་བ་བྲེས་པ། གདུགས་དང༌། རྒྱལ་ ༄༅། །མཚན་དང༌། བ་དན་བསྒྲེང་བས་བརྒྱན་པ་དག་གིས་ཀྱང་ཡུལ་གྱི་ཕྱོགས་གང་བར་བཀོད་དོ། །གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་ཐམས་ ཅད་སྦྱིན་པར་ཡང་འོ་དོད་ཀྱིས་བསྒོའོ། །བཟའ་ཤིང་གི་ར་བ་དང༌། ཀུན་དགའི་ར་བ་དང༌། དཀའ་ཐུབ་ཀྱི་ནགས་ཚལ་སྣ་ཚོགས་ཡོངས་སུ་གཏང་བ་དང༌། ཁྱིམ་དང༌། ཆུང་མ་ དང༑ བུ་དང༌། བུ་མོ་ཐམས་ཅད་ཡོངས་སུ་གཏང་བ་དང༌། རིན་པོ་ཆེ་རིན་ཐང་མེད་པ་ཐམས་ཅད་ཡོངས་སུ་གཏང་བ་དང༌། རང་གི་སྙིང་དང༌། རྐང་དང༌། རྒྱུ་མ་དང༌། མཁལ་མ་ དང༑ ཚིལ་དང༌། ཤ་དང༌། ཁྲག་དང༌། པགས་པ་དང༌། རྐང་ལག་དང༌། རྣ་བ་དང༌། མིག་དང༌། སྣ་དང༌། སོ་དང༌། མཆུ་དང༌། མགོ་ཡོངས་སུ་གཏང་བ་ནས་ཕྱི་ནང་གི་དངོས་ པོ་ཐམས་ཅད་རྣམ་པ་ཐམས་ཅད་དུ་ཡོངས་སུ་གཏང་བར་ཡང་འོ་དོད་ཀྱིས་བསྒོའོ། །དེས་ཡོ་བྱད་དེ་ལྟ་བུ་ཡོངས་སུ་གཏང་བའི་རྣམ་པ་མང་པོ་བཤམས་ཏེ་བསགས་ནས་རྒྱལ་ པོའི་གནས་རིན་པོ་ཆེའི་ས་ལས་རྣམ་པར་བརྒྱན་པའི་སྤྲིན་གྱི་སྒྲོན་མ་དེའི་ཤར་ཕྱོགས་ལོགས་ན་གྲོང་ཁྱེར་རིན་ཆེན་རྩེ་མོའི་གཟི་བརྗིད་ཅེས་བྱ་བའི་མདུན་རོལ་ནས་གཞི་ མཉམ་པའི་ཕྱོགས་ཡངས་པ་མཆུ་ཞེང་དུ་རྒྱ་ཆེ་ཞིང་མཉམ་པ། མཐོན་དམན་མེད་པ། རྣམ་པར་དག་ཅིང་གཞི་མཉམ་པ། ངམ་གྲོག་དང༌། གཡང་ས་དང༌། སྡོང་དུམ་ དང༑ ཚེར་མ་དང༌། གསེག་མ་དང༌། གྱོ་མོ་ཐམས་ཅད་མེད་པ། རིན་པོ་ཆེ་ཐམས་ཅད་ཀྱི་ཁམས་ལས་གྲུབ་པ། གཞི་རིན་པོ་ཆེ་ཐམས་ཅད་ལས་བྱས་ཤིང་རིན་པོ་ཆེའི་རྒྱལ་པོ་ཐམས་ཅད་བཀྲམ་ པ༑ ནོར་བུ་རིན་པོ་ཆེའི་རྒྱན་རྣམ་པ་དུ་མས་བརྒྱན་པ། རིན་པོ་ཆེའི་མེ་ཏོག་སྣ་ཚོགས་ཀྱིས་གང་བ། ཕྱེ་མ་སྣ་ཚོགས་དྲི་ཤིན་ཏུ་ཞིམ་པའི་རྡུལ་ལྡང་བ། བདུག་སྤོས་སྣ་ཚོགས་ཀྱིས་ བདུགས་པ། རིན་པོ་ཆེའི་སྒྲོན་མ་དཔལ་གྱི་གཟི་བརྗིད་ཅན་རབ་ཏུ་འབར་བ། སྤོས་དང་བདུག་སྤོས་ཐམས་ཅད་ཀྱི་ན་བུན་དང༌། སྤྲིན་གྱིས་ནམ་མཁའ་ཀུན་ཏུ་ཁེབས་པའི་རྒྱན་དང་ ལྡན་པ༑ རིན་པོ་ཆེ་སྣ་ཚོགས་ཀྱི་ཤིང་གི་ཕྲེང་བ་ལེགས་པར་བཀྱེ་བས་མཛེས་པར་བརྒྱན་པ། ཁང་པ་དང༌། གཞལ་མེད་ཁང་དང༌། ཁང་པ་བརྩེགས་པ་སྣ་ཚོགས་ཀྱིས་ཡོངས་སུ་ བརྒྱན་པ། གདུགས་དང༌། རྒྱལ་མཚན་དང༌། བ་དན་བསྒྲེང་བ། རིན་པོ་ཆེའི་སྣམ་བུ་ལྡིང་བ། རྣམ་པར་སྣང་བ། རིན་པོ་ཆེ་སྣ་ཚོགས་ཀྱི་མེ་ཏོག་གི་དྲ་བས་ཀུན་ནས་ཁེབས་པ། རིན་ པོ་ཆེ་སྤོས་ཐམས་ཅད་ཀྱི་རྒྱལ་པོའི་དྲ་བའི་གདུགས་ཀྱི་དཀྱིལ་འཁོར་ཅན། གསེར་གྱི་དྲ་བ་ལས་རིན་པོ་ཆེའི་དྲིལ་བུ་འཁྲོལ་བ་དང་ལྡན་པ། བླ་རེ་རིན་པོ་ཆེ་སྣ་ཚོགས་ཀྱིས་རྣམ་ པར་མཛེས་པར་བྱས་པས་ཁེབས་པར་བྲེས་པ། སྤོས་ཀྱི་རྒྱལ་པོ་སྣ་ཚོགས་ཀྱི་ཕྱེ་མ་རྣམ་པར་བཀྲམ་པ། རིན་པོ་ཆེ་སྣ་ཚོགས་ཀྱི་མེ་ཏོག་སིལ་མས་དགའ་དགའ་ལྟར་གང་བ། ༄༅། །རོལ་མོ་བརྡུང་བ་དང་དཀྲོལ་བ་བྱེ་བ་ཁྲག་ཁྲིག་བརྒྱ་སྟོང་གི་སྒྲ་སྐད་ཡིད་དུ་འོང་བ་འབྱུང་བ། རིན་པོ་ཆེ་ཐམས་ཅད་ཀྱི་རྒྱན་སྣ་ཚོགས་རྣམ་པར་དག་པས་ རྣམ་པར་བརྒྱན་པ། བྱང་ཆུབ་སེམས་དཔའི་ལས་རྣམ་པར་སྨིན་པས་མངོན་པར་གྲུབ་པ་ཞིག་ཡོད་པ་དེའི་དབུས་སུ་སེངྒེའི་ཁྲི་ཆེན་པོ་རིན་པོ་ཆེ་སྣ་བཅུ་ལས་གྲུབ་པའི་སའི་གཞི་སྣ་ ཚོགས་ལ་གནས་པས་རིན་པོ་ཆེའི་ཁྲི་འཕང་སྣ་ཚོགས་བཅུའི་འཁོར་གྱིས་རྣམ་པར་མཛེས་པར་བྱས་པ། རིན་པོ་ཆེའི་ཤིང་ཡལ་ག་ཅན་བཅུས་སྟེགས་བུའི་མཚམས་རྣམ་ པར་ཀླུབས་པའི་རྒྱན་མཛེས་པ་དང་ལྡན་པ། རྡོ་རྗེའི་འཁོར་ལོའི་སའི་གཞི་མི་ཤིགས་པ་ལ་རྐང་པ་རབ་ཏུ་བརྟེན་པ། རིན་པོ་ཆེ་ཐམས་ཅད་ཀྱི་གཟུགས་དང་མདོག་ཡོངས་སུ་ འཛིན་པའི་སྟན་གྱི་འཁོར་ལོ་ཅན། རིན་པོ་ཆེ་དུ་མ་ལས་བྱས་པའི་བོག་རེའི་རྒྱན་བརྒྱ་ཕྲག་དུ་མས་བརྒྱན་པ། རིན་པོ་ཆེ་སྣ་ཚོགས་ཀྱི་ཚོམ་བུ་རྣམ་པ་ཐ་དད་པའི་རྒྱན་གྱིས་ཤིན་ ཏུ་བརྒྱན་པ། རིན་པོ་ཆེའི་རྒྱལ་མཚན་ཀུན་ནས་རྣམ་པར་ཕྱེ་སྟེ་འཕེལ་བ་བསྒྲེང་བ། རིན་པོ་ཆེ་སྣ་ཚོགས་ཀྱི་བ་དན་དབྱངས་པ། རྣམ་པ་ཐ་དད་པའི་རྒྱན་དང་ལྡན་པ། རིན་པོ་ཆེའི་ དྲིལ་བུའི་དྲ་བས་བརྒྱན་པའི་ལྷ་རྫས་ཀྱི་རིན་པོ་ཆེ་སྣ་ཚོགས་དང༌། གསེར་གྱི་དྲ་བ་སྣ་ཚོགས་རྣམ་པར་བྲེས་པ། རིན་པོ་ཆེ་སྣ་ཚོགས་ཀྱི་མེ་ཏོག་གི་དྲ་བ་དང༌། རིན་པོ་ཆེའི་རྒྱལ་ པོ་ཆེན་པོའི་དྲ་བ་དང༌། གོས་རིན་པོ་ཆེ་སྣ་ཚོགས་དང༌། རིན་པོ་ཆེའི་དྲ་བ་ཅི་རིགས་སུ་ཀུན་ནས་བཀབ་ཅིང་མཛེས་པར་བྱས་པའི་རྒྱན་དང་ལྡན་པ། སྤོས་རིན་པོ་ཆེ་རྣམ་པ་ཐ་དད་པའི་ ཚོགས་ལས་སྙིམ་པས་བཅུས་ཤིང་སྤྲིན་མངོན་པར་གཏོར་བ། རིན་པོ་ཆེའི་རྒྱལ་པོ་ཁ་དོག་དང་དྲི་བསམ་གྱིས་མི་ཁྱབ་པ་ལས་བྱུང་བའི་དབྱིབས་ཡིད་དུ་འོང་བ་སྣ་ཚོགས་དང༌། སྤོས་ ཐམས་ཅད་ཀྱི་ན་བུན་དང་སྤྲིན་འབྱུང་བ། གམ་ཡོ་ནས་ལྷ་རྫས་ཀྱི་སྤོས་དང་བདུག་སྤོས་སྣ་ཚོགས་ཀྱིས་རབ་ཏུ་བདུགས་པ། ལྷ་རྫས་ལས་ཀྱང་འདས་པའི་སྟན་རེག་ན་བདེ་བ་ཁ་དོག་ བཟང་པོ་དུ་མ་ཅན་ལེགས་པར་བཏིང་བ། ལྷ་རྫས་ཀྱི་རོལ་མོ་དང་གླུ་སྙན་པ་ཡིད་དུ་འོང་པ་བརྒྱ་སྟོང་དུ་མའི་སྒྲ་ཀུན་ནས་འབྱུང་བ། རིན་པོ་ཆེ་སྣ་ཚོགས་ཀྱི་ཐེམ་སྐས་ཀྱི་ཕྲེང་བ་གདན་ གྱིས་རྣམ་པར་ཀླུབས་པས་རབ་ཏུ་བརྒྱན་པའི་རྒྱན་དང་ལྡན་པ། རིན་པོ་ཆེའི་འབྲུའི་གཟུགས་རིན་པོ་ཆེ་སྣ་ཚོགས་ཀྱིས་སྤྲས་པ། རྣམ་པར་འཕྲུལ་པ་སྣ་ཚོགས་ཀྱིས་རྣམ་པར་སྣང་ བར་བྱེད་པའི་འོད་དང་ལྡན་པ་མངོན་པར་གྲུབ་སྟེ། དེ་ལ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་གཟུགས་བཟང་པ། ཤིན་ཏུ་མཛེས་པ། བལྟ་ན་སྡུག་ པ༑ ཁ་དོག་བཟང་པོ་དམ་པ་རྒྱས་པ་དང་ལྡན་པ། མི་ཆེན་པོའི་མཚན་རྣམ་པར་དག་པ་རབ་ཏུ་ཐོབ་པ། རིན་པོ་ཆེ་རྣམ་པར་སྣང་བའི་ཅོད་པན་ཅན། རྡོ་རྗེ་མཐུ་བོ་ཆེ་ལྟར་མཁྲེགས་ ༄༅། །ཤིང་མི་ཤིགས་པའི་ལུས་དང་ལྡན་པ། རྩིབ་མའི་མཚམས་ཐགས་བཟང་ཞིང་བརྟན་པར་འབྲེལ་བ། ཡན་ལག་དང་ཉིང་ལག་ཐམས་ཅད་ཡོངས་ སུ་བཟང་བ། ཀུན་ནས་བཟང་བ། ཀུན་ནས་མཛེས་པ། ཀུན་ནས་སྡུག་པ། རྣམ་པའི་མཆོག་ཐམས་ཅད་དང་ལྡན་པ། ཆོས་ཀྱི་རྒྱལ་པོ་ཆེན་པོའི་རིགས་སུ་བྱུང་བ། ཡོ་བྱད་ ཐམས་ཅད་ལ་དབང་རབ་ཏུ་ཐོབ་པ། ཆོས་ཀྱི་དབང་ཤིན་ཏུ་རྣམ་པར་དག་པས་རང་གི་སེམས་ལ་དབང་བསྒྱུར་བ། ཚིག་གི་དཀྱིལ་འཁོར་ཁ་མ་བབ་པ། མི་འཁྲུགས་པའི་ ཡེ་ཤེས་དང་ལྡན་པ། ཆོས་ཀྱི་སྦྱོར་བ་མ་ནོར་བ་ཤིན་ཏུ་བརྟན་པར་བྱས་པ། ཡོན་ཏན་དང་ལེགས་པ་མཐའ་ཡས་པར་བརྗོད་དུ་ཡོད་པ་དེ་འདུག་པར་གྱུར་ཏོ། །རྒྱལ་པོ་ཆོས་ ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེ་སེངྒེའི་ཁྲི་ཆེན་པོ་ལ་འདུག་པ་དང་སྟེང་གི་སྤྱི་བོའི་ཐད་ཀའི་བར་སྣང་ལ་གདུགས་ཀྱི་དཀྱིལ་འཁོར་ཆེན་པོ་ རིན་པོ་ཆེ་སྣ་ཚོགས་རྣམ་པར་འབྲེལ་བའི་ཡུ་བ་ཅན། ནོར་བུ་རིན་པོ་ཆེ་དམ་པའི་མཛོད་ཀྱི་སྙིང་པོ་དང་ལྡན་པ། རིན་པོ་ཆེ་སྣ་ཚོགས་ཀྱི་ཤར་བུ་བརྒྱ་སྟོང་ལེགས་པར་བྲེས་པ། རིན་པོ་ཆེ་དུ་མའི་འོད་འཕྲོ་བ་དཔལ་གྱི་གཟི་བརྗིད་རབ་ཏུ་འབར་བས་རྣམ་པར་བརྒྱན་པ། འཛམ་བུ་ཆུ་ཀླུང་གི་གསེར་འོད་འཚེར་ཞིང་གསལ་ལ་རྣམ་པར་དག་པས་བླ་ནས་ བཀབ་པ། རིན་པོ་ཆེ་སྣ་ཚོགས་སྤ་བར་སྤེལ་བས་སྤྲས་པའི་གསེར་གྱི་དྲ་བས་ནང་ཤུན་གྱི་རྒྱན་བྱས་པ། མུ་ཏིག་སྣ་ཚོགས་ཀྱི་སེ་མོ་དོ་མངོན་པར་དཔྱངས་པ། རིན་པོ་ཆེ་སྣ་ཚོགས་ཀྱི་དྲ་ བས་ཀུན་ནས་བཀབ་པ། རིན་པོ་ཆེའི་དྲིལ་བུའི་དྲ་བ་ལས་གསེར་རིན་པོ་ཆེའི་དྲིལ་ཆེན་རིན་པོ་ཆེའི་ཆུན་པོའི་ལྡ་ལྡི་ལ་བརྒྱུས་པ་མངོན་པར་དཔྱངས་པ། ནོར་བུ་རིན་པོ་ཆེ་དམ་པའི་ཕྲེང་ བ་ཀུན་ནས་མངོན་པར་དཔྱངས་པའི་རྒྱན་དང་ལྡན་པ། ལྷ་རྫས་ཀྱི་སྒྲ་ཡིད་དུ་འོང་བའི་གདངས་གྲགས་པར་འབྱུང་བ། སེམས་ཅན་ཐམས་ཅད་དག་པའི་ལས་ཀྱི་ལམ་ལ་སྐུལ་བའི་ དྲིལ་གྱི་སྒྲ་རྣམ་པར་གྲགས་པ་བྱུང་བར་གྱུར་ཏེ། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེ། རིན་པོ་ཆེའི་རྡུལ་ཡབ་ཀྱིས་མངོན་པར་གཡབ་ཅིང་ ལྷའི་དབང་པོ་བརྒྱ་བྱིན་བས་ཀྱང་ལྷག་པར་གཟི་བརྗིད་རབ་ཏུ་འབར་བས་ཤིན་ཏུ་མཛེས་སོ། །དེ་སེངྒེའི་ཁྲི་དེ་ལ་འདུག་མ་ཐག་ཏུ་འགྲོ་བ་མང་པོ་དེ་དག་ཐམས་ཅད་མངོན་དུ་གྱུར་ཏེ་ ཐལ་མོ་སྦྱར་ནས་རྒྱལ་པོ་དེ་ལ་ཕྱག་འཚལ་ལོ། །དེ་ནས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེའི་དྲུང་དུ་སློང་བའི་སྲོག་ཆགས་བྱེ་བ་ཁྲག་ ཁྲིག་བརྒྱ་སྟོང་སྣ་ཚོགས་དངོས་པོ་སྣ་ཚོགས་ཡོངས་སུ་ལེན་པ། ཡོ་བྱད་སྣ་ཚོགས་ལ་མོས་པ། རིགས་སྣ་ཚོགས་དང་ལྡན་པ། འགྲོ་བའི་རྒྱུན་སྣ་ཚོགས་སུ་གཏོགས་པ། འདོད་ ༄༅། །པ་སྣ་ཚོགས་ཀྱི་སེམས་དང་ལྡན་པ། སྨོན་པ་དང་བསམ་པ་སྣ་ཚོགས་ཅན། ཕྱོགས་སྣ་ཚོགས་ནས་འདུས་པ། ཡུལ་གྱི་སྤྱོད་པ་སྣ་ཚོགས་ལ་གནས་ པ༑ ལོངས་སྤྱོད་སྣ་ཚོགས་ལ་མངོན་པར་སྨོན་པའི་སེམས་དང་ལྡན་པ། བསམ་པ་དང་ཡོངས་སུ་རྟོག་པ་སྣ་ཚོགས་ཅན། མིའི་རིས་སྣ་ཚོགས་སུ་གཏོགས་པ། རིགས་ ཀྱི་སྐྱེ་གནས་སྣ་ཚོགས་སུ་སྐྱེས་པ། ཡུལ་སྣ་ཚོགས་ནས་འོངས་པ། སྒྲ་སྐད་དང་ཚིག་གི་འདུ་བྱེད་སྣ་ཚོགས་དང་ལྡན་པ། དབྱིངས་ཀྱི་དཀྱིལ་འཁོར་སྣ་ཚོགས་འབྱིན་པ། དངོས་པོ་སྣ་ཚོགས་ཀྱི་དོན་དུ་གསོལ་བ་འདེབས་པ། ཚིག་དང་ངག་སྣ་ཚོགས་བརྗོད་པ། བསོད་ནམས་ཀྱི་རི་རབ་ཆེན་པོ་དེ་འབའ་ཞིག་གི་གདོང་དུ་ལྟ་བ། འདི་འབའ་ཞིག་ ཤེས་པའི་སྐྱེས་བུ་ཆེན་པོ་ཡིན་ཞེས་ངེས་པར་སེམས་བ། བསོད་ནམས་ཆེན་པོས་བརྟན་པའོ། །སྐྱེས་བུ་ཆེན་པོའི་ཟླ་བའོ། །གཏོང་བ་ཆེན་པོའི་བསམ་པ་དང་ལྡན་པའོ། །ཞེས་ བྱ་བར་འདུན་པའི་སེམས་ཀྱིས་རྟོག་པ། བྱང་ཆུབ་སེམས་དཔའི་སྨོན་ལམ་གྱི་སེམས་ཀྱིས་འདུག་པ། བྱང་ཆུབ་སེམས་དཔའི་སྨོན་ལམ་གྱི་སེམས་ཀྱིས་སྤྲུལ་པའི་སློང་མོ་ པའི་ཚོགས་ཆེན་པོ་དེ་མཐོང་ནས་སློང་མོ་བ་དེ་དག་ལ་སེམས་དགའ་བ་དང༌། སེམས་མོས་པ་དང༌། སེམས་སྤྲོ་བ་དང༌། དགེ་བའི་བཤེས་གཉེན་མཐོང་བའི་འདུ་ཤེས་སུ་ གྱུར་ཏོ༑ ༑སྙིང་རྗེ་ཆེན་པོའི་ཤུགས་དྲག་པོ་ཤིན་ཏུ་ཡངས་པ་ཡང་བྱུང་བར་གྱུར་ཏོ། །ཕྱི་མའི་མཐའི་བསྐལ་པར་སློང་མོ་བ་ཐམས་ཅད་ཡོངས་སུ་ཚིམ་པར་བྱ་བ་ལས་ཕྱིར་མི་ལྡོག་ པའི་བརྩོན་འགྲུས་ཀྱི་ཤུགས་དྲག་པོ་ཡང་སྐྱེས་པར་གྱུར་ཏོ། །འགྲོ་བ་ཐམས་ཅད་དུ་སྙོམས་པའི་སྦྱོར་བས་ཡོངས་སུ་གཏང་བའི་སེམས་ཀྱིས་རྒྱས་པར་དགང་བའི་སྤྲིན་ཀྱང་ མངོན་པར་བྱུང་བར་གྱུར་ཏེ། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེས་སློང་མོ་བ་དེ་དག་མཐོང་བའི་མོད་ལ་དེའི་རྒྱུས་ཆེས་དགའ་བར་ གྱུར་གྱི༑ བསྐལ་པས་མཚམས་མེད་པའི་མཐས་ཀླས་པར་སྟོང་གསུམ་གྱི་འཁོར་ལོས་བསྒྱུར་བའི་རྒྱལ་པོ་ཐོབ་པས་ནི། མ་ཡིན་ནོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་ མང་པོའི་མཐས་ཀླས་པར་བརྒྱ་བྱིན་གྱི་དབང་ལ་གནས་པས་ནི། མ་ཡིན་ནོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་མཐས་ཀླས་པར་རབ་མཚེ་མའི་ལྷའི་རྒྱལ་པོའི་དབང་ ལ་གནས་བ་ཐོབ་པས་ནི། མ་ཡིན་ནོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་མཐས་ཀླས་པར་རབ་དགའ་ལྡན་གྱི་ལྷའི་རྒྱལ་པོའི་དབང་ལ་གནས་པས་ནི། མ་ཡིན་ནོ།། བསྐལ་པ་ཚད་མེད་པའི་མཐས་ཀླས་པར་རབ་འཕྲུལ་དགའི་ལྷའི་རྒྱལ་པོའི་དབང་ཕྱུག་གི་དབང་ལ་གནས་པ་ཐོབ་པས་ནི། མ་ཡིན་ནོ། །བསྐལ་པ་བསམ་གྱིས་མི་ཁྱབ་པའི་ ༄༅། །མཐས་ཀླས་པར་དབང་སྒྱུར་གྱི་ལྷའི་རྒྱལ་པོའི་དབང་རབ་ཏུ་ཐོབ་སྟེ་ལྷའི་བུ་མོ་བཞིན་བཟང་མོ་ཡིད་དུ་འོང་བས་བསྙེན་བཀུར་བས་ནི། མ་ཡིན་ནོ། །བསྐལ་ པ་བརྗོད་དུ་མེད་པའི་མཐས་ཀླས་པར་ཚངས་པའི་གནས་ཀྱི་བདེ་བས་ཚངས་པའི་ཐབས་ལ་གནས་པ་ཐོབ་པས་ནི། མ་ཡིན་ནོ། །བསྐལ་པ་མཐའ་ཡས་པའི་མཐས་ཀླས་པར་ གྱ་ནོམ་སྣང་བའི་ལྷའི་བདེ་བ་ཐོབ་པས་ནི། མ་ཡིན་ནོ། །བསྐལ་པ་དཔག་ཏུ་མེད་ཅིང་མི་ཟད་པར་དགེ་རྒྱས་ཀྱི་ལྷའི་བདེ་བ་ཐོབ་པས་ནི། མ་ཡིན་ནོ། །བསྐལ་པ་མུ་མེད་པའི་ མཐས་ཀླས་པར་གནས་གཙང་མའི་ལྷའི་རྣམ་པར་ཐར་པ་ཞི་བའི་བདེ་བ་ལ་རྣམ་པར་སྤྱོད་པ་ཐོབ་པས་ནི། མ་ཡིན་ནོ། །རིགས་ཀྱི་བུ། འདི་ལྟ་སྟེ། དཔེར་ན། སྐྱེས་བུ་སྲེད་ པ་ལ་སྤྱོད་པ་ཕ་མ་དང༌། ཕུ་ནུ་དང༌། བུ་སྲིང་དང༌། མཛའ་བོ་དང༌། བློན་པོ་དང༌། གཉེན་བཤེས་དང༌། བུ་དང༌། བུ་མོ་དང༌། ཆུང་མ་དང༌། ཡུན་རིང་མོ་ཞིག་ཏུ་བྲལ་ལ། འབྲོག་ དགོན་པར་འཁྱམས་ཏེ། དེ་དག་མཐོང་བར་འདོད་འདོད་པ་ལས་དེ་དག་དང་ཕྲད་ན། དེ་དག་མཐོང་བས་མི་ངོམས་ཤིང་དགའ་བ་དང༌། ཆགས་པ་ཆེན་པོ་སྐྱེ་བར་འགྱུར་རོ། ། རིགས་ཀྱི་བུ། དེ་བཞིན་དུ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་སློང་མོ་བ་དེ་དག་མཐོང་པར་གྱུར་པའི་མོད་ལ་དགའ་བའི་ཤུགས་ ཆེན་པོ་སྐྱེས་སོ། །སེམས་ཀྱི་དགའ་བའི་རོ་བ་དེ་བ་དང་ལྡན་པར་གྱུར་ཏོ། །སེམས་སྤྲོ་བའི་ཤུགས་རབ་ཏུ་བྱུང་ངོ༌། །རབ་ཏུ་དགའ་བ་ཆེན་པོའི་ཤུགས་ཡོངས་སུ་སྐྱེས་སོ། །སངས་རྒྱས་ཀྱི་ བྱང་ཆུབ་ཏུ་དད་པ་དང་མོས་པའི་ཤུགས་ཀྱི་སྟོབས་རྒྱ་ཆེན་པོ་འཕེལ་ཏོ། །ཐམས་ཅད་མཁྱེན་པ་ཉིད་དུ་རྩ་བ་བརྟན་པའི་དད་པ་རྣམ་པར་འཕེལ་ཏོ། །སངས་རྒྱས་ཐམས་ཅད་ཀྱི་ཆོས་ལ་ ལྷག་པའི་བསམ་པ་རྣམ་པར་དག་པའི་སྟོབས་མངོན་པར་འཕེལ་ཏོ། །བྱང་ཆུབ་སེམས་དཔའི་དབང་པོ་ལས་སུ་རུང་བ་ཡོངས་སུ་བྱུང་ངོ༌། སེམས་དགའ་བས་རྒྱས་པས་མོས་པའི་ཤུགས་ ཆེན་པོ་སྐྱེས་པར་གྱུར་ཏོ། །སེམས་སྤྲོ་བའི་ཤུགས་ཡངས་པས་དགེ་བའི་བཤེས་གཉེན་ལ་དབང་པོ་དང་བསམ་པ་ཤིན་ཏུ་གུས་པར་གྱུར་ཏོ། །དེ་ཅིའི་ཕྱིར་ཞེ་ན། རྒྱལ་པོ་ཆོས་ཐམས་ ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ཐམས་ཅད་མཁྱེན་པ་ཉིད་དུ་དམིགས་པ་ལ་བརྩོན་པ། ཐམས་ཅད་མཁྱེན་པ་ཉིད་ལ་རབ་ཏུ་གཞོལ་བ། ཐམས་ཅད་མཁྱེན་པ་ ཉིད་ཀྱི་ལམ་དང་སྒོ་ལ་མངོན་དུ་བལྟས་པ། འགྲོ་བ་ཐམས་ཅད་ཤིན་ཏུ་ཚིམ་པར་བྱ་བའི་ཡིད་ལ་བྱ་བ་ལ་བརྩོན་པ། སངས་རྒྱས་ཐམས་ཅད་ཀྱི་ཡོན་ཏན་རྒྱ་མཚོ་ལ་འཇུག་པའི་ནན་ཏན་ ལ་འདུན་པ། བདུད་དང་ལས་དང་ཉོན་མོངས་པའི་སྒྲིབ་པ་ཐམས་ཅད་ཀྱི་རི་རྣམ་པར་འཐོར་བ་ལ་བརྩོན་པ། དེ་བཞིན་གཤེགས་པ་ཐམས་ཅད་ཀྱི་གདམས་ངག་མཐུན་པར་བླང་བ་ལ་ ༄༅། །སྟ་གོན་དུ་གནས་པ། དགེ་བའི་རྩ་བ་རྒྱ་མཚོ་སྒྲ་ཀུན་ནས་ཡོངས་སུ་བསྡུ་བ་ལ་བརྩོན་པའི་སྙིང་པོ་ཅན། མངོན་པར་ཞེན་པ་ཐམས་ཅད་ལས་གྱེན་དུ་ འཕགས་པའི་རྒྱུད་དང་ལྡན་པ། འཇིག་རྟེན་གྱི་ཡུལ་ཐམས་ཅད་ལ་མངོན་པར་ཞེན་པ་མེད་པ། ཆོས་ཀྱི་རང་བཞིན་ནམ་མཁའི་སྤྱོད་ཡུལ་ཅན་དེས་སློང་མོ་པ་དེ་དག་ལ་བུ་གཅིག་ པའི་འདུ་ཤེས་བསྐྱེད་པའི་ཕྱིར་རོ། །ཕ་དང་མའི་འདུ་ཤེས་དང༌། སྦྱིན་པའི་གནས་ཀྱི་འདུ་ཤེས་དང༌། དགེ་བའི་བཤེས་གཉེན་གྱི་འདུ་ཤེས་དང༌། དཀོན་པའི་འདུ་ཤེས་དང༌། དཀའ་བ་བྱེད་པའི་འདུ་ཤེས་དང༌། མང་པོ་བྱས་པའི་འདུ་ཤེས་དང༌། ཕན་འདོགས་པ་དམ་པའི་འདུ་ཤེས་དང༌། བྱང་ཆུབ་ཀྱི་ལམ་ཉེ་བར་སྟོན་པའི་འདུ་ཤེས་དང༌། མཁན་ པོའི་འདུ་ཤེས་དང༌། སྟོན་པའི་འདུ་ཤེས་བསྐྱེད་པའི་ཕྱིར་ཏེ། དེ་ལྟར་དེས་སློང་མོ་ཕ་དེ་དག་དོན་ཅི་ལ་འོངས་པ་དང༌། དོན་ཅི་ལ་ཕྱིན་པ་དང༌། དུས་ཅི་ཙམ་ན་འདུས་པ་ དང༌། ཡུལ་གང་དང་གང་ན་གནས་པ་དང༌། དངོས་པོ་ཅི་དང་ཅི་སློང་བ་དང༌། རྣམ་པ་གང་འདོད་པ་དང༌། བསམ་པ་ཅི་འདྲ་བ་དང༌། ཅི་དང་ཅི་ལ་སྨོན་པ་དང༌། ཅི་དང་ཅི་འདོད་ པ་དང༌། དངོས་པོ་གང་དང་གང་ཚོལ་བ་དེ་དག་ཐམས་ཅད་ཚུལ་བཞིན་དུ་མི་དགའ་བ་མེད་པའི་བྱམས་པ་ཆེན་པོའི་དཀྱིལ་འཁོར་དང༌། སློང་མོ་པའི་འགྲོ་བ་ལས་ཕྱིན་ ཕྱོགས་སུ་མ་བལྟས་པའི་གཏོང་བ་ཆེན་པོའི་འོད་ཟེར་དང༌། སེམས་ཅན་ཐམས་ཅད་ལ་སྙོམས་པར་སྦྱོར་བའི་གཏོང་བའི་སྒོས་ཡོངས་སུ་ཚིམ་པར་བྱས་སོ། །དེས་ཟས་འདོད་པ་ ལ་ནི༑ ཟས་བྱིན་ནོ། །སྐོམ་འདོད་པ་ལ་ནི། སྐོམ་བྱིན་ནོ། །གོས་འདོད་པ་ལ་ནི། གོས་བྱིན་ནོ། །མེ་ཏོག་འདོད་པ་ལ་ནི། མེ་ཏོག་བྱིན་ནོ། །དེ་བཞིན་དུ་སྤོས་དང༌། བདུག་སྤོས་ དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། གོས་དང༌། གདུགས་དང༌། རྒྱལ་མཚན་དང༌། བ་དན་དང༌། རིན་པོ་ཆེ་དང༌། རྒྱན་དང༌། སྟན་དང༌། མལ་དང༌། ཁྱིམ་དང༌། གཞལ་ མེད་ཁང་དང༌། གཙུག་ལག་ཁང་དང༌། བཟའ་ཤིང་གི་ར་བ་དང༌། ཀུན་དགའི་ར་བ་དང༌། དཀའ་ཐུབ་ཀྱི་ནགས་ཚལ་དང༌། རྟ་དང༌། གླང་པོ་དང༌། ཤིང་རྟ་དང༌། རྐང་ཐང་དང༌། དགལ་བ་དང༌། ཁྱོགས་དང༌། བཞོན་པ་དང༌། གསེར་དང༌། དབྱིག་དང༌། ནོར་བུ་དང༌། མུ་ཏིག་དང༌། དུང་དང༌། མན་ཤེལ་དང༌། བྱི་རུ་དང༌། ས་ལེ་སྦྲམ་དང༌། དངུལ་དག་ཀྱང་ བྱིན་པར་གྱུར་ཏོ། །རང་གི་ཁྱིམ་དང༌། གཞལ་མེད་ཁང་དང༌། བཙུན་མོའི་འཁོར་དང༌། གཡོག་འཁོར་དང༌། རྒྱལ་པོའི་མཛོད་ཐམས་ཅད་ཀྱང་ཕྱེ་སྟེ་བགོས་ནས་རབ་ཏུ་ བཏང་བར་གྱུར་ཏོ། །སུ་ཅི་འདོད་པ་དེ་དག་དེ་ཁྱེར་ཅིག་ཅེས་ནས་ཡུལ་འདོད་པ་དག་ཀྱང་ཡུལ་བྱིན་ནོ། །གྲོང་འདོད་པ་དག་ཀྱང་གྲོང་བྱིན་ནོ། །གྲོང་ཁྱེར་འདོད་པ་དག་ཀྱང་གྲོན་ ༄༅། །ཁྱེར་བྱིན་ཏོ། །སེམས་ཅན་ཐམས་ཅད་ལ་སྙོམས་པར་ཞུགས་པ་དེས་སློང་མོ་པ་དེ་དག་ཐམས་ཅད་ལ་ཅི་བདོག་པ་ཡོངས་སུ་བཏང་སྟེ། དངོས་པོ་ ཐམས་ཅད་ཡོངས་སུ་བཏང་བས་མངོན་པར་བསྟོད་དོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། སྡོང་པོས་བརྒྱན་པའི་ལེའུ་སྟེ། བམ་ པོ་བརྒྱ་བཞི་པ། དེའི་ཚེ་ཚོང་དཔོན་གྱི་བུ་མོ་རིན་ཅེན་འོད་ཅེས་བྱ་བ་བུ་མོ་དྲུག་ཅུའི་འཁོར་དང་ལྡན་པ། གཟུགས་བཟང་ཞིང་མཛེས་ལ་བལྟ་ན་སྡུག་པ། ཁ་དོག་བཟང་པོའི་ དམ་པ་རྒྱས་པ་དང་ལྡན་པ། མདོག་གསེར་གྱི་ཁ་དོག་ལྟ་བུ་དང་ལྡན་པ། སྐྲ་མཐོན་མཐིང་དུ་འདུག་པ། མིག་དཀར་ནག་འབྱེས་པ། དྲི་ཞིམ་པོ་ཡིད་དུ་འོང་བ་དང་ལྡན་ པ༑ ཚངས་པའི་དབྱངས་དང་ལྡན་པ། གོས་བཟང་བ། རྒྱན་གྱིས་ལེགས་པར་བརྒྱན་པ། དྲན་པ་དང༌། བློ་གྲོས་དང༌། རིག་པ་དང༌། ཁྲེལ་ཡོད་པ་དང༌། དགའ་བ་དང༌། ངོ་ཚ་ཤེས་པ་དང༌། སྤྱོད་པ་དང༌། ཆ་ལུགས་ཕུན་སུམ་ཚོགས་པ། བླ་མ་ལ་སྲི་ཞུ་དང་ལྡན་པ། ཤེས་བཞིན་གྱི་དམ་པས་སྤྱོད་པ། བྱེད་རྒུ་ཟབ་པ། ཆོས་བླང་བ་དང༌། གཟུང་བ་དང༌། ཁོང་དུ་ཆུད་པར་བྱ་བ་ལ་ཡིད་གཞུངས་པ་དང་ལྡན་པ། སྔོན་དགེ་བའི་རྩ་བ་ལེགས་པར་བྱས་པ། ཆོས་ཀྱིས་མངོན་པར་བརླན་པའི་སེམས་ཀྱི་རྒྱུད་རབ་ཏུ་ དང་བ༑ དགེ་བའི་བསམ་པ་རྣམ་པར་དག་པ། མོས་པ་ཡངས་པ། ནམ་མཁའི་སྤྱོད་ཡུལ་ཅན། གཞན་ལ་ཕན་པར་དགའ་བའི་སེམས་དང་ལྡན་པ། སངས་རྒྱས་བལྟ་བའི་ ཕྱོགས་ལ་རྣམ་པར་བལྟས་པ། ཐམས་ཅད་མཁྱེན་པའི་ཡེ་ཤེས་ལ་མངོན་པར་འདུན་པ་ཞིག་མཆོད་སྦྱིན་གྱི་རབ་ཆེན་པོ་དེར་འོངས་ཏེ་ཚོང་དཔོན་གྱི་བུ་མོ་རིན་ཅེན་འོད་ཅེས་ བྱ་བ་དེ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པའི་སེངྒེའི་ཁྲི་ཆེན་པོའི་གཡས་རོལ་ཧ་ཅང་མི་རིང་བ་ཞིག་ན་འདུག་འདུག་སྟེ། རྒྱལ་པོ་དེ་ལ་ ཕྱག་འཚལ་ནས་ཕར་ཅི་ལའང་ལེན་པ་མེད་དོ། །དེ་ཕྱོགས་གཅིག་ན་འདུག་ཅིང་སེམས་འདི་ལྟར་བསྐྱེད་པར་གྱུར་ཏེ། བདག་གིས་དགེ་བའི་བཤེས་གཉེན་འདི་ལྟ་བུ་མཐོང་ ཞིང་འགྲོགས་སུ་ཡོད་པ་ནི། བདག་གིས་ཐོབ་པར་བྱ་བ་ལེགས་པར་ཐོབ་བོ། །སྙམ་སྟེ། དེས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེ་ལ་ དགེ་བའི་བཤེས་གཉེན་གྱི་འདུ་ཤེས་དང༌། སྟོན་པའི་འདུ་ཤེས་དང༌། སྙིང་བརྩེ་བར་བྱེད་པའི་འདུ་ཤེས་དང༌། ཕན་འདོགས་པའི་འདུ་ཤེས་དང༌། སངས་རྒྱས་ཀྱི་འདུ་ཤེས་ བསྐྱེད་དེ་གཡོ་སྒྱུ་མེད་པའི་སེམས་ཀྱིས་དགའ་བ་དང༌། མོས་པ་དང༌། སྤྲོ་བའི་ཤུགས་རབ་ཏུ་ཡངས་པ་ཐོབ་པས་རང་གི་རྒྱན་རྣམས་ལུས་ལས་བཀྲོལ་ཏེ། རྒྱལ་པོ་ཆོས་ཐམས་ ༄༅། །ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་གང་ན་བ་དེར་མངོན་པར་བལྟས་ཏེ་གཏོར་བ་དང༌། དེ་དག་དེའི་སེངྒེའི་ཁྲིའི་འོག །ཁྲིའི་ འཕང་གི་སའི་སྟེང་དུ་བཀྲམ་པར་འགྱུར་ཏོ། །དེ་རྒྱན་དེ་དག་དེ་ལྟར་གཏོར་ནས་སྨོན་ལམ་བཏབ་པ། ཇི་ལྟར་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་ རབ་ཏུ་སྒྲོག་པ་འདི་སེམས་ཅན་མགོན་མེད་ཅིང་མུན་པའི་ནང་ན་འཐོམ་པ་རྣམས་ཀྱི་མགོན་སྐྱབས་སུ་གྱུར་པ་དེ་ལྟར་བདག་ཀྱང་མ་འོངས་པའི་དུས་ན་འགྱུར་བར་ཤོག་ ཅིག །འདི་ཆོས་གང་ཤེས་པ་དེ་དག་ཀྱང་བདག་གིས་ཀྱང་ཤེས་པར་ཤོག་ཅིག །འདི་ཐེག་པ་གང་གིས་འབྱུང་བ་དེས་བདག་ཀྱང་འབྱུང་བར་ཤོག་ཅིག །འདི་ལམ་གང་ན་ ཞུགས་པ་དེ་ནས་བདག་ཀྱང་འཇུག་པར་ཤོག་ཅིག །ཇི་ལྟར་འདི་གཟུགས་བལྟ་ན་བཏང་མི་བྲལ་ཟད་མི་ཤེས་པའི་ལོངས་སྤྱོད་དང་ལྡན་ཏེ། གཡོག་འཁོར་མཐའ་ཡས་ལ་ གཞན་གྱིས་མི་ཐུབ་ཅིང་ཐུབ་པར་དཀའ་སྟེ་ཐུབ་པ་མེད་པ་དེ་བཞིན་བདག་ཀྱང་ཤོག་ཅིག །འདི་གང་དང་གང་དུ་སྐྱེ་བར་འགྱུར་བ་དེ་དང་དེར་བདག་ཀྱང་སྐྱེ་བར་འགྱུར་བར་ ཤོག་ཅིག །སྙམ་པ་དང༌། དེ་དེ་ལྟར་སེམས་ཤིང་ཡིད་ལ་བྱེད་པ་ལ་བརྩོན་པ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་ཤེས་ནས་དེ་ལ་ བལྟས་ཏེ་འདི་སྐད་ཅེས་སྨྲས་སོ། །བུ་མོ། ཁྱོད་ལ་ཅི་དགོས་པ་ཁྱེར་ཅིག །བུ་མོ། ང་ནི། བདོག་པ་ཐམས་ཅད་ཡོངས་སུ་གཏོང་བ་སྟེ། སེམས་ཅན་ཐམས་ཅད་ཡོངས་སུ་ཚིམ་པར་བྱ་ བ་ལ་ཞུགས་པའོ། །དེ་སྐད་ཅེས་བྱས་པ་དང༌། དེའི་ཡིད་ལའང་བདག་ནི། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་ཐུགས་སུ་ཆུད་པར་གྱུར་ཏོ༑ ༑སྙམ་ནས་དེ་བས་ཀྱང་མོས་པར་གྱུར་ཏོ། །དེ་དེ་ལྟར་ཡོད་པའི་སེམས་སུ་གྱུར་ཏེ་དགེ་བའི་རྩ་བ་ཡངས་ཤིང་རྒྱ་ཆེ་བའི་ཤུགས་ཡོངས་སུ་སྐྱེས་ནས་རྒྱལ་པོ་ཆོས་ཐམས་ཅད་ ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ལ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྔོན་ཆད་ས་ལས་རྣམ་བརྒྱན་སྤྲིན་འདི་ནི། །རྒྱལ་པོ་སེངྒེ་ཁྱོད་འཁྲུངས་ མ་གྱུར་ཚེ། །མདངས་དགར་མ་གྱུར་གཟི་བརྗིད་མ་མཆིས་ཏེ། །ཡི་དྭགས་འཇིགས་པའི་གནས་དང་ཅི་མི་འདྲ། །མི་རྣམས་ཀུན་ཀྱང་སྲོག་གཅོད་མོས་པར་གྱུར། །མ་བྱིན་ ལེན་ལ་ཚུལ་དང་སྦྱོར་མ་མཆིས། །བརྫུན་དུ་སྨྲ་ཞིང་བརླང་བའི་ཚིག་ཀྱང་བརྗོད། །ཕྲ་མ་ཀྱལ་བའི་ཚིག་ཀྱང་རབ་ཏུ་སྨྲ། །གཞན་གྱི་ནོར་ལ་ཆགས་པའི་སེམས་དང་ལྡན། ། གང་ཟག་གཞན་ལ་ཀུན་ཀྱང་ངན་དུ་སེམས། །ལྟ་བའི་རྣམ་གནས་སྡིག་ཏོའི་སྤྱོད་ཡུལ་ཅན། །ལོག་པའི་སྦྱོར་བས་ངན་པའི་འགྲོ་བར་ལྟུང༌། །ཆོས་ངན་ཆོས་ལ་སྤྱོད་པའི་མི་ཡི་ ༄༅། །རྣམས༑ ༑མ་རིག་གཏི་མུག་མུན་པས་བསྒྲིབས་པ་དག །ལྟ་བ་ལོག་ཞུགས་ཕྱིན་ཅི་ལོག་མཐོང་བས། །དགུང་ལོ་མང་པོར་དགུང་ཆར་བབ་མ་གྱུར།། དགུང་ཆར་མ་བབ་ས་བོན་ཆབ་འཚལ་ཏེ། །ལོ་ཏོག་མི་འཁྲུངས་ཞུགས་ཤིང་འཁྲུངས་མ་གྱུར། །མཚོ་དང་ལུ་མ་ཆུ་བྲན་རྒྱུད་ཀྱང་བསྐམས། །ནགས་ཚལ་རྩི་ཤིང་ཀུན་ཀྱང་ དེ་བཞིན་ཏེ། །རྣམ་དག་སྤྱན་ཁྱོད་འཁྲུངས་པར་མ་གྱུར་བས། །ཆབ་ཀླུང་ཀུན་ཀྱང་མ་ལུས་བསྐམས་པར་གྱུར། །བཟའ་ཤིང་ར་བ་ཀུན་ཀྱང་རི་དགོན་འདྲ། །རུས་པ་དཀར་ པོས་དོགས་བལྟམས་པར་གྱུར། །གང་ཚེ་ཁྱོད་ལ་སློང་བ་མང་འདུས་ཏེ། །སློང་བ་ཐམས་ཅད་ཡོངས་སུ་ཚིམ་མཛད་པས། །ཕྱོགས་བཞི་ཀུན་ནས་སྤྲིན་ཆེན་འདུས་པར་ གྱུར༑ ༑ཐང་དང་གཤོང་རྣམས་ཀུན་ཀྱང་ངོམས་པར་བགྱིས། །སླན་ཆད་རྐུན་ཆོམ་གཡོན་ཅན་ཆད་པར་གྱུར། །དགུམ་པ་མ་མཆིས་སུ་ཡང་གཟུང་མ་མཆིས། །མགོན་མེད་ གང་ཡང་འགུམ་པར་མི་འགྱུར་ཏེ། །ཁྱོད་ནི་འགྲོ་བ་མངོན་མེད་ཀུན་གྱི་སྐྱབས། །སྲོག་གཅོད་པ་ལ་མངོན་པར་མོས་པའི་མི། །གཞན་རྣམས་བཀུམ་ཞིང་དེ་ཡི་ཁྲག་འཚལ་ ལ༑ ༑གཅིག་ལ་གཅིག་གི་ཤ་འཚལ་གྱུར་བ་དག །ཁྱོད་ཀྱི་སྦྱིན་པ་ཆེན་པོས་བྱམས་སེམས་གྱུར། །བརྒྱ་སྟོང་གྲངས་སུ་བགྲང་བར་གྱུར་པ་ལས། །དེ་ཚེ་འགའ་ཞིག་རད་པ་ འཚལ་གྱུར་གྱི། །གཞན་ནི་རྩྭ་དང་ལོ་མ་རད་པ་འཚལ། །དེ་ཚེ་ཀུན་ཀྱང་ཡི་དྭགས་བཀྲེས་མནར་བཞིན། །འགྲོ་བ་མགོན་མེད་མགོན་དུ་ཁྱོད་འཁྲུངས་ནས། །ས་བོན་མ་བཏབ་མ་རྨོས་ འབྲས་ཀྱང་བྱུང༌། །དཔག་བསམ་ཤིང་ལས་མཛོད་རྣམས་རྣམ་པར་ཐོན། །སྐྱེས་པ་བུད་མེད་མཁས་པ་གདའ་བར་གྱུར། །ཟླ་བ་ཟླ་ཕྱེད་དོན་དུ་སྔོན་ཆད་ནི། །ལམ་ནོར་གནས་པ་ གསོག་ཅིང་སྲི་ཞུ་ར་བགྱིད། །དེང་སང་རད་པ་རབ་འཚལ་རྒྱན་མང་ལྡན། །དགའ་བའི་གནས་ན་རྩེ་བའི་ལྷ་ཡང་འདྲ། །སྔོན་ཆད་ལོག་པ་རྣམས་ལ་མི་བཟད་ཞུགས། །ཆོས་ངན་ འདོད་ཆགས་མི་རྣམས་ཞེན་ཅིང་ཆགས། །ན་ཆུང་གཞོན་ནུ་གཞན་གྱིས་བསྲུངས་པ་རྣམས། །ནན་གྱིས་འཕྲོག་རློམ་ཆབ་འཚལ་མ་རུང་བགྱིས། །ལྷ་མོ་བཟང་མོའི་ཁ་དོག་གཟུགས་ ལྡན་པ༑ ༑གོས་བཟང་རྒྱན་ལྡན་དེང་སང་མཐོང་འགྱུར་ཏེ། །གཞན་གྱི་བུད་མེད་སྤོས་དྲི་གདའ་མཆིས་ཀྱང༌། །དགའ་ལྡན་ཇི་བཞིན་མཆིས་བྲང་རྒྱན་གྱིས་འཚལ། །ཤོ་བེ་བརླང་ པ་ཕྲ་མ་རྐྱལ་བ་རྣམས། །སྔོན་ཆད་གཡོ་སྒྱུའི་དབང་གིས་ངག་ཏུ་བརྗོད། །དེང་ཡང་ཚིག་གི་ནོངས་པ་བཞི་སྤངས་ཤིང༌། །ལྟ་བ་ངན་སྤངས་ཆོས་ལ་ཀུན་ཀྱང་སྤྱོད། །ཚངས་དབྱངས་ ཀ་ལ་པིངྐའི་སྒྲ་བྱུང་བའི། །ཁྱོད་ཀྱི་གསུང་མཆོག་འདི་ཡི་ཆ་ཤས་ལའང༌། །རོལ་མོའི་སྒྲ་དབྱངས་ཤིན་ཏུ་སྙན་པ་དང༌། །ལྷ་རྫས་གླུ་དབྱངས་འདི་དག་ཉེར་མི་འགྱུར། །ཁྱོད་ཀྱི་སྤྱི་ ༄༅། །གཙུག་དབུ་སྟེང་གདུགས་ལྡིང་བ། །རིན་ཆེན་བརྒྱུས་བགྱིས་གསེར་གྱི་དྲ་བས་བཀབ། །དཔལ་གྱི་སྙིང་མཛོད་ཡུ་བ་བཻ་ཌཱུཪྻ། །ཀུན་ནས་རིན་ཆེན་མཆོག་ གི་དྲིལ་གྱིས་འཁོར། །དྲིལ་ལས་བྱུང་བའི་སྒྲས་ཀྱང་མ་ལུས་པའི། །འཇིག་རྟེན་སྒྲ་དབྱངས་མ་ལུས་ཟིལ་མནན་ཅིང༌། །སངས་རྒྱས་གསུང་གི་ཡན་ལག་འདྲ་བར་འཁྲོལ། དམ་པའི་ཆོས་ཀྱི་སྒྲ་དབྱངས་ཞི་བ་སྒྲོག །དེ་ཐོས་སེམས་ཅན་ཉོན་མོངས་ཞི་བར་བགྱིད། །མ་ལུས་ཕྱོགས་ཀྱི་ཞིང་རྣམས་བརྒྱུད་པ་ཡི། །བསྐལ་པ་རྒྱ་མཚོའི་བདེ་གཤེགས་ རྒྱ་མཚོ་དང༌། །བློ་ལྡན་རྒྱ་མཚོའི་མཚན་གྱི་འཁོར་ལོ་རྣམས། །སྔོན་མཐའི་ཞིང་རྣམས་གཅིག་ནས་གཅིག་བརྒྱུད་དུ། །གང་མཚན་གང་དང་གང་ལགས་རིམ་བཞིན་ དང༌། །མ་ལུས་ཕྱོགས་སུ་དམ་ཆོས་འཁོར་ལོ་ཡང༌། །ཁྱོད་ཀྱི་བྱིན་གྱིས་དྲིལ་རྣམས་རབ་ཏུ་སྒྲོག །ཁྱོད་ཀྱི་དྲིལ་སྒྲ་ཐོགས་པ་མ་མཆིས་པར། །ཚངས་དབང་ལྷ་དབང་འགྲོ་ བའི་བདག་པོ་རྣམས། །རང་རང་ལས་ཀྱི་ཚུལ་ནི་ཀུན་རྗོད་ཅིང༌། །འཛམ་བུའི་རྒྱལ་མཚན་ཁྱབ་པར་ཀུན་ཏུ་སྒྲོག །དྲིལ་གྱི་སྒྲ་ལས་ལྷ་དང་མི་རྣམས་ཀྱིས། །རང་རང་ལས་ཀྱི་ ཚུལ་རྒྱུད་ཐོས་གྱུར་ནས། །སྡིག་ཏོ་རྣམ་སྤངས་དགེ་བ་སྤྱོད་པར་གྱུར། །སངས་རྒྱས་བྱང་ཆུབ་མཆོག་ལ་ཀུན་ཀྱང་གནས། །ཁྱོད་ཀྱི་ཡབ་ནི་མི་བདག་སྐར་མའི་འོད། །དེ་ཡི་ བཙུན་མོ་པདྨོ་ཁྱོད་ཀྱི་ཡུམ། །རྙོག་པ་ལྔ་རྣམས་ཤིན་ཏུ་རྒྱས་གྱུར་དུ། །ཆོས་འགྲིབ་རྒྱལ་སྲིད་དེས་ནི་བཞེས་པར་གྱུར། །དེ་ཡི་བཟའ་ཤིང་ར་བ་ཡངས་བྱུང་བ། །མེ་ཏོག་རྒྱས་ བརྒྱན་རིན་ཆེན་སྒྲོན་མ་སྟེ། །ཤིང་མང་བརྒྱས་བསྐོར་རྫིང་བུ་ལྔ་བརྒྱ་ཡིས། །དེ་ནི་ཤིན་ཏུ་བརྒྱན་པ་བྱུང་བར་གྱུར། །དེ་དག་སོ་སོ་རེ་རེའི་དོགས་སུ་ཡང༌། །ཀ་བ་སྟོང་ལྡན་གཞལ་ མེད་ཁང་བཟང་བྱུང༌། །སྟེགས་བུ་བཟང་པོ་སྣ་ཚོགས་སྟོང་གིས་བརྒྱན། །ཟླ་གམ་དྲ་བས་ཀུན་ནས་མཛེས་པར་བགྱིས། །ཆོས་ངན་སྟོབས་ནི་རབ་ཏུ་འཕེལ་གྱུར་བས། །དགུང་ ལོ་མང་པོར་དགུང་ཆར་བབ་མ་གྱུར། །རྫིང་བུ་ཀུན་གྱི་ཆབ་དང་ཞུགས་ཤིང་རྣམས། །དེ་ཚེ་ལོ་མ་མདོག་དང་བཅས་ཏེ་བསྐམས། །དགུང་བདུན་ན་ནི་ཁྱོད་བལྟམས་འགྱུར་བའི་ ཚེ༑ ༑དེ་ཚེ་ངོ་མཚར་རྨད་བྱུང་ལྟས་བྱུང་སྟེ། །དེ་དག་མཐོང་ནས་སེམས་ཅན་ངེས་རྟོགས་པར། །བདག་ཅག་སྐྱོབ་པ་ངེས་པར་འབྱུང་ཞེས་མཆི། །དགུང་གི་གུང་ལ་བབ་ནས་རྣམ་ དྲུག་ཏུ༑ ༑ཁམས་ཀྱི་དོགས་ཡོངས་སུ་གཡོས་པར་གྱུར། །མ་སྨད་ཤིན་ཏུ་བཟང་བའི་རྫིང་དེ་ཡི། །དབུས་སུ་གདུགས་དང་མཉམ་པའི་འོད་ཅིག་བྱུང༌། །ཆབ་བཟང་ཡན་ལག་ བརྒྱད་ལྡན་རྒྱས་པར་གྱུར། །རྫིང་བུ་ལྔ་བརྒྱ་ཀུན་ཀྱང་དེ་བཞིན་ཏེ། །ཞུགས་ཤིང་ཀུན་ཀྱང་ལོ་མ་འཁྲུངས་པར་གྱུར། །མེ་ཏོག་འབྲས་བུ་ཁ་དོག་མདོག་དང་ལྡན། །རྫིང་བུ་དེ་རྣམས་ ༄༅། །ཆབ་ཀྱིས་བལྟམས་གྱུར་པས། །ནགས་ཚལ་མ་ལུས་དེ་དག་ངོམས་པར་བགྱིས། །ཆབ་ཆེན་དེ་ལས་བྱུང་བའི་རྒྱུད་འཕྲོས་པས། །འཛམ་བུའི་རྒྱལ་ མཚན་ཆབ་ཀྱིས་བལྟམས་པར་གྱུར། །ཞུགས་ཤིང་སྨན་དང་ལོ་ཏོག་ལྡུམ་བུ་ཡང༌། །འཁྲུངས་གྱུར་ཞུགས་ཤིང་མེ་ཏོག་འབྲས་བུ་རྒྱས། །དོག་སའི་སྟེང་ན་མཆིས་རྒུའི་ས་ བོན་རྣམས། །ཀུན་ཀྱང་ཆབ་ཀྱིས་བརླན་པས་རྣམ་པར་འཁྲུངས། །ཆབ་ཀྱིས་བངས་གྱུར་དོག་སའི་ཕྱོགས་རྣམས་ཀྱང༌། །དེ་ཚེ་ཐམས་ཅད་རབ་ཏུ་མཉམ་པར་གྱུར། །སྒང་ གཤོང་དོག་སའི་ཕྱོགས་རྣམས་ཇི་སྙེད་པ། །དེ་དག་ཀུན་ཀྱང་དེ་ཚེ་མཉམ་པར་གྱུར། །གཡང་ས་གྲོག་པོ་མི་བདེའི་ཕྱོགས་ཀྱི་རྣམས། །དེ་ཚེ་ཡུད་ཀྱིས་ཀུན་ཀྱང་མཉམ་པར་ གྱུར༑ ༑ཚེར་མ་གསེག་མ་ལ་སོགས་མ་མཆིས་གྱུར། །རིན་ཆེན་བཟང་པོའི་འབྱུང་གནས་ཡོངས་སུ་ཐོན། །སྐྱེས་པ་བུད་མེད་ཚོགས་རྣམས་དགའ་བར་གྱུར། །སྐོམ་པས་ གདུངས་པ་ཀུན་ཀྱང་ཆབ་ལ་འཚལ། །ཀྱེ་མ་དེ་རིང་བདེ་ན་སུ་མཐུ་ཞེས། །སྙན་པར་བརྗོད་པ་དེ་སྐད་ཆད་དུ་བརྗོད། །ངོག་སའི་མངའ་བདག་སྐར་འོད་སྲས་དང་བཅས། །སྲས་ མོ་བློན་པོའི་ཚོགས་བཅས་དེ་ཡི་ཚེ། །སྐྱེ་བོ་བྱེ་བ་སྟོང་གིས་ཡོངས་བསྐོར་ཏེ། །བཟའ་ཤིང་ར་བར་དགྱེས་པར་གཤེགས་པ་མཛད། །མདངས་དགའ་རྫིང་ཆེན་ཡོངས་སུ་ མ་སྨད་པ། །སྤོས་ཆུས་བལྟམས་པ་དབུས་ན་མཆིས་གྱུར་བའི། །དེ་ཡི་དབུས་སུ་ཆོས་སྟེགས་བཟང་པོ་ཡི། །ཕོ་བྲང་སྟེང་གཤེགས་བཙུན་མོ་བཅས་པས་བཞུགས། །དགུང་ བདུན་ལོན་པར་གྱུར་ནས་དེ་ཡི་ཆབ། །དགུང་གི་གུང་ལ་གྱེན་དུ་ལུད་པར་གྱུར། །རི་དང་གཞལ་མེད་ཁང་གི་ཕྲེང་བཅས་པའི། །དོག་སའང་དེའི་ཚེ་ཡོངས་སུ་གཡོས་པར་གྱུར།། ཡོངས་སུ་མ་སྨད་དེ་ཡི་དབུས་ནས་ཀྱང༌། །པདྨོ་ཆེན་པོ་ལོ་མ་སྟོང་ལྡན་འཁྲུངས། །གདུགས་སྟོང་མདོར་གསལ་སྤྲིན་གྱི་དྲ་བ་ཅན། །རི་རབ་རྩེ་མོ་མན་ཆད་འོད་ཀྱིས་འགེངས།། ཆུ་བ་རྡོ་རྗེ་ནང་རིམ་དྲི་བདའ་སྟེ། །རིན་ཆེན་དབང་པོའི་ལོ་མ་རྣམ་དག་ཡངས། །འཛམ་བུ་ཆུ་ཀླུང་གསེར་བཟང་སྙིང་པོ་ཅན། །ཟེ་བ་སྤོས་རབ་འབར་བ་ཕུན་སུམ་ཚོགས། །མགོན་ པོ་ཁྱོད་ནི་དེ་ཡི་སྙིང་པོ་ལས། །སྐྱིལ་མོ་ཀྲུང་བཅས་སྐུ་ནི་བྱུང་བར་གྱུར། །མཚན་གྱིས་རྣམ་བརྒྱན་ཡན་ལག་ཤིན་ཏུ་མཛེས། །ལྷ་མང་བརྒྱས་ཀྱང་མངོན་པར་མཆོད་པ་བགྱིས།། རྒྱལ་པོ་ཕོ་བྲང་སྟེང་ནས་ཤོད་གཤེགས་ཏེ། །ཕྱག་གཉིས་བརྐྱངས་ཏེ་ལེགས་པར་ཁྱོད་བླངས་ནས། །བཙུན་མོའི་མགོ་ལ་བཞག་སྟེ་འདི་སྐད་གསུངས། །ཁྱོད་ཀྱི་བུ་འདི་ ཡིན་གྱི་དགར་གྱིས་ཤིག །འཇིག་རྟེན་མགོན་ཁྱོད་དེ་ལྟར་བལྟམས་གྱུར་ཚེ། །བྱེ་བའི་གཏེར་རྣམས་རབ་ཏུ་ཐོན་པར་གྱུར། །ཞུགས་ཤིང་ཀུན་ཀྱང་མངོན་པར་ཁ་འབུས་ཏེ།། ༄༅། །སྟེང་གི་མཁའ་ལས་རོལ་མོའི་སྒྲ་ཡང་བྱུང༌། །འཛམ་བུ་རྒྱལ་མཚན་སེམས་ཅན་ཐམས་ཅད་ཀྱང༌། །ཁྱོད་ལ་མངོན་ལྟ་འདུད་ཅིང་ཕྱག་ཀྱང་འཚལ། ། ཐལ་མོ་སྦྱར་ཅིང་ཀྱེ་མ་མགོན་མེད་པའི། །མགོན་ཞིག་བྱུང་ཞེས་དགའ་བའི་ཚིག་ཀྱང་བརྗོད། །ཁྱོད་ཀྱི་སྐུ་ལས་འོད་ཟེར་མང་འབྱུང་བས། །དོག་ས་ཀུན་ཏུ་རབ་ཏུ་སྣང་བར་ གྱུར༑ ༑འགྲོ་བའི་མུན་པ་ཀུན་ཀྱང་རྣམ་བསལ་ནས། །ནད་མང་མ་ལུས་རབ་ཏུ་ཞི་བར་གྱུར། །གནོད་སྦྱིན་གྲུལ་བུམ་ཤ་ཟ་མང་པོའི་ཚོགས། །རྣམ་པར་འཚེ་བ་དེ་དག་ བསལ་བར་གྱུར། །ཤིན་ཏུ་གདུག་པས་སེམས་ཅན་འགུམས་པ་ཡི། །སྦྲུལ་གདུག་ཀུན་ཀྱང་དེ་ཚེ་ཡོང་མི་རྒྱུ། །ཐོབ་མེད་སྨན་པ་མི་སྙན་སྡུག་བསྔལ་དང༌། །ནད་རླངས་ ནད་མང་གནོད་པར་འཚེ་བ་དག །མདོར་བསྡུས་ཀུན་ཀྱང་ཞི་ཞིང་མ་མཆིས་གྱུར། །འཇིག་རྟེན་ཀུན་ཏུ་རབ་དགའ་བྱུང་བར་གྱུར། །ཕན་ཚུན་མ་དང་འདྲ་བའི་འདུ་ཤེས་ ཀྱིས༑ ༑ཁོང་ནས་བྱམས་པ་དེ་ཚེ་འགྲོ་ཀུན་གྱུར། །ཤར་གཉེར་སེམས་བྲལ་འཚེ་བ་མ་མཆིས་ཏེ། །ཐམས་ཅད་མཁྱེན་ལམ་ནན་ཏན་ལྡན་པར་གྱུར། །ངན་སོང་རྒྱུད་རྣམས་ རྣམ་པར་རབ་ཏུ་བཟློག །མཐོ་རིས་ལམ་ཆེན་ཀུན་ཀྱང་བཏོད་པར་གྱུར། །ཐམས་ཅད་མཁྱེན་པའི་ལམ་ཡང་ཤིན་ཏུ་བསྟན། །དེ་ལྟར་ཁྱོད་ཀྱིས་འགྲོ་དོན་ཡངས་པ་མཛད། ། རྒྱ་མཚོ་ཆེ་འདྲ་ཡོངས་སུ་གཏོང་མཛད་པ། །ཁྱོད་མཐོང་བདག་ནི་ཐོབ་པ་དམ་པ་ཐོབ། །ཡུན་རིང་འཁྱམས་པའི་འགྲོ་བ་མགོན་བྲལ་དུ། །ཁྱོད་ནི་རྨད་དུ་བྱུང་བའི་མགོན་ཞིག་གཤེགས་ དེ་ནས་ཚོང་དཔོན་གྱི་བུ་མོ་རིན་ཆེན་འོད་ཀྱིས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ལ་ཚིགས་སུ་བཅད་པ་དེ་དག་གིས་མངོན་པར་ བསྟོད་དེ་སྙན་པར་བཀུར་ནས་རབ་ཏུ་བསྔགས་ཏེ་ལན་བརྒྱ་ཕྲག་སྟོང་དུ་གཡས་ཕྱོགས་སུ་བསྐོར་བ་བྱས་ཏེ་ཕྱག་འཚལ་ནས་ཕྱོགས་གཅིག་ཏུ་གུས་པའི་ཚུལ་གྱིས་འདུག་ གོ །དེ་ནས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་ཚོང་དཔོན་གྱི་བུ་མོ་རིན་ཆེན་འོད་ལ་བལྟས་ཏེ་འདི་སྐད་ཅེས་སྨྲས་སོ། །བུ་མོ། དེ་ ལྟར་ཁྱོད་སེམས་ཅན་ཕ་རོལ་གྱི་ཡོན་ཏན་གྱི་ཁྱད་པར་ཤེས་པའི་མངོན་པར་ཤེས་པ་ལ་ཞུགས་པ་ལེགས་སོ། །ལེགས་སོ། །བུ་མོ། འཇིག་རྟེན་ཐམས་ཅད་ནའང་སེམས་ ཅན་གང་སེམས་ཅན་ཕ་རོལ་གྱི་ཡོན་ཏན་ལ་མོས་པ་དེ་ལྟ་བུ་ནི། དཀོན་ཏེ། བུ་མོ། སེམས་ཅན་མུན་པས་བསྒྲིབས་པ། ཕན་གདགས་པ་ལ་དྲིན་དུ་མི་གཟོ་བ། བློ་ཕྱིན་ཅི་ལོག་ ལ་ཞུགས་པ། སེམས་འཁྲུགས་པར་གྱུར་པ། རྒྱུད་འཛིངས་པར་གྱུར་པ། མུན་པའི་སེམས་དང་ལྡན་པ། བསམ་པ་ངང་གིས་ལོག་པ། ནན་ཏན་དང་མི་ལྡན་པ། སེམས་ ༄༅། །ཅན་ཕ་རོལ་གྱི་ཡོན་ཏན་གྱི་ཁྱད་པར་མངོན་པར་མི་ཤེས་པ་རྣམས་ཀྱིས་ནི། བྱང་ཆུབ་སེམས་དཔའི་ཡོན་ཏན་ལ་འཇུག་པར་བྱ་བའམ། དེ་བཞིན་ གཤེགས་པའི་ཡོན་ཏན་ལ་བརྟག་པར་བྱ་བའམ། ཡོན་ཏན་ཐམས་ཅད་ཤེས་པའི་ཁྱད་པར་མངོན་པར་ཤེས་པ་ཐོབ་པར་བྱ་བར་མི་ནུས་སོ། །བུ་མོ། དེ་ལྟར་ཁྱོད་སེམས་ ཅན་ཆེན་པོ་མངོན་པར་ཤེས་པས་བྱང་ཆུབ་སེམས་དཔའི་ཡོན་ཏན་གྱི་རྣམ་པ་དེ་ལྟ་བུ་ལ་འཇུག་པ་ནི། གདོན་མི་ཟ་བར་བྱང་ཆུབ་ཏུ་ཡང་དག་པར་ཞུགས་པའོ། །དེ་ ལྟར་ངའི་ཁམས་སུ་ཁྱོད་ལྟ་བུ་ཡེ་ཤེས་དེ་འདྲ་བ་དང་ལྡན་པ་སྐྱེས་པ་ནི། ཛམྦུའི་གླིང་དུ་ངས་སེམས་ཅན་ཡོངས་སུ་བསྡུས་པའི་མཐུ་དོན་ཡོད་དོ། །དེ་ནས་རྒྱལ་པོ་ཆོས་ ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་ནོར་བུ་རིན་པོ་ཆེ་ཆེན་པོ་རིན་ཐང་མེད་པ་དང༌། ནོར་བུ་རིན་པོ་ཆེ་སྐར་མའི་འོད་སྣ་ཚོགས་དང༌། གོས་ རིན་པོ་ཆེ་རིན་ཐང་མེད་པ་བདག་གིས་ལག་བདར་ཏེ་བླངས་ནས་ཚོང་དཔོན་གྱི་བུ་མོ་རིན་ཆེན་འོད་ལ་བྱིན་ནོ། །དེའི་འཁོར་གྱི་བུ་མོ་ཐམས་ཅད་ཀྱང་གོས་རིན་པོ་ཆེ་སྣ་ ཚོགས་ཀྱིས་ཁྱད་པར་བྱིན་ནས་འདི་སྐད་ཅེས་སྨྲས་སོ། །བུ་མོ། གོས་རིན་པོ་ཆེ་འདི་ཁྱེར་ལ་བདག་གིས་ཡོངས་སུ་སྤྱད་པ་གྱིས་ཤིག །དེ་ནས་ཚོང་དཔོན་གྱི་བུ་མོ་ རིན་ཆེན་འོད་འཁོར་དང་བཅས་པས་པུས་མོ་གཉིས་ས་ལ་ཕབ་སྟེ་གོས་རིན་པོ་ཆེ་དག་ལག་པ་གཉིས་ཀྱིས་བླངས་ནས་སྤྱི་བོ་ལ་བླངས་ཏེ་ཕྱིར་བྱུང་ནས་རིན་པོ་ཆེ་དེ་དག་བགོས་སོ།། དེའི་འཁོར་གྱི་བུ་མོ་ཐམས་ཅད་ཀྱིས་ཀྱང་སོ་སོ་ནས་རང་རང་གི་གོས་རིན་པོ་ཆེ་དེ་དག་བགོས་ནས་དེས་གོས་རིན་པོ་ཆེ་དེ་དག་བགོས་པའི་འོག་ཏུ་རྒྱལ་པོ་ཆོས་ཐམས་ཅད་ཀྱི་ང་ རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ལ་བདག་གི་འཁོར་བུ་མོ་དེ་དག་དང་བཅས་པས་གཡས་ཕྱོགས་སུ་བསྐོར་བ་བྱས་སོ། །དེ་དག་ཐམས་ཅད་ཀྱི་གོས་རིན་པོ་ཆེ་ དེ་དག་ལ་རྒྱུ་སྐར་དང༌། སྐར་མ་ཐམས་ཅད་ཀྱི་གཟུགས་བརྙན་སྣང་བར་གྱུར་ཏེ། དེ་དག་མཐོང་ནས་འགྲོ་བའི་ཚོགས་མང་པོ་འདི་སྐད་ཅེས་འཛེར་ཏེ། བུ་མོ། ཁྱོད་ཀྱི་འཁོར་བུ་ མོ་འདི་དག་ནི། མཚན་མོའི་ལྷ་མོ་སྐར་མའི་ཚོགས་ཀྱིས་བརྒྱན་པ་ལྟར་ཤིན་ཏུ་མཛེས་པ་སྟེ། ཁྱོད་དེ་དག་གིས་བསྐོར་བས་གྱ་ནོམ་པར་མཛེས་སོ། །དེ་ནས་མཚན་མོའི་ལྷ་ མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་དུས་ ན་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ཞེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ན་ནི། དེ་ལྟར་མི་བལྟ་སྟེ། བཅོམ་ལྡན་ ༄༅། །འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་འདི་ནི། དེའི་ཚེ་རྒྱལ་པོ་ཆོས་ཐམས་ཅད་ཀྱི་ང་རོའི་ གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ཞེས་བྱ་བར་གྱུར་ཏོ། །རིགས་ཀྱི་བུ། དེའི་ཚེ་དེའི་དུས་ན་རྒྱལ་པོ་སྐར་མའི་འོད་ཀྱི་བཙུན་མ་པདྨོའི་འོད་ཅེས་བྱ་བ། རྒྱལ་པོ་ཆོས་ཐམས་ ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པའི་ཡུམ་དུ་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་ཡང་དེ་ལྟར་མི་བལྟ་སྟེ། ལྷ་མོ་སྒྱུ་མ་འདི་ནི། དེའི་ཚེ་རྒྱལ་ པོའི་བཙུན་མོ་པདྨོའི་འོད་ཅེས་བྱ་བར་གྱུར་ཏེ། རྫུས་ཏེ་བྱུང་བའི་གཞོན་ནུ་ཐུ་པར་ལེན་ལེན་པའོ། །ཡང་རིགས་ཀྱི་བུ། ཁྱོད་དེའི་ཚེ་དེའི་དུས་ན་རྒྱལ་པོ་སྐར་མའི་འོད་ཅེས་བྱ་ བ༑ རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པའི་ཡབ་ཏུ་གྱུར་པ་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ནའང་དེ་ལྟར་མི་བལྟ་སྟེ། རྒྱལ་པོ་ཟས་གཙང་མ་ནི། དེའི་ཚེ་དེའི་དུས་ན་རྒྱལ་པོ་སྐར་མའི་འོད་ཅེས་བྱ་བར་གྱུར་ཏོ། །ཡང་རིགས་ཀྱི་བུ། ཁྱོད་དེའི་ཚེ་དེའི་དུས་ན་ཚོང་དཔོན་གྱི་བུ་མོ་རིན་ཆེན་འོད་ཅེས་བྱ་ བ་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ནའང་དེ་ལྟར་མི་བལྟ་སྟེ། ཁོ་མོ་ནི། དེའི་ཚེ་དེའི་དུས་ན་ཚོང་དཔོན་གྱི་བུ་མོ་རིན་ཆེན་འོད་ཅེས་བྱ་བར་གྱུར་ཏོ། །ཡང་རིགས་ ཀྱི་བུ༑ ཁྱོད་དེའི་དུས་ན་སེམས་ཅན་ཛམྦུའི་གླིང་དེར་སྐྱེས་ཤིང་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་བསྡུ་བའི་དངོས་པོ་བཞིས་ཡོངས་ སུ་བསྡུས་པ་དེ་དག་གཞན་དག་ཅིག་ཡིན་པ་སྙམ་དུ་སེམས་ན་ནི། དེ་ལྟར་མི་བལྟ་སྟེ། བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་འདི་ཉིད་དུ་འདུས་ཏེ་བླ་ན་མེད་པ་ཡང་དག་ པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་བྱང་ཆུབ་སེམས་དཔའི་ས་ལ་བཀོད་དེ། ལ་ལ་ནི། ས་དང་པོ་ལ་བཀོད། ལ་ལ་ནི། ས་གཉིས་པ་ལ། ལ་ལ་ནི། ས་གསུམ་པ། ལ་ལ་ནི། ས་བཞི་པ། ལ་ལ་ནི། ས་ལྔ་པ། ལ་ལ་ནི། ས་དྲུག་པ། ལ་ལ་ནི། ས་བདུན་པ། ལ་ལ་ནི། ས་བརྒྱད་པ། ལ་ལ་ནི། ས་དགུ་པ། ལ་ལ་ནི། བྱང་ཆུབ་སེམས་དཔའི་ ས་བཅུ་པ་ལ་བཀོད་པར་གྱུར་པའི་བྱང་ཆུབ་སེམས་དཔའ་སྨོན་ལམ་སྣ་ཚོགས་རྣམ་པ་ཐ་དད་པ་དང༌། ཐམས་ཅད་མཁྱེན་པ་ཉིད་དུ་འཇུག་པ་སྣ་ཚོགས་དང༌། ཚོགས་སྣ་ཚོགས་ དང༌། ཡང་དག་པར་སྒྲུབ་པ་སྣ་ཚོགས་དང༌། སྤྱོད་པ་སྣ་ཚོགས་དང༌། འབྱུང་བ་སྣ་ཚོགས་དང༌། ལམ་གྱི་རྒྱན་རྣམ་པར་དག་པ་སྣ་ཚོགས་དང༌། རྣམ་པར་འཕྲུལ་བ་དང༌། ཁྱུ་ མཆོག་གི་མཐུ་ཕྱུང་བ་སྣ་ཚོགས་དང༌། ལམ་གྱི་རྒྱན་རྣམ་པ་སྣ་ཚོགས་ཀྱིས་ཡོངས་སུ་བྱུང་སྟེ་རྣམ་པར་ཐར་པ་ལ་རྣམ་པར་སྤྱོད་པ་སྣ་ཚོགས་ཀྱིས་འཁོར་གྱི་དཀྱིལ་འཁོར་འདི་ ༄༅། །ནི༑ ཆོས་ཀྱི་གཞལ་མེད་ཁང་སྣ་ཚོགས་ན་རྣམ་པར་སྤྱོད་པས་འཁོད་ཅིང་རྣམ་པར་སྤྱོད་པ་འདི་དག་ཡིན་ནོ། །དེ་ནས་མཚན་མོའི་ལྷ་མོ་ཤིང་ཐམས་ཅད་ ཀྱི་མེ་ཏོག་རྒྱས་པས་བདེ་བར་གནས་པས་དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་དགའ་བའི་འོད་སྤྲོ་བ་ཡངས་པ་ཡང་དག་པར་འབྱུང་བ་འདི་ཉིད་བརྣན་ཏེ་བསྟན་པའི་ ཕྱིར་ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་པ། རྒྱལ་བའི་སྲས་པོ་ཁོ་མོའི་མིག་ཡངས་ཏེ། །ཕྱོགས་ཀུན་ཞིང་མང་རྒྱ་མཚོ་སྣ་ཚོགས་ཀྱི། །སེམས་ཅན་རྒྱ་ ཆེན་གང་ཆེན་མཚོ་ཡི་རྣམས། །འཁོར་བར་གྱུར་ཚེ་ཀུན་ལ་རྣམ་པར་ལྟ། །འབྱམས་ཀླས་ཞིང་རྣམས་ཀུན་ན་བཞུགས་པ་ཡི། །རྒྱལ་བ་བྱང་ཆུབ་ཤིང་གི་དྲུང་བཞུགས་ པ༑ ༑རྡུལ་མེད་ཀུན་ཀྱང་ཕྱོགས་བཅུ་རྒྱས་བཀང་སྟེ། །ཆོས་སྒྲོག་རྟག་པར་འགྲོ་འདུལ་མཐོང་བར་བྱེད། །ཁོ་མོའི་རྣ་བ་རྒྱ་མཚོ་ཡོངས་སུ་དག །སྒྲ་རྣམས་མ་ལུས་ཐམས་ཅད་ དེས་ཐོས་ཏེ། བདེ་བར་གཤེགས་པས་ཆོས་གསུངས་མ་ལུས་པར། །ཐམས་ཅད་དགའ་བས་ཡང་དང་ཡང་དུ་ཐོས། །ཁོ་མོའི་ཡེ་ཤེས་གཉིས་མེད་ཆགས་པ་མེད། །སེམས་ ཅན་གཞན་གྱི་སེམས་ཀྱི་ཡུལ་ལ་འཇུག །འགྲོ་བའི་སེམས་ཀྱི་རྒྱ་མཚོ་ཡངས་པ་རྣམས། །མ་ལུས་ཀུན་ལ་མཚན་ཉིད་དངོས་ཀྱིས་འཇུག །སྔོན་གྱི་མཐའ་དྲན་ཏིང་ངེ་འཛིན་ སྟོབས་ཀྱིས། །བསྐལ་པ་རྒྱ་མཚོ་ཚད་མེད་ཁོ་མོས་ཤེས། །ཚེ་རབས་རྒྱུད་མང་གང་ཆེན་མཚོ་དག་ཀྱང༌། །ཕ་རོལ་དག་དང་བདག་གིའང་དེ་བཞིན་ཤེས། །རྒྱ་མཚོའི་ཞིང་གཅིག་ རྡུལ་ཕྲན་རབ་སྙེད་ཀྱི། །བསྐལ་པ་སྐད་ཅིག་གཅིག་གིས་མ་ལུས་ཤེས། །སེམས་ཅན་འགྲོ་རྒྱུད་དག་ན་འཁོར་བ་དང༌། །སངས་རྒྱས་རྣམ་འཕྲུལ་ཚོགས་བཅས་དེ་བཞིན་ ནོ༑ ༑དེ་དག་ཐོག་མའི་སྨོན་ལམ་ཅི་འདྲ་དང༌། །ཡང་དག་སྒྲུབ་ཚུལ་འཇུག་ཚུལ་རྣམ་ཡངས་དང༌། །སྤྱོད་ལ་བརྟེན་པས་ཚོགས་རྣམས་ཡོངས་སྒྲུབ་པ། །འཇིག་རྟེན་མཁྱེན་པ་ རྣམས་ཀྱང་ཁོ་མོས་དྲན། །མཉམ་མེད་ཚད་མེད་ཚོགས་གྱུར་ཡོན་ཏན་མཚོ་མངའ་བའི། །དབང་བསྐུར་སར་བྱོན་ཇི་སྙེད་དེ་དག་དང༌། །བྱང་ཆུབ་འཚང་རྒྱའི་ཚུལ་ནི་རྣམ་ ཡངས་ལ། །སེམས་ཀྱི་སྐད་ཅིག་གཅིག་གིས་ཁོ་མོ་འཇུག །ཐབས་ཀྱི་རྣམ་པ་གང་དང་གང་དག་གིས། །བདེ་གཤེགས་འཁོར་ལོ་དམ་པ་འགྲོར་བསྐོར་དང༌། །མྱ་ངན་འདས་ པ་ཡོན་ཏན་ཚད་མེད་དང༌། །ཆོས་རྣམས་གནས་པའི་དུས་ཀྱང་ཁོ་མོས་ཤེས། །དྲི་མེད་ཐེག་པ་རྒྱ་མཚོའི་ཚུལ་རྣམས་དང༌། །སེམས་ཅན་རྣམས་འདུལ་རྣམ་ཡངས་ཇི་སྙེད་ དང༌། །འགྲོ་བར་དེ་དག་གིས་ནི་གང་བསྟན་པ། །སོ་སོ་ཀུན་ལ་སྣ་ཚོགས་ཚུལ་གྱིས་འཇུག །དགའ་བའི་གཏེར་དང་མོས་པའི་དབྱིག་གི་རྣམས། །ཀུན་ཏུ་སྣང་བ་རྣམ་ཐར་ ༄༅། །ཚུལ་འདི་ཡིན། །ཁོ་མོས་བསྐལ་པ་བརྒྱ་མང་རྒྱ་ཆེར་བསྒོམས། །དེ་ཚུལ་དེ་ལ་ཁྱོད་ཀྱང་མྱུར་འཇུག་གྱིས། །རིགས་ཀྱི་བུ། ཁོ་མོས་བྱང་ཆུབ་ སེམས་དཔའི་རྣམ་པར་ཐར་པ་དགའ་བའི་འོད་སྤྲོ་བ་ཡངས་པ་ཡང་དག་པར་འབྱུང་བ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་དེ་བཞིན་གཤེགས་པ་ ཐམས་ཅད་ཀྱི་ཞབས་ཀྱི་དྲུང་དུ་ཐམས་ཅད་མཁྱེན་པ་ཉིད་ལ་འཇུག་པའི་སྨོན་ལམ་རྒྱ་མཚོ་ལ་ཞུགས་པ། དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྨོན་ལམ་རྒྱ་མཚོ་མངོན་ པར་སྒྲུབ་པའི་སྨོན་ལམ་ཡོངས་སུ་རྫོགས་པའི་བྱང་ཆུབ་སེམས་དཔའི་ས་གཅིག་ནོན་པས་བྱང་ཆུབ་སེམས་དཔའི་ས་རྒྱ་མཚོ་ཐམས་ཅད་ཡོངས་སུ་གནོན་པའི་སྟབས་ ལ་མཁས་པ། བྱང་ཆུབ་སེམས་དཔའི་སྤྱོད་པ་རྒྱ་མཚོ་ཐམས་ཅད་སྤྱོད་པ་རེ་རེར་ཡང་དག་པར་འདུ་བའི་སྨོན་ལམ་དང་སྤྱོད་པ་ཡོངས་སུ་དག་པ། བྱང་ཆུབ་སེམས་དཔའི་ རྣམ་པར་ཐར་པ་རེ་རེ་ལ་བྱང་ཆུབ་སེམས་དཔའི་རྣམ་པར་ཐར་པ་རྒྱ་མཚོ་ཐམས་ཅད་ཡོངས་སུ་འདུ་བར་རྣམ་པར་སྤྱད་པ་ལ་དབང་བསྒྱུར་བ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ། སྙིང་པོ་བྱང་ཆུབ་འདི་ཉིད་ན་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་སྨོན་ལམ་ལ་བརྩོན་པའི་འོད་ཅེས་ བྱ་བ་ཞིག །བཅོམ་ལྡན་འདས་ཀྱི་སྤྱན་སྔར་ཕྱིན་ཅིང་འདུག་གི །དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ ཅན་ཡོངས་སུ་སྨིན་པར་བྱ་བ་དང༌། ཇི་ལྟར་སངས་རྒྱས་ཀྱི་ཞིང་ཐམས་ཅད་ཡོངས་སུ་སྦྱང་བར་བྱ་བ་དང༌། ཇི་ལྟར་དེ་བཞིན་གཤེགས་པ་ཐམས་ཅད་ཤིན་ཏུ་མཉེས་པར་བྱ་ བས་བསྙེན་བཀུར་ཞིང་རིམ་གྲོར་བྱ་བ་དང༌། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་ཐམས་ཅད་ལ་བརྩོན་པར་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་ བཟང་གིས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་མཚན་མོའི་ལྷ་མོ་ཤིང་ཐམས་ཅད་ཀྱི་ མེ་ཏོག་རྒྱས་པས་བདེ་བར་གནས་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་དུ་བལྟས་ཏེ་མཚན་མོའི་ལྷ་མོ་ཤིང་ཐམས་ཅད་ཀྱི་ མེ་ཏོག་རྒྱས་པས་བདེ་བར་གནས་པའི་དྲུང་ནས་སོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་སྨོན་ལམ་ལ་བརྩོན་པའི་འོད་ གང་ན་བ་དེར་སོང་སོང་ནས་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་སྨོན་ལམ་ལ་བརྩོན་པའི་འོད་འཁོར་གྱི་དཀྱིལ་འཁོར་དེ་ཉིད་ན་ཆོས་ཀྱི་དབྱིངས་ཀྱི་ཚུལ་རབ་ ༄༅། །ཏུ་སྣང་བའི་རིན་པོ་ཆེའི་དྲ་བས་ཀུན་ནས་ཡོག་པའི་ལུས་དང་ལྡན་པ། ཉི་ཟླ་དང༌། གཟའ་སྐར་དང༌། རྒྱུ་སྐར་ཐམས་ཅད་ཀྱི་གཟུགས་བརྙན་ ཡོངས་སུ་སྟོན་པའི་ལུས་དང་ལྡན་པ། བསམ་པ་ཇི་ལྟ་བ་བཞིན་དུ་སེམས་ཅན་གྱིས་རྣམ་པར་དམིགས་པར་སྟོན་པའི་ལུས་དང་ལྡན་པ། སེམས་ཅན་ཐམས་ཅད་ཀྱི་ ལུས་ཀྱི་དབྱིབས་དང་འདྲ་བར་རང་གི་ལུས་རྣམ་པར་དམིགས་པར་བྱེད་པའི་ལུས་དང་ལྡན་པ། ཁ་དོག་རྒྱ་མཚོ་ཡངས་པ་མཐའ་དང་དབུས་མེད་པ་རྣམ་པར་དམིགས་ པར་སྟོན་པའི་ལུས་དང་ལྡན་པ། སྤྱོད་ལམ་ཐམས་ཅད་ལ་རྣམ་པར་སྤྱོད་པའི་ཚུལ་ཡོངས་སུ་སྟོན་པའི་ལུས་དང་ལྡན་པ། སྒོ་ཀུན་ཏུ་མངོན་པར་བལྟས་པར་རྣམ་པར་ དམིགས་པར་བྱེད་པའི་ལུས་དང་ལྡན་པ། ཆོས་ཀྱི་སྤྲིན་གྱི་འབྲུག་སྒྲ་ཀུན་ཏུ་སྒྲོག་ཅིང་རྣམ་པར་འཕྲུལ་པ་སྣ་ཚོགས་ཀྱིས་ཕྱོགས་ཐམས་ཅད་རྒྱས་པར་བཀང་སྟེ་ འགྲོ་བ་ཐམས་ཅད་ལ་མངོན་དུ་གནས་པའི་ལུས་དང་ལྡན་པ། དུས་ཐམས་ཅད་དུ་འགྲོ་བ་ཐམས་ཅད་ཀྱི་དོན་ལ་མངོན་དུ་བལྟས་པར་ནམ་མཁའི་དབྱིངས་ཀྱིས་གློ་ བའི་ལུས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཞབས་ལ་འདུད་ཅིང་ཕྱག་འཚལ་བའི་ལུས་དང་ལྡན་པ། སེམས་ཅན་ཐམས་ཅད་ཀྱི་དགེ་བའི་རྩ་བ་ བསགས་པ་ལ་གཅེས་ཤིང་སྔོན་དུ་འགྲོ་བའི་ལུས་དང་ལྡན་པ། དེ་བཞིན་གཤེགས་པ་ཐམས་ཅད་ལས་མངོན་དུ་ཆོས་ཀྱི་སྤྲིན་ཡང་དག་པར་ལེན་ཅིང་ཡོངས་སུ་འཛིན་ པའི་སྨོན་ལམ་གྲུབ་ཅིང་ཡོངས་སུ་རྫོགས་པར་བྱ་བའི་སེམས་ལས་ཕྱིར་ཕྱོགས་སུ་མ་གྱུར་ཅིང་དྲན་པས་ཡོངས་སུ་འཛིན་པའི་ལུས་དང་ལྡན་པ། མཐའ་དང་དབུས་མེད་ པའི་འོད་ཀྱིས་ཕྱོགས་དང་ཕྱོགས་མཚམས་ཐམས་ཅད་རྒྱས་པར་འགེངས་པའི་ལུས་དང་ལྡན་པ། འགྲོ་བ་ཐམས་ཅད་ཀྱི་མུན་པ་རྣམ་པར་སེལ་བའི་ཆོས་ཀྱི་སྒྲོན་མའི་ འོད་ཀུན་ཏུ་འགྱེད་ཅིང་སྣང་བ་ཡོངས་སུ་སྟོན་པའི་ལུས་དང་ལྡན་པ། ཆོས་སྒྱུ་མའི་རྣམ་པ་ལྟ་བུའི་ཡེ་ཤེས་ཀྱི་ལུས་དྲི་མ་མེད་པ་རབ་ཏུ་སྟོན་པའི་ལུས་དང་ལྡན་པ། ཆོས་ཀྱི་ ལུས་མུན་པ་དང་རྡུལ་དུ་བྲལ་བ་རབ་ཏུ་སྟོན་པའི་ལུས་དང་ལྡན་པ། ཆོས་ཉིད་སྒྱུ་མ་ལྟ་བུ་ལས་བྱུང་བའི་ལུས་དང་ལྡན་པ། ཆོས་ཉིད་རབ་ཏུ་རྟོགས་པས་མུན་པ་མེད་པའི་སེམས་ དང་ལྡན་པ། ཡེ་ཤེས་ཀྱི་སྣང་བ་སྒོ་ཀུན་ཏུ་གསལ་བ་རབ་ཏུ་ཐོབ་པ་ཤིན་ཏུ་ནད་མེད་ཅིང་གདུང་བ་མེད་པའི་ཡིད་ཀྱི་ལུས་དང་ལྡན་པ། ཆོས་ཀྱི་སྐུ་མི་ཤིགས་ཤིང་བརྟན་པ་དང་ ལྡན་པའི་དབྱིངས་ལས་བྱུང་བ། དེ་བཞིན་གཤེགས་པའི་བྱིན་གྱི་རླབས་གནས་མེད་པའི་རང་བཞིན་ཀུན་ནས་ཉོན་མོངས་པ་མེད་པའི་དང༌། དྲི་མ་མེད་པའི་ཆོས་ཉིད་ཀྱི་ལུས་ ༄༅། །རྣམ་པར་དག་པའི་ལུས་དང་ལྡན་པ་དེ་རིན་པོ་ཆེའི་རྒྱལ་པོ་འགྲོ་བ་ཐམས་ཅད་ཀྱི་གནས་རབ་ཏུ་སྣང་བའི་སྙིང་པོ་ཅན་གྱི་བསྟན་ལ་འདུག་པ་མཐོང་ ངོ༌། །དེས་དེ་མཐོང་ནས་སྤྱི་བོས་བཏུད་དེ་མཐོང་བར་བྱ་བའི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་རྗེས་སུ་དྲན་པར་བྱས་ནས་སའི་གཞི་ལས་བཏུད་དེ་རྒྱང་ བཅད་པ་ཞིག་ཏུ་མངོན་པར་བཏུད་དོ། །དེ་ནས་ཚོང་དཔོན་གྱི་བུ་ནོར་བཟང་སའི་གཞི་དེ་ལས་ལངས་ཏེ་ཐལ་མོ་སྦྱར་ནས་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་ སྨོན་ལམ་ལ་བརྩོན་པའི་འོད་དེའི་ལུས་ལ་བལྟས་པ་དང༌། འདུ་ཤེས་རྣམ་པར་དག་པ་བཅུ་ཐོབ་པར་གྱུར་ཏེ། དེ་དག་ཐོབ་པས་དགེ་བའི་བཤེས་གཉེན་ཐམས་ཅད་ དང་སྐལ་པ་མཉམ་པ་རབ་ཏུ་ཐོབ་པར་གྱུར་ཏོ། །བཅུ་གང་ཞེ་ན། འདི་ལྟ་སྟེ། ཐམས་ཅད་མཁྱེན་པ་ཉིད་དུ་བརྩམས་པའི་བརྩོན་འགྲུས་ལ་དམིགས་པ་ཐམས་ཅད་དུ་ གནས་པར་བྱ་བའི་ཕྱིར་དགེ་བའི་བཤེས་གཉེན་རྣམས་ལ་རང་གི་སེམས་ཀྱི་འདུ་ཤེས་རབ་ཏུ་ཐོབ་པར་གྱུར་ཏོ། །དགེ་བའི་བཤེས་གཉེན་བསྙེན་བཀུར་ཞིང་དགེ་ བའི་རྩ་བ་ཡངས་པ་ཡོངས་སུ་སྒྲུབ་པ་གྲུབ་པར་བྱ་བའི་ཕྱིར་རང་གི་ལས་ཀྱི་རྣམ་པར་སྨིན་པ་རྣམ་པར་དག་པའི་རང་བཞིན་གྱི་འདུ་ཤེས་རབ་ཏུ་ཐོབ་བོ། །སྨོན་ལམ་ཐམས་ ཅད་ཀྱིས་བརྒྱན་པའི་སྤྱོད་པ་ལ་ཡང་དག་པར་གནས་པར་བྱ་བའི་ཕྱིར་བྱང་ཆུབ་སེམས་དཔའི་སྤྱོད་པའི་རྒྱན་གྱི་འདུ་ཤེས་རབ་ཏུ་ཐོབ་བོ། །དགེ་བའི་བཤེས་གཉེན་ཐམས་ ཅད་ཀྱི་གདམས་ངག་གི་ལམ་ལ་ནན་ཏན་དུ་བྱ་བའི་ཕྱིར་སངས་རྒྱས་ཀྱི་ཆོས་ཐམས་ཅད་རབ་ཏུ་སྒྲུབ་པའི་འདུ་ཤེས་རབ་ཏུ་ཐོབ་བོ། །སངས་རྒྱས་ཐམས་ཅད་ཀྱི་ཡུལ་དུ་གྱུར་ པའི་ཆོས་བླ་ན་མེད་པ་ལ་རྣམ་པར་སྤྱོད་པའི་སྣང་བ་ཡོངས་སུ་མཐོང་བར་བྱ་བའི་ཕྱིར་ཉམས་སུ་མྱོང་བ་བ་སྐྱེད་པའི་འདུ་ཤེས་རབ་ཏུ་ཐོབ་བོ། །ཀུན་ཏུ་བཟང་པོའི་སྤྱོད་པས་ འབྱུང་བའི་སྨོན་ལམ་དང༌། སྤྱོད་པ་རྣམ་པར་དག་པར་བྱ་བའི་ཕྱིར་འབྱུང་བ་གཅིག་གི་འདུ་ཤེས་རབ་ཏུ་ཐོབ་པར་གྱུར་ཏོ། །དགེ་བའི་ཆོས་ཡོངས་སུ་བསགས་པ་ཐམས་ ཅད་རྣམ་པར་འཕེལ་བར་བྱ་བའི་ཕྱིར་ཐམས་ཅད་མཁྱེན་པའི་བསོད་ནམས་རྒྱ་མཚོའི་འབྱུང་གནས་ཀྱི་འདུ་ཤེས་རབ་ཏུ་ཐོབ་བོ། །སངས་རྒྱས་ཀྱི་བྱང་ཆུབ་ཏུ་ཐམས་ཅད་ མཁྱེན་པའི་ཡེ་ཤེས་ལ་བརྩོན་འགྲུས་ཀྱི་ཤུགས་ཡོངས་སུ་འཕེལ་བར་བྱ་བའི་ཕྱིར་དགེ་བའི་ཆོས་ཡོངས་སུ་མ་རྫོགས་པ་ཡོངས་སུ་རྫོགས་པར་བྱེད་པ་དང༌། ཡང་དག་ པར་འཕེལ་བར་བྱེད་པ་དང༌། ཡོངས་སུ་སྐྱོང་བའི་འདུ་ཤེས་རབ་ཏུ་ཐོབ་པར་གྱུར་ཏོ། །སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ ༄༅། །དགེ་བའི་རྩ་བ་ཐམས་ཅད་ཡོངས་སུ་རྫོགས་པའི་འདུ་ཤེས་རབ་ཏུ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཐམས་ཅད་ཀྱི་ཆོས་ལ་དབང་བསྒྱུར་ བར་རབ་ཏུ་གནས་པར་བྱ་བའི་ཕྱིར་དགེ་བའི་བཤེས་གཉེན་རྣམས་ལ་དོན་ཐམས་ཅད་ཡོངས་སུ་སྒྲུབ་པའི་འདུ་ཤེས་རབ་ཏུ་ཐོབ་སྟེ། འདུ་ཤེས་རྣམ་པར་དག་པ་བཅུ་ པོ་དེ་དག་རབ་ཏུ་ཐོབ་པར་གྱུར་ཏོ། །དེ་དག་ཐོབ་པས་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་སྨོན་ལམ་ལ་བརྩོན་པའི་འོད་སྣང་བ་ལས་བྱང་ཆུབ་སེམས་ དཔའ་དང་སྐལ་པ་མཐུན་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏེ། འདི་ལྟར་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་དུས་གསུམ་ རྗེས་སུ་དྲན་པའི་ཚུལ་ལ་དྲན་པའི་སྐལ་བ་མཉམ་པ་དང༌། ཆོས་རྒྱ་མཚོའི་ཚུལ་ཐམས་ཅད་ཐ་མ་དད་པར་ཁོང་དུ་ཆུད་པར་བྱ་བ་ལ་བློ་གྲོས་ཀྱི་སྐལ་པ་མཉམ་པ་དང༌། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་དཀྱིལ་འཁོར་རིགས་པས་རྗེས་སུ་ཤེས་པར་བྱ་བའི་བྱེ་བྲག་དང༌། ཚུལ་ཐ་དད་པར་མཁས་པ་ལ་རིག་པའི་ སྐལ་པ་མཉམ་པ་དང༌། བློ་ནམ་མཁའ་དང་མཉམ་པས་དུས་གསུམ་ཐམས་ཅད་ཀྱི་ཚུལ་རྒྱ་མཚོ་སྣང་བ་རབ་ཏུ་ཐོབ་པར་བྱ་བའི་ཕྱིར་བློའི་སྐལ་པ་མཉམ་པ་དང་། བྱང་ཆུབ་སེམས་དཔའ་ཐམས་ཅད་ཀྱི་དབང་པོ་རྒྱ་མཚོ་ཤེས་པའི་སྣང་བ་རབ་ཏུ་ཐོབ་པར་བྱ་བའི་ཕྱིར་དབང་པོ་རྣམ་པར་དག་པའི་སྐལ་པ་མཉམ་པ་དང༌། རྣམ་པ་ཐམས་ཅད་དུ་སེམས་ ཅན་ཡོངས་སུ་བསྡུ་བའི་རྒྱན་གྱིས་རྣམ་པར་བརྒྱན་པའི་བྱང་ཆུབ་སེམས་དཔའི་ལམ་གྱི་ཡོན་ཏན་ལ་ནན་ཏན་དུ་བྱ་བའི་རྒྱན་གྱིས་ལམ་ཁོང་དུ་ཆུད་པར་བྱ་བའི་ཕྱིར་སེམས་ རྣམ་པར་དག་པའི་སྐལ་པ་མཉམ་པ་དང༌། དེ་བཞིན་གཤེགས་པའི་ཡེ་ཤེས་ཀྱི་སྤྱོད་ཡུལ་སྣང་བ་རབ་ཏུ་ཐོབ་པར་བྱ་བའི་ཕྱིར་སྤྱོད་ཡུལ་གྱི་སྐལ་པ་མཉམ་པ་དང༌། ཐམས་ ཅད་མཁྱེན་པའི་ཚུལ་རྒྱ་མཚོ་ལ་འཇུག་པའི་ལམ་སྣང་བ་རྣམ་པ་ཐམས་ཅད་རབ་ཏུ་ཐོབ་པར་བྱ་བའི་ཕྱིར་ཚུལ་གྱི་རྗེས་སུ་འབྲང་བའི་སྐལ་པ་མཉམ་པ་དང༌། ཆོས་ཐམས་ཅད་ ཀྱི་རང་བཞིན་ཤེས་ཤིང་ཁོང་དུ་ཆུད་པ་རབ་ཏུ་ཐོབ་པར་བྱ་བའི་ཕྱིར་དོན་ཁོང་དུ་ཆུད་པའི་སྐལ་པ་མཉམ་པ་དང༌། ཆོས་ཀྱི་ཚུལ་རྒྱ་མཚོ་ཐམས་ཅད་ལ་ཆོས་ལ་རྣམ་པར་སྤྱོད་པའི་ སྐལ་པ་མཉམ་པ་དང༌། སྒྲིབ་པ་ཐམས་ཅད་ཀྱི་རི་རྣམ་པར་གཏོར་བའི་ཕྱིར་མི་འཇིགས་པའི་སྐལ་པ་མཉམ་པ་དང༌། བསམ་པ་ཇི་ལྟ་བ་བཞིན་དུ་འགྲོ་བ་རྣམས་ལ་རྣམ་པ་ཐ་དད་ པར་ཡོངས་སུ་བསྟན་པའི་མཚན་དང་དཔེ་བྱད་བཟང་པོས་རྣམ་པར་བྲིས་པའི་ལུས་རྣམ་པར་དག་པ་རབ་ཏུ་ཐོབ་པར་བྱ་བའི་ཕྱིར་གཟུགས་ཀྱི་ལུས་རྣམ་པར་དག་པའི་སྐལ་པ་ ༄༅། །མཉམ་པ་དང༌། བྱང་ཆུབ་སེམས་དཔའི་སྟོབས་ཡོངས་སུ་རྫོགས་པས་ཐམས་ཅད་མཁྱེན་པ་ཉིད་དུ་དམིགས་པ་རྣམ་པར་འཕེལ་བར་བྱ་བའི་ཕྱིར་ སྟོབས་ཀྱི་སྐལ་པ་མཉམ་པ་དང༌། སེམས་དང་བསམ་པའི་ནམ་མཁའ་ཡོངས་སུ་དག་པར་བྱ་བའི་ཕྱིར་མི་འཇིགས་པའི་སྐལ་པ་མཉམ་པ་དང༌། བསྐལ་པ་ཐམས་ ཅད་དུ་བྱང་ཆུབ་སེམས་དཔའི་སྤྱོད་པ་ལ་གནས་པས་མི་སྐྱོ་བ་རབ་ཏུ་ཐོབ་པར་བྱ་བའི་ཕྱིར་བཙོན་འགྲུས་ཀྱི་སྐལ་པ་མཉམ་པ་དང༌། ཆོས་ཐམས་ཅད་ལ་སྒྲིབ་པ་མེད་ པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཕྱིར་སྤོབས་པའི་སྐལ་པ་མཉམ་པ་དང༌། འགྲོ་བ་ཐམས་ཅད་ལས་མངོན་པར་འཕགས་པའི་ལུས་ཡོངས་སུ་དག་པར་ བྱ་བའི་ཕྱིར་ཟིལ་གྱིས་མི་ནོན་པའི་སྐལ་པ་མཉམ་པ་དང༌། འཁོར་གྱི་དཀྱིལ་འཁོར་ཐམས་ཅད་མངོན་པར་དགའ་བར་བྱ་བའི་ཚིགས་ཡོངས་སུ་དག་པར་བྱ་བའི་ ཕྱིར་མ་ཞུམ་མི་དམའ་བའི་སྐལ་པ་མཉམ་པ་དང༌། ཆོས་ཀྱི་ཚུལ་རྒྱ་མཚོ་ཐམས་ཅད་ཀྱི་སྒྲ་རབ་ཏུ་བསྒྲག་པའི་ཕྱིར་དབྱངས་ཀྱི་སྐལ་པ་མཉམ་པ་དང༌། འགྲོ་བ་ ཐམས་ཅད་ཀྱི་ཚིག་རྣམ་པར་དམིགས་པའི་ཐ་སྙད་དང༌། ཚུལ་རྒྱ་མཚོ་ལ་དབྱངས་ཀྱི་ཡན་ལག་རྣམ་པར་དག་པའི་སྐལ་པ་མཉམ་པ་དང༌། དེ་བཞིན་གཤེགས་ པའི་གདམས་ངག་གི་ཡོན་ཏན་ཁོང་དུ་ཆུད་པ་རྣམ་པར་དག་པར་བྱ་བ་ལ་ཡོན་ཏན་རྣམ་པར་དག་པའི་སྐལ་པ་མཉམ་པ་དང༌། ཁ་ན་མ་ཐོ་བ་མེད་པའི་ལས་རྣམ་པར་སྨིན་ པ་ཡོངས་སུ་དག་པར་བྱ་བའི་ཕྱིར་ཆོས་དང་ལས་ཀྱི་རྒྱུད་དུ་མི་འགལ་བའི་སྐལ་པ་མཉམ་པ་དང༌། སངས་རྒྱས་བྱུང་བ་ཐམས་ཅད་ཀྱི་ཆོས་ཀྱི་འཁོར་ལོ་རབ་ཏུ་བསྐོར་བའི་ ཕྱིར་མཆོད་སྦྱིན་གྱི་ཆོས་བཟང་པོ་ལ་རབ་ཏུ་གནས་པའི་སྐལ་པ་མཉམ་པ་དང༌། དེ་བཞིན་གཤེགས་པ་ཐམས་ཅད་ཀྱི་ཡུལ་དང་ཡེ་ཤེས་ལ་ཡང་དག་པར་གནས་པར་བྱ་ བའི་ཕྱིར་ཚངས་པའི་སྤྱོད་པ་རྣམས་པར་དག་པའི་སྐལ་པ་མཉམ་པ་དང༌། བྱམས་པའི་ཚུལ་སྣ་ཚོགས་ཀྱིས་སྐད་ཅིག་རེ་རེ་ལ་སེམས་ཅན་རྒྱ་མཚོ་ཐམས་ཅད་དུ་རྒྱས་པར་དགང་ བར་བྱ་བའི་ཕྱིར་བྱམས་པ་ཆེན་པོའི་སྐལ་པ་མཉམ་པ་དང༌། སེམས་ཅན་གྱི་ཁམས་ཐམས་ཅད་ཡོངས་སུ་སྐྱོབ་པའི་ཆོས་ཀྱི་སྤྲིན་གྱི་ཆར་མངོན་པར་དབབ་པའི་ཕྱིར་སྙིང་རྗེ་ ཆེན་པོའི་ཚུལ་རྒྱ་མཚོ་ལ་འཇུག་པའི་སྐལ་པ་མཉམ་པ་དང༌། སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་ཐབས་ཀྱི་རྒྱུད་དུ་སྐལ་པ་མཉམ་པར་བྱ་བའི་ཕྱིར་ལུས་ ཀྱི་ལས་ཀྱི་སྐལ་པ་མཉམ་པ་དང༌། ཆོས་ཐམས་ཅད་བརྗོད་ཅིང་སྨོས་པ་ལ་ངག་གི་ལས་རྣམ་པར་དག་པའི་སྐལ་པ་མཉམ་པ་དང༌། སེམས་ཅན་ཐམས་ཅད་ཀྱི་སེམས་ལ་ ༄༅། །ཐམས་ཅད་མཁྱེན་པ་ཉིད་དུ་དམིགས་པ་ཉེ་བར་བསྒྲུབ་པའི་ཕྱིར་ཡིད་ཀྱི་ལས་ཀྱི་སྐལ་པ་མཉམ་པ་དང༌། སངས་རྒྱས་ཀྱི་ཞིང་ཐམས་ཅད་ལ་ རྒྱན་རྣམ་པ་སྣ་ཚོགས་ཐམས་ཅད་ཀྱིས་རབ་ཏུ་བརྒྱན་པའི་སྐལ་པ་མཉམ་པ་དང༌། སངས་རྒྱས་འབྱུང་བརྒྱ་མཚོ་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་ སྤྱན་སྔར་འགྲོ་བའི་སྐལ་པ་མཉམ་པ་དང༌། དེ་བཞིན་གཤེགས་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་གསོལ་བ་གདབ་པའི་སྐལ་པ་མཉམ་པ་དང༌། དེ་ བཞིན་གཤེགས་པ་ཐམས་ཅད་ལ་དུས་མ་ལུས་པར་མཆོད་པ་ཐམས་ཅད་ཀྱིས་རིམ་གྲོ་བྱ་བའི་ཕྱིར་མཆོད་པས་རིམ་གྲོར་བྱ་བའི་སྐལ་པ་མཉམ་པ་དང༌། སེམས་ ཅན་གྱི་ཁམས་ཐམས་ཅད་དུ་སེམས་ཅན་ཡོངས་སུ་སྨིན་པར་བྱ་བ་དང་གདུལ་བའི་སྐལ་པ་མཉམ་པ་དང༌། ཆོས་ཀྱི་ཚུལ་ཐམས་ཅད་ལ་སྣང་བ་རབ་ཏུ་ཐོབ་པའི་ སྐལ་པ་མཉམ་པ་དང༌། ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་ཏིང་ངེ་འཛིན་རབ་ཏུ་ཐོབ་པའི་སྐལ་པ་མཉམ་པ་དང༌། སངས་རྒྱས་ཀྱི་ཞིང་རྒྱ་མཚོ་ཐམས་ཅད་ དུ་བྱང་ཆུབ་སེམས་དཔའི་སྤྱོད་པ་དང་རྣམ་པར་འཕྲུལ་པས་རྒྱས་པར་དགང་བའི་ཕྱིར་ཀུན་ཏུ་རྒྱས་པར་དགང་བའི་སྐལ་པ་མཉམ་པ་དང༌། བྱང་ཆུབ་སེམས་དཔའ་ ཐམས་ཅད་ཀྱི་རྣམ་པར་འཕྲུལ་པའི་ཚུལ་རྒྱ་མཚོ་ལ་བྱང་ཆུབ་སེམས་དཔའི་རྣམ་པར་སྤྱོད་པའི་སྐལ་པ་མཉམ་པ་དང༌། བྱང་ཆུབ་སེམས་དཔའི་སྤྱོད་པ་ལ་གནས་པ་ལ་ འཁོར་གྱི་སྐལ་པ་མཉམ་པ་དང༌། འཇིག་རྟེན་གྱི་ཁམས་ཐམས་ཅད་ཤིན་ཏུ་ཕྲ་བར་འཇུག་པ་ལ་འཇུག་པའི་སྐལ་པ་མཉམ་པ་དང༌། སངས་རྒྱས་ཀྱི་ཞིང་ཤིན་ཏུ་ཡངས་པ་ ཐམས་ཅད་དུ་སེམས་རྣམ་པར་ཕྱེ་བའི་སྐལ་པ་མཉམ་པ་དང༌། སངས་རྒྱས་ཀྱི་ཞིང་རྒྱ་མཚོ་ཐམས་ཅད་ལ་འཇུག་པ་རྣམ་པ་ཐ་དད་པ་ཁོང་དུ་ཆུད་པར་བྱ་བ་ལ་ཁོང་དུ་ཆུད་ པ་རྣམ་པ་ཐ་དད་པའི་སྐལ་པ་མཉམ་པ་དང༌། སངས་རྒྱས་ཀྱི་ཞིང་ཐམས་ཅད་རྣམ་པར་ཕྱེ་བ་ཡེ་ཤེས་མཐའ་ཡས་པས་རྣམ་པར་དམིགས་པར་བྱ་བ་ལ་ཚུལ་འབྱམས་ ཀླས་པས་ཀུན་ཏུ་རྒྱས་པར་དགང་བའི་སྐལ་པ་མཉམ་པ་དང༌། སངས་རྒྱས་ཀྱི་ཞིང་ཐམས་ཅད་དུ་མངོན་པར་འབྱུང་བའི་སྐལ་པ་མཉམ་པ་དང༌། ཕྱོགས་ཐམས་ཅད་ རྒྱས་པར་དགང་བར་ཡང་དག་པར་གཞོལ་བ་ཐོགས་པ་མེད་ཅིང་ཕྱིར་མི་ལྡོག་པར་བྱ་བའི་ཕྱིར་མི་ལྡོག་པའི་སྐལ་པ་མཉམ་པ་དང༌། སངས་རྒྱས་ཐམས་ཅད་ཀྱི་ སྙིང་པོ་བྱང་ཆུབ་ཏུ་རྣམ་པར་འཚང་རྒྱ་བའི་ཡེ་ཤེས་ཀྱི་དཀྱིལ་འཁོར་སྣང་བ་རབ་ཏུ་ཐོབ་པར་བྱ་བའི་ཕྱིར་མུན་པ་རྣམ་པར་སེལ་བའི་སྐལ་པ་མཉམ་པ་དང༌། སངས་རྒྱས་ ༄༅། །ཐམས་ཅད་ཀྱི་འཁོར་གྱི་དཀྱིལ་འཁོར་རྒྱ་མཚོར་རྗེས་སུ་ཕྱིན་པའི་སྐལ་པ་མཉམ་པ་དང༌། སངས་རྒྱས་ཀྱི་ཞིང་བརྗོད་དུ་མེད་པའི་དེ་བཞིན་ གཤེགས་པ་མཆོད་ཅིང་རིམ་གྲོ་བྱ་བའི་སྦྱོར་བ་ལ་སངས་རྒྱས་ཀྱི་ཞིང་ཐམས་ཅད་ལུས་ཀྱི་དྲ་བས་རྒྱས་པར་དགང་བའི་སྐལ་པ་མཉམ་པ་དང༌། ཆོས་ཀྱི་ཚུལ་རྒྱ་ མཚོ་རྗེས་སུ་རྒྱུ་བ་དེ་དང་དེ་དག་ལ་ཡེ་ཤེས་མངོན་སུམ་གྱི་སྐལ་པ་མཉམ་པ་དང༌། རྗེས་སུ་མཐུན་པའི་ཆོས་ཀྱི་ཚུལ་ཐམས་ཅད་མངོན་དུ་བྱ་བའི་སྦྱོར་བ་ལ་ནན་ཏན་ གྱི་སྐལ་པ་མཉམ་པ་དང༌། ཆོས་ཀྱི་མོས་པ་ཤིན་ཏུ་ཤས་ཆེ་བའི་བརྩམས་པ་རྣམ་པར་དག་པར་བྱ་བའི་ཕྱིར་བཙལ་བའི་སྐལ་པ་མཉམ་པ་དང༌། ལུས་དང་ངག་ དང་ཡིད་ཀྱི་ལས་ཀྱིས་སངས་རྒྱས་ཀྱི་ཡོན་ཏན་གྱི་རྒྱན་ཡོངས་སུ་སྒྲུབ་པ་ལ་རྣམ་པར་དག་པའི་སྐལ་པ་མཉམ་པ་དང༌། ཉམ་ང་བའི་རྟོག་པ་མེད་པའི་སེམས་ཀྱི་ དཀྱིལ་འཁོར་གྱིས་ཆོས་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་ཡོངས་སུ་དག་པར་བྱ་བའི་ཕྱིར་ཡིད་ཀྱི་སྐལ་པ་མཉམ་པ་དང༌། དགེ་བའི་རྩ་བ་ཐམས་ཅད་ཀྱི་ཚོགས་ ཡང་དག་པར་བརྩམས་པ་མཐར་ཕྱིན་པར་བྱ་བའི་སྦྱོར་བ་ལ་བརྩོན་འགྲུས་བརྩམས་པའི་སྐལ་པ་མཉམ་པ་དང༌། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་ སུ་རྫོགས་པར་བྱ་བ་ལ་སྤྱོད་པའི་རྒྱན་གྱི་སྐལ་པ་མཉམ་པ་དང༌། ཆོས་ཐམས་ཅད་ཀྱི་མཚན་མ་ཁོང་དུ་ཆུད་པར་བྱ་བ་ལ་ཆགས་པ་མེད་པར་རྣམ་པར་སྤྱད་པའི་སྐལ་པ་ མཉམ་པ་དང༌། ཆོས་ལ་རྣམ་པར་སྤྱོད་པའི་ཡེ་ཤེས་ཀྱིས་རྣམ་པར་འཕྲུལ་པ་དེ་དང་དེ་དག་ཏུ་ཐབས་མཁས་པའི་ཚུལ་གྱི་སྐལ་པ་མཉམ་པ་དང༌། བསམ་པ་ཇི་ལྟ་བ་ བཞིན་དུ་སེམས་ཅན་རྣམས་ལ་ཡུལ་བསྟན་པས་ཡང་དག་པར་བསྐུལ་བའི་ཕྱིར་སྐྱེ་མཆེད་རྣམ་པར་དག་པའི་སྐལ་པ་མཉམ་པ་དང༌། ཆོས་ཐམས་ཅད་སྒོམ་པ་དང༌། རྣམ་པར་སྒོམ་པ་རབ་ཏུ་ཐོབ་པར་བྱ་བའི་ཕྱིར་བྱང་ཆུབ་སེམས་དཔའི་ཏིང་ངེ་འཛིན་གྱི་སྒོ་རབ་ཏུ་ཐོབ་པར་བྱ་བའི་སྐལ་པ་མཉམ་པ་དང༌། དེ་བཞིན་གཤེགས་པ་ཐམས་ ཅད་ཀྱི་བྱིན་གྱི་རླབས་ཀྱི་སྐལ་པ་མཉམ་པ་དང༌། སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ཀྱིས་རབ་ཏུ་ཐོབ་པར་བྱ་བ་ལས་ཡོངས་སུ་གནན་པའི་སྐལ་པ་ མཉམ་པ་དང༌། བྱང་ཆུབ་སེམས་དཔའི་རྣམ་པར་དགོད་པ་ཐམས་ཅད་ལ་རབ་ཏུ་གནས་པའི་སྐལ་པ་མཉམ་པ་དང༌། སངས་རྒྱས་ཐམས་ཅད་ཀྱིས་ལུང་བསྟན་པ་ལ་ ཡོངས་སུ་བསྟན་པའི་སྐལ་པ་མཉམ་པ་དང༌། སྐད་ཅིག་གཅིག་གི་ཏིང་ངེ་འཛིན་རྒྱ་མཚོའི་ཚུལ་ཐམས་ཅད་ལ་ཏིང་ངེ་འཛིན་གྱི་སྐལ་པ་མཉམ་པ་དང༌། སངས་རྒྱས་ཀྱི་ ༄༅། །འཕྲིན་ལས་མཚན་ཉིད་སྣ་ཚོགས་ལ་ཏིང་ངེ་འཛིན་རྣམ་པར་དགོད་པའི་སྐལ་པ་མཉམ་པ་དང༌། རྗེས་སུ་དྲན་པའི་དམིགས་པའི་ཚུལ་རྒྱ་མཚོ་ ཐམས་ཅད་ལ་རྗེས་སུ་དྲན་པའི་སྐལ་པ་མཉམ་པ་དང༌། བྱང་ཆུབ་སེམས་དཔའི་བྱ་བ་ལ་ཕྱི་མའི་མཐའི་བསྐལ་པའི་མུར་ཐུག་པར་ཞེ་ནོན་པ་ལ་བྱང་ཆུབ་སེམས་ དཔས་སྤྱད་པའི་སྐལ་པ་མཉམ་པ་དང༌། སངས་རྒྱས་ཀྱི་ཡེ་ཤེས་ཚད་མེད་པ་ལ་མོས་ཤིང་དགའ་བའི་ཤུགས་རྒྱ་མཚོ་རྣམ་པར་འཕེལ་བར་བྱ་བའི་ཕྱིར་མོས་པའི་སྐལ་ པ་མཉམ་པ་དང༌། སྒྲིབ་པའི་རི་ཐམས་ཅད་ལ་རྣམ་པར་ཟློག་པའི་སྐལ་པ་མཉམ་པ་དང༌། སངས་རྒྱས་ཀྱི་ཡེ་ཤེས་ཀྱི་ཚོགས་མཐའ་ཡས་པ་ཡོངས་སུ་བསྒྲུབ་པའི་ ཕྱིར་ཕྱིར་མི་ཟློག་པའི་ཡེ་ཤེས་ཀྱི་སྐལ་པ་མཉམ་པ་དང༌། སེམས་ཅན་ཐམས་ཅད་ཡོངས་སུ་སྦྱིན་པར་བྱ་བ་དང༌། གདུལ་བའི་དུས་སུ་སྐྱེ་བའི་སྐལ་པ་དང་མཉམ་ པ་དང༌། ཐམས་ཅད་མཁྱེན་པ་ཉིད་ཀྱི་ཚུལ་གྱི་སྒོ་ལ་རྣམ་པར་སྤྱོད་པའི་སྐལ་པ་མཉམ་པ་དང༌། ཆོས་ཀྱི་དབྱིངས་ཀྱི་ཚུལ་གྱིས་ཁྱུ་མཆོག་གི་མཐུ་ཕྱུང་བའི་ཡུལ་ལ་རབ་ ཏུ་འཇུག་པར་བྱ་བའི་ཕྱིར་ཡུལ་གྱི་སྐལ་པ་མཉམ་པ་དང༌། གཞི་ཐམས་ཅད་ཡོངས་སུ་ཆོམ་པའི་སེམས་སུ་བྱ་བའི་ཕྱིར་གཞི་མེད་པའི་སྐལ་པ་མཉམ་པ་དང༌། ཆོས་མཉམ་པ་ཉིད་ཀྱི་ཡེ་ཤེས་ལ་འཇུག་པར་བྱ་བའི་ཕྱིར་ཆོས་བསྟན་པའི་སྐལ་པ་མཉམ་པ་དང༌། སངས་རྒྱས་ཐམས་ཅད་ཀྱི་བྱིན་གྱི་རླབས་རང་གི་ལུས་ཀྱིས་ཡང་ དག་པར་གནོན་པའི་ཕྱིར་བརྩོན་པའི་སྐལ་པ་མཉམ་པ་དང༌། འཇིག་རྟེན་ཐམས་ཅད་ཀྱིས་ཁོང་དུ་ཆུད་པར་བྱ་བའི་ཕྱིར་ནན་ཏན་གྱི་ཚུལ་ལ་མངོན་པར་ཤེས་པའི་སྐལ་པ་ མཉམ་པ་དང༌། ཕྱོགས་ཐམས་ཅད་ཀྱི་ཞིང་རྒྱ་མཚོར་འཇུག་པར་བྱ་བ་ལ་མངོན་པར་འདུ་བྱ་བ་མེད་པའི་རྫུ་འཕྲུལ་རབ་ཏུ་ཐོབ་པའི་སྐལ་པ་མཉམ་པ་དང༌། གཟུངས་རྒྱ་ མཚོ་ཐམས་ཅད་ཀྱི་སྣང་བ་རབ་ཏུ་ཐོབ་པར་བྱ་བ་ལ་གཟུངས་ཀྱི་སའི་སྐལ་པ་མཉམ་པ་དང༌། མདོ་སྡེའི་ཆོས་ཀྱི་རྣམ་གྲངས་ཐམས་ཅད་ལ་སངས་རྒྱས་ཐམས་ཅད་ཀྱི་ཆོས་ ཀྱི་འཁོར་ལོའི་དགོངས་པ་ཁོང་དུ་ཆུད་པར་བྱ་བའི་སྐལ་པ་མཉམ་པ་དང༌། ནམ་མཁའི་དབྱིངས་ལྟ་བུའི་ཆོས་ཀྱི་ཚུལ་ཐམས་ཅད་ཁོང་དུ་ཆུད་པར་བྱ་བའི་ཕྱིར་ཆོས་ཟབ་མོ་ ལ་འཇུག་པའི་སྐལ་པ་མཉམ་པ་དང༌། འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་དུ་སྣང་བར་བྱ་བའི་སྐལ་པ་མཉམ་པ་དང༌། བསམ་པ་ཇི་ལྟ་བ་བཞིན་དུ་ འགྲོ་བས་རྣམ་པར་དམིགས་པར་བསྟན་པ་ལ་མངོན་པར་གསལ་བའི་སྐལ་པ་མཉམ་པ་དང༌། ཞིང་གི་བྱིན་གྱི་རླབས་དང༌། རྣམ་པར་འཕྲུལ་པ་སེམས་ཅན་ཡོངས་སུ་ ༄༅། །བསྟན་པའི་ཕྱིར་རབ་ཏུ་བསྐྱོད་པའི་སྐལ་པ་མཉམ་པ་དང༌། མཐོང་བ་དང༌། ཐོས་པ་དང༌། རྗེས་སུ་དྲན་པས་སེམས་ཅན་གདུལ་བའི་ཕྱིར་དོན་ཡོད་ པར་སྤྱད་པའི་སྐལ་པ་མཉམ་པ་དང༌། སྨོན་ལམ་རྒྱ་མཚོའི་ཚུལ་ཐམས་ཅད་ཡོངས་སུ་རྫོགས་པས་སྟོབས་བཅུའི་ཡེ་ཤེས་རྗེས་སུ་འཚང་རྒྱ་བར་བྱ་བའི་ཕྱིར་འབྱུང་བའི་ སྐལ་པ་མཉམ་པ་ཡང་རབ་ཏུ་ཐོབ་པར་གྱུར་ཏོ། །དེ་ལྟར་ཚོང་དཔོན་གྱི་བུ་ནོར་བཟང་ཤིན་ཏུ་དགའ་བའི་སེམས་སུ་གྱུར་ཏེ། མཚན་མོའི་ལྷ་མོ་འགྲོ་བ་ཐམས་ཅད་སྲུང་ བའི་སྨོན་ལམ་ལ་བརྩོན་པའི་འོད་ལ་བལྟས་པས་འདུ་ཤེས་རྣམ་པར་དག་པ་དེ་དག་ཐོབ་པར་གྱུར་ཏེ། འདི་དག་ལ་སོགས་པ་མཚན་མོའི་ལྷ་མོ་འགྲོ་བ་ཐམས་ ཅད་སྲུང་བའི་སྨོན་ལམ་ལ་བརྩོན་པའི་འོད་ལས་སྐལ་པ་མཉམ་པའི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱང་ཐོབ་པར་གྱུར་ཏོ། །དེ་ནས་ཚོང་དཔོན་གྱི་ བུ་ནོར་བཟང་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་སྨོན་ལམ་ལ་བརྩོན་པའི་འོད་ལ་བལྟ་བའི་ཚུལ་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་ལ་ཞུགས་ པ༑ དགེ་བའི་བཤེས་གཉེན་གྱི་འདུ་ཤེས་རྣམ་པར་དག་པ་མཐའ་དང་དབུས་མེད་པ་རབ་ཏུ་ཐོབ་པ། སྐལ་པ་མཉམ་པའི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ ཕྲ་བ་སྙེད་ལ་ཞུགས་པས་བླ་གོས་ཕྲག་པ་གཅིག་ཏུ་གཟར་ཏེ་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་སྨོན་ལམ་ལ་བརྩོན་པའི་འོད་གང་ན་བ་དེར་ཐལ་མོ་སྦྱར་ ཏེ་བཏུད་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་ནི་བདག་གི་སེམས་ལ་བདག་དགོངས་ཏེ། །བྱང་ཆུབ་མོས་པ་མི་ལྡོག་ཤིན་ཏུ་བརྟན། །ཁྱོད་ཀྱི་ཐུགས་ ལའང་བདག་ནི་དེ་བཞིན་དུ། །བདག་གི་བཞིན་དུ་དེ་རིང་བརྟན་པར་སྐྱེས། །སྡིག་ཏོ་མ་ལུས་རྣམ་པར་བྱང་བར་གྱུར། །དགེ་བའི་རྣམ་སྨིན་མི་ཉ་མ་རབ་ཏུ་ཐོབ། །བདག་ གིས་བལྟ་ན་མཛེས་པ་ཁྱོད་མཐོང་བས། །ཆོས་དཀར་མི་བས་བདག་གིས་ཡོངས་སུ་བསགས། །བདག་གི་སེམས་ནི་ཡོན་ཏན་ཆུ་བོས་བརྒྱན། །སེམས་ཅན་ཕན་ བརྩོན་རྣམ་པ་ཐ་དད་པས། །བརྒྱན་འགྱུར་དེས་ནི་ཕྱི་མཐའི་བསྐལ་པར་ཡང༌། །ཞིང་རྣམས་ཀུན་ཏུ་སྤྱོད་པ་སྤྱད་པར་བགྱི། །འཕགས་མས་བདག་ལ་ཐུགས་བརྩེ་མཛད་ སླད་དུ༑ ༑ཆོས་རྣམས་ཐམས་ཅད་གྲུབ་པ་ཁྱོད་ཀྱིས་བསྟན། །བདག་ལ་སྨན་སླད་རྗེས་སུ་གཟུང་དགོངས་ཏེ། །ཆོས་ཀྱི་གདམས་ངག་དམ་པ་སྩལ་དུ་གསོལ། །ངན་འགྲོར་ ལྟུང་བའི་ལམ་ནི་རྣམ་པར་བཟློག །མཐོ་རིས་ཤུལ་གཙང་དམ་པ་ཡོངས་སུ་བསྟན། །བདེ་གཤེགས་མ་ལུས་བཞུད་ཅིང་རྗེས་བཞུད་པའི། །ཐམས་ཅད་མཁྱེན་པའི་ཤུལ་ ༄༅། །ཀྱང་ཁྱོད་ཀྱིས་བསྟན། །དཔེ་མེད་རྨད་དུ་བྱུང་མང་ཁྱོད་ལ་བདག །འབྱུང་བའི་འདུ་ཤེས་དམ་པ་ཉེ་བར་སྐྱེས། །ནམ་མཁའ་ལྟ་བུར་དྲི་མེད་ཚད་ མེད་པའི། །ཐམས་ཅད་མཁྱེན་ཉིད་ཆོས་སྒོ་རྣམ་པར་དག །ཀུན་མཁྱེན་ཚད་མེད་འབྱུང་གནས་བཟང་པོ་ཡི། །འདུ་ཤེས་དེ་རིང་ཚད་མེད་ཁྱོད་ལ་སྐྱེས། །བསོད་ནམས་ རྒྱ་མཚོ་མཁའ་ལྟར་ཚད་མེད་པའི། །སེམས་ལས་བྱུང་བ་སྐད་ཅིག་རེ་རེར་འབྱུང༌། །འཕགས་མ་ཕ་རོལ་ཕྱིན་པས་བདག་བཀུར་གསོལ། །བསམ་ཡས་བསོད་ ནམས་ཀྱིས་ཀྱང་རྣམ་སྤེལ་གསོལ། །ཡོན་ཏན་དགེ་བ་ཐམས་ཅད་ཡོངས་འཕེལ་ནས། །ཐམས་ཅད་མཁྱེན་པའི་གོ་འཕང་མྱུར་ཐོབ་མཛོད། །དགེ་བའི་བཤེས་གཉེན་ རྣམས་ལ་རྟག་པར་བདག །ཐམས་ཅད་མཁྱེན་ལམ་རབ་རྫོགས་འདུ་ཤེས་ཏེ། །དེ་ཡི་སླད་དུ་བདག་གི་ཆོས་དཀར་རྣམས། །མྱུར་དུ་རྫོགས་པར་འགྱུར་ཞེས་ཚིམ་པར་ གྱུར༑ ༑དེ་སླད་འདི་ལས་དོན་ཀུན་རབ་ཏུ་འབྱུང༌། །དགེ་བའི་ཡོན་ཏན་ལྡན་པ་གྲུབ་པར་གྱུར། །བརྗོད་པ་མཐའ་ཡས་ཐམས་ཅད་མཁྱེན་པའི་ལམ། །འདི་ནི་ཡོངས་སུ་ བསྒྲུབས་ཤིང་འགྲོ་ལ་བརྗོད། །ཡོན་ཏན་ཚད་མེད་ཁྱོད་ནི་སློབ་དཔོན་གྱུར། །ཐམས་ཅད་མཁྱེན་གྱི་ཆོས་ལ་བདག་འདྲེན་པ། །བསྐལ་པ་བྱེ་བ་ཁྲག་ཁྲིག་གྲངས་མེད་ པས༑ ༑འཕགས་མ་ཁྱོད་ལ་བདག་གིས་ལན་མི་ལོན། །དེ་ནས་ཚོང་དཔོན་གྱི་བུ་ནོར་བཟང་གིས་ཚིགས་སུ་བཅད་པ་དེ་དག་སྨྲས་ནས་མཚན་མོའི་ལྷ་མོ་འགྲོ་བ་ཐམས་ཅད་ སྲུང་བའི་སྨོན་ལམ་ལ་བརྩོན་པའི་འོད་ལ་འདི་སྐད་ཅེས་སྨྲས་སོ། །ལྷ་མོ། ཁྱོད་ཀྱིས་བདག་ལ་བྱང་ཆུབ་སེམས་དཔའི་རྣམ་པར་ཐར་པའི་ལུས་བསམ་གྱིས་མི་ཁྱབ་པ་འདི་ ནི༑ བསྟན་ནི། ལྷ་མོ། རྣམ་པར་ཐར་པ་འདིའི་མིང་ནི། ཅི་ཞེས་བགྱི། ལྷ་མོ། ཁྱོད་ནི། ཅི་སྲིད་ཅིག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས། ཅི་སྲིད་ ཅིག་ན་ནི། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར། དེ་སྐད་ཅེས་སྨྲས་པ་དང༌། མཚན་མོའི་ལྷ་མོ་འགྲོ་བ་ཐམས་ཅད་སྲུང་ བའི་སྨོན་ལམ་ལ་བརྩོན་པའི་འོད་ཀྱིས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ། རྣམ་པར་ཐར་པ་འདི་ནི། སེམས་ཅན་ཐམས་ཅད་ཡོངས་སུ་ སྨིན་པར་བྱ་བ་ལ་ཡང་དག་པར་སྐུལ་བའི་དགེ་བའི་རྩ་བ་ཡོངས་སུ་འབྱུང་བ་ཞེས་བྱ་བ་སྟེ། རིགས་ཀྱི་བུ། ཁོ་མོ་རྣམ་པར་ཐར་པ་འདི་དང་ལྡན་པས་ཆོས་ཐམས་ཅད་ ཀྱི་རང་བཞིན་མཉམ་པ་ཉིད་ཁོང་དུ་ཆུད་དོ། །ཆོས་ཐམས་ཅད་ཀྱི་ངོ་བོ་ཉིད་ལ་ཞུགས་ནས་གནས་མེད་པའི་ཆོས་ལ་བརྟེན་ཏེ་འཇིག་རྟེན་ཐམས་ཅད་ལས་འཕགས་པར་ ༄༅། །གྱུར་ཏོ༑ ༑ཆོས་རྣམས་ཀྱི་གཟུགས་ཤིན་ཏུ་རྣམ་པར་ཕྱེ་བ་ལ་ཞུགས་ཏེ་མི་འདྲ་བ་མེད་པའི་ཁ་དོག་དང༌། སྣ་ཚོགས་མེད་པའི་ཁ་དོག་དང༌། རྣམ་པ་ ཐ་དད་པ་མེད་པའི་ཁ་དོག་དང༌། མི་རྟོག་པའི་ཁ་དོག་དང༌། མི་སྔོ་བའི་ཁ་དོག་དང༌། མི་སེར་བའི་ཁ་དོག་དང༌། མི་དམར་བའི་ཁ་དོག་དང༌། མི་དཀར་བའི་ཁ་དོག་དང༌། མི་མཐུན་པ་མེད་པ་དང༌། སྣ་ཚོགས་མེད་པ་དང༌། རྣམ་པ་ཐ་དད་པ་མེད་པ་དང༌། རྟོག་པ་མེད་པ་དང༌། མི་སྔོ་བ་དང༌། མི་སེར་བ་དང༌། མི་དམར་བ་དང༌། མི་དཀར་བའི་ཁ་དོག་གི་ཆོས་ཉིད་ལ་ ཞུགས་ནས་ཁ་དོག་རྣམ་པར་ཕྱེ་བ་དུ་མའི་གཟུགས་ཀྱི་ལུས་སྣ་ཚོགས་ཀྱི་ཁ་དོག་ཅན། ཁ་དོག་དུ་མ་དང༌། ཁ་དོག་ཚད་མེད་པ་དང༌། ཁ་དོག་རྣམ་པར་དག་པ་ དང༌། རྒྱན་ཐམས་ཅད་འབྱིན་པའི་ཁ་དོག་དང༌། ཀུན་ཏུ་སྣང་བའི་ཁ་དོག་དང༌། འགྲོ་བ་ཐམས་ཅད་དང་འདྲ་བའི་ཁ་དོག་དང༌། འཇིག་རྟེན་ཐམས་ཅད་ལ་མངོན་དུ་ གྱུར་ཅིང་ལྷག་པའི་ཁ་དོག་དང༌། གཟུགས་བརྙན་ཀུན་ཏུ་སྣང་བའི་ཁ་དོག་དང༌། མི་མཐུན་པ་མེད་པའི་ཁ་དོག་དང༌། མཚན་དང་དཔེ་བྱད་བཟང་པོས་རྣམ་པར་ སྦྱངས་པའི་ཁ་དོག་དང༌། ཁ་ན་མ་ཐོ་བ་མེད་པར་སྤྱོད་པའི་འོད་དང་ལྡན་པའི་ཁ་དོག་དང༌། སྟོབས་ཆེན་པོས་རྣམ་པར་གནོན་པ་ཡོངས་སུ་སྟོན་པའི་ཁ་དོག་དང༌། ཟབ་མོ་ཐོབ་པར་དཀའ་བའི་ཁ་དོག་དང༌། འཇིག་རྟེན་ཐམས་ཅད་ཀྱིས་མི་ཐུབ་པའི་ཁ་དོག་དང༌། འགྲོ་བ་ཐམས་ཅད་ཀྱི་ཚིག་གིས་མི་ཟད་པའི་ཁ་དོག་དང༌། སྐད་ཅིག་རེ་རེ་ལ་ སྣ་ཚོགས་སུ་འགྱུར་བའི་ཁ་དོག་དང༌། ཁ་དོག་གི་སྤྲིན་སྣ་ཚོགས་ཡོངས་སུ་སྟོན་པའི་ཁ་དོག་དང༌། གཟུགས་དང་དབྱིབས་སྣ་ཚོགས་ཀྱི་ཁ་དོག་དང༌། རྣམ་པར་འཕྲུལ་པ་ ཚད་མེད་པ་སྟོན་པའི་ཁ་དོག་དང༌། ཤིན་ཏུ་ཡིད་དུ་འོང་ཞིང་རྣམ་པར་སྣང་བའི་ཁ་དོག་དང༌། བཟང་པོ་དང་མཛེས་པ་ཐམས་ཅད་འབེལ་བའི་ཁ་དོག་དང༌། སེམས་ཅན་ཐམས་ ཅད་ཡོངས་སུ་སྨིན་པར་བྱ་བ་དང་མཐུན་པའི་ཁ་དོག་དང༌། བསམ་པ་ཇི་ལྟ་བ་བཞིན་དུ་འདུལ་བ་ལ་མངོན་དུ་འགྱུར་བའི་དགེ་བའི་ཁ་དོག་དང༌། ཐོགས་པ་མེད་པར་ཀུན་ ཏུ་སྣང་བའི་ཁ་དོག་དང༌། དང་ཞིང་རྙོག་པ་མེད་ལ་རྣམ་པར་གསལ་ཏེ་འོད་དང་བའི་ཁ་དོག་དང༌། མི་ཤིགས་པའི་ལུས་ཀྱིས་བསྒྲུབས་པས་མཛེས་པར་གྱུར་པའི་ཁ་དོག་ དང༌། ཆོས་ཀྱི་ཚུལ་བསམ་གྱིས་མི་ཁྱབ་པ་རབ་ཏུ་སྟོན་པའི་ཁ་དོག་དང༌། ཟིལ་གྱིས་མ་ནོན་ལ་ཟིལ་གྱིས་གནོན་པས་ཐམས་ཅད་ཟིལ་དུ་རླག་པར་བྱེད་པའི་ཁ་དོག་དང༌། མུན་པ་དང་རབ་རིབ་མེད་པའི་ཁ་དོག་དང༌། མུན་པ་ཐམས་ཅད་རྣམ་པར་སེལ་བའི་ཁ་དོག་དང༌། དཀར་པོ་ཐམས་ཅད་ཤིན་ཏུ་བསྒྲུབས་པའི་ཁ་དོག་དང༌། བདག་ཉིད་ཆེ་ ༄༅། །བའི་ཡོན་ཏན་རྒྱ་མཚོའི་ཁ་དོག་དང༌། སྔོན་བླ་མ་ལ་རིམ་གྲོར་བྱས་པས་ཤིན་ཏུ་བསྒྲུབས་པའི་ཁ་དོག་དང༌། ལྷག་པའི་བསམ་པ་ནམ་མཁའ་ཡོངས་ སུ་དག་པར་བྱེད་པའི་ཁ་དོག་དང༌། མཆོག་དམ་པ་ཕུལ་དུ་བྱུང་བར་ཤིན་ཏུ་ཡངས་པའི་ཁ་དོག་དང༌། མི་འཕྲོག་མི་ཟད་པའི་ཡོན་ཏན་རྒྱ་མཚོ་རབ་ཏུ་སྟོན་པའི་ཁ་དོག་དང༌། འཇིག་རྟེན་ཐམས་ཅད་ལ་མི་གནས་ཤིང་མ་འདྲེས་པའི་ཁ་དོག་དང༌། ཐོགས་པ་མེད་པར་ཕྱོགས་ཐམས་ཅད་རྒྱས་པར་འགེངས་པའི་ཁ་དོག་དང༌། སེམས་ཀྱི་སྐད་ཅིག་ འབྱམས་ཀླས་པ་ལ་ཞིང་རྒྱ་མཚོ་བརྗོད་དུ་མེད་པར་ཁ་དོག་སྣ་ཚོགས་རྣམ་པ་དུ་མ་ཡོངས་སུ་སྟོན་པའི་ཁ་དོག་དང༌། སེམས་ཅན་ཐམས་ཅད་ཀྱི་དགའ་བའི་ཤུགས་ ཆེན་པོ་རྣམ་པར་འཕེལ་བར་བྱེད་པའི་ཁ་དོག་དང༌། སེམས་ཅན་རྒྱ་མཚོ་ཐམས་ཅད་ཡོངས་སུ་སྡུད་པའི་ཁ་དོག་དང༌། བ་སྤུའི་སྒོ་ཐམས་ཅད་ན་སངས་རྒྱས་ཀྱི་ཡོན་ ཏན་རྒྱ་མཚོ་མ་ལུས་པའི་སྤྲིན་གྱི་སྒྲ་སྒྲོག་པའི་ཁ་དོག་དང༌། སེམས་ཅན་ཐམས་ཅད་ཀྱི་བསམ་པ་དང་མོས་པ་རྒྱ་མཚོ་རྣམ་པར་སྦྱོང་བའི་ཁ་དོག་དང༌། ཆོས་ཐམས་ ཅད་ཀྱི་དོན་རྣམ་པར་གདོན་མི་ཟ་བ་ཡོངས་སུ་སྟོན་པའི་ཁ་དོག་དང༌། འོད་ཟེར་གྱི་དྲ་བའི་དཀྱིལ་འཁོར་ཁ་དོག་སྣ་ཚོགས་སུ་སྣང་བའི་ཁ་དོག་དང༌། ནམ་མཁའ་ལྟར་ དྲི་མ་མེད་པར་སྣང་བའི་ཁ་དོག་དང༌། རིན་པོ་ཆེའི་རྒྱལ་པོ་རྣམ་པར་དག་པ་ལྟར་རྡུལ་གྱི་དྲི་མ་མེད་པའི་འོད་ལ་གནས་པའི་ཁ་དོག་དང༌། ཆོས་ཉིད་དྲི་མ་མེད་པའི་འོད་ཀྱི་ ཁ་དོག་དང༌། ཁ་དོག་དཔག་ཏུ་མེད་པའི་ཚུལ་རྒྱ་མཚོ་རྣམ་པ་ཐ་དད་པ་ཡོངས་སུ་སྟོན་པའི་ཁ་དོག་དང༌། ཕྱོགས་ཀུན་ཏུ་སྣང་བར་བྱེད་པའི་ཁ་དོག་དང༌། དུས་ལ་གང་དུ་ བབ་པར་འགྲོ་བ་ཡོངས་སུ་སྟོན་པ་མ་འདྲེས་པའི་ཁ་དོག་དང༌། ཞི་བ་དང་དུལ་བའི་ཕྱོགས་ལས་བྱུང་བའི་ཁ་དོག་དང༌། ཉོན་མོངས་པ་ཐམས་ཅད་རབ་ཏུ་ཞི་བར་བྱེད་པའི་ཁ་ དོག་དང༌། འགྲོ་བ་བསོད་ནམས་ཀྱི་ཞིང་ཐམས་ཅད་ལ་རབ་ཏུ་སྟོན་པའི་ཁ་དོག་དང༌། འཇིགས་པ་ཐམས་ཅད་རབ་ཏུ་སེལ་བའི་ཁ་དོག་དང༌། དོན་ཡོད་པར་འགྲོ་བ་རྒྱས་པར་ འགེངས་པའི་ཁ་དོག་དང༌། ཡེ་ཤེས་ཀྱི་རྣམ་པར་གནོན་པ་ཆེན་པོ་རབ་ཏུ་བརྗོད་པའི་ཁ་དོག་དང༌། ཆགས་པ་མེད་པའི་ལུས་ཀྱིས་ཀུན་ཏུ་རྒྱས་པར་འགེངས་པའི་ཁ་དོག་ དང༌། ལུས་དམ་པའི་སྤྲིན་གྱི་དབྱངས་ཀྱིས་འགྲོ་བ་ཀུན་ཏུ་སྟོན་པར་བྱེད་པའི་ཁ་དོག་དང༌། བྱམས་པའི་རྒྱ་མཚོ་ཆེན་པོ་ཡོངས་སུ་སྡུད་པའི་ཁ་དོག་དང༌། བསོད་ནམས་ ཀྱི་རི་རབ་ཆེན་པོ་ཡོངས་སུ་སྒྲུབ་པའི་ཁ་དོག་དང༌། འགྲོ་བ་ཐམས་ཅད་དུ་མི་གནས་ཀྱང་འཇིག་རྟེན་གྱི་རྒྱུད་ཐམས་ཅད་དུ་གཟུགས་བརྙན་འབྱུང་བའི་ཁ་དོག་དང༌། ཡེ་ཤེས་ ༄༅། །ཀྱི་སྟོབས་ཆེན་པོ་རྣམ་པར་སྦྱོང་བའི་ཁ་དོག་དང༌། འཇིག་རྟེན་ཐམས་ཅད་ཀྱི་རྗེས་སུ་དྲན་པ་དང་འགྲོགས་པའི་ཁ་དོག་དང༌། རིན་པོ་ཆེ་ཐམས་ ཅད་ལྟ་བུའི་ཁ་དོག་དང༌། རྣམ་པར་སྣང་བའི་སྙིང་པོ་ལྟར་ཡོངས་སུ་སྟོན་པའི་ཁ་དོག་དང༌། འགྲོ་བ་ཐམས་ཅད་ཀྱི་མོས་པའི་ཚུལ་དང་མཐུན་པའི་ཁ་དོག་དང༌། ཐམས་ ཅད་མཁྱེན་པ་ཉིད་ཀྱི་རྣམ་པ་ལ་མངོན་དུ་གྱུར་པའི་ཁ་དོག་དང༌། མིག་འཛུམ་གྱིས་རྒྱས་པས་འགྲོ་བ་མོས་པར་བྱེད་པའི་ཁ་དོག་དང༌། རིན་པོ་ཆེའི་རྒྱན་དམ་པའི་འོད་ཀྱི་ ཁ་དོག་དང༌། འགྲོ་བ་ཐམས་ཅད་དུ་ཐོགས་པ་མེད་པ་ལ་ཕྱིར་ཕྱོགས་པ་མེད་པའི་ཁ་དོག་དང༌། ངེས་པ་མེད་ཅིང་མངོན་པར་ཞེན་པ་མེད་པའི་ཁ་དོག་དང༌། བྱིན་གྱི་རླབས་ ཀྱིས་རྣམ་པར་འཕྲུལ་པའི་ཁྱུ་མཆོག་གི་མཐུ་འབྱིན་པ་ཡོངས་སུ་སྟོན་པའི་ཁ་དོག་དང༌། རྫུ་འཕྲུལ་ཐམས་ཅད་ཀྱིས་རྣམ་པར་འཕྲུལ་བའི་ཁྱུ་མཆོག་གི་མཐུ་ཕྱུང་བ་ ཡོངས་སུ་སྟོན་པའི་ཁ་དོག་དང༌། དེ་བཞིན་གཤེགས་པའི་དགེ་བའི་རྩ་བ་སྣང་བར་བྱེད་པའི་ཁ་དོག་དང༌། ཆོས་ཀྱི་དབྱིངས་ཁ་ན་མ་ཐོ་བ་མེད་པའི་ཚུལ་རྒྱ་མཚོ་ལ་རབ་ ཏུ་ཞུགས་པའི་ཁ་དོག་དང༌། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ཕྱིན་པའི་གཟུགས་བརྙན་འབྱུང་བའི་ཁ་དོག་དང༌། ཁ་དོག་སྣ་ཚོགས་རབ་ཏུ་སྒྲུབ་ པའི་ཁ་དོག་དང༌། ལེགས་པར་སྤྱད་པ་དང༌། རྒྱུ་མཐུན་པ་བཟང་པོས་བྱུང་བའི་ཁ་དོག་དང༌། འདུལ་བ་ཇི་ལྟ་བ་བཞིན་དུ་ཉེ་བར་སྒྲུབ་པའི་ཁ་དོག་དང༌། འཇིག་རྟེན་ཐམས་ཅད་ ཀྱིས་བལྟ་ན་མི་ངོམས་པའི་ཁ་དོག་དང༌། འོད་དང་བ་རྣམ་པ་སྣ་ཚོགས་ཀྱི་འོད་དུ་སྣང་བའི་ཁ་དོག་དང༌། དུས་གསུམ་གྱི་ཁ་དོག་རྒྱ་མཚོ་ཐམས་ཅད་ཡོངས་སུ་སྟོན་པའི་ཁ་ དོག་དང༌། འོད་ཟེར་ཁ་དོག་ཐམས་ཅད་དང་ལྡན་པ་རྒྱ་མཚོ་རབ་ཏུ་འགྱེད་པའི་ཁ་དོག་དང༌། འོད་ཀྱི་དཀྱིལ་འཁོར་རྒྱ་མཚོ་ཁ་དོག་བརྗོད་དུ་མེད་པ་སྣ་ཚོགས་རྣམ་པ་ཐ་དད་ པ་ཡོངས་སུ་སྟོན་པའི་ཁ་དོག་དང༌། སྤོས་ཐམས་ཅད་ཀྱི་འོད་འཕྲོ་བ་ཀུན་ལས་འདས་པའི་ཁ་དོག་དང༌། བ་སྤུའི་སྒོ་རེ་རེ་ནས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ ཤིན་ཏུ་ཕྲ་བ་སྙེད་ཀྱི་ཉི་མའི་དཀྱིལ་འཁོར་གྱི་སྤྲིན་ཡོངས་སུ་སྟོན་པའི་ཁ་དོག་དང༌། ཟླ་བའི་དཀྱིལ་འཁོར་གྱི་གཟུགས་དྲི་མ་མེད་ཅིང་ཡངས་པའི་སྤྲིན་གྱི་བྱིན་གྱི་རླབས་ ཀྱི་ཁ་དོག་དང༌། མེ་ཏོག་ཡིད་དུ་འོང་བའི་རི་རབ་ཀྱི་སྤྲིན་མཐའ་ཡས་པ་རབ་ཏུ་འགྱེད་པའི་ཁ་དོག་དང༌། ཕྲེང་བ་སྣ་ཚོགས་མངོན་པར་སྒྲུབ་པའི་ཤིང་གི་སྤྲིན་ཕྲེང་ བ། ཐམས་ཅད་ཀྱི་ཆར་རབ་ཏུ་འབེབས་པའི་ཁ་དོག་དང༌། རིན་པོ་ཆེ་ཐམས་ཅད་ཀྱི་པདྨོའི་སྤྲིན་ཡོངས་སུ་སྟོན་པའི་ཁ་དོག་དང༌། སྤོས་དང་བདུག་སྤོས་ཐམས་ཅད་ཀྱི་ན་བུན་ ༄༅། །གྱི་གཟུགས་ཀྱི་སྤྲིན་གྱིས་ཆོས་ཀྱི་དབྱིངས་ཐམས་ཅད་རྒྱས་པར་འགྲེངས་པའི་ཁ་དོག་ཏུ་སེམས་ཀྱི་སྐད་ཅིག་རེ་རེ་ལ་ཕྱེ་མའི་མཛོད་ཀྱི་སྤྲིན་ ཐམས་ཅད་བྱིན་གྱིས་བརླབས་ཤིང་ཕྱོགས་བཅུར་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་རྒྱས་པར་བཀང་ནས་མཐོང་བས་འདུལ་བའི་སེམས་ཅན་རྣམས་དང༌། ཐོས་པས་འདུལ་བ་དང༌། རྗེས་སུ་དྲན་པས་འདུལ་བ་དང༌། ཆོས་ཀྱི་འཁོར་ལོ་སྤྲུལ་པ་མངོན་པར་སྒྲུབ་པས་འདུལ་བ་དང༌། ཡོངས་སུ་སྨིན་པར་འགྱུར་བའི་ དུས་ལ་བབ་པས་འདུལ་བར་འགྱུར་བ་དང༌། གཟུགས་ཀྱི་ལུས་ཡོངས་སུ་བསྟན་པས་འདུལ་བ་དང༌། བསྙེན་བཀུར་བྱ་བས་འདུལ་བ་དང༌། ཁོང་དུ་ཆུད་པར་བྱ་ བས་འདུལ་བ་དང༌། རྣམ་པར་འཕྲུལ་བ་དང༌། ཆོས་འཕྲུལ་སྣ་ཚོགས་ཡོངས་སུ་བསྟན་པས་འདུལ་བ་དང༌། རྣམ་པར་འཕྲུལ་པ་དང༌། ཆོས་འཕྲུལ་བསམ་གྱིས་མི་ ཁྱབ་པ་རྣམ་པར་དམིགས་པ་ཡོངས་སུ་བསྟན་པས་འདུལ་བའི་སེམས་ཅན་རྣམས་ཀྱི་བསམ་པའི་དབང་དང༌། དུས་ཀྱི་དབང་དང༌། མི་དགེ་བའི་ལས་ལས་རྣམ་ པར་བཟློག་པའི་དབང་དང༌། དགེ་བའི་ལས་ཡོངས་སུ་སྒྲུབ་པ་ལ་སོ་སོར་དགོད་པའི་དབང་དང༌། སྔོན་སྨོན་ལམ་ཆེན་པོ་མངོན་པར་བསྒྲུབས་པའི་དབང་དང༌། ཐམས་ ཅད་མཁྱེན་པ་ཉིད་ཀྱི་ཤུགས་ཀྱི་དབང་དང༌། བྱང་ཆུབ་སེམས་དཔའི་རྣམ་པར་ཐར་པ་རྒྱ་ཆེན་པོའི་རྣམ་པར་འཕྲུལ་པ་རབ་ཏུ་ཐོབ་པའི་ཆོས་ཀྱི་དབང་དང༌། འགྲོ་བ་ཐམས་ ཅད་ཡོངས་སུ་བསྐྱབ་པ་ཤིན་ཏུ་སྒྲུབ་པའི་སྙིང་རྗེ་ཆེན་པོའི་སྟོབས་ཡོངས་སུ་འབྱུང་བའི་དབང་དང༌། བྱམས་པ་ཆེན་པོའི་རྒྱ་མཚོ་རྣམ་པར་དག་པ་ཡོངས་སུ་སྐྱེད་པའི་ བསམ་པའི་དབང་གིས་དེ་བཞིན་གཤེགས་པའི་བྱིན་གྱི་རླབས་ཡང་དག་པར་བླང་བའི་ཕྱིར་རབ་ཏུ་འཇུག་གོ །རིགས་ཀྱི་བུ། དེ་ལྟར་ཁོ་མོས་བྱང་ཆུབ་སེམས་དཔའི་ རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་ལ་རབ་ཏུ་གནས་ཏེ། རྣམ་པར་དབྱེ་བ་ མེད་པའི་ཆོས་ལ་ཞུགས་ནས་མཐའ་དང་དབུས་མེད་པའི་ལུས་ཀྱི་ཁ་དོག་དང་དབྱིབས་ཡོངས་སུ་བསྟན་ཏེ། སྤྱོད་པའི་ལུས་རེ་རེ་ལས་མཐའ་དང་དབུས་མེད་པའི་ཁ་དོག་ རྒྱ་མཚོ་འཇིག་རྟེན་དུ་རྣམ་པར་དམིགས་པར་བྱས་ཏེ་སྤྱོད་པའི་ཁ་དོག་རེ་རེ་ལས་མཐའ་དང་དབུས་མེད་པའི་འོད་ཟེར་གྱི་སྤྲིང་ཡོངས་སུ་བཀྱེ་ཞིང༌། འོད་ཟེར་རེ་རེ་ལས་ ཀྱང་སངས་རྒྱས་ཀྱི་ཞིང་གི་གཟུགས་བརྙན་མཐའ་དང་དབུས་མེད་པ་ཡོངས་སུ་བསྟན་ནས་སངས་རྒྱས་ཀྱི་ཞིང་རེ་རེར་ཡང་དེ་བཞིན་གཤེགས་པ་འབྱུང་བ་མཐའ་དང་ ༄༅། །དབུས་མེད་པ་ཡོངས་སུ་བསྟན་ཏེ། དེ་བཞིན་གཤེགས་པ་རེ་རེ་ཞིང་ཡང་སངས་རྒྱས་ཀྱི་རྣམ་པར་འཕྲུལ་པ་མཐའ་དང་དབུས་མེད་པ་ཡོངས་ སུ་སྟོན་པ་བྱེད་ཅིང༌། སྔོན་གྱི་དགེ་བའི་རྩ་བ་ཡང་དག་པར་སྐུལ་བ་བྱེད་དོ། །དགེ་བའི་རྩ་བ་མ་བསྐྱེད་པ་རྣམས་ཀྱང་ཡོངས་སུ་སྐྱེད་དོ། །བསྐྱེད་པ་རྣམས་ཀྱང་ཡངས་ པར་བྱེད་དོ། །དགེ་བའི་རྩ་བ་ཡངས་པར་བྱས་པ་རྣམས་ནི། རྣམ་པར་འཕེལ་བར་བྱེད་དེ། ཁོ་མོ་ནི། སེམས་ཀྱི་སྐད་ཅིག་རེ་རེ་ལ་ཡང་སེམས་ཅན་གྱི་ཁམས་ མཐའ་དང་དབུས་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ས་ལ་རབ་ཏུ་དགོད་པར་བྱེད་དོ། །ཤིན་ཏུ་རྒྱས་པར་ཆེན་པོའི་ མདོ༑ སངས་རྒྱས་པ་པོ་ཆེ་ཞེས་བྱ་བ་ལས། སྡོང་པོས་བརྒྱན་པའི་ལེའུ་སྟེ། ༈ བམ་པོ་བརྒྱ་ལྔ་པ། རིགས་ཀྱི་བུ། གཞན་ཡང་ཁྱོད་ཀྱིས་འདི་སྐད་དུ་སྨྲས་ཏེ། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་ནས་ནི། ཇི་སྲིད་ཅིག་ལོན། བསྐལ་པ་བརྒྱ་ཕྲག་ཇི་སྙེད་ཅིག་ནས་ནི། བྱང་ཆུབ་ཀྱི་སྤྱོད་པ་ལ་སྤྱོད་ ཅེས་ཟེར་བ་དེའི་དོན་ཀྱང་སངས་རྒྱས་ཀྱི་བྱིན་གྱི་རླབས་ཀྱིས་བསྟན་པར་བྱའོ། །རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་དཀྱིལ་འཁོར་ནི། རྟོག་ པ་དང་རྣམ་པར་རྟོག་པའི་ཡུལ་དང་ལྡན་པ་སྟེ། དེ་ལ་འཁོར་བ་རིང་བའམ། འཁོར་བ་ཐུང་བར་རྣམ་པར་དགོད་ཅིང་བརྗོད་པར་བྱ་བ་མེད་དོ། །བསྐལ་པ་ཀུན་ནས་ཉོན་ མོངས་པའམ། བསྐལ་པ་རྣམ་པར་དག་པའམ། བསྐལ་པ་ཆུང་བའམ། བསྐལ་པ་ཆེ་བའམ། བསྐལ་པ་མང་བའམ། བསྐལ་པ་ཐ་དད་པའམ། བསྐལ་པ་རྣམ་པ་ སྣ་ཚོགས་སུ་བྱ་བའམ། བསྐལ་པ་རྣམ་པ་ཐ་དད་པར་བྱ་བར་ཡང་རྣམ་པར་དགོད་པ་དང༌། བརྗོད་པར་བྱ་བ་མེད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ། བྱང་ཆུབ་ སེམས་དཔའ་རྣམས་ཀྱི་ཡེ་ཤེས་ཀྱི་དཀྱིལ་འཁོར་ནི། རང་བཞིན་གྱི་ངོ་བོ་ཉིད་ཀྱིས་ཡོངས་སུ་དག་པ་སྟེ། འདུ་ཤེས་ཀྱི་དྲ་བ་ཐམས་ཅད་དང་བྲལ་བར་སྒྲིབ་པའི་རི་ ཐམས་ཅད་ལས་ཡང་དག་པར་འདས་པའི་བསམ་པ་ལ་ཡོངས་སུ་འཆར་ཏེ། དེའང་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་དུས་སུ་འདུལ་བ་ཇི་ལྟ་བ་ བཞིན་དུ་སྣང་བར་བྱེད་དོ། །རིགས་ཀྱི་བུ། འདི་ལྟ་སྟེ། ཉི་མའི་དཀྱིལ་འཁོར་ལ་ཉིན་མཚན་གྱི་གྲངས་སུ་བྱ་བ་མེད་དེ་མི་སྲིད་ཀྱང་ཉི་མའི་དཀྱིལ་འཁོར་ནུབ་ན་ནི། ནུབ་མོར་སྣང་ངོ༌། །ཉི་མའི་དཀྱིལ་འཁོར་ཤར་ན་ནི། ཉིན་པར་དུ་སྣང་ཞིང་བརྗོད་པ་ཡོད་དོ། །རིགས་ཀྱི་བུ༑ དེ་བཞིན་དུ་བྱང་ཆུབ་སེམས་དཔའི་ཡེ་ཤེས་ཀྱི་དཀྱིལ་ ༄༅། །འཁོར་རྣམ་པར་རྟོག་པ་མེད་པ་ལ་རྟོག་པ་དང༌། ཡོངས་སུ་རྟོག་པ་ཐམས་ཅད་མེད་དེ། འཁོར་བ་ན་གནས་པའི་འདུ་ཤེས་ཀྱི་རྣམ་པ་ཐམས་ཅད་དང་ དུས་སུ་བྱ་བ་ཐམས་ཅད་ཀྱང་མེད་མོད་ཀྱི། འོན་ཀྱང་བྱང་ཆུབ་སེམས་དཔའི་བསམ་པ་ལས་བྱུང་བའི་ཡེ་ཤེས་ཀྱི་དཀྱིལ་འཁོར་རྣམ་པར་རྟོག་པ་མེད་པ་ནི། སེམས་ ཅན་ཐམས་ཅད་ཡོངས་སུ་སྨིན་པར་བྱ་བའི་དུས་ཀྱི་དབང་གིས་བསྐལ་པར་གནས་པ་དང༌། འཁོར་བའི་འདུ་ཤེས་ཀྱི་རྣམ་པར་བགྲང་བའི་གྲངས་སུ་བགྲང་བ་ཡིན་ཏེ། ཡེ་ཤེས་ཀྱི་དཀྱིལ་འཁོར་རྣམ་པར་རྟོག་པ་མེད་པ་ལ་སྔོན་གྱི་མཐའ་དང༌། ཕྱི་མའི་བསྐལ་པར་གནས་པའི་འདུ་ཤེས་ཀྱི་རྣམ་པར་བགྲང་བ་ཡོད་དོ། །རིགས་ཀྱི་བུ། འདི་ ལྟ་སྟེ༑ དཔེར་ན། ཉི་མའི་དཀྱིལ་འཁོར་ནི། ནམ་མཁའི་དབྱིངས་ལ་འདུག་ཀྱང་རིན་པོ་ཆེའི་རི་ཐམས་ཅད་དང༌། རིན་པོ་ཆེའི་ཤིང་ཐམས་ཅད་དང༌། རིན་པོ་ཆེའི་སྣོད་ ཐམས་ཅད་དང༌། རིན་པོ་ཆེའི་འབྱུང་གནས་ཐམས་ཅད་དང༌། རྒྱ་མཚོ་ཐམས་ཅད་དང༌། མཚོ་དང་མཚེའུ་ཐམས་ཅད་དང༌། ཆུ་དང་བའི་སྣོད་ཐམས་ཅད་དང༌། འགྲོ་བ་ ཐམས་ཅད་ཀྱི་སེམས་ལ་གཟུགས་བརྙན་རྣམ་པར་དམིགས་པ་སྣང་སྟེ། སེམས་ཅན་ཐམས་ཅད་ལ་མངོན་དུ་གྱུར་བར་སྣང་ངོ༌། །རིན་པོ་ཆེ་ཐམས་ཅད་ཀྱི་རྡུལ་ཤིན་ ཏུ་ཕྲ་བ་རྣམས་ལ་ཉི་མའི་དཀྱིལ་འཁོར་གྱི་གཟུགས་བརྙན་བྱུང་བར་སྣང་ཡང་ཉི་མའི་དཀྱིལ་འཁོར་དེ་ནི། རིན་པོ་ཆེའི་རི་རྣམས་ལ་ཡང་གནས་པ་མེད་དོ། །རིན་པོ་ཆེའི་ ཤིང་ནས་རིན་པོ་ཆེའི་རྡུལ་ཤིན་ཏུ་ཕྲ་བ་རྣམས་ཀྱི་བར་དུའང་ཞུགས་པ་མེད། རིན་པོ་ཆེའི་འབྲུ་རྣམས་ཀྱི་ཁོངས་སུ་ཆུད་པའང་མ་ཡིན། རིན་པོ་ཆེའི་འབྱུང་གནས་རྣམས་ ཀྱི་རྗེས་སུ་སོང་བའང་མ་ཡིན། རྒྱ་མཚོ་རྣམས་ཀྱི་ནང་དུ་སོང་བའང་མ་ཡིན། ཆུའི་སྣོད་ཐམས་ཅད་ཀྱི་ནང་དུ་ཞུགས་པའང་མ་ཡིན་མོད་ཀྱི། ཐམས་ཅད་ཀྱི་ཁོངས་ན་འདུག་ པར་ཡང་སྣང་ངོ༌། །རིགས་ཀྱི་བུ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་བའི་རྒྱ་མཚོ་ལས་ནི། གྱེན་དུ་འཕགས། དེ་བཞིན་གཤེགས་ པའི་ཆོས་ཀྱི་དབྱིངས་ཀྱི་ནམ་མཁའ་ལ་ནི། མངོན་པར་བྱུང༌། ཆོས་ཀྱི་རང་བཞིན་ནམ་མཁའི་རྒྱུད་ལ་ནི། རྒྱུ་ཞིང་སྤྱོད། ཞི་བའི་ནམ་མཁའི་དབྱིངས་ལ་ནི། གནས་པར་ གྱུར་མོད་ཀྱི། སྲིད་པའི་ལམ་གྱི་རྒྱུད་དང༌། སྐྱེ་གནས་ཐམས་ཅད་དུའང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་གདུལ་བའི་དོན་དུ་སེམས་ཅན་ཐམས་ཅད་ དང་འདྲ་བའི་ལུས་སུ་སྐྱེ་བར་སྣང་སྟེ། འཁོར་བའི་ཉེས་པས་གོས་པར་མི་འགྱུར་རོ། །སྐྱེད་དང་ཤི་འཕོ་བའི་སྡུག་བསྔལ་གྱིས་ཉེ་བར་གདུང་བ་མེད་དོ། །རྟོག་པ་དང་རྣམ་ ༄༅། །པར་རྟོག་པ་དག་དང་འགྲོགས་པ་མེད་དོ། །བསྐལ་པ་ལའང་རིང་བའི་འདུ་ཤེས་སམ་ཐུང་བའི་འདུ་ཤེས་སུ་འགྱུར་བ་མེད་དོ། །དེ་ཅིའི་ཕྱིར་ཞེ་ ན༑ དེ་ནི། བྱང་ཆུབ་སེམས་དཔའ་ཕྱིན་ཅི་ལོག་ལས་ཤིན་ཏུ་འདས་པ་དང༌། འདུ་ཤེས་དང༌། སེམས་དང༌། ལྟ་བའི་ཕྱིན་ཅི་ལོག་ལས་ཡོངས་སུ་འདས་པ་དང༌། རྨི་ ལམ་ལྟ་བུའི་འཇིག་རྟེན་ཐམས་ཅད་ཡང་དག་པ་ཇི་ལྟ་བ་བཞིན་དུ་ཡེ་ཤེས་ཀྱིས་ཁོང་དུ་ཆུད་པ་དང༌། སྒྱུ་མ་ལྟ་བུའི་འཇིག་རྟེན་ཐམས་ཅད་རབ་ཏུ་རྟོགས་པ་དང༌། སེམས་ཅན་མེད་པའི་ཡེ་ཤེས་ཀྱི་དབྱིངས་རབ་ཏུ་ཐོབ་པ་དང༌། ཡང་དག་པ་ཇི་ལྟ་བ་བཞིན་དུ་ཆོས་རབ་ཏུ་མཐོང་བས་སྙིང་རྗེའི་དཀྱིལ་འཁོར་ཤིན་ཏུ་ཡངས་པ་དང༌། སྨོན་ལམ་ཆེན་པོའི་སྟོབས་ཀྱིས་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བའི་དོན་དུ་སེམས་ཅན་ཐམས་ཅད་ལ་མངོན་དུ་གྱུར་པར་སྣང་ངོ༌། ། རིགས་ཀྱི་བུ། འདི་ལྟ་སྟེ། དཔེར་ན། ཆུ་ཀླུང་ཆེན་པོ་ལ་སོགས་པ་ལ་གྲུ་ནི། རྟག་ཏུ་རྒྱུན་མི་འཆད་པར་སེམས་ཅན་ཡོངས་སུ་བསྒྲལ་བ་ལ་བརྩོན་པ་སྟེ། ནམ་མ་ ཞིག་གི་བར་དུ་རྒྱུན་གཅོད་པ་མེད་ཀྱང་དེ་ལ་ཕ་རོལ་གྱི་ངོགས་ལ་མངོན་པར་ཆགས་པ་མེད། ཚུ་རོལ་གྱི་ངོགས་ལའང་ཆགས་པ་མེད། ཆུའི་དབུས་ནའང་གནས་ པ་མེད་དོ། །རིགས་ཀྱི་བུ། དེ་བཞིན་དུ་བྱང་ཆུབ་སེམས་དཔའ་ཡང་ཕ་རོལ་ཏུ་ཕྱིན་པ་ཆེན་པོའི་གྲུའི་མཐུས་འཁོར་བའི་ཆུ་ཀླུང་གི་རྒྱུད་ལས་སེམས་ཅན་ཐམས་ཅད་ཡོངས་ སུ་བསྒྲལ་བ་ལ་ཞུགས་པ་ཡིན་ཏེ། དེ་ལ་ཚུ་རོལ་གྱི་མུས་འཇིགས་པ་མེད་དོ། ཕ་རོལ་གྱི་མུར་བདེ་བར་འགྱུར་བའི་འདུ་ཤེས་མེད་དོ། །འོན་ཀྱང་རྟག་ཏུ་རྒྱུན་མི་འཆད་པའི་ བྱང་ཆུབ་སེམས་དཔའི་སྤྱོད་པ་ལ་བསྐལ་པ་དཔག་ཏུ་མེད་པ་ཐམས་ཅད་དུ་གནས་པར་བྱ་བར་ཞེ་ནོན་པས་སེམས་ཅན་ཐམས་ཅད་ཡོངས་སུ་བསྒྲལ་བར་བྱ་བ་ལ་ཞུགས་ པ་ཡིན་ཏེ། བསྐལ་པའི་རྣམ་པ་ཐ་དད་པ་ལ་མངོན་པར་ཞེན་པ་མེད་དོ། །བསྐལ་པ་འདའ་བར་བྱ་བ་ལ་རིང་བའི་འདུ་ཤེས་སུ་གྱུར་ཅིང་བྱང་ཆུབ་སེམས་དཔའི་སྤྱད་པ་ལ་ སྤྱོད་པ་མ་ཡིན་ནོ། །རིགས་ཀྱི་བུ། འདི་ལྟ་སྟེ། དཔེར་ན། ཆོས་ཀྱི་དབྱིངས་ལྟར་ཡངས་པའི་ནམ་མཁའི་དབྱིངས་ནམ་མཁའི་གཞིའི་དཀྱིལ་འཁོར་ན་འཇིག་རྟེན་གྱི་ཁམས་ ཐམས་ཅད་འདུ་འམ། འཇིག་གམ། འདས་པར་གྱུར་ཀྱང་རྣམ་པར་རྟོག་པ་མེད་ཅིང་རང་བཞིན་གྱིས་རྣམ་པར་དག་པ་ལ་ཀུན་ནས་ཉོན་མོངས་པ་མེད་དེ། འཁྲུག་པ་མེད་ ཅིང་བསྒྲིབས་པ་མེད་ལ་ཕྱི་མའི་མཐའི་དུས་སུ་ཞིང་ཐམས་ཅད་འཛིན་ཀྱང་ཡོངས་སུ་སྐྱོ་བ་མེད་དོ། །རིགས་ཀྱི་བུ། དེ་བཞིན་དུ་བྱང་ཆུབ་སེམས་དཔའི་བསམ་པ་ཡེ་ཤེས་ ༄༅། །ནམ་མཁའི་དཀྱིལ་འཁོར་ཀྱང་སྨོན་ལམ་ཆེན་པོའི་རླུང་གི་དཀྱིལ་འཁོར་གྱིས་ཀུན་ནས་བསྐོར་ཅིང་ངན་སོང་གི་གཡང་ས་ཐམས་ཅད་ལས་ སེམས་ཅན་ཡོངས་སུ་འཛིན་ཀྱང་ཡོངས་སུ་སྐྱོ་བ་མེད་དོ། །བདེ་བའི་ལམ་ལ་འགོད་པ་བྱེད་ཀྱང་ཡོངས་སུ་སྒྱིད་ལུག་པ་མེད་དོ། །ཐམས་ཅད་མཁྱེན་པའི་ལམ་ལ་ འགོད་ཀྱང་ཞུམ་པར་བྱེད་པ་མེད་དོ། །ཉོན་མོངས་པ་ཐམས་ཅད་ཀྱིས་ཀྱང་འཁྲུག་པ་མེད་དོ། །འཁོར་བའི་ཉེས་པ་ཐམས་ཅད་ཀྱིས་ཀྱང་ཡོངས་སུ་གདུང་བ་མེད་དོ། ། རིགས་ཀྱི་བུ། འདི་ལྟ་སྟེ། དཔེར་ན། སྒྱུ་མའི་རྣམ་པ་ལས་གྲུབ་པའི་མི་ཡན་ལག་དང་ཉིང་ལག་ཤིན་ཏུ་ཚང་བ་ལ་ལུས་ལ་གནས་པའི་ཆོས་བཅུ་མེད་དེ། བཅུ་གང་ ཞེ་ན༑ འདི་ལྟ་སྟེ། དབུགས་ནང་དུ་རྒྱུ་བའམ། དབུགས་ཕྱིར་རྒྱུ་བའམ། གྲང་བའམ། དྲོ་བའམ། བཀྲེས་པའམ། སྐོམ་པའམ། དགའ་བའམ། མི་དགའ་བའམ། སྐྱེ་བ་དང༌། རྒ་བ་དང༌། ན་བ་དང༌། འཆི་བའམ། གནོད་པར་འགྱུར་བ་མེད་དོ། །རིགས་ཀྱི་བུ། དེ་བཞིན་དུ་བྱང་ཆུབ་སེམས་དཔའ་ཡེ་ཤེས་ཀྱི་སྒྱུ་མའི་རྣམ་པ་ལས་བྱུང་ བའི་གཟུགས་དང་ལྡན་པ། ཆོས་ཀྱི་དབྱིངས་ཐ་མི་དད་པའི་ལུས་དང་ལྡན་པ། སྲིད་པའི་ལམ་གྱི་རྒྱུད་ཐམས་ཅད་དུ་སེམས་ཅན་ཡོངས་སུ་སྨིན་པར་བྱེད་པའི་དོན་དུ་ སྐྱེས་ཏེ་བསྐལ་པ་ཐམས་ཅད་དུ་གནས་པ་ལའང་ཆོས་བཅུ་མེད་དེ། བཅུ་གང་ཞེ་ན། འདི་ལྟར་འཁོར་བ་ལ་མངོན་པར་དགའ་བའམ། འཁོར་བ་སྲིད་པའི་ལམ་གྱི་རྒྱུད་ དུ་སྐྱེ་བས་སྐྱོ་བར་འགྱུར་བའམ། ཡུལ་གྱི་དགའ་བ་ལ་འདུན་པའམ། ཁོང་ཁྲོ་བའི་སེམས་སམ། ལོངས་སྤྱད་པར་འདོད་པའམ། ཉོན་མོངས་པ་ཐམས་ཅད་ཀྱིས་ ཡོངས་སུ་གདུང་བའམ། སྡུག་བསྔལ་གྱི་ཚོར་བ་ཉམས་སུ་མྱོང་བའམ། ལམ་ཉམ་ང་བར་སྐྱེ་བས་འཇིགས་པའམ། སྲིད་པར་མངོན་པར་འདུན་པའམ། མངོན་ པར་ཆགས་པ་མེད་དོ། །འོན་ཀྱང་རིགས་ཀྱི་བུ། སངས་རྒྱས་ཀྱི་བྱིན་གྱི་རླབས་ཀྱིས་མ་འོངས་པའི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྨོན་ལམ་ རྒྱ་ཆེན་པོའི་སྟོབས་རྣམ་པར་འཕེལ་བར་བྱ་བའི་ཕྱིར་བསྟན་པར་བྱའོ། །རིགས་ཀྱི་བུ། སྔོན་འདས་པའི་དུས་བསྐལ་པ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་ སྙེད་ཀྱི་ཕ་རོལ་དེའི་ཡང་ཕ་སྔ་འདས་པར་གྱུར་པ་དེའི་ཚེ་དེའི་དུས་ན་འཇིག་རྟེན་གྱི་ཁམས་རིན་པོ་ཆེའི་འོད་ཅེས་བྱ་བ་ཞིག་བྱུང་སྟེ། རིགས་ཀྱི་བུ། འཇིག་རྟེན་གྱི་ཁམས་ རིན་པོ་ཆེའི་འོད་དེ་ལ་བསྐལ་པ་ནི། འོད་བཟང་པོ་ཞེས་བྱ་བ་བྱུང་ངོ༌། །བསྐལ་པ་འོད་བཟང་པོ་ཞེས་བྱ་བ་དེ་ལ་ནི། སངས་རྒྱས་སྟོང་ཕྲག་བཅུ་བྱུང་བར་གྱུར་ཏེ། རིགས་ཀྱི་བུ། ༄༅། །སངས་རྒྱས་སྟོང་ཕྲག་བཅུ་པོ་དེ་དག་ལས་བསྐལ་པའི་དང་པོ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་ཞེས་བྱ་བ་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་ཐམས་ཅད་ཀྱི་ཐོག་མ་ལ་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །རིགས་ཀྱི་བུ། དེ་བཞིན་གཤེགས་པ་དེ་གླིང་བཞི་པའི་དབུས་ན་རྒྱལ་པོའི་གནས་དགའ་བས་བརྒྱན་པ་ཞེས་ བྱ་བ་ཡོད་པ་དང་ཚད་དུའང་རྒྱང་མི་རིང་བ་ཞིག་ཏུ་བྱུང་སྟེ། རྒྱལ་པོའི་གནས་དགའ་བས་བརྒྱན་པ་དེའི་ཤར་ཕྱོགས་ལོགས་ན་ནགས་ཚལ་འོད་བཟང་པོ་ཞེས་བྱ་ བ་ཞིག་ཡོད་དེ། ནགས་ཚལ་འོད་བཟང་པོ་དེར་སྙིང་པོ་བྱང་ཆུབ་རིན་པོ་ཆེའི་མེ་ཏོག་གི་སྤྲིན་ཅེས་བྱ་བ་བྱུང་ངོ༌། །སྙིང་པོ་བྱང་ཆུབ་རིན་པོ་ཆེའི་སྤྲིན་ཅེས་བྱ་བ་དེར་གདན་སེངྒེའི་ ཁྲི་རིན་པོ་ཆེ་རྣམ་པར་སྣང་བའི་སྙིང་པོ་ཅན་བྱུང་སྟེ། དེ་ལ་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་བླ་ ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །དེའི་ཚེ་མིའི་ཚེའི་ཚད་ལོ་སྟོང་ཕྲག་བཅུ་ཐུབ་པ་ལས་འཇིག་རྟེན་དུ་སེམས་ཅན་སྲོག་གཅོད་པ་ དང༌། མ་བྱིན་པར་ལེན་པ་དང༌། འདོད་པས་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་ཟེར་བ་དང༌། ཞེ་གཅོད་པའི་ཚིག་སྨྲ་བ་དང༌། ཚིག་ཀྱལ་བ་ཟེར་བ་དང༌། ཆགས་སེམས་དང་ལྡན་པ་དང༌། གནོད་སེམས་ཡོད་པ་དང༌། ལོག་པར་ལྟ་བ་ཅན་བྱུང་སྟེ། དེ་ལྟར་མི་དགེ་བའི་ལས་ཀྱི་ལམ་བཅུ་རྣམ་པར་རྒྱས་པར་གྱུར་ནས་རབ་ཏུ་ བརྟན་པར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་དེས་འཇིག་རྟེན་གྱི་དབང་པོ་སྔོན་གྱི་རྒྱལ་བ་ལ་ བྱ་བ་བྱས་པ་རྣམས་དང༌། འཛམ་བུའི་གླིང་གི་མི་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱ་བའི་ཕྱིར་སྙིང་པོ་བྱང་ཆུབ་མཆོག་ཏུ་གཤེགས་ཏེ་བྱང་ཆུབ་སེམས་དཔའ་ རྣམས་ལ་ཆོས་བསྟན་ཏོ། །དེའི་ཚེ་རྒྱལ་པོའི་གནས་དགའ་བས་བརྒྱན་པ་དེ་ན་རྒྱལ་པོ་རྒྱལ་བའི་འོད་ཅེས་བྱ་བ་འདུག་འདུག་སྟེ། དེས་མི་མ་བྱིན་པར་ལེན་པ། རྐུ་བ། སྡིག་ཏོ་བྱེད་པ། སྲོག་གཅོད་པ། འདོད་པས་ལོག་པར་གཡེམ་པ། རྫུན་ཟེར་བ། ཕྲ་མ་སྨྲ་བ། ཞེ་གཅོད་པའི་ཚིག་དང་ལྡན་པ། ཚིག་ཀྱལ་པ་སྨྲ་བ། ཆགས་སེམས་ ༄༅། །ཅན། གནོད་སེམས་ཡོད་པ། ལོག་པར་ལྟ་བ། ཆོས་མ་ཡིན་པའི་འདོད་ཆགས་ལ་ཞེན་པ། འདོད་པ་མི་བཟད་པས་མངོན་པར་ནོན་པ། ལོག་ པའི་ཆོས་ཀྱི་ཀུན་ནས་འཁོར་བ། སྡིག་ཏོ་བྱེད་བྱེད་པ། ཁྲོ་གཏུམ་བྱེད་བྱེད་པ། བསོད་ནམས་མ་བྱས་པ། འཇིགས་པས་བག་ཚ་བ་མེད་པ། མར་མི་ཤེས་པ། ཕར་ མི་ཤེས་པ། དགེ་སྦྱོང་དུ་བྱ་བ་མེད་པ། བྲམ་ཟེར་བྱ་བ་མེད་པ། ཚུལ་མི་ཤེས་པ། གཡོ་དང་ལྡན་པ་བརྒྱ་སྟོང་དུ་མ་རབ་ཏུ་གདུལ་བར་བྱ་བའི་ཕྱིར་བཙོན་རར་བཙུད་པར་ གྱུར་ཏོ༑ ༑རྒྱལ་པོ་རྒྱལ་བའི་འོད་དེ་ལ་བུ་གཟུགས་བཟང་བ། ཤིན་ཏུ་མཛེས་པ། བལྟ་ན་སྡུག་པ། ཁ་དོག་བཟང་པོ་དམ་པ་རྒྱས་པ་དང་ལྡན་པ། མི་ཆེན་པོའི་མཚན་ཉི་ཤུ་ རྩ་བརྒྱད་དང་ལྡན་པ་རྣམ་པར་རྒྱལ་བ་ཞེས་བྱ་བ་ཞིག་ཡོད་པ་དེ་ཁང་པ་གླུ་སྙན་པའི་དབྱངས་ཞེས་བྱ་བའི་སྟེང་དུ་ཕྱིན་ཏེ་བུད་མེད་ཀྱི་འཁོར་མང་པོས་ཡོངས་སུ་བསྐོར་ ཅིང་འདུག་འདུག་པ་ལས་བཙོན་ར་ན་འཁོད་པའི་སེམས་ཅན་མཚོན་ཆ་སྣ་ཚོགས་ཀྱིས་དམད་དུ་གླགས་པ་དེ་དག་གི་སྒྲ་འཇིགས་འཇིགས་སྐད་དུ་འབོད་པ་ཐོས་ པར་གྱུར་ཏོ། །ཐོས་ནས་མི་དགའ་ཞིང་ཤིན་ཏུ་ཉམས་མི་བདེ་བའི་སེམས་སུ་གྱུར་ཏེ། སྙིང་རྗེ་ཆེན་པོ་སྐྱེས་ནས་ཁང་སྟེང་དེ་ནས་ཤོད་དུ་བབས་ཏེ། བཙོན་ར་དེར་ ཕྱིན་ནས་བཙོན་ར་དམ་པོ་ན་འཁོད་པའི་སེམས་ཅན་ཤིང་སྒྲོག་དང༌། ལྕགས་སྒྲོག་དང༌། ཁོང་སྒྲིལ་དང༌། ལྟུང་དང་མདོ་རྟོད་ཀྱིས་སྒྲོག་ཤིང་བརྟོད་དེ་གཅིག་གི་ལུས་དང་ གཅིག་ཏུ་སྦྲེལ་ནས་མུན་པ་མུན་ནག་ཏུ་བཙུད་དེ་དུད་པའི་རབ་རིབ་ཀྱིས་འགྲིགས་ཤིང་རླུང་ནད་ཉམས་སུ་མི་བདེ་བས་ཉམ་ཐག་པར་གྱུར་པ། དབུགས་ཤིན་ཏུ་མི་བདེ་ བར་རྒྱུ་བ། བཀྲེས་པ་དང་སྐོམ་པས་མནར་བ། སྒྲེན་མོ་གོས་མེད་པ། ལུས་ཐམས་ཅད་ཕྱག་དར་དང་རྡུལ་གྱི་ནང་ན་འགྲེ་བ། ལུས་རང་གི་སྐྲས་ཡོག་པ། བརླ་སྒྲིལ་གྱིས་ དམ་དུ་བཅིངས་པ། ཉོན་མོངས་པ་སྣ་ཚོགས་ཀྱིས་མཐོ་བརྩམས་པ། སྡུག་བསྔལ་གྱི་ཚོར་བས་ཟིལ་གྱིས་མནན་ཅིང་སྡུག་བསྔལ་ཉམས་སུ་མྱོང་བར་གྱུར་ཏེ། མི་ བཟད་པ་སྣ་ཚོགས་ཀྱི་སྨྲེ་སྔགས་བླ་ཞིང་འོ་དོད་འབོད་པ་དེ་དག་མཐོང་ནས་སྙིང་རྗེ་ཆེན་པོ་སྐྱེས་ཏེ། སྙིང་རྗེའི་བསམ་པ་རྒྱ་ཆེན་པོ་བྱུང་ནས་གཞན་ལ་ཕན་པར་བྱ་བའི་ སེམས་སྐྱེས་ཏེ་བཙོན་ར་ཐིབས་པོ་ན་འཁོད་པའི་སེམས་ཅན་རྣམས་བཙོན་ར་ནས་ཐར་པར་བྱའོ། །ཞེས་དབུགས་བཏོན་ནས་དེས་སེམས་ཅན་དེ་དག་ལ་མི་འཇིགས་པ་བྱིན་ ཏེ་རྒྱལ་པོ་རྒྱལ་བའི་འོད་གང་ན་བ་དེར་སོང་སྟེ་འདི་སྐད་ཅེས་གསོལ་ཏོ། །ལྷའི་ཞལ་སྔ་ནས་མཁྱེན་པ་མཛད་དུ་གསོལ། བཙོན་ར་མི་བདེ་བ་ན་མཆིས་པའི་སེམས་ཅན་རྣམས་ ༄༅། །ལ་གློ་བ་རྗེ་ནས་བདག་གིས་མི་འཇིགས་པ་སྩལ་ན། དེ་དག་དགྱེ་བར་ཅི་གནང་ཞེས་ནས་དེ་ནས་རྒྱལ་པོ་རྒྱལ་བའི་འོད་ཀྱིས་བློན་པོ་ལྔ་བརྒྱ་ པོ་བསགས་ནས་ཁྱེད་ཇི་སྙམ་དུ་སེམས་ཞེས་སྨྲས་པ་དང༌། དེ་དག་གིས་སྨྲས་པ། བཙོན་འདི་རྣམས་ནི། རྒྱལ་པོའི་ཕྱག་མཛོད་རྐུ་བ། རྒྱལ་པོའི་སྐུ་ལ་དར་བ། བཙུན་མོའི་འཁོར་དུ་ཞུགས་པ་ལས་བཟུང་བ་ཤ་སྟག་སྟེ། དེ་དག་ནི། མི་འགུམ་དུའང་མི་རུང༌། དེ་དག་གི་ཆད་པ་ནི། འགུམ་པས་འབྲ་བར་བས་སྟེ། མ་ལགས་ ནའང་བཙོན་རར་གུམ་ན། ཆད་པ་འབྲ་ལགས་གྲང༌། དེ་དག་གི་མགོན་སུ་བགྱིད་པ་དེའང་རྒྱལ་པོའི་ཞལ་སྔར་གློ་བ་རིང་ངོ༌། །དེ་ནས་རྒྱལ་པོའི་བུ་རྣམ་པར་རྒྱལ་བའི་ སྙིང་རྗེ་ཆེན་པོས་མི་བཟོད་ཆེས་ནས་བློན་པོ་དེ་དག་ལ་སྨྲས་པ། ཁྱེད་ཀྱིས་ཇི་སྐད་དུ་སྨྲ་བ་དེ་ལྟར་ཡང་རུང་སྟེ། ངས་ཁོང་ཏ་འདི་དག་གི་དོན་དུ་སྡུག་བསྔལ་ཉམས་སུ་བླང་ བ་ཐམས་ཅད་ཀྱང་བཟོད་པར་བྱ་ན། དེ་དག་ལ་ཁྱེད་ཀྱིས་ཅི་བྱ་བ་དེ་ང་ལ་གྱིས་ཏེ་ཉེས་པ་ཅན་དེ་དག་ཁྱེ་ཞིག །ངས་དེ་རྣམས་བཙོན་ར་ནས་དགྲོལ་བའི་དོན་དུ་མི་བདེ་བ་ ཐམས་ཅད་ཉམས་སུ་བླང་སྟེ་ལུས་དང༌། སྲོག་ཡོངས་སུ་དོར་བར་བྱའོ། །དེ་ཅིའི་ཕྱིར་ཞེ་ན། གལ་ཏེ་ངས་སེམས་ཅན་འདི་རྣམས་ཙམ་ཞིག་ཀྱང་བཙོན་ར་ནས་ དགྲོལ་བར་མ་ནུས་ན། ཁམས་གསུམ་པའི་བཙོན་ར་ན་འཁོད་པའི་སེམས་ཅན་སྲེད་པའི་ཞགས་པས་གླགས་པ། མ་རིག་པའི་ཐིབས་པོ་ན་འཁོད་པ། གཏི་མུག་གི་མུན་པར་ བཙུད་པ། ཕོངས་པའི་སྡུག་བསྔལ་གྱིས་མནར་བ། ངན་སོང་གི་རྒྱུད་ཟབས་སུ་རིང་ཞིང་འབྱུང་བར་དཀའ་བར་ཆུད་པ། དབྱིབས་མི་སྡུག་ལ་མདོག་མི་སྡུག་པ་དང་ལྡན་པ། དབང་ པོའི་སྦྱོར་བ་ཐམས་ཅད་དང་བྲལ་བ། ནོར་བའི་ཡིད་དང་ལྡན་པ། འབྱུང་བ་མི་མཐོང་བ། སྣང་བ་མེད་པ། ཁམས་གསུམ་པ་ལ་མངོན་པར་ཞེན་པ། བསོད་ནམས་དང་ཡེ་ཤེས་ ཀྱི་ཚོགས་མེད་པ། ཡེ་ཤེས་ཀྱི་སྐྱེ་མཆེད་དང་སྐོལ་བ། ཉོན་མོངས་པ་སྣ་ཚོགས་ཀྱིས་སེམས་དྲི་མ་ཅན་དུ་གྱུར་པ། སྡུག་བསྔལ་གྱི་ཤིང་ཐགས་ཀྱིས་འཁོར་བ། བདུད་ཀྱི་དབང་ དུ་གྱུར་པ། སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པས་མནར་བ་ རྣམས་ཀྱང་ཇི་ལྟར་ཁྲོལ་བར་བྱ་ཞེས་ནས་རྒྱལ་པོ་གཞོན་ནུ་རྣམ་པར་རྒྱལ་བས་བཙོན་ར་ན་འཁོད་པའི་སེམས་ཅན་དེ་དག་བདག་ཉིད་ཡོངས་སུ་གཏང་བ་དང༌། རྣམ་པ་ཐམས་ ཅད་དུ་ཡོངས་སུ་གཏང་བས་གཡོག་འཁོར་ཐམས་ཅད་དང༌། ནོར་གྱི་ཕུང་པོ་ཐམས་ཅད་ཀྱིས་བླུས་ཏེ་བཙོན་ར་དེ་དག་ནས་ཡོངས་སུ་བཀྱེ་ནས་སེམས་ཅན་དེ་དག་གི་སྡུག་བསྔལ་ ༄༅། །ཉམས་སུ་བླངས་ཏེ་ཕྱིར་ལྡོག་པ་མེད་པར་གྱུར་ཏོ། །དེ་ནས་བློན་པོ་ལྔ་བརྒྱ་པོ་དེ་དག་གིས་ལག་པ་གྱེན་དུ་བསྒྲེང་སྟེ་འོ་དོད་བོས་ནས་རྒྱལ་པོ་རྒྱལ་ བའི་འོད་ཀྱི་གན་དུ་དོང་སྟེ་འདི་སྐད་ཅེས་སྨྲས་སོ། །རྒྱལ་པོའི་ཞལ་སྔ་ནས་མཁྱེན་པར་མཛད་དུ་གསོལ། གཞོན་ནུ་རྣམ་པར་རྒྱལ་བའི་མཆིད་ཐབས་སུ་བགྱིས་པས་རྒྱལ་ པོའི་ཆབ་སྲིད་ཀྱང་སྟོར་བར་འགྱུར། བདག་ཅག་རྣམས་ཀྱང་སྲོག་ལ་འབབ་པར་ཐེ་ཚོམ་འཚལ་ཏེ། ལྷའི་ཞལ་སྔ་ནས་རྒྱལ་པོ་གཞོན་ནུ་རྣམ་པར་རྒྱལ་བ་ལ་བཀའ་ནན་ མ་མཛད་ན་ནི། རིང་པོའང་མི་ཐོགས་པར་ལྷའི་ཞལ་སྔར་སྐུ་ལ་དར་བར་འགྱུར་རོ། །ཞེས་པ་དང༌། དེ་ནས་རྒྱལ་པོ་རྒྱལ་བའི་འོད་ཤིན་ཏུ་ཁྲོས་ནས་རྒྱལ་པོའི་བུ་རྣམ་པར་ རྒྱལ་བ་དང༌། གཡོན་དང་ལྡན་པའི་མི་དེ་དག་ཏུ་བཅས་ཏེ་གསད་པར་བྱས་སོ། །དེ་ནས་དེའི་མ་སྐྱེད་སྐྱེད་པས་ཐོས་ནས་མི་དགའ་སྟེ། བུད་མེད་ཀྱི་འཁོར་སྟོང་དང་བཅས་ ཏེ་སྐྲ་ནི། བཤིག །ལུས་ཀྱི་རྒྱན་ནི། བོར། རང་གི་བཞིན་ནི། དྲལ། བྲང་ནི། རྡུང༌། མགོ་ནི། ཕྱག་དར་གྱིས་གང་བར་སྙིང་རྗེ་རྗེ་སྐད་ཀྱི་ང་རོར་དུ་ཞིང་རྒྱལ་པོའི་དྲུང་དུ་ ཕྱིན་ནས་འཁོར་དང་བཅས་པས་རྐང་པ་གཉིས་ལ་ཕྱག་བྱས་ཏེ་འདི་སྐད་དུ་གསོལ་བ་བཏབ་བོ། །ལྷའི་ཞལ་སྔ་ནས་ཐུགས་ཅི་དགོངས། རྒྱལ་པོ་གཞོན་ནུ་རྣམ་པར་རྒྱལ་ བ་གཏང་དུ་གསོལ། རྒྱལ་པོ་གཞོན་ནུ་རྣམ་པར་རྒྱལ་བའི་སྲོག་སྩལ་དུ་གསོལ་ཞེས་ནས་དེ་ནས་རྒྱལ་པོས་རྒྱལ་པོ་གཞོན་ནུ་རྣམ་པར་རྒྱལ་བ་མདུན་དུ་བཞག་སྟེ་འདི་སྐད་ ཅེས་སྨྲས་སོ། །གཞོན་ནུ། གཡོན་དང་ལྡན་པའི་མི་འདི་རྣམས་ཐོང༌། དེ་སྟེ་མི་གཏོང་ཞིང་དེ་རྣམས་ཀྱི་ལེ་ལན་དུ་ཤི་བར་གྱུར་ཏ་རེ་ཞེས་པ་དང༌། དེས་ཞུམ་པ་མེད་པའི་ སེམས་མ་འཁུམས་པ། ཐམས་ཅད་མཁྱེན་པ་ཉིད་དུ་དམིགས་པར་བརྩོན་པ། གཞན་ལ་ཕན་པར་གཞོལ་བ། སྙིང་རྗེ་ཆེན་པོ་སྔོན་དུ་འགྲོ་བས་འཆི་བར་ཁས་བླངས་ པ་དང༌། དེའི་མས་རྒྱལ་པོ་རྒྱལ་བའི་འོད་ལ་ཟླ་བ་ཕྱེད་ཅིག་ཏུ་ཕྲད་པར་གསོལ་བ་བཏབ་པ། དགུང་ཟླ་ཕྱེད་ཅིག་ཏུ་གཞོན་ནུ་འདི་སྦྱིན་པ་སྩོལ་དུ་ཅི་གནང༌། དེ་སླན་ཆད་ ནི༑ སུ་ཅི་དགྱེས་པ་དེའང་མཛད་པར་གསོལ་ཞེས་པ་དང༌། དེ་དེ་ལྟར་གྱིས་ཤིག །ཅེས་རྒྱལ་པོས་གནང་ངོ༌། །དེ་ནས་རྒྱལ་པོའི་གནས་དགའ་བས་བརྒྱན་པ་དེའི་བྱང་ཕྱོགས་ ལོགས་ཤིག་ན་སྔོན་མཆོད་སྦྱིན་གྱི་གནས་སུ་བྱ་བའི་བཟའ་ཤིང་གི་ར་བ་ཆེན་པོ་ཉི་མའི་འོད་ཅེས་བྱ་བ་དེར་གཞོན་ནུ་དེ་སོང་ནས་སུ་ཅི་འདོད་པ་དེ་ལ་དེ་བྱིན་ཏེ། དེས་གཏན་ པ་མེད་པའི་མཆོད་སྦྱིན་བྱས་ནས་ཟླ་བ་ཕྱེད་དུ་སྦྱིན་པ་རྣམ་པ་སྣ་ཚོགས་བྱིན་ནོ། །ཟས་འདོད་པ་ལ་ནི། ཟས་བྱིན། སྐོམ་འདོད་པ་ལ་ནི། སྐོམ་བྱིན། བཞོན་པ་དང༌། ༄༅། །གོས་དང༌། མེ་ཏོག་དང༌། བྱུག་པ་དང༌། ཕྱེ་མ་དང༌། ཆོས་གོས་དང༌། གདུགས་དང༌། རྒྱལ་མཚན་དང༌། བ་དན་དང༌། རིན་པོ་ཆེའི་རྒྱན་དང༌། ཡོ་བྱད་ཐམས་ཅད་དང༌། ལྷབ་ལྷུབ་ཐམས་ཅད་དང༌། ཡོ་བྱད་ཀྱི་རྣམ་པ་ཐམས་ཅད་ཀྱང་དེ་དག་འདོད་པ་ལ་ཡོངས་སུ་བཏང་སྟེ། དེ་ནས་ཉི་མ་ཐ་མ་ལ་བབ་པར་གྱུར་ པ་དང་འགྲོ་བ་མང་པོའི་ཚོགས་ཀུན་ནས་འདུས་ཏེ། རྒྱལ་པོའི་བློན་པོ་དང༌། བུད་མེད་ཀྱི་ཚོགས་དང༌། ཚོང་དཔོན་དང༌། ཁྱིམ་བདག་དང༌། ལྗོངས་དང་ཡུལ་གྱི་མི་དང་ ཞགས་པ་ཐུབ་པ་ཐམས་ཅད་ཀྱང་ཀུན་ནས་འདུས། བཅོམ་ལྡན་འདས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་དེ་བཞིན་གཤེགས་པ་དེ་ཡང་ སེམས་ཅན་ཡོངས་སུ་སྨིན་པར་བྱ་བ་དང༌། གདུལ་བའི་དུས་ཐུགས་སུ་ཆུད་ནས་མཆོད་སྦྱིན་གྱི་གནས་དེར་གཤེགས་ཏེ་ལྷའི་དབང་པོའི་ཚོགས་ཀྱིས་ནི། ཡོངས་སུ་ བསྐོར༑ ཀླུའི་དབང་པོས་ནི། ཡང་དག་པར་མཆོད། གནོད་སྦྱིན་གྱི་དབང་པོས་ནི། ལུས་མངོན་པར་བཏུད། དྲི་ཟའི་དབང་པོས་ནི། མངོན་པར་བསྟོད། ལྷ་མ་ཡིན་ གྱི་དབང་པོས་ནི། ལུས་ཤིན་ཏུ་བཏུད། ནམ་མཁའ་ལྡིང་གི་དབང་པོ་གཙུག་གི་རིན་པོ་ཆེས་རྣམ་པར་བརྒྱན་པས་ནི། སེམས་དང་བའི་མཆོད་པའི་རྣམ་པས་རབ་ཏུ་ བཀང༌། མིའམ་ཅིའི་དབང་པོ་རྣམས་ཀྱིས་ནི། དགའ་བས་ཡོངས་སུ་མཆོད་དེ་བསྟོད་པའི་གླུ་དབྱངས་ཀྱིས་ཡོངས་སུ་བསྐུལ། ལྟོ་འཕྱེ་ཆེན་པོའི་དབང་པོ་རྣམས་ཀྱིས་ནི། ཀུན་ནས་བསྐོར་ཅིང་ཞལ་དུ་བལྟ་བ་དེ་འགྲོ་བའི་ཚོགས་ཆེན་པོ་དེ་དང༌། རྒྱལ་པོ་གཞོན་ནུ་རྣམ་བར་རྒྱལ་བས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་ཤིན་ཏུ་མཛེས་པ། བལྟ་ན་སྡུག་པ། དབང་པོ་ཞི་བ། ཐུགས་ཞི་ བ༑ ཤིན་ཏུ་དབེན་པར་དབང་པོ་ལས་རྒྱལ་བ། གླང་པོ་ལྟར་ཤིན་ཏུ་དུལ་བ། མཚོ་ལྟར་རབ་ཏུ་དྭངས་ཤིང་གསལ་ལ་རྙོག་པ་མེད་པ། སངས་རྒྱས་ཀྱི་རྣམ་པར་འཕྲུལ་པ་ དང༑ ཆོ་འཕྲུལ་ཆེན་པོ་དང༌། སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་ཆེན་པོས་ནི། རྣམ་པར་མཛེས། སངས་རྒྱས་ཀྱི་བདག་ཉིད་ཆེ་བས་ནི། རབ་ཏུ་འབར། སངས་ རྒྱས་ཀྱི་མཚན་དང༌། དཔེ་བྱད་བཟང་པོའི་རྒྱན་གྱིས་ནི། སྐུ་མཛེས་པར་བརྒྱན། འཇིག་རྟེན་ཐམས་ཅད་ནི། སངས་རྒྱས་ཀྱི་འོད་ཀྱི་དཀྱིལ་འཁོར་སྣང་བས་རྒྱས་པར་ འགེངས་ཤིང་སངས་རྒྱས་ཀྱི་འོད་ཟེར་གྱིས་རབ་ཏུ་སྣང་བར་མཛད། སྐུའི་བ་སྤུའི་བུ་ག་ཐམས་ཅད་ནས་ནི། སྤོས་རིན་པོ་ཆེའི་ངད་འཕྲོ་བའི་འཁོར་ལོ་རབ་ཏུ་འགྱེད། ༄༅། །སངས་རྒྱས་ཀྱི་ཞིང་རབ་ཏུ་བསྐྱོད་པའི་ཚུལ་དུ་ནི། འཇིག་རྟེན་གྱི་ཁམས་ཐམས་ཅད་ཡོངས་སུ་སྐྱོབ་པ་མཛད་ཅིང་རྒྱན་ཐམས་ཅད་ཀྱི་སྤྲིན་གྱི་ཆར་ རབ་ཏུ་འབེབས་པའི་སངས་རྒྱས་ཀྱི་རྣམ་པར་གནོན་པ་དང༌། སེམས་ཅན་ཐམས་ཅད་ཀྱི་ཉོན་མོངས་པ་སྤོང་བའི་སངས་རྒྱས་ཀྱི་སྤྱོད་ལམ་དང༌། སེམས་ཅན་ཐམས་ ཅད་ཀྱི་དགའ་བའི་ཤུགས་རྣམ་པར་འཕེལ་བར་མཛད་པའི་སངས་རྒྱས་ཀྱི་ཞལ་བལྟ་བའི་བྱིན་གྱིས་ཕ་ཟད་ཅིག་ནས་ཚུར་གཤེགས་པ་མཐོང་ནས་དེ་བཞིན་གཤེགས་ པ་ལ་སེམས་མངོན་པར་མོས་པར་གྱུར་ཏོ། །དེ་ནས་རྒྱལ་པོ་གཞོན་ནུ་རྣམ་པར་རྒྱལ་བ་དང༌། འགྲོ་བའི་ཚོགས་ཆེན་པོ་དེ་དག་གིས་བཅོམ་ལྡན་འདས་དེ་བཞིན་ གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་དེ་ཕ་ཟད་དུ་བསུ་ནས་མོས་པའི་སེམས་ཀྱིས་ལུས་ཐམས་ཅད་ཀྱིས་ཕབ་སྟེ་ཕྱག་འཚལ་ ནས་ཞབས་གཉིས་ལ་སྤྱི་བོས་གཏུགས་ཏེ་མཆོད་པ་རྣམ་པ་སྣ་ཚོགས་ཀྱིས་ཡང་དག་པར་མཆོད་ནས་ཚིག་འདི་སྐད་དུ་བརྗོད་དོ། །བཅོམ་ལྡན་འདས་ཚུར་གཤེགས་ སུ་གསོལ། བདེ་བར་གཤེགས་པ་ཚུར་གཤེགས་སུ་གསོལ། དེ་བཞིན་གཤེགས་པས་བདག་ཅག་དགོངས་སོ། །བདེ་བར་གཤེགས་པས་བདག་ཅག་ཡོངས་ སུ་བཟུང་ངོ༌། །དེ་ནས་རྒྱལ་པོ་གཞོན་ནུ་རྣམ་པར་རྒྱལ་བས་བཅོམ་ལྡན་འདས་ལ་གདན་དམ་པས་བསྟབས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་གདན་བཏིང་ བ་འདི་ལ་བཞུགས་སུ་གསོལ་ཞེས་ནས་བཅོམ་ལྡན་འདས་དེར་གཤེགས་པ་དང༌། གདན་དེ་ཡང་གཙང་སྦྲ་ལྷུར་ལེན་པའི་ལུས་ཀྱི་རིས་སུ་གཏོགས་པའི་ལྷ་རྣམས་ཀྱིས་ སངས་རྒྱས་ཀྱི་བྱིན་གྱིས་རིན་པོ་ཆེ་སྤོས་ཀྱི་རྒྱལ་པོའི་པདྨོའི་སྙིང་པོ་ཅན་དུ་བྱིན་གྱིས་བརླབས་ནས་གདན་དེ་ལ་བཅོམ་ལྡན་འདས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་ སྒྲོན་མ་རྒྱལ་པོ་དེ་བཞིན་གཤེགས་པ་བཞུགས་སོ། །འཁོར་གྱི་སྟན་དེ་དག་ལ་བྱང་ཆུབ་སེམས་དཔའ་རྣམས་འཁོད་དེ། དེའི་ཞལ་མཐོང་མ་ཐག་ཏུ་འཁོར་དེའི་སེམས་ ཅན་ཐམས་ཅད་ཀྱང་སྒྲིབ་པ་ཐམས་ཅད་དང་བྲལ་ཏེ། ནད་ཐམས་ཅད་ཀྱང་ཞི་བར་གྱུར་ནས་འཕགས་པའི་ཆོས་ཀྱི་སྣོད་དུ་གྱུར་ཏོ། །དེ་ནས་བཅོམ་ལྡན་འདས་དེ་བཞིན་ གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོས་སེམས་ཅན་དེ་དག་སྣོད་དུ་གྱུར་པར་ཐུགས་སུ་ཆུད་ནས་བསྟན་པ་རིམ་པས་བཀའ་སྩལ་ཏེ། འདི་ལྟར་རྒྱུའི་དཀྱིལ་འཁོར་རབ་ཏུ་སྣང་བ་ཞེས་བྱ་བའི་མདོ་སྡེ་ཡང་དག་པར་བསྟན་ནས་ཞལ་གྱི་སྒོ་ནས་འགྲོ་བ་ཐམས་ཅད་ཀྱི་སྐད་རྒྱ་མཚོ་དང༌། དེས་པའི་ཚིག་དང་ ༄༅། །ངག་གི་དབྱངས་སུ་བརྗོད་པའི་གསུང་དབྱངས་ཀྱི་ཡན་ལག་སྟོང་དང་ལྡན་པ། ཆོས་ཀྱི་ཡན་ལག་ཐམས་ཅད་དང་ལྡན་པ་རབ་ཏུ་བསྒྲགས་པ་ དང༑ དེའི་མོད་ལ་འཁོར་དེ་ནས་སྲོག་ཆགས་བྱེ་བ་ཕྲག་བརྒྱད་ཅུ་ནི། རྡུལ་དང་བྲལ་ཏེ་དྲི་མ་མེད་པར་གྱུར་ནས་ཆོས་ལ་ཆོས་ཀྱི་མིག་སྐྱེས་པར་གྱུར་ཏོ། །སྲོག་ཆགས་ བྱེ་བ་མང་ཞིག་གིས་ནི། མི་སློབ་པའི་ས་ཐོབ་པར་གྱུར་ཏོ། །སྲོག་ཆགས་སྟོང་ཕྲག་བཅུ་ནི། ཐེག་པ་ཆེན་པོ་ལ་རྣམ་པར་དུལ་བར་གྱུར་ཏེ། འདི་ལྟར་བྱང་ཆུབ་སེམས་ དཔའི་སྤྱོད་པ་ཀུན་ཏུ་བཟང་པོ་དང༌། སྨོན་ལམ་ཆེན་པོ་ཡོངས་སུ་རྫོགས་པའི་ཚུལ་ལ་ཞུགས་པར་གྱུར་ཏོ། །དེ་ལྟར་བཅོམ་ལྡན་འདས་དེས་སངས་རྒྱས་ཀྱི་རྣམ་པར་ འཕྲུལ་པ་ཆེན་པོས་ཆོས་ཀྱི་འཁོར་ལོ་རབ་ཏུ་བསྐོར་བའི་ཚེ་ཕྱོགས་བཅུའི་སེམས་ཅན་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཐེག་པ་ཆེན་པོ་ ལ་རྣམ་པར་དུལ་བར་གྱུར་ཏོ། །ཕྱོགས་བཅུའི་འཇིག་རྟེན་སངས་རྒྱས་ཀྱི་ཞིང་འབྱམས་ཀླས་པ་སྣ་ཚོགས་སུ་གཏོགས་པ་དག་གི་སེམས་ཅན་མཐའ་དང་དབུས་མེད་པ་ དག་གིས་ཀྱང་ངན་སོང་གི་ལམ་རྣམ་པར་བཟློག་པར་གྱུར་ཏོ། །སེམས་ཅན་གྲངས་ལས་འདས་པ་ཞིག་ནི། མཐོ་རིས་སུ་སྐྱེ་བའི་ལམ་ལ་རབ་ཏུ་བཀོད་པར་གྱུར་ ཏོ༑ ༑རྒྱལ་པོ་གཞོན་ནུ་རྣམ་པར་རྒྱལ་བས་ཀྱང་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་ བའི་རྩ་བ་ལ་ཡང་དག་པར་སྐུལ་བ་འདི་ཐོབ་པར་གྱུར་ཏོ། །རིགས་ཀྱི་བུ། དེ་ལ་དེའི་ཚེ་དེའི་དུས་ན་རྒྱལ་པོ་གཞོན་ནུ་རྣམ་པར་རྒྱལ་བ་ཞེས་བྱ་བ་བྱུང་སྟེ། རང་གི་ལུས་དང་ སྲོག་ཡོངས་སུ་བཏང་ནས་ནོར་གྱི་ཚོགས་དང༌། འཁོར་ཐམས་ཅད་དང༌། མིའི་འཇིག་རྟེན་ན་འཚོ་བའི་བདེ་བ་ཡོངས་སུ་སྤངས་ནས་བཙོན་ར་ན་འཁོད་པའི་སེམས་ཅན་དེ་ དག་ཐར་པར་བྱས་པ། མཆོད་སྦྱིན་ཆེན་པོ་གཏན་པ་མེད་པའི་མཆོད་སྦྱིན་བྱེད་བྱེད་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་དེ་ལ་བསྙེན་བཀུར་བྱེད་བྱེད་པ། དེ་བཞིན་གཤེགས་པ་དེའི་ཞལ་མཐོང་བའི་མོད་ལ་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་སྐུལ་བ་ཡང་ཐོབ་པར་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་ནི། རིགས་ཀྱི་བུ། ཁྱོད་ཀྱིས་དེ་ལྟར་མི་བལྟ་ ༄༅། །སྟེ་ཁོ་མོ་ནི། དེའི་ཚེ་དེའི་དུས་ན་རྒྱལ་པོ་གཞོན་ནུ་རྣམ་པར་རྒྱལ་བ་ཞེས་བྱ་བར་གྱུར་ཏོ། །དེ་ལྟར་ཁོ་མོ་རྒྱལ་པོ་གཞོན་ནུ་རྣམ་པར་རྒྱལ་བ་ཞེས་བྱ་ པར་གྱུར་ཏེ། སྙིང་རྗེ་ཆེན་པོས་རབ་ཏུ་མི་དགའ་ཞིང་འགྲོ་བ་ཐམས་ཅད་ལ་ཕན་པར་ཞུགས་ཏེ། ཁམས་གསུམ་ལ་མི་གནས་པ་དང༌། རྣམ་པར་སྨིན་པའི་ལན་ལ་རེ་ བ་མེད་པ་དང༌། གྲགས་པ་དང༌། སྙན་པ་དང༌། མིང་སྨོས་པ་ལ་མངོན་པར་དགའ་བ་མེད་པ་དང༌། བདག་ལ་བསྟོད་པ་མེད་པ་དང༌། གཞན་ལ་སྨོད་པ་མེད་པ་དང༌། དངོས་ པོ་ཐམས་ཅད་ལ་མངོན་པར་ཞེན་པ་མེད་པ་དང༌། སྲེད་པའི་འདུ་ཤེས་ལས་གྱེན་དུ་འཕགས་པ་དང༌། ཁམས་གསུམ་པ་ལ་མངོན་པར་དགའ་བ་མེད་པ་དང༌། འཇིག་ རྟེན་གྱི་ཡུལ་གྱི་བདེ་བ་ལས་ཕྱིར་ཕྱོགས་པ་དང༌། དེ་བཞིན་གཤེགས་པའི་ཡུལ་ལ་མངོན་དུ་གྱུར་པ་དང༌། བྱང་ཆུབ་སེམས་དཔའི་བསམ་པ་རྣམ་པར་དག་པ་དང༌། ལྷག་པའི་བསམ་པ་རྡོ་རྗེ་ཡོངས་སུ་གྲུབ་པ་དང༌། འགྲོ་བ་ཐམས་ཅད་ལ་བྱམས་པ་ཆེན་པོས་ནན་ཏན་དུ་བྱེད་པ་དང༌། འགྲོ་བ་ཐམས་ཅད་ལ་སྙིང་བརྩེ་བས་སྡུག་ བསྔལ་རྣམ་པར་ཞི་བར་བྱ་བ་ལ་བརྩོན་པ་དང༌། དེ་བཞིན་གཤེགས་པའི་སྟོབས་ལ་བསམ་པ་ཐག་པ་ནས་ལྷག་པར་དམིགས་པ་དང༌། བྱང་ཆུབ་སེམས་དཔའི་ ལམ་ཡོངས་སུ་སྦྱང་བ་དང༌། ཐེག་པ་ཆེན་པོའི་རྒྱན་གྱིས་འབྱུང་བའི་ལམ་རབ་ཏུ་བརྒྱན་པར་བྱ་བ་དང༌། ཐམས་ཅད་མཁྱེན་པ་ཉིད་ཀྱི་སྒོ་མངོན་པར་བལྟ་བར་བྱ་བའི་ཚུལ་ གྱིས་དེ་དག་དེ་ལྟ་བུར་དཀའ་བ་དག་ཀྱང་བྱས་པར་གྱུར་ཏོ། །རིགས་ཀྱི་བུ། ཁོ་མོས་ནི། བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་ བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་སྐུལ་བ་འདི་ཡུན་དེ་སྲིད་དུ་རིང་བ་ཞིག་ནས་ཐོབ་པར་གྱུར་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་དུས་ནི་རྒྱལ་པོ་རྒྱལ་བའི་འོད་ལ་ལོག་པར་གསོལ་བ་འདེབས་ཤིང་ཁོ་མོ་གསད་པའི་ཕྱིར་གྲོས་སུ་གསོལ་བའི་བློན་པོ་ལྔ་བརྒྱ་པོ་དེ་རྣམས་གཞན་དག་ཅིག་ ཡིན་པ་སྙམ་དུ་སེམས་ན་ནི། དེ་ལྟར་མི་བལྟ་སྟེ། ལྷས་བྱིན་གྱིས་བཅོམ་ལྡན་འདས་དགྲོངས་པའི་ཕྱིར་སྐྱེས་བུ་ལྔ་བརྒྱ་བཀྱེ་བ་དེ་དག་ཡིན་ཏེ། དེ་དག་ཀྱང་བཅོམ་ལྡན་ འདས་ཀྱིས་མ་འོངས་པའི་དུས་བསྐལ་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ན་བསྐལ་པ་འོད་བཟང་པོ་ཞེས་བྱ་བ་ཞིག་ལ་སངས་རྒྱས་ལྔ་བརྒྱ་སངས་རྒྱས་ཀྱི་ཞིང་གི་ཡོན་ཏན་ དང་རྒྱན་སྣ་ཚོགས་དང་ལྡན་པ། རིགས་དང་རྒྱུད་སྣ་ཚོགས་སུ་སྐྱེས་པ། ཕ་དང་མ་སྣ་ཚོགས་སུ་སྨོས་པ། སྐྱེ་བའི་རྣམ་པར་འཕྲུལ་བ་སྣ་ཚོགས་ཡོངས་སུ་སྟོན་པ། མངོན་ ༄༅། །པར་འབྱུང་བའི་རྣམ་པར་འཕྲུལ་པ་སྣ་ཚོགས་དང་ལྡན་པ། བྱང་ཆུབ་ཀྱི་ཤིང་གི་འོད་སྣ་ཚོགས་ཡོངས་སུ་སྟོན་པ། སྙིང་པོ་བྱང་ཆུབ་སྣ་ ཚོགས་སུ་ཉེ་བར་འདོང་བའི་སྒོ་སྣ་ཚོགས་དང་ལྡན་པ། བདུད་ཕམ་པ་སྣ་ཚོགས་ཡོངས་སུ་སྟོན་པ། མངོན་པར་འཚང་རྒྱ་བའི་རྣམ་པར་འཕྲུལ་པ་སྣ་ཚོགས་ཡོངས་ སུ་སྟོན་པ། ཆོས་ཀྱི་འཁོར་ལོ་རབ་ཏུ་བསྐོར་བའི་ཚུལ་དང༌། མིང་དང༌། ངེས་པའི་ཚིག་སྣ་ཚོགས་དང་ལྡན་པ། མདོ་སྡེའི་ཚུལ་ཤིན་ཏུ་བསྟན་པ་སྣ་ཚོགས་དང་ ལྡན་པ། ཚིག་གི་ལམ་དང་སྐད་སྣ་ཚོགས་རབ་ཏུ་སྟོན་པ། འཁོར་གྱི་དཀྱིལ་འཁོར་གྱི་རྒྱན་སྣ་ཚོགས་དང་ལྡན་པ། འོད་ཀྱི་དཀྱིལ་འཁོར་གྱི་མཐུ་དང་རྒྱན་སྣ་ ཚོགས་རབ་ཏུ་འགྱེད་པ། ཚེའི་ཚད་སྣ་ཚོགས་དང་ལྡན་པ། བསྟན་པའི་བྱིན་གྱི་རླབས་སྣ་ཚོགས་དང་ལྡན་པ། བསྟན་པ་རྣམ་པར་དམིགས་པ་སྣ་ཚོགས་དང་ལྡན་ པ༑ མིང་སྣ་ཚོགས་དང་ལྡན་པ། སྙིང་རྗེ་ཆེན་པོའི་ལུས་སུ་གྱུར་པ་ཤ་སྟག་ཏུ་འགྱུར་ཏེ། དེ་དག་གི་བསྐལ་པའི་དང་པོ་ལ་དེ་བཞིན་གཤེགས་པ་ཐུགས་རྗེ་ཆེན་པོ་ མངའ་བ་ཞེས་བྱ་བ་འཇིག་རྟེན་གྱི་ཁམས་རིན་ཆེན་འོད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །དེའི་རྗེས་ལ་འཇིག་རྟེན་གྱི་ ཁམས་དེ་ཉིད་དུ་དེ་བཞིན་གཤེགས་པ་གཉིས་པ་འགྲོ་བ་ཐམས་ཅད་ལ་ཕན་པའི་སྨོན་ལམ་ཟླ་བ་ཞེས་བྱ་བ་འབྱུང་ངོ༌། །དེ་བཞིན་གཤེགས་པ་གསུམ་པ་ཐུགས་རྗེ་ཆེན་པོའི་ སེངྒེ་ཞེས་བྱ་བ་འབྱུང་ངོ༌། །དེ་བཞིན་གཤེགས་པ་བཞི་པ་འཇིག་རྟེན་ཐམས་ཅད་ལ་ཕན་པ་མཛད་པ་ཞེས་བྱ་བ་འབྱུང་བ་ནས་ཐམས་ཅད་ཀྱི་ཐ་མར་དེ་བཞིན་གཤེགས་པ་ སྨན་པའི་རྒྱལ་པོ་ཞེས་བྱ་བ་འབྱུང་བར་འགྱུར་རོ། །ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་ དེའི་དུས་ན་གཡོན་དང་ལྡན་པའི་མིའི་རྒྱལ་པོ་ལ་སྙིང་རིང་བར་གྱུར་ཏེ། ཁོ་མོས་གསོད་མ་མིའི་ལག་ཏུ་ཕྱིན་པ་ལས་རང་གི་ལུས་དང་སྲོག་ཡོངས་སུ་བཏང་སྟེ་བཙོན་ར་ དེ་དག་ནས་བཀྱེ་བ་དེ་རྣམས་གཞན་དག་ཅིག་ཡིན་པ་སྙམ་དུ་སེམས་ན་ནི། དེ་ལྟར་མི་བལྟ་སྟེ། དེ་བཞིན་གཤེགས་པ་ལོག་པར་དད་སེལ་ལ་སོགས་པ་བསྐལ་པ་ བཟང་པོ་པའི་དེ་བཞིན་གཤེགས་པ་རྣམས་དང༌། དེ་མ་ཡིན་པའི་བྱང་ཆུབ་སེམས་དཔའ་གྲངས་མེད་པ་བརྒྱ་སྟོང་ཕྲག་བཅུ་དག་སྟེ། བཅོམ་ལྡན་འདས་དེ་བཞིན་གཤེགས་ པ་སྟོབས་མཐའ་ཡས་གྲགས་པར་བརྗོད་པའི་དཔལ་ཡང་དག་པར་འབྱུང་བའི་བློ་གྲོས་མཐོང་བར་གྱུར་མ་ཐག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ ༄༅། །སེམས་བསྐྱེད་ནས་ད་ལྟར་ཕྱོགས་བཅུ་ན་བྱང་ཆུབ་སེམས་དཔའི་སྤྱད་པ་སྤྱོད་ཅིང་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་འདི་ཡང་སྒོམ་ཞིང་ཤིན་ཏུ་རྒྱས་པར་བྱེད་པ་དག་གོ །རིགས་ཀྱི་བུ། དེ་ ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་རྒྱལ་བའི་འོད་ཅེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ན་ནི། དེ་ལྟར་མི་བལྟ་སྟེ། སྨྲ་བ་ཆེན་པོ་བདེན་པ་ ཅན་ནི༑ དེའི་ཚེ་དེའི་དུས་ན་རྒྱལ་པོ་རྒྱལ་བའི་འོད་ཅེས་བྱ་བར་གྱུར་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་དུས་ན་རྒྱལ་པོའི་འཁོར་དུ་གྱུར་པ་བཙུན་མོའི་ འཁོར་དང༌། བཙུན་མོའི་གནས་ཀྱི་སྒོ་བའམ། འཁོར་ན་གནས་པའམ། རྗེས་སུ་འབྲང་བ་དེ་དག་ཀྱང་གཞན་དག་ཅིག་ཡིན་པ་སྙམ་དུ་སེམས་ན་ནི། དེ་ལྟར་མི་བལྟ་ སྟེ༑ ཞགས་པ་ཐུབ་པ་སྟོང་ཕྲག་དྲུག་ཅུ་པོ་སྨྲ་བ་ཆེན་པོ་བདེན་པ་ཅན་གྱི་སྨྲ་བའི་རྒྱལ་མཚན་ཡོངས་སུ་གཟུང་བའི་དོན་དུ་བཅོམ་ལྡན་འདས་ལ་རྒོལ་དུ་འགྲོ་བའི་ཚེ་ བཅོམ་ལྡན་འདས་ཀྱི་སྦྱན་སྔར་བླགས་ནས་ཀུན་ཀྱང་ཞིང་སྣ་ཚོགས་ཀྱི་རྒྱན་དང༌། བསྐལ་པ་སྣ་ཚོགས་དང༌། མིང་སྣ་ཚོགས་ཀྱི་དེ་བཞིན་གཤེགས་པར་འཇིག་རྟེན་ དུ་འབྱུང་བར་འགྱུར་རོ། །ཞེས་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དག་གོ །རིགས་ཀྱི་བུ། རྒྱལ་པོ་གཞོན་ནུ་རྣམ་ པར་རྒྱལ་བ་དེ་ཕ་དང་མས་གནང་ནས་སེམས་ཅན་བརྩོན་ར་བ་དེ་དག་ཡོངས་སུ་བཀྲོལ་བའི་འོག་ཏུ་སྲིད་ཤིན་ཏུ་བདེ་བ་དང༌། ནོར་དང༌། དབྱིག་རིན་པོ་ཆེ་ཕུན་སུམ་ཚོགས་ བ་དག་ཀྱང་པོར། བུ་དང་ཆུང་མ་དག་ཀྱང་སྤངས་ནས་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོའི་ཞམ་འབྲིང་དུ་ རབ་ཏུ་བྱུང་ངོ༌། །རབ་ཏུ་བྱུང་ནས་ཀྱང་ལོ་སྟོང་ཕྲག་ལྔར་ཚངས་པར་སྤྱོད་པ་སྤྱད་དེ། དེའི་བར་སྐབས་སུ་ཏིང་ངེ་འཛིན་གྱི་སྒོ་སྟོང་ཕྲག་བཅུ་ཡོངས་སུ་བསྒྲུབས་སོ། །གཟུངས་ ཀྱི་སྒོ་སྟོང་ཕྲག་བཅུའང་རབ་ཏུ་ཐོབ་བོ། །མངོན་པར་ཤེས་པའི་ཚུལ་སྟོང་ཕྲག་བཅུ་ལའང་རབ་ཏུ་ཞུགས་སོ། །བྱང་ཆུབ་སེམས་དཔའི་གཏེར་སྟོང་ཕྲག་བཅུའང་རབ་ཏུ་ཐོབ་ བོ༑ ༑ཐམས་ཅད་མཁྱེན་པའི་ཤུགས་སྟོང་ཕྲག་བཅུའང་ཡོངས་སུ་སྐྱེས་སོ། །བཟོད་པའི་སྒོ་སྟོང་ཕྲག་བཅུའང་ཡོངས་སུ་སྦྱངས་སོ། །སེམས་ངེས་པར་གཞག་པ་སྟོང་ཕྲག་ བཅུའང་མངོན་པར་བསྒྲུབས་སོ། །བྱང་ཆུབ་སེམས་དཔའི་སྟོབས་ཀྱི་ལུས་སྟོང་ཕྲག་བཅུའང་ཡོངས་སུ་སྤེལ་ཏོ། །བྱང་ཆུབ་སེམས་དཔའི་ཡེ་ཤེས་ཀྱི་སྒོ་སྟོང་ཕྲག་བཅུར་ཡང་ ༄༅། །རབ་ཏུ་ཞུགས་སོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་སྟོང་ཕྲག་བཅུ་ཡང་ཡོངས་སུ་སྐྱེས་སོ། །སངས་རྒྱས་བལྟ་བའི་ཕྱོགས་ཀྱི་སྒོ་སྟོང་ཕྲག་བཅུ་ ཡང་མངོན་དུ་གྱུར་ཏོ། །བྱང་ཆུབ་སེམས་དཔའི་སྨོན་ལམ་སྟོང་ཕྲག་བཅུའང་མངོན་པར་བསྒྲུབས་སོ། །དེ་དེ་ལྟ་བུའི་ཆོས་དང་ལྡན་པས་སེམས་ཀྱི་སྐད་ཅིག་རེ་རེ་ལ་ ཕྱོགས་བཅུར་སངས་རྒྱས་ཀྱི་ཞིང་སྟོང་ཕྲག་བཅུ་ཡོངས་སུ་གནོན་ཏོ། །འཇིག་རྟེན་གྱི་ཁམས་རེ་རེ་ཞིང་ཡང་སེམས་ཀྱི་སྐད་ཅིག་རེ་རེ་ལ་སངས་རྒྱས་སྟོང་ཕྲག་ བཅུ་སྔོན་གྱི་མཐའ་དང་ཕྱི་མའི་མཐར་རྗེས་སུ་དྲན་ནོ། །དེ་བཞིན་གཤེགས་པ་དེ་དག་གི་སངས་རྒྱས་ཀྱི་སྤྲུལ་པ་རྒྱ་མཚོ་སྟོང་ཕྲག་བཅུ་ཕྱོགས་བཅུར་གཤེགས་པ་དེ་ དག་ཀྱང་མཐོང་ཞིང་ཤེས་སོ། །སེམས་ཀྱི་སྐད་ཅིག་རེ་རེ་ལ་ཡང་སངས་རྒྱས་ཀྱི་ཞིང་སྟོང་ཕྲག་བཅུར་གཏོགས་པའི་སེམས་ཅན་འགྲོ་བའི་རྒྱུད་སྣ་ཚོགས་སུ་སྐྱེས་པ་ཤི་ འཕོ་ཞིང་སྐྱེ་བར་གྱུར་པ་མཐོ་བ་དང༌། དམའ་བ་དང༌། བདེ་འགྲོའི་ལམ་དུ་ཕྱིན་པ་དང༌། ངན་སོང་གི་ལམ་དུ་ཕྱིན་པ་དང༌། ཁ་དོག་སྡུག་པ་དང༌། ཁ་དོག་མི་སྡུག་པ་ ལས་ཅི་བཞིན་དུ་སྐྱེས་པར་གྱུར་པ་ཐམས་ཅད་ཀྱང་མཐོང་བར་གྱུར་ཏོ། །སེམས་ཅན་དེ་དག་གི་ཤི་འཕོ་དང་སྐྱེ་བ་ཡང་ཁོང་དུ་ཆུད་ཅིང་མཐོང་སྟེ། སེམས་ཀྱི་རྒྱུད་དང༌། སེམས་ཀྱི་སྤྱོད་པ་དང༌། སེམས་ཀྱི་འདབ་འབྲེལ་བ་དང༌། བསམ་པ་སྣ་ཚོགས་དང༌། དབང་པོ་རྒྱ་མཚོ་དང༌། སྦྱོར་བ་འབྱམས་ཀླས་པ་དང༌། ལས་མཐར་ཐུག་པ་དང༌། ཡོངས་སུ་སྨིན་པར་བྱ་བ་དང༌། རྣམ་པར་གདུལ་བའི་དུས་ཀྱང་ཁོང་དུ་ཆུད་ཅིང་མཐོང་ངོ༌། །རིགས་ཀྱི་བུ། རྒྱལ་པོ་གཞོན་ནུ་དེ་དེ་ནས་ཤི་འཕོས་ནས་ཀྱང་འཛམ་བུའི་གླིང་དེ་ ཉིད་དུ་རྒྱལ་པོའི་གནས་དགའ་བ་དང་ལྡན་པར་རྒྱལ་པོ་དེ་ཉིད་ཀྱི་རིགས་སུ་སྐྱེས་ནས་འཁོར་ལོས་བསྒྱུར་བའི་རྒྱལ་སྲིད་ཐོབ་པར་གྱུར་ཏོ། །དེ་འཁོར་ལོས་བསྒྱུར་བའི་ རྒྱལ་པོར་གྱུར་པས་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་ཡོངས་སུ་མྱ་ངན་ལས་འདས་པའི་འོག་ཏུ་དེ་ བཞིན་གཤེགས་པ་ཆོས་ཀྱི་ནམ་མཁའ་ལ་དཔལ་ཤིན་ཏུ་འཕགས་པའི་རྒྱལ་པོ་བསྙེན་བཀུར་ཏོ། །དེའི་འོག་ཏུ་སྙིང་པོ་བྱང་ཆུབ་དེ་ཉིད་དུ་བརྒྱ་བྱིན་དུ་གྱུར་ཏེ། དེ་བཞིན་ གཤེགས་པ་ལྷ་དབང་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་རབ་མཚེ་མའི་ལྷའི་རྒྱལ་པོར་གྱུར་ཏེ། དེ་བཞིན་གཤེགས་པ་སའི་ དཔལ་རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་རབ་དགའ་ལྡན་གྱི་ལྷའི་རྒྱལ་པོར་གྱུར་ཏེ། དེ་བཞིན་གཤེགས་པ་ཆོས་ཀྱི་ ༄༅། །འཁོར་ལོའི་འོད་རབ་ཏུ་བསྒྲགས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་རབ་འཕྲུལ་དགའི་ལྷའི་ རྒྱལ་པོར་གྱུར་ཏེ། དེ་བཞིན་གཤེགས་པ་ནམ་མཁའ་མཛེས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་དབང་བསྒྱུར་གྱི་ ལྷའི་རྒྱལ་པོར་གྱུར་ཏེ། དེ་བཞིན་གཤེགས་པ་སྟོབས་ལ་ཐུག་པ་མེད་པའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་ལྷ་མ་ཡིན་ གྱི་དབང་པོར་གྱུར་ཏེ། དེ་བཞིན་གཤེགས་པ་ཆོས་ཐམས་ཅད་ཀྱི་འབྲུག་སྒྲ་བསྒྲགས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ ཉིད་དུ་ཚངས་པའི་དབང་པོར་གྱུར་ཏེ། དེ་བཞིན་གཤེགས་པ་ཆོས་ཀྱི་འཁོར་ལོ་སྤྲུལ་པ་ཀུན་ཏུ་སྣང་བའི་དབྱངས་ཞེས་བྱ་བ་བསྙེན་བཀུར་ཏོ། །རིགས་ཀྱི་བུ། འཇིག་ རྟེན་གྱི་ཁམས་རིན་ཆེན་འོད་དེ་ཉིད་དུ་བསྐལ་བ་འོད་བཟང་པོ་དེ་ཉིད་ལ་དེ་བཞིན་གཤེགས་པ་དེ་དག་ལ་སོགས་པ་སངས་རྒྱས་སྟོང་ཕྲག་བཅུ་བྱུང་སྟེ། དེ་བཞིན་གཤེགས་ པ་དེ་དག་ཐམས་ཅད་ཀྱང་རྒྱལ་པོ་གཞོན་ནུ་རྣམ་པར་རྒྱལ་བས་བསྙེན་བཀུར་ཏོ། །རིགས་ཀྱི་བུ། བསྐལ་པ་འོད་བཟང་པོ་དེའི་འོག་ཏུ་བསྐལ་པ་འོད་ཟེར་བཟང་པོ་ཞེས་བྱ་བ་ བྱུང་སྟེ༑ བསྐལ་པ་འོད་ཟེར་བཟང་པོ་དེ་ལ་ཡང་སངས་རྒྱས་སྟོང་ཕྲག་བཅུ་བྱུང་ངོ༌། །ཁོ་མོ་ཡང་བསྐལ་པ་དེ་ལ་རྒྱལ་པོ་བློ་གྲོས་ཆེན་པོ་ཞེས་བྱ་བ་ཞིག་ཏུ་གྱུར་ཏེ། དེའི་ཚེ་ཁོ་ མོ་རྒྱལ་པོར་གྱུར་པས་དེ་བཞིན་གཤེགས་པ་མཚན་གྱི་དཔལ་རི་བོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་ཁྱིམ་བདག་ཅིག་ཏུ་གྱུར་ཏེ། དེ་བཞིན་གཤེགས་ པ་ཕུང་པོ་ཡོངས་སུ་གྲུབ་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་བློན་པོ་ཞིག་ཏུ་གྱུར་ཏེ། དེ་བཞིན་གཤེགས་པ་དྲི་མ་མེད་པའི་སྲས་ཞེས་བྱ་བ་བསྙེན་ བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་ལྷ་མ་ཡིན་གྱི་དབང་པོ་ཞིག་ཏུ་གྱུར་ཏེ། དེ་བཞིན་གཤེགས་པ་ཤུགས་མངའ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་ པ་དེ་ཉིད་ལ་ཤིང་གི་ལྷ་མོ་ཞིག་ཏུ་གྱུར་ཏེ། དེ་བཞིན་གཤེགས་པ་མཚན་ཉིད་རི་རབ་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་གཉིས་ལ་དེད་དཔོན་ཅིག་ཏུ་གྱུར་ཏེ་།དེ་ བཞིན་གཤེགས་པ་ཕྱག་དྲི་མ་མེད་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་གྲོང་ཁྱེར་གྱི་ལྷ་མོ་ཞིག་ཏུ་གྱུར་ཏེ། དེ་བཞིན་གཤེགས་པ་སེངྒེ་རྣམ་པར་གནོན་ པས་བཞུད་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་ངལ་བསོ་བོ་ཞིག་ཏུ་གྱུར་ཏེ། དེ་བཞིན་གཤེགས་པ་ལྷ་དབང་གཙུག་ཕུད་ཅེས་བྱ་བ་བསྙེན་བཀུར་ ༄༅། །ཏོ༑ ༑དེའི་འོག་ཏུ་བསྐལ་པ་དེ་ཉིད་ལ་དྲི་ཟའི་རྒྱལ་པོ་ཞིག་ཏུ་གྱུར་ཏེ། དེ་བཞིན་གཤེགས་པ་གྲགས་པ་ཆོས་ཀྱིས་འཕགས་པ་ཞེས་བྱ་བ་བསྙེན་ བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་གྲུལ་བུམ་གྱི་དབང་པོ་ཞིག་ཏུ་གྱུར་ཏེ། དེ་བཞིན་གཤེགས་པ་སྣང་བའི་ཅོད་པ་ན་ཞེས་བྱ་བ་བསྙེན་བཀུར་ཏོ། །རིགས་ཀྱི་བུ་ དེ་ལྟར་ཁོ་མོས་དེ་བཞིན་གཤེགས་པ་བཅུ་པོ་དེ་དག་ལ་སོགས་པ་བསྐལ་པ་འོད་ཟེར་བཟང་པོ་དེ་ལ་སྐྱེ་བའི་རིགས་སྣ་ཚོགས་སུ་སྐྱེས་ནས་དེ་བཞིན་གཤེགས་པ་ བྱེ་བ་ཕྲག་དྲུག་ཅུ་བསྙེན་བཀུར་ཏེ། ཁོ་མོས་དེ་བཞིན་གཤེགས་པ་དེ་དག་ཐམས་ཅད་ལ་མཆོད་པ་བྱས་སོ། །དེ་བཞིན་གཤེགས་པ་རེ་རེའི་སྦྱན་སྔར་འགྲོ་བའི་ཚེ་ ཡང་སེམས་ཅན་གྱི་ཁམས་མཐའ་དང་དབུས་མེད་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་བཞིན་གཤེགས་པ་རེ་རེའི་ སྦྱན་སྔར་འགྲོ་བའི་ཚེ་ཡང་ཏིང་ངེ་འཛིན་གྱི་སྒོ་སྣ་ཚོགས་རབ་ཏུ་ཐོབ་པར་གྱུར་ཏོ། །གཟུངས་ཀྱི་སྒོ་སྣ་ཚོགས་དང༌། མངོན་པར་སྒྲུབ་པའི་ཚུལ་སྣ་ཚོགས་དང༌། ཐ་ དད་པ་ཡང་དག་པར་ཤེས་པ་མངོན་པར་སྒྲུབ་པའི་ཚུལ་སྣ་ཚོགས་དང༌། ཐམས་ཅད་མཁྱེན་པ་ཉིད་ཀྱི་ཚུལ་རྗེས་སུ་རྟོགས་པར་བྱ་བ་སྣ་ཚོགས་དང༌། ཆོས་སྣང་བའི་ སྒོ་ཐོབ་པར་བྱ་བའི་ཚུལ་སྣ་ཚོགས་དང༌། ཡེ་ཤེས་ཀྱི་ཚུལ་ཁོང་དུ་ཆུད་པར་དཔྱད་པ་རྣམས་པ་སྣ་ཚོགས་དང༌། ཕྱོགས་རྒྱ་མཚོ་ལ་འཇུག་པའི་སྣང་བ་སྣ་ཚོགས་དང༌། ཞིང་རྒྱ་མཚོ་ སྣ་ཚོགས་ལ་འཇུག་ཅིང་ཁོང་དུ་ཆུད་པར་བྱ་བའི་སྣང་བ་སྣ་ཚོགས་དང༌། དེ་བཞིན་གཤེགས་པ་རྒྱ་མཚོ་མཐོང་བར་བྱ་བ་རྣམ་པར་དམིགས་པའི་སྣང་བ་སྣ་ཚོགས་ཀྱང་རབ་ཏུ་ཐོབ་ པ། །ཡོངས་སུ་ནོན་ཏོ། །རྣམ་པར་དག་གོ །ཡོངས་སུ་རྫོགས་སོ། །ཡོངས་སུ་གནས་པར་གྱུར་ཏོ། །སྐྱེས་སོ། །བྱུང་ངོ༌། །རྣམ་པར་འཕེལ་ཏོ། །ཡོངས་སུ་འཕེལ་ཏོ། །རབ་ཏུ་བྱུང་ངོ༌།། རྣམ་པར་བྱུང་ངོ༌། །བསྐལ་པ་འོད་ཟེར་བཟང་པོ་དེ་ལ་དེ་བཞིན་གཤེགས་པ་རྣམས་ཇི་ལྟར་རིམ་གྲོར་བྱས་པ་དེ་བཞིན་དུ་བསྐལ་པ་འཇིག་རྟེན་གྱི་ཁམས་རྒྱ་མཚོ་ཐམས་ཅད་ཀྱི་ རྡུལ་ཤིན་ཏུ་ཕྲ་བ་སྙེད་དུ་དེ་བཞིན་གཤེགས་པ་ཇི་སྙེད་ཅིག་བྱུང་བར་གྱུར་པ་དང༌། དེ་བཞིན་གཤེགས་པ་ཇི་སྙེད་ཅིག་འཇིག་རྟེན་གྱི་ཁམས་གཞན་ནས་དེ་དག་ཏུ་བྱོན་ཏེ་ཆོས་བསྟན་ པར་གྱུར་པའི་དེ་བཞིན་གཤེགས་པ་དེ་དག་ཐམས་ཅད་ལས་ཀྱང་ཁོ་མོས་ཆོས་བསྟན་པ་ཐོས་ཏེ། ཐོས་ནས་ཀྱང་ཡོངས་སུ་བཟུང་ངོ༌། །དེ་བཞིན་གཤེགས་པ་དེ་དག་ཐམས་ཅད་ཀྱང་ ཁོ་མོས་བསྙེན་བཀུར་ཏོ། །རིམ་གྲོར་བྱས་སོ། །སངས་རྒྱས་བཅོམ་ལྡན་འདས་དེ་དག་གི་བསྟན་པ་ཡང་ཁོ་མོས་ཡོངས་སུ་བཟུང་ངོ༌། །དེ་བཞིན་གཤེགས་པ་དེ་དག་ཐམས་ཅད་ ༄༅། །ལས་ཀྱང་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་ བ་ལ་ཡང་དག་པར་སྐུལ་བ་འདི་ཐོབ་པར་བྱ་བའི་ཚུལ་སྣ་ཚོགས་དང༌། རྣམ་པར་ཐར་པའི་ཚུལ་གྱི་སྒོ་སྣ་ཚོགས་ཀྱིས་ཐོབ་པར་གྱུར་ཏོ། །དེ་ནས་མཚན་མོའི་ལྷ་མོ་འགྲོ་བ་ ཐམས་ཅད་སྲུང་བའི་སྨོན་ལམ་ལ་བརྩོན་པའི་འོད་ཀྱིས་དེའི་ཚེ་རྣམ་པར་ཐར་པའི་ཚུལ་འདི་ཉིད་ཡོངས་སུ་བརྗོད་པ་དང༌། ཡོངས་སུ་བསྟན་པའི་ཕྱིར་ཚོང་དཔོན་གྱི་བུ་ནོར་ བཟང་ལ་ཚིགས་སུ་བཅད་དེ་སྨྲས་པ། བསམ་གྱིས་མི་ཁྱབ་རྣམ་ཐར་དམ་པ་འདི། །གྲགས་པ་ཁྱོད་ཀྱིས་བདག་ལ་གང་དྲིས་པ། །བདེ་བར་གཤེགས་པའི་བྱིན་གྱིས་ དེ་བསྟན་གྱི། །མ་ལུས་ཡང་དག་ཇི་བཞིན་བདག་ལ་ཉོན། །བསྐལ་པ་བསམ་ཡས་ཡངས་པ་མཐའ་ཡས་པ། །རྒྱ་མཚོའི་ཞིང་གི་རྡུལ་དང་གྲངས་མཉམ་པ། །དེ་ཀུན་ འདས་པའི་སྔ་རོལ་མདངས་དགའ་བའི། །འཇིག་རྟེན་ཁམས་ཤིག་བྱུང་བ་རིན་ཆེན་འོད། །དེ་ཚེ་བསྐལ་པ་བཟང་པོའི་འོད་ཀྱང་བྱུང༌། །དེ་ལ་རྒྱལ་བ་དཔག་ཏུ་མེད་པ་སྐྱེས། ཐུབ་པའི་དབང་པོ་དེ་དག་ཁོ་མོ་ཡིས། །རྣམ་ཐར་འདི་ལ་སྒོམ་ཞིང་བསྙེན་བཀུར་ཏོ། །རྒྱལ་པོའི་གནས་རབ་ཡངས་ཤིང་བཟང་བྱུང་བ། །དེ་ཡི་མིང་ནི་དགའ་བས་ བརྒྱན་པ་སྟེ། །དེ་ཚེ་སེམས་ཅན་རྣམ་པར་མ་དག་སེམས། །མི་བཟང་ངན་དུ་སྤྱོད་པ་དེར་བྱུང་གྱུར། །དེར་ནི་རྒྱལ་པོ་རྒྱལ་བའི་འོད་བྱུང་སྟེ། །སེམས་ཅན་དེ་དག་ཆོས་ཀྱིས་བསྐྱང་བ་བྱས། ། དེ་ཡི་བུ་ནི་རྣམ་པར་རྒྱལ་བ་སྟེ། །མཛེས་ཤིང་མཚན་གྱིས་ཡན་ལག་བརྒྱན་པ་པོ། །གཡོན་ལྡན་སྟོང་ཕྲག་མང་པོ་དེ་དག་ཀྱང༌། །དེ་ཚེ་རྒྱལ་པོས་གསད་པར་བྱས་མཐོང་ནས། ། བཞོན་ནུ་སྙིང་བརྩེ་མི་དགའ་ཀུན་ནས་འཁོར། །མྱུར་དུ་དགྱེ་བར་རྒྱལ་པོ་དེ་ལ་གསོལ། །རྒྱལ་པོས་ཐོས་ནས་དེ་ཚེ་བློན་པོ་རྣམས། །མ་ལུས་ཀུན་བསྡུས་དེ་ལ་བཀའ་སྩལ་ནས། ། ཀུན་གྱིས་དེ་ལ་ཕྱག་བྱས་ཕྱིར་གསོལ་པ། །དེ་ནི་རྒྱལ་པོ་ཁྱོད་དགྲོངས་ཐབས་ཅིག་ལགས། །རྒྱལ་པོ་དེ་ལྟར་ལོག་པར་ཐུགས་བཅུག་ནས། །སྲས་དེ་གསད་པར་དེ་ཚེ་བྱས་ གྱུར་ཀྱང༌། །བདག་སྲོག་ཕངས་པར་མ་བརྩིས་ངོ་ཟུམ་མེད། །རྒྱལ་པོའི་སྲས་ཀྱིས་གསད་པར་བྱས་མ་བཏང༌། །གསད་པར་བྱས་པ་དེ་ཡི་མས་ཐོས་ནས། །རྒྱལ་པོ་དེ་ལ་ འཁོར་བཅས་གསོལ་བ་འདེབས། །དགུང་ཟླ་ཕྱེད་ཅིག་སྦྱིན་པ་མ་ལུས་པར། །འཇིག་རྟེན་སྩོལ་དུ་གཞོན་ནུ་གཏང་བར་གནོང༌། །རྒྱལ་པོ་དེས་ཀྱང་དེ་ལྟར་གནང་གྱུར་ནས། །དེས་ ནི་ཅི་འདོད་སྦྱིན་པ་ཡོངས་སུ་བཏང༌། །ཟླ་བ་ཕྱེད་དུ་ཉིན་མཚན་སྦྱིན་བྱས་ནས། །ཉི་མའི་ཐ་མར་ཚོགས་པར་གྱུར་པ་ཡི། །ཞགས་པ་ཐུབ་པ་གང་རྣམས་ཅི་འདོད་པ། །དེ་ལ་དེ་ ༄༅། །བྱིན་འཆི་བར་སྟ་གོན་གནས། །རྒྱལ་པོའི་གནས་དེར་འགྲོ་བ་མང་པོ་དག །ཆོ་དེར་དུ་ཞིང་ཀུན་ཀྱང་འདུས་པར་གྱུར། །བྱང་ཆུབ་ཤིང་དྲུང་བདེ་ གཤེགས་དེ་ཡི་ཚེ། །དམ་ཆོས་དབྱངས་མཆོག་སྒྲོན་མའི་རྒྱལ་ཞུགས་པས། །འགྲོ་བའི་དབང་པོ་སྨིན་པར་ཐུགས་ཆུད་ནས། །མཆོད་སྦྱིན་ར་བར་ཐུགས་རྗེ་ཆེན་པོས་ བྱོན༑ ༑དེ་བཞིན་གཤེགས་པའི་རྣམ་འཕྲུལ་རྣམ་ཕྱེ་བས། །དེ་ཡི་འཁོར་དུ་བདེ་གཤེགས་བྱོན་གྱུར་ནས། །ཆོས་ཀྱི་སྒྲོན་མའི་སྤྲིན་གྱི་སྒྲ་སྒྲོག་པའི། །མདོ་སྡེ་རྒྱལ་པོ་ བདེ་བར་གཤེགས་པས་བཤད། །འགྲོ་བ་མཐའ་དང་དབུས་མེད་རྣམ་བཏུལ་ནས། །དེ་ཚེ་བྱང་ཆུབ་མཆོག་ཏུ་ལུང་ཡང་བསྟན། །རྒྱལ་བའི་སྲས་པོ་རྣམ་པར་རྒྱལ་བ་ ཡང༌། །ཤིན་ཏུ་དགའ་བས་བྱང་ཆུབ་མཆོག་ཏུ་ཞུགས། །བདེ་གཤེགས་བསྙེན་བཀུར་མཆོད་པ་རྣམ་ཡངས་པས། །དེ་ལ་མཆོད་བྱས་དགའ་བར་སྨྲས་པ་ནི། །འགྲོ་བ་ རྣམ་འདུལ་སྐྱབས་སུ་བདག་འགྱུར་བགྱི། །མགོན་དང་གནས་དང་དཔུང་དུའང་དེ་བཞིན་ཞེས། །རྒྱལ་བ་དེ་ཡི་ཞམ་རིང་ཐར་པར་ཞུགས། །ཡང་དག་བྱང་ཆུབ་ལམ་ནི་ ཡོངས་ཚོལ་ཞིང༌། །ཆོས་ཀྱི་རང་བཞིན་རབ་ཏུ་བརྟག་བྱ་བས། །དེར་གནས་བསྐལ་པ་བརྒྱ་ཕྲག་མང་དུ་སྤྱད། །སྡུག་བསྔལ་རྒྱ་མཚོར་ལྷུང་ཞིང་ལྡོངས་གྱུར་པའི། །འགྲོ་ བ་མགོན་མེད་ཀུན་ལ་སྙིང་བརྩེ་བས། །ཡང་དག་བྱང་ཆུབ་ལམ་ལ་ཡོངས་བསྒོམས་ནས། །དེ་ཚེ་དེ་ཡིས་རྣམ་ཐར་འདི་ཐོབ་བོ། །བསྐལ་པ་དེ་ལ་བདེ་གཤེགས་གང་བྱུང་བ། ། དེ་དག་ཀུན་ལའང་དགའ་བས་བསྙེན་བཀུར་ནས། །དེ་དག་ཀུན་ལ་མཆོད་པ་ཆེན་པོ་བྱས། །ཆོས་ཀྱི་འཁོར་ལོ་ཡོངས་སུ་བཟུང་བར་གྱུར། །དེ་ཡི་འོག་ཏུ་བསྐལ་པ་རྒྱ་མཚོ་ རྣམས༑ ༑ཞིང་མང་རྒྱ་མཚོའི་རྡུལ་སྙེད་ཀུན་ལ་ཡང༌། །རྒྱལ་བ་ཇི་སྙེད་སྐྱེས་པར་གྱུར་པ་དག །རབ་ཏུ་མཆོད་ཅིང་དེ་དག་བསྙེན་བཀུར་བྱས། །རྣམ་པར་རྒྱལ་ཞེས་བྱ་བ་ ཁོ་མོ་ཡིན། །ཉམ་ང་བཙོན་རར་གནས་པའི་བཙོན་མཐོང་ནས། །དེ་དག་དགྲོལ་ཕྱིར་ལུས་ཀྱང་ཡོངས་སུ་བཏང༌། །རྣམ་ཐར་འདི་ཡང་དེ་ཚེ་ཐོབ་པར་གྱུར། །ཞིང་རྣམས་རྒྱ་ མཚོའི་རྡུལ་ཕྲན་རབ་བགྲངས་པའི། །བསྐལ་པ་རྒྱ་མཚོ་མང་པོ་བསྒོམས་པར་བྱས། །ཚུལ་མང་མཐའ་དང་དབུས་མེད་མཉམ་མེད་པས། །སྐད་ཅིག་རེ་རེ་དག་ཏུ་རྣམ་པར་ སྤེལ༑ ༑ཐུབ་པའི་བདག་པོ་ཇི་སྙེད་མཐོང་གྱུར་པ། །དེ་དག་སྤྱན་སྔར་སྔོན་ཆད་འདི་ཐོབ་སྟེ། །སྒོ་ཚུལ་རྣམ་པ་གཞན་དང་གཞན་དག་གིས། །དེ་དག་གིས་ནི་རྣམ་ཐར་ འདི་ཡང་བསྟན། །དེ་དག་རྣམ་ཐར་མ་ནོར་བསམ་ཡས་ལ། །བསྐལ་པ་བྱེ་བ་མང་པོར་ཁོ་མོས་བསླབ། །དེ་ལ་རྒྱལ་བས་བཀོད་ཅིང་གྲོལ་གྱུར་པ། །དེ་དག་དམ་ཆོས་སྤྲིན་ ༄༅། །ལས་གཅིག་ཅར་འཐུང༌། །ཕྱོགས་བཅུ་ཀུན་གྱི་ཞིང་རྣམས་ཐམས་ཅད་དུ། །ཐོགས་པ་མེད་པར་ལུས་ཀྱིས་རྒྱས་པར་འགེངས། །སྐད་ཅིག་རེ་རེར་ཞིང་ རྒྱུད་བསམ་ཡས་པའི། །དུས་གསུམ་རྒྱུད་རྣམས་ཀུན་ལའང་རབ་ཏུ་འཇུག །དུས་གསུམ་རྒྱལ་བ་རྒྱ་མཚོ་མ་ལུས་པ། །རེ་རེ་ཀུན་ལའང་མངོན་དུ་རབ་ཏུ་ལྟ། །དེ་དག་ ལུས་ཀྱི་གཟུགས་བརྙན་རྒྱལ་བ་ལ། །སྤྲིན་དུ་གྱུར་པ་རྣམས་ཀྱང་སྤྱན་སྔར་འགྲིམ། །ཕྱོགས་རྣམས་ཀུན་ཏུ་ཉེ་བར་ཕྱིན་འདོང་ཞིང༌། །རྒྱལ་བའི་སྤྱན་སྔར་འདོང་བས་ ཤིན་ཏུ་མཛེས། །རྒྱན་རྣམས་མ་ལུས་མངོན་པར་ཆར་འབེབས་ཤིང༌། །རྒྱལ་བ་རྣམས་ལ་དེ་དག་མཆོད་པ་བྱེད། །སངས་རྒྱས་རྒྱ་མཚོ་ཆེ་ལ་རྣམ་ཡངས་པའི། །ཞུ་བ་ མཐའ་ཡས་ཀུན་ཀྱང་ཞུ་བ་བྱེད། །རྒྱལ་བའི་ཆོས་སྤྲིན་མངོན་པར་ཆར་འབབ་པ། །ཀུན་ཀྱང་མ་ལུས་ཡོངས་སུ་འཛིན་པ་བྱེད། །ཕྱོགས་བཅུ་མ་ལུས་ཀུན་ཏུ་དེ་དག་འདོང༌། རྒྱལ་བའི་དཀྱིལ་འཁོར་ཀུན་གྱི་སྤྱན་སྔར་འབབ། །གཟུགས་མང་རྣམ་པ་སྣ་ཚོགས་བསྟན་གནས་ཤིང༌། །རྣམ་འཕྲུལ་སྣ་ཚོགས་ཉེ་བར་སྟོན་པར་བྱེད། །ཁ་དོག་མཐའ་ ཡས་རང་གི་ལུས་གཟུགས་ཀྱིས། །ཕྱོགས་རྣམས་ཐམས་ཅད་རྣམ་པ་སྟོང་དུ་འགེངས། །དེ་དག་ལུས་གཅིག་ལས་ཀྱང་གཟུགས་ཀྱི་རྣམས། །མཐའ་དང་དབུས་མེད་ རྣམ་པར་སྟོན་པར་བྱེད། །བ་སྤུ་རེ་རེའི་སྒོ་ནས་གྲངས་མེད་པའི། །འོད་ཟེར་མང་པོ་རྒྱ་མཚོ་དེ་དག་འགྱེད། །སྐྱེ་རྒུའི་ཉོན་མོངས་མེ་ཡི་གདུང་པ་དག། སྣ་ཚོགས་ཐབས་ ཀྱིས་རབ་ཏུ་ཞི་བར་བྱེད། །འདི་ལ་གནས་པ་ལུས་སྤྲུལ་སྤྲིན་མང་བ། །བ་སྤུ་རེ་རེའི་སྒོ་ནས་འགྱེད་བྱེད་ཅིང༌། །ངོ་མཚར་རྨད་ཀྱིས་ཕྱོགས་ཀུན་རྒྱས་བཀང་ནས། །ཆོས་ཆུའི་ ཆར་གྱིས་སེམས་ཅན་རྣམ་པར་འདུལ། །ཚུལ་འཇུག་འདི་ནི་བསམ་གྱིས་མི་ཁྱབ་གཟུགས། །རྒྱལ་སྲས་ཀུན་གྱི་གནས་སུ་གྱུར་པ་སྟེ། །དེ་ལ་གནས་ཤིང་ཕྱི་མཐའི་ བསྐལ་པར་ཡང༌། །ཞིང་རྣམས་ཀུན་ཏུ་སྤྱད་པ་རབ་ཏུ་སྤྱོད། །བསམ་པ་ཇི་བཞིན་ཆོས་རྣམས་སྟོན་བྱེད་ཅིང༌། །དེ་དག་ལྟ་བའི་དྲ་བ་རྣམ་པར་ཟློག །མཐོ་རིས་མྱ་ངན་འདས་ ལ་སེམས་ཅན་འགོད། །ཐམས་ཅད་མཁྱེན་པའི་ས་ཡང་རྣམ་པར་སྟོན། །འཇིག་རྟེན་སྐྱེ་གནས་ཐམས་ཅད་མ་ལུས་པར། །ཁ་དོག་མཐའ་ཡས་ལུས་མང་བསམ་ཡས་ པ༑ ༑བསམ་པ་བཞིན་དུ་ཆོས་རྣམས་རྗོད་བྱེད་དེ། །དེ་དག་སེམས་ཅན་ཀུན་གྱི་གཟུགས་བརྙན་གཟུགས། །འདི་དང་གཞན་དག་ཚད་ལས་འདས་པ་ཡི། །ཡོན་ཏན་རྒྱ་ མཚོ་ཞིང་མང་རྒྱ་མཚོ་ཡི། །རྡུལ་ཕྲན་རབ་སྙེད་བསམ་གྱིས་མི་ཁྱབ་པ། །རྣམ་ཐར་ཞི་བ་འདི་ལྡན་ཐོབ་པར་གྱུར། །རིགས་ཀྱི་བུ། ཁོ་མོས་བྱང་ཆུབ་སེམས་དཔའི་རྣམ་ ༄༅། །པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་སྐུལ་བ་འདི་ ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་འཇིག་རྟེན་ཐམས་ཅད་ཀྱི་ལམ་གྱི་རྒྱུད་ལས་འདས་པ། འཇིག་རྟེན་གྱི་སྐྱེ་གནས་ཐམས་ཅད་དུ་གཟུགས་བརྙན་ རབ་ཏུ་འབྱུང་བ། འཇིག་རྟེན་གྱི་ཤེས་པ་ཐམས་ཅད་ལས་ཡང་དག་པར་འདས་པ། ཤེས་བྱའི་སྒྲིབ་པ་ཐམས་ཅད་ཀྱི་རི་རྣམ་པར་འཐོར་བ་ལ་བརྩོན་པ། ཆོས་ཐམས་ ཅད་ཀྱི་རང་བཞིན་དང་མཚན་ཉིད་རབ་ཏུ་རྟོགས་པ། ཉོན་མོངས་པའི་སྒྲིབ་པ་དང༌། མུན་པ་ཐམས་ཅད་རྣམ་པར་སེལ་བ་ལ་བརྩོན་པ། ཆོས་ཐམས་ཅད་རབ་ཏུ་དཔྱད་ པས་མངོན་པར་སྒྲུབ་པ་ལ་མཁས་པ། བདག་མེད་པའི་ཆོས་མངོན་དུ་གྱུར་པ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་རྒྱུན་མི་གཅོད་པ་། ཆོས་ཀྱི་དབྱིངས་ཀྱི་ཚུལ་གཉིས་སུ་མེད་པར་རབ་ཏུ་རྟོགས་པ་དག་གི་ལམ་གྱི་ཚུལ་རྒྱ་མཚོ་ཐམས་ཅད་ཀྱི་རྗེས་སུ་འབྲང་བའི་བློ་དང་ལྡན་པ་དེ་དག་གི་སྤྱོད་པ་ཤེས་པའམ། ཡོན་ཏན་རྒྱ་མཚོ་ལ་འཇུག་པའམ། ཡེ་ཤེས་ཀྱིས་རྣམ་པར་གནོན་པ་ཡོངས་སུ་ཤེས་པར་བྱ་བའམ། སེམས་ཀྱི་གནས་ཁོང་དུ་ཆུད་པར་བྱ་བའམ། ཏིང་ངེ་འཛིན་ལ་ དབང་སྒྱུར་བ་རྟོགས་པར་བྱ་བའམ། རྣམ་པར་ཐར་པས་རྣམ་པར་འཕྲུལ་པ་ཡོངས་སུ་ཤེས་པར་བྱ་བར་ནུས་རེ་སྐན། སོང་རིགས་ཀྱི་བུ། འཛམ་བུའི་གླིང་འདི་ཉིད་ཀྱི་ལུམྦི་ནིའི་ ནགས་ཚལ་ན་ལུམྦི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ཞེས་བྱ་བ་འདུག་གི །དེའི་གན་དུ་སོང་ལ་ཇི་ལྟར་ན། བྱང་ཆུབ་ སེམས་དཔའ་དེ་བཞིན་གཤེགས་པའི་རིགས་སུ་བྱུང་བ་ཡིན་པ་དང༌། ཇི་ལྟར་ན། འཇིག་རྟེན་རྣམས་ལ་སྣང་བ་བྱེད་པར་འགྱུར་བ་དང༌། ཇི་ལྟར་ན། ཕྱི་མའི་མཐའི་ བསྐལ་པའི་མུར་ཐུག་པར་བྱང་ཆུབ་སེམས་དཔའི་སྤྱོད་པ་སྤྱད་པས་མི་སྐྱོ་བར་འགྱུར་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་འགྲོ་བ་ ཐམས་ཅད་སྲུང་བའི་སྨོན་ལམ་ལ་བརྩོན་པའི་འོད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་སྨོན་ལམ་ལ་བརྩོན་ པའི་འོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཐལ་མོ་སྦྱར་ཏེ་ཕྱིར་ལྟ་ཞིང་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་སྨོན་ལམ་ལ་བརྩོན་པའི་ འོད་ཀྱི་དྲུང་ནས་སོང་ངོ༌། །ཤིན་ཏུ་རྒྱས་པ་ཆེན་པོའི་མདོ། །སངས་རྒྱས་ཕལ་པོ་ཆེ་ཞེས་བྱ་བ་ལས། སྡོང་པོས་བརྒྱན་པའི་ལེའུ་སྟེ། བམ་པོ་བརྒྱ་དྲུག་པ། དེ་ནས་ཚོང་ ༄༅། །དཔོན་གྱི་བུ་ནོར་བཟང་མཚན་མོའི་ལྷ་མོ་འགྲོ་བ་ཐམས་ཅད་སྲུང་བའི་སྨོན་ལམ་ལ་བརྩོན་པའི་འོད་ཀྱི་གདམས་ངག་དེ་རྗེས་སུ་དྲན་པར་བྱེད་ཅིང༌། བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་སྐུལ་བ་དེ་ལ་ ཡོངས་སུ་སྒོམ་པ་དང༌། ཁོང་དུ་ཆུད་པར་བྱ་བ་དང༌། རྒྱ་ཆེར་བྱེད་ཅིང་མཐར་གྱིས་ལུམྦི་ནིའི་ནགས་ཚལ་གང་ན་བ་དེར་ཕྱིན་ཏེ་ལུམྦི་ནིའི་ནགས་ཚལ་ལ་གཡས་ཕྱོགས་སུ་ བསྐོར་བ་བྱས་ནས་ལུམྦི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ཡོངས་སུ་ཚོལ་ཚོལ་བ་ལས། ལུམྦི་ནིའི་ནགས་ཚལ་གྱི་ ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ལུམྦི་ནིའི་ནགས་ཚལ་ན་རིན་པོ་ཆེའི་ཤིང་གི་ཡལ་ག་ཐམས་ཅད་ཀྱི་དཀྱིལ་འཁོར་གྱི་ཁྱིམ་བརྩེགས་པ་ ཞིག་ན་སེངྒེའི་ཁྲི་རིན་པོ་ཆེའི་པདྨོའི་སྙིང་པོ་ཅན་ཞིག་ལ་འདུག་ཅིང་ནགས་ཚལ་གྱི་ལྷ་མོ་ཁྲག་ཁྲིག་བརྒྱ་སྟོང་ཕྲག་ཉི་ཤུའི་འཁོར་གྱིས་ཀུན་ནས་བསྐོར་ཏེ་མདུན་དུ་བྱས་ ནས་ཆོས་སྟོན་ཏེ། བྱང་ཆུབ་སེམས་དཔའ་ཐམས་ཅད་ཀྱི་སྐྱེ་བ་རྒྱ་མཚོ་ཤིན་ཏུ་བསྟན་པ་ཞེས་བྱ་བའི་མདོ་སྡེ་ཡོངས་སུ་སྟོན་ཅིང༌། དེ་བཞིན་གཤེགས་པའི་རིགས་ ཀྱི་རྒྱུད་དུ་རིགས་དང་ལྡན་པར་སྐྱེས་པའི་བྱང་ཆུབ་སེམས་དཔའ་རྣམས་ཀྱི་ཡོན་ཏན་རྒྱ་མཚོའི་ཤུགས་རྣམ་པར་འཕེལ་བར་བྱེད་ཅིང་འདུག་པ་མཐོང་ནས་ལུམྦི་ནིའི་ ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གང་ན་བ་དེར་སོང་སྟེ་ཕྱིན་ནས་ལུམྦི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་ འཁོར་བཟང་པོས་དགའ་བའི་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ནས་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ། བདག་ གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་ན། བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་རིགས་སུ་བྱུང་བ་ལགས་པའང་ མ་འཚལ། ཇི་ལྟར་ན། བྱང་ཆུབ་སེམས་དཔའ་རྣམས་སྤྱོད་པ་ལ་སྤྱོད་ཅིང་སེམས་ཅན་རྣམས་ལ་སྣང་བ་འབྱིན་པར་འགྱུར་བའང་མ་འཚལ་ཏོ། །དེ་སྐད་ཅེས་སྨྲས་པ་དང༌། ལུམྦི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱིས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ། བཅུ་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་སྐྱེ་བ་སྟེ། དེ་དག་དང་ལྡན་ན། བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་རིགས་སུ་སྐྱེས་པ་ཡིན་ནོ། །དེ་དག་ལས་ ༄༅། །བྱུང་ན༑ བྱང་ཆུབ་སེམས་དཔའ་རྣམས་སེམས་ཀྱི་སྐད་ཅིག་རེ་རེ་ལའང་བྱང་ཆུབ་སེམས་དཔའི་དགེ་བའི་རྩ་བས་རྣམ་པར་འཕེལ་བར་འགྱུར་ཏེ། ཐོགས་པ་མེད་ པ་དང༌། ཞུམ་པ་མེད་པ་དང༌། ཕྱིར་ལྡོག་པ་མེད་པ་དང༌། རྒྱུན་གཅོད་པ་མེད་པ་དང༌། ཡོངས་སུ་སྐྱོ་བ་མེད་པ་དང༌། སྒྱིད་ལུག་པར་འགྱུར་བ་མེད་པ་དང༌། ཉམས་པར་འགྱུར་བ་ མེད་པ་དང༌། ཉམས་དམའ་བར་འགྱུར་བ་མེད་པ་དང༌། ཡོངས་སུ་ཡི་ཆད་པར་འགྱུར་བ་མེད་པ་དང༌། ཆུད་ཟ་བར་འགྱུར་བ་མེད་པ་དང༌། ཐམས་ཅད་མཁྱེན་པ་ཉིད་ཀྱི་ཕྱོགས་ཀྱི་ རྗེས་སུ་འབྲང་བར་འགྱུར་བ་དང༌། ཆོས་ཀྱི་དབྱིངས་ཀྱི་ཚུལ་ལ་ཡོངས་སུ་གཞོལ་བར་འགྱུར་བ་དང༌། སངས་རྒྱས་ཀྱི་བྱང་ཆུབ་ཏུ་ཡོངས་སུ་སྨིན་པ་ཐོབ་པར་འགྱུར་བ་དང༌། བྱང་ཆུབ་ སེམས་དཔའ་སེམས་བསྐྱེད་པ་ཤིན་ཏུ་ཡངས་པར་འགྱུར་བ་དང༌། ཕ་རོལ་ཏུ་ཕྱིན་པ་ཐམས་ཅད་ཀྱིས་རྣམ་པར་འཕེལ་བར་འགྱུར་བ་དང༌། འཇིག་རྟེན་གྱི་ལམ་རྒྱུད་ཐམས་ཅད་ ལས་རྣམ་པར་ལྡོག་པར་འགྱུར་བ་དང༌། དེ་བཞིན་གཤེགས་པའི་སར་ཡོངས་སུ་གྲུབ་པར་འགྱུར་བ་དང༌། ཡེ་ཤེས་ཀྱིས་མངོན་པར་ཤེས་པ་ཤིན་ཏུ་བྱང་བར་འགྱུར་བ་དང༌། སངས་ རྒྱས་ཀྱི་ཆོས་མངོན་དུ་འགྱུར་པ་དང༌། ཐམས་ཅད་མཁྱེན་པའི་ཡུལ་གྱི་དོན་དང་ལྡན་པར་འགྱུར་བའོ། །བཅུ་གང་ཞེ་ན། འདི་ལྟ་སྟེ། སངས་རྒྱས་ཐམས་ཅད་ལ་བསྙེན་བཀུར་བའི་ སྨོན་ལམ་གྱི་སྦྱོར་བའི་སྙིང་པོ་ཞེས་བྱ་བ་ནི། བྱང་ཆུབ་སེམས་དཔའི་སྐྱེ་བ་དང་པོའོ། །བྱང་ཆུབ་ཀྱི་སེམས་ཀྱི་ཡན་ལག་ཡོངས་སུ་གྲུབ་པར་འགྱུར་བ་འབྱུང་བའི་སྙིང་པོ་ཞེས་བྱ་བ་ནི། བྱང་ ཆུབ་སེམས་དཔའི་སྐྱེ་བ་གཉིས་པའོ། །ཆོས་ཀྱི་ཚུལ་ལ་ངེས་པར་རྟོགས་པར་གཞག་པའི་སྦྱོར་བའི་ཚུལ་མངོན་དུ་གྱུར་པ་འབྱུང་བའི་སྙིང་པོ་ཞེས་བྱ་བ་ནི། བྱང་ཆུབ་སེམས་དཔའི་སྐྱེ་བ་གསུམ་ པའོ༑ ༑དུས་གསུམ་སྣང་བར་བྱ་བའི་ལྷག་པའི་བསམ་པ་རྣམ་པར་དག་པའི་སྙིང་པོ་ཞེས་བྱ་བ་ནི། བྱང་ཆུབ་སེམས་དཔའི་སྐྱེ་བ་བཞི་པའོ། །ཀུན་ནས་སྣང་བའི་འོད་ཀྱི་སྙིང་པོ་ཞེས་བྱ་བ་ནི། བྱང་ཆུབ་སེམས་དཔའི་སྐྱེ་བ་ལྔ་པའོ། །དེ་བཞིན་གཤེགས་པའི་རིགས་ཀྱི་རྒྱུད་དུ་འབྱུང་བའི་སྙིང་པོ་ཞེས་བྱ་བ་ནི། བྱང་ཆུབ་སེམས་དཔའི་སྐྱེ་བ་དྲུག་པའོ། །དེ་བཞིན་གཤེགས་པ་ཐམས་ཅད་ ཀྱི་སྟོབས་ཀྱི་འོད་སྣང་བའི་རྒྱན་གྱི་སྙིང་པོ་ཞེས་བྱ་བ་ནི། བྱང་ཆུབ་སེམས་དཔའི་སྐྱེ་བ་བདུན་པའོ། །ཡེ་ཤེས་ཀྱི་སྒོ་ཀུན་ནས་རྣམ་པར་སྤྱད་པས་ཡོངས་སུ་འགྲུབ་པ་འབྱུང་བའི་སྙིང་པོ་ཞེས་བྱ་བ་ ནི༑ བྱང་ཆུབ་སེམས་དཔའི་སྐྱེ་བ་བརྒྱད་པའོ། །ཆོས་ཀྱི་དབྱིངས་སྤྲུལ་པས་བརྒྱན་པ་བྱེ་བའི་སྙིང་པོ་ཞེས་བྱ་བ་ནི། བྱང་ཆུབ་སེམས་དཔའི་སྐྱེ་བ་དགུ་པའོ། །དེ་བཞིན་གཤེགས་པའི་ས་ ཡོངས་སུ་གནོན་པའི་ཤུགས་དྲག་པོའི་སྙིང་པོ་ཞེས་བྱ་བ་ནི། བྱང་ཆུབ་སེམས་དཔའི་སྐྱེ་བ་བཅུ་པའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའི་སྐྱེ་བ་དང་པོ་སངས་རྒྱས་ཐམས་ཅད་ལ་བསྙེན་ ༄༅། །བཀུར་བའི་སྨོན་ལམ་གྱི་སྦྱོར་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་དཔའ་ཐོག་མར་སངས་རྒྱས་མཆོད་ཅིང་རིམ་གྲོར་བྱ་བ་ལ་ འཇུག་སྟེ། དེ་སངས་རྒྱས་བཅོམ་ལྡན་འདས་རྣམས་ལ་རིམ་གྲོ་དང༌། བཀུར་སྟི་དང༌། བསྟི་སྟང་དང༌། མཆོད་པ་བྱེད་ཅིང་བསྙེན་བཀུར་བྱེད་དེ་དགྱེས་པར་བྱེད་ལ་ཐུགས་བྱུང་བར་མི་ བྱེད་པས་དེ་བཞིན་གཤེགས་པའི་ཞལ་བལྟ་བས་མི་དོམས་པ། སངས་རྒྱས་ལ་རིམ་གྲོ་བྱ་བར་བརྩོན་པ། སངས་རྒྱས་ལ་དགའ་བའི་ཤུགས་ཀྱིས་རྣམ་པར་སྤེལ་བའི་ཤུགས་དང་ ལྡན་པ༑ དེ་བཞིན་གཤེགས་པ་མཐོང་བས་མོས་པའི་ཤུགས་དྲག་པོ་ཡོངས་སུ་སྐྱེས་པ་དེ་ཕྱིར་མི་ལྡོག་པའི་དད་པས་བསོད་ནམས་ཡོངས་སུ་སྡུད་པའི་ཚེ་དེ་བཞིན་གཤེགས་པ་ཐམས་ ཅད་ལ་མཆོད་པའི་ཚོགས་ཡོངས་སུ་བསྡུ་བ་ལ་བརྩོན་ཞིང་སྦྱོར་བ་རྒྱུན་མི་གཅོད་པ་ཡིན་ཏེ། རིགས་ཀྱི་བུ། དེ་ནི། བྱང་ཆུབ་སེམས་དཔའ་རྣམས་ཀྱི་སྐྱེ་བ་དང་པོ་སངས་རྒྱས་ཐམས་ཅད་ལ་བསྙེན་ བཀུར་བའི་སྨོན་ལམ་གྱི་སྦྱོར་བའི་སྙིང་པོ་ཞེས་བྱ་བ་སྟེ། ཐམས་ཅད་མཁྱེན་པ་ཉིད་ཀྱི་ཚོགས་དགེ་བའི་རྩ་བ་ཡོངས་སུ་འགྲུབ་པར་ཡང་དག་པར་སྡུད་པར་འགྱུར་བའོ། །རིགས་ཀྱི་བུ། དེ་ལ་བྱང་ཆུབ་སེམས་ དཔའི་སྐྱེ་བ་གཉིས་པ་བྱང་ཆུབ་ཀྱི་ཡན་ལག་ཡོངས་སུ་གྲུབ་པར་འགྱུར་བ་འབྱུང་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཏུ་སེམས་བསྐྱེད་དེ། འདི་ལྟར་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་སྙིང་རྗེ་ཆེན་པོའི་སེམས་དང༌། ཤིན་ཏུ་དགྱེས་པར་བྱ་བའི་ཕྱིར་སངས་རྒྱས་ཐམས་ཅད་བསྙེན་ བཀུར་བའི་སེམས་དང༌། དངོས་པོ་ཐམས་ཅད་ལ་ཕངས་པར་མི་བརྩི་བའི་ཕྱིར་སངས་རྒྱས་ཀྱི་ཆོས་ཐམས་ཅད་ཡོངས་སུ་བཙལ་བའི་སེམས་དང༌། ཐམས་ཅད་མཁྱེན་པ་ཉིད་མངོན་དུ་འགྱུར་ བར་བྱ་བའི་ཕྱིར་བཤམས་པ་ཆེན་པོའི་སེམས་དང༌། འགྲོ་བ་ཐམས་ཅད་ཡོངས་སུ་བསྡུ་བའི་སྦྱོར་བས་རྒྱས་པར་དགང་བའི་ཕྱིར་བྱམས་པ་ཆེན་པོའི་སེམས་དང༌། ཐམས་ཅད་མཁྱེན་པ་ཉིད་ཀྱི་ གོ་ཆ་བསྟན་པར་བྱ་བའི་ཕྱིར་འགྲོ་བ་ཐམས་ཅད་ཡོངས་སུ་མི་གཏོང་བའི་སེམས་དང༌། ཡང་དག་པ་ཇི་ལྟ་བ་བཞིན་དུ་ཤེས་པའི་སྣང་བ་རབ་ཏུ་ཐོབ་པར་བྱ་བའི་ཕྱིར་གཡོ་དང་སྒྱུ་མེད་པའི་སེམས་ དང༌། བྱང་ཆུབ་སེམས་དཔའི་ལམ་ལན་ནན་ཏན་དུ་བྱ་བའི་ཕྱིར་ཁ་འོག་ཏུ་ལུས་ཁྲུས་པའི་སེམས་དང༌། དེ་བཞིན་གཤེགས་པ་ཐམས་ཅད་ཀྱི་སྨོན་ལམ་དང་མི་འགལ་བར་བྱ་བའི་ཕྱིར་སངས་རྒྱས་ ཐམས་ཅད་ལ་སྐུ་བསླུ་བ་མེད་པའི་སེམས་དང༌། ཕྱི་མའི་མཐའི་མུར་ཐུག་པར་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་གདུལ་བ་རྒྱུན་མི་གཅད་པའི་ཕྱིར་ཐམས་ཅད་མཁྱེན་པ་ཉིད་དུ་ སྨོན་ལམ་ཆེན་པོ་འདེབས་པའི་སེམས་དང༌། དེ་དག་ལ་སོགས་པ་བྱང་ཆུབ་སེམས་ཀྱི་ཡན་ལག་གི་ཚོགས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱིས་ཡོངས་སུ་རྫོགས་པའི་བྱང་ཆུབ་ ༄༅། །སེམས་དཔའ་ནི། དེ་བཞིན་གཤེགས་པའི་རིགས་སུ་སྐྱེས་པ་ཡིན་ཏེ། རིགས་ཀྱི་བུ། དེ་ནི། བྱང་ཆུབ་སེམས་དཔའི་སྐྱེ་བ་གཉིས་པ་བྱང་ཆུབ་ཀྱི་སེམས་ཀྱི་ ཡན་ལག་ཡོངས་སུ་གྲུབ་པར་འགྱུར་བ་འབྱུང་བའི་སྙིང་པོ་ཞེས་བྱ་བའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་གསུམ་པ་ཆོས་ཀྱི་ཚུལ་ལ་ ངེས་པར་གཞག་པའི་སྦྱོར་བའི་ཚུལ་མངོན་དུ་གྱུར་པ་འབྱུང་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་དཔའ་ཆོས་ཐམས་ཅད་ཀྱི་ཚུལ་རྒྱ་མཚོ་ཡོད་དོ་ཅོག་ ངེས་པར་རྟོགས་པས་མངོན་དུ་བྱ་བའི་སེམས་དང་ལྡན་པ། ཐམས་ཅད་མཁྱེན་པའི་ལམ་གྱི་རྣམ་པ་ཡོངས་སུ་རྫོགས་པར་བྱ་བས་མངོན་དུ་བྱ་བར་གཅིག་ཏུ་སེམས་པའི་སེམས་དང་ལྡན་ པ༑ ཁ་ན་མ་ཐོ་བ་མེད་པའི་ལས་ལ་ཡང་དག་པར་སྤྱད་པར་སེམས་པའི་སེམས་དང་ལྡན་པ། བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ཡོངས་སུ་དག་པར་བྱ་བས་ མངོན་དུ་བྱ་བའི་སེམས་དང་ལྡན་པ། བྱང་ཆུབ་སེམས་དཔའི་ཡོན་ཏན་ཐམས་ཅད་ལ་ནན་ཏན་དུ་བྱ་བས་ཡོངས་སུ་གྲུབ་པར་བྱ་བའི་སེམས་དང་ལྡན་པ། བྱང་ཆུབ་སེམས་དཔའི་ལམ་གྱི་ རྒྱན་ཐམས་ཅད་མངོན་པར་སྒྲུབ་པའི་སེམས་དང་ལྡན་པ། ཐམས་ཅད་མཁྱེན་པ་ཉིད་དུ་དམིགས་པའི་ཚོགས་རྒྱ་ཆེན་པོ་ཡོངས་སུ་སྒྲུབ་པ་བསྐལ་པའི་མེ་འབར་བས་ཀྱང་རྒྱུན་མི་གཅད་པར་ བརྩོན་པར་བྱ་བའི་སེམས་དང་ལྡན་པ། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་ལ་རབ་ཏུ་ཞུགས་པ། བྱང་ཆུབ་སེམས་དཔའི་སྤྱོད་པ་ཀུན་ཏུ་བཟང་པོ་མངོན་པར་སྒྲུབ་པའི་ སེམས་དང་ལྡན་པ། ཡོངས་སུ་སྤྱད་པའི་ཚུལ་ཐམས་ཅད་ལ་རབ་ཏུ་ཞུགས་པ་ནི། བྱང་ཆུབ་སེམས་དཔའི་ཡོན་ཏན་ཡོངས་སུ་རྫོགས་པར་བྱ་བ་ལ་དངོས་པོ་ཐམས་ཅད་རྣམ་པར་སྒོམ་པས་ དངོས་པོ་མེད་པའི་ཚུལ་ལ་ཞུགས་པའི་སེམས་དང་ལྡན་པ་ཡིན་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའི་སྐྱེ་བ་གསུམ་པ་ཆོས་ཀྱི་ཚུལ་ལ་ངེས་པར་རྟོགས་པས་གཞག་པའི་སྦྱོར་ བའི་ཚུལ་མངོན་དུ་གྱུར་པ་འབྱུང་བའི་སྙིང་པོ་ཞེས་བྱ་བའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའི་སྐྱེ་བ་བཞི་པ་དུས་གསུམ་སྣང་བར་བྱ་བའི་ལྷག་པའི་བསམ་པ་རྣམ་པར་དག་པའི་ སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་དཔའ་ལྷག་པའི་བསམ་པའི་དབྱིངས་ལས་གྱ་ནོམ་པར་ཡོངས་སུ་དག་པ་ཡིན། སངས་རྒྱས་ཀྱི་བྱང་ཆུབ་ལ་སྣང་བ་རབ་ ཏུ་ཐོབ་པ་ཡིན། བྱང་ཆུབ་སེམས་དཔའི་ཚུལ་རྒྱ་མཚོ་ལ་རབ་ཏུ་ཞུགས་པ་ཡིན། བསམ་པ་བརྟན་པ་རྡོ་རྗེའི་ཁམས་ལྟ་བུས་ཡོངས་སུ་ཟིན་པའི་སེམས་དང་ལྡན་པས་ཤིན་ཏུ་བརྟན་པ་ཡིན། སྲིད་པའི་ལམ་གྱི་རྒྱུད་དུ་སྐྱེ་བ་ལས་ཕྱིན་ཕྱོགས་སུ་ཕྱོགས་པ་ཡིན། དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་ཡོངས་སུ་གྲུབ་པར་བྱ་བ་ལ་མངོན་དུ་གྱུར་པ་ཡིན། བྱང་ ༄༅། །ཆུབ་སེམས་དཔའི་དབང་པོ་རྣམ་པར་སྤེལ་བ་ལ་ཁྱད་པར་དུ་འབོགས་པ་རབ་ཏུ་ཐོབ་པ་ཡིན། ལྷག་པའི་བསམ་པ་ཤིན་ཏུ་འོད་གསལ་བར་བྱ་བའི་ཕྱིར། སེམས་ཤིན་ཏུ་དགེ་བ་ཡིན། སྨོན་ལམ་བརྟན་ཞིང་རྒྱ་ཆེ་བ་རྣམ་པར་འཕེལ་བར་བྱ་བ་ལ་མི་གཡོ་བ་ཡིན། སྒྲིབ་པ་ཐམས་ཅད་ཀྱི་རི་རྣམ་པར་གཏོར་བའི་ཕྱིར་དེ་བཞིན་གཤེགས་ པ་ཐམས་ཅད་ཀྱིས་ཡང་དག་པར་དགོངས་པ་ཡིན། འགྲོ་བ་ཐམས་ཅད་ཉེ་བར་འཚོ་བས་མགོན་དུ་གྱུར་པ་ཡིན་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའ་རྣམས་ཀྱི་བྱང་ ཆུབ་སེམས་དཔའི་སྐྱེ་བ་བཞི་པ་དུས་གསུམ་སྣང་བར་བྱ་བའི་ལྷག་པའི་བསམ་པ་རྣམ་པར་དག་པའི་སྙིང་པོ་ཞེས་བྱ་བའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ ཆུབ་སེམས་དཔའི་སྐྱེ་བ་ལྔ་པ་ཀུན་ནས་སྣང་བའི་འོད་ཀྱི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་དཔའ་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་ལ་རབ་ཏུ་ཞུགས་པས་སྦྱོར་བ་ཕུན་སུམ་ཚོགས་པ་ཡིན། སྦྱིན་པ་ལྷུག་པར་གཏོང་བས་དངོས་པོའི་འདུ་ཤེས་ཐམས་ཅད་ལས་གྱེན་དུ་འཕགས་པ་ཡིན། ཚུལ་ཁྲིམས་མཐའ་ ཡས་པས་མཐའ་ལས་རྒལ་བར་རྣམ་པར་དག་པ་ཡིན། སངས་རྒྱས་ཀྱི་ཆོས་ཐམས་ཅད་ལ་བཟོད་པའི་སྣང་བ་རབ་ཏུ་ཐོབ་པས་དེ་བཞིན་གཤེགས་པའི་ཡུལ་ལ་གནས་པའི་བཟོད་པ་ དང་ལྡན་པ་ཡིན། ཐམས་ཅད་མཁྱེན་པ་ཉིད་དུ་ཡངས་པར་འབྱུང་བ་ལ་ཞུགས་པས་བརྩོན་འགྲུས་ཆེན་པོ་དང་ལྡན་པ་ཡིན། སྒོ་ཀུན་ཏུ་ལྟ་བའི་ཏིང་ངེ་འཛིན་གྱི་དཀྱིལ་འཁོར་རྣམ་པར་དག་ པས་བསམ་གཏན་ལ་རབ་ཏུ་བརྩོན་པ་ཡིན། ཆོས་སྣང་བ་ཐམས་ཅད་རབ་ཏུ་ཐོབ་པས་ཤེས་རབ་ཀྱི་མཐུའི་འོད་དང་ལྡན་པ་ཡིན། སངས་རྒྱས་བལྟ་བ་རྒྱ་མཚོ་རྣམ་པར་དམིགས་པར་བྱ་བ་ ལ་ཞུགས་པས་ཐོགས་པ་མེད་པའི་མིག་དང་ལྡན་པ་ཡིན། འཇིག་རྟེན་ཐམས་ཅད་ཡོངས་སུ་ཚིམ་པར་བྱེད་པས་ཆོས་ཐམས་ཅད་ཀྱི་དེ་ཁོ་ན་ཉིད་ལ་དབང་སྒྱུར་བས་སྨོས་པ་ཡིན། ཆོས་ ཀྱི་ཚུལ་ཡང་དག་པ་ཇི་ལྟ་བ་བཞིན་དུ་ཐོབ་པར་བྱ་བ་ལ་རབ་ཏུ་བརྩོན་པ་ཡིན་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའི་རྣམས་ཀྱི་བྱང་ཆུབ་སེམས་དཔའི་སྐྱེ་བ་ལྔ་པ་ཀུན་ནས་ སྣང་བའི་འོད་ཀྱི་སྙིང་པོ་ཞེས་བྱ་བའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དྲུག་པ་དེ་བཞིན་གཤེགས་པའི་རིགས་ཀྱི་རྒྱུད་དུ་འབྱུང་བའི་སྙིང་པོ་ ཞེས་བྱ་བ་གང་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བ་ཡིན། དེ་བཞིན་གཤེགས་པའི་རྒྱུད་དུ་སྐྱེས་པ་ཡིན། ཚུལ་གྱི་སྒོ་ཐམས་ ཅད་ལ་ཤིན་ཏུ་གྲུབ་པ་ཡིན། འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་པ་རྣམས་ཀྱི་སྨོན་ལམ་ཆེན་པོ་ལ་རྣམ་པར་དག་པ་ཡིན། དེ་བཞིན་གཤེགས་པ་ཐམས་ ༄༅། །ཅད་ཀྱི་དགེ་བའི་རྩ་བ་ལ་རང་བཞིན་གཅིག་པའི་དགེ་བའི་རྩ་བར་གྱུར་པ་ཡིན། སངས་རྒྱས་ཐམས་ཅད་དང་ལུས་གཅིག་ཏུ་གྱུར་པ་ཡིན། ཆོས་དཀར་པོས་འཇིག་ རྟེན་གཞན་དུ་འགྲོ་བ་ཡིན། སངས་རྒྱས་ཀྱི་བྱིན་གྱི་རླབས་ཡོངས་སུ་བསྟན་པའི་ཏིང་ངེ་འཛིན་ལ་བདག་ཉིད་ཆེ་བའི་ཆོས་ཀྱིས་རྣམ་པར་སྤྱོད་པ་ཡིན། དུས་ལ་ཇི་ལྟར་འབབ་པ་བཞིན་དུ་ སེམས་ཅན་རྣམ་པར་དག་པར་བྱ་བའི་ཆོས་ལ་ཞུགས་པ་ཡིན། སངས་རྒྱས་ཀྱི་ཆོས་ཡོངས་སུ་དྲིས་པ་ལ་སྤོབས་པ་རྒྱུན་མི་འཆད་པ་ཡིན་ཏེ། རིགས་ཀྱི་བུ། འདི་ནི། བྱང་ཆུབ་སེམས་ དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དྲུག་པ་དེ་བཞིན་གཤེགས་པའི་རིགས་ཀྱི་རྒྱུད་དུ་འབྱུང་བའི་སྙིང་པོ་ཞེས་བྱ་བའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་ བྱང་ཆུབ་སེམས་དཔའི་སྐྱེ་བ་བདུན་པ་དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་འོད་སྣང་བའི་རྒྱན་གྱི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་ དཔའ་སངས་རྒྱས་ཀྱི་སྟོབས་ལ་འཇུག་པའི་སྣང་བས་སངས་རྒྱས་ཀྱི་ཞིང་དུ་འགྲོ་བ་ལས་ཕྱིར་མི་ལྡོག་གོ །བྱང་ཆུབ་སེམས་དཔའི་ཡོན་ཏན་རྒྱ་མཚོ་ལས་ཕྱིར་མི་འགྱུར་རོ། །ཆོས་ ཐམས་ཅད་སྒྱུ་མའི་རྣམ་པ་ལྟར་ཡང་དག་པ་ཇི་ལྟ་བ་བཞིན་དུ་ཤེས་པར་བྱ་བ་ལ་གནས་པས་ཡོངས་སུ་ཡི་ཆད་པར་མི་འགྱུར་རོ། །འཇིག་རྟེན་ཐམས་ཅད་རྨི་ལམ་ལྟ་བུར་རབ་ཏུ་རྟོགས་ པར་བྱེད་དོ། །གཟུགས་སུ་རྣམ་པར་དམིགས་པའི་གནས་ཐམས་ཅད་གཟུགས་བརྙན་ལྟ་བུར་མངོན་པར་སྒྲུབ་བོ། །མངོན་པར་ཤེས་པས་རྣམ་པར་འཕྲུལ་པ་སྤྲུལ་པ་ལྟ་བུ་ལ་དབང་རབ་ཏུ་ཐོབ་ པར་བྱེད་དོ། །སྲིད་པ་ཐམས་ཅད་དུ་སྐྱེ་བ་གྲིབ་མ་ལྟ་བུར་གདོད་རབ་ཏུ་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་སྒྲ་བརྙན་ལྟ་བུར་རབ་ཏུ་ཤེས་སོ། །ཐབས་ཀྱི་ཚུལ་ དོན་སྣ་ཚོགས་དང་ལྡན་པ་ལ་རབ་ཏུ་བརྩོན་པས་ཆོས་ཀྱི་དབྱིངས་ཀྱི་ཚུལ་རབ་ཏུ་བསྟན་པ་ལ་ཕ་རོལ་ཏུ་ཕྱིན་པའི་དམ་པ་ཐོབ་པ་ཡིན་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའ་ རྣམས་ཀྱི་བྱང་ཆུབ་སེམས་དཔའི་སྐྱེ་བ་བདུན་པ་དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་འོད་སྣང་བའི་རྒྱན་གྱི་སྙིང་པོ་ཞེས་བྱའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་ རྣམས་ཀྱི་བྱང་ཆུབ་སེམས་དཔའི་སྐྱེ་བ་བརྒྱད་པ་ཡེ་ཤེས་ཀྱི་སྒོ་ཀུན་ནས་རྣམ་པར་དཔྱད་པས་ཡོངས་སུ་འགྲུབ་པར་འབྱུང་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ། འདི་ལ་ བྱང་ཆུབ་སེམས་དཔའ་གཞོན་ནུར་གྱུར་ཅིང་བྱང་ཆུབ་སེམས་དཔའི་རྣམ་པར་དགོད་པ་ལ་རྣམ་པར་གནས་པ་ཡིན་ཏེ། དེ་ལ་གནས་ནས་ཐམས་ཅད་མཁྱེན་པ་ཉིད་ཡེ་ཤེས་ཀྱི་ཚུལ་ལ་རྣམ་ པར་དཔྱོད་དོ། །ཡེ་ཤེས་ཀྱི་ཚུལ་གྱི་སྒོ་རེ་རེ་ལ་ཡང་བྱང་ཆུབ་སེམས་དཔའི་སྤྱོད་ཡུལ་ཚད་མེད་པར་ཡོངས་སུ་སྟོན་པས་བསྐལ་པ་ཚད་མེད་པར་ཟད་པར་འགྱུར་རོ། །བྱང་ཆུབ་སེམས་དཔའི་ ༄༅། །ཏིང་ངེ་འཛིན་ཐམས་ཅད་ལའང་ཕ་རོལ་ཏུ་ཕྱིན་པའི་དམ་པས་དབང་དུ་འགྱུར་ཏེ། སེམས་ཀྱི་སྐད་ཅིག་རེ་རེ་ཞིང་སེམས་ཀྱི་སྐད་ཅིག་ཐམས་ཅད་ལ་ཡང་ཕྱོགས་ བཅུའི་སངས་རྒྱས་ཀྱི་ཞིང་བརྗོད་དུ་མེད་པ་དག་ན་བཞུགས་པའི་དེ་བཞིན་གཤེགས་པ་རྣམས་ཀྱི་ཞབས་ཀྱི་དྲུང་དུ་སྐྱེས་ཏེ། དམིགས་པ་ཐ་མི་དད་པས་ཐ་མི་དད་པའི་ཏིང་ངེ་འཛིན་ལ་སྙོམས་ པར་འཇུག་གོ །ཐ་མི་དད་པའི་ཆོས་རྣམས་ལ་ཐ་དད་པའི་ཡེ་ཤེས་ཀྱི་དབང་ཡོངས་སུ་སྟོན་ཏོ། །དམིགས་པ་བརྗོད་དུ་མེད་པ་དག་ཀྱང་བསྒྲིབས་པ་མེད་པའི་དབྱིངས་ཡོངས་སུ་ནོན་པར་ བྱེད་དོ༑ ༑དམིགས་པ་ཆུང་དུས་ཀྱང་མཐའ་ཡས་པས་བརྟན་པའི་ས་ལ་ཡོངས་སུ་འཇུག་གོ །ཆོས་ཉིད་ཚད་མེད་པ་ཡང་ཆུང་བའམ། ཆེ་བར་ཁོང་དུ་ཆུད་པར་བྱེད་དོ། །འཇིག་རྟེན་ཐམས་ ཅད་ཀྱང་རྣམ་པར་དམིགས་པ་དང༌། མཉམ་པར་རབ་ཏུ་རྟོགས་པར་བྱེད་དོ། །ཆོས་ཀྱི་དམིགས་པ་ཐམས་ཅད་དང༌། རྣམ་པར་ཤེས་པའི་རྒྱུད་ཐམས་ཅད་ཀྱང་སྒོམ་པས་ཁོང་དུ་ཆུད་པར་ བྱེད་དོ༑ རིགས་ཀྱི་བུ། འདི་ནི། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བརྒྱད་པ་ཡེ་ཤེས་ཀྱི་སྒོ་ཀུན་ནས་རྣམ་པར་དཔྱད་པས་ཡོངས་སུ་འགྲུབ་པ་འབྱུང་ བའི་སྙིང་པོ་ཞེས་བྱ་བའོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དགུ་པ་ཆོས་ཀྱི་དབྱིངས་སྤྲུལ་པས་བརྒྱན་པར་བྱེད་པའི་སྙིང་པོ་ཞེས་བྱ་བ་ གང་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་དཔའ་སེམས་ཀྱི་སྐད་ཅིག་ཐམས་ཅད་ལ་རྒྱན་སྣ་ཚོགས་དང༌། རྒྱན་དུ་མར་ལྡན་པའི་སངས་རྒྱས་ཀྱི་ཞིང་བྱིན་གྱིས་རློབ་སྟེ། སྤྲུལ་པ་ ཐམས་ཅད་ལ་མི་འཇིགས་པའི་ཕ་རོལ་ཏུ་ཕྱིན་པའི་དམ་པ་ཐོབ་པ་ཡིན། སངས་རྒྱས་ཀྱི་སྤྲུལ་པ་ཐམས་ཅད་ལ་ཤིན་ཏུ་མཁས་པར་གྱུར་པ་ཡིན། ཆོས་ཀྱི་སྤྲུལ་པ་ལ་མི་འཇིགས་པ་རྣམ་ པར་དག་པ་ཡིན། ཆོས་ཀྱི་དབྱིངས་དམ་པ་ཆགས་པ་མེད་པའི་སྤྱོད་ཡུལ་དང་ལྡན་པ་ཡིན། བསམ་པ་ཇི་བཞིན་དུ་སེམས་ཅན་གྱི་ལུས་རྣམ་པར་དམིགས་པར་བྱ་བའི་བྱིན་གྱི་རླབས་ ལ་མཁས་པ་ཡིན། སེམས་ཅན་གདུལ་བ་མཁས་པ་བསམ་གྱིས་མི་ཁྱབ་པ་དང་ལྡན་པ་ཡིན། སྤྱོད་པ་སྣ་ཚོགས་ཀྱིས་མངོན་པར་འཚང་རྒྱ་བ་ཡོངས་སུ་སྟོན་པ་ཡིན། ཐམས་ཅད་ མཁྱེན་པ་ཉིད་ཀྱི་ལམ་སྒྲིབ་པ་མེད་པ་མངོན་པར་སྒྲུབ་པ་ལ་མཁས་པ་ཡིན། དེའི་རྒྱུད་ཀྱི་ཆོས་ཀྱི་འཁོར་ལོ་བསྐོར་བ་ལ་མཁས་པ་ཡོངས་སུ་སྟོན་པ་ཡིན། སེམས་ཅན་མཐའ་དང་དབུས་ མེད་པ་གདུལ་བའི་ཐབས་མངོན་པར་སྒྲུབ་པ་ལ་མཁས་པ་ཡིན། རྣམ་པར་སྣང་མཛད་ཀྱི་ཡེ་ཤེས་དབྱིག་ཏུ་བྱ་བའི་མཛོད་དང་ལྡན་པས་སེམས་ཅན་གདུལ་བའི་དུས་ལ་བབ་ན་རྟག་ ཏུ་སྟ་གོན་དུ་གནས་པ་ཡིན་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དགུ་པ་ཆོས་ཀྱི་སྤྲུལ་པས་བརྒྱན་པར་བྱེད་པའི་སྙིང་པོ་ཞེས་བྱ་ ༄༅། །བའོ༑ ༑རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཅུ་པ་དེ་བཞིན་གཤེགས་པའི་ས་ཡོངས་སུ་གནོན་པའི་ཤུགས་ དྲག་པོའི་སྙིང་པོ་ཞེས་བྱ་བ་གང་ཞེ་ན། འདི་ལ་བྱང་ཆུབ་སེམས་དཔའ་དུས་གསུམ་གྱི་དེ་བཞིན་གཤེགས་པ་ཐམས་ཅད་དང་རང་བཞིན་གཅིག་པའི་ཡུལ་ལ་དབང་བསྐུར་བ་ཡིན་ཏེ། འཇིག་རྟེན་གྱི་ཁམས་ཐམས་ཅད་འདབ་ཆགས་པའི་ཡུལ་ལ་རབ་ཏུ་འཇུག་པ་ཡིན། སེམས་ཅན་ཐམས་ཅད་ཀྱི་སྔོན་གྱི་མཐའ་དང༌། ཕྱི་མའི་མཐའི་ཤི་འཕོ་བ་དང༌། སྐྱེ་བའི་ སེམས་རྒྱུན་ཆགས་པར་འབྱུང་བའང་རབ་ཏུ་ཤེས་སོ། །བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་འདབ་ཆགས་པའི་ཡུལ་ཡང་རབ་ཏུ་ཤེས་སོ། །འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ཅད་ཀྱི་མངོན་པར་རྫོགས་པར་འཚང་རྒྱ་བ་འདབ་ཆགས་པ་ཡང་རབ་ཏུ་ཤེས་སོ། །ཆོས་ཐམས་ཅད་ཀྱི་རྒྱུད་འདབ་ཆགས་པ་ལ་མཁས་པར་བྱ་བ་ཡང་རབ་ཏུ་ཤེས་ སོ༑ ༑བསྐལ་པ་འཇིག་པ་དང་འདུ་བ་ཐམས་ཅད་ཀྱི་སྔོན་གྱི་མཐའ་དང༌། ཕྱི་མའི་མཐའ་དང༌། ད་ལྟར་བྱུང་བ་རྣམས་ཀྱང་མིང་དང་བཅས། ས་ཚིགས་དང་བཅས་པར་འདབ་ཆགས་པར་ རབ་ཏུ་ཤེས་སོ། །སེམས་ཅན་ཚུལ་ཇི་ལྟ་བུར་ཡོངས་སུ་སྨིན་པར་བྱས་པ་དང༌། དུས་ལ་གང་དུ་འབབ་པ་རྣམས་ལ་མངོན་པར་རྫོགས་པར་འཚང་རྒྱ་བའི་རྒྱན་དང༌། རྣམ་པར་འཚང་རྒྱ་བས་ གདུལ་བར་བྱ་བ་ཡོངས་སུ་བསྟན་པའི་ཕྱིན་གྱི་རླབས་ཀྱི་ཡེ་ཤེས་ཀྱང་མངོན་པར་སྒྲུབ་བོ། །སངས་རྒྱས་བྱུང་བ་ཐམས་ཅད་མངོན་པར་འཚང་རྒྱ་བའི་དྲུང་དུ་ཉེ་བར་འགྲོ་ཞིང་ཆོས་ཀྱི་འཁོར་ལོ་ བསྐོར་བ་ལ་མཁས་པའི་ཚུལ་འདབ་ཆགས་པ་ཡང་སེམས་ཅན་གྱི་ཁམས་མཐའ་དང་དབུས་མེད་པ་གདུལ་བའི་ཐབས་མངོན་པར་སྒྲུབ་པ་ལ་མཁས་པས་ཡོངས་སུ་སྟོན་ཏེ། རིགས་ཀྱི་བུ། འདི་ནི༑ བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཅུ་པ་དེ་བཞིན་གཤེགས་པའི་ས་ཡོངས་སུ་གནོན་པའི་ཤུགས་དྲག་པོའི་སྙིང་པོ་ཞེས་བྱ་བའོ། །རིགས་ཀྱི་བུ། དེ་དག་ ནི༑ བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཅུ་རྣམས་ཏེ། དེ་དག་གིས་བྱང་ཆུབ་སེམས་དཔའ་རྣམས་སྐྱེ་བར་འགྱུར་བའོ། །འབྱུང་བར་འགྱུར་བའོ། །ཡང་དག་ པར་སྒྲུབ་བར་བྱེད་པའོ། །ཡང་དག་པར་འཕེལ་བར་བྱེད་པའོ། །རབ་ཏུ་རྫོགས་པར་བྱེད་པའོ། །ཡོངས་སུ་གྲུབ་པར་བྱེད་པའོ། །ཞིང་མ་ལུས་པ་ཐམས་ཅད་ཁོང་དུ་ཆུད་པར་བྱ་བའི་ཕྱིར་རྒྱན་ གཅིག་གི་ལྷབ་ལྷུབ་ལ་རྒྱན་དང་ལྷབ་ལྷུབ་ཀྱི་རྒྱུད་རྣམ་པ་སྣ་ཚོགས་བྱིན་གྱིས་རློབ་པའོ། །སེམས་ཅན་གྱི་ཁམས་གདུལ་བ་རྒྱུན་མི་གཅད་པའི་ཕྱིར་ཕྱི་མའི་མཐའི་བསྐལ་པའི་མུར་ཐུག་པར་ བྱིན་གྱིས་རླབས་ཀྱིས་རྒྱུན་ཆད་པ་མེད་པར་བྱེད་པའོ། །ཆོས་རྒྱ་མཚོ་ཐམས་ཅད་ཀྱི་དམིགས་པ་སྣ་ཚོགས་དང༌། ཤིན་ཏུ་བསྟན་པ་གཅིག་ནས་གཅིག་ཏུ་བརྒྱུད་པ་སྣ་ཚོགས་དུ་མ་ ༄༅། །རྣམ་པ་ཐ་དད་པ་དང༌། ཆོས་མཐའ་ཡས་པ་གཅིག་ནས་གཅིག་ཏུ་བརྒྱུད་པའི་རྒྱུན་མངོན་པར་འཚང་རྒྱ་བར་བྱེད་པའོ། །སངས་རྒྱས་ཀྱི་ཁྱུ་མཆོག་གི་མཐུ་ཕྱུང་ བ་བསམ་གྱིས་མི་ཁྱབ་པ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་དབྱིངས་ཀྱི་མཐའ་གཏུགས་པ་ཡོངས་སུ་སྟོན་པའོ། །སེམས་ཅན་ཚད་མེད་པ་སྤྱོད་པ་རྒྱ་མཚོ་སྣ་ཚོགས་ དང་ལྡན་པ་ཡོངས་སུ་སྨིན་པར་བྱ་བ་དང༌། གདུལ་བས་ཡོངས་སུ་འདུས་པ་རྣམས་ལ་ཆོས་ཀྱི་འཁོར་ལོ་བསྐོར་བ་ཡོངས་སུ་སྟོན་པའོ། །སེམས་ཅན་གྱི་ཁམས་ཐམས་ཅད་སངས་རྒྱས་ འབྱུང་བ་དང་མི་འབྲལ་བར་བྱིན་གྱིས་རློབ་པའོ། །ཆོས་ཐམས་ཅད་ཀྱི་སྤྲིན་དབྱངས་ཀྱི་ཡན་ལག་རྒྱ་མཚོ་བརྗོད་དུ་མེད་པས་རྣམ་པར་དག་པ་དམིགས་པ་ཐམས་ཅད་ལས་རབ་ཏུ་འབྱུང་ བ་རྣམ་པར་དམིགས་པར་བྱེད་པའོ། །ཚད་མེད་པར་རྣམ་པར་སྤྱད་པ་ལ་སྒྲིབ་པ་མེད་པར་རྟོགས་པས་ཁོང་དུ་ཆུད་པ་རྣམས་ཆོས་ཡིད་དུ་འོང་བའི་རྒྱན་ཐམས་ཅད་དང་ལྡན་པའི་བྱང་ཆུབ་ སེམས་དཔའི་དཀྱིལ་འཁོར་བསམ་པ་དང༌། མོས་པ་གང་དང་ལྡན་པའི་ཚུལ་བཞིན་དུ་སེམས་ཅན་རྣམས་ལ་ཡོངས་སུ་སྟོན་པའོ། །སངས་རྒྱས་ཀྱི་ས་ཚད་མེད་པའི་རྗེས་སུ་སོང་བ་རྣམས་ འཇིག་རྟེན་ཐམས་ཅད་ཡོངས་སུ་བསྒྲུབ་པའི་དོན་དུ་ཆོས་ཀྱི་མཛོད་མཐའ་དང་དབུས་མེད་པ་རབ་ཏུ་སྟོན་པའོ། །དེ་ནས་ལུམྦི་ནིའི་ནགས་ཚལ་ཀྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་ པོས་དགའ་བའི་དཔལ་གྱིས་དེའི་ཚེ་བྱང་ཆུབ་སེམས་དཔའི་ཆོས་ཀྱི་དོན་འདི་ཉིད་གསལ་བར་བརྗོད་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ་ཚོང་དཔོན་གྱི་ བུ་ནོར་བཟང་ལ་ཚིགས་སུ་བཅད་དེ་སྨྲས་པ། ལྷག་པའི་བསམ་པ་དྲི་མེད་རྙོག་པ་མེད་པ་ཡིས། །གང་རྣམས་རྒྱལ་བ་བལྟ་བས་ནམ་ཡང་མི་ངོམས་ཤིང༌། །རྒྱལ་བ་ཀུན་གྱི་ཕྱི་མའི་མཐའ་ཡི་ རྒྱན་སྤྲིན་ལ། །སྨོན་པའི་མཁས་པ་དེ་དག་སྐྱེ་བའི་ཐོག་མ་གནས། །དུས་གསུམ་བྱུང་བའི་འཇིག་རྟེན་མ་ལུས་ཀུན་བཀང་སྟེ། །ཞིང་དང་སེམས་ཅན་དེ་བཞིན་ཆོས་དང་སངས་རྒྱས་རྣམས། ། སེམས་ཅན་དགྲོལ་ཕྱིར་སྨོན་ལམ་འདེབས་པས་བརྒྱན་པའི་སེམས། །དེ་ནི་བསམ་གྱིས་མི་ཁྱབ་རྣམས་ཀྱི་སྐྱེ་བ་གཉིས། །གང་རྣམས་ཆོས་ཀྱི་སྤྲིན་འཐུང་ནམ་ཡང་མི་ངོམས་ཤིང༌། །ངོམས་ པར་རྟོགས་པའི་ཡིད་ཀྱིས་དུས་གསུམ་ཆགས་མེད་ལུས། །མཁའ་དབྱིངས་དྲི་མེད་མཉམ་མེད་སེམས་ཀྱི་ལུས་ལྡན་པ། །མཚུངས་པ་མེད་པ་དེ་ནི་དེ་དག་སྐྱེ་བ་གསུམ། །ལྷག་པའི་བསམ་པ་ རི་རབ་བརྡོ་རྗེ་མཚུངས་བརྟན་པས། །ཐམས་ཅད་མཁྱེན་ཚུལ་རྒྱ་མཚོར་རྣམ་པར་འཇུག་བྱེད་ཅིང༌། །གང་རྣམས་སྙིང་རྗེ་ཆེན་པོའི་གང་ཆེན་མཚོར་འཇུག་པ། །དེ་ནི་སྐྱེས་བུ་ཁྱུ་མཆོག་རྣམས་ཀྱི་ སྐྱེ་བ་བཞི། །གང་རྣམས་བྱམས་པས་ཕྱོགས་བཅུ་རྒྱས་པར་ཡོངས་བཀང་ཞིང༌། །ཕ་རོལ་ཕྱིན་པ་དྲི་མེད་རྒྱ་མཚོ་མངོན་བསྒྲུབས་ཏེ། །ཆོས་ཀྱི་འོད་འགྱེད་འགྲོ་བ་ཡོངས་སུ་སྨིན་བྱེད་པ། །དེ་ནི་སྐྱེས་ ༄༅། །བུ་ཆེན་པོ་དེ་དག་སྐྱེ་བ་ལྔ། །ཆོས་ཀྱི་རང་བཞིན་རབ་ཏུ་རྟོགས་པས་ཆགས་མེད་སེམས། །དུས་གསུམ་དཔེ་ཟླ་མེད་པའི་སངས་རྒྱས་རིགས་བྱུང་ཞིང༌། །གང་རྣམས་ ཆོས་དབྱིངས་རྒྱ་མཚོའི་ཚུལ་ལ་འཇུག་བྱེད་པ། །དེ་ནི་མཁས་པ་དེ་དག་སྐྱེ་བ་ཡངས་པ་དྲུག །གང་རྣམས་ཆོས་ལུས་ཡོངས་སུ་ཆགས་པ་མེད་པའི་སེམས། །ཞིང་རྣམས་མ་ལུས་རང་གི་ ལུས་ཀྱིས་དགང་བྱས་ཤིང༌། །སངས་རྒྱས་སྟོབས་རྣམས་མ་ལུས་ཁོང་དུ་ཆུད་རྟོགས་པ། །དེ་ནི་མཁས་པ་རྣམས་ཀྱི་སྐྱེ་བ་བསམ་ཡས་བདུན། །གང་རྣམས་ཡེ་ཤེས་རྒྱ་མཚོའི་ཚུལ་ ལ་དབང་ལྡན་ཞིང༌། །ཐམས་ཅད་མཁྱེན་པའི་སྒོ་ཚུལ་རྣམ་པར་དཔྱོད་བྱེད་ལ། །ཏིང་ངེ་འཛིན་ཀུན་ཚུལ་གང་ཆེན་མཚོ་ལ་ཡོངས་འཇུག་པ། །དེ་ནི་དེ་བཞིན་ཉིད་རྟེན་རྣམས་ཀྱི་སྐྱེ་བ་བརྒྱད། གང་རྣམས་ཞིང་ཀུན་འབྱམས་ཀླས་ཡོངས་སུ་སྦྱོང་བྱེད་ཅིང༌། །སེམས་ཅན་ཐམས་ཅད་ཡོངས་སྨིན་བྱེད་འདུལ་རབ་བརྩོན་ལ། །སངས་རྒྱས་རྣམ་པར་འཕྲུལ་པའི་རྒྱན་རྣམས་རྣམ་སྟོན་ པ༑ ༑དེ་ནི་གྲངས་པ་ཆེན་པོ་རྣམས་ཀྱི་སྐྱེ་བ་དགུ། །གང་རྣམས་རྒྱལ་བའི་སྟོབས་རྣམས་ཇི་བཞིན་རབ་ཞུགས་ཏེ། །ཐམས་ཅད་མཁྱེན་པའི་ཤུགས་དྲག་ཡངས་པ་རྣམ་སྤེལ་ཅིང༌། ། གང་རྣམས་ཆོས་དབྱིངས་གཞི་ཚུལ་ཐ་དད་ཆགས་མེད་པ། །དེ་ནི་རྒྱལ་སྲས་རྣམས་ཀྱི་སྐྱེ་བ་བཅུ་ཡིན་ནོ། །རིགས་ཀྱི་བུ། སྐྱེ་བ་བཅུ་པོ་དེ་དག་གིས་བྱང་ཆུབ་སེམས་དཔའ་རྣམས་དེ་ བཞིན་གཤེགས་པའི་རིགས་སུ་སྐྱེའོ། །དེ་ལྟར་ན། འཇིག་རྟེན་ཐམས་ཅད་ལ་སྣང་བ་བྱེད་པ་ཡིན་ནོ། །རིགས་ཀྱི་བུ། ཁོ་མོ་ནི། བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་ པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་བ་ཡོངས་སུ་སྟོན་པ་ཐོབ་པའོ། །སྨྲས་པ། འཕགས་མ། བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ ཚད་མེད་པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་བ་ཡོངས་སུ་སྟོན་པ་འདིའི་ཡུལ་ཇི་ལྟ་བུ་ཞིག་མཆིས། སྨྲས་པ། རིགས་ཀྱི་བུ། ཁོ་མོ་ནི། བྱང་ ཆུབ་སེམས་དཔའ་ཐམས་ཅད་ཀྱི་སྐྱེ་བ་ཡོངས་སུ་ལྟ་ཞིང་ཉེ་བར་འགྲོ་བའི་སྨོན་ལམ་ཡོངས་སུ་གྲུབ་པ་སྟེ། རིགས་ཀྱི་བུ། དེ་ལྟར་ཁོ་མོ་ནི། བཅོམ་ལྡན་འདས་རྣམ་པར་སྣང་མཛད་ཀྱི་ སྐྱེ་བ་རྒྱ་མཚོ་ཤིན་ཏུ་ཡངས་པ་ལ་འཇུག་ཅིང་ཁོང་དུ་ཆུད་པ་སྟེ། འདི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་བྱང་ཆུབ་སེམས་དཔའི་སྐྱེ་བ་ཁོང་དུ་ཆུད་པར་བྱེད་ཅིང༌། གླིང་བཞི་པ་སྐལ་པ་དང་ལྡན་པའི་ཛམྦུའི་གླིང་འདིའི་ལུམྦི་ནིའི་ནགས་ཚལ་དུ་བྱང་ཆུབ་སེམས་དཔའ་འབྱུང་བ་ཡོངས་སུ་བལྟ་བའི་དོན་དུ་སྔོན་གྱི་སྨོན་ལམ་གྱིས་སྐྱེས་ཏེ། ད་ལྟར་ཁོ་མོ་འདི་ ནི༑ བྱང་ཆུབ་སེམས་དཔའ་འབྱུང་བའི་རྗེས་སུ་དྲན་པ་སྒོམ་ཞིང་རྣམ་པར་སྤྱོད་དོ། །དེ་ལྟར་ཁོ་མོ་འདི་ན་གནས་གནས་ཏེ། དེ་ཕན་ཆད་ལོ་བརྒྱ་ན་བཅོམ་ལྡན་འདས་དགའ་ལྡན་གྱི་ཕོ་བྲང་ ༄༅། །ནས་འཕོ་བར་འགྱུར་རོ། །ཞེས་བྱ་བའི་ཚེ་ལུམྦི་ནིའི་ནགས་ཚལ་འདིར་སྔོན་གྱི་ལྟས་བཅུ་བྱུང་བར་གྱུར་ཏེ། བཅུ་གང་ཞེ་ན། འདི་ལྟར་ལུམྦི་ནིའི་ ནགས་ཚལ་འདི་ཐམས་ཅད་མཐོན་དམན་མེད་ལ་ངམ་གྲོག་དང་ག་ཡང་ས་མེད་ཅིང་མཉམ་པར་གནས་པར་གྱུར་པ་འདི་ནི། སྔོན་གྱི་ལྟས་དང་པོ་བྱུང་བའོ། །ཡང་ལུམྦི་ནིའི་ ནགས་ཚལ་འདི་ཐམས་ཅད་གསེག་མ་དང་གྱོ་མོ་མེད་ལ། སྡོང་དུམ་དང་ཚེར་མ་དང་བྲལ་ཏེ་སའི་གཞི་རྡོ་རྗེ་ལས་གྲུབ་པར་གྱུར་ནས་རིན་པོ་ཆེ་མང་པོས་ཡོངས་སུ་གང་བར་གནས་པར་ གྱུར་པ་འདི་ནི། སྔོན་གྱི་ལྟས་གཉིས་པ་བྱུང་བའོ། །ཡང་ལུམྦི་ནིའི་ནགས་ཚལ་འདི་ཐམས་ཅད་རིན་པོ་ཆེ་ཐམས་ཅད་ཀྱི་ཤིང་དང༌། སཱ་ལ་དང༌། ཏ་ལའི་ཕྲེང་བས་རྣམ་པར་འཁྲིགས་ པས་ཡོངས་སུ་བརྒྱན་པར་ཀུན་ནས་གནས་པར་གྱུར་པ་འདི་ནི། སྔོན་གྱི་ལྟས་གསུམ་པ་བྱུང་བའོ། །ཡང་ལུམྦི་ནིའི་ནགས་ཚལ་འདི་ཐམས་ཅད་ལྷ་རྫས་ལས་ཀྱང་འདས་པའི་སྤོས་ཀྱི་ མྱུ་གུ་ཀུན་ནས་ཐོན་པ་དང༌། ཕྱེ་མ་ཐམས་ཅད་ཀྱི་མཛོད་ཀུན་ནས་ཐོན་པ་དང༌། རྒྱལ་མཚན་ཐམས་ཅད་ཀྱི་སྤྲིན་དང་ན་བུན་ཡོངས་སུ་བྱུང་བ་དང༌། སྤོས་ཀྱི་རིན་པོ་ཆེའི་གཟུགས་ཀྱི་ ཤིང་དྲུང་ཀུན་ནས་འཁོར་ཏེ་རྒྱན་ཡོངས་སུ་སྦྱངས་པར་ཀུན་ནས་གནས་པར་གྱུར་པ་འདི་ནི། སྔོན་གྱི་ལྟས་བཞི་པ་བྱུང་བའོ། །ཡང་ལུམྦི་ནིའི་ནགས་ཚལ་འདི་ཐམས་ཅད་ལྷ་རྫས་ཀྱི་མེ་ ཏོག་དང༌། ཕྲེང་བ་དང༌། ལྷབ་ལྷུབ་སྣ་ཚོགས་ཀྱི་མཛོད་རྣམ་པ་ཐམས་ཅད་ཡོངས་སུ་རྒྱས་པ་དང་ལྡན་པར་ཀུན་ནས་གནས་པར་གྱུར་པ་འདི་ནི། སྔོན་གྱི་ལྟས་ལྔ་པ་བྱུང་བའོ། །ཡང་ལུམྦི་ནིའི་ནགས་ ཚལ་འདི་ཐམས་ཅད་ཀྱི་ཤིང་ཐམས་ཅད་ལ་ནོར་བུ་རིན་པོ་ཆེ་དམ་པའི་མཛོད་མངོན་པར་གྲུབ་པར་གྱུར་པ་འདི་ནི། སྔོན་གྱི་ལྟས་དྲུག་པ་བྱུང་བའོ། །ཡང་ལུམྦི་ནིའི་ནགས་ཚལ་འདི་ཐམས་ཅད་ ཀྱི་པདྨོའི་ཚལ་ཐམས་ཅད་དུ་ཆུ་ལས་སྐྱེས་པའི་མེ་ཏོག་ཐམས་ཅད་ཀྱང་ཁ་འབུས་ཏེ་སའི་གཞི་ལས་ཐོན་ནས་ཆུ་ལས་མངོན་པར་འཕགས་པར་གནས་པ་འདི་ནི། སྔོན་གྱི་ལྟས་བདུན་པ་བྱུང་བའོ།། ཡང་འཇིག་རྟེན་གྱི་ཁམས་འདིའི་འདོད་པ་ལ་སྤྱོད་པ་དང༌། གཟུགས་ལ་སྤྱོད་པའི་ལྷའི་བུ་རྣམས་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། མིའམ་ཅི་དང༌། ལྟོ་འཕྱེ་ཆེན་པོ་ དང༌། འཇིག་རྟེན་གྱི་དབང་པོའམ། འགྲོ་བའི་དབང་པོ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ལུམྦི་ནིའི་ནགས་ཚལ་འདི་ན་ཐལ་མོ་སྦྱར་ཅིང་འཁོད་པར་གྱུར་ཏེ། འདི་ནི། སྔོན་གྱི་ལྟས་ བརྒྱད་པ་བྱུང་བའོ། །ཡང་འཛམ་བུའི་གླིང་གི་འཇིག་རྟེན་གྱི་ཁམས་འདིའི་ལྷའི་བུ་མོའམ། ཀླུའི་བུ་མོའམ། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའི་ལྡིང་དང༌། མིའམ་ ཅི་དང༌། ལྟོ་འཕྱེ་ཆེན་པོའི་བུ་མོ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་རབ་ཏུ་དགའ་བའི་ཡིད་ཀྱིས་མཆོད་པའི་རྣམ་པ་ཐམས་ཅད་ལག་ན་ཐོགས་ཤིང་བླག་ཤའི་ཡལ་ག་ལ་མངོན་དུ་ ༄༅། །ལྟ་སྟེ་འདུད་ཅིང་ཕྱག་འཚལ་བར་འཁོད་པར་གྱུར་པ་འདི་ནི། སྔོན་གྱི་ལྟས་དགུ་པ་བྱུང་བའོ། །ཡང་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་སྐུ་ ལྟེ་བའི་དཀྱིལ་དག་ནས་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་བའི་སྒྲོན་མ་ཞེས་བྱ་བའི་འོད་ཟེར་མང་པོ་ཐོན་ཏེ། ལུམྦི་ནིའི་ནགས་ཚལ་འདི་ཐམས་ཅད་སྣང་བར་བྱས་ ནས་གནས་པར་གྱུར་ཏེ། འོད་ཟེར་གྱི་སྒོའི་དཀྱིལ་འཁོར་དེ་དག་ཐམས་ཅད་ལའང་དེ་བཞིན་གཤེགས་པ་དེ་དག་ཐམས་ཅད་ཀྱི་སྐྱེ་བས་རྣམ་པར་འཕྲུལ་བ་གཟུགས་བརྙན་དུ་གྱུར་ པར་སྣང་བ་དང༌། ཐོག་མ་བལྟམས་པའི་རྣམ་པར་འཕྲུལ་བ་དང་བཅས་པར་བྱང་ཆུབ་སེམས་དཔའི་ཡོན་ཏན་ཐམས་ཅད་ཀྱང་སངས་རྒྱས་ཀྱི་གསུང་གི་དབྱངས་དང་ལྡན་པར་འོད་ ཟེར་གྱི་སྒོའི་དཀྱིལ་འཁོར་དེ་དག་ལས་སྒྲར་ཐོན་ཅིང་གྲགས་པར་གྱུར་པ་འདི་ནི། སྔོན་གྱི་ལྟས་བཅུ་པ་བྱུང་བའོ། །བྱང་ཆུབ་སེམས་དཔའ་སྐྱེ་བའི་དུས་ལ་བབ་པའི་ཚེ་སྔོན་གྱི་ ལྟས་བཅུ་པོ་དེ་དག་བྱུང་བར་གྱུར་ཏེ། དེ་བྱུང་བས་འཇིག་རྟེན་གྱི་དབང་པོ་ཐམས་ཅད་ཀྱིས་ཀྱང་བྱང་ཆུབ་སེམས་དཔའ་འབྱུང་བར་འགྱུར་རོ། །ཞེས་བྱ་བར་ཤེས་སོ། །རིགས་ཀྱི་བུ་། དེ་ལྟར་ཁོ་མོ་སྔོན་གྱི་ལྟས་བཅུ་པོ་འདི་དག་མཐོང་བས་ཀྱང་དགའ་བའི་ཤུགས་བསམ་གྱིས་མི་ཁྱབ་པ་རབ་ཏུ་ཐོབ་བོ། །རིགས་ཀྱི་བུ། གཞན་ཡང་ལྷ་མོ་སྒྱུ་མ་གྲོང་ཁྱེར་ཆེན་པོ་སེར་སྐྱའི་ གནས་ནས་བྱུང་བའི་ཚེ་ལུམྦི་ནིའི་ནགས་ཚལ་འདིར་སྔོན་གྱི་ལྟས་སྣང་བ་ཆེན་པོ་བཅུ་བྱུང་བར་གྱུར་ཏོ། །དེ་དག་བྱུང་བས་སེམས་ཅན་ཚད་མེད་པ་རྣམས་ཐམས་ཅད་མཁྱེན་པའི་ཆོས་ཀྱི་སྣང་ བས་དགའ་བའི་ཤུགས་རྣམ་པར་འཕེལ་བར་གྱུར་ཏོ། །བཅུ་གང་ཞེ་ན། འདི་ལྟ་སྟེ། སའི་སྟེང་ན་གནས་པའི་རིན་པོ་ཆེའི་ཁང་པ་བརྩེགས་པ་ཐམས་ཅད་དུ་སྣང་བ་རབ་ཏུ་བྱུང་ངོ༌། །རིན་པོ་ ཆེའི་པདྨོ་ཁ་མ་བྱེ་བ་ཁ་བྱེ་བར་གྱུར་པའི་འདབ་མ་ཐམས་ཅད་ལས་སྣང་བ་རབ་ཏུ་བྱུང་སྟེ་བལྟམས་པ་ལེགས་པར་བལྟམས་སོ། །ཞེས་བྱ་བའི་སྒྲ་སྙན་པ་ཡང་དེ་དག་བས་བྱུང་བར་གྱུར་ཏོ། །ཕྱོགས་བཅུའི་ བྱང་ཆུབ་སེམས་དཔའ་རྣམས་ཀྱིས་ཐོག་མ་སེམས་བསྐྱེད་པའི་སྣང་བ་ཇི་སྙེད་ཅིག་ཡོད་པ་དེ་དག་ཀྱང་ལུམྦི་ནིའི་ནགས་ཚལ་འདིར་སྣང་བར་བྱས་ཏེ་མངོན་པར་ཤར་ཏོ། །ཕྱོགས་བཅུའི་ བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་ས་ཐམས་ཅད་ཡོངས་སུ་གནོན་པའི་སྣང་བའི་རྣམ་པར་འཕྲུལ་བ་ཇི་སྙེད་ཅིག་ཡོད་པ་དེ་དག་ཀྱང་ལུམྦི་ནིའི་ནགས་ཚལ་འདིར་བྱུང་ངོ༌། ། ཕྱོགས་བཅུའི་བྱང་ཆུབ་སེམས་དཔའ་རྣམས་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་སྒྲུབ་ཅིང་ཡེ་ཤེས་ཁོང་དུ་ཆུད་པའི་སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམྦི་ནིའི་ནགས་ཚལ་ འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་སྨོན་ལམ་ཐམས་ཅད་ལ་དབང་སྒྱུར་བའི་ཡེ་ཤེས་སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམྦི་ནིའི་ནགས་ཚལ་ ༄༅། །འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་སྨོན་ལམ་རྒྱ་ཆེན་པོ་མངོན་པར་སྒྲུབ་པའི་ཡེ་ཤེས་སྣང་བའི་འོད་ཇི་སྙེད་ཅིག་ཡོད་པ་ དེ་དག་ཀྱང་ལུམྦི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་སེམས་ཅན་ཡོངས་སུ་སྨིན་པར་བྱ་བ་དང༌། གདུལ་བར་བྱེད་པའི་ཡེ་ཤེས་ སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམྦི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་ཐམས་ཅད་ཀྱིས་ཆོས་ཀྱི་དབྱིངས་ཀྱི་ཚུལ་གྱི་ཡེ་ ཤེས་ཁོང་དུ་ཆུད་པའི་སྣང་བ་ཇི་སྙེད་ཅིག་ཡོད་པ་དེ་དག་ཀྱང་ལུམྦི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་ཐམས་ཅད་སངས་རྒྱས་ཐམས་ཅད་ ཀྱི་རྣམ་པར་འཕྲུལ་བ་དང༌། སྐྱེ་བ་དང༌། མངོན་པར་བྱུང་བ་དང༌། བྱང་ཆུབ་ཏུ་རྣམ་པར་འཚང་རྒྱ་བ་དང༌། ཡེ་ཤེས་ཐུགས་སུ་ཆུད་པར་མཛད་པའི་སྣང་བའི་འོད་ཇི་སྙེད་ཅིག་ཡོད་པ་དེ་དག་ ཀྱང་ལུམྦི་ནིའི་ནགས་ཚལ་འདིར་བྱུང་བར་གྱུར་ཏོ། །སྔོན་གྱི་ལྟས་སྣང་བ་ཆེན་པོ་བཅུ་པོ་དེ་དག་རབ་ཏུ་བྱུང་བར་གྱུར་ཏེ། དེ་དག་གིས་སེམས་ཅན་མཐའ་དང་དབུས་མེད་པའི་སེམས་དང་ བསམ་པའི་མུན་པ་ཐིབས་པོ་ཐམས་ཅད་ཀྱང་རབ་ཏུ་སྣང་བར་བྱས་སོ། །རིགས་ཀྱི་བུ། དེ་ལ་ལྷ་མོ་སྒྱུར་མ་ཤིང་བླག་ཤའི་གནས་སུ་ཕྱིན་པའི་ཚེ་འཇིག་རྟེན་གྱི་དབང་པོ་འདུས་པ་ཐམས་ཅད་དང༌། འདོད་པའི་ཁམས་ཀྱི་ལྷའི་བུ་ལྷའི་བུའི་ཚོགས་དང༌། ལྷའི་བུ་མོའི་འཁོར་དང་བཅས་ཏེ་འདུས་པ་ཐམས་ཅད་དང༌། གཟུགས་ལ་སྤྱོད་པའི་ལྷའི་བུ་དྲི་ང་བ་མེད་པ་ཐམས་ཅད་དང༌། ཀླུ་ དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོའི་འཁོར་དང་བཅས་ཏེ་ཚོགས་པ། བྱང་ཆུབ་སེམས་དཔའ་ལ་མཆོད་ པར་བརྩོན་པ་ཐམས་ཅད་ཀྱི་ལུས་དང༌། མཆོད་པའི་ཚོགས་ཐམས་ཅད་ཀྱང་ལྷ་མོ་སྒྱུ་མའི་གཟི་བརྗིད་དང༌། དཔལ་དང༌། ཁ་དོག་དང༌། གཟུགས་ཀྱིས་རབ་ཏུ་སྣང་བར་བྱས་སོ། །སྟོང་ གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་འོད་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཟིལ་དུ་བརླགས་པར་གྱུར་ཏེ་ཟིལ་གྱིས་མནན་ཏོ། །ལྷ་མོ་སྒྱུ་མའི་བ་སྤུའི་སྒོ་ ཐམས་ཅད་ནས་བྱུང་བའི་འོད་དང་སྣང་བ་དག་ནི། འོད་གཞན་གྱིས་ཉམས་པར་གྱུར་པ་མེད། བསྒྲིབས་པར་གྱུར་པ་མེད། ཆོད་པར་གྱུར་པ་མེད། ཐོགས་པར་གྱུར་པ་མེད་དེ། ཕྱོགས་ཐམས་ཅད་རྒྱས་པར་བཀང་ནས་སེམས་ཅན་དམྱལ་བའི་སྡུག་བསྔལ་ཐམས་ཅད་དང༌། བྱོལ་སོང་གི་སྐྱེ་གནས་ཀྱི་སྡུག་བསྔལ་ཐམས་ཅད་དང༌། གཤིན་རྗེའི་འཇིག་རྟེན་གྱི་སྡུག་ བསྔལ་ཐམས་ཅད་དང༌། སྲིད་པའི་ལམ་གྱི་རྒྱུད་དུ་གཏོགས་པའི་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་དང༌། ཉོན་མོངས་པ་ཐམས་ཅད་རབ་ཏུ་ཞི་བར་བྱས་ཏེ་ལྷག་གེ། ལྷམ་མེ། ༄༅། །ལྷང་ངེར་གནས་པར་གྱུར་ཏོ། །རིགས་ཀྱི་བུ། འདི་ནི། བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམྦི་ནིའི་ནགས་ཚལ་དུ་བྱུང་བ་དང་པོའོ། །རིགས་ ཀྱི་བུ༑ གཞན་ཡང་གང་གི་ཚེ་ལྷ་མོ་སྒྱུ་མའི་ལུས་སུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཆུད་ཅིང་གཟུགས་བརྙན་བྱུང་བར་སྣང་བར་གྱུར་པ་དེའི་སྟོང་གསུམ་ གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་གླིང་བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱའི་འཛམ་བུའི་གླིང་ཐམས་ཅད་ཀྱི་རྒྱལ་པོའི་གནས་མིང་སྣ་ཚོགས་དང་ལྡན་པ་ཤ་ སྟག་དང༌། ནགས་ཚལ་གྱི་མིད་སྣ་ཚོགས་དང་ལྡན་པ་ཤ་སྟག་དང༌། ཤིང་དྲུང་རྣམ་པ་ཐ་དད་པ་ཤ་སྟག་ཏུའང་ལྷ་མོ་སྒྱུ་མ་ཕྱིན་ཅིང་འཇིག་རྟེན་གྱི་དབང་པོ་ཐམས་ཅད་ཀྱིས་ ཡོངས་སུ་བསྐོར་ཏེ་བྱང་ཆུབ་སེམས་དཔའི་སྐྱེ་བ་ལ་སྟག་གོན་དུ་སྡོད་ཅིང༌། བྱང་ཆུབ་སེམས་དཔའི་ཡུམ་གྱི་ཡེ་ཤེས་ཀྱི་རྣམ་པར་འཕྲུལ་བ་བསམ་གྱིས་མི་ཁྱབ་པས་རྣམ་པ་ འདི་བཞིན་དུ་སྣང་བར་གྱུར་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམྦི་ནིའི་ནགས་ཆེལ་དུ་བྱུང་བ་གཉིས་པའོ། །རིགས་ཀྱི་བུ། གཞན་ ཡང་ལྷ་མོ་སྒྱུ་མའི་བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ལ་ཡང་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་བཅོམ་ལྡན་འདས་ཀྱིས་དེ་བཞིན་གཤེགས་པ་ཇི་སྙེད་ཅིག་ བསྙེན་བཀུར་ཏེ། རིམ་གྲོར་མཛད་པ་དང༌། བསྟི་སྟང་དང༌། བཀུར་སྟིར་མཛད་དེ་མཆོད་པ་དེ་དག་ཐམས་ཅད་ཀྱང་ཡོངས་སུ་སྣང་བར་གྱུར་ཏོ། །དེ་བཞིན་གཤེགས་པ་དེ་དག་གིས་ཆོས་ཇི་ སྙེད་ཅིག་བསྟན་པ་དེ་དག་ཐམས་ཅད་ཀྱང་བ་སྤུའི་བུ་ག་དེ་དག་ནས་སངས་རྒྱས་ཀྱི་གསུང་གི་ཡན་ལག་དང་ལྡན་པར་མ་ལུས་པར་གྲགས་པར་གྱུར་ཏེ། དཔེར་ན། ཆུའི་ཕོར་བུ་ཆུང་ངུའམ། གསེར་གྱི་རྡུལ་ཕྲ་མོའམ། མེ་ལོང་གི་དཀྱིལ་འཁོར་ཤིན་ཏུ་གསལ་བའམ། ཆུ་ཤིན་ཏུ་དང་བ་ལ་ནམ་མཁའི་དཀྱིལ་འཁོར་ཉི་ཟླ་དང་གཟའ་སྐར་གྱི་ཚོགས་ཀྱིས་རབ་ཏུ་བརྒྱན་པ་དང༌། སྤྲིན་གྱི་ཚོགས་འབྲུག་སྒྲ་ཟབ་མོ་འབྱིན་པ་ཅན་ཡང་གཟུགས་བརྙན་དུ་གྱུར་པར་སྣང་ངོ༌། །རིགས་ཀྱི་བུ། དེ་བཞིན་དུ་ལྷ་མོ་སྒྱུ་མའི་བ་སྦུའི་སྒོའི་དཀྱིལ་འཁོར་ཐམས་ཅད་ལའང་སྔོན་གྱི་ དེ་བཞིན་གཤེགས་པའི་རྣམ་པར་འཕྲུལ་པ་རྣམས་ཀྱང་ཡོངས་སུ་སྣང༌། ཆོས་བསྟན་པའི་སྒྲ་ཐམས་ཅད་ཀྱང་ཡོངས་སུ་གྲགས་པར་གྱུར་ཏེ། རིགས་ཀྱི་བུ། འདི་ནི། བྱང་ཆུབ་སེམས་ དཔའ་སྐྱེ་བའི་རྣམ་པར་འཕྲུལ་པ་ལུམྦི་ནིའི་ནགས་ཚལ་དུ་བྱུང་བ་གསུམ་པའོ། །རིགས་ཀྱི་བུ། གཞན་ཡང་ལྷ་མོ་སྒྱུ་མའི་ལུས་ཐམས་ཅད་དང༌། བ་སྤུའི་སྒོའི་དཀྱིལ་འཁོར་ཐམས་ཅད་ལས་ བ་སྤུའི་སྒོ་རེ་ར་ནས་ཀྱང་ཞིང་ཇི་སྙེད་ཅིག་དང༌། འཇིག་རྟེན་གྱི་ཁམས་རྒྱ་མཚོ་ཇི་སྙེད་ཅིག་དང༌། འཇིག་རྟེན་གྱི་ཁམས་འབྱམས་ཀླས་པ་ཇི་སྙེད་ཅིག་དང༌། འཇིག་རྟེན་གྱི་ཁམས་ཀྱི་རྒྱུད་ཇི་སྙེད་ ༄༅། །ཅིག་དང༌། འཇིག་རྟེན་གྱི་ཁམས་ཀྱི་མིང་དུ་བྱ་བ་ཇི་སྙེད་ཅིག་ཏུ་བཅོམ་ལྡན་འདས་ཀྱིས་སྔོན་བྱང་ཆུབ་སེམས་དཔའི་སྤྱོད་པ་མཛད་དེ། ཞིང་གི་གཞི་ཇི་ ལྟ་བུ་ཞིག་དང་ལྡན་པར་གྱུར་པ་དང༌། དབྱིབས་ནི། ཅི་འདྲ་བ་དང༌། རྒྱན་ནི། ཇི་ལྟ་བུ་ཞིག་དང་ལྡན་པར་གྱུར་པ་དང༌། ལྷུན་ནི། ཇི་ལྟ་བུ་ཞིག་དང་ལྡན་པར་གྱུར་པ་དང༌། རིའི་རྒྱན་ནི་། ཇི་ལྟ་བུ་དག་ཅིག་ཡོད་པར་གྱུར་པ་དང༌། གྲོང་དང༌། གྲོང་ཁྱེར་དང༌། ཡུལ་དང༌། གྲོང་རྡལ་གྱི་རྒྱན་ནི། ཇི་ལྟ་བུ་དག་ཅིག་གནས་གནས་པ་དང༌། བཟའ་ཤིང་གི་ར་བ་དང༌། མཚོ་ དང༌། ལུ་མ་དང༌། རྒྱ་མཚོའི་རྒྱན་ནི། ཇི་ལྟ་བུ་ཞིག་དང་ལྡན་པར་གྱུར་པ་དང༌། ནམ་མཁའ་དང༌། སྤྲིན་གྱི་རྒྱན་ནི། ཇི་ལྟ་བུ་ཞིག་དང་ལྡན་པར་གྱུར་པ་དང༌། སེམས་ཅན་གྱི་གནས་ནི། ཇི་ ལྟ་བུ་ཞིག་ཡོད་པར་གྱུར་པ་དང༌། ཐེག་པ་བསྟན་པ་ནི། གང་དང་ལྡན་པར་གྱུར་པ་དང༌། བསྐལ་པའི་མིད་དང་གྲངས་ནི། ཇི་སྙེད་ཅིག་ཅེས་བྱ་བར་གྱུར་བ་དང༌། སངས་རྒྱས་སྐྱེ་ བ་ནི༑ ཇི་སྙེད་ཅིག་བྱུང་བར་གྱུར་པ་དང༌། རྣམ་པར་དག་པ་ནི། གང་དུ་འདུ་བར་གྱུར་པ་དང༌། སེམས་ཅན་གྱི་ཚེའི་ཚད་ནི། ཇི་ཙམ་ཞིག་དང་ལྡན་པར་གྱུར་པ་དང༌། འཇིག་རྟེན་གྱི་ སྐྱེ་གནས་ནི། གང་དུ་སྐྱེས་པར་གྱུར་པ་དང༌། སེམས་ཅན་ནི། ཇི་ལྟ་བུ་ཞིག་དང་འགྲོགས་འགྲོགས་པ་དང༌། དགེ་བའི་བཤེས་གཉེན་ནི། ཇི་ལྟ་བུ་ཞིག་ལ་བརྟེན་བརྟེན་པ་དང༌། དགེ་བའི་ཆོས་ནི། ཇི་ལྟ་བུ་ཞིག་ལ་བརྩོན་པར་སྤྱོད་སྤྱོད་པ་དང༌། ཆོས་ཀྱི་ནན་ཏན་ནི། ཇི་ལྟ་བུ་ཞིག་ལ་བརྩོན་པར་བྱས་ཏེ། བྱང་ཆུབ་སེམས་དཔའི་སྤྱོད་པ་སྤྱོད་སྤྱོད་པའི་སངས་རྒྱས་ཀྱི་ཞིང་དེ་ དག་ཐམས་ཅད་ཀྱང་ཡོངས་སུ་སྣང་བར་གྱུར། བཅོམ་ལྡན་འདས་ཀྱིས་ཕྱིར་མི་ལྡོག་པའི་གནས་བརྙེས་ནས་སྔོན་སྐུ་ནི། ཇི་སྙེད་ཅིག་རྣམ་པར་སྤྱོད་པ་ཇི་ལྟ་བུ་ཞིག །ཆ་བྱད་ནི། ཇི་ལྟ་བུ་ ཞིག །ལོངས་སྤྱོད་ནི། ཅི་དང་ལྡན། བདེ་བ་དང་སྡུག་བསྔལ་ནི། ཇི་ལྟ་བུ་ཞིག་སྐུ་ཉམས་སུ་བཞེས། སྐུ་ཚེའི་རྒྱུད་ནི། ཇི་ལྟ་བུ་ཞིག་དང་ལྡན་པར་གྱུར་ཏེ། སྔོན་བྱང་ཆུབ་སེམས་ དཔའི་སྤྱོད་པ་སྤྱད་པར་གྱུར་པ་དེ་དག་ཐམས་ཅད་ཀྱང་བ་སྤུའི་སྒོ་ཐམས་ཅད་ནས་ཡོངས་སུ་སྣང་བར་གྱུར་ཏོ། །སངས་རྒྱས་ཀྱི་ཞིང་དེ་དག་ཐམས་ཅད་ཀྱི་སྐྱེ་གནས་དེ་དག་ཏུ་ལྷ་མོ་སྒྱུ་མ་ བྱང་ཆུབ་སེམས་དཔའི་ཡུམ་དུ་གྱུར་པ་དང༌། བྱང་ཆུབ་སེམས་དཔའི་སྐུ་དེ་དག་ཐམས་ཅད་ཀྱང་ལྷ་མོ་སྒྱུ་མའི་བ་སྤུའི་སྒོ་ཐམས་ཅད་དུ་རྣམ་པར་འཕྲུལ་པའི་གཟུགས་བརྙན་བྱུང་བར་ གྱུར་ཏེ༑ རིགས་ཀྱི་བུ། འདི་ནི། བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པ་ལུམྦི་ནིའི་ནགས་ཚལ་དུ་བྱུང་བ་བཞི་པའོ། །རིགས་ཀྱི་བུ། གཞན་ཡང་བཅོམ་ལྡན་འདས་ཀྱི་ སྔོན་སྐུ་ནི། ཇི་སྙེད་ཅིག་གིས་བྱང་ཆུབ་སེམས་དཔའི་སྤྱོད་པ་སྤྱད་པ་དང༌། ཁ་དོག་ནི། ཇི་ལྟ་བུ་ཞིག། དབྱིབས་ནི། ཅི་འདྲ་བ་ཞིག །ཆ་བྱད་ནི། ཇི་ལྟ་བུ་ཞིག །ད་རོད་ནི། ཇི་ལྟ་བུ་ཞིག་ ༄༅། །ལོངས་སྤྱོད་ནི། ཅི་དང་ལྡན། བདེ་བ་དང་སྡུག་བསྔལ་ནི། ཇི་ལྟ་བུ་ཞིག་སྐུ་ཉམས་སུ་བཞེས། སྐུ་ཚེའི་རྒྱུད་ནི། ཇི་ལྟ་བུ་ཞིག་དང་ལྡན་པར་གྱུར་པ་དེ་དག་ ཐམས་ཅད་ཀྱང་ལྷ་མོ་སྒྱུ་མའི་ལུས་ཀྱི་བ་སྤུའི་སྒོ་ཐམས་ཅད་ལ་གཟུགས་བརྙན་དུ་སྣང་བར་གྱུར་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ ལུམྦི་ནིའི་ནགས་ཚལ་དུ་བྱུང་བ་ལྔ་པའོ། །རིགས་ཀྱི་བུ། གཞན་ཡང་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་གཏང་བར་དཀའ་བ་ཡོངས་སུ་བཏང་སྟེ། ཞབས་དང་ཕྱག་ཡོངས་སུ་བཏང་བའམ། སྙན་དང་ཤངས་ཡོངས་སུ་བཏང་བའམ། ལྗགས་དང་ཚེམས་ཡོངས་སུ་བཏང་བའམ། སྤྱན་དང༌། དབུ་ཡོངས་སུ་བཏང་བའམ། ཤ་དང་ཁྲག་ཡོངས་སུ་བཏང་བའམ། རུས་པ་དང་རྐང་ཡོངས་སུ་བཏང་བའམ། མཁལ་མ་དང་ཐུགས་ཡོངས་སུ་བཏང་བའམ། པགས་པ་དང་ཕྲི་ཡོངས་སུ་བཏང་བའམ། ཕྱི་ ནང་གི་དངོས་པོ་ཡོངས་སུ་བཏང་བའམ། སྲས་པོ་དང༌། སྲས་མོ་དང༌། བཙུན་མོ་ཡོངས་སུ་བཏང་བའམ། སྐུ་ཡོངས་སུ་བཏང་བའམ། ལོངས་སྤྱོད་རིན་པོ་ཆེ་ཡོངས་སུ་བཏང་བའམ། གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་དང༌། ཁམས་དང༌། རྒྱལ་པོའི་གནས་ཡོངས་སུ་བཏང་བའམ། ནོར་དང༌། འབྲུ་དང༌། མཛོད་དང༌། བང་བ་ཡོངས་སུ་བཏང་བའམ། ནོར་ བུ་དང༌། མུ་ཏིག་དང༌། བེ་ཌཱུཪྻ་དང༌། དུང་དང༌། མན་ཤེལ་དང༌། བྱི་རུ་དང༌། གསེར་དང༌། དངུལ་ཡོངས་སུ་བཏང་བའམ། རིན་པོ་ཆེའི་རྒྱན་སྣ་ཚོགས་ཡོངས་སུ་བཏང་བའམ། མ་ལ་ཆ་ཡོངས་ སུ་བཏང་བའམ། ཁང་པ་དང་གཞལ་མེད་ཡོངས་སུ་བཏང་བའམ། ཡོ་བྱད་ཡོངས་སུ་བཏང་བ་དེ་ལྟར་གཏོང་བའི་བྱང་ཆུབ་སེམས་དཔའི་སྐུ་གཟུགས་དང༌། རྣམ་པ་ཇི་ལྟ་བུར་ཡོངས་སུ་ བཏང་བར་གྱུར་པ་དང༌། ལེན་པ་དེ་དག་ཀྱང་རྣམ་པ་ཇི་ལྟ་བུས་ལེན་པར་གྱུར་པ་དང༌། སྦྱིན་པའི་དངོས་པོ་རྣམ་པ་ཇི་ལྟ་བུ་དག་ཡོངས་སུ་བཏང་བར་གྱུར་པ་དང༌། ཡུལ་གྱི་ཕྱོགས་གང་དག་ཏུ་ ཡོངས་སུ་བཏང་བར་གྱུར་པ་དང༌། དེའི་སྟེ་བྱང་ཆུབ་སེམས་དཔའི་འཁོར་དུ་གྱུར་པ་དེ་དག་ཐམས་ཅད་ཀྱང་ལྷ་མོ་སྒྱུ་མའི་བ་སྦུའི་སྒོ་ཐམས་ཅད་ལས་གཟུགས་བརྙན་དུ་སྣང་བར་གྱུར་ཏོ། །སློང་ མོ་བའི་སྒྲ་དེ་དག་ཀྱང་གྲགས་པར་གྱུར་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་བ་ལུམྦི་ནིའི་ནགས་ཚལ་དུ་བྱུང་བ་དྲུག་པའོ། །རིགས་ཀྱི་བུ། གཞན་ ཡང་སྔོན་གྱི་མཐའི་རྒྱུད་དུ་བྱུང་བའི་དེ་བཞིན་གཤེགས་པ་རྣམས་ཡུམ་གྱི་སྐུ་ནས་བལྟམས་པར་གྱུར་པའི་ཚེ་སངས་རྒྱས་ཀྱི་ཞིང་གི་རྒྱན་དང་ལྷབ་ལྷུབ་ཇི་སྙེད་ཅིག་བྱུང་བར་གྱུར་པ་དང༌། སེམས་ཅན་གྱི་རྒྱན་རྣམ་པར་ཕྱེ་བ་དང༌། བཟའ་ཤིང་གི་རྒྱན་རྣམ་པར་ཕྱེ་བ་དང༌། མེ་ཏོག་དང༌། བདུག་བ་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང་ ༄༅། །གདུགས་དང༌། རྒྱལ་མཚན་དང༌། བ་དན་གྱི་རྒྱན་རྣམ་པར་ཕྱེ་བ་དང༌། རིན་པོ་ཆེའི་རྒྱལ་པོ་ཐམས་ཅད་རྣམ་པར་འཕྲུལ་པའི་རྒྱན་རྣམ་པར་ཕྱེ་བ་དང༌། རོལ་མོ་དང༌། གླུ་དང༌། བསྟོད་པ་དང༌། སིལ་སྙན་གྱི་སྒྲ་ཇི་སྙེད་ཅིག་བྱུང་བར་གྱུར་པ་དེ་དག་ཐམས་ཅད་ཀྱང་ལྷ་མོ་སྒྱུ་མ་ལུམྦི་ནིའི་ནགས་ཚལ་དུ་ཕྱིན་པའི་ཚེ་ལུམྦི་ནིའི་ནགས་ཚལ་ འདིར་ཡོངས་སུ་བྱུང་བར་གྱུར་ཏོ། །མངོན་པར་སྐྱེས་སོ། །འགྲོ་བས་རྣམ་པར་དམིགས་སུ་ཡོད་པར་བྱུང་བར་གྱུར་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའ་སྐྱེ་བའི་ རྣམ་པར་འཕྲུལ་བ་ལུམྦི་ནིའི་ནགས་ཚལ་དུ་བྱུང་བ་བདུན་པའོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའི་ལོངས་སྤྱོད་ལྷའི་དབང་པོ་ཐམས་ཅད་ཀྱི་གནས་ཀྱི་རྒྱན་གྱི་ལོངས་ སྤྱོད་ལས་ཡོངས་སུ་འདས་པ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མིའི་དབང་པོ་ཐམས་ ཅད་ཀྱི་གནས་ཀྱི་རྒྱན་གྱི་ལོངས་སྤྱོད་ལས་འདས་པ་འདི་ལྟ་སྟེ། རིན་པོ་ཆེའི་རྒྱལ་པོ་ཐམས་ཅད་ཀྱི་ཁང་པ་བརྩེགས་པའི་ལོངས་སྤྱོད་དམ། རིན་པོ་ཆེའི་རྒྱལ་པོའི་གཞལ་མེད་ཁང་གི་ ལོངས་སྤྱོད་དམ། རིན་པོ་ཆེའི་རྒྱལ་པོའི་དྲ་བའི་ལོངས་སྤྱོད་དམ། རིན་པོ་ཆེའི་རྒྱལ་པོའི་འབྲུའི་ལོངས་སྤྱོད་དམ། རིན་པོ་ཆེའི་རྒྱལ་པོའི་གཟུགས་ཀྱི་ལོངས་སྤྱོད་དམ། རིན་པོ་ཆེའི་ རྒྱན་ཐམས་ཅད་ཀྱི་ལོངས་སྤྱོད་དམ། སྤོས་ཀྱི་རྒྱལ་པོ་ཐམས་ཅད་ཀྱི་ལོངས་སྤྱོད་དམ། དམིགས་པ་ཐམས་ཅད་བཟང་ཞིང་མཐུན་པའི་ལོངས་སྤྱོད་ཀྱང་རུང་སྟེ། དེ་དག་ཐམས་ཅད་ལྷ་མོ་སྒྱུ་ མའི་རུམ་ནས་མ་འདྲེས་པར་ཐོན་ཏེ་ལུམྦི་ནིའི་ནགས་ཚལ་འདི་ཡོངས་སུ་བརྒྱན་ཅིང་ཀུན་ནས་གནས་པར་གྱུར་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའ་སྐྱེ་བ་རྣམ་པར་འཕྲུལ་ པ་ལུམྦི་ནིའི་ནགས་ཚལ་དུ་བྱུང་བ་བརྒྱན་པའོ། །རིགས་ཀྱི་བུ། གཞན་ཡང་ལྷ་མོ་སྒྱུ་མའི་ལུས་ལས་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་ ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་བཅོམ་ལྡན་འདས་རྣམ་པར་སྣང་མཛད་དང༌། སྐུ་གཟུགས་དང༌། སྐུ་མདོག་དང༌། དབྱིབས་འདྲ་བ། མཚན་དང༌། དཔེ་བྱད་བཟང་པོའི་རྒྱན་གྱིས་འདྲ་ བར་བརྒྱན་པ། འོད་འདྲ་བ་དང༌། འོད་ཟེར་འདྲ་བ་རབ་ཏུ་འགྱེད་པ། ཚུལ་དང་འགྲོས་སྟབས་འདྲ་བ། རྩལ་དང་མཐུ་འདྲ་བ། རྣམ་པར་སྣང་བའི་རྣམ་པར་འཕྲུལ་པ་མཐུན་པ། འཁོར་ འདྲ་བ༑ རྒྱན་མཚུངས་པ་མང་པོ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་ལེགས་པ་རྒྱ་མཚོ་ཡོངས་སུ་བརྗོད་ཅིང་ཐོན་པར་གྱུར་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའ་ སྐྱེ་བའི་རྣམ་པར་འཕྲུལ་བ་ལུམྦི་ནིའི་ནགས་ཚལ་དུ་བྱུང་བ་དགུ་པའོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་བལྟམས་པར་གྱུར་པའི་དུས་ལ་བབ་པ་དང༌། ལྷ་མོ་སྒྱུ་མའི་མདུན་ ༄༅། །དུ་འོག་གི་རྡོ་རྗེའི་གཞི་ལས་ས་ཆེན་པོ་མངོན་པར་བརྟོལ་ཏེ། རིན་པོ་ཆེའི་རྒྱལ་པོའི་པདྨོ་ཆེན་པོ་རིན་པོ་ཆེ་ཐམས་ཅད་ཀྱི་རྒྱན་གྱི་དམ་པ་ཞེས་བྱ་བ། ཆུ་བ་ རིན་པོ་ཆེའི་རྒྱལ་པོ་གཞན་གྱིས་མི་ཐུབ་པའི་རྡོ་རྗེ་ཆེན་པོ་ལས་གྲུབ་པ། རིན་པོ་ཆེའི་རྒྱལ་པོ་འགྲོ་བ་རྒྱ་མཚོའི་ནང་རིམ་དང་ལྡན་པ། ཟེ་བའི་རྩེ་མོ་རིན་པོ་ཆེའི་རྒྱལ་པོ་ཐམས་ཅད་ཀྱིས་ བརྒྱན་པ། འདབ་མའི་ཕྲེང་བ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བརྒྱན་ཅིང་ཤིན་ཏུ་རྣམ་པར་ཕྱེ་བ། ལོ་མའི་དཀྱིལ་འཁོར་རིན་པོ་ཆེའི་རྒྱལ་པོ་སྣ་ཚོགས་ཀྱིས་ བྱས་པ༑ སྙིང་པོ་མཛེས་པ་རིན་པོ་ཆེ་ཡིད་བཞིན་གྱིས་རྣམ་པར་དག་པ་དང་ལྡན་པ། ཟེ་བའི་ཕྲེང་བ་རྣམ་པར་ཕྱེ་བ་དང༌། རིན་པོ་ཆེ་ཐམས་ཅད་ཀྱི་ཁ་དོག་ཚད་མེད་པ་དང་ལྡན་པ། རིན་ པོ་ཆེའི་རྒྱལ་པོ་གྲངས་མེད་པའི་དྲ་བའི་རྒྱན་དང་ལྡན་པས་ཡོངས་སུ་ཡོག་པ། རིན་པོ་ཆེའི་རྒྱལ་པོ་རྡོ་རྗེ་མཐུ་བོ་ཆེས་མི་ཤིགས་པས་ལྷུན་ཀུན་ནས་བཀབ་པ། ལྷའི་རིས་ཐམས་ཅད་ ཀྱིས་ཀུན་ནས་བསྐོར་བ། ཀླུའི་དབང་པོ་ཐམས་ཅད་ཀྱིས་སྤོས་ཆུའི་སྤྲིན་གྱི་ཆར་མངོན་པར་དབབ་པ། གནོད་སྦྱིན་གྱི་དབང་པོ་ཐམས་ཅད་ཀྱིས་ཀུན་ནས་བསྐོར་ཅིང་ལྷ་རྫས་ཀྱི་ མེ་ཏོག་སྙིམ་པ་ནས་གཏོར་བ། དྲི་ཟའི་དབང་པོ་ཐམས་ཅད་ཀྱིས་སྔོན་གྱི་སངས་རྒྱས་ལ་རིམ་གྲོར་བྱས་པའི་ཀླུའི་དབྱངས་སྙན་ཅིང་ཡིད་དུ་འོང་བའི་ད་རོ་དང་སྦྱར་ཏེ་བསྟོད་པའི་སྤྲིན་ གྱིས་མངོན་པར་བསྟོད་པ། ལྷ་མ་ཡིན་གྱི་དབང་པོ་ཐམས་ཅད་ཀྱིས་ང་རྒྱལ་དང༌། རློམ་པ་དང༌། དྲེགས་པ་ཐམས་ཅད་བཏང་ཞིང་ཤིན་ཏུ་བཏུད་དེ་ཕྱག་བྱ་བ། ནམ་མཁའ་ལྡིང་གི་དབང་པོ་ ཐམས་ཅད་ཀྱིས་རིན་པོ་ཆེའི་སྣམ་བུ་ཀུན་ཏུ་སྤྱངས་ཏེ་ནམ་མཁའ་ཀུན་ནས་བརྒྱན་པར་བྱ་བ། མིའམ་ཅིའི་དབང་པོ་ཐམས་ཅད་ཀྱིས་བྱང་ཆུབ་སེམས་དཔའི་ཡོན་ཏན་ཡོངས་སུ་བརྗོད་ཅིང་ རོལ་མོ་དང༌། གླུའི་དབྱངས་ལ་བརྩོན་པ་དང༌། ཉམས་སུ་རབ་ཏུ་བདེ་བས་ཀུན་ནས་བལྟ་བ། ལྟོ་འཕྱེ་ཆེན་པོའི་དབང་པོ་ཐམས་ཅད་ཀྱིས་ཤིན་ཏུ་དགའ་བ་དང་མོས་པ་སྐྱེས་པས་ཡོངས་སུ་ བལྟ་ཞིང་སྒྲ་སྙན་པ་བྱུང་སྟེ་རྒྱན་གྱི་སྤྲིན་ཐམས་ཅད་ཀྱི་ཆར་མངོན་པར་དབབ་པ་བྱུང་བར་གྱུར་ཏེ། རིགས་ཀྱི་བུ། འདི་ནི། བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་བ་ལུམྦི་ནིའི་ ནགས་ཚལ་དུ་བྱུང་བ་བཅུ་པའོ། །རིགས་ཀྱི་བུ། བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་བཅུ་པོ་དེ་དག་ལུམྦི་ནིའི་ནགས་ཚལ་དུ་བྱུང་བར་གྱུར་ནས་དེའི་རྗེས་ལ་བྱང་ཆུབ་ སེམས་དཔའ་འོད་ཚད་མེད་བསམ་གྱིས་མི་ཁྱབ་པ་མངའ་བ། བལྟ་ན་བཏང་མི་བྲ་བ་ཞིག་ལྷ་མོ་སྒྱུ་མའི་རུམ་ནས་བལྟམས་ཏེ་ནམ་མཁའི་དབྱིངས་རུམ་ནས་ཉི་མའི་དཀྱིལ་འཁོར་ཤར་ བ་ལྟ༑ སྤྲིན་གྱི་ཚོགས་རུམ་ནས་གློག་གི་ཕྲེང་བ་འགྱུར་བ་ལྟ། རི་ཆེན་པོའི་སྤོ་རུམ་ནས་ཉི་མ་ཤར་ཁའི་སྤྲིན་གོ་ལྟ། མུན་པ་སྟུག་རུམ་ནས་སྒྲོན་མ་ཆེན་པོ་བྱུང་བ་ལྟ་སྟེ། མངོན་པར་ ༄༅། །བལྟམས་པར་གྱུར་ཏོ། །དེ་ལྟར་བྱང་ཆུབ་སེམས་དཔའ་ལྷ་མོ་སྒྱུ་མའི་ལུས་ལས་གཟུགས་བརྙན་ལྟར་བསྟན་པའི་ཆོས་ཉིད་དང༌། རྨི་ལམ་ལྟར་བསྟན་པའི་ ཆོས་ཉིད་དང༌། སྒྱུ་མའི་རྣམ་པའི་གཟུགས་རྣམ་པར་དམིགས་པ་ལྟར་བསྟན་པའི་ཆོས་ཉིད་དང༌། འགྲོ་བ་དང་འོང་བ་མེད་པའི་ཆོས་ཉིད་དང༌། སྐྱེ་བ་དང་འགག་པ་མེད་པའི་འོད་རྣམ་པར་ དམིགས་པ་ཡོངས་སུ་བསྟན་པའི་ཆོས་ཉིད་ཀྱིས་མངོན་པར་འབྱུང་བ་ཡོངས་སུ་བསྟན་ཏོ། །རིགས་ཀྱི་བུ། དེ་ལྟར་ཁོ་མོ་ནི། ལུམྦི་ནིའི་ནགས་ཚལ་འདི་ན་གནས་ཤིང༌། བཅོམ་ ལྡན་འདས་རྣམ་པར་སྣང་མཛད་ཀྱི་སྐུ་ཚེའི་རྣམ་པར་འཕྲུལ་པ་རྒྱ་མཚོ་ལ་ལྟ་ཞིང་ཁོང་དུ་ཆུད་པར་བྱེད་དེ། རིགས་ཀྱི་བུ། ཁོ་མོ་གླིང་བཞི་བསྐལ་པ་དང་ལྡན་པ་འདི་ན་བཅོམ་ ལྡན་འདས་རྣམ་པར་སྣང་མཛད་ཀྱི་སྐུ་ཚེའི་རྣམ་པར་འཕྲུལ་བ་ལ་ལྟ་ཞིང་ཁོང་དུ་ཆུད་པར་བྱ་བར་གནས་པ་དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ ཅད་ཀྱི་གླིང་བཞི་པ་ཐམས་ཅད་ཀྱི་འཛམ་བུའི་གླིང་བྱེ་བ་ཕྲག་བརྒྱ་ཐམས་ཅད་ནའང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ཚེའི་རྣམ་པར་འཕྲུལ་བ་བྱེ་བ་ཕྲག་བརྒྱ་ལ་ལྟ་ ཞིང་ཁོང་དུ་ཆུད་པར་བྱེད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་འདུས་པའི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་སངས་རྒྱས་ཀྱི་ཞིང་ཐམས་ ཅད་རྡུལ་ཤིན་ཏུ་ཕྲ་བ་ལ་འཇུག་པའི་ཡེ་ཤེས་ཀྱིས་ཁོང་དུ་ཆུད་པ་དག་ཏུ་ཡང་སེམས་ཀྱི་སྐད་ཅིག་རེ་རེ་ལ་སེམས་ཀྱིས་ཁོང་དུ་ཆུད་པར་བྱ་བ་རེ་རེས་བཅོམ་ལྡན་འདས་རྣམ་པར་སྣང་ མཛད་ཀྱི་སྐུ་ཚེའི་རྣམ་པར་འཕྲུལ་བ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ལ་ལྟ་ཞིང་ཁོང་དུ་ཆུད་པར་བྱེད་དོ། །དེའི་འོག་མའི་སེམས་ཀྱིས་སངས་རྒྱས་ཀྱི་ཞིང་རྡུལ་ཤིན་ཏུ་ ཕྲ་བ་རྣམས་ཀྱི་ཁོང་དུ་ཆུད་པའི་སངས་རྒྱས་ཀྱི་ཞིང་དེ་དག་ལས་སངས་རྒྱས་ཀྱི་ཞིང་རེ་རེར་ཡང་དེ་དང་མཉམ་པའི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལ་ལྟ་ཞིང་ཁོང་ དུ་ཆུད་པར་བྱེད་དེ། ཚུལ་དེ་ལྟ་བུས་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་སངས་རྒྱས་ཀྱི་ཞིང་རེ་རེ་དག་ཏུ་ཡང་བྱང་ཆུབ་སེམས་དཔའ་སྐྱེ་བའི་རྣམ་ པར་འཕྲུལ་པ་ཐམས་ཅད་ལ་ལྟ་ཞིང་ཁོང་དུ་ཆུད་པར་བྱེད་ཀྱང་རྡུལ་ཤིན་ཏུ་ཕྲ་བ་ཐམས་ཅད་ཀྱི་རྡུལ་རེ་རེ་ལ་ཞིང་གཅིག་ནས་གཅིག་ཏུ་བརྒྱུད་པའི་མཐའ་རྙེད་པར་མི་རུང་ངོ༌། །ཞིང་ཐམས་ ཅད་ཀྱི་ཞིང་རེ་རེར་བྱང་ཆུབ་སེམས་དཔའ་སྐྱེ་བ་གཅིག་ནས་གཅིག་ཏུ་བརྒྱུད་པའི་ཡང་མུ་རྙེད་པར་མི་རུང་ངོ༌། །ཇི་ལྟར་ཁོ་མོ་འཇིག་རྟེན་གྱི་ཁམས་འདིའི་བྱང་ཆུབ་སེམས་དཔའི་སྐྱེ་བ་ རྣམ་པར་འཕྲུལ་པ་ཐམས་ཅད་ལ་ལྟ་ཞིང་ཁོང་དུ་ཆུད་པར་བྱེད་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་མཐའ་དང་དབུས་མེད་པ་དང༌། རྡུལ་ཤིན་ཏུ་ཕྲ་བ་ཐམས་ཅད་ལའང་ ༄༅། །སེམས་ཀྱི་སྐད་ཅིག་རེ་རེའི་སེམས་ཀྱིས་ཁོང་དུ་ཆུད་པར་བྱ་བ་རེ་རེ་ལ་བྱིན་གྱི་རླབས་རྒྱུན་མི་འཆད་པའི་ཚུལ་གྱིས་བྱང་ཆུབ་སེམས་དཔའ་སྐྱེ་བའི་རྣམ་ པར་འཕྲུལ་བ་ཐམས་ཅད་ལ་ལྟ་ཞིང་ཁོང་དུ་ཆུད་པར་བྱེད་དོ། །དེ་སྐད་ཅེས་སྨྲས་པ་དང༌། ཚོང་དཔོན་གྱི་བུ་ནོར་བཟང་གིས་ལུམྦི་ནིའི་ནགས་ཚལ་གྱིས་ལྷ་མོ་གཟི་བརྗིད་ཀྱི་དཀྱིལ་ འཁོར་བཟང་པོས་དགའ་བའི་དཔལ་ལ་འདི་སྐད་ཅེས་སྨྲས་སོ། །འཕགས་མ། ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ ཅད་དུ་བྱང་ཆུབ་སེམས་དཔའི་སྐྱེ་བ་རྣམ་པར་འཕྲུལ་བ་ཡོངས་སུ་སྟོན་པ་འདི་རྙེད་ནས་ཡུན་ཇི་སྲིད་ཅིག་ལགས། སྨྲས་པ། རིགས་ཀྱི་བུ། སྔོན་འདས་པའི་དུས་བསྐལ་པ་སངས་རྒྱས་ ཀྱི་ཞིང་བྱེ་བའི་རྡུལ་ཤིན་ཏུ་ཕྲ་བ་སྙེད་འདས་པའི་ཕ་རོལ་དེའི་ཡང་ཕ་སྔ་ཞིག་ཏུ་འཇིག་རྟེན་གྱི་ཁམས་ཀུན་ནས་རིན་པོ་ཆེ་ཞེས་བྱ་བར་བསྐལ་བ་མཉམ་པར་བཞག་པ་ཞེས་བྱ་བ་ སངས་རྒྱས་བྱེ་བ་ཁྲག་ཁྲིག་བརྒྱད་ཅུ་བྱུང་བ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་ མཚན་ཞེས་བྱ་བ། མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟན་དུ་བྱུང་ངོ༌། །རིགས་ཀྱི་བུ། འཇིག་རྟེན་གྱི་ཁམས་ཀུན་ནས་རིན་པོ་ཆེ་ཞེས་བྱ་བ་དེར་གླིང་བཞི་པ་དབུ་མ་རྒྱན་སྣ་ཚོགས་ཀྱི་འོད་ཅེས་ བྱ་བ་བྱུང་སྟེ། གླིང་བཞི་པ་དེའི་འཛམ་བུའི་གླིང་གི་དབུས་སུ་རྒྱལ་པོའི་གནས་རི་རབ་རྣམ་པར་དག་པའི་རྒྱན་གྱི་རྒྱལ་མཚན་ཞེས་བྱ་བ་བྱུང་སྟེ། རྒྱལ་པོའི་གནས་དེར་རྒྱལ་པོ་རིན་པོ་ ཆེ་འོད་འཕྲོ་བའི་མིག་གི་འོད་ཅེས་བྱ་བ་བྱུང་ངོ༌། །རྒྱལ་པོ་རིན་པོ་ཆེ་འོད་འཕྲོ་བའི་མིག་གི་འོད་དེ་ལ་བཙུན་མོ་རབ་ཏུ་དགའ་བའི་འོད་ལ་དབང་སྒྱུར་བ་ཞེས་བྱ་བ་མངའོ། །རིགས་ཀྱི་བུ། དཔེར་ན། གླིང་བཞི་པ་སྐལ་པ་དང་ལྡན་པ་འདིའི་འཛམ་བུའི་གླིང་དུ་ལྷ་མོ་སྒྱུ་མ་བཅོམ་ལྡན་འདས་རྣམ་པར་སྣང་མཛད་ཀྱི་ཡུམ་དུ་གྱུར་པ་དེ་བཞིན་དུ་དེའི་ཚེ་དེའི་དུས་ན་གླིང་བཞི་ པ་རྒྱན་སྣ་ཚོགས་ཀྱི་འོད་ཀྱི་འཛམ་བུ་གླིང་དུ་ཡང་རབ་ཏུ་དགའ་བའི་འོད་ལ་དབང་སྒྱུར་བ་ཞེས་བྱ་བ་ཡང་བཅོམ་ལྡན་འདས་དེ་བཞིན་གཤེགས་པ་དབང་ཕྱུག་གི་ཡོན་ཏན་གཞན་གྱིས་ མི་ཐུབ་པའི་རྒྱལ་མཚན་གྱི་ཡུམ་དུ་གྱུར་ཏེ། སངས་རྒྱས་བྱེ་བ་ཁྲག་ཁྲིག་ཕྲག་བརྒྱད་ཅུ་བསྐལ་པའི་དང་པོ་ལ་བྱུང་སྟེ། ཐོག་མར་བྱུང་བའི་བཅོམ་ལྡན་འདས་དེ་བཞིན་གཤེགས་པ་ དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གྱི་ཡུམ་དུ་གྱུར་ཏེ། རིགས་ཀྱི་བུ། ལྷ་མོ་རབ་ཏུ་དགའ་བའི་འོད་ལ་དབང་སྒྱུར་བ་དེ་བྱང་ཆུབ་སེམས་དཔའ་སྐྱེ་བའི་དུས་ ༄༅། །ལ་བབ་པ་དང༌། བུད་མེད་ཁྲག་ཁྲིག་བརྒྱ་སྟོང་ཕྲག་ཉི་ཤུ་དང་ལྷན་ཅིག་ཏུ་བཟའ་ཤིང་གི་ར་བ་ཆེན་པོ་འོད་ཀྱི་དཀྱིལ་འཁོར་གསེར་གྱི་མེ་ཏོག་ཅེས་བྱ་ བ་དེར་ཕྱིན་ཏེ། དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གཞོན་ནུ་དེ་ཡང་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་བ་བསམ་གྱིས་མི་ཁྱབ་པས་ དེར་བལྟམས་སོ། །དེའི་ཚེ་བཟའ་ཤིང་གི་ར་བ་ཆེན་པོ་འོད་ཀྱི་དཀྱིལ་འཁོར་གསེར་གྱི་མེ་ཏོག་ཅེས་བྱ་བ་དེའི་དབུས་སུ་ཕོ་བྲང་བརྩེགས་པ་རིན་པོ་ཆེ་སྣ་ཚོགས་བཟང་པོ་ལས་ བརྩེགས་པ་ཞེས་བྱ་བ་བྱུང་སྟེ། ཕོ་བྲང་བརྩེགས་པ་དེའི་ནང་དུ་ཤིང་འདོད་པ་ཐམས་ཅད་འབྱིན་པའི་ཡལ་ག་ལ་འཇུ་སྟེ་ལྷ་མོ་རབ་ཏུ་དགའ་བའི་འོད་ལ་དབང་སྒྱུར་བ་ལས། བཅོམ་ལྡན་འདས་དེ་བཞིན་གཤེགས་པ་དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་བལྟམས་སོ། །དེའི་ཚེ་བཅོམ་ལྡན་འདས་དེ་བལྟམས་ཁར་མ་མ་དྲི་མ་ མེད་པ་སྐྱེད་པའི་འོད་ཅེས་བྱ་བ་སྟ་གོན་དུ་གནས་གནས་ཏེ། བྱང་ཆུབ་སེམས་དཔའ་དེ་བལྟམས་པར་གྱུར་མ་ཐག་ཏུ་འཇིག་རྟེན་གྱི་དབང་པོ་རྣམས་ཀྱིས་སྤོས་དྲི་ཤིན་ཏུ་ཞིམ་པའི་ སྤོས་ཆུའི་བུམ་པ་མེ་ཏོག་དྲི་ཞིམ་ཞིང་ཡིད་དུ་འོང་བ་སྣ་ཚོགས་མངོན་པར་འཐོར་བས་སྐུ་བསིལ་ཏེ། དེ་ལ་ཚུལ་དང་མཐུན་པའི་མཆོད་པ་བསམ་གྱིས་མི་ཁྱབ་ལ་གྲངས་མེད་པ་ མཆོག་ཏུ་བྱ་བས་མཆོད་ནས་མ་མ་དྲི་མ་མེད་པ་སྐྱེད་པའི་འོད་ཀྱི་བར་དུ་བཞག་གོ །མ་མ་དེས་བྱང་ཆུབ་སེམས་དཔའ་པང་དུ་བླངས་མ་ཐག་ཏུ་དེའི་མོད་ལ་མ་མ་དེ་དགའ་བ་དང༌། མོས་བའི་ ཤུགས་ཆེན་པོ་ཐོབ་པར་གྱུར་ནས་བྱང་ཆུབ་སེམས་དཔའི་ཏིང་ངེ་འཛིན་ཡུལ་ཀུན་ཏུ་ལྟ་བ་ཞེས་བྱ་བ་ཐོབ་པར་གྱུར་ཏོ། །དེ་ཐོབ་པར་གྱུར་མ་ཐག་ཏུ་དེས་ཕྱོགས་བཅུའི་འཇིག་རྟེན་གྱི་ཁམས་ ན་བཞུགས་པའི་དེ་བཞིན་གཤེགས་པ་ཚད་མེད་པ་དེ་དག་ཐམས་ཅད་ཀྱང་མཐོང་བར་གྱུར་ཏོ། །བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པ་དམིགས་པ་ཐམས་ཅད་ དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ་འདི་ལ་འང་ཤིན་ཏུ་ཕྲ་བའི་ཚུལ་གྱིས་ཞུགས་པར་གྱུར་ཏེ། དེ་ནི། དཔེར་ན། མའི་མངལ་དུ་ཞུགས་མ་ཐག་པའི་ རྣམ་པར་ཤེས་པ་ལྟ་བུའོ། །རྣམ་པར་ཐར་པ་དེ་ཐོས་པར་གྱུར་པས་ཀྱང་དེས་དེ་བཞིན་གཤེགས་པ་ཐམས་ཅད་སྐྱེ་བའི་རྣམ་པར་འབྲུལ་པ་ཡང་དག་པར་ལྟ་བའི་སྨོན་ལམ་ཆེན་པོ་ཡང་མངོན་ པར་བསྒྲུབས་སོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའི་མ་མ་དྲི་མ་མེད་པ་སྐྱེད་པའི་འོད་ཅེས་བྱ་བ་བྱུང་བར་གྱུར་པ་དེ་གཞན་ཞིག་ཡིན་པ་སྙམ་དུ་ སེམས་ན་ནི། ཁྱོད་ཀྱིས་དེ་ལྟར་མི་བལྟ་སྟེ། ཁོ་མོ་ནི། དེའི་ཚེ་དེའི་དུས་ན་བྱང་ཆུབ་སེམས་དཔའི་མ་མ་དྲི་མ་མེད་པ་སྐྱེད་པའི་འོད་ཅེས་བྱ་བར་གྱུར་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས་ ༄༅། །དེའི་ཚེ་དེའི་དུས་ན་བུད་མེད་ཁྲག་ཁྲིག་བརྒྱ་སྟོང་ཕྲག་ཉི་ཤུ་བྱུང་བར་གྱུར་པ་དེ་དག་གཞན་དག་ཅིག་ཡིན་པ་སྙམ་དུ་སེམས་ན་ཡང་དེ་ལྟར་མི་ལྟ་སྟེ། ལྷ་ མོ་ཁྲག་ཁྲིག་བརྒྱ་སྟོང་ཕྲག་ཉི་ཤུ་པོ་ལུམྦི་ནིའི་ནགས་ཚལ་ན་གནས་པ་ཁོ་མོའི་འཁོར་དུ་གྱུར་པ་འདི་དག་ཡིན་ནོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་ དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གཞོན་ནུའི་ཡུམ་རབ་ཏུ་དགའ་བའི་འོད་ལ་དབང་སྒྱུར་བ་ཞེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ནའང་ དེ་ལྟར་མི་བལྟ་སྟེ། ལྷ་མོ་སྒྱུ་མ་འདི་ནི། དེའི་ཚེ་དེའི་དུས་ན་རབ་ཏུ་དགའ་བའི་འོད་ལ་དབང་སྒྱུར་བ་ཞེས་བྱ་བའི་ལྷ་མོར་གྱུར་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་ དུས་ན་རྒྱལ་པོ་རིན་པོ་ཆེ་འོད་འཕྲོ་བའི་མིག་གི་འོད་ཅེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་ནའང་དེ་ལྟར་མི་བལྟ་སྟེ། རྒྱལ་པོ་ཟས་གཙང་མ་འདི་ནི། དེའི་དུས་ན་རྒྱལ་པོ་རིན་པོ་ཆེ་ འོད་འཕྲོ་བའི་མིག་གི་འོད་ཅེས་བྱ་བར་གྱུར་ཏོ། །རིགས་ཀྱི་བུ། དེ་ལྟར་ཁོ་མོ་ནི། དེ་ཕྱིན་ཆད་དུ་བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་སེམས་དཔའི་སྐྱེ་བའི་རྣམ་པར་ འཕྲུལ་པ་རྒྱ་མཚོ་ལ་ལྟ་ཞིང་ཁོང་དུ་ཆུད་པར་བྱེད་པ་དང༌། སེམས་ཅན་རྣམ་པར་འདུལ་བའི་ཁྱུ་མཆོག་གི་མཐུས་རྣམ་པར་འཕྲུལ་བ་རྒྱ་མཚོ་ལ་ལྟ་ཞིང་ཁོང་དུ་ཆུད་པར་བྱེད་པ་དང༌། སྐད་ཅིག་ཐམས་ཅད་དུ་བྲལ་བར་མ་གྱུར་ཏོ། །རིགས་ཀྱི་བུ། ཁོ་མོ་མི་མཇེད་ཀྱི་འཇིག་རྟེན་གྱི་ཁམས་འདི་ན་བཅོམ་ལྡན་འདས་རྣམ་པར་སྣང་མཛད་ཀྱི་སྨོན་ལམ་རྒྱ་མཚོ་འབྱམས་ཀླས་པ་ ལས་བྱུང་བའི་དེ་བཞིན་གཤེགས་པ་རྣམས་ཀྱི་སངས་རྒྱས་ཀྱི་ཞིང་རྒྱ་མཚོ་རྡུལ་ཤིན་ཏུ་ཕྲ་བ་ཐམས་ཅད་ན་ཡོད་པ་ལ་སེམས་ཀྱི་སྐད་ཅིག་ཐམས་ཅད་དུ་རྡུལ་ཤིན་ཏུ་ཕྲ་བ་ཐམས་ཅད་ལ་ ཡོངས་སུ་འདུལ་བའི་ཡེ་ཤེས་ཀྱི་མིག་གིས་ལྟ་ཞིང་ཁོང་དུ་ཆུད་པར་བྱེད་དེ། སངས་རྒྱས་ཀྱི་ཞིང་དེ་དག་ཏུ་དེ་བཞིན་གཤེགས་པ་བྱུང་བརྒྱ་མཚོ་དག་ཀྱང་ལྟ་ཞིང་ཁོང་དུ་ཆུད་པར་བྱེད་ ལ༑ དེ་བཞིན་གཤེགས་པ་དེ་དག་གི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་རྒྱ་མཚོ་ཆེན་པོ་དག་ལ་ལྟ་ཞིང་ཁོང་དུ་ཆུད་པར་བྱེད་པ་དེ་བཞིན་དུ་ཕྱོགས་བཅུའི་དེ་བཞིན་གཤེགས་ པ་ཐམས་ཅད་ཀྱི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་བརྒྱ་མཚོ་དང༌། སེམས་ཅན་རྣམ་པར་འདུལ་བའི་ཁྱུ་མཆོག་གི་མཐུ་ཕྱུང་བས་རྣམ་པར་འཕྲུལ་བ་རྒྱ་མཚོ་ཐམས་ཅད་ ལའང་སེམས་ཀྱི་སྐད་ཅིག་ཐམས་ཅད་དུ་ལྟ་ཞིང་ཁོང་དུ་ཆུད་པར་བྱེད་དོ། །ཇི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་རྡུལ་ཤིན་ཏུ་ཕྲ་བ་འབྱམས་ཀླས་པ་ཐམས་ ཅད་གཅིག་ནས་གཅིག་ཏུ་བརྒྱུད་པ་ལ་འཇུག་པས་བྱང་ཆུབ་སེམས་དཔའ་སྐྱེ་བ་མ་ནོར་པར་མངོན་དུ་གྱུར་ཏེ། སངས་རྒྱས་ཀྱི་ཡོན་ཏན་ལ་ཞུགས་པར་གྱུར་པ་དེ་བཞིན་དུ་ཕྱོགས་བཅུའི་ ༄༅། །འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་རྡུལ་ཤིན་ཏུ་ཕྲ་བ་འབྱམས་ ཀླས་པ་ཐམས་ཅད་ཀྱི་ཁོངས་སུ་ཆུད་པའི་ཞིང་རྒྱ་མཚོ་ཐམས་ཅད་ལའང་སངས་རྒྱས་འཇུག་སྟེ། དེ་དག་ཏུའང་སངས་རྒྱས་རྒྱ་མཚོ་ཤིན་ཏུ་ཡངས་པ་ལ་འཇུག་གོ །སངས་ རྒྱས་བཅོམ་ལྡན་འདས་དེ་དག་བྱང་ཆུབ་སེམས་དཔར་གྱུར་པའི་བྱང་ཆུབ་སེམས་དཔའ་འབྱུང་བའི་རྣམ་པར་འཕྲུལ་པ་རྣམས་ཀྱང་མངོན་དུ་གྱུར་པར་བལྟའོ། །དེ་བཞིན་གཤེགས་ པར་གྱུར་ནས་མཆོད་པར་བྱེད་དོ། །དེ་བཞིན་གཤེགས་པ་དེ་དག་ལས་ཀྱང་ཆོས་བསྟན་པ་ཉན་ཏོ། །ཆོས་ལ་ཡང་གཉེར་བའི་ཆོས་ཀྱིས་ནན་ཏན་བྱེད་དོ། །དེ་ནས་ལུམྦི་ནིའི་ནགས་ ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱིས་དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་ བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ་འདི་གསལ་བར་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ་ཚིགས་སུ་ བཅད་པ་འདི་དག་སྨྲས་སོ། །རིམ་གྲོ་བསྐྱེད་ཅིང་ང་ལ་གང་འདྲི་བ་[?]། །དེ་དག་བདག་ལས་རྒྱལ་བའི་སྲས་ཉོན་ཅིག །རྒྱལ་བའི་སྤྱོད་ཡུལ་བལྟ་དགའ་ཞི་བ་སྟེ། །རྒྱུ་དང་རྐྱེན་གྱིས་ ཚུལ་གྱིས་རྣམ་པར་བསྟན། །ཞིང་རྣམས་བྱེ་བའི་རྡུལ་ཕྲན་རབ་སྙེད་ཀྱི། །སྔོན་གྱི་བསྐལ་པ་བསམ་གྱིས་མི་ཁྱབ་དྲན། །བསྐལ་པའི་མིང་ནི་སྔ་ཕྱི་མཉམ་ཞེས་བྱ། །དེ་ལ་རྒྱལ་བ་བྱེ་བ་ བརྒྱད་ཅུ་བྱུང༌། །བསྐལ་པའི་དང་པོར་དེ་བཞིན་གཤེགས་བྱུང་བ། །དབང་ཕྱུག་ཡོན་ཏན་མི་ཐུབ་རྒྱལ་མཚན་ནོ། །ནགས་ཚལ་དམ་པ་གསེར་མདོག་མེ་ཏོག་ཏུ། །མགོན་པོ་དེ་འཁྲུངས་ བདག་གིས་མཐོང་བར་གྱུར། །མིང་དུ་དྲི་མེད་སྐྱེད་པའི་འོད་ཅེས་བྱ། །དེ་ཡི་མ་མ་མཁས་པར་བདག་གྱུར་ཏེ། །བལྟམས་མ་ཐག་ཏུ་གསེར་མདོག་དམ་པའི་འོད། །འཇིག་རྟེན་ དབང་པོས་བདག་གིས་པང་དུ་བཞག །གང་ཟག་དམ་པ་པང་དུ་བཞག་ཚེ་ཡང༌། །དེ་ཡི་སྤྱི་གཙུག་བལྟ་བར་མི་ནུས་ཏེ། །བསམ་ཡས་དེ་ལ་གཡས་དང་གཡོན་དུ་ཡང༌། །བལྟས་ཤིང་ མཐའ་རྙེད་མཐོང་བར་མ་གྱུར་ཏོ། །མཚན་རབ་བཟང་པོས་དེ་ནི་ཡོངས་སུ་བརྒྱན། །དྲི་མེད་དེ་སྐུ་བལྟ་ན་རབ་སྡུག་སྟེ། །རིན་ཆེན་གཟུགས་འདྲ་བདག་གིས་མཐོང་གྱུར་ནས། །དགའ་ བའི་ཤུགས་དྲག་མཚུངས་མེད་རྣམ་པར་འཕེལ། །དེ་ཡི་ཡོན་ཏན་དཔག་ཡས་སེམས་སེམས་ནས། །ཁོ་མོའི་བསོད་ནམས་རྒྱ་མཚོ་དཔག་མེད་འཕེལ། །དེ་ཡི་རྣམ་འཕྲུལ་རྒྱ་མཚོ་ མཐོང་གྱུར་ནས། །རྒྱ་ཆེན་བྱང་ཆུབ་སེམས་ཀྱང་སྐྱེས་པར་གྱུར། །རྒྱལ་བའི་ལེགས་པ་རྒྱ་མཚོ་དགའ་སྨོན་ནས། །སྨོན་ལམ་རྒྱ་མཚོ་བདག་གིས་རབ་ཏུ་བསྐྱེད། །འབྱམས་ཀླས་ཞིང་ ༄༅། །རྣམས་ཐམས་ཅད་རྣམ་པར་སྦྱངས། །དན་སོང་ལམ་རྣམ་ཀུན་ཀྱང་རྣམ་པར་བཟློག །ཞིང་རྣམས་འབྱམས་ཀླས་ཀུན་གྱི་བདེ་གཤེགས་རྣམས། །མ་ བྱོན་བསམ་གྱིས་མི་ཁྱབ་མཆོད་པ་དང༌། །སེམས་ཅན་སྡུག་བསྔལ་རྣམ་པར་དགྲོལ་བའི་ཕྱིར། །སྨོན་ལམ་རྒྱ་མཚོ་ཁོ་མོས་བཏབ་པར་གྱུར། །མགོན་པོ་དེ་ལས་བདག་གིས་ཆོས་ ཐོས་ནས། །རྣམ་ཐར་དམ་པའི་དཀྱིལ་འཁོར་འདི་ཡང་ཐོབ། །བསྐལ་པ་ཞིང་རྣམས་བྱེ་བའི་རྡུལ་སྙེད་དུ། །སྤྱད་པ་སྤྱད་དེ་དེ་ཡང་རྣམ་པར་སྦྱངས། །དེ་ལ་མགོན་པོ་ཇི་སྙེད་བྱུང་གྱུར་ པ༑ ༑དེ་དག་མ་ལུས་བདག་གིས་ཀུན་ཀྱང་མཆོད། །རྣམ་ཐར་རྒྱ་མཚོ་འདི་ནི་སྦྱོང་བྱེད་ཅིང༌། །དེ་དག་བསྟན་པ་ཁོ་མོས་ཡོངས་སུ་བཟུང༌། །ཞིང་རྣམས་བྱེ་བའི་རྡུལ་ཕྲན་རབ་སྙེད་ཀྱི། ། སྟོབས་བཅུ་མངའ་བ་ཇི་སྙེད་འདས་བྱུང་བ། །དེ་དག་ཆོས་ཀྱི་འཁོར་ལོ་ཁོ་མོས་བཟུང༌། །རྣམ་ཐར་དཀྱིལ་འཁོར་འདི་ཡང་རབ་ཏུ་བསྒོམས། །སངས་རྒྱས་ཞིང་གི་རྡུལ་ཕྲན་ཇི་སྙེད་ པ༑ ༑རྡུལ་རྩེ་འབྱམས་ཀླས་ཀུན་ལ་རྣམ་པར་མཐོང༌། །རྡུལ་ཕྲན་རེ་རེ་ལ་ཡང་རྒྱ་མཚོའི་ཞིང༌། །སྔོན་ཆད་རྒྱལ་བས་སྦྱངས་པ་རབ་ཏུ་མཐོང༌། །ཞིང་རྣམས་འབྱམས་ཀླས་དེ་དག་ཀུན་ ཏུ་ཡང༌། །མགོན་པོ་ཐུགས་རྒྱུད་གཅིག་ལ་བསམ་ཡས་པའི། །རླམ་འཕྲུལ་ཡངས་པ་ཡོངས་སུ་སྟོན་མཛད་ཅིང༌། །ནགས་ཚལ་མཆོག་ཏུ་འཁྲུངས་གྱུར་བདག་གིས་མཐོང༌། ། རྒྱལ་བ་ལ་ལ་ཞིང་རྣམས་ལ་ལ་ན། །བྱང་ཆུབ་འདམ་པར་འཚང་རྒྱ་ཐུགས་དགོངས་ཤིང༌། །དགའ་ལྡན་འཇིག་རྟེན་གནས་ན་བཞུགས་པ་ཡང༌། །ཞིང་རྣམས་བྱེ་བ་བསམ་གྱིས་མི་ཁྱབ་པོ། །ཞིང་ རྣམས་རྒྱ་མཚོའི་དབྱིངས་སུ་རྣམ་འཕྲུལ་བ། །ཤིན་ཏུ་ཡངས་པ་སྐྱེ་པའང་བདག་གིས་མཐོང༌། །ན་ཆུང་དམ་པའི་ཚོགས་ཀྱི་དབུས་བཞུགས་ཤིང༌། །མགོན་པོ་ཆོས་རྣམས་སྟོན་པའང་དེ་ བཞིན་མཐོང༌། །ཞིང་རྣམས་བྱེ་བའི་རྡུལ་ཕྱན་རང་སྙེད་ཀྱིས། །དཔའ་བོ་སེམས་ཀྱི་སྐད་ཅིག་རེ་རེ་ལ། །མངོན་པར་བྱུང་ཞིང་ཤིང་རྒྱལ་དྲུང་གཤེགས་དང༌། སངས་རྒྱས་སྤྱོད་ཡུལ་ཡངས་ པ་སྟོན་པ་མཐོང༌། །ཞིང་གཅིག་རྡུལ་ལ་བསམ་གྱིས་མི་ཁྱབ་བར། །ཡུལ་རྣམས་གཞན་དང་གཞན་དག་སྟོན་མཛད་པས། །འགྲོ་རྒྱུད་སེམས་ཅན་སྡུག་བསྔལ་འགྲོལ་མཛད་ཅིང༌། །མི་ གཙོ་རྣམ་པར་འཚང་རྒྱ་བདག་གིས་མཐོང༌། །རྡུལ་ཕྲན་རེ་རེའི་རྩེ་ལ་མི་ཟད་པའི། །རང་བྱུང་འཁོར་ལོ་རབ་ཏུ་བསྐོར་མཛད་ཅིང༌། །དབྱངས་རྣམས་རྒྱ་མཚོ་མི་ཟད་སྒྲོག་མཛད་པས། །ཆོས་ སྤྲིན་རྒྱ་ཆེན་ཆར་འབེབས་མཛད་པ་མཐོང༌། །འགྲོ་པ་ཀུན་ལ་རྣམ་པ་དུ་མར་ཡང༌། །སྐད་ཅིག་རེ་རེར་མྱ་ངན་འདས་སྟོན་པ། །ཞིང་རྣམས་བྱེ་བའི་རྡུལ་ཕྲན་རབ་སྙེད་ཀྱི། །སངས་རྒྱས་ཞིང་ གཅིག་རྡུལ་ལ་བདག་གིས་མཐོང༌། །རྡུལ་གཅིག་བལྟས་ཀྱང་ཞིང་རྣམས་རྒྱ་མཚོ་དང༌། །རྒྱལ་བ་འབྱུང་བ་ཇི་སྙེད་ཀུན་ཀྱང་མཐོང༌། །ཚེ་རབས་ཀུན་ཏུ་ལུས་མང་ཁྲག་ཁྲིག་གིས་།དེ་དག་མཆོད་ ༄༅། །པའི་དོན་དུ་ཉེ་བར་ཕྱིན། །ཞིང་ཚུལ་རྒྱ་མཚོ་བསམ་གྱིས་མི་ཁྱབ་པའི། །འགྲོ་རྒྱུད་མི་བཟད་ཇི་སྙེད་ཡོད་པ་ཡི། །འགྲོ་བ་ཀུན་ལ་མངོན་དུ་ཁོ་མོ་ནི། །ཆོས་སྤྲིན་ཡངས་ པའི་ཆར་ཡང་རབ་ཏུ་འབེབས། །རྒྱལ་སྲས་ཁོ་མོས་བསམ་གྱིས་མི་ཁྱབ་པའི། །རྣམ་ཐར་དཀྱིལ་འཁོར་དམ་པ་འདི་ཤེས་ཀྱི། །བསྐལ་པ་བྱེ་བ་ཁྲག་ཁྲིག་བསམ་ཡས་སུ། །ཐམས་ ཅད་བསྟན་པར་ཁོ་མོས་ནུས་རེ་སྐན། །རིགས་ཀྱི་བུ། ཁོ་མོས་བྱང་ཆུབ་སེམས་དཔའ་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་ རྣམ་པར་འཕྲུལ་བ་ཡོངས་སུ་སྟོན་པ་འདི་ཤེས་པར་ཟད་ན། ཁོ་མོ་བྱང་ཆུབ་སེམས་དཔའ་སེམས་ཀྱི་སྐད་ཅིག་རེ་རེ་ལ་བསྐལ་པ་ཐམས་ཅད་དུ་ཞུགས་པའི་མངལ་ནས་ཡོངས་སུ་བྱུང་ བའི་སེམས་དང་ལྡན་པ། ཆོས་ཀྱི་ཚུལ་ཐམས་ཅད་ངེས་པར་རྟོགས་པའི་སྐྱེ་བ་རབ་ཏུ་སྟོན་པ། དེ་བཞིན་གཤེགས་པ་ཐམས་ཅད་མཆོད་པའི་སྨོན་ལམ་གྱིས་བསམ་པ་ཡོངས་སུ་སྐྱེད་ པ༑ སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་འཚང་རྒྱ་བར་བྱ་བ་ལ་རབ་ཏུ་གཞོལ་བ། སེམས་ཅན་ཐམས་ཅད་ཀྱི་རིགས་དང༌། རྒྱུད་ཀྱི་ལམ་ཡོངས་སུ་བསྟན་པ་ལ་ གཟུགས་བརྙན་ལྟ་བུར་གྱུར་པ། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་པདྨོའི་ནང་ནས་སྐྱེ་བ། འགྲོ་བ་ཐམས་ཅད་ཡོངས་སུ་སྨིན་པར་བྱ་བའི་དུས་ལ་མཁས་པ། སེམས་ཅན་ཐམས་ཅད་གདུལ་བ་ལ་མངོན་པར་མོས་ཤིང་ཆེར་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ། ཞིང་འབྱམས་ཀླས་པ་ཐམས་ཅད་དུ་རྣམ་པར་འཕྲུལ་བའི་སྤྲིན་ཡོངས་སུ་ སྟོན་པ། འགྲོ་བ་ཐམས་ཅད་ཀྱི་རྒྱུད་དུ་སྐྱེ་བ་དང༌། རིགས་སུ་གཟུགས་བརྙན་བྱུང་བར་གྱུར་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ། གྲོང་ཁྱེར་ ཆེན་པོ་སེར་སྐྱའི་གནས་འདི་ན་ཤཱཀྱའི་བུ་མོ་གོ་པ་ཞེས་བྱ་བ་འདུག་གི །དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔའ་སེམས་ཅན་ཡོངས་སུ་སྨིན་པར་བྱ་བའི་ཕྱིར་འཁོར་བའི་འཁོར་བར་ བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་གིས་ལུམྦི་ནིའི་ནགས་ཚལ་གྱིས་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ ཏེ་ལུམྦི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ་ལུམྦི་ནིའི་ནགས་ ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱི་དྲུང་ནས་སོང་ངོ༌། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་བོ་ཆེ་ཞེས་བྱ་བ་ལས། སྡོང་པོས་བརྒྱན་ པོའི་ལེའུ་སྟེ། བམ་པོ་བརྒྱ་བདུན་པ། དེ་ནས་ཚོང་དཔོན་གྱི་བུ་ནོར་བཟང་ལུམྦི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱི་དྲུང་ནས་ ༄༅། །སོང་སྟེ་གྲོང་ཁྱེར་ཆེན་པོ་སེར་སྐྱའི་གནས་གང་ན་བ་དེར་ཕྱིན་ནས་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ་དེ་ཉིད་སྒོམ་པ་དང༌། ཁོང་དུ་ཆུད་པར་བྱ་བ་དང༌། རྒྱ་ཆེར་བྱ་བ་དང༌། ནན་ཏན་དུ་བྱ་བ་དང༌། ཤིན་ཏུ་ སྦྱངས་པ་དང༌། ཡོངས་སུ་བསམ་པ་དང༌། རྣམ་པར་དབྱེ་བ་བྱེད་ཅིང༌། བྱང་ཆུབ་སེམས་དཔའ་ཡང་དག་པར་འགྲོ་བའི་ཁང་པ་ཆོས་ཀྱི་དབྱིངས་རབ་ཏུ་སྣང་བའི་འོད་གང་ན་བ་དེར་ སོང་ངོ༑ །དེར་འགྲོ་བའི་ཚེ་བྱང་ཆུབ་སེམས་དཔའ་ཡོངས་སུ་འགྲོ་བའི་ཁང་པའི་ལྷ་མོ་མྱ་ངན་མེད་པའི་དཔལ་ཞེས་བྱ་བ་ཁྱིམ་གྱི་ལྷ་མོ་སྟོང་ཕྲག་བཅུ་དང་བཅས་པས་བསུ་ནས་ཚོང་ དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །སྐྱེས་བུ་ཆེན་པོ་ཤེས་རབ་དང་ཡེ་ཤེས་ཆེན་པོས་རྣམ་པར་གནོན་པ། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་ མི་ཁྱབ་པ་སྒོམ་པ་ལ་ལྷག་པར་དམིགས་པའི་སྨོན་ལམ་གྱི་སེམས་དང་ལྡན་པ། ཆོས་ཡངས་པའི་གཞལ་མེད་ཁང་གི་སྤྱོད་ཡུལ་ལ་སྤྱོད་པ། ཆོས་ཀྱི་གྲོང་ཁྱེར་དུ་མངོན་པར་ གཞོལ་བ། བྱང་ཆུབ་སེམས་དཔའི་ཐབས་ཀྱི་ཚུལ་མཐའ་ཡས་པས་སེམས་ཅན་གདུལ་བ་ལ་འཇུག་པ་རྒྱུན་མི་གཅོད་པ། དེ་བཞིན་གཤེགས་པའི་ཡོན་ཏན་རྒྱ་མཚོ་སྣང་བ་ རབ་ཏུ་ཐོབ་པ། འགྲོ་བ་ཐམས་ཅད་རྣམ་པར་གདུལ་བ་ལ་རབ་ཏུ་སྣང་བའི་སྤོབས་པ་དང་ཡེ་ཤེས་མངོན་དུ་གྱུར་པ། སེམས་ཅན་ཐམས་ཅད་ཀྱི་སྤྱོད་པ་ཤེས་པའི་ལུས་ཀྱིས་འགྲོ་ཞིང་རྗེས་སུ་ འབྲང་བར་བྱ་བའི་སྤྱོད་པ་ལ་མངོན་དུ་གྱུར་པའི་སེམས་དང་ལྡན་པ། འགྲོ་བ་ཐམས་ཅད་ཀྱི་སེམས་ཀྱི་དགའ་བ་རྒྱ་མཚོའི་ཤུགས་རྣམ་པར་འཕེལ་བར་བྱ་བའི་སྨོན་ལམ་དང་ལྡན་པ། དེ་བཞིན་ གཤེགས་པ་ཐམས་ཅད་ཀྱི་ཆོས་ཁོང་དུ་ཆུད་པར་བྱ་བའི་ལམ་དུ་ཞུགས་པ་ཁྱོད་བྱོན་པ་ལེགས་སོ། །མིག་ཕྱིར་གླན་པ་མེད་པས་སྤྱོད་པ་དང་སྤྱོད་ལམ་ཟབ་ཅིང་རྣམ་པར་དག་པའི་སྤྱོད་ཡུལ་ ཅན་ཁྱོད་ལ་བལྟས་ན། ཁྱོད་ནི། རིང་པོ་མི་ཐོགས་པར་དེ་བཞིན་གཤེགས་པའི་སྐུ་དང༌། གསུང་དང༌། ཐུགས་ཀྱི་རྒྱན་རྣམ་པར་དག་པ་བླ་ན་མེད་པ་རབ་ཏུ་ཐོབ་སྟེ་མཚན་དང་དཔེ་བྱད་བཟང་ པོས་རབ་ཏུ་བརྒྱན་པའི་ལུས་དང༌། སྟོབས་བཅུའི་ཡེ་ཤེས་སྣང་བས་བརྒྱན་པའི་སེམས་ཀྱིས་འཇིག་རྟེན་དུ་རྣམ་པར་སྤྱོད་པར་འགྱུར་རོ། །ཁྱོད་ཀྱི་བརྩོན་འགྲུས་དང༌། རྣམ་པར་གནོན་པ་ལ་ བལྟས་ན། ཁྱོད་ནི། རིང་པོ་མི་ཐོགས་པར་དུས་གསུམ་གྱི་དེ་བཞིན་གཤེགས་པ་མངོན་དུ་གྱུར་པར་མཐོང་བ་དང་ལྡན་ཞིང་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་ཡོངས་སུ་འཛིན་པ་ དང༌། བྱང་ཆུབ་སེམས་དཔའི་བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པའི་ཆོས་ཞི་བ་དང་ལྡན་པའི་གཞལ་མེད་ཁང་གི་དགའ་བ་མྱོང་བ་དང༌། སངས་ ༄༅། །རྒྱས་ཀྱི་རྣམ་པར་ཐར་པ་ཟབ་མོར་ཆུད་པར་འགྱུར་རོ། །དེ་ཡང་དེ་ལྟར་ཁྱོད་དགེ་བའི་བཤེས་གཉེན་གྱི་དྲུང་དུ་འགྲོ་བ་དང༌། བལྟ་བ་དང༌། བསྙེན་བཀུར་བ་ དང༌། གདམས་ངག་མ་ནོར་བར་བླང་བ་དང༌། དེའི་ཡོན་ཏན་ལ་ནན་ཏན་དུ་བྱ་བའི་ཚུལ་ལ་བརྩོན་པར་བྱེད་པས་ཡོངས་སུ་མི་སྐྱོ། ཕྱིར་མི་ལྡོག །སྒྱིད་ལུག་པར་མི་འགྱུར་ཏེ། ཁྱོད་ལ་བགེགས་ སམ༑ བར་དུ་གཅོད་པའམ། སྒྲིབ་པ་གང་གིས་ཀྱང་མི་ཚུགས་ཏེ། བདུད་དམ་བདུད་ཀྱི་རིས་སུ་གཏོགས་པའི་ལྷ་རྣམས་ཀྱང་མདུན་ན་གནས་པ་མེད་པ་དེའི་ཕྱིར་ཁྱོད་ནི། རིང་པོ་མི་ ཐོགས་པར་སེམས་ཅན་ཐམས་ཅད་དགའ་བར་བྱེད་པར་འགྱུར་རོ། །དེ་སྐད་ཅེས་སྨྲས་པ་དང༌། ཚོང་དཔོན་གྱི་བུ་ནོར་བཟང་གིས་བྱང་ཆུབ་སེམས་དཔའ་ཡོངས་སུ་འགྲོ་བའི་ཁང་ པའི་ལྷ་མོ་མྱ་ངན་མེད་པའི་དཔལ་ལ་འདི་སྐད་ཅེས་སྨྲས་སོ། །ལྷ་མོ། ཁྱོད་ཀྱིས་ཇི་སྐད་དུ་སྨྲས་པ་དེ་ལྟར་འགྱུར་རོ། །ལྷ་མོ། ཁོ་བོ་ནི། སེམས་ཅན་ཐམས་ཅད་ཀྱི་ཉོན་མོངས་པའི་ གདུང་བ་རྣམ་པར་ཞི་བས་དགའ་བར་འགྱུར་རོ། །སེམས་ཅན་ཐམས་ཅད་ཀྱི་ལས་ཉམ་ང་བའི་རྣམ་པར་སྨིན་པ་ཕྱིར་ལོག་པ་དང༌། སེམས་ཅན་ཐམས་ཅད་ཀྱི་བདེ་བ་འགྲུབ་པ་དང༌། སེམས་ཅན་ཐམས་ཅད་ཁ་ན་མ་ཐོ་བ་མེད་པའི་ལས་ལ་ནན་ཏན་དུ་བྱེད་པས་དགའ་བ་དམ་པ་ཉམས་སུ་མྱོང་བར་འགྱུར་རོ། །ནམ་སེམས་ཅན་དེ་དག་ལས་དང་ཉོན་མོངས་པ་རྣམ་པ་སྣ་ཚོགས་ མི་བདེ་བའི་སྦྱོར་བས་སེམས་རྣམ་པར་འཁྲུགས་ཤིང་ངན་སོང་དུ་ལྟུང་བར་གྱུར་པའམ། བདེ་བའི་རྒྱུད་ན་གནས་ཀྱང་ལུས་དང་སེམས་ཀྱི་སྡུག་བསྔལ་དང༌། ཡིད་མི་བདེ་བ་སྣ་ཚོགས་ཉམས་སུ་ མྱོང་བར་གྱུར་ཅིང་མི་དགའ་བར་གནས་པ་དེའི་ཚེ་བྱང་ཆུབ་སེམས་དཔའ་རྣམས་ཀྱང་ཤིན་ཏུ་ཡིང་མི་བདེ་བར་འགྱུར་རོ། །ལྷ་མོ། འདི་ལྟ་སྟེ། དཔེར་ན། མི་ཤིན་ཏུ་ངང་གིས་བྱམས་པ་ཞིག་ལ་བུ་ གཅིག་པ་སྡུག་ཅིང་ཡིད་དུ་འོང་བ་ཞིག་བདོག་པར་གྱུར་ལ། དེའི་ཡན་ལག་དང་ཉིང་ལག་བཅད་པ་ཞིག་མཐོང་ན། ཤིན་ཏུ་ངང་གིས་བྱམས་པའི་ཕྱིར་རབ་ཏུ་ཡིད་མི་བདེ་ཞིང་མི་དགའ་བར་འགྱུར་ རོ༑ ༑ལྷ་མོ། དེ་བཞིན་དུ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་ཡང་སེམས་ཅན་རྣམས་ལས་དང་ཉོན་མོངས་པའི་དབང་གིས་ངན་སོང་གསུམ་གྱི་རྒྱུད་དུ་ལྟུང་བ་ཞིག་ མཐོང་ན། རབ་ཏུ་མི་དགའ་ལ་ཤིན་ཏུ་ཉམས་མི་བདེ་བར་འགྱུར་རོ། །གང་གི་ཚེ་སེམས་ཅན་རྣམས་ལུས་དང༌། ངག་དང༌། ཡིད་ཀྱིས་ལེགས་པར་སྤྱད་པ་ཡང་དག་པར་ལེན་པའི་རྒྱུས་ ལུས་ཞིག་ནས་བདེ་བའི་རྒྱུས་མཐོ་རིས་ཀྱི་འཇིག་རྟེན་དུ་སྐྱེ་བར་གྱུར་ཏམ། ལྷ་དང་མིའི་ལམ་གྱི་རྒྱུད་དུ་ལུས་དང་སེམས་ཀྱི་བདེ་བ་ཉམས་སུ་མྱོང་བ་ཞིག་ཏུ་གྱུར་ན། དེའི་ཚེ་བྱང་ཆུབ་ སེམས་དཔའ་ཤིན་ཏུ་བདེ་བ་དང་ལྡན་ཞིང་ཉམས་བདེ་བ་དང༌། ཡིད་དགའ་བ་དང༌། རབ་ཏུ་སྤྲོ་བ་དང༌། དགའ་བའི་ཡིད་ཉམས་སུ་བདེ་བ་དང་ལྡན་པར་འགྱུར་རོ། །ལྷ་མོ། བྱང་ཆུབ་ ༄༅། །སེམས་དཔའ་རྣམས་ནི། བདག་གི་དོན་གྱི་ཕྱིར་ཐམས་ཅད་མཁྱེན་པ་ཉིད་དུ་སྨོན་ཅིང་དོན་དུ་གཉེར་བ་མ་ཡིན་ཏེ། འཁོར་བའི་དགའ་བ་དང༌། བདེ་བ་སྣ་ཚོགས་ ཉམས་སུ་མྱོང་བར་བྱ་བའི་ཕྱིར་མ་ཡིན། འདོད་པའི་ཁམས་སུ་གཏོགས་པའི་དགའ་བ་རྣམ་པ་ཐ་དད་པ་སྣ་ཚོགས་དོན་དུ་གཉེར་བས་མ་ཡིན། འདུ་ཤེས་དང༌། སེམས་དང༌། ལྟ་ བ་ཕྱིན་ཅི་ལོག་ཏུ་གྱུར་པའི་དབང་གིས་མ་ཡིན། ཀུན་ཏུ་སྦྱོར་བ་དང༌། འཆིང་བ་དང༌། བག་ལ་ཉལ་བ་དང༌། ཀུན་ནས་འཁོར་བའི་དབང་དུ་གྱུར་པས་མ་ཡིན། སྲིད་པ་དང༌། ལྟ་ བའི་དབང་དུ་གྱུར་པས་མ་ཡིན། སེམས་ཅན་སྣ་ཚོགས་དང་འདུ་ཞིང་འཛི་བའི་དགའ་བའི་འདུ་ཤེས་ཀྱི་སེམས་རྣམ་པར་འཕེལ་བས་མ་ཡིན། བསམ་གཏན་གྱི་དགའ་བ་ དང༌། བདེ་བ་མྱོང་བ་ལ་ཡོངས་སུ་ཆགས་པས་མ་ཡིན། སྒྲིབ་པ་སྣ་ཚོགས་ཀྱིས་བསྒྲིབས་ཤིང་འཁོར་བའི་རྒྱུད་ན་འདྲེ་ལྡོག་པ་མ་ཡིན་གྱི། ལྷ་མོ། བྱང་ཆུབ་སེམས་དཔའ་ རྣམས་ནི། སེམས་ཅན་འཁོར་བའི་རྒྱ་མཚོ་ན་འཁོད་ཅིང་སྡུག་བསྔལ་དཔག་ཏུ་མེད་པས་ཤིན་ཏུ་མནར་བ་རྣམས་ལ་སྙིང་རྗེ་ཆེན་པོ་བསྐྱེད་ཅིང་འགྲོ་བ་ཐམས་ཅད་ཡོངས་སུ་ བསྡུ་བའི་སྨོན་ལམ་ཆེན་པོ་མངོན་པར་སྒྲུབ་སྟེ། དེ་དག་ནི། སྙིང་རྗེ་ཆེན་པོས་སྨོན་ལམ་མངོན་པར་སྒྲུབ་པའི་ཤུགས་ཀྱིས་སེམས་ཅན་ཡོངས་སུ་སྨིན་པར་བྱ་བ་དང༌། གདུལ་བ་ལ་ བརྩོན་ཞིང༌། འཁོར་བ་ན་བྱང་ཆུབ་སེམས་དཔའི་སྤྱད་པ་སྤྱོད་པར་སྣང་ངོ༌། །དེ་དག་ནི། སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་རྣམ་པར་བཟློག་པའི་དོན་དུ་ཐམས་ཅད་མཁྱེན་པའི་ ཡེ་ཤེས་སྒྲིབ་པ་མེད་པ་ཡོངས་སུ་ཚོལ་ཞིང༌། དེ་བཞིན་གཤེགས་པ་ཐམས་ཅད་མཆོད་པ་དང༌། བསྙེན་བཀུར་བའི་སྨོན་ལམ་མངོན་པར་སྒྲུབ་བོ། །དེ་དག་དེ་བཞིན་གཤེགས་པ་མཆོད་ ཅིང་རིམ་གྲོར་བྱ་བའི་སྨོན་ལམ་གྱི་དབང་གིས་བྱང་ཆུབ་སེམས་དཔའི་སྤྱོད་པས་ཡོངས་སུ་སྐྱོ་བ་མེད་དེ། དེ་དག་བྱང་ཆུབ་སེམས་དཔའི་སྤྱད་པ་ལ་སྤྱོད་པའི་ཚེ་ཀུན་ནས་ཉོན་མོངས་པའི་ཞིང་ མཐོང་ན། སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བའི་སྨོན་ལམ་མངོན་པར་སྒྲུབ་བོ། །ཀུན་ནས་ཉོན་མོངས་པའི་ཞིང་ཡོངས་སུ་སྦྱོང་ཞིང་སེམས་ཅན་ཐམས་ཅད་ཀྱི་སྐྱེ་མཆེད་ སྣ་ཚོགས་མཐོང་བར་གྱུར་པའི་ཚེ་ཆོས་ཀྱི་སྐུ་ཐ་དད་པ་མེད་ཅིང་བླ་ན་མེད་པ་ཡོངས་སུ་དག་པར་བྱ་བའི་ཕྱིར་སྨོན་ལམ་མངོན་པར་སྒྲུབ་བོ། །སེམས་ཅན་རྣམས་ཀྱི་ལུས་དང༌། ངག་དང༌། སེམས་ ཀུན་ནས་ཉོན་མོངས་པ་དང་ལྡན་པ་མཐོང་ན། སེམས་ཅན་ཐམས་ཅད་ཀྱི་ལུས་དང༌། ངག་དང༌། སེམས་ཀྱི་རྒྱན་ཡོངས་སུ་དག་པར་བྱ་བའི་ཕྱིར་སྨོན་ལམ་མངོན་པར་སྒྲུབ་བོ། །སེམས་ཅན་ སྐྱེ་མཆེད་མ་ཚང་བ་དང༌། སེམས་ཡོངས་སུ་མ་དག་པ་མཐོང་ན། སེམས་ཅན་ཐམས་ཅད་ཀྱི་སེམས་དང༌། སྤྱོད་པ་ཡོངས་སུ་སྦྱོང་ཞིང༌། བྱང་ཆུབ་སེམས་དཔའི་སྤྱད་པ་ལ་སྤྱོད་པས་ཡོངས་ ༄༅། །སུ་སྐྱོ་བ་མེད་དོ། །ལྷ་མོ། དེ་ལྟར་བྱང་ཆུབ་སེམས་དཔའ་རྣམས་ནི། ཡོངས་སུ་སྐྱོ་བ་མེད་པའི་སེམས་ཀྱིས་བྱང་ཆུབ་སེམས་དཔའི་སྤྱོད་པ་མཐའ་དང་དབུས་ མེད་པ་ལ་སྤྱོད་དོ། །དེ་ལྟར་སྤྱོད་པ་ནི། ལྷ་དང་མིའི་ཕུན་སུམ་ཚོགས་པ་ཡོངས་སུ་སྐྱེད་པས་ལྷ་དང་བཅས་པའི་འཇིག་རྟེན་གྱི་རྒྱན་དུ་གྱུར་པ་ཡིན། བྱང་ཆུབ་ཏུ་སེམས་བསྐྱེད་པ་ལ་རབ་ཏུ་འགོད་པའི་ ཕྱིར་ཕ་དང་མར་གྱུར་པ་ཡིན། བྱང་ཆུབ་སེམས་དཔའི་ལམ་དུ་འཛུད་པས་མ་མ་ལྟ་བུར་གྱུར་པ་ཡིན། ངན་སོང་གི་གཡང་སའི་འཇིགས་པ་ལས་སྲུང་བའི་ཕྱིར་ལྷན་ཅིག་སྐྱེས་པའི་ལྷ་ རྟག་ཏུ་ཕྱི་བཞིན་འབྲང་བལྟ་བུར་གྱུར་པ་ཡིན། འཁོར་བའི་རྒྱ་མཚོ་ལས་སྒྲོལ་བའི་ཕྱིར་མཉན་པ་ཆེན་པོ་ལྟ་བུར་གྱུར་པ་ཡིན། བདུད་དང་ཉོན་མོངས་པའི་འཇིགས་པ་ཐམས་ཅད་ རྣམ་པར་ཟློག་པའི་ཕྱིར་སྐྱབས་སུ་གྱུར་པ་ཡིན། ཤིན་ཏུ་བསིལ་བའི་རང་བཞིན་ཉེ་བར་སྟོབ་པས་གནས་སུ་གྱུར་པ་ཡིན། སངས་རྒྱས་རྒྱ་མཚོ་ཐམས་ཅད་དུ་འཇུག་པར་བྱེད་པས་མུ་ སྟེགས་སུ་གྱུར་པ་ཡིན། ཆོས་རིན་པོ་ཆེའི་གླིང་དུ་སྐྱེལ་བས་མགོན་བྱེད་པར་གྱུར་པ་ཡིན། སངས་རྒྱས་ཀྱི་ཡོན་ཏན་ཐམས་ཅད་ཀྱི་མེ་ཏོག་གིས་སེམས་ཡོངས་སུ་རྒྱས་པར་བྱེད་པས་ མེ་ཏོག་ཏུ་གྱུར་པ་ཡིན། བསོད་ནམས་དང་ཡེ་ཤེས་ཀྱི་འོད་ཡངས་པ་རབ་ཏུ་འགྱེད་པས་རྒྱན་དུ་གྱུར་པ་ཡིན། ཀུན་ནས་མཛེས་པས་དགའ་བ་དང་བདེ་བ་དམ་པ་ཡིན། ཁ་ན་མ་ཐོ་བ་ མེད་པའི་ལས་ལ་ནན་ཏན་དུ་བྱེད་པས་ཕྲད་ན་ལེགས་པ་ཡིན། ཡན་ལག་དམ་པ་རྣམ་པ་ཐམས་ཅད་དུ་ཡོངས་སུ་ཚང་བའི་ལུས་དང་ལྡན་པས་ཀུན་ཏུ་བཟང་བ་ཡིན། བལྟ་ན་མི་མཐུན་པ་མེད་པས་ བཏང་མི་བྲ་བའི་གཟུགས་དང་ལྡན་པ་ཡིན། ཡེ་ཤེས་ཀྱི་འོད་ཟེར་རབ་ཏུ་འགྱེད་པའི་ཕྱིར་འོད་བྱེད་པ་ཡིན། ཆོས་ཀྱི་སྒྲོན་མ་འཛིན་པའི་ཕྱིར་སྣང་བ་བྱེད་པ་ཡིན། བྱང་ཆུབ་ཀྱི་བསམ་པ་ ཡོངས་སུ་དག་པར་བྱེད་པའི་ཕྱིར་གསལ་བར་བྱེད་པ་ཡིན། བདུད་ཀྱི་ལས་རྣམ་པར་ཟློག་པའི་ཕྱིར་དམག་དཔོན་དུ་གྱུར་པ་ཡིན། ཤེས་རབ་ཀྱི་འོད་ཟེར་གྱི་དྲ་བ་རབ་ཏུ་སྣང་བ་འགྱེད་ པའི་ཕྱིར་ཉི་མར་གྱུར་པ་ཡིན། ཆོས་ཀྱི་ནམ་མཁའ་ལ་བློའི་ཟླ་བ་འཆར་བར་བྱེད་པས་ཟླ་བར་གྱུར་པ་ཡིན། འགྲོ་བ་ཐམས་ཅད་དུ་ཆོས་ཀྱི་སྤྲིན་ཆེན་པོའི་ཆར་འབེབས་པས་སྤྲིན་དུ་གྱུར་པ་ ཡིན་ཏེ༑ ལྷ་མོ། དེ་ལྟར་ནན་ཏན་དུ་བྱེད་པའི་བྱང་ཆུབ་སེམས་དཔའ་རྣམས་ནི། སེམས་ཅན་ཐམས་ཅད་ཀྱི་ཡིད་དུ་འོང་བ་ཡིན་ནོ། །དེ་ནས་བྱང་ཆུབ་སེམས་དཔའ་ཡོངས་སུ་འགྲོ་བའི་ཁང་ པའི་ལྷ་མོ་མྱ་ངན་མེད་པའི་དཔལ་ཁྱིམ་གྱི་ལྷ་མོ་སྟོང་ཕྲག་བཅུ་དང་བཅས་པས་ཚོང་དཔོན་གྱི་བུ་ནོར་བཟང་ལ་ལྷ་རྫས་ལས་ཀྱང་འདས་པའི་མེ་ཏོག་དང༌། ཕྲེང་བ་དང༌། བདུག་སྤོས་དང༌། ཕྱེ་ མ་དང༌། བྱུག་པ་དང༌། ཕྱེ་མ་རིན་པོ་ཆེའི་རྒྱན་གྱི་ཆར་ཡིད་ཀྱི་རང་བཞིན་མངོན་པར་ཕབ་སྟེ་ཀུན་ནས་བསྐོར་ཅིང་རྗེས་སུ་འབྲངས་ནས་བྱང་ཆུབ་སེམས་དཔའི་ཁང་པར་འགྲོ་བའི་ཚེ་ཚིགས་སུ་བཅད་ ༄༅། །པ་འདི་དག་གིས་མངོན་པར་བསྟོད་དོ། །བྱང་ཆུབ་རྫོགས་པར་ཐུགས་བསྐྱེད་ཅིང༌། །སེམས་ཅན་ཀུན་ལ་ཐུགས་བརྩེ་བས། །རྒྱལ་བ་ཡེ་ཤེས་ཉི་མ་རྣམས། ། བར་འགའ་ཞིག་ན་འཇིག་རྟེན་འབྱུང༌། །བསྐལ་པ་བྱེ་བ་མང་པོས་ཀྱང༌། །ཁྱོད་ཀྱི་ཞལ་མཐོང་ཤིན་ཏུ་དཀའ། །འཇིག་རྟེན་མ་རིག་ལྡོངས་པ་ལ། །ཁྱོད་ཀྱི་ཡེ་ཤེས་ཉི་ཆེན་ཡིན། ། མི་ཤེས་རབ་རིབ་སྒྲིབ་པ་ཡི། །འཇིག་རྟེན་ཕྱིན་ཅི་ལོག་གཟིགས་ནས། །ཐུགས་རྗེ་ཆེན་པོ་རབ་བསྐྱེད་དེ། །ཁྱོད་ནི་རང་བྱུང་ཉིད་དུ་ཞུགས། །ཁྱོད་ནི་དགོངས་པ་རྣམ་དག་པས། ། སངས་རྒྱས་བྱང་ཆུབ་དོན་དུ་བརྩོན། །དགེ་བཤེས་བསྙེན་བཀུར་བསྟན་མཛད་ཅིང༌། །ལུས་སྲོག་ཕངས་པར་མཛད་མི་མངའ། །ཁྱོད་ནི་འཇིག་རྟེན་བརྟེན་མི་མངའ། །འདུ་འཛི་མི་ མངའ་གནས་མི་མངའ། །འདྲེན་པ་མ་མཆིས་མི་བརྟེན་པས། །དགོངས་པ་ཐོགས་མེད་ནམ་མཁའ་བཞིན། །བྱང་ཆུབ་སེམས་དཔའི་སྤྱོད་མཛད་ཅིང༌། །བསོད་ནམས་དཀྱིལ་འཁོར་ འོད་བཟང་བས། །ཡེ་ཤེས་སྒྲོན་མ་རབ་འགྱེད་པས། །འཇིག་རྟེན་ཚད་མེད་ཀུན་ཏུ་འཆར། །འཇིག་རྟེན་ནས་ཀྱང་འཕགས་མི་མཛད། །འཇིག་རྟེན་ཆོས་ཀྱིས་ཡོངས་མི་འགོ །ཆགས་པ་ མེད་པར་འཇིག་རྟེན་སྤྱོད། །མཁའ་ལ་སེར་བུ་ཇི་བཞིན་ནོ། །བསྐལ་པའི་མེ་འབར་མེ་བཞིན་དུ། །རྟག་ཏུ་འབར་བས་རབ་ཏུ་བརྩོན། །མེ་ལྟ་བུ་ཡི་བརྩོན་འགྲུས་ཀྱིས། །བྱང་ཆུབ་སྤྱད་པ་ སྤྱོད་པ་མཛད། །སེངྒེ་བཞིན་དུ་ཤིན་ཏུ་དཔའ། །བརྩོན་འགྲུས་རྣམ་པར་གནོན་པ་བརྟན། །ཡེ་ཤེས་རྣམ་པར་གནོན་དང་ལྡན། །གཞན་གྱིས་ཐུབ་པ་མེད་པར་སྤྱོད། །ཆོས་དབྱིངས་རྒྱ་མཚོ་འདི་དག་ ནི༑ ༑རྒྱ་མཚོའི་ཚུལ་རྣམས་ཇི་སྙེད་པ། །དེར་ཡང་དགེ་བཤེས་བསྙེན་བཀུར་པས། །དཔའ་བོ་ཁྱོད་ནི་འཇུག་པར་འགྱུར། །དེ་ནས་བྱང་ཆུབ་སེམས་དཔའ་ཡོངས་སུ་འགྲོ་བའི་ཁང་པའི་ལྷ་མོ་མྱ་ངན་མེད་པའི་ དཔལ་གྱིས་ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་དེ། དེ་འགྲོ་བའི་ཕྱི་བཞིན་ཆོས་འདོད་པའི་དོན་དུ་འབྲང་བར་གྱུར་ཏོ། །དེ་ནས་ཚོང་དཔོན་གྱི་བུ་ནོར་བཟང་ བྱང་ཆུབ་སེམས་དཔའ་ཡང་དག་པར་འགྲོ་བའི་ཁང་པ་ཆོས་ཀྱི་དབྱིངས་རབ་ཏུ་སྣང་བའི་འོད་དུ་ཕྱིན་ཏེ། ནང་དུ་སོང་ནས་ཤཱཀྱའི་བུ་མོ་གོ་པ་མཐོང་བར་འདོད་དེ་ཀུན་ཏུ་བལྟས་ན། ཤཱཀྱའི་བུ་མོ་གོ་པ་བྱང་ ཆུབ་སེམས་དཔའ་ཡང་དག་པར་འགྲོ་བའི་ཁང་པ་ཆོས་ཀྱི་དབྱིངས་རབ་ཏུ་སྣང་བའི་འོད་ཀྱི་དབུས་ན་སྟན་རིན་པོ་ཆེ་བྱང་ཆུབ་སེམས་དཔའ་ཐམས་ཅད་ཀྱི་གནས་སྣང་བར་བྱེད་པ། གཟུགས་བརྙན་གྱི་ པདྨོའི་སྙིང་པོ་ཅན་ཞིག་ལ་བུད་མེད་རྒྱལ་པོའི་རིགས་སུ་བྱུང་བ། སྔོན་བྱང་ཆུབ་སེམས་དཔའི་སྤྱོད་པ་ལ་དགེ་བའི་རྩ་བའི་སྐལ་བ་མཉམ་པ། སྔོན་སྦྱིན་པའི་ཡོངས་སུ་བསྡུ་བས་ཤིན་ཏུ་ བསྡུས་པ། ཚིག་སྙན་ཅིང་འཇམ་པར་སྨྲ་བའི་ངང་ཚུལ་དང་ལྡན་པ། ཐམས་ཅད་མཁྱེན་པ་ཉིད་དུ་དོན་མངོན་དུ་བྱ་བས་ཤིན་ཏུ་བསྡུས་པ། སངས་རྒྱས་དང་བྱང་ཆུབ་སེམས་དཔའི་ཡང་དག་ ༄༅། །པར་སྒྲུབ་པ་ལ་དོན་མཐུན་པས་ཤིན་ཏུ་བཟུང་བ། སྙིང་རྗེ་ཆེན་པོ་སྔོན་དུ་འགྲོ་བས་བུ་དང་བུ་མོ་ཡོངས་སུ་གཟུང་བའི་ཚུལ་བཅངས་པ། བྱམས་པ་ཆེན་པོ་དང་ ལྡན་པའི་རང་གི་ཁྱིམ་ཐབ་ཀྱི་རྗེས་སུ་འབྲང་བ་ཡོངས་སུ་དག་པར་བྱས་པ། སྔོན་བྱང་ཆུབ་སེམས་དཔའི་ཐབས་མཁས་པ་བསམ་གྱིས་མི་ཁྱབ་པས་ཡོངས་སུ་སྨིན་པར་བྱས་པ། སྟོང་ཕྲག་ བརྒྱད་ཅུ་རྩ་བཞིའི་འཁོར་གྱིས་ཀུན་ནས་བསྐོར་ཅིང་འདུག་པ་མཐོང་ངོ༌། །བུད་མེད་སྟོང་ཕྲག་བརྒྱད་ཅུ་རྩ་བཞི་པོ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ ལྡོག་པ༑ བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཚུལ་ལ་ཤིན་ཏུ་ཞུགས་པ། བྱང་ཆུབ་སེམས་དཔའི་བསླབ་པ་ལ་གཞན་གྱི་དྲིང་མི་འཇོག་པ། ཆགས་པ་ཐམས་ཅད་དང་བྲལ་བའི་ སེམས་དང་ལྡན་པ། འཁོར་བའི་དགའ་བ་ཐམས་ཅད་ཀྱིས་སྐྱོ་བའི་ཡིད་དང་ལྡན་པ། ཆོས་ཀྱི་དབྱིངས་ཀྱི་ཚུལ་ཆགས་པ་མེད་པས་ཡོངས་སུ་དག་པ། ཐམས་ཅད་མཁྱེན་པ་ཉིད་མངོན་དུ་བྱ་ བའི་སེམས་ཀྱི་ཤུགས་དང་ལྡན་པ། སྒྲིབ་པ་དང་བར་དུ་གཅོད་པའི་དྲ་བ་དང་བྲལ་བ། ཆགས་པའི་ལམ་ཐམས་ཅད་ལས་ཤིན་ཏུ་འདས་པ། ཆོས་ཀྱི་སྐུ་ལ་ལེགས་པར་སྤྲུལ་བས་རྣམ་པར་སྤྱོད་ པ༑ འཇིག་རྟེན་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་ལ་མངོན་པར་ཕྱོགས་པ། བསོད་ནམས་རྒྱ་མཚོ་དྲི་མ་མེད་པས་ཡོངས་སུ་བྱུང་བའི་སེམས་དང་ལྡན་པ། བྱང་ཆུབ་ སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨིན་ལམ་གྱིས་ཤིན་ཏུ་བྱུང་བ། བྱང་ཆུབ་སེམས་དཔའི་སྟོབས་ཀྱི་ཤུགས་ཡངས་པས་ཡེ་ཤེས་ཀྱི་ཉི་མའི་དཀྱིལ་འཁོར་གྱིས་སེམས་རབ་ཏུ་སྣང་ བ་ཡང་དག་པར་བསྐྱེད་པ་ཤ་སྟག་གོ །དེ་ནས་ཚོང་དཔོན་གྱི་བུ་ནོར་བཟང་ཤཱཀྱའི་བུ་མོ་གོ་པ་གང་ན་བ་དེར་ཕྱིན་ནས་ཤཱཀྱའི་བུ་མོ་གོ་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་ལངས་ ནས་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སེམས་བསྐྱེད་ན། ཇི་ལྟར་ན། བྱང་ཆུབ་སེམས་ དཔའ་རྣམས་འཁོར་བ་ན་ཡོངས་སུ་འཁོར་ཡང་འཁོར་བའི་སྐྱོན་གྱིས་མི་གོས་པ་དང༌། ཆོས་ཐམས་ཅད་མཉམ་པ་ཉིད་ཀྱི་རང་བཞིན་ཡང་ཁོང་དུ་ཆུད་ལ་ཉན་ཐོས་དང་རང་སངས་རྒྱས་ཀྱི་ས་ ལའང་མི་གནས་པ་དང༌། སངས་རྒྱས་ཀྱི་ཆོས་སྣང་བའང་རབ་ཏུ་ཐོབ་ལ་བྱང་ཆུབ་སེམས་དཔའི་སྤྱོད་པ་ཡང་རྒྱུན་མི་གཅོད་པ་དང༌། བྱང་ཆུབ་སེམས་དཔའི་ས་ལའང་རབ་ཏུ་གནས་ལ་དེ་ བཞིན་གཤེགས་པའི་ཡུལ་ཡང་ཡོངས་སུ་སྟོན་པ་དང༌། འཇིག་རྟེན་གྱི་ལམ་གྱི་རྒྱུད་ཐམས་ཅད་ལས་ཀྱང་ཡོངས་སུ་འདས་ལ་འཇིག་རྟེན་གྱི་ལམ་གྱི་རྒྱུད་ཐམས་ཅད་དུ་ཡང་ཉེ་བར་སྤྱོད་པ་དང༌། ཆོས་ ཀྱི་ལུས་ཡོངས་སུ་གྲུབ་པ་དང་ལྡན་ཡང་གཟུགས་ཀྱི་ལུས་ཁ་དོག་མཐའ་ཡས་པའང་མངོན་པར་སྒྲུབ་པ་དང༌། མཚན་མ་མེད་པའི་ཆོས་ཀྱི་སྐུ་ལ་ཡང་རབ་ཏུ་གཞོལ་ལ་འགྲོ་བ་ཐམས་ཅད་ཀྱི་ཁ་ ༄༅། །དོག་དང་དབྱིབས་ཀྱི་ལུས་ཀྱང་ཡོངས་སུ་སྟོན་པ་དང༌། ཆོས་ཐམས་ཅད་བརྗོད་དུ་མ་མཆིས་པར་ཡང་རབ་ཏུ་རྟོགས་ལ་དག་གི་ལམ་དང༌། ངེས་པའི་ཚིག་ཐམས་ ཅད་བརྗོད་པས་ཀྱང་སེམས་ཅན་རྣམས་ལ་ཆོས་སྟོན་པ་དང༌། སེམས་ཅན་ཐམས་ཅད་སེམས་ཅན་མེད་པར་ཡང་རབ་ཏུ་ཤེས་ལ་སེམས་ཅན་གྱི་ཁམས་གདུལ་བའི་ཚུལ་ལས་ཀྱང་ཕྱིར་མི་ ལྡོག་པ་དང༌། ཆོས་ཐམས་ཅད་མ་སྐྱེས་པ་དང་མ་འགག་པར་ཡང་ཁོང་དུ་ཆུད་ལ་དེ་བཞིན་གཤེགས་པ་ཐམས་ཅད་ལ་མཆོད་ཅིང་རིམ་གྲོར་བྱ་བའི་སྦྱོར་བ་ལས་ཀྱང་ཕྱིར་མི་ལྡོག་པ་དང༌། ཆོས་ཐམས་ཅད་ལ་ལས་དང་རྣམ་པར་སྨིན་པ་མ་མཆིས་པར་ཡང་རྟོགས་ལ་དགེ་བའི་ལས་མངོན་པར་འདུ་བྱ་བའི་སྦྱོར་བ་ལས་ཀྱང་ཕྱིར་མི་ལྡོག་པ་མ་འཚལ་ཏོ། །དེ་སྐད་ཅེས་སྨྲས་པ་དང༌། ཤཱཀྱའི་བུ་མོ་གོ་བས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ། དེ་ལྟར་ཁྱོད་བྱང་ཆུབ་སེམས་དཔའི་སྤྱོད་པའི་ཆོས་ཉིད་རྣམ་པ་དེ་ལྟ་བུ་དྲི་བར་སེམས་པ་ལགས་སོ། ། ལེགས་སོ། །དྲི་བ་བརྗོད་པ་དེ་དག་ཀྱང་ཀུན་ཏུ་བཟང་པོའི་སྨོན་ལམ་དང་སྤྱོད་པ་ལ་མངོན་དུ་གྱུར་པའི་ཚིག་གོ །རིགས་ཀྱི་བུ། དེ་བས་ན། ལེགས་པར་ཉོན་ལ་ཤིན་ཏུ་ཡིད་ལ་ཟུངས་ཤིག་ དང༌། སངས་རྒྱས་ཀྱི་བྱིན་གྱིས་བསྟན་པར་བྱའོ། །རིགས་ཀྱི་བུ། ཆོས་བཅུ་དང་ལྡན་པའི་བྱང་ཆུབ་སེམས་དཔའ་རྣམས་ནི། བྱང་ཆུབ་སེམས་དཔའི་སྤྱོད་པ་རྣམ་པ་འདི་ལྟ་བུ་མིག་འཕྲུལ་ གྱི་གཞིའི་དཔེ་དང་འདྲ་བ། ཡེ་ཤེས་ཀྱི་འོད་ཀུན་ཏུ་འབྱུང་བ་ཡོངས་སུ་རྫོགས་པར་བྱེད་དོ། །བཅུ་གང་ཞེ་ན། འདི་ལྟ་སྟེ། དགེ་བའི་བཤེས་གཉེན་རླབས་པོ་ཆེ་ལ་བརྟེན་པ་དང༌། མོས་པ་ རྒྱ་ཆེམ་པོ་རབ་ཏུ་ཐོབ་པ་དང༌། དགེ་བའི་བསམ་པ་རླབས་པོ་ཆེ་རྣམ་པར་དག་པ་དང༌། བསོད་ནམས་དང་ཡེ་ཤེས་རྒྱ་མཚོ་ཡངས་པས་རབ་ཏུ་བརྟན་པའི་སེམས་དང༌། སངས་རྒྱས་སྐྱེ་བ་འབྱུང་ པའི་ཆོས་བསྟན་པ་ཆེན་པོ་ཐོས་པ་རབ་ཏུ་ཐོབ་པ་དང༌། དུས་གསུམ་གྱི་དེ་བཞིན་གཤེགས་པ་ལ་མོས་པའི་སེམས་ཀྱིས་གནས་པ་དང༌། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ཐམས་ ཅད་མཉམ་པ་ཉིད་དུ་ཁོང་དུ་ཆུད་པ་དང༌། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་རབ་ཏུ་ཐོབ་པ་དང༌། རང་བཞིན་གྱིས་སྙིང་རྗེ་ཆེན་པོའི་ལྷག་པའི་བསམ་པ་རྣམ་པར་དག་ པ་དང༌། འཁོར་བའི་འཁོར་ལོ་ཐམས་ཅད་རབ་ཏུ་གཅད་པའི་སེམས་ཀྱི་སྟོབས་ཤུགས་དྲག་པོ་དང་ལྡན་པ་རབ་ཏུ་ཐོབ་པ་སྟེ། རིགས་ཀྱི་བུ། ཆོས་བཅུ་པོ་དེ་དག་དང་ལྡན་པའི་བྱང་ ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱོད་པ་རྣམ་པ་འདི་ལྟ་བུ་མིག་འཕྲུལ་གྱི་གཞིའི་དཔེ་དང་འདྲ་བ། འོད་ཀུན་ཏུ་འབྱུང་བ་ཡོངས་སུ་རྫོགས་པར་བྱེད་དོ། །རིགས་ཀྱི་བུ། དེ་ བརྩོན་འགྲུས་ཕྱིར་མི་ལྡོག་པ་དང་ལྡན་པའི་བྱང་ཆུབ་སེམས་དཔའ་རྣམས་ནི། ཆོས་དེ་དག་ཐོབ་པར་གྱུར་ནས་ཀྱང་མི་ཟད་པའི་ཚུལ་དུ་མངོན་པར་སྒྲུབ་ཅིང་།སྒོམ་པ་དང༌། ཤིན་ཏུ་རྒྱ་ཆེ་བར་བྱ་ ༄༅། །བའི་ཕྱིར་དགེ་བའི་བཤེས་གཉེན་བསྙེན་བཀུར་ཅིང་རྣམ་པ་བཅུས་མངོན་པར་དགའ་བར་བྱེད་དོ། །བཅུ་གང་ཞེ་ན། འདི་ལྟ་སྟེ། ལུས་དང་སྲོག་ལ་ཕངས་པར་མི་རྩི་བ་དང༌། འཁོར་ བའི་ཡོ་བྱད་དོན་དུ་མི་གཉེར་བ་དང༌། ཆོས་ཐམས་ཅད་ཀྱི་རང་བཞིན་མཉམ་པ་ཉིད་དུ་ཁོང་དུ་ཆུད་པ་དང༌། ཐམས་ཅད་མཁྱེན་པའི་སྨོན་ལམ་ལས་ཕྱིར་མི་ལྡོག་པ་དང༌། ཆོས་ཀྱི་དབྱིངས་ ཀྱི་ཚུལ་ཐམས་ཅད་ལ་རྣམ་པར་ལྟ་བ་དང༌། སྲིད་པའི་རྒྱ་མཚོ་ཐམས་ཅད་ལས་གྱེན་དུ་འཕགས་པའི་ཡིད་དང༌། གནས་མེད་པའི་ཆོས་ཀྱི་ནམ་མཁའ་ལ་མི་གནས་མི་རྟེན་པ་དང༌། བྱང་ཆུབ་ སེམས་དཔའ་ཐམས་ཅད་ཀྱི་སྨོན་ལམ་ལ་བསྒྲིབས་པ་མེད་པ་དང༌། ཞིང་རྒྱ་མཚོ་ཐམས་ཅད་དུ་རབ་ཏུ་འདལ་བ་དང༌། བྱང་ཆུབ་སེམས་དཔའི་ཡེ་ཤེས་ཀྱི་དཀྱིལ་འཁོར་བསྒྲིབས་པ་མེད་པ་ཤིན་ ཏུ་སྦྱངས་པ་སྟེ། རིགས་ཀྱི་བུ། ཆོས་བཅུ་པོ་དེ་དག་དང་ལྡན་པའི་བྱང་ཆུབ་སེམས་དཔའ་རྣམས་དགེ་བའི་བཤེས་གཉེན་བསྙེན་བཀུར་ཅིང་མངོན་པར་དགའ་བར་བྱེད་དོ། །དེ་ནས་ཤཱཀྱའི་བུ་ མོ་གོ་བས་དོན་དེ་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན་གྱིས་ཕྱོགས་བཅུར་བལྟས་ཏེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རླབས་ཆེན་དྲི་མེད་བློ་ལྡན་གཞན་གྱི་དོན་ཞུགས་ ཤིང༌། །དགེ་བཤེས་དམ་པ་བསྙེན་བརྩོན་གཡོ་དང་སྒྱུ་མེད་པ། །སྟོན་པའི་འདུ་ཤེས་ཐོབ་ཅིང་སྐྱོ་མེད་བརྩོན་འགྲུས་ཅན། །དེ་དག་སྤྱོད་པ་འཇིག་རྟེན་མིག་འཕྲུལ་འདྲ་འདི་ཡིན། །གང་རྣམས་ མོས་པ་རླབས་ཆེན་མཁའ་དང་འདྲ་ལྡན་ཞིང༌། །དེ་ཡི་ཁོངས་སུ་དུས་གསུམ་འཇིག་རྟེན་ཆུད་པ་དང༌། །ཞིང་དང་སེམས་ཅན་ཆོས་དང་སངས་རྒྱས་དེ་བཞིན་པ། །ཡེ་ཤེས་འོད་བྱེད་དེ་དག་སྤྱོད་པ་ འདི་ཡིན་ནོ། །གང་རྣམས་བསམ་པ་མཁའ་འདྲ་མཐའ་དང་དབུས་མེད་ལ། །ཀུན་ནས་ཉོན་མོངས་དྲི་མས་མགོས་རབ་དག་ཅིང༌། །དེ་བཞིན་གཤེགས་པ་ཀུན་གྱི་ཡོན་ཏན་འབྱུང་གྱུར་པ། ། དེ་དག་སྤྱོད་པ་མིག་འཕྲུལ་གཞི་ཡི་རྣམ་པ་འདྲ། །ཀུན་མཁྱེན་ཡེ་ཤེས་རྣམ་ཡངས་ཚད་མེད་བསམ་ཡས་དག །ཡོན་ཏན་རྒྱ་མཚོས་ཡིད་བསལ་ལྡན་པ་ཉེར་བརྟེན་པ། །དེ་དག་བསོད་ནམས་རྒྱ་ མཚོའི་ལུས་ངག་སྙིང་པོ་སྟེ། །འཇིག་རྟེན་སྤྱོད་ཀྱང་འཇིག་རྟེན་དྲི་མས་གོས་མི་འགྱུར། །རྒྱལ་བའི་གསུང་གི་ཡན་ལག་སྒྲ་སྐད་ཚུལ་ཀུན་གྱིས། །ཆོས་ཀྱི་འབྲུག་སྒྲ་ཉན་ཀྱང་གང་རྣམས་མི་ངོམས་ ཤིང༌། །ཆོས་ཚུལ་རྗེས་སུ་སྙེགས་པའི་ཤེས་རབ་འོད་ཀྱི་སྒྲོན། །དེ་དག་འགྲོ་བར་འོད་གསལ་བྱེད་པའི་སྤྱོད་འདི་ཡིན། །གང་རྣམས་ཕྱོགས་བཅུའི་དེ་བཞིན་གཤེགས་པ་ཚད་མེད་པ། །གཞན་ དང་གཞན་དག་སེམས་ཀྱི་སྐད་ཅིག་ཀུན་སེམས་ཤིང༌། །བདེ་གཤེགས་རྒྱ་མཚོ་ཐམས་ཅད་ལྟ་ཞིང་ཤེས་བྱེད་པ། །སངས་རྒྱས་སེམས་ལྡན་དེ་དག་སྤྱོད་ཡུལ་འདི་ཡིན་ནོ། །རྒྱལ་བ་རྣམས་ ཀྱི་རྣམ་པར་ཡངས་པའི་འཁོར་མཐོང་ཞིང༌། །དེ་དག་ཏིང་ངེ་འཛིན་ཚུལ་རྒྱ་མཚོ་མང་བོ་དང༌། །སྨོན་ལམ་རྒྱ་མཚོ་མཐའ་དང་དབུས་མེད་ཚུལ་འཇུག་པ། །མིག་འཕྲུལ་ལྟ་བུ་དེ་དག་སྤྱོད་པ་འདི་ཡིན་ ༄༅། །ནོ༑ ༑ཕྱོགས་བཅུའི་རྒྱལ་བ་མ་ལུས་ཀུན་གྱིས་བྱིན་བརླབས་ཏེ། །ཕྱི་མཐའི་བསྐལ་པར་སྤྱོད་བྱེད་ཀུན་ཏུ་བཟང་པོའི་རྣམས། །ཞིང་རྣམས་འབྱམས་ཀླས་ཀུན་ཏུ་ གཟུགས་བརྙན་བྱུང་གྱུར་པ། །ཆོས་འོད་བྱེད་པ་དེ་དག་སྤྱོད་པ་འདི་ཡིན་ནོ། །གང་རྣམས་ཡེ་ཤེས་ཉི་མ་སྙིང་རྗེའི་དཀྱིལ་འཁོར་ཅན། །འགྲོ་བ་ཉམས་ཉེས་མཐོང་ཞིང་ཆོས་ཀྱི་འོད་ སྣང་བས། །འགྲོ་བའི་མུན་པ་བསལ་ཅིང་བརྟན་པ་འཆར་འབྱུང་བ། །ཉི་མ་ལྟ་བུས་དེ་དག་སྤྱོད་པ་འདི་ཡིན་ནོ། །སྐྱེ་རྒུ་སྲིད་པའི་རྒྱུད་ན་འདྲེ་ལྡོག་མཐོང་གྱུར་ནས། །ཡིད་གསལ་འཁོར་ བའི་རྒྱུད་རྣམས་ཕྱིར་ཟློག་རབ་གནས་ཤིང༌། །ཆོས་ཀྱི་འཁོར་ལོ་ཀུན་ནས་ཡོངས་སུ་སྒྲུབ་བྱེད་པ། །སྤྱོད་པ་ཀུན་བཟང་དམ་པའི་བློ་ཅན་རབ་ཏུ་སྤྱོད། །ཚུལ་འདི་བསླབ་པ་དེ་དག་མཐའ་ དང་དབུས་མེད་པའི། །ལུས་རྣམས་བསམ་པ་ཇི་བཞིན་འགྲོ་བར་ཉེར་བསྟན་ཏེ། །གཟུགས་བརྙན་མིག་ཡོར་འདྲ་བའི་རང་ལུས་ཚད་མེད་པས། །སྲིད་པའི་རྒྱ་མཚོ་དག་ན་འགྲོ་མང་ཡོངས་ སྨིན་བྱེད། །བྱམས་ཚུལ་ཤིན་ཏུ་ཡངས་པས་འགྲོ་མང་རྒྱས་བཀང་སྟེ། །མོས་པ་སྣ་ཚོགས་འགྲོ་ལ་རྣམ་པར་སྤྱོད་བསྟན་ནས། །འགྲོ་བར་བསམ་པ་ཇི་བཞིན་ཆོས་ཀྱི་ཆར་འབེབས་ ཤིང༌། །བརྟན་པ་བྱང་ཆུབ་དོན་དུ་སེམས་ཅན་ཁྲག་ཁྲིག་འདུལ། །དེ་ནས་ཤཱཀྱའི་བུ་མོ་གོ་པས་ཚིགས་སུ་བཅད་པ་དེ་དག་སྨྲས་ནས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་ སོ༑ ༑རིགས་ཀྱི་བུ། ཁོ་མོས་ནི། བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་རྒྱ་མཚོའི་ཚུལ་ཐམས་ཅད་ལ་རྣམ་པར་ལྟ་བའི་ཡུལ་ཐོབ་པའོ། །ནོར་བཟང་གིས་ སྨྲས་པ༑ འཕགས་མ། བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་རྒྱ་མཚོའི་ཚུལ་ལ་རྣམ་པར་ལྟ་བའི་ཡུལ་དེའི་ཡུལ་ཇི་ལྟ་བུ་ཞིག་མཆིས། སྨྲས་པ། རིགས་ ཀྱི་བུ༑ ཁོ་མོ་བྱང་ཆུབ་སེམས་དཔའི་རྣམ་པར་ཐར་པ་འདི་ལ་སྙོམས་པར་ཞུགས་ན། འཇིག་རྟེན་གྱི་ཁམས་འདིའི་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་རྙེད་མཐོང་ ཞིང་ཁོང་དུ་ཆུད་དོ། །བསྐལ་པ་དེ་དག་གི་སེམས་ཅན་ལམ་གྱི་རྒྱུད་ཐམས་ཅད་དུ་གཏོགས་པ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །སེམས་ཅན་དེ་དག་གི་ཤི་འཕོ་དང༌། སྐྱེ་བའི་སྒོ་ཇི་ སྙེད་ཅིག་ཡོད་པ་དེ་བཞིན་དུ་རབ་ཏུ་ཤེས་སོ། །མངོན་པར་འགྲུབ་པའི་སྒོ་ཇི་སྙེད་ཅིག་ཡོད་པ་དང༌། ལས་མངོན་པར་འདུ་བྱེད་པ་ཡོངས་སུ་སྒྲུབ་པ་ཇི་སྙེད་ཅིག་ཡོད་པ་དང༌། ལས་རྣམ་པར་སྨིན་པ་སྣ་ ཚོགས་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །དེ་དག་གི་ལས་ཡོངས་སུ་བླངས་པ་དགེ་བ་ཡང་རབ་ཏུ་ཤེས་སོ། །མི་དགེ་བ་དང༌། འབྱུང་བ་དང༌། མི་འབྱུང་བ་དང༌། ངེས་པ་དང༌། མ་ངེས་ པ་དང༌། ལོག་པར་ངེས་པ་དང༌། བག་ལ་ཉལ་བ་དང་བཅས་པ་དང༌། བག་ལ་ཉལ་བ་མེད་པ་དང༌། དགེ་བའི་རྩ་བ་ཕུན་སུམ་ཚོགས་པ་དང༌། དགེ་བའི་རྩ་བ་རྒུད་པར་གྱུར་པ་དང༌། དགེ་བའི་རྩ་ ༄༅། །བ་ཡོངས་སུ་ཟིན་པ་དང༌། མི་དགེ་བའི་རྩ་བ་ཡོངས་སུ་ཟིན་པ་དང༌། དགེ་བ་དང་མི་དགེ་བ་ཡོངས་སུ་ཟིན་པ་དང༌། དེ་དག་གི་དགེ་བའི་ཆོས་ཡོངས་སུ་འདུས་པ་ དང༌། སྡིག་ཏོའི་ཆོས་ཡོངས་སུ་འདུས་པའི་ལས་ཡོངས་སུ་བླངས་པ་ཡང་རབ་ཏུ་ཤེས་སོ། །བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་པོ་དེ་དག་ལ་སངས་ རྒྱས་བཅོམ་ལྡན་འདས་ཇི་སྙེད་ཅིག་བྱུང་བ་དེ་དག་གི་མཚན་རྒྱ་མཚོ་ཡང་ཤེས་ཤིང་ཁོང་དུ་ཆུད་དོ། །སངས་རྒྱས་བཅོམ་ལྡན་འདས་དེ་དག་གིས་ཐུགས་དང་པོ་བསྐྱེད་པ་རྒྱ་མཚོ་ཡང་རབ་ཏུ་ ཤེས་སོ༑ ༑ཐམས་ཅད་མཁྱེན་པ་ཉིད་དུ་ཞུགས་པའི་ཚུལ་རྒྱ་མཚོ་ཡང་རབ་ཏུ་ཤེས་སོ། །སྨོན་ལམ་རྒྱ་མཚོ་ཐམས་ཅད་མངོན་པར་བསྒྲུབས་པ་ཡང་རབ་ཏུ་ཤེས་སོ། །སྔོན་གྱི་སངས་རྒྱས་བྱུང་བ་ རྣམས་ཀྱི་དྲུང་དུ་གཤེགས་པ་རྒྱ་མཚོ་ཡང་རབ་ཏུ་ཤེས་སོ། །སྔོན་གྱི་སངས་རྒྱས་ལ་མཆོད་ཅིང་རིམ་གྲོར་མཛད་པའི་སྦྱོར་བ་རྒྱ་མཚོ་ཡང་རབ་ཏུ་ཤེས་སོ། །སྔོན་བྱང་ཆུབ་སེམས་དཔའི་སྤྱོད་ པ་ཡོངས་སུ་རྫོགས་པར་མཛད་པ་རྒྱ་མཚོ་ཡང་རབ་ཏུ་ཤེས་སོ། །འབྱུང་བའི་རྒྱན་རྒྱ་མཚོ་ཡང་རབ་ཏུ་ཤེས་སོ། །སངས་རྒྱས་བཅོམ་ལྡན་འདས་དེ་དག་གིས་སེམས་ཅན་ཡོངས་སུ་སྨིན་ པར་མཛད་པ་དང་གདུལ་བ་རྒྱ་མཚོ་ཡང་རབ་ཏུ་ཤེས་སོ། །མངོན་པར་འཚང་རྒྱ་བ་མཛད་པ་རྒྱ་མཚོ་ཡང་རབ་ཏུ་ཤེས་སོ། །ཆོས་ཀྱི་འཁོར་ལོ་བསྐོར་བའི་ཁྱུ་མཆོག་གི་མཐུ་དང་རྣམ་པར་འཕྲུལ་ པ་ཡང་རབ་ཏུ་ཤེས་སོ། །སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་ཐམས་ཅད་ཀྱང་རབ་ཏུ་ཤེས་སོ། །སངས་རྒྱས་བཅོམ་ལྡན་འདས་དེ་དག་གི་འཁོར་གྱི་དཀྱིལ་འཁོར་རྣམ་པར་ཕྱེ་བ་ དག་ཀྱང་རབ་ཏུ་ཤེས་སོ། །འཁོར་གྱི་དཀྱིལ་འཁོར་དེ་དག་ན་ཉན་ཐོས་ཇི་སྙེད་ཅིག་འཁོད་པ་དེ་དག་གི་འབྱུང་བའི་ཚུལ་ཡང་རབ་ཏུ་ཤེས་སོ། །སྔོན་ཀྱི་དགེ་བའི་རྩ་བ་ཡང་རབ་ཏུ་ཤེས་ སོ༑ ༑ལམ་བསྒོམས་པ་སྣ་ཚོགས་ཀྱང་རབ་ཏུ་ཤེས་སོ། །ཡེ་ཤེས་ཐོབ་པར་བྱ་བ་ཕུན་སུམ་ཚོགས་ཤིང་རྣམ་པར་དག་པའི་བྱེ་བྲག་ཀྱང་རབ་ཏུ་ཤེས་སོ། །དེ་བཞིན་གཤེགས་པ་དེ་དག་ གིས་སེམས་ཅན་ཇི་སྙེད་ཅིག་རང་སངས་རྒྱས་ཀྱི་བྱང་ཆུབ་ལ་བཀོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གི་སྔོན་གྱི་དགེ་བའི་རྩ་བ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་ སོ༑ ༑རང་སངས་རྒྱས་དེ་དག་གིས་རང་སངས་རྒྱས་ཀྱི་བྱང་ཆུབ་ཁོང་དུ་ཆུང་བ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གི་ཞི་བའི་རྣམ་པར་སྤྱོད་པ་ལ་རྣམ་པར་རྩེ་ བའི་རྣམ་པར་ཐར་བའི་སྒོ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གི་རྫུ་འཕྲུལ་གྱི་རྣམ་པར་འཕྲུལ་བ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །རང་སངས་ རྒྱས་དེ་དག་གིས་སེམས་ཅན་ཇི་སྙེད་ཅིག་ཡོངས་སུ་སྨིན་པར་བྱས་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གིས་ཆོས་བསྟན་པ་ཇི་སྙེད་ཅིག་བརྗོད་པ་དེ་དག་ཀྱང་རབ་ཏུ་ཤེས་སོ། ། ༄༅། །རང་སངས་རྒྱས་དེ་དག་ཏིང་ངེ་འཛིན་མཐའ་ཡས་པ་ལ་རྣམ་པར་སྤྱོད་ཅིང་རྣམ་པར་ཐར་པ་རྣམ་པ་སྣ་ཚོགས་ཀྱིས་རྣམ་པར་རྩེ་བ་ཇི་སྙེད་ཅིག་ཡོད་པ་དེ་ དག་ཀྱང་རབ་ཏུ་ཤེས་སོ། །སངས་རྒྱས་བཅོམ་ལྡན་འདས་དེ་དག་གི་ཡོངས་སུ་མྱ་ངན་ལས་འདའ་བ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །སངས་རྒྱས་བཅོམ་ལྡན་འདས་དེ་དག་གི་ བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་དེ་དག་གིས་ཐོག་མ་དགེ་བའི་རྩ་བ་བསྐྱེད་བདག་ཀྱང་རབ་ཏུ་ ཤེས་སོ༑ ༑ཐོག་མ་སེམས་པ་སྐྱེད་པའི་སྨོན་ལམ་དག་ཀྱང་རབ་ཏུ་ཤེས་སོ། །སྨོན་ལམ་རྣམ་པར་དག་པ་ཐ་དད་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་སྤྱོད་པས་ འབྱུང་བའི་རྒྱན་ཐམས་ཅད་མངོན་པར་སྒྲུབ་པ་རྣམ་པ་ཐ་དད་པ་ཡང་རབ་ཏུ་ཤེས་སོ། །ཕ་རོལ་ཏུ་ཕྱིན་པའི་ལམ་གྱི་ཡན་ལག་གི་ཚོགས་རྣམ་པར་དག་པར་བྱ་བ་རྣམ་པ་ཐ་དད་པ་ཡང་ རབ་ཏུ་ཤེས་སོ། །བྱང་ཆུབ་སེམས་དཔའི་ལམ་ལ་ནན་ཏན་དུ་བྱ་བའི་རྒྱན་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་གནོན་པའི་ཚོགས་རྣམ་པ་ཐ་དད་པ་ ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་གནོན་པའི་ཤུགས་དྲག་པོ་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ལ་བཟེམ་པའི་མཐུ་དང་ལྡན་པའི་ ཏིང་ངེ་འཛིན་གྱི་དཀྱིལ་འཁོར་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ལ་ཡོངས་སུ་གནོན་པས་རྣམ་པར་རྩེ་བ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ ས་ཡོངས་སུ་གནོན་པའི་རྣམ་པར་སྤྱོད་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ལ་རབ་ཏུ་གནས་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་སྒོམ་པའི་རྒྱུད་ དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་སྦྱངས་པའི་ཚུལ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ལ་ཡང་དག་པར་གནས་པར་བྱ་བ་དག་ཀྱང་ རབ་ཏུ་ཤེས་སོ། །བྱང་ཆུབ་སེམས་དཔའི་སའི་མཚན་མ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་སའི་དབང་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ནས་ སར་འཕར་པའི་ཡེ་ཤེས་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་བསྡུ་བའི་ཡེ་ཤེས་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་སྨིན་པར་བྱ་བའི་ ཡེ་ཤེས་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་རྣམ་པར་དགོད་པ་ལ་ཡང་དག་པར་གནས་པར་བྱ་བ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་གྱི་རྒྱ་ ཡང་རབ་ཏུ་ཤེས་སོ། །བྱང་ཆུབ་སེམས་དཔའི་སྤྱོད་པ་ལ་རྣམ་པར་རྩེ་བ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ཏིང་ངེ་འཛིན་རྒྱ་མཚོ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་ ༄༅། །དཔའི་རྣམ་པར་ཐར་པའི་ཆུལ་རྒྱ་མཚོ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་དེ་དག་སེམས་ཀྱི་སྐད་ཅིག་རེ་རེ་ལ་ཏིང་ངེ་འཛིན་རྒྱ་མཚོ་སྣ་ཚོགས་ ཐོབ་པར་བྱེད་པ་དག་ཀྱང་རབ་ཏུ་ཤེས་སོ། །ཐམས་ཅད་མཁྱེན་པ་ཉིད་ཀྱི་སྣང་བའི་ཚུལ་ཐོབ་པར་བྱེད་པ་དག་ཀྱང་རབ་ཏུ་ཤེས་སོ། །ཐམས་ཅད་མཁྱེན་པ་ཉིད་ཀྱི་གློག་གི་སྣང་བའི་སྤྲིན་དག་ ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་བཟོད་པ་ཐོབ་པའི་ཚུལ་དག་ཀྱང་རབ་ཏུ་ཤེས་སོ། །ཐམས་ཅད་མཁྱེན་པ་ཉིད་དུ་འཇུག་པའི་ཡེ་ཤེས་ཀྱི་རྣམ་པར་གནོན་པ་དག་ཀྱང་རབ་ཏུ་ ཤེས་སོ༑ ༑བྱང་ཆུབ་སེམས་དཔའ་རྣམས་ཞིང་རྒྱ་མཚོར་རྗེས་སུ་བགྲོད་པར་བྱེད་པ་དག་ཀྱང་རབ་ཏུ་ཤེས་སོ། །ཆོས་རྒྱ་མཚོའི་ཚུལ་ལ་འཇུག་པ་དག་ཀྱང་རབ་ཏུ་ཤེས་སོ། །སེམས་ཅན་ རྒྱ་མཚོའི་མཚན་ཉིད་ཐ་དད་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་དམ་པར་སྤྱོད་པའི་ཚུལ་ཐམས་ཅད་ཀྱི་རྣམ་པར་འཕྲུལ་པ་དག་ཀྱང་རབ་ཏུ་ཤེས་སོ། །སྨོན་ལམ་གྱི་ཚུལ་ སྣ་ཚོགས་རྒྱ་མཚོ་དག་ཀྱང་རབ་ཏུ་ཤེས་སོ། །རྫུ་འཕྲུལ་གྱི་རྣམ་པར་འཕྲུལ་པ་སྣ་ཚོགས་རྒྱ་མཚོ་རྣམ་པ་ཐ་དད་པ་དག་ཀྱང་རབ་ཏུ་ཤེས་སོ། །རིགས་ཀྱི་བུ། ཁོ་མོ་ཇི་ལྟར་མི་མཇེད་ཀྱི་ འཇིག་རྟེན་གྱི་ཁམས་འདིའི་འདས་པ་དང་ད་ལྟར་བྱུང་བའི་བསྐལ་པ་སྣ་ཚོགས་རྒྱ་མཚོ་ལ་ཞུགས་ཏེ་ཁོང་དུ་ཆུད་པ་དེ་བཞིན་དུ་ཕྱི་མའི་མཐའ་གཅིག་ནས་གཅིག་ཏུ་བརྒྱུད་དེ་རྒྱུན་མི་འཆད་ པའི་མ་འོངས་པའི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་རྟེན་གྱི་ཁམས་ཀྱི་བསྐལ་པ་རྒྱ་མཚོ་ཇི་ལྟར་ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་སུ་གཏོགས་པའི་ འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་རྟེན་གྱི་ཁམས་སུ་གཏོགས་པའི་འཇིག་རྟེན་གྱི་ཁམས་གཅིག་ ནས་གཅིག་ཏུ་བརྒྱུད་པ་ཐམས་ཅད་ཀྱི་བསྐལ་པ་རྒྱ་མཚོ་ཇི་ལྟར་ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་འཇིག་རྟེན་གྱི་ཁམས་གཅིག་ནས་ གཅིག་ཏུ་བརྒྱུད་པ་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་འཇིག་རྟེན་གྱི་ཁམས་གཅིག་ནས་གཅིག་ ཏུ་བརྒྱུད་པ་ཐམས་ཅད་ཀྱི་བསྐལ་པ་རྒྱ་མཚོ་རྣམས་ཇི་ལྟར་ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་ཕྱོགས་བཅུར་འདབ་ཆགས་སུ་གནས་པའི་འཇིག་རྟེན་གྱི་ཁམས་ཐམས་ཅད་ ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་རྟེན་གྱི་ཁམས་ཕྱོགས་བཅུར་འདབ་ཆགས་སུ་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་རྣམས་ཇི་ ལྟར་ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་ཕྱོགས་བཅུར་འདབ་ཆགས་སུ་གནས་པ་གཅིག་ནས་གཅིག་ཏུ་བརྒྱུད་པ་དག་ན་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་ ༄༅། །བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་རྟེན་གྱི་ཁམས་ཕྱོགས་བཅུར་འདབ་ཆགས་སུ་གཅིག་ནས་གཅིག་ཏུ་བརྒྱུད་པ་དག་ན་གནས་ པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་རྣམས་ཇི་ལྟར་ཤེས་པ་དེ་བཞིན་དུ་ཕྱོགས་བཅུ་ཀུན་ཏུ་འོད་རྣམ་པར་སྣང་བའི་འཇིག་རྟེན་གྱི་ཁམས་ཀྱི་རྒྱུད་དུ་གཏོགས་པའི་ འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །ཕྱོགས་བཅུ་ཀུན་ཏུ་འོད་རྣམ་པར་སྣང་བའི་འཇིག་རྟེན་གྱི་ཁམས་ཀྱི་རྒྱུད་དུ་གཏོགས་པའི་འཇིག་རྟེན་གྱི་ ཁམས་ཐམས་ཅད་ཀྱི་བསྐལ་པ་རྒྱ་མཚོ་ཇི་ལྟར་ཤེས་པ་དེ་བཞིན་དུ། ཕྱོགས་བཅུ་ཀུན་ཏུ་འོད་རྣམ་པར་སྣང་བའི་འཇིག་རྟེན་གྱི་ཁམས་ཀྱི་རྒྱུད་ཕྱོགས་བཅུར་འདབ་ཆགས་སུ་གཅིག་ནས་ གཅིག་ཏུ་བརྒྱུད་པ་དག་ལ་གནས་པའི་འཇིག་རྟེན་གྱི་ཁམས་ཀྱི་རྒྱུད་གཅིག་ནས་གཅིག་ཏུ་བརྒྱུད་པ་རྣམས་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །ཕྱོགས་བཅུ་ཀུན་ཏུ་འོད་རྣམ་པར་ སྣང་བའི་འཇིག་རྟེན་གྱི་ཁམས་ཀྱི་རྒྱུད་ཕྱོགས་བཅུར་འདབ་ཆགས་སུ་གཅིག་ནས་གཅིག་ཏུ་བརྒྱུད་པ་དག་ལ་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་བ་རྒྱ་མཚོ་རྣམས་རབ་ཏུ་ ཤེས་པ་དེ་བཞིན་དུ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་རྒྱ་མཚོ་འདིར་གཏོགས་པའི་འཇིག་རྟེན་གྱི་ཁམས་འབྱམས་ཀླས་པ་རྣམས་ཀྱི་བསྐལ་པ་རྒྱ་མཚོ་ དག་ཀྱང་རབ་ཏུ་ཤེས་སོ། །དེ་བཞིན་དུ་འཇིག་རྟེན་གྱི་ཁམས་ཚུལ་དུ་བྱ་བ་རྣམས་དང༌། འཇིག་རྟེན་གྱི་ཁམས་ཀྱི་འཁོར་ལོ་རྣམས་དང༌། འཇིག་རྟེན་གྱི་ཁམས་ཀྱི་དཀྱིལ་འཁོར་རྣམས་དང༌། འཇིག་རྟེན་ གྱི་ཁམས་ཀྱི་བྱེ་བྲག་རྣམས་དང༌། འཇིག་རྟེན་གྱི་ཁམས་ཀྱི་ཆུ་ཀླུང་རྣམས་དང༌། འཇིག་རྟེན་གྱི་ཁམས་ཀྱི་ཀློང་རྣམས་དང༌། འཇིག་རྟེན་གྱི་ཁམས་ཡོངས་སུ་འཁྱིལ་པ་དང༌། འཇིག་རྟེན་གྱི་ཁམས་ རི་རབ་དང༌། འཇིག་རྟེན་གྱི་ཁམས་ཡོངས་སུ་འབྱུང་བ་དང༌། འཇིག་རྟེན་གྱི་ཁམས་པདྨོ་དང༌། འཇིག་རྟེན་གྱི་ཁམས་སྡོང་པོ་དང༌། འཇིག་རྟེན་གྱི་ཁམས་རྟ་བབས་དང༌། འཇིག་རྟེན་གྱི་ཁམས་མིང་དུ་ བྱ་བ་རྣམས་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདི་ཇི་ལྟར་ཤེས་པར་གྱུར་པ་དེ་བཞིན་དུ་ཕྱོགས་བཅུ་མཐའ་ ཡས་མུ་མེད་པའི་འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་དག་གི་བཅོམ་ལྡན་འདས་རྣམ་པར་སྣང་མཛད་ཀྱི་སྔོན་གྱི་སྨོན་ལམ་རྒྱ་མཚོ་དག་ཀྱང་ རབ་ཏུ་ཤེས་སོ། །རྗེས་སུ་དྲན་ནོ། །སྔོན་གྱི་སྦྱོར་བ་རྒྱ་མཚོ་དག་ལའང་ཤེས་ཤིང་ཁོང་དུ་ཆུད་དོ། །སྔོན་ཡོངས་སུ་བསྒྲུབས་པའི་ཚུལ་རྒྱ་མཚོ་དག་ལ་ཡང་ཤེས་ཤིང་ཁོང་དུ་ཆུད་དོ། །བསྐལ་པ་ མཐའ་དང་དབུས་མེད་པར་བྱང་ཆུབ་སེམས་དཔའི་སྤྱོད་པ་ལ་ཡང་དག་པར་བཞུགས་པ་མཛད་པ་དག་ཀྱང་ཤེས་ཤིང་ཁོང་དུ་ཆུད་དོ། །ཞིང་ཡོངས་སུ་དག་པར་མཛད་པའི་ཚུལ་དག་ཀྱང་ཤེས་ ༄༅། །ཤིང་ཁོང་དུ་ཆུད་དོ། །སེམས་ཅན་ཡོངས་སུ་སྨིན་པར་མཛད་པའི་ཐབས་ཀྱི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སྔོན་གྱི་དེ་བཞིན་གཤེགས་པ་རྣམས་ ལ་བསྙེན་བཀུར་མཛད་ཅིང་གཤེགས་པའི་རྣམ་པར་འཕྲུལ་བ་དག་ཀྱང་ཤེས་ཤིང་ཁོང་དུ་ཆུད་དོ། །སྔོན་གྱི་དེ་བཞིན་གཤེགས་པ་ལ་མཆོད་ཅིང་རིམ་གྲོར་མཛད་པའི་སྦྱོར་བའི་ཚུལ་ དག་ཀྱང་ཤེས་ཤིང་ཁོང་དུ་ཆུད་དོ། །སྔོན་གྱི་དེ་བཞིན་གཤེགས་པ་དག་གིས་ཆོས་བསྟན་པ་ཡོངས་སུ་བཟུང་བའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སྔོན་གྱི་བྱང་ཆུབ་སེམས་ དཔའི་ཏིང་ངེ་འཛིན་རབ་ཏུ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཡོ་བྱད་ལ་དབང་སྒྱུར་བ་རབ་ཏུ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སྔོན་གྱི་དེ་བཞིན་ གཤེགས་པའི་ཡོན་ཏན་རྒྱ་མཚོ་ལ་ནན་ཏན་དུ་མཛད་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སྦྱིན་པའི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། ། བྱང་ཆུབ་སེམས་དཔའི་ཚུལ་ཁྲིམས་དང་བརྟུལ་ཞུགས་ཀྱི་དཀྱིལ་འཁོར་ཡོངས་སུ་དག་པ་མངོན་པར་སྒྲུབ་པ་མཛད་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་ བཟོད་པ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་བརྩོན་འགྲུས་ཀྱི་ཤུགས་དྲག་པོ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བསམ་གཏན་གྱི་ ཡན་ལག་ཐམས་ཅད་ཡོངས་སུ་རྫོགས་པར་མཛད་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཤེས་རབ་ཀྱི་དཀྱིལ་འཁོར་ཡོངས་སུ་དག་པར་མཛད་པའི་ཚུལ་རྒྱ་མཚོ་དག་ཀྱང་ཤེས་ ཤིང་ཁོང་དུ་ཆུད་དོ། །འཇིག་རྟེན་གྱི་ཁམས་ཀྱི་སྐྱེ་གནས་ཐམས་ཅད་དུ་སྐུའི་གཟུགས་བརྙན་ཡོངས་སུ་བསྟན་པ་མཛད་པའི་ཐབས་ཀྱི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཀུན་ཏུ་བཟང་ པོའི་སྤྱོད་པ་དང་སྨོན་ལམ་གྱི་དཀྱིལ་འཁོར་ཡོངས་སུ་དག་པར་མཛད་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཞིང་རྒྱ་མཚོ་ཐམས་ཅད་ཡོངས་སུ་རྒྱས་པར་མཛད་པ་དག་ཀྱང་ཤེས་ཤིང་ཁོང་ དུ་ཆུད་དོ། །སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་མཛད་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །དེ་བཞིན་གཤེགས་པ་ཐམས་ཅད་ལས་ཡེ་ཤེས་སྣང་བར་གྱུར་པ་ རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །སངས་རྒྱས་ཀྱི་ཞིང་ཐམས་ཅད་ཀྱི་བྱང་ཆུབ་ཡོངས་སུ་གནས་པ་མཛད་པའི་རྣམ་པར་འཕྲུལ་པ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །དེ་ བཞིན་གཤེགས་པའི་ཡེ་ཤེས་སྣང་བ་རབ་ཏུ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཐམས་ཅད་མཁྱེན་པ་ཉིད་དུ་ཞུགས་ཏེ་ཐུགས་སུ་ཆུད་པའི་ཚུལ་རྒྱ་མཚོ་དག་ཀྱང་ཤེས་ ཤིང་ཁོང་དུ་ཆུད་དོ། །མངོན་པར་རྫོགས་པར་འཚང་རྒྱ་བའི་རྣམ་པར་འཕྲུལ་པ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཆོས་ཀྱི་འཁོར་ལོ་བསྐོར་བའི་ཁྱུ་མཆོག་གི་མཐུ་དང་རྣམ་པར་རོལ་ ༄༅། །པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །འཁོར་གྱི་དཀྱིལ་འཁོར་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །འཁོར་གྱི་དཀྱིལ་འཁོར་དེ་དག་གི་བྱང་ ཆུབ་སེམས་དཔའ་ཐམས་ཅད་ཀྱི་སྔོན་གྱི་དགེ་བའི་རྩ་བ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཐོག་མའི་སྨོན་ལམ་གྱི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །སེམས་ཅན་ཡོངས་ སུ་སྨིན་པར་བྱེད་པ་དང་འདུལ་བའི་ཐབས་ཀྱི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བཅོམ་ལྡན་འདས་ཀྱིས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་སེམས་ཅན་རྒྱ་མཚོ་ ཡོངས་སུ་སྨིན་པར་མཛད་པ་དེ་དག་ཀྱང་ཤེས་ཤིང་ཁོང་དུ་ཆུད་དོ། །སེམས་ཅན་དེ་དག་གི་སེམས་ཀྱི་སྐད་ཅིག་རེ་རེའི་དགེ་བའི་རྩ་བ་རྣམ་པར་འཕྲུལ་པའི་ཐབས་ཀྱི་ཚུལ་རྒྱ་མཚོ་དག་ཀྱང་ཤེས་ཤིང་ ཁོང་དུ་ཆུད་དོ། །ཏིང་ངེ་འཛིན་རབ་ཏུ་ཐོབ་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །གཟུངས་ཀྱི་སྒོ་རབ་ཏུ་ཐོབ་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །སྤོབས་པའི་ཡེ་ ཤེས་ཀྱི་དཀྱིལ་འཁོར་རྣམ་པར་དག་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་ས་ཐམས་ཅད་ཡོངས་སུ་གནོན་པའི་རྣམ་པར་འཕྲུལ་པའི་ཚུལ་རྒྱ་མཚོ་དག་ ཀྱང་ཤེས་ཤིང་ཁོང་དུ་ཆུད་དོ། །སྤྱོད་པའི་དྲ་བ་མངོན་པར་སྒྲུབ་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །མཐར་གྱིས་ཡོངས་སུ་སྒྲུབ་པའི་ཕྱོགས་ལ་འཇུག་པའི་ཡེ་ཤེས་ཀྱི་ ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །དེ་དག་གི་དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་ པར་འཇུག་པའི་རྣམ་པར་འཕྲུལ་པ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཇི་ལྟར་བཅོམ་ལྡན་འདས་རྣམ་པར་སྣང་མཛད་ཀྱི་སངས་རྒྱས་དང་བྱང་ཆུབ་སེམས་དཔའི་སྤྱོད་པ་རྒྱ་མཚོ་ཆོས་ཀྱི་ དབྱིངས་ཐམས་ཅད་དུ་བྱུང་བ་ཤེས་ཤིང་ཁོང་དུ་ཆུད་དོ། །མངོན་པར་སྒྲུབ་པ་དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་དང་བྱང་ཆུབ་སེམས་དཔའི་སྤྱོད་པ་རྒྱ་མཚོ་དང༌། ཡེ་ ཤེས་ཀྱི་སྒྱུ་མའི་དྲ་བ་མཐའ་ཡས་པ་ལ་འཇུག་པ་ཆོས་ཀྱི་དབྱིངས་མཐའ་ཡས་པ་རྒྱས་པར་འགེངས་པ། སྒོ་མཐའ་ཡས་པ་ནས་ཤིན་ཏུ་བསྟན་པར་བྱ་བ། ཕྱི་མའི་མཐའ་བསྐལ་པར་གནས་པ་ ལ་འཇུག་པས་བསྟན་པར་བྱ་བ། ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པར་བྱུང་བ་ཐམས་ཅད་ཀྱང་མ་འདྲེས་པར་ཤེས་ཤིང་ ཁོང་དུ་ཆུད་དོ། །མངོན་པར་སྒྲུབ་བོ། །དེ་ཅིའི་ཕྱིར་ཞེ་ན། རིགས་ཀྱི་བུ། བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་རྣམ་པར་ལྟ་ བའི་ཡུལ་གྱི་ཡུལ་ནི༑ དེ་ལྟ་བུ་སྟེ། དེའི་ཕྱིར་དེ་ལ་སྙོམས་པར་ཞུགས་ན། སེམས་ཅན་ཐམས་ཅད་ཀྱི་སེམས་དང་སྤྱོད་པའི་ཚུལ་རབ་ཏུ་ཤེས་སོ། །སེམས་ཅན་ཐམས་ཅད་ཀྱི་དགེ་བའི་ཚོགས་ ༄༅། །ཀྱང་རབ་ཏུ་ཤེས་སོ། །སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་དང༌། རྣམ་པར་བྱང་བའི་ཡེ་ཤེས་ཀྱི་ཚུལ་རྣམས་ཀྱང་རབ་ཏུ་ཤེས་སོ། །སེམས་ ཅན་ཐམས་ཅད་ཀྱི་ལས་སྣ་ཚོགས་ཀྱང་རབ་ཏུ་ཤེས་སོ། །ཉན་ཐོས་ཐམས་ཅད་ཀྱི་ཏིང་ངེ་འཛིན་གྱི་སྒོ་རྣམས་ཀྱང་རབ་ཏུ་ཤེས་སོ། །ཉན་ཐོས་ཐམས་ཅད་ཀྱི་ཏིང་ངེ་འཛིན་གྱི་ས་ཡང་རབ་ ཏུ་ཤེས་སོ། །རང་སངས་རྒྱས་ཐམས་ཅད་ཀྱི་རྣམ་པར་ཐར་པ་ཞི་བས་རྣམ་པར་འཕྲུལ་པ་ཡང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་རྒྱ་མཚོའི་ ཚུལ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་ཐར་པ་རྒྱ་མཚོ་ལ་འཇུག་པ་ཡང་རབ་ཏུ་ཤེས་སོ། །དེ་བཞིན་གཤེགས་པ་ཐམས་ཅད་ཀྱི་རྣམ་པར་ཐར་ པའི་ཚུལ་རྒྱ་མཚོ་ལ་འཇུག་པ་ཡང་རབ་ཏུ་ཤེས་སོ། །དེ་ནས་ཚོང་དཔོན་གྱི་བུ་ནོར་བཟང་གིས་ཤཱཀྱའི་བུ་མོ་གོ་པ་ལ་འདི་སྐད་ཅེས་སྨྲས་སོ། །འཕགས་མ། ཁྱོད་ཀྱིས་བྱང་ཆུབ་སེམས་ དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཆུལ་རྒྱ་མཚོ་ཐམས་ཅད་ལ་རྣམ་པར་ལྟ་བའི་ཡུལ་འདི་བརྙེས་ནས་ཇི་སྲིད་ཅིག་ལགས། སྨྲས་པ། རིགས་ཀྱི་བུ། སྔོན་ འདས་པའི་དུས་སངས་རྒྱས་ཀྱི་ཞིང་བརྒྱའི་རྡུལ་ཤིན་ཏུ་ཕྲ་བ་སྙེད་ཀྱི་བསྐལ་པ་འདས་པའི་ཕ་རོལ་གཅིག་ཏུ་འཇིག་རྟེན་གྱི་ཁམས་མི་འཇིགས་པ་བྱེད་པ་ཞེས་བྱ་བ་བྱུང་སྟེ། འཇིག་རྟེན་གྱི་ ཁམས་དེའི་བསྐལ་པ་འགྲོ་བའི་མཆོག་ཅེས་བྱ་བར་གྱུར་ཏོ། །འཇིག་རྟེན་གྱི་ཁམས་དེའི་དབུས་སུ་གླིང་བཞི་པ་བདེ་བ་ཡོད་པ་ཞེས་བྱ་བ་བྱུང་སྟེ། གླིང་བཞི་པ་དེའི་འཛམ་བུའི་གླིང་གི་དབུས་སུ་རྒྱལ་ པོའི་གནས་སྡོང་པོ་རི་བོའི་དཔལ་ཞེས་བྱ་བ་གྲོང་རྡལ་སྟོང་ཕྲག་བརྒྱད་ཅུ་རྩ་བཞིའི་ཕུལ་དུ་བྱ་བ་བྱུང་སྟེ། རྒྱལ་པོའི་གནས་སྡོང་པོ་རི་བོའི་དཔལ་དེ་དང༌། གྲོང་རྡལ་སྟོང་ཕྲག་བརྒྱད་ཅུ་རྩ་བཞི་པོ་དེ་ དག་ཀྱང་སོ་སོ་ནས་སའི་གཞི་བཻ་ཌཱུཪྻ་སྔོན་པོ་ལས་གྲུབ་པ་ལ་གནས་རིན་པོ་ཆེ་བདུན་ལས་བྱས་པའི་ར་བས་ཀུན་ནས་བསྐོར་བ། འོབས་སྤོས་ཆུས་ཡོངས་སུ་གང་བ། གཞི་གསེར་གྱི་བྱེ་མ་བདལ་ བ༑ ཨུཏྤལ་དང༌། པདྨོ་དང༌། ཀུ་མུ་ད་དང༌། མེ་ཏོག་པུཎྜ་རཱི་ཀ་ཤིང་རྟའི་འཁོར་ལོ་ཙམ་ཁ་དོག་དང་འོད་ཀྱི་དྲ་བ་སྣ་ཚོགས་ཤིང་དྲི་ཞིམ་པས་ཀུན་ནས་ཁྱབ་པ་བདུན་གྱིས་ཡོངས་སུ་བསྐོར་བ། རིན་པོ་ཆེ་ལས་བྱས་པའི་སྟེགས་བུའི་ཁྲི་འཕང་བདུན་ལས་ཏ་ལའི་ཕྲེང་བ་རིམ་པ་བདུན་གྱིས་ཀུན་ནས་དཀྲིགས་པ། རིན་པོ་ཆེ་སྣ་བདུན་གྱི་ཤིང་གི་ནགས་ཚལ་གྱི་ཕྲེང་བ་དཀྲིགས་པས་ཀུན་ ནས་བསྐོར་བ། སྟེང་ནས་གསེར་གྱི་དྲ་བ་བྲེས་པ་རིན་པོ་ཆེ་སྣ་ཚོགས་ཀྱིས་རྣམ་པར་ཕྱེ་བའི་མིག་མང་རིས་མཛེས་པར་རྣམ་པར་བྲེས་པས་སའི་གཞི་ཤིན་ཏུ་སྤ་བར་གྱུར་པ། དངོས་གྲུབ་ཅན་ གྱི་ཚོགས་རྣམ་པར་རྒྱུ་བ། བྱ་བཙུན་པའི་ཁྱུས་སྒྲ་སྐད་ཡིད་དུ་འོང་བའི་དབྱངས་སྙན་པ་ཕྱུང་བ། བཟའ་ཤིང་གི་རབ་བྱེ་བ་བརྒྱ་ཕྲག་སྟོང་གིས་མཛེས་པར་བྱས་པ། ཤིན་ཏུ་སྐྱིད་ཅིང་ཕུན་སུམ་ ༄༅། །ཚོགས་པར་གནས་པ། སྐྱེས་པ་དང་བུད་མེད་བརྒྱ་སྟོང་རབ་ཏུ་དགའ་བས་གང་བ། སེར་བུ་བདེ་ཞིང་ཡིད་དུ་འོང་བས་བསྐྱོད་དེ་མེ་ཏོག་གི་ཆར་མང་པོ་རྒྱུན་མི་འཆད་ པར་རབ་ཏུ་འབྲུལ་བ། སའི་བདག་པོ་དམ་པ་བརྒྱ་ཕྲག་སྟོང་གི་གནས་སུ་གྱུར་པ་དག་སྟེ། གྲོང་རྡལ་ཆེན་པོ་དེ་དག་གི་རིན་པོ་ཆེའི་ཤིང་ཐམས་ཅད་དང༌། གསེར་གྱི་དྲ་བའི་རྒྱན་ལ་སོགས་པ་ རླུང་གིས་བསྐྱོད་དེ་རོལ་མོ་མང་པོའི་སྒྲ་དང༌། སྙན་པའི་སྒྲ་སྐད་བྱུང་བ་དག་ལས་ཡིད་དུ་འོང་བའི་ཚིག་འདི་སྐད་བྱུང་ངོ༌། །གསོལ་ཅིག །མནོབས་ཤིག །ཆོས་ལ་སྤྱོད་ཅིག །བྱང་ ཆུབ་ཏུ་སེམས་སྐྱེད་ཅིག །ཕྱིར་མི་ལྡོག་པའི་ས་ལ་མངའ་ཐོབ་མཛོད་ཅིག །ཁྱེད་རྣམས་བདེ་བར་གྱུར་ཅིག །ཅེས་ཟེར་རོ། །རྒྱལ་པོའི་གནས་སྡོང་པོ་རི་བོའི་དཔལ་དེར་ཁམས་ཀྱི་ རྒྱལ་པོ་ནོར་གྱི་བདག་པོ་ཞེས་བྱ་བ་བྱུང་སྟེ། དེ་ལ་བཙུན་མོའི་འཁོར་བུད་མེད་སྟོང་ཕྲག་བརྒྱད་ཅུ་རྩ་བཞི་ཡོད་དོ། །བློན་པོ་བརྒྱ་ཕྲག་ལྔ་ཡོད་པར་གྱུར་ཏེ། རྒྱལ་པོ་ནོར་གྱི་བདག་པོ་ དེ་ལ་བུ་ལྔ་བརྒྱ་ཡོད་པ་དེ་ཐམས་ཅད་ཀྱང་དཔའ་བ། རྟུལ་ཕོད་པ། ཡན་ལག་དམ་པའི་གཟུགས་དང་ལྡན་པ། གཞན་གྱི་སྡེ་རབ་ཏུ་འཇོམས་པ། ཤིན་ཏུ་མཛེས་པ། བལྟ་ན་སྡུག་པ། ཁ་དོག་བཟང་པོའི་མཆོག་ཤིན་ཏུ་རྒྱས་པ་དང་ལྡན་པ་ཤ་སྟག་གོ །རྒྱལ་པོ་ནོར་གྱི་བདག་པོ་དེའི་བཙུན་མོ་དམ་པ་ནི། པདྨོའི་དཔལ་དམ་པ་འབྱུང་བ་ཞེས་བྱ་བ་སྟེ། བུད་མེད་སྟོང་ཕྲག་ བརྒྱད་ཅུ་རྩ་བཞི་པོ་དེ་དག་གི་ནང་ནས་གཙོ་མོར་བྱ་བའོ། །དེའི་བུ་གཟི་བརྗིད་ཀྱི་དབང་པོ་ཞེས་བྱ་བ་གཟུགས་བཟང་བ། ཤིན་ཏུ་མཛེས་པ། བལྟ་ན་སྡུག་པ། མི་ཆེན་པོའི་མཚན་སུམ་ཅུ་རྩ་གཉིས་ ཀྱིས་རབ་ཏུ་བརྒྱན་པའི་ལུས་དང་ལྡན་པ་ཞིག་ཡོད་པར་གྱུར་ཏེ། དེ་ལ་མི་ཆེན་པོའི་མཚན་སུམ་ཅུ་རྩ་གཉིས་པོ་འདི་དག་ཡོད་པར་གྱུར་ཏོ། །དེའང་འདི་ལྟར་རྒྱལ་བུ་གཞོན་ནུ་གཟི་བརྗིད་ཀྱི་ བདག་པོ་དེ་རྐང་པའི་མཐིལ་ཤིན་ཏུ་གནས་པ་དང་ལྡན་ཏེ། ས་ཆེན་པོ་ལ་རྐང་པའི་མཐིལ་འདོར་ན་མཉམ་པར་འདོར་ལ། འདེག་ན་མཉམ་པར་འདེག་སྟེ། གཞོག་ན་རྐང་པའི་མཐིལ་ ཀུན་གྱིས་ས་ཆེན་པོ་ལ་མཉམ་པར་རེག་གོ །དེའི་རྐང་པའི་མཐིལ་གཉིས་ལ་འཁོར་ལོ་རྩིབས་སྟོང་དང་ལྡན་པ། ལྟེ་བ་དང་བཅས་པ། མུ་ཁྱུད་དང་བཅས་པ། རྣམ་པ་ཐམས་ཅད་དུ་ ཤིན་ཏུ་ཚང་བ། ཤིན་ཏུ་མཛེས་པ། བལྟ་ན་སྡུག་པ་དག་ཀྱང་བྱུང་བར་གྱུར་ཏོ། །དེའི་རྐང་པའི་བོལ་གཉིས་ཀྱང་ཤིན་ཏུ་རྒྱས་པར་གྱུར་ཏོ། །རྐང་པའི་སྟེང་གི་མདོག་ཤིན་ཏུ་གསལ་ ལ་ཤིན་ཏུ་མཛེས་ཏེ། མེ་ཏོག་དམ་པ་བས་ཀྱང་ལྷག་པར་མདོག་བཟང་ཞིང་གསལ་བར་གྱུར་ཏོ། །དེའི་རྐང་ལག་གི་སོར་མོ་དྲ་བར་འབྲེལ་བར་གྱུར་ཏེ་ཤིན་ཏུ་མཛེས་པས་རྣམ་པར་ བྱེ་བ༑ བུ་ག་མེད་པས་ཟག་པ་མེད་པ་ནི། དཔེར་ན། ངང་པའི་རྒྱལ་པོ་གནས་སྲུང་ལྟ་བུར་གྱུར་ཏོ། །དེ་རྐང་པའི་རྟིང་པ་ཡངས་པ། ཤིན་ཏུ་དག་ལ་ཤིན་ཏུ་གསལ་བ། རིན་པོ་ཆེ་ཐམས་ ༄༅། །ཅད་ཀྱི་འོད་རབ་ཏུ་འགྱེད་པར་གྲུབ་པ་དང་ལྡན་པར་གྱུར་ཏོ། །དེའི་སོར་མོ་རྣམས་ཀྱང་རིང་ཞིང་ཟླུམ་ལ་ཚིགས་བར་མཉམ་ཞིང་ཡངས་པ་དང་ལྡན་པར་གྱུར་ཏེ། དེ་དག་མཉམ་པར་ས་ལ་འཇོག་གོ །མཉམ་པར་ས་ལས་འདེག་གོ །དེའི་རྐང་པ་དང་ལག་པའི་མཐིལ་ཡང་ཀ་ཙ་ལིནད་བས་ཀྱང་ལྷག་པར་རེག་ན་བདེ་བར་གྱུར་ཏེ། དེས་སྐྱེས་པའམ། བུད་མེད་དམ། ཁྱེའུ་དང་བུ་མོ་གང་ལ་རེག་ཀྱང་རུང་སྟེ། དེ་དག་ཐམས་ཅད་བདེ་བ་དང༌། ཡིད་དགའ་བའི་དམ་པས་ཚིམ་ཞིང་ཡིད་ཤིན་ཏུ་བདེ་བར་འགྱུར་རོ། །དེའི་བྱིན་པ་རི་དྭགས་ ཨེ་ན་ཡའི་བྱིན་པ་ལྟར་འདུག་པར་གྱུར་ཏེ། རིམ་གྱིས་གཞོལ་བ་དང༌། ཤིན་ཏུ་མཛེས་པ་དང༌། ལེགས་པར་གྲུབ་པར་གྱུར་པས། རི་དྭགས་ཀྱི་རྒྱལ་པོ་ཨེ་ན་ཡེ་ལྟར་དེ་ལ་སུས་ ཀྱང་བསྙེགས་པའམ་སླེབ་པར་མི་ནུས་ཏེ། འགྲོ་བས་ངལ་ཞིང་དུབ་པར་མི་འགྱུར་རོ། །རྒྱལ་བུ་གཞོན་ནུ་གཟི་བརྗིད་ཀྱི་དབང་པོ་དེ་བདུན་ཤིན་ཏུ་མཐོ་བ་དང་ཡང་ལྡན་པར་གྱུར་ཏེ། དེའི་རྐང་པ་གཉིས་ལ་ཤིན་ཏུ་མཐོ་བ་ཟླུམ་ལ་ཤིན་ཏུ་ལེགས་པ་དང༌། ཤིན་ཏུ་རྒྱས་པ་དང༌། ཚིགས་མི་སྣང་བ་དང༌། ཤིན་ཏུ་ཡིད་དུ་འོང་བ་དང༌། བལྟ་ན་སྡུག་པ་གཉིས་གྲུབ་པར་ གྱུར་ཏོ༑ ༑ལག་པ་ལ་གཉིས། ཐལ་གོང་གི་ལྷུན་ལ་གཉིས། ལྟག་པ་ལ་གཅིག་སྟེ། དེ་ལྟར་བདུན་ནོ། །དེའི་མཚན་གསང་བའི་སྦུབས་ན་འདུག་པ་གྲུབ་པར་གྱུར་ཏེ། དེའི་གསང་ པའི་གནས་སྦུབས་ན་འདུག་པ་ཤིན་ཏུ་མི་མངོན་ལ་ནང་དུ་ནུབ་ཅིང་ཀུན་ནས་ཡོག་པར་འདུག་པ་སྟེ། དཔེར་ན། གླང་པོ་ཅང་ཤེས་སམ། རྟ་ཅང་ཤེས་ལྟར་འདུག་པས་དེ་གོས་མ་གྱོན་པར་ འདུག་ཀྱང་བུད་མེད་དམ། སྐྱེས་པའམ། ཁྱེའུའམ། བུ་མོའམ། རྒན་པའམ། དར་ལ་བབ་པའམ། བླ་མའམ། བླ་མར་བྱ་བ་རྣམས་ཀྱིས་ཀྱང་མི་མཐོང་སྟེ། གཞན་དུ་ན་བདག་ལོངས་ པར་སྤྱོད་པའམ། ཆེད་དུ་བསྟན་པར་བྱ་སྟེ། འདོད་པས་སྤྱད་པ་ནི། མ་གཏོགས་སོ། །རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་དེ་རོ་སྟོང་སེངྒེ་ལྟར་འདུག་པ་དང་ལྡན་པར་གྱུར་ཏེ། ལུས་རིམ་པས་ རྒྱས་ལ་རོ་སྟོད་ཤིན་ཏུ་ཡངས་ཤིང་རྫོགས་པས། རི་དྭགས་ཀྱི་རྒྱལ་པོ་བས་ཀྱང་མཛེས་པར་དབྱིབས་ཤིན་ཏུ་ལེགས་པའི་རོ་སྟོད་དང་ལྡན་པར་གྱུར་ཏོ། །དེའི་ཐལ་གོང་རྒྱས་ཤིང་ལུས་ཤིན་ ཏུ་རྒྱས་པ། ལུས་རྣམ་པར་ཕྱེ་བ། ལུས་ཀྱི་ཆ་ཐམས་ཅད་རྐྱེན་དུ་འབབ་པར་མཉམ་པ། ལུས་ལ་དམའ་བ་མེད་པ། ལུས་ལ་མཐོ་བ་མེད་པ། ལུས་ལ་ཞུམ་པ་མེད་པ། ལུས་ལ་དགུ་པ་ མེད་པ༑ ལུས་རིན་པོ་ཆེའི་གཏན་པ་ཤིན་ཏུ་ཕྱིས་པ་བས་ཀྱང་ལྷག་པར་གསལ་བར་གྱུར་ཏོ། །དེ་དཔུང་མགོ་ཤིན་ཏུ་ཟླུམ་ཞིང་ཤ་རྒྱས་ལ་ཤིན་ཏུ་མཛེས་པར་གང་བ་དང་ལྡན་པར་གྱུར་ ཏོ། །དེས་མི་ཆེན་པོའི་མཚན་ལག་པ་ཤིན་ཏུ་རིང་བ་ཐོབ་པར་གྱུར་པ། དེས་ལུས་མ་བཏུད་དེ་ལུས་དྲང་པོར་འདུག་ཀྱང་པུས་མོའི་ལྷ་ང་གཉིས་ལ་ཉུག་ཅིང་རེག་གོ །དེས་མི་ཆེན་པོའི་མཚན་ ༄༅། །ལུས་ཆེ་ཞིང་དྲང་བའང་ཐོབ་པར་གྱུར་ཏེ། རྣམ་པ་ཐམས་ཅད་དུ་མཆོག་ཏུ་གྱུར་པ་དང་ལྡན་ལ། ལུས་ཚུལ་དང་འདྲ་བར་མཉམ་པ་དང༌། ལུས་རབ་ཏུ་མཉེན་པ་ དང༌། ལུས་ཤེན་ཏུ་ལྕི་བ་དང༌། ལུས་རབ་ཏུ་གསལ་བ་དང༌། ལུས་ཤིན་ཏུ་སིམ་པར་བྱེད་པ་དང་ལྡན་པར་གྱུར་ཏེ། དེས་མི་ཆེན་པོའི་མཚན་མགུལ་དུང་ལྟ་བུ་ཡང་ཐོབ་པར་གྱུར་ཏེ། མི་དམའི་མགུལ་དང༌། དེའི་མགུལ་གྱི་འཁོར་ཐམས་ཅད་དང༌། བཞིན་གྱི་འཁོར་ཐམས་ཅད་ན་རྩ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཤིན་ཏུ་མཉམ་པར་གྱུར་ཏེ། ཀུན་ཀྱང་ རབ་ཏུ་ཚང་བར་གྱུར་ཏོ། །མི་ཆེན་པོའི་མཚན་སེངྒེའི་འགྲམ་པ་ལྟ་བུ་ཡང་ཐོབ་པར་གྱུར་ཏེ། ཟ་འགྲམ་ཤིན་ཏུ་མཁྲེགས་པ་དང༌། བཞིན་གྱི་དཀྱིལ་འཁོར་ཤིན་ཏུ་རྒྱས་པ་དང༌། བཞིན་ གྱི་དཀྱིལ་འཁོར་ཤིན་ཏུ་ལེགས་ཤིང་ཡོངས་སུ་དག་པ་དང༌། ཁའི་སྒོ་ཤིན་ཏུ་ཡངས་པ་དང་ལྡན་པར་གྱུར་ཏོ། །མི་ཆེན་པོའི་མཚན་སོ་མཉམ་པ་བཞི་བཅུ་དང་ཡང་ལྡན་པར་གྱུར་ཏེ། སོ་མ་ཚང་བ་མེད་པ་ལ་ཟས་ཤིག་ཟ་ན་ཡང་ལན་གཅིག་བལྡད་པས་ཆུང་དུ་ན་འབྲས་ཅན་གྱི་འབྲུ་འགའ་ཡང་མ་ཞིག་པར་ཟ་བ་མེད་དོ། །སོ་ཐགས་བཟང་ཞིང་མཉམ་པ་རབ་ཏུ་ཐོབ་སྟེ། མཚམས་ཆུ་སྒོ་མེད་པ་དང༌། ཤིན་ཏུ་མཉམ་པ་དང༌། རྐྱེན་རྐྱེན་དུ་ཤིན་ཏུ་མཛེས་པ་སྟེ། དེ་ཁ་ཟས་ཤིག་ཟ་ན་ཡང་འགོ་བ་དང༌། འཆགས་པ་དང༌། ཞེན་པ་དང༌། ལྗན་ལྗིན་དུ་འགྱུར་ བའམ༑ ཐོགས་པར་འགྱུར་བའམ། གསེབ་འགང་བར་འགྱུར་བ་མེད་དོ། །མི་ཆེན་པོའི་མཚན་སོ་མཉམ་པ་རབ་ཏུ་ཐོབ་པར་གྱུར་ཏེ། སོ་མཉམ་ཞིང་རྔ་རྔོ་མེད་པ་དང༌། སོ་ལྷག་མེད་པ་དང༌། སོ་ཞུམ་པ་མེད་པ་དང༌། སོ་གྱེས་པ་མེད་པ་དང༌། སོ་ཐོག་དྲུང་མཉམ་པ་དང༌། སོ་རྔོ་བ་མེད་པར་གྱུར་ཏོ། །གཞོན་ནུ་དེའི་མཆེ་བ་ཤིན་ཏུ་དཀར་བར་གྱུར་ཏེ། མཆེ་བ་སྐྱོན་མེད་པ། མཆེ་བ་ ཤིན་ཏུ་གསལ་བ། མཆེ་བ་ཤིན་ཏུ་དག་པ། མཆེ་བ་ཤིན་ཏུ་བརྟན་པར་གྱུར་ཏོ། །མི་ཆེན་པོའི་མཚན་ལྕེ་ཤིན་ཏུ་ཡངས་པ་ཡང་རབ་ཏུ་ཐོབ་པར་གྱུར་ཏེ། དེའི་ལྕེ་ནི། ཤིན་ཏུ་ཡངས་ལ་སྲབ་ཅིང་ མཉེན་ཏེ། ཤིན་ཏུ་འཇམ་པ་དང༌། ལས་སུ་རུང་བ་དང༌། ཡིད་དུ་འོང་བ་དང༌། བསྒྱུར་ན་བདེ་བ་དང༌། གདོང་གི་དཀྱིལ་འཁོར་ཀུན་འགེབས་པ་དང༌། བདེན་ཞིང་ཕན་པར་འགྱུར་བའི་དོན་དང༌། ཡི་གེ་དང༌། ངག་དང༌། ངེས་པའི་ཚིག་ཐོགས་པ་མེད་པར་རྗོད་པར་གྱུར་ཏོ། །གཞོན་ནུ་དེ་ཚངས་པའི་དབྱངས་དང་ལྡན་པར་གྱུར་ཏེ། དབྱངས་ཡིད་དུ་འོང་བ་དང༌། རོལ་མོའི་སྒྲ་དང༌། ཀླུའི་ ང་རོ་དང༌། སིལ་སྙན་གྱི་དབྱངས་དང༌། སྒྲ་སྐད་དང༌། བརྗོད་ཅིང་སྨྲ་བའི་ཚིག་གི་ལས་ཡིད་དུ་འོང་བ་བརྗོད་པས། ངག་གི་ལམ་མངོན་པར་དགའ་བ་བསྐྱེད་པ། འཇིག་རྟེན་ཐམས་ཅད་མངོན་ པར་འདུན་པར་འགྱུར་བར་ཚངས་པ་ལས་ཀྱང་ལྷག་པའི་དབྱངས་ཀྱིས་ངག་རྗོད་དེ། འཁོར་གྱི་དཀྱིལ་འཁོར་ལས་ཀྱང་གུད་དུ་མི་འདའ་བར་ཐམས་ཅད་ཀྱི་ཡིད་དང་མཐུན་པར་བྱེད་པ་དང་ ༄༅། །ལྡན་པར་གྱུར་ཏོ། །གཞོན་ནུ་དེ་ནི། མིག་དཀར་ནག་འབྱེས་པར་གྱུར་ཏེ། མིག་ཤིན་ཏུ་དང་བ་དང༌། མིག་ཡོངས་སུ་དག་པ་དང༌། མིག་ལ་འོད་ཆགས་པ་དང༌། མིག་རྣམ་པར་གསལ་བ་དང༌། མིག་མངོན་པར་མཛེས་པ་དང༌། མིག་བལྟ་ན་སྡུག་པ་དང༌། མིག་ཡིད་དུ་འོང་བ་དང༌། མིག་འཛུམ་པ་དང་ལྡན་པར་གྱུར་ཏོ། །གཞོན་ནུ་དེ་ནི། རྫི་མ་བའི་ རྫི་མ་ལྟ་བུ་དང་ལྡན་པར་གྱུར་ཏོ། །མིག་གི་སྐྱེ་མཆེད་རིན་པོ་ཆེ་པདྨ་རཱ་ག་ལྟར་ཤིན་ཏུ་དག་པ། མིག་གི་སྤྲིན་མཉམ་པ། མིག་གི་སྤྲིན་མཚུངས་པ། མིག་གི་སྤྲིན་ལེགས་པ། མིག་ གི་སྤྲིན་ཡངས་པ། མིག་གི་སྤྲིན་རྫོགས་པ། མིག་གི་སྤྲིན་ཤིན་ཏུ་བརྟན་པར་གྱུར་ཏོ། །དེའི་སྨིན་མཚམས་སུ་མཛོད་སྤུ་སྐྱེས་པར་གྱུར་ཏེ། འཇམ་པ། ལས་སུ་རུང་བ། ཤིན་ཏུ་མཉེན་ པ༑ ཤིང་བལ་ལྟར་རེག་ན་བདེ་བ། དང་བ། གསལ་བ། འོད་ཡོད་པ། ཆབ་རོམ་ལྟ་བུ་ཁ་བའི་ཁ་དོག་ལྟར་འདུག་པ། འོད་ཟེར་དཀར་པོའི་དཀྱིལ་འཁོར་གྱི་འོད་རབ་ཏུ་སྣང་བ་དང་ལྡན་པར་ གྱུར་ཏོ༑ ༑དེའི་སྤྱི་བོ་ལ་གཙུག་ཏོར་མངོན་པར་གྲུབ་པར་གྱུར་ཏེ་ཤིན་ཏུ་ལེགས་པ། ཀུན་ནས་ཟླུམ་པ། དབུས་སུ་བབ་པ། སྐྲའི་རྒྱན་དུ་གྱུར་པ། རིན་པོ་ཆེའི་པདྨོ་འདབ་མ་བྱེ་བ་བརྒྱ་ཕྲག་ སྟོང་དང་ལྡན་པ་ལྟར་སྣང་བ། ཀུན་ནས་ཆ་མཉམ་པར་གནས་པ། རིན་ཐང་གདབ་ཏུ་ཚད་མེད་པས་གཅེས་པའི་གཙུག་ཏུ་གྱུར་པ་དང་ལྡན་པར་གྱུར་ཏོ། །གཞོན་ནུ་དེ་པགས་པ་ཤིན་ཏུ་ འཇམ་པ་དང་ལྡན་པར་གྱུར་ཏེ། དེའི་ལུས་ལ་རྡུལ་ཏམ། དྲི་མའམ། རྡུལ་ཏམ། སེར་ཀའམ། གཉེར་མའམ། ལྷོད་པའམ། འཁུམས་པའམ། འཕྱང་བའམ། སློད་བག་ཏུ་ གནས་པ་མེད་པར་གྱུར་ཏོ། །གཞོན་ནུ་དེ་ནི། མདོག་གསེར་གྱི་ཁ་དོག་ལྟ་བུ་དང་ལྡན་པར་གྱུར་ཏེ། འཛམ་བུ་ཆུ་ཀླུང་གི་གསེར་གྱི་མདོག་ལྟ་བུ་དང་ལྡན་ཞིང་འོད་ཀུན་ཏུ་འདོམ་གང་བ་ དང༌། གསེར་ལྟར་གཅིག་ཏུ་འབར་བའི་འོད་ཀྱི་དཀྱིལ་འཁོར་གྱིས་མཛེས་པར་བརྒྱན་པ་དང༌། བ་སྤུའི་བུ་ག་ཐམས་ཅད་ནས་དྲི་ཞིམ་པོའི་འོད་ཟེར་འབྱུང་བས་ལུས་ཀྱི་རྒྱན་རབ་ རིབ་མེད་ཅིང་འོད་གསལ་བ་དང་ལྡན་པར་གྱུར་ཏོ། །གཞོན་ནུ་དེ་ནི། བ་སྤུ་རེ་རེའི་བྱུང་བ་དང་ལྡན་པར་གྱུར་ཏེ། བ་སྤུའི་བུ་ག་རེ་རེ་ནས་བ་སྤུ་རེ་རེ་སྐྱེས་པར་གྱུར་པ། བཻ་ཌཱུཪྻ་སྔོན་ པོའི་ཁ་དོག་ལྟ་བུ། གཡས་ཕྱོགས་སུ་འཁྱིལ་བ། ལེགས་པར་སྐྱེས་པ། མཐང་ལ་ཞི་བར་འདུག་པ། ཤིན་ཏུ་ལེགས་པར་གནས་པ་དང་ལྡན་པར་གྱུར་ཏོ། །གཞོན་ནུ་དེའི་སྤུ་ཡན་ ལག་གྱེན་དུ་འཁྱིལ་བར་གྱུར་ཏེ། ཕྱིར་མི་ལྡོག་པའི་སྤུ་དང༌། མི་ལྡོག་པའི་སྤུ་དང༌། མ་འདྲེས་པའི་སྤུ་དང་ལྡན་པར་གྱུར་ཏོ། །གཞོན་ནུ་དེ་མི་ཆེན་པོའི་མཚན་སྐྲ་མཐོན་མཐིང་དུ་འདུག་ པ་ཐོབ་པར་གྱུར་ཏེ། དེའི་སྐྲ་ནོར་བུ་རིན་པོ་ཆེ་རྣམ་པར་སྣང་བའི་མདོག་ལྟར་མཐོན་མཐིང་དུ་འདུག་པ། འཇམ་པ། སྣུམ་པ། ལེགས་པར་འཁྱིལ་བ། གཡས་ཕྱོགས་སུ་འཁྱིལ་ ༄༅། །བ༑ དྲུང་ཤིན་ཏུ་རན་པ། ཟད་ཟེད་མེད་པ། འཇམ་འཇམ་ལྟར་འདུག་པ། མི་འཛིངས་པ། དབྱིབས་མཉམ་ཞིང་མཐུན་པར་གནས་པ་དང་ལྡན་པར་གྱུར་ཏོ། །རྒྱལ་བུ་གཞོན་ནུ་དེ་ཤིང་ གྲོ་དྷ་ལྟར་མཆུ་ཞེང་གབ་པའི་མི་ཆེན་པོའི་མཚན་རབ་ཏུ་ཐོབ་པར་གྱུར་ཏེ། ཀུན་ནས་རྐྱེན་དུ་རན་པ་དང༌། ཀུན་ཏུ་བཟང་བ་དང༌། ཀུན་ཏུ་མཛེས་པ་དང་ལྡན་པར་གྱུར་ཏེ། དེ་ནི། མདུན་ནས་ བལྟས་ནའང་ངོམས་མི་ཤེས་ཤིང༌། བལྟ་ན་ཡིད་དུ་འོང་བ། རྒྱབ་དང༌། གཡས་གཡོན་དང༌། འགྲོ་བ་དང༌། འདུག་པ་དང༌། འགྲེང་བ་དང༌། ཉལ་བ་དང༌། སྨྲ་བ་དང༌། མི་སྨྲ་བར་ འདུག་པ་ལ་བལྟས་ནའང་ངོམས་མི་ཤེས་ཤིང་ཡིད་དུ་འོང་ལ་བལྟ་ན་སྡུག་པར་གྱུར་ཏེ། རིགས་ཀྱི་བུ། རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་དེ་མི་ཆེན་པོའི་མཚན་སུམ་ཅུ་རྩ་ གཉིས་པོ་དེ་དག་གིས་ཡོངས་སུ་བརྒྱན་པའི་ལུས་དང་ལྡན་པར་གྱུར་ཏེ། སེམས་ཅན་ཐམས་ཅད་ཀྱིས་བལྟ་ན་ཡིད་དུ་མི་འོང་བའི་བག་མེད་པ། བལྟ་ན་བསམ་པ་ཐམས་ཅད་ཡོངས་ སུ་རྫོགས་པར་བྱེད་པ། བལྟ་ན་སེམས་ཅན་ཐམས་ཅད་ཀྱི་དགའ་བ་ཡོངས་སུ་འབྱུང་བ་དེ་ལྟ་བུ་ཞིག་སྐྱེས་པར་གྱུར་ཏེ། རིགས་ཀྱི་བུ། དེ་ནས་ལན་གཅིག་ཅིག་རྒྱལ་བུ་གཞོན་ནུ་གཟི་བརྗིད་ ཀྱི་བདག་པོ་དེ་ཡབ་ཀྱིས་གནང་ནས་རྒྱལ་པོའི་གནས་སྡོང་པོ་རི་བོའི་དཔལ་གྱི་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ལས་འོད་ཀྱི་སྤྲིན་འབྱུང་བ་ཞེས་བྱ་བ་དེར་ས་བཟང་པོ་བལྟ་བའི་ ཕྱིར་བུ་མོ་སྟོང་ཕྲག་ཉི་ཤུ་དང་ལྷན་ཅིག་ཏུ་བསོད་ནམས་ཀྱི་གཟི་བརྗིད་དང་དཔལ་གྱི་བསྐལ་བ་བཟང་པོའི་རྣམ་པར་འཕྲུལ་པའི་རྒྱན་གྱིས་བྱུང་ནས་སྐྱེས་པ་དང་བུད་མེད་ཀྱི་ཚོགས་ཀྱིས་ཀུན་ནས་ དགའ་བར་བྱ་ཞིང༌། ཛམྦུ་ཆུ་ཀླུང་གི་གསེར་གྱི་ཤིང་རྟ་རྡོ་རྗེ་རིན་པོ་ཆེའི་འཁོར་ལོ་ཆེན་པོ་བཞི་དང་ལྡན་པ། རྡོ་རྗེ་མཐུ་བོ་ཆེའི་སྲོག་ཤིང་སྲ་བ། ཙནྡན་དམ་པ་ལས་བསྒྲུབས་པའི་ཡུ་བ་ བཟང་པོ་དང་ལྡན་པ། རིན་པོ་ཆེའི་རྒྱལ་པོ་སྤོས་སྣ་ཚོགས་ཀྱི་ཤིང་ཐགས་རྣམ་པར་བཀྱེ་བ། རིན་པོ་ཆེ་ཐམས་ཅད་ཀྱི་མེ་ཏོག་སྣ་ཚོགས་ཀྱིས་རབ་ཏུ་མཛེས་པར་བྱས་པ། རིན་པོ་ཆེ་ཐམས་ ཅད་ཀྱི་དྲ་བས་ཀུན་ནས་ཡོག་པའི་རྒྱན་དང་ལྡན་པ། སེངྒེའི་ཁྲི་རིན་པོ་ཆེ་དམ་པའི་དྲ་བའི་རྒྱན་གྱི་སྙིང་པོ་ཅན་དབུས་སུ་བཤམས་པ། བུ་མོ་ལྔ་བརྒྱས་རིན་པོ་ཆེའི་སྲད་བུའི་ལྔ་ལྡི་ནས་ཡོངས་ སུ་བཟུང་བ། ནམ་མཁའ་ལ་ཆགས་པ་མེད་པའི་རླུང་ལྟར་མགྱོགས་པའི་རྟ་ཅང་ཤེས་སྟོང་དང་བཅས་པ་ལ་ཞོན་ནས་གདུགས་ཆེན་པོ་རིམ་གྱིས་གཞོལ་ཞིང་བལྟ་ན་སྡུག་པ། སྟེང་ གཡོགས་རིན་པོ་ཆེའི་རྒྱལ་པོ་བཻ་ཌཱུཪྻ་དཀར་པོ་ལས་བྱས་པ། འོད་དྲི་མ་མེད་པ་ཚད་མེད་པ་འབྱུང་བ། རིན་པོ་ཆེ་བསམ་གྱིས་མི་ཁྱབ་པ་རྨད་དུ་བྱུང་བ་སྣ་ཚོགས་ཐམས་ཅད་ཀྱིས་ སྤ་བར་སྤྲས་ཏེ་རྣམ་པ་ཐམས་ཅད་དུ་མཛེས་པར་བརྒྱན་པ། ཡུབ་རིན་པོ་ཆེའི་རྒྱལ་པོ་བཻ་ཌཱུཪྻ་སྔོན་པོ་ལས་བསྒྲེངས་པས་ནི། བསྐྱབས། སྲོག་ཆགས་བརྒྱ་སྟོང་མང་པོས་ནི། ཡོངས་ ༄༅། །སུ་བསྐོར། རོལ་མོ་བརྒྱ་སྟོང་མང་པོ་ལྷ་རྫས་ཀྱི་དབྱངས་ཡིད་དུ་འོང་བ་སྙན་པ་དང་ལྡན་པ་དག་ནི། རབ་ཏུ་བླངས། མེ་ཏོག་གི་ཆར་ཆེན་པོ་ནི། མངོན་ པར་འབབ། ལྷ་རྫས་ཀྱི་སྤོས་དྲི་ཞིམ་པའི་བདུག་སྤོས་ཀྱི་སྣོད་བྱེ་བ་ཁྲག་ཁྲིག་བརྒྱ་སྟོང་གིས་ནི། རབ་ཏུ་བདུག་ཅིང་འགྲོ་བར་གྱུར་ཏོ། །དེ་དེ་ལྟར་འགྲོ་བའི་ཚེ་ལམ་ཡང་རྒྱུད་བརྒྱད་ དང་ལྡན་པར་གྱུར་ཏེ། མཐོན་དམན་མེད་པ་དང༌། གསེག་མ་དང་གྱོ་མོ་མེད་པ་དང༌། གསེར་དངུལ་དང་རིན་པོ་ཆེའི་རྒྱལ་པོ་སྣ་ཚོགས་ཀྱི་ཁམས་ཀྱིས་སའི་གཞི་རབ་ཏུ་བསྒྲུབས་པ་ དང༌། གསེར་གྱི་ཕྱེ་མ་བཀྲམ་པ་དང༌། རིན་པོ་ཆེ་སྣ་ཚོགས་ཀྱི་མེ་ཏོག་སིལ་མས་ཆལ་བར་གང་བ་དང༌། གཡས་གཡོན་ནས་རིན་པོ་ཆེའི་ཤིང་གི་ཕྲེང་བས་དཀྲིགས་པ་དང༌། རིན་ པོ་ཆེ་སྣ་ཚོགས་ཀྱི་ཁ་རན་བཀྱེ་བ་དང༌། སྟེང་ནས་རིན་པོ་ཆེའི་དྲ་བ་བྲེས་པ་དང༌། རིན་པོ་ཆེའི་གནམ་ཡོལ་སྣ་ཚོགས་ཀྱིས་བཀབ་པ་དང༌། རིན་པོ་ཆེའི་རྒྱལ་མཚན་དང༌། བ་དན་ དང༌། སྣམ་བུ་བརྒྱ་སྟོང་རབ་ཏུ་བརྒྱན་པ་དུ་མ་བསྒྲེངས་ཤིང་དཔྱངས་པས་མཛེས་པར་བརྒྱན་པ་དང༌། གཡས་གཡོན་ནས་རིན་པོ་ཆེའི་སྟེགས་བུའི་ཕྲེང་བ་རྣམ་པར་བཀོད་པས་རྣམ་ པར་བརྒྱན་པ་སྟེ། རིན་པོ་ཆེ་སྟེགས་བུ་ལ་ལ་ལ་ནི། སློང་མོ་པའི་ཚོགས་ལ་ཡོངས་སུ་བསྟབ་པའི་དོན་དུ་རིན་པོ་ཆེའི་སྣོད་སྣ་ཚོགས་རིན་པོ་ཆེ་སྣ་ཚོགས་ཀྱིས་ཡོངས་སུ་བཀང་བ་ བཀོད༑ སྟེགས་བུ་ལ་ལ་ལ་ནི། རྒྱན་འདོད་པའི་སློང་མོ་པ་རྣམས་བརྒྱན་པའི་དོན་དུ་རིན་པོ་ཆེ་ཐམས་ཅད་ཀྱི་རྒྱན་གྱི་རྣམ་པ་ཡོངས་སུ་བཀོད། སྟེགས་བུ་ལ་ལ་ལ་ནི། སེམས་ཅན་ཐམས་ཅད་ ཀྱི་བསམ་པ་ཡོངས་སུ་རྫོགས་པར་བྱ་བའི་ཕྱིར་ཡིད་བཞིན་གྱི་ནོར་བུ་རིན་པོ་ཆེ་བཀོད། སྟེགས་བུ་ལ་ལ་ལ་ནི། སུ་ཅི་འདོད་པ་དེ་དག་ལ་དེ་སྦྱིན་པའི་དོན་དུ་ཁ་ཟས་དང༌། བཏུང་བ་དང༌། བྲོ་ བ་སྣ་ཚོགས་ཀྱིས་ཡོངས་སུ་བཀང་བའི་སྣོད་མང་པོ་བཀོད། སྟེགས་བུ་ལ་ལ་ལ་ནི། རྣམ་པ་ཐམས་ཅད་དུ་མཆོག་ཏུ་ཞིམ་པའི་རོ་དང༌། ཁ་དག་དང༌། དྲི་དང༌། བྲོ་བ་དང༌། རེག་བྱ་ཡིད་དུ་འོང་ བ་དང་ལྡན་པའི་ལྷ་རྫས་ཀྱི་ཁ་ཟས་ཀྱི་རྣམ་པ་བཀོད། སྟེགས་བུ་ལ་ལ་ལ་ནི། རོ་བྲོ་བ་སྣ་ཚོགས་དང་ལྡན་པའི་ལྷ་རྫས་ཀྱི་ཤིང་ཐོག་སྣ་ཚོགས་ཐམས་ཅད་སྤུངས། སྟེགས་བུ་ལ་ལ་ལ་ནི། གོས་འདོད་པ་རྣམས་ཡིད་བཞིན་དུ་སྤྱོད་དུ་གཟུད་པའི་ཕྱིར་ལྷ་རྫས་ཀྱི་གོས་རིན་པོ་ཆེ་ཁ་དོག་སྣ་ཚོགས་དང་ལྡན་པ། མདོག་བཟང་པོ་རྣམ་པ་སྣ་ཚོགས་དག་དང༌། རི་མོ་སྣ་ཚོགས་ཤིན་ཏུ་སྤ་ བར་རྣམ་པར་ཕྱེ་བ། ཤིན་ཏུ་བཙུན་པ་ལ་འོས་པ། ཤིན་ཏུ་ཕྲ་བ། རབ་ཏུ་འཇམ་པ། ཐགས་སུ་མ་བཏགས་པ་བྱེ་བ་བརྒྱ་ཕྲག་སྟོང་སྙེད་ཡོངས་སུ་བཀོད་པར་གྱུར་ཏོ། །སྟེགས་བུ་ལ་ལ་ལ་ནི། བྱུག་པ་འདོད་པའི་སེམས་ཅན་རྣམས་བསམ་པ་ཇི་ལྟ་བ་བཞིན་དུ་ཡོངས་སུ་སྤྱོད་དུ་གཟུད་པའི་ཕྱིར་ལྷ་རྫས་ཀྱི་སྤོས་ཀྱི་རྣམ་པ་ཁ་དོག་དང༌། དྲི་རྣམ་པ་སྣ་ཚོགས་ཐམས་ཅད་དང་ལྡན་པ་དག་ ༄༅། །བཀོད་པར་གྱུར་ཏོ། །སྟེགས་བུ་ལ་ལ་ལ་ནི། སེམས་ཅན་རྣམས་བསམ་པ་ཇི་ལྟ་བ་བཞིན་དུ་ཡོངས་སུ་སྤྱོད་དུ་གཟུད་པའི་ཕྱིར་ཡོ་བྱད་ཐམས་ཅད་ཀྱི་ཕུང་པོ་དག་ བཀོད་པར་གྱུར་ཏོ། །སྟེགས་བུ་ལ་ལ་ལ་ནི། ན་ཆུང་གཟུགས་བཟང་བ། རབ་ཏུ་མཛེས་པ། ཤིན་ཏུ་སྡུག་པ། ཆ་ལུག་སྡུག་གུ་སྣ་ཚོགས་དང་ལྡན་པ། ཡིད་དུ་འོང་བའི་གོས་སྣ་ ཚོགས་དང་ལྡན་པ། ཡིད་དུ་འོང་བའི་གོས་སྣ་ཚོགས་གྱོན་པ་རྒྱན་ཐམས་ཅད་ཀྱིས་མཛེས་པར་བརྒྱན་པ། བྱུག་པ་སྣ་ཚོགས་ཀྱིས་ཚུལ་སྡུག་གུར་བརྒྱན་ཅིང་མཛེས་པར་བྱས་པའི་ ལུས་དང་ལྡན་པ། བུད་མེད་ཀྱི་བཟོ་དང༌། སྒྱུ་དང༌། ཤེས་ཉེན་གྱི་ཚུལ་ལ་མཁས་པ་དག་བཀོད་པར་གྱུར་ཏོ། །དེའི་ཚེ་རྒྱལ་པོའི་གནས་སྡོང་པོ་རི་བོའི་དཔལ་དེ་ཉིད་ན་སྦྲུལ་ཚོང་མའི་ དམ་པ་རྒྱལ་པོའི་ལོངས་སྤྱོད་དུ་འོས་པ། བལྟ་ན་མཛེས་པ་ཞེས་བྱ་བ་ཞིག་ཡོད་པ་དེའི་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ཞེས་བྱ་བ་གཟུགས་བཟང་བ། ཤིན་ཏུ་ མཛེས་པ། བལྟ་ན་སྡུག་པ། ཧ་ཅང་ཡང་མི་རིང༌། ཧ་ཅང་ཡང་མི་ཐུང༌། ཧ་ཅང་ཡང་མི་སྦོམ། ཧ་ཅང་ཡང་མི་ཕྲ། ཧ་ཅང་ཡང་མི་དཀར། ཧ་ཅང་ཡང་མི་སྔོ་བ། སྐྲ་མཐོན་མཐིང་དུ་འདུག་པ། མིག་དཀར་ནག་འབྱེས་པ། བཞིན་ཡིད་དུ་འོང་པ། ཚངས་པའི་དབྱངས་དང་ལྡན་པ། འཇམ་ཞིང་སྙན་པར་སྨྲ་བ། ཤེས་རབ་དང་ལྡན་པ། ཤེས་ཉེན་གྱི་ཚུལ་ཐམས་ཅད་ལ་མཁས་པ། གཙུག་ལག་ཐམས་ཅད་ལ་ཤེས་པ། བརྩོན་པ། ལེ་ལོ་མེད་པ། རིམ་གྲོ་ཡོད་པ། མོས་པ་དང་ལྡན་པ། བྱམས་པའི་སེམས་བདོག་པ། ཁོང་ཁྲོ་བ་མི་མངའ་བ། བལྟ་ན་མི་ངོམས་ཤིང་ ཡིད་དུ་འོང་བ། འདོད་ཆགས་དང༌། ཞེ་སྡང་དང༌། གཏི་མུག་ཆུང་བ། ངོ་ཚ་ཤེས་ཤིང་ཁྲེལ་ཡོད་པ། དྲང་ཞིང་མཉེན་པ། གཡོ་དང་སྒྱུ་མེད་པ་ཞིག་ཡོད་དེ། དེ་མ་དང་ལྷན་ཅིག་ཏུ་བུ་མོ་ དུ་མ་ཞིག་གིས་བསྐོར་ཏེ་རིན་པོ་ཆེའི་ཤིང་རྟ་ལ་ཞོན་ནས་རྒྱལ་པོའི་གནས་སྡོང་པོ་རི་བོའི་དཔལ་ནས་བྱུང་སྟེ་རྒྱལ་པོས་བཀའ་སྩལ་ནས་རྒྱལ་བུ་གཞོན་ནུ་གཟི་བརྗིད་ཀྱི་བདག་པོའི་མདུན་ནས་ ཕར་རྒྱལ་བུ་གཞོན་ནུ་དེ་ལ་གླུ་ལེན་ཅིང་འདོང་འདོང་བ་ལས། རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་མཐོང་ནས་འདོད་ཆགས་ཀྱི་སེམས་ཤིན་ཏུ་མི་བཟད་པ་ཞིག་གཡོས་ཏེ། རྒྱལ་བུ་ གཞོན་ནུ་གཟི་བརྗིད་ཀྱི་བདག་པོ་ཤིན་ཏུ་ཡིད་དུ་འོང་ཆེས་ནས་རྗེས་སུ་འབྲང་ཞིང་སེམས་ལ་རང་དབང་མེད་པས། བལྟ་ན་སྡུག་པ་ལ་འདི་སྐད་ཅེས་སྨྲས་སོ། །མ་འདི་ལྟར་མཁྱེན་པར་མཛོད་ ཅིག །གལ་ཏེ་བདག་རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་ལ་མ་བཏང་ན་ནི། འགུམ་པའམ། སྲོག་ལ་འབབ་པའི་སྡུག་བསྔལ་གཅིག་ཏུ་འགྱུར་རོ། །དེས་སྨྲས་པ། བུ་མོ། དེ་ལྟ་བུའི་སེམས་ མ་སྐྱེད་ཅིག། གཞོན་ནུ་འདི་ནི། འཁོར་ལོས་བསྒྱུར་བའི་མཚན་དང་ལྡན་པ་སྟེ། དེའི་ཡབ་ནོར་གྱི་བདག་པོ་མི་བཞུགས་པར་འགྱུར་ན། འཁོར་ལོས་བསྒྱུར་བའི་རྒྱལ་སྲིད་ལ་གནས་པར་ ༄༅། །འགྱུར་བའི་གནས་ཡོད་དེ། དེ་འཁོར་ལོས་བསྒྱུར་བའི་རྒྱལ་པོར་འགྱུར་བས་དེའི་བུད་མེད་རིན་པོ་ཆེ་ནམ་མཁའ་ལ་འགྲོ་བ་འབྱུང་བར་འགྱུར་ལ། བུ་མོ་བདག་ ཅག་ཀྱང་སྦྲུལ་ཚོང་མ་དག་ཅིག་སྟེ། འཇིག་རྟེན་ཐམས་ཅད་དགའ་བར་བྱེད་པ་ཡིན་གྱི། ཡུ་བུས་སེམས་ཅན་འགའ་ཞིག་ལ་ནམ་འཚོའི་བར་དུ་བསྙེན་བཀུར་མི་བྱར་མི་རུང་བའང་མེད་དེ། ཡུ་ བུ་ནི༑ རྒྱལ་པོ་ནོར་གྱི་བདག་པོའི་བཀས་རྒྱལ་བུ་གཞོན་ནུ་གཟི་བརྗིད་ཀྱི་བདག་པོའི་རིམ་གྲོར་འདོང་འདོང་བར་ཟད་ཀྱི། དེ་ལྟ་བུའི་སེམས་བརྟན་པར་མ་བྱེད་ཅིག །གནས་དེ་ནི། ཐོབ་པར་ ཡང་ཤིན་ཏུ་དཀའོ། །དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐུ་ཉི་མ་དམ་པ་ཞེས་བྱ་བ་མཁྱེན་པ་དང་ཞབས་སུ་ལྡན་པ། བདེ་བར་གཤེགས་ པ༑ འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེའི་སྙིང་པོ་བྱང་ཆུབ་ ཆོས་ཀྱི་སྤྲིན་ཤིན་ཏུ་སྡུག་པའི་འོད་ཅེས་བྱ་བ་ཡང་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ལས་འོད་ཀྱི་སྤྲིན་འབྱུང་བ་ཞེས་བྱ་བ་དེའི་ནང་དུ་བྱུང་སྟེ། དེར་བཅོམ་ལྡན་འདས་དེ་ བཞིན་གཤེགས་པ་སྐུ་ཉི་མ་དམ་པ་ཐོག་མ་མངོན་པར་རྫོགས་པར་སངས་རྒྱས་ནས་ཞག་བདུན་ལོན་པ་དེ་བུ་མོ་ཤིང་རྟ་ལ་ཞོན་བཞིན་དུ་ཡུར་ཞིང་འཆོག་འཆོག་པའི་རྨི་ལམ་དུ་མཐོང་ ནས་སད་པར་གྱུར་པ་དང་སྔོན་གཉེན་བཤེས་སུ་གྱུར་པའི་ལྷ་མོ་ཞིག་གིས་བསྟན་པ། བུ་མོ། དེ་བཞིན་གཤེགས་པ་སྐུ་ཉི་མ་དམ་པ་དེ་སྙིང་པོ་བྱང་ཆུབ་ཆོས་ཀྱི་སྤྲིན་ཤིན་ཏུ་སྡུག་པའི་འོད་ཅེས་བྱ་ བ་རྣམ་པར་སྤྱོད་ཅིང་ཐོག་མ་མངོན་པར་རྫོགས་པར་སངས་རྒྱས་ནས་ཞག་བདུན་ལོན་ཏེ་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་ དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། ཚངས་པ་དང༌། གྱ་ནོམ་སྣང་བ་དང༌། འོག་མིན་གྱི་ལྷའི་ཚོགས་ཀྱིས་མདུན་དུ་བྱས་ཤིང་བཞུགས་ཏེ། དེར་སའི་ལྷ་མོ་ཐམས་ཅད་ཀྱང་ཀུན་ནས་འདུས། ཆུའི་ལྷ་མོ་དང༌། མེའི་ལྷ་མོ་དང༌། རླུང་གི་ལྷ་མོ་དང༌། རྒྱ་མཚོའི་ལྷ་མོ་དང༌། ཆུའི་ཀླུང་གི་ལྷ་མོ་དང༌། རིའི་ལྷ་མོ་དང༌། མཚན་མོའི་ལྷ་མོ་དང༌། སྐྱ་ རེངས་འཆར་བའི་ལྷ་མོ་དང༌། ནགས་ཚལ་གྱི་ལྷ་མོ་དང༌། ཤིང་གི་ལྷ་མོ་དང༌། སྨན་གྱི་ལྷ་མོ་དང༌། ལོ་ཏོག་གི་ལྷ་མོ་དང༌། གྲོང་ཁྱེར་གྱི་ལྷ་མོ་དང༌། རྐང་གིས་འགྲོ་བའི་ལྷ་མོ་དང༌། སྙིང་པོ་ བྱང་ཆུབ་ཀྱི་ལྷ་མོ་དང༌། ལུས་ཀྱི་འོད་ཟེར་གྱི་ལྷ་མོ་དང༌། སེམས་ཅན་གྱི་རིས་ཀྱི་ལྷ་མོ་དང༌། ནམ་མཁའི་ལྷ་མོ་དང༌། ཕྱོགས་ཐམས་ཅད་ཀྱི་ལྷ་མོ་དག་ཀྱང་བཅོམ་ལྡན་འདས་སྐུ་ཉི་མ་དམ་པའི་ཞལ་ བལྟ་བའི་ཕྱིར་ཀུན་ནས་འདུས་སོ། །ཞེས་ནས་དེ་ལྟར་དེས་དེ་བཞིན་གཤེགས་པ་མཐོང་བ་དང་དེ་བཞིན་གཤེགས་པའི་ཡོན་ཏན་ཐོས་པས་བག་ཚ་མེད་པ་ཐོབ་པར་གྱུར་ཏེ་སྐབས་སུ་བབ་ནས་ ༄༅། །རྒྱལ་བུ་གཞོན་ནུ་གཟི་བརྗིད་ཀྱི་བདག་པོའི་མདུན་དུ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གཟུགས་ཀྱི་མཆོག་གིས་འཇིག་རྟེན་ཁྱད་པར་འཕགས། ཡོན་ཏན་རྣམས་ཀྱིས་ཐམས་ཅད་ཕྱོགས་སུ་གྲགས། །ཤེས་རབ་སྟོབས་ཀྱི་བདག་དང་འདྲ་མ་མཆིས། །སྒྱུ་རྩལ་དགའ་བ་སྒྱུ་མའི་ཚུལ་ཀུན་འཚལ། །སྲོག་ཆགས་མང་པོ་སྟོང་འཕྲག་ དུ་མ་ཡིས། །འདོད་ཆགས་དབང་གིས་བདག་ལ་རབ་བལྟས་ཀྱང༌། །གཞོན་ནུ་བདག་ནི་འཇིག་རྟེན་གང་ལ་ཡང༌། །གློ་བ་ཆགས་པར་གྱུར་པ་གཅིག་མ་མཆིས། །སེམས་ཅན་ གང་ལའང་ཞེན་པར་གྱུར་པའམ། །གང་ལའང་ཁོང་ཁྲོར་བདག་གི་སེམས་མ་གྱུར། །གང་ལའང་དགྲ་མི་བགྱིད་དེ་ཞེ་མི་སྡང༌། །བདག་ནི་སེམས་ཅན་སྨན་པར་དགའ་བ་ལགས། ། སྐུ་གཞོན་སྐུ་མཆོག་ཡོན་ཏན་རབ་མངའ་ཁྱོད། །གང་ཚེ་བདག་གིས་གསལ་བར་མཐོང་གྱུར་པ། །དེ་ཚེ་དབང་པོ་ཀུན་ཀྱང་ཉམས་སུ་བདེ། །རྒྱ་ཆེ་ཡངས་པར་ཤིན་ཏུ་དགའ་བར་གྱུར། ། ཁྱོད་ཀྱི་དབུ་བཟང་ལྕང་ལོར་འཁྱིལ་བ་འམ། །རིན་ཆེན་རྣམ་སྣང་མདོག་ཏུ་མཐོན་མཐིང་གསལ། །ཞལ་གྱི་སྨིན་སྡུག་འཕྲལ་བ་ཤངས་སུ་མཛེས། །ཁྱོད་ཀྱི་ཞལ་སྔར་ལུས་འདི་ བདག་འབུལ་ལོ། །མཚན་གྱི་རབ་འཆང་གཟི་བརྗིད་ཆེ་མངའ་བ། །སྐུ་གཟུགས་གསེར་གྱི་རི་བོ་བཟང་པོ་འདྲ། །ཁྱོད་ཀྱི་སྤྱན་སྔར་བདག་ལྟ་མི་མཛེས་ཏེ། །ཟིལ་དུ་རློག་པས་སྣག་ཚའི་ གཟུགས་ཀྱང་འདྲ། །སྤྱན་གསལ་རིང་ལ་དཀར་ནག་འབྱེས་པས་མཛེས། །ཤིན་ཏུ་ཞལ་རྒྱས་སེངྒེའི་ཟ་འགྲམ་ཅན། །ཁྱོད་ཀྱི་གསུང་ནི་ཐོགས་པ་མ་མཆིས་ན། །གསུང་མཆོག་མངའ་ བས་བདག་ནི་གཟུང་དུ་གསོལ། །ཁྱོད་ཀྱི་ཞལ་ན་ལྗགས་ཡངས་མངའ་བ་ནི། །མདོག་དམར་ཡངས་པ་རིན་ཆེན་མཆོག་གི་འོད། །ཚངས་དབྱངས་ཡན་ལག་མཆོག་གི་གསུང་མངའ་བས། །གསུང་ ཞིང་འགྲོ་བ་རབ་ཏུ་དགའ་བ་མཛད། །ཁྱོད་ཀྱི་ཞལ་ན་ཐགས་བཟང་ཚེམས་མངའ་བ། །དུང་ལྟར་དྲི་མེད་ཤིན་ཏུ་རྣམ་པར་གསལ། །འཛུམ་ཞིང་བཞད་པ་རྣམ་པར་སྟོན་མཛད་ཀྱང༌། །སྐྱེས་བུ་དཔའ་ཁྱོད་འགྲོ་ བ་དགའ་བར་མཛད། །ཁྱོད་ཀྱི་སྐུ་ལ་མཚན་རབ་མཛེས་པ་རྣམས། །སུམ་ཅུ་རྩ་གཉིས་དག་ཅིང་འོད་ཀྱང་གསལ། །སྐུ་གཟུགས་བཟང་པོ་ཡོངས་སུ་དེས་བརྒྱན་པས། །མི་ཡི་དབང་པོ་འཁོར་ལོས་བསྒྱུར་ བ་བྱོན༑ ༑ཤིན་ཏུ་རྒྱས་པ་ཆེན་པོའི་མདོ། །སངས་རྒྱས་ཕལ་པོ་ཆེ་ཞེས་བྱ་བ་ལས། སྡོང་པོས་བརྒྱན་པའི་ལེའུ་སྟེ། བམ་པོ་བརྒྱ་བརྒྱད་པ། དེ་ནས་རྒྱལ་བུ་གཞོན་ནུ་གཟི་བརྗིད་ཀྱི་བདག་པོས་ བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་འདི་སྐད་ཅེས་སྨྲས་སོ། །བུ་མོ། །ཁྱོད་སུའི། ཁྱོད་ལ་ཡོངས་སུ་སྲུང་བ་ནི། གང་ཞིག་ཡོད། བུ་མོ། །ང་ལ་ནི། གཞན་གྱིས་ཡོངས་སུ་བཟུང་ བའི་བུད་མེད་བདག་གིར་བྱར་མི་རུང་ངོ༌། །ཞེས་ནས་དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །བལྟ་སྡུག་གཟུགས་ཀྱི་ཡོན་ཏན་ལེགས་ལྡན་པ། །མཚན་བཟང་བསོད་ནམས་རྣམ་ ༄༅། །པར་དག་པའི་ལུས། །ཁྱོད་ལ་དྲི་བའི་དོན་འདི་ང་ལ་སྨྲོས། །ལུས་མཆོག་ཁྱོད་ནི་སུ་ཡིས་ཡོངས་སུ་བཟུང༌། །ཁྱོད་ལ་ཕ་དང་མ་ནི་ཡོད་དམ་མེད། །ཁྱིམ་ཐབ་ མེད་དམ་ཁྱོད་ནི་སུ་ཞིག་དབང༌། །གཟུགས་མཛེས་ཁྱོད་ལ་སེམས་ཅན་གཞན་ནམ་གཅིག །བདག་གི་ཡིན་པར་འདུ་ཤེས་བྱེད་མེད་དམ། །ཁྱོད་ཀྱི་ཡིད་ནི་གསོད་ལ་མི་དགའ་གྲང༌། གཞན་ལས་མ་བྱིན་འཕྲོག་པར་མི་བྱེད་དམ། །འདོད་པས་ལོག་པར་གཡེམ་ལ་མི་དགའ་གྲང༌། །རྫུན་དུ་བརྗོད་སྨྲར་ཡིད་ནི་མི་སྨྲོས་སམ། །ཁྱོད་ཀྱི་བློ་གྲོས་མཛའ་དབྱེན་མི་འཇུག་གམ། ། ཚིག་བརླང་གཞན་ལ་གནོད་པར་མི་སྨྲ་གྲང༌། །གཞན་གྱི་ནོར་ལ་ཆགས་པར་སེམས་མེད་དམ། །འགྲོ་བ་རྣམས་ལ་གནོད་པར་མི་སེམས་གྲང༌། །ལྟ་བའི་འབྲོག་དགོན་ལམ་དུ་མ་ཞུགས་ གྲང༌། །ལས་ཀྱི་རྒྱུད་ལ་ཡེ་རྔམ་སེམས་མེད་དམ། །གཡོ་མདོག་སྒྱུ་ཡི་དབང་དུ་མི་འགྲོ་འམ། །མི་འཐད་འཇིག་རྟེན་གནོད་པར་མི་བྱེད་གྲང༌། །ཕ་མ་གཉེན་དང་མཛའ་བཤེས་བླ་མ་ ལ༑ ༑སྲི་ཞུ་རིམ་གྲོ་བྱ་བའི་ཚུལ་འཆང་ངམ། །ཕོངས་པར་གྱུར་པ་ཡོངས་སུ་བསྡུ་དོན་དུ། །ཁྱོད་ཀྱི་ཡིད་ལ་སྦྱིན་པའི་སེམས་ཡོད་དམ། །ཆོས་དང་མཐུན་པར་དུས་སུ་འདོམས་བྱེད་ ཅིང༌། །ལུས་དང་སེམས་ཡིད་ཡོངས་སུ་དག་བྱེད་ལ། །ཡང་དག་ལས་སུ་རུང་བ་སྐྱེད་བྱེད་པའི། །དགེ་བཤེས་རྣམས་ལ་དགའ་བའི་སེམས་ཡོད་དམ། །སངས་རྒྱས་རྣམས་ལ་རིམ་གྲོར་ བྱེད་ལྡན་ནམ། །སངས་རྒྱས་སྲས་ལ་དགའ་མཆོག་ཡོད་དམ་མེད། །གང་ལས་བདེ་གཤེགས་སྲས་རྣམས་སྐྱེར་འགྱུར་བའི། །ཆོས་ཀྱི་དམ་པ་དེ་ནི་ཤེས་མི་ཤེས། །ཆོས་ཡིད་མཆོག་ལ་ གནས་པར་ཁྱོད་བྱེད་གྲང༌། །ཆོས་མིན་སྤྱད་པའི་བློ་གྲོས་མེད་གྲང་ངོ༌། །ལེགས་པ་མཐའ་ཡས་ཡོན་ཏན་རྒྱ་མཚོ་ལ། །གུས་པའི་སྲི་ཞུ་དགའ་སེམས་མཆོག་ཡོད་དམ། །སྐྱེ་བོ་མགོན་ མེད་ཕོངས་པར་གྱུར་པ་ཡི། །འབྲེན་པ་རྣམས་ལ་བྱམས་པའི་ཡིད་ཡོད་དམ། །ངན་སོང་འགྲོ་བའི་ལམ་ལ་ཞུགས་པ་ཡི། །ཤིན་ཏུ་ཉམ་ཐག་སྙིང་རྗེས་སེམས་གྲང་ངོ༌། །གཞན་གྱི་ཕུན་ སུམ་ཚོགས་པ་མཐོང་གྱུར་ན། །ཁྱོད་ནི་དགའ་བ་མཆོག་དང་ལྡན་འགྱུར་རམ། །སྐྱེ་བོ་ཉོན་མོངས་རྣམས་ཀྱིས་འཁོལ་གྱུར་ལ། །ཤེས་རབ་མཐུ་བསྐྱེད་བཏང་སྙོམས་བྱེད་མི་བྱེད། །མི་ ཤེས་གཉིད་ལོག་སྐྱེ་བོ་མང་མཐོང་ན། །བྱང་ཆུབ་དམ་པར་སྨོན་ལམ་འདེབས་བྱེད་གྲང༌། །བསྐལ་པ་མཐའ་ཡས་སྤྱད་པ་སྤྱོད་པ་ན། །སྨོན་ལམ་དམ་པས་སྐྱོ་བར་མི་འགྱུར་གྲང༌། །དེ་ ནས་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པའི་མ་སྦྲུལ་ཚོད་མའི་གཙོ་མོ་བལྟ་ན་སྡུག་པས། རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་ལ་འདི་སྐད་ཅེས་སྨྲས་སོ། །གཞོན་ནུ། བདག་གི་བུ་ མོ་འདི་ནི། རྫུས་ཏེ་བྱུང་བ་པདྨོའི་ནང་ནས་སྐྱེས་པ་སྟེ། སྔོན་ཆད་ཁྱིམ་གྱི་ནང་ནས་ཕྱི་རོལ་ཏུ་མ་བྱུང་ངོ༌། །ཞེས་ནས་དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །བུ་མོ་འདི་ལ་ཁྱོད་ཀྱིས་གང་ ༄༅། །སྨྲས་པ༑ ༑དེ་ནི་བདག་གིས་རིམ་པས་ཁྱོད་ལ་བརྗོད། །ཇི་ལྟར་བུ་མོ་འདི་སྐྱེས་བསྐྱེད་བསྐྱེད་པ། །བདག་གིས་ཁྱོད་ལ་གསོལ་གྱི་གསན་དུ་གསོལ། །གང་ཚེ་དགུང་ སངས་ཁྱོད་ནི་བལྟམས་གྱུར་པ། །དེ་ཚེ་བདག་གི་བུ་མོ་འདི་སྐྱེས་ཏེ། །རྫུས་ཏེ་དྲི་མེད་པདྨོའི་སྦུབས་ནས་བྱུང༌། །ཡན་ལག་ཀུན་ཚང་མིག་ཡངས་འདི་ཡང་སྐྱེས། །དུས་ཀྱི་ནང་ན་སོས་ ཀ་དུས་མཆོག་ལ། །སྨན་དང་ལོ་ཏོག་མྱུ་གུ་ཐོན་པའི་ཚེ། །སཱ་ལའི་ར་བ་བཟའ་ཤིང་རབ་མཆོག་ཏུ། །བདག་ནི་རྩེ་དགའ་དེ་ཁྲོད་མཆི་མཆི་སྟེ། །སྣ་ཚོགས་ཡལ་གའི་ལོ་མ་རྒྱས་གྱུར་ ཅིང༌། །ཞུགས་ཤིང་མེ་ཏོག་སྡུག་རྒྱས་སྤྲིན་གྱི་མདོག །བྱ་བྲན་སྣ་ཚོགས་སྒྲ་སྙན་ཞུགས་ཤིང་ནང༌། །ནགས་ཁྲོད་མྱ་ངན་མ་མཆིས་དགར་མཆིས་མཆིས། །རྒྱན་དང་ལྡན་ཞིང་ཤིན་ཏུ་ ཡིད་འོང་ལ། །རིན་ཆེན་རཏྣ་སྣ་ཚོགས་འཚལ་བ་རྣམས། །རོལ་མོ་གླུ་ལ་ཤིན་ཏུ་བསླབ་པ་ཡི། །བུ་མོ་བརྒྱ་ཕྲག་བརྒྱད་དང་བདག་ཀྱང་ལྡན། །སྤོས་མཆོག་ལྡན་པའི་པུཎྜ་རཱི་ཀ་དང༌། ། རྫིང་འགྲམ་མེ་ཏོག་སིལ་མས་གཏམས་པ་ཡིས། །ས་ཕྱོགས་དེ་ན་བུད་མེད་མང་པོ་དང༌། །བདག་ཅག་དེ་ན་དགའ་བར་མཆིས་མཆིས་ན། །ཆབ་དབུས་དེ་ནས་རིན་ཆེན་པདྨོའི་མཆོག། འདབ་མ་སྟོང་དང་ལྡན་པ་བྱུང་བར་གྱུར། །ལོ་མ་རིན་ཆེན་ཡུ་བ་བཻ་ཌཱུཪྻ། །སྙིང་པོ་འཛམ་བུ་ཆུ་ཀླུང་གསེར་ལས་བགྱིས། །སྤོས་མཆོག་རིན་ཆེན་དམ་པའི་ཟེ་བ་ཅན། །འོད་ཆེན་ཛམྦུའི་ རྒྱལ་མཚན་ཀུན་ཏུ་འཕྲོ། །དེ་ཚེ་དགུང་ལ་གདུགས་ཤིག་ཤར་ཏམ་ཞེས། །སྐྱེ་བོ་ཀུན་ཀྱང་ཡིད་གཉིས་འཚལ་བར་གྱུར། །དགུང་སངས་རྒྱུར་ནས་པདྨོ་ཆེན་པོ་དེ། །གདུགས་ཀྱི་འོད་ཀྱིས་ རབ་ཏུ་རྒྱས་བགྱིས་ནས། །སྣང་བ་དེ་དང་སྒྲ་སྙན་རབ་ཀྱང་བཀྱེ། །འདི་འབྱུང་དེ་ནི་སྔོན་གྱི་ལྟས་སུ་བྱུང༌། །བུད་མེད་རིན་ཆེན་འདི་འདྲ་འཇིག་རྟེན་དུ། །ཚུལ་ཁྲིམས་དམ་པ་རྣམ་པར་དག་ པས་བྱུང༌། །སུག་ལས་བགྱིས་པ་ཆབ་འཚལ་མི་འགྱུར་བས། །འདི་ནི་སྔོན་ཆད་ལེགས་པར་སྤྱད་པའི་འབྲས། །སྐྲ་ནི་མཐོན་མཐིང་མིག་ཡངས་ཨུཏྤ་ལ། །ཚངས་པའི་དབྱངས་ལྡན་ཁ་ དོག་རྣམ་དག་ལྡན། །ཕྲེང་བ་རྒྱན་མཆོག་ཆ་ལུགས་དབྱིབས་སུ་ཤིས། །དཔལ་ལྟར་དྲི་མེད་པདྨོའི་མཆོག་ལས་སྐྱེས། །ལུས་ནི་རྣམ་དག་ཡན་ལག་རྐྱེན་དུ་མཉམ། །ལུས་ཀྱི་དབྱིབས་ལེགས་ ཡན་ལག་ཡོངས་སུ་ཚང༌། །གསེར་གྱི་གཟུགས་ལ་ནོར་བུས་ཕྱིས་པ་འདྲ། །ཕྱོགས་ཀུན་འོད་ཀྱིས་རྣམ་པར་གདའ་བར་གསལ། །ལུས་ལས་ཙནྡན་རྒྱལ་པོའི་སྤོས་ཀྱི་དྲི། །ཕྱོགས་སུ་རྒྱས་པར་འདི་ ཡི་ལུས་ལས་འབྱུང༌། །སྒྲ་སྙན་ལྷ་རྫས་ཡིད་དུ་འོང་བརྗོད་ཚེ། །ཁ་ནས་ཨུཏྤ་ལ་ཡི་ངད་ཀྱང་ལྡན། །འདི་ནི་གང་ཚེ་འཛུམ་ཞིང་དགོད་པའི་ཚེ། །རོལ་མོའི་སྒྲ་སྙན་དེ་ཚེ་འབྱུང་བར་འགྱུར། ། བུད་མེད་རིན་ཆེན་འཇིག་རྟེན་འདིར་བྱུང་སྟེ། །ཐ་མ་ལ་ཀུན་གྱི་དབང་དུ་འགྱུར་མ་ལགས། །ཁྱོད་མ་གཏོགས་པར་མི་ཡི་འཇིག་རྟེན་ན། །འདི་ཡི་བདག་པོ་གཞན་ནི་གཅིག་མ་མཆིས། །མཚན་ ༄༅། །རབ་བརྒྱན་པའི་སྐུ་གཟུགས་མཛེས་མངའ་བ། །ཁྱོད་ཀྱི་ཞལ་སྔར་བུ་མོ་འདི་བཞེས་གསོལ། །འདི་ནི་ཧ་ཅང་མི་རིང་མི་ཐུང་སྟེ། །ཧ་ཅང་མི་སྤོ་མ་ཧ་ཅང་ཕྲ་མ་ ལགས༑ ༑ལྟོ་ནི་གཞུ་འདྲ་ནུ་མ་ཤས་ཀྱང་རྒྱས། །ཡན་ལག་སྐྱོན་བྲལ་འདི་ནི་ཁྱོད་ལ་འོས། །གྲངས་དང་ཡི་གེ་ཤེས་བགྱི་ཚུལ་རྣམས་དང༌། །ལག་བརྡའི་ཚུལ་དང་གཙུག་ལག་ཚུལ་ ལ་མཁས། །འཇིག་རྟེན་ཀུན་ན་བཟོ་རྣམས་ཇི་སྙེད་པ། །མ་ལུས་དེ་ལ་འདི་ནི་ཕ་རོལ་ཕྱིན། །མདའ་གཞུའི་ཚུལ་ལའང་རྣམ་པ་བརྒྱས་སུ་མཁས། །འཕོང་གི་ཆོ་ག་རྣམ་པ་རངས་པར་ རྟོགས༑ ༑དགྲ་ཡིད་བཞོ་ཞིང་དབབ་པ་ཀུན་ལ་ཡང༌། །འདི་ནི་མཆོག་ཏུ་ཕ་རོལ་ཕྱིན་པར་གྱུར། །ལུས་རྣམས་ཀུན་ནས་རིན་ཆེན་རྣམ་དག་པའི། །འོད་མཆོག་འཁོར་གྱིས་ཤིན་ཏུ་ མཛེས་པ་སྟེ། །སྔོན་གྱི་ལེགས་པས་ཤིན་ཏུ་སྡུག་པར་བརྒྱན། །འདི་ནི་ཁྱོད་ཀྱི་ཕྱག་རྗེད་ཁྱོད་ལ་འོས། །མི་ཡི་འཇིག་རྟེན་གནས་རྣམས་ཇི་སྙེད་པ། །དེ་དག་གསོ་བའི་ཚུལ་གྱི་ཆོ་ག་ འཚལ༑ ༑དེ་དག་མ་ལུས་ཐམས་ཅད་ཞིར་བགྱི་ནའང༌། །མ་ནོར་སྨན་གྱི་ཆོ་གས་གསོ་ལ་མཁས། །ཛམྦུའི་རྒྱལ་མཚན་སྐད་རྣམས་ཐམས་ཅད་དང༌། །སྐྱེ་བོའི་ངེས་ཚིག་མ་ལུས་བྱེ་ བྲག་དང༌། །འཇིག་རྟེན་ཐ་སྙད་བརྗོད་པའི་མཚམས་སྦྱར་བ། །སྣ་ཚོགས་ཀུན་ལའང་འདི་ནི་ཕ་རོལ་ཕྱིན། །དབྱངས་ཀྱི་ཡན་ལག་མངོན་པར་སྒྲུབ་པའི་ཚུལ། །དེ་དག་བྱེ་བྲག་ཚུལ་ལའང་ རབ་ཏུ་ཞུགས། །འཇིག་རྟེན་གླུ་གར་རྣམ་པ་ཇི་སྙེད་པ། །མ་ལུས་དེ་རྣམས་ཀུན་གྱི་ཚུལ་ཡང་འཚལ། །རོལ་མོ་སིལ་སྙན་དག་གི་ཐབས་རྣམས་དང༌། །བཞད་གད་རོལ་མོའི་ཚུལ་ལ་རྣམ་པར་ མཁས༑ ༑ཆགས་དང་མ་ཆགས་མི་རྣམས་མངོན་འཚལ་ཀྱང༌། །ཁོང་ཁྲོ་ཆགས་པར་འགྱུར་བ་མ་མཆིས་སོ། །འཇིག་རྟེན་བུད་མེད་སྒྲ་རྣམས་ཇི་སྙེད་པ། །ཁྱད་པར་ནང་དུ་དེ་ལ་མ་ལུས་ འཚལ༑ ༑བུད་མེད་སྐྱེ་བོའི་སྐྱོན་དུ་བགྱི་བ་རྣམས། །གྲངས་མེད་དེ་དག་འདི་ལ་གཅིག་མ་མཆིས། །ཐིལ་གྱིས་བལྟ་དང་ཟུར་གྱིས་བལྟ་བ་དང༌། །ཡན་ལག་བསྟབས་དང་ཡན་ལག་རྣམས་ བསྟན་དང༌། །ཤེས་ཉེན་ཀུན་ལ་མཁས་པའི་མཐར་ཕྱིན་ཏེ། །ཁྱོད་ཀྱི་དགོངས་པ་ཡོངས་སུ་རྫོགས་པར་བགྱིད། །འདི་ནི་ཕྲག་དོག་སེར་སྣ་མ་མཆིས་ཏེ། །འདོད་པ་ཞེ་དུག་མི་ལྡང་ སྡིག་མི་བགྱིད། །བཟོད་ཅིང་དྲང་ལ་མཉེན་ཞིང་དེས་པ་སྟེ། །མི་ཁྲོ་མི་བརླང་ཤིན་ཏུ་མཁས་པ་ལགས། །ལྡང་བའི་ངང་ཚུལ་ཡིད་དུའོང་བའི་ངག །རྟག་ཏུ་བླ་མའི་ཐུགས་དང་སྦྱོར་བ་སྟེ། །སྐུ་ ཉམས་གར་བདེ་ལྟ་ཞིང་སྲི་ཞུ་ཆེ། །ཁྱོད་ཀྱི་སྤྱོད་མཐུན་རྗེས་སུ་སྙེགས་ཚུལ་དང་མཐུན། །རྒྱས་ཤིང་གཏུགས་དང་ནད་དང་ལྡན་པ་དང༌། །ཕོངས་པ་ཤིན་ཏུ་སྡུག་བསྔལ་གྱུར་པ་དང༌། །མིག་ དང་བྲལ་ཞིང་མགོན་སྐྱབས་མ་མཆིས་ལ། །འདི་ནི་སྙིང་བརྩེ་རྟག་ཏུ་སྐྱེད་པ་ལགས། །འདི་ནི་རྟག་ཏུ་གཞན་དོན་སེམས་ལ་བརྩོན། །བདག་ལ་སྨན་པ་སེམས་པར་བགྱིད་མ་མཆིས། །འཇིག་ ༄༅། །རྟེན་ཀུན་ལ་སྨན་པར་དགའ་བ་སྟེ། །རླབས་ཆེན་སེམས་ཀྱི་ཡོན་ཏན་ཀུན་གྱིས་བརྒྱན། །མཆིས་སམ་ཉལ་ལམ་མཆི་འམ་འགྲེང་ཡང་རུང༌། །སྨྲའམ་ མི་སྨྲ་འཛུམ་ཞིང་དགོད་ཀྱང་རུང༌། །རྟག་ཏུ་བག་མཆིས་དྲན་པ་ཤེས་བཞིན་ཏེ། །འདི་ནི་འཇིག་རྟེན་ཀུན་གྱིས་རྟག་ཏུ་བསྔགས། །བསོད་ནམས་ལྡན་པས་ཀུན་ཏུ་རྣམ་པར་ སྣང༌། །འགྲོ་བ་ཀུན་ཀྱང་རྟག་ཏུ་དགའ་བ་སྟེ། །འདི་ལ་ལྟ་བས་འཇིག་རྟེན་ངོམས་མི་འགྱུར། །འདི་ནི་གང་ལའང་ཆགས་པར་འགྱུར་མ་མཆིས། །དགེ་བ་ཤེས་རྣམས་ལ་སྲི་ ཞུ་འདི་ཆེ་སྟེ། །དེ་དག་མཐོང་བར་རྟག་པར་རབ་ཏུ་དགའ། །རྗེས་སུ་ཅི་འབྱུང་ལྟ་ཞིང་སྐྱོན་མེད་ཚུལ། །སེམས་བདག་བརྟན་པ་རི་རབ་རི་དང་འདྲ། །འདི་ནི་བསོད་ནམས་ མཆོག་གིས་རྟག་ཏུ་བརྒྱན། །མི་མཛའ་དགྲར་ལེན་འདི་ལ་ཡོང་མ་མཆིས། །འདི་ཡི་ཤེས་འདྲ་བུད་མེད་གཅིག་མ་མཆིས། །རྒྱལ་སྲས་ཁྱོད་ལ་འདི་ནི་ཚུལ་དང་མཐུན། །དེ་ནས་ རྒྱལ་བུ་གཟི་བརྗིད་ཀྱི་བདག་པོ་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ལས་འོད་ཀྱི་སྤྲིན་འབྱུང་བར་ཕྱིན་ཏེ། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པའི་མ་སྤྲུལ་ཚོང་ མའི་གཙོ་མོ་བལྟ་ན་སྡུག་བའི་མདུན་དུ་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་འདི་སྐད་ཅེས་སྨྲས་སོ། །བུ་མོ། ང་ནི། བླ་ན་མེད་པ་ཡང་དག་པར་རྫོགས་པའི་བྱང་ ཆུབ་ཏུ་ཞུགས་པ་ཡིན་ཏེ། དེ་བས་ན། ངས་ཐམས་ཅད་མཁྱེན་པའི་ཚོགས་ནི། ཚད་མེད་པ་ཞིག་བསག་པར་བྱ་དགོས། བསྐལ་བ་མཐའ་དང་དབུས་མེད་པ་ཞིག་ཏུ་བྱང་ཆུབ་སེམས་ དཔའི་སྤྱོད་པ་སྤྱད་དེ་ཕ་རོལ་ཏུ་ཕྱིན་པ་ཐམས་ཅད་ནི། ཡོངས་སུ་རྫོགས་པར་བྱ་དགོས། ཕྱི་མའི་མཐའི་བསྐལ་བའི་མུར་ཐུག་པར་ནི། དེ་བཞིན་གཤེགས་པ་རྣམས་ལ་མཆོད་པར་བྱ་ དགོས་ཏེ། སངས་རྒྱས་ཐམས་ཅད་ཀྱི་བསྟན་པ་ནི། ཡོངས་སུ་གཟུང་བར་བྱ། སངས་རྒྱས་ཀྱི་ཞིང་ཐམས་ཅད་ནི། ཡོངས་སུ་སྦྱང་བར་བྱ། དེ་བཞིན་གཤེགས་པ་ཐམས་ཅད་ཀྱི་རིགས་ ནི༑ མི་གཅད་པར་བྱ། སེམས་ཅན་གྱི་རྒྱུད་ཐམས་ཅད་ནི། ཡོངས་སུ་སྨིན་པར་བྱ། སེམས་ཅན་ཐམས་ཅད་ཀྱི་འཁོར་བའི་སྡུག་བསྔལ་ནི། རྣམ་པར་བཟློག་པར་བྱ། མཐའ་ལས་ རྒལ་བར་བདེ་བ་ལ་ནི། སེམས་ཅན་རབ་ཏུ་དགོད་པར་བྱ། སེམས་ཅན་ཐམས་ཅད་ཀྱི་ཡེ་ཤེས་ཀྱི་མིག་ནི། ཡོངས་སུ་དག་པར་བྱ། བྱང་ཆུབ་སེམས་དཔའ་ཐམས་ཅད་ཀྱིས་བསྒྲུབ་པ་ ལ་ནི༑ བརྩོན་པར་བྱ། བྱང་ཆུབ་སེམས་དཔའ་ཐམས་ཅད་ཀྱི་མཉམ་པ་ཉིད་ལ་ནི། གནས་པར་བྱ། བྱང་ཆུབ་སེམས་དཔའ་ཐམས་ཅད་ཀྱིས་ནི། ཡོངས་སུ་བསྒྲུབ་པར་བྱ། སེམས་ ཅན་གྱི་ཁམས་ཐམས་ཅད་ནི། ཡོངས་སུ་སྦྱང་བར་བྱ། སེམས་ཅན་ཐམས་ཅད་ཀྱི་ཕོངས་པ་ཡོངས་སུ་གཅད་པའི་ཕྱིར་བདག་གི་ནོར་ཐམས་ཅད་ནི། གཏང་བར་བྱ། ཕྱི་མའི་མཐའི་མུར་ ༄༅། །ཐུག་པའི་བསྐལ་པར་སྤྱིན་པའི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ་ཁ་ཟས་དང་བཏུང་བའི་སྤྱིན་པས་ནི། སེམས་ཅན་ཡོངས་སུ་ཚིམ་པར་བྱ། ཡོ་བྱད་ཀྱི་དངོས་ པོ་ཐམས་ཅད་ཡོངས་སུ་བཏང་བས་ནི། སློང་བའི་ཚོགས་ཐམས་ཅད་ཡོངས་སུ་ཚིམ་པར་བྱ་དགོས་ཏེ། དེ་ལྟར་བདོག་པ་ཐམས་ཅད་ཡོངས་སུ་གཏོང་བ་ལ་ནན་ཏན་ཉམས་སུ་ལེན་ པའི་ཚེ་ཕྱི་ནང་གི་དངོས་པོ་གང་ཅི་ཡང་རུང་སྟེ། ཡོངས་སུ་མི་གཏང་བ་དེ་ལྟ་བུ་མེད་པས་དེ་ལྟར་ངས་བུ་དང༌། བུ་མོ་དང༌། ཆུང་མ་ཡང་སྦྱིན་པར་བྱ་དགོས། །མིག་དང༌། མགོ་དང༌། རྐང་ལག་ དང༌། ཡན་ལག་དང༌། ཉིང་ལག་ཐམས་ཅད་ཀྱང་ཡོངས་སུ་གཏང་དགོས་ན། དེའི་ཚེ་ཁྱོད་གཞན་ལ་བྱིན་ན། །ངའི་སྦྱིན་པའི་བགེགས་སུ་འགྱུར་རོ། །བུ་ཡིད་དུ་འོང་བ་ཡོངས་སུ་བཏང་ན། ཡིད་མི་དགའ་བར་འགྱུར་རོ། །ལུས་དང་སེམས་ཀྱི་སྡུག་བསྔལ་ཡང་མང་པོ་ཞིག་ཉམས་སུ་མྱོང་བར་འགྱུར་རོ། །ང་ལ་བདོག་པ་ཐམས་ཅད་ཡོངས་སུ་བཏང་བར་བྱས་ན། སེར་སྣའི་ སེམས་སུ་འགྱུར་རོ། །ངའི་ཡན་ལག་དང༌། ཉིང་ལག་གཏུབས་ཤིང་སློང་མོ་བ་རྣམས་ལ་གཏོང་བའི་ཚེ་ཡིད་མི་དགའ་བར་ཡང་འགྱུར་རོ། །ནམ་ཞིག་ན་ངས་ཁྱོད་བོར་ཏེ། དེ་བཞིན་ གཤེགས་པའི་བསྟན་པ་ལ་རབ་ཏུ་འབྱུང་བར་འགྱུར་བ་དེ་ལྟ་བུའི་དུས་ཀྱང་ཡོད་དེ། དེའི་ཚེའང་ཁྱོད་ཡིད་མི་དགའ་བར་འགྱུར་རོ། །ཞེས་ནས་རྒྱལ་བུ་གཟི་བརྗིད་བདག་པོས་དེའི་ཚེ་བུ་མོ་ དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་ཚིགས་སུ་བཅད་དེ་སྨྲས་པ། ངས་ནི་འགྲོ་ཀུན་སྙིང་རྗེ་རབ་བསྐྱེད་དེ། །ཡུན་རིང་མཆོག་ནས་བྱང་ཆུབ་རབ་ཞུགས་པས། །ཡང་དག་བྱང་ཆུབ་ ཚོགས་ཆེན་རྒྱ་མཚོ་རྣམས། །ཚད་མེད་ཐམས་ཅད་ཡོངས་སུ་རྫོགས་བྱ་དགོས། །བསྐལ་པ་རྒྱ་མཚོ་མཐའ་དང་དབུས་མེད་པར། །མཁའ་ལྟར་ཚད་མེད་སྨོན་ལམ་རྣམ་སྦྱང་ཞིང༌། །དེ་བཞིན་ གཤེགས་པ་བཞུགས་པའི་ས་ཡི་རྣམས། །བསྐལ་པ་མཐའ་ཡས་ཡོངས་སུ་སྦྱང་ཡང་དགོས། །རྒྱལ་བ་དུས་གསུམ་འབྱུང་བ་ཐམས་ཅད་ཀྱི། །ཕ་རོལ་ཕྱིན་པའི་ལམ་ལ་ངས་བསླབ་སྟེ།། ཡེ་ཤེས་བླ་ན་མེད་པའི་ཚུལ་ཆེན་གྱིས། །བྱང་ཆུབ་ལམ་མཆོག་རྣམ་པར་སྦྱང་ཡང་དགོས། །ཕྱོགས་རྣམས་ཀུན་གྱི་ཞིང་རྣམས་ཐམས་ཅད་ཀྱང༌། །ཀུན་ནས་ཉོན་མོངས་རྣམ་པར་སྦྱང་བར་བྱ། ། འཇིག་རྟེན་ཀུན་གྱི་མི་ཁོམ་ཐམས་ཅད་དང༌། །ངན་སོང་ཀུན་ཀྱང་རྣམ་པར་བཟློག་དགོས་སོ། །ཉོན་མོངས་བསྒྲིབས་ཤིང་གཏི་མུག་མུན་འཐོམས་པའི། །སེམས་ཅན་ཀུན་ཀྱང་མ་ལུས་ རྣམ་སྦྱང་དགོས། །སྣ་ཚོགས་ཐབས་ཀྱིས་ཡོངས་སུ་སྦྱངས་བྱས་ཏེ། །ཐམས་ཅད་མཁྱེན་ལམ་ཚུལ་ལ་དགོད་ཀྱང་དགོས། །ཆགས་མེད་ས་རྣམས་ཀུན་ཀྱང་ངས་སྦྱངས་ཏེ། །བསྐལ་བ་ རྒྱ་མཚོར་རྒྱལ་བ་མཆོད་པར་བྱ། །འགྲོ་བ་མ་ལུས་ཀུན་ལ་བྱམས་བསྐྱེད་དེ། །འཇིག་རྟེན་དག་ཏུ་མ་ལུས་སྦྱིན་གཏང་དགོས། །སློང་བ་ཀུན་ནས་འདུས་ཤིང་འོངས་མཐོང་ནས། །ཐམས་ ༄༅། །ཅད་གཏང་བར་རྟག་ཏུ་བརྩོན་གྱུར་ན། །དེའི་ཚེ་ཁྱོད་ནི་ང་སེམས་མི་མཐུན་ཏེ། །ཞུམ་ཞིང་དམའ་ལ་འཇུངས་པར་མི་འགྱུར་རམ། །ང་ཡི་མགོ་འདོད་འོངས་པར་ ངས་མཐོང་སྟེ། །བྱང་ཆུབ་སེམས་དཔའི་སྤྱད་པ་སྤྱོད་གྱུར་ན། །དེ་ཚེ་ཁྱོད་ནི་སྡུག་བསྔལ་གདུངས་འགྱུར་གྱི། །འདི་འདྲའི་དོན་ཐོས་རབ་ཏུ་བརྟན་པར་གྱིས། །ང་ཡི་རྐང་ལག་གཏུབས་པ་ མཐོང་གྱུར་ན། །ཁྱོད་ནི་མི་དགའ་དེ་ཚེ་སློང་བ་ལ། །བུད་མེད་ངང་གིས་ཚིག་དྲག་མི་བཟོད་སྨྲ། །དོན་འདི་ཐོས་ཤིང་སེམས་ལ་ཡོངས་སུ་སོམས། །ཕངས་པའི་དངོས་དང་དེ་བཞིན་བུ་ རྣམས་དང༌། །ཁྱོད་ཀྱང་སློང་བའི་ཚོགས་ལ་སྦྱིན་དགོས་ཀྱི། །དོན་འདི་ཐོས་ཏེ་མི་དགའ་མེད་ན་ལྟ། །ཁྱོད་དགའ་ཐམས་ཅད་དེ་བཞིན་བྱ་ལ་རག །དེ་སྐད་ཅེས་སྨྲས་པ་དང༌། བུ་མོ་དགའ་ བའི་འོད་ཀྱི་དཔལ་ཤིན་ཏུ་སྦྱངས་པས་རྒྱལ་བུ་གཟི་བརྗིད་ཀྱི་བདག་པོ་ལ་འདི་སྐད་ཅེས་སྨྲས་སོ། །གཞོན་ནུ་ཇི་སྐད་གསུང་བ་དེ་ལྟར་བགྱིའོ། །བདག་ནི། ཁྱོད་ཅི་དགྱེས་པ་དང༌། ཅི་ བཞེད་པར་ལོངས་སྤྱོད་པ་དང༌། གང་དུ་དགྱེས་པར་མཆི་བ་དང༌། ཐམས་ཅད་དུ་ཡང་སླད་ནམ་ལས་པས་རྗེས་སུ་འབྲང་བ་དང༌། རྟག་ཏུ་ཞམ་རིང་སླེབ་པ་དང༌། དོན་ཐམས་ཅད་ལ་བརྩོན་ པ་དང༌། ཐུགས་དང་མཐུན་པར་སྤྱད་པ་དང༌། མེད་པར་ཉམས་སུ་བླང་བ་དང༌། མི་མཐུན་པ་མ་མཆིས་པར་ནན་ཏན་དུ་བགྱི་བའི་ཚུལ་ལ་སྤྱད་པར་བགྱིའོ། །ཞེས་ནས་བུ་མོ་དགའ་བའི་ འོད་ཀྱི་དཔལ་ཤིན་ཏུ་སྦྱངས་པས་རྒྱལ་པོའི་སྲས་གཟི་བརྗིད་ཀྱི་བདག་པོ་ལ་ཚིགས་སུ་བཅད་དེ་སྨྲས་པ། བདག་གི་ལུས་འདི་སེམས་ཅན་དམྱལ་བ་ཡི། །ཞུགས་ཀྱིས་ཡོངས་གདུངས་ཞུ་བར་ གྱུར་ཀྱང་རུང༌། །ཁྱོད་སྤྱོད་སྐལ་བ་མཉམ་པའི་ཕྱག་རྗེད་དུ། །ཚེ་རབས་རྒྱ་མཚོར་བདག་གིས་སྤྲོ་བར་བགྱི། །ཚེ་རབས་མཐའ་ཡས་སྐྱེས་པ་རེ་རེ་ཞིང༌། །བདག་གི་ལུས་ནི་ཤིན་ཏུ་གཏུབས་ གཤགས་ཀྱང༌། །བརྟན་དམ་སེམས་ཀྱིས་རབ་ཏུ་སྤྲོ་བར་བགྱི། །ངང་དགེ་ཁྱོད་ཀྱིས་བདག་གིས་ཁྱིམ་ཐབ་མཛོད། །ཁོར་ཡུག་རི་ཡིས་བསྐལ་བ་མཐའ་ཡས་སུ། །བདག་གི་མགོ་ནི་ཡོངས་ སུ་བཏགས་གྱུར་ཀྱང༌། །སེམས་ལ་མི་བདེ་མ་མཆིས་དད་པར་བགྱི། །ཁྱོད་ཀྱིས་རྟག་པར་བདག་གི་ཁྱིམ་ཐབ་མཛོད། །ཁྱོད་ཀྱིས་ཚེ་རབས་གྲངས་མེད་ཐམས་ཅད་དུ། །བདག་ལ་ཐུགས་བརྟན་ ཐུགས་ཀྱིས་མངའ་མཛད་དེ། །ཡན་ལག་ཤ་གཏུབས་གཞན་ལ་སྩལ་བ་མཛོད། །ཁྱོད་ཀྱི་ཆོས་ལ་བདག་ཀྱང་བརྟན་གཞག་གསོལ། །བདག་གི་ལུས་ནི་སླད་ན་མ་ལས་པར། །སྐྱེས་བུ་ལྷ་ཡི་སྲས་ པོ་ཁྱོད་ལ་དབུལ། །བསྐལ་པ་རྒྱ་མཚོར་སྤྱོད་པ་མཛད་པའི་ཚེ། །སྐྱེ་བོ་སློང་བ་རྣམས་ལ་དགྱེས་པར་སྩོལ། །སེམས་ཅན་ཀུན་ལ་ཐུགས་རྗེ་མཐའ་ཡས་པ། །བསྐྱེད་དེ་སེམས་ཅན་རྒྱ་ མཚོ་བསྡུ་སླད་དུ། །བྱང་ཆུབ་དམ་པ་མཆོག་ཏུ་ཁྱོད་ཞུགས་པས། །དེ་སླད་བདག་ཀྱང་ཐུགས་རྗེས་བཟུང་བ་མཛོད། །ལོངས་སྤྱོད་དོན་དང་ནོར་གྱི་དོན་མ་ལགས། །འདོད་སྤྱོད་དགའ་བ་ ༄༅། །བསྐྱེད་པའི་དོན་སླད་དུ། །སེམས་ཅན་མཆོག་ཁྱོད་ཁྱོར་འཚལ་མ་ལགས་ཀྱི། །ཁྱོད་དང་སྤྱོད་པ་མཐུན་པར་སྤྱད་སླད་དུའོ། །སྤྱན་གསལ་མཛེས་ཤིང་ བྱམས་པའི་ཐུགས་མངའ་བ། །ཁྱོད་ནི་འཇིག་རྟེན་གཟིགས་པ་ཅི་ཚུལ་ལགས། །ཐུགས་རྗེ་ཆེ་ཡི་འདོད་ཆགས་ཐུགས་མི་མངའ། །དེ་ལས་ཐུབ་དབང་འགྱུར་བ་གདོན་མི་ འཚལ༑ ༑ཁྱོད་ཀྱི་ཞབས་ཀྱིས་བཅགས་པའི་ས་རྣམས་ཀྱང༌། །དྲི་མེད་རིན་ཆེན་འོད་དུ་གནས་པ་ལས། །ཁམས་གསུམ་ཀུན་ཏུ་འཁོར་ལོས་བསྒྱུར་བར་ཡང༌། །མཚན་ རབ་ཡོངས་ཀྱིས་བརྒྱན་བྱོན་གདོན་མི་འཚལ། །བདག་གིས་གཡར་ལམ་མཐོང་བ་དགུང་ཞིག་ལ། །ཆོས་བཟང་སྤྲིན་འོད་བྱང་ཆུབ་སྙིང་པོ་ཡི། །ཤིང་དབང་དྲུང་ན་དེ་བཞིན་གཤེགས་ པ་བཞུགས། །སངས་རྒྱས་སྲས་མང་དུ་མས་མདུན་དུ་བདར། །རྒྱལ་བའི་དབང་པོ་སྐུ་མཆོག་ཉི་མ་དེ། །ཛམྦུ་ཆུ་ཀླུང་རིན་ཆེན་འཚེར་བ་འདྲ། །གཡར་ལམ་མཐོང་བར་ཕྱག་གིས་ བདག་མགོ་བྱུགས། །དེ་ནས་སད་ནས་གློ་བ་རབ་ཏུ་དགའ། །དགའ་བའི་འོད་ཅེས་བགྱི་བ་རྣམ་དག་ལུས། །སྔོན་ཆད་གཉེན་བཤེས་གྱུར་པའི་ལྷ་མོ་ཡིས། །བདག་ལ་བསྟན་པ་བདེ་ གཤེགས་དེ་ཉིད་ནི། །སྙིང་པོ་ཡང་དག་བྱང་ཆུབ་ཡོངས་ལ་ཞུགས། །སྔོན་ཡང་གཞོན་ནུ་གཟི་བརྗིད་ཁྱོད་བལྟ་ཞེས། །བདག་གི་སེམས་བསྐྱེད་དེ་ལྟར་བསམ་པར་གྱུར། །མདང་སུམ་ དགུང་ལ་ལྷ་མོ་དགེ་བ་ཡིས། །གཞོན་ནུ་དེ་ནི་མཐོང་བར་འགྱུར་ཞེས་བསྟན། །བདག་གིས་བདེ་གཤེགས་གཡར་ལམ་རྨིས་པས་མཐོང༌། །ཡོངས་སུ་དག་པའི་སེམས་ཅན་ཁྱོད་ཀྱང་ མཐོང༌། །ཡིད་བཞིན་བསམ་འགྲུབ་ཁྱོད་དང་བདག་བཅས་པས། །དེ་རིང་རྒྱལ་བ་དེ་ལ་མཆོད་པར་བགྱི། །དེ་ནས་རྒྱལ་པོའི་བུ་གཟི་བརྗིད་ཀྱི་བདག་པོས་དེ་བཞིན་གཤེགས་པ་སྐུ་ཉི་ མ་དམ་པའི་མཚན་ཐོས་ཏེ། སངས་རྒྱས་བལྟ་བའི་སྐབས་བྱུང་ནས་དགའ་བ་དང་མོས་པའི་ཤུགས་ཆེན་པོ་སྐྱེས་ཏེ་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་ནོར་བུ་རིན་པོ་ ཆེ་ལྔ་བརྒྱས་མངོན་པར་གཏོར་ནས་གཙུག་གི་རིན་པོ་ཆེ་དཔལ་གྱི་འོད་འབར་བ་ཞེས་བྱ་བའང་དེ་ལ་བྱིན་ནོ། །མེའི་མདོག་ལྟར་འདུག་པའི་ནོར་བུ་རིན་པོ་ཆེ་དམ་པས་བརྒྱན་པའི་གོས་རིན་པོ་ ཆེས་ཀྱང་དེ་བཀབ་བོ། །དེ་དེ་ལྟར་རིམ་གྲོ་བྱས་ཀྱང་དགའ་བར་གྱུར་པའམ། ཉམས་བདེ་བར་གྱུར་པ་ལྟ་བུའང་མེད་ལ། དགའ་བ་དང་མོས་པར་མ་གྱུར་གྱི། གཞན་དུ་ན་ཐལ་མོ་སྦྱར་ཅིང་མིག་ མི་འགེབས་པར་གཞོན་ནུ་གཟི་བརྗིད་བདག་གི་གདོང་ལ་ལྟ་ཞིང་གནས་པར་གྱུར་ཏོ། །དེ་ནས་སྤྲུལ་ཚོང་མའི་གཙོ་མོ་བལྟ་ན་སྡུག་པས་རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་ལ་ཚིགས་སུ་ བཅད་དེ་སྨྲས་པ། བུ་མོ་འདི་ནི་ཁྱོད་གསལ་བགྱི་སྙམ་ནས། །ཡུན་རིང་སྔ་ནས་བདག་གིས་བསམ་བསམ་སྟེ། །གཟུགས་མཛེས་དེ་ཡང་དེ་རིང་ཁྱོད་ལ་ཕུལ། །བསོད་ནམས་ལེགས་བརྒྱན་ ༄༅། །ཡོན་ཏན་རབ་དང་ལྡན། །ཚུལ་ཁྲིམས་བློ་དང་ཡོན་ཏན་གཞན་གྱིས་ཀྱང༌། །བུ་མོ་དམ་པ་འདི་དང་འདྲ་བ་ནི། །མི་ཡི་འཇིག་རྟེན་གང་ནའང་མ་མཆིས་ཏེ། །འཇིག་རྟེན་ ཀུན་གྱི་བུད་མེད་ནང་ན་མཆོག །པདྨོའི་སྦུབས་ནས་སྐྱེས་པས་རིགས་སྨོས་སུ། །སྐྱོན་གྱི་དྲི་མས་མ་གོས་འཐད་མ་ལགས། །མ་ལུས་སྐྱོན་གྱིས་མ་གོས་སེམས་དང་ལྡན། །རྟག་པར་ ཁྱོད་ཀྱི་སྤྱོད་ཚུལ་མཐུན་པར་འགྱུར། །རེག་ན་བདེ་ལ་ཀུན་ནས་འཕགས་པས་ན། །འདི་ཡི་ལུས་ནི་ཤིན་ཏུ་འཇམ་པ་སྟེ། །བྲོ་འཚལ་ནད་པ་གང་ལ་རེག་གྱུར་ཀྱང༌། །དེ་ཡི་མོད་ལ་བྲོ་དང་བྲལ་ བར་འགྱུར། །འདི་ཡི་ལུས་ལས་སྤོས་ཀྱི་ངད་འབྱུང་བ། །སྤོས་མཆོག་གཞན་རྣམས་མངོན་པར་ཟིལ་གྱིས་གནོན། །དེ་ཡི་དྲི་ཞིམ་ཚོར་ན་རྣམ་དག་པའི། །ཚུལ་ཁྲིམས་གནས་པར་ མི་རྣམས་ཀུན་ཀྱང་འགྱུར། །འདི་ཡི་ལུས་ནི་གསེར་གྱི་མདོག་འདྲ་སྟེ། །པདྨོའི་མཆོག་ལྟར་རྣམ་པར་རབ་ཏུ་གསལ། །ཁྲོས་པས་བལྟས་ན་བྱམས་པའི་སེམས་ལྡན་པར། ། སེམས་ཅན་མ་ལུས་ཀུན་ཀྱང་རབ་ཏུ་འགྱུར། །འདི་ཡི་ཚིག་སྙན་ཡིད་དུ་འོང་བ་སྟེ། །ཉམས་སུ་བདེ་བས་འགྲོ་བ་ཉན་པར་དགའ། །ཐོས་ན་དེ་རྒྱུས་སྐྱོན་གྱི་མུན་པ་དང༌། །མི་དགེའི་སུག་ ལས་བགྱིད་པར་མོས་མི་འགྱུར། །འདི་ནི་བསམ་བདག་ཡིད་ལ་དྲི་མེད་དེ། །འདི་ལ་ཀུན་ཏུ་གཡོ་དང་སྒྱུ་མ་མཆིས། །ཅི་སྨྲ་དེ་དག་ཡིད་ལའང་དེ་བཞིན་ཏེ། །ཚིག་དབྱངས་དེས་ནི་འགྲོ་ བ་ཚིམ་པར་བགྱིད། །སྒྱུ་ཡིས་སེམས་ཅན་འདྲིད་པར་མི་བགྱིད་དེ། །ནོར་གྱི་དོན་དུ་འགྲོ་བ་ཡོངས་མི་སླུ། །ཡིད་བསྡམས་ཁྲེལ་གྱིས་འཛེམ་དང་ལྡན་པ་སྟེ། །རྒན་ནམ་གཞོན་ལའང་རྟག་ཏུ་སྲི་ ཞུ་སྤྱོད༑ ༑རིགས་རྒྱུད་གཟུགས་ཀྱིས་དྲེགས་པ་མ་མཆིས་ཏེ། །འདི་ནི་འཁོར་གྱིས་དྲེགས་པའང་ཡོངས་མ་མཆིས། །ང་རྒྱལ་རློམ་སེམས་ཡོངས་དང་བྲལ་བ་སྟེ། །འགྲོ་བ་རྣམས་ལ་རྟག་ ཏུ་གུས་པར་འདུད། །དེ་ནས་རྒྱལ་པོའི་བུ་གཟི་བརྗིད་ཀྱི་བདག་པོ་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་འཁོར་དང་བཅས་པ་དང༌། བུ་མོ་སྟོང་ཕྲག་ཉི་ཤུ་དང༌། འཁོར་ཐམས་ ཅད་དང་བཅས་པར་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ནས་འོད་ཀྱི་སྤྲིན་འབྱུང་བ་དེ་ནས་བྱུང་སྟེ་སྙིང་པོ་བྱང་ཆུབ་ཆོས་ཀྱིས་འཕགས་པའི་འོད་གང་ན་བ་དེར་བཅོམ་ལྡན་འདས་དེ་ བཞིན་གཤེགས་པ་སྐུ་ཉི་མ་དམ་པ་གང་ན་བ་དེར་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པའི་ཞལ་བལྟ་བ་དང༌། དེ་ལ་ཕྱག་འཚལ་བ་དང༌། མཆོད་པ་དང༌། བསྙེན་བཀུར་ བའི་ཕྱིར་དོང་སྟེ། དེ་རྟ་བབས་སའི་བར་དུ་བཞོན་པས་སོང་ནས་བབས་ཏེ་རྐང་པས་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པའི་དྲུང་དུ་སོང་ངོ༌། །དེ་ནས་རྒྱལ་པོ་གཞོན་ནུ་གཟི་ བརྗིད་ཀྱི་བདག་པོས་རྒྱང་རིང་པོ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རབ་ཏུ་བཟང་བ། བལྟ་ན་སྡུག་པ། དབང་པོ་ཞི་བ། ཐུགས་ ༄༅། །ཞི་བ༑ དབང་པོ་བསྡམས་པ། གླང་པོ་ལྟར་ཤིན་ཏུ་དུལ་བ། མཚོ་ལྟར་དྭངས་ཤིང་རྙོག་པ་མེད་ལ་རྣམ་པར་གསལ་བ་མཐོང་ངོ༌། །དེ་ལྟར་མཐོང་ནས་དེའི་ སེམས་མངོན་པར་མོས་པར་གྱུར་ཏོ། །དེ་ལྟར་སེམས་མངོན་པར་མོས་པར་གྱུར་ནས་སངས་རྒྱས་མཐོང་བའི་དགའ་བ་དང༌། མོས་པའི་ཤུགས་ཆེན་པོ་རྣམ་པར་སྤེལ་ཏེ་དགའ་ བ་དང༌། མོས་པ་དང༌། སྤྲོ་བ་ཆེན་པོས་ཡོངས་སུ་རྒྱས་པའི་སེམས་ཀྱིས་བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་བུ་མོ་དགའ་བའི་ འོད་ཀྱི་དཔལ་ཤིན་ཏུ་སྦྱངས་པ་ལ་སོགས་པ་འཁོར་ཐམས་ཅད་དང་བཅས་པས་བཅོམ་ལྡན་འདས་དེའི་ཞབས་ལ་སྤྱི་བོས་ཕྱག་འཚལ་ཏེ་རིན་པོ་ཆེ་དམ་པའི་པདྨོ་སྟོང་ཕྲག་ལྔ་ བརྒྱས་བཅོམ་ལྡན་འདས་དེ་ལ་མངོན་པར་གཏོར་ཏེ། བཅོམ་ལྡན་འདས་དེའི་གཙུག་ལག་ཁང་ལྔ་བརྒྱ་ནོར་བུ་རིན་པོ་ཆེའི་རྒྱལ་པོ་སྤོས་སྣ་ཚོགས་ལས་བྱས་པ། རིན་པོ་ཆེའི་རྒྱལ་ པོ་སྣ་ཚོགས་ཀྱིས་རབ་ཏུ་བརྒྱན་པ་ལྔ་བརྒྱ་བརྩིགས་སོ། །གཙུག་ལག་ཁང་རེ་རེ་ཞིང་ཡང་ནོར་བུ་རིན་པོ་ཆེའི་རྒྱལ་པོ་སྟོང་ཕྲག་ལྔ་བརྒྱས་རབ་ཏུ་བརྒྱན་ཏོ། །དེ་ནས་བཅོམ་ལྡན་དེ་བཞིན་ དེ་བཞིན་གཤེགས་པ་སྐུ་ཉི་མ་དམ་པས་གཞོན་ནུ་གཟི་བརྗིད་ཀྱི་བདག་པོའི་བསམ་པ་ཐུགས་སུ་ཆུད་ནས་མདོ་སྡེ་སྒོ་ཀུན་ཏུ་ལྟ་བའི་སྒྲོན་མ་ཞེས་བྱ་བ་ཡང་དག་པར་བསྟན་ཏོ། །དེས་ དེ་ཐོས་ནས་ཆོས་ཐམས་ཅད་ཀྱི་ཚུལ་ལ་ཏིང་ངེ་འཛིན་གྱི་སྒོ་རྒྱ་མཚོ་ཕྲག་བཅུ་ཐོབ་པར་གྱུར་ཏེ། འདི་ལྟར་དེ་བཞིན་གཤེགས་པ་ཐམས་ཅད་ཀྱི་སྨོན་ལམ་རྒྱ་མཚོ་ཡང་དག་པར་འབྱུང་བ་ཞེས་ བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །དུས་གསུམ་སྣང་བའི་སྙིང་པོ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །སངས་རྒྱས་ཐམས་ཅད་ཀྱི་དཀྱིལ་འཁོར་མངོན་དུ་གྱུར་པར་ འབྱུང་བ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །སེམས་ཅན་འབྱམས་ཀླས་པ་ཐམས་ཅད་རབ་ཏུ་སྣང་བར་བྱ་བ་ལ་འཇུག་པ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། ། འཇིག་རྟེན་ཐམས་ཅད་དུ་འབྱུང་བའི་ཡེ་ཤེས་ཀྱི་སྣང་བ་ལ་ཞུགས་པ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །སེམས་ཅན་ཐམས་ཅད་ཀྱི་དབང་པོ་རྒྱ་མཚོ་ལ་འཇུག་པ་སྣང་བའི་ སྒྲོན་མ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །འགྲོ་བ་ཐམས་ཅད་ཡོངས་སུ་སྐྱོབ་པའི་ཡེ་ཤེས་ཀྱི་སྤྲིན་ཅེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །འགྲོ་བ་ཐམས་ཅད་ ཡོངས་སུ་སྨིན་པར་བྱ་བ་དང༌། གདུལ་བ་ལ་མངོན་དུ་གྱུར་པའི་སྒྲོན་མ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་ སྒྲ་རྣམས་དམིགས་པར་བྱེད་པ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ཡོངས་སུ་དག་པར་བྱེད་པའི་སྨོན་ལམ་གྱི་སྤྲིན་ཅེས་བྱ་ ༄༅། །བའི་ཏིང་ངེ་འཛིན་གྱི་སྒོ་རབ་ཏུ་ཐོབ་སྟེ། ཏིང་ངེ་འཛིན་གྱི་སྒོ་བཅུ་པོ་འདི་དག་ལ་སོགས་པ་ཆོས་ཀྱི་ཚུལ་ཐམས་ཅད་ལ་ཏིང་ངེ་འཛིན་གྱི་སྒོ་རྒྱ་མཚོ་ཕྲག་ བཅུ་རབ་ཏུ་ཐོབ་པར་གྱུར་ཏོ། །བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པས་ཀྱང་ཡེ་ཤེས་ཐུབ་པར་དཀའ་བ་རྒྱ་མཚོའི་སྙིང་པོ་ཞེས་བྱ་བའི་སེམས་ངེས་པར་གཞག་པ་རབ་ ཏུ་ཐོབ་པར་གྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་གྱུར་ཏོ། །དེ་ནས་རྒྱལ་པོའི་བུ་གཟི་བརྗིད་ཀྱི་བདག་པོས་བཅོམ་ལྡན་འདས་དེ་བཞིན་ གཤེགས་པ་སྐུ་ཉི་མ་དམ་པའི་ཞབས་གཉིས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་བུ་མོ་དགའ་བའི་འོད་ ཀྱི་དཔལ་ཤིན་ཏུ་སྦྱངས་པ་དང༌། འཁོར་ཐམས་ཅད་དང་བཅས་ཏེ་བཅོམ་ལྡན་འདས་དེའི་སྤྱན་སྔ་ནས་དོང་ངོ༌། །དེ་ནས་རྒྱལ་པོའི་གནས་སྡོང་པོ་རི་བོའི་དཔལ་གང་ན་བ་དང༌། རྒྱལ་ པོ་ཡབ་ནོར་གྱི་བདག་པོ་གང་ན་བ་དེར་དོང་སྟེ་དྲུང་དུ་ཕྱིན་ནས་རྒྱལ་པོ་ཡབ་ནོར་གྱི་བདག་པོའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་དོན་འདི་བརྗོད་དོ། །ལྷའི་ཞལ་སྔ་ནས་མཁྱེན་པར་ མཛད་དུ་གསོལ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐུ་ཉི་མ་དམ་པ་ཞེས་བགྱི་བ། མཁྱེན་པ་དང་ཞབས་སུ་ལྡན་པ། བདེ་བར་གཤེགས་ པ༑ འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། ཁྱོད་ཀྱི་ཁམས་འདི་དེ་ཉིད་ཀྱི་སྙིང་ པོ་བྱང་ཆུབ་ཆོས་ཀྱི་སྤྲིན་ཤིན་ཏུ་སྟུག་པོའི་འོད་ན་རྣམ་པར་སྤྱོད་དེ། མངོན་པར་རྫོགས་པར་སངས་རྒྱས་ནས་རིང་པོ་མ་ལགས་སོ། །དེ་ནས་རྒྱལ་པོ་ནོར་གྱི་བདག་པོས་གཞོན་ནུ་གཟི་ བརྗིད་ཀྱི་བདག་པོ་ལ་འདི་སྐད་ཅེས་སྨྲས་སོ། །གཞོན་ནུ་ཁྱོད་ལ་དོན་འདི་ལྷའམ། མིའམ། སུ་ཞིག་གིས་སྦྲན། དེས་སྨྲས་པ། བདག་ལ་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པས་ སྦྲན་ཏོ༑ ༑དེ་ནས་རྒྱལ་པོ་ནོར་གྱི་བདག་པོས་སངས་རྒྱས་བྱུང་བར་ཐོས་ནས་སངས་རྒྱས་སྐྱེ་བ་ལ་ནི། གཏེར་རབ་ཏུ་ཐོབ་པ་ཙམ་དུ་སེམས། སངས་རྒྱས་རིན་པོ་ཆེ་དང་ཕྲད་པར་ནི། དགའ་བར་སེམས། དེ་བཞིན་གཤེགས་པ་མཐོང་བས་ནི། ངན་སོང་གི་གཡང་སའི་འཇིགས་པ་ཐམས་ཅད་ཀྱང་རྣམ་པར་ལྡོག་པར་སེམས། ཉོན་མོངས་པའི་ནད་ཆེན་པོ་རབ་ཏུ་ཞི་ བར་བྱ་བ་ལ་ནི། སྨན་པའི་རྒྱལ་པོ་ཆེན་པོ་དང་ཕྲད་པ་ཙམ་དུ་སེམས། འཁོར་བའི་སྡུག་བསྔལ་ཐམས་ཅད་ལས་ནི། ཡོངས་སུ་འགྲེལ་བ་ཡིན་པར་སེམས། ཤིན་ཏུ་བདེ་ཞིང་ལྡན་ པ་ལ་ནི༑ རབ་ཏུ་གཞོག་པར་སེམས། རབ་རིབ་མེད་པའི་ཡེ་ཤེས་ཀྱི་སྣང་བ་ནི། ཡང་དག་པར་སྟོན་པར་སེམས། མ་རིག་པའི་མུན་པ་བསལ་བ་ལ་ནི། སྒྲོན་མ་ཆེན་པོ་བྱུང་བ་ཙམ་ ༄༅། །དུ་སེམས། འཇིག་རྟེན་མགོན་མེད་པ་ལས་ནི། ཆོས་ཀྱི་ཚུལ་གྱི་མགོན་དང་ཕྲད་པར་སེམས། འཇིག་རྟེན་འདྲེན་པ་མེད་པ་ལས་ནི། ཐམས་ཅད་མཁྱེན་པ་ ཉིད་ཀྱི་ཐེག་པས་འདྲེན་པ་སྐྱེས་པར་སེམས་ཤིང༌། སངས་རྒྱས་བྱུང་བར་ཐོས་པས་མོས་པ་དང༌། སྤྲོ་བ་ཆེན་པོ་སྐྱེས་ནས་རྒྱལ་རིགས་དང༌། བྲམ་ཟེ་དང༌། ལྗོངས་ཀྱི་མི་དང༌། ཡུལ་མི་ དང༌། བློན་པོ་དང༌། ཞམ་རིང་བ་དང༌། གཞོན་ནུ་དང༌། རྒྱལ་ཕྲན་དང༌། ཁམས་ཀྱི་བདག་པོ་དང༌། འཁོར་ཐམས་ཅད་ཀྱང་ཀུན་ནས་བསྡུས་ནས་སངས་རྒྱས་བྱུང་བར་སྒྲ་སྙན་པ་སྒྲོག་པའི་ གཞོན་ནུ་གཟི་བརྗིད་ཀྱི་བདག་པོ་ལ་རྒྱལ་པོའི་སྲིད་དེ་ཡང་ཆོས་ཀྱི་དགའ་བར་བྱིན་ནོ། །དེ་ལྟར་གཞོན་ནུ་དེ་རྒྱལ་སྲིད་ལ་དབང་བསྐུར་ནས་སྲོག་ཆགས་སྟོང་ཕྲག་བཅུ་དང་ལྷན་ཅིག་ཏུ་ བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པ་གང་ན་བ་དེར་སོང་སྟེ་སྤྱན་སྔར་ཕྱིན་ནས་བཅོམ་ལྡན་འདས་དེའི་ཞབས་གཉིས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ དེ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་བཅོམ་ལྡན་འདས་དེའི་སྤྱན་སྔར་རང་གི་འཁོར་དང་བཅས་ཏེ་འཁོད་དོ། །དེ་ནས་བཅོམ་ལྡན་འདས་དེ་བཞིན་གཤེགས་ པ་སྐུ་ཉི་མ་དམ་པས་རྒྱལ་པོ་ནོར་གྱི་བདག་པོ་དང༌། འཁོར་གྱི་དཀྱིལ་འཁོར་ཐམས་ཅད་ལ་གཟིགས་ནས་དེའི་ཚེ་མཛོད་སྤུ་ནས་འོད་ཟེར་འགྲོ་བ་ཐམས་ཅད་ཀྱི་སེམས་ཀྱི་སྒྲོན་མ་ཞེས་ བྱ་བ་རབ་ཏུ་བཀྱེའོ། །དེ་ཕྱོགས་བཅུའི་འཇིག་རྟེན་གྱི་ཁམས་སྣང་བར་བྱས་ཏེ། འཇིག་རྟེན་གྱི་དབང་པོ་ཐམས་ཅད་མངོན་སུམ་དུ་བཀོད་ནས་སངས་རྒྱས་ཀྱི་རྣམ་པར་འཕྲུལ་བ་བསམ་གྱིས་མི་ ཁྱབ་པ་ཡོངས་སུ་བསྟན་ཏོ། །སངས་རྒྱས་ཀྱིས་འདུལ་བའི་སེམས་ཅན་རྣམས་ཀྱི་བསམ་པ་དང༌། ལྷག་པའི་བསམ་པ་རྣམ་པར་སྦྱངས་ནས་དེའི་ཚེ་སངས་རྒྱས་ཀྱི་བྱིན་གྱི་རླབས་བསམ་ གྱིས་མི་ཁྱབ་པའི་མཐུས་སངས་རྒྱས་ཀྱི་སྐུ་འཇིག་རྟེན་ཐམས་ཅད་ལས་མངོན་པར་འཕགས་པ་དང༌། སངས་རྒྱས་ཀྱི་གསུང་དབྱངས་ཀྱི་ཡན་ལག་རྒྱ་མཚོ་ཐམས་ཅད་དང་ལྡན་པས་ གཟུངས་ཀྱི་སྒོ་ཆོས་ཐམས་ཅད་ལ་རབ་རིབ་མེད་པའི་དོན་གྱི་སྒྲོན་མ་ཞེས་བྱ་བ་གཟུངས་ཀྱི་སྒོ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དང་བཅས་པར་ཡང་དག་པར་བསྟན་ཏོ། །དེ་ནས་ རྒྱལ་པོ་ནོར་གྱི་བདག་པོས་གཟུངས་ཀྱི་སྒོ་དེ་ཐོས་ནས་ཆོས་ཐམས་ཅད་ལ་ཆོས་ཀྱི་སྣང་བ་ཆེན་པོ་སྐྱེས་པར་གྱུར་ཏོ། །འཁོར་དེའི་བྱང་ཆུབ་སེམས་དཔའ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་ སྙེད་ཀྱིས་ཀྱང་ཆོས་ཐམས་ཅད་ལ་རབ་རིབ་མེད་པའི་དོན་གྱི་སྒྲོན་མའི་གཟུངས་རབ་ཏུ་ཐོབ་པར་གྱུར་ཏོ། །ཁྲག་ཁྲིག་དྲུག་ཅུས་ནི། ཉེ་བར་ལེན་པ་མེད་པར་ཟག་པ་ལས་སེམས་རྣམ་པར་ གྲོལ་ལོ༑ ༑སྲོག་ཆགས་སྟོང་ཕྲག་བཅུས་ནི། ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པ་རྣམ་པར་དག་པར་གྱུར་ཏོ། །སེམས་ཅན་གྲངས་མེད་པ་ཞིག་གིས་ནི། སྔོན་ ༄༅། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཡོངས་སུ་བསྐྱེད་དོ། །ཕྱོགས་བཅུར་ཡང་སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་ མི་ཁྱབ་པ་ཡོངས་སུ་བསྟན་པ་དེས་སེམས་ཅན་གྱི་ཁམས་མཐའ་དང་དབུས་མེད་པ་ཐེག་པ་གསུམ་གྱིས་དུལ་བར་གྱུར་ཏོ། །དེ་ནས་རྒྱལ་པོ་ནོར་གྱི་བདག་པོ་ཆོས་ཀྱི་སྣང་བ་རབ་ཏུ་ཐོབ་པ་ དེའི་ཡིད་ལ་འདི་སྙམ་སྟེ། ཁྱིམ་ན་གནས་པས་ནི། རྣམ་པ་འདི་ལྟ་བུའི་ཆོས་ཀྱང་ཁོང་དུ་ཆུད་པར་མི་ནུས་ལ། ཡེ་ཤེས་རྣམ་པ་འདི་ལྟ་བུ་ཡང་སྒྲུབ་པར་མི་ནུས་ཀྱི། བདག་ནི། བཅོམ་ལྡན་འདས་ཀྱི་ཞམ་རིང་དུ་རབ་ཏུ་འབྱུང་ངོ༌། །སྙམ་ནས་རྒྱལ་པོ་ནོར་གྱི་བདག་པོས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་བཅོམ་ ལྡན་འདས་ཀྱི་ཞམ་རིང་དུ་རབ་ཏུ་བྱུང་ཞིང་བསྙེན་པར་རྫོགས་པའི་དགེ་སློང་གི་ཚུལ་ལ་མཆིས་པར་ཅི་གནང་ཞེས་ནས་བཅོམ་ལྡན་འདས་དེས་བཀའ་སྩལ་པ། རྒྱལ་པོ་ཆེན་པོ། དེའི་དུས་ལ་བབ་པར་ཤེས་ན་རུང་ངོ༌། །དེ་ནས་རྒྱལ་པོ་ནོར་གྱི་བདག་པོ་སྲོག་ཆགས་སྟོང་ཕྲག་བཅུ་དང་ལྷན་ཅིག་ཏུ་དེ་བཞིན་གཤེགས་པ་སྐུ་ཉི་མ་དམ་པའི་ཞམ་རིང་དུ་རབ་ཏུ་ བྱུང་ངོ༌། །དེ་ལྟར་རབ་ཏུ་བྱུང་ནས་རིང་པོ་མ་ལོན་པར་གཟུངས་ཀྱི་སྒོ་ཆོས་ཐམས་ཅད་ལ་རབ་རིབ་མེད་པའི་དོན་གྱི་སྒྲོན་མ་ཞེས་བྱ་བ་འཁོར་དང་བཅས་པར་ཡོངས་སུ་བསྒྲུབས་སོ། ། བསྒོམས་སོ། །ཤིན་ཏུ་བསྒོམས་སོ། །དེ་སྙེད་ཀྱི་ཏིང་ངེ་འཛིན་ཀྱི་སྒོ་ཡང་རབ་ཏུ་ཐོབ་པར་གྱུར་ཏོ། །བྱང་ཆུབ་སེམས་དཔའི་མངོན་པར་ཤེས་པ་བཅུ་ཡང་རབ་ཏུ་ཐོབ་བོ། །ཐ་དད་པ་ཡང་དག་པར་ ཤེས་པའི་ཚུལ་རྒྱ་མཚོ་ལའང་ཡང་དག་པར་ཞུགས་པར་གྱུར་ཏོ། །ཕྱོགས་བཅུའི་དེ་བཞིན་གཤེགས་པའི་དྲུང་དུ་འགྲོ་བར་ཐོགས་པ་མེད་པའི་སྤྱོད་ཡུལ་ཞེས་བྱ་བའི་ལུས་ཡོངས་སུ་ དག་པ་ཡང་རབ་ཏུ་ཐོབ་སྟེ། དེ་ནས་བཅོམ་ལྡན་འདས་དེའི་ཆོས་ཀྱི་འཁོར་ལོ་ཡང་དག་པར་བླངས་སོ། །ཡོངས་སུ་བཟུང་ངོ༌། །གཏམ་གྱི་སྐྱེས་བུ་ཡང་བྱས་སོ། །ཆོས་སྨྲ་བ་ཆེན་པོ་ ཡང་བྱས་སོ། །བསྟན་པ་ཡོངས་སུ་བཟུང་བ་ཡང་བྱས་སོ། །མངོན་པར་ཤེས་པ་ཐོབ་པའི་སྟོབས་ཀྱིས་ཀྱང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ་བསམ་པ་ཇི་ལྟ་བ་ བཞིན་དུ་སེམས་ཅན་རྣམས་ལ་ལུས་ཡོངས་སུ་བསྟན་ནས་སངས་རྒྱས་བྱུང་བ་དེ་རབ་ཏུ་བརྗོད་པ་དང༌། སྔོན་གྱི་དེ་བཞིན་གཤེགས་པས་ཡོངས་སུ་བསྒྲུབས་པའི་ཆོས་ཉིད་མངོན་ པར་བརྗོད་པ་དང༌། སྔོན་གྱི་སྦྱོར་བ་ཕུན་སུམ་ཚོགས་པ་དེ་དག་ཡོངས་སུ་བརྗོད་པ་དང༌། སངས་རྒྱས་ཀྱི་རྣམ་པར་འཕྲུལ་པའི་མཐུ་དེ་དག་ཡོངས་སུ་བརྗོད་པར་བྱ་བས་བསྟན་པ་ཡོངས་ སུ་བཟུང་པ་བྱས་སོ། །རྒྱལ་པོའི་སྲས་གཟི་བརྗིད་ཀྱི་བདག་པོས་ཀྱང་དེའི་ཉིན་པར་ཟླ་བ་ཉ་སྟེ་རྒྱས་པའི་ཚེ་རིན་པོ་ཆེ་བདུན་རབ་ཏུ་ཐོབ་པར་གྱུར་ཏེ། དེ་ཁང་པའི་སྟེང་ན་བུད་མེད་ཀྱི་ཚོགས་ ༄༅། །ཀྱིས་བསྐོར་ཅིང་འདུག་བའི་མདུན་དུ་འཁོར་ལོ་རིན་པོ་ཆེ་ཆེན་པོ་ཤུགས་ལ་ཐོགས་པ་མེད་པ་ཞེས་བྱ་བརྩིབས་སྟོང་ཕྲག་བརྒྱ་དང་ལྡན་པ། རིན་པོ་ཆེ་ཐམས་ ཅད་ཀྱིས་བརྒྱན་པ། ལྷ་རྫས་ཀྱི་ཛམྦུ་ཆུ་ཀླུང་གི་གསེར་ལས་གྲུབ་པ། འོད་ཀུན་ཏུ་འབྱུང་བ། རྣམ་པའི་མཆོག་ཐམས་ཅད་དང་ལྡན་པ་བྱུང་བར་གྱུར་ཏོ། །གླང་པོ་རིན་པོ་ཆེ་སྣ་ ཆེན་པོ་རྡོ་རྗེ་རིན་པོ་ཆེའི་རིའི་གཟི་བརྗིད་ཅེས་བྱ་བ་བྱུང་བར་གྱུར་ཏོ། །རྟ་རིན་པོ་ཆེ་རི་སྔོ་རླུང་གི་ཤུགས་ཞེས་བྱ་བ་བྱུང་བར་གྱུར་ཏོ། །ནོར་བུ་རིན་པོ་ཆེ་ཆེན་པོ་ཉི་མའི་སྙིང་པོ་འོད་སྤྲིན་ རྒྱལ་པོ་ཞེས་བྱ་བ་བྱུང་བར་གྱུར་ཏོ། །བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་དེ་ཡང་བུད་མེད་རིན་པོ་ཆེར་བྱུང་བར་གྱུར་ཏོ། །ཁྱིམ་བདག་རིན་པོ་ཆེ་ནོར་གྱི་ཕུང་པོ་མང་པོ་ཞེས་བྱ་ བྱ་བ་བྱུང་བར་གྱུར་ཏོ། །བློན་པོ་རིན་པོ་ཆེ་མིག་དྲི་མ་མེད་པ་ཞེས་བྱ་བ་ཡང་བྱུང་བར་གྱུར་ཏེ། དེ་ལྟར་བདུན་ནོ། །དེ་དེ་ལྟར་རིན་པོ་ཆེ་བདུན་དང་ལྡན་པའི་རྒྱལ་པོ་འཁོར་ལོས་བསྒྱུར་བ། གླིང་བཞི་ལ་དབང་བ། ཆོས་དང་ལྡན་པ། ཆོས་ཀྱི་རྒྱལ་པོ་རྣམ་པར་རྒྱལ་བ་དང་ལྡན་པ། ཡུལ་གྱི་མཐུ་དང་བརྩོན་འགྲུས་སུ་ལྡན་པར་གྱུར་ཏོ། །དེ་ལ་བུ་དཔའ་བ་རྟུལ་ཕོད་ཅིང་ ཡན་ལག་དམ་པའི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཡོད་པར་གྱུར་ཏེ། དེས་ས་ཆེན་པོ་འདི་སྐྱོན་མེད་པ་དང༌། དགྲ་མེད་པ་དང༌། གནོད་པ་མེད་པ་དང༌། འཚེ་བ་ མེད་པ་དང༌། སྐྱིད་པ་དང༌། ཕུན་སུམ་ཚོགས་པ་དང༌། བདེ་བ་དང༌། ལོ་ལེགས་པ་དང༌། མདངས་དགའ་བ་དང༌། སྐྱེ་བོ་དང་མི་མང་པོས་ཡོངས་སུ་གང་བ་ཡང་རི་དང་རྒྱ་མཚོའི་མཐས་ཀླས་པར་ ཆོས་ཀྱིས་མངོན་པར་རྒྱལ་ཏེ་གནས་པར་བྱས་སོ། །དེས་འཛམ་བུའི་གླིང་དེའི་རྒྱལ་པོའི་གནས་སྟོང་ཕྲག་བརྒྱད་ཅུ་རྩ་བཞི་དག་ཏུ་ཡང་རྒྱལ་པོའི་གནས་རེ་རེར་གཙུག་ལག་ཁང་ལྔ་བརྒྱ་ལྔ་ བརྒྱ་བྱེད་དུ་བཙུད་དེ། ཐམས་ཅད་ཀྱང་རྣམ་པའི་མཆོག་ཐམས་ཅད་དང་ལྡན་པ་ཤ་སྟག་གོ །ལོངས་སྤྱོད་དང་ཡོ་བྱད་ཀྱི་རྣམ་པ་ཐམས་ཅད་ཕུན་སུམ་ཚོགས་པ་ཤ་སྟག་གོ །བཟའ་ཤིང་ གི་ར་བ་དང༌། ཁང་པ་དང༌། འཆགས་དང༌། དུས་ཐམས་ཅད་དུ་བདེ་བར་སྤྱད་པའི་ནགས་ཚལ་གྱི་ཕྲེང་བས་རྣམ་པར་བརྒྱན་པ་ཤ་སྟག་གོ །གཙུག་ལག་ཁང་རེ་རེ་ཞིང་ཡང་དེ་བཞིན་གཤེགས་ པའི་མཆོད་རྟེན་བརྩིགས་པ་ནི། ལྷུན་གྱི་རྒྱ་ཤིན་ཏུ་ཆེ་བར་བྱས་པ་སྟེ། ནང་རིན་པོ་ཆེ་རྣམ་པ་མང་པོས་བརྒྱན་པ། རིན་པོ་ཆེའི་རྒྱལ་པོ་སྣ་ཚོགས་ཀྱིས་རྣམ་པར་སྤྲས་པ་ཤ་སྟག་སྟེ། རྒྱལ་ པོའི་གནས་དེ་ཐམས་ཅད་དུའང་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པ་འཁོར་དང་བཅས་པ་གྲོང་ཁྱེར་དུ་གཤེགས་པར་བྱ་བའི་ཕྱིར་སྤྱན་དྲངས་སོ། །རྒྱལ་པོའི་གནས་དེ་ དག་ཀུན་ཏུ་ཡང་དེ་བཞིན་གཤེགས་པ་དེ་ལ་དེ་བཞིན་གཤེགས་པའི་མཆོད་པ་རྣམ་པ་ཐམས་ཅད་དུ་བསམ་གྱིས་མི་ཁྱབ་པས་མཆོད་དེ། སངས་རྒྱས་གྲོང་ཁྱེར་དུ་གཤེགས་པའི་ཆོ་ ༄༅། །འཕྲུལ་དང༌། རྣམ་པར་འཕྲུལ་པས་སེམས་ཅན་ཚད་མེད་པའི་དགེ་བའི་རྩ་བ་ཡོངས་སུ་བསྐྱེད་པའི་ཕྱིར་གཤེགས་སུ་གསོལ་ཏོ། །དེར་ཡང་སེམས་ཅན་ མ་དད་པའི་སེམས་དང་ལྡན་པ་རྣམས་ནི། དད་པ་ཐོབ་པར་གྱུར་ཏོ། །དད་པ་དང་ལྡན་པའི་སེམས་ཅན་རྣམས་ནི། སངས་རྒྱས་མཐོང་བས་དགའ་བའི་ཤུགས་རྣམ་པར་འཕེལ་ བར་གྱུར་ཏོ། །དགའ་བའི་ཤུགས་རྣམ་པར་འཕེལ་བའི་སེམས་ཅན་རྣམས་ནི། བྱང་ཆུབ་ཀྱི་བསམ་པ་རྣམ་པར་དག་པ་ཐོབ་པར་གྱུར་ཏོ། །བྱང་ཆུབ་ཀྱི་བསམ་པ་རྣམ་པར་ དག་པའི་སེམས་ཅན་རྣམས་ནི། སྙིང་རྗེ་ཆེན་པོའི་སེམས་བསྐྱེད་པར་གྱུར་ཏོ། །སེམས་ཅན་ལ་ཕན་པར་ཞུགས་པའི་སེམས་ཅན་རྣམས་ནི། སངས་རྒྱས་ཀྱི་ཆོས་ཐམས་ཅད་ ཡོངས་སུ་བཙལ་བ་ལ་བརྩོན་པར་གྱུར་ཏོ། །སངས་རྒྱས་ཀྱི་ཆོས་ཀྱི་ཚུལ་གྱི་རྣམ་པ་ལ་མཁས་པའི་སེམས་ཅན་རྣམས་ནི། ཆོས་ཐམས་ཅད་ཀྱི་རང་བཞིན་ངེས་པར་ཁོང་དུ་ཆུད་པར་ བྱ་བའི་ཕྱིར་སེམས་མངོན་པར་གཞོལ་བར་གྱུར་ཏོ། །ཆོས་མཉམ་པ་ཉིད་ལ་ཞུགས་པའི་སེམས་ཅན་རྣམས་ནི། དུས་གསུམ་མཉམ་པ་ཉིད་ལ་འཇུག་པའི་ཕྱིར་སེམས་མངོན་པར་ གཞོལ་བར་གྱུར་ཏོ། །དུས་གསུམ་གྱི་ཡེ་ཤེས་སྣང་བ་ཐོབ་པའི་སེམས་ཅན་རྣམས་ནི། སངས་རྒྱས་གཅིག་ནས་གཅིག་ཏུ་བརྒྱུད་པ་རྣམ་པར་དམིགས་པར་བྱ་བའི་དོན་དུ་ཡེ་ཤེས་ སྣང་བ་ལ་ཞུགས་པར་གྱུར་ཏོ། །དེ་བཞིན་གཤེགས་པ་སྣ་ཚོགས་རྣམ་པར་དམིགས་པར་བྱ་བ་ལ་ཞུགས་པའི་སེམས་ཅན་རྣམས་ནི། འགྲོ་བ་ཐམས་ཅད་ཡོངས་སུ་བསྡུ་བའི་དོན་དུ་སེམས་ མངོན་པར་གཞོལ་བར་གྱུར་ཏོ། །འགྲོ་བ་ཐམས་ཅད་ཡོངས་སུ་བསྡུ་བ་ལ་བརྩོན་པའི་སེམས་ཅན་རྣམས་ནི། བྱང་ཆུབ་སེམས་དཔའི་ལམ་རྣམ་པར་དག་པར་བྱ་བའི་ཕྱིར་སྨོན་ལམ་བསྐྱེད་ པར་གྱུར་ཏོ། །ལམ་གྱི་མཉམ་པ་ཉིད་ལ་ཞུགས་པའི་སེམས་ཅན་རྣམས་ནི། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་མངོན་པར་བསྒྲུབ་པའི་ཕྱིར་ཡེ་ཤེས་སྣང་བ་ བསྐྱེད་པར་གྱུར་ཏོ། །ཆོས་རྒྱ་མཚོ་རྣམ་པར་དབྱེ་བ་ལ་མངོན་པར་མོས་པའི་སེམས་ཅན་རྣམས་ནི། ཞིང་གི་དྲ་བ་ཐམས་ཅད་རང་གི་ལུས་ཀྱིས་རྒྱས་པར་དགང་བའི་དོན་དུ་སེམས་མངོན་ པར་གཞོལ་བར་གྱུར་ཏོ། །ཞིང་མཉམ་པ་ཉིད་ལ་ཞུགས་པའི་སེམས་ཅན་རྣམས་ནི། སེམས་ཅན་ཐམས་ཅད་ཀྱི་དབང་པོ་རྒྱ་མཚོ་ཡོངས་སུ་ཤེས་པར་བྱ་བའི་ཕྱིར་སྨོན་ལམ་འདེབས་པར་ གྱུར་ཏོ༑ ༑འགྲོ་བ་ཐམས་ཅད་ཀྱི་དབང་པོ་དང་མོས་པ་ཇི་ལྟ་བ་བཞིན་དུ་རྣམ་པར་དཔྱད་པ་ལ་བརྩོན་པའི་སེམས་ཅན་རྣམས་ནི། ཐམས་ཅད་མཁྱེན་པ་ཉིད་ཁོང་དུ་ཆུད་པར་བྱ་བའི་ཕྱིར་བསམ་ པ་རྣམ་པར་དག་པར་གྱུར་ཏོ། །སེམས་ཅན་རྣམ་པ་དེ་ལྟ་བུ་དག་གི་དོན་རྣམ་པ་དེ་ལྟ་བུ་དེ་དག་འགྲུབ་པར་འགྱུར་བ་མཐོང་ནས་རྒྱལ་པོ་གཟི་བརྗིད་ཀྱི་བདག་པོས་སངས་རྒྱས་ཀྱི་རྣམ་པར་འཕྲུལ་ ༄༅། །པ་དང༌། ཆོས་འཕྲུལ་བསམ་གྱིས་མི་ཁྱབ་པ་བསྟན་པས་སེམས་ཅན་དེ་དག་ཡོངས་སུ་སྨིན་པར་བྱ་བ་དང༌། གདུལ་བའི་དོན་དུ་རྒྱལ་པོའི་གནས་དེ་དག་ཐམས་ ཅད་དུ་དེ་བཞིན་གཤེགས་པ་སྐུ་ཉི་མ་དམ་པ་གཤེགས་སུ་གསོལ་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་བུ་གཞི་བརྗིད་ཀྱི་བདག་པོ་ཞེས་བྱ་ བར་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་ནི། ཁྱོད་ཀྱིས་དེ་ལྟར་མི་བལྟ་སྟེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་འདི་ནི། དེའི་ཚེ་དེའི་དུས་ན་རྒྱལ་ པོའི་བུ་གཟི་བརྗིད་ཀྱི་བདག་པོ་ཞེས་བྱ་བ་འཁོར་ལོས་བསྒྱུར་བའི་རྒྱལ་སྲིད་ལ་དབང་བ། དེ་བཞིན་གཤེགས་པ་སྐུ་ཉི་མ་དམ་པ་ལ་བསྙེན་བཀུར་བྱེད་བྱེད་པ་དེ་ཡིན་ནོ། །རིགས་ ཀྱི་བུ༑ དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་ནོར་གྱི་བདག་པོ་གཞོན་ནུ་གཟི་བརྗིད་ཀྱི་བདག་པོའི་ཡབ་ཏུ་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་ནི། དེ་ལྟར་མི་ བལྟ་སྟེ༑ དེ་བཞིན་གཤེགས་པ་རིན་པོ་ཆེའི་མེ་ཏོག་གི་འོད་ཅེས་བྱ་བ་ནི། དེའི་ཚེ་དེའི་དུས་ན་རྒྱལ་པོ་ནོར་གྱི་བདག་པོ་ཞེས་བྱ་བར་གྱུར་པ་སྟེ། ད་ལྟར་ཤར་ཕྱོགས་སུ་འཇིག་རྟེན་གྱི་ ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་རྒྱ་མཚོའི་ཕ་རོལ་གྱི་འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ནམ་མཁའི་གཟུགས་བརྙན་གྱི་སྤྲིན་ཅེས་བྱ་ བ་ན་འཇིག་རྟེན་གྱི་ཁམས་ཀྱི་རྒྱུད་དབུ་མ་དུས་གསུམ་རབ་ཏུ་སྣང་བའི་རིན་པོ་ཆེའི་རྒྱལ་པོ་ཡོངས་སུ་འབྱུང་བའི་དབྱིངས་ཞེས་བྱ་བའི་འཇིག་རྟེན་གྱི་ཁམས་སངས་རྒྱས་ཀྱི་འོད་ཀྱི་དཀྱིལ་ འཁོར་དཔལ་གྱི་སྒྲོན་མ་ཞེས་བྱ་བ་ན་སྙིང་པོ་བྱང་ཆུབ་ཐམས་ཅད་ལ་དབང་བའི་ལུས་རབ་ཏུ་སྣང་བ་ཞེས་བྱ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་ རྒྱས་ཏེ༑ སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའི་འཁོར་གྱིས་བསྐོར་ཅིང་ཆོས་སྟོན་ཏོ། །བཅོམ་ལྡན་འདས་དེ་བཞིན་གཤེགས་པ་ རིན་པོ་ཆེའི་འོད་ཅེས་བྱ་བ་དེས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ནམ་མཁའི་གཟུགས་བརྙན་དུ་སྣང་བའི་སྤྲིན་ཡོངས་ སུ་དག་པར་མཛད་དེ། འཇིག་རྟེན་གྱི་ཁམས་རྒྱ་མཚོ་དེར་དེ་བཞིན་གཤེགས་པ་ཇི་སྙེད་ཅིག་བྱུང་བར་གྱུར་པ་དང༌། འབྱུང་བ་དང༌། འབྱུང་བར་འགྱུར་བ་དེ་དག་ཐམས་ཅད་ཀྱང་ བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་མེ་ཏོག་གི་འོད་དེས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨིན་ ཕར་མཛད་པ་ཤ་སྟག་གོ །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་བཙུན་མོ་པདྨོ་དཔལ་གྱི་སྙིང་པོ་འབྱུང་བ་ཞེས་བྱ་བ་བྱུང་སྟེ། གཞོན་ནུ་གཟི་བརྗིད་ཀྱི་ ༄༅། །བདག་པོའི་ཡུམ་དུ་གྱུར་པ། བུད་མེད་སྟོང་ཕྲག་བརྒྱད་ཅུ་རྩ་བཞིའི་གཙོ་མོར་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་ནི། དེ་ལྟར་མི་བལྟ་སྟེ། རིགས་ ཀྱི་བུ༑ བཅོམ་ལྡན་འདས་ཀྱི་ཡུམ་ལྷ་མོ་སྒྱུ་མ་བྱང་ཆུབ་སེམས་དཔའ་སྐྱེད་སྐྱེད་པ། རྣམ་པར་ཐར་པ་ཀུན་ཏུ་སྣང་ཞིང་སྒྲིབ་པ་མེད་པ་ལ་རབ་ཏུ་གནས་པ། སྔོན་དེ་བཞིན་གཤེགས་པས་ ཡོངས་སུ་བསྒྲུབས་པ་མངོན་དུ་གྱུར་པ། བྱང་ཆུབ་སེམས་དཔའི་སྐྱེ་བ་ཐམས་ཅད་ཡོངས་སུ་བསྟན་པའི་ཚུལ་ལ་མཁས་པ་འདི་ནི། དེའི་ཚེ་དེའི་དུས་ན་རྒྱལ་པོ་ནོར་གྱི་བདག་པོའི་བཙུན་ མོ་དམ་པ་པདྨོ་དཔལ་གྱི་སྙིང་པོ་འབྱུང་བ་ཞེས་བྱ་བར་གྱུར་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་སྦྲུལ་ཚོང་མའི་གཙོ་མོ་བལྟ་ན་སྡུག་པ་ཞེས་བྱ་བ་བྱུང་བ་དེ་ གཞན་ཞིག་ཡིན་པ་སྙམ་དུ་སེམས་ན་ནི། དེ་ལྟར་མི་བལྟ་སྟེ། ཤཱཀྱ་ལག་ན་འཁར་བའི་ཆུང་མ་ཁོ་མོའི་མ་མིག་མཛེས་ཞེས་བྱ་བ་འདི་ནི། དེའི་ཚེ་དེའི་དུས་ན་སྦྲུལ་ཚོང་མའི་གཙོ་ མོ་བལྟ་ན་སྡུག་པ་ཞེས་བྱ་བར་གྱུར་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་བུ་མོ་དགའ་བའི་འོད་ཤིན་ཏུ་སྦྱངས་པ་ཞེས་བྱ་བར་གྱུར་པ་དེ་གཞན་ཞིག་ཡིན་ པ་སྙམ་དུ་སེམས་ན་ནི། དེ་ལྟར་མི་བལྟ་སྟེ། ཁོ་མོ་ནི། དེའི་ཚེ་དེའི་དུས་ན་སྦྲུལ་ཚོང་མའི་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ཞེས་བྱ་བར་གྱུར་ཏོ། །རིགས་ཀྱི་བུ། དེ་ལ་ ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པ་གཟི་བརྗིད་ཀྱི་བདག་པོའི་འཁོར་དུ་གྱུར་པ་དེ་རྣམས་གཞན་ཞིག་ཡིན་པ་སྙམ་དུ་སེམས་ན་ནི། རིགས་ཀྱི་བུ། དེ་ནི། དེ་ལྟར་མི་བལྟ་ སྟེ༑ བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་ཡོངས་སུ་རྫོགས་པར་བྱ་བ་ལ་དགོད་དགོད་པའི་བྱང་ཆུབ་སེམས་དཔའི་འཁོར་གྱི་ དཀྱིལ་འཁོར་འདི་ཉིད་ན་འཁོད་ཅིང༌། འཇིག་རྟེན་གྱི་ཁམས་ཐམས་ཅད་དུ་གཟུགས་བརྙན་རབ་ཏུ་བྱུང་བའི་ལུས་དང༌། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ལ་རྣམ་པར་ སྤྱོད་པ་ལས་མ་ཉམས་པའི་སེམས་དང༌། དེ་བཞིན་གཤེགས་པ་ཐམས་ཅད་ཀྱི་ཞལ་མངོན་དུ་མཐོང་བར་རྣམ་པར་དམིགས་པའི་མིག་དང༌། དེ་བཞིན་གཤེགས་པ་ཐམས་ཅད་ཀྱི་ གསུང་གི་ཡན་ལག་གི་སྤྲིན་ནམ་མཁའ་དང་མཉམ་པའི་འཁོར་ལོ་རབ་ཏུ་བསྒྲགས་པའི་དབྱངས་རྣམ་པར་དམིགས་པའི་རྣ་བ་དང༌། ཆོས་ཐམས་ཅད་ལ་རྣམ་པར་སྤྱད་པར་དབང་སྒྱུར་ བའི་དབུགས་ཕྱི་ནང་དུ་རྒྱུ་བ་དང༌། སངས་རྒྱས་ཀྱི་ཞིང་ཐམས་ཅད་དུ་རྗེས་སུ་གྲགས་པའི་མིང་གི་སྒྲ་དང༌། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ཉེ་བར་ འགྲོ་བ་རྒྱུན་མི་གཅོད་པའི་བྱང་ཆུབ་སེམས་དཔའི་ལུས་དང༌། སེམས་ཅན་ཐམས་ཅད་ལ་བསམ་པ་ཇི་ལྟ་བ་བཞིན་དུ་མངོན་པར་སྟོན་པའི་ལུས་ཡོངས་སུ་སྨིན་པར་བྱ་བ་དང༌། གདུལ་ ༄༅། །བ་ལ་རྗེས་སུ་མཐུན་པ་མངོན་པར་བསྒྲུབས་པ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་ཡོངས་སུ་རྫོགས་པར་བྱ་ བ་དང༌། ཡང་དག་པར་སྒྲུབ་པ་ཕྱོགས་ཀྱི་དྲ་བ་མ་ལུས་པ་ཐམས་ཅད་དུ་འདལ་ཏེ། མ་འོངས་པའི་བསྐལ་པ་ཐམས་ཅད་དུ་རྒྱུན་མི་འཆད་པ་དང་ལྡན་པ་ཤ་སྟག་བཅོམ་ལྡན་ འདས་ཀྱི་འཁོར་གྱི་དཀྱིལ་འཁོར་ན་འཁོད་པ་འདི་དག་ཡིན་ནོ། །རིགས་ཀྱི་བུ། དེ་བཞིན་གཤེགས་པ་སྐུ་ཉི་མ་དམ་པ་དེ་ནི། འཁོར་ལོས་བསྒྱུར་བ་གཟི་བརྗིད་ཀྱི་བདག་པོ་ དང༌། ཁོ་མོས་ནམ་བཞུགས་ཀྱི་བར་དུ་ན་བཟའ་དང༌། བཤོས་དང༌། གཟིམས་ཆ་དང༌། སྙུན་གྱི་རྐྱེན་སྨན་དང༌། ཡོ་བྱད་ཀྱིས་བསྙེན་བཀུར་ཏོ། །རིགས་ཀྱི་བུ། དེ་བཞིན་ གཤེགས་པ་སྐུ་ཉི་མ་དམ་པ་ཡོངས་སུ་མྱ་ངན་ལས་འདས་པའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་དེ་བཞིན་གཤེགས་པ་སྐུ་ཤིན་ཏུ་དང་བ་ཞེས་བྱ་བ་འཇིག་རྟེན་དུ་བྱུང་ སྟེ༑ དེ་ཡང་ཁོ་མོ་ཅག་གིས་བསྙེན་བཀུར་ཏོ། །རིམ་གྲོར་བྱས་སོ། །བསྟི་སྟང་དུ་བྱས་སོ། །ཕུ་དུད་དུ་བྱས་སོ། །མཆོད་དོ། །དེའི་འོག་ཏུ་དེ་བཞིན་གཤེགས་པ་སྐུ་ཐམས་ཅད་ ལ་ཡེ་ཤེས་ཀྱི་གཟུགས་བརྙན་གྱི་ཟླ་བ་སྣང་བ་ཞེས་བྱ་བ་འཇིག་རྟེན་དུ་བྱུང་སྟེ། དེ་ཡང་ཁོ་མོ་ཅག་གིས་ལྷའི་དབང་པོར་གྱུར་ཏེ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་ པ་འཛམ་བུ་ཆུ་ཀླུང་གི་གཟི་བརྗིད་ཀྱི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྐུ་མཚན་གྱིས་རྣམ་པར་བརྒྱན་པ་ཞེས་བྱ་བ་བསྙེན་བཀུར་ཏོ། །དེའི་ འོག་ཏུ་དེ་བཞིན་གཤེགས་པ་འོད་ཟེར་སྣ་ཚོགས་འབར་བའི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཤིན་ཏུ་རྣམ་པར་གཟིགས་པའི་ཡེ་ཤེས་ དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཆེན་པོའི་འོད་ཟེར་ཤིན་ཏུ་ཡངས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་ གཤེགས་པ་རྡོ་རྗེ་མཐུ་བོ་ཆེའི་བརྩོན་འགྲུས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་གཞན་གྱིས་མི་ཐུབ་པའི་མཐུ་ཞེས་བྱ་བ་བསྙེན་བཀུར་ཏོ། ། དེའི་འོག་ཏུ་དེ་བཞིན་གཤེགས་པ་ཀུན་ཏུ་རྣམ་པར་གཟིགས་པའི་ཡེ་ཤེས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་དྲི་མ་མེད་པ་ཕུན་སུམ་ཚོགས་པའི་ སྤྲིན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སེངྒེ་རྣམ་པར་བསྒྱིངས་པའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་འབར་ བའི་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན་འོད་ཟེར་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ ༄༅། །ཉི་མའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྐུ་རིན་པོ་ཆེའི་པདྨོ་ཤིན་ཏུ་རྒྱས་པ་ཞེས་བྱ་བ་བསྙེན་བཀུར་ཏོ། །དེའི་འོག་ ཏུ་དེ་བཞིན་གཤེགས་པ་བསོད་ནམས་སྒྲོན་མའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་འོད་ཟེར་གྱི་སྤྲིན་གྱི་འོད་ཅེས་བྱ་བ་བསྙེན་ བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཀུན་ཏུ་རྣམ་པར་སྣང་བའི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྒྱན་དང་གདུགས་ཀྱི་དབྱངས་ཀྱི་ རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་སྣང་བས་རྣམ་པར་གནོན་པའི་སེངྒེ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་ པ་ཆོས་ཀྱི་དབྱིངས་ཀྱི་ཡུལ་གྱི་བློ་གྲོས་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སེམས་ཅན་ནམ་མཁའི་སེམས་སྣང་བའི་གཟུགས་ཞེས་བྱ་བ་བསྙེན་བཀུར་ ཏོ༑ ༑དེའི་འོག་ཏུ་དེ་བཞིན་གཤེགས་པ་རབ་ཏུ་ཞི་བའི་སྤོས་ཀྱི་གཙུག་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཞི་བའི་དབྱངས་ཀུན་ཏུ་བསྒྲགས་ པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་རབ་ཏུ་བརྟན་པའི་འོད་ཟེར་གྱི་དྲ་བའི་གཟུགས་ཀྱི་ཕུང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་ དེ་བཞིན་གཤེགས་པ་བདུད་རྩིའི་རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོའི་འབྲུག་སྒྲ་སྒྲོག་པའི་དབྱངས་ཞེས་བྱ་བ་ བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སངས་རྒྱས་ནམ་མཁའ་སྣང་བའི་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་ཟླ་ བ་མཛོད་སྤུའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀྱི་ཞལ་ཤིན་ཏུ་རྒྱས་པ་ཞེས་བྱ་བ་བསྙེན་བཀུར་ཏེ། །དེའི་འོག་ཏུ་དེ་བཞིན་གཤེགས་ པ་ཡེ་ཤེས་ཤིན་ཏུ་རྣམ་པར་དག་པའི་མེ་ཏོག་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་འོད་འཕྲོའི་རི་བོ་དཔལ་གྱི་གཟི་བརྗིད་ཀྱི་རྒྱལ་པོ་ཞེས་བྱ་བ་ བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན་རྒྱ་ཆེན་པོ་གཟི་བརྗིད་ཀྱི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཏིང་ངེ་འཛིན་གྱི་རི་རབ་ མངོན་པར་འཕགས་པའི་ཡེ་ཤེས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་ཟླ་བའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་ གཤེགས་པ་སྐུ་འོད་འཕྲོ་བའི་དཀྱིལ་འཁོར་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་མཆོག་གི་འོད་ཀྱི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་ ༄༅། །འོག་ཏུ་དེ་བཞིན་གཤེགས་པ་ཡེ་ཤེས་ཀྱི་སྤྱོད་པ་ཀུན་ཏུ་ཐོགས་པ་མེད་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་འཕྲོ་རྒྱ་མཚོའི་ སྒོའི་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་ཟླ་བའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ གཞལ་མེད་ཁང་གི་དབྱངས་ཀྱི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན་མི་མཚུངས་གྲགས་པའི་རྒྱལ་མཚན་ཞེས་བྱ་བ་བསྙེན་བཀུར་ཏོ། ། དེའི་འོག་ཏུ་དེ་བཞིན་གཤེགས་པ་ཕྱག་རབ་ཏུ་བརྐྱང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྔོན་གྱི་སྨོན་ལམ་གྱིས་འཕྲུལ་པའི་ཟླ་བ་ཞེས་བྱ་བ་བསྙེན་ བཀུར་ཏོ། །དེའི་འོག་ཏུ་དེ་བཞིན་གཤེགས་པ་ནམ་མཁའི་ཡེ་ཤེས་དོན་གྱི་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱིས་འཕགས་པའི་ནམ་ མཁའི་དབང་ཕྱུག་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྣམ་པར་སྣང་མཛད་དཔལ་གྱི་སྙིང་པོ་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་ གཤེགས་པ་ཆོས་མཐུ་བོ་ཆེའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ ཆོས་རྒྱ་མཚོའི་པདྨོ་ཞེས་བྱ་བ་བསྙེན་བཀུར་ཏོ། །རིགས་ཀྱི་བུ། དེ་ལྟར་དེ་བཞིན་གཤེགས་པ་དེ་དག་ལ་སོགས་པ་འཇིག་རྟེན་གྱི་ཁམས་དེར་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ ཅུ་བྱུང་སྟེ། དེ་དག་ཐམས་ཅད་ཁོ་མོ་ཅག་གིས་ན་བཟའ་དང༌། བཤོས་དང༌། གཟིམས་ཆ་དང༌། སྙུན་གྱི་རྐྱེན་སྨན་དང༌། ཡོ་བྱད་ཀྱིས་བསྙེན་བཀུར་ཏོ། །རིམ་གྲོར་བྱས་སོ། །བསྟི་སྟང་དུ་ བྱས་སོ། །ཕུ་དུད་དུ་བྱས་སོ། །མཆོད་དོ། །རིགས་ཀྱི་བུ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་པོ་དེ་དག་ཐམས་ཅད་ཀྱི་ཐ་མར་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་ཆོས་རྒྱ་ཆེན་པོ་ལ་མོས་པ་ཡང་དག་པར་འབྱུང་བའི་གཟི་བརྗིད་ཅེས་བྱ་བ་བྱུང་སྟེ། བཅོམ་ལྡན་འདས་དེ་གྲོང་ཁྱེར་དུ་གཤེགས་པ་ལ་ཁོ་མོ་རྒྱལ་པོའི་ཆུང་མར་ གྱུར་ཏེ་ཁྱིམ་ཐབ་དང་བཅས་པས་དེ་བཞིན་གཤེགས་པའི་མཆོད་པའི་སྒོ་རྣམ་པ་ཐམས་ཅད་དུ་བཤམས་པས་མཆོད་པ་བྱས་ནས་བཅོམ་ལྡན་འདས་དེ་ལས་ཆོས་ཀྱི་རྣམ་གྲངས་དེ་བཞིན་ གཤེགས་པ་ཐམས་ཅད་སྐྱེ་བ་འབྱུང་བའི་སྒྲོན་མ་ཞེས་བྱ་བ་ཐོས་སོ། །དེ་ཐོས་ནས་ཁོ་མོས་ཡེ་ཤེས་ཀྱི་མིག་རབ་ཏུ་ཐོབ་སྟེ་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་ འཛིན་གྱི་ཚུལ་རྒྱ་མཚོ་ཐམས་ཅད་ལ་རྣམ་པར་ལྟ་བའི་ཡུལ་འདི་ཡང་རབ་ཏུ་ཐོབ་པར་གྱུར་ཏོ། །རིགས་ཀྱི་བུ། དེ་ལྟར་ཁོ་མོ་རྣམ་པར་ཐར་པ་འདི་ལ་སྒོམ་ཞིང༌། བྱང་ཆུབ་སེམས་དཔའ་དང་ལྷན་ ༄༅། །ཅིག་ཏུ་བྱང་ཆུབ་སེམས་དཔའི་སྤྱོད་པ་སྤྱོད་ཅིང་བསྐལ་པ་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཅིག་ཏུ་རྒྱུ་རྒྱུ་སྟེ། སངས་རྒྱས་ཀྱི་ཞིང་ དེ་སྙེད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་བསྐལ་པ་དེ་དག་ལ་དེ་བཞིན་གཤེགས་པ་མཐའ་དང་དབུས་མེད་པ་ཞིག་བསྙེན་བཀུར་ནས་བསྐལ་པ་ལ་ལ་ལ་ནི། དེ་བཞིན་གཤེགས་པ་བསྐལ་ པར་བཞུགས་པ་གཅིག་ཀྱང་བསྙེན་བཀུར་ཏོ། །བསྐལ་པ་ལ་ལ་ནི། དེ་བཞིན་གཤེགས་པ་གཉིས་ཀྱང་བསྙེན་བཀུར་ཏོ། །བསྐལ་པ་ལ་ལ་ལ་ནི། དེ་བཞིན་གཤེགས་པ་བརྗོད་དུ་མེད་ པའི་བར་དག་ཀྱང་བསྙེན་བཀུར་ཏོ། །བསྐལ་པ་ལ་ལ་ལ་ནི། དེ་བཞིན་གཤེགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱང་བསྙེན་བཀུར་ཏོ། །དེ་སྲིད་དུ་ཁོ་མོས་བྱང་ཆུབ་སེམས་ དཔའི་སྐུ་ཡང་ཚད་ནི། ཇི་ཙམ་ཞིག །དབྱིབས་ནི། ཇི་ལྟ་བུ་ཞིག །སྐུ་མདོག་ནི། ཇི་འདྲ་བ་ཞིག་ཡིན་པ་ཁོང་དུ་མ་ཆུད་དོ། །སྐུའི་འཕྲིན་ལས་ཀྱང་ཁོང་དུ་མཆུད་དོ། །གསུང་གི་འཕྲིན་ ལས་དང༌། ཐུགས་ཀྱི་འཕྲིན་ལས་ཀྱང་ཁོང་དུ་མཆུད་དོ། ཡེ་ཤེས་ཀྱི་གཟིགས་པ་དང༌། ཡེ་ཤེས་ཀྱི་སྤྱོད་ཡུལ་དང༌། ཡེ་ཤེས་ཀྱི་ཏིང་ངེ་འཛིན་གྱི་ཡུལ་ཡང་ཁོང་དུ་མཆུད་དོ། །རིགས་ ཀྱི་བུ། བྱང་ཆུབ་སེམས་དཔའ་ཇི་སྙེད་ཅིག་གིས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་མཛད་པ་མཐོང་ནས་བྱང་ཆུབ་སེམས་དཔའ་ལ་དགའ་བའི་སེམས་བསྐྱེད་དེ་བརྡ་སྣ་ ཚོགས་དང༌། བསྙེན་པ་སྣ་ཚོགས་ཀྱིས་མོས་པ་བསྐྱེད་པར་གྱུར་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་འཇིག་རྟེན་དང༌། འཇིག་རྟེན་ལས་འདས་པའི་ཐབས་སྣ་ཚོགས་ཀྱིས་ཡོངས་ སུ་བཟུང་སྟེ། བྱང་ཆུབ་སེམས་དཔའི་འཁོར་དུ་གྱུར་ཏོ། །དེ་དག་ཀྱང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་འཁོར་དུ་འགྲོགས་འགྲོགས་པས་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །རིགས་ཀྱི་བུ། དེ་ལྟར་ཁོ་མོས་དེ་བཞིན་གཤེགས་པ་ཆོས་རྒྱ་ཆེན་པོ་ལ་མོས་པ་ཡང་དག་པར་འབྱུང་བའི་གཟི་བརྗིད་ཀྱི་ཞལ་ མཐོང་མ་ཐག་ཏུ་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ལ་རྣམ་པར་ལྟ་བའི་ཡུལ་འདི་ཐོབ་ནས་རྣམ་པར་ཐར་པ་འདི་སྒོམ་ཞིང༌། བྱང་ ཆུབ་སེམས་དཔའ་དང༌། བསྐལ་པ་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཅིག་ཏུ་འགྲོགས་འགྲོགས་ཏེ། བསྐལ་པ་སངས་རྒྱས་ཀྱི་ཞིང་བརྒྱའི་རྡུལ་ཤིན་ཏུ་ཕྲ་བ་སྙེད་པོ་ དེ་དག་ལ་དེ་བཞིན་གཤེགས་པ་ཇི་སྙེད་ཅིག་བྱུང་བར་གྱུར་པ་དེ་དག་ཐམས་ཅད་ཀྱང་ཁོ་མོས་བསྙེན་བཀུར་ཏོ། །མཆོད་དོ། །རིམ་གྲོར་བྱས་སོ། །དེ་བཞིན་གཤེགས་པ་དེ་དག་ཐམས་ཅད་ལས་ཀྱང་ ཁོ་མོས་ཆོས་བསྟན་པ་ཐོབ་སྟེ་ཡོངས་སུ་བླངས་སོ། །ཡང་དག་པར་བཟུང་ངོ༌། །སངས་རྒྱས་བཅོམ་ལྡན་འདས་དེ་དག་ཐམས་ཅད་ལས་ཀྱང་ཁོ་མོས་རྣམ་པར་ཐར་པ་འདི་ཚུལ་སྣ་ཚོགས་དང༌། ༄༅། །མདོ་སྡེའི་ཚུལ་གྱི་གསུང་སྣ་ཚོགས་དང༌། རྣམ་པར་ཐར་པའི་རང་བཞིན་སྣ་ཚོགས་དང༌། རྣམ་པར་ཐར་པའི་སྒོ་སྣ་ཚོགས་དང༌། རྣམ་པར་ཐར་པའི་རྒྱུད་སྣ་ཚོགས་ དང༌། དུས་ལ་འཇུག་པ་སྣ་ཚོགས་དང༌། ཞིང་རྒྱ་མཚོ་ལ་འཇུག་པ་སྣ་ཚོགས་དང༌། སངས་རྒྱས་བལྟ་བ་རྒྱ་མཚོ་རྣམ་པར་དམིགས་པར་བྱ་བ་སྣ་ཚོགས་དང༌། དེ་བཞིན་གཤེགས་པའི་ འཁོར་གྱི་དཀྱིལ་འཁོར་དུ་འཇུག་པ་སྣ་ཚོགས་དང༌། བྱང་ཆུབ་སེམས་དཔའི་སྨོན་ལམ་རྒྱ་མཚོའི་ཚུལ་གྱི་ལམ་སྣ་ཚོགས་དང༌། བྱང་ཆུབ་སེམས་དཔའི་སྤྱོད་པ་མངོན་པར་སྒྲུབ་པ་སྣ་ ཚོགས་དང༌། བྱང་ཆུབ་སེམས་དཔའི་རྣམ་པར་ཐར་པ་འབྱམས་ཀླས་པ་སྣ་ཚོགས་ཀྱིས་ཐོབ་པར་གྱུར་ཀྱང་བྱང་ཆུབ་སེམས་དཔའི་རྣམ་པར་ཐར་པ་ཀུན་ཏུ་བཟང་པོའི་ཚུལ་ནི། ཁོང་ དུ་མཆུད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཀུན་ཏུ་བཟང་པོ་རྣམས་ཀྱི་རྣམ་པར་ཐར་པའི་ཚུལ་ནི། ནམ་མཁའི་དབྱིངས་ཀྱིས་ཀླས་པར་ཚད་མེད་དོ། །སེམས་ཅན་གྱི་ མིང་དུ་བྱ་བ་ཐམས་ཅད་ཀྱི་དབྱིངས་ལྟར་ཚད་མེད་དོ། །དུས་གསུམ་གྱི་རྒྱུད་རྒྱ་མཚོའི་དབྱིངས་ལྟར་ཚད་མེད་དོ། །ཕྱོགས་རྒྱ་མཚོའི་དབྱིངས་ལྟར་ཚད་མེད་དོ། །ཆོས་ཀྱི་དབྱིངས་ཀྱི་ཚུལ་ རྒྱ་མཚོའི་དབྱིངས་ལྟར་ཚད་མེད་དོ། །རིགས་ཀྱི་བུ། བྱང་ཆུབ་སེམས་དཔའ་ཀུན་ཏུ་བཟང་པོ་རྣམས་ཀྱི་རྣམ་པར་ཐར་པའི་ཚུལ་གྱི་ལུས་ནི། དེ་བཞིན་གཤེགས་པའི་ཡུལ་དང་མཉམ་ པའོ༑ ༑དེ་ལྟར་རིགས་ཀྱི་བུ། ཁོ་མོས་བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཅིག་ཏུ་བྱང་ཆུབ་སེམས་དཔའི་སྐུ་ལ་ལྟ་ལྟ་ཡང་བལྟ་བས་མ་ངོམས་ཏེ། རིགས་ཀྱི་བུ། འདི་ ལྟ་སྟེ༑ དཔེར་ན། གཅིག་ཏུ་འདོད་ཆགས་ལ་སྤྱོད་པའི་སྐྱེས་པ་དང་བུད་མེད་ཕན་ཚུན་ནས་འཕྲད་པར་དུས་བྱས་པ་གཉིས་ལ་ནི། སེམས་ཀྱི་རྒྱུད་ཚུལ་བཞིན་མ་ཡིན་པ་ཡིད་ལ་བྱེད་པ་ ལས་བྱུང་བ་གཙང་བའི་འདུ་ཤེས་པ་དང༌། རྣམ་པར་རྟོག་པས་མོས་པ་ལས་བྱུང་བ་ཚད་མེད་པ་ཞིག་སྐྱེའོ། །རིགས་ཀྱི་བུ། དེ་བཞིན་དུ་ཁོ་མོ་བྱང་ཆུབ་སེམས་དཔའི་སྐུ་ལ་ལྟ་ན། བ་སྤུའི་ སྒོ་རེ་རེ་ནས་ཀྱང་འཇིག་རྟེན་གྱི་ཁམས་ཀྱི་རྒྱུད་འབྱམས་ཀླས་པ་མཐའ་དང་དབུས་མེད་པ། ཚད་མེད་པར་ཤིན་ཏུ་བསྟན་པ། གཞི་སྣ་ཚོགས་དང་ལྡན་པ། མཚམས་ཀྱི་རྒྱན་སྣ་ཚོགས་དང་ ལྡན་པ༑ དབྱིབས་སྣ་ཚོགས་དང་ལྡན་པ། རིའི་རྒྱན་སྣ་ཚོགས་ཀྱིས་བརྒྱན་པ། སའི་གཞིའི་རྒྱན་སྣ་ཚོགས་བསྟན་དུ་ཡོད་པ། སྤྲིན་སྣ་ཚོགས་དང་ལྡན་པའི་ནམ་མཁའ་ཀུན་ནས་ཁྱབ་ པའི་རྒྱན་དང་ལྡན་པ། ཚུལ་དང༌། མིང་དང༌། གྲངས་སྣ་ཚོགས་སུ་བརྗོད་པ། སངས་རྒྱས་འབྱུང་བ་དང༌། དེ་བཞིན་གཤེགས་པའི་རྒྱུད་སྣ་ཚོགས་འབྱུང་བ། སྙིང་པོ་བྱང་ཆུབ་ཀྱི་རྒྱན་སྣ་ ཚོགས་ཀྱིས་བརྒྱན་པ། དེ་བཞིན་གཤེགས་པ་ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་པ་སྣ་ཚོགས་དང་ལྡན་པ། དེ་བཞིན་གཤེགས་པའི་འཁོར་གྱི་དཀྱིལ་འཁོར་གྱི་རྒྱན་ ༄༅། །སྣ་ཚོགས་དང་ལྡན་པ། མདོ་སྡེའི་ཚུལ་སྣ་ཚོགས་ཤིན་ཏུ་བསྟན་པའི་སྒྲ་འབྱུང་བ། ཐེག་པའི་ཚུལ་སྣ་ཚོགས་མངོན་པར་སྒྲུབ་པ་འབྱུང་བ་དང་ལྡན་པ་། ཡོངས་སུ་དག་པའི་འོད་དང༌། སྣང་བ་སྣ་ཚོགས་ཀྱིས་རབ་ཏུ་སྣང་པ། མཚན་མ་སྔོན་ཆད་མ་མཐོང་བ་དག་སེམས་ཀྱི་སྐད་ཅིག་རེ་རེ་ཞིང་མིག་ལམ་དུ་སྣང་ངོ༌། །བ་སྤུའི་སྒོ་རེ་རེ་ནས་ཀྱང་ སངས་རྒྱས་རྒྱ་མཚོ་མཐའ་དང་དབུས་མེད་པའི་སྙིང་པོ་བྱང་ཆུབ་ཀྱི་རྒྱན་སྣ་ཚོགས་མངའ་བ། ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་པ་སྣ་ཚོགས་དང་ལྡན་པ། མདོ་སྡེའི་ཚུལ་ སྣ་ཚོགས་སྒྲོག་པའི་རྣམ་པར་འཕྲུལ་པ་དང་ལྡན་པ་དག་ཀྱང་རྒྱུན་མི་འཆད་པའི་ཚུལ་དུ་སེམས་ཀྱི་སྐད་ཅིག་རེ་རེ་ལ་མིག་ལམ་དུ་སྣང་ངོ༌། །བ་སྤུའི་སྒོ་རེ་རེ་ནས་ཀྱང་སེམས་ཅན་རྒྱ་མཚོ་ མཐའ་དང་དབུས་མེད་པ་ཁྱིམ་དང༌། ཀུན་དགའི་ར་བ་དང༌། རི་དང༌། གཞལ་མེད་ཁང་དང༌། ཆུ་ཀླུང་དང༌། རྒྱ་མཚོ་ལ་གནས་པ་གཟུགས་དང༌། ལུས་སྣ་ཚོགས་ཅན། ལོངས་སྤྱོད་ཀྱི་ ཡུལ་སྣ་ཚོགས་དང་ལྡན་པ། སྤྱོད་པ་དང༌། སྤྱོད་ཡུལ་དང༌། སྦྱོར་བ་སྣ་ཚོགས་དང་ལྡན་པ། དབང་པོ་སྣ་ཚོགས་སུ་གྲུབ་པའི་ཚུལ་དང་ལྡན་པ་དག་ཀྱང་སེམས་ཀྱི་སྐད་ཅིག་རེ་རེ་ལ་མིག་ ལམ་དུ་སྣང་ངོ༌། །བ་སྤུའི་སྒོ་རེ་རེ་ནས་ཀྱང་དུས་གསུམ་རྒྱ་མཚོ་ལ་འཇུག་པའི་ཚུལ་མཐའ་དང་དབུས་མེད་པ་ཞིག་མིག་ལམ་དུ་སྣང་ངོ༌། །བྱང་ཆུབ་སེམས་དཔའི་སྨོན་ལམ་རྒྱ་མཚོ་ མཐའ་དང་དབུས་མེད་པ་ཞིག་ནི། རྣམ་པར་དག་པར་འགྱུར་རོ། །བྱང་ཆུབ་སེམས་དཔའི་སྤྱོད་པ་རྣམ་པ་ཐ་དད་པ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ༌། །བྱང་ཆུབ་ སེམས་དཔའི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཡོངས་སུ་དག་པ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ༌། །བྱང་ཆུབ་སེམས་དཔའི་སྔོན་གྱི་སྦྱོར་བ་རྒྱ་མཚོ་མཐའ་དང་དབུས་མེད་ པ་དག་ཀྱང་ཡོངས་སུ་སྣང་ངོ༌། །སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཚུལ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ༌། །བྱང་ཆུབ་སེམས་དཔའི་བྱམས་པ་ ཆེན་པོའི་ཚུལ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ༌། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བའི་མཐུ་དང༌། ཐབས་རྒྱ་མཚོ་དག་ལའང་ འཇུག་ཅིང་ཁོང་དུ་ཆུད་དོ། །བྱང་ཆུབ་སེམས་དཔའི་སྙིང་རྗེ་ཆེན་པོའི་སྤྲིན་གྱི་ཚུལ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་འགྲུབ་བོ། །བྱང་ཆུབ་སེམས་དཔའི་དགའ་བའི་ཤུགས་ ཆེན་པོ་རྒྱ་མཚོ་མཐའ་དང་དབུས་མེད་པ་དག་ཀྱང་རྣམ་པར་འཕེལ་ཏེ། སེམས་ཀྱི་སྐད་ཅིག་རེ་རེ་ལ་ཡང་སེམས་ཅན་ཐམས་ཅད་ཡོངས་སུ་བསྡུ་བའི་ཚུལ་རྒྱ་མཚོ་མཐའ་དང་དབུས་མེད་པ་ དག་ཀྱང་རབ་ཏུ་འགྲུབ་བོ། །རིགས་ཀྱི་བུ། དེ་ལྟར་ཁོ་མོ་བསྐལ་པ་སངས་རྒྱས་ཀྱི་ཞིང་བརྒྱའི་རྡུལ་ཤིན་ཏུ་ཕྲ་བ་སྙེད་དག་ཏུ་བྱང་ཆུབ་སེམས་དཔའི་བ་སྤུའི་སྒོ་རེ་རེ་ཞིང་སེམས་ཀྱི་སྐད་ཅིག་རེ་རེ་ ༄༅། །ལ་ཆོས་ཀྱི་ཚུལ་རྒྱ་མཚོ་མཐའ་དང་དབུས་མེད་པ་ལ་ཞུགས་ཏེ། ཁོང་དུ་ཆུད་པར་བྱས་ཀྱང་མཐར་ཐུག་པར་མ་གྱུར་ཏེ་སྔོན་ཁོང་དུ་ཆུད་པ་ལ་བཟླས་ཏེ་ཁོང་དུ་ ཆུད་པར་བྱས་པའང་མེད་དོ། །སྔོན་ཐོབ་པ་ལས་བཟླས་ཏེ་ཐོབ་པར་བྱས་པའང་མེད་དོ། །རིགས་ཀྱི་བུ། དེ་ལྟར་དོན་ཐམས་ཅད་གྲུབ་པ་བཙུན་མོའི་འཁོར་གྱི་ནང་ན་བཞུགས་ཤིང༌། བུད་ མེད་ཀྱི་ཚོགས་ཀྱིས་ཡོངས་སུ་བསྐོར་བར་བཞུགས་པའི་ཚེའང་ཁོ་མོ་ནི། བ་སྤུའི་སྒོ་རེ་རེ་ནས་ཀྱང་དུས་གསུམ་གྱི་ཚུལ་རྒྱ་མཚོ་མཐའ་དང་དབུས་མེད་པ་ལ་ཆོས་ཀྱི་དབྱིངས་ལ་འཇུག་པའི་ ཚུལ་རྒྱ་མཚོ་ཁོང་དུ་ཆུད་པར་བྱ་བས་ཡོངས་སུ་འཇུག་གོ །རིགས་ཀྱི་བུ། ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ ཅད་ལ་རྣམ་པར་ལྟ་བའི་ཡུལ་འདི་ཤེས་ཏེ་མཉམ་པར་གཞོག་པར་ཟད་ན། ཁོ་མོས་བྱང་ཆུབ་སེམས་དཔའ་ཐབས་ཀྱི་ཚུལ་རྒྱ་མཚོ་མཐའ་དང་དབུས་མེད་པ་ལ་ཞུགས་པ། སེམས་ ཅན་ཐམས་ཅད་དང་མཉམ་ཞིང་འདྲ་བའི་དབྱིབས་སུ་གནས་པའི་ལུས་རྣམ་པར་དམིགས་པ་ཡོངས་སུ་སྟོན་པ། འགྲོ་བ་ཐམས་ཅད་ཀྱི་བསམ་པ་དང་མཐུན་པར་སྤྱོད་པ་ཡོངས་སུ་སྟོན་པ། བ་སྤུའི་སྒོ་ཐམས་ཅད་ནས་ཁ་དོག་མཐའ་ཡས་པའི་སྤྲུལ་པའི་སྤྲིན་རབ་ཏུ་འགྱེད་པ། ལུས་མེད་པའི་ཆོས་ཉིད་ཀྱི་ངོ་བོ་ཉིད་ཀྱི་རང་བཞིན་ཤིན་ཏུ་རྣམ་པར་དག་པ། ནམ་མཁའི་ མཚན་ཉིད་དུ་འགྲོ་བའི་རང་བཞིན་ཁོང་དུ་ཆུད་པས་རྣམ་པར་རྟོག་པ་མེད་པ། ཐམས་ཅད་དུ་རྗེས་སུ་སོང་བའི་བློ་རྣམ་པར་གདོན་མི་ཟ་བས་དེ་བཞིན་གཤེགས་པ་དང་མཉམ་པར་རྣམ་པར་ འཕྲུལ་པ་ལ་བརྩོན་པ། རྣམ་པར་ཐར་པའི་ཡུལ་མཐའ་དང་དབུས་མེད་པས་རྣམ་པར་འཕྲུལ་པ་ལ་ཞུགས་པ། ཆོས་ཀྱི་དབྱིངས་ཤིན་ཏུ་རྒྱ་ཆེན་པོར་སེམས་བསྐྱེད་པས་འཇུག་པ་ལ་རྣམ་པར་ སྤྱོད་ཅིང་དབང་སྒྱུར་བ། ཆོས་ཀྱི་གནས་སྒོ་ཐམས་ཅད་དང་ལྡན་པའི་རྣམ་པར་ཐར་པ་རྒྱ་མཚོ་ལ་རྣམ་པར་རྩེ་བ་དེ་དག་གི་སྤྱོད་པ་ཤེས་པའམ། ཡོན་ཏན་གྱི་གཏེར་མ་ལུས་པར་བསྟན་པར་ ནུས་རེ་སྐན། སོང་རིགས་ཀྱི་བུ། བཅོམ་ལྡན་འདས་རྣམ་པར་སྣང་མཛད་ཀྱི་ཞབས་ཀྱི་དྲུང་འདི་ཉིད་ན་ཁྲི་རིན་པོ་ཆེ་སྣ་ཚོགས་ཀྱི་རྒྱན་དང་ལྡན་པ། ནོར་བུ་རིན་པོ་ཆེའི་རྒྱལ་པོ་པདྨོའི་སྙིང་པོ་ཅན་ ལ་བྱང་ཆུབ་སེམས་དཔའི་ཡུམ་ལྷ་མོ་སྒྱུ་མ་ཞེས་བྱ་བ་འདུག་གི །དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔའི་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་འཇིག་རྟེན་གྱི་ཆོས་ཀྱི་ དྲི་མ་ཐམས་ཅད་ཀྱིས་མི་གོས་པ་ཡིན་པ་དང༌། དེ་བཞིན་གཤེགས་པ་མཆོད་པའི་ནན་ཏན་ལ་རྒྱུན་མི་འཆད་པ་ཡིན་པ་དང༌། བྱང་ཆུབ་སེམས་དཔའི་ལས་ཀྱི་མཐའ་ཐམས་ཅད་ལས་ ཕྱིར་མི་ལྡོག་པ་ཡིན་པ་དང༌། བྱང་ཆུབ་སེམས་དཔའི་རྣམ་པར་ཐར་པ་ལ་འཇུག་པ་ལ་སྒྲིབ་པ་ཐམས་ཅད་དང་བྲལ་བར་འགྱུར་བ་ཡིན་པ་དང༌། བྱང་ཆུབ་སེམས་དཔའི་རྣམ་པར་སྤྱོད་ ༄༅། །པ་ཐམས་ཅད་ལ་གཞན་གྱི་དྲིང་མི་འཇོག་པ་ཡིན་པ་དང༌། དེ་བཞིན་གཤེགས་པ་ཐམས་ཅད་དང་མངོན་དུ་གྱུར་པར་གནས་པ་ཡིན་པ་དང༌། སེམས་ཅན་ ཐམས་ཅད་ཡོངས་སུ་བསྡུ་བའི་ནན་ཏན་ལས་ཕྱིར་མི་ལྡོག་པ་ཡིན་པ་དང༌། ཕྱི་མའི་མཐའི་མུར་ཐུག་པའི་བསྐལ་པར་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་གནས་པར་བྱ་བ་ལས་ ཕྱིར་མི་ལྡོག་པ་ཡིན་པ་དང༌། ཐེག་པ་ཆེན་པོའི་སྨོན་ལམ་ལས་ཕྱིར་མི་ལྡོག་པ་ཡིན་པ་དང༌། འགྲོ་བ་ཐམས་ཅད་ཀྱི་དགེ་བའི་རྩ་བ་ཡོངས་སུ་གཟུང་བ་དང༌། རྣམ་པར་སྤེལ་བ་ལ་སྒྱིད་ལུག་པར་ མི་འགྱུར་པ་ཡིན་པ་དྲིས་ཤིག །དེ་ནས་ཤཱཀྱའི་བུ་མོ་གོ་པས་རྣམ་པར་ཐར་པའི་སྒོའི་ཚུལ་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་ འདི་དག་སྨྲས་སོ། །ཡང་དག་བྱང་ཆུབ་སྤྱོད་ལ་བརྩོན་པ་ཡི། །སེམས་ཅན་དམ་པ་སེམས་ཅན་སུས་མཐོང་བ། །མོས་པའི་སེམས་ཅན་ཁོང་ཁྲོ་ལྡན་ཡང་རུང༌། །དེ་ཡི་བསྡུ་བས་ཀུན་ཀྱང་ཡོངས་ སུ་འདུ༑ ༑ཞིང་བརྒྱའི་རྡུལ་ཕྲན་རབ་ཏུ་ཕྲ་སྙེད་ཀྱི། །བསྐལ་པ་མང་པོ་ཁོ་མོས་འདི་ནས་དྲན། །དེ་ཡི་ཕ་རོལ་བསྐལ་པ་རྣམ་བརྒྱན་ལ། །འཇིག་རྟེན་ཁམས་རབ་རི་བོའི་འོད་བྱུང་ངོ༌། །དེ་ལ་ཐུབ་ པ་སྟོང་ཕྲག་བགྲངས་པ་ནི། །བྱེ་བ་ཁྲག་ཁྲིག་སུམ་ཅུ་དྲུག་བྱུང་སྟེ། །དེ་ཀུན་ཐ་མར་ཐུབ་དབང་བྱུང་བ་ནི། །འགྲོ་བའི་སྒྲོན་མ་ཆོས་ཀྱི་རྒྱལ་མཚན་ནོ། །དེ་ཚེ་རྒྱལ་པོ་དཔལ་གྱི་གཟི་བརྗིད་བྱུང༌།། ཐུབ་དབང་དེ་ནི་མྱ་ངན་ཡོངས་འདས་ནས། །དགྲ་ཡི་འཁོར་བཅོམ་འཛམ་བུའི་རྒྱལ་མཚན་འདིར། །བཀའ་ལ་ཐོགས་མེད་མངའ་བདག་དམ་པར་གྱུར། །དེ་ལ་བུ་ནི་བརྒྱ་ཕྲག་ལྔ་ཡོད་དོ། །ཀུན་ ཀྱང་དཔའ་ཞིང་རྟུལ་བོད་གཟུགས་དང་ལྡན། །ཡན་ལག་ཀུན་རྫོགས་རྣམ་པར་དག་པའི་ལུས། །གོང་ན་མེད་པའི་དཔལ་གྱིས་རབ་ཏུ་བརྒྱན། །རྒྱལ་པོ་སྲས་བཅས་བདེ་གཤེགས་འདུན་པར་ གྱུར༑ ༑རྒྱལ་བའི་མཆོད་པ་རྒྱ་ཆེན་རབ་ཀྱང་བྱས། །དེ་ནི་རྟག་ཏུ་དམ་ཆོས་ཡོངས་བཟུང་བའི། །ཆོས་ལ་མངོན་བརྩོན་རབ་ཏུ་བརྟན་པར་གྱུར། །རྒྱལ་པོ་དེ་སྲས་འོད་ཟེར་བཟང་པོ་ནི། །སེམས་ ཅན་རྣམ་དག་གཞོན་ནུ་འཁྲུངས་གྱུར་པ། །ཤིན་ཏུ་བལྟ་མཛེས་ཡིད་འོང་གཟུགས་ལྡན་ཏེ། །ཡན་ལག་མཚན་རབ་སུམ་ཅུ་རྩ་གཉིས་བརྒྱན། །རྒྱལ་སྲིད་ཡོངས་སུ་སྤངས་ནས་མི་ཡི་འཁོར། །བྱེ་ བ་ལྔས་བསྐོར་དེ་ཚེ་རབ་ཏུ་བྱུང༌། །རབ་ཏུ་བྱུང་ནས་བརྩོན་འགྲུས་བརྟན་ལྡན་ཏེ། །རྒྱལ་པོའི་ཆོས་ཀྱང་ཡོངས་སུ་བཟུང་བར་གྱུར། །ཕོ་བྲང་དམ་པ་སྡོང་པོ་ལྡན་པ་ནི། །གྲོང་མཆོག་བྱེ་བ་སྟོང་ གིས་ཀུན་ནས་བསྐོར། །ནགས་ཚལ་ཡལ་ག་སྣ་ཚོགས་དེར་བྱུང་བ། །རབ་ཏུ་སྒྲ་ཞི་བླ་ན་མེད་པའི་དཔལ། །དེ་ནི་འོད་བཟང་བརྟུལ་ཞུགས་རབ་ལྡན་པ། །འཇིགས་མེད་ཤེས་རབ་སྤོབས་ དང་ལྡན་པ་བཞུགས། །དེས་ནི་སེམས་ཅན་ཉོན་མོངས་སྦྱངས་པའི་ཕྱིར། །རྒྱལ་བའི་ཆོས་ཀྱང་ཡོངས་སུ་བསྟན་པ་མཛད། །ཤེས་རབ་ལྡན་པ་དེ་ནི་བསོད་སྙོམས་ལ། །སྤྱོད་ལམ་མཛེས་ ༄༅། །ཤིང་ཆ་བྱད་ཞི་བ་དང༌། །མི་གཡེང་སྤྱན་གྱིས་དགོངས་པ་མཁྱེན་བཞིན་དུ། །ཚུལ་ཟབ་བསྟན་པར་བཞུད་པས་གྲོང་དུ་བྱོན། །གྲོང་མཆོག་དགའ་བའི་རྒྱལ་མཚན་ ཞེས་བྱ་བར། །ཚོང་དཔོན་ལེགས་པའི་སྙན་གྲགས་དེར་བྱུང་སྟེ། །ཁོ་མོ་དེ་ཡི་བུ་མོ་ཡིད་འོང་གྱུར། །གཟུགས་མཛེས་ལྡན་ཏེ་ཉི་མའི་འོད་ཅེས་བྱ། །ཁྱིམ་གྱི་དམ་པ་དེ་ཡི་སྒོ་ གནས་སུ། །འོད་ཟེར་བཟང་པོ་འཁོར་བཅས་ཁོ་མོས་མཐོང༌། །ཡན་ལག་མཚན་བརྒྱན་ཤིན་ཏུ་མཛེས་པ་སྟེ། །དེ་ལ་ཁོ་མོ་མོས་པ་མཆོག་ཅིག་སྐྱེས། །དེ་ནི་ཁོ་མོའི་ ཁྱིམ་གྱི་སྒོར་བྱོན་ནས། །ནོར་བུ་དེ་ཡི་ལྷུང་བཟེད་ནང་དུ་གསོལ། །རྒྱན་རྣམས་ཀུན་ཀྱང་བཀྲོལ་ཏེ་མོས་སེམས་ཀྱིས། །ཤིན་ཏུ་འདུན་པར་དེ་ལ་བདག་གིས་ཕུལ། །བདེ་ གཤེགས་སྲས་པོ་འོད་ཟེར་བཟང་དཔལ་ལ། །འདོད་ཆགས་སེམས་ཀྱིས་མཆོད་པ་རྣམས་བསྒྲུབས་པས། །བསྐལ་པའི་དམ་པ་ཉིས་བརྒྱ་ལྔ་བཅུར་ཡང༌། །ངན་སོང་གང་ དུའང་སོང་བར་མ་གྱུར་ཏོ། །ལྷ་ཡི་ཡུལ་དུ་ལྷ་རིགས་ལྡན་པར་སྐྱེས། །མི་ཡི་ཡུལ་དུ་རྒྱལ་པོའི་སྲས་མོར་གྱུར། །ཁ་དོག་མཐའ་ཡས་སྐུ་ཡི་མདོག་མངའ་བས། །ཀུན་ཏུ་ཁོ་མོ་ མངོན་པར་ཞལ་ཡང་བསྟན། བསྐལ་པ་ཉིས་བརྒྱ་ལ་བཅུ་འདས་གྱུར་ནས། །སྦྲུལ་ཚོང་གཙོ་མོ་བལྟ་ན་སྡུག་པ་སྟེ། །མི་འཇིགས་བྱེད་པའི་བུ་མོར་སྐྱེས་པར་གྱུར། །དེ་ཚེ་ ཤིན་ཏུ་སྦྱངས་ཞེས་བྱ་བ་ཡིན། །རྒྱལ་བུ་གཟི་བརྗིད་འོད་ཀྱིས་བདག་མཐོང་ནས། །ཁོ་མོས་དེ་ལ་དགའ་བས་མཆོད་པ་བྱས། །བདག་ཉིད་དེ་ལ་ཡོངས་སུ་དབུལ་བྱས་ནས། །ཁོ་མོ་དེ་ཡི་ དབང་གྱུར་ཆུང་མར་གྱུར། །དྲང་སྲོང་ཆེན་པོ་སྐུ་མཆོག་ཉི་མ་ལའང༌། །བདག་ཅག་བསྡོངས་ཏེ་ལེགས་པར་མཆོད་པ་བྱས། །མོས་པས་སངས་རྒྱས་དེ་ཡི་ཞལ་བལྟས་ནས། །བདག་ གིས་བྱང་ཆུབ་མཆོག་ཏུ་སེམས་ཀྱང་བསྐྱེད། །རྒྱལ་བ་བྱེ་བ་དྲུག་ཅུ་ཚང་བ་ཡང༌། །བསྐལ་པ་དེ་ལ་ཁོ་མོས་རིམ་གྲོ་བྱས། །རྒྱལ་བ་དེ་དག་ཐ་མའི་དུས་ཀྱི་ཚེ། །སངས་རྒྱས་མོས་པའི་གཟི་ བརྗིད་བྱུང་བར་གྱུར། །དེར་ནི་ཁོ་མོའི་ཆོས་མིག་རྣམ་པར་དག །ཆོས་ཀྱི་རང་བཞིན་བདག་གིས་ཁོང་དུ་ཆུད། །ཚུལ་མིན་རྣམ་རྟོག་རབ་ཏུ་ཞི་བར་གྱུར། །དེ་ཚེ་ཚུན་ཆད་ཁོ་མོས་སྣང་བ་ཐོབ་། རྒྱལ་སྲས་རྣམས་ཀྱི་ཏིང་ངེ་འཛིན་གྱི་ཡང༌། །དེ་ཕྱི་ཚུན་ཆད་རྣམ་པར་མཐོང་བར་གྱུར། །སེམས་ཀྱི་སྐད་ཅིག་གཅིག་གིས་རྒྱ་མཚོའི་ཞིང༌། །བསམ་ལས་རྣམ་འདས་ཕྱོགས་སུ་ཁོ་མོ་འཇུག ། ཕྱོགས་རྣམས་ཀུན་གྱི་སྣ་ཚོགས་རྣམ་དག་པའི། །ཞིང་རྣམས་ཚད་མེད་རྨང་བྱུང་ཁོ་མོས་མཐོང༌། །མཐོང་ཡང་དེ་དག་ལ་ནི་ཆགས་པ་མེད། །ཉོན་མོངས་བཅས་ལའང་ཁོང་ཁྲོ་སྡང་ བའང་མེད། །ཞིང་རྣམས་དེ་དག་མ་ལུས་ཐམས་ཅད་ཀྱི། །སྙིང་པོ་བྱང་ཆུབ་སངས་རྒྱས་མ་ལུས་མཐོང༌། །དེ་དག་འོད་ཀྱི་རྒྱ་མཚོ་ཚད་མེད་པའང༌། །སེམས་ཀྱི་སྐད་ཅིག་གཅིག་གིས་ ༄༅། །རྣམ་པར་ལྟ། །དེ་དག་འཁོར་གྱི་དཀྱིལ་འཁོར་རྒྱ་མཚོ་ཡང༌། །སེམས་གཅིག་ཐོགས་པ་མེད་པས་ཁོང་དུ་ཆུད། །རྣམ་པར་ཐར་པ་ཚད་མེད་ཐམས་ ཅད་དང༌། །དེ་དག་ཏིང་འཛིན་མ་ལུས་དེ་བཞིན་གཤེགས། །དེ་དག་སྤྱོད་པ་ཡངས་པའང་ཁོང་དུ་ཆུད། །ས་ཚུལ་མ་ལུས་ཀུན་ཀྱང་ཁོ་མོས་ཤེས། །སྨོན་ལམ་གྲངས་མེད་ རྒྱ་མཚོ་ཆེན་པོ་ཡང༌། །སྐད་ཅིག་རེ་རེས་མཐའ་ཡས་ཁོང་དུ་ཆུད། །བསྐལ་པ་མཐའ་ཡས་སྤྱད་པ་སྤྱོད་བྱེད་ཅིང༌། །སྐྱེས་བུ་དམ་པའི་སྐུ་ལ་ལྟ་ལྟ་སྟེ། །དེ་ཡི་བ་ སྤུ་རེ་རེ་རྣམ་འཕྲུལ་པའང༌། །ནམ་ཡང་མུར་ཕྱིན་བདག་གིས་མ་ནུས་སོ། །དེ་ཡི་བ་སྤུ་གཅིག་གི་རྩེ་ལ་ཡང༌། །ཞིང་མང་རྒྱ་མཚོ་གྲངས་ལས་འདས་པ་མཐོང༌། །རླུང་ གི་ཕུང་པོ་ཆུ་བོ་ཆེན་པོ་དང༌། །ས་ཡི་ལྷུན་རྣམས་མེ་ཡིས་ཡོངས་གང་མཐོང༌། །གཞི་རྣམ་སྣ་ཚོགས་རྣམ་ཕྱེའི་གཟུགས་ལྡན་ཞིང༌། །དབྱིབས་ཚུལ་སྣ་ཚོགས་ཁོང་དུ་ཆུད་ བྱ་བ༑ ༑དབྱིབས་དང་ལུས་ཀྱི་རྣམ་པ་སྣ་ཚོགས་ཤིང༌། །ལུས་དང་རྣམ་པ་མཐའ་ཡས་གཟུགས་ལྡན་པའི། །བརྗོད་ཡས་ཁམས་རྣམས་ཞིང་རྣམས་རྒྱ་མཚོ་དག ། ཚད་མེད་རྣམས་སུ་ཐ་དད་གསལ་བར་མཐོང༌། །ཆོས་ཀྱི་གསུང་གིས་འགྲོ་བ་གདུལ་དོན་དུ། །བརྩོན་པའི་རྒྱལ་བ་དེ་ཉིད་བཞུགས་པ་མཐོང༌། །བསྐལ་པར་སྤྱོད་པ་ ཡངས་པ་སྤྱོད་པའི་ཚེ། །སྐུ་ཡི་འཕྲིན་ལས་ཁོ་མོས་དེ་མ་ཤེས། །གསུང་དང་ཐུགས་མིན་དེ་གཉིས་འཕྲིན་ལས་མིན། །རྫུ་འཕྲུལ་རྣམ་འཕྲུལ་ཐ་དད་ཚུལ་མ་ཤེས། །དེ་ ནས་ཚོང་དཔོན་གྱི་བུ་ནོར་བཟང་གིས་ཤཱཀྱའི་བུ་མོ་གོ་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་ཤཱཀྱའི་བུ་མོ་གོ་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་ བྱས་ནས་ཡང་བལྟས་ཏེ་ཤཱཀྱའི་བུ་མོ་གོ་པའི་དྲུང་ནས་སོང་ངོ༌།། །།ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། སྡོང་པོས་ བརྒྱན་པའི་ལེའུ་སྟེ། །བམ་པོ་བརྒྱ་དགུ་པ། དེ་ནས་ཚོང་དཔོན་གྱི་བུ་ནོར་བཟང་ལྷ་མོ་སྒྱུ་མའི་གན་དུ་འགྲོ་བར་མངོན་དུ་བལྟས་ནས་སངས་རྒྱས་ཀྱི་སྤྱོད་ཡུལ་གྱི་རྒྱུད་ཀྱི་ཡེ་ཤེས་ ལ་ཞུགས་པ་དེས་འདི་སྙམ་དུ་བསམ་མོ། །བདག་གིས་དགེ་བའི་བཤེས་གཉེན་འཇིག་རྟེན་ཐམས་ཅད་ལས་གྱེན་དུ་འཕགས་པའི་སྐྱེ་མཆེད་དྲུག་དང་ལྡན་པ། གནས་མེད་པ་ལ་ རབ་ཏུ་གནས་པ། ཆགས་པ་ཐམས་ཅད་ལས་ཡང་དག་པར་འདས་པའི་ལུས་དང་ལྡན་པ། ཆགས་པ་མེད་པར་འགྲོ་བའི་ལམ་དུ་ཞུགས་པ་། ཆོས་ཀྱི་ལུས་ཤིན་ཏུ་ རྣམ་པར་དག་པ། ལུས་ཀྱི་ལམ་སྒྱུ་མས་ལེགས་པར་སྤྲུལ་པའི་ལུས་དང་ལྡན་པ། ཡེ་ཤེས་སྒྱུ་མའི་རྣམ་པར་འཇིག་རྟེན་ན་རྣམ་པར་སྤྱོད་པ། སྨོན་ལམ་སྒྱུ་མའི་ ༄༅། །གཟུགས་དང་ལུས་སུ་ལྡན་པ། སངས་རྒྱས་ཀྱི་བྱིན་གྱི་རླབས་ཡིད་ཀྱི་རང་བཞིན་གྱི་ལུས་དང་ལྡན་པ། མ་སྐྱེས་མ་འགག་པའི་ལུས་དང་ལྡན་ པ༑ འོང་བ་མེད་པའི་ལུས་དང་ལྡན་པ། བདེན་པ་མེད་པ་དང་རྫུན་པ་མེད་པའི་ལུས་དང་ལྡན་པ། མ་འཕོས་མ་ཞིག་པའི་ལུས་དང་ལྡན་པ། མ་བྱུང་མི་འཇིག་ པའི་ལུས་དང་ལྡན་པ། མཚན་ཉིད་མེད་པར་མཚན་ཉིད་གཅིག་པའི་ལུས་དང་ལྡན་པ། གཉིས་ལ་ཆགས་པ་དང་བྲལ་བའི་ལུས་དང་ལྡན་པ། ཀུན་གཞི་མེད་པ་ལ་གནས་ པའི་ལུས་དང་ལྡན་པ། མི་ཟད་ཅིང་ཉམས་པ་མེད་པའི་ལུས་དང་ལྡན་པ། གཟུགས་བརྙན་ལྟར་རྣམ་པར་རྟོག་པ་མེད་པའི་ལུས་དང་ལྡན་པ། རྨི་ལམ་དང་མཉམ་ པར་རྣམ་པར་རྒྱུ་བའི་ལུས་དང་ལྡན་པ། མེ་ལོང་གི་དཀྱིལ་འཁོར་ལྟར་འཕོ་བ་མེད་པའི་ལུས་དང་ལྡན་པ། ཕྱོགས་མེད་པ་ལྟར་རབ་ཏུ་ཞི་བ་ཁོང་དུ་ཆུད་པའི་ ལུས་དང་ལྡན་པ། །ཕྱོགས་ཀུན་ཏུ་རྒྱས་པར་འགེངས་པའི་ལུས་དང་ལྡན་པ། དུས་གསུམ་དུ་ཐ་མི་དད་པའི་ལུས་དང་ལྡན་པ། ལུས་མེད་པའི་སེམས་ ཀྱི་ལུས་རྣམ་པར་མི་རྟོག་པའི་ལུས་དང་ལྡན་པ། འཇིག་རྟེན་ཐམས་ཅད་ཀྱི་མིག་གི་ལམ་ལས་ཡོངས་སུ་འདས་པའི་ལུས་དང་ལྡན་པ། ཀུན་ཏུ་བཟང་པོའི་མིག་ གི་རྒྱུད་ཀྱིས་རྣམ་པར་ཤེས་པར་བྱ་བས་འདུལ་བའི་ལུས་དང་ལྡན་པ། ཆགས་པ་མེད་པ་ནམ་མཁའི་སྤྱོད་ཡུལ་དང་ལྡན་པ་རྣམས་མཐོང་བར་བྱ་བའམ། བསྙེན་ བཀུར་བར་བྱ་བའམ། མངོན་སུམ་དུ་འཕྲད་པར་བྱ་བའམ། འགྲོགས་པར་བྱ་བའམ། མཚན་མ་གཟུང་བར་བྱ་བའམ། དབྱངས་ཀྱི་དཀྱིལ་ འཁོར་རྣམ་པར་རིག་པར་བྱ་བའམ། ཚིག་གི་རྒྱུད་ཡོངས་སུ་ཤེས་པར་བྱ་བའམ། གདམས་ངག་ཡོངས་སུ་གཟུང་བར་བྱ་བར་ཐབས་ཇི་ལྟ་བུ་ཞིག་ཏུ་ནུས་ པར་འགྱུར་སྙམ་ནས་དེ་ལྟར་སེམས་ཤིང་ཡིད་ལ་བྱེད་པ་ལ་བརྩོན་པར་གནས་པའི་ཚེ་གྲོང་ཁྱེར་གྱི་ལྷ་མོ་རིན་ཆེན་མིག་ཅེས་བྱ་བ། ནམ་མཁའི་ལྷ་མོའི་ཚོགས་ ཀྱིས་ཡོངས་སུ་བསྐོར་བ་ཞིག་གིས་བདག་གི་ལུས་རྒྱན་སྣ་ཚོགས་ཀྱིས་ཡོངས་སུ་བརྒྱན་པ། བདག་གི་ལུས་རྒྱན་གྱིས་རྣམ་པར་ཀླུབས་པར་ནམ་མཁའ་ལ་འདུག་པར་ ཉེ་བར་བསྟན་ནས་ལྷ་རྫས་ཀྱི་མེ་ཏོག་རྣམ་པ་དང༌། ཁ་དོག་དུ་མ་ཅན་སྙིམ་པ་ནས་མངོན་པར་གཏོར་ཏེ་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ ཀྱི་བུ༑ ཁྱོད་ཀྱིས་འཁོར་བའི་ཡིད་ལ་དགའ་བར་མི་གནས་པས་སེམས་ཀྱི་གྲོང་ཁྱེར་ཡོངས་སུ་སྲུང་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་དེ་ ༄༅། །བཞིན་གཤེགས་པའི་སྟོབས་བཅུ་ལ་དམིགས་པས་སེམས་ཀྱི་གྲོང་ཁྱེར་བརྒྱན་པ་ལ་བརྩོན་པར་གྱིས་ཤིག །རིགས་ཀྱི་བུ་།ཁྱོད་ ཀྱིས་ཕྲག་དོག་དང༌། སེར་སྣ་དང༌། གཡོ་དང་བྲལ་བས་སེམས་ཀྱི་གྲོང་ཁྱེར་ཡོངས་སུ་སྦྱངས་པ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་ཆོས་ ཐམས་ཅད་ཀྱི་རང་བཞིན་ངེས་པར་རྟོགས་པར་བྱ་བས་སེམས་ཀྱི་གྲོང་ཁྱེར་གྱི་ཡོངས་སུ་གདུང་བ་རབ་ཏུ་ཞི་བར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་ཐམས་ཅད་མཁྱེན་པ་ཉིད་ཀྱི་ཚོགས་ལ་བརྩོན་འགྲུས་ཆེན་པོའི་ཤུགས་རྣམ་པར་སྤེལ་བས་སེམས་ཀྱི་གྲོང་ཁྱེར་རྣམ་པར་སྤེལ་བ་ལ་བརྩོན་པར་གྱིས་ ཤིག །རིགས་ཀྱི་བུ། ཁྱོད་ཀྱིས་ཏིང་ངེ་འཛིན་དང༌། སྙོམས་པར་འཇུག་པ་དང༌། བསམ་གཏན་དང༌། རྣམ་པར་ཐར་པ་དང༌། ཆོས་ཀྱི་གཞལ་མེད་ ཁང་ཡངས་པའི་རྣམ་པར་སྤྱོད་པ་ལ་དབང་སྒྱུར་བས་སེམས་ཀྱི་གྲོང་ཁྱེར་དང༌། གནས་ཀྱི་མཛོད་བརྒྱན་པ་དང༌། སྲུང་བ་ལ་བརྩོན་པར་གྱིས་ཤིག །རིགས་ ཀྱི་བུ༑ ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཡང་དག་པར་སྒྲུབ་པའི་ས་ཐམས་ཅད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་ ཐོབ་པར་འཚལ་བས་སེམས་ཀྱི་གྲོང་ཁྱེར་སྣང་བར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་དེ་བཞིན་གཤེགས་པ་ཐམས་ཅད་ཡང་དག་པར་བྱུང་ བའི་ཐབས་ཀྱི་ལམ་གྱིས་རང་གི་སེམས་ཀྱི་གྲོང་ཁྱེར་དུ་གཞོལ་བར་བྱ་བས་སེམས་ཀྱི་གྲོང་ཁྱེར་ཉེ་བར་བརྟན་པ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་ བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་མངོན་པར་སྒྲུབ་པའི་སེམས་རྣམ་པར་དག་པས་སེམས་ཀྱི་གྲོང་ཁྱེར་གྱི་ར་བ་བརྟན་པ་མངོན་པར་ སྒྲུབ་པར་གྱིས་ཤིག །རིགས་ཀྱི་བུ། ཁྱོད་ཀྱིས་ཉོན་མོངས་པ་དང༌། བདུད་ཀྱི་རིས་ཀྱི་སྡིག་ཏོའི་གྲོགས་པོ་དང༌། བདུད་ཀྱི་འཁོར་གྱིས་མི་ཆོམ་པར་བྱ་བས་ སེམས་ཀྱི་གྲོང་ཁྱེར་རྒལ་དཀའ་བ་དང༌། བཤིག་པར་དཀའ་བ་མངོན་པར་སྒྲུབ་པ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་སེམས་ཅན་ཐམས་ ཅད་དེ་བཞིན་གཤེགས་པའི་ཡེ་ཤེས་སྣང་བས་ཁོང་དུ་ཆུད་པར་བྱ་བའི་ཕྱིར་སེམས་ཀྱི་གྲོང་ཁྱེར་སྣང་བར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་ དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་གྱི་ཆར་ཡོངས་སུ་བཟུང་བས་སེམས་ཀྱི་གྲོང་ཁྱེར་མངོན་པར་བརླན་པ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ ༄༅། །ཀྱིས་དེ་བཞིན་གཤེགས་པ་ཐམས་ཅད་ཀྱི་བསོད་ནམས་རྒྱ་མཚོ་རང་གི་སེམས་ཀྱིས་ཡང་དག་པར་བླངས་པས་སེམས་ཀྱི་གྲོང་ཁྱེར་ བརྟན་པ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་བྱམས་པ་ཆེན་པོས་འགྲོ་བ་ཐམས་ཅད་རྒྱས་པར་དགང་བས་སེམས་ཀྱི་གྲོང་ཁྱེར་རབ་ཏུ་རྒྱས་ པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་མི་དགེ་བའི་ཆོས་ཀྱི་གཉེན་པོ་ཆོས་ཀྱི་གདུགས་ཡངས་པར་སྒྲུབ་པས་སེམས་ཀྱི་གྲོང་ ཁྱེར་ཡོངས་སུ་དག་པ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་སྙིང་རྗེ་ཆེན་པོ་ཤིན་ཏུ་ཡངས་པས་འགྲོ་བ་ཐམས་ཅད་ཀྱི་དོན་དུ་སེམས་གཡོ་ པར་བྱ་བས་སེམས་ཀྱི་གྲོང་ཁྱེར་རབ་ཏུ་བསྐྱོབ་པ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་ཕྱི་ནང་གི་དངོས་པོ་འགྲོ་བ་ཐམས་ཅད་ལ་ཡོངས་སུ་བསྟན་ པའི་ཕྱིར་སེམས་ཀྱི་གྲོང་ཁྱེར་གྱི་སྒོ་དབྱེ་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་འཁོར་བའི་ཡུལ་ཐམས་ཅད་ལ་དགའ་བ་ལས་ཕྱིན་ཕྱོགས་སུ་ བལྟ་བས་སེམས་ཀྱི་གྲོང་ཁྱེར་རྣམ་པར་དག་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་མི་དགེ་བའི་ཆོས་ཀྱི་རྒྱུད་ཐམས་ཅད་མི་སྲིད་པར་བྱ་ བས་སེམས་ཀྱི་གྲོང་ཁྱེར་གྱི་སྲོག་རབ་ཏུ་མཁྲང་བ་མངོན་པར་སྒྲུབ་པ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་ཐམས་ཅད་མཁྱེན་པ་ཉིད་ཀྱི་ཚོགས་ཡང་ དག་པར་སྒྲུབ་པའི་བརྩོན་འགྲུས་ལས་ཕྱིར་མི་ལྡོག་པར་བྱ་བས་སེམས་ཀྱི་གྲོང་ཁྱེར་བརྟན་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་དུས་གསུམ་ གྱི་དེ་བཞིན་གཤེགས་པའི་དཀྱིལ་འཁོར་ཐམས་ཅད་དྲན་པ་ཤིན་ཏུ་སྣང་བར་བྱས་པས་སེམས་ཀྱི་གྲོང་ཁྱེར་རབ་ཏུ་གསལ་བར་བྱ་བ་ལ་བརྩོན་པར་གྱིས་ཤིག ། རིགས་ཀྱི་བུ། ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་མདོ་སྡེ་སྣ་ཚོགས་ཀྱི་ཆོས་ཀྱི་སྒོ་རབ་ཏུ་དབྱེ་བའི་ཡེ་ཤེས་ལ་མངོན་པར་མཁས་ པར་བྱ་བས་སེམས་ཀྱི་གྲོང་ཁྱེར་རྣམ་པར་དབྱེ་བའི་ཚུལ་ལ་མཁས་པར་གྱིས་ཤིག །རིགས་ཀྱི་བུ། ཁྱོད་ཀྱིས་འགྲོ་བ་ཐམས་ཅད་མངོན་སུམ་དུ་གནས་པའི་ཐམས་ ཅད་མཁྱེན་པའི་སྒོ་དང༌། ལམ་གྱི་ཚུལ་ཡོངས་སུ་བརྟན་པའི་ཕྱིར་སེམས་ཀྱི་གྲོང་ཁྱེར་དམིགས་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་ དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྨོན་ལམ་རྒྱ་མཚོ་རང་གི་སྨོན་ལམ་དུ་མངོན་པར་སྒྲུབ་པ་རྣམ་པར་དག་པར་བྱ་བའི་ཕྱིར་སེམས་ཀྱི་གྲོང་ ༄༅། །ཁྱེར་བྱིན་གྱིས་བརླབ་པའི་ཚུལ་ལ་མཁས་པར་གྱིས་ཤིག །རིགས་ཀྱི་བུ། ཁྱོད་ཀྱིས་ཆོས་ཀྱི་དབྱིངས་ཐམས་ཅད་དུ་བསོད་ནམས་དང༌། ཡེ་ཤེས་ཀྱི་ ཚོགས་རྒྱ་ཆེན་པོ་རྣམ་པར་སྤེལ་བས་སེམས་ཀྱི་གྲོང་ཁྱེར་གྱི་ཚོགས་ཀྱི་མཐུ་རྣམ་པར་འཕེལ་བར་བྱ་བའི་ཐབས་ལ་མཁས་པར་གྱིས་ཤིག །རིགས་ཀྱི་བུ། ཁྱོད་ཀྱིས་ སེམས་ཅན་ཐམས་ཅད་ཀྱི་སེམས་དང༌། བསམ་པ་དང༌། དབང་པོ་དང༌། མོས་པ་དང༌། ཀུན་ནས་ཉོན་མོངས་པ་དང༌། རྣམ་པར་བྱང་བ་ཤེས་པར་བྱ་བས་སེམས་ཀྱི་གྲོང་ཁྱེར་ ནས་འོད་ཀུན་ཏུ་དགྱེ་བའི་ཐབས་ལ་མཁས་པར་གྱིས་ཤིག །རིགས་ཀྱི་བུ། ཁྱོད་ཀྱིས་ཆོས་ཀྱི་དབྱིངས་ཀྱི་ཚུལ་ཐམས་ཅད་ཡང་དག་པར་བསྡུ་བས་སེམས་ཀྱི་གྲོང་ཁྱེར་དུ་ དབང་སྒྱུར་བའི་ཚུལ་ལ་མཁས་པར་གྱིས་ཤིག །རིགས་ཀྱི་བུ། ཁྱོད་ཀྱིས་དེ་བཞིན་གཤེགས་པ་ཐམས་ཅད་དྲན་ཞིང་སྣང་བར་བྱ་བས་སེམས་ཀྱི་གྲོང་ཁྱེར་འོད་གསལ་ བར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་ལུས་མེད་པའི་ཆོས་ཀྱི་ཚུལ་ཐམས་ཅད་ཁོང་དུ་ཆུད་པར་བྱ་བས་སེམས་ཀྱི་གྲོང་ཁྱེར་གྱི་རང་བཞིན་ཡོངས་ སུ་ཤེས་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་ཐམས་ཅད་མཁྱེན་པའི་ཆོས་ཀྱི་གྲོང་ཁྱེར་དུ་འགྲོ་བར་བྱ་བས་སེམས་ཀྱི་གྲོང་ཁྱེར་སྒྱུ་མ་ལྟ་ བུར་བརྟག་པ་ལ་བརྩོན་པར་གྱིས་ཤིག །རིགས་ཀྱི་བུ། ཁྱོད་ཀྱིས་དེ་ལྟར་སེམས་ཀྱི་གྲོང་ཁྱེར་ཡོངས་སུ་སྦྱངས་པ་ལ་བརྩོན་པའི་བྱང་ཆུབ་སེམས་དཔའི་དགེ་བའི་རྩ་བ་ཐམས་ཅད་ ཡོངས་སུ་སྒྲུབ་པ་ཐོབ་པར་ནུས་སོ། །དེ་ཅིའི་ཕྱིར་ཞེ་ན། དེ་ལྟར་སེམས་ཀྱི་གྲོང་ཁྱར་ཡོངས་སུ་དག་པའི་བྱང་ཆུབ་སེམས་དཔའ་དེའི་མདུན་ན་ནི། སངས་རྒྱས་མཐོང་བར་བྱ་བ་ལ་སྒྲིབ་ པའམ། ཆོས་མཉན་པར་བྱ་བ་ལ་སྒྲིབ་པའམ། དེ་བཞིན་གཤེགས་པ་མཆོད་ཅིང་རིམ་གྲོར་བྱ་བ་ལ་སྒྲིབ་པའམ། སེམས་ཅན་ཡོངས་སུ་བསྡུ་བའི་སྦྱོར་བ་ལ་སྒྲིབ་པ་དང༌། སངས་ རྒྱས་ཀྱི་ཞིང་ཡོངས་སུ་དག་པར་བྱ་བ་ལ་སྒྲིབ་པ་ཡང་རུང་སྟེ། སྒྲིབ་པ་ཐམས་ཅད་མི་གནས་སོ། །རིགས་ཀྱི་བུ། སྒྲིབ་པ་ཐམས་ཅད་དང་བྲལ་བའི་སེམས་དང༌། ལྷག་པའི་བསམ་པར་ དགེ་བའི་བཤེས་གཉེན་ཡོངས་སུ་བཙལ་བ་ལ་མངོན་པར་བརྩོན་པའི་བྱང་ཆུབ་སེམས་དཔས་ནི། ལས་གྲོན་ཆུང་དུས་དགེ་བའི་བཤེས་གཉེན་མཐོང་བར་འགྱུར་ཏེ། རིགས་ཀྱི་ བུ༑ དགེ་བའི་བཤེས་གཉེན་ལ་རག་ལས་པ་ཡང་བྱང་ཆུབ་སེམས་དཔའ་རྣམས་ཀྱི་ཐམས་ཅད་མཁྱེན་པ་ཉིད་དོ། །དེ་ནས་ལུས་ཀྱི་རིས་སུ་གཏོགས་པའི་ལྷ་མོ་ཆོས་ཀྱི་པདྨོ་དཔལ་གྱི་ དཀྱིལ་འཁོར་ཅེས་བྱ་བ་དང༌། ངོ་ཚ་ཤེས་པའི་དཔལ་གྱི་དོག་པའི་འོད་ཅེས་བྱ་བ་གཉིས་ཤིག་ལྷ་མོའི་ཚོགས་ཚད་མེད་པས་ཡོངས་སུ་བསྐོར་ནས་ལྷ་མོ་སྒྱུ་མའི་ལེགས་པ་རྗོད་ ༄༅། །ཅིང་སྙིང་པོ་བྱང་ཆུབ་ནས་ཐོན་ཏེ་ཚོང་དཔོན་གྱི་བུ་ནོར་བཟང་གི་མདུན་གྱི་ནམ་མཁའ་ལ་འཁོད་ནས་རང་རང་གི་རིན་པོ་ཆེའི་རྣ་ཆ་ལས་འོད་ཟེར་གྱི་དྲ་བ་ རིན་པོ་ཆེའི་ཁ་དོག་ཏུ་འདུག་པ་དུ་མ་དང༌། སྤོས་དང༌། བདུག་པ་དྲི་མ་མེད་པ་འོད་འཕྲོ་བའི་ཁ་དོག་ཏུ་འདུག་པ་དུ་མ་དང༌། སེམས་དང༌། བསམ་པ་མོས་པར་བྱེད་པའི་ཁ་དོག་ དང༑ སེམས་ཀྱི་དགའ་བའི་ཤུགས་རྣམ་པར་འཕེལ་བར་བྱེད་པའི་ཁ་དོག་དང༌། ལུས་ཀྱི་གདུང་བ་སིམ་པར་བྱེད་པའི་ཁ་དོག་དང༌། ལུས་རྣམ་པར་དག་པ་ཡོངས་སུ་སྟོན་པའི་ ཁ་དོག་དང༌། ལུས་ཀྱི་མཐུ་ཐོགས་པ་མེད་པར་འབྱུང་བའི་ཡུལ་དང་ལྡན་པའི་འོད་ཟེར་གྱི་དྲ་བ་མང་པོ་བཀྱེ་བས། ཞིང་རྒྱ་ཆེན་པོ་སྣང་བར་བྱས་ནས་ཚོང་དཔོན་གྱི་བུ་ནོར་ བཟང་ལ་དེ་བཞིན་གཤེགས་པ་ཐམས་ཅད་ཀྱི་སྐུ་ཐམས་ཅད་དུ་ཁྱབ་པ་ཐམས་ཅད་ལ་མངོན་དུ་གྱུར་པ་ཡོངས་སུ་བསྟན་ནས་འཇིག་རྟེན་ཐམས་ཅད་ལ་གཡས་ཕྱོགས་ སུ་བསྐར་བ་བྱས་ཏེ་ཚོང་དཔོན་གྱི་བུ་ནོར་བཟང་གི་སྤྱི་བོའི་གཙུག་ཏུ་ཤར་ནས་སྤྱི་བོའི་གཙུག་མན་ཆད་བ་སྤུའི་བུ་ག་ཐམས་ཅད་དུ་ཞུགས་ཏེ་ལུས་ཀུན་ཏུ་ཁྱབ་པར་གྱུར་ ཏོ༑ ༑དེ་ལྟར་ལྷ་མོ་དེ་དག་གི་འོད་ཟེར་གྱིས་ཚོང་དཔོན་གྱི་བུ་ནོར་བཟང་ལ་ཕོག་མ་ཐག་ཏུ་དེའི་མོད་ལ་མུན་པ་ཐམས་ཅད་དང་མི་གནས་པའི་མིག་རྡུལ་དང་བྲལ་བའི་འོད་ སྣང་བ་ཞེས་བྱ་བ་ཐོབ་པར་གྱུར་ཏོ། །སེམས་ཅན་གྱི་རང་བཞིན་ཁོང་དུ་ཆུད་པར་བྱེད་པའི་མིག་རབ་རིབ་དང་བྲལ་བའི་འོད་སྣང་བ་ཞེས་བྱ་བ་ཐོབ་པར་གྱུར་ཏོ། །སེམས་ཅན་གྱི་རང་བཞིན་ ཁོང་དུ་ཆུད་པར་བྱེད་པའི་མིག་རབ་རིབ་དང་བྲལ་བ་ཞེས་བྱ་བ་ཐོབ་པར་གྱུར་ཏོ། །ཆོས་ཐམས་ཅད་ཀྱི་རང་བཞིན་གྱི་དཀྱིལ་འཁོར་ལ་རྣམ་པར་ལྟ་བའི་མིག་རྡུལ་དང་བྲལ་བས་དབང་ བསྒྱུར་བ་ཞེས་བྱ་བ་ཐོབ་པར་གྱུར་ཏོ། །ཞིང་ཐམས་ཅད་ལ་རྣམ་པར་ལྟ་བའི་མིག་རྣམ་པར་དག་པ་ལ་དབང་བསྒྱུར་བ་ཞེས་བྱ་བ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ ཅད་ཀྱི་ཆོས་ཀྱི་སྐུ་ལ་རྣམ་པར་ལྟ་བའི་མིག་རྣམ་པར་སྣང་བ་ཞེས་བྱ་བ་ཐོབ་པར་གྱུར་ཏོ། །དེ་བཞིན་གཤེགས་པའི་གཟུགས་ཀྱི་སྐུ་ཡོངས་སུ་གྲུབ་པ་རྣམ་པར་ཕྱེ་བ་བསམ་གྱིས་ མི་ཁྱབ་པ་ལ་རྣམ་པར་ལྟ་བའི་མིག་རྣམ་པར་དག་པའི་བློ་གྲོས་ཞེས་བྱ་བ་ཐོབ་པར་གྱུར་ཏོ། །ཞིང་རྒྱ་མཚོ་འབྱམས་ཀླས་པ་ཐམས་ཅད་ཀྱི་འཇིག་རྟེན་གྱི་ཁམས་འབྱུང་བ་དང༌། འཇིག་པ་རྣམ་པར་ཕྱེ་བ་ལ་རྣམ་པར་ལྟ་བའི་མིག་ཆགས་པ་མེད་པའི་འོད་ཅེས་བྱ་བ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་མདོ་སྡེའི་ ཚུལ་མངོན་པར་སྒྲུབ་པའི་ཕྱོགས་ལ་རྣམ་པར་ལྟ་བའི་མིག་ཀུན་ཏུ་སྣང་བ་ཞེས་བྱ་བ་ཐོབ་པར་གྱུར་ཏོ། །སངས་རྒྱས་ཀྱི་རྣམ་པར་འཕྲུལ་པ་དང༌། སེམས་ཅན་འདུལ་བའི་བྱིན་ ༄༅། །གྱི་རླབས་ལ་རྣམ་པར་ལྟ་བའི་མིག་ཀུན་ནས་ཡུལ་དུ་འགྱུར་བ་ཞེས་བྱ་བ་ཐོབ་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་དུ་བྱུང་བའི་སངས་རྒྱས་སྐྱེས་ པ་ལ་རྣམ་པར་ལྟ་བའི་མིག་ཀུན་ཏུ་ལྟ་བ་ཞེས་བྱ་བ་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཡང་དག་པར་འགྲོ་བའི་ཁང་པའི་སྒོ་སྲུང་སྲིན་པོའི་དབང་པོ་སྲིན་པོ་ སྟོང་ཕྲག་བཅུའི་གཙོ་བོ་མིག་བཟང་ཞེས་བྱ་བ་ཆང་མར་བཅས། བུ་དང་བཅས། རང་གི་གཉེན་བཤེས་དང་འཁོར་དུ་བཅས་པས་ཚོང་དཔོན་གྱི་བུ་ནོར་བཟང་ལ་མེ་ཏོག་ ཁ་དོག་སྣ་ཚོགས་ཡིད་དུ་འོང་བས་མངོན་པར་གཏོར་ཏེ་འདི་སྐད་ཅེས་སྨྲས་སོ། །རིགས་ཀྱི་བུ། ཆོས་བཅུ་དང་ལྡན་པའི་བྱང་ཆུབ་སེམས་དཔས་ནི། དགེ་བའི་བཤེས་ གཉེན་ཐམས་ཅད་དང་ཉེ་བར་བསྙེན་པ་ཡིན་ཏེ། བཅུ་གང་ཞེ་ན། འདི་ལྟར་བསམ་པ་ཡོངས་སུ་དག་པ་གཡོ་དང་སྒྱུ་མེད་པ་དང༌། འགྲོ་བ་ཐམས་ཅད་ཡོངས་སུ་སྡུད་ པ་ལ་ཐ་མི་དད་པའི་སྙིང་རྗེ་ཆེན་པོ་དང༌། སེམས་ཅན་ཐམས་ཅད་ལ་སེམས་ཅན་མེད་པའི་རང་བཞིན་ངེས་པར་རྩོགས་པའི་རབ་ཏུ་རྟོག་པ་དང༌། ལྷག་པའི་བསམ་པའི་ སྟོབས་ཐམས་ཅད་མཁྱེན་པར་འགྲོ་བ་ལས་ཕྱིར་མི་ལྡོག་པ་དང༌། དེ་བཞིན་གཤེགས་པའི་དཀྱིལ་འཁོར་ལ་མངོན་པར་འདུན་པའི་མོས་པའི་སྟོབས་དང༌། ཆོས་ཐམས་ ཅད་ཀྱི་རང་བཞིན་དྲི་མ་མེད་པས་རྣམ་པར་དག་པའི་མིག་དང༌། སེམས་ཅན་གྱི་དཀྱིལ་འཁོར་ཐམས་ཅད་ལ་ཐ་མི་དད་པའི་བྱམས་པ་ཆེན་པོ་དང༌། སྒྲིབ་པ་ཐམས་ཅད་རྣམ་ པར་འཐོར་བའི་ཡེ་ཤེས་ཀྱི་སྣང་བ་དང༌། འཁོར་བའི་སྡུག་བསྔལ་ཐམས་ཅད་ཀྱི་གཉེན་པོ་གདུགས་སུ་གྱུར་པའི་ཆོས་ཀྱི་སྤྲིན་ཆེན་པོ་དང༌། ཆོས་ཀྱི་དབྱིངས་ཀྱི་རྒྱུད་ཐམས་ ཅད་ལ་རབ་ཏུ་ཞུགས་ཤིང་དགེ་བའི་བཤེས་གཉེན་གྱི་རྗེས་སུ་འབྲང་བ་མངོན་དུ་གྱུར་པའི་ཡེ་ཤེས་ཀྱི་མིག་སྟེ། རིགས་ཀྱི་བུ། ཆོས་བཅུ་པོ་དེ་དག་དང་ལྡན་པའི་བྱང་ཆུབ་སེམས་ དཔའ་ནི། དགེ་བའི་བཤེས་གཉེན་ཐམས་ཅད་དང་ཉེ་བར་བསྙེན་པ་ཡིན་ནོ། །ཏིང་ངེ་འཛིན་ལ་ངེས་པར་གཞག་པའི་སྒོ་བཅུས་རྣམ་པར་ལྟ་བའི་བྱང་ཆུབ་སེམས་དཔའ་ནི། དགེ་ བའི་བཤེས་གཉེན་ཐམས་ཅད་དང་མངོན་དུ་གྱུར་པ་འཐོབ་པ་ཡིན་ཏེ། བཅུ་གང་ཞེ་ན། ཏིང་ངེ་འཛིན་ལ་ངེས་པར་གཞག་པའི་སྒོ་ཆོས་ཐམས་ཅད་ནམ་མཁའ་ལྟར་རྡུལ་དང་བྲལ་ བར་རྣམ་པར་དཔྱོད་པའི་དཀྱིལ་འཁོར་དང༌། ཏིང་ངེ་འཛིན་ལ་ངེས་པར་གཞག་པའི་སྒོ་ཕྱོགས་རྒྱ་མཚོ་ཐམས་ཅད་མངོན་དུ་གྱུར་པའི་མིག་དང༌། ཏིང་ངེ་འཛིན་ལ་ངེས་པར་ གཞག་པའི་སྒོ་དམིགས་པ་ཐམས་ཅད་ལ་རྣམ་པར་མི་རྟོག་རྣམ་པར་མི་དཔྱོད་པ་དང༌། ཏིང་ངེ་འཛིན་ལ་ངེས་པར་གཞག་པའི་སྒོ་ཕྱོགས་ཐམས་ཅད་དུ་དེ་བཞིན་གཤེགས་པའི་ ༄༅། །སྤྲིན་ཡོངས་སུ་འབྱུང་བ་དང༌། ཏིང་ངེ་འཛིན་ལ་ངེས་པར་གཞག་པའི་སྒོ་ཐམས་ཅད་མཁྱེན་པའི་ཡེ་ཤེས་དང༌། བསོད་ནམས་རྒྱ་མཚོ་གསོག་པའི་སྙིང་པོ་དང༌། ཏིང་ངེ་འཛིན་ལ་ངེས་པར་གཞག་པའི་སྒོ་སེམས་བསྐྱེད་པ་ཐམས་ཅད་ལ་དགེ་བའི་བཤེས་གཉེན་འབྱུང་བ་དང་འབྲལ་བ་མེད་ཅིང་ཉེ་བར་གྱུར་པ་དང༌། ཏིང་ངེ་འཛིན་ལ་ངེས་ པར་གཞག་པའི་སྒོ་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་དགེ་བའི་བཤེས་གཉེན་གྱི་ཁར་ལས་པས་ཡོངས་སུ་འགྲུབ་པ་དང༌། ཏིང་ངེ་འཛིན་ལ་ངེས་པར་གཞག་པའི་སྒོ་ དགེ་བའི་བཤེས་གཉེན་ཐམས་ཅད་དང་ཡོངས་སུ་མི་འབྲལ་བ་དང༌། ཏིང་ངེ་འཛིན་ལ་ངེས་པར་གཞག་པའི་སྒོ་དགེ་བའི་བཤེས་གཉེན་ཐམས་ཅད་མཉམ་པ་ཉིད་ཀྱིས་རྟག་པར་ ཀུན་ཏུ་ཉེ་བར་འགྲོ་བའི་སྦྱོར་བ་དང༌། ཏིང་ངེ་འཛིན་ལ་ངེས་པར་གཞག་པའི་སྒོ་དགེ་བའི་བཤེས་གཉེན་གྱི་ཐབས་ཀྱི་སྤྱོད་པ་ཐམས་ཅད་ཀྱིས་དུབ་པ་མེད་པའི་སྦྱོར་བ་སྟེ། རིགས་ཀྱི་བུ། ཏིང་ངེ་འཛིན་ལ་ངེས་པར་གཞག་པའི་སྒོ་བཅུ་པོ་དེ་དག་དང་ལྡན་པའི་བྱང་ཆུབ་སེམས་དཔའ་ནི། དགེ་བའི་བཤེས་གཉེན་ཐམས་ཅད་དང་མངོན་དུ་གྱུར་པ་ འཐོབ་པ་ཡིན་ཏེ། ཏིང་ངེ་འཛིན་གྱི་རྣམ་པར་ཐར་བ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་དགེ་བའི་བཤེས་གཉེན་གྱི་ཁ་ནས་གྲགས་པ་ཞེས་བྱ་བ་ཡང་ འཐོབ་པས། དེ་ལ་ཞུགས་པའི་བྱང་ཆུབ་སེམས་དཔའ་ནི། སངས་རྒྱས་ཐམས་ཅད་ཐ་མི་དད་ཅིང་མཉམ་པ་ཉིད་དུ་གྱུར་པ་ཡང་རབ་ཏུ་འཐོབ་བོ། །དགེ་བའི་བཤེས་གཉེན་ཐ་མི་དད་ ཅིང་ཐམས་ཅད་དུ་ཁྱབ་པ་འདི་རབ་ཏུ་ཐོབ་པར་འགྱུར་རོ། །སྲིན་པོའི་དབང་པོ་མིག་བཟང་གིས་དེ་སྐད་ཅེས་སྨྲས་པ་དང༌། ཚོང་དཔོན་གྱི་བུ་ནོར་བཟང་གིས་ནམ་མཁའི་དབྱིངས་ ལ་བལྟས་ཏེ་འདི་སྐད་ཅེས་སྨྲས་སོ། །འཕགས་པ། བདག་ལ་ཐུགས་བརྩེ་བར་མཛད་དེ། དགེ་བའི་བཤེས་གཉེན་བསྟེན་པས་སྨན་ཡོན་བཏགས་པ་མ་ནོངས་སོ། །ད་དུང་ཡང་ དགེ་བའི་བཤེས་གཉེན་བལྟ་བའི་སླད་དུ་ཇི་ལྟར་བརྩོན་པར་བགྱི་བ་དང༌། ཕྱོགས་གང་ལོགས་སུ་མཆི་བར་བགྱི་བ་དང༌། གནས་གང་ཞིག་ཏུ་ཡོངས་སུ་བཙལ་བ་དང༌། དམིགས་ པ་གང་ཞིག་བསམ་པར་བགྱི་བའི་ཐབས་ཀྱི་སྒོ་མ་ནོར་བར་བསྟན་དུ་གསོལ། སྨྲས་པ། རིགས་ཀྱི་བུ། དེ་བས་ན། ཕྱོགས་ཀུན་ཏུ་རབ་ཏུ་འདུད་པའི་ལུས་དང༌། དམིགས་པ་ ཐམས་ཅད་དུ་དགེ་བའི་བཤེས་གཉེན་དྲན་པ་དང་འབྲེལ་བའི་བསམ་པ་དང༌། ཀུན་ཏུ་འགྲོ་བའི་ཏིང་ངེ་འཛིན་གྱི་རྗེས་སུ་འབྲང་བ་དང༌། སེམས་ཀྱི་ཤུགས་རྨི་ལམ་ལྟ་བུ་དང༌། ཡིད་ཀྱི་ལུས་གཟུགས་བརྙན་ལྟ་བུས་རྣམ་པར་རྒྱུ་སྟེ་འགྲོ་བས་དགེ་བའི་བཤེས་གཉེན་གྱི་གན་དུ་སོང་ཞིག །དེ་ནས་ཚོང་དཔོན་གྱི་བུ་ནོར་བཟང་གིས་སྲིན་པོའི་དབང་པོ་མིག་ ༄༅། །བཟང་གིས་ཇི་སྐད་དུ་གཏམ་པ་དེ་ལྟར་ནན་ཏན་དུ་བྱས་པ་དང༌། མདུན་གྱི་སའི་ནང་ནས་པདྨོ་ཆེན་པོ་རྡོ་རྗེ་རིན་པོ་ཆེ་ཐམས་ཅད་ལས་གྲུབ་པའི་ཆུ་བ་ ཅན༑ ནང་རིམ་རིན་པོ་ཆེའི་རྒྱལ་པོ་འགྲོ་བ་རྒྱ་མཚོ་སྣ་ཚོགས་ལས་བྱས་པ། རིན་པོ་ཆེའི་རྒྱལ་པོ་ཐམས་ཅད་ལས་འདབ་མའི་ཕྲེང་བ་གྲུབ་པ། རིན་པོ་ཆེའི་རྒྱལ་པོ་རྣམ་པར་ སྣང་བའི་སྙིང་པོ་ཅན། སྤོས་ཀྱི་རིན་པོ་ཆེའི་རྒྱལ་པོ་རིན་པོ་ཆེ་ཐམས་ཅད་གྱི་མདོག་གི་ཟེ་བ་དང་ལྡན་པ། རིན་པོ་ཆེའི་དྲ་བ་གྲངས་མེད་པས་ཀུན་ནས་ཡོག་པ་བྱུང་བ་མཐོང་ ངོ༌། །རིན་པོ་ཆེའི་རྒྱལ་པོའི་པདྨོ་ཆེན་པོ་དེའི་སྙིང་པོ་ལའང་ཁང་པ་བརྩེགས་པ་ཆོས་ཀྱི་ཕྱོགས་སུ་ཡང་དག་པར་གཞོལ་བའི་སྙིང་པོ་ཞེས་བྱ་བ། ཤིན་ཏུ་སྤ་ལ་བལྟ་ན་ སྡུག་པ༑ སའི་གཞི་རྣམ་པར་སྣང་བའི་དབྱིབས་དང་ལྡན་པ། རིན་པོ་ཆེ་རྒྱལ་པོ་ཐམས་ཅད་ལས་བྱས་པའི་ཀ་བ་སྟོང་ཚང་བས་མཛེས་པར་བརྒྱན་པ། རྒྱན་ཐམས་ ཅད་དུ་རིན་པོ་ཆེ་ཐམས་ཅད་བཀྲམ་པ། འཛམ་བུ་ཆུ་ཀླུང་གི་གསེར་དྲི་མ་མེད་པའི་ལྷ་རྫས་ཀྱི་གཞི་བཏིང་བ། མུ་ཏིག་གི་ཕྲེང་བ་སྣ་ཚོགས་ཀྱི་དྲ་བ་གྲངས་མེད་པ་ཀུན་ནས་ བྲེས་པ༑ རིན་པོ་ཆེའི་རྒྱལ་པོ་སྣ་ཚོགས་རབ་ཏུ་སྤ་བར་སྤེལ་བས་བརྒྱན་པ། ཛམྦུ་ཆུ་ཀླུང་གི་ནོར་བུ་རིན་པོ་ཆེས་ཀུན་ནས་རྣམ་པར་ཕྱེ་བ། རིན་པོ་ཆེའི་ཁྲི་འཕང་གྲངས་ མེད་པས་ཀུན་ནས་བསྐོར་བ། ཕྱོགས་ཐམས་ཅད་ནས་རིན་པོ་ཆེ་རྒྱལ་པོའི་ཐེམ་སྐས་མཛེས་པར་བཀྱེ་བ་གནས་པར་མཐོང་ངོ༌། །ཁང་པ་བརྩེགས་པ་དེའི་དབུས་ན་ཡང་ཁྲི་ནོར་བུ་ རིན་པོ་ཆེ་ཡིད་བཞིན་གྱི་པདྨོའི་སྙིང་པོ་ཅན། ནོར་བུ་རིན་པོ་ཆེའི་གཟུགས་འཇིག་རྟེན་གྱི་དབང་པོའི་དབྱིབས་ལྟ་བུའི་རྟེན་གྱིས་བཟུང་བ། ནོར་བུ་རིན་པོ་ཆེའི་འབྲུ་ཐམས་ཅད་ཀྱི་ཁ་ དོག་ཏུ་འདུག་པ། དབང་པོའི་རྒྱལ་མཚན་རབ་ཏུ་སྣང་བའི་དབྱིབས་སུ་འདུག་པ། རྡོ་རྗེ་རིན་པོ་ཆེའི་འཁོར་ལོའི་ས་ལ་བརྟེན་པ། རིན་པོ་ཆེའི་རྒྱལ་པོ་སྣ་ཚོགས་ཀྱི་ཕྲེང་བས་བརྒྱན་ པ༑ རིན་པོ་ཆེའི་ཁྲི་འཕང་དུ་མ་ལས་བླངས་པ། རིན་པོ་ཆེའི་རྒྱལ་པོ་སྣང་བའི་རྒྱལ་མཚན་གྱིས་རབ་ཏུ་སྤྲས་པ། རིན་པོ་ཆེ་སྣ་ཚོགས་ཀྱི་རྒྱན་གྱིས་ཤིན་ཏུ་བརྒྱན་པ། རིན་པོ་ ཆེའི་རྒྱལ་པོའི་སྟན་ལྷ་རྫས་ལས་འདས་པ་ལེགས་པར་བཏིང་བ། གོས་རིན་པོ་ཆེ་ཁ་དོག་མཐའ་ཡས་པ་སྣ་ཚོགས་ཀྱིས་གཞི་ཐམས་ཅད་དུ་བཀྲམ་པ། རིན་པོ་ཆེའི་གོས་ཐམས་ ཅད་ཀྱི་གནམ་ཡོལ་བྲེས་པས་ནམ་མཁའ་རབ་ཏུ་བརྒྱན་པ། རིན་པོ་ཆེ་ཐམས་ཅད་ཀྱི་དྲ་བ་ཀུན་ཏུ་བྲེས་པ། ཕྱོགས་ཀུན་ནས་རིན་པོ་ཆེའི་རྒྱལ་མཚན་དཀྲིགས་པའི་སྒྲ་འབྱུང་ བ༑ རིན་པོ་ཆེ་ཐམས་ཅད་ཀྱི་སྣམ་བུའི་རྒྱལ་མཚན་ཕུར་ལབ་ཏུ་ལྡིང་བ། སྤོས་རིན་པོ་ཆེ་ཐམས་ཅད་ཀྱི་རྒྱལ་མཚན་རྣམ་པར་བྲེས་པས་ཀུན་ནས་བརྒྱན་པ། མེ་ཏོག་ཐམས་ ༄༅། །ཅད་ཀྱི་རྒྱལ་མཚན་ལས་མེ་ཏོག་གི་ཀློང་སྣ་ཚོགས་ཆར་དུ་མངོན་པར་འབྲུལ་བ། རིན་པོ་ཆེའི་དྲིལ་བུའི་རྒྱལ་མཚན་འཁྲོལ་བའི་སྒྲ་ཡིད་བདེ་བའི་ དབྱངས་སྙན་པར་གྲགས་པ། ཁང་པའི་ཁ་ཐམས་ཅད་ནས་རིན་པོ་ཆེ་སྣ་ཚོགས་ཀྱི་ཕྲེང་བ་རབ་ཏུ་དཔྱངས་པ། རིན་པོ་ཆེའི་གཟུགས་སྣ་ཚོགས་ཀྱི་ཁ་ནས་སྤོས་ཆུ་ཁ་དོག་ དུ་མ་དང་ལྡན་པའི་ཆར་འབབ་པ། ནོར་བུ་རིན་པོ་ཆེའི་རྒྱལ་པོ་རྣམ་པར་སྣང་བ་ལས་གླང་པོ་དམ་པའི་གཟུགས་སུ་བྱས་པའི་ཁ་ནས་པདྨོའི་དྲ་བ་འབྱུང་བ་དང་ལྡན་པ། རྡོ་རྗེ་ སྣ་ཚོགས་ཀྱི་སེངྒེའི་ཁ་ནས་སྤོས་ཀྱི་སྤྲིན་ཁ་དོག་མཐའ་ཡས་པ་རབ་ཏུ་འབྱུང་བ། རིན་པོ་ཆེའི་རྒྱལ་པོ་རྣམ་པར་སྣང་བ་ཚངས་པའི་གཟུགས་སུ་འདུག་པའི་ཁ་ནས་བྱམས་ པ་ཆེན་པོའི་ཚུལ་ཚངས་པའི་དབྱངས་ཀྱི་ང་རོར་སྒྲོག་པ་དང་ལྡན་པ། རིན་པོ་ཆེ་སྣ་ཚོགས་ཤིན་ཏུ་མཛེས་པའི་གཟུགས་ཀྱི་ཁ་ནས་དཀར་པོའི་ཕྱོགས་ཀྱི་ལེགས་པ་རབ་ཏུ་རྗོད་ པའི་ང་རོ་འབྱུང་བ། དུས་གསུམ་གྱི་སངས་རྒྱས་ཀྱི་མཚན་གསེར་གྱི་དྲིལ་གྱི་ཕྲེང་བ་ལས་སྒྲ་སྙན་པའི་དབྱངས་སུ་འབྱུང་བ་དང་ལྡན་པ། ནོར་བུ་རིན་པོ་ཆེ་དམ་པའི་དྲིལ་ གྱི་ཕྲེང་བ་ལས་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོའི་སྒྲ་ཡིད་དུ་འོང་བ་འབྱུང་བ་དང༌། རྡོ་རྗེའི་དྲིལ་སྣ་ཚོགས་ལས་བྱང་ཆུབ་སེམས་དཔའི་སྨོན་ལམ་ཐམས་ ཅད་ཀྱི་སྒྲ་རབ་ཏུ་འབྱུང་བ། རིན་པོ་ཆེའི་རྒྱལ་པོ་ཟླ་བའི་རྒྱལ་མཚན་གྱི་ཕྲེང་བས་སངས་རྒྱས་ཐམས་ཅད་ཀྱི་གཟུགས་བརྙན་རབ་ཏུ་འབྱུང་བའི་དབྱིངས་སྣ་ཚོགས་ཏུ་སྒྲོག་པ། ནོར་ བུ་རིན་པོ་ཆེའི་རྒྱལ་པོ་སྙིང་པོ་དག་པའི་ཕྲེང་བས་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་ཚེ་གཅིག་ནས་གཅིག་ཏུ་བརྒྱུད་པའི་གཟུགས་བརྙན་ རྣམ་པར་དམིགས་པར་བྱ་བ། རིན་པོ་ཆེའི་རྒྱལ་པོ་ཉི་མའི་སྙིང་པོའི་ཕྲེང་བས་ནམ་མཁའི་དབྱིངས་ཀྱི་མཐས་ཀླས་པའི་ཕྱོགས་བཅུའི་སངས་རྒྱས་ཀྱི་ཞིང་སྣ་ཚོགས་ཀྱི་དབྱིངས་ སུ་འོད་ཟེར་ཡོངས་སུ་བསྟན་པ། རིན་པོ་ཆེའི་རྒྱལ་པོ་སྣང་བའི་རྒྱལ་མཚན་གྱི་ཕྲེང་བས་དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་སྣང་བ་རབ་ཏུ་དབྱེ་བ། ནོར་ བུ་རིན་པོ་ཆེའི་རྒྱལ་པོ་སྣང་བའི་ཕྲེང་བས་སྤྲུལ་པའི་སྤྲིན་འགྲོ་བ་ཐམས་ཅད་ཀྱི་དབང་པོ་ལྟ་བུ། དེ་བཞིན་གཤེགས་པ་ལ་མཆོད་ཅིང་རིམ་གྲོ་བྱེད་པའི་འོད་རབ་ཏུ་དགྱེ་བ། རིན་པོ་ཆེའི་རྒྱལ་པོ་ཡིད་བཞིན་གྱི་ཕྲེང་བས་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་འཕྲུལ་བས་སྐད་ཅིག་རེ་རེ་ལ་ཆོས་ཀྱི་དབྱིངས་སུ་རྒྱས་པར་དགང་བ། རིན་ པོ་ཆེའི་རྒྱལ་པོ་རི་བོའི་རྒྱལ་མཚན་གྱི་ཕྲེང་བས་ལྷའི་དབང་པོ་ཐམས་ཅད་ཀྱི་ཁྱིམ་གྱི་ལྷ་མོའི་དབྱངས་སྙན་པ་རབ་ཏུ་སྒྲོག་པ་དང་ལྡན་ཞིང༌། ཁྲི་དེ་དམིགས་པ་ཐམས་ཅད་ ༄༅། །དུ་དེ་བཞིན་གཤེགས་པ་ལ་བསྟོད་པའི་སྤྲིན་འགྱེད་པས་ཡོན་ཏན་དང༌། ལེགས་པ་བསམ་གྱིས་མི་ཁྱབ་པ་བརྗོད་དུ་ཡོད་པ་དང༌། རིན་པོ་ཆེའི་རྒྱན་ གྲངས་མེད་པའི་འཁོར་གྱི་སྟན་གྱིས་བསྐོར་བར་མཐོང་ངོ༌། །ཁྲི་དེ་ལ་ལྷ་མོ་སྒྱུ་མ་འཇིག་རྟེན་གསུམ་ལས་ཡང་དག་པར་འདས་པའི་གཟུགས་འཇིག་རྟེན་ཐམས་ཅད་ལ་མངོན་ པར་གནས་པ་དང༌། སྲིད་པའི་རྒྱུད་ཐམས་ཅད་ལས་གྱེན་དུ་འཕགས་པའི་གཟུགས་འགྲོ་བ་ཐམས་ཅད་ཀྱིས་རྣམ་པར་དམིགས་སུ་ཡོད་པ་དང༌། འཇིག་རྟེན་ཐམས་ཅད་ ཀྱིས་མ་གོས་པའི་གཟུགས་བསོད་ནམས་ཡངས་པས་བྱུང་བ་དང༌། འགྲོ་བ་ཐམས་ཅད་དང་མཉམ་ཞིང་འདྲ་བའི་གཟུགས་སེམས་ཅན་ཐམས་ཅད་ལ་བཞིན་མངོན་པར་ སྟོན་པ་དང༌། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བར་མཐུན་པའི་གཟུགས་སེམས་ཅན་ཐམས་ཅད་དང་མངོན་སུམ་དུ་འདལ་བ་དང༌། དུས་ཐམས་ ཅད་འགྲོ་བ་ནམ་མཁའ་ལ་རྣམ་པར་དམིགས་པ་ཐ་མི་དད་པའི་གཟུགས་འགྲོ་བ་ཐམས་ཅད་ཀྱི་མཐས་ཀླས་པར་དམིགས་སུ་ཡོད་པར་བྱིན་གྱིས་རློབ་པ་དང༌། འགྲོ་བ་ མེད་པའི་གཟུགས་འཇིག་རྟེན་གྱི་ལམ་གྱི་རྒྱུད་ཐམས་ཅད་འགག་པ་དང༌། འོང་བ་མེད་པའི་གཟུགས་འགྲོ་བ་ཐམས་ཅད་དུ་མ་བྱུང་བ་དང༌། མ་སྐྱེས་པའི་གཟུགས་ མི་སྐྱེ་བར་མཉམ་པའི་ཆོས་ལ་བརྩོན་པ་དང༌། མ་འགག་པའི་གཟུགས་འཇིག་རྟེན་གྱི་རྣམ་པར་སྤྱོད་པ་ཐམས་ཅད་ལ་གཞོལ་བ་དང༌། ཡང་དག་པར་དམིགས་པའི་གཟུགས་ བདེན་པ་མེད་པ་དང༌། འཇིག་རྟེན་གྱིས་རྣམ་པར་དམིགས་པའི་གཟུགས་རྫུན་པ་མེད་པ་དང༌། འཕོ་བ་མེད་པའི་གཟུགས་ཤི་འཕོ་བ་དང་སྐྱེ་བ་ལས་འདས་པ་དང༌། མི་འཇིག་པའི་ གཟུགས་ཆོས་ཀྱི་དབྱིངས་ཀྱི་རང་བཞིན་གྱིས་འཇིག་པ་མེད་པ་དང༌། མཚན་ཉིད་མེད་པའི་གཟུགས་དུས་གསུམ་ཚིག་གི་ལམ་དུ་གཞོལ་བ་དང༌། མཚན་ཉིད་གཅིག་པའི་གཟུགས་ མཚན་ཉིད་མེད་པས་བྱུང་བ་དང༌། གཟུགས་བརྙན་ལྟ་བུའི་གཟུགས་འགྲོ་བ་ཐམས་ཅད་ཀྱི་སེམས་དང༌། བསམ་པ་ཇི་ལྟ་བ་བཞིན་དུ་དམིགས་པ་དང༌། སྒྱུ་མ་ལྟ་བུའི་གཟུགས་ ཡེ་ཤེས་སྒྱུ་མས་ཡོངས་སུ་གྲུབ་པ་དང༌། སྨིག་རྒྱུ་ལྟ་བུའི་གཟུགས་འགྲོ་བའི་འདུ་ཤེས་བཞིན་དུ་བྱིན་གྱིས་རློབ་པ་ལ་གཞོལ་བ་དང༌། གྲིབ་མ་ལྟ་བུའི་གཟུགས་སྔོན་གྱི་སྨོན་ ལམ་གྱིས་འགྲོ་བ་ཐམས་ཅད་ཀྱི་རྗེས་སུ་འབྲང་བ་དང༌། རྨི་ལམ་ལྟ་བུའི་གཟུགས་བསམ་པ་ཇི་ལྟ་བ་བཞིན་དུ་འགྲོ་བས་དམིགས་པ་ལ་མ་འདྲེས་པ་དང༌། ཆོས་ཀྱི་དབྱིངས་ ཐམས་ཅད་དུ་གཞོལ་བའི་གཟུགས་ནམ་མཁའི་དབྱིངས་ལྟར་རང་བཞིན་ཡོངས་སུ་དག་པ་དང༌། སྙིང་རྗེ་ཆེན་པོས་བྱུང་བའི་གཟུགས་སེམས་ཅན་གྱི་རྒྱུད་ཐམས་ཅད་ཡོངས་སུ་ ༄༅། །བསྐྱང་བ་ལ་བརྩོན་པ་དང༌། ཆགས་པ་མེད་པའི་སྒོས་བྱུང་བའི་གཟུགས་སྐད་ཅིག་རེ་རེས་ཆོས་ཀྱི་དབྱིངས་རྒྱས་པར་འགེངས་པ་དང༌། མཐའ་དང་དབུས་ མེད་པའི་གཟུགས་རྙོག་པ་མེད་པར་འགྲོ་བ་ཐམས་ཅད་ལ་བརྟེན་པ་དང༌། ཚད་མེད་པའི་གཟུགས་ཚིག་གི་ལམ་ཐམས་ཅད་ལས་ཡང་དག་པར་འདས་པ་དང༌། མི་གནས་པའི་ གཟུགས་འགྲོ་བ་ཐམས་ཅད་གདུལ་བའི་བྱིན་གྱི་རླབས་ཀྱིས་གྲུབ་པ་དང༌། བྱིན་གྱིས་མ་བརླབས་པའི་གཟུགས་བྱིན་གྱི་རླབས་ཀྱིས་འགྲོ་བའི་དོན་ལ་བརྩོན་པ་དང༌། མ་བྱུང་ བའི་གཟུགས་སྨོན་ལམ་སྒྱུ་མས་ཡོངས་སུ་གྲུབ་པ་དང༌། ཟིལ་གྱིས་མི་ནོན་པའི་གཟུགས་འཇིག་རྟེན་ཐམས་ཅད་ལས་མངོན་པར་འཕགས་པ་དང༌། ཡང་དག་པ་མ་ཡིན་ པའི་གཟུགས་ཞི་གནས་ཀྱི་སྣང་བས་རྣམ་པར་དམིགས་པ་དང༌། མི་འབྱུང་བའི་གཟུགས་འགྲོ་བའི་ལས་ཇི་ལྟ་བ་བཞིན་དུ་རྗེས་སུ་འབྲང་བ་དང༌། རིན་པོ་ཆེ་ཡིད་བཞིན་ གྱི་རྒྱལ་པོ་ལྟར་བསམ་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱ་བའི་སྨོན་ལམ་ཡོངས་སུ་གྲུབ་པ་དང༌། རྣམ་པར་མི་རྟོག་པའི་ གཟུགས་འགྲོ་བ་ཐམས་ཅད་ཀྱི་ཡོངས་སུ་རྟོག་པ་བཞིན་དུ་ཉེ་བར་གནས་པ་དང༌། མི་རྟོག་པས་རྟོག་པ་མེད་པའི་གཟུགས་འགྲོ་བ་ཐམས་ཅད་ཀྱི་རྣམ་པར་དམིགས་ པ་དང༌། ཐོགས་པ་མེད་པའི་གཟུགས་འཁོར་བ་ལས་བཟློག་པ་ལ་རབ་ཏུ་བརྩོན་པ་དང༌། རྣམ་པར་དག་པའི་གཟུགས་དེ་བཞིན་ཉིད་དང་མཉམ་པར་རྣམ་པར་མི་རྟོག་པ་དང༌། རྣམ་པ་དེ་ལྟ་བུའི་གཟུགས་གཟུགས་མེད་པར་གཟུགས་སུ་སྣང་བ་དང༌། ཚོར་བ་མེད་པའི་གཟུགས་ཀྱིས་འཇིག་རྟེན་གྱི་སྡུག་བསྔལ་གྱི་ཚོར་བ་རབ་ཏུ་ཞི་བར་བྱ་བ་ལ་བརྩོན་པ་ དང༌། འདུ་ཤེས་ཀྱི་རྣམ་པ་ཐམས་ཅད་ལས་གྱེན་དུ་འཕགས་པའི་གཟུགས་སེམས་ཅན་ཐམས་ཅད་ཀྱི་འདུ་ཤེས་ཀྱི་རྣམ་པས་རྣམ་པར་དམིགས་པ་དང༌། མངོན་པར་འདུ་བྱ་བ་ མེད་པའི་ཆོས་ཉིད་ཀྱིས་བྱུང་བའི་གཟུགས་ཆོས་སྒྱུ་མའི་རྣམ་པས་གྲུབ་པ་དང༌། རྣམ་པར་ཤེས་པའི་ཡུལ་ལས་ཡོངས་སུ་འདས་པའི་གཟུགས་བྱང་ཆུབ་སེམས་དཔའི་སྨོན་ལམ་ གྱི་ཡེ་ཤེས་ལས་བྱུང་བ་དང༌། རང་བཞིན་མེད་པའི་གཟུགས་འགྲོ་བ་ཐམས་ཅད་ཀྱི་ཚིག་གི་ལམ་ལ་གཞོལ་བ་དང༌། གདུང་བ་ཡོངས་སུ་བསལ་བའི་གཟུགས་ཆོས་ཀྱི་སྐུ་བསིལ་ བ་དམ་པ་དང་ལྡན་པས་ལྷ་མོ་སྒྱུ་མ་བསམ་པ་ཇི་ལྟ་བ་བཞིན་དུ་འགྲོ་བའི་གཟུགས་ཀྱི་ལུས་ཡོངས་སུ་སྟོན་པ་དང༌། སེམས་ཅན་གྱི་བསམ་པའི་དབང་དུ་འགྲོ་བ་ཐམས་ཅད་ དང་མཉམ་ཞིང་འདྲ་བའི་གཟུགས་ཀྱི་ལུས་འགྲོ་བ་ཐམས་ཅད་ཀྱི་གཟུགས་ཀྱི་ལུས་ལས་འཕགས་པ་སྟོན་ཅིང་འདུག་པ་མཐོང་ངོ༌། །དེ་ལ་སེམས་ཅན་ལ་ལས་ནི། ལྷ་མོ་སྒྱུ་ ༄༅། །མ་དེ་བདུད་ཀྱི་བུ་མོའི་གཟུགས་སུ་འདུག་ལ། བདུད་ཀྱི་བུ་མོའི་གཟུགས་པས་ཀྱང་ལྷག་པར་མཐོང་ངོ༌། །ལ་ལས་ནི། དབང་སྒྱུར་གྱི་ལྷའི་བུ་མོའི་གཟུགས་ པས་ཀྱང་ལྷག་པར་མཐོང་ངོ༌། །ལ་ལས་ནི། རབ་འཕྲུལ་དགའི་ལྷའི་བུ་མོའི་གཟུགས་པས་ཀྱང་ལྷག་པར་མཐོང་ངོ༌། །ལ་ལས་ནི། རབ་དགའ་ལྡན་གྱི་ལྷའི་བུ་མོའི་གཟུགས་ པས་ཀྱང་ལྷག་པར་མཐོང་ངོ༌། །ལ་ལས་ནི། རབ་མཚོ་མའི་ལྷའི་བུ་མོའི་གཟུགས་པས་ཀྱང་ལྷག་པར་མཐོང་ངོ༌། །ལ་ལས་ནི། སུམ་ཅུ་རྩ་གསུམ་གྱི་ལྷའི་བུ་མོའི་གཟུགས་ པས་ཀྱང་ལྷག་པར་མཐོང་ངོ༌། །ལ་ལས་ནི། རྒྱལ་པོ་ཆེན་པོ་བཞིའི་རིས་ཀྱི་ལྷའི་བུ་མོའི་གཟུགས་པས་ཀྱང་ལྷག་པར་མཐོང་ངོ༌། །ལ་ལས་ནི། གྲུལ་བུམ་གྱི་བུ་མོའི་ གཟུགས་པས་ཀྱང་ལྷག་པར་མཐོང་ངོ༌། །ལ་ལས་ནི། ལྟོ་འཕྱེ་ཆེན་པོའི་དབང་པོའི་བུ་མོའི་གཟུགས་པས་ཀྱང་ལྷག་པར་མཐོང་ངོ༌། །སེམས་ཅན་ལ་ལས་ནི། ལྷ་མོ་ སྒྱུ་མ་དེ་མིའི་དབང་པོའི་བུ་མོའི་གཟུགས་པས་ཀྱང་ལྷག་པར་མཐོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་འགྲོ་བ་ཐམས་ཅད་ཀྱི་གཟུགས་ཀྱི་འདུ་ཤེས་དང་བྲལ་ཡང་ སེམས་ཅན་ཕ་རོལ་གྱི་བསམ་པ་ལ་འཇུག་པ་དེས་སེམས་ཅན་ཐམས་ཅད་ཀྱི་བསམ་པའི་རྣམ་པ་ལ་ལྷ་མོ་སྒྱུ་མ་འགྲོ་བ་ཐམས་ཅད་ཉེ་བར་འཚོ་བའི་བསོད་ནམས་དང་ ལྡན་པ། ཐམས་ཅད་མཁྱེན་པ་ཉིད་ཀྱི་བསོད་ནམས་ཀྱིས་བསྒྲུབས་པའི་ལུས་དང་ལྡན་པ། སྦྱིན་པའི་ཕ་རོལ་ཏུ་ཕྱིན་པའི་སྦྱོར་བ་ཐ་མི་དད་པ་དང་ལྡན་པ། འགྲོ་བ་ཐམས་ཅད་ལ་ མཉམ་པ་ཉིད་ཀྱིས་ཞུགས་པ། སྙིང་རྗེ་ཆེན་པོའི་ལུས་སུ་སེམས་ཅན་ཐམས་ཅད་ཡོངས་སུ་སྡུད་པ། དེ་བཞིན་གཤེགས་པའི་ཡོན་ཏན་ཐམས་ཅད་ནན་ཏན་དུ་བྱས་པས་བྱུང་བ། བཟོད་པ་ཐམས་ཅད་ཀྱི་ཚུལ་རྒྱ་མཚོ་ལ་ཞུགས་པ། ཐམས་ཅད་མཁྱེན་པ་ཉིད་ཀྱི་བརྩོན་འགྲུས་ཀྱི་ཤུགས་ཀྱིས་སེམས་རྣམ་པར་སྤེལ་བ། ཆོས་ཀྱི་དཀྱིལ་འཁོར་ཐམས་ཅད་ ཡོངས་སུ་དག་པར་བྱ་བ་ལ་ཕྱིར་མི་ལྡོག་པའི་བརྩོན་འགྲུས་དང་ལྡན་པ། ཆོས་ཐམས་ཅད་ཀྱི་རང་བཞིན་ངེས་པར་རྟོགས་པས་བྱུང་བ། བསམ་གཏན་གྱི་ཡན་ལག་དང་ཚུལ་ ཐམས་ཅད་ལས་ཡོངས་སུ་གྲུབ་པའི་སེམས་དང་ལྡན་པ། བསམ་གཏན་གྱི་ཡན་ལག་ཐ་མི་དད་པའི་ཡུལ་ཡོངས་སུ་འཛིན་པའི་དེ་བཞིན་གཤེགས་པའི་བསམ་གཏན་གྱི་ དཀྱིལ་འཁོར་སྣང་བ་རབ་ཏུ་ཐོབ་པ། སེམས་ཅན་ཐམས་ཅད་ཀྱི་ཉོན་མོངས་པ་རྒྱ་མཚོ་བསྐམ་པ་ལ་ཤིན་ཏུ་གདོན་མི་ཟ་བར་བྱས་པའི་ངེས་པར་རྟོགས་པ་སྣ་ཚོགས་ལ་གནས་ པ༑ དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་རྣམ་པར་དབྱེ་བའི་ཚུལ་ལ་མཁས་པ། ཆོས་ཐམས་ཅད་ཀྱི་ཚུལ་རྒྱ་མཚོ་རྣམ་པར་དཔྱད་པའི་ཤེས་རབ་དང་ལྡན་པ། ༄༅། །དེ་བཞིན་གཤེགས་པ་ཐམས་ཅད་མཐོང་བས་མ་ངོམས་པ། དུས་གསུམ་གྱི་དེ་བཞིན་གཤེགས་པ་གཅིག་ནས་གཅིག་ཏུ་བརྒྱུད་པ་ལ་རྣམ་པར་ལྟ་ བའི་རྒྱུན་མི་གཅོད་པ། སངས་རྒྱས་ཐམས་ཅད་ལྟ་བའི་སྒོ་ལ་མངོན་དུ་གྱུར་པ། དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་བསྒྲུབས་པའི་ལམ་ཡོངས་སུ་དག་པར་ བྱ་བ༑ རྣམ་པ་ཐ་དད་པའི་ཚུལ་ལ་མཁས་པ། དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་ནམ་མཁའ་དང་མཉམ་པ། སེམས་ཅན་ཐམས་ཅད་ཡོངས་སུ་བསྡུ་བའི་ཐབས་ ཀྱི་ཚུལ་ལ་མཁས་པ། འགྲོ་བ་མཐའ་དང་དབུས་མེད་པ་བསམ་པ་ཇི་ལྟ་བ་བཞིན་དུ་ཡོངས་སུ་སྨིན་པར་བྱ་བ་དང་གདུལ་བའི་སྣང་བ་རབ་ཏུ་ཐོབ་པ། སངས་རྒྱས་ཐམས་ཅད་ཀྱི་སྐུ་ རྣམ་པར་དག་པ་རྣམ་པ་ཐ་དད་པ་ལ་ཞུགས་པ། ཞིང་རྒྱ་མཚོ་ཐམས་ཅད་ཡོངས་སུ་དག་པར་བྱ་བའི་སྨོན་ལམ་དང་ལྡན་པ། སེམས་ཅན་གྱི་ཁམས་ཐམས་ཅད་རྣམ་ པར་གདུལ་བའི་བྱིན་གྱི་རླབས་མཐར་ཐུག་པར་བྱ་བའི་སྨོན་ལམ་ཡོངས་སུ་དག་པ། དེ་བཞིན་གཤེགས་པའི་ཡུལ་ཐམས་ཅད་མཆོད་པས་རྒྱས་པར་དགང་བའི་སེམས་ དང་ལྡན་པ། བྱང་ཆུབ་སེམས་དཔའི་རྣམ་པར་འཕྲུལ་པ་ཐམས་ཅད་ལ་བརྩོན་པས་བྱུང་བ། ཆོས་ཀྱི་སྐུ་བླ་ན་མེད་པ་ཡོངས་སུ་དག་པ་དང་ལྡན་པ། གཟུགས་ཀྱི་ལུས་ མཐའ་ཡས་པ་ཡོངས་སུ་སྟོན་པ། བདུད་ཀྱི་དཔུང་ཐམས་ཅད་རབ་ཏུ་འཇོམས་པ། དགེ་བའི་རྩ་བ་ཤིན་ཏུ་རྒྱ་ཆེན་པོའི་སྟོབས་དང་ལྡན་པ། ཆོས་ཀྱི་སྟོབས་རབ་ཏུ་སྒྱེས་པའི་ བློ་ཅན། སངས་རྒྱས་ཀྱི་སྟོབས་སྣང་བ་རབ་ཏུ་ཐོབ་པ། བྱང་ཆུབ་སེམས་དཔའི་དབང་ཐམས་ཅད་ཀྱི་སྟོབས་ཡོངས་སུ་རྫོགས་པ། ཐམས་ཅད་མཁྱེན་པ་ཉིད་ཀྱི་ཤུགས་ཀྱི་སྟོབས་ ཡོངས་སུ་སྐྱེས་པ། དེ་བཞིན་གཤེགས་པའི་ཡེ་ཤེས་གློག་གི་ཤེས་རབ་སྣང་བར་བྱས་པ། སེམས་ཅན་མཐའ་དང་དབུས་མེད་པའི་སེམས་རྒྱ་མཚོ་རྣམ་པར་དཔྱད་པ་ལ་མཁས་ པ༑ འགྲོ་བ་ཤིན་ཏུ་མང་བའི་བསམ་པ་ལ་ཞུགས་པ། སེམས་ཅན་ཕ་རོལ་གྱི་དབང་པོ་རྣམ་པ་ཐ་དད་པ་ཤེས་པར་བྱ་བའི་ཚུལ་ལ་མཁས་པ། སེམས་ཅན་མཐའ་ཡས་པའི་ མོས་པ་རྣམ་པ་ཐ་དད་པའི་རྒྱུས་ལ་མཁས་པར་ཁོང་དུ་ཆུད་པ། ཕྱོགས་བཅུའི་ཞིང་རྒྱ་མཚོ་ཚད་མེད་པ་ལུས་ཀྱིས་རྒྱས་པར་འགེངས་པ། འཇིག་རྟེན་གྱི་ཁམས་རྣམ་པ་ཐ་དད་པ་ཐམས་ ཅད་ཤེས་པར་བྱ་བའི་ཚུལ་དང་རྣམ་པ་ལ་མཁས་པ། ཞིང་ཐ་དད་པའི་ཚུལ་ཐམས་ཅད་ཤེས་པར་བྱ་བའི་ཚུལ་ལ་མཁས་པའི་རྗེས་སུ་སོང་བ། ཡེ་ཤེས་ཀྱིས་ལྟ་བ་ཕྱོགས་རྒྱ་ མཚོ་ཐམས་ཅད་དུ་རབ་ཏུ་འདལ་བ། དུས་རྒྱ་མཚོ་ཐམས་ཅད་དུ་ཁྱབ་པའི་བློ་དང་ལྡན་པ། སངས་རྒྱས་རྒྱ་མཚོ་ཐམས་ཅད་ལ་མངོན་སུམ་དུ་འདུད་པའི་ལུས་ཅན། ཆོས་ཀྱི་ ༄༅། །སྤྲིན་རྒྱ་མཚོའི་ཆར་ཐམས་ཅད་ཡང་དག་པར་གཟུང་བ་ལ་མངོན་དུ་གྱུར་པའི་སེམས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་རབ་ ཏུ་རྫོགས་པར་བྱ་བའི་ནན་ཏན་གྱིས་འབྱུང་བ་ལ་རབ་ཏུ་བརྩོན་པ། བྱང་ཆུབ་སེམས་དཔའི་ཚོགས་ཐམས་ཅད་ཡོངས་སུ་སྒྲུབ་པ་ལ་རབ་ཏུ་ཞུགས་པའི་བློ་དང་ལྡན་པ། བྱང་ ཆུབ་སེམས་དཔའ་ཐམས་ཅད་ཀྱི་རབ་ཏུ་འཇུག་པ་ལ་རྣམ་པར་དཔྱོད་པའི་མཐུ་ཡོད་པ། བྱང་ཆུབ་ཀྱི་སེམས་ཀྱི་ཡན་ལག་ཐམས་ཅད་ཡོངས་སུ་གྲུབ་པ། བྱང་ཆུབ་སེམས་ དཔའ་ཐམས་ཅད་ཡོངས་སུ་བསྐྱང་བ་ལ་རབ་ཏུ་བརྩོན་པ། སངས་རྒྱས་ཐམས་ཅད་ཀྱི་ལེགས་པའི་སྤྲིན་ཀུན་ཏུ་སྣང་བ་རབ་ཏུ་སྟོན་པ། བྱང་ཆུབ་སེམས་དཔའ་དང༌། རྒྱལ་བ་ཐམས་ཅད་སྐྱེད་པའི་སྨོན་ལམ་གྱིས་བྱུང་བ་དང༌། དེ་དག་ལ་སོགས་པ་མཐོང་བའི་ཚུལ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཀྱི་ལྷ་མོ་སྒྱུ་མ་ཚོང་དཔོན་ གྱི་བུ་ནོར་བཟང་གིས་མཐོང་བར་གྱུར་ཏོ། །དེས་དེ་མཐོང་ནས་ལྷ་མོ་སྒྱུ་མ་ཇི་སྙེད་ཡོད་པ་དེ་སྙེད་དུ་བདག་གི་ལུས་བྱིན་གྱིས་བརླབས་ནས་ཕྱོགས་ཐམས་ཅད་ལ་མངོན་ དུ་བལྟས་པའི་ལྷ་མོ་སྒྱུ་མ་ལ་ཐམས་ཅད་དུ་ཁྱབ་པའི་ལུས་ཀྱིས་ཕྱག་བྱས་སོ། །དེས་དེ་ལྟར་ཕྱག་བྱས་མ་ཐག་ཏུ་ཏིང་ངེ་འཛིན་གྱི་སྒོ་མཐའ་དང་དབུས་མེད་པ་ཐོབ་པར་ གྱུར་ཏེ། དེས་ཏིང་ངེ་འཛིན་གྱི་སྒོ་དེ་དག་ལ་རྣམ་པར་བལྟས་ནས་མཚན་མར་བྱ་བ་དང༌། བསྒོམ་པ་དང༌། ལྷུར་བླང་བ་དང༌། རྗེས་སུ་དྲན་པར་བྱ་བ་དང༌། རྒྱས་པར་དགང་བ་དང༌། རབ་ཏུ་རྒྱ་ཆེར་བྱ་བ་དང༌། བལྟ་བ་དང༌། རྣམ་པར་སྤེལ་བ་དང༌། མངོན་པར་བསྒྲུབ་པ་དང༌། རྒྱས་གདབ་པར་བྱས་ཏེ་ཏིང་ངེ་འཛིན་གྱི་སྒོ་དེ་དག་ལས་ལངས་ནས་ལྷ་མོ་སྒྱུ་མ་ འཁོར་དང་བཅས། གནས་དང་བཅས། སྟན་དང་བཅས་པ་ལ་གཡས་ཕྱོགས་སུ་བསྐོར་བ་བྱས་ཏེ་མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་མ། བདག་ནི། འཇམ་དཔལ་གཞོན་ནུར་གྱུར་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དགེ་བའི་བཤེས་གཉེན་བསྙེན་བཀུར་བ་ལ་ཡོངས་སུ་ བསྐུལ་བ་བགྱིས་པ་སྟེ། དེ་ལྟར་བདག་དགེ་བའི་བཤེས་གཉེན་ནས་དགེ་བའི་བཤེས་གཉེན་དུ་བསྙེན་བཀུར་བགྱིད་ཅིང༌། མཐར་གྱིས་ཁྱོད་ཀྱི་ཞབས་ཀྱི་དྲུང་འདིའི་བར་དུ་ མཆིས་པ་ལགས་ན། འཕགས་མ། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་ན། རྣམ་པ་ཐམས་ཅད་མཁྱེན་པ་ཉིད་དུ་འགྲུབ་པ་ལགས། དེས་ སྨྲས་པ། རིགས་ཀྱི་བུ། ཁོ་མོ་ནི། བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པས་རྣམ་པར་བརྒྱན་པ་ཐོབ་པ་སྟེ། རིགས་ཀྱི་བུ། ཁོ་མོ་ ༄༅། །རྣམ་པར་ཐར་པ་དེ་དང་ལྡན་པས་འཇིག་རྟེན་གྱི་ཁམས་རྒྱ་མཚོ་འདིའི་འཇིག་རྟེན་གྱི་ཁམས་ཐམས་ཅད་ཀྱི་འཛམ་བུའི་གླིང་ཐམས་ཅད་ན་བཅོམ་ལྡན་ འདས་རྣམ་པར་སྣང་མཛད་ཀྱི་བྱང་ཆུབ་སེམས་དཔའི་སྲིད་པའི་ཐ་མ་ལ་སྐྱེ་བའི་རྣམ་པར་འཕྲུལ་པ་ཇི་སྙེད་ཅིག་ཡོད་པའི་བྱང་ཆུབ་སེམས་དཔའ་སྲིད་པའི་ཐ་མ་པ་དེ་དག་ ཐམས་ཅད་སོ་སོའི་མར་གྱུར་པ་སྟེ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་ཁོ་མོའི་ལྟོ་ན་གནས་པ། ཁོ་མོའི་ལྟོ་གཡས་པ་ནས་འབྱུང་ངོ༌། །རིགས་ཀྱི་བུ། སྐལ་ པ་དང་ལྡན་པའི་གླིང་བཞི་པ་འདི་ཉིད་ཀྱི་གྲོང་ཁྱེར་ཆེན་པོ་སེར་སྐྱའི་གནས་སུ་ཡང་རྒྱལ་པོ་ཟས་གཙང་མའི་བཙུན་མོའི་རིགས་དང་ལྡན་པའི་ཚུལ་གྱིས་བྱང་ཆུབ་སེམས་དཔའ་ དོན་གྲུབ་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་རྒྱ་ཆེན་པོ་བསམ་གྱིས་མི་ཁྱབ་པས་བསྐྱེད་དོ། །རིགས་ཀྱི་བུ། དེ་ལྟར་ཁོ་མོ་རྒྱལ་པོ་ཟས་གཙང་མའི་ཕོ་བྲང་ ན་འདུག་འདུག་པ་ལས། བྱང་ཆུབ་སེམས་དཔའ་དགའ་ལྡན་གྱི་ཕོ་བྲང་ནས་འཕོ་བའི་དུས་ལ་བབ་པ་དང༌། བ་སྤུའི་སྒོ་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་འོད་ཟེར་དེ་ བཞིན་གཤེགས་པ་ཐམས་ཅད་ཀྱི་ཡུམ་གྱི་ཡོན་ཏན་གྱི་དཀྱིལ་འཁོར་ལས་བྱུང་བའི་སྣང་བ་ཞེས་བྱ་བ་མང་པོ་བྱང་ཆུབ་སེམས་དཔའ་ཐམས་ཅད་ཀྱི་ཡུམ་གྱི་ཡོན་ཏན་གྱི་ རྒྱན་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཐོན་ནས་འཇིག་རྟེན་གྱི་ཁམས་ཐམས་ཅད་སྣང་བར་བྱས་ཏེ་ཁོ་མོའི་ལུས་ལ་ཤར་ནས་སྤྱི་བོ་མན་ཆད་བ་སྤུའི་བུ་ ག་ཐམས་ཅད་དུ་འཕྲོས་པར་གྱུར་ཏོ། །རིགས་ཀྱི་བུ། དེ་ལྟར་བྱང་ཆུབ་སེམས་དཔའི་འོད་ཟེར་མིང་གཅིག་ལ་བྱང་ཆུབ་སེམས་དཔའི་ཡུམ་གྱི་རྣམ་པར་འཕྲུལ་པ་དང་རྒྱན་དང་ རྣམ་པར་ཐར་པ་སྣ་ཚོགས་རབ་ཏུ་འགྱེད་པ་དེ་དག་ཁོ་མོའི་ལུས་སུ་དོང་མ་ཐག་ཏུ་དེའི་མོད་ལ་ཁོ་མོའི་ལུས་སུ་བྱང་ཆུབ་སེམས་དཔའི་འོད་ཟེར་གྱི་སྒོའི་དཀྱིལ་འཁོར་གྱིས་ རྣམ་པར་དམིགས་པར་བྱས་ཏེ་བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པའི་ཚུལ་དང༌། རྒྱན་ཐམས་ཅད་ཡོངས་སུ་སྣང་བར་གྱུར་ཏོ། །ཁྱིམ་དང་འཁོར་ལ་ཡང་དེ་ བཞིན་དུ་སྣང་བར་གྱུར་ཏོ། །རིགས་ཀྱི་བུ། དེ་ལྟར་བྱང་ཆུབ་སེམས་དཔའི་འོད་ཟེར་དེ་དག་ཁོ་མོའི་ལུས་སུ་དོང་མ་ཐག་ཏུ་དེའི་མོད་ལ་བྱང་ཆུབ་སེམས་དཔའི་འོད་ཟེར་གྱི་སྒོའི་ དཀྱིལ་འཁོར་དེ་དག་གིས་བྱང་ཆུབ་སེམས་དཔའ་གང་དག་གི་སྐྱེ་བའི་ཚུལ་དང༌། རྣམ་པར་འཕྲུལ་པ་རྣམ་པར་དམིགས་པར་བྱས་པ་དེ་དག་ཐམས་ཅད་ཀྱང་ཁོ་མོས་མཐོང་ བར་གྱུར་ཏེ། དེ་དག་ཐམས་ཅད་ཀྱང་སྙིང་པོ་བྱང་ཆུབ་དུ་གཤེགས་ནས་སེངྒེའི་གདན་ལ་བཞུགས་ཤིང༌། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱིས་བསྐོར་ཏེ་ ༄༅། །འཇིག་རྟེན་གྱི་དབང་པོ་རྣམས་ཀྱིས་བསྐོར་ཅིང་ཆོས་ཀྱི་འཁོར་ལོ་བསྐོར་བ་མང་པོ་མཐོང་ངོ༌། །དེ་བཞིན་གཤེགས་པ་དེ་དག་གིས་སྔོན་བྱང་ཆུབ་སེམས་ དཔའི་སྤྱོད་པ་མཛད་པའི་ཚེ་དེ་བཞིན་གཤེགས་པ་ཇི་སྙེད་ཅིང་བསྙེན་བཀུར་བ་དེ་དག་ཐམས་ཅད་ཀྱང་ཁོ་མོས་དང་པོ་ཐུགས་བསྐྱེད་པ་དང༌། སྐྱེ་བའི་རྣམ་པར་འཕྲུལ་པ་དང་ བཅས་མངོན་པར་རྫོགས་པར་བྱང་ཆུབ་པ་དང༌། ཆོས་ཀྱི་འཁོར་ལོ་བསྐོར་བ་དང༌། མྱ་ངན་ལས་འདས་པའི་རྣམ་པར་འཕྲུལ་པ་དང་བཅས། སངས་རྒྱས་ཀྱི་ཞིང་ཡོངས་སུ་དག་ པའི་རྒྱན་དང་བཅས་པར་མཐོང་ངོ༌། །དེ་བཞིན་གཤེགས་པ་དེ་དག་གི་སྤྲུལ་པའི་དཀྱིལ་འཁོར་སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པ་ དེ་དག་ཐམས་ཅད་ཀྱང་ཁོ་མོས་མཐོང་བར་གྱུར་ཏོ། །རིགས་ཀྱི་བུ། དེ་ལྟར་ཁོ་མོའི་ལུས་སུ་བྱང་ཆུབ་སེམས་དཔའི་འོད་ཟེར་དེ་དག་དོང་མ་ཐག་ཏུ་ཁོ་མོའི་ལུས་ཀྱང་འགྲོ་ བ་ཐམས་ཅད་ལས་མངོན་པར་འཕགས་པར་གྱུར་ཏེ། རུམ་ནམ་མཁའི་དབྱིངས་ལྟར་ཡངས་པར་གྱུར་ཀྱང་མིའི་ལུས་ལས་ལྷག་པར་ཡང་མི་སྣང་ངོ༌། །ཕྱོགས་བཅུ་ན་བྱང་ ཆུབ་སེམས་དཔའི་མངལ་གྱི་གནས་དང༌། ཁང་ཁྱིམ་དང༌། རྒྱན་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཁོ་མོའི་ལུས་ཀྱི་ཁོངས་སུ་ཆུད་པ་དང༌། ཁོ་མོའི་ལུས་སུ་ཤོད་ བར་གྱུར་པར་སྣང་བར་གྱུར་ཏོ། །རིགས་ཀྱི་བུ། དེ་ལྟར་ཁོ་མོའི་ལུས་སུ་བྱང་ཆུབ་སེམས་དཔའི་མངལ་གྱི་གནས་དང༌། ཁང་ཁྱིམ་དང༌། རྒྱན་དང༌། ལོངས་སྤྱོད་བྱུང་བར་གྱུར་པ་ དང༌། དེའི་མོད་ལ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་སྨོན་ལམ་གཅིག་པ། སྐལ་པ་མཉམ་པར་སྤྱོད་སྤྱོད་པ། དགེ་ བའི་རྩ་བ་གཅིག་པ། རྒྱན་གཅིག་པ། རྣམ་པར་ཐར་པ་གཅིག་ལ་རྣམ་པར་སྤྱོད་པ། ཡེ་ཤེས་ཀྱི་ས་གཅིག་ལ་གནས་པ། རྣམ་པར་འཕྲུལ་པ་གཅིག་གིས་བྱུང་བ། སྨོན་ལམ་གཅིག་ གིས་གྲུབ་པ། སྤྱོད་པ་གཅིག་གིས་བྱུང་བ། ཆོས་ཀྱི་ལུས་ཡོངས་སུ་དག་པ། གཟུགས་ཀྱི་ལུས་མཐའ་དང་དབུས་མེད་པའི་བྱིན་གྱི་རླབས་དང་ལྡན་པ། བྱང་ཆུབ་སེམས་དཔའ་ཀུན་ཏུ་ བཟང་པོའི་སྤྱོད་པ་དང༌། སྨོན་ལམ་དང༌། རྣམ་པར་འཕྲུལ་པས་བྱུང་བ་དག་དང༌། རིན་པོ་ཆེ་ཀླུའི་དབང་པོའི་སྙིང་པོའི་ཁང་པ་བརྩེགས་པ་ན་འཁོད་ཅིང་ཀླུའི་རྒྱལ་པོ་གང་ཆེན་ མཚོ་ལ་སོགས་པ་ཀླུའི་དབང་པོ་སྟོང་ཕྲག་བརྒྱད་ཅུ་དང༌། འཇིག་རྟེན་གྱི་དབང་པོ་ཐམས་ཅད་ཀྱིས་ཀྱང་མངོན་པར་མཆོད་ཅིང་བྱང་ཆུབ་སེམས་དཔའི་རྣམ་པར་འཕྲུལ་པ། དགའ་ལྡན་གྱི་ཕོ་བྲང་ཐམས་ཅད་ནས་ཤི་འཕོ་ཡོངས་སུ་སྟོན་པས་དགའ་ལྡན་གྱི་གནས་རེ་རེ་ནས་ཀྱང་འཇིག་རྟེན་གྱི་ཁམས་ཐམས་ཅད་དུ་འདལ་བའི་གླིང་བཞི་པར་སྐྱེ་བ་ ༄༅། །ལེན་པ་ཡོངས་སུ་སྟོན་པ། སེམས་ཅན་ཡོངས་སུ་སྨིན་པར་བྱ་བའི་ཐབས་ཀྱི་ཚུལ་བསམ་གྱིས་མི་ཁྱབ་པ་ལ་མཁས་པའི་རྗེས་སུ་སོང་བ་དང༌། སེམས་ ཅན་བག་མེད་པ་ཐམས་ཅད་ཡོངས་སུ་སྐུལ་ཞིང་མངོན་པར་ཞེན་པ་ཐམས་ཅད་ལས་གྱེན་དུ་བསྐྱོད་པ་དང༌། འོད་ཟེར་གྱི་དྲ་བ་ཆེན་པོ་རབ་ཏུ་དགྱེ་བས་འཇིག་རྟེན་གྱི་མུན་པ་ ཐམས་ཅད་རྣམ་པར་སེལ་བ་དང༌། ངན་སོང་ཐམས་ཅད་ཀྱི་སྡུག་བསྔལ་ཞི་བར་བྱེད་པ་དང༌། སེམས་ཅན་དམྱལ་བའི་ལམ་གྱི་རྒྱུད་ཐམས་ཅད་ནས་རྣམ་པར་ཟློག་པ་དང༌། སེམས་ཅན་ཐམས་ཅད་ཀྱི་སྔོན་གྱི་ལས་ཡོངས་སུ་སྐུལ་བ་དང༌། སེམས་ཅན་གྱི་ཁམས་ཐམས་ཅད་ཡོངས་སུ་སྐྱོབ་པ་དང༌། སེམས་ཅན་ཐམས་ཅད་ལ་ལུས་མངོན་པར་སྟོན་ པས་དགའ་ལྡན་གྱི་ཕོ་བྲང་ནས་འཕོས་ཏེ་འཁོར་དང་བཅས་པར་ཁོ་མོའི་ལུས་སུ་ཞུགས་ནས་དེ་དག་ཐམས་ཅད་ཀྱང་ཁོ་མོའི་ཁོང་ན་གོམ་པ་སྟོང་གསུམ་གྱི་སྟོང་ཆེན་པོའི་འཇིག་ རྟེན་གྱི་ཁམས་ཙམ་དུ་ཡངས་པ་ནས་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དུ་ཡངས་པའི་འགྲོས་ཀྱིས་རྒྱུ་ཞིང་སྤྱོད་དོ། །ཕྱོགས་ བཅུའི་འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་ཀྱི་དེ་བཞིན་གཤེགས་པའི་ཞབས་ཀྱི་དྲུང་གི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་བརྗོད་དུ་མེད་པ་དག་ ཀྱང་སེམས་ཀྱི་སྐད་ཅིག་རེ་རེ་ལ་བྱང་ཆུབ་སེམས་དཔའི་མངལ་གྱི་གནས་དང༌། རྣམ་པར་འཕྲུལ་བ་བལྟ་བའི་ཕྱིར་ཁོ་མོའི་ཁོང་དུ་འདོང་ངོ༌། །རྒྱལ་པོ་ཆེན་པོ་བཞི་དང༌། བརྒྱ་བྱིན་དང༌། རབ་མཚེ་མ་དང༌། རབ་དགའ་ལྡན་དང༌། རབ་འཕྲུལ་དགའ་དང༌། དབང་སྒྱུར་གྱི་ལྷའི་དབང་པོ་རྣམས་དང༌། ཚངས་པ་རྣམས་ཀྱང་མངལ་གྱི་གནས་ན་བཞུགས་པའི་བྱང་ཆུབ་སེམས་ དཔའ་ལ་བལྟ་བ་དང༌། ཕྱག་བྱ་བ་དང༌། བསྙེན་བཀུར་བ་དང༌། ཆོས་ཉན་པའི་གཏམ་ཉམས་སུ་མྱོང་བར་བྱ་བའི་ཕྱིར་ཉེ་བར་འདོང་ཡང་ཁོ་མོའི་རུམ་འདིས་དེ་སྙེད་ཀྱི་འཁོར་གྱི་དཀྱིལ་ འཁོར་ཞིག་ཡོངས་སུ་བཟུང་ཡང་ཡངས་པར་གྱུར་པ་ཡང་མེད། མིའི་ལུས་ཐ་མལ་པ་ལས་ཁོ་མོའི་ལུས་ཁྱད་པར་ཅན་དུ་གྱུར་པ་ཡང་མེད་མོད་ཀྱི། འཁོར་གྱི་དཀྱིལ་འཁོར་དེ་སྙེད་ཀྱང་ ཡོངས་སུ་བཟུང་ངོ༌། །ལྷ་དང་མི་དེ་དག་ཐམས་ཅད་ཀྱིས་ཀྱང་བྱང་ཆུབ་སེམས་དཔའི་ལོངས་སྤྱོད་སྣ་ཚོགས་དང༌། རྒྱན་ཡོངས་སུ་དག་པ་ཡང་མཐོང་བར་གྱུར་ཏོ། །དེ་ཅིའི་ཕྱིར་ཞེ་ ན། དེ་ནི། བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པ་འདི་ཉིད་ཤིན་ཏུ་བསྒོམས་པའི་ཕྱིར་རོ། །རིགས་ཀྱི་བུ། ཇི་ལྟར་ཁོ་མོ་སྐལ་པ་དང་ ལྡན་པའི་གླིང་བཞི་པ་འདིའི་འཛམ་བུའི་གླིང་ན་བྱང་ཆུབ་སེམས་དཔའ་ཁོང་ན་ཡོངས་སུ་འཛིན་པ་དེ་བཞིན་དུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་གླིང་ ༄༅། །བཞི་པ་ཐམས་ཅད་ཀྱི་འཛམ་བུའི་གླིང་དག་ནའང་རྣམ་པར་འཕྲུལ་པའི་རྒྱན་གྱི་ཚུལ་འདི་ཉིད་ཀྱིས་ཡོངས་སུ་འཛིན་པར་བྱེད་དེ། བྱང་ཆུབ་སེམས་དཔའི་རྣམ་ པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པ་འདི་ཉིད་ཤིན་ཏུ་བསྒོམས་པའི་ཕྱིར་ཁོ་མོའི་ལུས་འདི་གཉིས་སུ་གྱུར་པའང་མེད། མི་གཉིས་པའང་མེད། གཅིག་ལ་ གནས་པའང་མེད། མང་པོ་ལ་གནས་པའི་མེད་དོ། །རིགས་ཀྱི་བུ། ཇི་ལྟར་ཁོ་མོ་བཅོམ་ལྡན་འདས་རྣམ་པར་སྣང་མཛད་འདིའི་ཡུམ་དུ་གྱུར་པ་དེ་བཞིན་དུ། སྔོན་གྱི་དེ་བཞིན་ གཤེགས་པ་མཐའ་དང་དབུས་མེད་པ་དག་གི་ཡང་ཡུམ་དུ་གྱུར་ཏོ། །ལ་ལ་ཞིག་ཏུ་བྱང་ཆུབ་སེམས་དཔའ་པདྨོའི་སྤུབས་ནས་རྫུས་ཏེ་སྐྱེ་བ་ཞིག་ཏུ་གྱུར་ན་ཡང་པདྨོའི་ཚལ་གྱི་ལྷ་ མོར་གྱུར་ཅིང༌། ཁོ་མོས་བྱང་ཆུབ་སེམས་དཔའ་ལེན་ཏེ། འཇིག་རྟེན་རྣམས་ཀྱིས་ཀྱང་ཁོ་མོ་ནི། བྱང་ཆུབ་སེམས་དཔའི་ཡུམ་ཡིན་པར་ཤེས་སོ། །ལ་ལ་ཞིག་ཏུ་ཐུ་བར་ སྐྱེ་བར་གྱུར་ན་ཡང་དེ་དག་ཏུ་ཡང་ཁོ་མོས་ཐུ་བར་བླངས་ཏེ་བྱང་ཆུབ་སེམས་དཔའི་ཡུམ་དུ་གྱུར་ཏོ། །ལ་ལ་ཞིག་ཏུ་སངས་རྒྱས་ཀྱི་ཞིང་དུ་དེ་བཞིན་འབྱུང་བར་གྱུར་ནའང་ དེ་དག་ཏུའང་ཁོ་མོ་སྙིང་པོ་བྱང་ཆུབ་ཀྱི་ལྷ་མོར་གནས་གནས་སོ། །རིགས་ཀྱི་བུ། ཐབས་ཀྱི་སྒོ་ཇི་སྙེད་ཅིག་གིས་བྱང་ཆུབ་སེམས་དཔའ་སྲིད་པའི་ཐ་མ་པ་འཇིག་རྟེན་དུ་ འབྱུང་བ་ཡོངས་སུ་སྟོན་པ་དེ་སྙེད་ཀྱི་ཐབས་ཀྱི་སྒོས་ཁོ་མོ་བྱང་ཆུབ་སེམས་དཔའི་ཡུམ་དུ་གྱུར་ཏེ། རིགས་ཀྱི་བུ། ཁོ་མོ་འཇིག་རྟེན་གྱི་ཁམས་འདི་ན་བཅོམ་ལྡན་འདས་རྣམ་པར་ སྣང་མཛད་ཀྱི་བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པ་ཡོངས་སུ་བསྟན་པ་དག་ཏུ་ཡུམ་དུ་གྱུར་པ་དེ་བཞིན་དུ། བཅོམ་ལྡན་འདས་དེ་བཞིན་གཤེགས་པ་ལོག་པར་དད་ སེལ་དང༌། གསེར་ཐུབ་དང༌། བསོད་སྐྱབས་ཀྱི་ཡུམ་དུ་འང་གྱུར་ཏོ། །དེ་བཞིན་དུ་མ་བྱོན་པའི་དེ་བཞིན་གཤེགས་པ་བསྐལ་པ་བཟང་པོ་པ་རྣམས་ཀྱིའང་ཡུམ་དུ་འགྱུར་ཏེ། འདི་ ལྟར་བྱང་ཆུབ་སེམས་དཔའ་བྱམས་པ་དགའ་ལྡན་གྱི་གནས་ན་བཞུགས་ཤིང་ཤི་འཕོ་ཡོངས་སུ་སྟོན་པའི་དུས་ལ་བབ་པ་དང༌། འོད་ཟེར་བྱང་ཆུབ་སེམས་དཔའ་ཐམས་ཅད་སྐྱེ་ བར་འབྱུང་ཞིང༌། མངལ་ན་བཞུགས་པའི་རྣམ་པར་འཕྲུལ་པ་ཡོངས་སུ་སྟོན་པའི་འོད་བཀྱེ་ནས་ཆོས་ཀྱི་དབྱིངས་ཐམས་ཅད་ཀྱི་ཚུལ་དང༌། གཞི་རབ་ཏུ་སྣང་བར་བྱས་ཏེ་ཆོས་ཀྱི་ དབྱིངས་ཀྱི་ཚུལ་དང༌། གཞི་ཇི་སྙེད་ཅིག་ཏུ་བྱང་ཆུབ་སེམས་དཔའ་བྱམས་པས་མིའི་འཇིག་རྟེན་གྱི་མིའི་དབང་པོའི་རིགས་སུ་ཆེར་སྐྱེ་བ་ཡོངས་སུ་བསྟན་པས་སེམས་ཅན་གདུལ་ བར་བྱ་བ་ཇི་སྙེད་ཅིག་ཡོད་པ་དེ་དག་ཐམས་ཅད་དུའང་ཁོ་མོ་བྱང་ཆུབ་སེམས་དཔའི་ཡུམ་དུ་འགྱུར་རོ། །བྱང་ཆུབ་སེམས་དཔའི་ཡུམ་དུ་ཇི་ལྟར་འགྱུར་བ་དེ་བཞིན་དུ། བྱམས་ ༄༅། །པའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་སེངྒེ་དང༌། དེ་བཞིན་དུ་རབ་ཏུ་སྣང་བ་དང༌། དཔལ་ དང༌། སྤྱན་བཟང་པོ་དང༌། མེ་ཏོག་དང༌། མེ་ཏོག་དཔལ་དང༌། རྒྱས་པ་དང༌། རྒྱལ་དང༌། ཐུགས་བཟང་པོ་དང༌། རྡོ་རྗེ་དང༌། རྡུལ་དང་བྲལ་བ་དང༌། ཟླ་བ་སྒྲོན་མ་འཛིན་པ་དང༌། གྲགས་པ་དང༌། རྡོ་རྗེ་དག་པ་དང༌། དོན་གཅིག་ཏུ་སྟོན་པ་དང༌། མི་དཀར་ཡན་ལག་དང༌། ཕ་རོལ་ཏུ་ཕྱིན་པ་དང༌། རིན་པོ་ཆེ་འོད་འཕྲོ་བའི་རི་བོ་དང༌། སྒྲོན་མ་ཆེན་པོ་འཛིན་པ་ དང༌། པདྨོ་དམ་པ་དང༌། སྒྲ་རྣམ་པར་གྲགས་པ་དང༌། ཡོན་ཏན་དཔག་ཏུ་མེད་པ་མངའ་བ་དང༌། མར་མེའི་དཔལ་དང༌། ཡན་ལག་རྣམ་པར་བརྒྱན་པ་དང༌། ལེགས་པར་བཞུད་ པ་དང༌། བྱམས་པའི་དཔལ་དང༌། སྤྲུལ་པ་བཟང་པོ་དང༌། གནས་དང་བྲལ་བ་དང༌། གཟི་བརྗིད་འབར་བ་དང༌། གསུང་མཐའ་ཡས་པ་དང༌། ལེན་པ་མེད་པའི་མུ་ཁྱུད་དང༌། ཡིད་ གཉིས་རྣམ་པར་སེལ་བ་དང༌། ཡོངས་སུ་དག་པ་དང༌། འོད་ཤིན་ཏུ་ཡངས་པ་དང༌། གྲགས་པ་དག་པས་བྱུང་བ་དང༌། སྤྲིན་གྱི་དཔལ་དང༌། གཙུག་ཕུད་རྣམ་པར་མཛེས་པ་ དང༌། ཤིང་གི་རྒྱལ་པོ་དང༌། རིན་པོ་ཆེའི་དཀྱིལ་འཁོར་རིན་པོ་ཆེ་ཐམས་ཅད་ཀྱིས་རྣམ་པར་བརྒྱན་པའི་ཁ་དོག་དང༌། བློ་གྲོས་རྒྱ་མཚོ་དང༌། རིན་པོ་ཆེ་བཟང་པོ་དང༌། སྟོབས་ ལ་ཐུབ་པ་མེད་པ་དང༌། དགོངས་པ་ཡོངས་སུ་རྫོགས་པ་དང༌། དབང་ཕྱུག་ཆེན་པོ་དང༌། དབང་པོའི་དཔལ་དང༌། མེའི་དཔལ་དང༌། མཆོག་གི་དཔལ་དང༌། ཙནྡན་གྱི་སྤྲིན་དང༌། མི་ དཀར་རིང་བའི་སྤྱན་དང༌། བློ་གྲོས་དམ་པ་དང༌། བློ་གྲོས་རྣམ་པར་བསྒོམས་པ་དང༌། སྒྲུབ་པའི་རྒྱལ་པོ་དང༌། སྦྱོང་བའི་རྒྱལ་པོ་དང༌། རྡོ་རྗེའི་བློ་གྲོས་དང༌། རྣམ་པར་བརྒྱན་ པ་དང༌། ཕུན་སུམ་ཚོགས་པ་དང༌། ཟེ་བ་དགའ་བ་དང༌། དབང་ཕྱུག་ལྷ་དང༌། གཙུག་ཏོར་དཔལ་དང༌། ཡེ་ཤེས་རྡོ་རྗེའི་རི་བོ་དང༌། དཔལ་གྱི་སྙིང་པོ་དང༌། གསེར་གྱི་དྲ་བས་སྐུ་ རྣམ་པར་བརྒྱན་པ་དང༌། ཤིན་ཏུ་རྣམ་པར་ཕྱེ་བ་དང༌། དབང་ཕྱུག་ལྷ་དང༌། དབང་ཆེན་ལྷ་དང༌། མི་དམིགས་པའི་དཔལ་དང༌། རྣམ་པར་དག་པས་དགྱེས་པ་དང༌། འོད་འཕྲོ་ མངའ་བ་དང༌། ཆུའི་དཔལ་དང༌། རྣམ་དག་བློ་གྲོས་དང༌། ཐེག་པ་དམ་པ་དང༌། མ་ཉམས་པའི་ཡོན་ཏན་འབྱུང་བ་དང༌། དགྲ་ལས་དབེན་པ་དང༌། གསུང་སྒྲོག་པ་དང༌། དབང་ དུ་གྱུར་པའི་ཡོན་ཏན་གཟི་བརྗིད་དང༌། རྣམ་པར་སྣང་མཛད་དཔལ་དང༌། དྲི་ཞིམ་པོའི་ལོངས་སྤྱོད་དང༌། དྲི་ཞིམ་པོ་རྣམ་པར་ཕྱེ་བ་དང༌། ཡན་ལག་རྣམ་པར་ཕྱེ་བ་དང༌། ས་ ག་བཟང་བ་དང༌། ཞལ་ནས་སྤོས་ཐམས་ཅད་འོད་དུ་འཕྲོ་བ་དང༌། རྡོ་རྗེ་རིན་པོ་ཆེས་རྣམ་པར་བརྒྱན་པ་དང༌། རབ་ཏུ་བཞད་པའི་སྤྱན་དང༌། འདོད་ཆགས་རྡུལ་བཅོམ་དང༌། ༄༅། །སྐུ་མཆོག་ཏུ་འཁྲུངས་པ་དང༌། ལྷའི་དབྱིག་དང༌། རླབས་ཆེན་ལྷ་དང༌། འགོག་པར་གཞོལ་བ་དང༌། ཐུགས་རྣམ་པར་སངས་རྒྱས་པ་དང༌། རྡུལ་རྣམ་ པར་བསལ་བ་དང༌། འོད་འཕྲོ་བ་མངའ་ཆེན་དང༌། ཉེ་བར་ཞི་བ་མངའ་བ་དང༌། ས་གའི་ལྷ་དང༌། རྡོ་རྗེ་རི་བོ་དང༌། ཡེ་ཤེས་འོད་འཕྲོ་འབར་བའི་སྐུ་དང༌། བདེ་བར་མཛད་པ་ དང༌། བསྒྲུན་པའི་སྟག་དང༌། དགེ་བ་ཡོངས་སུ་རྫོགས་པ་དང༌། གྲགས་པ་ཡིད་དུ་འོང་བས་བཟང་བ་དང༌། མཐུས་རྣམ་པར་གནོན་པ་དང༌། དོན་དམ་པ་རྣམ་པར་གནོན་ པ་དང༌། ཞི་བའི་འོད་ཟེར་དང༌། གཅིག་ཏུ་འཕགས་པ་དང༌། དབྱངས་ཟབ་མོ་དང༌། སའི་བདག་པོ་དང༌། དཔག་ཏུ་མེད་པ་དང༌། དབྱངས་ཀྱི་དཔལ་དང༌། རྣམ་པར་གྲགས་པ་ དང༌། ལོངས་སྤྱོད་མཐུན་པ་དང༌། ལོངས་སྤྱོད་ཚོགས་པ་དང༌། སྨན་པའི་དམ་པ་དང༌། ཡོན་ཏན་ཟླ་བ་དང༌། བཞད་པའི་གཟི་བརྗིད་དང༌། ཡོན་ཏན་བསགས་པ་དང༌། ཟླ་བ་ འཕགས་པ་དང༌། ཉི་མའི་ལྷ་དང༌། འཇིགས་པར་གྲགས་པ་དང༌། འོད་ཟེར་གྱི་ཞལ་དང༌། སཱ་ལའི་དབང་པོའི་ལྷུན་དང༌། གྲགས་པ་དང༌། སྨན་གྱི་རྒྱལ་པོ་དང༌། རིན་ཆེན་ མཆོག་དང༌། བློ་གྲོས་རྡོ་རྗེ་དང༌། དཀར་པོའི་དཔལ་དང༌། གཞི་ཤིན་ཏུ་སྦྱངས་པ་དང༌། རིན་ཆེན་རྒྱལ་པོ་དང༌། གྲགས་པ་ཆེན་པོ་དང༌། ཤུགས་དྲག་འཛིན་པ་དང༌། མི་ དཔོག་འོད་དང༌། འོད་འཕྲོ་ཆེན་པོས་བཞུགས་པ་དང༌། དོན་ཡོད་པའི་ཆོས་ལ་མངའ་བ་དང༌། བརྩོན་འགྲུས་མ་ཉམས་པ་དང༌། དག་པའི་ལྷ་དང༌། འོད་བརྟན་པ་དང༌། ཀུན་གྱི་ བཤེས་གཉེན་དང༌། རྣམ་པར་གྲོལ་བའི་དབྱངས་དང༌། རྣམ་པར་བསྒྲགས་པའི་རྒྱལ་པོ་དང༌། ཚིག་གཅོད་པ་དང༌། ཙམྤ་ཀ་དྲི་མ་མེད་པའི་འོད་དང༌། ཁ་ན་མི་ཐོ་བ་མི་མངའ་བ་དང༌། ཟླ་བ་རྣམ་པར་འཕགས་པ་དང༌། སྒྲོན་མ་འཛིན་པ་དང༌། སྐུ་རྣམ་པར་མཛེས་པ་དང༌། བརྗོད་དུ་མེད་པར་འཕགས་པ་དང༌། འགྲོ་བའི་བཤེས་གཉེན་དང༌། འོད་ཟེར་མང་པོ་དང༌། དབྱངས་ཀྱི་ཡན་ལག་དཔའ་བོ་དང༌། ཆུ་ལྷའི་སྤྱན་དང༌། མོས་པའི་བློ་གྲོས་མངའ་བའི་གཟི་བརྗིད་དང༌། མེ་ཏོག་ཀུན་དའི་དཔལ་དང༌། མཆོད་པའི་ཟླ་བ་དང༌། བློ་མི་མངའ་བ་དང༌། ཆགས་པ་མི་མངའ་བ་དང༌། མི་དམིགས་པའི་བློ་གྲོས་དང༌། ཕུང་པོ་བསགས་པ་དང༌། ངན་སོང་རབ་ཏུ་འཇོམས་པ་དང༌། མེ་ཏོག་དམ་པ་དང༌། སེངྒེ་རྣམ་པར་སྒྲོག་པ་དང༌། དོན་ མི་དམའ་བ་དང༌། བསྒྲིབས་པ་མེད་པར་གཟིགས་པ་དང༌། ཕ་རོལ་གྱི་ཚོགས་འཇོམས་པ་དང༌། རླུང་གི་མུ་ཁྱུད་དང༌། སྙིང་པོ་མི་གཡོ་བ་དང༌། སྙིང་པོ་བཟང་པོ་དང༌། གཞན་གྱིས་ མི་ཐུབ་པའི་རི་བོ་དང༌། མི་གནས་ཡེ་ཤེས་དང༌། མཐའ་ཡས་བཞུགས་པ་དང༌། གཡུལ་དུ་བརྟན་པ་དང༌། སྤྱོད་པས་གྲུབ་པ་དང༌། བླ་མས་བོན་པ་དང༌། མཆོག་ཏུ་དགའ་བ་དང༌། ༄༅། །རྗེས་སུ་འཛིན་པའི་ཟླ་བ་དང༌། ལྷུན་མི་གཡོ་བ་དང༌། ཐུགས་དྲག་པོ་དང༌། ཐུགས་བརྩེ་བའི་བློ་གྲོས་དང༌། ཤིན་ཏུ་མཐོ་འཛིན་དང༌། འོད་ཟེར་མུ་ ཁྱུད་དང༌། མཚན་དཔེ་མེད་པ་དང༌། གཟི་བརྗིད་མ་ཉམས་པ་དང༌། ཐམས་ཅད་ཁ་དོག་དང༌། མཚན་མ་མེད་པའི་ཤེས་རབ་དང༌། མི་གཡོ་བའི་ལྷ་དང༌། བསམ་གྱིས་མི་ཁྱབ་ པའི་དཔལ་དང༌། རྣམ་པར་ཐར་པའི་ཟླ་བ་དང༌། བླ་ན་མེད་པའི་རྒྱལ་པོ་དང༌། ཟླ་བའི་ཕུང་པོ་དང༌། མཆོད་པའི་ཚངས་པ་དང༌། སྤྱན་མི་འགྱུར་བ་དང༌། བྱམས་པའི་རིགས་ དང༌། འཕྲིན་ལས་འཕགས་པ་དང༌། གཉེར་བའི་ཆོས་ཀྱི་བློ་གྲོས་དང༌། བླ་ན་མེད་པའི་དཔལ་དང༌། ཚངས་པའི་ལྷ་དང༌། ཡོན་ཏན་བསམ་གྱིས་མི་ཁྱབ་པའི་འོད་དང༌། བླ་ན་ མེད་པའི་ཆོས་ཀྱི་སྤྱོད་ཡུལ་དང༌། མཐའ་ཡས་བཟང་པོ་དང༌། ཚུལ་དང་འདྲ་བའི་གསུང་དང༌། བྱང་ཆུབ་སེམས་དཔའ་ཤིན་ཏུ་མཐོ་བའི་ལྷ་དག་སྟེ། རིགས་ཀྱི་བུ། དེ་ལྟར་སྟོང་ གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་མ་བྱོན་པའི་དེ་བཞིན་གཤེགས་པ་བྱམས་པ་ལ་སོགས་ཏེ། སྨོས་པ་འདི་དག་ལ་སོགས་པ་བསྐལ་པ་བཟང་པོ་པའི་ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་ཡུམ་དུའང་ཁོ་མོ་ཉིད་འགྱུར་རོ། །འཇིག་རྟེན་གྱི་ཁམས་འདིར་ཇི་ལྟ་བ་དེ་བཞིན་ དུ། ཕྱོགས་བཅུའི་འཇིག་རྟེན་གྱི་ཁམས་ཚད་མེད་པའི་ཆོས་ཀྱི་དབྱིངས་ཀྱི་ཚུལ་མཐའ་དང་དབུས་མེད་པ་ལ་ཞུགས་ཏེ། ཇི་ལྟར་དེ་བཞིན་གཤེགས་པ་བྱམས་པའི་ཡུམ་དུ་ཡོན་ཏན་ གྱི་ཁྱད་པར་བརྗོད་དུ་མེད་པར་འགྱུར་བ་དེ་བཞིན་དུ། ཡོན་ཏན་གྱི་ཁྱད་པར་བརྗོད་དུ་མེད་པའི་ཡང་བརྗོད་དུ་མེད་པའི་དེ་བཞིན་གཤེགས་པ་སེངྒེ་ནས་དེ་བཞིན་གཤེགས་པ་སྣང་ བའི་བར་གྱི་ཡུམ་དུ་འགྱུར་རོ། །ཇི་ལྟར་དེ་བཞིན་གཤེགས་པ་བསྐལ་པ་བཟང་པོ་པ་རྣམས་ཀྱི་ཡུམ་དུ་འགྱུར་བ་དེ་བཞིན་དུ། འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་ གི་རྒྱན་གྱིས་བརྒྱན་པ་འདི་ཐམས་ཅད་ཀྱི་འཇིག་རྟེན་གྱི་ཁམས་ཀྱི་རྒྱུད་ཐམས་ཅད་དང༌། འཇིག་རྟེན་གྱི་ཁམས་འབྱམས་ཀླས་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་ན་འཛམ་ བུའི་གླིང་ཡོད་པ་ཐམས་ཅད་དུ་ཕྱི་མའི་མཐའི་མུར་ཐུག་པའི་བསྐལ་པར་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱད་པ་སྤྱོད་ཅིང༌། བསྐལ་པ་ཐམས་ཅད་དུ་ སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བར་བྱིན་གྱིས་བརླབས་ཏེ། མ་བྱོན་པའི་དེ་བཞིན་གཤེགས་པ་བྱང་ཆུབ་སེམས་དཔར་གྱུར་པ་ ཐམས་ཅད་ཀྱི་ཡུམ་དུའང་འགྱུར་རོ། །དེ་སྐད་ཅེས་སྨྲས་པ་དང༌། ཚོང་དཔོན་གྱི་བུ་ནོར་བཟང་གིས་ལྷ་མོ་སྒྱུ་མ་ལ་འདི་སྐད་ཅེས་སྨྲས་སོ། །འཕགས་མ། ཁྱོད་ཀྱིས་བྱང་ཆུབ་ ༄༅། །སེམས་དཔའི་རྣམ་པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པས་རྣམ་པར་བརྒྱན་པ་འདི་བརྙེས་ནས་ཇི་སྙེད་ཅིག་ལགས། སྨྲས་པ། རིགས་ཀྱི་བུ། སྔོན་འདས་པའི་དུས་བསྐལ་པ་བསམ་གྱིས་མི་ཁྱབ་པ་སེམས་ཀྱི་ཡུལ་ལས་འདས་པར་རིགས་དང་ལྡན་པའི་བྱང་ཆུབ་སེམས་དཔའི་མིག་གི་ལམ་གྱིས་ རྣམ་པར་དམིགས་པ། རྣམ་པར་ཤེས་པས་བགྲང་བ་ལས་ཡོངས་སུ་འདས་པའི་ཕ་རོལ་ཅིག་ཏུ་བསྐལ་པ་དགེ་བའི་འོད་ཅེས་བྱ་བ་ཞིག་བྱུང་སྟེ། བསྐལ་པ་དགེ་བའི་ འོད་དེ་ལ་འཇིག་རྟེན་གྱི་ཁམས་རི་བོ་ཤིན་ཏུ་མཐོ་བའི་དཔལ་ཞེས་བྱ་བ་རྣམ་པར་དག་ལ་ཀུན་ནས་ཉོན་མོངས་པ། རིན་པོ་ཆེ་དུ་མ་ལས་གྲུབ་པ། ཁོར་ཡུག་དང་ བཅས་པ། རི་རབ་དང་རྒྱ་མཚོར་བཅས་པ། འགྲོ་བ་ལྔའི་རྒྱུད་དང་བཅས་པ་སྣ་ཚོགས་བལྟ་ན་མཛེས་པ་ཞིག་བྱུང་སྟེ། འཇིག་རྟེན་གྱི་ཁམས་རི་བོ་ཤིན་ཏུ་མཐོ་བའི་ དཔལ་དེར་གླིང་བཞི་པ་བྱེ་བ་བརྒྱ་ཕྲག་བཅུ་བྱུང་སྟེ། གླིང་བཞི་པ་བྱེ་བ་བརྒྱ་ཕྲག་བཅུ་པོ་དེ་དག་གི་དབུས་ན་གླིང་བཞི་པ་དབུ་མ་སེངྒེ་རྒྱལ་མཚན་དམ་པའི་གཟི་ བརྗིད་ཅེས་བྱ་བ་ཞིག་ཡོད་པར་གྱུར་ཏེ། གླིང་བཞི་པ་དེར་རྒྱལ་པོའི་གནས་བྱེ་བ་བརྒྱ་ཕྲག་བརྒྱད་ཅུ་བྱུང་བར་གྱུར་ཏོ། །རྒྱལ་པོའི་གནས་བྱེ་བ་བརྒྱ་ཕྲག་བརྒྱད་ ཅུ་པོ་དེ་དག་གི་དབུས་སུ་རྒྱལ་པོའི་གནས་དབུ་མ་རྒྱལ་མཚན་གྱི་དམ་པ་དང་ལྡན་པ་ཞེས་བྱ་བ་བྱུང་སྟེ། དེར་འཁོར་ལོས་བསྒྱུར་བའི་རྒྱལ་པོ་གཟི་བརྗིད་ཆེན་པོའི་མཐུ་ཞེས་ བྱ་བ་བྱུང་ངོ༌། །རྒྱལ་པོའི་གནས་རྒྱལ་མཚན་གྱི་དམ་པ་དང་ལྡན་པ་དེར་སྙིང་པོ་བྱང་ཆུབ་ཡལ་ག་སྣ་ཚོགས་ཀྱི་འོད་ཅེས་བྱ་བ་ཞིག་བྱུང་སྟེ། དེ་ན་སྙིང་པོ་བྱང་ཆུབ་ཀྱི་ལྷ་ མོ་མིག་གི་དཔལ་ཞེས་བྱ་བ་འདུག་འདུག་གོ །སྙིང་པོ་བྱང་ཆུབ་ཡལ་ག་སྣ་ཚོགས་ཀྱི་འོད་དེ་ལ་བྱང་ཆུབ་སེམས་དཔའ་རྒྱལ་མཚན་དྲི་མ་མེད་པ་ཞེས་བྱ་བ་ཞིག་ཐམས་ ཅད་མཁྱེན་པ་ཉིད་ཀྱི་ཆོས་ཁོང་དུ་ཆུད་པར་བྱ་བའི་ཕྱིར་འདུག་པ་ལས། དེའི་ཐམས་ཅད་མཁྱེན་པ་ཉིད་ཀྱི་ཆོས་ཁོང་དུ་ཆུད་པར་བྱ་བ་ལ་བར་ཆད་བྱ་བའི་ཕྱིར་བདུད་ཁ་ དོག་བཟང་པོའི་འོད་ཅེས་བྱ་བ་བདུད་ཀྱི་སྡེ་ཆེན་པོའི་འཁོར་དང་ལྡན་པ་ཞིག་ལུས་མི་སྣང་བར་མ་བྱས་པར་དྲུང་དུ་ཕྱིན་པར་གྱུར་རོ། །འཁོར་ལོས་བསྒྱུར་བ་གཟི་བརྗིད་ ཆེན་པོའི་མཐུ་དེ་ཡང་བྱང་ཆུབ་སེམས་དཔའི་དབང་ཐོབ་པའི་རྫུ་འཕྲུལ་ཆེན་པོའི་རྣམ་པར་འཕྲུལ་པས་བྱུང་བ་ཞིག་སྟེ། དེས་བདུད་ཀྱི་སྡེ་དེ་བས་ཀྱང་འཕགས་ལ་ཆེས་ མང་བའི་དཔུང་གི་ཚོགས་ཆེན་པོ་མངོན་པར་སྤྲུལ་ཏེ་བདུད་ཀྱི་སྡེ་ཕམ་པར་བྱ་བའི་ཕྱིར་སྙིང་པོ་བྱང་ཆུབ་དེའི་འཁོར་ཀུན་ནས་ཡོངས་སུ་བསྐོར་བ་དང༌། དེས་བདུད་ཀྱི་ ༄༅། །སྡེ་ཆེན་པོ་དེ་ཡང་རྣམ་པར་གཏོར་བར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་རྒྱལ་མཚན་དྲི་མ་མེད་པ་དེས་ཀྱང་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །དེ་ནས་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་གྱིས་འཁོར་ལོས་བསྒྱུར་བའི་རྒྱལ་པོ་གཟི་ བརྗིད་ཆེན་པོའི་མཐུ་ལ་བུའི་འདུ་ཤེས་བསྐྱེད་ནས་དེ་བཞིན་གཤེགས་པ་དེའི་ཞབས་གཉིས་ལ་ཕྱག་འཚལ་ནས་སྨོན་ལམ་བཏབ་པ། བཅོམ་ལྡན་འདས། བདག་ གང་དང་གང་དུ་སྐྱེས་པ་དེ་དང་དེར་འཁོར་ལོས་བསྒྱུར་བ་གཟི་བརྗིད་ཆེན་པོའི་མཐུ་འདི་བདག་གི་བུར་གྱུར་ཅིག །ནམ་འདི་བླ་ན་མེད་པ་ཡང་དག་པར་རྫོགས་པའི་ བྱང་ཆུབ་ཏུ་མངོན་པར་འཚང་རྒྱ་བར་འགྱུར་བ་དེའི་ཚེ་འང་བདག་ཉིད་དེའི་མར་གྱུར་ཅིག །ཅེས་ནས་དེས་སྨོན་ལམ་དེ་སྐད་དུ་བཏབ་སྟེ། སྙིང་པོ་བྱང་ཆུབ་ཡལ་ ག་སྣ་ཚོགས་ཀྱི་འོད་དེ་ཉིད་ལ་གནས་ཤིང་བསྐལ་པ་འོད་བཟང་པོ་འདི་ཉིད་ལ་དེ་བཞིན་གཤེགས་པ་ཁྲག་ཁྲིག་ཕྲག་བཅུ་བསྙེན་བཀུར་ཏོ། །རིགས་ཀྱི་བུ་།དེ་ ལ་ཇི་སྙམ་དུ་སེམས། དེའི་ཚེ་དེའི་དུས་ན་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་ནི། རིགས་ཀྱི་ བུ་ཁྱོད་ཀྱིས་དེ་ལྟར་མི་བལྟ་སྟེ། ཁོ་མོ་ནི། དེའི་ཚེ་དེའི་དུས་ན་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་ཞེས་བྱ་བར་གྱུར་ཏོ། །རིགས་ཀྱི་བུ། དེ་ལ་ཇི་སྙམ་དུ་སེམས། དེའི་ཚེ་ དེའི་དུས་ན་འཁོར་ལོས་བསྒྱུར་བའི་གཟི་བརྗིད་ཆེན་པོའི་མཐུ་ཞེས་བྱ་བ། བྱང་ཆུབ་སེམས་དཔའི་དབང་ཐོབ་པ། རྫུ་འཕྲུལ་ཆེན་པོའི་རྣམ་པར་འཕྲུལ་པས་བྱུང་བ། བདུད་ ཀྱི་སྡེ་ཆེན་པོ་རྣམ་པར་མཐོར་བར་བྱེད་པ་དེ་གཞན་ཞིག་ཡིན་པ་སྙམ་དུ་སེམས་ན་ནི། དེ་ལྟར་མི་བལྟ་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་རྣམ་པར་སྣང་མཛད་འདི་ནི། དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་གཟི་བརྗིད་ཆེན་པོའི་མཐུ་ཞེས་བྱ་བར་གྱུར་ཏོ། །རིགས་ ཀྱི་བུ༑ དེ་ལྟར་ཁོ་མོ་དེ་ནས་ཉེ་བར་བཟུང་ནས་གང་དང་གང་དུ་སྐྱེས་པ་དེ་དག་ཐམས་ཅད་དུའང་འདི་ནི། ཁོ་མོའི་བུར་གྱུར་ཏེ། སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་ སེམས་དཔའི་སྤྱད་པ་སྤྱོད་ཅིང༌། འགྲོ་བའི་རྒྱུད་ཀྱི་སྒོ་ཐམས་ཅད་དང༌། སྐྱེ་གནས་ཀྱི་སྒོ་ཐམས་ཅད་དང༌། དགེ་བའི་རྩ་བའི་སྒོ་ཐམས་ཅད་དང༌། བྱང་ཆུབ་སེམས་དཔའི་ སྤྱོད་པའི་རྒྱུད་ཀྱི་ཚུལ་ཐམས་ཅད་དང༌། སྐྱེས་པའི་རབས་ཀྱི་ཚུལ་ཐམས་ཅད་དང༌། ལྷའི་དབང་པོའི་ཚེ་ཐམས་ཅད་དང༌། འཇིག་རྟེན་གྱི་དབང་པོའི་འགྲོ་བའི་རྒྱུད་ཐམས་ ༄༅། །ཅད་དང༌། དབང་ཕྱུག་གིས་ཐམས་ཅད་དང༌། འགྲོ་བའི་རྒྱུད་དུ་སྣང་བ་ཐམས་ཅད་གང་དང་གང་དུ་སེམས་ཅན་ཡོངས་སུ་སྨིན་པར་བྱ་བའི་དོན་དུ་སྐྱེས་ པར་གྱུར་པ་དེ་དག་ཐམས་ཅད་དུ་ཡང་ཁོ་མོ་ཉིད་འདིའི་ཡུམ་དུ་གྱུར་ཏེ། སྲིད་པ་ཐམས་ཅད་དུ་འང་ཁོ་མོ་ཉིད་དང་བྲལ་བ་མེད་པར་ཡུམ་དུ་གྱུར་ཏོ། །བྱང་ཆུབ་སེམས་ དཔའི་སྐྱེ་བའི་སྒོ་ཐམས་ཅད་དུ་སྐད་ཅིག་སྐད་ཅིག་ཅིང་བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པ་བསྟན་པར་གྱུར་ཏོ། །དེ་དག་ཐམས་ཅད་དུ་ཡང་ཁོ་མོ་ཉིད་ འདིའི་ཡུམ་དུ་གྱུར་ཏོ། །འདས་པའི་དེ་བཞིན་གཤེགས་པ་མཐའ་དང་དབུས་མེད་པ་ཚད་མེད་པ་དག་གི་ཡུམ་དུའང་ཁོ་མོ་གྱུར་ཏོ། །ཕྱོགས་བཅུའི་དེ་བཞིན་གཤེགས་ པ་ད་ལྟར་བྱུང་བ་མཐའ་དང་དབུས་མེད་པ་ཚད་མེད་པ་དག་གི་ཡུམ་དུའང་ཁོ་མོ་གྱུར་ཏེ། དེ་བཞིན་གཤེགས་པ་ཇི་སྙེད་ཅིག་གི་སྲིད་པ་ཐ་མ་ལ་ཁོ་མོ་བྱང་ཆུབ་སེམས་ དཔའི་ཡུམ་དུ་གྱུར་པའི་དེ་བཞིན་གཤེགས་པ་དེ་དག་ཐམས་ཅད་ཀྱི་སྐུ་ལྟེ་བའི་དཀྱིལ་འཁོར་ནས་འོད་ཟེར་མང་པོ་བྱུང་ཞིང༌། ཁོ་མོའི་ལུས་དང་སེམས་རབ་ཏུ་སྣང་ བར་མཛད་དོ། །རིགས་ཀྱི་བུ། ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་ཆེན་པོ་ཡེ་ཤེས་སྒྱུ་མའི་རྣམ་པས་རྣམ་པར་བརྒྱན་པ་འདི་ཤེས་པར་ཟད་ ན༑ ཁོ་མོས་བྱང་ཆུབ་སེམས་དཔའི་སྙིང་རྗེ་ཆེན་པོའི་སྙིང་པོ་དང་ལྡན་པ། ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར་བྱ་བ་དང༌། གདུལ་བས་མི་ངོམས་པའི་ལྟ་ཅན། དེ་ བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་བ་བ་སྤུའི་རྩེ་མོ་ལས་འབྱུང་བར་སྟོན་པ་ལ་དབང་སྒྱུར་བ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ། སུམ་ཅུ་རྩ་གསུམ་གྱི་དབང་པོའི་གནས་དེ་ཉིད་ན་ལྷའི་བུ་དྲན་པ་དང་ལྡན་པའི་བུ་མོ་ལྷ་དབང་འོད་ཅེས་བྱ་བ་འདུག་གི །དེའི་གན་དུ་སོང་ལ་ཇི་ལྟར་བྱང་ ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང༌། ཇི་ལྟར་ནན་ཏན་དུ་བྱ་བ་དྲིས་ཤིག། དེ་ནས་ཚོང་དཔོན་གྱི་བུ་ནོར་བཟང་གིས་ལྷ་མོ་སྒྱུ་མའི་རྐང་ པ་གཉིས་ལ་སྤྱི་བོས་ཕྱག་འཚལ་ཏེ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། ལྷ་མོ་སྒྱུ་མའི་དྲུང་ནས་སོང་ངོ༌། །ཤིན་ཏུ་རྒྱས་པ་ ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། སྡོང་པོས་བརྒྱན་པའི་ལེའུ་སྟེ། ༈ བམ་པོ་བརྒྱ་བཅུ་པ། དེ་ནས་ཚོང་དཔོན་གྱི་བུ་ནོར་བཟང་སུམ་ཅུ་རྩ་གསུམ་གྱི་དབང་ བའི་གནས་གང་ན་བ་དང༌། ལྷའི་བུ་དྲན་པ་དང་ལྡན་པའི་བུ་མོ་ལྷ་དབང་འོད་གང་ན་བ་དེར་སོང་སྟེ་ཕྱིན་ནས་ལྷའི་བུ་མོ་ལྷ་དབང་འོད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ ༄༅། །ཏེ༑ ལྷའི་བུ་མོ་ལྷ་དབང་འོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ལྷའི་བུ་མོ་ལྷ་དབང་འོད་ཀྱི་མདུན་དུ་འདུག་སྟེ་ཐལ་མོ་ སྦྱར་ནས་འདི་སྐད་ཅེས་སྨྲས་སོ། །འཕགས་མ་ལྷ་མོ། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི། བྱང་ཆུབ་སེམས་དཔའ་རྣམས་ལ་གདམས་ངག་དང༌། རྗེས་ སུ་བསྟན་པ་མཛད་དོ། །ཞེས་བདག་གིས་ཐོས་ན། འཕགས་མ་ལྷ་མོ། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ ལྟར་ནན་ཏན་དུ་བགྱི་བ་བདག་ལ་བསྟན་དུ་གསོལ། དེ་སྐད་ཅེས་སྨྲས་པ་དང༌། ལྷའི་བུ་མོ་ལྷ་དབང་འོད་ཀྱིས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། ། རིགས་ཀྱི་བུ། ཁོ་མོ་ནི། བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་པ་མེད་པ། རྣམ་པར་དག་པས་བརྒྱན་པ་ཞེས་བྱ་བ་ཐོབ་པ་སྟེ། རིགས་ཀྱི་བུ། ཁོ་མོས་ མངོན་པར་དྲན་པ་བསྐལ་པ་ཨུཏྤ་ལ་ཞེས་བྱ་བ་ཞིག་བྱུང་བ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱའི་བྱེ་མ་སྙེད་ཅིག་བསྙེན་བཀུར་ཏེ། དེ་དག་མངོན་པར་ མ་བྱུང་བའི་ཚེ་ཡང་ཡོངས་སུ་སྲུང་བ་བྱས་སོ། །མཆོད་པ་བྱས་སོ། །ལོངས་སྤྱོད་པའི་དོན་དུ་བཟའ་ཤིང་གི་ར་བ་གསོལ་ཏོ། །སངས་རྒྱས་བཅོམ་ལྡན་འདས་དེ་དག་བྱང་ཆུབ་ སེམས་དཔར་གྱུར་ཏེ། ཡུམ་གྱི་སྐུ་ན་བཞུགས་པ་དང༌། བལྟམས་པ་དང༌། གཤེགས་སྟབས་མདུན་དུ་བཞུད་པ་དང༌། སེངྒེའི་ང་རོ་ཆེན་པོ་སྒྲོག་པ་དང༌། གཞོན་ནུའི་ས་ལ་ བཞུགས་པ་དང༌། བཙུན་མོའི་འཁོར་གྱི་ནང་ན་བཞུགས་པ་དང༌། མངོན་པར་བྱུང་བ་དང༌། བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དང༌། ཆོས་ཀྱི་འཁོར་ལོ་བསྐོར་ བ་དང༌། སངས་རྒྱས་ཀྱི་རྣམ་པར་འཕྲུལ་པ་ཐམས་ཅད་ཡོངས་སུ་སྟོན་པ་མཛད་པའི་ཚེ་སེམས་ཅན་ཡོངས་སུ་སྨིན་པ་དང༌། རྣམ་པར་གདུལ་བར་མཛད་པ་དེ་དག་ཐམས་ ཅད་ཀྱང་ཐུགས་དང་པོ་བསྐྱེད་པ་ནས་ཉེ་བར་བཟུང་བ་ཚུན་ཆད་དམ་པའི་ཆོས་མཐར་ཐུག་པར་ཟད་ཀྱི་བར་དུ་ཁོ་མོས་ཤེས་སོ། །དྲན་ནོ། །རྗེས་སུ་དྲན་ནོ། །བཟུང་ངོ༌། །ཡོངས་སུ་ བཟུང་ངོ༌། །ཉེ་བར་བཟུང་ངོ༌། །རྗེས་སུ་འབྲང་བར་བྱེད་དོ། །བསྐལ་པ་ས་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱ་བཅུའི་བྱེ་མ་སྙེད་ཅིག་ བསྙེན་བཀུར་ཏོ། །བསྐལ་པ་གྲགས་པ་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ ༄༅། །ཏོ༑ ༑བསྐལ་པ་དམིགས་སུ་མེད་པ་ཞེས་བྱ་བ་ཞིག་བྱུང་བ་དེ་ལ་ཁོ་མོས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་བསྙེན་བཀུར་ ཏོ༑ ༑བསྐལ་པ་འོད་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཛམྦུའི་གླིང་གི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏོ། །བསྐལ་པ་འོད་གཞལ་ དུ་མེད་པ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱ་ཉི་ཤུའི་བྱེ་མ་སྙད་ཅིག་བསྙེན་བཀུར་ཏོ། །བསྐལ་པ་དཔལ་ཤིན་ཏུ་འབར་བ་ཞེས་བྱ་བ་ ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་སྙིང་རྗེ་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་ བཞིན་གཤེགས་པ་ཆུ་ཀླུང་གངྒཱ་བརྒྱད་ཅུའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་རྒྱལ་བར་གྱུར་པ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ ཆུ་ཀླུང་གངྒཱ་དྲུག་ཅུའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་ཟླ་བ་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱ་བདུན་ཅུའི་བྱེ་ མ་སྙེད་ཅིག་བསྙེན་བཀུར་ཏོ། །རིགས་ཀྱི་བུ། དེ་ལྟར་ཚུལ་བཞིན་དུ་ཁོ་མོས་རྟག་ཏུ་རྒྱུན་མ་ཆད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་རྣམས་དང་བྲལ་བར་མ་གྱུར་པ་ནི། བསྐལ་པ་ཆུ་ཀླུང་གངྒཱའི་བྱེ་མ་སྙེད་ཅིག་དྲན་ཏེ། ཁོ་མོས་དེ་བཞིན་གཤེགས་པ་དེ་དག་ཐམས་ཅད་ལས་བྱང་ཆུབ་སེམས་ དཔའི་རྣམ་པར་ཐར་པ་དྲན་པ་ཐོགས་པ་མེད་ལ་རྣམ་པར་དག་པས་བརྒྱན་པ་འདི་ཐོས་སོ། །ཐོས་ནས་ཀྱང་ཡོངས་སུ་བཟུང་ངོ༌། །ཇི་སྐད་དུ་གསུངས་པ་བཞིན་དུ་ཁོང་དུ་ཆུད་དོ།། རྣམ་པར་ཐར་པ་འདི་ཉིད་ལ་ཁོ་མོ་རྟག་ཏུ་རྒྱུན་མ་ཆད་པར་རྗེས་སུ་ཞུགས་པར་གནས་གནས་ཏེ། དེ་བཞིན་གཤེགས་པ་དེ་དག་གིས་བྱང་ཆུབ་སེམས་དཔའི་ས་ཉེ་བར་བཟུང་བ་ ནས་དམ་པའི་ཆོས་གནས་པ་ཟད་པའི་མཐར་ཐུག་གི་བར་གྱི་སངས་རྒྱས་ཀྱི་རྣམ་པར་འཕྲུལ་པ་ཇི་སྙེད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་རྣམ་པར་ཐར་པ་དྲན་པ་ ཐོགས་པ་མེད་ལ་རྣམ་པར་དག་པས་བརྒྱན་པ་འདིས་དྲན་ནོ། །རྗེས་སུ་དྲན་ནོ། །བཟུང་ངོ༌། །ཡོངས་སུ་བཟུང་ངོ༌། །ཉེ་བར་བཟུང་ངོ༌། །རྗེས་སུ་འབྲང་བར་བྱེད་དོ། །རིགས་ཀྱི་ བུ༑ ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་མུན་པའི་མུན་ནག་དང་བྲལ་བ། འཁོར་བའི་ནམ་ནངས་པ། སྒྲིབ་ པ་དང་བྲལ་བ། གཉིད་མེད་པ་ལ་མོས་ཤིང་དགའ་བ། སྙོམ་པ་དང་ལེ་ལོ་རྣམ་པར་སྤངས་པ། ལུས་ཀྱི་འདུ་བྱེད་ཤིན་ཏུ་བྱང་བ། རྟག་པར་ཆོས་ཐམས་ཅད་ཀྱི་རང་བཞིན་ ༄༅། །ཁོང་དུ་ཆུད་པས་ཤིན་ཏུ་དག་པ། སྟོབས་བཅུ་རྣམ་པར་དག་པ་ཁོང་དུ་ཆུད་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་ རིགས་ཀྱི་བུ། གྲོང་ཁྱེར་ཆེན་པོ་སེར་སྐྱའི་གནས་ན་བྱིས་པའི་སློབ་དཔོན་ཀུན་གྱི་བཤེས་གཉེན་ཞེས་བྱ་བ་འདུག་གི། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་ བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང༌། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་དགའ་རངས་ཏེ་མགུ་ཞིང་ཉམས་བདེ་ལ་ ཚིམ་ཞིང་ཡིད་བདེ་བ་སྐྱེས་ནས་དགེ་བའི་རྩ་བ་བསམ་གྱིས་མི་ཁྱབ་པའི་ཤུགས་དྲག་པོ་རྣམ་པར་འཕེལ་བས། ལྷའི་བུ་མོ་ལྷ་དབང་འོད་ཀྱི་རྐང་པ་གཉིས་ལ་སྤྱི་བོས་ཕྱག་ འཚལ་ཏེ། ལྷའི་བུ་མོ་ལྷ་དབང་འོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ་ལྷའི་བུ་མོ་ལྷ་དབང་འོད་ཀྱི་དྲུང་ནས་སོང་ངོ༌། ། དེ་ནས་ཚོང་དཔོན་གྱི་བུ་ནོར་བཟང་སུམ་ཅུ་རྩ་གསུམ་གྱི་དབང་པོའི་གནས་ནས་བབས་ཏེ་མཐར་གྱིས་གྲོང་ཁྱེར་ཆེན་པོ་སེར་སྐྱའི་གནས་སུ་བྱིས་པའི་སློབ་དཔོན་ཀུན་གྱི་ བཤེས་གཉེན་གང་ན་བ་དེར་སོང་སྟེ་ཕྱིན་ནས་བྱིས་པའི་སློབ་དཔོན་ཀུན་གྱི་བཤེས་གཉེན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། བྱིས་པའི་སློབ་དཔོན་ཀུན་གྱི་ བཤེས་གཉེན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་བྱིས་པའི་སློབ་དཔོན་ཀུན་གྱི་བཤེས་གཉེན་གྱི་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ ཅེས་སྨྲས་སོ། །འཕགས་པ། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་ པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི། བྱང་ཆུབ་སེམས་དཔའ་རྣམས་ལ་གདམས་ངག་དང༌། རྗེས་སུ་བསྟན་པ་མཛད་དོ། ། ཞེས་བདག་གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་འཕགས་པས་བདག་ལ་བཀའ་ སྩལ་དུ་གསོལ། དེ་སྐད་ཅེས་སྨྲས་པ་དང༌། བྱིས་པའི་སློབ་དཔོན་ཀུན་གྱི་བཤེས་གཉེན་གྱིས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཚོང་ དཔོན་གྱི་བུ་བཟོ་མངོན་པར་ཤེས་པ་ཞེས་བྱ་བ་འདི་ནི། བྱང་ཆུབ་སེམས་དཔའ་ལས་ཡི་གེའི་ཤེས་པ་སློབ་སློབ་པ་ཡིན་གྱི། འདིའི་གན་དུ་སོང་སྟེ་དྲིས་དང༌། འདི་ནི། ཁྱོད་ ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང༌། ཇི་ལྟར་ནན་ཏན་དུ་བྱ་བ་སྟོན་པར་འགྱུར་རོ། །ཞེས་ནས་ཚོང་དཔོན་གྱི་བུ་ ༄༅། །ནོར་བཟང་ཚོང་དཔོན་གྱི་བུ་བཟོ་མངོན་པར་ཤེས་པ་གང་ན་བ་དེར་སོང་སྟེ། ཚོང་དཔོན་གྱི་བུ་བཟོ་མངོན་པར་ཤེས་པའི་རྐང་པ་གཉིས་ལ་སྤྱི་བོས་ ཕྱག་འཚལ་ནས་ཚོང་དཔོན་གྱི་བུ་བཟོ་མངོན་པར་ཤེས་པའི་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ། བདག་གིས་བླ་ན་མེད་པ་ ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་ བགྱི་བ་མ་འཚལ་ཏེ། འཕགས་པ་ནི། བྱང་ཆུབ་སེམས་དཔའ་རྣམས་ལ་གདམས་ངག་དང༌། རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། ཇི་ལྟར་བྱང་ཆུབ་ སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་འཕགས་པས་བདག་ལ་བཀའ་སྩལ་དུ་གསོལ། དེས་སྨྲས་པ་ རིགས་ཀྱི་བུ། ཁོ་བོ་ནི། བྱང་ཆུབ་སེམས་དཔའི་རྣམ་པར་ཐར་པ་བཟོ་མངོན་པར་ཤེས་པ་དང་ལྡན་པ་ཐོབ་པ་སྟེ། རིགས་ཀྱི་བུ། དེ་ལྟར་ཁོ་བོ་ཡི་གེའི་མ་མོ་སློབ་པའི་ ཚེ་ཡི་གེ་ཨ་བརྗོད་པ་དང་བྱང་ཆུབ་སེམས་དཔའི་མཐུས་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཡུལ་ཐ་མི་དད་པ་ཞེས་བྱ་བ་ཁོང་དུ་ཆུད་དོ། །ར་ཞེས་བྱ་བ་བརྗོད་པ་ དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་གཞིའི་བྱེ་བྲག་མཐའ་ཡས་པ་ཞེས་བྱ་བ་ཁོང་དུ་ཆུད་དོ། །པ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆོས་ཀྱི་གཞི་ཡང་ དག་པར་འདྲེས་པ་ཞེས་བྱ་བ་ཁོང་དུ་ཆུད་དོ། །ཙ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་འཁོར་ལོ་རྣམ་པར་ཕྱེ་བ་ཀུན་ནས་གཅོད་པ་ཞེས་བྱ་བ་ཁོང་དུ་ཆུད་ དོ༑ ༑ན་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་གནས་མེད་པས་གཞི་ཐུག་པ་མེད་པ་ཞེས་བྱ་བ་ཁོང་དུ་ཆུད་དོ། །ལ་ཞེས་བྱ་བ་བརྗོད་པ་དང་ཤེས་རབ་ཀྱི་ ཕ་རོལ་ཏུ་ཕྱིན་པའི་སྒོ་མིང་དང་བྲལ་ཏེ་གནས་མེད་པས་དྲི་མ་མེད་པ་ཞེས་བྱ་བ་ཁོང་དུ་ཆུད་དོ། །ད་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྦྱོར་བ་ཕྱིར་ ལྡོག་པ་ཞེས་བྱ་བ་ཁོང་དུ་ཆུད་དོ། །བ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་རྡོ་རྗེའི་དཀྱིལ་འཁོར་ཅེས་བྱ་བ་ཁོང་དུ་ཆུད་དོ། །ཌ་ཞེས་བྱ་བ་བརྗོད་པ་ དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཀུན་ཏུ་འཁོར་ལོ་ཞེས་བྱ་བ་ཁོང་དུ་ཆུད་དོ། །ཥ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་རྒྱ་མཚོའི་སྙིང་པོ་ཞེས་ བྱ་བ་ཁོང་དུ་ཆུད་དོ། །བ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཀུན་ནས་རྣམ་པར་འཕེལ་བར་རྣམ་པར་སྒྲུབ་པ་ཞེས་བྱ་བ་ཁོང་དུ་ཆུད་དོ། །ཏ་ཞེས་ ༄༅། །བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྐར་མའི་དཀྱིལ་འཁོར་ཅེས་བྱ་བ་ཁོང་དུ་ཆུད་དོ། །ཡ་ཞེས་བྱ་བ་བརྗོད་པ་དང་ཤེས་རབ་ཀྱིས་ རོལ་ཏུ་ཕྱིན་པའི་སྒོ་ཕུང་པོ་ཐ་མི་དད་པ་ཞེས་བྱ་བ་ཁོང་དུ་ཆུད་དོ། །ཥྚ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་གདུང་བ་ཀུན་ནས་ཞི་བར་བྱེད་པའི་འོད་ ཅེས་བྱ་བ་ཁོང་དུ་ཆུད་དོ། །ཀ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྤྲིན་ཐ་མི་དད་པ་ཞེས་བྱ་བ་ཁོང་དུ་ཆུད་དོ། །ས་ཞེས་བྱ་བ་བརྗོད་པ་དང་ཤེས་ རབ་ཀྱི་ཕ་རོལ་ཏུ་ཕྱིན་པའི་སྒོ་ཆར་མངོན་པར་འབབ་པས་ཁྱབ་པ་ཞེས་བྱ་བ་ཁོང་དུ་ཆུད་དོ། །མ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཤུགས་ ཆེན་པོས་བརྒྱན་པའི་རྩེ་མོ་ཞེས་བྱ་བ་ཁོང་དུ་ཆུད་དོ། །ག་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཀུན་ནས་རྣམ་པར་བསྒྲུབས་པ་ཞེས་བྱ་བ་ཁོང་དུ་ ཆུད་དོ༑ ༑ཐ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་དེ་བཞིན་ཉིད་ཐ་མི་དད་པའི་སྙིང་པོ་ཞེས་བྱ་བ་ཁོང་དུ་ཆུད་དོ། །ཛ་ཞེས་བྱ་བ་བརྗོད་པ་དང་ཤེས་རབ་ ཀྱི་ཕ་རོལ་ཏུ་ཕྱིན་པའི་སྒོ་འགྲོ་བའི་འཁོར་བ་རྣམ་པར་དག་པ་ལ་འཇུག་པ་ཞེས་བྱ་བ་ཁོང་དུ་ཆུད་དོ། །སྭ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སངས་ རྒྱས་ཐམས་ཅད་དྲན་པས་བརྒྱན་པ་ཞེས་བྱ་བ་ཁོང་དུ་ཆུད་དོ། །དྷ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆོས་ཀྱི་དཀྱིལ་འཁོར་རྣམ་པར་དཔྱོད་པ་རྣམ་པར་ འབྱེད་པ་ཞེས་བྱ་བ་ཁོང་དུ་ཆུད་དོ། །ཤ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སངས་རྒྱས་ཐམས་ཅད་ཀྱི་གདམས་ངག་གི་འཁོར་ལོ་སྣང་བ་ཞེས་བྱ་བ་ཁོང་ དུ་ཆུད་དོ། །ཁ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་མངོན་པར་འདུ་བྱ་བའི་རྒྱུ་དང༌། སའི་ཡེ་ཤེས་ཀྱི་སྙིང་པོ་ཞེས་བྱ་བ་ཁོང་དུ་ཆུད་དོ། །ཀྵ་ཞེས་བྱ་བ་ བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ལས་ཞི་བ་རྒྱ་མཚོའི་མཛོད་རྣམ་པར་འབྱེད་པ་ཞེས་བྱ་བ་ཁོང་དུ་ཆུད་དོ། །སྟ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ ཏུ་ཕྱིན་པའི་སྒོ་ཉོན་མོངས་པ་ཐམས་ཅད་རྣམ་པར་འཐོར་བས་རྣམ་པར་དག་པའི་སྙིང་པོ་ཞེས་བྱ་བ་ཁོང་དུ་ཆུད་དོ། །ཉ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་ སྒོ་འཇིག་རྟེན་འབྱུང་བ་རྣམ་པར་དམིགས་པ་ཞེས་བྱ་བ་ཁོང་དུ་ཆུད་དོ། །ཕ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་འཁོར་བ་དང་མི་མཐུན་པའི་འཁོར་ ལོའི་ཡེ་ཤེས་དཀྱིལ་འཁོར་ཅེས་བྱ་བ་ཁོང་དུ་ཆུད་དོ། །བྷ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་གནས་ཀྱི་དཀྱིལ་འཁོར་ཐམས་ཅད་རྣམ་པར་དམིགས་ ༄༅། །པར་བརྒྱན་པ་ཞེས་བྱ་བ་ཁོང་དུ་ཆུད་དོ། །ཚ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་བསགས་པ་དམ་པའི་ཐབས་ཀྱི་སྤྱོད་པའི་ གདུགས་ཀྱི་དཀྱིལ་འཁོར་ཐ་དད་པ་ཞེས་བྱ་བ་ཁོང་དུ་ཆུད་དོ། །སྨ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སངས་རྒྱས་ཐམས་ཅད་བལྟ་བའི་ཕྱོགས་ལ་མངོན་ དུ་གྱུར་པ་ཞེས་བྱ་བ་ཁོང་དུ་ཆུད་དོ། །ཧྭ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སེམས་ཅན་ཐམས་ཅད་ཀྱི་མདོག་ལ་རྣམ་པར་ལྟ་བའི་སྟོབས་ཤིན་ཏུ་ སྐྱེས་བ་རྒྱ་མཚོའི་སྙིང་པོ་ཞེས་བྱ་བ་ཁོང་དུ་ཆུད་དོ། །ཡས་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཡོན་ཏན་རྒྱ་མཚོ་ཐམས་ཅད་ནན་ཏན་རྟོགས་པར་ འཇུག་པ་ཞེས་བྱ་བ་ཁོང་དུ་ཆུད་དོ། །གྷ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆོས་ཐམས་ཅད་ཀྱི་སྤྲིན་ཡོངས་སུ་འཛིན་པའི་རྒྱ་མཚོ་བརྟན་པ་ཞེས་ བྱ་བ་ཁོང་དུ་ཆུད་དོ། །ཊ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སངས་རྒྱས་ཐམས་ཅད་སྨོན་ལམ་གྱི་ཕྱོགས་སུ་མངོན་པར་འགྲོ་བ་ཞེས་བྱ་བ་ཁོང་ དུ་ཆུད་དོ། །ཎ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཡི་གེ་འཁོར་ལོ་མི་ཟད་པའི་མཐའ་རྣམ་པར་འབྱེད་པ་ཞེས་བྱ་བ་ཁོང་དུ་ཆུད་དོ། །སྤ་ཞེས་ བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་མཐར་ཕྱིན་པའི་དཀྱིལ་འཁོར་ཅེས་བྱ་བ་ཁོང་དུ་ཆུད་དོ། །སྐ་ཞེས་བྱ་ བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སའི་སྙིང་པོ་ཐ་དད་པ་ཡང་དག་པར་ཤེས་པ་ཐོགས་པ་མེད་པའི་སྣང་བས་འཁོར་ལོ་རྒྱས་པར་འགེངས་པ་ཞེས་བྱ་བ་ཁོང་དུ་ ཆུད་དོ༑ ༑ཡམ་ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སངས་རྒྱས་ཐམས་ཅད་ཀྱི་ཆོས་ཤིན་ཏུ་བསྟན་པའི་ཡུལ་ཞེས་བྱ་བ་ཁོང་དུ་ཆུད་དོ། །ཤྩ་ཞེས་བྱ་བ་ བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སེམས་ཅན་གྱི་ནམ་མཁའ་ལས་ཆོས་ཀྱི་སྤྲིན་གྱི་འབྲུག་སྒྲ་བྱུང་བས་རྒྱས་པར་འགེངས་པ་ཞེས་བྱ་བ་ཁོང་དུ་ཆུད་དོ། །ཋ་ ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སེམས་ཅན་གྱི་དོན་བདག་མེད་པའི་དགོས་པ་མཐར་ཕྱིན་པར་ཟིན་པའི་སྒྲོན་མ་ཞེས་བྱ་བ་ཁོང་དུ་ཆུད་དོ། །དྷ་ ཞེས་བྱ་བ་བརྗོད་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆོས་ཀྱི་འཁོར་ལོ་ཐ་མི་དད་པའི་སྙིང་པོ་ཞེས་བྱ་བ་ཁོང་དུ་ཆུད་དོ། །རིགས་ཀྱི་བུ། ཁོ་བོ་དེ་ལྟར་ཡི་གེའི་མ་མོ་ སློབ་པའི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་དེ་དག་ལ་སོགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཚད་མེད་གྲངས་མེད་པ་ཞིག་ཁོང་དུ་ཆུད་དོ། །རིགས་ཀྱི་བུ། དེ་ ༄༅། །ལྟར་ཁོ་བོ་ནི། བྱང་ཆུབ་སེམས་དཔའི་རྣམ་པར་ཐར་པ་བཟོ་མངོན་པར་ཤེས་པ་དང་ལྡན་པ་འདི་ཐོབ་པ་སྟེ། རིགས་ཀྱི་བུ། ཁོ་བོས་དེ་ཤེས་པར་ཟད་ ན༑ ཁོ་བོས་བྱང་ཆུབ་སེམས་དཔའ་འཇིག་རྟེན་དང་འཇིག་རྟེན་ལས་འདས་པའི་བཟོ་གནས་ཐམས་ཅད་ཀྱི་ཕ་རོལ་ཏུ་ཕྱིན་པའི་མཆོག་ཐོབ་པ། བཟོའི་གནས་ཐམས་ཅད་ལ་ འཇུག་པ་དང༌། ཡི་གེ་དང༌། གྲངས་དང༌། རྩིས་དང༌། ཤོད་ཐབས་ཐམས་ཅད་ཁོང་དུ་ཆུད་པར་བྱ་བ་དང༌། སྔགས་དང༌། སྨན་ཐམས་ཅད་ཀྱི་ཚུལ་ལ་མཁས་པ་རབ་ཏུ་ཐོབ་ པར་བྱ་བ་དང༌། འབྱུང་པོ་དང༌། གཟའ་དང༌། སྐར་མ་དང༌། བརྗེད་བྱེད་དང༌། བྱང་སྟེམས་དང༌། རོ་ལངས་ཀྱི་གནོད་པ་ཐམས་ཅད་གསོ་བ་དང༌། སེམས་ཅན་གྱི་ཁམས་ གསོ་བར་བྱ་བའི་སྨན་དང་ཐབས་ཀྱི་རྒྱུས་དང༌། ཁམས་ཀྱི་ཐབས་ཡོངས་སུ་བསྡུ་བའི་ཆོ་ག་དང༌། གསེར་དང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ ཤེལ་དང༌། བྱི་རུ་དང༌། མུ་ཏིག་དམར་པོ་དང༌། མུ་ས་ར་གརྦྷ་དང༌། ཀེ་ས་ར་དང༌། དཔལ་གྱི་སྙིང་པོ་དང༌། རིན་པོ་ཆེ་ཐམས་ཅད་འབྱུང་ཞིང་སྐྱེ་བ་དང༌། རིགས་དང༌། འབྱུང་ ཁུངས་དང༌། རིན་ཐང་གི་རྒྱུས་ཤེས་པར་བྱ་བ་དང༌། བཟའ་ཤིང་གི་ར་བ་དང༌། དཀའ་ཐུབ་ཀྱི་ནགས་ཚལ་དང༌། གྲོང་དང༌། གྲོང་ཁྱེར་དང༌། ལྗོངས་དང༌། ཁམས་དང༌། རྒྱལ་བའི་གནས་མངོན་པར་སྒྲུབ་པ་དང༌། རི་དྭགས་དང༌། འཁོར་ལོ་དང༌། མཚན་མ་བལྟ་བ་དང༌། སེམས་ཅན་གྱི་མཚན་གྱི་ལྟས་དང༌། ས་གཡོ་བ་དང༌། ཕྱོགས་ཚིག་པ་དང༌། སྐར་ མདའ་ལྟུང་བ་དང༌། དགེ་མི་དགེ་དང༌། མུ་གེ་དང༌། ལོ་ལེགས་པ་ལ་སོགས་པ་འཇིག་རྟེན་གྱི་ཐབས་ལག་ཐམས་ཅད་ཀྱི་རྒྱུས་ཁོང་དུ་ཆུད་པར་བྱ་བ་དང༌། འཇིག་རྟེན་ལས་འདས་ པའི་ཆོས་རྣམ་པར་ཕྱེ་བ་ཐམས་ཅད་བརྗོད་ཅིང་བསྟན་པ་དང༌། ཁོང་དུ་ཆུད་པར་བྱ་བ་དང༌། ཡང་དག་པ་ཉིད་རྗེས་སུ་རིག་པར་བྱ་བའི་རྒྱུས་ལ་སྒྲིབ་པའམ། ཐེ་ཚོམ་མམ། ཡིད་ གཉིས་སམ། ནེམ་ནུར་རམ། ཚམ་ཚོམ་མམ། མགོ་རྨོངས་པའམ། འཁོར་བའམ། མི་བདེ་བའམ། སྒྱིད་ལུག་པའམ། མི་ཤེས་པའམ། ཁོང་དུ་མི་ཆུད་པ་མེད་པ་དེ་དག་གི་ སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ། ཡུལ་མ་ག་དྷ་འདི་ཉིད་ཀྱི་ལྗོངས་དག་པ་ཞེས་བྱ་བའི་གྲོང་ཁྱེར་འཚོ་བ་ཞེས་བྱ་བ་ན་དགེ་བསྙེན་མ་བཟང་ མོའི་མཆོག་ཅེས་བྱ་བ་འདུག་གི །དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང༌། ཇི་ལྟར་ནན་ཏན་དུ་བྱ་བ་དྲིས་ཤིག ། དེ་ནས་ཚོང་དཔོན་གྱི་བུ་ནོར་བཟང་གིས་ཚོང་དཔོན་གྱི་བུ་བཟོ་མངོན་པར་ཤེས་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཚོང་དཔོན་གྱི་བུ་བཟོ་མངོན་པར་ཤེས་པ་ ༄༅། །ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ་ཚོང་དཔོན་གྱི་བུ་བཟོ་མངོན་པར་ཤེས་པའི་དྲུང་ནས་ སོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་ལྗོངས་དག་པའི་གྲོང་ཁྱེར་འཚོ་བ་གང་ན་བ་དང༌། དགེ་བསྙེན་མ་བཟང་མོའི་མཆོག་གང་ན་བ་དེར་སོང་སྟེ་ཕྱིན་ནས་དགེ་བསྙེན་ མ་བཟང་མོའི་མཆོག་གི་རྐང་པ་གཉིས་ལ་སྤྱི་བོས་ཕྱག་འཚལ་ནས་དགེ་བསྙེན་མ་བཟང་མོའི་མཆོག་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ་དགེ་ བསྙེན་མ་བཟང་མོའི་མཆོག་གི་མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་མ། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་ མ་ནི༑ བྱང་ཆུབ་སེམས་དཔའ་རྣམས་ལ་གདམས་ངག་དང༌། རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་ དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་འཕགས་མས་བདག་ལ་བསྟན་དུ་གསོལ། དེས་སྨྲས་པ། རིགས་ཀྱི་བུ། ཁོ་མོ་ནི། ཆོས་ཀྱི་རྣམ་ གྲངས་གནས་མེད་པའི་དཀྱིལ་འཁོར་ཅེས་བྱ་བ་ཤེས་ཤིང་སྟོན་པ་སྟེ། ཁོ་མོས་ཐོགས་པ་མེད་པ་ཞེས་བྱ་བའི་ཏིང་ངེ་འཛིན་ཀྱང་ཐོབ་བོ། །ཏིང་ངེ་འཛིན་དེ་ནི། ཆོས་གང་ལ་ཡང་ ཐོགས་པ་མེད་དེ། དེ་ལ་གནས་ན། ཐམས་ཅད་མཁྱེན་པ་ཉིད་དུ་མིག་ཐོགས་པ་མེད་པ་འཇུག་གོ། ཐམས་ཅད་མཁྱེན་པ་ཉིད་དུ་རྣ་བ་ཐོགས་པ་མེད་པ་དང༌། ཐམས་ཅད་ མཁྱེན་པ་ཉིད་དུ་སྣ་ཚོགས་པ་མེད་པ་དང༌། ཐམས་ཅད་མཁྱེན་པ་ཉིད་དུ་ལྕེ་ཐོགས་པ་མེད་པ་དང༌། ཐམས་ཅད་མཁྱེན་པ་ཉིད་དུ་ལུས་ཐོགས་པ་མེད་པ་དང༌། ཐམས་ཅད་མཁྱེན་ པ་ཉིད་དུ་ཡིད་ཐོགས་པ་མེད་པ་ཡང་རབ་ཏུ་འཇུག་གོ། ཐམས་ཅད་མཁྱེན་པ་ཉིད་ཀྱི་རླབས་ཐོགས་པ་མེད་པ་དང༌། ཐམས་ཅད་མཁྱེན་པ་ཉིད་དུ་སྣང་བ་ཐོགས་པ་མེད་པ་དང༌། ཐམས་ཅད་མཁྱེན་པ་ཉིད་དུ་ཤུགས་ཐོགས་པ་མེད་པ་འགྲོ་བ་རབ་ཏུ་སྣང་བའི་དཀྱིལ་འཁོར་དག་ཀྱང་རབ་ཏུ་འཇུག་གོ །རིགས་ཀྱི་བུ། ཁོ་མོ་ནི། ཆོས་ཀྱི་རྣམ་གྲངས་གནས་ མེད་པའི་དཀྱིལ་འཁོར་འདི་ཤེས་ཤིང་ཁོང་དུ་ཆུད་པར་ཟད་ན། ཁོ་མོས་བྱང་ཆུབ་སེམས་དཔའི་སྤྱོད་པ་ཆགས་པ་མེད་པ་རིལ་གྱིས་ཤེས་པར་ནུས་རེ་སྐན། སོང་རིགས་ཀྱི་ བུ༑ ལྷོ་ཕྱོགས་ཀྱི་རྒྱུད་ན་ཁྲོང་ཁྱེར་རྒྱས་པའི་འགྲམ་ཞེས་བྱ་བ་ཡོད་དོ། དེ་ན་གསར་ཚོང་གཅེས་པ་གཏོང་བ་ཞེས་བྱ་བ་འདུག་གི །དེའི་གན་དུ་སོང་ལ་ཇི་ལྟར་བྱང་ཆུབ་སེམས་ ༄༅། །དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང༌། ཇི་ལྟར་ནན་ཏན་དུ་བྱ་བ་དྲིས་ཤིག། དེ་ནས་ཚོང་དཔོན་གྱི་བུ་ནོར་བཟང་གིས་དགེ་ བསྙེན་མ་བཟང་མོའི་མཆོག་གི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་བསྙེན་མ་བཟང་མོའི་མཆོག་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ ཡང་དང་ཡང་བལྟས་ཏེ་དགེ་བསྙེན་མ་བཟང་མོའི་མཆོག་གི་དྲུང་ནས་སོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་མཐར་གྱིས་ལྷོ་ཕྱོགས་ཀྱི་རྒྱུད་དུ་སོང་སྟེ། གྲོང་ཁྱེར་རྒྱས་ པའི་འགྲམ་དུ་གསེར་ཚོང་གཅེས་པ་གཏོང་བ་གང་ན་བ་དེར་ཕྱིན་ཏེ། གསེར་ཚོང་གཅེས་པ་གཏོང་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་མདུན་དུ་འདུག་ནས་ཐལ་ མོ་སྤྱར་ཏེ་འདི་སྐད་ཅེས་སྨྲས་སོ། །འཕགས་པ། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་ བྱང་ཆུབ་སེམས་དཔའི་སྤྱད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི། བྱང་ཆུབ་སེམས་དཔའ་རྣམས་ལ་གདམས་ ངག་དང༌། རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ ལྟར་ནན་ཏན་དུ་བགྱི་བ་འཕགས་པས་བདག་ལ་བཀའ་སྩལ་དུ་གསོལ། དེས་སྨྲས་པ། རིགས་ཀྱི་བུ། ཁོ་བོ་ནི། བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་པ་ མེད་ལ་རྣམ་པར་དག་པས་རྣམ་པར་བརྒྱན་པ་ཞེས་བྱ་བ་ཤེས་ཏེ། ཁོ་བོ་ནི། ཕྱོགས་བཅུའི་དེ་བཞིན་གཤེགས་པ་རྣམས་ཀྱི་ཞབས་ཀྱི་དྲུང་དུ་ཆོས་ཡོངས་སུ་ཚོལ་བ་རྒྱུན་མི་ གཅོད་པའོ། །རིགས་ཀྱི་བུ། ཁོ་བོས་བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་པ་མེད་ལ་རྣམ་པར་དག་པས་རྣམ་པར་བརྒྱན་པ་འདི་ཤེས་པར་ཟད་ན། ཁོ་བོས་ བྱང་ཆུབ་སེམས་དཔའ་བག་ཚ་བ་མེད་པར་སེངྒེའི་ང་རོ་སྒྲོག་པ། བསོད་ནམས་དང་ཡེ་ཤེས་ཆེན་པོ་ལ་གནས་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་ སྐན༑ སོང་རིགས་ཀྱི་བུ། རྒྱས་པའི་འགྲམ་གྱི་གྲོང་ཁྱེར་འདི་ཉིད་ན་ཁྱིམ་བདག་ཟླ་བ་བཟང་པོ་ཞེས་བྱ་བ། རྟག་ཏུ་ཁྱིམ་སྣང་བར་གྱུར་པ་དང་ལྡན་པ་ཞིག་འདུག་གི། དེའི་ གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང༌། ཇི་ལྟར་ནན་ཏན་དུ་བྱ་བ་དྲིས་ཤིག། དེ་ནས་ཚོང་དཔོན་གྱི་བུ་ནོར་ བཟང་གིས་གསེར་ཚོང་གཅེས་པ་གཏོང་གི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། གསེར་ཚོང་གཅེས་པ་གཏོང་བ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་ ༄༅། །བྱས་ནས་ཡང་དང་ཡང་བལྟས་ཏེ་གསེར་ཚོང་གཅེས་པ་གཏོང་བའི་དྲུང་ནས་སོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་ཁྱིམ་བདག་ཟླ་བ་བཟང་པོ་གང་ན་ བ་དེར་སོང་སྟེ། ཁྱིམ་བདག་ཟླ་བ་བཟང་པོའི་རྐང་པ་གཉིས་ལ་སྤྱི་བོས་ཕྱག་འཚལ་ནས་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ། བདག་ གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི། བྱང་ཆུབ་སེམས་དཔའ་རྣམས་ལ་གདམས་ངག་དང༌། རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། ཇི་ ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་འཕགས་པས་བདག་ལ་བསྟན་དུ་གསོལ། སྨྲས་པ། རིགས་ཀྱི་བུ། ཁོ་བོས་ནི། རྣམ་པར་ཐར་པ་ཡེ་ཤེས་དྲི་མ་མེད་པའི་འོད་ཅེས་བྱ་བ་ཐོབ་སྟེ། རིགས་ཀྱི་བུ། ཁོ་བོས་བྱང་ཆུབ་སེམས་དཔའི་རྣམ་པར་ཐར་པ་ཡེ་ཤེས་དྲི་མ་མེད་ པའི་འོད་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་རྣམ་པར་ཐར་པ་ཚད་མེད་པ་ཐོབ་པ་རྣམས་ཀྱི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ། ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་རི་དྭགས་གནས་ཞེས་བྱ་བ་ཡོད་དེ། དེ་ན་ཁྱིམ་བདག་མི་ཕམ་སྡེ་ཞེས་བྱ་བ་འདུག་གི། དེའི་གན་དུ་སོང་ལ་ཇི་ལྟར་བྱང་ ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང༌། ཇི་ལྟར་ནན་ཏན་དུ་བྱ་བ་དྲིས་ཤིག། དེ་ནས་ཚོང་དཔོན་གྱི་བུ་ནོར་བཟང་གིས་ཁྱིམ་བདག་ཟླ་བ་ བཟང་པོའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་ཁྱིམ་བདག་ཟླ་བ་བཟང་པོ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ་ཁྱིམ་ བདག་ཟླ་བ་བཟང་པོའི་དྲུང་ནས་སོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་མཐར་གྱིས་གྲོང་ཁྱེར་རི་དྭགས་ཀྱི་གནས་གང་ན་བ་དེར་སོང་སྟེ། ཁྱིམ་བདག་མི་ཕམ་སྡེ་གང་ན་ བ་དེར་ཕྱིན་ནས་ཁྱིམ་བདག་མི་ཕམ་སྡེའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་པ། བདག་གིས་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ ནན་ཏན་དུ་བགྱི་བ་མ་འཚལ་ཏེ། འཕགས་པ་ནི། བྱང་ཆུབ་སེམས་དཔའ་རྣམས་ལ་གདམས་ངག་དང༌། རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། ཇི་ ༄༅། །ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་བདག་ལ་བཀའ་སྩལ་དུ་ གསོལ༑ སྨྲས་པ། རིགས་ཀྱི་བུ། ཁོ་བོས་ནི། བྱང་ཆུབ་སེམས་དཔའི་རྣམ་པར་ཐར་པ་མི་ཟད་པའི་མཚན་ཉིད་ཅེས་བྱ་བ་ཐོབ་སྟེ། དེ་ཐོབ་པས་ནི། སངས་རྒྱས་མི་ཟད་པ་ མཐོང་བའི་གཏེར་རབ་ཏུ་ཐོབ་པར་འགྱུར་རོ། །སོང་རིགས་ཀྱི་བུ། ལྷོ་ཕྱོགས་ཀྱི་རྒྱུད་འདི་ཉིད་ཀྱི་ཆོས་ཀྱི་ཡུལ་གྲུ་ན་བྲམ་ཟེ་ཞི་འཛིན་མཆོག་ཅེས་བྱ་བ་འདུག་གི །དེའི་ གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང༌། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ ནོར་བཟང་གིས་ཁྱིམ་བདག་མི་ཕམ་སྡེའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཁྱིམ་བདག་མི་ཕམ་སྡེ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ ནས་ཡང་དང་ཡང་བལྟས་ཏེ་ཁྱིམ་བདག་མི་ཕམ་སྡེའི་དྲུང་ནས་སོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་མཐར་གྱིས་ཆོས་ཀྱི་ཡུལ་གྲུར་སོང་ནས་བྲམ་ཟེ་ཞི་འཛིན་ མཆོག་གང་ན་བ་དེར་ཕྱིན་ཏེ། བྲམ་ཟེ་ཞི་འཛིན་མཆོག་གི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། ། འཕགས་པ། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་ བ་དང༌། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི། བྱང་ཆུབ་སེམས་དཔའ་རྣམས་ལ་གདམས་ངག་དང༌། རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ ན༑ ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་འཕགས་པས་བདག་ལ་བཀའ་སྩལ་དུ་གསོལ། དེས་སྨྲས་པ། རིགས་ཀྱི་བུ། ཁོ་བོ་ནི། བདེན་པའི་བྱིན་གྱི་རླབས་ཀྱིས་སྤྱོད་པ་སྟེ། བདེན་པའི་ཚིག་གང་གིས་དུས་གསུམ་དུ་བྱང་ཆུབ་སེམས་དཔའ་གང་ཡང་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག །ལྡོག་པར་མི་འགྱུར་ཞེ་ན། བདེན་པའི་ཚིག་གི་བྱིན་གྱི་རླབས་དེས་བདག་གི་དགོས་པ་འདི་དང་འདི་ཞིག་གྲུབ་པར་ཤོག་ ཅིག །ཅེས་བྱས་ན་ཡང་དེས་ཁོ་བོའི་བསམ་པ་ཐམས་ཅད་དེ་བཞིན་དུ་འགྲུབ་བོ། །རིགས་ཀྱི་བུ། ཁོ་བོ་ནི། བདེན་པའི་བྱིན་གྱི་རླབས་དེ་ལྟ་བུས་དགོས་པ་ཐམས་ཅད་སྒྲུབ་ སྟེ༑ རིགས་ཀྱི་བུ། ཁོ་བོས་བདེན་པའི་བྱིན་གྱི་རླབས་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་བདེན་པའི་རྗེས་སུ་འབྲང་བའི་ཚིག་རབ་ཏུ་ཐོབ་པ་རྣམས་ཀྱི་ ༄༅། །སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ། ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་ཡིད་བཟང་པོའི་སྒོ་ཞེས་བྱ་བ་ཡོད་ དེ༑ དེ་ན་ཁྱེའུ་དཔལ་འབྱུང་བ་ཞེས་བྱ་བ་དང༌། བུ་མོ་དཔལ་གྱི་བློ་གྲོས་མ་ཞེས་བྱ་བ་གཉིས་ཤིག་འཁོད་ཀྱི། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་ སེམས་དཔའི་སྤྱོད་པ་ལ་བསླབ་པར་བྱ་བ་དང༌། ཇི་ལྟར་ནན་ཏན་དུ་བྱ་བ་དྲིས་ཤིག། དེ་ནས་ཚོང་དཔོན་གྱི་བུ་ནོར་བཟང་གིས་ཆོས་ཀྱི་རིམ་གྲོ་ཆེར་བསྐྱེད་དེ་བྲམ་ཟེ་ཞི་ འཛིན་མཆོག་གི་རྐང་པ་གཉིས་ལ་སྤྱི་བོས་ཕྱག་བྱས་ནས་བྲམ་ཟེ་ཞི་འཛིན་མཆོག་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ་ཡང་དང་ཡང་བལྟས་ནས་ བྲམ་ཟེ་གཞི་འཛིན་མཆོག་གི་དྲུང་ནས་སོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་མཐར་གྱིས་གྲོང་ཁྱེར་ཡིད་བཟང་པོའི་སྒོར་སོང་སྟེ། ཁྱེའུ་དཔལ་འབྱུང་བ་དང༌། བུ་མོ་དཔལ་གྱི་བློ་གྲོས་མ་གང་ན་བ་དེར་སོང་ནས་དེ་གཉིས་ཀྱི་རྐང་པ་ལ་སྤྱི་བོས་ཕྱག་འཚལ་ཏེ་མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་ པ༑ བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་ བགྱི་བ་དང༌། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་དག་ནི། བྱང་ཆུབ་སེམས་དཔའ་རྣམས་ལ་གདམས་ངག་དང༌། རྗེས་སུ་བསྟན་པ་མཛད་དོ། །ཞེས་བདག་ གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་འཕགས་པ་དག་གིས་བདག་ལ་བཀའ་སྩལ་ དུ་གསོལ། དེ་ནས་ཁྱེའུ་དཔལ་འབྱུང་བ་དང༌། བུ་མོ་དཔལ་གྱི་བློ་གྲོས་མས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ། བདག་ཅག་གཉིས་ཀྱིས་ནི། བྱང་ཆུབ་སེམས་དཔའི་རྣམ་པར་ཐར་པ་སྒྱུ་མའི་རྣམ་པ་ཞེས་བྱ་བ་ཐོབ་སྟེ། མངོན་དུ་བྱས་སོ། །རིགས་ཀྱི་བུ། དེ་ལྟར་ཁོ་བོ་ཅག་རྣམ་པར་ཐར་པ་འདི་དང་ལྡན་པས་འཇིག་རྟེན་ ཐམས་ཅད་སྒྱུ་མའི་རྣམ་པར་རྒྱུ་རྐྱེན་སྒྱུ་མ་ལས་བྱུང་བར་མཐོང་ངོ༌། །ལས་དང་ཉོན་མོངས་པ་སྒྱུ་མར་ཤེས་པས་སེམས་ཅན་ཐམས་ཅད་ཀྱང་སྒྱུ་མའི་རྣམ་པར་ཤེས་སོ། །མ་རིག་ པ་དང༌། སྲིད་པ་དང༌། སྲེད་པའི་རྒྱུ་ལས་བྱུང་བས་འགྲོ་བ་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ༌། །ཕན་ཚུན་གྱི་རྐྱེན་གྱི་རྒྱུ་ལས་བྱུང་བས་ཆོས་ཐམས་ཅད་ཀྱང་སྒྱུ་མའི་རྣམ་ པར་མཐོང་ངོ༌། །ཕྱིན་ཅི་ལོག་གི་རྒྱུ་ལས་བྱུང་བས་ཁམས་གསུམ་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ༌། །ཡང་དག་པ་མ་ཡིན་པའི་རྟོག་པའི་རྒྱུས་བསྐྱེད་པས་སེམས་ ༄༅། །ཅན་ཐམས་ཅད་ཀྱི་འཆི་འཕོ་དང༌། འབྱུང་བ་དང༌། སྐྱེ་བ་དང༌། རྒ་ཤི་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང་ འཁྲུག་པ་རྣམས་ཀྱང་སྒྱུ་མའི་རྣམ་པར་མཐོང་ངོ༌། །འདུ་ཤེས་དང༌། སེམས་དང༌། ལྟ་བ་ཕྱིན་ཅི་ལོག་གི་རྒྱུ་ལས་དངོས་པོ་མེད་པའི་འདུ་ཤེས་ཀྱིས་རྨོངས་ཏེ་བྱུང་བས་ཞིང་ ཐམས་ཅད་ཀྱང་སྒྱུ་མའི་རྣམ་པར་མཐོང་ངོ༌། །ཡེ་ཤེས་ཀྱི་སྤོང་བའི་རྒྱུ་ལ་བརྟགས་ཏེ་བསྐྱེད་པས་ཉན་ཐོས་དང༌། རང་སངས་རྒྱས་ཐམས་ཅད་ཀྱང་སྒྱུ་མའི་རྣམ་པར་ མཐོང་ངོ༌། །སྒྱུ་མར་མངོན་པར་བསྒྲུབས་པ་ལས་གྲུབ་སྟེ། སྤྲུལ་པའི་སྤྱོད་པ་དང༌། འདུལ་བ་སྒྱུ་མའི་རང་བཞིན་པས་བྱང་ཆུབ་སེམས་དཔའི་སྤྱོད་པ་དང༌། སྨོན་ལམ་ གྱིས་ཡོངས་སུ་སྨིན་པར་བྱ་བ་དང༌། གདུལ་བ་གཅིག་ནས་གཅིག་ཏུ་བརྒྱུད་པ་ཡང་སྒྱུ་མའི་རྣམ་པ་ལྟ་བུར་ཤེས་སོ། །སྨོན་ལམ་དང༌། ཡེ་ཤེས་སྒྱུ་མས་མངོན་པར་བསྒྲུབས་ ཏེ༑ ཡུལ་བསམ་གྱིས་མི་ཁྱབ་པ་བསྒྱུ་མའི་རང་བཞིན་ཡིན་པས་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ཀྱི་དཀྱིལ་འཁོར་ཀྱང་སྒྱུ་མར་མཐོང་ངོ༌། །རིགས་ཀྱི་ བུ༑ བདག་ཅག་གཉིས་ཀྱིས་ནི། བྱང་ཆུབ་སེམས་དཔའི་རྣམ་པར་ཐར་པ་སྒྱུ་མའི་རང་བཞིན་འདི་ཤེས་པར་ཟད་ན། ཁོ་བོ་ཅག་གིས་བྱང་ཆུབ་སེམས་དཔའ་ལས་སྒྱུ་ མ་མཐའ་ཡས་པས་རྣམ་པར་སྒྲུབ་པའི་དྲ་བ་ཁོང་དུ་ཆུད་པ་རྣམས་ཀྱི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། དེ་ནས་ཁྱེའུ་དཔལ་འབྱུང་པ་དང༌། བུ་མོ་དཔལ་གྱི་བློ་ གྲོས་མས་ཚོང་དཔོན་གྱི་བུ་ནོར་བཟང་དགེ་བའི་རྩ་བའི་ཤུགས་དྲག་པོ་བསམ་གྱིས་མི་ཁྱབ་པས་མངོན་པར་བརླན་ནས་རང་གི་རྣམ་པར་ཐར་པའི་ཡུལ་བསྟན་ཏེ་འདི་སྐད་ཅེས་ སྨྲས་སོ༑ ༑སོང་རིགས་ཀྱི་བུ། ལྷོ་ཕྱོགས་ཀྱི་རྒྱུད་འདི་ཉིད་ཀྱི་ཕྱོགས་ཀྱི་སྒོའི་གནས་རྒྱ་མཚོའི་འགྲམ་ཞེས་བྱ་བ་དེ་ན་བཟའ་ཤིང་གི་ར་བ་རྒྱ་ཆེན་པོ་ཞེས་བྱ་བ་ཡོད་དེ་དེའི་ ནང་ན་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་ཞེས་བྱ་བ། བྱང་ཆུབ་སེམས་དཔའི་དགེ་བའི་རྩ་བ་རྣམ་པར་སྨིན་པ་ལས་མངོན་ པར་གྲུབ་པ། བྱང་ཆུབ་སེམས་དཔའི་སེམས་དང་ཡིད་ལ་བྱ་བ་ལས་བྱུང་བ། བྱང་ཆུབ་སེམས་དཔའི་སྨོན་ལམ་ལས་མངོན་པར་སྐྱེས་པ། བྱང་ཆུབ་སེམས་དཔའི་དབང་ལས་ བྱུང་བ༑ བྱང་ཆུབ་སེམས་དཔའི་མངོན་པར་ཤེས་པའི་ཡེ་ཤེས་ཀྱི་སྟོབས་ཀྱིས་སྤྲུལ་པ། བྱང་ཆུབ་སེམས་དཔའི་ཐབས་མཁས་པ་ལས་བྱུང་བ། བྱང་ཆུབ་སེམས་དཔའི་ བསོད་ནམས་དང་ཡེ་ཤེས་ཀྱི་སྟོབས་ཀྱིས་རྫོགས་པ། བྱང་ཆུབ་སེམས་དཔའི་སྙིང་རྗེ་ཆེན་པོས་སེམས་ཅན་རྣམ་པར་གདུལ་བའི་དོན་དུ་བསྟན་པ། བྱང་ཆུབ་སེམས་ ༄༅། །དཔའི་བྱིན་གྱི་རླབས་རྣམ་པར་ཕྱེ་བས་བསྒྲུ་བས་པ། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་གནས་ལ་འཇུག་པའི་རྒྱན་ གྱིས་བརྒྱན་པ་ཡོད་དེ། དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཞེས་བྱ་བ། སྐྱེ་བའི་ས་ལ་གནས་པའི་མི་རྣམས་རྗེས་སུ་གཟུང་བ་དང༌། ཕ་དང༌། མ་དང༌། གཉེན་དུ་གྱུར་པ་རྣམས་ཡོངས་སུ་སྨིན་པར་བྱ་བ་དང༌། དེར་སྐྱེས་པའི་བྱང་ཆུབ་སེམས་དཔའ་སྐལ་པ་མཉམ་པ་རྣམས་ཀྱི་ཐེག་པ་ཆེན་པོ་རབ་ཏུ་བསྟན་པར་ བྱ་བ་དང༌། དེ་མ་ཡིན་པའི་སེམས་ཅན་གཞན་རྣམས་ཀྱང་གར་འོས་པའི་སར་དགེ་བའི་རྩ་བས་ཡོངས་སུ་སྨིན་པར་བྱ་བ་དང༌། རང་གི་རྣམ་པར་ཐར་པའི་ཚུལ་ལ་འཇུག་ པར་བྱ་བ་ཡོངས་སུ་བསྟན་པ་དང༌། བྱང་ཆུབ་སེམས་དཔའི་སྐྱེ་བ་ལ་དབང་སྒྱུར་བ་ཐམས་ཅད་ཀྱི་རྗེས་སུ་སོང་བ་རབ་ཏུ་བརྗོད་པ་དང༌། སེམས་ཅན་ཐམས་ཅད་ཀྱི་སྐྱེ་བ་ ཡོངས་སུ་བསྟན་པ་ལ་མངོན་པར་གཞོལ་བར་བྱ་བས་སེམས་ཅན་ཡོངས་སུ་སྨིན་པར་བྱ་བ་མི་གཏང་བ་དང༌། འགྲོ་བ་ཐམས་ཅད་ཡོངས་སུ་གཟུང་བ་མི་སྨད་པས་བྱང་ ཆུབ་སེམས་དཔའི་སྙིང་རྗེ་ཆེན་པོའི་སྟོབས་བསྟན་པར་བྱ་བ་དང༌། བྱང་ཆུབ་སེམས་དཔའི་གནས་གཞི་རྟེན་ཐམས་ཅད་ལས་གྱེན་དུ་འཕགས་པ་ཁོང་དུ་ཆུད་པར་བྱ་ བ་དང༌། གནས་མེད་པ་ལ་གཞོལ་བར་སྲིད་པར་སྐྱེ་བ་ཐམས་ཅད་ན་གནས་པ་ཡོངས་སུ་བསྟན་པའི་དོན་དུ་འདུག་གི། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ ཆུབ་སེམས་དཔའི་སྤྱོད་པ་ཡོངས་སུ་དྲི་བ་དང༌། ཇི་ལྟར་བྱང་ཆུབ་སེམས་དཔའི་ལམ་ཡོངས་སུ་དག་པར་བྱ་བ་དང༌། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་བསླབ་ པ་ལ་ནན་ཏན་དུ་བྱ་བ་དང༌། ཇི་ལྟར་བྱང་ཆུབ་སེམས་དཔས་བྱང་ཆུབ་ཀྱི་སེམས་ཡོངས་སུ་སྦྱང་བར་བྱ་བ་དང༌། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྨོན་ལམ་ མངོན་པར་བསྒྲུབ་པར་བྱ་བ་དང༌། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ཚོགས་ཡོངས་སུ་གསོག་པར་བྱ་བ་དང༌། ཇི་ལྟར་བྱང་ཆུབ་སེམས་དཔས་བྱང་ཆུབ་ སེམས་དཔའི་ས་ཡོངས་སུ་གནོན་པར་བྱ་བ་དང༌། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བ་དང༌། ཇི་ལྟར་བྱང་ཆུབ་ སེམས་དཔས་བྱང་ཆུབ་སེམས་དཔའི་བཟོད་པ་ལ་འཇུག་པར་བྱ་བ་དང༌། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ནན་ཏན་གྱི་ཡོན་ཏན་ལ་གནས་པར་བྱ་བ་ དང༌། ཇི་ལྟར་བྱང་ཆུབ་སེམས་དཔས་དགེ་བའི་བཤེས་གཉེན་བསྙེན་བཀུར་བར་བྱ་བ་དྲིས་ཤིག། དེ་ཅིའི་ཕྱིར་ཞེ་ན། རིགས་ཀྱི་བུ། བྱང་ཆུབ་སེམས་དཔའ་བྱམས་པ་ ༄༅། །ཞེས་བྱ་བ་དེ་ནི། བྱང་ཆུབ་སེམས་དཔའི་སྤྱོད་པ་ཐམས་ཅད་ལ་ཞུགས་པའོ། །དེ་ནི། སེམས་ཅན་ཐམས་ཅད་ཀྱི་སེམས་དང༌། བསམ་པ་རྟོགས་ པར་ཁོང་དུ་ཆུད་པའོ། །དེ་ནི། སེམས་ཅན་ཐམས་ཅད་ཀྱི་སྤྱོད་པའི་རྗེས་སུ་ཞུགས་པའོ། །དེ་ནི། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་ལ་མངོན་ དུ་གྱུར་པའོ། །དེས་ནི། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པར་བྱས་པའོ། །དེ་ནི། བྱང་ཆུབ་སེམས་དཔའི་ས་ཐམས་ཅད་ལ་རབ་ཏུ་གནས་པའོ། །དེས་ནི། བྱང་ཆུབ་སེམས་དཔའི་བཟོད་པ་ཐམས་ཅད་རབ་ཏུ་ཐོབ་པའོ། །དེ་ནི། བྱང་ཆུབ་སེམས་དཔའི་སྐྱོན་མེད་པར་ཞུགས་པའོ། །དེས་ནི། ལུང་བསྟན་པ་ཐམས་ཅད་ཡང་ དག་པར་བླངས་པའོ། །དེ་ནི། བྱང་ཆུབ་སེམས་དཔའི་རྣམ་པར་ཐར་པ་ཐམས་ཅད་ལ་རྣམ་པར་རྩེ་བའོ། །དེས་ནི། སངས་རྒྱས་ཀྱི་བྱིན་གྱི་རླབས་ཐམས་ཅད་ཡོངས་སུ་ བླངས་པའོ། །དེ་ནི། དེ་བཞིན་གཤེགས་པ་ཐམས་ཅད་ཀྱིས་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལ་དབང་བསྐུར་བས་མངོན་པར་དབང་བསྐུར་བའོ། །རིགས་ ཀྱི་བུ༑ དགེ་བའི་བཤེས་གཉེན་དེ་ཁྱོད་ལ་དགེ་བའི་རྩ་བ་ཐམས་ཅད་ཀྱིས་ནི། མངོན་པར་བརླན་པར་བྱེད་དོ། །བྱང་ཆུབ་ཏུ་སེམས་བསྐྱེད་པ་ནི། རྣམ་པར་འཕེལ་ བར་བྱེད་དོ། །ལྷག་པའི་བསམ་པའི་དབྱིངས་ནི། རབ་ཏུ་སྟོན་པར་བྱེད་དོ། །དགེ་བའི་རྩ་བ་ཐམས་ཅད་ནི། ཤིན་ཏུ་བྱང་བར་བྱེད་དོ། །བྱང་ཆུབ་སེམས་དཔའི་དབང་པོའི་ཤུགས་ ནི༑ ཡང་དག་པར་འཕེལ་བར་བྱེད་དོ། །ཆོས་ཀྱི་ཕྱོགས་བསྒྲིབས་པ་མེད་པ་ནི། ཡོངས་སུ་སྟོན་པར་བྱེད་དོ། །གཞི་ཀུན་ཏུ་ཟུག་པའི་ས་ཁོང་དུ་ཆུད་པར་བྱ་བ་ནི། རྟོགས་པར་ བྱེད་དེ༑ ༑བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱི་སར་འབྱུང་བའི་སྒོ་ལ་ནི། གཞོག་པར་བྱེད་དོ། །བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་དང༌། སྨོན་ལམ་ གྱི་ཡོན་ཏན་ཡོངས་སུ་འགྲུབ་པ་ནི། ཡང་དག་པར་བརྗོད་པར་འགྱུར་རོ། །བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ཐོས་པར་བྱ་བ་སྐྱེ་བའི་སྒོ་ནི། ཡོངས་སུ་སྟོན་པར་འགྱུར་ གྱི༑ རིགས་ཀྱི་བུ། ཁྱོད་དག་བའི་རྩ་བ་གཅིག་ལ་ཆགས་པར་མ་བྱེད་ཅིག། ཆོས་ཀྱི་སྒོའི་འོད་སྣང་བ་གཅིག་ལ་གཞོལ་བར་མ་བྱེད་ཅིག། སྤྱོད་པ་གཅིག་ཡོངས་སུ་རྫོགས་ པས་ཆོག་པར་མ་སེམས་ཤིག། སྨོན་ལམ་གཅིག་པུ་མངོན་པར་སྒྲུབ་པ་ལྷུར་མ་ལེན་ཅིག། ལུང་བསྟན་པ་གཅིག་གི་མཐར་ཐུག་པས་རྒྱུན་གཅད་པར་མ་བྱེད་ཅིག །བཟོད་ པ་གསུམ་ལ་འཇུག་པས་ཆོག་པར་བྱ་བའི་འདུ་ཤེས་སུ་མ་བྱེད་ཅིག། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱ་བ་རྒྱུན་མ་གཅོད་ཅིག། ས་བཅུ་ཐོབ་པས་མཐར་ཐུག་ ༄༅། །པར་མ་བྱེད་ཅིག །སངས་རྒྱས་ཀྱི་ཞིང་ཚད་ཡོད་པ་ཡོངས་སུ་གཟུང་བ་དང༌། ཡོངས་སུ་དག་པར་བྱ་བ་མ་སྨོན་ཅིག །དགེ་བའི་བཤེས་གཉེན་ ཚད་ཡོད་པ་དགའ་བར་བྱ་བ་དང༌། བསྙེན་བཀུར་བས་ངོམས་པར་མ་བྱེད་ཅིག །དེ་ཅིའི་ཕྱིར་ཞེ་ན། རིགས་ཀྱི་བུ། བྱང་ཆུབ་སེམས་དཔས་ནི། དགེ་བའི་རྩ་བ་ཚད་མེད་པ་ ཡོངས་སུ་བསྡུ་བར་བྱ་དགོས་སོ། །བྱང་ཆུབ་སེམས་དཔའི་ཚོགས་ཚད་མེད་པ་ཤིན་ཏུ་བསྒྲུབ་དགོས་སོ། །བྱང་ཆུབ་སེམས་དཔའི་སེམས་ཀྱི་རྒྱུ་ཚད་མེད་པ་ཡོངས་སུ་གསག་ དགོས་སོ། །ཡོངས་སུ་བསྔོ་བའི་ཚུལ་ཚད་མེད་པ་བསླབ་པར་བྱ་བ་དགོས་སོ། །སེམས་ཅན་གྱི་ཁམས་ཚད་མེད་པ་ཡོངས་སུ་སྨིན་པར་བྱ་དགོས་སོ། །སེམས་ཅན་གྱི་བསམ་ པའི་ཁམས་ཚད་མེད་པ་ལ་འཇུག་པར་བྱ་དགོས་སོ། །སེམས་ཅན་གྱི་དབང་པོ་ཚད་མེད་པ་ཡོངས་སུ་ཤེས་པར་བྱ་དགོས་སོ། །སེམས་ཅན་གྱི་མོས་པ་ཚད་མེད་པའི་ རྗེས་སུ་འབྲང་བར་བྱ་དགོས་སོ། །སེམས་ཅན་གྱི་སྤྱོད་པ་ཚད་མེད་པ་ཁོང་དུ་ཆུད་པར་བྱ་དགོས་སོ། །སེམས་ཅན་ཚད་མེད་པ་གདུལ་བར་བྱ་དགོས་སོ། །ཉོན་མོངས་པ་ དང་བག་ལ་ཉལ་བ་ཚད་མེད་པ་ཡང་དག་པར་གཞོམ་དགོས་སོ། །ལས་ཀྱི་སྒྲིབ་པ་ཚད་མེད་པ་ཡོངས་སུ་སྦྱང་དགོས་སོ། །ལྟ་བའི་རྣམ་པ་ཚད་མེད་པ་རྣམ་པར་བཟློག་ དགོས་སོ། །སེམས་ཅན་གྱི་ཀུན་ནས་ཉོན་མོངས་པ་ཚད་མེད་པ་གསལ་བར་བྱ་དགོས་སོ། །སེམས་རྣམ་པར་དག་པ་ཚད་མེད་པ་བསྐྱེད་པར་བྱ་དགོས་སོ། །སྡུག་བསྔལ་གྱི་ཟུག་ རྡུ་ཚད་མེད་པ་ཡང་དག་པར་དབྱུང་དགོས་སོ། །སྲེད་པའི་རྒྱ་མཚོ་ཚད་མེད་པ་ཡོངས་སུ་བསྐམ་པར་བྱ་དགོས་སོ། །མ་རིག་པའི་མུན་པ་ཚད་མེད་པ་རྣམ་པར་བསལ་དགོས་སོ།། ང་རྒྱལ་གྱི་རི་ཚད་མེད་པ་རབ་ཏུ་བསྙིལ་དགོས་སོ། །འཁོར་བའི་བཅིངས་པ་ཚད་མེད་པ་ཤིན་ཏུ་གཏུབ་དགོས་སོ། །སྲིད་པའི་ཆུ་བོ་ཚད་མེད་པ་བརྒལ་དགོས་སོ། །ཚེའི་རྒྱ་མཚོ་ ཚད་མེད་པ་བསྐམ་དགོས་སོ། །སེམས་ཅན་འདོད་པའི་འདམ་དུ་ཐོགས་པ་ཚད་མེད་པ་ཡོངས་སུ་དགྲོལ་དགོས་སོ། །སེམས་ཅན་ཁམས་གསུམ་གྱི་ཁྱིམ་དུ་ཐོགས་པ་ཚད་ མེད་པ་གདོན་པར་བྱ་དགོས་སོ། །སེམས་ཅན་ཚད་མེད་པ་འཕགས་པའི་ལམ་ལ་དགོད་དགོས་སོ། །འདོད་ཆགས་དང༌། ཞེ་སྡང་དང༌། གཏི་མུག་གི་སྤྱོད་པ་ཚད་མེད་ པ་རབ་ཏུ་ཞི་བར་བྱ་དགོས་སོ། །བདུད་ཀྱི་ཞགས་པ་ཚད་མེད་པ་ལས་ཡང་དག་པར་འདས་པར་བྱ་དགོས་སོ། །བདུད་ཀྱི་ལས་ཚད་མེད་པ་རྣམ་པར་བཟློག་དགོས་སོ། །བྱང་ ཆུབ་སེམས་དཔའི་ལྷག་པའི་བསམ་པའི་ཁམས་ཚད་མེད་པ་ཡོངས་སུ་སྦྱང་དགོས་སོ། །བྱང་ཆུབ་སེམས་དཔའི་སྦྱོར་བ་ཚད་མེད་པ་རྣམ་པར་འཕེལ་བར་བྱ་དགོས་སོ། ། ༄༅། །བྱང་ཆུབ་སེམས་དཔའི་དབང་པོ་ཚད་མེད་པ་ཡོངས་སུ་བསྐྱེད་དགོས་སོ། །བྱང་ཆུབ་སེམས་དཔའི་མོས་པ་ཚད་མེད་པ་ཡོངས་སུ་སྦྱང་དགོས་སོ། ། བྱང་ཆུབ་སེམས་དཔའི་མཉམ་པ་ཉིད་ཚད་མེད་པ་ལ་འཇུག་པར་བྱ་དགོས་སོ། །བྱང་ཆུབ་སེམས་དཔའི་སྤྱོད་པའི་ཁྱད་པར་ཚད་མེད་པའི་རྗེས་སུ་འབྲང་བར་བྱ་དགོས་ སོ༑ ༑བྱང་ཆུབ་སེམས་དཔའི་ཡོན་ཏན་ཚད་མེད་པ་ཡོངས་སུ་དག་པར་བྱ་དགོས་སོ། །བྱང་ཆུབ་སེམས་དཔས་བྱ་བའི་སྤྱོད་པ་ཚད་མེད་པ་ཡོངས་སུ་རྫོགས་པར་བྱ་ དགོས་སོ། །འཇིག་རྟེན་གྱི་སྤྱོད་པ་ཚད་མེད་པའི་རྗེས་སུ་འབྲང་བར་བྱ་དགོས་སོ། །འཇིག་རྟེན་གྱི་རྗེས་སུ་འབྲང་བ་ཚད་མེད་པ་ཡོངས་སུ་བསྟན་དགོས་སོ། །དད་པའི་ སྟོབས་ཚད་མེད་པ་ཡོངས་སུ་བསྐྱེད་དགོས་སོ། །བརྩོན་འགྲུས་ཀྱི་སྟོབས་ཚད་མེད་པ་ཉེ་བར་བརྟན་དགོས་སོ། །དྲན་པའི་སྟོབས་ཚད་མེད་པ་ཡོངས་སུ་དག་པར་བྱ་ དགོས་སོ། །ཏིང་ངེ་འཛིན་གྱི་སྟོབས་ཚད་མེད་པ་ཡོངས་སུ་རྫོགས་པར་བྱ་དགོས་སོ། །ཤེས་རབ་ཀྱི་སྟོབས་ཚད་མེད་པ་བསྐྱེད་པར་བྱ་དགོས་སོ། །མོས་པའི་སྟོབས་ཚད་ མེད་པ་བརྟན་པར་བྱ་དགོས་སོ། །བསོད་ནམས་ཀྱི་སྟོབས་ཚད་མེད་པ་ཡང་དག་པར་བསྒྲུལ་དགོས་སོ། །ཡེ་ཤེས་ཀྱི་སྟོབས་ཚད་མེད་པ་རྣམ་པར་སྤེལ་དགོས་སོ། ། བྱང་ཆུབ་སེམས་དཔའི་སྟོབས་ཚད་མེད་པ་ཡང་དག་པར་བསྒྲུབ་དགོས་སོ། །སངས་རྒྱས་ཀྱི་སྟོབས་ཚད་མེད་པ་ཡོངས་སུ་རྫོགས་པར་བྱ་དགོས་སོ། །ཆོས་ཀྱི་སྒོ་ཚད་མེད་པ་ རབ་ཏུ་དབྱེ་དགོས་སོ། །ཆོས་ཀྱི་ཕྱོགས་ཚད་མེད་པ་ལ་འཇུག་པར་བྱ་དགོས་སོ། །ཆོས་ཀྱི་སྒོ་ཚད་མེད་པ་ཡོངས་སུ་སྦྱང་དགོས་སོ། །ཆོས་ཀྱི་སྣང་བ་ཚད་མེད་པ་ཡང་དག་པར་ བསྐྱེད་དགོས་སོ། །ཆོས་ཀྱི་གསལ་བ་ཚད་མེད་པ་རབ་ཏུ་དགོས་སོ། །དབང་པོའི་རྒྱུད་ཚད་མེད་པ་སྣང་བར་བྱ་དགོས་སོ། །ཉོན་མོངས་པའི་ནད་ཚད་མེད་པ་ཡོངས་སུ་ ཤེས་པར་བྱ་དགོས་སོ། །ཆོས་ཀྱི་སྨན་ཚད་མེད་པ་ཡང་དག་པར་བསྡུ་དགོས་སོ། །ཉོན་མོངས་པའི་ནད་ཀྱིས་བཏབ་པའི་སེམས་ཅན་གྱི་ཁམས་ཚད་མེད་པ་གསོ་དགོས་སོ།། བདུད་རྩིའི་ཚོགས་ཚད་མེད་པ་ཡང་དག་པར་བསྡུ་བར་བྱ་དགོས་སོ། །སངས་རྒྱས་ཀྱི་ཞིང་ཡང་ཚད་མེད་པ་འདའ་བར་བྱ་དགོས་སོ། །དེ་བཞིན་གཤེགས་པ་ཚད་མེད་ པ་མཆོད་དགོས་སོ། །བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཚད་མེད་པར་འཇུག་པར་བྱ་དགོས་སོ། །དེ་བཞིན་གཤེགས་པའི་བསྟན་པ་ཚད་མེད་པ་ཡོངས་ སུ་གཟུང་དགོས་སོ། །སེམས་ཅན་གྱི་གནོད་པ་ཚད་མེད་པ་བཟོད་པར་བྱ་དགོས་སོ། །མི་ཁོམ་པ་དང༌། ངན་སོང་གི་ལམ་ཚད་མེད་པ་ཡོངས་སུ་གཅད་དགོས་སོ། །སེམས་ ༄༅། །ཅན་གྱི་བདེ་བ་ཚད་མེད་པ་ཉེ་བར་བསྒྲུབ་དགོས་སོ། །སེམས་ཅན་བསྡུ་བ་ཚད་མེད་པ་བྱ་དགོས་སོ། །གཟུངས་ཀྱི་སྒོ་ཚད་མེད་པ་ཡོངས་སུ་སྦྱང་ དགོས་སོ། །སྨོན་ལམ་གྱི་སྒོ་ཚད་མེད་པ་མངོན་པར་བསྒྲུབ་པ་དགོས་སོ། །བྱམས་པ་ཆེན་པོ་དང༌། སྙིང་རྗེ་ཆེན་པོའི་སྟོབས་ཚད་མེད་པ་ཡོངས་སུ་བསྒོམ་དགོས་སོ། ། ཆོས་ཡོངས་སུ་བཙལ་བ་ལ་བརྩོན་པར་བྱ་བ་ཚད་མེད་པ་བརྒྱུན་མི་གཅད་པར་བྱ་དགོས་སོ། །ངེས་པར་རྟོགས་པའི་སྟོབས་ཚད་མེད་པའི་རྗེས་སུ་འཇུག་དགོས་སོ། །མངོན་ པར་ཤེས་པ་མངོན་དུ་སྒྲུབ་པ་ཚད་མེད་པ་བསྐྱེད་དགོས་སོ། །རིག་པ་དང༌། ཡེ་ཤེས་ཀྱི་སྣང་བ་ཚད་མེད་པ་རྣམ་པར་དག་པར་བྱ་དགོས་སོ། །སེམས་ཅན་གྱི་རྒྱུད་ ཚད་མེད་པའི་རྗེས་སུ་འགྲོ་བར་བྱ་དགོས་སོ། །སྲིད་པར་སྐྱེ་བ་ཚད་མེད་པ་ཡོངས་སུ་གཟུང་དགོས་སོ། །ལུས་རྣམ་པར་ཕྱི་བ་ཚད་མེད་པ་ཡོངས་སུ་བསྟན་དགོས་སོ། ། སྐད་རྣམ་པར་ཕྱེ་བ་ཚད་མེད་པ་ཡོངས་སུ་ཤེས་པར་བྱ་དགོས་སོ། །སེམས་ཅན་གྱི་སེམས་རྣམ་པ་ཐ་དད་པ་ཚད་མེད་པ་ཁོང་དུ་ཆུད་པར་བྱ་དགོས་སོ། །བྱང་ཆུབ་ སེམས་དཔའི་སྤྱོད་ཡུལ་རྒྱ་ཆེན་པོའི་རྗེས་སུ་འཇུག་པར་བྱ་དགོས་སོ། །བྱང་ཆུབ་སེམས་དཔའི་གནས་ཤིན་ཏུ་ཡངས་པར་རྗེས་སུ་སྤྱད་དགོས་སོ། །བྱང་ཆུབ་ སེམས་དཔའི་རྣམ་པར་སྤྱོད་པ་ཟབ་མོ་ལ་རྣམ་པར་བལྟ་དགོས་སོ། །བྱང་ཆུབ་སེམས་དཔའི་ཡུལ་རྟོགས་པར་དཀའ་བ་ཁོང་དུ་ཆུད་པར་བྱ་དགོས་སོ། །བྱང་ཆུབ་སེམས་ དཔའི་ལམ་བགྲོད་པར་དཀའ་བ་བགྲོད་པར་བྱ་དགོས་སོ། །བྱང་ཆུབ་སེམས་དཔའི་ཤུགས་སྒྲུབ་པར་དཀའ་བ་ཡོངས་སུ་གཟུང་དགོས་སོ། །བྱང་ཆུབ་སེམས་དཔའི་སྐྱོན་མེད་ པར་འཇུག་པར་དཀའ་བ་ལ་འཇུག་པར་བྱ་དགོས་སོ། །བྱང་ཆུབ་སེམས་དཔའི་སྤྱོད་པ་རྣམ་པ་སྣ་ཚོགས་ཁོང་དུ་ཆུད་པར་བྱ་དགོས་སོ། །བྱང་ཆུབ་སེམས་དཔའི་རྣམ་པར་འཕྲུལ་ པ་ཐམས་ཅད་དུ་ཁྱབ་པ་ཀུན་ཏུ་བསྟན་དགོས་སོ། །བྱང་ཆུབ་སེམས་དཔའི་ཆོས་ཀྱི་སྤྲིན་ཡོངས་སུ་གཟུང་དགོས་སོ། །བྱང་ཆུབ་སེམས་དཔའི་སྤྱོད་པའི་དྲ་བ་མཐའ་དང་དབུས་ མེད་པ་རབ་ཏུ་རྒྱས་པར་བྱ་དགོས་སོ། །བྱང་ཆུབ་སེམས་དཔས་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པར་བྱ་དགོས་སོ། །བྱང་ཆུབ་སེམས་དཔས་ལུང་བསྟན་ པ་ཚད་མེད་པ་ཡང་དག་པར་མནོད་དགོས་སོ། །བྱང་ཆུབ་སེམས་དཔས་བཟོད་པའི་སྒོ་དཔག་ཏུ་མེད་པ་ལ་འཇུག་པར་བྱ་དགོས་སོ། །བྱང་ཆུབ་སེམས་དཔས་ས་གྲངས་ མེད་པ་ཡོངས་སུ་སྦྱང་དགོས་སོ། །བྱང་ཆུབ་སེམས་དཔས་ཆོས་ཀྱི་སྒོ་དཔག་ཏུ་མེད་པ་ཡོངས་སུ་དག་པར་བྱ་དགོས་སོ། །བྱང་ཆུབ་སེམས་དཔས་སངས་རྒྱས་ཀྱི་ཞིང་ ༄༅། །བརྗོད་དུ་མེད་པ་ཡོངས་སུ་སྦྱང་དགོས་སོ། །བྱང་ཆུབ་སེམས་དཔས་བསྐལ་པ་མཐའ་ཡས་པར་གོ་ཆ་བགོ་དགོས་སོ། །བྱང་ཆུབ་སེམས་དཔས་ དེ་བཞིན་གཤེགས་པ་དཔག་ཏུ་མེད་པ་མཆོད་པར་བྱ་དགོས་སོ། །བྱང་ཆུབ་སེམས་དཔས་སྨོན་ལམ་མངོན་པར་སྒྲུབ་པ་བསམ་གྱིས་མི་ཁྱབ་པ་མངོན་པར་བསྒྲུབ་དགོས་ སོ༑ ༑རིགས་ཀྱི་བུ། མདོར་ན། སེམས་ཅན་ཐམས་ཅད་ཡོངས་སུ་སྨིན་པར་བྱེད་པས་བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི། སེམས་ཅན་ཐམས་ཅད་དང་མཉམ་པར་ བསྟན་ཏོ། །བསྐལ་པ་ཐམས་ཅད་དུ་གནས་པས་བསྐལ་པ་ཐམས་ཅད་མཉམ་པར་བསྟན་ཏོ། །ཐམས་ཅད་དུ་སྐྱེ་བ་ཡོངས་སུ་བསྟན་པས་སྐྱེ་བ་ཐམས་ཅད་དང་མཉམ་ པར་བསྟན་ཏོ། །དུས་གསུམ་གྱི་ཡེ་ཤེས་ཁོང་དུ་ཆུད་པར་བྱ་བའི་ཕྱིར་དུས་ཐམས་ཅད་དང་མཉམ་པར་བསྟན་ཏོ། །ཆོས་ཐམས་ཅད་ལ་ནན་ཏན་དུ་བྱེད་པས་ཆོས་ཐམས་ ཅད་དང་མཉམ་པར་བསྟན་ཏོ། །ཞིང་ཐམས་ཅད་ཡོངས་སུ་དག་པར་བྱེད་པས་ཞིང་ཐམས་ཅད་དང་མཉམ་པར་བསྟན་ཏོ། །སྨོན་ལམ་ཐམས་ཅད་ཡོངས་སུ་རྫོགས་པར་ བྱེད་པས་སྨོན་ལམ་ཐམས་ཅད་དང་མཉམ་པར་བསྟན་ཏོ། །སངས་རྒྱས་ཐམས་ཅད་མཆོད་པ་མངོན་པར་སྒྲུབ་པས་སངས་རྒྱས་ཐམས་ཅད་དང་མཉམ་པར་བསྟན་ཏོ།། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་དང་གཅིག་ཏུ་འགྱུར་བའི་ཕྱིར་བྱང་ཆུབ་སེམས་དཔའ་ཐམས་ཅད་དང་མཉམ་པར་བསྟན་ཏོ། །དགེ་བའི་བཤེས་གཉེན་ཐམས་ ཅད་ལ་བསྙེན་བཀུར་བྱེད་པའི་ཕྱིར་བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི། དགེ་བའི་བཤེས་གཉེན་ཐམས་ཅད་དང་མཉམ་པར་བསྟན་ཏོ། །རིགས་ཀྱི་བུ། དེ་བས་ན། ཁྱོད་ ཀྱིས་དགེ་བའི་བཤེས་གཉེན་ཡོངས་སུ་བཙལ་པ་ལ་སྐྱོ་བར་མི་བྱའོ། །དགེ་བའི་བཤེས་གཉེན་མཐོང་བས་ངོམས་པ་བསྐྱེད་པར་མི་བྱའོ། །དགེ་བའི་བཤེས་གཉེན་ལ་ཡོངས་སུ་ དྲི་བས་ཆོག་ཤེས་པར་མི་བྱའོ། །དགེ་བའི་བཤེས་གཉེན་དང་འགྲོགས་པ་ལས་བསམ་པ་ཕྱིར་ལྡོག་པར་མི་བྱའོ། །དགེ་བའི་བཤེས་གཉེན་ལ་ཕུ་དུད་དང༌། རིམ་གྲོ་སྦྱོར་ བ་རྒྱུན་གཅད་པར་མི་བྱའོ། །དགེ་བའི་བཤེས་གཉེན་གྱི་གདམས་ངག་དང༌། རྗེས་སུ་བསྟན་པ་ལོག་པར་གཟུང་བར་མི་བྱའོ། །དགེ་བའི་བཤེས་གཉེན་གྱི་ཡོན་ཏན་ ཐོབ་པར་འགྱུར་བ་ལ་ཐེ་ཚོམ་མི་བསྐྱེད་དོ། །དགེ་བའི་བཤེས་གཉེན་གྱིས་འབྱུང་བའི་སྒོ་བསྟན་པ་ལ་ཡིད་གཉིས་སུ་མི་བྱའོ། །དགེ་བའི་བཤེས་གཉེན་གྱི་ཐབས་ཀྱི་ བསམ་པ་དང༌། འཇིག་རྟེན་གྱི་རྗེས་སུ་འབྲང་བར་བྱ་བའི་རྒྱུད་ལ་ཞེ་སྡང་བསྐྱེད་པར་མི་བྱའོ། །དགེ་བའི་བཤེས་གཉེན་ལ་མོས་པ་རྣམ་པར་བསྐྱེད་པས་ལུས་དང༌། ༄༅། །སེམས་རྣམ་པར་ལྡོག་པར་མི་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཐམས་ཅད་ ཐོས་པ་ནི། དགེ་བའི་བཤེས་གཉེན་ལ་རག་ལས་པའོ། །བྱང་ཆུབ་སེམས་དཔའི་ཡོན་ཏན་ཡོངས་སུ་རྫོགས་པར་བྱ་བ་ཐམས་ཅད་ནི། དགེ་བའི་བཤེས་གཉེན་ལས་བྱུང་ བའོ༑ ༑བྱང་ཆུབ་སེམས་དཔའི་སྨོན་ལམ་གྱི་རྒྱུན་ཐམས་ཅད་ནི། དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་དཔའི་དགེ་བའི་རྩ་བ་ཐམས་ཅད་ནི། དགེ་ བའི་བཤེས་གཉེན་གྱིས་བསྐྱེད་པའོ། །བྱང་ཆུབ་སེམས་དཔའི་ཚོགས་ཐམས་ཅད་ནི། དགེ་བའི་བཤེས་གཉེན་གྱིས་བསྒྲུབས་པའོ། །བྱང་ཆུབ་སེམས་དཔའི་ཆོས་ ཀྱི་སྒོ་སྣང་བ་ཐམས་ཅད་ནི། དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་དཔའི་འབྱུང་བའི་སྒོ་རྣམ་པར་དག་པ་ཐམས་ཅད་ནི། དགེ་བའི་བཤེས་ གཉེན་ལས་བྱུང་བའོ། །བྱང་ཆུབ་སེམས་དཔའི་བསླབ་པ་ལ་ནན་ཏན་དུ་བྱ་བ་ཐམས་ཅད་ནི། དགེ་བའི་བཤེས་གཉེན་ལ་རག་ལས་པའོ། །བྱང་ཆུབ་སེམས་དཔའི་ ཡོན་ཏན་གྱི་ཆོས་ཐམས་ཅད་ནི། དགེ་བའི་བཤེས་གཉེན་ལ་གནས་པའོ། །བྱང་ཆུབ་སེམས་དཔའི་ལྷག་པའི་བསམ་པ་ཡོངས་སུ་དག་པ་ཐམས་ཅད་ནི། དགེ་བའི་ བཤེས་གཉེན་རྩ་བར་གྱུར་པའོ། །བྱང་ཆུབ་སེམས་དཔའི་སེམས་བསྐྱེད་པ་བརྟན་པ་ཐམས་ཅད་ནི། དགེ་བའི་བཤེས་གཉེན་ལས་སྐྱེས་པའོ། །བྱང་ཆུབ་སེམས་དཔའ་ གཟུངས་དང༌། སྤོབས་པའི་སྒོ་སྣང་བ་ཐམས་ཅད་དུ་ཁྲིད་པ་ནི། དགེ་བའི་བཤེས་གཉེན་ནོ། །བྱང་ཆུབ་སེམས་དཔའི་རྣམ་པར་དག་པའི་སྒོའི་མཛོད་ཐམས་ཅད་ནི། དགེ་བའི་ བཤེས་གཉེན་གྱིས་ཡོངས་སུ་བཟུང་བའོ། །བྱང་ཆུབ་སེམས་དཔའི་ཡེ་ཤེས་སྣང་བ་ཐམས་ཅད་ནི། དགེ་བའི་བཤེས་གཉེན་གྱིས་ཡང་དག་པར་བསྐྱེད་པའོ། །བྱང་ཆུབ་ སེམས་དཔའི་སྨོན་ལམ་ཁྱད་པར་ཅན་ཐམས་ཅད་ནི། དགེ་བའི་བཤེས་གཉེན་གྱི་ལག་ན་འདུག་པའོ། །བྱང་ཆུབ་སེམས་དཔའི་སྨོན་ལམ་གྱི་ཚུལ་རྒྱུད་གཅིག་ཏུ་གྱུར་པ་ ཐམས་ཅད་ནི། དགེ་བའི་བཤེས་གཉེན་ལ་བརྟེན་པའོ། །བྱང་ཆུབ་སེམས་དཔའི་ཡང་དག་པར་སྒྲུབ་པ་ཁྱད་པར་ཅན་མཉམ་པ་ཐམས་ཅད་ནི། དགེ་བའི་བཤེས་གཉེན་གྱི་ རྒྱུད་ལས་བྱུང་བའོ། །བྱང་ཆུབ་སེམས་དཔའི་གསང་བའི་གནས་ཐམས་ཅད་ནི། དགེ་བའི་བཤེས་གཉེན་གྱི་མཛོད་ན་འདུག་པའོ། །བྱང་ཆུབ་སེམས་དཔའི་ཆོས་ཐམས་ཅད་ ནི༑ དགེ་བའི་བཤེས་གཉེན་གྱི་འབྱུང་གནས་ནས་བྱུང་བའོ། །བྱང་ཆུབ་སེམས་དཔའི་དབང་པོའི་ཤུགས་ཀྱི་མྱུ་གུ་ཐམས་ཅད་ནི། དགེ་བའི་བཤེས་གཉེན་གྱིས་རྣམ་པར་ ༄༅། །སྤེལ་པའོ། །བྱང་ཆུབ་སེམས་དཔའི་ཡེ་ཤེས་རྒྱ་མཚོ་ཐམས་ཅད་ནི། དགེ་བའི་བཤེས་གཉེན་གྱིས་ཡང་དག་པར་སྤེལ་བའོ། །བྱང་ཆུབ་སེམས་ དཔའི་གཏེར་གྱི་མཛོད་ཐམས་ཅད་ནི། དགེ་བའི་བཤེས་གཉེན་གྱིས་ཡོངས་སུ་བསྐྱངས་པའོ། །བྱང་ཆུབ་སེམས་དཔའི་བསོད་ནམས་བསགས་པ་ཐམས་ཅད་ནི། དགེ་ བའི་བཤེས་གཉེན་གྱིས་བསྲུངས་པའོ། །བྱང་ཆུབ་སེམས་དཔའི་ཚེ་རྣམ་པར་དག་པ་ཐམས་ཅད་ནི། དགེ་བའི་བཤེས་གཉེན་གྱིས་བསྐྱེད་པའོ། །བྱང་ཆུབ་སེམས་ དཔའི་ཆོས་མཉན་པའི་སྤྲིན་ཐམས་ཅད་ནི། དགེ་བའི་བཤེས་གཉེན་གྱི་ཁ་ནས་བྱུང་བའོ། །བྱང་ཆུབ་སེམས་དཔའི་འབྱུང་བའི་ལམ་ལ་འཇུག་པ་ཐམས་ཅད་ནི། དགེ་ བའི་བཤེས་གཉེན་གྱི་ཁོང་ན་ཡོད་པའོ། །སངས་རྒྱས་ཐམས་ཅད་ཀྱི་བྱང་ཆུབ་ནི། དགེ་བའི་བཤེས་གཉེན་ལ་རིམ་གྲོར་བྱས་པས་ཐོབ་པའོ། །བྱང་ཆུབ་སེམས་དཔའི་སྤྱོད་ པ་ཐམས་ཅད་ནི། དགེ་བའི་བཤེས་གཉེན་གྱིས་ཡོངས་སུ་བཟུང་བའོ། །བྱང་ཆུབ་སེམས་དཔའི་ཡོན་ཏན་བརྗོད་པ་ཐམས་ཅད་ནི། དགེ་བའི་བཤེས་གཉེན་གྱིས་བསྟན་ པའོ༑ ༑བྱང་ཆུབ་སེམས་དཔའི་ཆོས་ཀྱི་ཕྱོགས་ཀྱི་རྗེས་སུ་འབྲང་བ་ཐམས་ཅད་ནི། དགེ་བའི་བཤེས་གཉེན་གྱིས་ཡོངས་སུ་བསྟན་པའོ། །བྱང་ཆུབ་སེམས་དཔའི་ སེམས་དང་ལྷག་པའི་བསམ་པའི་བདག་ཉིད་ཆེ་བ་ནི། དགེ་བའི་བཤེས་གཉེན་གྱིས་ཡང་དག་པར་བརྗོད་པའོ། །བྱང་ཆུབ་སེམས་དཔའ་རྣམས་ཀྱི་བྱམས་པ་ཆེན་པོའི་སྟོབས་ ནི༑ དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་དཔའི་རྣམས་ཀྱི་སྙིང་རྗེ་ཆེན་པོའི་སྟོབས་ནི། དགེ་བའི་བཤེས་གཉེན་གྱིས་བསྐྱེད་པའོ། །བྱང་ཆུབ་སེམས་ དཔའི་དབང་ཐམས་ཅད་ནི། དགེ་བའི་བཤེས་གཉེན་གྱིས་ཡོངས་སུ་བཟུང་བའོ། །བྱང་ཆུབ་སེམས་དཔའ་རྣམས་ཀྱི་ཡན་ལག་ཐམས་ཅད་ནི། དགེ་བའི་བཤེས་གཉེན་ གྱིས་བསྐྱེད་པའོ། །བྱང་ཆུབ་སེམས་དཔའི་ཕན་པ་ཉེ་བར་སྒྲུབ་པ་ཐམས་ཅད་ནི། དགེ་བའི་བཤེས་གཉེན་ལས་བྱུང་བའོ། །རིགས་ཀྱི་བུ། དགེ་བའི་བཤེས་གཉེན་གྱིས་ ཡང་དག་པར་ཟིན་པའི་བྱང་ཆུབ་སེམས་དཔའ་རྣམས་ནི། ངན་སོང་དུ་མི་ལྟུང་ངོ༌། །དགེ་བའི་བཤེས་གཉེན་གྱིས་ཡོངས་སུ་བཟུང་བའི་བྱང་ཆུབ་སེམས་དཔའ་རྣམས་ནི། ཐེག་པ་ཆེན་པོ་ལས་མི་ལྡོག་གོ །དགེ་བའི་བཤེས་གཉེན་གྱིས་ཡོངས་སུ་བསམ་པའི་བྱང་ཆུབ་སེམས་དཔའ་རྣམས་ནི། བྱང་ཆུབ་སེམས་དཔའི་བསླབ་པ་དང་འགལ་ བར་མི་བྱེད་དོ། །དགེ་བའི་བཤེས་གཉེན་གྱིས་ཤིན་ཏུ་བསྲུངས་པའི་བྱང་ཆུབ་སེམས་དཔའ་རྣམས་ནི། སྡིག་པའི་གྲོགས་པའི་ལག་ཏུ་མི་འདོང་ངོ༌། །དགེ་བའི་བཤེས་ ༄༅། །གཉེན་གྱིས་ཡོངས་སུ་བསྐྱངས་པའི་བྱང་ཆུབ་སེམས་དཔའ་རྣམས་ནི། བྱང་ཆུབ་སེམས་དཔའི་ཆོས་ལས་ཉམས་པར་མི་འགྱུར་རོ། །དགེ་བའི་ བཤེས་གཉེན་གྱིས་ཡང་དག་པར་ཟིན་པའི་བྱང་ཆུབ་སེམས་དཔའ་རྣམས་ནི། སོ་སོ་སྐྱེ་བོའི་ས་ལས་ཡོངས་སུ་འདའོ། །དགེ་བའི་བཤེས་གཉེན་གྱིས་ཡོངས་སུ་བསྲུངས་ པའི་བྱང་ཆུབ་སེམས་དཔའ་རྣམས་ནི། ཉན་ཐོས་དང༌། རང་སངས་རྒྱས་ཀྱི་སྐྱོན་མེད་པར་མི་འཇུག་གོ །དགེ་བའི་བཤེས་གཉེན་གྱིས་བསྐྱངས་པའི་བྱང་ཆུབ་སེམས་ དཔའ་རྣམས་ནི། འཇིག་རྟེན་ལས་མངོན་པར་འཕགས་པ་ཡིན་ནོ། །དགེ་བའི་བཤེས་གཉེན་གྱིས་ཡང་དག་པར་བསྐྱེད་པའི་བྱང་ཆུབ་སེམས་དཔའ་རྣམས་ནི། འཇིག་ རྟེན་གྱི་ཆོས་ཀྱིས་མི་གོས་པ་ཡིན་ནོ། །དགེ་བའི་བཤེས་གཉེན་བསྙེན་བཀུར་བའི་བྱང་ཆུབ་སེམས་དཔའ་རྣམས་ནི། སྤྱོད་པ་ཐམས་ཅད་ལ་མི་འཁྲུལ་བར་སྤྱོད་པ་ ཡིན་ནོ༑ ༑དགེ་བའི་བཤེས་གཉེན་གྱིས་བསྒྲུབས་པའི་བྱང་ཆུབ་སེམས་དཔའ་རྣམས་ནི། བརྩམས་པ་ཐམས་ཅད་ལས་ཕྱིར་མི་ལྡོག་གོ །དགེ་བའི་བཤེས་གཉེན་ གྱིས་ཡོངས་སུ་བཟུང་བའི་བྱང་ཆུབ་སེམས་དཔའ་རྣམས་ནི། ལས་དང༌། ཉོན་མོངས་པས་ཐུབ་པར་དཀའ་བ་ཡིན་ནོ། །དགེ་བའི་བཤེས་གཉེན་གྱི་སྟོབས་ཀྱིས་ བསྟན་པའི་བྱང་ཆུབ་སེམས་དཔའ་རྣམས་ནི། བདུད་ཐམས་ཅད་ཀྱིས་མི་ཐུབ་པ་ཡིན་ནོ། །དགེ་བའི་བཤེས་གཉེན་གྱི་རྟེན་ལ་གནས་པའི་བྱང་ཆུབ་སེམས་དཔའ་རྣམས་ནི། བྱང་ཆུབ་ཀྱི་ཡན་ལག་ཐམས་ཅད་ཀྱིས་རྣམ་པར་འཕེལ་ལོ། །དེ་ཅིའི་ཕྱིར་ཞེ་ན། རིགས་ཀྱི་བུ། དགེ་བའི་བཤེས་གཉེན་ནི། སྒྲིབ་པར་གྱུར་པའི་ཆོས་ཐམས་ཅད་ལས་རྣམ་པར་ སྦྱང་བའོ། །དགེ་བའི་བཤེས་གཉེན་ནི། སྡིག་ཏོ་ལས་རྣམ་པར་བཟློག་པའོ། །དགེ་བའི་བཤེས་གཉེན་ནི། མི་བྱ་བ་རྣམས་ཁོང་དུ་ཆུད་པར་བྱེད་པའོ། །བག་མེད་པའི་ གནས་ལས་ཡང་དག་པར་ཟློག་པའོ། །མ་རིག་པའི་མུན་པ་རྣམ་པར་སེལ་བའོ། །ལྟ་བའི་འཆིང་བ་ཐུབ་པའོ། །འཁོར་བའི་གྲོང་ཁྱེར་ནས་འདོན་པའོ། །འཇིག་རྟེན་གྱི་གནས་ འདོར་བར་བྱེད་པའོ། །བདུད་ཀྱི་ཞགས་པ་ལས་ཐར་པར་བྱེད་པའོ། །སྡུག་བསྔལ་གྱི་ཟུག་རྔུ་འབྱིན་པའོ། །མི་ཤེས་པ་ཐིབས་པོ་ལས་ཐར་པར་བྱེད་པའོ། །ལྟ་བའི་མྱ་ངན་ ལས་ཡོངས་སུ་ཟློག་པའོ། །སྲིད་པའི་ཆུ་བོ་ལས་སྒྲོལ་བའོ། །འདོད་པའི་འདམ་ནས་འབྱིན་པའོ། །ལམ་མི་བདེ་བ་ནས་རྣམ་པར་ཟློག་པའོ། །བྱང་ཆུབ་སེམས་དཔའི་ལམ་ ཡང་དག་པར་སྟོན་པའོ། །བྱང་ཆུབ་སེམས་དཔའི་ཡི་དམ་ལ་གཞོག་པའོ། །ནན་ཏན་ལ་རབ་ཏུ་འགོད་པའོ། །ཐམས་ཅད་མཁྱེན་པ་ཉིད་དུ་འགྲོ་བའི་ཕྱོགས་རབ་ཏུ་སྟོན་ ༄༅། །པའོ༑ ༑ཤེས་རབ་ཀྱི་མིག་རྣམ་པར་སྦྱོང་བའོ། །བྱང་ཆུབ་སེམས་དཔའ་རྣམ་པར་འཕེལ་བར་བྱེད་པའོ། །སྙིང་རྗེ་ཆེན་པོ་ཡང་དག་པར་སྐྱེད་པའོ།། སྤྱོད་པ་ཡོངས་སུ་སྟོན་པའོ། །ཕ་རོལ་ཏུ་ཕྱིན་པའི་གདམས་ངག་རབ་ཏུ་སྟོན་པའོ། །ས་ལ་རབ་ཏུ་འགོད་པའོ། །བཟོད་པ་རྣམ་པར་འབྱེད་པའོ། །དགེ་བའི་རྩ་བ་ཐམས་ ཅད་ཡོངས་སུ་འགྲུབ་པར་བྱེད་པའོ། །ཚོགས་ཐམས་ཅད་སྐྱེད་པར་བྱེད་པའོ། །བྱང་ཆུབ་སེམས་དཔའི་ཡོན་ཏན་ཐམས་ཅད་སྟོབ་པའོ། །སངས་རྒྱས་ཐམས་ཅད་ཀྱི་ཞབས་ ཀྱི་དྲུང་དུ་ཕྱིན་པར་བྱེད་པའོ། །ཡོན་ཏན་ཐམས་ཅད་ཡོངས་སུ་སྟོན་པའོ། །དོན་ཐམས་ཅད་ཡང་དག་པར་ལེན་དུ་འཇུག་པའོ། །ནན་ཏན་ལ་གཟེངས་བསྟོད་པའོ། །འབྱུང་ བའི་སྒོ་སྟོན་པའོ། །ལམ་གོལ་བ་ལས་ཡོངས་སུ་སྲུང་བའོ། །ཆོས་སྣང་བའི་སྒོ་སྣང་བར་བྱེད་པའོ། །ཆོས་ཀྱི་སྒོ་མངོན་པར་རླན་པར་བྱེད་པའོ། །ཆོས་ཐོས་པར་བྱ་ བའི་སྤྲིན་གྱི་ཆར་རབ་ཏུ་འབེབས་པའོ། །ཉོན་མོངས་པ་ཐམས་ཅད་ཞི་བར་བྱེད་པའོ། །ལྟ་བའི་རྣམ་པ་ཐམས་ཅད་ལས་ཟློག་པའོ། །སངས་རྒྱས་ཀྱི་ཆོས་ཐམས་ཅད་ ལ་གནས་པར་བྱེད་པའོ། །འདི་ལྟར་ཡང་རིགས་ཀྱི་བུ། དགེ་བའི་བཤེས་གཉེན་ནི། སངས་རྒྱས་ཀྱི་རིགས་སུ་སྐྱེད་བས་མ་ལྟ་བུའོ། །དགེ་བའི་བཤེས་གཉེན་ནི། ཕན་པ་རྒྱ་ཆེན་པོ་སྒྲུབ་པས་ཕ་ལྟ་བུའོ། །དགེ་བའི་བཤེས་གཉེན་ནི། སྡིག་པ་ཐམས་ཅད་ལས་སྲུང་བས་མ་མ་ལྟ་བུའོ། །དགེ་བའི་བཤེས་གཉེན་ནི། བྱང་ཆུབ་སེམས་ དཔའི་བསླབ་པ་ཁོང་དུ་ཆུད་པར་བྱེད་པས་སློབ་དཔོན་ལྟ་བུའོ། །དགེ་བའི་བཤེས་གཉེན་ནི། ཕ་རོལ་ཏུ་ཕྱིན་པའི་ལམ་དུ་འཛུད་པས་ལམ་མཁན་ལྟ་བུའོ། །དགེ་བའི་བཤེས་ གཉེན་ནི། ཉོན་མོངས་པའི་ནད་ལས་ཐར་པར་བྱེད་པས་སྨན་པ་ལྟ་བུའོ། །དགེ་བའི་བཤེས་གཉེན་ནི། ཡེ་ཤེས་ཀྱི་སྨན་རྣམ་པར་འཕེལ་བར་བྱེད་པས་གངས་ཀྱི་རི་ལྟ་བུའོ། ། དགེ་བའི་བཤེས་གཉེན་ནི། འཇིགས་པ་ཐམས་ཅད་ལས་སྲུང་བས་དཔའ་བོ་ལྟ་བུའོ། །དགེ་བའི་བཤེས་གཉེན་ནི། འཁོར་བའི་ཆུ་བོ་ཆེན་པོ་ལས་སྒྲོལ་བས་མཉན་པ་ ལྟ་བུའོ༑ ༑དགེ་བའི་བཤེས་གཉེན་ནི། ཐམས་ཅད་མཁྱེན་པའི་ཡེ་ཤེས་རིན་པོ་ཆེའི་གླིང་དུ་ཕྱིན་པར་བྱེད་པས་སྐྱེ་བ་འཛིན་པ་ལྟ་བུའོ། །རིགས་ཀྱི་བུ། དེ་ལྟ་བས་ན། དེ་ལྟར་ཡིད་ལ་བྱ་བ་རྒྱུན་མ་ཆད་པས་ཁྱོད་ཀྱི་དགེ་བའི་བཤེས་གཉེན་བསྙེན་པར་གྱིས་ཤིག །ཁུར་ཐམས་ཅད་བཀུར་བས་ཡོངས་སུ་མི་སྐྱོ་བའི་ཕྱིར་ས་ལྟ་བུའི་སེམས་ དད། མི་ཕྱེད་པའི་ཕྱིར་རྡོ་རྗེ་ལྟ་བུའི་སེམས་དང༌། སྡུག་བསྔལ་ཐམས་ཅད་ཀྱིས་མི་སྒུལ་བའི་ཕྱིར་ཁོར་ཡུག་ལྟ་བུའི་སེམས་དང༌། ཅི་དགའ་བར་བཀའ་ཉན་པས་བྲན་ལྟ་ ༄༅། །བུའི་སེམས་དང༌། ངག་ཐམས་ཅད་མི་གཅོག་པས་སློབ་མ་ལྟ་བུའི་སེམས་དང༌། ལས་ཐམས་ཅད་ཉམས་སུ་བླང་བ་ལ་མི་སྨད་པས་འཇིག་རྟེན་ གྱི་བྲན་ལྟ་བུའི་སེམས་དང༌། ཉོན་མོངས་པ་ཐམས་ཅད་ཀྱིས་མི་སྐྱོ་བའི་ཕྱིར་མ་མ་ལྟ་བུའི་སེམས་དང༌། བྱའོ་ཅོག་ལ་མཐུན་པར་གཟུང་བས་གཡོག་ལྟ་བུའི་སེམས་ དང༌། ང་རྒྱལ་དང༌། མཐོ་བའི་ང་རྒྱལ་སྤངས་པས་ཕྱག་དར་བ་ལྟ་བུའི་སེམས་དང༌། དུས་དང༌། དུས་མ་ཡིན་པར་མཐོ་དམན་དུ་འགྱུར་བས་ཟླ་བ་ཉ་ལྟ་བུའི་སེམས་དང༌། མི་སྲུན་པ་ཐམས་ཅད་རྣམ་པར་སྤངས་པས་རྟ་ཅང་ཤེས་ལྟ་བུའི་སེམས་དང༌། ཁུར་ལྕི་བ་བཀུར་བས་ཐེག་པ་ལྟ་བུའི་སེམས་དང༌། དུལ་བ་དང༌། ཅང་ཤེས་ཀྱི་བསམ་པས་ གླང་པོ་ལྟ་བུའི་སེམས་དང༌། མི་སྒུལ་མི་བསྐྱོད་པས་རི་ལྟ་བུའི་སེམས་དང༌། མི་ཁྲོ་བས་ཁྱི་ལྟ་བུའི་སེམས་དང༌། ང་རྒྱལ་དང་དུས་མེད་པས་གདོལ་བ་ལྟ་བུའི་སེམས་དང༌། དྲེགས་པ་ཐམས་ཅད་མེད་པས་ཁྱུ་མཆོག་ར་བཅད་པ་ལྟ་བུའི་སེམས་དང༌། རློམ་སེམས་མེད་པས་མཚན་བུ་ལྟ་བུའི་སེམས་དང༌། འགྲོ་ཞིང་འོང་བས་མི་སྐྱོ་བས་གྲུ་ ལྟ་བུའི་སེམས་དང༌། དགེ་བའི་བཤེས་གཉེན་གྱི་ངག་གི་མཐར་ཕྱིན་པར་བྱེད་པས་ཟམ་པ་ལྟ་བུའི་སེམས་དང༌། དགེ་བའི་བཤེས་གཉེན་གྱི་ངོར་ལྟ་བས་བུ་མཛངས་ བ་ལྟ་བུའི་སེམས་དང༌། ཆོས་ཀྱི་རྒྱལ་པོའི་བཀའ་ལས་མི་འགལ་བར་བྱ་བས་རྒྱལ་པོ་གཞོན་ནུ་ལྟ་བུའི་སེམས་ཀྱིས་དགེ་བའི་བཤེས་གཉེན་ལ་བསྙེན་པར་བྱའོ། །རིགས་ཀྱི་ བུ༑ ཁྱོད་ཀྱིས་བདག་ལ་ནད་པར་འདུ་ཤེས་བསྐྱེད་དོ། །དགེ་བའི་བཤེས་གཉེན་ལ་ནི། སྨན་པའི་འདུ་ཤེས་དང༌། གདམས་ངག་ལ་ནི། སྨན་གྱི་འདུ་ཤེས་དང༌། ནན་ཏན་ཉམས་ སུ་བླང་བ་ལ་ནི། ནད་འཚོ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ། ཁྱོད་ཀྱིས་བདག་ལ་ནི། འགྲོན་པོའི་འདུ་ཤེས་བསྐྱེད་པའོ། །དགེ་བའི་བཤེས་གཉེན་ལ་ནི། ལམ་ མཚོན་པའི་འདུ་ཤེས་དང༌། གདམས་ངག་ལ་ནི། ལམ་གྱི་འདུ་ཤེས་དང༌། ནན་ཏན་ལ་ནི། ཕྱོགས་བདེ་བར་འགྲོ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ། ཁྱོད་ ཀྱིས་བདག་ལ་ནི། ཕ་རོལ་ཏུ་འགྲོ་བའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི། མཉན་པའི་འདུ་ཤེས་དང༌། རྗེས་སུ་བསྟན་པ་ལ་ནི། མུ་སྟེགས་ཀྱི་འདུ་ ཤེས་དང༌། ནན་ཏན་ལ་ནི། གྲུའི་འདུ་ཤེས་བསྐྱེད་པར་བྱའོ། །རིགས་ཀྱི་བུ། ཁྱོད་ཀྱིས་བདག་ལ་ནི། ཞིང་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི། ཀླུའི་དབང་པོའི་འདུ་ཤེས་དང༌། གདམས་ངག་ལ་ནི། ཆར་པའི་འདུ་ཤེས་དང༌། ནན་ཏན་ལ་ནི། ལོ་ཏོག་འགྲུབ་པའི་འདུ་ཤེས་བསྐྱེད་པར་བྱའོ། །རིགས་ཀྱི་བུ། ཁྱོད་ཀྱིས་ ༄༅། །བདག་ལ་ནི། དབུལ་པོའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི། ངལ་བསོ་བའི་འདུ་ཤེས་དང༌། གདམས་ངག་ལ་ནི། ནོར་ དང༌། དོན་གྱི་འདུ་ཤེས་དང༌། ནན་ཏན་ལ་ནི། དབུལ་བ་སེལ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ། ཁྱོད་ཀྱིས་བདག་ལ་ནི། སློབ་མའི་འདུ་ཤེས་བསྐྱེད་པར་ བྱའོ༑ ༑དགེ་བའི་བཤེས་གཉེན་ལ་ནི། སློབ་དཔོན་གྱི་འདུ་ཤེས་དང༌། གདམས་ངག་ལ་ནི། བཟོའི་འདུ་ཤེས་དང༌། ནན་ཏན་ལ་ནི། བཟོ་ཁོང་དུ་ཆུད་པའི་འདུ་ཤེས་ བསྐྱེད་པར་བྱའོ། །རིགས་ཀྱི་བུ། ཁྱོད་ཀྱིས་བདག་ལ་ནི། འཇིགས་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི། དཔའ་བོའི་འདུ་ཤེས་དང༌། གདམས་ ངག་ལ་ནི། མཚོན་ཆའི་འདུ་ཤེས་དང༌། ནན་ཏན་ལ་ནི། དགྲ་སེལ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ། ཁྱོད་ཀྱིས་བདག་ལ་ནི། ཚོང་པའི་འདུ་ཤེས་ བསྐྱེད་པར་བྱའོ། །དགེ་བའི་བཤེས་གཉེན་ལ་ནི། སྐྱ་བ་འཛིན་པའི་འདུ་ཤེས་དང༌། གདམས་ངག་ལ་ནི། རིན་པོ་ཆེའི་འདུ་ཤེས་དང༌། ནན་ཏན་ལ་ནི། རིན་པོ་ཆེའི་ སྡུད་པའི་འདུ་ཤེས་བསྐྱེད་པར་བྱའོ། །རིགས་ཀྱི་བུ། ཁྱོད་ཀྱིས་བདག་ལ་ནི། བུ་དམ་པའི་འདུ་ཤེས་བསྐྱེད་པར་བྱེད་པའོ། །དགེ་བའི་བཤེས་གཉེན་ལ་ནི། ཕ་མའི་ འདུ་ཤེས་དང༌། རྗེས་སུ་བསྟན་པ་ལ་ནི། རིགས་ཀྱི་ཚུལ་གྱི་འདུ་ཤེས་དང༌། ནན་ཏན་ལ་ནི། ཚུལ་མ་ཉམས་པའི་འདུ་ཤེས་བསྐྱེད་པར་བྱའོ། །རིགས་ཀྱི་བུ། ཁྱོད་ཀྱིས་བདག་ ལ་ནི༑ རྒྱལ་པོ་གཞོན་ནུའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ཆོས་ཀྱི་རྒྱལ་པོ་དང༌། བློན་པོ་དམ་པའི་འདུ་ཤེས་དང༌། གདམས་ངག་ལ་ནི། རྒྱལ་པོའི་ ཁྲིམས་ཀྱི་འདུ་ཤེས་དང༌། ནན་ཏན་ལ་ནི། ཡེ་ཤེས་ཀྱི་རྒྱལ་པོའི་ཅོད་པན་དང༌། རྒྱན་དང༌། ཆོས་ཀྱི་ཐབས་མགོ་ལ་བཅིང་བ་དང༌། ཆོས་ཀྱི་རྒྱལ་པོའི་གྲོང་ཁྱེར་ལ་རྣམ་པར་ ལྟ་བའི་འདུ་ཤེས་བསྐྱེད་པར་བྱ་སྟེ། རིགས་ཀྱི་བུ། ཁྱོད་ཀྱིས་དེ་ལྟ་བུའི་འདུ་ཤེས་ཡིད་ལ་བྱ་བ་ཡོངས་སུ་བསྒོམས་ཏེ་དགེ་བའི་བཤེས་གཉེན་རྣམས་ལ་ཉེ་བར་བསྙེན་པར་ གྱིས་ཤིག། དེ་ཅིའི་ཕྱིར་ཞེ་ན། རིགས་ཀྱི་བུ། དེ་ལྟར་དགེ་བའི་བཤེས་གཉེན་ལ་ལྷག་པའི་བསམ་པ་ཡོངས་སུ་དག་པའི་བྱང་ཆུབ་སེམས་དཔའ་རྣམས་ནི། དགེ་བའི་བཤེས་ གཉེན་གྱི་ངག་ཐམས་ཅད་ཉམས་སུ་ལེན་པའི་ཚེ་གངས་ཀྱི་རི་ལ་བརྟེན་པའི་རྩྭ་དང༌། གེལ་པ་དང༌། སྨན་དང༌། ནགས་ཚལ་ལྟ་བུ་དགེ་བའི་རྩ་བ་ཐམས་ཅད་ཀྱིས་རྣམ་པར་ འཕེལ་ལོ། །རྒྱ་མཚོ་ཆེན་པོ་ཆུའི་སྣོད་དུ་གྱུར་པ་ལྟར་ཆོས་ཐམས་ཅད་ཀྱི་སྣོད་དུ་འགྱུར་རོ། །གང་ཆེན་མཚོ་ཆེན་པོ་རིན་པོ་ཆེ་མང་པོའི་འབྱུང་གནས་སུ་གྱུར་པ་ལྟར་ ༄༅། །ཡོན་ཏན་ཐམས་ཅད་ཀྱི་འབྱུང་གནས་སུ་འགྱུར་རོ། །མེའི་དྲོད་ཀྱིས་གསེར་ཡོངས་སུ་འབྱང་བ་ལྟར་བྱང་ཆུབ་ཀྱི་སེམས་ཡོངས་སུ་བྱང་བར་འགྱུར་རོ། ། རྒྱ་མཚོ་ཆེན་པོ་ལས་འཕགས་པའི་རི་རབ་ལྟར་འཇིག་རྟེན་ལས་མངོན་པར་འཕགས་པར་འགྱུར་རོ། །པདྨོ་ལ་ཆུས་མི་ཆགས་པ་ལྟར་འཇིག་རྟེན་གྱི་ཆོས་ཀྱིས་མི་གོས་ པར་འགྱུར་རོ། །རྒྱ་མཚོ་ཆེན་པོ་རོ་རུལ་པ་དང་མི་འགྲོགས་པ་ལྟར་སྤྱོད་པ་ངན་པ་ཐམས་ཅད་དང་མི་འགྲོགས་སོ། །ཡུད་དུ་ཡར་གྱི་ཟླ་བ་ལྟར་ཆོས་དཀར་པོས་རྣམ་པར་ འཕེལ་བར་འགྱུར་རོ། །ཛམྦུའི་གླིང་སྣང་བར་བྱེད་པའི་ཉི་མ་ལྟར་ཆོས་ཀྱི་དབྱིངས་སུ་སྣང་བར་འགྱུར་རོ། །ཕ་མ་དང་འགྲོགས་པའི་བུ་ལྟར་བྱང་ཆུབ་སེམས་དཔའི་སྨོན་ ལམ་གྱི་ལུས་ཐམས་ཅད་ཡང་དག་པར་སྐྱེ་བར་འགྱུར་རོ། །དེ་ལྟར་མདོར་ན། རིགས་ཀྱི་བུ། དགེ་བའི་བཤེས་གཉེན་གྱི་གདམས་ངག་ལ་ཞུགས་པའི་བྱང་ཆུབ་སེམས་ དཔའ་རྣམས་ནི། ཡོན་ཏན་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུ་ནི། རབ་ཏུ་འཛིན་པར་འགྱུར་རོ། །དེའི་ལྷག་པའི་བསམ་པ་བྱེ་བ་ཁྲག་ཁྲིག་བརྒྱ་སྟོང་ ཕྲག་བཅུ་ནི། རབ་ཏུ་འཕེལ་བར་འགྱུར་རོ། །བྱིན་གྱི་རླབས་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི། རྣམ་པར་སྦྱོང་བར་འགྱུར་རོ། །སྒྲིབ་པའི་ཆོས་བྱེ་བ་ཁྲག་ཁྲིག་ བརྒྱ་སྟོང་ཕྲག་བཅུ་ནི། ཡོངས་སུ་སྤྱོད་པར་འགྱུར་རོ། །སྒྲིབ་པའི་ཆོས་གྲངས་མེད་པ་བརྒྱ་སྟོང་ཕྲག་བཅུ་ནི། ཡོངས་སུ་དག་པར་འགྱུར་རོ། །བདུད་གྲངས་མེད་པ་བརྒྱ་སྟོང་ཕྲག་ བཅུ་ལས་ནི། ཡང་དག་པར་འདམ་པར་འགྱུར་རོ། །ཆོས་ཀྱི་སྒོ་གྲངས་མེད་པ་བརྒྱ་སྟོང་ཕྲག་བཅུ་ལ་ནི། རབ་ཏུ་འཇུག་པར་འགྱུར་རོ། །ཚོགས་རྣམ་པར་དག་པའི་སྒོ་གྲངས་མེད་ པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི། ཡོངས་སུ་རྫོགས་པར་འགྱུར་རོ། །སྤྱོད་པ་གྲངས་མེད་པ་བརྒྱ་སྟོང་ཕྲག་བཅུ་ནི། ཀུན་ནས་དག་པར་འགྱུར་རོ། །སྨོན་ལམ་ཆེན་པོ་ གྲངས་མེད་པ་བརྒྱ་སྟོང་ཕྲག་བཅུ་ནི། མངོན་པར་གྲུབ་པར་འགྱུར་རོ། །རིགས་ཀྱི་བུ། དེ་ལྟར་མདོར་ན། བྱང་ཆུབ་སེམས་དཔའི་སྤྱོད་པ་ཐམས་ཅད་དང༌། བྱང་ཆུབ་སེམས་ དཔའི་ཕ་རོལ་ཏུ་ཕྱིན་པ་ཐམས་ཅད་དང༌། བྱང་ཆུབ་སེམས་དཔའི་ས་ཐམས་ཅད་དང༌། བྱང་ཆུབ་སེམས་དཔའི་བཟོད་པ་ལ་འཇུག་པ་ཐམས་ཅད་དང༌། བྱང་ཆུབ་སེམས་དཔའི་ ཏིང་ངེ་འཛིན་གྱི་སྒོ་ཐམས་ཅད་དང༌། བྱང་ཆུབ་སེམས་དཔའི་མངོན་པར་ཤེས་པའི་ཡེ་ཤེས་ཀྱི་རྣམ་པར་འཕྲུལ་པ་ཐམས་ཅད་དང༌། བྱང་ཆུབ་སེམས་དཔའི་གཟུངས་དང་སྤོབས་ པའི་སྣང་བ་ཐམས་ཅད་དང༌། བྱང་ཆུབ་སེམས་དཔའི་བསྔོ་བའི་ཡེ་ཤེས་དང༌། མངོན་པར་ཤེས་པ་ཚད་མེད་པ་ཐམས་ཅད་དང༌། བྱང་ཆུབ་སེམས་དཔའི་སྨོན་ལམ་མངོན་པར་ ༄༅། །སྒྲུབ་པ་ཐམས་ཅད་དང༌། སངས་རྒྱས་ཀྱི་ཆོས་ཐམས་ཅད་རབ་ཏུ་ཐོབ་ཅིང་ཡོངས་སུ་གྲུབ་པ་རྣམས་ནི། དགེ་བའི་བཤེས་གཉེན་ལ་རག་ལས་པ་དང༌། གོ་༑དགེ་བའི་བཤེས་གཉེན་རྩ་བར་གྱུར་པ་དག་གོ །དགེ་བའི་བཤེས་གཉེན་ལས་བྱུང་བ་དག་གོ །དགེ་བའི་བཤེས་གཉེན་སྐྱེ་གནས་སུ་གྱུར་པ་དག་གོ །དགེ་བའི་ བཤེས་གཉེན་སྐྱེ་མཆེད་དུ་གྱུར་པ་དག་གོ །དགེ་བའི་བཤེས་གཉེན་ལས་ཡོངས་སུ་སྐྱེས་པ་དག་གོ །དགེ་བའི་བཤེས་གཉེན་གྱིས་ཡོངས་སུ་སྤེལ་བ་དག་གོ །དགེ་ བའི་བཤེས་གཉེན་ལ་རབ་ཏུ་བརྟེན་པ་དག་གོ །དགེ་བའི་བཤེས་གཉེན་རྒྱུར་གྱུར་པའོ། །དགེ་བའི་བཤེས་གཉེན་ལས་རབ་ཏུ་སྐྱེས་པ་དག་གོ །དེ་ནས་ཚོང་དཔོན་གྱི་ བུ་ནོར་བཟང་གིས་རྣམ་པ་དེ་ལྟ་བུའི་དགེ་བའི་བཤེས་གཉེན་གྱི་ཡོན་ཏན་དང༌། བསྔགས་པ་རྗེས་སུ་བསྟན་པ་དང༌། བྱང་ཆུབ་སེམས་དཔའི་སྤྱོད་པ་ཚད་མེད་པ་དང༌། སངས་རྒྱས་ཀྱི་ཆོས་རྒྱ་ཆེན་པོ་ཐོས་ནས་དགའ་རངས་ཏེ་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས་ཁྱེའུ་དཔལ་འབྱུང་དང༌། བུ་མོ་དཔལ་གྱི་བློ་གྲོས་མ་གཉིས་ ཀྱི་རྐང་པ་ལ་སྤྱི་བོས་ཕྱག་འཚལ་ཏེ་ཁྱེའུ་དཔལ་འབྱུང་བ་དང༌། བུ་མོ་དཔལ་གྱི་བློ་གྲོས་མ་གཉིས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཁྱེའུ་ དཔལ་འབྱུང་བ་དང༌། བུ་མོ་དཔལ་གྱི་བློ་གྲོས་མའི་དྲུང་ནས་སོང་ངོ༌།། །།ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། སྡོང་པོས་བརྒྱན་པའི་ ལེའུ་སྟེ༑ ༑བམ་པོ་བརྒྱ་བཅུ་གཅིག་པ། དེ་ནས་ཚོང་དཔོན་གྱི་བུ་ནོར་བཟང་དགེ་བའི་བཤེས་གཉེན་གྱི་གདམས་ངག་གིས་སེམས་མངོན་པར་བརླན་པ་དེ། བྱང་ཆུབ་སེམས་ དཔའི་སྤྱོད་པ་རྗེས་སུ་བསྟན་པ་དེ་ནི། རྗེས་སུ་རྣམ་པར་སེམས། སྔོན་གྱི་མཐའི་ལུས་མང་པོ་ཡང་དག་པའི་སྤྱོད་པ་ཉམས་སུ་མ་བླངས་པར་ཆུད་ཟོས་པ་ལ་བསམ་པས་ནི། ལུས་ཀྱི་སྟོབས་རབ་ཏུ་བརྟན་པར་བྱེད། སྔོན་གྱི་མཐའི་མུར་ཐུག་པའི་ལུས་དང༌། སེམས་ཡོངས་སུ་དག་ཀྱང་དོན་མེད་པར་འཁོར་བའི་སེམས་ཀྱི་རྒྱུད་དུ་གྱུར་པ་ལ་བསམ་ པས་ནི༑ སེམས་དང་ཡིད་ལ་བྱ་བ་རབ་ཏུ་སྦྱོང༌། སྔོན་གྱི་མཐའི་མུར་ཐུག་པའི་ལས་ཡང་དག་པ་མ་ཡིན་པས་འཇིག་རྟེན་གྱི་དོན་དུ་གཡེན་སྤྱོ་སྟེ་མི་གཅེས་པར་ཤ་ཐང་པ་ ལ་བསམ་པས་ནི། ད་ལྟར་བྱུང་བའི་དོན་ཤིན་ཏུ་གཅེས་པ་ལ་ལེགས་པར་སྒྲུབ་པ་རྣམ་པར་སེམས། སྔོན་གྱི་མཐའི་མུར་ཐུག་པའི་ཡོངས་སུ་རྟོག་པ་ཡང་དག་པ་མ་ཡིན་པར་ རྣམ་པར་བརྟགས་པ་ལས་བྱུང་བ། ཕྱིན་ཅི་ལོག་གིས་ཡིད་ལ་བྱ་བའི་ཀུན་ནས་གླགས་པ་ལ་བསམ་པས་ནི། བྱང་ཆུབ་སེམས་དཔའི་སྤྱོད་པ་ཐམས་ཅད་ཡང་དག་པའི་རྟོག་ ༄༅། །པས་མངོན་པར་འདུ་བྱ་བའི་སྟོབས་ཡང་དག་པར་སྐྱེད། འདས་པའི་ལུས་ཀྱིས་བདག་གི་དོན་གྱི་སྦྱོར་པ་ལ་རྩོམ་རྩོམ་པའི་ཡུལ་ལ་ཡོངས་སུ་བསམ་ པས་ནི། སེམས་ཅན་ཐམས་ཅད་ཀྱི་སྦྱོར་བ་ལས་ཁྱད་པར་དུ་འཕགས་པར་ལྷག་པའི་བསམ་པས་ནི། སྟོབས་རབ་ཏུ་བརྟན་པར་བྱེད། སྔོན་འདོད་པ་ཡོངས་སུ་ཚོལ་ཚོལ་བའི་ སྤྱོད་པ་རོ་མེད་པ་ལ་ཡོངས་སུ་བསམ་པས་ནི། སངས་རྒྱས་ཀྱི་ཆོས་ཐམས་ཅད་འཐོབ་པའི་སྦྱོར་བས་དབུགས་ཕྱིན་པ་ཆེན་པོ་འཐོབ་པའི་དབང་པོའི་ཤུགས་དྲག་པོ་རྣམ་ པར་འཕེལ་བར་བྱེད། འདས་པའི་དུས་ཀྱི་ལྷག་པའི་བསམ་པ་ཕྱིན་ཅི་ལོག་དང་ལྡན་པའི་སྦྱོར་བ་ལ་ཡོངས་སུ་བསམ་པས་ནི། ད་ལྟར་བྱུང་བའི་དུས་སུ་ཕྱིན་ཅི་ལོག་མེད་ པ་དང་ལྡན་པའི་ཡང་དག་པའི་ལྟ་བ་དང༌། བྱང་ཆུབ་སེམས་དཔའི་སྨོན་ལམ་ལ་ཡི་དམ་བཅའ་བས་སེམས་ཀྱི་རྒྱུད་ཡོངས་སུ་རྒྱས་པར་བྱེད། སྔོན་གྱི་མཐའི་བརྩོན་འགྲུས་ བརྩམས་པ་མི་ཆ་ལ་དོན་མ་ཡིན་པ་དང༌། ཡོངས་སུ་མ་གྲུབ་པའི་བརྩོན་འགྲུས་ཉམས་སུ་བླངས་པ་ལ་ཡོངས་སུ་བསམ་པས་ནི། ད་ལྟར་བྱུང་བའི་དུས་སུ་སངས་རྒྱས་ཀྱི་ ཆོས་ཡོངས་སུ་བསྡུ་བ་ལ་སྟ་གོན་དུ་གནས་པའི་བརྩོན་འགྲུས་ཆེན་པོ་རྩོམ་པའི་རྣམ་པར་གནོན་པས་ལུས་དང་སེམས་ཀྱི་གཟེངས་མཐོ་བ་ཡང་དག་པར་སྐྱེད། སྔོན་གྱི་ མཐའི་མུར་ཐུག་པའི་འགྲོ་བ་ལྔའི་རྒྱུད་ཀྱི་ངན་སོང་དུ་བདག་དང་གཞན་བོར་བ་ལ་བརྟག་པས་ལུས་འཚོ་བ་མེད་པ་ཡོངས་སུ་བཟུང་བ་ལ་ཡང་དག་པར་བསམ་པས་ནི། སངས་རྒྱས་ ཀྱི་ཆོས་ཐམས་ཅད་ཡོངས་སུ་སྒྲུབ་པ་དང༌། འགྲོ་བ་ཐམས་ཅད་ཉེ་བར་འཚོ་བ་དང༌། དགེ་བའི་བཤེས་གཉེན་ཐམས་ཅད་བསྙེན་བཀུར་བར་ནུས་པའི་ལུས་ཡོངས་སུ་བཟུང་བས་ དགའ་བ་དང༌། མོས་པའི་ཤུགས་དྲག་པོ་རྒྱ་ཆེན་པོ་རྣམ་པར་འཕེལ་བར་བྱེད། ད་ལྟར་བྱུང་བའི་ཚེར་མངོན་པར་གྲུབ་ཀྱང་དགའ་བ་དང༌། ན་བ་དང༌། འཆི་བ་དང༌། མྱ་ངན་ གྱི་འབྱུང་གནས་སུ་གྱུར་ཏེ། འདུ་བ་དང་འབྲལ་བའི་གཏེར་དུ་གྱུར་པའི་ལུས་ཀྱང་ཕྱི་མའི་མཐའི་བསྐལ་པའི་མུར་ཐུག་པར་བྱང་ཆུབ་སེམས་དཔའི་སྤྱོད་པ་སྤྱད་པ་ལ་བརྩོན་ པ་དང༌། སེམས་ཅན་ཡོངས་སུ་སྨིན་པར་བྱ་བ་དང༌། སངས་རྒྱས་ཀྱི་ཆོས་ཡོངས་སུ་བསྡུ་བ་ལ་བརྩོན་པ་དང༌། དེ་བཞིན་གཤེགས་པའི་ཞལ་ལྟ་ཞིང་ཞིང་ཐམས་ཅད་དུ་རྒྱུ་བ་ དང༌། ཆོས་སྨྲ་བ་ཐམས་ཅད་ལ་རིམ་གྲོར་བྱ་བ་དང༌། དེ་བཞིན་གཤེགས་པ་ཐམས་ཅད་ཀྱི་བསྟན་པ་ཡོངས་སུ་བཟུང་བ་ལ་བརྩོན་པ་དང༌། ཆོས་ཐམས་ཅད་ཡོངས་སུ་བཙལ་ བའི་གྲོགས་སུ་གྱུར་པ་དང༌། དགེ་བའི་བཤེས་གཉེན་ཐམས་ཅད་མཐོང་བར་བྱ་བ་དང༌། སངས་རྒྱས་ཀྱི་ཆོས་ཐམས་ཅད་ཡང་དག་པར་བསྡུ་བ་ལ་བརྩོན་པའི་བྱང་ཆུབ་སེམས་ ༄༅། །དཔའི་སྨོན་ལམ་དང༌། ཡེ་ཤེས་ཀྱི་ལུས་ཀྱི་རྒྱུ་དང་རྐྱེན་དུ་གྱུར་པ་ལ་བལྟས་ཤིང༌། དགེ་བའི་རྩ་བའི་དབང་པོ་དང༌། ཤུགས་བསམ་གྱིས་མི་ཁྱབ་ པ་རྣམ་པར་འཕེལ་བར་བྱེད་ཅིང་དེ་ལྟ་བུའི་སེམས་དང༌། དེ་ལྟ་བུའི་ཡིད་ལ་བྱ་བ་དང༌། ཚུལ་བཞིན་དེ་ལྟ་བུ་ལ་རབ་ཏུ་བརྩོན་པ་དང༌། བྱང་ཆུབ་སེམས་དཔའ་ཐམས་ཅད་ ཀྱི་མོས་པས་ཡང་དག་པར་བསྒྲུབས་པའི་དད་པ་དང༌། བྱང་ཆུབ་སེམས་དཔའ་ཐམས་ཅད་ཀྱི་བསམ་པས་ཡོངས་སུ་བསྒྲུབས་པའི་ཉེ་བར་སེམས་པ་དང༌། བྱང་ཆུབ་སེམས་ དཔའ་ཐམས་ཅད་ཀྱི་ལྷག་པའི་བསམ་པས་སྒྲོ་བཏགས་པའི་རིམ་གྲོ་དང༌། བྱང་ཆུབ་སེམས་དཔའ་ཐམས་ཅད་ཀྱི་དབང་པོ་དང་བར་སྒྲོ་བཏགས་པའི་ཕུ་དུད་དང༌། བྱང་ ཆུབ་སེམས་དཔའ་ཐམས་ཅད་ཀྱི་སྟོན་པ་ལ་མོས་པས་ཡང་དག་པར་བསྒྲུབས་པའི་དབང་པོ་དང་བའི་ཤུགས་དང༌། བྱང་ཆུབ་སེམས་དཔའ་ཐམས་ཅད་ལ་རིམ་གྲོས་ བྱུང་བའི་སེམས་ཀྱི་མོས་པ་དང༌། བྱང་ཆུབ་སེམས་དཔའ་ཐམས་ཅད་ཀྱི་དད་པ་ལས་ཡོངས་སུ་བྱུང་བའི་དགེ་བའི་རྩ་བའི་ཚོགས་དང༌། བྱང་ཆུབ་སེམས་དཔའི་མངོན་ པར་འདུ་བྱ་བ་ཐམས་ཅད་ལས་ཡོངས་སུ་གྲུབ་པའི་མཆོད་པ་རྣམ་པ་ཐ་དད་པ་དང༌། བྱང་ཆུབ་སེམས་དཔའ་ཐམས་ཅད་དང་མཉམ་པའི་ལུས་ཀྱི་ཐལ་མོ་སྦྱར་བ་དང༌། འགྲོ་བའི་ལུས་ཐམས་ཅད་དུ་ཡོངས་སུ་བྱུང་བའི་མིག་རྣམ་པ་སྣ་ཚོགས་ཀྱིས་བལྟ་བ་དང༌། འགྲོ་བར་མིང་བཏགས་པ་ཐམས་ཅད་དུ་སྒྲོ་བཏགས་པའི་བྱང་ཆུབ་སེམས་དཔའ་ ཐམས་ཅད་ཀྱི་ཆོས་མཉམ་པ་ཉིད་རྣམས་དང༌། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱིས་སྤྲུལ་པ་ལས་བྱུང་བར་སྒྲོ་བཏགས་པའི་ལུས་ཀྱིས་འདུད་ཅིང་ཕྱག་བྱ་བ་ ཚད་མེད་པ་དང༌། བྱང་ཆུབ་སེམས་དཔའ་ཐམས་ཅད་ཀྱི་དབྱངས་ཀྱི་ཡན་ལག་རྣམ་པར་དག་པ་ལས་བྱུང་བའི་ལེགས་པ་བརྗོད་པའི་རྒྱན་མངོན་པར་སྒྲུབ་པ་དང༌། སྔོན་གྱི་ མཐའ་དང༌། ད་ལྟར་བྱུང་བའི་དུས་སུ་བྱུང་བའི་སེམས་ཅན་གྱི་གནས་ཀྱི་གནས་ཐམས་ཅད་ཡོངས་སུ་རྒྱས་པའི་དེ་བཞིན་གཤེགས་པའི་ཕོ་བྲང་མངོན་དུ་བྱས་པའི་འདུ་ཤེས་ ཀྱི་རྣམ་པ་དང༌། དེ་བཞིན་གཤེགས་པ་དང༌། བྱང་ཆུབ་སེམས་དཔའི་རྣམ་པར་འཕྲུལ་པས་མངོན་པར་རྫོགས་པར་འཚང་རྒྱ་བ་ཐམས་ཅད་དུ་ཁྱབ་པ་དང༌། སྐྲའི་རྩེ་མོ་ གཅིག་ལས་ཀྱང་ལྷག་པ་མེད་པར་བྱང་ཆུབ་སེམས་དཔའ་ཐམས་ཅད་ཀྱིས་རྒྱས་པར་འགེངས་པའི་རྗེས་སུ་སོང་བ་དང༌། བྱང་ཆུབ་སེམས་དཔའ་ཐམས་ཅད་ཀྱི་མིག་གི་ལམ་ རྣམ་པར་དག་པར་སྒྲོ་བཏགས་པའི་མངོན་པར་ཤེས་པ་སྣང་བས་རྣམ་པར་དམིགས་པ་དང༌། ཕྱོགས་ཀྱི་དྲ་བ་ཐ་དད་པ་ཐམས་ཅད་ཀྱི་རྗེས་སུ་སོང་བའི་ཡིད་ཀྱི་སྐྱེ་མཆེད་དང༌། ༄༅། །ཆོས་ཀྱི་དབྱིངས་ཀྱི་གཞི་ཐ་དད་པ་རྒྱས་པར་འགེངས་པའི་སྨོན་ལ་མ་མངོན་པར་སྒྲུབ་པའི་སྟོབས་དང༌། ཆོས་ཐམས་ཅད་ལ་འཇུག་པའི་སྒོ་ནམ་ མཁའི་དབྱིངས་ཀྱིས་ཀླས་ཏེ་མཐས་གཏུགས་པར་ཐམས་ཅད་དུ་ཁྱབ་ལ། དུས་གསུམ་དུ་ཐ་མི་དད་ཅིང་རྒྱུན་མི་འཆད་པ་དང༌། དད་པ་དང༌། མོས་པ་ལ་འཇུག་པའི་སྟོབས་ དགེ་བའི་བཤེས་གཉེན་གྱི་གདམས་ངག་སྣང་བའི་ཕྱོགས་ལ་ཞུགས་པས་ཡུལ་རྒྱ་མཚོའི་འགྲམ་གང་ན་བ་དེར་ཕྱིན་ཏེ། དེ་ལྟར་ཚོང་དཔོན་གྱི་བུ་ནོར་བཟང་རིམ་གྲོ་དང་ ཕུ་དུད་དང༌། མཆོད་པ་དང༌། བསྟོད་པ་དང༌། ཕྱག་བྱ་བ་དང༌། བལྟ་བའི་བྱིན་གྱི་རླབས་དང༌། སྨོན་ལམ་དང༌། འདུ་ཤེས་ཀྱི་རྗེས་སུ་སོང་བ་དེ་ལྟ་བུའི་ཡིད་དང་ལྡན་པ་ དང༌། ཡེ་ཤེས་ཀྱི་སྤྱོད་ཡུལ་ཚད་མེད་པའི་ས་དེ་ལྟ་བུ་ལ་ཞུགས་པའི་ཡེ་ཤེས་ཀྱི་མིག་གིས་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་ སྙིང་པོའི་སྒོ་ནས་ལུས་ཐམས་ཅད་ཀྱིས་ཕབ་སྟེ་ཕྱག་བྱས་སོ། །དེས་རྣམ་པ་དེ་ལྟ་བུའི་མངོན་པར་སྒྲུབ་པའི་ཚུལ་ཡུད་ཙམ་དུ་རྣམ་པར་དཔྱད་དེ་མོས་པ་དང༌། དད་པ་ ལས་བྱུང་བའི་ལྷག་པའི་བསམ་པ་དང༌། སྨོན་ལམ་གྱིས་མངོན་པར་བསྒྲུབས་པའི་མཐུས་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་བདག་ཉིད་རྒྱུན་མི་ འཆད་པར་བྱིན་གྱིས་བརླབས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་དང་མངོན་སུམ་དུ་གནས་པ་དང༌། དགེ་བའི་བཤེས་གཉེན་གྱིས་གནས་ཐམས་ཅད་དང༌། དེ་བཞིན་གཤེགས་པའི་མཆོད་རྟེན་ཐམས་ཅད་དང༌། དེ་བཞིན་གཤེགས་པའི་སྐུ་གཟུགས་ཐམས་ཅད་དང༌། སངས་རྒྱས་དང་བྱང་ཆུབ་སེམས་དཔའི་ཕོ་བྲང་ཐམས་ཅད་ དང༌། ཆོས་རིན་པོ་ཆེའི་གནས་ཐམས་ཅད་དང༌། ཉན་ཐོས་དང༌། རང་སངས་རྒྱས་ཐམས་ཅད་ཀྱི་གནས་དང༌། མཆོད་རྟེན་ཐམས་ཅད་མངོན་སུམ་དུ་གནས་པ་ནས་འཕགས་ པའི་ཚོགས་དང༌། སྦྱིན་པའི་གནས་དང༌། བླ་མ་དང༌། ཕ་མ་ཐམས་ཅད་ཀྱི་བར་གྱི་འགྲོ་བའི་ཚོགས་ཐམས་ཅད་དང༌། མངོན་སུམ་དུ་གནས་པ་རྒྱུན་མི་འཆད་པར་ཡེ་ཤེས་ ཀྱི་ལུས་ཐ་མི་དད་པའི་ཚུལ་ལ་འཇུག་པ་ཐམས་ཅད་ཀྱི་རྗེས་སུ་སོང་བ་དང༌། འདུ་ཤེས་ཀྱི་བྱིན་གྱི་རླབས་དང༌། ཡེ་ཤེས་ཡིད་ལ་བྱ་བས་བྱིན་གྱིས་བརླབས་སོ། །ཁང་པ་ བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོའི་སྒོ་ནས་ཇི་ལྟ་བ་དེ་བཞིན་དུ་གོང་དུ་བརྗོད་པའི་དམིགས་པ་ཐམས་ཅད་ལ་ཡང་ཆོས་ཀྱི་དབྱིངས་ ཐམས་ཅད་རྒྱས་པར་འགེངས་པས་འདུད་ཅིང་ཕྱག་བྱ་བར་བྱིན་གྱིས་བརླབ་སོ། །དེ་བཞིན་དུ་ཕྱི་མའི་མཐའི་མུར་ཐུག་པར་རྒྱུན་འཆད་པ་མེད་པར་བྱིན་གྱིས་བརླབས་ཏེ། ༄༅། །ནམ་མཁའི་དབྱིངས་ཚད་མེད་པ་དང་མཉམ་པ་ཉིད་དང༌། ཆོས་ཀྱི་དབྱིངས་སྒྲིབ་པ་མེད་པ་དང་མཉམ་པ་ཉིད་དང༌། ཡང་དག་པའི་མཐའ་ཐམས་ ཅད་ཀྱི་རྗེས་སུ་སོང་བ་དང་མཉམ་པ་ཉིད་དང༌། དེ་བཞིན་ཉིད་རྣམ་པར་མི་རྟོག་པ་དང་མཉམ་པ་ཉིད་དང༌། གྲིབ་མ་ལྟ་བུའི་ཡེ་ཤེས་དང་འདུ་ཤེས་ཀྱིས་རྒྱས་པར་དགང་ བ་མཉམ་པ་ཉིད་དང༌། རྨི་ལམ་ལྟ་བུའི་རྣམ་པར་དཔྱོད་པ་དང་མཉམ་པ་ཉིད་དང༌། གཟུགས་བརྙན་ལྟ་བུར་འཇིག་རྟེན་དང་འགྲོ་བ་ཐམས་ཅད་རྣམ་པར་དམིགས་ པའི་མཉམ་པ་ཉིད་དང༌། རྒྱུ་དང་རྐྱེན་ལས་བྱུང་བས་སྒྲ་བརྙན་ལྟ་བུའི་མཉམ་པ་ཉིད་དང༌། འབྱུང་བ་དང་འཇིག་པ་མི་སྐྱེ་བ་དང་མཉམ་པའི་མཉམ་པ་ཉིད་དང༌། རྐྱེན་ དང་རྟེན་པའི་རྒྱུད་དངོས་པ་མེད་པའི་རང་བཞིན་དང་མཉམ་པའི་མཉམ་པ་ཉིད་ཀྱིས་ལས་ཇི་ལྟ་བ་བཞིན་དུ་ཡོངས་སུ་བྱུང་བའི་རྣམ་པར་སྨིན་པ་ལ་ནི། མོས་པར་བྱེད། རྒྱུ་ ཇི་ལྟ་བ་བཞིན་དུ་ཡོངས་སུ་བྱུང་བའི་འབྲས་བུ་ལ་ནི། མོས་པར་བྱེད། བསགས་པ་ཇི་ལྟ་བ་བཞིན་དུ་ཡོངས་སུ་བྱུང་བའི་བྱ་བ་ཐམས་ཅད་ལ་ནི། མོས་པར་བྱེད། དད་པ་ ལས་ཡོངས་སུ་བྱུང་བའི་དེ་བཞིན་གཤེགས་པ་འབྱུང་བ་ཐམས་ཅད་ལ་ནི། མོས་པར་བྱེད། མོས་པ་ཇི་ལྟ་བ་བཞིན་དུ་ཡོངས་སུ་བྱུང་བའི་སངས་རྒྱས་མཆོད་པའི་སྤྲུལ་པ་ ཐམས་ཅད་ལ་ནི། མོས་པར་བྱེད། རིམ་གྲོ་ལས་བྱུང་བའི་དེ་བཞིན་གཤེགས་པའི་སྤྲུལ་པ་ཐམས་ཅད་ལ་ནི། མོས་པར་བྱེད། དགེ་བའི་རྩ་བའི་ཚོགས་ལས་ཡོངས་སུ་འབྱུང་བའི་ སངས་རྒྱས་ཐམས་ཅད་ཀྱི་ཆོས་ཉིད་ལ་ནི། མོས་པར་བྱེད། ཤེས་རབ་དང་ཐབས་ལས་ཡོངས་སུ་བྱུང་བའི་རྒྱན་ཡིད་ཀྱི་རང་བཞིན་དུ་སྒྲུབ་པ་ཐམས་ཅད་ལ་ནི། མོས་པར་བྱེད། སྨོན་ལམ་ལས་ཡོངས་སུ་བྱུང་བའི་སངས་རྒྱས་ཀྱི་ཆོས་ཐམས་ཅད་ལ་ནི། མོས་པར་བྱེད། བསྔོ་བ་ལས་ཡོངས་སུ་བྱུང་བའི་བྱང་ཆུབ་སེམས་དཔའི་སྤྱོད་པ་ཐམས་ཅད་དང༌། ཆོས་ཀྱི་དབྱིངས་ཐམས་ཅད་མཁྱེན་པའི་ཡུལ་དུ་གྱུར་པ་རྣམ་པར་སྒྲུབ་པས་རྒྱས་པར་དགང་པའི་རྒྱན་ལ་ནི། མོས་པར་བྱེད་ཅིང༌། ཡོངས་སུ་བསྔོ་བའི་ཡེ་ཤེས་ཚད་མེད་པའི་ འདུ་ཤེས་དང་བྲལ་བ་དང༌། སྐྱེ་བ་མེད་པའི་ཡེ་ཤེས་རྟོག་པའི་འདུ་ཤེས་མེད་པ་དང༌། ཡང་དག་པའི་སྤྱོད་པ་ལ་འཇུག་ཅིང་། རྒྱུ་ཉེ་བར་གསོག་པའི་ཡེ་ཤེས་རྒྱུ་དང་བྱ་བའི་ ལྟ་བ་མེད་པ་དང༌། ཕྱིན་ཅི་ལོག་མེད་པའི་ཡེ་ཤེས་ཕྱིན་ཅི་ལོག་གི་ལྟ་བ་དང་བྲལ་བ་དང༌། གཞན་གྱི་དྲིང་མི་འཇོག་པའི་ཡེ་ཤེས་དབང་ཕྱུག་ཏུ་ལྟ་བ་མེད་པ་དང༌། རྟེན་ པ་ལ་འཇུག་པའི་ཡེ་ཤེས་བདག་དང་ཕྱི་རོལ་གྱི་འདུ་ཤེས་ཀྱི་ལྟ་བ་དང་བྲལ་བ་དང༌། ཆོས་ཀྱི་དབྱིངས་མཐའ་དང་དབུས་མེད་པ་ལ་འཇུག་པའི་ཡེ་ཤེས་མཐར་འཛིན་པའི་ ༄༅། །ལྟ་བ་དང་བྲལ་བ་དང༌། གཟུགས་བརྙན་ལྟ་བུར་མངོན་པར་གྲུབ་པའི་ཡེ་ཤེས་འཕོ་བའི་ལྟ་བ་མེད་པ་དང༌། མི་སྐྱེ་མི་འགག་པའི་ཡེ་ཤེས་སྐྱེ་བ་དང་ འཇིག་པའི་ལྟ་བ་དང་བྲལ་བ་དང༌། སྟོང་པ་ཉིད་ཀྱིས་མི་སྐྱེ་བའི་ཡེ་ཤེས་ལྟ་བའི་རྣམ་པ་ཐམས་ཅད་དང་བྲལ་བ་དང༌། སྨོན་ལམ་མངོན་པར་སྒྲུབ་པའི་ཡེ་ཤེས་ཀྱི་སྟོབས་ དབང་ཕྱུག་མེད་པའི་ཆོས་ཉིད་རབ་ཏུ་རྟོགས་པ་དང༌། མཚན་མ་མེད་པའི་མཐའི་སྒོ་དང་ལྡན་པའི་ཡེ་ཤེས་མཚན་མ་ཐམས་ཅད་དང་བྲལ་བས་ས་བོན་ལས་མྱུ་གུ་ཆུད་མི་ཟ་ བའི་ཆོས་ཉིད་དང༌། རྒྱ་ལས་རྒྱའི་གཟུགས་བརྙན་འབྱུང་བའི་ཆོས་ཉིད་དང༌། གཟུགས་ལས་གཟུགས་བརྙན་འབྱུང་བའི་ཆོས་ཉིད་དང༌། སྒྲ་བརྙན་དང་སྒྲར་མཉམ་པ་རྣམ་ པར་དམིགས་པའི་ཆོས་ཉིད་དང༌། རྣམ་པར་དཔྱོད་པ་དང་རྨི་ལམ་དུ་མཉམ་པར་རྣམ་པར་དམིགས་པའི་ཆོས་ཉིད་དང༌། སེམས་གཟུགས་མེད་པས་འཇིག་རྟེན་ཡོངས་སུ་ བསྐྱེད་པའི་ཆོས་ཉིད་དང༌། རྐྱེན་དང་རྒྱུ་ཇི་ལྟར་བསགས་པ་བཞིན་དུ་འབྲས་བུ་འབྱུང་བའི་ཆོས་ཉིད་དང༌། ལས་ཇི་ལྟར་བསགས་པ་དང་མཉམ་པར་རྣམ་པར་སྦྱིན་པ་ འབྱུང་བའི་ཆོས་ཉིད་དང༌། ཐབས་མཁས་པས་རྣམ་པར་བསྒྲུབས་པའི་ཆོས་ཉིད་དང༌། ཆོས་དང་ཆོས་མ་ཡིན་པ་མཉམ་པ་ཉིད་ཀྱིས་མངོན་པར་བརླན་པའི་ཆོས་ཉིད་ དང༌། ཡེ་ཤེས་ཀྱི་རྗེས་སུ་འཇུག་པ་དེ་ལྟ་བུས་མངོན་པར་བསྒྲུབས་པའི་འདུ་ཤེས་དང་ཡིད་ལ་བྱ་བས། ཚོང་དཔོན་གྱི་བུ་ནོར་བཟང་གིས་ཁང་པ་བརྩེགས་པ་རྣམ་པར་སྣང་མཛད་ ཀྱི་རྒྱན་གྱིས་བརྒྱན་པའི་སྙིང་པོའི་སྒོ་ནས་རྣམ་པ་དེ་ལྟ་བུར་བཏུད་དེ་ཕྱག་འཚལ་ནས་ཡུན་རིང་མོ་ཞིག་ལོན་པ་དང༌། དགེ་བའི་རྩ་བའི་ཤུགས་བསམ་གྱིས་མི་ཁྱབ་པས་མངོན་ པར་བརླན་པའི་སེམས་དང་ལྡན་པ། ལུས་དང་སེམས་ཤིན་ཏུ་སིམ་པར་གྱུར་པ་དེ་ཁང་པ་བརྩེགས་པའི་གནས་ནས་ལངས་ཏེ་ཡུད་ཙམ་ཞིག་ཏུ་ཁང་པ་བརྩེགས་པ་ཆེན་པོ་ རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་དེ་ལ་མིག་མི་འགེངས་པས་བལྟས་ནས་ཐལ་མོ་སྦྱར་ཏེ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་དེ་ལྟ་ བུའི་འདུ་ཤེས་དང་ཡིད་ལ་བྱ་བས་བསྐུལ་བའི་སེམས་དང་ལྡན་པས་ཚིག་ཏུ་བརྗོད་པ། འདི་ནི། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའི་གནས་ལ་རྣམ་པར་ སྤྱོད་པ་རྣམས་ཀྱི་གནས་སོ། །འདི་ནི། ཆོས་ཐམས་ཅད་ལ་རྣམ་པར་མི་རྟོག་པའི་གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །ཆོས་ཀྱི་དབྱིངས་ཐ་མི་དད་པའི་གནས་ ལ་རྣམ་པར་སྤྱོད་པ། སེམས་ཅན་གྱི་ཁམས་མི་དམིགས་པའི་གནས་ལ་རྣམ་པར་སྤྱོད་པ། ཆོས་ཐམས་ཅད་གནས་མེད་པའི་གནས་ལ་རྣམ་པར་སྤྱོད་པ། འཇིག་རྟེན་ ༄༅། །ཐམས་ཅད་གནས་མེད་པའི་གནས་ལ་རྣམ་པར་སྤྱོད་པ། འགྲོ་བ་ཐམས་ཅད་ཀྱི་གནས་གནས་མེད་པའི་གནས་ལ་རྣམ་པར་སྤྱོད་པ། གནས་ཐམས་ ཅད་རྣམ་པར་བསྒོམས་པའི་གནས་ལ་རྣམ་པར་སྤྱོད་པ། བརྟེན་པ་ཐམས་ཅད་ལ་མི་རྟེན་པའི་གནས་ལ་རྣམ་པར་སྤྱོད་པ། ལུས་ཐམས་ཅད་ལ་མི་རྟེན་པའི་གནས་ ལ་རྣམ་པར་སྤྱོད་པ། འདུ་ཤེས་ཀྱི་རྣམ་པ་ཐམས་ཅད་བསལ་བའི་གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །འདི་ནི། ཆོས་ཐམས་ཅད་རང་བཞིན་མེད་པའི་ གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །རྟོག་པ་དང༌། རྣམ་པར་རྟོག་པ་དང༌། ཡོངས་སུ་རྟོག་པ་ཐམས་ཅད་དུ་རྣམ་པར་མི་རྟོག་པའི་གནས་ལ་རྣམ་པར་སྤྱོད་ པ༑ འདུ་ཤེས་དང༌། སེམས་དང༌། ཡིད་ཐམས་ཅད་ཀྱིས་རྣམ་པར་དབེན་པའི་གནས་ལ་སྤྱོད་པ། ལམ་ཐམས་ཅད་བླང་བ་མེད་པ་དང༌། དོར་བ་མེད་པའི་གནས་ལ་རྣམ་པར་ སྤྱོད་པ༑ ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་འཇུག་པའི་གནས་ལ་རྣམ་པར་སྤྱོད་པ། སྒོ་ཀུན་ནས་ཆོས་ཀྱི་དབྱིངས་རྒྱས་པར་འགེངས་པའི་ཐབས་ཀྱི་གནས་ལ་རྣམ་ པར་སྤྱོད་པ། ཉོན་མོངས་པ་ཐམས་ཅད་ཞི་ཞིང་ཉེ་བར་ཞི་བའི་གནས་ལ་རྣམ་པར་སྤྱོད་པ། ལྟ་བ་དང༌། སྲེད་པ་དང༌། ང་རྒྱལ་ཐམས་ཅད་སྤངས་པའི་ཤེས་རབ་ཤས་ཆེ་ བའི་གནས་ལ་རྣམ་པར་སྤྱོད་པ། བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པ་དང༌། མངོན་པར་ཤེས་པ་དང༌། རིགས་པ་སྐྱེད་པ་ཐམས་ ཅད་ལ་རྣམ་པར་རོལ་པའི་གནས་ལ་རྣམ་པར་སྤྱོད་པ། བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་གྱི་སྤྱོད་ཡུལ་སྒོམ་པའི་གནས་ལ་རྣམ་པར་སྤྱོད་པ་རྣམས་ཀྱི་ གནས་སོ། །འདི་ནི། སངས་རྒྱས་ཐམས་ཅད་ཀྱི་ཞབས་ཀྱི་དྲུང་ན་ཉེ་བར་གནས་པའི་གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །འདི་ནི། གང་དེ་དག་བསྐལ་པ་གཅིག་ ལ་བསྐལ་པ་ཐམས་ཅད་དང༌། བསྐལ་པ་ཐམས་ཅད་ལ་བསྐལ་པ་གཅིག་ཏུ་འཇུག་པའི་གནས་ལ་རྣམ་པར་སྤྱོད་པ། གང་དེ་དག་ཞིང་གཅིག་དང་ཞིང་ཐམས་ཅད་དུ་ཞིང་ ཐམས་ཅད་དང་ཞིང་གཅིག་ཏུ་ཐ་མི་དད་པའི་གནས་ལ་རྣམ་པར་སྤྱོད་པ། གང་དེ་དག་ཆོས་གཅིག་དང་ཆོས་ཐམས་ཅད་དུ་ཆོས་ཐམས་ཅད་དང་ཆོས་གཅིག་ཏུ་མི་འགལ་ བའི་གནས་ལ་རྣམ་པར་སྤྱོད་པ། གང་དེ་དག་སེམས་ཅན་གཅིག་དང་སེམས་ཅན་ཐམས་ཅད་དུ་སེམས་ཅན་ཐམས་ཅད་དང་སེམས་ཅན་གཅིག་ཏུ་ཐ་མི་དད་པའི་གནས་ ལ་རྣམ་པར་སྤྱོད་པ། གང་དེ་དག་སངས་རྒྱས་གཅིག་དང་སངས་རྒྱས་ཐམས་ཅད་དུ་སངས་རྒྱས་ཐམས་ཅད་དང་སངས་རྒྱས་གཅིག་ཏུ་མི་གནས་ལ་རྣམ་པར་སྤྱོད་པ། ༄༅། །གང་དེ་དག་དུས་ཐམས་ཅད་ལ་སྐད་ཅིག་གཅིག་གིས་འཇུག་པའི་གནས་ལ་རྣམ་པར་སྤྱོད་པ། གང་དེ་དག་སེམས་བསྐྱེད་པ་གཅིག་གིས་ཞིང་ཐམས་ ཅད་དུ་འགྲོ་བའི་གནས་ལ་རྣམ་པར་སྤྱོད་པ། གང་དེ་དག་སེམས་ཅན་ཐམས་ཅད་ཀྱི་གནས་སུ་གཟུགས་བརྙན་སྣང་བའི་གནས་ལ་རྣམ་པར་སྤྱོད་པ། གང་དེ་དག་ འཇིག་རྟེན་ཐམས་ཅད་ལ་ཕན་པ་དང་བདེ་བའི་སེམས་ཀྱི་གནས་ལ་རྣམ་པར་སྤྱོད་པ། གང་དེ་དག་ཐོབ་པར་བྱ་བ་ཐམས་ཅད་རང་ལ་རག་ལས་པའི་གནས་ལ་རྣམ་ པར་སྤྱོད་པ་དེ་དག་གི་གནས་སོ། །འདི་ནི། གང་དེ་དག་འཇིག་རྟེན་གྱི་གནས་ཐམས་ཅད་ལས་གྱེན་དུ་འཕགས་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་ བའི་ཕྱིར་འགྲོ་བ་ཐམས་ཅད་ཀྱི་གནས་ན་སྣང་བ་དང༌། གང་དེ་དག་ཞིང་ཐམས་ཅད་ལ་མི་གནས་ཀྱང་དེ་བཞིན་གཤེགས་པ་ཐམས་ཅད་ལ་མཆོད་པ་བྱ་བའི་ཕྱིར་ཞིང་ ཐམས་ཅད་དུ་རྗེས་སུ་སྤྱོད་པ་དང༌། གང་དེ་དག་སངས་རྒྱས་ཀྱི་ཞིང་ཐམས་ཅད་ཀྱི་རྒྱན་ཡོངས་སུ་གཟུང་བའི་ཕྱིར་ཞིང་ཐམས་ཅད་དུ་རྗེས་སུ་སྤྱོད་ཀྱང་གནས་ནས་ གཡོ་བ་མེད་པ་དང༌། གང་དེ་དག་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་འདུག་ཀྱང་སངས་རྒྱས་ཀྱི་འདུ་ཤེས་སུ་མངོན་པར་ཞེན་པ་དང་བྲལ་བ་དང༌། གང་དེ་དག་དགེ་བའི་བཤེས་གཉེན་ཐམས་ཅད་ལ་བརྟེན་པའི་གནས་ལ་རྣམ་པར་སྤྱོད་ཀྱང་འགྲོ་བ་ཐམས་ཅད་ན་དེའི་ཡེ་ཤེས་ལ་མཉམ་ཞིང་འདྲ་བ་མེད་པ་དང༌། གང་དེ་ དག་བདུད་ཀྱི་གནས་ཐམས་ཅད་ན་སྤྱོད་ཀྱང་འདོད་པའི་ཡོན་ཏན་གྱི་དགའ་བ་དང་བྲལ་བ་དང༌། གང་དེ་དག་འདུ་ཤེས་ཀྱི་རྣམ་པའི་གནས་ཐམས་ཅད་ལ་རྣམ་པར་སྤྱོད་ཀྱང་ འདུ་ཤེས་ཀྱི་རྣམ་པ་ཐམས་ཅད་རྣམ་པར་བསལ་བའི་ཡིད་དང་ལྡན་པ་དང༌། གང་དེ་དག་འགྲོ་བ་ཐམས་ཅད་དུ་ཁྱབ་པའི་ལུས་དང་ལྡན་ཡང་བདག་དང་སེམས་ཅན་དུ་གཉིས་ སུ་བྱ་བར་མི་སྤྱོད་པ་དང༌། གང་དེ་དག་འཇིག་རྟེན་གྱི་ཁམས་ཐམས་ཅད་ཀྱི་ཁོང་དུ་ཆུད་པའི་ལུས་དང་ལྡན་ཡང་ཆོས་ཀྱི་དབྱིངས་ཐ་དད་དུ་བྱ་བའི་གནས་ལ་རྣམ་པར་མི་ སྤྱོད་པ་དང༌། གང་དེ་དག་མ་འོངས་པའི་བསྐལ་པ་ཐམས་ཅད་དུ་གནས་པར་བྱ་བའི་སྨོན་ལམ་དང་ལྡན་ཡང་བསྐལ་པ་རིང་པ་དང་ཐུང་བའི་འདུ་ཤེས་ཀྱི་རྣམ་པས་རྣམ་ པར་མི་སྤྱོད་པ་དང༌། གང་དེ་དག་སྐྲའི་རྩེ་མོ་གཅིག་ནས་མི་གཡོ་ཡང་འཇིག་རྟེན་གྱི་ཁམས་ཐམས་ཅད་དུ་སྣང་བ་དེ་ལྟ་བུར་སྒྲུབ་དཀའ་བའི་ཆོས་ཀྱི་ཕྱོགས་ལ་འཇུག་པར་ རྣམ་པར་སྤྱོད་པ་དེ་དག་གི་གནས་སོ། །འདི་ནི། ཟབ་མོའི་གནས་ལ་རྣམ་པར་སྤྱོད་པ། མི་གཉིས་པའི་གནས་ལ་རྣམ་པར་སྤྱོད་པ། མཚན་ཉིད་མེད་པའི་གནས་ལ་ ༄༅། །རྣམ་པར་སྤྱོད་པ། གཉེན་པོ་མེད་པའི་གནས་ལ་རྣམ་པར་སྤྱོད་པ། མི་དམིགས་པའི་གནས་ལ་རྣམ་པར་སྤྱོད་པ། སྤྲོས་པ་མེད་པའི་གནས་ལ་ རྣམ་པར་སྤྱོད་པ། བྱམས་པ་ཆེན་པོ་དང་སྙིང་རྗེ་ཆེན་པོའི་གནས་ལ་རྣམ་པར་སྤྱོད་པ། ཉན་ཐོས་དང་རང་སངས་རྒྱས་ཐམས་ཅད་ཀྱིས་ཆུད་པར་དཀའ་བའི་གནས་ལ་ རྣམ་པར་སྤྱོད་པ། བདུད་ཀྱི་ཡུལ་ཐམས་ཅད་ལས་ཡང་དག་པར་འདས་པའི་གནས་ལ་རྣམ་པར་སྤྱོད་པ། འཇིག་རྟེན་གྱི་ཡུལ་ཐམས་ཅད་ཀྱིས་མ་གོས་པའི་གནས་ལ་ རྣམ་པར་སྤྱོད་པ། བྱང་ཆུབ་སེམས་དཔའ་ཐམས་ཅད་ཀྱི་གནས་ཀྱི་ཕ་རོལ་ཏུ་ཕྱིན་པའི་གནས་ལ་རྣམ་པར་སྤྱོད་པ། སངས་རྒྱས་ཐམས་ཅད་ཀྱི་གནས་དང་མཐུན་པའི་ གནས་ལ་རྣམ་པར་སྤྱོད་པ་རྣམས་ཀྱི་གནས་སོ། །གང་དེ་མཚན་མ་ཐམས་ཅད་དང་བྲལ་བའི་གནས་ལ་རྣམ་པར་སྤྱོད་ཀྱང་ཉན་ཐོས་ཀྱི་སྐྱོན་མེད་པར་མི་འཇུག་པ་ དང༌། གང་དེ་དག་ཆོས་ཐམས་ཅད་སྐྱེ་བ་མེད་པའི་གནས་ལ་རྣམ་པར་སྤྱོད་ཀྱང་མི་སྐྱེ་བའི་ཆོས་ཉིད་དུ་མི་ལྟུང་བ་དང༌། གང་དེ་དག་མི་སྡུག་པའི་གནས་ལ་རྣམ་པར་ སྤྱོད་ཀྱང་འདོད་ཆགས་དང་བྲལ་བའི་ཆོས་ཉིད་མངོན་དུ་མི་བྱེད་དོ། འདོད་ཆགས་ཀྱི་ཆོས་དང་ཡང་ལྷན་ཅིག་མི་གནས་པ་དང༌། གང་དེ་དག་བྱམས་པའི་གནས་ལ་ རྣམ་པར་སྤྱོད་ཀྱང་ཞེ་སྡང་གི་དྲི་མའི་རྗེས་སུ་སྟོང་བའི་སེམས་མེད་པ་དང༌། གང་དེ་དག་རྟེན་ཅིང་འབྲེལ་པའི་གནས་ལ་རྣམ་པར་སྤྱོད་ཀྱང་ཆོས་ཐམས་ཅད་ལ་ཤིན་ཏུ་རྨོངས་ པ་མེད་པ་དང༌། གང་དེ་དག་བསམ་གཏན་བཞིའི་གནས་ལ་རྣམ་པར་སྤྱོད་ཀྱང་བསམ་གཏན་གྱི་དབང་གིས་མི་སྐྱེ་བ་དང༌། གང་དེ་དག་ཚད་མེད་པ་བཞིའི་གནས་ལ་རྣམ་ པར་སྤྱོད་ཀྱང་སེམས་ཅན་ཡོངས་སུ་སྨིན་པར་བྱ་བའི་དོན་དུ་གཟུགས་ཀྱི་ཁམས་ཀྱི་ལམ་གྱི་རྒྱུད་དུ་མི་འདོང་བ་དང༌། གང་དེ་དག་གཟུགས་མེད་པའི་སྙོམས་པར་འཇུག་པ་ བཞིའི་གནས་ལ་རྣམ་པར་སྤྱོད་ཀྱང་སྙིང་རྗེ་ཆེན་པོས་ཡོངས་སུ་ཟིན་པས་གཟུགས་མེད་པའི་ཁམས་ཀྱི་ལམ་གྱི་རྒྱུད་དུ་མི་འདོང་བ་དང༌། གང་དེ་དག་ཞི་གནས་དང་ལྷག་ མཐོང་གི་གནས་ལ་རྣམ་པར་སྤྱོད་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་བདག་གིས་རིག་པའི་རྣམ་པར་གྲོལ་བ་མངོན་དུ་མི་བྱེད་པ་དང༌། གང་དེ་དག་བཏང་ སྙོམས་ཆེན་པོའི་གནས་ལ་རྣམ་པར་སྤྱོད་ཀྱང་སེམས་ཅན་གྱི་ཁམས་ཡོངས་སུ་མི་གཏོང་བ་དང༌། གང་དེ་དག་སྟོང་པ་ཉིད་ཀྱི་གནས་ལ་རྣམ་པར་སྤྱོད་ཀྱང་ལྟ་བའི་རྣམ་ པ་ལ་མི་གནས་པ་དང༌། གང་དེ་དག་མཚན་མ་མེད་པའི་སྤྱོད་ཡུལ་དང་ལྡན་ཡང་མཚན་མ་ལ་སྤྱོད་པའི་སེམས་ཅན་རྣམ་པར་གདུལ་བ་ལ་བརྩོན་པ་དང༌། གང་དེ་ ༄༅། །དག་སྨོན་ལམ་ཐམས་ཅད་དང་བྲལ་བ་ཡིན་ཡང་བྱང་ཆུབ་སེམས་དཔའི་སྤྱོད་པའི་སྨོན་ལམ་གྱི་རྒྱུན་མི་འཆད་པ་དང༌། གང་དེ་དག་ལས་དང་ཉོན་མོངས་ པ་ཐམས་ཅད་ལ་དབང་བསྒྱུར་ཡང་སེམས་ཅན་ཡོངས་སུ་སྨིན་པར་བྱ་བའི་དོན་དུ་ལས་དང་ཉོན་མོངས་པའི་རྗེས་སུ་འབྲང་བར་སྣང་བ་དང༌། གང་དེ་དག་ཤི་འཕོ་དང་སྐྱེ་བ་ ཡོངས་སུ་ཤེས་ཀྱང་ཚེའི་ཤི་འཕོ་དང་སྐྱེ་བ་ཡོངས་སུ་སྟོན་པ་དང༌། གང་དེ་དག་འགྲོ་བ་ཐམས་ཅད་ལས་རྣམ་པར་ལོག་ཀྱང་སེམས་ཅན་གདུལ་བའི་དབང་གིས་འགྲོ་བ་ཐམས་ ཅད་དུ་འདོང་བ་དང༌། གང་དེ་དག་བྱམས་པ་ལ་རྣམ་པར་སྤྱོད་ཀྱང་གང་ལ་ཡང་ཆགས་པར་རྣམ་པར་སྤྱོད་པ་མེད་པ་དང༌། གང་དེ་དག་སྙིང་རྗེ་ལ་རྣམ་པར་སྤྱོད་ཀྱང་གང་ ལ་ཡང་ཆགས་པར་ལྟ་བས་རྣམ་པར་སྤྱོད་པ་མ་ཡིན་པ་དང༌། གང་དེ་དག་དགའ་བ་ལ་རྣམ་པར་སྤྱོད་ཀྱང་སེམས་ཅན་སྡུག་བསྔལ་བ་ལ་རྣམ་པར་ལྟ་བས་རྟག་ཏུ་མི་ དགའ་བ་དང༌། གང་དེ་དག་བཏང་སྙོམས་ལ་རྣམ་པར་སྤྱོད་ཀྱང་གཞན་གྱི་དོན་ལ་རྟག་ཏུ་འབད་པ་དང༌། གང་དེ་དག་མཐར་གྱིས་གནས་པའི་སྙོམས་པར་འཇུག་པ་དགུ་ལ་ རྣམ་པར་སྤྱོད་ཀྱང་འདོད་པའི་ཁམས་སུ་སྐྱེ་བ་ལ་མི་སྨོད་པ་དང༌། གང་དེ་དག་སྐྱེ་བ་ཐམས་ཅད་ལ་མི་གནས་པར་རྣམ་པར་སྤྱོད་ཀྱང་ཡང་དག་པའི་མཐའ་མངོན་དུ་བྱ་བ་ ལ་རྣམ་པར་མི་སྤྱོད་པ་དང༌། གང་དེ་དག་རྣམ་པར་ཐར་པ་གསུམ་ལ་རྣམ་པར་སྤྱོད་ཀྱང་ཉན་ཐོས་ཀྱི་རྣམ་པར་ཐར་པ་ཐོབ་པར་བྱ་བ་ལ་རྣམ་པར་མི་སྤྱོད་པ་དང༌། གང་དེ་དག་འཕགས་པའི་ བདེན་པ་བཞི་རྣམ་པར་བལྟ་བ་ལ་རྣམ་པར་སྤྱོད་ཀྱང་འབྲས་བུ་མངོན་དུ་བྱ་བའི་ཕྱིར་རྣམ་པར་མི་སྤྱོད་པ་དང༌། གང་དེ་དག་རྟེན་ཅིང་འབྲེལ་བར་འབྱུང་བ་ཟབ་མོ་བརྟག་པ་ལ་རྣམ་པར་སྤྱོད་ ཀྱང་ཤིན་ཏུ་འགོག་པར་ལྟུང་བ་ལ་རྣམ་པར་མི་སྤྱོད་པ་དང༌། གང་དེ་དག་འཕགས་པའི་ལམ་གྱི་ཡན་ལག་བརྒྱད་སྒོམ་པ་ལ་རྣམ་པར་སྤྱོད་ཀྱང་ཤིན་ཏུ་འབྱུང་བ་ལ་རྣམ་པར་མི་ སྤྱོད་པ་དང༌། གང་དེ་དག་སོ་སོའི་སྐྱེ་བོའི་ས་ལས་ཤིན་ཏུ་འདས་པར་རྣམ་པར་སྤྱོད་ཀྱང་ཉན་ཐོས་དང༌། རང་སངས་རྒྱས་ཀྱི་སར་ལྟུང་བ་ལ་རྣམ་པར་མི་སྤྱོད་པ་དང༌། གང་དེ་དག་ཉེ་བར་ ལེན་པའི་ཕུང་པོ་ལྔ་ཡོངས་སུ་ཤེས་པ་ལ་རྣམ་པར་སྤྱོད་ཀྱང་ཕུང་པོ་ཤིན་ཏུ་འགོག་པར་ལྟུང་བ་ལ་རྣམ་པར་མི་སྤྱོད་པ་དང༌། གང་དེ་དག་བདུད་ཀྱི་ལམ་བཞི་ལས་ཤིན་ཏུ་འདས་པར་ རྣམ་པར་སྤྱོད་ཀྱང་བདུད་དུ་རྟོག་པ་ལ་རྣམ་པར་མི་སྤྱོད་པ་དང༌། གང་དེ་དག་སྐྱེ་མཆེད་དྲུག་ལས་ཤིན་ཏུ་འདས་པར་རྣམ་པར་སྤྱོད་ཀྱང་ཤིན་ཏུ་མངོན་པར་གྲུབ་པ་ལ་རྣམ་པར་མི་ སྤྱོད་པ་དང༌། གང་དེ་དག་དེ་བཞིན་ཉིད་ལ་རྣམ་པར་སྤྱོད་ཀྱང་ཡང་དག་པའི་མཐར་ལྟུང་བ་ལ་རྣམ་པར་མི་སྤྱོད་པ་དང༌། གང་དེ་དག་ཐེག་པ་ཐམས་ཅད་ཀྱི་འབྱུང་བ་ཡོངས་སུ་ ༄༅། །སྟོན་པ་ལ་རྣམ་པར་སྤྱོད་ཀྱང་ཐེག་པ་ཆེན་པོ་ལས་ཉམས་པ་ལ་རྣམ་པར་མི་སྤྱོད་པ་དེ་དག་དེ་ལྟ་བུར་ཡོན་ཏན་གྱི་གནས་ཐམས་ཅད་ལ་རྣམ་པར་སྤྱོད་པ་ རྣམས་ཀྱི་གནས་སོ། །དེ་ནས་ཚོང་དཔོན་གྱི་བུ་ནོར་བཟང་གིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདི་ལ་ཐུགས་རྗེ་ཆེན་པོ་བརྙེས་པས་རྣམ་དག་པ། །བྱམས་པ་ ཤེས་གཉེན་དཔལ་ཆེན་འཇིག་རྟེན་ཕན་བརྩོན་པ། །དབང་བསྐུར་ས་གནས་རྒྱལ་བའི་སྲས་ཀྱི་ཐུ་བོ་སྟེ། །སངས་རྒྱས་ཡུལ་ལ་རྗེས་སུ་དགོངས་ཤིང་རྣམ་པར་སྤྱོད། །རྒྱལ་ བའི་སྲས་པོ་གྲགས་པ་ཆེན་པོ་མངའ་བ་རྣམས། །ཡེ་ཤེས་ཆེན་པོའི་སྤྱོད་ཡུལ་རྣམ་ཐར་བཞུགས་པ་དག། གང་རྣམས་ཆོས་དབྱིངས་ཀུན་ཏུ་ཐོགས་མེད་རྣམ་རྒྱུ་བ། །དཔེ་ཟླ་ མེད་པ་དེ་དག་གནས་ནི་འདི་འདྲ་ཡིན། །དུལ་སྦྱིན་ཚུལ་ཁྲིམས་བཟོད་པ་བརྩོན་འགྲུས་སྟོབས་ཀྱིས་འཕགས། །བསམ་གཏན་མངོན་ཤེས་སྟོབས་ཀྱི་མཐར་ཕྱིན་ཤེས་རྟོགས་ པས༑ ༑ཤེས་རབ་ཐབས་དང་སྨོན་ལམ་སྟོབས་ལ་གནས་པ་རྣམས། །ཐེག་ཆེན་ཕ་རོལ་ཕྱིན་པ་རྣམས་ཀྱི་གནས་འདི་ཡིན། །འདི་ནི་ཆགས་མེད་བློ་གྲོས་བསམ་པ་རྒྱ་ཆེན་ཏེ།། ནམ་མཁའི་སྤྱོད་ཡུལ་ལྡན་པ་མི་གནས་མི་རྟེན་པ། །དུས་གསུམ་ཐམས་ཅད་རྒྱས་འགེངས་བསྒྲིབས་པ་མེད་པ་རྣམས། །སྲིད་ཀུན་དངོས་པོ་རྣམ་པར་བསྒོམས་པ་རྣམས་ ཀྱི་གནས། །གང་རྣམས་ཆོས་ཀུན་མི་སྐྱེའི་ཚུལ་ལ་ཞུགས་པ་རྣམས། །ཆོས་ཀྱི་རང་བཞིན་ནམ་མཁའི་དངོས་ཉིད་རྟོགས་མཛད་ལ། །ཅི་ལའང་གནས་པ་མི་མཛད་ནམ་མཁའི་བྱ་བཞིན་ ཏེ༑ ༑མཁྱེན་པས་བསྙེངས་པ་མི་མངའ་དེ་དག་གནས་འདི་ཡིན། །གང་རྣམས་འདོད་ཆགས་ཞེ་སྡང་གཏི་མུག་རང་བཞིན་དངོས། །རྟོག་པའི་རྒྱུས་བསྐྱེད་ཕྱིན་ཅི་ལོག་ལས་བྱུང་མཁྱེན་ ནས༑ ༑འདོད་ཆགས་བྲལ་བའང་རྣམ་པར་རྟོག་པར་མི་མཛད་པ། །ཞི་དང་ཉེ་བར་ཞི་ལྡན་དེ་དག་གནས་འདི་ཡིན། །གང་རྣམས་རྣམ་པར་ཐར་དང་བདེན་ཚུལ་འཕགས་ལམ་དང༌།། ཕུང་པོ་དེ་བཞིན་ཁམས་དང་སྐྱེ་མཆེད་རྟེན་པའི་དངོས། །ཡོངས་སུ་རྟོགས་མཛད་མཁས་པ་ཞི་བར་མི་ལྟུང་བ། །ཤེས་རབ་ཐབས་ལ་མཁས་པ་དེ་དག་གནས་འདི་ཡིན། །གང་རྣམས་ སྒྲིབ་པ་མེད་པའི་ཡེ་ཤེས་ཕྱོགས་བཞུགས་ཤིང༌། །རྒྱལ་བའི་ཞིང་ལ་ཡོངས་རྟོག་རྣམ་རྟོག་ཀུན་ཞི་ལ། །ཆོས་རྣམས་དངོས་པོའི་རང་བཞིན་མེད་པར་རྟོགས་མཛད་པ། །ཞི་བར་གཞོལ་ བ་དེ་དག་གནས་ནི་འདི་འདྲའོ། །གང་རྣམས་ཆགས་མེད་སྤྱོད་པས་ཆོས་དབྱིངས་འདི་དག་ཏུ། །དངོས་དང་བྲལ་བར་རྣམ་སྤྱོད་མཁའ་ཡི་རླུང་འདྲ་བ། །དངོས་པོ་ཀུན་དང་བྲལ་ཞིང་ དངོས་མེད་རྣམ་སྤྱོད་པ། །མི་གནས་བློ་མངའ་དེ་དག་གནས་ནི་འདི་ཡང་འདྲ། །གང་རྣམས་ངན་སོང་རྒྱུད་དུ་འགྲོ་བ་སོང་གྱུར་ཏེ། །སྡུག་བསྔལ་ནད་པ་མི་བདེ་ཉམས་སུ་མྱོང་ ༄༅། །གཟིགས་ཤིང༌། །བྱམས་པའི་འོད་ཀྱིས་ངན་སོང་ཐམས་ཅད་ཞི་མཛད་པ། །བྱམས་དང་ཐུགས་རྗེའི་ཐུགས་མངའ་དེ་དག་གནས་འདི་ཡིན། །ཉམ་ངའི་འཁོར་ ན་གནས་ཤིང་འཕགས་ལམ་གོལ་གྱུར་ཏེ། །འགྲོན་པོ་དམུས་ལོང་དམིགས་དང་བྲལ་བར་གྱུར་འདྲ་བའི། །འཇིག་རྟེན་གཟིགས་ཤིང་བར་ལམ་རབ་ལ་འགོད་མཛད་པ། །འགྲོན་ པོའི་བསེལ་རབ་འདྲ་བ་དེ་དག་གནས་འདི་ཡིན། །གང་རྣམས་སྐྱེ་དང་མྱ་ངན་རྒ་ཤི་དབང་གྱུར་པའི། །འགྲོ་བ་བདུད་ཀྱི་ཞགས་པས་ཡོངས་སུ་བཅིངས་གཟིགས་ཤིང༌། །རྣམ་ པར་བཀྲོལ་ནས་མི་འཇིགས་ཕྱོགས་བདེར་འདོན་མཛད་པ། །དཔའ་བོ་དེ་དག་ཐུབ་པར་དཀའ་བའི་གནས་འདི་ཡིན། །ཉོན་མོངས་ནད་པའི་འགྲོ་མང་གང་གིས་གཟིགས་གྱུར་ ཅིང༑ ༑ཡེ་ཤེས་བདུད་རྩི་སྨན་ཆེན་ཡོངས་སུ་བསྡུ་མཛད་ནས། །ཐུགས་རྗེ་ཆེན་པོ་བསྐྱེད་ཅིང་ཡོངས་སུ་འགྲོལ་མཛད་པ། །སྨན་པའི་རྒྱལ་པོ་ཆེན་པོ་འདྲ་བའི་གནས་འདི་ ཡིན༑ ༑གང་གིས་འགྲོ་མང་སྡུག་བསྔལ་མགོན་མེད་གྱུར་པ་རྣམས། །ཉོན་མོངས་གཏོས་སུ་ལྷུང་སྟེ་ཚམ་གྱི་མཚོར་ལྷུང་བ། །གཟིགས་ཤིང་དགེ་བའི་ཆོས་ཀྱི་གྲུ་ཆེན་ཡོངས་ སྦྱར་ཏེ། །སྒྲོལ་མཛད་མཉན་པའི་བུ་འདྲ་དེ་དག་གནས་འདི་ཡིན། །གང་གིས་ཉོན་མོངས་རྒྱ་མཚོ་སྤྱོད་པའི་འགྲོ་གཟིགས་ཤིང༌། །ཐམས་ཅད་མཁྱེན་ཐུགས་རིན་ཆེན་ དགོངས་དག་སེམས་ཅན་མཆོག །སྲིད་པའི་རྒྱ་མཚོར་གཤེགས་ཤིང་མངོན་པར་འདྲེན་མཛད་པ། །མཉན་པའི་བུ་ལྟར་སྤྱོད་པ་དེ་དག་གནས་འདི་ཡིན། །སྨོན་ལམ་གནས་ན་བཞུགས་ ཤིང་ཐུགས་རྗེ་བྱམས་སྤྱན་གྱིས། །གང་རྣམས་སེམས་ཅན་གནས་སུ་རྣམ་པར་གཟིགས་མཛད་ཅིང༌། །སྲིད་པའི་རྒྱ་མཚོ་གནས་པའི་འགྲོ་མང་མངོན་འདོན་པ། །མཁའ་ལྡིང་ གཞོན་འདྲ་དེ་དག་གནས་ནི་འདི་འདྲའོ། །གང་རྣམས་ཆོས་དབྱིངས་མཁའ་ལ་ཉི་ཟླ་འདྲ་ཚུལ་དུ། །སེམས་ཅན་གནས་སུ་འོད་ཀྱིས་ཁྱབ་པར་རྣམ་སྤྱོད་པ། །སྨོན་ལམ་དཀྱིལ་ འཁོར་ཡེ་ཤེས་དྲི་མེད་བཟང་པོའི་འོད། །འཇིག་རྟེན་སྣང་བར་མཛད་པ་དེ་དག་གནས་འདི་ཡིན། །གང་རྣམས་སེམས་ཅན་གཅིག་ནི་ཡོངས་སུ་སྨིན་བྱའི་ཕྱིར། །ཕྱི་མཐའི་ བསྐལ་པ་བྱེ་བ་ཟད་དུ་བརྟན་གནས་ལ། །སེམས་ཅན་གཅིག་ལ་ཇི་བཞིན་དེ་བཞིན་འགྲོ་བ་ཀུན། །འཇིག་རྟེན་མགོན་དུ་གྱུར་པ་དེ་དག་གནས་འདི་ཡིན། །གང་རྣམས་འབྱམས་ ཀླས་ཞིང་གཅིག་མཐའ་ཡི་བསྐལ་པར་ཡང༌། །འགྲོ་དོན་བརྩོན་འགྲུས་སྐྱོ་མེད་སྤྱོད་པ་རྣམ་སྤྱོད་པ། །ཞིང་གཅིག་ཇི་བཞིན་དེ་བཞིན་ཕྱོགས་རྣམས་ཀུན་ཏུ་སྟེ། །བསམ་པ་ རྡོ་རྗེ་བཞིན་བརྟན་དེ་དག་གནས་འདི་ཡིན། །གང་རྣམས་ཕྱོགས་བཅུའི་བདེ་གཤེགས་རྣམས་ཀྱི་ཆོས་སྤྲིན་ལ། །སྟན་གཅིག་གནས་བཞིན་རྨོངས་པ་མེད་པ་འཐུང་བྱེད་ ༄༅། །ཀྱང༌། །ཕྱི་མཐའི་བསྐལ་པ་ཁྲག་ཁྲིག་བགྲངས་པར་མི་ངོམས་སེམས། །བློ་ཆེན་རྒྱ་མཚོ་ལྟ་བུའི་གནས་ནི་འདི་འདྲའོ། །གང་རྣམས་ཞིང་མང་རྒྱ་མཚོ་ བརྗོད་དུ་མེད་འདོད་ཞིང༌། །མགོན་པོའི་འཁོར་རྣམས་རྒྱ་མཚོར་ཡོངས་སུ་འཇུག་བྱེད་ལ། །རྒྱལ་བའི་མཆོད་པ་སྣ་ཚོགས་རྒྱ་མཚོ་རབ་བྱེད་པ། །ཆགས་མེད་སྤྱོད་ཡུལ་ མངའ་བ་དེ་དག་གནས་འདི་ཡིན། །བརྟན་པ་གྲངས་རྣམས་སྨོན་ལམ་རྒྱ་མཚོར་འཇུག་བྱེད་ཅིང༌། །སྤྱོད་པ་རྒྱ་མཚོ་མཐའ་དང་དབུས་མེད་ཞུགས་གྱུར་ཏེ། །འགྲོ་ལ་ཕན་ ཕྱིར་བསྐལ་པ་རྒྱ་མཚོ་མང་སྤྱོད་པ། །ཡོན་ཏན་འབྱུང་གནས་དེ་དག་གནས་ནི་འདི་འདྲའོ། །གང་རྣམས་སྐྲ་རྩ་གཅིག་ཏུ་ཞིང་རྣམས་ཐམས་ཅད་དང༌། །སངས་རྒྱས་ ཐམས་ཅད་བསྐལ་པ་མཐའ་དང་དབུས་མེད་པ། །འཛུད་ཅིང་དེ་ཡི་ཚུལ་ལ་འཇུག་ཀྱང་རྨོངས་མེད་པ། །ཆགས་པ་མེད་པའི་མིག་ཅན་རྣམས་ཀྱི་གནས་འདི་ཡིན། །གང་ རྣམས་སེམས་ཀྱི་སྐད་ཅིག་གཅིག་ལ་རྒྱ་མཚོ་ཡི། །བསྐལ་པ་འཛུད་བྱེད་ཞིང་དང་སངས་རྒྱས་འགྲོ་བ་རྣམས། །དེ་བཞིན་འཛུད་བྱེད་བསྒྲིབས་མེད་ཡེ་ཤེས་དྲན་གནས་ པ༑ ༑ཡོན་ཏན་མཐར་ཕྱིན་དེ་དག་གནས་ནི་འདི་འདྲའོ། །གང་རྣམས་ཞིང་མང་ཐམས་ཅད་རྡུལ་དུ་བགྲངས་བྱས་ཤིང༌། །ཆུ་བ་མ་ལུས་ཐམས་ཅད་ཐིགས་པས་ཚད་བཟུང་ སྟེ༑ ༑དེ་སྙེད་གྲངས་སུ་སྨོན་ལམ་མངོན་པར་སྒྲུབ་བྱེད་པ། །ཆགས་མེད་བགྲང་བ་དེ་དག་གནས་ནི་འདི་འདྲ་འོ། །སྨོན་ལམ་གཟུངས་དང་ཏིང་འཛིན་སྒོ་ལ་འཇུག་བྱ་བ། །བསམ་ གཏན་རྣམ་ཐར་སྨོན་ལམ་སྒོ་རྣམས་དེ་བཞིན་ཏེ། །བསྐལ་པ་མཐའ་ཡས་མངོན་པར་སྒྲུབ་ཅིང་རྣམ་སྤྱོད་པ། །བདེ་གཤེགས་སྲས་པོ་དགོངས་ལྡན་དེ་དག་འདིར་འདོང་ངོ༌། །འདི་ ན་གནས་པ་རྒྱལ་སྲས་རྣམ་པ་སྣ་ཚོགས་ཏེ། །ཚིག་དང་དོན་ལྡན་གཙུག་ལག་མང་པོ་མངོན་པར་སྒྲུབ། །འགྲོ་ལ་བདེར་འགྱུར་བཟོ་ཡི་གནས་སུ་བྱ་བ་དག །རྗེས་སུ་བསམ་ཤིང་ དམ་པའི་གནས་ན་རྣམ་པར་སྤྱོད། །འདི་ན་གནས་པ་མངོན་ཤེས་ཐབས་དང་ཡེ་ཤེས་ཀྱིས། །ཕྱོགས་བཅུའི་སེམས་ཅན་འགྲོ་རྒྱུད་སྣ་ཚོགས་ཇི་སྙེད་པ། །ཀུན་ཏུ་སྐྱེ་ཞིང་འཆི་ བའི་ཁྱད་པར་རྣམ་པར་སྟོན། །རྣམ་ཐར་སྒྱུ་མའི་ཚུལ་གནས་ཆགས་མེད་སྤྱོད་དང་ལྡན། །འདི་ན་གནས་པ་ཐོག་མར་སེམས་བསྐྱེད་ཉེར་བཟུང་ཞིང༌། །ཆོས་བཟང་མཐར་ཐུག་ ཆོས་ཀྱི་སྤྱོད་པ་ཡོངས་སུ་སྟོན། །སྤྲུལ་པའི་སྤྲིན་གྱིས་ཆོས་དབྱིངས་ཡོངས་སུ་རྒྱས་བཀང་ཞིང༌། །དེ་བཞིན་རྣམ་འཕྲུལ་བརྒྱ་མང་ཀུན་ཀྱང་ཉེ་བར་སྟོན། །གང་རྣམས་སེམས་ ཀྱི་ཆ་གཅིག་བྱང་ཆུབ་རྣམ་སངས་རྒྱས། །ཡེ་ཤེས་བློ་གྲོས་མཐའ་དང་དབུས་མེད་ལ་འཇུག་པ། །ཐོས་ཏེ་རྣམ་པར་བསམ་ན་འཇིག་རྟེན་རྨོངས་སུ་རུང༌། །ཐུབ་པར་དཀའ་ ༄༅། །བ་དེ་དག་གནས་ནི་འདི་འདྲའོ། །འདི་ནི་ཆགས་མེད་བློ་གྲོས་རྣམས། །ཆོས་དབྱིངས་བསྒྲིབས་པ་མེད་པ་རྣམ་པར་སྤྱོད་བྱེད་པ། །དམིགས་པ་མེད་པའི་ སྤྱོད་ཡུལ་ཅན། །དྲི་མེད་བསམ་པའི་བློ་གྲོས་གནས་ཡིན་ནོ། །གང་རྣམས་ཆགས་པ་མེད་སྤྱོད་ཅིང༌། །ཞིང་རྣམས་ཀུན་ཏུ་གནས་པ་མེད་པར་རྣམ་སྤྱོད་པ། །མི་གཉིས་ ཤེས་ལ་སྤྱོད་པ་ཡི། །མཉམ་པ་མེད་པ་དེ་དག་གནས་འདི་ཡིན། །གང་རྣམས་ནམ་མཁའི་རང་བཞིན་དང༌། །མཉམ་པའི་ཆོས་རྣམས་གནས་མེད་ཞི་བ་རྟོགས་གྱུར་ཏེ། ། གང་རྣམས་མཁའ་ཡུལ་རྣམ་སྤྱོད་པ། །རྡུལ་དང་བྲལ་བ་དེ་དག་གནས་འདི་ཡིན། །འདི་ནི་སྙིང་རྗེའི་སེམས་ལྡན་པ། །གནས་ཤིང་འགྲོ་བ་སྡུག་བསྔལ་གཟིར་བ་མཐོང་ གྱུར་ནས། །འཇིག་རྟེན་ཕན་པར་བསམ་བརྩོན་ཏེ། །སྙིང་རྗེ་ཆེན་པོ་བརྙེས་པ་རྣམ་པར་སྤྱོད། །འདི་ནས་མི་སྣང་མེད་གསལ་བར། །སེམས་ཅན་ཀུན་གྱི་གནས་སུ་ཐོགས་ པ་མེད་པར་སྣང༌། །ཉི་མ་ཟླ་བའི་དཀྱིལ་འཁོར་བཞིན། །འཁོར་བའི་ཞགས་པ་ཀུན་ལས་རྣམ་པར་གྲོལ། །རྒྱལ་སྲས་དེ་དག་འདི་ན་གནས། །རྒྱལ་བ་རྣམས་ཀྱི་ཞབས་ དྲུང་ཐམས་ཅད་ཀུན་ན་ཡང༌། །ཞིང་རྣམས་ཀུན་ཏུ་རབ་ཏུ་སྣང༌། །མཐའ་ཡས་བསྐལ་པ་རྣམས་ཀྱང་ཟད་པར་མཛད། །འདི་ནས་འགྲོ་བའི་ལུས་མཉམ་དང༌། །རྒྱལ་ སྲས་ཀུན་གྱི་ལུས་དང་གྲངས་མང་མཉམ་པ་ཡི། །སྤྲུལ་པའི་སྤྲིན་གྱིས་ཕྱོགས་ཀྱི་རྣམས། །མ་ལུས་ཐམས་ཅད་རྒྱས་པར་འགེངས་པར་མཛད། །འདི་ན་བཞུགས་པའི་དཔའ་ བོ་རྣམས། །རྒྱལ་བའི་སྤྱོད་ཡུལ་ཐམས་ཅད་ཡོངས་སུ་འཇལ་བྱེད་ཅིང༌། །བསྐལ་པ་བྱེ་བར་རྣམ་སྤྱོད་ཀྱང༌། །ཡོངས་སུ་ངོམས་པར་འགྱུར་བའི་དུས་མེད་དོ། །འདི་ནི་ཏིང་ འཛིན་བྱེ་བ་རྣམས། །བརྗོད་དུ་མེད་པ་སྐད་ཅིག་རེ་རེར་རྟོགས་བྱས་ཤིང༌། །ཏིང་ངེ་འཛིན་གྱི་ཚུལ་བཞིན་དུ། །སངས་རྒྱས་ཡུལ་རྣམས་རྣམ་པར་སྟོན་པ་མཛད། །འདིར་ནི་སྐད་ཅིག་ བརྗོད་མེད་པའི། །བསྐལ་པ་ཞིང་རྣམས་སངས་རྒྱས་མཚན་ལ་རབ་ཞུགས་ཏེ། །ཤིན་ཏུ་ཡངས་པའི་བློ་ལྡན་པ། །བསྐལ་པ་དཔག་ཏུ་མེད་པའི་མཐར་ཡང་འབྱིན། །འདི་ན་ གནས་ཤིང་ཚད་མེད་པའི། །བསྐལ་པར་སེམས་རྒྱུད་གཅིག་གིས་རབ་ཏུ་འཇིག་པ་བྱེད། །ཡོངས་རྟོག་འདུ་ཤེས་མེད་བྲལ་ཡང༌། །འགྲོ་བའི་འདུ་ཤེས་དབང་དུ་སྟོན་པ་ བྱེད༑ ༑དེ་དག་ཏིང་འཛིན་འདི་གནས་སུ། །ཞུགས་ཀྱང་དུས་གསུམ་ཐམས་ཅད་གསལ་བར་མངོན་དུ་མཐོང༌། །སྐད་གཅིག་ཡུད་ལ་གནས་བརྟེན་ཅིང༌། །རྣམ་ཐར་གནས་ ལ་རྣམ་པར་སྤྱོད་པ་མཛད། །དེ་དག་རྣམ་སྤྱོད་གནས་འདི་ན། །མ་གཡོས་ལུས་ཀྱིས་སྐྱིལ་མོ་ཀྲུང་དུ་འཁོད་བཞིན་དུ། །ཞིང་རྣམས་ཐམས་ཅད་ཀུན་ཏུ་ཡང༌། །ཐམས་ ༄༅། །ཅད་ཁྱབ་པར་གཅིག་ཅར་ཡོངས་སུ་སྣང༌། །ཁྱུ་མཆོག་དེ་དག་འདི་ན་གནས། །བདེ་གཤེགས་རྣམས་ལས་ཆོས་ཀྱི་རྒྱ་མཚོ་ཡང་དག་འཐུང༌། ། ཡེ་ཤེས་རྒྱ་མཚོར་རབ་ཏུ་ཞུགས། །མི་ཟད་ཡོན་ཏན་རྣམས་ཀྱི་ཕ་རོལ་ཕྱིན། །འདི་ན་ཞིང་རྣམས་ཀུན་གྲངས་དང༌། །བསྐལ་པའི་གྲངས་དང་དེ་བཞིན་ཆོས་ཀྱི་གྲངས་ རྣམས་དང༌། །རྒྱལ་བ་ཀུན་གྱི་མཚན་གྱི་གྲངས། །སྒྲིབ་མེད་སེམས་པ་རྣམ་པར་དགོངས་པ་མཛད། །རྒྱལ་སྲས་དེ་དག་འདི་ན་གནས། །དུས་གསུམ་ཞིང་མང་ བགྲངས་པ་ཐམས་ཅད་མ་ལུས་པར། །དེ་དག་སྐད་ཅིག་གཅིག་གིས་ཀྱང༌། །ཡོངས་སུ་འབྱུང་དང་འཇིག་པ་རྣམ་པར་འབྱེད། །རྒྱལ་སྲས་དེ་དག་འདི་ན་གནས། ། རྒྱལ་བའི་སྤྱོད་པ་སྨོན་ལམ་འགྲོ་བའི་དབང་པོ་རྣམས། །གནས་ན་རྣམ་པར་སྤྱོད་བྱེད་ཀྱང༌། །རྒྱལ་སྲས་བློ་ལ་ཐོགས་པ་མེད་པས་མཐོང༌། །རྡུལ་ཕྲན་གཅིག་ ལ་གང་ཡོད་པའི། །འཁོར་རྣམས་རྒྱ་མཚོ་ཞིང་མང་སེམས་ཅན་དེ་བཞིན་དུ། །བསྐལ་པ་རྡུལ་ཕྲན་ཀུན་མཉམ་པ། །སྒྲིབ་པ་མེད་པར་མཐོང་བ་རྣམས་ཀྱིས་ མཐོང༌། །རྡུལ་ཕྲན་ཀུན་རྩེར་དེ་བཞིན་དུ། །འཁོར་དང་ཞིང་དང་བསྐལ་པ་ཐམས་ཅད་མ་ལུས་པར། །ཀུན་ཀྱང་གཟུགས་བརྙན་ཐབས་ཚུལ་དུ། །ཤིན་ཏུ་ རྣམ་ཕྱེ་ཡོངས་སུ་མཐོང་བ་ཡིན། །འདི་ནས་དེ་དག་ཆོས་རྣམས་ཀྱི། །རང་བཞིན་ཞིང་རྣམས་ཀུན་དང་དུས་དང་བསྐལ་པ་དང༌། །ཡང་དག་སངས་རྒྱས་དེ་བཞིན་ཏེ། །རང་བཞིན་ དངོས་བྲལ་འབྱུང་བའི་ཚུལ་གྱིས་མཁྱེན། །འདི་ནས་སེམས་ཅན་མཉམ་ཉིད་དང༌། །ཆོས་རྣམས་མཉམ་པ་ཉིད་དང་སངས་རྒྱས་མཉམ་ཉིད་དང༌། །ཞིང་དང་སྨོན་ལམ་མཉམ་ པ་ཉིད༑ ༑དུས་གསུམ་མཉམ་པ་ཉིད་ལའང་དེ་བཞིན་འཇུག །སེམས་ཅན་ཁྲག་ཁྲིག་རྣམ་པར་འདུལ། །སངས་རྒྱས་ཁྲག་ཁྲིག་རྣམས་ཀྱང་དེ་བཞིན་གཞན་མཆོད་བྱེད། ། གཞན་རྣམས་ཆོས་ལ་རྣམ་པར་རྟོག །འོན་ཀྱང་བརྟན་པ་གནས་མཆོག་འདི་ན་འཁོད། །བསྐལ་པ་ཁྲག་ཁྲིག་མང་པོས་ཀྱང༌། །དེ་དག་སྨོན་ལམ་ཡེ་ཤེས་ཡུལ་བློའི་ རྣམ་པ་དག །བདག་གིས་བརྗོད་པར་མི་ནུས་ཏེ། །མཐའ་ཡས་བློ་མངའ་རྣམས་ཀྱི་ཤིན་ཏུ་ཡང༌། །དེ་དག་སྨད་པ་མི་མངའ་བ། །བསྒྲིབས་མེད་སྤྱོད་ཡུལ་རབ་ལ་ཤིན་ ཏུ་དགྱེས་པ་ཡི། །ཕོ་བྲང་འདི་ལ་ཐལ་སྦྱར་ཏེ། །བདག་ཀྱང་ལུས་བཏུད་གུས་པར་ཕྱག་འཚལ་ལོ། །རྒྱལ་པོའི་སྲས་ཀྱི་ཐུ་བོ་སྟེ། །བསྒྲིབས་མེད་སྤྱོད་པ་མངའ་བ་འཕགས་ པ་བྱམས་པ་དེ། །རྣམ་དག་བློ་མངའ་དཔེ་མེད་ལ། །དེ་ཡི་རྗེས་སུ་བསམ་སྟེ་ཕྱག་འཚལ་ལོ། །དེ་ནས་ཚོང་དཔོན་གྱི་བུ་ནོར་བཟང་གིས་ཁང་པ་བརྩེགས་པ་ཆེན་པོ་ ༄༅། །རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་བྱང་ཆུབ་སེམས་དཔའ་རྣམས་ལ་དེ་དག་དང༌། བྱང་ཆུབ་སེམས་དཔའི་བསྟོད་པ་གཞན་ཚད་མེད་པ་དག་ གིས་ཀྱང་མངོན་པར་བསྟོད་དེ། ཤིན་ཏུ་བཏུད་ནས་ཕྱག་འཚལ་ཏེ་རབ་ཏུ་གུས་པར་བལྟས་ནས་རིམ་གྲོར་བྱས་ཏེ་མངོན་ཏུ་བྱས་ནས་མཆོད་དེ་ཁང་པ་བརྩེགས་པ་ཆེན་པོ་ རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོའི་སྒོ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བལྟ་བར་ནི། མོས། བྱང་ཆུབ་སེམས་དཔའ་ སེམས་དཔའ་ཆེན་པོ་བྱམས་པ་དང་ཕྲད་པར་ནི། དགའ་ཞིང་སྡོད་སྡོད་པ་ལས། དེས་བྱང་ཆུབ་སེམས་དཔའ་བྱམས་པ་ཁང་པ་བརྩེགས་པ་དེའི་ཕྱི་རོལ་གྱི་ཕྱོགས་ གཞན་ཞིག་ནས་སྲོག་ཆགས་བརྒྱ་སྟོང་དུ་མའི་འཁོར་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོའི་དབང་པོ་དུ་མས་མདུན་དུ་བྱས་ཏེ་གཡས་གཡོན་ནས་བརྒྱ་བྱིན་དང༌། ཚངས་པ་དང༌། འཇིག་རྟེན་གྱི་མགོན་པོ་རྣམས་ཀྱིས་ཕྱག་བྱ་ཞིང༌། ཡུལ་དེ་ན་ གནས་པ་གཉེན་བཤེས་སུ་འོང་བའི་བྲམ་ཟེ་བརྒྱ་སྟོང་མང་པོས་བསྐོར་ཅིང་མདུན་དུ་བྱས་ཏེ། ཁང་པ་བརྩེགས་པ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་ སྙིང་པོ་ལོགས་སུ་འོངས་པ་མཐོང་ནས་དགའ་རངས་ཏེ་མགུ་ཞིང་ཉམས་བདེ་ལ། ཚིམ་ཞིང་ཡིད་བདེ་བ་སྐྱེས་ནས་བྱང་ཆུབ་སེམས་དཔའ་བྱམས་པ་གང་ན་བ་དེ་ལོགས་སུ་ མངོན་དུ་བལྟས་ཏེ་ཐག་རིང་པོ་ནས་བྱང་ཆུབ་སེམས་དཔའ་བྱམས་པ་ལ་ལུས་ཐམས་ཅད་ཀྱིས་ཕབ་སྟེ་ཕྱག་བྱས་སོ། །དེ་ནས་བྱང་ཆུབ་སེམས་དཔའ་བྱམས་པས་ཚོང་དཔོན་ གྱི་བུ་ནོར་བཟང་ལ་བལྟས་ཏེ་འཁོར་ཀུན་ལ་ལག་པ་གཡས་པས་བསྟན་ནས་ཡང་དག་པའི་ཡོན་ཏན་གྱིས་བསྔགས་ཏེ་ཚིགས་སུ་བཅད་པ་འདི་དག་སྨྲས་སོ། །ལྟོས་ཤིག་བསམ་ པ་ཡོངས་སུ་དག་པ་འདི། །ནོར་བཟང་ནོར་རྣམས་རབ་ཏུ་བརྟན་པའི་བུ། །བྱང་ཆུབ་སྤྱོད་པ་དམ་པ་ཡོངས་ཚོལ་ཞིང༌། །མཁས་པ་ང་ཡི་དྲུང་དུ་ཉེ་བར་འོངས། །ལེགས་པར་འོངས་ སམ་སྙིང་རྗེ་བྱམས་བྱུང་ཁྱོད། །བྱམས་པའི་དཀྱིལ་འཁོར་ཡངས་པར་ལེགས་འོངས་སམ། །ལེགས་པར་འོངས་སམ་བལྟ་ན་རབ་ཞི་བ། །སྤྱད་པ་སྤྱོད་ཚེ་དུབ་པར་མ་གྱུར་ཏམ།། རྣམ་དག་བསམ་ལྡན་ཚུར་ཤོག་འོངས་པ་ལེགས། །སྐྱོ་མེད་ཡིད་ལྡན་ཚུར་ཤོག་འོངས་པ་ལེགས། །དབང་པོ་མ་ཞུམ་ཚུར་ཤོག་འོངས་པ་ལེགས། །མཁས་པ་སྤྱོད་ཚེ་དུབ་ པ་མེད་གྲང་ངོ༌། །ཆོས་རྣམས་ཐམས་ཅད་རྣམ་དབྱེའི་དོན་བྱུང་བ། །འགྲོ་བ་ཐམས་ཅད་རྣམ་འདུལ་རབ་བརྩོན་པ། །བཤེས་གཉེན་ཐམས་ཅད་བསྙེན་བཀུར་རབ་ ༄༅། །ཞུགས་པ། །བརྟུལ་ཞུགས་མི་གཡོ་བརྟན་པ་ཁྱེད་འོངས་ལེགས། །དགེ་བའི་ལམ་གྱིས་འོངས་པ་བདེར་འོངས་སམ། །ཡོན་ཏན་ལམ་ལ་གནས་པ་བདེར་ འོངས་སམ། །རྒྱལ་བའི་ལམ་དུ་ཞུགས་པ་བདེར་འོངས་སམ། །ལམ་རྣམས་གང་དུའང་ངལ་བར་མ་གྱུར་ཏམ། །ཡོན་ཏན་རང་བཞིན་ཚུར་ཤོག་བདེར་འོངས་སམ། །དགེ་ བས་མངོན་བརླན་ཚུར་ཤོག་བདེར་འོངས་སམ། །མཐའ་ཡས་སྤྱོད་ཡུལ་ལེགས་པར་བདེར་འོངས་སམ། །འགྲོ་བ་ཀུན་ན་ཁྱོད་མཐོང་ཤིན་ཏུ་དཀོན། །ཐོབ་དང་མ་ཐོབ་ མཉམ་པའི་ཡིད་ལྡན་པ། །སྨད་དང་སྡུག་བསྔལ་མ་གྲགས་རྣམ་པར་སྤངས། །འཇིག་རྟེན་ཆོས་ལ་ཨུཏྤལ་པདྨོ་བཞིན། །ཡིད་ལ་འཁྲུལ་མེད་ལེགས་པར་བདེར་ འོངས་སམ། །གཡོ་དང་སྒྱུ་བྲལ་བསམ་པ་དགེ་ལྡན་པ། །ང་རྒྱལ་དྲེགས་མེད་སྣོད་ཀྱི་དམ་པ་པོ། །ཁྲོ་དང་འཚིག་མེད་ཁེངས་ཤིང་འགྱིང་པ་མེད། །བལྟ་ན་སྡུག་པ་ ཁྱོད་མཐོང་ལེགས་པ་ཡིན། །ཚུར་ཤོག་ཕྱོགས་ཀུན་སྤྱོད་ཡུལ་མངོན་གྱུར་པ། །ཚུར་ཤོག་རྒྱལ་བའི་མཛོད་རྣམས་སྒྲུབ་བྱེད་པ། །ཚུར་ཤོག་རྒྱལ་བའི་མཛོད་རྣམས་ འཕེལ་བྱེད་པ། །ཡིད་ལ་དུབ་མེད་ལེགས་པར་ཁྱོད་འོངས་སམ། །ཚུར་ཤོག་དུས་གསུམ་ཡུལ་ལྡན་འོངས་པ་ལེགས། །ཆོས་ཀྱི་དབྱིངས་ལ་མོས་པའི་དཀྱིལ་འཁོར་ ལྡན༑ ༑སངས་རྒྱས་ཀུན་གྱི་ཡོན་ཏན་སྙིང་པོར་བྱུང༌། །མཁས་པ་ལེགས་པར་འོངས་སམ་མི་ངལ་ལམ། །ཚུར་ཤོག་འཇམ་དཔལ་ཡེ་ཤེས་པདྨོའི་མཆོག །ཚུར་ཤོག་སྤྲིན་དཔལ་ ཆར་པས་རྣམ་སྤེལ་བ། །རྒྱལ་བ་ཀུན་གྱི་སྲས་ཀྱིས་བཏང་བ་ཚུར། །ཁྱོད་ལ་བསྒྲིབས་པ་མེད་པའི་ཕྱོགས་ཀྱང་བསྟན། །ལྟོས་ཤིག་སྨོན་ལམ་དྲ་བ་ཅི་འདྲ་བ། །ཆོས་དབྱིངས་རྒྱས་ འགེངས་བསམ་གྱིས་མི་ཁྱབ་སྟེ། །བྱང་ཆུབ་སེམས་དཔའི་སྤྱོད་པ་ལམ་བསྒྲུབས་པ། །རྒྱ་ཆེ་ཡང་བྱེད་ནོར་བཟང་འདིར་འོངས་སོ། །བདེ་བར་གཤེགས་པའི་སྤྱོད་ཡུལ་ཚོལ་བྱེད་ ཅིང༌། །རྡུལ་དང་བྲལ་བའི་སྤྱོད་པ་འགྲོ་བའི་ཕྱིར། །སྨོན་ལམ་རླབས་ཆེན་ཡོངས་སུ་འདྲི་བྱེད་ཅིང༌། །སྐྱོ་བའི་ཡིད་མེད་འདི་ནི་འདིར་འོངས་སོ། །འདས་པའི་མགོན་པོས་གང་ལ་བསླབས་ མཛད་དེ། །དེ་བཞིན་མ་བྱོན་རྣམས་ཀྱང་སློབ་འགྱུར་ལ། །བདེ་གཤེགས་བཞུགས་པའི་སྤྱད་པར་བྱ་བ་རྣམས། །ཡོངས་སུ་དྲི་ཕྱིར་འདི་ནི་འདིར་འོངས་སོ། །འདི་ནི་བདག་གི་དགེ་ བཤེས་ཆོས་སྨྲ་བ། །ཆོས་ཀུན་ནན་ཏན་ཡོངས་སུ་སྟོན་བྱེད་པ། །བྱང་ཆུབ་སེམས་དཔའི་སྤྱོད་ལམ་ཡོངས་སྟོན་པ། །ཡིན་ཞེས་སེམས་གཅིག་བསམ་ནས་འདིར་འོངས་སོ། །བྱང་ཆུབ་ སེམས་དཔའ་བདག་གི་བློ་སྐྱེ་བ། །སངས་རྒྱས་སྲས་པོ་བྱང་ཆུབ་སྐྱེད་བྱེད་པ། །འདི་དག་བདག་བཤེས་སངས་རྒྱས་བསྔགས་པ་ཞེས། །དེ་ལྟར་དགེ་བའི་སེམས་ཀྱིས་འདིར་འོངས་སོ། ། ༄༅། །འདི་དག་སྐྱེད་པས་བདག་གི་མ་ལྟ་བུ། །ཡོན་ཏན་འོ་མ་ལྡུད་པས་མ་མ་འདྲ། །བྱང་ཆུབ་ཡན་ལག་ཡོངས་སུ་སྐྱོང་བ་ཡིན། །དགེ་བཤེས་འདི་དག་གནོད་པ་ རྣམ་པར་ཟློག །རྒ་ཤི་ཐར་བྱེད་སྨན་པ་ལྟ་བུ་སྟེ། །བདུད་རྩིའི་ཆར་འབེབས་བརྒྱ་བྱིན་ལྷ་དབང་འདྲ། །ཟླ་བ་ལྟ་བུར་དཀར་པོའི་ཕྱོགས་ཀྱིས་རྒྱས། །ཞི་བའི་ཕྱོགས་སྟོན་ཉི་མ་གསལ་ བ་འདྲ༑ ༑དགྲ་དང་གྲོགས་ལ་རི་བོ་འདྲ་བ་སྟེ། །རྒྱ་མཚོ་བཞིན་དུ་མི་འཁྲུག་སེམས་དང་ལྡན། །ཡོངས་སུ་སྐྱོང་དང་མཉན་པ་འདྲ་བ་ཞེས། །དེ་འདྲའི་སེམས་ཀྱིས་ནོར་བཟང་ འདིར་འོངས་སོ། །འཇིགས་མེད་སྐྱོབ་པས་དཔའ་བོ་ལྟ་བུ་སྟེ། །དེད་དཔོན་མགོན་དང་སྐྱབས་སུ་གྱུར་པ་ཡིན། །འདི་དག་བདག་ལ་བདེ་སྟོབ་མིག་ཡིན་ཞེས། །དེ་འདྲའི་ སེམས་ཀྱིས་དགེ་བཤེས་བསྙེན་བཀུར་བྱེད། །ཆོས་ཀྱི་ཕྱོགས་རྣམས་རྟག་ཏུ་སྟོན་པ་སྟེ། །སངས་རྒྱས་ཡོན་ཏན་ཡེ་ཤེས་སྟོན་པ་ཡིན། །ངན་སོང་ངན་འགྲོ་ཐམས་ཅད་ སྦྱོང་བར་བྱེད། །དགེ་བཤེས་འདི་དག་བདག་ལ་དགེ་བ་སྟོན། །འདི་དག་རྒྱལ་བའི་མཛོད་ཀུན་སྟོབ་པ་ཡིན། །འདི་དག་རྒྱལ་བ་ཀུན་གྱི་མཛོད་སྲུང་སྟེ། །འདི་དག་ རྒྱལ་བ་ཀུན་གྱི་གསང་འཛིན་ཅེས། །དེ་ལྟར་མཁས་པ་འདི་ནི་དགེ་བཤེས་བསྙེན། །ཡེ་ཤེས་ཕུན་ལྡན་འདི་ལས་རྣམ་པར་དག །གཟུགས་དང་ལོངས་སྤྱོད་ཚེ་རིགས་ ཕུན་སུམ་ཚོགས། །འདི་ལས་ཕུན་སུམ་ཚོགས་ཀུན་དཀོན་པ་མིན། །བསམ་པ་དེ་འདྲས་འདི་ནི་འདིར་འོངས་སོ། །བསམ་པ་རླབས་ཆེན་འདི་ལ་ཀུན་ཀྱང་ལྟོས། །མཁས་པའི་དགེ་ བཤེས་རྣམས་ལ་འདི་སྟེན་ཅིང༌། །མཁས་པ་འདི་བློ་ཅི་འདྲ་སྐྱེད་པ་ལྟོས། །ཁྱོད་ཀྱིས་རྟག་ཏུ་དེ་ལྟར་བསླབ་པར་བྱ། །འདི་ནི་སྔོན་གྱི་བསོད་ནམས་དགེ་བའི་རྒྱུས། །བྱང་ཆུབ་ཞུགས་ ཏེ་འཇམ་དཔལ་མཐོང་གྱུར་ནས། །དེ་ཡི་གདམས་ངག་རྗེས་སུ་མཐུན་སྤྱོད་ཅིང༌། །སྐྱོ་བ་མེད་པར་རྒྱུ་བ་འདི་ལ་ལྟོས། །འདིས་ནི་དགའ་བ་དེ་ཐམས་ཅད་ཀུན་སྤངས་ཏེ། །ལྷ་རྫས་ལྟ་བུའི་ ཁྱིམ་ཡང་ཡོངས་སུ་སྤངས། །ཕ་མ་མ་མ་སྐྱིད་པ་རྒྱ་ཆེན་ཀུན། །ཡོངས་སུ་སྤངས་ཤིང་བྲན་ལྟར་བཤེས་གཉེན་སྟེན། །མཁས་པ་འདིས་ནི་བསམ་པ་རྣམ་སྦྱངས་ཏེ། །བདག་གིས་མི་ ལུས་ཡོངས་སུ་སྤངས་བྱས་ནས། །སངས་རྒྱས་ཀུན་གྱི་ཕོ་བྲང་འགྲོ་བར་འགྱུར། །དེ་ཕྱིར་འབྲས་བུ་དེ་འདྲའང་ཐོབ་པར་འགྱུར། །འདི་ནི་རྒ་དང་ནད་ཀྱིས་ཡོངས་མནར་བའི། །སྲོག་ ཆགས་སྡུག་བསྔལ་བརྒྱ་ཡིས་གཅེས་པ་རྣམས། །སྐྱེ་ཤི་མྱ་ངན་འཇིགས་པས་གདུངས་མཐོང་ནས། །དེ་དག་དོན་དུ་སྙིང་རྗེའི་སེམས་ཀྱིས་སྤྱོད། །འགྲོ་རྒྱུད་ལྔ་ཡི་འཁོར་ལོའི་དཀྱིལ་ འཁོར་དུ། །སྡུག་བསྔལ་འཁྲུལ་འཁོར་བཙིར་བའི་འགྲོ་མཐོང་ནས། །སྡུག་བསྔལ་འཁྲུལ་འཁོར་འཁོར་ལོ་འཇོམས་པ་ཡི། །ཡེ་ཤེས་རྡོ་རྗེ་སྲ་བ་འདི་ཚོལ་ལོ། །འདོད་ཆགས་ཞེ་སྡང་ ༄༅། །རྩྭ་སྡོང་ཚེར་མ་ཅན། །ལྟ་ཆགས་རྩྭ་མང་ཡོངས་སུ་འཛིངས་པ་ཡི། །སེམས་ཅན་ཞིང་ནི་ཡོངས་སུ་སྦྱོང་བའི་ཕྱིར། །ཤེས་རབ་གཤོལ་བརྟན་བཟང་པོ་ འདི་ཚོལ་ལོ། །གཏི་མུག་མ་རིག་ཐིབས་པོའི་བསམ་པ་ཅན། །འགྲོ་བ་ཤེས་རབ་མིག་སྟོར་དམིགས་མེད་པ། །དེ་ལ་ཕྱོགས་བདེ་སྟོན་པའི་མཐུ་ཡོད་པ། །འགྲོ་བའི་དེད་ དཔོན་བཟང་པོར་འདི་འགྱུར་རོ། །བཟོད་པའི་གོ་བགོས་རྣམ་ཐར་བཞོན་པ་ཞོན། །ཡེ་ཤེས་རལ་གྲིས་མྱ་ངན་དགྲ་འཇོམས་པས། །མི་འཇིགས་སྟོབ་པའི་དཔའ་བོར་གྱུར་པ་ འདི༑ ༑འགྲོ་བ་རྣམས་ཀྱི་ལམ་སྟོན་འགྱུར་བ་ཡིན། །འདི་ནི་ཆོས་ཀྱི་གྲུ་རབ་སྦྱོར་བ་སྟེ། །ཡེ་ཤེས་རྒྱ་མཚོའི་ལམ་ལ་སློབ་པའོ། །ཞི་བ་རིན་ཆེན་མཆོག་གི་གླིང་སྐྱེལ་ བ༑ ༑འདི་ནི་ཁམས་གསུམ་མཚོ་ཡི་སྐྱ་བ་འཛིན། །ཡེ་ཤེས་འོད་ཟེར་སྨོན་ལམ་དཀྱིལ་འཁོར་ཅན། །སེམས་ཅན་ཀུན་གྱི་གནས་སུ་སྣང་བྱེད་པའི། །ཆོས་དབྱིངས་མཁའ་ལ་ འོད་ཆེན་རབ་ལྡན་པར། །འདི་ནི་ཁམས་གསུམ་ཉི་མར་འཆར་བར་འགྱུར། །བྱམས་པའི་དགའ་ལྡན་ཏིང་འཛིན་དང་བསིལ་བའི། །སེམས་ཅན་ཀུན་ལ་སྙོམས་སེམས་འོད་ བཟང་ལ། །དཀར་པོའི་ཆོས་ཀྱི་དཀྱིལ་འཁོར་ཡོངས་རྒྱས་པའི། །སངས་རྒྱས་ཟླ་བ་འདི་ནི་འཆར་བར་འགྱུར། །བསམ་པའི་གཞི་རྟེན་བརྟན་ལ་རབ་གནས་པ། །བྱང་ཆུབ་ སྤྱོད་པས་རིམ་གྱིས་འཕགས་པ་སྟེ། །ཆོས་ཀུན་རིན་ཆེན་འབྱུང་གནས་ལྡན་པ་ཡི། །ཡེ་ཤེས་རྒྱ་མཚོའི་མཆོག་ཏུ་འདི་འགྱུར་རོ། །བྱང་ཆུབ་སེམས་ཀྱི་ཀླུ་ཡི་དབང་གིས་བྱུང༌། །ཆོས་ ཀྱི་དབྱིངས་ཀྱི་མཁའ་ལ་མངོན་པར་འཕགས། །དཀར་པོའི་འབྲས་བུའི་ལོ་ཏོག་འཕེལ་བྱེད་པའི། །འདི་ནི་འགྲོ་བར་ཆོས་སྤྲིན་ཆར་འབེབས་འགྱུར། །དག་པའི་སྙིང་པོ་དྲི་གསུམ་མུན་ སེལ་བ༑ ༑བྱམས་པའི་སྣུམ་ཡོད་དྲན་པའི་སྣོད་བརྟན་པ། །དྲི་མེད་བྱང་ཆུབ་སེམས་བསྐྱེད་འོད་བཟང་བའི། །ཆོས་ཀྱི་མར་མེ་འདི་ནི་འབར་བྱེད་འགྱུར། །བྱང་ཆུབ་སེམས་ནི་མར་མེར་ སྙིང་རྗེ་སྐོ། །བྱམས་པ་རྡོས་པ་མི་གཡོ་བསམ་པ་མཁྲེགས། །བྱང་ཆུབ་ཡན་ལག་མཐར་གྱིས་བྱུང་བ་ཡི། །སངས་རྒྱས་སྲས་སུ་འདི་ནི་ཡང་དག་སྐྱེ། །བསོད་ནམས་སྙིང་པོ་མངོན་པར་ འཕེལ་བར་བྱེད། །ཡེ་ཤེས་སྙིང་པོ་ཡོངས་སུ་སྦྱོང་བར་འགྱུར། །འདི་ནི་ཤེས་པའི་སྙིང་པོ་འཆར་བར་བྱེད། །སྨོན་ལམ་ཇི་བཞིན་སྙིང་པོ་ཡང་དག་བྱུང༌། །སྙིང་རྗེ་བྱམས་པས་སྤྲུལ་པ་ འདི་འདྲ་བ། །སེམས་ཅན་དགྲོལ་བློ་ཕན་པའི་བསམ་ལྡན་པ། །རྣམ་དག་ཡིད་ཅན་འདི་ནི་ཅི་འདྲ་བ། །དེ་འདྲའི་འགྲོ་བ་ལྷ་དང་མིར་བཅས་དཀོན། །འདི་འདྲའི་བསམ་པ་རབ་ཏུ་རྩ་བརྟན་ ལ༑ ༑འདི་འདྲའི་སྦྱོར་བ་བརྟན་པས་རྣམ་འཕེལ་ཅིང༌། །སྲིད་གསུམ་ཡོག་པར་བྱེད་པ་འདི་འདྲ་བའི། །ཡེ་ཤེས་ཤིང་ཆེན་འབྲས་བུ་འབྱུང་བ་དཀོན། །འདི་ནི་ཡོན་ཏན་ཀུན་སྒྲུབ་དོན་དུ་ ༄༅། །གཉེར༑ ༑ཆོས་རྣམས་ཐམས་ཅད་ཡོངས་སུ་དྲི་བར་མོས། །ཐེ་ཚོམ་ཐམས་ཅད་རྣམ་པར་བསལ་དོན་དུ། །ལེ་ལོ་མེད་པར་བཤེས་གཉེན་ཐམས་ཅད་སྟེན། །འདི་ ནི་བདུད་ཀྱི་དཀྲུག་མ་ཉོན་མོངས་འཇོམས། །འདི་ནི་ལྟ་བའི་དྲི་མ་སྲིད་པ་སེལ། །འདི་ནི་འགྲོ་བ་ཐམས་ཅད་དགྲོལ་ལ་བརྩོན། །མཁས་པ་འདི་ནི་རྟག་ཏུ་ཁྱད་པར་ཚོལ། །ཡོན་ཏན་ ལམ་ལ་མ་ནོར་འདི་གནས་པས། །འདི་ནི་ངན་སོང་ཐམས་ཅད་སྦྱོང་བར་འགྱུར། །མཐོ་རིས་ལམ་ཡང་ཉེ་བར་སྟོན་པར་འགྱུར། །ཐར་པའི་ལམ་དུ་འགྲོ་བ་འཛུད་པར་འགྱུར། །འདི་ ནི་འགྲོ་རྒྱུད་ཀུན་གྱི་སྡུག་བསྔལ་སེལ། །འདི་ནི་འགྲོ་རྒྱུད་ཀུན་གྱི་བདེ་བ་སྟོབ། །འདི་ནི་སྲིད་པ་ཀུན་གྱི་ཞགས་པ་ཐུབ། །སྲིད་པའི་འགྲོ་རྒྱུད་ཐམས་ཅད་སེལ་བར་འགྱུར། །ལྟ་ བ་དོག་པ་རྣམ་པར་འབྱེད་པར་འགྱུར། །སྲེད་པའི་འཁྲི་ཤིང་དྲ་བ་གཅོད་པར་འགྱུར། །ཆགས་པའི་འདོད་ཆགས་ཉེ་བར་སྦྱོང་བར་འགྱུར། །སྲིད་གསུམ་ལམ་ཡང་ཡོངས་སུ་ སྟོན་པར་འགྱུར། །འདི་ནི་འཇིག་རྟེན་མགོན་དང་སྐྱབས་ཡིན་ཏེ། །འདི་ནི་འགྲོ་བ་ཀུན་ལ་འོད་བྱེད་པའོ། །རྣམ་པ་ཀུན་ཏུ་སྲིད་པ་སེལ་ལ་མཁས། །ས་གསུམ་ཀུན་གྱི་འདྲེན་ པར་འདི་འགྱུར་རོ། །ཉོན་མོངས་གཉིད་ལོག་འགྲོ་བ་སད་པར་བྱེད། །འདོད་པའི་འདམ་ལས་མཁས་པ་འདི་སྒྲོལ་ཏེ། །འདུ་ཤེས་ཆགས་ལས་ཡོངས་སུ་འདི་ཡང་འགྲོལ། ། བཅིངས་པ་ཀུན་ལས་ཐར་བར་བྱེད་པར་འགྱུར། །ཆོས་དབྱིངས་གཞི་ཡི་བྱེ་བྲག་སྣང་བར་བྱེད། །འཇིག་རྟེན་ཁམས་ཀྱི་བྱེ་བྲག་སྦྱོང་བར་འགྱུར། །ཆོས་ཀུན་གཞི་ཡི་བྱེ་བྲག་ཕ་རོལ་ཕྱིན། ནོར་བཟང་ཁྱོད་ནི་དགའ་བ་སྐྱེད་པར་འགྱུར། །མཁས་པ་ཁྱོད་ཀྱི་སྦྱོར་བའི་ཚུལ་དག་དང༌། །དག་ཅིང་ཁྱོད་ལ་སྨད་པ་མེད་ཚུལ་དང༌། །ཁྱོད་ཀྱི་བསམ་པའི་ཡོན་ཏན་ལྡན་ཚུལ་ལས། །བསམ་ པ་ཐམས་ཅད་ཡོངས་སུ་རྫོགས་པར་འགྱུར། །ཁྱོད་ཀྱིས་བདག་ཉིད་དགེ་བར་བྱས་ཚུལ་གྱིས། །རིང་པོར་མི་ཐོགས་སངས་རྒྱས་ཀུན་མཐོང་འགྱུར། །རིང་པོར་མི་ཐོགས་ཞིང་རྣམས་ ཀུན་འགྲོར་འགྱུར། །ཆོས་ཀུན་རིང་པོར་མི་ཐོགས་ཤེས་པར་འགྱུར། །ཞིང་རྣམས་རྒྱ་མཚོ་རྣམ་པར་སྦྱོང་བར་འགྱུར། །སེམས་ཅན་རྒྱ་མཚོ་རྣམ་པར་འགྲོལ་བར་འགྱུར། །སྤྱོད་ པ་རྒྱ་མཚོ་ཡོངས་སུ་རྫོགས་པར་འགྱུར། །ཁྱོད་ཀྱི་ནན་ཏན་རྒྱ་མཚོ་དེ་འདྲའོ། །ཁྱོད་ཀྱི་མོས་པའི་དཀྱིལ་འཁོར་ཚུལ་ལས་ན། །ཁྱོད་ནི་ཡོན་ཏན་རྣམས་ཀྱི་སྣོད་དུ་འགྱུར། །ཁྱོད་ ནི་དགེ་བ་ཡང་དག་འབྱུང་གནས་འགྱུར། །ཁྱོད་ནི་རྒྱལ་བའི་སྲས་དང་མཉམ་པར་འགྱུར། །ཁྱོད་ཀྱི་སྨོན་ལམ་དཀྱིལ་འཁོར་ཚུལ་ལས་ན། །ཁྱོད་ཀྱིས་བདུད་ཀྱི་དཀྱིལ་འཁོར་ ཕམ་པར་བྱས། །ཁྱོད་ཀྱིས་ལས་ཀྱི་དཀྱིལ་འཁོར་རྣམ་པར་སྦྱངས། །ཉོན་མོངས་དཀྱིལ་འཁོར་ཁྱོད་ཀྱིས་དག་པར་བྱས། །ཡེ་ཤེས་རྒྱུད་ནི་རྣམ་པར་སྦྱོང་བར་འགྱུར། །ཆོས་ ༄༅། །ཀྱི་རྒྱུད་ནི་རབ་ཏུ་བརྗོད་པར་འགྱུར། །ལས་དང་ཉོན་མོངས་སྡུག་བསྔལ་འཁྲུལ་འཁོར་རྒྱུད། །རིང་པོར་མི་ཐོགས་རྣམ་པར་ཟློག་པར་འགྱུར། །འཇིག་རྟེན་ འཁོར་ལོ་སྲིད་པའི་འཁོར་ལོར་བརྟེན། །ཤུ་བའི་ལམ་རྒྱུད་ལྔ་ཡི་འཁོར་ལོར་རྨོངས། །འགྲོ་ཀུན་སྡུག་བསྔལ་འཁོར་ལོ་གཅོད་པ་ཡི། །ཆོས་ཀྱི་འཁོར་ལོ་དམ་པ་བསྐོར་བར་འགྱུར་ སངས་རྒྱས་རིགས་ནི་རྗེས་སུ་འཛིན་པར་འགྱུར། །ཆོས་ཀྱི་རིགས་ནི་ཡོངས་སུ་སྦྱོང་བར་འགྱུར། །དགེ་འདུན་རིགས་ནི་ཡོངས་སུ་སྡུད་པར་འགྱུར། །རིན་ཆེན་འབྱུང་བའི་འབྱུང་ གནས་ཁྱོད་འགྱུར་རོ། །སྲེད་པའི་དྲ་བ་རྣམ་པར་ཟློག་པར་འགྱུར། །ལྟ་བའི་དྲ་བ་ཐིབས་པོ་དེ་བཞིན་ཏེ། །འགྲོ་བའི་སྡུག་བསྔལ་དྲ་བ་འགྲོལ་བར་འགྱུར། །སྨོན་ལམ་དྲ་བ་ དེ་ནི་ཁྱོད་ཀྱིས་སྦྱངས། །སེམས་ཅན་ཁམས་ནི་ཡོངས་སུ་སྨིན་བྱེད་འགྱུར། །འཇིག་རྟེན་ཁམས་ནི་ཡོངས་སུ་སྦྱོང་བར་འགྱུར། །ཡེ་ཤེས་ཁམས་ནི་ཤིན་ཏུ་དག་བྱེད་འགྱུར།། ཁྱོད་ཀྱི་བསམ་པའི་ཁམས་ནི་དེ་འདྲའོ། །ནོར་བཟང་དགའ་བ་འཕེལ་བར་བྱེད་པ་ཁྱོད། །སེམས་ཅན་ཀུན་ལ་ཕན་བདེ་དགའ་བྱེད་འགྱུར། །བྱང་ཆུབ་སེམས་དཔའི་རིགས་ རྒྱུད་དགའ་བྱེད་ཅིང༌། །སངས་རྒྱས་ཐམས་ཅད་སྨོན་ལམ་དགའ་བྱེད་འགྱུར། །སེམས་ཅན་ཀུན་གྱི་འགྲོ་བའི་གནས་སྟོན་པ། །ཞིང་རྣམས་ཐམས་ཅད་གཟུགས་བརྙན་ སྣང་སྟོན་པ། །ཆོས་རྣམས་ཐམས་ཅད་སྣང་བ་རབ་སྟོན་པའི། །བལྟ་ན་བཟང་བའི་རྒྱལ་བར་ཁྱོད་འགྱུར་རོ། །ཆོས་དབྱིངས་སྣང་བར་བྱེད་པའི་འོད་ལྡན་པ། །སེམས་ཅན་ཁམས་ རྣམས་བདེ་བྱེད་འོད་ལྡན་པ། །ངན་སོང་ཐམས་ཅད་ཞི་བྱེད་འོད་ལྡན་པའི། །སྲིད་གསུམ་སྡུག་བསྔལ་ཞི་བར་བྱེད་པར་འགྱུར། །མཐོ་རིས་ལམ་ནི་ཉེ་བར་སྟོན་པར་འགྱུར། ། སངས་རྒྱས་ལམ་ནི་འགྲོ་ལ་འབྱེད་པར་འགྱུར། །ཐར་པའི་ལམ་དུ་འགྲོ་བ་ཁྲིད་པར་འགྱུར། །དེ་འདྲའི་ལམ་ནི་ཁྱོད་ཀྱིས་རྣམ་པར་སྦྱངས། །ལོག་པའི་ལམ་ནི་རྣམ་པར་ཟློག་པར་ འགྱུར༑ ༑སྐྱེ་བོ་འཕགས་པའི་ལམ་ལ་འདུལ་བར་འགྱུར། །བརྟན་པའི་བློ་གྲོས་ལེ་ལོ་མེད་པ་ཁྱོད། །མི་གཡེང་བྱང་ཆུབ་ལམ་ནི་དེ་ལྟར་ཚོལ། །སྲིད་པའི་རྒྱ་མཚོར་གནས་པའི་ ལུས་ཅན་རྣམས། །སྡུག་བསྔལ་མཐར་ཕྱིན་བྱ་བར་ཁྱོད་བརྩོན་པ། །འགྲོ་བ་སྲིད་པའི་མཚོ་ལས་སྒྲོལ་བར་འགྱུར། །ཁྱོད་ཀྱི་ཡོན་ཏན་མཚོ་ཆེན་དེ་འདྲའོ། །ཡེ་ཤེས་ཉི་ མ་མཆོག་གི་འོད་ཟེར་མཚོས། །ལུས་ཅན་ཉོན་མོངས་རྒྱ་མཚོ་ཡོངས་བསྐམས་ཤིང༌། །དེ་དག་ནན་ཏན་མཚོ་ལ་བཀོད་བྱས་ནས། །ཡེ་ཤེས་རྒྱ་མཚོར་རབ་ཏུ་འགོད་པར་ འགྱུར༑ ༑བློ་གྲོས་རྒྱ་མཚོ་རྣམ་པར་འཕེལ་བར་འགྱུར། །སྤྱོད་པ་རྒྱ་མཚོ་རྣམ་པར་སྦྱོང་བར་འགྱུར། །སངས་རྒྱས་ཀུན་གྱི་སྨོན་ལམ་རྒྱ་མཚོ་ལ། །རིང་པོར་མི་ཐོགས་ཡོངས་ ༄༅། །སུ་འཇུག་པར་འགྱུར། །མཁས་པ་ཁྱོད་ནི་བློ་གྲོས་རྒྱ་མཚོའི་མཐུས། །ཞིང་རྣམས་རྒྱ་མཚོ་མང་པོར་ཕྱིན་པར་འགྱུར། །འཁོར་རྣམས་རྒྱ་མཚོ་མང་ པོ་མཐོང་བར་འགྱུར། །ཆོས་མང་རྒྱ་མཚོ་ཡོངས་སུ་འཐུང་བར་འགྱུར། །སངས་རྒྱས་སྤྲིན་མང་ཁྲག་ཁྲིག་མཐོང་བར་འགྱུར། །མཆོད་སྤྲིན་ཤིན་ཏུ་རྒྱ་ཆེན་བྱེད་པར་ འགྱུར༑ ༑ཆོས་ཀྱི་སྤྲིན་མང་ཁྲག་ཁྲིག་ཐོས་པར་འགྱུར། །ཁྱོད་ནི་སྨོན་ལམ་དེ་འདྲའི་སྤྲིན་ཀྱང་བྱེད། །སེམས་ཅན་ཐམས་ཅད་གནས་མང་རྒྱས་འགེངས་འགྱུར། །ཞིང་ རྣམས་ཀུན་གྱི་གནས་སུ་འགྲོ་བར་འགྱུར། །སངས་རྒྱས་ཀུན་གྱི་གནས་སུ་ཕྱིན་པར་འགྱུར། །ཁྱོད་ནི་དེ་འདྲའི་ཕྱོགས་སུ་ཞུགས་པ་ཡིན། །ཁྱོད་ནི་ཏིང་འཛིན་གནས་ སུ་འཇུག་པར་འགྱུར། །ཁྱོད་ཀྱིས་རྣམ་ཐར་གནས་རྣམས་ཐོབ་པར་འགྱུར། །ཁྱོད་ནི་མངོན་ཤེས་གནས་ལ་སྤྱོད་པར་འགྱུར། །ཆོས་ཀྱི་དབྱིངས་ཀྱི་གནས་ལ་རབ་ཏུ་ གནས༑ ༑ཉི་ཟླའི་གཟུགས་རྣམས་རབ་ཏུ་སྣང་བ་ལྟར། །སེམས་ཅན་ཀུན་གྱི་གནས་སུ་འཆར་བར་འགྱུར། །རྒྱལ་བ་རྣམས་ཀྱི་སྤྱན་སྔར་མངོན་འབྱུང་འགྱུར། །ཁྱོད་ ཀྱི་འབྱུང་བའི་ལམ་ཆེན་དེ་འདྲའོ། །འཇིག་རྟེན་ཀུན་ལ་མི་གནས་སྤྱོད་ཡུལ་དང༌། །ནམ་མཁའི་སྤྱོད་ཡུལ་བཟང་པོར་ཁྱོད་སྤྱོད་འགྱུར། །ཁྱོད་ཀྱི་སྤྱོད་ཡུལ་རབ་ཏུ་ ཞི་བར་འགྱུར། །ཁྱོད་ཀྱི་མངོན་ཤེས་སྤྱོད་ཡུལ་དེ་འདྲའོ། །མིག་འཕྲུལ་དྲ་བའི་བྱེ་བྲག་གཞི་མཁས་ཁྱོད། །ཞིང་གི་དྲ་བའི་བྱེ་བྲག་ཇི་སྙེད་གཞི། །སེར་པོ་མཁའ་ལ་ཆགས་པ་མེད་ པ་ལྟར༑ ༑རིང་པོར་མི་ཐོགས་རྒྱས་པར་འགེངས་པར་འགྱུར། །ཆོས་དབྱིངས་འབྱམས་ཀླས་ཁོང་དུ་ཆུད་པར་འགྱུར། །འབྱམས་ཀླས་འཇིག་རྟེན་ཁམས་སུ་འགྲོ་བར་འགྱུར། ། དུས་གསུམ་གཤེགས་པའི་སངས་རྒྱས་འབྱམས་ཀླས་ཀུན། །མཐོང་བར་འགྱུར་གྱི་ནོར་བཟང་དགའ་བར་གྱིས། །ཁྱོད་ཀྱིས་དེ་འདྲའི་རྣམ་ཐར་དེ་ལྟ་བུ། །མཐོང་ལ་མཐོང་ཞིང་ ད་དུང་མཐོང་བར་འགྱུར། །དེ་བས་མཁས་པ་སྐྱོ་བར་མ་བྱེད་ཅིག །དགའ་ཡངས་ཟང་ཟིང་མེད་པ་ཉམས་སུ་ལོངས། །ནོར་བཟང་ཁྱོད་ནི་ཡོན་ཏན་སྣོད་བཟང་སྟེ། །ཁྱོད་ནི་ རྒྱལ་བ་རྣམས་ཀྱི་གདམས་ངག་མཐུན། །ཁྱོད་ཀྱིས་ཚུལ་འདི་ཡོངས་སུ་གཟུང་བར་གནས། །དེ་བས་རྣམ་པར་འཕྲུལ་པ་འདི་དག་མཐོང༌། །སངས་རྒྱས་སྲས་པོ་གནས་མེད་ སྤྱོད་ཡུལ་ཅན། །གང་རྣམས་མཐོང་བར་བསྐལ་པ་ཁྲག་ཁྲིག་ཏུ། །ཤིན་ཏུ་དཀའ་ན་ལེགས་བརྗོད་མི་སྨོས་པ། །དེ་དག་སྤྱོད་ལེགས་སྤྱོད་ཚེ་ཁྱོད་ཀྱིས་མཐོང༌། །དེ་ལྟར་འཇམ་ དཔལ་མངོན་དུ་མཐོང་གྱུར་ཏེ། །དེ་འདྲའི་ཡོན་ཏན་སྣོད་དུ་གྱུར་བྱས་པ། །ཁྱོད་ཀྱི་ཐོས་པ་རྒྱ་ཆེ་བསམ་མི་ཁྱབ། །མི་ཡི་སྲིད་པར་ཁྱོད་ནི་ལེགས་པར་འོངས། །ངན་སོང་ ༄༅། །ལམ་རྣམས་ཐམས་ཅད་རྣམ་པར་ཟློག། མི་ཁོམ་ངན་འགྲོ་ཐམས་ཅད་རྣམ་པར་སྦྱངས། །སྡུག་བསྔལ་ཆོས་རྣམས་ཁྱོད་ཀྱིས་ཐམས་ཅད་བོར། མི་དགའ་ཐམས་ཅད་ཡོངས་སུ་སྤང་བར་གྱིས། །བྱིས་པའི་ས་ནི་ཁྱོད་ཀྱིས་རྣམ་པར་བཟློག །བྱང་ཆུབ་སེམས་དཔའི་ཡོན་ཏན་ས་ལ་གནས། །ཡེ་ཤེས་ས་ཡི་དམ་པ་ཡོངས་ བསྐང་ཞིང༌། །སངས་རྒྱས་ས་རབ་རིང་པོར་མི་ཐོགས་འཐོབ། །བྱང་ཆུབ་སེམས་དཔའི་སྤྱོད་པ་རྒྱ་མཚོ་སྙེད། །སངས་རྒྱས་ཡེ་ཤེས་ནམ་མཁའི་མཛོད་དང་མཚུངས། །དེ་ ཡི་ཚད་ཀྱི་སྨོན་ལམ་གང་ཆེན་མཚོ། །ཁྱོད་ཀྱིས་བཙལ་ཟིན་ཤིན་ཏུ་དགའ་བར་གྱིས། །དེ་ལྟར་དབང་པོ་ཡོངས་སུ་མི་སྐྱོ་ལ། །བསམ་པ་བརྟན་ཞིང་སྦྱོར་བ་ངེས་པ་ རྣམས༑ ༑གང་དག་འདི་འདྲའི་བཤེས་གཉེན་སྟེན་བྱེད་པ། །དེ་དག་རིང་པོར་མི་ཐོགས་མགོན་པོར་འགྱུར། །ཁྱོད་ཀྱི་བྱང་ཆུབ་སྤྱོད་པ་སྣ་ཚོགས་ཀྱིས། །སེམས་ ཅན་མང་པོ་དུལ་བར་འགྱུར་མཐོང་ཞིང༌། །ཆོས་ཀུན་སྒོ་ཡི་བྱང་ཆུབ་སྤྱོད་པ་ལ། །ནམ་ཡང་ཡིད་གཉིས་བྱེད་པར་མ་གྱུར་ཅིག ། དེ་ལྟར་ཕུན་སུམ་ཚོགས་པ་འདི་ འདྲ་འདི། །སངས་རྒྱས་སྲས་པོས་དེ་རིང་འདིར་མཐོང་བ། །དོན་ཆོས་ཡོན་ཏན་དད་པ་ཕུན་སུམ་ཚོགས། །ཁྱོད་ཀྱི་བསོད་ནམས་ཕུན་ལྡན་བསམ་མི་ཁྱབ། །དེ་ལྟར་ རྒྱལ་སྲས་རྣམས་ཀྱིས་རྒྱུན་འབྲེལ་བར། །རང་རང་སོ་སོའི་སྨོན་ལམ་བསྟན་བྱས་ཏེ། །ཁྱོད་ཀྱིས་དེ་དག་མ་ལུས་མཐུན་རྟོགས་པ། །ཁྱོད་ཀྱིས་ཐོབ་པ་ཆེན་པོ་ཅི་འདྲ་ལྟོས། །བྱང་ ཆུབ་སེམས་དཔའི་སྤྱོད་པའི་སྣོད་གྱུར་པ། །དེ་འདྲ་སྲིད་པ་བརྒྱར་ཡང་དཀོན་པས་ན། །དེ་ཕྱིར་རྒྱལ་སྲས་དེ་དག་རྒྱུན་འབྲེལ་བ། །ཁྱོད་ལ་རྣམ་ཐར་ཚུལ་རྣམས་ཡོངས་སུ་སྟོན། ། བསྐལ་པ་ཁྲག་ཁྲིག་བྱེ་བར་འགྲོ་བ་གང༌། །བདེ་གཤེགས་སྲས་དང་ལྷན་ཅིག་འགྲོགས་གྱུར་བ། །དེ་དག་དེ་རྣམས་སྤྱོད་ཡུལ་མི་ཤེས་ཏེ། །དེ་དག་ཡོན་ཏན་སྣོད་དུ་བདག་མ་ བྱས༑ ༑ཁྱོད་ཀྱིས་འདི་འདྲའི་ཚུལ་འདི་ཐོས་པར་གྱུར། །བྱང་ཆུབ་སེམས་དཔའ་ཆེན་པོའི་རྣམ་འཕྲུལ་པ། །འགྲོ་བ་ཀུན་ན་དཀོན་པ་ཁྱོད་ཀྱིས་མཐོང༌། །དེ་ལྟར་ནོར་བཟང་དགའ་བའི་ ཡིད་དུ་གྱིས། །ཁྱོད་ལ་སངས་རྒྱས་ཐམས་ཅད་དགོངས་པ་མཛད། །བྱང་ཆུབ་སེམས་དཔའ་ཁྱོད་གཟུང་ཕྱིར་ཡང་གནས། །ཁྱོད་ཀྱང་དེ་དག་རྗེས་སུ་བསྟན་ལ་གནས། །ལེགས་སོ་ ནོར་བཟང་ཁྱོད་ཀྱི་འཚོ་བ་དགེ །བྱང་ཆུབ་སེམས་དཔའི་རིགས་ཀྱི་ཆོས་ལ་གནས། །ཁྱོད་ནི་རྒྱལ་སྲས་ཡོན་ཏན་རྣམས་ལ་སློབ། །བདེ་བར་གཤེགས་རིགས་རྣམ་པར་འཕེལ་ བྱེད་འགྱུར། །ནོར་བཟང་དགའ་བ་རྒྱ་ཆེན་ཉམས་སུ་ལོངས། །སངས་རྒྱས་མཉམ་མེད་ཐམས་ཅད་ཁྱོད་ཀྱི་ཕ། །བྱང་ཆུབ་སེམས་དཔའ་ཐམས་ཅད་ཁྱོད་དང་སྤུན། །བྱང་ཆུབ་ ༄༅། །ཡན་ལག་ཐམས་ཅད་ཁྱོད་གྱི་གཉེན། །ཁྱོད་ནི་བདེ་གཤེགས་ཐུགས་ལས་སྐྱེས་པའི་སྲས། །ཆོས་ཀྱི་རྒྱལ་པོའི་རིགས་ཀྱི་རྒྱུད་འཛིན་པ། །བྱང་ཆུབ་སེམས་ དཔའི་རིགས་རྒྱུད་འཕེལ་བར་བྱེད། །རིང་པོར་མི་ཐོགས་ཆོས་རྒྱལ་འཐོབ་འགྱུར་གྱི། །ནོར་བཟང་དབང་པོ་ཚིམ་ཞིང་དགའ་བར་གྱིས། །སངས་རྒྱས་ཀུན་གྱི་དབང་བསྐུར་དམ་ པ་ཡང༌། །རིང་པོར་མི་ཐོགས་རྨད་བྱུང་ཐོབ་པར་འགྱུར། །རྒྱལ་བའི་སྲས་དང་མཚུངས་ཤིང་མཉམ་པར་འགྱུར། །ཁྱོད་ཀྱི་སྤྱོད་པའི་ཚུལ་མཐུན་དེ་འདྲའོ། །མི་གང་ ཅི་འདྲའི་ས་བོན་འདེབས་བྱེད་པ། །དེ་ནི་དེ་འདྲའི་འབྲས་བུ་འཐོབ་པར་འགྱུར། །དགའ་བ་རྒྱ་ཆེན་བསམ་ཡས་ཉམས་སུ་ལོངས། །ངས་ནི་དེ་རིང་ཁྱོད་ཀྱི་དབུགས་ཀྱང་ དབྱུང༌། །ཚེ་གཅིག་ཁྱོད་ཀྱིས་གང་རྣམས་ཐོག་གྱུར་པ། །བྱང་ཆུབ་སེམས་དཔའ་ཁྲག་ཁྲིག་བསམ་ཡས་པ། །བསྐལ་པ་ཁྲག་ཁྲིག་བྱང་ཆུབ་སྤྱོད་སྤྱོད་པ། །དེ་དག་ གིས་ཀྱང་ཕུན་སུམ་འདི་མ་རྙེད། །འདི་རྣམས་ཐམས་ཅད་མོས་པའི་འབྲས་བུ་སྟེ། །བརྩོན་འགྲུས་བསམ་པ་དག་ནི་དེ་བཞིན་ནོ། །གང་ཞིག་སྤྱོད་པ་འདི་འདྲར་དགའ་ བ་ཡང༌། །ནོར་བཟང་སྤྱོད་པ་གང་ཡིན་དེ་ལ་སྤྱོད། །སྤྱོད་པ་ཐམས་ཅད་སྨོན་ལམ་བྱུང་བ་ཡིན། །ཆོས་རྣམས་ཐམས་ཅད་མོས་ལས་ཡོངས་སུ་གྱུར། །ནོར་བཟང་དེ་ ལྟར་ཁྱོད་ཀྱིས་ཡོངས་སུ་བསྒྲུབས། །རྟག་ཏུ་ཁྱད་པར་སྤྱོད་པ་བཙལ་བར་གྱིས། །ཀླུ་ཡི་བསམ་པ་ཇི་སྙེད་བྱུང་གྱུར་པ། །དེ་སྙེད་ཆར་པ་ཡོངས་སུ་འབབ་པར་འགྱུར། །སྨོན་ལམ་ ཡེ་ཤེས་སྤྱོད་ཡུལ་ཇི་སྙེད་པ། །དེ་སྙེད་བྱང་ཆུབ་སྤྱོད་པ་རྒྱས་པར་འགྱུར། །ནོར་བཟང་བཟང་པོའི་སྤྱོད་ཅེས་བྱ་བ་འདི། །ཚུལ་འདི་ཁྱོད་ལ་བསྟན་པ་འདི་ཡིན་གྱི། །དེ་ ཤེས་གྱིས་ལ་དགེ་བཤེས་རང་བཞིན་གྱིས། །བསྙེན་བཀུར་བྱེད་ཚེ་འཇིགས་པར་མ་བྱེད་ཅིག །ལུས་རྣམས་བྱེ་བ་སྔོན་ཆད་ཁྱོད་ཀྱིས་ཀྱང༌། །འདོད་པའི་དོན་དུ་དོན་མེད་ ཟད་བྱས་སོམས། །ད་ནི་བྱང་ཆུབ་ཡོངས་སུ་ཚོལ་གྱུར་ན། །བརྟུལ་ཞུགས་བཟང་པོ་བརྟུལ་བས་ཞིག་ཀོ་འདོད། །ཁྱོད་ཀྱིས་བསྐལ་པ་བྱེ་བ་འདས་བྱས་ཏེ། །འདུ་བྱས་ སྡུག་བསྔལ་ཐམས་ཅད་ཉམས་སུ་མྱོང༌། །གངྒཱའི་བྱེ་སྙེད་སངས་རྒྱས་མཉེས་མ་བྱས། །འདི་འདྲའི་ཚུལ་ཡང་ཐོས་པར་མ་གྱུར་ཏོ། །དེ་ལས་ད་ནི་ཁོམ་པར་མིར་ཡང་ སྐྱེས༑ ༑སངས་རྒྱས་བྱུང་མཐོང་དགེ་བཤེས་འདི་འདྲ་སྟེ། །བྱང་ཆུབ་མཆོག་གི་སྤྱོད་པའང་ཐོས་པར་གྱུར། །རྣམ་དག་སེམས་སུ་དེ་ཀོ་ཅིར་མི་འགྱུར། །བདེ་བར་ གཤེགས་པ་ཡང་དུ་འབྱུང་བར་འགྱུར། །དགེ་བཤེས་དེ་བཞིན་ཆོས་མཉན་ཐོས་པར་འགྱུར། །གལ་ཏེ་བསམ་པ་ཡོངས་སུ་མ་སྦྱངས་ན། །ཚུལ་འདི་ཕྱིན་ཆད་ཐོས་ ༄༅། །པར་དཀའ་བ་ཡིན། །དེ་བས་དད་དང་མོས་དང་བསམ་པ་རྣམས། །ཡོངས་སུ་སྐྱེད་ལ་བླ་མ་ཕུ་དུད་ཀྱིས། །ཐེ་ཚོམ་ལྟ་བ་ཡོངས་སུ་སྐྱོ་སྤོངས་ལ། ། ཡང་དང་ཡང་དུ་འདི་འདྲའི་ཚུལ་ཉོན་ཅིག །གང་གིས་སྤྱོད་ལ་འཇུག་པ་འདི་འདྲ་འདི། །ཐོས་ནས་དེ་འདྲའི་སྨོན་ལམ་མངོན་བསྒྲུབས་པ། །དེ་དག་ནི་[?] ཡི་སྲིད་པར་ ལེགས་པར་འོངས། །གང་གིས་དེ་འདྲའི་མོས་པ་སྦྱངས་པ་ནི། །དེ་ལ་དགེ་བཤེས་ཐམས་ཅད་མི་དཀོན་ནོ། །དེ་ནི་རྒྱལ་བ་རྣམས་ཀྱི་སྲས་དང་སྤུན། །དེ་ལ་ཕྱིན་ ཆད་བྱང་ཆུབ་ཐེ་ཚོམ་མེད། །གང་ཞིག་འདི་འདྲའི་ཚུལ་འདིར་ཞུགས་གྱུར་བ། །དེས་ནི་ལོག་པར་ལྟུང་བ་ཐམས་ཅད་སྤངས། །དེས་ནི་སྡུག་བསྔལ་ཆོས་རྣམས་ཐམས་ ཅད་བསལ། །དེས་ནི་ཡོན་ཏན་ཐམས་ཅད་བསྡུ་བར་བྱས། །ལུས་ནི་བོར་ནས་རིང་པོར་མི་ཐོགས་སུ། །ཡོངས་སུ་དག་པའི་སངས་རྒྱས་ཞིང་དུ་འགྲོ་།བྱང་ཆུབ་སེམས་དཔའི་ གནས་སུ་འཇུག་པར་འགྱུར། །ཕྱོགས་བཅུའི་དེ་བཞིན་གཤེགས་པ་མཐོང་བར་འགྱུར། །ནོར་བཟང་ཁྱོད་ཀྱི་སྔོན་གྱི་རྒྱུ་སྡུག་པས། །ད་ལྟར་བྱུང་ལ་མོས་པ་ངེས་པ་ ཡིས༑ ༑ཁྱད་པར་དོན་གཉེར་དགེ་བཤེས་བསྟེན་བྱས་པས། །ཆུ་ལས་ཨུཏྤ་ལ་བཞིན་དེ་ཕྱིར་འཕེལ། །དགེ་བཤེས་ཐམས་ཅད་ཕུ་དུད་བསམ་པ་དང༌། །སངས་རྒྱས་ ཐམས་ཅད་དགྱེས་བྱའི་བསམ་པ་དང༌། །ཆོས་ཀུན་ཡོངས་སུ་དྲི་བའི་བསམ་པ་ཅན། །བརྟུལ་ཞུགས་བཟང་པོ་ལྡན་པ་དལ་གྱིས་ལོངས། །ཆོས་ཀྱི་ནན་ཏན་ཀུན་ལ་རབ་གནས་པ། ། ལམ་རྣམས་རྗེས་སུ་ཀུན་ཚོལ་རབ་གནས་པ། །སངས་རྒྱས་སྲས་ཀྱི་སྨོན་ལམ་རབ་གནས་པ། །ཡོན་ཏན་ཆོས་རྣམས་ཀུན་གྱི་སྣོད་ཁྱོད་ལོངས། །མོས་པ་ཕུན་སུམ་ཚོགས་པ་ཅི་འདྲ་ བས༑ ༑ཁྱོད་ཀྱིས་ང་ལ་ཕྱག་འདི་བྱས་པ་ནི། །སངས་རྒྱས་ཐམས་ཅད་འཁོར་དུ་མངོན་སུམ་དུ། །རིང་པོར་མི་ཐོགས་ཡོངས་སུ་འབྱུང་བར་འགྱུར། །སྐྱོ་བའི་ཡིད་མེད་ནོར་བཟང་ ལེགས་པ་ཡིན། །སངས་རྒྱས་ཀུན་གྱི་སྨོན་ལམ་སེམས་ལྡན་པ། །བརྟུལ་ཞུགས་བརྟན་ཁྱོད་རིང་པོར་མི་ཐོགས་པར། །སངས་རྒྱས་ཀུན་གྱི་ཡོན་ཏན་མཐར་ཕྱིན་འགྱུར། །ཡེ་ཤེས་སྤྱོད་ ཡུལ་རྣམ་ཐར་མཐར་ཕྱིན་པའི། །འཇམ་དཔལ་གན་དུ་ནོར་བཟང་ཁྱོད་སོང་སྟེ། །བཟང་པོའི་སྤྱོད་པ་དམ་པ་མཆོག་དྲིས་ཤིག །དེ་ཚུལ་ཁྱོད་འཇུག་དེ་ནི་བྱེད་པར་འགྱུར། །དེ་ལྟར་ བྱམས་པ་ཆགས་མེད་སྤྱོད་ཡུལ་གྱིས། །ནོར་བཟང་ཡང་དག་ལེགས་པས་འཕགས་མཐོང་ནས། །འཁོར་རྣམས་ཀུན་ལ་མངོན་པར་བསྟན་བྱས་ཏེ། །དེ་ཡི་ཡོན་ཏན་ལེགས་མཛོད་ འདི་བརྗོད་དོ། །འདི་འདྲའི་རྗེས་སུ་བསྟན་པ་དམ་པ་དང༌། །གདམས་ངག་དེ་འདྲ་ནོར་བཟང་ཐོས་གྱུར་ནས། །དགའ་བའི་ཤུགས་ཀྱིས་དབང་པོ་མངོན་བརླན་པས། །མཆི་མའི་རྒྱུད་ ༄༅། །མང་རབ་ཏུ་དེས་ཀྱང་བླགས། །དགའ་བའི་ཉམས་ཆེན་ཉམས་སུ་མྱོང་བར་འགྱུར། །དབང་པོ་ཚིམ་ནས་ཤུགས་ཀྱིས་དབུགས་ཀྱང་ཕྱུང༌། །ནོར་བཟང་ལངས་ཏེ་ ཐལ་མོ་རབ་སྦྱར་ནས། །བྱམས་པ་དེ་ལ་བསྐོར་བ་རབ་ཏུ་བྱས། །དེ་ཡི་ལག་ཏུ་འཇམ་དཔལ་སེམས་དབང་གིས། །མེ་ཏོག་ཕྲེང་བ་རིན་ཆེན་མཛེས་པ་དག། བྱང་ཆུབ་སེམས་དཔའི་སྨོན་ པས་མངོན་ཐོན་པ། །ཡིད་དུ་འོང་བ་མང་པོ་བྱུང་བར་གྱུར། །ནོར་བཟང་དེ་ཚེ་རབ་ཏུ་དགའ་གྱུར་ནས། །དགའ་བར་དེ་དག་ཁྱམས་པ་དེ་ལ་གཏོར། །དེ་ཚེ་དེ་ཡི་མགོ་ལ་ཀུན་ནས་བྱུགས། ། བྱམས་པས་ཚིགས་སུ་བཅད་པ་འདི་དག་སྨྲས། །རྒྱལ་བའི་སྲས་པོ་ནོར་བཟང་ལེགས་སོ་ལེགས། །དེ་ལྟར་ཁྱོད་ནི་ཡོངས་སུ་མི་སྐྱོ་བས། །ང་དང་འཇམ་དཔལ་ཅི་འདྲ་ཅི་བཞིན་ དུ༑ ༑ཡོན་ཏན་སྣོད་དུ་ཁྱོད་ནི་མྱུར་ཏེ་འགྱུར། །ཐོས་ནས་ནོར་བཟང་དགའ་བའི་ཚིག་བརྗོད་པ། །འདི་འདྲའི་དགེ་བཤེས་བདག་དང་ཕྲད་པ་ནི། །སྲིད་པ་བརྒྱ་ཕྲག་བགྲངས་ པར་ཤིན་ཏུ་དཀོན། །བདག་གིས་དེ་རིང་འདིར་ཕྱིན་ཤིན་ཏུ་ལེགས། །ཡོན་ཏན་ཀུན་གྱི་ཕ་རོལ་ཕྱིན་གྱུར་པ། །འཇམ་དཔལ་ཁྱོད་ཀྱི་བྱིན་རླབས་བཟང་པོ་ཡིས། །བདག་ གིས་བཤེས་གཉེན་འདི་དག་དཀོན་པ་རྙེད། །ཁྱོད་དང་བདག་ཏུ་མྱུར་དུ་འགྲོགས་པར་འགྱུར།། །།ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་ བྱ་བ་ལས། སྡོང་པོས་བརྒྱན་པའི་ལེའུ་སྟེ། བམ་པོ་བརྒྱ་བཅུ་གཉིས་པ། དེ་ནས་ཚོང་དཔོན་གྱི་བུ་ནོར་བཟང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་མདུད་ དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ན། ཇི་ལྟར་བྱང་ཆུབ་ སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་བྱམས་པ་ནི། དེ་བཞིན་གཤེགས་པ་ཐམས་ ཅད་ཀྱི་སྐུ་ཚེ་གཅིག་གིས་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་སྟེ། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐུ་ཚེ་ གཅིག་གིས་ཐོགས་པ་དེ་ནི། བྱང་ཆུབ་སེམས་དཔའི་རྣམ་པར་དགོད་པ་ཐམས་ཅད་ལས་ཡང་དག་པར་འདས་པ་ལགས། དེས་ནི། བྱང་ཆུབ་སེམས་དཔའི་ས་ཐམས་ཅད་རབ་ཏུ་བརྙེས་ པ་ལགས། དེ་ནི། བྱང་ཆུབ་སེམས་དཔའི་སྐྱོན་མེད་པ་རབ་ཏུ་ཞུགས་པ་ལགས། དེས་ནི། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པ་ལགས། དེ་ནི། བཟོད་པའི་སྒོ་ཐམས་ ཅད་དུ་ཞུགས་པ་ལགས། དེས་ནི། བྱང་ཆུབ་སེམས་དཔའི་ས་ཐམས་ཅད་རབ་ཏུ་བརྙེས་པ་ལགས། དེ་ནི། བྱང་ཆུབ་སེམས་དཔའི་རྣམ་པར་ཐར་པའི་སྒོ་ཐམས་ཅད་ལ་རྣམ་པར་ ༄༅། །རོལ་པ་ལགས། དེས་ནི། ཏིང་ངེ་འཛིན་ཐམས་ཅད་ཡོངས་སུ་སྒྲུབ་པ་ལགས། དེ་ནི། བྱང་ཆུབ་སེམས་དཔའི་རྒྱུད་ཐམས་ཅད་རྟོགས་པར་ཐུགས་སུ་ཆུད་པ་ ལགས༑ དེ་ནི། གཟུངས་དང་སྤོབས་པ་སྣང་བའི་ཚུལ་ཐམས་ཅད་རབ་ཏུ་བརྙེས་པ་ལགས། དེ་ནི། བྱང་ཆུབ་སེམས་དཔའི་དབང་ཐམས་ཅད་ལ་མངའ་ཐོབ་པ་ལགས། དེས་ ནི༑ བྱང་ཆུབ་སེམས་དཔའི་ཚོགས་ཐམས་ཅད་ཤིན་ཏུ་བསགས་པ་ལགས། དེ་ནི། ཤེས་རབ་དང་ཐབས་མཁས་པའི་ཚུལ་ལ་རྣམ་པར་རོལ་པ་ལགས། དེས་ནི། མངོན་པར་ ཤེས་པ་ཆེན་པོ་དང༌། རིག་པ་དང༌། ཡེ་ཤེས་སྣང་བའི་ཚུལ་བསྐྱེད་པ་ལགས། དེ་ནི། བསླབ་པ་ཐམས་ཅད་ལ་བྱུང་བ་ལགས། དེས་ནི། བྱང་ཆུབ་སེམས་དཔའི་སྤྱོད་པ་ཡོངས་ སུ་སྦྱངས་པ་ལགས། དེས་ནི། སྨོན་ལམ་གྱིས་འབྱུང་བའི་སྒོ་ཐམས་ཅད་མངོན་པར་བསྒྲུབས་པ་ལགས། དེས་ནི། དེ་བཞིན་གཤེགས་པ་ཐམས་ཅད་ཀྱི་ལུང་བསྟན་པ་རབ་ ཏུ་བླངས་པ་ལགས། དེ་ནི། ཐེག་པ་ཐམས་ཅད་ཀྱིས་འབྱུང་བའི་སྒོ་ལ་མཁས་པ་ལགས། དེས་ནི། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཡང་དག་པར་ བླངས་པ་ལགས། དེས་ནི། སངས་རྒྱས་ཐམས་ཅད་ཀྱི་བྱང་ཆུབ་ཡོངས་སུ་བཟུང་བ་ལགས། དེས་ནི། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་མཛོད་བཟུང་བ་ ལགས༑ དེས་ནི། དེ་བཞིན་གཤེགས་པ་ཐམས་ཅད་ཀྱི་གསང་བའི་མཛོད་འཛིན་པ་ལགས། དེ་ནི། བྱང་ཆུབ་སེམས་དཔའ་ཐམས་ཅད་ཀྱི་གསང་བའི་དཀྱིལ་འཁོར་ཐམས་ཅད་ ཀྱི་སྤྱི་བོར་ཕྱིན་པ་ལགས། དེ་ནི། ཉོན་མོངས་པའི་དཔུང་ཐམས་ཅད་རྣམ་པར་དཀྲུག་པ་ལ་ཤིན་ཏུ་དཔའ་བ་ལགས། དེ་ནི། འཁོར་བའི་འབྲོག་དགོན་པར་ལུས་པ་རྣམས་ཀྱི་ ལམ་སྟོན་པ་ལགས། དེ་ནི། ཉོན་མོངས་པའི་ནད་ཀྱིས་ཐེབས་པ་རྣམས་ཀྱི་སྨན་པར་གྱུར་པ་ལགས། དེ་ནི། སེམས་ཅན་ཐམས་ཅད་ཀྱི་ཕུལ་དུ་ཕྱིན་པ་ལགས། དེ་ནི། འཇིག་ རྟེན་གྱི་དབང་པོ་ཐམས་ཅད་ཀྱི་དབང་པོ་ལགས། དེ་ནི། འཕགས་པའི་གང་ཟག་ཐམས་ཅད་ཀྱི་ཐུ་བོ་ལགས། དེ་ནི། ཉན་ཐོས་དང་རང་སངས་རྒྱས་ཐམས་ཅད་ཀྱི་གཙོ་བོ་ ལགས༑ དེ་ནི། འཁོར་བའི་རྒྱ་མཚོ་ལ་རྒྱུ་བ་རྣམས་ཀྱི་སྐྱ་བ་འཛིན་པ་ལགས། དེས་ནི། སེམས་ཅན་གདུལ་བའི་ཐབས་ཀྱི་རྒྱ་མཚོ་ཆེན་པོ་བཤལ་བ་ལགས། དེ་ནི། འགྲོ་བ་ཡོངས་ སུ་སྨིན་པ་རྣམས་ཀྱི་དབང་པོ་རྣམ་པར་གཟིགས་པ་ལགས། དེ་ནི། སེམས་ཅན་ཐམས་ཅད་ཡོངས་སུ་བསྡུ་བ་ལ་བརྩོན་པ་ལགས། དེ་ནི། བྱང་ཆུབ་སེམས་དཔའ་ཐམས་ཅད་ ཡོངས་སུ་བསྐྱང་བ་ལ་བརྩོན་པ་ལགས། དེ་ནི། བྱང་ཆུབ་སེམས་དཔའི་བྱ་བ་ཐམས་ཅད་ལ་ཡང་དག་པར་འགྲོ་བར་བརྩོན་པ་ལགས། དེ་ནི། དེ་བཞིན་གཤེགས་པ་ཐམས་ ༄༅། །ཅད་ཀྱི་ཞབས་ཀྱི་དྲུང་ན་གནས་པ་ལགས། དེ་ནི། འཁོར་གྱི་དཀྱིལ་འཁོར་ཐམས་ཅད་དུ་མངོན་པར་འཕགས་པ་ལགས། དེ་ནི། འགྲོ་བ་ཐམས་ཅད་ ཀྱི་གནས་སུ་གཟུགས་བརྙན་སྣང་བ་ལགས། དེ་ནི། འཇིག་རྟེན་གྱི་ཆོས་ཐམས་ཅད་ཀྱིས་མ་གོས་པ་ལགས། དེ་ནི། བདུད་ཀྱི་ཡུལ་ཐམས་ཅད་ལས་ཡང་དག་པར་འདས་ པ་ལགས། དེ་ནི། སངས་རྒྱས་ཀྱི་ཡུལ་ཐམས་ཅད་ཀྱི་རྗེས་སུ་བཞུད་པ་ལགས། དེ་ནི། བྱང་ཆུབ་སེམས་དཔའི་ཡུལ་ཐམས་ཅད་ལ་སྒྲིབ་པ་མེད་པ་བརྙེས་པ་ལགས། དེ་ནི། དེ་བཞིན་གཤེགས་པ་ཐམས་ཅད་ལ་མཆོད་པར་བརྩོན་པ་ལགས། དེ་ནི། སངས་རྒྱས་ཀྱི་ཆོས་ཐམས་ཅད་ལ་རྒྱུད་ཀྱི་ཚུལ་གཅིག་ཏུ་གྱུར་པ་ལགས། དེ་ནི། དབང་བསྐུར་ བའི་ཐབས་ཐོབ་པ་ལགས། དེ་ནི། ཆོས་ཀྱི་རྒྱལ་སྲིད་ཆེན་པོ་ལ་གནས་པར་འགྱུར་བ་ལགས། དེ་ནི། ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལ་དབང་བསྐུར་བ་ལགས། དེ་ནི༑ སངས་རྒྱས་ཀྱི་ཆོས་ཐམས་ཅད་རབ་ཏུ་བྱུང་བ་ལགས། དེ་ནི། ཐམས་ཅད་མཁྱེན་པའི་ཡེ་ཤེས་ལ་དབང་བསྒྱུར་བའི་མཐར་ཕྱིན་པ་ལགས་ན། འཕགས་པ། ཇི་ ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང༌། ཇི་ལྟར་ནན་ཏན་དུ་བགྱི་བ་དང༌། ཇི་ལྟར་བྱང་ཆུབ་སེམས་དཔས་ནན་ཏན་དུ་ བགྱིས་ན། སངས་རྒྱས་ཀྱི་ཆོས་ཐམས་ཅད་འཐོབ་པར་འགྱུར་བ་དང༌། སེམས་ཅན་གྱི་ཁམས་ཇི་ལྟར་གཉེར་བའི་ཚུལ་བཞིན་དུ་རིམ་གྲོར་བགྱིད་པར་འགྱུར་བ་དང༌། ཡི་དམ་ ཇི་ལྟར་བཅས་པའི་ཚུལ་བཞིན་དུ་མཐར་ཕྱིན་པར་འགྱུར་བ་དང༌། བྱང་ཆུབ་སེམས་དཔའི་སྤྱོད་པ་ཆེན་པོ་བརྩམས་པ་གྲུབ་པར་འགྱུར་བ་དང༌། ལྷ་དང་བཅས་པའི་འཇིག་ རྟེན་དབུགས་འབྱིན་པར་འགྱུར་བ་དང༌། བདག་དང༌། སེམས་ཅན་དང༌། སངས་རྒྱས་དང༌། ཆོས་དང༌། དགེ་འདུན་སླུ་བར་མི་འགྱུར་བ་དང༌། སངས་རྒྱས་ཀྱི་རིགས་རྒྱུན་མི་ གཅོད་པ་དང༌། བྱང་ཆུབ་སེམས་དཔའི་རིགས་སྟོང་པར་མི་འབྱིན་པ་དང༌། དེ་བཞིན་གཤེགས་པའི་ཚུལ་ཡོངས་སུ་འཛིན་པར་འགྱུར་བ་བདག་ལ་བཀའ་སྩལ་དུ་གསོལ། དེ་ནས་བྱང་ཆུབ་སེམས་དཔའ་བྱམས་པས་འཁོར་གྱི་དཀྱིལ་འཁོར་དེ་ཐམས་ཅད་ལ་བལྟས་ཏེ་ཚོང་དཔོན་གྱི་བུ་ནོར་བཟང་ལ་ཉེ་བར་བསྟན་ནས་འདི་སྐད་ཅེས་སྨྲས་སོ། །རིགས་ ཀྱི་བུ་དག །ཚོང་དཔོན་གྱི་བུ་འདི་འདི་ལྟར་ང་ལ་བྱང་ཆུབ་སེམས་དཔའི་སྤྱོད་པ་དང༌། ཡོན་ཏན་ཡོངས་སུ་སྒྲུབ་པ་འདྲི་བ་ལ་ལྟོས། བཟོད་པ་ཅན་དག། ཚོང་དཔོན་གྱི་ བུ་འདི་ནི། བརྩོན་འགྲུས་བརྩམས་པ་འདི་ལྟ་བུ་དང༌། དོན་དུ་གཉེར་བ་འདི་ལྟ་བུ་དང༌། མོས་པའི་ཡི་དམ་འདི་ལྟ་བུ་དང༌། ལྷག་པའི་བསམ་པ་བརྟན་པ་འདི་ལྟ་བུ་དང་ ༄༅། །བརྩོན་འགྲུས་མི་ལྡོག་པ་འདི་ལྟ་བུ་དང༌། སངས་རྒྱས་ཀྱི་ཆོས་ཀྱིས་མི་ངོམས་པ་འདི་ལྟ་བུ་དང༌། ཁྱད་པར་ཡོངས་སུ་བཙལ་བ་འདི་ལྟ་བུ་དང༌། མགོའི་ ཐོད་ལ་མེ་འབར་བ་ལྟ་བུར་སྤྱོད་པ་འདི་ལྟ་བུ་དང༌། དགེ་བའི་བཤེས་གཉེན་མཐོང་བར་འདོད་པ་འདི་ལྟ་བུ་དང༌། དགེ་བའི་བཤེས་གཉེན་བསྙེན་བཀུར་བས་སྐྱོ་བ་མེད་ པ་འདི་ལྟ་བུས་དགེ་བའི་བཤེས་གཉེན་ཐམས་ཅད་ཡོངས་སུ་ཚོལ་ཞིང་ཡོངས་སུ་དྲི་བ་དང༌། བསྙེན་བཀུར་བ་བྱེད་ཅིང༌། འཇམ་དཔལ་གཞོན་ནུར་གྱུར་པས་བཏང་ནས་ གྲོང་ཁྱེར་དཔལ་གྱི་འབྱུང་གནས་ཉེ་བར་བཟུང་བ་ནས་ལྷོ་ཕྱོགས་ཀྱི་རྒྱུད་ཐམས་ཅད་དུ་རྒྱུས་ཏེ་དགེ་བའི་བཤེས་གཉེན་བརྒྱ་རྩ་བཅུ་ལ་ཡོངས་སུ་དྲི་བ་བྱེད་ཅིང༌། ཐ་མ་ ངའི་དྲུང་འདིའི་བར་དུ་སྐྱོ་བ་ཐམས་ཅད་དང་བྲལ་བའི་ལྷག་པའི་བསམ་པས་ཕྱིན་ཏེ། རིགས་ཀྱི་བུ་དག །རྣམ་པ་འདི་ལྟ་བུར་ཐེག་པ་ཆེན་པོ་ལ་ཡང་དག་པར་ཞུགས་ པ༑ ཡི་དམ་ཆེན་པོ་ལ་ཡང་དག་པར་གནས་པ། བསམ་པ་ཆེན་པོ་ལ་རབ་ཏུ་རྟུལ་བའི་ཡིད་དང་ལྡན་པ། སྙིང་རྗེ་ཆེན་པོའི་གོ་བགོས་པའི་ངད་དང་ལྡན་པ། བྱམས་པ་ཆེན་ པོས་སེམས་ཅན་ཐམས་ཅད་ཡོངས་སུ་བསྐྱབ་པའི་བློ་གྲོས་ཅན། བརྩོན་འགྲུས་ཆེན་པོའི་ཕ་རོལ་ཏུ་ཕྱིན་པ་ལ་རབ་ཏུ་བརྩོན་པ། སེམས་ཅན་གྱི་ལམ་གྲོགས་མང་ པོས་ཡོངས་སུ་བསྐྱང་བ་ལ་མངོན་པར་བརྩོན་པ། འཁོར་བའི་རྒྱ་མཚོ་ཆེན་པོ་ལས་སེམས་ཅན་བསྒྲལ་བ་ལ་ཞུགས་པ། ཐམས་ཅད་མཁྱེན་པ་ཉིད་ཀྱི་ལམ་ཆེན་པོ་ལ་ཞུགས་ པ༑ ཆོས་ཀྱི་གྲུ་ཆེན་པོ་ཡང་དག་པར་བཤམ་པ་ལ་བརྩོན་པ། ཆོས་ཆེན་པོ་དང་བསོད་ནམས་རིན་པོ་ཆེ་ཡོངས་སུ་བསྡུ་བ་ལ་རབ་ཏུ་རྟུལ་བ། ཆོས་ཀྱི་མཆོད་སྦྱིན་ཆེན་པོའི་ ཚོགས་བསགས་པ་ལ་བརྩོན་པ་རྣམས་ཀྱི་མིང་ཐོས་པའམ། གཟུགས་ཀྱི་ལུས་མཐོང་བའམ། གཟུགས་ཀྱི་ལུས་མཐོང་བའམ། སྤྱོད་ཡུལ་དུ་འགྲོགས་པའམ། སྤྱོད་པ་དང་སྐལ་བ་མཉམ་པ་ནི། ཤིན་ ཏུ་དཀོན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ། སྐྱེས་བུ་དམ་པ་འདི་ནི། འགྲོ་བ་ཐམས་ཅད་ཡོངས་སུ་བསྐྱབ་པའི་དོན་དུ་བྱུང་བ་སྟེ། སེམས་ཅན་ཐམས་ཅད་སྡུག་བསྔལ་ ལས་ཡོངས་སུ་ཐར་པར་བྱེད་པ་དང༌། ངན་སོང་ཐམས་ཅད་ཡང་དག་པར་བསལ་བ་དང༌། མི་ཁོམ་པའི་ལམ་ཐམས་ཅད་རྣམ་པར་བཟློག་པ་དང༌། ལམ་ཉམ་ང་བ་ཐམས་ཅད་ཡོངས་ སུ་སྤང་བ་དང༌། མི་ཤེས་པའི་མུན་པ་ནག་པོ་ཐམས་ཅད་རྣམ་པར་བསལ་བ་དང༌། འཁོར་བའི་འབྲོག་དགོན་པ་ཐམས་ཅད་ལས་ཡང་དག་པར་བཟླ་བ་དང༌། འགྲོ་བའི་རྒྱུད་ཀྱི་ འཁོར་ལོ་ཐམས་ཅད་རྣམ་པར་བཟློག་པ་དང༌། བདུད་ཀྱི་ཡུལ་ཐམས་ཅད་ལས་ཡང་དག་པར་བཟླ་བ་དང༌། གནས་ཀྱི་རྟེན་ཐམས་ཅད་ལས་གྱེན་དུ་བསྐྱོད་པ་དང༌། རྟེན་གྱི་ ༄༅། །གཞི་ཐམས་ཅད་ལས་བསྐུལ་བ་དང༌། འགྲོ་བའི་རྒྱུད་ཐམས་ཅད་དུ་མི་གནས་པར་བྱ་བ་དང༌། འདོད་པའི་འདམ་ནས་ཡང་དག་པར་གདོན་པ་དང༌། དགའ་ བའི་འདོད་ཆགས་སྤང་བ་དང༌། ལྟ་བའི་བཅིངས་པ་གཏུབ་པ་དང༌། འཇིག་ཚོགས་ལ་མངོན་པར་ཞེན་པ་རྣམ་པར་བཟློག་པ་དང༌། འདུ་ཤེས་ཀྱི་ཞགས་པ་ཡང་དག་པ་གཅད་ པ་དང༌། ཕྱིན་ཅི་ལོག་གི་ལམ་ནས་རྣམ་པར་བཟློག་པ་དང༌། ང་རྒྱལ་གྱི་རྒྱལ་མཚན་བསྙལ་བ་དང༌། བག་ལ་ཉལ་བའི་ཟུག་རྡུ་ཡང་དག་པར་དབྱུང་བ་དང༌། སྒྲིབ་པའི་སྒོ་ གླེགས་གཞོམ་པ་དང༌། སྒྲིབ་པའི་རི་རྣམ་པར་གཏོར་བ་དང༌། སྲིད་པའི་དྲ་བ་ནས་གདོན་པ་དང༌། མ་རིག་པའི་ཀུན་ཏུ་སྦྱོར་བ་ལས་དབྱེ་བ་དང༌། སྲེད་པའི་ཆུ་བོ་ལས་ བསྒྲལ་བ་དང༌། གཡོ་དང་སྒྱུ་སྤང་བ་དང༌། སེམས་ཀྱི་རྙོག་པ་དང་བ་དང༌། ཐེ་ཚོམ་དང༌། ཡིད་གཉིས་དང༌། ནེམ་ནུར་བསལ་བ་དང༌། མི་ཤེས་པའི་ཆུ་པོ་ཆེན་པོ་ལས་ བསྒྲལ་བ་དང༌། འཁོར་བའི་སྐྱོན་ཐམས་ཅད་རྣམ་པར་སྨད་པའི་ཕྱིར་རབ་ཏུ་ཞུགས་པའོ། །རིགས་ཀྱི་བུ། སྐྱེས་བུ་དམ་པ་འདི་ནི། སེམས་ཅན་རྣམས་ཆུ་བོ་བཞི་ལས་ ཡོངས་སུ་བསྒྲལ་བའི་ཕྱིར་ཆོས་ཀྱི་གྲུ་ཆེན་པོ་ཡང་དག་པར་བཤམ་པར་འདོད་པའོ། །ལྟ་བའི་འདམ་དུ་བྱིང་བ་རྣམས་ཀྱི་ཆོས་ཀྱི་རྐང་སྟེགས་ཆེན་པོ་དགོད་པར་འདོད་ པའོ༑ ༑གཏི་མུག་གི་མུན་པར་འཐོམས་པ་རྣམས་ལ་ཡེ་ཤེས་ཀྱི་སྣང་བ་དབྱུང་བར་འདོད་པའོ། །འཁོར་བའི་མྱ་ངན་དུ་འཁྱམས་པ་རྣམས་ལ་འཕགས་པའི་ལམ་བསྟན་པར་འདོད་ པའོ༑ ༑ཉོན་མོངས་པའི་ནད་ཆེན་པོས་གཟིར་བ་རྣམས་ལ་ཆོས་ཀྱི་སྨན་སྦྱིན་པར་འདོད་པའོ། །སྐྱེ་བ་དང༌། རྒ་བ་དང༌། འཆི་བས་གཙེས་པ་རྣམས་ལ་འཆི་བ་མེད་པའི་དབྱིངས་སྦྱིན་ པར་འདོད་པའོ། །མེ་གསུམ་རབ་ཏུ་འབར་བ་རྣམས་ལ་ཞི་གནས་ཀྱི་ཆུས་རབ་ཏུ་ཞི་བར་བྱ་བར་འདོད་པའོ། །མྱ་ངན་དང༌། སྨྲེ་སྔགས་འདོན་པ་དང༌། ཡིད་མི་བདེ་བ་དང༌། འཁྲུག་ པས་གདུངས་པ་རྣམས་ལ་དབུགས་ཕྱིན་པ་ཆེན་པོ་སྦྱིན་པར་འདོད་པའོ། །སྲིད་པའི་བཙོན་རས་འཁོར་བ་རྣམས་ལ་ཡེ་ཤེས་ཀྱི་མཚོན་ཆ་སྦྱིན་པར་འདོད་པའོ། །ལྟ་བའི་བཅིངས་ པས་གླགས་པ་རྣམས་ལ་ཤེས་རབ་ཀྱི་མཚོན་ཆས་བསྟུད་པར་འདོད་པའོ། །ཁམས་གསུམ་གྱི་གྲོང་ཁྱེར་གྱིས་འཁོར་བ་རྣམས་ལ་ཐར་པའི་སྒོ་བསྟན་པར་འདོད་པའོ། །ཕྱོགས་ མི་བདེ་བར་མངོན་པར་གཞོལ་བ་རྣམས་ལ་བདེ་བའི་ཕྱོགས་བསྟན་པར་འདོད་པའོ། །ཉོན་མོངས་པའི་ཆོམ་པོས་གཙེས་པ་རྣམས་ལ་དབུགས་ཕྱིན་པ་ཆེན་པོ་སྦྱིན་པར་འདོད་ པའོ༑ ༑ངན་སོང་གི་གཡང་སས་འཇིགས་ཤིང་སྐྲག་པ་རྣམས་ལ་འཇུ་སའི་ལག་པ་བརྐྱང་བར་འདོད་པའོ། །ཕུང་པོའི་གཤེད་མས་གཙེས་པ་རྣམས་ལ་མྱ་ངན་ལས་འདས་པའི་ ༄༅། །གྲོང་ཁྱེར་བསྟན་པར་འདོད་པའོ། །ཁམས་ཀྱི་སྤྲུལ་གྱིས་ཀུན་ནས་འཁོར་བ་རྣམས་ལ་འཕགས་པའི་ལམ་གྱིས་འབྱུང་བ་བསྟན་པར་འདོད་པའོ། །སྐྱེ་མཆེད་ ཀྱི་གྲོང་སྟོང་པ་ན་གནས་པ་རྣམས་ཤེས་རབ་ཀྱི་སྣང་བས་གདོན་པར་འདོད་པའོ། །མུ་སྟེགས་ངན་པ་ལ་ཞུགས་པའི་སེམས་ཅན་རྣམས་ཡང་དག་པའི་མུ་སྟེགས་སུ་གཟུད་པར་འདོད་ པའོ༑ ༑བཤེས་གཉེན་མ་ཡིན་པའི་ལག་ཏུ་ལྷུང་བ་རྣམས་ལ་ཡང་དག་པའི་དགེ་བའི་བཤེས་གཉེན་བསྟན་པར་འདོད་པའོ། །བྱིས་པའི་ཆོས་ཀྱི་སྤྱོད་ཡུལ་ལ་མངོན་པར་མོས་པ་ རྣམས་འཕགས་པའི་ཆོས་ལ་རབ་ཏུ་དགོད་པར་འདོད་པའོ། །འཁོར་བའི་ཁྱིམ་ལ་མངོན་པར་དགའ་བ་རྣམས་གྱེན་དུ་བསྐྱོད་དེ་ཐམས་ཅད་མཁྱེན་པའི་ཕོ་བྲང་དུ་གཟུད་པར་འདོད་ པའོ༑ ༑རིགས་ཀྱི་བུ་དག །དེ་ལྟར་སྐྱེས་བུ་དམ་པ་འདི་ནི། སེམས་ཅན་ཡོངས་སུ་སྐྱོབ་པའི་བློ་གྲོས་དེ་ལྟ་བུས་བྱང་ཆུབ་ཏུ་སེམས་བསྐྱེད་པ་རྣམ་པར་དག་པར་བྱ་བ་ཡོངས་སུ་བཙལ་ བ་ལ་རྒྱུན་མི་འཆད་པའོ། །ཐེག་པ་ཆེན་པོ་ཡོངས་སུ་བསྒྲུབ་པའི་ཕྱིར་ཡོངས་སུ་སྐྱོ་བ་མེད་པའོ། །ཆོས་ཀྱི་སྤྲིན་ཐམས་ཅད་ལ་འཐུང་བས་མི་ངོམས་པའོ། །ཚོགས་ཐམས་ ཅད་ཡོངས་སུ་རྫོགས་པར་བྱ་བའི་ཕྱིར་རྟག་ཏུ་བརྩོན་པའི། །ཆོས་ཀྱི་སྒོ་ཐམས་ཅད་ཡོངས་སུ་སྦྱང་བའི་ཕྱིར་མི་གཏོང་བ་ལ་བརྩོན་པའོ། །བྱང་ཆུབ་སེམས་དཔའི་སྤྱོད་པ་ ཐམས་ཅད་སྤྱད་པའི་ཕྱིར་བརྩོན་འགྲུས་མི་གཏོང་བའོ། །སྨོན་ལམ་ཐམས་ཅད་མངོན་པར་བསྒྲུབ་པའི་ཕྱིར་མི་ལྡོག་པའི་སྦྱོར་བ་དང་ལྡན་པའོ། །དགེ་བའི་བཤེས་གཉེན་ཐམས་ ཅད་མཐོང་བར་བྱ་བས་མི་ངོམས་པའོ། །དགེ་བའི་བཤེས་གཉེན་ཐམས་ཅད་བསྙེན་བཀུར་བས་ལུས་ལ་དུབ་པར་འགྱུར་བ་མེད་པའོ། །དགེ་བའི་བཤེས་གཉེན་ཐམས་ཅད་ ཀྱི་གདམས་ངག་དང༌། རྗེས་སུ་བསྟན་པ་ལ་མཐུན་པར་འཛིན་པ་སྟེ། རིགས་ཀྱི་བུ་དག །སེམས་ཅན་གྱི་འཇིག་རྟེན་ན་སེམས་ཅན་གང་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཏུ་སྨོན་ལམ་འདེབས་པ་དེ་ལྟ་བུའི་སེམས་ཅན་དཀོན་ནོ། །དེ་བས་ཀྱང་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ ཏེ་བརྩོན་འགྲུས་བརྩམ་པའི་ཚུལ་འདི་ལྟ་བུས་སངས་རྒྱས་ཀྱི་ཆོས་ཡོངས་སུ་སྡུད་པ་དང༌། མོས་པ་དྲག་པོ་འདི་ལྟ་བུས་བྱང་ཆུབ་སེམས་དཔའི་ལམ་ཡོངས་སུ་ཚོལ་བ་དང༌། དོན་དུ་གཉེར་བ་འདི་ལྟ་བུས་བྱང་ཆུབ་སེམས་དཔའི་སྤྱོད་པ་ཡོངས་སུ་དག་པར་བྱེད་པ་དང༌། ཉོན་མོངས་པ་འདི་ལྟ་བུས་དགེ་བའི་བཤེས་གཉེན་བསྙེན་བཀུར་བྱེད་ པ་དང༌། མགོའི་ཐོད་ལ་མེ་འབར་བ་ལྟར་སྤྱོད་པ་འདི་ལྟ་བུས་དགེ་བའི་བཤེས་གཉེན་གྱི་ངག་དང་འགལ་བར་མི་བྱེད་པ་དང༌། ལྷག་པའི་བསམ་པ་བརྟན་ ༄༅། །པས་ནན་ཏན་དུ་བྱེད་པ་འདི་ལྟ་བུས་དགེ་བའི་བཤེས་གཉེན་གྱི་གདམས་ངག་ལ་ནན་ཏན་དུ་བྱེད་པ་དང༌། མཐུན་པར་ལེན་པ་འདི་ལྟ་བུས་བྱང་ཆུབ་ ཀྱི་ཡན་ལག་ཡོངས་སུ་སྒྲུབ་པ་དང༌། ཁེ་དང༌། བཀུར་སྟི་དང་རྙེད་པ་དོན་དུ་མི་གཉེར་བ་འདི་ལྟ་བུས་བྱང་ཆུབ་སེམས་དཔའི་བསམ་པའི་ཁམས་དང་འགལ་བར་མི་བྱེད་ པ་དང༌། ཁྱིམ་དང༑ ལོངས་སྤྱོད་དང༌། འདོད་པའི་དགའ་བ་དང༌། བདེ་བ་དང༌། ཕ་མ་དང༌། གཉེན་བཤེས་དང༌། དངོས་པོ་ཐམས་ཅད་ལ་ལྟོས་པ་མེད་པར་ཡོངས་སུ་བཏང་བ་ འདི་ལྟ་བུས་བྱང་ཆུབ་སེམས་དཔའི་གྲོགས་ཡོངས་སུ་ཚོལ་བ་དང༌། ལུས་དང༌། སྲོག་ལ་ཕངས་པར་མི་རྩི་བ་འདི་ལྟ་བུས་ཐམས་ཅད་མཁྱེན་པ་ཉིད་ལ་མངོན་པར་མོས་པར་བྱེད་ པ་དེ་ལྟ་བུའི་སེམས་ཅན་ནི། ཆོས་དཀོན་ནོ། །རིགས་ཀྱི་བུ་དག །འདིས་ཇི་ལྟར་ཆེར་སྐྱེས་པ་འདི་གཅིག་ལ་ཇི་སྙེད་ཅིག་ཐོབ་པ་དང༌། ཁོང་དུ་ཆུད་པ་དེ་ནི། བྱང་ཆུབ་སེམས་དཔའ་ དེ་མ་ཡིན་པ་གཞན་གྱིས་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་གིས་ཀྱང་བྱང་ཆུབ་སེམས་དཔའི་སྤྱོད་པ་དང༌། སྨོན་ལམ་ཡོངས་སུ་རྫོགས་པར་བྱ་བ་ཐོབ་པ་དང༌། ཁོང་དུ་ ཆུད་པའམ། སངས་རྒྱས་ཀྱི་བྱང་ཆུབ་ཏུ་ཉེ་བར་འགྱུར་བའམ། སངས་རྒྱས་ཀྱི་ཞིང་ཡོངས་སུ་དག་པར་བྱ་བའམ། སེམས་ཅན་ཡོངས་སུ་སྨིན་པར་བྱ་བ་དང༌། གདུལ་བའམ། ཆོས་ཀྱི་དབྱིངས་ཀྱི་ཡེ་ཤེས་ལ་འཇུག་པའམ། ཕ་རོལ་ཏུ་ཕྱིན་པ་ཡང་དག་པར་བསྒྲུབ་པའམ། སྤྱོད་པའི་དྲ་བ་རྒྱ་ཆེར་བྱ་བའམ། སྨོན་ལམ་མངོན་པར་བསྒྲུབ་པ་ཡོངས་སུ་རྫོགས་ པར་བྱ་བའམ། བདུད་ཀྱི་ལས་ལས་ཡང་དག་པར་འདའ་བར་བྱ་བའམ། དགེ་བའི་བཤེས་གཉེན་བསྙེན་བཀུར་བའམ། བྱང་ཆུབ་སེམས་དཔའི་སྤྱོད་པ་ཐམས་ཅད་མངོན་པར་བསྒྲུབ་ པར་བྱ་བ་དང༌། ཡོངས་སུ་དག་པར་བྱ་བའམ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་མངོན་པར་སྒྲུབ་པའི་སྟོབས་ཡོངས་སུ་རྫོགས་པར་བྱ་བ་ལ་ཡང་དག་པར་འབྱུང་བ་ མེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ཚོང་དཔོན་གྱི་བུ་ནོར་བཟང་གི་ཡོན་ཏན་དང༌། ལེགས་པ་ཡང་དག་པར་ཡོངས་སུ་བརྗོད་པ་བྱས་ནས་དེ་ལ་ བརྟེན་ཏེ་སྲོག་ཆགས་བརྒྱ་ཕྲག་སྟོང་གི་བྱང་ཆུབ་ཀྱི་ཡན་ལག་གི་བསམ་པ་བརྟན་པར་བྱས་ནས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ། དེ་ལྟར་ཁྱོད་ ཀྱི་འཇིག་རྟེན་ཐམས་ཅད་ལ་ཕན་པ་དང༌། བདེ་བའི་ཕྱིར་སེམས་ཅན་གྱི་ཁམས་ཐམས་ཅད་ཡོངས་སུ་བསྐྱབ་པའི་དོན་དུ་སངས་རྒྱས་ཀྱི་ཆོས་ཐམས་ཅད་རབ་ཏུ་ཐོབ་པར་བྱ་བའི་ཕྱིར་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལེགས་སོ་ལེགས་སོ། །རིགས་ཀྱི་བུ། ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དེ་ལྟར་སེམས་བསྐྱེད་ ༄༅། །པ་ནི༑ ཁྱོད་ཀྱིས་ཐོབ་པར་བྱ་བ་ལེགས་པར་ཐོབ་བོ། །ཁྱོད་ཀྱིས་མིའི་ལུས་ལེགས་པར་ཐོབ་བོ། །འཚོ་བའི་འཇིག་རྟེན་དུ་ཁྱོད་ལེགས་པར་འཚོས་སོ། །ཁྱོད་ཀྱིས་ སངས་རྒྱས་བྱུང་བ་དགྱེས་པར་བྱས་སོ། །ཁྱོད་ཀྱིས་དགེ་བའི་བཤེས་གཉེན་འཇམ་དཔལ་ལེགས་པར་མཐོང་ངོ༌། །ཁྱོད་ཀྱིས་བསམ་པའི་རྒྱུད་སྣོད་བཟང་པོར་གྱུར་ཏོ། །ཁྱོད་ནི། དགེ་བའི་ རྩ་བས་མངོན་པར་བརླན་ཏོ། །ཁྱོད་ནི། དཀར་པོའི་ཆོས་ཀྱིས་ལེགས་པར་བརྟན་ནོ། །ཁྱོད་ཀྱིས་མོས་པ་རླབས་ཆེན་པོ་དང༌། དགེ་བའི་བསམ་པ་ལེགས་པར་ཤིན་ཏུ་སྦྱངས་སོ། །ཁྱོད་ ནི༑ སངས་རྒྱས་ཐམས་ཅད་ཀྱིས་ལེགས་པར་དགོངས་སོ། །རིགས་ཀྱི་བུ། ཁྱོད་ནི། དགེ་བའི་བཤེས་གཉེན་གྱིས་ལེགས་པར་བཟུང་ངོ༌། །དེ་ཅིའི་ཕྱིར་ཞེ་ན། རིགས་ཀྱི་བུ། བྱང་ཆུབ་ཀྱི་སེམས་ ནི༑ སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །འགྲོ་བ་ཐམས་ཅད་ཀྱི་ཆོས་དཀར་པོ་རྣམ་པར་འཕེལ་བར་བྱེད་པས་ཞིང་ལྟ་བུའོ། །འཇིག་རྟེན་ཐམས་ཅད་རབ་ཏུ་རྟེན་པས་ས་ ལྟ་བུའོ༑ ༑ཉོན་མོངས་པའི་དྲི་མ་ཐམས་ཅད་དག་པར་བྱེད་པས་ཆུ་ལྟ་བུའོ། །འཇིག་རྟེན་ཐམས་ཅད་ལ་རྟེན་པ་མེད་པས་རླུང་ལྟ་བུའོ། །ལྟ་བའི་ཉེ་བར་ལེན་པའི་རྩ་བ་ཐམས་ཅད་རབ་ ཏུ་སྲེག་པས་མེ་ལྟ་བུའོ། །སེམས་ཅན་ཐམས་ཅད་ཀྱི་གནས་སྣང་བར་བྱེད་པས་ཉི་མ་ལྟ་བུའོ། །ཆོས་དཀར་པོའི་དཀྱིལ་འཁོར་ཡོངས་སུ་རྒྱས་པར་བྱེད་པས་ཟླ་བ་ལྟ་བུའོ། །ཆོས་ ཀྱི་སྣང་བ་བྱེད་པས་སྒྲོན་མ་ལྟ་བུའོ། །མཉམ་པ་དང་མི་མཉམ་པ་ཡོངས་སུ་མཐོང་བར་བྱེད་པས་མིག་ལྟ་བུའོ། །ཐམས་ཅད་མཁྱེན་པ་ཉིད་ཀྱི་གྲོང་ཁྱེར་དུ་ཕྱིན་པར་བྱེད་པས་ལམ་ལྟ་ བུའོ༑ ༑མུ་སྟེགས་ངན་པ་རྣམ་པར་སྤོང་བས་མུ་སྟེགས་ལྟ་བུའོ། །བྱང་ཆུབ་སེམས་དཔའ་ཐམས་ཅད་མངོན་པར་གནས་པས་བཞོན་པ་ལྟ་བུའོ། །བྱང་ཆུབ་སེམས་དཔའི་སྤྱོད་པ་ཐམས་ ཅད་ཀྱི་སྒོར་འཇུག་པར་བྱེད་པས་སྒོ་ལྟ་བུའོ། །ཏིང་ངེ་འཛིན་གྱི་ཁང་པ་ན་གནས་པར་བྱེད་པས་གཞལ་མེད་ཁང་ལྟ་བུའོ། །ཆོས་ཀྱི་དགའ་བ་དང་མོས་པ་ཉམས་སུ་མྱོང་བར་བྱེད་པས་བཟའ་ ཤིང་གི་ར་བ་ལྟ་བུའོ། །འགྲོ་བ་ཐམས་ཅད་ཡོངས་སུ་སྐྱོབ་པས་གནས་ལྟ་བུའོ། །འཇིག་རྟེན་ཐམས་ཅད་ལ་ཕན་པ་སྐྱེད་པས་རྟེན་ལྟ་བུའོ། །བྱང་ཆུབ་སེམས་དཔའི་སྤྱད་པ་ཐམས་ཅད་སྤྱོད་ པར་བྱེད་པས་གཞི་ལྟ་བུའོ། །བྱང་ཆུབ་སེམས་དཔའ་ཐམས་ཅད་ཡོངས་སུ་སྲུང་བས་ཕ་ལྟ་བུའོ། །བྱང་ཆུབ་སེམས་དཔའ་ཆེན་པོ་ཐམས་ཅད་ཀྱི་མ་ལྟ་བུའོ། །ཐམས་ཅད་ལས་ཡོངས་སུ་སྐྱོང་ བས་མ་མ་ལྟ་བུའོ། །སློབ་པ་དང་མི་སློབ་པ་དང་རང་སངས་རྒྱས་ཐམས་ཅད་ཀྱི་སེམས་ཟིལ་གྱིས་གནོན་པས་རྒྱལ་པོ་ལྟ་བུའོ། །སྨོན་ལམ་ཐམས་ཅད་ཀྱིས་ཁྱད་པར་དུ་འཕགས་པས་དབང་ པོ་ལྟ་བུའོ། །ཡོན་ཏན་ཐམས་ཅད་ཡང་དག་པར་འདུ་བས་རྒྱ་མཚོ་ཆེན་པོ་ལྟ་བུའོ། །སེམས་ཅན་ཐམས་ཅད་ལ་སེམས་མཉམ་པས་རི་ཆེན་པོ་ལྟ་བུའོ། །འཇིག་རྟེན་ཐམས་ཅད་རྟེན་པས་ ༄༅། །ཁོར་ཡུག་ལྟ་བུའོ། །ཡེ་ཤེས་ཀྱི་སྨན་རྣམ་པར་འཕེལ་བར་བྱེད་པས་གངས་ཀྱི་རི་ལྟ་བུའོ། །ཡོན་ཏན་གྱི་སྤོས་ཐམས་ཅད་ཀྱི་གནས་སུ་གྱུར་བས་སྤོས་ཀྱི་ ངད་ལྡང་བ་ལྟ་བུའོ། །ཡོན་ཏན་རྒྱ་ཆེ་བས་ནམ་མཁའ་ལྟ་བུའོ། །འཇིག་རྟེན་གྱི་ཆོས་ཐམས་ཅད་ཀྱིས་མི་གོས་པས་པདྨ་ལྟ་བུའོ། །སེམས་དུལ་ཞིང་ཅང་ཤེས་པས་གླང་པོ་ལྟ་བུའོ། ། རྒོད་པ་ཐམས་ཅད་དང་བྲལ་བས་རྟ་ཅང་ཤེས་ལྟ་བུའོ། །ཐེག་པ་ཆེན་པོ་ཡོངས་སུ་སྐྱོང་བའི་སྔོན་དུ་འགྲོ་བས་ཁ་ལོ་སྒྱུར་བ་ལྟ་བུའོ། །ཉོན་མོངས་པའི་ནད་སོས་པར་བྱེད་པས་སྨན་ལྟ་ བུའོ༑ ༑མི་དགེ་བའི་ཆོས་ཐམས་ཅད་ཟད་པར་བྱེད་པས་སའི་འོག་ལྟ་བུའོ། །ཆོས་ཐམས་ཅད་ངེས་པར་ཁོང་དུ་ཆུད་པར་བྱེད་པས་རྡོ་རྗེ་ལྟ་བུའོ། །ཡོན་ཏན་གྱི་དྲི་ཞིམ་པར་བྱེད་པས་ སྤོས་ཀྱི་སྣོད་ལྟ་བུའོ། །འཇིག་རྟེན་ཐམས་ཅད་ཀྱི་བལྟ་ན་མངོན་པར་དགའ་བས་མེ་ཏོག་དམ་པ་ལྟ་བུའོ། །འདོད་ཆགས་ཀྱི་གདུང་བ་བསིལ་བར་བྱེད་པས་ཁ་བའི་ཙནྡན་ལྟ་བུའོ། །ཆོས་ ཀྱི་དབྱིངས་ཐམས་ཅད་རྒྱས་པར་འགེངས་པས་ཨ་ག་རུ་ནག་པོ་ལྟ་བུའོ། །ཉོན་མོངས་པའི་ནད་ཐམས་ཅད་འཇོམས་པས་སྨན་གྱི་རྒྱལ་པོ་བལྟ་ན་སྡུག་པ་ལྟ་བུའོ། །བག་ལ་ཉལ་བའི་ ཟུག་རྔུ་ཐམས་ཅད་ཡང་དག་པར་འབྱིན་པས་འབྲལ་བར་བྱེད་པའི་སྨན་ལྟ་བུའོ། །དབང་པོ་ཐམས་ཅད་ལ་དབང་སྒྱུར་བས་དབང་པོ་ལྟ་བུའོ། །དབུལ་བ་ཐམས་ཅད་ཡོངས་སུ་སེལ་བས་ ངལ་བ་སོ་པོ་ལྟ་བུའོ། །ཡོན་ཏན་ཐམས་ཅད་ཀྱི་རྒྱན་གྱིས་བརྒྱན་པར་བྱེད་པས་དཔལ་ལྟ་བུའོ། །བྱང་ཆུབ་སེམས་དཔའ་ཐམས་ཅད་མཛེས་པར་བྱེད་པས་ལྷབ་ལྷུབ་ལྟ་བུའོ། །ཉེས་བྱས་ཐམས་ ཅད་སྲེག་པས་བསྐལ་པ་འཚིག་པའི་མེ་ལྟ་བུའོ། །སངས་རྒྱས་ཀྱི་ཆོས་ཐམས་ཅད་རྣམ་པར་འཕེལ་བར་བྱེད་པས་རྩ་བ་མ་གྲུགས་པའི་སྨན་གྱི་རྒྱལ་པོ་ཆེན་པོ་ལྟ་བུའོ། །ཉོན་མོངས་པའི་ དུག་ཐམས་ཅད་རྣམ་པར་སེལ་བས་ཀླུའི་རིན་པོ་ཆེ་ལྟ་བུའོ། །རྙོག་པ་ཐམས་ཅད་སེལ་བས་ནོར་བུ་རིན་པོ་ཆེ་ཆུ་འདང་ལྟ་བུའོ། །དོན་ཐམས་ཅད་ཡོངས་སུ་གྲུབ་པས་ཡིད་བཞིན་རིན་པོ་ ཆེའི་རྒྱལ་པོ་ལྟ་བུའོ། །བསམ་པ་ཐམས་ཅད་ཡོངས་སུ་རྫོགས་པར་བྱེད་པས་བུམ་པ་བཟང་པོ་ལྟ་བུའོ། །ཡོན་ཏན་ཐམས་ཅད་ཀྱི་རྒྱན་གྱི་ཆར་མངོན་པར་འབེབས་པས་འདོད་སྦྱིན་གྱི་ཤིང་ ལྟ་བུའོ༑ ༑འཁོར་བའི་སྐྱོན་ཐམས་ཅད་དང་མ་འདྲེས་པས་གོས་དང་རིས་ཅན་ལྟ་བུའོ། །རང་བཞིན་གྱིས་འོད་གསལ་བས་ཤིང་བལ་གྱི་རྒྱུད་ལྟ་བུའོ། །སེམས་ཅན་གྱི་བསམ་པའི་ཞིང་རྣམ་ པར་སྤྱོད་པས་གཤོལ་བུ་ལྟ་བུའོ། །འཇིག་ཚོགས་ཀྱི་གོ་ཆ་བརྟོལ་བས་མདེའུ་ཐུང་ལྟ་བུའོ། །སྡུག་བསྔལ་གྱི་འབེན་ངེས་པར་འབིགས་པས་མདའ་ལྟ་བུའོ། །ཉོན་མོངས་པའི་དགྲ་ལས་ རྣམ་པར་རྒྱལ་བར་བྱེད་པས་མདུང་ལྟ་བུའོ། །ཚུལ་བཞིན་མ་ཡིན་པ་ཡིད་ལ་བྱེད་པ་འགེབས་པས་གོ་ཆ་ལྟ་བུའོ། །ཉོན་མོངས་པའི་ཀླད་པ་འགེམས་པས་རལ་གྲི་ལྟ་བུའོ། །ང་རྒྱལ་དང་དྲེགས་ ༄༅། །པ་དང་རློམ་པའི་གོ་ཆ་འདྲལ་བས་རལ་གྲིའི་སོ་ལྟ་བུའོ། །བག་ལ་ཉལ་གྱི་གོ་ཆ་གཤོག་པས་མདའ་སྟེའུ་ཁ་ལྟ་བུའོ། །ང་རྒྱལ་གྱི་རྒྱལ་མཚན་སྙོལ་བས་ དཔའ་བོའི་རུ་མཚོན་ལྟ་བུའོ། །མི་ཤེས་པའི་ཤིང་སྒྱེལ་བར་བྱེད་པས་ལག་ཆ་ལྟ་བུའོ། །སྡུག་བསྔལ་གྱི་ཤིང་རབ་ཏུ་གཅོད་པས་སྟ་རེ་ལྟ་བུའོ། །གནོད་པ་ཐམས་ཅད་ལས་ཡོངས་སུ་ སྐྱོབ་པས་མཚོན་ཆ་ལྟ་བུའོ། །ཕ་རོལ་ཏུ་ཕྱིན་པའི་ལུས་ཡོངས་སུ་སྲུང་བས་ལག་པ་ལྟ་བུའོ། །ཡོན་ཏན་ཐམས་ཅད་ལ་སོ་སོར་འགོད་པས་རྐང་པ་ལྟ་བུའོ། །མ་རིག་པའི་དྲིའི་ལིང་ ཏོག་ཡོངས་སུ་སེལ་བས་མིག་མཁན་ལྟ་བུའོ། །འཇིག་ཚོགས་ཀྱི་ཟུག་རྔུ་ཡང་དག་པར་འབྱིན་པས་སྐམ་པ་ལྟ་བུའོ། །བག་ལ་ཉལ་གྱི་ཚེར་མ་འབྱིན་པས་ཚེར་ཟུངས་ལྟ་བུའོ། །འཁོར་ བའི་བཅིང་པ་ལས་ཡོངས་སུ་འགྲེལ་བས་མཛའ་བོ་ལྟ་བུའོ། །གནོད་པ་ཐམས་ཅད་སེལ་བས་ནོར་བུ་ལྟ་བུའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱིས་འབྱུང་བའི་ལམ་ མངོན་པར་ཤེས་པར་བྱེད་པས་གཙུག་ལག་ལྟ་བུའོ། །བསོད་ནམས་མི་ཟད་པས་གཏེར་ལྟ་བུའོ། །ཡེ་ཤེས་མི་ཟད་པས་ཆུ་མིག་ལྟ་བུའོ། །ཆོས་ཐམས་ཅད་ཀྱི་གདོང་གི་གཟུགས་ བརྙན་སྟོན་པས་མེ་ལོང་གི་དཀྱིལ་འཁོར་ལྟ་བུའོ། །འགོ་བ་མེད་པས་མེ་ཏོག་པུཎྜ་རཱི་ཀ་ལྟ་བུའོ། །ཕ་རོལ་ཏུ་ཕྱིན་པ་དང་བསྡུ་བའི་དངོས་པོ་རྒྱུན་དུ་འབབ་པས་ཆུ་ཀླུང་ཆེན་པོ་ལྟ་བུའོ། ། ཆོས་ཀྱི་སྤྲིན་གྱི་ཆར་མངོན་པར་འབེབས་པས་ཀླུའི་རྒྱལ་པོ་ཆེན་པོ་ལྟ་བུའོ། །བྱང་ཆུབ་སེམས་དཔའ་ཐམས་ཅད་ཀྱི་སྙིང་རྗེ་ཆེན་པོ་ཡོངས་སུ་འཛིན་པས་འཚོ་བའི་དབང་པོ་ལྟ་བུའོ། ། འཆི་བ་མེད་པའི་དབྱིངས་སུ་ཕྱིན་པར་བྱེད་པས་བདུད་རྩི་ལྟ་བུའོ། །འདུལ་བའི་སེམས་ཅན་ཐམས་ཅད་ཡོངས་སུ་སྡུད་ཅིང་འདྲེན་པས་ཀུན་ནས་འཁོར་བའི་སྙིང་ལྟ་བུའོ། །འཁོར་བའི་ཆུ་ ལ་རྒྱུ་བ་མངོན་པར་འདོན་པས་མཆིལ་བ་ལྟ་བུའོ། །ཡོན་ཏན་ཐམས་ཅད་ཀྱི་དྲི་ཞིམ་པོ་འཛིན་པས་སྤོས་ཀྱི་སྣོད་ལྟ་བུའོ། །ཤིན་ཏུ་ནད་མེད་པར་བྱེད་པས་དུག་སྨན་ལྟ་བུའོ། །འདོད་པས་ དགའ་བའི་དུག་མེད་པར་བྱེད་པས་དུག་གི་གཉེན་པོ་ལྟ་བུའོ། །ཚུལ་བཞིན་མ་ཡིན་པའི་དུག་ཐམས་ཅད་འབྱང་བར་བྱེད་པས་སྔགས་དང་གཟུངས་ལྟ་བུའོ། །སྒྲིབ་པ་དང་བར་ཆད་ཀྱི་རྩྭ་ ཐམས་ཅད་རྣམ་པར་འཐོར་བས་རླུང་གི་དཀྱིལ་འཁོར་ལྟ་བུའོ། །བྱང་ཆུབ་ཀྱི་ཕྱོགས་ཀྱི་ཆོས་རིན་པོ་ཆེ་ཐམས་ཅད་ཀྱི་འབྱུང་གནས་སུ་གྱུར་པས་རིན་པོ་ཆེའི་གླིང་ལྟ་བུའོ། །ཆོས་དཀར་པོ་ ཐམས་ཅད་འབྱུང་བས་རིགས་ལྟ་བུའོ། །ཡོན་ཏན་གྱི་ཆོས་ཐམས་ཅད་སྐྱེ་བའི་སྒོར་གྱུར་པས་འབྱུང་གནས་ལྟ་བུའོ། །བྱང་ཆུབ་སེམས་དཔའི་ཚོང་པ་ཐམས་ཅད་ཀྱིས་སྤྱོད་པས་ཚོང་དུས་ ལྟ་བུའོ༑ ༑ལས་དང་ཉོན་མོངས་པའི་སྒྲིབ་པ་དང་དྲི་མ་ཐམས་ཅད་ཡོངས་སུ་སྦྱོང་བས་ཆུའི་ཁམས་ལྟ་བུའོ། །ཐམས་ཅད་མཁྱེན་པ་ཉིད་ཀྱི་ཚོགས་ཡོངས་སུ་རྫོགས་པར་བྱེད་པས་སྦྲང་ ༄༅། །རྩིའི་གནས་ལྟ་བུའོ། །བྱང་ཆུབ་སེམས་དཔའ་ཐམས་ཅད་མཁྱེན་པའི་ཕོ་བྲང་དུ་ཕྱིན་པར་བྱེད་པས་ལམ་ལྟ་བུའོ། །ཆོས་དཀར་པོ་ཐམས་ཅད་ཡོངས་སུ་འཛིན་ པས་སྣོད་ལྟ་བུའོ། །ཉོན་མོངས་པའི་རྡུལ་ཐམས་ཅད་མི་སྣང་བར་བྱེད་པས་ཆར་པ་ལྟ་བུའོ། །བྱང་ཆུབ་སེམས་དཔའི་རྣམ་པར་དགོད་པ་ཐམས་ཅད་སྟོན་པས་གནས་ལྟ་བུའོ། །ཉན་ ཐོས་ཀྱི་རྣམ་པར་གྲོལ་བ་དང་མི་འདྲ་བས་རྡོ་བ་ཁབ་ལེན་ལྟ་བུའོ། །རང་བཞིན་གྱིས་དྲི་མ་མེད་པས་བཻ་ཌཱུཪྻ་ལྟ་བུའོ། །ཉན་ཐོས་དང་རང་སངས་རྒྱས་ཐམས་ཅད་དང༌། འཇིག་རྟེན་གྱི་ ཤེས་པ་ཐམས་ཅད་ཟིལ་དུ་བརླག་པ་དང་ཟིལ་གྱིས་ནོན་པར་བྱེད་པས་ཨིནྡྲ་ནཱི་ལ་ལྟ་བུའོ། །ཉོན་མོངས་པའི་གཉིད་ཀྱིས་ལོག་པའི་སེམས་ཅན་སད་པར་བྱེད་པས་མཐོ་རིས་ཀྱི་རྔ་ ལྟ་བུའོ༑ ༑རྙོག་པ་མེད་པས་ཆུ་དྭངས་པ་ལྟ་བུའོ། །འདུས་བྱས་དང་འདུས་མ་བྱས་ལ་སྤྱོད་པའི་དགེ་བའི་རྩ་བའི་ཚོགས་ཟིལ་དུ་རླག་པར་བྱེད་པས་ཛམྦུ་ཆུ་ཀླུང་གི་གསེར་གྱི་རྒྱན་ལྟ་ བུའོ༑ ༑འཇིག་རྟེན་གསུམ་ལས་མངོན་པར་འཕགས་པས་རིའི་རྒྱལ་པོ་ཆེན་པོ་ལྟ་བུའོ། །སྐྱབས་ཚོལ་བ་ཡོངས་སུ་མི་གཏོང་བས་སྐྱབས་ལྟ་བུའོ། །དོན་མ་ཡིན་པ་འཇོམས་པས་ དོན་ལྟ་བུའོ། །སྙིང་དགའ་བར་བྱེད་པས་དབྱིག་ལྟ་བུའོ། །འགྲོ་བ་ཐམས་ཅད་ཡོངས་སུ་ཚིམ་པར་བྱེད་པས་མཆོད་སྦྱིན་གྱི་ཡོ་བྱད་ལྟ་བུའོ། །འགྲོ་བ་ཐམས་ཅད་ཀྱི་སེམས་ཀྱི་གཙོ་ བོ་དང་ཐུ་བོར་གྱུར་པས་ན། རྒན་པ་ལྟ་བུའོ། །སངས་རྒྱས་ཀྱི་ཆོས་ཐམས་ཅད་འཛིན་པས་གླེང་གཞི་ལྟ་བུའོ། །བྱང་ཆུབ་སེམས་དཔའི་སྤྱོད་པ་དང་སྨོན་ལམ་ཐམས་ཅད་སྡུད་པས་མདོ་ ལྟ་བུའོ༑ ༑འཇིག་རྟེན་ཐམས་ཅད་སྐྱོང་བས་རྫིའུ་ལྟ་བུའོ། །སྡིག་ཏོ་ཐམས་ཅད་རྣམ་པར་ཟློག་པས་སྲུང་མ་ལྟ་བུའོ། །ཉོན་མོངས་པའི་ལྷ་མ་ཡིན་འདྲེན་པས་དབང་པོའི་མིག་འཕྲུལ་ལྟ་བུའོ།། འདུལ་བ་འདྲེན་པས་ཆུའི་ཞགས་པ་ལྟ་བུའོ། །བག་ཆགས་དང་བག་ལ་ཉལ་བ་དང་ཉོན་མོངས་པ་ཐམས་ཅད་གཞོབ་ཏུ་རློག་པས་དབང་པོའི་མེ་ལྟ་བུའོ། །ལྷ་དང་མི་དང་ལྷ་མ་ཡིན་དུ་ བཅས་པའི་འཇིག་རྟེན་རྣམས་ལ་མཆོད་རྟེན་ལྟ་བུའོ། །རིགས་ཀྱི་བུ། དེ་ལྟར་བྱང་ཆུབ་ཀྱི་སེམས་ནི། ཡོན་ཏན་དེ་དག་དང༌། ཡོན་ཏན་གྱི་ཁྱད་པར་གཞན་དག་ཀྱང་ཚད་མེད་པ་དང་ལྡན་ པ་སྟེ། རིགས་ཀྱི་བུ། མདོར་ན། སངས་རྒྱས་ཀྱི་ཆོས་ཐམས་ཅད་དང༌། སངས་རྒྱས་ཀྱི་ཡོན་ཏན་ཇི་སྙེད་པ་དེ་སྙེད་དུ་བྱང་ཆུབ་ཀྱི་སེམས་ལ་ཡོན་ཏན་དང་ལེགས་པ་ཡོད་པར་བལྟའོ། ། དེ་ཅིའི་ཕྱིར་ཞེ་ན། འདི་ལས་ནི། བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པའི་དཀྱིལ་འཁོར་རབ་ཏུ་འབྱུང་བ་སྟེ། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་ཐམས་ ཅད་ཀྱང་འདི་ལས་འབྱུང་ངོ༌། །རིགས་ཀྱི་བུ། དེ་བས་ན། གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ནི། ཐམས་ཅད་མཁྱེན་པ་ཉིད་ཀྱི་སེམས་དང༌། ༄༅། །ལྷག་པའི་བསམ་པས་ཤིན་ཏུ་བཟུང་བས་ཡོན་ཏན་ཚང་མེད་པ་ཕུན་སུམ་ཚོགས་པ་ཡིན་ནོ། །རིགས་ཀྱི་བུ། འདི་ལྟ་སྟེ། དཔེར་ན། འཇིགས་པ་མེད་པ་ ཞེས་བྱ་བའི་རྩི་ཡོད་དེ། དེ་འཆང་ན། འཇིགས་པ་ལྔ་མི་འབྱུང་སྟེ། འདི་ལྟར་མེས་མི་འཚིག་གོ །དུག་གིས་མི་ཚུགས་སོ། །མཚོན་གྱིས་མི་ཆོད་དོ། །ཆུས་མི་འཁྱེར་རོ། །དུ་བས་ མི་འཆིའོ། །རིགས་ཀྱི་བུ། དེ་བཞིན་དུ་ཐམས་ཅད་མཁྱེན་པའི་སེམས་ཀྱི་རྩི་འཆང་བའི་བྱང་ཆུབ་སེམས་དཔའ་ཡང་འདོད་ཆགས་ཀྱི་མེས་མི་འཚིག་གོ །ཡུལ་གྱི་དུག་གིས་མི་ ཚུགས་སོ། །ཉོན་མོངས་པའི་མཚོན་གྱིས་མི་ཆོད་དོ། །སྲིད་པའི་ཆུས་མི་འཁྱེར་རོ། །ཡོངས་སུ་རྟོག་པའི་དུ་བས་མི་འཆིའོ། །རིགས་ཀྱི་བུ། འདི་ལྟ་སྟེ། དཔེར་ན། རྣམ་པར་མི་ གཏོང་བ་ཞེས་བྱ་བའི་རྩི་ཡོད་དེ། དེ་འཆང་ན། གཞན་གྱིས་གནོད་པར་བྱ་བའི་འཇིགས་པ་ཐམས་ཅད་མི་འབྱུང་ངོ༌། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་ ཀྱི་ཡེ་ཤེས་ཀྱི་རྩི་འཆང་བའང་འཁོར་བའི་གནོད་པའི་འཇིགས་པ་ཐམས་ཅད་མི་འབྱུང་ངོ༌། །རིགས་ཀྱི་བུ། འདི་ལྟ་སྟེ། དཔེར་ན། མཆུ་ཞེས་བྱ་བའི་རྩི་ཡོད་དེ། དེ་འཆང་ན། དྲི་ ཚོར་བ་ཙམ་གྱིས་སྤྲུལ་ཐམས་ཅད་འབྱེར་རོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་ཀྱི་རྩི་འཆང་བའི་ཡོན་ཏན་གྱི་དྲི་ཙམ་གྱིས་ཀྱང་ཉོན་མོངས་པའི་སྦྲུལ་ཐམས་ ཅད་འབྱེར་བར་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། སྐྱེས་བུ་གཞན་གྱིས་མི་ཐུབ་པའི་རྩི་འཆང་ན་ནི། དགྲའི་དཀྱིལ་འཁོར་ཐམས་ཅད་ཀྱིས་མི་ཚུགས་སོ། །དེ་བཞིན་ དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་ཀྱི་སེམས་གཞན་གྱིས་མི་ཐུབ་པའི་རྩི་འཆང་བ་ཡང་བདུད་དང་ཕྱིར་རྒོལ་བ་ཐམས་ཅད་ཀྱིས་ཐུབ་པར་དཀའོ། །རིགས་ཀྱི་བུ། འདི་ ལྟ་སྟེ༑ དཔེར་ན། རྣམ་པར་སེལ་བ་ཞེས་བྱ་བའི་རྩི་ཡོད་དེ། དེ་བཅངས་ན། ཟུག་རྡུ་ཐམས་ཅད་འབྱིན་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་རྣམ་པར་ སེལ་བ་འཆང་བ་ནི། འདོད་ཆགས་དང༌། ཞེ་སྡང་དང༌། གཏི་མུག་གི་ཟུག་རྔུ་ཐམས་ཅད་མི་འབྱུང་ངོ༌། །རིགས་ཀྱི་བུ། འདི་ལྟ་སྟེ། དཔེར་ན། རྩིའི་རྒྱལ་པོ་ཆེན་པོ་བལྟ་ན་སྡུག་པ་ཞེས་ བྱ་བ་ཡོད་དེ། དེ་བཅངས་ན། ནད་ཐམས་ཅད་སེལ་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་རྩིའི་རྒྱལ་པོ་ཆེན་པོ་བལྟ་ན་སྡུག་པ་འཆང་བ་ཡང་ཉོན་ མོངས་པ་དང༌། མི་ཤེས་པའི་ནད་ཐམས་ཅད་རབ་ཏུ་སེལ་བར་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྩིའི་ཤིང་ཆེན་པོ་སྦྱོར་བ་ཞེས་བྱ་བ་ཡོད་དེ། དེའི་ཤུན་པས་རྨ་ལ་རེག་ མ་ཐག་ཏུ་རྨ་ཐམས་ཅད་འཚོ་བར་འགྱུར་རོ། །གང་ནས་བཤུས་པ་དེའི་ཤུན་ཕྲགས་ཀྱང་ཕྱིར་སྐྱེའོ། །དེ་བཞིན་དུ་བྱང་ཆུབ་ཀྱི་སེམས་ཀྱི་ས་བོན་ལས་སྐྱེས་པའི་ཤིང་ཐམས་ཅད་མཁྱེན་ ༄༅། །པ་ཉིད་དུ་སྦྱོར་བ་ཡང་མཐོང་མ་ཐག་ཏུ་རིགས་ཀྱི་བུ་དད་པ་རྣམས་ཀྱི་ལས་དང་ཉོན་མོངས་པའི་རྨ་ཡོངས་སུ་འཚོ་བར་འགྱུར་རོ། །ཐམས་ཅད་མཁྱེན་པ་ཉིད་ཀྱི་ ཤིང་དེ་ལ་ཡང་འཇིག་རྟེན་ཐམས་ཅད་ཀྱིས་རྨ་དབྱུང་བའམ། ཉམས་པར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྩི་ཆེན་པོའི་རྣམ་པར་ཙ་བ་མ་གྲུགས་པ་ཞེས་བྱ་བ་ ཡོད་དེ༑ དེའི་མཐུས་འཛམ་བུའི་གླིང་གི་ཤིང་ཐམས་ཅད་ཀྱང་ཡན་ལག་ཐམས་ཅད་རྣམ་པར་འཕེལ་ལོ། །དེ་བཞིན་དུ་བྱང་ཆུབ་ཀྱི་སེམས་རྩ་བ་མ་གྲུགས་པའི་རྩི་ཆེན་པོའི་མཐུས་ ཀྱང་སློབ་པ་དང༌། མི་སློབ་པ་དང༌། རང་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་རྩ་བའི་ཆོས་ཀྱི་ཤིང་རྣམས་རྣམ་པར་འཕེལ་ལོ། །འདི་ལྟ་སྟེ། དཔེར་ ན༑ དགའ་བ་འཐོབ་པ་ཞེས་བྱ་བའི་རྩི་ཡོད་དེ། དེ་སུའི་ལུས་ལ་ཐོགས་པའི་ལུས་དང༌། སེམས་ནད་མེད་པར་འགྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་ཀྱི་སེམས་དགའ་ བ་འཐོབ་པར་བྱེད་པའི་རྩི་ཡང་བྱང་ཆུབ་སེམས་དཔའ་ཐམས་ཅད་ཀྱི་ལུས་དང༌། སེམས་ནད་མེད་པ་ཡོངས་སུ་སྐྱེད་དོ། །རིགས་ཀྱི་བུ། འདི་ལྟ་སྟེ། དཔེར་ན། དྲན་པ་འཐོབ་པ་ ཞེས་བྱ་བའི་རྩི་ཡོད་དེ། དེ་བཅངས་ན། སེམས་ཀྱི་དྲན་པ་རྣམ་པར་དག་པར་འགྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དྲན་པ་ཐོབ་པར་བྱེད་པའི་ ཡང་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ཐམས་ཅད་ལ་སྒྲིབ་པ་མེད་པའི་དྲན་པ་རྣམ་པར་དག་པར་བྱེད་དོ། །རིགས་ཀྱི་བུ། འདི་ལྟ་སྟེ། དཔེར་ན། པདྨ་ཆེན་པོ་ ཞེས་བྱ་བའི་རྩི་ཡོད་དེ། དེ་ཟོས་པ་ཙམ་གྱིས་ཚེའི་ཚད་བསྐལ་པར་འགྱུར་རོ། །དེ་བཞིན་དུ་བྱང་ཆུབ་ཀྱི་སེམས་པདྨོ་ཆེན་པོའི་རྩི་ཟོས་པའི་བྱང་ཆུབ་སེམས་དཔའ་ཡང་བསྐལ་པ་ གྲངས་མེད་པའི་ཚེ་ལ་དབང་པའི་ཕ་རོལ་ཏུ་ཕྱིན་པ་ཐོབ་པར་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། མི་སྣང་བ་ཞེས་བྱ་བའི་རྩི་ཡོད་དེ། དེ་བཅངས་ན། མི་དང་མི་མ་ཡིན་པ་ ཐམས་ཅད་ཀྱིས་མི་མཐོང་ངོ༌། །དེ་བཞིན་དུ་བྱང་ཆུབ་ཀྱི་སེམས་ཀྱི་རྩི་མི་སྣང་བར་འགྱུར་བར་བཅངས་ཏེ་འདྲེས་པས་རྣམ་པར་སྤྱོད་པའི་བྱང་ཆུབ་སེམས་དཔའ་ཡང་བདུད་ཀྱི་ཡུལ་ཐམས་ ཅད་དུ་མི་སྣང་ངོ༌། །རིགས་ཀྱི་བུ། འདི་ལྟ་སྟེ། དཔེར་ན། རྒྱ་མཚོ་ཆེན་པོའི་ནང་ན་ནོར་བུ་རིན་པོ་ཆེའི་རྒྱལ་པོ་ཆེན་པོ་རིན་པོ་ཆེ་ཐམས་ཅད་ཡོངས་སུ་སྡུད་པ་ཞེས་བྱ་བ་ཡོད་དེ། དེ་འཇིག་ རྟེན་གྱི་ཁམས་གཞན་དུ་མ་འཕོས་ན། རྒྱ་མཚོ་ཆེན་པོ་ལ་བསལ་པ་ཚིག་པའི་མེ་ཐམས་ཅད་ཀྱིས་ཀྱང་ཏ་ལ་ཙམ་ཡང་སྐམ་པར་ནུས་པའི་གནས་མེད་སྐབས་མེད་དོ། །དེ་བཞིན་དུ་བྱང་ ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ནོར་བུ་རིན་པོ་ཆེ་ཐམས་ཅད་ཡོངས་སུ་སྡུད་པའི་ནོར་བུ་རིན་པོ་ཆེའི་རྒྱལ་པོ་ཆེན་པོ་བསམ་པ་དང་སེམས་ཀྱི་རྒྱུད་ལ་ ༄༅། །ཡོད་པ་རྣམས་ཀྱི་དགེ་བའི་རྩ་བ་ཐམས་ཅད་མཁྱེན་པ་ཉིད་དུ་བསྔོས་པ་འགའ་ཞིག་རྣམ་པར་ཆུད་ཟ་བར་འགྱུར་བ་དེ་ལྟ་བུའི་གནས་མེད་སྐབས་མེད་དེ། དེ་ནི། མི་སྲིད་དེ། ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཡོངས་སུ་བཏང་བ་ཞིག་ཏུ་གྱུར་ན་ནི། དགེ་བའི་རྩ་བ་ཐམས་ཅད་ཀྱང་སྐམ་པར་འགྱུར་རོ། །རིགས་ཀྱི་བུ། འདི་ལྟ་སྟེ་། དཔེར་ན། ནོར་བུ་རིན་པོ་ཆེ་ཆེན་པོ་འོད་ཐམས་ཅད་ཡོངས་སུ་འདུས་པ་ཞེས་བྱ་བ་ཡོད་དེ། དེ་མགུལ་དུ་བཏགས་ན། ནོར་བུ་རིན་པོ་ཆེའི་རྒྱན་ཐམས་ཅད་ཀྱང་ཟིལ་གྱིས་ནོན་ པར་འགྱུར་རོ། །དེ་བཞིན་དུ་བྱང་ཆུབ་ཀྱི་སེམས་འོད་ཐམས་ཅད་ཡོངས་སུ་འདུས་པའི་རིན་པོ་ཆེ་ཆེན་པོ་བསམ་པའི་རྒྱན་དུ་ཐོགས་པའི་བྱང་ཆུབ་སེམས་དཔའ་ཡང་ཉན་ཐོས་དང༌། རང་སངས་རྒྱས་སུ་སེམས་བསྐྱེད་པའི་རིན་པོ་ཆེའི་རྒྱན་ཐམས་ཅད་ཟིལ་གྱིས་གནོན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཆེན་པོ་ཆུ་འདང་ཞེས་བྱ་བ་ ཡོད་དེ༑ དེ་ཆུར་བཅུག་ན། འདམ་དང་རྙོག་པ་ཐམས་ཅད་རབ་ཏུ་དང་བར་བྱེད་དོ། །དེ་བཞིན་དུ་བྱང་ཆུབ་ཀྱི་སེམས་ཆུ་འདང་གི་ནོར་བུ་རིན་པོ་ཆེ་ཡང་ཉོན་མོངས་པའི་འདམ་དང༌། རྙོག་པ་ཐམས་ཅད་རབ་ཏུ་དང་བར་བྱེད་དོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཆེན་པོ་ཆུ་དང་འགྲོགས་པ་ཞེས་བྱ་བ་ཐོགས་པའི་ཉ་པ་ནི། ཆུར་མི་འཆིའོ། ། དེ་བཞིན་དུ་ཐམས་ཅད་མཁྱེན་པ་ཉིད་ཀྱི་སེམས་ཆུ་དང་འགྲོགས་པའི་ནོར་བུ་རིན་པོ་ཆེ་ཆེན་པོ་ཐོགས་པའི་བྱང་ཆུབ་སེམས་དཔའ་ཡང་འཁོར་བའི་རྒྱ་མཚོ་ཐམས་ཅད་དུ་མི་འཆིའོ། ། རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཀླུའི་ནོར་བུའི་གོ་ཆ་ཞེས་བྱ་བ་ཡོད་དེ། དེ་ལག་ན་འདུག་ན། ཉ་པ་ལ་སོགས་པ་ཆུ་ལས་འཚོ་བ་རྣམས་ཀླུའི་གནས་ཐམས་ཅད་དུ་ དོང་ཡང་ཀླུའི་སྦྲུལ་ཐམས་ཅད་ཀྱིས་མི་ཚུགས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཡེ་ཤེས་ཀླུའི་ནོར་བུའི་གོ་ཆ་འཆང་བའི་བྱང་ཆུབ་སེམས་དཔའ་ཡང་ འདོད་པའི་གནས་ཀྱི་ཁམས་ཐམས་ཅད་དུ་འགྲོ་ཡང་ཉམས་པར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་བརྒྱ་བྱིན་མངོན་པར་ཆགས་པ་ཐོགས་པའི་ལྷའི་ རྒྱལ་པོ་བརྒྱ་བྱིན་ནི། ལྷའི་ཚོགས་ཐམས་ཅད་ཟིལ་གྱིས་གནོན་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་ཀྱི་སེམས་བརྒྱ་བྱིན་མངོན་པར་ཆགས་པའི་ནོར་བུ་རིན་པོ་ཆེའི་རྒྱལ་ པོ་ཆེན་པོ་སྨོན་ལམ་གྱི་ཅོད་པན་མགོ་ལ་ཐོགས་པའི་བྱང་ཆུབ་སེམས་དཔའ་ཡང་ཁམས་གསུམ་པ་ཐམས་ཅད་ཟིལ་གྱིས་གནོན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་ བུ་རིན་པོ་ཆེ་ཆེན་པོ་ཡིད་བཞིན་གྱི་རྒྱལ་པོ་ཐོགས་པའི་མི་ནི། འཕོངས་པ་ཐམས་ཅད་ཀྱིས་མི་འཇིགས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཡིད་ ༄༅། །བཞིན་གྱི་རྒྱལ་པོའི་ནོར་བུ་རིན་པོ་ཆེ་ཆེན་པོ་ཐོགས་པའི་བྱང་ཆུབ་སེམས་དཔའ་ཡང་ཡོ་བྱད་དང་འཚོ་བའི་བག་ཚ་བ་ཐམས་ཅད་ཀྱིས་མི་འཇིགས་སོ། ། རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཉི་མས་མཛེས་པ་ནི། ཉི་མ་ལ་བསྟན་ན། མེ་འབྱུང་ངོ༌། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ ཉི་མས་མཛེས་པའི་ནོར་བུ་རིན་པོ་ཆེ་ཡང་ཤེས་རབ་ཀྱི་འོད་ཟེར་གྱིས་ཕོག་ན། ཡེ་ཤེས་ཀྱི་མེ་འབྱིན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཟླ་བས་ མཛེས་པ་ཞེས་བྱ་བ་ལ་ཟླ་བའི་འོད་ཀྱིས་ཕོག་ན། ཆུའི་རྒྱུན་འབྱིན་ཏོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པ་ཟླ་བས་མཛེས་པའི་རིན་པོ་ཆེ་ཆེན་པོ་ཡང་དགེ་བའི་རྩ་བ་ཡོངས་སུ་ བསྔོས་པའི་ཟླ་བའི་འོད་ཀྱིས་ཕོག་ན། དགེ་བའི་རྩ་བ་ཐམས་ཅད་ཀྱི་སྨོན་ལམ་གྱི་ཆུའི་རྒྱུན་འབྱིན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཡིད་བཞིན་གྱི་ རྒྱལ་པོའི་ཅོད་པན་ཐོགས་པའི་ཀླུའི་རྒྱལ་པོ་ཆེན་པོ་རྣམས་ལ་གཞན་གྱིས་གནོད་པར་བྱ་བའི་འཇིགས་པ་མེད་དོ། །དེ་བཞིན་དུ་བྱང་ཆུབ་ཀྱི་སེམས་སྙིང་རྗེ་ཆེན་པོའི་ནོར་བུ་རིན་པོ་ ཆེ་ཡིད་བཞིན་གྱི་རྒྱལ་པོ་ཐོགས་པའི་བྱང་ཆུབ་སེམས་དཔའ་རྣམས་ལའང་ངན་སོང་དང༌། ངན་འགྲོས་གནོད་པར་བྱ་བའི་འཇིགས་པ་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཆེན་པོ་འགྲོ་བའི་རྒྱན་དམ་པ་ཞེས་བྱ་བ་ནི། སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱ་བས་ནམ་ཡང་བྱང་བར་མི་འགྱུར་རོ། །དེ་བཞིན་ དུ་བྱང་ཆུབ་ཏུ་སེམས་བསྐྱེད་པ་འགྲོ་བ་ཐམས་ཅད་ཀྱི་རྒྱན་གྱི་དམ་པའི་ནོར་བུ་རིན་པོ་ཆེ་ཆེན་པོ་ཡང་སེམས་ཅན་ཐམས་ཅད་ཀྱི་བསམ་པ་དང༌། བྱང་ཆུབ་སེམས་དཔའི་སྨོན་ལམ་ ཡོངས་སུ་རྫོགས་པར་བྱ་བས་ནམ་ཡང་བྱང་བར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱལ་པོ་འཁོར་ལོས་བསྒྱུར་བའི་ནོར་བུ་རིན་པོ་ཆེ་ཆེན་པོ་ནི། མུན་པ་ཐམས་ཅད་ ཡོངས་སུ་སེལ་ཅིང་འགྲོ་སྟེ། ཁྱིམ་གྱི་ནང་ན་གནས་ན་ཡང་རབ་ཏུ་སྣང་བར་བྱེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་འཁོར་ལོས་བསྒྱུར་བའི་ནོར་བུ་རིན་པོ་ ཆེ་ཆེན་པོ་ཡང་མ་རིག་པའི་མུན་པ་ཐམས་ཅད་སེལ་ཅིང་འགྲོ་བའི་རྒྱུད་ཐམས་ཅད་དུ་འགྲོ་སྟེ། འདོད་པའི་ཁམས་ན་གནས་ན་ཡང་ཡེ་ཤེས་ཀྱི་སྣང་བ་ཆེན་པོ་རབ་ཏུ་འགྱེད་དོ། །རིགས་ ཀྱི་བུ༑ འདི་ལྟ་སྟེ། དཔེར་ན། གང་ཅི་ཡང་རུང་སྟེ། ནོར་བུ་རིན་པོ་ཆེ་ཆེན་པོ་ཨིནྡྲ་ནཱི་ལའི་འོད་ཀྱིས་ཕོག་པ་དེ་དག་ཐམས་ཅད་ནི། ནོར་བུ་རིན་པོ་ཆེ་ཆེན་པོ་ཨིནྡྲ་ནཱི་ལའི་ཁ་དོག་ཏུ་ འགྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་ཨིནྡྲ་ནཱི་ལའང་ཆོས་གང་དང་གང་ལ་རྣམ་པར་སྤྱད་པ་དང༌། ཡོངས་སུ་བཏང་ ༄༅། །བ་དང༌། དགེ་བའི་རྩ་བ་གང་ཅི་ཡང་རུང་སྟེ། ཐམས་ཅད་མཁྱེན་པ་ཉིད་དུ་སེམས་བསྐྱེད་པས་ཡོངས་སུ་བསྔོས་པ་དེ་དག་ཐམས་ཅད་ཀྱང་ཐམས་ཅད་ མཁྱེན་པ་ཉིད་ཀྱི་ནོར་བུ་རིན་པོ་ཆེ་ཆེན་པོའི་ཁ་དོག་ཏུ་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་བཻ་ཌཱུཪྻ་ནི། ལོ་བརྒྱ་ཕྲག་སྟོང་དུ་མི་གཙང་བའི་ནང་ ཞིག་ན་འདུག་ཀྱང་དྲི་མི་ཞིམ་པ་ཐམས་ཅད་དང་ལྷན་ཅིག་མི་གནས་ཏེ། དེའི་རང་བཞིན་འོད་གསལ་བ་ནི། དེ་བཞིན་དུ་གསལ་ཞིང་ཤིན་ཏུ་དྲི་མ་མེད་དོ། །དེ་བཞིན་དུ་ཐམས་ ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་བཻ་ཌཱུཪྻ་ཡང་བསྐལ་པ་བརྒྱ་ཕྲག་སྟོང་ཞིག་ཏུ་འདོད་པའི་ཁམས་ཐམས་ཅད་དུ་གནས་ཀྱང་འདོད་པའི་ཁམས་ཀྱི་སྐྱོན་ ཐམས་ཅད་ཀྱིས་ཀུན་ནས་ཉོན་མོངས་པར་མི་འགྱུར་ཏེ། ཆོས་ཀྱི་དབྱིངས་ཀྱི་རང་བཞིན་འོད་གསལ་བ་ནི། དེ་བཞིན་དུ་ཤིན་ཏུ་དག་པར་གནས་སོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཆེན་པོ་དྲི་མ་མེད་པས་རྣམ་པར་དག་པའི་འོད་ཅེས་བྱ་བ་ནི། རིན་པོ་ཆེའི་འབྱུང་གནས་ཐམས་ཅད་ཟིལ་གྱིས་གནོན་ཏོ། །དེ་བཞིན་དུ་ཐམས་ ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་དྲི་མ་མེད་པས་རྣམ་པར་དག་པའི་འོད་ཀྱང་སོ་སོའི་སྐྱེ་བོ་དང༌། སློབ་པ་དང༌། མི་སློབ་པ་དང༌། རང་སངས་ རྒྱས་ཐམས་ཅད་ཀྱི་ཡོན་ཏན་རིན་པོ་ཆེའི་འབྱུང་གནས་ཟིལ་གྱིས་གནོན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། རིན་པོ་ཆེ་ཆེན་པོ་མེ་འབྱུང་བ་ཞེས་བྱ་བ་ནི། གཅིག་པུ་གནས་ཀྱང་ མུན་པ་ཐམས་ཅད་རྣམ་པར་སེལ་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་མེ་འབྱུང་བ་ལྷག་མཐོང་དང་ལྡན་པ་གཅིག་པུ་ཡང་ཚུལ་བཞིན་ ཡིད་ལ་བྱ་བས་མི་ཤེས་པའི་མུན་པ་ཐམས་ཅད་རྣམ་པར་སེལ་ཏོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནས་གྲུས་བླངས་པའི་ནོར་བུ་རིན་པོ་ཆེ་རིན་ཐང་མེད་པ་ ཚོང་པའི་ལག་ཏུ་འོངས་པ་ནི། གྲོང་ཁྱེར་དུ་ཕྱིན་ན། ནོར་བུ་མཆིང་བུ་བརྒྱ་ཕྲག་སྟོང་ཡང་ཁ་དོག་དང༌། རིན་ཐང་གི་ཟིལ་གྱིས་གནོན་ཏོ། །དེ་བཞིན་དུ་འཁོར་བའི་རྒྱ་མཚོ་ཆེན་པོ་ན་ གནས་ཀྱང་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་རིན་ཐང་མེད་པ་སྨོན་ལམ་གྱི་གྲུར་བཅུག་པ་ནི། བྱང་ཆུབ་སེམས་དཔའ་སེམས་དང་པོ་བསྐྱེད་ པའི་ལྷག་པའི་བསམ་པའི་རྒྱུད་ལ་འདུག་སྟེ། ཐམས་ཅད་མཁྱེན་པའི་གྲོང་ཁྱེར་དུ་མ་ཕྱིན་ཀྱང་རྣམ་པར་གྲོལ་བའི་གྲོང་ཁྱེར་དུ་ཕྱིན་ན། ཉན་ཐོས་དང༌། རང་སངས་རྒྱས་ནོར་ བུ་མཆིང་བུ་ལྟ་བུ་ཐམས་ཅད་ཟིལ་གྱིས་གནོན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཆེན་པོ་དབང་གི་རྒྱལ་པོ་ཞེས་བྱ་བ་ཡོད་དེ། དེ་ནི། འཛམ་བུའི་གླིང་ ༄༅། །ན་གནས་ཀྱང་དཔག་ཚད་སྟོང་ཕྲག་བཞི་བཅུ་ན་གནས་པའི་ཉི་ཟླའི་དཀྱིལ་འཁོར་གྱི་ཁྱིམ་གཞལ་མེད་ཁང་གི་གཟུགས་བརྙན་གྱི་རྒྱན་ཡོངས་སུ་སྟོན་ ཏོ༑ ༑དེ་བཞིན་དུ་ཡོན་ཏན་ཐམས་ཅད་ཀྱིས་ཡོངས་སུ་སྦྱངས་པའི་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་དབང་གི་རྒྱལ་པོ་ཡང་འཁོར་བའི་ གནས་ན་འདུག་བཞིན་དུ་ཆོས་ཀྱི་དབྱིངས་ཀྱི་ནམ་མཁའི་སྤྱོད་ཡུལ་ལས་རྒྱུ་བའི་དེ་བཞིན་གཤེགས་པའི་ཡེ་ཤེས་ཆེན་པོའི་ཉི་ཟླ་དང༌། སངས་རྒྱས་ཀྱི་ཡུལ་གྱི་དཀྱིལ་ འཁོར་ཐམས་ཅད་ཀྱང་གཟུགས་བརྙན་གྱི་རྒྱན་ཡོངས་སུ་སྟོན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། ཇི་སྲིད་དུ་ཉི་ཟླའི་དཀྱིལ་འཁོར་གྱིས་སྣང་བར་བྱེད་པ་དེ་སྲིད་ དུ་ནོར་དང༌། འབྲུ་དང༌། རིན་པོ་ཆེའི་རྣམ་པ་དང༌། གསེར་དང༌། དངུལ་དང༌། མེ་ཏོག་དང༌། སྤོས་དང༌། ཕྲེང་བ་དང༌། གོས་དང༌། ལོངས་སྤྱོད་གང་ཇི་སྙེད་པ་དེ་དག་ ཐམས་ཅད་ཀྱིས་ནོར་བུ་རིན་པོ་ཆེ་ཆེན་པོ་དབང་གི་རྒྱལ་པོའི་རིན་དུ་མི་ཆོག་གོ །དེ་བཞིན་དུ་ཇི་སྲིད་དུ་དུས་གསུམ་ལ་ཐམས་ཅད་མཁྱེན་པའི་ཡེ་ཤེས་ཆོས་ཀྱི་དབྱིངས་ཀྱི་ཡུལ་ སྣང་བར་མཛད་པ་དེ་སྲིད་དུ་ལྷ་དང༌། མི་དང༌། ཉན་ཐོས་དང༌། རང་སངས་རྒྱས་ཐམས་ཅད་ཀྱི་དགེ་བའི་རྩ་བ་ཟག་པ་ཡོད་པའམ། ཟག་པ་མེད་པ་གང་ཇི་སྙེད་པ་དེ་དག་ ཐམས་ཅད་ཀྱིས་ཀྱང་བྱང་ཆུབ་ཏུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་དབང་གི་རྒྱལ་པོའི་རིན་དུ་མི་ཆོག་གོ །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཆེན་པོ་རྒྱ་ མཚོའི་རྒྱན་གྱི་དམ་པ་ཞེས་བྱ་བ་ཡོད་དེ། དེ་ནི། རྒྱ་མཚོའི་རྒྱན་ཐམས་ཅད་ཡོངས་སུ་སྟོན་ཏོ། །དེ་བཞིན་དུ་བྱང་ཆུབ་དུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་རྒྱ་མཚོའི་རྒྱན་གྱི་དམ་ པ་ཡང་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་རྒྱ་མཚོའི་རྒྱན་ཐམས་ཅད་ཡོངས་སུ་སྟོན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཆེན་པོ་ཡིད་བཞིན་གྱི་རྒྱལ་ པོ་མ་གཏོགས་པར་ལྷ་རྫས་ཀྱི་འཛམ་བུ་ཆུ་ཀླུང་གི་གསེར་ལས་ལྷག་པར་འཕགས་པ་གང་ཡང་མེད་དོ། །དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ནོར་བུ་རིན་པོ་ཆེ་ཆེན་པོ་ཡིད་ བཞིན་གྱི་རྒྱལ་པོ་མ་གཏོགས་པར་བྱང་ཆུབ་ཏུ་སེམས་བསྐྱེད་པའི་ལྷ་རྫས་ཀྱི་འཛམ་བུ་ཆུ་ཀླུང་གི་གསེར་ལས་ལྷག་པར་ཁྱད་པར་དུ་འཕགས་པ་གང་ཡང་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། ཀླུའི་ཚོགས་གྲུབ་པར་འགྱུར་བའི་སྤྲུལ་འདུལ་བ་ནི། ཀླུ་དང་སྤྲུལ་ཐམས་ཅད་ལ་དབང་སྒྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་ པའི་ནན་ཏན་གྱི་ཀླུའི་དཀྱིལ་འཁོར་གྲུབ་པའི་བྱང་ཆུབ་སེམས་དཔའ་སྤྲུལ་འདུལ་བ་ཡང་ཉོན་མོངས་པའི་ཀླུ་དང་སྤྲུལ་ཐམས་ཅད་ལ་དབང་སྒྱུར་རོ། །རིགས་ཀྱི་བུ། འདི་ལྟ་སྟེ། ༄༅། །དཔེར་ན། དཔའ་བོ་ལག་ཆ་དང་ལྡན་པ་ནི། དགྲའི་འཁོར་གྱིས་ཚུགས་པར་དཀའོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ལག་ཆ་ དང་ལྡན་པའི་བྱང་ཆུབ་སེམས་དཔའ་ཐམས་ཅད་ཀྱང་ཉོན་མོངས་པའི་དགྲའི་དཀྱིལ་འཁོར་ཐམས་ཅད་ཀྱིས་ཐུབ་པར་དཀའོ། །རིགས་ཀྱི་བུ། འདི་ལྟ་སྟེ། དཔེར་ན། ལྷ་རྫས་ཀྱི་ ཙནྡན་སྤྲུལ་གྱི་སྙིང་པོའི་ཕྱེ་མ་སྲང་གཅིག་གིས་ནི། སྟོང་གསུམ་གྱི་འཇིག་རྟེན་གྱི་ཁམས་དྲི་ཞིམ་པོས་རྒྱས་པར་འགེངས་ཏེ། དེ་ཞོ་གཅིག་ཙམ་ལ་ཡང་སྟོང་གསུམ་གྱི་སྟོང་ ཆེན་པོའི་འཇིག་རྟེན་གྱི་ཁམས་རིན་པོ་ཆེས་ཡོངས་སུ་གང་བས་རིན་དུ་མི་ཆོག་གོ །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ལྷ་རྫས་ཀྱི་ཙནྡན་སྤྲུལ་གྱི་སྙིང་པོ་ལྷག་ པའི་བསམ་པ་གཅིག་ལ་གནས་པའི་ཁམས་ཀྱང་ཆོས་ཀྱི་དབྱིངས་ཐམས་ཅད་ཡོན་ཏན་གྱི་དྲི་ཞིམ་པོས་རྒྱས་པར་འགེངས་ཏེ། སློབ་པ་དང༌། མི་སློབ་པ་དང༌། རང་སངས་རྒྱས་ ཐམས་ཅད་ཀྱི་སེམས་ཀྱི་སེམས་ཀྱང་ཟིལ་གྱིས་གནོན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། ཙནྡན་རིན་པོ་ཆེ་ཆེན་པོ་ཁ་བའི་ཙནྡན་ཞེས་བྱ་བ་ནི། གདུང་བ་ཐམས་ཅད་རབ་ཏུ་ཞི་ བར་བྱེད་དེ། ལུས་ཐམས་ཅད་ཀྱང་རབ་ཏུ་བསིལ་བར་བྱེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཁ་བའི་ཙནྡན་རིན་པོ་ཆེ་ཡང་ཉོན་མོངས་པའི་ཀུན་ཏུ་ རྟོག་པ་དང༌། འདོད་ཆགས་དང༌། ཞེ་སྡང་དང༌། གཏི་མུག་གི་གདུང་བ་ཐམས་ཅད་ཀྱང་རབ་ཏུ་སེལ་ཏོ། །ཡེ་ཤེས་ཀྱི་ལུས་ཀྱང་རབ་ཏུ་སིམ་པར་བྱེད་དོ། །རིགས་ཀྱི་བུ། འདི་ལྟ་སྟེ། དཔེར་ ན༑ རིའི་རྒྱལ་པོ་རི་རབ་ཀྱི་དྲུང་དུ་ཇི་སྙེད་ཅིག་ཉེ་བར་འོངས་པ་དེ་དག་ཐམས་ཅད་ཀྱང་གསེར་གྱི་ཁ་དོག་ཏུ་ཁ་དོག་གཅིག་ཏུ་འགྱུར་རོ། །དེ་བཞིན་དུ་གང་སུའང་རུང་སྟེ། ཐམས་ཅད་ མཁྱེན་པ་ཉིད་དུ་སེམས་བསྐྱེད་པ་དང་ལྡན་པའི་བྱང་ཆུབ་སེམས་དཔའི་དྲུང་དུ་ཉེ་བར་འོངས་པ་དེ་དག་ཐམས་ཅད་ཀྱང་ཐམས་ཅད་མཁྱེན་པ་ཉིད་ཀྱི་ཁ་དོག་ཏུ་ཁ་དོག་གཅིག་པར་འགྱུར་ རོ༑ ༑རིགས་ཀྱི་བུ། འདི་ལྟ་སྟེ། དཔེར་ན། ཤིང་སུས་ཀྱང་མི་ཚུགས་པ་དང་ཀུན་ནས་འདུ་བའི་ཤུན་ཕྲགས་ཀྱི་དྲི་ཞིམ་པོ་འབྱུང་བ་དེ་ལྟ་བུ་ནི། འྫམྦུའི་གླིང་གི་མེ་ཏོག་པར་ཤི་ཀ་ དང༌། མེ་ཏོག་ཛཱ་ཏི་དང༌། མེ་ཏོག་སུ་མ་ན་ལ་སོགས་པ་མེ་ཏོག་གི་རྣམ་པ་ཐམས་ཅད་ལའང་མེད་དོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་ བའི་ས་བོན་ལས་བྱུང་བའི་སྨོན་ལམ་གྱི་ཤིང་གི་ཡོན་ཏན་དང༌། ཡེ་ཤེས་ཀྱི་ཤུན་ཕྲགས་ཀྱི་དྲི་ཞིམ་པོའི་ངད་འབྱུང་བ་དེ་ལྟ་བུ་ནི། དགེ་བའི་རྩ་བ་དམའ་བ་དང་ལྡན་པ་ཐམས་ ཅད་དང༌། ཉན་ཐོས་དང༌། རང་སངས་རྒྱས་ཀྱི་མེ་ཏོག་པར་ཤི་ཀ་དང༌། མེ་ཏོག་ཛཱ་ཏི་དང༌། མེ་ཏོག་སུ་མ་ནའི་ཚུལ་ཁྲིམས་པ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་ ༄༅། །གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བ་ཟག་པ་མེད་པ་དང་ལྡན་པ་ཐམས་ཅད་ལའང་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། ཤིང་སུས་ཀྱང་མི་ཐུབ་པ་དང༌། ཀུན་ནས་འདུ་བ་ཁ་འབུས་པར་གྱུར་ན། མེ་ཏོག་སྟོང་ཕྲག་མང་པོའི་འབྱུང་གནས་སུ་གྱུར་པར་ཤེས་པར་བྱའོ། །དེ་བཞིན་དུ་ཐམས་ཅད་མཁྱེན་ པ་ཉིད་དུ་སེམས་བསྐྱེད་པའི་ཤིང་ཀུན་ནས་འདུ་བ་དགེ་བའི་རྩ་བས་ཁ་འབུས་པར་གྱུར་ན། ལྷ་དང་མི་གྲངས་མེད་པའི་བྱང་ཆུབ་ཀྱི་མེ་ཏོག་ཟག་པ་དང་བཅས་པ་དང༌། ཟག་པ་མེད་ པའི་སྐྱེ་གནས་སུ་འགྱུར་བར་ཤེས་པར་བྱའོ། །རིགས་ཀྱི་བུ། འདི་ལྟ་སྟེ། དཔེར་ན། ཤིང་ཀུན་ནས་འདུ་བའི་མེ་ཏོག་གིས་ཉི་མ་གཅིག་ཏུ་བསྒོས་པའི་གོས་སམ། ཏིལ་མར་ ལས་དྲི་ཞིམ་པའི་ངད་འབྱུང་བ་དེ་ལྟ་བུ་ཡང་མེ་ཏོག་ཙམ་པ་ཀ་དང༌། མེ་ཏོག་སུ་མ་ནས་ཉི་མ་བརྒྱ་ཕྲག་སྟོང་དུ་བསྒོས་པའི་གོས་སམ། ཏིལ་མར་ལས་ཀྱང་མི་འབྱུང་ངོ༌། །དེ་བཞིན་ དུ་ཐམས་ཅད་མཁྱེན་པ་ཉིད་ཀྱི་སེམས་ཀྱི་རྒྱུད་ཚེ་གཅིག་ཏུ་ཡོངས་སུ་བསྒོས་བའི་བྱང་ཆུབ་སེམས་དཔའི་ཡོན་ཏན་དང༌། ཡེ་ཤེས་ཀྱི་དྲི་ཞིམ་པོའི་ངད་ཕྱོགས་བཅུའི་སངས་རྒྱས་ ཀྱི་ཞབས་ཀྱི་དྲུང་དུ་ལྡང་བ་དེ་ལྟ་བུ་ནི། བསྐལ་པ་བརྒྱ་ཕྲག་སྟོང་དུ་བསྒོས་པའི་ཉེན་ཐོས་དང༌། རང་སངས་རྒྱས་ཐམས་ཅད་ཀྱི་སེམས་ལས་ཀྱང་ཟག་པ་མེད་པའི་དགེ་བའི་རྩ་ བ་དང་ཆོས་ཀྱི་ཡེ་ཤེས་ཀྱི་དྲི་ཞིམ་པོ་མི་འབྱུང་ངོ༌། །རིགས་ཀྱི་བུ། འདི་ལྟ་སྟེ། དཔེར་ན། ཤིང་གི་རིགས་ན་ལི་ཀེ་རེ་ཞེས་བྱ་བ་རྒྱ་མཚོ་གནོད་པ་དང་བྲལ་བ་ནས་སྐྱེ་བ་ཡོད་དོ། །དེའི་ རྩ་བ་ཡན་ཆད་མེ་ཏོག་གི་བར་དུ་ཡང་དུས་ཐམས་ཅད་དུ་ནམ་ཡང་སེམས་ཅན་རྣམས་ཀྱི་ཉེ་བར་འཚོ་བར་མི་འགྱུར་བ་མེད་དོ། །དེ་བཞིན་དུ་སྙིང་རྗེ་ཆེན་པོ་དང༌། སྨོན་ལམ་གྱི་རྩ་བ་ ཡང་དག་པར་སྐྱེས་པའི་བྱང་ཆུབ་སེམས་དཔའ་ཡང་ཐོག་མ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ནས་ཉེ་བར་བཟུང་བ་ཕྱིན་ཆད་དམ་པའི་ཆོས་གནས་པའི་མཐར་ཐུག་གི་བར་ དུ་ནམ་ཡང་ལྷ་དང་བཅས་པའི་འཇིག་རྟེན་གྱི་ཉེ་བར་འཚོ་བར་མི་འགྱུར་བ་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། དངུལ་ཆུའི་རིགས་གསེར་དུ་སྣང་བ་ཞེས་བྱ་བ་ཡོད་དོ། །དེ་ ནི༑ སྲང་གཅིག་གིས་ཀྱང་ལྕགས་སྲང་སྟོང་གསེར་དུ་སྒྱུར་རོ། །དངུལ་ཆུ་སྲང་གཅིག་པོ་དེ་ནི། ལྕགས་སྲང་སྟོང་པོ་དེས་ཟད་པར་བྱ་བའམ། ལྕགས་སུ་བསྒྱུར་བར་མི་ནུས་སོ། །དེ་ བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རོའི་ཁམས་དགེ་བའི་རྩ་བ་ཡོངས་སུ་བསྔོས་པའི་ཡེ་ཤེས་ཀྱིས་བཟུང་བ་ནི། ལས་དང་ཉོན་མོངས་པའི་སྒྲིབ་པའི་ ལྕགས་ཐམས་ཅད་ཟད་པར་བྱས་ཏེ། ཆོས་ཐམས་ཅད་ཐམས་ཅད་མཁྱེན་པ་ཉིད་ཀྱི་ཁ་དོག་ཏུ་བྱེད་ཀྱང་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རོའི་ཁམས་གཅིག་པོ་དེ་ ༄༅། །ནི༑ ལས་དང་ཉོན་མོངས་པའི་ལྕགས་ཐམས་ཅད་ཀྱིས་ཀྱང་ཀུན་ནས་ཉོན་མོངས་པར་བྱ་བའམ། ཟད་པར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ ན༑ མེ་ནི། ཇི་ཙམ་དུ་ཆུང་དུ་ཟིན་ཀྱང་རྐྱེན་ཇི་ཙམ་དང་ཕྲད་པ་དེ་ཙམ་གྱི་མེ་ལྕེ་ཡོངས་སུ་སྐྱེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་མེ་ཇི་ཙམ་དུ་ ཆུང་དུ་ཟིན་ཀྱང་དམིགས་པ་རྒྱ་ཆེན་པོའི་ཚོགས་ཀྱི་རྐྱེན་ཇི་ཙམ་དང་ཕྲད་པ་དེ་ཙམ་དུ་ཡེ་ཤེས་ཀྱི་འོད་འཕྲོ་བ་རབ་ཏུ་དགྱེ་བས་རྣམ་པར་འཕེལ་བར་བྱེད་དོ། །རིགས་ཀྱི་བུ། འདི་ལྟ་སྟེ། དཔེར་ན། མེ་མར་གཅིག་ལས་མེ་མར་བྱེ་བ་བརྒྱ་ཕྲག་སྟོང་ཞིག་བུས་ཀྱང་མེ་མར་དེ་ནི། དེ་སྙེད་བྱུང་བས་མི་ཟད་དེ། མཐར་ཐུག་པ་མེད་དོ། །དེ་བཞིན་དུ་ཐམས་ ཅད་མཁྱེན་པ་ཉིད་དུ་སེམས་བསྐྱེད་པའི་མེ་མར་གཅིག་ལས་འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་ཐམས་ཅད་མཁྱེན་ པ་ཉིད་དུ་ཐུགས་བསྐྱེད་པའི་མེ་མར་མང་པོ་འབར་ཡང་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་མེ་མར་གཅིག་པོ་དེ་ནི། དེ་སྙེད་ཀྱི་ཐམས་ཅད་མཁྱེན་པ་ཉིད་དུ་སེམས་ བསྐྱེད་པའི་མེ་མར་བྱུང་བས་མི་ཟད་དེ། མཐར་ཐུག་པ་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། མེ་མར་གཅིག་ཅིག་ཁྱིམ་མམ་ཁང་བུ་ཇི་ལྟ་བུར་བཅུག་ཀྱང་རུང་སྟེ། བཅུག་མ་ཐག་ཏུ་ལོ་སྟོང་དུ་བསགས་བསགས་པའི་མུན་པ་ཡང་རྣམ་པར་སེལ་ཅིང་སྣང་བར་བྱེད་དོ། །དེ་བཞིན་དུ་ཐམས་ཅད་མཁྱེན་པའི་སེམས་བསྐྱེད་པ་གཅིག་ཀྱང་སེམས་ཅན་ གྱི་བསམ་པའི་ཁྱིམ་ཐིབས་པོ་མ་རིག་པའི་མུན་པ་དང་ལྡན་པ་ཅི་ལྟ་བུ་ཡང་རུང་སྟེ། དེའི་རྒྱུད་དུ་ཕྱིན་ན། དེ་ཕྱིན་མ་ཐག་ཏུ་བསྐལ་པ་བརྒྱ་སྟོང་བརྗོད་དུ་མེད་པར་བསགས་པའི་ལས་ དང་ཉོན་མོངས་པའི་སྒྲིབ་པ་དང༌། མུན་པ་ཐམས་ཅད་རྣམ་པར་སེལ་ཅིང་ཡེ་ཤེས་ཀྱི་སྣང་བ་ཡོངས་སུ་སྐྱེད་དོ། །རིགས་ཀྱི་བུ། འདི་ལྟ་སྟེ། དཔེར་ན། མེ་མར་ནི། སྙིང་པོ་ཇི་ཙམ་ པ་དེའི་རྐྱེན་ཙམ་དུ་སྣང་བར་བྱེད་དེ། མར་གྱི་ཚོགས་ཇི་སྲིད་དུ་གནས་པ་དེ་སྲིད་དུ་འབར་རོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་མེ་མར་ཡང་བྱང་ཆུབ་སེམས་ དཔའི་སྨོན་ལམ་གྱི་སྙིང་པོའི་ཁྱད་པར་ཅི་འདྲ་བ་དེ་ལྟ་བུར་ཆོས་ཀྱི་དབྱིངས་ཡོངས་སུ་སྣང་བར་བྱེད་དེ། སྙིང་རྗེ་ཆེན་པོས་སྤྱོད་པའི་མེ་མར་གྱི་ཚོགས་ཇི་སྲིད་དུ་གནས་པ་དེ་སྲིད་དུ་སེམས་ ཅན་གདུལ་བ་དང༌། ཞིང་ཡོངས་སུ་དག་པར་བྱ་བ་དང༌། སངས་རྒྱས་ཀྱི་སྐུ་དོན་སྒྲུབ་པ་ལ་ཡོངས་སུ་འབར་བར་གནས་སོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ ཆེ་ཞེས་བྱ་བ་ལས། སྡོང་པོས་བརྒྱན་པའི་ལེའུ་སྟེ། བམ་པོ་བརྒྱ་བཅུ་གསུམ་པ། རིགས་ཀྱི་བུ། འདི་ལྟ་སྟེ། དཔེར་ན། ལྷ་རྫས་ཀྱི་འཛམ་བུ་ཆུ་ཀླུང་གི་གསེར་གྱི་རྒྱན་ལྷའི་ ༄༅། །རྒྱལ་པོ་དབང་སྒྱུར་བའི་མགོ་ལ་ཐོགས་པ་ནི། འདོད་པ་ན་སྤྱོད་པའི་ལྷའི་བུ་ཐམས་ཅད་ཀྱིས་མི་འཕྲོག་གོ །དེ་བཞིན་དུ་ཐམས་ཅད་མཁྱེན་པ་ཉིད་དུ་ སེམས་བསྐྱེད་པ་ལྷ་རྫས་ཀྱི་འཛམ་བུ་ཆུ་ཀླུང་གི་གསེར་གྱི་རྒྱན་ནན་ཏན་དང༌། ཡོན་ཏན་ལ་རབ་ཏུ་གནས་པ་བྱང་ཆུབ་སེམས་དཔའ་ཕྱིར་མི་ལྡོག་པ་རྣམས་ཀྱི་སྨོན་ལམ་ཆེན་པོའི་ མགོ་ལ་ཐོགས་པ་ནི། བྱིས་པ་ཐ་དད་པའི་སྐྱེ་བོ་དང༌། སློབ་པ་དང༌། མི་སློབ་པ་དང༌། རང་སངས་རྒྱས་ཐམས་ཅད་ཀྱིས་མི་འཕྲོག་གོ །རིགས་ཀྱི་བུ། འདི་ལྟ་སྟེ། དཔེར་ན་། རི་དྭགས་ཀྱི་རྒྱལ་པོ་སེངྒེའི་ང་རོས་ནི། སེངྒེའི་ཕྲུ་གུ་སྐྱེས་ནས་རིང་པོ་མ་ལོན་པའང་ཉམས་སུ་བདེ་ཞིང་རྟའི་རི་དྭགས་ཐམས་ཅད་ནི། ཀུན་ཏུ་འབྱེར་བར་འགྱུར་རོ། །དེ་བཞིན་དུ་ དེ་བཞིན་གཤེགས་པ་སྐྱེས་བུའི་སེངྒེ་ཆེན་པོའི་ཐམས་ཅད་མཁྱེན་པ་ཉིད་ཀྱི་ང་རོ་བྱང་ཆུབ་ཀྱི་སེམས་ཡོངས་སུ་བརྗོད་པ་ཕྱུང་བས་ནི། ལས་དང་པོ་པའི་བྱང་ཆུབ་སེམས་ དཔའ་སེངྒེའི་ཕྲུ་གུ་རྣམས་སངས་རྒྱས་ཀྱི་ཆོས་ཀྱིས་ཉམས་སུ་བདེ་ཞིང་རྟའི་དམིགས་པ་ལ་གནས་པའི་སེམས་ཅན་ཐམས་ཅད་ནི། ཀུན་ཏུ་འབྱེར་རོ། །རིགས་ཀྱི་བུ། འདི་ལྟ་ སྟེ༑ དཔེར་ན། སེངྒེའི་རྒྱུས་པ་ལས་རྒྱུད་དུ་བྱས་པའི་པི་ཝང་གི་སྒྲས་ནི། པི་ཝང་ཐམས་ཅད་ཀྱི་རྒྱུད་ཡོངས་སུ་འཆད་དོ། །དེ་བཞིན་དུ་དེ་བཞིན་གཤེགས་པ་སེངྒེའི་ཕ་རོལ་ ཏུ་ཕྱིན་པའི་སྐུ་མངའ་བའི་བྱང་ཆུབ་ཏུ་སེམས་བསྐྱེད་པའི་རྒྱུས་པའི་ཡོན་ཏན་བརྗོད་པའི་སྒྲས་འདོད་པའི་རྒྱུད་ཀྱི་དགའ་བའི་པི་ཝང་ཐམས་ཅད་ཀྱི་རྒྱུད་ཡོངས་སུ་འཆད་པར་འགྱུར་རོ། ། ཉན་ཐོས་དང༌། རང་སངས་རྒྱས་ཀྱི་སྤྱོད་པ་དང༌། ཡོན་ཏན་གྱི་གཏམ་ཐམས་ཅད་ཀྱང་ཡོངས་སུ་འགག་པར་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་པ་ དང༌། མ་ཧེ་དང༌། རའི་འོ་མས་ཡོངས་སུ་གང་བའི་ནང་དུ་སེངྒེའི་འོ་མ་ཐིགས་གཅིག་བླུགས་པས། འོ་མ་དེ་དག་ཐམས་ཅད་འགྱེས་པར་འགྱུར་ཏེ། འདུར་མི་བཏུབ་བོ། །དེ་བཞིན་ དུ་བསྐལ་པ་བརྒྱ་ཕྲག་སྟོང་དུ་བསགས་པའི་ཉོན་མོངས་པ་ཀུན་གྱི་འོ་མའི་རྒྱ་མཚོར་ཡང་དེ་བཞིན་གཤེགས་པ་སྐྱེས་བུའི་སེངྒེ་ཆེན་པོའི་ཐམས་ཅད་མཁྱེན་པ་ཉིད་དུ་སེམས་བསྐྱེད་ པའི་འོ་མ་ཐིགས་པ་གཅིག་བླུགས་པས་ཐམས་ཅད་མ་ལུས་པར་ཟད་པར་འགྱུར་ཏེ། ཉན་ཐོས་དང་རང་སངས་རྒྱས་ཐམས་ཅད་ཀྱི་རྣམ་པར་ཐར་པ་རྣམས་ཀྱང་མི་གནས་མི་ འདུའོ༑ ༑རིགས་ཀྱི་བུ། འདི་ལྟ་སྟེ། དཔེར་ན། བྱ་ཀ་ལ་ཕིངྐའི་ཕྲུ་གུ་སྒོ་ངའི་སྦུབས་ནས་མ་བྱུང་བ་ལ་ང་རོའི་མཐུའི་ཁྱད་པར་ཡོད་པ་དེ་ལྟ་བུ་ནི། གངས་ཀྱི་རི་ལ་གནས་པའི་ བྱའི་ཚོགས་མཐུ་དང་ཤུགས་ཐམས་ཅད་ཡོངས་སུ་རྫོགས་པ་ཐམས་ཅད་ལ་ཡང་མེད་དོ། །དེ་བཞིན་དུ་བྱང་ཆུབ་སེམས་དཔའ་ཀ་ལ་པིངྐའི་ཕྲུ་གུ་ལས་དང་པོ་པ་འཁོར་བའི་སྒོ་ ༄༅། །ངའི་སྦུབས་ན་འདུག་པ་ལ་སྙིང་རྗེ་ཆེན་པོ་དང༌། བྱང་ཆུབ་ཀྱི་སེམས་ཀྱི་ང་རོའི་མཐུའི་ཁྱད་པར་ཡོད་པ་དེ་ལྟ་བུ་ནི། ཉན་ཐོས་དང༌། རང་སངས་རྒྱས་ ཐམས་ཅད་ལ་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། ནམ་མཁའ་ལྡིང་ཆེན་པོའི་ཕྲུ་གུ་སྐྱེས་ནས་རིང་པོ་མ་ལོན་པ་ལ་གཤོག་པའི་རླུང་གི་སྟོབས་དང༌། མཐུ་ བདོག་པ་དང༌། མིག་ཡོངས་སུ་དག་པའི་ཡོན་ཏན་ཡོད་པ་དེ་ལྟ་བུ་ནི། དེ་མ་ཡིན་པའི་བྱ་ལུས་ཚད་དུ་ཕྱིན་པ་གཞན་ཐམས་ཅད་ལའང་མེད་དོ། །དེ་བཞིན་དུ་དེ་བཞིན་ གཤེགས་པ་ནམ་མཁའ་ལྡིང་ཆེན་པོའི་རིགས་དང༌། རྒྱུད་དུ་བྱུང་བའི་བྱང་ཆུབ་སེམས་དཔའ་ནམ་མཁའ་ལྡིང་ཆེན་པོའི་ཕྲུ་གུ་སེམས་དང་པོ་བསྐྱེད་པ་ལ་ཐམས་ཅད་ མཁྱེན་པ་ཉིད་དུ་སེམས་བསྐྱེད་པའི་གཤོག་པའི་རླུང་གི་སྟོབས་དང༌། ཤུགས་བདོག་པ་དང༌། སྙིང་རྗེ་ཆེན་པོ་དང༌། ལྷག་པའི་བསམ་པའི་མིག་ཡོངས་སུ་དག་པའི་ཡོན་ ཏན་ཡོད་པའི་ཉན་ཐོས་དང༌། རང་སངས་རྒྱས་བསྐལ་པ་བརྒྱ་སྟོང་ཚང་བས་བྱུང་བ་ཐམས་ཅད་ལ་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། སྐྱེས་བུ་ཆེན་པོའི་ལག་ ནས་སྤྱད་པའི་མདེའུ་ཐུང་གིས་ནི། གོ་ཆ་ཇི་ཙམ་དུ་སྲ་ཡང་བརྟོལ་ཏོ། །དེ་བཞིན་དུ་བྱང་ཆུབ་སེམས་དཔའ་བརྩོན་འགྲུས་བརྟན་པོ་དང་ལྡན་པའི་ལག་ནས་སྤྱད་པའི་ཐམས་ ཅད་མཁྱེན་པ་ཉིད་དུ་སེམས་བསྐྱེད་པའི་མདེའུ་ཐུང་གིས་ཀྱང་ལྟ་བ་དང༌། བག་ལ་ཉལ་བའི་གོ་ཆ་ཐམས་ཅད་མི་བརྟོལ་བ་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། མཐུ་བོ་ ཆེ་ཆེན་པོ་ཁྲོས་ཏེ་རྔམ་པའི་འཕྲལ་བ་ལ་ཐོར་བུ་ཇི་སྲིད་དུ་གནས་པ་དེ་སྲིད་དུ་འཛམ་བུའི་གླིང་གི་མི་ཐམས་ཅད་ཀྱིས་ཀྱང་མི་ཐུབ་བོ། །དེ་བཞིན་དུ་བྱང་ཆུབ་སེམས་དཔའ་མཐུ་བོ་ཆེ་ཆེན་ པོ་སྙིང་རྗེ་ཆེན་པོས་རྔམ་པའི་ལྷག་པའི་བསམ་པའི་གདོང་ལ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཐོར་བུ་ཇི་སྲིད་དུ་གནས་པ་དེ་སྲིད་དུ་འཇིག་རྟེན་གྱི་ཁམས་ཐམས་ ཅད་དུ་གཏོགས་པའི་བདུད་ཐམས་ཅད་དང༌། བདུད་ཀྱི་ལས་ཐམས་ཅད་ཀྱིས་ཀྱང་མི་ཐུབ་བོ། །རིགས་ཀྱི་བུ། འདི་ལྟ་སྟེ། དཔེར་ན། འཕོང་གི་སློབ་དཔོན་གྱི་མཆན་བུ་མ་བྱང་བ་ འཕོང་གི་ཐབས་ལ་མ་གོམས་པ་ལ་འཕོང་གི་གནས་དང༌། ཐབས་ཀྱི་མཐུ་དང༌། ཁྱད་པར་བདོག་པ་དེ་ལྟ་བུ་ནི། ཐམས་ཅད་ལ་བྱང་ཡང་འཕོང་མི་ཤེས་པ་རྣམས་ལ་མེད་དོ། ། དེ་བཞིན་དུ་བྱང་ཆུབ་སེམས་དཔའ་ཅད་ཤེས་ལས་དང་པོ་པ་ཐམས་ཅད་མཁྱེན་པ་ཉིད་ལ་མ་གོམས་པ་ལ་སྨོན་ལམ་གྱི་ཡེ་ཤེས་དང་མོས་པས་སྤྱོད་པའི་མཐུའི་ཁྱད་པར་ཅི་བདོག་ པ་དེ་ལྟ་བུ་ནི། བྱང་ཆུབ་ཏུ་སེམས་མ་བསྐྱེད་པའི་སེམས་ཅན་ཐམས་ཅད་དང༌། སློབ་པ་དང༌། མི་སློབ་པ་དང༌། རང་སངས་རྒྱས་ཐམས་ཅད་ལ་མེད་དོ། །རིགས་ཀྱི་བུ། འདི་ལྟ་ ༄༅། །སྟེ༑ དཔེར་ན། འཕོང་སློབ་པའི་འཕོང་གི་རྒྱུས་ཐམས་ཅད་ལ་ནི། དང་པོར་རྐང་པའི་སྟངས་ལ་གོམས་པར་བྱ་བ་སྔོན་དུ་འགྲོའོ། །དེ་བཞིན་དུ་བྱང་ཆུབ་ སེམས་དཔའ་ཐམས་ཅད་མཁྱེན་པ་ཉིད་ཀྱི་ས་ལ་སློབ་པས་སངས་རྒྱས་ཀྱི་ཆོས་ཐམས་ཅད་ཁོང་དུ་ཆུད་པར་བྱ་བ་ལ་ཡང་དང་པོར་ཐམས་ཅད་མཁྱེན་པ་ཉིད་དུ་སེམས་བསྐྱེད་ པའི་ལྷག་པའི་བསམ་པ་ལ་ཡང་དག་པར་གནས་པ་སྔོན་དུ་འགྲོའོ། །རིགས་ཀྱི་བུ། འདི་ལྟ་སྟེ། དཔེར་ན། སྒྱུ་མའི་མཁན་པོ་སྒྱུ་མའི་རྣམ་པ་དང༌། ཡུལ་ཐམས་ཅད་ཡོངས་ སུ་སྟོན་པའི་བྱ་བ་ཐམས་ཅད་ནི། དང་པོར་སྔགས་ཀྱི་དངོས་གྲུབ་མངོན་པར་སྒྲུབ་པ་ཡིད་ལ་བྱས་ན། འགྲུབ་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའི་ཡུལ་དང༌། རྣམ་ པར་འཕྲུལ་པ་ཐམས་ཅད་ཡོངས་སུ་སྟོན་པའི་སངས་རྒྱས་དང༌། བྱང་ཆུབ་སེམས་དཔའི་ཡུལ་ཐམས་ཅད་ལ་ཡང་དང་པོ་སེམས་བསྐྱེད་པའི་སྨོན་ལམ་མངོན་པར་སྒྲུབ་པ་ནི། ཡོངས་སུ་གྲུབ་པ་ཡིན་ནོ། །རིགས་ཀྱི་བུ། འདི་ལྟ་སྟེ། དཔེར་ན། སྒྱུ་མའི་སྔགས་དང༌། རིག་སྔགས་ཐམས་ཅད་ནི། གཟུགས་མེད་ལ་བསྟན་དུ་མེད་པ་ཡིན་ཡང་སེམས་ བསྐྱེད་པས་སྒྱུ་མའི་སྤྲུལ་པ་དང༌། གཟུགས་ཀྱི་རྣམ་པ་ཐམས་ཅད་ཡོངས་སུ་སྟོན་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཡང་གཟུགས་མེད་ལ་ བསྟན་དུ་མེད་དེ། ཆོས་ཀྱི་དབྱིངས་ཐམས་ཅད་སེམས་བསྐྱེད་པ་ལ་དབང་བསྒྱུར་བ་ཙམ་གྱིས་ཆོས་ཀྱི་དབྱིངས་ཐམས་ཅད་ཡོན་ཏན་གྱི་རྒྱན་རྣམ་པར་ཕྱེ་བ་ཐམས་ཅད་ཀྱིས་རྣམ་ པར་སྒྲུབ་བོ། །རིགས་ཀྱི་བུ། འདི་ལྟ་སྟེ། དཔེར་ན། བྱི་ལའི་མིག་གིས་བལྟས་པ་ཙམ་གྱིས་བྱི་བ་ཐམས་ཅད་ཀུན་ཏུ་འབྱེར་རོ། །དེ་བཞིན་དུ་བྱང་ཆུབ་སེམས་དཔའི་ཐམས་ཅད་ མཁྱེན་པ་ཉིད་དུ་སེམས་བསྐྱེད་པའི་ལྷག་པའི་བསམ་པའི་སྦྱོར་བ་ཙམ་གྱིས་ལས་དང༌། ཉོན་མོངས་པ་ཐམས་ཅད་འབྱོར་བར་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན་། འཛམ་བུ་ཆུ་ཀླུང་གི་གསེར་གྱི་རྒྱན་བཏགས་ན། རྒྱན་ཐམས་ཅད་ཟིལ་གྱིས་གནོན་ཏོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་འཛམ་བུ་ཆུ་ཀླུང་གི་གསེར་གྱི་རྒྱན་ ཐོགས་པ་ཡང་ཉན་ཐོས་དང༌། རང་སངས་རྒྱས་ཐམས་ཅད་ཀྱི་ཡོན་ཏན་གྱི་རྒྱན་ཟིལ་གྱིས་གནོན་ཏོ། །ཟིལ་ཏུ་རླགས་པར་བྱེད་དོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་བ་ཁབ་ ལོང་གི་རྒྱལ་པོ་ཁམས་ཇི་ཙམ་དུ་ཆུང་ཡང་ལྕགས་སྒྲོག་སྲ་བ་ཐམས་ཅད་ཞིག་པར་བྱེད་དོ། །དེ་བཞིན་དུ་སེམས་ཐག་པ་ནས་བསྐྱེད་པའི་ཐམས་ཅད་མཁྱེན་པ་ཉིད་དུ་སེམས་ བསྐྱེད་པའི་ཁམས་ཇི་ཙམ་དུ་ཆུང་ཡང་ལྟ་བའི་རྣམ་པ་དང༌། མ་རིག་པ་དང༌། སྲེད་པའི་སྒྲོག་ཐམས་ཅད་ཞིག་པར་བྱེད་དོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་བ་ཁབ་ ༄༅། །ལོང་གི་ཁམས་ནི། གང་དང་གང་དུ་བཞག་པ་དེ་དང་དེར་ལྕགས་ཕལ་བ་ཐམས་ཅད་འགྱེས་ཤིང་མི་གནས་ལ་མི་འདུའོ། །དེ་བཞིན་དུ་ཐམས་ཅད་ མཁྱེན་པ་ཉིད་དུ་སེམས་བསྐྱེད་པའི་ཁམས་ཀྱང་ལས་སམ། ཉོན་མོངས་པའམ། ཉན་ཐོས་དང༌། རང་སངས་རྒྱས་ཀྱི་རྣམ་པར་གྲོལ་བ་གང་དང་གང་དུ་བྱུང་བ་དེ་དང་དེ་དག་ གི་ལས་དང༌། ཉོན་མོངས་པ་ཐམས་ཅད་དང༌། ཉན་ཐོས་དང༌། རང་སངས་རྒྱས་ཀྱི་རྣམ་པར་ཐར་པ་ཐམས་ཅད་ཀྱང་འབྱེར་ཞིང་མི་འཁོང་མི་འདུའོ། །རིགས་ཀྱི་བུ། འདི་ ལྟ་སྟེ༑ དཔེར་ན། ཆུ་སྲིན་གྱི་ཚལ་གྱི་ཟེགས་མ་གཅིག་ཟོས་པའི་ཉ་བ་ནི། ཆུའི་སྲོག་ཆགས་ཐམས་ཅད་ཀྱི་འཇིགས་པ་དང་བྲལ་བ་ཡིན་ཏེ། ཆུ་སྲིན་གྱིས་སོས་བཏབ་ ཀྱང་ལུས་ལ་མི་ཚུགས་སོ། །དེ་བཞིན་དུ་ལྷག་པའི་བསམ་པས་བྱང་ཆུབ་ཀྱི་སེམས་ཀྱི་ཆ་གཅིག་ཟོས་པའི་བྱང་ཆུབ་སེམས་དཔའ་ཡང་འཁོར་བའི་ལས་དང༌། ཉོན་ མོངས་པའི་འཇིགས་པ་དང་བྲལ་བ་ཡིན་ཏེ། ཉན་ཐོས་དང༌། རང་སངས་རྒྱས་ཐམས་ཅད་ཀྱིས་མངོན་པར་ཁོང་དུ་ཆུད་པར་བྱ་བའི་ནང་ན་འདུག་ཀྱང་ཡང་དག་པའི་ མཐའ་མངོན་དུ་བྱ་བའི་ལམ་གོལ་བར་ལྟུང་བས་གནོད་པར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། བདུད་རྩིའི་ཆུ་འཐུངས་པའི་སྐྱེས་བུ་ནི། གཞན་གྱིས་ གནོད་པར་བྱ་བ་ཐམས་ཅད་ཀྱིས་མི་འཆིའོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་བདུད་རྩིའི་ཆུ་འཐུངས་པ་ཡང་ཉན་ཐོས་ དང༌། རང་སངས་རྒྱས་ཐམས་ཅད་ཀྱི་སར་མི་འཆིའོ། །བྱང་ཆུབ་སེམས་དཔའི་སྙིང་རྗེ་ཆེན་པོའི་སྨོན་ལམ་ལས་ཀྱང་རྒྱུན་འཆད་པར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། བསྐུ་བ་གྲུབ་པའི་སྐྱེས་བུ་ནི། མིའི་གནས་ཐམས་ཅད་རྣམ་པར་སྤྱོད་ཀྱང་མི་ཀུན་གྱིས་མི་མཐོང་ངོ༌། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་ པའི་ཤེས་རབ་དང༌། སྨོན་ལམ་གྱིས་ཉེ་བར་བརྟན་པ་བདུད་ཀྱི་ཡུལ་ཐམས་ཅད་ལ་རྣམ་པར་སྤྱོད་ཀྱང་བདུད་ཐམས་ཅད་ཀྱིས་མི་མཐོང་ངོ༌། །རིགས་ཀྱི་བུ། འདི་ལྟ་སྟེ། དཔེར་ ན་རྒྱལ་པོ་ཆེན་པོ་ལ་བརྟན་པའི་སྐྱེས་བུ་ནི། སྐྱེ་བོ་མ་རབས་ཐམས་ཅད་ཀྱིས་མི་འཇིགས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་ པ་ཆོས་ཀྱི་རྒྱལ་པོ་ཆེན་པོ་ལ་བརྟེན་པ་ཡང་སྒྲིབ་པ་དང༌། བར་ཆད་དང༌། ངན་སོང་ཐམས་ཅད་ཀྱིས་མི་འཇིགས་སོ། །རིགས་ཀྱི་བུ། འདི་ལྟ་སྟེ། དཔེར་ན། ས་ཕུག་གི་ཁྱིམ་ན་ གནས་ན། སའི་གསེབ་ཐམས་ཅད་རླན་གྱིས་ཡངས་སུ་གང་བས་མེའི་འཇིགས་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་ཀྱི་རྒྱུད་བྱང་ཆུབ་སེམས་ཀྱི་དགེ་བའི་རྩ་བས་ ༄༅། །མངོན་པར་བརླན་པ་ལའང་ཉན་ཐོས་དང༌། རང་སངས་རྒྱས་ཀྱི་རྣམ་པར་གྲོལ་བའི་ཡེ་ཤེས་ཀྱི་མེས་འཇིགས་པ་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། དཔའ་བོ་ལ་བརྟེན་པའི་མི་ནི། དགྲ་ཐམས་ཅད་ཀྱིས་མི་འཇིགས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་དཔའ་བོ་ལ་བརྟན་པ་ཡང་ སྤྱོད་པ་ངན་པའི་དགྲ་ཐམས་ཅད་ཀྱིས་མི་འཇིགས་སོ། །རིགས་ཀྱི་བུ། འདི་ལྟ་སྟེ། དཔེར་ན། ལྷའི་དབང་པོ་བརྒྱ་བྱིན་རྡོ་རྗེའི་ལག་ཆ་ཐོགས་པ་ནི། ལྷ་མ་ཡིན་གྱི་ཚོགས་ཐམས་ ཅད་རབ་ཏུ་འཇོམས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་བརྟན་པའི་ལྷག་པའི་བསམ་པ་རྡོ་རྗེའི་ལག་ཆ་ཐོགས་པ་ཡང་བདུད་དང་ ཕས་ཀྱི་རྒོལ་བའི་ལྷ་མ་ཡིན་གྱི་ཚོགས་ཐམས་ཅད་རབ་ཏུ་འཇོམས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྩི་རོའི་བཅུད་འཐུངས་པའི་སྐྱེས་བུ་ནི། ཚེ་ཤིན་ཏུ་རིང་པར་གནས་ སོ༑ ༑ཉམ་ཆུང་བར་མི་འགྱུར་རོ། །རྒ་བར་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རོའི་བཅུད་ཀྱི་ཚོགས་འཐུངས་པ་ ཡང་བསྐལ་པ་གྲངས་མེད་པར་འཁོར་བ་ན་འཁོར་ཡང་ཡོངས་སུ་སྐྱོ་བ་མེད་ལ་འཁོར་བའི་སྐྱོན་གྱིས་མི་གོས་སོ། །རིགས་ཀྱི་བུ། འདི་ལྟ་སྟེ། དཔེར་ན། སྨན་གྱི་རོ་སྦྱར་རོ་ ཅོག་ཐམས་ཅད་དུ་ཆུ་ནི། སྔོན་དུ་འགྲོ་བ་སྟེ། གང་ལ་ཡང་སྐྱོན་དུ་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའི་སྤྱོད་པ་དང༌། སྨོན་ལམ་གྱི་ཚོགས་སྦྱར་བ་ཐམས་ཅད་དུ་ ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ནི། སྔོན་དུ་འགྲོ་བ་སྟེ། གང་ལ་ཡང་སྐྱོན་དུ་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། མིའི་དོན་དུ་བྱ་བ་ཐམས་ཅད་ ལ་ནི༑ སྲོག་གི་དབང་པོ་སྔོན་དུ་འགྲོའོ། །དེ་བཞིན་དུ་བྱང་ཆུབ་སེམས་དཔས་སངས་རྒྱས་ཀྱི་ཆོས་ཐམས་ཅད་ཡང་དག་པར་བླང་བ་ལའང་བྱང་ཆུབ་ཀྱི་སེམས་སྔོན་དུ་འགྲོའོ། ། རིགས་ཀྱི་བུ། འདི་ལྟ་སྟེ། དཔེར་ན། སྐྱེས་བུ་སྲོག་གི་དབང་པོ་དང་བྲལ་བ་ནི། ལས་ཐམས་ཅད་ལ་མཐུ་མེད་པས་ཕ་མ་དང༌། གཉེན་བཤེས་ཀྱི་ཚོགས་ཀྱིས་ཀྱང་ཉེ་བར་འཚོ་ བར་བྱར་མེད་དོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དང་བྲལ་བ་ཡང་སངས་རྒྱས་ཀྱི་ཡེ་ཤེས་ཐོབ་པར་བྱ་བ་ལ་མཐུ་མེད་པས། སེམས་ ཅན་ཐམས་ཅད་ཀྱིས་ཀྱང་ཐམས་ཅད་མཁྱེན་པ་ཉིད་ཀྱི་ཡོན་ཏན་གྱིས་ཉེ་བར་འཚོ་བར་བྱར་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི། དུག་ཐམས་ཅད་ཀྱིས་ གདུག་པར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་སྐྱེད་པའི་རྒྱ་མཚོ་ཆེན་པོ་ཡང་ལས་དང༌། ཉོན་མོངས་པ་དང༌། ཉན་ཐོས་དང་རང་སངས་རྒྱས་སུ་ ༄༅། །སེམས་བསྐྱེད་པའི་དུག་ཐམས་ཅད་ཀྱིས་གདུག་བར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། ཉི་མའི་དཀྱིལ་འཁོར་ནི་སྐར་མ་ཐམས་ཅད་ཀྱི་ འོད་ཀྱིས་ཐུབ་པར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཉི་མའི་དཀྱིལ་འཁོར་ཡང་ཉན་ཐོས་དང༌། རང་སངས་རྒྱས་ཀྱི་སྐར་མ་ཐམས་ཅད་ཀྱི་ ཡོན་ཏན་ཟག་པ་མེད་པའི་འོད་ཀྱིས་མི་ཐུབ་བོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱལ་པོའི་བུ་སྐྱེས་ནས་ཡུན་རིང་དུ་མ་ལོན་པ་ཡང་བློན་པོའི་མཆོག་ཏུ་བྱ་བ་ནས་རྒན་པ་ ཐམས་ཅད་རིགས་སུ་རིགས་དང་ལྡན་པར་སྐྱེས་པ་དང༌། དབང་གིས་ཟིལ་གྱིས་གནོན་ཏོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་ནས་རིང་པོ་མ་ལོན་པ་། ཆོས་ཀྱི་རྒྱལ་པོ་དེ་བཞིན་གཤེགས་པའི་རིགས་སུ་སྐྱེས་པའི་ལས་དང་པོ་པ་ཡང་ཡུན་རིང་པོ་ནས་ཚངས་པར་སྤྱོད་སྤྱོད་པའི་ཉན་ཐོས་ནས་རྒན་པ་ཐམས་ཅད་བྱང་ཆུབ་ཀྱི་སེམས་ ཀྱི་སྙིང་རྗེ་ཆེན་པོའི་དབང་གིས་ཟིལ་གྱིས་གནོན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། བློན་པོ་ཇི་ཙམ་དུ་རྒན་པས་ཀྱང་རྒྱལ་བུ་གཞོན་ནུ་ཇི་ཙམ་དུ་ཆུང་བ་ལའང་ཕྱག་བྱ་ དགོས་སོ། །རྒྱལ་པོའི་བུས་ཀྱང་བློན་པོ་རྒན་པོ་ལ་རིམ་གྲོ་མི་བྱ་བ་མ་ཡིན་ནོ། །དེ་བཞིན་དུ་ཉན་ཐོས་དང༌། རང་སངས་རྒྱས་ཇི་ཙམ་དུ་རྒན་ལ། ཇི་ཙམ་དུ་ཚངས་པའི་སྤྱོད་ པ་རིང་དུ་སྤྱོད་སྤྱོད་པ་རྣམས་ཀྱིས་ཀྱང་བྱང་ཆུབ་སེམས་དཔའ་ལས་དང་པོ་པ་ལ་འདུད་བར་བྱའོ། །བྱང་ཆུབ་སེམས་དཔས་ཀྱང་ཉན་ཐོས་དང༌། རང་སངས་རྒྱས་རྣམས་ལ་རིམ་གྲོ་མེད་ པར་བྱ་བ་མ་ཡིན་ནོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱལ་པོའི་བུ་ཐམས་ཅད་ཀྱིས་མི་དགོས་པར་བྱ་བ་ཞིག་ནའང་རྒྱལ་པོའི་མཚན་དང་ལྡན་ན། རིགས་ཀྱི་བཙུན་པས་རྒྱལ་ པོའི་བློན་པོ་དམ་པར་བྱ་བ་ཐམས་ཅད་དང་ཡང་མི་མཉམ་མོ། །དེ་བཞིན་དུ་བྱང་ཆུབ་སེམས་དཔའ་ལས་དང་པོ་ལས་དང་ཉོན་མོངས་པའི་ཉེ་བར་ལེན་པ་ཐམས་ཅད་ཀྱིས་ནོན་པ་ ཡང་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་མཚན་དང་ལྡན་ན། སངས་རྒྱས་ཀྱི་རིགས་ཀྱི་བཙུན་ཞིང་ཆེ་བས་ཉན་ཐོས་དང༌། རང་སངས་རྒྱས་མཆོག་ཏུ་ཕྱིན་པ་ཐམས་ ཅད་དང་ཡང་མི་མཉམ་མོ། །རིགས་ཀྱི་བུ། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཡོངས་སུ་དག་པ་ནི་མིག་ལ་རབ་རིབ་ཀྱི་སྐྱོན་ཡོད་ན། ཡོངས་སུ་མ་དག་པར་སྣང་ངོ༌། །དེ་ བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རིན་པོ་ཆེ་རང་བཞིན་གྱིས་ཡོངས་སུ་དག་པ་ཡང་སེམས་ཅན་དང་ཕའི་མིག་མི་ཤེས་པའི་རབ་རིབ་ཀྱི་སྐྱོན་དང་ལྡན་པ་རྣམས་ ལ་ཡོངས་སུ་མ་དག་པར་སྣང་ངོ༌། །རིགས་ཀྱི་བུ། འདི་ལྟ་སྟེ། དཔེར་ན། རྩིའི་གཟུངས་སྔགས་དང་རྩི་ཐམས་ཅད་བསྡུས་ཏེ་བྱས་པ་ནི་རེག་གམ། མཐོང་ངམ། འགྲོགས་ན་ ༄༅། །ཡང་སེམས་ཅན་གྱི་ནད་རབ་ཏུ་ཞི་བར་བྱེད་དོ། །དེ་བཞིན་དུ་བྱང་ཆུབ་ཀྱི་སེམས་ཀྱི་སྨོན་ལམ་དང༌། ཡེ་ཤེས་ཀྱི་ལུས་དགེ་བའི་རྩ་བའི་ཚོགས་དང༌། ཤེས་རབ་དང༌། ཐབས་ཀྱི་སྔགས་དང༌། རྩི་ཐམས་ཅད་ལས་བསྒྲུབས་པ་བྱང་ཆུབ་ཀྱི་སེམས་དང་ལྡན་པ་ནི། ཐོས་སམ། མཐོང་ངམ། འགྲོགས་སམ། རྗེས་སུ་དྲན་ པའི་ཚུལ་གྱིས་ཀྱང་སེམས་ཅན་གྱི་ཉོན་མོངས་པའི་ནད་རབ་ཏུ་ཞི་བར་བྱེད་དོ། །རིགས་ཀྱི་བུ། འདི་ལྟ་སྟེ། དཔེར་ན། གོས་དང་བའི་མཚན་ཉིད་ཅན་ནི། འདམ་གྱི་ཉེས་ པ་ཐམས་ཅད་ཀྱིས་མི་གོས་སོ། །དེ་བཞིན་དུ་བྱང་ཆུབ་ཀྱི་སེམས་ཀྱི་གོས་དང་བའི་མཚན་ཉིད་ཅན་ནི། འཁོར་བའི་ཉོན་མོངས་པའི་འདམ་གྱི་སྐྱོན་ཐམས་ཅད་ཀྱིས་ཀུན་ ནས་ཉོན་མོངས་པར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། ཤིང་གི་གཟུགས་མགོ་གཟེར་གྱིས་བཏབ་པ་ནི། ཡོངས་སུ་འགྱེས་པར་མི་འགྱུར་ཏེ། བྱ་བ་ ཐམས་ཅད་ཀྱང་བྱེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སྨོན་པའི་ཡེ་ཤེས་ཀྱི་ལུས་ཀྱི་སྤྱི་བོ་བྱང་ཆུབ་ཏུ་སེམས་བསྐྱེད་པའི་སྨོན་ལམ་གྱི་གཟེར་གྱིས་བཏབ་པ་ཡང་ བྱང་ཆུབ་སེམས་དཔའི་བྱ་བ་ཐམས་ཅད་ལ་མཐུ་ཡོད་དེ། ཐམས་ཅད་མཁྱེན་པ་ཉིད་ཀྱི་སྨོན་ལམ་གྱི་ཡེ་ཤེས་ལས་ལུས་སུ་གྲུབ་པ་ཡིན་པས་ཡོངས་སུ་འགྱེས་པར་མི་ འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། གཟེར་དང་མི་ལྡན་པའི་འཁྲུལ་འཁོར་ནི། ཤིང་གི་ཡན་ལག་དེ་ཉིད་ཡིན་ཡང་དགོས་པ་བྱ་བའི་མཐུ་མེད་དོ། །དེ་བཞིན་དུ་ བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ལྷག་པའི་བསམ་པ་དང་མི་ལྡན་ན། བྱང་ཆུབ་ཀྱི་ཡན་ལག་གི་ཚོགས་དེ་ཉིད་ཡིན་ཡང་སངས་རྒྱས་ཀྱི་ ཆོས་སྒྲུབ་པ་ལ་མཐུ་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། འཁོར་ལོས་བསྒྱུར་བའི་རྒྱལ་པོ་ལ་རིན་པོ་ཆེ་ཨ་ག་རུ་ནག་པོ་གླང་པོའི་སྙིང་པོ་ཞེས་བྱ་བ་ཡོད་པ་དེས་ བཅུགས་མ་ཐག་ཏུ་རྒྱལ་པོ་འཁོར་ལོས་བསྒྱུར་བའི་ཡན་ལག་བཞི་པའི་དཔུང་གི་ཚོགས་ཐམས་ཅད་ཀྱང་ནམ་མཁའ་ལ་གནས་པར་འགྱུར་རོ། །དེ་བཞིན་དུ་ཐམས་ཅད་མཁྱེན་ པ་ཉིད་དུ་སེམས་བསྐྱེད་པ་ཨ་ག་རུས་བདུགས་པའི་བྱང་ཆུབ་སེམས་དཔའི་དགེ་བའི་རྩ་བ་ཐམས་ཅད་ཀྱང་ཁམས་གསུམ་པ་ཐམས་ཅད་ལས་རྣམ་པར་འདས་ཏེ། དེ་བཞིན་ གཤེགས་པའི་ཡེ་ཤེས་ནམ་མཁའི་སྤྱོད་ཡུལ་འདུས་མ་བྱས་པ་ཐམས་ཅད་ཀྱི་མཐར་ཐུག་པར་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་ནི། རིན་པོ་ཆེ་མ་རབས་ ཀྱི་འབྱུང་ཁུངས་ནས་མི་འབྱུང་གི །རྡོ་རྗེའི་འབྱུང་ཁུངས་སམ། གསེར་གྱི་འབྱུང་ཁུངས་ནས་འབྱུང་ངོ༌། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་ལྟ་བུའང་ ༄༅། །སེམས་ཅན་གྱི་བསམ་པའི་དགེ་བའི་རྩ་བ་མ་རབས་ཀྱི་རིན་པོ་ཆེའི་འབྱུང་གནས་ནས་མི་སྐྱེ་སྟེ། གཞན་དུ་ན་སེམས་ཅན་ཡོངས་སུ་སྐྱོབ་པའི་སྙིང་རྗེ་ ཆེན་པོའི་རྡོ་རྗེའི་འབྱུང་ཁུངས་སམ། ཐམས་ཅད་མཁྱེན་པའི་ཡེ་ཤེས་ལ་ལྷག་པར་དམིགས་པའི་གསེར་གྱི་འབྱུང་ཁུངས་ཆེན་པོ་ནས་འབྱུང་ངོ༌། །རིགས་ཀྱི་བུ། འདི་ལྟ་ སྟེ༑ དཔེར་ན། ཤིང་གི་རིགས་རྩ་བ་མེད་པ་ཞེས་བྱ་བ་ཡོད་དེ། དེའི་རྩ་བ་མཐར་ཐུག་པ་མི་དམིགས་མོད་ཀྱི། ཤིང་རྣམས་ལ་ཡལ་ག་དང༌། ལོ་མ་དང༌། འདབ་མ་དང༌། མེ་ཏོག་ཤིན་ཏུ་རྒྱས་པ་དྲ་བ་ལྟ་བུར་གྱུར་པ་སྣང་ངོ༌། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་དགེ་བའི་རྩ་བའི་མཐར་ཐུག་པའང་མི་དམིགས་མོད་ཀྱི། འཇིག་རྟེན་གྱི་སྐྱེ་གནས་ཐམས་ཅད་དུའང་ཐམས་ཅད་མཁྱེན་པ་ཉིད་ཀྱི་བསོད་ནམས་དང༌། ཡེ་ཤེས་དང༌། མངོན་པར་ཤེས་པའི་མེ་ཏོག་ཤིན་ཏུ་རྒྱས་པ་སྨོན་ལམ་ཆེན་པོའི་དྲ་ བར་གྱུར་པའང་ཡོངས་སུ་སྣང་ངོ༌། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་ནི། སྣོད་ངན་པའི་གཞི་ལ་འདུག་ན་མཛེས་པར་མི་སྣང་ངོ༌། །སྣོད་མ་རྡོལ་བ་མ་གཏོགས་པར་ སྣོད་རྡོལ་བ་དང་བུ་ག་ཅན་གྱིས་གཟུང་བར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་ཆེན་པོ་ཡང་སེམས་ཅན་མོས་པ་ཞན་པའི་སྣོད་དང༌། སེར་སྣ་ཅན་ནམ། ཚུལ་ཁྲིམས་ངན་པ་ཅན་ནམ། གནོད་སེམས་ཅན་ནམ། ལེ་ལོ་ཅན་ནམ། དྲན་པ་འཁྲུགས་པའམ། ཤེས་རབ་འཆལ་བ་ཅན་རྣམས་ལ་མི་མཛེས་ཏེ། བྱང་ ཆུབ་སེམས་དཔའི་ལྷག་པའི་བསམ་པ་རིན་པོ་ཆེའི་སྣོད་མ་གཏོགས་པར་སེམས་ཅན་ལྷག་པའི་བསམ་པ་ལོག་པ་ལ་ཞུགས་པ་བློ་མི་བརྟན་པའི་སྣོད་ཀྱིས་ཀྱང་གཟུང་བར་མི་ནུས་ སོ༑ ༑རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་ནི། རིན་པོ་ཆེ་ཐམས་ཅད་འབིགས་སོ། །དེ་བཞིན་དུ། ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་ཡང་སངས་རྒྱས་ཀྱི་ ཆོས་རིན་པོ་ཆ་ཐམས་ཅད་འབིགས་པར་ཁོང་དུ་ཆུད་པར་བྱེད་དོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་ནི། བྲག་ཐམས་ཅད་ཤིགས་པར་འཛེམས་སོ། །དེ་བཞིན་དུ་ཐམས་ ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་ཡང་ལྟ་བའི་རྣམ་པ་ཐམས་ཅད་ཀྱི་བྲག་ཤིགས་པར་འཇོམས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་རིན་པོ་ཆེ་ནི། ཆག་ཀྱང་ ཐམས་ཅད་ལས་ཁྱད་པར་དུ་འཕགས་པའི་གསེར་གྱི་རྒྱན་ཟིལ་གྱིས་གནོན་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་རིན་པོ་ཆེ་བསམ་པ་ལོག་པར་ཞུགས་ པས་ཆག་པར་གྱུར་ཀྱང་ཉན་ཐོས་དང༌། རང་སངས་རྒྱས་ཐམས་ཅད་ཀྱི་ཡོན་ཏན་གྱི་གསེར་གྱི་རྒྱན་ཟིལ་གྱིས་གནོན་ཏོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་རིན་པོ་ཆེ་ནི། ༄༅། །ཆག་ཀྱང་ཕོངས་པ་ཐམས་ཅད་རྣམ་པར་སེལ་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་རིན་པོ་ཆེ་ནན་ཏན་མེད་པས་ཆག་ པར་གྱུར་ཀྱང་འཁོར་བའི་ཕོངས་པ་ཐམས་ཅད་རྣམ་པར་སེལ་ཏོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེའི་ཁམས་ནི། ཇི་ཙམ་ཞིག་ཏུ་ཆུང་ཡང་ནོར་བུ་དང་རྡོ་ཐམས་ ཅད་གཅོག་པའི་མཚན་ཉིད་དོ། །དེ་བཞིན་དུ་དམིགས་པ་ཇི་ཙམ་དུ་ཆུང་བ་ལ་ཞུགས་ཀྱང་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེའི་ཁམས་ནི། མི་ཤེས་པ་ ཐམས་ཅད་འཇིག་པར་བྱེད་པའི་མཚན་ཉིད་དོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་རིན་པོ་ཆེ་ནི། སྐྱེ་བོ་མ་རབས་ཀྱི་ལག་ཏུ་ཕྱིན་པར་མི་འགྱུར་རོ། །དེ་བཞིན་དུ་ ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་རིན་པོ་ཆེ་ཡང་མ་རབས་ཀྱི་བསམ་པ་དང་ལྡན་པ་དགེ་བའི་རྩ་བ་ངན་དོན་ཅན་གྱི་ལྷ་དང་མིའི་ལག་ཏུ་ཕྱིན་པར་མི་འགྱུར་ རོ༑ ༑རིགས་ཀྱི་བུ། འདི་ལྟ་སྟེ། དཔེར་ན། རིན་པོ་ཆེ་ཡོངས་སུ་བརྟག་པ་ལ་མི་མཁས་པའི་སྐྱེས་བུ་ནི། རྡོ་རྗེ་རིན་པོ་ཆེའི་ཡོན་ཏན་ཉམས་སུ་མྱོང་བར་མི་འགྱུར་རོ། །དེ་བཞིན་དུ་ ཤེས་རབ་འཆལ་བའི་ངང་ཚུལ་དང་ལྡན་པའི་སྐྱེས་བུ་གང་ཟག་ཀྱང་བྱང་ཆུབ་ཀྱི་སེམས་རྡོ་རྗེ་རིན་པོ་ཆེ་ཆེན་པོའི་ཡོན་ཏན་ལ་མི་མཁས་པས་ཀྱང་དེའི་ཡོན་ཏན་གྱི་ཁྱད་པར་ ཉམས་སུ་མྱོང་བར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་ནི། ཞུ་བར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་ཀྱི་རྒྱུར་གྱུར་པའི་བྱང་ཆུབ་ཏུ་སེམས་ བསྐྱེད་པའི་རྡོ་རྗེ་ཡང་ཞུ་བར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེའི་ལག་ཆ་ཆེན་པོ་ནི། གཞན་དུ་ན་མཐུ་བོ་ཆེ་ཆེན་པོའི་སྟོབས་ལྟར་ཁྱད་པར་དུ་འཕགས་ པའི་མཐུ་སྟོབས་ཀྱི་ཤུགས་དྲག་པོ་མ་གཏོགས་པར་སྟོབས་པོ་ཆེ་ཆེན་པོས་ཀྱང་གཟུང་བར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེའི་ལག་ཆ་ ཆེན་པོ་ཡང་གཞན་དུ་ན་བྱང་ཆུབ་སེམས་དཔའ་ཆེན་པོ་ཐམས་ཅད་མཁྱེན་པ་ཉིད་ཀྱི་རྒྱུའི་སྟོབས་ཀྱི་བརྟན་པ་དགེ་བའི་རྩ་བ་ཆད་མེད་པའི་མཐུ་བོ་ཆེ་ཆེན་པོའི་སྟོབས་ལྟར་ཁྱད་པར་དུ་ འཕགས་པ་སྟོབས་ཀྱི་ཤུགས་ཆེན་པོ་རབ་ཏུ་ཐོབ་པ་མ་གཏོགས་པར་ཉན་ཐོས་དང༌། རང་སངས་རྒྱས་སྟོབས་པོ་ཆེ་ཐམས་ཅད་ཀྱིས་ཀྱང་ཡོངས་སུ་གཟུང་བར་མི་ནུས་སོ། །རིགས་ ཀྱི་བུ༑ འདི་ལྟ་སྟེ། དཔེར་ན། མཚོན་ཆ་ཐམས་ཅད་ཀྱིས་མི་ཚུགས་པ་གང་དུ་ཡང་རྡོ་རྗེས་མི་ཚུགས་པ་མེད་དེ། ཁ་མི་འབབ་བོ། །དེ་བཞིན་དུ་སེམས་ཅན་ཡོངས་སུ་སྨིན་པར་བྱ་བ་ དང༌། གདུལ་བའམ། དུས་གསུམ་གྱི་བསྐལ་པར་སྤྱད་པའི་སྡུག་བསྔལ་དང་འགྲོགས་པར་བྱ་བ་གང་དུ་ཉན་ཐོས་དང༌། རང་སངས་རྒྱས་ཀྱི་སྨོན་ལམ་དང༌། ཡེ་ཤེས་ཀྱི་མཚོན་ ༄༅། །ཆས་རྡུགས་པ། ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེའི་མཚོན་ཆ་ཆེན་པོ་ཐོགས་པའི་བྱང་ཆུབ་སེམས་དཔའ་ཡོངས་སུ་སྐྱོ་བའི་ཡིད་ མེད་པས་ནི། མི་བཟོད་པ་མེད་དེ། ཁ་མི་འབབ་བོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་ནི། གཞན་དུ་ན་རྡོ་རྗེ་ཉིད་ལས་གྱུར་པའི་གཞི་མ་གཏོགས་པར་སའི་ཕྱོགས་ གང་གིས་ཀྱང་གཟུང་བར་མི་ནུས་སོ། །དེ་བཞིན་དུ་བྱང་ཆུབ་སེམས་དཔའི་འབྱུང་བའི་སྨོན་ལམ་གྱི་ཚོགས་ཀྱི་རྡོ་རྗེ་ནི། གཞན་དུ་ན་ལྷག་པའི་བསམ་པས་བྱང་ཆུབ་ཏུ་སེམས་ བསྐྱེད་པའི་རྡོ་རྗེ་བརྟན་པའི་སའི་གཞི་མ་གཏོགས་པར་ཉན་ཐོས་དང༌། རང་སངས་རྒྱས་ཐམས་ཅད་ཀྱིས་གཟུང་བར་མི་ནུས་སོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱ་མཚོ་ ཆེན་པོའི་སྣོད་རྡོ་རྗེའི་གཞི་སྲ་ཞིང་གསེབ་མེད་པས། ཆུ་གསང་དུ་འཛག་པར་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའི་དགེ་བའི་རྩ་བ་བྱང་ཆུབ་ཀྱི་སེམས་ཀྱི་རྡོ་རྗེ་གསེབ་ མེད་པ་ཡོངས་སུ་བསྔོས་པའི་གཞི་ཅན་ལ་གནས་པ་ཡང་སྲིད་པར་སྐྱེས་པ་ཐམས་ཅད་ཀྱིས་ཟད་པར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེའི་གཞི་ལ་ བརྟན་པའི་ས་ཆེན་པོ་ནི། འཇིག་པར་མི་འགྱུར་རོ། །དམའ་བར་མི་འགྱུར་རོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པའི་རྡོ་རྗེ་སྲ་བའི་གཞི་ལ་བརྟན་པའི་བྱང་ཆུབ་སེམས་ དཔའི་སྨོན་ལམ་རྣམས་ཀྱང་ཁམས་གསུམ་ཐམས་ཅད་དུ་འཇིག་པར་མི་འགྱུར་རོ། །དམའ་བར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་ནི། ཆུས་བངས་པའམ་ རུལ་བར་མི་འགྱུར་རོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པའི་རྡོ་རྗེ་ཡང་ལས་དང༌། ཉོན་མོངས་པ་ཐམས་ཅད་ཀྱི་ཆུར་བསྐལ་པར་གནས་ཀྱང་རུལ་བར་མ་འགྱུར། བངས་ པར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྡོ་རྗེ་ནི། མེ་ཐམས་ཅད་ཀྱི་དྲོད་ཀྱིས་ཀྱང་ཚིག་པར་མི་འགྱུར། ཡོངས་སུ་གདུང་བར་ཡང་མི་འགྱུར་རོ། །དེ་བཞིན་དུ་ཐམས་ ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་ཡང་འཁོར་བ་ཐམས་ཅད་ཀྱི་སྡུག་བསྔལ་གྱི་མེའི་དྲོད་ཐམས་ཅད་ཀྱིས་མི་ཚིག་གོ །ཉོན་མོངས་པ་ཐམས་ཅད་ཀྱི་མེའི་གདུང་བས་ གདུངས་པར་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྙིང་པོ་བྱང་ཆུབ་ལ་བཞུགས་ ཤིང་བདུད་རྒོལ་དུ་གཞུག་པ་མཛད་པ་དང༌། ཐམས་ཅད་མཁྱེན་པ་ཉིད་དུ་མངོན་པར་རྫོགས་པར་འཚང་རྒྱ་བ་རྣམས་ཀྱི་གདན་ནི། གཞན་དུ་ན་སྟོང་གསུམ་གྱི་སྟོང་ཆེན་པོའི་ འཇིག་རྟེན་གྱི་ཁམས་ཀྱི་རྡོ་རྗེའི་ལྟེ་བའི་སའི་གཞི་མ་གཏོགས་པར་སའི་ཕྱོགས་གཞན་གྱིས་གཟུང་བར་མི་ནུས་སོ། །དེ་བཞིན་དུ་བྱང་ཆུབ་སེམས་དཔའ་བླ་ན་མེད་པ་ཡང་དག་ ༄༅། །པར་རྫོགས་པའི་བྱང་ཆུབ་ཏུ་སྨོན་ལམ་འདེབས་པ་དང༌། སྤྱད་པ་སྤྱོད་པ་དང༌། ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་དང༌། བཟོད་པ་ལ་འཇུག་པ་ དང༌། ས་ཐོབ་པར་བྱེད་པ་དང༌། དགེ་བའི་རྩ་བ་ཡོངས་སུ་རྫོགས་པར་བྱེད་པ་དང༌། ལུང་བསྟན་པ་ཡོངས་སུ་ནོད་པ་དང༌། བྱང་ཆུབ་སེམས་དཔའི་ལམ་གྱི་ཚོགས་ཐམས་ཅད་ ཉེ་བར་སྟོན་པ་དང༌། དེ་བཞིན་གཤེགས་པ་ཐམས་ཅད་ལ་མཆོད་པ་བྱེད་པ་དང༌། ཆོས་ཀྱི་སྤྲིན་ཆེན་པོ་ཡོངས་སུ་འཛིན་པ་རྣམས་ཀྱི་དགེ་བའི་རྩ་བའི་སྟོབས་དང༌། ཤུགས་དང༌། དྲག་ཤུལ་དེ་དག་ཀྱང་གཞན་དུ་ན་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་སྨོན་ལམ་ཐམས་ཅད་ཀྱི་ཡེ་ཤེས་རྡོ་རྗེ་སྲ་བའི་ལྟེ་བ་ཅན་མ་གཏོགས་པར་སེམས་གཞན་གྱིས་ ཡོངས་སུ་གཟུང་བར་མི་ནུས་སོ། །རིགས་ཀྱི་བུ། དེ་ལྟར་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ནི། ཡོན་ཏན་དེ་དག་དང༌། གཞན་ཚད་མེད་པ་ནས་ཡོན་ཏན་གྱི་ཁྱད་ པར་བརྗོད་དུ་མེད་པའི་ཡང་བརྗོད་དུ་མེད་པ་དང་ལྡན་པ་སྟེ། སེམས་ཅན་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་དག་ཀྱང་ཡོན་ཏན་ གྱི་ཆོས་དེ་ལྟ་བུ་དང་ལྡན་པར་གྱུར་ཏོ། །ལྡན་པར་འགྱུར་རོ། །དེ་བས་ན། རིགས་ཀྱི་བུ། དེ་ལྟར་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། ཡོན་ཏན་འདི་དག་རབ་ཏུ་ཐོབ་པར་བྱ་བའི་ཕྱིར་བྱང་ཆུབ་སེམས་དཔའི་སྤྱོད་པ་ཡོངས་སུ་ཚོལ་བ་ནི། ཁྱོད་ཀྱིས་ཐོབ་པར་བྱ་བ་ལེགས་པར་ཐོབ་བོ། །རིགས་ཀྱི་བུ། ཁྱོད་ན་རེ། ཇི་ལྟར་ བྱང་ཆུབ་སེམས་དཔའི་སྤྱོད་པ་ལ་སྤྱད་པར་བྱ། ཇི་ལྟར་ནན་ཏན་དུ་བྱ་ཞེས་ཟེར་བ་ནི། རིགས་ཀྱི་བུ། ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་ པོ་འདི་ཉིད་ཀྱི་ནང་དུ་སོང་སྟེ་ལྟོས་ཤིག་དང༌། དེར་ཁྱོད་ཀྱིས་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང༌། བསླབ་ནས་ཀྱང་ཡོན་ཏན་ཇི་ལྟ་བུ་ ཡོངས་སུ་འགྲུབ་པར་འགྱུར་བ་ཤེས་པར་འགྱུར་རོ། །དེ་ནས་ཚོང་དཔོན་གྱི་བུ་ནོར་བཟང་གིས་བྱང་ཆུབ་སེམས་དཔའ་བྱམས་པ་ལ་གཡས་ཕྱོགས་སུ་བསྐོར་བ་བྱས་ཏེ་འདི་སྐད་ཅེས་ སྨྲས་སོ༑ ༑འཕགས་པ། ཕོ་བྲང་བརྩེགས་པའི་ཆབ་སྒོ་དབྱེར་གསོལ་ནང་དུ་མཆིའོ། །དེ་ནས་བྱང་ཆུབ་སེམས་དཔའ་བྱམས་པས་ཁང་པ་བརྩེགས་པ་རྣམ་པར་སྣང་མཛད་ཀྱི་རྒྱན་ གྱིས་བརྒྱན་པའི་སྙིང་པོའི་སྒོ་དྲུང་དུ་ཕྱིན་ཏེ། ལག་པ་གཡས་པས་སེ་གོལ་གཏོགས་ཏེ་སྒྲ་བྱུང་བ་དང༌། དེའི་སྒོ་དེའང་རང་བྱེ་བར་གྱུར་པ་དང༌། དེས་སྨྲས་པ། རིགས་ཀྱི་བུ། ད་ཁང་ པ་བརྩེགས་པ་འདིར་སོང་ཞིག །དེ་ནས་ཚོང་དཔོན་གྱི་བུ་ནོར་བཟང་ངོ་མཚར་ཆེན་པོ་ཐོབ་པར་གྱུར་ཏེ། ཁང་པ་བརྩེགས་པ་དེའི་ནང་དུ་ཕྱིན་པ་དང༌། ཕྱིན་མ་ཐག་ཏུ་སྒོ་དེ་ཡང་རང་ ༄༅། །ཆད་པར་གྱུར་ཏོ། །དེས་མཐོང་བ་ཁང་པ་བརྩེགས་པ་དེ་ཤིན་ཏུ་རྒྱ་ཆེ་ཞིང་ཡངས་ལ། རྒྱར་དཔག་ཚད་བརྒྱ་སྟོང་མང་པོ་དང་ལྡན་པ། ནམ་མཁའི་དབྱིངས་ ཀྱི་ཚད་ཀྱིས་གཞལ་བ། འཁོར་ཐམས་ཅད་དུ་ནམ་མཁའི་དབྱིངས་ལྟར་ཡངས་པ། གདུགས་དང༌། རྒྱལ་མཚན་དང༌། བ་དན་གྱི་རྒྱན་གྲངས་མེད་པས་བརྒྱན་པ། རིན་པོ་ཆེ་ གྲངས་མེད་པའི་རྒྱན་གྱིས་བརྒྱན་པ། མུ་ཏིག་གི་ཕྲེང་བ་གྲངས་མེད་པ་རབ་ཏུ་དབྱངས་པའི་རྒྱན་གྱིས་བརྒྱན་པ། རིན་པོ་ཆེའི་ཕྲེང་བ་གྲངས་མེད་པ་རབ་ཏུ་དཔྱངས་པའི་རྒྱན་གྱིས་ བརྒྱན་པ། མུ་ཏིག་དམར་པོའི་ཕྲེང་བ་གྲངས་མེད་པ་རབ་ཏུ་དཔྱངས་པའི་རྒྱན་གྱིས་བརྒྱན་པ། སེངྒེའི་མུ་ཏིག་གི་ཕྲེང་བ་གྲངས་མེད་པ་རབ་ཏུ་དཔྱངས་པའི་རྒྱན་གྱིས་བརྒྱན་པ། སེངྒེའི་རྒྱལ་མཚན་གྲངས་མེད་པའི་རྒྱན་གྱིས་བརྒྱན་པ། ཟླ་བ་དང་ཟླ་གམ་གྲངས་མེད་པའི་རྒྱན་གྱིས་བརྒྱན་པ། དར་གྱི་ལྔ་ལྡི་སྣ་ཚོགས་གྲངས་མེད་པ་རབ་ཏུ་དཔྱངས་པའི་ རྒྱན་གྱིས་བརྒྱན་པ། དར་གྱི་བ་དན་སྣ་ཚོགས་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེ་མང་པོ་གྲངས་མེད་པའི་འོད་ཀྱི་རྒྱན་གྱིས་བརྒྱན་པ། གསེར་གྱི་དྲ་བ་གྲངས་ མེད་པའི་རྒྱན་གྱིས་བརྒྱན་པ། རིན་པོ་ཆེའི་སྣམ་བུ་གྲངས་མེད་པའི་རྒྱན་གྱིས་བརྒྱན་པ། གསེར་གྱི་ལྕགས་བོད་རིན་པོ་ཆེས་སྤྲས་པ་གྲངས་མེད་པའི་རྒྱན་གྱིས་བརྒྱན་པ། དྲིལ་བུ་སྒྲ་སྙན་པའི་བྱུང་བ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་དྲིལ་བུ་གཡེར་ཁའི་དྲ་བ་བསྐྱོད་ན་ཡིད་དུ་འོང་བའི་སྒྲ་འབྱུང་བ་གྲངས་མེད་པའི་རྒྱན་གྱིས་བརྒྱན་པ། ལྷ་ རྫས་ཀྱི་མེ་ཏོག་མང་པོའི་ཆར་མངོན་པར་འབབ་པ་གྲངས་མེད་པའི་རྒྱན་གྱིས་བརྒྱན་པ། ལྷ་རྫས་ཀྱི་ཕྲེང་བའི་ལྔ་ལྡི་མངོན་པར་དཔྱངས་པ་གྲངས་མེད་པའི་རྒྱན་གྱིས་བརྒྱན་པ། གམ་ ཡོ་ནས་སྨོས་ཀྱི་སྣོད་ནས་བདུག་སྤོས་འཐུལ་བའི་ཡོ་བྱད་གྲངས་མེད་པའི་རྒྱན་གྱིས་བརྒྱན་པ། གསེར་གྱི་ཕྱེ་མའི་ཆར་རབ་ཏུ་འབབ་པ་གྲངས་མེད་པའི་རྒྱན་གྱི་བརྒྱན་པ། པུ་ཤུའི་ དྲ་བ་གྲངས་མེད་པའི་རྒྱན་གྱིས་བརྒྱན་པ། སྐར་ཁུང་གྲངས་མེད་པའི་རྒྱན་གྱིས་བརྒྱན་པ། རྟ་བབས་གྲངས་མེད་པའི་རྒྱན་གྱིས་བརྒྱན་པ། བ་གམ་གྲངས་མེད་པའི་རྒྱན་གྱིས་བརྒྱན་ པ༑ མེ་ལོང་གི་དཀྱིལ་འཁོར་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་ཕ་གུ་གྲངས་མེད་པ་གཏམས་པའི་རྒྱན་གྱིས་བརྒྱན་པ། རིན་པོ་ཆེའི་རྩིག་པ་གྲངས་མེད་པའི་རྒྱན་ གྱིས་བརྒྱན་པ། རིན་པོ་ཆེའི་ཀ་བ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་གོས་ཀྱི་སྤྲིན་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་ཤིང་གྲངས་མེད་པའི་རྒྱན་གྱིས་བརྒྱན་ པ༑ རིན་པོ་ཆེའི་ཁྲི་འཕང་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་ལམ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེ་གྲངས་མེད་པའི་བ་དན་གྱི་རྒྱན་གྱིས་བརྒྱན་པ། ༄༅། །སའི་གཞི་རྒྱན་སྣ་ཚོགས་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེ་གྲངས་མེད་པ་ལས་བརྩེགས་པའི་ཁང་པའི་རྒྱན་གྱིས་བརྒྱན་པ། རིན་པོ་ ཆེའི་ཁྲི་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་བུ་མོ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་སྣམ་བུ་གྲངས་མེད་པ་བཏིང་བའི་འཆག་སའི་རྒྱན་གྱིས་བརྒྱན་ པ༑ འཛམ་བུ་ཆུ་ཀླུང་གི་གསེར་གྱི་ཆུ་ཤིང་གི་ཀ་བ་ཤིན་ཏུ་རྣམ་པར་ཕྱེ་བ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེ་ཐམས་ཅད་ཀྱི་གཟུགས་གྲངས་མེད་པའི་རྒྱན་གྱིས་ བརྒྱན་པ། བྱང་ཆུབ་སེམས་དཔའི་ལུས་གྲངས་མེད་པའི་རྒྱན་གྱིས་བརྒྱན་པ། བྱའི་ཚོགས་སྣ་ཚོགས་ཡིད་དུ་འོང་བའི་སྒྲ་འབྱིན་པ་གྲངས་མེད་པའི་རྒྱན་གྱིས་བརྒྱན་པ། རིན་ པོ་ཆེའི་པདྨོ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་སྲོག་ཤིང་འཛིན་པ་གྲངས་མེད་པའི་རྒྱན་གྱིས་བརྒྱན་པ། རྫིང་བུ་གྲངས་མེད་པའི་རྒྱན་གྱིས་བརྒྱན་པ། མེ་ཏོག་ པུཎྜ་རཱི་ཀ་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་ཐེམ་སྐས་གྲངས་མེད་པའི་རྒྱན་གྱིས་བརྒྱན་པ། རིན་པོ་ཆེའི་སྟེགས་བུ་རྣམ་པར་བཀོད་པ་གྲངས་མེད་པའི་རྒྱན་གྱིས་ བརྒྱན་པ༑ རིན་པོ་ཆེ་སྣ་ཚོགས་གྲངས་མེད་པས་སྤྲས་པའི་རྒྱན་གྱིས་བརྒྱན་པ། ནོར་བུ་རིན་པོ་ཆེ་ཆེན་པོའི་འོད་གྲངས་མེད་པ་རབ་ཏུ་འགྱེད་པའི་རྒྱན་གྱིས་བརྒྱན་པ། རིན་པོ་ ཆེ་ཐམས་ཅད་རྣམ་པར་ཕྱེ་བ་གྲངས་མེད་པའི་རྒྱན་གྱིས་བརྒྱན་པ། ཡོན་ཏན་དང་ལེགས་པ་ཕུན་སུམ་ཚོགས་པ་གྲངས་མེད་པའི་རྒྱན་གྱིས་བརྒྱན་པ་འདུག་པར་མཐོང་སྟེ། ཁང་པ་བརྩེགས་ པ་དེའི་ནང་ན་ཡང་ཁང་པ་བརྩེགས་པ་གཞན་བརྒྱ་སྟོང་འདི་ལྟ་བུའི་རྒྱན་དང༌། །ལྷབ་ལྷུབ་ཀྱིས་བརྒྱན་པ། རིན་པོ་ཆེའི་གདུགས་དང༌། རྒྱལ་མཚན་དང༌། ལྷའི་བདག་གྲངས་མེད་ པའི་རྒྱན་གྱིས་བརྒྱན་པ་ནས་ཡོན་ཏན་དང་ལེགས་པ་ཕུན་སུམ་ཚོགས་པ་གྲངས་མེད་པའི་བར་གྱི་རྒྱན་གྱིས་བརྒྱན་པས་གང་བར་མཐོང་ངོ༌། །ཁང་པ་བརྩེགས་པ་དེ་དག་ཐམས་ཅད་ཀྱང་ དེ་ལྟར་རྒྱ་ཆེ་ཞིང་ཡངས་པ། དེ་ལྟར་ཚད་མེད་དེ་ནམ་མཁའི་མཛོད་དུ་གྱུར་པ་ཀུན་ནས་ཤིན་ཏུ་སྤ་བར་འཁོད་པར་མཐོང་ངོ༌། །དེས་ཁང་པ་བརྩེགས་པ་རྣམ་པར་ཕྱེ་བ་དེ་དག་ཐམས་ཅད་ ཀྱང་དམིགས་པ་གཅིག་ལ་ཕན་ཚུན་མ་འདྲེས་པ་དང༌། ཕན་ཚུན་མ་འཛིངས་པ་དང༌། ཕན་ཚུན་ས་ལ་གསལ་བོར་འདུག་པར་གཟུགས་བརྙན་གྱི་ཚུལ་དུ་དེ་ལ་སྣང་བར་གྱུར་ཏེ། དམིགས་ པ་གཅིག་ལ་ཇི་ལྟ་བ་དེ་བཞིན་དུ་དམིགས་པ་མ་ལུས་པ་དེ་དག་ཐམས་ཅད་ལའང་སྣང་བར་མཐོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་གིས་ཁང་པ་བརྩེགས་པ་ཆེན་པོ་རྣམ་པར་ སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོའི་ཡུལ་དང༌། རྣམ་པར་འཕྲུལ་པ་བསམ་གྱིས་མི་ཁྱབ་པ་རྣམ་པ་དེ་ལྟ་བུ་དག་མཐོང་ནས་དགའ་བའི་ཐུགས་དཔག་ཏུ་མེད་པ་རྣམ་པར་ ༄༅། །འཕེལ་བའི་སྤྲོ་བ་དང༌། མོས་པ་ཆེན་པོས་ལུས་དང་སེམས་མངོན་པར་བརླན་པ་དང༌། འདུ་ཤེས་ཀྱི་རྣམ་པ་ཐམས་ཅད་རྣམ་པར་བསལ་པའི་ཡིད་དང༌། སྒྲིབ་པ་ཐམས་ཅད་རྣམ་པར་ཟློག་པའི་སེམས་དང༌། རྨོངས་པ་ཐམས་ཅད་དང་རྣམ་པར་བྲལ་བ་དང༌། འཁྲུལ་པ་མེད་པའི་ཕྱོགས་ལ་རབ་ཏུ་གཞོལ་བ་དང༌། ཐམས་ཅད་ལ་ ཐོགས་པ་མེད་པའི་དྲན་པས་རྣམ་པར་དམིགས་པའི་རྣ་བ་དང་ལྡན་པ་དང༌། ཡིད་ལ་བྱ་བའི་རྣམ་པར་འཁྲུག་པ་ཐམས་ཅད་དང་བྲལ་བ་དང༌། རྣམ་པར་ཐར་པ་སྒྲིབ་པ་མེད་ པའི་ཚུལ་གྱི་རྗེས་སུ་འབྲང་བའི་བློ་དང༌། དམིགས་པ་ཐམས་ཅད་ལ་སྒྲིབ་པ་མེད་པར་མིག་རབ་ཏུ་འགྲོ་བར་གྱུར་ནས་ཕྱོགས་ཀྱི་རྒྱུད་ཐམས་ཅད་ལ་མངོན་དུ་བལྟས་པའི་ ལུས་ཀྱིས་ཕྱག་བྱ་བར་མངོན་པར་སྒྲུབ་པའི་སྟོབས་ཐམས་ཅད་དུ་ཁྱབ་པ་དང་ལྡན་པའི་ལུས་ཐམས་ཅད་ཀྱིས་ཕབ་སྟེ་ཕྱག་བྱས་སོ། །དེ་ལྟར་ཚོང་དཔོན་གྱི་བུ་ནོར་བཟང་ གིས་ཕྱག་བྱས་མ་ཐག་ཏུ་བྱང་ཆུབ་སེམས་དཔའ་བྱམས་པའི་བྱིན་གྱི་རླབས་ཀྱི་མཐུས་ཁང་པ་བརྩེགས་པ་དེ་དག་ཐམས་ཅད་ཀྱི་ནང་དུ་བདག་ཉིད་ཕྱིན་པར་ཤེས་པར་གྱུར་ ཏོ༑ ༑ཁང་པ་བརྩེགས་པ་དེ་དག་ཐམས་ཅད་དུའང་རྣམ་པར་འཕྲུལ་བ་བསམ་གྱིས་མི་ཁྱབ་པའི་ཡུལ་ཅན་རྣམ་པ་སྣ་ཚོགས་རྣམ་པ་ཐ་དད་པ་མང་པོ་ཡང་མཐོང་བར་གྱུར་ཏོ། ཁང་པ་བརྩེགས་པ་ལ་ལར་ནི། བྱང་ཆུབ་སེམས་དཔའ་བྱམས་པས་ཐོག་མ་རིགས་ནི། གང་དུ་སྐྱེས་ཏེ། མིང་ཅི་ཞེས་བྱ་བར་གྱུར་པ་ཞིག་གིས་དགེ་བའི་རྩ་བ་གང་དང༌། ཡོངས་སུ་བསྐུལ་བ་གང་དང༌། དགེ་བའི་བཤེས་གཉེན་གང་གིས་ཡང་དག་པར་བསྐུལ་བ་དང༌། ཚེའི་ཚད་ནི། ཇི་ཙམ་ཞིག་ཏུ། བསྐལ་པའི་མིང་ནི། ཅི་ཞེས་བྱ་བར། དེ་བཞིན་ གཤེགས་པ་ནི། གང་ལ། རྒྱན་ནི། ཇི་ལྟ་བུ་ཞིག་དང་ལྡན་པའི་ཞིང་དུ། འཁོར་ནི། ཇི་ལྟ་བུ་ཞིག་ཏུ། སྨོན་ལམ་གྱི་ཁྱད་པར་ནི། ཇི་ལྟ་བུ་ཞིག་མངོན་པར་བསྒྲུབས་ཏེ་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་གྱི་སེམས་བསྐྱེད་པ་དེ་དག་ཐམས་ཅད་ཀྱང་མཐོང་བར་གྱུར་ཏོ། །ཤེས་པར་གྱུར་ཏོ། །ཁོང་དུ་ཆུད་པར་གྱུར་ཏོ། །དེའི་ཚེ་ སེམས་ཅན་དེ་དག་དང༌། དེ་བཞིན་གཤེགས་པ་དེའི་སྐུ་ཚེའི་ཚད་དང༌། ཚེའི་ཚད་ཇི་སྲིད་གཅིག་ཏུ་གྱུར་པ་དེ་ཙམ་གྱི་དུས་སུ་དེ་བཞིན་གཤེགས་པ་དེའི་ཞབས་ཀྱི་དྲུང་ན་བདག་ ཉིད་འདུག་པར་ཡང་ཤེས་པར་གྱུར་ཏེ། བྱ་བ་དེ་དག་ཐམས་ཅད་ཀྱང་མཐོང་བར་གྱུར་ཏོ། །ཁང་པ་བརྩེགས་པ་ལ་ལར་ནི། བྱང་ཆུབ་སེམས་དཔའ་བྱམས་པས་ཐོག་མ་གང་དུ་ བྱམས་པའི་ཏིང་ངེ་འཛིན་ཐོབ་པར་གྱུར་པ་དང༌། དུས་གང་ནས་བཟུང་སྟེ་དེའི་མིང་བྱམས་པ་ཞེས་བྱ་བར་གྱུར་པ་དེ་དག་མཐོང་བར་གྱུར་ཏོ། །ལ་ལར་ནི། གང་དུ་སྤྱོད་པ་སྤྱད་པ་ ༄༅། །དང༌། ལ་ལར་ནི། གང་དུ་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་པ་དང༌། ལ་ལར་ནི། གང་དུ་བཟོད་པ་ལ་ཞུགས་པ་དང༌། ལ་ལར་ནི། གང་དུ་ས་ནོན་པ་དང༌། ལ་ལར་ནི། གང་དུ་སངས་རྒྱས་ཀྱི་ཞིང་གི་རྒྱན་ཡོངས་སུ་བཟུང་བ་དང༌། ལ་ལར་ནི། གང་དུ་དེ་བཞིན་གཤེགས་པའི་བསྟན་པ་ཡོངས་སུ་བཟུང་བ་ དང༌། ལ་ལར་ནི། གང་དུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་པ་དང༌། ལ་ལར་ནི། གང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དང༌། རྣམ་པ་ནི། ཇི་ལྟ་བུ་ཞིག་ཏུ་ལུང་བསྟན་པ་དང༌། ལུང་ནི། སུས་བསྟན་པ་དང༌། ཡུན་ནི། ཇི་སྲིད་གཅིག་གིས་ལུང་བསྟན་པ་དེ་དག་ཐམས་ཅད་ཀྱང་མཐོང་བར་གྱུར་ཏོ། །ཁང་ པ་བརྩེགས་པ་ལ་ལར་ནི། བྱང་ཆུབ་སེམས་དཔའ་བྱམས་པ་འཁོར་ལོས་བསྒྱུར་བའི་རྒྱལ་པོར་གྱུར་ཏེ་སེམས་ཅན་རྣམས་དགེ་བ་བཅུའི་ལས་ཀྱི་ལམ་ལ་རབ་ཏུ་འགོད་པ་ མཐོང་བར་གྱུར་ཏོ། །ལ་ལར་ནི། འཇིག་རྟེན་གྱི་མགོན་པོར་གྱུར་ཏེ། འཇིག་རྟེན་གྱི་ཕན་པ་དང༌། བདེ་བ་ཐམས་ཅད་ཀྱིས་སེམས་ཅན་རྣམས་ལ་ཉེ་བར་སྡུད་པ་དང༌། ལ་ ལར་ནི༑ བརྒྱ་བྱིན་དུ་གྱུར་ཏེ། འདོད་པར་ཡོན་ཏན་གྱི་དགའ་བ་ལས་སེམས་ཅན་རྣམས་རྣམ་པར་ཟློག་པ་དང༌། ལ་ལར་ནི། ཚངས་པར་གྱུར་ཏེ་བསམ་གཏན་དང༌། ཚད་མེད་པའི་དགའ་བ་སེམས་ཅན་རྣམས་ལ་ཡོངས་སུ་རྗོད་པ་དང༌། ལ་ལར་ནི། ལྷའི་དབང་པོ་རབ་མཚོ་མར་གྱུར་ཏེ་ཚད་མེད་པའི་ཡོན་ཏན་སེམས་ཅན་རྣམས་ལ་ཡོངས་སུ་ རྗོད་པ་དང༌། ལ་ལར་ནི། ལྷའི་དབང་པོ་རབ་དགའ་ལྡན་དུ་གྱུར་ཏེ། བྱང་ཆུབ་སེམས་དཔའ་ཚེ་གཅིག་གིས་ཐོགས་པའི་ཡོན་ཏན་རྗོད་པ་དང༌། ལ་ལར་ནི། ལྷའི་རྒྱལ་པོ་ རབ་འཕྲུལ་དགའ་བར་གྱུར་ཏེ། ལྷའི་འཁོར་དུ་བྱང་ཆུབ་སེམས་དཔའ་ཐམས་ཅད་ཀྱི་སྤྲུལ་པའི་རྒྱན་ཡོངས་སུ་སྟོན་པ་དང༌། ལ་ལར་ནི། ལྷའི་རྒྱལ་པོ་དབང་སྒྱུར་དུ་གྱུར་ཏེ། ལྷ་རྣམས་ལ་ཆོས་ཐམས་ཅད་ལ་དབང་སྒྱུར་བ་ཡང་དག་པར་སྟོན་པ་དང༌། ལ་ལར་ནི། བདུད་དུ་གྱུར་ཏེ་ལྷ་རྣམས་ལ་ཕུན་སུམ་ཚོགས་པ་ཐམས་ཅད་མི་རྟག་པར་སྟོན་པ་དང༌། ལ་ལར་ནི། ལྷ་མ་ཡིན་གྱི་དབང་པོའི་གནས་སུ་སྐྱེས་ཏེ་ལྷ་མ་ཡིན་གྱི་འཁོར་ན་ང་རྒྱལ་དང༌། དྲེགས་པ་དང༌། རློམ་པ་ཐམས་ཅད་རབ་ཏུ་སྤང་བ་དང༌། ཡེ་ཤེས་ཀྱི་རྒྱ་ མཚོ་ཆེན་པོར་འཇུག་པར་བྱ་བ་དང༌། ཆོས་ཀྱི་ཡེ་ཤེས་ཀྱི་རྒྱུ་ཐོབ་པར་བྱ་བའི་ཕྱིར་ཆོས་སྟོན་པ་མཐོང་ངོ༌། །ཁང་པ་བརྩེགས་པ་ལ་ལར་ནི། གཤིན་རྗེའི་འཇིག་རྟེན་མཐོང་ བར་གྱུར་ཏེ། དེ་ན་བྱང་ཆུབ་སེམས་དཔའ་བྱམས་པ་འོད་ཀྱིས་སེམས་ཅན་དམྱལ་བ་ཐམས་ཅད་སྣང་བར་བྱེད་ཅིང༌། སེམས་ཅན་དམྱལ་བར་སྐྱེས་པའི་སེམས་ཅན་རྣམས་ཀྱི་ ༄༅། །སེམས་ཅན་དམྱལ་བའི་སྡུག་བསྔལ་ཐམས་ཅད་རབ་ཏུ་ཞི་བར་བྱེད་པ་མཐོང་ངོ༌། །ཁང་པ་བརྩེགས་པ་ལ་ལར་ནི། ཡི་དྭགས་ཀྱི་གནས་མཐོང་བར་གྱུར་ ཏེ༑ དེ་ན་བྱང་ཆུབ་སེམས་དཔའ་བྱམས་པ་སེམས་ཅན་ཡི་དྭགས་ཀྱི་གནས་སུ་སྐྱེས་པ་རྣམས་ལ་ཁ་ཟས་དང༌། བཏུང་བ་མང་པོ་ཉེ་བར་སྒྲུབ་ཅིང་བཀྲེས་པ་དང༌། སྐོམ་པ་རབ་ ཏུ་ཞི་བར་བྱེད་པ་མཐོང་ངོ༌། །ཁང་པ་བརྩེགས་པ་ལ་ལར་ནི། བྱོལ་སོང་གི་སྐྱེ་གནས་ན་སྐྱེ་བའི་སྐྱེ་མཆེད་རྣམ་པ་ཐ་དད་པ་སྣ་ཚོགས་ཀྱིས་བྱོལ་སོང་གི་སྐྱེ་གནས་སུ་གཏོགས་ པའི་སེམས་ཅན་མང་པོ་འདུལ་བ་མཐོང་ངོ༌། །ཁང་པ་བརྩེགས་པ་ལ་ལར་ནི། རྒྱལ་པོ་ཆེན་པོའི་ཁམས་སུ་གཏོགས་པའི་ལྷའི་འཁོར་ན་འཇིག་རྟེན་གྱི་མགོན་པོ་རྣམས་ལ་ ཆོས་སྟོན་པ་མཐོང་ངོ༌། །ལ་ལར་ནི། ལྷའི་དབང་པོ་བརྒྱ་བྱིན་གྱི་འཁོར་ན། ལ་ལར་ནི། ལྷའི་རྒྱལ་པོ་རབ་མཚེ་མའི་འཁོར་ན། ལ་ལར་ནི། ལྷའི་རྒྱལ་པོ་རབ་དགའ་ ལྡན་གྱི་འཁོར་ན། ལ་ལར་ནི། ལྷའི་རྒྱལ་པོ་རབ་འཕྲུལ་དགའི་འཁོར་ན། ལ་ལར་ནི། ལྷའི་རྒྱལ་པོ་དབང་སྒྱུར་གྱི་འཁོར་ན། ལ་ལར་ནི། བདུད་ཀྱི་འཁོར་ན། ཁང་ པ་བརྩེགས་པ་ལ་ལར་ནི། ཚངས་པའི་དབང་པོའི་འཁོར་ན་བྱང་ཆུབ་སེམས་དཔའ་བྱམས་པ་ཆོས་སྟོན་པ་མཐོང་ངོ༌། །ལ་ལར་ནི། ཀླུ་དང་ལྟོ་འཕྱེ་ཆེན་པོའི་འཁོར་ ན༑ ལ་ལར་ནི། གནོད་སྦྱིན་དང་སྲིན་པོའི་འཁོར་ན། ལ་ལར་ནི། དྲི་ཟ་དང་མི་འམ་ཅིའི་འཁོར་ན། ལ་ལར་ནི། ལྷ་མ་ཡིན་དང་གསོད་འཕྲོག་གི་དབང་པོའི་འཁོར་ན། ལ་ལར་ནི། ནམ་མཁའ་ལྡིང་གི་དབང་པོ་ཆེན་པོའི་འཁོར་ན། ལ་ལར་ནི། མིའི་འཁོར་ན། ཁང་པ་བརྩེགས་པ་ལ་ལར་ནི། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མི་འམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པའི་འཁོར་ན་བྱང་ཆུབ་སེམས་དཔའ་བྱམས་པ་ཆོས་སྟོན་པ་མཐོང་ངོ༌།། ལ་ལར་ནི། ཉན་ཐོས་ཀྱི་འཁོར་ན། ལ་ལར་ནི། རང་སངས་རྒྱས་ཀྱི་འཁོར་ན། ལ་ལར་ནི། བྱང་ཆུབ་སེམས་དཔའི་འཁོར་ན། ཁང་པ་བརྩེགས་པ་ལ་ལར་ནི། བྱང་ཆུབ་ སེམས་དཔའ་སེམས་ཐོག་མ་བསྐྱེད་པ་ལས་དང་པོ་པ་རྣམས་ལ་བྱང་ཆུབ་སེམས་དཔའ་བྱམས་པ་ཆོས་སྟོན་པ་མཐོང་ངོ༌། །ལ་ལར་ནི། སྤྱོད་པ་ལ་ཞུགས་པ་རྣམས་ལ། ལ་ལར་ནི། བཟོད་པ་ཐོབ་ཅིང་ཕྱིར་མི་ལྡོག་པ་རྣམས་ལ། ལ་ལར་ནི། ཚེ་གཅིག་གིས་ཐོགས་ཤིང་དབང་བསྐུར་པ་རྣམས་ལ། ཁང་པ་བརྩེགས་པ་ལ་ལར་ནི། བྱང་ཆུབ་ སེམས་དཔའ་ས་དང་པོ་ལ་གནས་པ་རྣམས་ལ་སའི་ཁྱད་པར་ཡོངས་སུ་བརྗོད་པ་མཐོང་ངོ༌། །ལ་ལར་ནི། ས་བཅུ་ལ་གནས་པའི་བར་གྱི་བྱང་ཆུབ་སེམས་དཔའ་རྣམས་ ༄༅། །དང་ལྷན་ཅིག་ཏུ་བྱང་ཆུབ་སེམས་དཔའ་བྱམས་པ་ས་ཐམས་ཅད་ཀྱི་ཁྱད་པར་ཡང་དག་པར་བགྲོ་བ་བྱེད་པ་མཐོང་ངོ༌། །ལ་ལར་ནི། ཕ་རོལ་ཏུ་ཕྱིན་ པ་ཐམས་ཅད་ཡོངས་སུ་རྫོགས་པར་བྱ་བ་དང༌། ལ་ལར་ནི། བསླབ་པ་ཐམས་ཅད་ལ་མངོན་དུ་འཇུག་པར་བྱ་བ་ཀུན་ཏུ་མཐའ་ཡས་པ་དང༌། ལ་ལར་ནི། ཏིང་ངེ་འཛིན་ གྱི་སྒོ་ལ་འཇུག་པ་རྒྱ་ཆེན་པོ་དང༌། ལ་ལར་ནི། རྣམ་པར་ཐར་པའི་ཚུལ་ཟབ་མོ་དང༌། ལ་ལར་ནི། བསམ་གཏན་དང༌། ཏིང་ངེ་འཛིན་དང༌། སྙོམས་པར་འཇུག་པ་ དང༌། མངོན་པར་ཤེས་པ་ཞི་བའི་ཡུལ་གྱིས་རྒྱས་པར་དགང་བ་དང༌། ལ་ལར་ནི། བྱང་ཆུབ་སེམས་དཔའི་སྤྱོད་པ་དང༌། འདུལ་བ་དང༌། ཐབས་ཀྱི་སྒོ་ལ་འཇུག་པ་དང༌། ལ་ལར་ནི། སྨོན་ལམ་མངོན་པར་སྒྲུབ་པ་རྒྱ་ཆེ་བ་དང༌། ཁང་པ་བརྩེགས་པ་ལ་ལར་ནི། བྱང་ཆུབ་སེམས་དཔའ་བྱམས་པ་སྐལ་པ་མཐུན་པར་སྤྱོད་པའི་བྱང་ཆུབ་སེམས་ དཔའ་རྣམས་དང་འགྲོགས་ཤིང་འཇིག་རྟེན་ལ་ཕན་པར་བྱ་བའི་དོན་དུ་བཟོའི་གནས་སྣ་ཚོགས་དང༌། གཙུག་ལག་གི་ཁྱད་པར་སེམས་ཅན་ཐམས་ཅད་ལ་ཕན་པ་དང༌། བདེ་བར་འགྱུར་བ་དང༌། འབྱོར་པ་རྣམས་ཡང་དག་པར་བགྲོ་བ་མཐོང་ངོ༌། །ལ་ལར་ནི། བྱང་ཆུབ་སེམས་དཔའ་ཚེ་གཅིག་གིས་ཐོགས་པ་རྣམས་དང་འགྲོགས་ཤིང༌། སངས་རྒྱས་ཐམས་ཅད་ཀྱི་ཡེ་ཤེས་ལ་དབང་བསྐུར་བའི་སྒོ་ཡང་དག་པར་བགྲོ་བ་མཐོང་ངོ༌། །ཁང་པ་བརྩེགས་བ་ལ་ལར་ནི། བྱང་ཆུབ་སེམས་དཔའ་བྱམས་པ་འཆག་པ་བྱེད་ ཅིང་ལོ་བརྒྱ་སྟོང་དུ་མར་མི་གཏོང་བ་ལ་བརྩོན་པ་མཐོང་ངོ༌། །ལ་ལར་ནི། ལུང་འབོག་པ་དང༌། ཁ་ཏོན་བྱ་བ་ལ་བརྩོན་པར། ལ་ལར་ནི། ཆོས་ཀྱི་སྒོ་རབ་ཏུ་བརྟག་པ་ལ་བརྩོན་ པར༑ ལ་ལར་ནི། དམ་པའི་ཆོས་བགྲོ་བ་ལ་བརྩོན་པ། ལ་ལར་ནི། དམ་པའི་ཆོས་བྲི་བ་ལ་བརྩོན་པར། ལ་ལར་ནི། བྱམས་པ་ལ་མཉམ་པར་བཞག་པར། ལ་ལར་ནི། བསམ་གཏན་དང་ཚད་མེད་པ་ཐམས་ཅད་ལ་མཉམ་པར་བཞག་པར། ལ་ལར་ནི། རྒྱས་པའི་སྐྱེ་མཆེད་དང༌། རྣམ་པར་ཐར་པ་ཐམས་ཅད་ལ་མཉམ་པར་བཞག་པ་དང༌། ཁང་པ་ བརྩེགས་པ་ལ་ལར་ནི། བྱང་ཆུབ་སེམས་དཔའ་བྱམས་པ་བྱང་ཆུབ་སེམས་དཔའི་མངོན་པར་ཤེས་པ་སྒྲུབ་པའི་ཐབས་ཀྱི་ཏིང་ངེ་འཛིན་ལ་མཉམ་པར་བཞག་པ་མཐོང་ངོ༌། ། ཁང་པ་བརྩེགས་པ་ལ་ལར་ནི། བྱང་ཆུབ་སེམས་དཔའི་ཏིང་ངེ་འཛིན་སྤྲུལ་པ་ཡོད་པ་ལ་མཉམ་པར་བཞག་པའི་བྱང་ཆུབ་སེམས་དཔའ་མང་པོ་མཐོང་སྟེ། དེ་དག་གི་ལུས་ ཐམས་ཅད་དང༌། བ་སྤུའི་སྒོ་ཐམས་ཅད་ནས་སྤྲུལ་པ་ཐམས་ཅད་ཀྱི་སྤྲིན་མང་པོ་འབྱུང་བ་མཐོང་ངོ༌། །ལ་ལར་ནི། ལུས་དང་བ་སྤུའི་སྒོ་ཐམས་ཅད་ནས་ནི། ལྷའི་རིས་ཀྱི་སྤྲིན་ ༄༅། །མང་པོ་འབྱུང་བ་མཐོང་ངོ༌། །ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ ལྡིང་དང༌། མི་འམ་ཅི་དང༌། ལྟོ་འཕྱེ་ཆེན་པོ་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་གྱི་མགོན་པོ་དང༌། འཁོར་ལོས་བསྒྱུར་བའི་སྤྲིན་མང་པོ་འབྱུང་བ་དང༌། ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི། ཁམས་ཀྱི་རྒྱལ་པོའི་སྤྲིན་མང་པོ་འབྱུང་བ་དང༌། ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི། རྒྱལ་བུ་གཞོན་ནུའི་ སྤྲིན་མང་པོ་འབྱུང་བ་དང༌། ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི། ཚོང་དཔོན་དང༌། བློན་པོ་དང༌། ཁྱིམ་བདག་གི་སྤྲིན་མང་པོ་དང༌། ལ་ལའི་ལུས་དང་བ་སྤུའི་ སྒོ་ཐམས་ཅད་ནས་ནི། ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའི་སྤྲིན་མང་པོ་དང༌། ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི། དེ་བཞིན་ གཤེགས་པའི་སྐུའི་སྤྲིན་མང་པོ་དང༌། ལ་ལའི་ལུས་དང་བ་སྤུའི་སྒོ་ཐམས་ཅད་ནས་ནི། སེམས་ཅན་ཐམས་ཅད་དུ་སྤྲུལ་པའི་སྤྲིན་ཚད་མེད་པ་འབྱུང་བ་མཐོང་ངོ༌། །ལ་ ལའི་ལུས་དང་བ་སྤུའི་སྒོ་ཐམས་ཅད་ནས་ནི། ཆོས་ཀྱི་སྒོ་རྣམ་པ་སྣ་ཚོགས་འབྱུང་བ་ཐོས་པར་གྱུར་ཏེ། འདི་ལྟར་བྱང་ཆུབ་སེམས་དཔའི་ཡོན་ཏན་བསྔགས་པའི་སྒོ་དང༌། སྦྱིན་པའི་ཕ་རོལ་ཏུ་ཕྱིན་པའི་སྒོ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་དང༌། ཐབས་དང༌། སྨོན་ལམ་དང༌། སྟོབས་དང༌། ཡེ་ཤེས་ཀྱི་ཕ་རོལ་ཏུ་ཕྱིན་པའི་སྒོ་དང༌། བསྡུ་བའི་དངོས་པོ་དང༌། བསམ་གཏན་དང༌། ཚད་མེད་པ་དང༌། ཏིང་ངེ་འཛིན་དང༌། སྙོམས་པར་འཇུག་པ་དང༌། མངོན་པར་ཤེས་པ་དང༌། རིག་པ་དང༌། གཟུངས་དང༌། སྤོབས་པ་དང༌། བདེན་པ་དང༌། ཐ་དད་པ་ཡང་དག་པར་ཤེས་པ་དང༌། ཞི་གནས་དང༌། ལྷག་མཐོང་དང༌། རྣམ་ པར་ཐར་པའི་སྒོ་དང༌། རྟེན་ཅིང་འབྲེལ་པར་འབྱུང་བ་དང༌། རྟེན་པ་དང༌། ཆོས་ཀྱི་མདོ་དང༌། དྲན་པ་ཉེ་བར་གཞག་པ་དང༌། ཡང་དག་པར་སྤོང་བ་དང༌། རྫུ་འཕྲུལ་གྱི་ རྐང་པ་དང༌། དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། ལམ་དང༌། ཉན་ཐོས་ཀྱི་ཐེག་པའི་གཏམ་དང༌། རང་སངས་རྒྱས་ཀྱི་ཐེག་པའི་གཏམ་དང༌། ཐེག་པ་ ཆེན་པོའི་གཏམ་དང༌། ས་དང༌། བཟོད་པ་དང༌། སྤྱོད་པ་དང༌། སྨོན་ལམ་གྱི་སྒོ་དང༌། དེ་བཞིན་དུ་ཆོས་ཐམས་ཅད་ཀྱི་སྒོར་འཇུག་པའི་སྒྲ་མང་པོ་འབྱུང་བ་ཐོས་སོ། །ཁང་ པ་བརྩེགས་པ་ལ་ལར་ནི། དེ་བཞིན་གཤེགས་པའི་འཁོར་གྱི་དཀྱིལ་འཁོར་དུ་ཀུན་ནས་འདུས་པར་མཐོང་སྟེ། དེ་བཞིན་གཤེགས་པ་དེ་དག་གི་རྣམ་པ་ཐ་དད་པ་རྣམ་ ༄༅། །པ་སྣ་ཚོགས་སྐྱེ་བ་དང༌། རིགས་རྣམ་པ་ཐ་དད་པ་དང༌། སྐུ་རྣམ་པར་ཕྱེ་བ་ཚད་མེད་པ་རྣམ་པ་ཐ་དད་པ་དང༌། སྐུ་ཚེ་རྣམ་པ་ཐ་དད་པ་དང༌། ཞིང་རྣམ་པ་ཐ་དད་པ་དང༌། བསྐལ་པ་རྣམ་པ་ཐ་དད་པ་དང༌། ཆོས་བསྟན་པ་རྣམ་པ་ཐ་དད་པ་དང༌། འབྱུང་བའི་སྒོ་རྣམ་པ་ཐ་དད་པ་དང༌། དམ་པའི་ཆོས་གནས་པ་ རྣམ་པ་ཐ་དད་པ་ནས་འཁོར་གྱི་དཀྱིལ་འཁོར་རྣམ་པ་ཐམས་ཅད་དུ་རྣམ་པ་ཐ་དད་པ་དག་ཀྱང་མ་ལུས་པར་མཐོང་བར་གྱུར་ཏོ། །ཁང་པ་བརྩེགས་པ་ཆེན་པོ་རྣམ་པར་ སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་དེའི་དབུས་སུ་ཁང་པ་བརྩེགས་པ་གཅིག་ཅིག་གཞན་པས་ཆེ་ལ་ཡངས་ཤིང་ཁང་པ་བརྩེགས་པ་གཞན་ཐམས་ཅད་ཀྱི་ རྒྱན་མ་ལུས་པ་ཐམས་ཅད་པས་ཀྱང་ཆེས་ལྷག་པར་འཕགས་པའི་རྒྱན་གྱིས་ཡང་དག་པར་བརྒྱན་པ་ཞིག་འདུག་པར་མཐོང་སྟེ། ཁང་པ་བརྩེགས་པ་དེའི་ནང་ན་སྟོང་ གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདུག་པ་མཐོང་ངོ༌། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་ཡང་གླིང་བཞི་པ་བྱེ་བ་ཕྲག་བརྒྱ་དང༌། འཛམ་བུའི་གླིང་བྱེ་བ་ཕྲག་བརྒྱ་དང༌། དགའ་ལྡན་གྱི་གནས་བྱེ་བ་ཕྲག་བརྒྱ་འཁོད་པར་མཐོང་ངོ༌། །འཛམ་བུའི་གླིང་དེ་དག་ཐམས་ཅད་ནའང་བྱང་ཆུབ་སེམས་དཔའ་ བྱམས་པ་པདྨོའི་ནང་ནས་སྐྱེ་བ་དང༌། བརྒྱ་བྱིན་དང༌། ཚངས་པས་ཡོངས་སུ་བླངས་པ་དང༌། གོམ་པ་བདུན་དུ་འགྲོ་བ་དང༌། ཕྱོགས་བཅུར་རྣམ་པར་བལྟས་པ་དང་། སེངྒེའི་ང་རོ་ཆེན་པོ་སྒྲོག་པ་དང༌། གཞོན་ནུའི་ས་ཐམས་ཅད་ཡོངས་སུ་སྟོན་པ་དང༌། བཙུན་མོའི་འཁོར་གྱི་ནང་ན་གནས་པ་དང༌། བཟའ་ཤིང་གི་ར་བར་འགྲོ་བ་དང༌། ཐམས་ ཅད་མཁྱེན་པ་ཉིད་ལ་མངོན་དུ་ཕྱོགས་ཏེ་མངོན་པར་བྱུང་ནས་རབ་ཏུ་འབྱུང་བ་དང༌། དཀའ་བའི་སྤྱོད་པ་ཡོངས་སུ་སྟོན་པ་དང༌། ཟས་ཟ་བ་དང༌། སྙིང་པོ་བྱང་ཆུབ་ཏུ་འགྲོ་བ་ དང༑ བདུད་རྒོལ་དུ་འཇུག་པ་དང༌། བྱང་ཆུབ་ཏུ་རྣམ་པར་འཚང་རྒྱ་བ་དང༌། བྱང་ཆུབ་ཀྱི་ཤིང་ལ་མིག་མི་འགེབས་པས་ལྟ་བ་དང༌། ཆངས་པ་ཆེན་པོས་གསོལ་བ་ གདབ་པ་དང༌། མངོན་པར་རྫོགས་པར་སངས་རྒྱས་ཏེ་ཆོས་ཀྱི་འཁོར་ལོ་བསྐོར་བའི་ཡུལ་སྣ་ཚོགས་ཡོངས་སུ་བསྟན་པ་རྣམ་པ་ཐ་དད་པ་དང༌། ཚུལ་དང་མིང་རྣམ་པ་སྣ་ ཚོགས་བསྟན་པ་རྣམ་པ་ཐ་དད་པ་དང༌། ཚེའི་ཚད་སྣ་ཚོགས་རྣམ་པ་ཐ་དད་པ་དང༌། འཁོར་གྱི་དཀྱིལ་འཁོར་གྱི་རྒྱན་སྣ་ཚོགས་རྣམ་པ་ཐ་དད་པ་དང༌། སངས་རྒྱས་ཀྱི་ ཞིང་རྣམ་པར་དག་པའི་ཚུལ་བསྟན་པ་རྣམ་པ་སྣ་ཚོགས་རྣམ་པ་ཐ་དད་པ་དང༌། སྤྱོད་པ་དང༌། སྨོན་ལམ་བརྗོད་པ་སྣ་ཚོགས་རྣམ་པ་ཐ་དད་པ་དང༌། ཆོས་བསྟན་ཅིང་རྣམ་ ༄༅། །པར་དགོད་པ་དང༌། སེམས་ཅན་ཡོངས་སུ་སྨིན་པར་བྱ་བའི་ཐབས་སྣ་ཚོགས་རྣམ་པ་ཐ་དད་པ་དང༌། རིང་བསྲེལ་བགོ་བ་དང༌། བསྟན་པ་གནས་པའི་ བྱིན་གྱི་རླབས་ཡོངས་སུ་བསྟན་པ་སྣ་ཚོགས་རྣམ་པ་ཐ་དད་པས་ཆོས་ཀྱི་འཁོར་ལོ་བསྐོར་ཞིང༌། ལྷའི་གནས་སུ་འགྲོ་བ་མཐོང་སྟེ། དེ་དག་ཐམས་ཅད་ན་ཡང་ཚོང་དཔོན་ གྱི་བུ་ནོར་བཟང་ཉིད་རྐང་པའི་དྲུང་ན་འདུག་པར་རང་གིས་ཤེས་པར་གྱུར་ཏོ། །དེ་འཁོར་གྱི་དཀྱིལ་འཁོར་ཐམས་ཅད་དང༌། བྱ་བ་ཐམས་ཅད་ཡོངས་སུ་བསྟན་པ་དང༌། ཚེའི་ ཚད་རྣམ་པ་ཐ་དད་པ་ཐམས་ཅད་ལ་དྲན་པ་མ་ཉམས་པའི་བྱིན་གྱི་རླབས་ཀྱིས་འདུ་ཤེས་ཀྱི་རྣམ་པ་ཐམས་ཅད་ཁོང་དུ་ཆུད་པའི་ཡེ་ཤེས་ཀྱི་ས་ལ་གནས་པས་ཁང་པ་བརྩེགས་ པ་དེ་དག་གི་དྲིལ་དང༌། དྲིལ་བུ་གཡེར་ཁའི་དྲ་བ་དང༌། རོལ་མོ་དང༌། གླུ་ལ་སོགས་པའི་དམིགས་པ་ཇི་སྙེད་ཅིག་ཡོད་པ་དེ་དག་ཐམས་ཅད་ལས་ཆོས་ཀྱི་སྤྲིན་གྱི་ འབྲུག་སྒྲ་བསམ་གྱིས་མི་ཁྱབ་པ་འབྱུང་བ་ཐོས་པར་གྱུར་ཏེ། ལ་ལ་ལས་ནི། བྱང་ཆུབ་ཀྱི་སེམས་རྣམ་པ་ཐ་དད་པ་དང༌། ལ་ལ་ལས་ནི། ཕ་རོལ་ཏུ་ཕྱིན་པའི་སྤྱོད་པ་ དང༌། སྨོན་ལམ་རྣམ་པ་ཐ་དད་པ་དང༌། ལ་ལ་ལས་ནི། ས་ཚད་མེད་པ་རྣམ་པ་ཐ་དད་པ་དང༌། ལ་ལ་ལས་ནི། མངོན་པར་ཤེས་པ་བསམ་གྱིས་མི་ཁྱབ་པའི་རྣམ་པར་ འཕྲུལ་པ་རྣམ་པ་ཐ་དད་པ་དང༌། ལ་ལ་ལས་ནི། དེ་བཞིན་གཤེགས་པའི་མཆོད་པ་སྣ་ཚོགས་རྣམ་པ་ཐ་དད་པ་དང༌། ལ་ལ་ལས་ནི། སངས་རྒྱས་ཀྱི་ཞིང་གི་རྒྱན་རྣམ་པ་ཐ་ དད་པ་དང༌། ལ་ལ་ལས་ནི། དེ་བཞིན་གཤེགས་པའི་ཆོས་ཀྱི་སྤྲིན་ཚད་མེད་པ་རྣམ་པ་ཐ་དད་པ་དང༌། དེ་བཞིན་དུ་ཆོས་ཐམས་ཅད་ཀྱི་སྒྲ་གོང་དུ་ཇི་སྐད་དུ་བརྗོད་པ་ཐམས་ཅད་ ཐོས་པར་གྱུར་ཏོ། །ལ་ལ་ལས་ནི། ཐམས་ཅད་མཁྱེན་པ་ཉིད་དུ་འཇུག་པའི་སྒྲ་ཐོས་ཏེ། འཇིག་རྟེན་གྱི་ཁམས་ཆེ་གེ་མོ་ཞིག་ཅེས་བྱ་བར་བྱང་ཆུབ་སེམས་དཔའ་མིང་དང་ཆེ་གེ་ མོ་ཞིག་གིས་ཆོས་ཀྱི་སྒོ་ནི། ཆེ་གེ་མོ་ཞིག་ཅེས་བྱ་བ་ཐོས། དགེ་བའི་བཤེས་གཉེན་ནི། ཆེ་གེ་མོ་ཞིག་གིས་ཡང་དག་པར་བསྐུལ། དེ་བཞིན་གཤེགས་པ་ནི། ཆེ་གེ་མོ་ཞིག་ གི་ཞབས་ཀྱི་དྲུང་དུ། བསྐལ་པའི་མིང་ནི། འདི་ཞེས་བྱ་བར། སངས་རྒྱས་ཀྱི་ཞིང་ནི། འདི་ལྟ་བུ་ཞིག་ཏུ། འཁོར་གྱི་དཀྱིལ་འཁོར་ནི། འདི་ལྟ་བུ་ཞིག་ན་འདུག་འདུག་སྟེ། དགེ་བའི་རྩ་བ་ནི། འདི་ལྟ་བུ་ཞིག་བསྐྱེད་ནས་དེ་བཞིན་གཤེགས་པའི་ཡོན་ཏན་ནི། འདི་ལྟ་བུ་དག་ཅིག་ཐོས་ཏེ། ལྷག་པའི་བསམ་པ་ནི། འདི་ལྟ་བུ་དང༌། སྨོན་ལམ་གྱི་རྣམ་ པ་ནི༑ འདི་འདྲ་བ་ཞིག་གིས་བྱང་ཆུབ་ཏུ་སེམས་བསྐྱེད་ནས་དེས་བསྐལ་པ་ནི། འདི་སྙེད་ཅིག་ཏུ་བྱང་ཆུབ་སེམས་དཔའི་སྤྱོད་པ་སྤྱད་དེ། བསྐལ་པ་འདི་སྙེད་ཅིག་གིས་བླ་ན་ ༄༅། །མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །མཚན་ནི། འདི་ཞེས་བྱ། སྐུ་ཚེའི་ཚད་ནི། འདི་ཙམ་ ཞིག་སྟེ༑ སངས་རྒྱས་ཀྱི་ཞིང་གི་ཡོན་ཏན་དང༌། རྒྱན་ཕུན་སུམ་ཚོགས་པ་འདི་འདྲ་བ་དང༌། སྨོན་ལམ་གྱི་ཁྱད་པར་འདི་ལྟ་བུ་ཞིག་དང༌། སེམས་ཅན་རྣམ་པར་གདུལ་ པ་འདི་འདྲ་བ་ཞིག་དང༌། ཉན་ཐོས་དང་རང་སངས་རྒྱས་ཀྱི་འཁོར་ཀུན་ནས་འདུས་པ་འདི་འདྲ་བ་ཞིག་གོ །དེ་ཡོངས་སུ་མྱ་ངན་ལས་འདས་ནས་ཀྱང་བསྐལ་པ་འདི་སྙེད་ཅིག་ ཏུ་དམ་པའི་ཆོས་གནས་པར་འགྱུར་རོ། །སེམས་ཅན་གྱི་དོན་ནི། འདི་ཙམ་ཞིག་ཏུ་འགྱུར་རོ། །ཞེས་བྱ་བའི་སྒྲ་ཐོས་སོ། །ལ་ལ་ལས་ནི། འཇིག་རྟེན་གྱི་ཁམས་ཆེ་གེ་ མོ་ཞིག་ན་བྱང་ཆུབ་སེམས་དཔའ་མིང་དང༌། ཆེ་གེ་མོ་ཞིག་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་ན། གཏང་བར་དཀའ་བ་འདི་ལྟ་བུའི་ཡོངས་སུ་གཏོང་བ་བརྒྱ་ནི། བྱེད་ དོ༑ ༑བྱང་ཆུབ་སེམས་དཔའ་ཆེ་གེ་མོ་ཞིག་ནི། ཚུལ་ཁྲིམས་སྲུང་ངོ༌། །བཟོད་པ་སྒོམ་མོ། །བརྩོན་འགྲུས་རྩོམ་མོ། །བསམ་གཏན་ལ་སྙོམས་པར་འཇུག་གོ །ཤེས་ རབ་ཀྱིས་རྣམ་པར་དབྱེ་བ་ལ་བརྩོན་ནོ། །བྱང་ཆུབ་སེམས་དཔའ་ཆེ་གེ་མོ་ཞིག་ནི། དམ་པའི་ཆོས་ཡོངས་སུ་བཙལ་བའི་དོན་དུ་རྒྱལ་པོའི་སྲིད་ཡོངས་སུ་གཏོང་ བར་བྱེད་དོ། །རིན་པོ་ཆེ་ཡོངས་སུ་གཏོང་བ་དང༌། བུ་ཡོངས་སུ་གཏོང་བ་དང༌། ཆུང་མ་ཡོངས་སུ་གཏོང་བ་དང༌། རྐང་ལག་དང༌། མིག་དང༌། མགོ་ཡོངས་སུ་གཏོང་བར་བྱེད་ དོ༑ ༑མེར་མཆོང་བར་བྱེད་དོ། །བྱང་ཆུབ་སེམས་དཔའ་མིང་དང༌། ཆེ་གེ་མོ་ཞིག་གིས་ནི། དེ་བཞིན་གཤེགས་པའི་བསྟན་པ་བཟུང་སྟེ་ཆོས་སྨྲ་བ་བྱེད་དོ། །ཆོས་ཀྱི་སྦྱིན་ པ་གཏོང་ངོ༌། །ཆོས་ཀྱི་མཆོད་སྦྱིན་བྱེད་དོ། །ཆོས་ཀྱི་རྒྱལ་མཚན་སྒྲེང་ངོ༌། །ཆོས་ཀྱི་རྔ་རྡུང་ངོ༌། །ཆོས་ཀྱི་དུང་འབུད་དོ། །ཆོས་ཀྱི་ཆར་འབེབས་སོ། །དེ་བཞིན་གཤེགས་ པའི་བསྟན་པ་འཛིན་ཏོ། །དེ་བཞིན་གཤེགས་པའི་མཆོད་རྟེན་བརྒྱན་པ་བྱེད་དོ། །དེ་བཞིན་གཤེགས་པའི་སྐུ་གཟུགས་བརྒྱན་པ་བྱེད་དོ། །སེམས་ཅན་ལ་བདེ་བའི་ ཡོ་བྱད་ཀྱིས་སྡུད་དོ། །དམ་པའི་ཆོས་ཀྱི་མཛོད་སྲུང་ངོ༌། །ཞེས་བྱ་བའི་སྒྲ་ཐོས་སོ། །ལ་ལ་ལས་ནི། འཇིག་རྟེན་གྱི་ཁམས་ཆེ་གེ་མོ་ཞིག་ཅེས་བྱ་བ་ན་དེ་བཞིན་གཤེགས་ པ་མཚན་ཆེ་གེ་མོ་ཞིག་དབང་བསྐུར་བ་མིང་དང་ཆེ་གེ་མོ་ཞིག་གིས་འཁོར་འདི་ལྟ་བུ་ཞིག་ན་སངས་རྒྱས་ཀྱི་ཞིང་འདི་ལྟ་བུ་ཞིག་དང༌། བསྐལ་པ་འདི་ལྟ་བུ་ཞིག་ལ་སྐུ་ཚེའི་ ཚད་འདི་ཙམ་ཞིག་དང༌། ཆོས་བསྟན་པ་འདི་ལྟ་བུ་དང༌། སེམས་ཅན་འདུལ་བ་འདི་འདྲ་བ་དང༌། འདི་ལྟ་བུའི་སྨོན་ལམ་གྱིས་མངོན་པར་འཚང་རྒྱ་བས་ད་ལྟར་བཞུགས་ ༄༅། །ཤིང་འཚོ་སྐྱོང་ངོ༌། །ཞེས་བྱ་བ་དང༌། དེ་བཞིན་དུ་དྲིལ་དང༌། དྲིལ་བུ་དང༌། གཡེར་ཁའི་དྲ་བ་དང༌། རོལ་མོ་ལ་སོགས་པའི་དམིགས་པ་ ཐམས་ཅད་ལས་ཆོས་ཀྱི་སྒོ་རྣམ་པ་ཐ་དད་པ་ཚད་མེད་པའི་སྒྲ་ཐོས་པར་གྱུར་ཏེ། སྒྲ་དེ་དག་ཐམས་ཅད་ཐོས་པས། ཚོང་དཔོན་གྱི་བུ་ནོར་བཟང་དགའ་བའི་ཤུགས་ རྒྱ་ཆེན་པོས་མངོན་པར་བརླན་པའི་སེམས་ཀྱིས་ཆོས་ཀྱི་སྒོ་དེ་དག་ཐོས་ནས་ལ་ལར་ནི། གཟུངས་ཀྱི་སྒོ་མང་པོ་ཐོབ་པར་གྱུར་ཏོ། །ལ་ལར་ནི། སྤོབས་པའི་སྒོ་མང་པོ་ ཐོབ་པར་གྱུར་ཏོ། །ལ་ལར་ནི། བཟོད་པའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི། སྤྱོད་པའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི། སྨོན་ལམ་གྱི་སྒོ་མང་པོ་ ཐོབ་པར་གྱུར་ཏོ། །ལ་ལར་ནི། ཕ་རོལ་ཏུ་ཕྱིན་པའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི། མངོན་པར་ཤེས་པའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི། རིག་པ་ དང་ཡེ་ཤེས་སྣང་བའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི། རྣམ་པར་ཐར་པའི་སྒོ་མང་པོ་ཐོབ་པར་གྱུར་ཏོ། །ལ་ལར་ནི། ཏིང་ངེ་འཛིན་གྱི་སྒོར་འཇུག་པ་མང་ པོ་ཐོབ་པར་གྱུར་ཏོ། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། སྡོང་པོས་བརྒྱན་པའི་ལེའུ་སྟེ། ༈[?] བམ་པོ་བརྒྱ་བཅུ་བཞི་པ། མེ་ལོང་ གི་དཀྱིལ་འཁོར་དེ་དག་ལས་ཀྱང་གཟུགས་བརྙན་གྱི་རྒྱན་རྣམ་པར་དམིགས་པ་ཚད་མེད་པ་མཐོང་བར་གྱུར་ཏེ། ལ་ལར་ནི། དེ་བཞིན་གཤེགས་པའི་འཁོར་གྱི་ དཀྱིལ་འཁོར་གྱི་གཟུགས་བརྙན་རྣམ་པར་དམིགས་པ་མཐོང་ངོ༌། །ལ་ལར་ནི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱི་གཟུགས་བརྙན་རྣམ་པར་དམིགས་ པ་དང༌། ལ་ལར་ནི། ཉན་ཐོས་ཀྱི་འཁོར་གྱི་དཀྱིལ་འཁོར་གྱི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། རང་སངས་རྒྱས་ཀྱི་འཁོར་གྱི་དཀྱིལ་འཁོར་ གྱི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། དེ་བཞིན་གཤེགས་པའི་འཁོར་གྱི་དཀྱིལ་འཁོར་གྱི་གཟུགས་བརྙན་རྣམ་པར་དམིགས་པ་དང༌། ལ་ ལར་ནི༑ ཀུན་ནས་ཉོན་མོངས་པའི་ཞིང་གི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། རྣམ་པར་དག་པའི་ཞིང་གི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། ཀུན་ནས་ཉོན་མོངས་ཤིང་རྣམ་པར་དག་པའི་ཞིང་གི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། རྣམ་པར་དག་ཅིང་ཀུན་ནས་ཉོན་མོངས་པའི་ ཞིང་གི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། སངས་རྒྱས་དང་བཅས་པའི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང༌། ལ་ ༄༅། །ལར་ནི། སངས་རྒྱས་མི་བཞུགས་པའི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། ཆུང་བའི་འཇིག་རྟེན་ གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། ཆེ་བའི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། ཕྲ་བའི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། རྒྱ་ཆེ་བའི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་ པ་དང༌། ལ་ལར་ནི། མིག་འཕྲུལ་གྱིས་འཇུག་པའི་འཇིག་རྟེན་གྱི་ཁམས་ཀྱི་གཟུགས་བརྙན་གྱི་རྣམ་པར་དམིགས་པ་དང༌། ལ་ལར་ནི། སྣྲེལ་ཞིའི་འཇིག་རྟེན་ གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། སྤྱིའུ་ཚུགས་ཀྱི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང༌། ལ་ ལར་ནི༑ སའི་གཞི་མཉམ་པར་འདུག་པའི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། སེམས་ཅན་དམྱལ་བ་དང༌། བྱོལ་ སོང་དང༌། ཡི་དྭགས་ཀྱི་གནས་ཀྱི་འཇིག་རྟེན་གྱི་ཁམས་ཀྱི་གཟུགས་བརྙན་རྣམ་པར་དམིགས་པ་དང༌། ལ་ལར་ནི། ལྷ་དང་མིས་གང་བའི་འཇིག་རྟེན་གྱི་ཁམས་ ཀྱི་གཟུགས་བརྙན་རྣམ་པར་དམིགས་པ་མཐོང་བར་གྱུར་ཏོ། །འཆགས་དེ་དག་དང༌། གནས་དེ་དག་དང༌། སྟན་དེ་དག་ལ་བྱང་ཆུབ་སེམས་དཔའ་གྲངས་མེད་པ་དགོས་ པ་སྣ་ཚོགས་ལ་བརྩོན་པ་དག་ཀྱང་མཐོང་བར་གྱུར་ཏེ། ལ་ལར་ནི། འཆག་པ་དང༌། ལ་ལར་ནི། བསམ་གཏན་བྱེད་པ་དང༌། ལ་ལར་ནི། ལྟ་བ་དང༌། ལ་ལར་ནི། སེམས་ ཅན་རྣམས་ལ་སྙིང་རྗེ་ཆེན་པོས་རྒྱས་པར་འགེངས་པ་དང༌། ལ་ལར་ནི། གཙུག་ལག་གི་ཚུལ་སྣ་ཚོགས་འཇིག་རྟེན་གྱི་དོན་དུ་འགྱུར་བ་སྒྲུབ་པ་དང༌། ལ་ལར་ནི། ལུང་ ནོད་པ་དང༌། ལ་ལར་ནི། ཁ་ཏོན་བྱེད་པ་དང༌། ལ་ལར་ནི། ཡི་གེ་འབྲི་བ་དང༌། ལ་ལར་ནི། དྲི་བ་ཡོངས་སུ་འདྲི་བ་དང༌། ལ་ལར་ནི། ཕུང་པོ་གསུམ་པའི་བཤགས་ པ་དང༌། ཡོངས་སུ་བསྔོ་བ་ལ་བརྩོན་པ་དང༌། ལ་ལར་ནི། སྨོན་ལམ་མངོན་པར་སྒྲུབ་པར་བྱེད་པར་མཐོང་ངོ༌། །ཀ་བ་དེ་དག་ལས་ཀྱང་རིན་པོ་ཆེའི་རྒྱལ་པོ་ཐམས་ཅད་ཀྱི་འོད་ ཀྱི་དྲ་བ་མང་པོ་འབྱུང་བ་མཐོང་སྟེ། ལ་ལ་ལས་ནི། ཁ་དོག་སྔོན་པོ་དང༌། ལ་ལ་ལས་ནི། ཁ་དོག་སེར་པོ་དང༌། ལ་ལ་ལས་ནི། ཁ་དོག་དམར་པོ་དང༌། ལ་ལ་ལས་ནི། ཁ་དོག་དཀར་པོ་དང༌། ལ་ལ་ལས་ནི། ཤེལ་གྱི་ཁ་དོག་དང༌། ལ་ལ་ལས་ནི། གསེར་གྱི་ཁ་དོག་དང༌། ལ་ལ་ལས་ནི། ཨིནྡྲ་ནཱི་ལའི་ཁ་དོག་དང༌། ལ་ལ་ལས་ནི། ༄༅། །འཇའི་ཁ་དོག་དང༌། ལ་ལ་ལས་ནི། འཛམ་བུ་ཆུ་ཀླུང་གི་གསེར་གྱི་ཁ་དོག་དང༌། ལ་ལ་ལས་ནི། འོད་ཐམས་ཅད་དུ་སྣ་ཚོགས་པའི་ཁ་དོག་ ལུས་དང་སེམས་ཀྱི་བདེ་བ་སྐྱེད་པ། བལྟ་ན་མཆོག་ཏུ་མཛེས་པ་མཐོང་བར་གྱུར་ཏོ། །འཛམ་བུ་ཆུ་ཀླུང་གི་གསེར་གྱི་ཆུ་ཤིང་གི་ཀ་བ་དེ་དག་དང༌། རིན་པོ་ཆེ་ཐམས་ ཅད་ཀྱི་གཟུགས་དེ་དག་ཀྱང་ལག་ནས་མེ་ཏོག་གི་སྤྲིན་མངོན་པར་སྦྱོང་བར་མཐོང་སྟེ། ལག་ནས་ཕྲེང་བའི་ལྡ་ལྡི་དང༌། ལག་ནས་གོས་དང༌། ལག་ནས་གདུགས་ དང༌། རྒྱལ་མཚན་དང༌། བ་དན་དང༌། ལག་ནས་སྤོས་དང༌། གདུག་སྤོས་དང༌། བྱུག་པ་དང༌། ལག་ནས་ནོར་བུ་རིན་པོ་ཆེའི་དྲ་བ་དང༌། ལག་ནས་རིན་པོ་ཆེ་སྣ་ཚོགས་ དང༌། གསེར་གྱི་ལྕགས་པོད་སྣ་ཚོགས་དང༌། ལག་ནས་མུ་ཏིག་སྣ་ཚོགས་ཀྱི་སེ་མོ་དོ་དང༌། ལག་ནས་རིན་པོ་ཆེ་སྣ་ཚོགས་ཀྱི་སེ་མོ་དོ་མངོན་པར་སྦྱོང་བ་དང༌། ལག་ ནས་རྒྱན་ཐམས་ཅད་ཐོགས་པར་མཐོང་ངོ༌། །ལ་ལར་ནི། གཙུག་གི་རིན་པོ་ཆེ་དང༌། ཅོད་པན་གྱིས་འདུད་ཅིང་མིག་མི་འགེབས་པར་ལྟ་བ་དང༌། ཐལ་མོ་སྦྱོར་ཞིང་ ཕྱག་འཚལ་བར་མཐོང་ངོ༌། །མུ་ཏིག་གི་ཕྲེང་བ་དེ་དག་ལས་ཀྱང་སྤོས་སྣ་ཚོགས་ཀྱིས་དྲི་ཞིམ་པོར་བྱས་པའི་ཆུ་ཡན་ལག་བརྒྱད་དང་ལྡན་པའི་ཆར་གྱི་རྒྱུན་ཕྲ་མོ་ འབབ་པར་མཐོང་ངོ༌། །རིན་པོ་ཆེ་བཻ་ཌཱུཪྻའི་ཕྲེང་བའི་དྲ་བ་དེ་དག་ལས་ཀྱང་མར་[?] མེའི་ཕྲེང་བ་རབ་ཏུ་འབར་བ་མང་པོ་མཐོང་བར་གྱུར་ཏོ། །རིན་པོ་ཆེའི་གདུགས་དེ་དག་ཀྱང་རྒྱན་ དང༌། ལྷབ་ལྷུབ་ཐམས་ཅད་ཀྱིས་མཛེས་པར་བརྒྱན་ཏེ། རིན་པོ་ཆེའི་དྲིལ་དང༌། དྲིལ་བུ་གཡེར་ཁའི་དྲ་བ་དང༌། དར་གྱི་ལྡ་ལྡི་དང༌། ཆུན་པོ་དང༌། རིན་པོ་ཆེའི་ཤར་བུ་ དང༌། ནོར་བུ་རིན་པོ་ཆེ་སྣ་ཚོགས་ཀྱི་སྒོ་ངས་ཡོངས་སུ་བརྒྱན་པའི་སྙིང་པོ་དང་ལྡན་པར་མཐོང་ངོ༌། །རྫིང་དེ་དག་ནས་ཀྱང་རིན་པོ་ཆེའི་མེ་ཏོག་པདྨོ་དང༌། ཨུཏྤ་ལ་དང༌། ཀུ་མུ་ད་ དང༌། པུཎྜ་རི་ཀ་གྲངས་མེད་པ་མངོན་པར་ཐོན་པར་མཐོང་སྟེ། ལ་ལ་ནི། མཐོ་གང་འཁོར་བ་ཙམ། ལ་ལ་ནི། འདོམ་གང་འཁོར་བ་ཙམ། ལ་ལ་ནི། ཤིང་རྟའི་འཁོར་ལོ་ ཙམ་སྟེ༑ དེ་དག་ལ་ཡང་གཟུགས་སྣ་ཚོགས་ཀྱི་རྒྱན་མང་པོ་འཁོད་པར་མཐོང་སྟེ། འདི་ལྟར་བུད་མེད་ཀྱི་གཟུགས་དང༌། སྐྱེས་པའི་གཟུགས་དང༌། ཁྱེའུའི་གཟུགས་ དང༌། བུ་མོའི་གཟུགས་དང༌། བརྒྱ་བྱིན་གྱི་གཟུགས་དང༌། ཚངས་པའི་གཟུགས་དང༌། འཇིག་རྟེན་གྱི་མགོན་པོའི་གཟུགས་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ བ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མི་འམ་ཅི་དང༌། ལྟོ་འཕྱེ་ཆེན་པོའི་གཟུགས་དང༌། ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའི་ ༄༅། །གཟུགས་དང༌། འགྲོ་བ་ཐམས་ཅད་ཀྱི་གཟུགས་ཀྱི་དབྱིབས་སུ་འདུག་པའི་ལུས་ཁ་དོག་སྣ་ཚོགས་རྣམ་པ་དུ་མ་དང་ལྡན་པ་མང་པོ་ཐལ་མོ་སྦྱར་ ཏེ་ལུས་འདུད་ཅིང་ཕྱག་འཚལ་བར་འཁོད་པ་མཐོང་ངོ༌། །དེ་བཞིན་གཤེགས་པའི་སྐུ་གཟུགས་མི་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ་སྐྱིལ་མོ་ཀྲུང་དུ་ བཅས་ཏེ་བཞུགས་པ་དག་ཀྱང་མཐོང་ངོ༌། །ས་ཆེན་པོའི་གཞི་བཻ་ཌཱུཪྻ་ལས་གྲུབ་པ་མིག་མང་རིས་སུ་འདུག་པའི་མིག་མང་རིས་རེ་རེ་ནས་ཀྱང་གཟུགས་བརྙན་རྣམ་པར་ དམིགས་པ་བསམ་གྱིས་མི་ཁྱབ་པ་མང་པོ་མཐོང་བར་གྱུར་ཏེ། ཁང་པ་བརྩེགས་པ་ལ་ལ་ལས་ནི། ཞིང་གི་གཟུགས་བརྙན་རྣམ་པར་དམིགས་པ། ལ་ལ་ལས་ནི། བྱང་ཆུབ་སེམས་དཔའི་གཟུགས་བརྙན་རྣམ་པར་དམིགས་པ། ལ་ལ་ལས་ནི། སངས་རྒྱས་ཀྱི་གཟུགས་བརྙན་རྣམ་པར་དམིགས་པར་མཐོང་བར་གྱུར་ཏེ། ཁང་པ་ བརྩེགས་པ་དེ་དག་གི་རྒྱན་དང༌། ལྷབ་ལྷུབ་ཇི་སྙེད་པ་དེ་དག་ཐམས་ཅད་ཀྱང་མིག་མང་རིས་རེ་རེ་ལ་གཟུགས་བརྙན་དུ་སྣང་བར་མཐོང་ངོ༌། །རིན་པོ་ཆེའི་ཤིང་རིན་པོ་ ཆེའི་མེ་ཏོག་དང་འབྲས་བུའི་མཛོད་སྣ་ཚོགས་དང་ལྡན་པ་དེ་དག་ཐམས་ཅད་ལས་ཀྱང་ལུས་ཕྱེད་ཙམ་བྱུང་བའི་གཟུགས་དབྱིབས་སྣ་ཚོགས་དང༌། ཁ་དོག་སྣ་ཚོགས་ སུ་འདུག་པ་མང་པོ་ཐོན་པར་མཐོང་སྟེ། ལ་ལ་ལས་ནི། སངས་རྒྱས་ཀྱི་སྐུ་ཕྱེད་ཙམ་བྱུང་བ་དང༌། ལ་ལ་ལས་ནི། བྱང་ཆུབ་སེམས་དཔའི་ལུས་ཕྱེད་ཙམ་བྱུང་བ་དང༌། ལ་ལ་ ལས་ནི། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མི་འམ་ཅི་དང༌། ལྟོ་འཕྱེ་ཆེན་པོའི་ལུས་ཕྱེད་ཙམ་བྱུང་བ་དང༌། ལ་ ལ་ལས་ནི། བརྒྱ་བྱིན་དང༌། ཚངས་པ་དང༌། འཇིག་རྟེན་གྱི་མགོན་པོའི་ལུས་ཕྱེད་ཙམ་བྱུང་བ་དང༌། ལ་ལ་ལས་ནི། འཁོར་ལོས་བསྒྱུར་བ་དང༌། མིའི་དབང་པོའི་ལུས་ ཕྱེད་ཙམ་བྱུང་བ་དང༌། ལ་ལ་ལས་ནི། རྒྱལ་བུ་གཞོན་ནུ་དང༌། ཚོང་དཔོན་དང༌། ཁྱིམ་བདག་དང༌། བློན་པོ་དང༌། སྐྱེས་པ་དང༌། བུད་མེད་དང༌། ཁྱེའུ་དང༌། བུ་མོ་ དང༌། དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མའི་ལུས་ཕྱེད་ཙམ་བྱུང་བ་མཐོང་སྟེ། ལ་ལའི་ལག་ནས་ནི། མེ་ཏོག་གི་ཕྲེང་བ་སྦྱོང་བ་དང༌། ལ་ལའི་ལག་ནས་ནི། རིན་པོ་ཆེའི་ཕྲེང་བ་མངོན་པར་སྦྱོང་བ་དང༌། ལ་ལའི་ལག་ནས་ནི། རྒྱན་ཐམས་ཅད་མངོན་པར་ཐོགས་པ་དང༌། ལ་ལ་ནི། ལུས་འདུད་ཅིང་ཐལ་ མོ་སྦྱར་ཏེ་མིག་མི་འགེབས་པར་ལྟ་ཞིང་ཕྱག་འཚལ་བ་དང༌། ལ་ལ་ནི། མངོན་པར་བསྟོད་པ་དང༌། ལ་ལ་ནི། མཉམ་པར་བཞག་པ་དང༌། ལ་ལ་ནི། གསེར་གྱི་ཁ་ ༄༅། །དོག་ཏུ་འདུག་པ་དང༌། ལ་ལ་ནི། དངུལ་གྱི་ཁ་དོག་ཏུ་འདུག་པ་དང༌། ལ་ལ་ནི། བྱི་རུའི་ཁ་དོག་ཏུ་འདུག་པ་དང༌། ལ་ལ་ནི། རིན་པོ་ཆེ་ བཻ་ཌཱུཪྻ་སྔོན་པོའི་ཁ་དོག་ཏུ་འདུག་པ་དང༌། ལ་ལ་ནི། རིན་པོ་ཆེ་ཨིནྡྲ་ནཱི་ལའི་ཁ་དོག་ཏུ་འདུག་པ་དང༌། ལ་ལ་ནི། ནོར་བུ་རིན་པོ་ཆེ་རྣམ་པར་སྣང་བའི་ཁ་དོག་ཏུ་ འདུག་པ་དང༌། ལ་ལ་ནི། རིན་པོ་ཆེ་ཐམས་ཅད་ཀྱི་ཁ་དོག་ཏུ་འདུག་པ་དང༌། ལ་ལ་ནི། མེ་ཏོག་ཙམ་པ་ཀའི་ཁ་དོག་ཏུ་འདུག་པ་དང༌། ལ་ལ་ནི། འོད་ཀྱི་ལུས་དང༌། ལ་ལ་ནི། མཚན་གྱིས་རྣམ་པར་བྲིས་པའི་ལུས་སུ་མཐོང་བར་གྱུར་ཏོ། །ཟླ་གམ་དེ་དག་ལས་ཀྱང་ཉི་ཟླ་དང༌། གཟའ་སྐར་གྱི་གཟུགས་བརྙན་གྲངས་མེད་པ་མང་པོ་ ཐོན་ཏེ་ཕྱོགས་བཅུར་སྣང་བར་བྱེད་པ་མཐོང་བར་གྱུར་ཏོ། །ཁང་པ་དང༌། གཞལ་མེད་ཁང་དང༌། ཁང་པ་བརྩེགས་པའི་རྩིག་ངོས་དེ་དག་ཐམས་ཅད་ཀྱང་རིན་པོ་ཆེ་ ཐམས་ཅད་ཀྱིས་མིག་མང་རིས་སྣ་ཚོགས་སུ་བྲིས་པར་མཐོང་སྟེ། རིན་པོ་ཆེའི་མིག་མང་རིས་དེ་དག་ཐམས་ཅད་ལས་ཀྱང་བྱང་ཆུབ་སེམས་དཔའ་བྱམས་པས་བྱང་ཆུབ་ སེམས་དཔའི་སྤྱོད་པ་རིམ་པས་ཇི་ལྟར་སྤྱད་པའི་བྱང་ཆུབ་སེམས་དཔའི་སྤྱོད་པ་ཐམས་ཅད་རིམ་པར་མཐོང་བར་གྱུར་ཏོ། །མིག་མང་རིས་ལ་ལ་ལས་ནི། བྱང་ཆུབ་ སེམས་དཔའ་བྱམས་པས་མགོ་བྱིན་པ་མཐོང་ངོ༌། །ལ་ལ་ལས་ནི། མིག་བྱིན་པ་དང༌། ལ་ལ་ལས་ནི། ལག་པ་བྱིན་པ་དང༌། ལ་ལ་ལས་ནི། གཙུག་གི་རིན་པོ་ ཆེ་བྱིན་པ་དང༌། ལ་ལ་ལས་ནི། ཐོར་པག་དང་བཅས་པའི་གཙུག་གི་རིན་པོ་ཆེ་བྱིན་པ་དང༌། ལ་ལ་ལས་ནི། སོ་བྱིན་པ་དང༌། ལ་ལ་ལས་ནི། ལྕེ་བྱིན་པ་དང༌། ལ་ ལ་ལས་ནི། རྣ་བ་བྱིན་པ་དང༌། ལ་ལ་ལས་ནི། སྣ་བྱིན་པ་དང༌། ལ་ལ་ལས་ནི། སྙིང་བྱིན་པ་དང༌། ལ་ལ་ལས་ནི། ཤ་དང་རྐང་བྱིན་པ་དང༌། ལ་ལ་ལས་ནི། ཁྲག་ བྱིན་པ་དང༌། ལ་ལ་ལས་ནི། པགས་པ་དང་ཕྲི་བྱིན་པ་དང༌། ལ་ལ་ལས་ནི། སེན་མོ་ཤ་དང་བཅས་པར་བྱིན་པ་དང༌། ལ་ལ་ལས་ནི། དྲ་བར་འབྲེལ་པ་དང་བཅས་ པའི་སོར་མོ་བྱིན་པ་དང༌། ལ་ལ་ལས་ནི། བུ་དང༌། བུ་མོ་དང༌། ཆུང་མ་བྱིན་པ་དང༌། ལ་ལ་ལས་ནི། རིན་པོ་ཆེའི་ཕུང་པོ་བྱིན་པ་དང༌། ལ་ལ་ལས་ནི། གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་དང༌། ཁམས་དང༌། རྒྱལ་པོའི་གནས་བྱིན་པ་དང༌། ལ་ལ་ལས་ནི། འཛམ་བུའི་གླིང་བྱིན་པ་དང༌། ལ་ལ་ལས་ནི། གླིང་བཞི་ བྱིན་པ་དང༌། ལ་ལ་ལས་ནི། རྒྱལ་སྲིད་ཀྱི་དབང་ཕྱུག་བྱིན་པ་དང༌། ལ་ལ་ལས་ནི། རྒྱལ་པོའི་ཁྲི་བྱིན་པ་དང༌། ལ་ལ་ལས་ནི། བྲན་ཕོ་མོ་བྱིན་པ་དང༌། ལ་ལ་ ༄༅། །ལས་ནི༑ བཙུན་མོའི་འཁོར་བྱིན་པ་དང༌། ལ་ལ་ལས་ནི། བཟའ་ཤིང་གི་ར་བ་དང༌། དཀའ་ཐུབ་ཀྱི་ནགས་ཚལ་བྱིན་པ་དང༌། ལ་ལ་ལས་ནི། གདུགས་དང༌། རྒྱལ་མཚན་དང༌། བ་དན་བྱིན་པ་དང༌། ལ་ལ་ལས་ནི། མེ་ཏོག་དང༌། ཕྲེང་བ་དང༌། བྱུག་པ་བྱིན་པ་དང༌། ལ་ལ་ལས་ནི། ནད་ཀྱི་རྩི་བྱིན་པ་དང༌། ལ་ལ་ལས་ནི། ཁ་ཟས་དང༌། སྐོམ་གྱི་རྣམ་པ་མང་པོ་བྱིན་པ་དང༌། ལ་ལ་ལས་ནི། ཡོ་བྱད་ཐམས་ཅད་བྱིན་པ་དང༌། ལ་ལ་ལས་ནི། གནས་ཐམས་ཅད་བྱིན་ པ་དང༌། ལ་ལ་ལས་ནི། གཞལ་བའི་སྣོད་རིན་པོ་ཆེས་བཀང་བ་བྱིན་པ་དང༌། ལ་ལ་ལས་ནི། རིན་པོ་ཆེའི་ཤིང་རྟ་བྱིན་པ་དང༌། ལ་ལ་ལས་ནི། བཙོན་ར་ན་ འཁོད་པ་ཐར་པར་བྱེད་པ་དང༌། ལ་ལ་ལས་ནི། གསད་པར་ཆད་པ་ལས་ཐར་པར་བྱེད་པ་དང༌། ལ་ལ་ལས་ནི། བྱིས་པ་གསོ་བ་བྱེད་པ་དང༌། ལ་ལ་ལས་ ནི༑ ལམ་སྟོར་བ་ལ་ལམ་སྟོན་པ་དང༌། ལ་ལ་ལས་ནི། མཉན་པར་གྱུར་ཏེ་ཆུ་ཀླུང་གི་རྒྱུད་ལ་གྲུ་འདོར་བ་དང༌། ལ་ལ་ལས་ནི། རྟའི་རྒྱལ་པོ་སྟོབས་ཀྱིས་ སྒྲོལ་བར་གྱུར་ཏེ། རྒྱ་མཚོ་ཆེན་པོའི་སྲིན་པོའི་གླིང་དུ་ཕྱིན་པར་གྱུར་པའི་སེམས་ཅན་ཡོངས་སུ་སྐྱོབ་པ་དང༌། ལ་ལ་ལས་ནི། དྲང་སྲོང་ཆེན་པོར་གྱུར་ཏེ་ བསྟན་པ་མངོན་པར་སྒྲུབ་པ་དང༌། ལ་ལ་ལས་ནི། འཁོར་ལོས་བསྒྱུར་བར་གྱུར་ཏེ། སེམས་ཅན་དགེ་བ་བཅུའི་ལས་ཀྱི་ལམ་ལ་འགོད་པ་དང༌། ལ་ལ་ལས་ནི། སྨན་ པར་གྱུར་ཏེ་ན་བའི་གསོས་བྱེད་པ་དང༌། ལ་ལ་ལས་ནི། ཕ་མ་ལ་ཕུ་དུད་བྱེད་པ་དང༌། ལ་ལ་ལས་ནི། དགེ་བའི་བཤེས་གཉེན་ལ་རིམ་གྲོ་བྱེད་པ་དང༌། ལ་ལ་ལས་ནི། ཉན་ཐོས་ཀྱི་ཁ་དོག་དང༌། གཟུགས་ཀྱིས་སེམས་ཅན་འདུལ་བ་ལ་བརྩོན་པ་དང༌། ལ་ལ་ལས་ནི། རང་སངས་རྒྱས་ཀྱི་ཁ་དོག་དང༌། གཟུགས་ཀྱིས་སེམས་ཅན་འདུལ་ བ་ལ་བརྩོན་པ་དང༌། ལ་ལ་ལས་ནི། བྱང་ཆུབ་སེམས་དཔའི་ཁ་དོག་དང༌། གཟུགས་ཀྱིས་སེམས་ཅན་འདུལ་བ་ལ་བརྩོན་པ་དང༌། ལ་ལ་ལས་ནི། སངས་རྒྱས་ཀྱི་སྐུ་མདོག་ དང༑ སྐུ་གཟུགས་ཀྱིས་སེམས་ཅན་འདུལ་བ་ལ་བརྩོན་པ་དང༌། ལ་ལ་ལས་ནི། སྐྱེས་པའི་རབས་ཀྱི་ཁྱད་པར་ཐམས་ཅད་ཀྱིས་སྐྱེ་བ་ཡོངས་སུ་བསྟན་ཏེ་སེམས་ཅན་ཡོངས་ སུ་སྨིན་པར་བྱེད་པ་དང༌། ལ་ལ་ལས་ནི། ཆོས་སྨྲ་བའི་གཟུགས་ཀྱིས་དེ་བཞིན་གཤེགས་པའི་བསྟན་པ་ལ་ཞུགས་ཏེ་ལུང་འབོག་པ་དང༌། ཁ་ཏོན་བྱ་བ་དང༌། ཚུལ་བཞིན་དུ་ དཔྱད་པར་བྱ་བ་ལ་བརྩོན་པ་དང༌། དེ་བཞིན་གཤེགས་པའི་མཆོད་རྟེན་ལ་རྒྱན་གྱིས་བརྒྱན་པར་བྱེད་པ་དང༌། དེ་བཞིན་གཤེགས་པའི་སྐུ་གཟུགས་བྱེད་དུ་འཇུག་པ་དང༌། ༄༅། །སངས་རྒྱས་མཆོད་པ་ལ་སེམས་ཅན་ཡོངས་སུ་བསྐུལ་བ་དང༌། སྤོས་དང་བྱུག་པ་གསོལ་ཞིང་འབྲུ་མར་དྲི་ཞིམ་པོས་བྱུག་པ་དང༌། དྲིལ་བུ་དང་མེ་ཏོག་ གི་ཕྲེང་བ་གསོལ་པ་ལ་སོགས་པ་དང༌། སངས་རྒྱས་ཀྱི་མཆོད་པ་རྣམ་པ་ཐམས་ཅད་ལ་བརྩོན་པ་དང༌། དགེ་བ་བཅུའི་ལས་ཀྱི་ལམ་ལ་སེམས་ཅན་རབ་ཏུ་འགོད་པ་དང༌། བསླབ་པའི་གནས་ལྔ་དང༌། གསོ་སྦྱོང་གི་ཡན་ལག་བརྒྱད་དང༌། སངས་རྒྱས་དང༌། ཆོས་དང༌། དགེ་འདུན་ལ་སྐྱབས་བཙལ་བ་དང༌། རབ་ཏུ་འབྱུང་བ་དང༌། ཆོས་མཉན་ པ་དང༌། ལུང་མནོད་པ་དང༌། ཁ་ཏོན་བྱ་བ་དང༌། ཚུལ་བཞིན་ཡིད་ལ་བྱ་བ་ལ་སེམས་ཅན་འགོད་པར་བྱེད་པ་དང༌། ཆོས་ཀྱི་གཏམ་བྱ་བའི་ཕྱིར་སེངྒེའི་སྟན་ལ་འདུག་ཅིང་ སངས་རྒྱས་ཀྱི་བྱང་ཆུབ་རྣམ་པར་འགྲེལ་བ་དང༌། དེ་ལྟར་བྱང་ཆུབ་སེམས་དཔའ་བྱམས་པས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་ཕ་རོལ་ཏུ་ཕྱིན་པ་དྲུག་ལ་ སྤྱད་པ་དེ་དག་ཐམས་ཅད་ཚོང་དཔོན་གྱི་བུ་ནོར་བཟང་གིས་མིག་མང་རིས་དེ་དག་ལས་རྣམ་པ་གཞན་དང་གཞན་མཐོང་བར་གྱུར་ཏོ། །དེས་ཁང་པ་བརྩེགས་པ་ལ་ལ་ལས་ནི། བྱང་ཆུབ་སེམས་དཔའ་བྱམས་པས་དགེ་བའི་བཤེས་གཉེན་ཇི་སྙེད་ཅིག་བསྙེན་བཀུར་བ་དེ་དག་ཐམས་ཅད་ཀྱི་རྣམ་པར་འཕྲུལ་པའི་རྒྱན་ཐམས་ཅད་ཀྱང་མཐོང་བར་ གྱུར་ཏེ། དགེ་བའི་བཤེས་གཉེན་དེ་དག་ཐམས་ཅད་ཀྱི་དྲུང་དུ་བདག་ཉིད་ཕྱིན་ཅིང༌། ཚུར་ཤོག་ནོར་བཟང་ལེགས་པར་འོངས་སམ། མི་ངལ་ལམ། འདི་རེ་བྱང་ཆུབ་སེམས་དཔའི་ རྒྱན་དང༌། ཡུལ་རྣམ་པར་སྤྲུལ་པ་བསམ་གྱིས་མི་ཁྱབ་པ་འདི་དག་ལ་ལྟོས་ཤིག །ཅེས་བསྒོ་ཞིང་གཏམ་བྱེད་པར་ཤེས་པར་གྱུར་ཏེ། དེ་ལྟར་ཚོང་དཔོན་གྱི་བུ་ནོར་བཟང་གིས་ ཁང་པ་བརྩེགས་པ་དེ་དག་རེ་རེ་དང༌། དམིགས་པ་དེ་དག་རེ་རེ་ལས་ཀྱང་བསམ་གྱིས་མི་ཁྱབ་པའི་རྒྱན་དང༌། ཡུལ་རྣམ་པར་སྤྲུལ་པ་འདི་དག་དང༌། གཞན་དག་ཀྱང་གྲངས་ མེད་པ་མང་པོ་མཐོང་བར་གྱུར་ཏེ། དྲན་པའི་མཐུ་ཉམས་པ་མེད་པ་དང༌། མིག་ཡོངས་སུ་དག་པ་ཕྱོགས་ཀུན་རྣམ་པར་ལྟ་བ་དང༌། ལྷག་མཐོང་ལ་ལྟ་བའི་ཡེ་ཤེས་སྒྲིབ་པ་མེད་ པ་དང༌། བྱང་ཆུབ་སེམས་དཔའི་ཡེ་ཤེས་དང༌། བྱིན་གྱི་རླབས་ཀྱི་དབང་རབ་ཏུ་ཐོབ་པས་བྱང་ཆུབ་སེམས་དཔའི་འདུ་ཤེས་ཀྱི་རྣམ་པ་ལ་ཞུགས་པའི་ཡེ་ཤེས་ཀྱི་ས་ལ་གནས་ཏེ་ མཐའ་ཡས་པའི་རྒྱན་དང༌། ཡུལ་རྣམ་པར་སྤྲུལ་པ་དེ་དག་ཐམས་ཅད་མཐོང་བར་གྱུར་ཏོ། །འདི་ལྟ་སྟེ། དཔེར་ན། སྐྱེས་བུ་གཉིད་ཀྱིས་ལོག་པའི་རྨི་ལམ་དུ་གཟུགས་ཀྱི་དམིགས་ པའི་ཁྱད་པར་སྣ་ཚོགས་མང་པོ་ཞིག་མཐོང་བར་གྱུར་ཏེ། འདི་ལྟར་ཁྱིམ་དང་གཞལ་མེད་ཁང་མདངས་དགའ་བའམ། གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་མདངས་ ༄༅། །དགའ་བའམ། བཟའ་ཤིང་གི་ར་བ་དང༌། ཀུན་དགའི་ར་བ་དང༌། དཀའ་ཐུབ་ཀྱི་ནགས་ཚལ་མདངས་དགའ་བའམ། ཤིང་དང༌། ཆུ་ཀླུང་དང༌། རྫིང་དང༌། རི་མདངས་དགའ་བའམ། གོས་དང༌། ཁ་ཟས་དང༌། བཏུང་བའི་ལོངས་སྤྱོད་ཉམས་སུ་བདེ་བའམ། གླུ་དང༌། སིལ་སྙན་དང༌། རོལ་མོའི་སྒྲ་སྙན་པ་སྣ་ཚོགས་ཀྱིས་རྩེ་བ་ ཉམས་སུ་དགའ་བ་ཞིག་མཐོང་ངམ། ཕ་མ་དང༌། གཉེན་བཤེས་དང༌། བདག་ཉིད་འགྲོགས་པར་ཤེས་པར་གྱུར་པའམ། རྒྱ་མཚོ་ཆེན་པོ་དང༌། རིའི་རྒྱལ་པོ་རི་རབ་དང༌། ལྷའི་གནས་ཐམས་ཅད་དམ། འཛམ་བུའི་གླིང་དག་ན་བདག་དཔག་ཚད་བརྒྱ་ཕྲག་དུ་མར་གནས་པར་ཤེས་པར་གྱུར་ལ། ཁྱིམ་མམ། གནས་དེའང་ཤིན་ཏུ་ཡངས་ཤིང་ ཡོན་ཏན་དང༌། རྒྱན་ཐམས་ཅད་ཀྱིས་ཡོངས་སུ་བརྒྱན་པར་མཐོང་སྟེ། ཉིན་པར་ཞིག་ཡིན་པར་ཤེས་ཀྱང་ནམ་དེ་ཡང་རིང་བ་དང༌། ཐུང་བར་བྱེ་བྲག་མི་འབྱེད་ལ། རྨི་ལམ་ ཡིན་པ་ཙམ་དུའང་མི་ཤེས་སོ། །བདག་ཉིད་ཀྱང་བདེ་བའི་ཡོ་བྱད་ཐམས་ཅད་དང་ལྡན་ཞིང༌། ལུས་ཀྱི་འདུ་བྱེད་ཟོ་བདོག་བདེ་ལ་སྙོམ་པ་དང༌། གཉིད་མེད་དེ་མི་དགའ་བ་ ཐམས་ཅད་ཡོངས་སུ་བསལ་བས་དགའ་བ་དང༌། བདེ་བ་རྒྱ་ཆེན་པོ་ཉམས་སུ་མྱོང་སྟེ། ཡུན་ཀྱང་རིང་མོ་ཞིག་ལོན་པ་སྙམ་ནས་ཉིན་གཅིག་གམ། ཉིན་བདུན་ནམ། ཟླ་བ་ ཕྱེད་དམ། ཟླ་བ་གཅིག་གམ། ལོ་གཅིག་གམ། ལོ་བརྒྱའམ། དེ་བས་ཀྱང་རིང་བ་ཞིག་ལོན་པ་ཙམ་དུ་ཤེས་པར་གྱུར་ནས་སད་ན། དེ་ཐམས་ཅད་ཀྱང་རྗེས་སུ་དྲན་ནོ། །དེ་བཞིན་དུ་ ཚོང་དཔོན་གྱི་བུ་ནོར་བཟང་གིས་ཀྱང་བྱང་ཆུབ་སེམས་དཔའི་བྱིན་གྱི་རླབས་དང༌། ཁམས་གསུམ་པ་ཐམས་ཅད་རྨི་ལམ་ལྟ་བུར་ཡང་དག་པར་གཞོལ་བའི་ཡེ་ཤེས་ཀྱིས་ཆུང་ བའི་འདུ་ཤེས་འགགས་པའི་སེམས་དང་ལྡན་པར་གྱུར་ཏེ། བྱང་ཆུབ་སེམས་དཔའི་འདུ་ཤེས་ཀྱི་རྣམ་པ་ཡངས་ཤིང་རྒྱ་ཆེ་བ་དང༌། སྒྲིབ་པ་མེད་པ་ལ་གནས་ཤིང༌། བྱང་ཆུབ་ སེམས་དཔའི་རྒྱན་གྱི་ཡུལ་ཁོང་དུ་ཆུད་ལ་བྱང་ཆུབ་སེམས་དཔའི་ཚུལ་ལ་འཇུག་པ་བསམ་གྱིས་མི་ཁྱབ་པའི་རྗེས་སུ་འབྲངས་པའི་བློ་དང་ལྡན་པས། རྒྱན་རྣམ་པར་སྤྲུལ་པ་དེ་ དག་ཐམས་ཅད་ཀྱང་མཐོང་བར་གྱུར་ཏོ། །ཤེས་པར་གྱུར་ཏོ། །ཉམས་སུ་མྱོང་བར་གྱུར་ཏོ། །རྣམ་པར་དཔྱད་པར་གྱུར་ཏོ། །མཚན་མར་བྱས་པར་གྱུར་ཏོ། །དམིགས་ཀྱིས་རྟོགས་ པར་གྱུར་ཏོ། །བདག་ཉིད་ཀྱང་དེ་དག་ན་འདུག་པར་ཤེས་པར་གྱུར་ཏོ། །འདི་ལྟ་སྟེ། དཔེར་ན། མི་ནད་པ་སེམས་ཀྱི་རྒྱུད་ཐ་མ་བྱུང་བར་གྱུར་ཏེ། དེ་མ་ཐག་ཏུ་སྐྱེ་བའི་སེམས་ཉེ་བར་ གགས་ནས་ལས་ཀྱི་སྲིད་པ་མངོན་དུ་གྱུར་ན། ལས་ཇི་ལྟ་བུར་བྱས་ཤིང་བསགས་པའི་རྣམ་པར་སྨིན་པས་ལས་མི་དགེ་བའི་རྐྱེན་གྱིས་ནི། སེམས་ཅན་དམྱལ་བ་དང༌། བྱོལ་ ༄༅། །སོང་གི་སྐྱེ་གནས་དང༌། ཡི་དྭགས་ཀྱི་ཡུལ་ལམ། གཤིན་རྗེའི་མི་ལག་ཆ་གཉེམས་པ་ཐོགས་པ་གཤེ་ཞིང་ཁྲོ་བ་དག་ཀྱང་མཐོང་བར་གྱུར། སེམས་ ཅན་དམྱལ་བ་པའི་དུད་མོ་དང༌། འོ་དོད་ཀྱི་སྒྲ་ཡང་ཐོས་པར་གྱུར་ལ་བ་ཚྭའི་ཆུ་དེ་དག་མཐོང་སྟེ། སྤུ་གྲིའི་སོ་གཤིབས་པའི་རི་དེ་དག་དང༌། ལྕགས་ཀྱི་ཤལ་མ་ལིའི་ སྡོང་པོ་དེ་དག་དང༌། རལ་གྲིའི་སོའི་ནགས་ཚལ་དེ་དག་ཀྱང་མཐོང་བར་གྱུར་ཏམ། སེམས་ཅན་དམྱལ་བ་དེ་དག་ཀྱང་ཀུན་ནས་འབར་ཞིང་ཡོངས་སུ་འབར་བ་དང༌། རབ་ ཏུ་འབར་བ་དང༌། ལྕགས་ཀྱི་བུམ་པ་གཅིག་ཏུ་འབར་བ་དག་ཀྱང་མཐོང་བར་གྱུར་ལ། གནོད་པ་དེ་དག་ཐམས་ཅད་ཀྱིས་ཀྱང་གནོད་པར་བྱ་ཞིང༌། ཚོར་བ་དེ་དག་ཀྱང་ ཉམས་སུ་མྱོང་བ་ཙམ་དུ་ཤེས་པར་གྱུར་ཏེ། སེམས་ཅན་དམྱལ་བ་དེ་དག་ཀྱང་མེའི་གདུང་བས་སྡུག་བསྔལ་བ་ཞིག་ཏུ་མཐོང་ངམ། བདག་གིས་མྱོང་བར་གྱུར་ཏམ། ལས་དགེ་བའི་ཚོགས་ཀྱིས་ལྷའི་ཁང་པ་དང༌། གནས་ཤིག་མཐོང་བར་གྱུར་ཏམ། ལྷའི་འཁོར་དང༌། ལྷ་མོའི་ཚོགས་དང༌། རྒྱན་རྣམ་པར་ཕྱེ་བ་ཐམས་ཅད་ཀྱང་མཐོང་ བར་གྱུར་ཏེ། བཟའ་ཤིང་གི་ར་བ་དང༌། དཀའ་ཐུབ་ཀྱི་ནགས་ཚལ་དང༌། ཆུ་ཀླུང་དང༌། རྫིང་དང༌། རིན་པོ་ཆེའི་རི་དང༌། ཡིད་བཞིན་གྱི་ཤིང་དང༌། ལོངས་སྤྱོད་མང་པོ་ མཐོང་ངམ་ཉམས་སུ་མྱོང་བར་གྱུར་ཏེ། ཚེའི་ཡུན་ཀྱང་དེ་དང་མཉམ་པར་ཤེས་པར་གྱུར་ན། དེ་ནི། འདི་ནས་ཀྱང་འཕོས་པ་མེད། དེར་ཡང་སྐྱེས་པ་མེད་དེ། མི་སྣང་བར་མ་གྱུར་ བཞིན་དུ། ལས་ཀྱི་ཡུལ་བསམ་གྱིས་མི་ཁྱབ་པས་བྱ་བའི་རྣམ་པ་དེ་ལྟ་བུ་དག་ཤེས་ཤིང་མཐོང་ལ་ཉམས་སུ་མྱོང་བར་རུང་ངོ༌། །དེ་བཞིན་དུ་ཚོང་དཔོན་གྱི་བུ་ནོར་བཟང་གིས་ བྱང་ཆུབ་སེམས་དཔའི་ལས་ཀྱི་ཡུལ་བསམ་གྱིས་མི་ཁྱབ་པའི་ཕྱིར་རྒྱན་རྣམ་པར་སྤྲུལ་པ་དེ་དག་ཐམས་ཅད་ཀྱང་མཐོང་བར་གྱུར་ཏོ། །འདི་ལྟ་སྟེ། དཔེར་ན། སྐྱེས་བུ་འབྱུང་ པོའི་གདོན་གྱིས་ནོན་པ་ནི། གཟུགས་ཀྱི་རྣམ་པ་སྣ་ཚོགས་མང་པོ་མཐོང་སྟེ། ཅི་དྲིས་པ་དེ་དག་གི་ལུང་ཡང་སྟོན་ཏོ། །དེ་བཞིན་དུ་ཚོང་དཔོན་གྱི་བུ་ནོར་བཟང་གིས་བྱང་ཆུབ་སེམས་ དཔའི་ཡེ་ཤེས་དང༌། བྱིན་གྱི་རླབས་ཀྱི་མཐུས་རྒྱན་དེ་དག་ཐམས་ཅད་མཐོང་བར་གྱུར་ཏོ། །འདི་ལྟ་སྟེ། དཔེར་ན། ཀླུའི་ཁང་པར་བྱིན་པའི་སྐྱེས་བུས་ནི། ཀླུའི་འདུ་ཤེས་ཀྱི་རྣམ་ པ་ལ་ཞུགས་པས། ཉི་མ་གཅིག་གམ། ཉི་མ་བདུན་ནམ། ཟླ་བ་ཕྱེད་དམ། ཟླ་བ་གཅིག་གམ། ལོ་གཅིག་གམ། ལོ་བརྒྱར་ཡང་འདུ་ཤེས་ཀྱི་རྣམ་པས་ཤེས་ཏེ། ཀླུའི་འདུ་ཤེས་ ཀྱི་རྣམ་པ་དང་བྲལ་ནས་མིའི་འདུ་ཤེས་ཀྱི་རྣམ་པར་ན་ཡུད་ཙམ་ལས་མ་ལོན་པར་མཐོང་ངོ༌། །དེ་བཞིན་དུ་ཚོང་དཔོན་གྱི་བུ་ནོར་བཟང་བྱང་ཆུབ་སེམས་དཔའི་འདུ་ཤེས་ ༄༅། །ཀྱི་རྣམ་པས་མ་བཏང་བའི་བློ་དང་ལྡན་པས་ཀྱང་བྱང་ཆུབ་སེམས་དཔའ་བྱམས་པའི་བྱིན་གྱི་རླབས་ཀྱིས་ཡུད་ཙམ་གཅིག་པོ་དེ་ཡང་བསྐལ་པ་བྱེ་ བ་ཁྲག་ཁྲིག་བརྒྱ་སྟོང་མང་པོར་ཤེས་པར་གྱུར་ཏོ། །འདི་ལྟ་སྟེ། དཔེར་ན། ཚངས་པ་ཆེན་པོའི་གཞལ་མེད་ཁང་འགྲོ་བ་ཐམས་ཅད་ན་རྒྱན་གྱི་དམ་པ་ཕུལ་ཞེས་བྱ་བ་ ཡོད་དེ༑ དེའི་ནང་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱང་གཟུགས་བརྙན་གྱི་ཚུལ་དུ་དམིགས་པ་ཐམས་ཅད་དང་མ་འདྲེས་པར་གསལ་ བར་སྣང་ངོ༌། །དེ་བཞིན་དུ་ཚོང་དཔོན་གྱི་བུ་ནོར་བཟང་གིས་ཀྱང་རྒྱན་དེ་དག་ཐམས་ཅད་དམིགས་པ་ཐམས་ཅད་དུ་ཕན་ཚུན་མ་འདྲེས་པ་དང༌། ཕན་ཚུན་མ་འཛིངས་པར་ གཟུགས་རབ་ཏུ་བྱུང་བ་མཐོང་ངོ༌། །འདི་ལྟ་སྟེ། དཔེར་ན། རྒྱལ་བའི་སྐྱེ་མཆེད་ཀྱི་སྙོམས་པར་འཇུག་པ་ལ་རྣམ་པར་སྤྱོད་པའི་དགེ་སློང་ནི། གཅིག་པུ་གཉིས་སུ་མེད་ པའི་ཁང་བུའམ། འཆག་སའམ། འདུག་པའི་གནས་ན་འདུག་གམ། བསྐྱེད་གང་རུང་སྟེ། འཇིག་རྟེན་ཐམས་ཅད་རྒྱས་པའི་སྐྱེ་མཆེད་གང་ལ་སྙོམས་པར་ཞུགས་པའི་ ཡུལ་བཞིན་དུ་བསམ་གཏན་པའི་ཡུལ་བསམ་གྱིས་མི་ཁྱབ་པར་མཐོང་ཞིང་ཉམས་སུ་མྱོང་ངོ༌། །དེ་བཞིན་དུ་ཚོང་དཔོན་གྱི་བུ་ནོར་བཟང་གིས་ཀྱང་ཡུལ་གང་ལ་ ཞུགས་པའི་ཚུལ་བཞིན་དུ། རྒྱན་དེ་དག་ཐམས་ཅད་མཐོང་ཞིང་ཤེས་ཏེ་ཉམས་སུ་མྱོང་བར་གྱུར་ཏོ། །འདི་ལྟ་སྟེ། དཔེར་ན། དྲི་ཟའི་གྲོང་ཁྱེར་རྣམས་ཀྱི་རྒྱན་དང༌། ལྷབ་ལྷུབ་ ཐམས་ཅད་ནམ་མཁའི་དབྱིངས་ལ་བྱུང་བ་ནི། ཡོངས་སུ་སྣང་ཡང་ཅི་ལ་ཡང་སྒྲིབ་པར་མི་འགྱུར་རོ། །འདི་ལྟ་སྟེ། དཔེར་ན། གནོད་སྦྱིན་གྱི་གཞལ་མེད་ཁང་མིའི་ཁང་པ་ན་ འདུག་པའམ། མིའི་ཁང་པ་གནོད་སྦྱིན་གྱི་ཁང་པའི་ཁོངས་ན་འདུག་པ་ནི། ཕན་ཚུན་ཐ་མི་དད་དེ། ལས་ཀྱི་ཡུལ་རྣམ་པ་ཇི་ལྟར་དག་པའི་ཚུལ་བཞིན་དུ་སྣང་ངོ༌། །འདི་ལྟ་སྟེ། དཔེར་ན། རྒྱ་མཚོ་ཆེན་པོ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱང་རྒྱའི་གཟུགས་བརྙན་ལྟར་སྣང་ངོ༌། །འདི་ལྟ་སྟེ། དཔེར་ན། སྒྱུ་མའི་མཁན་ པོ་ནི༑ སྔགས་དང༌། རིག་སྔགས་དང༌། རྩིའི་མཐུ་དང༌། བྱིན་གྱི་རླབས་ཀྱིས་གཟུགས་ཀྱི་རྣམ་པ་ཐམས་ཅད་དང༌། བྱ་བ་ཐམས་ཅད་ཀྱང་ཡོངས་སུ་སྟོན་ཏོ། །དེ་བཞིན་དུ་ ཚོང་དཔོན་གྱི་བུ་ནོར་བཟང་གིས་ཀྱང་བྱང་ཆུབ་སེམས་དཔའ་བྱམས་པའི་བྱིན་གྱི་རླབས་ཡེ་ཤེས་སྒྱུ་མ་བསམ་གྱིས་མི་ཁྱབ་པ་ལ་ཞུགས་པས་བྱང་ཆུབ་སེམས་དཔའི་ དབང་དང༌། བྱིན་གྱི་རླབས་ཀྱི་ཡེ་ཤེས་ཆོས་ཐམས་ཅད་ཤེས་པའི་སྒྱུ་མའི་སྟོབས་ཀྱིས་མངོན་པར་བསྒྲུབས་པའི་མཐུས་རྒྱན་གྱི་ཡུལ་རྣམ་པར་སྤྲུལ་པ་དེ་དག་མཐོང་བར་ ༄༅། །གྱུར་ཏོ། །དེ་ནས་བྱང་ཆུབ་སེམས་དཔའ་བྱམས་པས་ཁང་པ་བརྩེགས་པ་དེའི་ནང་དུ་སོང་སྟེ་བྱིན་གྱི་རླབས་དེ་དག་བརྟུལ་ནས་ཚོང་དཔོན་གྱི་བུ་ནོར་ བཟང་ལ་སེ་གོལ་གྱི་སྒྲ་བྱས་ཏེ་འདི་སྐད་ཅེས་སྨྲས་སོ། །རིགས་ཀྱི་བུ། འདི་ནི། ཆོས་རྣམས་ཀྱི་ཆོས་ཉིད་ཡིན་གྱི། ལོངས། རིགས་ཀྱི་བུ། ཆོས་ཐམས་ཅད་ནི། རྣམ་པར་ བསྒྲུབས་ན། ཉེ་བར་འགྲུབ་པའི་མཚན་ཉིད་དེ། བྱང་ཆུབ་སེམས་དཔའི་ཡེ་ཤེས་ཀྱི་བྱིན་གྱིས་བརླབས་པའི་རང་བཞིན་དེ་ལྟ་བུ་སྟེ། ཡོངས་སུ་མ་གྲུབ་པའོ། །སྒྱུ་མ་དང༌། རྨི་ལམ་དང༌། གཟུགས་བརྙན་ལྟ་བུའོ། །དེ་ནས་ཚོང་དཔོན་གྱི་བུ་ནོར་བཟང་སེ་གོལ་གྱི་སྒྲ་དེས་ཏིང་ངེ་འཛིན་དེ་ལས་ལངས་པར་གྱུར་པ་དང༌། དེ་ལ་བྱང་ཆུབ་སེམས་ དཔའ་བྱམས་པས་སྨྲས་པ། རིགས་ཀྱི་བུ། ཁྱོད་ཀྱིས་བྱང་ཆུབ་སེམས་དཔའི་བྱིན་གྱི་རླབས་རྣམ་པར་འཕྲུལ་བ་མཐོང་མོད། ཁྱོད་ཀྱིས་བྱང་ཆུབ་སེམས་དཔའི་ཚོགས་ ཀྱི་མཐུ་དང༌། རྒྱུ་མཐུན་པ་མཐོང་མོད། ཁྱོད་ཀྱིས་བྱང་ཆུབ་སེམས་དཔའི་སྨོན་ལམ་གྱི་ཡེ་ཤེས་ཀྱིས་རྣམ་པར་བསྒྲུབས་པ་མཐོང་མོད། ཁྱོད་ཀྱིས་བྱང་ཆུབ་སེམས་ དཔའི་གནས་མདངས་དགའ་བ་མཐོང་མོད། ཁྱོད་ཀྱིས་བྱང་ཆུབ་སེམས་དཔའི་སྤྱོད་པ་ཡོངས་སུ་བསྡུ་བ་མཐོང་མོད། ཁྱོད་ཀྱིས་བྱང་ཆུབ་སེམས་དཔའི་འབྱུང་བའི་སྒྲ་ ཐོས་མོད། ཁྱོད་ཀྱིས་སངས་རྒྱས་ཀྱི་ཞིང་གི་ཡོན་ཏན་དང༌། རྒྱན་ཚད་མེད་པ་མཐོང་མོད། ཁྱོད་ཀྱིས་དེ་བཞིན་གཤེགས་པའི་སྨོན་ལམ་རྣམ་པ་ཐ་དད་པའི་ཁྱད་པར་མཐོང་ མོད༑ ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་རྗེས་སུ་འབྲང་བ་བྱས་མོད། ཁྱོད་ཀྱིས་བྱང་ཆུབ་སེམས་དཔའི་ཏིང་ངེ་འཛིན་གྱི་དགའ་བ་དང་ བདེ་བ་མྱོང་མོད། ནོར་བཟང་གིས་སྨྲས་པ། འཕགས་པ། དགེ་བའི་བཤེས་གཉེན་གྱི་བྱིན་གྱི་རླབས་དང༌། དགེ་བའི་བཤེས་གཉེན་གྱིས་དགོངས་པ་དང༌། དགེ་བའི་བཤེས་ གཉེན་གྱི་མཐུས་མཐོང་ངོ༌། །འཕགས་པ། རྣམ་པར་ཐར་པ་འདིའི་མིང་ཅི་ཞེས་བགྱི། སྨྲས་པ། རིགས་ཀྱི་བུ། རྣམ་པར་ཐར་པ་འདི་ནི། དུས་གསུམ་གྱི་དམིགས་པ་ཐམས་ཅད་ ལ་ཤེས་པ་རབ་ཏུ་ཞུགས་པའི་དྲན་པ་ཉམས་པ་མེད་པས་བརྒྱན་པའི་སྙིང་པོ་ཞེས་བྱ་བ་སྟེ། རིགས་ཀྱི་བུ། རྣམ་པར་ཐར་པ་འདི་ལྟ་བུ་བརྗོད་དུ་མེད་པའི་ཡང་བརྗོད་དུ་མེད་པ་ དག་ནི༑ ཚེ་གཅིག་གིས་ཐོགས་པའི་བྱང་ཆུབ་སེམས་དཔས་ཐོབ་བོ། །ནོར་བཟང་གིས་སྨྲས་པ། འཕགས་པ། རྒྱན་དེ་དག་གང་དུ་མཆིས། སྨྲས་པ། གང་ནས་འོངས་པ་དེར་ དོན་[?] ནོར་བཟང་གིས་སྨྲས་པ། གང་ནས་མཆིས། སྨྲས་པ། བྱང་ཆུབ་སེམས་དཔའི་ཡེ་ཤེས་ཀྱི་བྱིན་གྱི་རླབས་མངོན་པར་བསྒྲུབས་པ་ལས་འོངས་སོ། །དེ་ནི། བྱིན་གྱི་རླབས་དེ་ ༄༅། །ཉིད་ལ་གནས་ཤིང་གང་དུ་ཡང་སོང་བ་མེད་ལ་འཕོས་པ་མེད་དོ། །ཕུང་པོར་གྱུར་པ་མེད་དོ། །ཚོགས་སུ་གྱུར་པ་མེད་དོ། །བརྩེགས་པར་གནས་པ་མེད་དོ། ། དངོས་པོར་གནས་པ་མེད་དོ། །ཡུལ་ན་གནས་པ་མ་ཡིན་ནོ། །ཕྱོགས་ན་གནས་པ་མ་ཡིན་ནོ། །རིགས་ཀྱི་བུ། འདི་ལྟ་སྟེ། དཔེར་ན། ཀླུ་རྣམས་ཀྱི་སྤྲིན་གྱི་དྲ་བ་ནི་ལུས་ལ་ཡང་མི་ གནས། སེམས་ལ་ཡང་མི་གནས། ནང་ན་ཡང་མི་གནས་མོད་ཀྱི། ཀླུའི་སེམས་ཀྱི་དབང་དང༌། ཀླུའི་དབང་བསམ་གྱིས་མི་ཁྱབ་པས་ཆར་གྱི་རྒྱུན་ཚད་མེད་པ་བཀྱེ་བ་ནི་མེད་ པ་མ་ཡིན་ཏེ་སྣང་ངོ༌། །རིགས་ཀྱི་བུ། དེ་བཞིན་དུ་རྒྱན་དེ་དག་ཀྱང་ནང་ན་གནས་པ་ཡང་མ་ཡིན། ཕྱི་རོལ་ན་གནས་པ་ཡང་མ་ཡིན་ཏེ། བྱང་ཆུབ་སེམས་དཔའི་བྱིན་གྱི་རླབས་ ཀྱི་དབང་དང༌། ཁྱོད་ཀྱི་སྣོད་བཟང་བའི་ཕྱིར་མི་སྣང་བའང་མ་ཡིན་ནོ། །རིགས་ཀྱི་བུ། འདི་ལྟ་སྟེ། དཔེར་ན། སྒྱུ་མའི་མཁན་པོས་ནི་ཡུལ་ཐམས་ཅད་ཡོངས་སུ་བསྟན་ཀྱང་ གང་ནས་ཀྱང་འོངས་པ་མེད། བཤིག་ཀྱང་གང་དུ་ཡང་འགྲོ་བ་མེད་དེ། འཕོ་བ་མེད་མོད་ཀྱི་སྔགས་དང་རྩིའི་མཐུས་ཡོངས་སུ་མི་སྣང་བ་མ་ཡིན་ནོ། །རིགས་ཀྱི་བུ། དེ་ བཞིན་དུ་རྒྱན་དེ་དག་ཀྱང་གང་དུ་ཡང་སོང་བ་མེད། གང་ནས་ཀྱང་འོང་བ་མེད་ལ། གང་དུ་ཡང་ཕུང་པོར་གྱུར་བ་མེད་མོད་ཀྱི། བྱང་ཆུབ་སེམས་དཔའི་ཡེ་ཤེས་སྒྱུ་ མ་བསམ་གྱིས་མི་ཁྱབ་པ་ལ་ཤིན་ཏུ་བསླབ་པ་དང༌། སྔོན་གྱི་སྨོན་ལམ་གྱི་བྱིན་གྱི་རླབས་དང༌། ཡེ་ཤེས་ཀྱི་དབང་གིས་ཡོངས་སུ་མི་སྣང་བ་མ་ཡིན་ནོ། །ནོར་བཟང་གིས་སྨྲས་པ། འཕགས་པ། ཤུལ་ཇི་སྲིད་ཅིག་ནས་གཤེགས། སྨྲས་པ། རིགས་ཀྱི་བུ། བྱང་ཆུབ་སེམས་དཔའ་རྣམས་འགྲོ་བ་ནི་འོང་བ་མེད་པར་འགྲོའོ། །གཡོ་བ་དང་གནས་པ་མེད་པར་ འགྲོའོ༑ ༑གནས་དང་རྟེན་མེད་པར་འགྲོའོ། །ཤི་འཕོ་དང་སྐྱེ་བ་མེད་པར་འགྲོའོ། །གནས་པ་དང་འཕོ་བ་མེད་པར་འགྲོའོ། །གཡོ་བ་དང་ལྡང་བ་མེད་པར་འགྲོའོ། །ལྟོས་པ་དང་ གནས་མེད་པར་འགྲོའོ། །ལས་དང་རྣམ་པར་སྨིན་པ་མེད་པར་འགྲོའོ། །མི་སྐྱེ་བ་དང་མི་འགག་པར་འགྲོའོ། །རྟག་པ་མེད་པ་དང་ཆད་པ་མེད་པར་འགྲོའོ། །གཞན་ཡང་རིགས་ཀྱི་ བུ༑ བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་འདུལ་བའི་སེམས་ཅན་ལ་ལྟ་བས་སྙིང་རྗེ་ཆེན་པོའོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་སྡུག་བསྔལ་བའི་སེམས་ ཅན་ཡོངས་སུ་སྐྱོབ་པས་བྱམས་པའོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་གང་དུ་དགའ་བར་སྐྱེ་བས་ཚུལ་ཁྲིམས་སོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་ སྔོན་གྱི་བྱིན་གྱིས་རླབས་ཀྱིས་སྨོན་ལམ་མོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་ཐམས་ཅད་དེ་བཞིན་ཡོངས་སུ་སྟོན་པས་མངོན་པར་ཤེས་པའོ། །བྱང་ཆུབ་སེམས་ ༄༅། །དཔའ་རྣམས་ཀྱི་འགྲོ་བ་ནི། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ནས་གཡོ་བ་མེད་པས་མངོན་པར་འདུ་བྱ་བ་མེད་པའོ། །བྱང་ཆུབ་སེམས་ དཔའ་རྣམས་ཀྱི་འགྲོ་བ་ནི། ལུས་དང་སེམས་ཡོངས་སུ་མི་གཏོང་བས་ལེན་པ་དང་འདོར་བ་མེད་པའོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི། སེམས་ཅན་ཐམས་ཅད་ཀྱི་ རྗེས་སུ་འབྲང་བས་ཤེས་རབ་དང་ཐབས་སོ། །བྱང་ཆུབ་སེམས་དཔའ་རྣམས་ཀྱི་འགྲོ་བ་ནི། མིག་ཡོར་དང༌། གཟུགས་བརྙན་དང༌། སྤྲུལ་པ་ལྟ་བུ་ཡིན་པས་སྤྲུལ་པ་ཡོངས་ སུ་སྟོན་པའོ། །རིགས་ཀྱི་བུ། གཞན་ཡང་ཁྱོད་ལམ་ཇི་སྲིད་ཅིག་ནས་འོངས་ཞེས་ཁྱོད་ཀྱིས་སྨྲས་པ་ནི། རིགས་ཀྱི་བུ། ང་ནི། ཚེའི་ས་ཡུལ་ཕྲེང་བ་སྟོབས་ཀྱི་གྲོང་རྡལ་ཁང་ཁྱིམ་ ཅན་ཞེས་བྱ་བ་དེ་ན་ཚོང་དཔོན་ས་སྐྱོང་ཞེས་བྱ་བ་ཞིག་ཡོད་དེ། དེ་སངས་རྒྱས་ཀྱི་ཆོས་ལ་བཞག་ནས་ཚེའི་སའི་མི་རྣམས་ལ་སྣོད་ཀྱི་ཚུལ་བཞིན་དུ་ཆོས་བསྟན་པ་བྱས་ཏེ། ཕ་མ་དང༌། བྲམ་ཟེ་དང༌། ཁྱིམ་བདག་གཉེན་བཤེས་སུ་འོང་བ་རྣམས་ཐེག་པ་ཆེན་པོ་ལ་ཡང་དག་པར་བསྐུལ་ནས་འདིར་འོངས་སོ། །ནོར་བཟང་གིས་སྨྲས་པ། འཕགས་ པ༑ བྱང་ཆུབ་སེམས་དཔའ་རྣམས་ཀྱི་ཚེའི་ས་གང་ལགས། སྨྲས་པ། རིགས་ཀྱི་བུ། བཅུ་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་ཚེའི་ས་སྟེ། བཅུ་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་ནི། བྱང་ཆུབ་སེམས་དཔའི་རིགས་སུ་སྐྱེས་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །ལྷག་པའི་བསམ་པ་ནི། དགེ་བའི་བཤེས་ གཉེན་གྱི་རིགས་སུ་སྐྱེས་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །ས་ལ་གནས་པ་ནི། ཕ་རོལ་ཏུ་ཕྱིན་པའི་རིགས་སུ་སྐྱེས་པས་བྱང་ཆུབ་སེམས་དཔའ་རྣམས་ཀྱི་ ཚེའི་སའོ། །སྨོན་ལམ་མངོན་པར་སྒྲུབ་པ་ནི། སྤྱོད་པའི་རིགས་སུ་སྐྱེས་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །སྙིང་རྗེ་ཆེན་པོ་ནི། བསྡུ་བའི་དངོས་པོ་ཐམས་ཅད་ ཀྱི་རིགས་སུ་སྐྱེས་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །ཡང་དག་པ་ཇི་ལྟ་བ་བཞིན་དུ་ཆོས་རྟོགས་པར་བྱ་བ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་རིགས་སུ་ སྐྱེས་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །ཐེག་པ་ཆེན་པོ་ནི། ཐབས་མཁས་པའི་རིགས་སུ་སྐྱེས་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །སེམས་ཅན་ ཡོངས་སུ་སྨིན་པར་བྱ་བ་ནི། མངོན་པར་རྫོགས་པར་འཚང་རྒྱ་བའི་རིགས་སུ་སྐྱེས་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །ཐབས་དང་ཤེས་རབ་གཉིས་ནི། མི་སྐྱེ་ བའི་ཆོས་ཀྱི་བཟོད་པའི་རིགས་སུ་སྐྱེས་པས་བྱང་ཆུབ་སེམས་དཔའ་རྣམས་ཀྱི་ཚེའི་སའོ། །རིགས་ཀྱི་བུ། ཆོས་ཐམས་ཅད་ཀྱི་ནན་ཏན་ནི། འདས་པ་དང༌། མ་བྱོན་པ་དང༌། ༄༅། །ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་རིགས་སུ་སྐྱེས་པས་བྱང་ཆུབ་སེམས་དཔའ་རྣམས་ཀྱི་ཚེའི་ས་ཏེ། །རིགས་ཀྱི་བུ། བཅུ་པོ་ དེ་དག་ནི། བྱང་ཆུབ་སེམས་དཔའ་རྣམས་ཀྱི་ཚེའི་སའོ། །རིགས་ཀྱི་བུ། ཐབས་མཁས་པ་ནི། བྱང་ཆུབ་སེམས་དཔའ་རྣམས་ཀྱི་ཕའོ། །ཤེས་རབ་ཀྱི་ཕ་རོལ་ཏུ་ཕྱིན་ པ་ནི༑ མའོ། །སྦྱིན་པའི་ཕ་རོལ་ཏུ་ཕྱིན་པ་ནི། འོ་མའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནི། མ་མའོ། །བཟོད་པའི་ཕ་རོལ་ཏུ་ཕྱིན་པ་ནི། ལྷབ་ལྷུབ་དང་རྒྱན་ཏོ། ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི། སྐྱེད་པའོ། །བསམ་གཏན་གྱི་ཕ་རོལ་ཏུ་ཕྱིན་པ་ནི། སྤྱོད་པ་རྣམ་པར་དག་པར་བྱེད་པའོ། །དགེ་བའི་བཤེས་གཉེན་རྣམས་ནི། བསླབ་པ་ལ་སྤྱོད་དུ་འཇུག་པའོ། །བྱང་ཆུབ་ཀྱི་ཡན་ལག་ཐམས་ཅད་ནི། གྲོགས་པོའོ། །དགེ་བའི་རྩ་བའི་ཆོས་ཐམས་ཅད་ནི། གཉེན་བཤེས་སོ། །བྱང་ཆུབ་སེམས་ དཔའ་ཐམས་ཅད་ནི། ཕུ་ནུ་བོའོ། །བྱང་ཆུབ་ཀྱི་སེམས་ནི། རིགས་སོ། །ནན་ཏན་ནི། རིགས་ཀྱི་ཆོས་སོ། །སའི་གནས་ནི། རིགས་ཀྱི་གནས་སོ། །བཟོད་པ་ཐོབ་པ་ནི། རིགས་ སུ་རིགས་དང་ལྡན་པར་སྐྱེས་པའོ། །སྨོན་ལམ་མངོན་པར་སྒྲུབ་པ་ནི། རིགས་ཀྱི་གཞུང་ཐོབ་པའོ། །སྤྱོད་པ་རྣམ་པར་དག་པ་ནི། རིགས་ཀྱི་ཆོས་ཀྱི་རྗེས་སྙེགས་པའོ། །ཐེག་ པ་ཆེན་པོ་ལ་ཡང་དག་པར་སྐུལ་བ་ནི། རིགས་ཀྱི་རྒྱུན་མི་གཅོད་པའོ། །དབང་བསྐུར་ནས་ཚེ་གཅིག་གིས་ཐོགས་པ་ནི། ཆོས་ཀྱི་རྒྱལ་པོའི་སྲས་ཀྱི་ཐུ་བོའོ། །དེ་བཞིན་གཤེགས་ པ་ཉིད་དུ་ཡང་དག་པར་སྒྲུབ་པ་ནི། རིགས་ཀྱི་བུ་རྒྱུད་ཡོངས་སུ་དག་པ་སྟེ། རིགས་ཀྱི་བུ། དེ་ལྟར་ན། བྱང་ཆུབ་སེམས་དཔའ་བྱིས་པ་ཐ་དད་པའི་སྐྱེ་བོའི་ས་ལས་ཤིན་ཏུ་ འདས་པ་ཡིན། བྱང་ཆུབ་སེམས་དཔའི་སྐྱོན་མེད་པར་ཞུགས་པ་ཡིན། དེ་བཞིན་གཤེགས་པའི་རིགས་སུ་ཡང་དག་པར་བྱུང་བ་ཡིན་ནོ། །དེ་བཞིན་གཤེགས་པའི་རྒྱུད་ལ་ རབ་ཏུ་གནས་པ་ཡིན། དཀོན་མཆོག་གསུམ་གྱི་རིགས་རྒྱུན་མི་གཅད་པ་ལ་ཞུགས་པ་ཡིན། བྱང་ཆུབ་སེམས་དཔའི་རིགས་ཡོངས་སུ་བསྡུ་བ་ལ་མངོན་པར་བརྩོན་པ་ ཡིན༑ རིགས་དང་རུས་ཀྱིས་ཡོངས་སུ་དག་པ་ཡིན། གནད་ཀྱི་རྒྱུད་ཀྱིས་སྨད་དུ་མེད་པ་ཡིན། ལྷ་དང་བཅས་པའི་འཇིག་རྟེན་དང༌། བདུད་དང་བཅས་པ་དང༌། ཚངས་པ་དང་ བཅས་པ་དང༌། དགེ་སྦྱོང་དང༌། བྲམ་ཟེར་བཅས་པའི་སྐྱེ་རྒུའི་ནང་ན་རིགས་ལ་སྨོས་པའི་སྐྱོན་ཐམས་ཅད་ཀྱི་ཁ་ན་མ་ཐོ་བ་མེད་པ་ཡིན་ཏེ། སངས་རྒྱས་ཀྱི་རིགས་དམ་པར་སྐྱེས་ ལ༑ སྨོན་ལམ་ཆེན་པོའི་ལུས་དང་ལྡན་པས་རིགས་ཀྱིས་བཙུན་པ་ཡིན། རིགས་ཀྱི་བུ། རྒྱུད་ཀྱི་རིགས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་རྣམས་ནི། ཆོས་ཐམས་ ༄༅། །ཅད་གཟུགས་བརྙན་ལྟ་བུར་ཡོངས་སུ་ཤེས་པས་འཇིག་རྟེན་གྱི་སྐྱེ་གནས་ཐམས་ཅད་དུ་སྨད་པ་མེད་པ་ཡིན་ཏེ། སྲིད་པའི་སྐྱེ་གནས་ཐམས་ཅད་སྤྲུལ་ པ་ལྟ་བུར་ཡོངས་སུ་ཤེས་པས་སྲིད་པའི་ལམ་གྱི་རྒྱུད་དུ་སྐྱེ་ཞིང་གནས་པ་ཐམས་ཅད་ཀྱིས་ཀུན་ནས་ཉོན་མོངས་པར་མི་འགྱུར་རོ། །ཆོས་ཐམས་ཅད་བདག་མེད་པར་ཁོང་དུ་ ཆུད་པས་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བས་ཡོངས་སུ་མི་སྐྱོའོ། །བྱམས་པ་ཆེན་པོ་དང༌། སྙིང་རྗེ་ཆེན་པོའི་ལུས་དང་ལྡན་པའི་ཕྱིར་ སེམས་ཅན་ཐམས་ཅད་ལ་ཕན་གདགས་པས་ངལ་བར་མི་འགྱུར་རོ། །འཁོར་བ་ཐམས་ཅད་རྨི་ལམ་ལྟ་བུར་ཡོངས་སུ་རྟོགས་པས་བསྐལ་པ་ཐམས་ཅད་དུ་གནས་པས་སྒྱིད་ ལུག་པར་མི་འགྱུར་རོ། །ཕུང་པོ་ཐམས་ཅད་སྒྱུ་མ་ལྟ་བུར་ཡོངས་སུ་ཤེས་པས་སྐྱེ་བ་དང༌། འཆི་འཕོ་དང༌། འཆི་བ་ཡོངས་སུ་བསྟན་པ་ཐམས་ཅད་ཀྱིས་དུབ་པར་མི་འགྱུར་ རོ༑ ༑ཁམས་དང༌། སྐྱེ་མཆེད་ཆོས་ཀྱི་དབྱིངས་ཀྱི་རང་བཞིན་ཏུ་རབ་ཏུ་རྟོགས་པས་ཡུལ་ཐམས་ཅད་ཀྱིས་རྨ་མི་འབྱུང་ངོ༌། །འདུ་ཤེས་ཀྱི་རྣམ་པ་ཐམས་ཅད་སྨིག་རྒྱུ་ལྟ་ བུར་ཤིན་ཏུ་བསྒོམས་པས་འཁོར་བའི་དགའ་བ་ཐམས་ཅད་ཀྱིས་མོས་པར་མི་འགྱུར་རོ། །སྒྱུ་མ་ལྟ་བུའི་ཆོས་ཐམས་ཅད་ལ་རྣམ་པར་རྩེ་བས་བདུད་ཀྱི་ཡུལ་ ཐམས་ཅད་ཀྱིས་མི་གོས་སོ། །ཆོས་ཀྱི་ལུས་སུ་བྱུང་བས་ཉོན་མོངས་པ་ཐམས་ཅད་དུ་སྨོས་སུ་མེད་དོ། །སྐྱེ་བ་ལ་དབང་རབ་ཏུ་ཐོབ་པས་འགྲོ་བའི་རྒྱུད་ཐམས་ཅད་རྟོགས་པར་ ཁོང་དུ་ཆུད་པ་ཡིན་ནོ། །རིགས་ཀྱི་བུ། དེ་ལྟར་ང་ནི། འཇིག་རྟེན་གྱི་ཁམས་ཐམས་ཅད་ཀྱི་སྐྱེ་གནས་ཀྱི་ཁོངས་སུ་ཆུད་པའི་ལུས་དང༌། འགྲོ་བ་ཐམས་ཅད་ཀྱི་གཟུགས་དང་ མཉམ་པའི་ཁ་དོག་གི་ཁྱད་པར་དང༌། སེམས་ཅན་ཐམས་ཅད་དང་མཉམ་པའི་ངེས་པའི་ཚིག་གི་བྱེ་བྲག་དང༌། འགྲོ་བ་ཐམས་ཅད་དང་མཉམ་པའི་མིང་རྣམ་པ་ཐ་དད་ པ་དང༌། སེམས་ཅན་ཐམས་ཅད་ཀྱི་མོས་པ་དང་མཉམ་པའི་སྤྱོད་ལམ་དང༌། འགྲོ་བ་རྣམ་པར་གདུལ་བ་ཐམས་ཅད་དང་མཉམ་པའི་འཇིག་རྟེན་གྱི་རྗེས་སུ་འབྲང་བ་དང་། སེམས་ཅན་རྣམ་པར་དག་པར་བྱ་བ་ཐམས་ཅད་དང་མཉམ་པའི་ཚེ་དང༌། རིགས་སུ་སྐྱེ་བ་ཡོངས་སུ་བསྟན་པ་དང༌། བྱིས་པའི་སྤྱོད་པ་ཐམས་ཅད་དང་མཉམ་པའི་བྱ་བ་ལ་ འཇུག་པའི་སྒོ་དང༌། སེམས་ཅན་གྱི་འདུ་ཤེས་ཀྱི་རྣམ་པ་ཐམས་ཅད་དང༌། མཉམ་པའི་ཡོངས་སུ་ཤེས་པར་བྱ་བ་ལ་འཇུག་པ་དང༌། བྱང་ཆུབ་སེམས་དཔའི་སྨོན་ལམ་གྱི་ སྤྲུལ་པ་ཐམས་ཅད་དང་མཉམ་པའི་ལུས་ཡོངས་སུ་བསྟན་ཅིང་བརྗོད་པས། ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། སྔོན་སྐལ་པ་མཉམ་པར་སྤྱོད་སྤྱོད་པའི་སེམས་ ༄༅། །ཅན་བྱང་ཆུབ་ཀྱི་སེམས་སྟོར་བར་གྱུར་པ་རྣམས་ཡོངས་སུ་སྨིན་པར་བྱ་བ་དང༌། འཛམ་བུའི་གླིང་དུ་སྐྱེས་པའི་ཚེ་ཡོངས་སུ་བསྟན་པ་དང༌། ལྷོ་ཕྱོགས་ཀྱི་ རྒྱུད་འདིའི་ཡུལ་ཕྲེང་བ་སྟོབས་ཀྱི་གྲོང་རྡལ་ཁང་ཁྱིམ་དང་ལྡན་པ་ཞེས་བྱ་བ་འདིའི་བྲམ་ཟེའི་རིགས་སུ་སྐྱེས་པ་རྣམས་དང༌། ཕ་མ་དང་གཉེན་བཤེས་སུ་འོང་བ་རྣམས་རྣམ་ པར་གདུལ་བ་དང༌། བྲམ་ཟེའི་རིགས་དང་རྒྱུད་ཀྱི་ཁྱད་པར་གྱིས་རིགས་ཀྱི་ང་རྒྱལ་ཅན་དུ་གྱུར་པ་འདི་དག་ང་རྒྱལ་མེད་པར་བྱས་ཏེ། དེ་བཞིན་གཤེགས་པའི་རིགས་སུ་ བསྐྱེད་པའི་དོན་དུ་འདིར་སྐྱེས་སོ། །རིགས་ཀྱི་བུ། དེ་ལྟར་ང་ལྷོ་ཕྱོགས་ཀྱི་རྒྱུད་འདི་ན་ཐབས་རྣམ་པ་འདི་ལྟ་བུས་སེམས་ཅན་བསམ་པའི་ཚུལ་ཇི་ལྟ་བུ་དང་ལྡན་པ་དང༌། རྣམ་ པ་ཇི་ལྟ་བུས་འདུལ་བ་རྣམས་ཡོངས་སུ་སྨིན་པར་བྱ་བ་དང༌། གདུལ་བ་བྱེད་ཅིང༌། ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་འདི་ན་ འདུག་གོ །འདི་ནས་ཤི་འཕོས་ནས་ཀྱང་བསམ་པའི་ཚུལ་ཇི་ལྟ་བ་བཞིན་དུ་སེམས་ཅན་རྣམས་ཀྱི་རྗེས་སུ་འབྲང་བར་བྱ་བ་དང༌། དགའ་ལྡན་གྱི་རིས་སུ་གཏོགས་པའི་ལྷའི་ བུ་སྐལ་པ་མཉམ་པར་སྤྱོད་སྤྱོད་པ་རྣམས་ཡོངས་སུ་སྨིན་པར་བྱ་བ་དང༌། འདོད་པའི་ཁམས་ནས་ཡོངས་སུ་འདས་པ་ཐམས་ཅད་ལའང་བྱང་ཆུབ་སེམས་དཔའི་བསོད་ ནམས་དང༌། ཡེ་ཤེས་དང༌། སྤྲུལ་པའི་རྒྱན་ཡོངས་སུ་བསྟན་པ་དང༌། འདོད་པའི་དགའ་བའི་སྲེད་པ་ལས་རྣམ་པར་བཟློག་པ་དང༌། འདུ་བྱེད་ཐམས་ཅད་མི་རྟག་པ་ཉིད་དུ་བསྟན་ པ་དང༌། ལྷར་སྐྱེས་པ་ཐམས་ཅད་ཀྱང་མཐར་རྒུད་པར་འགྱུར་བ་ཡོངས་སུ་བསྟན་པ་དང༌། ཡེ་ཤེས་ཆེན་པོའི་ཆོས་ཀྱི་སྒོ་འཆི་འཕོའི་རྣམ་པ་ཞེས་བྱ་བ་ཚེ་གཅིག་གིས་ཐོགས་ པའི་བྱང་ཆུབ་སེམས་དཔའ་རྣམས་དང་ཡང་དག་པར་བགྲོ་བར་བྱ་བ་དང༌། ལྷན་ཅིག་ཡོངས་སུ་སྨིན་པར་གྱུར་པ་རྣམས་དེར་སྐྱེ་བར་ཡོངས་སུ་བསྡུ་བར་བྱ་བ་དང༌། དེ་བཞིན་ གཤེགས་པ་ཤཱཀྱ་ཐུབ་པས་བཀྱེ་བའི་པདྨོ་རྣམས་ཀྱང་ཁ་དབྱེ་བའི་ཕྱིར་དགའ་ལྡན་གྱི་གནས་སུ་སྐྱེ་བ་ཡོངས་སུ་སྟོན་ཏེ། དུས་ལ་བབ་ལ་བསམ་པ་ཡོངས་སུ་རྫོགས་ནས་ནི། ཐམས་ཅད་མཁྱེན་པ་ཉིད་ཀྱང་ཐོབ་པར་བྱེད་ཀྱི། ངས་བྱང་ཆུབ་མཐོང་ནས་ཀྱང་རིགས་ཀྱི་བུ་ཁྱོད་དང༌། འཇམ་དཔལ་གཞོན་ནུར་གྱུར་པར་བཅས་པས་ད་དུང་ཡང་མཐོང་བར་ འགྱུར་རོ། །སོང་རིགས་ཀྱི་བུ། ད་དུང་ཡང་འཇམ་དཔལ་གཞོན་ནུར་གྱུར་པའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་ བ་དང༌། ཇི་ལྟར་ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ལ་འཇུག་པར་བྱ་བ་དང༌། ཇི་ལྟར་མངོན་པར་བསྒྲུབ་པ་དང༌། ཇི་ལྟར་སྨོན་པར་བྱ་བ་དང༌། ཇི་ལྟར་རྒྱས་པར་བྱ་ ༄༅། །བ་དང༌། ཇི་ལྟར་རྗེས་སུ་འབྲང་བར་བྱ་བ་དང༌། ཇི་ལྟར་ཡོངས་སུ་སྦྱང་བར་བྱ་བ་དང༌། ཇི་ལྟར་ཁོང་དུ་ཆུད་པར་བྱ་བ་དང༌། ཇི་ལྟར་ཡོངས་སུ་རྫོགས་ པར་བྱ་བ་དྲིས་ཤིག་དང༌། དགེ་བའི་བཤེས་གཉེན་དེས་ཁྱོད་ལ་སྟོན་པར་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པས་སྤྱོད་པ་མངོན་པར་སྒྲུབ་ པ་དེ་ལྟ་བུའི་སྨོན་ལམ་གྱི་ཁྱད་པར་ནི། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་ཕྲག་སྟོང་ལ་ཡང་མེད་དོ། །འཇམ་དཔལ་གཞོན་ནུར་གྱུར་པའི་སྨོན་ལམ་མངོན་ པར་སྒྲུབ་པ་ནི། ཚད་མེད་དོ། །འཇམ་དཔལ་གཞོན་ནུར་གྱུར་པའི་བྱང་ཆུབ་སེམས་དཔའི་ཡོན་ཏན་གྱི་ཁྱད་པར་ཐམས་ཅད་མངོན་པར་སྒྲུབ་པ་ནི། ཚད་མེད་དོ། །འཇམ་ དཔལ་གཞོན་ནུར་གྱུར་པ་ནི། སངས་རྒྱས་བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཡུམ་ལྟ་བུའོ། །འཇམ་དཔལ་གཞོན་ནུར་གྱུར་པ་ནི། བྱང་ཆུབ་སེམས་དཔའ་བྱེ་བ་ཁྲག་ཁྲིག་ བརྒྱ་ཕྲག་སྟོང་ལ་གདམས་ངག་སྟོན་པའོ། །འཇམ་དཔལ་གཞོན་ནུར་གྱུར་པ་ནི། སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་ལ་རབ་ཏུ་ བརྩོན་པའོ། །འཇམ་དཔལ་གཞོན་ནུར་གྱུར་པ་ནི། ཕྱོགས་བཅུའི་འཇིག་རྟེན་གྱི་ཁམས་སུ་མིང་གི་འཁོར་ལོས་རྣམ་པར་རྒྱས་པར་གྱུར་པའོ། །འཇམ་དཔལ་གཞོན་ནུར་ གྱུར་པ་ནི། དེ་བཞིན་གཤེགས་པའི་འཁོར་གྱི་དཀྱིལ་འཁོར་ཐམས་ཅད་དུ་གཏམ་གྱི་སྐྱེས་བུར་གྱུར་པའོ། །འཇམ་དཔལ་གཞོན་ནུར་གྱུར་པ་ནི། དེ་བཞིན་གཤེགས་པ་ ཐམས་ཅད་ཀྱིས་བསྔགས་ཤིང་བསྟོད་པའོ། །འཇམ་དཔལ་གཞོན་ནུར་གྱུར་པ་ནི། ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་མཐོང་བ་སྟེ། ཆོས་ཟབ་མོའི་ཡེ་ཤེས་ལ་རྣམ་ པར་སྤྱོད་པའོ། །འཇམ་དཔལ་གཞོན་ནུར་གྱུར་པ་ནི། རྣམ་པར་ཐར་པ་ཐམས་ཅད་ཀྱི་ཚུལ་ཐམས་ཅད་ལ་རིང་དུ་སོང་བའི་སྤྱོད་ཡུལ་དང་ལྡན་པ་སྟེ། བྱང་ཆུབ་སེམས་དཔའི་སྤྱོད་ པ་ཀུན་ཏུ་བཟང་པོ་ལ་ཞུགས་པའོ། །རིགས་ཀྱི་བུ། དགེ་བའི་བཤེས་གཉེན་དེ་ནི། ཁྱོད་དེ་བཞིན་གཤེགས་པའི་རིགས་སུ་སྐྱེད་པའོ། །དགེ་བའི་རྩ་བ་ཐམས་ཅད་ཡོངས་སུ་འཕེལ་ བར་བྱེད་པའོ། །བྱང་ཆུབ་སེམས་དཔའི་ཚོགས་མང་པོ་རབ་ཏུ་སྒྲུབ་པའོ། །ཡང་དག་པའི་དགེ་བའི་བཤེས་གཉེན་སྟོན་པའོ། །ཡོན་ཏན་ཐམས་ཅད་ལ་ཡང་དག་པར་སྐུལ་བའོ། ། སྨོན་ལམ་ཆེན་པོའི་དྲ་བ་ཐམས་ཅད་དུ་འཇུག་པའོ། །སྨོན་ལམ་མངོན་པར་སྒྲུབ་པ་ཐམས་ཅད་ལ་རབ་ཏུ་གཞོག་པའོ། །བྱང་ཆུབ་སེམས་དཔའ་ཐམས་ཅད་ཀྱི་གསང་བ་ཐོས་ པར་བྱེད་པའོ། །བྱང་ཆུབ་སེམས་དཔའི་བསམ་གྱིས་མི་ཁྱབ་པ་ཐམས་ཅད་ཡང་དག་པར་སྟོན་པའོ། །སྔོན་གྱི་ཚེའི་གནས་སུ་སྐལ་པ་མཐུན་པར་སྤྱོད་པའོ། །རིགས་ཀྱི་བུ། དེ་ ༄༅། །བས་ན༑ ཁྱོད་ད་ལྟར་ཡང་འཇམ་དཔལ་གྱི་རྐང་པའི་དྲུང་ན་འདུག་གི །ཡོན་ཏན་གྱི་གདམས་ངག་ཐམས་ཅད་ཐོབ་པར་བྱ་བ་དང༌། ཡོངས་སུ་སྐྱོ་བ་མ་ སྐྱེད་ཅིག །ཡོངས་སུ་སྒྱིད་ལུག་པར་མ་བྱེད་ཅིག །དེ་ཅིའི་ཕྱིར་ཞེ་ན། ནོར་བཟང༌། ཁྱོད་ཀྱིས་དགེ་བའི་བཤེས་གཉེན་ཇི་སྙེད་ཅིག་མཐོང་བ་དང༌། སྤྱོད་པའི་སྒོ་ཇི་སྙེད་ཅིག་ ཐོས་པ་དང༌། རྣམ་པར་ཐར་པའི་ཚུལ་ཇི་སྙེད་ཅིག་ལ་ཞུགས་པ་དང༌། སྨོན་ལམ་གྱི་ཁྱད་པར་ཇི་སྙེད་ཅིག་ཁོང་དུ་ཆུད་པ་དེ་དག་ཐམས་ཅད་ཀྱང་འཇམ་དཔལ་གཞོན་ནུར་ གྱུར་པའི་མཐུ་དང༌། བྱིན་གྱི་རླབས་སུ་བལྟ་སྟེ། འཇམ་དཔལ་གཞོན་ནུར་གྱུར་པ་ནི། ཐམས་ཅད་ལའང་ཕ་རོལ་ཏུ་ཕྱིན་པའི་མཆོག་ཐོབ་པའོ། །དེ་ནས་ཚོང་དཔོན་གྱི་བུ་ནོར་ བཟང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ ཡང་དང་ཡང་བལྟས་ཏེ་བྱང་ཆུབ་སེམས་དཔའ་བྱམས་པའི་དྲུང་ནས་སོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་གྲོང་ཁྱེར་བརྒྱ་རྩ་བཅུ་ཀུན་ཏུ་རྒྱུས་ཏེ་ཕྱོགས་ཀྱི་གནས་ཡིད་ བདེ་བ་མངོན་དུ་གྱུར་པ་ཞེས་བྱ་བ་ཞིག་ན་འཇམ་དཔལ་གཞོན་ནུར་གྱུར་པ་ལ་སེམས་ཤིང་རྣམ་པར་ལྟ་བས་འཇམ་དཔལ་གཞོན་ནུར་གྱུར་པ་མཐོང་བར་མོས་ཤིང་སྨོན་ ལ་ཕྲད་པར་དགའ་བས་སྡོད་ཅིང་འདུག་འདུག་པ་དང༌། དེ་ནས་འཇམ་དཔལ་གཞོན་ནུར་གྱུར་པས་དཔག་ཚད་བརྒྱ་རྩ་བཅུ་བཞིའི་ཕ་རོལ་ནས་ལག་པ་བརྐྱང་སྟེ་ཚོང་དཔོན་གྱི་བུ་ནོར་ བཟང་གྲོང་ཁྱེར་ཡིད་བདེ་བ་མངོན་དུ་གྱུར་པ་ན་འདུག་པའི་སྤྱི་བོར་བཞག་སྟེ་འདི་སྐད་ཅེས་སྨྲས་སོ། །རིགས་ཀྱི་བུ། ལེགས་སོ། །ལེགས་སོ། །དད་པའི་དབང་པོ་དང་མི་ལྡན་པ། སེམས་ སྐྱོ་བ་ཅན། བསམ་པ་ཞུམ་པ་ཅན། སྦྱོར་བ་བོར་བ། བརྩོན་འགྲུས་ལྡོག་པ། ཡོན་ཏན་ཅུང་ཟད་ཀྱིས་དགའ་བར་རྩི་བ། དགེ་བའི་རྩ་བ་གཅིག་ལ་ཞེན་པར་གནས་པ། སྤྱོད་པ་དང༌། སྨོན་ལམ་མངོན་པར་སྒྲུབ་པ་ལ་མི་མཁས་པ། དགེ་བའི་བཤེས་གཉེན་གྱིས་ཡོངས་སུ་མ་བཟུང་བ། སངས་རྒྱས་ཀྱིས་མ་དགོངས་པ་རྣམས་ཀྱིས་ནི། ཆོས་ཉིད་འདི་ལྟ་བུ་ཡོངས་ སུ་ཤེས་པར་བྱ་བ་དང༌། ཚུལ་འདི་ལྟ་བུ་དང༌། སྤྱོད་ཡུལ་འདི་ལྟ་བུ་དང༌། གནས་འདི་ལྟ་བུ་ཡོངས་སུ་ཤེས་པར་བྱ་བ་དང༌། རྣམ་པར་ཤེས་པར་བྱ་བའམ། ཁོང་དུ་ཆུད་པར་ བྱ་བའམ། འཇུག་པར་བྱ་བའམ། ཡིད་ཆེས་པར་བྱ་བའམ། བརྟག་པར་བྱ་བའམ། རྟོག་པར་བྱ་བའམ། ཐོབ་པར་བྱ་བར་མི་ནུས་སོ། །ཞེས་ཏེ། དེས་དེ་ལ་ཆོས་ཀྱི་གཏམ་ གྱིས་ཡང་དག་པར་བསྟན་པ་དང༌། ཡང་དག་པར་བསྐུལ་བ་དང༌། གཟེངས་བསྟོད་པ་དང༌། དགའ་བར་བྱས་ཏེ་ཆོས་ཀྱི་སྒོ་གྲངས་མེད་པ་དང་ལྡན་པར་བྱས་ནས་ཡེ་ཤེས་ ༄༅། །མཐའ་ཡས་པའི་སྣང་བ་ཆེན་པོ་ཐོབ་པར་བྱས་ཏེ་བྱང་ཆུབ་སེམས་དཔའི་གཟུངས་དང༌། སྤོབས་པ་དང༌། ཏིང་ངེ་འཛིན་དང༌། མངོན་པར་ཤེས་པ་དང༌། ཡེ་ཤེས་མཐའ་ཡས་པའི་བྱིན་གྱིས་བྱིན་དུ་བརླབས་པར་བྱས་ཏེ་ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ལ་བཞག་ནས་བདག་གི་ཡུལ་ལའང་རབ་ཏུ་བཞག་སྟེ། ཚོང་ དཔོན་གྱི་བུ་ནོར་བཟང་གི་དྲུང་ནས་སོང་ངོ༌། །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། སྡོང་པོས་བརྒྱན་པའི་ལེའུ་སྟེ། བཞི་བཅུ་རྩ་ ལྔ་པའོ།། ༑༑ཤིན་ཏུ་རྒྱས་པ་ཆེན་པོའི་མདོ། །སངས་རྒྱས་ཕལ་པོ་ཆེ་ཞེས་བྱ་བ་ལས། སྡོང་པོས་བརྒྱན་པའི་ལེའུ་སྟེ། བམ་པོ་བརྒྱ་བཅོ་ལྔ་པ་སྟེ། ཐ་མ། དེ་ནས་ཚོང་དཔོན་གྱི་ བུ་ནོར་བཟང་དགེ་བའི་བཤེས་གཉེན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་བསྙེན་བཀུར་བ། ཐམས་ཅད་མཁྱེན་པ་ཉིད་དུ་ཚོགས་ བསགས་པའི་སེམས་དང་ལྡན་པ། དགེ་བའི་བཤེས་གཉེན་ཐམས་ཅད་ཀྱི་གདམས་ངག་དང༌། རྗེས་སུ་བསྟན་པ་ལ་མཐུན་པར་འཛིན་པས་ཞུགས་པ། དགེ་བའི་བཤེས་ གཉེན་ཐམས་ཅད་ཀྱི་དྲུང་དུ་བསམ་པ་མཉམ་པས་འགྲོ་བ། དགེ་བའི་བཤེས་གཉེན་ཐམས་ཅད་དགའ་བར་བྱ་བས་ཡིད་མི་དབྱུང་བའི་བློ་དང་ལྡན་པ། དགེ་བའི་བཤེས་ གཉེན་ཐམས་ཅད་ཀྱི་གདམས་ངག་དང༌། རྗེས་སུ་བསྟན་པའི་ཚུལ་རྒྱ་མཚོའི་རྗེས་སུ་སོང་བ། སྙིང་རྗེ་ཆེན་པོའི་བསམ་པ་རྒྱ་མཚོ་ལས་ཡང་དག་པར་བྱུང་བའི་སྙིང་པོ་དང་ལྡན་ པ༑ བྱམས་པ་ཆེན་པོའི་ཚུལ་གྱི་སྤྲིན་གྱིས་འགྲོ་བ་ཐམས་ཅད་རྣམ་པར་སྣང་བར་བྱེད་པ། དགའ་བ་ཆེན་པོའི་ཤུགས་རྣམ་པར་འཕེལ་བའི་ལུས་དང་ལྡན་པ། བྱང་ཆུབ་སེམས་ དཔའི་རྣམ་པར་ཐར་པ་རྒྱ་ཆེན་པོ་ལ་རབ་ཏུ་ཞི་བར་རྣམ་པར་སྤྱོད་པ། སྒོ་ཐམས་ཅད་ནས་ལྷག་པར་འཕྲོ་བའི་གཏོང་བའི་མིག་དང་ལྡན་པ། དེ་བཞིན་གཤེགས་པ་ཐམས་ཅད་ ཀྱི་ཡོན་ཏན་རྒྱ་མཚོའི་ནན་ཏན་རབ་ཏུ་རྫོགས་པ། དེ་བཞིན་གཤེགས་པ་ཐམས་ཅད་ཀྱི་མོས་པའི་ལམ་དུ་ཞུགས་པ། ཐམས་ཅད་མཁྱེན་པ་ཉིད་ཀྱི་ཚོགས་ལ་བརྩོན་འགྲུས་ ཀྱི་ཤུགས་རྣམ་པར་འཕེལ་བས་བྱང་ཆུབ་སེམས་དཔའ་ཐམས་ཅད་ཀྱི་སེམས་དང༌། བསམ་པས་ཤིན་ཏུ་སྦྱངས་པའི་བློ་དང་ལྡན་པ། དུས་གསུམ་གྱི་དེ་བཞིན་གཤེགས་ པ་ཐམས་ཅད་གཅིག་ནས་གཅིག་ཏུ་བརྒྱུད་པ་ལ་ཞུགས་པ། སངས་རྒྱས་ཐམས་ཅད་ཀྱི་ཆོས་ཀྱི་ཚུལ་རྒྱ་མཚོ་ཁོང་དུ་ཆུད་པ། དེ་བཞིན་གཤེགས་པ་ཐམས་ཅད་ཀྱི་འཁོར་ ལོའི་རྒྱ་མཚོའི་རྗེས་སུ་སོང་བ། འཇིག་རྟེན་གྱི་སྐྱེ་གནས་ཐམས་ཅད་དུ་གཟུགས་བརྙན་ཡོངས་སུ་སྟོན་པའི་སྤྱོད་ཡུལ་དང་ལྡན་པ། བྱང་ཆུབ་སེམས་དཔའ་ཐམས་ཅད་ཀྱི་ ༄༅། །སྨོན་ལམ་གྱི་ཚུལ་རྒྱ་མཚོ་ལ་ཞུགས་པ། བསྐལ་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་རབ་ཏུ་ཞུགས་པ། ཐམས་ཅད་མཁྱེན་པ་ཉིད་ཀྱི་ ཡུལ་སྣང་བ་རབ་ཏུ་ཐོབ་པ། བྱང་ཆུབ་སེམས་དཔའི་དབང་པོ་ཐམས་ཅད་རྣམ་པར་འཕེལ་བ། ཐམས་ཅད་མཁྱེན་པའི་ལམ་སྣང་བ་རབ་ཏུ་ཐོབ་པ། ཕྱོགས་ཐམས་ཅད་དུ་སྒྲིབ་ པ་མེད་པའི་སྣང་བ་རབ་ཏུ་ཐོབ་པ། ཆོས་ཀྱི་དབྱིངས་ཐམས་ཅད་ཀྱི་ཚུལ་ལ་རབ་ཏུ་ཞུགས་པའི་བློ་དང་ལྡན་པ། ཞིང་གི་ཚུལ་ཐམས་ཅད་ལ་སྣང་བ་རབ་ཏུ་གྲུབ་པ། སེམས་ཅན་ འབྱམས་ཀླས་པ་ཐམས་ཅད་ཀྱི་དོན་བྱ་བ་ལ་རྒྱུད་དང་མི་མཐུན་པ་མེད་པར་རྗེས་སུ་སོང་བ། སྒྲིབ་པའི་གཡང་སའི་རི་ཐམས་ཅད་རྣམ་པར་འཐོར་བ། སྒྲིབ་པ་མེད་པའི་ཆོས་ཀྱི་ རྗེས་སུ་སོང་བ། བྱང་ཆུབ་སེམས་དཔའི་རྣམ་པར་ཐར་པ་སའི་གཞི་ཀུན་ཏུ་གནས་པའི་ཆོས་ཀྱི་དབྱིངས་ཀྱི་སྙིང་པོ་ཅན་ལ་རབ་ཏུ་ཞི་བར་རྣམ་པར་དཔྱོད་པ། དེ་བཞིན་ གཤེགས་པ་ཐམས་ཅད་ཀྱི་སྤྱོད་ཡུལ་རྗེས་སུ་ཚོལ་བ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་དེ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་ ཡུལ་ལ་རྣམ་པར་དཔྱོད་ཅིང་འདུག་པར་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོའི་མིང་ཐོས་པ་དང༌། བྱང་ཆུབ་སེམས་དཔའི་སྤྱོད་པ་ཐོས་ པ་དང༌། སྨོན་ལམ་གྱི་ཁྱད་པར་ཐོས་པ་དང༌། ཚོགས་ཡོངས་སུ་སྒྲུབ་པ་ལ་འཇུག་པ་དང༌། གནས་པའི་ཁྱད་པར་ཐོས་པ་དང༌། མངོན་པར་སྒྲུབ་པ་དང༌། འབྱུང་བའི་ལམ་གྱི་ཁྱད་པར་ ཐོས་པ་དང༌། ཀུན་ཏུ་བཟང་པོའི་སའི་ཚུལ་གྱི་རྒྱུད་ཐོས་པ་དང༌། སའི་ཚོགས་ཐོས་པ་དང༌། ས་ཐོབ་པར་བྱེད་པའི་ཤུགས་ཐོས་པ་དང༌། ས་ཡོངས་སུ་གནོན་པ་ཐོས་པ་དང༌། ས་ལ་ གནས་པ་ཐོས་པ་དང༌། ས་སྔོན་དུ་འདོར་བས་གནོན་པ་ཐོས་པ་དང༌། སའི་སྤྱོད་ཡུལ་ཐོས་པ་དང༌། སའི་བྱིན་གྱི་རླབས་ཐོས་པ་དང༌། ས་ལ་ཡང་དག་པར་གནས་པ་ཐོས་ནས་བྱང་ ཆུབ་སེམས་དཔའ་ཀུན་ཏུ་བཟང་པོ་མཐོང་བར་དགའ་ཞིང་སྐོམ་སྟེ་ནམ་མཁའི་དབྱིངས་ལྟར་ཤིན་ཏུ་ཡངས་པའི་སེམས་མངོན་པར་ཞེན་པ་ཐམས་ཅད་ལས་གྱེན་དུ་འཕགས་པ་ དང༌། ཞིང་གི་འདུ་ཤེས་ཤིན་ཏུ་བསྒོམས་པ་དང༌། ཆགས་པ་ཐམས་ཅད་ལས་ཡང་དག་པར་འདས་པའི་སེམས་ཆོས་ཐམས་ཅད་ལ་སྒྲིབ་པ་མེད་པའི་སྤྱོད་ཡུལ་ཅན་དང༌། ཐོགས་པ་མེད་པའི་སེམས་ཕྱོགས་རྒྱ་མཚོ་ཐམས་ཅད་རྒྱས་པར་འགེངས་པ་དང༌། སྒྲིབ་པ་མེད་པའི་སེམས་ཐམས་ཅད་མཁྱེན་པ་ཉིད་ཡུལ་ཡོངས་སུ་གནོན་པ་དང༌། ཤིན་ཏུ་ རྣམ་པར་དག་པའི་སེམས་སྙིང་པོ་བྱང་ཆུབ་ཀྱི་རྒྱན་ལྷག་མཐོང་གིས་ཡོངས་སུ་དག་པ་དང༌། ཤིན་ཏུ་རྣམ་པར་ཕྱེ་བའི་སེམས་སངས་རྒྱས་ཐམས་ཅད་ཀྱི་ཆོས་རྒྱ་མཚོ་ལ་ཞུགས་ ༄༅། །པ་དང༌། ཤིན་ཏུ་ཡངས་པའི་སེམས་སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བ་དང༌། གདུལ་བ་རྒྱས་པར་འགེངས་པ་དང༌། ཤིན་ ཏུ་ཆེ་བའི་སེམས་སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱེད་པ་དང༌། ཚད་མེད་པའི་སེམས་སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་གཟུགས་བརྙན་ རབ་ཏུ་འབྱུང་བ་དང༌། བསྐལ་པ་ཐམས་ཅད་དུ་གནས་པས་མི་ཟད་ཅིང་མཐར་ཐུག་པ་མེད་པའི་སེམས། དེ་བཞིན་གཤེགས་པ་ཐམས་ཅད་ཀྱི་སྟོབས་དང༌། མི་བསྙེངས་པ་ དང༌། སངས་རྒྱས་ཀྱི་ཆོས་ཀྱི་མ་འདྲེས་པའི་མཐར་ཐུག་པས་སྙིང་པོ་བྱང་ཆུབ་རྡོ་རྗེ་དམ་པའི་སྙིང་པོ་ཅན་དེ་ལ་པདྨོའི་སྟན་རིན་པོ་ཆེ་ཐམས་ཅད་ཀྱི་ལྷུན་ཅན་ཞིག་ལ་དེ་ བཞིན་གཤེགས་པའི་གདན་སེངྒེའི་ཁྲི་ལ་མངོན་པར་བལྟས་ཏེ་འདུག་གོ །དེ་ནས་ཚོང་དཔོན་གྱི་བུ་ནོར་བཟང་དེ་ལྟ་བུའི་བསམ་པ་དང༌། ཡིད་ལ་བྱ་བ་ལ་བརྩོན་པར་ གནས་པའི་སྔོན་གྱི་དགེ་བའི་རྩ་བའི་རླན་དང༌། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་དང༌། བྱང་ཆུབ་སེམས་དཔའ་ཀུན་ཏུ་བཟང་པོ་དང༌། སྔོན་གྱི་དགེ་ བའི་རྩ་བའི་སྐལ་པ་མཐུན་པས་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་འགྱུར་བར་སྔོན་གྱི་ལྟས་བཅུ་བྱུང་ངོ༌། །བཅུ་གང་ཞེ་ན། འདི་ལྟ་སྟེ། སངས་རྒྱས་ ཀྱི་ཞིང་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་ཀྱི་རྒྱན་རྣམ་པར་དག་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་མི་ཁོམ་པ་དང༌། ངན་སོང་དང༌། ངན་འགྲོའི་ལམ་ཐམས་ཅད་རྣམ་པར་བསལ་བས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་པདྨོའི་ཚལ་གྱི་རྒྱན་ལྟར་སངས་རྒྱས་ཀྱི་ཞིང་རྣམ་པར་ དག་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སེམས་ཅན་ཐམས་ཅད་ཀྱི་ལུས་དང༌། སེམས་དགའ་ཞིང་སིམ་པར་བྱེད་པས་རྣམ་པར་དག་པར་གྱུར་ཏོ། །སངས་ རྒྱས་ཀྱི་ཞིང་ཐམས་ཅད་རིན་པོ་ཆེ་ཐམས་ཅད་ཀྱི་རང་བཞིན་དུ་ཀུན་ཏུ་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སེམས་ཅན་གྱི་ཁམས་ཀུན་མཚན་ དང་དཔེ་བྱད་བཟང་པོས་རབ་ཏུ་བརྒྱན་པར་ཀུན་ནས་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་རྒྱན་དང་ལྷབ་ལྷུབ་ཀྱི་སྤྲིན་གྱིས་ཀུན་ཏུ་ཁེབས་ པར་ཀུན་ཏུ་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སེམས་ཅན་གྱི་ཁམས་ཐམས་ཅད་ཕན་ཚུན་བྱམས་པའི་སེམས་དང༌། ཕན་པའི་ སེམས་དང༌། གནོད་སེམས་མེད་པའི་སེམས་དང་ལྡན་པར་ཀུན་ནས་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སྙིང་པོ་བྱང་ཆུབ་ཀྱི་རྒྱན་གྱིས་ ༄༅། །བརྒྱན་པར་ཀུན་ནས་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སེམས་ཅན་ཐམས་ཅད་སངས་རྒྱས་རྗེས་སུ་དྲན་པ་ཡིད་ ལ་བྱ་བ་ལ་བརྩོན་པར་ཀུན་ནས་གནས་པས་རྣམ་པར་དག་པར་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་མཐོང་བར་འགྱུར་བའི་སྔོན་གྱི་ལྟས་ བཅུ་པོ་དེ་དག་བྱུང་བར་གྱུར་ཏོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མཐོང་བར་འགྱུར་བའི་སྔོན་གྱི་ལྟས་སྣང་བ་ཆེན་པོ་བཅུ་བྱུང་བར་གྱུར་ཏེ། བཅུ་གང་ ཞེ་ན༑ འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་ཤིན་ཏུ་ཕྲ་བ་རེ་རེ་ཞིང་ཡང་དེ་བཞིན་གཤེགས་པ་ཐམས་ཅད་ཀྱི་འོད་ཟེར་གྱི་དྲ་བ་ མང་པོ་རྣམ་པར་སྣང་བར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་སངས་རྒྱས་ཐམས་ཅད་ཀྱི་འོད་ ཀྱི་དཀྱིལ་འཁོར་མང་པོ་ཐོན་ཏེ། ཁ་དོག་གཅིག་པ་དང༌། ཁ་དོག་སྣ་ཚོགས་དང༌། ཁ་དོག་བརྒྱ་སྟོང་དུ་མར་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ།། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་རིན་པོ་ཆེ་ཐམས་ཅད་ཀྱི་སྤྲིན་དེ་བཞིན་གཤེགས་པ་ཐམས་ཅད་ཀྱི་ གཟུགས་བརྙན་རྣམ་པར་དམིགས་པར་བྱེད་པ་མང་པོ་ཐོན་ཏེ་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་ རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་དེ་བཞིན་གཤེགས་པ་ཐམས་ཅད་ཀྱི་འོད་འཕྲོ་བའི་འཁོར་ལོ་དང༌། དཀྱིལ་འཁོར་གྱི་སྤྲིན་མང་པོ་ཐོན་ཏེ་ཆོས་ཀྱི་དབྱིངས་ཐམས་ ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་སྤོས་དང༌། མེ་ཏོག་དང༌། ཕྲེང་བ་ དང༌། བྱུག་པ་དང༌། བདུག་པའི་སྤྲིན་མང་པོ་ཐོན་ཏེ་བྱང་ཆུབ་སེམས་དཔའ་ཀུན་ཏུ་བཟང་པོའི་ཡོན་ཏན་གྱི་ཆོས་རྒྱ་མཚོའི་སྤྲིན་ཐམས་ཅད་ཀྱི་འབྲུག་སྒྲ་རབ་ཏུ་སྒྲོག་ཅིང༌། ཕྱོགས་ བཅུའི་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་ཉི་ མ་དང༌། ཟླ་བ་དང༌། སྐར་མའི་སྤྲིན་མང་པོ་ཐོན་ཏེ་བྱང་ཆུབ་སེམས་དཔའ་ཀུན་ཏུ་བཟང་པོའི་འོད་རབ་ཏུ་འགྱེད་ཅིང༌། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་ལུས་ཐམས་ཅད་ཀྱི་དབྱིབས་ལྟར་འདུག་པའི་མར་མེའི་སྤྲིན་མང་པོ་ཐོན་ནས་ ༄༅། །སངས་རྒྱས་ཀྱི་འོད་ཟེར་ལྟར་རབ་ཏུ་སྣང་བར་བྱེད་ཅིང༌། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་ རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་ནོར་བུ་རིན་པོ་ཆེའི་གཟུགས་དེ་བཞིན་གཤེགས་པ་ཐམས་ཅད་ཀྱི་སྐུར་སྣང་བའི་སྤྲིན་མང་པོ་ཐོན་ནས་ཕྱོགས་ བཅུའི་འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ ཀྱང་འོད་ཟེར་གྱི་གཟུགས་དེ་བཞིན་གཤེགས་པ་ཐམས་ཅད་ཀྱི་སྐུའི་དབྱིབས་སུ་སྣང་བའི་སྤྲིན་མང་པོ་ཐོན་ཏེ་སངས་རྒྱས་ཐམས་ཅད་ཀྱི་བྱིན་གྱི་རླབས་དང༌། སྨོན་ལམ་གྱི་ སྤྲིན་གྱི་ཆར་མངོན་པར་འབེབས་ཤིང༌། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་བྱང་ཆུབ་སེམས་དཔའི་ལུས་ཀྱི་གཟུགས་བརྙན་གཟུགས་ཀྱི་རྣམ་པ་ཐམས་ཅད་ཀྱི་ཁ་དོག་ཏུ་སྣང་བའི་སྤྲིན་རྒྱ་མཚོ་སེམས་ཅན་ཐམས་ ཅད་གདོན་པའི་སྦྱོར་བ་དང་ལྡན་པ། སེམས་ཅན་ཐམས་ཅད་ཀྱི་ཆོས་ཀྱི་བསམ་པ་ཡོངས་སུ་རྫོགས་པར་སྒྲུབ་པ་མང་པོ་ཐོན་ཏེ་ཆོས་ཀྱི་དབྱིངས་ཐམས་ཅད་རྒྱས་པར་ འགེངས་པར་གྱུར་ཏོ། །བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་འགྱུར་བའི་སྔོན་གྱི་ལྟས་སྣང་བ་ཆེན་པོ་བཅུ་པོ་དེ་དག་བྱུང་བར་གྱུར་ཏོ། །དེ་ནས་ཚོང་དཔོན་གྱི་བུ་ནོར་ བཟང་གིས་སྔོན་གྱི་ལྟས་སུ་སྣང་བ་བཅུ་པོ་དེ་དག་མཐོང་ནས་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་འགྱུར་བའི་སྐབས་ནི། བྱེ། རང་གི་དགེ་བའི་རྩ་བས་ནི། བརྟན། དེ་ བཞིན་གཤེགས་པ་ཐམས་ཅད་ཀྱི་བྱིན་གྱིས་ནི། བརླབས། སངས་རྒྱས་ཐམས་ཅད་ཀྱི་ཆོས་ཀྱི་སྣང་བ་ནི། ཡང་དག་པར་སྐྱེས། བྱང་ཆུབ་སེམས་དཔའ་ཀུན་ཏུ་བཟང་པོའི་ སྤྱོད་པ་ལ་ནི། མངོན་དུ་གྱུར། བྱང་ཆུབ་སེམས་དཔའ་ཀུན་ཏུ་བཟང་པོ་ནི་སྨོན་ལམ་གྱི་བྱིན་གྱིས་ནི། བྱིན་དུ་བརླབས། དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་ལ་ནི། མངོན་པར་མོས། བྱང་ཆུབ་སེམས་དཔའི་སྤྱོད་ཡུལ་རླབས་པོ་ཆེ་ལ་ཤིན་ཏུ་ངེས་པའི་སྟོབས་དང་ཤུགས་ནི། རབ་ཏུ་ཐོབ། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་ན། ཐམས་ཅད་མཁྱེན་པ་ཉིད་ཐོབ་པ་དང་འདྲ་བར་ནི། སེམས། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་བྱ་བ་ལ་དབང་པོ་ནི། མངོན་དུ་གྱུར། བྱང་ཆུབ་སེམས་དཔའ་ ཀུན་ཏུ་བཟང་པོ་མཐོང་བར་བྱ་བ་ལ་བརྩོན་འགྲུས་ཀྱི་ཤུགས་ཆེན་པོ་ནི། ཐོབ། བྱང་ཆུབ་སེམས་དཔའ་ཀུན་ཏུ་བཟང་པོ་ཡོངས་སུ་བཙལ་བ་ལ་བརྩོན་འགྲུས་ཕྱིར་མི་ལྡོག་ ༄༅། །པའི་སྦྱོར་བ་དང་ནི། ལྡན། ཕྱོགས་ཐམས་ཅད་དུ་མངོན་དུ་གྱུར་པའི་དབང་པོའི་འཁོར་ལོ་དང༌། ཀུན་ཏུ་ལྟ་བས་ཡུལ་ཡོངས་སུ་གནོད་པའི་བྱང་ཆུབ་སེམས་ དཔའི་ལུས་དང༌། སངས་རྒྱས་མ་ལུས་པའི་ཞབས་ཀྱི་དྲུང་ན་བྱང་ཆུབ་སེམས་དཔའ་ཀུན་ཏུ་བཟང་པོ་འདུག་པའི་རྗེས་སུ་འབྲང་བའི་སེམས་དེ་བཞིན་གཤེགས་པ་ཐམས་ཅད་ དམིགས་པར་བྱ་བ་ལ་ཡང་དག་པར་བཏང་བ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་དམིགས་པ་ཡོངས་སུ་བཙལ་བ་དང་མི་འབྲལ་བའི་བསམ་པ་དང༌། བྱང་ཆུབ་སེམས་ དཔའ་ཀུན་ཏུ་བཟང་པོ་མཐོང་བར་བྱ་བའི་འདུ་ཤེས་ཀྱི་རྣམ་པའི་སྙིང་པོ་དང་ལྡན་པའི་ཡེ་ཤེས་ཀྱི་མིག་བྱང་ཆུབ་སེམས་དཔའ་ཀུན་ཏུ་བཟང་པོའི་ལམ་ལ་ཞུགས་པ་དང༌། ནམ་ མཁའི་དབྱིངས་ལྟར་ཡངས་པའི་བསམ་པ་དང༌། སྙིང་རྗེ་ཆེན་པོའི་རྡོ་རྗེ་ཐོགས་པའི་ལྷག་པའི་བསམ་པ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་རྗེས་སུ་འབྲང་བར་སྨོན་ པ༑ ཕྱི་མའི་མཐའི་བསྐལ་པའི་མུར་ཐུག་པར་བྱིན་གྱིས་བརླབས་པ་དང༌། ཡོངས་སུ་གནོན་པའི་རྩལ་རྣམ་པར་དག་པ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ མཉམ་པ་ཉིད་ཀྱི་རྗེས་སུ་སོང་བ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་ས་ལ་གནས་པའི་ཡེ་ཤེས་ལ་རྣམ་པར་སྤྱོད་པ། དེ་བཞིན་གཤེགས་པ་ཐམས་ཅད་ཀྱི་ཡུལ་ ལ་ཡང་དག་པར་གནས་པ་དང་ནི་ལྡན་པ་དེས་བྱང་ཆུབ་སེམས་དཔའ་ཀུན་ཏུ་བཟང་པོ་དེ་བཞིན་གཤེགས་པ་ཐམས་ཅད་ནས་མཉམ་པ་ཉིད་རྗེས་སུ་ཐོབ་པ། དུས་གསུམ་མཉམ་པ་ ཉིད་ཀྱི་རྗེས་སུ་སོང་བ། བསམ་གྱིས་མི་ཁྱབ་པའི་ཡུལ་དང་ལྡན་པ། མི་འཕྲོག་པའི་སྤྱོད་ཡུལ་ཅན། མུ་མེད་པའི་ཡེ་ཤེས་ཀྱི་ཡུལ་དང་ལྡན་པ། བྱང་ཆུབ་སེམས་དཔའ་ཐམས་ ཅད་ཀྱིས་རྣམ་པར་བལྟ་བ། འཇིག་རྟེན་ཐམས་ཅད་ཀྱིས་ཟིལ་གྱིས་མི་ནོན་པ། འཁོར་གྱི་དཀྱིལ་འཁོར་ཐམས་ཅད་ཀྱི་རྗེས་སུ་འབྲང་ན་མངོན་པར་འཕགས་པའི་ལུས་དང་ལྡན་ པ་དེ། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྤྱན་སྔ་ན་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ན་ནི། འདུག །བྱང་ཆུབ་སེམས་དཔའི་ ཚོགས་ཀྱིས་ནི། ཡོངས་སུ་བསྐོར། བྱང་ཆུབ་སེམས་དཔའི་དགེ་འདུན་ན། མདུན་དུ་བྱས་ཤིང༌། སེངྒེའི་ཁྲི་རིན་པོ་ཆེའི་པདྨོ་ཆེན་པོའི་སྙིང་པོ་ཅན་ཞིག་ལ་འདུག་པ་མཐོང་སྟེ། དེས་དེའི་ བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འོད་ཟེར་གྱི་སྤྲིན་མང་པོ་ཐོན་ནས་འཇིག་རྟེན་གྱི་ཁམས་ཆོས་ཀྱི་ དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་རབ་ཏུ་སྣང་བར་བྱས་ནས་སེམས་ཅན་རྣམས་ཀྱི་སྡུག་བསྔལ་རབ་ཏུ་ཞི་བར་བྱེད་པ་མཐོང་ངོ༌། །དེས་དེའི་ལུས་ ༄༅། །པདྨོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་འདི་ཉིད་ཡོངས་སུ་སྟོན་པར་མཐོང་བ་དེ་བཞིན་དུ་ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་ཐམས་ ཅད་ཀྱི་རྡུལ་ཤིན་ཏུ་ཕྲ་བ་དག་ལ་རྡུལ་ཤིན་ཏུ་ཕྲ་བ་རེ་རེའི་སངས་རྒྱས་ཀྱི་འཁོར་གྱི་དཀྱིལ་འཁོར་ཆོས་ཀྱི་དབྱིངས་ལྟར་རྒྱ་ཆེ་བ་དག་ན་བྱང་ཆུབ་སེམས་དཔའ་ཀུན་ཏུ་བཟང་པོ་དེ་ བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་སེངྒེའི་ཁྲི་རིན་པོ་ཆེའི་པདྨོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་འདི་ཉིད་ཡོངས་སུ་སྟོན་པ་མཐོང་ངོ༌། །དེའི་ལུས་ རེ་རེ་ལས་ཀྱང་དུས་གསུམ་དུ་བྱུང་བའི་དམིགས་པ་ཐམས་ཅད་གཟུགས་བརྙན་གྱི་ཚུལ་དུ་རྣམ་པར་དམིགས་པར་མངོན་པར་བསྟན་པ་མཐོང་ངོ༌། །ཞིང་ཐམས་ཅད་དང༌། སེམས་ ཅན་ཐམས་ཅད་དང༌། སངས་རྒྱས་བྱུང་བ་ཐམས་ཅད་དང༌། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་གཟུགས་བརྙན་གྱི་ཚུལ་དུ་རྣམ་པར་དམིགས་པར་ མངོན་དུ་བསྟན་པ་མཐོང་ངོ༌། །སེམས་ཅན་ཐམས་ཅད་ཀྱི་སྒྲ་དང༌། སངས་རྒྱས་ཐམས་ཅད་ཀྱི་དབྱངས་དང༌། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་དང༌། གདམས་ངག་ཡོངས་སུ་བསྟན་པའི་ཆོ་འཕྲུལ་ཐམས་ཅད་དང༌། བྱང་ཆུབ་སེམས་དཔའི་ཡང་དག་པར་བསྡུ་བ་ཐམས་ཅད་དང༌། སངས་རྒྱས་ཐམས་ཅད་ཀྱི་རྣམ་པར་རོལ་ པ་དག་ཀྱང་ཐོས་པར་གྱུར་ཏོ། །དེས་དེ་ལྟར་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་རྩེ་བ་དེ་ལྟ་བུ་དག་མཐོང་སྟེ། ཐོས་ནས་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམས་ པ་བཅུ་ཐོབ་པར་གྱུར་ཏོ། །བཅུ་གང་ཞེ་ན། འདི་ལྟ་སྟེ། སེམས་ཀྱི་སྐད་ཅིག་གཅིག་ལ་སངས་རྒྱས་ཀྱི་ཞིང་ཐམས་ཅད་ལུས་ཀྱིས་རྒྱས་པར་དགང་བའི་ཡེ་ཤེས་ཀྱི་ཕ་རོལ་ཏུ་ཕྱིན་ པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་འགྲོ་བ་ལ་ཐ་མི་དད་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་ གྱུར་ཏོ༑ ༑དེ་བཞིན་གཤེགས་པ་ཐམས་ཅད་མཆོད་ཅིང་རིམ་གྲོར་བྱ་བའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ ཅད་ལས་དེ་བཞིན་གཤེགས་པ་རེ་རེ་ལས་ཀྱང་སངས་རྒྱས་ཀྱི་ཆོས་ཐམས་ཅད་ཡོངས་སུ་ཞུས་པ་རབ་ཏུ་བླང་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་ གྱུར་ཏོ༑ ༑དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་ངེས་པར་རྟོགས་པར་བྱ་བའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སངས་ བརྒྱ་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །ཐ་དད་པ་ཡང་དག་པར་ཡེ་ཤེས་ཟད་མི་ཤེས་ ༄༅། །འཁོར་དག་ཏུ་རིན་པོ་ཆེའི་ཆར་ཆེན་པོ་མངོན་པར་འབབ་པར་བྱེད་པ་མཐོང་ངོ༌། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་གཟུགས་ཀྱི་ཁམས་ ཀྱི་ལྷའི་རིས་ཀྱི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་ཐོན་ནས་བྱང་ཆུབ་སེམས་དཔའ་ལ་ཡང་དག་པར་བསྔགས་པ་བྱེད་ཅིང་སངས་རྒྱས་ཀྱི་ ཞིང་ཐམས་ཅད་རྒྱས་པར་འགེངས་པ་མཐོང་ངོ༌། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་ཚངས་པའི་རྒྱུད་དུ་གཏོགས་པའི་ལྷའི་རིས་ཐམས་ཅད་སྤྲུལ་པའི་སྤྲིན་ མང་པོ་མངོན་པར་ཐོན་ཏེ་མངོན་པར་སངས་རྒྱས་པའི་དེ་བཞིན་གཤེགས་པ་རྣམས་ལ་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པར་མཐོང་ངོ༌། །བ་སྤུའི་བུ་ག་ཐམས་ ཅད་ཀྱི་བ་སྤུའི་སྒོ་རེ་རེ་ནས་ཀྱང་འདོད་པའི་ཁམས་ཐམས་ཅད་དུ་གཏོགས་པའི་ལྷའི་དབང་པོའི་ལུས་ཀྱི་སྤྲིན་མང་པོ་མངོན་པར་ཐོན་ཏེ་དེ་བཞིན་གཤེགས་པ་ཐམས་ཅད་ཀྱི་ ཆོས་ཀྱི་འཁོར་ལོ་མང་པོ་ཡང་དག་པར་འཛིན་པར་མཐོང་ངོ༌། །བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་སེམས་ཀྱི་སྐད་ཅིག་རེ་རེ་ལ་སངས་རྒྱས་ཀྱི་ཞིང་གི་སྤྲིན་དུས་ གསུམ་དུ་གཏོགས་པའི་སངས་རྒྱས་ཀྱི་ཞིང་ཐམས་ཅད་དང་འདྲ་བ། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་ཐོན་ནས་ཆོས་ཀྱི་དབྱིངས་ནམ་མཁའི་ མཐས་ཀླས་པ་ཐམས་ཅད་རྒྱས་པར་བཀང་སྟེ་སེམས་ཅན་གནས་མེད་པ་དང༌། སྐྱབས་མེད་པ་དང༌། རྟེན་མེད་པ་རྣམས་ཀྱི་གནས་དང༌། སྐྱབས་དང༌། རྟེན་དུ་གྱུར་པ་མཐོང་ངོ༌། །བ་ སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་སེམས་ཀྱི་སྐད་ཅིག་རེ་རེ་ལས་སངས་རྒྱས་ཀྱི་ཞིང་ཡོངས་སུ་དག་པ་སངས་རྒྱས་བྱུང་བ་དང༌། བྱང་ཆུབ་སེམས་དཔའི་འཁོར་གྱི་དཀྱིལ་ འཁོར་ཐམས་ཅད་ཀྱིས་ཡོངས་སུ་གང་བའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་ཐོན་ནས་ཆོས་ཀྱི་དབྱིངས་ནམ་མཁའི་མཐས་ཀླས་པ་ཐམས་ཅད་ རྒྱས་པར་བཀང་སྟེ་སེམས་ཅན་མོས་པ་རླབས་པོ་ཆེ་རྣམས་ཡོངས་སུ་དག་པར་སྒྲུབ་པ་མཐོང་ངོ༌། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སེམས་ཀྱི་སྐད་ཅིག་རེ་རེ་ ལ་སངས་རྒྱས་ཀྱི་ཞིང་རྣམ་པར་དག་པ་ལ་ཀུན་ནས་ཉོན་མོངས་པ། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་སྤྲིན་མང་པོ་མངོན་པར་ཐོན་ནས་ཆོས་ཀྱི་དབྱིངས་ ནམ་མཁའི་དབྱིངས་ཀྱི་མཐས་ཀླས་པ་ཐམས་ཅད་རྒྱས་པར་བཀང་སྟེ་ཀུན་ནས་ཉོན་མོངས་པའི་སེམས་ཅན་རྣམས་རྣམ་པར་དག་པར་སྒྲུབ་པ་མཐོང་ངོ༌། །བ་སྤུའི་བུ་ག་རེ་རེའི་ བ་སྤུའི་སྒོ་ཐམས་ཅད་ལས་སེམས་ཀྱི་སྐད་ཅིག་རེ་རེ་ལ་སངས་རྒྱས་ཀྱི་ཞིང་ཀུན་ནས་ཉོན་མོངས་པ་རྣམ་པར་དག་པ། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་ ༄༅། །སྙེད་ཀྱི་སྤྲིན་མང་པོ་མངོན་པར་ཐོན་ནས་ཆོས་ཀྱི་དབྱིངས་ནམ་མཁའི་དབྱིངས་ཀྱིས་ཀླས་པ་ཐམས་ཅད་རྒྱས་པར་བཀང་སྟེ་སེམས་ཅན་གཅིག་ཏུ་ཀུན་ནས་ ཉོན་མོངས་པ་རྣམས་རྣམ་པར་དག་པ་སྒྲུབ་པ་མཐོང་ངོ༌། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ལས་ཀྱང་སེམས་ཅན་ཐམས་ཅད་ཀྱི་ལུས་ཀྱི་སྤྲིན་སངས་རྒྱས་ཀྱི་ ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་ཐོན་ཏེ་སེམས་ཅན་གྱི་ཁམས་ནམ་མཁའི་དབྱིངས་ཀྱིས་ཀླས་པ་ཐམས་ཅད་རྒྱས་པར་བཀང་ནས་སེམས་ཅན་ཐམས་ ཅད་ཀྱི་སྤྱོད་པའི་རྗེས་སུ་འབྲང་བར་བྱེད་ཅིང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་མཐོང་ངོ༌། །བ་སྤུའི་བུ་ག་ ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སེམས་ཀྱི་སྐད་ཅིག་རེ་རེ་ལ་བྱང་ཆུབ་སེམས་དཔའི་ལུས་ཀྱི་སྤྲིན་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ མངོན་པར་ཐོན་ནས་ཆོས་ཀྱི་དབྱིངས་ནམ་མཁའི་དབྱིངས་ཀྱིས་ཀླས་པ་ཐམས་ཅད་རྒྱས་པར་བཀང་སྟེ་སེམས་ཅན་ཐམས་ཅད་ཀྱི་དགེ་བའི་རྩ་བ་རྣམ་པར་འཕེལ་བར་བྱ་ བའི་ཕྱིར་སངས་རྒྱས་ཐམས་ཅད་ཀྱི་མཚན་མང་པོ་རྗོད་པར་བྱེད་པར་མཐོང་ངོ༌། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་བྱང་ཆུབ་སེམས་དཔའི་ལུས་ཀྱི་སྤྲིན་ སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་ཐོན་ཏེ་ཆོས་ཀྱི་དབྱིངས་ནམ་མཁའི་དབྱིངས་ཀྱིས་ཀླས་པ་ཐམས་ཅད་རྒྱས་པར་བཀང་ནས་སངས་རྒྱས་ཀྱི་ཞིང་ འབྱམས་ཀླས་པ་ཐམས་ཅད་དུ་བྱང་ཆུབ་སེམས་དཔའ་ཐམས་ཅད་ཀྱི་སེམས་དང་པོ་བསྐྱེད་པ་ནས་ཉེ་བར་བཟུང་བའི་དགེ་བའི་རྩ་བ་ཐམས་ཅད་མངོན་པར་སྒྲུབ་པ་ཉེ་བར་སྒྲུབ་པ་ མཐོང་ངོ༌། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་བྱང་ཆུབ་སེམས་དཔའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་ཐོན་ཏེ་ སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་རྣམ་པར་དག་པར་བྱ་བའི་ཕྱིར་བྱང་ཆུབ་སེམས་དཔའི་སྨོན་ལམ་རྒྱ་མཚོ་ཐམས་ཅད་མངོན་ པར་རྗོད་པ་མཐོང་ངོ༌། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱ་བའི་དོན་དུ་བྱང་ཆུབ་སེམས་ དཔའ་ཀུན་ཏུ་བཟང་པོའི་སྤྱོད་པའི་སྤྲིན་ཐམས་ཅད་མཁྱེན་པ་ཉིད་དུ་ཡང་དག་པར་འབྱུང་བ། དགའ་བའི་ཤུགས་རྣམ་པར་འཕེལ་བར་བྱེད་པ་སངས་རྒྱས་ཀྱི་ཞིང་ཐམས་ཅད་ཀྱི་ རྡུལ་ཤིན་ཏུ་ཕྲ་བ་སྙེད་ཀྱི་ཆར་མངོན་པར་ཐོན་ནས་མངོན་པར་འབབ་པ་མཐོང་ངོ༌། །དེས་དེའི་བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་མངོན་པར་རྫོགས་པར་ ༄༅། །འཚང་རྒྱ་བའི་སྤྲིན་སངས་རྒྱས་ཀྱི་ཞིང་ཐམས་ཅད་དུ་མངོན་པར་རྫོགས་པར་འཚང་རྒྱ་བར་སྟོན་པ། ཐམས་ཅད་མཁྱེན་པ་ཉིད་དུ་ཡང་དག་པར་འབྱུང་ བའི་ཆོས་ཀྱི་སྤྲིན་ཆེན་པོ་རྣམ་པར་འཕེལ་བར་བྱེད་པ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་ཐོན་པར་མཐོང་ངོ༌། །དེ་ནས་ཚོང་དཔོན་གྱི་བུ་ནོར་ བཟང་གིས་བྱང་ཆུབ་སེམས་དཔའ་ཀུན་ཏུ་བཟང་པོའི་རྫུ་འཕྲུལ་གྱི་ཡུལ་དེ་ལྟ་བུ་མཐོང་ནས་དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས་དེ་ བས་ཀྱང་ཤས་ཆེར་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ལ་སེམས་སེམས་པ་དང༌། བྱང་ཆུབ་སེམས་དཔའ་ཀུན་ཏུ་བཟང་པོའི་ཡན་ལག་རེ་རེ་དང༌། ཡན་ལག་ རྣམ་པར་ཕྱེ་བ་རེ་རེ་དང༌། ལུས་ཀྱི་ཆ་རེ་རེ་དང༌། ལུས་ཀྱི་ཆ་རྣམ་པར་ཕྱེ་བ་རེ་རེ་དང༌། ཡན་ལག་གི་ཕྱོགས་རེ་རེ་དང༌། ཡན་ལག་གི་ཕྱོགས་རྣམ་པར་ཕྱེ་བ་རེ་རེ་དང༌། ལུས་ རེ་རེ་དང༌། ལུས་རྣམ་པར་ཕྱེ་བ་རེ་རེ་དང༌། བ་སྤུའི་བུ་ག་རེ་རེ་དང༌། བ་སྤུའི་བུ་ག་རྣམ་པར་ཕྱེ་བ་རེ་རེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རླུང་ གི་ཕུང་པོ་དང་བཅས། ཆུའི་ཕུང་པོ་དང་བཅས། སའི་ཕུང་པོ་དང་བཅས། མེའི་ཕུང་པོ་དང་བཅས། རྒྱ་མཚོ་དང་བཅས། གླིང་དང་བཅས། ཆུ་ཀླུང་དང་བཅས། རིན་པོ་ཆེའི་ རི་དང་བཅས། རི་རབ་དང་བཅས། ཁོར་ཡུག་དང་བཅས། གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་དང༌། ཁམས་དང༌། རྒྱལ་པོའི་གནས་དང་བཅས། ནགས་ཚལ་དང་བཅས་ ཁང་ཁྱིམ་དང་བཅས། སྐྱེ་བོའི་ཚོགས་དང་བཅས། སེམས་ཅན་དམྱལ་བའི་འཇིག་རྟེན་དང་བཅས། བྱོལ་སོང་གི་སྐྱེ་གནས་དང་བཅས། གཤིན་རྗེའི་འཇིག་རྟེན་དང་བཅས། ལྷ་ མ་ཡིན་གྱི་འཇིག་རྟེན་དང་བཅས། ཀླུའི་འཇིག་རྟེན་དང་བཅས། ནམ་མཁའ་ལྡིང་གི་འཇིག་རྟེན་དང་བཅས། མིའི་འཇིག་རྟེན་དང་བཅས། ལྷའི་འཇིག་རྟེན་དང་བཅས། ཚངས་ པའི་འཇིག་རྟེན་དང་བཅས། འདོད་པའི་ཁམས་ཀྱི་ཡུལ་དང་བཅས། གཟུགས་ཀྱི་ཁམས་ཀྱི་ཡུལ་དང་བཅས། གཟུགས་མེད་པའི་ཁམས་ཀྱི་ཡུལ་དང་བཅས། གཞི་དང་ བཅས༑ རྟེན་དང་བཅས། དབྱིབས་དང་བཅས། སྤྲིན་དང་བཅས། གློག་དང་བཅས། སྐར་མ་དང་བཅས། ཉིན་ཞག་དང་བཅས། ཟླ་བ་ཕྱེད་དང་བཅས། ཟླ་བ་གཅིག་དང་བཅས། དུས་དང་བཅས། ལོ་དང་བཅས། བསྐལ་པ་བར་མ་དང་བཅས། བསྐལ་པ་དང་བཅས་པར་གཟུགས་བརྙན་གྱི་ཚུལ་དུ་མཐོང་ངོ༌། །འཇིག་རྟེན་གྱི་ཁམས་འདི་ལ་ཇི་ལྟ་བ་དེ་ བཞིན་དུ་ཤར་ཕྱོགས་ཀྱི་འཇིག་རྟེན་གྱི་ཁམས་ཀྱང་མཐོང་བར་གྱུར་ཏོ། །ཤར་ཕྱོགས་ལ་ཇི་ལྟ་བ་དེ་བཞིན་དུ་ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་དང༌། བྱང་ ༄༅། །ཤར་གྱི་ཕྱོགས་མཚམས་དང༌། ཤར་ལྷོའི་ཕྱོགས་མཚམས་དང༌། ལྷོ་ནུབ་ཀྱི་ཕྱོགས་མཚམས་དང༌། ནུབ་བྱང་གི་ཕྱོགས་མཚམས་དང༌། འོག་དང་ སྟེང་གི་ཕྱོགས་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་ཀྱང་སངས་རྒྱས་བྱུང་བ་དང་བཅས། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པར་གཟུགས་ བརྙན་གྱི་ཚུལ་དུ་མཐོང་བར་གྱུར་ཏོ། །དེས་མི་མཇེད་ཀྱི་འཇིག་རྟེན་གྱི་ཁམས་འདིའི་སྔོན་གྱི་མཐའི་མུར་ཐུག་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཇི་ སྙེད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་མི་ཆེན་པོའི་མཚན་རེ་རེ་ལས་སངས་རྒྱས་བྱུང་བ་དང་བཅས། བྱང་ཆུབ་སེམས་དཔའི་འཁོར་གྱི་ དཀྱིལ་འཁོར་ཐམས་ཅད་དང་བཅས། སེམས་ཅན་དང་བཅས། ཁང་ཁྱིམ་དང་བཅས། ཉིན་ཞག་དང་བཅས། བསྐལ་པ་དང་བཅས་པར་མཐོང་བར་གྱུར་ཏོ། །དེ་བཞིན་དུ་ཕྱི་ མའི་མཐའི་མུར་ཐུག་པའི་སངས་རྒྱས་ཀྱི་ཞིང་འབྱམས་ཀླས་པ་ཐམས་ཅད་ཀྱང་མཐོང་བར་གྱུར་ཏོ། །ཇི་ལྟར་འཇིག་རྟེན་གྱི་ཁམས་འདིའི་སྔོན་གྱི་མཐའ་དང༌། ཕྱི་མའི་ མཐའི་མུར་ཐུག་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་མཐོང་བར་གྱུར་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་ སྔོན་གྱི་མཐའ་དང༌། ཕྱི་མའི་མཐའི་མུར་ཐུག་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ དང༌། མི་ཆེན་པོའི་མཚན་རེ་རེ་དང༌། བ་སྤུའི་བུ་ག་རེ་རེ་ནས་ཤིན་ཏུ་རྣམ་པར་ཕྱེ་བ་དང༌། ཕན་ཚུན་མ་འདྲེས་པར་མཐོང་བར་གྱུར་ཏོ། །བྱང་ཆུབ་སེམས་དཔའ་ཀུན་ཏུ་བཟང་ པོ་ཡང་ཇི་ལྟར་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྤྱན་སྔ་ནས་སེངྒེའི་ཁྲི་རིན་པོ་ཆེའི་པདྨོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་ འདི་ལྟ་བུ་ཡོངས་སུ་སྟོན་པར་མཐོང་བ་དེ་བཞིན་དུ་ཤར་ཕྱོགས་ནའང་བཅོམ་ལྡན་འདས་དེ་བཞིན་གཤེགས་པ་བཟང་པོའི་དཔལ་གྱི་འཇིག་རྟེན་གྱི་ཁམས་པདྨོའི་དཔལ་ན་ རྣམ་པར་རྩེ་བ་འདི་ཉིད་ཡོངས་སུ་སྟོན་ཅིང་འདུག་པར་མཐོང་ངོ༌། །ཤར་ཕྱོགས་ན་ཇི་ལྟ་བ་དེ་བཞིན་དུ་ཕྱོགས་དང་ཕྱོགས་མཚམས་ཀུན་ཏུ་འཇིག་རྟེན་གྱི་ཁམས་ཐམས་ཅད་ ཀྱི་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་བྱང་ཆུབ་སེམས་དཔའ་ཀུན་ཏུ་བཟང་པོ་སེངྒེའི་ཁྲི་རིན་པོ་ཆེའི་པདྨོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་ འདི་ཉིད་ཡོངས་སུ་སྟོན་པ་མཐོང་ངོ༌། །ཇི་ལྟར་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་སེངྒེའི་ཁྲི་རིན་པོ་ཆེའི་ ༄༅། །ལས་འོད་ཀྱི་དཀྱིལ་འཁོར་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་སྤྲིན་མང་པོ་ཁ་དོག་སྣ་ཚོགས་ཅན་མང་པོ་ཐོན་ཏེ། བྱང་ཆུབ་སེམས་ དཔའ་ཐམས་ཅད་ཀྱི་དགའ་བ་དང༌། མོས་པའི་ཤུགས་རྒྱ་ཆེན་པོ་རྣམ་པར་འཕེལ་བར་བྱེད་པ་མཐོང་ངོ༌། །སྤྱི་པོ་དང་ཕྲག་པའི་ལྷུན་གཉིས་དང༌། བ་སྤུའི་སྒོ་ཐམས་ཅད་ནས་ ཀྱང་སྤོས་འོད་འཕྲོ་བའི་སྤྲིན་གྱི་ཆར་ཁ་དོག་སྣ་ཚོགས་སུ་འདུག་པ་མང་པོ་མངོན་པར་ཐོན་ནས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱས་པར་ བཀང་སྟེ་མངོན་པར་འབབ་པ་མཐོང་ངོ༌། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་མེ་ཏོག་ཐམས་ཅད་ཀྱི་སྤྲིན་གྱི་ཆར་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ ཤིན་ཏུ་ཕྲ་བ་སྙེད་མང་པོ་མངོན་པར་ཐོན་ནས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱས་པར་བཀང་སྟེ་མངོན་པར་འབབ་པ་མཐོང་ངོ༌། །བ་སྤུའི་བུ་ག་ ཐམས་ཅད་ལས་བ་སྤུའི་སྒོ་རེ་རེ་ལས་ཀྱང་སྤོས་སྣ་ཚོགས་ཀྱི་ཤིང་གི་སྤྲིན་མང་པོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་ཐོན་ནས་ཆོས་ཀྱི་དབྱིངས་ ནམ་མཁའི་དབྱིངས་ཀྱི་མཐས་ཀླས་པ་ཐམས་ཅད་རྒྱས་པར་བཀང་ནས་སྤོས་ཀྱི་ཤིང་གི་སྤྲིན་གྱི་རྒྱན་གྱིས་བརྒྱན་པར་བྱས་ཏེ་སྤོས་དང༌། ཕྱེ་མ་དང༌། བདུག་པའི་མཛོད་ཟད་མི་ ཞེས་པའི་ཆར་རབ་ཏུ་འགྱེད་ཅིང༌། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱས་པར་བཀང་སྟེ་མངོན་པར་འབབ་པར་བྱེད་པ་མཐོང་ངོ༌། །བ་སྤུའི་སྒོ་ཐམས་ ཅད་ལས་བ་སྤུའི་སྒོ་རེ་རེ་ནས་ཀྱང་གོས་སྣ་ཚོགས་ཀྱི་སྤྲིན་མང་པོ་མངོན་པར་ཐོན་ཏེ། ཆོས་ཀྱི་དབྱིངས་ནམ་མཁའི་དབྱིངས་ཀྱི་མཐས་ཀླས་པ་ཐམས་ཅད་ཀུན་ནས་ཡོག་པར་བྱས་ ནས་བརྒྱན་པར་མཐོང་ངོ༌། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་དར་སྣ་ཚོགས་ཀྱི་ལྡ་ལྡིའི་སྤྲིན་དང༌། ཕྲེང་བ་སྣ་ཚོགས་ཀྱི་སྤྲིན་དང༌། མུ་ཏིག་སྣ་ཚོགས་ཀྱི་ སྤྲིན་དང༌། ནོར་བུ་རིན་པོ་ཆེ་ཡིད་བཞིན་གྱི་སྤྲིན་གྱི་ཆར་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་ཐོན་ནས་དེ་བཞིན་གཤེགས་པ་ཐམས་ཅད་ཀྱི་ འཁོར་གྱི་དཀྱིལ་འཁོར་རྒྱས་པར་བཀང་སྟེ་མངོན་པར་འབབ་པ་མཐོང་ངོ༌། །བ་སྤུའི་བུ་ག་ཐམས་ཅད་ལས་བ་སྤུའི་སྒོའི་རེ་རེ་ནས་ཀྱང་སེམས་ཅན་ཐམས་ཅད་ཀྱི་བསམ་པ་ ཡོངས་སུ་རྫོགས་པར་བསྒྲུབ་པའི་ཕྱིར་རིན་པོ་ཆེའི་ཤིང་གི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་ཐོན་ཏེ་ཆོས་ཀྱི་དབྱིངས་ནམ་མཁའི་མཐས་ཀླས་ པ་ཐམས་ཅད་རྒྱས་པར་བཀང་ནས་རིན་པོ་ཆེའི་ཤིང་ལས་རིན་པོ་ཆེའི་མཛོད་རྣམ་པར་འཕྲོ་བའི་རྒྱན་གྱིས་བརྒྱན་པར་བྱས་ཏེ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་ ༄༅། །པས་ཕྱི་མའི་མུར་ཐུག་པའི་བསྐལ་པར་བྱིན་གྱིས་བརླབས་ཏེ་ཆོས་ཀྱི་ཚིག་གཅིག་ཤིན་ཏུ་བསྟན་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་ སྤྱོད་པ་ཐོབ་པར་གྱུར་ཏོ། །ཆོས་རྒྱ་མཚོ་ཐམས་ཅད་མངོན་སུམ་དུ་རབ་ཏུ་ཤེས་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །ཆོས་ཀྱི་དབྱིངས་ ཀྱི་ཚུལ་རྒྱ་མཚོ་ཐམས་ཅད་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སེམས་ཅན་ཐམས་ཅད་ཀྱི་འདུ་ཤེས་ཀྱི་རྣམ་པ་ཡོངས་སུ་སྒྲུབ་པའི་ཡེ་ ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སྐད་ཅིག་གཅིག་ལ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་མངོན་སུམ་དུ་རབ་ཏུ་ཤེས་པའི་ ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏེ། དེ་ལྟར་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་དང་ལྡན་པའི་ཚོང་དཔོན་གྱི་བུ་ནོར་བཟང་གི་ སྤྱི་བོར་བྱང་ཆུབ་སེམས་དཔའ་ཀུན་ཏུ་བཟང་པོས་ལག་པ་གཡས་པ་བརྐྱང་སྟེ་བཞག་པར་གྱུར་ཏོ། །དེ་ལྟར་ཚོང་དཔོན་གྱི་བུ་ནོར་བཟང་གི་སྤྱི་བོ་ལ་བྱང་ཆུབ་སེམས་དཔའ་ ཀུན་ཏུ་བཟང་པོས་ལག་པ་བཞག་མ་ཐག་ཏུ་དེའི་མོད་ལ་དེས་ཏིང་ངེ་འཛིན་གྱི་སྒོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ལ་ཞུགས་པར་གྱུར་ཏེ། ཏིང་ངེ་ འཛིན་རེ་རེས་ཀྱང་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་སྔོན་ཆད་མ་མཐོང་བ་དག་ལའང་ཞུགས་པར་གྱུར་ཏོ། །དེའི་ཐམས་ཅད་མཁྱེན་པ་ཉིད་ཀྱི་ ཚོགས་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་ཀྱང་ཚོགས་སུ་གྱུར་ཏོ། །དེའི་ཐམས་ཅད་མཁྱེན་པ་ཉིད་ཀྱི་ཆོས་ཀྱི་ཚོགས་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་ བྱུང་བར་གྱུར་ཏོ། །ཐམས་ཅད་མཁྱེན་པ་ཉིད་ལ་རབ་ཏུ་གནས་པར་བྱ་བ་ཆེན་པོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་མངོན་པར་འཕགས་པར་གྱུར་ཏོ། ། སྨོན་ལམ་རྒྱ་མཚོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ལའང་ཞུགས་པར་གྱུར་ཏོ། །ཐམས་ཅད་མཁྱེན་པ་ཉིད་དུ་འབྱུང་བའི་ལམ་སངས་རྒྱས་ཀྱི་ཞིང་ཐམས་ ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་རབ་ཏུ་བྱུང་བར་གྱུར་ཏོ། །བྱང་ཆུབ་སེམས་དཔའི་སྤྱོད་པ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ལའང་རབ་ཏུ་ཞུགས་པར་ གྱུར་ཏོ༑ ༑ཐམས་ཅད་མཁྱེན་པ་ཉིད་ཀྱི་ཤུགས་དྲག་པོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་རྣམ་པར་འཕེལ་བ་འགྱུར་ཏོ། །སངས་རྒྱས་ཐམས་ ཅད་ཀྱི་ཡེ་ཤེས་སྣང་བ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་རབ་ཏུ་སྣང་བར་གྱུར་ཏོ། །ཇི་ལྟར་མི་མཇེད་ཀྱི་འཇིག་རྟེན་གྱི་ཁམས་འདིར་བྱང་ཆུབ་ ༄༅། །སེམས་དཔའ་ཀུན་ཏུ་བཟང་པོ་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྤྱན་སྔར་འདུག་པས་ལག་པ་གཡས་པ་བརྐྱང་སྟེ་ཚོང་དཔོན་ གྱི་བུ་ནོར་བཟང་གི་སྤྱི་བོར་བཞག་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་དེ་བཞིན་གཤེགས་པའི་ཞབས་ཀྱི་དྲུང་ན་འདུག་པའི་བྱང་ཆུབ་སེམས་དཔའ་ཀུན་ཏུ་བཟང་ པོས་ཀྱང་ལག་པ་གཡས་པ་བརྐྱང་ཞིང༌། ཚོང་དཔོན་གྱི་བུ་ནོར་བཟང་གི་སྤྱི་བོ་ལ་བཞག་པར་གྱུར་ཏོ། །དེ་བཞིན་དུ་ཕྱོགས་དང༌། ཕྱོགས་མཚམས་ཐམས་ཅད་ཀུན་གྱི་འཇིག་ རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་འཇིག་རྟེན་གྱི་ཁམས་དག་གི་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་འདུག་པའི་བྱང་ཆུབ་སེམས་ དཔའ་ཀུན་ཏུ་བཟང་པོས་ཀྱང་ལག་པ་གཡས་པ་བརྐྱང་ཞིང་ཚོང་དཔོན་གྱི་བུ་ནོར་བཟང་གི་སྤྱི་བོ་ལ་བཞག་པར་གྱུར་ཏོ། །བཅོམ་ལྡན་འདས་རྣམ་པར་སྣང་མཛད་ཀྱི་ཞབས་ ཀྱི་དྲུང་ན་འདུག་པའི་བྱང་ཆུབ་སེམས་དཔའ་ཀུན་ཏུ་བཟང་པོའི་ལག་པས་རེག་སྟེ་ཚོང་དཔོན་གྱི་བུ་ནོར་བཟང་གིས་ཆོས་ཀྱི་སྒོ་མང་པོ་ལ་ཞུགས་པར་གྱུར་པ་དེ་བཞིན་དུ་ ཀུན་ཏུ་བཟང་པོའི་ལུས་ཐམས་ཅད་ལས་འཕོས་པའི་ལག་པའི་སྤྲིན་མང་པོས་རེག་པས་ཚོང་དཔོན་གྱི་བུ་ནོར་བཟང་གིས་ཀྱང་ཆོས་ཀྱི་སྒོ་མང་པོ་ལ་ཚུལ་སྣ་ཚོགས་ཀྱིས་ ཞུགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་ཀྱིས་ངའི་རྣམ་ པར་འཕྲུལ་པ་མཐོང་མོད། །སྨྲས་པ། འཕགས་པ། མཐོང་ནི་མཐོང་ན། དེ་ཙམ་དུ་བསམ་གྱིས་མི་ཁྱབ་པའི་རྣམ་པར་ཐར་པ་དེ་ནི། དེ་བཞིན་གཤེགས་པས་མཁྱེན་ན་མཁྱེན་གྲང་ངོ༌། །དེས་ སྨྲས་པ། རིགས་ཀྱི་བུ། ངས་ནི། ཐམས་ཅད་མཁྱེན་པ་ཉིད་ཀྱི་སེམས་མངོན་པར་འདོད་ཅིང༌། བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་ཏུ་རྣམ་ པར་སྤྱད་དེ། བསྐལ་པ་ཆེན་པོ་དེ་དག་རེ་རེ་ལ་ཡང་བྱང་ཆུབ་ཀྱི་སེམས་ཡོངས་སུ་སྦྱོང་བར་བྱེད་ཅིང༌། ངས་དེ་བཞིན་གཤེགས་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་ མེད་པའི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏོ། །བསྐལ་པ་ཆེན་པོ་དེ་དག་རེ་རེ་ལ་ཡང་ཐམས་ཅད་མཁྱེན་པ་ཉིད་ཀྱི་བསོད་ནམས་ཡོངས་སུ་སྡུད་པར་བྱེད་ཅིང༌། མཆོད་སྦྱིན་ ཆེན་པོ་གཏོང་བ་ཐམས་ཅད་དང་སྦྱར་བ། འཇིག་རྟེན་ཐམས་ཅད་དུ་རྣམ་པར་གྲགས་པ། སེམས་ཅན་ཐམས་ཅད་ལ་བསྟབས་པ་དག་ཀྱང་མཆོད་སྦྱིན་དུ་བྱས་སོ། །བསྐལ་པ་ཆེན་པོ་ དེ་དག་རེ་རེ་ལ་ཡང་ཐམས་ཅད་མཁྱེན་པ་ཉིད་ཀྱི་ཆོས་ལ་མངོན་པར་སྨོན་ཅིང་གཏོང་བ་དང༌། གཏོང་བ་ཆེན་པོ་དང༌། ཤིན་ཏུ་གཏོང་བ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་ ༄༅། །བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་བྱས་སོ། །བསྐལ་པ་ཆེན་པོ་དེ་དག་རེ་རེ་ལ་ཡང་ལུས་དང༌། སྲོག་ཕངས་པར་བྱ་བ་མེད་པར་སངས་རྒྱས་ཀྱི་ཆོས་ གཅེས་པར་བྱ་བས་ལུས་བརྗོད་དུ་མེད་པའི་ཡང་བརྗོད་དུ་མེད་པ་ཞིག་ཡོངས་སུ་བཏང་ངོ༌། །རྒྱལ་པོའི་སྲིད་ཆེན་པོ་ཡང་ཡོངས་སུ་བཏང་ངོ༌། །གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་དང༌། ཁམས་དང༌། རྒྱལ་པོའི་གནས་དག་ཀྱང་ཡོངས་སུ་བཏང་ངོ༌། །སྡུག་ཅིང་ཡིད་དུ་འོང་ལ་བཏང་མི་བྲ་བའི་འཁོར་གྱི་ཚོགས་དག་ཀྱང་ཡོངས་སུ་བཏང་ངོ༌། །བུ་དང༌། བུ་མོ་ དང༌། ཆུང་མ་དེ་དག་ཀྱང་ཡོངས་སུ་བཏང་ངོ༌། །རང་གི་ལུས་དང་ཤ་དག་ཀྱང་ཡོངས་སུ་བཏང་ངོ༌། །བདག་གི་ལུས་ལས་ཁྲག་དག་ཀྱང་སློང་བ་རྣམས་ལ་ཡོངས་སུ་བཏང་ངོ༌། །རུས་པ་དང༌། རྐང་དག་ཀྱང་ཡོངས་སུ་བཏང་ངོ༌། །ཡང་ལག་དང་ཉིང་ལག་དག་ཀྱང་ཡོངས་སུ་བཏང་ངོ༌། །སྣ་དང་རྣ་བ་དག་ཀྱང་ཡོངས་སུ་བཏང་ངོ༌། །མིག་དག་ཀྱང་ཡོངས་སུ་བཏང་ངོ༌། །རང་གི་ཁ་ནས་ ལྕེའི་དབང་པོ་དག་ཀྱང་ཡོངས་སུ་བཏང་ངོ༌། །བསྐལ་པ་དེ་དག་རེ་རེ་ལ་ཡང་འཇིག་རྟེན་ཐམས་ཅད་ལས་མངོན་པར་འཕགས་ཤིང་བླ་ན་མེད་པར་འགྱུར་པའི་ཐམས་ཅད་མཁྱེན་པ་ཉིད་ ཀྱི་དབུ་ལ་མངོན་པར་སྨོན་ཅིང༌། རང་གི་མགོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་ཡོངས་སུ་བཏང་ངོ༌། །བསྐལ་པ་ཆེན་པོ་རེ་རེ་ ལ་ཇི་ལྟ་བ་དེ་བཞིན་དུ་བསྐལ་པ་ཆེན་པོ་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ལས་བསྐལ་པ་རྒྱ་མཚོ་རེ་རེ་ལ་ཡང་དེ་བཞིན་གཤེགས་ པ་སངས་རྒྱས་ཀྱི་ཞིང་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་ལ་དབང་པོ་དམ་པར་གྱུར་ཏེ་རིམ་གྲོ་བྱས་སོ། །བཀུར་སྟི་བྱས་སོ། །ཕུ་དུད་དུ་བྱས་སོ། ། མཆོད་པ་བྱས་སོ། །ན་བཟའ་དང༌། བཤོས་དང༌། གཟིམས་ཆ་དང༌། སྙུན་གྱི་རྐྱེན་སྨན་དང༌། ཡོ་བྱད་དག་ཀྱང་དབུལ་བ་བྱས་སོ། །དེ་བཞིན་གཤེགས་པ་དེ་དག་གི་བསྟན་པ་ལ་ཡང་རབ་ ཏུ་བྱུང་སྟེ་སངས་རྒྱས་ཀྱི་གདམས་ངག་ཐམས་ཅད་ལ་ཡང་རབ་ཏུ་ཞུགས་སོ། །དེ་དག་གི་བསྟན་པ་ཡང་ཡོངས་སུ་བཟུང་ངོ༌། །རིགས་ཀྱི་བུ། དེ་སྙེད་ཀྱི་བསྐལ་པ་རྒྱ་མཚོར་ཡང་དེ་བཞིན་ གཤེགས་པའི་བསྟན་པ་ལ་སེམས་བསྐྱེད་པ་འགའ་ཙམ་གྱིས་ཀྱང་མི་མཐུན་པའི་སེམས་བསྐྱེད་དུ་མི་དྲན་ནོ། །དེ་སྙེད་ཀྱི་བསྐལ་པ་རྒྱ་མཚོར་སེམས་བསྐྱེད་པ་འགའ་ཙམ་གྱིས་ཀྱང་ ཁོང་ཁྲོ་བ་དང་ལྡན་པའི་སེམས་བསྐྱེད་པའམ། བདག་ཏུ་འཛིན་པའི་སེམས་སམ། བདག་ཡོངས་སུ་བསྐྱང་ཞིང་ཡོངས་སུ་གཟུང་བའི་སེམས་སམ། བདག་དང་གཞན་དུ་དབྱེ་བའི་སེམས་ སམ༑ བྱང་ཆུབ་ཀྱི་ལམ་དང་འབྲལ་བར་བྱ་བའི་སེམས་སམ། འཁོར་བ་ན་གནས་པས་ཡོངས་སུ་སྐྱོ་བའི་སེམས་སམ། ཞུམ་པའི་སེམས་སམ། སྒྲིབ་པས་མགོ་རྨོངས་པའི་སེམས་ ༄༅། །བསྐྱེད་དུ་མི་དྲན་ཏེ། གཞན་དུ་ན་ཐམས་ཅད་མཁྱེན་པ་ཉིད་ཀྱི་ཚོགས་གསག་པའི་ཕྱིར་བྱང་ཆུབ་ཀྱི་སེམས་ཡེ་ཤེས་གཞན་གྱིས་མི་ཐུབ་ཅིང་བརྒལ་བར་ དཀའ་བའི་སྙིང་པོ་དང་ལྡན་པ་བསྐྱེད་དོ། །རིགས་ཀྱི་བུ། འདི་ལྟ་སྟེ། ངའི་སྔོན་གྱི་སྦྱོར་བ་ཕུན་སུམ་ཚོགས་པ། སངས་རྒྱས་ཀྱི་ཞིང་ཡོངས་སུ་དག་པར་བྱས་པའི་སྦྱོར་བ་དག་དང༌། དེས་སྙིང་རྗེ་ཆེན་པོའི་སེམས་རབ་ཏུ་ཐོབ་སྟེ། སེམས་ཅན་ཡོངས་སུ་བསྐྱབ་པ་དང༌། ཡོངས་སུ་སྨིན་པར་བྱ་བ་དང༌། ཡོངས་སུ་སྦྱང་བར་བྱས་པའི་སྦྱོར་བ་དག་དང༌། སངས་རྒྱས་མཆོད་ ཅིང་བསྙེན་བཀུར་བའི་སྦྱོར་བ་དག་དང༌། དམ་པའི་ཆོས་ཡོངས་སུ་བཙལ་བའི་དོན་དུ་བླ་མ་ལ་རིམ་གྲོ་བྱས་པའི་སྦྱོར་བ་དག་དང༌། དམ་པའི་ཆོས་ཡོངས་སུ་གཟུང་བའི་དོན་དུ་ལུས་ ཡོངས་སུ་བཏང་བའི་སྦྱོར་བ་དག་དང༌། དམ་པའི་ཆོས་ཡོངས་སུ་བསྲུང་བའི་དོན་དུ་རང་གི་སྲོག་ཡོངས་སུ་བཏང་བའི་སྦྱོར་བ་དེ་དག་ནི། བསྟན་པར་བྱ་ན་བསྐལ་པ་རྒྱ་མཚོ་ཐམས་ ཅད་ཟད་པར་འགྱུར་རོ། །རིགས་ཀྱི་བུ། ངས་ནི། ཆོས་རྒྱ་མཚོ་དེ་སྙེད་ཅིག་ལས་ཀྱང་ཚིག་དང༌། ཡི་གེ་འགའ་ཙམ་ཡང་སེམས་ཅན་ཐམས་ཅད་ཡོངས་སུ་བསྐྱབ་པ་ལ་བརྩོན་པ་ དང༌། རང་གི་སེམས་ཀྱི་རྒྱུད་ངེས་པར་ཤེས་པར་བྱ་བ་ལ་བརྩོན་པ་དང༌། ཕ་རོལ་གྱི་ཆོས་མངོན་དུ་ཐོས་པར་བྱ་བ་ལ་བརྩོན་པ་དང༌། འཇིག་རྟེན་པའི་ཡེ་ཤེས་སྣང་བ་ཐམས་ ཅད་རབ་ཏུ་བརྗོད་པ་ལ་བརྩོན་པ་དང༌། འཇིག་རྟེན་ལས་འདས་པའི་ཡེ་ཤེས་ཐམས་ཅད་རབ་ཏུ་བརྗོད་པ་ལ་བརྩོན་པ་དང༌། སེམས་ཅན་ཐམས་ཅད་ཀྱི་འཁོར་བའི་བདེ་བ་ཡོངས་སུ་ བསྐྱེད་པ་ལ་བརྩོན་པ་དང༌། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་ཡང་དག་པར་བསྔགས་པ་ལ་བརྩོན་པས་འཁོར་ལོས་བསྒྱུར་བའི་རྒྱལ་སྲིད་ཡོངས་སུ་བཏང་བས་མ་ཉོས་ པའམ། བདོག་པ་ཐམས་ཅད་ཡོངས་སུ་བཏང་བས་མ་ཉོས་པ་གང་མེད་དེ། དེ་ལྟར་ང་ཉིད་ཀྱི་སྔོན་གྱི་སྦྱོར་བ་ཕུན་སུམ་ཚོགས་པ་བསྟན་པར་བྱ་ན། བསྐལ་པ་རྒྱ་མཚོ་སངས་རྒྱས་ཀྱི་ཞིང་ བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཟད་པར་འགྱུར་རོ། །རིགས་ཀྱི་བུ། དེ་ལྟར་ངས་རྣམ་པ་དེ་ལྟ་བུའི་ཚོགས་ཀྱི་སྟོབས་དང༌། དགེ་བའི་རྩ་བའི་རྒྱུ་བསགས་ པའི་སྟོབས་དང༌། མོས་པ་རྒྱ་ཆེན་པོའི་སྟོབས་དང༌། ཡོན་ཏན་ལ་ནན་ཏན་དུ་བྱ་བའི་སྟོབས་དང༌། ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པར་བྱ་བའི་སྟོབས་དང༌། ཤེས་རབ་ཀྱི་མིག་གི་སྟོབས་དང༌། དེ་བཞིན་གཤེགས་པའི་བྱིན་གྱི་རླབས་ཀྱི་སྟོབས་དང༌། སྨོན་ལམ་ཆེན་པོའི་སྟོབས་དང༌། སྙིང་རྗེ་ཆེན་པོའི་སྟོབས་དང༌། ཤིན་ཏུ་སྦྱངས་པའི་མངོན་ པར་ཤེས་པའི་སྟོབས་དང༌། དགེ་བའི་བཤེས་གཉེན་གྱིས་ཡོངས་སུ་བཟུང་བའི་སྟོབས་ཀྱིས་ཆོས་ཀྱི་ལུས་ཡོངས་སུ་དག་པ་དུས་གསུམ་དུ་ཐ་མི་དད་པ་ཐོབ་པར་གྱུར་ཏོ། །བླ་ན་མེད་ ༄༅། །པའི་གཟུགས་ཀྱི་ལུས་འཇིག་རྟེན་ཐམས་ཅད་ལས་མངོན་པར་འཕགས་པ། འགྲོ་བ་ཐམས་ཅད་ཀྱི་བསམ་ལ་ཇི་ལྟ་བ་བཞིན་དུ་རྣམ་པར་དམིགས་པ། ཐམས་ ཅད་དུ་རྗེས་སུ་སོང་བ། སངས་རྒྱས་ཀྱི་ཞིང་ཐམས་ཅད་དུ་རབ་ཏུ་གཞོལ་བ། ཐམས་ཅད་དུ་རབ་ཏུ་གནས་པ། རྣམ་པར་འཕྲུལ་པ་ཐམས་ཅད་རྣམ་པ་ཐམས་ཅད་དུ་སྟོན་པ། འགྲོ་བ་ ཐམས་ཅད་ཀྱི་ཡིད་དུ་འོང་བ་ཡང་ཡོངས་སུ་སྦྱངས་སོ། །རིགས་ཀྱི་བུ། ངས་ལུས་ཐོབ་པ་ཕུན་སུམ་ཚོགས་པ། བསྐལ་པ་རྒྱ་མཚོ་མཐའ་ཡས་པས་ཡོངས་སུ་གྲུབ་པ། བསྐལ་པ་བྱེ་ བ་ཁྲག་ཁྲིག་བརྒྱ་སྟོང་མང་པོས་འབྱུང་བར་དཀའ་བ་འདི་ལ་ལྟོས། རིགས་ཀྱི་བུ། ང་ནི་དགེ་བའི་རྩ་བ་མ་བསྐྱེད་པའི་སེམས་ཅན་རྣམས་ཀྱི་རྣ་ལམ་དུ་ཡང་མི་འོང་ན། མཐོང་བར་ལྟ་ཅི་ཞིག་ སྨོས༑ རིགས་ཀྱི་བུ། སེམས་ཅན་གང་དག་ངའི་མིང་ཐོས་པ་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་ཡོད་དོ། །མཐོང་བ་ཙམ་དང༌། སྐྱལ་བ་ ཙམ་དང༌། རེག་པ་ཙམ་དང༌། རྗེས་སུ་འབྲང་བ་ཙམ་དང༌། རྨི་ལམ་དུ་མཐོང་བ་ཙམ་དང༌། རྨི་ལམ་དུ་མིང་ཐོས་པ་ཙམ་གྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ མི་ལྡོག་པར་འགྱུར་བ་ཡོད་དེ། སེམས་ཅན་ལ་ལས་ནི་ང་ཉིན་ཞག་གཅིག་ཏུ་དྲན་པར་བྱས་ན། ཡོངས་སུ་སྨིན་པར་འགྱུར་རོ། །ལ་ལས་ནི་ཞག་བདུན་དང༌། ལ་ལས་ནི་ཟླ་བ་ ཕྱེད་དང༌། ལ་ལས་ནི་ཟླ་བ་གཅིག་དང༌། ལ་ལས་ནི་ལོ་གཅིག་དང༌། ལ་ལས་ནི་ལོ་བརྒྱ་དང༌། ལ་ལས་ནི་བསྐལ་པ་གཅིག་དང༌། ལ་ལས་ནི་བསྐལ་པ་བརྒྱ་ནས། ལ་ལས་ནི་ བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དུ་ང་རྗེས་སུ་དྲན་པར་བྱས་ན། ཡོངས་སུ་སྨིན་པར་འགྱུར་རོ། །ལ་ལས་ནི་ཚེ་གཅིག་ཏུ་ ང་རྗེས་སུ་དྲན་པར་བྱས་ན། ཡོངས་སུ་སྨིན་པར་འགྱུར་རོ། ལ་ལས་ནི་ཚེའི་རྒྱུད་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙད་ཀྱིས་ཡོངས་སུ་ སྨིན་པར་འགྱུར་རོ། །སེམས་ཅན་ལ་ལས་ནི་ངའི་འོད་མཐོང་བས་ཡོངས་སུ་སྨིན་པར་འགྱུར་རོ། །ལ་ལས་ནི་འོད་ཟེར་བཀྱེ་བ་མཐོང་བས། ལ་ལ་ནི་ཞིང་བསྐྱོད་པས། ལ་ལ་ནི་ གཟུགས་ཀྱི་ལུས་བསྟན་པས། ལ་ལ་ནི་དགའ་བར་བྱས་པས་ཡོངས་སུ་སྨིན་པར་འགྱུར་ཏེ། རིགས་ཀྱི་བུ། དེ་ལྟར་ཐབས་ཀྱི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ ཀྱིས་སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །རིགས་ཀྱི་བུ། སེམས་ཅན་གང་གིས་ངའི་སངས་རྒྱས་ཀྱི་ཞིང་ཡོངས་ སུ་དག་པ་ཐོས་པ་དེ་དག་ནི་སངས་རྒྱས་ཀྱི་ཞིང་ཡོངས་སུ་དག་པར་སྐྱེའོ། །གང་གིས་ངའི་ལུས་ཡོངས་སུ་དག་པ་མཐོང་བར་གྱུར་པ་དེ་དག་ནི་ངའི་ལུས་ལྟ་བུར་སྐྱེ་བར་འགྱུར་གྱི། ༄༅། །རིགས་ཀྱི་བུ། ངའི་ལུས་རྣམ་པར་དག་པ་འདི་ལ་ལྟོས་ཤིག །དེ་ནས་ཚོང་དཔོན་གྱི་བུ་ནོར་བཟང་གིས་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ལ་ བསམ་པ་དང༌། བ་སྤུའི་བུ་ག་རེ་རེ་ལ་ཡང་སངས་རྒྱས་ཀྱི་ཞིང་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པ་སངས་རྒྱས་སྐྱེ་བས་ཡོངས་སུ་གང་བར་མཐོང་ངོ༌། །ཞིང་རྒྱ་མཚོ་རེ་རེ་ན་ ཡང་དེ་བཞིན་གཤེགས་པ་བྱང་ཆུབ་སེམས་དཔའི་འཁོར་རྒྱ་མཚོ་ཀུན་ནས་བསྐོར་བ་མང་པོ་བཞུགས་པར་མཐོང་ངོ༌། །ཞིང་རྒྱ་མཚོ་དེ་དག་ཐམས་ཅད་ཀྱང་གཞི་སྣ་ཚོགས་དང༌། དབྱིབས་སྣ་ཚོགས་དང༌། རྒྱན་སྣ་ཚོགས་དང༌། ཁོར་ཡུག་སྣ་ཚོགས་དང༌། སྤྲིན་སྣ་ཚོགས་དང༌། ནམ་མཁའ་སྣ་ཚོགས་ཀྱིས་ཀུན་ནས་ཁེབས་པ་དང༌། སངས་རྒྱས་འབྱུང་བ་སྣ་ ཚོགས་དང༌། ཆོས་ཀྱི་འཁོར་ལོ་སྣ་ཚོགས་ཀྱི་དབྱངས་དང་ལྡན་པར་མཐོང་ངོ༌། །བ་སྤུའི་བུ་ག་རེ་རེ་ལ་ཇི་ལྟ་བ་བཞིན་དུ་བ་སྤུའི་བུ་ག་མ་ལུས་པ་ཐམས་ཅད་དང༌། མཚན་ཐམས་ ཅད་དང༌། དཔེ་བྱད་བཟང་པོ་ཐམས་ཅད་དང༌། ཡན་ལག་དང་ཉིང་ལག་ཐམས་ཅད་ལ་ཡང་དེ་བཞིན་ཏེ། ཞིང་རྒྱ་མཚོ་རེ་རེ་ནས་ཀྱང་སངས་རྒྱས་ཀྱི་སྐུ་སྤྲུལ་པའི་སྤྲིན་སངས་ རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་བྱུང་ནས་ཕྱོགས་བཅུར་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་ཏུ་སེམས་ཅན་ཡོངས་སུ་སྨིན་པར་མཛད་པ་མཐོང་ངོ༌། །དེ་ནས་ཚོང་དཔོན་གྱི་བུ་ནོར་བཟང་བྱང་ཆུབ་སེམས་དཔའ་ཀུན་ཏུ་བཟང་པོའི་གདམས་ངག་དང༌། རྗེས་སུ་བསྟན་པས་རྗེས་ སུ་བསྟན་ནས་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ཀྱི་ཁོངས་སུ་གཏོགས་པའི་འཇིག་རྟེན་གྱི་ཁམས་ཐམས་ཅད་དུ་ཞུགས་ཏེ་སེམས་ཅན་ཡོངས་སུ་སྨིན་པར་བྱེད་པར་ གྱུར་ཏོ༑ ༑དེ་ལྟར་ཚོང་དཔོན་གྱི་བུ་ནོར་བཟང་གིས་དགེ་བའི་བཤེས་གཉེན་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཅིག་གི་དྲུང་དུ་ཕྱིན་ཏེ་མཐོང་བ་དང༌། བསྙེན་བཀུར་བས་ཡེ་ ཤེས་ཀྱི་སྣང་བ་དང༌། དགེ་བའི་རྩ་བ་བསགས་པ་དེ་དག་གིས་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་སྟེ་དགེ་བའི་རྩ་བ་བསགས་པར་གྱུར་པ་དེའི་བརྒྱའི་ཆར་ཡང་ཉེ་བར་ མི་འགྲོའོ། །སྟོང་གི་ཆར་ཡང་མ་ཡིན། བརྒྱ་སྟོང་གི་ཆར་ཡང་མ་ཡིན། བྱེ་བ་བརྒྱ་སྟོང་གི་ཆར་ཡང་མ་ཡིན། གྲངས་དང༌། ཆ་དང༌། བགྲང་བ་དང༌། དཔེར་དང༌། རྒྱུར་བྱ་བ་ ཙམ་དུ་ཡང་མི་ཕོད་དོ། །དེས་དང་པོ་སེམས་བསྐྱེད་པ་ནས་ཉེ་བར་བཟུང་ནས་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བའི་བར་དེར་སངས་རྒྱས་ཀྱི་ཞིང་རྒྱ་མཚོ་གཅིག་ནས་ གཅིག་ཏུ་བརྒྱུད་པ་ཇི་སྙེད་ཅིག་ལ་ཞུགས་པར་གྱུར་པ་དེ་དག་པས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་བར་དུ་བྱང་ཆུབ་ ༄༅། །སེམས་དཔའ་ཀུན་ཏུ་བཟང་པོའི་བ་སྤུའི་བུ་ག་རེ་རེར་སངས་རྒྱས་ཀྱི་ཞིང་རྒྱ་མཚོ་གཅིག་ནས་གཅིག་ཏུ་བརྒྱུད་པ་མང་པོ་ལ་སེམས་ཀྱི་སྐད་ཅིག་གཅིག་ གིས་ཞུགས་པར་གྱུར་ཏེ། བ་སྤུའི་བུ་ག་རེ་རེར་ཇི་ལྟ་བ་བཞིན་དུ་བ་སྤུའི་བུ་ག་མ་ལུས་པ་ཐམས་ཅད་ལ་ཡང་སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་བརྗོད་དུ་ མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རྣམ་པར་གནོན་པ། ཕྱི་མའི་མཐའི་མུར་ཐུག་པའི་བསྐལ་པར་བྱིན་གྱིས་བརླབས་པ། འཇིག་རྟེན་གྱི་ཁམས་རྒྱས་ པར་འགེངས་པས་ཞུགས་ཀྱང་ཞིང་རྒྱ་མཚོ་གཅིག་ནས་གཅིག་ཏུ་བརྒྱུད་པའི་མཐར་ཕྱིན་པར་མ་གྱུར་ཏེ། ཞིང་རྒྱ་མཚོའི་ལྷུན་དང༌། ཞིང་རྒྱ་མཚོའི་བྱེ་བྲག་དང༌། ཞིང་རྒྱ་ མཚོ་ཡོངས་སུ་བསྡུ་བ་དང༌། ཞིང་རྒྱ་མཚོ་ཡོངས་སུ་འགྲུབ་པ་དང༌། ཞིང་རྒྱ་མཚོ་འཇིག་པ་དང༌། ཞིང་རྒྱ་མཚོ་རྣམ་པར་ཕྱེ་བ་དང༌། སངས་རྒྱས་བྱུང་བ་རྒྱ་མཚོ་གཅིག་ནས་ གཅིག་ཏུ་བརྒྱུད་པ་དང༌། སངས་རྒྱས་བྱུང་བ་རྒྱ་མཚོའི་སྐུ་དང༌། སངས་རྒྱས་བྱུང་བ་རྒྱ་མཚོ་ཡོངས་སུ་བསྡུ་བ་དང༌། སངས་རྒྱས་བྱུང་བ་རྒྱ་མཚོ་ཡོངས་སུ་འབྱུང་བ་དང༌། སངས་ རྒྱས་བྱུང་བ་རྒྱ་མཚོ་འཇིག་པ་དང༌། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་དང༌། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་གཅིག་ནས་ གཅིག་ཏུ་བརྒྱུད་པ་དང༌། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོའི་ལུས་དང༌། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོའི་བྱེ་བྲག་དང༌། བྱང་ ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཡོངས་སུ་བསྡུ་བ་དང༌། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཡོངས་སུ་འབྱུང་བ་དང༌། བྱང་ཆུབ་ སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་འཇིག་པ་དང༌། སེམས་ཅན་གྱི་ཁམས་ལ་འཇུག་པ་དང༌། སེམས་ཀྱི་སྐད་ཅིག་རེ་རེས་སེམས་ཅན་གྱི་དབང་པོ་ཤེས་པ་ལ་ འཇུག་པ་དང༌། སེམས་ཅན་གྱི་དབང་པོ་ཤེས་པ་ཁོང་དུ་ཆུད་པར་བྱ་བ་དང༌། སེམས་ཅན་ཡོངས་སུ་སྨིན་པར་བྱ་ཞིང་གདུལ་བ་དང༌། བྱང་ཆུབ་སེམས་དཔའི་རྣམ་པར་ འཕྲུལ་པ་ཟབ་མོ་ལ་རྣམ་པར་གནས་པ་དང༌། བྱང་ཆུབ་སེམས་དཔའི་ས་ཡོངས་སུ་གནོན་པ་རྒྱ་མཚོའི་མཐར་ཡང་ཕྱིན་པར་མ་གྱུར་ཏེ། དེ་ཞིང་ལ་ལར་ནི། བསྐལ་ པར་རྣམ་པར་སྤྱད་པར་གྱུར་ཏོ། །ཞིང་ལ་ལར་ནི། བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་སྤྱད་པར་གྱུར་ཏེ། ཞིང་དེ་དག་ནས་ཀྱང་ གཡོས་པ་མེད་དོ། །སེམས་ཀྱི་སྐད་ཅིག་རེ་རེ་ལ་ཡང་ཞིང་རྒྱ་མཚོ་མཐའ་དང་དབུས་མེད་པ་ལ་འཇུག་ཅིང༌། སེམས་ཅན་རྣམས་ཀྱང་བླ་ན་མེད་པ་ཡང་དག་པར་རྫོགས་ ༄༅། །པའི་བྱང་ཆུབ་ཏུ་ཡོངས་སུ་སྨིན་པར་བྱེད་པར་གྱུར་ཏེ། དེས་དེ་ལྟར་མཐར་གྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང༌། སྨོན་ལམ་ རྒྱ་མཚོ་མཉམ་པ་ཉིད་ཀྱི་བར་དུའང་མཐོང་བར་གྱུར་ཏོ། །དེ་བཞིན་གཤེགས་པ་ཐམས་ཅད་དང་མཉམ་པ་ཉིད་དང༌། ཞིང་ཐམས་ཅད་ལུས་ཀྱིས་རྒྱས་པར་དགང་བ་ མཉམ་པ་ཉིད་དང༌། སྤྱོད་པ་ཡོངས་སུ་རྫོགས་པས་རྒྱས་པར་དགང་བ་མཉམ་པ་ཉིད་དང༌། མངོན་པར་རྫོགས་པར་འཚང་རྒྱ་བའི་རྣམ་པར་འཕྲུལ་པ་ཡོངས་སུ་བསྟན་ པས་རྒྱས་པར་དགང་བ་མཉམ་པ་ཉིད་དང༌། ཆོས་ཀྱི་འཁོར་ལོ་བསྐོར་བ་མཉམ་པ་ཉིད་དང༌། ཐ་དད་པ་ཡང་དག་པར་ཤེས་པ་རྣམ་པར་དག་པ་མཉམ་པ་ཉིད་དང༌། དབྱངས་བརྗོད་པ་མཉམ་པ་ཉིད་དང༌། དབྱངས་ཀྱི་ཡན་ལག་རྒྱ་མཚོ་ཐམས་ཅད་ཀྱི་སྤྱོར་བ་མཉམ་པ་ཉིད་དང༌། སྟོབས་དང༌། མི་འཇིགས་པ་མཉམ་པ་ཉིད་དང༌། སངས་ རྒྱས་ཀྱི་རྣམ་པར་སྤྱོད་པ་མཉམ་པ་ཉིད་དང༌། བྱམས་པ་ཆེན་པོ་དང༌། སྙིང་རྗེ་ཆེན་པོ་མཉམ་པ་ཉིད་དང༌། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ ཁྱབ་པའི་རྣམ་པར་འཕྲུལ་པ་མཉམ་པ་ཉིད་ཀྱང་རྗེས་སུ་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བསྐལ་པ་དང༌། བསྐལ་ པ་འབྱམས་ཀླས་པ་དང༌། འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་པོ་དེ་དག་བརྣན་ཏེ་མངོན་ པར་བརྗོད་པའི་ཕྱིར་ཚིགས་སུ་བཅད་པའི་དབྱངས་ཀྱིས་སྨོན་ལམ་བཏབ་པ། ༈ [?] ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེངྒེ་ཀུན། ། བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་ སུམ་དུ༑ ༑ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་ དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པར། །ཐམས་ཅད་རྒྱལ་བ་བདག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། ། དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང༌། །བདེ་བར་གཤེགས་པ་ཐམས་ཅད་བདག་གིས་བསྟོད། །མེ་ཏོག་དམ་པ་ཕྲེང་བ་ དམ་པ་དང༌། །སིལ་སྙན་རྣམས་དང་བྱུག་པ་བདུག་མཆོག་དང༌། །མར་མེའི་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་ ༄༅། །དམ་པ་རྣམས་དང་དྲི་མཆོག་དང༌། །ཕྱེ་མའི་ཕུར་མ་རི་རབ་མཉམ་པ་དང༌། །ཁྱད་པར་ཅན་གྱི་རྒྱན་མཆོག་ཐམས་ཅད་ཀྱིས། །རྒྱལ་བ་དེ་དག་ལ་ནི་ མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་ འཚལ་མཆོད་པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ན། །ལུས་དང་ངག་དང་དེ་བཞིན་ཡིད་ཀྱིས་ཀྱང༌། །སྡིག་པ་བདག་གིས་བགྱིས་པ་ཅི་མཆིས་པ། །དེ་ དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང༌། །འགྲོ་བ་རྣམས་ཀྱི་ བསོད་ནམས་གང་ལ་ཡང༌། །དེ་དག་ཀུན་གྱི་རྗེས་སུ་བདག་ཡི་རང༌། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་ བརྙེས༑ ༑མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང༌། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་ དང༌། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གི་བྱང་ཆུབ་ཕྱིར་བསྔོ་འོ། །འདས་པའི་སངས་རྒྱས་རྣམས་ དང་ཕྱོགས་བཅུ་ཡི། །འཇིག་རྟེན་དག་ན་གང་བཞུགས་མཆོད་པར་གྱུར། །གང་ཡང་མ་བྱོན་དེ་དག་རབ་མྱུར་བར། །བསམ་རྫོགས་བྱང་ཆུབ་རིམ་པར་སངས་རྒྱས་སྤྱོན། །ཕྱོགས་ བཅུ་ག་ལའི་ཞིང་རྣམས་ཇི་སྙེད་པ། །དེ་དག་རྒྱ་ཆེར་ཡོངས་སུ་དག་པར་གྱུར། །བྱང་ཆུབ་ཤིང་དབང་དྲུང་གཤེགས་རྒྱལ་བ་དང༌། །སངས་རྒྱས་སྲས་ཀྱིས་རབ་ཏུ་གང་བར་ ཤོག །ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་རྟག་ཏུ་ནད་མེད་བདེ་བར་གྱུར། །འགྲོ་བ་ཀུན་གྱི་ཆོས་ཀྱི་དོན་རྣམས་ནི། །མཐུན་པར་གྱུར་ཅིང་རེ་བའང་ འགྲུབ་པར་ཤོག །བྱང་ཆུབ་སྤྱོད་པ་དག་ནི་བདག་སྤྱོད་ཅིང༌། །འགྲོ་བ་ཀུན་ཏུ་སྐྱེ་བ་དྲན་པར་གྱུར། །ཚེ་རབས་ཀུན་ཏུ་འཆི་འཕོ་སྐྱེ་བ་ན། །རྟག་ཏུ་བདག་ནི་རབ་ཏུ་འབྱུང་ བར་ཤོག །རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང༌། །ཚུལ་ཁྲིམས་སྤྱོད་པ་དྲི་མེད་ཡོངས་དག་པར། །རྟག་ཏུ་མ་ཉམས་སྐྱོན་ མེད་སྤྱོད་པར་ཤོག །ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང༌། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་ ༄༅། །བདག་གིས་ཆོས་བསྟན་ཏོ། །དེས་ཤིང་ཕ་རོལ་ཕྱིན་ལ་རབ་བརྩོན་ཏེ། །བྱང་ཆུབ་སེམས་ནི་ནམ་ཡང་བརྗེད་མ་གྱུར། །སྡིག་པ་གང་རྣམས་སྒྲིབ་ པར་འགྱུར་བ་དག །དེ་དག་མ་ལུས་ཡོངས་སུ་བྱང་བར་ཤོག །ལས་དང་ཉོན་མོངས་བདུད་ཀྱི་ལས་རྣམས་ལས། །གྲོལ་ཞིང་འཇིག་རྟེན་འགྲོ་བ་རྣམས་སུ་ཡང༌། །ཇི་ ལྟར་པདྨོ་རྒྱུས་མི་ཆགས་པ་བཞིན། །ཉི་ཟླ་ནམ་མཁར་ཐོགས་པ་མེད་ལྟར་སྤྱད། །ཞིང་གི་ཁྱོན་དང་ཕྱོགས་རྣམས་ཇི་ཙམ་པར། །ངན་སོང་སྡུག་བསྔལ་རབ་ཏུ་ཞི་བར་ བྱེད༑ ༑བདེ་བ་དག་ལ་འགྲོ་བ་ཀུན་འགོད་ཅིང༌། །འགྲོ་བ་ཐམས་ཅད་ལ་ནི་ཕན་པར་སྤྱད། །བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང༌། །སེམས་ཅན་དག་གི་སྤྱོད་དང་མཐུན་ པར་འཇུག །བཟང་པོ་སྤྱོད་པ་དག་ནི་རབ་སྟོན་ཅིང༌། །མ་འོངས་བསྐལ་པ་ཀུན་ཏུ་སྤྱོད་པར་གྱུར། །བདག་གི་སྤྱོད་དང་མཚུངས་པར་གང་སྤྱོད་པ། །དེ་དག་དང་ནི་རྟག་ཏུ་ འགྲོགས་པར་ཤོག །ལུས་དང་ངག་རྣམས་དང་ནི་སེམས་ཀྱིས་ཀྱང༌། །སྤྱོད་པ་དག་དང་སྨོན་ལམ་གཅིག་ཏུ་སྤྱད། །བདག་ལ་ཕན་པར་འདོད་པའི་གྲོགས་པོ་དག །བཟང་ པོ་སྤྱོད་པ་རབ་ཏུ་སྟོན་པ་རྣམས། །དེ་དག་དང་ཡང་རྟག་ཏུ་ཕྲད་པར་ཤོག །དེ་དག་བདག་གིས་ནམ་ཡང་ཡིད་མི་དབྱུང༌། །སངས་རྒྱས་སྲས་ཀྱིས་བསྐོར་བའི་མགོན་པོ་ རྣམས༑ ༑མངོན་སུམ་རྟག་ཏུ་བདག་གིས་རྒྱལ་བ་བལྟ། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་དག་ལ་ཡང་མཆོད་པ་རྒྱ་ཆེར་བགྱི། །རྒྱལ་བ་རྣམས་ཀྱི་དམ་པའི་ཆོས་འཛིན་ ཅིང༌། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །བཟང་པོ་སྤྱོད་པ་རྣམ་པར་སྤྱོད་པ་ཡང༌། །མ་འོངས་བསྐལ་པ་ཀུན་ཏུ་སྤྱད་པར་བགྱི། །སྲིད་པ་ཐམས་ཅད་དུ་ཡང་འཁོར་བ་ན། །བསོད་ ནམས་ཡེ་ཤེས་དག་ནི་མི་ཟད་རྙེད། །ཐབས་དང་ཤེས་རབ་ཏིང་འཛིན་རྣམ་ཐར་དང༌། །ཡོན་ཏན་ཀུན་གྱི་མི་ཟད་མཛོད་དུ་གྱུར། །རྡུལ་གཅིག་སྟེང་ན་རྡུལ་སྙེད་ཞིང་རྣམས་ཏེ། །ཞིང་ དེར་བསམ་གྱིས་མི་ཁྱབ་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་ལ། །བྱང་ཆུབ་སྤྱད་པ་སྤྱོད་ཅིང་བལྟ་བར་བགྱི། །དེ་ལྟར་མ་ལུས་ཐམས་ཅད་ཕྱོགས་སུ་ ཡང༌། །སྐྲ་ཙམ་ཁྱོན་ལ་དུས་གསུམ་ཚད་སྙེད་ཀྱི། །སངས་རྒྱས་རྒྱ་མཚོ་ཞིང་རྣམས་རྒྱ་མཚོ་དང༌། །བསྐལ་པ་རྒྱ་མཚོར་སྤྱོད་ཅིང་རབ་ཏུ་འཇུག །གསུང་གཅིག་ཡན་ལག་རྒྱ་མཚོའི་ སྒྲ་སྐད་ཀྱི། །རྒྱལ་བ་ཀུན་དབྱངས་ཡན་ལག་རྣམ་དག་པ། །འགྲོ་བ་ཀུན་གྱི་བསམ་པ་ཇི་བཞིན་དབྱངས། །སངས་རྒྱས་གསུང་ལ་རྟག་ཏུ་འཇུག་པར་བགྱི། །དུས་གསུམ་གཤེགས་ པའི་རྒྱལ་བ་ཐམས་ཅད་དག །འཁོར་ལོ་ཚུལ་རྣམས་རབ་ཏུ་བསྐོར་བ་ཡི། །དེ་དག་གི་ཡང་གསུང་དབྱངས་མི་ཟད་ལ། །བློ་ཡི་སྟོབས་ཀྱིས་བདག་ཀྱང་རབ་ཏུ་འཇུག །མ་འོངས་ ༄༅། །བསྐལ་པ་ཐམས་ཅད་འཇུག་པར་ཡང༌། །སྐད་ཅིག་གཅིག་གིས་བདག་ཀྱང་འཇུག་པར་བགྱི། །གང་ཡང་བསྐལ་པ་དུས་གསུམ་ཚད་དེ་དག །སྐད་ཅིག་ ཆ་ཤས་ཀྱིས་ནི་ཞུགས་པར་སྤྱད། །དུས་གསུམ་གཤེགས་པ་མི་ཡི་སེངྒེ་དག །དེ་དག་སྐད་ཅིག་གཅིག་ལ་བདག་གིས་བལྟ། །རྟག་ཏུ་དེ་དག་གི་ནི་སྤྱོད་ཡུལ་ལ། །སྒྱུ་མར་ གྱུར་པའི་རྣམ་ཐར་སྟོབས་ཀྱིས་འཇུག །གང་ཡང་དུས་གསུམ་དག་གི་ཞིང་བཀོད་པ། །དེ་དག་རྡུལ་གཅིག་སྟེང་དུ་མངོན་པར་སྒྲུབ། །དེ་ལྟར་མ་ལུས་ཕྱོགས་རྣམས་ཐམས་ ཅད་དུ། །རྒྱལ་བ་རྣམས་ཀྱི་ཞིང་གི་རྒྱན་ལ་འཇུག །གང་ཡང་མ་བྱོན་འཇིག་རྟེན་སྒྲོན་མ་རྣམས། །དེ་དག་རིམ་པར་འཚང་རྒྱ་འཁོར་ལོ་བསྐོར། །མྱ་ངན་འདས་པ་རབ་ཏུ་ཞི་ མཐའ་སྟོན། །མགོན་པོ་ཀུན་གྱི་དྲུང་དུ་བདག་མཆིའོ། །ཀུན་ཏུ་མྱུར་བའི་རྫུ་འཕྲུལ་སྟོབས་རྣམས་དང༌། །ཀུན་ནས་སྒོ་ཡི་ཐེག་པའི་སྟོབས་དག་དང༌། །ཀུན་ཏུ་ཡོན་ཏན་སྤྱོད་ པའི་སྟོབས་རྣམས་དང༌། །ཀུན་ཏུ་ཁྱབ་པ་བྱམས་པ་དག་གི་སྟོབས། །ཀུན་ཏུ་དགེ་བའི་བསོད་ནམས་སྟོབས་རྣམས་དང༌། །ཆགས་པ་མེད་པར་གྱུར་པའི་ཡེ་ཤེས་སྟོབས། ། ཤེས་རབ་ཐབས་དང་ཏིང་འཛིན་སྟོབས་དག་གིས། །བྱང་ཆུབ་སྟོབས་རྣམས་ཡང་དག་སྒྲུབ་པར་བྱེད། །ལས་ཀྱི་སྟོབས་རྣམས་ཡོངས་སུ་དག་བྱེད་ཅིང༌། །ཉོན་མོངས་སྟོབས་ རྣམས་ཀུན་ཏུ་འཇོམས་པར་བྱེད། །བདུད་ཀྱི་སྟོབས་རྣམས་སྟོབས་མེད་རབ་བྱེད་ཅིང༌། །བཟང་པོ་སྤྱོད་པའི་སྟོབས་ནི་རྫོགས་པར་བགྱི། །ཞིང་རྣམས་རྒྱ་མཚོ་རྣམ་པར་དག་བྱེད་ཅིང༌། །སེམས་ ཅན་རྒྱ་མཚོ་དག་ནི་རྣམ་པར་སྒྲོལ། །ཆོས་རྣམས་རྒྱ་མཚོ་རབ་ཏུ་མཐོང་བྱེད་ཅིང༌། །ཡེ་ཤེས་རྒྱ་མཚོ་རབ་ཏུ་རྟོགས་པར་བྱེད། །སྤྱོད་པ་རྒྱ་མཚོ་རྣམ་པར་དག་བྱེད་ཅིང༌། །སྨོན་ལམ་རྒྱ་མཚོ་ རབ་ཏུ་རྫོགས་པར་བྱེད། །སངས་རྒྱས་རྒྱ་མཚོ་རབ་ཏུ་མཆོད་བྱེད་ཅིང༌། །བསྐལ་པ་རྒྱ་མཚོར་མི་སྐྱོ་སྤྱད་པར་བགྱི། །གང་ཡང་དུས་གསུམ་གཤེགས་པའི་རྒྱལ་བ་ཡི། །བྱང་ཆུབ་སྤྱོད་པའི་ སྨོན་ལམ་བྱེ་བྲག་རྣམས། །བཟང་པོ་སྤྱོད་པས་བྱང་ཆུབ་སངས་རྒྱས་ནས། །དེ་ཀུན་བདག་གིས་མ་ལུས་རྫོགས་པར་བགྱི། །རྒྱལ་བ་ཀུན་གྱི་སྲས་ཀྱི་ཐུ་བོ་པ། །གང་གི་མིང་ནི་ཀུན་ཏུ་བཟང་ ཞེས་བྱ༑ ༑མཁས་པ་དེ་དང་མཚུངས་པར་སྤྱད་པའི་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ། །ལུས་དང་ངག་དང་ཡིད་ཀྱང་རྣམ་དག་ཅིང༌། །སྤྱོད་པ་རྣམ་དག་ཞིང་རྣམས་ཡོངས་དག་ དང༌། །བསྔོ་བ་བཟང་པོ་མཁས་པ་ཅི་འདྲ་བ། །དེ་འདྲར་བདག་ཀྱང་དེ་དང་མཚུངས་པར་ཤོག །ཀུན་ནས་དགེ་བ་བཟང་པོ་སྤྱད་པའི་ཕྱིར། །འཇམ་དཔལ་གྱི་ནི་སྨོན་ལམ་སྤྱད་པར་བགྱི། ། མ་འོངས་བསྐལ་པ་ཀུན་ཏུ་མི་སྐྱོ་བར། །དེ་ཡི་བྱ་བ་མ་ལུས་རྫོགས་པར་བགྱི། །སྤྱོད་པ་དག་ནི་ཚད་ཡོད་མ་གྱུར་ཅིག །ཡོན་ཏན་རྣམས་ཀྱང་ཚད་གཟུང་མེད་པར་ཤོག །སྤྱོད་པ་ཚད་མེད་ ༄༅། །པ་ལ་གནས་ནས་ཀྱང༌། །དེ་དག་འཕྲུལ་པ་ཐམས་ཅད་འཚལ་བར་བགྱི། །ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ ཏེ༑ ༑ཇི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ ལ་ཕུལ༑ ༑ལྷ་དང་མི་ཡི་བདེ་བ་མཆོག་རྣམས་ཀྱང༌། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ ཤིང༌། །ལན་གཅིག་ཙམ་ཡང་དད་པ་བསྐྱེད་པ་ནི། །བསོད་ནམས་དམ་པའི་མཆོག་ཏུ་འདི་འགྱུར་རོ། །གང་གིས་བཟང་སྤྱོད་སྨོན་ལམ་འདི་བཏབ་པ། །དེས་ནི་ངན་སོང་ཐམས་ཅད་ སྤོང་བར་འགྱུར། །དེས་ནི་གྲོགས་པོ་ངན་པའང་སྤངས་པ་ཡིན། །སྣང་བ་མཐའ་ཡས་དེ་ཡང་དེས་མྱུར་མཐོང༌། །དེ་དག་རྙེད་པ་རབ་རྙེད་བདེ་བར་འཚོ། །མི་ཚོ་འདིར་ཡང་དེ་དག་ལེགས་པར་ འོངས༑ ༑ཀུན་ཏུ་བཟང་པོ་དེ་ཡང་ཅི་འདྲ་བར། །དེ་དག་རིང་པོར་མི་ཐོགས་དེ་བཞིན་འགྱུར། །མཚམས་མེད་ལྔ་པོ་དག་གི་སྡིག་པ་རྣམས། །གང་གིས་མི་ཤེས་དབང་གིས་བྱས་པ་དག ། དེ་ཡིས་བཟང་པོའི་སྤྱོད་པ་འདི་བརྗོད་ན། །མྱུར་དུ་མ་ལུས་ཡོངས་སུ་བྱང་བར་འགྱུར། །ཡེ་ཤེས་དང་ནི་གཟུགས་དང་མཚན་རྣམས་དང༌། །རིགས་དང་ཁ་དོག་རྣམས་དང་ལྡན་པར་ འགྱུར༑ ༑བདུད་དང་མུ་སྟེགས་མང་པོས་དེ་མི་ཐུབ། །འཇིག་རྟེན་གསུམ་པོ་ཀུན་ནའང་མཆོད་པར་འགྱུར། །བྱང་ཆུབ་ཤིང་དབང་དྲུང་དུ་དེ་མྱུར་འགྲོ་།སོང་ནས་སེམས་ཅན་ཕན་ཕྱིར་དེ་འདུག་ སྟེ༑ ༑བྱང་ཆུབ་སངས་རྒྱས་འཁོར་ལོ་རབ་ཏུ་བསྐོར། །བདུད་རྣམས་སྡེ་དང་བཅས་པ་ཐམས་ཅད་བཏུལ། །གང་ཡང་བཟང་པོ་སྤྱོད་པའི་སྨོན་ལམ་འདི། །འཆང་བ་དང་ནི་སྟོན་ཏམ་ཀློག་ན་ཡང༌། །དེ་ཡི་ རྣམ་པར་སྨིན་པ་སངས་རྒྱས་མཁྱེན། །བྱང་ཆུབ་མཆོག་ལ་སོམ་ཉི་མ་བྱེད་ཅིག །འཇམ་དཔལ་ཇི་ལྟར་མཁྱེན་ཅིང་དཔའ་བ་དང༌། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་གི་ནི་རྗེས་སུ་ བདག་སློབ་ཅིང༌། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ ཀུན་ཀྱང༌། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་བདག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། བདེ་བ་ཅན་གྱི་ཞིང་དེར་རབ་ཏུ་འགྲོ་།དེར་སོང་ནས་ནི་སྨོན་ལམ་འདི་དག་ཀྱང༌། །ཐམས་ཅད་མ་ལུས་མངོན་དུ་གྱུར་པར་ཤོག །དེ་དག་མ་ལུས་བདག་གིས་ཡོངས་སུ་བཀང༌། །འཇིག་རྟེན་ཇི་ སྲིད་སེམས་ཅན་ཕན་པར་བགྱི། །རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ ༄༅། །ཡང་བདག་གིས་དེར་ཐོབ་ཤོག །དེར་ནི་བདག་གིས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་ སུ་ཡང༌། །སེམས་ཅན་རྣམས་ལ་ཕན་པ་མང་པོ་བགྱི། །གང་གིས་བཟང་པོ་སྤྱོད་པ་སྟོན་པ་ཡིས། །དགེ་བ་ཅུང་ཟད་བདག་གིས་ཅི་བསགས་པ། །དེས་ནི་འགྲོ་བའི་སྨོན་ལམ་དགེ་བ་ རྣམས༑ ༑སྐད་ཅིག་གཅིག་གིས་ཐམས་ཅད་འབྱོར་པར་ཤོག །གང་ཡང་བཟང་པོ་སྤྱོད་པ་བསྔོས་པ་ཡིས། །བསོད་ནམས་མཐའ་ཡས་དམ་པ་ཐོབ་པ་དེས། །འགྲོ་བ་སྡུག་བསྔལ་ཆུ་ བོར་བྱིང་བ་རྣམས། །འོད་དཔག་མེད་པའི་གནས་རབ་འགྲོ་བར་ཤོག །ཤིན་ཏུ་རྒྱས་པ་ཆེན་པོའི་མདོ། སངས་རྒྱས་ཕལ་པོ་ཆེ་ཞེས་བྱ་བ་ལས། བྱང་ཆུབ་སེམས་དཔའི་སྡེ་སྣོད་ཀྱི་ནང་ ནས་སྡོང་པོས་བརྒྱན་པ་ཞེས་བྱ་བ་ཆོས་ཀྱི་རྣམ་གྲངས་ཆེན་པོ་ལས་ནོར་བཟང་གིས་དགེ་བའི་བཤེས་གཉེན་བསྙེན་བཀུར་བའི་སྤྱོད་པ་ཕྱོགས་གཅིག་པ་སྟེ། ཇི་སྙེད་པ་རྫོགས་ སོ༑༑ །།ལོཙྪ་བ་བཻ་རོ་ཙན་རཀྵི་ཏས་ཞུ་ཆེན་བགྱིས་ཏེ་གཏན་ལ་ཕབ་པའོ།། །། Copyright © 2012 by the Asian Classics Input Project. All rights reserved.