Loading
འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ།
ཀ
checked, but not manually proofread
[DD] ༄༅། །རྒྱ་གར་སྐད་[DD] དུ། ཨཱཪྻ་ཨཥྚ་ས་ཧ་སྲི་
ཀཱ་པྲ་ཛྙཱ་པ་ར་མི་ཏཱ། བོད་སྐད་དུ། འཕགས་པ་
ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ།
བམ་པོ་དང་པོ། སངས་རྒྱས་དང་བྱང་ཆུབ་སེམས་[DD]
[DD] ༄༅། །དཔའ་དང༌། འཕགས་པ་ཉན་ཐོས་དང་རང་སངས་རྒྱས་ཐམས་
ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་
ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་བཞུགས་ཏེ། དགེ་སློང་སྟོང་
ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དག་དང་ཐབས་ཅིག་གོ །ཐམས་
ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དུ་གྱུར་པ། [DD]
སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ།
བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པར་ཀུན་
ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཐམས་ཅད་ཀྱི་དབང་དམ་པའི་ཕ་རོལ་ཏུ་སོན་པ་ཐོབ་པ་ཤ་སྟག་སྟེ།
གང་ཟག་གཅིག་མ་གཏོགས་པ་ནི། འདི་ལྟ་སྟེ། ཚེ་དང་ལྡན་པ་ཀུན་དགའ་བོའོ། །དེ་ནས་བཅོམ་ལྡན་འདས་ཀྱིས་གནས་བརྟན་
ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་
ཀྱི་ཕ་རོལ་ཏུ་ཕྱིན་པ་ལས་བརྩམས་ཏེ། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤེས་རབ་ཀྱི་ཕ་རོལ་ཏུ་ཕྱིན་
༄༅། །པ་ལ་ངེས་པར་འབྱུང་བར་འགྱུར་བ་དེ་བཞིན་དུ་ཁྱོད་སྤོབས་པར་བྱོས་ཤིག །དེ་ནས་ཚེ་དང་ལྡན་པ་ཤཱ་
རིའི་བུ་འདི་སྙམ་དུ་སེམས་ཏེ། ཅི་ཚེ་དང་ལྡན་པ་རབ་འབྱོར་འདི་བདག་ཉིད་ཀྱི་རང་གི་ཤེས་རབ་ཀྱི་སྤོབས་པའི་སྟོབས་བསྐྱེད་
པ་དང༌། རང་གི་ཤེས་རབ་ཀྱི་སྤོབས་པའི་སྟོབས་བྱིན་གྱིས་བརླབས་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ཉེ་བར་སྟོན་པར་འགྱུར་རམ། འོན་ཏེ་སངས་རྒྱས་ཀྱི་མཐུས་ཡིན་སྙམ་མོ། །དེ་ནས་སངས་རྒྱས་ཀྱི་
མཐུས་ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུའི་དེ་ལྟ་བུའི་ཚུལ་གྱི་སེམས་ཀྱི་རྟོག་པ་དེ་སེམས་ཀྱིས་ཤེས་ནས་ཚེ་
དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། བཅོམ་ལྡན་འདས་ཀྱི་ཉན་ཐོས་རྣམས་ནི་གང་ཅི་སྨྲ་
བ་དང༌། སྟོན་པ་དང༌། ཉེ་བར་སྟོན་པ་དང༌། རྗོད་པར་བྱེད་པ་དང༌། གསལ་བར་བྱེད་པ་དང༌། ཡང་དག་པར་གསལ་བར་བྱེད་པ་དེ་དག་ཐམས་ཅད་ནི། དེ་བཞིན་གཤེགས་པའི་སྐྱེས་བུའི་
མཐུ་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ཆོས་གང་བསྟན་པའི་ཆོས་བསྟན་པ་དེ་ལ་སློབ་པ་ན་དེ་དག་གིས་ཆོས་ཉིད་དེ་མངོན་སུམ་དུ་བྱས་ནས་འཛིན་
ཏོ༑ ༑དེ་དག་གིས་ཆོས་ཉིད་དེ་མངོན་སུམ་དུ་བྱས་ཤིང་བཟུང་ནས་གང་དང་གང་འཆད་པ་དང༌། གང་དང་གང་སྟོན་པ་དང༌། གང་དང་གང་ཉེ་བར་སྟོན་པ་དང༌། གང་དང་གང་རྗོད་པར་
བྱེད་པ་དང༌། གང་དང་གང་གསལ་བར་བྱེད་པ་དང༌། གང་དང་གང་ཡང་དག་པར་གསལ་བར་བྱེད་པ་དེ་དག་ཐམས་ཅད་ཆོས་ཉིད་དང་མི་འགལ་བ་ཡིན་ནོ། །ཚེ་དང་ལྡན་པ་ཤཱ་རིའི་
བུ༑ རིགས་ཀྱི་བུ་དེ་དག་འདི་ལྟར་ཆོས་ཉིད་དེ་ཉེ་བར་སྟོན་པ་རྣམས་ཆོས་ཉིད་དང་མི་འགལ་བ་དེའང་དེ་བཞིན་གཤེགས་པས་ཆོས་བསྟན་པའི་རྒྱུ་མཐུན་པའོ། །དེ་ནས་སངས་རྒྱས་ཀྱི་
མཐུས་ཚེ་དང་ལྡན་པ་རབ་འབྱོར་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གང་བཅོམ་ལྡན་འདས་ཀྱིས་འདི་སྐད་དུ། རབ་འབྱོར། བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལས་བརྩམས་ཏེ་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ངེས་པར་འབྱུང་བར་འགྱུར་
༄༅། །བ་དེ་བཞིན་དུ་ཁྱོད་སྤོབས་པར་བྱོས་ཤིག་ཅེས་བཀའ་སྩལ་པ། བཅོམ་ལྡན་འདས། བྱང་ཆུབ་སེམས་དཔའ་བྱང་ཆུབ་སེམས་དཔའ་ཞེས་བརྗོད་པ་གང་ལགས་
པ་དེ་ལ་བཅོམ་ལྡན་འདས། འདི་ལྟ་སྟེ། བྱང་ཆུབ་སེམས་དཔའ་ཞེས་བགྱི་བ་འདི་ཆོས་གང་གི་ཚིག་བླ་དྭགས་ལགས། བཅོམ་ལྡན་འདས། འདི་ལྟ་སྟེ། བྱང་ཆུབ་སེམས་དཔའ་ཞེས་བགྱི་
བའི་ཆོས་དེ་བདག་གིས་ཡང་དག་པར་རྗེས་སུ་མ་མཐོང་ངོ༌། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི་བའི་ཆོས་དེའང་བདག་གིས་ཡང་དག་པར་རྗེས་
སུ་མ་མཐོང་ངོ༌། །བཅོམ་ལྡན་འདས། བྱང་ཆུབ་སེམས་དཔའམ། བྱང་ཆུབ་སེམས་དཔའི་ཆོས་ཀྱང་བདག་གིས་མ་འཚལ། མ་དམིགས། ཡང་དག་པར་རྗེས་སུ་མ་མཐོང༌། ཤེས་རབ་
ཀྱི་ཕ་རོལ་ཏུ་ཕྱིན་པའང་མ་འཚལ། མ་དམིགས། ཡང་དག་པར་རྗེས་སུ་མ་མཐོང་ན། བྱང་ཆུབ་སེམས་དཔའ་གང་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་གང་ལ་གདམས་ཤིང་རྗེས་སུ་
བསྟན་པར་བགྱི། བཅོམ་ལྡན་འདས། འོན་ཀྱང་ཡང་གལ་ཏེ་འདི་ལྟར་སྨྲས་པ་དང༌། བསྟན་པ་དང༌། ཉེ་བར་བསྟན་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་མི་
འགོང༌། ཀུན་ཏུ་མི་ཞུམ། བག་མི་ཚ། བག་འཁུམས་པར་མི་འགྱུར། འདིའི་ཡིད་ཕྱིར་ཕྱོགས་པར་མི་བགྱིད། བཅོམ་ཞིང་ཕྱིར་ཕྱོགས་པར་མི་འགྱུར། མི་དངང༌། ཀུན་ཏུ་མི་
སྐྲག །ཀུན་ཏུ་སྐྲག་པ་དང་ལྡན་པར་མི་འགྱུར་ན། འདི་ཉིད་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྗེས་སུ་བསྟན་པར་བགྱི་བ་ལགས་སོ། །འདི་ཉིད་
བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པར་རིག་པར་བགྱིའོ། །འདི་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གདམས་པ་ལགས་སོ། །གལ་ཏེ་དེ་ལྟར་
གནས་ན། དེ་ཉིད་འདིའི་གདམས་པ་དང༌། རྗེས་སུ་བསྟན་པ་ལགས་སོ། །བཅོམ་ལྡན་འདས། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་
ལ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་པས། ཇི་ལྟར་བསླབས་ན། འདི་བྱང་ཆུབ་ཀྱི་སེམས་དེས་ཀྱང་རློམ་སེམས་སུ་མི་བགྱིད་པ་དེ་ལྟར་བསླབ་པར་བགྱིའོ། །དེ་ཅིའི་སླད་དུ་
ཞེ་ན༑ འདི་ལྟར་སེམས་དེ་ནི། སེམས་མ་མཆིས་པ་སྟེ། སེམས་ཀྱི་རང་བཞིན་ནི། འོད་གསལ་བ་ལགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་
ཅེས་སྨྲས་སོ། །ཚེ་དང་ལྡན་པ་རབ་འབྱོར། ཡང་ཅི་སེམས་གང་སེམས་མེད་པའི་སེམས་དེ་ཡོད་དམ། དེ་སྐད་ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་
ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། ཡང་ཅི་སེམས་མེད་པ་ཉིད་གང་ཡིན་པའི་སེམས་མེད་པ་ཉིད་དེ་ལ་ཡོད་པ་ཉིད་དམ། མེད་པ་ཉིད་ཡོད་པའམ། དམིགས་པར་ཡང་
༄༅། །འགྱུར་རམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མེད་དོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། གལ་ཏེ་སེམས་
མེད་པ་དེ་ལ་ཡོད་པའམ། མེད་པ་མེད་ཅིང་མི་དམིགས་ན། ཚེ་དང་ལྡན་པ་ཤཱ་རིའི་བུ། འདི་སྐད་དུ། སེམས་གང་སེམས་མེད་པའི་སེམས་དེ་ཡོད་དམ་ཞེས་སྨྲས་པའི་ཁྱོད་ཀྱིས་བརྒལ་
བ་གང་ཡིན་པ་དེ་ཅི་རིགས་པར་འགྱུར་རམ། དེ་སྐད་ཅེས་སྨྲས་པ་དང༌། ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར་
སེམས་མེད་པ་ཉིད་དེའང་གང་ཡིན། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། སེམས་མེད་པ་དེ་ནི། འགྱུར་བ་མེད་པ། རྣམ་པར་རྟོག་པ་མེད་པའོ། །དེ་ནས་ཚེ་དང་ལྡན་པ་
ཤཱ་རིའི་བུས་ཚེ་དང་ལྡན་པ་རབ་འབྱོར་ལ་ལེགས་སོ། །ཞེས་བྱ་བ་བྱིན་ཏེ། ཚེ་དང་ལྡན་པ་རབ་འབྱོར། ཇི་ལྟར་ཡང་ཁྱོད་བཅོམ་ལྡན་འདས་ཀྱིས་ཉོན་མོངས་པ་མེད་པ་ལ་གནས་པའི་
མཆོག་ཏུ་གསུངས་པ་ལྟར་སྟོན་པ་ལེགས་སོ། ལེགས་སོ། །དེ་བས་ན། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་
མི་ལྡོག་པར་ཉེ་བར་བརྟག་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང་མ་བྲལ་བར་ཡང་རིག་པར་བྱའོ། །ཉན་ཐོས་ཀྱི་ས་ལ་སློབ་
པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ། གཟུང་བར་བྱ། བཅང་བར་བྱ། ཀླག་པར་བྱ། ཀུན་ཆུབ་པར་བྱ། རབ་ཏུ་གདོན་པར་བྱའོ། །ཤེས་རབ་ཀྱི་ཕ་
རོལ་ཏུ་ཕྱིན་པ་འདི་ཉིད་ལ་བསླབ་པར་བྱའོ། །རྣལ་འབྱོར་དུ་བྱའོ། །རང་སངས་རྒྱས་ཀྱི་ས་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ། གཟུང་བར་
བྱ༑ བཅང་བར་བྱ། ཀླག་པར་བྱ། ཀུན་ཆུབ་པར་བྱ། རབ་ཏུ་གདོན་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བསླབ་པར་བྱའོ། །རྣལ་འབྱོར་དུ་བྱའོ། །བྱང་ཆུབ་སེམས་དཔའི་
ས་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ། གཟུང་པར་བྱ། བཅང་བར་བྱ། ཀླག་པར་བྱ། ཀུན་ཆུབ་པར་བྱ། རབ་ཏུ་གདོན་པར་བྱའོ། །ཤེས་
རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་ཐབས་མཁས་པ་དང་ལྡན་པས་བྱང་ཆུབ་སེམས་དཔའི་ཆོས་ཐམས་ཅད་ཐོབ་པར་བྱ་བའི་ཕྱིར་རྣལ་འབྱོར་དུ་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་
དཔའ་སེམས་དཔའ་ཆེན་པོས་གང་ལ་བསླབ་ཅིང་རྣལ་འབྱོར་དུ་བྱ་བའི་བྱང་ཆུབ་སེམས་དཔའི་ཆོས་ཐམས་ཅད་རྒྱས་པར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལས་བསྟན་ཏོ། །བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱ། གཟུང་བར་བྱ། བཅང་བར་བྱ། ཀླག་པར་བྱ། ཀུན་
༄༅། །ཆུབ་པར་བྱ། རབ་ཏུ་གདོན་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་ཐབས་མཁས་པ་དང་ལྡན་པས་སངས་རྒྱས་ཀྱི་ཆོས་ཐམས་ཅད་ཐོབ་པར་བྱ་བའི་
ཕྱིར་རྣལ་འབྱོར་དུ་བྱའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལས་ནི། བྱང་ཆུབ་སེམས་དཔའ་སེམས་དཔའ་ཆེན་པོས་གང་ལ་བསླབ་པར་བྱ་བ་དང༌། རྣལ་
འབྱོར་དུ་བྱ་བའི་སངས་རྒྱས་ཀྱི་ཆོས་ཐམས་ཅད་རྒྱས་པར་བསྟན་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས།
བྱང་ཆུབ་སེམས་དཔའི་མིང་གང་ལགས་པ་འདི་ཉིད་བདག་གིས་མ་འཚལ། མ་དམིགས། ཡང་དག་པར་རྗེས་སུ་མི་མཐོང་ངོ༌། །ཤེས་རབ་ཀྱི་ཕ་རོལ་ཏུ་ཕྱིན་པའང་མ་འཚལ། མ་
དམིགས། ཡང་དག་པར་རྗེས་སུ་མི་མཐོང་ངོ༌། །བཅོམ་ལྡན་འདས། བདག་གིས་བྱང་ཆུབ་སེམས་དཔའི་མིང་འདི་ཉིད་མ་འཚལ། མ་དམིགས། ཡང་དག་པར་རྗེས་སུ་མ་མཐོང༌།
ཤེས་རབ་ཀྱི་ཕ་རོལ་ཏུ་ཕྱིན་པའང་མ་འཚལ། མ་དམིགས། ཡང་དག་པར་རྗེས་སུ་མ་མཐོང་ན། བྱང་ཆུབ་སེམས་དཔའ་གང་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་གང་ལ་གདམས་
ཤིང་རྗེས་སུ་བསྟན་པར་བགྱི། བཅོམ་ལྡན་འདས། གང་བདག་གིས་དངོས་པོ་མ་འཚལ། མ་དམིགས། ཡང་དག་པར་རྗེས་སུ་མ་མཐོང་ན། མིང་ཙམ་གྱིས་འདི་ལྟ་སྟེ། བྱང་ཆུབ་
སེམས་དཔའ་ཞེས་འདུ་བ་དང༌། འགོད་པར་བགྱིད་པ་ནི། བདག་གི་གློ་བ་ལ་གཅགས་ལགས་སོ། །བཅོམ་ལྡན་འདས། འོན་ཀྱང་མིང་དེ་ཡང་གནས་པ་མ་ལགས་ཤིང༌། མི་གནས་པའང་
མ་ལགས་ལ། གནས་པ་དང་བྲལ་བ་མ་ལགས་ཤིང་གནས་པ་དང་བྲལ་བ་མ་ལགས་པའང་མ་ལགས་སོ། །དེ་ཅིའི་སླད་དུ་ཞེ་ན། མིང་དེ་མ་མཆིས་པའི་སླད་དུའོ། །དེ་ལྟར་མིང་དེ་གནས་
པ་མ་ལགས་ཤིང་མི་གནས་པའང་མ་ལགས་ལ། གནས་པ་དང་བྲལ་བ་མ་ལགས་ཤིང་གནས་པ་དང་བྲལ་བ་མ་ལགས་པའང་མ་ལགས་སོ། །བཅོམ་ལྡན་འདས། གལ་ཏེ་དེ་ལྟར་ཤེས་
རབ་ཀྱི་ཕ་རོལ་ཏུ་ཕྱིན་པ་ཟབ་མོ་བཤད་པ་དང༌། བསྟན་པ་དང༌། ཉེ་བར་བསྟན་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་མི་འགོང༌། ཀུན་ཏུ་མི་ཞུམ། བག་མི་ཚ། བག་
འཁུམས་པར་མི་འགྱུར། འདིའི་ཡིད་ཕྱིར་ཕྱོགས་པར་མི་བགྱིད། བཅོམ་ཞིང་ཕྱིར་ཕྱོགས་པར་མི་འགྱུར། མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་ལྡན་པར་མི་འགྱུར་ཞིང༌།
ལྷག་པའི་བསམ་པས་མོས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་དང་མ་བྲལ་བར་རིག་པར་བགྱིའོ། །ཕྱིར་མི་ལྡོག་པའི་བྱང་ཆུབ་
སེམས་དཔའི་ས་ལ་གནས་པ་སྟེ། མི་གནས་པའི་ཚུལ་གྱིས་ལེགས་པར་གནས་པ་ལགས་སོ། །བཅོམ་ལྡན་འདས། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་
༄༅། །ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པས་གཟུགས་ལ་གནས་པར་མི་བགྱིའོ། །དེ་བཞིན་དུ་ཚོར་བ་ལ་མ་ལགས། འདུ་
ཤེས་ལ་མ་ལགས། འདུ་བྱེད་རྣམས་ལ་མ་ལགས། རྣམ་པར་ཤེས་པ་ལ་གནས་པར་མི་བགྱིའོ། །དེ་ཅིའི་སླད་དུ་ཞེ་ན། གལ་ཏེ་གཟུགས་ལ་གནས་ན། གཟུགས་མངོན་པར་
འདུ་བྱེད་པ་ལ་སྤྱོད་ཀྱི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་མ་ལགས་སོ། །དེ་བཞིན་དུ་གལ་ཏེ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། གལ་ཏེ་རྣམ་པར་ཤེས་པ་
ལ་གནས་ན། རྣམ་པར་ཤེས་པ་མངོན་པར་འདུ་བྱེད་པ་ལ་སྤྱོད་ཀྱི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་མ་ལགས་སོ། །དེ་ཅིའི་སླད་དུ་ཞེ་ན། མངོན་པར་འདུ་བྱེད་པ་ལ་སྤྱོད་ན།
ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་འཛིན་པ་མ་ལགས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བགྱིད་པའང་མ་ལགས། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་
རྫོགས་པར་བགྱིད་པའང་མ་ལགས་སོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་མ་གྱུར་ན། ཡོངས་སུ་མི་གཟུང་བ་ཡོངས་སུ་གཟུང་བས་ཐམས་ཅད་མཁྱེན་པ་ཉིད་
ལ་ངེས་པར་འབྱུང་བར་མི་འགྱུར་རོ། །དེ་ཅིའི་སླད་དུ་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གཟུགས་ཡོངས་སུ་གཟུང་བ་མ་མཆིས་སོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་
པ་ལ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ཡོངས་སུ་གཟུང་བ་མ་མཆིས་སོ། །གཟུགས་ཡོངས་སུ་གཟུང་བ་མ་མཆིས་པ་གང་ལགས་པ་དེ་ནི། གཟུགས་
མ་ལགས། དེ་བཞིན་དུ་ཚོར་བ་གང་ལགས་པ་དང༌། འདུ་ཤེས་གང་ལགས་པ་དང༌། འདུ་བྱེད་རྣམས་གང་ལགས་པ་དང༌། རྣམ་པར་ཤེས་པ་ཡོངས་སུ་གཟུང་བ་མ་མཆིས་པ་གང་ལགས་
པ་དེ་ནི༑ རྣམ་པར་ཤེས་པ་མ་ལགས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་དེའང་ཡོངས་སུ་གཟུང་བ་མ་མཆིས་སོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་
ཕ་རོལ་ཏུ་ཕྱིན་པ་འདི་ལ་སྤྱད་པར་བགྱིའོ། །འདིའང་བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་ཐམས་ཅད་ཡོངས་སུ་གཟུང་བ་མ་མཆིས་པ་ཞེས་བགྱི་བའི་ཏིང་ངེ་འཛིན་ཏེ། ཡངས་
པ་མདུན་དུ་བགྱིས་པ་ཚད་མེད་པར་ངེས་པ་ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ལགས་པའོ། །ཐམས་ཅད་མཁྱེན་པ་ཉིད་དེའང་ཡོངས་སུ་གཟུང་བ་མ་མཆིས་ཏེ། མཚན་
མར་གཟུང་བ་མ་ལགས་སོ། །གལ་ཏེ་མཚན་མར་བཟུང་བར་གྱུར་ན། ཀུན་ཏུ་རྒྱུ་ཕྲེང་བ་ཅན་འདི་ལ་དད་པར་མི་འགྱུར་བ་ཞིག་ན། ཀུན་ཏུ་རྒྱུ་ཕྲེང་བ་ཅན་ཐམས་ཅད་མཁྱེན་པའི་ཡེ་ཤེས་
འདི་ལ་མོས་ནས་དད་པས་རྗེས་སུ་འབྲང་ཞིང་ཕྱོགས་གཅིག་པའི་ཡེ་ཤེས་ཀྱིས་ཞུགས་སོ། །དེ་ཞུགས་ནས་གཟུགས་ཡོངས་སུ་མི་འཛིན་ཏོ། །དེ་བཞིན་དུ་ཚོར་བ་མ་ལགས། འདུ་
༄༅། །ཤེས་མ་ལགས། འདུ་བྱེད་རྣམས་མ་ལགས། རྣམ་པར་ཤེས་པ་ཡོངས་སུ་མི་འཛིན་ཏོ། །དེ་ལ་ཤེས་པ་དེ་དགའ་བ་དང༌། བདེ་བར་ཡང་ཡང་དག་པར་རྗེས་སུ་མི་
མཐོང་ངོ༌། །ཤེས་པ་དེ་ནང་གི་གཟུགས་ཀྱི་ཡིན་པར་ཡང་དག་པར་རྗེས་སུ་མི་མཐོང་ངོ༌། །ཤེས་པ་དེ་ཕྱི་རོལ་གྱི་གཟུགས་ཀྱི་ཡིན་པར་ཡང་དག་པར་རྗེས་སུ་མི་མཐོང༌། ཤེས་པ་དེ་ཕྱི་
ནང་གི་གཟུགས་ཀྱི་ཡིན་པར་ཡང་དག་པར་རྗེས་སུ་མི་མཐོང༌། ཤེས་པ་དེ་གཟུགས་ལས་གཞན་དུའང་ཡང་དག་པར་རྗེས་སུ་མི་མཐོང་ངོ༌། །དེ་བཞིན་དུ་ཤེས་པ་དེ་ནང་གི་ཚོར་བ་དང༌།
འདུ་ཤེས་དང༌། འདུ་བྱེད་རྣམས་ཀྱི་མ་ཡིན། ཤེས་པ་དེ་ནང་གི་རྣམ་པར་ཤེས་པའི་ཡིན་པར་ཡང་དག་པར་རྗེས་སུ་མི་མཐོང༌། ཤེས་པ་དེ་ཕྱི་རོལ་གྱི་རྣམ་པར་ཤེས་པའི་ཡིན་པར་
ཡང་དག་པར་རྗེས་སུ་མི་མཐོང༌། ཤེས་པ་དེ་ཕྱི་ནང་གི་རྣམ་པར་ཤེས་པའི་ཡིན་པར་ཡང་དག་པར་རྗེས་སུ་མི་མཐོང༌། ཤེས་པ་དེ་རྣམ་པར་ཤེས་པ་ལས་གཞན་དུའང་ཡང་དག་པར་
རྗེས་སུ་མི་མཐོང་སྟེ། ཚིག་གི་རྣམ་གྲངས་འདི་ལ་ཀུན་ཏུ་རྒྱུ་ཕྲེང་བ་ཅན་མོས་སོ། །དེ་ཐམས་ཅད་མཁྱེན་པའི་ཡེ་ཤེས་འདི་ལ་ཐམས་ཅད་དུ་དད་པས་རྗེས་སུ་འབྲང་ཞིང་ཆོས་ཉིད་ཚད་
མར་བགྱིས་ཏེ་འདི་ལྟར་མོས་པ་ཞེས་བགྱིའོ། །དེས་ཆོས་གང་ཡང་ཡོངས་སུ་མ་བཟུང་ངོ༌། །གང་གཟུང་བའམ་གཏང་བར་བགྱི་བའི་ཆོས་དེ་གང་ཡང་མ་དམིགས་སོ། །དེ་མྱ་ངན་
ལས་འདས་པར་ཡང་རློམ་སེམས་སུ་མི་བགྱིད་དོ། །བཅོམ་ལྡན་འདས། འདིའང་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པར་རིག་པར་བགྱི་སྟེ། གང་གཟུགས་
ཡོངས་སུ་མི་འཛིན། དེ་བཞིན་དུ་གང་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། གང་རྣམ་པར་ཤེས་པ་ཡོངས་སུ་མི་འཛིན་ལ། དེ་བཞིན་གཤེགས་པའི་སྟོབས་བཅུ་དང༌། དེ་
བཞིན་གཤེགས་པའི་མི་འཇིགས་པ་བཞི་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་རྣམས་ཡོངས་སུ་མ་རྫོགས་པར་བར་མ་དོར་ཡོངས་སུ་མྱ་ངན་ལས་མི་འདའ་བ་སྟེ། དེ་བས་
ན༑ བཅོམ་ལྡན་འདས། འདིའང་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པར་རིག་པར་བགྱིའོ། །བཅོམ་ལྡན་འདས། གཞན་ཡང་བྱང་ཆུབ་སེམས་
དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྒོམ་པས་འདི་ལྟར་ཉེ་བར་བརྟག་ཅིང་འདི་ལྟར་ངེས་པར་བསམ་པར་བགྱི་སྟེ།
ཤེས་རབ་ཀྱི་ཕ་རོལ་ཏུ་ཕྱིན་པ་འདི་གང་ཡིན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་གང་གི་ཡིན། ཅི་ཆོས་གང་མེད་པ་དང༌། མི་དམིགས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནམ་
ཞེས་གལ་ཏེ་དེ་ལྟར་ཉེ་བར་བརྟགས། དེ་ལྟར་ངེས་པར་བསམས་ན། མི་འགོང༌། ཀུན་ཏུ་མི་ཞུམ། བག་མི་ཚ། བག་འཁུམས་པར་མི་འགྱུར། འདིའི་ཡིད་ཕྱིར་ཕྱོགས་པར་མི་བགྱིད།
༄༅། །བཅོམ་ཞིང་ཕྱིར་ཕྱོགས་པར་མི་འགྱུར། མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་ལྡན་པར་མི་འགྱུར་ན། བྱང་ཆུབ་སེམས་དཔའ་སེམས་དཔའ་ཆེན་པོ་
ཤེས་རབ་ཀྱི་ཕ་རོལ་ཏུ་ཕྱིན་པ་དང་མ་བྲལ་བར་རིག་པར་བགྱིའོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར།
འདི་ལྟར་གང་གི་ཚེ་གཟུགས་ཉིད་གཟུགས་ཀྱི་ངོ་བོ་ཉིད་དང་བྲལ་བ། དེ་བཞིན་དུ་གང་གི་ཚེ་ཚོར་བ་ཉིད་དང༌། འདུ་ཤེས་ཉིད་དང༌། འདུ་བྱེད་རྣམས་ཉིད་དང༌། དེ་བཞིན་དུ་འདི་ལྟར་གང་གི་ཚེ་རྣམ་
པར་ཤེས་པ་ཉིད་ཀྱང་རྣམ་པར་ཤེས་པའི་ངོ་བོ་ཉིད་དང་བྲལ་བ། གང་གི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དང་བྲལ་བ། གང་གི་
ཚེ་ཐམས་ཅད་མཁྱེན་པ་ཉིད་ཀྱང་ཐམས་ཅད་མཁྱེན་པའི་ངོ་བོ་ཉིད་དང་བྲལ་བ་ཡིན་ན། ཅིའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང་
མ་བྲལ་བར་རིག་པར་བྱ། དེ་སྐད་ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། དེ་དེ་བཞིན་ནོ། །
དེ་དེ་བཞིན་ཏེ། ཤཱ་རིའི་བུ། གཟུགས་ཉིད་གཟུགས་ཀྱི་ངོ་བོ་ཉིད་དང་བྲལ་བའོ། །དེ་བཞིན་དུ་ཚོར་བ་ཉིད་དང༌། འདུ་ཤེས་ཉིད་དང༌། འདུ་བྱེད་རྣམས་ཉིད་དང༌། དེ་བཞིན་དུ་རྣམ་
པར་ཤེས་པ་ཉིད་ཀྱང་ཚེ་དང་ལྡན་པ་ཤཱ་རིའི་བུ། རྣམ་པར་ཤེས་པའི་ངོ་བོ་ཉིད་དང་བྲལ་བའོ། །ཚེ་དང་ལྡན་པ་ཤཱ་རིའི་བུ། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་
པའི་ངོ་བོ་ཉིད་དང་བྲལ་བའོ། །ཚེ་དང་ལྡན་པ་ཤཱ་རིའི་བུ། ཐམས་ཅད་མཁྱེན་པ་ཉིད་ཀྱང་ཐམས་ཅད་མཁྱེན་པའི་ངོ་བོ་ཉིད་དང་བྲལ་བའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཤེས་རབ་ཀྱི་ཕ་
རོལ་ཏུ་ཕྱིན་པའི་མཚན་ཉིད་དང་ཡང་བྲལ་བའོ། །མཚན་ཉིད་ནི། མཚན་ཉིད་ཀྱི་ངོ་བོ་ཉིད་དང་ཡང་བྲལ་བའོ། །མཚན་ཉིད་ཀྱི་གཞིའང་མཚན་ཉིད་ཀྱི་གཞིའི་ངོ་བོ་ཉིད་དང་ཡང་བྲལ་བའོ། །ངོ་བོ་
ཉིད་ནི༑ ངོ་བོ་ཉིད་ཀྱི་མཚན་ཉིད་དང་ཡང་བྲལ་བའོ། །དེ་སྐད་ཅེས་སྨྲས་པ་དང༌། ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར།
ཡང་ཅི་བྱང་ཆུབ་སེམས་དཔའ་སེམས་དཔའ་ཆེན་པོ་གང་འདི་ལ་སློབ་པར་འགྱུར་བ་དེ་ཐམས་ཅད་མཁྱེན་པ་ཉིད་ལ་ངེས་པར་འབྱུང་བར་འགྱུར་རམ། ཚེ་དང་ལྡན་པ་རབ་འབྱོར་གྱིས་སྨྲས་
པ༑ ཚེ་དང་ལྡན་པ་ཤཱ་རིའི་བུ། དེ་དེ་བཞིན་ནོ། །དེ་དེ་བཞིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འདི་ལ་སློབ་པར་འགྱུར་བ་དེ་ཐམས་ཅད་མཁྱེན་པ་ཉིད་ལ་ངེས་པར་འབྱུང་
བར་འགྱུར་རོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ཤཱ་རིའི་བུ། ཆོས་ཐམས་ཅད་ནི། ངེས་པར་འབྱུང་བ་མེད་ཅིང་མ་སྐྱེས་པའོ། །ཚེ་དང་ལྡན་པ་ཤཱ་རིའི་བུ། དེ་ལྟར་སྤྱོད་པའི་བྱང་ཆུབ་སེམས་དཔའ་
༄༅། །སེམས་དཔའ་ཆེན་པོ་ནི། ཐམས་ཅད་མཁྱེན་པ་ཉིད་ལ་ཉེ་བར་འགྱུར་རོ། །ཇི་ལྟ་ཇི་ལྟར་ཐམས་ཅད་མཁྱེན་པ་ཉིད་ལ་ཉེ་བར་གྱུར་པ་དེ་ལྟ་དེ་ལྟར་སེམས་ཅན་
ཡོངས་སུ་སྨིན་པའི་ཕྱིར་ལུས་དང་སེམས་ཡོངས་སུ་དག་པ་དང༌། མཚན་ཡོངས་སུ་དག་པ་དང༌། སངས་རྒྱས་ཀྱི་ཞིང་ཡོངས་སུ་དག་པ་དང༌། སངས་རྒྱས་དང་ཉེ་བར་ཡང་འགྱུར་རོ། །ཚེ་
དང་ལྡན་པ་ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ནི། ཐམས་ཅད་མཁྱེན་པ་ཉིད་ལ་ཉེ་བ་ཡིན་ནོ། །གཞན་ཡང་
ཚེ་དང་ལྡན་པ་རབ་འབྱོར་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལས་བརྩམས་ཏེ་འདི་སྐད་ཅེས་སྨྲས་སོ། །གལ་ཏེ་གཟུགས་ལ་སྤྱོད་ན། མཚན་མ་ལ་སྤྱོད་དོ། །གལ་
ཏེ་གཟུགས་ཀྱི་མཚན་མ་ལ་སྤྱོད་ན། མཚན་མ་ལ་སྤྱོད་དོ། །གལ་ཏེ་གཟུགས་མཚན་མའོ། སྙམ་དུ་སྤྱོད་ན། མཚན་མ་ལ་སྤྱོད་དོ། །གལ་ཏེ་གཟུགས་ཀྱི་སྐྱེ་བ་ལ་སྤྱོད་ན།
མཚན་མ་ལ་སྤྱོད་དོ། །གལ་ཏེ་གཟུགས་ཀྱི་འགག་པ་ལ་སྤྱོད་ན། མཚན་མ་ལ་སྤྱོད་དོ། །གལ་ཏེ་གཟུགས་ཀྱི་འཇིག་པ་ལ་སྤྱོད་ན། མཚན་མ་ལ་སྤྱོད་དོ། །གལ་ཏེ་གཟུགས་སྟོང་
པའོ། སྙམ་དུ་སྤྱོད་ན། མཚན་མ་ལ་སྤྱོད་དོ། །བདག་སྤྱོད་དོ། །སྙམ་དུ་སྤྱོད་ན། མཚན་མ་ལ་སྤྱོད་དོ། །བདག་བྱང་ཆུབ་སེམས་དཔའོ། སྙམ་དུ་སྤྱོད་ན། མཚན་མ་ལ་སྤྱོད་དོ། །བདག་
བྱང་ཆུབ་སེམས་དཔའོ། སྙམ་ན། དེ་དམིགས་པ་ཉིད་ལ་སྤྱོད་དོ། །དེ་བཞིན་དུ་གལ་ཏེ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། གལ་ཏེ་རྣམ་པར་ཤེས་པ་ལ་སྤྱོད་ན། མཚན་
མ་ལ་སྤྱོད་དོ། །གལ་ཏེ་རྣམ་པར་ཤེས་པའི་མཚན་མ་ལ་སྤྱོད་ན། མཚན་མ་ལ་སྤྱོད་དོ། །གལ་ཏེ་རྣམ་པར་ཤེས་པ་མཚན་མའོ། སྙམ་དུ་སྤྱོད་ན། མཚན་མ་ལ་སྤྱོད་དོ། །གལ་ཏེ་རྣམ་པར་
ཤེས་པའི་སྐྱེ་བ་ལ་སྤྱོད་ན། མཚན་མ་ལ་སྤྱོད་དོ། །གལ་ཏེ་རྣམ་པར་ཤེས་པའི་འགག་པ་ལ་སྤྱོད་ན། མཚན་མ་ལ་སྤྱོད་དོ། །གལ་ཏེ་རྣམ་པར་ཤེས་པའི་འཇིག་པ་ལ་སྤྱོད་ན། མཚན་
མ་ལ་སྤྱོད་དོ། །གལ་ཏེ་རྣམ་པར་ཤེས་པ་སྟོང་པའོ། །སྙམ་དུ་སྤྱོད་ན། མཚན་མ་ལ་སྤྱོད་དོ། །བདག་སྤྱོད་དོ་སྙམ་དུ་སྤྱོད་ན། མཚན་མ་ལ་སྤྱོད་དོ། བདག་བྱང་ཆུབ་སེམས་དཔའོ། །སྙམ་ན་
དེ་དམིགས་པ་ཉིད་ལ་སྤྱོད་དོ། །གལ་ཏེ་ཡང་དེ་འདི་སྙམ་དུ་གང་དེ་ལྟར་སྤྱོད་པ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་སྟེ། དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པར་བྱེད་པ་
ཡིན་ནོ། །སྙམ་དུ་སེམས་ན། དེ་མཚན་མ་ཉིད་ལ་སྤྱོད་པ་སྟེ། བྱང་ཆུབ་སེམས་དཔའ་འདི་ནི། ཐབས་མི་མཁས་པར་རིག་པར་བྱའོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་
འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན། དེ་སྐད་ཅེས་
༄༅། །སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། གལ་ཏེ་བྱང་ཆུབ་སེམས་དཔའ་
སེམས་དཔའ་ཆེན་པོ་གཟུགས་ལ་མི་སྤྱོད། གཟུགས་ཀྱི་མཚན་མ་ལ་མི་སྤྱོད། གཟུགས་མཚན་མའོ། སྙམ་དུ་མི་སྤྱོད། གཟུགས་ཀྱི་སྐྱེ་བ་ལ་མི་སྤྱོད། གཟུགས་ཀྱི་འགག་
པ་ལ་མི་སྤྱོད། གཟུགས་ཀྱི་འཇིག་པ་ལ་མི་སྤྱོད། གཟུགས་སྟོང་པའོ་སྙམ་དུ་མི་སྤྱོད། བདག་སྤྱོད་དོ་སྙམ་དུ་མི་སྤྱོད། བདག་བྱང་ཆུབ་སེམས་དཔའོ། སྙམ་དུ་མི་སྤྱོད།
བདག་བྱང་ཆུབ་སེམས་དཔའོ། །སྙམ་དུ་དམིགས་པ་ལ་མི་སྤྱོད་པ་དང༌། དེ་བཞིན་དུ་གལ་ཏེ་ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་ལ་མ་ཡིན། གལ་ཏེ་
རྣམ་པར་ཤེས་པ་ལ་མི་སྤྱོད། རྣམ་པར་ཤེས་པའི་མཚན་མ་ལ་མི་སྤྱོད། རྣམ་པར་ཤེས་པ་མཚན་མའོ། སྙམ་དུ་མི་སྤྱོད། རྣམ་པར་ཤེས་པའི་སྐྱེ་བ་ལ་མི་སྤྱོད། རྣམ་པར་
ཤེས་པའི་འགག་པ་ལ་མི་སྤྱོད། རྣམ་པར་ཤེས་པའི་འཇིག་པ་ལ་མི་སྤྱོད། རྣམ་པར་ཤེས་པ་སྟོང་པའོ། སྙམ་དུ་མི་སྤྱོད། བདག་སྤྱོད་དོ་སྙམ་དུ་མི་སྤྱོད་དོ། བདག་བྱང་
ཆུབ་སེམས་དཔའོ། སྙམ་དུ་མི་སྤྱོད། བདག་བྱང་ཆུབ་སེམས་དཔའོ། སྙམ་དུ་དམིགས་པ་ལ་མི་སྤྱོད་ཅིང༌། གལ་ཏེ་ཡང་དེ་འདི་སྙམ་དུ་གང་དེ་ལྟར་སྤྱོད་པ་དེ་ནི། ཤེས་རབ་
ཀྱི་ཕ་རོལ་ཏུ་ཕྱིན་པ་ལ་སྤྱོད་པ་སྟེ། དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པར་བྱེད་པ་ཡིན་ནོ། །སྙམ་དུ་མི་སེམས་པ་སྟེ། དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི།
ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་ནོ། །དེ་སྤྱོད་ཀྱང་སྤྱོད་དོ། །སྙམ་དུ་ཉེ་བར་མི་རྟོགས། མི་སྤྱོད་དོ་སྙམ་དུ་ཉེ་བར་མི་རྟོགས། སྤྱོད་ཀྱང་སྤྱོད་ལ་མི་སྤྱོད་ཀྱང་མི་སྤྱོད་དོ། སྙམ་དུ་ཉེ་
བར་མི་རྟོགས། སྤྱོད་པའང་མ་ཡིན་ལ་མི་སྤྱོད་པའང་མ་ཡིན་པའོ། །སྙམ་དུ་ཉེ་བར་མི་རྟོགས། སྤྱད་པར་བྱའོ། སྙམ་དུའང་ཉེ་བར་མི་རྟོགས་།སྤྱད་པར་མི་བྱའོ། སྙམ་དུའང་ཉེ་བར་མི་
རྟོགས༑ སྤྱད་པར་བྱ་བའང་ཡིན་ལ་སྤྱད་པར་མི་བྱ་བའང་ཡིན་ནོ། །སྙམ་དུ་ཉེ་བར་མི་རྟོགས། སྤྱད་པར་བྱ་བ་ཡང་མ་ཡིན་ལ་སྤྱད་པར་མི་བྱ་བ་ཡང་མ་ཡིན་པ་ཉིད་དོ། །སྙམ་དུ་ཉེ་བར་མི་རྟོགས་
གོ༑ ༑དེ་ཅིའི་ཕྱིར་ཞེ་ན། ཆོས་ཐམས་ཅད་ནི། ཉེ་བར་མ་རྟོགས་ཤིང་མ་ཟིན་པས་སོ། །འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་ཏིང་ངེ་འཛིན་ཆོས་ཐམས་ཅད་ལེན་པ་མེད་པ་ཞེས་
བྱ་བ་སྟེ༑ ཡངས་པ་མདུན་དུ་བྱས་པ་ཚད་མེད་པར་ངེས་པ་ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ཡིན་པའོ། །ཏིང་ངེ་འཛིན་འདིས་གནས་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་ནི། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་ནས་སངས་རྒྱས་ཀྱི་མཐུས་གནས་བརྟན་ཚེ་དང་ལྡན་པ་རབ་འབྱོར་གྱིས་
༄༅། །འདི་སྐད་ཅེས་གསོལ་ཏོ། །བཅོམ་ལྡན་འདས། གང་ཏིང་ངེ་འཛིན་འདིས་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། སྔོན་གྱི་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ལགས་སོ། །དེ་ནི། ཏིང་ངེ་འཛིན་
དེའང་ཡང་དག་པར་རྗེས་སུ་མི་མཐོང༌། ཏིང་ངེ་འཛིན་དེས་ཀྱང་རློམ་སེམས་སུ་མི་བགྱིད། བདག་ནི། མཉམ་པར་བཞག་པ་སྟེ། བདག་ཏིང་ངེ་འཛིན་ལ་སྙོམས་པར་འཇུག་གོ །བདག་
ཏིང་ངེ་འཛིན་ལ་སྙོམས་པར་བཞག་པའོ། །བདག་ཏིང་ངེ་འཛིན་ལ་སྙོམས་པར་ཞུགས་པའོ། །སྙམ་པ་དེ་ལྟ་བུ་དེ་ལ་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མ་
མཆིས་སོ། །དེ་སྐད་ཅེས་གསོལ་པ་དང༌། ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། ཏིང་ངེ་འཛིན་གང་གིས་གནས་ན།
བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་ལུང་སྟོན་པའི་ཏིང་ངེ་འཛིན་དེ་བསྟན་པར་ནུས་སམ། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། དེ་ནི། མ་ཡིན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ། དེས་ནི། ཏིང་ངེ་
འཛིན་དེའང་མི་ཤེས། ཡང་དག་པར་མི་ཤེས་སོ། །ཚེ་དང་ལྡན་པ་ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། མི་ཤེས། ཡང་དག་པར་མི་ཤེས་ཞེས་ཟེར་རམ། ཚེ་དང་ལྡན་པ་རབ་
འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། མི་ཤེས། ཡང་དག་པར་མི་ཤེས་ཞེས་ཟེར་རོ། །དེ་ཅིའི་ཕྱིར་ཞེ་ན། ཏིང་ངེ་འཛིན་དེ་མེད་པས་ན། མི་ཤེས། ཡང་དག་པར་མི་ཤེས་སོ། །ཏིང་
ངེ་འཛིན་དེའང་མི་ཤེས། ཡང་དག་པར་མི་ཤེས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་ལེགས་སོ། ཞེས་བྱ་བ་བྱིན་ཏེ། ཇི་ལྟར་ཡང་ཁྱོད་དེ་བཞིན་གཤེགས་པའི་
མཐུས་སྤོབས་པ་དང༌། དེ་བཞིན་གཤེགས་པའི་བྱིན་གྱིས་བརླབས་ཀྱིས་སྟོན་པ་ནི། རབ་འབྱོར། ལེགས་སོ། ལེགས་སོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། བྱང་ཆུབ་སེམས་
དཔའ་སེམས་དཔའ་ཆེན་པོས་ནི། དེ་བཞིན་དུ་འདི་ལ་བསླབ་པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་
སློབ་བོ༑ ༑དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ཤེས་རབ་
ཀྱི་ཕ་རོལ་ཏུ་ཕྱིན་པ་ལ་སློབ་པ་ལགས་སམ། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། བྱང་ཆུབ་
༄༅། །སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པ་ཡིན་ནོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་
ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ཆོས་གང་ལ་སློབ་པ་ལགས། དེ་སྐད་ཅེས་
གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་པ་ནི། ཆོས་གང་ལའང་
མི་སློབ་བོ། །དེ་ཅིའི་ཕྱིར་ཞེ་ན། ཤཱ་རིའི་བུ། ཆོས་དེ་དག་ནི། བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པས་ཇི་ལྟར་མངོན་པར་ཆགས་པ་དེ་བཞིན་དུ་ཡོད་པ་མ་ཡིན་ནོ། །ཚེ་དང་ལྡན་
པ་ཤཱ་རིའི་བུས་གསོལ་པ། བཅོམ་ལྡན་འདས། འོ་ན་དེ་དག་ཇི་ལྟར་མཆིས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། ཇི་ལྟར་མེད་པ་དེ་བཞིན་དུ་ཡང་དག་པར་ཡོད་
དེ༑ དེ་ལྟར་མེད་པ་དེའི་ཕྱིར་མ་རིག་པ་ཞེས་བྱའོ། །དེ་དག་ལ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་མངོན་པར་ཆགས་ཏེ། དེ་དག་གིས་ཆོས་ཐམས་ཅད་མེད་པ་ལ་
བརྟགས་སོ། །དེ་དག་གིས་དེ་ལ་བརྟགས་ནས་མཐའ་གཉིས་ལ་ཞེན་པས་ཆོས་དེ་དག་མི་ཤེས་མི་མཐོང་སྟེ། དེའི་ཕྱིར་དེ་དག་མེད་བཞིན་དུ་ཆོས་ཐམས་ཅད་ལ་རྟོག་གོ །བརྟགས་
ནས་མཐའ་གཉིས་ལ་མངོན་པར་ཆགས་སོ། །མངོན་པར་ཆགས་པ་དེའི་གཞིས་དམིགས་པ་ལ་གནས་ནས་འདས་པའི་ཆོས་ལ་རྟོག་གོ །མ་འོངས་པའི་ཆོས་ལ་རྟོག་གོ །ད་ལྟར་བྱུང་བའི་
ཆོས་ལ་རྟོག་གོ །དེ་དག་གིས་བརྟགས་ནས་མིང་དང་གཟུགས་ལ་མངོན་པར་ཞེན་ཏོ། །དེ་དག་གིས་མེད་པའི་ཆོས་ཐམས་ཅད་ལ་བརྟགས་སོ། །དེ་དག་གིས་མེད་པའི་ཆོས་དེ་དག་ཐམས་
ཅད་ལ་བརྟགས་པས་ལམ་ཡང་དག་པ་ཇི་ལྟ་བ་བཞིན་དུ་མི་ཤེས་མི་མཐོང་ངོ༌། །ལམ་ཡང་དག་པ་ཇི་ལྟ་བ་བཞིན་དུ་མ་ཤེས་མ་མཐོང་བས་ཁམས་གསུམ་ལས་ངེས་པར་མི་འབྱུང་ཡང་
དག་པའི་མཐའ་ཁོང་དུ་མི་ཆུད་དེ། དེའི་ཕྱིར་དེ་དག་བྱིས་པ་ཞེས་བྱ་བའི་གྲངས་སུ་འགྲོའོ། །དེ་དག་ཆོས་བདེན་པ་ལ་ཡིད་མི་ཆེས་སོ། །ཤཱ་རིའི་བུ། ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་ནི། ཆོས་གང་ལའང་མངོན་པར་ཞེན་པར་མི་བྱེད་དོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །
བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ཐམས་ཅད་མཁྱེན་པ་ཉིད་ལ་སློབ་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་
བུ༑ བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ཐམས་ཅད་མཁྱེན་པ་ཉིད་ལ་སློབ་སྟེ། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ཆོས་
༄༅། །ཐམས་ཅད་ལ་སློབ་བོ། །ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ཐམས་ཅད་མཁྱེན་པ་ཉིད་ལ་སློབ་པར་འགྱུར། ཐམས་ཅད་
མཁྱེན་པ་ཉིད་ལ་ཉེ་བར་འགྱུར། ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །
བཅོམ་ལྡན་འདས། གང་ཞིག་འདི་སྐད་དུ་འདྲི་སྟེ། ཅི་སྒྱུ་མའི་སྐྱེས་བུ་འདི་ཐམས་ཅད་མཁྱེན་པ་ཉིད་ལ་སློབ་པར་འགྱུར་རམ། ཐམས་ཅད་མཁྱེན་པ་ཉིད་ལ་ཉེ་བར་འགྱུར་རམ། ཐམས་
ཅད་མཁྱེན་པ་ཉིད་ལ་ངེས་པར་འབྱུང་བར་འགྱུར་རམ་ཞེས་དེ་སྐད་དུ་ཡོངས་སུ་འདྲི་ན། བཅོམ་ལྡན་འདས། དེ་ལ་ཇི་ལྟར་བསྟན་པར་བགྱི། དེ་སྐད་ཅེས་གསོལ་པ་དང༌། བཅོམ་ལྡན་
འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས། རབ་འབྱོར། དེ་བས་ན། འདིར་ཁྱོད་ཉིད་ལ་དྲི་བར་བྱ་ཡི། ཁྱོད་ཀྱིས་ཅི་ནུས་པ་དེ་བཞིན་དུ་སྟོན་ཅིག་ཅེས་བཀའ་སྩལ་པ་དང༌།
བཅོམ་ལྡན་འདས། ལེགས་སོ། །ཞེས་གསོལ་ནས་ཚེ་དང་ལྡན་པ་རབ་འབྱོར་བཅོམ་ལྡན་འདས་ཀྱི་ལྟར་མཉན་པ་དང༌། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རབ་
འབྱོར༑ འདི་ཇི་སྙམ་དུ་སེམས། སྒྱུ་མ་དེ་གཞན་ལ་གཟུགས་དེ་གཞན་ནམ། དེ་བཞིན་དུ་སྒྱུ་མ་དེ་གཞན་ལ་ཚོར་བ་དེ་གཞན་ནམ། འདུ་ཤེས་དེ་གཞན་ནམ། འདུ་བྱེད་རྣམས་
དེ་གཞན་ནམ། རབ་འབྱོར། དེ་ཇི་སྙམ་དུ་སེམས། སྒྱུ་མ་དེ་གཞན་ལ་རྣམ་པར་ཤེས་པ་དེ་གཞན་ནམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ལྟ་མ་ལགས་ཏེ། སྒྱུ་མ་དེ་
གཞན་ལ་གཟུགས་དེ་གཞན་མ་ལགས་ཏེ། བཅོམ་ལྡན་འདས། གཟུགས་ཉིད་སྒྱུ་མ་ལགས་སོ། །སྒྱུ་མ་ཉིད་གཟུགས་ལགས་སོ། །བཅོམ་ལྡན་འདས། དེ་བཞིན་དུ་སྒྱུ་མ་དེ་གཞན་ལ་
ཚོར་བ་དེ་གཞན་དང༌། འདུ་ཤེས་དེ་གཞན་དང༌། འདུ་བྱེད་རྣམས་དེ་གཞན་ཡང་མ་ལགས་ཏེ། བཅོམ་ལྡན་འདས། ཚོར་བ་དང༌། འདུ་ཤེས་དང༌། འདུ་བྱེད་རྣམས་ཉིད་སྒྱུ་མ་ལགས་
སོ༑ ༑སྒྱུ་མ་ཉིད་ཚོར་བ་དང༌། འདུ་ཤེས་དང༌། འདུ་བྱེད་རྣམས་ལགས་སོ། །བཅོམ་ལྡན་འདས། སྒྱུ་མ་དེ་གཞན་ལ་རྣམ་པར་ཤེས་པ་དེ་གཞན་ཡང་མ་ལགས་ཏེ། བཅོམ་ལྡན་འདས།
རྣམ་པར་ཤེས་པ་ཉིད་སྒྱུ་མ་ལགས་སོ། །སྒྱུ་མ་ཉིད་རྣམ་པར་ཤེས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཉེ་བར་ལེན་པའི་ཕུང་པོ་ལྔ་
པོ་འདི་རྣམས་ལ་འདི་ལྟ་སྟེ། བྱང་ཆུབ་སེམས་དཔའ་ཞེས་བྱ་བའི་འདུ་ཤེས་དང༌། ཀུན་ཤེས་པ་དང༌། རྣམ་པར་རིག་པ་དང༌། ཐ་སྙད་འདི་ཡིན་ནམ། དེ་སྐད་ཅེས་བཀའ་སྩལ་པ་དང༌།
བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་དེ་བཞིན་ཏེ། བདེ་བར་གཤེགས་པ། དེ་དེ་བཞིན་ནོ། །བཅོམ་ལྡན་འདས། བྱང་
༄༅། །ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པ་དེས་ནི། སྒྱུ་མའི་སྐྱེས་བུ་ལྟར་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ལ་བསླབ་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། འདི་ལྟ་སྟེ། ཉེ་བར་ལེན་པའི་ཕུང་པོ་ལྔ་པོ་དེ་དག་ཉིད་སྒྱུ་མའི་སྐྱེས་བུར་གཟུང་བར་བགྱིའོ། །དེ་ཅིའི་སླད་དུ་ཞེ་ན།
བཅོམ་ལྡན་འདས། འདི་ལྟར་བཅོམ་ལྡན་འདས་ཀྱིས་གཟུགས་ནི། སྒྱུ་མ་ལྟ་བུར་གསུངས་ཏེ། གཟུགས་གང་ལགས་པ་དེའང་དབང་པོ་དྲུག་དང༌། ཕུང་པོ་ལྔ་པོ་དེ་དག་ལགས་སོ། །
བཅོམ་ལྡན་འདས། འདི་ལྟར་བཅོམ་ལྡན་འདས་ཀྱིས་ཚོར་བ་དང༌། འདུ་ཤེས་དང༌། འདུ་བྱེད་རྣམས་སྒྱུ་མ་ལྟ་བུར་གསུངས་ཤིང༌། བཅོམ་ལྡན་འདས། འདི་ལྟར་བཅོམ་ལྡན་འདས་
ཀྱིས་རྣམ་པར་ཤེས་པའང་སྒྱུ་མ་ལྟ་བུར་གསུངས་ཏེ། བཅོམ་ལྡན་འདས། རྣམ་པར་ཤེས་པ་གང་ལགས་པ་དེའང་དབང་པོ་དྲུག་དང༌། ཕུང་པོ་ལྔ་པོ་དེ་དག་ལགས་སོ། །བཅོམ་ལྡན་འདས།
ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསྟན་པ་འདི་ཐོས་ན། དངང་ཞིང་ཀུན་ཏུ་སྐྲག་ལ་ཀུན་ཏུ་སྐྲག་པ་དང་ལྡན་པར་མི་འགྱུར་རམ། བཅོམ་
ལྡན་འདས་ཀྱིས་བཀའ་སྩལ་པ། རབ་འབྱོར། གལ་ཏེ་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྡིག་པའི་གྲོགས་པོའི་ལག་ཏུ་སོང་བར་
གྱུར་ན་ནི། དངང་ཞིང་ཀུན་ཏུ་སྐྲག་ལ་ཀུན་ཏུ་སྐྲག་པ་དང་ལྡན་པར་འགྱུར་རོ། །རབ་འབྱོར། གལ་ཏེ་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་
བཤེས་གཉེན་གྱི་ལག་ཏུ་སོང་བར་གྱུར་ན་ནི། མི་དངང༌། ཀུན་ཏུ་མི་སྐྲག །ཀུན་ཏུ་སྐྲག་པ་དང་ལྡན་པར་མི་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་
པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་བའི་བཤེས་གཉེན་གང་རྣམས་ལགས་པར་རིག་པར་བགྱི།
བཅོམ་ལྡན་འདས་ཀྱིས་བཀའ་སྩལ་པ། གང་དེ་དག་ལ་ཕ་རོལ་ཏུ་ཕྱིན་པ་རྣམས་འདོམས་ཤིང་རྗེས་སུ་སྟོན་པ་རྣམས་དང༌། གང་དེ་དག་ལ་བདུད་ཀྱི་ལས་རྣམས་ཉེ་བར་སྟོན་པ་སྟེ། བདུད་
ཀྱི་ཉེས་པ་ནི། འདི་ལྟ་བུར་རིག་པར་བྱ། བདུད་ཀྱི་ཉེས་པ་ནི། འདི་དག་ཡིན། བདུད་ཀྱི་ལས་ནི། འདི་དག་ཡིན་།པར་རིག་པར་བྱ། བདུད་ཀྱི་ལས་འདི་དག་ཁྱེད་ཀྱིས་རྟོགས་ནས་སྤང་བར་
བྱའོ༑ ༑ཞེས་བྱ་བ་སྟེ། རབ་འབྱོར། འདི་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ། ཐེག་པ་ཆེན་པོ་ལ་ཡང་དག་པར་ཞུགས་པ། ཐེག་པ་ཆེན་པོ་ལ་
ཡང་དག་པར་གནས་པའི་དགེ་བའི་བཤེས་གཉེན་རྣམས་སུ་རིག་པར་བྱའོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་
༄༅། །གསོལ་ཏོ། །བཅོམ་ལྡན་འདས་ཀྱིས་གང་འདི་སྐད་དུ། རབ་འབྱོར། འདི་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ། ཐེག་པ་
ཆེན་པོ་ལ་ཡང་དག་པར་ཞུགས་པ། ཐེག་པ་ཆེན་པོ་ལ་ཡང་དག་པར་གནས་པའི་དགེ་བའི་བཤེས་གཉེན་རྣམས་སུ་རིག་པར་བྱའོ། །ཞེས་བཀའ་སྩལ་པ་དང༌། བཅོམ་ལྡན་འདས།
གང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བཀའ་སྩལ་པ་དེ་ལ་བྱང་ཆུབ་སེམས་དཔའ་ཞེས་བགྱི་བའི་གཞིའི་དོན་གང་ལགས། དེ་སྐད་ཅེས་གསོལ་པ་དང༌།
བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། བྱང་ཆུབ་སེམས་དཔའི་གཞིའི་དོན་ནི། གཞིའི་དོན་མེད་པ་ཡིན་ནོ། །དེ་ཅིའི་
ཕྱིར་ཞེ་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཆོས་ཐམས་ཅད་ཀྱི་ཆགས་པ་མེད་པ་ལ་སློབ་བོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་
པོ་ནི༑ ཆོས་ཐམས་ཅད་རྗེས་སུ་རྟོགས་པའི་དོན་དུ་ཆགས་པ་མེད་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། རབ་འབྱོར། བྱང་ཆུབ་དོན་
དུ་གཉེར་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །རབ་འབྱོར་གྱིས་གསོལ་པ། བཅོམ་ལྡན་འདས་ཀྱིས་གང་ཡང་འདི་སྐད་དུ་བྱང་ཆུབ་སེམས་དཔའ་སེམས་
དཔའ་ཆེན་པོ་ཞེས་བཀའ་སྩལ་པ། བཅོམ་ལྡན་འདས། རྒྱུ་ཅིའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། སེམས་ཅན་
གྱི་ཕུང་པོ་ཆེན་པོ་དང༌། སེམས་ཅན་གྱི་རིས་ཆེན་པོའི་མཆོག་ཉིད་དུ་བྱའོ། །སྙམ་པ་སྟེ། དོན་དེས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །དེ་ནས་བཅོམ་ལྡན་འདས་
ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཀྱང་དོན་གང་གི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བགྱི་བར་སྤོབས་སོ། །བཅོམ་
ལྡན་འདས་ཀྱིས་བཀའ་སྩལ་པ། ཤཱ་རིའི་བུ། ད་དེའི་དུས་ལ་བབ་པར་ཤེས་ན། སྤོབས་པར་གྱིས་ཤིག །ཚེ་དང་ལྡན་པ་ཤཱ་རིའི་བུས་གསོལ་པ། བདག་ཏུ་ལྟ་བ་དང༌། སེམས་ཅན་དུ་
ལྟ་བ་དང༌། སྲོག་ཏུ་ལྟ་བ་དང༌། གང་ཟག་ཏུ་ལྟ་བ་དང༌། འབྱུང་བར་ལྟ་བ་དང༌། འཇིག་པར་ལྟ་བ་དང༌། ཆད་པར་ལྟ་བ་དང༌། རྟག་པར་ལྟ་བ་དང༌། རང་གི་ལུས་ལ་ལྟ་བ་ཆེན་པོ་འདི་ལྟ་བུ་ལ་
སོགས་པའི་ལྟ་བ་དེ་དག་སྤང་བའི་སླད་དུ་ཆོས་བསྟན་ཏོ། །སྙམ་སྟེ། དོན་དེས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བགྱིའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་
རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཀྱང་དོན་གང་གི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བགྱི་བར་སྤོབས་སོ། །བཅོམ་ལྡན་འདས་
༄༅། །ཀྱིས་བཀའ་སྩལ་པ། རབ་འབྱོར། དེའི་དུས་ལ་བབ་པར་ཤེས་ན། སྤོབས་པར་གྱིས་ཤིག །རབ་འབྱོར་གྱིས་གསོལ་པ། བཅོམ་ལྡན་འདས། བྱང་
ཆུབ་སེམས་དཔའ་སེམས་དཔའ་ཆེན་པོ་ཞེས་བགྱི་པ་ནི། བཅོམ་ལྡན་འདས། དེ་བྱང་ཆུབ་ཀྱི་སེམས། ཐམས་ཅད་མཁྱེན་པའི་སེམས། ཟག་པ་མེད་པའི་སེམས། མཉམ་པ་མེད་
པའི་སེམས། མི་མཉམ་པ་དང་མཉམ་པའི་སེམས། ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ལགས་པའི་སེམས་གང་ལགས་པའི་སེམས་དེ་ལའང་མ་ཆགས།
ཡོངས་སུ་མ་ཟིན་ཏོ། །དེ་ཅིའི་སླད་དུ་ཞེ་ན། འདི་ལྟར་ཐམས་ཅད་མཁྱེན་པའི་སེམས་དེ་ནི། ཟག་པ་མ་མཆིས་པ། ཡོངས་སུ་མ་ཟིན་པའོ། །དེ་ནི། ཐམས་ཅད་མཁྱེན་པའི་སེམས་ཟག་
པ་མ་མཆིས་ཤིང་ཡོངས་སུ་མ་ཟིན་པ་གང་ལགས་པའི་སེམས་དེ་ལའང་མ་ཆགས་ཤིང་ཡོངས་སུ་མ་ཟིན་ཏེ། དོན་དེས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བགྱི་བའི་
གྲངས་སུ་མཆིའོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། ཅིའི་རྒྱུས་སེམས་དེ་ལ་ཡང་མ་ཆགས་ཤིང་
ཡོངས་སུ་མ་ཟིན། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། སེམས་མེད་པའི་ཕྱིར་སེམས་དེ་ལ་ཡང་མ་ཆགས་ཤིང་ཡོངས་སུ་མ་ཟིན་ཏོ། །ཤཱ་རིའི་བུས་སྨྲས་པ། ཚེ་
དང་ལྡན་པ་རབ་འབྱོར། ཡང་ཅི་སེམས་གང་སེམས་མེད་པའི་སེམས་དེ་ཡོད་དམ། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་སེམས་མེད་པ་དེ་ལ་ཡོད་པའམ་མེད་པ་
ཡོད་པའམ་དམིགས་པར་འགྱུར་རམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། གལ་ཏེ་སེམས་མེད་
པ་དེ་ལ་གང་ཡོད་པའམ་མེད་པ་མེད་ཅིང་མི་དམིགས་ན། ཚེ་དང་ལྡན་པ་ཤཱ་རིའི་བུ། དེ་ཇི་ལྟར་འདི་སྐད་དུ་སེམས་གང་སེམས་མེད་པའི་སེམས་དེ་ཡོད་དམ་ཞེས་ཟེར། ཤཱ་རིའི་བུས་སྨྲས་
པ༑ ཚེ་དང་ལྡན་པ་རབ་འབྱོར། ཇི་ལྟར་ཡང་ཁྱོད་བཅོམ་ལྡན་འདས་ཀྱིས་ཉོན་མོངས་པ་མེད་པ་ལ་གནས་པའི་མཆོག་ཏུ་གསུངས་པ་ལྟར་སྟོན་པ་ལེགས་སོ། ལེགས་སོ། །དེ་ནས་བཅོམ་
ལྡན་འདས་ལ་ཚེ་དང་ལྡན་པ་གང་པོ་བྱམས་མའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། སེམས་དཔའ་ཆེན་པོ་སེམས་དཔའ་ཆེན་པོ་ཞེས་བགྱི་བ་གང་ལགས་པ་འདི་ནི། སེམས་
དཔའ་དེ་གོ་ཆ་ཆེན་པོ་བགོས་པ། སེམས་དཔའ་དེ་ཐེག་པ་ཆེན་པོ་ལ་ཡང་དག་པར་ཞུགས་པ། ཐེག་པ་ཆེན་པོ་ལ་ཡང་དག་པར་གནས་པ་ལགས་ཏེ། དེའི་སླད་དུ་སེམས་དཔའ་ཆེན་པོ་
སེམས་དཔའ་ཆེན་པོ་ཞེས་བགྱི་བའི་གྲངས་སུ་མཆིའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། གོ་ཆ་ཆེན་པོ་བགོས་པ།
༄༅། །གོ་ཆ་ཆེན་པོ་བགོས་པ་ཞེས་བགྱི་བ་འདི་གསུངས་ན། བཅོམ་ལྡན་འདས། ཇི་ཙམ་གྱིས་ན། བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་
ལགས༑ བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་སྙམ་དུ། བདག་གིས་སེམས་ཅན་གཞལ་དུ་མེད་པ་ཡོངས་སུ་
མྱ་ངན་ལས་བཟླ་བར་བྱའོ། །བདག་གིས་སེམས་ཅན་གྲངས་མེད་པ་ཡོངས་སུ་མྱ་ངན་ལས་བཟླ་བར་བཟླའོ། །སྙམ་ལ། གང་གིས་གང་ཡོངས་སུ་མྱ་ངན་ལས་བཟླས་པའི་སེམས་ཅན་དེ་དག་
ཀྱང་ཡོད་པ་མ་ཡིན་ནོ། །སྙམ་སྟེ། དེས་སེམས་ཅན་དེ་སྙེད་པ་དེ་དག་ཡོངས་སུ་མྱ་ངན་ལས་ཟློ་བར་བྱེད་ལ། གང་ཡོངས་སུ་མྱ་ངན་ལས་བཟླས་པ་དང༌། གང་གིས་ཡོངས་སུ་མྱ་ངན་ལས་
བཟླས་པའི་སེམས་ཅན་ཡང་འགའ་ཡང་ཡོད་པ་མ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར། སྒྱུ་མའི་ཆོས་ཉིད་ཉེ་བར་བཟུང་ན། ཆོས་རྣམས་ཀྱི་ཆོས་ཉིད་འདི་ཡིན་པའི་ཕྱིར་རོ། །རབ་
འབྱོར༑ དཔེར་ན། སྒྱུ་མ་བྱེད་པ་མཁས་པའམ། སྒྱུ་མ་བྱེད་པའི་ཉེ་གནས་ཀྱིས་ལམ་པོ་ཆེའི་བཞི་མདོར་སྐྱེ་བོའི་ཚོགས་ཆེན་པོ་མངོན་པར་སྤྲུལ་ཏེ་མངོན་པར་སྤྲུལ་ནས་སྐྱེ་བོའི་ཚོགས་
ཆེན་པོ་དེ་མི་སྣང་བར་བྱས་ན། རབ་འབྱོར། དེ་ཇི་སྙམ་དུ་སེམས། དེ་ལ་ཡང་གང་གིས་གང་ཡང་བསད་པའམ། ཤི་བའམ། བཤིག་པའམ། མི་སྣང་བར་བྱས་པ་ཡོད་དམ། རབ་
འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་
སེམས་ཅན་གཞལ་དུ་མེད་གྲངས་མེད་པ་རྣམས་ཡོངས་སུ་མྱ་ངན་ལས་ཟློ་བར་བྱེད་དེ། གང་ཡོངས་སུ་མྱ་ངན་ལས་བཟླས་པ་དང༌། གང་གིས་ཡོངས་སུ་མྱ་ངན་ལས་བཟླས་པར་འགྱུར་བའི་
སེམས་ཅན་ཡང་འགའ་ཞིག་ཡོད་པ་མ་ཡིན་ནོ། །གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་བསྟན་པ་འདི་ལྟ་བུ་འདི་ཐོས་ནས་མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་
ལྡན་པར་མི་འགྱུར་ན། འདི་ཙམ་གྱིས་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་གོ་ཆ་ཆེན་པོ་བགོས་པར་རིག་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་
རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཀྱེ་མ་བཅོམ་ལྡན་འདས་ཀྱིས་ཇི་ལྟར་གསུངས་པའི་དོན་བདག་གིས་འཚལ་བ་དེ་ལྟར་ན། བཅོམ་ལྡན་འདས། བྱང་
ཆུབ་སེམས་དཔའ་སེམས་དཔའ་ཆེན་པོ་འདི་ནི། གོ་ཆ་མ་མཆིས་པ་བགོས་པ་ལགས་པར་རིག་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་དེ་བཞིན་ཏེ།
བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། གོ་ཆ་མེད་པ་བགོས་པར་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར། ཐམས་ཅད་མཁྱེན་པ་ཉིད་ནི། མ་བྱས་པ། རྣམ་པར་མ་
༄༅། །བསྒྱུར་བ། མངོན་པར་འདུས་མ་བྱས་པའོ། །སེམས་ཅན་གང་དག་གི་དོན་དུ་གོ་ཆ་འདི་བགོས་པའི་སེམས་ཅན་དེ་དག་ཀྱང་མ་བྱས་པ། རྣམ་པར་མ་བསྒྱུར་བ། མངོན་
པར་འདུས་མ་བྱས་པའོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་དེ་བཞིན་ནོ། །བདེ་
བར་གཤེགས་པ། དེ་དེ་བཞིན་ནོ། །དེ་ཅིའི་སླད་དུ་ཞེ་ན། བཅོམ་ལྡན་འདས། འདི་ལྟར་གཟུགས་ནི། མ་བཅིངས་མ་གྲོལ་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་
རྣམས་དང༌། བཅོམ་ལྡན་འདས། འདི་ལྟར་རྣམ་པར་ཤེས་པ་ནི། མ་བཅིངས་མ་གྲོལ་བའོ། །བཅོམ་ལྡན་འདས། གཟུགས་ཀྱི་དེ་བཞིན་ཉིད་ཀྱང་མ་བཅིངས་མ་གྲོལ་བའོ། །དེ་བཞིན་
དུ་ཚོར་བའི་དེ་བཞིན་ཉིད་དང༌། འདུ་ཤེས་ཀྱི་དེ་བཞིན་ཉིད་དང༌། འདུ་བྱེད་རྣམས་ཀྱི་དེ་བཞིན་ཉིད་དང༌། བཅོམ་ལྡན་འདས། རྣམ་པར་ཤེས་པའི་དེ་བཞིན་ཉིད་ཀྱང་མ་བཅིངས་མ་གྲོལ་
བའོ༑ ༑དེ་ནས་ཚེ་དང་ལྡན་པ་གང་པོ་བྱམས་མའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། གཟུགས་མ་བཅིངས་མ་གྲོལ་བ་ཞེས་ཟེར་རམ། དེ་
བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། ཚེ་དང་ལྡན་པ་རབ་འབྱོར། རྣམ་པར་ཤེས་པ་མ་བཅིངས་མ་གྲོལ་བ་ཞེས་ཟེར་རམ། ཚེ་དང་ལྡན་པ་རབ་འབྱོར།
གཟུགས་ཀྱི་དེ་བཞིན་ཉིད་ཀྱང་མ་བཅིངས་མ་གྲོལ་བ་ཞེས་ཟེར་རམ། དེ་བཞིན་དུ་ཚོར་བའི་དེ་བཞིན་ཉིད་དང༌། འདུ་ཤེས་ཀྱི་དེ་བཞིན་ཉིད་དང༌། འདུ་བྱེད་རྣམས་ཀྱི་དེ་བཞིན་ཉིད་དང༌།
ཚེ་དང་ལྡན་པ་རབ་འབྱོར། རྣམ་པར་ཤེས་པའི་དེ་བཞིན་ཉིད་ཀྱང་མ་བཅིངས་མ་གྲོལ་བ་ཞེས་ཟེར་རམ། ཚེ་དང་ལྡན་པ་རབ་འབྱོར། འོན་ཏེ་གཟུགས་གང་མ་བཅིངས་མ་གྲོལ་བ་ཞེས་ཟེར་
བའི་གཟུགས་དེ་གང་ཡིན། དེ་བཞིན་དུ་ཚོར་བ་དེ་གང་ཡིན། འདུ་ཤེས་དེ་གང་ཡིན། འདུ་བྱེད་རྣམས་དེ་གང་ཡིན། ཚེ་དང་ལྡན་པ་རབ་འབྱོར། རྣམ་པར་ཤེས་པ་གང་མ་བཅིངས་མ་
གྲོལ་བ་ཞེས་ཟེར་བའི་རྣམ་པར་ཤེས་པ་དེ་གང་ཡིན། ཚེ་དང་ལྡན་པ་རབ་འབྱོར། གཟུགས་ཀྱི་དེ་བཞིན་ཉིད་མ་བཅིངས་མ་གྲོལ་བ་ཞེས་ཟེར་བའི་གཟུགས་ཀྱི་དེ་བཞིན་ཉིད་དེ་གང་
ཡིན༑ དེ་བཞིན་དུ་ཚོར་བའི་དེ་བཞིན་ཉིད་དང༌། འདུ་ཤེས་ཀྱི་དེ་བཞིན་ཉིད་དང༌། འདུ་བྱེད་རྣམས་ཀྱི་དེ་བཞིན་ཉིད་དེ་གང་ཡིན། ཚེ་དང་ལྡན་པ་རབ་འབྱོར། རྣམ་པར་ཤེས་པའི་དེ་བཞིན་
ཉིད་མ་བཅིངས་མ་གྲོལ་བ་ཞེས་ཟེར་བའི་རྣམ་པར་ཤེས་པའི་དེ་བཞིན་ཉིད་དེ་གང་ཡིན། དེ་སྐད་ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་གང་པོ་བྱམས་མའི་བུ་
ལ་འདི་སྐད་ཅེས་སྨྲས་སོ། །ཚེ་དང་ལྡན་པ་གང་པོ། གང་གི་ཚེ་སྒྱུ་མའི་སྐྱེས་བུའི་གཟུགས་གང་ཡིན་པ་དེ་ནི། མ་བཅིངས་མ་གྲོལ་བའོ། །དེ་བཞིན་དུ་སྒྱུ་མའི་སྐྱེས་བུའི་ཚོར་བ་གང་
༄༅། །ཡིན་པ་དང༌། སྒྱུ་མའི་སྐྱེས་བུའི་འདུ་ཤེས་གང་ཡིན་པ་དང༌། སྒྱུ་མའི་སྐྱེས་བུའི་འདུ་བྱེད་རྣམས་གང་ཡིན་པ་དང༌། ཚེ་དང་ལྡན་པ་གང་པོ། །གང་གི་ཚེ་སྒྱུ་
མའི་སྐྱེས་བུའི་རྣམ་པར་ཤེས་པ་གང་ཡིན་པ་དེ་ནི། མ་བཅིངས་མ་གྲོལ་བའོ། །ཚེ་དང་ལྡན་པ་གང་པོ། །སྒྱུ་མའི་སྐྱེས་བུའི་གཟུགས་ཀྱི་དེ་བཞིན་ཉིད་གང་ཡིན་པ་དེ་ནི། མ་བཅིངས་
མ་གྲོལ་བའོ། །དེ་བཞིན་དུ་སྒྱུ་མའི་སྐྱེས་བུའི་ཚོར་བའི་དེ་བཞིན་ཉིད་དང༌། འདུ་ཤེས་ཀྱི་དེ་བཞིན་ཉིད་དང༌། འདུ་བྱེད་རྣམས་ཀྱི་དེ་བཞིན་ཉིད་གང་ཡིན་པ་དང༌། ཚེ་དང་ལྡན་པ་
གང་པོ༑ ༑སྒྱུ་མའི་སྐྱེས་བུའི་རྣམ་པར་ཤེས་པའི་དེ་བཞིན་ཉིད་གང་ཡིན་པ་དེ་ནི། མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། ཡང་དག་པ་མ་ཡིན་པས་ན། མ་བཅིངས་མ་གྲོལ་
བའོ༑ ༑དབེན་པས་ན། མ་བཅིངས་མ་གྲོལ་བའོ། །མ་སྐྱེས་པས་ན། མ་བཅིངས་མ་གྲོལ་བ་སྟེ། འདི་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་གོ་ཆ་ཆེན་པོ་བགོས་
པ༑ ཐེག་པ་ཆེན་པོ་ལ་ཡང་དག་པར་ཞུགས་པ། ཐེག་པ་ཆེན་པོ་ལ་ཡང་དག་པར་གནས་པའི་གོ་ཆ་ཆེན་པོ་གོ་ཆ་མེད་པའོ། །དེ་སྐད་ཅེས་སྨྲས་པ་དང༌། ཚེ་དང་ལྡན་པ་གང་པོ་
བྱམས་མའི་བུ་ཅང་མི་སྨྲ་བར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་ལྟར་བྱང་ཆུབ་སེམས་དཔའ་
སེམས་དཔའ་ཆེན་པོ་གོ་ཆ་ཆེན་པོ་བགོས་པར་གྱུར་པ། ཐེག་པ་ཆེན་པོ་ལ་ཡང་དག་པར་ཞུགས་ཤིང༌། ཐེག་པ་ཆེན་པོ་ལ་ཡང་དག་པར་གནས་པར་འགྱུར་བའི་ཐེག་པ་ཆེན་པོ་དེ་ནི། གང་
ལགས༑ ཐེག་པ་ཆེན་པོ་དེ་ལ་ཇི་ལྟར་ཡང་དག་པར་ཞུགས་པར་རིག་པར་བགྱི་བའམ། ཐེག་པ་ཆེན་པོ་དེས་གང་ནས་ངེས་པར་འབྱུང་བར་འགྱུར་བའམ། ཐེག་པ་ཆེན་པོ་དེ་ལ་གང་གིས་
ཡང་དག་པར་ཞུགས་པའམ། ཐེག་པ་ཆེན་པོ་དེས་གང་དུ་གནས་པར་འགྱུར་བའམ། ཐེག་པ་ཆེན་པོ་དེས་གང་ཞིག་ངེས་པར་འབྱུང་བར་འགྱུར། དེ་སྐད་ཅེས་གསོལ་པ་དང༌། བཅོམ་
ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། ཐེག་པ་ཆེན་པོ་ཞེས་བྱ་བ་འདི་ནི། གཞལ་དུ་མེད་པའི་ཚིག་བླ་དྭགས་སོ། །རབ་འབྱོར། གཞལ་
དུ་མེད་པ་ཞེས་བྱ་བ་འདི་ནི། ཚད་མེད་པའི་ཕྱིར་རོ། །རབ་འབྱོར། གང་ཡང་འདི་སྐད་དུ། ཐེག་པ་ཆེན་པོ་དེ་ལ་ཇི་ལྟར་ཡང་དག་པར་ཞུགས་པར་རིག་པར་བགྱི་བའམ། ཐེག་པ་ཆེན་པོ་
དེས་གང་ནས་ངེས་པར་འབྱུང་བར་འགྱུར་བའམ། ཐེག་པ་ཆེན་པོ་དེ་ལ་གང་གིས་ཡང་དག་པར་ཞུགས་པའམ། ཐེག་པ་ཆེན་པོ་དེས་གང་དུ་གནས་པར་འགྱུར་བའམ། ཐེག་པ་ཆེན་
པོ་དེས་གང་ཞིག་ངེས་པར་འབྱུང་བར་འགྱུར་ཞེས་ཟེར་བ་ནི། ཕ་རོལ་ཏུ་ཕྱིན་པ་རྣམས་ཀྱི་སྒོ་ནས་ཡང་དག་པར་ཞུགས་ནས། ཁམས་གསུམ་ནས་ངེས་པར་འབྱུང་བར་འགྱུར་ཞིང་མི་
༄༅། །དམིགས་པ་གང་ཡིན་པས་ཡང་དག་པར་ཞུགས་ཏེ་ཐམས་ཅད་མཁྱེན་པ་ཉིད་དུ་གནས་པར་འགྱུར་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ངེས་པར་
འབྱུང་བར་འགྱུར་ཏེ། འོན་ཀྱང་གང་ནས་ཀྱང་ངེས་པར་འབྱུང་བ་མེད། གང་གིས་ཀྱང་ཡང་དག་པར་མ་ཞུགས། གང་དུའང་གནས་པར་མི་འགྱུར་མོད་ཀྱི། གནས་པ་མེད་པའི་ཚུལ་གྱིས་
ཐམས་ཅད་མཁྱེན་པ་ཉིད་ལ་གནས་པར་འགྱུར་ལ། ཐེག་པ་ཆེན་པོ་དེས་གང་ཡང་ངེས་པར་མ་ཕྱུང༌། ངེས་པར་འབྱུང་བར་ཡང་མི་འགྱུར། ངེས་པར་ཕྱུང་བའང་མེད་དེ། དེ་ཅིའི་ཕྱིར་
ཞེ་ན༑ གང་ངེས་པར་འབྱུང་བ་དང༌། གང་གིས་ངེས་པར་འབྱུང་བའི་ཆོས་དེ་གཉིས་གའང་མེད་ཅིང་མི་དམིགས་ཏེ། དེ་ལྟར་ན། ཆོས་ཐམས་ཅད་མེད་ཅིང་མི་དམིགས་པ་ལ་ཆོས་གང་ཞིག་ཆོས་
གང་གིས་ངེས་པར་འབྱུང་བར་འགྱུར། དེ་སྐད་ཅེས་།བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས།
ཐེག་པ་ཆེན་པོ་ཐེག་པ་ཆེན་པོ་ཞེས་བགྱི་བ་འདི་ནི། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ནས་ངེས་པར་འབྱུང་བར་འགྱུར་བ་ལ་རྗོད་དོ། །ནམ་
མཁའ་ལྟར་མཉམ་པ་ཉིད་ཀྱི་ཕྱིར་དེ་ནི། ཐེག་པ་ཆེན་པོའོ། །ཇི་ལྟར་ནམ་མཁའ་ལ་སེམས་ཅན་གཞལ་དུ་མ་མཆིས། གྲངས་མ་མཆིས། ཚད་མ་མཆིས་པའི་གོ་སྐབས་མཆིས་པ་
དེ་བཞིན་དུ། བཅོམ་ལྡན་འདས། ཐེག་པ་ཆེན་པོ་ལའང་སེམས་ཅན་གཞལ་དུ་མ་མཆིས། གྲངས་མ་མཆིས། ཚད་མ་མཆིས་པའི་གོ་སྐབས་མཆིས་ཏེ། བཅོམ་ལྡན་འདས། རྣམ་གྲངས་
འདིས་ན། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐེག་པ་ཆེན་པོའོ། །འདི་ལ་འོང་བའང་མ་མཐོང༌། འདི་ལ་འགྲོ་ལའང་མ་མཐོང་ཞིང༌། འདི་ལ་གནས་པའང་མ་
མཆིས་སོ། །བཅོམ་ལྡན་འདས། འདི་ལྟར་ཐེག་པ་ཆེན་པོ་འདི་ལ་སྔོན་གྱི་མཐའ་མི་དམིགས། ཕྱི་མའི་མཐའ་ཡང་མི་དམིགས། དབུས་ཀྱང་མི་དམིགས་ཏེ། བཅོམ་ལྡན་འདས། ཐེག་
པ་དེ་ནི༑ དུས་གསུམ་དུ་མཉམ་པའོ། །དེ་བས་ན། ཐེག་པ་ཆེན་པོ་ཐེག་པ་ཆེན་པོ་ཞེས་བགྱིའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་ལེགས་སོ། །ཞེས་བྱ་བ་
བྱིན་ཏེ༑ རབ་འབྱོར། ལེགས་སོ། ལེགས་སོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། དེ་ལྟར་ན། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐེག་པ་ཆེན་པོ་
ཡིན་ནོ༑ ༑བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་འདི་ལ་བསླབས་པས་ཐམས་ཅད་མཁྱེན་པ་ཉིད་རྗེས་སུ་ཐོབ་པར་གྱུར་ཏོ། །རྗེས་སུ་ཐོབ་བོ། །རྗེས་སུ་འཐོབ་པར་འགྱུར་
རོ༑ ༑དེ་ནས་བཅོམ་ལྡན་འདས་ལ་ཚེ་དང་ལྡན་པ་གང་པོ་བྱམས་མའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། གནས་བརྟན་རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པའི་སླད་
༄༅། །དུ་བྱིན་གྱིས་བརླབས་པ་འདི་ནི། ཐེག་པ་ཆེན་པོ་བཤད་པར་བྱ་བར་སེམས་ལགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་
གསོལ་ཏོ། །བཅོམ་ལྡན་འདས། བདག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་དང་འགལ་བར་ཐེག་པ་ཆེན་པོ་སྟོན་པར་མ་གྱུར་ལགས་གྲང༌། བཅོམ་ལྡན་འདས་ཀྱིས་བཀའ་སྩལ་པ། རབ་
འབྱོར༑ དེ་ནི། མ་ཡིན་ཏེ། རབ་འབྱོར། ཁྱོད་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཐེག་པ་ཆེན་པོ་རྗེས་སུ་མཐུན་པར་སྟོན་ཏོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་
ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། སངས་རྒྱས་ཀྱི་མཐུས་ལགས་སོ། །བཅོམ་ལྡན་འདས། གཞན་ཡང་བྱང་ཆུབ་སེམས་དཔའ་སྔོན་གྱི་
མཐར་ཡང་ཉེ་བར་མི་རྟོགས། བྱང་ཆུབ་སེམས་དཔའ་ཕྱི་མའི་མཐར་ཡང་ཉེ་བར་མི་རྟོགས། བྱང་ཆུབ་སེམས་དཔའ་དབུས་སུའང་ཉེ་བར་མི་རྟོགས་སོ། །ཉེ་བར་མི་རྟོགས་པ་དེ་ཅིའི་
སླད་དུ་ཞེ་ན། གཟུགས་མུ་མ་མཆིས་པས་ན། བྱང་ཆུབ་སེམས་དཔའ་ཡང་མུ་མ་མཆིས་པར་རིག་པར་བགྱིའོ། །དེ་བཞིན་དུ་ཚོར་བ་དང༌། འདུ་ཤེས་དང་འདུ་བྱེད་རྣམས་དང༌། རྣམ་
པར་ཤེས་པ་མུ་མ་མཆིས་པས་ན། བྱང་ཆུབ་སེམས་དཔའ་ཡང་མུ་མ་མཆིས་པར་རིག་པར་བགྱིའོ། །གཟུགས་བྱང་ཆུབ་སེམས་དཔའོ། །ཞེས་ཉེ་བར་མ་རྟོགས་ཏེ། འདིའང་མ་མཆིས་མི་
དམིགས་སོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་བྱང་ཆུབ་སེམས་དཔའོ། །ཞེས་ཉེ་བར་མ་རྟོགས་ཏེ། འདིའང་མ་མཆིས་མི་དམིགས་སོ། །
བཅོམ་ལྡན་འདས། དེ་ལྟར་བདག་གིས་བྱང་ཆུབ་སེམས་དཔའི་ཆོས་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་དམིགས་པས་བཅོམ་ལྡན་འདས། འདི་ལྟ་སྟེ། བྱང་
ཆུབ་སེམས་དཔའ་ཞེས་བགྱི་བའི་མིང་འདི་གང་ལ་ཡོད་པའི་ཆོས་དེ་ཡང་དག་པར་རྗེས་སུ་མི་མཐོང་ངོ༌། །ཤེས་རབ་ཀྱི་ཕ་རོལ་ཏུ་ཕྱིན་པའང་ཡང་དག་པར་རྗེས་སུ་མི་མཐོང༌། མི་དམིགས།
ཐམས་ཅད་མཁྱེན་པ་ཉིད་ཀྱང་ཡང་དག་པར་རྗེས་སུ་མི་མཐོང༌། མི་དམིགས་ཏེ། བཅོམ་ལྡན་འདས། བདག་གིས་ཆོས་དེ་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་ཡང་
དག་པར་མ་མཐོང་ཞིང་མ་དམིགས་ན། ཆོས་གང་ཞིག་ཆོས་གང་གིས་ཆོས་གང་ལ་གདམས་ཤིང་རྗེས་སུ་བསྟན་པར་བགྱི། བཅོམ་ལྡན་འདས། སངས་རྒྱས་ཞེས་བགྱི་བ་འདི་ནི། མིང་
ཙམ་མོ༑ ༑བཅོམ་ལྡན་འདས། བྱང་ཆུབ་སེམས་དཔའ་ཞེས་བགྱི་བ་འདིའང་མིང་ཙམ་མོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི་བ་འདིའང་མིང་ཙམ་མོ། །མིང་
དེའང་མངོན་པར་མ་གྲུབ་སྟེ། བཅོམ་ལྡན་འདས། ཇི་ལྟར་བདག་བདག་ཅེས་ཀྱང་བཅོམ་ལྡན་འདས། བདག་ཤིན་ཏུ་མངོན་པར་མ་གྲུབ་པ་བཞིན་ནོ། །དེ་ལྟར་ཆོས་ཐམས་ཅད་ངོ་བོ་ཉིད་མ་མཆིས་
༄༅། །པ་ལ་གང་ཞིག་གཟུང་དུ་མ་མཆིས་ཤིང་མངོན་པར་མ་གྲུབ་པའི་གཟུགས་དེ་གང་ལགས། ཚོར་བ་དང༌། འདུ་ཤེས་དང༌། འདུ་བྱེད་རྣམས་དེ་གང་ལགས། གང་ཞིག་
གཟུང་དུ་མ་མཆིས་ཤིང་མངོན་པར་མ་གྲུབ་པའི་རྣམ་པར་ཤེས་པ་དེ་གང་ལགས། དེ་ལྟར་ཆོས་དེ་དག་ཐམས་ཅད་ཀྱི་ངོ་བོ་ཉིད་མ་མཆིས་པ་གང་ལགས་པ་དེ་ནི། མངོན་པར་མ་གྲུབ་
པ་ལགས་ལ། གང་ཆོས་ཐམས་ཅད་ཀྱི་མངོན་པར་མ་གྲུབ་པ་གང་ལགས་པ་དེའང་ཆོས་མ་ལགས་ཏེ། དེས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མངོན་པར་མ་གྲུབ་པས་མངོན་པར་
མ་གྲུབ་པ་ལ་ཅི་ཞིག་གདམས་ཤིང་རྗེས་སུ་བསྟན་པར་བགྱི། བཅོམ་ལྡན་འདས། མངོན་པར་མ་གྲུབ་པ་ལས་གཞན་ན་ཆོས་ཐམས་ཅད་དམ། སངས་རྒྱས་ཀྱི་ཆོས་སམ། བྱང་ཆུབ་
སེམས་དཔའི་ཆོས་སམ། གང་བྱང་ཆུབ་ཏུ་སྤྱོད་པའང་མི་དམིགས་སོ། །བཅོམ་ལྡན་འདས། གལ་ཏེ་དེ་ལྟར་བཤད་ཅིང་དེ་ལྟར་བསྟན་ཏེ་དེ་ལྟར་ཉེ་བར་བསྟན་པ་ལ་བྱང་ཆུབ་སེམས་
དཔའ་སེམས་དཔའ་ཆེན་པོའི་སེམས་མི་འགོང༌། ཀུན་ཏུ་མི་ཞུམ། བག་མི་ཚ། བག་འཁུམས་པར་མི་འགྱུར། འདིའི་ཡིད་ཕྱིར་ཕྱོགས་པར་མི་བགྱིད། བཅོམ་ཞིང་ཕྱིར་ཕྱོགས་
པར་མི་འགྱུར། མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་ལྡན་པར་མི་འགྱུར་ན། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་
པའོ༑ ༑བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྒོམ་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་
པ་ལ་ཉེ་བར་རྟོག་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ངེས་པར་སེམས་པའོ། །ཞེས་དེ་ལྟར་རིག་པར་བགྱིའོ། །དེ་ཅིའི་སླད་དུ་ཞེ་ན།
བཅོམ་ལྡན་འདས། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཆོས་འདི་དག་ཉེ་བར་རྟོག་པ་དེའི་ཚེ་གཟུགས་ཉེ་བར་མི་རྟོག །གཟུགས་ཉེ་བར་
མི་འཛིན། གཟུགས་སྐྱེ་བར་ཡང་དག་པར་རྗེས་སུ་མི་མཐོང༌། གཟུགས་འགག་པར་ཡང་དག་པར་རྗེས་སུ་མི་མཐོང༌། དེ་བཞིན་དུ་ཚོར་བ་མ་ཡིན། འདུ་ཤེས་མ་ཡིན། འདུ་བྱེད་རྣམས་
མ་ཡིན༑ རྣམ་པར་ཤེས་པ་ཉེ་བར་མི་རྟོག །རྣམ་པར་ཤེས་པ་ཉེ་བར་མི་འཛིན། རྣམ་པར་ཤེས་པ་སྐྱེ་བར་ཡང་དག་པར་རྗེས་སུ་མི་མཐོང༌། རྣམ་པར་ཤེས་པ་འགག་པར་ཡང་དག་པར་རྗེས་
སུ་མི་མཐོང་ངོ༌། །དེ་ཅིའི་སླད་དུ་ཞེ་ན། འདི་ལྟར་གཟུགས་ཀྱི་སྐྱེ་བ་མ་མཆིས་པ་གང་ལགས་པ་དེ་ནི། གཟུགས་མ་ལགས། གཟུགས་ཀྱི་འཇིག་པ་མ་མཆིས་པ་གང་ལགས་པ་དེ་ནི།
གཟུགས་མ་ལགས་ཏེ། དེས་ན་སྐྱེ་བ་མ་མཆིས་པ་དང༌། གཟུགས་ཞེས་བགྱི་བ་འདི་ནི། གཉིས་སུ་མ་མཆིས་ཤིང་གཉིས་སུ་བགྱིར་མ་མཆིས་སོ། །དེས་ན་འཇིག་པ་མ་མཆིས་པ་དང༌།
༄༅། །གཟུགས་ཞེས་བགྱི་བ་འདིའང་གཉིས་སུ་མ་མཆིས་ཤིང་གཉིས་སུ་བགྱིར་མ་མཆིས་ཏེ། གང་ཡང་འདི་སྐད་དུ་གཟུགས་ཞེས་བགྱི་བ་འདི་ནི། གཉིས་སུ་མ་མཆིས་
པའི་གྲངས་སུ་གཏོགས་སོ། །དེ་བཞིན་དུ་འདི་ལྟར་ཚོར་བའི་གང་ལགས་པ་དང༌། འདུ་ཤེས་ཀྱི་གང་ལགས་པ་དང༌། འདུ་བྱེད་རྣམས་ཀྱི་གང་ལགས་པ་དང༌། འདི་ལྟར་རྣམ་པར་
ཤེས་པའི་སྐྱེ་བ་མ་མཆིས་པ་གང་ལགས་པ་དེ་ནི། རྣམ་པར་ཤེས་པ་མ་ལགས། རྣམ་པར་ཤེས་པའི་འཇིག་པ་མ་མཆིས་པ་གང་ལགས་པ་དེ་ནི། རྣམ་པར་ཤེས་པ་མ་ལགས་ཏེ།
དེས་ན་སྐྱེ་བ་མ་མཆིས་པ་དང༌། རྣམ་པར་ཤེས་པ་ཞེས་བགྱི་བ་འདིའང་གཉིས་སུ་མ་མཆིས་ཤིང་གཉིས་སུ་བགྱིར་མ་མཆིས་སོ། །དེས་ན་འཇིག་པ་མ་མཆིས་པ་དང༌། རྣམ་པར་
ཤེས་པ་ཞེས་བགྱི་བ་འདིའང་གཉིས་སུ་མ་མཆིས་ཤིང་གཉིས་སུ་བགྱིར་མ་མཆིས་ཏེ། གང་ཡང་འདི་སྐད་དུ་རྣམ་པར་ཤེས་པ་ཞེས་བགྱི་བ་འདི་ནི། གཉིས་སུ་མ་མཆིས་པའི་
གྲངས་སུ་གཏོགས་སོ། །བཅོམ་ལྡན་འདས། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཆོས་ཐམས་ཅད་རྣམ་པ་ཐམས་ཅད་དུ་ཉེ་བར་རྟོག་ན། དེའི་ཚེ་གཟུགས་ཉེ་བར་མི་རྟོག །གཟུགས་
ཉེ་བར་མི་འཛིན། གཟུགས་སྐྱེ་བར་ཡང་དག་པར་རྗེས་སུ་མི་མཐོང༌། གཟུགས་འགག་པར་ཡང་དག་པར་རྗེས་སུ་མི་མཐོང༌། དེ་བཞིན་དུ་ཚོར་བ་མ་ཡིན། འདུ་ཤེས་མ་ཡིན། འདུ་
བྱེད་རྣམས་མ་ཡིན། རྣམ་པར་ཤེས་པ་ཉེ་བར་མི་རྟོག། རྣམ་པར་ཤེས་པ་ཉེ་བར་མི་འཛིན། རྣམ་པར་ཤེས་པ་སྐྱེ་བར་ཡང་དག་པར་རྗེས་སུ་མི་མཐོང༌། རྣམ་པར་ཤེས་པ་འགག་པར་ཡང་
དག་པར་རྗེས་སུ་མི་མཐོང་ངོ༌། །དེ་ཅིའི་སླད་དུ་ཞེ་ན། འདི་ལྟར་གཟུགས་ཀྱི་སྐྱེ་བ་མ་མཆིས་པ་གང་ལགས་པ་དེ་ནི། གཟུགས་མ་ལགས། གཟུགས་ཀྱི་འཇིག་པ་མ་མཆིས་པ་གང་ལགས་
པ་དེ་ནི༑ གཟུགས་མ་ལགས་ཏེ། དེས་ན་སྐྱེ་བ་མ་མཆིས་པ་དང༌། གཟུགས་ཞེས་བགྱི་བ་འདི་ནི། གཉིས་སུ་མ་མཆིས་ཤིང་གཉིས་སུ་བགྱིར་མ་མཆིས་སོ། །དེས་ན་འཇིག་པ་མ་
མཆིས་པ་དང༌། གཟུགས་ཞེས་བགྱི་བ་འདི་ནི། གཉིས་སུ་མ་མཆིས་ཤིང་གཉིས་སུ་བགྱིར་མ་མཆིས་ཏེ། གང་ཡང་འདི་སྐད་དུ་གཟུགས་ཞེས་བགྱི་བ་འདི་ནི། གཉིས་སུ་མ་མཆིས་པའི་
གྲངས་སུ་གཏོགས་སོ། །དེ་བཞིན་དུ་འདི་ལྟར་ཚོར་བའི་གང་ལགས་པ་དང༌། འདུ་ཤེས་ཀྱི་གང་ལགས་པ་དང༌། འདུ་བྱེད་རྣམས་ཀྱི་གང་ལགས་པ་དང༌། འདི་ལྟར་རྣམ་པར་ཤེས་པའི་སྐྱེ་བ་
མ་མཆིས་པ་གང་ལགས་པ་དེ་ནི། རྣམ་པར་ཤེས་པ་མ་ལགས། རྣམ་པར་ཤེས་པའི་འཇིག་པ་མ་མཆིས་པ་གང་ལགས་པ་དེ་ནི། རྣམ་པར་ཤེས་པ་མ་ལགས་ཏེ། དེས་ན་སྐྱེ་བ་མ་མཆིས་པ་
དང༌། རྣམ་པར་ཤེས་པ་ཞེས་བགྱི་བ་འདིའང་གཉིས་སུ་མ་མཆིས་ཤིང་གཉིས་སུ་བགྱིར་མ་མཆིས་སོ། །དེས་ན་འཇིག་པ་མ་མཆིས་པ་དང༌། རྣམ་པར་ཤེས་པ་ཞེས་བགྱི་བ་འདིའང་གཉིས་
༄༅། །སུ་མ་མཆིས་ཤིང་གཉིས་སུ་བགྱིར་མ་མཆིས་ཏེ། གང་ཡང་འདི་སྐད་དུ་རྣམ་པར་ཤེས་པ་ཞེས་བགྱི་བ་འདི་ནི། གཉིས་སུ་མ་མཆིས་པའི་གྲངས་སུ་གཏོགས་སོ། །
འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་གཉིས་པ། དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །དེའི་ཕྱིར་ཚེ་དང་ལྡན་
པ་རབ་འབྱོར་གྱིས་ཇི་སྐད་སྨྲས་པའི་དོན་བདག་གིས་ཤེས་པ་དེ་ལྟར་ན། བྱང་ཆུབ་སེམས་དཔའ་ཡང་སྐྱེ་བ་མེད་པ་ཡིན་ནོ། །ཚེ་དང་ལྡན་པ་རབ་འབྱོར། གལ་ཏེ་ཡང་བྱང་ཆུབ་སེམས་
དཔའ་ཡང་སྐྱེ་བ་མེད་པ་ཡིན་ན། བྱང་ཆུབ་སེམས་དཔའ་དཀའ་བ་སྤྱད་པ་སྤྱོད་པའམ། སེམས་ཅན་རྣམས་ཀྱི་དོན་གྱི་ཕྱིར་སྡུག་བསྔལ་གང་ཡིན་པ་དེ་དག་ཉམས་སུ་མྱོང་བའི་དོན་དུ་སྤྲོ་བའང་
ཅི་ཞིག་ཡོད། དེ་སྐད་ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། ཁོ་བོ་ནི། བྱང་ཆུབ་སེམས་
དཔའ་སེམས་དཔའ་ཆེན་པོ་དཀའ་བ་སྤྱད་པ་སྤྱོད་པར་མི་འདོད་དོ། །གང་ཞིག་དཀའ་བའི་འདུ་ཤེས་ཀྱིས་སྤྱོད་པ་དེ་ནི། བྱང་ཆུབ་སེམས་དཔར་ཡང་མི་འགྱུར་ཏེ། དེ་ཅིའི་ཕྱིར་ཞེ་ན།
ཚེ་དང་ལྡན་པ་ཤཱ་རིའི་བུ། དཀའ་བའི་འདུ་ཤེས་བསྐྱེད་ནས་ནི། སེམས་ཅན་གཞལ་དུ་མེད་གྲངས་མེད་པའི་དོན་བྱ་བར་མི་ནུས་སོ། །འོན་ཀྱང་བདེ་བའི་འདུ་ཤེས་ཉིད་དུ་བྱས་ནས་དེ་
སེམས་ཅན་ཐམས་ཅད་ལ་མར་འདུ་ཤེས་པ་དང༌། ཕར་འདུ་ཤེས་པ་དང༌། བུར་འདུ་ཤེས་པ་དང༌། བུ་མོར་འདུ་ཤེས་བསྐྱེད་པར་བྱས་ཤིང༌། དེ་བཞིན་དུ་སྐྱེས་པ་དང༌། བུད་མེད་དག་ལ་
འདུ་ཤེས་དེ་དག་བྱས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་དོ། །དེ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་
ཐམས་ཅད་ལ་མར་འདུ་ཤེས་པ་དང༌། ཕར་འདུ་ཤེས་པ་དང༌། བུར་འདུ་ཤེས་པ་དང༌། བུ་མོར་འདུ་ཤེས་པ་དང༌། བདག་ཉིད་ཀྱི་བར་དུའང་འདུ་ཤེས་བསྐྱེད་པར་བྱ་སྟེ། ཇི་ལྟར་བདག་
ནི༑ ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་སྡུག་བསྔལ་ཐམས་ཅད་ལས་ཐར་བར་བྱ་བ་དེ་བཞིན་དུ་སེམས་ཅན་ཐམས་ཅད་ཐམས་ཅད་ནས་ཐམས་ཅད་རྣམ་པ་ཐམས་
ཅད་དུ་ཐམས་ཅད་སྡུག་བསྔལ་ཐམས་ཅད་ལས་ཐར་པར་བྱའོ། །ཞེས་དེ་ལྟར་སེམས་ཅན་ཐམས་ཅད་ལའང་འདུ་ཤེས་བསྐྱེད་པར་བྱ་སྟེ། བདག་གིས་སེམས་ཅན་འདི་དག་ཐམས་ཅད་
ཡོངས་སུ་མི་གཏང་ངོ༌། །བདག་གིས་སེམས་ཅན་འདི་དག་ཐམས་ཅད་སྡུག་བསྔལ་གྱི་ཕུང་པོ་དཔག་ཏུ་མེད་པ་ལས་ཐར་བར་བྱའོ། །བདག་གི་ལུས་བརྒྱར་གཏུབས་ཀྱང་ཆུང་ངུ་ན་འདི་
དག་ལ་བདག་གིས་གནོད་སེམས་ཀྱང་མི་བསྐྱེད་དོ། །སྙམ་དུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་བསྐྱེད་པར་བྱའོ། །གལ་ཏེ་སེམས་དེ་ལྟར་གནས་ན། དཀའ་བ་
༄༅། །བྱེད་པའི་འདུ་ཤེས་སུ་སྤྱོད་པ་མ་ཡིན་ནོ། །དཀའ་བ་བྱེད་པའི་འདུ་ཤེས་སུ་གནས་པ་མ་ཡིན་ནོ། །ཚེ་དང་ལྡན་པ་ཤཱ་རིའི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་
ཆེན་པོས་ཅི་ནས་ཀྱང་བདག་ནི། ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མེད་ཅིང་མི་དམིགས་པ་དེ་བཞིན་དུ་ཆོས་ཐམས་ཅད་ཐམས་ཅད་ནས་ཐམས་ཅད་རྣམ་པ་ཐམས་
ཅད་དུ་ཐམས་ཅད་མེད་ཅིང་མི་དམིགས་པ་དེ་ལྟར་སེམས་བསྐྱེད་པར་བྱ་ཞིང༌། དེ་ལྟར་ན། ནང་དང༌། ཕྱིའི་ཆོས་ཐམས་ཅད་ལ་འདུ་ཤེས་བསྐྱེད་པར་བྱའོ། །གལ་ཏེ་སེམས་དེ་ལྟར་སྤྱོད་ན། དཀའ་བའི་
འདུ་ཤེས་ཅན་དུ་སྤྱོད་པ་མ་ཡིན། དཀའ་བའི་འདུ་ཤེས་ཅན་དུ་གནས་པ་མ་ཡིན་ནོ། །ཚེ་དང་ལྡན་པ་ཤཱ་རིའི་བུས་གང་ཡང་འདི་སྐད་དུ་བྱང་ཆུབ་སེམས་དཔའ་ཡང་སྐྱེ་བ་མེད་པ་ཡིན་ནོ། །
ཞེས་སྨྲས་པ་དེ་ནི། དེ་དེ་བཞིན་ནོ། །ཚེ་དང་ལྡན་པ་ཤཱ་རིའི་བུ། དེ་དེ་བཞིན་ཏེ། བྱང་ཆུབ་སེམས་དཔའ་ནི། སྐྱེ་བ་མེད་པའོ། །ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར།
ཡང་ཅི་བྱང་ཆུབ་སེམས་དཔའ་ཉིད་སྐྱེ་བ་མེད་དམ། འོན་ཏེ་བྱང་ཆུབ་སེམས་དཔའི་ཆོས་རྣམས་ཀྱང་སྐྱེ་བ་མེད། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། བྱང་ཆུབ་
སེམས་དཔའི་ཆོས་རྣམས་ཀྱང་སྐྱེ་བ་མེད་དོ། །ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། ཡང་ཅི་བྱང་ཆུབ་སེམས་དཔའི་ཆོས་རྣམས་ཁོ་ན་སྐྱེ་བ་མེད་དམ། འོན་ཏེ་ཐམས་ཅད་
མཁྱེན་པ་ཉིད་ཀྱང་སྐྱེ་བ་མེད། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཐམས་ཅད་མཁྱེན་པ་ཉིད་ཀྱང་སྐྱེ་བ་མེད་དོ། །ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། ཡང་ཅི་
ཐམས་ཅད་མཁྱེན་པ་ཉིད་ཁོ་ན་སྐྱེ་བ་མེད་དམ། འོན་ཏེ་ཐམས་ཅད་མཁྱེན་པ་ཉིད་ཀྱི་ཆོས་རྣམས་ཀྱང་སྐྱེ་བ་མེད། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཐམས་ཅད་མཁྱེན་པ་
ཉིད་ཀྱི་ཆོས་རྣམས་ཀྱང་སྐྱེ་བ་མེད་དོ། །ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། ཡང་ཅི་ཐམས་ཅད་མཁྱེན་པ་ཉིད་ཀྱི་ཆོས་རྣམས་ཁོ་ན་སྐྱེ་བ་མེད་དམ། འོན་ཏེ་སོ་སོའི་སྐྱེ་བོའང་སྐྱེ་
བ་མེད༑ རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། སོ་སོའི་སྐྱེ་བོའང་སྐྱེ་བ་མེད་དོ། །ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། ཡང་ཅི་སོ་སོའི་སྐྱེ་བོ་ཉིད་སྐྱེ་བ་མེད་དམ།
འོན་ཏེ་སོ་སོའི་སྐྱེ་བོའི་ཆོས་རྣམས་ཀྱང་སྐྱེ་བ་མེད། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། སོ་སོའི་སྐྱེ་བོའི་ཆོས་རྣམས་ཀྱང་སྐྱེ་བ་མེད་དོ། །དེ་སྐད་ཅེས་སྨྲས་པ་དང༌། ཚེ་དང་
ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། གལ་ཏེ་བྱང་ཆུབ་སེམས་དཔའ་ཡང་སྐྱེ་བ་མེད། བྱང་ཆུབ་སེམས་དཔའི་ཆོས་རྣམས་
ཀྱང་སྐྱེ་བ་མེད། ཐམས་ཅད་མཁྱེན་པ་ཉིད་ཀྱང་སྐྱེ་བ་མེད། ཐམས་ཅད་མཁྱེན་པ་ཉིད་ཀྱི་ཆོས་རྣམས་ཀྱང་སྐྱེ་བ་མེད། སོ་སོའི་སྐྱེ་བོའང་སྐྱེ་བ་མེད། སོ་སོའི་སྐྱེ་བོའི་ཆོས་རྣམས་ཀྱང་སྐྱེ་བ་
༄༅། །མེད་པ་ཡིན་ན། ཚེ་དང་ལྡན་པ་རབ་འབྱོར། འོ་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཐམས་ཅད་མཁྱེན་པ་ཉིད་རྗེས་སུ་ཐོབ་པ་ཡིན་ནམ། དེ་སྐད་ཅེས་
སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། ཁོ་བོ་ནི། མ་སྐྱེས་པའི་ཆོས་ལ་ཐོབ་པར་མི་འདོད་ལ་མངོན་
པར་རྟོགས་པ་ཡང་མ་ཡིན་ཏེ། མ་སྐྱེས་པའི་ཆོས་ཀྱིས་ཐོབ་པ་མ་སྐྱེས་པ་འཐོབ་པར་ཡང་མི་འགྱུར་རོ། །ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། ཡང་ཅི་མ་སྐྱེས་པའི་ཆོས་
ཀྱིས་ཐོབ་པ་སྐྱེས་པ་འཐོབ་པར་འགྱུར་རམ། འོན་ཏེ་སྐྱེས་པའི་ཆོས་ཀྱིས་ཐོབ་པ་མ་སྐྱེས་པ་འཐོབ་པར་འགྱུར། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་མ་སྐྱེས་
པའི་ཆོས་སྐྱེས་པ་ཡིན་ནམ། འོན་ཏེ་མ་སྐྱེས་པའི་ཆོས་མ་སྐྱེས་པ་ཉིད་ཡིན། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། ཡང་ཅི་སྐྱེ་བའི་ཆོས་ཉིད་མི་སྐྱེ་བ་ཡིན་ནམ། འོན་ཏེ་མི་
སྐྱེ་བའི་ཆོས་མི་སྐྱེ་བ་ཡིན། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། སྐྱེ་བའི་ཆོས་སམ་མི་སྐྱེ་བའི་ཆོས་ཞེས་སྨྲ་བར་མི་སྤོབས་སོ། །ཤཱ་རིའི་བུས་སྨྲས་པ། ཚེ་དང་ལྡན་པ་
རབ་འབྱོར། ཁྱོད་ཀྱིས་སྐྱེ་བ་མེད་པའང་སྨྲ་བར་མི་སྤོབས་སམ། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། སྐྱེ་བ་མེད་པ་ཉིད་རྗོད་པ་ཡིན་ལ། ཚེ་དང་ལྡན་པ་ཤཱ་རིའི་བུ། སྐྱེ་བ་
མེད་པ་ཉིད་སོ་སོར་སྣང་བ་ཡིན་ནོ། །ཚེ་དང་ལྡན་པ་ཤཱ་རིའི་བུ། སྐྱེ་བ་མེད་པ་ཉིད་སྤོབས་པ་ཡིན་ཏེ། ཚེ་དང་ལྡན་པ་ཤཱ་རིའི་བུ། དེ་ཁོ་ན་བཞིན་དུ་ཤིན་ཏུ་སོ་སོར་སྣང་བ་ཉིད་དོ། །དེ་སྐད་ཅེས་
སྨྲས་པ་དང༌། ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར་ནི། ཆོས་སྟོན་པའི་ནང་ན་མཆོག་ཏུ་གཞག་པར་བྱའོ། །དེ་ཅིའི་
ཕྱིར་ཞེ་ན། འདི་ལྟར་གནས་བརྟན་ཚེ་དང་ལྡན་པ་རབ་འབྱོར་ནི། གང་དང་གང་ཉིད་ལ་ཡོངས་སུ་དྲི་བ་བྱས་པ་དེ་དང་དེ་ཉིད་ལ་ངེས་པར་འབྱུང་བར་འགྱུར་ཞིང༌། ཆོས་ཉིད་ལས་ཀྱང་མི་གཡོ་
ལ༑ ཆོས་ཉིད་དང་འགལ་བར་ཡང་མི་བྱེད་དོ། །དེ་སྐད་ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ།
བཅོམ་ལྡན་འདས་ཀྱི་ཉན་ཐོས་མི་གནས་པའི་ཆོས་ཅན་རྣམས་ཀྱི་ཆོས་ཉིད་ནི། འདི་ཡིན་ཏེ། དེ་དག་ནི། གང་དང་གང་ཉིད་ལ་ཡོངས་སུ་དྲི་བ་བྱས་པ་དེ་དང་དེ་ཉིད་ལ་ངེས་པར་འབྱུང་བར་འགྱུར་
ཞིང༌། ཆོས་ཉིད་དང་འགལ་བར་ཡང་མི་བྱེད་ལ། ཆོས་ཉིད་ལས་ཀྱང་མི་འདའ་འོ། །དེ་ཅིའི་ཕྱིར་ཞེ་ན། འདི་ལྟར་ཡང་ཆོས་ཐམས་ཅད་ལ་མི་གནས་པའི་ཕྱིར་རོ། །དེ་སྐད་ཅེས་སྨྲས་པ་དང༌། ཚེ་
དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། ལེགས་སོ། ལེགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་
༄༅། །ཆོས་ཐམས་ཅད་ལ་མི་གནས་པའི་ཕ་རོལ་ཏུ་ཕྱིན་པ་འདི་གང་ཡིན། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ནི། ཐེག་པ་ཐམས་ཅད་པ་
ཆོས་ཐམས་ཅད་ལ་མི་གནས་པའི་ཕྱིར། ཆོས་ཐམས་ཅད་ལ་མི་གནས་པའི་ཕ་རོལ་ཏུ་ཕྱིན་པ་ཡིན་ནོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་
པ་ཟབ་མོ་འདི་ལྟར་བཤད་ཅིང་འདི་ལྟར་བསྟན་པ་དང༌། འདི་ལྟར་ཉེ་བར་བསྟན་པ་ལ་སེམས་ཞུམ་པར་མི་འགྱུར་བ་དང༌། ནེམ་ནུར་དུ་མི་འགྱུར་བ་དང༌། རྨོངས་པར་མི་འགྱུར་བ་དང༌།
སེམས་གཞན་དུ་མི་འགྱུར་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་འདིས་གནས་ཤིང་ཡིད་ལ་བྱེད་པ་འདི་དང་མ་བྲལ་བ་
ཡིན་ནོ༑ ༑ཞེས་རིག་པར་བྱའོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། བྱང་ཆུབ་སེམས་དཔའ་སེམས་དཔའ་
ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པས་གནས་པ་གང་ཡིན་པ་དེ་ཇི་ལྟར་ཡིད་ལ་བྱེད་པ་དང་མ་བྲལ་བར་འགྱུར། ཚེ་དང་ལྡན་པ་རབ་འབྱོར། གལ་ཏེ་བྱང་ཆུབ་སེམས་དཔའ་
སེམས་དཔའ་ཆེན་པོ་ཡིད་ལ་བྱེད་པ་དང་མ་བྲལ་བ་ཡིན་ན། དེ་ལྟ་ན་ནི། དེ་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་དང་བྲལ་བར་འགྱུར་ཞིང༌། ཚེ་དང་ལྡན་པ་རབ་འབྱོར། གལ་ཏེ་ཡང་
བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དང་མ་བྲལ་ན། དེ་ལྟ་ན་ནི། དེ་ཡིད་ལ་བྱེད་པ་དེ་དང་བྲལ་བར་འགྱུར་རོ། །ཚེ་དང་ལྡན་པ་རབ་འབྱོར།
གལ་ཏེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡིད་ལ་བྱེད་པ་དང་མ་བྲལ་ཡང་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་དང་མ་བྲལ་བ་ཉིད་དུ་འགྱུར་ན། དེ་ལྟ་ཡིན་དུ་ཟིན་ན་སེམས་
ཅན་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་དང་མ་བྲལ་བར་འགྱུར་ཏེ། དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ཀྱང་ཡིད་ལ་བྱེད་པ་དང་མ་བྲལ་བར་གནས་སོ། །དེ་སྐད་
ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། ལེགས་སོ། ལེགས་སོ། །འོན་ཀྱང་ཁྱོད་ལའང་ཀླན་ཀར་
འགྱུར་ཏེ། ཚེ་དང་ལྡན་པ་ཤཱ་རིའི་བུས་ནི། དོན་འདི་ཉིད་ཡང་དག་པའི་ཚིག་ཏུ་བརྗོད་པར་ཡང་ཡོངས་སུ་གཟུང་བ་ཡིན་ནོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ཤཱ་རིའི་བུ། སེམས་ཅན་ངོ་བོ་ཉིད་མེད་
པས་ན༑ ཡིད་ལ་བྱེད་པ་ངོ་བོ་ཉིད་མེད་པར་རིག་པར་བྱའོ། །ཚེ་དང་ལྡན་པ་ཤཱ་རིའི་བུ། སེམས་ཅན་དངོས་པོ་མེད་པས་ན། ཡིད་ལ་བྱེད་པ་དངོས་པོ་མེད་པར་རིག་པར་བྱའོ། །ཚེ་དང་ལྡན་པ་ཤཱ་
རིའི་བུ༑ སེམས་ཅན་དབེན་པས་ན། ཡིད་ལ་བྱེད་པ་དབེན་པར་རིག་པར་བྱའོ། །ཚེ་དང་ལྡན་པ་ཤཱ་རིའི་བུ། སེམས་ཅན་བསམ་གྱིས་མི་ཁྱབ་པས་ན། ཡིད་ལ་བྱེད་པ་བསམ་གྱིས་མི་ཁྱབ་
༄༅། །པར་རིག་པར་བྱའོ། །ཚེ་དང་ལྡན་པ་ཤཱ་རིའི་བུ། སེམས་ཅན་མངོན་པར་རྫོགས་པར་བྱང་མ་ཆུབ་པས་ན། ཡིད་ལ་བྱེད་པ་མངོན་པར་རྫོགས་པར་བྱང་མ་ཆུབ་
པར་རིག་པར་བྱའོ། །ཚེ་དང་ལྡན་པ་ཤཱ་རིའི་བུ། སེམས་ཅན་ཡང་དག་པ་ཇི་ལྟ་བ་མ་ཡིན་པའི་དོན་དུ་མངོན་པར་རྫོགས་པར་བྱང་ཆུབ་པས་ན། ཡིད་ལ་བྱེད་པ་ཡང་དག་པ་ཇི་ལྟ་བ་མ་
ཡིན་པའི་དོན་དུ་མངོན་པར་རྫོགས་པར་བྱང་ཆུབ་པར་རིག་པར་བྱའོ། །ཚེ་དང་ལྡན་པ་ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ནི། དེ་ལྟ་བུའི་ངོ་བོའི་ཡིད་ལ་བྱེད་པ་
འདི་དང༌། གནས་པ་འདིས་གནས་པར་འདོད་དོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། རྣམ་པ་ཐམས་ཅད་མཁྱེན་པ་ཉིད་ཀྱི་སྤྱོད་པའི་ལེའུ་ཞེས་བྱ་བ་སྟེ།
དང་པོའོ།། །།དེའི་ཚེ་ཡང་ལྷ་རྣམས་ཀྱི་དབང་པོ་བརྒྱ་བྱིན་སུམ་ཅུ་རྩ་གསུམ་གྱི་རིས་ཀྱི་ལྷའི་བུ་བཞི་ཁྲི་དང་ལྷན་ཅིག་ཏུ་འཁོར་དེ་ཉིད་དུ་འདུས་ཏེ་འཁོད་པར་གྱུར་ཏོ། །
འཇིག་རྟེན་སྐྱོང་བ་བཞིའང་རྒྱལ་ཆེན་བཞིའི་རིས་ཀྱི་ལྷའི་བུ་ཉི་ཁྲིར་བཅས་པ་དང༌། མི་མཇེད་ཀྱི་བདག་པོ་ཚངས་པའང་ཚངས་རིས་ཀྱི་ལྷའི་བུ་ཁྲིར་བཅས་པ་དང༌། གནས་གཙང་
མའི་ལྷའི་བུ་ལྔ་སྟོང་ཡང་འཁོར་དེ་ཉིད་དུ་འདུས་ཏེ་འཁོད་པར་གྱུར་ཏེ། ལྷ་རྣམས་ཀྱི་རང་གི་ལས་ཀྱི་རྣམ་པར་སྨིན་པ་ལས་སྐྱེས་པའི་འོད་གང་ཡིན་པ་དེ་ཐམས་ཅད་ཀྱང་སངས་
རྒྱས་ཀྱི་མཐུ་དང༌། སངས་རྒྱས་ཀྱི་གཟི་བརྗིད་དང༌། སངས་རྒྱས་ཀྱི་བྱིན་གྱི་རླབས་ཀྱིས་ཟིལ་གྱིས་མནན་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཚེ་དང་ལྡན་པ་གནས་བརྟན་རབ་འབྱོར།
ལ་འདི་སྐད་ཅེས་སྨྲས་སོ། །འཕགས་པ་རབ་འབྱོར། ལྷའི་བུ་སྟོང་ཕྲག་མང་པོ་འཁོར་འདིར་འདུས་ཏེ་འཁོད་པ་འདི་རྣམས་འཕགས་པ་རབ་འབྱོར་ལས་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཉེ་བར་བསྟན་པ་དང༌། གདམས་པ་དང༌། རྗེས་སུ་བསྟན་པ་ཉན་པར་འདོད་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཇི་ལྟར་
ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པར་བྱ། ཇི་ལྟར་བསླབ་པར་བྱ། ཇི་ལྟར་རྣལ་འབྱོར་དུ་བྱ། གནས་བརྟན་རབ་འབྱོར་གྱིས་སྨྲས་པ། ཀཽ་ཤི་ཀ །དེའི་ཕྱིར་སངས་རྒྱས་ཀྱི་མཐུ་དང་
སངས་རྒྱས་ཀྱི་གཟི་བརྗིད་དང༌། སངས་རྒྱས་ཀྱི་བྱིན་གྱི་རླབས་ཀྱིས་ཉེ་བར་བསྟན་པར་བྱ་སྟེ། ལྷའི་བུ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དེ་དག་
གིས་སེམས་བསྐྱེད་པར་བྱའོ། །གང་དག་ཡང་དག་པ་ཉིད་དུ་ངེས་པ་ལ་ཞུགས་པ་དེ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་སྐལ་བ་མེད་དོ། །དེ་ཅིའི་
ཕྱིར་ཞེ་ན། དེ་དག་གིས་འཁོར་བའི་རྒྱུན་ལས་མཚམས་བཅད་པས་དེ་དག་ཡང་དང་ཡང་དུ་འཁོར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་སྐལ་བ་
༄༅། །མེད་དོ༑ ༑འོན་ཀྱང་གལ་ཏེ་དེ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། དེ་དག་ལའང་རྗེས་སུ་ཡི་རང་བར་བྱའོ། །ཁོ་བོ་ནི།
དེ་དག་གི་དགེ་བ་ལ་བར་ཆད་མི་བྱེད་དེ། ཁྱད་པར་དུ་འཕགས་པའི་ཆོས་རྣམས་ལས་ཆེས་ཁྱད་པར་དུ་འཕགས་པའི་ཆོས་རྣམས་ལ་ལྷག་པར་དམིགས་པར་བྱའོ། །དེ་ནས་བཅོམ་
ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར། ལེགས་སོ། ལེགས་སོ། །ཁྱོད་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སྤྲོ་བ་བསྐྱེད་པ་གང་
ཡིན་པ་དེ་ནི། རབ་འབྱོར། ཡང་ཁྱོད་ལེགས་སོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་
འདས༑ བདག་ཅག་གིས་ནི། བཅོམ་ལྡན་འདས་ཀྱི་བཀའ་དྲིན་གཟོ་བར་བགྱི་སྟེ། བཀའ་དྲིན་མི་གཟོ་བར་མི་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཇི་ལྟར་སྔོན་གྱི་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་དྲུང་དུ་བཅོམ་ལྡན་འདས་སྔོན་བྱང་ཆུབ་སེམས་དཔར་གྱུར་པ་ཉིད་ཀྱིས་བདག་ཅག་རྣམས་ཀྱི་
དོན་དུ་བྱང་ཆུབ་ཀྱི་ཕྱིར་ཚངས་པར་སྤྱད་པ་སྤྱོད་པ་ན་ཉན་ཐོས་གང་དག་གིས་ཕ་རོལ་ཏུ་ཕྱིན་པ་རྣམས་ལ་གདམས་ཤིང་རྗེས་སུ་བསྟན་ཏེ། དེ་ལ་བཅོམ་ལྡན་འདས་ཀྱིས་སྤྱད་པས་བླ་
ན་མེད་པའི་ཡེ་ཤེས་བསྐྱེད་པ་དེ་བཞིན་དུ། བཅོམ་ལྡན་འདས། བདག་ཅག་གིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྗེས་སུ་ཡོངས་སུ་གཟུང་བར་བགྱི་ཞིང་རྗེས་སུ་
ཡོངས་སུ་བསྐོར་བར་བགྱིའོ། །ཡང་དག་པར་ཡོངས་སུ་གཟུང་བར་བགྱི་ཞིང་ཡང་དག་པར་ཡོངས་སུ་བསྐོར་བར་ཡང་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། འདི་ལ་བདག་
ཅག་གིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྗེས་སུ་ཡོངས་སུ་བཟུང་ཞིང་རྗེས་སུ་ཡོངས་སུ་བསྐོར་བ་དང༌། ཡང་དག་པར་ཡོངས་སུ་བཟུང་ཞིང་ཡང་དག་པར་ཡོངས་སུ་
བསྐོར་བས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་ཚེ་དང་ལྡན་པ་རབ་འབྱོར་གྱིས་ལྷ་རྣམས་ཀྱི་དབང་པོ་བརྒྱ་བྱིན་
ལ་སྨྲས་པ། ཀཽ་ཤི་ཀ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང༌། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་
པར་བྱ་བ་ངས་ཁྱོད་ལ་བཤད་པར་བྱའོ། །ཀཽ་ཤི་ཀ། བྱང་ཆུབ་སེམས་དཔའ་སེམས་དཔའ་ཆེན་པོས་སྟོང་པ་ཉིད་ལ་གནས་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པར་བྱ་སྟེ། ཀཽ་ཤི་
ཀ། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོས་གོ་ཆ་ཆེན་པོ་བགོས་པར་འགྱུར་བར་བྱའོ། །གཟུགས་ལ་གནས་པར་མི་བྱའོ། །ཚོར་བ་ལ་མ་ཡིན། འདུ་ཤེས་ལ་མ་ཡིན།
༄༅། །འདུ་བྱེད་རྣམས་ལ་མ་ཡིན། རྣམ་པར་ཤེས་པ་ལ་གནས་པར་མི་བྱའོ། །མིག་ལ་གནས་པར་མི་བྱའོ། །གཟུགས་ལ་གནས་པར་མི་བྱའོ། །མིག་གི་རྣམ་
པར་ཤེས་པ་ལ་གནས་པར་མི་བྱའོ། །མིག་གི་འདུས་ཏེ་རེག་པ་ལ་གནས་པར་མི་བྱའོ། །མིག་གི་འདུས་ཏེ་རེག་པ་ལས་བྱུང་བའི་ཚོར་བ་ལ་གནས་པར་མི་བྱའོ། །དེ་བཞིན་དུ་རྣ་བ་
དང༌། སྣ་དང༌། ལྕེ་དང༌། ལུས་དང༌། ཡིད་ལ་གནས་པར་མི་བྱའོ། །སྒྲ་དང༌། དྲི་དང༌། རོ་དང༌། རེག་དང༌། ཆོས་རྣམས་དང༌། རྣ་བའི་རྣམ་པར་ཤེས་པ་ནས་ཡིད་ཀྱི་རྣམ་པར་ཤེས་པའི་
བར་དང༌། ཡིད་ཀྱི་འདུས་ཏེ་རེག་པ་དང༌། ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བའི་བར་ལ་གནས་པར་མི་བྱའོ། །སའི་ཁམས་ལ་གནས་པར་མི་བྱའོ། །ཆུའི་ཁམས་དང༌།
མེའི་ཁམས་དང༌། རླུང་གི་ཁམས་དང༌། ནམ་མཁའི་ཁམས་དང༌། རྣམ་པར་ཤེས་པའི་ཁམས་ལ་གནས་པར་མི་བྱའོ། །དྲན་པ་ཉེ་བར་གཞག་པ་ལ་གནས་པར་མི་བྱའོ། །ཡང་དག་
པར་སྤོང་བ་དང༌། རྫུ་འཕྲུལ་གྱི་རྐང་པ་དང༌། དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། ལམ་ལ་གནས་པར་མི་བྱའོ། །རྒྱུན་དུ་ཞུགས་པའི་འབྲས་བུ་ལ་གནས་པར་
མི་བྱའོ༑ ༑ལན་ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བའི་འབྲས་བུ་དང༌། དགྲ་བཅོམ་པ་ཉིད་ལ་གནས་པར་མི་བྱའོ། །རང་སངས་རྒྱས་ཉིད་ལ་གནས་པར་མི་བྱའོ། །སངས་
རྒྱས་ཉིད་ལ་གནས་པར་མི་བྱའོ། །དེ་ལྟར་ན་གཟུགས་སོ། །ཞེས་གནས་པར་མི་བྱའོ། །དེ་ལྟར་ན་ཚོར་བའོ། །ཞེས་བྱ་བ་དང༌། འདུ་ཤེས་སོ། །ཞེས་བྱ་བ་དང༌། འདུ་བྱེད་རྣམས་སོ། །ཞེས་བྱ་
བ་དང༌། དེ་ལྟར་ན་རྣམ་པར་ཤེས་པའོ། །ཞེས་གནས་པར་མི་བྱའོ། །དེ་ལྟར་ན་མིག་གོ །ཞེས་བྱ་བ་ནས་ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བའོ། །ཞེས་བྱ་བའི་བར་དུ་གནས་པར་
མི་བྱའོ༑ ༑དེ་ལྟར་ན་སའི་ཁམས་སོ། །ཞེས་བྱ་བ་ནས་རྣམ་པར་ཤེས་པའི་ཁམས་སོ། །ཞེས་བྱ་བའི་བར་དུ་གནས་པར་མི་བྱའོ། །དེ་ལྟར་ན་དྲན་པ་ཉེ་བར་གཞག་པའོ། །ཞེས་གནས་པར་
མི་བྱའོ༑ ༑དེ་ལྟར་ན་ཡང་དག་པར་སྤོང་བ་དང༌། རྫུ་འཕྲུལ་གྱི་རྐང་པ་དང༌། དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་རྣམས་སོ། །ཞེས་བྱ་བ་དང༌། དེ་ལྟར་ན་ལམ་གྱི་ཡན་ལག་
གོ །ཞེས་གནས་པར་མི་བྱའོ། །དེ་ལྟར་ན་རྒྱུན་དུ་ཞུགས་པའི་འབྲས་བུའོ་ཞེས་གནས་པར་མི་བྱའོ། །དེ་ལྟར་ན་ལན་ཅིག་ཕྱིར་འོང་བའི་འབྲས་བུའོ། །ཞེས་བྱ་བ་དང༌། དེ་ལྟར་ན་ཕྱིར་
མི་འོང་བའི་འབྲས་བུའོ། །ཞེས་བྱ་བ་དང༌། དེ་ལྟར་ན་དགྲ་བཅོམ་པའོ། །ཞེས་གནས་པར་མི་བྱའོ། །དེ་ལྟར་ན་རང་སངས་རྒྱས་སོ། །ཞེས་གནས་པར་མི་བྱའོ། །དེ་ལྟར་ན་སངས་རྒྱས་སོ། །
ཞེས་གནས་པར་མི་བྱའོ། །གཟུགས་རྟག་པ་དང་མི་རྟག་པའོ། །ཞེས་གནས་པར་མི་བྱའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་རྟག་པ་
༄༅། །དང་མི་རྟག་པའོ། །ཞེས་གནས་པར་མི་བྱའོ། །གཟུགས་བདེ་བ་དང་སྡུག་བསྔལ་བའོ། །ཞེས་གནས་པར་མི་བྱའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་
བྱེད་རྣམས་དང༌། རྣམ་པར་ཤེས་པ་བདེ་བ་དང་སྡུག་བསྔལ་བའོ། །ཞེས་གནས་པར་མི་བྱའོ། །གཟུགས་སྟོང་པ་དང་མི་སྟོང་པའོ། །ཞེས་གནས་པར་མི་བྱའོ། །དེ་བཞིན་དུ་ཚོར་བ་དང༌།
འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་སྟོང་པ་དང་མི་སྟོང་པའོ། །ཞེས་གནས་པར་མི་བྱའོ། །གཟུགས་བདག་དང་བདག་མེད་པའོ། །ཞེས་གནས་པར་མི་བྱའོ། །
དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་བདག་དང་བདག་མེད་པའོ། །ཞེས་གནས་པར་མི་བྱའོ། །གཟུགས་སྡུག་པ་དང་མི་སྡུག་པའོ། །
ཞེས་གནས་པར་མི་བྱའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་སྡུག་པ་དང་མི་སྡུག་པའོ། །ཞེས་གནས་པར་མི་བྱའོ། །གཟུགས་སྟོང་
པའོ༑ ༑ཞེས་ཉེ་བར་དམིགས་པས་གནས་པར་མི་བྱའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་སྟོང་པའོ། །ཞེས་ཉེ་བར་དམིགས་པས་
གནས་པར་མི་བྱའོ། །རྒྱུན་དུ་ཞུགས་པའི་འབྲས་བུ་འདུས་མ་བྱས་ཀྱིས་རབ་ཏུ་ཕྱེ་བའོ། །ཞེས་གནས་པར་མི་བྱའོ། །དེ་བཞིན་དུ་ལན་ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་
པའི་འབྲས་བུ་དང༌། དགྲ་བཅོམ་པ་ཉིད་འདུས་མ་བྱས་ཀྱིས་རབ་ཏུ་ཕྱེ་བའོ། །ཞེས་གནས་པར་མི་བྱའོ། །རང་སངས་རྒྱས་ཉིད་འདུས་མ་བྱས་ཀྱིས་རབ་ཏུ་ཕྱེ་བའོ། །ཞེས་གནས་པར་མི་བྱའོ། །
སངས་རྒྱས་ཉིད་འདུས་མ་བྱས་ཀྱིས་རབ་ཏུ་ཕྱེ་བའོ། །ཞེས་གནས་པར་མི་བྱའོ། །རྒྱུན་དུ་ཞུགས་པ་སྦྱིན་པའི་གནས་སོ། །ཞེས་བྱ་བར་གནས་པར་མི་བྱའོ། །རྒྱུན་དུ་ཞུགས་པ་རེ་ལྟར་ཐོགས་
ན་སྲིད་པ་ལན་བདུན་པའོ། །ཞེས་གནས་པར་མི་བྱའོ། །ལན་ཅིག་ཕྱིར་འོང་བ་སྦྱིན་པའི་གནས་སོ། །ཞེས་གནས་པར་མི་བྱའོ། །ལན་ཅིག་ཕྱིར་འོང་བ་ཡོངས་སུ་མཐར་མ་ཕྱིན་པའི་ཕྱིར་
འཇིག་རྟེན་འདིར་ལན་ཅིག་ཕྱིར་འོངས་ནས་སྡུག་བསྔལ་མཐར་བྱེད་པར་འགྱུར་རོ། །ཞེས་གནས་པར་མི་བྱའོ། །ཕྱིར་མི་འོང་བ་སྦྱིན་པའི་གནས་སོ། །ཞེས་གནས་པར་མི་བྱའོ། །ཕྱིར་མི་
འོང་བ་འཇིག་རྟེན་འདིར་ཕྱིར་མི་འོང་བར་དེ་ཉིད་དུ་ཡོངས་སུ་མྱ་ངན་ལས་འདའོ། །ཞེས་གནས་པར་མི་བྱའོ། །དགྲ་བཅོམ་པ་ཉིད་སྦྱིན་པའི་གནས་སོ། །ཞེས་གནས་པར་མི་བྱའོ། །དགྲ་
བཅོམ་པ་འདི་ཉིད་དུ་ཕུང་པོའི་ལྷག་མ་མ་ལུས་པར་མྱ་ངན་ལས་འདས་པའི་དབྱིངས་སུ་།ཡོངས་སུ་མྱ་ངན་ལས་འདའ་བར་འགྱུར་རོ། །ཞེས་གནས་པར་མི་བྱའོ། །རང་སངས་རྒྱས་སྦྱིན་པའི་
གནས་སོ། །ཞེས་གནས་པར་མི་བྱའོ། །རང་སངས་རྒྱས་ནི། ཉན་ཐོས་ཀྱི་ས་ལས་འདས་ནས་སངས་རྒྱས་ཀྱི་ས་མ་ཐོབ་པར་ཡོངས་སུ་མྱ་ངན་ལས་འདའ་བར་འགྱུར་རོ། །ཞེས་གནས་པར་
༄༅། །མི་བྱའོ། །སངས་རྒྱས་ནི། སྦྱིན་པའི་གནས་སོ། །ཞེས་གནས་པར་མི་བྱའོ། །སངས་རྒྱས་ནི། སོ་སོའི་སྐྱེ་བོའི་ས་ལས་འདས་པ་དང༌། ཉན་ཐོས་ཀྱི་ས་ལས་འདས་
པ་དང༌། རང་སངས་རྒྱས་ཀྱི་ས་ལས་འདས་ནས་གཞལ་དུ་མེད་གྲངས་མེད་པའི་སེམས་ཅན་རྣམས་ཀྱི་དོན་མཛད་དེ། གཞལ་དུ་མེད་གྲངས་མེད་པའི་སེམས་ཅན་བྱེ་བ་ཁྲག་ཁྲིག་བརྒྱ་
སྟོང་ཡོངས་སུ་མྱ་ངན་ལས་བཟླས། གཞལ་དུ་མེད་གྲངས་མེད་པའི་སེམས་ཅན་རྣམས་ཉན་ཐོས་དང༌། རང་སངས་རྒྱས་དང༌། ཡང་དག་པར་རྫོགས་པའི་སངས་རྒྱས་སུ་ངེས་པར་
མཛད་ཅིང་སངས་རྒྱས་ཀྱི་ས་ལ་བཞུགས་ཏེ་སངས་རྒྱས་ཀྱི་མཛད་པ་མཛད་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་སངས་རྒྱས་ཀྱི་ཡོངས་སུ་མྱ་ངན་ལས་འདའ་
པས་ཡོངས་སུ་མྱ་ངན་ལས་འདའ་བར་འགྱུར་རོ། །ཞེས་དེས་འདི་ལྟར་ཡང་གནས་པར་མི་བྱའོ། །དེ་ནས་ཡང་ཚེ་དང་ལྡན་པ་ཤཱ་རིའི་བུ་འདི་སྙམ་དུ་སེམས་ཏེ། གལ་ཏེ་སངས་རྒྱས་
ནི༑ སོ་སོའི་སྐྱེ་བོའི་ས་ལས་འདས་པ་དང༌། ཉན་ཐོས་ཀྱི་ས་ལས་འདས་པ་དང༌། རང་སངས་རྒྱས་ཀྱི་ས་ལས་འདས་ནས་གཞལ་དུ་མེད་གྲངས་མེད་པའི་སེམས་ཅན་རྣམས་ཀྱི་དོན་
མཛད་དེ། གཞལ་དུ་མེད་གྲངས་མེད་པའི་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་མྱ་ངན་ལས་བཟླས། གཞལ་དུ་མེད་གྲངས་མེད་པའི་སེམས་ཅན་རྣམས་ཉན་ཐོས་
དང༌། རང་སངས་རྒྱས་དང༌། ཡང་དག་པར་རྫོགས་པའི་སངས་རྒྱས་སུ་ངེས་པར་མཛད་ཅིང་སངས་རྒྱས་ཀྱི་ས་ལ་བཞུགས་ཏེ་སངས་རྒྱས་ཀྱི་མཛད་པ་མཛད་ནས་ཕུང་པོའི་ལྷག་མ་མེད་པའི་མྱ་ངན་
ལས་འདས་པའི་དབྱིངས་སུ་སངས་རྒྱས་ཀྱི་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་འགྱུར་རོ། །ཞེས་དེས་འདི་ལྟར་ཡང་གནས་པར་མི་བྱ་ན། དེས་ཡང་ཇི་ལྟར་འདི་ལ་
གནས་པར་བྱ། ཇི་ལྟར་བསླབ་པར་བྱ་སྙམ་པ་དང༌། དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུའི་སེམས་ཀྱི་རྟོག་པ་སེམས་ཀྱིས་ཤེས་ནས་ཚེ་
དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། དེ་ཇི་སྙམ་དུ་སེམས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཅི་ཞིག་
ལ་གནས། ཚེ་དང་ལྡན་པ་ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། ཅི་ལའང་གནས་པ་མ་ཡིན་
ནོ༑ ༑དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཐུགས་ནི། ཤིན་ཏུ་མི་གནས་པ་སྟེ། དེ་ནི། འདུས་བྱས་ཀྱི་ཁམས་ལའང་མི་གནས་
ལ༑ འདུས་མ་བྱས་ཀྱི་ཁམས་ལའང་མི་གནས་ཏེ། དེ་ལས་བཞེངས་པའང་མ་ཡིན་ནོ། །དེ་ནས་ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་
༄༅། །ལྡན་པ་ཤཱ་རིའི་བུ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟ་བུ་ཉིད་དུ་གནས་པར་བྱ་ཞིང་འདི་ལྟར་བསླབ་པར་བྱ་སྟེ། ཇི་ལྟར་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འགའ་ཞིག་ལ་གནས་པ་མ་ཡིན་ཞིང་མི་གནས་པའང་མ་ཡིན་ལ་མི་མཐུན་པར་གནས་པ་མ་ཡིན་ཞིང་
མི་མཐུན་པར་མི་གནས་པའང་མ་ཡིན་པ་དེ་བཞིན་དུ་གནས་པར་བྱའོ། །སྙམ་པ་དང༌། དེ་བཞིན་གཤེགས་པའི་གནས་པ་ཇི་ལྟ་བ་དེ་བཞིན་དུ་གནས་པར་བྱའོ། །སྙམ་ཞིང་དེ་
བཞིན་དུ་བསླབ་པར་བྱའོ། །སྙམ་པ་དང༌། དེ་བཞིན་གཤེགས་པའི་གནས་པ་ཇི་ལྟ་བ་དེ་བཞིན་དུ་གནས་ན། མི་གནས་པའི་ཚུལ་གྱིས་ལེགས་པར་གནས་པ་ཡིན་ནོ། །སྙམ་དུ་
འདིས་དེ་ལྟར་བསླབ་པར་བྱའོ། །འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་གནས་པར་བྱ་ཞིང་དེ་བཞིན་དུ་བསླབ་པར་བྱ་སྟེ། དེ་ལྟར་སློབ་པའི་བྱང་ཆུབ་སེམས་
དཔའ་སེམས་དཔའ་ཆེན་པོ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་འདིས་གནས་ཤིང་ཡིད་ལ་བྱེད་པ་འདི་དང་མ་བྲལ་བ་ཡིན་ནོ། །དེ་ནས་འཁོར་དེའི་ནང་ནས་ལྷའི་བུ་ཁ་ཅིག་
འདི་སྙམ་དུ་སེམས་པར་གྱུར་ཏེ། གནོད་སྦྱིན་རྣམས་ཀྱིས་གནོད་སྦྱིན་གྱི་སྐད་དང༌། གནོད་སྦྱིན་གྱི་སྒྲ་དང༌། གནོད་སྦྱིན་གྱི་ཚིག་དང༌། གནོད་སྦྱིན་གྱི་གཏམ་དུ་བྱས་པ་དང༌། གནོད་སྦྱིན་
གྱི་རབ་ཏུ་བརྗོད་པ་གང་ཡིན་པ་དེ་དག་སྨྲས་པ་ནི། ཤེས་པར་རུང་གི། གནས་བརྟན་རབ་འབྱོར་གང་འཆད་པ་དང༌། རབ་ཏུ་བརྗོད་པ་དང༌། སྟོན་པ་དང༌། ཉེ་བར་སྟོན་པ་འདི་ནི། ཤེས་པར་
ཡང་མི་རུང་ངོ༌། སྙམ་མོ། །དེ་ནས་ཚེ་དང་ལྡན་པ་རབ་འབྱོར་གྱིས་སངས་རྒྱས་ཀྱི་མཐུས་ལྷའི་བུ་དེ་དག་གི་སེམས་ཀྱི་རྟོག་པའི་ངོ་བོ་ཉིད་དེ་ལྟ་བུ་སེམས་ཀྱིས་ཡོངས་སུ་ཤེས་ནས་ལྷའི་
བུ་དེ་དག་ལ་སྨྲས་པ། ལྷའི་བུ་དག། ཤེས་པར་མི་རུང༌། ཤེས་པར་མི་རུང་ཞེས་བྱ་བ་དེ་ནི། འདི་ལྟར་འདི་ལ་ཅུང་ཟད་ཀྱང་སྨོས་པ་མེད་དེ། འདི་ལ་ཅུང་ཟད་ཀྱང་ཐོས་པ་མེད་དོ། །དེ་ནས་
ལྷའི་བུ་དེ་དག་ཡང་འདི་སྙམ་དུ་སེམས་པར་གྱུར་ཏེ། ཨེ་མའོ་འཕགས་པ་རབ་འབྱོར་འདིས་ནི། གསལ་བར་བྱེད་པར་འགྱུར་རོ། །ཨེ་མའོ་འཕགས་པ་རབ་འབྱོར་འདིས་ནི།
གསལ་བར་བྱེད་པར་འགྱུར་ཏེ། འཕགས་པ་རབ་འབྱོར་ནི། རིང་བ་བས་ཀྱང་ཆེས་རིང་དུ་འཇུག་པ། འཕགས་པ་རབ་འབྱོར་འདི་ནི། ཕྲ་བ་བས་ཀྱང་ཆེས་ཕྲ་བ། ཟབ་པ་བས་ཀྱང་
ཆེས་ཟབ་པར་འཇུག་པས་སྟོན་ཅིང་འཆད་དོ། །སྙམ་མོ། །དེ་ནས་ཡང་སངས་རྒྱས་ཀྱི་མཐུས་ཚེ་དང་ལྡན་པ་རབ་འབྱོར་གྱིས་ལྷའི་བུ་དེ་དག་གི་སེམས་ཀྱི་རྟོག་པ་སེམས་ཀྱིས་ཤེས་
ནས་ལྷའི་བུ་དེ་དག་ལ་འདི་སྐད་ཅེས་སྨྲས་སོ། །ལྷའི་བུ་དག །དེ་ལྟ་བས་ན། གང་རྒྱུན་དུ་ཞུགས་པའི་འབྲས་བུ་ཐོབ་པར་འདོད་པ་དང༌། རྒྱུན་དུ་ཞུགས་པའི་འབྲས་བུ་
༄༅། །ལ་གནས་པར་འདོད་པ་དེས་བཟོད་པ་འདི་ལ་མ་བརྟེན་པར་མི་འགྲུབ་བོ། །དེ་བཞིན་དུ་སྦྱར་ཏེ་གང་ལན་ཅིག་ཕྱིར་འོང་བའི་འབྲས་
བུ་ཐོབ་པར་འདོད་པ་དང༌། ལན་ཅིག་ཕྱིར་འོང་བའི་འབྲས་བུ་ལ་གནས་པར་འདོད་པ་དང༌། གང་ཕྱིར་མི་འོང་བའི་འབྲས་བུ་ཐོབ་པར་འདོད་པ་དང༌། ཕྱིར་མི་འོང་བའི་
འབྲས་བུ་ལ་གནས་པར་འདོད་པ་དང༌། གང་དགྲ་བཅོམ་པ་ཉིད་ཐོབ་པར་འདོད་པ་དང༌། དགྲ་བཅོམ་པ་ཉིད་ལ་གནས་པར་འདོད་པ་དང༌། གང་རང་བྱང་ཆུབ་ཐོབ་པར་འདོད་པ་དང༌།
རང་བྱང་ཆུབ་ལ་གནས་པར་འདོད་པ་དེས་བཟོད་པ་འདི་ལ་མ་བརྟེན་པར་མི་འགྲུབ་བོ། །གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་ཅིང་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ལ་གནས་པར་འདོད་པ་དེས་བཟོད་པ་འདི་ལ་མ་བརྟེན་པར་མི་འགྲུབ་བོ། །དེ་ནས་ཡང་ལྷའི་བུ་དེ་དག་འདི་སྙམ་དུ་སེམས་ཏེ། འཕགས་པ་རབ་འབྱོར་
འདི་ལ་ཆོས་ཉན་པ་རང་བཞིན་ཇི་ལྟ་བུ་ཞིག་བཙལ་བར་བྱ་སྙམ་པ་དང༌། དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་རབ་འབྱོར་གྱིས་ལྷའི་བུ་དེ་དག་གི་སེམས་ཀྱི་རྟོག་པ་སེམས་
ཀྱིས་ཤེས་ནས་ལྷའི་བུ་དེ་དག་ལ་སྨྲས་པ། ལྷའི་བུ་དག །ཁོ་བོ་ལ་ཆོས་ཉན་པ་ནི། སྒྱུ་མ་དང༌། སྤྲུལ་པ་ལྟ་བུ་དག་བཙལ་བར་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ནི། ཉན་
པར་མི་འགྱུར། མངོན་དུ་བྱེད་པར་མི་འགྱུར་རོ། །དེ་ནས་ལྷའི་བུ་དེ་དག་གིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་རབ་འབྱོར། ཡང་ཅི་སེམས་ཅན་དེ་དག་སྒྱུ་མ་ལྟ་
བུ་ཡིན་གྱི། དེ་དག་སྒྱུ་མ་ནི། མ་ཡིན་ནམ། དེ་སྐད་ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ལྷའི་བུ་དེ་དག་ལ་འདི་སྐད་ཅེས་སྨྲས་སོ། །ལྷའི་བུ་དག །སེམས་ཅན་དེ་དག་ནི། སྒྱུ་མ་ལྟ་
བུ༑ ལྷའི་བུ་དག། སེམས་ཅན་དེ་དག་ནི། རྨི་ལམ་ལྟ་བུ་སྟེ། ལྷའི་བུ་དག། དེ་ལྟར་ན། སྒྱུ་མ་དང༌། སེམས་ཅན་དག་ནི། གཉིས་སུ་མེད་དེ། གཉིས་སུ་བྱར་མེད་དོ། །དེ་ལྟར་ན། རྨི་ལམ་དང༌།
སེམས་ཅན་དག་ནི། གཉིས་སུ་མེད་དེ། གཉིས་སུ་བྱར་མེད་དོ། །ལྷའི་བུ་དག། ཆོས་ཐམས་ཅད་ཀྱང་སྒྱུ་མ་ལྟ་བུ། རྨི་ལམ་ལྟ་བུའོ། །རྒྱུན་དུ་ཞུགས་པའང་སྒྱུ་མ་ལྟ་བུ། རྨི་ལམ་ལྟ་བུའོ། །
རྒྱུན་དུ་ཞུགས་པའི་འབྲས་བུའང་སྒྱུ་མ་ལྟ་བུ། རྨི་ལམ་ལྟ་བུའོ། །དེ་བཞིན་དུ་ལན་ཅིག་ཕྱིར་འོང་བ་དང༌། ལན་ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བ་དང༌། ཕྱིར་མི་འོང་
བའི་འབྲས་བུ་དང༌། དགྲ་བཅོམ་པའང་སྒྱུ་མ་ལྟ་བུ། རྨི་ལམ་ལྟ་བུའོ། །དགྲ་བཅོམ་པ་ཉིད་ཀྱང་སྒྱུ་མ་ལྟ་བུ། རྨི་ལམ་ལྟ་བུའོ། །རང་སངས་རྒྱས་ཀྱང་སྒྱུ་མ་ལྟ་བུ། རྨི་ལམ་ལྟ་བུའོ། །རང་
སངས་རྒྱས་ཀྱང་སྒྱུ་མ་ལྟ་བུ། རྨི་ལམ་ལྟ་བུའོ། །ཡང་དག་པར་རྫོགས་པའི་སངས་རྒྱས་ཀྱང་སྒྱུ་མ་ལྟ་བུ། རྨི་ལམ་ལྟ་བུའོ། །ཡང་དག་པར་རྫོགས་པའི་སངས་རྒྱས་ཉིད་ཀྱང་སྒྱུ་མ་ལྟ་བུ་
༄༅། །བུ༑ རྨི་ལམ་ལྟ་བུའོ། །དེ་ནས་ལྷའི་བུ་དེ་དག་གིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་རབ་འབྱོར། ཡང་དག་པར་རྫོགས་པའི་སངས་
རྒྱས་ཀྱང་སྒྱུ་མ་ལྟ་བུ། རྨི་ལམ་ལྟ་བུའོ། །ཞེས་ཟེར་རམ། །ཡང་དག་པར་རྫོགས་པའི་སངས་རྒྱས་ཉིད་ཀྱང་སྒྱུ་མ་ལྟ་བུ། རྨི་ལམ་ལྟ་བུའོ། །ཞེས་ཟེར་རམ། རབ་འབྱོར་གྱིས་སྨྲས་པ།
ལྷའི་བུ་དག །མྱ་ངན་ལས་འདས་པའང་སྒྱུ་མ་ལྟ་བུ། རྨི་ལམ་ལྟ་བུར་སྨྲ་ན། ཆོས་གཞན་ལྟ་ཅི་སྨོས། ལྷའི་བུ་དེ་དག་གིས་སྨྲས་པ། འཕགས་པ་རབ་འབྱོར། མྱ་ངན་ལས་འདས་
པའང་སྒྱུ་མ་ལྟ་བུ། རྨི་ལམ་ལྟ་བུའོ། །ཞེས་ཟེར་རམ། ཚེ་དང་ལྡན་པ་རབ་འབྱོར་གྱིས་སྨྲས་པ། ལྷའི་བུ་དག། བདག་ནི། གལ་ཏེ་མྱ་ངན་ལས་འདས་པ་ལས་ཁྱད་པར་དུ་འཕགས་
པའི་ཆོས་གཞན་ཞིག་ཡོད་ཀྱང་དེའང་སྒྱུ་མ་ལྟ་བུ། རྨི་ལམ་ལྟ་བུའོ། །ཞེས་སྨྲའོ། །ལྷའི་བུ་དག །དེ་ལྟར་ན། སྒྱུ་མ་དང༌། མྱ་ངན་ལས་འདས་པ་འདི་ནི། གཉིས་སུ་མེད་དེ།
གཉིས་སུ་བྱར་མེད་དོ། །དེ་ལྟར་ན། རྨི་ལམ་དང༌། མྱ་ངན་ལས་འདས་པ་འདི་ནི། གཉིས་སུ་མེད་དེ། གཉིས་སུ་བྱར་མེད་དོ། །དེ་ནས་ཚེ་དང་ལྡན་པ་ཤཱ་རིའི་བུ་དང༌། ཚེ་དང་ལྡན་པ་
གང་པོ་བྱམས་མའི་བུ་དང༌། ཚེ་དང་ལྡན་པ་ལྟོ་རིང་ཆེན་པོ་དང༌། ཚེ་དང་ལྡན་པ་ཀ་ཏྱཱ་ཡ་ན་ཆེན་པོ་དང༌། ཚེ་དང་ལྡན་པ་འོད་སྲུང་ཆེན་པོ་དང༌། ཉན་ཐོས་ཆེན་པོ་གཞན་དག་གིས་
བྱང་ཆུབ་སེམས་དཔའ་སྟོང་ཕྲག་དུ་མ་དང་ཐབས་ཅིག་ཏུ་ཚེ་དང་ལྡན་པ་གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལྟར་
བསྟན་པ་འདི་ལ་སུ་དག་ཡང་དག་པར་འཛིན་པར་འགྱུར། དེ་ནས་ཚེ་དང་ལྡན་པ་ཀུན་དགའ་བོས་གནས་བརྟན་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག །ཕྱིར་མི་ལྡོག་པའི་བྱང་
ཆུབ་སེམས་དཔའ་སེམས་དཔའ་ཆེན་པོ་རྣམས་སམ། ལྟ་བ་ཕུན་སུམ་ཚོགས་པའི་གང་ཟག་རྣམས་སམ། དགྲ་བཅོམ་པ་ཟག་པ་ཟད་པ་གང་ཡིན་པ་དེ་དག་ཤེས་རབ་ཀྱི་ཕ་རོལ་ཏུ་ཕྱིན་
པ་འདི་ལྟར་བསྟན་པ་འདི་ལ་ཡང་དག་པར་འཛིན་པར་འགྱུར་རོ། །དེ་ནས་ཚེ་དང་ལྡན་པ་རབ་འབྱོར་གྱིས་གནས་བརྟན་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག། ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ལྟར་བཤད་པ་འདི་ལ་ཡང་དག་པར་འཛིན་པ་སུའང་མི་འབྱུང་ངོ༌། །དེ་ཅིའི་ཕྱིར་ཞེ་ན། འདི་ལྟར་འདི་ལ་ཆོས་གང་ཡང་མ་སྨོས། ཆོས་གང་ཡང་ཡོངས་སུ་སྣང་
བར་མ་བྱས། ཆོས་གང་ཡང་མ་བཞག་གོ །དེ་བས་ན། ཇི་ལྟར་འདི་ལ་ཆོས་གང་ཡང་མ་སྨོས། ཆོས་གང་ཡང་ཡོངས་སུ་སྣང་བར་མ་བྱས། ཆོས་གང་ཡང་མ་བཞག་པ་དེ་བཞིན་དུ་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལྟར་བསྟན་པ་འདི་ལ་ཡང་དག་པར་འཛིན་པ་གང་ཡང་མི་འབྱུང་ངོ༌། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། འཕགས་པ་
༄༅། །རབ་འབྱོར་གྱིས་དེ་ལྟར་ཆོས་ཀྱི་རྣམ་གྲངས་འདི་བསྟན་པ་ལ་བདག་གིས་ཀྱང་མཆོད་པའི་དོན་དུ་འདི་ལྟར་མེ་ཏོག་དག་མངོན་པར་སྤྲུལ་ཏེ་འཕགས་པ་རབ་
འབྱོར་ལ་མངོན་པར་གཏོར་ཏོ། །སྙམ་མོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་དེའི་ཚེ་མེ་ཏོག་དག་མངོན་པར་སྤྲུལ་ནས་ཚེ་དང་ལྡན་པ་རབ་འབྱོར་ལ་མངོན་པར་གཏོར་ཏོ། །
དེ་ནས་གནས་བརྟན་ཚེ་དང་ལྡན་པ་རབ་འབྱོར་ལྷ་རྣམས་ཀྱི་དབང་པོ་བརྒྱ་བྱིན་ལ་རྗེས་སུ་བརྗོད་པའི་ཕྱིར་འདི་སྙམ་དུ་སེམས་ཏེ། ཡང་འདི་ལྟར་ལྷ་རྣམས་ཀྱི་དབང་པོ་བརྒྱ་བྱིན་
གྱིས་མངོན་པར་གཏོར་བའི་མེ་ཏོག་འདི་དག་ནི། བདག་གིས་སྔོན་ཆད་སུམ་ཅུ་རྩ་གསུམ་གྱི་ལྷའི་གནས་ནའང་ཡོད་པར་མ་མཐོང་སྟེ། མེ་ཏོག་འདི་དག་ནི། སྤྲུལ་པའོ། །འདི་ལྟར་
ལྷ་རྣམས་ཀྱི་དབང་པོས་མངོན་པར་གཏོར་བའི་མེ་ཏོག་འདི་དག་ནི། ཤིང་དང༌། གེལ་པ་དང༌། འཁྲི་ཤིང་ལས་སྐྱེས་པ་མ་ཡིན་གྱི། ཡིད་ལས་བྱུང་བའི་མེ་ཏོག་གོ། སྙམ་པ་དང༌།
དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཚེ་དང་ལྡན་པ་རབ་འབྱོར་གྱི་སེམས་ཀྱི་རྟོག་པ་སེམས་ཀྱིས་ཤེས་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་
རབ་འབྱོར། མེ་ཏོག་འདི་དག་ནི། མ་སྐྱེས་པའོ། །དེ་ཅིའི་ཕྱིར་ཞེ་ན། ཡིད་ལས་སྐྱེས་པའི་མེ་ཏོག་ནི། གང་ཡང་མེད་དེ། ཤིང་དང༌། གེལ་པ་དང༌། འཁྲི་ཤིང་ལས་སྐྱེས་པའང་མ་
ཡིན་ནོ༑ ༑དེ་ནས་ཚེ་དང་ལྡན་པ་རབ་འབྱོར་གྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ། གང་ཁྱོད་འདི་སྐད་དུ། མེ་ཏོག་འདི་དག་ནི། མ་སྐྱེས་པ་སྟེ། མེ་ཏོག་འདི་
དག་ནི༑ ཡིད་ལས་སྐྱེས་པ་མ་ཡིན་གྱི། ཤིང་དང༌། གེལ་པ་དང༌། འཁྲི་ཤིང་ལས་སྐྱེས་པའང་མ་ཡིན་ནོ། །ཞེས་ཟེར་ན། ཀཽ་ཤི་ཀ། གང་མ་སྐྱེས་པ་དེ་ནི། མེ་ཏོག་མ་ཡིན་ནོ། །དེ་ནས་ལྷ་རྣམས་
ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། ཨེ་མའོ་འཕགས་པ་རབ་འབྱོར་ནི། ཤེས་རབ་ཟབ་སྟེ། མིང་དང༌། ཚིག་ཏུ་བཏགས་པ་དེའང་སྟོན་ལ། དེ་དང་འགལ་བར་ཡང་མི་བྱེད། དེ་
ཉིད་ཀྱང་གསལ་བར་བྱེད་ཅིང་དེ་ཉིད་ཀྱང་ཉེ་བར་སྟོན་ཏོ། །སྙམ་མོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་རབ་
འབྱོར༑ དེ་དེ་བཞིན་ནོ། །དེ་དེ་བཞིན་ཏེ། འཕགས་པ་རབ་འབྱོར། ཇི་སྐད་དུ་ཉེ་བར་སྟོན་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་འདི་ལ་བསླབ་པར་བྱའོ། །
དེ་སྐད་ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ། དེ་དེ་བཞིན་ནོ། དེ་དེ་བཞིན་ཏེ། དེ་ལྟར་བྱང་ཆུབ་སེམས་
དཔའ་སེམས་དཔའ་ཆེན་པོས་འདི་ལ་བསླབ་པར་བྱའོ། །ཀཽ་ཤི་ཀ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། རྒྱུན་དུ་ཞུགས་པའི་འབྲས་བུ་ལ་མི་སློབ་བོ། །ལན་ཅིག་
༄༅། །ཕྱིར་འོང་བའི་འབྲས་བུ་ལ་མི་སློབ། ཕྱིར་མི་འོང་བའི་འབྲས་བུ་ལ་མི་སློབ། དགྲ་བཅོམ་པ་ཉིད་ལ་མི་སློབ་བོ། །རང་སངས་རྒྱས་ཉིད་ལ་མི་སློབ། སངས་རྒྱས་
ཉིད་ལ་མི་སློབ་སྟེ། གང་ས་འདི་དག་ལ་མི་སློབ་པ་དེ་ནི། སངས་རྒྱས་ཉིད་དང༌། ཐམས་ཅད་མཁྱེན་པ་ཉིད་ལ་སློབ་བོ། །གང་སངས་རྒྱས་ཉིད་དང༌། ཐམས་ཅད་མཁྱེན་པ་ཉིད་ལ་སློབ་
པ་དེ་ནི༑ སངས་རྒྱས་ཀྱི་ཆོས་གཞལ་དུ་མེད་གྲངས་མེད་པ་ལ་སློབ་བོ། །གང་སངས་རྒྱས་ཀྱི་ཆོས་གཞལ་དུ་མེད་གྲངས་མེད་པ་ལ་སློབ་པ་དེ་ནི། གཟུགས་འཕེལ་བར་བྱ་བ་དང༌། འགྲིབ་
པར་བྱ་བའི་ཕྱིར་མི་སློབ་བོ། །དེ་བཞིན་དུ་དེ་ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་ལ་མ་ཡིན། དེ་རྣམ་པར་ཤེས་པ་འཕེལ་བར་བྱ་བ་དང༌། འགྲིབ་པར་བྱ་བའི་
ཕྱིར་མི་སློབ་བོ། །གང་གཟུགས་འཕེལ་བར་བྱ་བ་དང༌། འགྲིབ་པར་བྱ་བའི་ཕྱིར་མི་སློབ་པ་དང༌། གང་ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་ལ་མ་ཡིན།
གང་རྣམ་པར་ཤེས་པ་འཕེལ་བར་བྱ་བ་དང༌། འགྲིབ་པར་བྱ་བའི་ཕྱིར་མི་སློབ་པ་དེ་ནི། གཟུགས་ཡོངས་སུ་གཟུང་བ་དང༌། དོར་བར་བྱ་བའི་ཕྱིར་མི་སློབ་བོ། །དེ་བཞིན་དུ་དེ་
ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་ལ་མ་ཡིན། དེ་རྣམ་པར་ཤེས་པ་ཡོངས་སུ་གཟུང་བ་དང༌། དོར་བར་བྱ་བའི་ཕྱིར་མི་སློབ་བོ། །ཆོས་འགའ་ཞིག་
ཡོངས་སུ་གཟུང་བའི་ཕྱིར་ཡང་མི་སློབ་སྟེ། སྐྱེ་བའི་ཕྱིར་མི་སློབ། ནུབ་པའི་ཕྱིར་མི་སློབ་བོ། །གང་ཆོས་འགའ་ཞིག་ཡོངས་སུ་གཟུང་བའི་ཕྱིར་མི་སློབ་ཅིང་སྐྱེ་བའི་ཕྱིར་མི་སློབ། ནུབ་པའི་
ཕྱིར་མི་སློབ་པ་དེ་ནི། ཐམས་ཅད་མཁྱེན་པ་ཉིད་ཀྱང་ཡོངས་སུ་གཟུང་བའི་ཕྱིར་མི་སློབ་ཅིང་སྐྱེ་བའི་ཕྱིར་མི་སློབ། ནུབ་པའི་ཕྱིར་མི་སློབ་སྟེ། དེ་ལྟར་སློབ་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་ནི། ཐམས་ཅད་མཁྱེན་པ་ཉིད་ལ་སློབ་ཅིང་ཐམས་ཅད་མཁྱེན་པ་ཉིད་ལ་ངེས་པར་འབྱུང་བར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་
སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་འགའ་ཞིག་ཡོངས་སུ་གཟུང་བའི་ཕྱིར་མི་སློབ་ཅིང་སྐྱེ་བའི་ཕྱིར་མི་སློབ། ནུབ་པའི་
ཕྱིར་མི་སློབ་པ་དེ་ནི། ཐམས་ཅད་མཁྱེན་པ་ཉིད་ཀྱང་ཡོངས་སུ་གཟུང་བའི་ཕྱིར་མི་སློབ་ཅིང་སྐྱེ་བའི་ཕྱིར་མི་སློབ། ནུབ་པའི་ཕྱིར་མི་སློབ་ན། ཚེ་དང་ལྡན་པ་རབ་འབྱོར། དེ་ལྟར་སློབ་པའི་བྱང་
ཆུབ་སེམས་དཔའ་སེམས་དཔའ་ཆེན་པོ་ནི། ཐམས་ཅད་མཁྱེན་པ་ཉིད་ལ་སློབ་ཅིང་ཐམས་ཅད་མཁྱེན་པ་ཉིད་ལ་ངེས་པར་འབྱུང་བར་འགྱུར་རམ། ཚེ་དང་ལྡན་པ་རབ་འབྱོར་གྱིས་སྨྲས་པ།
ཚེ་དང་ལྡན་པ་ཤཱ་རིའི་བུ། དེ་དེ་བཞིན་ནོ། དེ་དེ་བཞིན་ཏེ། ཚེ་དང་ལྡན་པ་ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་འགའ་ཞིག་ཡོངས་སུ་གཟུང་བའི་ཕྱིར་མི་
༄༅། །སློབ་ཅིང་སྐྱེ་བའི་ཕྱིར་མི་སློབ། ནུབ་པའི་ཕྱིར་མི་སློབ་པ་དེ་ནི། ཐམས་ཅད་མཁྱེན་པ་ཉིད་ཀྱང་ཡོངས་སུ་གཟུང་བའི་ཕྱིར་མི་སློབ་ཅིང་སྐྱེ་བའི་ཕྱིར་མི་སློབ། ནུབ་
པའི་ཕྱིར་མི་སློབ་ན། སངས་རྒྱས་ཀྱི་ཆོས་རྣམས་ཀྱང་ཡོངས་སུ་གཟུང་བའི་ཕྱིར་མི་སློབ་ཅིང་སྐྱེ་བའི་ཕྱིར་མི་སློབ། ནུབ་པའི་ཕྱིར་མི་སློབ་སྟེ། ཚེ་དང་ལྡན་པ་ཤཱ་རིའི་བུ། དེ་ལྟར་སློབ་པའི་
བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཐམས་ཅད་མཁྱེན་པ་ཉིད་ལ་སློབ་ཅིང་ཐམས་ཅད་མཁྱེན་པ་ཉིད་ལ་ངེས་པར་འབྱུང་བར་འགྱུར་རོ། །དེ་ནས་ལྷ་རྣམས་ཀྱི་དབང་པོ་
བརྒྱ་བྱིན་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །འཕགས་པ་ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་གང་ལས་
བཙལ་བར་བྱ། ཤཱ་རིའི་བུས་སྨྲས་པ། ཀཽ་ཤི་ཀ། བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཚེ་དང་ལྡན་པ་རབ་འབྱོར་གྱི་ལེའུ་ལས་བཙལ་
བར་བྱའོ། །དེ་སྐད་ཅེས་སྨྲས་པ་དང༌། ལྷ་རྣམས་ཀྱི་དབང་པོ་བརྒྱ་བྱིན་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །འཕགས་པ་ཤཱ་རིའི་བུ། འདི་ལྟར་འཕགས་པ་རབ་
འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འཆད་པ་གང་ཡིན་པ་འདི་སུའི་མཐུར་རིག་པར་བྱ། འདི་སུའི་བྱིན་གྱི་རླབས་སུ་རིག་པར་བྱ། ཚེ་དང་ལྡན་པ་ཤཱ་རིའི་བུས་སྨྲས་པ། ཀཽ་ཤི་ཀ།
ཚེ་དང་ལྡན་པ་རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འཆད་པ་གང་ཡིན་པ་འདི་ནི། དེ་བཞིན་གཤེགས་པའི་མཐུར་རིག་པར་བྱ། འདི་ནི། དེ་བཞིན་གཤེགས་པའི་བྱིན་གྱི་རླབས་སུ་
རིག་པར་བྱའོ། །དེ་ནས་ཚེ་དང་ལྡན་པ་རབ་འབྱོར་གྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ། གང་འདི་སྐད་དུ་འཕགས་པ་རབ་འབྱོར་གང་ཤེས་རབ་ཀྱི་ཕ་
རོལ་ཏུ་ཕྱིན་པ་འཆད་པ་གང་ཡིན་པ་འདི་སུའི་མཐུར་རིག་པར་བྱ། འདི་སུའི་བྱིན་གྱི་རླབས་སུ་རིག་པར་བྱ་ཞེས་ཟེར་བ་ནི། ཀཽ་ཤི་ཀ། བདག་ཤེས་རབ་ཀྱི་ཕ་རོལ་ཏུ་ཕྱིན་པ་འཆད་པ་གང་
ཡིན་པ་འདི་ནི། དེ་བཞིན་གཤེགས་པའི་མཐུར་རིག་པར་བྱའོ། །འདི་ནི། དེ་བཞིན་གཤེགས་པའི་བྱིན་གྱི་རླབས་སུ་རིག་པར་བྱའོ། །ཀཽ་ཤི་ཀ། གང་ཡང་འདི་སྐད་དུ་བྱང་ཆུབ་སེམས་
དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་གང་ལས་བཙལ་བར་བྱ་ཞེས་ཟེར་བ་ནི། །ཀཽ་ཤི་ཀ། བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་
པ་གཟུགས་ལས་བཙལ་བར་མི་བྱ། གཟུགས་ལས་གཞན་དུའང་བཙལ་བར་མི་བྱའོ། །དེ་བཞིན་དུ་ཚོར་བ་ལས་མ་ཡིན། འདུ་ཤེས་ལས་མ་ཡིན། འདུ་བྱེད་རྣམས་ལས་མ་ཡིན། རྣམ་
པར་ཤེས་པ་ལས་བཙལ་བར་མི་བྱ། རྣམ་པར་ཤེས་པ་ལས་གཞན་དུ་ཡང་བཙལ་བར་མི་བྱའོ། །དེ་ཅིའི་ཕྱིར་ཞེ་ན། ཀཽ་ཤི་ཀ། འདི་ལྟར་གཟུགས་ནི། ཤེས་རབ་ཀྱི་ཕ་རོལ་ཏུ་ཕྱིན་པ་མ་
༄༅། །ཡིན༑ གཟུགས་ལས་གཞན་ན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་མེད་དོ། །དེ་བཞིན་དུ་ཚོར་བ་མ་ཡིན། འདུ་ཤེས་མ་ཡིན། འདུ་བྱེད་རྣམས་མ་ཡིན། རྣམ་པར་
ཤེས་པ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན། རྣམ་པར་ཤེས་པ་ལས་གཞན་ནའང་ཤེས་རབ་ཀྱི་ཕ་རོལ་ཏུ་ཕྱིན་པ་མེད་དོ། །དེ་སྐད་ཅེས་སྨྲས་པ་དང༌། ལྷ་རྣམས་ཀྱི་དབང་པོ་བརྒྱ་བྱིན་
གྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་རབ་འབྱོར། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཕ་རོལ་ཏུ་ཕྱིན་པ་ཆེན་པོའོ། །འཕགས་པ་རབ་
འབྱོར༑ འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་མ་མེད་པའི་ཕ་རོལ་ཏུ་ཕྱིན་པའོ། །འཕགས་པ་རབ་འབྱོར། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་
མེད་པའི་ཕ་རོལ་ཏུ་ཕྱིན་པའོ། །འཕགས་པ་རབ་འབྱོར། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཐའ་ཡས་པའི་ཕ་རོལ་ཏུ་ཕྱིན་པའོ། །གནས་བརྟན་རབ་འབྱོར་གྱིས་
སྨྲས་པ༑ དེ་དེ་བཞིན་ནོ། །ཀཽ་ཤི་ཀ། དེ་དེ་བཞིན་ཏེ། ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཕ་རོལ་ཏུ་ཕྱིན་པ་ཆེན་པོའོ། །ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་
རོལ་ཏུ་ཕྱིན་པ་འདི་ནི། ཚད་མ་མེད་པའི་ཕ་རོལ་ཏུ་ཕྱིན་པའོ། །ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་མེད་པའི་ཕ་རོལ་ཏུ་ཕྱིན་པའོ། །ཀཽ་ཤི་ཀ། འདི་ལྟ་སྟེ།
ཤས་[*SHES?] རབ་ཀྱི་ཕ་རོལ་ཏུ་ཕྱིན་པ་འདི་ནི། མཐའ་ཡས་པའི་ཕ་རོལ་ཏུ་ཕྱིན་པའོ། །དེ་ཅིའི་ཕྱིར་ཞེ་ན། གཟུགས་ཆེ་བའི་ཕྱིར་ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཕ་རོལ་ཏུ་
ཕྱིན་པ་ཆེན་པོའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ཆེ་བའི་ཕྱིར་ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཕ་རོལ་ཏུ་ཕྱིན་
པ་ཆེན་པོའོ། །གཟུགས་ཚད་མ་མེད་པའི་ཕྱིར་ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་མ་མེད་པའི་ཕ་རོལ་ཏུ་ཕྱིན་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌།
འདུ་བྱེད་རྣམས་དང༌། རྣམ་པར་ཤེས་པ་ཚད་མ་མེད་པའི་ཕྱིར་ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་མ་མེད་པའི་ཕ་རོལ་ཏུ་ཕྱིན་པའོ། །གཟུགས་ཚད་མེད་པའི་
ཕྱིར་ཀཽ་ཤི་ཀ །འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་མེད་པའི་ཕ་རོལ་ཏུ་ཕྱིན་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་
ཚད་མེད་པའི་ཕྱིར་ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་མེད་པའི་ཕ་རོལ་ཏུ་ཕྱིན་པའོ། །གཟུགས་མཐའ་ཡས་པའི་ཕྱིར་ཀཽ་ཤི་ཀ །འདི་ལྟ་སྟེ། ཤེས་རབ་ཀྱི་ཕ་
རོལ་ཏུ་ཕྱིན་པ་འདི་ནི། མཐའ་ཡས་པའི་ཕ་རོལ་ཏུ་ཕྱིན་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་མཐའ་ཡས་པའི་ཕྱིར་ཀཽ་ཤི་ཀ། འདི་
༄༅། །ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཐའ་ཡས་པའི་ཕ་རོལ་ཏུ་ཕྱིན་པའོ། །ཀཽ་ཤི་ཀ། དེ་བཞིན་དུ་ཕ་རོལ་ཏུ་ཕྱིན་པ་ཆེན་པོ་ཞེས་བྱ་བར་མངོན་པར་
ཆགས་པར་མི་།བྱེད་དོ། དེ་བཞིན་དུ་ཚད་མ་མེད་པའི་ཕ་རོལ་ཏུ་ཕྱིན་པ་ཞེས་བྱ་བ་དང༌། དེ་བཞིན་དུ་ཚད་མེད་པའི་ཕ་རོལ་ཏུ་ཕྱིན་པ་ཞེས་བྱ་བ་དང༌། དེ་བཞིན་དུ་མཐའ་ཡས་པའི་
ཕ་རོལ་ཏུ་ཕྱིན་པའོ། །ཞེས་བྱ་བར་མངོན་པར་ཆགས་པར་མི་བྱེད་དོ། །ཀཽ་ཤི་ཀ། དེ་ལྟ་བས་ན། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཕ་རོལ་ཏུ་ཕྱིན་པ་ཆེན་པོའོ། །འདི་ནི་
ཚད་མ་མེད་པའི་ཕ་རོལ་ཏུ་ཕྱིན་པའོ། །འདི་ནི། ཚད་མེད་པའི་ཕ་རོལ་ཏུ་ཕྱིན་པའོ། །ཀཽ་ཤི་ཀ། འདི་ནི། མཐའ་ཡས་པའི་ཕ་རོལ་ཏུ་ཕྱིན་པའོ། །ཀཽ་ཤི་ཀ། དམིགས་པ་མཐའ་ཡས་པའི་
ཕྱིར་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཐའ་ཡས་པའི་ཕ་རོལ་ཏུ་ཕྱིན་པའོ། །ཀཽ་ཤི་ཀ། སེམས་ཅན་མཐའ་ཡས་པའི་ཕྱིར་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་
འདི་ནི༑ མཐའ་ཡས་པའི་ཕ་རོལ་ཏུ་ཕྱིན་པའོ། །ཀཽ་ཤི་ཀ། ཡང་ཇི་ལྟར་ན། དམིགས་པ་མཐའ་ཡས་པའི་ཕྱིར་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཐའ་ཡས་པའི་
ཕ་རོལ་ཏུ་ཕྱིན་པ་ཡིན་ཞེ་ན། ཀཽ་ཤི་ཀ། འདི་ལྟར་ཆོས་ཐམས་ཅད་ཀྱི་ཐོག་མ་དང༌། དབུས་དང༌། ཐ་མ་མི་དམིགས་ཏེ། དེ་བས་ན། ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་
ཕྱིན་པ་འདི་ནི། མཐའ་ཡས་པའི་ཕ་རོལ་ཏུ་ཕྱིན་པ་སྟེ། ཀཽ་ཤི་ཀ། རྣམ་གྲངས་འདིས་དམིགས་པ་མཐའ་ཡས་པའི་ཕྱིར་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཐའ་
ཡས་པའི་ཕ་རོལ་ཏུ་ཕྱིན་པའོ། །ཀཽ་ཤི་ཀ། གཞན་ཡང་གང་གི་ཕྱིར་འདི་ལྟར་ཆོས་ཐམས་ཅད་མཐའ་ཡས་མུ་མེད་དེ། དེ་རྣམས་ཀྱི་ཐོག་མའམ། དབུས་སམ། ཐ་མའང་མི་དམིགས་
ཏེ༑ དེ་བས་ན། ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཐའ་ཡས་པའི་ཕ་རོལ་ཏུ་ཕྱིན་པའོ། །དེ་ཅིའི་ཕྱིར་ཞེ་ན། ཀཽ་ཤི་ཀ །གཟུགས་ཀྱི་ཐོག་མའམ། དབུས་
སམ༑ ཐ་མའང་མི་དམིགས་སོ། །ཀཽ་ཤི་ཀ །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའི་ཐོག་མའམ། དབུས་སམ། ཐ་མའང་མི་དམིགས་
ཏེ༑ ཀཽ་ཤི་ཀ། རྣམ་གྲངས་འདིས་ཀྱང་དམིགས་པ་མཐའ་ཡས་པའི་ཕྱིར་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཐའ་ཡས་པའི་ཕ་རོལ་ཏུ་ཕྱིན་པའོ། །ཀཽ་ཤི་ཀ། གཞན་
ཡང་སེམས་ཅན་མཐའ་ཡས་མུ་མེད་དོ། །དེ་ཅིའི་ཕྱིར་ཞེ་ན། སེམས་ཅན་ལ་ཐོག་མའམ། དབུས་སམ། ཐ་མའང་མི་དམིགས་སོ། །ཀཽ་ཤི་ཀ། དེ་བས་ན། སེམས་ཅན་མཐའ་ཡས་
པའི་ཕྱིར་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཐའ་ཡས་པའི་ཕ་རོལ་ཏུ་ཕྱིན་པའོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཚེ་དང་ལྡན་པ་རབ་འབྱོར་ལ་འདི་སྐད་
༄༅། །ཅེས་སྨྲས་སོ། །འཕགས་པ་རབ་འབྱོར། ཇི་ལྟར་ན། སེམས་ཅན་མཐའ་ཡས་པའི་ཕྱིར་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཐའ་ཡས་པའི་ཕ་
རོལ་ཏུ་ཕྱིན་པ་ཡིན། གནས་བརྟན་རབ་འབྱོར་གྱིས་སྨྲས་པ། ཀཽ་ཤི་ཀ །བགྲང་བ་དང་མི་ལྡན་པའམ། བགྲང་བ་མེད་པས་སེམས་ཅན་མཐའ་ཡས་པའི་ཕྱིར་འདི་ལྟ་སྟེ། ཤེས་
རབ་ཀྱི་ཕ་རོལ་ཏུ་ཕྱིན་པ་འདི་མཐའ་ཡས་པའི་ཕ་རོལ་ཏུ་ཕྱིན་པ་ཡིན་ནོ། །བརྒྱ་བྱིན་གྱིས་སྨྲས་པ། འཕགས་པ་རབ་འབྱོར། འོ་ན་ཇི་ལྟར་སེམས་ཅན་མཐའ་ཡས་པའི་ཕྱིར་འདི་ལྟ་
སྟེ༑ ཤེས་རབ་ཀྱི་ཕ་རོལ་ཏུ་ཕྱིན་པ་འདི་མཐའ་ཡས་པའི་ཕ་རོལ་ཏུ་ཕྱིན་པ་ཞེས་བྱ། གནས་བརྟན་རབ་འབྱོར་གྱིས་སྨྲས་པ། ཀཽ་ཤི་ཀ། འདི་ཇི་སྙམ་དུ་སེམས། འདི་ལྟ་སྟེ། སེམས་
ཅན་སེམས་ཅན་ཞེས་བྱ་བ་འདི་ཆོས་གང་གི་ཚིག་བླ་དྭགས་ཡིན། བརྒྱ་བྱིན་གྱིས་སྨྲས་པ། འཕགས་པ་རབ་འབྱོར། འདི་ལྟ་སྟེ། སེམས་ཅན་སེམས་ཅན་ཞེས་བྱ་བ་འདི་ནི་
ཆོས་ཀྱི་ཚིག་བླ་དྭགས་ཀྱང་མ་ཡིན། ཆོས་མེད་པའི་ཚིག་བླ་དྭགས་ཀྱང་མ་ཡིན་ཏེ། མིང་དུ་བཏགས་པ་འདི་ནི། གློ་བུར་དུ་བྱུང་བའོ། །མིང་དུ་བཏགས་པ་འདི་ནི། དངོས་པོ་མེད་
པའོ༑ ༑མིང་དུ་བཏགས་པ་འདི་ནི། བདག་གི་བ་མེད་པའོ། །འདི་ལྟ་སྟེ། སེམས་ཅན་སེམས་ཅན་ཞེས་མིང་དུ་བཏགས་པ་འདི་ནི། དམིགས་སུ་མེད་པའོ། །གནས་བརྟན་རབ་
འབྱོར་གྱིས་སྨྲས་པ། ཀཽ་ཤི་ཀ། འདི་ཇི་སྙམ་དུ་སེམས། འདི་ལ་སེམས་ཅན་དུ་ཡོངས་སུ་བསྟན་པར་བྱས་པ་གང་ཡང་ཡོད་དམ། བརྒྱ་བྱིན་གྱིས་སྨྲས་པ། འཕགས་པ་རབ་འབྱོར། དེ་ནི་
མ་ཡིན་ནོ། །རབ་འབྱོར་གྱིས་སྨྲས་པ། ཀཽ་ཤི་ཀ། གང་ལ་སེམས་ཅན་དུ་ཡོངས་སུ་བསྟན་པར་བྱས་པ་འགའ་ཞིག་མེད་པ་དེ་ལ་སེམས་ཅན་མཐའ་ཡས་པ་ཡོད་དམ། ཀཽ་ཤི་ཀ། གལ་ཏེ་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བསྐལ་པ་གངྒཱའི་ཀླུང་གི་བྱེ་མ་སྙེད་དུའང་བཞུགས་ཏེ་མཐའ་ལས་འདས་པ་རྣམ་པར་རིག་པར་བྱེད་པའི་
དབྱངས་དང༌། གསུང་དབྱངས་ཟབ་མོས་སེམས་ཅན་སེམས་ཅན་ཞེས་ཚིག་ཏུ་བརྗོད་དུ་ཟིན་ཀྱང་དེ་ལ་སེམས་ཅན་གང་ཡང་སྐྱེས་པའམ། སྐྱེ་བར་འགྱུར་བའམ། སྐྱེ་བའམ། འགག་
པའམ། འགག་པར་འགྱུར་བའམ། འགག་པ་ཡོད་དམ། བརྒྱ་བྱིན་གྱིས་སྨྲས་པ། འཕགས་པ་རབ་འབྱོར། དེ་ནི། མ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་ཐོག་མ་ནས་དག་པའི་
ཕྱིར་དང༌། ཐོག་མ་ནས་ཡོངས་སུ་དག་པའི་ཕྱིར་རོ། །རབ་འབྱོར་གྱིས་སྨྲས་པ། ཀཽ་ཤི་ཀ །རྣམ་གྲངས་འདིས་ཀྱང་འདི་ལྟར་སེམས་ཅན་མཐའ་ཡས་པའི་ཕྱིར་འདི་ལྟ་སྟེ། ཤེས་རབ་ཀྱི་
ཕ་རོལ་ཏུ་ཕྱིན་པ་འདི་ནི། མཐའ་ཡས་པའི་ཕ་རོལ་ཏུ་ཕྱིན་པའོ། །ཀཽ་ཤི་ཀ། དེ་ལྟར་ཡང་སེམས་ཅན་མཐའ་ཡས་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མཐའ་ཡས་པར་རིག་པར་བྱའོ། །
༄༅། །དེ་ནས་དབང་པོ་དང་བཅས་པའི་ལྷ་རྣམས་དང༌། ཚངས་པ་དང་བཅས་པ་དང༌། སྐྱེ་དགུའི་བདག་པོ་དང་བཅས་པ་དང༌། དྲང་སྲོང་དང་བཅས་པ་དང༌། སྐྱེས་པ་དང༌། བུད་མེད་
ཀྱི་ཚོགས་དང་བཅས་པ་རྣམས་ཀྱིས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དེ། ཨེ་མའོ་ཆོས། ཨེ་མའོ་ཆོས། ཨེ་མའོ་ཆོས་རྣམས་ཀྱི་ཆོས་ཉིད་དེ་བཞིན་གཤེགས་པ་འབྱུང་
བ་གང་ཡིན་པ་དེ་ནི། འཕགས་པ་གནས་བརྟན་རབ་འབྱོར་གྱིས་ལེགས་པར་སྨྲས་པས་བརྗོད་ཅིང་བསྟན་ཏེ་བཤད་ལ་རབ་ཏུ་བཞག་གོ། །བཅོམ་ལྡན་འདས། དེང་སླན་ཆད་
བདག་ཅག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་དང་མ་བྲལ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་
ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་འདིས་གནས་པ་འདི་ནི། དེ་བཞིན་གཤེགས་པ་ལེགས་པར་འཛིན་ཏོ། །དེ་ནས་བཅོམ་ལྡན་འདས་ཀྱིས་དབང་པོ་དང་བཅས་པའི་ལྷ་རྣམས་
དང༌། ཚངས་པ་དང་བཅས་པ་དང༌། སྐྱེ་དགུའི་བདག་པོ་དང་བཅས་པ་དང༌། དྲང་སྲོང་དང་བཅས་པ་དང༌། སྐྱེས་པ་དང༌། བུད་མེད་ཀྱི་ཚོགས་དེ་རྣམས་ལ་བཀའ་སྩལ་པ། ལྷའི་བུ་དག་
དེ་དེ་བཞིན་ནོ། དེ་དེ་བཞིན་ཏེ། ལྷའི་བུ་དག །གང་གི་ཚེ་རྒྱལ་པོའི་ཕོ་བྲང་འཁོར་ན་མར་མེ་ཅན་ཞེས་བྱ་བའི་ཚོང་དུས་ཀྱི་དབུས་སུ་མར་མེ་མཛད་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཀྱི་དྲུང་ནང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་དང་མ་བྲལ་བར་གྱུར་པས། དེའི་ཚེ་མར་མེ་མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཀྱིས་བྲམ་ཟེའི་ཁྱེའུ་ཁྱོད་མ་འོངས་པའི་དུས་ཀྱི་བསྐལ་པ་གྲངས་མེད་པ་ན་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་རིག་པ། སྐྱེས་བུ་གདུལ་བྱའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་
ལྡན་འདས་སུ་འགྱུར་རོ། །ཞེས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བཅོམ་ལྡན་འདས་ལ་ལྷའི་བུ་དེ་དག་གིས་འདི་སྐད་ཅེས་བཅོམ་ལྡན་འདས་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐམས་ཅད་མཁྱེན་པ་ཉིད་ཀྱི་བར་དུ་སྒྲུབ་པར་བྱེད་པ་དང༌། རྗེས་སུ་ཡོངས་སུ་འཛིན་པར་བྱེད་པ་
ངོ་མཚར་ཏོ། །བདེ་བར་གཤེགས་པ། ཤིན་ཏུ་ངོ་མཚར་ཏོ། །ཞེས་གསོལ་ཏོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། བརྒྱ་བྱིན་གྱི་ལེའུ་ཞེས་བྱ་སྟེ། གཉིས་
པའོ༑༑ ༑༑འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་གསུམ་པ། དེ་ནས་བཅོམ་ལྡན་འདས་ཀྱིས་འཁོར་དེར་ལྷའི་བུ་གང་དག་འདུས་ཏེ་འཁོད་པར་གྱུར་པ་
༄༅། །དང༌། དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མའི་འཁོར་གང་དག་འདུས་ཏེ་འཁོད་པར་གྱུར་པ་དང༌། ལྷའི་བུ་དེ་རྣམས་འདུས་ཏེ་
འཁོད་པར་གྱུར་པར་མཁྱེན་ཅིང་འཁོར་བཞི་པོ་ཐམས་ཅད་འདུས་ཤིང་འཁོད་པར་ཡང་མཁྱེན་ནས། འདོད་པ་ན་སྤྱོད་པ་དང༌། གཟུགས་ན་སྤྱོད་པའི་ལྷའི་བུ་རྣམས་དང༌། ཚངས་རིས་
ཀྱི་ལྷའི་བུ་རྣམས་དང༌། འོད་གསལ་དང༌། དགེ་ཆུང་དང༌། འོག་མིན་གྱི་ལྷའི་བུ་རྣམས་དཔང་དུ་བཞག་སྟེ། ལྷ་རྣམས་ཀྱི་དབང་པོ་བརྒྱ་བྱིན་ལ་སོགས་པ་འདོད་པ་ན་སྤྱོད་པའི་ལྷའི་
བུ་རྣམས་དང༌། ཚངས་པ་ཆེན་པོ་ལ་སོགས་པ་ཚངས་རིས་ཀྱི་ལྷའི་བུ་རྣམས་དང༌། འོད་གསལ་གྱི་ལྷའི་བུ་རྣམས་ལ་བཀའ་སྩལ་པ། ལྷའི་བུ་དག། རིགས་ཀྱི་བུའམ་རིགས་ཀྱི་བུ་
མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་ཏམ། འཆང་ངམ། ཀློག་གམ། ཀུན་ཆུབ་པར་བྱེད་དམ། རབ་ཏུ་འདོན་ན། དེ་ལ་བདུད་དམ། བདུད་ཀྱི་རིས་ཀྱི་ལྷ་གླགས་
ལྟ་བ་དང༌། གླགས་ཚོལ་བ་དག་གིས་གླགས་རྙེད་པར་མི་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་དེ་ལ་མིའམ་མི་མ་ཡིན་པ་གླགས་ལྟ་བ་དང༌། གླགས་ཚོལ་བ་རྣམས་ཀྱིས་
གླགས་རྙེད་པར་ཡང་མི་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་དེའང་ཡ་ང་བ་མ་སྤངས་པར་འཆི་བའི་དུས་བྱེད་པར་མི་འགྱུར་རོ། །ལྷའི་བུ་དག། གཞན་ཡང་ལྷའི་བུ་གང་དག་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་རྣམས་དང༌། ལྷའི་བུ་གང་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་མ་བཟུང་བ་དང༌། མ་བཅངས་པ་དང༌། མ་
བཀླགས་པ་དང༌། ཀུན་ཆུབ་པར་མ་བྱས་པ་དང༌། རབ་ཏུ་མི་འདོན་པའི་ལྷའི་བུ་དེ་དག་རིགས་ཀྱི་བུ་དེའི་དྲུང་དུ་འོང་འདོད་པར་འགྱུར་ཏེ། རིགས་ཀྱི་བུ། ཤེས་རབ་ཀྱི་ཕ་རོལ་ཏུ་ཕྱིན་
པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དེ་ལ་ཉན་པར་འགྱུར་ཏེ། ཐོས་ནས་ཀྱང་འཛིན་པར་འགྱུར། འཆང་བར་འགྱུར། ཀློག་
པར་འགྱུར། ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར་རོ། །ལྷའི་བུ་དག །གཞན་ཡང་རིགས་ཀྱི་བུའམ་རིགས་ཀྱི་བུ་མོ་ཤེས་རབ་ཀྱི་ཕ་རོལ་ཏུ་ཕྱིན་པ་འཛིན་པ་དང༌།
འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དེ་དགོན་པར་སོང་ཡང་རུང༌། ཤིང་དྲུང་དུ་སོང་ཡང་རུང༌། ཁྱིམ་སྟོང་དུ་སོང་ཡང་རུང༌། བླ་གབ་མེད་པར་སོང་ཡང་
རུང༌། ལམ་དུ་སོང་ཡང་རུང༌། ལམ་གོལ་བར་སོང་ཡང་རུང༌། འབྲོག་དགོན་པར་སོང་ཡང་རུང༌། རྒྱ་མཚོ་ཆེན་པོར་སོང་ཡང་རུང༌། དེ་དང་དེར་འགྲོ་བའམ། འཆག་པའམ། འདུག་
པའམ༑ ཉལ་བ་ན་ཡང་རུང་སྟེ། འཇིགས་པར་འགྱུར་བའམ། རེངས་པར་འགྱུར་བ་ཉིད་མི་འབྱུང་མི་སྐྱེའོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་བཞིས་འདི་སྐད་ཅེས་གསོལ་
༄༅། །ཏོ༑ ༑བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་
བགྱིད་པ་དང༌། རབ་ཏུ་འདོན་པར་འགྱུར་བ་དེ་ནི། ཐེག་པ་གསུམ་གྱིས་སེམས་ཅན་རྣམས་འདུལ་བར་བགྱིད་ཅིང་སེམས་ཅན་གྱི་འདུ་ཤེས་ཀྱང་མི་བསྐྱེད་པ་ནི། ངོ་མཚར་ཏོ། །
བཅོམ་ལྡན་འདས། བདག་ཅག་གིས་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་
བགྱིད་པ་དང༌། རབ་ཏུ་འདོན་པར་འགྱུར་བ་དེ་ལ་བསྲུང་བ་དང༌། བསྐྱབ་པ་དང༌། སྦ་བར་བགྱིའོ། །དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་
གསོལ་ཏོ། །བཅོམ་ལྡན་འདས། བདག་གིས་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་
པར་བགྱིད་པ་དང༌། རབ་ཏུ་འདོན་པར་འགྱུར་བ་དེ་དག་ལ་བསྲུང་བ་དང༌། བསྐྱབ་པ་དང༌། སྦ་བར་བགྱིའོ། །བཅོམ་ལྡན་འདས་ལ་ཚངས་པ་མི་མཇེད་ཀྱི་བདག་པོ་ཚངས་རིས་ཀྱི་ལྷའི་
བུ་རྣམས་དང་བཅས་པས་ཀྱང་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་
པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པར་འགྱུར་བ་དེ་ལ་བསྲུང་བ་དང༌། བསྐྱབ་པ་དང༌། སྦ་བར་བགྱིའོ། །དེ་ནས་བཅོམ་ལྡན་འདས་ལ་ལྷ་རྣམས་
ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་
པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དེ་ཚེ་འདི་ལ་ཡོན་ཏན་འདི་དག་ངེས་པར་འཐོབ་ཅིང་ཡོངས་སུ་འཛིན་པར་འགྱུར་བ་ངོ་མཚར་ཏོ། །བཅོམ་ལྡན་འདས། ཡང་ཅི་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་བཟུང་ན། ཕ་རོལ་ཏུ་ཕྱིན་པ་དྲུག་པོ་ཐམས་ཅད་བཟུང་བར་འགྱུར་རམ། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་
ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ། དེ་དེ་བཞིན་ནོ། །དེ་དེ་བཞིན་ཏེ། ཀཽ་ཤི་ཀ། ཤེས་རབ་ཀྱི་ཕ་རོལ་ཏུ་ཕྱིན་པ་བཟུང་བས་ཕ་རོལ་ཏུ་ཕྱིན་པ་དྲུག་པོ་ཐམས་ཅད་བཟུང་བར་འགྱུར་
རོ༑ ༑ཀཽ་ཤི་ཀ། གཞན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པར་བྱེད་ན། ཀཽ་ཤི་ཀ། རིགས་ཀྱི་
བུའམ་རིགས་ཀྱི་བུ་མོ་དེས་ཚེ་འདི་ལ་ཡོན་ཏན་གང་དག་འཛིན་པར་འགྱུར་བ་དེ་ཐམས་ཅད་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་
༄༅། །ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་ལེགས་སོ། །ཞེས་གསོལ་ནས་ལྷ་རྣམས་ཀྱི་དབང་པོ་བརྒྱ་བྱིན་བཅོམ་ལྡན་འདས་ཀྱི་ལྟར་ཉན་པ་དང༌། བཅོམ་ལྡན་
འདས་ཀྱིས་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །དེ་ལ་གང་ཞིག་ཆོས་འདི་ལ་རྩོད་པར་འདོད་པ་དང༌། རྒོལ་བར་འདོད་པ་དང༌། འགལ་བར་བྱེད་འདོད་ན། རྩོད་པར་འདོད་པ་
དང༌། རྒོལ་བར་འདོད་པ་དང༌། འགལ་བར་བྱེད་འདོད་པ་དེ་དག་གི་རྩོད་པ་དང༌། རྒོལ་བ་དང༌། འགལ་བར་བྱེད་པ་སྐྱེས་ཤིང་སྐྱེས་པ་རྣམས་སླར་ནུབ་པ་ཉིད་དུ་འགྱུར་ཞིང་གནས་
པར་མི་འགྱུར་ཏེ། རྩོད་པར་འདོད་པ་དང༌། རྒོལ་བར་འདོད་པ་དང༌། འགལ་བར་བྱེད་འདོད་པ་དེ་དག་གི་བསམ་པ་དེ་དག་ཡོངས་སུ་རྫོགས་པར་མི་འགྱུར་རོ། །དེ་ཅིའི་ཕྱིར་ཞེ་ན། ཀཽ་
ཤི་ཀ། དེ་ནི། འདི་ལྟར་འགྱུར་ཏེ། རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་
དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་དུ་བྱེད་པ་དེའི་རྩོད་པའི་གཞི་དེ་ལྟར་སྐྱེས་ཤིང་སྐྱེས་པ་དེ་དག་སླར་ཡང་ནུབ་པ་ཉིད་
དུ་འགྱུར་ཞིང་གནས་པར་མི་འགྱུར་ཏེ། རྩོད་པར་འདོད་པ་དང༌། རྒོལ་བར་འདོད་པ་དང༌། འགལ་བར་བྱེད་འདོད་པ་དེ་དག་གི་བསམ་པ་དེ་དག་ཡོངས་སུ་རྫོགས་པར་མི་འགྱུར་རོ། །
ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་
པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་དུ་བྱེད་པ་དེ་ཚེ་འདི་ལ་ཡོན་ཏན་འདི་དག་ཀྱང་ཡོངས་སུ་འཛིན་པར་འགྱུར་རོ། །ཀཽ་ཤི་ཀ། འདི་ལྟ་སྟེ། དཔེར་ན། རྩི་མ་གྷཱི་
ཞེས་བྱ་བ་དུག་ཐམས་ཅད་རབ་ཏུ་ཞི་བར་བྱེད་པ་ཞིག་ཡོད་དེ། དེར་སྐྱེ་བོ་སྦྲུལ་གདུག་པ་བཀྲེས་ཤིང་ཟས་འདོད་དེ་ཟས་ཚོལ་བ་ཞིག་གིས་སྲོག་ཆགས་སུ་གྱུར་པ་འགའ་ཞིག་
མཐོང་སྟེ་སྐྱེ་བོ་སྦྲུལ་གདུག་པ་དེས་ཟས་ཀྱི་ཕྱིར་བཟའ་བར་འདོད་ནས་སྲོག་ཆགས་སུ་གྱུར་པ་དེའི་དྲིའི་ཕྱོགས་སུ་འབྲང་ཞིང་བསྙེགས་པ་དང་དེ་ནས་སྲོག་ཆགས་སུ་གྱུར་པ་དེ་རྩི་མ་གྷཱི་
གང་ན་ཡོད་པ་དེར་སོང་ནས་ཕྱིན་ཏེ་འདུག་པ་དང་དེ་ནས་སྦྲུལ་དེ་རྩི་དེའི་དྲི་ཙམ་གྱིས་ཕྱིར་ལྡོག་གོ །དེ་ཅིའི་ཕྱིར་ཞེ་ན། དེ་ལྟར་སྦྲུལ་གྱི་གདུག་པ་ཟིལ་གྱིས་གནོན་པ་དེ་ནི། རྩི་དེའི་སྨན་
གྱི་ཡོན་ཏན་དུ་བལྟ་བར་བྱ་སྟེ། རྩི་དེ་ནི། དེ་ལྟར་མཐུ་ཆེའོ། །ཀཽ་ཤི་ཀ །དེ་བཞིན་དུ་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌།
ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དེ་ལ་ནི། ཀཽ་ཤི་ཀ། རྩོད་པ་དང༌། རྒོལ་བ་
༄༅། །དང༌། འགལ་བར་བྱེད་བའི་གཞི་སྐྱེས་ཤིང་སྐྱེས་པ་གང་ཡིན་པ་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པའི་གཟི་བརྗིད་དང༌། སྟོབས་དང༌། མཐུ་དང༌།
ཤེས་རབ་ཀྱི་ཕ་རོལ་ཏུ་ཕྱིན་པའི་སྟོབས་བསྐྱེད་པས་མྱུར་དུ་དེ་ཉིད་ནས་མེད་པར་འགྱུར། ཉེ་བར་ཞི་ཞིང་འཕེལ་བར་མི་འགྱུར་ཏེ། དེ་གང་དང་གང་ནས་བྱུང་བ་དེ་དང་དེ་ཉིད་ནས་
འགག་ཅིང་ནུབ་པར་འགྱུར་ལ་གནས་པར་མི་འགྱུར་རོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ནི། འདོད་ཆགས་ལ་སོགས་པ་ནས་མྱ་ངན་ལས་འདས་པ་ཉིད་ཀྱི་
བར་དུ་འཛིན་པ་དག་ཉེ་བར་ཞི་བར་བྱེད་དེ། རྣམ་པར་འཕེལ་བར་བྱེད་པ་མ་ཡིན་ནོ། །ཀཽ་ཤི་ཀ །རྒྱལ་པོ་ཆེན་པོ་བཞི་དང༌། ལྷ་རྣམས་ཀྱི་དབང་པོ་བརྒྱ་བྱིན་དང༌། མི་མཇེད་ཀྱི་
བདག་པོ་ཚངས་པ་དང༌། སངས་རྒྱས་བཅོམ་ལྡན་འདས་རྣམས་དང༌། བྱང་ཆུབ་སེམས་དཔའ་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་
ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་
དུ་བྱེད་པ་དེ་ལ་བསྲུང་བ་དང༌། བསྐྱབ་པ་དང༌། སྦ་བར་བྱེད་དེ། དེས་ཚེ་འདི་ལ་ཡོན་ཏན་འདི་དག་ཡོངས་སུ་བཟུང་བར་འགྱུར་རོ། །ཀཽ་ཤི་ཀ། གཞན་ཡང་རིགས་ཀྱི་བུའམ་རིགས་
ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་
དང༌། ཁ་ཏོན་དུ་བྱེད་པ་དེའི་ཚིག་གཟུང་བར་འོས་པར་འགྱུར། ཚིག་འཇམ་པར་འགྱུར། ཚིག་རན་པར་འགྱུར། ཚིག་འཆལ་པ་མེད་པར་འགྱུར་རོ། །ཁྲོ་བས་ཟིལ་གྱིས་ནོན་པར་མི་འགྱུར།
ང་རྒྱལ་གྱིས་ཟིལ་གྱིས་ནོན་པར་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་དུལ་བར་བྱེད། ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་འདུད་
པར་བྱེད་དེ། ཁྲོ་བ་འཕེལ་བར་མི་བྱེད། ང་རྒྱལ་འཕེལ་བར་མི་བྱེད། འཁོན་དུ་འཛིན་པ་ཡོངས་སུ་མི་འཆང༌། གནོད་སེམས་ཡོངས་སུ་མི་འཆང་ལ་བག་ལ་ཉལ་མི་འཛིན་ཏོ། །རིགས་
ཀྱི་བུའམ་རིགས་ཀྱི་བུ་མོ་དེ་ལྟར་སྤྱོད་པ་དེ་ལ་དྲན་པ་དང་བྱམས་པ་སྐྱེ་བར་འགྱུར་ཞིང༌། དེ་འདི་སྙམ་དུ་སེམས་ཏེ། གལ་ཏེ་བདག་གིས་གནོད་སེམས་བསྐྱེད་དུ་ཟིན་ན། བདག་གི་དབང་
པོ་རྣམས་འཁྲུགས་ཤིང་བཞིན་གྱི་མདོག་ཀྱང་འགྱུར་བས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ཤིང་འདི་ལ་སློབ་པར་འདོད་པ་ཁྲོ་བའི་དབང་དུ་
འགྲོ་བ་འདི་ནི། མི་རིགས་སོ། སྙམ་ནས་དེ་མྱུར་དུ་དྲན་པ་རྙེད་པར་འགྱུར་ཏེ། ཀཽ་ཤི་ཀ། རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་
༄༅། །བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་དུ་བྱེད་པར་
འགྱུར་བ་དེས་ཚེ་འདི་ལ་ཡོན་ཏན་འདི་དག་ཀྱང་ཡོངས་སུ་འཛིན་པར་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་
སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་དུལ་བ་དང༌། ཁེངས་པ་མ་
མཆིས་པའི་སླད་དུ་ཉེ་བར་གནས་པ་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ། གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་
པ་འདི་འཛིན་པར་འགྱུར་འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར། ཉེ་བར་སྟོན་པར་འགྱུར། ལུང་འབོགས་
པར་འགྱུར། ཁ་ཏོན་བྱེད་པར་འགྱུར་ཞིང༌། གལ་ཏེ་རིགས་ཀྱི་བུའམ་རིགས་ཀྱི་བུ་མོ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌།
ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པས་གཡུལ་འགྱེད་པའི་ཚེ་གཡུལ་དུ་ཐོག་མར་ཞུགས་པར་
གྱུར་ན༑ དེ་གཡུལ་དུ་འཇུག་གམ། གཡུལ་དུ་ཞུགས་སམ། གཡུལ་ལས་འདས་སམ། གཡུལ་གྱི་ནང་དུ་འགྲོའམ། འགྲེང་ངམ། འདུག་ཀྱང་རུང་སྟེ། ཀཽ་ཤི་ཀ། རིགས་ཀྱི་བུའམ་རིགས་
ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡིད་ལ་འཛིན་པའམ། འཆང་བའམ། ཀློག་པའམ། ཀུན་ཆུབ་པར་བྱེད་པའམ། རབ་ཏུ་འདོན་པའམ། སྟོན་པའམ། ཉེ་བར་སྟོན་པའམ།
ལུང་འབོགས་པའམ། ཁ་ཏོན་བྱེད་པ་དེ་སྲོག་གི་བར་ཆད་དུ་འགྱུར་བ་གང་ཡིན་པ་འདི་ནི། གནས་མ་ཡིན་ཞིང་གོ་སྐབས་མེད་དོ། །གཞན་གྱི་གནོད་པ་བྱེད་པས་དེ་སྲོག་གི་བར་ཆད་དུ་
འགྱུར་བ་འདི་ཡང་གནས་མ་ཡིན་ནོ། །ཀཽ་ཤི་ཀ། ཡང་གལ་ཏེ་འགའ་ཞིག་གིས་དེ་ལ་དབྱུག་པའམ། མཚོན་ནམ། བོང་བའམ། གཞན་གང་ཡང་རུང་བས་འཕངས་ན། དེའི་ལུས་ལ་
ཕོག་པར་མི་འགྱུར་རོ། །དེ་ཅིའི་ཕྱིར་ཞེ་ན། ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། རིག་སྔགས་ཆེན་མོའོ། །ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་
འདི་ནི༑ ཚད་མ་མེད་པའི་རིག་སྔགས་སོ། །ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་མེད་པའི་རིག་སྔགས་སོ། །ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་
ཕྱིན་པ་འདི་ནི། བླ་ན་མེད་པའི་རིག་སྔགས་སོ། །ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཉམ་པ་མེད་པའི་རིག་སྔགས་སོ། །ཀཽ་ཤི་ཀ། འདི་ལྟ་སྟེ། ཤེས་རབ་ཀྱི་
༄༅། །ཕ་རོལ་ཏུ་ཕྱིན་པ་འདི་ནི། མི་མཉམ་པ་དང་མཉམ་པའི་རིག་སྔགས་སོ། །དེ་ཅིའི་ཕྱིར་ཞེ་ན། ཀཽ་ཤི་ཀ། རིག་སྔགས་འདི་ལ་སློབ་པའི་རིགས་ཀྱི་བུའམ་རིགས་
ཀྱི་བུ་མོ་ནི། བདག་ལ་གནོད་པ་བྱ་བར་ཡང་མི་སེམས། གཞན་ལ་གནོད་པ་བྱ་བར་ཡང་མི་སེམས། གཉིས་ག་ལ་གནོད་པ་བྱ་བར་ཡང་མི་སེམས་སོ། །ཀཽ་ཤི་ཀ། རིག་སྔགས་འདི་
ལ་སློབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་བྱང་ཆུབ་པར་འགྱུར། ཐམས་ཅད་
མཁྱེན་པའི་ཡེ་ཤེས་ཐོབ་པར་འགྱུར་ཏེ། དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་ཐམས་ཅད་ཀྱི་སེམས་ལ་རྣམ་
པར་ལྟ་བར་འགྱུར་རོ། །དེ་ཅིའི་ཕྱིར་ཞེ་ན། ཀཽ་ཤི་ཀ །རིག་སྔགས་འདི་ལ་བསླབས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་གང་མ་ཐོབ་པའམ། མ་ཤེས་པའམ།
མངོན་སུམ་དུ་མ་བྱས་པ་གང་ཡང་མེད་དོ། །དེའི་ཕྱིར་ཐམས་ཅད་མཁྱེན་པའི་ཡེ་ཤེས་ཞེས་བྱའོ། །ཀཽ་ཤི་ཀ། རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་
ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་
ཏོན་དུ་བྱེད་པར་འགྱུར་བ་དེས་ཚེ་འདི་ལ་ཡོན་ཏན་འདིའང་ཡོངས་སུ་གཟུང་བར་འགྱུར་རོ། །ཀཽ་ཤི་ཀ། གཞན་ཡང་གང་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་བྲིས་ཏེ་གླེགས་བམ་དུ་
ཆུད་པར་བྱས་ཤིང་མཆོད་པ་སྔོན་དུ་བྱས་ཏེ་བཞག་ནས་བཀུར་སྟིར་བྱེད་ལ། མི་འཛིན། མི་འཆང༌། མི་ཀློག། ཀུན་ཆུབ་པར་མི་བྱེད། རབ་ཏུ་འདོན་པར་མི་བྱེད། སྟོན་པར་མི་བྱེད།
ཉེ་བར་སྟོན་པར་མི་བྱེད། ལུང་འབོགས་པར་མི་བྱེད། ཁ་ཏོན་མི་བྱེད་པ་དེར་ཡང་ཀཽ་ཤི་ཀ། སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་སེམས་ཅན་རྣམས་ལ་མི་དང་མི་མ་
ཡིན་པ་གླགས་ལྟ་བ་དག་གིས་གླགས་བལྟས་ཀྱང་གླགས་རྙེད་པར་མི་འགྱུར་ཏེ། དེ་ནི། གནས་མེད་དོ། །ཀཽ་ཤི་ཀ། རིགས་ཀྱི་བུའམ་རིགས་ཀྱི་བུ་མོ་དེས་ཚེ་འདི་ལ་ཡོན་ཏན་འདིའང་
ཡོངས་སུ་འཛིན་པར་འགྱུར་རོ། །ཀཽ་ཤི་ཀ། འདི་ལྟ་སྟེ། དཔེར་ན། གང་དག་བྱང་ཆུབ་ཀྱི་སྙིང་པོ་ན་འདུག་པ་དང༌། བྱང་ཆུབ་ཀྱི་སྙིང་པོའི་ཁོར་ཡུག་ན་འདུག་པ་དང༌། བྱང་ཆུབ་ཀྱི་སྙིང་པོའི་
ནང་ན་འདུག་པ་དང༌། བྱང་ཆུབ་ཀྱི་ཤིང་གི་རྩ་བ་ན་འདུག་པའི་མི་དང་མི་མ་ཡིན་པ་དང༌། བྱོལ་སོང་ཡན་ཆད་ཀྱང་སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་མི་དང༌། མི་མ་ཡིན་
པ་དག་གིས་གཙེ་བའམ། གནོད་པར་བྱ་བའམ། འབེབས་པར་བྱེད་མི་ནུས་སོ། །དེ་ཅིའི་ཕྱིར་ཞེ་ན། གང་དག་སེམས་ཅན་ཐམས་ཅད་ལ་མི་འཇིགས་པ་དང་འཁོན་མེད་པ་དང༌།
༄༅། །མི་སྐྲག་པ་རབ་ཏུ་སྒོམ་པར་མཛད་ཅིང༌། རབ་ཏུ་སྟོན་པར་མཛད་པ་འདས་པ་དང༌། མ་བྱོན་པ་དང༌། ད་ལྟར་བྱུང་བའི་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རྣམས་དེར་མངོན་པར་རྫོགས་པར་སངས་རྒྱས་པ་དང༌། མངོན་པར་རྫོགས་པར་འཚང་རྒྱ་བར་འགྱུར་བ་དང༌། མངོན་པར་རྫོགས་པར་
འཚང་རྒྱ་བའི་ཕྱིར་རོ། །དེ་བཞིན་དུ་ཀཽ་ཤི་ཀ། གང་དུ་རིགས་ཀྱི་བུའམ་རིགས་ཀྱི་བུ་མོ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་འཛིན་པ་དང༌། འཆང་བ་དང༌། ཀློག་པ་དང༌། ཀུན་
ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་དུ་བྱེད་པ་དེར་ཀཽ་ཤི་ཀ །སྔོན་གྱི་ལས་ཀྱི་རྣམ་པར་སྨིན་པ་
མ་གཏོགས་པར་སེམས་ཅན་མི་དང་མི་མ་ཡིན་པ་དག་གིས་གཙེ་བའམ། གནོད་པར་བྱ་བའམ། འབེབས་པར་བྱེད་མི་ནུས་སོ། །དེ་ཅིའི་ཕྱིར་ཞེ་ན། ཀཽ་ཤི་ཀ། ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ཉིད་ཀྱིས་ས་ཕྱོགས་དེ་སེམས་ཅན་རྣམས་ཀྱི་མཆོད་རྟེན་དུ་གྱུར་པར་བྱས་པ་དང༌། ཕྱག་བྱ་བ་དང༌། བརྗེད་པར་བྱ་བ་དང༌། མཆོད་པར་བྱ་བ་དང༌།
རི་མོར་བྱ་བ་དང༌། བསྙེན་བཀུར་དུ་བྱ་བ་དང༌། བཀུར་སྟིར་བྱ་བ་དང༌། བླ་མར་བྱ་བ་དང༌། དེར་ཉེ་བར་ཕྱིན་པའི་སེམས་ཅན་རྣམས་ཀྱི་སྐྱོབ་པ་དང༌། སྐྱབས་དང༌། གནས་
དང༌། དཔུང་གཉེན་དུ་འགྱུར་བར་བྱས་པས་སོ། །ཀཽ་ཤི་ཀ། རིགས་ཀྱི་བུའམ་རིགས་ཀྱི་བུ་མོ་དེས་ཚེ་འདི་ལ་ཕན་ཡོན་འདི་དག་ཀྱང་ཡོངས་སུ་འཛིན་ཏོ། །དེ་སྐད་ཅེས་བཀའ་སྩལ་པ་
དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་གིས་ཤེས་རབ་ཀྱི་ཕ་རོལ་ཏུ་
ཕྱིན་པ་འདི་བྲིས་ནས་གླེགས་བམ་དུ་ཆུད་པར་བགྱིས་ཏེ་བཞག་ལ། དེ་ལ་ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་
དང༌། ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌། ལྷའི་བ་དན་དག་དང༌། ཁོར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷའི་མཆོད་པ་
རྣམ་པ་མང་པོ་དག་གིས་བཀུར་སྟིར་བགྱིས་པ་དང༌། བླ་མར་བགྱིས་པ་དང༌། རྗེད་པ་དང༌། མཆོད་པ་དང༌། རི་མོར་བགྱིས་པ་དང༌། བསྙེན་བཀུར་བགྱིས་པ་དང༌། གང་གིས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པའི་སྐུ་གདུང་དག་མཆོད་རྟེན་གྱི་ནང་དུ་སྩལ་ཏེ་ཡོངས་སུ་འཛིན་ཅིང་
འཆང་ལ་དེ་དག་ལའང་དེ་བཞིན་དུ་ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་དང༌། ལྷའི་ན་བཟའ་དང༌། ལྷའི་
༄༅། །གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌། ལྷའི་བ་དན་དང༌། ཁོར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷའི་མཆོད་པ་རྣམ་
པ་མང་པོ་དག་གིས་བཀུར་སྟིར་བགྱིས་པ་དང༌། བླ་མར་བགྱིས་པ་དང༌། རྗེད་པ་དང༌། མཆོད་པ་དང༌། རི་མོར་བགྱིས་པ་དང༌། བསྙེན་བཀུར་བགྱིས་ན། རིགས་ཀྱི་བུའམ་རིགས་
ཀྱི་བུ་མོ་དེ་གཉིས་གང་བསོད་ནམས་ཆེས་མང་དུ་བསྐྱེད་པར་འགྱུར། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་
བཀའ་སྩལ་ཏོ། །ཀཽ་ཤི་ཀ །དེའི་ཕྱིར་འདི་ཁྱོད་ཉིད་ལ་དྲི་བར་བྱ་སྟེ། ཁྱོད་ཀྱིས་ཇི་ལྟར་ནུས་པ་དེ་བཞིན་དུ་ལུང་སྟོན་ཅིག །ཀཽ་ཤི་ཀ །འདི་ཇི་སྙམ་དུ་སེམས། དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཐམས་ཅད་མཁྱེན་པ་ཉིད་ཀྱི་བདག་གི་དངོས་པོ་མངོན་པར་གྲུབ་པ་གང་ཡིན་པ་དེ་ལམ་གང་ཞིག་ལ་བསླབས་པས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང༌། ཐམས་ཅད་མཁྱེན་པ་ཉིད་བརྙེས་
ཤིང་མངོན་པར་རྫོགས་པར་སངས་རྒྱས། དེ་སྐད་ཅེས་བཀའ་སྩལ་པ་དང༌། ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བསླབས་པས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་དང་ཐམས་ཅད་མཁྱེན་པ་ཉིད་བརྙེས་ཤིང་མངོན་པར་རྫོགས་པར་སངས་རྒྱས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་ལྟ་བས་ན།
འོ་ན་ནི། བདག་གི་དངོས་པོའི་སྐུ་འདི་བརྙེས་པས་དེ་བཞིན་གཤེགས་པ་དེ་བཞིན་གཤེགས་པ་ཞེས་བྱ་བའི་གྲངས་སུ་མི་འགྲོའི། ཐམས་ཅད་མཁྱེན་པ་ཉིད་བརྙེས་པས་ནི། དེ་བཞིན་
གཤེགས་པ་དེ་བཞིན་གཤེགས་པ་ཞེས་བྱ་བའི་གྲངས་སུ་འགྲོའོ། །ཀཽ་ཤི་ཀ །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཐམས་ཅད་མཁྱེན་
པ་ཉིད་གང་ཡིན་པ་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལས་བྱུང་བ་ཡིན་ཞིང༌། ཀཽ་ཤི་ཀ །དེ་བཞིན་གཤེགས་པའི་བདག་གི་དངོས་པོའི་སྐུ་བརྙེས་པ་འདིའང་ཤེས་རབ་ཀྱི་ཕ་
རོལ་ཏུ་ཕྱིན་པ་དང༌། ཐབས་མཁས་པ་ལས་བྱུང་བ་ཡིན་ཏེ། ཐམས་ཅད་མཁྱེན་པའི་ཡེ་ཤེས་ཀྱི་རྟེན་དུ་གྱུར་པ་ཡིན་ནོ། །རྟེན་འདི་ལ་བརྟེན་ནས་ནི། ཐམས་ཅད་མཁྱེན་པའི་ཡེ་ཤེས་
རབ་ཏུ་འབྱེད་པར་འགྱུར། སངས་རྒྱས་ཀྱི་སྐུ་རབ་ཏུ་འབྱེད་པར་ཡང་འགྱུར། ཆོས་ཀྱི་སྐུ་རབ་ཏུ་འབྱེད་པར་ཡང་འགྱུར། དགེ་འདུན་གྱི་སྐུ་རབ་ཏུ་འབྱེད་པར་ཡང་འགྱུར་རོ། །དེ་ལྟར་
༄༅། །ན་ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་བདག་གི་དངོས་པོའི་སྐུ་བརྙེས་པ་གང་ཡིན་པ་འདི་ནི། ཐམས་ཅད་མཁྱེན་པའི་ཡེ་ཤེས་ཀྱི་རྟེན་དུ་གྱུར་པས་ན།
སེམས་ཅན་ཐམས་ཅད་ཀྱི་མཆོད་རྟེན་དུ་གྱུར་ཅིང་ཕྱག་བྱ་བ་དང༌། བཀུར་སྟིར་བྱ་བ་དང༌། བླ་མར་བྱ་བ་དང༌། རྗེད་པར་བྱ་བ་དང༌། མཆོད་པར་བྱ་བ་དང༌། རི་མོར་བྱ་བ་དང༌།
བསྙེན་བཀུར་བྱ་བར་གྱུར་པ་ཡིན་ལ། དེ་བཞིན་དུ་ང་ཡོངས་སུ་མྱ་ངན་ལས་འདས་པར་གྱུར་ཀྱང་སྐུ་དེ་དག་ལའང་མཆོད་པ་བྱེད་པར་འགྱུར་རོ། །དེ་བས་ན། ཀཽ་ཤི་ཀ།
རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྲིས་ནས་གླེགས་བམ་དུ་ཆུད་པར་བྱས་ཏེ་བཞག་ལ། དེ་ལ་ལྷའི་མེ་ཏོག་དང༌། ལྷའི་བདུག་པ་
དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་དང༌། ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌། ལྷའི་བ་དན་
དག་དང༌། ཁོ་ར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷའི་མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་
པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་དག་བསོད་ནམས་ཆེས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན། ཀཽ་ཤི་ཀ །རིགས་
ཀྱི་བུའམ་རིགས་ཀྱི་བུ་མོ་དེས་ཐམས་ཅད་མཁྱེན་པའི་ཡེ་ཤེས་ལ་མཆོད་པ་བྱས་པར་འགྱུར་རོ། །རིགས་ཀྱི་བུའམ། རིགས་ཀྱི་བུ་མོ་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་
འདྲི་བ་ན་གླེགས་བམ་དུ་ཆུད་པ་འདི་ལ་བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད། མཆོད་པ་རྣམ་པ་མང་པོ་དག་བྱེད་ན། འདི་
ཉིད་དེ་ལས་བསོད་ནམས་ཆེས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན། ཀཽ་ཤི་ཀ །གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་པ་བྱེད་པ་དེས་ཐམས་ཅད་མཁྱེན་པའི་ཡེ་ཤེས་ལ་མཆོད་པ་
བྱས་པར་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འཛམ་བུའི་གླིང་འདིའི་
མི་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འདྲི་བར་མི་བགྱིད། འཛིན་པར་མི་བགྱིད། འཆང་བར་མི་བགྱིད། ཀློག་པར་མི་བགྱིད། ཀུན་ཆུབ་པར་མི་བགྱིད། རབ་ཏུ་འདོན་
པར་མི་བགྱིད། སྟོན་པར་མི་བགྱིད། ཉེ་བར་སྟོན་པར་མི་བགྱིད། ལུང་འབོགས་པར་མི་བགྱིད། ཁ་ཏོན་དུ་མི་བགྱིད། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མེ་ཏོག་དང༌། བདུག་
པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོ་ར་ཡུག་ཏུ་མར་མེའི་ཕྲེང་བ་དག་དང༌།
༄༅། །མཆོད་པ་རྣམ་པ་མང་པོ་དག་གིས་མཆོད་པར་མི་བགྱིད་དེ། བཀུར་སྟིར་མི་བགྱིད། བླ་མར་མི་བགྱིད། རྗེད་པར་མི་བགྱིད། མཆོད་པར་མི་བགྱིད།
རི་མོར་མི་བགྱིད། བསྙེན་བཀུར་མི་བགྱིད་པ་དེ་དག་གིས་བཅོམ་ལྡན་འདས། ཅི་བཅོམ་ལྡན་འདས་ཀྱིས་གསུངས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་པ་བགྱིས་པ་དེ་
ལྟར་དོན་ཆེན་པོ་ཅན་དུ་མ་འཚལ་ལགས་སམ། བཅོམ་ལྡན་འདས། ཅི་བཅོམ་ལྡན་འདས་ཀྱིས་གསུངས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མཆོད་པ་བགྱིས་པ་དེ་ལྟར་ཕན་
ཡོན་ཆེན་པོ་དང་ལྡན་པར་རྟོགས་པར་མ་གྱུར་ལགས་སམ། དེ་ལྟར་འབྲས་བུ་ཆེ་བ་དང༌། རྣམ་པར་སྨིན་པ་ཆེ་བར་དེས་རིག་པར་མ་གྱུར་ལགས་སམ། འོན་ཏེ་འཚལ་ཞིང་རྟོགས་
ལ་རིག་ཀྱང་སླར་ཞིང་དད་པར་མ་གྱུར་པ་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་
ཤི་ཀ །འདི་ཇི་སྙམ་དུ་སེམས། འཛམ་བུའི་གླིང་གི་མི་དེ་དག་ལས་གང་དག་སངས་རྒྱས་ལ་རྟོགས་ནས་དད་པ་དང་ལྡན་པ་དང༌། གང་དག་ཆོས་ལ་རྟོགས་ནས་དད་པ་དང་ལྡན་པ་དང༌། གང་དག་
དགེ་འདུན་ལ་རྟོགས་ནས་དད་པ་དང་ལྡན་པ་ཇི་སྙེད་ཅིག་ཡོད། དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་
ཏོ༑ ༑བཅོམ་ལྡན་འདས། འཛམ་བུའི་གླིང་གི་མི་དེ་དག་ལས་གང་དག་སངས་རྒྱས་ལ་རྟོགས་ནས་དད་པ་དང་ལྡན་པ་དང༌། གང་དག་ཆོས་ལ་རྟོགས་ནས་དད་པ་དང་ལྡན་པ་དང༌། གང་དག་དགེ་
འདུན་ལ་རྟོགས་ནས་དད་པ་དང་ལྡན་པ་ནི། ཉུང་ངོ༌། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ།
དེ་དེ་བཞིན་ནོ། དེ་དེ་བཞིན་ཏེ། འཛམ་བུའི་གླིང་གི་མི་དེ་དག་ལས་གང་དག་སངས་རྒྱས་ལ་རྟོགས་ནས་དད་པ་དང་ལྡན་པ་དང༌། གང་དག་ཆོས་ལ་རྟོགས་ནས་དད་པ་དང་ལྡན་པ་དང༌། གང་དག་
དགེ་འདུན་ལ་རྟོགས་ནས་དད་པ་དང་ལྡན་པ་དེ་ལྟ་བུ་ནི། ཉུང་ངོ༌། །ཀཽ་ཤི་ཀ །གང་དག་རྒྱུན་དུ་ཞུགས་པའི་འབྲས་བུ་ཐོབ་པ་ནི། ཉུང་བ་དེ་དག་པས་ཀྱང་ཆེས་ཉུང་ངོ༌། །གང་དག་ལན་
ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བའི་འབྲས་བུ་ཐོབ་པ་ནི། ཉུང་བ་དེ་དག་པས་ཀྱང་ཆེས་ཉུང་ངོ༌། །གང་དག་དགྲ་བཅོམ་པ་ཉིད་ཐོབ་པ་ནི། ཉུང་བ་དེ་དག་པས་ཀྱང་
ཆེས་ཉུང་ངོ༌། །གང་དག་རང་བྱང་ཆུབ་མངོན་དུ་བྱེད་པ་ནི། ཉུང་བ་དེ་དག་པས་ཀྱང་ཆེས་ཉུང་ངོ༌། །གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་
ནི༑ ཉུང་བ་དེ་དག་པས་ཀྱང་ཆེས་ཉུང་ངོ༌། །གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་སེམས་བསྐྱེད་པ་དེ་རབ་ཏུ་རྒྱས་པར་བྱེད་པ་དེ་ནི། ཉུང་
༄༅། །བ་དེ་དག་པས་ཀྱང་ཆེས་ཉུང་ངོ༌། །གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་སེམས་བསྐྱེད་པ་རྒྱས་པར་བྱས་ནས་
བརྩོན་འགྲུས་བརྩམས་ཤིང་གནས་པ་དེ་ནི། ཉུང་བ་དེ་དག་པས་ཀྱང་ཆེས་ཉུང་ངོ༌། །གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་དེ་ནི། ཉུང་བ་དེ་དག་པས་
ཀྱང་ཆེས་ཉུང་ངོ༌། །གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ནི། ཉུང་བ་དེ་དག་པས་ཀྱང་ཆེས་ཉུང་ངོ༌། །གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་འབད་དེ་
ཕྱིར་མི་ལྡོག་པའི་བྱང་ཆུབ་སེམས་དཔའི་ས་ལ་གནས་པ་ནི། ཉུང་བ་དེ་དག་པས་ཀྱང་ཆེས་ཉུང་ངོ༌། །གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་འབད་དེ་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ནི། ཉུང་བ་དེ་དག་པས་ཀྱང་ཆེས་ཉུང་ངོ༌། །གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་
ཅིང་འབད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེ་དག་ནི། ཉུང་བ་དེ་དག་པས་ཀྱང་ཆེས་ཉུང་ངོ༌། །ཀཽ་ཤི་ཀ །བྱང་ཆུབ་སེམས་
དཔའ་སེམས་དཔའ་ཆེན་པོ་གང་དག་ཕྱིར་མི་ལྡོག་པའི་བྱང་ཆུབ་སེམས་དཔའི་ས་ལ་གནས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
རྒྱས་ནས་རིགས་ཀྱི་བུའམ་རིགས་ཀྱི་བུ་མོ་ལྷག་པའི་བསམ་པ་ཕུན་སུམ་ཚོགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་ཅིང་འབད་པ་གཞན་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་
ཉེ་བར་སྟོན་ཅིང་ལུང་འབོགས་པ་དང༌། དེ་དག་ལ་ཡང་འཛིན་དུ་འཇུག་པ་དང༌། འཆད་དུ་འཇུག་པ་དང༌། ཀློག་ཏུ་འཇུག་པ་དང༌། ཀུན་ཆུབ་པར་བྱེད་དུ་འཇུག་པ་དང༌། རབ་ཏུ་འདོན་དུ་
འཇུག་པ་དང༌། སྟོན་དུ་འཇུག་པ་དང༌། ཉེ་བར་སྟོན་དུ་འཇུག་པ་དང༌། ལུང་འབོགས་སུ་འཇུག་པ་དང༌། ཁ་ཏོན་བྱེད་དུ་འཇུག་པ་དེ་དང༌། དེ་དག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་དེ་
ལ་ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་དང༌། ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་དང༌།
ལྷའི་དྲིལ་བུ་དང༌། ལྷའི་བ་དན་དག་དང༌། ཁོ་ར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷའི་མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད།
རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་པ་དག་ཡིན་ནོ། །ཀཽ་ཤི་ཀ །ཡང་གང་དག་བྱང་ཆུབ་ཀྱི་སེམས་བསྐྱེད་པ་དང༌། བྱང་ཆུབ་ཀྱི་སེམས་བསྐྱེད་ནས་བྱང་
ཆུབ་ཀྱི་སེམས་རྒྱས་པར་བྱེད་ཅིང་བྱང་ཆུབ་ཀྱི་སེམས་རབ་ཏུ་རྒྱས་པར་བྱས་ཏེ་བྱང་ཆུབ་ཏུ་སྤྱོད་པའི་སེམས་ཅན་དག་ནི། གཞལ་དུ་མེད་པ་གྲངས་མེད་པར་ཡོད་མོད་ཀྱི། ཀཽ་ཤི་ཀ །ཡང་
༄༅། །སེམས་ཅན་གཞལ་དུ་མེད་པ་གྲངས་མེད་པ་བྱང་ཆུབ་ཀྱི་ཕྱིར་སྤྱོད་པ་དེ་དག་ལས་གལ་ཏེ་ན་གཅིག་གམ། གཉིས་ཤིག་ཕྱིར་མི་ལྡོག་པའི་བྱང་ཆུབ་
སེམས་དཔའི་ས་ལ་གནས་པར་འགྱུར་རོ། །དེ་ཅིའི་ཕྱིར་ཞེ་ན། ཀཽ་ཤི་ཀ །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི། བརྩོན་འགྲུས་ཞན་པ་དང་ལེ་ལོ་ཅན་དང༌། སེམས་པ་
དམན་པ་དང༌། སེམས་དམན་པ་དང༌། འདུ་ཤེས་དམན་པ་དང༌། མོས་པ་དམན་པ་དང༌། ཤེས་རབ་དམན་པ་རྣམས་ཀྱིས་བསྒྲུབ་པར་དཀའོ། །ཀཽ་ཤི་ཀ །དེ་བས་ན། དེ་ལྟར་
རིགས་ཀྱི་བུའམ་རིགས་ཀྱི་བུ་མོ་གང་མྱུར་དུ་བདེ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་རྒྱུན་མི་ཆད་པར་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་པར་བྱའོ། །གཟུང་བར་བྱའོ། །བཅང་བར་བྱའོ། །བཀླག་པར་བྱའོ། །ཀུན་ཆུབ་པར་བྱའོ། །རབ་ཏུ་གདོན་པར་བྱའོ། །བསྟན་པར་བྱའོ། །
ཉེ་བར་བསྟན་པར་བྱའོ། །ལུང་འབོགས་པར་བྱའོ། །ཁ་ཏོན་དུ་བྱའོ། །ཡོངས་སུ་དྲི་བར་བྱའོ། །དེ་ཅིའི་ཕྱིར་ཞེ་ན། ཀཽ་ཤི་ཀ །འདི་ལྟར་རིགས་ཀྱི་བུའམ་རིགས་ཀྱི་བུ་མོ་དེ་དག་
འདི་སྙམ་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་
པ་འདི་ལ་བསླབས་པས། བདག་ཅག་གིས་ཀྱང་འདི་ལ་བསླབ་པར་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བདག་ཅག་གི་སྟོན་པའོ། །ཞེས་ཤེས་ཏེ། ཀཽ་ཤི་ཀ །དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞུགས་ཀྱང་རུང༌། ཡོངས་སུ་མྱ་ངན་ལས་འདས་ཀྱང་རུང་སྟེ། བྱང་ཆུབ་སེམས་དཔའ་སེམས་དཔའ་ཆེན་
པོས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་པར་བྱའོ། །ཀཽ་ཤི་ཀ །དེ་བས་ན། དེ་ལྟར་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པ་མཆོད་པའི་ཕྱིར་རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དེ་བཞིན་གཤེགས་པའི་རིང་བསྲེལ་
གྱི་སྙིང་པོ་ཅན་བྱེ་བ་དུ་མ་བྱེད་དུ་བཅུག་སྟེ། བྱས་ནས་ཀྱང་དེས་དེ་ལ་ནམ་འཚོ་བའི་བར་དུ་ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་
དང༌། ལྷའི་ཕྱེ་མ་དང༌། ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌། ལྷའི་བ་དན་དག་དང༌། ཁོར་ཡུག་ཏུ་ལྷའི་མར་མེའི་ཕྲེང་བ་དག་དང༌།
ལྷའི་མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །དེ་ཇི་
༄༅། །སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས།
མང་ངོ༌། བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་བསོད་ནམས་ཆེས་མང་དུ་བསྐྱེད་
དེ༑ གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོག་ཅིང་མོས་ལ་སེམས་དང་བས་བྱང་ཆུབ་ཏུ་སེམས་བསྐྱེད་ནས་ལྷག་པའི་བསམ་པས་ཉན་པ་དང༌། འཛིན་པ་
དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། གཞན་
དག་ལའང་རྒྱ་ཆེར་ཡང་དག་པར་སྟོན་པ་དང༌། འདིའི་དོན་རྣམ་པར་འགྲེལ་པ་དང༌། ཡིད་ཀྱིས་རྗེས་སུ་རྟོག་པ་དང༌། ཇི་ལྟ་བུར་གྲུབ་པའི་ཤེས་རབ་ཀྱིས་འདིར་ཡོངས་སུ་དཔྱོད་པར་
བྱེད་པ་དང༌། སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག །དམ་པའི་ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་རིང་དུ་གནས་པར་བྱ་བ་དང༌། ཚུལ་དང་མ་བྲལ་
བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་བསྒྲུབ་པ་བྱས་པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་བྱས་ཏེ་འཆང་ངམ་བཞག་ལ།
ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་
དན་དག་དང༌། ཁོར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད།
རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་འདི་ཉིད་དེ་བས་ཆེས་བསོད་ནམས་ཀྱི་ཕུང་པོ་མང་དུ་བསྐྱེད་དོ། །ཀཽ་ཤི་ཀ །རིན་པོ་ཆེ་སྣ་བདུན་གྱི་རང་
བཞིན་གྱི་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་བྱེ་བ་དུ་མ་ལྟ་ཞོག །ཀཽ་ཤི་ཀ །ཡང་རིགས་ཀྱི་བུའམ་རིགས་ཀྱི་བུ་མོ་གང་ལ་ལས་འཛམ་བུའི་གླིང་འདི་ཀུན་ཏུ་
རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་གྱིས་ཡོངས་སུ་གང་བར་བྱེད་དུ་བཅུག་སྟེ། བྱས་ནས་ཀྱང་དེ་དག་ལ་ནམ་འཚོ་བའི་
བར་དུ་ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་དང༌། ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་
དང༌། ལྷའི་དྲིལ་བུ་དང༌། ལྷའི་བ་དན་དག་དང༌། ཁོ་ར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷའི་མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་
༄༅། །བྱེད༑ རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་
དེའི་གཞི་ལས་བསོད་ནམས་མང་དུ་སྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་
སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདིས་བསོད་ནམས་ཆེས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོག་
ཅིང་མོས་ལ་སེམས་དང་བས་བྱང་ཆུབ་ཏུ་སེམས་བསྐྱེད་ནས་ལྷག་པའི་བསམ་པས་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌།
རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། གཞན་དག་ལའང་རྒྱ་ཆེར་ཡང་དག་པར་སྟོན་པ་དང༌། འདིའི་དོན་
རྣམ་པར་འགྲེལ་བ་དང༌། ཡིད་ཀྱིས་རྗེས་སུ་རྟོག་པ་དང༌། ཇི་ལྟ་བུར་གྲུབ་བའི་ཤེས་རབ་ཀྱིས་འདིར་ཡོངས་སུ་དཔྱོད་པར་བྱེད་པ་དང༌། སངས་རྒྱས་ཀྱི་ཚུལ་རྒྱུན་ཆད་པར་མ་
གྱུར་ཅིག །དམ་པའི་ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་རིང་དུ་གནས་པར་བྱ་བ་དང༌། ཚུལ་དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ལ་ཕན་གདགས་པ་སྒྲུབ་པ་བྱས་པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་བྱས་ཏེ་འཆང་ངམ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་
པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོ་ར་ཡུག་ཏུ་མར་མེའི་ཕྲེང་བ་དག་དང༌།
མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །རིགས་
ཀྱི་བུའམ་རིགས་ཀྱི་བུ་མོ་འདི་ཉིད་དེ་བས་ཆེས་བསོད་ནམས་མང་དུ་སྐྱེད་དོ། །ཀཽ་ཤི་ཀ །འཛམ་བུའི་གླིང་འདི་རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དེ་བཞིན་གཤེགས་པའི་རིང་
བསྲེལ་གྱི་སྙིང་པོ་ཅན་རྣམས་ཀྱིས་ཡོངས་སུ་གང་བ་ལྟ་ཞོག །ཀཽ་ཤི་ཀ །ཡང་གལ་ཏེ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ལས་
སེམས་ཅན་རེ་རེས་རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་རེ་རེ་བྱེད་དུ་བཅུག་སྟེ། དེ་དག་ལ་ནམ་འཚོ་བའི་བར་དུ་ལྷའི་མེ་ཏོག་
དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་དང༌། ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌།
༄༅། །ལྷའི་བ་དན་དག་དང༌། ཁོ་ར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷའི་མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་
བྱེད༑ རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་སེམས་ཅན་དེ་དག་ཐམས་ཅད་དེའི་གཞི་ལས་བསོད་ནམས་མང་དུ་བསྐྱེད་
དམ༑ བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་
རིགས་ཀྱི་བུ་མོ་འདིས་བསོད་ནམས་ཆེས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོག་ཅིང་མོས་ལ་སེམས་དང་བས་བྱང་ཆུབ་ཏུ་སེམས་བསྐྱེད་
ནས་ལྷག་པའི་བསམ་པས་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་
འབོགས་པ་དང༌། ཁ་ཏོན་བྱེད་པ་དང༌། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དང༌། འདིའི་དོན་རྣམ་པར་འགྲེལ་པ་དང༌། ཡིད་ཀྱིས་རྗེས་སུ་རྟོག་པ་དང༌། ཇི་ལྟ་བུར་
གྲུབ་པའི་ཤེས་རབ་ཀྱིས་འདིར་ཡོངས་སུ་དཔྱོད་པར་བྱེད་པ་དང༌། སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག །དམ་པའི་ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་རིང་
དུ་གནས་པར་བྱ་བ་དང༌། ཚུལ་དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་བསྒྲུབ་པ་བྱས་པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་
བྱས་ཏེ་འཆང་ངམ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌།
རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོ་ར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད་
རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་འདི་ཉིད་དེའི་གཞི་ལས་བསོད་ནམས་ཆེས་མང་དུ་བསྐྱེད་དོ། །ཀཽ་
ཤི་ཀ །གླིང་ཆེན་པོ་བཞི་པའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལྟ་ཞོག །ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་ཡོད་པ་དེ་དག་
ཐམས་ཅད་ལས་སེམས་ཅན་རེ་རེས་རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་རེ་རེ་བྱེད་དུ་བཅུག་སྟེ། དེ་དག་ལ་ནམ་འཚོ་
བའི་བར་དུ་ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་དང༌། ལྷའི་ན་བཟའ་དང་ལྷའི་གདུགས་དང༌། ལྷའི་རྒྱལ་
༄༅། །མཚན་དང༌། ལྷའི་དྲིལ་བུ་དང༌། ལྷའི་བ་དན་དག་དང༌། ཁོར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷའི་མཆོད་པ་རྣམ་པ་མང་པོ་དག་གིས་མཆོད་
པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་སེམས་ཅན་དེ་དག་ཐམས་
ཅད་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་
པ༑ ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོག་ཅིང་མོས་
ལ༑ སེམས་དང་བས་བྱང་ཆུབ་ཏུ་སེམས་བསྐྱེད་ནས་ལྷག་བའི་བསམ་པས་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་
པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། གཞན་དག་ལའང་རྒྱ་ཆེར་ཡང་དག་པར་རབ་ཏུ་སྟོན་པ་དང༌། འདིའི་དོན་རྣམ་པར་འགྲེལ་
པ་དང༌། ཡིད་ཀྱིས་རྗེས་སུ་རྟོག་པ་དང༌། ཇི་ལྟ་བུར་གྲུབ་པའི་ཤེས་རབ་ཀྱིས་འདིར་ཡོངས་སུ་དཔྱོད་པར་བྱེད་པ་དང༌། སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག །དམ་པའི་
ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་རིང་དུ་གནས་པར་བྱ་བ་དང༌། ཚུལ་དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་བསྒྲུབ་
པ་བྱས་པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་བྱས་ཏེ་འཆང་ངམ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། ཕྱུག་
པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོ་ར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་
མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་འདི་ཉིད་
དེའི་གཞི་ལས་བསོད་ནམས་ཆེས་མང་དུ་བསྐྱེད་དོ། །ཀཽ་ཤི་ཀ །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལྟ་ཞོག །ཀཽ་ཤི་ཀ །ཡང་སྟོང་གཉིས་པ་བར་
མའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཅིག་ཡོད་པ་དེ་དག་ཐམས་ཅད་ལས་སེམས་ཅན་རེ་རེས་རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དེ་བཞིན་གཤེགས་པའི་རིང་
བསྲེལ་གྱི་སྙིང་པོ་ཅན་རེ་རེ་བྱེད་དུ་བཅུག་སྟེ། དེ་དག་ལ་ནམ་འཚོ་བའི་བར་དུ་ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་
༄༅། །མ་དང༌། ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌། ལྷའི་བ་དང་དག་དང༌། ཁོ་ར་ཡུག་ཏུ་ལྷའི་མར་མེའི་ཕྲེང་བ་
དག་དང༌། ལྷའི་མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་
ཀ །དེ་ཇི་སྙམ་དུ་སེམས། ཅི་སེམས་ཅན་དེ་དག་ཐམས་ཅད་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། བདེ་
བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདིས་བསོད་ནམས་ཆེས་མང་དུ་བསྐྱེད་དེ། གང་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོག་ཅིང་མོས་ལ་སེམས་དང་བས་བྱང་ཆུབ་ཏུ་སེམས་བསྐྱེད་ནས་ལྷག་པའི་བསམ་པས་ཉན་པ་དང༌། འཛིན་པ་དང༌། འཆང་
བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། གཞན་དག་ལའང་རྒྱ་
ཆེར་ཡང་དག་པར་སྟོན་པ་དང༌། འདིའི་དོན་རྣམ་པར་འགྲེལ་བ་དང༌། ཡིད་ཀྱིས་རྗེས་སུ་རྟོག་པ་དང༌། ཇི་ལྟ་བུར་གྲུབ་པའི་ཤེས་རབ་ཀྱིས་འདིར་ཡོངས་སུ་དཔྱོད་པར་བྱེད་པ་
དང༌། སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག །དམ་པའི་ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་རིང་དུ་གནས་པར་བྱ་བ་དང༌། ཚུལ་དང་མ་བྲལ་བས་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་བསྒྲུབ་པ་བྱས་པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་བྱས་ཏེ་འཆང་ངམ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་
དེ་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོ་ར་ཡུག་ཏུ་
མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་
བྱེད་ན༑ ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་འདི་ཉིད་དེའི་གཞི་ལས་བསོད་ནམས་ཆེས་མང་དུ་བསྐྱེད་དོ། །ཀཽ་ཤི་ཀ །སྟོང་གཉིས་པ་བར་མའི་འཇིག་རྟེན་གྱི་ཁམས་ཀྱི་སེམས་
ཅན་ཐམས་ཅད་ལྟ་ཞོག །ཀཽ་ཤི་ཀ །ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ལས་སེམས་ཅན་དེ་དག་རེ་རེས་རིན་པོ་
ཆེ་སྣ་བདུན་གྱི་རང་བཞིན་གྱི་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་རེ་རེ་བྱེད་དུ་བཅུག་སྟེ། དེ་དག་ལ་ནམ་འཚོ་བའི་བར་དུ་ལྷའི་མེ་ཏོག་དང༌། ལྷའི་བདུག་
༄༅། །པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་དང༌། ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་
དྲིལ་བུ་དང༌། ལྷའི་བ་དན་དག་དང༌། ཁོ་ར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷའི་མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད།
རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་སེམས་ཅན་དེ་དག་ཐམས་ཅད་དེའི་གཞི་ལས་བསོད་ནམས་ཆེས་མང་དུ་
བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་
ཀྱི་བུའམ་རིགས་ཀྱི་བུ་མོ་འདིས་བསོད་ནམས་ཆེས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོག་ཅིང་མོས་ལ་སེམས་དང་བས་བྱང་ཆུབ་ཏུ་
སེམས་བསྐྱེད་ནས་ལྷག་པའི་བསམ་པས་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་
པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། གཞན་དག་ལའང་རྒྱ་ཆེར་ཡང་དག་པར་སྟོན་པ་དང༌། འདིའི་དོན་རྣམ་པར་འགྲེལ་བ་དང༌། ཡིད་ཀྱིས་རྗེས་སུ་རྟོག་པ་དང༌།
ཇི་ལྟ་བུར་གྲུབ་པའི་ཤེས་རབ་ཀྱིས་འདིར་ཡོངས་སུ་དཔྱོད་པར་བྱེད་པ་དང༌། སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག །དམ་པའི་ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་རིང་
དུ་གནས་པར་བྱ་བ་དང༌། ཚུལ་དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་བསྒྲུབ་པ་བྱས་པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་
བྱས་ཏེ་འཆང་ངམ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་
མཚན་དང༌། དྲིལ་བུ་དང༌། བ་དན་དག་དང༌། ཁོ་ར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་
བྱེད༑ མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་འདི་ཉིད་དེའི་གཞི་ལས་བསོད་ནམས་ཆེས་མང་དུ་བསྐྱེད་དོ། །ཀཽ་ཤི་ཀ །སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་རྣམས་རེ་རེས་རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་རེ་རེ་
བྱེད་དུ་བཅུག་སྟེ། དེ་དག་ལ་ནམ་འཚོ་བའི་བར་དུ་ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་དང༌། ལྷའི་ན་བཟའ་དང༌།
༄༅། །ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌། ལྷའི་བ་དན་དག་དང༌། ཁོ་ར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷའི་མཆོད་པ་
རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་པ་ལྟ་ཞོག །ཀཽ་ཤི་ཀ །ཡང་གལ་ཏེ་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གང་སུ་དག་ཡོད་པ་དེ་དག་ཐམས་ཅད་ཡོངས་སུ་བརྟག་བཟུང་སྟེ། སྔ་ཕྱི་མེད་པར་མིའི་ལུས་ཐོབ་པར་གྱུར་
ལ་དེ་དག་ལས་ཀྱང་སེམས་ཅན་རེ་རེས་རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་རེ་རེ་བྱེད་དུ་བཅུག་སྟེ། བྱེད་དུ་བཅུག་
ནས་ཀྱང་སེམས་ཅན་རེ་རེས་ཀྱང་མཆོད་རྟེན་དེ་དག་ཐམས་ཅད་བཞག་སྟེ། བསྐལ་པའམ་བསྐལ་པ་བས་ལྷག་པར་སིལ་སྙན་ཐམས་ཅད་དང༌། གླུ་དབྱངས་ཐམས་ཅད་དང༌།
གར་ཐམས་ཅད་དང༌། རོལ་མོ་དང༌། ཕེག་རྡོབ་པ་ཐམས་ཅད་དང༌། ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་དང༌།
ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌། ལྷའི་བ་དན་ཐམས་ཅད་དང༌། ཁོ་ར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷ་དང༌། མི་
རྣམས་ཀྱི་མཆོད་པ་རྣམ་པ་མང་པོ་དེ་དག་ཐམས་ཅད་ཀྱིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད་བསྙེན་བཀུར་བྱེད་ལ། སེམས་
ཅན་དེ་དག་ཐམས་ཅད་ཀྱིས་དེ་ལྟ་བུའི་ངོ་བོ་ཉིད་ཀྱི་བསོད་ནམས་བྱ་བ་དེས་མཆོད་རྟེན་གཞལ་དུ་མེད་པ་གྲངས་མེད་པ་དག་བྱེད་དུ་བཅུག་ལ། དེ་ལྟ་བུའི་ངོ་བོའི་མཆོད་པ་དག་ཀྱང་བྱེད་དུ་
བཅུག་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་སེམས་ཅན་དེ་དག་ཐམས་ཅད་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་
ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདིས་བསོད་ནམས་ཆེས་མང་དུ་བསྐྱེད་དེ།
གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོག་ཅིང་མོས་ལ། སེམས་དང་བས་བྱང་ཆུབ་ཏུ་སེམས་བསྐྱེད་ནས་ལྷག་པའི་བསམ་པས་ཉན་པ་དང༌། འཛིན་པ་དང་
འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་སྟོན་བྱེད་པ་དང༌། གཞན་དག་ལའང་
རྒྱ་ཆེར་ཡང་དག་པར་སྟོན་པ་དང༌། འདིའི་དོན་རྣམ་པར་འགྲེལ་པ་དང༌། ཡིད་ཀྱིས་རྗེས་སུ་རྟོག་པ་དང༌། ཇི་ལྟ་བུར་གྲུབ་པའི་ཤེས་རབ་ཀྱིས་འདིར་ཡོངས་སུ་དཔྱོད་པར་བྱེད་པ་དང༌། སངས་
༄༅། །རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག །དམ་པའི་ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་རིང་དུ་གནས་པར་བྱ་བ་དང༌། ཚུལ་དང་མ་བྲལ་
བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་བསྒྲུབ་པ་བྱས་པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་བྱས་ཏེ་འཆང་ངམ་བཞག་ལ། ཤེས་
རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌།
བ་དན་དག་དང༌། ཁོ་ར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་མཆོད་པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་
པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་འདི་ཉིད་དེའི་གཞི་ལས་བསོད་ནམས་ཆེས་མང་དུ་བསྐྱེད་དོ། །དེ་སྐད་ཅེས་བཀའ་སྩལ་
པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་དེ་བཞིན་ནོ། །བདེ་བར་གཤེགས་པ། དེ་དེ་བཞིན་ཏེ།
བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བཀུར་སྟིར་བགྱིད་པ་དང༌། བླ་མར་བགྱིད་པ་དང༌། རྗེད་པར་བགྱིད་པ་དང༌། མཆོད་པར་བགྱིད་པ་དང༌། རི་མོར་བགྱིད་པ་
དང༌། བསྙེན་བཀུར་བགྱིད་པའི་རིགས་ཀྱི་བུའམ་རིགས་ཀྱི་བུ་མོ་དེས་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་སངས་རྒྱས་རྣམས་ཀྱིས་སངས་
རྒྱས་ཀྱི་ཡེ་ཤེས་ཀྱིས་ཡོངས་སུ་མཁྱེན་པའི་འཇིག་རྟེན་གྱི་ཁམས་ཐམས་ཅད་ན་བཞུགས་པ་རྣམས་ལ་ཤིན་ཏུ་བཀུར་སྟིར་བགྱིས་པ་དང༌། བླ་མར་བགྱིས་པ་དང༌། རྗེད་པར་བགྱིས་པ་
དང༌། མཆོད་པར་བགྱིས་པ་དང༌། རི་མོར་བགྱིས་པ་དང༌། བསྙེན་བཀུར་བགྱིས་པར་འགྱུར་རོ། །བཅོམ་ལྡན་འདས། རྣམ་གྲངས་འདིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་ཀྱི་སེམས་ཅན་ཐམས་ཅད་ལྟ་ཞོག །བཅོམ་ལྡན་འདས། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ན་སེམས་ཅན་གང་ཇི་སྙེད་མཆིས་
པ་དེ་དག་ཐམས་ཅད་ཀྱིས་ཀྱང་སེམས་ཅན་རེ་རེས་རིན་པོ་ཆེ་སྣ་བདུན་གྱི་རང་བཞིན་གྱི་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་རེ་རེ་བགྱིད་དུ་སྩལ་ལ། བགྱིད་
དུ་སྩལ་ནས་ཀྱང་སེམས་ཅན་དེ་དག་རེ་རེས་མཆོད་རྟེན་དེ་དག་ཐམས་ཅད་བཞག་སྟེ། བསྐལ་པའམ་བསྐལ་པ་བས་ལྷག་པར་སིལ་སྙན་ཐམས་ཅད་དང༌། གླུ་དབྱངས་ཐམས་ཅད་དང༌།
གར་ཐམས་ཅད་དང༌། རོལ་མོ་དང༌། ཕེག་རྡོབ་པ་ཐམས་ཅད་དང༌། ལྷའི་མེ་ཏོག་ཐམས་ཅད་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་
༄༅། །དང༌། ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌། ལྷའི་བ་དན་ཐམས་ཅད་དང༌། ཁོ་ར་ཡུག་ཏུ་ལྷའི་མར་མེའི་
ཕྲེང་བ་དག་དང༌། ལྷའི་མཆོད་པ་རྣམ་པ་མང་པོ་དག་ཐམས་ཅད་ཀྱིས་མཆོད་པར་བྱེད་དེ། བཀུར་སྟིར་བགྱིད། བླ་མར་བགྱིད། རྗེད་པར་བགྱིད། མཆོད་པར་བགྱིད། རི་མོར་བགྱིད་
བསྙེན་བཀུར་བགྱིད་པ་བས། བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་འདིས་བསོད་ནམས་ཆེས་མང་དུ་བསྐྱེད་དེ། །གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་
པར་དད་དེ་རྟོག་ཅིང་མོས་ལ། སེམས་དང་བས་བྱང་ཆུབ་ཏུ་སེམས་བསྐྱེད་ནས་ལྷག་པའི་བསམ་པས་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་
བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པ་དང༌། གཞན་དག་ལའང་རྒྱ་ཆེར་ཡང་དག་པར་སྟོན་པ་དང༌། འདིའི་
དོན་རྣམ་པར་འགྲེལ་བ་དང༌། ཡིད་ཀྱིས་རྗེས་སུ་རྟོག་པ་དང༌། ཇི་ལྟ་བུར་གྲུབ་པའི་ཤེས་རབ་ཀྱིས་འདིར་ཡོངས་སུ་དཔྱོད་པར་བགྱིད་པ་དང༌། སངས་རྒྱས་ཀྱི་ཚུལ་རྒྱུན་ཆད་པར་མ་
གྱུར་ཅིག །དམ་པའི་ཆོས་ནུབ་པར་མ་གྱུར་ཅིག་ཅེས་།དམ་པའི་ཆོས་ཡུན་རིང་དུ་གནས་པར་བགྱི་བ་དང༌། ཚུལ་དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ལ་ཕན་གདགས་པ་བསྒྲུབ་པ་བགྱིས་པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་བགྱིས་ཏེ་འཆང་ངམ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་པ་དང༌།
དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་
པ་མང་པོ་དག་གིས་མཆོད་པར་བྱེད་དེ། བཀུར་སྟིར་བགྱིད། བླ་མར་བགྱིད། རྗེད་པར་བགྱིད། མཆོད་པར་བགྱིད། རི་མོར་བགྱིད། བསྙེན་བཀུར་བགྱིད་ན། བཅོམ་ལྡན་འདས། རིགས་
ཀྱི་བུའམ་རིགས་ཀྱི་བུ་མོ་འདི་ཉིད་དེ་བས་བསོད་ནམས་ཆེས་མང་དུ་བསྐྱེད་དོ། །དེ་ནས་བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་
ཀ །དེ་དེ་བཞིན་ནོ། །དེ་དེ་བཞིན་ཏེ། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་ནི། དེའི་གཞི་ལས་བསོད་ནམས་མང་པོ་བསྐྱེད་དོ། །ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་དེའི་
གཞི་ལས་བསོད་ནམས་གཞལ་དུ་མེད་པ་བསྐྱེད་དོ། །ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་གྲངས་མེད་པ་བསྐྱེད་དོ། །ཀཽ་ཤི་ཀ །རིགས་ཀྱི་བུའམ་
རིགས་ཀྱི་བུ་མོ་དེ་དེའི་གཞི་ལས་བསོད་ནམས་བསམ་གྱིས་མི་ཁྱབ་པ་བསྐྱེད་དོ། །ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མཉམ་པ་མེད་པ་བསྐྱེད་དོ། །
༄༅། །ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་ཚད་མེད་པ་བསྐྱེད་དོ། །དེ་ཅིའི་ཕྱིར་ཞེ་ན། ཀཽ་ཤི་ཀ །དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐམས་ཅད་མཁྱེན་པ་ཉིད་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལས་སྐྱེས་ཤིང༌། དེ་བཞིན་གཤེགས་པའི་སྐུ་ལ་མཆོད་པའང་
ཐམས་ཅད་མཁྱེན་པ་ཉིད་ལས་སྐྱེས་སོ། །ཀཽ་ཤི་ཀ །དེ་ལྟ་བས་ན། དེ་ལྟར་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོག་ཅིང་
མོས་ལ་སེམས་དང་བས་བྱང་ཆུབ་ཏུ་སེམས་བསྐྱེད་ནས་ལྷག་པའི་བསམ་པས་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་
པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། གཞན་དག་ལའང་རྒྱ་ཆེར་ཡང་དག་པར་སྟོན་པ་དང༌། འདིའི་དོན་རྣམ་པར་འགྲེལ་བ་དང༌།
ཡིད་ཀྱིས་རྗེས་སུ་རྟོག་པ་དང༌། ཇི་ལྟ་བུར་གྲུབ་པའི་ཤེས་རབ་ཀྱིས་འདིར་ཡོངས་སུ་དཔྱོད་པར་བྱེད་པ་དང༌། སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག །དམ་པའི་ཆོས་ནུབ་པར་
མ་གྱུར་ཅིག །ཅེས་དམ་པའི་ཆོས་ཡུན་རིང་དུ་གནས་པར་བྱ་བ་དང༌། ཚུལ་དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་བསྒྲུབ་པ་བྱས་
པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་བྱས་ཏེ་འཆང་ངམ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌།
ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོ་ར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་ཀྱང་མཆོད་པར་
བྱེད་དེ༑ བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །བསོད་ནམས་མངོན་པར་འདུ་བྱེད་པ་དེ་ལ་རིན་པོ་ཆེ་སྣ་
བདུན་གྱི་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་ལ་བཀུར་སྟིར་བྱས་པའི་བསོད་ནམས་མངོན་པར་འདུ་བྱས་པ་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ། སྟོང་གི་
ཆར་ཡང༌། བརྒྱ་སྟོང་གི་ཆར་ཡང༌། བྱེ་བའི་ཆར་ཡང༌། བྱེ་བ་བརྒྱའི་ཆར་ཡང༌། བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་
མི་འགྲོའོ། གྲངས་སུའང་ཉེ་བར་མི་འགྲོའོ། །ཆར་ཡང༌། བགྲང་བར་ཡང༌། དཔེར་ཡང༌། དཔེས་བསྟན་པར་བྱ་བར་ཡང༌། རྟེན་དུ་ཡང༌། རྒྱུར་ཡང་མི་བཟོད་དོ། །དེ་ནས་ལྷའི་བུ་བཞི་
ཁྲི་གང་དག་ལྷ་རྣམས་ཀྱི་དབང་པོ་བརྒྱ་བྱིན་དང་བཅས་པ་འཁོར་དེར་འདུས་ཏེ་འཁོད་པར་གྱུར་པ་དེ་དག་གིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །གྲོགས་
༄༅། །པོ༑ ཤེས་རབ་ཀྱི་ཕ་རོལ་ཏུ་ཕྱིན་པ་ཟུངས་ཤིག །གྲོགས་པོ། ཤེས་རབ་ཀྱི་ཕ་རོལ་ཏུ་ཕྱིན་པ་གཟུང་བར་བྱ་བ་ཡིན་ནོ། །གྲོགས་པོ། ཤེས་རབ་ཀྱི་ཕ་རོལ་
ཏུ་ཕྱིན་པ་བཅང་པར་བྱ་བ་ཡིན་ནོ། །གྲོགས་པོ། ཤེས་རབ་ཀྱི་ཕ་རོལ་ཏུ་ཕྱིན་པ་བཀླག་པར་བྱ་བ་ཡིན་ནོ། །གྲོགས་པོ། ཤེས་རབ་ཀྱི་ཕ་རོལ་ཏུ་ཕྱིན་པ་ཀུན་ཆུབ་པར་བྱ་བ་ཡིན་
ནོ༑ ༑གྲོགས་པོ། ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་གདོན་པར་བྱ་བ་ཡིན་ནོ། །གྲོགས་པོ། ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པར་བྱ་བ་ཡིན་ནོ། །གྲོགས་པོ། ཤེས་རབ་
ཀྱི་ཕ་རོལ་ཏུ་ཕྱིན་པ་ཉེ་བར་བསྟན་པར་བྱ་བ་ཡིན་ནོ། །གྲོགས་པོ། ཤེས་རབ་ཀྱི་ཕ་རོལ་ཏུ་ཕྱིན་པ་ལུང་དཔོག་པར་བྱ་བ་ཡིན་ནོ། །གྲོགས་པོ། ཤེས་རབ་ཀྱི་ཕ་རོལ་ཏུ་ཕྱིན་པ་ཁ་
ཏོན་དུ་བྱ་བ་ཡིན་ནོ། །དེ་ནས་བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་
ཟུངས་ཤིག །ཀཽ་ཤི་ཀ །ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ཆོངས་ཤིག །ཀཽ་ཤི་ཀ །ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལྷོགས་ཤིག །ཀཽ་ཤི་ཀ །ཁྱོད་ཀྱིས་ཤེས་རབ་
ཀྱི་ཕ་རོལ་ཏུ་ཕྱིན་པ་ཀུན་ཆུབ་པར་གྱིས་ཤིག །ཀཽ་ཤི་ཀ །ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་ཐོན་ཅིག །ཀཽ་ཤི་ཀ །ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་ཅིག །
ཀཽ་ཤི་ཀ །ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ཉེ་བར་སྟོན་ཅིག །ཀཽ་ཤི་ཀ །ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལུང་ཕོག་ཅིག །ཀཽ་ཤི་ཀ །ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་
ཁ་ཏོན་དུ་བྱོས་ཤིག །དེ་ཅིའི་ཕྱིར་ཞེ་ན། ཀཽ་ཤི་ཀ །གང་གི་ཚེ་ལྷ་མ་ཡིན་རྣམས་འདི་ལྟ་བུར་སེམས་ཀྱི་རྒྱུ་བ་འབྱུང་སྟེ། འདི་སྙམ་དུ་སུམ་ཅུ་རྩ་གསུམ་པའི་ལྷ་རྣམས་དང་འཐབ་པར་བྱའོ། །
སུམ་ཅུ་རྩ་གསུམ་པའི་ལྷ་རྣམས་དང་ལྷན་ཅིག་ཏུ་གཡུལ་འགྱེད་པར་བྱའོ། །སྙམ་ན། དེའི་ཚེ་ཀཽ་ཤི་ཀ །ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་དྲན་པར་བྱོས་ཤིག །ཁ་ཏོན་དུ་
བྱོས་ཤིག་དང་ལྷ་མ་ཡིན་དེ་དག་གི་སེམས་ཀྱི་རྒྱུ་བ་དེ་ལྟ་བུ་དེ་དག་ཀྱང་ནུབ་པར་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་
གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། རིག་སྔགས་ཆེན་མོའོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་
ཕ་རོལ་ཏུ་ཕྱིན་པ་འདི་ནི། ཚད་མ་མེད་པའི་རིག་སྔགས་སོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་མེད་པའི་རིག་སྔགས་སོ། །བཅོམ་ལྡན་
འདས༑ འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། གོང་ན་མེད་པའི་རིག་སྔགས་སོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བླ་ན་མེད་པའི་
༄༅། །རིག་སྔགས་སོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཉམ་པ་མེད་པའི་རིག་སྔགས་སོ། །བཅོམ་ལྡན་འདས། འདི་ལྟ་སྟེ།
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མི་མཉམ་པ་དང་མཉམ་པའི་རིག་སྔགས་སོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་
སྐད་ཅེས་བཀའ་སྩལ་ཏོ། །ཀཽ་ཤི་ཀ །དེ་དེ་བཞིན་ནོ། །དེ་དེ་བཞིན་ཏེ། ཀཽ་ཤི་ཀ །འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། རིག་སྔགས་ཆེན་མོའོ། །ཀཽ་ཤི་ཀ །འདི་ལྟ་སྟེ་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་མ་མེད་པའི་རིག་སྔགས་སོ། །ཀཽ་ཤི་ཀ །འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚད་མེད་པའི་རིག་སྔགས་སོ། །ཀཽ་ཤི་ཀ །འདི་ལྟ་
སྟེ༑ ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། གོང་ན་མེད་པའི་རིག་སྔགས་སོ། །ཀཽ་ཤི་ཀ །འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བླ་ན་མེད་པའི་རིག་སྔགས་སོ། །ཀཽ་ཤི་ཀ །འདི་
ལྟ་སྟེ༑ ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མཉམ་པ་མེད་པའི་རིག་སྔགས་སོ། །ཀཽ་ཤི་ཀ །འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མི་མཉམ་པ་དང་མཉམ་པའི་རིག་
སྔགས་སོ། །དེ་ཅིའི་ཕྱིར་ཞེ་ན། ཀཽ་ཤི་ཀ །འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་རིག་སྔགས་འདི་ལ་བརྟེན་ནས་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀཽ་ཤི་ཀ །མ་འོངས་པའི་དུས་ན་འབྱུང་བའི་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ཇི་སྙེད་པ་དེ་སྙེད་ཀྱང་ཀཽ་ཤི་ཀ།
འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་རིག་སྔགས་འདི་ཉིད་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཀཽ་ཤི་ཀ།
ད་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཞལ་དུ་མེད་གྲངས་མེད་པ་ན་སངས་རྒྱས་བཅོམ་ལྡན་འདས་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་སངས་རྒྱས་པ་དེ་དག་ཀྱང་ཀཽ་ཤི་ཀ །འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་རིག་སྔགས་འདི་ཉིད་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་སོ། །ཀཽ་ཤི་ཀ །ང་ཡང་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་རིག་སྔགས་འདི་ཉིད་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་སོ། །ཀཽ་ཤི་ཀ །རིག་སྔགས་འདི་ཉིད་ལ་བརྟེན་ནས་དགེ་བ་བཅུའི་ལས་ཀྱི་ལམ་རྣམས་ཀྱང་འཇིག་རྟེན་དུ་རབ་ཏུ་འབྱེད་དོ། །བྱང་ཆུབ་ཀྱི་ཡན་ལག་དང་ལྡན་
༄༅། །པའི་བསམ་གཏན་བཞི་འཇིག་རྟེན་དུ་རབ་ཏུ་འབྱེད་དོ། །བྱང་ཆུབ་ཀྱི་ཡན་ལག་དང་ལྡན་པའི་ཚད་མེད་པ་བཞི་འཇིག་རྟེན་དུ་རབ་ཏུ་འབྱེད་དོ། །བྱང་ཆུབ་ཀྱི་ཡན་
ལག་དང་ལྡན་པའི་གཟུགས་མེད་པའི་སྙོམས་པར་འཇུག་པ་བཞི་འཇིག་རྟེན་དུ་རབ་ཏུ་འབྱེད་དོ། །བྱང་ཆུབ་ཀྱི་ཡན་ལག་དང་ལྡན་པའི་མངོན་པར་ཤེས་པ་དྲུག་རྣམས་འཇིག་རྟེན་དུ་
རབ་ཏུ་འབྱེད་དོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡང་འཇིག་རྟེན་དུ་རབ་ཏུ་འབྱེད་དོ། །མདོར་ན་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཡང་འཇིག་རྟེན་དུ་རབ་ཏུ་འབྱེད་དོ། །
སངས་རྒྱས་ཀྱི་ཡེ་ཤེས་དང༌། རང་བྱུང་གི་ཡེ་ཤེས་དང༌། བསམ་གྱིས་མི་ཁྱབ་པའི་ཡེ་ཤེས་ཀྱང་འཇིག་རྟེན་དུ་རབ་ཏུ་འབྱེད་དོ།། །།འཕགས་པ་ཤེས་རབ་ཀྱི་ཕ་རོལ་ཏུ་
ཕྱིན་པ་བརྒྱད་སྟོང་པ། བམ་པོ་བཞི་པ། ཀཽ་ཤི་ཀ །གང་གི་ཚེ་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་མི་འབྱུང་
བར་འགྱུར་བ་དེའི་ཚེ་ཡང་ཀཽ་ཤི་ཀ །འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་རིག་སྔགས་འདི་ཉིད་ལ་བརྟེན་ནས་ཀཽ་ཤི་ཀ །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་མཐུན་པ་སྔོན་ཐོས་པས་ཐབས་མཁས་པ་དང་ལྡན་པར་འགྱུར་རོ། །ཀཽ་ཤི་ཀ །སེམས་ཅན་རྣམས་ལ་རྗེས་སུ་བརྩེ་བ་དང་ལྡན་པ་དེ་དག་ཀྱང་རྗེས་སུ་
བརྩེ་བའི་ཕྱིར་འཇིག་རྟེན་འདི་ལ་བརྟེན་ཏེ་དགེ་བ་བཅུའི་ལས་ཀྱི་ལམ་།རྣམས་འཇིག་རྟེན་དུ་རབ་ཏུ་འབྱེད་དོ། །བྱང་ཆུབ་ཀྱི་ཡན་ལག་དང་མི་ལྡན་པའི་བསམ་གཏན་བཞི་འཇིག་རྟེན་དུ་རབ་ཏུ་
འབྱེད་དོ། །བྱང་ཆུབ་ཀྱི་ཡན་ལག་དང་མི་ལྡན་པའི་ཚད་མེད་པ་བཞི་འཇིག་རྟེན་དུ་རབ་ཏུ་འབྱེད་དོ། །བྱང་ཆུབ་ཀྱི་ཡན་ལག་དང་མི་ལྡན་པའི་གཟུགས་མེད་པའི་སྙོམས་པར་འཇུག་པ་བཞི་འཇིག་
རྟེན་དུ་རབ་ཏུ་འབྱེད་དོ། །བྱང་ཆུབ་ཀྱི་ཡན་ལག་དང་མི་ལྡན་པའི་མངོན་པར་ཤེས་པ་ལྔ་རྣམས་འཇིག་རྟེན་དུ་རབ་ཏུ་འབྱེད་དོ། །ཀཽ་ཤི་ཀ །འདི་ལྟ་སྟེ། དཔེར་ན། ཟླ་བའི་དཀྱིལ་འཁོར་ལ་
རྟེན་ནས་སྨན་དང༌། སྐར་མ་ཐམས་ཅད་སྟོབས་ཇི་ལྟ་བ་དང༌། མཐུ་ཇི་ལྟ་བར་ཀུན་ཏུ་སྣང་པར་བྱེད། རྒྱུ་སྐར་རྣམས་ཀྱང་སྟོབས་ཇི་ལྟ་བ་དང༌། མཐུ་ཇི་ལྟ་བ་བཞིན་དུ་སྣང་བར་བྱེད་དོ། །ཀཽ་
ཤི་ཀ །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདས་ནས་དམ་པའི་ཆོས་འཇིག་པར་གྱུར་པ་དང༌། དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་མ་བྱུང་བ་ན་ལ་ལ་ཆོས་སྤྱོད་པ་དང༌། མཚུངས་པར་སྤྱོད་པ་དང༌། ཞི་བར་སྤྱོད་པ་དང༌། དགེ་བར་སྤྱོད་པ་གང་དག་འཇིག་རྟེན་ན་
རབ་ཏུ་འདོགས་པ་དང༌། རབ་ཏུ་སྒོམ་པ་དེ་དག་ཐམས་ཅད་བྱང་ཆུབ་སེམས་དཔའ་ལས་སྐྱེས་ཤིང་བྱང་ཆུབ་སེམས་དཔས་རབ་ཏུ་ཕྱེ་སྟེ་བྱང་ཆུབ་སེམས་དཔའི་ཐབས་མཁས་པ་ལས་
༄༅། །འཇུག་ལ་བྱང་ཆུབ་སེམས་དཔའ་རྣམས་ཀྱི་ཐབས་མཁས་པ་དེའང་ཤེས་རབ་ཀྱི་ཕ་རོལ་ཏུ་ཕྱིན་པ་ལས་སྐྱེས་པར་རིག་པར་བྱའོ། །ཀཽ་ཤི་ཀ །གཞན་ཡང་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌།
ཁ་ཏོན་བྱེད་པ་དང༌། ཡི་གེར་འདྲི་བ་དང༌། ཡིད་ལ་བྱེད་པ་དང༌། དྲན་པར་བྱེད་པའི་རིགས་ཀྱི་བུ་དང༌། རིགས་ཀྱི་བུ་མོ་རྣམས་དེའི་གཞི་ལས་ཚེ་འདི་ལ་ཡོན་ཏན་མང་པོ་རྣམས་རེ་བར་
བྱའོ༑ ༑དེ་སྐད་ཅེས་བཀའ་སྩལ་པ་དང༌། ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་
བུ་མོ་དེ་དག་ཀྱང་ཚེ་འདིའི་ཡོན་ཏན་གང་དག་དང་ལྡན་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་དག་ནི། ཡ་ང་བ་མ་
སྤངས་པས་འཆི་བའི་དུས་བྱེད་པར་མི་འགྱུར། དུག་གིས་འཆི་བའི་དུས་བྱེད་པར་མི་འགྱུར། མཚོན་གྱིས་འཆི་བའི་དུས་བྱེད་པར་མི་འགྱུར། མེས་འཆི་བའི་དུས་བྱེད་པར་མི་
འགྱུར༑ ཆུས་འཆི་བའི་དུས་བྱེད་པར་མི་འགྱུར། དབྱུག་པས་འཆི་བའི་དུས་བྱེད་པར་མི་འགྱུར། ཕ་རོལ་གྱི་གནོད་པ་བྱེད་པས་འཆི་བའི་དུས་བྱེད་པར་མི་འགྱུར། དེ་དག་ལ་རྒྱལ་
པོའམ༑ རྒྱལ་པོའི་བུའམ། རྒྱལ་པོའི་བློན་པོ་ཆེན་པོའམ། རྒྱལ་པོའི་བློན་པོ་དག་གིས་གནོད་པ་བྱུང་ཞིང་སྐྱེས་ནའང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་དྲན་ཞིང་ཁ་ཏོན་དུ་བྱེད་པ་དག་
ལ་ཕྱིར་མི་སྣང་བར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡང་དང་ཡང་དྲན་ཞིང་ཁ་ཏོན་བྱེད་པ་དེ་དག་ལ་རྒྱལ་པོའམ། རྒྱལ་པོའི་བུའམ། རྒྱལ་པོའི་བློན་པོ་ཆེན་པོའམ།
རྒྱལ་པོའི་བློན་པོ་དེར་གླགས་ལྟ་བ་དང༌། གླགས་ཚོལ་བ་གང་དག་ཉེ་བར་འོངས་པར་གྱུར་ན། དེ་དག་གིས་གླགས་རྙེད་པར་མི་འགྱུར་ཏེ། འདི་ལྟར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་
ཡོངས་སུ་བཟུང་བའི་ཕྱིར་རོ། །དེར་རྒྱལ་པོའམ། རྒྱལ་པོའི་བུའམ། རྒྱལ་པོའི་བློན་པོ་ཆེན་པོའམ། རྒྱལ་པོའི་བློན་པོ་དག་ཉེ་བར་འོངས་ནའང་དེ་དག་སྨྲ་བར་འདོད་ཅིང་གཏམ་ཟེར་བར་
འདོད་དེ་ཡང་དག་པར་དགའ་བར་བྱའོ། །སྙམ་དུ་སེམས་པར་འགྱུར་རོ། །དེ་ཅིའི་ཕྱིར་ཞེ་ན། ཀཽ་ཤི་ཀ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། སེམས་ཅན་ཐམས་ཅད་ཀྱི་དྲུང་ན་བྱམས་
པའི་སེམས་ཀྱིས་བྱམས་པ་ཉེ་བར་བསྒྲུབ་པ་དང༌། སྙིང་རྗེའི་སེམས་ཀྱིས་སྙིང་རྗེ་ཉེ་བར་བསྒྲུབ་པས་ཉེ་བར་གནས་པར་འགྱུར་རོ། །ཀཽ་ཤི་ཀ །དེ་ཉིད་ཀྱི་ཕྱིར་ན་རིགས་ཀྱི་བུའམ་རིགས་
ཀྱི་བུ་མོ་གང་ཡང་གདུག་པ་དང༌། སྡིག་སྦྲུལ་མང་པོའི་དགོན་པའི་ནང་དུ་སོང་བ་དེ་དག་ལ་མིའམ་མི་མ་ཡིན་པ་གླགས་ལྟ་བ་དང༌། གླགས་ཚོལ་བ་དེ་དག་གིས་ཀྱང་ཀཽ་ཤི་ཀ །དེ་དག་ལ་སྔོན་
༄༅། །གྱི་ལས་ཀྱི་རྣམ་པར་སྨིན་པ་མ་གཏོགས་པར་གླགས་རྙེད་པར་མི་འགྱུར་རོ། །དེ་ནས་མུ་སྟེགས་ཅན་གཞན་ཀུན་ཏུ་རྒྱུ་བརྒྱ་ཀླན་ཀ་ཚོལ་བའི་བསམ་པས་དེའི་ཚེ་
བཅོམ་ལྡན་འདས་ག་ལ་བ་དེར་འོངས་པར་གྱུར་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་མུ་སྟེགས་ཅན་གཞན་ཀུན་ཏུ་རྒྱུ་དེ་དག་རྒྱང་ནས་འོང་བ་མཐོང་ནས་དེ་དག་གི་སེམས་
ལ་ཀུན་ཏུ་བརྟགས་ཏེ་འདི་སྙམ་དུ། མུ་སྟེགས་ཅན་གཞན་ཀུན་ཏུ་རྒྱུ་འདི་དག་ཀླན་ཀ་ཚོལ་བའི་བསམ་པས་བཅོམ་ལྡན་འདས་ག་ལ་བ་དེར་འོངས་ཀྱི། བདག་གིས་ཅི་ནས་ཀྱང་མུ་
སྟེགས་ཅན་གཞན་ཀུན་ཏུ་རྒྱུ་དེ་དག་བཅོམ་ལྡན་འདས་ཀྱི་དྲུང་དུ་ཉེ་བར་མི་འོང་བར་བྱ་བའི་ཕྱིར་བདག་གིས་བཅོམ་ལྡན་འདས་ཀྱི་ཐད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདིའི་ཕྱོགས་
ཆ་ཇི་སྙེད་ཅིག་བཟུང་བ་དེ་ཙམ་ཞིག་བདག་གིས་དྲན་པས་བསམ་པར་བྱ། ཁ་ཏོན་དུ་བྱ། རབ་ཏུ་འདོན་པར་བྱ་སྟེ། དེ་ལྟར་བྱས་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་འདི་བཤད་པ་ལ་
བར་ཆད་དུ་མི་འགྱུར་རོ། །ཞེས་བསམས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ཀྱི་ཐད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདིའི་ཕྱོགས་ཆ་ཇི་སྙེད་ཅིག་དེས་
བཟུང་བ་དེ་སྙེད་ཙམ་ཞིག་དྲན་པས་བསམས་ཏེ་ཁ་ཏོན་དུ་བྱས་ཤིང་རབ་ཏུ་བཏོན་པར་གྱུར་ཏོ། །དེ་ནས་མུ་སྟེགས་ཅན་གཞན་ཀུན་ཏུ་རྒྱུ་དེ་དག་རྒྱང་རིང་བ་བས་ཀྱང་ཆེས་རིང་བ་ནས་བཅོམ་
ལྡན་འདས་ལ་སྐོར་བ་བྱས་ཏེ་སྒོ་དེ་ཉིད་དང༌། ལམ་དེ་ཉིད་ནས་ཕྱིར་ལོག་སྟེ་དོང་ངོ༌། །དེ་ནས་ཚེ་དང་ལྡན་པ་ཤཱ་རིའི་བུ་འདི་སྙམ་དུ་སེམས་ཏེ། འདིར་ཅིའི་ཕྱིར་འདི་ལྟར་མུ་སྟེགས་ཅན་གཞན་
ཀུན་ཏུ་རྒྱུ་དེ་དག་རྒྱང་རིང་བ་བས་ཀྱང་ཆེས་རིང་བ་ནས་བཅོམ་ལྡན་འདས་ལ་སྐོར་བ་བྱས་ཏེ་སྒོ་དེ་ཉིད་དང༌། ལམ་དེ་ཉིད་ནས་སླར་དོང་སྙམ་མོ། །དེ་ནས་བཅོམ་ལྡན་འདས་ཀྱིས་ཚེ་དང་
ལྡན་པ་ཤཱ་རིའི་བུའི་དེ་ལྟ་བུའི་སེམས་ཀྱི་རྟོག་པ་ཐུགས་ཀྱིས་མཁྱེན་ནས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། ལྷ་རྣམས་ཀྱི་དབང་པོ་བརྒྱ་བྱིན་གྱིས་མུ་
སྟེགས་ཅན་གཞན་ཀུན་ཏུ་རྒྱུ་ཀླན་ཀ་ཚོལ་བའི་བསམ་པ་ཅན་དེ་དག་གི་སེམས་དག་མཐོང་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པ་ལ་བར་ཆད་བྱེད་པར་གྱུར་ན་མི་རུང་ངོ༌། །སྙམ་
ཞིང་ཅི་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འཆད་པར་མུ་སྟེགས་ཅན་གཞན་ཀུན་ཏུ་རྒྱུ་དེ་དག་འོང་བར་མ་གྱུར་ཅིག་སྙམ་པས་མུ་སྟེགས་ཅན་གཞན་ཀུན་ཏུ་རྒྱུ་རྩོད་པར་འདོད་པ་དང༌།
རྒོལ་བར་འདོད་པ་དང༌། འགལ་བར་བྱེད་པར་འདོད་པ་རྣམས་བཟློག་པའི་དོན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་དྲན་པས་ཡིད་ལ་བསམས་ཏེ་ཁ་ཏོན་དུ་བྱས་ཤིང་རབ་ཏུ་བཏོན་ཏེ་ལྷ་
རྣམས་ཀྱི་དབང་པོ་བརྒྱ་བྱིན་གྱི་ལྟར་ངས་ཀྱང་གནང་ངོ༌། །དེ་ཅིའི་ཕྱིར་ཞེ་ན། ཤཱ་རིའི་བུ། མུ་སྟེགས་ཅན་གཞན་ཀུན་ཏུ་རྒྱུ་དེ་དག་གཅིག་ལ་ཡང་ཆོས་དཀར་པོ་ཡོད་པར་ངས་མ་མཐོང་
༄༅། །སྟེ༑ ཤཱ་རིའི་བུ། དེ་དག་ཐམས་ཅད་ནི། ཀླན་ཀ་ཚོལ་བའི་བསམ་པ་དང༌། ཞེ་འགྲས་པའི་སེམས་ཀྱིས་འོང་འདོད་པར་གྱུར་ཏོ། །དེ་ནས་བདུད་སྡིག་
ཅན་འདི་སྙམ་དུ་སེམས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་འཁོར་བཞི་པོ་འདི་དག་ཚོགས་ཤིང་འཁོད་དེ་དེ་བཞིན་གཤེགས་
པའི་མངོན་དུ་གྱུར་ཅིང་འདོད་པ་ན་སྤྱོད་པ་དང༌། གཟུགས་ན་སྤྱོད་པའི་ལྷའི་བུ་འདི་དག་ཀྱང་མངོན་དུ་གྱུར་པ་ལགས་ན། འདིར་ནི། ངེས་པར་བྱང་ཆུབ་སེམས་དཔའ་སེམས་
དཔའ་ཆེན་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་གྱི། མིག་གིས་མི་རྩོལ་བར་བྱ་བའི་ཕྱིར་བདག་ཉེ་བར་འགྲོའོ། །སྙམ་མོ། །དེ་ནས་
བདུད་སྡིག་ཅན་གྱིས་ཡན་ལག་བཞི་པའི་དཔུང་གི་ཚོགས་མངོན་པར་སྤྲུལ་ཏེ་བཅོམ་ལྡན་འདས་ག་ལ་བ་དེར་ཉེ་བར་འོངས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་
སྙམ་དུ་སེམས་ཏེ། ཀྱེ་མའོ་འདི་དག་ནི། བདུད་སྡིག་ཅན་ཡིན་ཏེ། ཡན་ལག་བཞི་པའི་དཔུང་གི་ཚོགས་མངོན་པར་སྤྲུལ་ནས་བཅོམ་ལྡན་འདས་ག་ལ་བ་དེར་འོངས་པ་ཡིན་
གྱི། ཡན་ལག་བཞི་པའི་དཔུང་གི་ཚོགས་ཀྱི་བཀོད་པ་གང་ཡིན་པ་འདི་ནི། རྒྱལ་པོ་གཟུགས་ཅན་སྙིང་པོའི་ཡན་ལག་བཞི་པའི་དཔུང་གི་ཚོགས་ཀྱི་བཀོད་པ་ཡང་མ་ཡིན།
རྒྱལ་པོ་གསལ་རྒྱལ་གྱི་ཡན་ལག་བཞི་པའི་དཔུང་གི་ཚོགས་ཀྱི་བཀོད་པའང་མ་ཡིན། །ཤཱཀྱ་རྣམས་ཀྱི་ཡན་ལག་བཞི་པའི་དཔུང་གི་ཚོགས་ཀྱི་བཀོད་པའང་མ་ཡིན་ནོ། །ལི་ཙ་བཱི་རྣམས་
ཀྱི་ཡན་ལག་བཞི་པའི་དཔུང་གི་ཚོགས་ཀྱི་བཀོད་པའང་མ་ཡིན་གྱི། འདི་ནི། བདུད་སྡིག་ཅན་གྱིས་མངོན་པར་སྤྲུལ་པ་ཡིན་ཏེ། བདུད་སྡིག་ཅན་ནི། ཡུན་རིང་པོ་ནས་བཅོམ་ལྡན་
འདས་ལ་གླགས་ལྟ་བ་དང༌། གླགས་ཚོལ་བ་དང༌། སེམས་ཅན་རྣམས་ལ་གནོད་པའི་བསམ་པ་དང༌། རྗེས་སུ་འབྲེལ་བ་ཡིན་ནོ། །ད་བདག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་
འདི་དྲན་པས་བསམ་པར་བྱ། ཁ་ཏོན་དུ་བྱ། རབ་ཏུ་གདོན་པར་བྱའོ། །སྙམ་མོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་དྲན་པས་བསམས་
ཤིང་ཁ་ཏོན་དུ་བྱས་ཏེ་རབ་ཏུ་བཏོན་པར་གྱུར་ཏོ། །ལྷ་རྣམས་ཀྱི་དབང་པོ་བརྒྱ་བྱིན་གྱིས་ཇི་ལྟ་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་དྲན་པས་བསམས་ཤིང་ཁ་ཏོན་དུ་བྱས་ཏེ་རབ་ཏུ་
བཏོན་པ་དེ་ལྟ་དེ་ལྟར་བདུད་སྡིག་ཅན་སྒོ་དེ་ཉིད་དང༌། ལམ་དེ་ཉིད་ནས་སླར་ལོག་སྟེ་སོང་བར་གྱུར་ཏོ། །དེ་ནས་སུམ་ཅུ་རྩ་གསུམ་པའི་རིས་ཀྱི་ལྷའི་བུ་རྣམས་ཀྱིས་ལྷའི་མེ་ཏོག་མནད་
ར་བ་དག་མངོན་པར་སྤྲུལ་ཏེ་བར་སྣང་གི་ནམ་མཁའ་ལ་འདུག་ནས་བཅོམ་ལྡན་འདས་ག་ལ་བ་དེར་ལྷའི་མེ་ཏོག་མནད་ར་བ་དེ་དག་མངོན་པར་རབ་ཏུ་གཏོར་ཏེ་འདི་སྐད་དུ། ཀྱེ་མ་
༄༅། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཡུན་རིང་མོ་ཞིག་ན་འཛམ་བུའི་གླིང་གི་མི་རྣམས་ཀྱི་ནང་དུ་བྱུང་ངོ༌། །ཞེས་ཆེད་དུ་བརྗོད་པ་ཆེད་དུ་བརྗོད་ནས་ཡང་ལྷའི་
མེ་ཏོག་རྣམས་བཟུང་ནས་བཅོམ་ལྡན་འདས་ག་ལ་བ་དེར་མངོན་པར་གཏོར། མངོན་པར་རབ་ཏུ་གཏོར་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས། སེམས་ཅན་གང་དག་
ཤེས་རབ་ཀྱི་ཕ་རོལ་ཏུ་ཕྱིན་པ་འཆད་པ་དང༌། སྒོམ་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་དག་ལ་ནི། བདུད་དམ་བདུད་ཀྱི་རིས་ཀྱི་ལྷ་རྣམས་ཀྱིས་གླགས་རྙེད་པར་མི་
འགྱུར་རོ། །བཅོམ་ལྡན་འདས། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་མཉན་པ་དང༌། ཐོས་ནས་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་
གདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་དུ་བགྱིད་པའི་སེམས་ཅན་དེ་དག་ནི། ངན་ངོན་གྱི་དགེ་བའི་རྩ་བ་དང་ལྡན་པ་མ་ལགས་སོ། །
བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་གང་དག་གི་རྣ་ལམ་དུ་གྲགས་པར་གྱུར་པའི་སེམས་ཅན་དེ་དག་གིས་ཀྱང་སྔོན་གྱི་རྒྱལ་བ་རྣམས་ལ་བགྱི་བ་བགྱིས་པ་
ལགས་ན། གང་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་
ཏོན་བགྱིད་པ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་བགྱིད་པ་ལྟ་ཅི་སྨོས་ཏེ། བཅོམ་ལྡན་འདས། སེམས་ཅན་དེ་དག་གིས་ནི།
དེ་བཞིན་གཤེགས་པ་ལ་བསྙེན་བཀུར་བགྱིས་པ་ལགས་སོ། །དེ་ཅིའི་སླད་དུ་ཞེ་ན། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ཐམས་ཅད་མཁྱེན་པ་ཉིད་རབ་ཏུ་འབྱེད་ཅིང་འདི་
ལས་ཐམས་ཅད་མཁྱེན་པ་ཉིད་བཙལ་བར་བགྱིའོ། །བཅོམ་ལྡན་འདས། འདི་ལྟ་སྟེ། དཔེར་ན། རིན་པོ་ཆེ་དང༌། རིན་པོ་ཆེ་ཆེན་པོ་གང་ཡང་རུང་བ་དེ་དག་ཐམས་ཅད་ནི། རྒྱ་མཚོ་ཆེན་
པོས་རབ་ཏུ་ཕྱེ་བ་ལགས། དེ་དག་ཐམས་ཅད་ནི། རྒྱ་མཚོ་ཆེན་པོ་ལས་བཙལ་བར་བགྱི་བ་ལགས་སོ། །བཅོམ་ལྡན་འདས། དེ་བཞིན་དུ་ཐམས་ཅད་མཁྱེན་པ་ཉིད་ཀྱི་རིན་པོ་ཆེ་ཆེན་པོ་
ནི༑ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱ་མཚོ་ཆེན་པོ་ལས་བཙལ་བར་བགྱིའོ། །དེ་སྐད་ཅེས་གསོལ་
པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །དེ་དེ་བཞིན་ནོ། །དེ་དེ་བཞིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རྣམས་ཀྱི་ཐམས་ཅད་མཁྱེན་པ་ཉིད་ཀྱི་རིན་པོ་ཆེ་ཆེན་པོ་ནི། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱ་མཚོ་ཆེན་པོ་འདི་ལས་སྐྱེས་སོ། །དེ་ནས་
༄༅། །བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ནི། སྦྱིན་པའི་ཕ་རོལ་ཏུ་ཕྱིན་པའི་བསྔགས་པ་མི་
གསུང་ཞིང་མིང་ཡོངས་སུ་མི་སྒྲོག །ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་མ་ལགས། བཟོད་པའི་ཕ་རོལ་ཏུ་ཕྱིན་པའི་མ་ལགས། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་མ་ལགས།
བཅོམ་ལྡན་འདས་ནི། བསམ་གཏན་གྱི་ཕ་རོལ་ཏུ་ཕྱིན་པའི་བསྔགས་པ་མི་གསུང་ཞིང་མིང་ཡོངས་སུ་མི་སྒྲོགས་གི། འོན་ཀྱང་བཅོམ་ལྡན་འདས་ནི། ཤེས་རབ་ཀྱི་ཕ་རོལ་ཏུ་ཕྱིན་པ་
གཅིག་པུ་ཉིད་ཀྱི་བསྔགས་པ་ཡོངས་སུ་གསུང་བ་དང༌། མིང་ཡོངས་སུ་སྒྲོག་པར་མཛད་དོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །ཀུན་དགའ་བོ། དེ་དེ་
བཞིན་ཏེ། ཀུན་དགའ་བོ། ང་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ནའི་བསྔགས་པ་སྨྲ་བ་དང༌། མིང་ཡོངས་སུ་སྒྲོག་གི། ཕ་རོལ་ཏུ་ཕྱིན་པ་གཞན་གྱི་ནི། མ་ཡིན་ནོ། །དེ་ཅིའི་
ཕྱིར་ཞེ་ན། ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཕ་རོལ་ཏུ་ཕྱིན་པ་ལྔ་པོ་རྣམས་ཀྱི་སྔོན་དུ་འགྲོ་བ་སྟེ། དེས་ན། ཕ་རོལ་ཏུ་ཕྱིན་པའི་མིང་འཐོབ་བོ། །ཀུན་དགའ་བོ།
དེ་ཇི་སྙམ་དུ་སེམས། ཐམས་ཅད་མཁྱེན་པ་ཉིད་དུ་ཡོངས་སུ་མ་བསྔོས་པའི་སྦྱིན་པས་སྦྱིན་པའི་ཕ་རོལ་ཏུ་ཕྱིན་པ་ཞེས་བྱ་བའི་མིང་འཐོབ་པར་འགྱུར་རམ། ཀུན་དགའ་བོས་
གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེ་ཇི་སྙམ་དུ་སེམས། དེ་བཞིན་དུ་ཡོངས་སུ་མ་བསྔོས་པའི་ཚུལ་
ཁྲིམས་དང༌། ཡོངས་སུ་མ་བསྔོས་པའི་བཟོད་པ་དང༌། ཡོངས་སུ་མ་བསྔོས་པའི་བརྩོན་འགྲུས་དང༌། ཡོངས་སུ་མ་བསྔོས་པའི་བསམ་གཏན་རྣམས་དང༌། ཀུན་དགའ་བོ། འདི་ཇི་
སྙམ་དུ་སེམས། ཐམས་ཅད་མཁྱེན་པ་ཉིད་དུ་ཡོངས་སུ་མ་བསྔོས་པའི་ཤེས་རབ་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བའི་མིང་འཐོབ་པར་འགྱུར་རམ། ཀུན་དགའ་བོས་གསོལ་
པ༑ བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། འདི་ཇི་སྙམ་དུ་སེམས། དགེ་བའི་རྩ་པ་རྣམས་ཐམས་ཅད་མཁྱེན་པ་ཉིད་
དུ་ཡོངས་སུ་བསྔོ་བས་ཡོངས་སུ་སྔོ་བར་བྱེད་པའི་ཤེས་རབ་གང་ཡིན་པ་དེ་བསམ་གྱིས་མི་ཁྱབ་པ་ཡིན་ནམ། ཀུན་དགའ་བོས་གསོལ་པ། བཅོམ་ལྡན་འདས། དེ་དེ་བཞིན་ཏེ།
བཅོམ་ལྡན་འདས། དགེ་བའི་རྩ་བ་རྣམས་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བས་ཡོངས་སུ་སྔོ་བར་བྱེད་པའི་ཤེས་རབ་གང་ལགས་པ་དེ་ནི། བསམ་གྱིས་མི་ཁྱབ་པའོ། །
བཅོམ་ལྡན་འདས། དེ་ནི། མཆོག་ཏུ་བསམ་གྱིས་མི་ཁྱབ་བོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེ་ལྟ་བས་ན། དེ་ལྟར་དམ་པ་ཡིན་པའི་ཕྱིར་དེ་ནི། ཤེས་
༄༅། །རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བའི་མིང་འཐོབ་པར་འགྱུར་ཏེ། གང་གིས་དགེ་བའི་རྩ་བ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པ་རྣམས་ཕ་རོལ་ཏུ་ཕྱིན་
པའི་མིང་འཐོབ་བོ། །ཀུན་དགའ་བོ། དེ་ལྟ་བས་ན། དགེ་བའི་རྩ་བ་རྣམས་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཕ་རོལ་ཏུ་
ཕྱིན་པ་ལྔའི་སྔོན་དུ་འགྲོ་ཞིང་འདྲེན་པ་ཡོངས་སུ་འདྲེན་པའོ། །ཚུལ་འདིས་ཕ་རོལ་ཏུ་ཕྱིན་པ་ལྔ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ནའི་ནང་དུ་འདུས་སོ། །ཀུན་དགའ་བོ། འདི་
ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ནི། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པའི་ཚིག་བླ་དྭགས་སོ། །ཀུན་དགའ་བོ། དེ་ལྟ་བས་ན། ཤེས་རབ་ཀྱི་ཕ་རོལ་ཏུ་ཕྱིན་པ་
ཡོངས་སུ་བསྒྲགས་ན། ཕ་རོལ་ཏུ་ཕྱིན་པ་དྲུག་པོ་ཐམས་ཅད་ཡོངས་སུ་བསྒྲགས་པར་འགྱུར་རོ། །ཀུན་དགའ་བོ། འདི་ལྟ་སྟེ། དཔེར་ན། ས་ཆེན་པོ་ལ་ས་བོན་བཏབ་པ་ཚོགས་པ་
དང་ཕྲད་ན་སྐྱེ་བར་འགྱུར་ཏེ། ས་ཆེན་པོ་ནི། ས་བོན་དེ་དག་གི་གཞི་ཡིན་པས་ས་ཆེན་པོ་ལ་བརྟེན་ནས་ས་བོན་དེ་དག་སྐྱེ་བར་འགྱུར་རོ། །ཀུན་དགའ་བོ། དེ་བཞིན་དུ་ཕ་རོལ་ཏུ་
ཕྱིན་པ་ལྔ་ནི། ཤེས་རབ་ཀྱི་ཕ་རོལ་ཏུ་ཕྱིན་པས་ཡང་དག་པར་བཟུང་བས་ཐམས་ཅད་མཁྱེན་པ་ཉིད་ལ་བརྟེན་པ་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་ཕ་རོལ་ཏུ་
ཕྱིན་པ་ལྔ་སྐྱེ་བར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་བའི་ཕྱིར་ཕ་རོལ་ཏུ་ཕྱིན་པ་ཞེས་བྱ་བའི་མིང་འཐོབ་པར་འགྱུར་རོ། །ཀུན་དགའ་བོ། དེ་ལྟ་བས་ན།
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ཕ་རོལ་ཏུ་ཕྱིན་པ་ལྔའི་སྔོན་དུ་འགྲོ་ཞིང་འདྲེན་པ་ཡོངས་སུ་འདྲེན་པའོ། །དེ་ནས་བཅོམ་ལྷན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་
སྐད་ཅེས་གསོལ་ཏོ། །བཅོམ་ལྡན་འདས། རེ་ཤིག་ཤེས་རབ་ཀྱི་ཕ་རོལ་ཏུ་ཕྱིན་པ་བཟུང་ཞིང་བཅངས་པ་དང༌། བཀླགས་པ་དང༌། ཀུན་ཆུབ་པར་བགྱིས་པ་དང༌། རབ་ཏུ་བཏོན་པ་དང༌།
བསྟན་པ་དང༌། ཉེ་བར་བསྟན་པ་དང༌། ལུང་ཕོག་པ་དང༌། ཁ་ཏོན་དུ་བགྱིས་པས་རིགས་ཀྱི་བུའམ་རིགས་ཀྱི་བུ་མོས་ཡོན་ཏན་གང་དག་ཡོངས་སུ་འཛིན་པར་འགྱུར་པ་ཤེས་རབ་ཀྱི་ཕ་
རོལ་ཏུ་ཕྱིན་པའི་ཡོན་ཏན་འདི་དག་ཐམས་ཅད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཡོངས་སུ་བསྒྲགས་པ་ནི། མ་ལགས་ཏེ། འོན་ཀྱང་
གང་ཞིག་བདག་གིས་བཅོམ་ལྡན་འདས་ཀྱི་ཐད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདིའི་ཕྱོགས་གཅིག་བཟུང་ཞིང་རབ་ཏུ་བཏོན་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་
པ༑ ཀཽ་ཤི་ཀ། ལེགས་སོ། ལེགས་སོ། །ཀཽ་ཤི་ཀ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་
༄༅། །དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དེ་དག་ཉིད་འབའ་ཞིག་ལ་ཡོན་ཏན་འདི་དག་འབྱུང་བ་འབའ་ཞིག་ཏུ་ནི། མ་
ཟད་ཀྱི༑ ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་གང་གིས་སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག། དམ་པའི་ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་
རིང་དུ་གནས་པར་བྱ་བ་དང༌། ཚུལ་དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་བསྒྲུབ་པ་བྱས་པར་འགྱུར་བར་ཤེས་རབ་ཀྱི་ཕ་རོལ་ཏུ་
ཕྱིན་པ་འདི་བྲིས་ནས་གླེགས་བམ་དུ་ཆུད་པར་བྱས་ཏེ་འཆང་ངམ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌།
ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོ་ར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་མཆོད་
པར་བྱེད་དེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ། རིགས་ཀྱི་བུའམ་རིགས་ཀྱི་བུ་མོ་དེའི་ཡང་ཚེ་
འདི་ཉིད་ཀྱི་ཡོན་ཏན་ངས་བཤད་པ་ཡིན་ནོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་
འདས༑ བདག་གིས་ཀྱང་གང་ཞིག་སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག །དམ་པའི་ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་རིང་དུ་གནས་པར་བགྱི་བ་དང༌། ཚུལ་
དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་སྒྲུབ་པ་བགྱིས་པར་འགྱུར་བར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྲིས་ནས་གླེགས་བམ་དུ་
ཆུད་པར་བགྱིས་ཏེ་འཆང་ངམ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་པ་དང༌། འདྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌།
རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོ་ར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་མཆོད་པར་བགྱིད་དེ། བཀུར་སྟིར་བགྱིད། བླ་མར་བགྱིད།
རྗེད་པར་བགྱིད། མཆོད་པར་བགྱིད། རི་མོར་བགྱིད། བསྙེན་བཀུར་བགྱིད་པའི་རིགས་ཀྱི་བུའམ་རིགས་ཀྱི་བུ་མོ་དེ་ལ་བསྲུང་བ་དང༌། བསྐྱབ་པ་དང༌། སྦ་བ་བགྱིད་པར་འགྱུར་ན། གང་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་འདྲི་བ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌།
ལུང་འབོགས་པ་དང༌། ཁ་ཏོན་དུ་བགྱིད་པ་དང༌། མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་
༄༅། །བུ་དང༌། བ་དན་དག་དང༌། ཁོ་ར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་ཀྱང་མཆོད་པར་བགྱིད་དེ། བཀུར་སྟིར་བགྱིད། བླ་
མར་བགྱིད། རྗེད་པར་བགྱིད། མཆོད་པར་བགྱིད། རི་མོར་བགྱིད། བསྙེན་བཀུར་བགྱིད་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །ལེགས་
སོ༑ ༑ལེགས་སོ། །ཀཽ་ཤི་ཀ །ཡང་རིགས་ཀྱི་བུའམ་རིགས་ཀྱི་བུ་མོ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཁ་ཏོན་དུ་བྱེད་པ་ན། དེ་ཉིད་དུ་ལྷའི་བུ་བརྒྱ་ཕྲག་མང་པོ་འོང་བར་འགྱུར།
ལྷའི་བུ་སྟོང་ཕྲག་མང་པོ་དང༌། ལྷའི་བུ་བརྒྱ་སྟོང་ཕྲག་མང་པོ་རྣམས་ཆོས་ཉན་པའི་ཕྱིར་ཉེ་བར་འོང་བར་འགྱུར་རོ། །ལྷའི་བུ་དེ་དག་ཆོས་ཉན་པ་ན་ཆོས་སྨྲ་བ་དེའི་སྤོབས་པ་ཉེ་བར་
བསྒྲུབ་བོ། །སྙམ་དུ་སེམས་པར་འགྱུར་རོ། །གང་གི་ཚེ་ཡང་ཆོས་སྨྲ་བ་དེ་མི་སྨྲ་བར་འདོད་པར་གྱུར་བ་དེའི་ཚེ་ཡང་ལྷའི་བུ་དེ་དག་གིས་ཆོས་ལ་གུས་པ་དེ་ཉིད་ཀྱིས་རིགས་ཀྱི་བུའམ་
རིགས་ཀྱི་བུ་མོ་དེ་ཇི་ལྟར་སྨྲ་བ་ཉིད་དུ་འདུན་པ་དེ་ལྟར་སྤོབས་པ་ཉེ་བར་སྒྲུབ་པར་སེམས་སོ། །ཀཽ་ཤི་ཀ། རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་
འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པར་འགྱུར་བ་
དེ་དག་ཚེ་འདི་ལ་ཡོན་ཏན་འདི་དག་ཀྱང་ཡོངས་སུ་འཛིན་པར་འགྱུར་རོ། །ཀཽ་ཤི་ཀ། གཞན་ཡང་རིགས་ཀྱི་བུའམ་རིགས་ཀྱི་བུ་མོ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པ་ན། ང་ལ་
ཀླན་ཀ་ཚོལ་བའི་བསམ་པས་འགའ་ཞིག་རྒོལ་ན་མ་རུང་ངོ༌། །སྙམ་དུ་འཁོར་གྱི་མདུན་དུ་སེམས་ཞུམ་པར་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར། དེ་ལ་ཤེས་རབ་ཀྱི་ཕ་རོལ་ཏུ་ཕྱིན་
པས་བསྲུང་བ་དང༌། བསྐྱབ་པ་དང༌། སྦ་བ་བྱེད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དེས་ནི། ཀླན་ཀ་ཚོལ་བ་ཡང་ཡང་དག་པར་རྗེས་སུ་མི་མཐོང་ངོ༌། །ཤེས་རབ་ཀྱི་ཕ་རོལ་ཏུ་
ཕྱིན་པ་ལ་གནས་པས་ནི། ཀླན་ཀ་ཚོལ་བར་བྱེད་པའང་ཡང་དག་པར་རྗེས་སུ་མི་མཐོང་ངོ༌། །གང་ལ་ཀླན་ཀ་བཙལ་བར་བྱ་བ་དེའང་ཡང་དག་པར་རྗེས་སུ་མི་མཐོང་ངོ༌། །ཤེས་རབ་ཀྱི་ཕ་
རོལ་ཏུ་ཕྱིན་པ་དེ་ཡང་ཡང་དག་པར་རྗེས་སུ་མི་མཐོང་སྟེ། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་བའི་རིགས་ཀྱི་བུའམ་རིགས་ཀྱི་བུ་མོ་ལ་རྣམ་གྲངས་འདིས་རྒོལ་བ་
གང་ཡང་མི་འབྱུང་ངོ༌། །དེའང་མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་ལྡན་པར་མི་བྱེད་དོ། །ཀཽ་ཤི་ཀ། རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་
འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པར་འགྱུར་བ་
༄༅། །དེས་ཚེ་འདི་ལ་ཡོན་ཏན་འདི་དག་ཀྱང་ཡོངས་སུ་འཛིན་པར་འགྱུར་རོ། །ཀཽ་ཤི་ཀ །གཞན་ཡང་རིགས་ཀྱི་བུའམ་རིགས་ཀྱི་བུ་མོ་དག་ཕ་མ་དང༌། མཛའ་བོ་
དང༌། བློན་པོ་དང༌། གཉེན་བཤེས་དང༌། སྣག་གི་གཉེན་མཚམས་རྣམས་དང༌། དགེ་སྦྱོང་དང༌། བྲམ་ཟེ་དག་ལ་ཡིད་དུ་འོང་བར་འགྱུར་རོ། །དེ་ལ་ཕ་རོལ་རྒོལ་བ་བྱུང་ཞིང་སྐྱེས་པ་
དག་ཆོས་དང་ལྡན་པས་ཚར་གཅོད་པ་ལ་སྟོབས་ཡོད་ཅིང་ནུས་པ་ཡོད་པར་འགྱུར་ཏེ། ཕ་རོལ་གྱིས་བརྒལ་བ་ནའང་བརྒལ་བ་ལ་ལུང་སྟོན་ནུས་པར་འགྱུར་རོ། །ཀཽ་ཤི་ཀ །རིགས་ཀྱི་
བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་
པ་དང༌། ལུང་འབོགས་པ་དང༌། ཁ་ཏོན་བྱེད་པར་འགྱུར་བའི་རིགས་ཀྱི་བུའམ་རིགས་ཀྱི་བུ་མོ་དེས་ཚེ་འདི་ལ་ཡོན་ཏན་འདི་དག་ཀྱང་ཡོངས་སུ་འཛིན་པར་འགྱུར་རོ། །ཀཽ་ཤི་ཀ །ཡང་
རིགས་ཀྱི་བུའམ་རིགས་ཀྱི་བུ་མོ་དེས་ཕྱོགས་གང་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྲིས་ནས་གླེགས་བམ་དུ་ཆུད་པར་བྱས་ཏེ་མཆོད་པ་སྔོན་དུ་འགྲོ་བས་བཞག་པར་འགྱུར་བ་དེར་
ཀཽ་ཤི་ཀ། རྒྱལ་ཆེན་བཞིའི་རིས་ཀྱི་ལྷ་དག་གི་ནང་ན་ལྷའི་བུ་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་དེ་དག་ཀྱང་དེར་འོང་བར་སེམས་
ཏེ༑ དེ་དག་ཀྱང་དེར་འོང་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་ཆུད་པ་ལ་ལྟ་བར་འགྱུར། ཕྱག་འཚལ་བར་འགྱུར། འདུད་པ་བྱེད་པར་འགྱུར། འཛིན་པར་འགྱུར།
འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར། ཉེ་བར་སྟོན་པར་འགྱུར། ལུང་འབོགས་པར་འགྱུར། ཁ་ཏོན་བྱེད་
པར་འགྱུར་ཏེ། བལྟས་ཤིང་ཕྱག་བྱས་ནས་འདུད་པ་བྱས། གཟུང་བ་བྱས། བཅང་བ་བྱས། བཀླག་པ་བྱས། ཀུན་ཆུབ་པར་བྱས། རབ་ཏུ་འདོན་པར་བྱས། སྟོན་པར་བྱས། ཉེ་བར་
སྟོན་པར་བྱས། ལུང་ཕོག་ཅིང་ཁ་ཏོན་བྱས་ཏེ་ཡང་ཕྱིར་འགྲོ་བར་སེམས་སོ། །ཀཽ་ཤི་ཀ །སུམ་ཅུ་རྩ་གསུམ་པའི་ལྷ་དག་གི་ནང་ན་ལྷའི་བུ་གང་སུ་དག་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་ཡང་དག་པར་ཞུགས་པ་དེ་དག་ཀྱང་དེར་འོང་བར་སེམས་ཏེ། དེ་དག་ཀྱང་དེར་འོངས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་ཆུད་པ་ལ་ལྟ་བར་འགྱུར། ཕྱག་
འཚལ་བར་འགྱུར། འདུད་པ་བྱེད་པར་འགྱུར། འཛིན་པར་འགྱུར། འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར།
ཉེ་བར་སྟོན་པར་འགྱུར། ལུང་འབོགས་པར་འགྱུར། ཁ་ཏོན་བྱེད་པར་འགྱུར་ཏེ། བལྟས་ཤིང་ཕྱག་བྱས་ནས་འདུད་པ་བྱས། གཟུང་བ་བྱས། བཅང་བ་བྱས། ཀླག་པ་བྱས། ཀུན་ཆུབ་
༄༅། །པར་བྱས། རབ་ཏུ་འདོན་པར་བྱས། སྟོན་པར་བྱས། ཉེ་བར་སྟོན་པར་བྱས། ལུང་ཕོག་ཅིང་ཁ་ཏོན་བྱས་ཏེ་ཡང་ཕྱིར་འགྲོ་བར་སེམས་སོ། །ཀཽ་ཤི་ཀ །འཐབ་བྲལ་གྱི་
ལྷ་དག་གི་ནང་ན་ལྷའི་བུ་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་དེ་དག་ཀྱང་དེར་འོང་བར་སེམས་ཏེ། དེ་དག་ཀྱང་དེར་འོངས་ནས་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་ཆུད་པ་ལ་ལྟ་བར་འགྱུར། ཕྱག་འཚལ་བར་འགྱུར། འདུད་པ་བྱེད་པར་འགྱུར། འཛིན་པར་འགྱུར། འཆང་བར་འགྱུར། ཀློག་པར་འགྱུར།
ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར། ཉེ་བར་སྟོན་པར་འགྱུར་།ལུང་འབོགས་པར་འགྱུར། ཁ་ཏོན་བྱེད་པར་འགྱུར་ཏེ། བལྟས་ཤིང་ཕྱག་བྱས་ནས་
འདུད་པ་བྱས། གཟུང་བ་བྱས། བཅང་བ་བྱས། ཀླག་པ་བྱས། ཀུན་ཆུབ་པར་བྱས། རབ་ཏུ་འདོན་པར་བྱས། སྟོན་པར་བྱས། ཉེ་བར་སྟོན་པར་བྱས། ལུང་ཕོག་ཅིང་ཁ་ཏོན་བྱས་ཏེ་
ཡང་ཕྱིར་འགྲོ་བར་སེམས་སོ། །ཀཽ་ཤི་ཀ །དགའ་ལྡན་གྱི་ལྷ་དག་གི་ནང་ན་ལྷའི་བུ་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་དེ་དག་ཀྱང་
དེར་འོང་བར་སེམས་ཏེ། དེ་དག་ཀྱང་དེར་འོངས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་ཆུད་པ་ལ་ལྟ་བར་འགྱུར། ཕྱག་འཚལ་བར་འགྱུར། འདུད་པ་བྱེད་པར་
འགྱུར༑ འཛིན་པར་འགྱུར། འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར། ཉེ་བར་སྟོན་པར་འགྱུར། ལུང་འབོགས་
པར་འགྱུར། ཁ་ཏོན་བྱེད་པར་འགྱུར་ཏེ། བལྟས་ཤིང་ཕྱག་བྱས་ནས་འདུད་པ་བྱས། གཟུང་བ་བྱས། བཅང་བ་བྱས། བཀླག་པ་བྱས། ཀུན་ཆུབ་པར་བྱས། རབ་ཏུ་འདོན་པར་བྱས། སྟོན་པར་བྱས།
ཉེ་བར་སྟོན་པར་བྱས། ལུང་ཕོག་ཅིང་ཁ་ཏོན་བྱས་ཏེ་ཡང་ཕྱིར་འགྲོ་བར་སེམས་སོ། །ཀཽ་ཤི་ཀ། འཕྲུལ་དགའི་ལྷ་དག་གི་ནང་ན་ལྷའི་བུ་གང་སུ་དག་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ཡང་དག་པར་ཞུགས་པ་དེ་དག་ཀྱང་དེར་འོང་བར་སེམས་ཏེ། དེ་དག་ཀྱང་དེར་འོངས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་ཆུད་པ་ལ་ལྟ་བར་འགྱུར། ཕྱག་འཚལ་
བར་འགྱུར། འདུད་པ་བྱེད་པར་འགྱུར། འཛིན་པར་འགྱུར། འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར། ཉེ་བར་
སྟོན་པར་འགྱུར། ལུང་འབོགས་པར་འགྱུར། ཁ་ཏོན་བྱེད་པར་འགྱུར་ཏེ། བལྟས་ཤིང་ཕྱག་བྱས་ནས་འདུད་པ་བྱས། གཟུང་བ་བྱས། བཅང་བ་བྱས། བཀླག་པ་བྱས། ཀུན་ཆུབ་པར་
བྱས༑ རབ་ཏུ་འདོན་པར་བྱས། སྟོན་པར་བྱས། ཉེ་བར་སྟོན་པར་བྱས། ལུང་ཕོག་ཅིང་ཁ་ཏོན་བྱས་ཏེ་ཡང་ཕྱིར་འགྲོ་བར་སེམས་སོ། །ཀཽ་ཤི་ཀ། གཞན་འཕྲུལ་དབང་བྱེད་ཀྱི་ལྷ་དག་གི་ནང་
༄༅། །ན་ལྷའི་བུ་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་དེ་དག་ཀྱང་དེར་འོང་བར་སེམས་ཏེ། དེ་དག་ཀྱང་དེར་འོངས་ནས་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་ཆུད་པ་ལ་བལྟ་བར་འགྱུར། ཕྱག་འཚལ་བར་འགྱུར། འདུད་པ་བྱེད་པར་འགྱུར། འཛིན་པར་འགྱུར། འཆང་བར་འགྱུར། ཀློག་པར་འགྱུར།
ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར། ཉེ་བར་སྟོན་པར་འགྱུར། ལུང་འབོགས་པར་འགྱུར། ཁ་ཏོན་བྱེད་པར་འགྱུར་ཏེ་བལྟས་ཤིང་ཕྱག་བྱས་
ནས་འདུད་པ་བྱས། གཟུང་བ་བྱས། བཅང་བ་བྱས། བཀླག་པ་བྱས། ཀུན་ཆུབ་པར་བྱས། རབ་ཏུ་འདོན་པར་བྱས། སྟོན་པར་བྱས། ཉེ་བར་སྟོན་པར་བྱས། ལུང་ཕོག་ཅིང་ཁ་ཏོན་
བྱས་ཏེ་ཡང་ཕྱིར་འགྲོ་བར་སེམས་སོ། །ཀཽ་ཤི་ཀ །དེ་བཞིན་དུ་གཟུགས་ན་སྤྱོད་པའི་ལྷ་རྣམས་ལ་ལྷའི་བུ་གང་ཇི་སྙེད་ཡོད་པ་ནས་ཚངས་པའི་འཇིག་རྟེན་ན་ཚངས་རིས་ཀྱི་ལྷའི་བུ་གང་སུ་
དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་དེ་དག་ཀྱང་དེར་འོང་བར་སེམས་ཏེ། དེ་དག་ཀྱང་དེར་འོངས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་
བམ་དུ་ཆུད་པ་ལ་ལྟ་བར་འགྱུར། ཕྱག་འཚལ་བར་འགྱུར། འདུད་པ་བྱེད་པར་འགྱུར། འཛིན་པར་འགྱུར་།འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར།
རབ་ཏུ་འདོན་པར་འགྱུར། སྟོན་པར་འགྱུར། ཉེ་བར་སྟོན་པར་འགྱུར། ལུང་འབོགས་པར་འགྱུར། ཁ་ཏོན་བྱེད་པར་འགྱུར་ཏེ། བལྟས་ཤིང་ཕྱག་བྱས་ནས་འདུད་པ་བྱས། གཟུང་བ་བྱས།
བཅང་བ་བྱས། བཀླག་པ་བྱས། ཀུན་ཆུབ་པར་བྱས། རབ་ཏུ་འདོན་པར་བྱས། སྟོན་པར་བྱས། ཉེ་བར་སྟོན་པར་བྱས། ལུང་ཕོག་ཅིང་ཁ་ཏོན་བྱས་ཏེ་ཡང་ཕྱིར་འགྲོ་བར་སེམས་སོ། །
ཀཽ་ཤི་ཀ །ཁྱོད་ཀྱིས་འདིར་ཚངས་རིས་པ་ཉིད་ཇི་ལྟ་བ་དེ་བཞིན་དུ་ནི། མི་བསམ་སྟེ། ཚངས་རིས་པ་ཇི་ལྟ་བ་དེ་བཞིན་དུ་ཚངས་པའི་མདུན་ན་འདོན་གྱི་ལྷ་དག་གི་ནང་ན་ལྷའི་བུ་གང་སུ་དག་
ཡོད་པའང་སྔ་མ་བཞིན་དུ་སྦྱར་རོ། །དེ་བཞིན་དུ་ཚངས་པ་ཆེན་པོ་དང༌། འོད་ཆུང་དང༌། ཚད་མེད་འོད་དང༌། འོད་གསལ་དང༌། དགེ་ཆུང་དང༌། ཚད་མེད་དགེ་དང༌། དགེ་རྒྱས་དང༌། སྤྲིན་
མེད་དང༌། བསོད་ནམས་འཕེལ་དང༌། འབྲས་བུ་ཆེ་བ་དང༌། འདུ་ཤེས་མེད་པའི་སེམས་ཅན་དང༌། མི་ཆེ་བ་དང༌། མི་གདུང་བ་དང༌། གྱ་ནོམ་སྣང་དང༌། ཤིན་ཏུ་མཐོང་དང༌། ཀཽ་ཤི་ཀ། འོག་
མིན་གྱི་ལྷ་དག་གི་ནང་ན་ལྷའི་བུ་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་དེ་དག་ཀྱང་དེར་འོང་བར་སེམས་ཏེ། དེ་དག་ཀྱང་དེར་འོངས་ནས་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་ཆུད་པ་ལ་ལྟ་བར་འགྱུར་ཕྱག་འཚལ་བར་འགྱུར། འདུད་པ་བྱེད་པར་འགྱུར། འཛིན་པར་འགྱུར་།འཆང་བར་འགྱུར། ཀློག་པར་འགྱུར།
༄༅། །ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར། ཉེ་བར་སྟོན་པར་འགྱུར། ལུང་འབོགས་པར་འགྱུར། ཁ་ཏོན་བྱེད་པར་འགྱུར་ཏེ།
བལྟས་ཤིང་ཕྱག་བྱས་ནས་འདུད་པ་བྱས། བཟུང་བ་བྱས། བཅང་བ་བྱས། བཀླགས་པ་བྱས། ཀུན་ཆུབ་པར་བྱས། རབ་ཏུ་འདོན་པར་བྱས། སྟོན་པར་བྱས། ཉེ་བར་སྟོན་པར་བྱས།
ལུང་ཕོག་ཅིང་ཁ་ཏོན་བྱས་ཏེ་ཡང་ཕྱིར་འགྲོ་བར་སེམས་སོ། །ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེས་སེམས་འདི་ལྟར་བསྐྱེད་པར་བྱ་སྟེ། གང་སུ་དག་ཕྱོགས་བཅུའི་འཇིག་
རྟེན་གྱི་ཁམས་གཞལ་དུ་མེད། གྲངས་མེད་པ་དག་ན་ཡོད་པའི་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་
པོ་དང༌། མི་དང་མི་མ་ཡིན་པ་དེ་དག་ལ་གླེགས་བམ་འདི་ལས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ལྟོས་ཤིག །ཕྱག་ཚོལ་ཅིག །འདུད་པ་གྱིས་ཤིག །ཟུངས་ཤིག །ཆོངས་ཤིག །ལྷོགས་
ཤིག །ཀུན་ཆུབ་པར་གྱིས་ཤིག །རབ་ཏུ་ཐོན་ཅིག །སྟོན་ཅིག །ཉེ་བར་སྟོན་ཅིག །ལུང་ཕོག་ཅིག་ཁ་ཏོན་གྱིས་ཤིག །བལྟས་ཤིང་ཕྱག་བྱས་ཏེ་འདུད་པ་བྱས། བཟུང་བ་བྱས། བཅང་
བ་བྱས༑ བཀླག་པ་བྱས། ཀུན་ཆུབ་པར་བྱས། རབ་ཏུ་འདོན་པར་བྱས། སྟོན་པར་བྱས། ཉེ་བར་སྟོན་པར་བྱས། ལུང་ཕོག་ཅིང་ཁ་ཏོན་བྱས་ནས་ཡང་ཕྱིར་བདག་ཉིད་ཀྱི་གནས་སུ་
དེངས་ཤིག །དེ་དག་ལ་ཆོས་ཀྱི་སྦྱིན་པ་འདི་ཉིད་བྱིན་པར་གྱུར་ཅིག །ཅེས་བསམ་པར་བྱའོ། །ཀཽ་ཤི་ཀ །འདི་ལ་ཁྱོད་འདི་སྙམ་དུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་ཉིད་ཀྱི་
འདོད་པ་ན་སྤྱོད་པ་དང༌། གཟུགས་ན་སྤྱོད་པའི་ལྷའི་བུ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་དེ་དག་ཉིད་འབའ་ཞིག་དེར་འོང་བ་སྙམ་དུ་སེམས་
པར་གྱུར་ན་མི་རུང་སྟེ། ཀཽ་ཤི་ཀ །དེ་ལྟར་མི་བལྟའོ། །ཀཽ་ཤི་ཀ །འོན་ཀྱང་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འདོད་པ་ན་སྤྱོད་པ་དང༌། གཟུགས་ན་སྤྱོད་པའི་
ལྷའི་བུ་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་ཇི་སྙེད་ཡོད་པ་དེ་དག་ཀྱང་དེར་འོང་བར་སེམས་ཏེ། དེ་དག་ཀྱང་དེར་འོངས་ནས་ཤེས་རབ་ཀྱི་
ཕ་རོལ་ཏུ་ཕྱིན་པ་འདི་གླེགས་བམ་དུ་ཆུད་པ་ལ་ལྟ་བར་འགྱུར། ཕྱག་འཚལ་བར་འགྱུར། འདུད་པ་བྱེད་པར་འགྱུར། འཛིན་པར་འགྱུར། འཆང་བར་འགྱུར། ཀློག་པར་འགྱུར། ཀུན་
ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར། ཉེ་བར་སྟོན་པར་འགྱུར། ལུང་འབོགས་པར་འགྱུར། ཁ་ཏོན་བྱེད་པར་འགྱུར་ཏེ། བལྟས་ཤིང་ཕྱག་བྱས་ནས་
འདུད་པ་བྱས། བཟུང་བ་བྱས། བཅང་བ་བྱས། བཀླགས་པ་བྱས། ཀུན་ཆུབ་པར་བྱས། རབ་ཏུ་འདོན་པར་བྱས། སྟོན་པར་བྱས། ཉེ་བར་སྟོན་པར་བྱས། ལུང་ཕོག་ཅིང་ཁ་ཏོན་བྱས་ཏེ་
༄༅། །ཡང་ཕྱིར་འགྲོ་བར་སེམས་སོ། །ཀཽ་ཤི་ཀ །ཡང་རིགས་ཀྱི་བུའམ་རིགས་ཀྱི་བུ་མོ་དེའི་ཁྱིམ་དང༌། གནས་ཁང་དང༌། ཁང་བཟང་ཡང་ཤིན་ཏུ་སྲུང་བར་འགྱུར་
ཞིང་སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་དེ་ལ་སུའང་འཚེ་བ་བྱེད་པར་ཡང་མི་འགྱུར་ཏེ། ཀཽ་ཤི་ཀ །དེ་།ལྟར་དེར་གཟི་བརྗིད་ཆེ་བ། གཟི་བརྗིད་ཆེ་བ་ཞེས་བྱ་བའི་ལྷ་དང༌།
ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་དག་འོང་བར་སེམས་པས་སོ། །ཀཽ་ཤི་
ཀ །རིགས་ཀྱི་བུའམ་རིགས་ཀྱི་བུ་མོ་དེས་ཚེ་འདི་ལ་ཡོན་ཏན་འདི་དག་ཀྱང་ཡོངས་སུ་འཛིན་པར་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་
པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཡང་རིགས་ཀྱི་བུའམ་རིགས་ཀྱི་བུ་མོ་དེས་འདི་ལྟར། ལྷའམ། ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་
ནམ༑ ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་ཆེན་པོའམ། མིའམ། མི་མ་ལགས་པ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མཉན་པ་དང༌། བལྟ་བ་དང༌། ཕྱག་
བགྱི་བ་དང༌། འདུད་པ་བགྱི་བ་དང༌། བཟུང་བ་དང༌། བཅང་བ་དང༌། བཀླག་པ་དང༌། ཀུན་ཆུབ་པར་བགྱི་བ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་
འབོགས་པ་དང༌། ཁ་ཏོན་བགྱིད་པའི་སླད་དུ་དེར་མཆིས་པར་ཇི་ལྟར་འཚལ་བར་བགྱི། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱི་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་
བཀའ་སྩལ་ཏོ། །ཀཽ་ཤི་ཀ །གལ་ཏེ་རིགས་ཀྱི་བུའམ་རིགས་ཀྱི་བུ་མོས་དེར་སྣང་བ་ཆེན་པོ་དག་མཐོང་ན། དེ་ལ་འདིར་ངེས་པར་ལྷའམ། ཀླུའམ། གནོད་སྦྱིན་ནམ། དྲི་ཟའམ། ལྷ་མ་
ཡིན་ནམ། ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་ཆེན་པོའམ། མིའམ། མི་མ་ཡིན་པ་དག་འོངས་ཤིང་ལྷགས་པ་ཡིན་ནོ། །ཞེས་རིགས་ཀྱི་བུའམ། རིགས་ཀྱི་བུ་མོ་དེས་
ཤེས་པར་བྱའོ། །ཀཽ་ཤི་ཀ །གཞན་ཡང་རིགས་ཀྱི་བུའམ། རིགས་ཀྱི་བུ་མོ་དེས་མི་མ་ཡིན་པའི་དྲི་སྔོན་ཆད་མ་བསྣམས་པ་བྲོ་བར་གྱུར་ན། དྲི་དེ་ཚོར་ནས་དེ་ལ་འདིར་ངེས་པར་ལྷའམ།
ཀླུའམ༑ གནོད་སྦྱིན་ནམ། དྲི་ཟའམ། ལྷ་མ་ཡིན་ནམ། ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་ཆེན་པོའམ། མིའམ་མི་མ་ཡིན་པ་འོངས་ཤིང་ལྷགས་པ་ཡིན་ནོ། །ཞེས་རིགས་
ཀྱི་བུའམ་རིགས་ཀྱི་བུ་མོ་དེས་ཤེས་པར་བྱའོ། །ཀཽ་ཤི་ཀ །གཞན་ཡང་གལ་ཏེ་རིགས་ཀྱི་བུའམ་རིགས་ཀྱི་བུ་མོ་དེ་ཀུན་ཏུ་སྤྱོད་པ་གཟོབ་པར་འགྱུར། ཀུན་ཏུ་སྤྱོད་པ་གཙང་བར་འགྱུར་
ཏེ༑ དེ་ཀུན་ཏུ་སྤྱོད་པ་གཟོབ་པ་དང༌། ཀུན་ཏུ་སྤྱོད་པ་གཙང་བ་དེས་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་
༄༅། །དང༌། མི་དང༌། མི་མ་ཡིན་པ་དག་དེར་འོང་བར་སེམས་སོ། །དེར་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་
ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་གང་དག་དེར་འོངས་པར་གྱུར་པ་དེ་དག་ཀུན་ཏུ་སྤྱོད་པ་གཟོབ་པ་དང༌། ཀུན་ཏུ་སྤྱོད་པ་གཙང་བ་དེས་ཡི་རངས་ཤིང་རབ་ཏུ་དགའ་
སྟེ་མགུ་བ་དང༌། ཡིད་བདེ་བ་སྐྱེ་བར་འགྱུར་རོ། །དེ་ན་གཟི་བརྗིད་ཆུང་བ། གཟི་བརྗིད་ཆུང་བའི་ལྷ་གང་དག་གནས་པ་དེ་དག་ཀྱང་དེ་ནས་འབྱོལ་བར་སེམས་སོ། །དེ་ཅིའི་ཕྱིར་ཞེ་ན། ལྷ་
དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་གཟི་བརྗིད་ཆེན་པོ། གཟི་བརྗིད་ཆེན་
པོ་དེ་དག་ཉིད་ཀྱི་དཔལ་དང༌། གཟི་བརྗིད་དང༌། བཙུན་པ་མི་བཟོད་པས་དེ་ལྟར་ལྷ་གཟི་བརྗིད་ཆུང་བ། གཟི་བརྗིད་ཆུང་བ་དེ་དག་འབྱོལ་བར་སེམས་སོ། །ཀཽ་ཤི་ཀ །ཡང་ཇི་ལྟ་ཇི་ལྟར་
ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ། གཟི་བརྗིད་ཆེ་བ། གཟི་
བརྗིད་ཆེ་བ་དེ་དག་རྟག་ཏུ་འོང་བར་སེམས་པ་དེ་ལྟ་དེ་ལྟར་རིགས་ཀྱི་བུའམ་རིགས་ཀྱི་བུ་མོ་དེའང་དད་པ་མང་བར་འགྱུར་ཏེ། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེས་ཚེ་འདི་ལ་
ཡོན་ཏན་འདི་དག་ཀྱང་ཡོངས་སུ་འཛིན་པར་འགྱུར་རོ། །ཀཽ་ཤི་ཀ། གཞན་ཡང་རིགས་ཀྱི་བུའམ་རིགས་ཀྱི་བུ་མོ་དེས་དེ་ལ་བླ་མར་བྱ་བ་དང༌། གུས་པར་བྱ་བ་དང༌། ཡོངས་སུ་རྫོགས་
པར་བྱ་བའི་ཕྱིར་ཆོས་ཀྱི་ཚུལ་གྱི་གནས་དེའི་ཁོ་ར་ཡུག་ཏུ་མི་གཙང་བ་དང༌། མི་གཟོབ་པའི་ཀུན་ཏུ་སྤྱོད་པ་ལ་འཇུག་པར་མི་བྱའོ། །ཀཽ་ཤི་ཀ། གཞན་ཡང་རིགས་ཀྱི་བུའམ་རིགས་ཀྱི་
བུ་མོ་དེ་ལུས་ངལ་བ་དང༌། སེམས་ངལ་བར་མི་འགྱུར། དེ་བདེ་བར་ཉལ་བར་བྱེད་པར་འགྱུར། བདེ་བར་འགྲོ་བར་འགྱུར། གཉིད་ཀྱིས་ལོག་ན་ཡང་སྡིག་པའི་རྨི་ལམ་མཐོང་བར་མི་འགྱུར།
མཐོང་ནའང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཉིད་མཐོང་བར་འགྱུར། མཆོད་རྟེན་རྣམས་ཉིད་མཐོང་བར་འགྱུར། བྱང་ཆུབ་སེམས་
དཔའ་རྣམས་ཉིད་མཐོང་བར་འགྱུར། དེ་བཞིན་གཤེགས་པའི་ཉན་ཐོས་རྣམས་ཉིད་མཐོང་བར་འགྱུར། སྒྲ་ཐོས་ནའང་ཕ་རོལ་ཏུ་ཕྱིན་པའི་སྒྲ་དག་ཉིད་ཐོས་པར་འགྱུར། བྱང་ཆུབ་ཀྱི་
ཕྱོགས་ཉིད་ཀྱི་ཆོས་རྣམས་ཐོས་པར་འགྱུར། བྱང་ཆུབ་ཀྱི་ཤིང་དག་ཉིད་མཐོང་བར་འགྱུར། དེ་དག་ཏུའང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
མངོན་པར་རྫོགས་པར་འཚང༌། རྒྱ་བ་དག་ཉིད་མཐོང་བར་འགྱུར། དེ་བཞིན་དུ་མངོན་པར་རྫོགས་པར་སངས་རྒྱས་པ་རྣམས་ཆོས་ཀྱི་འཁོར་ལོ་བསྐོར་བ་མཐོང་བར་འགྱུར། ཤེས་རབ་ཀྱི་ཕ་
༄༅། །རོལ་ཏུ་ཕྱིན་པ་བགྲོ་བ་ལ་དགའ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་མང་པོ་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་བགྲོ་བར་བྱེད་པ་
དང༌། འདི་ལྟར་ཐམས་ཅད་མཁྱེན་པ་ཉིད་ཡོངས་སུ་གཟུང་བར་བྱ། འདི་ལྟར་སངས་རྒྱས་ཀྱི་ཞིང་ཡོངས་སུ་སྦྱང་བར་བྱའོ། །ཞེས་ཐབས་མཁས་པ་ཉེ་བར་སྟོན་པ་མཐོང་བར་འགྱུར་
རོ༑ ༑སངས་རྒྱས་བཅོམ་ལྡན་འདས་མངོན་པར་བྱང་ཆུབ་པའི་སྒྲ་རྒྱ་ཆེན་པོའང་ཐོས་པར་འགྱུར་རོ། །ཕྱོགས་ག་གེ་མོ་ཞིག་དང༌། ཕྱོགས་ཀྱི་ཆ་ག་གེ་མོ་ཞིག་དང༌། འཇིག་རྟེན་གྱི་
ཁམས་ག་གེ་མོ་ཞིག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆེ་གེ་མོ་ཞེས་བྱ་བ་དེ་ཉན་ཐོས་དང༌། བྱང་ཆུབ་སེམས་དཔའ་མང་པོ་དང༌།
ཉན་ཐོས་དང༌། བྱང་ཆུབ་སེམས་དཔའ་བརྒྱ་ཕྲག་མང་པོ་དང༌། ཉན་ཐོས་དང༌། བྱང་ཆུབ་སེམས་དཔའ་སྟོང་ཕྲག་མང་པོ་དང༌། ཉན་ཐོས་དང༌། བྱང་ཆུབ་སེམས་དཔའ་བརྒྱ་སྟོང་
ཕྲག་མང་པོ་དང༌། ཉན་ཐོས་དང༌། བྱང་ཆུབ་སེམས་དཔའ་བྱེ་བ་ཕྲག་མང་པོ་དང༌། ཉན་ཐོས་དང༌། བྱང་ཆུབ་སེམས་དཔའ་བྱེ་བ་བརྒྱ་ཕྲག་མང་པོ་དང༌། ཉན་ཐོས་དང༌། བྱང་
ཆུབ་སེམས་དཔའ་བྱེ་བ་སྟོང་ཕྲག་མང་པོ་དང༌། ཉན་ཐོས་དང༌། བྱང་ཆུབ་སེམས་དཔའ་བྱེ་བ་བརྒྱ་སྟོང་ཕྲག་མང་པོ་དང༌། ཉན་ཐོས་དང༌། བྱང་ཆུབ་སེམས་དཔའ་བྱེ་བ་ཁྲག་ཁྲིག་
བརྒྱ་སྟོང་ཕྲག་མང་པོས་ཡོངས་སུ་བསྐོར་ཅིང་མདུན་དུ་བྱས་ཏེ་ཆོས་སྟོན་ཏོ། །ཞེས་སངས་རྒྱས་ཀྱི་སྒྲ་རླབས་པོ་ཆེའང་ཐོས་པར་འགྱུར་རོ། །ཀཽ་ཤི་ཀ། ཡང་རིགས་ཀྱི་བུའམ་རིགས་ཀྱི་
བུ་མོ་དེས་དེ་ལྟ་བུའི་ཚུལ་གྱི་རྨི་ལམ་འདི་དག་མཐོང་བར་འགྱུར་ཏེ། དེ་བདེ་བར་ཉལ་བར་འགྱུར། བདེ་བར་སད་པར་འགྱུར། ལུས་ཀྱི་ནང་དུ་མདངས་རབ་ཏུ་བཅུག་པས་ཤིན་ཏུ་
བདེ་བ་མྱོང་བར་འགྱུར། ཡང་ཞིང་ཡང་བ་ཉིད་མྱོང་བར་འགྱུར། དེ་ལ་མ་འོངས་པར་ཁ་ཟས་ལ་བརྐམ་པའི་སེམས་ཀྱི་རྒྱུད་མི་སྐྱེ་བར་འགྱུར། ཁ་ཟས་ཀྱི་འདུ་ཤེས་ཆུང་བར་འགྱུར་
ཏེ༑ ཀཽ་ཤི་ཀ །དཔེར་ན། དགེ་སློང་རྣལ་འབྱོར་སྤྱོད་པ་ཏིང་ངེ་འཛིན་ལས་ལངས་པའི་སེམས་ཡིད་ལ་བྱེད་པས་ཡོངས་སུ་བརླན་པས་ཁ་ཟས་ལ་བརྐམ་པ་དྲག་པོ་མི་འབྱུང་ཞིང་ཟས་
ལ་འདུ་ཤེས་ཆུང་བར་འགྱུར་བ་དེ་བཞིན་དུ་།ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་ལ་ཡང་ཁ་ཟས་ལ་བརྐམ་པ་དྲག་པོ་མི་འབྱུང་བར་།འགྱུར་ཏེ། དེ་ཟས་ཀྱི་འདུ་ཤེས་ཆུང་བར་
འགྱུར་རོ། །དེ་ཅིའི་ཕྱིར་ཞེ་ན། ཀཽ་ཤི་ཀ །དེ་ནི། འདི་ལྟར། རིགས་ཀྱི་བུའམ་རིགས་ཀྱི་བུ་མོ་ཇི་ལྟར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྒོམ་པའི་རྣལ་འབྱོར་ལ་བརྩོན་པ་དེ་ལྟར་
དེའི་ལུས་ལ་མི་མ་ཡིན་པ་དག་མདངས་ཉེ་བར་སྒྲུབ་པར་སེམས་པར་འགྱུར་རོ། །ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་མཐོང་བའི་ཆོས་ལ་ཡོན་ཏན་འདི་དག་ཀྱང་ཡོངས་སུ་
༄༅། །འཛིན་པར་འགྱུར་རོ། །ཀཽ་ཤི་ཀ །གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྲིས་ཏེ་གླེགས་བམ་དུ་ཆུད་པར་བྱས་
ནས་མཆོད་པ་སྔོན་དུ་འགྲོ་བས་བཞག་སྟེ་མཆོད་པར་བྱེད་ལ། འཛིན་པར་མི་བྱེད། འཆང་བར་མི་བྱེད། ཀློག་པར་མི་བྱེད། ཀུན་ཆུབ་པར་མི་བྱེད། རབ་ཏུ་འདོན་པར་མི་བྱེད།
སྟོན་པར་མི་བྱེད། ཉེ་བར་སྟོན་པར་མི་བྱེད། ལུང་འབོགས་པར་མི་བྱེད། ཁ་ཏོན་དུ་མི་བྱེད་པ་དེ་བས་ནི། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་འདི་ཉིད་བསོད་ནམས་མང་
དུ་བསྐྱེད་དེ་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོག་ཅིང་མོས་ལ། སེམས་དང་བས་བྱང་ཆུབ་ཏུ་སེམས་བསྐྱེད་ནས་ལྷག་
པའི་བསམ་པས་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་
པ་དང༌། ཁ་ཏོན་བྱེད་པ་དང༌། གཞན་དག་ལའང་རྒྱ་ཆེར་ཡང་དག་པར་སྟོན་པ་དང༌། དེའི་དོན་རྣམ་པར་འགྲེལ་བ་དང༌། ཡིད་ཀྱིས་རྗེས་སུ་རྟོག་པ་དང༌། ཇི་ལྟ་བུར་གྲུབ་པའི་ཤེས་
རབ་ཀྱིས་འདིར་ཡོངས་སུ་དཔྱོད་པར་བྱེད་པ་དང༌། སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག། དམ་པའི་ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་རིང་དུ་གནས་པར་
བྱ་བ་དང༌། ཚུལ་དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་སྒྲུབ་པ་བྱས་པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་བྱས་ཏེ་
འཆང་ངམ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་
དང༌། དྲིལ་བུ་དང༌། བ་དན་དག་དང༌། ཁོར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་པོ་དག་གིས་ཀྱང་མཆོད་པར་བྱེད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བཀུར་སྟིར་
བྱེད༑ བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་ཉིད་དེ་བས་གཞི་དེ་ལས་བསོད་ནམས་ཆེས་
མང་དུ་བསྐྱེད་པར་འགྱུར་ཏེ། ཀཽ་ཤི་ཀ །དེ་ལྟ་བས་ན། འདི་ལྟར་ཚེ་འདི་ལ་ཡོན་ཏན་ཁྱད་པར་ཅན་འདི་དག་ཡོངས་སུ་འཛིན་པར་འདོད་པའི་རིགས་ཀྱི་བུའམ་རིགས་ཀྱི་བུ་མོས་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ཉིད་ལ་མངོན་པར་དད་པར་བྱ། རབ་ཏུ་བརྟག་པར་བྱ། ལྷག་པར་མོས་པར་བྱ། སེམས་དང་བས་བྱང་ཆུབ་ཏུ་སེམས་བསྐྱེད་ནས་ལྷག་པའི་བསམ་པས་མཉན་
པར་བྱ༑ གཟུང་བར་བྱ། བཅང་བར་བྱ། བཀླག་པར་བྱ། ཀུན་ཆུབ་པར་བྱ། རབ་ཏུ་གདོན་པར་བྱ། བསྟན་པར་བྱ། ཉེ་བར་བསྟན་པར་བྱ། ལུང་དཔོག་པར་བྱ། ཁ་ཏོན་དུ་བྱ།
༄༅། །གཞན་དག་ལའང་རྒྱ་ཆེར་ཡང་དག་པར་བསྟན་པར་བྱ། དེའི་དོན་རྣམ་པར་དགྲོལ་བར་བྱ། ཡིད་ཀྱིས་རྗེས་སུ་བརྟག་པར་བྱ། ཇི་ལྟ་བུར་གྲུབ་པའི་ཤེས་
རབ་ཀྱིས་འདིར་ཡོངས་སུ་དཔྱད་པར་བྱ། སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག །དམ་པའི་ཆོས་ནུབ་པར་མ་གྱུར་ཅིག །ཅེས་དམ་པའི་ཆོས་ཡུན་རིང་དུ་གནས་པར་བྱ་བ་
དང༌། ཚུལ་དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་སྒྲུབ་པ་བྱས་པར་འགྱུར་བར་ཆུང་ངུ་ན་གླེགས་བམ་དུ་ཆུད་པར་བྱས་ཏེ་
བཅང་ཞིང་གཞག་པར་བྱའོ། །དོན་དུ་གཉེར་བའི་རིགས་ཀྱི་བུའམ་རིགས་ཀྱི་བུ་མོ་དེ་དག་ལ་ཡང་དག་པར་བགོ་བར་བྱའོ། །བདག་དང་སེམས་ཅན་དགེ་བ་གཞན་དག་ལ་སངས་
རྒྱས་ཀྱི་ཚུལ་སྤྱན་ཆེན་པོ་དང་མ་བྲལ་བར་འགྱུར་རོ། །ཞེས་དེ་ལ་ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་དང༌།
ལྷའི་ན་བཟའ་དང༌། ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌། ལྷའི་བ་དན་དག་དང༌། ཁོ་ར་ཡུག་ཏུ་ལྷའི་མར་མེའི་ཕྲེང་བ་དག་དང༌། ལྷའི་མཆོད་པ་རྣམ་
པ་མང་པོ་དག་གིས་ཀྱང་རྟག་ཏུ་མཆོད་པར་བྱ་སྟེ། བཀུར་སྟིར་བྱ་།བླ་མར་བྱ། རྗེད་པར་བྱ། མཆོད་པར་བྱ། རི་མོར་བྱ་།བསྙེན་བཀུར་བྱའོ། །འཕགས་པ་ཤེས་རབ་ཀྱི་ཕ་
རོལ་ཏུ་ཕྱིན་པ་བརྒྱད་སྟོང་པ་ལས། ཕ་རོལ་ཏུ་ཕྱིན་པ་དང༌། མཆོད་རྟེན་ལ་བཀུར་སྟིར་བྱེད་པ་གཞལ་དུ་མེད་པའི་ཡོན་ཏན་འཛིན་པའི་ལེའུ་ཞེས་བྱ་བ་སྟེ། གསུམ་པའོ།། །།
གཞན་ཡང་བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་བཀའ་སྩལ་པ། ཀཽ་ཤི་ཀ །གལ་ཏེ་ཁྱོད་ལ་ཛམྦུའི་གླིང་འདི་དེ་བཞིན་གཤེགས་པའི་སྐུས་བྱུར་བུར་ཡོངས་
སུ་བཀང་སྟེ་བྱིན་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདིའང་བྲིས་ཏེ་གཏད་ནས་དེ་ལས་ཆ་གང་རུང་ཅིག་བསྟབས་ན། ཆ་བཞག་པ་དེ་གཉིས་ལས་ཀཽ་ཤི་ཀ །ཁྱོད་ཆ་གང་ལེན། བརྒྱ་
བྱིན་གྱིས་གསོལ་པ། བཅོམ་ལྡན་འདས། གལ་ཏེ་ཛམྦུའི་གླིང་འདི་དེ་བཞིན་གཤེགས་པའི་སྐུས་བྱུར་བུར་བལྟམས་ཏེ་སྩལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདིའང་བྲིས་ཏེ་
གཏད་ནས་དེ་ལས་ཆ་གང་རུང་ཅིག་བསྟབས་ན། ཆ་བཞག་པ་དེ་གཉིས་ལས་བཅོམ་ལྡན་འདས། བདག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལེན་ཏོ། །དེ་ཅིའི་སླད་དུ་ཞེ་ན།
འདི་ལྟ་སྟེ། དེ་བཞིན་གཤེགས་པའི་ཚུལ་ལ་རི་མོར་བགྱི་བའི་སླད་དུ་སྟེ། འདི་ནི། དེ་བཞིན་གཤེགས་པའི་ཡང་དག་པའི་དོན་གྱི་སྐུའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་
ཀྱིས་སངས་རྒྱས་བཅོམ་ལྡན་འདས་རྣམས་ནི། ཆོས་ཀྱི་སྐུ་ཅན་ཡིན་ཏེ། དགེ་སློང་དག །འདི་ལ་ནི། སྐུ་དམ་པར་མ་འཛིན་པར་དགེ་སློང་དག །ང་ནི། ཆོས་ཀྱི་སྐུས་ཡོངས་སུ་
༄༅། །རྫོགས་པར་ལྟོས་ཤིག །ཅེས་བྱ་བ་འདི་གསུངས་པས། དེ་བཞིན་གཤེགས་པའི་སྐུ་འདིའང་ཡང་དག་པའི་མཐས་རབ་ཏུ་ཕྱེ་བར་བལྟ་སྟེ། འདི་ལྟ་སྟེ། ཤེས་
རབ་ཀྱི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཡང་བདག་དེ་བཞིན་གཤེགས་པའི་སྐུ་དེ་རྣམས་ལ་མི་གུས་པའང་མ་ལགས་ཏེ། བཅོམ་ལྡན་འདས། དེ་བཞིན་གཤེགས་པའི་སྐུ་
དེ་དག་ལ་བདག་གུས་པ་ཉིད་ལགས་སོ། །བཅོམ་ལྡན་འདས། འོན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་དེ་བཞིན་གཤེགས་པའི་སྐུ་དེ་དག་འཁྲུངས་ཏེ་མཆོད་པ་བརྙེས་སོ། །
བཅོམ་ལྡན་འདས། དེ་ལྟ་བས་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཆོད་པས་དེ་བཞིན་གཤེགས་པའི་སྐུ་དེ་རྣམས་ལའང་མཆོད་པ་ཡོངས་སུ་རྫོགས་པར་བགྱིས་པར་
འགྱུར་རོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པའི་སྐུ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་བྱུང་བའི་སླད་དུའོ། །བཅོམ་ལྡན་འདས། འདི་ལྟ་སྟེ། དཔེར་ན། གང་
གི་ཚེ་བདག་ཆོས་བཟང་ལྷའི་མདུན་ས་ན་བདག་ཉིད་ཀྱི་ལྷའི་སྟན་ལ་མཆིས་པ་དེའི་ཚེ་ལྷའི་བུ་དག་བདག་གི་རིམ་གྲོ་བགྱི་བའི་སླད་དུ་མཆིའོ། །གང་གི་ཚེ་བདག་མ་མཆིས་པར་
གྱུར་པ་དེའི་ཚེའང་བདག་གི་སྟན་གང་ལགས་པ་དེར་ལྷའི་བུ་དེ་དག་བདག་ལ་གུས་པས་སྟན། དེ་ལ་ཕྱག་བགྱིས། བསྐོར་བ་བགྱིས་ནས་ཡང་སླར་མཆིའོ། །དེ་ཅིའི་སླད་དུ་ཞེ་ན།
ལྷ་རྣམས་ཀྱི་དབང་པོ་བརྒྱ་བྱིན་སྟན་འདི་ལ་མཆིས་ནས་སུམ་ཅུ་རྩ་གསུམ་པའི་ལྷ་རྣམས་ལ་ཆོས་སྟོན་པ་ཞེས་བྱ་བ་ཡིན་ནོ་སྙམ་མོ། །བཅོམ་ལྡན་འདས། དེ་བཞིན་དུ་དབང་ཆེ་བར་གྲགས་
པ་རྒྱུ་དང༌། རྐྱེན་དུ་གྱུར་པའི་ཤེས་རབ་ཀྱི་ཕ་རོལ་ཏུ་ཕྱིན་པའང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཐམས་ཅད་མཁྱེན་པ་ཉིད་སྒྲུབ་པར་བྱེད་པ་
ལགས་སོ། །དེ་བཞིན་གཤེགས་པའི་སྐུ་རྣམས་ནི། ཐམས་ཅད་མཁྱེན་པའི་གནས་སུ་གྱུར་པ་ལགས་ཀྱི། དེ་དག་ནི། ཡེ་ཤེས་སྐྱེ་བའི་རྒྱུར་གྱུར་པ་མ་ལགས། རྐྱེན་དུ་གྱུར་པ་མ་
ལགས་ཏེ། བཅོམ་ལྡན་འདས། དེ་ལྟར་དེ་བཞིན་གཤེགས་པའི་སྐུ་ལ་མཆོད་པ་ནི། ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་ལས་བྱུང་བ་ལགས་སོ། །བཅོམ་ལྡན་འདས། དེ་ལྟ་བས་
ན༑ ཆ་བཞག་པ་དེ་གཉིས་ལས་བཅོམ་ལྡན་འདས། བདག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལེན་ཏོ། །བཅོམ་ལྡན་འདས། བདག་དེ་བཞིན་གཤེགས་པའི་སྐུ་དེ་རྣམས་ལ་མི་
གུས་པའང་མ་ལགས་ཏེ། བཅོམ་ལྡན་འདས། དེ་བཞིན་གཤེགས་པའི་སྐུ་དེ་དག་ལ་བདག་གུས་པ་ཉིད་ལགས་སོ། །འོན་ཀྱང་དེ་བཞིན་གཤེགས་པའི་སྐུ་དག་ནི། ཤེས་རབ་ཀྱི་ཕ་
རོལ་ཏུ་ཕྱིན་པས་ཡོངས་སུ་བསྒོས་པས་མཆོད་པ་བརྙེས་སོ། །བཅོམ་ལྡན་འདས། ཡང་ཛམྦུའི་གླིང་དེ་བཞིན་གཤེགས་པའི་སྐུས་བྱུར་བུར་གཏམས་པ་ལྟ་ཞོག །གླིང་ཆེན་པོ་བཞི་པའི་
༄༅། །འཇིག་རྟེན་གྱི་ཁམས་དེ་བཞིན་གཤེགས་པའི་སྐུས་བྱུར་བུར་གཏམས་པ་ལྟ་ཞོག། སྟོང་གི་འཇིག་རྟེན་གྱི་ཁམས་དེ་བཞིན་གཤེགས་པའི་སྐུས་བྱུར་
བུར་བལྟམས་པ་ལྟ་ཞོག །སྟོང་གཉིས་པ་བར་མའི་འཇིག་རྟེན་གྱི་ཁམས་དེ་བཞིན་གཤེགས་པའི་སྐུས་བྱུར་བུར་བལྟམས་པ་ལྟ་ཞོག །བཅོམ་ལྡན་འདས། སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་འདི་ཉིད་དེ་བཞིན་གཤེགས་པའི་སྐུས་བྱུར་བུར་གཏམས་ཏེ་ཆ་གཅིག་ཏུ་བགྱིས་ཏེ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་འདིའང་བྲིས་
ལ་ཆ་གཉིས་པར་བཞག་སྟེ། ཆ་བཞག་པ་འདི་གཉིས་ལས་ཁྱོད་ཆ་གང་འདོད་པ་གཅིག་ཁྱེར་ཅིག་ཅེས་ཆ་གཅིག་བསྟབས་ན། བཅོམ་ལྡན་འདས། དེ་ལ་བདག་ནི། ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ཉིད་ལེན་ཏོ། །བཅོམ་ལྡན་འདས། བདག་དེ་བཞིན་གཤེགས་པའི་སྐུ་དེ་རྣམས་ལ་མི་གུས་པའང་མ་ལགས་ཏེ། བཅོམ་ལྡན་འདས། དེ་བཞིན་གཤེགས་
པའི་སྐུ་དེ་དག་ལ་བདག་གུས་པ་ཉིད་ལགས་སོ། །འོན་ཀྱང་དེ་བཞིན་གཤེགས་པའི་སྐུ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བསྒོས་པས་མཆོད་པ་བརྙེས་སོ། །དེ་
བཞིན་གཤེགས་པའི་སྐུ་རྣམས་ནི། ཐམས་ཅད་མཁྱེན་པའི་ཡེ་ཤེས་ཀྱི་གནས་སུ་གྱུར་པ་ལགས་ལ། ཐམས་ཅད་མཁྱེན་པའི་ཡེ་ཤེས་དེའང་ཤེས་རབ་ཀྱི་ཕ་རོལ་ཏུ་ཕྱིན་པ་ལས་
ངེས་པར་འབྱུང་བ་ལགས་སོ། །བཅོམ་ལྡན་འདས། དེ་ལྟ་བས་ན། ཆ་བཞག་པ་དེ་གཉིས་ལས་བཅོམ་ལྡན་འདས། བདག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལེན་ཏོ། །
བཅོམ་ལྡན་འདས། བདག་དེ་བཞིན་གཤེགས་པའི་སྐུ་ལ་གུས་པར་མི་བགྱིད་པའང་མ་ལགས་ཏེ། བཅོམ་ལྡན་འདས། བདག་དེ་བཞིན་གཤེགས་པའི་སྐུ་དེ་དག་ལ་གུས་པ་ཉིད་
ལགས་སོ། །བཅོམ་ལྡན་འདས། འོན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་དེ་བཞིན་གཤེགས་པའི་སྐུ་དེ་དག་ཀྱང་འཁྲུངས་ཏེ། དེ་བཞིན་གཤེགས་པའི་སྐུ་དེ་དག་མཆོད་པ་
བརྙེས་པ་ནི། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བསྒོས་པ་ལགས་པའི་སླད་དུའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ།
བམ་པོ་ལྔ་པ། བཅོམ་ལྡན་འདས། འདི་ལྟ་སྟེ། དཔེར་ན། རིན་ཐང་མ་མཆིས་པའི་ནོར་བུ་རིན་པོ་ཆེ་ཡོན་ཏན་འདི་ལྟ་བུའི་ངོ་བོ་འདི་དག་དང་ལྡན་པ་ཞིག་མཆིས་ཏེ། འདི་ལྟ་སྟེ། དེ་
གང་དང་གང་དུ་བཞག་པ་དེ་དང་དེར་མི་དང༌། མི་མ་ལགས་པ་དག་གིས་གླགས་རྙེད་པར་མི་འགྱུར། གང་དང་གང་དུ་སྐྱེས་པའམ་བུད་མེད་ལ་ལ་མི་མ་ལགས་པས་ཟིན་པ་དེ་དང་
དེར་ནོར་བུ་རིན་པོ་ཆེ་ཆེན་པོ་དེ་སྩལ་མ་ཐག་ཏུ་མི་མ་ལགས་པ་དེ་དེ་ནས་འབྱེར། བསེར་མས་གཟིར་ཅིང་རྒྱས་པའི་ལུས་ལ་ནོར་བུ་རིན་པོ་ཆེ་བཞག་ནའང་དེའི་བསེར་མ་དེ་ཚར་
༄༅། །གཅོད་དེ་མི་འཕེལ་བ་དང༌། ཞི་བར་བགྱིད། མཁྲིས་པས་ཚ་བར་གྱུར་པའི་ལུས་ལ་བཞག་ནའང་དེའི་མཁྲིས་པ་དེའང་ཚར་གཅོད་དེ་མི་འཕེལ་བ་དང༌།
ཞི་བར་བགྱིད། བད་ཀན་གྱིས་ཡོངས་སུ་རྒྱས་ཤིང་ཀུན་ཏུ་གཟིར་བའི་སྟེང་དུ་བཞག་ནའང་དེའི་བད་ཀན་དེའང་ཚར་གཅོད་དེ་མི་འཕེལ་བ་དང༌། ཞི་བར་བགྱིད། འདུས་པའི་
ནད་ཀྱིས་སྡུག་བསྔལ་བའི་ལུས་ལ་བཞག་ནའང་དེའི་འདུས་པའི་ནད་དེའང་ཚར་གཅོད་དེ་མི་འཕེལ་བ་དང༌། ཞི་བར་བགྱིད། མཚན་མོ་མུན་པ་མུན་ནག་གི་ནང་དུ་ནི། སྣང་བར་
བགྱིད༑ ཚ་བའི་ཚེ་ནའང་ས་ཕྱོགས་གང་དུ་བཞག་པའི་ས་ཕྱོགས་དེ་བསིལ་བར་འགྱུར། གྲང་བའི་ཚེ་ནའང་ས་ཕྱོགས་གང་དུ་བཞག་པའི་ས་ཕྱོགས་དེ་དྲོ་བར་འགྱུར་རོ། །ས་
ཕྱོགས་གང་ན་སྦྲུལ་གདུག་པ་མཆིས་པ་དང༌། དེ་བཞིན་དུ་སྲོག་ཆགས་ཕྲ་མོ་གཞན་དག་མཆིས་པའི་ས་ཕྱོགས་དེར་འཛིན་ཅིང་བཞག་ན། སྦྲུལ་གདུག་པ་དེ་དག་དང༌། སྲོག་
ཆགས་ཕྲ་མོ་དེ་དག་ཀྱང་འབྱེར་རོ། །བཅོམ་ལྡན་འདས། གལ་ཏེ་སྐྱེས་པའམ་བུད་མེད་སྦྲུལ་གདུག་པས་ཟིན་ན། དེ་ལ་ནོར་བུ་རིན་པོ་ཆེ་དེ་བསྟན་ན། ནོར་བུ་རིན་པོ་ཆེ་དེ་
མཐོང་མ་ཐག་ཏུ་དེའི་དུག་བཅོམ་ནས་མ་མཆིས་པར་འགྱུར་ཏེ། བཅོམ་ལྡན་འདས། ནོར་བུ་རིན་པོ་ཆེ་དེའང་ཡོན་ཏན་དེ་དག་དང་དེ་ལྟ་བུའི་ངོ་བོ་གཞན་དག་དང་ཡང་ལྡན་ནོ། །
བཅོམ་ལྡན་འདས། གང་སུ་དག་མིག་ལ་ཆུ་བུར་རམ། རབ་རིབ་བམ། མིག་ནད་དམ། ལིང་ཏོག་བྱུང་ན། དེ་དག་གི་མིག་གི་སྟེང་དུ་ནོར་བུ་རིན་པོ་ཆེ་དེ་བཞག་ན། དེ་དག་ལ་བཞག་མ་
ཐག་ཏུ་མིག་གི་སྐྱོན་དེ་དག་ཀྱང་བྱང་ཞིང་ཞི་བར་འགྱུར་ཏེ། བཅོམ་ལྡན་འདས། ནོར་བུ་རིན་པོ་ཆེ་དེ་ཡོན་ཏན་དེ་དག་དང༌། དེ་ལྟ་བུ་གཞན་དག་དང་ཡང་ལྡན་ནོ། །ཆབ་གང་གི་ནང་དུ་སྩལ་
པའི་ཆབ་དེའང་རང་གི་མདོག་ཏུ་མདོག་གཅིག་པར་འགྱུར། གལ་ཏེ་རས་དཀར་པོས་དཀྲིས་ཏེ་ཆབ་ཀྱི་ནང་དུ་སྩལ་ན་ཆབ་དེའང་དཀར་པོར་འགྱུར། དེ་བཞིན་དུ་གལ་ཏེ་རས་སྔོན་པོ་
དང༌། སེར་པོ་དང༌། དམར་པོ་དང༌། བཙོད་ཀ་དང༌། དེ་ལྟ་བུ་དག་དང༌། གཞན་དག་ཀྱང་རུང་སྟེ་རས་རྣམ་པ་སྣ་ཚོགས་ཀྱི་ནང་ནས་རས་གང་ཡང་རུང་བས་ནོར་བུ་རིན་པོ་ཆེ་དེ་དཀྲིས་
སམ༑ བཅིངས་ཏེ་ཆབ་ཀྱི་ནང་དུ་སྩལ་ན། རས་ཀྱི་ཚོན་དེ་དང་དེ་དག་གི་ཆབ་ཀྱང་དེ་དང་དེ་དག་གི་རང་བཞིན་གྱི་མདོག་ཏུ་འགྱུར་ལ། ཆབ་དེ་ལ་རྙོག་པར་གྱུར་པ་ཅི་མཆིས་པ་དེ་དག་
ཀྱང་དང་བར་འགྱུར་ཏེ། བཅོམ་ལྡན་འདས། ནོར་བུ་རིན་པོ་ཆེ་དེ། ཡོན་ཏན་དེ་ལྟ་བུའི་ངོ་བོ་དག་དང་ལྡན་ནོ། །དེ་ནས་ཚེ་དང་ལྡན་པ་ཀུན་དགའ་བོས་ལྷ་རྣམས་ཀྱི་དབང་པོ་བརྒྱ་བྱིན་ལ་
འདི་སྐད་ཅེས་སྨྲས་སོ། །ཀཽ་ཤི་ཀ །ཡང་ཅི་ནོར་བུ་རིན་པོ་ཆེ་དེ་དག་ལྷའི་འཇིག་རྟེན་འབའ་ཞིག་ན་ཡོད་དམ། འོན་ཏེ་ནོར་བུ་རིན་པོ་ཆེ་དེ་དག་ཛམྦུའི་གླིང་གི་མི་རྣམས་ལའང་ཡོད། བརྒྱ་
༄༅། །བྱིན་གྱིས་སྨྲས་པ། འཕགས་པ་ཀུན་དགའ་བོ། ནོར་བུ་རིན་པོ་ཆེ་དེ་དག་ནི། ལྷའི་ནང་ན་ཡོད་དེ། ཛམྦུའི་གླིང་གི་མི་དག་ལའང་ནོར་བུ་རིན་པོ་ཆེ་ཡོད་
མོད་ཀྱི༑ དེ་དག་ནི། ལྕི་ལ་ཆུང་ཞིང་ཕྲ་ལ་ཡོན་ཏན་མ་རྫོགས་ཏེ། དེ་ལྟ་བུའི་ངོ་བོའི་ཡོན་ཏན་དེ་དག་དང་མི་ལྡན་པས་ལྷའི་ནོར་བུ་རིན་པོ་ཆེ་དེ་དག་གི་བརྒྱའི་ཆར་ཡང་ཉེ་བར་མི་
འགྲོ། སྟོང་གི་ཆར་ཡང༌། བརྒྱ་སྟོང་གི་ཆར་ཡང༌། བྱེ་བའི་ཆར་ཡང༌། བྱེ་བ་བརྒྱའི་ཆར་ཡང༌། བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང༌། བྱེ་བ་ཁྲག་ཁྲིག་བརྒྱ་སྟོང་
གི་ཆར་ཡང་ཉེ་བར་མི་འགྲོའོ། །གྲངས་སུའང༌། བགྲང་བར་ཡང༌། དཔེར་ཡང༌། དཔེས་བསྟན་པར་བྱ་བར་ཡང༌། རྟེན་དུའང༌། ཉེ་བའི་རྒྱུར་ཡང་མི་བཟོད་དེ། ལྷ་རྣམས་ཀྱི་ནོར་བུ་
རིན་པོ་ཆེ་གང་ཡིན་པ་དེ་དག་ནི། ཡང་ཞིང་ཡོན་ཏན་གྱི་རྣམ་པ་ཐམས་ཅད་ཡོངས་སུ་རྫོགས་པ་ཡིན་ནོ། །ནོར་བུ་རིན་པོ་ཆེ་དེ་ཟ་མ་ཏོག་གང་གི་ནང་དུ་བཅུག་གམ་ཕྱུང་ན། ནོར་བུ་
རིན་པོ་ཆེ་དེ་ཕྱུང་ཡང་དེས་ཟ་མ་ཏོག་དེ་སྙིང་དུ་སྡུག་པར་འགྱུར། ནོར་བུ་རིན་པོ་ཆེ་དེའི་ཡོན་ཏན་དེ་དག་གིས་ཟ་མ་ཏོག་དེ་ལ་ཤིན་ཏུ་སྙིང་དུ་སྡུག་པ་སྐྱེའོ། །བཅོམ་ལྡན་འདས།
དེ་བཞིན་དུ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པར་གྱུར་ཀྱང་དེ་བཞིན་གཤེགས་པའི་སྐུ་དེ་
དག་གིས་མཆོད་པ་བརྙེས་པ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐམས་ཅད་མཁྱེན་པའི་ཡེ་ཤེས་ཀྱི་ཡོན་ཏན་ལགས་ཏེ། དེ་བཞིན་གཤེགས་པའི་སྐུ་འདི་དག་ནི། ཐམས་ཅད་
མཁྱེན་པའི་ཡེ་ཤེས་ཀྱི་སྣོད་དུ་གྱུར་པ་ལགས་སོ། །བཅོམ་ལྡན་འདས། ཡང་ཇི་ལྟར་སངས་རྒྱས་བཅོམ་ལྡན་འདས་རྣམས་འཇིག་རྟེན་གྱི་ཁམས་ཐམས་ཅད་དུ་ཆོས་སྟོན་པར་མཛད་པ་
ནི༑ ཤེས་རབ་ཀྱི་ཕ་རོལ་ཏུ་ཕྱིན་པ་ལས་འཁྲུངས་པའི་སླད་དུ་མཆོད་པར་བགྱི་བ་དེ་བཞིན་དུ་ཆོས་སྨྲ་བ་པོའི་ཆོས་སྟོན་པ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལས་སྐྱེས་པའི་སླད་དུ་
མཆོད་པར་བགྱི་བ་ལགས་སོ། །བཅོམ་ལྡན་འདས། དཔེར་ན། རྒྱལ་པོའི་སྐྱེས་བུ་ནི། རྒྱལ་པོའི་མཐུས་སྐྱེ་བོ་ཆེན་པོའི་ཚོགས་སུས་ཀྱང་མི་འཇིགས་པར་བཀུར་བར་འགྱུར་རོ། །དེ་
བཞིན་དུ་ཆོས་སྨྲ་བ་པོ་དེ་ཆོས་ཀྱི་སྐུའི་མཐུས་སྐྱེ་བོའི་ཚོགས་ཆེན་པོ་སུས་ཀྱང་མི་འཇིགས་པར་མཆོད་དོ། །ཅི་ལྟར་ཆོས་སྟོན་པའི་ཆོས་སྨྲ་བ་པོ་མཆོད་པ་བརྙེས་པ་དེ་ལྟར་དེ་བཞིན་
གཤེགས་པའི་སྐུ་གདུང་དེ་རྣམས་ཀྱིས་མཆོད་པ་བརྙེས་སོ། །བཅོམ་ལྡན་འདས། དེ་ལྟ་བས་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་བཞིན་གཤེགས་པའི་སྐུས་
བྱུར་བུར་བལྟམས་པ་ལྟ་ཞོག །བཅོམ་ལྡན་འདས། གང་ཡང་གངྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་དེ་དག་ཀྱང་དེ་བཞིན་གཤེགས་པའི་སྐུས་བྱུར་བུར་གཏམས་པ་ཆ་
༄༅། །གཅིག་ཏུ་བཞག་ལ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྲིས་ནས་ཆ་གཉིས་པར་བཞག་སྟེ། བཅོམ་ལྡན་འདས། ལ་ལ་ཞིག་གིས་བདག་ལ་ཆ་བཞག་
པ་འདི་གཉིས་ལས་ཁྱོད་གང་འདོད་པ་ཆ་གཅིག་ཁྱེར་ཅིག་ཅེས་བསྟབས་ན། ཆ་བཞག་པ་དེ་གཉིས་ལས་བདག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལེན་ཏོ། །བཅོམ་ལྡན་
འདས༑ བདག་དེ་བཞིན་གཤེགས་པའི་སྐུ་དེ་རྣམས་ལ་མི་གུས་པ་ཡང་མ་ལགས་ཀྱི། བཅོམ་ལྡན་འདས། དེ་བཞིན་གཤེགས་པའི་སྐུ་དེ་དག་ལའང་བདག་གུས་པ་ལགས་
ཏེ༑ བཅོམ་ལྡན་འདས། འོན་ཀྱང་ཐམས་ཅད་མཁྱེན་པ་ཉིད་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལས་རབ་ཏུ་ཕྱེ་བ་ལགས་ལ། དེ་བཞིན་གཤེགས་པའི་སྐུ་ལ་མཆོད་པ་ནི།
ཐམས་ཅད་མཁྱེན་པའི་ཡེ་ཤེས་ལས་སྐྱེས་པ་ལགས་སོ། །བཅོམ་ལྡན་འདས། དེ་ལྟ་བས་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་མཆོད་ན་།འདས་པ་དང༌། མ་བྱོན་པ་དང༌། ད་
ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་མཆོད་པ་བགྱིས་པར་འགྱུར་རོ། །བཅོམ་ལྡན་འདས། གཞན་ཡང་འཇིག་རྟེན་གྱི་ཁམས་གཞལ་དུ་མ་མཆིས་གྲངས་མ་
མཆིས་པ་དག་ན་སངས་རྒྱས་བཅོམ་ལྡན་འདས་རྣམས་ད་ལྟར་བཞུགས་ཏེ་འཚོ་ཞིང་གཞེས་པ་དེ་དག་ཆོས་ཉིད་དུ་ལྟ་བར་འདོད་པའི་རིགས་ཀྱི་བུའམ་རིགས་ཀྱི་བུ་མོས་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ལ་སྤྱད་པར་བགྱིའོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་རྣལ་འབྱོར་དུ་བགྱིའོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བསྒོམ་པར་བགྱིའོ། །དེ་སྐད་ཅེས་
གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །དེ་དེ་བཞིན་ནོ། །དེ་དེ་བཞིན་ཏེ། ཀཽ་ཤི་ཀ །འདས་པའི་དུས་ན་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་བྱུང་བར་གྱུར་པ་དེ་དག་ཀྱང་ཀཽ་ཤི་ཀ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ཏེ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀཽ་ཤི་ཀ །མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་གང་དག་འབྱུང་བར་འགྱུར་བ་དེ་དག་ཀྱང་ཀཽ་ཤི་ཀ །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
འཚང་རྒྱ་བར་འགྱུར་རོ། །ཀཽ་ཤི་ཀ །ད་ལྟར་གྱི་དུས་ན་འཇིག་རྟེན་གྱི་ཁམས་གཞལ་དུ་མེད་གྲངས་མེད་པ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་
པ་དེ་དག་ཀྱང་ཀཽ་ཤི་ཀ །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀཽ་ཤི་ཀ །ད་ལྟར་དེ་
༄༅། །བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ང་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ཏེ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་
གསོལ་ཏོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཕ་རོལ་ཏུ་ཕྱིན་པ་ཆེན་པོ་ལགས་ཏེ། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཀྱིས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་རབ་ཏུ་མཁྱེན་ཅིང་ཡང་དག་པར་གཟིགས་སོ། །བཅོམ་ལྡན་འདས་ཀྱིས་བཀའ་སྩལ་
པ༑ ཀཽ་ཤི་ཀ །དེ་དེ་བཞིན་ནོ། །དེ་དེ་བཞིན་ཏེ། ཀཽ་ཤི་ཀ །འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཡུན་རིང་པོར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་ན་།དེས་སེམས་
ཅན་ཐམས་ཅད་ཀྱི་སེམས་ཀྱི་སྤྱོད་པའང་ཤེས་རབ་ཀྱི་ཕ་རོལ་ཏུ་ཕྱིན་པས་ཡང་དག་པར་ཤེས་ཤིང་ཡང་དག་པར་མཐོང་ངོ༌། །དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་
བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཅི་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་འབའ་ཞིག་ལ་སྤྱོད་ཀྱི། ཕ་རོལ་ཏུ་ཕྱིན་
པ་གཞན་དག་ལ་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་པོ་ཐམས་ཅད་ལ་སྤྱོད་དེ།
ཀཽ་ཤི་ཀ །འོན་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ན་འདི་དག་གི་སྔོན་དུ་འགྲོ་བའོ། །སྦྱིན་པ་སྦྱིན་པར་བྱེད་པ་དང༌། ཚུལ་ཁྲིམས་
སྲུང་བ་དང༌། བཟོད་པ་སྒྲུབ་པ་དང༌། བརྩོན་འགྲུས་རྩོམ་པ་དང༌། བསམ་གཏན་ལ་མཉམ་པར་གཞོག་པ་དང༌། ཆོས་ལ་རྣམ་པར་ལྟ་བའི་བྱང་ཆུབ་སེམས་དཔའ་སེམས་དཔའ་
ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ན་འདི་དག་གི་སྔོན་དུ་འགྲོ་བའོ། །ཀཽ་ཤི་ཀ །ཕ་རོལ་ཏུ་ཕྱིན་པ་དྲུག་པོ་ཐབས་མཁས་པས་ཡོངས་སུ་ཟིན་ཅིང་ཤེས་རབ་ཀྱི་ཕ་རོལ་ཏུ་ཕྱིན་
པས་ཡོངས་སུ་བསྔོས་པ་དང༌། ཐམས་ཅད་མཁྱེན་པར་ཡོངས་སུ་བསྔོས་པ་འདི་རྣམས་ལ་ནི། བྱེ་བྲག་མེད་ཅིང་ཐ་དད་དུ་བྱ་བ་མི་དམིགས་སོ། །ཀཽ་ཤི་ཀ །འདི་ལྟ་སྟེ། དཔེར་ན་
ཛམྦུའི་གླིང་གི་ཤིང་སྣ་ཚོགས་ནི། ཁ་དོག་ཐ་དད། དབྱིབས་ཐ་དད། ལོ་མ་ཐ་དད། མེ་ཏོག་ཐ་དད། འབྲས་བུ་ཐ་དད། ཆུ་ཞེང་ཕུན་སུམ་ཚོགས་པ་ཐ་དད་ཀྱང་ཤིང་དེ་དག་གི་གྲིབ་མ་
བྱེ་བྲག་མེད་ཅིང་ཐ་དད་དུ་བྱ་བ་མི་མངོན་ཏེ། གཞན་དུ་ན་གྲིབ་མ་གྲིབ་མ་ཞེས་བྱ་བའི་གྲངས་སུ་འགྲོ་བ་དེ་བཞིན་དུ་ཀཽ་ཤི་ཀ །ཕ་རོལ་ཏུ་ཕྱིན་པ་དྲུག་པོ་ཐབས་མཁས་པས་ཡོངས་སུ་
༄༅། །ཟིན་ཅིང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བསྔོས་པ་དང༌། ཐམས་ཅད་མཁྱེན་པར་ཡོངས་སུ་བསྔོས་པ་འདི་རྣམས་ལ་ནི། བྱེ་བྲག་མེད་ཅིང་
ཐ་དད་དུ་བྱ་བ་མི་དམིགས་སོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས།
འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཡོན་ཏན་ཆེན་པོ་དང་ལྡན་ནོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། གཞལ་དུ་མ་
མཆིས་པའི་ཡོན་ཏན་དང་ལྡན་ནོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མུ་མ་མཆིས་པའི་ཡོན་ཏན་དང་ལྡན་ནོ། །འཕགས་པ་ཤེས་རབ་
ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། ཡོན་ཏན་ཡོངས་སུ་བརྗོད་པ་ཞེས་བྱ་བའི་ལེའུ་སྟེ། བཞི་པའོ།། །།དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་
བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོག་ཅིང་མོས་ལ་
སེམས་དང་བས་བྱང་ཆུབ་ཏུ་སེམས་བསྐྱེད་ནས་ལྷག་པའི་བསམ་པས་ཉན་ཅིང་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌།
སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པ་དང༌། གཞན་དག་ལའང་རྒྱ་ཆེར་ཡང་དག་པར་སྟོན་པ་དང༌། འདིའི་དོན་རྣམ་པར་འགྲེལ་པ་དང༌། ཡིད་
ཀྱིས་རྗེས་སུ་རྟོག་པ་དང༌། ཇི་ལྟ་བུར་གྲུབ་པའི་ཤེས་རབ་ཀྱིས་འདིར་ཡོངས་སུ་དཔྱོད་པར་བགྱིད་པ་དང༌། སངས་རྒྱས་ཀྱི་ཚུལ་རྒྱུན་ཆད་པར་མ་གྱུར་ཅིག །དམ་པའི་ཆོས་ནུབ་པར་མ་
གྱུར་ཅིག་ཅེས་དམ་པའི་ཆོས་ཡུན་རིང་དུ་གནས་པར་བགྱི་བ་དང༌། ཚུལ་དང་མ་བྲལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕན་གདགས་པ་སྒྲུབ་པ་བགྱིས་པར་འགྱུར་བར་
ཆུང་ངུ་ན་གླེགས་བམ་དུ་ཆུད་པར་བགྱིས་ཏེ་འཆང་ངམ་འཇོག་པ་དང༌། དེ་ལྟར་བསྟན་པ་འདི་ཐོས་ནས་ཀྱེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། འདི་ལྟར་དོན་ཆེའོ། །ཀྱེ་མ་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ནི། འདི་ལྟར་ཕན་ཡོན་ཆེའོ། །ཀྱེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། འདི་ལྟར་འབྲས་བུ་ཆེའོ། །ཀྱེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། འདི་ལྟར་
རྣམ་པར་སྨིན་པ་ཆེའོ། །ཀྱེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། འདི་ལྟར་ཡོན་ཏན་མང་པོ་དང་ལྡན་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བདག་གིས་གཏང་བར་མི་
བྱའོ༑ ༑ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བདག་གིས་བསྲུང་བར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བདག་གིས་སྦ་བར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་
༄༅། །ཤིན་ཏུ་རྙེད་པར་དཀའོ། །ཞེས་ལྷག་པར་མོས་ཤིང་བདག་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་
དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོར་ཡུག་ཏུ་མར་མེའི་ཕྲེང་བ་དག་དང༌། མཆོད་པ་རྣམ་པ་མང་
པོ་དག་གིས་མཆོད་དེ། བཀུར་སྟིར་བགྱིད་པ་དང༌། བླ་མར་བགྱིད་པ་དང༌། རྗེད་པར་བགྱིད་པ་དང༌། མཆོད་པར་བགྱིད་པ་དང༌། རི་མོར་བགྱིད་པ་དང༌། བསྙེན་བཀུར་བགྱིད་པ་
དང༌། ཡང་གཞན་ཞིག་ཐ་ན་གླེགས་བམ་དུ་ཡང་ཆུད་པར་བགྱིས་ནས་མཆོད་དེ། རིགས་ཀྱི་བུའམ་རིགས་ཀྱི་བུ་མོ་གཞན་དོན་དུ་གཉེར་ཞིང་འདུན་ནས་སློང་བ་ལ་སྦྱིན་པ་དང༌།
སྟོབ་ཅིང་འབུལ་ལ་ཡོངས་སུ་གཏོང་ན། བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གཏོང་བའི་བློ་དང་ལྡན་པ་གང་ལགས་པ་དང༌། གཏོང་བའི་བློ་དང་མི་ལྡན་པ་གང་
ལགས་པ་དེ་གཉིས་གང་གིས་བསོད་ནམས་ཆེས་མང་དུ་བསྐྱེད། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་
སྩལ་ཏོ། །ཀཽ་ཤི་ཀ །དེའི་ཕྱིར་འདིར་ཁྱོད་ཉིད་ལ་དྲི་སྟེ། ཁྱོད་ཀྱིས་ཇི་ལྟར་ནུས་པ་དེ་བཞིན་དུ་ལུང་སྟོན་ཅིག །ཀཽ་ཤི་ཀ །དེ་ཇི་སྙམ་དུ་སེམས། རིགས་ཀྱི་བུའམ་རིགས་ཀྱི་བུ་མོ་
གང་དེ་བཞིན་གཤེགས་པ་མྱ་ངན་ལས་འདས་པའི་སྐུ་ལ་བདག་ཉིད་ཀྱིས་བཀུར་སྟིར་བྱས་ནས་བསྙེན་བཀུར་བྱེད་ཅིང་འཛིན་པར་བྱེད་དེ། བཀུར་སྟིར་བྱེད་པ་དང༌། བླ་མར་བྱེད་པ་དང༌།
རྗེད་པར་བྱེད་པ་དང༌། མཆོད་པར་བྱེད་པ་དང༌། རི་མོར་བྱེད་པ་དང༌། བསྙེན་བཀུར་བྱེད་པ་དང༌། རིགས་ཀྱི་བུའམ་རིགས་ཀྱི་བུ་མོ་གཞན་གང་ཞིག་དེ་བཞིན་གཤེགས་པའི་སྐུ་ལ་བདག་
ཉིད་ཀྱིས་ཀྱང་བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ལ་མཆོད་པ་རྒྱས་པར་འགྱུར་རོ་སྙམ་པས། སེམས་ཅན་རྣམས་
ལའང་སྙིང་བརྩེ་བའི་ཕྱིར་གཞན་དག་ལའང་རྒྱ་ཆེར་ཡང་དག་པར་སྟོན་པར་བྱེད། སྦྱིན་པར་བྱེད། ཀུན་འགེད་པར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་གཉིས་གང་
བསོད་ནམས་ཆེས་མང་དུ་བསྐྱེད། ཅི་བདག་ཉིད་ཀྱིས་ཀྱང་མཆོད་པར་བྱེད་ལ་གཞན་དག་ལའང་རྒྱ་ཆེར་ཡང་དག་པར་སྟོན་པར་བྱེད། སྦྱིན་པར་བྱེད། ཀུན་འགེད་པར་བྱེད་པ་གང་
ཡིན་པ་དེ་ཆེས་བསོད་ནམས་མང་དུ་བསྐྱེད་དམ། ཅི་འོན་ཏེ་གང་ཞིག་རང་ཉིད་ཁོ་ནས་བདག་ཉིད་སོ་སོ་ལ་མཆོད་པ་བསོད་ནམས་མང་དུ་བསྐྱེད། བརྒྱ་བྱིན་གྱིས་གསོལ་པ། བཅོམ་
ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་བདག་ཉིད་ཀྱང་དེ་བཞིན་གཤེགས་པའི་སྐུ་ལ་བཀུར་སྟིར་བགྱིད། བླ་མར་བགྱིད། རྗེད་པར་བགྱིད། མཆོད་པར་བགྱིད། རི་མོར་
༄༅། །བགྱིད། བསྙེན་བཀུར་བགྱིད་ལ་མཆོད་པ་རྒྱས་པར་འགྱུར་རོ། །སྙམ་པས་སེམས་ཅན་རྣམས་ལ་གློ་བ་བརྩེ་བའི་སླད་དུ་གཞན་དག་ལའང་རྒྱ་ཆེར་ཡང་དག་པར་
སྟོན་པར་བགྱིད། སྦྱིན་པར་བགྱིད། ཀུན་འགེད་པར་བགྱིད་ན། འདི་གཉིས་ལས་རིགས་ཀྱི་བུའམ་རིགས་ཀྱི་བུ་མོ་འདི་ཉིད་དེ་བས་ཆེས་བསོད་ནམས་མང་དུ་བསྐྱེད་དོ། །བཅོམ་
ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་དེ་བཞིན་ནོ། །དེ་དེ་བཞིན་ཏེ། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་གང་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྲིས་
ནས་གླེགས་བམ་དུ་ཆུད་པར་བྱས་ཏེ་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་
པ་དང༌། ཁ་ཏོན་བྱེད་པ་དང༌། རིགས་ཀྱི་བུའམ་རིགས་ཀྱི་བུ་མོ་གཞན་དོན་དུ་གཉེར་ཞིང་འདུན་ནས་སློང་བ་དག་ལ་ཆུང་ངུ་ན་གླེགས་བམ་དུའང་ཆུད་པར་བྱས་ཏེ་སྦྱིན་པ་དང་སྟོབ་
ཅིང་འབུལ་ལ་ཡོངས་སུ་གཏོང་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་གཉིས་ལས། རིགས་ཀྱི་བུའམ་རིགས་ཀྱི་བུ་མོ་གཞན་རྗེས་སུ་འཛིན་པར་བྱེད་པ་ཡོངས་སུ་
གཏོང་བའི་བློ་དང་ལྡན་པ་འདི་ཉིད་གཞི་དེ་ལས་བསོད་ནམས་མང་དུ་བསྐྱེད་དོ། །ཀཽ་ཤི་ཀ །གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་
འདིའི་སྣོད་དུ་གྱུར་པའི་རིགས་ཀྱི་བུའམ་རིགས་ཀྱི་བུ་མོ་གང་དང་གང་ན་འདུག་པ་དེ་དང་དེར་སོང་སྟེ། དེ་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སྦྱིན་པར་བྱེད། ཡང་དག་པར་
འགེད་པར་བྱེད་ན། འདི་ཉིད་ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་དེ་བས་ཆེས་བསོད་ནམས་མང་དུ་བསྐྱེད་དོ། །ཀཽ་ཤི་ཀ །གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་
གིས་ཛམྦུའི་གླིང་གི་སེམས་ཅན་གང་ཇི་སྙེད་ཡོད་པ་དེ་དག་ཐམས་ཅད་དགེ་བ་བཅུའི་ལས་ཀྱི་ལམ་ལ་ཡང་དག་པར་བཀོད་ཅིང་བཞག་ན། ཀཽ་ཤི་ཀ །འདི་ཇི་སྙམ་དུ་སེམས། ཅི་རིགས་
ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་ཆེས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། བདེ་བར་གཤེགས་པ། མང་ངོ༌། །བཅོམ་
ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་
གླེགས་བམ་དུ་ཆུད་པར་བྱས་ཏེ་མངོན་པར་དད་པས་མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་
དང་བ་ལ། ལྷག་པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་
༄༅། །དཔའ་ལ་ལྷག་པའི་བསམ་པས་བྱིན་ནམ། ཆུང་ངུ་ན་བྲི་བ་དང་ཀློག་པ་ལ་ཡང་སྙོམ་ལས་མེད་པར་སྒྲུབ་ཅིང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་
དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་
མཚོན་པ་དང༌། རྗེས་སུ་མཚོན་པ་དང༌། དེ་ལ་འདིའི་དོན་ཡང་དག་པར་སྟོན་ཅིང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་འདི་ལྟར་
སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །
མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་
པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་ཡོངས་
སུ་གཏོང་བའི་བློ་དང་ལྡན་པ་འདི་ནི། རིགས་ཀྱི་བུའམ་རིགས་ཀྱི་བུ་མོ་སྔ་མ་དེ་བས་ཀྱང་ཆེས་བསོད་ནམས་མང་དུ་བསྐྱེད་དོ། །ཀཽ་ཤི་ཀ །ཡང་ཛམྦུའི་གླིང་གི་སེམས་ཅན་ཐམས་
ཅད་ལྟ་ཞོག །ཀཽ་ཤི་ཀ །རྣམ་གྲངས་འདིས་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་
གིས་དགེ་བ་བཅུའི་ལས་ཀྱི་ལམ་ལ་ཡང་དག་པར་བཀོད་ཅིང་བཞག་པ་དང༌། ཀཽ་ཤི་ཀ །ཡང་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་
ལྟ་ཞོག །ཀཽ་ཤི་ཀ །རྣམ་གྲངས་དེ་ལྟ་བུར་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་
གིས་དགེ་བ་བཅུའི་ལས་ཀྱི་ལམ་ལ་ཡང་དག་པར་བཀོད་ཅིང་བཞག་པ་དང༌། ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་
ལྟ་ཞོག །ཀཽ་ཤི་ཀ །རྣམ་གྲངས་དེ་ལྟ་བུར་སྟོང་གཉིས་པ་བར་མའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་
ལ་ཞིག་གིས་དགེ་བ་བཅུའི་ལས་ཀྱི་ལམ་ལ་ཡང་དག་པར་བཀོད་ཅིང་བཞག་པ་དང༌། ཀཽ་ཤི་ཀ །ཡང་སྟོང་གཉིས་པ་བར་མའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལྟ་
ཞོག །ཀཽ་ཤི་ཀ །རྣམ་གྲངས་དེ་ལྟ་བུར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་
༄༅། །ལ་ལ་ཞིག་གིས་དགེ་བ་བཅུའི་ལས་ཀྱི་ལམ་ལ་ཡང་དག་པར་བཀོད་ཅིང་བཞག་པ་དང༌། ཀཽ་ཤི་ཀ །ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་
གྱི་ཁམས་ཀྱི་སེམས་ཅན་ཐམས་ཅད་ལྟ་ཞོག །ཀཽ་ཤི་ཀ །རྣམ་གྲངས་དེ་ལྟ་བུར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་
ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་དགེ་བ་བཅུའི་ལས་ཀྱི་ལམ་ལ་ཡང་དག་པར་བཀོད་ཅིང་བཞག་ན། ཀཽ་ཤི་ཀ །དེ་ཇི་སྙམ་དུ་
སེམས༑ ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ།
མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་
ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་པར་བྱས་ནས་མངོན་པར་དད་པས་མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་
པ་ལ། སེམས་དང་བས་སེམས་དང་བ་ལ། ལྷག་པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་
ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་པའི་བསམ་པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་
པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་
པར་མཚོན་པ་དང༌། རྗེས་སུ་མཚོན་པ་དང༌། དེ་ལ་འདིའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་
ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་
རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་
འདུལ་བར་བྱེད་པར་འགྱུར་རོ། །ཞེས་སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་ཡོངས་སུ་གཏོང་བའི་བློ་
དང་ལྡན་པ་འདི་ནི། རིགས་ཀྱི་བུའམ་རིགས་ཀྱི་བུ་མོ་སྔ་མ་དེ་བས་ཆེས་བསོད་ནམས་མང་དུ་བསྐྱེད་དོ། །ཀཽ་ཤི་ཀ །གཞན་ཡང་ཛམྦུའི་གླིང་ན་སེམས་ཅན་ཇི་སྙེད་ཡོད་པ་དེ་དག་ཐམས་
༄༅། །ཅད་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་བཞི་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་
མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་
སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་
པར་བྱས་ནས་མངོན་པར་དད་པས་མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་ལ། ལྷག་
པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་བས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་
པའི་བསམ་པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་
དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་
པ་དང༌། དེ་ལ་འདིའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་
འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་
གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་སྨྲ་ཞིང༌། དེ་ལྟར་དེའི་
སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་པའོ། །ཀཽ་ཤི་ཀ །ཡང་ཛམྦུའི་གླིང་གི་སེམས་ཅན་ཐམས་ཅད་ལྟ་ཞོག །ཀཽ་ཤི་ཀ །རྣམ་གྲངས་དེ་ལྟ་བུར་གླིང་ཆེན་པོ་བཞི་པའི་འཇིག་
རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་བཞི་ལ་བཀོད་པ་དང༌། ཀཽ་ཤི་ཀ །ཡང་གླིང་
ཆེན་པོ་བཞི་པའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལྟ་ཞོག །ཀཽ་ཤི་ཀ །རྣམ་གྲངས་དེ་ལྟ་བུར་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་
ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་བཞི་ལ་བགོད་པ་དང༌། ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་སེམས་ཅན་ཐམས་
༄༅། །ཅད་ལྟ་ཞོག །ཀཽ་ཤི་ཀ །རྣམ་གྲངས་དེ་ལྟ་བུར་སྟོང་གཉིས་པ་བར་མའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་
བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་བཞི་ལ་བཀོད་པ་དང༌། ཀཽ་ཤི་ཀ །ཡང་སྟོང་གཉིས་པ་བར་མའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལྟ་
ཞོག །ཀཽ་ཤི་ཀ །རྣམ་གྲངས་དེ་ལྟ་བུར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་
གང་ལ་ལ་ཞིག་གིས་བསམ་གཏན་བཞི་ལ་བཀོད་པ་དང༌། ཀཽ་ཤི་ཀ །ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལྟ་ཞོག །ཀཽ་ཤི་ཀ །རྣམ་
གྲངས་དེ་ལྟ་བུར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་
གང་ལ་ལ་ཞིག་གིས་བསམ་གཏན་བཞི་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་
བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་
ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་པར་བྱས་ནས་མངོན་པར་དད་པས་མངོན་པར་དད་པ་ལ། རབ་ཏུ་
རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་ལ། ལྷག་པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་
ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་པའི་བསམ་པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་
ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་
རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་པ་དང༌། དེའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་
ཤེག་༑བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ།
༄༅། །ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་སྨྲ་ཞིང༌། དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་མེད་
པར་བྱེད་པའོ། །ཀཽ་ཤི་ཀ །གཞན་ཡང་ཛམྦུའི་གླིང་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཚད་མེད་པ་བཞི་ལ་
བཀོད་པ་དང༌། དེ་བཞིན་དུ་སྦྱར་ཏེ་ཚད་མེད་པ་ལ་ཇི་ལྟ་བ་དེ་བཞིན་དུ་གཟུགས་མེད་པའི་སྙོམས་པར་འཇུག་པ་བཞི་དང༌། མངོན་པར་ཤེས་པ་ལྔ་ནས་བསམ་གཏན་དང༌། ཚད་མེད་
པ་དང༌། གཟུགས་མེད་པའི་སྙོམས་པར་འཇུག་པ་དང༌། མངོན་པར་ཤེས་པ་མ་ལུས་པའི་བར་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་
དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་
སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུ་འམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་
ཆུད་པར་བྱས་ནས་མངོན་པར་དད་པས་མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་ལ།
ལྷག་པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་
པའི་བསམ་པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་དག་པར་
འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་པ་དང༌། དེའི་དོན་
ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན།
མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་
མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་སྨྲ་ཞིང༌། དེ་ལྟར་དེའི་སེམས་
རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་པའོ། །ཀཽ་ཤི་ཀ །ཡང་ཛམྦུའི་གླིང་གི་སེམས་ཅན་ཐམས་ཅད་བསམ་གཏན་དང༌། ཚད་མེད་པ་དང༌། གཟུགས་མེད་པའི་སྙོམས་པར་
༄༅། །འཇུག་པ་དང༌། མངོན་པར་ཤེས་པ་རྣམས་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །རྣམ་གྲངས་དེ་ལྟ་བུར་གླིང་ཆེན་པོ་
བཞི་པའི་འཇིག་རྟེན་གྱི་ཁམས་ན་སེམས་ཅན་གང་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་དང༌། ཚད་མེད་པ་
དང༑ གཟུགས་མེད་པའི་སྙོམས་པར་འཇུག་པ་དང༌། མངོན་པར་ཤེས་པ་དག་ལ་བཀོད་པ་དང༌། ཀཽ་ཤི་ཀ །ཡང་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་
ཇི་སྙེད་ཡོད་པ་དེ་དག་ཐམས་ཅད་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་དང༌། ཚད་མེད་པ་དང༌། གཟུགས་མེད་པའི་སྙོམས་པར་འཇུག་པ་དང༌། མངོན་
པར་ཤེས་པ་དག་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་གང་ཇི་སྙེད་ཡོད་པ་དེ་དག་ཐམས་
ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་དང༌། ཚད་མེད་པ་དང༌། གཟུགས་མེད་པའི་སྙོམས་པར་འཇུག་པ་དང༌། མངོན་པར་ཤེས་པ་དག་
ལ་བཀོད་པ་དང༌། ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་དང༌།
ཚད་མེད་པ་དང༌། གཟུགས་མེད་པའི་སྙོམས་པར་འཇུག་པ་དང༌། མངོན་པར་ཤེས་པ་དག་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གཉིས་པ་བར་
མའི་འཇིག་རྟེན་གྱི་ཁམས་ན་སེམས་ཅན་གང་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་དང༌། ཚད་མེད་པ་དང༌།
གཟུགས་མེད་པའི་སྙོམས་པར་འཇུག་པ་དང༌། མངོན་པར་ཤེས་པ་དག་ལ་བཀོད་པ་དང༌། ཀཽ་ཤི་ཀ །ཡང་སྟོང་གཉིས་པ་བར་མའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་
བསམ་གཏན་དང༌། ཚད་མེད་པ་དང༌། གཟུགས་མེད་པའི་སྙོམས་པར་འཇུག་པ་དང༌། མངོན་པར་ཤེས་པ་དག་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ།
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གང་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་དང་
ཚད་མེད་པ་དང༌། གཟུགས་མེད་པའི་སྙོམས་པར་འཇུག་པ་དང༌། མངོན་པར་ཤེས་པ་དག་ལ་བཀོད་པ་དང༌། ཀཽ་ཤི་ཀ །ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
ཀྱི་སེམས་ཅན་ཐམས་ཅད་བསམ་གཏན་དང༌། ཚད་མེད་པ་དང༌། གཟུགས་མེད་པའི་སྙོམས་པར་འཇུག་པ་དང༌། མངོན་པར་ཤེས་པ་དག་ལ་བཀོད་པའི་བསོད་ནམས་མངོན་པར་འདུ་
༄༅། །བྱེད་པ་ལྟ་ཞོག །ཀཽ་ཤི་ཀ །རྣམ་གྲངས་དེ་ལྟ་བུར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་གང་ཇི་
སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བསམ་གཏན་དང༌། ཚད་མེད་པ་དང༌། གཟུགས་མེད་པའི་སྙོམས་པར་འཇུག་པ་
དང༌། མངོན་པར་ཤེས་པ་དག་ལ་བཀོད་ན། ཀཽ་ཤི་ཀ །ཡང་དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་
བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་
ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་པར་བྱས་ནས་མངོན་པར་དད་པས་མངོན་པར་དད་པ་
ལ༑ རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་ལ། ལྷག་པའི་བསམ་པ་ཕུན་སུམ་ཚོགས་པས་ལྷག་པའི་
བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་པའི་བསམ་པས་བྱིན་ནམ། ཆུང་ངུ་ན་བྲི་བ་
དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་
བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་པ་དང༌། དེ་ལ་འདིའི་དོན་ཡང་དག་པར་སྟོན་པ་དང༌།
དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན་མྱུར་དུ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་
དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ་ཞེས། །སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌།
ཐེ་ཚོམ་མེད་པར་བྱེད་པའོ། །ཀཽ་ཤི་ཀ །གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྲིས་ནས་བདག་ཉིད་ཀྱང་ཀློག་པ་དང༌། བྲིས་ནས་གཞན་
དག་ལའང་སྔ་མ་བཞིན་དུ་བྱིན་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་སྔ་མ་དེ་བས་འདི་ཆེས་བསོད་ནམས་མང་དུ་བསྐྱེད་དོ། །ཀཽ་ཤི་ཀ །གཞན་ཡང་རིགས་ཀྱི་བུའམ་རིགས་
༄༅། །ཀྱི་བུ་མོ་གང་དོན་ལ་མཁས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཀློག་པ་དང༌། བྲིས་ནས་གཞན་དག་ལའང་སྔ་མ་བཞིན་དུ་བྱིན་ལ་དོན་དང་བཅས། ཚིག་འབྲུ་
དང་བཅས་པར་ཉེ་བར་སྟོན་པ་ཡོངས་སུ་གསལ་བར་བྱེད་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་འདི་ནི། དེ་བས་བསོད་ནམས་ཆེས་མང་དུ་བསྐྱེད་དོ། །དེ་ནས་བཅོམ་ལྡན་འདས་ལ་
ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡང་ཉེ་བར་བསྟན་པར་བགྱི་བ་ལགས་སམ། དེ་སྐད་ཅེས་
གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་མ་རྟོགས་པ་དག་ལ་ཤེས་
རབ་ཀྱི་ཕ་རོལ་ཏུ་ཕྱིན་པ་འདིའང་ཉེ་བར་བསྟན་པར་བྱའོ། །དེ་ཅིའི་ཕྱིར་ཞེ་ན། ཀཽ་ཤི་ཀ །མ་འོངས་པའི་དུས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་གཟུགས་བརྙན་འབྱུང་བར་འགྱུར་ཏེ།
དེ་ལ་རིགས་ཀྱི་བུའམ་རིགས་ཀྱི་བུ་མོ་མ་རྟོགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ་དག་ཤེས་རབ་ཀྱི་ཕ་རོལ་ཏུ་ཕྱིན་པའི་
གཟུགས་བརྙན་ཐོས་ནས་ཆུད་ཟོས་པར་གྱུར་ན་མི་རུང་ངོ༌། །དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་
ཀྱི་ཕ་རོལ་ཏུ་ཕྱིན་པའི་གཟུགས་བརྙན་བསྟན་པ་དེ་ནི། འདི་ལགས་སོ། །ཞེས་ཇི་ལྟར་མ་འོངས་པའི་དུས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་གཟུགས་བརྙན་དུ་རིག་པར་བགྱི། དེ་སྐད་ཅེས་
གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །མ་འོངས་པའི་དུས་ན་དགེ་སློང་ཁ་ཅིག་ལུས་མ་བསྒོམས་པ། ཚུལ་
ཁྲིམས་མ་བསྒོམས་པ། སེམས་མ་བསྒོམས་པ། ཤེས་རབ་མ་བསྒོམས་པ། ཤེས་རབ་འཆལ་བ། ལུག་ལྟར་ལྐུག་པའི་རང་བཞིན་ཅན་ཤེས་རབ་ཡོངས་སུ་ཉམས་པ་དག་འབྱུང་སྟེ།
དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་ཏོ། །སྙམ་ནས་དེའི་གཟུགས་བརྙན་སྟོན་པར་འགྱུར་རོ། །ཀཽ་ཤི་ཀ །ཤེས་རབ་ཀྱི་ཕ་རོལ་ཏུ་ཕྱིན་པའི་གཟུགས་བརྙན་ཇི་ལྟར་སྟོན་པར་འགྱུར་
ཞེ་ན༑ གཟུགས་འཇིག་པ་ནི། གཟུགས་མི་རྟག་པ་ཉིད་དོ། །ཞེས་སྟོན་པར་འགྱུར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་འཇིག་པ་ནི། རྣམ་
པར་ཤེས་པ་མི་རྟག་པ་ཉིད་དོ། །ཞེས་སྟོན་པར་འགྱུར་རོ། །འདི་སྐད་དུ་གང་དེ་ལྟར་ཚོལ་བ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་འགྱུར་རོ། །ཞེས་ཀྱང་ཉེ་བར་སྟོན་ཏེ། ཀཽ་ཤི་ཀ་
འདི་ནི༑ ཤེས་རབ་ཀྱི་ཕ་རོལ་ཏུ་ཕྱིན་པའི་གཟུགས་བརྙན་དུ་རིག་པར་བྱའོ། །ཀཽ་ཤི་ཀ །ཡང་གཟུགས་འཇིག་པ་ནི། གཟུགས་མི་རྟག་པ་ཉིད་དུ་མི་བལྟའོ། །དེ་བཞིན་དུ་ཚོར་བ་དང༌།
༄༅། །འདུ་ཤེས་དང༌། འདུ་བྱེད་རྣམས་དང༌། ཀཽ་ཤི་ཀ །ཡང་རྣམ་པར་ཤེས་པ་འཇིག་པ་ནི། རྣམ་པར་ཤེས་པ་མི་རྟག་པ་ཉིད་དུ་མི་བལྟ་སྟེ། གལ་ཏེ་དེ་ལྟར་བལྟ་ན། ཤེས་
རབ་ཀྱི་ཕ་རོལ་ཏུ་ཕྱིན་པའི་གཟུགས་བརྙན་ལ་སྤྱོད་པ་ཡིན་ནོ། ། ཀཽ་ཤི་ཀ །དེ་ལྟ་བས་ན། རིགས་ཀྱི་བུའམ་རིགས་ཀྱི་བུ་མོས་ཤེས་རབ་ཀྱི་ཕ་རོལ་ཏུ་ཕྱིན་པ་འདིའི་དོན་ཉེ་བར་བསྟན་པར་
བྱ་སྟེ༑ ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཉེ་བར་བསྟན་ན། རིགས་ཀྱི་བུའམ་རིགས་ཀྱི་བུ་མོ་འདི་ནི། བསོད་ནམས་ཆེས་མང་དུ་བསྐྱེད་དོ། །ཀཽ་ཤི་ཀ །གཞན་ཡང་རིགས་ཀྱི་བུའམ་
རིགས་ཀྱི་བུ་མོ་གང་ལ་ལ་ཞིག་གིས་ཛམྦུའི་གླིང་གི་སེམས་ཅན་ཇི་སྙེད་ཡོད་པ་དེ་དག་ཐམས་ཅད་རྒྱུན་དུ་ཞུགས་པའི་འབྲས་བུ་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་
ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་
འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་
བམ་དུའང་ཆུད་པར་བྱས་ཏེ། མངོན་པར་དད་པས་མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་
ལ༑ ལྷག་པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་
པའི་བསམ་པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་
དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་
སུ་མཚོན་པ་དང༌། དེ་ལ་འདིའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་
བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་
ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་
སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་པ་དང༌། ཚིག་འདི་སྐད་དུ། རིགས་ཀྱི་བུ་ཁྱོད་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་དེ་དག་
༄༅། །ཉིད་ཐོབ་པར་གྱིས་ཤིག་ཅེས་ཟེར་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་སྔ་མ་དེ་བས་འདི་ཉིད་བསོད་ནམས་ཆེས་མང་དུ་བསྐྱེད་དོ། །དེ་ཅིའི་ཕྱིར་
ཞེ་ན༑ ཀཽ་ཤི་ཀ །འདི་ལས་རྒྱུན་དུ་ཞུགས་པའི་འབྲས་བུ་རབ་ཏུ་འབྱེད་དོ། །ཀཽ་ཤི་ཀ །ཡང་ཛམྦུའི་གླིང་གི་སེམས་ཅན་ཐམས་ཅད་རྒྱུན་དུ་ཞུགས་པའི་འབྲས་བུ་ལ་བཀོད་པའི་
བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་
ཀྱི་བུ་མོ་གང་ལ་ལ་ཞིག་གིས་རྒྱུན་དུ་ཞུགས་པའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་རྒྱུན་དུ་ཞུགས་
པའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་
ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རྒྱུན་དུ་ཞུགས་པའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་རྒྱུན་
དུ་ཞུགས་པའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གཉིས་པ་བར་མའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་
ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རྒྱུན་དུ་ཞུགས་པའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་སྟོང་གཉིས་པ་བར་མའི་འཇིག་རྟེན་གྱི་ཁམས་ཀྱི་
སེམས་ཅན་ཐམས་ཅད་རྒྱུན་དུ་ཞུགས་པའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་
ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རྒྱུན་དུ་ཞུགས་པའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་རྒྱུན་དུ་ཞུགས་པའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །རྣམ་གྲངས་འདི་ལྟ་བུར་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རྒྱུན་དུ་
ཞུགས་པའི་འབྲས་བུ་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ།
བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་
༄༅། །མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་པར་བྱས་ནས་མངོན་པར་དད་པས་མངོན་པར་དད་པ་ལ། རབ་ཏུ་རྟོག་
པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་ལ། ལྷག་པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་
ཚོགས་པ་ལ་བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་པའི་བསམ་པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་
ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་
པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་པ་དང༌། དེ་ལ་འདིའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་
ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་ཟད་
པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་
པ་དང༌། ཚིག་འདི་སྐད་དུ། རིགས་ཀྱི་བུ་ཁྱོད་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་དེ་དག་ཉིད་ཐོབ་པར་གྱིས་ཤིག་ཅེས་ཟེར་ན། ཀཽ་ཤི་ཀ །རིགས་ཀྱི་བུའམ་རིགས་
ཀྱི་བུ་མོ་སྔ་མ་དེ་བས་འདི་ཉིད་བསོད་ནམས་ཆེས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན། ཀཽ་ཤི་ཀ །འདི་ལས་རྒྱུན་དུ་ཞུགས་པའི་འབྲས་བུ་རབ་ཏུ་འབྱེད་དོ། །ཀཽ་ཤི་ཀ །གཞན་ཡང་རིགས་ཀྱི་
བུའམ་རིགས་ཀྱི་བུ་མོ་གང་ལ་ལ་ཞིག་གིས་ཛམྦུའི་གླིང་གི་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ལན་ཅིག་ཕྱིར་འོང་བའི་འབྲས་བུ་ལ་བཀོད་ན། ཀཽ་ཤི་ཀ་དེ་།ཇི་སྙམ་དུ་སེམས།
ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་
ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་
བམ་དུའང་ཆུད་པར་བྱས་ནས་མངོན་པར་དད་པས་མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་
༄༅། །ལ། ལྷག་པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་
ཆུབ་སེམས་དཔའ་ལ་ལྷག་པའི་བསམ་པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་
པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་
པ་དང༌། རྗེས་སུ་མཚོན་པ་དང༌། དེ་ལ་འདིའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ། རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག།
ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་
པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་
འདུལ་བར་བྱེད་པར་འགྱུར་རོ། །ཞེས་སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་པ་དང༌། ཚིག་འདི་སྐད་དུ། རིགས་ཀྱི་བུ་ཁྱོད་འདི་ལྟ་སྟེ། ཤེས་
རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་དེ་དག་ཉིད་ཐོབ་པར་གྱིས་ཤིག་ཅེས་ཟེར་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་སྔ་མ་དེ་བས་འདི་ཉིད་བསོད་ནམས་ཆེས་མང་དུ་
བསྐྱེད་དོ། །དེ་ཅིའི་ཕྱིར་ཞེ་ན། ཀཽ་ཤི་ཀ །འདི་ལས་ལན་ཅིག་ཕྱིར་འོང་བའི་འབྲས་བུ་རབ་ཏུ་འབྱེད་དོ། །ཀཽ་ཤི་ཀ །ཡང་ཛམྦུའི་གླིང་གི་སེམས་ཅན་ཐམས་ཅད་ལན་ཅིག་ཕྱིར་འོང་
བའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་
རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ལན་ཅིག་ཕྱིར་འོང་བའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཀྱི་སེམས་
ཅན་ཐམས་ཅད་ལན་ཅིག་ཕྱིར་འོང་བའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་ཇི་སྙེད་
ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ལན་ཅིག་ཕྱིར་འོང་བའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་
ཁམས་ཀྱི་སེམས་ཅན་ཐམས་ཅད་ལན་ཅིག་ཕྱིར་འོང་བའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གཉིས་པ་བར་མའི་འཇིག་རྟེན་གྱི་
༄༅། །ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ལན་ཅིག་ཕྱིར་འོང་བའི་འབྲས་བུ་ལ་
བཀོད་པ་དང༌། ཀཽ་ཤི་ཀ །ཡང་སྟོང་གཉིས་པ་བར་མའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལན་ཅིག་ཕྱིར་འོང་བའི་འབྲས་བུ་ལ་བཀོད་པའི་བསོད་ནམས་མངོན་
པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་
གང་ལ་ལ་ཞིག་གིས་ལན་ཅིག་ཕྱིར་འོང་བའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་ཡོད་པ་
དེ་དག་ཐམས་ཅད་ལན་ཅིག་ཕྱིར་འོང་བའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ལན་ཅིག་ཕྱིར་འོང་བའི་འབྲས་
བུ་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་
ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་
བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་པར་བྱས་ནས་མངོན་པར་དད་པས་མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་
པར་མོས་པས་ལྷག་པར་མོས་པ་ལ། སེམས་།དང་བས་སེམས་དང་བ་ལ། ལྷག་པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་
ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ། ལྷག་པའི་བསམ་པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་
པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་
བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་པ་དང༌། དེ་ལ་འདིའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་
ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
༄༅། །རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་
ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་
མེད་པར་བྱེད་པ་དང༌། ཚིག་འདི་སྐད་དུ་རིགས་ཀྱི་བུ་ཁྱོད་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་དེ་དག་ཉིད་ཐོབ་པར་གྱིས་ཤིག་ཅེས་ཟེར་ན། ཀཽ་ཤི་ཀ།
རིགས་ཀྱི་བུའམ་རིགས་ཀྱི་བུ་མོ་སྔ་མ་དེ་བས་འདི་ཉིད་བསོད་ནམས་ཆེས་མང་དུ་བསྐྱེད་དོ༑ ༑དེ་ཅིའི་ཕྱིར་ཞེ་ན། ཀཽ་ཤི་ཀ། འདི་ལས་ལན་ཅིག་ཕྱིར་འོང་བའི་འབྲས་བུ་
རབ་ཏུ་འབྱེད་དོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་དྲུག་པ། ཀཽ་ཤི་ཀ །གཞན་ཡང་རིགས་ཀྱི་བུའམ་རིགས་ཀྱི་བུ་མོ་གང་
ལ་ལ་ཞིག་གིས་ཛམྦུའི་གླིང་གི་སེམས་ཅན་དེ་དག་ཐམས་ཅད་ཕྱིར་མི་འོང་བའི་འབྲས་བུ་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་
དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་
སྩལ་པ༑ ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་པར་བྱས་
ནས་མངོན་པར་དད་པས་མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་ལ། ལྷག་པའི་བསམ་
པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་པའི་བསམ་པས་
བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་དག་པར་འགོད་
པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་པ་དང༌། དེ་ལ་
འདིའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་
སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་
༄༅། །ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་
བར་བྱེད་པར་འགྱུར་རོ། །ཞེས་སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་པ་དང༌། ཚིག་འདི་སྐད་དུ་རིགས་ཀྱི་བུ་ཁྱོད་འདི་ལྟ་སྟེ། ཤེས་རབ་ཀྱི་ཕ་རོལ་
ཏུ་ཕྱིན་པ་དང་ལྡན་པའི་ཆོས་དེ་དག་ཉིད་ཐོབ་པར་གྱིས་ཤིག་ཅེས་ཟེར་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་སྔ་མ་དེ་བས་འདི་ཉིད་བསོད་ནམས་ཆེས་མང་དུ་སྐྱེད་
དོ༑ ༑དེ་ཅིའི་ཕྱིར་ཞེ་ན། ཀཽ་ཤི་ཀ །འདི་ལས་ཕྱིར་མི་འོང་བའི་འབྲས་བུ་རབ་ཏུ་འབྱེད་དོ། །ཀཽ་ཤི་ཀ །ཡང་ཛམྦུའི་གླིང་གི་སེམས་ཅན་ཐམས་ཅད་ཕྱིར་མི་འོང་བའི་འབྲས་བུ་ལ་
བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་
བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱིར་མི་འོང་བའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཀྱི་སེམས་ཅན་ཐམས་
ཅད་ཕྱིར་མི་འོང་བའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་
ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱིར་མི་འོང་བའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་སེམས་
ཅན་ཐམས་ཅད་ཕྱིར་མི་འོང་བའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གཉིས་པ་བར་མའི་འཇིག་རྟེན་གྱི་ཁམས་ན་སེམས་ཅན་ཇི་
སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱིར་མི་འོང་བའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་སྟོང་གཉིས་པ་བར་མའི་འཇིག་
རྟེན་གྱི་ཁམས་ཀྱི་སེམས་ཅན་ཐམས་ཅད་ཕྱིར་མི་འོང་བའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གསུམ་གྱི་སྟོང་ཆེན་པོའི་འཇིག་རྟེན་
གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱིར་མི་འོང་བའི་འབྲས་བུ་ལ་བཀོད་པ་དང༌། ཀཽ་ཤི་ཀ །ཡང་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཕྱིར་མི་འོང་བའི་འབྲས་བུ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་
༄༅། །ཕྱིར་མི་འོང་བའི་འབྲས་བུ་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་
བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་
ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་པར་བྱས་ནས་མངོན་པར་དད་པས་
མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་ལ། ལྷག་པའི་བསམ་པ་ཕུན་སུམ་
ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་པའི་བསམ་པས་བྱིན་
ནམ༑ ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌།
ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་པ་དང༌། དེ་ལ་འདིའི་
དོན་ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་
ན༑ མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་
གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་སྨྲ་ཞིང་དེ་ལྟར་དེའི་
སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་པ་དང༌། ཚིག་འདི་སྐད་དུ་རིགས་ཀྱི་བུ་ཁྱོད་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་དེ་དག་ཉིད་ཐོབ་པར་གྱིས་
ཤིག་ཅེས་ཟེར་ན། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་སྔ་མ་དེ་བས་འདི་ཉིད་བསོད་ནམས་ཆེས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན། ཀཽ་ཤི་ཀ །འདི་ལས་ཕྱིར་མི་འོང་བའི་
འབྲས་བུ་རབ་ཏུ་འབྱེད་དོ། །ཀཽ་ཤི་ཀ །གཞན་ཡང་ཛམྦུའི་གླིང་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་དགྲ་བཅོམ་པ་ཉིད་ལ་
བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས།
༄༅། །མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུ་འམ་རིགས་ཀྱི་བུ་མོ་འདི་ཆེས་བསོད་
ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་པར་བྱས་ནས་མངོན་པར་དད་པས་མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་
པ་ལ༑ ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་ལ། ལྷག་པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ།
བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་པའི་བསམ་པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་
པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་
དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་པ་དང༌། དེ་ལ་འདིའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ། རིགས་ཀྱི་བུ་
ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་
པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་པ་དང༌།
ཚིག་འདི་སྐད་དུ་རིགས་ཀྱི་བུ་ཁྱོད་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་དེ་དག་ཉིད་ཐོབ་པར་གྱིས་ཤིག་ཅེས་ཟེར་ན། ཀཽ་ཤི་ཀ །རིགས་ཀྱི་བུའམ་རིགས་
ཀྱི་བུ་མོ་སྔ་མ་དེ་བས་འདི་ཉིད་བསོད་ནམས་ཆེས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན། ཀཽ་ཤི་ཀ །འདི་ལས་དགྲ་བཅོམ་པ་ཉིད་རབ་ཏུ་འབྱེད་དོ། །དེ་ལ་འདི་ལྟར། རིགས་ཀྱི་བུ།
ཁྱོད་ཇི་ལྟ་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པ་དེ་ལྟ་དེ་ལྟར་ཁྱོད་ཀྱིས་མཐར་གྱིས་སངས་རྒྱས་ཀྱི་ཆོས་རྣམས་འཐོབ་པར་འགྱུར་ཞིང་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་དང་ཉེ་བར་འགྱུར་རོ། །ཁྱོད་ཀྱིས་བསླབ་པ་འདི་ལ་བསླབས་ཤིང་སྤྱད་དེ་འབད་ན། རྒྱུན་དུ་ཞུགས་པའི་འབྲས་བུ་རབ་ཏུ་འབྱེད་པར་འགྱུར་རོ། །ལན་ཅིག་ཕྱིར་འོང་
བའི་འབྲས་བུ་རབ་ཏུ་འབྱེད་པར་འགྱུར་རོ། །ཕྱིར་མི་འོང་བའི་འབྲས་བུ་རབ་ཏུ་འབྱེད་པར་འགྱུར་རོ། །དགྲ་བཅོམ་པ་ཉིད་རབ་ཏུ་འབྱེད་པར་འགྱུར་རོ། །རང་སངས་རྒྱས་ཉིད་རབ་ཏུ་འབྱེད་
༄༅། །པར་འགྱུར་རོ། །ཡང་དག་པར་རྫོགས་པའི་སངས་རྒྱས་ཉིད་རབ་ཏུ་འབྱེད་པར་འགྱུར་རོ། །ཞེས་སྤྲོ་བ་འཕེལ་བར་བྱེད་པར་འགྱུར་རོ། །ཀཽ་ཤི་ཀ །ཡང་
ཛམྦུའི་གླིང་གི་སེམས་ཅན་ཐམས་ཅད་དགྲ་བཅོམ་པ་ཉིད་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །གླིང་ཆེན་པོ་བཞི་པའི་འཇིག་རྟེན་གྱི་ཁམས་
ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་དགྲ་བཅོམ་པ་ཉིད་ལ་བཀོད་པ་དང༌། ཀཽ་ཤི་ཀ །ཡང་གླིང་ཆེན་པོ་
བཞི་པའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་དགྲ་བཅོམ་པ་ཉིད་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་སྤྱི་ཕུད་ཀྱི་འཇིག་
རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་དགྲ་བཅོམ་པ་ཉིད་ལ་བཀོད་པ་དང༌། ཀཽ་ཤི་ཀ །ཡང་
སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་དགྲ་བཅོམ་པ་ཉིད་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གཉིས་པ་བར་
མའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་དགྲ་བཅོམ་པ་ཉིད་ལ་བཀོད་པ་དང༌། ཀཽ་ཤི་
ཀ་༑ཡང་སྟོང་གཉིས་པ་བར་མའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་དགྲ་བཅོམ་པ་ཉིད་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་དགྲ་བཅོམ་པ་ཉིད་ལ་བཀོད་
པ་དང༌། ཀཽ་ཤི་ཀ །ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་དགྲ་བཅོམ་པ་ཉིད་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །
ཀཽ་ཤི་ཀ །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་
ཞིག་གིས་དགྲ་བཅོམ་པ་ཉིད་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་
གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས། བསོད་ནམས་ཀྱི་ཕུང་པོ་དེ་གྲངས་སུ་བགྱི་བར་སླ་བ་མ་ལགས་ཏེ། བཅོམ་ལྡན་
འདས༑ བསོད་ནམས་ཀྱི་ཕུང་པོ་དེ་བགྲང་བར་ཡང་དཔེར་ཡང༌། དཔེས་བསྟན་པར་བགྱི་བར་ཡང༌། རྟེན་དུའང༌། ཉེ་བའི་རྒྱུར་ཡང་བགྱི་བར་སླ་བ་མ་ལགས་སོ། །བཅོམ་ལྡན་འདས་
༄༅། །ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་
འདི་ཆུང་ངུ་ན་གླེགས་བམ་དུའང་ཆུད་པར་བྱས་ནས་མངོན་པར་དད་པས་མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ།
སེམས་དང་བས་སེམས་དང་བ་ལ། ལྷག་པའི་བསམ་པ་ཕུན་སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་
བསྐྱེད་པའི་བྱང་ཆུབ་སེམས་དཔའ་ལ་ལྷག་པའི་བསམ་པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་
པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་
དང༌། རྣམ་པར་མཚོན་པ་དང༌། རྗེས་སུ་མཚོན་པ་དང༌། དེ་ལ་འདིའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་
ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་
བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་
རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་པ་དང༌། ཚིག་འདི་སྐད་དུ་རིགས་ཀྱི་བུ་ཁྱོད་
འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་དེ་དག་ཉིད་ཐོབ་པར་གྱིས་ཤིག་ཅེས་ཟེར་ན། དེ་བས་འདི་ཉིད་བསོད་ནམས་ཆེས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན།
ཀཽ་ཤི་ཀ །འདི་ལས་དགྲ་བཅོམ་པ་ཉིད་རབ་ཏུ་འབྱེད་དོ། །དེ་ལ་འདི་ལྟར་རིགས་ཀྱི་བུ། ཁྱོད་ཇི་ལྟ་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པ་དེ་ལྟ་དེ་ལྟར་ཁྱོད་མཐར་གྱིས་
སངས་རྒྱས་ཀྱི་ཆོས་རྣམས་ཐོབ་པར་འགྱུར་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བར་འགྱུར་རོ། །ཁྱོད་འདི་ལ་བསླབས་ཤིང་སྤྱད་དེ་འབད་ན། རྒྱུན་དུ་ཞུགས་པའི་
འབྲས་བུ་རབ་ཏུ་འབྱེད་པར་འགྱུར་རོ། །ལན་ཅིག་ཕྱིར་འོང་བའི་བའི་འབྲས་བུ་རབ་ཏུ་འབྱེད་པར་འགྱུར་རོ། །ཕྱིར་མི་འོང་བའི་འབྲས་བུ་རབ་ཏུ་འབྱེད་པར་འགྱུར་རོ། །དགྲ་བཅོམ་པ་
ཉིད་རབ་ཏུ་འབྱེད་པར་འགྱུར་རོ། །རང་སངས་རྒྱས་ཉིད་རབ་ཏུ་འབྱེད་པར་འགྱུར་རོ། །ཡང་དག་པར་རྫོགས་པའི་སངས་རྒྱས་ཉིད་རབ་ཏུ་འབྱེད་པར་འགྱུར་རོ། །ཞེས་སྤྲོ་བ་འཕེལ་
༄༅། །བར་བྱེད་པར་འགྱུར་རོ། །ཀཽ་ཤི་ཀ །གཞན་ཡང་ཛམྦུའི་གླིང་གི་སེམས་ཅན་ཇི་སྙེད་ཡོད་པ་དེ་དག་ཐམས་ཅད་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་
ཞིག་གིས་རང་སངས་རྒྱས་ཉིད་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་
གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ་མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་
ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་པར་བྱས་ནས། མངོན་པར་དད་པས་མངོན་པར་དད་པ་
ལ༑ རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་ལ། ལྷག་པའི་བསམ་པ་ཕུན་སུམ་ཚོགས་པས་ལྷག་
པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་པའི་བསམ་པས་བྱིན་ནམ། ཆུང་ངུ་ན་
བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་
གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་པ་དང༌། དེ་ལ་འདིའི་དོན་ཡང་དག་པར་སྟོན་
པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་ལ་བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་
ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་པར་འགྱུར་རོ། །ཞེས་སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་
དང༑ ཐེ་ཚོམ་མེད་པར་བྱེད་པ་དང༌། ཚིག་འདི་སྐད་དུ་རིགས་ཀྱི་བུ་ཁྱོད་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་དེ་དག་ཉིད་ཐོབ་པར་གྱིས་ཤིག་ཅེས་ཟེར་ན། དེ་
བས་འདི་ཉིད་ཆེས་བསོད་ནམས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན། ཀཽ་ཤི་ཀ །འདི་ལས་རང་སངས་རྒྱས་ཉིད་རབ་ཏུ་འབྱེད་དོ། །དེ་ལ་འདི་ལྟར། རིགས་ཀྱི་བུ་ཁྱོད་ཇི་ལྟ་ཇི་ལྟར་
ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པར་འགྱུར་བ་དེ་ལྟ་དེ་ལྟར་མཐར་གྱིས་ཁྱོད་སངས་རྒྱས་ཀྱི་ཆོས་རྣམས་ཐོབ་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་
༄༅། །དང་ཉེ་བར་འགྱུར་རོ། །ཁྱོད་བསླབ་པ་འདི་ལ་སློབ་ཅིང་སྤྱད་དེ་འབད་ན། རྒྱུན་དུ་ཞུགས་པའི་འབྲས་བུ་རབ་ཏུ་འབྱེད་པར་འགྱུར་རོ། །ལན་ཅིག་ཕྱིར་འོང་བའི་
འབྲས་བུ་རབ་ཏུ་འབྱེད་པར་འགྱུར་རོ། །ཕྱིར་མི་འོང་བའི་འབྲས་བུ་རབ་ཏུ་འབྱེད་པར་འགྱུར་རོ། །དགྲ་བཅོམ་པ་ཉིད་རབ་ཏུ་འབྱེད་པར་འགྱུར་རོ། །རང་སངས་རྒྱས་ཉིད་རབ་ཏུ་འབྱེད་
པར་འགྱུར་རོ། །ཡང་དག་པར་རྫོགས་པའི་སངས་རྒྱས་ཉིད་རབ་ཏུ་འབྱེད་པར་འགྱུར་རོ། །ཞེས་སྤྲོ་བ་འཕེལ་བར་བྱེད་པར་འགྱུར་རོ། །ཀཽ་ཤི་ཀ །ཡང་འཛམ་བུའི་གླིང་གི་སེམས་ཅན་
ཐམས་ཅད་རང་སངས་རྒྱས་ཉིད་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་
དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རང་སངས་རྒྱས་ཉིད་ལ་བཀོད་པ་དང༌། ཀཽ་ཤི་ཀ །ཡང་གླིང་ཆེན་པོ་བཞི་པའི་འཇིག་རྟེན་གྱི་ཁམས་
ཀྱི་སེམས་ཅན་ཐམས་ཅད་རང་སངས་རྒྱས་ཉིད་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་ཇི་
སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རང་སངས་རྒྱས་ཉིད་ལ་བཀོད་པ་དང༌། ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་
ཁམས་ཀྱི་སེམས་ཅན་ཐམས་ཅད་རང་སངས་རྒྱས་ཉིད་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གཉིས་པ་བར་མའི་འཇིག་རྟེན་གྱི་ཁམས་ན་སེམས་
ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རང་སངས་རྒྱས་ཉིད་ལ་བཀོད་པ་དང༌། ཀཽ་ཤི་ཀ །ཡང་སྟོང་གཉིས་པ་བར་མའི་
འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་རང་སངས་རྒྱས་ཉིད་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རང་སངས་རྒྱས་ཉིད་ལ་བཀོད་པ་དང༌། ཀཽ་ཤི་ཀ །ཡང་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་རང་སངས་རྒྱས་ཉིད་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གསུམ་
གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རང་
སངས་རྒྱས་ཉིད་ལ་བཀོད་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ།
༄༅། །བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་
བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་གླེགས་བམ་དུའང་ཆུད་པར་བྱས་ནས་མངོན་པར་དད་པས་
མངོན་པར་དད་པ་ལ། རབ་ཏུ་རྟོག་པས་རབ་ཏུ་རྟོག་པ་ལ། ལྷག་པར་མོས་པས་ལྷག་པར་མོས་པ་ལ། སེམས་དང་བས་སེམས་དང་བ་ལ། ལྷག་པའི་བསམ་པ་ཕུན་
སུམ་ཚོགས་པས་ལྷག་པའི་བསམ་པ་ཕུན་སུམ་ཚོགས་པ་ལ། བྱང་ཆུབ་ཏུ་སེམས་བསྐྱེད་པས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་ལ་ལྷག་པའི་བསམ་
པས་བྱིན་ནམ། ཆུང་ངུ་ན་བྲི་བ་དང༌། བཀླག་པ་ལའང་སྙོམ་ལས་མེད་པར་སྒྲུབ་པ་དང༌། བརྩོན་པས་དེ་ལ་འཛིན་དུ་འཇུག་པ་དང༌། ཡང་དག་པར་སྟོན་པ་དང༌། ཡང་དག་
པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཚིག་གིས་མཚོན་པ་དང༌། རྣམ་པར་མཚོན་པ་དང༌། རྗེས་སུ་མཚོན་
པ་དང༌། དེ་ལ་འདིའི་དོན་ཡང་དག་པར་སྟོན་པ་དང༌། དེ་ལ་འདི་སྐད་དུ་རིགས་ཀྱི་བུ་ཁྱོད་ཚུར་ཤེག །བྱང་ཆུབ་སེམས་དཔའི་ལམ་འདི་ལ་སློབས་ཤིག །ཁྱོད་ཀྱིས་ལམ་འདི་
ལ་བསླབས་ཤིང་སྤྱད་དེ་འབད་ན། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་
ནས་ཀྱང་སེམས་ཅན་གྱི་ཁམས་གཞལ་དུ་མེད་པ་རྣམས་ཕུང་པོ་ཡང་དག་པར་ཟད་པ་བླ་ན་མེད་པ་འདི་ལྟ་སྟེ། ཡང་དག་པའི་མཐའ་རབ་ཏུ་འབྱེད་པ་ལ་མངོན་པར་འདུལ་བར་བྱེད་
པར་འགྱུར་རོ། །ཞེས་སྨྲ་ཞིང་དེ་ལྟར་དེའི་སེམས་རྣམ་པར་སྦྱོང་བ་དང༌། ཐེ་ཚོམ་མེད་པར་བྱེད་པ་དང༌། ཚིག་འདི་སྐད་དུ་རིགས་ཀྱི་བུ་ཁྱོད་འདི་ལྟ་སྟེ། ཤེས་རབ་ཀྱི་ཕ་
རོལ་ཏུ་ཕྱིན་པ་དང་ལྡན་པའི་ཆོས་དེ་དག་ཉིད་ཐོབ་པར་གྱིས་ཤིག་ཅེས་ཟེར་ན། དེ་བས་འདི་ཉིད་ཆེས་བསོད་ནམས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན། ཀཽ་ཤི་ཀ །འདི་ལས་རང་
སངས་རྒྱས་ཉིད་རབ་ཏུ་འབྱེད་དོ། །དེ་ལ་འདི་ལྟར་རིགས་ཀྱི་བུ་ཁྱོད་ཇི་ལྟ་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པར་འགྱུར་བ་དེ་ལྟ་དེ་ལྟར་མཐར་གྱིས་ཁྱོད་སངས་རྒྱས་ཀྱི་
ཆོས་རྣམས་ཐོབ་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བར་འགྱུར་རོ། །ཁྱོད་བསླབ་པ་འདི་ལ་སློབ་ཅིང་སྤྱད་དེ་འབད་ན། རྒྱུན་དུ་ཞུགས་པའི་
འབྲས་བུ་རབ་ཏུ་འབྱེད་པར་འགྱུར་རོ། །ལན་ཅིག་ཕྱིར་འོང་བའི་འབྲས་བུ་རབ་ཏུ་འབྱེད་པར་འགྱུར་རོ། །ཕྱིར་མི་འོང་བའི་འབྲས་བུ་རབ་ཏུ་འབྱེད་པར་འགྱུར་རོ། །དགྲ་བཅོམ་པ་
༄༅། །ཉིད་རབ་ཏུ་འབྱེད་པར་འགྱུར་རོ། །རང་སངས་རྒྱས་ཉིད་རབ་ཏུ་འབྱེད་པར་འགྱུར་རོ། །ཡང་དག་པར་རྫོགས་པའི་སངས་རྒྱས་ཉིད་རབ་ཏུ་འབྱེད་པར་འགྱུར་
རོ༑ ༑ཞེས་སྤྲོ་བ་འཕེལ་བར་བྱེད་པར་འགྱུར་རོ། །ཀཽ་ཤི་ཀ །གཞན་ཡང་ཛམྦུའི་གླིང་གི་སེམས་ཅན་ཇི་སྙེད་ཡོད་པ་དེ་དག་ཐམས་ཅད་རིགས་ཀྱི་བུའམ་རིགས་ཀྱི་བུ་མོ་གང་ལ་
ལ་ཞིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཅུག་པ་དང༌། ཀཽ་ཤི་ཀ་༑རིགས་ཀྱི་བུའམ་རིགས་ཀྱི་བུ་མོ་གཞན་གང་ཞིག་གིས་དེ་དག་
ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཅུག་ནས་དེ་དག་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྲིས་ཏེ་བྱིན་པ་དང༌། ཀཽ་ཤི་ཀ །རིགས་ཀྱི་
བུའམ་རིགས་ཀྱི་བུ་མོ་གང་ལ་ལ་ཞིག་གིས་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སློབ་པར་འགྱུར་ཞིང་རྣལ་འབྱོར་དུ་བྱེད་པར་འགྱུར་ཏེ། འདི་ཉིད་ཀྱིས་ཤེས་རབ་ཀྱི་
ཕ་རོལ་ཏུ་ཕྱིན་པ་འདི་སྒོམ་པ་དང༌། འཕེལ་བ་དང༌། རྒྱས་པ་དང༌། ཡངས་པར་གྱུར་པས་སངས་རྒྱས་ཀྱི་ཆོས་རྣམས་ཡོངས་སུ་རྫོགས་པར་བྱེད་པར་འགྱུར་རོ། །སྙམ་པས་
ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉེ་བར་གཏད་ན། རིགས་ཀྱི་བུའམ་རིགས་ཀྱི་བུ་མོ་སྔ་མ་དེ་བས་འདི་
ཆེས་བསོད་ནམས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན། འདི་ནི། ངེས་པ་ཁོ་ནར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་
ཅན་རྣམས་ཀྱི་སྡུག་བསྔལ་མཐར་འབྱིན་པར་འགྱུར་རོ། །ཀཽ་ཤི་ཀ །ཡང་ཛམྦུའི་གླིང་གི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་
པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་རིགས་ཀྱི་བུའམ་རིགས་
ཀྱི་བུ་མོ་གང་ལ་ལ་ཞིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང༌། ཀཽ་ཤི་ཀ །ཡང་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཀྱི་སེམས་
ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་སྤྱི་ཕུད་ཀྱི་འཇིག་རྟེན་གྱི་
ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་པ་དང༌། ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་བསོད་
༄༅། །ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གཉིས་པ་བར་མའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་
རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང༌། ཀཽ་ཤི་ཀ །ཡང་སྟོང་གཉིས་པ་བར་མའི་འཇིག་རྟེན་གྱི་
ཁམས་ཀྱི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་སེམས་བསྐྱེད་པ་དང༌། ཀཽ་ཤི་ཀ །ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་སེམས་བསྐྱེད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་
སྙེད་ཡོད་པ་དེ་དག་ཐམས་ཅད་ཀྱང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཅུག་པ་དང༌། ཀཽ་
ཤི་ཀ །རིགས་ཀྱི་བུའམ་རིགས་ཀྱི་བུ་མོ་གཞན་གང་ལ་ལ་ཞིག་གིས་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཅུག་ནས་དེ་དག་ལ་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་བྲིས་ཏེ་བྱིན་པ་དང༌། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སློབ་པར་འགྱུར་
ཞིང་རྣལ་འབྱོར་དུ་བྱེད་པར་འགྱུར་ཏེ། དེ་ལྟར་ན། འདིའི་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལྷག་པར་སྒོམ་པ་དང༌། འཕེལ་བ་དང༌། རྒྱས་པ་དང༌། ཡངས་པར་གྱུར་པས་ཡོངས་སུ་
རྫོགས་པར་འགྱུར་རོ། །སྙམ་པས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉེ་བར་གཏད་ན། ཀཽ་ཤི་ཀ །རིགས་ཀྱི་བུའམ་
རིགས་ཀྱི་བུ་མོ་སྔ་མ་དེ་བས་འདི་ཆེས་བསོད་ནམས་མང་དུ་བསྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། འདི་ནི། ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་སངས་རྒྱས་ནས་སེམས་ཅན་རྣམས་ཀྱི་སྡུག་བསྔལ་མཐར་འབྱིན་པར་འགྱུར་རོ། །ཀཽ་ཤི་ཀ །གཞན་ཡང་ཛམྦུའི་གླིང་གི་སེམས་ཅན་ཇི་སྙེད་ཡོད་པ་དེ་དག་ཐམས་ཅད་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ལ། དེ་དག་ཉིད་ལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཤེས་རབ་ཀྱི་ཕ་རོལ་ཏུ་
༄༅། །ཕྱིན་པ་འདི་གླེགས་བམ་དུ་བྲི་བར་བྱས་ནས་བྱིན་ཞིང་ཉེ་བར་གཏད་དེ་དོན་དང་བཅས་ཤིང་ཡི་གེ་དང་བཅས་པ་ཉེ་བར་སྟོན་ན། ཀཽ་ཤི་ཀ །དེ་ཇི་སྙམ་དུ་སེམས།
ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །
བཅོམ་ལྡན་འདས། བསོད་ནམས་ཀྱི་ཕུང་པོ་དེ་གྲངས་སུ་བགྱི་བར་སླ་བ་མ་ལགས་ཏེ། བཅོམ་ལྡན་འདས། བསོད་ནམས་ཀྱི་ཕུང་པོ་དེ་བགྲང་བར་ཡང༌། དཔེར་ཡང༌། དཔེས་བསྟན་
པར་བགྱི་བར་ཡང༌། རྟེན་དུའང༌། རྒྱུར་ཡང་བགྱི་བར་སླ་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་
ཆེས་བསོད་ནམས་མང་དུ་བསྐྱེད་དེ། གང་གིས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བར་འདོད་པ་དེ་དག་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་བྲི་བ་བྱས་ནས་བྱིན་ཞིང་ཉེ་བར་གཏད་དེ་དོན་དང་བཅས་ཤིང་ཡི་གེ་དང་བཅས་
པ་ཉེ་བར་སྟོན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་འདོམས་ཤིང་རྗེས་སུ་སྟོན་པའོ། །ཀཽ་ཤི་ཀ །ཡང་ཛམྦུའི་གླིང་གི་སེམས་ཅན་ཐམས་ཅད་ཕྱིར་མི་ལྡོག་པར་
གྱུར་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉེ་བར་གཏད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་
ཡོད་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ལ་དེ་དག་ལའང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་གླེགས་བམ་ལ་བྲི་བ་བྱས་ནས་བྱིན་ཞིང་ཉེ་བར་གཏད་ལ་དོན་དང་བཅས་ཤིང་ཡི་གེ་དང་བཅས་པ་ཉེ་བར་སྟོན་པ་དང༌། ཀཽ་ཤི་ཀ །ཡང་གླིང་ཆེན་པོ་བཞི་པའི་འཇིག་
རྟེན་གྱི་ཁམས་ཀྱི་སེམས་ཅན་ཐམས་ཅད་ཕྱིར་མི་ལྡོག་པར་གྱུར་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉེ་བར་གཏད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་
སྤྱི་ཕུད་ཀྱི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ལ་དེ་དག་ལའང་རིགས་ཀྱི་
བུའམ་རིགས་ཀྱི་བུ་མོ་གང་ལ་ལ་ཞིག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་ལ་བྲི་བ་བྱས་ནས་བྱིན་ཞིང་ཉེ་བར་གཏད་དེ་དོན་དང་བཅས་ཤིང་ཡི་གེ་དང་བཅས་པ་ཉེ་བར་སྟོན་
པ་དང༌། ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཕྱིར་མི་ལྡོག་པར་གྱུར་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉེ་བར་གཏད་པའི་བསོད་ནམས་
༄༅། །མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གཉིས་པ་བར་མའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ལ་དེ་དག་ལའང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་ལ་བྲི་བ་བྱས་
ནས་བྱིན་ཞིང་ཉེ་བར་གཏད་དེ་དོན་དང་བཅས་ཤིང་ཡི་གེ་དང་བཅས་པ་ཉེ་བར་སྟོན་པ་དང༌། ཀཽ་ཤི་ཀ །ཡང་སྟོང་གཉིས་པ་བར་མའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་
ཕྱིར་མི་ལྡོག་པར་གྱུར་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉེ་བར་གཏད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ལ་དེ་དག་ལ་ཡང་རིགས་ཀྱི་བུའམ་རིགས་ཀྱི་བུ་མོ་
གང་ལ་ལ་ཞིག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་བམ་ལ་བྲི་བ་བྱས་ནས་བྱིན་ཞིང་ཉེ་བར་གཏད་དེ་དོན་དང་བཅས་ཤིང་ཡི་གེ་དང་བཅས་པ་ཉེ་བར་སྟོན་པ་དང༌། ཀཽ་ཤི་ཀ།
ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཕྱིར་མི་ལྡོག་པར་གྱུར་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉེ་བར་གཏད་པའི་བསོད་ནམས་
མངོན་པར་འདུ་བྱེད་པ་ལྟ་ཞོག །ཀཽ་ཤི་ཀ །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ལ་དེ་དག་ལ་ཡང་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གླེགས་
བམ་ལ་བྲི་བ་བྱས་ནས་བྱིན་ཞིང་ཉེ་བར་གཏད་དེ་དོན་དང་བཅས་ཤིང་ཡི་གེ་དང་བཅས་པ་ཉེ་བར་སྟོན་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་རིགས་ཀྱི་བུའམ་རིགས་ཀྱི་བུ་མོ་དེ་དེའི་
གཞི་ལས་བསོད་ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས། བསོད་ནམས་ཀྱི་ཕུང་
པོ་དེ་གྲངས་སུ་བགྱི་བར་སླ་བ་མ་ལགས་ཏེ། བཅོམ་ལྡན་འདས། བསོད་ནམས་ཀྱི་ཕུང་པོ་དེ་བགྲང་བར་ཡང༌། དཔེར་ཡང༌། དཔེས་བསྟན་པར་བགྱི་བར་ཡང༌། རྟེན་དུའང༌། རྒྱུར་ཡང་
བགྱི་བར་སླ་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བས་ཀྱང་རིགས་ཀྱི་བུའམ་རིགས་ཀྱི་བུ་མོ་འདི་ཆེས་བསོད་ནམས་མང་དུ་བསྐྱེད་དེ། གང་གིས་
ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ་དེ་དག་ལ་ཤེས་རབ་
༄༅། །ཀྱི་ཕ་རོལ་ཏུ་ཕྱིན་པ་འདི་གླེགས་བམ་དུ་བྲི་བ་བྱས་ནས་བྱིན་ཞིང་ཉེ་བར་གཏད་དེ་དོན་དང་བཅས་ཤིང་ཡི་གེ་དང་བཅས་པ་ཉེ་བར་སྟོན་ཅིང་ཤེས་རབ་ཀྱི་ཕ་རོལ་ཏུ་ཕྱིན་
པ་འདི་འདོམས་ཤིང་རྗེས་སུ་སྟོན་པ་དང༌། ཀཽ་ཤི་ཀ །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཞིག་བྱུང་སྟེ། དེ་འདི་སྐད་དུ། བདག་ནི། འདི་དག་པས་ཆེས་མྱུར་དུ་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །ཞེས་ཟེར་ཏེ། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་གང་ཞིག་གིས་མངོན་པར་ཤེས་
པ་ཤིན་ཏུ་མྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འདོམས་ཤིང་རྗེས་སུ་སྟོན་ན། རིགས་ཀྱི་བུའམ་རིགས་ཀྱི་བུ་མོ་སྔ་མ་དེ་
ལས་འདི་ཉིད་ཆེས་བསོད་ནམས་མང་དུ་བསྐྱེད་དོ། །དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་
དཔའ་སེམས་དཔའ་ཆེན་པོ་ཇི་ལྟ་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་གྱུར་པ་དེ་ལྟ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གདམས་པར་བགྱི་ཞིང་རྗེས་
སུ་བསྟན་པར་བགྱི་བ་ལགས་སོ། །དེ་ལྟ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གདམས་པར་བགྱི་བ་དང༌། རྗེས་སུ་བསྟན་པར་བགྱི་བ་ལགས་པས་དེ་བཞིན་ཉིད་ལ་ཉེ་བར་འགྱུར་
རོ༑ ༑དེ་བཞིན་ཉིད་ལ་ཉེ་བར་གྱུར་ན། གང་དག་གི་གོས་དང༌། བསོད་སྙོམས་དང༌། མལ་ཆ་དང༌། སྟན་དང༌། བྲོ་འཚལ་བའི་གསོས་སྨན་དང༌། ཡོ་བྱད་རྣམས་ཡོངས་སུ་སྤྱད་པ་དེ་དག་གི་བྱ་
བ་བྱས་པ་དེ་དག་འབྲས་བུ་ཆེན་པོ་དང༌། ཕན་ཡོན་ཆེན་པོར་བགྱིད་པ་དེས་ན། དེ་བསོད་ནམས་ཆེས་མང་དུ་བསྐྱེད་དོ། །དེ་ཅིའི་སླད་དུ་ཞེ་ན། བཅོམ་ལྡན་འདས། དེ་ལྟར་བྱང་ཆུབ་སེམས་དཔའ་
སེམས་དཔའ་ཆེན་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བར་འགྱུར་པ་འདི་ནི། དེ་ལྟ་བུ་ཉིད་ལགས་པའི་སླད་དུའོ། །དེ་ནས་ཚེ་དང་ལྡན་པ་རབ་འབྱོར་གྱིས་ལྷ་རྣམས་ཀྱི་
དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ །གང་ཁྱོད་བྱང་ཆུབ་སེམས་དཔའི་ཐེག་པ་པའི་གང་ཟག་རྣམས་ལ་སྤྲོ་བ་སྦྱིན་པ་དང༌། ཡོངས་སུ་འཛིན་པ་དང༌། རྗེས་སུ་སྟོན་པར་
བྱེད་པ་ནི། ལེགས་སོ། ལེགས་སོ། །ཀཽ་ཤི་ཀ །ཁྱོད་ཀྱི་བྱ་བ་ནི། འདི་ཡིན་ཏེ། འཕགས་པ་ཉན་ཐོས་གང་ཞིག་སེམས་ཅན་ཐམས་ཅད་རྗེས་སུ་འཛིན་པར་བྱེད་འདོད་པ་དེས་ནི། བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་སྤྲོ་བ་འཕེལ་བར་བྱེད་པ་དང༌། ཡོངས་སུ་འཛིན་པར་བྱེད་པ་དང༌། རྗེས་སུ་སྟོན་པར་བྱེད་པ་
དེ་ལྟར་འདི་བྱ་བ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི། འདི་ལས་སྐྱེས་ཏེ། གལ་ཏེ་བྱང་
༄༅། །ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བྱང་ཆུབ་ཀྱི་སེམས་འདི་མ་བསྐྱེད་དུ་ཟིན་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ལ་སློབ་པར་ཡང་མི་འགྱུར་ཞིང་ཕ་རོལ་ཏུ་ཕྱིན་པ་དྲུག་ལ་སློབ་པར་ཡང་མི་འགྱུར་ལ། མ་བསླབས་ན་ནི། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་མི་འགྱུར་བ་ཞིག་ན། གང་གི་ཕྱིར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་བསླབ་པ་
ཕ་རོལ་ཏུ་ཕྱིན་པ་དྲུག་པོ་འདི་དག་ལ་སློབ་སྟེ། དེའི་ཕྱིར་བྱང་ཆུབ་ཏུ་སེམས་བསྐྱེད་དོ། །དེའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །
འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། བསོད་ནམས་ཀྱི་རྣམ་གྲངས་ཀྱི་ལེའུ་ཞེས་བྱ་སྟེ། ལྔ་པའོ།། །།དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་བྱམས་པས་གནས་བརྟན་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་རྗེས་སུ་
ཡི་རང་བ་ཡོངས་སུ་བསྔོ་བ་དང་ལྡན་པའི་བསོད་ནམས་བྱ་བའི་དངོས་པོ་གང་ཡིན་པ་དང༌། གང་ཡང་སེམས་ཅན་ཐམས་ཅད་ཀྱི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་
པོ་དང༌། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་དང༌། བསྒོམས་པ་ལས་བྱུང་བའི་བསོད་ནམས་བྱ་བའི་དངོས་པོ་གང་ཡིན་པ་དེ་དག་ལས་བྱང་ཆུབ་སེམས་དཔའ་
སེམས་དཔའ་ཆེན་པོའི་རྗེས་སུ་ཡི་རང་བ་ཡོངས་སུ་བསྔོ་བ་དང་ལྡན་པའི་བསོད་ནམས་བྱ་བའི་དངོས་པོ་འདི་ཉིད་མཆོག་ཅེས་བྱའོ། །དམ་པ་ཞེས་བྱའོ། །གཙོ་བོ་ཞེས་བྱའོ། །རབ་ཅེས་བྱའོ། །
མཆོག་རབ་ཅེས་བྱའོ། །གྱ་ནོམ་པ་ཞེས་བྱའོ། །བླ་མ་ཞེས་བྱའོ། །བླ་ན་མེད་པ་ཞེས་བྱའོ། །གོང་ན་མེད་པ་ཞེས་བྱའོ། །མཉམ་པ་མེད་པ་ཞེས་བྱའོ། །མི་མཉམ་པ་དང་མཉམ་པ་ཞེས་བྱའོ། །
དེ་སྐད་ཅེས་སྨྲས་པ་དང༌། གནས་བརྟན་ཚེ་དང་ལྡན་པ་རབ་འབྱོར་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་སྨྲས་སོ། །བྱམས་པ་ཡང༌། བྱང་ཆུབ་སེམས་
དཔའ་སེམས་དཔའ་ཆེན་པོ་གང་གིས་ཐམས་ཅད་ནས་ཐམས་ཅད་དུ་སོང་བའི་ཕྱོགས་བཅུའི་འཇིག་རྟེན་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཞལ་དུ་མེད་པའི་གཞལ་
དུ་མེད་པ། གྲངས་མེད་པའི་གྲངས་མེད་པ། ཚད་མེད་པའི་ཚད་མེད་པ། བསམ་གྱིས་མི་ཁྱབ་པའི་བསམ་གྱིས་མི་ཁྱབ་པ། མཐའ་ཡས་མུ་མེད་པ་ཡོད་པ་རྣམས་ཀྱི་ཕྱོགས་རེ་རེའི་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རེ་རེར་འདས་པའི་དུས་ན་གཞལ་དུ་མེད་པའི་གཞལ་དུ་མེད་པ། གྲངས་མེད་པའི་གྲངས་མེད་པ། ཚད་མེད་པའི་ཚད་མེད་པ། བསམ་གྱིས་
༄༅། །མི་ཁྱབ་པའི་བསམ་གྱིས་མི་ཁྱབ་པ། མཐའ་ཡས་མུ་མེད་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལམ་ཆད་པ། འཇུག་པ་
ཆད་པ༑ སྤྲོས་པ་དང་སྲིད་པར་འདྲེན་པ་ཆད་པ། མཆི་མ་ཟད་པ། ཚེར་མ་བཅོམ་པ། ཁུར་ཤིན་ཏུ་བོར་བ། བདག་གི་དོན་རྗེས་སུ་ཐོབ་པ། སྲིད་པར་སྦྱོར་བ་ཡོངས་སུ་ཟད་པ། ཡང་དག་
པར་ཀུན་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཐམས་ཅད་ཀྱི་དབང་དམ་པའི་ཕ་རོལ་ཏུ་སོན་པ། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་
མྱ་ངན་ལས་འདས་པ་དེ་དག་གི་སེམས་དང་པོ་བསྐྱེད་པ་ནས་བཟུང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་བར་དང༌། ཕུང་པོ་ལྷག་
མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པའི་བར་དང༌། དམ་པའི་ཆོས་ནུབ་པར་མ་གྱུར་པའི་བར་ཏེ། དེ་དག་གི་བར་གྱི་སངས་རྒྱས་བཅོམ་
ལྡན་འདས་དེ་རྣམས་ཀྱི་ཚུལ་ཁྲིམས་ཀྱི་ཕུང་པོ་དང༌། ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་གཟིགས་
པའི་ཕུང་པོ་དང༌། ཕ་རོལ་ཏུ་ཕྱིན་པ་དྲུག་དང་ལྡན་པའི་དགེ་བའི་རྩ་བ་གང་དག་ཡིན་པ་དག་དང༌། སངས་རྒྱས་ཀྱི་ཡོན་ཏན་ཕུན་སུམ་ཚོགས་པ་དང་ལྡན་པའི་དགེ་བའི་རྩ་བ་རྣམས་དང༌།
སྟོབས་དང་མི་འཇིགས་པའི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་དང༌། དེ་བཞིན་དུ་མངོན་པར་ཤེས་པའི་ཕ་རོལ་ཏུ་ཕྱིན་པ་དང་ལྡན་པ་དང༌། ཡོངས་སུ་ཤེས་པའི་ཕ་རོལ་ཏུ་ཕྱིན་
པ་དང་ལྡན་པ་དང༌། སྨོན་ལམ་གྱི་ཕ་རོལ་ཏུ་ཕྱིན་པ་དང༌། ཐམས་ཅད་མཁྱེན་པའི་ཡེ་ཤེས་ཕུན་སུམ་ཚོགས་པ་དང་ལྡན་པའི་དགེ་བའི་རྩ་བ་གང་ཡིན་པ་རྣམས་དང༌། ཕན་པར་བཞེད་
པ་གང་ཡིན་པ་དང༌། བྱམས་པ་ཆེན་པོ་གང་ཡིན་པ་དང༌། སྙིང་རྗེ་ཆེན་པོ་གང་ཡིན་པ་དང༌། སངས་རྒྱས་ཀྱི་ཡོན་ཏན་གཞལ་དུ་མེད་པ་གྲངས་མེད་པ་གང་ཡིན་པ་དང༌། བླ་ན་མེད་
པ་ཡང་དག་པར་རྫོགས་པའི་བྱང་ཆུབ་གང་ཡིན་པ་དང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བདེ་བ་གང་ཡིན་པ་དང༌། ཆོས་ཐམས་ཅད་ལ་དབང་ཕྱུག་གི་ཕ་རོལ་ཏུ་ཕྱིན་
པ་གང་ཡིན་པ་དང༌། ཟིལ་གྱིས་མནན་པ་དཔག་ཏུ་མེད་པ་དང༌། ཐམས་ཅད་ཟིལ་གྱིས་གནོན་པའི་རྫུ་འཕྲུལ་མངོན་པར་འདུ་བྱེད་པའི་མཆོག་གང་ཡིན་པ་དང༌། སྒྲིབ་པ་མེད་པ། མ་ཆགས་
པ༑ ཐོགས་པ་མེད་པ། མཉམ་པ་མེད་པ། མི་མཉམ་པ་དང་མཉམ་པ། དཔེ་མེད་པ། དཔག་ཏུ་མེད་པ། དེ་བཞིན་གཤེགས་པའི་ཡང་དག་པ་ཇི་ལྟ་བའི་ཡེ་ཤེས་ཀྱི་སྟོབས་གང་
ཡིན་པ་དང༌། སྟོབས་ཀྱི་ནང་ན་སངས་རྒྱས་ཀྱི་ཡེ་ཤེས་ཀྱི་སྟོབས་གང་ཡིན་པ་དང༌། སངས་རྒྱས་ཀྱི་ཡེ་ཤེས་དང་གཟིགས་པ་གང་ཡིན་པ་དང༌། སྟོབས་བཅུའི་ཕ་རོལ་ཏུ་ཕྱིན་པ་གང་ཡིན་པ་
༄༅། །དང༌། མི་འཇིགས་པ་བཞི་མཆོག་ཏུ་ཡོངས་སུ་རྫོགས་པར་ཁོང་དུ་ཆུད་པ་གང་ཡིན་པ་དང༌། ཆོས་ཐམས་ཅད་དོན་དམ་པར་མངོན་པར་སྒྲུབ་པས་ཆོས་ཁོང་དུ་
ཆུད་པ་གང་ཡིན་པ་དང༌། ཆོས་ཀྱི་འཁོར་ལོ་རབ་ཏུ་བསྐོར་བ་གང་ཡིན་པ་དང༌། ཆོས་ཀྱི་སྒྲོན་མ་ཐོགས་པ་དང༌། ཆོས་ཀྱི་རྔ་རྡུང་བ་དང༌། ཆོས་ཀྱི་དུང་འབུད་པ་དང༌། ཆོས་ཀྱི་དུང་
སྒྲོགས་པ་དང༌། ཆོས་ཀྱི་རལ་གྲི་འདེབས་པ་དང༌། ཆོས་ཀྱི་ཆར་འབེབས་པ་དང༌། ཆོས་ཀྱི་མཆོད་སྦྱིན་སྦྱིན་པ་དང༌། ཆོས་ཀྱི་སྦྱིན་པས་སེམས་ཅན་ཐམས་ཅད་ཡང་དག་པར་ཚིམ་པར་
མཛད་ཅིང་ཡང་དག་པར་སྟོབ་པ་དང༌། གང་ཡང་ཆོས་བསྟན་པ་དེ་དག་དང༌། སངས་རྒྱས་ཀྱི་ཆོས་རྣམས་སམ། རང་སངས་རྒྱས་ཀྱི་ཆོས་རྣམས་སམ། ཉན་ཐོས་ཀྱི་ཆོས་རྣམས་ལ་
གང་དག་བརྟུལ་བ་དང༌། བསླབས་པ་དང༌། མོས་པར་གྱུར་པ་དང༌། ངེས་པར་གྱུར་པ་དང༌། རྫོགས་པའི་བྱང་ཆུབ་ལ་གཞོལ་བར་གྱུར་པ་གང་དག་ཡིན་པ་དེ་དག་ཐམས་
ཅད་ཀྱི་དགེ་བའི་རྩ་བ་གང་ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་ལུང་བསྟན་པ་དེ་དག་གི་ཕ་རོལ་ཏུ་ཕྱིན་པ་དྲུག་དང་ལྡན་པའི་དགེ་བའི་རྩ་བ་གང་ཡིན་པ་རྣམས་དང༌། གང་ཟག་རང་སངས་རྒྱས་ཀྱི་ཐེག་པ་ཅན་
གང་དག་རང་སངས་རྒྱས་ཀྱི་བྱང་ཆུབ་ལ་ལུང་བསྟན་པ་དེ་དག་ཐམས་ཅད་ཀྱི་དགེ་བའི་རྩ་བ་གང་ཡིན་པ་རྣམས་དང༌། གང་ཟག་ཉན་ཐོས་ཀྱི་ཐེག་པ་ཅན་རྣམས་ཀྱི་སྦྱིན་པ་ལས་བྱུང་བའི་བསོད་
ནམས་བྱ་བའི་དངོས་པོ་དང༌། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་དང༌། བསྒོམས་པ་ལས་བྱུང་བའི་བསོད་ནམས་བྱ་བའི་དངོས་པོ་གང་ཡིན་པ་དང༌། སློབ་པའི་ཟག་
པ་མེད་པའི་དགེ་བའི་རྩ་བ་གང་ཡིན་པ་རྣམས་དང༌། མི་སློབ་པའི་ཟག་པ་མེད་པའི་དགེ་བའི་རྩ་བ་གང་ཡིན་པ་རྣམས་དང༌། སོ་སོའི་སྐྱེ་བོ་གང་དག་གིས་ཆོས་དེ་དག་ལ་དགེ་བའི་རྩ་བ་
བསྐྲུན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གི་འཁོར་བཞི་པོ་དགེ་སློང་རྣམས་དང༌། དགེ་སློང་མ་རྣམས་དང༌། དགེ་བསྙེན་རྣམས་དང༌། དགེ་བསྙེན་མ་རྣམས་ཀྱི་
སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང༌། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་དང༌། བསྒོམས་པ་ལས་བྱུང་བའི་བསོད་ནམས་བྱ་བའི་དངོས་པོ་
གང་ཡིན་པ་རྣམས་དང༌། དེར་སངས་རྒྱས་བཅོམ་ལྡན་འདས་ཆོས་སྟོན་པ་དེ་དག་ལ་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་
དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་གང་དག་དང༌། བྱོལ་སོང་གི་སྐྱེ་གནས་སུ་སོང་བའི་སེམས་ཅན་གང་དེ་དག་ཐམས་ཅད་ཀྱིས་དགེ་བའི་རྩ་བ་བསྐྲུན་པ་གང་ཡིན་པ་
༄༅། །རྣམས་དང༌། སངས་རྒྱས་བཅོམ་ལྡན་འདས་དེ་དག་ཡོངས་སུ་མྱ་ངན་ལས་འདའ་བ་ལའང་གང་གིས་དགེ་བའི་རྩ་བ་བསྐྲུན་པ་གང་དག་ཡིན་པ་དང༌། སངས་
རྒྱས་བཅོམ་ལྡན་འདས་དེ་དག་ཡོངས་སུ་མྱ་ངན་ལས་འདས་པ་ལ་ཡང་གང་གིས་དགེ་བའི་རྩ་བ་བསྐྲུན་པ་གང་དག་ཡིན་པ་དང༌། སངས་རྒྱས་བཅོམ་ལྡན་འདས་ལ་བརྟེན་པ་དང༌།
ཆོས་ལ་བརྟེན་པ་དང༌། དགེ་འདུན་རྣམས་ལ་བརྟེན་པ་དང༌། ཡིད་ཀྱིས་བསྒོམ་པར་བྱ་བའི་གང་ཟག་དག་ལ་བརྟེན་ནས་དགེ་བའི་རྩ་བ་བསྐྲུན་པ་གང་ཡིན་པའི་དགེ་བའི་རྩ་བ་
དེ་དག་ཐམས་ཅད་མ་ལུས་ཤིང་ལུས་པ་མེད་པར་གཅིག་ཏུ་མངོན་པར་བསྡུས་ཏེ་བསྡོམས་ཤིང་གཞལ་ནས་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་སྟེ། དམ་པ་དང༌། གཙོ་
བོ་དང༌། རབ་དང༌། རབ་མཆོག་དང༌། གྱ་ནོམ་པ་དང༌། བླ་མ་དང༌། བླ་ན་མེད་པ་དང༌། གོང་ན་མེད་པ་དང༌། མཉམ་པ་མེད་པ་དང༌། མི་མཉམ་པ་དང༌། མཉམ་པའི་རྗེས་སུ་ཡི་རང་བས་
རྗེས་སུ་ཡི་རང་ལ། དེ་ལྟར་རྗེས་སུ་ཡི་རང་ནས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །
ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པར་གྱུར་ཅིག །སྙམ་པས་ངག་ཏུ་བརྗོད་པར་བྱ་བ་ཡིན་ཏེ། དེ་ལ་གང་ཟག་བྱང་ཆུབ་སེམས་དཔའི་ཐེག་པ་ཅན་དག་
དངོས་པོ་གང་དག་དང༌། དམིགས་པ་གང་དག་དང༌། རྣམ་པ་གང་དག་གིས་ཡོངས་སུ་བསྔོ་ཞིང་སེམས་དེ་བསྐྱེད་པ་ན་ཅི་ག་དངོས་པོ་དེ་དག་དང༌། དམིགས་པ་དེ་དག་དང༌། རྣམ་པ་དེ་དག་
ཇི་ལྟར་མཚན་མར་བྱས་པ་དེ་བཞིན་དུ་དམིགས་སམ། དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་གནས་བརྟན་ཚེ་དང་ལྡན་པ་རབ་འབྱོར་ལ་
འདི་སྐད་ཅེས་སྨྲས་སོ། །བཙུན་པ་རབ་འབྱོར། དངོས་པོ་དེ་དག་དང༌། དམིགས་པ་དེ་དག་དང༌། རྣམ་པ་དེ་དག་ཇི་ལྟར་མཚན་མར་བྱས་པ་དེ་བཞིན་དུ་མི་དམིགས་སོ། །དེ་སྐད་ཅེས་སྨྲས་
པ་དང༌། གནས་བརྟན་ཚེ་དང་ལྡན་པ་རབ་འབྱོར་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་སྨྲས་སོ། །གལ་ཏེ་དེ་དངོས་པོ་མེད་པ་དང༌། །དམིགས་པ་
མེད་པ་ལ་དམིགས་པར་བྱེད་ཅིང་མཚན་མར་བྱེད་ན་ཇི་ལྟར། འདི་འདུ་ཤེས་ཕྱིན་ཅི་ལོག་པ་དང༌། སེམས་ཕྱིན་ཅི་ལོག་པ་དང༌། ལྟ་བ་ཕྱིན་ཅི་ལོག་པར་མི་འགྱུར། དེ་ཅིའི་ཕྱིར་ཞེ་
ན༑ འདི་ལྟར་འདོད་ཆགས་ཀྱང་དངོས་པོ་མེད་བཞིན་དུ་མི་རྟག་པ་ལ་རྟག་པ་དང༌། སྡུག་བསྔལ་བ་ལ་བདེ་བ་དང༌། བདག་མེད་པ་ལ་བདག་དང༌། མི་སྡུག་པ་ལ་སྡུག་པར་རྣམ་པར་
བརྟགས་ཤིང་ཀུན་ཏུ་བརྟགས་ནས་འདུ་ཤེས་ཕྱིན་ཅི་ལོག་པ་དང༌། སེམས་ཕྱིན་ཅི་ལོག་པ་དང༌། ལྟ་བ་ཕྱིན་ཅི་ལོག་པར་འབྱུང་ངོ༌། །གཞན་ཡང་དངོས་པོ་ཇི་ལྟ་བ་དང༌། དམིགས་པ་
༄༅། །ཇི་ལྟ་བ་དང༌། རྣམ་པ་ཇི་ལྟ་བ་བཞིན་དུ་བྱང་ཆུབ་ཀྱང་དེ་བཞིན། སེམས་ཀྱང་དེ་བཞིན་ཡིན་ན། དེ་ལྟ་ན། ཆོས་ཐམས་ཅད་དང༌། ཁམས་ཐམས་ཅད་ཀྱང་
དེ་བཞིན་ནོ། །གལ་ཏེ་ཡང་དངོས་པོ་ཇི་ལྟ་བ་དང༌། དམིགས་པ་ཇི་ལྟ་བ་དང༌། རྣམ་པ་ཇི་ལྟ་བ་བཞིན་དུ་བྱང་ཆུབ་ཀྱང་དེ་བཞིན། སེམས་ཀྱང་དེ་བཞིན་ཡིན་ན། དེས་ན་དངོས་པོ་
གང་དག་དང༌། དམིགས་པ་གང་དག་དང༌། རྣམ་པ་གང་དག་གིས་སེམས་གང་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་པའམ། རྗེས་སུ་ཡི་
རང་བ་དང་ལྡན་པའི་བསོད་ནམས་བྱ་བའི་དངོས་པོ་གང་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་གང་དུ་ཡོངས་སུ་སྔོ་བར་བྱེད། དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་བྱམས་པས་ཚེ་དང་ལྡན་པ་གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་རབ་འབྱོར། འདི་ནི། ཐེག་པ་ལ་གསར་དུ་ཞུགས་པའི་བྱང་ཆུབ་སེམས་
དཔའ་སེམས་དཔའ་ཆེན་པོའི་མདུན་དུ་བཤད་པར་མི་བྱ། བསྟན་པར་མི་བྱའོ། །དེ་ཅིའི་ཕྱིར་ཞེ་ན། དེ་ལ་གང་དད་པ་ཙམ་དང༌། དགའ་བ་ཙམ་དང༌། མོས་པ་ཙམ་དང༌། གུས་པ་
ཙམ་དང་ཡོད་པ་དེ་དག་ཐམས་ཅད་ཀྱང་འཇིག་པར་འགྱུར་རོ། །འཕགས་པ་རབ་འབྱོར། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་མདུན་དུ་འདི་བཤད་
པར་བྱའོ། །ཉེ་བར་བསྟན་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་དགེ་བའི་བཤེས་གཉེན་གྱིས་ཉེ་བར་བསྟན་པར་གྱུར་པ་དེའང་འདི་ལ་མི་འགོང༌། ཀུན་ཏུ་མི་ཞུམ།
བག་མི་ཚ། བག་འཁུམས་པར་མི་འགྱུར། འདིའི་ཡིད་ཕྱིར་ཕྱོགས་པར་མི་བྱེད། བཅོམ་ཞིང་ཕྱིར་ཕྱོགས་པར་མི་འགྱུར། མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་ལྡན་པར་
མི་འགྱུར་རོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་རྗེས་སུ་ཡི་རང་བར་བྱས་ནས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་ཐམས་ཅད་མཁྱེན་པ་
ཉིད་དུ་ཡོངས་སུ་བསྔོ་བར་བྱའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་བདུན་པ། དེ་ནས་གནས་བརྟན་ཚེ་དང་ལྡན་པ་རབ་འབྱོར་གྱིས་བྱང་
ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་སྨྲས་སོ། །བྱམས་པ། སེམས་གང་གིས་རྗེས་སུ་ཡི་རང་ནས་གང་ཡོངས་སུ་སྔོ་བར་བྱེད་པའི་སེམས་དེའང་ཟད་
ཅིང་འགགས་པར་གྱུར་ལ། བྲལ་ཞིང་རྣམ་པར་གྱུར་པ་ཡིན་ཏེ། དེས་ན་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་པའི་སེམས་དེ་གང་ཞིག་
ཡིན། རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་པའི་སེམས་དེའང་གང་ཡིན་ལ།
༄༅། །གང་གི་ཚེ་སེམས་གཉིས་ཕྲད་པ་མེད་པ་དང༌། སེམས་དེ་རང་བཞིན་གྱིས་ཡོངས་སུ་བསྔོ་བར་ཡང་མི་ནུས་ན། སེམས་ཀྱིས་སེམས་ཡོངས་སུ་བསྔོ་བར་ནུས་པར་
ཡང་ཇི་ལྟར་འགྱུར། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་གནས་བརྟན་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་རབ་འབྱོར། ཐེག་པ་ལ་གསར་དུ་
ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བསྟན་པ་འདི་ཐོས་ནས་དངང་ཞིང་ཀུན་ཏུ་སྐྲག་ལ། ཀུན་ཏུ་སྐྲག་པ་དང་ལྡན་པར་གྱུར་ན་མི་རུང་ངོ༌། །འཕགས་
པ་རབ་འབྱོར། ཡང་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་དེ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་ཡོངས་སུ་བསྔོ་བར་བྱ། རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་ཡོངས་སུ་འཛིན་པ་དང༌། རྗེས་སུ་ཡི་རང་བ་དང་ལྡན་པའི་སེམས་ཡོངས་
སུ་སྔོ་བར་བྱེད་པས་ཇི་ལྟར་རྗེས་སུ་ཡི་རང་བ་དང་ལྡན་པའི་སེམས་དེ་ལེགས་པར་ཡོངས་སུ་བཟུང་ཞིང་ལེགས་པར་ཡོངས་སུ་བསྔོས་པར་འགྱུར། །དེ་ནས་གནས་བརྟན་
ཚེ་དང་ལྡན་པ་རབ་འབྱོར་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བརྩམས་ཤིང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་གཞིར་བྱས་ཏེ་བྱང་
ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སྨྲས་པ། བྱམས་པ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ཕྱོགས་བཅུའི་འཇིག་རྟེན་ན་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་གཞལ་དུ་མེད་ཅིང་གྲངས་མེད་པ་ཡོད་པའི་ཕྱོགས་རེ་རེའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རེ་རེར་ཡང་འདས་པའི་སངས་རྒྱས་བཅོམ་
ལྡན་འདས་ལམ་ཆད་པ། འཇུག་པ་ཆད་པ། སྤྲོས་པ་དང་སྲིད་པར་འདྲེན་པ་ཆད་པ། མཆི་མ་ཟད་པ། ཚེར་མ་བཅོམ་པ། ཁུར་ཤིན་ཏུ་བོར་བ་བདག་གི་དོན་རྗེས་སུ་ཐོབ་པ། སྲིད་
པར་སྦྱོར་བ་ཡོངས་སུ་ཟད་པ། ཡང་དག་པར་ཀུན་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཐམས་ཅད་ཀྱི་དབང་དམ་པའི་ཕ་རོལ་ཏུ་སོན་པ། གཞལ་དུ་མེད་ཅིང་གྲངས་མེད་པ།
ཡོངས་སུ་མྱ་ངན་ལས་འདས་པར་གྱུར་པའི་སངས་རྒྱས་བཅོམ་ལྡན་འདས་དེ་དག་གི་སེམས་དང་པོ་བསྐྱེད་པ་ནས་བཟུང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་པའི་བར་དང༌། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པའི་བར་དང༌། དམ་པའི་ཆོས་ནུབ་པར་མ་གྱུར་པའི་བར་
ཏེ༑ དེ་དག་གི་བར་གྱི་སངས་རྒྱས་བཅོམ་ལྡན་འདས་དེ་དག་གི་དགེ་བའི་རྩ་བ་ཕ་རོལ་ཏུ་ཕྱིན་པ་དང་ལྡན་པ་གང་ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གི་བསོད་ནམས་
༄༅། །མངོན་པར་འདུ་བྱེད་པ་དང༌། དགེ་བའི་རྩ་བ་མངོན་པར་འདུ་བྱེད་པ་གང་ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གི་ཚུལ་ཁྲིམས་ཀྱི་ཕུང་པོ་དང༌།
ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་གང་ཡིན་པ་རྣམས་དང༌། ཕན་པར་
བཞེད་པ་གང་ཡིན་པ་དང༌། བྱམས་པ་ཆེན་པོ་གང་ཡིན་པ་དང༌། སྙིང་རྗེ་ཆེན་པོ་གང་ཡིན་པ་དང༌། སངས་རྒྱས་ཀྱི་ཡོན་ཏན་གཞལ་དུ་མེད་ཅིང་གྲངས་མེད་པ་གང་ཡིན་པ་རྣམས་
དང༌། སངས་རྒྱས་བཅོམ་ལྡན་འདས་དེ་དག་གིས་ཆོས་གང་བཤད་པ་དང༌། ཆོས་དེ་ལ་གང་གིས་བསླབས་པ་དང༌། ལྷག་པར་མོས་པ་དང༌། གནས་པ་དེ་དག་གི་དགེ་བའི་རྩ་བ་གང་
ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་
པ་དེ་དག་གི་དགེ་བའི་རྩ་བ་ཕ་རོལ་ཏུ་ཕྱིན་པ་དྲུག་དང་ལྡན་པ་གང་ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གིས་གང་ཟག་རང་སངས་རྒྱས་ཀྱི་ཐེག་པ་ཅན་གང་
དག་རང་བྱང་ཆུབ་ཏུ་ལུང་བསྟན་པ་དེ་དག་གི་དགེ་བའི་རྩ་བ་གང་ཡིན་པ་རྣམས་དང༌། གང་ཟག་ཉན་ཐོས་ཀྱི་ཐེག་པ་ཅན་དག་གི་སྦྱིན་པ་ལས་བྱུང་བའི་དགེ་བའི་རྩ་བ་དང༌། ཚུལ་ཁྲིམས་ལས་
བྱུང་བའི་དགེ་བའི་རྩ་བ་དང༌། བསྒོམས་པ་ལས་བྱུང་བའི་དགེ་བའི་རྩ་བ་དང༌། སློབ་པའི་ཟག་པ་མེད་པའི་དགེ་བའི་རྩ་བ་གང་ཡིན་པ་རྣམས་དང༌། མི་སློབ་པའི་ཟག་པ་མེད་པའི་དགེ་བའི་
རྩ་བ་གང་ཡིན་པ་རྣམས་དང༌། ཆོས་དེ་ལ་སོ་སོའི་སྐྱེ་བོ་གང་དག་གིས་དགེ་བའི་རྩ་བ་བསྐྲུན་པ་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌།
མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་གང་དག་གིས་ཆོས་དེ་ཐོས་ཏེ་ཐོས་ནས་ཀྱང་དགེ་བའི་རྩ་བ་བསྐྲུན་པ་དང༌། བྱོལ་སོང་གི་སྐྱེ་གནས་སུ་སོང་བའི་སེམས་ཅན་
གང་དག་གིས་ཆོས་དེ་ཐོས་ཏེ་ཐོས་ནས་ཀྱང་དགེ་བའི་རྩ་བ་བསྐྲུན་པ་དང༌། སེམས་ཅན་གང་དག་གིས་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བ་དང༌། ཡོངས་སུ་མྱ་ངན་
ལས་འདས་པ་དེ་དག་ལ་དགེ་བའི་རྩ་བ་བསྐྲུན་པ་སྟེ། དེ་དག་ཐམས་ཅད་ཀྱི་དགེ་བའི་རྩ་བ་གང་དག་ཡིན་པ་དེ་དག་ཐམས་ཅད་གཅིག་ཏུ་བསྡུས་ཏེ་བསྡོམས་ཤིང་གཞལ་ནས་མ་ལུས་པར་
བྱས་ཏེ་རྗེས་སུ་ཡི་རང་བར་བྱ་བ་མ་ལུས་པ་ལ་རྗེས་སུ་ཡི་རང་ནས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་
བསྔོས་ན། ཡོངས་སུ་སྔོ་བར་བྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་འདུ་ཤེས་ཕྱིན་ཅི་ལོག་ཏུ་མི་འགྱུར། སེམས་ཕྱིན་ཅི་ལོག་ཏུ་མི་འགྱུར། ལྟ་བ་ཕྱིན་
༄༅། །ཅི་ལོག་ཏུ་མི་འགྱུར། དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་གནས་བརྟན་ཚེ་དང་ལྡན་པ་རབ་འབྱོར་ལ་འདི་སྐད་ཅེས་
སྨྲས་སོ༑ ༑འཕགས་པ་རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་གང་གིས་གང་ཡོངས་སུ་བསྔོ་བའི་སེམས་དེ་ལ་སེམས་སུ་འདུ་ཤེས་པར་མ་གྱུར་
ན༑ དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
ཡོངས་སུ་བསྔོས་པ་ཡིན་ནོ། །ཇི་ལྟར་སེམས་དེ་ལ་སེམས་དེ་འདི་ཡིན་ནོ། །ཞེས་ཡང་དག་པར་མི་ཤེས་པ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོའི་འདུ་ཤེས་ཕྱིན་ཅི་ལོག་
ཏུ་མི་འགྱུར། སེམས་ཕྱིན་ཅི་ལོག་ཏུ་མི་འགྱུར། ལྟ་བ་ཕྱིན་ཅི་ལོག་ཏུ་མི་འགྱུར་རོ། །དེ་སྟེ་སེམས་གང་གིས་གང་ཡོངས་སུ་བསྔོ་བའི་སེམས་དེ་ལ་སེམས་དེ་ནི། འདི་ཡིན་ནོ། །ཞེས་ཡང་
དག་པར་ཤེས་ཤིང་སེམས་སུ་འདུ་ཤེས་པར་གྱུར་ན། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོའི་འདུ་ཤེས་ཕྱིན་ཅི་ལོག་པ་དང༌། སེམས་ཕྱིན་ཅི་ལོག་པ་དང༌། ལྟ་བ་ཕྱིན་
ཅི་ལོག་པར་འགྱུར་རོ། །གལ་ཏེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་གང་ཡོངས་སུ་བསྔོ་བའི་སེམས་དེ་ལ་འདི་ལྟར་ཡང་དག་པར་ཤེས་ཤིང་འདི་ལྟར་སེམས་
ཏེ༑ སེམས་དེ་ལ་སེམས་པ་ན། འདི་ལྟར་ཟད་པ་ལ་ཟད་པའོ། །ཞེས་དེ་ལྟར་ཡང་ཟད་པར་ཤེས་ལ་འགགས་པ་དང༌། བྲལ་བ་དང༌། རྣམ་པར་གྱུར་པ་ཡིན་ནོ། །ཞེས་དེ་ལྟར་ཤེས་ཏེ་གང་
ཟད་པ་དེའང་ཡོངས་སུ་བསྔོ་བར་མི་ནུས་ལ། སེམས་གང་གིས་ཡོངས་སུ་བསྔོ་བའི་སེམས་དེའི་ཆོས་ཉིད་ཀྱང་དེ་ཡིན། ཆོས་གང་དག་གིས་ཡོངས་སུ་བསྔོ་བའི་ཆོས་དེ་དག་གི་ཆོས་ཉིད་ཀྱང་
དེ་ཡིན༑ ཆོས་གང་དག་ཏུ་ཡོངས་སུ་བསྔོ་བའི་ཆོས་དེ་དག་གི་ཆོས་ཉིད་ཀྱང་དེ་ཡིན་ནོ། །ཞེས་གལ་ཏེ་དེ་ལྟར་ཡོངས་སུ་བསྔོ་ན། ཡང་དག་པར་ཡོངས་སུ་བསྔོ་བ་ཡིན་གྱི། ལོག་པར་ཡོངས་
སུ་བསྔོ་བ་མ་ཡིན་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་བསྔོ་བར་བྱའོ། །འཕགས་པ་རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་
པོས་འདས་པ་ཇི་ལྟ་བ་དེ་བཞིན་དུ་མ་བྱོན་པའི་སངས་རྒྱས་བཅོམ་ལྡན་འདས་ལམ་ཆད་པ། འཇུག་པ་ཆད་པ། སྤྲོས་པ་དང་སྲིད་པར་འདྲེན་པ། ཆད་པ། གཞལ་དུ་མེད་ཅིང་གྲངས་མེད་པ་
དེ་དག་གི་སེམས་དང་པོ་བསྐྱེད་པ་ནས་བཟུང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བའི་བར་དང༌། ཕུང་པོ་ལྷག་མ་མེད་
པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་བའི་བར་དང༌། དམ་པའི་ཆོས་ནུབ་པར་མི་འགྱུར་བའི་བར་ཏེ། དེ་དག་གི་བར་གྱི་སངས་རྒྱས་བཅོམ་
༄༅། །ལྡན་འདས་རྣམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་གང་ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གི་ཚུལ་ཁྲིམས་
ཀྱི་ཕུང་པོ་དང༌། ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་གང་ཡིན་པ་རྣམས་
དང༌། ཕན་པར་བཞེད་པ་གང་ཡིན་པ་དང༌། བྱམས་པ་ཆེན་པོ་གང་ཡིན་པ་དང༌། སྙིང་རྗེ་ཆེན་པོ་གང་ཡིན་པ་དང༌། སངས་རྒྱས་ཀྱི་ཡོན་ཏན་གཞལ་དུ་མེད་ཅིང་གྲངས་མེད་པ་གང་
ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གིས་ཆོས་གང་འཆད་པར་འགྱུར་བ་གང་ཡིན་པ་རྣམས་དང༌། ཆོས་དེ་ལ་སློབ་པར་འགྱུར་བ་གང་ཡིན་པ་རྣམས་དང༌།
ལྷག་པར་མོས་པར་འགྱུར་བ་རྣམས་དང༌། གནས་པར་འགྱུར་བ་དེ་དག་གི་དགེ་བའི་རྩ་བ་གང་ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་
དཔའ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་བ་དེ་དག་གི་ཕ་རོལ་ཏུ་ཕྱིན་པ་དྲུག་དང་ལྡན་པའི་དགེ་བའི་རྩ་བ་གང་ཡིན་པ་རྣམས་དང༌།
སངས་རྒྱས་བཅོམ་ལྡན་འདས་དེ་དག་གིས་གང་ཟག་རང་སངས་རྒྱས་ཀྱི་ཐེག་པ་ཅན་དག་རང་སངས་རྒྱས་ཀྱི་བྱང་ཆུབ་ལ་ལུང་སྟོན་པར་འགྱུར་བ་དེ་དག་གི་དགེ་བའི་རྩ་བ་གང་
ཡིན་པ་རྣམས་དང༌། གང་ཟག་ཉན་ཐོས་ཀྱི་ཐེག་པ་ཅན་རྣམས་ཀྱི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང༌། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་
དང༌། བསྒོམས་པ་ལས་བྱུང་བའི་བསོད་ནམས་བྱ་བའི་དངོས་པོ་གང་ཡིན་པ་རྣམས་དང༌། སློབ་པའི་ཟག་པ་མེད་པའི་དགེ་བའི་རྩ་བ་གང་ཡིན་པ་རྣམས་དང༌། མི་སློབ་པའི་ཟག་པ་མེད་པའི་
དགེ་བའི་རྩ་བ་གང་ཡིན་པ་རྣམས་དང༌། ཆོས་དེ་ལ་སོ་སོའི་སྐྱེ་བོ་གང་དག་གིས་དགེ་བའི་རྩ་བ་བསྐྲུན་པར་འགྱུར་བ་དང༌། གང་ཡང་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་
དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་གང་དག་གིས་ཆོས་དེ་ཐོས་པར་འགྱུར་བ་དང༌། ཐོས་ནས་ཀྱང་དགེ་བའི་རྩ་བ་བསྐྲུན་པར་འགྱུར་བ་
དང༌། གང་ཡང་བྱོལ་སོང་གི་སྐྱེ་གནས་སུ་སོང་བའི་སེམས་ཅན་གང་དག་གིས་ཀྱང་ཆོས་དེ་ཐོས་པར་འགྱུར་བ་དང༌། ཐོས་ནས་ཀྱང་དགེ་བའི་རྩ་བ་དག་བསྐྲུན་པར་འགྱུར་བ་དང༌། སེམས་
ཅན་གང་དག་གིས་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བ་དང༌། ཡོངས་སུ་མྱ་ངན་ལས་འདས་པ་དེ་དག་ལ་དགེ་བའི་རྩ་བ་བསྐྲུན་པར་འགྱུར་བ་དེ་དག་ཐམས་ཅད་
ཀྱི་དགེ་བའི་རྩ་བ་གང་དག་ཡིན་པ་དེ་དག་ཐམས་ཅད་གཅིག་ཏུ་བསྡུས་ཏེ་བསྡོམས་ཤིང་གཞལ་ནས་མ་ལུས་པར་བྱས་ཏེ་རྗེས་སུ་ཡི་རང་བར་བྱ་བ་མ་ལུས་པ་ལ་རྗེས་སུ་ཡི་རང་ནས་རྗེས་
༄༅། །སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་པའི་བྱང་ཆུབ་སེམས་དཔའ་
སེམས་དཔའ་ཆེན་པོ་ཇི་ལྟར་འདུ་ཤེས་ཕྱིན་ཅི་ལོག་ཏུ་མི་འགྱུར། སེམས་ཕྱིན་ཅི་ལོག་ཏུ་མི་འགྱུར། ལྟ་བ་ཕྱིན་ཅི་ལོག་ཏུ་མི་འགྱུར་ཞེ་ན། གལ་ཏེ་བྱང་ཆུབ་སེམས་དཔའ་སེམས་དཔའ་
ཆེན་པོ་དེ་སེམས་གང་གིས་གང་ཡོངས་སུ་བསྔོ་བའི་སེམས་དེ་ལ་སེམས་སུ་འདུ་ཤེས་པར་མི་འགྱུར་ན། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོས་རྗེས་སུ་ཡི་རང་བ་
དང་ལྡན་པའི་བསོད་ནམས་བྱ་བའི་དངོས་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་ཡིན་ནོ། །ཇི་ལྟར་སེམས་དེ་ལ་སེམས་དེ་འདི་ཡིན་ནོ། །ཞེས་ཡང་
དག་པར་མི་ཤེས་པ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་འདུ་ཤེས་ཕྱིན་ཅི་ལོག་པར་མི་འགྱུར། སེམས་ཕྱིན་ཅི་ལོག་པར་མི་འགྱུར། ལྟ་བ་ཕྱིན་ཅི་ལོག་པར་མི་
འགྱུར་རོ། །དེ་སྟེ་སེམས་གང་གིས་གང་ཡོངས་སུ་བསྔོ་བའི་སེམས་དེ་ལ་སེམས་དེ་ནི། འདི་ཡིན་ནོ། །ཞེས་ཡང་དག་པར་ཤེས་ཤིང་སེམས་སུ་འདུ་ཤེས་པར་གྱུར་ན། དེ་ལྟར་ན།
བྱང་ཆུབ་སེམས་དཔའ་སེམས་དཔའ་ཆེན་པོའི་འདུ་ཤེས་ཕྱིན་ཅི་ལོག་པ་དང༌། སེམས་ཕྱིན་ཅི་ལོག་པ་དང༌། ལྟ་བ་ཕྱིན་ཅི་ལོག་པར་འགྱུར་རོ། །གལ་ཏེ་བྱང་ཆུབ་སེམས་དཔའ་སེམས་
དཔའ་ཆེན་པོ་སེམས་གང་ཡོངས་སུ་བསྔོ་བའི་སེམས་དེ་ལ་འདི་ལྟར་ཤེས་ཤིང་འདི་ལྟར་སེམས་ཏེ། སེམས་དེ་ལ་སེམས་པ་ན། དེ་ལྟར་ཟད་པ་ལ་ཟད་པའོ། །ཞེས་དེ་ལྟར་ཡང་དག་པར་ཤེས་
ཤིང་འགགས་པ་དང༌། བྲལ་བ་དང༌། རྣམ་པར་གྱུར་པ་ཡིན་ནོ། །ཞེས་དེ་ལྟར་ཤེས་ཏེ་གང་ཟད་པ་དེ་ཡང་ཡོངས་སུ་བསྔོ་བར་མི་ནུས། སེམས་གང་གིས་ཡོངས་སུ་བསྔོ་བའི་སེམས་དེའི་ཆོས་ཉིད་
ཀྱང་དེ་ཡིན། ཆོས་གང་དག་གིས་ཡོངས་སུ་བསྔོ་བའི་ཆོས་དེ་དག་གི་ཆོས་ཉིད་ཀྱང་དེ་ཡིན། ཆོས་གང་དག་ཏུ་ཡོངས་སུ་བསྔོ་བའི་ཆོས་དེ་དག་གི་ཆོས་ཉིད་ཀྱང་དེ་ཡིན་ནོ། །ཞེས་གལ་
ཏེ་དེ་ལྟར་ཡོངས་སུ་བསྔོ་ན་ཡང་དག་པར་ཡོངས་སུ་བསྔོ་བ་ཡིན་གྱི། ལོག་པར་ཡོངས་སུ་བསྔོ་བ་མ་ཡིན་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་བསྔོ་བར་
བྱའོ༑ ༑འཕགས་པ་རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཞལ་དུ་མེད་ཅིང་གྲངས་མེད་པ་རྣམས་ན་ད་
ལྟར་བྱུང་བའི་སངས་རྒྱས་བཅོམ་ལྡན་འདས་ལམ་ཆད་པ། འཇུག་པ་ཆད་པ། སྤྲོས་པ་དང་སྲིད་པར་འདྲེན་པ་ཆད་པ། གཞལ་དུ་མེད་ཅིང་གྲངས་མེད་པ་བཞུགས་ཏེ་འཚོ་ཞིང་གཞེས་པ་རྣམས་
ཀྱི་སེམས་དང་པོ་བསྐྱེད་པ་ནས་བཟུང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་བར་དང༌། ཕུང་པོ་ལྷག་མ་མེད་པའི་མྱ་ངན་
༄༅། །ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བའི་བར་དང༌། དམ་པའི་ཆོས་མ་ནུབ་པའི་བར་ཏེ། དེ་དག་གི་བར་གྱི་སངས་རྒྱས་བཅོམ་ལྡན་
འདས་དེ་རྣམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་གང་ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གི་ཚུལ་ཁྲིམས་ཀྱི་ཕུང་པོ་དང༌། ཏིང་ངེ་འཛིན་
གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་གང་ཡིན་པ་རྣམས་དང༌། ཕན་པར་བཞེད་པ་
གང་ཡིན་པ་དང༌། བྱམས་པ་ཆེན་པོ་གང་ཡིན་པ་དང༌། སྙིང་རྗེ་ཆེན་པོ་གང་ཡིན་པ་དང༌། སངས་རྒྱས་ཀྱི་ཡོན་ཏན་གཞལ་དུ་མེད་ཅིང་གྲངས་མེད་པ་གང་ཡིན་པ་རྣམས་དང༌།
སངས་རྒྱས་བཅོམ་ལྡན་འདས་དེ་དག་གིས་ཆོས་གང་བཤད་པ་དང༌། ཆོས་དེ་ལ་གང་གིས་བསླབས་པ་དང༌། ལྷག་པར་མོས་པ་དང༌། གནས་པ་དེ་དག་གི་དགེ་བའི་རྩ་བ་གང་
ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
ལུང་སྟོན་པ་དེ་དག་གི་ཕ་རོལ་ཏུ་ཕྱིན་པ་དྲུག་དང་ལྡན་པའི་དགེ་བའི་རྩ་བ་གང་ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གིས་གང་ཟག་རང་སངས་རྒྱས་ཀྱི་
ཐེག་པ་ཅན་དག་རང་སངས་རྒྱས་ཀྱི་བྱང་ཆུབ་ལ་ལུང་སྟོན་པ་དེ་དག་གི་དགེ་བའི་རྩ་བ་གང་ཡིན་པ་རྣམས་དང༌། གང་ཟག་ཉན་ཐོས་ཀྱི་ཐེག་པ་ཅན་རྣམས་ཀྱི་སྦྱིན་པ་ལས་བྱུང་བའི་བསོད་
ནམས་བྱ་བའི་དངོས་པོ་དང༌། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་དང༌། བསྒོམས་པ་ལས་བྱུང་བའི་བསོད་ནམས་བྱ་བའི་དངོས་པོ་གང་ཡིན་པ་རྣམས་དང༌། སློབ་པའི་ཟག་
པ་མེད་པའི་དགེ་བའི་རྩ་བ་གང་ཡིན་པ་རྣམས་དང༌། མི་སློབ་པའི་ཟག་པ་མེད་པའི་དགེ་བའི་རྩ་བ་གང་ཡིན་པ་རྣམས་དང༌། ཆོས་དེ་ལ་སོ་སོའི་སྐྱེ་བོ་གང་དག་གིས་དགེ་བའི་རྩ་བ་བསྐྲུན་པ་
དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་གང་དག་གིས་ཆོས་དེ་ཐོས་ཏེ་ཐོས་ནས་
ཀྱང་དགེ་བའི་རྩ་བ་བསྐྲུན་པ་དང༌། བྱོལ་སོང་གི་སྐྱེ་གནས་སུ་སོང་བའི་སེམས་ཅན་གང་དག་གིས་ཆོས་དེ་ཐོས་ཏེ་ཐོས་ནས་ཀྱང་དགེ་བའི་རྩ་བ་བསྐྲུན་པ་དང༌། གང་དག་གིས་སངས་རྒྱས་
བཅོམ་ལྡན་འདས་དེ་དག་ཡོངས་སུ་མྱ་ངན་ལས་འདའ་བ་དང༌། ཡོངས་སུ་མྱ་ངན་ལས་འདས་པ་ལ་དགེ་བའི་རྩ་བ་བསྐྲུན་པ་གང་ཡིན་པ་དེ་དག་ཐམས་ཅད་ཀྱི་དགེ་བའི་རྩ་བ་གང་
ཡིན་པ་དེ་དག་ཐམས་ཅད་གཅིག་ཏུ་བསྡུས་ཏེ་བསྡོམས་ཤིང་གཞལ་ནས་མ་ལུས་པར་བྱས་ཏེ་རྗེས་སུ་ཡི་རང་བར་བྱ་བ་མ་ལུས་པ་ལ་རྗེས་སུ་ཡི་རང་ནས་རྗེས་སུ་ཡི་རང་བ་དང་ལྡན་
༄༅། །པའི་བསོད་ནམས་བྱ་བའི་དངོས་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་པའི་བྱང་ཆུབ་སེམས་དཔའ་སེམས་དཔའ་ཆེན་
པོ་ཇི་ལྟར་འདུ་ཤེས་ཕྱིན་ཅི་ལོག་ཏུ་མི་འགྱུར། སེམས་ཕྱིན་ཅི་ལོག་ཏུ་མི་འགྱུར། ལྟ་བ་ཕྱིན་ཅི་ལོག་ཏུ་མི་འགྱུར་ཞེ་ན། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་
དེ་སེམས་གང་གིས་གང་ཡོངས་སུ་བསྔོ་བའི་སེམས་དེ་ལ་སེམས་སུ་འདུ་ཤེས་པར་མི་འགྱུར་ན། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་རྗེས་སུ་ཡི་རང་བ་དང་
ལྡན་པའི་བསོད་ནམས་བྱ་བའི་དངོས་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་ཡིན་ནོ། །ཇི་ལྟར་སེམས་དེ་ལ་སེམས་དེ་ནི། འདི་ཡིན་ནོ། །ཞེས་
ཡང་དག་པར་མི་ཤེས་པ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་འདུ་ཤེས་ཕྱིན་ཅི་ལོག་པར་མི་འགྱུར། སེམས་ཕྱིན་ཅི་ལོག་པར་མི་འགྱུར། ལྟ་བ་ཕྱིན་ཅི་ལོག་
པར་མི་འགྱུར་རོ། །དེ་སྟེ་སེམས་གང་གིས་གང་ཡོངས་སུ་བསྔོ་བའི་སེམས་དེ་ལ་སེམས་དེ་ནི། འདི་ཡིན་ནོ། །ཞེས་ཡང་དག་པར་ཤེས་ཤིང་སེམས་སུ་འདུ་ཤེས་པར་རྒྱུར་ན།
དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོའི་འདུ་ཤེས་ཕྱིན་ཅི་ལོག་པ་དང༌། སེམས་ཕྱིན་ཅི་ལོག་པ་དང༌། ལྟ་བ་ཕྱིན་ཅི་ལོག་པར་འགྱུར་རོ། །ཡང་གལ་ཏེ་
བྱང་ཆུབ་སེམས་དཔའ་སེམས་དཔའ་ཆེན་པོ་སེམས་གང་ཡོངས་སུ་བསྔོ་བའི་སེམས་དེ་ལ་འདི་ལྟར་ཤེས་ཤིང་འདི་ལྟར་སེམས་ཏེ། སེམས་དེ་ལ་སེམས་པ་ན་དེ་ལྟར་ཟད་པ་ལ་ཟད་
པའོ༑ ༑ཞེས་དེ་ལྟར་ཡང་དག་པར་ཤེས་ཤིང༌། འགགས་པ་དང༌། བྲལ་བ་དང༌། རྣམ་པར་གྱུར་པ་ཡིན་ནོ། །ཞེས་དེ་ལྟར་ཤེས་ཏེ་གང་ཟད་པ་དེའང་ཡོངས་སུ་བསྔོ་བར་མི་ནུས། སེམས་
གང་གིས་ཡོངས་སུ་བསྔོ་བའི་སེམས་དེའི་ཆོས་ཉིད་ཀྱང་དེ་ཡིན། ཆོས་གང་དག་གིས་ཡོངས་སུ་བསྔོ་བའི་ཆོས་དེ་དག་གི་ཆོས་ཉིད་ཀྱང་དེ་ཡིན། ཆོས་གང་དག་ཏུ་ཡོངས་སུ་བསྔོ་བའི་
ཆོས་དེ་དག་གི་ཆོས་ཉིད་ཀྱང་དེ་ཡིན་ནོ། །ཞེས་གལ་ཏེ་དེ་ལྟར་ཡོངས་སུ་བསྔོ་ན། ཡང་དག་པར་ཡོངས་སུ་བསྔོ་བ་ཡིན་གྱི། ལོག་པར་ཡོངས་སུ་བསྔོ་བ་མ་ཡིན་ཏེ། དེ་ལྟར་བྱང་
ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་བསྔོ་བར་བྱའོ། །འཕགས་པ་རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་འདས་པ་དང༌། མ་བྱོན་
པ་དང༌། ད་ལྟར་གྱི་སངས་རྒྱས་བཅོམ་ལྡན་འདས་ལམ་ཆད་པ། འཇུག་པ་ཆད་པ། སྤྲོས་པ་དང་སྲིད་པར་འདྲེན་པ་ཆད་པ། གཞལ་དུ་མེད་ཅིང་གྲངས་མེད་པ་དག་གི་སེམས་དང་པོ་
བསྐྱེད་པ་ནས་བཟུང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང༌། མངོན་པར་རྫོགས་པར་འཚང་རྒྱ་བར་འགྱུར་བ་དང༌། མངོན་
༄༅། །པར་རྫོགས་པར་འཚང་རྒྱ་བའི་བར་དང༌། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དང༌། ཡོངས་སུ་མྱ་ངན་ལས་འདའ་
བར་འགྱུར་བ་དང༌། ཡོངས་སུ་མྱ་ངན་ལས་འདའ་བའི་བར་དང༌། དམ་པའི་ཆོས་མ་ནུབ་པ་དང༌། ནུབ་པར་མི་འགྱུར་བ་དང༌། ནུབ་པར་མ་གྱུར་པའི་བར་ཏེ། དེ་དག་གི་བར་གྱི་སངས་རྒྱས་
བཅོམ་ལྡན་འདས་དེ་རྣམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་དགེ་བའི་རྩ་བ་གང་ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གི་ཚུལ་ཁྲིམས་ཀྱི་ཕུང་པོ་དང༌། ཏིང་ངེ་
འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་གང་ཡིན་པ་རྣམས་དང༌། ཕན་པར་བཞེད་
པ་གང་ཡིན་པ་དང༌། བྱམས་པ་ཆེན་པོ་གང་ཡིན་པ་དང༌། སྙིང་རྗེ་ཆེན་པོ་གང་ཡིན་པ་དང༌། སངས་རྒྱས་ཀྱི་ཡོན་ཏན་གཞལ་དུ་མེད་ཅིང་གྲངས་མེད་པ་གང་ཡིན་པ་རྣམས་དང༌། སངས་
རྒྱས་བཅོམ་ལྡན་འདས་དེ་དག་གིས་ཆོས་གང་བཤད་པ་དང༌། འཆད་པར་འགྱུར་བ་དང༌། འཆད་པ་དང༌། ཆོས་དེ་དག་ལ་གང་གིས་བསླབས་པ་དང༌། སློབ་པར་འགྱུར་བ་དང༌། སློབ་
པ་དང༌། མོས་པ་དང༌། མོས་པར་འགྱུར་བ་དང༌། མོས་པར་བྱེད་པ་དང༌། གནས་པ་དང༌། གནས་པར་འགྱུར་བ་དང༌། གནས་པར་བྱེད་པ་དེ་དག་གི་དགེ་བའི་རྩ་བ་གང་ཡིན་པ་རྣམས་དང༌།
སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དང༌། ལུང་སྟོན་པར་འགྱུར་
བ་དང༌། ལུང་སྟོན་པ་དེ་དག་ཐམས་ཅད་ཀྱི་དགེ་བའི་རྩ་བ་གང་ཡིན་པ་རྣམས་དང༌། སངས་རྒྱས་བཅོམ་ལྡན་འདས་དེ་དག་གིས་གང་ཟག་རང་སངས་རྒྱས་ཀྱི་ཐེག་པ་ཅན་གང་དག་རང་བྱང་ཆུབ་ལ་
ལུང་བསྟན་པ་དང༌། ལུང་སྟོན་པར་འགྱུར་བ་དང༌། ལུང་སྟོན་པ་དེ་དག་ཐམས་ཅད་ཀྱི་དགེ་བའི་རྩ་བ་གང་ཡིན་པ་རྣམས་དང༌། གང་ཟག་ཉན་ཐོས་ཀྱི་ཐེག་པ་ཅན་རྣམས་ཀྱི་སྦྱིན་པ་ལས་བྱུང་
བའི་དགེ་བའི་རྩ་བ་གང་ཡིན་པ་རྣམས་དང༌། ཚུལ་ཁྲིམས་ལས་བྱུང་བའི་དགེ་བའི་རྩ་བ་གང་ཡིན་པ་རྣམས་དང༌། བསྒོམས་པ་ལས་བྱུང་བའི་དགེ་བའི་རྩ་བ་གང་ཡིན་པ་རྣམས་དང༌། སློབ་
པའི་ཟག་པ་མེད་པའི་དགེ་བའི་རྩ་བ་གང་ཡིན་པ་རྣམས་དང༌། མི་སློབ་པའི་ཟག་པ་མེད་པའི་དགེ་བའི་རྩ་བ་གང་ཡིན་པ་རྣམས་དང༌། ཆོས་དེ་ལ་སོ་སོའི་སྐྱེ་བོ་གང་དག་གིས་དགེ་བའི་
རྩ་བ་བསྐྲུན་པ་དང༌། བསྐྲུན་པར་འགྱུར་བ་དང༌། བསྐྲུན་པ་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་
པོ་དང༌། མི་དང༌། མི་མ་ཡིན་པ་གང་དག་གིས་ཀྱང་ཆོས་དེ་ཐོས་པར་གྱུར་པ་དང༌། ཐོས་པར་འགྱུར་བ་དང༌། ཐོས་པ་དང༌། ཐོས་ནས་ཀྱང་དགེ་བའི་རྩ་བ་བསྐྱེད་པ་དང༌། བསྐྱེད་
༄༅། །པར་འགྱུར་བ་དང༌། སྐྱེད་པ་དང༌། བྱོལ་སོང་གི་སྐྱེ་གནས་སུ་སྐྱེས་པའི་སེམས་ཅན་གང་དག་གིས་དམ་པའི་ཆོས་དེ་ཐོས་པར་གྱུར་པ་དང༌། ཐོས་པར་
འགྱུར་བ་དང༌། ཐོས་པ་དང༌། ཐོས་ནས་ཀྱང་དགེ་བའི་རྩ་བ་བསྐྲུན་པ་དང༌། སྐྲུན་པར་འགྱུར་བ་དང༌། སྐྲུན་པ་དང༌། སེམས་ཅན་གང་དག་གིས་སངས་རྒྱས་བཅོམ་ལྡན་འདས་
དེ་དག་ཡོངས་སུ་མྱ་ངན་ལས་འདས་པ་དང༌། ཡོངས་སུ་མྱ་ངན་ལས་འདའ་བར་འགྱུར་བ་དང༌། ཡོངས་སུ་མྱ་ངན་ལས་འདའ་བ་ལ་དགེ་བའི་རྩ་བ་བསྐྲུན་པ་དང༌། སྐྲུན་པར་
འགྱུར་བ་དང༌། སྐྲུན་པ་དེ་རྣམས་ཐམས་ཅད་ཀྱི་དགེ་བའི་རྩ་བ་གང་ཡིན་པ་དེ་དག་ཐམས་ཅད་གཅིག་ཏུ་བསྡུས་ཏེ་བསྡོམས་ཤིང་གཞལ་ནས་མ་ལུས་པར་བྱས་ཏེ་རྗེས་སུ་
ཡི་རང་བར་བྱ་བ་མ་ལུས་པ་ལ་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བ་དང༌། དམ་པ་དང༌། གཙོ་བོ་དང༌། རབ་དང༌། མཆོག་རབ་དང༌། གྱ་ནོམ་པ་དང༌། བླ་མ་དང༌།
བླ་ན་མེད་པ་དང༌། གོང་ན་མེད་པ་དང༌། མཉམ་པ་མེད་པ་དང༌། མི་མཉམ་པ་དང༌། མཉམ་པའི་རྗེས་སུ་ཡི་རང་བས་རྗེས་སུ་ཡི་རང་ལ། དེ་ལྟར་རྗེས་སུ་ཡི་རང་ནས་རྗེས་
སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །ཞེས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཡོངས་སུ་སྒྲུབ་པར་གྱུར་ཅིག་སྙམ་པས་ངག་ཏུ་རྗོད་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཇི་ལྟར་འདུ་ཤེས་ཕྱིན་ཅི་ལོག་ཏུ་མི་འགྱུར། སེམས་ཕྱིན་ཅི་
ལོག་ཏུ་མི་འགྱུར། ལྟ་བ་ཕྱིན་ཅི་ལོག་ཏུ་མི་འགྱུར་ཞེ་ན། གལ་ཏེ་ཡོངས་སུ་བསྔོ་བར་བྱེད་པ་འདི་སྙམ་དུ། ཆོས་དེ་དག་ནི། ཟད་པ། འགགས་པ། བྲལ་བ། རྣམ་པར་གྱུར་པ་ཡིན་
པས་གང་དུ་ཆོས་དེ་ཟད་པར་མི་འགྱུར་བར་ཡོངས་སུ་བསྔོ་བར་བྱའོ། །ཞེས་སེམས་པ་དེ་ལྟ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་ཡིན་ནོ། །གལ་
ཏེ་ཡང་འདི་ལྟར་ཆོས་ཀྱིས་ནི། ཆོས་ཡོངས་སུ་མི་བསྔོའོ། །སྙམ་དུ་ཉེ་བར་རྟོག་པ་དེ་ལྟ་ནའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་ཡིན་ཏེ། བཙུན་
པ་རབ་འབྱོར། དེ་ལྟར་ཡོངས་སུ་བསྔོ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། འདུ་ཤེས་ཕྱིན་ཅི་ལོག་ཏུ་མི་འགྱུར། སེམས་ཕྱིན་ཅི་ལོག་ཏུ་མི་འགྱུར། ལྟ་བ་ཕྱིན་ཅི་
ལོག་ཏུ་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་ནི། ཡོངས་སུ་བསྔོ་བ་དེ་ལ་མངོན་པར་ཞེན་པ་མེད་དོ། །གལ་ཏེ་ཡང་འདི་སྙམ་དུ་སེམས་ཀྱིས་སེམས་མི་ཤེས་ཤིང་ཆོས་ཀྱིས་
ཆོས་མི་ཤེས་སོ། །ཞེས་ཡང་དག་པར་ཤེས་པ་དེ་ལྟ་ནའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་ཡིན་ཏེ། འདི་ནི། བྱང་ཆུབ་སེམས་དཔའ་
༄༅། །སེམས་དཔའ་ཆེན་པོའི་ཡོངས་སུ་བསྔོ་བ་བླ་ན་མེད་པའོ། །གལ་ཏེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བསོད་ནམས་མངོན་པར་
འདུ་བྱེད་པ་དེ་ཤེས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར། དེ་ནི། ཡོངས་སུ་བསྔོ་བ་དེ་ལ་མངོན་
པར་ཞེན་པའི་ཕྱིར་རོ། །གལ་ཏེ་ཡང་དེ་འདི་སྙམ་དུ། བསོད་ནམས་མངོན་པར་འདུ་བྱེད་པ་དེའང་དབེན་པ་ཞི་བའོ། །ཞེས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་
དངོས་པོ་གང་ཡིན་པ་དེའང་དབེན་པ་ཞི་བའོ། །ཞེས་སེམས་པ་དེ་ལྟར་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་ཡིན་ནོ། །གལ་ཏེ་དེ་འདུ་བྱེད་
ཐམས་ཅད་ནི། དབེན་པའོ། །ཞི་བའོ། །སྙམ་དུ་དེ་ལྟར་ཡང་མི་ཤེས་པ་དེ་ལྟར་ན། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་དེའི་ཤེས་རབ་ཀྱི་ཕ་རོལ་ཏུ་ཕྱིན་
པ་ཡིན་ནོ། །གང་ཡང་སངས་རྒྱས་བཅོམ་ལྡན་འདས་།ཡོངས་སུ་མྱ་ངན་ལས་འདས་པ་དེ་དག་གི་དགེ་བའི་རྩ་བ་དེ་ཅི་འདྲ་བ་ལྟར་ཡོངས་སུ་བསྔོ་བ་དེ་དང་དེའི་དགེ་བའི་རྩ་བའང་
དེ་འདྲ་བ་ཉིད་དེ། གང་གིས་དེ་ཡོངས་སུ་བསྔོས་པ་དེའང་དེའི་རིགས་ཅན། དེའི་མཚན་ཉིད་ཅན། དེའི་རིས་སུ་གཏོགས་པ། དེའི་རང་བཞིན་ཅན་ཡིན་པར། གལ་ཏེ་དེ་ལྟར་ཤེས་
ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་མ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་རྣམས་ནི། མཚན་མའི་ཚུལ་གྱིས་ཡོངས་སུ་
བསྔོ་བ་གནང་བར་མི་མཛད་དོ། །གང་འདས་པ་དེ་ནི། ཟད་པ་འགགས་པ་བྲལ་བ་རྣམ་པར་གྱུར་པའོ། །གང་མ་འོངས་པ་དེའང་མ་ཐོབ་པའོ། །ད་ལྟར་བྱུང་བ་དེ་ལ་ནི། གནས་པ་
མི་དམིགས་ལ། གང་མི་དམིགས་པ་དེ་ནི། མཚན་མ་མ་ཡིན་ཞིང་ཡུལ་མ་ཡིན་པར་གལ་ཏེ་དེ་ལྟར་མཚན་མར་བྱེད་ཅིང་མི་སེམས་ན། བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ཡོངས་སུ་བསྔོས་པ་མ་ཡིན་ནོ། །དེ་སྟེ་དྲན་པ་དང་བྲལ་བས་མཚན་མར་མི་བྱེད་ཅིང་མི་སེམས་པ་དང༌། དྲན་པ་དང་བྲལ་བའམ་ཁོང་དུ་མ་ཆུད་པས་ཡིད་ལ་མི་བྱེད་ན། དེ་
ལྟ་ནའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་མ་ཡིན་ནོ། །དེ་སྟེ་མཚན་མ་དེ་ལ་སེམས་ཤིང་མཚན་མར་མི་བྱེད་ན། དེ་ལྟར་ན་བྱང་ཆུབ་སེམས་
དཔའ་སེམས་དཔའ་ཆེན་པོས་དགེ་བའི་རྩ་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་ཡིན་ནོ། །འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་
པོས་འདི་ལ་བསླབ་པར་བྱ་སྟེ། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་དེའི་ཐབས་མཁས་པར་རིག་པར་བྱའོ། །གང་ཐབས་མཁས་པ་འདིས་དགེ་བའི་རྩ་བ་ཡོངས་སུ་
༄༅། །བསྔོ་བ་འདི་ནི། ཐམས་ཅད་མཁྱེན་པ་ཉིད་ལ་ཉེ་བ་ཡིན་ནོ། །ཐབས་མཁས་པ་འདི་ལ་སློབ་པར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་རྒྱུན་མི་ཆད་པར་མཉན་པར་བྱ། གཟུང་བར་བྱ། བཅང་བར་བྱ། བཀླག་པར་བྱ། ཀུན་ཆུབ་པར་བྱ། རབ་ཏུ་གདོན་པར་བྱ། བསྟན་པར་བྱ།
ཉེ་བར་བསྟན་པར་བྱ། ལུང་དབོག་པར་བྱ། ཁ་ཏོན་དུ་བྱ། ཡོངས་སུ་དྲི་བར་བྱའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མ་བརྟེན་པར་ཐོས་པ་དང་མི་ལྡན་པས་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡོངས་སུ་བསྔོ་བའི་བྱ་བ་འདི་ལ་འཇུག་མི་ནུས་སོ། །དེ་ལ་གང་འདི་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མ་བརྟེན་ཀྱང་བསོད་ནམས་
བྱ་བའི་དངོས་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བར་ནུས་སོ། །ཞེས་ཟེར་ན། དེ་ལ་དེ་སྐད་མ་ཟེར་ཅིག །ཅེས་བརྗོད་པར་བྱ་བ་ཡིན་ནོ། །དེ་ཅིའི་ཕྱིར་ཞེ་
ན༑ བདག་གི་དངོས་པོ་དེ་དག་འགགས་པ་དང༌། འདུ་བྱེད་དེ་དག་ཀྱང་འགགས་པ་སྟེ། ཞི་བ། དབེན་པ། དམིགས་པ་དང་བྲལ་བ་ཡིན་ནོ། །འོན་ཀྱང་གང་ཟག་དེ་ནི། ཡང་དག་པ་ཇི་
ལྟ་བ་ཉིད་ལ་མཚན་མར་བྱས་ཤིང་རྣམ་པར་བརྟགས་ནས་ཡང་དག་པ་ཇི་ལྟ་བ་བཞིན་མ་ཡིན་པ་ལ་ཡང་དག་པ་ཇི་ལྟ་བར་འདུ་ཤེས་པས་དམིགས་པ་ལ་མི་དམིགས་པར་
ཡོངས་སུ་བསྔོ་བར་བྱེད་པ་ཡིན་ཏེ། དེའི་དགེ་བའི་རྩ་བ་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་ནི། སངས་རྒྱས་བཅོམ་ལྡན་འདས་རྣམས་ཀྱིས་གནང་
བར་མི་མཛད་དོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་རྣམས་ཀྱི་ཡོངས་སུ་མྱ་ངན་ལས་འདས་པ་ལ་མཚན་མར་བྱེད་ཅིང་རྣམ་པར་རྟོག་པ་དང༌། མྱ་ངན་ལས་འདས་པ་ལ་རྣམ་
པར་དམིགས་པ་གང་ཡིན་པ་དེ་ཉིད་དེའི་དམིགས་པ་ཆེན་པོ་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི། དམིགས་པའི་འདུ་ཤེས་ཅན་གྱི་
ཡོངས་སུ་བསྔོ་བ་དོན་ཆེན་པོ་བྱེད་པའོ། །ཞེས་མི་གསུང་ངོ༌། །དེ་ཅིའི་ཕྱིར་ཞེ་ན། ཡོངས་སུ་བསྔོ་བ་དེ་ནི། དུག་དང་བཅས་ཤིང༌། ཟུག་རྔུ་དང་བཅས་པ་ཡིན་ནོ། །འདི་ལྟ་སྟེ། དཔེར་ན། ཁ་
ཟས་བཟང་པོ་དུག་ཅན་ཞིག་ཡོད་ལ་དེ་བཞིན་དུ་དེའི་ཁ་དོག་དང༌། དྲི་དང༌། རོ་དང༌། རེག་པའི་སྒོ་ནས་འདོད་པར་བྱ་བའང་ཡིན་མོད་ཀྱི། འོན་ཀྱང་དུག་དང་བཅས་པ་ཡིན་པས་ན། མཁས་པ་
རྣམས་ཀྱིས་ཡོངས་སུ་སྤང་བར་བྱ་བ་ཡིན་གྱི། ཡོངས་སུ་ལོངས་སྤྱད་པར་བྱ་བ་མ་ཡིན་ནོ། །དེ་ཉིད་སྐྱེས་བུ་བྱིས་པའི་རང་བཞིན་ཅན་ཤེས་རབ་འཆལ་བའི་རང་བཞིན་ཅན་གྱིས་ཡོངས་སུ་
ལོངས་སྤྱད་པར་བསམས་ཏེ། དེས་ཟས་དེ་ཟ་བ་ན་དེའི་ཁ་དོག་དང༌། དྲི་དང༌། རོ་དང༌། རེག་པའི་སྒོ་ནས་མྱངས་པ་ན་བདེ་བར་བྱེད་ལ་ཞུ་བའི་ཚེ་དེ་ལ་རྣམ་པར་སྨིན་པ་སྡུག་བསྔལ་བར་འགྱུར་
༄༅། །ཏེ༑ དེ་དེའི་གཞི་ལས་ཤི་བའམ་ཤི་བ་ཙམ་གྱི་སྡུག་བསྔལ་དུ་འགྱུར་རོ། །འཕགས་པ་རབ་འབྱོར། དེ་བཞིན་དུ་འདི་ལ་ཁ་ཅིག་ལོག་པར་ཟིན་ཅིང་ལོག་པར་རིག་པ་དང༌།
ལོག་པར་ཁ་ཏོན་བྱས་པས་ལེགས་པར་སྨྲས་པའི་དོན་མ་ཤེས་ཤིང་དོན་ཡང་དག་པ་ཇི་ལྟ་བ་བཞིན་དུ་ཁོང་དུ་མ་ཆུད་པ་དག་འདི་སྐད་དུ་རིགས་ཀྱི་བུ། ཁྱོད་ཚུར་ཤེག །འཇིག་རྟེན་ཐམས་
ཅད་ཀྱི་འཇིག་རྟེན་གྱི་ཁམས་གཞལ་དུ་མེད་ཅིང་གྲངས་མེད་པའི་སངས་རྒྱས་བཅོམ་ལྡན་འདས་འདས་པ་དང༌། མ་འོངས་པ་དང༌། ད་ལྟར་བྱུང་བ་རྣམས་ཀྱི་ཐུགས་དང་པོ་བསྐྱེད་པ་ནས་
ཉེ་བར་བཟུང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང༌། རྒྱ་བར་འགྱུར་བ་དང༌། རྒྱ་བའི་བར་དང༌། ཕུང་པོའི་ལྷག་མ་མེད་པའི་
མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དང༌། འདའ་བར་འགྱུར་བ་དང༌། འདའ་བའི་བར་དང༌། དམ་པའི་ཆོས་ནུབ་པར་མ་གྱུར་པ་དང༌། ནུབ་པར་མི་འགྱུར་
བ་དང༌། མ་ནུབ་པའི་བར་ཏེ། བར་དེའི་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང༌། དེ་དག་གི་ཉན་ཐོས་རྣམས་ཀྱི་ཚུལ་ཁྲིམས་ཀྱི་
ཕུང་པོ་དང༌། ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་གང་ཡིན་པ་རྣམས་དང༌།
སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དང༌། ལུང་སྟོན་པར་འགྱུར་བ་
དང༌། ལུང་སྟོན་པ་དེ་དག་གིས་དགེ་བའི་རྩ་བ་བསྐྲུན་པ་དང༌། སྐྲུན་པར་འགྱུར་བ་དང༌། སྐྲུན་པ་གང་ཡིན་པ་རྣམས་དང༌། གང་ཟག་རང་སངས་རྒྱས་ཀྱི་ཐེག་པ་ཅན་གང་དག་རང་བྱང་ཆུབ་ཏུ་
ལུང་བསྟན་པ་དང༌། ལུང་སྟོན་པར་འགྱུར་བ་དང༌། ལུང་སྟོན་པ་དེ་དག་གིས་དགེ་བའི་རྩ་བ་བསྐྲུན་པ་དང༌། སྐྲུན་པར་འགྱུར་བ་དང༌། སྐྲུན་པ་གང་ཡིན་པ་རྣམས་དང༌། ཉན་ཐོས་ཀྱི་ཐེག་
པ་ཅན་གྱི་གང་ཟག་གང་དག་ཉན་ཐོས་ཀྱི་བྱང་ཆུབ་ཏུ་ལུང་བསྟན་པ་དང༌། ལུང་སྟོན་པར་འགྱུར་བ་དང༌། ལུང་སྟོན་པ་དེ་དག་གིས་དགེ་བའི་རྩ་བ་བསྐྲུན་པ་དང༌། སྐྲུན་པར་འགྱུར་བ་དང༌།
སྐྲུན་པ་གང་ཡིན་པ་རྣམས་དང༌། སོ་སོའི་སྐྱེ་བོ་གང་དག་གིས་དེར་དགེ་བའི་རྩ་བ་བསྐྲུན་པ་དང༌། སྐྲུན་པར་འགྱུར་བ་དང༌། སྐྲུན་པ་གང་ཡིན་པ་རྣམས་ཏེ། དེ་རྣམས་ཐམས་ཅད་ཀྱི་
དགེ་བའི་རྩ་བ་དེ་དག་ཐམས་ཅད་གཅིག་ཏུ་བསྡུས་ཤིང་བསྡོམས་ཏེ་གཞལ་ནས་མ་ལུས་པར་བྱས་ཏེ་མ་ལུས་པ་ལ་རྗེས་སུ་ཡི་རང་ནས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་
དངོས་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་གྱིས་ཤིག །ཅེས་འདོམས་ཤིང་རྗེས་སུ་སྟོན་པར་འགྱུར་ཏེ། དེ་ལྟར་ཡོངས་སུ་བསྔོ་བ་དེ་ནི། མཚན་མའི་
༄༅། །ཚུལ་གྱིས་ཡོངས་སུ་བསྔོ་བས་དུག་ཉིད་དུ་འགྱུར་ཏེ། འདི་ལྟ་སྟེ། དཔེར་ན། ཁ་ཟས་དེ་དུག་དང་བཅས་པ་བཞིན་ནོ། །དེ་ལྟར་ན། དམིགས་པའི་འདུ་ཤེས་ཅན་ལ་
ཡོངས་སུ་བསྔོ་བ་མེད་དོ། །དེ་ཅིའི་ཕྱིར་ཞེ་ན། དམིགས་པ་ནི་དུག་དང་བཅས་པའོ། །དེ་བས་ན། གང་ཟག་བྱང་ཆུབ་སེམས་དཔའི་ཐེག་པ་ཅན་གྱིས་དེ་ལྟར་བསླབ་པར་མི་བྱའོ། །ཡང་
དེས་ཇི་ལྟར་བསླབ་པར་བྱ་ཞིང་ཇི་ལྟར་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་དགེ་བའི་རྩ་བ་ཡོངས་སུ་གཟུང་བར་བྱ་བ་དང༌། ཇི་
ལྟར་ཡོངས་སུ་བཟུང་ན། ལེགས་པར་ཡོངས་སུ་བཟུང་བར་འགྱུར་ཞིང༌། ཇི་ལྟར་ཡོངས་སུ་བསྔོ་བར་བྱ་བ་དང༌། ཇི་ལྟར་ཡོངས་སུ་བསྔོས་ན་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་ལེགས་པར་ཡོངས་སུ་བསྔོས་པར་འགྱུར་ཞེ་ན། འདི་ལ་རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ཅན་དེ་བཞིན་གཤེགས་པ་ལ་སྐུར་པ་
མི་གདབ་པར་འདོད་པ་དེས་དགེ་བའི་རྩ་བ་དེ་དག་ཐམས་ཅད་འདི་ལྟར་རྗེས་སུ་ཡི་རང་བར་བྱ་ཞིང་འདི་ལྟར་ཡོངས་སུ་བསྔོ་བར་བྱ་སྟེ། དགེ་བའི་རྩ་བ་དེ་ཇི་ལྟར་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་སངས་རྒྱས་ཀྱི་ཡེ་ཤེས་དང༌། སངས་རྒྱས་ཀྱི་སྤྱན་གྱིས་མཁྱེན་ཅིང་གཟིགས་པ་དང༌། དགེ་
བའི་རྩ་བ་དེ་རིགས་གང་ཡིན་པ་དང༌། རིས་གར་གཏོགས་པ་དང༌། ཅི་འདྲ་བ་དང༌། རང་བཞིན་གང་ཡིན་པ་དང༌། མཚན་ཉིད་གང་ཡིན་པ་དང༌། ཆོས་ཉིད་གང་གིས་ཡོད་པ་དེ་བཞིན་དུ་
རྗེས་སུ་ཡི་རང་ཞིང༌། དགེ་བའི་རྩ་བ་དེ་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་དེ་དག་གིས་རྗེས་སུ་གནང་བ་དེ་བཞིན་དུ་བདག་གིས་རྗེས་སུ་ཡི་རང་བར་བྱའོ། །སྙམ་པ་སྟེ། དེ་ལྟར་རྗེས་སུ་ཡི་རང་ཞིང་དེ་ལྟར་ཡོངས་སུ་བསྔོ་བར་
བྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། སངས་རྒྱས་བཅོམ་ལྡན་འདས་རྣམས་ལ་གནོད་པར་མི་འགྱུར་ཞིང༌། ཡང་དག་པར་རྗེས་སུ་ཡི་རང་བར་བྱས་པ་དང༌།
དགེ་བའི་རྩ་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལེགས་པར་ཡོངས་སུ་བསྔོས་པར་འགྱུར་བ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་དེ་དག་ལ་སྐུར་པ་མི་འདེབས་པ་ཡིན་ཏེ། ལྷག་པའི་བསམ་པས་མོས་པས་ཡོངས་སུ་བསྔོ་བར་བྱེད་པ་དེའི་ཡོངས་སུ་བསྔོ་བ་དེ་ལྟ་བུ་ནི། དུག་མེད་པའི་
ཡོངས་སུ་བསྔོ་བ་ཡིན། ཡོངས་སུ་བསྔོ་བ་ཆེན་པོ་ཡིན། ཆོས་ཀྱི་དབྱིངས་ཀྱི་ཡོངས་སུ་བསྔོ་བ་ཡིན། ཡོངས་སུ་རྫོགས་ཤིང་ཤིན་ཏུ་ཡོངས་སུ་རྫོགས་པ་ཡིན་ནོ། །གཞན་
༄༅། །ཡང་རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ཅན་གྱིས་ཚུལ་ཁྲིམས་གང་ཡིན་པ་དང༌། ཏིང་ངེ་འཛིན་གང་ཡིན་པ་དང༌། ཤེས་
རབ་གང་ཡིན་པ་དང༌། རྣམ་པར་གྲོལ་བ་གང་ཡིན་པ་དང༌། རྣམ་པར་གྲོལ་བའི་ཡེ་ཤེས་གཟིགས་པ་གང་ཡིན་པ་ཇི་ལྟར་འདོད་པའི་ཁམས་སུ་མི་གཏོགས། གཟུགས་ཀྱི་
ཁམས་སུ་མི་གཏོགས། གཟུགས་མེད་པའི་ཁམས་སུ་མི་གཏོགས་པ་དང༌། འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བའང་མ་ཡིན་པ་དེ་ལྟར་ཡོངས་སུ་
བསྔོ་བར་བྱའོ། །དེ་ཅིའི་ཕྱིར་ཞེ་ན། དུས་གསུམ་དང༌། ཁམས་གསུམ་མ་གཏོགས་པའི་ཕྱིར་དེ་བཞིན་དུ་ཡོངས་སུ་བསྔོ་བའང་མ་གཏོགས་པའོ། །ཆོས་གང་དུ་ཡོངས་
སུ་བསྔོ་བ་དེས་ཡོངས་སུ་བསྔོ་བའི་ཆོས་དེའང་མ་གཏོགས་པའོ། །གལ་ཏེ་དེ་ལྟར་མོས་ཤིང་དེ་ལྟར་ཡོངས་སུ་བསྔོ་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་
ཡོངས་སུ་བསྔོ་བར་བྱེད་པ་དེའི་ཡོངས་སུ་བསྔོ་བ་ནི། ཆུད་མ་ཟོས་པ་ཡིན་ཏེ། མ་གཏོགས་པའི་ཡོངས་སུ་བསྔོ་བ། ཡོངས་སུ་བསྔོ་བ་དུག་མེད་པ། ཡོངས་སུ་བསྔོ་བ་ཆེན་
པོ༑ ༑ཆོས་ཀྱི་དབྱིངས་ཀྱི་ཡོངས་སུ་བསྔོ་བ་ཡོངས་སུ་རྫོགས་ཤིང་ལེགས་པར་ཡོངས་སུ་རྫོགས་པ་ཡིན་ནོ། །དེ་སྟེ་ཡོངས་སུ་བསྔོ་བ་དེ་ལ་མངོན་པར་ཆགས་ཤིང་མཚན་
མར་བྱེད་ན། ལོག་པར་ཡོངས་སུ་བསྔོ་བ་ཡིན་ནོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་ཡོངས་སུ་བསྔོ་བ་གང་ཞིག་དགེ་བའི་རྩ་བ་དེ་ཇི་ལྟར་སངས་རྒྱས་བཅོམ་
ལྡན་འདས་རྣམས་ཀྱིས་མཁྱེན་ཅིང༌། ཇི་ལྟར་རྗེས་སུ་གནང་བ་དེ་ལྟར་ཆོས་ཀྱི་དབྱིངས་ཀྱི་ཡོངས་སུ་བསྔོ་བ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་
པ་དེ་ལྟར་དེ་ལེགས་པར་ཡོངས་སུ་བསྔོས་པ་ཡིན་ནོ། །སྙམ་ཞིང༌། དེ་ལྟར་བདག་གིས་ཡོངས་སུ་བསྔོའོ་སྙམ་ན། འདི་ནི། ཡང་དག་པར་ཡོངས་སུ་བསྔོ་བ་ཡིན་ཏེ། དེ་ལྟར་
ཡོངས་སུ་བསྔོས་པ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལེགས་པར་ཡོངས་སུ་བསྔོས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་
ལ་ལེགས་སོ། །ཞེས་བྱ་བ་བྱིན་ཏེ། རབ་འབྱོར། ཁྱོད་སྟོན་པའི་བྱ་བ་བྱེད་ཅིང་གང་ཁྱོད་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཆོས་སྟོན་པ་ནི། རབ་འབྱོར།
ལེགས་སོ། ལེགས་སོ། །དེ་ཅིའི་ཕྱིར་ཞེ་ན། རབ་འབྱོར། ཡོངས་སུ་བསྔོ་བ་གང་ཡིན་པ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་ཀྱི་དབྱིངས་ཀྱི་ཡོངས་སུ་
བསྔོ་བའོ། །ཆོས་ཉིད་འདི་ཉིད་ལ་སངས་རྒྱས་བཅོམ་ལྡན་འདས་རྣམས་ཀྱིས་ཇི་ལྟར་མཁྱེན་པ་དང༌། གཟིགས་པ་དང༌། དགེ་བའི་རྩ་བ་དེ་རིགས་གང་ཡིན་པ་དང༌། རིས་གར་
༄༅། །གཏོགས་པ་དང༌། ཅི་འདྲ་བ་དང༌། རང་བཞིན་གང་ཡིན་པ་དང༌། མཚན་ཉིད་གང་ཡིན་པ་དང༌། ཆོས་ཉིད་གང་གིས་ཡོད་པ་དེ་ལྟར་རྗེས་སུ་ཡི་རང་བ་དང༌།
ཇི་ལྟར་རྗེས་སུ་གནང་བ་དེ་ལྟར་བདག་གིས་ཡོངས་སུ་བསྔོའོ། །སྙམ་པ་འདིའི་བསོད་ནམས་ཀྱི་ཕུང་པོ་གང་ཡིན་པ་དང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་དགེ་བ་བཅུའི་ལས་ཀྱི་ལམ་
ལ་ཡང་དག་པར་བཀོད་ཅིང་བཞག་པའི་བསོད་ནམས་མངོན་པར་འདུ་བྱེད་པ་གང་ཡིན་པ་དེ་ལས་བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་ཀྱི་དབྱིངས་ཀྱི་ཡོངས་
སུ་བསྔོ་བ་ལས་སྐྱེས་པའི་བསོད་ནམས་ཀྱི་ཕུང་པོ་འདི་ཉིད་མཆོག་ཅེས་བྱའོ། །དམ་པ་ཞེས་བྱའོ། །གཙོ་བོ་ཞེས་བྱའོ། །རབ་ཅེས་བྱའོ། མཆོག་རབ་ཅེས་བྱའོ། །གྱ་
ནོམ་པ་ཞེས་བྱའོ། །བླ་མ་ཞེས་བྱའོ། །བླ་ན་མེད་པ་ཞེས་བྱའོ། །གོང་ན་མེད་པ་ཞེས་བྱའོ། །མཉམ་པ་མེད་པ་ཞེས་བྱའོ། །མི་མཉམ་པ་དང་མཉམ་པ་ཞེས་བྱའོ། །
རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་དགེ་བ་བཅུའི་
ལས་ཀྱི་ལམ་ལ་བཀོད་པའི་བསོད་ནམས་མངོན་པར་འདུ་བྱེད་པ་ལྟ་ཞོག །རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་
སེམས་ཅན་ཇི་སྙེད་ཡོད་པ་དེ་དག་ཐམས་ཅད་བསམ་གཏན་བཞི་ཐོབ་པར་གྱུར་པ་དེ་དག་གི་བསོད་ནམས་མངོན་པར་འདུ་བྱེད་པ་གང་ཡིན་པ་དེ་བས་ཀྱང་བྱང་ཆུབ་སེམས་
དཔའ་སེམས་དཔའ་ཆེན་པོའི་ཡོངས་སུ་བསྔོ་བ་དང་ལྡན་པའི་བསོད་ནམས་ཀྱི་ཕུང་པོ་འདི་ནི། མཆོག་ཅེས་བྱའོ། དམ་པ་ཞེས་བྱའོ། །གཙོ་བོ་ཞེས་བྱའོ། །རབ་ཅེས་བྱའོ། །
མཆོག་རབ་ཅེས་བྱའོ། །གྱ་ནོམ་པ་ཞེས་བྱའོ། །བླ་མ་ཞེས་བྱའོ། །བླ་ན་མེད་པ་ཞེས་བྱའོ། །གོང་ན་མེད་པ་ཞེས་བྱའོ། །མཉམ་པ་མེད་པ་ཞེས་བྱའོ། །མི་མཉམ་པ་དང་
མཉམ་པ་ཞེས་བྱའོ། །རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་བསམ་
གཏན་བཞི་རྫོགས་པར་གྱུར་པའི་བསོད་ནམས་མངོན་པར་འདུ་བྱེད་པ་ལྟ་ཞོག །རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་
དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཚད་མེད་པ་བཞི་ཐོབ་པར་གྱུར་པ་དང༌། རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་
༄༅། །ཀླུང་གི་བྱེ་མ་སྙེད་ཀྱི་སེམས་ཅན་ཐམས་ཅད་ཚད་མེད་པ་བཞི་ཐོབ་པའི་བསོད་ནམས་མངོན་པར་འདུ་བྱེད་པ་ལྟ་ཞོག །རབ་འབྱོར། སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་གཟུགས་མེད་པའི་སྙོམས་པར་འཇུག་པ་བཞི་ཐོབ་པར་
གྱུར་པ་དང༌། རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་ཐམས་ཅད་གཟུགས་མེད་པའི་སྙོམས་པར་
འཇུག་པ་བཞི་ཐོབ་པའི་བསོད་ནམས་མངོན་པར་འདུ་བྱེད་པ་ལྟ་ཞོག །རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་
ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་མངོན་པར་ཤེས་པ་ལྔ་ཐོབ་པར་གྱུར་པ་དང༌། རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་ཐམས་ཅད་མངོན་པར་ཤེས་པ་ལྔ་ཐོབ་པའི་བསོད་ནམས་མངོན་པར་འདུ་བྱེད་པ་ལྟ་ཞོག །རབ་འབྱོར། སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་རྒྱུན་དུ་ཞུགས་པར་གྱུར་པ་དང༌། རབ་འབྱོར། ཡང་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་ཐམས་ཅད་རྒྱུན་དུ་ཞུགས་པར་གྱུར་པའི་བསོད་ནམས་མངོན་པར་འདུ་བྱེད་པ་ལྟ་
ཞོག །རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ལན་ཅིག་ཕྱིར་འོང་
བར་གྱུར་པ་དང༌། རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་ཐམས་ཅད་ལན་ཅིག་ཕྱིར་འོང་བར་གྱུར་
པའི་བསོད་ནམས་མངོན་པར་འདུ་བྱེད་པ་ལྟ་ཞོག །རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་
ཡོད་པ་དེ་དག་ཐམས་ཅད་ཕྱིར་མི་འོང་བར་གྱུར་པ་དང༌། རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་
ཐམས་ཅད་ཕྱིར་མི་འོང་བར་གྱུར་པའི་བསོད་ནམས་མངོན་པར་འདུ་བྱེད་པ་ལྟ་ཞོག །རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་
སྙེད་དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་དགྲ་བཅོམ་པར་གྱུར་པ་དང༌། རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་
༄༅། །གི་བྱེ་མ་སྙེད་ཀྱི་སེམས་ཅན་ཐམས་ཅད་དགྲ་བཅོམ་པར་གྱུར་པའི་བསོད་ནམས་མངོན་པར་འདུ་བྱེད་པ་ལྟ་ཞོག །རབ་འབྱོར། སྟོང་གསུམ་
གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་རང་སངས་རྒྱས་སུ་གྱུར་པ་དང༌། རབ་འབྱོར། ཡང་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་ཐམས་ཅད་རང་སངས་རྒྱས་སུ་གྱུར་པའི་བསོད་ནམས་མངོན་པར་འདུ་བྱེད་
པ་ལྟ་ཞོག །རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་གང་དག་ཡོད་པ་དེ་དག་ཐམས་ཅད་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པར་གྱུར་ལ། དེ་དག་ཐམས་ཅད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་
སྙེད་གཞན་དང༌། གཞན་དག་ཉིད་ན་སེམས་ཅན་གང་དག་ཡོད་པ་དེ་དག་ཐམས་ཅད་ལ་བྱང་ཆུབ་སེམས་དཔའ་རེ་རེས་ཆོས་གོས་དང༌། བསོད་སྙོམས་དང༌། མལ་ཆ་
དང༌། ན་བའི་གསོས་སྨན་དང༌། ཡོ་བྱད་དང༌། བདེ་བར་སྦྱར་བ་ཐམས་ཅད་དང༌། བདེ་བ་ལ་རེག་པར་གནས་པ་ཐམས་ཅད་ཀྱིས་བསྐལ་པ་གངྒཱའི་ཀླུང་གི་བྱེ་མ་སྙེད་
དུ་རིམ་གྲོར་བྱས་ཏེ་སྦྱིན་པ་དེའང་དམིགས་པའི་འདུ་ཤེས་ཀྱིས་བྱིན་ལ། རྣམ་གྲངས་དེས་ན་ཡོངས་སུ་བརྟགས་ནས་སེམས་ཅན་དེ་རྣམས་ཐམས་ཅད་ལས་རེ་རེ་ལའང་བྱང་ཆུབ་སེམས་
དཔའ་དེ་རྣམས་ཐམས་ཅད་ལས་ཀྱང་བྱང་ཆུབ་སེམས་དཔའ་རེ་རེས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་ཆོས་གོས་དང༌། བསོད་སྙོམས་དང༌། མལ་ཆ་དང༌། ན་བའི་གསོས་སྨན་
དང༌། ཡོ་བྱད་དང༌། བདེ་བར་སྦྱར་བ་ཐམས་ཅད་དང༌། བདེ་བ་ལ་རེག་པར་གནས་པ་ཐམས་ཅད་ཀྱིས་རིམ་གྲོར་བྱས་ཏེ། བཀུར་སྟིར་བྱེད། བླ་མར་བྱེད། རྗེད་པར་བྱེད། མཆོད་
པར་བྱེད། རི་མོར་བྱེད། བསྙེན་བཀུར་བྱེད་དེ། དེ་བཞིན་དུ་རེ་རེ་ལའང་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་རྣམ་གྲངས་འདིས་སྦྱིན་པ་བྱིན་ཞིང༌། དེ་བཞིན་དུ་ཐམས་
ཅད་ལ་ཡང་སྦྱིན་པ་བྱིན་ན། རབ་འབྱོར། དེ་ཇི་སྙམ་དུ་སེམས། ཅི་བྱང་ཆུབ་སེམས་དཔའ་དེ་དག་དེའི་གཞི་ལས་བསོད་ནམས་མང་དུ་བསྐྱེད་དམ། རབ་འབྱོར་གྱིས་གསོལ་པ།
བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས། གཞལ་དུ་མ་མཆིས་སོ། །བདེ་བར་གཤེགས་པ། གཞལ་དུ་མ་མཆིས་སོ། །བཅོམ་ལྡན་
འདས༑ དེའི་བསོད་ནམས་ཀྱི་ཕུང་པོ་ནི། གྲངས་སུ་བགྱི་བར་ཡང་སླ་བ་མ་ལགས་སོ། །བཅོམ་ལྡན་འདས། དེའི་བསོད་ནམས་ཀྱི་ཕུང་པོ་ནི། བགྲང་བར་ཡང༌། དཔེར་ཡང༌། དཔེས་
༄༅། །བསྟན་པར་བགྱི་བར་ཡང༌། གཞིར་ཡང༌། རྒྱུར་ཡང་བགྱི་བར་སླ་བ་མ་ལགས་སོ། །བཅོམ་ལྡན་འདས། གལ་ཏེ་བསོད་ནམས་ཀྱི་ཕུང་པོ་དེ་གཟུགས་ཅན་
ཞིག་ལགས་ན་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ཏུའང་མི་ཤོང་བར་འགྱུར་རོ། །དེ་སྐད་ཅེས་གསོལ་པ་དང༌། བཅོམ་ལྡན་
འདས་ཀྱིས་གནས་བརྟན་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། ཡང་གང་གི་ཕྱིར་གང་ཟག་བྱང་
ཆུབ་སེམས་དཔའི་ཐེག་པ་ཅན་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པས་ཡོངས་སུ་བཟུང་བ་ཆོས་ཀྱི་དབྱིངས་ཀྱི་ཡོངས་སུ་བསྔོ་བ་འདིས་དགེ་བའི་རྩ་བ་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་པ་དེའི་ཕྱིར་དེའི་བསོད་ནམས་མང་དུ་བསྐྱེད་དེ། རབ་འབྱོར། ཆོས་ཀྱི་དབྱིངས་ཀྱི་ཡོངས་སུ་བསྔོ་བ་ལས་སྐྱེས་པའི་
བསོད་ནམས་ཀྱི་ཕུང་པོ་འདི་ལ་ནི། དམིགས་པའི་འདུ་ཤེས་ཅན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྦྱིན་པ་ལས་བྱུང་བའི་བསོད་ནམས་མངོན་པར་འདུ་
བྱེད་པ་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆར་ཡང༌། བརྒྱ་ཕྲག་སྟོང་གི་ཆར་ཡང༌། བྱེ་བའི་ཆར་ཡང༌། བྱེ་བ་ཕྲག་བརྒྱའི་ཆར་ཡང༌། བྱེ་བ་ཕྲག་སྟོང་གི་
ཆར་ཡང༌། བྱེ་བ་བརྒྱ་ཕྲག་སྟོང་གི་ཆར་ཡང༌། བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཆར་ཡང་ཉེ་བར་མི་འགྲོའོ། །གྲངས་སུའང་ཉེ་བར་མི་འགྲོ། བགྲང་བར་ཡང༌། དཔེར་ཡང༌། དཔེས་བསྟན་
པར་བྱ་བར་ཡང༌། གཞིར་ཡང༌། རྒྱུར་ཡང་མི་བཟོད་དོ། །དེ་ཅིའི་ཕྱིར་ཞེ་ན། འདི་ལྟར་སྔ་མ་དམིགས་པའི་འདུ་ཤེས་ཅན་གྱི་བྱང་ཆུབ་སེམས་དཔའ་དེ་དག་གི་སྦྱིན་པ་ནི། ཤིན་ཏུ་
མང་པོ་བྱིན་ནའང་ཤིན་ཏུ་མང་པོར་ཡང་གྲངས་སུ་དེ་འགྱུར་རོ། །དེ་ནས་རྒྱལ་ཆེན་བཞིའི་རིས་ཀྱི་ལྷའི་བུ་སྟོང་ཕྲག་ཉི་ཤུ་རྣམས་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པས་ཡོངས་སུ་
བཟུང་བའི་དགེ་བའི་རྩ་བ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པ་འདི་ནི། ཡོངས་སུ་བསྔོ་བ་ཆེན་པོ་ལགས་ཏེ། འདི་ལྟར་གང་དུ་དམིགས་པ་དང་བཅས་པའི་བྱང་ཆུབ་སེམས་
དཔའ་དེ་དག་གི་སྦྱིན་པ་ལས་བྱུང་བའི་བསོད་ནམས་མངོན་པར་འདུ་བྱེད་པ་དེ་སྙེད་ཀྱང་ཟིལ་གྱིས་མནན་པ་ལགས་སོ། །དེ་ནས་སུམ་ཅུ་རྩ་གསུམ་གྱི་རིས་ཀྱི་ལྷའི་བུ་བརྒྱ་ཕྲག་སྟོང་
གིས་ལྷའི་མེ་ཏོག་དང༌། ལྷའི་བདུག་པ་དང༌། ལྷའི་དྲི་དང༌། ལྷའི་ཕྲེང་བ་དང༌། ལྷའི་བྱུག་པ་དང༌། ལྷའི་ཕྱེ་མ་རྣམས་ཀྱི་ཆར་དང༌། ལྷའི་རིན་པོ་ཆེའི་ཆར་དང༌། ལྷའི་ན་བཟའི་ཆར་
༄༅། །གྱིས་བཅོམ་ལྡན་འདས་ལ་མངོན་པར་གཏོར། མངོན་པར་རབ་ཏུ་གཏོར་ནས་ལྷའི་གདུགས་དང༌། ལྷའི་རྒྱལ་མཚན་དང༌། ལྷའི་དྲིལ་བུ་དང༌། ལྷའི་བ་
དན་དག་དང༌། ལྷའི་མཆོད་པ་རྣམ་པ་མང་པོ་དག་གིས་བཅོམ་ལྡན་འདས་ལ་བཀུར་སྟིར་བྱས། བླ་མར་བྱས། རྗེད་པར་བྱས། མཆོད་པར་བྱས། རི་མོར་བྱས། བསྙེན་བཀུར་
བྱས་ཏེ་ལྷའི་སིལ་སྙན་རྣམས་རབ་ཏུ་དཀྲོལ་ནས་ཚིག་འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་ཀྱི་དབྱིངས་ཀྱི་
ཡོངས་སུ་བསྔོ་བ་འདི་ནི། བསྔོ་བ་ཆེན་པོ་ལགས་ཏེ། འདི་ལྟར་གང་དུ་དམིགས་པ་ཅན་གྱི་བྱང་ཆུབ་སེམས་དཔའ་དེ་དག་གི་སྦྱིན་པ་ལས་བྱུང་བའི་བསོད་ནམས་མངོན་པར་འདུ་
བགྱིད་པའི་ཕུང་པོ་ཆེན་པོ་དེ་སྙེད་ཀྱང་ཟིལ་གྱིས་གནོན་པ་ལགས་སོ། །འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་དང་ཐབས་མཁས་པས་ཡོངས་སུ་བཟུང་བའི་སླད་དུ་འདི་ནི།
བསྔོ་བ་ཆེན་པོ་ལགས་སོ། །དེ་བཞིན་དུ་ལྷའི་རིས་གཞན་དག་ནས་ཀྱང་ལྷགས་ནས་བཅོམ་ལྡན་འདས་ལ་བཀུར་སྟིར་བྱ་བ་དམ་པ་དང༌། བླ་མར་བྱ་བ་དམ་པ་དང༌། རྗེད་པར་
བྱ་བ་དམ་པ་དང༌། མཆོད་པར་བྱ་བ་དམ་པ་དང༌། རི་མོར་བྱ་བ་དམ་པ་དང༌། བསྙེན་བཀུར་བྱ་བ་དམ་པ་རྣམས་ཀྱིས་བཀུར་སྟིར་བྱས། བླ་མར་བྱས། རྗེད་པར་བྱས། མཆོད་
པར་བྱས། རི་མོར་བྱས། བསྙེན་བཀུར་བྱས་ནས་དེ་སྐད་དུ་སྒྲ་ཕྱུང་ཞིང་དབྱངས་རྗེས་སུ་བསྒྲགས་སོ། །དེ་བཞིན་དུ་སྦྱར་བར་བྱ་སྟེ། འཐབ་བྲལ་དང༌། དགའ་ལྡན་དང༌། འཕྲུལ་དགའ་
དང༌། གཞན་འཕྲུལ་དབང་བྱེད་དང༌། ཚངས་རིས་དང༌། ཚངས་པའི་མདུན་ན་འདོན་དང༌། ཚངས་པ་ཀུན་འཁོར་དང༌། ཚངས་ཆེན་དང༌། འོད་ཆུང་དང༌། ཚད་མེད་འོད་དང༌། འོད་
གསལ་དང༌། དགེ་ཆུང་དང༌། ཚད་མེད་དགེ་དང༌། དགེ་རྒྱས་དང༌། སྤྲིན་མེད་དང༌། བསོད་ནམས་འཕེལ་དང༌། འབྲས་བུ་ཆེ་དང༌། འདུ་ཤེས་མེད་པའི་སེམས་ཅན་དང༌། མི་ཆེ་བ་དང༌།
མི་གདུང་བ་དང༌། གྱ་ནོམ་སྣང་དང༌། ཤིན་ཏུ་མཐོང་དང༌། འོག་མིན་གྱི་ལྷ་དེ་དག་ཀྱང་དེ་བཞིན་དུ་ཐལ་མོ་སྦྱར་ཏེ་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་
ཏོ༑ ༑བཅོམ་ལྡན་འདས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པས་ཡོངས་སུ་བཟུང་བའི་དགེ་བའི་རྩ་བ་
ཡོངས་སུ་བསྔོ་བ་དེས་བྱང་ཆུབ་སེམས་དཔའ་དམིགས་པའི་འདུ་ཤེས་ཅན་གྱི་ཡུན་རིང་པོ་དེ་ཙམ་དུ་བསགས་པ་དང༌། དེ་ལྟར་རྒྱ་ཆེར་ཡང་དག་པར་བསྒྲུབས་པའི་བསོད་
ནམས་ཀྱི་ཕུང་པོ་དེ་སྙེད་ཀྱང་ཟིལ་གྱིས་གནོན་པ་ངོ་མཚར་ཏོ། །དེ་ནས་བཅོམ་ལྡན་འདས་ཀྱིས་གནས་གཙང་མའི་རིས་ཀྱི་ལྷའི་བུ་ལ་སོགས་ཏེ་ལྷའི་བུ་དེ་དག་ཐམས་ཅད་
༄༅། །ལ་བཀའ་སྩལ་པ། ལྷའི་བུ་དག །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་གི་སེམས་ཅན་ཐམས་
ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱ་བའི་དོན་དུ་
སྦྱིན་པ་བྱིན་པའི་བསོད་ནམས་མངོན་པར་འདུ་བྱེད་པ་ལྟ་ཞོག །ལྷའི་བུ་དག། རྣམ་གྲངས་འདིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་
གི་བྱེ་མ་སྙེད་གཞན་དང༌། གཞན་དག་ན་སེམས་ཅན་གང་དག་ཡོད་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་སྟེ་
བྱང་ཆུབ་ཏུ་སེམས་བསྐྱེད་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་གཞན་དང༌། གཞན་དག་གི་སེམས་ཅན་ཐམས་ཅད་
ལ་ཆོས་གོས་དང༌། བསོད་སྙོམས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་དང༌། བདེ་བར་སྦྱར་བ་ཐམས་ཅད་དང༌། བདེ་བ་ལ་རེག་པར་གནས་པ་ཐམས་
ཅད་ཀྱིས་བྱང་ཆུབ་སེམས་དཔའ་རེ་རེས་ཀྱང་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་སྟེ་སྦྱིན་པ་བྱིན་ཞིང༌། དེ་བཞིན་དུ་དམིགས་པའི་འདུ་ཤེས་ཅན་དེ་དག་ཐམས་
ཅད་ཀྱིས་ཀྱང་སྦྱིན་པ་བྱིན་པའི་བར་དང༌། རྣམ་གྲངས་འདིས་སེམས་ཅན་དེ་རྣམས་ཐམས་ཅད་དང༌། བྱང་ཆུབ་སེམས་དཔའ་དེ་རྣམས་ཐམས་ཅད་རེ་རེ་ནས་ཡོངས་སུ་བརྟགས་
ནས་བྱང་ཆུབ་སེམས་དཔའ་རེ་རེ་ནས་བྱང་ཆུབ་སེམས་དཔའ་དེ་རྣམས་ཐམས་ཅད་ཀྱིས་བར་གྱི་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་སྟེ། སེམས་ཅན་དེ་དག་ཐམས་ཅད་
ལ་ཆོས་གོས་དང༌། བསོད་སྙོམས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་དང༌། བདེ་བར་སྦྱར་བ་ཐམས་ཅད་དང༌། བདེ་བ་ལ་རེག་པར་གནས་པ་ཐམས་ཅད་ཀྱིས་
རིམ་གྲོར་བྱེད་ཅིང༌། སྦྱིན་པ་དེའང་དམིགས་པའི་འདུ་ཤེས་ཀྱིས་བྱིན་ལ། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་
པས་ཡོངས་སུ་ཟིན་པ་ཞིག་གིས་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང༌། བྱང་ཆུབ་སེམས་དཔའ་དང༌། རང་སངས་རྒྱས་
དང༌། གང་ཟག་ཉན་ཐོས་ཀྱི་ཐེག་པ་ཅན་དེ་རྣམས་ཀྱི་ཚུལ་ཁྲིམས་ཀྱི་ཕུང་པོ་དང༌། ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌།
རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང༌། དེ་ལ་སེམས་ཅན་གཞན་དག་གིས་ཀྱང་དགེ་བའི་རྩ་བ་དག་བསྐྲུན་པ་དང༌། སྐྲུན་པར་འགྱུར་བ་དང༌། སྐྲུན་པར་
༄༅། །བྱེད་པ་དེ་དག་ཐམས་ཅད་གཅིག་ཏུ་བསྡུས་ཤིང་བསྡོམས་ཏེ་གཞལ་ནས་མ་ལུས་པར་བྱས་ཏེ། མ་ལུས་པ་ལ་རྗེས་སུ་ཡི་རང་བའི་མཆོག་གིས་རྗེས་
སུ་ཡི་རང་ཞིང་དམ་པ་དང༌། གཙོ་བོ་དང༌། རབ་དང༌། མཆོག་རབ་དང༌། གྱ་ནོམ་པ་དང༌། བླ་མ་དང༌། བླ་ན་མེད་པ་དང༌། གོང་ན་མེད་པ་དང༌། གོང་མའི་ཡང་གོང་མ་
དང༌། མཉམ་པ་མེད་པ་དང༌། མི་མཉམ་པ་དང༌། མཉམ་པ་དང༌། རབ་ཏུ་མཉམ་པ་མེད་པ་དང༌། བསམ་གྱིས་མི་ཁྱབ་པའི་རྗེས་སུ་ཡི་རང་བས་རྗེས་སུ་ཡི་རང་ལ། རྗེས་
སུ་ཡི་རང་ནས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པར་གྱུར་ཅིག། ཅེས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། རྗེས་སུ་ཡི་རང་བ་ཡོངས་སུ་བསྔོ་བ་དང་ལྡན་པའི་བསོད་ནམས་བྱ་བའི་དངོས་པོ་འདི་ལ་བྱང་ཆུབ་སེམས་དཔའ་
དམིགས་པའི་འདུ་ཤེས་ཅན་དག་གི་བསོད་ནམས་མངོན་པར་འདུ་བྱེད་པ་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ་།སྟོང་གི་ཆར་ཡང༌། བརྒྱ་སྟོང་གི་ཆར་ཡང༌།
བྱེ་བའི་ཆར་ཡང༌། བྱེ་བ་བརྒྱའི་ཆར་ཡང༌། བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོའོ། །གྲངས་
སུའང༌། བགྲང་བར་ཡང༌། དཔེར་ཡང༌། དཔེས་བསྟན་པར་བྱ་བར་ཡང༌། གཞིར་ཡང༌། རྒྱུར་ཡང་མི་བཟོད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེ་དག་ཐམས་
ཅད་ནི། དམིགས་པའི་འདུ་ཤེས་ཅན་གྱིས་སྦྱིན་པ་སྦྱིན་པར་བྱེད་པ་ཡིན་པའི་ཕྱིར་རོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་
བརྒྱད་པ། དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་འདི་སྐད་དུ་འདས་པ་དང༌། མ་བྱོན་པ་དང༌། ད་ལྟར་
བྱུང་བའི་སངས་རྒྱས་བཅོམ་ལྡན་འདས་དང༌། བྱང་ཆུབ་སེམས་དཔའ་དང༌། རང་སངས་རྒྱས་དང༌། ཉན་ཐོས་ཀྱི་དགེ་འདུན་ཐམས་ཅད་དང༌། སེམས་ཅན་ཐམས་ཅད་ཀྱི་དགེ་བའི་
རྩ་བ་འདས་པ་དང༌། མ་འོངས་པ་དང༌། ད་ལྟར་བྱུང་བ་ཞེས་བྱ་བ་གང་ཡིན་པ་དེ་དག་ཐམས་ཅད་གཅིག་ཏུ་བསྡུས་ཤིང་བསྡོམས་ཏེ་གཞལ་ནས་མ་ལུས་པར་བྱས་ཏེ། མ་ལུས་
པ་ལ་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་ཞིང་དམ་པ་དང༌། གཙོ་བོ་དང༌། རབ་དང༌། མཆོག་རབ་དང༌། གྱ་ནོམ་པ་དང༌། བླ་མ་དང༌། བླ་ན་མེད་པ་དང༌། གོང་ན་མེད་
པ་དང༌། གོང་མའི་ཡང་གོང་མ་དང༌། མཉམ་པ་མེད་པ་དང༌། མི་མཉམ་པ་དང་མཉམ་པ་དང༌། རབ་ཏུ་མཉམ་པ་མེད་པ་དང༌། བསམ་གྱིས་མི་ཁྱབ་པའི་རྗེས་སུ་ཡི་རང་བས་
༄༅། །རྗེས་སུ་ཡི་རང་ལ་ཞེས་གང་གསུངས་པ་དེ་ལ། བཅོམ་ལྡན་འདས། ཇི་ཙམ་གྱིས་ན། རྗེས་སུ་ཡི་རང་བའི་མཆོག་ཏུ་འགྱུར། དེ་སྐད་ཅེས་གསོལ་པ་
དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། གལ་ཏེ་གང་ཟག་བྱང་ཆུབ་སེམས་དཔའི་ཐེག་པ་ཅན་དག་འདས་པ་
དང༌། མ་འོངས་པ་དང༌། ད་ལྟར་གྱི་ཆོས་རྣམས་མི་འཛིན། རློམ་སེམས་སུ་མི་བྱེད། མི་དམིགས། མི་རྟོག། རྣམ་པར་མི་རྟོག །ཡང་དག་པར་རྗེས་སུ་མི་མཐོང་ཞིང་ཆོས་དེ་
དག་ལ་འདི་ལྟར་ཡང་ཡོངས་སུ་རྟོག་སྟེ་ཆོས་ཐམས་ཅད་ནི། རྟོག་པས་རྣམ་པར་བསྒྲུབས་པ་སྟེ། མ་སྐྱེས་པ། ངེས་པར་མ་སྐྱེས་པ། འོང་བ་མེད་པ། འགྲོ་བ་མེད་པའོ། །འདི་
ལ་ཆོས་གང་ཡང་མ་སྐྱེས་སོ། །ཆོས་གང་ཡང་སྐྱེ་བར་མི་འགྱུར་རོ། །ཆོས་གང་ཡང་མི་སྐྱེའོ། །འདི་ལ་ཆོས་གང་ཡང་འགགས་པ་མེད་དོ། །ཆོས་གང་ཡང་འགག་པར་མི་
འགྱུར་རོ། །ཆོས་གང་ཡང་མི་འགག་གོ །ཞེས་དེ་ལྟར་ཆོས་དེ་དག་ཉེ་བར་བརྟགས་ནས་ཆོས་དེ་དག་གི་ཆོས་ཉིད་ཇི་ལྟ་བ་དེ་ལྟར་རྗེས་སུ་ཡི་རང་བར་བྱེད་དོ། །དེ་ལྟར་རྗེས་
སུ་ཡི་རང་ནས་དེ་ཁོ་ན་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་སྟེ། རབ་འབྱོར། འདི་ཙམ་གྱིས་ན། བྱང་ཆུབ་སེམས་དཔའ་སེམས་དཔའ་
ཆེན་པོའི་རྗེས་སུ་ཡི་རང་བའི་མཆོག་ཏུ་འགྱུར་རོ། །རབ་འབྱོར། དགེ་བའི་རྩ་བ་ཡོངས་སུ་བསྔོ་བ་འདི་ལ་བྱང་ཆུབ་སེམས་དཔའ་སྔ་མ་དམིགས་པར་འདུ་ཤེས་པ་དང༌། དམིགས་
པར་ལྟ་བ་དེ་དག་གི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དེས་ནི། བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆར་ཡང༌། བརྒྱ་སྟོང་གི་ཆར་ཡང༌། བྱེ་བའི་ཆར་ཡང༌། བྱེ་བ་བརྒྱའི་ཆར་
ཡང༌། བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོའོ། །གྲངས་སུའང༌། བགྲང་བར་ཡང༌། དཔེར་ཡང༌། དཔེས་
བསྟན་པར་བྱ་བར་ཡང༌། གཞིར་ཡང༌། རྒྱུར་ཡང་མི་བཟོད་དོ། །རབ་འབྱོར། གཞན་ཡང་གང་ཟག་བྱང་ཆུབ་སེམས་དཔའི་ཐེག་པ་ཅན་འདས་པ་དང༌། མ་བྱོན་པ་དང༌། ད་ལྟར་བྱུང་
བའི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱི་སྦྱིན་པ་ལ་རྗེས་སུ་ཡི་རང་བར་འདོད་པ་དང༌། ཚུལ་ཁྲིམས་ལ་རྗེས་སུ་ཡི་རང་བར་འདོད་པ་དང༌། བཟོད་པ་ལ་རྗེས་སུ་ཡི་
རང་བར་འདོད་པ་དང༌། བརྩོན་འགྲུས་ལ་རྗེས་སུ་ཡི་རང་བར་འདོད་པ་དང༌། བསམ་གཏན་ལ་རྗེས་སུ་ཡི་རང་བར་འདོད་པ་དང༌། ཤེས་རབ་ལ་རྗེས་སུ་ཡི་རང་བར་འདོད་པ་དེས་
འདི་ལྟར་རྗེས་སུ་ཡི་རང་བར་བྱ་སྟེ། རྣམ་པར་གྲོལ་བ་ཇི་ལྟ་བ་དེ་བཞིན་དུ་སྦྱིན་པའོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་ཚུལ་ཁྲིམས་སོ། །རྣམ་པར་གྲོལ་བ་ཇི་ལྟ་བ་དེ་
༄༅། །བཞིན་དུ་བཟོད་པའོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་བརྩོན་འགྲུས་སོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་བསམ་གཏན་ནོ། །རྣམ་པར་གྲོལ་
བ་ཇི་ལྟ་བ་དེ་བཞིན་དུ་ཤེས་རབ་བོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་རྣམ་པར་གྲོལ་བའོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་རྣམ་པར་གྲོལ་བའི་ཡེ་ཤེས་མཐོང་
བའི་ཕུང་པོའོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་རྗེས་སུ་ཡི་རང་བའོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་
པོའོ༑ ༑རྣམ་པར་གྲོལ་བ་ཇི་ལྟ་བ་དེ་བཞིན་དུ་ཡོངས་སུ་བསྔོ་བའོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་སངས་རྒྱས་བཅོམ་ལྡན་འདས་རྣམས་དང༌། རང་སངས་རྒྱས་རྣམས་ཀྱང་
ངོ༑ ༑རྣམ་པར་གྲོལ་བ་ཇི་ལྟ་བ་དེ་བཞིན་དུ་དེ་དག་གི་ཉན་ཐོས་གང་དག་ཡོངས་སུ་མྱ་ངན་ལས་འདས་པ་རྣམས་སོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་ཆོས་གང་དག་འདས་
ཤིང་འགགས་པ་དེ་རྣམས་སོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་ཆོས་གང་དག་མ་འོངས་པ་མ་བྱུང་བ་དེ་རྣམས་སོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་ཆོས་གང་དག་ད་ལྟར་
བྱུང་བ་གནས་བཞིན་པ་རྣམས་སོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་འདས་པའི་སངས་རྒྱས་བཅོམ་ལྡན་འདས་དེ་དག་དང༌། དེ་དག་གི་ཉན་ཐོས་རྣམས་སོ། །རྣམ་པར་གྲོལ་བ་
ཇི་ལྟ་བ་དེ་བཞིན་དུ་མ་བྱོན་པའི་སངས་རྒྱས་བཅོམ་ལྡན་འདས་དེ་དག་དང༌། དེ་དག་གི་ཉན་ཐོས་རྣམས་སོ། །རྣམ་པར་གྲོལ་བ་ཇི་ལྟ་བ་དེ་བཞིན་དུ་གང་དག་ད་ལྟར་འཇིག་རྟེན་གྱི་ཁམས་གཞལ་
དུ་མེད་ཅིང་གྲངས་མེད་པ་རྣམས་ན་བཞུགས་ཏེ་འཚོ་ཞིང་གཞེས་པ་ད་ལྟར་བྱུང་བའི་སངས་རྒྱས་བཅོམ་ལྡན་འདས་དེ་རྣམས་དང༌། དེ་དག་གི་ཉན་ཐོས་རྣམས་སོ། །རྣམ་པར་གྲོལ་བ་ཇི་ལྟ་བ་དེ་
བཞིན་དུ་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཏེ། དེ་ལྟར་མ་བཅིངས་ཤིང༌། མ་གྲོལ་ལ། མ་ཆགས་པའི་ཆོས་འདི་དག་གི་ཆོས་ཉིད་གང་
ཡིན་པ་དེ་ལ་རྗེས་སུ་ཡི་རང་བ་བླ་ན་མེད་པས་རྗེས་སུ་ཡི་རང་ངོ༌། །རྗེས་སུ་ཡི་རང་ནས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་ཡོངས་སུ་མི་བསྔོ་བའི་ཚུལ་གྱིས་ཆོས་དེ་དག་གི་ཆོས་ཉིད་ཇི་ལྟ་བ་དེ་ལྟར་མི་འཕོ་བ་དང༌། མི་འཇིགས་པས་ཡོངས་སུ་བསྔོའོ། །ཞེས་བྱ་བའོ། །རབ་འབྱོར། འདི་ཙམ་གྱིས་ན་བྱང་ཆུབ་སེམས་
དཔའ་སེམས་དཔའ་ཆེན་པོའི་རྗེས་སུ་ཡི་རང་བའི་མཆོག་ཡིན་ནོ། །རབ་འབྱོར། ཡང་གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་གཞན་དག་དང་
གཞན་དག་ན་ཡོད་པའི་སེམས་ཅན་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་
༄༅། །དག་པར་ཞུགས་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་གཞན་དག་དང༌། གཞན་དག་ན་ཡོད་པའི་སེམས་ཅན་
ཐམས་ཅད་བྱང་ཆུབ་ཏུ་སེམས་བསྐྱེད་ལ། བྱང་ཆུབ་སེམས་དཔའ་དེ་དག་ཐམས་ཅད་ལས་རེ་རེས་ཀྱང་བྱང་ཆུབ་སེམས་དཔའ་རེ་རེ་ལ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་
ནས་སྦྱིན་པ་བྱིན་ཏེ། དམིགས་པའི་འདུ་ཤེས་ཀྱིས་ཆོས་གོས་དང༌། བསོད་སྙོམས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་དང༌། བདེ་བར་སྦྱར་བ་ཐམས་ཅད་དང༌།
བདེ་བ་ལ་རེག་པར་གནས་པ་ཐམས་ཅད་ཀྱིས་རིམ་གྲོར་བྱེད་ཅིང་རྣམ་གྲངས་འདིས་ཐམས་ཅད་ཀྱང་ཐམས་ཅད་དག་ལ་རིམ་གྲོར་བྱེད་པ་དམིགས་པའི་འདུ་ཤེས་ཅན་གྱིས་སྦྱིན་པ་
བྱིན་པ་ལྟ་ཞོག །རབ་འབྱོར། གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པར་གྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས་བསྐལ་པ་གང་གཱའི་ཀླུང་གི་བྱེ་
མ་སྙེད་དུ་ལུས་ཀྱིས་ལེགས་པར་སྤྱོད་པ་དང་ངག་གིས་ལེགས་པར་སྤྱོད་པ་དང༌། ཡིད་ཀྱིས་ལེགས་པར་སྤྱོད་པའི་ཚུལ་ཁྲིམས་དམིགས་པའི་འདུ་ཤེས་ཅན་དག་གིས་ཡང་དག་པར་བླངས་ཏེ་གནས་པ་
དང་རྣམ་གྲངས་འདིས་བྱང་ཆུབ་སེམས་དཔའ་དེ་དག་ཐམས་ཅད་ལས་བྱང་ཆུབ་སེམས་དཔའ་རེ་རེས་ཀྱང་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་སྟེ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་ལུས་ཀྱིས་ལེགས་པར་
སྤྱོད་པ་དང་ངག་གིས་ལེགས་པར་སྤྱོད་པ་དང༌། ཡིད་ཀྱིས་ལེགས་པར་སྤྱོད་པའི་ཚུལ་ཁྲིམས་དམིགས་པའི་འདུ་ཤེས་ཅན་དག་གིས་ཡང་དག་པར་བླངས་ཏེ་གནས་པ་དང༌། རྣམ་གྲངས་འདིས་བྱང་
ཆུབ་སེམས་དཔའ་དེ་དག་ཐམས་ཅད་ཀྱིས་ཀྱང་ཚུལ་ཁྲིམས་དམིགས་པའི་འདུ་ཤེས་ཅན་དག་གིས་ཡང་དག་པར་བླངས་ཏེ་གནས་ལ། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་
ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པས་ཡོངས་སུ་ཟིན་པ་གང་ཞིག་གིས་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཁྲིམས་དང༌།
ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་དང༌། རང་སངས་རྒྱས་དེ་དག་གི་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་
རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང༌། ཉན་ཐོས་དེ་དག་གི་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌།
རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང༌། འདས་པ་དང༌། མ་འོངས་པ་དང༌། ད་ལྟར་བྱུང་བའི་སེམས་ཅན་ཐམས་ཅད་ཀྱི་དགེ་བའི་རྩ་བ་དེ་དག་ཐམས་ཅད་གཅིག་ཏུ་བསྡུས་ཤིང་
༄༅། །བསྡོམས་ཏེ་གཞལ་ནས་མ་ལུས་པར་བྱས་ཤིང༌། མ་ལུས་པ་ལ་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་སྟེ། དམ་པ་དང༌། གཙོ་བོ་དང༌། རབ་དང༌། མཆོག་
རབ་དང༌། གྱ་ནོམ་པ་དང༌། བླ་མ་དང༌། བླ་ན་མེད་པ་དང༌། གོང་ན་མེད་པ་དང༌། གོང་མའི་ཡང་གོང་མ་དང༌། མཉམ་པ་མེད་པ་དང༌། མི་མཉམ་པ་དང་མཉམ་པ་དང༌། ཤིན་ཏུ་མཉམ་པ་
མེད་པ་དང༌། བསམ་གྱིས་མི་ཁྱབ་པའི་རྗེས་སུ་ཡི་རང་བས་རྗེས་སུ་ཡི་རང་ཞིང༌། རྗེས་སུ་ཡི་རང་ནས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། རབ་འབྱོར། རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་འདི་ལ་བྱང་ཆུབ་སེམས་དཔའ་དམིགས་པ་ཅན་དག་
གི་ཚུལ་ཁྲིམས་ལས་བྱུང་བའི་བསོད་ནམས་མངོན་པར་འདུ་བྱེད་པ་སྔ་མ་དེས་ནི། བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆར་ཡང༌། བརྒྱ་སྟོང་གི་ཆར་ཡང༌། བྱེ་བའི་ཆར་ཡང༌། བྱེ་བ་
བརྒྱའི་ཆར་ཡང༌། བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོའོ། །གྲངས་སུའང་ཉེ་བར་མི་འགྲོའོ། །བགྲང་བར་ཡང༌།
དཔེར་ཡང༌། དཔེས་བསྟན་པར་བྱ་བར་ཡང༌། གཞིར་ཡང༌། རྒྱུར་ཡང་མི་བཟོད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེ་དག་ཐམས་ཅད་ནི། དམིགས་པའི་འདུ་
ཤེས་ཅན་གྱིས་ཚུལ་ཁྲིམས་ཡང་དག་པར་བླངས་ཏེ་གནས་པའི་ཕྱིར་རོ། །རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་ཐམས་
ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་ལུས་
ཀྱིས་ལེགས་པར་སྤྱོད་པ་དང༌། ངག་གིས་ལེགས་པར་སྤྱོད་པ་དང༌། ཡིད་ཀྱིས་ལེགས་པར་སྤྱོད་པའི་ཚུལ་ཁྲིམས་དམིགས་པའི་འདུ་ཤེས་ཅན་གྱིས་ཡང་དག་པར་བླངས་ཏེ་གནས་པ་ལྟ་ཞོག །རབ་
འབྱོར༑ སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་གང་དག་ཡོད་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་
ཞུགས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་ཅིང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
གངྒཱའི་ཀླུང་གི་བྱེ་མ་སྙེད་གཞན་དག་དང༌། གཞན་དག་གི་སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའ་རེ་རེ་ལ་མཚང་དྲུས་ཤིང་བརྡེགས་ཏེ་སྤྱོས་ཀྱང་ང་རྒྱལ་དང་བཅས་པ་དམིགས་པའི་
འདུ་ཤེས་ཅན་གྱིས་བཟོད་པ་ཡང་དག་པར་བླངས་ཏེ་གནས་པ་ནས་དེ་བཞིན་དུ་དམིགས་པའི་འདུ་ཤེས་ཅན་གྱི་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་བཟོད་པ་ཡང་དག་པར་བླངས་ཏེ་གནས་
༄༅། །པའི་བར་དང༌། རྣམ་གྲངས་འདིས་བྱང་ཆུབ་སེམས་དཔའ་དེ་དག་ཐམས་ཅད་ལས་བྱང་ཆུབ་སེམས་དཔའ་རེ་རེས་ཀྱང་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་
ཅིང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་གཞན་དག་དང༌། གཞན་དག་ན་ཡོད་པའི་སེམས་ཅན་ཐམས་ཅད་ཀྱིས་བསྐལ་པ་གངྒཱའི་ཀླུང་གི་བྱེ་མ་
སྙེད་དུ་མཚང་དྲུས་ཤིང་བརྡེགས་ཏེ་སྤྱོས་པ་དང༌། ང་རྒྱལ་དང་བཅས་པ་དམིགས་པའི་འདུ་ཤེས་ཅན་གྱིས་བཟོད་པ་ཡང་དག་པར་བླངས་ཏེ་གནས་པ་དང༌། དེ་བཞིན་དུ་དེ་དག་ཐམས་ཅད་
ཀྱང་ཐམས་ཅད་ཀྱིས་མཚང་དྲུས་ཤིང་བརྡེགས་ཏེ་སྤྱོས་ཀྱང་ང་རྒྱལ་དང་བཅས་པ་དམིགས་པའི་འདུ་ཤེས་ཅན་གྱིས་བཟོད་པ་ཡང་དག་པར་བླངས་ཏེ་གནས་པར་གྱུར་ལ། བྱང་ཆུབ་སེམས་
དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པས་ཡོངས་སུ་ཟིན་པ་གང་ཞིག་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་
འདས་རྣམས་ཀྱི་ཚུལ་ཁྲིམས་ཀྱི་ཕུང་པོ་དང༌། ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་
དང༌། རང་སངས་རྒྱས་དེ་དག་གི་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང༌། ཉན་ཐོས་དེ་དག་
གི་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང༌། སེམས་ཅན་ཐམས་ཅད་ཀྱི་འདས་པ་དང༌། མ་འོངས་པ་
དང༌། ད་ལྟར་བྱུང་བའི་དགེ་བའི་རྩ་བ་དེ་དག་ཐམས་ཅད་གཅིག་ཏུ་བསྡུས་ཤིང་བསྡོམས་ཏེ་གཞལ་ནས་མ་ལུས་པར་བྱས་ཤིང༌། མ་ལུས་པ་ལ་རྗེས་སུ་ཡི་རང་བའི་མཆོག་གིས་རྗེས་སུ་ཡི་
རང་སྟེ༑ དམ་པ་དང༌། གཙོ་བོ་དང༌། རབ་དང༌། མཆོག་རབ་དང༌། གྱ་ནོམ་པ་དང༌། བླ་མ་དང༌། བླ་ན་མེད་པ་དང༌། གོང་ན་མེད་པ་དང༌། གོང་མའི་ཡང་གོང་མ་དང༌། མཉམ་པ་མེད་པ་དང༌། མི་
མཉམ་པ་དང་མཉམ་པ་དང༌། ཤིན་ཏུ་མཉམ་པ་མེད་པ་དང༌། བསམ་གྱིས་མི་ཁྱབ་པའི་རྗེས་སུ་ཡི་རང་བས་རྗེས་སུ་ཡི་རང་ཞིང༌། རྗེས་སུ་ཡི་རང་ནས་རྗེས་སུ་ཡི་རང་བ་དང་ལྡན་པའི་བསོད་ནམས་
བྱ་བའི་དངོས་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། རབ་འབྱོར། རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་འདི་ལ་བྱང་ཆུབ་སེམས་དཔའ་
དམིགས་པ་ཅན་སྔ་མ་དེ་དག་གི་བཟོད་པ་དང་ལྡན་པའི་བསོད་ནམས་མངོན་པར་འདུ་བྱེད་པ་དེས་ནི། བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆར་ཡང༌། བརྒྱ་སྟོང་གི་ཆར་ཡང༌། བྱེ་བའི་ཆར་ཡང་
བྱེ་བ་བརྒྱའི་ཆར་ཡང༌། བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོའོ། །གྲངས་སུའང་བགྲང་བར་ཡང༌། དཔེར་ཡང༌། དཔེས་
༄༅། །བསྟན་པར་བྱ་བར་ཡང༌། གཞིར་ཡང༌། རྒྱུར་ཡང་མི་བཟོད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེ་དག་ཐམས་ཅད་ནི། དམིགས་པའི་འདུ་ཤེས་
ཅན་གྱིས་བཟོད་པ་ཡང་དག་པར་བླངས་ཏེ་གནས་པའི་ཕྱིར་རོ། །རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་ཐམས་ཅད་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་གཞན་དག་དང༌། གཞན་དག་གི་སེམས་ཅན་ཐམས་ཅད་ཀྱིས་མཚང་དྲུས་ཤིང་བརྡེགས་ཏེ་སྤྱོས་ཀྱང་ང་རྒྱལ་དང་བཅས་པ་དམིགས་པའི་འདུ་ཤེས་
ཅན་གྱིས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བཟོད་པ་ཡང་དག་པར་བླངས་ཏེ་གནས་པ་ལྟ་ཞོག །རབ་འབྱོར། གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་
གི་བྱེ་མ་སྙེད་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པར་གྱུར་ཏེ། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་ཡང་དག་པར་ཞུགས་ནས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་ཅིང་འཆག་པས་མངོན་པར་གནས་ཏེ། བསྐལ་པ་གངྒཱའི་ཀླུང་གི་བྱེ་མ་སྙེད་དུ་ཡི་མི་གསོད་ཅིང་
རྨུགས་པ་དང༌། གཉིད་ཀྱིས་ཟིལ་གྱིས་མ་ནོན་པར་བརྩོན་འགྲུས་དམིགས་པའི་འདུ་ཤེས་ཅན་གྱིས་ཡང་དག་པར་བླངས་ཏེ་གནས་ལ། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་
རབ་ཀྱི་ཕ་རོལ་ཏུ་ཕྱིན་པ་དང་ཐབས་མཁས་པས་ཡོངས་སུ་ཟིན་པ་གང་ཞིག་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཁྲིམས་ཀྱི་ཕུང་པོ་དང༌།
ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་དང༌། རང་སངས་རྒྱས་དེ་དག་གི་ཡང་ཚུལ་ཁྲིམས་
དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང༌། ཉན་ཐོས་དེ་དག་གི་ཡང་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་
རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང༌། སེམས་ཅན་ཐམས་ཅད་ཀྱི་འདས་པ་དང༌། མ་འོངས་པ་དང༌། ད་ལྟར་བྱུང་བའི་དགེ་བའི་རྩ་བ་མངོན་
པར་འདུས་བྱས་པ་དེ་དག་ཐམས་ཅད་གཅིག་ཏུ་བསྡུས་ཤིང་བསྡོམས་ཏེ་གཞལ་ནས་མ་ལུས་པར་བྱས་ཤིང༌། མ་ལུས་པ་ལ་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་སྟེ། དམ་པ་དང༌།
གཙོ་བོ་དང༌། རབ་དང༌། མཆོག་རབ་དང༌། གྱ་ནོམ་པ་དང༌། བླ་མ་དང༌། བླ་ན་མེད་པ་དང༌། གོང་ན་མེད་པ་དང༌། གོང་མའི་ཡང་གོང་མ་དང༌། མཉམ་པ་མེད་པ་དང༌། མི་མཉམ་པ་དང༌།
༄༅། །མཉམ་པ་དང༌། ཤིན་ཏུ་མཉམ་པ་མེད་པ་དང༌། བསམ་གྱིས་མི་ཁྱབ་པའི་རྗེས་སུ་ཡི་རང་བས་རྗེས་སུ་ཡི་རང་ལ། རྗེས་སུ་ཡི་རང་ནས་རྗེས་སུ་ཡི་རང་
བ་དང་ལྡན་པའི་བསོད་ནམས་བྱ་བའི་དངོས་པོ་བླ་ན་མེད་པ་ཡང་།དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། རབ་འབྱོར། རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་
དངོས་པོ་འདི་ལ། བྱང་ཆུབ་སེམས་དཔའ་དམིགས་པ་ཅན་སྔ་མ་དེ་དག་གི་བརྩོན་འགྲུས་ལས་བྱུང་བའི་བསོད་ནམས་མངོན་པར་འདུ་བྱེད་པ་དེས་ནི། བརྒྱའི་ཆར་ཡང་ཉེ་བར་མི་འགྲོ་།སྟོང་
གི་ཆར་ཡང༌། བརྒྱ་སྟོང་གི་ཆར་ཡང༌། བྱེ་བའི་ཆར་ཡང༌། བྱེ་བ་བརྒྱའི་ཆར་ཡང༌། བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་
འགྲོའོ། །གྲངས་སུའང༌། བགྲང་བར་ཡང༌། དཔེར་ཡང༌། དཔེས་བསྟན་པར་བྱ་བར་ཡང༌། གཞིར་ཡང༌། རྒྱུར་ཡང་མི་བཟོད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེ་
དག་ཐམས་ཅད་ནི། དམིགས་པའི་འདུ་ཤེས་ཅན་གྱིས་བརྩོན་འགྲུས་ཡང་དག་པར་བླངས་ཏེ་གནས་པའི་ཕྱིར་རོ། །རབ་འབྱོར། ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
གང་གཱའི་ཀླུང་གི་བྱེ་མ་སྙེད་ཀྱི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་
པར་ཞུགས་ནས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་ཅིང་འཆག་པས་མངོན་པར་གནས་ཏེ། བསྐལ་པ་གངྒཱའི་ཀླུང་གི་བྱེ་མ་སྙེད་དུ་ཡི་མི་གསོད་ཅིང་རྨུགས་པ་དང༌། གཉིད་ཀྱིས་ཟིལ་གྱིས་
མ་ནོན་པར་དམིགས་པའི་འདུ་ཤེས་ཅན་གྱིས་བརྩོན་འགྲུས་ཡང་དག་པར་བླངས་ཏེ་གནས་པ་ལྟ་ཞོག །རབ་འབྱོར། གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་
བྱེ་མ་སྙེད་ཀྱི་སེམས་ཅན་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ཏེ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་
པར་ཞུགས་ནས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་དམིགས་པའི་འདུ་ཤེས་ཅན་དག་གིས་བསམ་གཏན་བཞི་ལ་མཉམ་པར་བཞག་ལ། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་
རབ་ཀྱི་ཕ་རོལ་ཏུ་བྱིན་པ་འདི་དང་ཐབས་མཁས་པས་ཡོངས་སུ་ཟིན་པ་གང་ཞིག་འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཚུལ་ཁྲིམས་ཀྱི་ཕུང་
པོ་དང༌། ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་དང༌། རང་སངས་རྒྱས་དེ་དག་གི་ཚུལ་ཁྲིམས་
དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང༌། ཉན་ཐོས་དེ་དག་གི་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་
༄༅། །དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང༌། སེམས་ཅན་ཐམས་ཅད་ཀྱི་འདས་པ་དང༌། མ་འོངས་པ་དང༌། ད་ལྟར་
བྱུང་བའི་དགེ་བའི་རྩ་བ་མངོན་པར་འདུ་བྱེད་པ་དེ་དག་ཐམས་ཅད་གཅིག་ཏུ་བསྡུས་ཤིང་བསྡོམས་ཏེ་གཞལ་ནས་མ་ལུས་པར་བྱས་ཤིང་མ་ལུས་པ་ལ་རྗེས་སུ་ཡི་རང་བའི་མཆོག་གིས་
རྗེས་སུ་ཡི་རང་སྟེ། དམ་པ་དང༌། གཙོ་བོ་དང༌། རབ་དང༌། མཆོག་རབ་དང༌། གྱ་ནོམ་པ་དང༌། བླ་མ་དང༌། བླ་ན་མེད་པ་དང༌། གོང་ན་མེད་པ་དང༌། གོང་མའི་ཡང་གོང་མ་དང་མཉམ་པ་
མེད་པ་དང༌། མི་མཉམ་པ་དང་མཉམ་པ་དང༌། ཤིན་ཏུ་མཉམ་པ་མེད་པ་དང༌། བསམ་གྱིས་མི་ཁྱབ་པའི་རྗེས་སུ་ཡི་རང་བས་རྗེས་སུ་ཡི་རང་ལ། རྗེས་སུ་ཡི་རང་ནས་རྗེས་སུ་ཡི་རང་བ་དང་
ལྡན་པའི་བསོད་ནམས་བྱ་བའི་དངོས་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། རབ་འབྱོར། རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་
འདི་ལ་བྱང་ཆུབ་སེམས་དཔའ་དམིགས་པ་ཅན་གྱི་བསམ་གཏན་བཞི་ལས་བྱུང་བའི་བསོད་ནམས་མངོན་པར་འདུ་བྱེད་པ་སྔ་མ་དེས་ནི། བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆར་
ཡང༌། བརྒྱ་སྟོང་གི་ཆར་ཡང༌། བྱེ་བའི་ཆར་ཡང༌། བྱེ་བ་བརྒྱའི་ཆར་ཡང༌། བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོའོ། །
གྲངས་སུའང་བགྲང་བར་ཡང༌། དཔེར་ཡང༌། དཔེས་བསྟན་པར་བྱ་བར་ཡང༌། གཞིར་ཡང༌། རྒྱུར་ཡང་མི་བཟོད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེ་དག་ཐམས་ཅད་ནི།
དམིགས་པའི་འདུ་ཤེས་ཅན་གྱིས་བསམ་གཏན་དག་ལ་མཉམ་པར་གཞོག་པའི་ཕྱིར་རོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། རྗེས་སུ་ཡི་རང་བ་དང༌། ཡོངས་སུ་བསྔོ་
བའི་ལེའུ་ཞེས་བྱ་སྟེ། དྲུག་པའོ།། །།དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི།
ཐམས་ཅད་མཁྱེན་པའི་ཡེ་ཤེས་ཡོངས་སུ་སྒྲུབ་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཐམས་ཅད་མཁྱེན་པ་ཉིད་ལགས་སོ། །བཅོམ་ལྡན་འདས་ཀྱིས་བཀའ་
སྩལ་པ༑ དེ་དེ་བཞིན་ནོ། །ཤཱ་རིའི་བུ། ཇི་སྐད་ཟེར་བ་དེ་བཞིན་ནོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། གསལ་བར་བགྱིད་པ་ལགས་ཏེ། བཅོམ་
ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཕྱག་བགྱི་བར་འོས་པ་ལགས་སོ། །བཅོམ་ལྡན་འདས། ཤེས་རབ་ཀྱི་
ཕ་རོལ་ཏུ་ཕྱིན་པ་ནི། ཉེ་བར་གོས་པ་མེད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། འཇིག་རྟེན་ཐམས་ཅད་ཀྱིས་ཉེ་བར་མི་གོས་པ་ལགས་སོ། །བཅོམ་ལྡན་འདས།
༄༅། །ཤེས་རབ་ཀྱི་ཕ་རོལ་ཏུ་ཕྱིན་པ་ནི། སྣང་བར་བགྱིད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཁམས་གསུམ་པ་ཐམས་ཅད་ཀྱི་རབ་རིབ་
དང་བྲལ་བར་བགྱིད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཉོན་མོངས་པ་དང་ལྟ་བའི་མུན་པ་ཐམས་ཅད་སེལ་བར་བགྱིད་པ་ལགས་སོ། །བཅོམ་ལྡན་
འདས༑ ཤེས་རབ་ཀྱི་ཕ་རོལ་ཏུ་ཕྱིན་པ་ནི། བརྟེན་པར་བགྱིད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མཆོག་ཏུ་བགྱིད་པ་ལགས་སོ། །བཅོམ་ལྡན་འདས།
ཤེས་རབ་ཀྱི་ཕ་རོལ་ཏུ་ཕྱིན་པ་ནི། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་བདེ་ལེགས་སུ་བགྱིད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། སེམས་ཅན་ལྡོངས་
པ་རྣམས་ལ་སྣང་བར་བགྱིད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། འཇིགས་པ་དང༌། ཉེ་བར་འཚེ་བ་ཐམས་ཅད་རབ་ཏུ་སྤོང་བ་དང༌། སྣང་བར་བགྱིད་
པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། སྤྱན་ལྔ་ཡོངས་སུ་འཛིན་པར་བགྱིད་པས་སེམས་ཅན་ཐམས་ཅད་ལ་ལམ་སྟོན་པ་ལགས་སོ། །བཅོམ་ལྡན་འདས།
ཤེས་རབ་ཀྱི་ཕ་རོལ་ཏུ་ཕྱིན་པ་ནི། མིག་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། གཏི་མུག་དང༌། མུན་པ་དང༌། རབ་རིབ་རྣམས་དང་བྲལ་བར་བགྱིད་པ་ལགས་
སོ༑ ༑བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། རབ་རིབ་དང་བྲལ་བར་བགྱིད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཆོས་ཐམས་ཅད་མི་བགྱིད་
པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ལམ་ལོག་པར་མཆིས་པའི་སེམས་ཅན་རྣམས་ལམ་དུ་འཛུད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་
ཏུ་ཕྱིན་པ་ནི། ཐམས་ཅད་མཁྱེན་པ་ཉིད་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཉོན་མོངས་པ་དང༌། ཤེས་བྱའི་སྒྲིབ་པའི་བག་ཆགས་དང་མཚམས་སྦྱོར་བ་
ཐམས་ཅད་སྤོང་བའི་སླད་དུ་ཆོས་ཐམས་ཅད་མི་སྐྱེད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཆོས་ཐམས་ཅད་མི་འགོག་པ་ལགས་སོ། །བཅོམ་ལྡན་འདས།
ཤེས་རབ་ཀྱི་ཕ་རོལ་ཏུ་ཕྱིན་པ་ནི། མ་སྐྱེས་པ་དང༌། མ་འགགས་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། རང་གི་མཚན་ཉིད་སྟོང་པ་ཉིད་ཀྱི་སླད་དུ་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱི་ཡུམ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། སངས་རྒྱས་ཀྱི་ཆོས་རིན་པོ་ཆེ་ཐམས་ཅད་སྩོལ་བའི་སླད་དུ་སྟོབས་བཅུ་
བགྱིད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མི་འཇིགས་པ་བཞི་བགྱིད་པའི་སླད་དུ་མི་ཐུལ་བ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་
༄༅། །ཕྱིན་པ་ནི། མགོན་མ་མཆིས་པའི་སེམས་ཅན་རྣམས་ཀྱི་མགོན་བགྱིད་པ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཐེར་ཟུག་
ཏུ་གནས་པ་མ་མཆིས་པའི་སླད་དུ་འཁོར་བའི་གཉེན་པོ་ལགས་སོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཆོས་ཐམས་ཅད་ཀྱི་ངོ་བོ་ཉིད་སྟོན་པ་ལགས་སོ། །བཅོམ་
ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་འཁོར་ལོ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བ་ཡོངས་སུ་རྫོགས་
པ་ལགས་སོ། །བཅོམ་ལྡན་འདས། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པར་བགྱི། བཅོམ་ལྡན་འདས། ཤེས་རབ་ཀྱི་ཕ་
རོལ་ཏུ་ཕྱིན་པ་ལ་ཇི་ལྟར་ཡིད་ལ་བགྱི། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཇི་ལྟར་ཕྱག་འཚལ་བར་བགྱི། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་
དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། སྟོན་པ་ལ་ཇི་ལྟ་བར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དེ་ལྟར་གནས་པར་བྱའོ། །ཤཱ་རིའི་བུ། སྟོན་པ་ལ་ཇི་ལྟ་
བར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དེ་ལྟར་ཡིད་ལ་བྱའོ། །ཤཱ་རིའི་བུ། སྟོན་པ་ལ་ཇི་ལྟ་བར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དེ་ལྟར་ཕྱག་བྱའོ། །དེ་ནས་ལྷ་རྣམས་ཀྱི་དབང་པོ་བརྒྱ་
བྱིན་འདི་སྙམ་དུ་སེམས་ཏེ། ཀྱེ་མའོ། །འཕགས་པ་ཤཱ་རིའི་བུ་ཅིའི་ཕྱིར་འདི་འདྲི་བར་གྱུར། ཀྱེ་མ་འཕགས་པ་ཤཱ་རིའི་བུ་ཅིའི་གཞི་ལས་འདི་འདྲི་བར་གྱུར་སྙམ་མོ། །དེ་ནས་ལྷ་རྣམས་ཀྱི་
དབང་པོ་བརྒྱ་བྱིན་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །འཕགས་པ་ཤཱ་རིའི་བུ་ཅིའི་ཕྱིར་འདི་འདྲི་བར་གྱུར། འཕགས་པ་ཤཱ་རིའི་བུ་ཅིའི་གཞི་ལས་འདི་འདྲི་བར་གྱུར།
དེ་སྐད་ཅེས་སྨྲས་པ་དང༌། ཚེ་དང་ལྡན་པ་ཤཱ་རིའི་བུས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ །ཤེས་རབ་ཀྱི་ཕ་རོལ་ཏུ་ཕྱིན་པའི་ཐབས་མཁས་པས་ཡོངས་སུ་
ཟིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བར་བྱེད་པས་བྱང་ཆུབ་སེམས་
དཔའ་དམིགས་པ་ཅན་སྔ་མ་དེ་དག་ཐམས་ཅད་ཀྱི་སྦྱིན་བ་ལས་བྱུང་བའི་བསོད་ནམས་མངོན་པར་འདུ་བྱེད་པ་གང་ཡིན་པ་དང༌། ཚུལ་ཁྲིམས་ལས་བྱུང་བ་གང་ཡིན་པ་དང༌། བཟོད་པ་ལས་
བྱུང་བ་གང་ཡིན་པ་དང༌། བརྩོན་འགྲུས་ལས་བྱུང་བ་གང་ཡིན་པ་དང༌། བསམ་གཏན་ལས་བྱུང་བའི་བསོད་ནམས་མངོན་པར་འདུ་བྱེད་པ་གང་ཡིན་པ་དེ་དག་ཐམས་ཅད་ཟིལ་གྱིས་གནོན་
ཏེ། དེས་ན་བདག་ནི། གཞི་འདི་ལས་འདི་འདྲི་བར་གྱུར་ཏོ། །ཀཽ་ཤི་ཀ །ཡང་འོན་ཀྱང་ཕ་རོལ་ཏུ་ཕྱིན་པ་ལྔ་པོ་རྣམས་ཐམས་ཅད་མཁྱེན་པ་ཉིད་ཀྱི་ལམ་དུ་འཇུག་པའི་ཕྱིར་ཤེས་རབ་ཀྱི་ཕ་
༄༅། །རོལ་ཏུ་ཕྱིན་པ་ཉིད་སྔོན་དུ་འགྲོ་བ་ཡིན་ནོ། །ཀཽ་ཤི་ཀ །འདི་ལྟ་སྟེ། དཔེར་ན། དམུས་ལོང་བརྒྱའམ། སྟོང་ངམ། བརྒྱ་སྟོང་ཡང་རུང་ཡོངས་སུ་འདྲེན་པ་
མེད་ན༑ ལམ་དུ་འཇུག་པའི་སྐལ་པ་མེད་ཅིང་གྲོང་ངམ། གྲོང་ཁྱེར་རམ། གྲོང་རྡལ་དུ་འགྲོ་བའི་སྐལ་པ་མེད་དོ། །ཀཽ་ཤི་ཀ །དེ་བཞིན་དུ་སྦྱིན་པ་དང༌། ཚུལ་ཁྲིམས་དང༌། བཟོད་
པ་དང༌། བརྩོན་འགྲུས་དང༌། བསམ་གཏན་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བས་ནི། ཕ་རོལ་ཏུ་ཕྱིན་པའི་མིང་མི་ཐོབ་ཅིང་དམུས་ལོང་དུ་གྱུར་པ་ཡིན་ཏེ། ཡོངས་སུ་
འདྲེན་པ་མེད་པའི་ཕྱིར་ཐམས་ཅད་མཁྱེན་པ་ཉིད་ཀྱི་ལམ་དུ་འཇུག་པའི་སྐལ་བའང་མེད་ན། ཐམས་ཅད་མཁྱེན་པའི་གྲོང་ཁྱེར་ཆེན་པོར་འཇུག་པའམ། རྗེས་སུ་ཐོབ་པར་ལྟའང་ག་ལ་
འགྱུར༑ ཀཽ་ཤི་ཀ །ཡང་གང་གི་ཚེ་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་རྣམས་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་བར་
གྱུར་པ་དེའི་ཚེ་ཕ་རོལ་ཏུ་ཕྱིན་པའི་མིང་དང༌། ཕ་རོལ་ཏུ་ཕྱིན་པའི་སྒྲ་འཐོབ་སྟེ། དེའི་ཚེ་ནི། ཕ་རོལ་ཏུ་ཕྱིན་པ་ལྔ་པོ་འདི་དག་ཐམས་ཅད་མཁྱེན་པའི་ལམ་དུ་འཇུག་པ་དང༌། ཐམས་
ཅད་མཁྱེན་པ་རྗེས་སུ་ཐོབ་པར་བྱ་བའི་དོན་དུ་མིག་རབ་ཏུ་ཐོབ་པ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་
ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པར་བགྱི། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་
འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། གཟུགས་མངོན་པར་མི་སྒྲུབ་པར་བལྟའོ། །ཤཱ་རིའི་བུ། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་མངོན་
པར་མི་སྒྲུབ་པར་བལྟའོ། །ཤཱ་རིའི་བུ། ཕུང་པོ་ལྔ་རྣམས་མངོན་པར་མི་སྒྲུབ་པ་གང་ཡིན་པ་དེ་ནི། ཤཱ་རིའི་བུ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མངོན་པར་སྒྲུབ་པ་ཞེས་བརྗོད་དོ། །དེ་ལྟར་མངོན་
པར་འདུ་མི་བྱེད་པས་ཕུང་པོ་ལྔ་རྣམས་ལ་མངོན་པར་སྒྲུབ་པ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མངོན་པར་སྒྲུབ་པ་སྟེ། མངོན་པར་སྒྲུབ་པ་ཞེས་བརྗོད་དོ། །དེ་སྐད་ཅེས་བཀའ་སྩལ་པ་དང༌།
བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལྟར་མངོན་པར་བསྒྲུབས་པས་ཆོས་གང་ཞིག་གཏོད་པར་
བགྱིད༑ བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལྟར་མངོན་པར་བསྒྲུབས་པས་ནི། ཆོས་གང་ཡང་གཏོད་པར་མི་བྱེད་དོ། །ཤཱ་རིའི་བུ། གང་
གང་གི་ཚེ་ཆོས་གང་ཡང་གཏོད་པར་མི་བྱེད་པ་དེའི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བའི་གྲངས་སུ་འགྲོའོ། །དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་
༄༅། །ཅེས་གསོལ་ཏོ། །བཅོམ་ལྡན་འདས། ཅི་ཤེས་རབ་ཀྱི་ཕ་རོལ་ཏུ་ཕྱིན་པ་འདིས་ཐམས་ཅད་མཁྱེན་པ་ཉིད་ཀྱང་གཏོད་པར་མི་བགྱིད་ལགས་སམ། བཅོམ་
ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །འདི་སྐད་དུ་ཅི་ཤེས་རབ་ཀྱི་ཕ་རོལ་ཏུ་ཕྱིན་པ་འདིས་ཐམས་ཅད་མཁྱེན་པ་ཉིད་ཀྱང་གཏོད་པར་མི་བགྱིད་ལགས་སམ། ཞེས་ཟེར་བ་ནི།
ཇི་ལྟར་དམིགས་པ་དེ་ལྟར་གཏོད་པར་མི་བྱེད་དོ། །མིང་ཇི་ལྟ་བ་དེ་ལྟར་གཏོད་པར་མི་བྱེད་དོ། །མངོན་པར་འདུ་བྱེད་པ་ཇི་ལྟ་བ་དེ་ལྟར་གཏོད་པར་མི་བྱེད་དོ། །བརྒྱ་བྱིན་གྱིས་གསོལ་པ།
བཅོམ་ལྡན་འདས། འོ་ན་ཇི་ལྟར་གཏོད་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །ཇི་ལྟར་གཏོད་པར་མི་བྱེད་པ་དེ་ལྟར་གཏོད་པར་བྱེད་དོ། །བརྒྱ་བྱིན་གྱིས་
གསོལ་པ། བཅོམ་ལྡན་འདས། ཇི་སྲིད་དུ་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདིས་ཆོས་གང་ཡང་མི་སྐྱེད་མི་འགོག་པ་དང༌། ཆོས་ཐམས་ཅད་སྐྱེ་བ་མ་མཆིས་པ་དང༌། འགོག་
པ་མ་མཆིས་པའི་སླད་དུ་ཉེ་བར་གནས་ལ་གནས་པའང་མ་ལགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི། ངོ་མཚར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་
འདི་སྐད་ཅེས་གསོལ་ཏོ། །བཅོམ་ལྡན་འདས། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཡང་འདུ་ཤེས་པར་བགྱིད་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་རིང་དུ་
བགྱིད༑ ཤེས་རབ་ཀྱི་ཕ་རོལ་ཏུ་ཕྱིན་པ་འདི་གསོག་ཏུ་བགྱིད། ཤེས་རབ་ཀྱི་ཕ་རོལ་ཏུ་ཕྱིན་པ་འདི་གསོབ་ཏུ་བགྱིད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་མི་བགྱིད་པ་ལགས་སོ། །དེ་སྐད་
ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ནོ། །རབ་འབྱོར། དེ་དེ་བཞིན་ཏེ། རབ་འབྱོར། རྣམ་གྲངས་གང་
གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་རྒྱང་རིང་དུ་བྱེད་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་འདི་གསོག་ཏུ་བྱེད་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་འདི་གསོབ་ཏུ་བྱེད་པ་དང༌། ཤེས་
རབ་ཀྱི་ཕ་རོལ་ཏུ་ཕྱིན་པ་འདི་མི་བྱེད་པར་འགྱུར་བའི་རྣམ་གྲངས་འདི་ནི། ཡོད་དོ། །དེ་ཅིའི་ཕྱིར་ཞེ་ན། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡོངས་སུ་གསལ་བར་བྱས་ན།
གཟུགས་ཡོངས་སུ་གསལ་བར་བྱས་པ་མ་ཡིན། ཚོར་བ་མ་ཡིན། འདུ་ཤེས་མ་ཡིན། འདུ་བྱེད་རྣམས་མ་ཡིན། རྣམ་པར་ཤེས་པ་ཡོངས་སུ་གསལ་བར་བྱས་པ་མ་ཡིན། རྒྱུན་དུ་ཞུགས་
པའི་འབྲས་བུ་ཡོངས་སུ་གསལ་བར་བྱས་པ་མ་ཡིན། ལན་ཅིག་ཕྱིར་འོང་བའི་འབྲས་བུ་ཡོངས་སུ་གསལ་བར་བྱས་པ་མ་ཡིན། ཕྱིར་མི་འོང་བའི་འབྲས་བུ་ཡོངས་སུ་གསལ་བར་བྱས་
པ་མ་ཡིན། དགྲ་བཅོམ་པ་ཉིད་ཡོངས་སུ་གསལ་བར་བྱས་པ་མ་ཡིན། རང་སངས་རྒྱས་ཉིད་ཡོངས་སུ་གསལ་བར་བྱས་པ་མ་ཡིན། སངས་རྒྱས་ཉིད་ཡོངས་སུ་གསལ་བར་བྱས་པ་མ་
༄༅། །ཡིན་ནོ། །གནས་བརྟན་རབ་འབྱོར་གྱིས་གསོལ་པ། བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཕ་རོལ་ཏུ་ཕྱིན་པ་ཆེན་པོ་ལགས་སོ། །
བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། རྣམ་གྲངས་གང་གིས་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཕ་རོལ་ཏུ་ཕྱིན་པ་ཆེན་པོ་ཡིན།
གནས་བརྟན་རབ་འབྱོར་གྱིས་གསོལ་པ། བཅོམ་ལྡན་འདས། གཟུགས་ཆེན་པོར་མི་བགྱིད། ཆུང་ངུར་མི་བགྱིད། གཟུགས་སྡུད་པར་མི་བགྱིད། གཡེང་པར་མི་བགྱིད་དོ། །
དེ་བཞིན་དུ་ཚོར་བ་མ་ལགས། འདུ་ཤེས་མ་ལགས། འདུ་བྱེད་རྣམས་མ་ལགས་ཏེ། བཅོམ་ལྡན་འདས། རྣམ་པར་ཤེས་པ་ཆེན་པོར་མི་བགྱིད། ཆུང་ངུར་མི་བགྱིད། རྣམ་པར་
ཤེས་པ་སྡུད་པར་མི་བགྱིད། གཡེང་པར་མི་བགྱིད་དོ། །དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་གང་ལགས་པ་དེ་དག་ཀྱང་སྟོབས་དང་ལྡན་པར་ཡང་མི་
བགྱིད༑ སྟོབས་མ་མཆིས་པར་ཡང་མི་བགྱིད། སྡུད་པར་མི་བགྱིད། གཡེང་པར་མི་བགྱིད་དོ། །ཐམས་ཅད་མཁྱེན་པ་གང་ལགས་པ་དེའང་ཆེན་པོར་མི་བགྱིད། ཆུང་ངུར་མི་
བགྱིད༑ སྡུད་པར་མི་བགྱིད། གཡེང་པར་མི་བགྱིད་དོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཐམས་ཅད་མཁྱེན་པ་ཉིད་ནི། མ་བསྡུས། མ་གཡེངས་པ་ལགས་སོ། །
བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གལ་ཏེ་དེ་ལྟར་འཚལ་ནའང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་མ་ལགས་ན། བདག་ནི། ཐམས་ཅད་མཁྱེན་པའི་
ཡེ་ཤེས་དང་ལྡན་པ་སྟེ། འདི་ལྟར་སེམས་ཅན་རྣམས་ལ་ཆོས་བསྟན་པར་བྱའོ། །འདི་ལྟར་སེམས་ཅན་འདི་དག་ཡོངས་སུ་མྱ་ངན་ལས་འདའ་བར་བྱའོ། །སྙམ་དུ་འཚལ་བ་ལྟ་སྨོས་སུ་ཅི་མཆིས།
དེ་ཅིའི་སླད་དུ་ཞེ་ན། སེམས་ཅན་འདི་དག་ཡོངས་སུ་མྱ་ངན་ལས་འདའོ། །སྙམ་པ་གང་ལགས་པ་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་མཐུན་པ་མ་ལགས་ཏེ། སེམས་ཅན་དུ་དམིགས་
པ་འདི་ཉིད་དེའི་དམིགས་པ་ཆེན་པོར་འགྱུར་རོ། །དེ་ཅིའི་སླད་དུ་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ནི། སེམས་ཅན་ངོ་བོ་ཉིད་མ་མཆིས་པ་དང༌། སྐྱེ་བ་མ་མཆིས་པའི་རང་བཞིན་ཅན་དུ་རིག་
པར་བགྱི་སྟེ། སེམས་ཅན་ངོ་བོ་ཉིད་མ་མཆིས་པས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ངོ་བོ་ཉིད་མ་མཆིས་པར་རིག་པར་བགྱིའོ། །སེམས་ཅན་དབེན་པས་ན། ཤེས་རབ་ཀྱི་ཕ་རོལ་ཏུ་ཕྱིན་པ་
དབེན་པར་རིག་པར་བགྱིའོ། །སེམས་ཅན་བསམ་གྱིས་མི་ཁྱབ་པས་ན། ཤེས་རབ་ཀྱི་ཕ་རོལ་ཏུ་ཕྱིན་པ་བསམ་གྱིས་མི་ཁྱབ་པར་རིག་པར་བགྱིའོ། །སེམས་ཅན་མི་འཇིག་པའི་ཆོས་ཉིད་
ལགས་པས་ན། ཤེས་རབ་ཀྱི་ཕ་རོལ་ཏུ་ཕྱིན་པ་མི་འཇིག་པའི་ཆོས་ཉིད་དུ་རིག་པར་བགྱིའོ། །སེམས་ཅན་མངོན་པར་རྫོགས་པར་འཚང་མི་རྒྱ་བས་ན། ཤེས་རབ་ཀྱི་ཕ་རོལ་ཏུ་ཕྱིན་པ་
༄༅། །མངོན་པར་རྫོགས་པར་འཚང་མི་རྒྱ་བར་རིག་པར་བགྱིའོ། །སེམས་ཅན་ཡང་དག་པའི་དོན་ཇི་ལྟ་བ་བཞིན་དུ་མངོན་པར་རྫོགས་པར་འཚང་མི་རྒྱ་བས་ན།
ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པའི་དོན་ཇི་ལྟ་བ་བཞིན་དུ་མངོན་པར་རྫོགས་པར་འཚང་མི་རྒྱ་བར་རིག་པར་བགྱིའོ། །སེམས་ཅན་སྟོབས་ཡང་དག་པར་སྒྲུབ་པས་ན། དེ་
བཞིན་གཤེགས་པའི་སྟོབས་ཡང་དག་པར་སྒྲུབ་པར་རིག་པར་བགྱི་སྟེ། བཅོམ་ལྡན་འདས། རྣམ་གྲངས་འདིས་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཕ་རོལ་ཏུ་
ཕྱིན་པ་ཆེན་པོ་ལགས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་
པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་མོས་ཤིང་ནེམ་ནུར་མི་བགྱིད། ཐེ་ཚོམ་མི་འཚལ། རྨོངས་པར་མི་འགྱུར་ན། བཅོམ་ལྡན་འདས། དེ་གང་ནས་ཤི་འཕོས་
ནས་འདིར་སྐྱེས་པར་རིག་པར་བགྱི། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་འདིའི་དོན་དང༌། ཆོས་ཉིད་དང༌། དོན་གྱི་ཚུལ་དང༌། ཆོས་ཉིད་ཀྱི་ཚུལ་གྱི་རྗེས་སུ་འགྲོ་
བར་འགྱུར་ལ་རྗེས་སུ་འཚལ་བར་འགྱུར་ཞིང༌། རྗེས་སུ་རྟོགས་པར་བགྱིད་པར་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡུན་རིང་པོ་ཇི་སྲིད་ཅིག་ཏུ་སྤྱད་ཅིང་
ཚུལ་བསྲུངས་པར་རིག་པར་བགྱི། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། བྱང་ཆུབ་སེམས་
དཔའ་སེམས་དཔའ་ཆེན་པོ་དེ་ནི། སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་བྱས་ཤིང་ཡོངས་སུ་དྲིས་ནས་འཇིག་རྟེན་གྱི་ཁམས་གཞན་དག་ནས་ཤི་འཕོས་ཏེ་འདིར་
སྐྱེས་པར་རིག་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་བྱས་ཤིང་
ཡོངས་སུ་དྲིས་ནས་འཇིག་རྟེན་གྱི་ཁམས་གཞན་དག་ནས་ཤི་འཕོས་ཏེ་འདིར་སྐྱེས་པར་གྱུར་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཆད་པ་དང༌། སྟོན་པ་དང༌། ཉེ་བར་སྟོན་པ་
དང༌། ལུང་འབོགས་པ་ཉན་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སྟོན་པར་འདུ་ཤེས་བསྐྱེད་དོ། །བདག་གི་སྟོན་པ་མངོན་སུམ་དུ་གྱུར་ཏེ་
བདག་གི་སྟོན་པ་མཐོང་ངོ༌། །སྙམ་དུ་སེམས་བསྐྱེད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་ལ་རྣ་བ་བླགས་ནས་གུས་
པར་ཉན་ཏེ་གཏམ་གྱི་བར་ཆད་མི་བྱེད་དོ། །ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཡུན་རིང་པོར་སྤྱད་ཅིང་ཚུལ་བསྲུངས་པ་དེ་ལྟ་བུའི་རང་བཞིན་དུ་རིག་པར་
༄༅། །བྱའོ༑ ༑ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། སངས་རྒྱས་མང་པོ་ལ་བསྙེན་བཀུར་བྱས་པ་དེ་ལྟ་བུའི་ཚུལ་དུ་རིག་པར་བྱའོ། །དེ་
ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་མཉན་པའམ། རྟོགས་
པའམ༑ བསམ་པའམ། བསྐྱེད་པའམ། ཉེ་བར་གཟུང་བར་ནུས་སམ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ནི། འདིའོ། ཞེའམ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་འདི་ལའོ། །
ཞེའམ༑ ཤེས་རབ་ཀྱི་ཕ་རོལ་ཏུ་ཕྱིན་པ་དེ་ནི། ག་གེ་མོ་ཞིག་ནའོ། །ཞེས་སམ། རྣམ་པ་དང༌། རྟགས་དང༌། མཚན་མ་འདིས་སོ། །ཞེས་ཀྱང་བསྟན་པའམ་མཉན་པར་ནུས་སམ།
བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ཏེ། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཕུང་པོའམ། ཁམས་སམ། སྐྱེ་མཆེད་དུ་བསྟན་
པའམ༑ མཉན་པའམ། རྟོགས་པའམ། བསམ་པའམ། བསྐྱེད་པའམ། ཉེ་བར་གཟུང་བར་མི་ནུས་སོ། །དེ་ཅིའི་ཕྱིར་ཞེ་ན། རབ་འབྱོར། ཆོས་ཐམས་ཅད་དབེན་པ་ཉིད་
དང༌། ཆོས་ཐམས་ཅད་ཤིན་ཏུ་དབེན་པ་ཉིད་ཡིན་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། བསྟན་པའམ། མཉན་པའམ། རྟོགས་པའམ། བསམ་པའམ། བསྐྱེད་
པའམ༑ ཉེ་བར་གཟུང་བར་མི་ནུས་སོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཕུང་པོ་དང༌། ཁམས་དང༌། སྐྱེད་མཆེད་ལས་གཞན་ནའང་མེད་པར་རིག་པར་བྱ་སྟེ། དེ་ཅིའི་ཕྱིར་ཞེ་ན། རབ་
འབྱོར༑ ཕུང་པོ་དང༌། ཁམས་དང༌། སྐྱེ་མཆེད་ཉིད་སྟོང་པ། དབེན་པ། ཞི་བས་སོ། །དེ་ལྟར་ན། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཕུང་པོ་དང༌། ཁམས་དང༌། སྐྱེ་མཆེད་འདི་ནི། གཉིས་
སུ་མེད་དེ། གཉིས་སུ་བྱར་མེད་དོ། །སྟོང་པ་དང༌། དབེན་པ་དང༌། ཞི་བའི་ཕྱིར་དམིགས་སུ་མེད་དེ། ཆོས་ཐམས་ཅད་ཀྱི་མི་དམིགས་པ་གང་ཡིན་པ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་
ཞེས་བརྗོད་དོ། །གང་གི་ཚེ་འདུ་ཤེས་པ་དང༌། ཀུན་ཤེས་པ་དང༌། བཏགས་པ་དང༌། ཐ་སྙད་མི་འབྱུང་བ་དེའི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །གནས་བརྟན་རབ་འབྱོར་གྱིས་
གསོལ་པ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་རྣལ་འབྱོར་དུ་བགྱིད་པ་དེ་ཡུན་རིང་པོ་ཇི་སྲིད་ཅིག་
སྤྱད་ཅིང་ཚུལ་བསྲུངས་པར་རིག་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དབང་པོའི་རིམ་པ་ཡོད་
པས་འདི་ནི། རྣམ་པར་ཕྱེ་སྟེ་ལུང་བསྟན་པར་བྱ་བ་ཡིན་ནོ། །རབ་འབྱོར། ཡང་རྣམ་གྲངས་གང་གིས་བྱང་ཆུབ་སེམས་དཔའ་རྣམས་སངས་རྒྱས་བརྒྱ་ཕྲག་མང་པོ་དང༌། སངས་
༄༅། །རྒྱས་སྟོང་ཕྲག་མང་པོ་དང༌། སངས་རྒྱས་བརྒྱ་སྟོང་ཕྲག་མང་པོ་དག་མཐོང་ནས་དེ་དག་གི་དྲུང་དུ་ཚངས་པར་སྤྱོད་པ་སྤྱད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་
འདི་ལ་མ་དད་མ་མོས་པར་འགྱུར་བའི་རྣམ་གྲངས་ཀྱང་ཡོད་དོ། །དེ་ཅིའི་ཕྱིར་ཞེ་ན། སྔོན་ཡང་སངས་རྒྱས་བཅོམ་ལྡན་འདས་དེ་དག་གི་ཐད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་
མོ་འདི་འཆད་པ་དང༌། སྟོན་པ་དང༌། ཉེ་བར་སྟོན་པ་ལ་མ་གུས་སོ། །མ་གུས་པས་ལེགས་པར་མི་ཉན་ཏོ། །ལེགས་པར་མི་ཉན་བས་བསྙེན་བཀུར་མི་བྱེད་དོ། །བསྙེན་བཀུར་
མི་བྱེད་པས་ཡོངས་སུ་མི་འདྲིའོ། །ཡོངས་སུ་མ་དྲིས་པས་མངོན་པར་མི་དད་དོ། །མངོན་པར་མ་དད་པས་འཁོར་དེ་ནས་འབྱོལ་ཏེ། དེ་དག་གཞི་དེ་ལས་ཆོས་ཀྱིས་ཕོངས་པར་
འགྱུར་བ་དང་མཐུན་པའི་ལས་བྱས་ཤིང་བསགས་ལ། ཀུན་ནས་བསགས་ཤིང་ཉེ་བར་བསགས་པས་ད་ལྟར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཆད་པ་དང༌།
སྟོན་པ་དང༌། ཉེ་བར་སྟོན་པ་ན། མ་གུས་པས་འབྱོལ་ཞིང་མ་དད་ལ་མོས་པར་མི་བྱེད་པས་ལུས་དང༌། སེམས་ཀྱི་ཚོགས་པ་སྒྲུབ་པར་མི་བྱེད་དོ། །ཚོགས་པ་སྒྲུབ་པར་མི་བྱེད་
པས་ནི༑ ཤེས་རབ་ཀྱི་ཕ་རོལ་ཏུ་ཕྱིན་པ་འདི་མི་ཤེས། མི་མཐོང༌། ཁོང་དུ་མི་ཆུད། རིག་པར་མི་བྱེད་དེ། དེ་དག་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མ་དད་པར་འགྱུར་རོ། །
མ་དད་པ་ནི། མི་ཉན་ཏོ། །མ་ཉན་པས་ནི། མི་ཤེས་སོ། །མ་ཤེས་པས་ནི། མི་མཐོང་ངོ༌། །མ་མཐོང་བས་ནི། ཁོང་དུ་མི་ཆུད་དོ། །ཁོང་དུ་མ་ཆུད་པ་ནི། ཆོས་ཀྱིས་ཕོངས་པར་འགྱུར་བ་དང་
མཐུན་པའི་ལས་བྱེད། ཡང་དག་པར་གསོག་པར་བྱེད། ཀུན་ཏུ་གསོག་པར་བྱེད། ཉེ་བར་གསོག་པར་བྱེད་དོ། །དེ་དག་ཆོས་ཀྱིས་ཕོངས་པར་འགྱུར་བ་དང་མཐུན་པའི་ལས་བྱས་པ་དང༌།
བསགས་པ་དང༌། ཀུན་ནས་བསགས་པ་དང༌། ཉེ་བར་བསགས་པ་དེས་ཤེས་རབ་འཆལ་བར་འགྱུར་བ་དང་མཐུན་པའི་ལས་མངོན་པར་འདུ་བྱེད་པར་འགྱུར་རོ། །དེ་དག་ཤེས་རབ་འཆལ་བར་
འགྱུར་བ་དང་མཐུན་པའི་ལས་མངོན་པར་འདུས་བྱས་པ་དང༌། བསགས་པ་དང༌། ཀུན་ནས་བསགས་པ་དང༌། ཉེ་བར་བསགས་པ་དེས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པ་དང༌། སྟོན་པ་དང༌།
ཉེ་བར་སྟོན་པ་ན་སྤོང་བར་འགྱུར། སྐུར་བར་འགྱུར། མི་སྙན་པར་བརྗོད་པར་འགྱུར་ཏེ། སྐུར་ནས་ཀྱང་འབྱོལ་བར་འགྱུར་རོ། །རབ་འབྱོར། ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སྤོང་བ་དང་
སྐུར་པ་དང༌། མི་སྙན་པར་བརྗོད་པས་ནི། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཐམས་ཅད་མཁྱེན་པ་ཉིད་སྤོང་བར་འགྱུར། སྐུར་པར་
འགྱུར༑ མི་སྙན་པར་བརྗོད་པར་འགྱུར་ཏེ། དེ་དག་ནི། རང་གི་རྒྱུད་བཅོམ་ཞིང་བསྲེགས་ནས་བློ་ཆུང་བ། ཤེས་རབ་ཆུང་བ། བསོད་ནམས་ཆུང་བ། དགེ་བའི་རྩ་བ་ཆུང་བའི་གང་ཟག་དད་པ་ཙམ་
༄༅། །དང་ལྡན་པ། དགའ་བ་ཙམ་དང་ལྡན་པ། དང་བ་ཙམ་དང་ལྡན་པ། འདུན་པ་ཙམ་དང་ལྡན་པ། ལས་དང་པོ་པ། སྐལ་བ་མེད་པའི་རང་བཞིན་ཅན་གཞན་རྣམས་
ཀྱིའང་དད་པ་ཙམ་དང༌། དགའ་བ་ཙམ་དང༌། དང་བ་ཙམ་དང༌། འདུན་པ་ཙམ་དེའང་ཕྱིར་ཟློག་ཅིང་འབྲལ་བར་བྱེད། ལྡོག་པར་བྱེད་དེ། འདི་ལ་བསླབ་པར་མི་བྱའོ། །ཞེས་སྨྲ་ཞིང༌། འདི་ནི།
སངས་རྒྱས་ཀྱི་གསུང་མ་ཡིན་ནོ། །ཞེས་ཚིག་ཏུ་བརྗོད་པར་འགྱུར་རོ། །དེ་ལྟར་དེ་དག་བདག་གི་རྒྱུད་བཅོམ་ཞིང་ཕྲལ་ཏེ་གཞན་གྱི་རྒྱུད་ཀྱང་བཅོམ་ཞིང་ཕྲལ་ནས་ཤེས་རབ་ཀྱི་ཕ་རོལ་ཏུ་
ཕྱིན་པ་ལ་སྐུར་པ་འདེབས་པར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྐུར་པ་བཏབ་ན་ཐམས་ཅད་མཁྱེན་པ་ཉིད་ལ་སྐུར་པ་བཏབ་པར་འགྱུར་རོ། །ཐམས་ཅད་མཁྱེན་པ་ཉིད་ལ་
སྐུར་པ་བཏབ་ན། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་སྐུར་པ་བཏབ་པར་འགྱུར་རོ། །དེ་ལྟར་དེ་དག་སངས་རྒྱས་བཅོམ་ལྡན་འདས་
རྣམས་ཀྱི་དྲུང་ནས་འབྱོལ་བར་འགྱུར། ཆོས་ཀྱིས་ཡོངས་སུ་བཏང་བར་འགྱུར། དགེ་འདུན་ལས་ཡོངས་སུ་ཕྱི་རོལ་ཏུ་འགྱུར་རོ། །དེ་ལྟར་དེ་རྣམས་ཐམས་ཅད་ནས་ཐམས་ཅད་རྣམ་པ་ཐམས་
ཅད་དུ་ཐམས་ཅད་དཀོན་མཆོག་གསུམ་ལས་ཕྱི་རོལ་ཏུ་འགྱུར་ཏེ། དེ་དག་སེམས་ཅན་རྣམས་ལ་ཕན་པ་དང༌། བདེ་བ་ཉེ་བར་གཅོད་པར་བྱེད་པས་སེམས་ཅན་དམྱལ་བ་ཆེན་པོ་རྣམས་སུ་
རྣམ་པར་སྨིན་པར་འགྱུར་བ་དང་མཐུན་པའི་ལས་ཉེ་བར་གསོག་པར་འགྱུར་རོ། །དེ་དག་དེ་ལྟ་བུའི་ལས་མངོན་པར་འདུ་བྱེད་པ་དང༌། ཉེ་བར་བཞག་པ་དང༌། ཀུན་ནས་བསླང་བ་དང༌། ཆོས་ཀྱིས་
ཕོངས་པར་འགྱུར་བ་དང་མཐུན་པ་དང༌། ཤེས་རབ་འཆལ་བར་འགྱུར་བ་དང་མཐུན་པའི་རང་བཞིན་དེ་ཉིད་ཀྱིས་ལོ་བརྒྱ་ཕྲག་མང་པོ་དང༌། ལོ་སྟོང་ཕྲག་མང་པོ་དང༌། ལོ་བརྒྱ་སྟོང་ཕྲག་མང་པོ་དང༌། ལོ་བྱེ་
བ་བརྒྱ་ཕྲག་མང་པོ་དང༌། ལོ་བྱེ་བ་སྟོང་ཕྲག་མང་པོ་དང༌། ལོ་བྱེ་བ་བརྒྱ་སྟོང་ཕྲག་མང་པོ་དང༌། ལོ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོར་སེམས་ཅན་དམྱལ་བ་ཆེན་པོ་རྣམས་སུ་ལྟུང་བར་འགྱུར་རོ། །
དེ་དག་སེམས་ཅན་དམྱལ་བ་ཆེན་པོ་ནས་སེམས་ཅན་དམྱལ་བ་ཆེན་པོར་འགྲོ་བར་འགྱུར་ཏེ། དེ་དག་དེ་ལྟར་ཡུན་རིང་པོར་སེམས་ཅན་དམྱལ་བ་ཆེན་པོ་ནས་སེམས་ཅན་དམྱལ་བ་ཆེན་པོར་འཕོ་བ་
ན༑ མེས་འཇིག་པའི་བསྐལ་པ་འབྱུང་བར་འགྱུར་རོ། །མེས་འཇིག་པའི་བསྐལ་པ་བྱུང་བ་ན། འཇིག་རྟེན་གྱི་ཁམས་གཞན་དག་ན་སེམས་ཅན་དམྱལ་བ་ཆེན་པོ་གང་དག་ཡོད་པ་དེ་དག་ཏུ་འདོར་བར་
འགྱུར་ཏེ། དེ་དག་སེམས་ཅན་དམྱལ་བ་ཆེན་པོ་དེ་དག་ཏུ་ལྟུང་བར་འགྱུར་རོ། །དེར་བོར་ཏེ་སེམས་ཅན་དམྱལ་བ་ཆེན་པོ་དེ་དག་ཏུ་ལྟུང་བར་གྱུར་པ་དེ་དག །དེར་ཡང་སེམས་ཅན་དམྱལ་བ་ཆེན་པོ་ནས་
སེམས་ཅན་དམྱལ་བ་ཆེན་པོར་འཕོ་བར་འགྱུར་རོ། །དེ་དག་དེར་ཡང་སེམས་ཅན་དམྱལ་བ་ཆེན་པོ་ནས་སེམས་ཅན་དམྱལ་བ་ཆེན་པོར་འཕོ་བ་ན་དེར་ཡང་སླར་དེ་ཁོ་ན་བཞིན་དུ་མེས་འཇིག་པའི་བསྐལ་
༄༅། །པ་འབྱུང་བར་འགྱུར་རོ། །དེ་དག་མེས་འཇིག་པའི་བསྐལ་པ་བྱུང་བ་ན་དེ་ནས་ཤི་འཕོས་མ་ཐག་ཏུ་འཇིག་རྟེན་གྱི་ཁམས་གཞན་དག་ན་སེམས་ཅན་དམྱལ་བ་ཆེན་པོ་
ཡོད་པ་དེར་འདོར་ཏེ། དེ་དག་སེམས་ཅན་དམྱལ་བ་ཆེན་པོ་དེ་དག་ཏུ་སྐྱེ་བར་འགྱུར་རོ། །དེར་ཡང་དེ་ཁོ་ན་བཞིན་དུ་སེམས་ཅན་དམྱལ་བ་ཆེན་པོ་ནས་སེམས་ཅན་དམྱལ་བ་ཆེན་པོར་འཕོ་བར་
འགྱུར་རོ། །དེ་དག་དེར་ཡང་ཡུན་རིང་པོར་སེམས་ཅན་དམྱལ་བ་ཆེན་པོ་ནས་སེམས་ཅན་དམྱལ་བ་ཆེན་པོར་འཕོ་བ་ན་དེར་ཡང་མེས་འཇིག་པའི་བསྐལ་པ་འབྱུང་བར་འགྱུར་རོ། །དེ་དག་
ཏུ་མེས་འཇིག་པའི་བསྐལ་པ་བྱུང་བ་ནའང་དེ་དག་དེ་ནས་ཤི་འཕོས་ཏེ་ལས་མ་ཟད་ཅིང་ལྷག་མ་དང་བཅས་པའི་ལས་དེ་ཉིད་ཀྱིས་སླར་འཇིག་རྟེན་གྱི་ཁམས་འདིར་འདོར་བར་འགྱུར་ཞིང༌།
བོར་བར་གྱུར་པ་ནའང་སེམས་ཅན་དམྱལ་བ་ཆེན་པོ་རྣམས་སུ་སྐྱེ་བར་འགྱུར་རོ། །དེ་དག་སླར་སེམས་ཅན་དམྱལ་བ་ཆེན་པོ་རྣམས་སུ་སེམས་ཅན་དམྱལ་བའི་སྡུག་བསྔལ་ཆེན་པོ་དེ་དག་
མྱོང་བར་འགྱུར་ཏེ། ཇི་སྲིད་དུ་མེས་འཇིག་པ་འབྱུང་བར་འགྱུར་བ་དེ་སྲིད་དུ་མྱོང་བར་འགྱུར་རོ། །དེ་ལྟར་དེ་དག་སྡུག་བསྔལ་མང་པོ་མྱོང་བ་དང་མཐུན་པའི་ལས་ཉམས་སུ་མྱོང་བར་འགྱུར་རོ། །
དེ་ཅིའི་ཕྱིར་ཞེ་ན། དེ་ལྟ་བུའི་ཚིག་གི་ཉེས་པ་སྨྲས་པའི་ཕྱིར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། མཚམས་མ་མཆིས་
པ་ལྔའི་ལས་བགྱིས་ཤིང་ཉེ་བར་བསགས་པ་རྣམས་ནི། ཡིད་ཀྱིས་ནོངས་པར་སྤྱད་པ་དང༌། ངག་གིས་ནོངས་པར་སྤྱད་པ་འདིའི་གཟུགས་བརྙན་ནམ། རྗེས་སུ་མཐུན་པའམ། ཚུལ་མཐུན་པ་ཙམ་
ཡང་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །ཤཱ་རིའི་བུ། དེ་དེ་བཞིན་ཏེ། ཤཱ་རིའི་བུ། མཚམས་མེད་པ་ལྔའི་ལས་བྱས་ཤིང་ཉེ་བར་བསགས་པ་རྣམས་ནི། ཡིད་
ཀྱིས་ཉེས་པར་སྤྱད་པ་དང༌། ངག་གིས་ཉེས་པར་སྤྱད་པའི་ལས་བྱས་ཤིང་བསགས་ཏེ་ཀུན་ནས་བསགས་པ་དང༌། ཉེ་བར་བསགས་པ་འདིའི་གཟུགས་བརྙན་ནམ། རྗེས་སུ་མཐུན་པའམ། ཚུལ་
མཐུན་པ་ཙམ་ཡང་མ་ཡིན་ནོ། །གང་སུ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཆད་པ་དང༌། སྟོན་པ་དང༌། ཉེ་བར་སྟོན་པ་ལ་ཕྱིར་གཞིལ་བར་སེམས་ཤིང་སྐུར་པར་འགྱུར། མི་སྙན་
པར་ཟེར་བར་འགྱུར་ཏེ། འདི་ལ་བསླབ་པར་མི་བྱའོ། །ཞེས་སྨྲ་བར་འགྱུར་ལ། འདི་ནི། དེ་བཞིན་གཤེགས་པས་བཤད་པ་མ་ཡིན་ནོ། །ཞེས་ཚིག་སྨྲ་བར་འགྱུར་ཞིང་སེམས་ཅན་གཞན་དག་ཀྱང་
དེ་དང་བྲལ་བར་བྱེད་པ་དེ་དག་ནི། རང་གི་རྒྱུད་བཅོམ་ནས་གཞན་གྱི་རྒྱུད་ཀྱང་འཇོམས་པར་འགྱུར། རང་གི་རྒྱུད་དུག་ཅན་དུ་བྱས་ནས་གཞན་གྱི་རྒྱུད་ཀྱང་དུག་ཅན་དུ་བྱེད་པར་འགྱུར། རང་ཉིད་
བརླག་ནས་གཞན་ཡང་བརླག་པར་བྱེད་པར་འགྱུར། བདག་ཉིད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་མ་ཤེས་མ་རྟོགས་ལ་གཞན་དག་ཀྱང་འདི་ལ་བསླབ་པར་མི་བྱའོ། །ཞེས་འཛིན་
༄༅། །དུ་འཇུག་པའོ། །ཤཱ་རིའི་བུ། གང་ཟག་དེ་ལྟ་བུའི་རང་བཞིན་ཅན་ནི། བལྟ་བར་ཡང་ངས་མི་གནང་ན། དེ་དག་དང་འགྲོགས་པ་ལྟ་ཅི་སྨོས། རྙེད་པ་དང་བཀུར་སྟི་ལྟ་ཅི་སྨོས།
གནས་པ་ལྟ་ཅི་སྨོས། དེ་ཅིའི་ཕྱིར་ཞེ་ན། ཤཱ་རིའི་བུ། དེ་ལྟ་བུའི་རང་བཞིན་ཅན་གྱི་གང་ཟག་དེ་དག་ནི། ཆོས་ལ་སུན་འབྱིན་པར་རིག་པར་བྱ་བ་ཡིན་ནོ། །ཤཱ་རིའི་བུ། གང་ཟག་དེ་ལྟ་བུའི་རང་
བཞིན་ཅན་དེ་དག་ནི། ལོ་འདབ་རུལ་པ་ལྟ་བུར་གྱུར་པར་རིག་པར་བྱའོ། །ཤཱ་རིའི་བུ། གང་ཟག་དེ་ལྟ་བུ་དེ་དག་ནི། ནག་པོའི་རང་བཞིན་ཅན་ནག་པོ་ཉེ་བར་སྐྱེད་པར་རིག་པར་བྱའོ། །ཤཱ་རིའི་བུ།
གང་ཟག་དེ་ལྟ་བུ་དེ་དག་ལས་གང་དག་མཉན་པ་དང༌། དད་པར་བྱ་བར་སེམས་པ་དེ་དག་ཐམས་ཅད་ཀྱང་ཚུལ་མ་ཡིན་པས་བརླག་པར་འགྱུར་རོ། །ཤཱ་རིའི་བུ། གང་དག་ཤེས་རབ་ཀྱི་ཕ་རོལ་ཏུ་
ཕྱིན་པ་ལ་སུན་འབྱིན་པ་དེ་དག་ནི། ཤཱ་རིའི་བུ། ཆོས་ལ་སུན་འབྱིན་པའི་གང་ཟག་ཏུ་རིག་པར་བྱའོ། །ཤཱ་རིའི་བུས་གསོལ་པ། བཅོམ་ལྡན་འདས་ཀྱིས་གང་ཟག་དེར་སྐྱེས་ཤིང་སེམས་ཅན་
དམྱལ་བ་ཆེན་པོ་ན་མཆིས་པ་དེའི་ལུས་ཀྱི་ཚད་མ་བསྟན་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། གང་ཟག་སེམས་ཅན་དམྱལ་བ་ཆེན་པོ་དེར་སྐྱེས་པ་དེའི་ལུས་ཀྱི་ཚད་ལྟ་
ཞོག་ཅིག །དེ་ཅིའི་ཕྱིར་ཞེ་ན། གང་ཟག་དེ་ལྟ་བུའི་རང་བཞིན་ཅན་གྱི་ལུས་ཀྱི་ཚད་ཐོས་ནས་ཁྲག་དྲོན་པོ་ཁ་ནས་སྐྱུག་ཅིང་འཆི་བར་འགྱུར་བའམ། འཆི་བ་ཙམ་མམ། སྡུག་བསྔལ་མི་བཟད་
པ་དང༌། ནད་ཀྱིས་རེག་ཅིང་ཚིག་པའམ། དེ་ལ་མྱ་ངན་གྱི་ཟུག་རྔུ་ཞུགས་པའམ། གཡང་ས་ཆེན་པོར་ལྟུང་བའམ། སྐམ་པའམ། རྙིད་པར་གྱུར་ན་མི་རུང་བས་ན། གང་ལ་ཉེས་པ་དེ་དག་ཡོད་པའི་
ལས་དེའི་ཚད་འཇིགས་པ་ཆེན་པོ་ཅན་དེ་ལྟ་བུ་ཐོས་པར་མ་གྱུར་ཅིག །ཅེས་བཅོམ་ལྡན་འདས་ཀྱིས་ལུས་དེའི་ཚད་འདི་ཙམ་དུ་འགྱུར་རོ། །ཞེས་ཚེ་དང་ལྡན་པ་ཤཱ་རིའི་བུ་ལ་གོ་སྐབས་མ་ཕྱེའོ། །ལན་
གཉིས་ལན་གསུམ་དུའང་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །གང་ཟག་དེའི་ལུས་ཀྱི་ཚད་ཀྱིས་ཕྱི་མའི་སྐྱེ་བོ་ལ་སྣང་བར་བགྱིས་པར་འགྱུར་བས་ངག་དང་ཡིད་
ཀྱི་ལས་བྱས་ཤིང་བསགས་པ་དང༌། ཀུན་ཏུ་བསགས་པ་དང༌། ཉེ་བར་བསགས་པ་འདིས་སེམས་ཅན་དམྱལ་བ་ཆེན་པོའི་ལུས་འདི་ལྟ་བུ་ཆེན་པོ་ཡོངས་སུ་འཛིན་པར་འགྱུར་རོ། །ཞེས་བཅོམ་ལྡན་
འདས་ཀྱིས་བདག་ལ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། གང་ངག་དང༌། ཡིད་ཀྱིས་ཉེས་པར་སྤྱད་པ་མི་དགེ་བའི་ལས་མངོན་པར་འདུ་བྱེད་པ། མངོན་པར་
འདུས་བྱས་པ་བསགས་ཤིང་ཀུན་ནས་བསགས་ལ། ཉེ་བར་བསགས་པ་འདིས་ཡུན་རིང་པོ་འདི་ཙམ་དུ་སྡུག་བསྔལ་མྱོང་པར་འགྱུར་རོ། །ཞེས་བྱ་བ་འདི་ཉིད་ཀྱིས་ཕྱི་མའི་སྐྱེ་བོ་ལ་སྣང་བ་བྱས་པར་
འགྱུར་ཏེ། ཤཱ་རིའི་བུ། སྡུག་བསྔལ་དེ་ཉིད་ལ་གཞལ་དུ་མེད་པ་དང༌། སྡུག་བསྔལ་མང་པོར་བཤད་པ་གང་ཡིན་པ་དེ་ཉིད་ཀྱིས་རིགས་ཀྱི་བུའམ་རིགས་ཀྱི་བུ་མོ་གང་དག་དཀར་པོའི་སྐལ་པ་
༄༅། །ཅན་རྣམས་སྐྱོ་བར་འགྱུར་ཞིང་དེ་ནས་ཆོས་ཀྱིས་ཕོངས་པར་འགྱུར་བ་དང་མཐུན་པའི་ལས་དེ་དག་ལས་རྣམ་པར་ལྡོག་ཅིང་བསོད་ནམས་མངོན་པར་འདུ་བྱེད་པ་ཁོ་ན་
བྱེད་དེ༑ བདག་ཀྱང་དེ་འདྲ་བའི་སྡུག་བསྔལ་དང་ཕྲད་པར་མི་འགྱུར་བར་བྱ་བའི་ཕྱིར་སྲོག་གི་ཕྱིར་ཡང་དམ་པའི་ཆོས་སྤོང་བར་མི་བྱེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་
གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོས་ལུས་ཀྱི་ལས་དང༌། ངག་གི་ལས་དང༌། ཡིད་ཀྱི་ལས་ཤིན་ཏུ་བསྡམ་པར་བགྱིའོ། །དེ་ཅིའི་སླད་
དུ་ཞེ་ན༑ བཅོམ་ལྡན་འདས། དེ་ལྟར་ངག་གིས་ནོངས་པར་སྨྲས་པ་དེ་ལྟ་བུའི་ངོ་བོས་བསོད་ནམས་མ་ལགས་པའི་ཕུང་པོ་ཆེན་པོ་འདི་སྐྱེས་པ་ལགས་སོ། །བཅོམ་ལྡན་འདས། ཡང་
ལས་གང་གིས་བསོད་ནམས་མ་ལགས་པའི་ཕུང་པོ་ཆེན་པོ་འདི་སྐྱེས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ངག་གིས་ཉེས་པར་སྨྲས་པ་དེ་ལྟ་
བུའི་ངོ་བོས་བསོད་ནམས་མ་ཡིན་པའི་ཕུང་པོ་ཆེན་པོ་འདི་ཙམ་སྐྱེས་སོ། །རབ་འབྱོར། གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་སུན་དབྱུང་བར་སེམས་པར་འགྱུར།
སྐུར་བར་སེམས་པར་འགྱུར། ཕྱིར་གཞིལ་བར་སེམས་པར་འགྱུར་བའི་སྐྱེས་བུ་གཏི་མུག་ཅན་དེ་དག་ལེགས་པར་གསུངས་པའི་ཆོས་འདུལ་བ་འདི་ཉིད་དུ་རབ་ཏུ་འབྱུང་བར་
འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཕྱིར་བཅིལ་ན། སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ཀྱང་ཕྱིར་བཅིལ་བར་འགྱུར་རོ། །སངས་རྒྱས་ཀྱི་བྱང་ཆུབ་ཕྱིར་བཅིལ་
ན༑ འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཐམས་ཅད་མཁྱེན་པ་ཉིད་ཕྱིར་བཅིལ་བར་འགྱུར་རོ། །ཐམས་ཅད་མཁྱེན་པ་ཉིད་
ཕྱིར་བཅིལ་ན། དམ་པའི་ཆོས་ཕྱིར་བཅིལ་བར་འགྱུར་རོ། །དམ་པའི་ཆོས་ཕྱིར་བཅིལ་ན། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ཕྱིར་བཅིལ་བར་འགྱུར་རོ། །དེ་བཞིན་
གཤེགས་པའི་ཉན་ཐོས་ཀྱི་དགེ་འདུན་ཕྱིར་བཅིལ་བ་དེ་ལྟ་ན་ནི། དཀོན་མཆོག་གསུམ་ལས་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་ཕྱི་རོལ་ཏུ་གྱུར་པ་ཡིན་
པས་ཆེས་གཞལ་དུ་མེད་ཅིང་གྲངས་མེད་པའི་མི་དགེ་བའི་ལས་ཆེན་པོ་མངོན་པར་འདུ་བྱེད་པ་ཡོངས་སུ་འཛིན་པར་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་
འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཕྱིར་གཞིལ་བར་
སེམས་པ་དེའི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། རིགས་ཀྱི་བུའམ་རིགས་ཀྱི་བུ་མོ་དེ་བདུད་ཀྱིས་བྱིན་གྱིས་བརླབས་པའམ།
༄༅། །ཤེས་རབ་འཆལ་བར་འགྱུར་བ་དང་མཐུན་པའི་ངག་གི་ལས་ཀྱིས་འདི་ཆོས་ཟབ་མོ་དག་ལ་མི་དད་ཅིང་རབ་ཏུ་དད་པར་མི་འགྱུར་ཏེ། རབ་འབྱོར། སྡིག་པའི་
ཆོས་འདི་གཉིས་དང་ལྡན་པས་རིགས་ཀྱི་བུའམ་རིགས་ཀྱི་བུ་མོ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཕྱིར་འཇིལ་བར་འགྱུར་རོ། །རབ་འབྱོར། གཞན་ཡང་ཤེས་རབ་ཀྱི་ཕ་རོལ་ཏུ་
ཕྱིན་པ་ཟབ་མོ་འདི་འཆད་པ་དང༌། སྟོན་པ་དང༌། ཉེ་བར་སྟོན་པ་ན་ཕྱིར་གཞིལ་བར་སེམས་པར་འགྱུར་བ་གང་ཡིན་པ་དེ་ནི། རྣམ་པ་བཞི་པོ་འདི་དག་དང་ལྡན་པར་འགྱུར་ཏེ། རིགས་ཀྱི་
བུའམ་རིགས་ཀྱི་བུ་མོ་དེ་སྡིག་པའི་གྲོགས་པོའི་ལག་ཏུ་སོན་པར་འགྱུར་བའམ། མངོན་པར་མི་བརྩོན་པར་འགྱུར་བའམ། ཕུང་པོ་ལ་མངོན་པར་ཞེན་པར་འགྱུར་བའམ། བདག་ལ་
བསྟོད་ཅིང་གཞན་ལ་སྨོད་དེ་ཉེས་པའི་སྐབས་ཚོལ་བར་འགྱུར་བའོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། དམྱལ་བའི་ལེའུ་ཞེས་བྱ་བ་སྟེ། བདུན་པའོ།། །།
འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་དགུ་པ། དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་
འདས༑ ཤེས་རབ་ཀྱི་ཕ་རོལ་ཏུ་ཕྱིན་པ་ནི། མངོན་པར་མི་བརྩོན་པ་དང༌། དགེ་བའི་རྩ་བ་དང་བྲལ་བ་དང༌། སྡིག་པའི་གྲོགས་པོའི་ལག་ཏུ་སོང་བས་མོས་པར་དཀའོ། །བཅོམ་ལྡན་
འདས་ཀྱིས་བཀའ་སྩལ་པ། དེ་དེ་བཞིན་ནོ། །རབ་འབྱོར། དེ་དེ་བཞིན་ཏེ། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མངོན་པར་མི་བརྩོན་པ་དང༌། དགེ་བའི་རྩ་བ་ཆུང་བ་དང༌། བློ་ཞན་པ་དང༌།
དོན་དུ་མི་གཉེར་བ་དང༌། ཐོས་པ་ཉུང་བ་དང༌། ཤེས་རབ་ཞན་པ་དང༌། སྡིག་པའི་གྲོགས་པོས་ཉེ་བར་བརྟན་པ་དང༌། ལེགས་པར་མི་ཉན་པ་དང༌། མི་འདྲི་བའི་རང་བཞིན་ཅན་དང༌། དགེ་བའི་ཆོས་
ལ་མི་བརྩོན་པས་མོས་པར་དཀའོ། །རབ་འབྱོར་གྱིས་གསོལ་པ། བཅོམ་ལྡན་འདས། ཨེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་ནི། མོས་པར་དཀའ་བའི་སླད་དུ་འདི་ཇི་ཙམ་དུ་ཟབ་པ་ལགས།
བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། གཟུགས་ནི། མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་ངོ་བོ་ཉིད་མེད་པའི་ཕྱིར་གཟུགས་མ་བཅིངས་མ་གྲོལ་
བའོ༑ ༑རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། རབ་འབྱོར། རྣམ་པར་ཤེས་པ་ངོ་བོ་
ཉིད་མེད་པའི་ཕྱིར་རྣམ་པར་ཤེས་པ་མ་བཅིངས་མ་གྲོལ་བའོ། །རབ་འབྱོར། གཟུགས་ཀྱི་སྔོན་གྱི་མཐའ་མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་ལ་སྔོན་གྱི་
མཐའི་ངོ་བོ་ཉིད་མེད་པའི་ཕྱིར་རོ། །རབ་འབྱོར། གཟུགས་ཀྱི་ཕྱི་མའི་མཐའ་མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་ལ་ཕྱི་མའི་མཐའི་ངོ་བོ་ཉིད་མེད་པའི་ཕྱིར་རོ། །
༄༅། །རབ་འབྱོར། གཟུགས་ཀྱི་ད་ལྟར་བྱུང་བ་མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་ལ་ད་ལྟར་བྱུང་བའི་ངོ་བོ་ཉིད་མེད་པའི་ཕྱིར་རོ། །རབ་
འབྱོར༑ དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའི་སྔོན་གྱི་མཐའ་མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། རབ་འབྱོར། རྣམ་པར་ཤེས་པ་
ལ་སྔོན་གྱི་མཐའི་ངོ་བོ་ཉིད་མེད་པའི་ཕྱིར་རོ། །རབ་འབྱོར། རྣམ་པར་ཤེས་པའི་ཕྱི་མའི་མཐའ་མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། རབ་འབྱོར། རྣམ་པར་ཤེས་པ་ལ་ཕྱི་མའི་
མཐའི་ངོ་བོ་ཉིད་མེད་པའི་ཕྱིར་རོ། །རབ་འབྱོར། རྣམ་པར་ཤེས་པའི་ད་ལྟར་བྱུང་བ་མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། རབ་འབྱོར། རྣམ་པར་ཤེས་པ་ལ་ད་ལྟར་བྱུང་བའི་ངོ་
བོ་ཉིད་མེད་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མི་བརྩོན་པ་དང༌། དགེ་བའི་རྩ་བ་མ་བསགས་པ་དང༌། སྡིག་པའི་
གྲོགས་པོའི་ལག་ཏུ་སོང་བ་དང༌། བདུད་ཀྱི་དབང་དུ་གྱུར་པ་དང༌། ལེ་ལོ་ཅན་དང༌། བརྩོན་འགྲུས་ཞན་པ་དང༌། དྲན་པ་ཉམས་པ་དང༌། ཤེས་རབ་འཆལ་པས་མོས་པར་དཀའ་ཞིང་
མཆོག་ཏུ་མོས་པར་དཀའ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །རབ་འབྱོར། དེ་དེ་བཞིན་ཏེ། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མི་
བརྩོན་པ་དང༌། དགེ་བའི་རྩ་བ་མ་བསགས་པ་དང༌། སྡིག་པའི་གྲོགས་པོའི་ལག་ཏུ་སོང་བ་དང༌། བདུད་ཀྱི་དབང་དུ་གྱུར་པ་དང༌། ལེ་ལོ་ཅན་དང༌། བརྩོན་འགྲུས་ཞན་པ་དང༌། དྲན་པ་ཉམས་པ་དང༌། ཤེས་
རབ་འཆལ་པས་མོས་པར་དཀའ་བ་ཡིན་ཏེ། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མཆོག་ཏུ་མོས་པར་དཀའ་བ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་རྣམ་པར་
དག་པ་གང་ཡིན་པ་དེ་ནི། འབྲས་བུ་རྣམ་པར་དག་པ། འབྲས་བུ་རྣམ་པར་དག་པ་གང་ཡིན་པ་དེ་ནི། གཟུགས་རྣམ་པར་དག་པ་སྟེ། རབ་འབྱོར། དེ་ལྟར་ན། གཟུགས་རྣམ་པར་དག་པ་དང༌།
འབྲས་བུ་རྣམ་པར་དག་པ་འདི་ནི། གཉིས་སུ་མེད་ཅིང་གཉིས་སུ་བྱར་མེད་དེ། ཐ་མི་དད་ཅིང་མ་ཆད་པའོ། །རབ་འབྱོར། དེ་ལྟར་ན། འབྲས་བུ་རྣམ་པར་དག་པས་ན། གཟུགས་རྣམ་པར་
དག་པ༑ གཟུགས་རྣམ་པར་དག་པས་ན། འབྲས་བུ་རྣམ་པར་དག་པའོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་རྣམ་པར་དག་པ་
གང་ཡིན་པ་དེ་ནི། འབྲས་བུ་རྣམ་པར་དག་པའོ། །འབྲས་བུ་རྣམ་པར་དག་པ་གང་ཡིན་པ་དེ་ནི། རྣམ་པར་ཤེས་པ་རྣམ་པར་དག་པ་སྟེ། རབ་འབྱོར། དེ་ལྟར་ན། རྣམ་པར་ཤེས་པ་རྣམ་
པར་དག་པ་དང༌། འབྲས་བུ་རྣམ་པར་དག་པ་འདི་ནི། གཉིས་སུ་མེད་ཅིང་གཉིས་སུ་བྱར་མེད་དེ། ཐ་མི་དད་ཅིང་མ་ཆད་པའོ། །རབ་འབྱོར། དེ་ལྟར་ན། འབྲས་བུ་རྣམ་པར་དག་པས་ན། རྣམ་
༄༅། །པར་ཤེས་པ་རྣམ་པར་དག་པ། རྣམ་པར་ཤེས་པ་རྣམ་པར་དག་པས་ན། འབྲས་བུ་རྣམ་པར་དག་པའོ། །རབ་འབྱོར། གཞན་ཡང་གཟུགས་རྣམ་པར་དག་
པ་གང་ཡིན་པ་དེ་ནི། ཐམས་ཅད་མཁྱེན་པ་ཉིད་རྣམ་པར་དག་པ། ཐམས་ཅད་མཁྱེན་པ་ཉིད་རྣམ་པར་དག་པ་གང་ཡིན་པ་དེ་ནི། གཟུགས་རྣམ་པར་དག་པ་སྟེ། རབ་འབྱོར། དེ་ལྟར་
ན༑ གཟུགས་རྣམ་པར་དག་པ་དང༌། ཐམས་ཅད་མཁྱེན་པ་ཉིད་རྣམ་པར་དག་པ་འདི་ནི། གཉིས་སུ་མེད་དེ། གཉིས་སུ་བྱར་མེད་ཅིང་ཐ་མི་དད་དེ་མ་ཆད་པའོ། །རབ་འབྱོར། དེ་ལྟར་
ན༑ ཐམས་ཅད་མཁྱེན་པ་ཉིད་རྣམ་པར་དག་པས་ན། གཟུགས་རྣམ་པར་དག་པ། གཟུགས་རྣམ་པར་དག་པས་ན། ཐམས་ཅད་མཁྱེན་པ་ཉིད་རྣམ་པར་དག་པའོ། །རབ་འབྱོར། དེ་
བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་རྣམ་པར་དག་པ་གང་ཡིན་པ་དེ་ནི། ཐམས་ཅད་མཁྱེན་པ་ཉིད་རྣམ་པར་དག་པའོ། །ཐམས་ཅད་
མཁྱེན་པ་ཉིད་རྣམ་པར་དག་པ་གང་ཡིན་པ་དེ་ནི། རྣམ་པར་ཤེས་པ་རྣམ་པར་དག་པ་སྟེ། རབ་འབྱོར། དེ་ལྟར་ན། རྣམ་པར་ཤེས་པ་རྣམ་པར་དག་པ་དང༌། ཐམས་ཅད་མཁྱེན་པ་ཉིད་
རྣམ་པར་དག་པ་འདི་ནི། གཉིས་སུ་མེད་ཅིང་གཉིས་སུ་བྱར་མེད་དེ། ཐ་མི་དད་ཅིང་མ་ཆད་པའོ། །རབ་འབྱོར། དེ་ལྟར་ན། ཐམས་ཅད་མཁྱེན་པ་ཉིད་རྣམ་པར་དག་པས་ན། རྣམ་པར་
ཤེས་པ་རྣམ་པར་དག་པའོ། །རྣམ་པར་ཤེས་པ་རྣམ་པར་དག་པས་ན། ཐམས་ཅད་མཁྱེན་པ་ཉིད་རྣམ་པར་དག་པའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །
བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཟབ་བོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྣམ་པར་དག་པའི་ཕྱིར་རོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་རབ་
ཀྱི་ཕ་རོལ་ཏུ་ཕྱིན་པ་ནི། གསལ་བར་བགྱིད་པའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྣམ་པར་དག་པའི་ཕྱིར་རོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་རབ་ཀྱི་
ཕ་རོལ་ཏུ་ཕྱིན་པ་ནི། སྣང་བར་བགྱིད་པའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྣམ་པར་དག་པའི་ཕྱིར་རོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་
ཏུ་ཕྱིན་པ་ནི། མཚམས་སྦྱོར་བ་མ་མཆིས་པའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྣམ་པར་དག་པའི་ཕྱིར་རོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་
རོལ་ཏུ་ཕྱིན་པ་ནི། ཀུན་ནས་ཉོན་མོངས་པ་མ་མཆིས་པའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྣམ་པར་དག་པའི་ཕྱིར་རོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་
རབ་ཀྱི་ཕ་རོལ་ཏུ་ཕྱིན་པ་ནི། ཐོབ་པ་མ་མཆིས་པ་མངོན་པར་རྟོགས་པ་མ་མཆིས་པའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྣམ་པར་དག་པའི་ཕྱིར་རོ། །ཤཱ་རིའི་བུས་གསོལ་པ།
༄༅། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མངོན་པར་འགྲུབ་པ་མ་མཆིས་པའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྣམ་པར་དག་
པའི་ཕྱིར་རོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། འདོད་པའི་ཁམས་དང༌། གཟུགས་ཀྱི་ཁམས་དང༌། གཟུགས་མེད་པའི་ཁམས་སུ་ཤིན་ཏུ་སྐྱེ་བ་
མ་མཆིས་པའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྣམ་པར་དག་པའི་ཕྱིར་རོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མ་
འཚལ༑ ཡང་དག་པར་མ་འཚལ་བའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྣམ་པར་དག་པའི་ཕྱིར་རོ། །ཤཱ་རིའི་བུས་གསོལ་པ། བཅོམ་ལྡན་འདས། ཡང་ཤེས་རབ་ཀྱི་ཕ་
རོལ་ཏུ་ཕྱིན་པ་ནི། ཅི་ཞིག་མ་འཚལ་ཞིང་ཡང་དག་པར་མ་འཚལ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། གཟུགས་མི་ཤེས། ཡང་དག་པར་མི་
ཤེས་སོ༑ ༑དེ་ཅིའི་ཕྱིར་ཞེ་ན། ཤཱ་རིའི་བུ། རྣམ་པར་དག་པའི་ཕྱིར་རོ། །ཤཱ་རིའི་བུ། དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་
ཤེས་པ་མི་ཤེས། ཡང་དག་པར་མི་ཤེས་སོ། །དེ་ཅིའི་ཕྱིར་ཞེ་ན། རྣམ་པར་དག་པའི་ཕྱིར་རོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཐམས་ཅད་མཁྱེན་
པ་ཉིད་ལ་གནོད་པར་ཡང་མི་བགྱིད། ཕན་པར་ཡང་མི་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། རྣམ་པར་དག་པའི་ཕྱིར་རོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་
རོལ་ཏུ་ཕྱིན་པ་ནི། ཆོས་གང་ཡང་ཡོངས་སུ་མི་འཛིན། ཡོངས་སུ་མི་གཏོང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྣམ་པར་དག་པའི་ཕྱིར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་
པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་རྣམ་པར་དག་པས། གཟུགས་རྣམ་པར་དག་པའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤིན་ཏུ་རྣམ་པར་
དག་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། བདག་རྣམ་པར་དག་པས་ཚོར་བ་དང༌། འདུ་ཤེས་དང༌། འདུ་བྱེད་རྣམས་རྣམ་པར་དག་པའོ། །བཅོམ་ལྡན་འདས། བདག་རྣམ་པར་
དག་པས་རྣམ་པར་ཤེས་པ་རྣམ་པར་དག་པའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤིན་ཏུ་རྣམ་པར་དག་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། བདག་
རྣམ་པར་དག་པས་འབྲས་བུ་རྣམ་པར་དག་པའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤིན་ཏུ་རྣམ་པར་དག་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། བདག་
རྣམ་པར་དག་པས་ཐམས་ཅད་མཁྱེན་པ་ཉིད་རྣམ་པར་དག་པའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤིན་ཏུ་རྣམ་པར་དག་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་
༄༅། །འདས༑ བདག་རྣམ་པར་དག་པས་ཐོབ་པ་མ་མཆིས། མངོན་པར་རྟོགས་པའང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤིན་ཏུ་རྣམ་པར་
དག་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། བདག་མུ་མ་མཆིས་པས་ན། གཟུགས་མུ་མ་མཆིས་པའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤིན་ཏུ་རྣམ་
པར་དག་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། བདག་མུ་མ་མཆིས་པས་ན། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་མུ་མ་མཆིས་པའོ། །
བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤིན་ཏུ་རྣམ་པར་དག་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་དེ་
ལྟར་རྟོགས་པ་གང་ལགས་པ་དེ་ནི། འདིའི་ཤེས་རབ་ཀྱི་ཕ་རོལ་ཏུ་ཕྱིན་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤིན་ཏུ་རྣམ་པར་དག་པའི་ཕྱིར་རོ། །ཚེ་དང་ལྡན་
པ་རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཚུ་རོལ་གྱི་འགྲམ་ནའང་མི་གནས། ཕ་རོལ་གྱི་འགྲམ་ནའང་མི་གནས། གཉིས་ཀའི་བར་རྒྱང་
རིང་པོ་ནའང་མི་གནས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤིན་ཏུ་རྣམ་པར་དག་པའི་ཕྱིར་རོ། །ཚེ་དང་ལྡན་པ་རབ་འབྱོར་གྱིས་གསོལ་པ། བཅོམ་ལྡན་འདས། དེ་ལྟར་
ཡང་འདུ་ཤེས་ན་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་འདོར་བར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་རིང་དུ་བགྱིད་པར་འགྱུར་རོ། །
བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ལེགས་སོ། ལེགས་སོ། །དེ་དེ་བཞིན་ནོ། །རབ་འབྱོར། དེ་དེ་བཞིན་ཏེ། དེ་ཅིའི་ཕྱིར་ཞེ་ན། རབ་འབྱོར། མིང་ལས་ཀྱང་ཆགས་པར་འགྱུར་རོ། །
མཚན་མ་ལས་ཀྱང་ཆགས་པར་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་
བཅོམ་ལྡན་འདས་ཀྱིས་གང་དུ་ཆགས་པ་འདི་དག་ཀྱང་བཤད་པས་ཇི་ཙམ་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལེགས་པར་བཤད་ཅིང་ལེགས་པར་བསྟན་ཏེ། ཤིན་ཏུ་མཐར་གཏུགས་པ་ནི། ངོ་
མཚར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། ཆགས་པ་དེ་དག་གང་ཡིན། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་
རིའི་བུ༑ གཟུགས་སྟོང་པའོ་སྙམ་པ་ནི། ཆགས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། ཚེ་དང་ལྡན་པ་ཤཱ་རིའི་བུ། རྣམ་པར་ཤེས་པ་སྟོང་པའོ་སྙམ་པ་ནི།
ཆགས་པའོ། །འདས་པའི་ཆོས་རྣམས་ལ་འདས་པའི་ཆོས་རྣམས་སོ། །ཞེས་ཡང་དག་པར་ཤེས་པ་ནི། ཆགས་པའོ། །མ་འོངས་པའི་ཆོས་རྣམས་ལ་མ་འོངས་པའི་ཆོས་རྣམས་སོ། །ཞེས་ཡང་དག་
༄༅། །པར་ཤེས་པ་ནི། ཆགས་པའོ། །ད་ལྟར་བྱུང་བའི་ཆོས་རྣམས་ལ་ད་ལྟར་བྱུང་བའི་ཆོས་རྣམས་སོ། །ཞེས་ཡང་དག་པར་ཤེས་པ་ནི། ཆགས་པའོ། །གང་ཟག་བྱང་ཆུབ་སེམས་
དཔའི་ཐེག་པ་ཅན་སེམས་དང་པོ་བསྐྱེད་པས་བསོད་ནམས་ཀྱི་ཕུང་པོ་འདི་ཙམ་བསྐྱེད་དོ། །ཞེས་ཡང་དག་པར་ཤེས་པ་ནི། ཆགས་པའོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཚེ་དང་
ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །འཕགས་པ་རབ་འབྱོར། རྣམ་གྲངས་གང་གིས་ཆགས་པར་འགྱུར། རབ་འབྱོར་གྱིས་སྨྲས་པ། ཀཽ་ཤི་ཀ །གལ་ཏེ་འདི་ནི། བྱང་ཆུབ་ཀྱི་སེམས་
དང་པོའོ་ཞེས་བྱང་ཆུབ་ཀྱི་།སེམས་དེ་ཡང་དག་པར་ཤེས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །ཞེས་ཡོངས་སུ་བསྔོ་བར་བྱེད་པས་ཏེ། རིགས་ཀྱི་བུའམ་
རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་དེས་སེམས་ཀྱི་རང་བཞིན་ཡོངས་སུ་བསྔོ་བར་ནི། མི་ནུས་སོ། །ཀཽ་ཤི་ཀ །དེ་བས་ན། གཞན་ལ་ཡང་དག་པར་སྟོན་པ་དང༌། ཡང་
དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པ་ཉིད་རྗེས་སུ་རྟོགས་
པས་ཡང་དག་པར་བསྟན་པར་བྱ། ཡང་དག་པར་དགོད་པར་བྱ། ཡང་དག་པར་གཟེངས་བསྟོད་པར་བྱ། ཡང་དག་པར་རབ་ཏུ་དགའ་བར་བྱ་སྟེ། དེ་ལྟར་ན། རིགས་ཀྱི་བུའམ་རིགས་ཀྱི་བུ་མོ་དེ་
བདག་ཉིད་ལའང་གནོད་པར་མི་བྱེད་ཅིང་སངས་རྒྱས་ཀྱིས་གནང་བའི་ཡང་དག་པར་འགོད་པས་གཞན་འགོད་པར་བྱེད་པར་ཡང་འགྱུར་ལ། ཆགས་པའི་མཐའ་འདི་དག་ཐམས་ཅད་ཀྱང་རྣམ་པར་སྤངས་
པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་ལེགས་སོ། །ཞེས་བྱ་བ་བྱིན་ཏེ། རབ་འབྱོར། ཁྱོད་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་ལ་ཆགས་པའི་
མཐའ་འདི་དག་ཁོང་དུ་ཆུད་པར་བྱེད་པ་ལེགས་སོ། ལེགས་སོ། །རབ་འབྱོར། དེའི་ཕྱིར་ཆགས་པ་རབ་ཏུ་ཕྲ་བ་གཞན་དག་ཀྱང་བརྗོད་པར་བྱ་སྟེ། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་
ངས་ཁྱོད་ལ་བཤད་དོ། །བཅོམ་ལྡན་འདས་ལ་ལེགས་སོ། །ཞེས་གསོལ་ནས་ཚེ་དང་ལྡན་པ་རབ་འབྱོར། བཅོམ་ལྡན་འདས་ཀྱི་ལྟར་ཉན་པ་དང༌། བཅོམ་ལྡན་འདས་ཀྱིས་འདི་སྐད་ཅེས་བཀའ་
སྩལ་ཏོ༑ ༑རབ་འབྱོར། འདི་ལ་རིགས་ཀྱི་བུའམ་རིགས་ཀྱི་བུ་མོ་དད་པ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་མར་ཡིད་ལ་བྱེད་ནའང་རབ་འབྱོར་
མཚན་མ་ཇི་སྲིད་པ་དེ་སྲིད་དུ་ཆགས་པ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར། མཚན་མ་ལས་ནི། ཆགས་པར་འགྱུར་རོ། །དེ་ལྟར་ན། དེ་འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་
རྒྱས་བཅོམ་ལྡན་འདས་རྣམས་ཀྱི་ཟག་པ་མེད་པའི་ཆོས་གང་ཡིན་པ་དེ་དག་ལ་རྗེས་སུ་ཡི་རང་ངོ༌། །དེ་ལྟར་རྗེས་སུ་ཡི་རང་ནས་རྗེས་སུ་ཡི་རང་བ་དང་ལྡན་པའི་དགེ་བའི་རྩ་བ་དག་བླ་ན་མེད་པ་ཡང་དག་
༄༅། །པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །ཞེས་ཡོངས་སུ་བསྔོ་བར་བྱེད་ན། རབ་འབྱོར། ཡང་ཆོས་རྣམས་ཀྱི་ཆོས་ཉིད་གང་ཡིན་པ་དེ་ནི། འདས་པའམ། མ་འོངས་
པའམ༑ ད་ལྟར་བྱུང་བ་མ་ཡིན་ཏེ། གང་འདས་པ་དང༌། མ་འོངས་པ་དང༌། ད་ལྟར་བྱུང་བ་མ་ཡིན་པ་དེ་ནི། དུས་གསུམ་ལས་ངེས་པར་གྲོལ་བ། གང་དུས་གསུམ་ལས་ངེས་པར་གྲོལ་བ་དེ་ནི། ཡོངས་
སུ་བསྔོ་བ་དང༌། མཚན་མར་བྱ་བ་དང༌། དམིགས་པར་བྱ་བར་མི་ནུས་ཤིང༌། དེ་ནི། མཐོང་བ་དང༌། ཐོས་པ་དང༌། རྟོགས་པ་དང༌། རྣམ་པར་ཤེས་པའང་མ་ཡིན་ནོ། །རབ་འབྱོར་གྱིས་གསོལ་པ།
བཅོམ་ལྡན་འདས། ཆོས་རྣམས་ཀྱི་རང་བཞིན་ནི། ཟབ་བོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དབེན་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། ཤེས་
རབ་ཀྱི་ཕ་རོལ་ཏུ་ཕྱིན་པ་ནི། རང་བཞིན་ཟབ་པའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། རང་བཞིན་རྣམ་པར་དག་པའི་ཕྱིར་དང༌། རབ་འབྱོར། རང་བཞིན་དབེན་པའི་ཕྱིར་ཤེས་
རབ་ཀྱི་ཕ་རོལ་ཏུ་ཕྱིན་པ་ནི། རང་བཞིན་ཟབ་བོ། །རབ་འབྱོར་གྱིས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། རང་བཞིན་དབེན་པའི་ཕྱིར་བཅོམ་ལྡན་འདས། ཤེས་རབ་
ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཆོས་ཐམས་ཅད་ཀྱང་རང་བཞིན་དབེན་པ་ཉིད་དེ། རབ་འབྱོར། ཆོས་ཐམས་ཅད་ཀྱི་རང་བཞིན་དབེན་
པ་ཉིད་གང་ཡིན་པ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར་ཆོས་ཐམས་ཅད་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་མ་
བྱས་པར་མངོན་པར་རྫོགས་པར་སངས་རྒྱས་སོ། །རབ་འབྱོར་གྱིས་གསོལ་པ། བཅོམ་ལྡན་འདས། དེ་ལྟ་བས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་
ཐམས་ཅད་མངོན་པར་རྫོགས་པར་སངས་མ་རྒྱས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ལྟར་རང་བཞིན་གྱིས་ཆོས་དེ་དག་གང་ཡང་མེད་དོ། །རང་བཞིན་གང་ཡིན་པ་དེ་ནི། རང་བཞིན་
མེད་པ༑ ༑རང་བཞིན་མེད་པ་གང་ཡིན་པ་དེ་ནི། རང་བཞིན་ཡིན་ཏེ། འདི་ལྟ་སྟེ། ཆོས་ཐམས་ཅད་ཀྱི་མཚན་ཉིད་མེད་པའི་ཕྱིར་ན་མཚན་ཉིད་གཅིག་པའི་ཕྱིར་རོ། །རབ་འབྱོར། དེ་ལྟ་བས་ན། དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཐམས་ཅད་མངོན་པར་རྫོགས་པར་སངས་མ་རྒྱས་སོ། །དེ་ཅིའི་ཕྱིར་ཞེ་ན། རབ་འབྱོར། ཆོས་ཀྱི་རང་བཞིན་ནི། གཉིས་སུ་མེད་དེ། རབ་
འབྱོར༑ ཆོས་ཐམས་ཅད་ཀྱི་རང་བཞིན་ནི། གཅིག་ཏུ་ཟད་དོ། །རབ་འབྱོར། ཆོས་ཐམས་ཅད་ཀྱི་རང་བཞིན་གང་ཡིན་པ་དེ་ནི། རང་བཞིན་མེད་པ། རང་བཞིན་མེད་པ་གང་ཡིན་པ་དེ་ནི། རང་བཞིན་
ཡིན་ཏེ༑ རབ་འབྱོར། དེ་ལྟར་ན། ཆགས་པའི་མཐའ་དེ་དག་ཐམས་ཅད་རྣམ་པར་སྤངས་པ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཟབ་པ་
༄༅། །ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ནམ་མཁའ་ཟབ་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་བོ། །རབ་འབྱོར་གྱིས་གསོལ་པ།
བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། རྗེས་སུ་རྟོགས་པར་དཀའ་བ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ལྟར་སུའང་མངོན་པར་རྫོགས་
པར་འཚང་རྒྱ་བ་མེད་དོ། །རབ་འབྱོར་གྱིས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། བསམ་གྱིས་མི་ཁྱབ་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ།
རབ་འབྱོར། འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། སེམས་ཀྱིས་ཤེས་པར་བྱ་བ་མ་ཡིན། སེམས་ཀྱིས་རྟོགས་པར་བྱ་བ་མ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས།
ཤེས་རབ་ཀྱི་ཕ་རོལ་ཏུ་ཕྱིན་པ་ནི། མ་བགྱིས་པ་ལགས་སམ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱེད་པ་པོ་མི་དམིགས་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མ་བྱས་པའོ། །
རབ་འབྱོར་གྱིས་གསོལ་པ། བཅོམ་ལྡན་འདས། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཇི་ལྟར་སྤྱད་པར་བགྱི། བཅོམ་ལྡན་འདས་ཀྱིས་
བཀའ་སྩལ་པ། རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་གཟུགས་ལ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །
དེ་བཞིན་དུ་གལ་ཏེ་ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་ལ་མ་ཡིན། གལ་ཏེ་རྣམ་པར་ཤེས་པ་ལ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །གལ་ཏེ་གཟུགས་མི་
རྟག་པའོ་ཞེས་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། གལ་ཏེ་རྣམ་པར་ཤེས་པ་མི་རྟག་པའོ་ཞེས་མི་སྤྱོད་ན། ཤེས་
རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །གལ་ཏེ་གཟུགས་སྟོང་པའོ་ཞེས་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་བཞིན་དུ་ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་
ལ་མ་ཡིན། གལ་ཏེ་རྣམ་པར་ཤེས་པ་སྟོང་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །གལ་ཏེ་གཟུགས་མ་རྫོགས་པ་དང་རྫོགས་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་
རོལ་ཏུ་ཕྱིན་པ་ལ་སྤྱོད་དོ། །གཟུགས་ཀྱི་རྫོགས་པ་མ་ཡིན་པའམ་རྫོགས་པ་གང་ཡིན་པ་དེ་ནི། གཟུགས་མ་ཡིན་ཏེ། གལ་ཏེ་དེ་ལྟར་ཡང་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །
དེ་བཞིན་དུ་ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་ལ་མ་ཡིན། གལ་ཏེ་རྣམ་པར་ཤེས་པ་རྫོགས་པ་མ་ཡིན་པ་དང་རྫོགས་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་
ཕྱིན་པ་ལ་སྤྱོད་དོ། །རྣམ་པར་ཤེས་པ་རྫོགས་པ་མ་ཡིན་པའམ་རྫོགས་པ་གང་ཡིན་པ་དེ་ནི། རྣམ་པར་ཤེས་པ་མ་ཡིན་ཏེ། གལ་ཏེ་དེ་ལྟར་ཡང་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་
༄༅། །སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གི་ཕྱིར་དེ་ལྟར་ཇི་སྲིད་དུ་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱི་ཆགས་པ་དང་བཅས་པ་ཉིད་དང༌། ཆགས་པ་མ་མཆིས་པ་ཉིད་བཤད་པ་ནི། ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། གལ་ཏེ་
བྱང་ཆུབ་སེམས་དཔའ་སེམས་དཔའ་ཆེན་པོ་གཟུགས་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་བཞིན་དུ་ཚོར་བ་
དང༌། འདུ་ཤེས་དང༌། འདུ་བྱེད་རྣམས་དང༌། གལ་ཏེ་རྣམ་པར་ཤེས་པ་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །
རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་མིག་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །
དེ་བཞིན་དུ་ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བའི་བར་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །སའི་ཁམས་
ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །རྣམ་པར་ཤེས་པའི་ཁམས་ཀྱི་བར་ལ་ཆགས་པ་དང་བཅས་པ་དང༌། ཆགས་
པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །སྦྱིན་པའི་ཕ་རོལ་ཏུ་ཕྱིན་པ་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་
ཕྱིན་པ་ལ་སྤྱོད་དོ། །དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་པའི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་བསམ་གཏན་གྱི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་
ཕ་རོལ་ཏུ་ཕྱིན་པ་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་བཞིན་དུ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང༌། སྟོབས་
དང༌། མི་འཇིགས་པ་དང༌། སོ་སོ་ཡང་དག་པར་རིག་པ་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་
རོལ་ཏུ་ཕྱིན་པ་ལ་སྤྱོད་དོ། །རྒྱུན་དུ་ཞུགས་པའི་འབྲས་བུ་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་བཞིན་དུ་ལན་གཅིག་ཕྱིར་
འོང་བའི་འབྲས་བུ་དང༌། ཕྱིར་མི་འོང་བའི་འབྲས་བུ་དང༌། དགྲ་བཅོམ་པ་ཉིད་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །རང་སངས་
རྒྱས་ཉིད་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །སངས་རྒྱས་ཉིད་ལ་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་
༄༅། །དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །རབ་འབྱོར་གལ་ཏེ་ཐམས་ཅད་མཁྱེན་པ་ཉིད་ལའང་ཆགས་པ་དང་བཅས་པ་དང༌། ཆགས་པ་མེད་པའོ་སྙམ་
དུ་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྤྱོད་པ་ནི། གཟུགས་ལ་ཆགས་པ་མི་སྐྱེད་དོ། །དེ་བཞིན་དུ་ཚོར་
བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་ལ་མ་ཡིན། རྣམ་པར་ཤེས་པ་ལ་ཆགས་པ་མི་སྐྱེད་དོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྤྱོད་ན།
མིག་ལ་ཆགས་པ་མི་སྐྱེད་པ་ནས་ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བའི་བར་ལ་ཆགས་པ་མི་སྐྱེད། སའི་ཁམས་ལ་ཆགས་པ་མི་སྐྱེད་པ་ནས་རྣམ་པར་ཤེས་པའི་ཁམས་ཀྱི་བར་ལ་
ཆགས་པ་མི་སྐྱེད། སྦྱིན་པའི་ཕ་རོལ་ཏུ་ཕྱིན་པ་ལ་ཆགས་པ་མི་སྐྱེད། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་མ་ཡིན། བཟོད་པའི་ཕ་རོལ་ཏུ་ཕྱིན་པ་ལ་མ་ཡིན། བརྩོན་འགྲུས་ཀྱི་ཕ་
རོལ་ཏུ་ཕྱིན་པ་ལ་མ་ཡིན། བསམ་གཏན་གྱི་ཕ་རོལ་ཏུ་ཕྱིན་པ་ལ་མ་ཡིན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཆགས་པ་མི་སྐྱེད། བྱང་ཆུབ་ཀྱི་ཕྱོགས་རྣམས་ལ་མ་ཡིན། སྟོབས་རྣམས་
ལ་མ་ཡིན། མི་འཇིགས་པ་རྣམས་ལ་མ་ཡིན། སོ་སོ་ཡང་དག་པར་རིག་པ་རྣམས་ལ་མ་ཡིན། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་རྣམས་ལ་ཆགས་པ་མི་སྐྱེད་དོ། །རྒྱུན་དུ་ཞུགས་
པའི་འབྲས་བུ་ལ་ཆགས་པ་མི་སྐྱེད། ལན་ཅིག་ཕྱིར་འོང་བའི་འབྲས་བུ་ལ་མ་ཡིན། ཕྱིར་མི་འོང་བའི་འབྲས་བུ་ལ་མ་ཡིན། དགྲ་བཅོམ་པ་ཉིད་ལ་ཆགས་པ་མི་སྐྱེད། རང་སངས་རྒྱས་ཉིད་
ལ་ཆགས་པ་མི་སྐྱེད། སངས་རྒྱས་ཉིད་ལ་ཆགས་པ་མི་སྐྱེད། ཐམས་ཅད་མཁྱེན་པ་ཉིད་ལའང་ཆགས་པ་མི་སྐྱེད་དོ། །དེ་ཅིའི་ཕྱིར་ཞེ་ན། རབ་འབྱོར། ཐམས་ཅད་མཁྱེན་པ་ཉིད་ནི། མ་
ཆགས་པ། མ་བཅིངས་པ། མ་གྲོལ་བ། ཡང་དག་པར་མ་འདས་པའོ། །རབ་འབྱོར། དེ་ལྟར་ཆགས་པ་ཐམས་ཅད་ལས་རབ་ཏུ་བཟླ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་
པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ། །རབ་འབྱོར་གྱིས་གསོལ་པ། བཅོམ་ལྡན་འདས། འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི་བའི་ཆོས་འདི་ནི། ཟབ་སྟེ། དེ་
ནི༑ བསྟན་ཀྱང་མི་འགྲིབ། མ་བསྟན་ཀྱང་མི་འགྲིབ། བསྟན་ཀྱང་མི་འཕེལ། མ་བསྟན་ཀྱང་མི་འཕེལ་བ་ནི། ངོ་མཚར་ཏོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་
རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། ལེགས་སོ། ལེགས་སོ། །རབ་འབྱོར། དེ་དེ་བཞིན་ནོ། །དེ་བཞིན་ཏེ། རབ་འབྱོར། འདི་ལྟ་སྟེ་དཔེར་ན། དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྲིད་འཚོ་བའི་བར་དུ་བཞུགས་ཤིང་ནམ་མཁའི་བསྔགས་པ་བརྗོད་ཀྱང་ནམ་མཁའ་ཡོངས་སུ་འཕེལ་བར་མི་འགྱུར། བསྔགས་པ་མ་
༄༅། །བརྗོད་ཀྱང་ནམ་མཁའ་ཡོངས་སུ་འགྲིབ་པར་མི་འགྱུར་རོ། །རབ་འབྱོར། འདི་ལྟ་སྟེ། དཔེར་ན་སྒྱུ་མའི་སྐྱེས་བུ་ལ་བསྔགས་པ་བརྗོད་ཀྱང་རྗེས་སུ་ཆགས་པར་ཡང་མི་
འགྱུར༑ ཀུན་ནས་ཉོན་མོངས་པར་མི་འགྱུར། བསྔགས་པ་མ་བརྗོད་ཀྱང་ཁོང་ཁྲོ་བར་མི་འགྱུར། ཀུན་ནས་ཉོན་མོངས་པར་མི་འགྱུར་རོ། །རབ་འབྱོར། དེ་བཞིན་དུ་ཆོས་རྣམས་ཀྱི་ཆོས་ཉིད་གང་
ཡིན་པ་དེའང་བསྟན་ཀྱང་དེ་སྙེད་དུ་ཟད་དོ། །མ་བསྟན་ཀྱང་དེ་སྙེད་དུ་ཟད་དོ། །གནས་བརྟན་རབ་འབྱོར་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་
ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་གང་ཞིག་ཞུམ་པར་མི་བགྱིད། ཡ་ཡ་བོར་མི་འགྱུར་ཏེ། འདི་ལ་རྣལ་འབྱོར་དུའང་བགྱིད་ལ་ཕྱིར་
མི་ལྡོག་པ་ནི། དཀའ་བ་བགྱིད་པ་ལགས་སོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་འདི་ནི། ནམ་མཁའ་སྒོམ་པ་ལགས་སོ། །བཅོམ་ལྡན་འདས། བྱང་ཆུབ་
སེམས་དཔའ་སེམས་དཔའ་ཆེན་པོ་གང་དག་གིས་གོ་ཆ་འདི་བགོས་པ་དེ་དག་ནི། ཕྱག་བགྱི་བར་འོས་པ་ལགས་སོ། །དེ་ཅིའི་ཕྱིར་ཞེ་ན། བཅོམ་ལྡན་འདས། གང་སེམས་ཅན་རྣམས་ཀྱི་སླད་དུ་གོ་
ཆ་བགོ་བར་འཚལ་བ་དེ་ནི། ནམ་མཁའ་དང་ལྷན་ཅིག་གོ་ཆ་བགོ་བར་འཚལ་བ་ལགས་སོ། །གང་ཞིག་ནམ་མཁའ་དང་མཚུངས་པའི་སེམས་ཅན་ཆོས་ཀྱི་དབྱིངས་དང་མཚུངས་པའི་སེམས་ཅན་
རྣམས་ཀྱི་སླད་དུ་གོ་ཆ་བགོ་བར་འཚལ་བ་ནི། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་ལགས་ཏེ། བཅོམ་ལྡན་འདས། བྱང་ཆུབ་སེམས་དཔའ་སེམས་
དཔའ་ཆེན་པོ་དཔའ་བོ་ལགས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བ་དེ་ནི། བཅོམ་ལྡན་འདས། ནམ་མཁའ་ཡོངས་སུ་ཐར་བར་འཚལ་བ་
ལགས་སོ། །དེ་ནི། བཅོམ་ལྡན་འདས། ནམ་མཁའ་འདེག་པར་འཚལ་བ་ལགས་སོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་མཁའ་དང་མཚུངས་པ་ཆོས་ཀྱི་དབྱིངས་
དང་མཚུངས་པའི་སེམས་ཅན་རྣམས་ཀྱི་སླད་དུ་གོ་ཆ་འཚལ་བ་དེ་ནི། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་གོ་ཆ་ཆེན་པོ་ཐོབ་པ་ལགས་སོ། །དེ་ནས་དགེ་སློང་གཞན་ཞིག་གིས་བཅོམ་ལྡན་འདས་ག་ལ་བ་དེ་
ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །བཅོམ་ལྡན་འདས། འདི་ལྟར་ཤེས་རབ་ཀྱི་
ཕ་རོལ་ཏུ་ཕྱིན་པ་ནི། ཆོས་གང་ཡང་མི་སྐྱེད། ཆོས་གང་ཡང་འགོག་པར་མི་བགྱིད་དོ། །དེ་ནས་ཚེ་དང་ལྡན་པ་རབ་འབྱོར་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་སྨྲས་སོ། །འཕགས་པ་རབ་
འབྱོར། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་དེ་ལྟར་རྣལ་འབྱོར་དུ་བྱེད་པ་དེ་ཅི་ལ་རྣལ་འབྱོར་དུ་བྱེད་པར་འགྱུར། རབ་འབྱོར་གྱིས་སྨྲས་པ། ཀཽ་ཤི་ཀ །གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་རྣལ་
༄༅། །འབྱོར་དུ་བྱེད་པ་དེ་ནི། ནམ་མཁའ་ལ་རྣལ་འབྱོར་དུ་བྱེད་པར་འགྱུར་རོ། །ཀཽ་ཤི་ཀ །གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སློབ་ཅིང་རྣལ་འབྱོར་དུ་བྱེད་པར་སེམས་པ་དེ་ནི་
བླ་གབ་མེད་པ་ལ་རྣལ་འབྱོར་དུ་བྱེད་པར་འགྱུར་རོ། །དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པར་འགྱུར་བ་དེ་ལ་བསྲུང་བ་དང༌། བསྐྱབ་པ་དང༌། སྦ་བ་ཅི་ཞིག་བགྱི་བ་བཀའ་སྩལ་བར་གསོལ། དེ་ནས་ཚེ་དང་ལྡན་པ་རབ་འབྱོར་གྱིས་ལྷ་རྣམས་ཀྱི་དབང་
པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ །ཆོས་གང་ལ་བསྲུང་བ་དང༌། བསྐྱབ་པ་དང༌། སྦ་བར་བྱ་བའི་ཆོས་དེ་ཁྱོད་ཀྱིས་ཡང་དག་པར་རྗེས་སུ་མཐོང་ངམ། བརྒྱ་བྱིན་གྱིས་སྨྲས་པ། འཕགས་
པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཀཽ་ཤི་ཀ །གལ་ཏེ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཇི་ལྟར་བཤད་པ་འདི་ལ་གནས་ན།
དེ་ཉིད་དེ་ལ་སྲུང་བ་དང༌། སྐྱོབ་པ་དང༌། སྦེད་པར་འགྱུར་རོ། །དེ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བར་གྱུར་ན་ནི། མི་དང༌། མི་མ་ཡིན་པ་དེ་ལ་གླགས་ལྟ་བ་དང༌། གླགས་ཚོལ་བ་དག་གིས་
གླགས་རྙེད་པར་འགྱུར་རོ། །ཀཽ་ཤི་ཀ །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་སྤྱོད་པ་ལ་བསྲུང་བ་དང༌། བསྐྱབ་པ་དང༌། སྦ་བར་བྱ་བར་སེམས་
པ་དེ་ནི། ནམ་མཁའ་ལ་བསྲུང་བ་དང༌། བསྐྱབ་བ་དང༌། སྦ་བར་བྱ་བར་སེམས་སོ། །ཀཽ་ཤི་ཀ །འདི་ཇི་སྙམ་དུ་སེམས། ཁྱོད་ཀྱིས་བྲག་ཅ་ལ་བསྲུང་བ་དང༌། བསྐྱབ་པ་དང༌། སྦ་བར་བྱེད་པར་ནུས་སམ། བརྒྱ་
བྱིན་གྱིས་སྨྲས་པ། འཕགས་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཀཽ་ཤི་ཀ །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སྤྱད་ཅིང་
གནས་པས་ནི། ཆོས་ཐམས་ཅད་ཀྱང་བྲག་ཅ་ལྟ་བུར་ཡོངས་སུ་ཤེས་སོ། །དེ་བས་ན། དེ་ལ་རློམ་སེམས་སུ་མི་བྱེད། ཡང་དག་པར་རྗེས་སུ་མི་མཐོང༌། མི་ཤེས། ཡང་དག་པར་མི་ཤེས། ཆོས་དེ་དག་ཀྱང་མེད་ཅིང་
ཡང་དག་པར་མི་སྣང་ལ། ཡང་དག་པར་མེད་ཅིང་མི་དམིགས་སོ། །ཞེས་གནས་ཏེ། གལ་ཏེ་དེ་ལྟར་གནས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ནས་སངས་རྒྱས་ཀྱི་མཐུས་སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་ན་རྒྱལ་པོ་ཆེན་པོ་བཞི་པོ་དང༌། ལྷ་རྣམས་ཀྱི་དབང་པོ་བརྒྱ་བྱིན་ཐམས་ཅད་དང༌། ཚངས་པ་ཆེན་པོ་ཐམས་ཅད་དང༌། མི་མཇེད་ཀྱི་བདག་པོ་ཚངས་པ་ཆེན་པོ་གང་དག་ཡོད་པ་དེ་
དག་ཐམས་ཅད་བཅོམ་ལྡན་འདས་ག་ལ་བ་དེར་འོངས་ཏེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་
འཁོད་དོ། །ཕྱོགས་གཅིག་ཏུ་འཁོད་པ་དང༌། རྒྱལ་པོ་ཆེན་པོ་དེ་དག་དང༌། ལྷ་རྣམས་ཀྱི་དབང་པོ་བརྒྱ་བྱིན་ཐམས་ཅད་དང༌། ཚངས་པ་ཆེན་པོ་ཐམས་ཅད་དང༌། ཚངས་པ་ཆེན་པོ་མི་མཇེད་ཀྱི་བདག་པོས་ཀྱང་
༄༅། །སངས་རྒྱས་ཀྱི་མཐུ་དང༌། སངས་རྒྱས་ཀྱི་བྱིན་གྱི་རླབས་ཀྱིས་སངས་རྒྱས་སྟོང་དང༌། དེ་དག་གིས་མིང་འདི་དག་ཉིད་དང༌། ཚིག་འདི་དག་ཉིད་དང༌། ཡི་གེ་འདི་དག་ཉིད་དང༌།
རབ་འབྱོར་ཅེས་བྱ་བའི་དགེ་སློང་འདི་དག་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་དང༌། ཤེས་རབ་ཀྱི་ཕ་རོལ་ཏུ་ཕྱིན་པའི་ལེའུ་འདི་ཉིད་ཉེ་བར་བསྟན་ཅིང༌། དེར་ཡང་ལྷ་རྣམས་ཀྱི་དབང་
པོ་བརྒྱ་བྱིན་རྣམས་ཉིད་ཀྱིས་ཡོངས་སུ་དྲིས་ཤིང་ཡོངས་སུ་ཞུས་ཏེ་ས་ཕྱོགས་འདི་ཉིད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་བཤད་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་
བྱམས་པས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ས་ཕྱོགས་འདི་ཉིད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་འཆད་པར་འགྱུར་བ་
ཤེས་པར་གྱུར་ཏོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། རྣམ་པར་དག་པ་ཞེས་བྱ་བའི་ལེའུ་སྟེ། བརྒྱད་པའོ།། །།དེ་ནས་བཅོམ་ལྡན་འདས་
ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི་བ་འདི་ནི། མིང་ཙམ་མོ། །མིང་དེའང་འདིའོ། །ཞེས་མི་དམིགས་
ཏེ༑ ངག་གི་དངོས་པོ་འདི་ཉིད་མིང་ཞེས་བགྱིའོ། །ཤེས་རབ་ཀྱི་ཕ་རོལ་ཏུ་ཕྱིན་པ་དེའང་མ་མཆིས་མི་དམིགས་ཏེ། མིང་ཇི་ལྟ་བ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའང་དེ་བཞིན་ནོ། །ཤེས་
རབ་ཀྱི་ཕ་རོལ་ཏུ་ཕྱིན་པ་ཇི་ལྟ་བར་མིང་ཡང་དེ་བཞིན་ཏེ། ཆོས་འདི་གཉིས་ནི། མ་མཆིས་ཤིང་མི་དམིགས་ན། བཅོམ་ལྡན་འདས། ཅིའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་མིང་འདི་དག་ཉིད་དང༌། ཚིག་འདི་དག་ཉིད་དང༌། ཡི་གེ་འདི་དག་ཉིད་ཀྱིས་ས་ཕྱོགས་འདི་ཉིད་དུ་ཤེས་རབ་ཀྱི་
ཕ་རོལ་ཏུ་ཕྱིན་པ་འདི་ཉིད་འཆད་པར་འགྱུར། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། འདི་ལྟར་བྱང་ཆུབ་སེམས་
དཔའ་སེམས་དཔའ་ཆེན་པོ་བྱམས་པ་ནི། གཟུགས་རྟག་པ་མ་ཡིན་མི་རྟག་པ་མ་ཡིན། གཟུགས་བཅིངས་པ་མ་ཡིན་གྲོལ་བ་མ་ཡིན་པས་མཐའ་ལས་འདས་ཤིང་རྣམ་པར་དག་པའོ། །ཞེས་
མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་དུ་ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་ལ་མ་ཡིན། རྣམ་པར་ཤེས་པ་རྟག་པ་མ་ཡིན་མི་རྟག་པ་མ་ཡིན།
རྣམ་པར་ཤེས་པ་བཅིངས་པ་མ་ཡིན་གྲོལ་བ་མ་ཡིན་པས་མཐའ་ལས་འདས་ཤིང་རྣམ་པར་དག་པའོ། །ཞེས་མངོན་པར་རྫོགས་པར་འཚང་རྒྱ་བར་འགྱུར་རོ། །རབ་འབྱོར། རྒྱུ་འདིས་ན་
བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་མིང་འདི་དག་ཉིད་དང༌། ཚིག་འདི་དག་ཉིད་དང༌། ཡི་གེ་
༄༅། །འདི་དག་ཉིད་ཀྱིས་ས་ཕྱོགས་འདི་ཉིད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་འཆད་པར་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་
པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཨེ་མའོ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཡོངས་སུ་དག་པའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར།
གཟུགས་རྣམ་པར་དག་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་རྣམ་པར་དག་པས་
ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །རབ་འབྱོར། གཟུགས་སྐྱེ་བ་མེད་པ་དང༌། འགག་པ་མེད་པ་དང༌། ཀུན་ནས་ཉོན་མོངས་པ་མེད་པ་དང༌། རྣམ་པར་བྱང་བ་མེད་པ་རྣམ་པར་དག་པས་
ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་སྐྱེ་བ་མེད་པ་དང༌། འགག་པ་མེད་པ་དང༌།
ཀུན་ནས་ཉོན་མོངས་པ་མེད་པ་དང༌། རྣམ་པར་བྱང་བ་མེད་པ་རྣམ་པར་དག་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་བའོ། །རབ་འབྱོར། ནམ་མཁའ་རྣམ་པར་དག་པས་ཤེས་རབ་ཀྱི་ཕ་
རོལ་ཏུ་ཕྱིན་པ་ཡོངས་སུ་དག་པའོ། །རབ་འབྱོར། གཟུགས་གོས་པ་མེད་ཅིང་ཡོངས་སུ་འཛིན་པ་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །རབ་འབྱོར། དེ་བཞིན་དུ་ཚོར་
བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་གོས་པ་མེད་ཅིང་ཡོངས་སུ་འཛིན་པ་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །རབ་འབྱོར། ནམ་མཁའ་དང༌།
བྲག་ཅ་སྨྲར་མེད་ཅིང་བརྗོད་དུ་མེད་ལ་དམིགས་སུ་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །རབ་འབྱོར། ཉེ་བར་གོས་པ་དང༌། གོས་པ་མེད་པའི་ཆོས་ཐམས་ཅད་ཀྱིས་གོས་པ་
མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་
རིགས་ཀྱི་བུའམ་རིགས་ཀྱི་བུ་མོ་གང་དག་གི་རྣ་ལམ་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གྲག་པར་གྱུར་པ་དེ་དག་ཀྱང་རྙེད་པ་ལེགས་པར་རྙེད་པ་ལགས་ན། གང་དག་འཛིན་པ་དང༌། འཆང་བ་དང༌།
ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པར་འགྱུར་བ་ལྟ་ཅི་སྨོས་ཏེ། དེ་དག་ལ་ནི། མིག་གི་ནད་འབྱུང་
བར་མི་འགྱུར། རྣ་བའི་ནད་མ་ཡིན། སྣའི་ནད་མ་ཡིན། ལྕེའི་ནད་མ་ཡིན། ལུས་ཀྱི་ནད་འབྱུང་བར་མི་འགྱུར་རོ། །རྨོངས་པ་ཉིད་དུ་མི་འགྱུར་རོ། །དེ་དག་ནི། ཉམ་ང་བ་མི་སྤོང་བས་འཆི་བའི་དུས་མི་
བགྱིད་དོ། །དེ་དག་ལ་ལྷའི་བུ་བརྒྱ་སྟོང་ཕྲག་མང་པོ་དག་དེའི་ཕྱི་བཞིན་དུ་འབྲང་བར་འགྱུར་རོ། །ཚེས་བརྒྱད་དང༌། བཅུ་བཞི་དང༌། བཅོ་ལྔ་ལ་ཆོས་སྨྲ་བའི་རིགས་ཀྱི་བུའམ་རིགས་ཀྱི་བུ་མོ་དེ་གང་དང་
༄༅། །གང་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འཆད་པར་འགྱུར་བ་དེ་དང་དེར་བསོད་ནམས་ཆེས་མང་དུ་སྐྱེད་པར་འགྱུར་རོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་
ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ནོ། །རབ་འབྱོར། དེ་དེ་བཞིན་ཏེ། རབ་འབྱོར། རིགས་ཀྱི་བུའམ་རིགས་ཀྱི་བུ་མོ་དེའི་ཕྱི་བཞིན་དུ་ལྷ་བརྒྱ་སྟོང་ཕྲག་མང་པོ་དག་
རྗེས་སུ་འབྲང་བར་འགྱུར་རོ། །ལྷ་བརྒྱ་སྟོང་ཕྲག་མང་པོ་དག་དེར་འོང་བར་འགྱུར་རོ། །ཆོས་སྟོན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པར་བྱེད་པའི་ཆོས་ཉན་པར་འདོད་པ་དེ་དག་ཐམས་ཅད་
ཀྱང་བསྲུང་པ་དང༌། བསྐྱབ་པ་དང༌། སྦ་བ་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱི་རིན་པོ་ཆེ་
བླ་ན་མེད་པའོ། །རབ་འབྱོར། དེའི་ཕྱིར་ཡང་རིགས་ཀྱི་བུའམ་རིགས་ཀྱི་བུ་མོ་དེ་དེའི་གཞི་ལས་བསོད་ནམས་མང་དུ་སྐྱེད་པར་འགྱུར་རོ། །རབ་འབྱོར། འོན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་
འདི་ཡི་གེར་འདྲི་བ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་
པ་ལ་བར་ཆད་མང་དུ་འབྱུང་བར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར་རིན་པོ་ཆེ་ཆེན་པོ་ནི། དགྲ་མང་བ་ཡིན་ཏེ། ཇི་ཙམ་དུ་གཅེས་པར་གྱུར་པ་བཞིན་དུ་དགྲ་ཆེས་ལྕི་བར་འགྱུར་
རོ༑ ༑རབ་འབྱོར། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་རིན་པོ་ཆེ་ཆེན་པོ་འདི་ནི། འཇིག་རྟེན་ན་བླ་ན་མེད་པའི་རིན་པོ་ཆེ་སྟེ། འཇིག་རྟེན་ལ་ཕན་པ་དང་བདེ་བའི་ཕྱིར་ཞུགས་པ། ཆོས་ཐམས་ཅད་མི་
སྐྱེ་བ་དང༌། མི་འགག་པར་བྱ་བའི་ཕྱིར་དང༌། ཀུན་ནས་ཉོན་མོངས་པ་མེད་པར་བྱ་བའི་ཕྱིར་མི་འཇིགས་པའི་ཚུལ་གྱིས་ཉེ་བར་གནས་པའོ། །རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཆོས་གང་
ལའང་མི་གནས། ཆོས་གང་ལའང་མི་སྦྱོར། ཆོས་གང་ལའང་ཡོངས་སུ་མི་འཛིན་ཏོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར་ཆོས་དེ་དག་ཐམས་ཅད་ནི། མེད་ཅིང་མི་དམིགས་སོ། །རབ་འབྱོར། མ་
སྐྱེས་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། མ་གོས་པའོ། །རབ་འབྱོར། མ་གོས་པ་ཞེས་བྱ་བ་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། རབ་འབྱོར། འདི་ལྟར་གཟུགས་མ་གོས་པས་ན། ཤེས་
རབ་ཀྱི་ཕ་རོལ་ཏུ་ཕྱིན་པ་མ་གོས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་མ་གོས་པས་ན། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་མ་གོས་པའོ། །
རབ་འབྱོར། གལ་ཏེ་དེ་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དག་པར་མི་ཤེས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །རབ་འབྱོར། ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་
ནི༑ ཆོས་གང་ལའང་འཇུག་པར་བྱེད་པའམ། ངེས་པར་འཇུག་པར་བྱེད་པའམ། ཡང་དག་པར་སྟོན་པར་བྱེད་པའམ། ངེས་པར་སྟོན་པར་བྱེད་པའམ། ཡོངས་སུ་ཐོབ་པར་བྱེད་པའམ། ངེས་པར་ཐོབ་པར་
༄༅། །བྱེད་པ་མེད་དོ། །དེ་ནས་ལྷའི་བུ་སྟོང་ཕྲག་མང་པོ་དག་བར་སྣང་ལ་ཅ་ཅོ་དང༌། ག་ཞ་དག་བྱེད་དེ། གོས་དག་འཐོར་ཞིང་འདི་སྐད་དུ། ཨེ་མ་ཛམྦུའི་གླིང་དུ་ཆོས་ཀྱི་འཁོར་ལོ་བསྐོར་
བ་ལན་གཉིས་སུ་བྱུང་བར་སྣང་ངོ༌། །ཞེས་ཀྱང་ཟེར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་གནས་བརྟན་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། འདི་ནི། ཆོས་ཀྱི་འཁོར་ལོ་
ལན་གཉིས་སུ་བསྐོར་བ་མ་ཡིན་ཏེ། ཆོས་གང་ལའང་རབ་ཏུ་བསྐོར་བའམ་ལྡོག་པ་མེད་དོ། །རབ་འབྱོར། དེ་ལྟར་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་
པ་ཡིན་ནོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ནི། གང་ཞིག་ཆོས་ཐམས་ཅད་ལ་ཆགས་པ་
མ་མཆིས་པ་དང༌། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་ཡང་ཆོས་གང་ཡང་མངོན་པར་རྫོགས་པར་འཚང་མི་རྒྱ་བ་དང༌། ཆོས་ཀྱི་འཁོར་
ལོ་རབ་ཏུ་བསྐོར་ཡང་ཆོས་གང་ཡང་ཡང་དག་པར་མི་སྟོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་ཕ་རོལ་ཏུ་ཕྱིན་པ་ཆེན་པོ་ལགས་སོ། །དེ་ཅིའི་སླད་དུ་ཞེ་ན། ཆོས་གང་ཞིག་དམིགས་
པར་བྱ་བའམ། ཆོས་གང་ཞིག་བསྟན་པར་བྱ་བ་དེ་ནི། མེད་ལ། འགའ་ཞིག་གིས་འགའ་ཞིག་བསྐོར་བར་བྱ་བའང་མེད་དོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་ཐམས་ཅད་ནི། ཤིན་ཏུ་
མངོན་པར་མ་གྲུབ་པ་སྟེ། ཆོས་གང་ཡང་ལྡོག་པར་མི་འགྱུར། རབ་ཏུ་བསྐོར་བར་མི་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་ཐམས་ཅད་ནི། ཐོག་མ་ནས་མངོན་པར་མ་གྲུབ་པ་སྟེ། ཆོས་
ཐམས་ཅད་ནི། རང་བཞིན་གྱིས་དབེན་པའི་ཕྱིར་རོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་
ཏེ༑ རབ་འབྱོར། སྟོང་པ་ཉིད་ནི། རབ་ཏུ་འཇུག་པའམ་ལྡོག་པ་མེད་དོ། །རབ་འབྱོར། མཚན་མ་མེད་པ་ཡང་འཇུག་པའམ་ལྡོག་པ་མེད་དོ། །རབ་འབྱོར། སྨོན་པ་མེད་པའང་འཇུག་པའམ་ལྡོག་པ་མེད་དོ། །
རབ་འབྱོར། གང་འདི་ལྟར་བསྟན་པ་འདི་ནི། ཆོས་ཐམས་ཅད་བསྟན་པ་ཡིན་ཏེ། སུས་ཀྱང་བསྟན་པ་མེད་ལ་སུས་ཀྱང་ཐོས་པའང་མེད། སུས་ཀྱང་མནོས་པའང་མེད། སུས་ཀྱང་མངོན་སུམ་དུ་བྱས་པའང་
མེད༑ སུས་ཀྱང་མངོན་སུམ་དུ་བྱེད་པའང་མ་ཡིན། སུས་ཀྱང་མངོན་སུམ་དུ་བྱེད་པར་ཡང་མི་འགྱུར་རོ། །ཆོས་བསྟན་པ་འདིས་ནི། སུའང་ཡོངས་སུ་མྱ་ངན་ལས་མ་འདས། ཡོངས་སུ་མྱ་ངན་ལས་འདའ་
བར་མི་འགྱུར། ཡོངས་སུ་མྱ་ངན་ལས་མི་འདའ་སྟེ། ཆོས་བསྟན་པ་འདིས་ནི། སུའང་སྦྱིན་པའི་གནས་སུ་བྱས་པའང་མེད་དོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་
འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ནམ་མཁའ་མ་མཆིས་པའི་སླད་དུ་འདི་ནི། མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་དམིགས་སུ་མ་མཆིས་
༄༅། །པར་མཉམ་པའི་སླད་དུ་འདི་ནི། མི་མཉམ་པ་དང་མཉམ་པ་ཉིད་ཀྱི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཤིན་ཏུ་སྟོང་པའི་སླད་དུ་འདི་ནི། དབེན་པའི་ཕ་རོལ་ཏུ་
ཕྱིན་པའོ། །བཅོམ་ལྡན་འདས། ཆོས་ཐམས་ཅད་མི་དམིགས་པའི་སླད་དུ་འདི་ནི། མི་བརྫི་བའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། མིང་མ་མཆིས་ཤིང་ལུས་མ་མཆིས་པའི་སླད་དུ་འདི་
ནི༑ གནས་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། འགྲོ་བ་དང་འོང་བ་མ་མཆིས་པའི་སླད་དུ་འདི་ནི། ངོ་བོ་ཉིད་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་
ཐམས་ཅད་རྟོག་པ་མ་མཆིས་པའི་སླད་དུ་འདི་ནི། བརྗོད་དུ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཕུང་པོ་ལྔ་དམིགས་སུ་མ་མཆིས་པའི་སླད་དུ་འདི་ནི། མིང་མ་མཆིས་པའི་ཕ་
རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་འགྲོ་བ་མ་མཆིས་པའི་སླད་དུ་འདི་ནི། འགྲོ་བ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་གཟུང་བ་མ་མཆིས་
པའི་སླད་དུ་འདི་ནི། མི་འཕྲོག་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། མི་བས་པའི་ཆོས་དང་ལྡན་པའི་སླད་དུ་འདི་ནི། མི་བས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་
ཅད་མངོན་པར་མ་གྲུབ་པའི་སླད་དུ་འདི་ནི། ཆོས་ཐམས་ཅད་མི་སྐྱེ་བའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། བྱེད་པ་པོ་མི་དམིགས་པའི་སླད་དུ་འདི་ནི། བྱེད་པ་པོ་མ་མཆིས་པའི་ཕ་རོལ་ཏུ་
ཕྱིན་པའོ། །བཅོམ་ལྡན་འདས། ཆོས་ཐམས་ཅད་བདག་མ་མཆིས་པའི་སླད་དུ་འདི་ནི། ཤེས་པ་པོ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། འཆི་འཕོ་བ་དང་སྐྱེ་བ་དག་མི་སྐྱེ་བའི་
སླད་དུ་འདི་ནི། མི་འཕོ་བའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། སྔོན་གྱི་མཐའ་དང༌། ཕྱི་མའི་མཐའ་དང༌། ད་ལྟར་བྱུང་བའི་དུས་མི་དམིགས་པའི་སླད་དུ་འདི་ནི། འདུལ་བ་མེད་པའི་ཕ་
རོལ་ཏུ་ཕྱིན་པའོ། །བཅོམ་ལྡན་འདས། སྐྱེ་བ་མ་མཆིས་པ་རྣམ་པར་ཤེས་པར་བགྱིད་པའི་སླད་དུ་འདི་ནི། རྨི་ལམ་དང༌། སྒྲ་བརྙན་དང༌། མིག་ཡོར་དང༌། སྨིག་རྒྱུ་དང༌། སྒྱུ་མའི་ཕ་རོལ་ཏུ་ཕྱིན་
པའོ༑ ༑བཅོམ་ལྡན་འདས། འདོད་ཆགས་དང༌། ཞེ་སྡང་དང༌། གཏི་མུག་ངོ་བོ་ཉིད་མ་མཆིས་པའི་སླད་དུ་འདི་ནི། ཀུན་ནས་ཉོན་མོངས་པ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་
འདས༑ རྟེན་མི་དམིགས་པའི་སླད་དུ་འདི་ནི། རྣམ་པར་བྱང་བ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ནམ་མཁའ་གོས་པ་མ་མཆིས་པའི་སླད་དུ་འདི་ནི། གོས་པ་མ་མཆིས་
པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། རློམ་སེམས་ཐམས་ཅད་ལས་འདས་པའི་སླད་དུ་འདི་ནི། སྤྲོས་པ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། གཡོ་བ་མ་མཆིས་
པའི་སླད་དུ་འདི་ནི། རློམ་སེམས་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཀྱི་དབྱིངས་གནས་པ་ཉིད་ཀྱི་སླད་དུ་འདི་ནི། མི་གཡོ་བའི་ཕ་རོལ་ཏུ་ཕྱིན་པའོ། །བཅོམ་ལྡན་
༄༅། །འདས༑ ཆོས་ཐམས་ཅད་ཕྱིན་ཅི་མ་ལོག་པ་དེ་བཞིན་ཉིད་ཀྱི་སླད་དུ་འདི་ནི། འདོད་ཆགས་དང་བྲལ་བའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་རྣམ་
པར་མི་རྟོག་པ་ཉིད་ཀྱི་སླད་དུ་འདི་ནི། ལྡང་བ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་ཀྱི་མཚན་མ་མི་དམིགས་པའི་སླད་དུ་འདི་ནི། ཞི་བའི་ཕ་རོལ་ཏུ་ཕྱིན་པའོ། །
བཅོམ་ལྡན་འདས། ཡོན་ཏན་གྱི་ཕ་རོལ་ཏུ་ཕྱིན་པའི་སླད་དུ་འདི་ནི། སྐྱོན་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཡོངས་སུ་རྟོག་པ་མ་མཆིས་པའི་སླད་དུ་འདི་ནི། ཉོན་མོངས་
པ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཡང་དག་པའི་མཐའི་སླད་དུ་འདི་ནི། སེམས་ཅན་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་ལྡང་བ་མ་མཆིས་
པའི་སླད་དུ་འདི་ནི། ཚད་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་མངོན་པར་མ་ཞེན་པའི་སླད་དུ་འདི་ནི། མཐའ་གཉིས་མི་རྟོག་པའི་ཕ་རོལ་ཏུ་ཕྱིན་པའོ། །
བཅོམ་ལྡན་འདས། ཆོས་ཐམས་ཅད་དབྱེར་མ་མཆིས་པའི་སླད་དུ་འདི་ནི། ཐ་མི་དད་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཉན་ཐོས་དང་རང་སངས་རྒྱས་ཀྱིས་ཐམས་ཅད་ལ་འདོད་པ་མ་
མཆིས་པའི་སླད་དུ་འདི་ནི། མཆོག་ཏུ་མི་འཛིན་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། རྣམ་པར་རྟོག་པ་ཞི་བ་ཉིད་ཀྱི་སླད་དུ་འདི་ནི། རྣམ་པར་མི་རྟོག་པའི་ཕ་རོལ་ཏུ་ཕྱིན་པའོ། །བཅོམ་ལྡན་
འདས༑ ཆོས་ཉིད་ཚད་མ་མཆིས་པ་ཉིད་ཀྱི་སླད་དུ་འདི་ནི། གཞལ་དུ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་ཆགས་པ་མ་མཆིས་པའི་སླད་དུ་འདི་ནི། ཆགས་པ་མ་
མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་འདུས་མ་བགྱིས་པའི་སླད་དུ་འདི་ནི། མི་རྟག་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་ནམ་།མཁའ་དང་
མཉམ་པའི་སླད་དུ་འདི་ནི། སྡུག་བསྔལ་བའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་མི་དམིགས་པའི་སླད་དུ་འདི་ནི། སྟོང་པ་ཉིད་ཀྱི་ཕ་རོལ་ཏུ་ཕྱིན་པའོ། །བཅོམ་ལྡན་འདས།
ཆོས་ཐམས་ཅད་མངོན་པར་མ་ཆགས་པའི་སླད་དུ་འདི་ནི། བདག་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་མངོན་པར་མ་གྲུབ་པའི་སླད་དུ་འདི་ནི། མཚན་ཉིད་མ་
མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། མཐའ་ཡས་མུ་མ་མཆིས་པའི་སླད་དུ་འདི་ནི། སྟོང་པ་ཉིད་ཐམས་ཅད་ཀྱི་ཕ་རོལ་ཏུ་ཕྱིན་པའོ། །བཅོམ་ལྡན་འདས། བྱང་ཆུབ་ཀྱི་ཕྱོགས་དེ་རྣམས་
དམིགས་སུ་མ་མཆིས་པའི་སླད་དུ་འདི་ནི། དྲན་པ་ཉེ་བར་གཞག་པ་ལ་སོགས་པ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་ཕ་རོལ་ཏུ་ཕྱིན་པའོ། །བཅོམ་ལྡན་འདས། རྣམ་པར་ཐར་པའི་སྒོ་གསུམ་མི་དམིགས་
པའི་སླད་དུ་འདི་ནི། སྟོང་པ་ཉིད་དང༌། མཚན་མ་མེད་པ་དང་སྨོན་པ་མེད་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། འདི་རྣམས་དམིགས་སུ་མ་མཆིས་པའི་སླད་དུ་འདི་ནི། རྣམ་པར་ཐར་པ་བརྒྱད་
༄༅། །ཀྱི་ཕ་རོལ་ཏུ་ཕྱིན་པའོ། །བཅོམ་ལྡན་འདས། བསམ་གཏན་དང་པོ་ལ་སོགས་པ་མི་དམིགས་པའི་སླད་དུ་འདི་ནི། མཐར་གྱིས་གནས་པའི་སྙོམས་པར་འཇུག་པ་དགུའི་
ཕ་རོལ་ཏུ་ཕྱིན་པའོ། །བཅོམ་ལྡན་འདས། སྡུག་བསྔལ་ལ་སོགས་པ་མི་དམིགས་པའི་སླད་དུ་འདི་ནི། བདེན་པ་བཞིའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། སྦྱིན་པ་ལ་སོགས་པ་མི་དམིགས་
པའི་སླད་དུ་འདི་ནི། ས་བཅུའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། མི་བརྫི་བའི་སླད་དུ་འདི་ནི། སྟོབས་ཀྱི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཤིན་ཏུ་མ་ཞུམ་པའི་སླད་དུ་འདི་ནི། མི་
འཇིགས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཡེ་ཤེས་ཐམས་ཅད་ཆགས་པ་མ་མཆིས་པ་དང༌། ཐོགས་པ་མ་མཆིས་པའི་སླད་དུ་འདི་ནི། སོ་སོ་ཡང་དག་པར་རིག་པའི་ཕ་རོལ་ཏུ་
ཕྱིན་པའོ། །བཅོམ་ལྡན་འདས། བགྲང་བ་ལས་ཡང་དག་པར་འདས་པའི་སླད་དུ་འདི་ནི། སངས་རྒྱས་ཀྱི་ཆོས་མ་འདྲེས་པ་ཐམས་ཅད་ཀྱི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་
མ་ལོག་པ་དེ་བཞིན་ཉིད་ཀྱི་སླད་དུ་འདི་ནི། དེ་བཞིན་གཤེགས་པའི་དེ་བཞིན་ཉིད་ཀྱི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་ངོ་བོ་ཉིད་མ་མཆིས་པའི་སླད་དུ་འདི་ནི། རང་བྱུང་
གི་ཕ་རོལ་ཏུ་ཕྱིན་པའོ། །བཅོམ་ལྡན་འདས། ཆོས་ཐམས་ཅད་ཀྱི་ངོ་བོ་ཉིད་ཀྱི་རྣམ་པ་ཐམས་ཅད་ཡོངས་སུ་མཁྱེན་པའི་སླད་དུ་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཐམས་ཅད་མཁྱེན་
པའི་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། བསྟོད་པའི་ལེའུ་ཞེས་བྱ་སྟེ། དགུ་པའོ།། །།འཕགས་པ་ཤེས་རབ་ཀྱི་ཕ་རོལ་
ཏུ་ཕྱིན་པ་བརྒྱད་སྟོང་པ། བམ་པོ་བཅུ་པ། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་རིགས་ཀྱི་བུའམ་རིགས་ཀྱི་བུ་མོ་གང་དག་གི་རྣ་ལམ་དུ་
སྣང་བར་འགྱུར་བའང་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པར་འགྱུར་བ་དང༌། སངས་རྒྱས་མང་པོ་ལ་དགེ་བའི་རྩ་བ་བསྐྲུན་པ་དང༌། དགེ་བའི་བཤེས་གཉེན་གྱིས་ཡོངས་སུ་ཟིན་པར་འགྱུར་བ་
ཡིན་ནོ༑ ༑གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཛིན་པར་འགྱུར། འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར་
ཉེ་བར་སྟོན་པར་འགྱུར། ལུང་འབོགས་པར་འགྱུར། ཁ་ཏོན་བྱེད་པར་འགྱུར་ཞིང༌། བཟུང་བ་དང༌། བཅངས་པ་དང༌། བཀླགས་པ་དང༌། ཀུན་ཆུབ་པར་བྱས་པ་དང༌། རབ་ཏུ་སྟོན་པ་དང༌། བསྟན་པ་དང༌། ཉེ་བར་
བསྟན་པ་དང༌། ལུང་འབོགས་པ་དང༌། ཁ་ཏོན་བྱས་ནས་དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་བྱེད་པར་འགྱུར་བ་ལྟ་ཅི་སྨོས་ཏེ། དེ་དག་ནི།
དགེ་བའི་རྩ་བ་ངན་ངོན་ཙམ་དང་ལྡན་པར་མི་འགྱུར་ཏེ། རིགས་ཀྱི་བུ་དང༌། རིགས་ཀྱི་བུ་མོ་དེ་དག་ནི། སངས་རྒྱས་མང་པོ་ལ་བསྙེན་བཀུར་བྱས་པར་འགྱུར་རོ། །གང་དག་ད་ལྟར་ཡང་ཤེས་རབ་ཀྱི་
༄༅། །ཕ་རོལ་ཏུ་ཕྱིན་པ་འདི་ཉན་པར་འགྱུར་ཞིང༌། མཉན་ནས་ཀྱང་འཛིན་པར་འགྱུར། འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། རབ་ཏུ་
འདོན་པར་འགྱུར། སྟོན་པར་འགྱུར། ཉེ་བར་སྟོན་པར་འགྱུར། ལུང་འབོགས་པར་འགྱུར། ཁ་ཏོན་བྱེད་པར་འགྱུར། དེ་བཞིན་ཉིད་དུ་སློབ་པར་འགྱུར། དེ་བཞིན་ཉིད་དུ་སྒྲུབ་པར་འགྱུར། དེ་
བཞིན་ཉིད་དུ་རྣལ་འབྱོར་དུ་བྱེད་པར་འགྱུར་བའི་རིགས་ཀྱི་བུའམ་རིགས་ཀྱི་བུ་མོ་དེ་དག་གིས་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་
ཐད་ནས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་ནས་སངས་རྒྱས་བཅོམ་ལྡན་འདས་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡོངས་སུ་ཞུས་ཤིང་ཡོངས་སུ་དྲིས་པར་བྱས་པ་ཡིན་ནོ། །གང་
དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལྟར་ཟབ་པ་འདི་བཤད་པ་དང༌། བསྟན་པ་དང༌། ཉེ་བར་བསྟན་པ་ལ་འགོང་བར་མི་འགྱུར། ཀུན་ཏུ་ཞུམ་པར་མི་འགྱུར། བག་ཚ་བར་མི་འགྱུར། བག་
འཁུམས་པར་མི་འགྱུར། ཡིད་ཕྱིར་ཕྱོགས་པར་མི་འགྱུར། བཅོམ་ཞིང་ཕྱིར་ཕྱོགས་པར་མི་འགྱུར། མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་ལྡན་པར་མི་འགྱུར་བའི་རིགས་ཀྱི་བུ་
དང༌། རིགས་ཀྱི་བུ་མོ་དེ་དག་ནི། སངས་རྒྱས་མང་པོ་ལ་དགེ་བའི་རྩ་བ་བསྐྲུན་པར་རིག་པར་བྱའོ། །དེ་ནས་ཚེ་དང་ལྡན་པ་ཤཱ་རིའི་བུས་ལྷ་རྣམས་ཀྱི་དབང་པོ་བརྒྱ་བྱིན་གྱི་འདི་ལྟ་བུའི་སེམས་
ཀྱི་རྟོག་པ་སེམས་ཀྱིས་ཤེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉིད་འཆད་པ་དང༌།
སྟོན་པ་དང༌། ཉེ་བར་སྟོན་པ་ལ་མངོན་པར་དད་དེ་རྟོག་ཅིང་མོས་ལ་སེམས་དང་བས་བྱང་ཆུབ་ཏུ་སེམས་བསྐྱེད་དེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་
པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་
དུ་རྣལ་འབྱོར་དུ་བགྱིད་པར་འགྱུར་བ་དེ་ནི། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟ་བ་དེ་བཞིན་དུ་གཟུང་བར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཤེས་
རབ་ཀྱི་ཕ་རོལ་ཏུ་ཕྱིན་པ་འདི་ནི། ཟབ་སྟེ། བཅོམ་ལྡན་འདས། དགེ་བའི་རྩ་བ་ཆུང་བ་དང༌། སངས་རྒྱས་བཅོམ་ལྡན་འདས་རྣམས་ལ་མངོན་སུམ་དུ་མ་ཐོས་ཤིང་ཡོངས་སུ་མ་དྲིས་པའི་རང་བཞིན་
ཅན་དུ་གྱུར་པ་དང༌། སྔོན་སྤྱད་པ་དང་མི་ལྡན་པ་རྣམས་ཀྱིས་ནི། འདི་ལྟར་ཟབ་པའི་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མོས་པར་མི་ནུས་སོ། །བཅོམ་ལྡན་འདས། ཡང་གང་དག་འདི་ལ་མི་མོས་
ཤིང་མ་རྟོགས་པས་སྤོང་བར་སེམས་པའི་རིགས་ཀྱི་བུ་དང༌། རིགས་ཀྱི་བུ་མོ་དེ་དག་གིས་ནི། སྔོན་གྱི་མཐར་ཡང་འདི་ལྟར་ཟབ་པའི་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་བཤད་པ་ན་སྤངས་པར་གྱུར་
༄༅། །ཏོ༑ ༑དེ་ཅིའི་སླད་དུ་ཞེ་ན། བཅོམ་ལྡན་འདས། འདི་ལྟར་དགེ་བའི་རྩ་བ་ཆུང་བའི་སླད་དུ་སྔོན་གྱི་མཐར་མ་སྤྱད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ཇི་
ལྟར་ཡང་མོས་པར་མི་ནུས་སོ། །གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཆད་པ་ན་སྤོང་བར་འགྱུར་བ་དེ་དག་ཀྱང་དེ་བཞིན་དུ་རིག་པར་བགྱི་སྟེ། དེ་དག་གིས་སྔོན་གྱི་མཐར་ཡང་
ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉིད་བཤད་པ་ན་སྤངས་པ་ལགས་ཏེ། འདི་ལྟར་དེ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཤད་པ་ལ་དད་པ་མ་མཆིས། བཟོད་པ་མ་
མཆིས༑ སྲེད་པ་མ་མཆིས། འདུན་པ་མ་མཆིས། བརྩོན་འགྲུས་མ་མཆིས། དང་བ་མ་མཆིས། མོས་པ་མ་མཆིས་སོ། །དེ་དག་གིས་ནི། སྔོན་གྱི་སངས་རྒྱས་བཅོམ་ལྡན་འདས་རྣམས་
དང་རང་སངས་རྒྱས་ཀྱི་ཉན་ཐོས་རྣམས་ལ་ཡོངས་སུ་མ་དྲིས་ཏེ་ཡོངས་སུ་དྲི་བ་མ་བགྱིས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །འཕགས་
པ་ཤཱ་རིའི་བུ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཟབ་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་མ་སྤྱད་པ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཤད་པ་ལ་མོས་
པར་མི་འགྱུར་བ་དེ་ལ་ངོ་མཚར་ཅི་ཞིག་ཡོད། དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་
ལ་ཕྱག་འཚལ་ལོ། །བཅོམ་ལྡན་འདས། གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་བ་དེ་ནི། ཐམས་ཅད་མཁྱེན་པའི་ཡེ་ཤེས་ལ་ཕྱག་འཚལ་བ་ལགས་སོ། །བཅོམ་ལྡན་འདས་ཀྱིས་བཀའ་
སྩལ་པ༑ ཀཽ་ཤི་ཀ །དེ་དེ་བཞིན་ནོ། །དེ་དེ་བཞིན་ཏེ། ཀཽ་ཤི་ཀ །གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་བ་དེ་ནི། ཐམས་ཅད་མཁྱེན་པའི་ཡེ་ཤེས་ལ་ཕྱག་འཚལ་བ་ཡིན་ནོ། །དེ་ཅིའི་ཕྱིར་
ཞེ་ན༑ ཀཽ་ཤི་ཀ །སངས་རྒྱས་བཅོམ་ལྡན་འདས་རྣམས་ཀྱི་ཐམས་ཅད་མཁྱེན་པ་ཉིད་ནི། འདི་ལས་སྐྱེས་ཏེ། ཀཽ་ཤི་ཀ །ཐམས་ཅད་མཁྱེན་པ་ཉིད་ཀྱི་ཡེ་ཤེས་ལས་སྐྱེས་པས་ཀྱང་ཤེས་རབ་ཀྱི་ཕ་
རོལ་ཏུ་ཕྱིན་པ་རབ་ཏུ་ཕྱེ་བ་ཡིན་ནོ། །དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སྤྱད་པར་བྱ། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་གནས་པར་བྱ། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་
འདི་ལ་རྣལ་འབྱོར་དུ་བྱའོ། །དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་
ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་ལགས། ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་
བགྱིད༑ དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །ལེགས་སོ། ལེགས་སོ། །ཀཽ་ཤི་ཀ །གང་ཁྱོད་དེ་བཞིན་གཤེགས་
༄༅། །པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དོན་འདི་ཡོངས་སུ་འདྲི་བར་བྱ་བ་དང༌། ཡོངས་སུ་དྲི་བར་བྱེད་པར་སེམས་པ་ནི་ཡང་ཁྱོད་ལེགས་སོ། །ཀཽ་ཤི་ཀ།
ཁྱོད་ཀྱི་སྤོབས་པ་འདིའང་སངས་རྒྱས་ཀྱི་མཐུས་སྐྱེས་པ་ཡིན་ནོ། །ཀཽ་ཤི་ཀ །བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སྤྱོད་པ་ན་གཟུགས་ལ་མི་གནས། གཟུགས་
སོ༑ ༑ཞེས་མི་གནས་ཏེ། ཀཽ་ཤི་ཀ །འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གཟུགས་ལ་མི་གནས། གཟུགས་སོ། །ཞེས་མི་གནས་པ་དེ་ལྟར་ན། ཀཽ་ཤི་ཀ། བྱང་ཆུབ་སེམས་དཔའ་སེམས་
དཔའ་ཆེན་པོ་གཟུགས་ལ་རྣལ་འབྱོར་དུ་བྱེད་པ་ཡིན་ནོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ལ་མི་གནས། རྣམ་པར་ཤེས་པའོ། །ཞེས་མི་གནས་ཏེ།
ཀཽ་ཤི་ཀ །འདི་ལྟར་བྱང་ཆུབ་སེམས་དཔའ་སེམས་དཔའ་སེམས་དཔའ་ཆེན་པོ་རྣམ་པར་ཤེས་པ་ལ་མི་གནས། རྣམ་པར་ཤེས་པའོ། །ཞེས་མི་གནས་པ་དེ་ལྟར་ན། ཀཽ་ཤི་ཀ། བྱང་ཆུབ་སེམས་དཔའ་སེམས་
དཔའ་ཆེན་པོ་རྣམ་པར་ཤེས་པ་ལ་རྣལ་འབྱོར་དུ་བྱེད་པ་ཡིན་ནོ། །ཀཽ་ཤི་ཀ །གཟུགས་སོ། །ཞེས་མི་སྦྱོར་ཏེ། ཀཽ་ཤི་ཀ། འདི་ལྟར་གཟུགས་སོ། །ཞེས་མི་སྦྱོར་བ་དེ་ལྟར་ན། གཟུགས་སོ། །
ཞེས་མི་གནས་པ་ཡིན་ནོ། །ཀཽ་ཤི་ཀ །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའོ། །ཞེས་མི་སྦྱོར་ཏེ། ཀཽ་ཤི་ཀ། འདི་ལྟར་རྣམ་པར་ཤེས་པའོ། །ཞེས་
མི་སྦྱོར་བ་དེ་ལྟར་ན། རྣམ་པར་ཤེས་པའོ། །ཞེས་གནས་པ་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་དེ་ལྟར་གནས་ཤིང་དེ་ལྟར་རྣལ་འབྱོར་དུ་བྱེད་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་
ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཟབ་པའོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། གཏིང་དཔག་དཀའ་བའོ། །
བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། གཟུང་བར་དཀའ་བའོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཚད་མ་མཆིས་པའོ། །བཅོམ་ལྡན་འདས་ཀྱིས་བཀའ་སྩལ་པ་
ཤཱ་རིའི་བུ། དེ་དེ་བཞིན་ནོ། །དེ་དེ་བཞིན་ཏེ། ཤཱ་རིའི་བུ། གཟུགས་ཟབ་བོ། །སྙམ་དུ་མི་གནས་ཏེ། ཤཱ་རིའི་བུ། འདི་ལྟར་གཟུགས་ཟབ་བོ། །སྙམ་དུ་མི་གནས་པ་དེ་ལྟར་ན། གཟུགས་ལ་རྣལ་
འབྱོར་དུ་བྱེད་པ་ཡིན་ནོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། ཤཱ་རིའི་བུ། རྣམ་པར་ཤེས་པ་ཟབ་བོ། །སྙམ་དུ་མི་གནས་ཏེ། ཤཱ་རིའི་བུ། འདི་ལྟར་རྣམ་པར་ཤེས་
པ་ཟབ་བོ། །སྙམ་དུ་མི་གནས་པ་དེ་ལྟར་ན། རྣམ་པར་ཤེས་པ་ལ་རྣལ་འབྱོར་དུ་བྱེད་པ་ཡིན་ནོ། །ཤཱ་རིའི་བུ། གཟུགས་ཟབ་བོ། །སྙམ་དུ་རྣལ་འབྱོར་དུ་མི་བྱེད་དེ། ཤཱ་རིའི་བུ། འདི་ལྟར་གཟུགས་
ཟབ་བོ༑ ༑སྙམ་དུ་རྣལ་འབྱོར་དུ་མི་བྱེད་པ་དེ་ལྟར་ན། གཟུགས་ཟབ་བོ། །སྙམ་དུ་མི་གནས་པ་ཡིན་ནོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། ཤཱ་རིའི་བུ། རྣམ་པར་
༄༅། །ཤེས་པ་ཟབ་བོ། །སྙམ་དུ་རྣལ་འབྱོར་དུ་མི་བྱེད་དེ། ཤཱ་རིའི་བུ། འདི་ལྟར་རྣམ་པར་ཤེས་པ་ཟབ་བོ། །སྙམ་དུ་རྣལ་འབྱོར་དུ་མི་བྱེད་པ་དེ་ལྟར་ན། རྣམ་པར་ཤེས་
པ་ཟབ་བོ། །སྙམ་དུ་མི་གནས་པ་ཡིན་ནོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་
རོལ་ཏུ་ཕྱིན་པ་ནི། ཟབ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པར་ལུང་བསྟན་པ་རྣམས་ཀྱི་མདུན་དུ་བཤད་པར་བགྱི་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་
འདས༑ དེ་ནི། ནེམ་ནུར་མི་བགྱིད། ཐེ་ཚོམ་འཚལ་བར་མི་འགྱུར། རྨོངས་པར་མི་འགྱུར། རྩོད་པར་མི་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུ་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་
འདི་སྐད་ཅེས་སྨྲས་སོ། །འཕགས་པ་ཤཱ་རིའི་བུ། ཡང་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ལུང་མ་བསྟན་པའི་མདུན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བཤད་ན། ཉེས་པ་
ཅིར་འགྱུར། དེ་སྐད་ཅེས་སྨྲས་པ་དང༌། ཚེ་དང་ལྡན་པ་ཤཱ་རིའི་བུས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ །བྱང་ཆུབ་སེམས་དཔའ་སེམས་དཔའ་ཆེན་པོ་ལུང་མ་
བསྟན་པ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌། མཉན་པ་ཐོབ་པར་གྱུར་ལ། ཐོས་ནས་ཀྱང་དངང་བར་མི་འགྱུར། ཀུན་ཏུ་སྐྲག་པར་མི་
འགྱུར༑ ཀུན་ཏུ་སྐྲག་པ་དང་ལྡན་པར་མི་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཀཽ་ཤི་ཀ །རྒྱང་རིང་པོ་ནས་འོངས་པར་རིག་པར་བྱ་སྟེ། ཡུན་རིང་པོ་ནས་ཐེག་པ་ལ་ཡང་དག་པར་
ཞུགས་པ་དགེ་བའི་རྩ་བ་ཡོངས་སུ་སྨིན་པ་ཡིན་པར་རིག་པར་བྱའོ། །འདི་ནི། ད་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་འགྱུར་ཏེ། དེ་ནི། ལུང་
བསྟན་པ་ལ་བསྙེན་པ་ཡིན་པར་རིག་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཅིག་གམ།
གཉིས་སམ། གསུམ་ལས་མི་འདའ་སྟེ། དེ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་འགྱུར་རོ། །འོན་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་དེ་རྣམས་མཉེས་པར་བྱེད་པར་འགྱུར་ཏེ། མཉེས་པར་བྱས་ནས་ཀྱང་ཐུགས་ཕྱུང་བར་བྱེད་པར་མི་འགྱུར་རོ། །དེ་བཞིན་གཤེགས་པ་མཐོང་བའང་ལུང་བསྟན་པས་འབྲས་བུ་
ཡོད་པར་བྱེད་པར་འགྱུར་རོ། །དེ་བཞིན་གཤེགས་པ་མཐོང་བ་དེ་ལས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་འགྱུར་རོ། །ཇི་སྲིད་དུ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་པར་འགྱུར་བ་དེ་སྲིད་དུ་དེ་བཞིན་གཤེགས་པ་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌། རིམ་གྲོ་བྱ་བ་ནས་བླ་ན་མེད་པ་ཡང་དག་པར་རྫོགས་
༄༅། །པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པའི་བར་གྱིས་འབྲས་བུ་ཡོད་པར་བྱེད་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་
སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌།
མཉན་པ་ཐོབ་པར་གྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། བཅོམ་ལྡན་འདས། རྒྱང་རིང་པོ་ནས་མཆིས་པ་ལགས་ཏེ། ཡུན་རིང་པོ་ནས་ཐེག་པ་ལ་ཡང་དག་པར་
ཞུགས་པ་དགེ་བའི་རྩ་བ་ཡོངས་སུ་སྨིན་པ་ལགས་པར་འཚལ་བར་བགྱི་ན། གང་འདི་ཐོས་ནས་ཀྱང་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་
པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པར་འགྱུར་བ་རྣམས་ལྟ་སྨོས་ཀྱང་ཅི་འཚལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་
སྐད་ཅེས་བཀའ་སྩལ་ཏོ། །ཤཱ་རིའི་བུ། དེ་དེ་བཞིན་ནོ། །དེ་དེ་བཞིན་ཏེ། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བལྟ་བ་དང༌།
ཕྱག་བྱ་བ་དང༌། བསྙེན་བཀུར་བྱ་བ་དང༌། མཉན་པ་ཐོབ་པར་གྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཤཱ་རིའི་བུ། རྒྱང་རིང་པོ་ནས་འོངས་པ་ཡིན་ཏེ། ཡུན་རིང་པོ་ནས་
ཐེག་པ་ལ་ཡང་དག་པར་ཞུགས་པ་དགེ་བའི་རྩ་བ་ཡོངས་སུ་སྨིན་པ་ཡིན་པར་རིག་པར་བྱ་ན། གང་འདི་ཐོས་ནས་ཀྱང་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་
དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པར་འགྱུར་བ་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་
འདས། དཔེར་གསལ་བར་བདག་སྤོབས་སོ། །བདེ་བར་གཤེགས་པ། བདག་སྤོབས་སོ། །བཅོམ་ལྡན་འདས། འདི་ལྟ་སྟེ། དཔེར་ན། རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ཅན་
གང་ཞིག་གི་རྨི་ལམ་དུའང་བྱང་ཆུབ་ཀྱི་སྙིང་པོ་ལ་འདུག་པ་རྨི་ན། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། མངོན་པར་རྫོགས་པར་བྱང་ཆུབ་པར་བགྱི་བའི་སླད་དུ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་བསྙེན་པ་ལགས་སོ། །བཅོམ་ལྡན་འདས། དེ་བཞིན་དུ་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བལྟ་བ་དང༌། ཕྱག་བགྱི་བ་དང༌། བསྙེན་
བཀུར་བགྱི་བ་དང༌། མཉན་པ་ཐོབ་པར་གྱུར་ན། བཅོམ་ལྡན་འདས། བྱང་ཆུབ་སེམས་དཔའི་ཐེག་པ་པའི་གང་ཟག་དེ་ནི། རྒྱང་རིང་པོ་ནས་མཆིས་པ་ལགས་ཏེ། ཡུན་རིང་པོ་ནས་ཐེག་པ་ལ་ཡང་དག་པར་
ཞུགས་པ་དགེ་བའི་རྩ་བ་ཡོངས་སུ་སྨིན་པ་ལགས་ན། ཐོས་ནས་ཀྱང་བཟུང་བ་དང༌། བཅངས་པ་དང༌། བཀླགས་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་
༄༅། །དང༌། ལུང་འབོགས་པ་དང༌། ཁ་ཏོན་དུ་བགྱིད་པ་ལྟ་སྨོས་ཀྱང་ཅི་འཚལ་ཏེ། བྱང་ཆུབ་སེམས་དཔའི་ཐེག་པ་པའི་གང་ཟག་དེ་ནི། ལུང་བསྟན་པ་དང་བསྙེན་པ་ལགས་ཤིང༌།
བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། སངས་རྒྱས་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་བྱང་ཆུབ་པར་བགྱི་བའི་སླད་དུ་ལུང་
བསྟན་པར་འགྱུར་བར་རིག་པར་བགྱིའོ། །གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐ་ན་མཉན་པའང་རྙེད་པར་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཡུན་རིང་པོ་
ནས་ཐེག་པ་ལ་ཡང་དག་པར་ཞུགས་པ་དགེ་བའི་རྩ་བ་ཡོངས་སུ་སྨིན་པ་ལགས་པར་རིག་པར་བགྱི་ན། བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་
མོ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་དུ་བགྱིད་པར་འགྱུར་བ་ལྟ་
སྨོས་ཀྱང་ཅི་འཚལ། དེ་ཅིའི་སླད་དུ་ཞེ་ན། བཅོམ་ལྡན་འདས། སེམས་ཅན་ཆོས་ཀྱིས་ཕོངས་པར་འགྱུར་བ་དང་མཐུན་པའི་ལས་བསགས་པ་དང་ཕལ་ཆེར་མ་བྲལ་བ་དེ་དག་གི་སེམས་ཕལ་ཆེར་ནི།
ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་མི་མཐུན་པར་འགྱུར་ཞིང་སེམས་ལྡོག་པར་འགྱུར་རོ། །སེམས་ཅན་དགེ་བའི་རྩ་བ་མ་བསགས་པ་ནི། ཕལ་ཆེར་ཡང་དག་པའི་མཐའ་འདི་ལ་རབ་ཏུ་མི་
འཇུག་ཅིང་རབ་ཏུ་དད་པར་མི་འགྱུར་ཏེ། གང་དག་ཡང་དག་པའི་མཐའ་འདི་ལ་རབ་ཏུ་འཇུག་ཅིང་རབ་ཏུ་དད་པར་འགྱུར་བའི་རིགས་ཀྱི་བུ་དང༌། རིགས་ཀྱི་བུ་མོ་དེ་དག་ནི། དགེ་བའི་རྩ་བ་བསགས་པ་ལགས་ཏེ།
བཅོམ་ལྡན་འདས། དེ་དག་ནི། དགེ་བའི་རྩ་བ་ཤིན་ཏུ་བསགས་པར་རིག་པར་བགྱིའོ། །བཅོམ་ལྡན་འདས། འདི་ལྟ་སྟེ། དཔེར་ན། སྐྱེས་བུ་ཞིག་འབྲོག་དགོན་པ་དཔག་ཚད་བརྒྱ་པའམ། དཔག་ཚད་
ཉིས་བརྒྱ་པའམ། དཔག་ཚད་སུམ་བརྒྱ་པའམ། དཔག་ཚད་བཞི་བརྒྱ་པའམ། དཔག་ཚད་ལྔ་བརྒྱ་པའམ། དཔག་ཚད་བརྒྱ་ཕྲག་བཅུ་པའི་འབྲོག་དགོན་པ་ནས་བྱུང་སྟེ་དེས་བྱུང་བ་དང་མཚན་མ་གང་
གིས་གྲོང་ངམ། གྲོང་ཁྱེར་རམ། གྲོང་རྡལ་མཆིས་པར་མངོན་པའི་མཚན་མ་སྔར་གདའ་བ་བ་ལང་རྫིའམ། ཕྱུགས་རྫིའམ། མཚམས་སམ། ཀུན་དགའ་ར་བ་ཕུན་སུམ་ཚོགས་པའམ། ཚལ་ཕུན་
སུམ་ཚོགས་པའམ། དེ་མ་ལགས་པའི་མཚན་མ་གཞན་དག་ཀྱང་རུང་སྟེ། དེས་སྔར་མཚན་མ་དེ་དག་མཐོང་བ་དང་འདི་སྙམ་དུ། འདི་ལྟར་སྔར་གྱི་མཚན་མ་འདི་དག་སྣང་བས། དེ་ལྟར་གྲོང་ངམ། གྲོང་
ཁྱེར་རམ། གྲོང་རྡལ་དུ་ཉེ་བར་གྱུར་ཏེ། སྙམ་ནས་དེ་ནི། དབུགས་ཕྱིན་པ་རྙེད་པ་ལགས་ཏེ། དེ་ལ་སླན་ཆད་ཆོམ་པོ་ཡིད་ལ་བགྱིད་པ་མ་མཆིས་པ་ལགས་སོ། །བཅོམ་ལྡན་འདས། དེ་བཞིན་དུ་བྱང་ཆུབ་
སེམས་དཔའ་སེམས་དཔའ་ཆེན་པོ་གང་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ཉེ་བར་གནས་ན། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། བླ་ན་མེད་པ་
༄༅། །ཡང་དག་པར་རྫོགས་པའི་བྱང་ཆུབ་ཏུ་བསྙེན་པ་ལགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་ལུང་བསྟན་པ་ཐོབ་པར་རིག་པར་བགྱིའོ། །དེའང་ཉན་ཐོས་ཀྱི་སའམ་རང་སངས་རྒྱས་ཀྱི་ས་ལ་སྐྲག་པར་མི་འགྱུར། འཇིགས་པར་མི་འགྱུར་རོ། །དེ་ཅིའི་སླད་དུ་ཞེ་ན། འདི་
ལྟར་དེས་སྔར་གྱི་མཚན་མ་འདི་དག་མཐོང་སྟེ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བལྟ་བ་དང༌། ཕྱག་བགྱི་བ་དང༌། བསྙེན་བཀུར་བགྱི་བ་དང༌། མཉན་པ་ཐོབ་པའི་སླད་དུའོ། །
དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། དེ་དེ་བཞིན་ནོ། །དེ་དེ་བཞིན་ཏེ། ཤཱ་རིའི་བུ། ཇི་ལྟར་འདི་སངས་
རྒྱས་ཀྱི་མཐུས་སྨྲ་བ་དང༌། སྨྲ་བར་འགྱུར་བ་དེ་བཞིན་དུའང་གནས་འདི་ལ་ཁྱོད་སྤོབས་པར་གྱིས་ཤིག །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་
སྐད་ཅེས་གསོལ་ཏོ། །བཅོམ་ལྡན་འདས། འདི་ལྟ་སྟེ། དཔེར་ན། འདི་ན་སྐྱེས་བུ་ལ་ལ་ཞིག་རྒྱ་མཚོ་ཆེན་པོ་ལྟ་འཚལ་བར་གྱུར་ཏེ། དེ་རྒྱ་མཚོ་ཆེན་པོ་ལྟར་མཆིས་པ་དང༌། ཇི་ལྟ་ཇི་ལྟར་དེ་
རྒྱ་མཚོ་ཆེན་པོ་ལྟ་བར་མཆིས་པ་དེ་ལྟ་དེ་ལྟར་གལ་ཏེ་དེས་སྡོང་པོའམ། སྡོང་པོའི་མཚན་མའམ། རིའམ། རིའི་མཚན་མ་མཐོང་ན། དེས་འདི་སྙམ་དུ། འདི་ནས་རྒྱ་མཚོ་ཆེན་པོ་ནི། ད་དུང་རིང་ངོ༌།
སྙམ་དུ་འཚལ་པར་བགྱིའོ། །གལ་ཏེ་ཕྱིས་སྡོང་པོའམ། སྡོང་པོའི་མཚན་མའམ། རིའམ། རིའི་མཚན་མ་མ་མཐོང་ན། དེས་འདི་སྙམ་དུ། འདི་ནས་ནི། རྒྱ་མཚོ་ཆེན་པོ་དང་ཉེའོ། །སྙམ་དུ་
འཚལ་བར་བགྱིའོ། །དེ་ཅིའི་སླད་དུ་ཞེ་ན། རྒྱ་མཚོ་ཆེན་པོ་ནི། རིམ་གྱིས་དམའ་བ་ལགས་པས། རྒྱ་མཚོ་ཆེན་པོའི་ནང་ན་སྡོང་པོའམ། སྡོང་པོའི་མཚན་མའམ། རིའམ། རིའི་མཚན་མ་
གང་ཡང་མ་མཆིས་ཏེ། འདི་ལྟར་ཡང་རྒྱ་མཚོ་ཆེན་པོ་དེ་མིག་གིས་མངོན་སུམ་དུ་མ་མཐོང་བ་དེ་ལྟ་ནའང་རྒྱ་མཚོ་ཆེན་པོ་ནི། བདག་གིས་བསྙེན་ཏེ། འདི་ཕན་ཆད་རྒྱ་མཚོ་ཆེན་པོ་མི་རིང་ངོ༌། །
སྙམ་མོ༑ ༑བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉན་པ་ན་འདི་སྙམ་དུ་རིག་པར་བགྱི་སྟེ། འདི་ལྟར་ཡང་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་བདག་མངོན་སུམ་དུ་ནི། ལུང་མ་བསྟན་པ་དེ་ལྟ་ནའང་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་བདག་ལུང་སྟོན་པ་དང་བསྙེན་པར་རིག་པར་བགྱིའོ། །དེ་ཅིའི་སླད་དུ་ཞེ་ན། དེ་ནི། འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བལྟ་བ་དང༌། ཕྱག་བགྱི་བ་དང༌། བསྙེན་བཀུར་བགྱི་བ་དང༌།
མཉན་པ་ཐོབ་པའི་སླད་དུའོ། །བཅོམ་ལྡན་འདས། འདི་ལྟ་སྟེ། དཔེར་ན། དཔྱིད་ཀའི་དུས་ཉེ་བར་གནས་པ་ན། ཤིང་སྣ་ཚོགས་ཀྱི་ཡལ་གའི་ལོ་མ་རྙིང་པ་རྣམས་ལྷགས་པ་ལས་ལོ་མ་སྣ་ཚོགས་འབྱུང་སྟེ།
༄༅། །ལོ་མ་རྣམས་བྱུང་བ་དང་ཛམྦུའི་གླིང་གི་མི་རྣམས་ནགས་ཚལ་དག་ལ་སྔར་གྱི་མཚན་མ་དེ་དག་མཐོང་ནས་དེ་ནི། མེ་ཏོག་དང༌། འབྲས་བུ་རྣམས་རིང་པོ་མི་ཐོགས་པར་
འབྱུང་ངོ༌། སྙམ་ནས་ཡིད་དགའ་བར་འགྱུར་རོ། །དེ་ཅིའི་སླད་དུ་ཞེ་ན། དེ་ནི། འདི་ལྟར་སྡོང་པོ་ལས་མཚན་མ་འདི་ལྟ་བུ་དག་སྔར་གདའ་བའི་སླད་དུའོ། །བཅོམ་ལྡན་འདས། དེ་བཞིན་དུ་གང་
གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལྟ་བ་དང༌། ཕྱག་བགྱི་བ་དང༌། བསྙེན་བཀུར་བགྱི་བ་དང༌། མཉན་པ་རྙེད་པའི་སླད་དུ་ཉེ་
བར་གནས་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་དགེ་བའི་རྩ་བ་ཡོངས་སུ་སྨིན་པ་ལགས་བར་རིག་པར་བགྱི་སྟེ། ཤེས་
རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ནི། དེ་ལ་སྔོན་གྱི་དགེ་བའི་རྩ་བ་དེ་ཉིད་ཀྱིས་ཉེ་བར་བསྟབས་པ་ལགས་སོ། །དེ་ལ་གང་སྔོན་སངས་རྒྱས་མཐོང་བའི་ལྷ་དེ་དག་ནི། འདི་སྙམ་དུ་སེམས་ཏེ། སྔོན་
གྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་མཚན་མ་སྔར་བྱུང་བ་ཡིན་པས། བྱང་ཆུབ་སེམས་དཔའ་སེམས་
དཔའ་ཆེན་པོ་འདི་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རིང་པོ་མི་ཐོགས་པར་ལུང་བསྟན་པ་ཐོབ་པར་འགྱུར་རོ། །སྙམ་ནས་རབ་ཏུ་དགའ་བར་འགྱུར་ཞིང་རངས་ཏེ་ཡིད་མགུ་བ་
སྐྱེ་བར་འགྱུར་རོ། །བཅོམ་ལྡན་འདས། འདི་ལྟ་སྟེ། དཔེར་ན། བུད་མེད་སྦྲུམ་མ་མངལ་ལྕི་བར་གྱུར་པ་དེ་གང་གི་ཚེ་ལུས་བསྐྱོད་ན། ཆེར་སྙོམ་པར་འགྱུར་ཏེ། དེ་འཆག་པ་ལ་དད་ཆེར་མི་འགྱུར།
ཁ་ཟས་ཆུང་ངུ་འཚལ་བར་འགྱུར། རྨུགས་པ་དང་གཉིད་ཆུང་བར་འགྱུར། སྨྲ་བ་ཉུང་བར་འགྱུར། སྟོབས་ཆུང་བར་འགྱུར། སྡུག་བསྔལ་མང་བར་འགྱུར། སྨྲེ་བཞིན་དུ་མང་དུ་གནས་པར་
འགྱུར། འགྲོགས་པ་ལ་དད་ཆེ་བར་མི་འགྱུར། སྔོན་གྱི་ཚུལ་བཞིན་མ་ལགས་པ་ཡིད་ལ་བགྱིད་པ་བསྟེན་ཅིང་ངེས་པར་བསྟེན་ལ་བསྒོམས་ཏེ་མང་དུ་བྱས་པས་འདི་ལྟ་བུའི་ཚོར་བ་ལུས་ཀྱིས་མྱོང་
ངོ༑ ༑སྙམ་པ་དེའི་ཚེ་བཅོམ་ལྡན་འདས། ཇི་ལྟར་སྔར་གྱི་མཚན་མ་འདི་དག་མཐོང་བ་དེ་ལྟར་བུད་མེད་འདི་ནི། རིང་པོ་མི་ཐོགས་པར་བུ་འབྱུང་བར་འཚལ་བར་བགྱིའོ། །བཅོམ་ལྡན་འདས། དེ་
བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་ཡོངས་སུ་སྨིན་པ་དེ། གང་གི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལྟ་བ་དང༌། ཕྱག་བགྱི་བ་དང༌། བསྙེན་བཀུར་
བགྱི་བ་དང༌། མཉན་པའི་སླད་དུ་ཉེ་བར་གནས་ལ། ཉན་པ་དང་དེ་ལ་དགའ་ཞིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དོན་དུ་གཉེར་བའི་སེམས་བསྐྱེད་པ་དེའི་ཚེ་བཅོམ་ལྡན་འདས། བྱང་ཆུབ་སེམས་
དཔའ་སེམས་དཔའ་ཆེན་པོ་འདི་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རིང་པོ་མི་ཐོགས་པར་ལུང་བསྟན་པ་ཐོབ་པར་འགྱུར་བར་འཚལ་བར་བགྱིའོ། །དེ་སྐད་ཅེས་གསོལ་པ་དང༌།
༄༅། །བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། ལེགས་སོ། ལེགས་སོ། །ཤཱ་རིའི་བུ། འདི་ཡང་སངས་རྒྱས་ཀྱི་
མཐུས་ཁྱོད་སྤོབས་པར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་འདི་ལྟར་ལེགས་པར་ཡོངས་སུ་བཟུང་བ་དང༌། ལེགས་པར་སྦྱངས་པ་དང༌། ལེགས་པར་ཡོངས་སུ་
གཏད་པའི་བར་འདི་ནི། ངོ་མཚར་ཏོ། །བཅོམ་ལྡན་འདས་ཀྱིས་།བཀའ་སྩལ་པ། རབ་འབྱོར། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། སྐྱེ་བོ་མང་པོ་ལ་
ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་སྙིང་བརྩེ་བ་དང༌། སྐྱེ་བོ་ཕལ་པོ་ཆེའི་དོན་དང༌། ཕན་པ་དང་བདེ་བའི་ཕྱིར་ཞུགས་པ་སྟེ། ལྷ་དང་མི་རྣམས་ལ་སྙིང་བརྩེ་བ་ཅན་
སྙིང་བརྩེ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་
སངས་རྒྱས་ནས་བླ་ན་མེད་པའི་ཆོས་སྟོན་པར་འདོད་པའོ། །རབ་འབྱོར་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་
སྤྱོད་པ་ན་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་
ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས། གཟུགས་ཀྱི་འཕེལ་བ་ཡང་དག་པར་རྗེས་སུ་མི་མཐོང་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་བཞིན་དུ་ཚོར་བའི་མ་ཡིན། འདུ་ཤེས་ཀྱི་
མ་ཡིན༑ འདུ་བྱེད་རྣམས་ཀྱི་མ་ཡིན། རྣམ་པར་ཤེས་པའི་འཕེལ་བ་ཡང་དག་པར་རྗེས་སུ་མི་མཐོང་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །གཟུགས་ཀྱི་འགྲིབ་པ་ཡང་དག་པར་རྗེས་
སུ་མི་མཐོང་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་བཞིན་དུ་ཚོར་བའི་མ་ཡིན། འདུ་ཤེས་ཀྱི་མ་ཡིན། འདུ་བྱེད་རྣམས་ཀྱི་མ་ཡིན། རྣམ་པར་ཤེས་པའི་འགྲིབ་པ་ཡང་དག་པར་རྗེས་
སུ་མི་མཐོང་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཆོས་ཡང་དག་པར་རྗེས་སུ་མི་མཐོང་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཆོས་མ་ཡིན་པ་ཡང་དག་པར་རྗེས་སུ་མི་མཐོང་
ན༑ ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ལྟར་ན། འདིའི་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ཡོངས་སུ་རྫོགས་པར་འགྱུར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། བསྟན་
པ་འདི་ནི། བསམ་གྱིས་མི་ཁྱབ་བོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། གཟུགས་བསམ་གྱིས་མི་ཁྱབ་སྟེ། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རབ་
༄༅། །འབྱོར༑ རྣམ་པར་ཤེས་པ་བསམ་གྱིས་མི་ཁྱབ་བོ། །རབ་འབྱོར། གཟུགས་བསམ་གྱིས་མི་ཁྱབ་ཅེས་བྱ་བར་ཡང་མི་ཤེས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །
དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རབ་འབྱོར། རྣམ་པར་ཤེས་པ་བསམ་གྱིས་མི་ཁྱབ་ཅེས་བྱ་བར་ཡང་མི་ཤེས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་
ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལྟར་ཟབ་པ་འདི་ལ་སུ་ཞིག་མོས་པར་འགྱུར། བཅོམ་ལྡན་
སངས་[*'DAS?] ཀྱིས་བཀའ་སྩལ་པ། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་གྱུར་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མོས་པར་འགྱུར་རོ། །
ཚེ་དང་ལྡན་པ་ཤཱ་རིའི་བུས་གསོལ་པ། བཅོམ་ལྡན་འདས། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱད་པར་གྱུར་པ་ལགས། བཅོམ་ལྡན་འདས། ཇི་ལྟར་ན། སྤྱད་པར་གྱུར་པ་
ཞེས་བགྱི་བའི་མིང་འཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྟོབས་རྣམས་ལ་མི་རྟོག །མི་འཇིགས་པ་
རྣམས་ལ་མི་རྟོག །སངས་རྒྱས་ཀྱི་ཆོས་རྣམས་ལའང་མི་རྟོག །ཐམས་ཅད་མཁྱེན་པ་ཉིད་ལའང་མི་རྟོག་གོ །དེ་ཅིའི་ཕྱིར་ཞེ་ན། ཤཱ་རིའི་བུ། སྟོབས་རྣམས་བསམ་གྱིས་མི་ཁྱབ། མི་འཇིགས་པ་
རྣམས་ཀྱང་བསམ་གྱིས་མི་ཁྱབ། སངས་རྒྱས་ཀྱི་ཆོས་རྣམས་ཀྱང་བསམ་གྱིས་མི་ཁྱབ། ཐམས་ཅད་མཁྱེན་པ་ཉིད་ཀྱང་བསམ་གྱིས་མི་ཁྱབ། ཆོས་ཐམས་ཅད་ཀྱང་བསམ་གྱིས་མི་ཁྱབ་སྟེ། ཤཱ་རིའི་བུ།
དེ་ལྟར་སྤྱད་པར་གྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལའང་མི་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དེ། དེ་ལྟར་སྤྱད་པར་གྱུར་པ་ཞེས་བྱ་ཞིང་སྤྱད་པར་གྱུར་པ་ཞེས་བྱ་
བའི་མིང་འཐོབ་བོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་བོ། །བཅོམ་ལྡན་འདས། ཤེས་རབ་ཀྱི་
ཕ་རོལ་ཏུ་ཕྱིན་པ་ནི། རིན་པོ་ཆེའི་ཕུང་པོའོ། །བཅོམ་ལྡན་འདས། ནམ་མཁའ་དག་པའི་སླད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ནི། དག་པའི་ཕུང་པོའོ། །བཅོམ་ལྡན་འདས། རིགས་ཀྱི་བུ་དང༌། རིགས་
ཀྱི་བུ་མོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་
པ་དང༌། ཁ་ཏོན་བགྱིད་པ་དང༌། ཡི་གེར་འདྲི་བ་ལ་བར་ཆད་བགྱིད་པ་མང་པོ་འབྱུང་བ་འདི་ནི། ངོ་མཚར་ཏོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་
སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། རིགས་ཀྱི་བུའམ་རིགས་ཀྱི་བུ་མོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་
༄༅། །པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འདྲི་བ་ལ་བར་ཆད་བྱེད་པ་
མང་དུ་འབྱུང་ངོ༌། །དེ་ཅིའི་ཕྱིར་ཞེ་ན། རབ་འབྱོར། དེ་ནི། འདི་ལྟར་རིགས་ཀྱི་བུ་དང༌། རིགས་ཀྱི་བུ་མོ་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་
པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འབྲི་བ་དག་ལ་བདུད་སྡིག་ཅན་དག་བར་ཆད་བྱ་བར་བརྩོན་པར་
བྱེད་དོ༑ ༑དེར་མྱུར་དུ་བྲི་སྟེ་གལ་ཏེ་ཟླ་བའམ། ཟླ་བ་གཉིས་སམ། ཟླ་བ་གསུམ་གྱིས་འབྲི་ནའང་བྲི་བར་བྱ་བ་ཡིན་ནོ། །གལ་ཏེ་ལོ་གཅིག་གིས་སམ། དེ་ཕན་ཆད་འབྲི་བར་འགྱུར་ན། དེ་ལྟ་
ནའང་རབ་འབྱོར། རིགས་ཀྱི་བུའམ་རིགས་ཀྱི་བུ་མོ་དེ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྲི་བར་བྱའོ། །དེ་ཅིའི་ཕྱིར་ཞེ་ན། རབ་འབྱོར། དེ་ནི། འདི་ལྟར་ཡིན་ཏེ། རིན་པོ་ཆེ་ཆེན་པོ་
གང་ཡིན་པ་དེ་ལ་ནི། བར་ཆད་བྱེད་པ་མང་དུ་འབྱུང་ངོ༌། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་
ཏོན་བགྱིད་པ་དང༌། ཡི་གེར་འབྲི་བ་ལ་བདུད་སྡིག་ཅན་བར་ཆད་ཀྱི་ལས་བགྱི་བར་སྤྲོ་བ་རྣམ་པ་མང་པོ་སྐྱེས་ནས་བརྩོན་པ་བགྱིད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ལྟར་
ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་
བྱེད་པ་དང༌། ཡི་གེར་འབྲི་བ་ལ་བདུད་སྡིག་ཅན་བར་ཆད་ཀྱི་ལས་བྱ་བར་བརྩོན་པར་ནི། འགྱུར་མོད་ཀྱི། དེ་ལྟར་ནའང་ཡི་དམ་མ་ཉམས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་བར་
ཆད་བྱེད་མི་ནུས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གི་ཚེ་རིགས་ཀྱི་བུ་དང་རིགས་ཀྱི་བུ་མོ་དག་ཤེས་རབ་ཀྱི་ཕ་རོལ་ཏུ་
ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པ་དང༌། ཡི་
གེར་འབྲི་བ་ལ་བདུད་སྡིག་ཅན་དག་བར་ཆད་བགྱི་བ་ལ་སྤྲོ་བ་སྐྱེ་བར་འགྱུར་བ་དེའི་ཚེ། བཅོམ་ལྡན་འདས། ཇི་ལྟར་ན། དེང་སང་རིགས་ཀྱི་བུ་དང་རིགས་ཀྱི་བུ་མོ་དག་གིས་ཤེས་རབ་ཀྱི་ཕ་རོལ་ཏུ་
ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པ་དང༌། ཡི་གེར་
༄༅། །འབྲི་བར་འགྱུར། བཅོམ་ལྡན་འདས། གང་གི་མཐུས་རིགས་ཀྱི་བུ་དང༌། རིགས་ཀྱི་བུ་མོ་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་
པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པ་དང༌། ཡི་གེར་འབྲི་བར་འགྱུར། དེ་སྐད་ཅེས་གསོལ་པ་དང༌།
བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། རིགས་ཀྱི་བུ་དང༌། རིགས་ཀྱི་བུ་མོ་དེ་དག་ནི། སངས་རྒྱས་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མཐུས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་
འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འབྲི་བར་འགྱུར་བ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌།
དེ་བཞིན་ཉིད་དུ་རྣལ་འབྱོར་དུ་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ། འདི་ནི། ཆོས་རྣམས་ཀྱི་ཆོས་ཉིད་དེ་གང་འཇིག་རྟེན་གྱི་ཁམས་གཞལ་དུ་མེད་གྲངས་མེད་པ་དག་ན་སངས་
རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་པ་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌།
ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འབྲི་བ་ལ་དགོངས་པར་འགྱུར། ཡོངས་སུ་བཟུང་བར་འགྱུར་རོ། །རིགས་ཀྱི་བུ་དང༌། རིགས་ཀྱི་བུ་མོ་གང་དག་ཤེས་རབ་ཀྱི་ཕ་
རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་
གེར་འབྲི་བར་འགྱུར་བ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་བྱེད་པར་འགྱུར་བ་དེ་དག་ལའང་སངས་རྒྱས་བཅོམ་ལྡན་འདས་དེ་དག་གིས་
དགོངས་པར་འགྱུར། ཡོངས་སུ་བཟུང་བར་འགྱུར་ཏེ། ཤཱ་རིའི་བུ། སངས་རྒྱས་ཀྱིས་དགོངས་པ་དང༌། སངས་རྒྱས་ཀྱིས་ཡོངས་སུ་བཟུང་བའི་རིགས་ཀྱི་བུ་དང༌། རིགས་ཀྱི་བུ་མོ་དག་ལ་
བར་ཆད་བྱེད་མི་ནུས་སོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་
དཔའ་ཆེན་པོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་
སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པ་དང༌། ཡི་གེར་འབྲི་བར་འགྱུར་བ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་བགྱིད་
༄༅། །པར་འགྱུར་བ་དེ་དག་ཐམས་ཅད་ནི། བཅོམ་ལྡན་འདས། སངས་རྒྱས་ཀྱི་མཐུ་དང༌། སངས་རྒྱས་ཀྱི་བྱིན་གྱིས་བརླབས་དང༌། སངས་རྒྱས་ཀྱིས་ཡོངས་སུ་བཟུང་བས། ཤེས་
རབ་ཀྱི་ཕ་རོལ་ཏུ་ཕྱིན་པ་འདི་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་
དང༌། ཁ་ཏོན་བགྱིད་པ་དང༌། ཡི་གེར་འབྲི་བར་འགྱུར་བ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་བགྱིད་པར་འགྱུར་བ་དེ་ལྟར་སྒྲུབ་པར་
འགྱུར་རོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། དེ་དེ་བཞིན་ནོ། །དེ་དེ་བཞིན་ཏེ། ཤཱ་རིའི་བུ། བྱང་ཆུབ་
སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ནི། སངས་རྒྱས་ཀྱི་མཐུ་དང༌། སངས་རྒྱས་ཀྱི་བྱིན་གྱི་རླབས་དང༌། སངས་རྒྱས་ཀྱིས་ཡོངས་སུ་བཟུང་བས། ཤེས་རབ་ཀྱི་ཕ་རོལ་ཏུ་
ཕྱིན་པ་ཟབ་མོ་འདི་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་
པ་དང༌། ཡི་གེར་འབྲི་བར་འགྱུར་བ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་བྱེད་པར་འགྱུར་རོ། །ཤཱ་རིའི་བུ། བྱང་ཆུབ་སེམས་དཔའ་སེམས་
དཔའ་ཆེན་པོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌།
ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འབྲི་བར་འགྱུར་བ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་བྱེད་པར་འགྱུར་བ་དེ་དག་ནི། དེ་
བཞིན་གཤེགས་པས་མཁྱེན་ཏོ། །ཤཱ་རིའི་བུ། དེ་དག་ནི། དེ་བཞིན་གཤེགས་པས་བྱིན་གྱིས་བརླབས་སོ། །ཤཱ་རིའི་བུ། དེ་དག་ནི། དེ་བཞིན་གཤེགས་པས་གཟིགས་སོ། །ཤཱ་རིའི་བུ། དེ་
དག་ནི༑ དེ་བཞིན་གཤེགས་པས་སངས་རྒྱས་ཀྱི་སྤྱན་གྱིས་རྣམ་པར་གཟིགས་སོ། །ཐོས་ནས་ཀྱང་བཟུང་བ་དང༌། བཅངས་པ་དང༌། བཀླགས་པ་དང༌། ཀུན་ཆུབ་པར་བྱས་པ་དང༌། རབ་ཏུ་བཏོན་པ་དང༌།
བསྟན་པ་དང༌། ཉེ་བར་བསྟན་པ་དང༌། ལུང་འབོགས་པ་དང༌། ཁ་ཏོན་བྱས་པ་དང༌། ཡི་གེར་བྲིས་ནས་དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་བྱེད་པ་
ནི༑ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང༌། དེ་བཞིན་ཉིད་ལ་གནས་པར་འགྱུར་རོ། །ཤཱ་རིའི་བུ། གང་དག་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་བྲིས་ནས་འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། རབ་ཏུ་འདོན་པར་འགྱུར། སྟོན་པར་འགྱུར། ཉེ་བར་སྟོན་པར་འགྱུར། ལུང་འབོགས་པར་
༄༅། །འགྱུར༑ ཁ་ཏོན་བྱེད་པར་འགྱུར། ཡི་གེར་འབྲི་བར་འགྱུར་གྱི། དེ་བཞིན་ཉིད་དུ་མི་སློབ། དེ་བཞིན་ཉིད་དུ་མི་སྒྲུབ། དེ་བཞིན་ཉིད་དུ་རྣལ་འབྱོར་དུ་མི་བྱེད་པ་དེ་དག་ནི་
དེ་བཞིན་ཉིད་དུ་མི་སློབ་པ་དང༌། དེ་བཞིན་ཉིད་དུ་མི་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་མི་བྱེད་པས། དེ་བཞིན་ཉིད་དང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གནས་པར་མི་འགྱུར་
མོད་ཀྱི། ཤཱ་རིའི་བུ། དེ་དག་ཀྱང་དེ་བཞིན་གཤེགས་པས་མ་བྱིན། དེ་དག་ཀྱང་དེ་བཞིན་གཤེགས་པས་བྱིན་གྱིས་བརླབས། དེ་དག་ཀྱང་དེ་བཞིན་གཤེགས་པས་གཟིགས་ཏེ། ཤཱ་རིའི་བུ། དེ་དག་ཀྱང་
དེ་བཞིན་གཤེགས་པས་སངས་རྒྱས་ཀྱི་སྤྱན་གྱིས་རྣམ་པར་གཟིགས་སོ། །ཤཱ་རིའི་བུ། དེ་དག་གི་འབབ་པ་དང༌། ཡོངས་སུ་གཡོ་བ་དེ་ཡང་དོན་ཆེན་པོ་དང༌། ཕན་ཡོན་ཆེན་པོ་དང༌། འདས་པ་
ཆེན་པོ་དང༌། རྣམ་པར་སྨིན་པ་ཆེན་པོ་དང་ལྡན་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཆོས་ཐམས་ཅད་ཀྱི་དོན་དམ་པ་དང་ལྡན་པ་ཡིན་ཏེ། སེམས་ཅན་
ཐམས་ཅད་ལ་ཡང་དག་པ་ཇི་ལྟ་བ་བཞིན་དུ་རྟོགས་པར་བྱ་བས་ཉེ་བར་གནས་སོ། །ཤཱ་རིའི་བུ། ཡང་ཕ་རོལ་ཏུ་ཕྱིན་པ་དྲུག་དང་ལྡན་པའི་མདོ་སྡེ་འདི་དག་ནི། དེ་བཞིན་གཤེགས་པ་འདས་ནས་
ཀྱང་དམ་པའི་ཆོས་འཇིག་པའི་དུས་ཀྱི་ཚེ་ཆོས་འདུལ་བ་སྙིང་པོ་གསར་པ་ཐོབ་པ་ན་ལྷོ་ཕྱོགས་སུ་འབྱུང་བར་འགྱུར་རོ། །ལྷོ་ཕྱོགས་ནས་ཀྱང་བར་ཏ་ནིར་འབྱུང་བར་འགྱུར་རོ། །བར་ཏ་ནི་ནས་ཀྱང་
བྱང་ཕྱོགས་སུ་འབྱུང་སྟེ། ཤཱ་རིའི་བུ། དེའི་དུས་ན་གང་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་
པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པར་འགྱུར་ཞིང༌། ཐ་ན་གླེགས་བམ་དུ་ཆུད་པར་བྱས་ནས་འཆང་བར་འགྱུར་བའི་རིགས་ཀྱི་བུ་དང་རིགས་ཀྱི་བུ་མོ་དེ་དག་ནི། དེ་བཞིན་
གཤེགས་པས་དགོངས་སོ། །དེ་དག་ནི། དེ་བཞིན་གཤེགས་པས་མཁྱེན་ཏོ། །ཤཱ་རིའི་བུ། དེ་དག་ནི། དེ་བཞིན་གཤེགས་པས་བྱིན་གྱིས་བརླབས་སོ། །ཤཱ་རིའི་བུ། དེ་དག་ནི། དེ་བཞིན་གཤེགས་
པས་གཟིགས་སོ། །ཤཱ་རིའི་བུ། དེ་དག་ནི། དེ་བཞིན་གཤེགས་པས་སངས་རྒྱས་ཀྱི་སྤྱན་གྱིས་རྣམ་པར་གཟིགས་སོ། །ཤཱ་རིའི་བུས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་
པ་འདི་ལྟ་བུར་ཟབ་མོ་འདིའང་འདི་ལྟར་ཕྱི་མའི་དུས་ཕྱི་མའི་ཚེ་ན་བྱང་གི་ཡུལ་དང༌། བྱང་གི་ཕྱོགས་ཀྱི་ཆར་རྒྱས་པར་འགྱུར་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ།
དེ་ལ་བྱང་གི་ཡུལ་དང་བྱང་གི་ཕྱོགས་ཀྱི་ཆ་དེར་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་མཉན་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་རྣལ་འབྱོར་དུ་བྱེད་པ་དེ་དག་རྒྱས་པར་
འགྱུར་རོ། །ཤཱ་རིའི་བུ། གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉན་པ་དང༌། འདྲི་བ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་
༄༅། །པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་བར་འགྱུར་བ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་དུ་
རྣལ་འབྱོར་དུ་བྱེད་པར་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། ཡུན་རིང་པོ་ནས་ཐེག་པ་ལ་ཡང་དག་པར་ཞུགས་པར་རིག་པར་བྱའོ། །ཤཱ་རིའི་བུས་གསོལ་པ།
བཅོམ་ལྡན་འདས། བྱང་གི་ཡུལ་དང༌། བྱང་གི་ཕྱོགས་ཀྱི་ཆར་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉན་པ་དང༌། འབྲི་བ་དང༌། འཛིན་པ་དང༌། འཆང་བ་དང༌། ཀློག་པ་དང༌།
ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པར་འགྱུར་བ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་
དུ་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་བགྱིད་པར་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཉུང་ངུའམ། འོན་ཏེ་མང་སྟེ་ཇི་སྙེད་ཅིག་འབྱུང་བར་འགྱུར། བཅོམ་
ལྡན་འདས་ཀྱིས་བཀའ་སྩལ་པ། ཤཱ་རིའི་བུ། བྱང་གི་ཡུལ་དང༌། བྱང་གི་ཕྱོགས་ཀྱི་ཆར་བྱང་ཆུབ་སེམས་དཔའ་སེམས་དཔའ་ཆེན་པོ་མང་ཞིང་ཤིན་ཏུ་མང་དུ་འབྱུང་བར་འགྱུར་རོ། །ཤཱ་
རིའི་བུ༑ དེ་དག་མང་མོད་ཀྱི། མང་པོ་དེ་དག་ལས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉན་པ་དང༌། འབྲི་བ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་
འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པར་འགྱུར་བ་དང༌། དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་པ་དང༌། དེ་བཞིན་ཉིད་དུ་རྣལ་འབྱོར་དུ་བྱེད་
པར་འགྱུར་བ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་འདི་བཤད་པ་ན། འགོང་བར་མི་འགྱུར། ཀུན་ཏུ་ཞུམ་པར་མི་འགྱུར། བག་ཚ་བར་མི་འགྱུར། བག་འཁུམས་པར་མི་འགྱུར། ཡིད་ཕྱིར་ཕྱོགས་
པར་མི་འགྱུར། དངང་བར་མི་འགྱུར། ཀུན་ཏུ་སྐྲག་པར་མི་འགྱུར། ཀུན་ཏུ་སྐྲག་པ་དང་ལྡན་པར་མི་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། ཆེས་ཉུང་བར་འགྱུར་
ཏེ༑ བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། ཡུན་རིང་པོ་ནས་ཐེག་པ་ལ་ཡང་དག་པར་ཞུགས་པར་རིག་པར་བྱའོ། །དེ་དག་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རྣམས་ཀྱི་རྗེས་སུ་འབྲང་ཞིང་ཡོངས་སུ་དྲིས་པ་དང༌། ཡོངས་སུ་ཞུས་པ་དང༌། ཡོངས་སུ་དྲི་བ་བྱས་ཤིང་གང་ཟག་བྱང་ཆུབ་སེམས་དཔའི་ཐེག་པ་ཅན་རིགས་
ཀྱི་བུའམ་རིགས་ཀྱི་བུ་མོ་དེ་དག་གིས་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་མཆོད་པ་ཡིན་ནོ། །དེ་དག་ནི། ཚུལ་ཁྲིམས་ཡོངས་སུ་རྫོགས་
པར་བྱེད་པར་འགྱུར་རོ། །དེ་དག་ནི། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཉིད་ལས་བརྩམས་ཏེ་སྐྱེ་བོ་མང་པོའི་དོན་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། དེ་ནི་
༄༅། །འདི་ལྟར་རིགས་ཀྱི་བུ་དང་རིགས་ཀྱི་བུ་མོ་དེ་དག་ལ་ང་ཉིད་ཀྱིས་ཐམས་ཅད་མཁྱེན་པ་ཉིད་དང་ལྡན་པའི་གཏམ་བྱས་སོ། །དེ་དག་ནི། ཚེ་རབས་འཕོས་ཀྱང་ཐམས་ཅད་མཁྱེན་
པ་ཉིད་དང་ལྡན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པ་འདི་ཉིད་ལ་ཡང་དག་པར་སྤྱོད་པར་འགྱུར་རོ། །འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ནས་
དེ་ཉིད་ཀྱི་གཏམ་བྱེད་པར་འགྱུར། དེ་ཉིད་ཀྱི་གཏམ་ལ་མངོན་པར་དགའ་བར་འགྱུར་རོ། །དེ་དག་ལ་ལེགས་པར་གནས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མཉམ་པར་བཞག་པར་འགྱུར་ཏེ་
བདུད་ཀྱིས་ཀྱང་དབྱེ་བར་བྱེད་མི་ནུས་ན། འདི་ལྟ་སྟེ། སེམས་ཅན་གཞན་དག་གིས་འདུན་པའམ་སྔགས་ཀྱི་སྒོ་ནས་དབྱེ་བ་ལྟ་ཅི་སྨོས། དེ་ཅིའི་ཕྱིར་ཞེ་ན། དེ་ནི། འདི་ལྟར་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་མཐུ་བརྟན་པའི་ཕྱིར་རོ། །རིགས་ཀྱི་བུ་དང་རིགས་ཀྱི་བུ་མོ་དེ་དག་གིས་དེ་ཐོས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་དགའ་བ་དང༌། དང་བ་དང༌། རབ་ཏུ་དང་བ་རྒྱ་ཆེན་པོ་
འཐོབ་པར་འགྱུར་རོ། །དེ་དག་གིས་ནི། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་སྐྱེ་བོ་མང་པོ་དག་གི་དགེ་བའི་རྩ་བ་སྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་རིགས་
ཀྱི་བུ་དང་རིགས་ཀྱི་བུ་མོ་དེ་དག་གིས་ནི། ངའི་མངོན་སུམ་དུ་ཚིག་འདི་སྐད་དུ། བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་གིས་སྲོག་ཆགས་བརྒྱ་ཕྲག་མང་པོ་དང༌། སྲོག་ཆགས་སྟོང་ཕྲག་
མང་པོ་དང༌། སྲོག་ཆགས་བརྒྱ་སྟོང་ཕྲག་མང་པོ་དང༌། སྲོག་ཆགས་བྱེ་བ་བརྒྱ་ཕྲག་མང་པོ་དང༌། སྲོག་ཆགས་བྱེ་བ་སྟོང་ཕྲག་མང་པོ་དང༌། སྲོག་ཆགས་བྱེ་བ་བརྒྱ་སྟོང་ཕྲག་མང་པོ་དང༌། སྲོག་ཆགས་
བྱེ་བ་ཁྲག་ཁྲིག་བརྒྱ་སྟོང་མང་པོ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞག་པར་བྱའོ། །ཡང་དག་པར་བསྟན་པར་བྱའོ། །ཡང་དག་པར་དགོད་པར་བྱའོ། །ཡང་དག་
པར་གཟེངས་བསྟོད་པར་བྱའོ། །ཡང་དག་པར་དགའ་བ་བསྐྱེད་པར་བྱའོ། །ཡང་དག་པར་རབ་ཏུ་དབྱེ་བར་བྱའོ། །རྫོགས་པའི་བྱང་ཆུབ་ལ་གནས་པར་བྱའོ། །སླར་མི་ལྡོག་པར་བྱའོ། །ཞེས་སྨྲས་སོ། །དེ་
ཅིའི་ཕྱིར་ཞེ་ན། ངས་གང་དག་གིས་ཚིག་འདི་སྐད་ཅེས་བྱང་ཆུབ་ཀྱི་དོན་དུ་སྤྱོད་པ་ན་བདག་གིས་སྲོག་ཆགས་བརྒྱ་ཕྲག་མང་པོ་དང༌། སྲོག་ཆགས་སྟོང་ཕྲག་མང་པོ་དང༌། སྲོག་ཆགས་བརྒྱ་སྟོང་ཕྲག་
མང་པོ་དང༌། སྲོག་ཆགས་བྱེ་བ་བརྒྱ་ཕྲག་མང་པོ་དང༌། སྲོག་ཆགས་བྱེ་བ་སྟོང་ཕྲག་མང་པོ་དང༌། སྲོག་ཆགས་བྱེ་བ་བརྒྱ་སྟོང་ཕྲག་མང་པོ་དང༌། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་རྣམས་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞག་པར་བྱའོ། །ཡང་དག་པར་བསྟན་པར་བྱའོ། །ཡང་དག་པར་དགོད་པར་བྱའོ། །ཡང་དག་པར་གཟེངས་བསྟོད་པར་བྱའོ། །ཡང་དག་པར་
དགའ་བར་བྱའོ། །ཡང་དག་པར་རབ་ཏུ་དབྱེ་བར་བྱའོ། །རྫོགས་པའི་བྱང་ཆུབ་ལ་གནས་པར་བྱའོ། །ཕྱིར་མི་ལྡོག་པར་བྱའོ། །ཞེས་སྨྲས་པའི་རིགས་ཀྱི་བུ་དང་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་
༄༅། །པ་ཅན་དེ་དག་གི་སེམས་ལ་སེམས་ཀྱིས་བལྟས་ནས་རྗེས་སུ་ཡི་རང་བར་བྱས་སོ། །དེ་ལྟར་རིགས་ཀྱི་བུ་དང་རིགས་ཀྱི་བུ་མོ་དེ་དག་ནི། མོས་པ་རྒྱ་ཆེན་པོ་དང་ལྡན་པ་ཡིན་
ནོ༑ ༑གང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་དུ་གྱུར་པ་རྣམས་ཆོས་སྟོན་པར་འགྱུར་བ་དང༌། གང་དུ་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རྣམས་ཀྱི་ཐད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་རྒྱ་ཆེར་ཐོས་པར་འགྱུར་བ་གང་ཡིན་པའི་སངས་རྒྱས་ཀྱི་ཞིང་གཞན་དང་གཞན་དུ་འགྲོ་བར་བྱ་བར་སེམས་
པར་འགྱུར་རོ། །སངས་རྒྱས་ཀྱི་ཞིང་དེ་དག་ཏུའང་དེ་དག་གིས་སྲོག་ཆགས་བརྒྱ་ཕྲག་མང་པོ་དང༌། སྲོག་ཆགས་སྟོང་ཕྲག་མང་པོ་དང༌། སྲོག་ཆགས་བརྒྱ་སྟོང་ཕྲག་མང་པོ་དང༌། སྲོག་ཆགས་
བྱེ་བ་བརྒྱ་ཕྲག་མང་པོ་དང༌། སྲོག་ཆགས་བྱེ་བ་སྟོང་ཕྲག་མང་པོ་དང༌། སྲོག་ཆགས་བྱེ་བ་བརྒྱ་སྟོང་ཕྲག་མང་པོ་དང༌། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་དག་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ཡང་དག་པར་འཇོག་པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བ་སྐྱེད་པ་
དང༌། ཡང་དག་པར་རབ་ཏུ་འབྱེད་པ་དང༌། ཡང་དག་པར་བྱང་ཆུབ་ལ་གཞོག་པར་བྱེད་པ་དང༌། ཕྱིར་མི་ལྡོག་པར་བྱེད་པར་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་
དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་འདས་པ་དང༌། མ་འོངས་པ་དང༌། ད་ལྟར་
བྱུང་བའི་ཆོས་ཀྱི་བར་རྣམས་ལ་མ་གཟིགས་པའམ། མ་གསན་པའམ། མངོན་པར་མི་མཁྱེན་པའམ། རྣམ་པར་མི་མཁྱེན་པ་གང་ཡང་མ་མཆིས་ཤིང༌། ཆོས་གང་ཡང་རྣམ་པར་མི་མཁྱེན་
པ་མ་མཆིས། སེམས་ཅན་གྱི་སྤྱོད་པ་གང་ཡང་རྣམ་པར་མི་མཁྱེན་པ་མ་མཆིས་པ་དང༌། བཅོམ་ལྡན་འདས། ཡང་དེའི་ཚེ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཛིན་པ་དང༌།
འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པ་དང༌། ཡི་གེར་འབྲི་བར་འགྱུར་བ། མ་འོངས་པའི་
བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་འདོད་པ་རྣམས་དང༌། ལྷག་པའི་བསམ་པ་ཕུན་སུམ་ཚོགས་པ་རྣམས་དང༌། བརྩོན་འགྲུས་བརྩམས་པ་རྣམས་ཀྱིའང་སྤྱོད་པ་གང་དུ་མཁྱེན་པ་
ཞེས་བྱ་བ་དེ་ནི། ངོ་མཚར་ཏོ། །གང་དེའི་ཚེ་ན་ཕ་རོལ་ཏུ་ཕྱིན་པ་དྲུག་པོ་འདི་དག་གི་སླད་དུ་སེམས་ཅན་ཐམས་ཅད་ཀྱི་དོན་དུ་བརྩོན་པ་བསྐྱེད་དེ། ཚོལ་བ་དང༌། ཡོངས་སུ་ཚོལ་བ་དང༌། ཚོལ་བར་
འགྱུར་བའི་རིགས་ཀྱི་བུ་དང་རིགས་ཀྱི་བུ་མོ་དེ་དག་ལས་བཙལ་བ་དང༌། ཡོངས་སུ་བཙལ་བ་དང༌། བཙལ་བར་འགྱུར་བའི་བྱང་ཆུབ་སེམས་དཔའ་ཁ་ཅིག་གིས་ནི། བཙལ་བ་ན་རྙེད་པར་འགྱུར།
༄༅། །ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཁ་ཅིག་གིས་བཙལ་ཡང་མི་རྙེད། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཁ་ཅིག་གིས་མ་བཙལ་ཀྱང་རྙེད་པར་འགྱུར་བ་
བཅོམ་ལྡན་འདས། འདིའི་རྒྱུ་གང་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། དེ་དེ་བཞིན་ནོ། །
དེ་དེ་བཞིན་ཏེ། དེ་བཞིན་གཤེགས་པས་ནི། འདས་པ་དང༌། མ་འོངས་པ་དང༌། ད་ལྟར་བྱུང་བའི་ཆོས་རྣམས་ལ་མ་གཟིགས་པའམ། མ་གསན་པའམ། མི་མཁྱེན་པའམ། རྣམ་པར་མི་
མཁྱེན་པ་ནི། གང་ཡང་མེད་དོ། །ཤཱ་རིའི་བུ། ཡང་དེའི་ཚེ་དེའི་དུས་ན་བྱང་ཆུབ་སེམས་དཔའ་ཁ་ཅིག་གིས་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་བཙལ་ཞིང་རྗེས་སུ་བཙལ་ལ་ཡོངས་སུ་བཙལ་ཀྱང་
མི་རྙེད་ལ། བྱང་ཆུབ་སེམས་དཔའ་ཁ་ཅིག་གིས་ནི། མ་བཙལ། རྗེས་སུ་མ་བཙལ། ཡོངས་སུ་མ་བཙལ་ཀྱང་རྙེད་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེ་དག་གིས་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་སྔོན་གྱི་མཐར་ཡང་བརྩོན་པ་མ་བོར་བར་བཙལ་བ་དང༌། ཡོངས་སུ་བཙལ་བས་ན། དེ་དག་གིས་སྔོན་གྱི་དགེ་བའི་རྩ་བའི་འདུན་པ་དེ་ཉིད་ཀྱིས་ཤེས་རབ་ཀྱི་ཕ་རོལ་ཏུ་
ཕྱིན་པ་འདི་མ་བཙལ། རྗེས་སུ་མ་བཙལ། ཡོངས་སུ་མ་བཙལ་ཀྱང་རྙེད་པར་འགྱུར་རོ། །དེ་ལས་གཞན་པའི་མདོ་སྡེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མངོན་པར་བརྗོད་པ་དེ་དག་ཀྱང་དེ་དག་ལ་
རང་ཉིད་ཉེ་བར་འོང་བར་འགྱུར། ཉེ་བར་གཞོལ་བ་དང༌། ཉེ་བར་ཕྱོགས་པར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་ནི་འདི་ལྟར་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཞིག་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་བརྩོན་པ་མ་བོར་བར་ཚོལ་བ་དང༌། ཡོངས་སུ་ཚོལ་བ་དེས་ནི། སྐྱེ་བ་འཕོས་ཤིང་ཚེ་རབས་བ་རྗེས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་རྙེད་པར་འགྱུར་ཞིང༌།
དེ་ལས་གཞན་པའི་མདོ་སྡེ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པ་དག་ཀྱང་དེའི་དྲུང་དུ་རང་ཉིད་ཉེ་བར་འོང་བ་དང༌། ཉེ་བར་གཞོལ་བ་དང༌། ཉེ་བར་ཕྱོགས་པར་འགྱུར་རོ། །དེ་སྐད་ཅེས་བཀའ་
སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། ཕ་རོལ་ཏུ་ཕྱིན་པ་དྲུག་དང་ལྡན་པའི་མདོ་སྡེ་འདི་དག་ཉིད་རིགས་ཀྱི་བུ་དང་རིགས་
ཀྱི་བུ་མོ་དེ་དག་ལ་ཉེ་བར་འོང་བ་དང༌། ཉེ་བར་གཞོལ་བ་དང༌། ཉེ་བར་ཕྱོགས་པར་འགྱུར་གྱི། གཞན་དག་ནི། མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། མདོ་
སྡེ་ཟབ་མོ་ཟབ་པ་གཞན་ཇི་སྙེད་ཡོད་པ་དེ་དག་ཀྱང་བདག་ཉིད་རིགས་ཀྱི་བུ་དང་རིགས་ཀྱི་བུ་མོ་དེ་དག་ལ་རང་ཉིད་ཉེ་བར་འོང་བ་དང༌། ཉེ་བར་གཞོལ་བ་དང༌། ཉེ་བར་ཕྱོགས་པར་འགྱུར་རོ། །དེ་ཅིའི་
ཕྱིར་ཞེ་ན། ཤཱ་རིའི་བུ། དེ་ནི། འདི་ལྟར་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་འཇོག་པ་དང༌།
༄༅། །ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་པ་དང༌། ཡང་དག་པར་རབ་ཏུ་དགའ་བར་བྱེད་པ་དང༌། ཡང་དག་པར་རབ་
ཏུ་འབྱེད་པར་འགྱུར་བ་དང༌། ཡང་དག་པར་རྫོགས་པའི་བྱང་ཆུབ་ལ་གནས་པར་བྱེད་པར་འགྱུར་བ་དང༌། ཕྱིར་མི་ལྡོག་པར་བྱེད་པར་འགྱུར་ཞིང༌། བདག་ཉིད་ཀྱང་དེ་ལ་སློབ་པར་འགྱུར་ན། ཤཱ་
རིའི་བུ༑ སྐྱེ་བ་འཕོས་ནས་ཀྱང་དེ་དག་ལ་མི་དམིགས་པ་དང་ལྡན་པ་དང༌། སྟོང་པ་ཉིད་དང་ལྡན་པ་དང༌། ཕ་རོལ་ཏུ་ཕྱིན་པ་དྲུག་དང་ལྡན་པའི་མདོ་སྡེ་ཟབ་མོ་ཟབ་པ་དག་རང་ཉིད་ཉེ་བར་འོང་
བར་འགྱུར། རང་ཉིད་ཉེ་བར་གཞོལ་བར་འགྱུར། རང་ཉིད་ཉེ་བར་ཕྱོགས་པར་འགྱུར་རོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། འཛིན་པའི་ཡོན་ཏན་ཡོངས་
སུ་བརྗོད་པའི་ལེའུ་ཞེས་བྱ་སྟེ། བཅུ་པའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་བཅུ་གཅིག་པ། དེ་ནས་བཅོམ་ལྡན་འདས་ལ་ཚེ་དང་ལྡན་
པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུ་དང༌། རིགས་ཀྱི་བུ་མོ་དེ་དག་གི་ཡོན་ཏན་འདི་དག་ནི། བཅོམ་ལྡན་འདས་ཀྱིས་ཡོངས་སུ་བརྗོད་ན། བཅོམ་ལྡན་
འདས༑ ཡང་དེ་དག་ལ་བར་དུ་གཅོད་པ་ཇི་ཙམ་དག་འབྱུང་བར་འགྱུར། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་
འབྱོར༑ བར་ཆད་བྱེད་པའི་བདུད་ཀྱི་ལས་མང་དུ་འབྱུང་བར་འགྱུར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། བར་དུ་གཅོད་པར་བགྱིད་པའི་བདུད་ཀྱི་ལས་མང་པོ་ཚུལ་ཇི་ལྟ་བུ་དག་འབྱུང་བར་
འགྱུར༑ བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་འཆད་པ་དེ་དག་གི་སྤོབས་པ་ཡུན་རིང་མོ་ཞིག་ན་འབྱུང་
བར་འགྱུར་ཏེ། རབ་འབྱོར། འདི་ནི། བདུད་ཀྱི་ལས་དང་པོར་རིག་པར་བྱའོ། །རབ་འབྱོར། སྤོབས་པ་དེ་སྐྱེས་ནའང་ཡིད་གཡེངས་པ་ཉིད་དུ་འགྱུར་ཏེ། འདིའང་བདུད་ཀྱི་ལས་སུ་རིག་པར་བྱའོ། །རབ་
འབྱོར༑ དེ་དག་གླལ་བ་དང༌། རྒོད་པ་དང༌། སྟེག་ཅིང་ཡི་གེར་འབྲི་བར་གྱུར་ན། འདིའང་བདུད་ཀྱི་ལས་སུ་རིག་པར་བྱའོ། །རབ་འབྱོར། སེམས་རྣམ་པར་གཡེང་བས་ཀུན་ཆུབ་པར་བྱེད་ན། འདིའང་
བདུད་ཀྱི་ལས་སུ་རིག་པར་བྱའོ། །རབ་འབྱོར། རྣམ་པར་ཤེས་པ་ཕན་ཚུན་དང་ལྡན་པས་ཡི་གེར་འབྲི་ན། འདིའང་བདུད་ཀྱི་ལས་སུ་རིག་པར་བྱའོ། །རབ་འབྱོར། དྲན་པ་མི་འཐོབ་ན། འདིའང་བདུད་
ཀྱི་ལས་སུ་རིག་པར་བྱའོ། །རབ་འབྱོར། ཕན་ཚུན་བཞད་གད་བྱེད་ཅིང་ཡི་གེར་འབྲི་ན། འདིའང་བདུད་ཀྱི་ལས་སུ་རིག་པར་བྱའོ། །རབ་འབྱོར། ཕན་ཚུན་ཅོ་འདྲི་ཞིང་ཡི་གེར་འབྲི་ན། འདིའང་བདུད་
ཀྱི་ལས་སུ་རིག་པར་བྱའོ། །རབ་འབྱོར། མིག་གཡེང་ཞིང་ཡེ་གེར་འབྲི་ན། འདིའང་བདུད་ཀྱི་ལས་སུ་རིག་པར་བྱའོ། །རབ་འབྱོར། ཡི་གེར་འབྲི་བ་དག་ཕན་ཚུན་ཚོགས་པ་དང་མི་མཐུན་པར་གྱུར་ན། འདིའང་
༄༅། །བདུད་ཀྱི་ལས་སུ་རིག་པར་བྱའོ། །རབ་འབྱོར། བདག་གིས་འདིའི་གཏིང་མི་རྙེད། རོ་མི་མྱོང་ངོ༌། །ཞེས་སྟན་ལས་ལ་ངས་ཏེ་འགྲོ་ན། འདིའང་བདུད་ཀྱི་ལས་སུ་རིག་པར་བྱའོ། །
རབ་འབྱོར། བདག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ལུང་མ་བསྟན་ཏོ། །ཞེས་སེམས་མ་དང་པས་སྟན་ལས་ལངས་ཏེ་སོང་ན། འདིའང་བདུད་ཀྱི་ལས་སུ་རིག་པར་བྱའོ། །རབ་འབྱོར། བདག་
གང་དུ་སྐྱེས་པའི་གྲོང་དང༌། གྲོང་ཁྱེར་དང༌། གྲོང་རྡལ་གྱི་མིང་ཡང་འདིར་མ་སྨོས། འདིར་བདག་གི་མིང་དང་རིགས་ཀྱང་མ་སྨོས། བདག་གི་ཕ་མའི་མིང་དང་རིགས་ཀྱང་འདིར་མ་སྨོས། བདག་གང་དུ་
སྐྱེས་པའི་རིགས་ཀྱང་མ་སྨོས་སོ། །སྙམ་ནས་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་མི་ཉན་པར་སེམས་ཤིང༌། དེ་ནས་འགྲོ་བར་སེམས་ན། སེམས་བསྐྱེད་པ་དེ་དག་ཇི་སྙེད་ཀྱིས་དེ་དག་ཇི་ལྟ་ཇི་ལྟར་
འགྲོ་བར་འགྱུར་བ་དེ་ལྟ་དེ་ལྟར་གང་དུ་དེ་དག་གིས་སླར་རྣལ་འབྱོར་ཉིད་དུ་བྱ་བར་འགྱུར་བ་བསྐལ་པ་དེ་སྙེད་དུ་འཁོར་བ་ཡོངས་སུ་འཛིན་པར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། ཤེས་རབ་
ཀྱི་ཕ་རོལ་ཏུ་ཕྱིན་པ་འདི་མི་ཉན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། འཇིག་རྟེན་པ་དང༌། འཇིག་རྟེན་ལས་འདས་པའི་ཆོས་རྣམས་ལ་ངེས་པར་འབྱུང་བར་མི་འགྱུར་ཏེ། རབ་
འབྱོར༑ འདིའང་དེ་དག་གི་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་གང་ཟག་བྱང་ཆུབ་སེམས་དཔའི་ཐེག་པ་ཅན་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཐམས་ཅད་མཁྱེན་པའི་ཡེ་
ཤེས་སྒྲུབ་པར་བྱེད་པ་འདི་སྤངས་ཤིང་བོར་ནས་མདོ་སྡེ་གང་དག་ཐམས་ཅད་མཁྱེན་པའི་ཡེ་ཤེས་སྒྲུབ་པར་བྱེད་པ་མ་ཡིན་པ་ཉིད་དེ་དག་ཡོངས་སུ་བཙལ་བར་སེམས་པར་འགྱུར་ཏེ། རབ་འབྱོར།
འདིའང་དེ་དག་གི་བདུད་ཀྱི་ལས་སུ་རིག་པར་བྱའོ། །རབ་འབྱོར། ཡང་ཇི་ལྟར་འཇིག་རྟེན་པ་དང༌། འཇིག་རྟེན་ལས་འདས་པའི་ཆོས་དག་ལ་སློབ་པར་མི་འདོད་པ་དང༌། འཇིག་རྟེན་པ་དང༌། འཇིག་
རྟེན་ལས་འདས་པའི་ཆོས་དག་ལ་ངེས་པར་འབྱུང་བར་མི་འདོད་པ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མི་སློབ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མ་བསླབས་པས་འཇིག་རྟེན་པ་དང༌།
འཇིག་རྟེན་ལས་འདས་པའི་ཆོས་དག་ལ་ངེས་པར་འབྱུང་བར་མི་འགྱུར་རོ། །དེ་ལྟར་བློ་ཆུང་བ་དེ་དག་འཇིག་རྟེན་པ་དང༌། འཇིག་རྟེན་ལས་འདས་པའི་ཆོས་རྣམས་ཡང་དག་པ་ཇི་ལྟ་བ་བཞིན་དུ་ཡོངས་སུ་
ཤེས་པའི་རྩ་བ་ཤེས་རབ་ཀྱི་ཕ་རོལ་ཏུ་ཕྱིན་པ་སྤངས་ཤིང་བོར་ནས་ཡལ་ག་ལ་འཇུ་བར་སེམས་སོ། །རབ་འབྱོར། འདི་ལྟ་སྟེ། དཔེར་ན། ཁྱི་ནི། ཇོ་བོའི་ཐད་ནས་ཟན་གོང་བསླང་བ་བཏང་སྟེ་ལས་བྱེད་
པའི་མི་ལས་ཟན་ཁམ་བཙལ་བར་སེམས་པ་དེ་བཞིན་དུ་རབ་འབྱོར། ཕྱི་མ་མ་འོངས་པའི་དུས་ན་གང་ཟག་བྱང་ཆུབ་སེམས་དཔའི་ཐེག་པ་ཅན་གང་ལ་ལ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཐམས་ཅད་
མཁྱེན་པའི་ཡེ་ཤེས་ཀྱི་རྩ་བ་འདི་བོར་ཏེ་ཉན་ཐོས་དང་རང་སངས་རྒྱས་ཀྱི་ཐེག་པ་ཡལ་ག་དང༌། ལོ་མ་དང༌། འདབ་མ་ལྟ་བུ་ལས་སྙིང་པོ་སངས་རྒྱས་ཉིད་བཙལ་བར་སེམས་པར་འགྱུར་ཏེ། རབ་འབྱོར།
༄༅། །འདིའང་བྱང་ཆུབ་སེམས་དཔའ་དེ་དག་གི་བདུད་ཀྱི་ལས་སུ་རིག་པར་བྱའོ། །དེ་ཅིའི་ཕྱིར་ཞེ་ན། བློ་ཆུང་བ་དེ་དག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐམས་ཅད་
མཁྱེན་པའི་ཡེ་ཤེས་སྒྲུབ་པར་བྱེད་པར་མི་ཤེས་ཏེ། དེ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་སྤངས་ཤིང་བོར་ནས་དེ་ལས་གཞན་པའི་མདོ་སྡེ་གང་དག་ཉན་ཐོས་ཀྱི་ས་མངོན་པར་སྟོན་པ་དང༌།
རང་སངས་རྒྱས་ཀྱི་ས་མངོན་པར་སྟོན་པ་དེ་དག་ལ་ལྷག་པར་ཀུན་ཆུབ་པར་བྱ་བར་སེམས་པར་འགྱུར་ཏེ། དེ་ལྟ་བུའི་ཚུལ་གྱིས་བྱང་ཆུབ་སེམས་དཔའ་དེ་དག་ནི། ཡལ་ག་དང༌། ལོ་མ་དང༌། འདབ་
མ་ལྟ་བུ་ལ་ཞུགས་པ་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་གང་ཟག་ཉན་ཐོས་ཀྱི་ཐེག་པ་ཅན་དག་དང༌། རང་སངས་
རྒྱས་ཀྱི་ཐེག་པ་ཅན་དག་སློབ་པ་དེ་ལྟར་བསླབ་པར་མི་བྱའོ། །རབ་འབྱོར། གང་ཟག་ཉན་ཐོས་ཀྱི་ཐེག་པ་ཅན་དང༌། རང་སངས་རྒྱས་ཀྱི་ཐེག་པ་ཅན་དག་ཇི་ལྟར་སློབ་ཅེ་ན། རབ་འབྱོར། དེ་དག་འདི་སྙམ་དུ་
སེམས་ཏེ། བདག་གཅིག་པུ་དུལ་བར་བྱའོ། །བདག་གཅིག་པུ་ཞི་བར་བྱའོ། །བདག་གཅིག་པུ་ཡོངས་སུ་མྱ་ངན་ལས་འདའ་བར་བྱའོ། །སྙམ་སྟེ། བདག་འབའ་ཞིག་དུལ་བ་དང༌། ཞི་བ་དང༌། ཡོངས་སུ་
མྱ་ངན་ལས་འདའ་བའི་ཕྱིར་དགེ་བའི་རྩ་བ་ཐམས་ཅད་མངོན་པར་འདུ་བྱེད་པའི་སྦྱོར་བ་རྩོམ་སྟེ། རབ་འབྱོར། ཡང་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་བསླབ་པར་མི་བྱའོ། །རབ་འབྱོར།
འོན་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་ནི། འཇིག་རྟེན་ཐམས་ཅད་ལ་ཕན་གདགས་པའི་ཕྱིར་བདག་ཉིད་ཀྱང་དེ་བཞིན་ཉིད་ལ་གནས་པར་བྱ། སེམས་ཅན་ཐམས་ཅད་ཀྱང་དེ་བཞིན་
ཉིད་ལ་དགོད་པར་བྱ་སྟེ། སེམས་ཅན་གྱི་ཁམས་གཞལ་དུ་མེད་པ་རྣམས་ཡོངས་སུ་མྱ་ངན་ལས་འདའ་བར་བྱའོ། །ཞེས་དེ་ལྟར་བསླབ་པར་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་
དགེ་བའི་རྩ་བ་ཐམས་ཅད་མངོན་པར་འདུ་བྱེད་པའི་སྦྱོར་བ་དེ་ལྟར་བརྩམ་པར་བྱ་ཞིང་དེས་རློམ་སེམས་སུའང་མི་བྱའོ། །རབ་འབྱོར། འདི་ལྟ་སྟེ། དཔེར་ན། གླང་པོ་ཆེ་མ་མཐོང་བའི་སྐྱེས་བུ་ལ་ལ་
ཞིག་གླང་པོ་ཆེའི་ཁ་དོག་དང༌། དབྱིབས་ཚོལ་ཏེ། དེས་མུན་ཁུང་ནས་གླང་པོ་ཆེ་ཞིག་རྙེད་ནས་སྣང་བ་ག་ལ་བ་དེར་བརྟགས་སོ། །དེར་བརྟགས་ནས་གླང་པོ་ཆེའི་རྗེས་བཙལ་བར་སེམས་ཤིང་གླང་པོ་
ཆེའི་རྗེས་ལས་གླང་པོ་ཆེའི་ཁ་དོག་དང༌། དབྱིབས་གཟུང་བར་སེམས་ན། རབ་འབྱོར། དེ་ཇི་སྙམ་དུ་སེམས། ཅི་སྐྱེས་བུ་དེའང་མཁས་པའི་རང་བཞིན་ཅན་ཡིན་ནམ། རབ་འབྱོར་གྱིས་གསོལ་
པ༑ བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བཞིན་དུ་གང་ཟག་བྱང་ཆུབ་སེམས་དཔའི་ཐེག་པ་ཅན་གང་ཤེས་རབ་ཀྱི་ཕ་རོལ་ཏུ་ཕྱིན་པ་
འདི་མི་ཤེས་ཤིང་མི་འདྲི་བར་དེ་སྤངས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས། མདོ་སྡེ་གང་དག་ཉན་ཐོས་ཀྱི་ས་མངོན་པར་སྟོན་པ་དང༌།
༄༅། །རང་སངས་རྒྱས་ཀྱི་ས་མངོན་པར་སྟོན་པ་དེ་དག་ཡོངས་སུ་བཙལ་བར་སེམས་པ་དེ་དག་དེ་ལྟ་བུའི་ཚུལ་དུ་རིག་པར་བྱ་སྟེ། རབ་འབྱོར། འདིའང་དེ་དག་གི་བདུད་ཀྱི་ལས་སུ་
རིག་པར་བྱའོ། །རབ་འབྱོར། འདི་ལྟ་སྟེ། དཔེར་ན། སྐྱེས་བུ་རིན་པོ་ཆེ་དོན་དུ་གཉེར་བ་ཞིག་རྒྱ་མཚོ་ཆེན་པོ་མཐོང་ནས་དེར་རིན་པོ་ཆེ་དག་ལ་མི་དཔྱོད་ཅིང་མི་སེམས་ལ་མི་འཇུག་པར་དེ་རིན་པོ་
ཆེའི་རྒྱུར་བ་ལང་གི་རྨིག་རྗེས་ཀྱི་ནང་དུ་ཚོལ་བར་སེམས་ཤིང་བ་ལང་གི་རྨིག་རྗེས་དང་རྒྱ་མཚོ་ཆེན་པོ་མཚུངས་པར་བྱ་བར་སེམས་ན། རབ་འབྱོར། དེ་ཇི་སྙམ་དུ་སེམས། ཅི་སྐྱེས་བུ་དེ་མཁས་
པའི་རང་བཞིན་ཅན་དུ་རིག་པར་བྱའམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བཞིན་དུ་གང་
ཟག་བྱང་ཆུབ་སེམས་དཔའི་ཐེག་པ་ཅན་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་རྙེད་ཀྱང་མ་རྟོགས་ཤིང་མི་ཤེས་པས་འདོར་བར་བྱེད་དེ། མདོ་སྡེ་གང་དག་ཉན་ཐོས་ཀྱི་ས་མངོན་པར་སྟོན་པ་
དང༌། རང་སངས་རྒྱས་ཀྱི་ས་མངོན་པར་སྟོན་པ་དེ་དག་ལ་བརྩོན་པ་ཆུང་ངུས་གནས་པར་འདོད་པས་བཙལ་བར་སེམས་པ་དེ་དག་ནི། དེ་ལྟ་བུའི་ཚུལ་དུ་རིག་པར་བྱའོ། །གང་དུ་བྱང་ཆུབ་སེམས་
དཔའི་ཐེག་པ་མ་བརྗོད་པར་བདག་གཅིག་པུ་དུལ་བ་དང༌། ཞི་བར་གནས་པ་དང༌། འདི་ལྟར་ཡོངས་སུ་མྱ་ངན་ལས་འདའ་བར་བྱ་བ་ཉིད་དོ། །ཞེས་བྱ་བ་དང༌། ནང་དུ་ཡང་དག་བཞག་པ་དང༌། རྒྱུན་དུ་
ཞུགས་པའི་འབྲས་བུ་ཐོབ་པར་བྱའོ། །ལན་ཅིག་ཕྱིར་འོང་བའི་འབྲས་བུ་དང་ཕྱིར་མི་འོང་བའི་འབྲས་བུ་དང༌། དགྲ་བཅོམ་པ་ཉིད་ཀྱི་འབྲས་བུ་ཐོབ་པར་བྱའོ། །རང་བྱང་ཆུབ་ཐོབ་པར་བྱའོ། །ཚེ་འདི་
ཉིད་ལ་ལེན་པ་མེད་པར་ཟག་པ་ལས་སེམས་ཡོངས་སུ་གྲོལ་བར་བྱས་ནས་ཡོངས་སུ་མྱ་ངན་ལས་འདའ་བར་བྱའོ། །ཞེས་བརྗོད་པ་དེ་ནི། ཉན་ཐོས་དང༌། རང་སངས་རྒྱས་ཀྱི་ས་དང་ལྡན་པ་ཞེས་བྱ་སྟེ། འདི་ལ་
བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་སེམས་བསྐྱེད་པར་མི་བྱའོ། །དེ་ཅིའི་ཕྱིར་ཞེ་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཐེག་པ་ཆེན་པོ་ལ་ཡང་དག་པར་
ཞུགས་ཤིང་གོ་ཆ་ཆེན་པོ་བགོས་པ་ཡིན་ཏེ། དེ་དག་གིས་ནམ་དུའང་སྤྲོ་བ་ཆུང་ངུ་ལ་སེམས་མི་བསྐྱེད་དོ། །དེ་ཅིའི་ཕྱིར་ཞེ་ན། སྐྱེས་བུ་དམ་པ་དེ་དག་ནི། འཇིག་རྟེན་ཡོངས་སུ་འདྲེན་པ་འཇིག་རྟེན་གྱི་
དོན་བྱེད་པ་ཡིན་ཏེ། དེ་བས་ན། དེ་དག་གིས་དུས་རྟག་ཏུ་རྒྱུན་མི་ཆད་པར་ཕ་རོལ་ཏུ་ཕྱིན་པ་དྲུག་ལ་ལེགས་པར་བསླབ་པར་བྱའོ། །རབ་འབྱོར། ཡང་གང་ཟག་བྱང་ཆུབ་སེམས་དཔའི་ཐེག་པ་ཅན་གང་དག་
དགེ་བའི་རྩ་བ་ཡོངས་སུ་མ་སྨིན་པ། བློ་ཆུང་བ། ལྷག་པའི་བསམ་པ་ཞན་པ་དེ་དག་ཕ་རོལ་ཏུ་ཕྱིན་པ་དྲུག་དང་ལྡན་པའི་མདོ་སྡེ་དག་མི་ཤེས་ཤིང་ཁོང་དུ་མ་ཆུད་པས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་
སྤངས་ཤིང་བོར་ནས་མདོ་སྡེ་གང་དག་ཉན་ཐོས་དང་རང་སངས་རྒྱས་ཀྱི་ས་མངོན་པར་སྟོན་པ་དེ་དག་ཡོངས་སུ་བཙལ་བར་སེམས་ཏེ། རབ་འབྱོར། གང་ཟག་བྱང་ཆུབ་སེམས་དཔའི་ཐེག་པ་ཅན་འདི་ལྟ་
༄༅། །བུའི་ཚུལ་ཅན་དེ་དག་གི་འདིའང་བདུད་ཀྱི་ལས་སུ་རིག་པར་བྱའོ། །རབ་འབྱོར། འདི་ལྟ་སྟེ། དཔེར་ན། ཤིང་མཁན་ནམ། ཤིང་མཁན་གྱི་སློབ་མ་ཞིག་རྣམ་པར་རྒྱལ་
བའི་ཁང་པའི་ཚད་དུ་ཁང་པ་བྱེད་པར་འདོད་པ་དང༌། སྒྲུབ་པར་འདོད་ནས་དེ་ཉི་མ་དང༌། ཟླ་བའི་གཞལ་མེད་ཁང་གི་ཚད་དང༌། དཀྱིལ་འཁོར་ཡོངས་སུ་ཚོལ་ཏེ། དེ་ཡོངས་སུ་ཚོལ་བས་ཉི་མ་དང༌། ཟླ་བའི་
གཞལ་མེད་ཁང་མཐོང་བ་དང༌། དེ་དེ་དག་གི་ཚད་གཟུང་བར་སེམས་ན། རབ་འབྱོར། དེ་ཇི་སྙམ་དུ་སེམས། རྣམ་པར་རྒྱལ་བའི་ཁང་པའི་ཚད་ཀྱི་ཁང་པ་བྱེད་པར་འདོད་པ་དང༌། སྒྲུབ་པར་འདོད་
པས༑ ཉི་མ་དང༌། ཟླ་བའི་གཞལ་མེད་ཁང་གི་ཚད་གཟུང་བར་བྱ་བ་ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་
པ༑ རབ་འབྱོར། དེ་བཞིན་དུ་མ་འོངས་པའི་དུས་ན་འབྱུང་བར་འགྱུར་བའི་གང་ཟག་བྱང་ཆུབ་སེམས་དཔའི་ཐེག་པ་ཅན་ལ་ལ་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་ཤིང་ཤེས་རབ་ཀྱི་ཕ་
རོལ་ཏུ་ཕྱིན་པ་འདི་རྙེད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སྤངས། ཤེས་རབ་ཀྱི་ཕ་རོལ་ཏུ་ཕྱིན་པ་བཏང་ནས་ཉན་ཐོས་དང་རང་སངས་རྒྱས་ཀྱི་ས་དང་ལྡན་པའི་མདོ་སྡེ་དག་ལས་ཐམས་ཅད་
མཁྱེན་པ་ཉིད་ཡོངས་སུ་ཚོལ་བར་སེམས་ཏེ། མདོ་སྡེ་གང་དག་བདག་གཅིག་པུ་དུལ་བར་བྱའོ། །བདག་གཅིག་པུ་ཞི་བར་བྱའོ། །བདག་གཅིག་པུ་ཡོངས་སུ་མྱ་ངན་ལས་འདའ་བར་བྱའོ། །
ཞེས་དེ་ལྟར་མངོན་པར་སྟོན་པ། བདག་འབའ་ཞིག་དུལ་བ་དང༌། ཞི་བ་དང༌། ཡོངས་སུ་མྱ་ངན་ལས་འདའ་བ་ཐོབ་པར་བྱེད་པ་དེ་ལྟ་བུའི་ཚུལ་གྱི་མདོ་སྡེ་དག་ཡོངས་སུ་ཚོལ་ཞིང་
དེ་ལྟ་བུར་སློབ་པར་སེམས་ན། རབ་འབྱོར། དེ་ཇི་སྙམ་དུ་སེམས། བྱང་ཆུབ་སེམས་དཔའ་དེ་དག་ཀྱང་མཁས་པའི་རང་བཞིན་ཅན་དུ་རིག་པར་བྱའམ། རབ་འབྱོར་གྱིས་གསོལ་པ། བཅོམ་
ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདིའང་དེ་དག་གི་བདུད་ཀྱི་ལས་སུ་རིག་པར་བྱའོ། །རབ་འབྱོར། འདི་ལྟ་སྟེ། དཔེར་ན། སྐྱེས་
བུ་ལ་ལ་ཞིག་འཁོར་ལོས་སྒྱུར་བའི་རྒྱལ་པོ་ལྟ་འདོད་པར་གྱུར་ལ། དེས་འཁོར་ལོས་སྒྱུར་བའི་རྒྱལ་པོ་མཐོང་སྟེ་མཐོང་ནས་འཁོར་ལོས་སྒྱུར་བའི་རྒྱལ་པོའི་ཁ་དོག་དང༌། དབྱིབས་དང༌།
གཟི་བརྗིད་དང༌། རྫུ་འཕྲུལ་འདི་འདྲའོ། །ཞེས་མཚན་མར་བཟུང་ནས་དེས་མཁར་གྱི་རྒྱལ་པོ་མཐོང་ན། དེས་མཁར་གྱི་རྒྱལ་པོ་དེའི་ཁ་དོག་དང༌། དབྱིབས་དང༌། གཟི་བརྗིད་དང༌། རྫུ་འཕྲུལ་དང༌།
མཚན་མ་བཟུང་སྟེ་བྱེ་བྲག་ཤེས་པར་མི་ནུས་པས་འདི་སྐད་དུ། འཁོར་ལོས་སྒྱུར་བའི་རྒྱལ་པོ་དེ་ནི། ཁ་དོག་དང༌། དབྱིབས་དང༌། གཟི་བརྗིད་དང༌། རྫུ་འཕྲུལ་དང༌། མཚན་མ་འདི་ཁོ་ན་འདྲའོ། །
ཞེས་ཟེར་ན། རབ་འབྱོར། དེ་ཇི་སྙམ་དུ་སེམས། གང་འཁོར་ལོས་སྒྱུར་བའི་རྒྱལ་པོ་མཁར་གྱི་རྒྱལ་པོ་དང་མཚུངས་པར་བྱ་བར་སེམས་པའི་སྐྱེས་བུ་དེ་མཁས་པའི་རང་བཞིན་ཅན་དུ་རིག་པར་
༄༅། །བྱའམ༑ རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བཞིན་དུ་མ་འོངས་པའི་དུས་ན་འབྱུང་བར་འགྱུར་བའི་
གང་ཟག་བྱང་ཆུབ་སེམས་དཔའི་ཐེག་པ་ཅན་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་རྙེད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བཏང༌། ཤེས་རབ་ཀྱི་
ཕ་རོལ་ཏུ་ཕྱིན་པ་བོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་རིང་དུ་བྱས་ནས་ཉན་ཐོས་དང་རང་སངས་རྒྱས་ཀྱི་ས་དང་ལྡན་པའི་མདོ་སྡེ་དག་ལས་ཐམས་ཅད་མཁྱེན་པ་ཉིད་ཡོངས་སུ་བཙལ་བར་
སེམས་པར་འགྱུར་ཏེ། རབ་འབྱོར། འདིའང་དེ་དག་གི་བདུད་ཀྱི་ལས་སུ་རིག་པར་བྱའོ། །རབ་འབྱོར། ཡང་ཉན་ཐོས་དང་རང་སངས་རྒྱས་དང་ལྡན་པའི་མདོ་སྡེ་འདི་དག་ལས་བྱང་ཆུབ་སེམས་
དཔའ་སེམས་དཔའ་ཆེན་པོས་ཐམས་ཅད་མཁྱེན་པ་ཉིད་ཡོངས་སུ་བཙལ་བར་བྱའོ། །ཞེས་ང་མི་སྨྲ་སྟེ། རབ་འབྱོར། ཡང་འོན་ཀྱང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་བྱང་
ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐབས་མཁས་པ་གང་བཤད་པ་དེ་ལ་མ་བསླབས་པར་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ངེས་པར་འབྱུང་བར་མི་འགྱུར་རོ། །དེ་ཅིའི་ཕྱིར་ཞེ་ན། མདོ་སྡེ་གཞན་དག་ཏུ་བྱང་ཆུབ་སེམས་དཔའ་ཡང་དག་པར་འགྲུབ་པ་ནི། དཀའ་བ་ཡིན་ནོ། །རབ་འབྱོར། དེ་ལྟ་བས་ན། དེ་བཞིན་
གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པའི་ཕན་ཡོན་དེ་དག་ཡང་དག་པར་གཟིགས་པས། རྣམ་གྲངས་དུ་མས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཤེས་རབ་ཀྱི་ཕ་རོལ་
ཏུ་ཕྱིན་པ་འདི་ཡང་དག་པར་སྟོན། ཡང་དག་པར་འགོད། ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱེད། ཡང་དག་པར་འཇུག་པར་བྱེད། ཡང་དག་པར་འཇོག་པར་བྱེད་
དེ༑ དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །རབ་འབྱོར། ཡང་དེ་ཇི་སྙམ་དུ་སེམས།
གང་དག་ཕྱིར་མི་ལྡོག་པའི་ཐེག་པ་ཆེན་པོ་ཐོབ་ཅིང་བསྒྲུབས་ནས་དེ་ལྟ་བུ་བོར་ཏེ་ཐེག་པ་དམན་པ་ཡོངས་སུ་བཙལ་བར་སེམས་ན། བྱང་ཆུབ་སེམས་དཔའ་དེ་དག་ཀྱང་མཁས་པའི་རང་བཞིན་ཅན་
ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ལྟ་སྟེ། དཔེར་ན། སྐྱེས་བུ་བཀྲེས་པ་ཞིག་
གིས་ཁ་ཟས་རོ་བརྒྱ་པ་ཞུ་ན་ཕན་པ། ཞུ་ན་བདེ་བ། ཚེའི་མཐར་ཐུག་པའི་བར་དུ་བཀྲེས་པ་དང༌། སྐོམ་པ་ཟློག་པ་ཞིག་རྙེད་ལ། དེས་དེ་བོར་ཏེ་ཞག་དྲུག་ཅུ་པའི་འབྲས་ཆན་བཙལ་བར་སེམས་
ཤིང་ཞག་དྲུག་ཅུ་པའི་འབྲས་ཆན་རྙེད་ནས་ཁ་ཟས་རོ་བརྒྱ་པ་བོར་ཏེ་ཞག་དྲུག་ཅུ་པའི་འབྲས་ཆན་དེ་ཟ་བར་སེམས་ན། རབ་འབྱོར། དེ་ཇི་སྙམ་དུ་སེམས། ཅི་སྐྱེས་བུ་དེ་མཁས་པའི་རང་བཞིན་ཅན་ཡིན་
༄༅། །ནམ༑ རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བཞིན་དུ་མ་འོངས་པའི་
དུས་ན་འབྱུང་བར་འགྱུར་བའི་བྱང་ཆུབ་སེམས་དཔའ་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་རྙེད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བཏང༌།
ཤེས་རབ་ཀྱི་ཕ་རོལ་ཏུ་ཕྱིན་པ་བོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་རིང་དུ་བྱས་ནས་ཉན་ཐོས་ཀྱི་ཐེག་པ་དང་རང་སངས་རྒྱས་ཀྱི་ཐེག་པ་དང་ལྡན་པའི་མདོ་སྡེ་དག་བཙལ་བར་
སེམས་ཤིང༌། མདོ་སྡེ་གང་དག་ཉན་ཐོས་དང་རང་སངས་རྒྱས་ཀྱི་ས་མངོན་པར་སྟོན་པ་དེ་དག་གིས་ཐམས་ཅད་མཁྱེན་པ་ཉིད་དང་ཐབས་མཁས་པ་བཙལ་བར་སེམས་ན། རབ་འབྱོར།
དེ་ཇི་སྙམ་དུ་སེམས། བྱང་ཆུབ་སེམས་དཔའ་དེ་དག་ཀྱང་མཁས་པའི་རང་བཞིན་ཅན་དུ་རིག་པར་བྱའམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །
བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཡང་དེ་དག་གི་བདུད་ཀྱི་ལས་སུ་རིག་པར་བྱའོ། །རབ་འབྱོར། འདི་ལྟ་སྟེ། དཔེར་ན། སྐྱེས་བུ་ལ་ལ་ཞིག་གིས་ནོར་བུ་
རིན་པོ་ཆེ་རིན་ཐང་མེད་པ་ཞིག་རྙེད་ནས་ནོར་བུ་རིན་པོ་ཆེ་རིན་ཐང་ཆུང་ཞིང་བྱིན་ཆུང་བ་དང་ལྷན་ཅིག་མཚུངས་པར་བྱ་བར་སེམས་ན། རབ་འབྱོར། དེ་ཇི་སྙམ་དུ་སེམས། ཅི་སྐྱེས་བུ་
དེ་མཁས་པའི་རང་བཞིན་ཅན་དུ་རིག་པར་བྱའམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བཞིན་དུ་མ་
འོངས་པའི་དུས་ན་འབྱུང་བར་འགྱུར་བའི་གང་ཟག་བྱང་ཆུབ་སེམས་དཔའི་ཐེག་པ་ཅན་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འོད་གསལ་བ་རིན་པོ་ཆེ་འདི་ཐོས་ཤིང་རྙེད་ནས། ཉན་ཐོས་དང་
རང་སངས་རྒྱས་ཀྱི་ཐེག་པ་དང་མཚུངས་པར་བྱ་བར་སེམས་པར་འགྱུར་ཏེ། ཉན་ཐོས་དང་རང་སངས་རྒྱས་ཀྱི་ས་ལས་ཐམས་ཅད་མཁྱེན་པ་ཉིད་དང༌། ཐབས་མཁས་པ་ཡོངས་སུ་བཙལ་བར་
སེམས་ན། རབ་འབྱོར། དེ་ཇི་སྙམ་དུ་སེམས། བྱང་ཆུབ་སེམས་དཔའ་དེ་དག་ཀྱང་མཁས་པའི་རང་བཞིན་ཅན་དུ་རིག་པར་བྱའམ། རབ་འབྱོར་གྱིས་གསོལ་པ། བཅོམ་ལྡན་འདས་
དེ་ནི༑ མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདིའང་བྱང་ཆུབ་སེམས་དཔའ་དེ་དག་གི་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་
ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཆད་པ་དང༌། སྟོན་པ་དང༌། ཉེ་བར་སྟོན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཆུང་
ངུ་ན་ཡི་གེར་འབྲི་བ་ལ་ཡང་གང་སེམས་རྣམ་པར་གཡེང་བར་བྱེད་པར་འགྱུར་བའི་སྤོབས་པ་མང་པོ་འབྱུང་བར་འགྱུར་ཏེ། རབ་འབྱོར། འདིའང་བྱང་ཆུབ་སེམས་དཔའ་དེ་དག་གི་བདུད་ཀྱི་ལས་སུ་
༄༅། །རིག་པར་བྱའོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཡང་ཤེས་རབ་ཀྱི་ཕ་
རོལ་ཏུ་ཕྱིན་པ་ཡི་གེར་བྲིར་ནུས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ནོ། །རབ་འབྱོར། གང་སུ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེ་འབྲུར་བྲིས་
ནས་ཤེས་རབ་ཀྱི་ཕ་རོལ་ཏུ་ཕྱིན་པ་བྲིས་པར་སེམས་པའམ། མེད་པའོ། །ཞེས་པའམ། ཡི་གེ་དག་ལ་ཤེས་རབ་ཀྱི་ཕ་རོལ་ཏུ་ཕྱིན་པར་མངོན་པར་ཆགས་པའམ། ཡི་གེ་མེད་པའོ། །སྙམ་
ན༑ རབ་འབྱོར། འདིའང་དེ་དག་གི་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེར་འབྲི་བ་ལ་ཡུལ་ཡིད་ལ་བྱེད་པ་དག་འབྱུང་བར་འགྱུར། གྲོང་དང༌།
གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་ཡིད་ལ་བྱེད་པ་དག་འབྱུང་བར་འགྱུར། སྐྱེད་མོས་ཚལ་ཡིད་ལ་བྱེད་པ་དག་འབྱུང་བར་འགྱུར། བླ་མ་ཡིད་ལ་
བྱེད་པ་དག་འབྱུང་བར་འགྱུར། ཀུན་ཏུ་སྟོན་པ་ཡིད་ལ་བྱེད་པ་དག་འབྱུང་བར་འགྱུར། ཆོམ་རྐུན་ཡིད་ལ་བྱེད་པ་དག་འབྱུང་བར་འགྱུར། ལག་ཅན་ཡིད་ལ་བྱེད་པ་དག་འབྱུང་བར་འགྱུར། བི་ཤི་ཁཱ་
ཡིད་ལ་བྱེད་པ་དག་འབྱུང་བར་འགྱུར། ཤི་བི་ཀཱ་ཡིད་ལ་བྱེད་པ་དག་འབྱུང་བར་འགྱུར། སྨད་འཚོང་ཡིད་ལ་བྱེད་པ་དག་འབྱུང་བར་འགྱུར། བདེ་བ་ཡིད་ལ་བྱེད་པ་དང༌། སྡུག་བསྔལ་ཡིད་ལ་བྱེད་པ་
དང༌། འཇིགས་པ་ཡིད་ལ་བྱེད་པ་དག་འབྱུང་བར་འགྱུར། བུད་མེད་ཡིད་ལ་བྱེད་པ་དང༌། སྐྱེས་པ་ཡིད་ལ་བྱེད་པ་དང༌། མ་ནིང་ཡིད་ལ་བྱེད་པ་དག་འབྱུང་བར་འགྱུར། མཛའ་བ་དང༌། མི་འཛའ་བ་དང་མི་ལྡན་
པ་ཡིད་ལ་བྱེད་པ་དག་འབྱུང་བར་འགྱུར། ཕ་མ་དང་ལྡན་པའི་ཡིད་ལ་བྱེད་པ་དག་འབྱུང་བར་འགྱུར། སྤུན་ཟླ་དང༌། སྲིང་མོ་དང་ལྡན་པའི་ཡིད་ལ་བྱེད་པ་དག་འབྱུང་བར་འགྱུར། གཉེན་བཤེས་དང་ལྡན་
པའི་ཡིད་ལ་བྱེད་པ་དང༌། གྲོགས་པོ་དང༌། རྩ་ལག་དང༌། སྣག་གི་གཉེན་མཚམས་དང་ལྡན་པའི་ཡིད་ལ་བྱེད་པ་དང༌། ཆུང་མ་དང༌། བུ་དང༌། བུ་མོ་དང་ལྡན་པའི་ཡིད་ལ་བྱེད་པ་དང༌། ཁྱིམ་དང༌། ཟས་དང༌། བཏུང་
བ་དང་ལྡན་པའི་ཡིད་ལ་བྱེད་པ་དང༌། གོས་ཡིད་ལ་བྱེད་པ་དང༌། མལ་སྟན་ཡིད་ལ་བྱེད་པ་དང༌། འཚོ་བའི་ཡོ་བྱད་ཡིད་ལ་བྱེད་པ་དང༌། འཕྲལ་གྱི་བྱ་བ་ཡིད་ལ་བྱེད་པ་དང༌། འདོད་ཆགས་ཡིད་ལ་བྱེད་པ་དང༌།
ཞེ་སྡང་ཡིད་ལ་བྱེད་པ་དང༌། གཏི་མུག་ཡིད་ལ་བྱེད་པ་དང༌། དུས་ཚིགས་ཡིད་ལ་བྱེད་པ་དང༌། དུས་བཟང་པོ་ཡིད་ལ་བྱེད་པ་དང༌། དུས་ངན་པ་ཡིད་ལ་བྱེད་པ་དང༌། གླུ་ཡིད་ལ་བྱེད་པ་དང༌། སིལ་སྙན་ཡིད་ལ་བྱེད་
པ་དང༌། གར་ཡིད་ལ་བྱེད་པ་དང༌། སྙན་དངགས་དང༌། གླུ་ཚིག་དང༌། སྒྲུང་ཡིད་ལ་བྱེད་པ་དང༌། བསྟན་བཅོས་ཡིད་ལ་བྱེད་པ་དང༌། ཐ་སྙད་ཡིད་ལ་བྱེད་པ་དང༌། བཞད་གད་ཡིད་ལ་བྱེད་པ་དང༌། འཇོ་སྒེག་ཡིད་
ལ་བྱེད་པ་དང༌། མྱ་ངན་ཡིད་ལ་བྱེད་པ་དང༌། ཉོན་མོངས་པ་ཡིད་ལ་བྱེད་པ་དང༌། བདག་ཡིད་ལ་བྱེད་པ་སྟེ། རབ་འབྱོར། ཡིད་ལ་བྱེད་པ་དེ་དག་དང༌། གཞན་དག་ཀྱང་བདུད་སྡིག་ཅན་ཉེ་བར་སྒྲུབ་པར་འགྱུར་ཏེ།
༄༅། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པ་དང༌། སྟོན་པ་དང༌། ཉེ་བར་སྟོན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌།
ཆུང་ངུ་ན་ཡི་གེར་འབྲི་བ་ལའང་བར་ཆད་བྱེད་པར་འགྱུར། སེམས་གཡེང་བར་བྱེད་པར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་འདི་དག་རྟོགས་པར་བྱ་སྟེ། རྟོགས་ནས་
ཀྱང་སྤང་བར་བྱའོ། །རབ་འབྱོར། གཞན་ཡང་རྒྱལ་པོ་ཡིད་ལ་བྱེད་པ་དང༌། གཞོན་ནུ་ཡིད་ལ་བྱེད་པ་དང༌། གླང་པོ་ཆེ་ཡིད་ལ་བྱེད་པ་དང༌། རྟ་ཡིད་ལ་བྱེད་པ་དང༌། ཤིང་རྟ་ཡིད་ལ་བྱེད་པ་དང༌། ལ་གཅན་གྱི་
ཆོ་ལོ་ལྟ་བ་ཡིད་ལ་བྱེད་པ་དག་འབྱུང་བར་འགྱུར་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་མེ་
ཡིད་ལ་བྱེད་པ་དང༌། འདོད་པ་ཡིད་ལ་བྱེད་པ་དང༌། ནོར་དང་འབྲུ་ཕུན་སུམ་ཚོགས་པ་ཡིད་ལ་བྱེད་པ་དག་འབྱུང་བར་འགྱུར་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་
བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་
འབོགས་པ་དང༌། ཁ་ཏོན་བྱེད་པ་དང༌། ཆུང་ངུ་ན་ཡི་གེར་འབྲི་བ་དག་ལ་བར་ཆད་བྱེད་པར་འགྱུར་པ་དང༌། རྙེད་པ་དང༌། བཀུར་སྟི་དང༌། ཆོས་གོས་དང༌། བསོད་སྙོམས་དང༌། མལ་སྟན་དང༌། ན་བའི་
གསོས་སྨན་དང༌། ཡོ་བྱད་རྣམས་འབྱུང་བར་འགྱུར་བ་དང༌། རྙེད་པ་དང༌། བཀུར་སྟི་དང༌། ཚིགས་སུ་བཅད་པ་དག་གི་རོ་མྱང་བས་སེམས་ལ་གདུང་བ་དག་འབྱུང་བར་འགྱུར་ཏེ། རབ་འབྱོར། འདིའང་བྱང་
ཆུབ་སེམས་དཔའ་སེམས་དཔའ་ཆེན་པོ་དག་གིས་བདུད་ཀྱི་ལས་སུ་རིག་པར་བྱ་སྟེ། བདུད་ཀྱི་ལས་འདི་དག་ཐམས་ཅད་རྟོགས་པར་བྱ་སྟེ། དེ་དག་རྟོགས་ནས་ཀྱང་སྤང་བར་བྱ་བ་ཡིན་ནོ། །རབ་འབྱོར།
གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཐ་ན་
ཡི་གེར་འབྲི་བ་དག་ལ་ཉན་ཐོས་དང་རང་སངས་རྒྱས་ཀྱི་ས་དང་ལྡན་པའི་མདོ་སྡེ་གང་དག་ཟབ་མོ་ཟབ་པ་དག་ཡོད་པ་དེ་དག་བདུད་སྡིག་ཅན་དགེ་སློང་གི་ཆ་བྱད་དུ་འོངས་ནས་སྦྱིན་པར་བྱེད་པར་འགྱུར་ཏེ།
འདི་སྐད་དུ་འདི་ལ་སློབས་ཤིག །འདི་བྲིས་ཤིག། འདི་ལུང་ཕོག་ཅིག། འདི་ཁ་ཏོན་དུ་གྱིས་ཤིག་དང་འདི་ལས་ཐམས་ཅད་མཁྱེན་པ་ཉིད་འགྲུབ་པར་འགྱུར་རོ། ཞེས་ཟེར་ན། རབ་འབྱོར། བྱང་
ཆུབ་སེམས་དཔའ་སེམས་དཔའ་ཆེན་པོ་ཐབས་མཁས་པས་དེ་དག་ལ་དགའ་བ་མི་བསྐྱེད་དོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར་ཡང་མདོ་སྡེ་དེ་དག་ལས་སྟོང་པ་ཉིད་དང༌། མཚན་མ་མེད་
པ་དང༌། སྨོན་པ་མེད་པ་དག་བཤད་མོད་ཀྱི། ཡང་དེ་ལས་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་མཁས་པ་མ་བསྟན་ཏོ། །དེ་ལ་བྱང་ཆུབ་སེམས་དཔའ་གང་དག་ཐབས་མཁས་པའི་ཡེ་
༄༅། །ཤེས་ཀྱི་བྱེ་བྲག་མངོན་པར་མི་ཤེས་པ་དེ་དག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཏང་བར་སེམས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཏང་ནས་ཉན་
ཐོས་དང་རང་སངས་རྒྱས་ཀྱི་ས་དང་ལྡན་པའི་མདོ་སྡེ་དག་ལས་ཐབས་མཁས་པ་བཙལ་བར་སེམས་པར་འགྱུར་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་
ལས་སུ་རིག་པར་བྱའོ། །རབ་འབྱོར། གཞན་ཡང་ཆོས་ཉན་པ་དག་འདུན་པ་དང་ལྡན་ཞིང་ཤེས་རབ་ཀྱི་ཕ་རོལ་ཏུ་ཕྱིན་པ་གཟུང་བར་འདོད་ལ། ཆོས་སྨྲ་བ་སྙོམ་ལས་བྱེད་པར་འགྱུར་ཏེ་ཆོས་སྟོན་
པར་མི་འདོད་ན། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་ཚོགས་པ་དང་བྲལ་བས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་ཆོས་སྨྲ་བ་སྙོམ་ལས་
མེད་པར་གྱུར་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་སྦྱིན་པར་འདོད་ལ། ཆོས་ཉན་པ་སྙོམ་ལས་དང་བྱ་བ་མང་པོ་དང་ལྡན་པར་འགྱུར་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་
ཆེན་པོས་ཚོགས་པ་དང་བྲལ་བས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་ཆོས་ཉན་པ་དག་འདུན་པ་དང་ལྡན་ཞིང་ཤེས་རབ་ཀྱི་ཕ་རོལ་ཏུ་ཕྱིན་པ་གཟུང་བར་འདོད། བཅང་བར་
འདོད། ཀློག་པར་འདོད། ཀུན་ཆུབ་པར་བྱེད་པར་འདོད། རབ་ཏུ་འདོན་པར་འདོད། ཐ་ན་ཡི་གེར་བྲི་བར་ཡང་འདོད་ཅིང༌། རྟོགས་པ་དང་ལྡན། བློ་དང་ལྡན། དྲན་པ་དང་ལྡན་པར་གྱུར་ལ། ཆོས་
སྨྲ་བ་ཡུལ་གཞན་དུ་འགྲོ་བར་འགྱུར་ཏེ། མགོ་སྨོས་པས་གོ་བ་མ་ཡིན་པའམ། རྣམ་པར་སྤྲོས་ཏེ་གོ་བ་མ་ཡིན་པའམ། མངོན་པར་མི་ཤེས་པ་ཡིན་ན། རབ་འབྱོར། འདིའང་ཤེས་རབ་ཀྱི་ཕ་རོལ་ཏུ་ཕྱིན་པ་
འདི་འཆད་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། སློབ་པ་དང༌། ཆུང་ངུ་ན་ཡི་གེར་འབྲི་བ་དེ་ལ་ཚོགས་པ་དང་བྲལ་བར་འགྱུར་ཏེ། རབ་འབྱོར། འདིའང་བྱང་
ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་ཆོས་སྨྲ་བ་སྙོམ་ལས་མེད་པར་འགྱུར། དོན་མངོན་པར་ཤེས་པར་འགྱུར་ཞིང༌། ཤེས་རབ་ཀྱི་
ཕ་རོལ་ཏུ་ཕྱིན་པ་འདི་སྦྱིན་པར་འདོད། ཀློག་ཏུ་གཞུག་པར་འདོད་ལ། ཆོས་ཉན་པ་ཡུལ་གཞན་དུ་འགྲོ་བར་འགྱུར་ཏེ། མགོ་སྨོས་པས་གོ་བ་མ་ཡིན། རྣམ་པར་སྤྲོས་ཏེ་གོ་བ་མ་ཡིན། མངོན་པར་མི་ཤེས་
པར་གྱུར་ན། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་ཚོགས་པ་དང་བྲལ་བས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་ཆོས་སྨྲ་བ་ཟང་ཟིང་ལྷུར་བྱེད། རྙེད་
པ་དང་བཀུར་སྟི་ལྷུར་བྱེད། ཆོས་གོས་ལྷུར་བྱེད་པར་གྱུར་ལ། ཆོས་ཉན་པ་ནི། འདོད་པ་ཆུང་ཞིང་ཆོག་ཤེས་ལ་རབ་ཏུ་དབེན་པའམ་ནོར་སྦྱིན་པར་མི་འདོད་པར་གྱུར་ན། རབ་འབྱོར། འདིའང་ཤེས་རབ་ཀྱི་
ཕ་རོལ་ཏུ་ཕྱིན་པ་ལ་བསླབ་པ་དང༌། བྲི་བ་དེ་ལ་ཚོགས་པ་དང་བྲལ་བར་འགྱུར་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་ཆོས་
༄༅། །ཉན་པ་ནི། དད་པར་གྱུར་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉན་པར་འདོད། དོན་ཁོང་དུ་ཆུད་པར་འདོད། ནོར་ཡོངས་སུ་གཏང་བར་འདོད་ལ། ཆོས་སྨྲ་བ་ནི། དད་
པ་མེད་པར་གྱུར་པའམ། ནོར་ལེན་པར་མི་འདོད་པའམ། འདོད་པ་ཆུང་བའམ། སྨྲ་བར་མི་འདོད་ན། རབ་འབྱོར། འདི་ཡང་ཚོགས་པ་དང་མི་ལྡན་པས་བདུད་ཀྱི་ལས་སུ་རིག་པར་བྱའོ། །རབ་
འབྱོར༑ གཞན་ཡང་ཆོས་ཉན་པ་ནི། དད་པ་དང་ལྡན་པར་གྱུར་པ་དང༌། ཉན་པར་བྱ་བར་འདོད་པ་དང༌། དོན་ཁོང་དུ་ཆུད་པར་བྱ་བར་འདོད་ལ། ཆོས་སྨྲ་བ་ལ་ཆོས་ཀྱི་བར་ཆད་དུ་གྱུར་པས་མདོ་སྡེ་
དེ་དག་མེད་པའམ་མི་འཇུག་ན། རབ་འབྱོར། འདི་ལས་ཀྱང་ཆོས་སྨྲ་བ་མ་རྙེད་པའི་ཆོས་ཉན་པ་པོ་མི་མཐུན་པར་བརྗོད་པར་འགྱུར་རོ། །རབ་འབྱོར། འདིའང་ཤེས་རབ་ཀྱི་ཕ་རོལ་ཏུ་ཕྱིན་པ་ཐོས་ནས་
འཛིན་པའམ། འཆང་བའམ། ཀློག་པའམ། ཡི་གེར་འབྲི་བ་དེ་ལ་ཚོགས་པ་དང་མི་ལྡན་པར་འགྱུར་ཏེ། རབ་འབྱོར། འདི་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་
རིག་པར་བྱའོ། །རབ་འབྱོར། གཞན་ཡང་ཆོས་སྨྲ་བ་འཆད་པར་འདོད་ལ་ཆོས་ཉན་པ་ཉན་མི་འདོད་ན། རབ་འབྱོར། འདིའང་ཤེས་རབ་ཀྱི་ཕ་རོལ་ཏུ་ཕྱིན་པ་ཐོས་ནས་འཛིན་པའམ། འཆང་བའམ།
ཀློག་པའམ། ཡི་གེར་འབྲི་བ་དེ་ལ་ཚོགས་པ་དང་མི་ལྡན་པར་འགྱུར་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་
ཡང་ཆོས་ཉན་པ་གཉིད་ཆེ་བར་གྱུར། ལུས་ལྕི་བར་གྱུར་ཏེ། དེ་གཉིད་ཆེ་བ་དེ་དང་ལྡན་པ་དང༌། ལུས་སྙོམ་པ་དེ་དང་ལྡན་པས་ཉན་མི་འདོད་པར་གྱུར་ལ། ཆོས་སྨྲ་བ་ནི། འཆད་འདོད་པར་གྱུར་ན།
རབ་འབྱོར། འདིའང་ཚོགས་པ་དང་མི་ལྡན་པར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་ཆོས་སྨྲ་བ་གཉིད་ཆེ་
བར་འགྱུར། ལུས་ལྕི་བར་གྱུར་ཏེ། དེ་གཉིད་ཆེ་བ་དང་ལྡན་པ་དང༌། ལུས་སྙོམ་པ་དེ་དང་ལྡན་པས་འཆད་མི་འདོད་པར་གྱུར་ལ། ཆོས་ཉན་པ་ནི། ཉན་འདོད་པར་གྱུར་ན། རབ་འབྱོར་འདིའང་
ཡི་གེར་བྲི་བ་དང༌། བཀླག་པ་དང༌། ཀུན་ཆུབ་པར་བྱ་བ་དེ་ལ་ཚོགས་པ་དང་མི་ལྡན་པར་འགྱུར་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་
པར་བྱའོ། །རབ་འབྱོར། གཞན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེར་འབྲི་བ་དང༌། འཆད་པ་དང༌། སློབ་པ་ལ། ལ་ལ་ཞིག་དེར་འོངས་ནས་སེམས་ཅན་དམྱལ་བའི་མི་བསྔགས་པ་
བརྗོད༑ བྱོལ་སོང་གི་སྐྱེ་གནས་ཀྱི་མི་བསྔགས་པ་བརྗོད། ཡི་དྭགས་ཀྱི་ཡུལ་གྱི་མི་བསྔགས་པ་བརྗོད། ལྷ་མ་ཡིན་གྱི་ལུས་ཀྱི་མི་བསྔགས་པ་བརྗོད་དེ། སེམས་ཅན་དམྱལ་བ་ནི། འདི་
ལྟར་སྡུག་བསྔལ་བའོ། །བྱོལ་སོང་གི་སྐྱེ་གནས་ནི། འདི་ལྟར་སྡུག་བསྔལ་བའོ། །ཡི་དྭགས་ཀྱི་ཡུལ་ནི། འདི་ལྟར་སྡུག་བསྔལ་བའོ། །ལྷ་མ་ཡིན་གྱི་ལུས་ནི། འདི་ལྟར་སྡུག་བསྔལ་
༄༅། །བའོ༑ ༑འདུ་བྱེད་རྣམས་ནི། འདི་ལྟར་སྡུག་བསྔལ་བ་སྟེ། འདི་ཉིད་དུ་སྡུག་བསྔལ་མཐར་དབྱུང་བར་བྱའོ། །ཞེས་ཟེར་ན། རབ་འབྱོར། འདིའང་བྱང་ཆུབ་སེམས་
དཔའ་སེམས་དཔའ་ཆེན་པོས་ཚོགས་པ་དང་མི་ལྡན་པས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེར་འབྲི་བ་དང༌། འཆད་པ་
དང༌། སློབ་པ་ལ། ལ་ལ་ཞིག་དེར་འོངས་ནས་ལྷའི་བསྔགས་པ་བརྗོད་དེ། ལྷ་རྣམས་ནི། འདི་ལྟར་བདེའོ། །མཐོ་རིས་ནི། འདི་ལྟར་བདེའོ། །འདོད་པའི་ཁམས་སུ་འདོད་པ་ནི། འདི་ལྟར་
བསྟེན་ཏོ། །གཟུགས་ཀྱི་ཁམས་སུ་བསམ་གཏན་རྣམས་ལ་འདི་ལྟར་མཉམ་པར་གཞོག་གོ །གཟུགས་མེད་པའི་སྙོམས་པར་འཇུག་པ་རྣམས་ལ་འདི་ལྟར་མཉམ་པར་གཞོག་གོ །
འདིའང་ཤེས་རབ་ཀྱིས་ཐམས་ཅད་བརྟགས་ན། སྐྱེ་བ་ཐམས་ཅད་སྡུག་བསྔལ་བ་ཡིན་ཏེ། བཅོམ་ལྡན་འདས་ཀྱིས་ཀྱང་འདི་སྐད་དུ་གསུངས་ཏེ། དགེ་སློང་དག། སེ་གོལ་གཏོགས་པ་
སྲིད་དུའང་སྲིད་པར་འགྲུབ་པའི་བསྔགས་པ་མི་སྟོན་ཏོ། །འདུས་བྱས་ཐམས་ཅད་ནི། མི་རྟག་པ། སྲིད་པར་སོང་བ་ཐམས་ཅད་ནི། སྡུག་བསྔལ་བ། ཁམས་གསུམ་པ་ཐམས་ཅད་ནི།
སྟོང་པ། ཆོས་ཐམས་ཅད་ནི། བདག་མེད་པ་སྟེ། དེ་ལྟར་ན། དེ་དག་ཐམས་ཅད་ནི། མི་བརྟན་པ། མི་རྟག་པ། སྡུག་བསྔལ་བ། འགྱུར་བའི་ཆོས་ཅན་དུ་རིག་པར་བྱས་ནས་མཁས་པ་དག་
གིས་འདི་ཉིད་དུ་རྒྱུན་དུ་ཞུགས་པའི་འབྲས་བུ་ཐོབ་པར་བྱའོ། །ལན་ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བའི་འབྲས་བུ་དང༌། འདི་ཉིད་དུ་དགྲ་བཅོམ་པ་རབ་ཏུ་ཐོབ་པར་བྱ་སྟེ། བདག་
ཅག་སླར་འབྱོར་པ་དང༌། རྒུད་པའི་སྡུག་བསྔལ་མང་པོ་དེ་དག་དང་ཕྲད་པར་གྱུར་ཏ་རེ་ཞེས་ཟེར་བ་དེ་ལ་བྱང་ཆུབ་སེམས་དཔའ་ཁ་ཅིག་སྐྱོ་བར་བྱེད་པར་འགྱུར་ན། རབ་འབྱོར། འདིའང་བྱང་ཆུབ་
སེམས་དཔའ་སེམས་དཔའ་ཆེན་པོས་ཚོགས་པ་དང་མི་ལྡན་པས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་དགེ་སློང་ཆོས་སྨྲ་བ་གང་ཡིན་པ་དེ་ནི། གཅིག་པུ་ལ་མངོན་
པར་དགའ་བར་འགྱུར་ལ། ཆོས་ཉན་པ་གང་ཡིན་པ་དེ་དག་ནི། འཁོར་ལྷུར་བྱེད་པར་འགྱུར་བ་དང༌། ཆོས་སྨྲ་བ་དེའང་འདི་སྐད་དུ་གང་ང་ལ་བསྙེན་པར་བྱེད་པ་དེ་དག་ལ་ནི། ངས་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་སྦྱིན་ནོ། །གང་ང་ལ་བསྙེན་པར་མི་བྱེད་པ་དེ་དག་ལ་ནི། མི་སྦྱིན་ནོ། །ཞེས་ཟེར་བར་འགྱུར་ཞིང༌། རིགས་ཀྱི་བུ་དང་རིགས་ཀྱི་བུ་མོ་དེ་དག་དེ་ལྟར་དོན་དུ་གཉེར་བ་
དང༌། འདོད་པ་དང༌། ཆོས་ལ་གུས་པས་ཆོས་སྨྲ་བ་ལ་བསྙེན་པར་བྱེད་ཀྱང་གོ་སྐབས་འབྱེད་པར་མི་འགྱུར་བ་དང༌། ཆོས་སྨྲ་བ་དེའང་ཟང་ཟིང་ཅུང་ཟད་ཙམ་འདོད་ལ་དེའང་སྦྱིན་པར་མི་འདོད་པ་
དང༑ གང་དང་གང་ན་མུ་གེ་དང༌། གྲུབ་པ་དང་བདེ་བ་མེད་པ་དང༌། སྲོག་གི་བར་ཆད་དུ་འགྱུར་བ་ཡོད་པ་དེ་དང་དེར་འགྲོ་བར་འགྱུར་ཏེ། ཆོས་ཉན་པ་དེ་དག་ཀྱང་གཞན་ལས་ཐོས་ནས་ཕྱོགས་དེར་
༄༅། །མུ་གེ་བྱུང་སྟེ། གྲུབ་པ་དང་བདེ་བ་མེད་ཅིང་ཕྱོགས་དེར་སྲོག་གི་བར་ཆད་དུའང་འགྱུར་རོ། །ཞེས་རིག་པ་དང༌། ཆོས་སྨྲ་བ་དེའང་རིགས་ཀྱི་བུ་དེ་དག་ལ་འདི་སྐད་དུ།
རིགས་ཀྱི་བུ་དག། ཕྱོགས་འདི་ཞེས་བྱ་བར་གལ་ཏེ་མུ་གེའི་འཇིགས་པ་འབྱུང་སྟེ། རིགས་ཀྱི་བུ། ཁྱོད་དེར་དོང་ན། མུ་གེའི་འཇིགས་པས་ཕྱིས་འགྱོད་པར་གྱུར་ཏ་རེ་ཞེས་ཟེར་ནས་དེ་དག་
དེ་ལྟར་ཆོས་སྨྲ་བ་དེས་ཐབས་ཕྲ་མོས་སྤོང་སྟེ། དེ་དག་ཀྱང་ཡིད་ཕྱུང་ནས་འདི་ལྟར་ཤེས་ཏེ། འདི་དག་ནི། སྤོང་བའི་མཚན་མ་ཡིན་གྱི། འདི་དག་ནི། སྦྱིན་པར་འདོད་པའི་མཚན་མ་མ་
ཡིན་ཏེ། འདི་ནི། སྦྱིན་མི་འདོད་དོ། །ཞེས་རིག་པས་བསྙེན་པར་མི་བྱེད་པར་འགྱུར་ཏེ། རབ་འབྱོར། འདིའང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འདྲ་བ་དང༌། སློབ་པ་དང༌། སྟོན་པ་དང༌། ཉེ་
བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དེ་ལ་ཚོགས་པ་དང་མི་ལྡན་པར་འགྱུར་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་
རིག་པར་བྱའོ། །རབ་འབྱོར། གཞན་ཡང་ཆོས་སྨྲ་བ་དེ་གང་ན་སྲོག་ཆགས་ཀྱི་འཇིགས་པ་ཡོད་པ་དང༌། གང་ན་གཅན་གཟན་གྱི་འཇིགས་པ་ཡོད་པ་དང༌། གང་ན་མི་མ་ཡིན་པའི་འཇིགས་
པ་ཡོད་པ་དེར་འཇུག་པར་འགྱུར་ཏེ། དེར་འགྲོའམ་འདུག་པ་དང༌། གཅན་གཟན་གྱི་དགོན་པའམ། སྡིག་སྦྲུལ་གྱི་དགོན་པ་དང༌། ཆོམ་རྐུན་གྱི་དགོན་པ་དང༌། ཆུའི་དགོན་པ་དང༌། མུ་
གེའི་དགོན་པ་གང་ན་ཡོད་པ་དེར་འགྲོ་བར་འགྱུར་ཏེ། དེ་ཆོས་ཉན་པ་དེ་དག་ལ་འདི་སྐད་དུ། རིགས་ཀྱི་བུ་དག། ཤེས་པར་གྱིས་ཤིག །ང་ནི། ཡུལ་གང་ན་སྲོག་ཆགས་ཀྱི་འཇིགས་པ་དང༌།
གཅན་གཟན་གྱི་འཇིགས་པ་དང༌། ཤ་ཟའི་འཇིགས་པ་དང༌། སྡིག་སྦྲུལ་གྱི་དགོན་པ་དང༌། ཆོམ་རྐུན་གྱི་དགོན་པ་དང༌། ཆུའི་དགོན་པ་དང༌། མུ་གེའི་དགོན་པ་གང་ན་ཡོད་པ་དེར་འགྲོའོ། །
རིགས་ཀྱི་བུ་དག། ཤེས་པར་གྱིས་ཤིག །ཁྱེད་སྡུག་བསྔལ་འདི་དག་མྱོང་བར་ནུས་སམ་ཞེས་ཟེར་ཞིང༌། དེ་དག་ཐབས་ཕྲ་མོས་སྤོང་བར་འགྱུར་ཏེ། དེ་ནས་དེ་དག་ཀྱང་ཡིད་འབྱུང་བར་འགྱུར་རོ། །
ཡིད་ཕྱུང་ནས་དེ་ལ་བསྙེན་པར་མི་བྱེད་ཅིང་ཕྱིར་ལྡོག་པར་འགྱུར་ཏེ། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འབྲི་བའི་བར་ལ་བར་ཆད་འདི་
དག་འབྱུང་བར་འགྱུར་རོ། །རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་ཚོགས་པ་དང་མི་ལྡན་པར་འགྱུར་བས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་
དགེ་སློང་ཆོས་སྨྲ་བ་ནི། མཛའ་བོའི་ཁྱིམ་དང༌། སློངས་མོ་སྟེར་བའི་ཁྱིམ་ལྷུར་ལེན་པར་འགྱུར་ཏེ། དེ་མཛའ་བོའི་ཁྱིམ་དང༌། སློངས་མོ་སྟེར་བའི་ཁྱིམ་ལྷུར་ལེན་པ་དེས་རྟག་ཏུ་མཛའ་བོའི་ཁྱིམ་དང༌། སློང་
མོ་སྟེར་བའི་ཁྱིམ་ལ་བལྟ་བར་ཉེ་བར་འགྲོ་བར་སེམས་ཏེ། དེ་རྟག་ཏུ་ལྟ་བ་དེས་བྱ་བ་མང་བའི་ཕྱིར་ཆོས་ཉན་པ་དེ་དག་སྤོང་བར་འགྱུར་ཏེ། རེ་ཤིག་ང་ལ་ཅུང་ཟད་བལྟ་བར་བྱ་བ་ཞིག་ཡོད་དོ། །ང་ལ་ཅུང་
༄༅། །ཟད་འགྲོ་དགོས་པ་ཞིག་ཡོད་དོ། །ཞེས་ཟེར་ན། རབ་འབྱོར། འདིའང་ཤེས་རབ་ཀྱི་ཕ་རོལ་ཏུ་ཕྱིན་པ་བྲི་བ་དང༌། ཀུན་ཆུབ་པར་བྱ་བ་དེ་ལ་ཚོགས་པ་དང་མི་ལྡན་པར་
འགྱུར་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་ཚོགས་པ་དང་མི་ལྡན་པས་བདུད་ཀྱི་ལས་སུ་རིག་པར་བྱའོ། །རབ་འབྱོར། དེ་ལྟར་བདུད་སྡིག་ཅན་ནི། ཅི་
ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སུའང་མི་འཛིན་པ་དང༌། མི་འཆང་བ་དང༌། མི་ཀློག་པ་དང༌། ཀུན་ཆུབ་པར་མི་བྱེད་པ་དང༌། རབ་ཏུ་འདོན་པར་མི་བྱེད་པ་དང༌། མི་སྟོན་པ་དང༌། ཉེ་བར་
མི་སྟོན་པ་དང༌། ལུང་འབོགས་པར་མི་བྱེད་པ་དང༌། ཁ་ཏོན་དུ་མི་བྱེད་པ་དང༌། ཡི་གེར་མི་འབྲི་བ་དང༌། ཡི་གེར་འབྲིར་མི་འཇུག་པ་དེ་ལྟར་རྣམ་པ་དེ་དང་དེ་དག་གིས་དེ་ལྟ་དེ་ལྟར་རྩོལ་བར་
འགྱུར་རོ། །རབ་འབྱོར། དེ་ལྟ་བས་ན། བར་ཆད་ཇི་སྙེད་ཚོགས་པ་དང་མི་ལྡན་པར་འགྱུར་བ་དེ་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་
བྱ་སྟེ༑ རིག་ནས་སྤང་བར་བྱའོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། རྒྱུ་ཅིའི་སླད་དུ་འདི་ལྟར་
བདུད་སྡིག་ཅན་ཅི་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སུའང་མི་འཛིན་པ་དང༌། མི་འཆང་བ་དང༌། མི་ཀློག་པ་དང༌། ཀུན་ཆུབ་པར་མི་བགྱིད་པ་དང༌། རབ་ཏུ་འདོན་པར་མི་བགྱིད་པ་དང༌།
མི་སྟོན་པ་དང༌། ཉེ་བར་མི་སྟོན་པ་དང༌། ལུང་འབོགས་པར་མི་བགྱིད་པ་དང༌། ཁ་ཏོན་དུ་མི་བགྱིད་པ་དང༌། ཡི་གེར་མི་འབྲི་བ་དང༌། ཡི་གེར་འབྲིར་མི་འཇུག་པ་དེ་ལྟ་དེ་ལྟར་ཐབས་སུ་སྦྱོར་ཞིང་
འབད་པ་ཆེར་རྩོལ། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། སངས་རྒྱས་བཅོམ་ལྡན་འདས་རྣམས་ཀྱིས་
ཐམས་ཅད་མཁྱེན་པ་ཉིད་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལས་སྐྱེས་སོ། །དེ་བཞིན་གཤེགས་པའི་བསྟན་པ་ནི། ཐམས་ཅད་མཁྱེན་པ་ཉིད་ལས་བྱུང་ངོ༌། །དེ་བཞིན་གཤེགས་པའི་བསྟན་
པ་ལས་ནི། སེམས་ཅན་གཞལ་དུ་མེད་གྲངས་མེད་བསམ་གྱིས་མི་ཁྱབ་པའི་ཉོན་མོངས་པ་སྤོང་བ་འབྱུང་ངོ༌། །ཉོན་མོངས་པ་སྤངས་པ་ལ་ནི། བདུད་སྡིག་ཅན་གྱིས་གླགས་མི་རྙེད་དོ། །མ་རྙེད་
པས་སྡུག་བསྔལ་གྱིས་ཡིད་གཟིར་ཅིང་ཡིད་མི་བདེ་སྟེ་མྱ་ངན་གྱི་ཟུག་རྔུ་ཁོང་དུ་ཆུད་པར་འགྱུར་རོ། །དེའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེར་འབྲི་བའམ། ཀུན་ཆུབ་པར་བྱེད་པའམ།
སློབ་པར་བྱེད་པ་ལ་རབ་ཏུ་མི་དགའ་ཞིང་འབད་པ་ཆེན་པོས་བརྩོན་པ་ཆེར་བྱེད་དེ། ཅི་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སུའང་མི་འབྲི་བ་དང༌། ཀུན་ཆུབ་པར་མི་བྱེད། སློབ་པར་མི་བྱེད་པ་དེ་
ལྟ་དེ་ལྟར་ཐབས་སུ་སྦྱོར་ཞིང་བརྩོན་པ་ཆེར་བྱེད་དོ། །རབ་འབྱོར། གཞན་ཡང་བདུད་སྡིག་ཅན་དགེ་སྦྱོང་གི་ཆ་བྱད་དུ་འོངས་ནས་འབྱེད་པར་བྱེད་པར་འགྱུར་ཏེ། རབ་འབྱོར། བྱང་ཆུབ་སེམས་
༄༅། །དཔའ་ཐེག་པ་ལ་གསར་དུ་ཞུགས་པ། བློ་ཆུང་བ། བློ་ཞན་པ། བློ་དམན་པ། ལྡོངས་པར་གྱུར་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པའི་
རིགས་ཀྱི་བུ་དེ་དག་འདི་ལྟར་འབྲལ་བར་བྱེད་དེ། གང་ཚེ་དང་ལྡན་པ། ཁྱོད་ཉན་པ་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་ཏེ། ཡང་ཇི་ལྟར་ངའི་མདོ་སྡེའི་ནང་དུ་ཆུད་ཅིང་མདོ་སྡེའི་
ནང་དུ་གཏོགས་པ་འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ། །ཞེས་རབ་འབྱོར། དེ་ལྟར་བདུད་སྡིག་ཅན་གྱིས་ཐེ་ཚོམ་ཟ་བས་སྤོང་དུ་འཇུག་སྟེ། རབ་འབྱོར། ཡང་དེ་ལྟར་བདུད་སྡིག་
ཅན་དགེ་སྦྱོང་གི་ཆ་བྱད་དུ་འོངས་ནས་དབྱེ་བ་བྱས་ནས་བྱང་ཆུབ་སེམས་དཔའ་ཐེག་པ་ལ་གསར་དུ་ཞུགས་པ། བློ་ཆུང་བ། བློ་ཞན་པ། བློ་དམན་པ། ལྡོངས་པར་གྱུར་པ། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པ་དག་ཐེ་ཚོམ་ཟར་འཇུག་གོ །དེ་དག་ཐེ་ཚོམ་དུ་གྱུར་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་མི་འཛིན། མི་འཆང༌། མི་ཀློག། ཀུན་
ཆུབ་པར་མི་བྱེད། རབ་ཏུ་འདོན་པར་མི་བྱེད། མི་སྟོན། ཉེ་བར་མི་སྟོན། ལུང་འབོགས་པར་མི་བྱེད། ཁ་ཏོན་དུ་མི་བྱེད། ཡི་གེར་མི་འབྲི། ཡི་གེར་འབྲིར་མི་འཇུག་པར་འགྱུར་ཏེ། རབ་
འབྱོར༑ འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་བདུད་སྡིག་ཅན་གྱིས་དགེ་སློང་དུ་སྤྲུལ་ཏེ་སངས་རྒྱས་ཀྱི་ཆ་
བྱད་དུ་འོངས་ནས་བྱང་ཆུབ་སེམས་དཔའ་གང་ཆོས་ཟབ་མོ་དག་ལ་སྤྱོད་པ་དེ་ནི། ཡང་དག་པའི་མཐའ་མངོན་དུ་བྱེད་ཅིང༌། དེ་ཉན་ཐོས་སུ་འགྱུར་གྱི། བྱང་ཆུབ་སེམས་དཔར་མི་འགྱུར་ཏེ། དཔེར་ན།
བྱང་ཆུབ་སེམས་དཔའ་འདི་བཞིན་ནོ། །ཞེས་བདུད་ཀྱི་ལས་ཉེ་བར་སྦྱོར་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར།
དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡི་གེར་འབྲི་བ་དང༌། ཀུན་ཆུབ་པར་བྱེད་པ་དང༌། སློབ་པར་བྱེད་པ་ལ་བདུད་སྡིག་ཅན་གྱི་བདུད་ཀྱི་ལས་གཞན་དང་གཞན་དག་མང་དུ་འབྱུང་བར་འགྱུར་ཏེ། དེ་
དག་བྱང་ཆུབ་སེམས་དཔའ་སེམས་དཔའ་ཆེན་པོས་རྟོགས་པར་བྱའོ། །རྟོགས་ནས་ཡོངས་སུ་སྤང་བར་བྱའོ། །བསྟེན་པར་མི་བྱའོ། །གཞན་དུ་ན་བརྩོན་འགྲུས་བརྩམས་ཤིང་དྲན་པ་དང༌། ཤེས་
བཞིན་དང་ཡང་ལྡན་པར་བྱའོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་དེ་བཞིན་ནོ། །བདེ་བར་གཤེགས་
པ། དེ་དེ་བཞིན་ཏེ། བཅོམ་ལྡན་འདས། ནོར་བུ་རིན་པོ་ཆེ་ཆེན་པོ་གང་ལགས་པ་དེ་དག་ལ་དགྲ་མང་ངོ༌། །དེ་ཅིའི་སླད་དུ་ཞེ་ན། བཅོམ་ལྡན་འདས། འདི་ལྟ་སྟེ། རྙེད་པར་དཀའ་ཞིང་རིན་ཆེ་བའི་སླད་
དུ་སྟེ། དེ་དག་དབྱིག་ལགས་པས་ན། དེའི་སླད་དུ་དེ་དག་ལ་དགྲ་མང་བར་འགྱུར་རོ། །དེ་བཞིན་དུ་བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལའང་ཕལ་ཆེར་བར་དུ་གཅོད་པ་
༄༅། །མང་དུ་འབྱུང་ངོ༌། །བཅོམ་ལྡན་འདས། དེ་ལ་གང་དག་བར་དུ་གཅོད་པའི་དབང་གིས་ལེ་ལོ་ཅན་དུ་འགྱུར་ཞིང༌། གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་མི་
འཛིན་པར་སེམས་པ་དང༌། མི་འཆང་བ་དང༌། མི་ཀློག་པ་དང༌། ཀུན་ཆུབ་པར་མི་བགྱིད་པ་དང༌། རབ་ཏུ་འདོན་པར་མི་བགྱིད་པ་དང༌། མི་སྟོན་པ་དང༌། ཉེ་བར་མི་སྟོན་པ་དང༌། ལུང་འབོགས་པ་
མི་བགྱིད་པ་དང༌། ཁ་ཏོན་དུ་མི་བགྱིད་པ་དང༌། ཡི་གེར་མི་འབྲི་བ་དང༌། ཆུང་ངུ་ན་ཡི་གེར་འབྲིར་མི་འཇུག་པར་ཡང་སེམས་པའི་བྱང་ཆུབ་སེམས་དཔའ་དེ་དག་ནི། བདུད་ཀྱིས་བྱིན་གྱིས་
བརླབས་པ་ལགས་པ་དང༌། བཅོམ་ལྡན་འདས། དེ་དག་ནི། ཐེག་པ་ལ་གསར་དུ་ཞུགས་པ་ལགས་པ་དང༌། དེ་དག་བློ་ཆུང་བ་ལགས་པ་དང༌། བློ་དམན་པ་ལགས་པ་དང༌། བློ་ཞན་པ་ལགས་
པ་དང༌། བཅོམ་ལྡན་འདས། དེ་དག་ནི། བློ་ཕྱིན་ཅི་ལོག་ལགས་ཤིང༌། དེ་དག་གི་སེམས་ཆོས་རྒྱ་ཆེན་པོ་རྒྱ་ཆེན་པོ་དག་ལ་མི་འཇུག་པར་ཡང་རིག་པར་བགྱིའོ། །དེ་སྐད་ཅེས་གསོལ་པ་
དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་མི་
འཛིན་པར་སེམས་པ་དང༌། མི་འཆང་བ་དང༌། མི་ཀློག་པ་དང༌། ཀུན་ཆུབ་པར་མི་བྱེད་པ་དང༌། རབ་ཏུ་འདོན་པར་མི་བྱེད་པ་དང༌། མི་སྟོན་པ་དང༌། ཉེ་བར་མི་སྟོན་པ་དང༌། ལུང་འབོགས་
པར་མི་བྱེད་པ་དང༌། ཁ་ཏོན་དུ་མི་བྱེད་པ་དང༌། ཡི་གེར་མི་འབྲི་བ་དང༌། ཆུང་ངུ་ན་ཡི་གེར་འབྲིར་མི་འཇུག་པར་ཡང་སེམས་པའི་བྱང་ཆུབ་སེམས་དཔའ་དེ་དག་ནི། རབ་འབྱོར། བདུད་ཀྱིས་
བྱིན་གྱིས་བརླབས་པར་རིག་པར་བྱ་སྟེ། རབ་འབྱོར། བྱང་ཆུབ་སེམས་དཔའ་དེ་དག་ཐེག་པ་ལ་གསར་དུ་ཞུགས་པ་ཡིན་ནོ། །དེ་དག་ནི། བློ་ཆུང་བ་རྣམས་ཡིན་ནོ། །དེ་དག་ནི། བློ་
དམན་པ་རྣམས་ཡིན་ནོ། །དེ་དག་ནི། བློ་ཞན་པ་རྣམས་ཡིན་ནོ། །རབ་འབྱོར། དེ་དག་ནི། བློ་ཕྱིན་ཅི་ལོག་པ་རྣམས་ཡིན་ནོ། །དེ་དག་ནི། ཆོས་རྒྱ་ཆེན་པོ་རྒྱ་ཆེན་པོ་དག་ལ་སེམས་མི་འཇུག་
པར་འགྱུར་རོ། །རབ་འབྱོར། འདི་ལྟར་ཡང་བདུད་ཀྱི་ལས་འབྱུང་བར་འགྱུར་ཞིང༌། བདུད་ཀྱི་ཉེས་པ་དང༌། བར་དུ་གཅོད་པར་བྱེད་པ་མང་དུ་འབྱུང་མོད་ཀྱི། དེ་ལྟ་ནའང་རབ་འབྱོར། གང་
དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པར་སེམས་ཤིང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པར་བྱེད་པ་དང༌། སྟོན་པ་དང༌། ཉེ་བར་སྟོན་པ་
དང༌། ལུང་འབོགས་པ་དང༌། ཁ་ཏོན་དུ་བྱེད་པ་དང༌། ཡི་གེར་འབྲི་བ་དང༌། ཆུང་ངུ་ན་ཡི་གེར་འབྲིར་འཇུག་པར་སེམས་ནའང་རབ་འབྱོར། དེ་ནི། སངས་རྒྱས་ཀྱི་མཐུ་དང༌། སངས་རྒྱས་ཀྱི་བྱིན་
གྱིས་བརླབས་དང༌། སངས་རྒྱས་ཀྱིས་ཡོངས་སུ་བཟུང་བས། དེ་དག་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པར་བྱེད་པ་དང༌། སྟོན་པ་དང༌། ཉེ་བར་
༄༅། །སྟོན་པ་དང༌། ལུང་འབོགས་པ་དང༌། ཁ་ཏོན་དུ་བྱེད་པ་དང༌། ཡི་གེར་འབྲི་བ་དང༌། ཆུང་ངུ་ན་ཡི་གེར་འབྲིར་འཇུག་པར་རིག་པར་བྱའོ། །དེ་ཅིའི་ཕྱིར་ཞེ་ན། འདི་
ལ་བདུད་སྡིག་ཅན་ཡང་བར་ཆད་བྱ་བའི་ཕྱིར་བརྩོན་པ་ཆེར་བྱེད་ལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ཡོངས་སུ་གཟུང་བའི་ཕྱིར་བརྩོན་པ་
ཆེར་མཛད་དོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། བདུད་ཀྱི་ལས་ཀྱི་ལེའུ་ཞེས་བྱ་སྟེ། བཅུ་གཅིག་པའོ།། །།འཕགས་པ་ཤེས་རབ་ཀྱི་ཕ་
རོལ་ཏུ་ཕྱིན་པ་བརྒྱད་སྟོང་པ། བམ་པོ་བཅུ་གཉིས་པ། དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར། འདི་ལྟ་སྟེ། དཔེར་ན། བུད་མེད་
འགའ་ཞིག་ལ་བུ་མང་དུ་ཡོད་དེ། ལྔའམ། བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུའམ། བརྒྱའམ། སྟོང་ངམ། བརྒྱ་སྟོང་ཡོད་ལ། དེ་དག་ཐམས་ཅད་ཀྱི་
མ་ན་བར་གྱུར་ན། དེ་དག་བདག་ཅག་གི་མ་ཅི་ནས་སྲོག་གི་བར་ཆད་དུ་མི་འགྱུར་བ་དང༌། བདག་ཅག་གི་མ་ཅི་ནས་ཡུན་རིང་དུ་འཚོ་བར་འགྱུར་བ་དང༌། བདག་ཅག་གི་མ་ཅི་ནས་
ལུས་མ་རུང་བར་མི་འགྱུར་བ་དང༌། བདག་ཅག་གི་མ་ཅི་ནས་ཡུན་རིང་དུ་གནས་པར་འགྱུར་བ་དང༌། བདག་ཅག་གི་མ་ཅི་ནས་ཉམ་ཉེས་པར་མི་འགྱུར་བ་དང༌། བདག་ཅག་གི་མ་
ལ་ཅི་ནས་སྡུག་བསྔལ་གྱི་ཚོར་བ་མི་འབྱུང་བ་དང༌། འདི་ལ་རེག་པར་མི་གནས་པ་མེད་པ་དང༌། ལུས་ལ་ཡིད་དུ་མི་འོང་བ་མི་འབྱུང་བར་འབད་ཅིང་རྩོལ་ལོ། །དེ་ཅིའི་ཕྱིར་ཞེ་ན། འདིས་ནི།
བདག་ཅག་བསྐྱེད་དེ། འདི་ནི། དཀའ་བ་བྱེད་པ། བདག་ཅག་གི་སྲོག་སྦྱིན་པ། འཇིག་རྟེན་ཀུན་ཏུ་སྟོན་པ་ཡིན་ནོ། །སྙམ་པས་འདི་ལ་སྡུག་བསྔལ་གྱི་ཚོར་བའམ། སྡུག་བསྔལ་གྱི་
རེག་པ་གང་ཡང་འབྱུང་ང་རེ་ཞེས་བུ་དེ་དག་མ་དེ་ལ་བདེ་བར་སྦྱར་བ་ཐམས་ཅད་ཀྱིས་ལེགས་པར་གཟུང་བས་འཛིན། ལེགས་པར་སྦ་བས་སྦེད། ལེགས་པར་བཅོས་པས་འཆོས་ཤིང༌།
འདིའི་མིག་གམ། རྣ་བའམ། སྣའམ། ལྕེའམ། ལུས་སམ། ཡིད་ལ་རླུང་ངམ། མཁྲིས་པའམ། བད་ཀན་ནམ། འདུས་པའམ། སྦྲང་བུའམ། ཤ་སྦྲང་ངམ། སྡིག་སྦྲུལ་ལམ།
མིའམ་མི་མ་ཡིན་པའམ། ཀུན་ཏུ་འབབ་པའམ། ཉམ་ཐག་པའམ། ཡེ་འབྲོག་གམ། མི་འདོད་པ་འབྱུང་བ་ལུས་ལ་འབྱུང་ང་རེ་ཞེས་དེ་ལྟར་བུ་དེ་དག་གིས་མ་དེ་ལ་བསམས་ཏེ་བདེ་
བར་སྦྱར་བ་ཐམས་ཅད་ཀྱིས་འདི་ནི། བདག་ཅག་གི་མ། སྐྱེད་པ། དཀའ་བ་བྱེད་པ། འདི་ནི། བདག་ཅག་གི་སྲོག་སྦྱིན་པར་བྱེད་པ། འཇིག་རྟེན་ཀུན་སྟོན་པའོ། །ཞེས་འཆོས་ཤིང་
བདག་གིར་བྱེད། སྦེད་པར་བྱེད་དོ། །རབ་འབྱོར། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་
༄༅། །ལ་དགོངས་ཏེ། གང་དག་དེ་དག་ཡི་གེར་འབྲི་བ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་
དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དེ་དག་ཐམས་ཅད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་མཐུ་དང༌།
བྱིན་གྱི་རླབས་དང༌། དགོངས་པ་ལས་འགྱུར་རོ། །འཇིག་རྟེན་གྱི་ཁམས་གཞན་དང་གཞན་དག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ཇི་
སྙེད་ཅིག་སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་ཐུགས་བརྩེ་བ་དང༌། སྐྱེ་བོ་ཕལ་པོ་ཆེའི་དོན་དང༌། ཕན་པ་དང༌། བདེ་བ་དང༌། ལྷ་དང༌། མི་རྣམས་དང༌།
སེམས་ཅན་ཐམས་ཅད་ལ་ཐུགས་བརྩེ་བ་དག་ཐུགས་བརྩེ་བའི་ཕྱིར་ད་ལྟར་བཞུགས་ཏེ་འཚོ་ཞིང་གཞེས་པ་དེ་དག་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་དགོངས་ཏེ་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཅི་ནས་ཀྱང་རིང་དུ་གནས་པར་འགྱུར་བ་དང༌། ཅི་ནས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདིའི་མིང་འཇིག་པར་མི་འགྱུར་བ་དང༌། ཅི་ནས་ཀྱང་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པ་དང༌། ཡི་གེར་འབྲི་བ་དང༌། སློབ་པ་ལ་བདུད་སྡིག་ཅན་ནམ་བདུད་ཀྱི་རིས་ཀྱི་ལྷ་དག་བར་ཆད་བྱེད་པར་མི་འགྱུར་བར་མཛད་དོ། །རབ་
འབྱོར༑ དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆོས་ཤིང་བདག་གིར་མཛད་ཅིང་སྦེད་དོ། །དེ་
ཅིའི་ཕྱིར་ཞེ་ན། འདི་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡུམ་སྟེ། སྐྱེད་པའོ། །ཐམས་ཅད་མཁྱེན་པ་ཉིད་སྟོན་པའོ། །འཇིག་
རྟེན་ཀུན་ཏུ་སྟོན་པའོ། །རབ་འབྱོར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི། འདི་ལས་སྐྱེས་ཏེ། རབ་འབྱོར། ཤེས་རབ་ཀྱི་ཕ་རོལ་
ཏུ་ཕྱིན་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་ཐམས་ཅད་མཁྱེན་པའི་ཡེ་ཤེས་སྐྱེད་པར་བྱེད་པའོ། །སྟོན་པར་བྱེད་པའོ། །དེ་
ལྟར་འཇིག་རྟེན་འདི་ཀུན་ཏུ་སྟོན་པའོ། །རབ་འབྱོར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐམས་ཅད་མཁྱེན་པ་ཉིད་ནི། འདི་ལས་སྐྱེས་
སོ༑ ༑རབ་འབྱོར། འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་སངས་རྒྱས་པ་དེ་དག་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
༄༅། །རྒྱས་སོ༑ ༑རབ་འབྱོར། ཕྱི་མ་མ་འོངས་པའི་དུས་ན་འབྱུང་བར་འགྱུར་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེ་དག་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ནས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །རབ་འབྱོར། ད་ལྟར་གྱི་དུས་ན་འཇིག་རྟེན་གྱི་ཁམས་གཞལ་དུ་མེད་ཅིང་གྲངས་མེད་པའི་ཕྱོགས་
བཅུའི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་
རྟེན་ལ་ཐུགས་བརྩེ་བ་དང༌། སྐྱེ་བོ་ཕལ་པོ་ཆེའི་དོན་དང༌། ཕན་པ་དང༌། བདེ་བ་དང༌། ལྷ་དང༌། མི་རྣམས་དང༌། སེམས་ཅན་ཐམས་ཅད་ལ་ཐུགས་བརྩེ་བ་དག་ཐུགས་བརྩེ་བའི་ཕྱིར་
བཞུགས་ཏེ་འཚོ་ཞིང་གཞེས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ་དག་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་
འདི་ཉིད་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །རབ་འབྱོར། ད་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ནས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །རབ་འབྱོར། དེ་ལྟར་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རྣམས་སྐྱེད་པར་བྱེད་པ་སྟེ། དེ་ལྟར་ན། འདི་ནི། འཇིག་རྟེན་ཀུན་ཏུ་སྟོན་པར་བྱེད་པའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་
འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གང་འདི་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རྣམས་ལ་འཇིག་རྟེན་འདི་སྟོན་པའོ། །ཞེས་བཀའ་སྩལ་ན། བཅོམ་ལྡན་འདས། ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རྣམས་ལ་འཇིག་རྟེན་སྟོན་པ་ལགས། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་འཇིག་རྟེན་དུ་གསུངས་པ་གང་
ལགས༑ དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། ཕུང་པོ་ལྔ་རྣམས་ནི། དེ་བཞིན་གཤེགས་པས་འཇིག་
༄༅། །རྟེན་དུ་གསུངས་ཏེ། ལྔ་གང་ཞེ་ན། འདི་ལྟ་སྟེ། གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་སྟེ། རབ་འབྱོར། ཕུང་པོ་འདི་ལྔ་ནི།
དེ་བཞིན་གཤེགས་པས་འཇིག་རྟེན་ཞེས་གསུངས་སོ། །རབ་འབྱོར་གྱིས་གསོལ་པ། བཅོམ་ལྡན་འདས། དེ་བཞིན་གཤེགས་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པས་ཕུང་པོ་ལྔ་ཇི་ལྟར་བསྟན།
བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པས་ཅི་ཞིག་བསྟན། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་
འབྱོར༑ མི་འཇིག། རབ་ཏུ་མི་འཇིག་པས་ན། ཕུང་པོ་ལྔ་འཇིག་རྟེན་ནོ། །ཞེས་དེ་བཞིན་གཤེགས་པ་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པས་བསྟན་ཏོ། །དེ་ཅིའི་ཕྱིར་མི་འཇིག །རབ་ཏུ་
མི་འཇིག་ཅེས་བསྟན་ཅེ་ན། རབ་འབྱོར་ཕུང་པོ་ལྔ་རྣམས་ནི། ངོ་བོ་ཉིད་མེད་པས་ན། སྟོང་པ་ཉིད་ཀྱི་ངོ་བོ་ཉིད་དོ། །རབ་འབྱོར། སྟོང་པ་ཉིད་ནི། འཇིག་པའམ། རབ་ཏུ་འཇིག་པ་མ་ཡིན་ཏེ།
རབ་འབྱོར། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་འཇིག་རྟེན་འདི་སྟོན་པའོ། །རབ་འབྱོར། མཚན་
མ་མེད་པའམ། སྨོན་པ་མེད་པའམ། མངོན་པར་འདུ་མི་བྱེད་པའམ། མི་སྐྱེ་བའམ། དངོས་པོ་མེད་པའམ། ཆོས་ཀྱི་དབྱིངས་མི་འཇིག། རབ་ཏུ་མི་འཇིག་པ། རབ་འབྱོར། དེ་ལྟར་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་འཇིག་རྟེན་འདི་སྟོན་པའོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད། སེམས་ཅན་གྲངས་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་ན། དེ་བཞིན་
གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ཏེ་སེམས་ཅན་གཞལ་དུ་མེད། སེམས་ཅན་གྲངས་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར།
སེམས་ཅན་ངོ་བོ་ཉིད་མེད་པའི་ཕྱིར་སེམས་ཅན་གཞལ་དུ་མེད། སེམས་ཅན་གྲངས་མེད་པའོ། །ཞེས་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། དེ་
ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད། སེམས་ཅན་གྲངས་མེད་པ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །
རབ་འབྱོར། གཞན་ཡང་སེམས་ཅན་དངོས་པོ་མེད་པའི་ཕྱིར་དེ་བཞིན་གཤེགས་པས་སེམས་ཅན་གཞལ་དུ་མེད། སེམས་ཅན་གྲངས་མེད་པ་དག་གི་སེམས་ཀྱི་སྤྱོད་པ་དེ་དག་ཀྱང་རབ་ཏུ་མཁྱེན་ཏེ།
རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད། སེམས་ཅན་གྲངས་མེད་པ་དག་གི་སེམས་ཀྱི་སྤྱོད་པ་གཞལ་དུ་མེད་
༄༅། །གྲངས་མེད་པ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རྣམས་ལ་འཇིག་རྟེན་འདི་སྟོན་པའོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ཏེ་སེམས་
ཅན་གཞལ་དུ་མེད་གྲངས་མེད་པ་དག་གི་སེམས་བསྡུས་པ་རྣམས་སེམས་བསྡུས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་
པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་གྲངས་མེད་པ་དག་གི་སེམས་བསྡུས་པ་རྣམས་སེམས་བསྡུས་པའོ། །ཞེས་ཡང་དག་པ་ཇི་ལྟ་བ་བཞིན་དུ་
རབ་ཏུ་མཁྱེན་ཅེ་ན། དེ་བསྡུས་པ་དང་བཅས་པ་ཟད་པ་ཉིད་དུ་དང་ཟད་པའང་མ་ཟད་པ་ཉིད་དུ་ཡང་དག་པ་ཇི་ལྟར་བཞིན་དུ་མཁྱེན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་བསྡུས་པ་རྣམས་སེམས་བསྡུས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་
འབྱོར༑ གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་གཡེངས་པ་རྣམས་སེམས་གཡེངས་པའོ། །
ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་
སེམས་གཡེངས་པ་རྣམས་སེམས་གཡེངས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། ཆོས་ཉིད་ལས་སེམས་གཡེངས་པའི་སེམས་དེ་དག་ནི། མཚན་ཉིད་
མེད་པ༑ སེམས་དེ་དག་ནི། མི་ཟད་པ། རྣམ་པར་མི་ཟད་པ། མ་གཡེངས་པར་སེམས་དེ་དག་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་གཡེངས་པ་རྣམས་སེམས་གཡེངས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར།
གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ཏེ་སེམས་ཅན་གཞལ་དུ་མེད་གྲངས་མེད་པ་དག་གི་སེམས་གཞལ་དུ་མེད་པ་མི་ཟད་པ་ལ་སེམས་གཞལ་དུ་
མེད་པ་མི་ཟད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་ན། དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་
དུ་མེད་གྲངས་མེད་པ་དག་གི་སེམས་གཞལ་དུ་མེད་ཅིང་མི་ཟད་པ་ལ་སེམས་གཞལ་དུ་མེད་ཅིང་མི་ཟད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། གང་གིས་དེ་
༄༅། །ལྟར་ནམ་མཁའ་བཞིན་དུ་གཞལ་དུ་མེད་ཅིང་མི་ཟད་པས་ན། སེམས་གཞལ་དུ་མེད་ཅིང་མི་ཟད་པར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་དེའི་སེམས་དེ་ནི། དེ་
བཞིན་གཤེགས་པས་བྱིན་གྱིས་བརླབས་པ། འགག་པ་མེད་པ། སྐྱེ་བ་མེད་པ། གནས་པ་མེད་པ། རྟེན་མེད་པ། གཞལ་དུ་མེད་པ། མི་ཟད་པ་ཡིན་ཏེ། རབ་འབྱོར། དེ་ལྟར་དེ་བཞིན་
གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་གྲངས་མེད་པ་དག་གི་སེམས་གཞལ་དུ་མེད་ཅིང་མི་ཟད་པ་ལ་སེམས་གཞལ་དུ་མེད་ཅིང་མི་ཟད་
པའོ༑ ༑ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་
མེད་པ་དག་གི་ཀུན་ནས་ཉོན་མོངས་པར་གྱུར་པའི་སེམས་རྣམས་ཀུན་ནས་ཉོན་མོངས་པར་གྱུར་བའི་སེམས་སོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་
ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་ཀུན་ནས་ཉོན་མོངས་པར་གྱུར་པའི་སེམས་རྣམས་ཀུན་ནས་ཉོན་
མོངས་པར་གྱུར་པའི་སེམས་སོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། ཀུན་ནས་ཉོན་མོངས་པས་ཀུན་ནས་ཉོན་མོངས་པར་གྱུར་པ་མ་
ཡིན་ཞིང་བརྡར་བཏགས་པ་མེད་པ་སྟེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཀུན་ནས་ཉོན་
མོངས་པར་གྱུར་པ་དག་སེམས་ཀུན་ནས་ཉོན་མོངས་པར་གྱུར་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཀུན་ནས་ཉོན་མོངས་པར་མ་གྱུར་པ་རྣམས་སེམས་ཀུན་ནས་ཉོན་མོངས་པར་མ་གྱུར་པའོ། །ཞེས་ཡང་
དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་
ཀུན་ནས་ཉོན་མོངས་པར་མ་གྱུར་པ་རྣམས་སེམས་ཀུན་ནས་ཉོན་མོངས་པར་མ་གྱུར་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་རང་
བཞིན་གྱིས་འོད་གསལ་བ་སྟེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཀུན་ནས་
ཉོན་མོངས་པར་མ་གྱུར་པ་རྣམས་སེམས་ཀུན་ནས་ཉོན་མོངས་པར་མ་གྱུར་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་
༄༅། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་གནས་པ་རྣམས་སེམས་གནས་པའོ། །ཞེས་ཡང་དག་པ་ཇི་ལྟ་བ་
བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་གནས་པ་རྣམས་
སེམས་གནས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། གཞི་མེད་པ་ལ་གནས་པ་སྟེ། རབ་འབྱོར། དེ་ལྟར་དེ་བཞིན་གཤེགས་
པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་གནས་པ་རྣམས་སེམས་གནས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་
ཏོ༑ ༑རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རབ་ཏུ་བཟུང་བ་རྣམས་སེམས་རབ་
ཏུ་བཟུང་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་
དུ་མེད་པ་དག་གི་སེམས་རབ་ཏུ་བཟུང་བ་རྣམས་སེམས་རབ་ཏུ་བཟུང་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། བཟུང་བ་མ་ཡིན་ཞིང་
རབ་ཏུ་གཟུང་བར་བྱ་བ་མ་ཡིན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རབ་ཏུ་བཟུང་བ་
རྣམས་སེམས་རབ་ཏུ་བཟུང་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་
ནས་སེམས་ཅན་གཞལ་དུ་མེད་པ་དག་གི་སེམས་ཟག་པ་དང་བཅས་པ་རྣམས་སེམས་ཟག་པ་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་
ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཟག་པ་དང་བཅས་པ་རྣམས་སེམས་ཟག་པ་དང་བཅས་པའོ། །
ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། ངོ་བོ་ཉིད་མེད་ཅིང་མེད་པ་དང་འདྲ་བ་ཡིན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཟག་པ་དང་བཅས་པ་རྣམས་སེམས་ཟག་པ་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་
ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཟག་པ་མེད་པ་རྣམས་
༄༅། །སེམས་ཟག་པ་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་
ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཟག་པ་མེད་པ་རྣམས་སེམས་ཟག་པ་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་
དག་ནི༑ དངོས་པོ་མེད་པར་གཞོལ་བ་ལྷུན་གྱིས་གྲུབ་པ་སྟེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་
དག་གི་སེམས་ཟག་པ་མེད་པ་རྣམས་སེམས་ཟག་པ་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་
ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་འདོད་ཆགས་དང་བཅས་པ་རྣམས་སེམས་འདོད་ཆགས་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་
རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་འདོད་ཆགས་དང་བཅས་
པ་རྣམས་སེམས་འདོད་ཆགས་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་ཀྱི་འདོད་ཆགས་དང་བཅས་པ་གང་ཡིན་པ་དེ་ནི། སེམས་
ཀྱི་ཡང་དག་པ་ཇི་ལྟ་བ་ཉིད་མ་ཡིན། སེམས་ཀྱི་ཡང་དག་པ་ཇི་ལྟ་བ་ཉིད་གང་ཡིན་པ་དེ་ནི། འདོད་ཆགས་དང་བཅས་པའི་སེམས་མ་ཡིན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་འདོད་ཆགས་དང་བཅས་པ་རྣམས་སེམས་འདོད་ཆགས་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་
རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་འདོད་ཆགས་དང་བྲལ་བ་རྣམས་
སེམས་འདོད་ཆགས་དང་བྲལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་
ཅན་གཞལ་དུ་མེད་པ་དག་གི་སེམས་འདོད་ཆགས་དང་བྲལ་བ་རྣམས་སེམས་འདོད་ཆགས་དང་བྲལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་ཀྱི་བྲལ་
བ་གང་ཡིན་པ་དེ་ནི། སེམས་ཀྱི་འདོད་ཆགས་དང་བཅས་པ་ཉིད་མ་ཡིན། འདོད་ཆགས་དང་བྲལ་བའི་སེམས་ཀྱི་ཡང་དག་པ་ཇི་ལྟ་བ་ཉིད་གང་ཡིན་པ་དེ་ནི། སེམས་ཀྱི་འདོད་ཆགས་དང་བཅས་པ་
མ་ཡིན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་འདོད་ཆགས་དང་བྲལ་བ་རྣམས་སེམས་
༄༅། །འདོད་ཆགས་དང་བྲལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་
པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཞེ་སྡང་དང་བཅས་པ་རྣམས་སེམས་ཞེ་སྡང་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་
འབྱོར༑ ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཞེ་སྡང་དང་བཅས་པ་རྣམས་སེམས་ཞེ་སྡང་དང་
བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་ཀྱི་ཞེ་སྡང་དང་བཅས་པ་གང་ཡིན་པ་དེ་ནི། སེམས་ཀྱི་ཡང་དག་པ་ཇི་ལྟ་བ་ཉིད་མ་ཡིན། རབ་
འབྱོར༑ སེམས་ཀྱི་ཡང་དག་པ་ཇི་ལྟ་བ་ཉིད་གང་ཡིན་པ་དེ་ནི། སེམས་ཀྱི་ཞེ་སྡང་དང་བཅས་པ་མ་ཡིན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་
པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཞེ་སྡང་དང་བཅས་པ་རྣམས་སེམས་ཞེ་སྡང་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །
རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཞེ་སྡང་དང་བྲལ་བ་རྣམས་སེམས་ཞེ་སྡང་དང་
བྲལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་
གི་སེམས་ཞེ་སྡང་དང་བྲལ་བ་རྣམས་སེམས་ཞེ་སྡང་དང་བྲལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་ཀྱི་བྲལ་བ་གང་ཡིན་པ་དེ་ནི། ཞེ་སྡང་དང་བཅས་པ་
མ་ཡིན༑ ཞེ་སྡང་དང་བྲལ་བའི་སེམས་ཀྱི་ཡང་དག་པ་ཇི་ལྟ་བ་ཉིད་གང་ཡིན་པ་དེ་ནི། སེམས་ཞེ་སྡང་དང་བཅས་པ་མ་ཡིན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་
རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཞེ་སྡང་དང་བྲལ་བ་རྣམས་སེམས་ཞེ་སྡང་དང་བྲལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །
རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་གཏི་མུག་དང་བཅས་པ་རྣམས་སེམས་གཏི་མུག་
དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་
པ་དག་གི་སེམས་གཏི་མུག་དང་བཅས་པ་རྣམས་སེམས་གཏི་མུག་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་ཀྱི་གཏི་མུག་དང་བཅས་པ་
༄༅། །གང་ཡིན་པ་དེ་ནི། སེམས་ཀྱི་ཡང་དག་པ་ཇི་ལྟ་བ་ཉིད་མ་ཡིན། སེམས་ཀྱི་ཡང་དག་པ་ཇི་ལྟ་བ་ཉིད་གང་ཡིན་པ་དེ་ནི། སེམས་ཀྱི་གཏི་མུག་དང་བཅས་པ་མ་
ཡིན་ཏེ༑ རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་གཏི་མུག་དང་བཅས་པ་རྣམས་སེམས་
གཏི་མུག་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་
སེམས་ཅན་གཞལ་དུ་མེད་པ་དག་གི་སེམས་གཏི་མུག་དང་བྲལ་བ་རྣམས་སེམས་གཏི་མུག་དང་བྲལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་
བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་གཏི་མུག་དང་བྲལ་བ་རྣམས་སེམས་གཏི་མུག་དང་བྲལ་བའོ། །ཞེས་
ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་ཀྱི་གཏི་མུག་དང་བྲལ་བ་གང་ཡིན་པ་དེ་ནི། སེམས་ཀྱི་གཏི་མུག་དང་བཅས་པ་མ་ཡིན། གཏི་མུག་དང་བྲལ་བའི་
སེམས་ཀྱི་ཡང་དག་པ་ཇི་ལྟ་བ་ཉིད་གང་ཡིན་པ་དེ་ནི། སེམས་ཀྱི་གཏི་མུག་དང་བཅས་པ་མ་ཡིན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་
བརྟེན་ནས་སེམས་ཅན་གཞལ་དུ་མེད་པ་དག་གི་སེམས་གཏི་མུག་དང་བྲལ་བ་རྣམས་སེམས་གཏི་མུག་དང་བྲལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་
བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྒྱ་ཆེན་པོ་མ་ཡིན་པ་རྣམས་སེམས་རྒྱ་ཆེན་པོ་མ་ཡིན་པའོ། །ཞེས་ཡང་དག་པ་
ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྒྱ་ཆེན་པོ་མ་
ཡིན་པ་རྣམས་སེམས་རྒྱ་ཆེན་པོ་མ་ཡིན་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། ཀུན་ནས་སློང་བ་དང་མི་ལྡན་པ་ཀུན་ནས་སློང་བ་མེད་
པར་གཏོགས་པའོ། །རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྒྱ་ཆེན་པོ་མ་ཡིན་པ་
རྣམས་སེམས་རྒྱ་ཆེན་པོ་མ་ཡིན་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་
བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྒྱ་ཆེན་པོ་རྣམས་སེམས་རྒྱ་ཆེན་པོའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་
༄༅། །པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྒྱ་ཆེན་པོ་རྣམས་སེམས་རྒྱ་ཆེན་པོའོ། །ཞེས་ཡང་དག་
པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། མི་འབྲི། སེམས་དེ་དག་ནི། མི་འཕེལ་ཞིང༌། སེམས་རྣམས་བྲལ་བ་མེད་པའི་ཕྱིར་སེམས་དེ་དག་ནི། རྣམ་
པར་བྲལ་བ་མེད་པ་སྟེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྒྱ་ཆེན་པོ་རྣམས་
སེམས་རྒྱ་ཆེན་པོའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་
སེམས་ཅན་གཞལ་དུ་མེད་པ་དག་གི་སེམས་ཆེན་པོར་གྱུར་བ་མ་ཡིན་པ་རྣམས་སེམས་ཆེན་པོར་གྱུར་པ་མ་ཡིན་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་
འབྱོར༑ ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཆེན་པོར་གྱུར་པ་མ་ཡིན་པ་རྣམས་སེམས་
ཆེན་པོར་གྱུར་པ་མ་ཡིན་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། འོང་བ་མེད་པ་འགྲོ་བ་མེད་པ་མ་གཏོགས་པ་སྟེ། རབ་འབྱོར།
དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཆེན་པོར་གྱུར་པ་མ་ཡིན་པ་རྣམས་སེམས་ཆེན་པོར་གྱུར་པ་མ་ཡིན་
པའོ༑ ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་
མེད་པ་དག་གི་སེམས་ཆེན་པོར་གྱུར་པ་རྣམས་སེམས་ཆེན་པོར་གྱུར་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཆེན་པོར་གྱུར་པ་རྣམས་སེམས་ཆེན་པོར་གྱུར་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་
འབྱོར༑ སེམས་དེ་དག་ནི། མཉམ་པ་ཉིད་ཀྱིས་མཉམ་པ་ཡིན་ཏེ། ངོ་བོ་ཉིད་ཀྱིས་མཉམ་པའོ། །རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་
སེམས་ཅན་གཞལ་དུ་མེད་པ་དག་གི་སེམས་ཆེན་པོར་གྱུར་པ་རྣམས་སེམས་ཆེན་པོར་གྱུར་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་
གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཚད་མ་མེད་པ་རྣམས་སེམས་ཚད་མ་མེད་པའོ། །ཞེས་ཡང་དག་པ་ཇི་ལྟ་བ་བཞིན་
༄༅། །དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཚད་མ་
མེད་པ་རྣམས་སེམས་ཚད་མ་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། །རབ་འབྱོར། སེམས་དེ་དག་ནི། རྟེན་མེད་པས་སེམས་ཚད་མ་མེད་པ་ཡིན་ཏེ། རབ་འབྱོར།
དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཚད་མ་མེད་པ་རྣམས་སེམས་ཚད་མ་མེད་པའོ། །ཞེས་ཡང་
དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་
བསྟན་དུ་ཡོད་པ་རྣམས་སེམས་བསྟན་དུ་ཡོད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་
ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་བསྟན་ཏུ་ཡོད་པ་རྣམས་སེམས་བསྟན་དུ་ཡོད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་
དེ་དག་དང༌། སེམས་ཀྱི་ངོ་བོ་ཉིད་ནི། མཉམ་།པར་བསྟན་པ་ཡིན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་
མེད་པ་དག་གི་སེམས་བསྟན་དུ་ཡོད་པ་རྣམས་སེམས་བསྟན་དུ་ཡོད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་
ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་བསྟན་དུ་མེད་པ་རྣམས་སེམས་བསྟན་དུ་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་
འབྱོར༑ ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་བསྟན་དུ་མེད་པ་རྣམས་སེམས་བསྟན་དུ་མེད་པའོ། །
ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། མཚན་ཉིད་མེད་ཅིང་དོན་གྱིས་དབེན་པ་ཡིན་པའི་ཕྱིར་སེམས་དེ་ནི། མི་སྣང་བ་སྟེ། སྤྱན་གསུམ་མམ་ཐམས་ཅད་ལ་སྣང་
བར་མ་གྱུར་པའོ། །རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་བསྟན་དུ་མེད་པ་རྣམས་
སེམས་བསྟན་དུ་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་
སེམས་ཅན་གཞལ་དུ་མེད་པ་དག་གི་སེམས་ཐོགས་པ་དང་བཅས་པ་རྣམས་སེམས་ཐོགས་པ་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་
༄༅། །བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཐོགས་པ་དང་བཅས་པ་རྣམས་སེམས་ཐོགས་
པ་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། མེད་པ་ལ་ཀུན་བརྟགས་པ་སྟེ། སྟོང་པ་དམིགས་པའི་དབང་དུ་གྱུར་པའོ། །
རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཐོགས་པ་དང་བཅས་པ་རྣམས་སེམས་
ཐོགས་པ་དང་བཅས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་
ཅན་གཞལ་དུ་མེད་པ་དག་གི་སེམས་ཐོགས་པ་མེད་པ་རྣམས་སེམས་ཐོགས་པ་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་
པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཐོགས་པ་མེད་པ་རྣམས་སེམས་ཐོགས་པ་མེད་པའོ། །ཞེས་ཡང་དག་པ་ཇི་ལྟ་བ་བཞིན་
དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། གཉིས་སུ་མེད་པར་གྱུར་པ། མ་བྱུང་བ། ཀུན་ཏུ་མ་བྱུང་བ་སྟེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་
ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་ཐོགས་པ་མེད་པ་རྣམས་སེམས་ཐོགས་པ་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་
འབྱོར༑ གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་བླ་ན་ཡོད་པ་རྣམས་སེམས་བླ་ན་ཡོད་
པའོ༑ ༑ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་
དག་གི་སེམས་བླ་ན་ཡོད་པ་རྣམས་སེམས་བླ་ན་ཡོད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་བླ་ན་ཡོད་པ་ཡང་དག་པ་ཇི་ལྟ་བ་ཉིད་གང་ཡིན་པ་དེ་
ལ་རློམ་སེམས་མེད་དེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་བླ་ན་ཡོད་པ་རྣམས་
སེམས་བླ་ན་ཡོད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་
ཅན་གཞལ་དུ་མེད་པ་དག་གི་སེམས་བླ་ན་མེད་པ་རྣམས་སེམས་བླ་ན་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་
༄༅། །རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་བླ་ན་མེད་པ་རྣམས་སེམས་བླ་ན་མེད་པའོ། །ཞེས་ཡང་དག་པ་ཇི་ལྟ་བ་དེ་བཞིན་
དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། སེམས་རྡུལ་ཕྲ་མོ་ཙམ་ཡང་མི་དམིགས་པའི་ཕྱིར་སྤྲོས་པ་མེད་པ་ཡིན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་བླ་ན་མེད་པ་རྣམས་སེམས་བླ་ན་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་
འབྱོར༑ གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་མཉམ་པར་མ་བཞག་པ་རྣམས་སེམས་མཉམ་
པར་མ་བཞག་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་
གཞལ་དུ་མེད་པ་དག་གི་སེམས་མཉམ་པར་མ་བཞག་པ་རྣམས་སེམས་མཉམ་པར་མ་བཞག་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི།
མི་མཉམ་པ་དང་མཉམ་པས་མི་མཉམ་པར་འཇུག་ཅིང་དེ་ལྟར་སེམས་མཉམ་པར་མ་བཞག་པ་སྟེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་
ནས་སེམས་ཅན་གཞལ་དུ་མེད་པ་དག་གི་སེམས་མཉམ་པར་མ་བཞག་པ་རྣམས་སེམས་མཉམ་པར་མ་བཞག་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་
བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་མཉམ་པར་བཞག་པ་རྣམས་སེམས་མཉམ་པར་བཞག་པའོ། །ཞེས་ཡང་དག་
པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་མཉམ་པར་
བཞག་པ་རྣམས་སེམས་མཉམ་པར་བཞག་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། མཉམ་པ་དང་མཉམ་པས་མཉམ་པར་འཇུག་ཅིང༌། དེ་
ལྟར་སེམས་མཉམ་པར་བཞག་པ་དེ་དག་ནི། ནམ་མཁའ་དང་མཚུངས་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་
དུ་མེད་པ་དག་གི་སེམས་མཉམ་པར་བཞག་པ་རྣམས་སེམས་མཉམ་པར་བཞག་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྣམ་པར་མ་གྲོལ་བ་རྣམས་སེམས་རྣམ་པར་མ་གྲོལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་
༄༅། །ཏོ༑ ༑རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྣམ་པར་མ་།གྲོལ་
བ་རྣམས་སེམས་རྣམ་པར་མ་གྲོལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། སེམས་དེ་དག་ནི། རང་བཞིན་གྱིས་རྣམ་པར་གྲོལ་བ་ངོ་བོ་ཉིད་མེད་པའི་རང་
བཞིན་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྣམ་པར་མ་གྲོལ་བ་རྣམས་སེམས་རྣམ་པར་
མ་གྲོལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་
གཞལ་དུ་མེད་པ་དག་གི་སེམས་རྣམ་པར་གྲོལ་བ་རྣམས་སེམས་རྣམ་པར་གྲོལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་
པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྣམ་པར་གྲོལ་བ་རྣམས་སེམས་རྣམ་པར་གྲོལ་བའོ། །ཞེས་ཡང་དག་པ་ཇི་ལྟ་བ་བཞིན་དུ་
རབ་ཏུ་མཁྱེན་ཅེ་ན། རབ་འབྱོར། སེམས་ནི། མེད་པ་ཡིན་པའི་ཕྱིར་སེམས་ནི། དེ་བཞིན་གཤེགས་པས་འདས་པར་མ་དམིགས་མ་འོངས་པ་དང་ད་ལྟར་བྱུང་བར་མ་དམིགས་ཏེ། རབ་
འབྱོར༑ དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་རྣམ་པར་གྲོལ་བ་རྣམས་སེམས་རྣམ་པར་གྲོལ་བའོ། །
ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་
གི་སེམས་བལྟར་མེད་པ་རྣམས་སེམས་བལྟར་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་
འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་སེམས་བལྟར་མེད་པ་རྣམས་སེམས་བལྟར་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། མེད་པའི་
ཕྱིར་སེམས་དེ་བལྟར་མེད་པ་དང་མ་བྱུང་བའི་ཕྱིར་རྣམ་པར་རིག་པར་བྱ་བ་མ་ཡིན་པ་དང༌། ཡོངས་སུ་མ་གྲུབ་པའི་ཕྱིར་ཤེས་རབ་ཀྱི་མིག་དང༌། ལྷའི་མིག་གིས་ཀྱང་བཟུང་དུ་མེད་ན། ཐམས་
ཅད་ལ་མི་སྣང་བའི་ཕྱིར་ཤའི་མིག་གིས་ལྟ་ཅི་སྨོས་ཏེ། རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞལ་དུ་མེད་པ་དག་གི་
སེམས་བལྟར་མེད་པ་རྣམས་སེམས་བལྟར་མེད་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། དེ་བཞིན་གཤེགས་པ་
༄༅། །དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་འཇིག་རྟེན་འདི་སྟོན་པའོ། །རབ་འབྱོར། གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་
ཏུ་ཕྱིན་པ་འདི་ལ་བརྟེན་ནས་སེམས་ཅན་གཞན་དང༌། གང་ཟག་གཞན་གཞལ་དུ་མེད་གྲངས་མེད་པ་དག་གི་ཕྱེ་བ་དང་བཙུམས་པ་རྣམས་ཕྱེ་བ་དང་བཙུམས་པའོ། །ཞེས་ཡང་དག་པ་ཇི་ལྟ་
བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞན་དང་གང་ཟག་གཞན་གཞལ་དུ་
མེད་གྲངས་མེད་པ་དག་གི་ཕྱེ་བ་དང་བཙུམས་པ་རྣམས་ཕྱེ་བ་དང་བཙུམས་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། དེ་དག་སྐྱེ་བ་ཐམས་ཅད་ནི།
གཟུགས་ལ་གནས་ཤིང་སྐྱེའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། དེ་བཞིན་དུ་དེ་དག་སྐྱེ་བ་ཐམས་ཅད་ནི། ཚོར་བ་དང༌། འདུ་ཤེས་དང༌། འདུ་བྱེད་
རྣམས་དང༌། རྣམ་པར་ཤེས་པ་ལ་གནས་ཤིང་སྐྱེའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། དེ་ལ་ཇི་ལྟར་དེ་བཞིན་གཤེགས་པས་ཕྱེ་བ་དང་བཙུམས་
པ་དེ་རྣམས་གཟུགས་ལ་གནས་པར་རྣམ་པར་མཁྱེན་པར་འགྱུར་ཞིང༌། དེ་བཞིན་དུ་ཇི་ལྟར་ཕྱེ་བ་དང་བཙུམས་པ་དེ་རྣམས་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་
པར་ཤེས་པ་ལ་གནས་པར་རྣམ་པར་མཁྱེན་པར་འགྱུར་ཞེ་ན། དེ་བཞིན་སོང་བ་ཤི་ཕན་ཆད་འབྱུང་ངོ༌། །ཞེས་བྱ་བ་འདི་ནི། གཟུགས་ལ་བརྟེན་པའོ། །དེ་བཞིན་སོང་བ་ཤི་ཕན་ཆད་མི་འབྱུང་ངོ༌། །ཞེས་
བྱ་བ་འདི་ནི། གཟུགས་ལ་བརྟེན་པའོ། །དེ་བཞིན་སོང་བ་ཤི་ཕན་ཆད་འབྱུང་བ་ཡང་ཡིན་ལ་མི་འབྱུང་བའང་ཡིན་ནོ། །ཞེས་བྱ་བ་འདི་ནི། གཟུགས་ལ་བརྟེན་པའོ། །དེ་བཞིན་སོང་བ་ཤི་ཕན་ཆད་
འབྱུང་བའང་མ་ཡིན། མི་འབྱུང་བའང་མ་ཡིན་ནོ། །ཞེས་བྱ་བ་འདི་ནི། གཟུགས་ལ་བརྟེན་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། དེ་བཞིན་སོང་བ་ཤི་ཕན་
ཆད་འབྱུང་ངོ༌། །ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ། །དེ་བཞིན་སོང་བ་ཤི་ཕན་ཆད་མི་འབྱུང་ངོ༌། །ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ། །དེ་བཞིན་སོང་བ་
ཤི་ཕན་ཆད་འབྱུང་བའང་ཡིན་ལ་མི་འབྱུང་བ་ཡང་ཡིན་ནོ། །ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ། །དེ་བཞིན་སོང་བ་ཤི་ཕན་ཆད་འབྱུང་བའང་མ་ཡིན། མི་འབྱུང་བའང་མ་
ཡིན་ནོ༑ ༑ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ། །བདག་དང་འཇིག་རྟེན་རྟག་པ་ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ །ཞེས་བྱ་བ་འདི་ནི། གཟུགས་ལ་བརྟེན་
པའོ༑ ༑བདག་དང་འཇིག་རྟེན་མི་རྟག་པ་ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། གཟུགས་ལ་བརྟེན་པའོ། །བདག་དང་འཇིག་རྟེན་རྟག་པའང་ཡིན། མི་
༄༅། །རྟག་པའང་ཡིན་ནོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། གཟུགས་ལ་བརྟེན་པའོ། །བདག་དང་འཇིག་རྟེན་རྟག་པ་ཉིད་
ཀྱང་མ་ཡིན། མི་རྟག་པ་ཉིད་ཀྱང་མ་ཡིན་ནོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ །ཞེས་བྱ་བ་འདི་ནི། གཟུགས་ལ་བརྟེན་པའོ། །དེ་བཞིན་དུ་ཚོར་བ་དང༌། འདུ་ཤེས་
དང༌། འདུ་བྱེད་རྣམས་དང༌། བདག་དང་འཇིག་རྟེན་ནི། རྟག་པ་སྟེ། འདི་ཉིད་བདེན་གྱི། གཞན་ནི། གཏི་མུག་གོ །ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ། །བདག་དང་
འཇིག་རྟེན་ནི། མི་རྟག་པ་སྟེ། འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ། །བདག་དང་འཇིག་རྟེན་ནི། རྟག་པའང་ཡིན་ལ།
མི་རྟག་པའང་ཡིན་ནོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ། །བདག་དང་འཇིག་རྟེན་ནི། རྟག་པ་
ཉིད་ཀྱང་མ་ཡིན། མི་རྟག་པ་ཉིད་ཀྱང་མ་ཡིན་ནོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ།། །།
འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་བཅུ་གསུམ་པ། བདག་དང་འཇིག་རྟེན་མཐའ་དང་བཅས་པའོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་
མུག་གོ། ཞེས་བྱ་བ་འདི་ནི། གཟུགས་ལ་བརྟེན་པའོ། །བདག་དང་འཇིག་རྟེན་མཐའ་མེད་པའོ་ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། གཟུགས་ལ་བརྟེན་པའོ། །
བདག་དང་འཇིག་རྟེན་མཐའ་དང་བཅས་པའང་ཡིན་ལ་མཐའ་མེད་པའང་ཡིན་ནོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། གཟུགས་ལ་བརྟེན་པའོ། །བདག་དང་
འཇིག་རྟེན་མཐའ་དང་བཅས་པ་ཉིད་ཀྱང་མ་ཡིན་མཐའ་མེད་པའང་མ་ཡིན་ནོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། གཟུགས་ལ་བརྟེན་པའོ། །དེ་བཞིན་
དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། བདག་དང་འཇིག་རྟེན་མཐའ་དང་བཅས་པའོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། རྣམ་པར་
ཤེས་པ་ལ་བརྟེན་པའོ། །བདག་དང་འཇིག་རྟེན་མཐའ་མེད་པའོ་ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ། །བདག་དང་
འཇིག་རྟེན་མཐའ་དང་བཅས་པའང་ཡིན་ལ་མཐའ་མེད་པའང་ཡིན་ནོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ །ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ། །བདག་
དང་འཇིག་རྟེན་མཐའ་དང་བཅས་པ་ཉིད་ཀྱང་མ་ཡིན། མཐའ་མེད་པའང་མ་ཡིན་ནོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། རྣམ་པར་ཤེས་པ་ལས་
༄༅། །བརྟེན་པའོ། །སྲོག་དེ་ནི། ལུས་དེའོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ །ཞེས་བྱ་བ་འདི་ནི། གཟུགས་ལ་བརྟེན་པའོ། །སྲོག་ཀྱང་གཞན་ལ་ལུས་
ཀྱང་གཞན་ནོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ །ཞེས་བྱ་བ་འདི་ནི། གཟུགས་ལ་བརྟེན་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། སྲོག་
དེ་ནི༑ ལུས་དེའོ། །ཞེས་བྱ་བ་འདི་ཉིད་བདེན་གྱི། གཞན་ནི། གཏི་མུག་གོ །ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པའོ། །སྲོག་ཀྱང་གཞན་ལ་ལུས་ཀྱང་གཞན་ནོ། །ཞེས་བྱ་བ་འདི་ཉིད་
བདེན་གྱི། གཞན་ནི། གཏི་མུག་གོ། ཞེས་བྱ་བ་འདི་ནི། རྣམ་པར་ཤེས་པ་ལ་བརྟེན་པ་སྟེ། རབ་འབྱོར། དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞན་དང་གང་ཟག་གཞན་གཞལ་དུ་མེད་གྲངས་མེད་པ་དག་གི་ཕྱེ་བ་དང་བཙུམས་པ་དེ་དག་གཟུགས་ལ་བརྟེན་པར་རྣམ་པར་
མཁྱེན་པར་གྱུར་ཏོ། །དེ་བཞིན་དུ་ཕྱེ་བ་དང་བཙུམས་པ་དེ་དག་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ལ་བརྟེན་པར་རྣམ་པར་མཁྱེན་པར་གྱུར་ཏོ། །རབ་འབྱོར་
གཞན་ཡང་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞན་དང་གང་ཟག་གཞན་གཞལ་དུ་མེད་གྲངས་མེད་པ་དག་གི་ཕྱེ་བ་དང་བཙུམས་པ་དེ་དག་
ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞན་དང་གང་ཟག་གཞན་གཞལ་དུ་མེད་
གྲངས་མེད་པ་དག་གི་ཕྱེ་བ་དང་བཙུམས་པ་དེ་དག་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། རབ་འབྱོར། འདི་ལ་དེ་བཞིན་གཤེགས་པས་གཟུགས་མཁྱེན་ཏོ། །རབ་འབྱོར། དེ་བཞིན་གཤེགས་པས་
གཟུགས་ཇི་ལྟར་མཁྱེན་ཅེ་ན། རབ་འབྱོར། དེ་བཞིན་གཤེགས་པས་དེ་བཞིན་ཉིད་ཇི་ལྟ་བ་དེ་བཞིན་དུ་གཟུགས་མཁྱེན་ཏོ། རབ་འབྱོར། དེ་ལྟར་དེ་བཞིན་གཤེགས་པས་གཟུགས་མཁྱེན་ཏོ། །དེ་
བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་ཏེ། རབ་འབྱོར། འདི་ལ་དེ་བཞིན་གཤེགས་པས་རྣམ་པར་ཤེས་པ་མཁྱེན་ཏོ། །རབ་འབྱོར། ཇི་ལྟར་དེ་བཞིན་གཤེགས་པས་རྣམ་པར་
ཤེས་པ་མཁྱེན་ཅེ་ན། རབ་འབྱོར། དེ་བཞིན་གཤེགས་པས་དེ་བཞིན་ཉིད་ཇི་ལྟ་བ་དེ་བཞིན་དུ་རྣམ་པར་ཤེས་པ་མཁྱེན་ཏེ། རབ་འབྱོར། དེ་ལྟར་དེ་བཞིན་གཤེགས་པས་རྣམ་པར་ཤེས་པ་མཁྱེན་
ཏོ༑ ༑རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་སེམས་ཅན་གཞན་དང་གང་ཟག་གཞན་གཞལ་དུ་མེད་གྲངས་མེད་པ་དག་གི་ཕྱེ་བ་དང་བཙུམས་པ་
ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །རབ་འབྱོར། དེ་ལྟར་ན། དེ་བཞིན་གཤེགས་པས་དེ་བཞིན་ཉིད་ལ་དེ་བཞིན་གཤེགས་པའི་དེ་བཞིན་ཉིད་དང༌། ཕུང་པོའི་དེ་བཞིན་ཉིད་དང༌། ཕྱེ་བ་དང་
༄༅། །བཙུམས་པའི་དེ་བཞིན་ཉིད་དུ་འདོགས་པར་མཛད་དོ། །རབ་འབྱོར། ཕུང་པོའི་དེ་བཞིན་ཉིད་གང་ཡིན་པ་དེ་ཉིད་ནི། འཇིག་རྟེན་གྱི་དེ་བཞིན་ཉིད་ཀྱང་ཡིན་ནོ། །དེ་
ཅིའི་ཕྱིར་ཞེ་ན། རབ་འབྱོར། དེ་བཞིན་གཤེགས་པས་ཕུང་པོ་ལྔ་ནི། འཇིག་རྟེན་ནོ། །ཞེས་མིང་དུ་གསུངས་ཏེ། རབ་འབྱོར། དེ་ལྟ་བས་ན། ཕུང་པོའི་དེ་བཞིན་ཉིད་གང་ཡིན་པ་དེ་ནི། འཇིག་
རྟེན་གྱི་དེ་བཞིན་ཉིད་དོ། །འཇིག་རྟེན་གྱི་དེ་བཞིན་ཉིད་གང་ཡིན་པ་དེ་ནི། ཆོས་ཐམས་ཅད་ཀྱི་དེ་བཞིན་ཉིད་དོ། །ཆོས་ཐམས་ཅད་ཀྱི་དེ་བཞིན་ཉིད་གང་ཡིན་པ་དེ་ནི། རྒྱུན་དུ་ཞུགས་པའི་འབྲས་
བུའི་དེ་བཞིན་ཉིད་དོ། །རྒྱུན་དུ་ཞུགས་པའི་འབྲས་བུའི་དེ་བཞིན་ཉིད་གང་ཡིན་པ་དེ་ནི། ལན་ཅིག་ཕྱིར་འོང་བའི་འབྲས་བུའི་དེ་བཞིན་ཉིད་དོ། །ལན་ཅིག་ཕྱིར་འོང་བའི་འབྲས་བུའི་དེ་བཞིན་ཉིད་
གང་ཡིན་པ་དེ་ནི། ཕྱིར་མི་འོང་བའི་འབྲས་བུའི་དེ་བཞིན་ཉིད་དོ། །ཕྱིར་མི་འོང་བའི་འབྲས་བུའི་དེ་བཞིན་ཉིད་གང་ཡིན་པ་དེ་ནི། དགྲ་བཅོམ་པའི་འབྲས་བུའི་དེ་བཞིན་ཉིད་དོ། །དགྲ་བཅོམ་པའི་འབྲས་
བུའི་དེ་བཞིན་ཉིད་གང་ཡིན་པ་དེ་ནི། རང་སངས་རྒྱས་ཀྱི་དེ་བཞིན་ཉིད་དོ། །རང༌། སངས་རྒྱས་ཀྱི་དེ་བཞིན་ཉིད་གང་ཡིན་པ་དེ་ནི། དེ་བཞིན་གཤེགས་པའི་དེ་བཞིན་ཉིད་དེ། རབ་འབྱོར། དེ་ལྟར་ན་
དེ་བཞིན་གཤེགས་པའི་དེ་བཞིན་ཉིད་དང༌། ཕུང་པོའི་དེ་བཞིན་ཉིད་དང༌། ཆོས་ཐམས་ཅད་ཀྱི་དེ་བཞིན་ཉིད་དང༌། འཕགས་པ་ཉན་ཐོས་དང་རང་སངས་རྒྱས་ཐམས་ཅད་ཀྱི་དེ་བཞིན་ཉིད་འདི་ནི། དེ་
བཞིན་ཉིད་གཅིག་པ། དངོས་པོ་དང་དངོས་པོ་མེད་པ་དུ་མ་དང་བྲལ་བ་སྟེ། གཅིག་པ་མ་ཡིན་པའི་ཕྱིར་དང༌། ཐ་དད་པ་མ་ཡིན་པའི་ཕྱིར་དང༌། མི་ཟད་པའི་ཕྱིར་དང༌། འགྱུར་བ་མེད་པའི་ཕྱིར་དང༌། གཉིས་སུ་
མེད་པའི་ཕྱིར་དང༌། གཉིས་སུ་བྱར་མེད་པའི་ཕྱིར་རོ། །རབ་འབྱོར། དེ་ལྟར་དེ་བཞིན་གཤེགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་དེ་བཞིན་ཉིད་འདི་མངོན་པར་རྫོགས་པར་སངས་རྒྱས་སོ། །
རབ་འབྱོར། དེ་ལྟར་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་འཇིག་རྟེན་འདི་སྟོན་པའོ། །རབ་འབྱོར། དེ་ལྟར་ན། དེ་
བཞིན་གཤེགས་པ་འཇིག་རྟེན་འདི་ལ་འཇིག་རྟེན་ཡང་དག་པར་སྟོན་པ་ཡིན་ཏེ། དེ་ལྟར་ནའང་འཇིག་རྟེན་འདི་ཀུན་ཏུ་སྟོན་པར་གྱུར་པའོ། །རབ་འབྱོར། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡུམ་དང༌། སྐྱེད་བྱེད་དང༌། སྐྱེད་པར་མཛད་པའོ། །རབ་འབྱོར། དེ་ལྟར་དེ་བཞིན་གཤེགས་པས་དེ་བཞིན་ཉིད་
མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་དེ་བཞིན་ཉིད་མཁྱེན་ཏོ། །མ་ལོག་པའི་དེ་བཞིན་ཉིད་མཁྱེན་ཏོ། །གཞན་མ་ཡིན་པའི་དེ་བཞིན་ཉིད་མཁྱེན་ཏོ། །རབ་འབྱོར། དེ་ལྟར་དེ་བཞིན་གཤེགས་
པས་དེ་བཞིན་ཉིད་མངོན་པར་རྫོགས་པར་སངས་རྒྱས་པས་ན། དེ་བཞིན་གཤེགས་པ་ཞེས་བྱའོ། །གནས་བརྟན། རབ་འབྱོར་གྱིས་གསོལ་པ། བཅོམ་ལྡན་འདས། དེ་བཞིན་ཉིད་ནི། ཟབ་སྟེ། བཅོམ་
༄༅། །ལྡན་འདས། དེ་བཞིན་ཉིད་དེ་ལས་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་རབ་ཏུ་འབྱེད་ཅིང་རབ་ཏུ་སྟོན་ཏོ། །བཅོམ་ལྡན་འདས། གཞན་སུ་ཞིག་འདི་ལ་
མོས་པར་འགྱུར་ཏེ། འདི་ལ་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའམ། དགྲ་བཅོམ་པ་བརྣག་པ་ཡོངས་སུ་རྫོགས་པའམ། གང་ཟག་ལྟ་བ་ཕུན་སུམ་ཚོགས་པ་
རྣམས་སོ། །བཅོམ་ལྡན་འདས། དེ་ལྟ་བུ་མཆོག་ཏུ་ཟབ་པའི་གནས་འདི་དག་ནི། དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ནས་གསུངས་སོ། །དེ་སྐད་ཅེས་གསོལ་པ་
དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། དེ་བཞིན་གཤེགས་པས་མཆོག་ཏུ་ཟབ་པའི་གནས་
འདི་དག་མངོན་པར་རྫོགས་པར་སངས་རྒྱས་ནས་བཤད་དེ། རབ་འབྱོར། འདི་ལྟར་དེ་བཞིན་གཤེགས་པས་གང་མངོན་པར་རྫོགས་པར་སངས་རྒྱས་པའི་དེ་བཞིན་ཉིད་འདི་ནི། མི་ཟད་པ་སྟེ།
མངོན་པར་རྫོགས་པར་སངས་རྒྱས་ནས་མི་ཟད་པ་ལ་མི་ཟད་པ་ཉིད་དུ་བསྟན་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་ལ་སོགས་པ་འདོད་པ་ན་སྤྱོད་པའི་ལྷའི་བུ་རྣམས་དང༌། ཚངས་རིས་ཀྱི་
ལྷའི་བུ་ཉི་ཁྲི་དག་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་
བཅོམ་ལྡན་འདས་ལ་འདོད་པ་ན་སྤྱོད་པ་དང༌། གཟུགས་ན་སྤྱོད་པའི་ལྷའི་བུ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཟབ་མོ་དག་རབ་ཏུ་བཤད་ན། བཅོམ་ལྡན་འདས།
འདི་ལ་མཚན་ཉིད་ཇི་ལྟར་བཞག །བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དག །སྟོང་པའོ། །ཞེས་འདི་ལ་མཚན་ཉིད་བཞག་གོ། །ལྷའི་བུ་དག །མཚན་མ་མེད་པའོ། །སྨོན་པ་
མེད་པའོ། །ཞེས་འདི་ལ་མཚན་ཉིད་བཞག་གོ། །ལྷའི་བུ་དག །སྐྱེ་བ་མེད་པའོ། །འགག་པ་མེད་པའོ། །ཀུན་ནས་ཉོན་མོངས་པ་མེད་པའོ། །རྣམ་པར་བྱང་བ་མེད་པའོ། །དངོས་པོ་མེད་པའོ། །
མྱ་ངན་ལས་འདས་པའོ། །ཆོས་ཀྱི་དབྱིངས་སོ། །དེ་བཞིན་ཉིད་དོ། །ཞེས་འདི་ལ་མཚན་ཉིད་བཞག་གོ། །དེ་ཅིའི་ཕྱིར་ཞེ་ན། ལྷའི་བུ་དག། མཚན་ཉིད་འདི་དག་ནི། མི་གནས་པ། མཚན་ཉིད་
འདི་དག་ནི། ནམ་མཁའ་དང་འདྲ་བའོ། །ལྷའི་བུ་དག། མཚན་ཉིད་འདི་དག་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་མ་བཞག་སྟེ། མཚན་ཉིད་
འདི་དག་ནི། གཟུགས་སུ་བགྲང་བ་མ་ཡིན་ནོ། །ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པར་བགྲང་བ་མ་ཡིན་ནོ། །མཚན་ཉིད་འདི་དག་ནི། གཟུགས་ལ་བརྟེན་
པ་མ་ཡིན་ནོ། །ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ལ་བརྟེན་པ་མ་ཡིན་ནོ། །མཚན་ཉིད་འདི་དག་ནི། ལྷའམ། མིའམ། མི་མ་ཡིན་པ་དག་གིས་མ་
༄༅། །བཞག་གོ། །མཚན་ཉིད་འདི་དག་ནི། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱིས་བསྐྱོད་མི་ནུས་སོ། །དེ་ཅིའི་ཕྱིར་ཞེ་ན། ལྷ་དང༌། མི་དང༌། ལྷ་མ་
ཡིན་དུ་བཅས་པའི་འཇིག་རྟེན་ཡང་མཚན་ཉིད་འདི་དག་ཁོ་ནར་ཟད་དོ། །མཚན་ཉིད་འདི་དག་ནི། གང་གིས་ཀྱང་ལག་གིས་བཞག་པ་མ་ཡིན་ནོ། །ལྷའི་བུ་དག། གང་ཞིག་འདི་སྐད་དུ།
ནམ་མཁའ་འདི་སུས་བཞག་ཅེས་ཟེར་ན། ལྷའི་བུ་དག། ཅི་དེ་ཡང་དག་པར་སྨྲ་བས་སྨྲ་བ་ཡིན་ནམ། དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་འདོད་པ་ན་སྤྱོད་པ་དང༌།
གཟུགས་ན་སྤྱོད་པའི་ལྷའི་བུ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། ནམ་མཁའ་ནི། སུས་ཀྱང་མ་བཞག་གོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ནམ་མཁའ་ནི། འདུས་
མ་བགྱིས་པ་ལགས་ཏེ། ནམ་མཁའ་ནི། སུས་ཀྱང་མ་བཞག་གོ། །དེ་ནས་བཅོམ་ལྡན་འདས་ཀྱིས་འདོད་པ་ན་སྤྱོད་པ་དང༌། གཟུགས་ན་སྤྱོད་པའི་ལྷའི་བུ་དེ་དག་ལ་བཀའ་སྩལ་པ། ལྷའི་བུ་དག་
དེ་དེ་བཞིན་ནོ། །དེ་དེ་བཞིན་ཏེ། དེ་བཞིན་གཤེགས་པ་རྣམས་བྱུང་ཡང་རུང༌། དེ་བཞིན་གཤེགས་པ་རྣམས་མ་བྱུང་ཡང་རུང་སྟེ། མཚན་ཉིད་འདི་དག་ནི། དེ་བཞིན་དུ་གནས་སོ། །དེ་ཅིའི་ཕྱིར་
ཞེ་ན༑ ཇི་ལྟར་འདི་དག་གནས་པ་དེ་ལྟར་ཡང་དག་པར་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ནས་བཤད་དེ། དེ་བས་ན། ལྷའི་བུ་དག། དེ་བཞིན་གཤེགས་པ་དེ་
བཞིན་གཤེགས་པ་ཞེས་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། མཚན་ཉིད་ཟབ་མོ་འདི་དག་དེ་བཞིན་གཤེགས་
པས་མངོན་པར་རྫོགས་པར་སངས་རྒྱས་སོ། །འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། དེ་བཞིན་གཤེགས་པ་རྣམས་ཀྱི་ཆགས་པ་མ་མཆིས་པའི་ཡེ་ཤེས་སོ། །ཆགས་པ་མ་
མཆིས་པའི་ཡེ་ཤེས་ཀྱི་སླད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ནི། དེ་བཞིན་གཤེགས་པའི་སྤྱོད་ཡུལ་ལགས་སོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་
འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རྣམས་ལ་འཇིག་རྟེན་འདི་ཡང་དག་པར་སྟོན་པ་ཡིན་ནོ། །རབ་འབྱོར། ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་
ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་འདི་ལ་བརྟེན་ཅིང་གནས་པ་དེ་ཁོ་ན་བཞིན་དུ་ཆོས་དེ་དག་ལ་མི་གནས་པས་རྟག་ཏུ་གནས་པ་ཡིན་ཞིང༌། དེ་བཞིན་དུ་ཡང་དེ་བཞིན་གཤེགས་པས་མངོན་པར་
རྫོགས་པར་སངས་རྒྱས་ཏེ། དེས་ན། དེ་དག་ཆོས་ཁོ་ན་ལ་བརྟེན་ཅིང་གནས་སོ། །ཆོས་ལ་བཀུར་སྟིར་མཛད་དོ། །བླ་མར་མཛད་དོ། །རྗེད་པར་མཛད་དོ། །མཆོད་པར་མཛད་དོ། །རི་མོར་མཛད་
༄༅། །དོ༑ ༑བསྙེན་བཀུར་མཛད་དོ། །རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཆོས་རྣམས་ཀྱི་ཆོས་ཉིད་ཡིན་ཏེ། དེའི་ཕྱིར་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བཀུར་སྟིར་མཛད་དོ། །བླ་མར་མཛད་དོ། །རྗེད་པར་མཛད་དོ། །མཆོད་པར་མཛད་དོ། །རི་མོར་
མཛད་དོ། །བསྙེན་བཀུར་མཛད་དོ། །དེ་ཅིའི་ཕྱིར་ཞེ་ན། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་
ཀྱི་ཐམས་ཅད་མཁྱེན་པ་ཉིད་རབ་ཏུ་འབྱེད་པར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི། བྱས་པ་ཤེས་ཤིང༌། བྱས་པ་ཚོར་བ་
ཡིན་ནོ༑ ༑རབ་འབྱོར། ཡང་གང་ཞིག་འདི་སྐད་དུ། དེ་བཞིན་གཤེགས་པ་ནི། བྱས་པ་ཤེས་ཤིང༌། བྱས་པ་ཚོར་བའོ། །ཞེས་ཟེར་ན། ཡང་དག་པར་སྨྲ་བས་སྨྲ་བའོ། །བྱས་པ་ཤེས་
ཤིང༌། བྱས་པ་ཚོར་བའོ། །ཞེས་ཟེར་ན། ཡང་དག་པར་སྨྲ་བས་སྨྲ་བའོ། །ཞེས་བྱ་བ། རབ་འབྱོར། ཇི་ལྟར་དེ་བཞིན་གཤེགས་པ་བྱས་པ་ཤེས་ཤིང༌། བྱས་པ་ཚོར་བ་ཡིན་ཞེ་ན།
རབ་འབྱོར། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐེག་པ་གང་དང་གང་གིས་གཤེགས་པ་དང༌། སྒྲུབ་པ་གང་དང་གང་གིས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཐེག་པ་དེ་དག་ཉིད་དང༌། སྒྲུབ་པ་དེ་དག་ཉིད་བྱས་པ་ཤེས་ཤིང༌། བྱས་པ་ཚོར་བ་དེ་ཉིད་ཀྱིས་དེ་བཞིན་གཤེགས་པས་རྗེས་
སུ་འཛིན་ཅིང་རྗེས་སུ་སྐྱོང་སྟེ། རབ་འབྱོར། འདི་ནི། དེ་བཞིན་གཤེགས་པའི་བྱས་པ་ཤེས་ཤིང༌། བྱས་པ་ཚོར་བ་ཡིན་པར་རིག་པར་བྱའོ། །རབ་འབྱོར། གཞན་ཡང་དེ་བཞིན་གཤེགས་
པས་ཆོས་ཐམས་ཅད་མ་བྱས་པ་མ་བྱས་པའོ། །ཞེས་མངོན་པར་རྫོགས་པར་སངས་རྒྱས་སོ། །འགྱུར་བ་མེད་པ་འགྱུར་བ་མེད་པའོ། །ཞེས་མངོན་པར་རྫོགས་པར་སངས་རྒྱས་སོ། །མངོན་
པར་འདུས་མ་བྱས་པ་མངོན་པར་འདུས་མ་བྱས་པའོ། །ཞེས་མངོན་པར་རྫོགས་པར་སངས་རྒྱས་ཏེ། རབ་འབྱོར། འདིའང་དེ་བཞིན་གཤེགས་པའི་བྱས་པ་ཤེས་ཤིང་བྱས་པ་ཚོར་བར་
རིག་པར་བྱའོ། །རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་ཆོས་ཐམས་ཅད་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་
འཇུག་སྟེ། རབ་འབྱོར། རྣམ་གྲངས་འདིས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་འཇིག་རྟེན་འདི་
ཡང་དག་པར་སྟོན་པའོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གི་ཚེ་ཆོས་ཐམས་
༄༅། །ཅད་ཤེས་པ་པོ་དང༌། མཐོང་བ་པོ་མེད་པ་ཡིན་པ་དེའི་ཚེ་བཅོམ་ལྡན་འདས། ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་རྣམས་ལ་འཇིག་རྟེན་འདི་ཡང་དག་པར་སྟོན་པ་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །
རབ་འབྱོར། ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དོན་འདི་ཡོངས་སུ་ཞུ་བར་བྱ་བ་དང༌། འདྲི་བར་བྱ་བར་སེམས་པ་གང་ཡིན་པ་དེ་ནི། ལེགས་
སོ༑ ༑ལེགས་སོ། །རབ་འབྱོར། ཁྱོད་གང་འདི་སྐད་དུ། ཆོས་ཐམས་ཅད་ཤེས་པ་པོ་མེད་པ། མཐོང་བ་པོ་མེད་པའོ། །ཞེས་ཟེར་བ་ནི། རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། ཆོས་
ཐམས་ཅད་ནི། ཤེས་པ་པོ་དང༌། མཐོང་བ་པོ་མེད་པ་ཡིན་ནོ། །རབ་འབྱོར། ཇི་ལྟར་ཆོས་ཐམས་ཅད་ཤེས་པ་པོ་དང༌། མཐོང་བ་པོ་མེད་པ་ཡིན་ཞེ་ན། རབ་འབྱོར། ཆོས་ཐམས་
ཅད་ནི༑ སྟོང་པའོ། །རབ་འབྱོར། ཆོས་ཐམས་ཅད་ནི། མི་གནས་པའོ། །རབ་འབྱོར། དེ་ལྟར་ན། ཆོས་ཐམས་ཅད་ཤེས་པ་པོ་དང༌། མཐོང་བ་པོ་མེད་པའོ། །རབ་འབྱོར། དེ་
ལྟར་ན༑ ཆོས་དེ་དག་ཐམས་ཅད་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་སོ། །རབ་འབྱོར། དེ་ལྟར་ནའང་ཤེས་
རབ་ཀྱི་ཕ་རོལ་ཏུ་ཕྱིན་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་འཇིག་རྟེན་འདི་ཡང་དག་པར་སྟོན་པ་ཡིན་ནོ། །གཟུགས་མ་མཐོང་བ་དང༌། ཚོར་
བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་མ་མཐོང་བའི་ཕྱིར་ཡང་དག་པར་སྟོན་པའོ། །རབ་འབྱོར། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་འཇིག་རྟེན་འདི་ཡང་དག་པར་སྟོན་པ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཇི་ལྟར་
གཟུགས་མ་མཐོང་བ་ལགས། ཇི་ལྟར་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། བཅོམ་ལྡན་འདས། ཇི་ལྟར་རྣམ་པར་ཤེས་པ་མ་མཐོང་བ་ལགས། བཅོམ་ལྡན་
འདས་ཀྱིས་བཀའ་སྩལ་པ། རབ་འབྱོར། གལ་ཏེ་གཟུགས་ལ་དམིགས་པའི་རྣམ་པར་ཤེས་པ་མི་སྐྱེ་བ་དེ་ལྟར་ན། གཟུགས་མི་མཐོང་བ་ཡིན་ནོ། །དེ་བཞིན་དུ་གལ་ཏེ་ཚོར་བ་དང༌།
འདུ་ཤེས་དང༌། འདུ་བྱེད་རྣམས་དང༌། རབ་འབྱོར། གལ་ཏེ་རྣམ་པར་ཤེས་པ་ལ་དམིགས་པའི་སེམས་མི་སྐྱེ་བ་དེ་ལྟར་ན། རྣམ་པར་ཤེས་པ་མི་མཐོང་བ་ཡིན་ནོ། །རབ་
འབྱོར། གཟུགས་མི་མཐོང་བ་གང་ཡིན་པ་དང༌། ཚོར་བ་དང༌། འདུ་ཤེས་དང༌། འདུ་བྱེད་རྣམས་གང་ཡིན་པ་དང༌། རབ་འབྱོར། རྣམ་པར་ཤེས་པ་མི་མཐོང་བ་གང་ཡིན་པ་དེ་ལྟར་དེ་
༄༅། །བཞིན་གཤེགས་པས་འཇིག་རྟེན་གཟིགས་པ་ཡིན་ནོ། །རབ་འབྱོར། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ནི། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རྣམས་ལ་འཇིག་རྟེན་འདི་ཡང་དག་པར་སྟོན་པའོ། །རབ་འབྱོར། ཡང་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པས་འཇིག་རྟེན་ཡང་དག་པར་སྟོན་ཅེ་ན། དེ་
ལྟར་འཇིག་རྟེན་སྟོང་པའོ། །དེ་ལྟར་འཇིག་རྟེན་བརྗོད་པའོ། །དེ་ལྟར་འཇིག་རྟེན་ཤེས་པར་བྱེད་པའོ། །དེ་ལྟར་འཇིག་རྟེན་མཐོང་བར་མཛད་དོ། །དེ་ལྟར་འཇིག་རྟེན་བསམ་གྱིས་མི་ཁྱབ་པ་
དང༌། དེ་ལྟར་འཇིག་རྟེན་ཞི་བ་དང༌། དེ་ལྟར་འཇིག་རྟེན་དབེན་པ་དང༌། དེ་ལྟར་འཇིག་རྟེན་རྣམ་པར་དག་པའོ། །ཞེས་འཇིག་རྟེན་བརྗོད་དོ། །དེ་ལྟར་ཤེས་པར་བྱེད་དོ། །དེ་ལྟར་འཇིག་
རྟེན་མཐོང་བར་མཛད་པས་སོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། འཇིག་རྟེན་ཡང་དག་པར་སྟོན་པ་ཞེས་བྱ་བའི་ལེའུ་སྟེ། བཅུ་གཉིས་པའོ།། །།
དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཟབ་བོ། །བཅོམ་ལྡན་འདས། ཀྱེ་མ་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བགྱི་བ་ཆེན་པོས་ཉེ་བར་གནས་སོ། །བཅོམ་ལྡན་འདས། ཀྱེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བགྱི་བ་བསམ་གྱིས་མི་ཁྱབ་པ་དང༌། བགྱི་བ་
མཉམ་པ་མ་མཆིས་པ་དང༌། བགྱི་བ་གཞལ་དུ་མ་མཆིས་པ་དང༌། བགྱི་བ་གྲངས་མ་མཆིས་པ་དང༌། བགྱི་བ་མི་མཉམ་པ་དང་མཉམ་པས་ཉེ་བར་གནས་སོ། །བཅོམ་ལྡན་འདས་ཀྱིས་བཀའ་སྩལ་
པ༑ རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བྱ་བ་ཆེན་པོས་ཉེ་བར་གནས་སོ། །རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བྱ་
བ་བསམ་གྱིས་མི་ཁྱབ་པ་དང༌། བྱ་བ་མཉམ་པ་མེད་པ་དང༌། བྱ་བ་གཞལ་དུ་མེད་པ་དང༌། བྱ་བ་གྲངས་མེད་པ་དང༌། བྱ་བ་མི་མཉམ་པ་དང་མཉམ་པས་ཉེ་བར་གནས་སོ། །རབ་འབྱོར། ཇི་ལྟར་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྱ་བ་བསམ་གྱིས་མི་ཁྱབ་པས་ཉེ་བར་གནས་ཤེ་ན། རབ་འབྱོར། དེ་བཞིན་གཤེགས་པ་ཉིད་དང༌། སངས་རྒྱས་ཉིད་དང༌། རང་བྱུང་ཉིད་དང༌། ཐམས་ཅད་
མཁྱེན་པ་ཉིད་ནི། བསམ་གྱིས་མི་ཁྱབ་བོ། །རབ་འབྱོར། དེ་ལྟར་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བྱ་བ་བསམ་གྱིས་མི་ཁྱབ་པས་ཉེ་བར་གནས་ཏེ། འདི་ནི། སེམས་ཀྱིས་བསམ་
པར་མི་ནུས་སོ། །དེ་ཅིའི་ཕྱིར་ཞེ་ན། འདི་ལ་སེམས་སམ་སེམས་པའམ་སེམས་ལས་བྱུང་བའི་ཆོས་མི་འཇུག་པའི་ཕྱིར་རོ། །རབ་འབྱོར། ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྱ་བ་མཉམ་
པ་མེད་པས་ཉེ་བར་གནས་ཤེ་ན། རབ་འབྱོར། དེ་བཞིན་གཤེགས་པས་དེ་བཞིན་གཤེགས་པ་ཉིད་དང༌། སངས་རྒྱས་ཉིད་དང༌། རང་བྱུང་ཉིད་དང༌། ཐམས་ཅད་མཁྱེན་པ་ཉིད་ནི། བསམ་པའམ།
༄༅། །སྙམ་པར་མི་ནུས་སོ། །རབ་འབྱོར། དེ་ལྟར་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བྱ་བ་མཉམ་པ་མེད་པས་ཉེ་བར་གནས་སོ། །རབ་འབྱོར། ཇི་ལྟར་ན།
ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྱ་བ་གཞལ་དུ་མེད་པས་ཉེ་བར་གནས་ཤེ་ན། རབ་འབྱོར། དེ་བཞིན་གཤེགས་པ་ཉིད་དང༌། སངས་རྒྱས་ཉིད་དང༌། རང་བྱུང་ཉིད་དང༌། ཐམས་ཅད་
མཁྱེན་པ་ཉིད་ནི། གཞལ་དུ་མེད་པ་ཡིན་ཏེ། རབ་འབྱོར། དེ་ལྟར་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བྱ་བ་གཞལ་དུ་མེད་པས་ཉེ་བར་གནས་སོ། །རབ་འབྱོར། ཇི་ལྟར་ན།
ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྱ་བ་གྲངས་མེད་པས་ཉེ་བར་གནས་ཤེ་ན། རབ་འབྱོར། དེ་བཞིན་གཤེགས་པ་ཉིད་དང༌། སངས་རྒྱས་ཉིད་དང༌། རང་བྱུང་ཉིད་དང༌། ཐམས་ཅད་མཁྱེན་
པ་ཉིད་ནི། གྲངས་མེད་པ་ཡིན་ཏེ། རབ་འབྱོར། དེ་ལྟར་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བྱ་བ་གྲངས་མེད་པས་ཉེ་བར་གནས་སོ། །རབ་འབྱོར། ཇི་ལྟར་ན། ཤེས་རབ་ཀྱི་ཕ་རོལ་
ཏུ་ཕྱིན་པ་འདི་ནི། བྱ་བ་མི་མཉམ་པ་དང་མཉམ་པས་ཉེ་བར་གནས་ཤེ་ན། རབ་འབྱོར། དེ་བཞིན་གཤེགས་པ་ཉིད་དང༌། སངས་རྒྱས་ཉིད་དང༌། རང་བྱུང་ཉིད་དང༌། ཐམས་ཅད་མཁྱེན་པ་
ཉིད་རྣམས་ལ་མཉམ་པའང་མེད་ན། ལྷག་པ་ལྟ་ཅི་སྨོས། རབ་།འབྱོར། དེ་ལྟར་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྱ་བ་མི་མཉམ་པ་དང་མཉམ་པས་ཉེ་བར་གནས་སོ། །གནས་བརྟན་
རབ་འབྱོར་གྱིས་གསོལ་པ། བཅོམ་ལྡན་འདས། ཅི་ལགས། དེ་བཞིན་གཤེགས་པ་ཉིད་བསམ་གྱིས་མི་ཁྱབ་པ། མཉམ་པ་མ་མཆིས་པ། གཞལ་དུ་མ་མཆིས་པ། གྲངས་མ་མཆིས་པ། མི་
མཉམ་པ་དང་མཉམ་པ་ལགས་སམ། དེ་བཞིན་དུ་སངས་རྒྱས་ཉིད་དང༌། དེ་བཞིན་དུ་རང་བྱུང་ཉིད་དང༌། དེ་བཞིན་དུ་ཐམས་ཅད་མཁྱེན་པ་ཉིད་བསམ་གྱིས་མི་ཁྱབ་པ། མཉམ་པ་མ་མཆིས་པ། གཞལ་དུ་
མ་མཆིས་པ། གྲངས་མ་མཆིས་པ། མི་མཉམ་པ་དང་མཉམ་པ་ལགས་སམ། འོན་ཏེ་གཟུགས་ཀྱང་བསམ་གྱིས་མི་ཁྱབ་པ། མཉམ་པ་མ་མཆིས་པ། གཞལ་དུ་མ་མཆིས་པ། གྲངས་མ་
མཆིས་པ། མི་མཉམ་པ་དང་མཉམ་པ་ལགས། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། འོན་ཏེ་རྣམ་པར་ཤེས་པའང་བསམ་གྱིས་མི་ཁྱབ་པ། མཉམ་པ་མ་མཆིས་
པ༑ གཞལ་དུ་མ་མཆིས་པ། གྲངས་མ་མཆིས་པ། མི་མཉམ་པ་དང་མཉམ་པ་ལགས། འོན་ཏེ་ཆོས་ཐམས་ཅད་ཀྱང་བསམ་གྱིས་མི་ཁྱབ་པ། མཉམ་པ་མ་མཆིས་པ། གཞལ་དུ་མ་མཆིས་
པ༑ གྲངས་མ་མཆིས་པ། མི་མཉམ་པ་དང་མཉམ་པ་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་
དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། གཟུགས་ཀྱང་བསམ་གྱིས་མི་ཁྱབ་པ། མཉམ་པ་མེད་པ། གཞལ་དུ་མེད་པ། གྲངས་མེད་པ། མི་མཉམ་པ་དང་མཉམ་པའོ། །རབ་འབྱོར། དེ་
༄༅། །བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའང་བསམ་གྱིས་མི་ཁྱབ་པ། མཉམ་པ་མེད་པ། གཞལ་དུ་མེད་པ། གྲངས་
མེད་པ༑ མི་མཉམ་པ་དང་མཉམ་པའོ། །རབ་འབྱོར། དེ་བཞིན་དུ་ཆོས་ཐམས་ཅད་ཀྱང་བསམ་གྱིས་མི་ཁྱབ་པ། མཉམ་པ་མེད་པ། གཞལ་དུ་མེད་པ། གྲངས་མེད་པ། མི་མཉམ་པ་དང་
མཉམ་པའོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་ཀྱི་ཆོས་ཉིད་གང་ཡིན་པ་དེ་ལ་ནི། སེམས་མེད། སེམས་པ་མེད། སེམས་ལས་བྱུང་བའི་ཆོས་རྣམས་མེད་པས་སྙམ་དུ་མེད་དོ། །
རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའི་ཆོས་ཉིད་གང་ཡིན་པ་དེ་ལ་ནི། སེམས་མེད། སེམས་པ་མེད། སེམས་ལས་བྱུང་
བའི་ཆོས་རྣམས་མེད་པས་སྙམ་དུ་མེད་དོ། །རབ་འབྱོར། ཆོས་ཐམས་ཅད་ཀྱི་ཆོས་ཉིད་གང་ཡིན་པ་དེ་ལ་ནི། སེམས་མེད། སེམས་པ་མེད། སེམས་ལས་བྱུང་བའི་ཆོས་རྣམས་
མེད་པས་སྙམ་དུ་མེད་དོ། །རབ་འབྱོར། དེ་ལྟར་ན། གཟུགས་ཀྱང་བསམ་གྱིས་མི་ཁྱབ་པ། མཉམ་པ་མེད་པའོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་
བྱེད་རྣམས་དང༌། རྣམ་པར་ཤེས་པའང་བསམ་གྱིས་མི་ཁྱབ་པ། མཉམ་པ་མེད་པའོ། །རབ་འབྱོར། དེ་བཞིན་དུ་ཆོས་ཐམས་ཅད་ཀྱང་བསམ་གྱིས་མི་ཁྱབ་པ། མཉམ་པ་མེད་
པའོ༑ ༑རབ་འབྱོར། གཟུགས་ཀྱང་གཞལ་དུ་མེད་པའོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའང་གཞལ་དུ་མེད་པའོ། །རབ་
འབྱོར༑ ཆོས་ཐམས་ཅད་ཀྱང་གཞལ་དུ་མེད་པའོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་ཀྱི་ཚད་མ་མི་ཤེས་སོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌།
འདུ་བྱེད་རྣམས་དང༌། རྣམ་པར་ཤེས་པའི་ཚད་མ་མི་ཤེས་ཏེ། རབ་འབྱོར། ཆོས་ཐམས་ཅད་ཀྱི་ཡང་ཚད་མ་མི་ཤེས་སོ། །རབ་འབྱོར། ཅིའི་ཕྱིར་གཟུགས་ཀྱི་ཚད་མ་རབ་ཏུ་
མི་ཤེས༑ དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རབ་འབྱོར། ཅིའི་ཕྱིར་རྣམ་པར་ཤེས་པའི་ཚད་མ་རབ་ཏུ་མི་ཤེས། རབ་འབྱོར། ཅིའི་ཕྱིར་ཆོས་
ཐམས་ཅད་ཀྱིའང་ཚད་མ་རབ་ཏུ་མི་ཤེས་ཤེ་ན། རབ་འབྱོར། གཟུགས་ལ་ཚད་མ་མེད་དོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་
པར་ཤེས་པ་ལ་ཚད་མ་མེད་དེ། རབ་འབྱོར། ཆོས་ཐམས་ཅད་ལའང་ཚད་མ་མེད་དོ། །རབ་འབྱོར། ཅིའི་ཕྱིར་གཟུགས་ལ་ཚད་མ་མེད། རབ་འབྱོར། ཅིའི་ཕྱིར་དེ་བཞིན་དུ་ཚོར་བ་
དང༌། འདུ་ཤེས་དང༌། འདུ་བྱེད་རྣམས་དང༌། རབ་འབྱོར། ཅིའི་ཕྱིར་རྣམ་པར་ཤེས་པ་ལ་ཚད་མ་མེད། རབ་འབྱོར། ཅིའི་ཕྱིར་ཆོས་ཐམས་ཅད་ལ་ཚད་མ་མེད་ཅེ་ན། རབ་འབྱོར། ཆོས་
༄༅། །ཐམས་ཅད་ནི། ཚད་མ་མེད་པ་ཡིན་པའི་ཕྱིར་རོ། །རབ་འབྱོར། གཟུགས་ཀྱང་གྲངས་མེད་པའོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་
རྣམས་དང༌། རྣམ་པར་ཤེས་པ་ཡང་གྲངས་མེད་པའོ། །རབ་འབྱོར། ཆོས་ཐམས་ཅད་ཀྱང་གྲངས་མེད་པ་སྟེ། བགྲང་བ་ལས་འདས་པ་ཉིད་ཡིན་པའི་ཕྱིར་རོ། །རབ་འབྱོར།
གཟུགས་ཀྱང་མི་མཉམ་པ་དང་མཉམ་པའོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའང་མི་མཉམ་པ་དང་མཉམ་པའོ། །རབ་
འབྱོར༑ དེ་བཞིན་དུ་ཆོས་ཐམས་ཅད་ཀྱང་མི་མཉམ་པ་དང་མཉམ་པ་སྟེ། རབ་འབྱོར། ཆོས་ཐམས་ཅད་ནི། ནམ་མཁའ་དང་མཉམ་པའི་ཕྱིར་རོ། །རབ་འབྱོར། དེ་ཇི་སྙམ་དུ་སེམས།
ཅི་ནམ་མཁའ་ལ་མཉམ་པའམ། གྲངས་སམ། ཚད་མའམ། སྙོམས་པའམ། སེམས་སམ། སེམས་པའམ། སེམས་ལས་བྱུང་བའི་ཆོས་གང་ཡང་ཡོད་དམ། རབ་འབྱོར་གྱིས་
གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ཁོ་ན་བཞིན་དུ་རྣམ་གྲངས་འདིས་ཆོས་འདི་ཐམས་ཅད་ཀྱང་
བསམ་གྱིས་མི་ཁྱབ་པ། མཉམ་པ་མེད་པ། གཞལ་དུ་མེད་པ། གྲངས་མེད་པ། མི་མཉམ་པ་དང་མཉམ་པ་སྟེ། རབ་འབྱོར། འདི་དག་ནི། དེ་བཞིན་གཤེགས་པའི་ཆོས་ཡིན་
ནོ༑ ༑རབ་འབྱོར། རྣམ་གྲངས་འདིས་ཀྱང་ཆོས་ཐམས་ཅད་ནི། བསམ་གྱིས་མི་ཁྱབ། མཉམ་པ་མེད། གཞལ་དུ་མེད། གྲངས་མེད། མི་མཉམ་པ་དང་མཉམ་པ་སྟེ། རབ་འབྱོར། དེ་བཞིན་
གཤེགས་པའི་ཆོས་འདི་དག་ནི། སེམས་དང་བྲལ་བའི་ཕྱིར་བསམ་གྱིས་མི་ཁྱབ་བོ། །སྙོམས་པ་ལས་ཡང་དག་པར་འདས་པའི་ཕྱིར་མཉམ་པ་མེད་དོ། །རབ་འབྱོར། བསམ་གྱིས་མི་ཁྱབ་
པ་དང༌། མཉམ་པ་མེད་པ་ཞེས་བྱ་བ་འདི་ནི། རྣམ་པར་ཤེས་པར་གྱུར་པའི་ཆོས་ཀྱི་ཚིག་བླ་དྭགས་སོ། །གཞལ་དུ་མེད་པ་དང༌། བགྲང་དུ་མེད་པ་དང༌། མི་མཉམ་པ་དང་མཉམ་པ་ཞེས་བྱ་བའང༌།
དེ་བཞིན་ཏེ། རབ་འབྱོར། གཞལ་དུ་མེད་པ། བགྲང་དུ་མེད་པ་དང༌། མི་མཉམ་པ་དང་མཉམ་པ་ཞེས་བྱ་བ་ནི། མཉམ་པ་དང༌། གྲངས་དང༌། ཚད་མ་དང་བྲལ་བའི་ཕྱིར་ཏེ། དེ་བཞིན་
གཤེགས་པའི་ཆོས་རྣམས་གཞལ་དུ་མེད་པ་དང༌། བགྲང་དུ་མེད་པ་དང༌། མི་མཉམ་པ་དང་མཉམ་པ་ཡིན་ནོ། །ཆོས་འདི་དག་ནི། ནམ་མཁའ་དང་མཉམ་པ་དང༌། བགྲང་དུ་མེད་པ་དང༌།
གཞལ་དུ་མེད་པ་ཉིད་ཀྱིས་ན། མི་མཉམ་པ་དང་མཉམ་པ་དང༌། བགྲང་དུ་མེད་པ་དང༌། གཞལ་དུ་མེད་པ་ཡིན་ནོ། །ཀྱེ་མ་ཆོས་འདི་དག་ནི། ནམ་མཁའ་དང་མཉམ་པས་མི་མཉམ་པ་དང༌།
མཉམ་པར་མི་འཇུག་པ་ཡིན་ཏེ། རབ་འབྱོར། དེ་བས་ན། ཆོས་འདི་དག་ནི། མཉམ་པ་མེད་པ་ཞེས་བརྗོད་དོ། །ནམ་མཁའ་བསམ་གྱིས་མི་ཁྱབ་པའི་ཕྱིར་ཆོས་འདི་དག་བསམ་གྱིས་མི་ཁྱབ་པའོ། །
༄༅། །ནམ་མཁའ་མཉམ་པ་མེད་པའི་ཕྱིར་ཆོས་འདི་དག་མཉམ་པ་མེད་པའོ། །ནམ་མཁའ་གཞལ་དུ་མེད་པའི་ཕྱིར་ཆོས་འདི་དག་གཞལ་དུ་མེད་པའོ། །ནམ་མཁའ་གྲངས་
མེད་པའི་ཕྱིར་ཆོས་འདི་དག་གྲངས་མེད་པའོ། །ནམ་མཁའ་མི་མཉམ་པ་དང་མཉམ་པའི་།ཕྱིར་ཆོས་འདི་དག་ནི་མི་མཉམ་པ་དང་མཉམ་པའོ། །བཅོམ་ལྡན་འདས་ཀྱིས་བསམ་གྱིས་མི་ཁྱབ་པ་དང༌།
མཉམ་པ་མེད་པ་དང༌། གཞལ་དུ་མེད་པ་དང༌། གྲངས་མེད་པ་དང༌། མི་མཉམ་པ་དང་མཉམ་པ་འདི་དག་བཤད་པ་ནའང་དགེ་སློང་ལྔ་བརྒྱ་ལེན་པ་མེད་པར་ཟག་པ་ལས་སེམས་རྣམ་པར་གྲོལ་
ལོ༑ ༑དགེ་སློང་མ་ཉིས་སྟོང་ཡང་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །དགེ་བསྙེན་པ་དྲུག་སྟོང་ཡང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་
གོ །དགེ་བསྙེན་མ་སུམ་སྟོང་ཡང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། བྱང་ཆུབ་སེམས་དཔའ་ཉི་ཁྲིས་ཀྱང་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །
དེ་དག་ཀྱང་བསྐལ་པ་བཟང་པོ་འདི་ཉིད་ལ་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དགེ་བསྙེན་དང་དགེ་བསྙེན་མ་གང་དག་ཆོས་རྣམས་ལ་ཆོས་
ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པ་དེ་དག་ཀྱང་བཅོམ་ལྡན་འདས་ཀྱིས་ལུང་བསྟན་ཏེ། དེ་དག་ཀྱང་ལེན་པ་མེད་པར་ཟག་པ་ལས་སེམས་རྣམ་པར་གྲོལ་བར་འགྱུར་རོ། །དེ་ནས་
བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཟབ་སྟེ། བཅོམ་ལྡན་འདས། ཀྱེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་
འདི་ནི༑ བགྱི་བ་ཆེན་པོས་ཉེ་བར་གནས་པ་ལགས་སོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །
དེ་དེ་བཞིན་ཏེ། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཟབ་བོ། །རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བྱ་བ་ཆེན་པོས་ཉེ་བར་གནས་སོ། །དེ་ཅིའི་ཕྱིར་ཞེ་ན། རབ་འབྱོར་
འདི་ནི། ཐམས་ཅད་མཁྱེན་པ་ཉིད་དང་ཡང་དག་པར་ལྡན་ནོ། །འདི་ནི། རང་སངས་རྒྱས་ཀྱི་ས་དང་ཡང་དག་པར་ལྡན་ནོ། །འདི་ནི། ཉན་ཐོས་ཀྱི་ས་དང་ཡང་དག་པར་ལྡན་ནོ། །རབ་འབྱོར། འདི་
ལྟ་སྟེ༑ དཔེར་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ། ཡུལ་གྱི་མི་ལ་མཐུ་དང༌། བརྩོན་འགྲུས་ཐོབ་པའི་རྒྱལ་པོའི་བྱ་བ་གང་ཞིག་ཡིན་པ་དང༌། གྲོང་ཁྱེར་གྱི་བྱ་བ་གང་ཡིན་པ་དང༌།
ལྗོངས་ཀྱི་བྱ་བ་གང་ཡིན་པ་དེ་དག་ཐམས་ཅད་ནི། བློན་པོ་དང་འབྲེལ་པར་འགྱུར་ཏེ། དེའི་ཕྱིར་རྒྱལ་པོ་ནི། བརྩོན་པ་ཆུང་ཞིང་ཁུར་བོར་བར་འགྱུར་རོ། །རབ་འབྱོར། དེ་བཞིན་དུ་གང་སངས་རྒྱས་
ཀྱི་ཆོས་སམ། རང་སངས་རྒྱས་ཀྱི་ཆོས་སམ། ཉན་ཐོས་ཀྱི་ཆོས་ཀྱང་རུང་སྟེ། དེ་དག་ཐམས་ཅད་ནི། ཤེས་རབ་ཀྱི་ཕ་རོལ་ཏུ་ཕྱིན་པ་དང་ཡང་དག་པར་ལྡན་པས་ཤེས་རབ་ཀྱི་ཕ་རོལ་ཏུ་ཕྱིན་པ་
༄༅། །ཉིད་དེ་ལ་བྱ་བ་བྱེད་དོ། །རབ་འབྱོར། རྣམ་གྲངས་འདིས་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བྱ་བ་ཆེན་པོས་ཉེ་བར་གནས་སོ། །གཟུགས་ལ་ཡོངས་སུ་མི་འཛིན་
ཅིང་མངོན་པར་མ་ཞེན་པར་བྱ་བའི་ཕྱིར་དང༌། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ལ་ཡོངས་སུ་མི་འཛིན་ཅིང་མངོན་པར་མ་ཞེན་པར་བྱ་བའི་
ཕྱིར་དང༌། རྒྱུན་དུ་ཞུགས་པའི་འབྲས་བུ་ལ་ཡོངས་སུ་མི་འཛིན་ཅིང་མངོན་པར་མ་ཞེན་པར་བྱ་བའི་ཕྱིར་དང༌། དེ་བཞིན་དུ་ལན་ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བའི་
འབྲས་བུ་དང༌། དགྲ་བཅོམ་པ་ལ་ཡོངས་སུ་མི་འཛིན་ཅིང་མངོན་པར་མ་ཞེན་པར་བྱ་བའི་ཕྱིར་དང༌། རང་བྱང་ཆུབ་ལ་ཡོངས་སུ་མི་འཛིན་ཅིང་མངོན་པར་མ་ཞེན་པར་བྱ་བའི་ཕྱིར་དང༌། ཐམས་
ཅད་མཁྱེན་པ་ཉིད་ལ་ཡོངས་སུ་མི་འཛིན་ཅིང་མངོན་པར་མ་ཞེན་པར་བྱ་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཉེ་བར་གནས་སོ། །རབ་འབྱོར་གྱིས་གསོལ་པ། བཅོམ་ལྡན་འདས། ཇི་ལྟར་
ན༑ ཐམས་ཅད་མཁྱེན་པ་ཉིད་ལ་ཡོངས་སུ་མི་འཛིན་ཅིང་མངོན་པར་མ་ཞེན་པར་བགྱི་བའི་སླད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཉེ་བར་གནས་པ་ལགས། བཅོམ་ལྡན་འདས་ཀྱིས་བཀའ་
སྩལ་པ༑ རབ་འབྱོར། དེ་ཇི་སྙམ་དུ་སེམས། གང་ལ་ཡོངས་སུ་འཛིན་པའམ། མངོན་པར་ཞེན་པར་བྱེད་པ་དགྲ་བཅོམ་པ་ཉིད་ཅི་ཁྱོད་ཀྱིས་ཡང་དག་པར་རྗེས་སུ་མཐོང་ངམ། རབ་འབྱོར་
གྱིས་གསོལ་པ། བཅོམ་ལྡན་འདས། དེ་ནི། མ་ལགས་ཏེ། བཅོམ་ལྡན་འདས། གང་ལ་ཡོངས་སུ་འཛིན་པའམ་མངོན་པར་ཞེན་པར་འགྱུར་བ་དགྲ་བཅོམ་པ་ཉིད་ཀྱི་ཆོས་དེ་ལྟ་བུ་ནི། བདག་
གིས་ཡང་དག་པར་རྗེས་སུ་མ་མཐོང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། ངས་ཀྱང་དེ་བཞིན་གཤེགས་པ་ཉིད་ཡང་
དག་པར་རྗེས་སུ་མ་མཐོང་སྟེ། རབ་འབྱོར། ངས་དེ་བཞིན་གཤེགས་པ་ཉིད་དེ་ཡང་དག་པར་རྗེས་སུ་མ་མཐོང་བས་ཡོངས་སུ་འཛིན་པར་མི་བྱེད། མངོན་པར་ཞེན་པར་མི་བྱེད་དོ། །
རབ་འབྱོར། དེ་ལྟ་བས་ན། ཐམས་ཅད་མཁྱེན་པ་ཉིད་ལའང་ཡོངས་སུ་འཛིན་པ་མེད་ཅིང་མངོན་པར་ཞེན་པ་མེད་དོ། །རབ་འབྱོར་གྱིས་གསོལ་པ། བཅོམ་ལྡན་འདས། ཐེག་པ་ལ་
གསར་དུ་ཞུགས་པ་དགེ་བའི་རྩ་བ་ཆུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་བཅོམ་ལྡན་འདས། ཐམས་ཅད་མཁྱེན་པ་ཉིད་ལའང་ཡོངས་སུ་མི་འཛིན་ཅིང་མངོན་པར་ཞེན་པ་
མེད་དོ༑ ༑ཞེས་བགྱི་བའི་བསྟན་པ་འདི་ཐོས་ན། དངང་ཞིང་ཀུན་ཏུ་སྐྲག་ལ། ཀུན་ཏུ་སྐྲག་པ་དང་ལྡན་པར་འགྱུར་དུ་མཆིའོ། །བཅོམ་ལྡན་འདས། འོན་ཀྱང་བྱང་ཆུབ་སེམས་དཔའ་སེམས་དཔའ་
ཆེན་པོ་གང་རྒྱུ་ཕུན་སུམ་ཚོགས་པ། སྔོན་གྱི་རྒྱལ་བ་ལ་བགྱི་བ་བགྱིས་པ་དང༌། ཡུན་རིང་པོ་ནས་དགེ་བའི་རྩ་བ་བསྐྲུན་པར་གྱུར་པ་དེ་དག་གིས་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་
༄༅། །ཐོས་ན༑ མོས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་དེ་བཞིན་ནོ། དེ་དེ་བཞིན་ཏེ། །དེ་ནས་བཅོམ་ལྡན་འདས་ལ་འདོད་
པ་ན་སྤྱོད་པ་དང༌། གཟུགས་ན་སྤྱོད་པའི་ལྷའི་བུ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཟབ་ཅིང་བལྟ་དཀའ་བ། རྟོགས་པར་དཀའ་
བ་ལགས་ཏེ། བཅོམ་ལྡན་འདས། གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ནས་མོས་པར་འགྱུར་བའི་བྱང་ཆུབ་སེམས་དཔའ་དེ་དག་ནི། སྔོན་གྱི་རྒྱལ་བ་ལ་བགྱི་བ་བགྱིས་
པ༑ ཡུན་རིང་པོར་དགེ་བའི་རྩ་བ་བསྐྲུན་པའོ། །བཅོམ་ལྡན་འདས། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དག་ན་སེམས་ཅན་ཇི་སྙེད་མཆིས་པ་དེ་དག་ཐམས་ཅད་
ཀྱིས་དད་པའི་རྗེས་སུ་འབྲང་བའི་ས་ལ་བསྐལ་པའམ། བསྐལ་པ་བས་ལྷག་པར་སྤྱད་པ་དང༌། གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་ཉི་མ་གཅིག་ཙམ་ཡང་བཟོད་ཅིང་སྲེད་
དེ་ཚོལ་བ་དང༌། སེམས་པ་དང༌། འཇལ་བ་དང༌། ཉེ་བར་རྟོག་པ་དང༌། ཉེ་བར་སེམས་པར་བགྱིད་ན། བཅོམ་ལྡན་འདས། འདི་ཉིད་དེ་དག་པས་མཆོག་ཏུ་འགྱུར་རོ། །དེ་སྐད་ཅེས་གསོལ་པ་
དང་བཅོམ་ལྡན་འདས་ཀྱིས་འདོད་པ་ན་སྤྱོད་པ་དང༌། གཟུགས་ན་སྤྱོད་པའི་ལྷའི་བུ་དེ་རྣམས་ལ་བཀའ་སྩལ་པ། ལྷའི་བུ་དག། གལ་ཏེ་རིགས་ཀྱི་བུའམ་རིགས་ཀྱི་བུ་མོ་གང་དག་ཤེས་རབ་
ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉན་ན། ལྷའི་བུ་དག །དེས་ནི། ཆེས་མྱུར་བར་མྱ་ངན་ལས་འདའ་བའི་བར་དུ་རེ་བར་བྱ་སྟེ། དད་པས་རྗེས་སུ་འབྲང་བའི་ས་ལ་བསྐལ་པའམ། བསྐལ་པ་བས་ལྷག་པར་
སྤྱོད་པ་དེ་དག་གིས་ནི། མ་ཡིན་ནོ། །དེ་ནས་འདོད་པ་ན་སྤྱོད་པའི་ལྷའི་བུ་དང༌། གཟུགས་ན་སྤྱོད་པའི་ལྷའི་བུ་དེ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས༑ འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཕ་རོལ་ཏུ་ཕྱིན་པ་ཆེན་པོའོ། །ཞེས་གསོལ་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་
ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་དྲུང་ནས་མཆིའོ། །ཞེས་གསོལ་ཏེ་དོང་ངོ༌། །དེ་དག་ཧ་ཅང་ཡང་མི་རིང་བ་ཞིག་ཏུ་ཕྱིན་ནས་མི་སྣང་བར་གྱུར་ཏེ། འདོད་པ་ན་སྤྱོད་པའི་ལྷའི་
བུ་རྣམས་ནི། འདོད་པའི་ཁམས་སུ་གནས་པར་གྱུར། གཟུགས་ན་སྤྱོད་པའི་ལྷའི་བུ་རྣམས་ནི། ཚངས་པའི་འཇིག་རྟེན་དུ་གནས་པར་གྱུར་ཏོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་
བརྒྱད་སྟོང་པ་ལས། བསམ་གྱིས་མི་ཁྱབ་པའི་ལེའུ་ཞེས་བྱ་བ་སྟེ། བཅུ་གསུམ་པའོ།། །།དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་
གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཐོས་པ་དང་ལྷན་ཅིག་ཁོ་ནར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཆད་པ་ཐོས་ལ་མོས་ཤིང་མི་འགོང༌།
༄༅། །ཀུན་ཏུ་མི་ཞུམ། རྣམ་པར་མི་གནས། མི་རྨོངས། ཐེ་ཚོམ་མི་ཟ། སོམ་ཉི་མི་ཟ་བར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མངོན་པར་དགའ་ན། བཅོམ་ལྡན་འདས།
དེ་གང་ནས་ཤི་འཕོས་ནས་གང་དུ་སྐྱེ་བར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཐོས་པ་དང་ལྷན་
ཅིག་ཁོ་ནར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཆད་པ་ཐོས་ལ་མོས་ཤིང་མི་འགོང༌། ཀུན་ཏུ་མི་ཞུམ། རྣམ་པར་མི་གནས། མི་རྨོངས། ཐེ་ཚོམ་མི་ཟ། སོམ་ཉི་མི་ཟ་བར་བལྟ་
བ་དང༌། མཉན་པ་ལ་མངོན་པར་དགའ་བར་འགྱུར་ཞིང༌། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཛིན་ཅིང་སྒོམ་པར་འགྱུར་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་
བྱེད་པ་མི་སྤོང་ཞིང་ཡིད་ཕྱིར་ཕྱོགས་པར་མི་བྱེད། གཟུང་བ་དང༌། བཅང་བ་དང༌། བཀླག་པ་དང༌། ཀུན་ཆུབ་པར་བྱ་བ་དང༌། རབ་ཏུ་འདོན་པའི་ཕྱིར་འདུན་པ་བསྐྱེད་པར་འགྱུར། རྗེས་སུ་འབྲང་
ཞིང་ཕྱི་བཞིན་འགྲོ་བར་འགྱུར། ཆོས་སྨྲ་བ་མི་གཏོང་བར་འགྱུར་ཏེ། རབ་འབྱོར། འདི་ལྟ་སྟེ། དཔེར་ན། བ་བེའུ་གཞོན་ནུ་ཡོད་པ་བེའུ་མི་གཏོང་བ་དེ་བཞིན་དུ་རབ་འབྱོར། བྱང་ཆུབ་
སེམས་དཔའ་སེམས་དཔའ་ཆེན་པོ་གང་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་ནས་ཇི་སྲིད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལུས་ལ་ཐོགས་པའམ། གླེགས་བམ་དུ་ཆུད་
པར་མ་གྱུར་པ་དེ་སྲིད་དུ་ཆོས་སྨྲ་བ་མི་གཏོང་བར་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། རབ་འབྱོར། མི་དག་གི་ནང་ནས་ཤི་འཕོས་ནས་མིར་སྐྱེས་པ་ཡིན་ནོ། །རབ་
འབྱོར་གྱིས་གསོལ་པ། བཅོམ་ལྡན་འདས། ཡོན་ཏན་འདི་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་གཞན་ནས་ཤི་འཕོས་ནས་འདིར་སྐྱེས་པ་
གྱུར་པ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་བཅོམ་ལྡན་འདས་གཞན་དག་ལ་བསྙེན་བཀུར་བྱས་
ཤིང་ཡོངས་སུ་ཞུས་ཡོངས་སུ་དྲིས་ལ་ཡོངས་སུ་དྲི་བ་བྱས་ཏེ་སངས་རྒྱས་ཀྱི་ཞིང་གཞན་དེ་དག་ནས་ཤི་འཕོས་ནས་འདིར་སྐྱེས་པའང་ཡོད་དེ། དེའང་ཡོན་ཏན་འདི་དག་ཉིད་དང་ལྡན་པར་རིག་
པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དགའ་ལྡན་གྱི་ལྷ་དག་གི་ནང་ནས་ཤི་འཕོས་ནས་འདིར་སྐྱེས་པ་དེའང་ཡོན་ཏན་དེ་དག་ཉིད་དང་ལྡན་པར་
རིག་པར་བྱ་སྟེ། གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བསྙེན་བཀུར་བྱས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་བརྩམས་ཏེ། ཡོངས་སུ་ཞུས་ཤིང་
ཡོངས་སུ་དྲིས་ལ་ཡོངས་སུ་དྲི་བ་བྱས་པ་དེའང་ཡོན་ཏན་འདི་དག་དང་ལྡན་པར་རིག་པར་བྱའོ། །རབ་འབྱོར། ཡང་བྱང་ཆུབ་སེམས་དཔའ་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་
༄༅། །ཐོས་ནས་སྔོན་གྱི་མཐར་ཡང་ཡོངས་སུ་མ་ཞུས་ཤིང་ཡོངས་སུ་མ་དྲིས། ཡོངས་སུ་དྲི་བ་མ་བྱས་པ་དེ་ནི། མི་ཉིད་ཀྱི་ནང་དུ་སྐྱེས་ན་ཡང་ཤེས་རབ་ཀྱི་ཕ་རོལ་ཏུ་ཕྱིན་
པ་ཟབ་མོ་འདི་བཤད་པ་ལ་ནེམ་ནུར་དུ་འགྱུར། རྨོངས་པར་འགྱུར། སེམས་ཞུམ་པར་འགྱུར་ཏེ། རབ་འབྱོར། བྱང་ཆུབ་སེམས་དཔའ་དེ་ནི། སྔོན་གྱི་མཐར་ཡང་ཡོངས་སུ་མི་དྲི་བའི་རང་
བཞིན་དུ་གྱུར་པར་རིག་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཤད་པ་ལ་ནེམ་ནུར་དུ་གྱུར། རྨོངས་པར་གྱུར། སེམས་ཞུམ་པ་ཉིད་
དུ་གྱུར་པའི་ཕྱིར་རོ། །རབ་འབྱོར། གཞན་ཡང་བྱང་ཆུབ་སེམས་དཔའ་གང་གིས་སྔོན་གྱི་མཐར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉིད་ཉི་མ་གཅིག་གམ། གཉིས་སམ།
གསུམ་མམ། བཞིའམ། ལྔ་ཙམ་དུ་ཐོས་པར་གྱུར་ཏེ། བསྙེན་བཀུར་བྱས་ནས་ཡོངས་སུ་ཞུས་ཤིང་ཡོངས་སུ་དྲིས་ལ་ཡོངས་སུ་དྲི་བ་བྱས་པ་དེ་ནི། དུས་རེ་ཤིག་དད་པ་ཡིན་ཏེ། སླར་
ཡང་སྟོར་བར་འགྱུར་ཞིང་ཡོངས་སུ་དྲི་བས་འཕྲོག་པར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། དེ་ནི། འདི་ལྟར་ཡིན་ཏེ། གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་སྔོན་
ཡོངས་སུ་མ་ཞུས། ཡང་དག་པར་ཡོངས་སུ་མ་དྲིས། ཡང་དག་པར་ཡོངས་སུ་དྲི་བ་མ་བྱས་ཤིང་རྗེས་སུ་མ་འབྲངས་པར་གྱུར་པ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་མཉན་པར་
བྱ་བའི་ཕྱིར་རེས་འགའ་ནི། འདུན་པས་རྗེས་སུ་འབྲང་བར་འགྱུར། རེས་འགའ་ནི། འདུན་པར་མི་འགྱུར་བ་དེ་ཕྱིར་ཞིང་གཡེངས་པ་དང་ཞུམ་པར་འགྱུར། དེའི་བློ་རྒོད་པར་འགྱུར་ཞིང་རས་བལ་གྱི་འདབ་
མ་བཞིན་དུ་འགྱུར་ཏེ། བྱང་ཆུབ་སེམས་དཔའ་འདི་ནི། ཐེག་པ་ལ་ཡང་དག་པར་ཞུགས་ནས་རིང་པོ་མ་ལོན་ཞིང་ཐེག་པ་ལ་གསར་དུ་ཞུགས་ཏེ་འོངས་པར་རིག་པར་བྱའོ། །བྱང་ཆུབ་སེམས་
དཔའ་དེ་ནི། དད་པ་དེ་དང༌། དང་བ་དེ་དང༌། འདུན་པ་དེ་རབ་ཏུ་གཏོང་བར་འགྱུར་ཏེ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་རྗེས་སུ་འཛིན་པར་མི་འགྱུར། རྗེས་སུ་འཇུག་པར་མི་
འགྱུར༑ རྗེས་སུ་བསྟེན་པར་མི་འགྱུར་བས་དེ་ཉན་ཐོས་ཀྱི་སའམ། རང་སངས་རྒྱས་ཀྱི་སའམ། དེ་ས་གཉིས་ལས་གང་ཡང་རུང་བའི་ས་གཅིག་ཏུ་རེ་བར་བྱའོ། །རབ་འབྱོར། འདི་ལྟ་སྟེ། དཔེར་
ན༑ རྒྱ་མཚོ་ཆེན་པོར་ཞུགས་པའི་གྲུ་ཆག་པ་ན་གང་དག་དེར་ཤིང་ངམ་སྤང་ལེབ་ལ་མི་འཛིན་ཏམ། ཤི་བའི་རོ་ལ་མི་འཇུ་ན། རབ་འབྱོར། དེ་ནི། ཆུའི་ཕ་རོལ་གྱི་འགྲམ་དུ་མ་ཕྱིན་པར་
ཆུའི་ནང་དུ་འཆི་བའི་དུས་བྱེད་པར་འགྱུར་རོ། །ཞེས་རིག་པར་བྱའོ། །རབ་འབྱོར། ཡང་གང་དག་རྒྱ་མཚོ་ཆེན་པོར་ཞུགས་པའི་གྲུ་ཆག་པ་ན་དེར་ཤིང་ངམ། སྤང་ལེབ་བམ། ཤི་བའི་རོ་ལ་འཇུ་ན། རབ་
འབྱོར༑ དེ་ནི། ཆུས་འཆི་བའི་དུས་བྱེད་པར་མི་འགྱུར་ཞིང་བདེ་བར་ཕ་རོལ་གྱི་འགྲམ་དུ་ཕྱིན་པར་འགྱུར་ཏེ། མ་རྨས་མ་སྣད་པར་སྐམ་ས་ལ་གནས་པར་འགྱུར་རོ། །ཞེས་རིག་པར་བྱའོ། །རབ་འབྱོར།
༄༅། །དེ་བཞིན་དུ་བྱང་ཆུབ་སེམས་དཔའ་དད་པ་ཙམ་དང༌། དགའ་བ་ཙམ་དང༌། དང་བ་ཙམ་དང༌། འདུན་པ་ཙམ་དང་ལྡན་ཡང་དེས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མ་བརྟེན་ན། རབ་
འབྱོར༑ དེ་ནི། ལམ་གྱི་བར་མ་དོར་རྣམ་པར་འཇིག་པར་འགྱུར་ཏེ། ཐམས་ཅད་མཁྱེན་པ་ཉིད་མ་ཐོབ་པར་ཉན་ཐོས་ཉིད་དམ་རང་སངས་རྒྱས་ཉིད་དུ་གནས་པར་འགྱུར་རོ། །ཞེས་དེ་ལྟར་རིག་པར་
བྱའོ༑ ༑རབ་འབྱོར། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་དད་པ་ཡོད་པ་དང༌། བཟོད་པ་
ཡོད་པ་དང༌། སྲེད་པ་ཡོད་པ་དང༌། འདུན་པ་ཡོད་པ་དང༌། བརྩོན་འགྲུས་ཡོད་པ་དང༌། བག་བྱེད་པ་ཡོད་པ་དང༌། མོས་པ་ཡོད་པ་དང༌། ལྷག་པའི་བསམ་པ་ཡོད་པ་དང༌། གཏོང་བ་ཡོད་པ་དང༌། གུས་
པར་བྱེད་པ་ཡོད་པ་དང༌། དགའ་བ་ཡོད་པ་དང༌། མགུ་བ་ཡོད་པ་དང༌། དང་བ་ཡོད་པ་དང༌། རབ་ཏུ་དགའ་བ་ཡོད་པ་དང༌། བརྩོན་པ་མི་གཏོང་བ་ཡོད་པ་དེ་དག་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་
ལ་བརྟེན་པར་བྱེད་ན། དེ་ལྟར་ན། དེ་དག་གི་དད་པ་དེ་དང༌། བཟོད་པ་དེ་དང༌། སྲེད་པ་དེ་དང༌། འདུན་པ་དེ་དང༌། བརྩོན་འགྲུས་དེ་དང༌། བག་བྱེད་པ་དེ་དང༌། མོས་པ་དེ་དང༌། ལྷག་པའི་བསམ་པ་དེ་དང༌།
གཏོང་བ་དེ་དང༌། གུས་པར་བྱེད་པ་དེ་དང༌། དགའ་བ་དེ་དང༌། མགུ་བ་དེ་དང༌། དང་བ་དེ་དང༌། རབ་ཏུ་དགའ་བ་དེ་དང༌། བརྩོན་པ་མི་གཏོང་བ་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ཐོབ་ནས་ཐམས་
ཅད་མཁྱེན་པ་ལ་གནས་པར་འགྱུར་རོ། །རབ་འབྱོར། འདི་ལྟ་སྟེ། དཔེར་ན། བུད་མེད་དམ། སྐྱེས་པའང་རུང་བུམ་པ་སོ་མ་བཏང་བས་ཆུ་འཆུ་ན། རབ་འབྱོར། དེའི་བུམ་པ་དེ་ནི། ཡུན་
རིང་པོར་མི་ཐུབ་སྟེ། དེ་ནི། མྱུར་བ་ཉིད་དུ་ཆག་ཅིང་ཞིག་པར་འགྱུར་བར་རིག་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་བུམ་པ་སོ་མ་བཏང་བའི་ཕྱིར་དེ་ནི། མཐར་ས་ཉིད་དུ་འགྱུར་རོ། །རབ་འབྱོར།
དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་དད་པ་ཡོད་པ་དང༌། བཟོད་པ་ཡོད་པ་དང༌།
སྲེད་པ་ཡོད་པ་དང༌། འདུན་པ་ཡོད་པ་དང༌། བརྩོན་འགྲུས་ཡོད་པ་དང༌། བག་བྱེད་པ་ཡོད་པ་དང༌། མོས་པ་ཡོད་པ་དང༌། ལྷག་པའི་བསམ་པ་ཡོད་པ་དང༌། གཏོང་བ་ཡོད་པ་དང༌། གུས་པར་བྱེད་པ་
ཡོད་པ་དང༌། དགའ་བ་ཡོད་པ་དང༌། རབ་ཏུ་དགའ་བ་ཡོད་པ་དང༌། དང་བ་ཡོད་པ་དང༌། ཡིད་དགའ་བ་ཡོད་པ་དང༌། བརྩོན་པ་མི་གཏོང་བ་ཡོད་དུ་ཟིན་ཀྱང་དེ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་
མཁས་པས་ཡོངས་སུ་མ་བཟུང་བར་གྱུར་ན། རབ་འབྱོར། བྱང་ཆུབ་སེམས་དཔའ་དེ་ནི། ལམ་གྱི་བར་མ་དོར་རྣམ་པར་འཇིག་པར་འགྱུར་བར་རིག་པར་བྱའོ། །རབ་འབྱོར། བྱང་ཆུབ་སེམས་དཔའི་
ལམ་གྱི་བར་མ་དོར་རྣམ་པར་འཇིག་པ་གང་ཞེ་ན། ཉན་ཐོས་ཀྱི་སའམ། རང་སངས་རྒྱས་ཀྱི་སའོ། །རབ་འབྱོར། འདི་ལྟ་སྟེ། དཔེར་ན། བུད་མེད་དམ་སྐྱེས་པ་ཡང་རུང་སྟེ། བུམ་པ་ལེགས་པར་སོ་
༄༅། །བཏང་བས་འབབ་ཆུའམ། རྫིང་བུའམ། ལྟེང་ཀའམ། མཚོའམ། ཁྲོན་པའམ། དེ་མ་ཡིན་པའི་ཆུའི་གཞི་གཞན་ལས་ཆུ་བཅུས་ཏེ། དེས་ཆུ་དེ་ཁྱེར་ན། རབ་
འབྱོར༑ བུམ་པ་དེས་ནི། བདེ་བར་ཁྱིམ་དུ་ཕྱིན་པར་འགྱུར་བར་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར་བུམ་པ་སོ་ལེགས་པར་བཏང་བའི་ཕྱིར་རོ། །རབ་འབྱོར། དེ་བཞིན་
དུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་དད་པ་ཡོད། བཟོད་པ་ཡོད། སྲེད་པ་ཡོད། འདུན་
པ་ཡོད༑ བརྩོན་འགྲུས་ཡོད། བག་བྱེད་པ་ཡོད། མོས་པ་ཡོད། ལྷག་པའི་བསམ་པ་ཡོད། གཏོང་བ་ཡོད། གུས་པར་བྱེད་པ་ཡོད། དགའ་བ་ཡོད། རབ་ཏུ་དགའ་བ་ཡོད། དང་བ་ཡོད། ཡིད་
དགའ་བ་ཡོད། བརྩོན་པ་མི་གཏོང་བའང་ཡོད་ལ། དེ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པས་ཡོངས་སུ་བཟུང་བར་གྱུར་ན། རབ་འབྱོར། བྱང་ཆུབ་སེམས་དཔའ་སེམས་དཔའ་
ཆེན་པོ་དེ་ནི། ལམ་གྱི་བར་མ་དོར་རྣམ་པར་འཇིག་པར་མི་འགྱུར་ཏེ། མ་རྨས་མ་སྣད་པར་ཐམས་ཅད་མཁྱེན་པ་ཉིད་ལ་གནས་པར་འགྱུར་བར་རིག་པར་བྱའོ།། །།འཕགས་
པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་བཅུ་བཞི་པ། རབ་འབྱོར། འདི་ལྟ་སྟེ། དཔེར་ན། སྐྱེས་བུ་ཤེས་རབ་འཆལ་བའི་རང་བཞིན་ཅན་ཞིག་རྒྱ་མཚོའི་གྲུ་མིག་ཚགས་མ་
བྱས་ཤིང་མ་བཅོས་པ། བཅིང་བ་བཅིངས་ནས་རིང་དུ་ལོན་པ་ཞིག་ཆུའི་ནང་དུ་དྲངས་ནས་དེར་རྫས་བསྐྱས་ཏེ་གང་ཞིང་ཁལ་གྱིས་ནོན་པའི་ནང་དུ་ཞུགས་པར་གྱུར་ན། རབ་འབྱོར། གྲུ་དེ་ནི། འདི་ལྟ་སྟེ། འདི་
ལྟ་བུར་འཇིག་པའི་ཆོས་ཅན་དུ་འགྱུར་ཏེ། ཆུའི་ཕ་རོལ་ཏུ་མ་རྒལ་བར་དེའི་རྫས་ཀྱང་གཞན་དུ་འགྱུར་ལ། གྲུ་དེའང་གཞན་དུ་འགྲོ་བར་རིག་པར་བྱ་སྟེ། དེ་ལྟར་དེད་དཔོན་ཐབས་མི་མཁས་པ་འཆལ་
པའི་ཤེས་རབ་ཅན་དེ་ནོར་ཆེན་པོ་དང་བྲལ་བ་དང་ཕྲད་པར་འགྱུར་ཏེ། རིན་པོ་ཆེའི་འབྱུང་གནས་ཆེན་པོ་ལས་ཡོངས་སུ་ཉམས་པར་འགྱུར་རོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་ལ་ལ་
ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་དད་པ་ཡོད། བཟོད་པ་ཡོད། སྲེད་པ་ཡོད། འདུན་པ་ཡོད། བརྩོན་འགྲུས་ཡོད། བག་བྱེད་པ་ཡོད། མོས་པ་
ཡོད༑ ལྷག་པའི་བསམ་པ་ཡོད། གཏོང་བ་ཡོད། གུས་པར་བྱེད་པ་ཡོད། དགའ་བ་ཡོད། མགུ་བ་ཡོད། དང་བ་ཡོད། རབ་ཏུ་དགའ་བ་ཡོད། བརྩོན་པ་མི་གཏོང་བ་ཡོད་ཀྱང་དེ་ཤེས་རབ་ཀྱི་ཕ་རོལ་ཏུ་ཕྱིན་
པས་ཡོངས་སུ་མ་བཟུང་ཞིང་ཐབས་མཁས་པ་དང་བྲལ་བར་གྱུར་ན། རབ་འབྱོར། བྱང་ཆུབ་སེམས་དཔའ་དེ་ནི། ཐམས་ཅད་མཁྱེན་པའི་རིན་པོ་ཆེའི་འབྱུང་གནས་མ་ཐོབ་པ་ཉིད་དུ་བར་མ་དོར་ཆུད་
ཟོས་ཤིང་ཡི་གསོད་པར་འགྱུར་ཏེ། རང་གི་དོན་ཆེན་པོ་ལས་ཡོངས་སུ་ཉམས་པར་འགྱུར་ཞིང་གཞན་གྱི་དོན་ཆེན་པོའི་རིན་པོ་ཆེའི་ཕུང་པོ་ལས་ཡོངས་སུ་ཉམས་པར་འགྱུར་ཏེ། འདི་ལྟ་སྟེ། ཐམས་
༄༅། །ཅད་མཁྱེན་པའི་དོན་ཆེན་པོའི་རིན་པོ་ཆེའི་འབྱུང་གནས་ལས་ཡོངས་སུ་ཉམས་པར་འགྱུར་བར་རིག་པར་བྱའོ། །རབ་འབྱོར། ཡང་བྱང་ཆུབ་སེམས་པའི་བར་མ་དོར་
ཆུད་ཟ་བ་གང་ཞེ་ན། འདི་ལྟ་སྟེ། ཉན་ཐོས་ཀྱི་སའམ། རང་སངས་རྒྱས་ཀྱི་སའོ། རབ་འབྱོར། འདི་ལྟ་སྟེ། དཔེར་ན། དེད་དཔོན་མཁས་པའི་རང་བཞིན་ཅན་གྱིས་རྒྱ་མཚོར་འཇུག་པའི་གྲུ་
བཅིང་བ་ལེགས་པར་བཅིངས། མིག་ཚགས་བྱ་བ་ལེགས་པར་བྱས་ནས་བཅོས་པར་བྱ་བ་ལེགས་པར་བཅོས་ཏེ་ཆུའི་ནང་དུ་དྲངས་ནས་རྫས་བསྐྱས་ཏེ་གང་བར་བྱས་ནས་ལེགས་པར་བཤམས་
ཤིང་མཐུན་པའི་རླུང་དང་སྦྱར་ཏེ་དེ་གང་དུ་འགྲོ་བར་འདོད་པའི་ཕྱོགས་སུ་མཐར་གྱིས་སོང་ན། རབ་འབྱོར། གྲུ་དེ་ནི། ཆུས་འཇིག་པར་མི་འགྱུར་གྱི། གྲུ་དེ་ནི། གང་དུ་འགྲོ་བར་བྱ་བའི་ཕྱོགས་དེར་
ཕྱིན་པར་འགྱུར་ཞིང༌། དེད་དཔོན་དེའང་རྙེད་པ་ཆེན་པོ་འདི་ལྟ་སྟེ། འཇིག་རྟེན་གྱི་རིན་པོ་ཆེ་དག་དང་ལྡན་པར་འགྱུར་རོ། །ཞེས་རིག་པར་བྱའོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་
སེམས་དཔའ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་དད་པ་ཡོད། བཟོད་པ་ཡོད། སྲེད་པ་ཡོད། བརྩོན་འགྲུས་ཡོད། བག་
བྱེད་པ་ཡོད། མོས་པ་ཡོད། ལྷག་པའི་བསམ་པ་ཡོད། གཏོང་བ་ཡོད། གུས་པར་བྱེད་པ་ཡོད། དགའ་བ་ཡོད། མགུ་བ་ཡོད། དང་བ་ཡོད། རབ་ཏུ་དགའ་བ་ཡོད། བརྩོན་པ་མི་གཏོང་བའང་ཡོད་
ལ༑ དེ་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་ཞིང་ཐབས་མཁས་པ་དང་མ་བྲལ་བར་གྱུར་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། བར་མ་དོར་ཆུད་ཟོས་པར་མི་
འགྱུར་ཞིང་ཡི་གསོད་པར་མི་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གནས་པར་འགྱུར་བར་རིག་པར་བྱའོ། །དེ་ཅིའི་ཕྱིར་ཞེ་
ན༑ རབ་འབྱོར། དེ་ནི། འདི་ལྟར་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་དད་པ་ཡོད།
བཟོད་པ་ཡོད། སྲེད་པ་ཡོད། འདུན་པ་ཡོད། བརྩོན་འགྲུས་ཡོད། བག་བྱེད་པ་ཡོད། མོས་པ་ཡོད། ལྷག་པའི་བསམ་པ་ཡོད། གཏོང་བ་ཡོད། གུས་པར་བྱེད་པ་ཡོད། དགའ་བ་ཡོད། མགུ་
བ་ཡོད༑ དང་བ་ཡོད། རབ་ཏུ་དགའ་བ་ཡོད། བརྩོན་པ་མི་གཏོང་བའང་ཡོད་ལ། དེའི་ཆོས་འདི་དག་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་ཞིང་ཐབས་མཁས་པ་དང་མ་བྲལ་ན། དེ་ནི།
གང་གིས་ཐམས་ཅད་མཁྱེན་པ་ཉིད་དུ་འགྱུར་བའི་ཆོས་མངོན་དུ་བྱེད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཡང་དག་པར་ཞུགས་པར་འགྱུར་བ་མ་
གཏོགས་པར་ཉན་ཐོས་ཀྱི་སའམ། རང་སངས་རྒྱས་ཀྱི་སར་མི་སྒྲུབ་བོ། །རབ་འབྱོར། འདི་ལྟ་སྟེ། དཔེར་ན། སྐྱེས་བུ་འགའ་ཞིག་སྐྱེས་ནས་ལོ་བརྒྱ་ཉི་ཤུ་ལོན་པ་ཞིག་རྒན་པོ་རྒས་ཤིང་འཁོགས་
༄༅། །པར་གྱུར་ལ། དེའི་ལུས་ལ་རླུང་ལས་གྱུར་པའམ། མཁྲིས་པ་ལས་གྱུར་པའམ། བད་ཀན་ལས་གྱུར་པའམ། འདུས་པ་ལས་གྱུར་པའི་ནད་འགའ་ཞིག་གིས་
བཏབ་ན། རབ་འབྱོར། དེ་ཇི་སྙམ་དུ་སེམས། སྐྱེས་བུ་དེའང་མ་བརྟེན་པར་ཁྲི་ལས་ལྡང་ནུས་སམ། རབ་འབྱོར་གྱིས་གསོལ་པ། བཅོམ་ལྡན་འདས།
དེ་ནི༑ མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། གལ་ཏེ་སྐྱེས་བུ་དེ་ཁྲི་ལས་ལྡང་ནུས་པར་གྱུར་ཀྱང་དེ་རྒས་པ་དེ་དང་ནད་དེས་བཅོམ་པས་རྒྱང་གྲགས་
གཅིག་སྲིད་དམ། རྒྱང་གྲགས་གཉིས་སྲིད་དུ་འགྲོ་བའི་སྟོབས་མེད་དོ། །གལ་ཏེ་སྐྱེས་བུ་དེ་ཁྲི་ལས་ལྡང་ནུས་ཀྱང་འགྲོ་བར་བྱ་བར་སྟོབས་མེད་དོ། །རབ་འབྱོར། དེ་བཞིན་དུ་བྱང་ཆུབ་སེམས་
དཔའ་སེམས་དཔའ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་དད་པ་ཡོད་པ་དང༌། བཟོད་པ་ཡོད་པ་དང༌། སྲེད་པ་ཡོད་པ་དང༌། འདུན་པ་ཡོད་
པ་དང༌། བརྩོན་འགྲུས་ཡོད་པ་དང༌། བག་བྱེད་པ་ཡོད་པ་དང༌། མོས་པ་ཡོད་པ་དང༌། ལྷག་པའི་བསམ་པ་ཡོད་པ་དང༌། གཏོང་བ་ཡོད་པ་དང༌། གུས་པར་བྱེད་པ་ཡོད་པ་དང༌། དགའ་བ་ཡོད་པ་
དང༌། མགུ་བ་ཡོད་པ་དང༌། དང་བ་ཡོད་པ་དང༌། རབ་ཏུ་དགའ་བ་ཡོད་པ་དང༌། བརྩོན་པ་མི་གཏོང་བ་ཡོད་པར་གྱུར་ཀྱང་དེ་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་བཟུང་ཞིང་ཐབས་མཁས་
པ་དང་བྲལ་བར་གྱུར་པས་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་བ་ལ་ཡང་དག་པར་ཞུགས་སུ་ཟིན་ཀྱང་རབ་འབྱོར། ཡང་འདི་ལྟར་
བྱང་ཆུབ་སེམས་དཔའ་དེ་ནི། བར་མ་དོར་ཆུད་ཟོས་ཤིང་ཡི་གསོད་པར་འགྱུར་ཏེ། འདི་ལྟ་སྟེ། ཉན་ཐོས་ཀྱི་སའམ་རང་སངས་རྒྱས་ཀྱི་ས་ལ་གནས་པར་འགྱུར་བར་རིག་པར་བྱའོ། །དེ་ཅིའི་ཕྱིར་
ཞེ་ན༑ དེ་ནི། འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་བཟུང་བ་དང༌། ཐབས་མཁས་པ་དང་བྲལ་བའི་ཕྱིར་རོ། །རབ་འབྱོར། འདི་ལྟ་སྟེ། དཔེར་ན། སྐྱེས་བུ་སྐྱེས་ནས་ལོ་བརྒྱ་ཉི་ཤུ་
ལོན་པར་གྱུར་པ། རྒན་པོ་རྒས་ཤིང་འཁོགས་པ་དེ་ཉིད་ཀྱི་ལུས་ལ་རླུང་ལས་གྱུར་པའམ། མཁྲིས་པ་ལས་གྱུར་པའམ། བད་ཀན་ལས་གྱུར་པའམ། འདུས་པ་ལས་གྱུར་པའི་ནད་འགའ་
ཞིག་གིས་བཏབ་སྟེ། དེའི་གཡས་དང་གཡོན་གྱི་ཕྱོགས་གཉིས་ནས་སྐྱེས་བུ་སྟོབས་དང་ལྡན་པ་གཉིས་ཀྱིས་ལེགས་པར་བརྟེན་ཞིང་འཇུར་བཅུག་ཅིང་ལེགས་པར་བཟུང་ནས་དེ་ལ་འདི་སྐད་དུ། ཀྱེ་
སྐྱེས་བུ༑ ཁྱོད་གང་དུ་འགྲོ་བར་བྱ་བའི་གནས་དེར་ཁྱོད་ཀྱིས་མ་ཕྱིན་གྱི་བར་དུ་ཁྱོད་བདག་ཅག་གཉིས་ཀྱིས་བརྟེན་པས་ལམ་དུ་བར་མ་དོར་རྡེག་འཆོས་པའི་འཇིགས་པར་མི་འགྱུར་གྱི། ཁྱོད་གང་དུ་
འགྲོ་འདོད་པ་དེར་སོང་ཤིག་ཅེས་བསྒོ་ན། ཁྲི་དེ་ལས་ལྡང་ནུས་པར་འགྱུར་རོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་
༄༅། །ཆུབ་མངོན་པར་རྫོགས་པར་འཚང་རྒྱ་བར་བྱ་བ་ལ་དད་པ་ཡོད་པ་དང༌། བཟོད་པ་ཡོད་པ་དང༌། སྲེད་པ་ཡོད་པ་དང༌། འདུན་པ་ཡོད་པ་དང༌། བརྩོན་འགྲུས་ཡོད་པ་
དང༌། བག་བྱེད་པ་ཡོད་པ་དང༌། མོས་པ་ཡོད་པ་དང༌། ལྷག་པའི་བསམ་པ་ཡོད་པ་དང༌། གཏོང་བ་ཡོད་པ་དང༌། གུས་པར་བྱེད་པ་ཡོད་པ་དང༌། དགའ་བ་ཡོད་པ་དང༌། མགུ་བ་ཡོད་པ་དང༌། དང་
བ་ཡོད་པ་དང༌། རབ་ཏུ་དགའ་བ་ཡོད་པ་དང༌། བརྩོན་པ་མི་གཏོང་བ་ཡོད་པར་གྱུར་ལ། དེ་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་ཞིང་ཐབས་མཁས་པ་དང་མ་བྲལ་བར་གྱུར་ན། རབ་
འབྱོར༑ བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། བར་མ་དོར་ཆུད་ཟོས་པར་མི་འགྱུར། ཡི་གསོད་པར་མི་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། འདི་ལྟ་
སྟེ༑ དེའི་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་གནས་རྗེས་སུ་ཐོབ་ནུས་པར་རིག་པར་བྱའོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། དཔེའི་
ལེའུ་ཞེས་བྱ་བ་སྟེ། བཅུ་བཞི་པའོ།། །།དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་
སེམས་དཔའ་ཆེན་པོ་ལས་དང་པོ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཇི་ལྟར་གནས་པར་བགྱི། ཇི་ལྟར་བསླབ་པར་བགྱི། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་
པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལས་དང་པོ་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པར་འདོད་པས་དགེ་བའི་
བཤེས་གཉེན་དག་ལ་བསྙེན་པར་བྱ། བསྟེན་པར་བྱ། བསྙེན་བཀུར་བྱའོ། །གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་འདོམས་ཤིང་རྗེས་སུ་སྟོན་པར་འགྱུར་བ་དང༌། གང་དག་ཤེས་རབ་ཀྱི་ཕ་
རོལ་ཏུ་ཕྱིན་པའི་དོན་འདི་ལ་ལུང་འབོགས་པ་དེ་དག་ནི། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེའི་དགེ་བའི་བཤེས་གཉེན་དུ་རིག་པར་བྱའོ། །དེ་ལ་འདི་སྐད་དུ་རིགས་ཀྱི་བུ།
ཁྱོད་ཚུར་ཤེག །སྦྱིན་པའི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་གྱིས་ཤིག །དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་པའི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་
ཕྱིན་པ་དང༌། བསམ་གཏན་གྱི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་གྱིས་ཤིག །རིགས་ཀྱི་བུ། ཁྱོད་སྦྱིན་པ་གང་དང་གང་ཉིད་བྱིན་པ་དེ་དག་ཐམས་ཅད་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོས་ཤིག །རིགས་ཀྱི་བུ། ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་གཟུགས་སུ་མ་སྙེམས་ཤིག །དེ་བཞིན་དུ་ཚོར་
བར་མ་ཡིན། འདུ་ཤེས་སུ་མ་ཡིན། འདུ་བྱེད་རྣམས་སུ་མ་ཡིན། རིགས་ཀྱི་བུ། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྣམ་པར་ཤེས་པར་མ་སྙེམས་ཤིག །དེ་ཅིའི་ཕྱིར་
༄༅། །ཞེ་ན༑ རིགས་ཀྱི་བུ། ཐམས་ཅད་མཁྱེན་པ་ཉིད་ནི། མི་སྙེམས་པའོ། །དེ་བཞིན་དུ་ཁྱོད་ཚུལ་ཁྲིམས་གང་དང་གང་ཉིད་སྲུང་བ་དང༌། དེ་བཞིན་དུ་སྦྱར་ཏེ་རིགས་ཀྱི་
བུ་ཁྱོད་བཟོད་པ་གང་དང་གང་ཉིད་སྒྲུབ་པ་དང༌། རིགས་ཀྱི་བུ། ཁྱོད་བརྩོན་འགྲུས་གང་དང་གང་ཉིད་རྩོམ་པ་དང༌། རིགས་ཀྱི་བུ། ཁྱོད་བསམ་གཏན་གང་དང་གང་ཉིད་ལ་མཉམ་པར་འཇོག་པ་དང༌།
རིགས་ཀྱི་བུ༑ ཁྱོད་ཤེས་རབ་གང་དང་གང་ཉིད་ཡོངས་སུ་སྦྱོང་བར་བྱེད་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོས་ཤིག །རིགས་ཀྱི་བུ། ཁྱོད་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཟུགས་སུ་མ་སྙེམས་ཤིག །དེ་བཞིན་དུ་ཚོར་བར་མ་ཡིན། འདུ་ཤེས་སུ་མ་ཡིན། འདུ་བྱེད་རྣམས་སུ་མ་ཡིན། རིགས་ཀྱི་བུ།
ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རྣམ་པར་ཤེས་པར་མ་སྙེམས་ཤིག །དེ་ཅིའི་ཕྱིར་ཞེ་ན། རིགས་ཀྱི་བུ། ཐམས་ཅད་མཁྱེན་པ་ཉིད་ནི། མི་སྙེམས་པའོ། །རིགས་
ཀྱི་བུ༑ ཁྱོད་ཉན་ཐོས་ཀྱི་སའམ། རང་སངས་རྒྱས་ཀྱི་ས་ལ་འདོད་པར་མ་བྱེད་ཅིག་ཅེས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ལུང་འབོགས་ཏེ། རབ་འབྱོར། དེ་ལྟར་བྱང་ཆུབ་སེམས་དཔའ་
སེམས་དཔའ་ཆེན་པོ་ལས་དང་པོ་པ་དགེ་བའི་བཤེས་གཉེན་དག་གིས་མཐར་གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གཞུག་པར་བྱའོ། །རབ་འབྱོར་གྱིས་གསོལ་པ། བཅོམ་ལྡན་འདས།
བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཡང་དག་པར་ཞུགས་ཤིང༌། དེ་ལྟ་བུའི་ངོ་བོའི་སྦྱིན་པ་
ལ་བརྟེན། དེ་ལྟ་བུའི་ངོ་བོའི་ཚུལ་ཁྲིམས་དང༌། དེ་ལྟ་བུའི་ངོ་བོའི་བཟོད་པ་དང༌། དེ་ལྟ་བུའི་ངོ་བོའི་བརྩོན་འགྲུས་དང༌། དེ་ལྟ་བུའི་ངོ་བོའི་བསམ་གཏན་དང༌། དེ་ལྟ་བུའི་ངོ་བོའི་ཤེས་རབ་ལ་
བརྟེན་ནས་ཡོངས་སུ་མྱ་ངན་ལས་འདས་པ་ལ་རང་དབང་དུ་གྱུར་པ་ལགས་ཀྱང་ཡོངས་སུ་མྱ་ངན་ལས་འདས་པ་མི་འཚལ་གྱི། འོན་ཀྱང་སེམས་ཅན་གྱི་ཁམས་ཤིན་ཏུ་སྡུག་བསྔལ་བ་
མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་ཏེ་འཁོར་བར་སྐྲག་པར་མི་བགྱིད་པ་ནི། དཀའ་བ་བགྱིད་པ་ལགས་སོ། །དེ་སྐད་
ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། བྱང་ཆུབ་སེམས་
དཔའ་སེམས་དཔའ་ཆེན་པོ་གང་འཇིག་རྟེན་ལ་ཕན་པའི་ཕྱིར་ཞུགས་པ་དང༌། འཇིག་རྟེན་ལ་བདེ་བའི་ཕྱིར་དང༌། འཇིག་རྟེན་ལ་སྙིང་བརྩེ་བའི་ཕྱིར་ཞུགས་པ་དང༌། བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་སྐྱོབ་པར་འགྱུར་བར་བྱའོ། །འཇིག་རྟེན་གྱི་སྐྱབས་སུ་འགྱུར་བར་བྱའོ། །འཇིག་རྟེན་གྱི་གནས་སུ་འགྱུར་བར་
༄༅། །བྱའོ༑ ༑འཇིག་རྟེན་གྱི་དཔུང་གཉེན་དུ་འགྱུར་བར་བྱའོ། །འཇིག་རྟེན་གྱི་གླིང་དུ་འགྱུར་བར་བྱའོ། །འཇིག་རྟེན་གྱི་སྣང་བར་འགྱུར་བར་བྱའོ། །འཇིག་རྟེན་གྱི་ཡོངས་
སུ་འདྲེན་པར་འགྱུར་བར་བྱའོ། །འཇིག་རྟེན་གྱི་རྟེན་དུ་འགྱུར་བར་བྱའོ། །སྙམ་སྟེ། དེ་ལྟ་བུའི་ངོ་བོའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བརྩོན་འགྲུས་རྩོམ་པ་དེ་དཀའ་
བ་བྱེད་པ་ཡིན་ནོ། །རབ་འབྱོར། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་
འཇིག་རྟེན་གྱི་སྐྱོབ་པར་འགྱུར་ཞེ་ན། རབ་འབྱོར། འཁོར་བ་ན་སྤྱོད་པའི་འཇིག་རྟེན་གྱི་སྡུག་བསྔལ་ཇི་སྙེད་ཡོད་པ་དེ་དག་ལས་དེ་སྐྱོབ་པར་བྱེད་ཅིང་སྡུག་བསྔལ་དེ་དག་སྤང་བའི་ཕྱིར་
འབད་པར་བྱེད་ལ་བརྩོན་འགྲུས་རྩོམ་པ་སྟེ། རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་སངས་རྒྱས་ནས་འཇིག་རྟེན་གྱི་སྐྱོབ་པར་འགྱུར་རོ། །རབ་འབྱོར། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་སྐྱབས་སུ་འགྱུར་ཞེ་ན། རབ་འབྱོར། སེམས་ཅན་གང་སྐྱེ་བའི་ཆོས་ཅན། རྒ་བའི་ཆོས་ཅན། ན་བའི་ཆོས་ཅན། འཆི་
བའི་ཆོས་ཅན། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པའི་ཆོས་ཅན་གྱི་སེམས་ཅན་དེ་དག་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌།
སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་ལས་ཡོངས་སུ་ཐར་པར་བྱེད་པ་སྟེ། རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་སྐྱབས་སུ་འགྱུར་རོ། །རབ་འབྱོར། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་གནས་སུ་འགྱུར་ཞེ་ན། རབ་འབྱོར། གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་སྦྱོར་བ་མེད་པར་བྱ་བའི་ཕྱིར་སེམས་ཅན་རྣམས་ལ་ཆོས་སྟོན་ཏེ། རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་གནས་སུ་འགྱུར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། ཇི་ལྟར་ན། སྦྱོར་བ་མ་མཆིས་པ་ལགས།
བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། གཟུགས་ཀྱི་འབྲེལ་པ་མེད་པ་གང་ཡིན་པ་དེ་ནི། གཟུགས་ཀྱི་སྦྱོར་བ་མེད་པའོ། །གཟུགས་ཀྱི་སྦྱོར་བ་མེད་པ་གང་ཡིན་པ་དེ་ནི། གཟུགས་
༄༅། །ཀྱི་འབྲེལ་པ་མེད་པའོ། །གཟུགས་ཀྱི་འབྲེལ་པ་མེད་པ་གང་ཡིན་པ་དེ་ནི། གཟུགས་ཀྱི་སྐྱེ་བ་མེད་པ་དང༌། འགག་པ་མེད་པའོ། །གཟུགས་ཀྱི་སྐྱེ་བ་མེད་པ་དང༌། འགག་
པ་མེད་པ་གང་ཡིན་པ་དེ་ནི། གཟུགས་ཀྱི་སྦྱོར་བ་མེད་པའོ། །གང་གཟུགས་ལ་སྦྱོར་པ་མེད་པ་འདི་ནི། གཟུགས་ཀྱི་འབྲེལ་པ་མེད་པའོ། །གཟུགས་ཀྱི་འབྲེལ་པ་མེད་པ་འདི་ནི། གཟུགས་
ཀྱི་སྦྱོར་བ་མེད་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རབ་འབྱོར། རྣམ་པར་ཤེས་པའི་འབྲེལ་པ་མེད་པ་གང་ཡིན་པ་དེ་ནི། རྣམ་པར་ཤེས་པའི་
སྦྱོར་བ་མེད་པའོ། །རྣམ་པར་ཤེས་པའི་སྦྱོར་བ་མེད་པ་གང་ཡིན་པ་དེ་ནི། རྣམ་པར་ཤེས་པའི་འབྲེལ་པ་མེད་པའོ། །རྣམ་པར་ཤེས་པའི་འབྲེལ་པ་མེད་པ་གང་ཡིན་པ་དེ་ནི། རྣམ་པར་ཤེས་
པའི་སྐྱེ་བ་མེད་པ་དང༌། འགག་པ་མེད་པའོ། །རྣམ་པར་ཤེས་པའི་སྐྱེ་བ་མེད་པ་དང༌། འགག་པ་མེད་པ་གང་ཡིན་པ་དེ་ནི། རྣམ་པར་ཤེས་པའི་སྦྱོར་བ་མེད་པའོ། །རྣམ་པར་ཤེས་པའི་སྦྱོར་བ་
མེད་པ་གང་ཡིན་པ་དེ་ནི། རྣམ་པར་ཤེས་པའི་འབྲེལ་པ་མེད་པའོ། །རྣམ་པར་ཤེས་པའི་འབྲེལ་པ་མེད་པ་འདི་ནི། རྣམ་པར་ཤེས་པའི་སྦྱོར་བ་མེད་པའོ། །རབ་འབྱོར། དེ་ལྟར་ན། ཆོས་ཐམས་
ཅད་ནི༑ སྦྱོར་བ་མེད་པ་འབྲེལ་པ་མེད་པའོ། །ཞེས་རྣམ་པར་ཤེས་པས་མཐོང་པས་སྦྱོར་བ་མེད་པར་འགྱུར་རོ། །རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་གནས་སུ་འགྱུར་རོ། །རབ་འབྱོར། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་དཔུང་གཉེན་དུ་འགྱུར་ཞེ་ན། རབ་འབྱོར། གཟུགས་ཀྱི་ཕ་རོལ་གང་ཡིན་པ་དེ་ནི། གཟུགས་མ་ཡིན། རབ་འབྱོར།
ཕ་རོལ་ཇི་ལྟ་བར་གཟུགས་ཀྱང་དེ་བཞིན་ཏེ། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རབ་འབྱོར། རྣམ་པར་ཤེས་པའི་ཕ་རོལ་གང་ཡིན་པ་དེ་ནི། རྣམ་པར་ཤེས་པ་མ་ཡིན།
རབ་འབྱོར། ཕ་རོལ་ཇི་ལྟ་བ་བཞིན་དུ་རྣམ་པར་ཤེས་པའང་དེ་བཞིན་ཏེ། རབ་འབྱོར། གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའི་ཕ་རོལ་ཇི་ལྟ་བར་ཆོས་
ཐམས་ཅད་ཀྱང་དེ་བཞིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། གལ་ཏེ་གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའི་ཕ་རོལ་ཇི་ལྟ་བར་
ཆོས་ཐམས་ཅད་ཀྱང་དེ་བཞིན་ནོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་དག་གིས་ཆོས་ཐམས་ཅད་མངོན་པར་རྫོགས་པར་སངས་རྒྱས་པ་ཉིད་དུ་མི་འགྱུར་ལགས་སམ། དེ་ཅིའི་
སླད་དུ་ཞེ་ན། བཅོམ་ལྡན་འདས། འདི་ལ་རྣམ་པར་རྟོག་པ་གང་ཡང་མ་མཆིས་པའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། ཕ་རོལ་གང་ཡིན་
༄༅། །པ་དེ་ལ་རྣམ་པར་རྟོག་པ་གང་ཡང་མེད་དེ། རབ་འབྱོར། རྣམ་པར་རྟོག་པ་མེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དག་གིས་ཆོས་ཐམས་ཅད་
མངོན་པར་རྫོགས་པར་སངས་རྒྱས་པ་ཉིད་ཡིན་ཏེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་མཆོག་ཏུ་དཀའ་བ་བྱེད་པ་ཡིན་ནོ། །གང་དེ་ལྟར་ཆོས་ཐམས་
ཅད་ལ་ངེས་པར་སེམས་ཤིང་མངོན་དུའང་མི་བྱེད། ཞུམ་པར་ཡང་མི་བྱེད་པར་འདི་ལྟར་བདག་ཅག་གིས་ཆོས་འདི་དག་མངོན་པར་རྫོགས་པར་འཚང་རྒྱ་བར་བྱའོ། །འདི་ལྟར་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་འདི་དག་བསྟན་པར་བྱའོ། །རབ་ཏུ་བཤད་པར་བྱའོ། །སྙམ་ན། རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་
དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་དཔུང་གཉེན་དུ་འགྱུར་རོ། །རབ་འབྱོར། ཇི་ལྟར་ན། བྱང་ཆུབ་སེམས་དཔའ་
སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་གླིང་དུ་འགྱུར་ཞེ་ན། རབ་འབྱོར། འདི་ལྟ་སྟེ། དཔེར་ན། འབབ་
ཆུའམ་རྒྱ་མཚོ་དག་གི་ནང་ན་ཕྱོགས་གང་ཆུས་ཡོངས་སུ་བསྐོར་བར་གྱུར་པ་ནི། གླིང་ཞེས་བྱའོ། །རབ་འབྱོར། དེ་བཞིན་དུ་གཟུགས་ནི། སྔོན་གྱི་མཐའ་དང༌། ཕྱི་མའི་མཐའ་ཡོངས་སུ་ཆད་པའོ། །དེ་
བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རབ་འབྱོར། དེ་བཞིན་དུ་རྣམ་པར་ཤེས་པ་ནི། སྔོན་གྱི་མཐའ་དང༌། ཕྱི་མའི་མཐའ་ཡོངས་སུ་ཆད་པ་སྟེ། རབ་འབྱོར། ཡོངས་སུ་ཆད་
པ་འདིས་ཆོས་ཐམས་ཅད་སྔོན་གྱི་མཐའ་དང༌། ཕྱི་མའི་མཐའ་ཡོངས་སུ་ཆད་པ་ཡིན་ནོ། །རབ་འབྱོར། ཆོས་ཐམས་ཅད་ཀྱི་ཡོངས་སུ་ཆད་པ་གང་ཡིན་པ་འདི་ནི། ཞི་བའོ། །འདི་ནི། གྱ་ནོམ་
པའོ༑ ༑འདི་ནི། ཡོངས་སུ་མྱ་ངན་ལས་འདས་པའོ། །འདི་ནི། ཇི་ལྟ་བ་བཞིན་ནོ། །འདི་ནི། ཕྱིན་ཅི་མ་ལོག་པ་སྟེ། རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་གླིང་དུ་འགྱུར་རོ། །རབ་འབྱོར། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་སྣང་བར་འགྱུར་ཞེ་ན། རབ་འབྱོར། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དུས་རིང་པོར་མ་རིག་པའི་སྒོ་ངའི་སྦུབས་དང༌། ལིང་ཏོག་གིས་ཡོངས་སུ་ཁེབས་པའི་སེམས་ཅན་མུན་པས་ཟིལ་གྱིས་
ནོན་པ་རྣམས་ཤེས་རབ་ཀྱིས་སྣང་བར་བྱེད་ཅིང་མི་ཤེས་པའི་མུན་པ་མུན་ནག་ཐམས་ཅད་སེལ་བར་བྱེད་དེ། རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་
༄༅། །མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་སྣང་བར་འགྱུར་རོ། །རབ་འབྱོར། ཇི་ལྟར་ན། བྱང་ཆུབ་སེམས་
དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་ཡོངས་སུ་འདྲེན་པར་འགྱུར་ཞེ་ན། རབ་འབྱོར། འདི་ལ་
བྱང་ཆུབ་སེམས་དཔའ་སེམས་དཔའ་ཆེན་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་གཟུགས་རང་བཞིན་གྱིས་སྐྱེ་བ་མེད་པ་དང༌། འགག་
པ་མེད་པར་ཆོས་སྟོན་ཏོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་རང་བཞིན་གྱིས་སྐྱེ་བ་མེད་པ་དང༌། འགག་པ་མེད་པར་ཆོས་སྟོན་ཏོ། །སོ་སོའི་
སྐྱེ་བོའི་ཆོས་རྣམས་ཀྱང་རང་བཞིན་གྱིས་སྐྱེ་བ་མེད་པ་དང༌། འགག་པ་མེད་པར་ཆོས་སྟོན་ཏོ། །ཉན་ཐོས་ཀྱི་ཆོས་རྣམས་ཀྱང་རང་བཞིན་གྱིས་སྐྱེ་བ་མེད་པ་དང༌། འགག་པ་མེད་པར་ཆོས་
སྟོན་ཏོ༑ ༑རང་སངས་རྒྱས་ཀྱི་ཆོས་རྣམས་ཀྱང་རང་བཞིན་གྱིས་སྐྱེ་བ་མེད་པ་དང༌། འགག་པ་མེད་པར་ཆོས་སྟོན་ཏོ། །བྱང་ཆུབ་སེམས་དཔའི་ཆོས་རྣམས་ཀྱང་རང་བཞིན་གྱིས་སྐྱེ་བ་མེད་པ་
དང༌། འགག་པ་མེད་པར་ཆོས་སྟོན་ཏོ། །སངས་རྒྱས་ཀྱི་ཆོས་རྣམས་ཀྱང་རང་བཞིན་གྱིས་སྐྱེ་བ་མེད་པ་དང༌། འགག་པ་མེད་པར་ཆོས་སྟོན་ཏོ། །ཆོས་ཐམས་ཅད་ཀྱང་རང་བཞིན་གྱིས་སྐྱེ་བ་མེད་
པ་དང༌། འགག་པ་མེད་པར་ཆོས་སྟོན་ཏོ། །རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་
འཇིག་རྟེན་གྱི་ཡོངས་སུ་འདྲེན་པར་འགྱུར་རོ། །རབ་འབྱོར། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
རྒྱས་ནས་འཇིག་རྟེན་གྱི་རྟེན་དུ་འགྱུར་ཞེ་ན། རབ་འབྱོར། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
རྒྱས་ནས་འཇིག་རྟེན་ལ་གཟུགས་ནི། ནམ་མཁའི་རྟེན་ཅན་ནོ། །ཞེས་ཆོས་སྟོན་པར་འགྱུར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའང་ནམ་
མཁའི་རྟེན་ཅན་ནོ། །ཞེས་ཆོས་སྟོན་པར་འགྱུར་རོ། །རབ་འབྱོར། དེ་བཞིན་དུ་ཆོས་ཐམས་ཅད་ཀྱང་ནམ་མཁའི་རྟེན་ཅན། འགྲོ་བ་མེད་པ། འོང་བ་མེད་པ། ནམ་མཁའ་དང་མཚུངས་པ་སྟེ། ཇི་
ལྟར་ནམ་མཁའ་འོང་བ་མེད་པ། འགྲོ་བ་མེད་པ། མ་བྱས་པ། རྣམ་པར་མི་འགྱུར་བ། མངོན་པར་འདུས་མ་བྱས་པ། མི་གནས་པ། ཡང་དག་པར་མི་གནས་པ། རྣམ་པར་མི་གནས་པ། མ་
སྐྱེས་པ༑ མ་འགགས་པ། དེ་བཞིན་དུ་རབ་འབྱོར། ཆོས་ཐམས་ཅད་ཀྱང་འོང་བ་མེད་པ། འགྲོ་བ་མེད་པ། མ་བྱས་པ། རྣམ་པར་མི་འགྱུར་བ། མངོན་པར་འདུས་མ་བྱས་པ། མི་གནས་པ། ཡང་
༄༅། །དག་པར་མི་གནས་པ། རྣམ་པར་མི་གནས་པ། མ་སྐྱེས་པ། མ་འགགས་པ། ནམ་མཁའ་དང་མཚུངས་པའི་ཕྱིར་རྣམ་པར་མི་རྟོག་པའོ། །དེ་ཅིའི་ཕྱིར་ཞེ་ན། རབ་
འབྱོར༑ གཟུགས་ཀྱི་སྟོང་པ་ཉིད་གང་ཡིན་པ་དེ་ནི། འོང་བའམ་འགྲོ་བ་མེད་དོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རབ་འབྱོར། རྣམ་པར་ཤེས་པའི་སྟོང་པ་
ཉིད་གང་ཡིན་པ་དེ་ནི། འོང་བའམ་འགྲོ་བ་མེད་དེ། རབ་འབྱོར། དེ་བཞིན་དུ་ཆོས་ཐམས་ཅད་ཀྱི་སྟོང་པ་ཉིད་ནི། འོང་བའམ་འགྲོ་བ་མེད་དོ། །དེ་ཅིའི་ཕྱིར་ཞེ་ན། རབ་འབྱོར། ཆོས་ཐམས་
ཅད་ནི༑ སྟོང་པ་ཉིད་ཀྱི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་ཐམས་ཅད་ནི། མཚན་མ་མེད་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་ཐམས་
ཅད་ནི༑ སྨོན་པ་མེད་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་ཐམས་ཅད་ནི། མངོན་པར་འདུ་མི་བྱེད་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་
འབྱོར༑ ཆོས་ཐམས་ཅད་ནི། འབྱུང་བ་མེད་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་ཐམས་ཅད་ནི། སྐྱེ་བ་མེད་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་
འབྱོར༑ ཆོས་ཐམས་ཅད་ནི། དངོས་པོ་མེད་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་ཐམས་ཅད་ནི། རྨི་ལམ་གྱི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་
འབྱོར༑ ཆོས་ཐམས་ཅད་ནི། བདག་གི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་ཐམས་ཅད་ནི། མུ་མེད་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར༑
ཆོས་ཐམས་ཅད་ནི། ཞི་བའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་ཐམས་ཅད་ནི། མྱ་ངན་ལས་འདས་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར།
ཆོས་ཐམས་ཅད་ནི། དབྱུང་དུ་མེད་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་ཐམས་ཅད་ནི། འོང་བ་མེད་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར།
ཆོས་ཐམས་ཅད་ནི། འགྲོ་བ་མེད་པའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་ཐམས་ཅད་ནི། མི་གཡོ་བའི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་
ཐམས་ཅད་ནི། གཟུགས་ཀྱི་རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། དེ་བཞིན་དུ་ཆོས་ཐམས་ཅད་ནི། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའི་
རྟེན་ཅན་ཏེ། དེ་དག་རྟེན་དེ་ལས་མི་འདའོ། །རབ་འབྱོར། ཆོས་ཐམས་ཅད་ནི། དགྲ་བཅོམ་པ་དང༌། རང་སངས་རྒྱས་ཉིད་དང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྟེན་ཅན་ཏེ། དེ་
དག་རྟེན་དེ་ལས་མི་འདའོ། །དེ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཐམས་ཅད་ནི།
༄༅། །ནམ་མཁའི་རྟེན་ཅན་ནོ། །ཞེས་ཆོས་སྟོན་ཏོ། །རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་ནས་འཇིག་རྟེན་གྱི་རྟེན་དུ་འགྱུར་བ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་སུ་དག་གིས་
འཚལ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་རྣམས་ཀྱི་དྲུང་དུ་སྤྱད་པར་གྱུར་པ་དགེ་བའི་རྩ་བ་ཡོངས་སུ་སྨིན་པ་གང་ཡིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ཤེས་རབ་
ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཤེས་པར་འགྱུར་པར་རིག་པར་བྱའོ། །རབ་འབྱོར་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་
ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་འཚལ་བར་འགྱུར་བ་དེ་དག་གི་ངོ་བོ་ཉིད་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་
སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཤེས་པར་འགྱུར་བ་དེ་དག་ནི། འདུལ་བ་ལས་བྱུང་བ་དབེན་པའི་རང་བཞིན་ཅན་ནོ། །རབ་འབྱོར་གྱིས་གསོལ་
པ༑ བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཅི་དེ་ལྟ་བུའི་རྟེན་ཅན་ཁོ་ནར་འགྱུར་བ་དང༌། རྟེན་དེ་དག་ཉིད་མངོན་པར་རྫོགས་པར་སངས་རྒྱས་ནས་སེམས་ཅན་དག་
ལའང་རྟེན་འདི་ཉིད་སྟོན་པར་འགྱུར་ཞིང༌། དེ་དག་དེ་ལྟར་སེམས་ཅན་རྣམས་ཀྱི་རྟེན་དུ་འགྱུར་བ་ལགས་སམ། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་
འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། འདི་ལྟ་བུའི་རྟེན་ཅན་དུ་འགྱུར་བ་དང༌། རྟེན་འདི་དག་
མངོན་པར་རྫོགས་པར་སངས་རྒྱས་ནས་སེམས་ཅན་དག་ལ་རྟེན་འདི་དག་སྟོན་པར་འགྱུར་ཞིང༌། དེ་དག་དེ་ལྟར་སེམས་ཅན་རྣམས་ཀྱི་རྟེན་དུ་འགྱུར་ཏེ། །རབ་འབྱོར། དེ་ལྟར་ན། བྱང་ཆུབ་སེམས་
དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་གཞལ་དུ་མེད་པ་གྲངས་མེད་པ་དག་གི་རྟེན་དུ་འགྱུར་རོ། །རབ་
འབྱོར་གྱིས་གསོལ་པ། བཅོམ་ལྡན་འདས། སེམས་ཅན་གཞལ་དུ་མ་མཆིས་གྲངས་མ་མཆིས་པ་དག་ཡོངས་སུ་མྱ་ངན་ལས་བཟླའོ། །ཞེས་གོ་ཆ་འདི་བགོས་པའི་བྱང་ཆུབ་སེམས་དཔའ་
སེམས་དཔའ་ཆེན་པོ་ནི། དཀའ་བ་བགྱིད་པ་ལགས་སོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་
༄༅། །བཞིན་ནོ། །དེ་དེ་བཞིན་ཏེ། སེམས་ཅན་གཞལ་དུ་མེད་གྲངས་མེད་པ་དག་ཡོངས་སུ་མྱ་ངན་ལས་བཟླའོ། །ཞེས་གང་གིས་གོ་ཆ་འདི་བགོས་པའི་བྱང་ཆུབ་སེམས་
དཔའ་སེམས་དཔའ་ཆེན་པོ་ནི། དཀའ་བ་བྱེད་པའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པའི་གོ་ཆ་དེ་ནི། གཟུགས་དང་འབྲེལ་
བའང་མ་ཡིན། གཟུགས་ཀྱི་དོན་དུ་འབྲེལ་བའང་མ་ཡིན། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་དང་འབྲེལ་བའང་མ་ཡིན། རྣམ་པར་
ཤེས་པའི་དོན་དུ་འབྲེལ་བའང་མ་ཡིན། ཉན་ཐོས་ཀྱི་ས་དང་འབྲེལ་བའང་མ་ཡིན། ཉན་ཐོས་ཀྱི་སའི་དོན་དུ་འབྲེལ་བའང་མ་ཡིན། རང་སངས་རྒྱས་ཀྱི་ས་དང་འབྲེལ་བའང་མ་ཡིན། རང་
སངས་རྒྱས་ཀྱི་སའི་དོན་དུ་འབྲེལ་བའང་མ་ཡིན། སངས་རྒྱས་ཀྱི་ས་དང་འབྲེལ་བའང་མ་ཡིན། སངས་རྒྱས་ཀྱི་སའི་དོན་དུ་འབྲེལ་བའང་མ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར། ཀྱེ་མ་
བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པའི་གོ་ཆ་འདི་ནི། ཆོས་ཐམས་ཅད་དང་མ་འབྲེལ་བའོ། །རབ་འབྱོར་གྱིས་གསོལ་པ། བཅོམ་ལྡན་འདས། འདི་ལྟར་
བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་དེ་ལྟར་སྤྱོད་པ་དེས་གནས་གསུམ་ལ་རེ་བར་མི་བགྱི་སྟེ། གསུམ་གང་ཞེ་ན།
འདི་ལྟ་སྟེ། ཉན་ཐོས་ཀྱི་སའམ། རང་སངས་རྒྱས་ཀྱི་སའམ། སངས་རྒྱས་ཀྱི་སའོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །
རབ་འབྱོར། ཁྱོད་དོན་གྱི་དབང་ཅི་ཞིག་མཐོང་ན་འདི་སྐད་དུ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་དེ་ལྟར་
སྤྱོད་པ་དེས་གནས་གསུམ་ལ་རེ་བར་མི་བྱ་སྟེ། གསུམ་གང་ཞེ་ན། འདི་ལྟ་སྟེ། ཉན་ཐོས་ཀྱི་སའམ། རང་སངས་རྒྱས་ཀྱི་སའམ། སངས་རྒྱས་ཀྱི་སའོ། །ཞེས་ཟེར། རབ་འབྱོར། བྱང་
ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་དེ་ལྟར་སྤྱོད་པ་དེ་ཉན་ཐོས་ཀྱི་སའམ། རང་སངས་རྒྱས་ཀྱི་ས་ལ་རེ་བ་འདི་ནི།
གནས་མེད་ཅིང་གོ་སྐབས་མེད་དོ། །འོན་ཀྱང་གང་གིས་སེམས་ཅན་ཐམས་ཅད་ཀྱི་དོན་དུ་གོ་ཆ་ཆེན་པོ་བགོས་པ་འདི་ནི། སངས་རྒྱས་ཀྱི་ས་ཉིད་ལ་རེ་བར་བྱའོ། །རབ་འབྱོར་གྱིས་གསོལ་པ།
བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཟབ་སྟེ། དེ་ནི། སུས་ཀྱང་བསྒོམ་པར་བགྱི་བ་མ་ལགས། དེ་ནི། གང་གིས་ཀྱང་བསྒོམས་པར་མ་གྱུར། གང་གིས་ཀྱང་སྒོམ་
པར་མི་བྱེད། གང་གིས་ཀྱང་སྒོམ་པར་མི་འགྱུར། བསྒོམ་པར་བགྱི་བའང་ཅུང་ཟད་མ་མཆིས། གང་དུ་བསྒོམ་པར་བགྱི་བའང་མ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས།
༄༅། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཆོས་གང་ཡང་ཡོངས་སུ་གྲུབ་པ་མ་མཆིས་པའི་སླད་དུའོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་
སྒོམ་པ་འདི་ནི། ནམ་མཁའ་སྒོམ་པ་ལགས་སོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་འདི་ནི། ཆོས་ཐམས་ཅད་མི་སྒོམ་པ་ལགས་སོ། །བཅོམ་
ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་འདི་ནི། མ་ཆགས་པ་སྒོམ་པ་ལགས་སོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་
པ་འདི་ནི། མཐའ་ཡས་པ་སྒོམ་པ་ལགས་སོ། །བཅོམ་ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་འདི་ནི། དངོས་པོ་མ་མཆིས་པ་སྒོམ་པ་ལགས་སོ། །བཅོམ་
ལྡན་འདས། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་འདི་ནི། ཡོངས་སུ་བཟུང་བ་མ་མཆིས་པ་སྒོམ་པ་ལགས་སོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་
ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། དེ་ལྟ་བས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་
གནས་པས་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བརྟག་པར་བྱའོ། །རབ་འབྱོར། འདི་
ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་མངོན་པར་ཆགས་པར་མི་བྱེད་པ་དང༌། འདི་ལྟར་གཞན་གྱིས་སྨྲས་པ་དང༌། གཞན་གྱིས་བགྲོས་པ་དག་
ལ་མངོན་པར་ཆགས་པར་མི་བྱེད་པ་དང༌། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་གྱི་དད་པའི་ཕྱིར་མི་འབྲང་བ་དང༌། རབ་འབྱོར། འདི་ལྟར་བྱང་ཆུབ་སེམས་དཔའ་སེམས་དཔའ་
ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཤད་པ་ལ་མི་འགོང༌། ཀུན་ཏུ་མི་ཞུམ། མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་ལྡན་པར་མི་འགྱུར། ནེམ་ནུར་མི་བྱེད། ཐེ་ཚོམ་མི་
ཟ༑ རྨོངས་པར་མི་འགྱུར་ཞིང༌། རྟོགས་པར་བྱེད། མོས་པར་བྱེད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་མཐོང་བ་དང༌། ཐོས་པར་དགའ་བས་ན། རབ་འབྱོར། འདིས་སྔོན་གྱི་མཐར་ཡང་
ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དྲིས་པར་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཤད་པ་ལ་མི་དངང༌། ཀུན་ཏུ་མི་
སྐྲག །ཀུན་ཏུ་སྐྲག་པ་དང་མི་ལྡན་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་
འདི་བཤད་པ་ལ་མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་ལྡན་པར་མི་འགྱུར་ན། བཅོམ་ལྡན་འདས། རྣམ་པ་གང་གིས་དེས་ཤེས་རབ་ཀྱི་ཕ་རོལ་ཏུ་ཕྱིན་པ་བྱེ་བྲག་ཏུ་བརྟགས་པ་
༄༅། །ལགས༑ བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཐམས་ཅད་མཁྱེན་པ་ཉིད་ལ་གཞོལ་བའི་རྒྱུད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོས་
ཤེས་རབ་ཀྱི་ཕ་རོལ་ཏུ་ཕྱིན་པ་བྱེ་བྲག་ཏུ་བརྟགས་པ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཇི་ལྟར་ཐམས་ཅད་མཁྱེན་པ་ཉིད་ལ་གཞོལ་བའི་རྒྱུད་བྱེ་བྲག་ཏུ་བརྟགས་པ་
ལགས༑ བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ནམ་མཁའ་ལ་གཞོལ་བའི་རྒྱུད་དང༌། རབ་འབྱོར། ནམ་མཁའ་ལ་འབབ་པ་དང༌། རབ་འབྱོར། ནམ་མཁའ་ལ་ཕྱོགས་
པའི་རྒྱུད་ཀྱིས་ཐམས་ཅད་མཁྱེན་པ་ཉིད་ལ་གཞོལ་བའི་རྒྱུད་བྱེ་བྲག་ཏུ་བརྟགས་པ་ཡིན་ནོ། །རབ་འབྱོར། ཡང་ཐམས་ཅད་མཁྱེན་པ་ཉིད་ལ་གཞོལ་བའི་རྒྱུད་ཀྱིས་བྱེ་བྲག་ཏུ་བརྟགས་པ་གང་
ཡིན་པ་དེ་ནི། བྱེ་བྲག་ཏུ་བརྟགས་པའོ། །དེ་ཅིའི་ཕྱིར་ཞེ་ན། རབ་འབྱོར། ཐམས་ཅད་མཁྱེན་པ་ཉིད་ནི། གཞལ་དུ་མེད་པའོ། །རབ་འབྱོར། ཐམས་ཅད་མཁྱེན་པ་ཉིད་ནི། ཚད་མ་མེད་པའོ། །
རབ་འབྱོར། གཞལ་དུ་མེད་པ་དང༌། ཚད་མེད་པ་གང་ཡིན་པ་དེ་ནི། གཟུགས་མ་ཡིན། ཚོར་བ་མ་ཡིན། འདུ་ཤེས་མ་ཡིན། འདུ་བྱེད་རྣམས་མ་ཡིན། རྣམ་པར་ཤེས་པ་མ་ཡིན། ཐོབ་
པ་མ་ཡིན། མངོན་པར་རྟོགས་པ་མ་ཡིན། ཁོང་དུ་ཆུད་པ་མ་ཡིན། ལམ་མ་ཡིན། ལམ་གྱི་འབྲས་བུ་མ་ཡིན། ཡེ་ཤེས་མ་ཡིན། རྣམ་པར་ཤེས་པ་མ་ཡིན། སྐྱེ་བ་མ་ཡིན། འཇིག་པ་
མ་ཡིན། འབྱུང་བ་མ་ཡིན། འགྲིབ་པ་མ་ཡིན། འགག་པ་མ་ཡིན། སྒོམ་པ་མ་ཡིན། རྣམ་པར་སྒོམ་པ་མ་ཡིན་ཏེ། སུས་ཀྱང་མ་བྱས། གང་ནས་ཀྱང་མ་འོངས། གང་དུའང་མི་འགྲོ། ཡུལ་གང་དུའང་མི་
གནས༑ ཕྱོགས་གང་དུའང་མི་གནས་ཏེ། གཞན་དུ་ན་གཞལ་དུ་མེད་པ་ཚད་མེད་པ་ཞེས་བྱ་བ་དེ་ལྟ་བུའི་གྲངས་སུ་འགྲོའོ། །ནམ་མཁའ་གཞལ་དུ་མེད་པའི་ཕྱིར་ཐམས་ཅད་མཁྱེན་པ་ཉིད་གཞལ་དུ་
མེད་པ་སྟེ། གཞལ་དུ་མེད་པ་གང་ཡིན་པ་དེ་ནི། སུས་ཀྱང་མངོན་པར་རྫོགས་པར་འཚང་རྒྱ་བར་མི་ནུས་ཏེ། གཟུགས་ཀྱིས་མ་ཡིན། ཚོར་བས་མ་ཡིན། འདུ་ཤེས་ཀྱིས་མ་ཡིན། འདུ་བྱེད་རྣམས་ཀྱིས་
མ་ཡིན། རྣམ་པར་ཤེས་པས་མ་ཡིན། སྦྱིན་པའི་ཕ་རོལ་ཏུ་ཕྱིན་པས་མ་ཡིན། ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་མ་ཡིན། བཟོད་པའི་ཕ་རོལ་ཏུ་ཕྱིན་པས་མ་ཡིན། བརྩོན་འགྲུས་ཀྱི་ཕ་རོལ་ཏུ་
ཕྱིན་པས་མ་ཡིན། བསམ་གཏན་གྱི་ཕ་རོལ་ཏུ་ཕྱིན་པས་མ་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པས་མངོན་པར་རྫོགས་པར་འཚང་རྒྱ་བར་མི་ནུས་སོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་
ཉིད་ཐམས་ཅད་མཁྱེན་པ་ཉིད་དོ། །དེ་བཞིན་དུ་ཚོར་བ་ཉིད་དང༌། འདུ་ཤེས་ཉིད་དང༌། འདུ་བྱེད་རྣམས་ཉིད་དང༌། རབ་འབྱོར། རྣམ་པར་ཤེས་པ་ཉིད་ནི། ཐམས་ཅད་མཁྱེན་པ་ཉིད་དོ། །རབ་འབྱོར།
སྦྱིན་པའི་ཕ་རོལ་ཏུ་ཕྱིན་པ་ཉིད་ནི། ཐམས་ཅད་མཁྱེན་པ་ཉིད་དོ། །དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཉིད་དང༌། བཟོད་པའི་ཕ་རོལ་ཏུ་ཕྱིན་པ་ཉིད་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་
༄༅། །པ་ཉིད་དང༌། བསམ་གཏན་གྱི་ཕ་རོལ་ཏུ་ཕྱིན་པ་ཉིད་དང༌། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ནི། ཐམས་ཅད་མཁྱེན་པ་ཉིད་དོ། །དེ་ནས་ལྷ་རྣམས་
ཀྱི་དབང་པོ་བརྒྱ་བྱིན་འདོད་པ་ན་སྤྱོད་པའི་ལྷའི་བུ་རྣམས་དང་བཅས་པ་དང༌། མི་མཇེད་ཀྱི་བདག་པོ་ཚངས་པའང་གཟུགས་ན་སྤྱོད་པའི་ལྷའི་བུ་རྣམས་དང་བཅས་ཏེ་བཅོམ་ལྡན་འདས། ག་ལ་བ་
དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་
འཁོད་པ་དང་ལྷ་རྣམས་ཀྱི་དབང་པོ་བརྒྱ་བྱིན་འདོད་པ་ན་སྤྱོད་པའི་ལྷའི་བུ་རྣམས་དང་བཅས་པ་དང༌། མི་མཇེད་ཀྱི་བདག་པོ་ཚངས་པའང་གཟུགས་ན་སྤྱོད་པའི་ལྷའི་བུ་རྣམས་དང་བཅས་པས་
བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཟབ་པའོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། གཏིང་
དཔག་དཀའ་བའོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། བལྟ་བར་དཀའ་བའོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། རྟོགས་པར་དཀའ་སྟེ། དོན་
གྱི་དབང་འདི་གཟིགས་ནས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
རྒྱས་ནས་བྱང་ཆུབ་ཀྱི་སྙིང་པོ་ལ་བཞུགས་པ་ན་བརྩོན་པ་ཆུང་བ་ལ་ཐུགས་གཞོལ་བར་མཛད་དེ། ཆོས་བསྟན་པ་ལ་གཞོལ་བར་མ་མཛད་དོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་
ལྷ་རྣམས་ཀྱི་དབང་པོ་བརྒྱ་བྱིན་དང༌། འདོད་པ་ན་སྤྱོད་པའི་ལྷའི་བུ་རྣམས་དང༌། མི་མཇེད་ཀྱི་བདག་པོ་ཚངས་པ་དང༌། གཟུགས་ན་སྤྱོད་པའི་ལྷའི་བུ་རྣམས་ལ་འདི་སྐད་ཅེས་བཀའ་སྩལ་ཏོ། །ལྷའི་
བུ་དག །དེ་དེ་བཞིན་ཏེ། །དེ་དེ་བཞིན་ནོ། ལྷའི་བུ་དག །ཀྱེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཟབ་པའོ། །ལྷའི་བུ་དག །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། གཏིང་དཔག་དཀའ་བའོ། །ལྷའི་
བུ་དག །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བལྟ་དཀའ་བའོ། །ལྷའི་བུ་དག །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། རྟོགས་པར་དཀའ་སྟེ། དོན་གྱི་དབང་འདི་གཟིགས་ནས་ཀྱང་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་མ་ཐག་ཏུ་བྱང་ཆུབ་ཀྱི་སྙིང་པོ་ལ་བཞུགས་པ་ན་ཀྱེ་མ་ཆོས་
ཟབ་མོ་འདི་ངས་མངོན་པར་རྫོགས་པར་སངས་རྒྱས་སོ། །སྙམ་པས་བརྩོན་པ་ཆུང་བ་ལ་ཐུགས་གཞོལ་བར་མཛད་དེ། ཆོས་བསྟན་པ་ལ་གཞོལ་བར་མ་མཛད་དོ། །གང་དུ་སུས་ཀྱང་མངོན་པར་རྫོགས་
པར་སངས་མ་རྒྱས། སུའང་མངོན་པར་རྫོགས་པར་འཚང་རྒྱ་བར་མི་འགྱུར་སུའང་མངོན་པར་རྫོགས་པར་འཚང་མི་རྒྱ་བ་འདི་ནི། ཆོས་ཀྱི་ཟབ་པ་ཡིན་ནོ། །ནམ་མཁའ་ཟབ་པའི་ཕྱིར་ཆོས་འདི་ཟབ་བོ། །
༄༅། །བདག་ཟབ་པའི་ཕྱིར་ཆོས་འདི་ཟབ་བོ། །ཆོས་ཐམས་ཅད་འོང་བ་མེད་པའི་ཕྱིར་ཆོས་འདི་ཟབ་བོ། །ཆོས་ཐམས་ཅད་འགྲོ་བ་མེད་པའི་ཕྱིར་ངས་མངོན་པར་རྫོགས་པར་སངས་
རྒྱས་པའི་ཆོས་འདི་ཟབ་པ་ཡིན་ནོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་དང༌། འདོད་པ་ན་སྤྱོད་པའི་ལྷའི་བུ་དག་དང༌། མི་མཇེད་ཀྱི་བདག་པོ་ཚངས་
པ་དང༌། གཟུགས་ན་སྤྱོད་པའི་ལྷའི་བུ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། ངོ་མཚར་ཏོ། །བདེ་བར་གཤེགས་པ། རྨད་དུ་བྱུང་བའོ། །བཅོམ་ལྡན་འདས། ཆོས་འདི་ནི།
འཇིག་རྟེན་ཐམས་ཅད་དང་མི་མཐུན་པར་བསྟན་ཏེ། བཅོམ་ལྡན་འདས། ཆོས་ཐམས་ཅད་མི་གཟུང་བའི་སླད་དུ་ཆོས་འདི་བསྟན་པ་ལགས་ན། འཇིག་རྟེན་དག་ནི། འཛིན་པ་ལ་སྤྱོད་དོ། །
འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། ལྷའི་ལེའུ་ཞེས་བྱ་སྟེ། བཅོ་ལྔ་པའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་
བཅོ་ལྔ་པ། དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཀྱེ་མ་ཆོས་བསྟན་པ་འདི་ནི། ཆོས་ཐམས་ཅད་དམིགས་སུ་མ་མཆིས་པ་སྟེ།
བཅོམ་ལྡན་འདས། ཆོས་འདི་ནི། གང་ལའང་ཐོགས་པ་མ་མཆིས་སོ། །བཅོམ་ལྡན་འདས། ཀྱེ་མ་ནམ་མཁའ་དང་མཚུངས་པས་གནས་ཐམས་ཅད་དམིགས་སུ་མ་མཆིས་པའི་སླད་དུ་ཆོས་
འདི་ནི༑ ཐོགས་པ་མ་མཆིས་པའི་མཚན་ཉིད་དོ། །བཅོམ་ལྡན་འདས། ཀྱེ་མ་གཉིས་སུ་མ་མཆིས་པའི་སླད་དུ་ཆོས་འདི་ནི། མཚུངས་པ་མ་མཆིས་པའི་མཚན་ཉིད་དོ། །བཅོམ་ལྡན་འདས། ཀྱེ་མ་
རྒོལ་བ་མ་མཆིས་པའི་སླད་དུ་ཆོས་འདི་ནི། དོ་ཟླ་མ་མཆིས་པའི་མཚན་ཉིད་དོ། །བཅོམ་ལྡན་འདས། ཀྱེ་མ་མངོན་པར་གྲུབ་པ་མ་མཆིས་པའི་སླད་དུ་ཆོས་འདི་ནི། གནས་མ་མཆིས་པའོ། །བཅོམ་ལྡན་
འདས༑ ཀྱེ་མ་སྐྱེ་བ་ཐམས་ཅད་སྐྱེ་བ་མ་མཆིས་པའི་སླད་དུ་ཆོས་འདི་ནི། འབྱུང་བ་མ་མཆིས་པའོ། །བཅོམ་ལྡན་འདས། ཀྱེ་མ་ལམ་ཐམས་ཅད་མི་དམིགས་པའི་སླད་དུ་ཆོས་འདི་ནི། ལམ་མ་མཆིས་
པའོ༑ ༑དེ་ནས་ལྷ་རྣམས་ཀྱི་དབང་པོ་བརྒྱ་བྱིན་དང༌། མི་མཇེད་ཀྱི་བདག་པོ་ཚངས་པ་དང༌། འདོད་པ་ན་སྤྱོད་པ་དང༌། གཟུགས་ན་སྤྱོད་པའི་ལྷའི་བུ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་
ཏོ༑ ༑བཅོམ་ལྡན་འདས། ཀྱེ་མ་བཅོམ་ལྡན་འདས་ཀྱི་ཉན་ཐོས་འཕགས་པ་གནས་བརྟན་རབ་འབྱོར་འདི་ནི། རྗེས་སུ་མཐུན་པར་སྐྱེས་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། གནས་
བརྟན་རབ་འབྱོར་འདི་ནི། འདི་ལྟར་ཆོས་གང་དང་གང་ཁོ་ནར་སྟོན་པའི་ཆོས་དེ་དང་དེ་ཉིད་སྟོང་པ་ཉིད་ལས་བརྩམས་ཏེ་སྟོན་པའི་སླད་དུའོ། །དེ་ནས་ཚེ་དང་ལྡན་པ་རབ་འབྱོར་གྱིས་ལྷ་རྣམས་ཀྱི་དབང་པོ་བརྒྱ་
བྱིན་དང༌། མི་མཇེད་ཀྱི་བདག་པོ་ཚངས་པ་དང༌། འདོད་པ་ན་སྤྱོད་པ་དང༌། གཟུགས་ན་སྤྱོད་པའི་ལྷའི་བུ་དེ་དག་ལ་འདི་སྐད་ཅེས་སྨྲས་སོ། །ལྷའི་བུ་དག། གང་འདི་སྐད་དུ་གནས་བརྟན་རབ་འབྱོར་འདི་ནི།
༄༅། །དེ་བཞིན་གཤེགས་པའི་རྗེས་སུ་མཐུན་པར་སྐྱེས་སོ། །ཞེས་སྨྲས་པ་ནི། མ་སྐྱེས་པའི་ཕྱིར་གནས་བརྟན་རབ་འབྱོར་ནི། དེ་བཞིན་གཤེགས་པའི་རྗེས་སུ་མཐུན་
པར་སྐྱེས་ཏེ། གནས་བརྟན་རབ་འབྱོར་དེ་ནི། དེ་བཞིན་གཤེགས་པའི་དེ་བཞིན་ཉིད་ཀྱི་རྗེས་སུ་སོང་བའོ། །ཇི་ལྟར་དེ་བཞིན་གཤེགས་པའི་དེ་བཞིན་ཉིད་འོང་བའང་མེད་སོང་བའང་མེད་པ་དེ་
བཞིན་དུ་གནས་བརྟན་རབ་འབྱོར་གྱི་དེ་བཞིན་ཉིད་འོང་བའང་མེད་སོང་བའང་མེད་དེ། དེ་ལྟར་ན་གནས་བརྟན་རབ་འབྱོར་ནི། དེ་བཞིན་གཤེགས་པའི་དེ་བཞིན་ཉིད་ཀྱི་རྗེས་སུ་སོང་བའོ། །གནས་
བརྟན་རབ་འབྱོར་ནི། དང་པོ་ཉིད་ནས་དེ་བཞིན་གཤེགས་པའི་དེ་བཞིན་ཉིད་ཀྱི་རྗེས་སུ་སོང་བ་སྟེ། དེ་ཅིའི་ཕྱིར་ཞེ་ན། དེ་བཞིན་གཤེགས་པའི་དེ་བཞིན་ཉིད་གང་ཡིན་པ་དེ་ནི། ཆོས་ཐམས་ཅད་
ཀྱི་དེ་བཞིན་ཉིད་དོ། །ཆོས་ཐམས་ཅད་ཀྱི་དེ་བཞིན་ཉིད་གང་ཡིན་པ་དེ་ནི། དེ་བཞིན་གཤེགས་པའི་དེ་བཞིན་ཉིད་དོ། །དེ་བཞིན་གཤེགས་པའི་དེ་བཞིན་ཉིད་གང་ཡིན་པ་དང༌། ཆོས་ཐམས་ཅད་ཀྱི་དེ་
བཞིན་ཉིད་གང་ཡིན་པ་དེ་ནི། གནས་བརྟན་རབ་འབྱོར་གྱི་དེ་བཞིན་ཉིད་དོ། །གནས་བརྟན་རབ་འབྱོར་ནི། དེ་བཞིན་ཉིད་དེའི་རྗེས་སུ་སོང་བ་སྟེ། དེ་བས་ན། དེ་བཞིན་གཤེགས་པའི་རྗེས་སུ་སྐྱེས་སོ། །
དེ་བཞིན་གཤེགས་པའི་དེ་བཞིན་ཉིད་དེའང་དེ་བཞིན་ཉིད་མ་ཡིན་ཏེ། དེ་བཞིན་ཉིད་དེའི་རྗེས་སུ་སོང་བའོ། །དེ་ལྟར་ན། གནས་བརྟན་རབ་འབྱོར་ནི། དེ་བཞིན་གཤེགས་པའི་རྗེས་སུ་སྐྱེས་པའོ། །
དེ་བཞིན་གཤེགས་པའི་དེ་བཞིན་ཉིད་ཀྱི་གནས་པ་གང་ཡིན་པའི་གནས་པ་དེས་གནས་བརྟན་རབ་འབྱོར་ནི། དེ་བཞིན་གཤེགས་པའི་རྗེས་སུ་སྐྱེས་པའོ། །ཇི་ལྟར་དེ་བཞིན་གཤེགས་པའི་དེ་བཞིན་
ཉིད་འགྱུར་བ་མེད་པ་དང༌། རྣམ་པར་འགྱུར་བ་མེད་པ་དང༌། རྟོག་པ་མེད་པ་དང༌། རྣམ་པར་རྟོག་པ་མེད་པ་དེ་བཞིན་དུ་གནས་བརྟན་རབ་འབྱོར་གྱི་དེ་བཞིན་ཉིད་ཀྱང་འགྱུར་བ་མེད་པ་དང༌། རྣམ་པར་འགྱུར་བ་
མེད་པ་དང༌། རྟོག་པ་མེད་པ་དང༌། རྣམ་པར་རྟོག་པ་མེད་པའོ། །དེ་ལྟར་ན། གནས་བརྟན་རབ་འབྱོར་ཡང་དེ་བཞིན་ཉིད་དེས་འགྱུར་བ་མེད་པ། རྣམ་པར་འགྱུར་བ་མེད་པ། རྟོག་པ་མེད་པ། རྣམ་པར་
རྟོག་པ་མེད་པས་དེ་བཞིན་གཤེགས་པའི་རྗེས་སུ་སྐྱེས་སོ། །ཇི་ལྟར་དེ་བཞིན་གཤེགས་པའི་དེ་བཞིན་ཉིད་འགྱུར་བ་མེད། རྣམ་པར་འགྱུར་བ་མེད། རྟོག་པ་མེད། རྣམ་པར་རྟོག་པ་མེད་དེ། གང་ལའང་
ཐོགས་པ་མེད་པ་དེ་བཞིན་དུ་ཆོས་ཐམས་ཅད་ཀྱི་དེ་བཞིན་ཉིད་ཀྱང་འགྱུར་བ་མེད། རྣམ་པར་འགྱུར་བ་མེད། རྟོག་པ་མེད། རྣམ་པར་རྟོག་པ་མེད་དེ། གང་ལའང་ཐོགས་པ་མེད་དོ། །དེ་ཅིའི་ཕྱིར་ཞེ་ན། དེ་
བཞིན་གཤེགས་པའི་དེ་བཞིན་ཉིད་གང་ཡིན་པ་དང༌། ཆོས་ཐམས་ཅད་ཀྱི་དེ་བཞིན་ཉིད་གང་ཡིན་པའི་དེ་བཞིན་ཉིད་འདི་ནི། གཅིག་སྟེ། གཉིས་སུ་མེད་ཅིང་གཉིས་སུ་བྱར་མེད་དོ། །གཉིས་སུ་
མེད་པའི་དེ་བཞིན་ཉིད་ནི། གང་དུའང་དེ་བཞིན་ཉིད་མ་ཡིན། གང་ལས་ཀྱང་དེ་བཞིན་ཉིད་མ་ཡིན། གང་གིའང་དེ་བཞིན་ཉིད་མ་ཡིན་ཏེ། གང་གི་ཕྱིར་དེ་ནི། གང་གིའང་དེ་བཞིན་ཉིད་མ་ཡིན་པ་དེས་
༄༅། །ན༑ དེ་བཞིན་ཉིད་དེ་ནི། གཉིས་སུ་མེད་པ་སྟེ། གཉིས་སུ་མེད་པའི་དེ་བཞིན་ཉིད་ནི། གཉིས་སུ་བྱར་མེད་དོ། །དེ་ལྟར་ན། གནས་བརྟན་རབ་འབྱོར་ནི། མ་བྱས་པའི་དེ་
བཞིན་ཉིད་ལས་དེ་བཞིན་གཤེགས་པའི་རྗེས་སུ་སྐྱེས་ཏེ། མ་བྱས་པའི་དེ་བཞིན་ཉིད་གང་ཡིན་པ་དེ་ནི། ནམ་ཡང་དེ་བཞིན་ཉིད་མ་ཡིན་པར་མི་འགྱུར་རོ། །གང་གི་ཕྱིར་དེ་ནམ་ཡང་དེ་བཞིན་ཉིད་མ་
ཡིན་པར་མི་འགྱུར་བ་དེའི་ཕྱིར་དེ་བཞིན་ཉིད་དེ་ནི། གཉིས་སུ་མེད་དེ། གཉིས་སུ་མེད་པའི་དེ་བཞིན་ཉིད་ནི། གཉིས་སུ་བྱར་མེད་དོ། །དེ་ལྟར་ན། གནས་བརྟན་རབ་འབྱོར་ནི། དེ་བཞིན་གཤེགས་
པའི་རྗེས་སུ་སྐྱེས་སོ། །ཇི་ལྟར་དེ་བཞིན་གཤེགས་པའི་དེ་བཞིན་ཉིད་ཐམས་ཅད་དུ་ཆོས་ཐམས་ཅད་ལ་མི་རྟོག །རྣམ་པར་མི་རྟོག་པ་དེ་བཞིན་དུ་གནས་བརྟན་རབ་འབྱོར་གྱི་དེ་བཞིན་
ཉིད་ཀྱང་ཐམས་ཅད་དུ་ཆོས་ཐམས་ཅད་ལ་མི་རྟོག །རྣམ་པར་མི་རྟོག་གོ །དེ་བཞིན་དུ་དེ་བཞིན་གཤེགས་པ་དང་རབ་འབྱོར་ནི། དེ་བཞིན་ཉིད་ཀྱིས་མངོན་པར་སྤྲུལ་པ་སྟེ། འདི་གཉིས་ཀའང་
བསྐལ་པ་མ་ཡིན་ཞིང་ཐ་མི་དད་པ་སྟེ། ཐ་དད་པར་བྱེད་པ་མི་དམིགས་པའི་ཕྱིར་རོ། །དེ་ལྟར་ན། གནས་བརྟན་རབ་འབྱོར་ནི། དེ་བཞིན་གཤེགས་པའི་རྗེས་སུ་སྐྱེས་སོ། །ཇི་ལྟར་དེ་
བཞིན་གཤེགས་པའི་དེ་བཞིན་ཉིད་ནི། ཆོས་ཐམས་ཅད་ཀྱི་དེ་བཞིན་ཉིད་ལས་གཞན་མ་ཡིན་པ་དེ་བཞིན་དུ་རབ་འབྱོར་གྱི་དེ་བཞིན་ཉིད་ཀྱང་ཆོས་ཐམས་ཅད་ཀྱི་དེ་བཞིན་ཉིད་ལས་གཞན་
མ་ཡིན་ལ། ཆོས་ཐམས་ཅད་ཀྱི་དེ་བཞིན་ཉིད་ལས་གཞན་མ་ཡིན་པ་གང་ཡིན་པ་དེ་ནི། གང་གིའང་དེ་བཞིན་ཉིད་མ་ཡིན་པར་མི་འགྱུར་ཏེ། དེ་བཞིན་ཉིད་དེ་ཉིད་ནི། ཆོས་ཐམས་ཅད་ཀྱི་དེ་བཞིན་ཉིད་
དོ༑ ༑དེ་བཞིན་ཉིད་དེ་ལ་གནས་བརྟན་རབ་འབྱོར་གྱིས་གཞན་མ་ཡིན་པའི་དེ་བཞིན་ཉིད་ཀྱིས་རྗེས་སུ་སོང་བར་ཁས་བླངས་ཏེ། འདིར་འགའ་ཞིག་འགའ་ཞིག་ཏུ་རྗེས་སུ་སོང་བར་ཁས་བླངས་པའང་
མེད་དོ༑ ༑དེ་ལྟར་ན། གནས་བརྟན་རབ་འབྱོར་ནི། དེ་བཞིན་གཤེགས་པའི་རྗེས་སུ་སྐྱེས་སོ། །ཇི་ལྟར་དེ་བཞིན་གཤེགས་པའི་དེ་བཞིན་ཉིད་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་
བ་མ་ཡིན་པ་དེ་བཞིན་དུ་ཆོས་ཐམས་ཅད་ཀྱི་དེ་བཞིན་ཉིད་ཀྱང་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་ཏེ། དེ་ལྟར་ན། གནས་བརྟན་རབ་འབྱོར་དེ་བཞིན་ཉིད་དེའི་རྗེས་སུ་སོང་
བས་དེ་བཞིན་གཤེགས་པའི་རྗེས་སུ་སྐྱེས་པ་ཞེས་བྱའོ། །དེ་བཞིན་གཤེགས་པའི་དེ་བཞིན་ཉིད་ཀྱིས་ཀྱང་དེ་བཞིན་ཉིད་ཀྱི་རྗེས་སུ་སོང་བ་སྟེ། དེ་བཞིན་གཤེགས་པའི་དེ་བཞིན་ཉིད་ཀྱིས་འདས་པའི་
དེ་བཞིན་ཉིད་ཀྱི་རྗེས་སུ་སོང་ངོ༌། །འདས་པའི་དེ་བཞིན་ཉིད་ཀྱིས་དེ་བཞིན་གཤེགས་པའི་དེ་བཞིན་ཉིད་ཀྱི་རྗེས་སུ་སོང་ངོ༌། །དེ་བཞིན་གཤེགས་པའི་དེ་བཞིན་ཉིད་ཀྱིས་མ་འོངས་པའི་དེ་བཞིན་ཉིད་ཀྱི་རྗེས་
སུ་སོང་ངོ༌། །མ་འོངས་པའི་དེ་བཞིན་ཉིད་ཀྱིས་དེ་བཞིན་གཤེགས་པའི་དེ་བཞིན་ཉིད་ཀྱི་རྗེས་སུ་སོང་ངོ༌། །དེ་བཞིན་གཤེགས་པའི་དེ་བཞིན་ཉིད་ཀྱིས་ད་ལྟར་བྱུང་བའི་དེ་བཞིན་ཉིད་ཀྱི་རྗེས་སུ་སོང་ངོ༌། །ད་
༄༅། །ལྟར་བྱུང་བའི་དེ་བཞིན་ཉིད་ཀྱིས་དེ་བཞིན་གཤེགས་པའི་དེ་བཞིན་ཉིད་ཀྱི་རྗེས་སུ་སོང་ངོ༌། །དེ་བཞིན་གཤེགས་པའི་དེ་བཞིན་ཉིད་ཀྱིས་འདས་པ་དང༌། མ་
འོངས་པ་དང༌། ད་ལྟར་བྱུང་བའི་དེ་བཞིན་ཉིད་ཀྱི་རྗེས་སུ་སོང་ངོ༌། །འདས་པ་དང༌། མ་འོངས་པ་དང༌། ད་ལྟར་བྱུང་བའི་དེ་བཞིན་ཉིད་ཀྱིས་དེ་བཞིན་གཤེགས་པའི་དེ་བཞིན་ཉིད་ཀྱི་རྗེས་སུ་
སོང་སྟེ༑ དེ་ལྟར་ན། གནས་བརྟན་རབ་འབྱོར་གྱི་དེ་བཞིན་ཉིད་དང༌། འདས་པ་དང༌། མ་འོངས་པ་དང༌། ད་ལྟར་བྱུང་བའི་དེ་བཞིན་ཉིད་དང༌། དེ་བཞིན་གཤེགས་པའི་དེ་བཞིན་ཉིད་འདི་ནི།
གཉིས་སུ་མེད་དེ། གཉིས་སུ་བྱར་མེད་དོ། །དེ་བཞིན་དུ་ཆོས་ཐམས་ཅད་ཀྱི་དེ་བཞིན་ཉིད་དང༌། རབ་འབྱོར་གྱི་དེ་བཞིན་ཉིད་འདི་ནི། གཉིས་སུ་མེད་དེ། གཉིས་སུ་བྱར་མེད་དོ། །བཅོམ་
ལྡན་འདས། བྱང་ཆུབ་སེམས་དཔར་གྱུར་པའི་དེ་བཞིན་ཉིད་གང་ཡིན་པ་དེ་ཉིད་ནི། བཅོམ་ལྡན་འདས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་
རྒྱས་པའི་དེ་བཞིན་ཉིད་དེ། དེ་བཞིན་ཉིད་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་
པ་ནའང་དེ་བཞིན་གཤེགས་པའི་མིང་འཐོབ་པར་འགྱུར་པ་དེ་ནི། དེ་བཞིན་ཉིད་འདི་ཡིན་ནོ། །དེ་བཞིན་གཤེགས་པའི་དེ་བཞིན་ཉིད་འདི་བསྟན་པ་དེའི་ཚེ་ནའང་དེ་བཞིན་གཤེགས་པ་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་བཞིན་དུ་ས་ཆེན་པོ་འདི་རྣམ་པར་འགྱུར་བ་དྲུག་དང༌། ལྟས་ཆེན་པོ་བཅོ་བརྒྱད་དུ་འགུལ། རབ་ཏུ་འགུལ། ཀུན་ཏུ་རབ་ཏུ་
འགུལ༑ གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། ལྡེག། རབ་ཏུ་ལྡེག། ཀུན་ཏུ་རབ་ཏུ་ལྡེག །འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། ཆེམ་ཆེམ། རབ་ཏུ་ཆེམ་ཆེམ་
ཀུན་ཏུ་རབ་ཏུ་ཆེམ་ཆེམ། འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར་རོ། །གཞན་ཡང་གནས་བརྟན་རབ་འབྱོར་གྱིས་ལྷའི་བུ་དེ་དག་ལ་སྨྲས་པ། ལྷའི་བུ་དག །དེ་ལྟར་ན། གནས་
བརྟན་རབ་འབྱོར་ནི། དེ་བཞིན་གཤེགས་པའི་རྗེས་སུ་སྐྱེས་སོ། །གཞན་ཡང་གནས་བརྟན་རབ་འབྱོར་ནི། གཟུགས་ཀྱི་རྗེས་སུ་མ་སྐྱེས་ཏེ། ཚོར་བའི་མ་ཡིན། འདུ་ཤེས་ཀྱི་མ་ཡིན། འདུ་བྱེད་
རྣམས་ཀྱི་མ་ཡིན། རྣམ་པར་ཤེས་པའི་རྗེས་སུ་མ་སྐྱེས་སོ། །རྒྱུན་དུ་ཞུགས་པའི་འབྲས་བུའི་རྗེས་སུ་མ་སྐྱེས་ཏེ། ལན་ཅིག་ཕྱིར་འོང་བའི་འབྲས་བུའི་མ་ཡིན། ཕྱིར་མི་འོང་བའི་འབྲས་བུའི་མ་
ཡིན༑ དགྲ་བཅོམ་པའི་འབྲས་བུའི་རྗེས་སུ་མ་སྐྱེས་སོ། །རང་སངས་རྒྱས་ཉིད་ཀྱི་རྗེས་སུ་མ་སྐྱེས། སངས་རྒྱས་ཉིད་ཀྱི་རྗེས་སུ་མ་སྐྱེས་སོ། །དེ་ཅིའི་ཕྱིར་ཞེ་ན། འདི་ལྟར་གང་གིས་རྗེས་སུ་སྐྱེ་བ་དང༌།
གང་རྗེས་སུ་སྐྱེས་བའི་ཆོས་དེ་དག་ནི། ཡང་དག་པར་ཡོད་པ་མ་ཡིན་ཞིང་ཉེ་བར་མི་དམིགས་སོ། །དེ་ལྟར་ན། གནས་བརྟན་རབ་འབྱོར་ནི། དེ་བཞིན་གཤེགས་པའི་རྗེས་སུ་སྐྱེས་སོ། །དེ་ནས་བཅོམ་
༄༅། །ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟ་སྟེ། དེ་བཞིན་ཉིད་འདི་ནི། སྤྱོད་པ་ཟབ་མོ་ལགས་སོ། །དེ་སྐད་ཅེས་
གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། དེ་དེ་བཞིན་ནོ། །དེ་དེ་བཞིན་ཏེ། ཤཱ་རིའི་བུ། འདི་ལྟ་སྟེ། དེ་བཞིན་ཉིད་འདི་ནི།
སྤྱོད་པ་ཟབ་མོ་ཡིན་ནོ། །དེ་བཞིན་ཉིད་བསྟན་པ་འདི་བཤད་པ་ནའང་དགེ་སློང་སུམ་བརྒྱ་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །དགེ་སློང་མ་ལྔ་བརྒྱ་ཆོས་རྣམས་ལ་ཆོས་
ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །ལྷའི་བུ་ལྔ་སྟོང་སྔོན་ཡོངས་སུ་སྦྱང་བ་བྱས་པ་དག་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་དྲུག་
ཅུ་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །དེ་ནས་ཚེ་དང་ལྡན་པ་ཤཱ་རིའི་བུས་བྱང་ཆུབ་སེམས་དཔའ་དེ་རྣམས་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་
བར་ཤེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་འདི་རྣམས་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་པའི་
རྒྱུ་ནི༑ གང་ལགས། རྐྱེན་ནི། གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། བྱང་ཆུབ་སེམས་དཔའ་འདི་དག་གིས་ནི། སངས་རྒྱས་ལྔ་བརྒྱ་ལ་བསྙེན་བཀུར་བྱས་ཤིང་
ཐམས་ཅད་དུའང་སྦྱིན་པ་བྱིན། ཚུལ་ཁྲིམས་བསྲུངས། བཟོད་པ་བསྒྲུབས། བརྩོན་འགྲུས་བརྩམས། བསམ་གཏན་དག་བསྐྱེད་དེ། དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་བཟུང་
ཞིང་ཐབས་མཁས་པ་དང་བྲལ་བར་གྱུར་ཏོ། །ཤཱ་རིའི་བུ། འདི་ལྟར་ཡང་བྱང་ཆུབ་སེམས་དཔའ་འདི་དག་གི་ལམ་སྟོང་པ་ཉིད་དམ། མཚན་མ་མེད་པ་ལ་སྤྱོད་པའམ། སྨོན་པ་མེད་པ་ཡིན་མོད་
ཀྱི༑ དེ་ལྟར་ནའང་དེ་དག་ཐབས་མཁས་པ་དང་མི་ལྡན་པའི་ཕྱིར་ཡང་དག་པའི་མཐའ་མངོན་དུ་བྱས་ནས་ཉན་ཐོས་ཀྱི་སར་ངེས་པར་བྱུང་གི། སངས་རྒྱས་ཀྱི་སར་ནི། མ་ཡིན་ནོ། །ཤཱ་རིའི་བུ། འདི་
ལྟ་སྟེ༑ དཔེར་ན། འདབ་ཆགས་བྱ་ཞིག་གི་ལུས་དཔག་ཚད་བརྒྱ་པའམ། དཔག་ཚད་ཉིས་བརྒྱ་པའམ། དཔག་ཚད་སུམ་བརྒྱ་པའམ། དཔག་ཚད་བཞི་བརྒྱ་པའམ། དཔག་ཚད་ལྔ་བརྒྱ་
པ་ཙམ་དུ་གྱུར་པ་ཞིག་ཡོད་དེ། དེ་སུམ་ཅུ་རྩ་གསུམ་པའི་ལྷའི་ནང་ན་འདུག་པ་ལས་ཛམྦུའི་གླིང་འདིར་འགྲོའོ། །སྙམ་དུ་སེམས་ཤིང༌། ཤཱ་རིའི་བུ། འདབ་ཆགས་བྱ་དེ་འདབ་མ་མ་སྐྱེས་པའམ།
འདབ་མ་བྱི་བར་གྱུར་པའམ། འདབ་མ་བཅད་པར་གྱུར་ལ། དེས་ཛམྦུའི་གླིང་འདིར་གནས་པར་བྱའོ། །སྙམ་དུ་བསམས་ཏེ་སུམ་ཅུ་རྩ་གསུམ་པའི་ལྷའི་རིས་ནས་བདག་ཉིད་མཆོངས་ཏེ་འདབ་
ཆགས་བྱ་དེ་དེ་ནས་ལྷུང་བ་དང༌། ནམ་མཁའི་བར་སྣང་ལ་གནས་པའི་བར་དེར་འདི་སྙམ་དུ། ཀྱེ་མའོ་བདག་ཕྱིར་སུམ་ཅུ་རྩ་གསུམ་པའི་ལྷའི་ནང་དུ་གནས་པར་བྱའོ། །སྙམ་དུ་སེམས་ན། ཤཱ་རིའི་
༄༅། །བུ༑ དེ་ཇི་སྙམ་དུ་སེམས། ཅི་འདབ་ཆགས་བྱ་དེས་ཕྱིར་སུམ་ཅུ་རྩ་གསུམ་པའི་ལྷའི་ནང་དུ་གནས་པར་ནུས་སམ། ཚེ་དང་ལྡན་པ་ཤཱ་རིའི་བུས་གསོལ་པ། བཅོམ་ལྡན་
འདས༑ དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། གལ་ཏེ་ཡང་དེ་འདི་སྙམ་དུ། ཀྱེ་མ་བདག་ནི། མ་སྨྲས་མ་སྣད་པར་ཛམྦུའི་གླིང་དུ་གནས་པར་བྱའོ། །སྙམ་
ན༑ ཤཱ་རིའི་བུ། དེ་ཇི་སྙམ་དུ་སེམས། ཅི་འདབ་ཆགས་བྱ་དེ་མ་སྨས་མ་སྣད་པར་ཛམྦུའི་གླིང་དུ་གནས་པར་འགྱུར་རམ། ཤཱ་རིའི་བུས་གསོལ་པ། བཅོམ་ལྡན་འདས། དེ་ནི། མ་
ལགས་སོ། །བཅོམ་ལྡན་འདས། དེ་ཛམྦུའི་གླིང་དུ་ལྷུང་ན་རྨས་ཤིང་སྣད་པར་འགྱུར་ཏེ། དེ་འགུམ་པའམ། འགུམ་པ་ལ་ཐུག་པ་ཙམ་གྱི་སྡུག་བསྔལ་དུ་འགྱུར་རོ། །དེ་ཅིའི་སླད་དུ་ཞེ་ན།
བཅོམ་ལྡན་འདས། དེ་ནི། འདི་ལྟར་ལགས་ཏེ། གང་གི་ལུས་ཀྱང་ཆེན་པོར་གྱུར་པ་དང༌། འདབ་མའང་མ་མཆིས་པར་གྱུར་པ་དང༌། མཐོན་པོ་ཞིག་ནས་ཀྱང་ལྷུང་བར་གྱུར་པའི་སླད་དུའོ། །དེ་
སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། དེ་དེ་བཞིན་ནོ། །དེ་དེ་བཞིན་ཏེ། ཤཱ་རིའི་བུ། བྱང་ཆུབ་སེམས་དཔའ་
སེམས་དཔའ་ཆེན་པོ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་གནས་ཤིང་སྦྱིན་པ་བྱིན། ཚུལ་ཁྲིམས་བསྲུངས། བཟོད་
པ་བསྒྲུབས། བརྩོན་འགྲུས་བརྩམས། བསམ་གཏན་ལ་མཉམ་པར་བཞག་སྟེ། དེ་རྒྱ་ཆེར་ཡང་དག་པར་ཞུགས་པར་གྱུར་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་འཚང་རྒྱ་བར་དེའི་སེམས་ཆེར་བསྐྱེད་པར་གྱུར་ཀྱང་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་འདིས་ཡོངས་སུ་མ་ཟིན་ཅིང་ཐབས་མཁས་པ་དང་བྲལ་བར་གྱུར་ན། འདི་ལྟར་ཉན་ཐོས་ཀྱི་སའམ་རང་
སངས་རྒྱས་ཀྱི་སར་ལྟུང་ངོ༌། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཁྲིམས་དེ་
དང༌། ཏིང་ངེ་འཛིན་དེ་དང༌། ཤེས་རབ་དེ་དང༌། རྣམ་པར་གྲོལ་བ་དེ་དང༌། རྣམ་པར་གྲོལ་བའི་ཡེ་ཤེས་གཟིགས་པ་དེ་ལ་མཚན་མའི་ཚུལ་གྱིས་སེམས་ཤིང་འཛིན་པར་བྱེད་པ་དེས་ནི། དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཚུལ་ཁྲིམས་མི་ཤེས་མི་མཐོང་སྟེ། ཏིང་ངེ་འཛིན་མ་ཡིན། ཤེས་རབ་མ་ཡིན། རྣམ་པར་གྲོལ་བ་མ་ཡིན། དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་རྣམ་པར་གྲོལ་བའི་ཡེ་ཤེས་གཟིགས་པ་མི་ཤེས་མི་མཐོང་ངོ༌། །དེས་མ་ཤེས་མ་མཐོང་བས་སྟོང་པ་ཉིད་ཀྱི་སྒྲ་ཉན་
ཅིང་དེས་སྒྲ་དེ་ལ་མཚན་མར་བྱེད་དེ། དེས་སྒྲ་དེ་མཚན་མར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་འདོད་པ་དེའི་ཕྱིར་འདི་ནི། ཉན་ཐོས་ཀྱི་སའམ་རང་སངས་རྒྱས་
༄༅། །ཀྱི་ས་ལ་གནས་པར་འགྱུར་བར་རིག་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ། གང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་བཟུང་ཞིང་ཐབས་མཁས་པ་
དང་བྲལ་བར་གྱུར་པ་དེ་ནི། འདི་ལྟར་འགྱུར་རོ། །ཤཱ་རིའི་བུས་གསོལ་པ། བཅོམ་ལྡན་འདས་ཀྱིས་ཇི་ལྟར་བཤད་པའི་དོན་བདག་གིས་འཚལ་བ་ལྟར་ན། བྱང་ཆུབ་སེམས་དཔའ་གང་བསོད་
ནམས་ཀྱི་ཚོགས་ཤིན་ཏུ་མང་པོ་དང་ལྡན་དུ་ལགས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་བཟུང་ལ་ཐབས་མཁས་པ་དང་བྲལ་ཞིང་དགེ་བའི་བཤེས་གཉེན་དང་མི་ལྡན་པར་
གྱུར་ན། དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པ་ལ་ཐེ་ཚོམ་དུ་འགྱུར་རོ། །བཅོམ་ལྡན་འདས། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་བགྱི་ཞིང་ཐབས་མཁས་པ་ལའང་བརྩོན་པར་བགྱིའོ། །
དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། དེ་དེ་བཞིན་ནོ། །དེ་དེ་བཞིན་ཏེ། ཤཱ་རིའི་བུ། བྱང་ཆུབ་
སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་བཟུང་ཞིང་ཐབས་མཁས་པ་དང་བྲལ་བ་ནི། བསོད་ནམས་ཀྱི་ཚོགས་མང་པོ་དང་ལྡན་ནའང་དགེ་
བའི་བཤེས་གཉེན་དང་བྲལ་བར་གྱུར་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པ་ནི་ཐེ་ཚོམ་དུ་འགྱུར་རོ། །ཤཱ་རིའི་བུ། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་
པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་བས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྒོམ་པར་བྱ་ཞིང་ཐབས་མཁས་པ་དང་ཡང་ལྡན་
པར་བྱའོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདོད་པ་ན་སྤྱོད་པའི་ལྷའི་བུ་རྣམས་དང་བཅས་པ་དང༌། མི་མཇེད་ཀྱི་བདག་པོ་ཚངས་པ་གཟུགས་ན་སྤྱོད་པའི་ལྷའི་བུ་རྣམས་དང་བཅས་
པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཟབ་བོ། །བཅོམ་ལྡན་འདས། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ནི། འབྱུང་བར་དཀའོ། །བཅོམ་ལྡན་འདས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་ཤིན་ཏུ་འབྱུང་བར་དཀའོ། །དེ་ནས་
བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་སོགས་པ་འདོད་པ་ན་སྤྱོད་པའི་ལྷའི་བུ་རྣམས་དང༌། མི་མཇེད་ཀྱི་བདག་པོ་ཚངས་པ་ལ་སོགས་པ་གཟུགས་ན་སྤྱོད་པའི་ལྷའི་བུ་
རྣམས་ལ་བཀའ་སྩལ་པ། ལྷའི་བུ་དག །དེ་དེ་བཞིན་ནོ། །དེ་དེ་བཞིན་ཏེ། ལྷའི་བུ་དག། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཟབ་བོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་
༄༅། །འབྱུང་བར་དཀའ་སྟེ། ཤེས་རབ་འཆལ་པ་དང༌། བརྩོན་འགྲུས་དམན་པ་དང༌། མོས་པ་དམན་པ་དང༌། ཐབས་མི་མཁས་པ་དང༌། སྡིག་པའི་གྲོགས་པོ་ལ་
བརྟེན་པ་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་ཤིན་ཏུ་འབྱུང་བར་དཀའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་
གྱིས་འདི་སྐད་ཅེས་གསོལ་ཏོ། །གང་བཅོམ་ལྡན་འདས་ཀྱིས་འདི་སྐད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འབྱུང་བར་དཀའོ། །བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་འཚང་རྒྱ་བ་འབྱུང་བར་ཤིན་ཏུ་དཀའོ། །ཞེས་བཀའ་སྩལ་ན། གང་ལ་ཅུང་ཟད་ཀྱང་མངོན་པར་རྫོགས་པར་འཚང་རྒྱ་བར་བགྱི་བ་མ་མཆིས་ན། བཅོམ་
ལྡན་འདས། ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་འབྱུང་བར་དཀའ་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བ་ཤིན་ཏུ་འབྱུང་བར་དཀའ་བ་ལགས། དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་ཐམས་ཅད་སྟོང་པ་ལགས་པའི་སླད་དུ་ཆོས་གང་མངོན་པར་རྫོགས་
པར་འཚང་རྒྱ་བར་ནུས་པའི་ཆོས་དེ་གང་ཡང་མ་མཆིས་སོ། །བཅོམ་ལྡན་འདས། འདི་ལྟར་ཆོས་ཐམས་ཅད་ནི། སྟོང་པ་སྟེ། བཅོམ་ལྡན་འདས། ཆོས་གང་སྤང་བར་བགྱི་བའི་སླད་
དུ་ཆོས་བསྟན་པའི་ཆོས་དེའང་མ་མཆིས་སོ། །དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་གང་ལགས་པ་དང༌། མངོན་པར་རྫོགས་པར་སངས་
རྒྱ་བར་བགྱི་བ་གང་ལགས་པ་དང༌། འཚལ་བ་གང་ལགས་པ་དང༌། འཚལ་བར་བགྱི་བ་གང་ལགས་པའི་ཆོས་དེ་དག་ཐམས་ཅད་ནི། སྟོང་པའོ། །བཅོམ་ལྡན་འདས། རྣམ་གྲངས་འདིས་
ཀྱང་བདག་ནི། འདི་སྙམ་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་ནི། འབྱུང་བར་སླ་བ་ལགས་ཏེ། འབྱུང་བར་དཀའ་བ་ནི། མ་ལགས་སོ། །
ཞེས་སེམས་སོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། འབྱུང་བ་མེད་པའི་ཕྱིར་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་འབྱུང་བར་དཀའོ། །རབ་འབྱོར། ཡང་དག་པ་མ་ཡིན་པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འབྱུང་བར་དཀའོ། །རབ་འབྱོར། རྣམ་པར་མི་
རྟོག་པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་འབྱུང་བར་དཀའོ། །རབ་འབྱོར། རྣམ་པར་མ་བསྒྲུབས་པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འབྱུང་
བར་དཀའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་ནི། མཆོག་ཏུ་འབྱུང་བར་དཀའོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་
༄༅། །ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། སྟོང་པ་ཞེས་བྱ་བའི་རྣམ་གྲངས་འདིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འབྱུང་བར་དཀའོ། །
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་མཆོག་ཏུ་འབྱུང་བར་དཀའོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་རབ་འབྱོར། ནམ་མཁའ་འདི་སྙམ་དུ་བདག་
གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །སྙམ་དུ་མི་སེམས་སོ། །ཚེ་དང་ལྡན་པ་རབ་འབྱོར། དེ་བཞིན་དུ་ཆོས་འདི་དག་ཀྱང་མངོན་པར་རྫོགས་
པར་འཚང་རྒྱ་བར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་རབ་འབྱོར། ཆོས་ཐམས་ཅད་ནི། ནམ་མཁའ་དང་མཚུངས་པའི་ཕྱིར་རོ། །ཚེ་དང་ལྡན་པ་རབ་འབྱོར། གལ་ཏེ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་འབྱུང་བར་སླར་ཟིན་ན། བྱང་ཆུབ་སེམས་དཔའ་གངྒཱའི་ཀླུང་གི་བྱེ་མ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་ཞིག་
ན། ཚེ་དང་ལྡན་པ་རབ་འབྱོར། འདི་ལྟར་བྱང་ཆུབ་སེམས་དཔའ་གངྒཱའི་ཀླུང་གི་བྱེ་མ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་སྟེ། ཚེ་དང་ལྡན་པ་རབ་འབྱོར། དེ་
བས་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འབྱུང་བར་དཀའ་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་མཆོག་ཏུ་འབྱུང་བར་
དཀའོ༑ ༑ཞེས་དེ་ལྟར་རིག་པར་བྱའོ། །དེ་སྐད་ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། ཡང་ཅི་གཟུགས་
གང་ཡིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་གམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། །ཚེ་དང་ལྡན་པ་
ཤཱ་རིའི་བུ། ཡང་ཅི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་གང་ཕྱིར་ལྡོག་པའི་ཆོས་དེ་གཟུགས་ལས་གཞན་ན་ཡོད་དམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་
ཡིན་ནོ༑ ༑རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་གང་ཡིན་པ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ལས་ཕྱིར་ལྡོག་གམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལས་གང་ཕྱིར་ལྡོག་པའི་ཆོས་དེ་ཚོར་བ་དང༌། འདུ་ཤེས་དང༌། འདུ་བྱེད་རྣམས་ལས་གཞན་ན་ཡོད་དམ། རྣམ་པར་ཤེས་པ་ལས་གཞན་ན་ཡོད་དམ། ཤཱ་རིའི་བུས་སྨྲས་པ། ཚེ་དང་
ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་གཟུགས་ཀྱི་དེ་བཞིན་ཉིད་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་
༄༅། །གམ༑ ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་ཚོར་བའི་དེ་བཞིན་ཉིད་
དང༌། འདུ་ཤེས་ཀྱི་དེ་བཞིན་ཉིད་དང༌། འདུ་བྱེད་རྣམས་ཀྱི་དེ་བཞིན་ཉིད་གང་ཡིན་པ་དང༌། རྣམ་པར་ཤེས་པའི་དེ་བཞིན་ཉིད་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་
ཕྱིར་ལྡོག་གམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ལས་གང་ཕྱིར་ལྡོག་པའི་ཆོས་དེ་གཟུགས་ཀྱི་དེ་བཞིན་ཉིད་ལས་གཞན་ན་ཡོད་དམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ།
ཚེ་དང་ལྡན་པ་ཤཱ་རིའི་བུ། ཡང་ཅི་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པའི་ཆོས་དེ་ཚོར་བའི་དེ་བཞིན་ཉིད་དང༌། འདུ་ཤེས་ཀྱི་དེ་བཞིན་ཉིད་དང༌། འདུ་བྱེད་རྣམས་
ཀྱི་དེ་བཞིན་ཉིད་ལས་གཞན་ན་ཡོད་དམ། རྣམ་པར་ཤེས་པའི་དེ་བཞིན་ཉིད་ལས་གཞན་ན་ཡོད་དམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་
སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་གཟུགས་གང་ཡིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའམ། ཤཱ་།རིའི་བུས་སྨྲས་པ། ཚེ་དང་ལྡན་
པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་གང་ཡིན་པ་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་
ཤཱ་རིའི་བུ། ཡང་ཅི་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་ཆོས་དེ་གཟུགས་ལས་གཞན་ན་ཡོད་དམ། ཤཱ་རིའི་བུས་སྨྲས་པ། ཚེ་དང་ལྡན་
པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་
བའི་ཆོས་དེ་ཚོར་བ་དང༌། འདུ་ཤེས་དང༌། འདུ་བྱེད་རྣམས་ལས་གཞན་ན་ཡོད་དམ། རྣམ་པར་ཤེས་པ་ལས་གཞན་ན་ཡོད་དམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་
ནི༑ མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་གཟུགས་ཀྱི་དེ་བཞིན་ཉིད་གང་ཡིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
རྒྱའམ༑ ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་ཚོར་བའི་དེ་བཞིན་ཉིད་དང༌། འདུ་ཤེས་ཀྱི་
༄༅། །དེ་བཞིན་ཉིད་དང༌། འདུ་བྱེད་རྣམས་ཀྱི་དེ་བཞིན་ཉིད་དང༌། རྣམ་པར་ཤེས་པའི་དེ་བཞིན་ཉིད་གང་ཡིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱའམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་ཆོས་གང་ཡིན་པ་དེ་གཟུགས་ཀྱི་དེ་བཞིན་ཉིད་ལས་གཞན་ན་ཡོད་དམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་
ནི༑ མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་ཆོས་གང་ཡིན་པ་
དེ་ཚོར་བའི་དེ་བཞིན་ཉིད་དང༌། འདུ་ཤེས་ཀྱི་དེ་བཞིན་ཉིད་དང༌། འདུ་བྱེད་རྣམས་ཀྱི་དེ་བཞིན་ཉིད་ལས་གཞན་ན་ཡོད་དམ། རྣམ་པར་ཤེས་པའི་དེ་བཞིན་ཉིད་ལས་གཞན་ན་ཡོད་དམ།
ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་གཟུགས་གང་ཡིན་པ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་རིག་པར་བྱའམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་ཚོར་བ་དང༌།
འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་གང་ཡིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རིག་པར་བྱའམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར།
དེ་ནི༑ མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་གཟུགས་ལས་གཞན་པའི་ཆོས་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རིག་པར་
བྱའམ༑ ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་ཚོར་བ་དང༌། འདུ་ཤེས་དང༌། འདུ་བྱེད་རྣམས་
ལས་གཞན་པ་དང༌། རྣམ་པར་ཤེས་པ་ལས་གཞན་པའི་ཆོས་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རིག་པར་བྱའམ། ཤཱ་རིའི་བུས་སྨྲས་པ། ཚེ་དང་
ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་གཟུགས་ཀྱི་དེ་བཞིན་ཉིད་གང་ཡིན་པ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་རིག་པར་བྱའམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་ཚོར་བའི་དེ་བཞིན་
ཉིད་དང༌། འདུ་ཤེས་ཀྱི་དེ་བཞིན་ཉིད་དང༌། འདུ་བྱེད་རྣམས་ཀྱི་དེ་བཞིན་ཉིད་དང༌། རྣམ་པར་ཤེས་པའི་དེ་བཞིན་ཉིད་གང་ཡིན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རིག་
༄༅། །པར་བྱའམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་གཟུགས་
ཀྱི་དེ་བཞིན་ཉིད་ལས་གཞན་པའི་ཆོས་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རིག་པར་བྱའམ། ཤཱ་རིའི་བུས་སྨྲས་པ། ཚེ་དང་ལྡན་པ། རབ་འབྱོར། དེ་ནི། མ་
ཡིན་ནོ༑ ༑རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་ཚོར་བའི་དེ་བཞིན་ཉིད་དང༌། འདུ་ཤེས་ཀྱི་དེ་བཞིན་ཉིད་དང༌། འདུ་བྱེད་རྣམས་ཀྱི་དེ་བཞིན་ཉིད་ལས་གཞན་པ་
དང༌། རྣམ་པར་ཤེས་པའི་དེ་བཞིན་ཉིད་ལས་གཞན་པའི་ཆོས་གང་ཡིན་པ་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རིག་པར་བྱའམ། ཤཱ་རིའི་བུས་སྨྲས་པ། ཚེ་དང་
ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། དེ་ཇི་སྙམ་དུ་སེམས། དེ་བཞིན་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་
ཕྱིར་ལྡོག་གམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། དེ་ཇི་སྙམ་དུ་སེམས། གང་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པའི་ཆོས་དེ་དེ་བཞིན་ཉིད་ལ་ཡོད་དམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་
པ༑ ཚེ་དང་ལྡན་པ་ཤཱ་རིའི་བུ། ཡང་གང་ཞིག་ཆོས་ཉིད་དེ་ཉིད་ལ་མི་གནས་པའི་ཚུལ་གྱིས་གནས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་གང་ཕྱིར་ལྡོག་པའི་ཆོས་དེ་གང་ཡིན་
ཤཱ་རིའི་བུ། གང་ཞིག་དེ་བཞིན་ཉིད་དུ་གྱུར་པའི་ཆོས་དེའང་གང་ཡིན། ཚེ་དང་ལྡན་པ་ཤཱ་རིའི་བུ། ཅི་དེ་བཞིན་ཉིད་ཕྱིར་ལྡོག་པར་འགྱུར་བ་ཡང་ཡོད་དམ། ཤཱ་རིའི་བུས་སྨྲས་པ། ཚེ་དང་
ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། དེ་ལྟར་བདེན་པ་ཉིད་དང༌། གནས་པ་ཉིད་དུ་ཆོས་ཐམས་ཅད་དམིགས་སུ་མེད་པ་ལ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་འགྱུར་བའི་ཆོས་དེ་གང་ཡིན། དེ་སྐད་ཅེས་སྨྲས་པ་དང༌། ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་
སྨྲས་སོ༑ ༑ཆོས་ཀྱི་ཚུལ་གྱིས་རྣམ་པ་གང་ཞིག་ཚེ་དང་ལྡན་པ་གནས་བརྟན་རབ་འབྱོར་གྱིས་བཤད་པ་དེ་ལྟར་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་གང་ཕྱིར་ལྡོག་པའི་ཆོས་
དེ་གང་ཡང་མེད་དོ། །ཚེ་དང་ལྡན་པ་རབ་འབྱོར། བྱང་ཆུབ་སེམས་དཔའི་ཐེག་པ་པའི་གང་ཟག་གསུམ་པོ་གང་དག་ཡིན་པ་འདི་དག་ནི། དེ་བཞིན་གཤེགས་པས་གསུངས་པ་ཡིན་ན།
ཇི་ལྟར་ཚེ་དང་ལྡན་པ་རབ་འབྱོར་གྱིས་བསྟན་པ་ལྟར་ན་ནི། གསུམ་པོ་དག་གི་རྣམ་པར་གཞག་པ་ཡོད་པར་མི་འགྱུར་གྱི། ཐེག་པ་གཅིག་ཁོ་ནར་འགྱུར་ཏེ། འདི་ལྟ་སྟེ། སངས་རྒྱས་ཀྱི་ཐེག་
༄༅། །པ་དང༌། བྱང་ཆུབ་སེམས་དཔའི་ཐེག་པ་སྟེ། ཐེག་པ་ཆེན་པོའོ། །དེ་ནས་ཚེ་དང་ལྡན་པ་བྱམས་མའི་བུ་གང་པོས་ཚེ་དང་ལྡན་པ་ཤཱ་རིའི་བུ་ལ་འདི་སྐད་
ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། ཡང་ཅི་ཚེ་དང་ལྡན་པ་གནས་བརྟན་རབ་འབྱོར་ཉན་ཐོས་ཀྱི་ཐེག་པ་ཅན་ནམ། རང་སངས་རྒྱས་ཀྱི་ཐེག་པ་ཅན་ནམ། ཐེག་པ་ཆེན་པོ་པའི་བྱང་
ཆུབ་སེམས་དཔའ་གཅིག་ཀྱང་ཡོད་པར་ཁས་མི་ལེན་ནམ། རེ་ཞིག་གནས་བརྟན་ཚེ་དང་ལྡན་པ་རབ་འབྱོར་འདི་ལ་དྲི་དགོས་སོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་
གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། ཡང་ཅི་ཁྱོད་ཉན་ཐོས་ཀྱི་ཐེག་པ་ཅན་ནམ། རང་སངས་རྒྱས་ཀྱི་ཐེག་པ་ཅན་ནམ། ཐེག་པ་ཆེན་པོ་པའི་བྱང་
ཆུབ་སེམས་དཔའ་གཅིག་ཀྱང་ཡོད་པར་ཁས་མི་ལེན་ནམ། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་ཅི་དེ་བཞིན་ཉིད་ཀྱི་དེ་བཞིན་ཉིད་གང་ཡིན་པ་དེ་ལ་ཉན་ཐོས་ཀྱི་ཐེག་པ་
ཅན་ནམ། རང་སངས་རྒྱས་ཀྱི་ཐེག་པ་ཅན་ནམ། ཐེག་པ་ཆེན་པོ་པའི་བྱང་ཆུབ་སེམས་དཔའ་གཅིག་ཀྱང་ཡང་དག་པར་རྗེས་སུ་མཐོང་ངམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར།
དེ་ནི༑ མ་ཡིན་ཏེ། དེ་བཞིན་ཉིད་ཀྱང་རེ་ཤིག་རྣམ་པ་གསུམ་དུ་དམིགས་སུ་མེད་ན། བྱང་ཆུབ་སེམས་དཔའ་ལྟ་ཅི་སྨོས། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཡང་
ཅི་དེ་བཞིན་ཉིད་རྣམ་པ་གཅིག་ཏུ་ཡང་དམིགས་སུ་ཡོད་དམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། ཅི་ཁྱོད་ཀྱིས་དེ་
བཞིན་ཉིད་ལ་བྱང་ཆུབ་སེམས་དཔའི་ཆོས་གཅིག་ཀྱང་ཡང་དག་པར་རྗེས་སུ་མཐོང་ངམ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་སྨྲས་པ། ཚེ་
དང་ལྡན་པ་ཤཱ་རིའི་བུ། དེ་ལྟར་བདེན་པ་ཉིད་དང༌། གནས་པ་ཉིད་དུ་བྱང་ཆུབ་སེམས་དཔའི་ཆོས་དེ་ཡང་དམིགས་སུ་མེད་ན། ཁྱོད་ཅིའི་ཕྱིར་འདི་སྙམ་དུ། འདི་ནི། ཉན་ཐོས་ཀྱི་ཐེག་པ་ཅན། འདི་
ནི༑ རང་སངས་རྒྱས་ཀྱི་ཐེག་པ་ཅན། འདི་ནི། ཐེག་པ་ཆེན་པོ་པའོ། །སྙམ་དུ་སེམས། ཤཱ་རིའི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་ཉིད་ལ་རབ་ཏུ་རྣམ་པར་འབྱེད་
པ་རྣམས་ཁྱད་པར་མེད་པ་དང༌། བྱེ་བྲག་མེད་པ་དང༌། ཐ་དད་དུ་བྱར་མེད་པ་ཉིད་ཐོས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གང་སེམས་མི་འགོང༌། ཀུན་ཏུ་མི་ཞུམ། ཕྱིར་ཕྱོགས་པར་མི་འགྱུར་
ན༑ བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། བྱང་ཆུབ་ཏུ་ངེས་པར་འབྱུང་བར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །
རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། འདི་ལྟར་དེ་བཞིན་གཤེགས་པའི་མཐུ་དང༌། སངས་རྒྱས་ཀྱི་བྱིན་གྱི་རླབས་ཀྱིས་ཁྱོད་དེ་སྐད་དུ་སྨྲ་བར་སྤོབས་པ་དེ་ནི། རབ་འབྱོར། ལེགས་
༄༅། །སོ་ལེགས་སོ། །དེ་ལྟར་བྱང་ཆུབ་སེམས་དཔའ་དེ་དག་དེ་བཞིན་ཉིད་རབ་ཏུ་རྣམ་པར་འབྱེད་པ་རྣམས་ཁྱད་པར་མེད་པ་དང༌། བྱེ་བྲག་མེད་པ་དང༌། ཐ་དད་དུ་བྱ་བ་མེད་
པར་ཐོས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་མི་འགོང༌། ཀུན་ཏུ་མི་ཞུམ། ཕྱིར་མི་ཕྱོགས་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། བྱང་ཆུབ་
ལ་ངེས་པར་འབྱུང་བར་རིག་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་གང་གིས་བྱང་ཆུབ་སེམས་དཔའ་སེམས་
དཔའ་ཆེན་པོ་འདི་ངེས་པར་འབྱུང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱིས་བྱང་ཆུབ་སེམས་དཔའ་སེམས་དཔའ་
ཆེན་པོ་འདི་ངེས་པར་འབྱུང་བར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་
ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་བར་འཚལ་བས་ཇི་ལྟར་གནས་པར་བགྱི། ཇི་ལྟར་བསླབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རབ་
འབྱོར༑ བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་བར་འདོད་པས། སེམས་ཅན་ཐམས་ཅད་ལ་མཉམ་པར་གནས་
པར་བྱ་སེམས་ཅན་ཐམས་ཅད་ལ་སེམས་མཉམ་པ་བསྐྱེད་པར་བྱ་སྟེ། མི་མཉམ་པ་མེད་པའི་སེམས་ཀྱིས་གཞན་ལ་དམིགས་པར་བྱ། བྱམས་པའི་སེམས་ཀྱིས་གཞན་ལ་དམིགས་པར་བྱ། ཕན་པའི་
སེམས་ཀྱིས་གཞན་ལ་དམིགས་པར་བྱ། དགེ་བའི་སེམས་ཀྱིས་གཞན་ལ་དམིགས་པར་བྱ། ང་རྒྱལ་བཅག་པའི་སེམས་ཀྱིས་གཞན་ལ་དམིགས་པར་བྱ། ཁོང་ཁྲོ་བ་མེད་པའི་སེམས་ཀྱིས་གཞན་
ལ་དམིགས་པར་བྱ། འཚེ་བ་མེད་པའི་སེམས་ཀྱིས་གཞན་ལ་དམིགས་པར་བྱ། མཐོ་འཚམ་པ་མེད་པའི་སེམས་ཀྱིས་གཞན་ལ་དམིགས་པར་བྱ། སེམས་ཅན་ཐམས་ཅད་ལ་མར་འདུ་ཤེས་པ་
ཉེ་བར་བཞག་པ་དང༌། ཕར་འདུ་ཤེས་པ་དང༌། བུར་འདུ་ཤེས་པ་དང༌། བུ་མོར་འདུ་ཤེས་པ་ཉེ་བར་བཞག་སྟེ་གཞན་ལ་དམིགས་པར་བྱའོ། །རབ་འབྱོར། དེ་ལྟར་ན། བྱང་ཆུབ་སེམས་དཔའ་
སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་སེམས་ཅན་ཐམས་ཅད་ལ་དེ་ལྟར་གནས་པར་བྱ། དེ་ལྟར་བསླབ་པར་བྱ་སྟེ།
བདག་སེམས་ཅན་ཐམས་ཅད་ཀྱི་མགོན་དུ་འགྱུར་བར་བྱའོ། །བདག་ཉིད་ཀྱང་སྡིག་པ་ཐམས་ཅད་ལས་ལྡོག་པ་ལ་གནས་པར་བྱ། སྦྱིན་པ་སྦྱིན་པར་བྱ། ཚུལ་ཁྲིམས་བསྲུང་བར་བྱ། བཟོད་པ་
བསྒོམ་པར་བྱ། བརྩོན་འགྲུས་བརྩམ་པར་བྱ། བསམ་གཏན་ལ་མཉམ་པར་བཞག་པར་བྱ། ཤེས་རབ་ཀྱིས་ཡོངས་སུ་རྒྱས་པར་བྱ། རྟེན་ཅིང་འབྲེལ་པར་འབྱུང་བ་ལུགས་དང་མཐུན་པ་དང༌།
༄༅། །ལུགས་དང་མཐུན་པ་མ་ཡིན་པ་བལྟ་བར་བྱ། གཞན་དག་ཀྱང་དེ་ལ་ཡང་དག་པར་བསྐུལ་བ་དང༌། དེའི་བསྔགས་པ་བརྗོད་པ་དང༌། དེ་ལ་རྗེས་སུ་མཐུན་པས་དགའ་
བར་བྱའོ། །དེ་བཞིན་དུ་བདེན་པ་ནས་བྱང་ཆུབ་སེམས་དཔའི་སྐྱོན་མེད་པར་འཇུག་པའི་བར་དང༌། སེམས་ཅན་རྣམས་ཡོངས་སུ་སྨིན་པ་ལ་གནས་ནས་གཞན་དག་ཀྱང་དེ་ལ་ཡང་དག་པར་བསྐུལ་
བ་དང༌། དེའི་བསྔགས་པ་བརྗོད་པ་དང༌། དེ་ལ་རྗེས་སུ་མཐུན་པས་དགའ་བར་བྱའོ། །དེ་ལྟར་འདོད་ཅིང་དེ་ལྟར་སློབ་པ་ནི། སྒྲིབ་པ་མེད་པའི་ཚུལ་ནས་དམ་པའི་ཆོས་གནས་པ་དང༌། སྒྲིབ་པ་མེད་
པའི་རང་བཞིན་གྱི་བར་དུ་འགྱུར་རོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། དེ་བཞིན་ཉིད་ཀྱི་ལེའུ་ཞེས་བྱ་སྟེ། བཅུ་དྲུག་པའོ།། །།དེ་ནས་བཅོམ་
ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་པ་གང་དག་ལགས། རྟགས་
གང་དག་ལགས། མཚན་མ་གང་དག་ལགས། བཅོམ་ལྡན་འདས། ཇི་ལྟར་བདག་གིས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལགས་པར་འཚལ་བར་བགྱི། བཅོམ་
ལྡན་འདས་ཀྱིས་བཀའ་སྩལ་པ། རབ་འབྱོར། སོ་སོའི་སྐྱེ་བོའི་ས་གང་ཡིན་པ་དང༌། ཉན་ཐོས་ཀྱི་ས་གང་ཡིན་པ་དང༌། རང་སངས་རྒྱས་ཀྱི་ས་གང་ཡིན་པ་དང༌། སངས་རྒྱས་ཀྱི་ས་གང་ཡིན་པ་
དེ་ནི༑ དེ་བཞིན་ཉིད་ཀྱི་ས་ཞེས་བྱ་སྟེ། འདི་དག་ཐམས་ཅད་ཀྱི་དེ་བཞིན་ཉིད་ལ་གཉིས་སུ་མེད་ཅིང་གཉིས་སུ་བྱར་མེད་དེ། རྟོག་པ་མེད་ལ་རྣམ་པར་རྟོག་པ་མེད་པའོ། །དེ་བཞིན་ཉིད་དེ་དང༌། ཆོས་ཉིད་དེ་ལ་
འཇུག་པ་དང༌། དེ་བཞིན་ཉིད་ལ་གནས་ཤིང༌། དེ་བཞིན་ཉིད་ལ་མི་རྟོག། རྣམ་པར་མི་རྟོག་སྟེ། དེ་ལྟར་འཇུག་ཅིང་དེ་ལྟར་ཞུགས་པ་ནི། དེ་བཞིན་ཉིད་ཇི་ལྟ་བ་བཞིན་ཐོས་ནས་དེ་ལས་ཀྱང་སོང་ནས་
འདི་ལྟར་མ་ཡིན་ནོ། །ཞེས་ནེམ་ནུར་མི་བྱེད། ཡིད་གཉིས་མི་བྱེད། ཐེ་ཚོམ་མི་བྱེད། རྨོངས་པར་མི་བྱེད་དེ། འོན་ཀྱང་འདི་ནི། དེ་བཞིན་ཏེ། དེ་ཁོ་ན་ལྟར་ཡིན་ནོ། །ཞེས་མོས་པར་བྱེད། ཁོང་དུ་ཆུད་
པར་བྱེད་དོ། །ཅི་ཐོད་ཐོད་སྨྲ་བར་མི་འགྱུར་གྱི། དོན་དང་ལྡན་པའི་ཚིག་ཏུ་སྨྲ་སྟེ། དོན་དང་མི་ལྡན་པ་མ་ཡིན་ཞིང་ཕ་རོལ་གྱིས་བྱས་པ་དག་དང་མ་བྱས་པ་ལ་མི་ལྟ་སྟེ། རབ་འབྱོར། རྣམ་པ་དེ་དག་དང༌།
རྟགས་དེ་དག་དང༌། མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར།
གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། དགེ་སྦྱོང་དང༌། བྲམ་ཟེ་འདི་དག་ནི། ཤེས་པར་བྱ་བ་ཤེས་སོ། །བལྟ་བར་བྱ་བ་མཐོང་ངོ༌། །ཞེས་དགེ་སྦྱོང་དང༌།
བྲམ་ཟེ་གཞན་དག་གི་ངོར་མི་ལྟ་ཞིང༌། ལྷ་གཞན་དག་ལ་ཕྱག་མི་འཚལ། ལྷ་གཞན་དག་ལ་མེ་ཏོག་གམ། བདུག་པའམ། དྲིའམ། ཕྲེང་བའམ། བྱུག་པའམ། ཕྱེ་མའམ། གོས་སམ། གདུགས་
༄༅། །སམ༑ རྒྱལ་མཚན་ནམ། དྲིལ་བུའམ། བ་དན་དག་གམ། མར་མེ་དག་སྦྱིན་པར་མི་སེམས་ཤིང༌། ལྷ་གཞན་དག་ལ་མི་རྟེན་ཏེ། རབ་འབྱོར། རྣམ་པ་དེ་དག་དང་
རྟགས་དེ་དག་དང༌། མཚན་མ་དེ་དག་དང་ཡང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་
བྱའོ༑ ༑རབ་འབྱོར། ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། ངན་སོང་དུ་མི་སྐྱེ་ཞིང་བུད་མེད་ཀྱི་དངོས་པོ་ཡང་ཡོངས་སུ་མི་འཛིན་ཏོ། །རབ་འབྱོར།
གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། དགེ་བ་བཅུའི་ལས་ཀྱི་ལམ་རྣམས་ཡང་དག་པར་བླངས་ནས་གནས་ཏེ། དེ་བདག་ཉིད་ཀྱང་སྲོག་གཅོད་པ་སྤངས་
ཤིང་གཞན་ཡང་སྲོག་གཅོད་པ་སྤོང་བ་ལ་ཡང་དག་པར་འགོད་དོ། །བདག་ཉིད་ཀྱང་མ་བྱིན་པར་ལེན་པ་སྤངས་ཤིང་གཞན་ཡང་མ་བྱིན་པར་ལེན་པ་སྤོང་བ་ལ་ཡང་དག་པར་འགོད་དོ། །བདག་
ཉིད་ཀྱང་འདོད་པས་ལོག་པར་སྤྱོད་པ་སྤངས་པ་ཡིན་ཞིང་གཞན་ཡང་འདོད་པས་ལོག་པར་སྤྱོད་པ་སྤོང་བ་ལ་ཡང་དག་པར་འགོད་དོ། །བདག་ཉིད་ཀྱང་འབྲུའི་ཆང་དང༌། བཅོས་པའི་ཆང་བག་མེད་
པའི་གནས་སྤངས་ཤིང་གཞན་ཡང་འབྲུའི་ཆང་དང༌། བཅོས་པའི་ཆང་བག་མེད་པའི་གནས་སྤོང་བ་ལ་ཡང་དག་པར་འགོད་དོ། །བདག་ཉིད་ཀྱང་བརྫུན་དུ་སྨྲ་བ་སྤངས་ཤིང་གཞན་ཡང་བརྫུན་
དུ་སྨྲ་བ་སྤོང་བ་ལ་ཡང་དག་པར་འགོད་དོ། །བདག་ཉིད་ཀྱང་ཕྲ་མ་སྨྲ་བ་སྤངས་ཤིང་གཞན་ཡང་ཕྲ་མ་སྨྲ་བ་སྤོང་བ་ལ་ཡང་དག་པར་འགོད་དོ། །བདག་ཉིད་ཀྱང་ཚིག་རྩུབ་མོ་སྨྲ་བ་སྤངས་ཤིང་གཞན་ཡང་
ཚིག་རྩུབ་མོ་སྨྲ་བ་སྤོང་བ་ལ་ཡང་དག་པར་འགོད་དོ། །བདག་ཉིད་ཀྱང་ཚིག་བཀྱལ་པ་སྨྲ་བ་སྤངས་ཤིང་གཞན་ཡང་ཚིག་བཀྱལ་པ་སྨྲ་བ་སྤོང་བ་ལ་ཡང་དག་པར་འགོད་དོ། །བདག་ཉིད་ཀྱང་བརྣབ་
སེམས་སྤངས་ཤིང་གཞན་ཡང་བརྣབ་སེམས་སྤོང་བ་ལ་ཡང་དག་པར་འགོད་དོ། །བདག་ཉིད་ཀྱང་གནོད་སེམས་སྤངས་ཤིང་གཞན་ཡང་གནོད་སེམས་སྤོང་བ་ལ་ཡང་དག་པར་འགོད་དོ། །
བདག་ཉིད་ཀྱང་ལོག་པར་ལྟ་བ་སྤངས་ཤིང་གཞན་ཡང་ལོག་པར་ལྟ་བ་སྤོང་བ་ལ་ཡང་དག་པར་འགོད་དོ། །རབ་འབྱོར། དེ་ལྟར་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི།
བདག་ཉིད་ཀྱང་དགེ་བ་བཅུའི་ལས་ཀྱི་ལམ་རྣམས་ཡང་དག་པར་བླངས་ནས་གནས་ཤིང་གཞན་ཡང་དགེ་བ་བཅུའི་ལས་ཀྱི་ལམ་རྣམས་ལ་ཡང་དག་པར་སྟོན། ཡང་དག་པར་འགོད། ཡང་དག་པར་
གཟེངས་བསྟོད། ཡང་དག་པར་རབ་ཏུ་དགའ་བར་བྱེད། བརྟན་པར་བྱེད་དེ། །དེ་རྨི་ལམ་དུའང་མི་དགེ་བ་བཅུའི་ལས་ཀྱི་ལམ་རྣམས་གཅིག་གམ། མང་དུ་ཡང་རུང་སྟེ། ཐམས་ཅད་ནས་ཐམས་ཅད་
རྣམ་པ་ཐམས་ཅད་ཀྱི་ཐམས་ཅད་དུ་མི་འབྱུང་ཞིང་སེམས་ཀྱིས་ཀྱང་ཀུན་ཏུ་མི་སྤྱོད་དོ། །རབ་འབྱོར། ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་རྨི་ལམ་དུའང་དགེ་བ་
༄༅། །བཅུའི་ལས་ཀྱི་ལམ་རྣམས་མངོན་དུ་འགྱུར་ཏེ། རབ་འབྱོར། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་དང་ཡང་ལྡན་པའི་བྱང་ཆུབ་སེམས་དཔའ་
སེམས་དཔའ་ཆེན་པོ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་
སེམས་དཔའ་ཆེན་པོ་ནི། ཆོས་གང་དང་གང་ཀུན་ཆུབ་པར་བྱེད་པ་དང༌། སྦྱིན་པར་བྱེད་པ་དེ་དང་དེ་དག་ཉིད་སེམས་ལ་ཀུན་ཆུབ་པར་བྱེད་ཅིང་སྦྱིན་པར་བྱེད་དེ། བདག་གིས་ཆོས་འདི་
སེམས་ཅན་ཐམས་ཅད་ཀྱི་དོན་དང༌། ཕན་པ་དང༌། བདེ་བའི་ཕྱིར་སྦྱིན་པར་བྱ་སྟེ། ཆོས་བསྟན་པ་འདིས་ཀྱང་སེམས་ཅན་ཐམས་ཅད་ཆོས་ཀྱི་བསམ་པ་ཡོངས་སུ་རྫོགས་པར་གྱུར་ཅིག།
ཅེས་ཆོས་ཀྱི་སྦྱིན་པ་དེའང་སེམས་ཅན་ཐམས་ཅད་ལ་ཐུན་མོང་དུ་བྱེད་དེ། རབ་འབྱོར། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་དང་ཡང་ལྡན་པའི་བྱང་ཆུབ་སེམས་དཔའ་
སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་
སེམས་དཔའ་ཆེན་པོ་ནི། ཆོས་ཟབ་མོ་བཤད་པ་ལ་ནེམ་ནུར་མི་བྱེད། ཡིད་གཉིས་མི་བྱེད། ཐེ་ཚོམ་མི་བྱེད། རྨོངས་པར་མི་འགྱུར་རོ། །དེ་ཕན་པའི་ཚིག་དང་ལྡན་པར་འགྱུར། ཚིག་རན་
པར་འགྱུར། ཚིག་འཇམ་པར་འགྱུར། རྨུགས་པ་དང་གཉིད་ཆུང་བར་འགྱུར་རོ། །བག་ལ་ཉལ་མེད་པར་འགྱུར། དེ་འོང་ངམ་འགྲོ་བ་ནའང་སེམས་མ་འཁྲུལ་བར་འགྲོ་ཞིང་འོང་ངོ༌། །དེ་དྲན་པ་ཉེ་བར་
བཞག་ཅིང་འགྲོ། དྲན་པ་ཉེ་བར་བཞག་ཅིང་འོང༌། དེ་རྐང་པ་ས་ལ་འདེགས་པ་བུལ་བར་མི་བྱེད། རྐང་པ་ས་ལ་འཇོག་པ་བུལ་བར་མི་བྱེད། བདེ་བ་ཉིད་དུ་འདེགས། བདེ་བར་འཇོག །རྐང་པ་ས་ལ་གྱ་ཚོམ་
དུ་མི་འདེགས། རྐང་པ་ས་ལ་གྱ་ཚོམ་དུ་མི་འཇོག །དེ་མཐོང་བཞིན་དུ་ས་ཕྱོགས་སུ་གོམ་པ་འདོར་རོ། །རབ་འབྱོར། ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་ལུས་ལ་
ཆོས་གོས་ཡོངས་སུ་ལོངས་སྤྱད་པའང་ཤིག་མེད་པར་འགྱུར་ཏེ། ཀུན་ཏུ་སྤྱོད་པ་གཟོབ་པར་འགྱུར། གནོད་པ་ཉུང་བར་འགྱུར། སྐྱོན་ཉུང་བར་འགྱུར་རོ། །སེམས་ཅན་གཞན་དག་གི་ལུས་ལ་
སྲིན་བུའི་རིགས་སྟོང་ཕྲག་བརྒྱད་ཅུ་དག་གང་ཡོད་པ་དེ་དག་ཀྱང་དེའི་ལུས་ལ་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་ངོ༌། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར་
ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་བའི་རྩ་བ་དེ་དག་ནི། འཇིག་རྟེན་ཐམས་ཅད་ལས་མངོན་པར་འཕགས་པ་ཡིན་ནོ། །ཇི་ལྟ་ཇི་ལྟར་དགེ་བའི་རྩ་བ་དེ་དག་རྣམ་
པར་འཕེལ་བ་དེ་ལྟ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེའང་ལུས་ཡོངས་སུ་དག་པ་ཡོངས་སུ་འཛིན་ཏོ། །ངག་ཡོངས་སུ་དག་པ་དང༌། སེམས་ཡོངས་སུ་དག་པ་ཡོངས་སུ་
༄༅། །འཛིན་ཏོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་ཡོངས་སུ་དག་པ་གང་ལགས་པར་རིག་པར་བགྱི།
བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཇི་ལྟ་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་བའི་རྩ་བ་དེ་དག་རྣམ་པར་འཕེལ་བ་དེ་ལྟ་དེ་ལྟར་བྱང་ཆུབ་སེམས་དཔའ་
སེམས་དཔའ་ཆེན་པོ་སེམས་ལ་བྱ་བ་ཉུང་བ་ཡོངས་སུ་འཛིན་ཏོ། །སེམས་གཡོ་མེད་པ་དང༌། སེམས་སྒྱུ་མེད་པ་དང༌། སེམས་གྱ་གྱུ་མེད་པ་དང༌། སེམས་ཡོན་པོ་མེད་པ་ཡོངས་སུ་འཛིན་
ཏོ༑ ༑རབ་འབྱོར། སེམས་རྣམ་པར་དག་པ་གང་ཡིན་པ་དེས་ཉན་ཐོས་དང་རང་སངས་རྒྱས་ཀྱི་ས་ལས་འདས་པར་འགྱུར་ཏེ། རབ་འབྱོར། འདི་ནི། བྱང་ཆུབ་སེམས་དཔའ་སེམས་དཔའ་ཆེན་
པོའི་སེམས་ཡོངས་སུ་དག་པར་རིག་པར་བྱའོ། །རབ་འབྱོར། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོའང་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། རྙེད་པ་
དང༌། བཀུར་སྟི་དང༌། ཚིགས་སུ་བཅད་པ་ལ་ལྷུར་མི་བྱེད་དོ། །ཆོས་གོས་དང༌། བསོད་སྙོམས་དང༌། མལ་སྟན་དང༌། ན་བའི་གསོས་སྨན་དང༌། ཡོ་བྱད་དག་ལ་ལྷུར་བྱེད་པ་མ་ཡིན་ནོ། །ཕྲག་
དོག་དང༌། སེར་སྣ་མང་བ་མ་ཡིན་ནོ། །ཆོས་ཟབ་མོ་དག་བཤད་ན། ཡང་དག་པར་མི་ཞུམ་ཞིང་བློ་བརྟན་པར་འགྱུར། བློ་ཟབ་པར་འགྱུར། རི་མོར་བྱས་ཏེ་གཞན་ལས་ཆོས་ཉན་ཅིང༌། རི་མོར་བྱས་ཏེ་
གཞན་ལས་ཆོས་གང་ཉན་པ་དེ་དག་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་དང་སྦྱོར་བར་བྱེད་དོ། །འཇིག་རྟེན་གྱི་བཟོའི་གནས་དང༌། ལས་ཀྱི་གནས་ཇི་སྙེད་ཡོད་པ་དེ་དག་ཐམས་ཅད་ཀྱང་ཤེས་
རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་ཆོས་ཉིད་དང་སྦྱོར་བར་བྱེད་དོ། གང་ཆོས་ཀྱི་དབྱིངས་དང་མི་སྦྱོར་བའི་ཆོས་གང་ཡང་ཡང་དག་པར་རྗེས་སུ་མི་མཐོང་སྟེ། ཐམས་ཅད་ཀྱང་དེ་དང་ལྡན་པར་ཡང་
དག་པར་མཐོང་ངོ༌། །རབ་འབྱོར། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་གལ་ཏེ་བདུད་སྡིག་ཅན་དེས་སེམས་ཅན་དམྱལ་བ་ཆེན་པོ་བརྒྱད་མངོན་པར་སྤྲུལ་ཏེ། སེམས་ཅན་དམྱལ་བ་ཆེན་པོ་དེ་
རེ་རེར་ཡང་བྱང་ཆུབ་སེམས་དཔའ་བརྒྱ་ཕྲག་མང་པོ་དག་དང༌། བྱང་ཆུབ་སེམས་དཔའ་སྟོང་ཕྲག་མང་པོ་དག་དང༌། བྱང་ཆུབ་སེམས་དཔའ་བརྒྱ་སྟོང་ཕྲག་མང་པོ་དག་མངོན་པར་སྤྲུལ་ཏེ་ཕྱིར་མི་ལྡོག་
པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་འདི་སྐད་ཅེས་ཟེར་ཏེ། དེ་བཞིན་གཤེགས་པས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཕྱིར་མི་ལྡོག་པར་ལུང་བསྟན་པ་དེ་
༄༅། །དག་ནི༑ སེམས་ཅན་དམྱལ་བ་ཆེན་པོ་བརྒྱད་པོ་འདི་དག་ཏུ་སྐྱེས་ཏེ། ཁྱོད་ཀྱང་ཕྱིར་མི་ལྡོག་པར་ལུང་བསྟན་པས་ཁྱོད་ཀྱང་སེམས་ཅན་དམྱལ་བ་ཆེན་པོ་བརྒྱད་པོ་འདི་དག་
ཏུ་སྐྱེ་བར་འགྱུར་གྱི། འདི་ལྟར་ཁྱོད་ཀྱིས་བྱང་ཆུབ་ཀྱི་སེམས་དེ་ཕྱིར་བཤགས་པར་གྱིས་ཤིག །སོ་སོར་སྤོངས་ཤིག །སེམས་ཅན་དམྱལ་བ་བརྒྱད་པོ་དེར་སྐྱེས་ན། ཁྱོད་ལ་སངས་རྒྱས་ཀྱིས་
ཅི་ཞིག་བྱ། དེ་ལྟར་བྱས་ན། ཁྱོད་མཐོ་རིས་ཀྱི་འཇིག་རྟེན་དུ་འགྲོ་བར་འགྱུར་རོ། །ཞེས་ཟེར་བ་དེ་ལྟ་ནའང་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་མི་འཁྲུག་མི་གཡོ་
ཞིང༌། འདི་སྙམ་དུ། གང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ངན་འགྲོ་རྣམས་སུ་སྐྱེ་བ་འདི་ནི། གནས་མ་ཡིན་ཞིང་གོ་སྐབས་མེད་དོ། །སྙམ་དུ་ཤེས་ན། རབ་
འབྱོར༑ རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་
ལྡོག་པར་གཟུང་བར་བྱའོ། །རབ་འབྱོར། གཞན་ཡང་བདུད་སྡིག་ཅན་དགེ་སྦྱོང་གི་ཆ་བྱད་དུ་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་གན་དུ་འོངས་ནས་འདི་སྐད་ཅེས་
ཟེར་ཏེ༑ གང་ཁྱོད་ཀྱིས་སྔོན་ཐོས་པ་དེ་ཕྱིར་བཤགས་པར་གྱིས་ཤིག །གང་ཁྱོད་ཀྱིས་སྔོན་ཡོངས་སུ་བཟུང་བ་དེ་སོ་སོར་སྤོངས་ཤིག །གལ་ཏེ་ཁྱོད་ཀྱིས་འདི་ཕྱིར་བཤགས་ཤིང་གལ་
ཏེ་ཁྱོད་ཀྱིས་འདི་སོ་སོར་སྤངས་པ་དེ་ལྟ་ན་ང་ཁྱོད་ཀྱི་གན་དུ་ཡང་དང་ཡང་དུ་ཉེ་བར་འོང་ངོ༌། །གང་ཁྱོད་ཀྱིས་དེ་ལྟར་ཐོས་པ་འདི་ནི། སངས་རྒྱས་ཀྱི་བཀའ་མ་ཡིན་ཏེ། འདི་ནི། སྙན་དངགས་བྱེད་པས་རང་བཟོར་
བྱས་པའོ། །ཡང་གང་ང་འཆད་པ་འདི་ནི། སངས་རྒྱས་ཀྱིས་བཤད་པ་སྟེ། འདི་ནི། སངས་རྒྱས་ཀྱི་བཀའོ། །ཞེས་ཟེར་བ་དེ་ཐོས་ནས་གལ་ཏེ་བྱང་ཆུབ་སེམས་དཔའ་འཁྲུག་ཅིང་གཡོ་ན། རབ་འབྱོར།
བྱང་ཆུབ་སེམས་དཔའ་འདི་ནི། དེ་བཞིན་གཤེགས་པ་དག་གིས་ལུང་མ་བསྟན་པ་སྟེ། བྱང་ཆུབ་སེམས་དཔའ་འདི་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པ་མ་ཡིན་ཞིང༌། འདི་ནི།
ཕྱིར་མི་ལྡོག་པའི་ཁམས་ལ་གནས་པ་མ་ཡིན་པར་རིག་པར་བྱའོ། །རབ་འབྱོར། ཡང་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་བདུད་སྡིག་ཅན་ལས་ཚིག་འདི་དག་ཐོས་ནས་ཀྱང་མི་འཁྲུག་
མི་གཡོ་ཞིང་དེ་ཆོས་ཉིད་ལ་རྟོན་ཏེ་མི་སྐྱེ་བ་ཉིད་དང༌། མི་འགག་པ་ཉིད་དང༌། མངོན་པར་འདུ་མི་བྱེད་པ་ཉིད་ལ་རྟོག་ཅིང་གཞན་གྱི་དད་པའི་ཕྱིར་མི་འགྲོ་སྟེ། རབ་འབྱོར། དཔེར་ན། དགེ་སློང་དགྲ་
བཅོམ་པ་ཟག་པ་ཟད་པ་གཞན་གྱི་དད་པའི་ཕྱིར་མི་འབྲང་སྟེ་ཆོས་ཉིད་མངོན་སུམ་དུ་བྱེད་ཅིང་བདུད་སྡིག་ཅན་གྱིས་མི་འཕྲོག་པ་དེ་བཞིན་དུ་རབ་འབྱོར། ཕྱིར་མི་ལྡོག་པའི་བྱང་ཆུབ་སེམས་
དཔའ་སེམས་དཔའ་ཆེན་པོའང་ཉན་ཐོས་ཀྱི་ཐེག་པ་དང༌། རང་སངས་རྒྱས་ཀྱི་ཐེག་པ་ཅན་གྱི་གང་ཟག་དག་གིས་མི་རྫི་བ་ཡིན་ཏེ། ཉན་ཐོས་ཀྱི་སའམ། རང་སངས་རྒྱས་ཀྱི་སར་ཕྱིར་མི་ལྡོག་པའི་
༄༅། །ཆོས་ཅན་དུ་འགྱུར་རོ། །ཐམས་ཅད་མཁྱེན་པ་ཉིད་དུ་ངེས་ཤིང་རྫོགས་པའི་བྱང་ཆུབ་ལ་གཞོལ་བར་འགྱུར་རོ། །རབ་འབྱོར། ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་དེ་གང་གི་ཚེ་ཕྱིར་མི་ལྡོག་པའི་ཁམས་ལ་གནས་པར་གྱུར་པ་དེའི་ཚེ་གཞན་གྱི་དྲིང་ལ་མི་འཇོག་པར་འགྱུར་བ་ཡིན་ནོ། །རབ་འབྱོར། རྣམ་པ་དེ་དག་དང༌། རྟགས་དེ་དག་དང༌།
མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ།། །།
འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་བཅུ་དྲུག་པ། རབ་འབྱོར། གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་གན་དུ་ལ་ལ་
འོངས་ནས་འདི་སྐད་ཅེས་ཟེར་ཏེ། བྱང་ཆུབ་སེམས་དཔའི་སྤྱོད་པ་འདི་ནི། འཁོར་བའི་སྤྱོད་པ་ཡིན་ཏེ། ཁྱོད་འདི་ཉིད་དུ་སྡུག་བསྔལ་མཐར་ཕྱུང་ལ་ཕྱིར་འཁོར་བ་ན་སྤྱོད་པའི་སྡུག་བསྔལ་
དང༌། ཡིད་མི་བདེ་བ་དག་མྱོང་བར་མ་བྱེད་ཅིག །ཀྱེ་མ་མ་ལ་རེ་ཞིག་འདི་ཉིད་དུ་ཁྱོད་ཀྱི་ཕུང་པོ་འདི་མངོན་པར་གྲུབ་པར་མི་འགྱུར་བར་ཡང་ཁྱོད་ཕུང་པོ་གཞན་ཡོངས་སུ་གཟུང་བར་སེམས་
པ་ལྟ་ག་ལ་སྲིད་ཅེས་ཟེར་བ་ལ་གལ་ཏེ་དེ་མི་འཁྲུག་མི་གཡོ་ན། བདུད་སྡིག་ཅན་བདག་ཉིད་དེར་འོངས་ནས་དེ་ལ་འདི་སྐད་དུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་གིས་
བསྐལ་པ་གངྒཱའི་ཀླུང་གི་བྱེ་མ་སྙེད་དུ་སངས་རྒྱས་བཅོམ་ལྡན་འདས་དག་ལ་ཆོས་གོས་དང༌། བསོད་སྙོམས་དང༌། མལ་སྟན་དང༌། སྙུན་གྱི་གསོས་སྨན་དང༌། ཡོ་བྱད་དག་གིས་རིམ་གྲོར་བྱས་པ་དང༌།
སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་དག་གི་དྲུང་དུ་ཚངས་པར་སྤྱོད་པ་སྤྱད་པ་དང༌། སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་དག་ལ་བསྙེན་བཀུར་བྱས་ཤིང་
བྱང་ཆུབ་སེམས་དཔའི་ཐེག་པ་འདི་ཉིད་ཀྱི་ཕྱིར་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་གིས་གནས་པར་བྱ་ཞེས་ཡོངས་སུ་ཞུས། ཡོངས་སུ་དྲིས། ཡོངས་སུ་དྲི་བ་བྱས་ཏེ།
ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་གནས་པར་བྱ་བ་དེ་ལྟར་དེ་བཞིན་གཤེགས་པ་དེ་དག་གིས་བསྟན་པ་དེ་བཞིན་དུ་གནས། དེ་བཞིན་དུ་སྤྱད། དེ་བཞིན་དུ་རྣལ་
འབྱོར་དུ་བྱས་ཀྱང་དེ་དག་གིས་ད་དུང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཏེ། དེ་ལྟར་གདམས་པ་དང༌། རྗེས་སུ་བསྟན་པ་ལ་གནས་
ཤིང་དེ་ལྟར་བསླབས་པས་ཀྱང་ཐམས་ཅད་མཁྱེན་པ་ཉིད་རྗེས་སུ་མ་ཐོབ་ན། ཡང་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་ཐོབ་པར་ག་ལ་འགྱུར་ཞེས་བྱས་
ནས་གལ་ཏེ་དེ་ལྟ་བུས་ཀྱང་མི་འཁྲུག་མི་གཡོ་ན། བདུད་སྡིག་ཅན་གྱིས་ས་ཕྱོགས་དེ་ཉིད་དུ་དགེ་སློང་དག་མངོན་པར་སྤྲུལ་ནས་འདི་སྐད་ཅེས་ཟེར་ཏེ། འདི་ལྟར་དགེ་སློང་དགྲ་བཅོམ་པ་ཟག་
༄༅། །པ་ཟད་པ་གང་དག་ཡིན་པ་འདི་དག་ནི། བྱང་ཆུབ་ཏུ་ཞུགས་པར་གྱུར་པ་ལས་ད་ལྟར་དགྲ་བཅོམ་པ་ཉིད་ཐོབ་ཅིང་དགྲ་བཅོམ་པ་ཉིད་ལ་གནས་པ་ཡིན་ན། ཁྱོད་ཀྱིས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་ག་ལ་འགྱུར་ཞེས་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་དེ་སྐད་བཤད། དེ་སྐད་བསྟན་ཀྱང་སེམས་མི་འཁྲུག་
མི་གཡོ་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །གལ་ཏེ་བྱང་ཆུབ་སེམས་དཔའ་
སེམས་དཔའ་ཆེན་པོ་དེ་ལྟ་བུའི་འབྲལ་བར་བྱེད་པའི་ཚིག་རྣམས་གཞན་ལས་ཐོས་ནས་སེམས་ཆོས་ཉིད་ལས་ཡོངས་སུ་ཉམས་པར་མི་འགྱུར། དེའི་ཡིད་ཕྱིར་ལྡོག་པར་མི་འགྱུར།
དེའི་སེམས་གཞན་དུ་མི་འགྱུར་ཞིང་བདུད་ཀྱི་ལས་དེ་དག་ཐམས་ཅད་དེ་ལྟར་ཤེས་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་དེ་ལྟར་ཕ་རོལ་ཏུ་ཕྱིན་པ་དག་ལ་
སྤྱོད་པ་དེ་ཐམས་ཅད་མཁྱེན་པ་ཉིད་མི་འཐོབ་པར་འགྱུར་བ་འདི་ནི། གནས་མ་ཡིན་ཞིང་གོ་སྐབས་མེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྤྱོད་ཅིང་དེ་ལྟར་སློབ་
སྟེ༑ དེ་བཞིན་གཤེགས་པས་ཇི་ལྟར་གསུངས་པའི་སྤྱོད་པ་དེ་དང་མ་བྲལ་བ་དང༌། ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པ་དེ་དག་དང་མ་བྲལ་བ་ལ་བདུད་སྡིག་ཅན་གྱིས་གླགས་
རྙེད་པར་འགྱུར་བ་དེ་ནི། གནས་མ་ཡིན་ཞིང་གོ་སྐབས་མེད་དོ། །གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བདུད་ཀྱི་ལས་རྣམས་ཁོང་དུ་ཆུད་ཅིང་འབྲལ་བར་བྱེད་པའི་ཚིག་རྣམས་གཞན་ལས་ཐོས་
ནས་ཡོངས་སུ་མི་ཉམས། དེའི་ཡིད་ཕྱིར་མི་ལྡོག། སེམས་གཞན་དུ་མི་འགྱུར་ཏེ། བདུད་ཀྱི་ལས་དེ་དག་དེ་ལྟར་ཤེས་ན། རབ་འབྱོར། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་དང༌།
ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་
སེམས་དཔའ་ཆེན་པོ་ཕྱིར་མི་ལྡོག་པ་ནི། གཟུགས་ཀྱི་འདུ་ཤེས་མངོན་པར་འདུ་བྱེད་པ་མ་ཡིན། གཟུགས་ཀྱི་འདུ་ཤེས་སྐྱེད་པ་མ་ཡིན། དེ་བཞིན་དུ་ཚོར་བའི་འདུ་ཤེས་མ་ཡིན། འདུ་ཤེས་
ཀྱི་འདུ་ཤེས་མ་ཡིན། འདུ་བྱེད་རྣམས་ཀྱི་འདུ་ཤེས་མ་ཡིན། རྣམ་པར་ཤེས་པའི་འདུ་ཤེས་མངོན་པར་འདུ་བྱེད་པ་མ་ཡིན། རྣམ་པར་ཤེས་པའི་འདུ་ཤེས་སྐྱེད་པ་མ་ཡིན་ནོ། །དེ་ཅིའི་ཕྱིར་ཞེ་ན།
འདི་ལྟར་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། རང་གི་མཚན་ཉིད་ཀྱིས་སྟོང་པས་ཆོས་རྣམས་ལ་བྱང་ཆུབ་སེམས་དཔའི་སྐྱོན་མེད་པར་འཇུག་སྟེ། ཆོས་དེའང་མི་དམིགས་
ཤིང་མངོན་པར་འདུ་མི་བྱེད་མི་སྐྱེད་དོ། །དེ་བས་ན། མི་སྐྱེ་བའི་ཡེ་ཤེས་ཀྱི་བཟོད་པ་ཐོབ་པ་ཞེས་བྱ་སྟེ། རབ་འབྱོར། རྣམ་པ་དེ་དག་དང༌། རྟགས་དེ་དག་དང་མཚན་མ་དེ་དག་དང་ལྡན་པའི་བྱང་ཆུབ་
༄༅། །སེམས་དཔའ་སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་བྱང་
ཆུབ་སེམས་དཔའ་སེམས་དཔའ་ཆེན་པོའི་དྲུང་དུ་བདུད་སྡིག་ཅན་དགེ་སློང་གི་ཆ་བྱད་དུ་བསྒྱུར་ཏེ་ཉེ་བར་འོངས་ནས་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོའི་འདུན་པ་ཟློག་པར་
བྱེད་དེ༑ འདི་ལྟ་སྟེ། ཐམས་ཅད་མཁྱེན་པ་ཉིད་དེ་ནི། ནམ་མཁའ་དང་མཚུངས་སོ། །འདི་ལྟ་སྟེ། ཐམས་ཅད་མཁྱེན་པ་ཉིད་ཅེས་བྱ་བའི་ཆོས་འདི་ནི། མེད་པའོ། །འདི་ལྟ་སྟེ། ཐམས་
ཅད་མཁྱེན་པ་ཉིད་ཅེས་བྱ་བའི་ཆོས་འདི་ནི། ཡོད་པ་མ་ཡིན་པ་སྟེ། སུ་ཞིག་དེ་ལ་ཤེས་པར་འགྱུར། སུ་ཞིག་དེ་ལ་མངོན་པར་རྫོགས་པར་འཚང་རྒྱ་བར་འགྱུར། དེས་གང་ཡང་ངེས་པར་མི་འབྱུང་སྟེ།
གང་མངོན་པར་རྫོགས་པར་འཚང་རྒྱ་བ་དང༌། གང་མངོན་པར་རྫོགས་པར་འཚང་རྒྱ་བར་བྱ་བ་དང༌། གང་ཤེས་པར་བྱེད་པ་དང༌། གང་ཤེས་པར་བྱ་བའི་ཆོས་དེ་དག་ཐམས་ཅད་ནམ་མཁའ་དང་
མཚུངས་ཏེ། ཁྱོད་ནི། དོན་མེད་པར་ཉོན་མོངས་སོ། །འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །ཞེས་བྱ་བ་དེ་ནི། བདུད་ཀྱི་ལས་སུ་བསྟན་
ཏེ༑ འདི་ནི། སངས་རྒྱས་ཀྱིས་བཤད་པ་མ་ཡིན་ནོ། །ཞེས་ཟེར་ཞིང་གང་འབྲལ་བར་བྱེད་པ་འདི་ནི། བདུད་ཀྱི་ལས་ཡིན་ནོ། །ཞེས་རིགས་ཀྱི་བུའམ་རིགས་ཀྱི་བུ་མོ་དེས་དེ་ལྟར་ཤེས་པར་བྱ་སྟེ། དེ་
ལྟར་བསམ་པར་བྱ། དེ་ལྟར་རིག་པར་བྱ་སྟེ། དེ་ལྟར་བསམས་ནས་དེ་ལ་སེམས་བརྟན་པར་བྱའོ། །སེམས་མི་གཡོ་བ་དང༌། སེམས་མི་འཕྲོགས་པར་བྱའོ། །རབ་འབྱོར། རྣམ་པ་དེ་དག་དང༌། རྟགས་དེ་
དག་དང༌། མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་
ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཉན་ཐོས་དང་རང་སངས་རྒྱས་ཀྱི་ས་དག་ལས་ལྡོག་ཅིང་ཐམས་ཅད་མཁྱེན་པ་ཉིད་ལ་འཇུག་པར་འགྱུར་བ་ཡིན་ནོ། །དེ་དག་
འདོད་ན་བསམ་གཏན་དང་པོ་ལ་སྙོམས་པར་འཇུག་གོ། །དེ་བཞིན་དུ་གཉིས་པ་དང༌། དེ་བཞིན་དུ་གསུམ་པ་དང༌། དེ་བཞིན་དུ་བསམ་གཏན་བཞི་པ་ལ་སྙོམས་པར་འཇུག་སྟེ། དེ་བསམ་གཏན་
བཞི་པོ་དེ་དག་ལ་གནས་ཤིང་བསམ་གཏན་ལ་ཡོངས་སུ་འདྲིས་པར་བྱེད་དོ། །དེ་བསམ་གཏན་དག་ལ་སྙོམས་པར་འཇུག་ཀྱང་བསམ་གཏན་གྱི་དབང་གིས་མི་སྐྱེ་ཞིང༌། ཡང་དེ་ཉིད་འདོད་པ་ན་སྤྱོད་
པའི་ཆོས་རྣམས་ལ་གནས་པར་བྱེད་དེ། རབ་འབྱོར། འདིའང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར།
གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། མིང་ཆེད་ཆེར་བྱེད་པ་མ་ཡིན། གྲགས་པ་དང༌། སྒྲ་དང༌། ཚིགས་སུ་བཅད་པ་ཆེད་ཆེར་བྱེད་པ་མ་ཡིན་ཏེ། མིང་ལ་ཆགས་
༄༅། །པར་མི་བྱེད་དོ། །དེ་སེམས་མི་འཁྲུག་ཅིང་སེམས་ཅན་ཐམས་ཅད་ལ་ཕན་པའི་སེམས་སུ་འགྱུར་ཏེ། དེ་འགྲོ་བ་དང་འོང་བ་ན་སེམས་འཁྲུལ་པས་མི་འགྲོ། སེམས་
འཁྲུལ་པར་མི་འོང་སྟེ། དྲན་བཞིན་དུ་འོང༌། དྲན་བཞིན་དུ་འགྲོའོ། །དེ་གལ་ཏེ་ཁྱིམ་ན་གནས་ནའང་འདོད་པ་རྣམས་ལ་འདོད་པ་ལ་མངོན་པར་ཆགས་པའམ་བསམ་པ་ལྷག་པར་ཆེར་མི་འབྱུང་སྟེ།
དེ་སྐྱོ་བར་འདུ་ཤེས་པས་འདོད་པ་ལ་ཡོངས་སུ་སྤྱོད་ཅིང་དེ་སྐྲག་པར་འདུ་ཤེས་པས་འདོད་པ་ལ་ཡོངས་སུ་སྤྱོད་དོ། །རབ་འབྱོར། འདི་ལྟ་སྟེ། དཔེར་ན། སྐྱེས་བུ་ཞིག་ཆོམ་རྐུན་གྱི་གནས་དགོན་
པའི་ནང་དུ་སོང་སྟེ་ཟས་ཀྱི་བྱ་བ་བྱེད་ན། སྐྲག་པའི་འདུ་ཤེས་ཀྱིས་ཟས་ཀྱི་བྱ་བ་བྱེད་ཅིང་འགྲོ་བར་འདུ་ཤེས་པས་ཟས་ཀྱི་བྱ་བ་བྱེད་དེ། བདག་ཆོམ་རྐུན་གྱི་གནས་དགོན་པ་འདི་ནས་ཇི་ཙམ་ན་འདའ་
སྙམ་དུ་དེ་ལྟར་འདུ་ཤེས་པས་རིངས་ཐབས་སུ་ཟས་ཟ་བ་དེ་བཞིན་དུ། རབ་འབྱོར། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའང་ཁྱིམ་ན་གནས་ན་འདོད་པ་གང་དང་གང་དག་
ལ་ཡོངས་སུ་སྤྱོད་པའི་འདོད་པ་དེ་དང་དེ་དག་ལ་དོན་དུ་མི་གཉེར་བ་ཉིད་དང༌། མི་བརྐམ་པ་ཉིད་དང༌། མ་ཆགས་པ་ཉིད་དུ་ཡོངས་སུ་སྤྱོད་དོ། །འདོད་པའི་ཡོན་ཏན་ལྔ་པོ་དགའ་བའི་རང་བཞིན་ཅན། བདེ་
བའི་རང་བཞིན་ཅན་དེ་དག་ལ་དོན་དུ་མི་གཉེར་བ་ཉིད་དུ་འགྱུར་རོ། །དེ་དག་ཁྱིམ་ན་གནས་ན་མཉམ་པ་དང་མི་མཉམ་པས་འཚོ་བར་མི་བྱེད་དེ། ཆོས་འབའ་ཞིག་གིས་འཚོ་བར་བྱེད་ཅིང་ཆོས་མ་ཡིན་
པས་མི་འཚོའོ། །འཆི་བར་གྱུར་ཀྱང་བླའི། གཞན་ལ་གནོད་པ་མི་བྱེད་དོ། །དེ་ཅིའི་ཕྱིར་ཞེ་ན། འདི་ལྟར་སྐྱེས་བུ་དམ་པ། སྐྱེས་བུ་ཆེན་པོ། སྐྱེས་བུ་མཆོག །སྐྱེས་བུ་མཆོག་རབ། སྐྱེས་བུ་མཛེས་
པ༑ སྐྱེས་བུ་ཁྱུ་མཆོག །སྐྱེས་བུ་རྒྱ་ཆེ་བ། སྐྱེས་བུ་གཙོ་བོ། སྐྱེས་བུ་སྐྱེས་མཆོག །སྐྱེས་བུ་གཅེས་པ། སྐྱེས་བུ་པདྨོ། སྐྱེས་བུ་པདྨ་དཀར་པོ། སྐྱེས་བུ་ཅང་ཤེས། སྐྱེས་བུ་གླང་པོ་ཆེ། སྐྱེས་བུ་
སེངྒེ༑ སྐྱེས་བུ་གདུལ་བྱའི་ཁ་ལོ་སྒྱུར་བ་དག་གིས་ནི། སེམས་ཅན་ཐམས་ཅད་བདེ་བའི་མཆོག་ལ་གཟུད་པར་བྱ་བ་ཡིན་ནོ། །རབ་འབྱོར། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་
དེ་དག་ཁྱིམ་ན་གནས་ཏེ། འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་སྟོབས་བསྐྱེད་པ་ཐོབ་པའི་ཕྱིར་རོ། །རབ་འབྱོར། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་དང་ལྡན་པའི་བྱང་
ཆུབ་སེམས་དཔའ་སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་ཕྱིར་མི་ལྡོག་པའི་བྱང་ཆུབ་སེམས་
དཔའ་སེམས་དཔའ་ཆེན་པོ་ལ་གནོད་སྦྱིན་ཆེན་པོ་ལག་ན་རྡོ་རྗེ་རྟག་པར་ཕྱི་བཞིན་དུ་འབྲང་བར་འགྱུར་ཏེ། དེ་ཐུབ་པར་དཀའ་ཞིང་མི་དང་མི་མ་ཡིན་པ་དག་གིས་འདའ་བར་བྱ་མི་ནུས་པར་འགྱུར་རོ། །
སེམས་ཅན་ཐམས་ཅད་ཀྱིས་བསྙེན་དཀའ་བར་འགྱུར་རོ། །དེ་སེམས་མི་གཡེང་བར་འགྱུར། དབང་པོ་མ་ཚང་བར་མི་འགྱུར་ཏེ། དབང་པོ་ཡོངས་སུ་རྫོགས་པར་འགྱུར་ཞིང་དབང་པོ་ཡོངས་སུ་མ་
༄༅། །རྫོགས་པར་མི་འགྱུར། སྐྱེས་བུ་ཁྱུ་མཆོག་གི་དབང་པོ་དང་ལྡན་པར་འགྱུར་ཏེ། སྐྱེས་བུ་དམ་པ་མ་ཡིན་པར་མི་འགྱུར། དེ་བུད་མེད་དག་དབང་དུ་བྱ་བའི་སྔགས་
ཀྱི་རིགས་དང༌། རྩི་དང༌། རིག་པ་དང༌། སྨན་ལ་སོགས་པ་དེ་དག་ཐམས་ཅད་ཐམས་ཅད་ཀྱི་ཐམས་ཅད་དུ་མི་སྦྱོར་ཏེ། འཚོ་བ་ཡོངས་སུ་དག་པར་འགྱུར། ལོག་པས་འཚོ་བར་མི་
འགྱུར་རོ། །རྩོད་པ་དང་རྒོལ་བར་སྨྲ་བའི་ངང་ཚུལ་ཅན་དུ་མི་འགྱུར། ལྟ་བ་དྲང་པོར་འགྱུར། བདག་ལ་མི་བཏོད། གཞན་ལ་མི་སྨོད་དེ། དེ་ཡོན་ཏན་དེ་དག་དང༌། གཞན་དག་
དང་ཡང་ལྡན་པར་འགྱུར་རོ། །དེ་སྐྱེས་པ་དང་བུད་མེད་དག་ལ་ཁྱོད་ཀྱི་བུ་ཕོར་འགྱུར་རོ། །ཞེའམ། བུ་མོར་འགྱུར་རོ། །ཞེས་ལུང་མི་སྟོན་ཏེ། དེ་ལ་དེ་ལྟ་བུ་ལ་སོགས་པའི་ཀུན་སྟོན་
པའི་ཉེས་པ་དེ་ལྟ་བུའི་ངོ་བོ་མི་འབྱུང་ངོ༌། །རབ་འབྱོར། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་དང་ཡང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་རྣམ་པ་གང་དག་དང༌། རྟགས་གང་དག་དང༌། མཚན་མ་གང་དག་དང་ལྡན་པའི་བྱང་
ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་རིག་པར་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་
པའི་རྣམ་པ་གང་ཡིན་པ་དང༌། རྟགས་གང་ཡིན་པ་དང༌། མཚན་མ་གང་ཡིན་པའི་རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་བསྟན་པར་བྱའོ། །ཡང་དེ་དག་གང་ཞེ་ན། འདི་ལྟ་སྟེ། དེ་དག་
ཕུང་པོ་དང༌། སྐྱེ་མཆེད་དང༌། ཁམས་དང༌། རྟེན་ཅིང་འབྲེལ་པར་འབྱུང་བའི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས་སོ། །དེ་དག་ནི། འདུ་འཛི་ལ་དགའ་བའི་གཏམ་གྱི་སྦྱོར་བ་དང༌། རྗེས་
སུ་སྦྱོར་བ་ལ་བརྩོན་པར་མི་གནས་སོ། །རྒྱལ་པོའི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས་སོ། །རྐུན་པོའི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས་སོ། །
དམག་གི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས། འཐབ་མོའི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས། གྲོང་དང་གྲོང་ཁྱེར་དང༌། གྲོང་རྡལ་དང༌།
ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་གྱི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས། བདག་གི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་
གནས༑ བློན་པོ་དང༌། བློན་པོ་ཆེན་པོའི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས། སྐྱེས་པ་དང༌། བུད་མེད་དང༌། མ་ནིང་གི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་
བརྩོན་པར་མི་གནས། བཞོན་པ་དང༌། སྐྱེད་མོས་ཚལ་དང༌། གཙུག་ལག་ཁང་དང༌། གཞལ་ཡས་ཁང་དང༌། མཚེའུ་དང༌། མཚོ་དང༌། ལྟེང་ཀ་དང༌། རྫིང་དང༌། ནགས་ཚལ་དང༌། ཀུན་དགའི་
༄༅། །ར་བ་དང༌། རིའི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས། གནོད་སྦྱིན་དང༌། སྲིན་པོ་དང༌། ཡི་དྭགས་དང༌། ཤ་ཟ་དང༌། ལུས་སྲུལ་པོ་དང༌། གྲུལ་
བུམ་གྱི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས། ཟས་དང༌། བཏུང་བ་དང༌། གོས་དང༌། རྒྱན་དང༌། སྤོས་དང༌། ཕྲེང་བ་དང༌། བྱུག་པའི་གཏམ་གྱི་སྦྱོར་བ་དང༌། རྗེས་
སུ་སྦྱོར་བ་ལ་བརྩོན་པར་མི་གནས། སྲང་དང༌། ལམ་གྱི་བཞི་མདོ་དང༌། དཔོང་ས་དང༌། ཚོང་དུས་དང༌། བུ་བཟའི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས། གླུ་དང༌།
གར་དང༌། སྙན་པ་བརྗོད་པ་དང༌། བྲོ་བརྡུང་བ་དང༌། རོལ་མོ་མཁན་གྱི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས། རྒྱ་མཚོ་དང༌། ཆུ་བོ་དང༌། གླིང་གི་གཏམ་གྱི་སྦྱོར་བ་
དང༌། རྗེས་སུ་སྦྱོར་བ་ལ་བརྩོན་པར་མི་གནས། ཆོས་དང་འགལ་བའི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས། སོ་སོའི་སྐྱེ་བོ་ལ་དགའ་བའི་གཏམ་གྱི་སྦྱོར་བ་དང༌།
རྗེས་སུ་སྦྱོར་བ་ལ་བརྩོན་པར་མི་གནས་ཏེ། གཞན་དུ་ན་ཤེས་རབ་ཀྱི་ཕ་རོལ་ཏུ་ཕྱིན་པའི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་གནས་ཤིང༌། ཐམས་ཅད་མཁྱེན་པ་དང་ལྡན་
པའི་ཡིད་ལ་བྱེད་པ་དག་དང་མ་བྲལ་བར་འགྱུར་ཏེ། དེ་དག་ནི། འཐབ་མོ་དང༌། མཚང་འདྲུ་བ་དང༌། རྩོད་པ་དང༌། རྒོལ་བའི་གཏམ་གྱི་སྦྱོར་བ་དང༌། རྗེས་སུ་སྦྱོར་བ་ལ་བརྩོན་པར་མི་གནས། དེ་
དག་ནི༑ ཆོས་འདོད་པ་ཁོ་ནར་འགྱུར་ཏེ། ཆོས་མ་ཡིན་པ་འདོད་པར་མི་འགྱུར། དེ་དག་ནི། མི་འབྱེད་པའི་བརྗོད་པ་སྨྲ་བར་འགྱུར་ཏེ། འབྱེད་པའི་བརྗོད་པ་སྨྲ་བར་མི་འགྱུར། དེ་དག་ནི། མཛའ་
བར་འདོད་པ་ཡིན་ཏེ། མི་མཛའ་བར་འདོད་པ་མ་ཡིན། དེ་དག་ནི། ཆོས་སྨྲ་བར་འགྱུར་ཏེ། ཆོས་མ་ཡིན་པ་སྨྲ་བར་མི་འགྱུར། དེ་དག་ནི། དེ་བཞིན་གཤེགས་པ་མཐོང་བ་ཁོ་ནར་འདོད་པས་རེ་བར་
བྱེད་དེ༑ འཇིག་རྟེན་གྱི་ཁམས་གཞན་དག་ན་གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞུགས་ཏེ་འཚོ་ཞིང་གཞེས་པ་དེ་དག་གི་དྲུང་དུ་ཉེ་བར་སྐྱེ་བར་བྱ་བའི་
ཕྱིར་སེམས་བསྐྱེད་ཅིང་དེ་དག་འདོད་ན་དེར་ཉེ་བར་སྐྱེས་ཏེ། དེ་དག་དེ་ལྟར་དེ་བཞིན་གཤེགས་པ་ལ་བལྟ་བ་དང༌། དེ་བཞིན་གཤེགས་པ་ལ་བསྙེན་བཀུར་བྱ་བ་དང་མི་འབྲལ་བར་འགྱུར་རོ། །རབ་
འབྱོར༑ གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་ནི། འདོད་པ་ན་སྤྱོད་པའི་ལྷ་དག་ལས་ཤི་འཕོས་པ་དང༌། གཟུགས་ན་སྤྱོད་པའི་ལྷ་དག་ལས་ཤི་འཕོས་པ་
དང༌། གཟུགས་མེད་པ་ན་སྤྱད་པའི་ལྷ་དག་ལས་ཤི་འཕོས་ནས་ཛམྦུའི་གླིང་གི་ཡུལ་གྱི་དབུས་འདི་ཉིད་ཀྱི་ནང་ན་མི་དག་སྒྱུ་རྩལ་ལ་མཁས་པ། སྙན་དངགས་ལ་མཁས་པ། སྔགས་དག་ལ་མཁས་པ།
རིག་པ་དག་ལ་མཁས་པ། བསྟན་བཅོས་དག་ལ་མཁས་པ། མཚན་མ་དག་ལ་མཁས་པ། ཆོས་ཀྱི་དོན་ལ་མཁས་པ་དག་ཡོད་པར་སྐྱེ་སྟེ། མཐའ་འཁོབ་ཀྱི་སྐྱེ་བོ་དག་ཏུ་སྐྱེ་བ་ནི། ཉུང༌། ཕལ་
༄༅། །ཆེར་ཡུལ་གྱི་དབུས་སུ་སྐྱེའོ། །གང་དག་མཐའ་འཁོབ་ཀྱི་སྐྱེ་བོའི་ནང་དུ་སྐྱེས་པ་དེ་དག་ཀྱང་གྲོང་ཁྱེར་ཆེན་པོའི་ནང་དུ་སྐྱེས་ཏེ། དེ་དག་ལའང་ཡོན་ཏན་འདི་དག་
ཡོད་དོ༑ ༑རབ་འབྱོར། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་སྙམ་དུ། བདག་ཕྱིར་མི་ལྡོག་པའམ།
ཕྱིར་མི་ལྡོག་པ་མ་ཡིན་པ་སྙམ་དུ་མི་སེམས་ཏེ། དེ་ནི། འདི་ལྟར་རང་གི་ས་ལ་ཐེ་ཚོམ་མི་སྐྱེ། སོམ་ཉི་མི་བྱེད་དེ། ཀུན་ཏུ་ཞུམ་པར་ཡང་མི་འགྱུར་རོ། །རབ་འབྱོར། འདི་ལྟ་སྟེ།
དཔེར་ན། རྒྱུན་དུ་ཞུགས་པ་ནི། རང་གིས་རྒྱུན་དུ་ཞུགས་པའི་འབྲས་བུ་ལ་ནེམ་ནུར་མི་བྱེད། ཐེ་ཚོམ་མི་ཟ་བ་དེ་བཞིན་དུ་རབ་འབྱོར། ཕྱིར་མི་ལྡོག་པའི་བྱང་ཆུབ་སེམས་དཔའ་
སེམས་དཔའ་ཆེན་པོ་ཡང་རང་གི་བྱང་ཆུབ་སེམས་དཔའི་ས་ལ་ནེམ་ནུར་མི་བྱེད། ཐེ་ཚོམ་མི་ཟ། སོམ་ཉིར་མི་བྱེད་དེ། རང་གི་ས་ལ་དེ་ཀུན་ཏུ་ཞུམ་པར་མི་འགྱུར་རོ། །བདུད་ཀྱི་ལས་སྐྱེས་
ཤིང་བྱུང་བ་རྣམས་ཀྱང་མྱུར་དུ་རིག་ཅིང་དེ་དག་བདུད་ཀྱི་ལས་སྐྱེས་ཤིང་བྱུང་བ་རྣམས་ཀྱི་དབང་དུ་མི་འགྲོའོ། །རབ་འབྱོར། འདི་ལྟ་སྟེ། དཔེར་ན། སྐྱེས་བུ་ཞིག་གིས་མཚམས་མེད་པ་
བྱས་ན་འཆི་ཁའི་གནས་སྐབས་ཀྱི་བར་དུ་མཚམས་མེད་པའི་སེམས་དེ་དང་མི་འབྲལ་བར་འགྱུར་ཏེ། སེམས་དེ་བསལ་བའམ་མནན་པར་མི་ནུས་ཤིང་འཆི་ཁའི་དུས་ཀྱི་བར་དུ་དེའི་སེམས་དེ་
རྗེས་སུ་འབྲང་ངོ༌། །རབ་འབྱོར། དེ་བཞིན་དུ་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་ལྡོག་པའི་སེམས་ཀྱང་གནས་པར་འགྱུར་ཞིང་རང་གི་ཕྱིར་མི་ལྡོག་པའི་
ས་ལས་མི་བསྐྱོད་པར་འགྱུར་ཏེ། དེ་ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱིས་ཀྱང་བསྐྱོད་པའམ་བསྒུལ་བར་མི་ནུས་སོ། །བདུད་ཀྱི་ལས་སྐྱེས་ཤིང་བྱུང་བ་དག་ཀྱང་རིག་
པར་བྱེད་དེ། བདུད་ཀྱི་ལས་སྐྱེས་ཤིང་བྱུང་བ་དག་གི་དབང་དུ་མི་འགྲོ་སྟེ། དེ་རང་གི་ས་ལ་ནེམ་ནུར་མི་བྱེད་ཅིང་ཐེ་ཚོམ་མི་བྱེད་པས་ཚེ་འཕོས་ནའང་ཉན་ཐོས་ཀྱི་སེམས་དང་རང་སངས་རྒྱས་
ཀྱི་སེམས་མི་སྐྱེའོ། །དེ་ཚེ་འཕོས་ནའང་འདི་སྙམ་དུ་སེམས་ཏེ། བདག་ནི། མངོན་པར་རྫོགས་པར་འཚང་མི་རྒྱ་བར་མི་འགྱུར་ཏེ། བདག་ནི། བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་འཚང་རྒྱའོ། །སྙམ་ནས་དེ་རང་གི་ས་ལ་གནས་ཤིང་དེ་གཞན་གྱི་དྲིང་མི་འཇོག་པར་འགྱུར། རང་གི་ས་ལ་མི་རྫི་བར་འགྱུར་རོ། །དེ་ཅིའི་ཕྱིར་ཞེ་ན། དེ་ནི། འདི་
ལྟར་མི་འཕྲོག་པའི་སེམས་དང༌། མི་འཕྲོག་པའི་ཡེ་ཤེས་ཀྱིས་གནས་པ་དང་ལྡན་པར་འགྱུར་བའི་ཕྱིར་རོ། །གལ་ཏེ་ཡང་བདུད་སྡིག་ཅན་སངས་རྒྱས་ཀྱི་ཆ་བྱད་ཀྱིས་ཉེ་བར་འོངས་ཏེ་དེར་ཉེ་
༄༅། །བར་འོངས་ནས་འདི་སྐད་ཟེར་ཏེ། ཁྱོད་འདི་ཉིད་དུ་དགྲ་བཅོམ་པ་ཉིད་མངོན་སུམ་དུ་གྱིས་ཤིག །ཁྱོད་ནི། བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་ལུང་མ་བསྟན་ཏེ། རྣམ་པ་གང་དག་དང༌། རྟགས་གང་དག་དང༌། མཚན་མ་གང་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་རྣམ་པ་དེ་དག་མེད། རྟགས་དེ་དག་མེད། མཚན་མ་དེ་དག་མེད། དེ་དག་ཡོད་པ་མ་ཡིན་ན། ཅི་ཁྱོད་དེ་ལ་སྤྱོད་དམ།
ཞེས་ཟེར་ལ། གལ་ཏེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་གཞན་དུ་གྱུར་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། སྔོན་
གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པར་རིག་པར་བྱའོ། །
གལ་ཏེ་ཡང་དེ་འདི་སྙམ་དུ། ཀྱེ་མ་འདི་ནི། བདུད་སྡིག་ཅན་ཡིན་ཏེ། སངས་རྒྱས་ཀྱི་ཆ་བྱད་དུ་མངོན་པར་སྤྲུལ་ནས་འོངས་པའམ། བདུད་ཀྱིས་བྱིན་གྱིས་བརླབས་པའམ།
བདུད་ཀྱིས་སྤྲུལ་པ་ཞིག་ཡིན་ཏེ། འདི་ནི། དེ་བཞིན་གཤེགས་པ་མ་ཡིན་ནོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཇི་སྐད་གསུངས་
པ་དེ་ནི༑ དེ་བཞིན་ཏེ། གཞན་དུ་མ་ཡིན་ནོ། །ཞེས་སེམས་སམ། གལ་ཏེ་དེ་འདི་སྙམ་དུ་སོ་སོར་རྟོག་ཅིང་འདི་སྙམ་དུ་སེམས་ཏེ། ཀྱེ་མ་འདི་ནི། བདུད་སྡིག་ཅན་གྱིས་སངས་རྒྱས་སུ་བྱིན་
གྱིས་བརླབས་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་དབྲལ་བར་འདོད་དོ། །སྙམ་ལ། རབ་འབྱོར། གལ་ཏེ་བདུད་སྡིག་ཅན་ཕྱིར་ལོག་ན། བྱང་ཆུབ་སེམས་
དཔའ་སེམས་དཔའ་ཆེན་པོ་འདི་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་
བསྟན་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། ཕྱིར་མི་ལྡོག་པའི་བྱང་ཆུབ་སེམས་དཔའི་ས་ལ་གནས་པ་ཡིན་པར་རིག་པར་བྱའོ། །རབ་འབྱོར། གལ་ཏེ་བྱང་ཆུབ་
སེམས་དཔའ་སེམས་དཔའ་ཆེན་པོ་ལ་རྣམ་པ་འདི་དག་དང༌། རྟགས་འདི་དག་དང༌། མཚན་མ་འདི་དག་ཡོད་ན། རབ་འབྱོར། ཇི་ལྟར་དེ་ལ་ཡོན་ཏན་འདི་དག་ཡོད་པ་དང་སྦྱར་ན། ཀྱེ་མ་
བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། གདོན་མི་ཟ་བར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ལུང་བསྟན་པ་སྟེ།
བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། ཕྱིར་མི་ལྡོག་པའི་བྱང་ཆུབ་སེམས་དཔའི་ས་ལ་གནས་པ་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། དེ་ནི། འདི་ལྟར་ཕྱིར་མི་ལྡོག་
༄༅། །པའི་བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་ཡོད་པའི་ཕྱིར་ཏེ། རབ་འབྱོར། རྣམ་པ་དེ་དག་དང༌།
རྟགས་དེ་དག་དང༌། མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །
རབ་འབྱོར། གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། དམ་པའི་ཆོས་ཡོངས་སུ་གཟུང་བའི་ཕྱིར་བདག་ཀྱང་ཡོངས་སུ་གཏོང་བར་བྱེད། སྲོག་ཀྱང་
ཡོངས་སུ་གཏོང་བར་བྱེད་དོ། །དེའི་ཕྱིར་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པ་ནི། དམ་པའི་ཆོས་ཡོངས་སུ་གཟུང་བའི་ཕྱིར་ཤིན་ཏུ་བརྩོན་པར་བྱེད་དེ།
སངས་རྒྱས་བཅོམ་ལྡན་འདས་འདས་པ་དང༌། མ་བྱོན་པ་དང༌། ད་ལྟར་བྱུང་བ་རྣམས་ལ་དགའ་བ་དང༌། གུས་པ་དང༌། སངས་རྒྱས་བཅོམ་ལྡན་འདས་རྣམས་ཆོས་ཀྱི་སྐུའོ། །ཞེས་ཆོས་
ལ་དགའ་བ་དང༌། གུས་པའི་ཕྱིར་དམ་པའི་ཆོས་ཡོངས་སུ་འཛིན་པར་བྱེད་དེ། འདི་ནི། སངས་རྒྱས་བཅོམ་ལྡན་འདས་འདས་པ་འབའ་ཞིག་གི་དམ་པའི་ཆོས་ཡོངས་སུ་གཟུང་བ་མ་
ཡིན་གྱི༑ སངས་རྒྱས་བཅོམ་ལྡན་འདས་ད་ལྟར་བྱུང་བ་རྣམས་ཀྱི་དམ་པའི་ཆོས་ཡོངས་སུ་གཟུང་བའང་འདི་ཉིད་ཡིན། མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་དམ་པའི་
ཆོས་ཡོངས་སུ་གཟུང་བའང་འདི་ཉིད་ཡིན་ཏེ། དེ་ལ་བདག་ཀྱང་མ་བྱོན་པའི་སངས་རྒྱས་བཅོམ་ལྡན་འདས་དེ་རྣམས་ཀྱི་གྲངས་སུ་བགྲང་བར་གཏོགས་པ་དེས་ན། བདག་ཀྱང་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་དེ་ལ་ལུང་བསྟན་ཏེ། འདི་ནི། བདག་གིའང་དམ་པའི་ཆོས་ཡོངས་སུ་གཟུང་བའོ། །སྙམ་སྟེ། དོན་གྱི་དབང་འདི་མཐོང་ནས་དམ་པའི་ཆོས་ཡོངས་སུ་གཟུང་བའི་ཕྱིར་བདག་ཉིད་
ཡོངས་སུ་གཏོང་བ་དག་བྱེད་དོ། །སྲོག་ཡོངས་སུ་གཏོང་བ་དག་ཀྱང་བྱེད་དེ། དེ་ལ་ཞུམ་པར་མི་འགྱུར། ལེ་ལོ་མི་བྱེད་དོ། །རབ་འབྱོར། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་
དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་ཕྱིར་མི་
ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་སྟོན་པ་ལ་ནེམ་ནུར་མེད། ཐེ་
ཚོམ་མི་ཟའོ། །རབ་འབྱོར་གྱིས་གསོལ་པ། བཅོམ་ལྡན་འདས། ཅི་དེ་བཞིན་གཤེགས་པ་ཁོ་ན་ཆོས་སྟོན་པ་ལ་ནེམ་ནུར་མ་མཆིས་ཤིང་ཐེ་ཚོམ་མི་
འཚལ་བ་ལགས་ཀྱི། ཉན་ཐོས་ལ་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཉན་ཐོས་ཆོས་སྟོན་པ་ལ་ཡང་ནེམ་ནུར་མི་བྱེད་ཅིང་ཐེ་ཚོམ་མི་ཟའོ། །དེ་ཅིའི་ཕྱིར་ཞེ་ན།
༄༅། །འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་མི་སྐྱེ་བའི་ཆོས་ལ་བཟོད་པ་ཐོབ་པས་ན། དེའི་ཕྱིར་དེ་ཆོས་ཐམས་ཅད་ཀྱི་ཆོས་ཉིད་དང་མི་འགལ་བར་
ཉན་ཏེ༑ ཐོས་ནས་ཀྱང་ནེམ་ནུར་མི་བྱེད། ཐེ་ཚོམ་མི་ཟ་སྟེ། རབ་འབྱོར། ཡོན་ཏན་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཕྱིར་མི་ལྡོག་པ་ཡིན་ནོ། །
རབ་འབྱོར། འདི་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་རྣམ་པ་དང༌། རྟགས་དང༌། མཚན་
མར་རིག་པར་བྱའོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། ཕྱིར་མི་ལྡོག་པའི་རྣམ་པ་དང༌། རྟགས་དང༌། མཚན་མའི་ལེའུ་ཞེས་བྱ་བ་སྟེ། བཅུ་བདུན་
པའོ༑༑ ༑༑དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་
ཆེན་པོ་ཡོན་ཏན་ཆེན་པོའི་ཚོགས་དང་ལྡན་པ་དང༌། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་ཚད་མ་མཆིས་པ་དང་ལྡན་པ་དང༌། བཅོམ་ལྡན་འདས།
བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་དཔག་ཏུ་མ་མཆིས་པ་དང་ལྡན་པ་ནི། ངོ་མཚར་ཏོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་
འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ཏེ། །དེ་དེ་བཞིན་ནོ། དེ་ཅིའི་ཕྱིར་ཞེ་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པས་ནི། ཡེ་
ཤེས་མཐའ་ཡས་མུ་མེད་པ་རབ་ཏུ་འཐོབ་སྟེ། ཉན་ཐོས་དང་རང་སངས་རྒྱས་ཐམས་ཅད་ཀྱིས་མི་འཕྲོག་པ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས་ནི། ཕྱིར་མི་ལྡོག་པའི་བྱང་
ཆུབ་སེམས་དཔའ་སེམས་དཔའ་ཆེན་པོའི་རྣམ་པ་དང༌། རྟགས་དང༌། མཚན་མ་དག་བསྐལ་པ་གངྒཱའི་ཀླུང་གི་བྱེ་མ་སྙེད་དུ་སྟོན་ཀྱང་སྤྱོད་དེ། དེའི་སླད་དུ་བཅོམ་ལྡན་འདས། བྱང་ཆུབ་
སེམས་དཔའ་སེམས་དཔའ་ཆེན་པོ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་གནས་ཟབ་མོ་ཟབ་མོ་དག་བསྟན་དུ་གསོལ། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་
དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། ཁྱོད་གནས་ཟབ་མོ་ཟབ་མོ་དག་ལས་བརྩམས་ནས་ཤེས་པར་བྱ་བར་འདོད་པ་ལེགས་སོ། ལེགས་སོ། །རབ་འབྱོར།
ཟབ་ཅེས་བྱ་བ་དེ་ནི། སྟོང་པ་ཉིད་ཀྱི་ཚིག་བླ་དྭགས་སོ། །རབ་འབྱོར། འདི་ལྟ་སྟེ། ཟབ་ཅེས་བྱ་བ་དེ་ནི། མཚན་མ་མེད་པ་དང༌། སྨོན་པ་མེད་པ་དང༌། མངོན་པར་འདུ་མི་བྱེད་པ་དང༌། མ་བྱུང་
བ་དང༌། མ་སྐྱེས་པ་དང༌། དངོས་པོ་མེད་པ་དང༌། འདོད་ཆགས་དང་བྲལ་བ་དང༌། འགོག་པ་དང༌། མྱ་ངན་ལས་འདས་པ་དང༌། བྲལ་བར་གྱུར་བའི་ཚིག་བླ་དྭགས་སོ། །རབ་འབྱོར་གྱིས་
༄༅། །གསོལ་པ། བཅོམ་ལྡན་འདས། འདི་ཆོས་དེ་དག་འབའ་ཞིག་གི་ཚིག་བླ་དྭགས་ལགས་ཀྱི། ཆོས་ཐམས་ཅད་ཀྱི་ཡང་མ་ལགས་སམ། བཅོམ་ལྡན་འདས་
ཀྱིས་བཀའ་སྩལ་པ། རབ་འབྱོར། འདི་ནི། ཆོས་ཐམས་ཅད་ཀྱིའང་ཚིག་བླ་དྭགས་སོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་ནི། ཟབ་བོ། །རབ་འབྱོར། དེ་བཞིན་དུ་ཚོར་བ་དང༌།
འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། ཟབ་བོ། །རབ་འབྱོར། གཟུགས་ཇི་ལྟར་ཟབ། རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་
དང༌། རབ་འབྱོར། རྣམ་པར་ཤེས་པ་ཇི་ལྟར་ཟབ་ཅེ་ན། རབ་འབྱོར། དེ་བཞིན་ཉིད་ཇི་ལྟ་བ་དེ་བཞིན་དུ་གཟུགས་ཟབ་བོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་
དང༌། རབ་འབྱོར། དེ་བཞིན་ཉིད་ཇི་ལྟ་བ་དེ་བཞིན་དུ་རྣམ་པར་ཤེས་པ་ཟབ་བོ། །རབ་འབྱོར། དེ་ལ་གཟུགས་ཀྱི་དེ་བཞིན་ཉིད་ཇི་ལྟ་བ་དེ་བཞིན་དུ་གཟུགས་ཟབ་བོ། །དེ་བཞིན་དུ་ཚོར་བའི་
དེ་བཞིན་ཉིད་དང༌། འདུ་ཤེས་ཀྱི་དེ་བཞིན་ཉིད་དང༌། འདུ་བྱེད་རྣམས་ཀྱི་དེ་བཞིན་ཉིད་ཇི་ལྟ་བ་དང༌། རབ་འབྱོར། དེ་ལ་རྣམ་པར་ཤེས་པའི་དེ་བཞིན་ཉིད་ཇི་ལྟ་བ་དེ་བཞིན་དུ་རྣམ་པར་ཤེས་པ་
ཟབ་བོ། །རབ་འབྱོར། གང་ལ་གཟུགས་མེད་པ་འདི་ནི། གཟུགས་ཀྱི་ཟབ་པ་ཉིད་དོ། །རབ་འབྱོར། དེ་བཞིན་དུ་གང་ལ་ཚོར་བ་མེད་པ་དང༌། འདུ་ཤེས་མེད་པ་དང༌། འདུ་བྱེད་རྣམས་མེད་པ་
དང༑ རྣམ་པར་ཤེས་པ་མེད་པ་འདི་ནི། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའི་ཟབ་པ་ཉིད་དོ། །རབ་འབྱོར་གྱིས་གསོལ་པ། བཅོམ་ལྡན་འདས། ཇི་སྲིད་དུ་
ཐབས་ཞིབ་མོས་གཟུགས་ལས་ཀྱང་བཟློག་ལ་མྱ་ངན་ལས་འདས་པའང་བསྟན་པ་དང༌། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། ཇི་སྲིད་དུ་ཐབས་ཞིབ་མོས་རྣམ་
པར་ཤེས་པ་ལས་ཀྱང་བཟློག་ལ་མྱ་ངན་ལས་འདས་པའང་བསྟན་པ་ནི། ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་
པའི་གནས་ཟབ་མོ་ཟབ་མོ་འདི་དག་གང་ཞིག་སེམས་པར་འགྱུར། འཇལ་བར་འགྱུར། ངེས་པར་རྟོག་པར་འགྱུར་ཏེ། བདག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཇི་ལྟར་བསྟན་པ་དེ་
བཞིན་དུ་གནས་པར་བྱའོ། །བདག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཇི་ལྟར་བཤད་པ་དེ་བཞིན་དུ་བསླབ་པར་བྱའོ། །བདག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཇི་ལྟར་ཉེ་བར་
བསྟན་པ་དེ་བཞིན་དུ་བསྒྲུབ་པར་བྱའོ། །དེ་བཞིན་དུ་སྒྲུབ་པར་བྱེད་པ་དང༌། དེ་བཞིན་དུ་ཉེ་བར་སེམས་པ་དང༌། དེ་བཞིན་དུ་ཉེ་བར་ཡོངས་སུ་རྟོག་པ་དང༌། དེ་བཞིན་དུ་ཉེ་བར་རབ་ཏུ་སྦྱོར་བར་
བྱེད་པ་དང༌། དེ་བཞིན་དུ་རྩོལ་བ་དང༌། དེ་བཞིན་དུ་འབད་པར་བྱེད་པས། ཉིན་གཅིག་ཙམ་ཡང་འདི་ལ་རྣལ་འབྱོར་དུ་བྱེད་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཉི་མ་གཅིག་པོ་དེ་ལ་
༄༅། །ལས་ཇི་ཙམ་བྱེད་པར་འགྱུར་ཞེ་ན། རབ་འབྱོར། འདི་ལྟ་སྟེ། དཔེར་ན་སྐྱེས་བུ་འདོད་ཆགས་ལ་སྤྱོད་པ། རྣམ་པར་རྟོག་པ་ལ་སྤྱོད་པ་ལ་ལ་ཞིག་ཡོད་ལ། སྐྱེས་
བུ་འདོད་ཆགས་ལ་སྤྱོད་པ་རྣམ་པར་རྟོག་པ་ལ་སྤྱོད་པ་དེས་བུད་མེད་གཟུགས་བཟང་བ་མཛེས་པ། བལྟ་ན་སྡུག་པ་ཞིག་དང་དུས་བཏབ་པར་གྱུར་ལ། བུད་མེད་དེའང་གཞན་གྱིས་ཡོངས་སུ་ཟིན་
པ་ཞིག་ཡིན་ཏེ། བདག་ཉིད་ཁྱིམ་ནས་འབྱུང་ཞིང་འོང་བའི་དབང་མེད་ན། རབ་འབྱོར། དེ་ཇི་སྙམ་དུ་སེམས། སྐྱེས་བུ་དེའི་རྣམ་པར་རྟོག་པ་ཇི་ལྟ་བུ་དང་ལྡན་པ་དག་འབྱུང་བར་འགྱུར།
རབ་འབྱོར་གྱིས་གསོལ་པ། བཅོམ་ལྡན་འདས། སྐྱེས་བུ་དེའི་རྣམ་པར་རྟོག་པ་ནི། བུད་མེད་དང་ལྡན་པ་ཁོ་ན་འབྱུང་སྟེ། དེ་ནི། མཆིའོ། །དེ་མཆིས་ནས་དེ་དང་ལྷན་ཅིག་འདི་ལྟར་སྤྱད་
པར་བྱའོ། །འདི་ལྟར་དགའ་བར་བྱའོ། །འདི་ལྟར་རྩེ་བར་བྱའོ། །འདི་ལྟར་རབ་ཏུ་རྣམ་པར་སྤྱད་པར་བྱའོ། །སྙམ་མོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ཇི་སྙམ་
དུ་སེམས། སྐྱེས་བུ་དེ་ལ་ཉི་མ་འདས་ཀྱི་བར་དུ་རྣམ་པར་རྟོག་པ་ཇི་སྙེད་ཅིག་འབྱུང༌། རབ་འབྱོར་གྱིས་གསོལ་པ། བཅོམ་ལྡན་འདས། གདུགས་འདས་ཀྱི་བར་དུ་སྐྱེས་བུ་དེ་ལ་རྣམ་པར་
རྟོག་པ་མང་པོ་ཞིག་འབྱུང་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། སྐྱེས་བུ་དེ་ལ་ཉི་མ་འདས་ཀྱི་བར་དུ་རྣམ་པར་རྟོག་པ་ཇི་སྙེད་ཅིག་འབྱུང་བ། རབ་འབྱོར།
བྱང་ཆུབ་སེམས་དཔའ་སེམས་དཔའ་ཆེན་པོས་བསྐལ་པ་དེ་སྙེད་དུ་འཁོར་བ་ལ་རྒྱབ་ཀྱིས་ཕྱོགས་པར་བྱེད་པ་དང༌། འདོར་བ་དང༌། མཐར་འབྱིན་པར་བྱེད་དོ། །གང་ཤེས་རབ་ཀྱི་ཕ་རོལ་ཏུ་ཕྱིན་
པ་འདི་ལ་ཇི་ལྟར་བཞག་པ་དང༌། ཇི་ལྟར་བཤད་པ་དང༌། ཇི་ལྟར་ཉེ་བར་བསྟན་པ་དང༌། ཇི་ལྟར་བསྟན་པ་དང༌། ཇི་ལྟར་ངེས་པར་བསྟན་པ་ལྟར་འདི་ལ་གནས་པ་དང༌། སློབ་པ་དང༌། རྟོག་པ་
དང༑ ཉེ་བར་སེམས་པ་དང༌། རྣལ་འབྱོར་དུ་བྱེད་པ་ནི། ཉེས་པ་གང་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ལྡོག་པར་
འགྱུར་བའི་ཉེས་པ་དེ་དག་ཀྱང་རྣམ་པར་སྤོང་ངོ༌། །རབ་འབྱོར། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་ལ་བརྩོན་པར་བྱེད་ཅིང་དེ་
ལྟ་བུའི་གནས་པ་འདིས་གནས་པ་དེ་ནི། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པ་འདིས་ཉིན་གཅིག་ལ་ལས་དེ་སྙེད་བྱེད་དོ། །བྱང་ཆུབ་སེམས་དཔའ་གང་ཤེས་
རབ་ཀྱི་ཕ་རོལ་ཏུ་ཕྱིན་པ་དང་བྲལ་བས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་སྟེ་སྦྱིན་པ་བྱིན་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་
ཉིན་གཅིག་ཙམ་ཡང་རྣལ་འབྱོར་དུ་བྱེད་ན། འདི་ཉིད་དེ་བས་ཁྱད་པར་དུ་འཕགས་སོ། །རབ་འབྱོར། གཞན་ཡང་བྱང་ཆུབ་སེམས་དཔའ་གང་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་སྟེ་རྒྱུན་དུ་
༄༅། །ཞུགས་པ་དག་ལ་སྦྱིན་པ་སྦྱིན་པར་བྱེད་ཅིང་རབ་ཏུ་འཇོག་པ་དང༌། དེ་བཞིན་དུ་ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་དག་ལའང་སྦྱིན་པ་
སྦྱིན་པར་བྱེད་ཅིང་རབ་ཏུ་འཇོག་པ་དང༌། རང་སངས་རྒྱས་དག་ལ་སྦྱིན་པ་སྦྱིན་པར་བྱེད་ཅིང་རབ་ཏུ་འཇོག་པ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་
ལ་སྦྱིན་པ་སྦྱིན་པར་བྱེད་ཅིང་རབ་ཏུ་འཇོག་པར་བྱེད་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལས་
ཇི་ལྟར་ཉེ་བར་བསྟན་པ་དང༌། ཇི་ལྟར་བསྟན་པ་དང༌། ཇི་ལྟར་ངེས་པར་སྟོན་པ་དེ་བཞིན་དུ་ཉིན་གཅིག་ཙམ་ཡང་རྣལ་འབྱོར་དུ་བྱེད་ན། བྱང་ཆུབ་སེམས་དཔའ་སྔ་མ་དེ་བས་བྱང་ཆུབ་སེམས་དཔའ་
སེམས་དཔའ་ཆེན་པོ་འདི་བསོད་ནམས་ཆེས་མང་དུ་བསྐྱེད་དོ། །རབ་འབྱོར། གཞན་ཡང་བྱང་ཆུབ་སེམས་དཔའ་གང་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་ཅིང་རྒྱུན་དུ་ཞུགས་པ་དག་ནས་
ཡང་དག་པར་རྫོགས་པའི་སངས་རྒྱས་རྣམས་ཀྱི་བར་ལ་སྦྱིན་པ་སྦྱིན་པར་བྱེད་ཅིང་རབ་ཏུ་འཇོག་པ་དང༌། ཚུལ་ཁྲིམས་ཡོངས་སུ་རྫོགས་པར་བྱེད་པར་གྱུར་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དང་
བྲལ་བར་གྱུར་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་གང་ཞིག་ཡིད་ལ་བྱེད་པ་དེ་ལས་ལངས་ཏེ་ཆོས་སྟོན་ན། རབ་འབྱོར། བྱང་ཆུབ་
སེམས་དཔའ་སྔ་མ་དེ་བས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ཉིད་བསོད་ནམས་ཆེས་མང་དུ་བསྐྱེད་དོ། །རབ་འབྱོར། གཞན་ཡང་བྱང་ཆུབ་སེམས་དཔའ་གང་བསྐལ་པ་གང་གཱའི་ཀླུང་
གི་བྱེ་མ་སྙེད་དུ་འདུག་ཅིང་རྒྱུན་དུ་ཞུགས་པ་དག་ནས་ཡང་དག་པར་རྫོགས་པའི་སངས་རྒྱས་རྣམས་ཀྱི་བར་ལ་སྦྱིན་པ་སྦྱིན་པར་བྱེད་ཅིང་རབ་ཏུ་འཇོག་པ་དང༌། ཚུལ་ཁྲིམས་ཀྱང་ཡོངས་སུ་རྫོགས་
པར་བྱེད་པར་གྱུར། བཟོད་པ་དང་ཡང་ལྡན་པར་གྱུར་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་
གནས་པ་གང་ཞིག་ཡིད་ལ་བྱེད་པ་དེ་ལས་ལངས་ཏེ་ཆོས་ཀྱི་སྦྱིན་པ་སྦྱིན་པར་བྱེད་ན། རབ་འབྱོར། བྱང་ཆུབ་སེམས་དཔའ་སྔ་མ་དེ་བས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་
ཉིད་བསོད་ནམས་ཆེས་མང་དུ་བསྐྱེད་དོ། །རབ་འབྱོར། གཞན་ཡང་བྱང་ཆུབ་སེམས་དཔའ་གང་བསྐལ་པ་གངྒཱའི་ཀླུང་གི་བྱེ་མ་སྙེད་དུ་འདུག་ཅིང་རྒྱུན་དུ་ཞུགས་པ་དག་ནས་ཡང་དག་པར་
རྫོགས་པའི་སངས་རྒྱས་རྣམས་ཀྱི་བར་ལ་སྦྱིན་པ་སྦྱིན་པར་བྱེད་ཅིང་རབ་ཏུ་འཇོག་པ་དང༌། ཚུལ་ཁྲིམས་ཡོངས་སུ་རྫོགས་པར་བྱེད་པར་གྱུར་པ་དང༌། བཟོད་པ་དང་ཡང་ལྡན་པ་དང༌།
བརྩོན་འགྲུས་བརྩམས་པ་དང༌། བསམ་གཏན་དག་དང་བྱང་ཆུབ་ཀྱི་ཕྱོགས་ཀྱི་ཆོས་རྣམས་ལ་རྣལ་འབྱོར་དུ་བྱེད་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བ་དང༌། རབ་འབྱོར། ཡང་བྱང་
༄༅། །ཆུབ་སེམས་དཔའ་སེམས་དཔའ་ཆེན་པོ་གང་ཞིག་གིས་དེ་ལྟར་ཆོས་ཀྱི་སྦྱིན་པ་བྱིན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། རབ་འབྱོར།
བྱང་ཆུབ་སེམས་དཔའ་སྔ་མ་དེ་བས་བྱང་ཆུབ་སེམས་དཔའ་སེམས་དཔའ་ཆེན་པོ་གང་འདི་ཉིད་བསོད་ནམས་ཆེས་མང་དུ་བསྐྱེད་དོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་གང་དེ་ལྟར་ཆོས་ཀྱི་སྦྱིན་པ་སྦྱིན་པར་བྱེད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་ལས་གསུངས་པའི་ཡོངས་སུ་བསྔོ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་
ན༑ དེ་བས་འདི་བསོད་ནམས་ཆེས་མང་དུ་བསྐྱེད་དོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་དེ་ལྟར་ཆོས་ཀྱི་སྦྱིན་པ་བྱིན་ལ་ཤེས་རབ་ཀྱི་ཕ་རོལ་ཏུ་ཕྱིན་
པ་ལས་གསུངས་པའི་ཡོངས་སུ་བསྔོ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ཞིང༌། གང་གིས་ཡོངས་སུ་བསྔོས་ནས་ཀྱང་ནང་དུ་ཡང་དག་འཇོག་ལ་རྣལ་འབྱོར་
དུ་མི་བྱེད་པ་དང༌། རབ་འབྱོར། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཞིག་དེ་ལྟར་ཆོས་ཀྱི་སྦྱིན་པ་སྦྱིན་པར་བྱེད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་ལས་གསུངས་པའི་ཡོངས་
སུ་བསྔོ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ལ། ཡོངས་སུ་བསྔོས་ནས་ཀྱང་ཡང་ནང་དུ་ཡང་དག་འཇོག་ལ་རྣལ་འབྱོར་དུ་བྱེད་དེ། ནང་དུ་ཡང་དག་འཇོག་ལ་
རྣལ་འབྱོར་དུ་བྱེད་པ་ནའང་ནང་དུ་ཡང་དག་འཇོག་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་དང་མ་བྲལ་བར་བྱེད་པའི་བྱང་ཆུབ་སེམས་དཔའ་སེམས་དཔའ་
ཆེན་པོ་འདི་ནི། ཆེས་བསོད་ནམས་མང་དུ་བསྐྱེད་དོ། །རབ་འབྱོར་གྱིས་གསོལ་པ། བཅོམ་ལྡན་འདས། གང་གི་ཚེ་བཅོམ་ལྡན་འདས་ཀྱིས་མངོན་པར་འདུས་བྱས་པ་ནི། རྣམ་པར་རྟོག་པའོ། །ཞེས་
གསུངས་པ་དེའི་ཚེ་ཇི་ལྟར་ན། བསོད་ནམས་མང་དུ་བསྐྱེད་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་
རོལ་ཏུ་ཕྱིན་པ་ལ་སྤྱོད་པའི་བསོད་ནམས་མངོན་པར་འདུ་བྱེད་པ་དེའང་དེ་ལྟར་སྟོང་པ་ཁོ་ནར་སྣང་ངོ༌། །གསོག་ཉིད་དུ་སྣང་ངོ༌། །གསོབ་ཉིད་དུ་སྣང་ངོ༌། །སྙིང་པོ་མེད་པ་ཉིད་དུ་སྣང་ངོ༌། །རབ་འབྱོར། ཡང་
བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟ་ཇི་ལྟར་འདི་ལྟར་ཆོས་ཐམས་ཅད་ལ་སོ་སོར་རྟོག་པ་དེ་ལྟ་དེ་ལྟར་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང་
མ་བྲལ་བར་འགྱུར་རོ། །རབ་འབྱོར། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟ་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་དང་མ་བྲལ་བར་གྱུར་པ་དེ་ལྟ་དེ་ལྟར་བསོད་ནམས་གཞལ་དུ་མེད་གྲངས་
མེད་པ་བསྐྱེད་དོ། །རབ་འབྱོར་གྱིས་གསོལ་པ། བཅོམ་ལྡན་འདས། གཞལ་དུ་མ་མཆིས་པ་དང༌། གྲངས་མ་མཆིས་པ་ལ་ཐ་དད་དུ་བགྱི་བ་ཅི་མཆིས། བྱེ་བྲག་ཅི་མཆིས། བཅོམ་ལྡན་འདས་ཀྱིས་
༄༅། །བཀའ་སྩལ་པ། རབ་འབྱོར། གཞལ་དུ་མེད་པ་ཞེས་བྱ་བ་ནི། གང་ལ་ཚད་མ་མི་འཇུག་པའོ། །རབ་འབྱོར། གྲངས་མེད་པ་ཞེས་བྱ་བ་ནི། གང་བགྲང་བས་ཟད་པར་
མི་ནུས་པའོ། །རབ་འབྱོར་གྱིས་གསོལ་པ། བཅོམ་ལྡན་འདས་གང་གིས་གཟུགས་ཀྱང་གཞལ་དུ་མ་མཆིས་པར་འགྱུར་བའི་རྣམ་གྲངས་མཆིས་སམ། དེ་བཞིན་དུ་ཚོར་བ་དང༌། འདུ་
ཤེས་དང༌། འདུ་བྱེད་རྣམས་དང༌། བཅོམ་ལྡན་འདས། གང་གིས་རྣམ་པར་ཤེས་པའང་གཞལ་དུ་མ་མཆིས་པར་འགྱུར་བའི་རྣམ་གྲངས་མཆིས་སམ། བཅོམ་ལྡན་འདས་ཀྱིས་བཀའ་
སྩལ་པ༑ རབ་འབྱོར་གང་འདི་སྐད་དུ། བཅོམ་ལྡན་འདས། གང་གིས་གཟུགས་ཀྱང་གཞལ་དུ་མེད་པར་འགྱུར་བའི་རྣམ་གྲངས་ཡོད་དམ། དེ་བཞིན་དུ་ཚོར་བ་དང༌། འདུ་ཤེས་
དང༌། འདུ་བྱེད་རྣམས་དང༌། བཅོམ་ལྡན་འདས། གང་གིས་རྣམ་པར་ཤེས་པའང་གཞལ་དུ་མེད་པར་འགྱུར་བའི་རྣམ་གྲངས་ཡོད་དམ་ཞེས་སྨྲས་པ་ནི། རབ་འབྱོར། རྣམ་གྲངས་གང་གིས་
གཟུགས་ཉིད་གཞལ་དུ་མེད་པར་འགྱུར་བའི་རྣམ་གྲངས་ཡོད་དོ། །དེ་བཞིན་དུ་ཚོར་བ་ཉིད་དང༌། འདུ་ཤེས་ཉིད་དང༌། འདུ་བྱེད་རྣམས་ཉིད་དང༌། རབ་འབྱོར། རྣམ་གྲངས་གང་གིས་རྣམ་པར་
ཤེས་པ་ཉིད་ཀྱང་གཞལ་དུ་མེད་པར་འགྱུར་བའི་རྣམ་གྲངས་ཡོད་དོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་གཞལ་དུ་མ་མཆིས་པ་ཞེས་བགྱི་བ་འདི་གང་གི་ཚིག་བླ་
དྭགས་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། གཞལ་དུ་མེད་པ་ཞེས་བྱ་བ་འདི་ནི། སྟོང་པ་ཉིད་ཀྱི་ཚིག་བླ་དྭགས་སོ། །གཞལ་དུ་མེད་པ་ཞེས་བྱ་བ་འདི་ནི། མཚན་མ་མེད་
པའི་ཚིག་བླ་དྭགས་སོ། །རབ་འབྱོར། གཞལ་དུ་མེད་པ་ཞེས་བྱ་བ་འདི་ནི། སྨོན་པ་མེད་པའི་ཚིག་བླ་དྭགས་སོ། །རབ་འབྱོར་གྱིས་གསོལ་པ། བཅོམ་ལྡན་འདས། ཅི་གཞལ་དུ་མ་མཆིས་
པ་ཞེས་བགྱི་བ་འདི་སྟོང་པ་ཉིད་འབའ་ཞིག་གི་ཚིག་བླ་དྭགས་དང༌། བཅོམ་ལྡན་འདས། གཞལ་དུ་མ་མཆིས་པ་ཞེས་བགྱི་བ་འདི་མཚན་མ་མ་མཆིས་པ་ཉིད་དང༌། སྨོན་པ་མ་མཆིས་པ་ཉིད་འབའ་
ཞིག་གི་ཚིག་བླ་དྭགས་ལགས་ཏེ། ཆོས་གཞན་དག་གི་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ངས་ཆོས་ཐམས་ཅད་སྟོང་པའོ། །
ཞེས་མ་བཤད་དམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་བཞིན་གཤེགས་པས་ཆོས་ཐམས་ཅད་སྟོང་པ་ཉིད་དོ། །ཞེས་བཀའ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ།
རབ་འབྱོར། སྟོང་པ་ཉིད་གང་དག་ཡིན་པ་དེ་དག་ནི། མི་ཟད་པའང་ཡིན་ལ་སྟོང་པ་ཉིད་གང་ཡིན་པ་དེ་ནི། གཞལ་དུ་མེད་པའང་ཡིན་ནོ། །རབ་འབྱོར། དེ་ལྟ་བས་ན། ཆོས་འདི་དག་ནི་དོན་ལ་བྱེ་བྲག་
གམ་ཐ་དད་དུ་བྱ་བར་མི་དམིགས་ཏེ། རབ་འབྱོར། དེ་དག་ནི། མངོན་པར་བརྗོད་པའོ། །ཞེས་དེ་བཞིན་གཤེགས་པས་བསྟན་ཅིང་བརྗོད་དོ། །གཞལ་དུ་མེད་པ་ཞེས་བྱ་བའམ། གྲངས་མེད་པ་
༄༅། །ཞེས་བྱ་བའམ། མི་ཟད་པ་ཞེས་བྱ་བའམ། སྟོང་པ་ཞེས་བྱ་བའམ། མཚན་མ་མེད་པ་ཞེས་བྱ་བའམ། སྨོན་པ་མེད་པ་ཞེས་བྱ་བའམ། མངོན་པར་འདུ་མི་བྱེད་པ་
ཞེས་བྱ་བའམ། མི་འབྱུང་བ་ཞེས་བྱ་བའམ། མི་སྐྱེ་བ་ཞེས་བྱ་བའམ། དངོས་པོ་མེད་པ་ཞེས་བྱ་བའམ། འདོད་ཆགས་དང་བྲལ་བ་ཞེས་བྱ་བའམ། འགོག་པ་ཞེས་བྱ་བའམ། མྱ་ངན་ལས་
འདས་པ་ཞེས་བྱ་བ་འདི་ནི། རབ་འབྱོར། བསྟན་པ་མངོན་པར་སྒྲུབ་པ་བཤད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་སོ། །རབ་
འབྱོར་གྱིས་གསོལ་པ། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཐམས་ཅད་ཀྱི་ཆོས་ཉིད་ཀྱི་བར་འདིའང་བསྟན་ལ་
ཆོས་ཐམས་ཅད་ཀྱི་ཆོས་ཉིད་དེའང་བརྗོད་དུ་མ་མཆིས་པ་ངོ་མཚར་ཏོ། །བཅོམ་ལྡན་འདས། བདག་གིས་ཇི་ལྟར་བཅོམ་ལྡན་འདས་ཀྱིས་གསུངས་པའི་དོན་འཚལ་པ་ལྟར་ན། བཅོམ་
ལྡན་འདས། དེ་ལྟར་ཆོས་ཐམས་ཅད་ཀྱང་བརྗོད་དུ་མ་མཆིས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །རབ་འབྱོར། དེ་དེ་བཞིན་ཏེ། རབ་འབྱོར།
ཆོས་ཐམས་ཅད་ཀྱང་བརྗོད་དུ་མེད་པའོ། །དེ་ཅིའི་ཕྱིར་ཞེ་ན། རབ་འབྱོར། ཆོས་ཐམས་ཅད་ཀྱི་སྟོང་པ་ཉིད་གང་ཡིན་པ་དེ་ནི། བརྗོད་དུ་མི་ནུས་པའི་ཕྱིར་རོ། །རབ་འབྱོར་གྱིས་གསོལ་
པ༑ བཅོམ་ལྡན་འདས། ཡང་ཅི་བརྗོད་དུ་མ་མཆིས་པའི་དོན་ལ་འཕེལ་བའམ། ཡོངས་སུ་འགྲིབ་པ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ནོ། །རབ་
འབྱོར་གྱིས་གསོལ་པ། བཅོམ་ལྡན་འདས། གལ་ཏེ་བརྗོད་དུ་མ་མཆིས་པའི་དོན་ལ་འཕེལ་བ་མ་མཆིས། ཡོངས་སུ་འགྲིབ་པ་མ་མཆིས་ན་ནི། སྦྱིན་པའི་ཕ་རོལ་ཏུ་ཕྱིན་པ་ལའང་འཕེལ་བ་
མ་མཆིས། ཡོངས་སུ་འགྲིབ་པའང་མ་མཆིས་པར་འགྱུར་རོ། །དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་པའི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང༌།
བསམ་གཏན་གྱི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་ལའང་བཅོམ་ལྡན་འདས། །འཕེལ་བ་མ་མཆིས། ཡོངས་སུ་འགྲིབ་པའང་མ་མཆིས་པར་འགྱུར་རོ། །བཅོམ་ལྡན་
འདས༑ གལ་ཏེ་ཕ་རོལ་ཏུ་ཕྱིན་པ་དྲུག་པོ་འདི་རྣམས་ལ་འཕེལ་བ་མ་མཆིས། ཡོངས་སུ་འགྲིབ་པ་མ་མཆིས་ན། བཅོམ་ལྡན་འདས། ཇི་ལྟར་རྣམ་པར་མི་འཕེལ་བའི་ཕ་རོལ་ཏུ་ཕྱིན་པ་དྲུག་
པོ་རྣམས་ཀྱི་སྟོབས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བའམ། ཇི་ལྟར་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་ཉེ་བར་འགྱུར། བཅོམ་ལྡན་འདས། ཕ་རོལ་ཏུ་ཕྱིན་པ་ཡོངས་སུ་རྫོགས་པར་མ་བགྱིས་པར་ནི། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་
༄༅། །ཡང་དག་པར་རྫོགས་པའི་བྱང་ཆུབ་ཏུ་ཉེ་བར་མི་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་དེ་བཞིན་ཏེ། །དེ་དེ་བཞིན་ཏོ། རབ་འབྱོར། ཡང་
ཕ་རོལ་ཏུ་ཕྱིན་པའི་དོན་ལ་འཕེལ་བའམ། ཡོངས་སུ་འགྲིབ་པའང་མེད་མོད་ཀྱི། རབ་འབྱོར། འོན་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་
ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྒོམ་པ་ཐབས་མཁས་པ་ནི། འདི་སྙམ་དུ་སྦྱིན་པའི་ཕ་རོལ་ཏུ་ཕྱིན་པ་འདི་ནི། རྣམ་པར་འཕེལ་ལོ། །སྦྱིན་པའི་ཕ་རོལ་ཏུ་ཕྱིན་པ་འདི་ནི། ཡོངས་
སུ་འགྲིབ་བོ། །ཞེས་བྱ་བར་མི་སེམས་ཀྱི། འོན་ཀྱང་དེ་འདི་སྙམ་དུ། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་ཞེས་བྱ་བ་འདི་ནི། མིང་ཙམ་མོ། །ཞེས་བསམས་ནས་དེ་སྦྱིན་པ་སྦྱིན་པར་
བྱེད་ཅིང༌། ཡིད་ལ་བྱེད་པ་དེ་དག་དང༌། སེམས་བསྐྱེད་པ་དེ་དག་དང༌། དགེ་བའི་རྩ་བ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་སྟེ། བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཇི་ལྟ་བ་དེ་བཞིན་དུ་ཡོངས་སུ་བསྔོའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་
ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྒོམ་པ་ཐབས་མཁས་པ་ནི། འདི་སྙམ་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་འདི་ནི། རྣམ་པར་འཕེལ་ལོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་འདི་ནི།
ཡོངས་སུ་འགྲིབ་བོ། །ཞེས་མི་སེམས་ཀྱི། འོན་ཀྱང་དེ་འདི་སྙམ་དུ། འདི་ལྟ་སྟེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཞེས་བྱ་བ་འདི་ནི། མིང་ཙམ་མོ། །ཞེས་བསམས་ནས་དེ་ཚུལ་ཁྲིམས་ཡང་དག་
པར་བླངས་ཏེ་གནས་ཤིང་ཡིད་ལ་བྱེད་པ་དེ་དག་དང༌། སེམས་བསྐྱེད་པ་དེ་དག་དང༌། དགེ་བའི་རྩ་བ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་སྟེ། བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཇི་ལྟ་བ་དེ་བཞིན་དུ་ཡོངས་སུ་བསྔོའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཤེས་
རབ་ཀྱི་ཕ་རོལ་ཏུ་ཕྱིན་པ་ལ་སྒོམ་པ་ཐབས་མཁས་པ་ནི། འདི་སྙམ་དུ། བཟོད་པའི་ཕ་རོལ་ཏུ་ཕྱིན་པ་འདི་ནི། རྣམ་པར་འཕེལ་ལོ། །བཟོད་པའི་ཕ་རོལ་ཏུ་ཕྱིན་པ་འདི་ནི། ཡོངས་སུ་འགྲིབ་
བོ༑ ༑ཞེས་མི་སེམས་ཀྱི། འོན་ཀྱང་དེ་འདི་སྙམ་དུ། འདི་ལྟ་སྟེ། བཟོད་པའི་ཕ་རོལ་ཏུ་ཕྱིན་པ་ཞེས་བྱ་བ་འདི་ནི། མིང་ཙམ་མོ། །སྙམ་ནས་དེ་བཟོད་པ་སྒྲུབ་ཅིང་ཡིད་ལ་བྱེད་པ་དེ་དག་དང༌། སེམས་
བསྐྱེད་པ་དེ་དག་དང༌། དགེ་བའི་རྩ་བ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཇི་ལྟ་བ་དེ་བཞིན་དུ་ཡོངས་སུ་
བསྔོའོ༑ ༑རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྒོམ་པ་ཐབས་མཁས་པ་ནི། འདི་
༄༅། །སྙམ་དུ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་འདི་ནི། རྣམ་པར་འཕེལ་ལོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་འདི་ནི། ཡོངས་སུ་འགྲིབ་བོ། །ཞེས་བྱ་བར་མི་སེམས་
ཀྱི༑ འོན་ཀྱང་དེ་འདི་སྙམ་དུ། འདི་ལྟ་སྟེ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཞེས་བྱ་བ་འདི་ནི། མིང་ཙམ་མོ། །ཞེས་བསམས་ནས་དེ་བརྩོན་འགྲུས་རྩོམ་ཞིང་ཡིད་ལ་བྱེད་པ་དེ་དག་དང༌།
སེམས་བསྐྱེད་པ་དེ་དག་དང༌། དགེ་བའི་རྩ་བ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཇི་ལྟ་བ་དེ་བཞིན་
དུ་ཡོངས་སུ་བསྔོའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྒོམ་པ་ཐབས་
མཁས་པ་ནི། འདི་སྙམ་དུ། བསམ་གཏན་གྱི་ཕ་རོལ་ཏུ་ཕྱིན་པ་འདི་ནི། རྣམ་པར་འཕེལ་ལོ། །བསམ་གཏན་གྱི་ཕ་རོལ་ཏུ་ཕྱིན་པ་འདི་ནི། ཡོངས་སུ་འགྲིབ་བོ། །ཞེས་བྱ་བར་མི་སེམས་
ཀྱི༑ འོན་ཀྱང་དེ་འདི་སྙམ་དུ། འདི་ལྟ་སྟེ། བསམ་གཏན་གྱི་ཕ་རོལ་ཏུ་ཕྱིན་པ་ཞེས་བྱ་བ་འདི་ནི། མིང་ཙམ་མོ། །ཞེས་བསམས་ནས་དེ་བསམ་གཏན་དག་ལ་ཡང་མཉམ་པར་གཞོག་ལ།
ཡིད་ལ་བྱེད་པ་དེ་དག་དང༌། སེམས་བསྐྱེད་པ་དེ་དག་དང༌། དགེ་བའི་རྩ་བ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་སྟེ། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཇི་ལྟ་བ་དེ་བཞིན་དུ་ཡོངས་སུ་བསྔོའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་
ལ་སྒོམ་པ་ཐབས་མཁས་པ་ནི། འདི་སྙམ་དུ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། རྣམ་པར་འཕེལ་ལོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཡོངས་སུ་འགྲིབ་བོ། །ཞེས་བྱ་བར་མི་སེམས་
ཀྱི༑ འོན་ཀྱང་དེ་འདི་སྙམ་དུ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་འདི་ནི། མིང་ཙམ་མོ། ཞེས་བསམས་ནས། དེ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཤེས་རབ་ཀྱི་ཕ་
རོལ་ཏུ་ཕྱིན་པ་ལ་སྒོམ་ཞིང༌། ཡིད་ལ་བྱེད་པ་དེ་དག་དང༌། སེམས་བསྐྱེད་པ་དེ་དག་དང༌། དགེ་བའི་རྩ་བ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་སྟེ། བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཇི་ལྟ་བ་དེ་བཞིན་དུ་ཡོངས་སུ་བསྔོའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཅེས་བགྱི་བ་འདིའང་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་
བྱ་བ་འདི་ནི། དེ་བཞིན་ཉིད་དོ། །རབ་འབྱོར། དེ་བཞིན་ཉིད་ནི། རྣམ་པར་འཕེལ་བའམ་ཡོངས་སུ་འགྲིབ་པ་མེད་དོ། །གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཡིད་ལ་བྱེད་པ་དེ་
༄༅། །དག་དང་ལྡན་པས་རྒྱུན་མི་ཆད་པར་མང་དུ་གནས་ན་དེ་ལྟར་ན། དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བ་ཡིན་ནོ། །རབ་འབྱོར། དེ་ལྟར་བརྗོད་དུ་མེད་
པའི་དོན་ལ་འཕེལ་བར་ཡང་མི་འགྱུར། ཡོངས་སུ་འགྲིབ་པར་ཡང་མི་འགྱུར་རོ། །ཡིད་ལ་བྱེད་པ་དེ་དག་གིས་ཡོངས་སུ་མི་འགྲིབ་བོ། །རབ་འབྱོར། དེ་ལྟར་ཕ་རོལ་ཏུ་ཕྱིན་པ་ལ་འཕེལ་
བར་ཡང་མི་འགྱུར། ཡོངས་སུ་འགྲིབ་པར་ཡང་མི་འགྱུར་རོ། །རབ་འབྱོར། དེ་ལྟར་ཆོས་ཐམས་ཅད་ལའང་འཕེལ་བར་ཡང་མི་འགྱུར། ཡོངས་སུ་འགྲིབ་པར་ཡང་མི་འགྱུར་རོ། །རབ་འབྱོར།
དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཡིད་ལ་བྱེད་པ་དེ་ལྟ་བུ་དག་གིས་གནས་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བ་ཡིན་ནོ། །འཕགས་པ་ཤེས་རབ་ཀྱི་ཕ་
རོལ་ཏུ་ཕྱིན་པ་བརྒྱད་སྟོང་པ་ལས། སྟོང་པ་ཉིད་ཀྱི་ལེའུ་ཞེས་བྱ་སྟེ། བཅོ་བརྒྱད་པའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་བཅུ་བདུན་པ།
དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཡང་ཅི་སེམས་བསྐྱེད་པ་དང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའམ། འོན་ཏེ་སེམས་བསྐྱེད་པ་སླད་མས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་འཚང་རྒྱ། བཅོམ་ལྡན་འདས། སེམས་བསྐྱེད་པ་སྔ་མ་ནི། སེམས་བསྐྱེད་པ་སླད་མ་དང་མི་འགྲོགས། སེམས་བསྐྱེད་པ་སླད་མའང་སེམས་བསྐྱེད་པ་སྔ་མ་དང་མི་
འགྲོགས་ན། བཅོམ་ལྡན་འདས། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་བའི་རྩ་བ་རྣམས་གསོག་པར་འགྱུར། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་
དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། འདི་ཇི་སྙམ་དུ་སེམས། འབྲུ་མར་གྱི་མར་མེ་འབར་བའི་མེ་ལྕེ་དང་པོ་ཕོག་པས་སྙིང་པོ་དེ་ཚིག་གམ། འོན་ཏེ་མེ་ལྕེ་ཕྱི་མ་
ཕོག་པས་སྙིང་པོ་དེ་ཚིག་པར་འགྱུར། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས། མེ་ལྕེ་དང་པོ་ཕོག་པས་སྙིང་པོ་དེ་ཚིག་པ་མ་ལགས། མེ་
ལྕེ་དང་པོ་བྱུང་བ་ལ་མ་བརྟེན་པར་ཡང་སྙིང་པོ་དེ་མི་འཚིག་གོ། བཅོམ་ལྡན་འདས། མེ་ལྕེ་སླད་མ་ཕོག་པས་ཀྱང་སྙིང་པོ་དེ་མི་འཚིག་སྟེ། མེ་ལྕེ་སླད་མ་ཕོག་པ་ལ་མ་བརྟེན་པར་ཡང་སྙིང་པོ་དེ་མི་ཚིག་
གོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཅི་སྙིང་པོ་དེའང་ཚིག་གམ། རབ་འབྱོར་གྱིས་གསོལ་པ། བཅོམ་ལྡན་འདས། ཚིག་ལགས་སོ། །
བདེ་བར་གཤེགས་པ། ཚིག་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བཞིན་དུ་སེམས་བསྐྱེད་པ་དང་པོས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་
༄༅། །མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ། སེམས་བསྐྱེད་པ་དང་པོ་ལ་མ་བརྟེན་པར་ཡང་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་འཚང་མི་རྒྱའོ། །སེམས་བསྐྱེད་པ་ཕྱི་མས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ། སེམས་བསྐྱེད་པ་ཕྱི་མ་ལ་མ་
བརྟེན་པར་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱའོ། སེམས་བསྐྱེད་པ་དེ་དག་གིས་ཀྱང་མ་ཡིན། སེམས་བསྐྱེད་པ་དེ་དག་ལས་གཞན་
པས་ཀྱང་མངོན་པར་རྫོགས་པར་འཚང་མི་རྒྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་ཡང་
རྒྱའོ༑ ༑དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། རྟེན་ཅིང་འབྲེལ་པར་འབྱུང་བ་འདི་ཟབ་པ་
ལགས་ཏེ། བཅོམ་ལྡན་འདས་སེམས་བསྐྱེད་པ་དང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
མི་རྒྱ་ལ༑ སེམས་བསྐྱེད་པ་དང་པོ་ལ་མ་བརྟེན་པར་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ། སེམས་བསྐྱེད་པ་སླད་མས་ཀྱང་བྱང་ཆུབ་སེམས་
དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་ལ། སེམས་བསྐྱེད་པ་སླད་མ་ལ་མ་བརྟེན་པར་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ། སེམས་བསྐྱེད་པ་དེ་དག་གིས་ཀྱང་མ་ལགས། སེམས་བསྐྱེད་པ་དེ་མ་ལགས་པ་གཞན་
ལས་ཀྱང་མངོན་པར་རྫོགས་པར་འཚང་མི་རྒྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཡང་
འགྱུར་རོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། འདི་ཇི་སྙམ་དུ་སེམས། ཅི་སེམས་གང་འགགས་
པ་དེ་ཕྱིར་འབྱུང་བར་འགྱུར་རམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་
སེམས། ཅི་སེམས་གང་འབྱུང་བ་དེ་འགག་པའི་ཆོས་ཅན་ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས། འགག་པའི་ཆོས་ཅན་ལགས་སོ། །བཅོམ་ལྡན་འདས་ཀྱིས་
བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཅི་གང་འགག་པའི་ཆོས་ཅན་དེ་འགག་པར་འགྱུར་རམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །
༄༅། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཅི་སེམས་གང་མ་བྱུང་བ་དེ་འགག་པའི་ཆོས་ཅན་ཡིན་ནམ། རབ་འབྱོར་གྱིས་
གསོལ་པ། །བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཅི་སེམས་གང་ཞིག་འགག་པའི་ཆོས་ཅན་
མ་ཡིན་པ་དེ་འགག་པར་འགྱུར་རམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་
སེམས༑ ཅི་སེམས་གང་མི་འབྱུང་མ་འགག་པའི་ཆོས་ཅན་དེ་འགག་པར་འགྱུར་རམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་
ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཅི་ཆོས་གང་རང་བཞིན་གྱིས་ངོ་བོ་ཉིད་འགགས་པ་ཉིད་ཀྱི་ཆོས་དེ་འགག་པར་འགྱུར་རམ། རབ་འབྱོར་གྱིས་གསོལ་པ།
བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཅི་ཆོས་རྣམས་ཀྱི་ཆོས་ཉིད་གང་ཡིན་པ་དེ་འགག་པར་
འགྱུར་རམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། དེ་བཞིན་
ཉིད་ཇི་ལྟ་བ་དེ་ཁོ་ན་བཞིན་དུ་གནས་པར་འགྱུར་རམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་བཞིན་ཉིད་ཇི་ལྟ་བ་དེ་ཁོ་ན་བཞིན་དུ་གནས་པར་འགྱུར་རོ། །བཅོམ་ལྡན་འདས་ཀྱིས་
བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། གལ་ཏེ་དེ་བཞིན་ཉིད་ཇི་ལྟ་བ་དེ་བཞིན་དུ་གནས་ན་ནི། དེའི་ཚེ་ཐེར་ཟུག་མ་ཡིན་པར་མི་འགྱུར་རམ། རབ་འབྱོར་གྱིས་གསོལ་པ།
བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། དེ་བཞིན་ཉིད་ཟབ་པ་མ་ཡིན་ནམ། རབ་འབྱོར་གྱིས་གསོལ་
པ༑ བཅོམ་ལྡན་འདས། ཟབ་བོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། དེ་བཞིན་ཉིད་ལ་སེམས་ཡོད་དམ། རབ་འབྱོར་གྱིས་གསོལ་པ། བཅོམ་
ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། སེམས་དེ་དེ་བཞིན་ཉིད་ཡིན་ནམ། རབ་འབྱོར་གྱིས་གསོལ་པ། བཅོམ་
ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། དེ་བཞིན་ཉིད་ལས་གཞན་ན་སེམས་ཡོད་དམ། རབ་འབྱོར་གྱིས་གསོལ་
པ༑ བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཁྱོད་ཀྱིས་དེ་བཞིན་ཉིད་ཡང་དག་པར་རྗེས་སུ་མཐོང་ངམ། རབ་འབྱོར་གྱིས་གསོལ་པ།
༄༅། །བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། གང་དེ་ལྟར་སྤྱོད་པ་དེ་ཟབ་མོ་ལ་སྤྱོད་དམ། རབ་
འབྱོར་གྱིས་གསོལ་པ། བཅོམ་ལྡན་འདས། གང་དེ་ལྟར་སྤྱོད་པ་དེ་ཅི་ལ་ཡང་མི་སྤྱོད་དོ། །དེ་ཅིའི་ཕྱིར་ཞེ་ན། འདི་ལྟར་དེ་ལ་ཀུན་ཏུ་སྤྱོད་པ་དེ་དག་མི་འཇུག་ཅིང་ཀུན་ཏུ་སྤྱོད་པ་མེད་དོ། །བཅོམ་
ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་ཅི་ལ་སྤྱོད། རབ་འབྱོར་གྱིས་གསོལ་པ། བཅོམ་
ལྡན་འདས། དོན་དམ་པ་ལ་སྤྱོད་དོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། བྱང་ཆུབ་སེམས་དཔའ་སེམས་དཔའ་ཆེན་པོ་གང་དོན་དམ་པ་ལ་
སྤྱོད་པ་དེ་མཚན་མ་ལ་སྤྱོད་དམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས།
ཅི་དེས་མཚན་མ་དེ་རྣམ་པར་མ་བཤིག་གམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་
སྙམ་དུ་སེམས། ཅི་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས་མཚན་མ་རྣམ་པར་བཤིག་པར་འགྱུར་རམ། རབ་འབྱོར་གྱིས་གསོལ་པ།
བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཇི་ལྟར་བདག་གིས་འདི་ཉིད་དུ་མཚན་མ་སྤངས་པ་ཐོབ་པར་འགྱུར་སྙམ་དུ་མི་སྦྱོར་ཏེ།
གལ་ཏེ་ཐོབ་པར་གྱུར་ན་ནི། སངས་རྒྱས་ཀྱི་ཆོས་ཐམས་ཅད་མ་རྫོགས་པས་ན། ཉན་ཐོས་སུ་འགྱུར་རོ། །བཅོམ་ལྡན་འདས། མཚན་ཉིད་གང་ལགས་པ་དང༌། མཚན་མ་གང་ལགས་པའི་
མཚན་མ་དེའང་འཚལ་ལ། མཚན་མ་དེ་མེད་པ་ལ་ཡང་ཡོངས་སུ་འདྲིས་པར་བགྱིད་པ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་མཁས་པའོ། །དེ་ནས་ཚེ་དང་ལྡན་པ་ཤཱ་
རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་རྣམ་པར་ཐར་པའི་སྒོ་སྟོང་པ་ཉིད་དང༌། མཚན་མ་
མེད་པ་དང༌། སྨོན་པ་མེད་པ་གསུམ་རྨི་ལམ་ན་སྒོམ་ན། ཅི་དེའི་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་འཕེལ་བར་འགྱུར་རམ། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། གལ་ཏེ་ཉིན་
པར་བསྒོམས་པས་རྣམ་པར་འཕེལ་ན་ནི། རྨི་ལམ་ནའང་རྣམ་པར་འཕེལ་ལོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ཤཱ་རིའི་བུ། རྨི་ལམ་དང་ཉིན་པར་ནི། རྣམ་པར་མི་རྟོག་པའོ། །ཞེས་བཅོམ་
ལྡན་འདས་ཀྱིས་གསུངས་ཏེ། །ཚེ་དང་ལྡན་པ་ཤཱ་རིའི་བུ། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་རྙེད་པ་དེ་ཉིན་གཅིག་བཞིན་དུ་ཤེས་རབ་ཀྱི་ཕ་རོལ་
༄༅། །ཏུ་ཕྱིན་པ་ལ་སྤྱོད་ན། དེའི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གོམས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་རྨི་ལམ་ནའང་ཤེས་རབ་ཀྱི་ཕ་རོལ་
ཏུ་ཕྱིན་པ་རྒྱས་པར་འགྱུར་རོ། །ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། གང་ཡང་སྐྱེས་པའམ། བུད་མེད་གང་རྨི་ལམ་ན་དགེ་བའམ་མི་དགེ་བའི་ལས་ཤིག་བྱེད་ན། ཅི་དེའི་
ལས་གསོག་པའམ། ཉེ་བར་གསོག་པར་འགྱུར་རམ། རབ་འབྱོར་གྱིས་སྨྲས་པ། ཇི་ལྟར་བཅོམ་ལྡན་འདས་ཀྱིས་ཆོས་ཐམས་ཅད་རྨི་ལམ་ལྟ་བུའོ། །ཞེས་གསུངས་པ་དེ་ལྟར་ན། ལས་
དེ་གསོག་པའམ། ཉེ་བར་གསོག་པར་མི་འགྱུར་རོ། །ཚེ་དང་ལྡན་པ་ཤཱ་རིའི་བུ། དེ་སྟེ་ཡང་སྐྱེས་བུ་བསད་ནས་རྣམ་པར་རྟོག་ཅིང་བསད་པར་འདུ་ཤེས་བསྐྱེད་ན། ལས་དེ་གསོག་
པའམ༑ ཉེ་བར་གསོག་པར་འགྱུར་རོ། །ཚེ་དང་ལྡན་པ་ཤཱ་རིའི་བུ། ཡང་ཇི་ལྟར་རྨི་ལམ་ན་སྲོག་གཅོད་པ་བྱས་ནས་རྣམ་པར་རྟོག་ཅིང་བསད་པར་འདུ་ཤེས་བསྐྱེད་ནས་གལ་ཏེ་སད་ནས་
ཀྱང་འདི་ལྟར་རྣམ་པར་རྟོག་སྟེ། ཨ་ལ་ལ་བསད་དོ། །ལེགས་པར་བསད་དོ། །ཤིན་ཏུ་བསད་དོ། །ངས་བསད་དོ། །སྙམ་དུ་གང་དེ་ལྟར་རྟོག་ཅིང་གསོད་པར་འདུ་ཤེས་བསྐྱེད་ན་ནི། ཚེ་དང་
ལྡན་པ་ཤཱ་རིའི་བུ། ལས་དེ་སོགས་པའམ། ཉེ་བར་གསོག་པར་འགྱུར་རོ། །ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། གལ་ཏེ་སྐྱེས་བུ་དེ་སད་ནས་ཀྱང་འདི་ལྟར་རྣམ་པར་རྟོག་ཅིང༌།
པའི་འདུ་ཤེས་བསྐྱེད་དེ་ཨ་ལ་ལ་བསད་དོ། །ལེགས་པར་བསད་དོ། །ཤིན་ཏུ་བསད་དོ། །ངས་བསད་དོ། །སྙམ་དུ་རྣམ་པར་རྟོག་ཅིང་གསོད་པར་འདུ་ཤེས་བསྐྱེད་ན། དེ་བཞིན་དུ་ལས་དེ་
གསོག་པའམ། ཉེ་བར་གསོག་པར་འགྱུར་ན། སངས་རྒྱས་བཅོམ་ལྡན་འདས་ཀྱང་ཟད་པའི་འདུ་ཤེས་ཀྱིས་རྣམ་པར་རྟོག་པ་བསྐྱེད་པར་མཛད་པས་དེའི་ཡང་ལས་དེ་གསོག་པའམ།
ཉེ་བར་གསོག་པར་འགྱུར་རམ། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། དེ་ནི། མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི། རྟོག་པ་དང༌། རྣམ་པར་
རྟོག་པ་ཐམས་ཅད་དང་བྲལ་བ་ཡིན་ཏེ། འདི་ལྟ་སྟེ། ནམ་མཁའ་ལྟ་བུ་ཉིད་དོ། །ཚེ་དང་ལྡན་པ་ཤཱ་རིའི་བུ། དེ་བཞིན་དུ་དམིགས་པ་མེད་པར་ལས་མི་སྐྱེ། དམིགས་པ་མེད་པར་
སེམས་མི་སྐྱེ་སྟེ། ཚེ་དང་ལྡན་པ་ཤཱ་རིའི་བུ། དེ་ལྟ་བས་ན། ལས་ནི། དམིགས་པ་དང་བཅས་པ་ཉིད་དུ་སྐྱེའི། དམིགས་པ་མེད་པར་མ་ཡིན་ནོ། །སེམས་ནི། དམིགས་པ་དང་
བཅས་པ་ཉིད་དུ་སྐྱེའི། དམིགས་པ་མེད་པར་མ་ཡིན་ནོ། །ཚེ་དང་ལྡན་པ་ཤཱ་རིའི་བུ། མཐོང་བ་དང༌། ཐོས་པ་དང༌། རྟོགས་པ་དང༌། རྣམ་པར་ཤེས་པའི་ཆོས་རྣམས་ལ་བློ་འཇུག་སྟེ།
དེ་ལ་བློ་ལ་ལ་ནི། ཀུན་ནས་ཉོན་མོངས་པ་ཡོངས་སུ་འཛིན། བློ་ལ་ལ་ནི། རྣམ་པར་བྱང་བ་ཡོངས་སུ་འཛིན་ཏེ། ཚེ་དང་ལྡན་པ་ཤཱ་རིའི་བུ། དེ་ལྟ་བས་ན། སེམས་པ་ནི། དམིགས་པ་
༄༅། །དང་བཅས་པར་སྐྱེའི། དམིགས་པ་མེད་པར་མ་ཡིན་ནོ། །ལས་ནི། དམིགས་པ་དང་བཅས་པར་སྐྱེའི། དམིགས་པ་མེད་པར་མ་ཡིན་ནོ། །ཤཱ་རིའི་
བུས་སྨྲས་པ། ཚེ་དང་ལྡན་པ་རབ་འབྱོར། གང་གི་ཚེ་དམིགས་པ་ཐམས་ཅད་དབེན་ནོ། །ཞེས་བཅོམ་ལྡན་འདས་ཀྱིས་བཀའ་སྩལ་པ། ཚེ་དང་ལྡན་པ་རབ་འབྱོར། དེའི་ཚེ་ཅིའི་ཕྱིར་
སེམས་པ་དམིགས་པ་དང་བཅས་པར་སྐྱེའི། དམིགས་པ་མེད་པར་མི་སྐྱེ། རབ་འབྱོར་གྱིས་སྨྲས་པ། ཚེ་དང་ལྡན་པ་ཤཱ་རིའི་བུ། མཚན་མར་བྱས་ནས་དམིགས་པ་རྣམས་མེད་པ་ཉིད་
ལ་དམིགས་པར་བྱས་ནས་དམིགས་པ་དང་བཅས་པར་སེམས་པ་སྐྱེའི། དམིགས་པ་མེད་པར་ནི། མ་ཡིན་ནོ། །ཚེ་དང་ལྡན་པ་ཤཱ་རིའི་བུ། སེམས་པ་ནི། དབེན་པ་སྟེ། མཚན་མའང་
དབེན་པའོ། །དེ་བཞིན་དུ་མ་རིག་པའི་རྐྱེན་གྱིས་འདུ་བྱེད་རྣམས་ཀྱང་དབེན་པའོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཡང་དབེན་པའོ། །ཞེས་བྱ་བ་ནས་སྐྱེ་བའི་རྐྱེན་གྱིས་རྒ་ཤིའང་
ཞེས་བྱ་བའི་བར་དུའང་དབེན་པའོ། །ཚེ་དང་ལྡན་པ་ཤཱ་རིའི་བུ། དེ་བཞིན་དུ་དམིགས་པ་དེ་དག་ཐམས་ཅད་ནི། དབེན་པའོ། །སེམས་པའང་མཚན་མས་དབེན་པ་སྟེ། འཇིག་རྟེན་གྱི་ཐ་
སྙད་ལ་བརྟེན་ནས་དམིགས་པ་དང་བཅས་པའི་སེམས་སྐྱེའོ། །ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གང་རྨི་ལམ་
ན་སྦྱིན་པ་སྦྱིན་པར་བྱེད་ཅིང༌། སྦྱིན་པ་དེའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། ཅི་དེའི་ཚེ་སྦྱིན་པ་དེ་ཡོངས་སུ་བསྔོས་པ་ཞེས་བྱའམ། རབ་འབྱོར་གྱིས་སྨྲས་པ། ཚེ་
དང་ལྡན་པ་ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་མངོན་དུ་འདུག་ན། འདི་ནི། བར་དུ་མ་ཆོད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དེ་བཞིན་
གཤེགས་པས་ལུང་བསྟན་ཏེ། དོན་འདི་ལུས་ཀྱིས་མངོན་སུམ་དུ་བྱེད་པ་ཡིན་གྱི། འདི་ལ་དྲིས་ཤིག་དང་འདིས་དོན་འདིའི་ལན་ལྡོན་པར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུས་བྱང་ཆུབ་
སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་བྱམས་པ། གནས་བརྟན་རབ་འབྱོར་འདི་སྐད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་
པ་འདི་དོན་འདིའི་ལན་ལྡོན་ནོ། །ཞེས་ཟེར་ན། ཚེ་དང་ལྡན་པ་མ་ཕམ་པས་དོན་འདིའི་ལན་ལོན་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ཚེ་དང་ལྡན་པ་རབ་འབྱོར་
ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། གང་འདི་སྐད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་དོན་འདིའི་ལན་ལྡོན་ནོ། །ཞེས་ཟེར་ན། ཚེ་དང་ལྡན་པ་རབ་
འབྱོར༑ ཅི་བྱམས་པ་ཞེས་བྱ་བའི་མིང་གང་ཡིན་པ་དེ་དོན་འདིའི་ལན་ལྡོན་ཏམ། དེ་སྟེ་གཟུགས་ལན་ལྡོན་ཏམ། དེ་སྟེ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་
༄༅། །པ་ལན་ལྡོན་ཏམ། དེ་སྟེ་ཁ་དོག་ལན་ལྡོན་ཏམ། དེ་སྟེ་དབྱིབས་ལན་ལྡོན་ཏམ། དེ་སྟེ་གཟུགས་ཀྱི་སྟོང་པ་ཉིད་གང་ཡིན་པ་དེ་ལན་ལྡོན་ཏམ། དེ་བཞིན་དུ་ཚོར་བ་དང༌། འདུ་
ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའི་སྟོང་པ་ཉིད་གང་ཡིན་པ་དེ་ལན་ལྡོན། ཚེ་དང་ལྡན་པ་རབ་འབྱོར། གཟུགས་ཀྱི་སྟོང་པ་ཉིད་གང་ཡིན་པ་དེས་ནི། ལན་ལྡོན་མི་ནུས་སོ། །དེ་བཞིན་
དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། ཚེ་དང་ལྡན་པ་རབ་འབྱོར། རྣམ་པར་ཤེས་པའི་སྟོང་པ་ཉིད་གང་ཡིན་པ་དེས་ནི། ལན་ལྡོན་མི་ནུས་སོ། །ཚེ་དང་ལྡན་པ་རབ་འབྱོར། ཆོས་གང་
ལན་ལྡོན་པར་བྱེད་པའི་ཆོས་དེའང་བདག་གིས་ཡང་དག་པར་རྗེས་སུ་མ་མཐོང་ངོ༌། །ཆོས་གང་ལ་ལན་གླན་པར་བྱ་བའི་ཆོས་དེའང་བདག་གིས་ཡང་དག་པར་རྗེས་སུ་མ་མཐོང་ངོ༌། །ཆོས་གང་
གིས་ལན་གླན་པར་བྱ་བའི་ཆོས་དེ་ཡང་བདག་གིས་ཡང་དག་པར་རྗེས་སུ་མ་མཐོང་ངོ༌། །ཆོས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་ཆོས་དེའང་བདག་གིས་ཡང་
དག་པར་རྗེས་སུ་མ་མཐོང་ངོ༌། །དེ་ནས་ཚེ་དང་ལྡན་པ་ཤཱ་རིའི་བུས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་བྱམས་པ། ཆོས་འདི་དག་གང་ཇི་
ལྟར་ཚིག་གིས་བསྟན་པ་དེ་བཞིན་དུ་ཁྱོད་ཀྱིས་མངོན་སུམ་དུ་བྱས་སམ། བྱམས་པས་སྨྲས་པ། ཚེ་དང་ལྡན་པ་ཤཱ་རིའི་བུ། ཆོས་འདི་དག་ཇི་ལྟར་ཚིག་གིས་བསྟན་པ་དེ་བཞིན་དུ་བདག་གིས་མངོན་
སུམ་དུ་མ་བྱས་ཏེ། ཚེ་དང་ལྡན་པ་ཤཱ་རིའི་བུ། ཇི་ལྟར་ཚིག་གིས་བརྗོད་པའམ་སེམས་ཀྱིས་བསམས་པའི་ཆོས་དེ་དག་ཀྱང་དེ་ལྟར་བདག་གིས་མི་ཤེས། མི་དམིགས། ཡང་དག་པར་རྗེས་སུ་མ་མཐོང་ངོ༌། །
ཚེ་དང་ལྡན་པ་ཤཱ་རིའི་བུ། འོན་ཀྱང་ཇི་ལྟར་ལུས་ཀྱིས་རེག་ཏུ་མེད་པ་དང༌། ཚིག་གིས་བརྗོད་དུ་མེད་པ་དང༌། ཡིད་ཀྱིས་བསམ་དུ་མེད་པ་དེ་བཞིན་དུ་ཆོས་ཐམས་ཅད་ཀྱང་ངོ་བོ་ཉིད་མེད་པའི་ཕྱིར་རང་བཞིན་
མེད་པའོ། །དེ་ནས་ཚེ་དང་ལྡན་པ་ཤཱ་རིའི་བུ་འདི་སྙམ་དུ། ཨེ་མ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་ནི། ཤེས་རབ་ཟབ་སྟེ། ཇི་ལྟར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཡུན་
རིང་པོར་སྤྱད་པ་ལྟར་སྟོན་ཏོ། །སྙམ་དུ་སེམས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ། ཁྱོད་ཅིའི་ཕྱིར་འདི་སྙམ་དུ་ཨེ་མ་བྱང་ཆུབ་སེམས་དཔའ་
སེམས་དཔའ་ཆེན་པོ་བྱམས་པ་འདི་ནི། ཤེས་རབ་ཟབ་བོ། །སྙམ་དུ་སེམས། ཤཱ་རིའི་བུ། ཁྱོད་ཆོས་གང་དང་ལྡན་པས་དགྲ་བཅོམ་པ་ཞེས་རབ་ཏུ་དབྱེ་བའི་ཆོས་དེའང་ཁྱོད་ཀྱིས་ཡང་དག་པར་
རྗེས་སུ་མཐོང་ངམ། ཤཱ་རིའི་བུས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་
ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ནི། འདི་སྙམ་དུ་ཆོས་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །ཆོས་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
༄༅། །ཏུ་ལུང་སྟོན་པར་འགྱུར་རོ། །ཆོས་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ། །ཆོས་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་
པར་རྫོགས་པར་འཚང་རྒྱ་བར་འགྱུར་རོ། །སྙམ་དུ་མི་སེམས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་སྤྱོད་པ་ན་མི་དངང༌།
ཀུན་ཏུ་མི་སྐྲག །ཀུན་ཏུ་སྐྲག་པ་དང་ལྡན་པར་མི་འགྱུར་རོ། །སྟོབས་བསྐྱེད་པ་རྙེད་པའི་ཕྱིར་ང་མངོན་པར་རྫོགས་པར་འཚང་མི་རྒྱ་བར་མི་འགྱུར་སྙམ་དུ་དེ་ལྟར་དེ་རྣལ་འབྱོར་དུ་བྱེད་དེ། གལ་ཏེ་དེ་ལྟར་
སྤྱོད་ན༑ ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གཅན་གཟན་གྱི་དགོན་པའི་ནང་དུ་སོང་ན་དངང་བར་མི་བྱ། ཀུན་ཏུ་སྐྲག་པར་
མི་བྱ༑ ཀུན་ཏུ་སྐྲག་པ་དང་ལྡན་པར་མི་བྱའོ། །དེ་ཅིའི་ཕྱིར་ཞེ་ན། འདི་ལྟར་དེས་སེམས་ཅན་ཐམས་ཅད་ཀྱི་དོན་དུ་ཐམས་ཅད་ཡོངས་སུ་བཏང་བ་ཡིན་ནོ། །དེས་སེམས་འདི་ལྟར་བསྐྱེད་པར་བྱ་སྟེ།
གལ་ཏེ་བདག་གཅན་གཟན་གྱིས་ཟོས་ན། དེ་དག་ལ་འདི་ལྟར་སྦྱིན་པ་དེ་བྱིན་པར་གྱུར་པ་དང༌། བདག་གི་སྦྱིན་པའི་ཕ་རོལ་ཏུ་ཕྱིན་པ་ཡང་ཡོངས་སུ་རྫོགས་པར་འགྱུར་རོ། །བདག་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུའང་ཉེ་བར་འགྱུར་གྱི། ཇི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་བྱོལ་སོང་གི་
སྐྱེ་གནས་སུ་སོང་བའི་སེམས་ཅན་དེ་དག་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་ཞིང་ཤེས་པར་མི་འགྱུར་ཏེ། ལྷའི་ཉེ་བར་ལོངས་སྤྱད་པ་དང༌། ཡོངས་སུ་ལོངས་
སྤྱོད་པ་དང་ལྡན་པར་འགྱུར་བ་དེ་ལྟར་བྱའོ། །སྙམ་མོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོམ་རྐུན་གྱི་དགོན་པའི་ནང་དུ་སོང་ན་དངང་བར་མི་བྱ། ཀུན་ཏུ་སྐྲག་
པར་མི་བྱ། ཀུན་ཏུ་སྐྲག་པ་དང་ལྡན་པར་མི་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ནི། བདོག་པ་ཐམས་ཅད་ཡོངས་སུ་གཏོང་བའི་དགེ་བའི་རྩ་བ་ལ་མངོན་པར་དགའ་
བ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོས་ལུས་ཀྱང་རབ་ཏུ་བོར་ཞིང་ཡོ་བྱད་དང༌། ཉེ་བར་མཁོ་བ་ཐམས་ཅད་ཡོངས་སུ་གཏང་བར་བྱ་དགོས་པའི་ཕྱིར་རོ། །དེས་སེམས་འདི་ལྟར་
བསྐྱེད་པར་བྱ་སྟེ། གལ་ཏེ་བདག་གི་ཡོ་བྱད་དང་ཉེ་བར་མཁོ་བ་ཐམས་ཅད་འཕྲོག་ན། སེམས་ཅན་དེ་དག་ལ་སྦྱིན་པ་དེ་བྱིན་པར་གྱུར་ཅིག །གལ་ཏེ་འགའ་ཞིག་གིས་བདག་གི་སྲོག་གཅོད་ན་ནི།
བདག་གིས་དེ་ལ་གནོད་སེམས་དང༌། ཁྲོ་བ་དང༌། ཞེ་སྡང་བསྐྱེད་པར་མི་བྱ་སྟེ། དེ་དག་ལའང་བདག་གིས་ལུས་དང༌། ངག་དང༌། ཡིད་ཀྱིས་གནོད་པར་མི་བྱའོ། །དེ་ལྟར་ན་དེའི་ཚེ་བདག་གི་སྦྱིན་པའི་
ཕ་རོལ་ཏུ་ཕྱིན་པ་དང༌། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་བས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་འགྱུར་
༄༅། །ཇི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེ་ན་ཆོམ་རྐུན་གྱི་དགོན་པ་ཐམས་ཅད་
ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་བར་འགྱུར་ཞིང་ཤེས་པར་མི་འགྱུར་བ་དེ་ལྟར་བྱ་ཞིང་དེ་ལྟར་བསྒྲུབ་བོ། །ཇི་ལྟར་བདག། བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་ཉེས་པ་དེ་དག་དང༌། གཞན་དག་ཀྱང་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་ཞིང་མི་ཤེས་པ་
དེ་ལྟར་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཕྱིར་འབད་དོ། །སྙམ་མོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆུའི་དགོན་པར་གྱུར་བའི་ནང་དུ་སོང་ན་
དངང་བར་མི་བྱ། ཀུན་ཏུ་སྐྲག་པར་མི་བྱ། ཀུན་ཏུ་སྐྲག་པ་དང་ལྡན་པར་མི་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ནི། མི་དངང༌། ཀུན་ཏུ་མི་སྐྲག་པའི་ཆོས་
ཅན་ཡིན་ནོ། །དེས་འདི་ལྟར་སེམས་བསྐྱེད་པར་བྱ་སྟེ། བདག་གིས་སེམས་ཅན་ཐམས་ཅད་ཀྱི་སྲེད་པ་ཐམས་ཅད་གཅད་པའི་ཕྱིར་བསླབ་པར་བྱའོ། །གལ་ཏེ་བདག་སྐོམ་པས་འཆི་བའི་དུས་
བྱེད་པར་གྱུར་ན། ཡི་དྭགས་ཀྱི་འཇིག་རྟེན་དུ་སྐྱེ་བར་འགྱུར་རོ། །སྙམ་དུ་བྱང་ཆུབ་སེམས་དཔའ་སེམས་དཔའ་ཆེན་པོས་དངང་བར་མི་བྱ། ཀུན་ཏུ་སྐྲག་པར་མི་བྱ། ཀུན་ཏུ་སྐྲག་པ་དང་ལྡན་
པར་མི་བྱའོ། །འོན་ཀྱང་ཀྱེ་མ་སེམས་ཅན་འདི་དག་ནི། བསོད་ནམས་ཆུང་བ་སྟེ། འདི་ལྟར་འཇིག་རྟེན་འདི་ན་ཆུའི་དགོན་པར་གྱུར་པ་འདི་ལྟ་བུ་དག་སྣང་ངོ༌། །སྙམ་དུ་སེམས་ཅན་ཐམས་ཅད་ཀྱི་ཐད་དུ་སྙིང་
རྗེ་ཆེན་པོའི་སེམས་བསྐྱེད་དོ། །ཇི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེ་ན་ཆུའི་དགོན་པར་གྱུར་པ་ཐམས་ཅད་
ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་ཞིང་མི་ཤེས་པ་དེ་ལྟར་བདག་གིས་བྱའོ། །ཇི་ལྟར་སེམས་ཅན་ཐམས་ཅད་ཡན་ལག་བརྒྱད་དང་ལྡན་པའི་ཆུ་རྙེད་པར་འགྱུར་བ་དེ་ལྟར་བསོད་
ནམས་ལ་གཟུད་པར་བྱའོ། །ཇི་ལྟར་དེའི་ཚེ་བདག་གི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་བ་དེ་ལྟར་སེམས་ཅན་ཐམས་ཅད་ཀྱི་ཕྱིར་བརྩོན་འགྲུས་བརྟན་པར་བརྩམ་པར་བྱའོ། །
སྙམ་མོ༑ ༑ཤཱ་རིའི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བཀྲེས་པའི་དགོན་པའི་ནང་དུ་སོང་ན་དངང་བར་མི་བྱ། ཀུན་ཏུ་སྐྲག་པར་མི་བྱ། ཀུན་ཏུ་སྐྲག་པ་དང་ལྡན་པར་མི་བྱ་
སྟེ༑ དེས་འདི་ལྟར་གོ་ཆ་བགོ་བར་བྱའོ། །ཇི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་བཀྲེས་པའི་དགོན་པ་འདི་ལྟ་
བུ་དག་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་ཞིང་མི་ཤེས་པ་དང༌། སེམས་ཅན་དེ་དག་ཐམས་ཅད་སྐྱིད་པ་དང༌། བདེ་བ་དང་ལྡན་པ་དང༌། བདེ་བ་ཐམས་ཅད་དང་
༄༅། །ཕྲད་པར་འགྱུར་བ་དེ་ལྟར་བརྩོན་འགྲུས་བརྟན་པར་བརྩམ་མོ། །དེ་ལྟར་བདག་གིས་སངས་རྒྱས་ཀྱི་ཞིང་ཡོངས་སུ་སྦྱང་བར་བྱའོ། །ཇི་ལྟར་སེམས་ཅན་དེ་དག་གི་བསམ་
པ་གང་དང་གང་ཡིན་པ་དང༌། གང་དང་གང་ཉིད་ཡིད་ཀྱིས་བསམ་པ་དེ་དང་དེ་ཉིད་འགྲུབ་པར་འགྱུར་བ་དེ་ལྟར་བྱ་སྟེ། འདི་ལྟ་སྟེ། དཔེར་ན། སུམ་ཅུ་རྩ་གསུམ་གྱི་ལྷ་རྣམས་ཀྱི་ཡིད་ཀྱིས་བསམ་
པ་ཙམ་གྱིས་ཐམས་ཅད་འབྱུང་བར་འགྱུར་བ་དེ་བཞིན་དུ་སེམས་ཅན་དེ་རྣམས་ཀྱི་ཡིད་ཀྱིས་བསམ་པ་ཙམ་གྱིས་དེ་དག་ཐམས་ཅད་འགྲུབ་པར་འགྱུར་བ་དང༌། ཡིད་ལ་བསམ་པ་ཐམས་
ཅད་འབྱུང་བར་བྱའོ། །ཇི་ལྟར་དུས་དེའི་ཚེ་བདག་གི་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་བ་དེ་ལྟར་སེམས་ཅན་ཐམས་ཅད་ཀྱི་ཆེད་དུ་རང་གི་སེམས་ཡོངས་སུ་དག་པ་ལ་
འབད་པར་བྱའོ། །སྙམ་པས། ཇི་ལྟར་སེམས་ཅན་དེ་དག་གི་ཆོས་ཀྱི་བསམ་པ་ཡོངས་སུ་རྫོགས་པར་འགྱུར་བ་དང༌། སེམས་ཅན་ཐམས་ཅད་ཀྱི་འཚོ་བའི་ཡོ་བྱད་ཐམས་ཅད་དུས་ཐམས་
ཅད་དུ་རྣམ་པ་ཐམས་ཅད་མ་ཚང་བར་མི་འགྱུར་བ་དེ་ལྟར་བརྩོན་འགྲུས་བརྟན་པར་བརྩམ་མོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ནད་ཀྱི་དགོན་པར་
གྱུར་པའི་ནང་དུ་སོང་ན་དངང་བར་མི་བྱ། ཀུན་ཏུ་སྐྲག་པར་མི་བྱ། ཀུན་ཏུ་སྐྲག་པ་དང་ལྡན་པར་མི་བྱ་སྟེ། དེས་འདི་ལྟར་ཉེ་བར་བརྟག་པར་བྱ། བསམ་པར་བྱ། གཞལ་བར་བྱ་སྟེ། འདི་ལ་ཆོས་
འགའ་ཞིག་ན་བར་བྱེད་པའང་མེད། ཆོས་འགའ་ཞིག་ན་བ་ཞེས་བྱ་བའང་མེད་དོ། །ཞེས་དེས་སྟོང་པ་ཉིད་དུ་བརྟག་པར་བྱ་སྟེ། དངང་བར་མི་བྱ། ཀུན་ཏུ་སྐྲག་པར་མི་བྱ། ཀུན་ཏུ་སྐྲག་པ་དང་ལྡན་པར་
མི་བྱའོ༑ ༑ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོས་ནི། སེམས་འདི་ལྟར་བསྐྱེད་པར་མི་བྱ་སྟེ། ཡུན་རིང་མོ་ཞིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བར་འགྱུར་རོ། །སྙམ་དུ་དེ་ལྟར་སེམས་བསྐྱེད་པར་མི་བྱ་ཞིང་དངང་བར་མི་བྱ། ཀུན་ཏུ་སྐྲག་པར་མི་བྱ། ཀུན་ཏུ་སྐྲག་པ་དང་ལྡན་པར་མི་བྱའོ། །དེ་ཅིའི་ཕྱིར་ཞེ་ན།
སེམས་ཀྱི་སྐད་ཅིག་འདི་ཙམ་པ་གང་ཡིན་པ་དེ་ནི། སྔོན་མེད་པའི་ཐ་མ་སྟེ། འདི་ལྟ་སྟེ། མཐའ་མེད་པའོ། །ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེས་འདི་ལྟར་
དཀའ་བའི་འདུ་ཤེས་བསྐྱེད་པར་མི་བྱ་སྟེ། སྔོན་མེད་པའི་མཐའ་མ་འདི་ནི། མང་ཞིང་ཡུན་རིང་བའོ། །སྔོན་མེད་པའི་མཐའ་མ་འདི་ནི། སེམས་ཀྱི་སྐད་ཅིག་མ་གཅིག་དང་ལྡན་པ་སྟེ།
འདི་ལྟ་སྟེ། མཐའ་མེད་པའོ། །སྙམ་མོ། །ཤཱ་རིའི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཡུན་རིང་མོ་ཞིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་འཚང་རྒྱ་བར་འགྱུར་རོ། །ཞེས་དངང་བར་མི་བྱ། ཀུན་ཏུ་སྐྲག་པར་མི་བྱ། ཀུན་ཏུ་སྐྲག་པ་དང་ལྡན་པར་མི་བྱའོ། །ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་
༄༅། །གང་འཇིགས་པ་མི་བཟད་པ་འདི་དག་དང༌། གཞན་དག་མཐོང་ཞིང་ཐོས་པ་དང༌། རྟོགས་པ་དང༌། རྣམ་པར་ཤེས་པ་དག་ལ་མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་
པ་དང་ལྡན་པར་མི་འགྱུར་ན། ཤཱ་རིའི་བུ། རིགས་ཀྱི་བུའམ་རིགས་ཀྱི་བུ་མོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་སྐལ་བ་ཡོད་པར་ཤེས་
པར་བྱའོ། །ཤཱ་རིའི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་གོ་ཆ་ཆེན་པོ་བགོ་དགོས་ཏེ། ཇི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་སེམས་ཅན་ཐམས་ཅད་ཀྱི་ནད་རྣམས་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་བ་དང༌། མི་ཤེས་
པར་འགྱུར་བ་དེ་ལྟར་བྱ་ཞིང་དེ་ལྟར་བརྩོན་འགྲུས་བརྟན་པ་བརྩམ་པར་བྱའོ། །ཇི་ལྟར་དེ་བཞིན་གཤེགས་པས་གསུངས་པ་སྨྲ་བར་འགྱུར་བ་དང༌། ཇི་ལྟར་གསུངས་པ་བཞིན་བྱེད་
པར་འགྱུར་བ་དེ་ལྟར་བྱ་ཞིང་ཇི་ལྟར་དུས་དེའི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པའང་བདག་ལ་ཡོངས་སུ་རྫོགས་པར་འགྱུར་བ་དེ་ལྟར་སེམས་ཅན་ཐམས་ཅད་ཀྱི་དོན་དུ་ཤེས་རབ་ཀྱི་ཕ་
རོལ་ཏུ་ཕྱིན་པ་ལ་ཡོངས་སུ་འདྲིས་པར་བྱའོ། །དེ་ནས་འཁོར་དེར་གངྒཱའི་ལྷ་མོ་ཞེས་བྱ་བའི་བུད་མེད་གཅིག་འདུས་པར་གྱུར་ཏེ་འདུག་པ་དེ་སྟན་ལས་ལངས་ཏེ་བླ་གོས་ཕྲག་པ་གཅིག་
ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས། བདག་ནི། གནས་འདི་ལ་མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་ལྡན་པར་མི་བགྱིད་དོ། མི་དངང༌། ཀུན་ཏུ་མི་སྐྲག་པར་སེམས་ཅན་ཐམས་ཅད་ལ་ཆོས་བསྟན་
པར་བགྱིའོ། །དེ་ནས་དེའི་ཚེ་བཅོམ་ལྡན་འདས་ཀྱིས་འཛུམ་པ་གསེར་གྱི་ཁ་དོག་ལྟ་བུ་མཛད་དེ། འོད་དེས་འཇིག་རྟེན་གྱི་ཁམས་མཐའ་ཡས་མུ་མེད་པ་ཁྱབ་པར་བྱས་ནས་ཚངས་པའི་འཇིག་
རྟེན་གྱི་བར་དུ་མངོན་པར་བྱུང་སྟེ། སླར་ལོག་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་དབུའི་གཙུག་ཏུ་ནུབ་པར་གྱུར་ཏོ། །བཅོམ་ལྡན་འདས་ཀྱིས་འཛུམ་
པ་མཛད་མ་ཐག་ཏུ་དེ་ནས་བུད་མེད་དེས་གསེར་གྱི་མེ་ཏོག་དག་བླངས་ཏེ། གསེར་གྱི་མེ་ཏོག་གིས་བཅོམ་ལྡན་འདས་ལ་གཏོར་ཅིང་མངོན་པར་གཏོར་ལ་མངོན་པར་རབ་ཏུ་གཏོར་ཏོ། །དེ་ནས་
གསེར་གྱི་མེ་ཏོག་དེ་དག་ཆགས་པ་མེད་པར་བར་སྣང་གི་ནམ་མཁའ་ལ་འདུག་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་
མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས།
༄༅། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། རྒྱུ་མ་མཆིས། རྐྱེན་མ་མཆིས་པར་འཛུམ་པ་མི་མཛད་ན། འཛུམ་པ་
མཛད་པའི་རྒྱུ་གང་ལགས། རྐྱེན་གང་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་
བོ༑ སྲིང་མོ་གངྒཱའི་ལྷ་མོ་འདི་མ་འོངས་པའི་དུས་ན་གསེར་གྱི་མེ་ཏོག་ཅེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་
ལྡན་པ༑ བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་
དུ་འབྱུང་བར་འགྱུར་ཏེ། བསྐལ་པ་སྐར་མ་ལྟ་བུ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཀུན་དགའ་བོ། སྲིང་མོ་
གངྒཱའི་ལྷ་མོ་འདི་ནི། བུད་མེད་ཀྱི་ལུས་བསྒྱུར་ཏེ་སྐྱེས་པའི་ལུས་ཐོབ་ནས་འདི་ནས་ཤི་འཕོས་ནས་མི་བསྐྱོད་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་པའི་སངས་རྒྱས་ཀྱི་ཞིང་མངོན་པར་དགའ་བའི་འཇིག་རྟེན་གྱི་ཁམས་སུ་སྐྱེ་བར་འགྱུར་རོ། །དེར་སྐྱེས་ནས་ཀྱང་མི་བསྐྱོད་པ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཀྱི་དྲུང་དུ་ཚངས་པར་སྤྱད་པ་སྤྱོད་པར་འགྱུར་རོ། །དེ་ནས་ཤི་འཕོས་ནས་དེ་བཞིན་གཤེགས་པ་དག་བལྟ་བ་དང་མ་བྲལ་བར་སངས་རྒྱས་ཀྱི་ཞིང་ནས་
སངས་རྒྱས་ཀྱི་ཞིང་དུ་འགྲོ་བར་འགྱུར་རོ། །དེ་ནས་ཀྱང་གང་ན་སངས་རྒྱས་བཅོམ་ལྡན་འདས་རྣམས་དང་མ་བྲལ་བའི་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་སྟེ། དེ་དང་
དེ་དག་ཏུ་འགྲོ་བར་འགྱུར་རོ། །ཀུན་དགའ་བོ། །འདི་ལྟ་སྟེ། དཔེར་ན། འཁོར་ལོས་སྒྱུར་བའི་རྒྱལ་པོ་ཁང་བཟང་ནས་ཁང་བཟང་དུ་འགྲོ་བ་དང༌། དེ་ནམ་འཚོའི་བར་དུ་རྐང་པའི་
མཐིལ་གྱིས་ས་ལ་མི་རེག་པར་འགྲོ་སྟེ། འཆི་གའི་བར་དུའང་རྐང་པའི་མཐིལ་ས་ལ་མ་རེག་པར་འཆི་བའི་དུས་བྱེད་པ་དེ་བཞིན་དུ་ཀུན་དགའ་བོ། སྲིང་མོ་གངྒཱའི་ལྷ་མོ་འདིའང་
སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བར་འགྱུར་ཏེ། དེའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཀྱི་བར་དུ་སངས་རྒྱས་
བཅོམ་ལྡན་འདས་རྣམས་དང་མི་འབྲལ་བར་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོ་འདི་སྙམ་དུ་སེམས་ཏེ། མི་བསྐྱོད་པ་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཀྱི་དྲུང་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོད་པ་དེ་དག་ནི། དེ་བཞིན་གཤེགས་པ་འདུས་པ་ཉིད་དུ་རིག་པར་བྱའོ། །སྙམ་མོ། །
༄༅། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོའི་སེམས་ཀྱི་རྟོག་པ་ཐུགས་ཀྱིས་མཁྱེན་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །
ཀུན་དགའ་བོ། དེ་དེ་བཞིན་ནོ། །དེ་དེ་བཞིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། འདམ་ལས་རྒལ་བ་ཡིན་ཏེ། མི་བསྐྱོད་པ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཀྱི་ཞིང་ན་ཚངས་པར་སྤྱད་པ་སྤྱོད་དོ། །ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། བྱང་ཆུབ་ཡོངས་སུ་འགྲུབ་
པ་ལ་ཉེ་བར་སོན་པར་རིག་པར་བྱའོ། །ཀུན་དགའ་བོ། ཡང་གསེར་གྱི་མེ་ཏོག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་ཉན་ཐོས་ཀྱི་དགེ་འདུན་ནི།
ཚད་ཡོད་པར་མི་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། གང་དག་ལ་ཚད་མེད་པའི་ཉན་ཐོས་དེ་སྙེད་དག་དེར་འབྱུང་བར་འགྱུར་ཏེ། འོན་ཀྱང་གཞལ་དུ་མེད་པ་དང༌། བགྲང་
དུ་མེད་པ་ཞེས་བྱ་བ་དེ་ལྟ་བུའི་གྲངས་སུ་འགྲོ་བར་འགྱུར་རོ། །ཀུན་དགའ་བོ། ཡང་དེའི་ཚེ་དེའི་དུས་ན་སངས་རྒྱས་ཀྱི་ཞིང་དེར་གཅན་གཟན་གྱི་དགོན་པ་མི་འབྱུང༌། ཆོམ་རྐུན་གྱི་
དགོན་པ་མི་འབྱུང༌། ཆུའི་དགོན་པ་མི་འབྱུང༌། མུ་གེའི་དགོན་པ་མི་འབྱུང༌། ནད་ཀྱི་དགོན་པ་མི་འབྱུང་སྟེ། ཀུན་དགའ་བོ། མ་ལེགས་པར་འགྱུར་བའི་དགོན་པ་དེ་དག་དང༌། མ་ལེགས་
པ་གཞན་དག་ཀྱང་སངས་རྒྱས་ཀྱི་ཞིང་དེར་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་ཞིང་མི་ཤེས་པར་འགྱུར་རོ། །ཀུན་དགའ་བོ། ཡང་གསེར་གྱི་མེ་ཏོག་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན། འཇིགས་པ་མི་བཟད་པའི་
དགོན་པ་འདི་ལྟ་བུའི་ངོ་བོ་དག་དེའི་ཚེ་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་ཞིང་མི་ཤེས་པར་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་
ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། སྲིང་མོ་གངྒཱའི་ལྷ་མོ་འདིས་དེ་བཞིན་གཤེགས་པ་གང་གི་དྲུང་དུ་དང་པོ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་དགེ་བའི་རྩ་བ་བསྐྱེད། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་
ཏོ༑ ༑ཀུན་དགའ་བོ། སྲིང་མོ་གངྒཱའི་ལྷ་མོ་འདིས་ནི། མར་མེ་མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་དྲུང་དུ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་དང་པོ་སེམས་བསྐྱེད་པའི་དགེ་བའི་རྩ་བ་བསྐྱེད་དོ། །དེ་ཡང་མར་མེ་མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བླ་
༄༅། །ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་ཡིད་ཀྱིས་གསེར་གྱི་མེ་ཏོག་གིས་གཏོར་ནས་ཡོངས་སུ་བསྔོས་ཏེ། ངས་མར་མེ་མཛད་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་གང་གི་ཚེ་ཨུཏྤལ་ལྔས་གཏོར་ཅིང་ངས་མི་སྐྱེ་བའི་ཆོས་ལ་བཟོད་པའང་ཐོབ་བོ། །དེ་ནས་མར་མེ་
མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ང་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ། ལྷ་
དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སུ་འགྱུར་རོ། །ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེའི་ཚེ་སྲིང་མོ་འདིས་ང་ལུང་བསྟན་པ་ཐོས་
ནས་ཀྱེ་མ་མ་ལ་བྲམ་ཟེའི་ཁྱེའུ་འདི་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེ་བཞིན་དུ་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་
བསྟན་ན་ཅི་མ་རུང་སྙམ་དུ་སེམས་སྐྱེས་སོ། །ཀུན་དགའ་བོ། ད་ལྟར་སྲིང་མོ་འདིས་མར་མེ་མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་དྲུང་དུ་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དང་པོ་སེམས་བསྐྱེད་པའི་དགེ་བའི་རྩ་བ་བསྐྱེད་དོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་
སྐད་ཅེས་གསོལ་ཏོ། །བཅོམ་ལྡན་འདས། ཨེ་མ་སྲིང་མོ་གངྒཱའི་ལྷ་མོ་འདི་ནི། ཡོངས་སུ་སྦྱང་བ་བགྱིས་ཤིང་མཐར་ཕྱིན་པར་བགྱིས་པ་ལགས་ཏེ། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་ལུང་བསྟན་པའོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ནོ། །ཀུན་དགའ་
བོ༑ དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །ཨེ་མའོ་སྲིང་མོ་གངྒཱའི་ལྷ་མོ་འདི་ནི། ཡོངས་སུ་སྦྱང་བ་བྱས་ཤིང་མཐར་ཕྱིན་པར་བྱས་པ་ཡིན་ཏེ། བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ལུང་བསྟན་པའོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། སྲིང་མོ་གངྒཱའི་ལྷ་མོའི་ལེའུ་ཞེས་བྱ་སྟེ། བཅུ་དགུ་པའོ།། །།
དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་
པ་ལ་སྤྱོད་པས་ཇི་ལྟར་སྟོང་པ་ཉིད་ལ་ཡོངས་སུ་འདྲིས་པར་བགྱི། ཇི་ལྟར་སྟོང་པ་ཉིད་ཀྱི་ཏིང་ངེ་འཛིན་ལ་སྙོམས་པར་འཇུག་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རབ་
༄༅། །འབྱོར༑ འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས་གཟུགས་སྟོང་པའོ། །སྙམ་དུ་སོ་སོར་བརྟག་
པར་བྱ་སྟེ། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་སྟོང་པའོ། །ཞེས་སོ་སོར་བརྟག་པར་བྱའོ། །ཇི་ལྟར་སོ་སོར་རྟོག་
པ་ན་ཆོས་ཉིད་དེ་ལ་ཆོས་ཉིད་ཀྱི་རང་བཞིན་ཡོད་པ་ཡིན་ནོ། །ཞེས་ཡང་དག་པར་རྗེས་སུ་མི་མཐོང་བ་དེ་ལྟར་མི་གཡེང་བའི་སེམས་ཀྱི་རྒྱུད་ཀྱིས་སོ་སོར་བརྟག་པར་བྱ་སྟེ། ཆོས་
ཉིད་དེའང་ཡང་དག་པར་རྗེས་སུ་མ་མཐོང་བས་ཡང་དག་པའི་མཐའ་མངོན་སུམ་དུ་མི་བྱེད་དོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་
འབྱོར་གྱིས་འདི་།སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གང་འདི་སྐད་དུ། བྱང་ཆུབ་སེམས་དཔའ་སེམས་དཔའ་ཆེན་པོས་སྟོང་པ་ཉིད་མངོན་སུམ་དུ་མི་བྱའོ། །
ཞེས་གསུངས་ན། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་དེ་ལ་གནས་ན། ཇི་ལྟར་སྟོང་པ་ཉིད་མངོན་སུམ་དུ་མི་བགྱིད།
བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནི། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་
ཉིད་ལ་རྟོག་མོད་ཀྱི། མངོན་སུམ་དུ་བྱའོ། །སྙམ་དུའང་མི་རྟོག་ལ་མངོན་སུམ་དུ་བྱ་བ་ཡིན་ནོ། །སྙམ་དུའང་མི་རྟོག་གི །ཡོངས་སུ་འདྲིས་པར་བྱའོ། །སྙམ་དུ་རྟོག་གོ། །འདི་ནི།
ཡོངས་སུ་འདྲིས་པར་བྱ་བའི་དུས་ཡིན་ཏེ། མངོན་སུམ་དུ་བྱ་བའི་དུས་ནི། མ་ཡིན་ནོ། །སྙམ་དུ་རྟོག་ཅིང༌། བདག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་གཟུང་བར་ཡང་
འགྱུར་ལ་མངོན་སུམ་དུའང་མི་བྱའོ། །སྙམ་པས་མཉམ་པར་མ་བཞག་པ་ཉིད་དུ་དམིགས་པ་ལ་སེམས་ཉེ་བར་འདོགས་ཏེ། བར་སྐབས་དེར་བྱང་ཆུབ་སེམས་དཔའ་སེམས་དཔའ་ཆེན་
པོ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ལས་ཡོངས་སུ་ཉམས་པར་མི་འགྱུར་ཞིང་ཟག་པ་ཟད་པར་ཡང་མི་བྱེད་ལ། འདི་ལ་ཡོངས་སུ་འདྲིས་པར་ཡང་བྱེད་དོ། །གང་གི་ཚེ་ན་བྱང་ཆུབ་
སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་ངེ་འཛིན་ལ་གནས་པ་དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོས་མཚན་མ་མེད་པའི་ཏིང་ངེ་འཛིན་
ལ་གནས་པར་བྱ་སྟེ། མཚན་མ་མེད་པ་མངོན་སུམ་དུ་ཡང་མི་བྱའོ། །དེ་ཅིའི་ཕྱིར་ཞེ་ན། དེ་ལྟར་དགེ་བའི་རྩ་བ་བརྟན་པ་ཡོངས་སུ་བསྐྱེད་པའི་ཆོས་དང་ལྡན་པའི་བྱང་ཆུབ་སེམས་དཔའ་
སེམས་དཔའ་ཆེན་པོས་ནི། འདི་ཡོངས་སུ་འདྲིས་པར་བྱ་བའི་དུས་ཡིན་གྱི། མངོན་སུམ་དུ་བྱ་བའི་དུས་ནི། མ་ཡིན་ནོ། །སྙམ་དུ་རབ་ཏུ་བརྟག་པར་བྱ་སྟེ། ཤེས་རབ་ཀྱི་ཕ་
༄༅། །རོལ་ཏུ་ཕྱིན་པས་ཀྱང་ཡོངས་སུ་བཟུང་ལ་ཡང་དག་པའི་མཐའ་ཡང་མངོན་སུམ་དུ་མི་བྱེད་དོ། །རབ་འབྱོར། འདི་ལྟ་སྟེ། དཔེར་ན། སྐྱེས་བུ་རབ་
ཏུ་དཔའ་བར་གྱུར་པ། ཤིན་ཏུ་བརྩོན་འགྲུས་དང་ལྡན་པར་གྱུར་པ། བརྟན་ཞིང་གནས་པར་གྱུར་པ། གཟུགས་བཟང་བར་གྱུར་པ། མཛེས་པར་གྱུར་པ།
རབ་ཏུ་བལྟ་ན་སྡུག་པར་གྱུར་པ། ཡོན་ཏན་མང་པོ་དང་ལྡན་པར་གྱུར་པ། ཡོན་ཏན་མཆོག་དང་ལྡན་པར་གྱུར་པ། ཚུལ་ཁྲིམས་དང༌། དབང་ཕྱུག་མཆོག་དང༌།
ཐོས་པ་དང༌། གཏོང་བ་ལ་སོགས་པའི་ཡོན་ཏན་དང་ལྡན་པར་གྱུར་པ། ཡིད་གཞུངས་པར་གྱུར་པ། སྨྲ་ནུས་པར་གྱུར་པ། ལན་ལྡོན་ནུས་པར་གྱུར་པ། སྤོབས་
པ་ཕུན་སུམ་ཚོགས་པར་གྱུར་པ། སྒྲུབ་པ་ཕུན་སུམ་ཚོགས་པ་དང་ལྡན་པར་གྱུར་པ། དུས་ཤེས་པར་གྱུར་པ། ཡུལ་ཤེས་པར་གྱུར་པ། གནས་ཤེས་པར་གྱུར་པ།
འཕོང་སྐྱེན་པའི་མཐར་ཕྱིན་པར་གྱུར་པ། མཚོན་ཆ་མང་པོ་ཟློག་པར་གྱུར་པ། མཚོན་ཆ་སྲ་བ་ཟློག་པར་གྱུར་པ། སྒྱུ་རྩལ་ཐམས་ཅད་ལ་རབ་ཏུ་མཁས་པར་གྱུར་པ། ཤིན་
ཏུ་ཡོངས་སུ་རྫོགས་པས་བཟོའི་གནས་ཐམས་ཅད་ཀྱི་ཤིན་ཏུ་མཐར་ཕྱིན་པར་གྱུར་པ། དྲན་པ་དང་ལྡན་པར་གྱུར་པ། བློ་གྲོས་དང་ལྡན་པར་གྱུར་པ། རྟོགས་པ་དང་ལྡན་
པར་གྱུར་པ། མོས་པ་དང་ལྡན་པར་གྱུར་པ། ལུགས་དང་ལྡན་པར་གྱུར་པ། བསྟན་བཅོས་ཐམས་ཅད་ལ་འཇིགས་པ་མེད་པར་གྱུར་པ། མཛའ་བོ་དང་ལྡན་པར་གྱུར་པ། ནོར་
དང་ལྡན་པར་གྱུར་པ། དཔུང་དང་ལྡན་པར་གྱུར་པ། ཡན་ལག་མ་ཚང་བ་མེད་པར་གྱུར་པ། དབང་པོ་ཡོངས་སུ་ཚང་བར་གྱུར་པ། ཡོ་བྱད་ཐམས་ཅད་ཕུན་སུམ་
ཚོགས་པར་གྱུར་པ། འཁོར་ཕུན་སུམ་ཚོགས་པར་གྱུར་པ། སྐྱེ་བོ་མང་པོ་ལའང་ཕངས་ཤིང་ཡིད་དུ་འོང་བར་གྱུར་པ། དགོས་པ་གང་དང་གང་ཉིད་རྩོམ་པ་དེ་དང་
དེ་དག་ཐམས་ཅད་ལ་སྒྲོལ་ནུས་པར་གྱུར་པ། རིགས་པས་ཐ་སྙད་དུ་བྱེད་པ་འགའ་ཞིག་ཡོད་ལ། དེ་ལ་ཐམས་ཅད་དུའང་རྙེད་པ་ཆེ་བར་གྱུར་པ་སྟེ། དེ་རྙེད་པ་ཆེན་པོ་དེ་
དང་ལྡན་པས་སྐྱེ་བོ་མང་པོ་ལ་འགེད་པར་བྱེད། བཀུར་སྟིར་བྱ་བ་ལ་བཀུར་སྟིར་བྱེད། བླ་མར་བྱ་བ་ལ་བླ་མར་བྱེད། རི་མོར་བྱ་བ་ལ་རི་མོར་བྱེད། མཆོད་པར་བྱ་བ་ལ་
མཆོད་པར་བྱེད་ན། རབ་འབྱོར། འདི་ཇི་སྙམ་དུ་སེམས། ཅི་སྐྱེས་བུ་དེ་དེའི་གཞི་ལས་དགའ་བ་དང༌། མགུ་བ་དང༌། རངས་པ་དང༌། ཡིད་བདེ་བ་ཆེར་སྐྱེའམ། རབ་
འབྱོར་གྱིས་གསོལ་པ། བཅོམ་ལྡན་འདས། དེ་དེ་བཞིན་ནོ། །བདེ་བར་གཤེགས་པ། དེ་དེ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཡང་སྐྱེས་
༄༅། །བུ་དེ་ཕུན་སུམ་ཚོགས་པ་ཆེན་པོ་དེ་དང་ལྡན་ནས་ཕ་མ་དང༌། བུ་དང༌། ཆུང་མ་རྣམས་ཁྲིད་དེ་རྒྱུའི་ཚོགས་པ་འགའ་ཞིག་དང་ལྡན་པས་འབྲོག་དགོན་
པ་ཆེན་པོ་འཇིགས་པ་ཆེན་པོ་བྱིས་པ་རྣམས་ལ་སྡིགས་མོར་རུང་བ་སྤུ་ཟིང་ཞེས་བྱེད་པ་དེར་ཞུགས་པར་གྱུར་ལ། དེ་དེར་ཕྱིན་ནས་ཕ་མ་དང༌། བུ་དང༌། ཆུང་མ་དེ་དག་ལ་
བདག་གིས་ཁྱེད་འབྲོག་དགོན་པ་འཇིགས་པ་མི་བཟད་པ་ཆེན་པོ་འདི་ནས་ཉེ་ཞོ་མེད་ཅིང་བདེ་ལེགས་སུ་མྱུར་དུ་བསྒྲལ་ཏེ་མྱུར་དུ་ཐར་བར་བྱ་ཡི། མ་འཇིགས་ཤིག །མ་
འཇིགས་ཤིག །ཅེས་མི་འཇིགས་པ་བསྟབས་ལ། རབ་འབྱོར། ཡང་འབྲོག་དགོན་པ་དེ་ན་སྐྱེས་བུ་དེ་ལ་ཕྱིར་རྒོལ་བ་དང༌། མི་མཛའ་བ་མང་པོ་ཞིག་བྱུང་བར་གྱུར་
ན༑ རབ་འབྱོར། དེ་ཇི་སྙམ་དུ་སེམས། ཕྱིར་རྒོལ་བ་དང༌། མི་མཛའ་བ་དེ་དག་ཉེ་བར་གནས་པས་སྐྱེས་བུ་དཔའ་བོ་ཕྱིར་མི་ལྡོག་པ། ལྟ་བ་དང༌། བརྩོན་འགྲུས་དང༌།
སྟོབས་དང་ལྡན་པ། ཤེས་རབ་དང་ལྡན་པ། ཤིན་ཏུ་མཉེས་གཤིན་པ། མཛངས་པ། བརྟན་པ། ཚོགས་ཆེན་པོ་དང་ལྡན་པ་དེ། ཕ་མ་དང༌། བུ་དང༌། ཆུང་མ་དེ་
དག་བོར་ཏེ་འབྲོག་དགོན་པ་འཇིགས་པ་ཆེན་པོ་མི་བཟད་པ་དེ་ལས་བདག་གཅིག་པུ་བྱུང་སྟེ་འགྲོ་བར་སེམས་སམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི།
མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། འདི་ལྟར་སྐྱེས་བུ་དེས་ཕ་མ་དང༌། བུ་དང༌། ཆུང་མ་དེ་དག་ཡོངས་སུ་མི་འདོར་ཏེ། དེ་ནང་དང་ཕྱིའི་དཔུང་གི་ཚོགས་དང་ཡང་
ལྡན་ལ༑ འབྲོག་དགོན་པ་དེ་ན་ཕྱིར་རྒོལ་བ་དང་མི་མཛའ་བ་དེ་དག་ལ་ཕྱིར་རྒོལ་བ་གཞན་དེ་བས་ཆེས་མང་བ། ཆེས་དཔའ་བ། གོ་མཚོན་ཆེས་སྲ་བ། ཆེས་རླབས་ཆེ་བ་དག་མཆིས་
པས་བསྲུང་བས་ན། དེའི་སླད་དུ་དེའི་ཕྱིར་རྒོལ་བ། མི་མཛའ་བ། ཀླན་ཀ་ཚོལ་བ། གླགས་ལྟ་བ། གླགས་ཚོལ་བ་དག་གིས་གླགས་མི་རྙེད་དེ། བཅོམ་ལྡན་འདས། དེའི་སླད་དུ་
སྐྱེས་བུ་སྟོབས་དང་ལྡན་པ་དེ་མ་སྣད་མ་རྨས་པར་ཕ་མ་དང༌། བུ་དང༌། ཆུང་མ་དང༌། བདག་ཉིད་ཀྱང་འབྲོག་དགོན་པ་འཇིགས་པ་ཆེན་པོ་མི་བཟད་པ་དེ་ལས་འབྱུང་ནུས་ཏེ། བདེ་བའམ།
བདེ་ལེགས་སུ་མྱུར་དུ་གྲོང་ངམ། གྲོང་ཁྱེར་རམ། གྲོང་རྡལ་གྱི་བར་དུ་ཕྱིན་པར་འགྱུར་རོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་
སྐད་ཅེས་བཀའ་སྩལ་ཏོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ལ་ཕན་པ་དང་སྙིང་བརྩེ་བའི་བྱམས་པ་ལ་གནས་
པ༑ སྙིང་རྗེ་ལ་གནས་པ། དགའ་བ་ལ་གནས་པ། བཏང་སྙོམས་ལ་གནས་པ། ཐབས་མཁས་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་བ་ཡང་དགེ་
༄༅། །བའི་རྩ་བ་རྣམས་ཡང་དག་པར་རྫོགས་པའི་སངས་རྒྱས་ཀྱིས་གནང་བའི་ཡོངས་སུ་བསྔོ་བས་ཡོངས་སུ་བསྔོས་ནས་འདི་ལྟར་ཡང་རྣམ་པར་ཐར་པའི་སྒོ་
སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའི་ཏིང་ངེ་འཛིན་ལ་འཇུག་པ་དེ་ལྟ་ནའང་ཉན་ཐོས་ཀྱི་སའམ། རང་སངས་རྒྱས་ཀྱི་ས་ལ་ཡང་དག་པའི་མཐའ་གང་
ཡང་མངོན་སུམ་དུ་མི་བྱེད་དོ། །དེ་ཅིའི་ཕྱིར་ཞེ་ན། འདི་ལྟར་འདིའི་ཡོངས་སུ་འཛིན་པར་བྱེད་པ་ནི། མཆོག་ཏུ་སྟོབས་དང་ལྡན་ཞིང་མཆོག་ཏུ་བརྟན་པ་ཡིན་ཏེ། འདི་
ལྟ་སྟེ༑ ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པའོ། །དེས་ན། འདིས་སེམས་ཅན་ཐམས་ཅད་ཡོངས་སུ་མ་བཏང་བ་ཡིན་ཞིང༌། དེས་ན། འདིས་
དགེ་ཞིང་བདེ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནུས་སོ། །རབ་འབྱོར། གང་གི་ཚེ་བྱང་ཆུབ་སེམས་དཔའ་
སེམས་དཔའ་ཆེན་པོ་སེམས་ཅན་ཐམས་ཅད་ཀྱི་དྲུང་ན་བྱམས་པའི་སེམས་དམིགས་པར་བྱེད་ཅིང༌། དམིགས་པར་བྱས་ནས་དེ་དག་ལ་བྱམས་པའི་མཆོག་གིས་ཉེ་བར་
འབྲེལ་བར་བྱེད་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཉོན་མོངས་པའི་ཕྱོགས་དང༌། བདུད་ཀྱི་ཕྱོགས་ལས་ཤིན་ཏུ་འདས་ཤིང༌། ཉན་ཐོས་ཀྱི་ས་དང་
རང་སངས་རྒྱས་ཀྱི་ས་ལས་ཤིན་ཏུ་འདས་ཏེ། དེ་ཏིང་ངེ་འཛིན་དེ་ལ་གནས་སོ། །རབ་འབྱོར། དེ་ཟག་པ་ཟད་པ་མ་ཐོབ་ཀྱང་ཕ་རོལ་ཏུ་ཕྱིན་པའི་མཆོག་སྟོང་པ་ཉིད་ལ་ཡོངས་སུ་
འདྲིས་པར་བྱེད་དོ། །རབ་འབྱོར། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་ངེ་འཛིན་ལ་གནས་པ་དེའི་ཚེ་བྱང་ཆུབ་
སེམས་དཔའ་སེམས་དཔའ་ཆེན་པོ་བར་སྐབས་དེར་མཚན་མ་མེད་པའི་ཏིང་ངེ་འཛིན་ལ་མི་གནས་ཏེ། དེས་མཚན་མ་མེད་པའི་ཏིང་ངེ་འཛིན་མངོན་སུམ་དུ་བྱ་པ་མ་
ཡིན་ནོ༑ ༑རབ་འབྱོར། འདི་ལྟ་སྟེ། དཔེར་ན། འདབ་ཆགས་བྱ་ནི། ནམ་མཁའ་བར་སྣང་ལ་རྒྱུའང་ས་ལ་མི་ལྟུང་ཞིང་གནས་ཅི་ལའང་མི་བརྟེན་པར་འདུག་སྟེ།
ནམ་མཁའ་བར་སྣང་ཉིད་ལ་གནས་ཀྱང་དེ་ལའང་མི་བརྟེན་མི་གནས་སོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་པ་ཉིད་ལ་གནས་པས་གནས་
ཤིང་སྟོང་པ་ཉིད་ལ་ཡོངས་སུ་འདྲིས་པར་ཡང་བྱེད་དོ། །མཚན་མ་མེད་པ་ལ་གནས་པས་གནས་ཤིང་མཚན་མ་མེད་པ་ལ་ཡོངས་སུ་འདྲིས་པར་ཡང་བྱེད་དོ། །སྨོན་པ་མེད་
པ་ལ་གནས་པས་གནས་ཤིང་སྨོན་པ་མེད་པ་ལ་ཡོངས་སུ་འདྲིས་པར་ཡང་བྱེད་དེ། སངས་རྒྱས་ཀྱི་ཆོས་རྣམས་ཡོངས་སུ་མ་རྫོགས་པར་སྟོང་པ་ཉིད་དང༌། མཚན་མ་མེད་པ་དང་
༄༅། །སྨོན་པ་མེད་པར་ཡང་མི་ལྟུང་ངོ༌། །རབ་འབྱོར། འདི་ལྟ་སྟེ། དཔེར་ན། འཕོང་གི་སློབ་དཔོན་སྟོབས་དང་ལྡན་པ་མདའི་མཚོན་ལ་ལེགས་པར་བསླབས་པ་ཤིན་ཏུ་མཐར་
ཕྱིན་པ་དེས་མདའ་སྟེང་དུ་འཕངས་ཏེ་མདའ་འཕངས་ནས་དེ་མདའ་གཞན་དག་གིས་སླར་བཟློག་ནས་མདའ་དེ་ས་ལ་མི་ལྟུང་བར་འཛིན་ཏེ། མདའ་སྔ་མ་དེ་ལ་མདའ་ཕྱི་མ་བརྒྱུད་མར་འཕངས་
པས་ས་ལ་ལྟུང་དུ་མི་སྟེར་ཏེ། ཀྱེ་མ་མདའ་དེ་ས་ལ་ལྷུང་ཡང་བླ་སྙམ་དུ་འདོད་པ་མ་བྱུང་བ་དེ་སྲིད་དུ་མདའ་དེ་ས་ལ་མི་ལྟུང་ངོ༌། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་
ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཐབས་མཁས་པས་ཡོངས་སུ་བཟུང་བ་དེ་ནི། ཇི་སྲིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དགེ་བའི་རྩ་བ་དེ་དག་ཡོངས་
སུ་སྨིན་པ་དང༌། ཤིན་ཏུ་ཡོངས་སུ་སྨིན་པར་མ་གྱུར་པ་དེ་སྲིད་དུ་ཡང་དག་པའི་མཐའ་དམ་པ་དེ་མངོན་སུམ་དུ་མི་བྱེད་དོ། །གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
དགེ་བའི་རྩ་བ་དེ་དག་ཡོངས་སུ་སྨིན་ཅིང་ཤིན་ཏུ་སྨིན་པར་གྱུར་པ་དེའི་ཚེ་ཡང་དག་པའི་མཐའ་དམ་པ་མངོན་སུམ་དུ་བྱེད་དོ། །རབ་འབྱོར། དེ་ལྟ་བས་ན། བྱང་ཆུབ་སེམས་དཔའ་སེམས་
དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྒོམ་པར་བྱ། དེ་ལྟར་ཆོས་ཟབ་མོ་དེ་དག་གི་ཆོས་ཉིད་སོ་སོར་བརྟག་ཅིང་ཉེ་བར་
བསམ་པར་བྱ་སྟེ། མངོན་སུམ་དུ་ནི། མི་བྱའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་བཅོ་བརྒྱད་པ། དེ་སྐད་ཅེས་བཀའ་སྩལ་པ་
དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་སྟོང་པ་ཉིད་ལ་སྤྱོད། སྟོང་
པ་ཉིད་ལ་གནས། སྟོང་པ་ཉིད་ཀྱི་ཏིང་ངེ་འཛིན་ལ་མཉམ་པར་འཇོག་ལ་ཡང་དག་པའི་མཐའ་ཡང་མངོན་སུམ་དུ་མི་བགྱིད་པ་ནི། དཀའ་བ་བགྱིད་པ་ལགས་སོ། །བཅོམ་ལྡན་འདས། བྱང་ཆུབ་
སེམས་དཔའ་སེམས་དཔའ་ཆེན་པོ་དེ་ནི། ཤིན་ཏུ་དཀའ་བ་བགྱིད་པ་ལགས་ཏེ། བཅོམ་ལྡན་འདས། དེ་ནི། ངོ་མཚར་ཏོ། །བདེ་བར་གཤེགས་པ། དེ་ནི། ཤིན་ཏུ་ངོ་མཚར་ཆེའོ། །དེ་སྐད་
ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། བྱང་ཆུབ་སེམས་དཔའ་སེམས་
དཔའ་ཆེན་པོ་གང་སྟོང་པ་ཉིད་ལ་སྤྱོད་ཅིང་སྟོང་པ་ཉིད་ལ་གནས་ཏེ་སྟོང་པ་ཉིད་ཀྱི་ཏིང་ངེ་འཛིན་ལ་མཉམ་པར་གཞོག་ཅིང་ཡང་དག་པའི་མཐའ་ཡང་མངོན་སུམ་དུ་མི་བྱེད་པ་ནི། དཀའ་བ་
བྱེད་པ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཤིན་ཏུ་དཀའ་བ་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་
༄༅། །སེམས་ཅན་ཐམས་ཅད་ཡོངས་སུ་མ་བཏང་སྟེ། དེ་ལ་བདག་གིས་སེམས་ཅན་དེ་དག་ཐམས་ཅད་ཐར་བར་བྱའོ། །ཞེས་བྱ་བ་དེ་ལྟ་བུའི་རང་བཞིན་ཅན་གྱི་སྨོན་
ལམ་གྱི་ཁྱད་པར་དེ་དག་འབྱུང་བར་འགྱུར་རོ། ། །གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལྟར་སེམས་ཅན་ཐམས་ཅད་བདག་གིས་ཡོངས་སུ་མི་གཏང་ངོ༌། །བདག་གིས་
འདི་དག་ཐམས་ཅད་ཡོངས་སུ་ཐར་པར་བྱའོ། །ཞེས་སེམས་མངོན་པར་སྒྲུབ་ཅིང༌། རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་ངེ་འཛིན་མངོན་པར་སྒྲུབ་པ་དང༌། རྣམ་པར་ཐར་པའི་སྒོ་
མཚན་མ་མེད་པའི་ཏིང་ངེ་འཛིན་མངོན་པར་སྒྲུབ་པ་དང༌། རྣམ་པར་ཐར་པའི་སྒོ་སྨོན་པ་མེད་པའི་ཏིང་ངེ་འཛིན་མངོན་པར་སྒྲུབ་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ནི།
ཐབས་མཁས་པ་དང་ལྡན་པར་རིག་པར་བྱ་སྟེ། དེ་ནི། སངས་རྒྱས་ཀྱི་ཆོས་ཡོངས་སུ་མ་རྫོགས་པར་བར་མ་དོར་ཡང་དག་པའི་མཐའ་མངོན་སུམ་དུ་མི་བྱེད་དོ། །དེ་ཅིའི་ཕྱིར་ཞེ་ན། འདི་
ལྟར་དེ་ནི། ཐབས་མཁས་པས་སྲུང་བར་བྱེད་དོ། །དེས་སེམས་ཅན་ཐམས་ཅད་ཡོངས་སུ་མ་བཏང་བ་གང་ཡིན་པ་དེ་ཉིད་དེའི་སེམས་བསྐྱེད་པ་ཡིན་ཏེ། དེ་ལྟར་སེམས་བསྐྱེད་པ་དེ་དང༌།
ཐབས་མཁས་པ་དེ་དང་ལྡན་པ་དེ་ནི། བར་མ་དོར་ཡང་དག་པའི་མཐའ་མངོན་སུམ་དུ་མི་བྱེད་དོ། །རབ་འབྱོར། གཞན་ཡང་ནམ་བྱང་ཆུབ་སེམས་དཔའ་སེམས་དཔའ་ཆེན་པོ་ཟབ་
མོའི་གནས་སུ་གྱུར་པ་འདི་ལྟ་སྟེ། རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་ངེ་འཛིན་དང༌། རྣམ་པར་ཐར་པའི་སྒོ་མཚན་མ་མེད་པའི་ཏིང་ངེ་འཛིན་དང༌། རྣམ་པར་ཐར་པའི་སྒོ་སྨོན་པ་མེད་པའི་ཏིང་ངེ་
འཛིན་འདི་དག་ལ་སོ་སོར་རྟོག་པའམ་སོ་སོར་རྟོག་པར་འདོད་པར་གྱུར་ན། དེས་འདི་ལྟར་སེམས་མངོན་པར་བསྒྲུབ་པར་བྱ་སྟེ། སེམས་ཅན་འདི་དག་ནི། ཡུན་རིང་པོར་སེམས་ཅན་དུ་འདུ་ཤེས་པས་དམིགས་
པ་ལ་སྤྱོད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དམིགས་པའི་ལྟ་བ་ཅན་གྱི་དམིགས་པའི་ལྟ་བ་སྤང་བའི་ཕྱིར་སེམས་ཅན་དེ་དག་ལ་ཆོས་བསྟན་ཏོ། །
སྙམ་དུ་བསམས་ནས་རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་ངེ་འཛིན་ལ་མཉམ་པར་གཞོག་ཅིང་ཡང་དག་པའི་མཐའ་ཡང་མངོན་སུམ་དུ་མི་བྱེད་དོ། །རྣམ་པར་ཐར་པའི་སྒོ་མཚན་མ་མེད་པའི་ཏིང་ངེ་
འཛིན་ལ་མཉམ་པར་གཞོག་ཅིང་ཡང་དག་པའི་མཐའ་ཡང་མངོན་སུམ་དུ་མི་བྱེད་དོ། །རྣམ་པར་ཐར་པའི་སྒོ་སྨོན་པ་མེད་པའི་ཏིང་ངེ་འཛིན་ལ་མཉམ་པར་གཞོག་ཅིང་ཡང་དག་པའི་མཐའ་ཡང་མངོན་སུམ་
དུ་མི་བྱེད་དོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་པ་འདི་དང༌། ཐབས་མཁས་པ་འདི་དང་ལྡན་ན། བར་མ་དོར་ཡང་དག་པའི་མཐའ་མངོན་སུམ་དུ་མི་བྱེད་ཅིང་བྱམས་
པའི་ཏིང་ངེ་འཛིན་ལས་ཀྱང་ཉམས་པར་མི་འགྱུར། སྙིང་རྗེ་ལས་མ་ཡིན། དགའ་བ་ལས་མ་ཡིན། བཏང་སྙོམས་ཀྱི་ཏིང་ངེ་འཛིན་ལས་ཀྱང་ཡོངས་སུ་ཉམས་པར་མི་འགྱུར་རོ། །དེ་ཅིའི་ཕྱིར་ཞེ་ན། ཐབས་
༄༅། །མཁས་པས་ཡོངས་སུ་བཟུང་བས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དཀར་པོ་དག་གིས་རྒྱ་ཆེར་རྣམ་པར་འཕེལ་ཏེ། དེའི་དད་པ་ལ་སོགས་པའི་དབང་
པོ་ཡང་ཤིན་ཏུ་རྣོ་བར་འགྱུར། སྟོབས་དང༌། བྱང་ཆུབ་ཀྱི་ཡན་ལག་དང༌། ལམ་རྣམས་ཀྱང་འཐོབ་པར་འགྱུར་རོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འདི་
སྙམ་དུ་སེམས་ཏེ། སེམས་ཅན་འདི་དག་ནི། ཡུན་རིང་པོར་ཆོས་ཀྱི་འདུ་ཤེས་ཀྱིས་དམིགས་པ་ལ་སྤྱོད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་
ནས་དམིགས་པར་ལྟ་བ་ཅན་དེ་དག་གི་དམིགས་པའི་ལྟ་བ་སྤང་བར་བྱ་བའི་ཕྱིར་ཆོས་བསྟན་ཏོ། །སྙམ་དུ་བསམས་ནས་སེམས་ཅན་ཐམས་ཅད་ཀྱི་ཕྱིར་རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་
ངེ་འཛིན་ལ་མཉམ་པར་གཞོག་གོ། །དེ་སེམས་བསྐྱེད་པ་དེ་དང༌། ཐབས་མཁས་པ་སྔ་མ་དེ་དང་ལྡན་པས་རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་ངེ་འཛིན་ལ་མཉམ་པར་འཇོག་ཅིང་ཡང་
དག་པའི་མཐའ་ཡང་མངོན་སུམ་དུ་མི་བྱེད་དོ། །བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཀྱི་ཏིང་ངེ་འཛིན་ལས་ཀྱང་ཉམས་པར་མི་འགྱུར་རོ། །དེ་ཅིའི་ཕྱིར་ཞེ་ན། ཐབས་མཁས་
པས་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཆོས་དཀར་པོ་དག་གིས་རྒྱ་ཆེར་རྣམ་པར་འཕེལ་ཏེ། དེའི་དད་པ་ལ་སོགས་པའི་དབང་པོ་ཡང་ཤིན་ཏུ་རྣོ་བར་འགྱུར།
སྟོབས་དང༌། བྱང་ཆུབ་ཀྱི་ཡན་ལག་དང༌། ལམ་རྣམས་ཀྱང་འཐོབ་པར་འགྱུར་རོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འདི་སྙམ་དུ་སེམས་ཏེ། སེམས་ཅན་འདི་
དག་ནི༑ ཡུན་རིང་པོར་མཚན་མའི་འདུ་ཤེས་ཀྱིས་མཚན་མ་ལ་སྤྱོད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དེ་དག་ལ་མཚན་མའི་འདུ་
ཤེས་སྤང་བའི་ཕྱིར་ཆོས་བསྟན་ཏོ། །སྙམ་སྟེ། སེམས་ཅན་ཐམས་ཅད་ཀྱི་ཕྱིར་རྣམ་པར་ཐར་པའི་སྒོ་མཚན་མ་མེད་པའི་ཏིང་ངེ་འཛིན་ལ་མཉམ་པར་གཞོག་གོ། །དེ་སེམས་བསྐྱེད་པ་དེ་དང༌།
ཐབས་མཁས་པ་སྔ་མ་དེ་དང་ལྡན་པས་རྣམ་པར་ཐར་པའི་སྒོ་མཚན་མ་མེད་པའི་ཏིང་ངེ་འཛིན་ལ་མཉམ་པར་གཞོག་ཅིང་ཡང་དག་པའི་མཐའ་ཡང་མངོན་སུམ་དུ་མི་བྱེད་ལ། བྱམས་པ་དང༌། སྙིང་རྗེ་
དང༌། དགའ་བ་དང༌། བཏང་སྙོམས་དང༌། ཏིང་ངེ་འཛིན་ཐམས་ཅད་ལས་ཀྱང་ཡོངས་སུ་ཉམས་པར་མི་འགྱུར་རོ། །དེ་ཅིའི་ཕྱིར་ཞེ་ན། ཐབས་མཁས་པས་ཡོངས་སུ་བཟུང་བས་བྱང་ཆུབ་སེམས་དཔའ་
སེམས་དཔའ་ཆེན་པོ་ཆོས་དཀར་པོ་དག་གིས་རྒྱ་ཆེར་རྣམ་པར་འཕེལ་ཏེ། དེའི་དད་པ་ལ་སོགས་པའི་དབང་པོ་ཡང་ཤིན་ཏུ་རྣོ་བར་འགྱུར། སྟོབས་དང༌། བྱང་ཆུབ་ཀྱི་ཡན་ལག་དང༌། ལམ་རྣམས་
ཀྱང་འཐོབ་པར་འགྱུར་རོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འདི་སྙམ་དུ་སེམས་ཏེ། སེམས་ཅན་འདི་དག་ནི། ཡུན་རིང་པོར་རྟག་པར་འདུ་ཤེས་པ་དང༌།
༄༅། །བདེ་བར་འདུ་ཤེས་པ་དང༌། བདག་ཏུ་འདུ་ཤེས་པ་དང༌། སྡུག་པར་འདུ་ཤེས་པས་ཕྱིན་ཅི་ལོག་པ་སྟེ། ཅི་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་སངས་རྒྱས་ནས་རྟག་པར་འདུ་ཤེས་པ་དང༌། བདེ་བར་འདུ་ཤེས་པ་དང༌། བདག་ཏུ་འདུ་ཤེས་པ་དང༌། སྡུག་པར་འདུ་ཤེས་པས་ཕྱིན་ཅི་ལོག་ཏུ་གྱུར་པ་སྤང་བའི་
ཕྱིར་འདི་ཐམས་ཅད་ནི། མི་རྟག་པ་སྟེ། འདི་ནི། རྟག་པ་མ་ཡིན་ནོ། །འདི་ཐམས་ཅད་ནི། སྡུག་བསྔལ་བ་སྟེ། འདི་ནི། བདེ་བ་མ་ཡིན་ནོ། །འདི་ཐམས་ཅད་ནི། བདག་མེད་པ་སྟེ། འདི་ནི།
བདག་དང་བཅས་པ་མ་ཡིན་ནོ། །འདི་ཐམས་ཅད་ནི། མི་སྡུག་པ་ཡིན་ཏེ། འདི་ནི། སྡུག་པ་མ་ཡིན་ནོ། །ཞེས་ཆོས་བསྟན་པར་འགྱུར་བ་དེ་ལྟར་བྱའོ། །དེ་སེམས་བསྐྱེད་པ་དེ་དང་ལྡན་ཞིང༌།
ཐབས་མཁས་པ་སྔ་མ་དང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་བས་སངས་རྒྱས་ཀྱི་ཆོས་རྣམས་ཡོངས་སུ་མ་རྫོགས་པར་བར་མ་དོར་ཡང་དག་པའི་མཐའ་མངོན་སུམ་དུ་མི་བྱེད་དོ། །
དེ་བཞིན་དུ་རྣམ་པར་ཐར་པའི་སྒོ་སྨོན་པ་མེད་པའི་ཏིང་ངེ་འཛིན་ལ་མཉམ་པར་བཞག་སྟེ་གནས་ཤིང་ཡང་དག་པའི་མཐའ་མངོན་སུམ་དུ་མི་བྱེད། བྱམས་པ་དང༌། སྙིང་རྗེ་དང༌། དགའ་བ་དང༌།
བཏང་སྙོམས་ལས་ཀྱང་ཡོངས་སུ་ཉམས་པར་མི་འགྱུར་རོ། །དེ་ཅིའི་ཕྱིར་ཞེ་ན། ཐབས་མཁས་པས་ཡོངས་སུ་ཟིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཆོས་དཀར་པོ་དག་
གི་རྒྱ་ཆེར་རྣམ་པར་འཕེལ་ཏེ། དེའི་དད་པ་ལ་སོགས་པའི་དབང་པོ་ཡང་ཤིན་ཏུ་རྣོ་བར་འགྱུར་རོ། སྟོབས་དང༌། བྱང་ཆུབ་ཀྱི་ཡན་ལག་དང༌། ལམ་རྣམས་ཀྱང་འཐོབ་པར་འགྱུར་རོ། །རབ་འབྱོར།
བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་སེམས་བསྐྱེད་པ་འདི་སྐྱེད་པར་བྱེད་དེ། འདི་ལྟར་སེམས་ཅན་འདི་དག་ནི། ཡུན་རིང་པོར་དམིགས་པ་ལ་སྤྱད་པར་གྱུར་ཅིང་ད་ལྟར་ཡང་དམིགས་
པ་ལ་སྤྱོད། མཚན་མའི་འདུ་ཤེས་ལ་སྤྱད་པར་གྱུར་ཅིང་ད་ལྟར་ཡང་མཚན་མའི་འདུ་ཤེས་ལ་སྤྱོད། ཕྱིན་ཅི་ལོག་ལ་སྤྱད་པར་གྱུར་ཅིང་ད་ལྟར་ཡང་ཕྱིན་ཅི་ལོག་ལ་སྤྱོད། རིལ་པོར་འདུ་ཤེས་
པ་ལ་སྤྱད་པར་གྱུར་ཅིང་ད་ལྟར་ཡང་རིལ་པོར་འདུ་ཤེས་པ་ལ་སྤྱོད། ཡང་དག་པ་མ་ཡིན་པའི་འདུ་ཤེས་ལ་སྤྱད་པར་གྱུར་ཅིང་ད་ལྟར་ཡང་ཡང་དག་པ་མ་ཡིན་པའི་འདུ་ཤེས་ལ་སྤྱོད། ལོག་པར་ལྟ་
བ་ལ་སྤྱད་པར་གྱུར་ཅིང་ད་ལྟར་ཡང་ལོག་པར་ལྟ་བ་ལ་སྤྱོད་དོ། ཇི་ལྟར་འདི་དག་ལ་ཉེས་པ་འདི་དག་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་ཞིང་མི་ཤེས་པ་དེ་ལྟར་
བྱའོ༑ ༑ཞེས་དེ་ལྟར་སེམས་ཅན་ཐམས་ཅད་ལ་སེམས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དྲན་པའི་ཤེས་པ་དེ་དང༌། སེམས་བསྐྱེད་པ་དེ་ལྟ་བུ་དང་ལྡན་ཞིང༌། ཐབས་མཁས་པ་
དང་ཡང་ལྡན། ཤེས་རབ་ཀྱི་ཕ་རོལ་ཏུ་ཕྱིན་པས་ཀྱང་ཡོངས་སུ་བཟུང་བས། དེ་ལྟར་ཆོས་ཟབ་མོ་འདི་དག་གི་ཆོས་ཉིད་ལ་འདི་ལྟར་སྟོང་པ་ཉིད་དམ། མཚན་མ་མེད་པའམ། སྨོན་པ་མེད་པའམ།
༄༅། །མངོན་པར་འདུ་མི་བྱེད་པའམ། མི་འབྱུང་བའམ། མི་སྐྱེ་བའམ། དངོས་པོ་མེད་པར་སོ་སོར་རྟོག་གོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་
གང་དེ་ལྟར་ཤེས་པའི་ཆོས་དང་ལྡན་པ་ནི། མངོན་པར་འདུ་མི་བྱེད་པར་ལྟུང་བའམ་ཁམས་གསུམ་པ་དང་ལྷན་ཅིག་གནས་པར་འགྱུར་བ་ནི། གནས་མ་ཡིན་ཞིང་གོ་སྐབས་མེད་དོ། །
རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་བྱང་ཆུབ་སེམས་དཔའ་
སེམས་དཔའ་ཆེན་པོ་ལ་འདི་སྐད་ཅེས་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་པ་ཉིད་མངོན་སུམ་དུ་མི་བྱེད་པ་དང༌། མཚན་མ་མེད་པ་མངོན་སུམ་དུ་མི་བྱེད་པ་དང༌། སྨོན་པ་
མེད་པ་མངོན་སུམ་དུ་མི་བྱེད་པ་དང༌། མངོན་པར་འདུ་མི་བྱེད་པ་མངོན་སུམ་དུ་མི་བྱེད་པ་དང༌། འབྱུང་བ་མེད་པ་མངོན་སུམ་དུ་མི་བྱེད་པ་དང༌། སྐྱེ་བ་མེད་པ་མངོན་སུམ་དུ་མི་བྱེད་པ་དང༌།
དངོས་པོ་མེད་པའང་མངོན་སུམ་དུ་མི་བྱེད་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ལའང་སྒོམ་པར་བྱེད་པས་ཆོས་འདི་དག་ལ་ཡོངས་སུ་འདྲིས་པར་བྱ་བ་ནི། གང་ཡིན་ཞིང་སེམས་གང་དག་
མངོན་པར་སྒྲུབ་པ་ན་སེམས་ཇི་ལྟ་བུའི་རང་བཞིན་དུ་མངོན་པར་བསྒྲུབ་པར་བྱ་ཞེས་བྲི་བར་བྱའོ། །གལ་ཏེ་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ལ་བྱང་ཆུབ་སེམས་
དཔའ་སེམས་དཔའ་ཆེན་པོས་དེ་སྐད་དྲིས་པ་ན་འདི་སྐད་དུ། བྱང་ཆུབ་སེམས་དཔའ་སེམས་དཔའ་ཆེན་པོས་སྟོང་པ་ཉིད་ཡིད་ལ་བྱའོ། །མཚན་མ་མེད་པ་དང༌། སྨོན་པ་མེད་པ་དང༌། མངོན་པར་
འདུ་མི་བྱེད་པ་དང༌། མི་འབྱུང་བ་དང༌། མི་སྐྱེ་བ་དང༌། དངོས་པོ་མེད་པ་ཉིད་བྱང་ཆུབ་སེམས་དཔའ་སེམས་དཔའ་ཆེན་པོས་ཡིད་ལ་བྱའོ། །ཞེས་ལུང་སྟོན་ཅིང༌། གལ་ཏེ་སེམས་ཅན་ཐམས་ཅད་
ཡོངས་སུ་མི་གཏོང་བའི་སེམས་དེ་ཉེ་བར་མི་སྟོན་ཏམ། ཐབས་མཁས་པ་ལུང་མི་སྟོན་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། སྔོན་གྱི་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཉིད་དུ་ལུང་མ་བསྟན་པར་རིག་པར་བྱའོ། །དེ་ཅིའི་ཕྱིར་ཞེ་ན། ཕྱིར་
མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་མ་འདྲེས་པའི་ཆོས་གང་ཡིན་པའི་ཆོས་དེ་མི་སྟོན། རབ་ཏུ་མི་འབྱེད། ཉེ་བར་མི་སྟོན། རབ་ཏུ་མི་ཤེས། དྲིས་ཀྱང་ལུང་མི་སྟོན་ལན་
མི་ལྡོན་ཅིང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ས་གང་ཡིན་པའི་ས་དེ་མི་གནོན་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་བྱང་ཆུབ་
སེམས་དཔའ་སེམས་དཔའ་ཆེན་པོ་རྣམ་གྲངས་གང་གིས་ཕྱིར་མི་ལྡོག་པར་འགྱུར་བའི་རྣམ་གྲངས་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། རྣམ་གྲངས་གང་
༄༅། །གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པར་འགྱུར་བའི་རྣམ་གྲངས་ཡོད་དེ། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་ཐོས་ཀྱང་རུང༌། མ་ཐོས་ཀྱང་རུང་སྟེ། དེ་ལྟར་ཤེས་ཤིང་དེ་ལྟར་ལན་ལྡོན་ན། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོར་རིག་པར་བྱའོ། །
རབ་འབྱོར་གྱིས་གསོལ་པ། བཅོམ་ལྡན་འདས། དེའི་སླད་དུ་བྱང་ཆུབ་ཏུ་སྤྱོད་པ་མང་ཡང་གང་དེ་ལྟར་ལན་ལྡོན་པ་ནི། ཉུང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་
ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཕྱིར་མི་ལྡོག་པའི་ཡེ་ཤེས་ཀྱི་སར་ལུང་བསྟན་པ་དེ་དག་ནི། ཉུང་སྟེ། ཡང་གང་ལུང་བསྟན་པར་གྱུར་པ་དེ་དག་ནི། དེ་ལྟར་ལན་
ལྡོན་ཏོ༑ ༑བྱང་ཆུབ་སེམས་དཔའ་སེམས་དཔའ་ཆེན་པོ་དེ་དང་དེ་དག་ནི། དགེ་བའི་རྩ་བ་འབར་བ་བསྐྱེད་པར་རིག་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དང་དེ་དག་ནི།
ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱིས་མི་འཕྲོག་པའོ། །རབ་འབྱོར། ཡང་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་རྨི་ལམ་གྱི་ནང་ན་ཡང་ཆོས་ཐམས་ཅད་
རྨི་ལམ་ལྟར་ཡང་དག་པར་ལྟ་ཞིང་མངོན་སུམ་དུ་ཡང་མི་བྱེད་ན། རབ་འབྱོར། འདི་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་ལྡོག་པའི་མཚན་ཉིད་དུ་
རིག་པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྨི་ལམ་གྱི་ནང་ན་ཡང་ཉན་ཐོས་ཀྱི་སའམ། རང་སངས་རྒྱས་ཀྱི་སའམ། ཁམས་གསུམ་ལ་འདོད་པ་མེད་
ཅིང་ཕན་ཡོན་གྱི་སེམས་མི་བསྐྱེད་ན། རབ་འབྱོར། འདི་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར།
གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྨི་ལམ་གྱི་ནང་ནའང་འཁོར་བརྒྱ་ཕྲག་དུ་མ་དང༌། སྟོང་ཕྲག་དུ་མ་དང༌། བརྒྱ་སྟོང་ཕྲག་དུ་མ་དང༌། བྱེ་བ་བརྒྱ་ཕྲག་དུ་མ་དང༌། བྱེ་བ་སྟོང་
ཕྲག་དུ་མ་དང༌། བྱེ་བ་བརྒྱ་སྟོང་ཕྲག་དུ་མ་དང༌། བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་འཁོར་གྱི་དབུས་སུ་ཆུད་ཅིང་འཁོར་གྱི་དཀྱིལ་འཁོར་གྱི་ཁྱམས་ན་འདུག་ནས་དགེ་སློང་གི་དགེ་འདུན་
གྱིས་ཡོངས་སུ་བསྐོར་ཅིང་བྱང་ཆུབ་སེམས་དཔའི་དགེ་འདུན་གྱིས་མདུན་དུ་བདར་ནས་བདག་ཉིད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པར་སངས་རྒྱས་ནས་ཆོས་སྟོན་
པར་མཐོང་ན། རབ་འབྱོར། འདི་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར། གཞན་ཡང་བྱང་ཆུབ་
སེམས་དཔའ་སེམས་དཔའ་ཆེན་པོའི་རྨི་ལམ་ན་ཡང་བདག་ཉིད་ནམ་མཁའ་ལ་མངོན་པར་འཕགས་ཏེ་སེམས་ཅན་དག་ལ་ཆོས་སྟོན་པ་དང༌། འོད་འདོམ་གང་བར་ཀུན་ཏུ་ཤེས་ཤིང་ཕྱོགས་
༄༅། །གཞན་དག་ཏུ་སོང་སྟེ་འཇིག་རྟེན་གྱི་ཁམས་གཞན་དེར་སངས་རྒྱས་ཀྱི་མཛད་པ་མཛད་ནས་དེར་ཡང་དགེ་སློང་དག་མངོན་པར་སྤྲུལ་ཅིང་ཆོས་སྟོན་ཏེ། རབ་འབྱོར།
འདི་ལྟར་ཡང་རྨི་ལམ་གྱི་ནང་ནའང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོར་ཀུན་ཏུ་ཤེས་ན། རབ་འབྱོར། འདི་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་
སེམས་དཔའ་ཆེན་པོའི་ཕྱིར་མི་ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་རྨི་ལམ་ན་ཡང་མི་དངང༌། ཀུན་ཏུ་མི་སྐྲག།
ཀུན་ཏུ་སྐྲག་པ་དང་ལྡན་པར་མི་འགྱུར་ཏེ། གྲོང་ལ་གནོད་པའམ། གྲོང་ཁྱེར་ལ་གནོད་པའམ། གྲོང་རྡལ་ལ་གནོད་པའམ། ལྗོངས་སུ་གནོད་པའམ། ཡུལ་འཁོར་དུ་གནོད་པའམ། འབྲོག་
མེ་ཤོར་བའི་གནོད་པ་བྱུང་ངམ། གཅན་གཟན་ནམ། རི་དྭགས་སམ། དེ་མ་ཡིན་པའི་རི་དྭགས་ཀྱི་རིགས་ཕྲ་མོ་གཞན་དག་མཐོང་བ་དང༌། མགོ་གཅོད་པ་ཉེ་བར་གནས་པའམ། དེ་མ་ཡིན་པ་
གཞན་གང་ཡང་རུང་བའི་འཇིགས་པ་ཆེན་པོ་མི་བཟད་པ་དང༌། སྡུག་བསྔལ་བ་དང༌། ཡིད་མི་བདེ་བ་དག་བྱུང་བ་དང༌། སེམས་ཅན་གཞན་དག་གི་སྡུག་བསྔལ་བ་དང༌། ཡིད་མི་བདེ་བ་དང༌།
འཇིགས་པ་ཆེན་པོ་མི་བཟད་པ་དག་མཐོང་ཡང་དེ་ལ་འཇིགས་པ་མི་བཟད་པ་སྐྱེ་བར་མི་འགྱུར། མི་དངང༌། ཀུན་ཏུ་མི་སྐྲག། ཀུན་ཏུ་སྐྲག་པ་དང་ལྡན་པར་མི་བྱེད་དེ། དེ་ནས་དེ་གཉིད་ཀྱིས་
ལོག་པ་ལས་སད་དེ་དེ་ལངས་མ་ཐག་ཏུ་འདི་སྙམ་དུ་སེམས་ཏེ། ཁམས་གསུམ་འདི་དག་ཐམས་ཅད་ནི། རྨི་ལམ་ལྟ་བུ་སྟེ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་ནས་དེ་ལྟར་གང་ཡང་དག་པར་སྟོན་པས་ཆོས་བསྟན་པར་བྱའོ། །སྙམ་ན། རབ་འབྱོར། འདི་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་
ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར། གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་རྨི་ལམ་གྱི་ནང་ན་དམྱལ་བ་པའི་སེམས་ཅན་རྣམས་མཐོང་
བ་ན་འདི་སྙམ་དུ་སེམས་ཏེ། ཇི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དུ་ངན་སོང་ཐམས་ཅད་ཐམས་ཅད་ནས་
ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་བར་འགྱུར་བ་དེ་ལྟར་བྱའོ། །སྙམ་ན། རབ་འབྱོར། འདིའང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདིའི་ངན་
སོང་རྣམ་པར་དག་པའི་མཚན་ཉིད་དུ་རིག་པར་བྱའོ། །རབ་འབྱོར། དེ་ལ་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དུ་ངན་སོང་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་འབྱུང་བར་མི་འགྱུར་བར་ཇི་ལྟར་ཤེས་ཤེ་ན། རབ་འབྱོར།
༄༅། །གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་རྨི་ལམ་གྱི་ནང་ན་དམྱལ་བར་གཏོགས་པའམ། བྱོལ་སོང་དང༌། ཡི་དྭགས་སུ་གཏོགས་པའི་སེམས་ཅན་དག་
མཐོང་ནས་དྲན་པ་རྙེད་པར་འགྱུར་ཏེ། དེ་དྲན་པ་དེ་རྙེད་ནས་འདི་སྙམ་དུ་སེམས་ཏེ། ཇི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་
སངས་རྒྱས་ཀྱི་ཞིང་ན་ངན་སོང་ཐམས་ཅད་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་མི་འབྱུང་བ་དེ་ལྟར་བྱའོ། །སྙམ་པ་འདི་ནི། རབ་འབྱོར། དེ་ལྟར་བྱང་ཆུབ་སེམས་
དཔའ་སེམས་དཔའ་ཆེན་པོའི་ངན་སོང་ཡོངས་སུ་དག་པའི་མཚན་ཉིད་དུ་རིག་པར་བྱ་སྟེ། རབ་འབྱོར། འདི་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་
ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་རྨི་ལམ་གྱི་ནང་དུ་གྲོང་ཁྱེར་ཚིག་པ་དང༌། གྲོང་ཚིག་པར་གྱུར་པ་རྨིས་ཏེ། དེ་རྨི་ལམ་
དེ་ལས་སད་ནས་འདི་སྙམ་དུ་སེམས་ཏེ། ཇི་ལྟར་ངས་རྨི་ལམ་གྱི་ནང་དུ་རྣམ་པ་གང་དང༌། རྟགས་གང་དང༌། མཚན་མ་གང་དག་མཐོང་བའི་རྣམ་པ་གང་དང༌། རྟགས་གང་དང༌། མཚན་མ་གང་
དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པར་གཟུང་བར་བྱ་བའི་རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་ང་ལ་ཡོད་ན། བདེན་པ་དེ་དང་
བདེན་པའི་ཚིག་དེས་གྲོང་ཁྱེར་ཚིག་པ་དང༌། གྲོང་ཚིག་པ་འདི་ཉེ་བར་ཞི་བར་གྱུར་ཅིག །བསིལ་བར་གྱུར་ཅིག །མེད་པར་གྱུར་ཅིག་ཅེས་བྱས་ན། རབ་འབྱོར། གལ་ཏེ་གྲོང་ཚིག་པ་དང༌། གྲོང་ཁྱེར་
ཚིག་པ་དེ་ཉེ་བར་ཞི་བ་དང༌། བསིལ་བ་དང༌། མེད་པར་གྱུར་ན་ནི། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཕྱིར་མི་ལྡོག་པར་ལུང་བསྟན་པར་རིག་པར་བྱའོ། །གལ་ཏེ་ཉེ་བར་མ་ཞི། བསིལ་བར་མ་གྱུར། མེད་པར་མ་སོང་ན། རབ་འབྱོར།
བྱང་ཆུབ་སེམས་དཔའ་སེམས་དཔའ་ཆེན་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པར་རིག་པར་བྱའོ། །རབ་འབྱོར། ཡང་གལ་ཏེ་མེས་ཚིག་པ་དེ་ཁྱིམ་ནས་ཁྱིམ། སྲང་ནས་
སྲང་དུ་ཐལ་ཏེ་སྲང་གཞན་གང་ཡང་རུང་བའམ། ཁྱིམ་གཞན་གང་ཡང་རུང་བར་སོང་ནས་ཚིག་སྟེ་ཉེ་བར་མ་ཞི། བསིལ་བར་མ་གྱུར། མེད་པར་མ་སོང་ན། རབ་འབྱོར། དེ་ནི། བྱང་ཆུབ་སེམས་དཔའ་
སེམས་དཔའ་ཆེན་པོ་དེས་ཆོས་སྤོང་བ་ཉིད་དང༌། ཤེས་རབ་འཆལ་བར་འགྱུར་བ་དང་མཐུན་པའི་ལས་ཉེ་བར་བསགས་པར་རིག་པར་བྱ་སྟེ། དེས་ན། འདི་ལ་མཐོང་བའི་ཆོས་ལ་འབྱུང་བར་འགྱུར་བ་དང་
རྗེས་སུ་མཐུན་པ་ཉིད་ཀྱི་ལས་རྣམ་པར་སྨིན་པ་ཡིན་པས་ཆོས་སྤོང་བ་དེ་ཉིད་ལས་ལྷག་མ་དང་བཅས་པའི་ལས་ཀྱི་རྣམ་པར་སྨིན་པ་ཡིན་ནོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་
༄༅། །མི་ལྡོག་པའི་མཚན་ཉིད་ཀྱི་རྒྱུ་ནི། དེ་ཡིན། རྐྱེན་ནི། དེ་ཡིན་ཏེ། རབ་འབྱོར། འདི་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །རབ་འབྱོར། གཞན་ཡང་རྣམ་པ་གང་དག་དང༌། རྟགས་གང་དག་དང༌། མཚན་མ་གང་དག་གིས་ཕྱིར་མི་ལྡོག་པའི་བྱང་ཆུབ་སེམས་དཔའ་
སེམས་དཔའ་ཆེན་པོར་གཟུང་བར་བྱ་བའི་རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་བསྟན་པར་བྱ་ཡི། དེ་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ། །
དེ་ནས་ཚེ་དང་ལྡན་པ་རབ་འབྱོར་གྱིས་བཅོམ་ལྡན་འདས་ལ་ལེགས་སོ། །ཞེས་གསོལ་ནས་བཅོམ་ལྡན་འདས་ཀྱི་ལྟར་ཉན་པ་དང༌། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རབ་འབྱོར།
གལ་ཏེ་སྐྱེས་པའམ། བུད་མེད་དམ། ཁྱེའུའམ། བུ་མོ་ལ་ལ་ཞིག་མི་མ་ཡིན་པས་ཟིན་ཅིང་བབས་པར་གྱུར་ན། དེར་བྱང་ཆུབ་སེམས་དཔའ་སེམས་དཔའ་ཆེན་པོ་འོངས་ནས་བྱིན་གྱིས་རླབས་འདི་
ལྟར་བསམ་པར་བྱ་སྟེ། གལ་ཏེ་ང་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་
པ་ཡིན་ཞིང༌། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་དོན་དུ་བསམ་པ་ཡོངས་སུ་དག་ལ། ཇི་ལྟར་བདག་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བདག་གི་ཡིད་ལ་བྱེད་པ་ཡོངས་སུ་དག་ཅིང༌། བདག་ཉན་ཐོས་ཀྱི་སེམས་དང༌། རང་སངས་
རྒྱས་ཀྱི་སེམས་དང་བྲལ་བ་དེས་ན། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་བྱ་བ་ཡིན་ལ། བདག་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་བ་མ་ཡིན་ཞིང༌། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ཁོ་ན་ཡིན་པ་དང༌། ཡང་
འཇིག་རྟེན་གྱི་ཁམས་གཞལ་དུ་མེད་གྲངས་མེད་པ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་དེ་དག་ལ་མ་མཁྱེན་པའམ། མ་གཟིགས་པའམ། ཐུགས་སུ་མ་ཆུད་པའམ། མངོན་སུམ་དུ་མ་མཛད་པའམ། མངོན་པར་རྫོགས་པར་སངས་མ་རྒྱས་པ་ཅི་ཡང་མེད་དེ། ཇི་ལྟར་སངས་
རྒྱས་བཅོམ་ལྡན་འདས་དེ་དག་གིས་བདག་གི་བསམ་པ་མཁྱེན་པ་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ན། བདེན་པ་འདི་དང༌། བདེན་
པའི་ཚིག་འདིས་སྐྱེས་པའམ། བུད་མེད་དམ། ཁྱེའུའམ། བུ་མོ་འདི་མི་མ་ཡིན་པའི་གདོན་གྱིས་ཟིན་ཅིང་ནོན་པ་དེ་སོང་ཤིག་ཅེས་བྱས་ལ་བྱང་ཆུབ་སེམས་དཔའ་སེམས་དཔའ་ཆེན་པོས་གལ་ཏེ་
༄༅། །དེ་སྐད་སྨྲས་པ་དང་མི་མ་ཡིན་པ་དེ་མ་སོང་ན་ནི། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་འདི་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པར་རིག་པར་བྱའོ། །རབ་འབྱོར། ཡང་གལ་ཏེ་བྱང་ཆུབ་སེམས་དཔའ་སེམས་
དཔའ་ཆེན་པོས་དེ་སྐད་སྨྲས་པ་ན་མི་མ་ཡིན་པ་དེ་སོང་ན་ནི། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་འདི་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་རིག་པར་བྱའོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། ཐབས་མཁས་
པ་ལ་སྤྱོད་པའི་ལེའུ་ཞེས་བྱ་སྟེ། ཉི་ཤུ་པའོ།། །།རབ་འབྱོར། ཡང་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་འདི་སྐད་དུ་སྨྲ་བར་འགྱུར་ཏེ། བདེན་པ་དང༌།
བདེན་པའི་ཚིག་གང་གིས་བདག་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་
བསྟན་ན། བདེན་པ་དང༌། བདེན་པའི་ཚིག་དེས་མི་མ་ཡིན་པ་འདི་སོང་ཞིག་ཅེས་བྱས་ན། རབ་འབྱོར། དེ་ལ་བདུད་སྡིག་ཅན་མི་མ་ཡིན་པ་དེ་འགྲོ་བར་བྱ་བའི་ཕྱིར་བརྩོན་པར་བྱེད་དོ། །དེ་ཅིའི་ཕྱིར་
ཞེ་ན༑ དེར་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ལ་ཞུགས་ནས་རིང་པོ་མ་ལོན་པ་དེའི་གན་ན་ཤིན་ཏུ་སྟོབས་དང་ལྡན་པ་དང༌། ཤིན་ཏུ་གཟི་བརྗིད་དང་ལྡན་པའི་བདུད་སྡིག་ཅན་
ཇི་ལྟར་མི་མ་ཡིན་པ་འདི་འགྲོ་བར་འགྱུར་སྙམ་པས་འབད་པར་བྱེད་དོ། །དེ་ལྟར་མི་མ་ཡིན་པ་དེ་བདུད་ཀྱི་བྱིན་གྱི་རླབས་ཀྱིས་འགྲོ་བར་འགྱུར་ལ། དེ་ལྟར་ན་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་དེ་འདི་སྙམ་དུ་མི་མ་ཡིན་པ་འགྲོ་བ་ནི། ངའི་མཐུའོ། །སྙམ་དུ་སེམས་ཀྱི། ཡང་འདི་ལྟར་བདུད་ཀྱི་མཐུས་མི་མ་ཡིན་པ་འགྲོའོ། །སྙམ་དུ་མི་ཤེས་སོ། །དེ་བརྩོན་པ་དེ་ཙམ་ཞིག་བྱེད་
པར་འགྱུར་ཏེ། དེ་བརྩོན་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ལ་བརྙས་པར་བྱེད། རྔན་ཅན་བྱེད། བསྟིང་བར་བྱེད། འཕྱ་བར་བྱེད། སྨོད་པར་བྱེད་པར་འགྱུར་ཏེ།
ང་ནི༑ སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །ཞེས་དེ་དེ་ཙམ་གྱིས་
ཕྱི་ཕྱིར་ང་རྒྱལ་བསྐྱེད་པར་འགྱུར། ང་རྒྱལ་ཡང་དག་པར་སྐྱེད་པར་འགྱུར། ང་རྒྱལ་འཕེལ་བར་བྱེད་པར་འགྱུར། ང་རྒྱལ་ཡང་དག་པར་འཕེལ་བར་འགྱུར། ང་རྒྱལ་སྟོན་པར་བྱེད་པར་
འགྱུར༑ ང་རྒྱལ་ཉེ་བར་སྟོན་པར་བྱེད་པར་འགྱུར། ང་རྒྱལ་རྒྱས་པར་བྱེད་པར་འགྱུར། ང་རྒྱལ་ཉེ་བར་རྒྱས་པར་བྱེད་པར་འགྱུར། ང་རྒྱལ་འབྱུང་བར་བྱེད་པར་འགྱུར་རོ། །དེ་ང་རྒྱལ་དང༌། ཆེ་བའི་
༄༅། །ང་རྒྱལ་དང༌། ང་རྒྱལ་ལས་ཀྱང་ང་རྒྱལ་དང༌། མངོན་པའི་ང་རྒྱལ་དང༌། ལོག་པའི་ང་རྒྱལ་དེས་ཐམས་ཅད་མཁྱེན་པ་ཉིད་རྒྱང་རིང་དུ་བྱེད་པར་འགྱུར། བླ་ན་མེད་པ་
སངས་རྒྱས་ཀྱི་ཡེ་ཤེས་དང༌། རང་བྱུང་གི་ཡེ་ཤེས་དང༌། ཐམས་ཅད་མཁྱེན་པའི་ཡེ་ཤེས་རྒྱང་རིང་དུ་བྱེད་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྒྱང་རིང་དུ་བྱེད་པར་
འགྱུར་རོ། །དེ་ལྟ་བུའི་ཚུལ་གྱིས་དགེ་བའི་བཤེས་གཉེན་དགེ་བའི་ཆོས་ཅན། མོས་པ་རྒྱ་ཆེ་བ། ལྷག་པའི་བསམ་པ་ཕུན་སུམ་ཚོགས་པ། ཐབས་མཁས་པ་ཕྱིར་མི་ལྡོག་པའི་ཆོས་
དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟ་བུ་དག་མཐོང་ན། མངོན་པའི་ང་རྒྱལ་བསྐྱེད་ནས་བརྙས་པར་བྱེད་ཅིང༌། དེ་ལྟ་བུའི་ཚུལ་གྱིས་དགེ་བའི་བཤེས་གཉེན་མི་
བསྙེན། མི་བསྟེན། བསྙེན་བཀུར་མི་བྱེད། མི་འདྲི་ཞིང་བདུད་ཀྱིས་འཆིང་བ་དེ་ཉིད་སྲ་བར་བྱེད་དེ། དེ་ནི། ས་གཉིས་སུ་རིག་པར་བྱ་སྟེ། འདི་ལྟ་སྟེ། ཉན་ཐོས་ཀྱི་སའམ། རང་སངས་རྒྱས་
ཀྱི་སའོ། །རབ་འབྱོར། དེ་ལྟར་བདེན་པའི་བྱིན་གྱིས་རླབས་ཀྱིས་བདུད་སྡིག་ཅན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ལ་ཞུགས་ནས་རིང་པོ་མ་ལོན་པ། དད་པ་ཆུང་བ།
ཐོས་པ་ཉུང་བ། དགེ་བའི་བཤེས་གཉེན་དང་བྲལ་བ། ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་ཟིན་ཅིང་ཐབས་མཁས་པ་དང་བྲལ་བ་ལ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཀྱི་བར་ཆད་བྱེད་དེ། རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོའི་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་ལ་མིང་སྟོན་པས་ཀྱང་བདུད་ཀྱི་ལས་སུ་འགྱུར་རོ། །རབ་འབྱོར། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལ་མིང་སྟོན་པས་ཀྱང་བདུད་ཀྱི་ལས་སུ་འགྱུར་ཞེ་ན། རབ་
འབྱོར༑ འདི་ལ་བདུད་སྡིག་ཅན་བྱང་ཆུབ་སེམས་དཔའ་སེམས་དཔའ་ཆེན་པོའི་མིང་སྟོན་པ་དང༌། མིང་བྱིན་གྱིས་བརླབས་པས་ཀྱང་ཉེ་བར་འོང་བར་འགྱུར་ཏེ། གཞན་གང་ཡང་རུང་བ་དང༌།
གཞན་གང་ཡང་རུང་བའི་ཆ་བྱད་དུ་འོངས་ནས་འདི་སྐད་དུ། ཁྱོད་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ཅིའི་ཕྱིར་ཞེ་ན། ཁྱོད་ཀྱི་མིང་ནི། འདི་ཞེས་བྱ། ཁྱོད་ཀྱི་མའི་མིང་ནི། འདི་ཞེས་བྱ། ཁྱོད་ཀྱི་ཕའི་མིང་ནི། འདི་ཞེས་བྱ། ཁྱོད་ཀྱི་སྤུན་ཟླའི་མིང་
ནི། འདི་ཞེས་བྱ། ཁྱོད་ཀྱི་སྲིང་མོའི་མིང་ནི། འདི་ཞེས་བྱ། ཁྱོད་ཀྱི་གྲོགས་པོ་དང༌། བློན་པོ་དང༌། ཉེ་དུ་དང༌། སྣག་གི་གཉེན་མཚམས་ཀྱི་མིང་ནི། འདི་ཞེས་བྱའོ། །ཞེས་མ་མེས་དང༌། ཕ་
མེས་གཉིས་གའི་རབས་བདུན་ཚུན་ཆད་ཀྱི་མིང་བརྗོད་ཅིང༌། ཁྱོད་ནི། ཕྱོགས་ག་གེ་མོ་ཞིག་ཏུ་སྐྱེས་ཏེ། གྲོང་ངམ། གྲོང་ཁྱེར་རམ། གྲོང་རྡལ་ག་གེ་མོ་ཞིག་ཏུ་སྐྱེས་ནས་ག་གེ་མོ་ཞིག་ཏུ་སྐྱེས་སོ། །
༄༅། །ཞེས་ཟེར་ཞིང༌། གལ་ཏེ་རང་བཞིན་གྱིས་རྟུལ་བ་ཞིག་ཡིན་ན། དེ་ལ་འདི་སྐད་དུ། ཁྱོད་སྔོན་ཡང་དེ་བཞིན་དུ་རྟུལ་པོར་གྱུར་ཏོ། །ཞེས་ཟེར་རོ། །གལ་ཏེ་རང་བཞིན་
གྱིས་དབང་པོ་རྣོ་བ་ཞིག་ཡིན་ན། དེའི་ཕྱིར་དེ་ལ་འདི་སྐད་དུ། ཁྱོད་སྔོན་ཡང་དབང་པོ་རྣོན་པོར་གྱུར་ཏོ། །ཞེས་ཟེར་རོ། །གལ་ཏེ་དགོན་པ་པ་ཞིག་ཡིན་ནམ། གལ་ཏེ་བསོད་སྙོམས་པ་ཞིག་ཡིན་
ནམ༑ གལ་ཏེ་ཕྱག་དར་ཁྲོད་པ་ཞིག་ཡིན་ནམ། གལ་ཏེ་ཟས་ཕྱིས་མི་ལེན་པ་ཞིག་ཡིན་ནམ། གལ་ཏེ་སྟན་གཅིག་པ་ཞིག་ཡིན་ནམ། གལ་ཏེ་གཞི་ཇི་བཞིན་པ་ཞིག་ཡིན་ནམ། གལ་ཏེ་ཆོས་
གོས་གསུམ་པ་ཞིག་ཡིན་ནམ། གལ་ཏེ་དུར་ཁྲོད་པ་ཞིག་ཡིན་ནམ། གལ་ཏེ་ཤིང་དྲུང་པ་ཞིག་ཡིན་ནམ། གལ་ཏེ་ཙོག་པུ་པ་ཞིག་ཡིན་ནམ། གལ་ཏེ་བླ་གབ་མེད་པ་ཞིག་ཡིན་ནམ། གལ་ཏེ་
ཕྱིང་བ་པ་ཞིག་ཡིན་ནམ། གལ་ཏེ་འདོད་པ་ཉུང་ཞིང་ཆོག་ཤེས་པ་རབ་ཏུ་དབེན་པ་ཞིག་ཡིན་ནམ། གལ་ཏེ་རྐང་པ་སྐུད་པ་དང་བྲལ་བ་ཞིག་ཡིན་ནམ། གལ་ཏེ་འཇམ་པོར་སྨྲ་ཞིང་ཚིག་ཉུང་བ་
ཞིག་ཡིན་ན། དེ་ལ་བདུད་སྡིག་ཅན་ཚེ་འདིའི་ཡོན་ཏན་དེ་དང་དེ་དག་གིས་འདི་སྐད་དུ། ཁྱོད་ནི་སྔོན་ཡང་ཡོན་ཏན་འདི་དང་འདི་དག་དང་ཡང་ལྡན་པར་གྱུར་ཏེ། ཁྱོད་ནི། སྔོན་གྱི་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཕྱིར་མི་ལྡོག་པའི་བྱང་ཆུབ་སེམས་དཔའི་ས་ལ་ངེས་པར་
ལུང་བསྟན་ཏོ། །དེ་ཅིའི་ཕྱིར་ཞེ་ན། འདི་ལྟར་ཁྱོད་ལ་སྦྱངས་པའི་ཡོན་ཏན་འདི་ལྟ་བུ་འདི་དག་ཡོད་ཀྱི། ཁྱོད་ནི། གདོན་མི་ཟ་བར་སྔོན་ཡང་སྦྱངས་པའི་ཡོན་ཏན་འདི་དག་དང་ལྡན་པར་གྱུར་ཏོ། །
ཞེས་བསྒོ་བར་བྱེད་དོ། །དེ་ལྟར་སྔོན་གྱི་མིང་བསྟན་པ་དེ་དང༌། མིང་ལ་བརྟེན་པ་དང༌། ད་ལྟར་གྱི་སྦྱངས་པའི་ཡོན་ཏན་དང་ཡོ་བྱད་བསྙུངས་པ་དེས་རློམ་སེམས་སྐྱེད་པར་འགྱུར་ཏེ། དེ་འདི་སྙམ་
དུ༑ བདག་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏེ། འདི་ལྟར་ཡོན་
ཏན་འདི་དག་ནི། བདག་ལ་ཡོད་དོ། །སྙམ་པ་དང༌། དེ་ལ་བདུད་སྡིག་ཅན་འདི་སྐད་དུ། ཁྱོད་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཕྱིར་མི་ལྡོག་པར་ལུང་བསྟན་ཏོ། །དེ་ཅིའི་ཕྱིར་ཞེ་ན། འདི་ལྟར་ཁྱོད་ལ་སྦྱངས་པའི་ཡོན་ཏན་དེ་ལྟ་བུ་དེ་དག་ཡོད་དོ། །ཞེས་ཟེར་རོ། །རབ་འབྱོར།
ཡང་དེ་ལ་བདུད་སྡིག་ཅན་རེས་འགའ་ནི། དགེ་སློང་གི་ཆ་བྱད་དུ་འོང་བར་སེམས། རེས་འགའ་ནི། དགེ་སློང་མའི་ཆ་བྱད་དུ་འོང་བར་སེམས། རེས་འགའ་ནི། དགེ་བསྙེན་གྱི་ཆ་བྱད་དུ། རེས་
འགའ་ནི། དགེ་བསྙེན་མའི་ཆ་བྱད། རེས་འགའ་ནི། བྲམ་ཟེའི་ཆ་བྱད། རེས་འགའ་ནི། ཁྱིམ་བདག་གི་ཆ་བྱད། རེས་འགའ་ནི། མའི་ཆ་བྱད། རེས་འགའ་ནི། ཕའི་ཆ་བྱད། རེས་འགའ་ནི། སྤུན་
༄༅། །ཟླའི་ཆ་བྱད། རེས་འགའ་ནི། སྲིང་མོའི་ཆ་བྱད། རེས་འགའ་ནི། གྲོགས་པོ་དང༌། བློན་པོ་དང༌། ཉེ་དུ་དང༌། སྣག་གི་གཉེན་མཚམས་ཀྱི་ཆ་བྱད་དུ་འོང་བར་
འགྱུར་ཏེ། འོངས་ནས་འདི་སྐད་དུ། ཁྱོད་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་ཕྱིར་མི་ལྡོག་པའི་ས་ལ་ལུང་བསྟན་ཏོ། །དེ་ཅིའི་ཕྱིར་ཞེ་ན། འདི་ལྟར་ཁྱོད་ལ་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཡོན་ཏན་གང་ཡིན་པའི་སྦྱངས་པའི་
ཡོན་ཏན་དེ་ལྟ་བུ་དེ་དག་ཡོད་དོ། །ཞེས་ཟེར་རོ། །རབ་འབྱོར། ཡང་ངས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་གི་ཡོན་ཏན་བསྟན་པ་དང༌། རྣམ་པ་དང༌། རྟགས་
དང༌། མཚན་མ་གང་དག་བསྟན་པ་དེ་དག་དེ་ལ་མེད་ན། རབ་འབྱོར། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྱིས་ཀྱེ་མ་བྱང་ཆུབ་སེམས་དཔའ་སེམས་དཔའ་ཆེན་
པོ་འདི་ནི། བདུད་ཀྱིས་བྱིན་གྱིས་བརླབས་པའོ། །ཞེས་རིག་པར་བྱའོ། །དེ་ཅིའི་ཕྱིར་ཞེ་ན། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྣམ་པ་གང་ཡིན་པ་
དང༌། རྟགས་གང་ཡིན་པ་དང༌། མཚན་མ་གང་ཡིན་པ་དེ་དག་དེ་ལ་མེད་པའི་ཕྱིར་རོ། །རབ་འབྱོར། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བྱིན་གྱི་རླབས་དེ་ལྟ་བུས་མངོན་
པའི་ང་རྒྱལ་སྐྱེད་པར་འགྱུར་ཏེ། མངོན་པའི་ང་རྒྱལ་བསྐྱེད་ནས་ང་རྒྱལ་གྱིས་ཟིལ་གྱིས་ནོན་ཅིང་ཁེངས་པས་ཟིལ་གྱིས་ནོན། བདུད་ཀྱི་བྱིན་གྱི་རླབས་ཀྱིས་ནོན་པས། དེ་བྱང་ཆུབ་
སེམས་དཔའ་སེམས་དཔའ་ཆེན་པོ་གཞན་དག་ལ་བརྙས་པར་འགྱུར། རྔན་ཅན་བྱེད་པར་འགྱུར། བསྟིང་བར་འགྱུར། འཕྱ་བར་འགྱུར། སྨོད་པར་འགྱུར་ཏེ། རབ་འབྱོར། འདིའང་བྱང་ཆུབ་
སེམས་དཔའ་སེམས་དཔའ་ཆེན་པོས་བདུད་ཀྱི་བྱིན་གྱི་རླབས་ཀྱིས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་མིང་བསྟན་པ་
དང༌། མིང་ལུང་བསྟན་པས་བདུད་ཀྱི་ལས་སུ་རིག་པར་བྱའོ། །རབ་འབྱོར། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་མིང་བསྟན་པ་དང༌། མིང་ལུང་བསྟན་པས་བདུད་ཀྱི་ལས་སུ་
རིག་པར་བྱ་ཞེ་ན། རབ་འབྱོར། འདི་ལ་བདུད་སྡིག་ཅན་དགེ་སློང་གི་ཆ་བྱད་དུ་འོངས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལ་འདི་སྐད་དུ་ལུང་སྟོན་ཏེ། དེས་གང་སེམས་ཀྱིས་ཨེ་
མ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པའི་མིང་ནི། འདི་ཞེས་བྱ་བར་གྱུར་ཅིག་ཅེས་མིང་གི་རྗེས་སུ་འབྲང་ལ་སེམས་ཀྱིས་རྗེས་སུ་
བརྟགས་ཤིང་རྗེས་སུ་དཔྱད་པ་བཞིན་དུ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་མིང་ནི། འདི་ཞེས་བྱ་བ་དེ་ལྟ་བུར་འགྱུར་རོ། །ཞེས་དེ་
༄༅། །ཉིད་ཀྱི་མིང་ལུང་སྟོན་ཏོ། །དེ་ལ་བྱང་ཆུབ་སེམས་དཔའ་ཤེས་རབ་འཆལ་པའི་རང་བཞིན་ཅན་ཐབས་ལ་མི་མཁས་པ་འདི་སྙམ་དུ་སེམས་ཏེ། ཇི་ལྟར་བདག་གིས་
ཨེ་མ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་མིང་ནི། འདི་ཞེས་བྱ་བར་གྱུར་ཅིག་ཅེས་མིང་གི་རྗེས་སུ་འབྲང་ལ་རྗེས་སུ་བརྟགས་
ཤིང་རྗེས་སུ་དཔྱད་པ་དེ་ལྟར་དགེ་སློང་འདིས་བསྟན་ཏོ། །སྙམ་ཞིང༌། དེས་འདི་ལྟར་བདག་གིས་རྗེས་སུ་བསམས་པའི་མིང་གང་ཡིན་པ་དང༌། བདུད་སྡིག་ཅན་དེ་ཉིད་དམ། བདུད་ཀྱི་རིས་ཀྱི་
ལྷ་དག་གིས་མངོན་པར་སྤྲུལ་པ་དང༌། བདུད་ཀྱིས་བྱིན་གྱིས་བརླབས་པའི་དགེ་སློང་གིས་མིང་གང་བརྗོད་པ་དེ་གཉིས་ག་ལ་ཇི་ལྟར་བདག་གི་སེམས་བསྐྱེད་པ་བྱུང་བ་དང༌། དགེ་སློང་འདིས་བདག་
གི་མིང་ཇི་སྐད་དུ་བསྟན་པ་གཉིས་མིང་མཚུངས་སོ། །ཞེས་བརྟགས་ནས་བདག་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་མིང་གིས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །སྙམ་དུ་སེམས་པར་འགྱུར་ཞིང༌། རབ་འབྱོར། ངས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་
གི་རྣམ་པ་དང༌། རྟགས་དང༌། མཚན་མ་གང་དག་བསྟན་པ་དེ་དག་དེ་ལ་མེད་ཅིང༌། དེ་དག་དང་བྲལ་བར་གྱུར་ལ། མིང་བསྟན་པ་དང༌། མིང་ལུང་བསྟན་པ་དེས་དེ་རློམ་སེམས་སྐྱེད་པར་
འགྱུར་ཞིང༌། དེས་རློམ་སེམས་བསྐྱེད་ནས་བདག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་གྱི། འདི་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་
བསྟན་ཏོ། །ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ལ་བརྙས་པར་བྱེད་དོ། །དེ་ལྟར་བརྙས་པའི་སེམས་དེ་དང༌། ང་རྒྱལ་དང༌། ཆེ་བའི་ང་རྒྱལ་དང༌། ང་རྒྱལ་ལས་ཀྱང་
ང་རྒྱལ་དང༌། ལོག་པའི་ང་རྒྱལ་དང༌། མངོན་པའི་ང་རྒྱལ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ལ་བརྙས་པས་ཐམས་ཅད་མཁྱེན་པ་ཉིད་རྒྱང་རིང་དུ་བྱེད་ཅིང༌། སངས་
རྒྱས་ཀྱི་ཡེ་ཤེས་རྒྱང་རིང་དུ་བྱེད་པར་འགྱུར་རོ། །དེ་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་བཟུང་ཞིང་ཐབས་མཁས་པ་དང་བྲལ་བ། དགེ་བའི་བཤེས་གཉེན་དང་བྲལ་བ། སྡིག་པའི་
གྲོགས་པོས་ཡོངས་སུ་ཟིན་པ་དེས་ཉན་ཐོས་ཀྱི་སའམ། རང་སངས་རྒྱས་ཀྱི་སའམ། ས་གཉིས་པོ་དེ་ལས་ས་གང་ཡང་རུང་བ་གཅིག་ཏུ་རེ་བར་བྱའོ། །གལ་ཏེ་ཡང་ཡུན་རིང་མོ་དང༌། ཤིན་ཏུ་
ཡུན་རིང་མོར་སྦྱངས་ཤིང་དུལ་བར་གྱུར་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པར་
གྱུར་ལ། གལ་ཏེ་དེ་དགེ་བའི་བཤེས་གཉེན་དག་ལ་བརྟེན་ཅིང་དགེ་བའི་བཤེས་གཉེན་དག་གི་ཐད་དུ་རྟག་པར་འགྲོ་བར་གྱུར་ན། ལུས་ཡོངས་སུ་གྲུབ་པ་དེ་ཉིད་ཀྱིས་སེམས་བསྐྱེད་པ་དེ་
༄༅། །དག་ལ་རྣམ་པར་སྨོད་པར་འགྱུར། བྱང་བར་བྱེད་པར་འགྱུར། གནོད་པར་འགྱུར། འདོར་བར་འགྱུར། སོ་སོར་འཆགས་པར་འགྱུར་བ་དེ་ལྟ་ནའང་དེའི་སངས་
རྒྱས་ཀྱི་ས་རྙེད་པར་དཀའ་བར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོའི་རློམ་སེམས་ཀྱི་ལྟུང་བའི་གནས་ནི། འདི་སྙེད་དུ་ཆེས་ལྕི་སྟེ། རབ་
འབྱོར༑ འདི་ལྟ་སྟེ། དཔེར་ན། དགེ་སློང་ཉན་ཐོས་ཀྱི་ཐེག་པ་ཅན་གྱི་ཉན་ཐོས་ཀྱི་རྩ་བའི་ལྟུང་བ་བཞི་ལྕི་བ་ཡིན་ཏེ། དེ་ལས་ལྟུང་བ་གཞན་དང་གཞན་གང་ཡང་རུང་བ་འགའ་ཞིག་བྱུང་
ན༑ དགེ་སློང་མ་ཡིན། དགེ་སྦྱོང་མ་ཡིན། ཤཱཀྱའི་སྲས་པོ་མ་ཡིན་ནོ། །ལྟུང་བ་བཞི་པོ་དེ་དག་པས་ཀྱང་རློམ་སེམས་དང༌། བརྙས་པའི་སེམས་བསྐྱེད་པ་དེ་ཆེས་ལྕི་སྟེ། འདི་ལྟ་སྟེ། བྱང་
ཆུབ་སེམས་དཔའ་སེམས་དཔའ་ཆེན་པོའི་མིང་ལུང་བསྟན་པ་ལས་བརྙས་པའི་མི་དགེ་བ་ཆེན་པོའི་སེམས་བསྐྱེད་པ་བྱུང་བ་འདི་ནི། ལྟུང་བ་དེ་དག་པས་སེམས་བསྐྱེད་པ་ཆེས་ལྕི་བར་རིག་
པར་བྱའོ། །རབ་འབྱོར། རྩ་བའི་ལྟུང་བ་བཞི་པོ་ལྟ་ཞོག་གི །རབ་འབྱོར། མཚམས་མེད་པའི་ལས་ལྔ་པོ་དེ་དག་པས་ཀྱང་གང་འདི་བྱང་ཆུབ་སེམས་དཔའ་སེམས་དཔའ་ཆེན་པོའི་མིང་
ལུང་སྟོན་པས་རློམ་སེམས་དང་ལྡན་པའི་སེམས་བསྐྱེད་པ་བྱུང་བའི་སེམས་བསྐྱེད་པ་འདི་ནི། ཆེས་ལྕི་སྟེ། མཚམས་མེད་པའི་ལས་ལྔ་པོའི་ལྟུང་བ་དེ་དག་པས་ཀྱང་སེམས་བསྐྱེད་པ་འདི་
ཆེས་ལྕི་བར་རིག་པར་བྱའོ། །རབ་འབྱོར། དེ་ལྟར་མིང་བསྟན་པ་དེ་ལྟ་བུས་ཀྱང་བདུད་ཀྱི་ལས་ཕྲ་མོ་ཕྲ་བ་དག་འབྱུང་བར་འགྱུར་ཏེ། དེ་དག་བྱང་ཆུབ་སེམས་དཔའ་སེམས་དཔའ་ཆེན་པོས་རྟོགས་
པར་བྱའོ། །རྟོགས་ནས་རྣམ་པར་སྤང་བར་བྱ་ཞིང༌། གཞན་དག་ཀྱང་ཁོང་དུ་ཆུད་པར་བྱེད་དུ་གཞུག་ཅིང་སྤོང་དུ་གཞུག་གོ། །རབ་འབྱོར། གཞན་ཡང་བདུད་སྡིག་ཅན་བྱང་ཆུབ་སེམས་དཔའ་སེམས་
དཔའ་ཆེན་པོའི་དྲུང་དུ་འོངས་ནས་དབེན་པའི་ཡོན་ཏན་གྱིས་བསྐུལ་ཞིང་དྲན་པར་བྱེད་དོ། །རབ་འབྱོར། ཇི་ལྟར་བདུད་སྡིག་ཅན་བྱང་ཆུབ་སེམས་དཔའ་སེམས་དཔའ་ཆེན་པོའི་དྲུང་དུ་འོངས་ནས་
དབེན་པའི་ཡོན་ཏན་གྱིས་བསྐུལ་ཞིང་དྲན་པར་བྱེད་ཅེ་ན། རབ་འབྱོར། འདི་ལ་བདུད་སྡིག་ཅན་བྱང་ཆུབ་སེམས་དཔའ་སེམས་དཔའ་ཆེན་པོའི་དྲུང་དུ་འོངས་ཞིང་འོངས་ནས་འདི་སྐད་དུ། དེ་བཞིན་
གཤེགས་པ་ནི། དབེན་པའི་བསྔགས་པ་གསུང་གི །དགོན་པ་དང༌། ནགས་འདབས་དང༌། རིའི་ཕུག་དང༌། དུར་ཁྲོད་དང༌། སོག་མའི་ཕུང་པོ་ལ་སོགས་པའི་ནང་དུ་གནས་པར་བྱའོ། །ཞེས་ཟེར་ཏེ།
རབ་འབྱོར། འདི་ལྟ་སྟེ། དགོན་པ་དང༌། བས་མཐའ་དང༌། ཡུལ་མི་མེད་པ་དང༌། ནགས་འདབས་དང༌། རིའི་ཕུག་དང༌། དུར་ཁྲོད་དང༌། སོག་མའི་ཕུང་པོ་ལ་སོགས་པའི་གནས་མལ་སྣ་ཚོགས་ནི།
བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པའོ། །ཞེས་ང་མི་སྨྲའོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་གལ་ཏེ་དགོན་པ་དང༌། བས་མཐའ་དང༌། ཡུལ་མི་མེད་པ་དང༌།
༄༅། །ནགས་འདབས་དང༌། རིའི་ཕུག་དང༌། དུར་ཁྲོད་དང༌། སོག་མའི་ཕུང་པོ་ལ་སོགས་པའི་གནས་མལ་སྣ་ཚོགས་ན་གནས་པ་ལས། བྱང་ཆུབ་སེམས་དཔའ་
སེམས་དཔའ་ཆེན་པོའི་དབེན་པ་གཞན་གང་ལགས། བཅོམ་ལྡན་འདས། ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པ་གཞན་ཇི་ལྟ་བུ་ལགས། དེ་སྐད་ཅེས་གསོལ་པ་དང༌།
བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཉན་ཐོས་དང་ལྡན་པའི་ཡིད་ལ་བྱེད་པ་
དག་གིས་དབེན་པར་གྱུར། རང་སངས་རྒྱས་དང་ལྡན་པའི་ཡིད་ལ་བྱེད་པ་དག་གིས་དབེན་པར་གྱུར་ན། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་དབེན་པར་གནས་པ་ཡིན་
ནོ༑ ༑དེ་གྲོང་གི་ནང་ན་གནས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་དང༌། སེམས་ཅན་ཐམས་ཅད་ལ་བྱམས་པ་དང༌། སྙིང་རྗེ་ཆེན་པོའི་གནས་པས་གནས་ཏེ། གནས་པ་
འདིས་གནས་པ་དེ་ནི། དབེན་པ་ཉིད་དུ་གནས་པ་ཡིན་ནོ། །རབ་འབྱོར། ཡང་ངས་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཉན་ཐོས་དང་རང་སངས་རྒྱས་དང་ལྡན་པའི་ཡིད་ལ་བྱེད་པ་དག་
གིས་དབེན་པ་འདི་གནང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དབེན་པ་འདིས་གནས་པས་ཉིན་མཚན་འདའ་བར་བྱེད་ན། དབེན་པར་གནས་པ་ཡིན་ནོ། །གལ་ཏེ་བྱང་ཆུབ་སེམས་
དཔའ་སེམས་དཔའ་ཆེན་པོ་དགོན་པ་དང༌། ནགས་འདབས་དང༌། རིའི་ཕུག་དང༌། དུར་ཁྲོད་དང༌། བས་མཐའི་གནས་མལ་དག་ན་གནས་པ་འདིས་གནས་ན། བྱང་ཆུབ་སེམས་དཔའ་སེམས་དཔའ་
ཆེན་པོ་དབེན་པར་གནས་པ་ཡིན་ནོ། །རབ་འབྱོར། གང་ཡང་བདུད་སྡིག་ཅན་གྱིས་དགོན་པ་དང༌། ནགས་འདབས་དང༌། རིའི་ཕུག་དང༌། དུར་ཁྲོད་དང༌། བས་མཐའི་གནས་མལ་དུ་གནས་པའི་
དབེན་པ་ཉེ་བར་བསྟན་པའི་དབེན་པ་དེས་དེ་ཉན་ཐོས་དང་རང་སངས་རྒྱས་དང་ལྡན་པའི་ཡིད་ལ་བྱེད་པ་དག་དང་འདྲེས་པ་ཉིད་དུ་གྱུར་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མངོན་པར་མི་བརྩོན་ཞིང་
ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་མི་བྱེད་དེ། དེ་ལྟར་འདྲེས་པར་གནས་པས་གནས་ཤིང༌། དེ་ལྟར་ཡིད་ལ་བྱེད་པ་ཡོངས་སུ་མ་དག་པས་གནས་པས་ལུས་དང༌། ངག་དང༌། ཡིད་
ཀྱི་ལས་ཀྱི་མཐའ་ཡོངས་སུ་མ་དག་པར་འགྱུར་རོ། །ལུས་དང༌། ངག་དང༌། ཡིད་ཀྱི་ལས་ཀྱི་མཐའ་ཡོངས་སུ་མ་དག་པས་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་མ་ཡིན་པ་གཞན་དག་གྲོང་
གི་ནང་ན་གནས་ཀྱང་ཉན་ཐོས་དང་རང་སངས་རྒྱས་དང་ལྡན་པའི་ཡིད་ལ་བྱེད་པ་དག་དང་མ་འདྲེས་ཤིང༌། ཤེས་རབ་དང༌། ཐབས་དང༌། སྙིང་རྗེ་ཆེན་པོ་ལ་གནས་པས་གནས་པ་དག་ལ་བརྙས་པར་
སེམས་ཤིང༌། དགོན་པ་ན་གནས་ཀྱང་དེའི་ལུས་དང༌། ངག་དང༌། ཡིད་ཀྱི་ལས་ཀྱི་མཐའ་ཡོངས་སུ་མ་དག་ཅིང་འདྲེས་པར་གནས་པ་ཉིད་ལ་གནས་པར་འགྱུར་ཏེ། དབེན་པར་གནས་པ་མ་ཡིན་ལ།
༄༅། །ཤེས་རབ་དང༌། ཐབས་དང༌། སྙིང་རྗེ་ཆེན་པོ་ལ་གནས་པས་གནས་པ། གྲོང་ན་གནས་པ་ལུས་དང༌། ངག་དང༌། ཡིད་ཀྱི་ལས་ཡོངས་སུ་དག་པར་སྤྱོད་པ། ཉན་
ཐོས་དང་རང་སངས་རྒྱས་དང་ལྡན་པའི་ཡིད་ལ་བྱེད་པ་དག་གིས་དབེན་པར་གྱུར་པ། ཉན་ཐོས་དང་རང་སངས་རྒྱས་དང་ལྡན་པའི་ཡིད་ལ་བྱེད་པ་དག་དང་མ་འདྲེས་པ་དེ་དག་ལ་དེས་བརྙས་
པས་བསམ་གཏན་དང༌། ཏིང་ངེ་འཛིན་དང༌། སྙོམས་པར་འཇུག་པ་དང༌། རྣམ་པར་ཐར་པ་དང༌། མངོན་པར་ཤེས་པ་རྣམས་ཐོབ་པར་མི་འགྱུར་ཞིང༌། དེའི་དེ་དག་ཡོངས་སུ་རྫོགས་པར་མི་
འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་ཐབས་མི་མཁས་པ་ཡིན་པའི་ཕྱིར་རོ། །རབ་འབྱོར། གང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འབྲོག་དགོན་པ་དཔག་ཚད་བརྒྱ་པ།
གཅན་གཟན་དང༌། རི་དྭགས་དང༌། བྱའི་ཚོགས་མེད་པ། རི་དྭགས་དང༌། གཅན་གཟན་ཕྲ་མོ་དང༌། གནོད་སྦྱིན་དང༌། སྲིན་པོ་རྗེས་སུ་རྒྱུ་བ་མེད་པ། ཆོམ་རྐུན་མེད་པའི་དགོན་པ་འཇིགས་
པ་མི་བཟད་པ་དང༌། འཚེ་བ་མེད་པ་དག་ན་ལོའམ། ལོ་བརྒྱའམ། ལོ་སྟོང་ངམ། ལོ་བྱེ་བའམ། ལོ་བྱེ་བ་བརྒྱའམ། ལོ་བྱེ་བ་སྟོང་ངམ། ལོ་བྱེ་བ་བརྒྱ་སྟོང་ངམ། ལོ་བྱེ་བ་ཁྲག་ཁྲིག་
བརྒྱ་སྟོང་ངམ། དེ་བས་ཀྱང་ལྷག་པར་གནས་ཤིང༌། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དབེན་པ་གང་དུ་ལྷག་པའི་བསམ་པས་ཡང་དག་པར་ཞུགས་ཤིང་ལྷག་པའི་བསམ་པ་
ཕུན་སུམ་ཚོགས་པས་གནས་པ་ངས་བསྟན་པའི་དབེན་པ་འདི་མི་ཤེས་ན། བྱང་ཆུབ་སེམས་དཔའ་ཐབས་མི་མཁས་པ་དེ། མི་ཤེས་པས་དགོན་པ་ལྷུར་བྱེད་ཅིང་གནས་ཏེ། དབེན་པ་དེ་ལ་བརྟེན་པ་དང༌།
ཞེན་པ་དང༌། ཆགས་པ་དང༌། ལྷག་པར་ཆགས་པ་དང་ལྡན་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེས་དེ་ཙམ་གྱིས་ངའི་སེམས་མགུ་བར་བྱས་པ་མ་ཡིན་ནོ། །དེ་ཅིའི་ཕྱིར་ཞེ་
ན༑ རབ་འབྱོར། དབེན་པ་འདིས་གནས་པ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དབེན་པར་ངས་བསྟན་པ་གང་ཡིན་པའི་དབེན་པ་དེ་ལ་མི་སྣང་ངོ༌། །དེ་ལྟར་བདུད་སྡིག་ཅན་འོངས་
ནས་སྟེང་གི་བར་སྣང་གི་ནམ་མཁའ་ལ་འདུག་སྟེ་དེ་ལ་འདི་སྐད་དུ། རིགས་ཀྱི་བུ། ལེགས་སོ། ལེགས་སོ། །དེ་བཞིན་གཤེགས་པས་བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པ་
བསྟན་པ་ནི། འདི་ཡིན་ཏེ། རིགས་ཀྱི་བུ། ཁྱོད་དབེན་པ་འདི་ཉིད་ཀྱིས་གནས་པར་གྱིས་ཤིག་དང༌། དེ་ལྟར་ན། རིགས་ཀྱི་བུ། ཁྱོད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བར་འགྱུར་རོ། །ཞེས་སྨྲ་བར་འགྱུར་ཞིང༌། དེ་ཡང་དགོན་པའི་དབེན་པ་དེས་གྲོང་གི་ནང་དུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དེས་པ། དགེ་སློང་
ཚངས་པར་སྤྱོད་པ་དང་བཅས་པ། དགེ་བའི་ཆོས་ཅན། ཉན་ཐོས་དང་རང་སངས་རྒྱས་དང་ལྡན་པའི་ཡིད་ལ་བྱེད་པ་དག་དང་མ་འདྲེས་པ། ལུས་དང་ངག་དང་ཡིད་ཀྱི་ལས་ཀྱི་མཐའ་དང༌། འཚོ་བ་
༄༅། །ཡོངས་སུ་དག་པ་དག་ལ་བརྙས་པར་བྱེད་ཅིང་དེ་ལ་འདི་སྐད་དུ། ཀྱེ་མ་ཚེ་དང་ལྡན་པ་འདི་དག་ནི། འདྲེས་པར་གནས་པས་གནས་པར་བྱེད་དེ། དབེན་པར་གནས་པ་
མ་ཡིན་ནོ། །ཀྱེ་མ་ཚེ་དང་ལྡན་པ་འདི་དག་ནི། ཀུན་ཏུ་འདྲེས་པར་གནས་པས་གནས་པར་བྱེད་དེ། དབེན་པར་གནས་པས་གནས་པ་མ་ཡིན་ནོ། །ཞེས་སྨྲ་བར་འགྱུར་ཞིང༌། བྱང་ཆུབ་སེམས་
དཔའ་སེམས་དཔའ་ཆེན་པོའི་དབེན་པར་གནས་པས་གནས་པ་གང་ཡིན་པ་དེ་དག་ལ་འདྲེས་པར་གནས་པས་རྩོད་པར་བྱེད། ཀུན་ཏུ་འདྲེས་པར་གནས་པས་རྩོད་པར་བྱེད་པར་འགྱུར་རོ། །གང་
འདྲེས་པར་གནས་པས་གནས་པ་དེ་དག་ལ་ནི། དེ་དབེན་པར་གནས་པས་ཀུན་ཏུ་སྤྱོད་པ་ཡིན་ནོ། །ཞེས་ཟེར་ཅིང༌། དེ་ལ་གུས་པ་སྐྱེད་པར་འགྱུར་ལ། གང་ལ་གུས་པ་བསྐྱེད་པར་འོས་པ་དེ་
ལ་ནི༑ ང་རྒྱལ་སྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། གནས་པ་གང་གིས་བདག་གནས་པ་འདི་དག་ནི། གནས་པ་ཡིན་ཏེ། བདག་ནི། མི་མ་ཡིན་པ་དག་གིས་བསྐུལ་ཅིང༌།
བདག་ནི། མི་མ་ཡིན་པ་དག་གིས་དྲན་པར་བྱས་པ་ཡིན་ན། གྲོང་གི་ནང་ན་གནས་པ་སུ་ཞིག་ལ་མི་མ་ཡིན་པ་དག་སྐུལ་པར་བྱེད། གྲོང་གི་ནང་ན་གནས་པ་སུ་ཞིག་ལ་མི་མ་ཡིན་པ་དག་དྲན་
པར་བྱེད་པར་འགྱུར་སྙམ་ནས་དེ་ལྟར་དེ་གང་ཟག་བྱང་ཆུབ་སེམས་དཔའི་ཐེག་པ་ཅན་དག་ལ་བརྙས་པར་བྱེད་དེ། རབ་འབྱོར། འདི་ནི། བྱང་ཆུབ་སེམས་དཔའ་གདོལ་པར་རིག་པར་བྱའོ། །
བྱང་ཆུབ་སེམས་དཔའ་སུན་འབྱིན་པར་རིག་པར་བྱའོ། །བྱང་ཆུབ་སེམས་དཔའི་གཟུགས་བརྙན་དུ་རིག་པར་བྱའོ། །བྱང་ཆུབ་སེམས་དཔའ་བཅོས་བུར་རིག་པར་བྱའོ། །བྱང་ཆུབ་སེམས་དཔའི་སྲེ་
དར་རིག་པར་བྱ་སྟེ། དགེ་སློང་གི་ཆ་བྱད་དུ་བཅོས་པ་ཆོམ་རྐུན་པའོ། །གང་ཟག་བྱང་ཆུབ་སེམས་དཔའི་ཐེག་པ་ཅན་གྱི་ནང་ན་ཆོམ་རྐུན་པའོ། །ལྷ་དང་བཅས་པའི་འཇིག་རྟེན་གྱི་ཆོམ་རྐུན་པ་
ཡིན་ཏེ༑ རབ་འབྱོར། ཡང་གང་ཟག་དེ་ལྟ་བུའི་རང་བཞིན་ཅན་ནི། བསྙེན་པར་མི་བྱ། གུས་པར་མི་བྱ། བསྙེན་བཀུར་མི་བྱའོ། །དེ་ཅིའི་ཕྱིར་ཞེ་ན། གང་ཟག་དེ་ལྟ་བུ་ནི། མངོན་པའི་ང་རྒྱལ་ཅན་
དུ་ལྷུང་བར་རིག་པར་བྱ་སྟེ། དེ་ལྟ་བུ་འདིས་ཡང་གཞན་མཐུ་ཆུང་བ་ཐེག་པ་ལ་ཞུགས་ནས་རིང་པོར་མ་ལོན་པ་དག་ལ་སུན་འབྱིན་པར་བྱེད་དེ། གང་ཟག་དེ་ལྟ་བུ་ནི། རྣམ་པར་མ་དག་པའི་
ཆོས་ཅན་དུ་རིག་པར་བྱ། གང་ཟག་དེ་ལྟ་བུ་ནི། སློབ་དཔོན་དང་མི་ལྡན་པར་རིག་པར་བྱའོ། །གང་ཟག་དེ་ལྟ་བུ་ནི། འཕགས་པའི་ཆོས་དང་མི་ལྡན་པར་རིག་པར་བྱའོ། །རབ་འབྱོར། ཡང་བྱང་
ཆུབ་སེམས་དཔའ་སེམས་དཔའ་ཆེན་པོ་གང་གིས་སེམས་ཅན་ཐམས་ཅད་ཡོངས་སུ་མ་བཏང༌། ཐམས་ཅད་མཁྱེན་པ་ཉིད་ཡོངས་སུ་མ་བཏང༌། བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཡོངས་སུ་མ་བཏང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་
༄༅། །ཅིང་སེམས་ཅན་ཐམས་ཅད་ཀྱི་དོན་བྱ་བར་འདོད་པ་དེས་གང་ཟག་དེ་ལྟ་བུ་བསྙེན་པར་མི་བྱ། གུས་པར་མི་བྱ། བསྙེན་བཀུར་མི་བྱ་སྟེ། རབ་འབྱོར། འོན་ཀྱང་འདི་
ལྟར་སེམས་ཅན་ཐམས་ཅད་ཀྱི་དོན་དུ་མངོན་པར་བརྩོན་པས་བདུད་ཀྱི་ལས་དེ་དག་དང༌། གཞན་ཡང་ཤེས་པར་བྱ་བའི་ཕྱིར་རྟག་ཏུ་སེམས་སྐྱོ་བར་བྱའོ། །ལམ་མ་ཐོབ་པའི་སེམས་ཅན་ཐམས་ཅད་
ལ་ལམ་ཉེ་བར་བསྟན་པའི་དོན་དུ་ཡིད་མི་སྐྲག་པ་དང༌། ཁམས་གསུམ་པ་དང་མ་འདྲེས་པར་བྱ་སྟེ། དེར་ཡང་རེ་ཞིག་བྱམས་པའི་ཡིད་དང༌། སྙིང་རྗེའི་ཡིད་ཀྱིས་སྙིང་རྗེ་ཆེན་པོ་བསྐྱེད་དེ་སྙིང་བརྩེ་
བ་ཉེ་བར་བཟུང་ནས་ཡང་དག་པར་ཞུགས་པའི་སེམས་ཅན་རྣམས་ལ་དགའ་བའི་སེམས་དང༌། མི་དམིགས་པའི་ཆོས་ཉིད་ཀྱིས་ཆོས་རྣམས་ལ་བཏང་སྙོམས་པས་འདི་ལྟར་ཅི་ནས་བདུད་ཀྱི་ལས་
ཀྱི་ཉེས་པ་ཐམས་ཅད་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་གཏན་མི་འབྱུང་མི་སྐྱེ་བ་དེ་ལྟར་བྱ་ཞིང༌། གལ་ཏེ་དེ་ལྟ་བུ་བྱུང་ནའང་མྱུར་དུ་སྤང་བ་དེ་ལྟར་སློབ་བོ། །ཞེས་
སེམས་བསྐྱེད་པར་བྱ་སྟེ། འདིའང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རང་གི་མངོན་པར་ཤེས་པས་ཕ་རོལ་གནོན་པ་ཡིན་པར་རིག་པར་བྱ་སྟེ། རབ་འབྱོར། འདིའང་བྱང་ཆུབ་སེམས་
དཔའ་སེམས་དཔའ་ཆེན་པོས་དབེན་པའི་ཡོན་ཏན་གྱིས་བདུད་ཀྱི་ལས་སུ་རིག་པར་བྱའོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། བདུད་ཀྱི་ལས་ཀྱི་ལེའུ་ཞེས་བྱ་སྟེ།
ཉི་ཤུ་རྩ་གཅིག་པའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་བཅུ་དགུ་པ། དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་བཀའ་
སྩལ་པ༑ རབ་འབྱོར། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་བསམ་པ་ལ་ཡང་དག་པར་ཞུགས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
འཚང་རྒྱ་བར་འདོད་པས། དང་པོ་ཉིད་དུ་དགེ་བའི་བཤེས་གཉེན་དག་ལ་བསྟེན་པར་བྱ། གུས་པར་བྱ། བསྙེན་བཀུར་བྱའོ། །རབ་འབྱོར་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་
དཔའ་སེམས་དཔའ་ཆེན་པོ་ལྷག་པའི་བསམ་པ་ལ་ཡང་དག་པར་ཞུགས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བས། དང་པོ་ཁོ་ནར་
དགེ་བའི་བཤེས་གཉེན་གང་དག་ལ་བསྙེན་པར་བགྱི་བ་དང༌། གུས་པར་བགྱི་བ་དང༌། བསྙེན་བཀུར་བགྱི་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་བའི་བཤེས་གཉེན་དེ་དག་གང་
ལགས་པར་འཚལ་བར་བགྱི། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། སངས་རྒྱས་བཅོམ་ལྡན་འདས་
ཉིད་དང༌། ཕྱིར་མི་ལྡོག་པར་གྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཡིན་པ་བྱང་ཆུབ་སེམས་དཔའི་སྤྱོད་པ་ལ་མཁས་པ་གང་དག་ཕ་རོལ་ཏུ་ཕྱིན་པ་འདི་དག་ལེགས་པར་འདོམས་
༄༅། །ཤིང་རྗེས་སུ་སྟོན་པ་དེ་དག་དང༌། གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སྟོན་ཅིང་ཉེ་བར་སྟོན་པ་དེ་དག་ནི། རབ་འབྱོར། བྱང་ཆུབ་སེམས་དཔའ་སེམས་
དཔའ་ཆེན་པོའི་དགེ་བའི་བཤེས་གཉེན་དུ་རིག་པར་བྱའོ། །རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་བའི་བཤེས་གཉེན་དུ་རིག་
པར་བྱའོ། །རབ་འབྱོར། ཕ་རོལ་ཏུ་ཕྱིན་པ་དྲུག་པོ་ཐམས་ཅད་ཉིད་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་བའི་བཤེས་གཉེན་དུ་རིག་པར་བྱ་སྟེ། ཕ་རོལ་ཏུ་ཕྱིན་པ་དྲུག་པོ་ཉིད་
ནི༑ སྟོན་པའོ། །ཕ་རོལ་ཏུ་ཕྱིན་པ་དྲུག་ནི། ལམ་མོ། །ཕ་རོལ་ཏུ་ཕྱིན་པ་དྲུག་ནི། སྣང་བའོ། །ཕ་རོལ་ཏུ་ཕྱིན་པ་དྲུག་ནི། སྒྲོན་མའོ། །ཕ་རོལ་ཏུ་ཕྱིན་པ་དྲུག་ནི། འོད་དོ། །ཕ་རོལ་ཏུ་ཕྱིན་པ་དྲུག་
ནི༑ སྐྱོབ་པའོ། །ཕ་རོལ་ཏུ་ཕྱིན་པ་དྲུག་ནི། སྐྱབས་སོ། །ཕ་རོལ་ཏུ་ཕྱིན་པ་དྲུག་ནི། གནས་སོ། །ཕ་རོལ་ཏུ་ཕྱིན་པ་དྲུག་ནི། དཔུང་གཉེན་ནོ། །ཕ་རོལ་ཏུ་ཕྱིན་པ་དྲུག་ནི། གླིང་ངོ༌། །ཕ་རོལ་ཏུ་ཕྱིན་
པ་དྲུག་ནི། མའོ། །ཕ་རོལ་ཏུ་ཕྱིན་པ་དྲུག་ནི། ཕའོ། །ཕ་རོལ་ཏུ་ཕྱིན་པ་དྲུག་ནི། ཤེས་པ་དང༌། རྟོགས་པ་དང༌། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་བྱ་བའི་དོན་དུ་གནས་པར་
གྱུར་པའོ། །དེ་ཅིའི་ཕྱིར་ཞེ་ན། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། འདི་ལ་བརྟེན་པ་ཡིན་ཏེ། འདི་ལྟ་སྟེ། ཕ་རོལ་ཏུ་ཕྱིན་པ་དྲུག་པོ་རྣམས་ལའོ། །རབ་འབྱོར། འདས་པའི་དུས་
ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཡོངས་སུ་མྱ་
ངན་ལས་འདས་པའི་སངས་རྒྱས་བཅོམ་ལྡན་འདས་དེ་དག་གི་ཐམས་ཅད་མཁྱེན་པ་ཉིད་ཀྱང་འདི་ལྟ་སྟེ། ཕ་རོལ་ཏུ་ཕྱིན་པ་དྲུག་པོ་འདི་དག་ལས་སྐྱེས་སོ། །རབ་འབྱོར། མ་འོངས་པའི་དུས་ན་འབྱུང་
བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བའི་སངས་
རྒྱས་བཅོམ་ལྡན་འདས་དེ་དག་གི་ཐམས་ཅད་མཁྱེན་པ་ཉིད་ཀྱང་འདི་ལྟ་སྟེ། ཕ་རོལ་ཏུ་ཕྱིན་པ་དྲུག་པོ་འདི་དག་ལས་སྐྱེའོ། །རབ་འབྱོར། འཇིག་རྟེན་གྱི་ཁམས་གཞལ་དུ་མེད་གྲངས་མེད་དཔག་
དུ་མེད་བསམ་གྱིས་མི་ཁྱབ་པ་དག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་ད་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་ནས་བཞུགས་ཏེ་འཚོ་ཞིང་གཞེས་ལ་ཆོས་སྟོན་པའི་སངས་རྒྱས་བཅོམ་ལྡན་འདས་དེ་དག་གི་ཐམས་ཅད་མཁྱེན་པ་ཉིད་ཀྱང་འདི་ལྟ་སྟེ། ཕ་རོལ་ཏུ་ཕྱིན་པ་དྲུག་པོ་འདི་
དག་ལས་སྐྱེས་སོ། །རབ་འབྱོར། ད་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
༄༅། །སངས་རྒྱས་པའི་ངའི་ཐམས་ཅད་མཁྱེན་པ་ཡང་རབ་འབྱོར། འདི་ལྟ་སྟེ། ཕ་རོལ་ཏུ་ཕྱིན་པ་དྲུག་པོ་འདི་དག་ལས་སྐྱེས་སོ། །དེ་ཅིའི་ཕྱིར་ཞེ་ན། རབ་འབྱོར། ཕ་
རོལ་ཏུ་ཕྱིན་པ་དྲུག་པོ་འདི་དག་གི་ནང་ན་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་རྣམས་འདུས་ཤིང༌། ཚངས་པའི་གནས་བཞི་དང༌། བསྡུ་བའི་དངོས་པོ་བཞི་དང༌། སངས་རྒྱས་ཀྱི་
ཆོས་ཇི་སྙེད་ཡོད་པ་སྟེ། སངས་རྒྱས་ཀྱི་ཡེ་ཤེས་དང༌། རང་བྱུང་གི་ཡེ་ཤེས་དང༌། བསམ་གྱིས་མི་ཁྱབ་པའི་ཡེ་ཤེས་དང༌། གཞལ་དུ་མེད་པའི་ཡེ་ཤེས་དང༌། གྲངས་མེད་པའི་ཡེ་ཤེས་
དང༑ མཉམ་པ་མེད་པའི་ཡེ་ཤེས་དང༌། མི་མཉམ་པ་དང་མཉམ་པའི་ཡེ་ཤེས་དང༌། ཐམས་ཅད་མཁྱེན་པའི་ཡེ་ཤེས་དེ་དག་ཐམས་ཅད་ཕ་རོལ་ཏུ་ཕྱིན་པ་དྲུག་གི་ནང་ན་འདུས་པའི་
ཕྱིར་རོ༑ ༑རབ་འབྱོར། དེ་ལྟ་བས་ན། ཕ་རོལ་ཏུ་ཕྱིན་པ་དྲུག་པོ་འདི་དག་ཉིད་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་བའི་བཤེས་གཉེན་ནོ། །ཕ་རོལ་ཏུ་ཕྱིན་པ་དྲུག་པོ་འདི་
ཉིད་སྟོན་པའོ། །ཕ་རོལ་ཏུ་ཕྱིན་པ་དྲུག་ནི། ལམ་མོ། །ཕ་རོལ་ཏུ་ཕྱིན་པ་དྲུག་ནི། སྣང་བའོ། །ཕ་རོལ་ཏུ་ཕྱིན་པ་དྲུག་ནི། སྒྲོན་མའོ། །ཕ་རོལ་ཏུ་ཕྱིན་པ་དྲུག་ནི། འོད་དོ། །ཕ་རོལ་ཏུ་ཕྱིན་
པ་དྲུག་ནི། སྐྱོབ་པའོ། །ཕ་རོལ་ཏུ་ཕྱིན་པ་དྲུག་ནི། སྐྱབས་སོ། །ཕ་རོལ་ཏུ་ཕྱིན་པ་དྲུག་ནི། གནས་སོ། །ཕ་རོལ་ཏུ་ཕྱིན་པ་དྲུག་ནི། དཔུང་གཉེན་ནོ། །ཕ་རོལ་ཏུ་ཕྱིན་པ་དྲུག་ནི། གླིང་ངོ༌། །
ཕ་རོལ་ཏུ་ཕྱིན་པ་དྲུག་ནི། མའོ། །ཕ་རོལ་ཏུ་ཕྱིན་པ་དྲུག་ནི། ཕའོ། །ཕ་རོལ་ཏུ་ཕྱིན་པ་དྲུག་ནི། ཤེས་པ་དང༌། རྟོགས་པ་དང༌། ཐམས་ཅད་མཁྱེན་པ་ཉིད་དང༌། བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཐོབ་པར་བྱ་བའི་དོན་དུ་གནས་པར་འགྱུར་བའོ། །ནམ་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་སློབ་པ་ན་ལན་ལྡོན་མི་ནུས་པའི་སེམས་ཅན་ཐམས་ཅད་ལ་
ཡང་དེ་ཕན་འདོགས་པར་འགྱུར་བ་ཡིན་ནོ། །རབ་འབྱོར། ཡང་ཕ་རོལ་ཏུ་ཕྱིན་པ་དྲུག་པོ་འདི་དག་ལ་སློབ་པར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་
ཕྱིན་པ་འདི་ཉིད་མཉན་པར་བྱ། གཟུང་བར་བྱ། བཅང་བར་བྱ། བཀླག་པར་བྱ། ཀུན་ཆུབ་པར་བྱ། རབ་ཏུ་གདོན་པར་བྱ། བསྟན་པར་བྱ། ཉེ་བར་བསྟན་པར་བྱ། ལུང་དབོག་པར་བྱ།
ཁ་ཏོན་དུ་བྱ། དོན་དང་ཆོས་དང་ཚུལ་གྱིས་ཉེ་བར་ཡོངས་སུ་བརྟག་པར་བྱ། ཉེ་བར་བསམ་པར་བྱ། འདྲི་བར་བྱ། ཡོངས་སུ་འདྲི་བར་བྱའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་
འདི་ནི༑ ཕ་རོལ་ཏུ་ཕྱིན་པ་དྲུག་པོ་འདི་དག་གི་སྔོན་ངུ་འགྲོ་བའོ། །འདྲེན་པའོ། །རབ་ཏུ་འདྲེན་པའོ། །ཡང་དག་པར་སྟོན་པའོ། །ཀུན་ཏུ་སྟོན་པའོ། །སྐྱེད་པའོ། །མ་མའོ། །དེ་ཅིའི་ཕྱིར་ཞེ་ན། ཤེས་
རབ་ཀྱི་ཕ་རོལ་ཏུ་ཕྱིན་པ་དང་བྲལ་ན། ཕ་རོལ་ཏུ་ཕྱིན་པ་ལྔ་ནི། མི་སྣང་ཞིང༌། ཕ་རོལ་ཏུ་ཕྱིན་པ་ཞེས་བྱ་བའི་མིང་ཡང་ཐོབ་པར་མི་འགྱུར་རོ། །རབ་འབྱོར། དེ་ལྟ་བས་ན། བྱང་ཆུབ་སེམས་
༄༅། །དཔའ་སེམས་དཔའ་ཆེན་པོ་གཞན་གྱི་དྲིང་མི་འཇོག་པར་འགྲོ་བར་འདོད་ཅིང༌། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྱི་དྲིང་མི་འཇོག་པ་ལ་
གནས་པར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བསླབ་པར་བྱའོ། །རབ་འབྱོར་གྱིས་གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་ཉིད་
གང་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཆགས་
པ་མེད་པའི་མཚན་ཉིད་དོ། །རབ་འབྱོར་གྱིས་གསོལ་པ། བཅོམ་ལྡན་འདས། རྣམ་གྲངས་གང་དང༌། ཆགས་པ་མ་མཆིས་པའི་མཚན་ཉིད་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་
མཆིས་པར་འགྱུར་བའི་ཆགས་པ་མ་མཆིས་པའི་མཚན་ཉིད་དེ་ཉིད་ཀྱིས་ཆོས་ཐམས་ཅད་མཆིས་པར་འགྱུར་བའི་རྣམ་གྲངས་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ།
རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། རྣམ་གྲངས་གང་དང༌། ཆགས་པ་མེད་པའི་མཚན་ཉིད་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོད་པར་འགྱུར་བའི་ཆགས་པ་
མེད་པའི་མཚན་ཉིད་དེ་ཉིད་ཀྱིས་ཆོས་ཐམས་ཅད་ཡོད་པར་འགྱུར་བའི་རྣམ་གྲངས་ཡོད་དོ། །དེ་ཅིའི་ཕྱིར་ཞེ་ན། རབ་འབྱོར། ཆོས་ཐམས་ཅད་ནི། དབེན་པའོ། རབ་འབྱོར། ཆོས་ཐམས་
ཅད་ནི༑ སྟོང་པ་སྟེ། རབ་འབྱོར། དེ་ལྟ་བས་ན། ཆགས་པ་མེད་པའི་མཚན་ཉིད་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་དབེན་པ་དང༌། སྟོང་པར་འགྱུར་བའི་ཆགས་པ་མེད་པའི་མཚན་ཉིད་དེ་
ཉིད་ཀྱིས་ཆོས་ཐམས་ཅད་ནི། དབེན་པ་དང༌། སྟོང་པའོ། །རབ་འབྱོར་གྱིས་གསོལ་པ། བཅོམ་ལྡན་འདས། གལ་ཏེ་ཆོས་ཐམས་ཅད་དབེན་པ་དང༌། ཆོས་ཐམས་ཅད་སྟོང་པ་ལགས་ན། བཅོམ་
ལྡན་འདས། ཇི་ལྟར་སེམས་ཅན་རྣམས་ཀུན་ནས་ཉོན་མོངས་པར་རབ་ཏུ་ཤེས་པར་འགྱུར། བཅོམ་ལྡན་འདས། ཇི་ལྟར་སེམས་ཅན་རྣམས་རྣམ་པར་བྱང་བར་རབ་ཏུ་ཤེས་པར་འགྱུར། བཅོམ་ལྡན་
འདས༑ དབེན་པ་ནི། ཀུན་ནས་ཉོན་མོངས་པར་མི་འགྱུར། བཅོམ་ལྡན་འདས། དབེན་པ་ནི། རྣམ་པར་བྱང་བར་མི་འགྱུར་རོ། །བཅོམ་ལྡན་འདས། སྟོང་པ་ནི། ཀུན་ནས་ཉོན་མོངས་པར་མི་འགྱུར།
བཅོམ་ལྡན་འདས། སྟོང་པ་ནི། རྣམ་པར་བྱང་བར་མི་འགྱུར་རོ། །བཅོམ་ལྡན་འདས། དབེན་པའམ། སྟོང་པ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
མི་རྒྱ་ལ༑ བཅོམ་ལྡན་འདས། དབེན་པ་དང༌། སྟོང་པ་ཉིད་ལས་གཞན་ནའང་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའམ། མངོན་པར་རྫོགས་
པར་འཚང་རྒྱ་བར་འགྱུར་བའམ། མངོན་པར་རྫོགས་པར་འཚང་རྒྱ་བའི་ཆོས་དེ་དམིགས་སུ་མ་མཆིས་ན། བཅོམ་ལྡན་འདས། བཤད་པ་འདིའི་དོན་བདག་གིས་ཇི་ལྟར་འཚལ་བར་བགྱི། བཅོམ་
༄༅། །ལྡན་འདས། བསྟན་དུ་གསོལ། བདེ་བར་གཤེགས་པ། བསྟན་དུ་གསོལ། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་
འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་ཇི་སྙམ་དུ་སེམས། སེམས་ཅན་རྣམས་ཡུན་རིང་པོ་ནས་ངར་འཛིན་པ་དང༌། ང་ཡིར་འཛིན་པ་ལ་སྤྱོད་དམ། རབ་འབྱོར་གྱིས་
གསོལ་པ། བཅོམ་ལྡན་འདས། དེ་དེ་བཞིན་ནོ། །བདེ་བར་གཤེགས་པ། དེ་དེ་བཞིན་ཏེ། སེམས་ཅན་རྣམས་ནི། ཡུན་རིང་པོ་ནས་ངར་འཛིན་པ་དང༌། ང་ཡིར་འཛིན་པ་ལ་སྤྱོད་དོ། །བཅོམ་
ལྡན་འདས་ཀྱིས་བཀའ་སྩལ་པ། རབ་འབྱོར། དེ་ཇི་སྙམ་དུ་སེམས། ཅི་ངར་འཛིན་པ་དང༌། ང་ཡིར་འཛིན་པ་སྟོང་པ་ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས། སྟོང་
པ་ལགས་སོ། །བདེ་བར་གཤེགས་པ། སྟོང་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ཇི་སྙམ་དུ་སེམས། ངར་འཛིན་པ་དང༌། ང་ཡིར་འཛིན་པས་
སེམས་ཅན་རྣམས་འཁོར་བ་ན་འཁོར་རམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་དེ་བཞིན་ནོ། །བདེ་བར་གཤེགས་པ། དེ་དེ་བཞིན་ཏེ། ངར་འཛིན་པ་དང༌། ང་ཡིར་
འཛིན་པས་སེམས་ཅན་རྣམས་འཁོར་བ་ན་འཁོར་རོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ལྟར་ན། སེམས་ཅན་རྣམས་ཀུན་ནས་ཉོན་མོངས་པར་རབ་ཏུ་ཤེས་
སོ༑ ༑ཇི་ལྟར་སེམས་ཅན་རྣམས་འཛིན་པ་དང༌། མངོན་པར་ཆགས་པ་དེ་ལྟར་ཀུན་ནས་ཉོན་མོངས་པར་འགྱུར་གྱི། འདི་ལ་སུའང་ཀུན་ནས་ཉོན་མོངས་པར་འགྱུར་བ་ནི། མེད་དོ། །རབ་འབྱོར།
ཇི་ལྟར་འཛིན་པ་མེད་པ་དང༌། མངོན་པར་ཆགས་པ་མེད་པ་དེ་ལྟར་ངར་འཛིན་པ་དང༌། ང་ཡིར་འཛིན་པ་རབ་ཏུ་མི་ཤེས་ཏེ། རབ་འབྱོར། དེ་ལྟར་ན། སེམས་ཅན་རྣམས་རྣམ་པར་བྱང་བར་རབ་
ཏུ་ཤེས་སོ། །ཇི་ལྟར་སེམས་ཅན་རྣམས་ལ་འཛིན་པ་མེད་ཅིང་མངོན་པར་ཆགས་པ་མེད་པ་དེ་ལྟར་རྣམ་པར་བྱང་བར་འགྱུར་གྱི། འདི་ལ་སུའང་རྣམ་པར་བྱང་བར་འགྱུར་བ་ནི། མེད་དོ། །རབ་
འབྱོར༑ བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །རབ་འབྱོར། དེ་ལྟར་ཆོས་ཐམས་ཅད་དབེན་ཞིང༌། ཆོས་ཐམས་ཅད་སྟོང་པ་
ལ་སེམས་ཅན་རྣམས་ཀུན་ནས་ཉོན་མོངས་པ་དང༌། རྣམ་པར་བྱང་བར་རབ་ཏུ་ཤེས་སོ། །རབ་འབྱོར་གྱིས་གསོལ་པ། བཅོམ་ལྡན་འདས། འདི་ལྟར་ཆོས་ཐམས་ཅད་དབེན་ཞིང༌། ཆོས་
ཐམས་ཅད་སྟོང་པ་ལ་སེམས་ཅན་རྣམས་ཀུན་ནས་ཉོན་མོངས་པ་དང༌། རྣམ་པར་བྱང་བའང་རབ་ཏུ་ཤེས་པ་འདི་ནི། ངོ་མཚར་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་
དཔའ་ཆེན་པོ་དེ་ལྟར་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྤྱོད་ན། གཟུགས་ལ་མི་སྤྱོད་དེ། ཚོར་བ་
༄༅། །ལ་མ་ལགས། འདུ་ཤེས་ལ་མ་ལགས། འདུ་བྱེད་རྣམས་ལ་མ་ལགས། རྣམ་པར་ཤེས་པ་ལ་མི་སྤྱོད་དོ། །བཅོམ་ལྡན་འདས། བྱང་ཆུབ་སེམས་དཔའ་
སེམས་དཔའ་ཆེན་པོ་དེ་ལྟར་སྤྱོད་ན། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱིས་མི་བརྫི་བར་འགྱུར་རོ། །བཅོམ་ལྡན་འདས། བྱང་ཆུབ་སེམས་དཔའ་སེམས་
དཔའ་ཆེན་པོ་དེ་ལྟར་སྤྱོད་ན། གང་ཟག་ཉན་ཐོས་ཀྱི་ཐེག་པ་ཅན་དང༌། རང་སངས་རྒྱས་ཀྱི་ཐེག་པ་ཅན་ཐམས་ཅད་ཀྱི་སྤྱོད་པ་ཟིལ་གྱིས་གནོན་ཏེ། ཟིལ་གྱིས་མི་ནོན་པའི་གནས་ཀྱང་
འཐོབ་བོ། །དེ་ཅིའི་སླད་དུ་ཞེ་ན། བཅོམ་ལྡན་འདས། སངས་རྒྱས་ཉིད་དང༌། དེ་བཞིན་གཤེགས་པ་ཉིད་དང༌། རང་བྱུང་ཉིད་དང༌། ཐམས་ཅད་མཁྱེན་པ་ཉིད་ནི། ཟིལ་གྱིས་མི་ནོན་
པ་ལགས་ཏེ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པ་ཡིད་ལ་བགྱིད་པའི་གནས་པ་འདིས་ཀྱང་གནས་ཏེ་ཉིན་
མཚན་འདའ་བར་བགྱིད་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཉེ་བར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
འཚང་རྒྱ་བར་འགྱུར་རོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ།
རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྤྱོད་ན། གཟུགས་
ལ་མི་སྤྱོད་དེ། །དེ་བཞིན་དུ་ཚོར་བ་ལ་མ་ཡིན། འདུ་ཤེས་ལ་མ་ཡིན། འདུ་བྱེད་རྣམས་ལ་མ་ཡིན། རྣམ་པར་ཤེས་པ་ལ་མི་སྤྱོད་དོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་
ལྟར་སྤྱོད་ན། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་དག་གིས་མི་བརྫི་བར་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྤྱོད་ན། གང་ཟག་ཉན་
ཐོས་ཀྱི་ཐེག་པ་ཅན་དང༌། རང་སངས་རྒྱས་ཀྱི་ཐེག་པ་ཅན་ཐམས་ཅད་ཀྱི་སྤྱོད་པ་ཟིལ་གྱིས་གནོན་ཏེ། ཟིལ་གྱིས་མི་ནོན་པའི་གནས་ཀྱང་འཐོབ་པར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། སངས་
རྒྱས་ཉིད་དང༌། དེ་བཞིན་གཤེགས་པ་ཉིད་དང༌། རང་བྱུང་ཉིད་དང༌། ཐམས་ཅད་མཁྱེན་པ་ཉིད་ནི། ཟིལ་གྱིས་མི་ནོན་པའོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་
ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པའི་གནས་པ་འདིས་ཀྱང་གནས་ཏེ་ཉིན་མཚན་འདའ་བར་བྱེད་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཉེ་བར་གྱུར་པ་ཡིན་
ཏེ༑ མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །རབ་འབྱོར། ཡང་གལ་ཏེ་ཛམྦུའི་གླིང་ན་སེམས་ཅན་ཇི་སྙེད་ཡོད་པ་དེ་དག་ཐམས་
༄༅། །ཅད་ཀྱིས་སྔ་ཕྱི་མེད་པར་མིའི་ལུས་ཐོབ་པར་གྱུར་ལ། མིའི་ལུས་ཐོབ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཇི་སྲིད་འཚོའི་བར་དུ་གནས་ཤིང་ཇི་སྲིད་འཚོའི་བར་དུ་གནས་ནས་ཇི་སྲིད་འཚོའི་བར་དུ་དེ་བཞིན་གཤེགས་པ་ཐམས་ཅད་ལ་བཀུར་
སྟིར་བྱེད། བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་ཅིང༌། དེ་བཞིན་དུ་སེམས་ཅན་ཐམས་ཅད་ལ་སྦྱིན་པ་བྱིན་ལ། སྦྱིན་པ་དེའང་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ན། རབ་འབྱོར། དེ་ཇི་སྙམ་དུ་སེམས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དེའི་གཞི་ལས་བསོད་ནམས་མང་དུ་བསྐྱེད་
དམ༑ རབ་འབྱོར་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བས་ཀྱང་བྱང་ཆུབ་
སེམས་དཔའ་སེམས་དཔའ་ཆེན་པོ་གང་ཆུང་ངུ་ན་ཉིན་གཅིག་ཙམ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པས་གནས་ན། རིགས་ཀྱི་བུའམ་རིགས་ཀྱི་བུ་མོ་དེ་
ཆེས་བསོད་ནམས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན། རབ་འབྱོར། ཇི་ལྟ་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་
པས་ཉིན་མཚན་དུ་གནས་པ་དེ་ལྟ་དེ་ལྟར་སེམས་ཅན་ཐམས་ཅད་ཀྱི་སྦྱིན་པའི་གནས་སུ་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། དེ་ནི། འདི་ལྟར་བྱང་ཆུབ་སེམས་དཔའ་སེམས་དཔའ་
ཆེན་པོ་དེའི་བྱམས་པ་དང་ལྡན་པའི་སེམས་དེ་ལྟ་བུ་ནི། སངས་རྒྱས་བཅོམ་ལྡན་འདས་མ་གཏོགས་པར་སེམས་ཅན་གཞན་དག་ལ་མེད་དོ། །དེ་ཅིའི་ཕྱིར་ཞེ་ན། རབ་འབྱོར། དེ་བཞིན་གཤེགས་
པ་ནི༑ གང་ཟག་ཟླ་མེད་པའོ། །རབ་འབྱོར། དེ་བཞིན་གཤེགས་པ་ནི། དཔེ་མེད་པའོ། །རབ་འབྱོར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། བསམ་
གྱིས་མི་ཁྱབ་པའི་ཆོས་རྣམས་དང་ལྡན་པའོ། །རབ་འབྱོར། ཇི་ལྟར་ན། རིགས་ཀྱི་བུའམ་རིགས་ཀྱི་བུ་མོ་དེས་དེ་སྙེད་ཀྱི་བསོད་ནམས་མངོན་པར་སྒྲུབ་ཅེ་ན། རབ་འབྱོར། བྱང་ཆུབ་སེམས་དཔའ་
སེམས་དཔའ་ཆེན་པོ་དེ་ཤེས་རབ་ཇི་ལྟ་བུ་དང་ལྡན་པར་གྱུར་པས་སེམས་ཅན་ཐམས་ཅད་གསད་པར་བྱ་བར་འགྱུར་བ་ལྟ་བུར་མཐོང་སྟེ། དེས་དེའི་ཚེ་ན་སྙིང་རྗེ་ཆེན་པོ་ཡོངས་སུ་བཟུང་བར་
གྱུར་ཅིང༌། དེས་ལྷའི་མིག་གིས་བལྟས་པ་དང་སེམས་ཅན་གཞལ་དུ་མེད། བགྲང་དུ་མེད། ཚད་གཟུང་དུ་མེད། དཔག་ཏུ་མེད་པ་རྣམས་མཚམས་མེད་པའི་ལས་རྣམས་དང་ལྡན་པར་གྱུར་པར་མཐོང་ཞིང༌།
མི་ཁོམ་པར་གྱུར་པ་དང༌། རྣམ་པར་ཉམས་པ་དང༌། ལྟ་བའི་དྲ་བས་ཁེབས་པ་དང༌། ལམ་མ་རྙེད་པ་དང༌། མི་ཁོམ་པར་གྱུར་པ་གཞན་དག་ཀྱང་མཐོང་ལ། དལ་བ་ཆུད་གསོན་པ་དག་མཐོང་
༄༅། །ནས་དེའི་དུས་ན་དེ་སྐྱོ་བ་ཆེན་པོ་སྐྱེས་ཏེ། དེས་སེམས་ཅན་དེ་དག་ཐམས་ཅད་ལ་བྱམས་པ་ཆེན་པོ་དེ་དང༌། སྙིང་རྗེ་ཆེན་པོ་དེས་ཁྱབ་པར་བྱས་ནས་བདག་ནི། སེམས་
ཅན་འདི་དག་ཐམས་ཅད་ཀྱི་མགོན་དུ་གྱུར་པར་བྱ་ཞིང༌། བདག་གིས་སེམས་ཅན་འདི་དག་ཐམས་ཅད་སྡུག་བསྔལ་ལས་ཐར་བར་བྱའོ། །སྙམ་དུ་ཡིད་ལ་བྱས་པར་འགྱུར་བ་དང༌། མཚན་མ་
དེ་དག་གམ། གཞན་དག་ལྷན་ཅིག་མི་གནས་པར་འགྱུར་བའི་ཤེས་རབ་དེ་ལྟ་བུ་དང་ལྡན་པར་འགྱུར་རོ། །རབ་འབྱོར། འདིའང་བྱང་ཆུབ་སེམས་དཔའ་སེམས་དཔའ་ཆེན་པོའི་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་བ་ལ་ཤེས་རབ་ཀྱི་སྣང་བ་ཆེན་པོའོ། །རབ་འབྱོར། འདི་ལྟར་གནས་པས་གནས་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་ནི། འཇིག་རྟེན་ཐམས་ཅད་ཀྱི་སྦྱིན་གནས་སུ་ཡོངས་སུ་འཛིན་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་གོ །སྦྱིན་པ་པོ་དང་སྦྱིན་པའི་བདག་པོ་གང་དག་
གི་ཆོས་གོས་དང༌། བསོད་སྙོམས་དང༌། མལ་ཆ་དང༌། ནད་ཀྱི་གསོས་སྨན་དང༌། ཡོ་བྱད་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སེམས་རབ་ཏུ་ཉེ་བར་བཞག་པས་ཡོངས་སུ་སྤྱོད་ན།
སྦྱིན་པ་པོ་དང་སྦྱིན་པའི་བདག་པོ་རྣམས་ཀྱི་སྦྱིན་པ་དང་ཡོན་རྣམ་པར་སྦྱོང་བས་དེ་དག་ཐམས་ཅད་མཁྱེན་པ་ཉིད་དུ་ཉེ་བར་འགྱུར་རོ། །རབ་འབྱོར། དེ་ལྟ་བས་ན། བྱང་ཆུབ་སེམས་དཔའ་སེམས་
དཔའ་ཆེན་པོ་ཡུལ་འཁོར་གྱི་བསོད་སྙོམས་འབྲས་བུ་ཡོད་པར་ལོངས་སྤྱོད་པར་འདོད་པ་དང༌། སེམས་ཅན་ཐམས་ཅད་ལ་ལམ་སྟོན་པར་འདོད་པ་དང༌། རྒྱ་ཆེར་སྣང་བར་བྱེད་འདོད་པ་དང༌། སེམས་
ཅན་འཁོར་བ་ན་གནས་པ་རྣམས་འཁོར་བ་ལས་ཐར་པར་བྱེད་འདོད་པ་དང༌། སེམས་ཅན་ཐམས་ཅད་ཀྱི་མིག་རྣམ་པར་སྦྱང་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པ་
འདིས་གནས་པར་བྱའོ། །གལ་ཏེ་ཡིད་ལ་བྱེད་པ་འདིས་གནས་པར་འདོད་ན། དེས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པ་ཤེས་པར་བྱའོ། །དེ་ཅིའི་ཕྱིར་ཞེ་ན། གང་ཞིག་འདི་དག་
ཤེས་པར་བྱ་བར་སེམས་པ་དེ་ཉིད་དེའི་ཡིད་ལ་བྱེད་པར་འགྱུར་ཏེ། དེ་ལས་གཞན་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བའི་ཡིད་ལ་བྱེད་པའི་སྐབས་དབྱེ་བར་མི་བྱའོ། །ཇི་ལྟར་འདི་ཤེས་རབ་ཀྱི་ཕ་
རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པས་ཉིན་མཚན་ཟད་པར་འགྱུར་བ་དེ་ལྟར་བྱའོ། །རབ་འབྱོར། འདི་ལྟ་སྟེ། དཔེར་ན། ནོར་བུ་རིན་པོ་ཆེ་ཤེས་པ་ལ་གནས་པའི་སྐྱེས་བུ་འགའ་ཞིག་གིས་
ནོར་བུ་རིན་པོ་ཆེའི་རིགས་ཤེས་པས་སྔོན་མ་རྙེད་པའི་ནོར་བུ་རིན་པོ་ཆེ་ཆེན་པོ་ཞིག་རྙེད་པར་གྱུར་ལ། དེས་ནོར་བུ་རིན་པོ་ཆེ་ཆེན་པོ་དེ་རྙེད་པས་དགའ་བ་དང༌། རབ་ཏུ་དགའ་བ་ཆེ་ཞིང་ཡངས་པ་དང་
ལྡན་པར་གྱུར་པ་ལས། དེའི་ནོར་བུ་རིན་པོ་ཆེ་ཆེན་པོ་དེའང་སྟོར་བ་དང་དེ་དེའི་གཞི་ལས་སྡུག་བསྔལ་བ་དང༌། ཡིད་མི་བདེ་བ་ཆེན་པོ་དང་ལྡན་པར་འགྱུར་ཏེ། དེ་འདི་ལྟར་ཀྱེ་མ་བདག་ནི། ནོར་བུ་
༄༅། །རིན་པོ་ཆེ་ཆེན་པོ་དེ་དང་བྲལ་ལོ། །ཞེས་རྟག་ཏུ་རྒྱུན་མི་ཆད་པར་ནོར་བུ་རིན་པོ་ཆེ་ཆེན་པོ་དང་བྲལ་བའི་ཡིད་ལ་བྱེད་པ་འབྱུང་ཞིང༌། དེ་ལྟར་ནོར་བུ་རིན་པོ་ཆེ་ཆེན་
པོ་དེའམ། དེ་མ་ཡིན་པ་གཞན་དེ་དང་ཡོན་ཏན་འདྲ་ཞིང་རིགས་མཐུན་པ་རྙེད་པར་མ་གྱུར་གྱི་བར་དུ་སྐྱེས་བུ་དེ་ནོར་བུ་རིན་པོ་ཆེ་ཆེན་པོ་དེ་མི་བརྗེད་དོ། །རབ་འབྱོར། དེ་བཞིན་དུ་བྱང་ཆུབ་སེམས་
དཔའ་སེམས་དཔའ་།ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་ནོར་བུ་རིན་པོ་ཆེ་ཆེན་པོ་ལས་ཡོངས་སུ་ཉམས་པས་ཀྱང་ནོར་བུ་རིན་པོ་ཆེ་ཆེན་པོ་ལས་ཡོངས་སུ་ཉམས་པ་ནོར་བུ་རིན་པོ་ཆེ་ཆེན་
པོ་ལ་རིན་པོ་ཆེར་འདུ་ཤེས་པ་ལྟར། ཤེས་རབ་ཀྱི་ཕ་རོལ་ཏུ་ཕྱིན་པ་ཡིད་ལ་བྱེད་པ་དང་ལྡན་ཞིང་ཤེས་རབ་ཀྱི་ཕ་རོལ་ཏུ་ཕྱིན་པ་ཡིད་ལ་བྱེད་པ་དང་མ་བྲལ་བས་ཐམས་ཅད་མཁྱེན་པའི་
སེམས་ཀྱིས་ཇི་སྲིད་དུ་དེའམ། གཞན་རྙེད་པར་གྱུར་པ་དེ་སྲིད་དུ་བཙལ་བར་བྱ་ཞིང༌། དེ་སྲིད་དུ་དེས་ཤེས་རབ་ཀྱི་ཕ་རོལ་ཏུ་ཕྱིན་པའི་ནོར་བུ་རིན་པོ་ཆེ་ཆེན་པོ་རྙེད་པ་དང་ལྡན་པའི་ཡིད་ལ་བྱེད་
པ་དང༌། ཐམས་ཅད་མཁྱེན་པ་ཉིད་ཀྱི་ནོར་བུ་རིན་པོ་ཆེ་ཆེན་པོ་རྙེད་པ་དང་ལྡན་པའི་ཡིད་ལ་བྱེད་པ་དང་མི་འབྲལ་བར་འགྱུར་བར་བྱའོ། །རབ་འབྱོར་གྱིས་གསོལ་པ། བཅོམ་ལྡན་འདས།
གང་ཡང་བཅོམ་ལྡན་འདས་ཀྱིས་ཆོས་ཐམས་ཅད་དང༌། ཡིད་ལ་བགྱིད་པ་ཐམས་ཅད་ནི། ངོ་བོ་ཉིད་དང་བྲལ་བ་དང༌། སྟོང་པར་གསུངས་ལགས་ན། བཅོམ་ལྡན་འདས། ཇི་ལྟར་ན།
བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བགྱིད་པ་དང༌། ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བགྱིད་པ་དང་མ་བྲལ་བར་
འགྱུར༑ དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་
འདི་སྙམ་དུ། ཆོས་ཐམས་ཅད་ནི། རང་བཞིན་གྱིས་དབེན་པའོ། །ཆོས་ཐམས་ཅད་ནི། རང་བཞིན་གྱིས་སྟོང་པའོ། ཞེས་ཡིད་ལ་བྱེད་ན། དེ་ལྟར་ཡིད་ལ་བྱེད་པ་དེ་ནི། ཤེས་རབ་ཀྱི་ཕ་རོལ་ཏུ་
ཕྱིན་པ་དང་ལྡན་པའི་ཡིད་ལ་བྱེད་པ་དང༌། ཐམས་ཅད་མཁྱེན་པ་དང་ལྡན་པའི་ཡིད་ལ་བྱེད་པ་དང་མ་བྲལ་བ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། སྟོང་པ་སྟེ།
དེ་ནི༑ མི་འཕེལ་མི་འགྲིབ་བོ། །རབ་འབྱོར་གྱིས་གསོལ་པ། བཅོམ་ལྡན་འདས། གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་པ་སྟེ། དེ་མི་འཕེལ་མི་འགྲིབ་ན། བཅོམ་ལྡན་འདས། དེ་ཇི་
ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་འཕེལ་བ་མ་མཆིས་པའི་ཤེས་རབ་ཀྱི་ཕ་རོལ་ཏུ་ཕྱིན་པས་བྱང་ཆུབ་ཏུ་སྒྲུབ་པར་འགྱུར། ཇི་ལྟར་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར།
༄༅། །ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ནི། འཕེལ་བའམ། འགྲིབ་པ་མེད་དོ། །རབ་འབྱོར། ཇི་ལྟར་
ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་པས་དེ་འཕེལ་བ་དང༌། འགྲིབ་པ་མེད་པ་ཡིན་ལ། རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའང་སྟོང་པས་དེ་འཕེལ་བ་མེད་
ཅིང་འགྲིབ་པ་མེད་དོ། །རབ་འབྱོར། གང་གི་ཕྱིར་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་པས་དེ་འཕེལ་བ་མེད་ཅིང་འགྲིབ་པ་མེད་པ་ཡིན་ལ། རབ་འབྱོར། དེ་བཞིན་དུ་བྱང་ཆུབ་
སེམས་དཔའ་སེམས་དཔའ་ཆེན་པོ་སྟོང་པས་དེ་འཕེལ་བ་མེད་ཅིང་འགྲིབ་པ་མེད་པ་ཡིན་པ་དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ཕྱིར་ཡང་དག་པར་སྒྲུབ་
ཅིང་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རབ་འབྱོར། གལ་ཏེ་དེ་སྐད་དུ་བཤད་པ་ལ་བྱང་ཆུབ་སེམས་དཔའ་སེམས་དཔའ་
ཆེན་པོ་མི་དངང༌། ཀུན་ཏུ་མི་སྐྲག་ཀུན་ཏུ་སྐྲག་པ་དང་མི་ལྡན་ཞིང་ཞུམ་པར་མ་གྱུར་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་
ལ་སྤྱོད་པར་རིག་པར་བྱའོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དམ། བཅོམ་ལྡན་འདས་
ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་ཤེས་རབ་ཀྱི་ཕ་རོལ་ཏུ་ཕྱིན་པའི་སྟོང་པ་ཉིད་གང་ལགས་པ་དེ་ཤེས་རབ་
ཀྱི་ཕ་རོལ་ཏུ་ཕྱིན་པ་ལ་སྤྱོད་དམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་ཤེས་རབ་ཀྱི་ཕ་
རོལ་ཏུ་ཕྱིན་པའི་སྟོང་པ་ཉིད་ལས་གཞན་ན་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཆོས་དེ་འགའ་ཡང་དམིགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་
ནི༑ མ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་སྟོང་པ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར།
དེ་ནི༑ མ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཆོས་འགའ་ཡང་སྟོང་པ་ཉིད་འདི་ལ་དམིགས་སམ། བཅོམ་ལྡན་
འདས་ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་སྟོང་པ་ཉིད་ལ་སྟོང་པ་ཉིད་སྤྱོད་དམ། བཅོམ་ལྡན་འདས་ཀྱིས་
བཀའ་སྩལ་པ། རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་གཟུགས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དམ། བཅོམ་ལྡན་འདས་
༄༅། །ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་ཚོར་བ་དང༌། འདུ་ཤེས་དང༌། འདུ་བྱེད་
རྣམས་དང༌། བཅོམ་ལྡན་འདས། ཡང་ཅི་རྣམ་པར་ཤེས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ནོ། །
རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་གཟུགས་ལས་གཞན་ན་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཆོས་དེ་འགའ་ཡང་དམིགས་སམ། བཅོམ་ལྡན་འདས་
ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་ཚོར་བ་དང༌། འདུ་ཤེས་དང༌། འདུ་བྱེད་རྣམས་ལས་གཞན་དང༌། རྣམ་
པར་ཤེས་པ་ལས་གཞན་ན་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཆོས་དེ་འགའ་ཡང་དམིགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ནོ། །
རབ་འབྱོར་གྱིས་གསོལ་པ། བཅོམ་ལྡན་འདས། འོ་ན་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་འགྱུར། དེ་སྐད་ཅེས་གསོལ་པ་དང༌།
བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། ཡང་ཅི་གང་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཆོས་དེ་ཁྱོད་ཀྱིས་ཡང་དག་པར་
རྗེས་སུ་མཐོང་ངམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་གང་
ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཁྱོད་ཀྱིས་ཡང་དག་པར་རྗེས་སུ་མཐོང་ངམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་
སོ༑ ༑བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ཇི་སྙམ་དུ་སེམས། ཆོས་འགའ་ཞིག་དམིགས་སུ་མེད་པའི་ཆོས་དེ་ཡང་དག་པར་རྗེས་སུ་མཐོང་ངམ། ཆོས་དེ་ཉིད་སྐྱེས་པའམ། སྐྱེ་བར་
འགྱུར་བའམ། སྐྱེ་བའམ། འགགས་པའམ། འགག་པར་འགྱུར་བའམ། འགག་པ་ཡིན་ནམ་ཅི། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་
ཀྱིས་བཀའ་སྩལ་པ། རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོའི་མི་སྐྱེ་བའི་ཆོས་ལ་བཟོད་པ་ཐོབ་པ་ནི། དེ་ལྟ་བུའི་ངོ་བོ་ཡིན་ཏེ། རབ་འབྱོར། དེ་ལྟ་བུའི་ངོ་བོའི་བཟོད་
པ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་
ཆེན་པོ་ནི། དེ་བཞིན་གཤེགས་པའི་མི་འཇིགས་པའི་ལམ་འདི་བསྒྲུབས་ནས་དེ་ལྟར་སྤྱོད་ཅིང་དེ་ལྟར་བརྩོན་ཏེ་དེ་ལྟར་འབད་ན། སངས་རྒྱས་ཀྱི་ཡེ་ཤེས་བླ་ན་མེད་པ་དང༌། ཡེ་ཤེས་ཆེན་པོ་
༄༅། །དང༌། ཐམས་ཅད་མཁྱེན་པའི་ཡེ་ཤེས་དང༌། དེད་དཔོན་ཆེན་པོའི་ཡེ་ཤེས་ཐོབ་པར་མི་འགྱུར་བ་འདི་ནི། གནས་མེད་དོ། །རབ་འབྱོར་གྱིས་གསོལ་པ།
བཅོམ་ལྡན་འདས། ཆོས་ཐམས་ཅད་ཀྱི་མི་སྐྱེ་བའི་ཆོས་ཉིད་གང་ལགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་རམ། བཅོམ་ལྡན་འདས་ཀྱིས་
བཀའ་སྩལ་པ། རབ་འབྱོར། དེ་ནི། མ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། འོ་ན་དེ་ཆོས་གང་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་
པ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཡང་ཅི་ཁྱོད་ཀྱིས་ཆོས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་ཆོས་དེ་ཡང་དག་
པར་རྗེས་སུ་མཐོང་ངམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་ཏེ། བཅོམ་ལྡན་འདས། ཆོས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་ལུང་བསྟན་པ་དང༌། ལུང་སྟོན་བར་འགྱུར་བ་དང༌། ལུང་སྟོན་པའི་ཆོས་དེ་ནི། བདག་གིས་ཡང་དག་པར་རྗེས་སུ་མ་མཐོང་ངོ༌། །བཅོམ་ལྡན་འདས། ཆོས་གང་མངོན་པར་རྫོགས་
པར་སངས་རྒྱས་པའམ། ཆོས་གང་མངོན་པར་རྫོགས་པར་སངས་རྒྱས་པར་བགྱི་བའམ། ཆོས་གང་གིས་མངོན་པར་རྫོགས་པར་འཚང་རྒྱ་བར་འགྱུར་བའི་ཆོས་དེ་ཡང་བདག་གིས་ཡང་
དག་པར་རྗེས་སུ་མ་མཐོང་ངོ༌། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་ཐམས་ཅད་དམིགས་སུ་མ་མཆིས་པ་ལ་བདག་འདི་སྙམ་དུ། ཆོས་འདི་ནི། མངོན་པར་རྫོགས་པར་འཚང་
རྒྱའོ༑ ༑ཆོས་འདི་ནི། མངོན་པར་རྫོགས་པར་འཚང་རྒྱ་བར་བགྱིའོ། །ཆོས་འདིས་ནི། མངོན་པར་རྫོགས་པར་སངས་རྒྱས་སོ། །ཞེས་མི་སེམས་པའི་སླད་དུའོ། །འཕགས་པ་ཤེས་རབ་ཀྱི་ཕ་རོལ་ཏུ་
ཕྱིན་པ་བརྒྱད་སྟོང་པ་ལས། དགེ་བའི་བཤེས་གཉེན་གྱི་ལེའུ་ཞེས་བྱ་སྟེ། ཉི་ཤུ་རྩ་གཉིས་པའོ།། །།ཡང་དེའི་ཚེ་ལྷ་རྣམས་ཀྱི་དབང་པོ་བརྒྱ་བྱིན་འཁོར་དེ་ཉིད་དུ་འདུས་པར་གྱུར་
ནས་འདུག་གོ །དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཟབ་བོ། །ཀྱེ་མ་བཅོམ་ལྡན་
འདས༑ ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བལྟ་བར་དཀའ་ཞིང་རྟོགས་པར་དཀའ་བའོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་
བཀའ་སྩལ་ཏོ། །ཀཽ་ཤི་ཀ །དེ་དེ་བཞིན་ནོ། །དེ་དེ་བཞིན་ཏེ། ཀཽ་ཤི་ཀ །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཟབ་བོ། །ཀཽ་ཤི་ཀ །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། བལྟ་དཀའ་ཞིང་རྟོགས་
པར་དཀའ་བ་སྟེ། ནམ་མཁའ་ཟབ་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཟབ་བོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་དབེན་པའི་ཕྱིར་བལྟ་དཀའོ། །སྟོང་པའི་ཕྱིར་རྟོགས་པར་དཀའོ། །དེ་
༄༅། །སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་དག་ཤེས་རབ་ཀྱི་
ཕ་རོལ་ཏུ་ཕྱིན་པ་ཟབ་མོ་འདི་ཉན་པར་འགྱུར་ཞིང༌། ཐོས་ནས་ཀྱང་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བགྱིད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་
སྟོན་པ་དང༌། ལུང་འབོགས་པ་དང༌། ཁ་ཏོན་བགྱིད་པ་དང༌། ཡི་གེར་འདྲི་བར་འགྱུར་བའི་སེམས་ཅན་དེ་དག་ནི། ངན་ངོན་གྱི་དགེ་བའི་རྩ་བ་དང་ལྡན་པ་མ་ལགས་སོ། །དེ་སྐད་ཅེས་
གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །དེ་དེ་བཞིན་ནོ། །དེ་དེ་བཞིན་ཏེ། ཀཽ་ཤི་ཀ །གང་དག་ཤེས་རབ་ཀྱི་
ཕ་རོལ་ཏུ་ཕྱིན་པ་ཟབ་མོ་འདི་ཉན་པར་འགྱུར་ཞིང༌། ཐོས་ནས་ཀྱང་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་
སྟོན་པ་དང༌། ལུང་འབོགས་པ་དང༌། །ཁ་ཏོན་བྱེད་པ་དང༌། ཡི་གེར་འབྲི་བར་འགྱུར་བའི་སེམས་ཅན་དེ་དག་ནི། ངན་ངོན་གྱི་དགེ་བའི་རྩ་བ་དང་ལྡན་པ་མ་ཡིན་ནོ། །ཀཽ་ཤི་ཀ །ཛམྦུའི་གླིང་ན་
སེམས་ཅན་ཇི་སྙེད་ཡོད་པ་དེ་དག་ཐམས་ཅད་དགེ་བ་བཅུའི་ལས་ཀྱི་ལམ་ལ་བཀོད་པར་གྱུར་ན། ཀཽ་ཤི་ཀ །དེ་ཇི་སྙམ་དུ་སེམས། ཅི་སེམས་ཅན་དེ་དག་ཡང་དེའི་གཞི་ལས་བསོད་
ནམས་མང་དུ་བསྐྱེད་དམ། བརྒྱ་བྱིན་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །རིགས་ཀྱི་བུའམ་
རིགས་ཀྱི་བུ་མོ་འདི་དེ་བས་ཆེས་བསོད་ནམས་མང་དུ་བསྐྱེད་དེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉན་པ་དང༌། ཐོས་ནས་ཀྱང་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་
པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འབྲི་བར་འགྱུར་བ་སྟེ། ཀཽ་ཤི་ཀ །རིགས་ཀྱི་བུའམ་རིགས་ཀྱི་
བུ་མོ་གང་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉན་པར་འགྱུར་ཞིང༌། ཐོས་ནས་ཀྱང་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌།
སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འབྲི་བར་འགྱུར་བ་དེ་དགེ་བའི་རྩ་བ་གང་དང་ལྡན་པར་འགྱུར་བའི་བསོད་ནམས་ཀྱི་ཕུང་པོ་འདི་ལ་སྔ་མ་
ཛམྦུའི་གླིང་གི་སེམས་ཅན་ཐམས་ཅད་ཀྱི་ཚུལ་ཁྲིམས་ལས་བྱུང་བའི་བསོད་ནམས་ཀྱི་ཕུང་པོས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆར་ཡང༌། བརྒྱ་སྟོང་གི་ཆར་ཡང༌། བྱེ་བའི་ཆར་ཡང༌།
བྱེ་བ་བརྒྱའི་ཆར་ཡང༌། བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང༌། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོའོ། །གྲངས་སུའང་ཉེ་བར་མི་འགྲོའོ། །བགྲང་བར་ཡང༌། དཔེར་
༄༅། །ཡང༌། དཔེས་བསྟན་པར་བྱ་བར་ཡང༌། གཞིར་ཡང༌། རྒྱུར་ཡང་མི་བཟོད་དོ། །དེ་ནས་དགེ་སློང་གཞན་ཞིག་གིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་
སྨྲས་སོ༑ ༑ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉན་པ་དང༌། ཐོས་ནས་ཀྱང་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་
པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འབྲི་བར་འགྱུར་བ་དེས་ཁྱོད་ཟིལ་གྱིས་མནན་ཏོ། །དེ་སྐད་ཅེས་སྨྲས་
པ་དང༌། ལྷ་རྣམས་ཀྱི་དབང་པོ་བརྒྱ་བྱིན་གྱིས་དགེ་སློང་དེ་ལ་འདི་སྐད་ཅེས་སྨྲས་སོ། །འཕགས་པ། རིགས་ཀྱི་བུའམ་རིགས་ཀྱི་བུ་མོ་དེས་སེམས་བསྐྱེད་པ་གཅིག་གིས་ཀྱང་བདག་ཟིལ་གྱིས་
མནན་ན། གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་
བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འབྲི་བར་འགྱུར་བས་ལྟའང་ཅི་སྨོས། གང་གིས་ཐོས་ནས་ཀྱང་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་
པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་བྲིས་ཏེ་དེ་བཞིན་ཉིད་དུ་སློབ་པ་དང༌། དེ་བཞིན་ཉིད་དུ་སྒྲུབ་
པ་དང༌། དེ་བཞིན་ཉིད་དུ་རྣལ་འབྱོར་དུ་བྱེད་པ་ལྟའང་ཅི་སྨོས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དང་དེ་དག་ནི། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་
ཟིལ་གྱིས་གནོན་ཅིང་འགྲོ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་འབའ་ཞིག་ཟིལ་གྱིས་གནོན་ཅིང་འགྲོ་
བར་མ་ཟད་ཀྱི། གང་ཡང་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་དང༌། རང་སངས་རྒྱས་དེ་དག་ཐམས་ཅད་ཀྱང་ཟིལ་གྱིས་གནོན་ཅིང་འགྲོ་བར་
འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་དང༌། རང་སངས་རྒྱས་རྣམས་འབའ་
ཞིག་ཟིལ་གྱིས་གནོན་ཅིང་འགྲོ་བར་མ་ཟད་ཀྱི། གང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་བདག་པོ་ཆེན་པོ་དག་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་དང་
བྲལ་བ་དེ་དག་ཐམས་ཅད་ཀྱང་ཟིལ་གྱིས་གནོན་ཅིང་འགྲོ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་བདག་པོ་ཆེན་པོ་དག་འབའ་
ཞིག་ཟིལ་གྱིས་གནོན་ཅིང་འགྲོ་བར་མ་ཟད་ཀྱི། གང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་ཅིང་ཚུལ་ཁྲིམས་ཀྱི་ཕུང་པོ་མ་ཉམས་པ་དང༌། སྐྱོན་མེད་པ་
༄༅། །ཉིད་དང༌། འདྲེན་མར་མ་གྱུར་པ་དང༌། ཡོངས་སུ་རྫོགས་པ་དང༌། ཡོངས་སུ་དག་པ་དང༌། ལྷད་མ་ཞུགས་པའི་ཚུལ་ཁྲིམས་ཀྱི་ཕུང་པོ་དང་ལྡན་ལ། ཤེས་རབ་
ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་དང་བྲལ་བ་དེ་དག་ཐམས་ཅད་ཀྱང་ཟིལ་གྱིས་གནོན་ཅིང་འགྲོ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། བྱང་ཆུབ་
སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཀྱི་ཕུང་པོ་མ་ཉམས་པ། སྐྱོན་མེད་པ། འདྲེན་མར་མ་གྱུར་པ། ཡོངས་སུ་རྫོགས་པ། ཡོངས་སུ་དག་པ། ལྷད་མ་ཞུགས་པ་དང་ལྡན་པ་
དག་འབའ་ཞིག་ཟིལ་གྱིས་གནོན་ཅིང་འགྲོ་བར་མ་ཟད་ཀྱི། གང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པ་ཕུན་སུམ་ཚོགས་པ། ཞི་བ་ཕུན་སུམ་ཚོགས་པ། ཆུང་ངུ་ན་སྡོང་
དུམ་མེས་ཚིག་པ་ལའང་གནོད་པའི་སེམས་མི་བསྐྱེད་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་དང་བྲལ་བ་དེ་དག་ཐམས་ཅད་ཀྱང་ཟིལ་གྱིས་གནོན་ཅིང་འགྲོ་བར་འགྱུར་
རོ༑ ༑བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པ་ཕུན་སུམ་ཚོགས་པ། ཞི་བ་ཕུན་སུམ་ཚོགས་པ། སེམས་ཁོང་ཁྲོ་བ་
མེད་པ་དག་འབའ་ཞིག་ཟིལ་གྱིས་གནོན་ཅིང་འགྲོ་བར་མ་ཟད་ཀྱི། གང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ། སྙོམས་པ་མེད་པ། ལེ་ལོ་མེད་པ། མ་
ཞུམ་པའི་ལུས་དང༌། ངག་དང༌། ཡིད་ཀྱི་ལས་ཀྱི་མཐའ་དང་ལྡན་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དང་ཐབས་མཁས་པ་དང་བྲལ་བ་དེ་དག་ཐམས་ཅད་ཀྱང་ཟིལ་གྱིས་གནོན་ཅིང་འགྲོ་
བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ། སྙོམས་པ་མེད་པ། ལེ་ལོ་མེད་པ། མ་ཞུམ་
པའི་ལུས་དང༌། ངག་དང༌། ཡིད་ཀྱི་ལས་ཀྱི་མཐའ་དང་ལྡན་པ་དག་འབའ་ཞིག་ཟིལ་གྱིས་གནོན་ཅིང་འགྲོ་བར་མ་ཟད་ཀྱི། གང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་
གཏན་ལ་དགའ་ཞིང་བསམ་གཏན་ལ་མོས་པ། བསམ་གཏན་གྱི་སྟོབས་ཅན། བསམ་གཏན་དང་ལྡན་པ། བསམ་གཏན་ལ་གནས་པ། བསམ་གཏན་ལ་དབང་བ། ཤེས་རབ་ཀྱི་ཕ་རོལ་ཏུ་
ཕྱིན་པ་དང༌། ཐབས་མཁས་པ་དང་བྲལ་བ་དེ་དག་ཐམས་ཅད་ཀྱང་ཟིལ་གྱིས་གནོན་ཅིང་འགྲོ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་
ཇི་ལྟར་བསྟན་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་ཐམས་ཅད་ཟིལ་གྱིས་གནོན་ཅིང་འགྲོ་བར་
འགྱུར་རོ། །ཉན་ཐོས་ཀྱི་ཐེག་པ་ཅན་དང༌། རང་སངས་རྒྱས་ཀྱི་ཐེག་པ་ཅན་ཐམས་ཅད་དང༌། ཐབས་མི་མཁས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཟིལ་གྱིས་གནོན་པར་
༄༅། །འགྱུར་ཏེ། དེ་དག་ནི། ཟིལ་གྱིས་མི་གནོན་པར་མི་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་
པ་ཇི་ལྟར་བསྟན་པ་ལ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྗེས་སུ་འཇུག་ན། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། ཐམས་ཅད་མཁྱེན་པའི་གདུང་མི་གཅད་པར་བྱ་
བའི་ཕྱིར་ཞུགས་པ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། དེ་བཞིན་གཤེགས་པ་རྣམས་རྒྱང་རིང་དུ་མི་བྱེད་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་
ཆེན་པོ་འདི་དེ་ལྟར་ནན་ཏན་བྱེད་ན། བྱང་ཆུབ་ཀྱི་སྙིང་པོར་ཡུན་མི་རིང་བར་འགྲོ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དེ་ལྟར་
སློབ་ན༑ སེམས་ཅན་ཉོན་མོངས་པའི་འདམ་དུ་བྱིང་བ་རྣམས་འབྱིན་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་དེ་ལྟར་སློབ་ན། བྱང་ཆུབ་སེམས་དཔའི་བསླབ་པ་ལ་
སློབ་པ་ཡིན་ཏེ། ཉན་ཐོས་ཀྱི་བསླབ་པ་ལ་མི་སློབ་བོ། །རང་སངས་རྒྱས་ཀྱི་བསླབ་པ་ལ་མི་སློབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་
སློབ་པའི་དྲུང་དུ་འཇིག་རྟེན་སྐྱོང་བ་རྒྱལ་པོ་ཆེན་པོ་བཞི་འོངས་ནས་འདི་སྐད་ཅེས། རིགས་ཀྱི་བུ། ཁྱོད་མྱུར་དུ་བྱང་ཆུབ་སེམས་དཔའི་བསླབ་པ་ལ་སློབས་ཤིག །ལ་གོར་སློབས་ཤིག་དང༌།
གང་ཁྱོད་བྱང་ཆུབ་ཀྱི་སྙིང་པོ་ལ་འདུག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་བླང་བར་བྱ་བའི་ལྷུང་བཟེད་བཞི་པོ་ནི། འདི་དག་ཡིན་ནོ། །
ཞེས་སྨྲ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་བསྟན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དེ་ལྟར་སློབ་པའི་དྲུང་དུ་འཇིག་རྟེན་སྐྱོང་བ་རྒྱལ་པོ་ཆེན་པོ་བཞི་
འབའ་ཞིག་མཆི་བར་སེམས་པར་ཡང་མ་ཟད་དེ། བཅོམ་ལྡན་འདས། བདག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་དྲུང་དུ་མཆི་བར་སེམས་ན། ལྷའི་བུ་གཞན་དག་ལྟ་ཅི་
སྨོས༑ བྱང་ཆུབ་སེམས་དཔའ་སེམས་དཔའ་ཆེན་པོ་དེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་།པའི་སངས་རྒྱས་དག་གིས་ཀྱང་རྟག་ཏུ་དགོངས་པར་འགྱུར་རོ། །བྱང་ཆུབ་སེམས་
དཔའ་སེམས་དཔའ་ཆེན་པོ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ལ་ནི། འཇིག་རྟེན་གྱི་སྡུག་བསྔལ་བ་དང༌། ཕ་རོལ་གྱི་གནོད་པ་གང་ཡང་རུང་བ་དག་འབྱུང་བ་དེ་དག་དང༌། གཞན་
དག་ཐམས་ཅད་ནས་ཐམས་ཅད་རྣམ་པ་ཐམས་ཅད་དུ་ཐམས་ཅད་འབྱུང་བར་མི་འགྱུར་ཏེ། བཅོམ་ལྡན་འདས། འདིའང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་
པ་ལ་སྤྱོད་པའི་ཚེ་འདིའི་ཡོན་ཏན་ལགས་སོ། །དེ་ནས་ཚེ་དང་ལྡན་པ་ཀུན་དགའ་བོ་འདི་སྙམ་དུ་སེམས་ཏེ། ཅི་ལྷ་རྣམས་ཀྱི་དབང་པོ་བརྒྱ་བྱིན་འདི་བདག་ཉིད་ཀྱི་སྤོབས་པས་སྨྲའམ། འོན་ཏེ་
༄༅། །སངས་རྒྱས་ཀྱི་མཐུས་སྨྲ་སྙམ་མོ། །དེ་ནས་སངས་རྒྱས་ཀྱི་མཐུས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཚེ་དང་ལྡན་པ་ཀུན་དགའ་བོའི་སེམས་ཀྱི་རྟོག་པ་སེམས་ཀྱིས་
ཤེས་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །འཕགས་པ་ཀུན་དགའ་བོ། འདི་ནི། སངས་རྒྱས་ཀྱི་མཐུར་རིག་པར་བྱའོ། །འཕགས་པ་ཀུན་དགའ་བོ། འདི་ནི། སངས་
རྒྱས་ཀྱི་བྱིན་གྱི་རླབས་སུ་རིག་པར་བྱ་སྟེ། འཕགས་པ་ཀུན་དགའ་བོ། བདག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ལས་བརྩམས་ཏེ་སྨྲ་མི་ནུས་སོ། །དེ་ནས་བཅོམ་ལྡན་འདས་ཀྱིས་
ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། ཇི་ལྟར་ལྷ་རྣམས་ཀྱི་དབང་པོ་བརྒྱ་བྱིན་གྱིས་སྨྲས་པ་དེ་དེ་བཞིན་ནོ། །དེ་དེ་བཞིན་ཏེ། འདི་ནི། དེ་བཞིན་གཤེགས་
པའི་མཐུའོ། །འདི་ནི། དེ་བཞིན་གཤེགས་པའི་བྱིན་གྱིས་བརླབས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཤད་པ་ཡིན་ནོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས།
བརྒྱ་བྱིན་གྱི་ལེའུ་ཞེས་བྱ་སྟེ། ཉི་ཤུ་རྩ་གསུམ་པའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་ཉི་ཤུ་པ། དེ་ནས་ཡང་བཅོམ་ལྡན་འདས་
ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། ཡང་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པ་
དང༌། ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་དེའི་ཚེ། ཀུན་དགའ་བོ། གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
ཀྱི་བདུད་སྡིག་ཅན་དེ་དག་ཐམས་ཅད་འདི་ལྟར་ཐེ་ཚོམ་ཟ་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ཅི་བར་མ་དོར་ཉན་ཐོས་ཀྱི་སའམ། རང་སངས་རྒྱས་ཀྱི་ས་ལ་ཡང་དག་
པའི་མཐའ་མངོན་སུམ་དུ་བྱེད་དམ། འོན་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་སྙམ་མོ། །ཀུན་དགའ་བོ། གཞན་ཡང་གང་གི་ཚེ་བྱང་
ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པས་གནས་པ་དེའི་ཚེ་གང་བདུད་སྡིག་ཅན་དེ་དག་མྱ་ངན་གྱི་ཟུག་རྔུས་ཟུག་པར་འགྱུར་རོ། །ཀུན་དགའ་བོ།
གཞན་ཡང་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་དེའི་ཚེ་བདུད་སྡིག་ཅན་དེ་དག་བྱང་
ཆུབ་སེམས་དཔའ་སེམས་དཔའ་ཆེན་པོ་ལ་འཚེ་བར་བྱེད་དེ། ཅི་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ཞུམ་པར་འགྱུར་བ་དང༌། སྤུ་ཟིང་ཞེས་བྱེད་པར་འགྱུར་བ་དང༌། དེས་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་དེའི་སེམས་བསྐྱེད་པ་གཅིག་ཙམ་ཡང་ཟད་པར་འགྱུར་སྙམ་སྟེ་འཇིགས་པ་དག་ཀྱང་འབྱིན་ཅིང༌། ཕྱོགས་དང་ཕྱོགས་སུ་སྐར་མདའ་ལྟུང་བ་དང༌། མེ་འཐོར་
༄༅། །བ་ལྟ་བུ་དག་ཀྱང་གཏོང་ཞིང་སྟོན་ཏོ། །ཀུན་དགའ་བོ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱི་དྲུང་དུ་བདུད་སྡིག་ཅན་འཚེ་བར་སེམས་ཤིང་
མི་འོང་སྟེ། འོན་ཀྱང་ཁ་ཅིག་གི་དྲུང་དུ་ནི། འོང༌། ཁ་ཅིག་གི་དྲུང་དུ་ནི། མི་འོང་ངོ༌། །ཀུན་དགའ་བོས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟ་བུའི་
དྲུང་དུ་བདུད་སྡིག་ཅན་འཚེ་བར་སེམས་ཤིང་མཆི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་སྔོན་གྱི་མཐར་ཡང་
ཤེས་རབ་ཀྱི་ཕ་རོལ་ཏུ་ཕྱིན་པ་བཤད་པ་ལ་མོས་པའི་སེམས་མ་བསྐྱེད་པར་གྱུར་ན། ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་བདུད་སྡིག་ཅན་འཚེ་བར་སེམས་
ཤིང་འོང་སྟེ། གླགས་ཀྱང་རྙེད་པར་འགྱུར་རོ། །ཀུན་དགའ་བོ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཤད་པ་ལ་འདི་
ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནམ་མ་ཡིན་སྙམ་དུ་ཐེ་ཚོམ་ཟ་བར་འགྱུར། ཡིད་གཉིས་སྐྱེ་བར་འགྱུར་ཏེ། ཀུན་དགའ་བོ། དེ་ལྟར་ཐེ་ཚོམ་སྐྱེས་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་ལ་ཡང་བདུད་སྡིག་ཅན་འཚེ་བར་སེམས་ཤིང་འོང་སྟེ། དེ་ལ་གླགས་ཀྱང་རྙེད་པར་འགྱུར་རོ། །ཀུན་དགའ་བོ། གཞན་ཡང་འདི་ལ་བྱང་ཆུབ་སེམས་དཔའ་སེམས་དཔའ་ཆེན་
པོ་དགེ་བའི་བཤེས་གཉེན་དང་བྲལ་ཞིང་སྡིག་པའི་གྲོགས་པོས་ཡོངས་སུ་ཟིན་པར་གྱུར་ན། དེ་ཟབ་མོ་ཟབ་མོའི་གནས་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་པ་ལ་མི་ཉན་ཏེ། མ་ཉན་པས་
མི་ཤེས་སོ། །མ་ཤེས་པས་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྒོམ་པར་བྱ་ཞེས་མི་འདྲི་སྟེ། ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལའང་བདུད་སྡིག་ཅན་
འཚེ་བར་སེམས་ཤིང་འོང་སྟེ། དེ་ལ་གླགས་ཀྱང་རྙེད་པར་འགྱུར་རོ། །ཀུན་དགའ་བོ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཞིག་དམ་པའི་ཆོས་མ་ཡིན་པ་ཡོངས་སུ་
འཛིན་པ་ལ་སྦྱོར་བ་ལ་བརྟེན་པར་འགྱུར་ཏེ། འདི་ནི། བདག་གི་གྲོགས་པོ་དོན་ཐམས་ཅད་ལ་ཡང་ང་མི་འདོར་བ། བདག་གི་གྲོགས་པོ་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་
མང་དུ་ཡོད་མོད་ཀྱི། དེ་དག་ནི། བདག་གི་བསམ་པ་རྫོགས་པར་མི་བྱེད་དེ། འདི་ནི། བདག་དང་མཐུན་པའི་གྲོགས་རྙེད་པ་ཡིན་ཏེ། འདིས་བདག་གི་བསམ་པ་ཡོངས་སུ་རྫོགས་པར་བྱེད་དོ། །
སྙམ་ན༑ ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལའང་བདུད་སྡིག་ཅན་འཚེ་བར་སེམས་ཤིང་འོང་སྟེ། གླགས་ཀྱང་རྙེད་པར་འགྱུར་རོ། །ཀུན་དགའ་བོ། གཞན་
ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཤད་པ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ལ་འདི་སྐད་ཅེས་ཟེར་ཏེ།
༄༅། །ཀྱེ་མ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཟབ་སྟེ། ཁྱོད་ལ་འདི་མཉན་པས་ཅི་ཞིག་བྱ། ཇི་ལྟར་མདོ་སྡེ་གཞན་དག་ཏུ་དེ་བཞིན་གཤེགས་པས་བཤད་པ་
དེ་ལྟར་འདིར་བརྩོན་པར་བྱས་པ་ན་ནི། མ་ཡིན་ཏེ། བདག་གིས་ནི། འདིའི་གཏིང་མི་རྙེད། རོ་མི་མྱོང་ན། ཁྱོད་ལ་འདི་མཉན་པའམ་བྲིས་པས་ཅི་ཞིག་བྱ་ཞེས་བྱང་ཆུབ་སེམས་དཔའ་
སེམས་དཔའ་ཆེན་པོ་གཞན་དག་ཀྱང་དེ་ལྟར་འབྲལ་བར་བྱེད་དེ། ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལ་ཡང་བདུད་སྡིག་ཅན་འཚེ་བར་སེམས་ཤིང་
འོང་སྟེ༑ གླགས་ཀྱང་རྙེད་པར་འགྱུར་རོ། །ཀུན་དགའ་བོ། གཞན་ཡང་གང་གི་ཚེ་བྱང་ཆུབ་སེམས་དཔས་བྱང་ཆུབ་སེམས་དཔའ་གཞན་དག་ལ་བརྙས་པར་བྱེད་ཅིང༌། བདག་ནི།
དབེན་པར་གནས་པས་གནས་ཏེ། གཞན་དག་ནི། དབེན་པར་གནས་པས་མི་གནས་སོ། །གཞན་དག་ལ་ནི། དབེན་པར་གནས་པ་མེད་དོ། །སྙམ་ན། ཀུན་དགའ་བོ། དེའི་ཚེ་བདུད་
སྡིག་ཅན་དགའ་མགུ་ཡི་རངས་པར་འགྱུར་ཞིང༌། རབ་ཏུ་དགའ་བ་དང༌། རངས་པ་དང༌། ཡིད་བདེ་བ་སྐྱེ་སྟེ། ཀུན་ཏུ་ཚིམ་པ་སྐྱེ་ཞིང་སེམས་ཚིམ་པར་འགྱུར་ལ་རབ་ཏུ་དགའ་བ་སྐྱེ་བར་
འགྱུར་རོ། །དེ་ཅིའི་ཕྱིར་ཞེ་ན། འདི་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྒྱང་རིང་དུ་བྱེད་དོ། །སྙམ་མོ། །ཀུན་དགའ་བོ། གཞན་ཡང་གང་གི་ཚེ་བྱང་ཆུབ་སེམས་དཔའ་
སེམས་དཔའ་ཆེན་པོའི་མིང་ནས་སྨོས་པའམ། རུས་ནས་སྨོས་པའམ། སྦྱངས་པའི་ཡོན་ཏན་ཡོངས་སུ་བརྗོད་པ་དེའི་ཚེ་དེ་ཙམ་གྱིས་དེ་མ་ཡིན་པའི་བྱང་ཆུབ་སེམས་དཔའ་སེམས་དཔའ་
ཆེན་པོ་ངེས་པ། དགེ་བའི་ཆོས་ཅན་གཞན་དག་ལ་བརྙས་པར་བྱེད་དེ། དེ་ལའང་ཡོན་ཏན་དེ་དག་མེད་དེ། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་
རོལ་ཏུ་ཕྱིན་པ་ལ་སྤྱོད་པའི་ཡོན་ཏན་གང་ཡིན་པ་དེ་དག་དང༌། རྣམ་པ་དེ་དག་དང༌། རྟགས་དེ་དག་དང༌། མཚན་མ་དེ་དག་མེད་དོ། །དེ་དག་དེ་ལ་མེད་བཞིན་དུ་དེ་ཕྱིར་མི་ལྡོག་པའི་ཡོན་ཏན་
རྣམས་ལ་ཉོན་མོངས་པ་སྐྱེད་དེ། འདི་ལྟ་སྟེ། ང་གང་ལ་སྣང་བའི་ཆོས་དེ་དག་ལ་ཁྱེད་མི་སྣང་ངོ༌། །ཞེས་བདག་ལ་བསྟོད་ཅིང་གཞན་ལ་སྨོད་དོ། །དེ་ལ་བདུད་སྡིག་ཅན་འདི་སྙམ་དུ་སེམས་ཏེ།
བདུད་ཀྱི་གནས་སྟོངས་པར་མི་འགྱུར་ཞིང་སེམས་ཅན་དམྱལ་བ་ཆེན་པོ་ཞིག་པར་མི་འགྱུར། བྱོལ་སོང་གི་སྐྱེ་གནས་དང༌། ཡི་དྭགས་ཀྱི་ཡུལ་དང༌། ལྷ་མ་ཡིན་གྱི་ཚོགས་ཞིག་པར་མི་འགྱུར་
བ་ལྟ་སྙམ་ནས་བདུད་སྡིག་ཅན་གྱིས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འདི་ལྟར་རྙེད་པ་དང༌། བཀུར་སྟིས་ནོན་པའི་རང་བཞིན་ཅན་དུ་འགྱུར་ཞིང༌། ཚིག་བཙུན་
པར་འགྱུར་བ་དང༌། ཚིག་བཙུན་པ་དེས་སྐྱེ་བོ་མང་པོས་འཛིན་པར་འགྱུར་ཞིང༌། དེ་དག་ལ་སྐྱེ་བོ་མང་པོའང་མཉན་པ་དང༌། དད་པར་བྱ་སྙམ་དུ་སེམས་པ་དེ་ལྟར་བྱིན་གྱིས་རློབ་སྟེ། མཐོང་ངམ།
༄༅། །ཐོས་ནས་ཀྱང་དེ་དག་གི་རྗེས་སུ་བྱེད་པར་འགྱུར་ཞིང༌། དེ་དག་མཐོང་བ་དང༌། ཐོས་པའི་རྗེས་སུ་བྱེད་པ་ན་དེ་བཞིན་ཉིད་དུ་མི་སློབ། དེ་བཞིན་ཉིད་དུ་མི་སྒྲུབ། དེ་
བཞིན་ཉིད་དུ་རྣལ་འབྱོར་དུ་མི་བྱེད་པར་འགྱུར་རོ། །དེ་དག་དེ་ལྟར་དེ་བཞིན་ཉིད་ལ་མི་སློབ་ཅིང༌། དེ་བཞིན་ཉིད་ལ་མི་སྒྲུབ། དེ་བཞིན་ཉིད་ལ་རྣལ་འབྱོར་དུ་མི་བྱེད་པས་ཉོན་མོངས་པ་
རྣམ་པར་འཕེལ་བར་འགྱུར་རོ། །དེ་དག་དེ་ལྟར་སེམས་ཀྱི་རྒྱུད་ཕྱིན་ཅི་ལོག་པས་ལུས་དང༌། ངག་དང༌། ཡིད་ཀྱི་ལས་གང་དང་གང་བྱེད་པ་དེ་དག་ཐམས་ཅད་མི་འདོད་པ་དང༌། མི་སྡུག་པ་དང༌། མི་
དགའ་བ་དང༌། ཡིད་དུ་མི་འོང་བར་འགྱུར་རོ། །དེ་ལྟར་སེམས་ཅན་དམྱལ་བ་ཆེན་པོ་དེ་དག་ཞིག་པར་མི་འགྱུར་རོ། །བྱོལ་སོང་གི་སྐྱེ་གནས་དང༌། ཡི་དྭགས་ཀྱི་ཡུལ་དང༌། ལྷ་མ་ཡིན་གྱི་ཚོགས་དང༌།
བདུད་ཀྱི་གནས་རྣམས་ཞིག་པར་མི་འགྱུར་རོ། །ཀུན་དགའ་བོ། དོན་གྱི་དབང་འདི་ཡང་མཐོང་ནས་བདུད་སྡིག་ཅན་དགའ་མགུ་ཡི་རངས་ཤིང་རབ་ཏུ་དགའ་བ་དང༌། ཚིམ་པ་དང༌། ཡིད་བདེ་བ་སྐྱེ་
བར་འགྱུར་རོ། །ཀུན་དགའ་བོ། གཞན་ཡང་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཉན་ཐོས་ཀྱི་ཐེག་པ་ཅན་དང་ལྷན་ཅིག་འཐབ་པར་བྱེད། རྩོད་པར་བྱེད། འགྱེད་པར་
བྱེད༑ གཤེ་ཞིང་སྤྱོ་བར་བྱེད། གནོད་པར་སེམས་ཤིང་ཞེ་སྡང་བསྐྱེད་ན། དེའི་ཚེ་བདུད་སྡིག་ཅན་འདི་སྙམ་དུ་སེམས་ཏེ། ཀྱེ་མ་རིགས་ཀྱི་བུ་འདི་ནི། ཐམས་ཅད་མཁྱེན་པ་ཉིད་རྒྱང་རིང་དུ་བྱེད་
པར་འགྱུར་ཏེ། ཐམས་ཅད་མཁྱེན་པ་ཉིད་ལས་ཤིན་ཏུ་རྒྱང་རིང་བར་གནས་པར་འགྱུར་རོ། །སྙམ་མོ། །གལ་ཏེ་ཡང་གང་ཟག་བྱང་ཆུབ་སེམས་དཔའི་ཐེག་པ་ཅན། གང་ཟག་བྱང་ཆུབ་སེམས་དཔའི་ཐེག་
པ་ཅན་གཞན་དང་ལྷན་ཅིག་འཐབ་པར་བྱེད། རྩོད་པར་བྱེད། འགྱེད་པར་བྱེད། གཤེ་ཞིང་སྤྱོ་བར་བྱེད། གནོད་པར་སེམས་ཤིང་ཞེ་སྡང་བསྐྱེད་ན། དེ་ལ་བདུད་སྡིག་ཅན་ཤིན་ཏུ་དགའ་མགུ་ཡི་
རངས་ཤིང་རབ་ཏུ་དགའ་བ་དང༌། ཚིམ་པ་དང༌། ཡིད་བདེ་བ་སྐྱེ་བར་འགྱུར་ཏེ། དེ་འདི་སྙམ་དུ་སེམས་ཏེ། བྱང་ཆུབ་སེམས་དཔའ་འདི་གཉིས་གའང་ཐམས་ཅད་མཁྱེན་པ་ཉིད་ལས་རྒྱང་རིང་དུ་གནས་
པར་འགྱུར་རོ། །སྙམ་མོ། །ཀུན་དགའ་བོ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལུང་མ་བསྟན་པ་གང་བྱང་ཆུབ་སེམས་དཔའ་སེམས་དཔའ་ཆེན་པོ་ལུང་བསྟན་པ་དང་ལྷན་ཅིག་
འཐབ་པར་བྱེད། རྩོད་པར་བྱེད། འགྱེད་པར་བྱེད། གཤེ་ཞིང་སྤྱོ་བར་བྱེད། གནོད་པར་སེམས་ཤིང་ཞེ་སྡང་སྐྱེད་ལ་སེམས་ལ་གནོད་པར་བྱེད་ན། བྱང་ཆུབ་སེམས་དཔའ་སེམས་དཔའ་ཆེན་པོ་
དེས་གལ་ཏེ་ཐམས་ཅད་མཁྱེན་པ་ཉིད་མ་བཏང་ན། སེམས་བསྐྱེད་པ་དེ་སྙེད་ཀྱི་བསྐལ་པར་གོ་ཆ་བགོ་དགོས་སོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་ཀུན་
དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། སེམས་བསྐྱེད་པ་དེ་དག་ལ་ངེས་པར་འབྱུང་བ་ཅུང་ཟད་ཅིག་མཆིས་སམ། འོན་ཏེ་བསྐལ་པ་དེ་སྙེད་དུ་བྱང་ཆུབ་སེམས་དཔའ་སེམས་
༄༅། །དཔའ་ཆེན་པོ་དེས་གདོན་མི་འཚལ་བར་གོ་ཆ་བགོ་འཚལ་བ་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། གང་ཟག་ཉན་ཐོས་ཀྱི་ཐེག་པ་
ཅན་དང༌། རང་སངས་རྒྱས་ཀྱི་ཐེག་པ་ཅན་དང༌། གང་ཟག་བྱང་ཆུབ་སེམས་དཔའི་ཐེག་པ་ཅན་དག་ལ་ངས་ངེས་པར་འབྱུང་བ་དང་བཅས་པའི་ཆོས་བསྟན་ཏོ། །དེ་ལ་ཀུན་དགའ་བོ། གང་ཟག་
བྱང་ཆུབ་སེམས་དཔའི་ཐག་[*THEG] པ་ཅན་གང་ཞིག་གང་ཟག་བྱང་ཆུབ་སེམས་དཔའི་ཐེག་པ་ཅན་དང་ལྷན་ཅིག་འཐབ་ཅིང་རྩོད་དེ་བཀྱེ་ནས་གཤེ་ཞིང་སྤྱོས། གནོད་པར་བསམས། ཞེ་སྡང་བསྐྱེད་
ནས་སོ་སོར་བཤགས་པར་མི་བྱེད། ཕྱིས་སྡོམ་པ་མི་འཛིན། འཁོན་དུ་འཛིན་ཅིང་འཁོན་དུ་བཟུང་ནས་འདུག་ན། ཀུན་དགའ་བོ། གང་ཟག་དེ་ལ་ངེས་པར་འབྱུང་བ་ཡོད་པར་ང་མི་སྨྲ་སྟེ།
ཀུན་དགའ་བོ། གང་ཟག་དེས་ཕྱིར་ཡང་བསྐལ་པ་དེ་སྙེད་དུ་གདོན་མི་ཟ་བར་གོ་ཆ་བགོ་དགོས་སོ། །ཀུན་དགའ་བོ། ཡང་གང་ཟག་བྱང་ཆུབ་སེམས་དཔའི་ཐེག་པ་ཅན་གང༌། གང་ཟག་
བྱང་ཆུབ་སེམས་དཔའི་ཐག་[*THEG] པ་ཅན་དང་ལྷན་ཅིག་འཐབ་ཅིང་རྩོད་དེ་བཀྱེ་ནས་གཤེ་ཞིང་སྤྱོས། གནོད་པར་བསམས། ཞེ་སྡང་བསྐྱེད་ནས་སོ་སོར་བཤགས་པར་བྱེད། སོ་སོར་བཤགས་
པར་བྱས་ནས་ཕྱིས་ཀྱང་སྡོམ་པ་འཛིན་ལ་སེམས་འདི་ལྟར་བསྐྱེད་དེ། ཅི་ནས་བདག་གིས་སེམས་ཅན་ཐམས་ཅད་ཀྱི་རྩོད་པ་གཅད་པར་བྱ་བ་ཡིན། བསལ་བར་བྱ་བ་ཡིན། རབ་ཏུ་ཞི་བར་
བྱ་བ་ཡིན་ན། བདག་ཉིད་རྩོད་པར་བྱེད་པ་དང༌། སྨྲས་པ་ལ་བདག་སླར་སྨྲ་བ་ནི། རྙེད་པ་ངན་པ་རྙེད་པ་ཡིན་ནོ། །ངན་པ་རྙེད་དེ། ལེགས་པ་མ་རྙེད་དོ། །བདག་གིས་ཅི་ནས་སེམས་ཅན་ཐམས་
ཅད་ཀྱི་ཟམ་པ་ལྟ་བུར་འགྱུར་བར་བྱ་བ་ཡིན་ལ། བདག་ཕ་རོལ་ལ་ཁྱོད་ཅེས་ཚིག་དྲག་ཏུ་སྨྲ་བའམ། ཚིག་རྩུབ་པོས་ལན་ལྡོན་ཞིང་སྨྲ་བ་འདི་ནི། བདག་གིས་སྨྲ་བར་མི་བྱ་སྟེ། འཐབ་ཅིང་རྩོད་པ་
དང༌། འགྱེད་པ་རྣམས་ལ་བདག་ནི། གླེན་པ་དང༌། འོན་པ་དང༌། ལྐུག་པ་དང་འདྲ་བར་བྱའོ། །ཕ་རོལ་གྱིས་ངན་དུ་སྨྲས་པ་དང༌། ངན་དུ་བརྗོད་པ་དང༌། ངན་དུ་ཟེར་བ་རྣམས་སྨྲ་བ་ཐོས་ཀྱང་གཞན་
གྱི་དྲུང་དུ་ངན་སེམས་སུ་མི་བྱའོ། །ཕ་རོལ་གྱི་ཉེས་པ་དང༌། སྐྱོན་བདག་གིས་ཤེས་པར་བྱ་བ་འདི་ནི། བདག་ལ་ལེགས་པ་མ་ཡིན་ཏེ། བདག་གི་ཆ་མ་ཡིན་ནོ། །བདག་གིས་གཞན་གྱི་ཉེས་པ་
དང༌། སྐྱོན་མཉན་ཏོ། །སྙམ་དུ་བསམ་པ་འདི་ནི། བདག་གི་ཆ་མ་ཡིན་ནོ། །སྙམ་མོ། །དེ་ཅིའི་ཕྱིར་ཞེ་ན། བདག་གི་ལྷག་པའི་བསམ་པ་འཁྲུག་པར་བྱ་བ་མ་ཡིན་ནོ། །ཅི་ནས་བདག་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་ཐམས་ཅད་བདེ་བའི་ཡོ་བྱད་ཐམས་ཅད་ཀྱིས་བདེ་བར་བྱ་བ་དང༌། ཡོངས་སུ་མྱ་ངན་ལས་འདའ་
བར་བྱ་བ་ཞེས་བྱ་བ་དེ་བདག་གིས་གནོད་སེམས་བསྐྱེད་པ་ཡིན་ནམ། བདག་དང་གཞན་དག་འགྲས་པ་ནའང་བདག་གིས་གཞན་ལ་གནོད་སེམས་མི་བྱ་བ་ཞེས་བྱ་བ་དེ་བདག་འཁྲུགས་པར་
༄༅། །གྱུར་པ་ཡིན་ནམ། འདི་ནི། བདག་གིས་བྱ་བ་མ་ཡིན་ཏེ། བདག་གིས་ནི། བརྟུལ་བ་བརྟན་པས་ཕ་རོལ་མནན་པར་བྱ་ཞིང༌། སྲོག་གི་བར་ཆད་བྱེད་པ་ལའང་བདག་
འཁྲུག་པར་མི་བྱ་བ་དང༌། བཞིན་ལ་ཁྲོ་གཉེར་འབྱུང་བར་མི་བྱའོ། །སྙམ་པ་འདི་ནི། ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་དེའི་ངེས་པར་འབྱུང་བ་ཡིན་པར་ངས་
བཤད་དོ། །ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོས་གང་ཟག་ཉན་ཐོས་ཀྱི་ཐེག་པ་ཅན་རྣམས་ཀྱི་དྲུང་དུའང་དེ་ལྟར་གནས་པར་བྱ་སྟེ། ཇི་ལྟར་སེམས་ཅན་སུའི་
དྲུང་དུའང་འཁྲུག་པར་མི་འགྱུར་བ་དེ་ལྟར་སེམས་ཅན་ཐམས་ཅད་ཀྱི་དྲུང་དུ་གནས་པར་བྱའོ། །ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོས་གང་ཟག་བྱང་ཆུབ་སེམས་
དཔའི་ཐེག་པ་ཅན་གཞན་དག་གི་དྲུང་དུ་ཇི་ལྟར་གནས་པར་བྱ་ཞེ་ན། ཀུན་དགའ་བོ། འདི་ལྟ་སྟེ། སྟོན་པ་ལ་ཇི་ལྟ་བ་དེ་བཞིན་དུ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་
དག་ནི༑ ངའི་སྟོན་པའོ། །ཞེས་དེ་ལྟར་གནས་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི། བདག་དང་ཐེག་པ་གཅིག་ལ་ཞུགས་པའོ། །བྱང་ཆུབ་སེམས་དཔའ་
སེམས་དཔའ་ཆེན་པོ་འདི་དག་ནི། བདག་དང་ལམ་གཅིག་ཏུ་ཞུགས་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི། བདག་དང་བསམ་པ་མཐུན་པའོ། །བྱང་ཆུབ་
སེམས་དཔའ་སེམས་དཔའ་ཆེན་པོ་འདི་དག་ནི། བདག་དང་ཐེག་པ་མཐུན་པ་ལ་ཡང་དག་པར་ཞུགས་པ་སྟེ། གང་ལ་འདི་དག་གིས་བསླབ་པར་བྱ་བ་དེ་ལ་བདག་གིས་ཀྱང་བསླབ་པར་
བྱའོ༑ ༑འདི་དག་གིས་ཇི་ལྟར་བསླབ་པར་བྱ་བ་དེ་བཞིན་དུ་བདག་གིས་ཀྱང་དེ་ལྟར་བསླབ་པར་བྱའོ། །གལ་ཏེ་འདི་དག་ལས་ཁ་ཅིག་འདྲེས་པར་གནས་པས་གནས་པར་གྱུར་ནའང་
བདག་གིས་ནི། འདྲེས་པར་གནས་པས་གནས་པར་མི་བྱའོ། །གལ་ཏེ་ཡང་འདི་དག་ཐམས་ཅད་མཁྱེན་པ་དང་ལྡན་པའི་ཡིད་ལ་བྱེད་པས་མ་འདྲེས་པར་གནས་པས་གནས་ན། བདག་
གིས་ཀྱང་དེ་བཞིན་དུ་བསླབ་པར་བྱའོ། །ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཐམས་ཅད་མཁྱེན་པ་ཉིད་ལ་སློབ་པ་ན་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལ་བར་ཆད་མེད་པར་འགྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་
བརྒྱད་སྟོང་པ་ལས། མངོན་པའི་ང་རྒྱལ་གྱི་ལེའུ་ཞེས་བྱ་སྟེ། ཉི་ཤུ་བཞི་པའོ།། །།དེ་ནས་ཡང་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་
གསོལ་ཏོ། །བཅོམ་ལྡན་འདས། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་བསླབས་ན། ཐམས་ཅད་མཁྱེན་པ་ཉིད་ལ་སློབ་པ་ལགས། བཅོམ་ལྡན་འདས་ཀྱིས་བཀའ་
༄༅། །སྩལ་པ། རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཟད་པ་ལ་སློབ་ན། ཐམས་ཅད་མཁྱེན་པ་ཉིད་ལ་སློབ་བོ། །དེ་བཞིན་དུ་འབྱུང་བ་མེད་པ་
དང༌། འགག་པ་མེད་པ་དང༌། སྐྱེ་བ་མེད་པ་དང༌། དངོས་པོ་མེད་པ་དང༌། དབེན་པ་དང༌། འདོད་ཆགས་དང་བྲལ་བ་དང༌། ནམ་མཁའ་དང༌། ཆོས་ཀྱི་དབྱིངས་དང༌། རབ་འབྱོར། གལ་ཏེ་བྱང་ཆུབ་
སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ལ་སློབ་ན། ཐམས་ཅད་མཁྱེན་པ་ཉིད་ལ་སློབ་བོ། །རབ་འབྱོར་གྱིས་གསོལ་པ། བཅོམ་ལྡན་འདས། ཅིའི་སླད་དུ་བྱང་ཆུབ་སེམས་
དཔའ་སེམས་དཔའ་ཆེན་པོ་ཟད་པ་ལ་སློབ་ན། ཐམས་ཅད་མཁྱེན་པ་ཉིད་ལ་སློབ་པ་ལགས། དེ་བཞིན་དུ་འབྱུང་བ་མ་མཆིས་པ་དང༌། འགག་པ་མ་མཆིས་པ་དང༌། སྐྱེ་བ་མ་མཆིས་པ་དང༌།
དངོས་པོ་མ་མཆིས་པ་དང༌། དབེན་པ་དང༌། འདོད་ཆགས་དང་བྲལ་བ་དང༌། ནམ་མཁའ་དང༌། ཆོས་ཀྱི་དབྱིངས་དང༌། མྱ་ངན་ལས་འདས་པ་ལ་སློབ་ན། ཐམས་ཅད་མཁྱེན་པ་ཉིད་ལ་སློབ་པ་
ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། གང་འདི་སྐད་དུ་ཅིའི་ཕྱིར་བྱང་ཆུབ་སེམས་དཔའ་
སེམས་དཔའ་ཆེན་པོ་ཟད་པ་ལ་སློབ་ན། ཐམས་ཅད་མཁྱེན་པ་ཉིད་ལ་སློབ། དེ་བཞིན་དུ་འབྱུང་བ་མེད་པ་དང༌། འགག་པ་མེད་པ་དང༌། སྐྱེ་བ་མེད་པ་དང༌། དངོས་པོ་མེད་པ་དང༌། དབེན་པ་
དང༌། འདོད་ཆགས་དང་བྲལ་བ་དང༌། ནམ་མཁའ་དང༌། ཆོས་ཀྱི་དབྱིངས་དང༌། མྱ་ངན་ལས་འདས་པ་ལ་སློབ་ན། ཐམས་ཅད་མཁྱེན་པ་ཉིད་ལ་སློབ་པར་འགྱུར་ཞེས་ཟེར་བ། རབ་འབྱོར། དེ་
ཇི་སྙམ་དུ་སེམས། ཅི་དེ་བཞིན་གཤེགས་པའི་དེ་བཞིན་ཉིད་གང་ཡིན་པ་དང༌། དེ་བཞིན་ཉིད་གང་གིས་དེ་བཞིན་གཤེགས་པ་དེ་བཞིན་གཤེགས་པའོ། །ཞེས་རབ་ཏུ་འབྱེད་པ་དེ་ཟད་པར་འགྱུར་
རམ༑ རབ་འབྱོར་གྱིས་གསོལ་པ། བཅོམ་ལྡན་འདས། དེ་ནི། མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཟད་པ་ནི། ཟད་པར་མི་འགྱུར་ཏེ། བཅོམ་ལྡན་འདས། ཟད་པ་ནི། མི་ཟད་པ་
ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ཇི་སྙམ་དུ་སེམས། དེ་བཞིན་གཤེགས་པའི་དེ་བཞིན་ཉིད་གང་ཡིན་པ་དང༌། དེ་བཞིན་ཉིད་གང་གིས་དེ་བཞིན་གཤེགས་
པ་དེ་བཞིན་གཤེགས་པའོ། །ཞེས་རབ་ཏུ་འབྱེད་པ་དེ་འབྱུང་བར་འགྱུར་བའམ། འགག་པར་འགྱུར་བའམ། སྐྱེ་བར་འགྱུར་བའམ། དངོས་པོར་འགྱུར་བའམ། དབེན་པར་འགྱུར་བའམ། རྣམ་པར་
འཇིག་པར་འགྱུར་བའམ། འདོད་ཆགས་དང་བྲལ་བར་འགྱུར་བའམ། ནམ་མཁར་འགྱུར་བའམ། ཆོས་ཀྱི་དབྱིངས་སུ་འགྱུར་བ་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་
སོ༑ ༑བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ཇི་སྙམ་དུ་སེམས། དེ་བཞིན་གཤེགས་པའི་དེ་བཞིན་ཉིད་གང་ཡིན་པ་དང༌། དེ་བཞིན་ཉིད་གང་གིས་དེ་བཞིན་གཤེགས་པ་
༄༅། །དེ་བཞིན་གཤེགས་པའོ། །ཞེས་རབ་ཏུ་འབྱེད་པ་དེ་མྱ་ངན་ལས་འདའ་བར་འགྱུར་རམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་
ཀྱིས་བཀའ་སྩལ་པ། རབ་འབྱོར། དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། དེ་བཞིན་ཉིད་མི་ཟད་པའོ། །ཞེས་དེ་ལྟར་སློབ་སྟེ། རབ་འབྱོར། བྱང་ཆུབ་སེམས་
དཔའ་སེམས་དཔའ་ཆེན་པོ་དེ་ལྟར་སློབ་ན། ཐམས་ཅད་མཁྱེན་པ་ཉིད་ལ་སློབ་བོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ཤེས་རབ་ཀྱི་ཕ་རོལ་ཏུ་
ཕྱིན་པ་ལ་སློབ་བོ། །སངས་རྒྱས་ཀྱི་ས་ལ་སློབ་བོ། །སྟོབས་དག་ལ་སློབ་བོ། །མི་འཇིགས་པ་དག་ལ་སློབ་བོ། །སངས་རྒྱས་ཀྱི་ཆོས་ཐམས་ཅད་ལ་སློབ་བོ། །ཐམས་ཅད་མཁྱེན་པའི་ཡེ་
ཤེས་ལ་སློབ་བོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། བསླབ་པ་ཐམས་ཅད་ཀྱི་ཕ་རོལ་ཏུ་ཕྱིན་པ་རྗེས་སུ་ཐོབ་པར་འགྱུར་རོ། །རབ་འབྱོར། བྱང་ཆུབ་
སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། བདུད་དམ། བདུད་ཀྱི་འཁོར་ཏམ། བདུད་ཀྱི་རིས་ཀྱི་ལྷ་དག་གིས་བརྫི་བར་མི་ནུས་སོ། །རབ་འབྱོར། བྱང་ཆུབ་སེམས་དཔའ་སེམས་
དཔའ་ཆེན་པོ་དེ་ལྟར་སློབ་ན། མྱུར་དུ་ཕྱིར་མི་ལྡོག་པའི་ཆོས་ཉིད་རྗེས་སུ་ཐོབ་པར་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། མྱུར་དུ་བྱང་ཆུབ་
ཀྱི་སྙིང་པོ་ལ་འདུག་པར་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། རང་གི་སྤྱོད་ཡུལ་ལ་སྤྱོད་དོ། །རབ་འབྱོར། བྱང་ཆུབ་སེམས་དཔའ་སེམས་
དཔའ་ཆེན་པོ་དེ་ལྟར་སློབ་ན། མགོན་པོར་འགྱུར་བའི་ཆོས་དག་ལ་སློབ་བོ། །བྱམས་པ་ཆེན་པོ་ལ་སློབ་བོ། །སྙིང་རྗེ་ཆེན་པོ་ལ་སློབ་བོ། །དགའ་བ་ཆེན་པོ་ལ་སློབ་བོ། །བཏང་སྙོམས་ཆེན་པོ་ལ་
སློབ་བོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ཆོས་ཀྱི་འཁོར་ལོ་ལན་གསུམ་དུ་བཟླས་པ་རྣམ་པ་བཅུ་གཉིས་སུ་རབ་ཏུ་བསྐོར་བ་ལ་སློབ་བོ། །རབ་འབྱོར།
བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། སེམས་ཅན་གྱི་ཁམས་བྲི་བར་མི་བྱའོ། །ཞེས་སློབ་བོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན།
དེ་བཞིན་གཤེགས་པའི་གདུང་རྒྱུན་མི་འཆད་པར་བྱ་བ་ལ་སློབ་བོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། བདུད་རྩིའི་དབྱིངས་ཀྱི་སྒོ་དབྱེའོ་ཞེས་སློབ་བོ། །རབ་
འབྱོར༑ བསླབ་པ་རྒྱ་ཆེན་པོ་འདི་ནི། སེམས་སྟོབས་ཞན་པས་སློབ་མི་ནུས་ཤིང་བསླབ་པ་འདི་ལ་མཐུ་ཆུང་ངུས་བསླབ་པར་མི་ནུས་སོ། །དེ་ཅིའི་ཕྱིར་ཞེ་ན། རབ་འབྱོར། གང་བསླབ་པ་འདི་ལ་
སློབ་པ་དེ་དག་ནི། སེམས་ཅན་ཐམས་ཅད་ཀྱི་མཐུན་པ་ཐུན་མོང་ངོ༌། །རབ་འབྱོར། དེ་དག་ནི། སེམས་ཅན་ཐམས་ཅད་ཀྱི་མགོན་ནོ། །གང་བསླབ་པ་འདི་ལ་སློབ་པ་དེ་དག་ནི། སེམས་ཅན་
༄༅། །ཐམས་ཅད་ལས་མངོན་པར་འཕགས་པ་རྗེས་སུ་ཐོབ་པར་འདོད་པ་ཡིན་ཏེ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་པ་ནི། སེམས་
ཅན་དམྱལ་བ་དག་ཏུ་མི་སྐྱེ། བྱོལ་སོང་གི་སྐྱེ་གནས་དག་ཏུ་མི་སྐྱེ། ཡི་དྭགས་ཀྱི་ཡུལ་རྣམས་སུ་མི་སྐྱེ། ལྷ་མ་ཡིན་གྱི་ལུས་སུ་མི་སྐྱེ། མཐའ་འཁོབ་ཀྱི་སྐྱེ་བོའི་ནང་དུ་མི་སྐྱེ། གདོལ་པའི་
རིགས་སུ་མི་སྐྱེ། བྱ་བའི་རིགས་སུ་མི་སྐྱེ། རྔོན་པ་དང༌། ཉ་པ་དང༌། ཆོམ་རྐུན་པ་དང༌། ཤན་པའི་རིགས་སུ་མི་སྐྱེ་སྟེ། དེ་ལྟ་བུའི་རིགས་ངན་པ། ལས་ངན་པ། རྟེན་ངན་པའི་རིགས་
གཞན་དུའང་མི་སྐྱེའོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་པ་ནི། ལོང་བར་མི་འགྱུར། འོན་པར་མི་འགྱུར། ཞར་བར་མི་འགྱུར། རྡུམ་པོར་མི་འགྱུར།
སྒུར་པོར་མི་འགྱུར། འཐེང་པོར་མི་འགྱུར། ཞ་བོར་མི་འགྱུར། གྲུམ་པོར་མི་འགྱུར། ལྐུག་པར་མི་འགྱུར། དིག་པར་མི་འགྱུར། རྣ་བ་མི་གསལ་བར་མི་འགྱུར། ཡན་ལག་ཉམས་
པར་མི་འགྱུར། ཡན་ལག་མ་ཚང་བར་མི་འགྱུར། ཡན་ལག་མི་སྡུག་པར་མི་འགྱུར། མདོག་མི་སྡུག་པར་མི་འགྱུར། དབྱིབས་མི་སྡུག་པར་མི་འགྱུར། དབང་པོ་ཉམས་པར་མི་འགྱུར།
དབང་པོ་མ་ཚང་བར་མི་འགྱུར་ཏེ། དབང་པོའི་རྣམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །དབྱངས་ཕུན་སུམ་ཚོགས་པར་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་
དཔའ་ཆེན་པོ་དེ་ལྟར་སློབ་པ་ནི། སྲོག་གཅོད་པར་མི་འགྱུར། མ་བྱིན་པར་ལེན་པར་མི་འགྱུར། འདོད་པ་ལ་ལོག་པར་སྤྱོད་པར་མི་འགྱུར། བརྫུན་དུ་སྨྲ་བར་མི་འགྱུར། ཕྲ་མ་སྨྲ་བར་མི་
འགྱུར། ཚིག་རྩུབ་མོ་སྨྲ་བར་མི་འགྱུར། ཚིག་བཀྱལ་པ་སྨྲ་བར་མི་འགྱུར། བརྣབ་སེམས་ཅན་དུ་མི་འགྱུར། གནོད་སེམས་ཅན་དུ་མི་འགྱུར། ལོག་པར་ལྟ་བ་ཅན་དུ་མི་འགྱུར། ལོག་པར་
འཚོ་བས་འཚོ་བར་མི་བྱེད་དོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་པ་ནི། ལྷ་ཚེ་རིང་པོའི་ནང་དུ་མི་སྐྱེ། ཚུལ་ཁྲིམས་འཆལ་པ་ཡོངས་སུ་མི་འཛིན། ཡང་དག་
པ་མ་ཡིན་པའི་ཆོས་ཡོངས་སུ་མི་འཛིན། བསམ་གཏན་དང་སྙོམས་པར་འཇུག་པའི་དབང་གིས་མི་སྐྱེའོ། །དེ་ཅིའི་ཕྱིར་ཞེ་ན། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་
མཁས་པ་གང་དང་ལྡན་པས་ལྷ་ཚེ་རིང་པོའི་ནང་དུ་མི་སྐྱེ་བར་འགྱུར་བའི་ཐབས་མཁས་པ་དེ་ལ་ཡོད་དོ། །རབ་འབྱོར། ཐབས་མཁས་པ་དེའང་གང་ཞེ་ན། འདི་ལྟ་སྟེ། ཤེས་རབ་ཀྱི་ཕ་རོལ་
ཏུ་ཕྱིན་པ་འདི་ཉིད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་ཐབས་མཁས་པ་དང་ལྡན་པ་འདིས་བསམ་གཏན་ལའང་སྙོམས་པར་འཇོག་ལ་བསམ་གཏན་གྱི་དབང་གིས་སྐྱེ་
བར་མི་འགྱུར་བ་དེ་ལྟར་ཐབས་མཁས་པ་འདི་ལ་རྣལ་འབྱོར་དུ་བྱེད་དོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་པ་ནི། སྟོབས་ཡོངས་སུ་དག་པར་འགྱུར།
༄༅། །མི་འཇིགས་པ་ཡོངས་སུ་དག་པར་འགྱུར། སངས་རྒྱས་ཀྱི་ཆོས་ཐམས་ཅད་ཡོངས་སུ་དག་པར་འགྱུར་ཏེ། དེ་དག་རྗེས་སུ་ཐོབ་པར་འགྱུར་རོ། །ཚེ་དང་ལྡན་པ་རབ་
འབྱོར་གྱིས་གསོལ་པ། བཅོམ་ལྡན་འདས། གང་གི་ཚེ་ཆོས་ཐམས་ཅད་རང་བཞིན་གྱིས་ཡོངས་སུ་དག་པ་ཉིད་ལགས་ན། བཅོམ་ལྡན་འདས། དེའི་ཚེ་བྱང་ཆུབ་སེམས་དཔའ་སེམས་
དཔའ་ཆེན་པོ་ཆོས་གང་གིས་སྟོབས་ཡོངས་སུ་དག་པར་འགྱུར། མི་འཇིགས་པ་ཡོངས་སུ་དག་པར་འགྱུར། སངས་རྒྱས་ཀྱི་ཆོས་ཡོངས་སུ་དག་པར་འགྱུར་བ་རྗེས་སུ་ཐོབ་པར་འགྱུར།
དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། དེ་ཅིའི་ཕྱིར་ཞེ་ན། རབ་
འབྱོར༑ ཆོས་ཐམས་ཅད་ནི། རང་བཞིན་གྱིས་ཡོངས་སུ་དག་པ་ཡིན་ནོ། །རབ་འབྱོར། དེ་ལྟར་ཆོས་ཐམས་ཅད་རང་བཞིན་གྱིས་ཡོངས་སུ་དག་པ་ལ་བྱང་ཆུབ་སེམས་དཔའ་སེམས་
དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པ་དག་མི་ཞུམ་མི་འགོང་ན། རབ་འབྱོར། དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་འབྱོར། བྱིས་པ་སོ་སོའི་སྐྱེ་བོ་དག་ཆོས་
འདི་དག་དེ་ལྟར་མ་ཤེས་མ་མཐོང་བས་ཆོས་རྣམས་ཀྱི་ཆོས་ཉིད་མི་ཤེས་མི་མཐོང་སྟེ། རབ་འབྱོར། སེམས་ཅན་དེ་དག་གི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་འབད་ཅིང་བརྩོན་
འགྲུས་རྩོམ་སྟེ། བདག་ཁོ་ནས་མི་ཤེས་པའི་སེམས་ཅན་རྣམས་ཤེས་པར་བྱའོ། །བདག་ཁོ་ནས་མི་མཐོང་བའི་སེམས་ཅན་རྣམས་མཐོང་བར་བྱའོ། །ཞེས་བསླབ་པ་འདི་ལ་སློབ་བོ། །བསླབ་པ་འདི་ལ་
སློབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། སྟོབས་རྣམས་རྗེས་སུ་ཐོབ་པར་འགྱུར། མི་འཇིགས་པ་རྣམས་རྗེས་སུ་ཐོབ་པར་འགྱུར་རོ། །སངས་རྒྱས་ཀྱི་ཆོས་ཐམས་ཅད་རྗེས་སུ་ཐོབ་པར་
འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་པ་ནི། སེམས་ཅན་ཕ་རོལ་དང༌། གང་ཟག་ཕ་རོལ་དག་གི་སེམས་ཀྱི་སྤྱོད་པ་དང༌། གཡོ་བ་རྣམས་ཡང་དག་པ་ཇི་
ལྟ་བ་བཞིན་དུ་རབ་ཏུ་ཤེས་ཏེ། ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པས་ཕ་རོལ་གྱི་སེམས་ཀྱི་སྤྱོད་པ་ཤེས་པའི་ཕ་རོལ་ཏུ་འགྲོའོ། །རབ་འབྱོར། འདི་ལྟ་སྟེ། དཔེར་ན། ས་ཆེན་པོའི་སའི་
ཕྱོགས་གང་ན་རྡོ་བ་མེད་པ་དང༌། གང་ན་གསེར་དང༌། ས་ལེ་སྦྲམ་དང༌། དངུལ་དག་འབྱུང་བ་དེ་ལྟ་བུ་ནི། ཉུང་གི །ས་ཆེན་པོའི་ས་ཕྱོགས་གང་ན་བ་ཚྭ་ཅན་དང༌། གྲམ་ས་དང༌། རྩྭ་དང༌། སྡོང་དུམ་
དང༌། ཚེར་མ་སྣ་ཚོགས་ཀྱིས་གང་བ་དེ་ལྟ་བུ་ནི། ཆེས་མང་ངོ༌། །རབ་འབྱོར། དེ་བཞིན་དུ་སེམས་ཅན་གྱི་རིས་ན་གང་དག་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ཐམས་ཅད་མཁྱེན་པ་ཉིད་ཀྱི་བསླབ་
པ་ལ་སློབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཉུང་ངོ༌། །སེམས་ཅན་གྱི་རིས་ན་གང་ཉན་ཐོས་དང་རང་སངས་རྒྱས་ཀྱི་བསླབ་པ་ལ་སློབ་པའི་སེམས་ཅན་དེ་དག་ནི། ཆེས་མང་ངོ༌། །རབ་
༄༅། །འབྱོར༑ གཞན་ཡང་འདི་ལྟ་སྟེ། དཔེར་ན། སེམས་ཅན་གྱི་རིས་ན་འཁོར་ལོས་སྒྱུར་བའི་རྒྱལ་པོའི་སྲིད་ཐོབ་པར་འགྱུར་བའི་ལས་ཡང་དག་པར་བླངས་ཏེ་གནས་
པའི་སེམས་ཅན་དེ་དག་ནི། ཉུང་གི། སེམས་ཅན་གྱི་རིས་ན་གང་མཁར་གྱི་རྒྱལ་པོའི་སྲིད་ཐོབ་པར་འགྱུར་བའི་ལས་ཡང་དག་པར་བླངས་ཏེ་གནས་པའི་སེམས་ཅན་དེ་དག་ནི། ཆེས་མང་ངོ༌། །
རབ་འབྱོར། དེ་བཞིན་དུ་སེམས་ཅན་གྱི་རིས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །ཞེས་ལམ་ཆེན་པོ་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་
ཕྱིན་པའི་ལམ་དུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། ཉུང་ངོ༌། །སེམས་ཅན་གྱི་རིས་ན་གང་ཉན་ཐོས་དང་རང་སངས་རྒྱས་ཀྱི་ལམ་དུ་ཞུགས་པའི་སེམས་ཅན་
དེ་དག་ནི། ཆེས་མང་ངོ༌། །རབ་འབྱོར། གཞན་ཡང་འདི་ལྟ་སྟེ། དཔེར་ན། སེམས་ཅན་གྱི་རིས་ན་གང་དག་བརྒྱ་བྱིན་ཉིད་དུ་འགྱུར་བའི་ལས་ཡང་དག་པར་བླངས་ཏེ་གནས་པའི་སེམས་ཅན་དེ་
དག་ནི༑ ཉུང་ངོ༌། །སེམས་ཅན་གྱི་རིས་ན་གང་དག་ལྷའི་འཇིག་རྟེན་དུ་སྐྱེ་བར་འགྱུར་བའི་ལས་ཡང་དག་པར་བླངས་ཏེ་གནས་པའི་སེམས་ཅན་དེ་དག་ནི། ཆེས་མང་ངོ༌། །རབ་འབྱོར། དེ་
བཞིན་དུ་སེམས་ཅན་གྱི་རིས་ན་གང་དག་ཤེས་རབ་ཀྱི་ཕ་རོལ་ཏུ་ཕྱིན་པའི་བསླབ་པ་ལ་སློབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། ཉུང་ངོ༌། །རབ་འབྱོར། སེམས་
ཅན་གྱི་རིས་ན་གང་ཉན་ཐོས་དང་རང་སངས་རྒྱས་ཀྱི་བསླབ་པ་ལ་སློབ་པའི་སེམས་ཅན་དེ་དག་ནི། ཆེས་མང་ངོ༌། །རབ་འབྱོར། གཞན་ཡང་འདི་ལྟ་སྟེ། དཔེར་ན། སེམས་ཅན་གྱི་རིས་ན་གང་ཚངས་
པ་ཉིད་དུ་འགྱུར་བའི་ལས་ཡང་དག་པར་བླངས་ཏེ་གནས་པའི་སེམས་ཅན་དེ་དག་ནི། ཉུང་ངོ༌། །སེམས་ཅན་གྱི་རིས་ན་གང་དག་ཚངས་པའི་འཁོར་དུ་སྐྱེ་བར་འགྱུར་བའི་ལས་ཡང་དག་པར་བླངས་ཏེ་
གནས་པའི་སེམས་ཅན་དེ་དག་ནི། ཆེས་མང་ངོ༌། །རབ་འབྱོར། དེ་བཞིན་དུ་སེམས་ཅན་གྱི་རིས་ན་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་བྱང་ཆུབ་སེམས་
དཔའ་སེམས་དཔའ་ཆེན་པོ་དེ་དག་ནི། ཉུང་ངོ༌། །རབ་འབྱོར། སེམས་ཅན་གྱི་རིས་ན་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་འགྱུར་བའི་བྱང་ཆུབ་སེམས་དཔའ་
སེམས་དཔའ་ཆེན་པོ་དེ་དག་ནི། ཆེས་མང་ངོ༌། །རབ་འབྱོར། དེ་ལྟ་བས་ན། སེམས་ཅན་གྱི་རིས་ན་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པའི་སེམས་
ཅན་དེ་དག་ནི། ཉུང་ངོ༌། །རབ་འབྱོར། ཉུང་བ་དེ་དག་པས་ཀྱང་གང་དེ་བཞིན་ཉིད་དུ་སྒྲུབ་པའི་སེམས་ཅན་དེ་དག་ནི། ཆེས་ཉུང་ངོ༌། །རབ་འབྱོར། དེ་བཞིན་ཉིད་དུ་བསྒྲུབ་པ་ཆེས་ཉུང་པ་དེ་དག་པས་
ཀྱང་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་དེ་དག་ནི། ཆེས་ཉུང་ངོ༌། །རབ་འབྱོར། གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་ཉུང་བ་དེ་དག་པས་ཀྱང་བྱང་
༄༅། །ཆུབ་སེམས་དཔའ་སེམས་དཔའ་ཆེན་པོ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དེ་དག་ནི། ཆེས་ཉུང་ངོ༌། །རབ་འབྱོར། དེ་ལྟ་
བས་ན༑ བྱང་ཆུབ་སེམས་དཔའ་སེམས་དཔའ་ཆེན་པོས་ཉུང་བ་བས་ཀྱང་ཆེས་ཉུང་བའི་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་གྲངས་སུ་བགྲང་བར་འདོད་
པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བསླབ་པར་བྱའོ། །རྣལ་འབྱོར་དུ་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཤེས་རབ་ཀྱི་ཕ་རོལ་
ཏུ་ཕྱིན་པ་ལ་སློབ་པ་ན་ཐ་བ་དང་ལྡན་པའི་སེམས་མི་སྐྱེ། ཐེ་ཚོམ་དང་ལྡན་པའི་སེམས་མི་སྐྱེ། ཕྲག་དོག་དང་ལྡན་པའི་སེམས་མི་སྐྱེ། སེར་སྣ་དང་ལྡན་པའི་སེམས་མི་སྐྱེ། ཚུལ་ཁྲིམས་
འཆལ་བ་དང་ལྡན་པའི་སེམས་མི་སྐྱེ། གནོད་སེམས་དང་ལྡན་པའི་སེམས་མི་སྐྱེ། ལེ་ལོ་དང་ལྡན་པའི་སེམས་མི་སྐྱེ། གཡེང་བ་དང་ལྡན་པའི་སེམས་མི་སྐྱེ། འཆལ་བའི་ཤེས་རབ་དང་
ལྡན་པའི་སེམས་མི་སྐྱེའོ། །རབ་འབྱོར། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པས་ཕ་རོལ་ཏུ་ཕྱིན་པ་ཐམས་ཅད་ཡང་དག་པར་བཟུང་
བར་འགྱུར་རོ། །ཕ་རོལ་ཏུ་ཕྱིན་པ་ཐམས་ཅད་ཡོངས་སུ་བཟུང་བར་འགྱུར་རོ། །ཕ་རོལ་ཏུ་ཕྱིན་པ་ཐམས་ཅད་མཆོག་ཏུ་བཟུང་བར་འགྱུར་རོ། །ཕ་རོལ་ཏུ་ཕྱིན་པ་ཐམས་ཅད་རྗེས་སུ་སོང་
བར་འགྱུར་རོ། །ཕ་རོལ་ཏུ་ཕྱིན་པ་ཐམས་ཅད་ནང་དུ་འདུས་པར་འགྱུར་རོ། །རབ་འབྱོར། འདི་ལྟ་སྟེ། དཔེར་ན། འཇིག་ཚོགས་ལ་ལྟ་བའི་ནང་དུ་ལྟ་བ་དྲུག་ཅུ་རྩ་གཉིས་འདུས་པར་འགྱུར་ཏེ། རབ་འབྱོར།
དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པ་དེར་ཕ་རོལ་ཏུ་ཕྱིན་པ་ཐམས་ཅད་ནང་དུ་འདུས་པར་འགྱུར་རོ། །རབ་འབྱོར། འདི་ལྟ་སྟེ། དཔེར་ན།
སྐྱེས་བུའི་སྲོག་གི་དབང་པོའི་ནང་དུ་དབང་པོ་ཐམས་ཅད་འདུས་པར་འགྱུར་རོ། །རབ་འབྱོར། དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་
བའི་ཆོས་ཐམས་ཅད་ནང་དུ་འདུས་པར་འགྱུར་རོ། །རབ་འབྱོར། འདི་ལྟ་སྟེ། དཔེར་ན། སྐྱེས་བུའི་སྲོག་གི་དབང་པོ་འགགས་ན། དབང་པོ་ཐམས་ཅད་འགག་པར་འགྱུར་རོ། །རབ་འབྱོར། དེ་བཞིན་
དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་ན། མི་ཤེས་པ་འགག་པ་དང༌། མི་དགེ་བའི་ཆོས་ཐམས་ཅད་འགག་པར་འགྱུར་ཞིང༌། ཕ་རོལ་ཏུ་ཕྱིན་པ་
ཐམས་ཅད་ནང་དུ་འདུས་ཤིང་ཡོངས་སུ་འཛིན་པར་འགྱུར་རོ། །རབ་འབྱོར། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་བཟུང་བར་འདོད་པས་
ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་ན། སེམས་ཅན་ཐམས་ཅད་ཀྱི་མཆོག་ཏུ་
༄༅། །སློབ་བོ༑ ༑དེ་ཅིའི་ཕྱིར་ཞེ་ན། བསོད་ནམས་ཀྱི་མཆོག་ཉིད་ཡིན་པའི་ཕྱིར་རོ། །རབ་འབྱོར། དེ་ཇི་སྙམ་དུ་སེམས། ཅི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་ན་ཡོད་པའི་སེམས་ཅན་ཇི་སྙེད་སེམས་ཅན་དུ་བསྡུ་བས་ཀུན་ཏུ་བསྡུས་པ་དེ་དག་ཐམས་ཅད་མང་བ་ཡིན་ནམ། རབ་འབྱོར་གྱིས་གསོལ་པ། བཅོམ་ལྡན་འདས། འཛམ་བུའི་གླིང་གི་སེམས་
ཅན་ཡང་མང་བ་ལགས་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལྟ་ཅི་སྨོས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་
སེམས་དཔའ་སེམས་དཔའ་ཆེན་པོ་གཅིག་གིས་ཇི་སྲིད་འཚོའི་བར་དུ་འདུག་ཅིང་སེམས་ཅན་དེ་དག་ཐམས་ཅད་ལ་གོས་དང༌། ཟས་དང༌། མལ་ཆ་དང༌། ན་བའི་གསོས་སྨན་དང༌། ཡོ་
བྱད་དང༌། ཉེ་བར་ཕན་པ་ཐམས་ཅད་ཀྱིས་རིམ་གྲོར་བྱས་ན། རབ་འབྱོར། འདི་ཇི་སྙམ་དུ་སེམས། ཅི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དེའི་གཞི་ལས་བསོད་ནམས་མང་དུ་
བསྐྱེད་དམ། རབ་འབྱོར་གྱིས་གསོལ་པ། བཅོམ་ལྡན་འདས། མང་ངོ༌། །བདེ་བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་
དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཆུང་ངུ་ན་སེ་གོལ་གཏོགས་པ་སྲིད་དུ་སྒོམ་ན། དེ་བས་ཆེས་བསོད་ནམས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན།
རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི། དོན་དེ་ལྟར་ཆེ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱེད་པའོ། །རབ་འབྱོར། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་འཚང་རྒྱ་བར་འདོད་པ་དང༌། སེམས་ཅན་ཐམས་ཅད་ཀྱི་ནང་ན་བླ་ན་མེད་པར་འགྱུར་བར་འདོད་པ་དང༌། སེམས་ཅན་མགོན་མེད་པ་ཐམས་ཅད་ཀྱི་མགོན་དུ་འགྱུར་བར་འདོད་པ་དང༌།
སངས་རྒྱས་ཀྱི་ཡུལ་རྗེས་སུ་ཐོབ་པར་འདོད་པ་དང༌། སངས་རྒྱས་ཀྱི་ཁྱུ་མཆོག་ཏུ་འགྱུར་བ་རྗེས་སུ་ཐོབ་པར་འདོད་པ་དང༌། སངས་རྒྱས་ཀྱི་རྣམ་པར་རོལ་པས་རྩེ་བར་འདོད་པ་དང༌། སངས་རྒྱས་ཀྱི་སེང་གེའི་
སྒྲ་སྒྲོག་པར་འདོད་པ་དང༌། སངས་རྒྱས་ཀྱི་ཕུན་སུམ་ཚོགས་པ་རྗེས་སུ་ཐོབ་པར་འདོད་པ་དང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་ཆོས་ཀྱི་གཏམ་བྱེད་པར་འདོད་པའི་བྱང་ཆུབ་
སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བསླབ་པར་བྱའོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་པ་ན་
དེས་གང་མ་བསླབས་པར་འགྱུར་བའི་ཕུན་སུམ་ཚོགས་པ་དེ་དག་ངས་ཡང་དག་པར་རྗེས་སུ་མ་མཐོང་ངོ༌། །རབ་འབྱོར་གྱིས་གསོལ་པ། བཅོམ་ལྡན་འདས། ཡང་ཅི་ཉན་ཐོས་ཀྱི་ཕུན་སུམ་ཚོགས་
༄༅། །པའང་བྱང་ཆུབ་སེམས་དཔའ་སེམས་དཔའ་ཆེན་པོ་དེས་བསླབ་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཉན་ཐོས་ཀྱི་ཕུན་སུམ་ཚོགས་
པའང་བྱང་ཆུབ་སེམས་དཔའ་སེམས་དཔའ་ཆེན་པོ་དེས་བསླབ་པར་འགྱུར་ཏེ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཉན་ཐོས་ཀྱི་ཕུན་སུམ་ཚོགས་པ་ལའང་གནས་
པར་བྱའོ། །ཞེས་མི་སློབ། བདག་ལ་ཉན་ཐོས་ཀྱི་ཕུན་སུམ་ཚོགས་པ་ཡོད་པར་འགྱུར་རོ། །ཞེས་མི་སློབ་སྟེ། དེ་ལྟར་སློབ་པར་ནི། མི་བྱེད་དོ། །རབ་འབྱོར། ཡང་ཉན་ཐོས་ཀྱི་ཡོན་ཏན་གང་དག་
ཡིན་པ་དེ་དག་ཀྱང་ཡང་དག་པར་ཤེས་ཏེ། དེ་ལ་གནས་པ་ནི། མ་ཡིན་ནོ། །དེ་ལྟར་རྣམ་པར་དཔྱོད་པར་བྱེད་ཀྱི། གནས་པར་ནི་མི་བྱེད་དེ། བདག་གིས་ཉན་ཐོས་ཀྱི་ཡོན་ཏན་འདི་དག་བཤད་
པར་བྱའོ། །རབ་ཏུ་བསྟན་པར་བྱའོ། །ཞེས་སློབ་བོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱི་སྦྱིན་
པའི་གནས་སུ་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་ན། དེ་ལས་གཞན་པའི་སྦྱིན་པའི་གནས་ཉན་ཐོས་དང་ལྡན་པ་དང༌། རང་སངས་རྒྱས་དང་
ལྡན་པ་དེ་དག་ཐམས་ཅད་ཟིལ་གྱིས་གནོན་ཏེ། དེ་ཐམས་ཅད་མཁྱེན་པ་ཉིད་ལ་ཉེ་བར་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སློབ་པ་ནི། ཤེས་
རབ་ཀྱི་ཕ་རོལ་ཏུ་ཕྱིན་པ་མི་འདོར་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང༌། ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་དང་མ་བྲལ་བ་ཡིན་ནོ། །རབ་འབྱོར། བྱང་ཆུབ་སེམས་དཔའ་སེམས་
དཔའ་ཆེན་པོ་དེ་ལྟར་སྤྱོད་ན། ཐམས་ཅད་མཁྱེན་པ་ཉིད་ལས་ཡོངས་སུ་མི་ཉམས་པའི་ཆོས་ཅན་དུ་རིག་པར་བྱའོ། །ཉན་ཐོས་ཀྱི་ས་དང༌། རང་སངས་རྒྱས་ཀྱི་སའང་རིང་དུ་བྱེད་དོ། །བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ལ་ཉེ་བར་འགྱུར་རོ། །གལ་ཏེ་ཡང་དེ་འདི་སྙམ་དུ། འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། གང་ཞིག་ཐམས་ཅད་མཁྱེན་པ་ཉིད་ཐོབ་པར་བྱེད་པ་ཡིན་ནོ། །སྙམ་དུ་སེམས་
ཤིང༌། དེ་ལྟར་ཤེས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མི་སྤྱོད་དོ། །དེ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པ་འདིའང་ཡང་དག་པར་མི་ཤེས་ཏེ། འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པའོ། །འདིའི་ཤེས་
རབ་ཀྱི་ཕ་རོལ་ཏུ་ཕྱིན་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཐམས་ཅད་མཁྱེན་པ་ཉིད་ཐོབ་པའོ། །ཞེས་རབ་འབྱོར། གལ་ཏེ་དེ་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཡང་
དག་པར་མི་ཤེས། ཡང་དག་པར་རྗེས་སུ་མི་མཐོང་ན། རབ་འབྱོར། དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་ནོ། །འཕགས་པ་
ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། བསླབ་པའི་ལེའུ་ཞེས་བྱ་སྟེ། ཉི་ཤུ་ལྔ་པའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་ཉི་ཤུ་
༄༅། །གཅིག་པ༑ དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱོད་པ་ཉིད་ཀྱིས་ཀྱང་རེ་ཞིག་སེམས་ཅན་ཐམས་
ཅད་འདི་ལྟར་ཟིལ་གྱིས་གནོན་ན། གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་པས་ལྟ་ཅི་སྨོས། སེམས་ཅན་གང་དག་ཐམས་
ཅད་མཁྱེན་པ་ཉིད་དུ་སེམས་འཇུག་པ་དེ་དག་ནི། རྙེད་པ་ལེགས་པར་རྙེད་པ་ཡིན། སེམས་ཅན་དེ་དག་ནི། འཚོ་བའང་ལེགས་པར་འཚོ་བ་ཡིན་ན། ཡང་གང་གིས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་སེམས་བསྐྱེད་པ་ལྟ་ཅི་སྨོས། སེམས་ཅན་དམ་པ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བའི་སེམས་
ཅན་དེ་དག་ནི། འདོད་པར་བྱ་བའོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་མེ་ཏོག་མན་དཱ་ར་བ་དག་མངོན་པར་སྤྲུལ་ནས་མེ་ཏོག་སྙིམ་པར་ཐོགས་ཏེ་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་ལ་གཏོར་ནས་ཚིག་ཏུའང་འདི་སྐད་ཅེས་སྨྲས་སོ། །བྱང་ཆུབ་སེམས་དཔའི་ཐེག་པ་པའི་གང་ཟག་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་སངས་རྒྱས་ཏེ་མངོན་པར་རྫོགས་པར་སངས་རྒྱས་ནས་འཁོར་བའི་རྒྱ་མཚོ་ཆེན་པོས་ཁྱེར་བར་གྱུར་པའི་སེམས་ཅན་ཐམས་ཅད་ཕ་རོལ་གྱི་འགྲམ་རྫོགས་པའི་
སངས་རྒྱས་ཀྱི་ས་ལ་མཉམ་པར་གཞག་པར་བགྱིའོ། །ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་དག་གིས་འཚལ་བ་དང༌། ཡོངས་སུ་བསམས་པ་དང༌། ཡོངས་སུ་
བཟུང་བའི་སེམས་བསྐྱེད་པ་དེ་རྣམས་འབྱོར་བར་གྱུར་ཅིག །དེ་དག་གི་སངས་རྒྱས་ཀྱི་ཆོས་དེ་དག་ཉིད་ཡོངས་སུ་རྫོགས་པར་གྱུར་ཅིག། ཐམས་ཅད་མཁྱེན་པ་ཉིད་དང་ལྡན་པའི་ཆོས་དེ་དག་ཉིད་
ཡོངས་སུ་རྫོགས་པར་གྱུར་ཅིག །རང་བྱུང་གི་ཆོས་དེ་དག་ཉིད་ཡོངས་སུ་རྫོགས་པར་གྱུར་ཅིག །མི་འཕྲོག་པའི་ཆོས་དེ་དག་ཉིད་ཡོངས་སུ་རྫོགས་པར་གྱུར་ཅིག །བཅོམ་ལྡན་འདས། བདག་ནི། བྱང་ཆུབ་
སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་གང་ཡིན་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་ལྡོག་པའི་སེམས་བསྐྱེད་པ་གཅིག་ཀྱང་མི་སྐྱེའོ། །བཅོམ་ལྡན་འདས།
བདག་ནི། བྱང་ཆུབ་སེམས་དཔའི་ཐེག་པ་པའི་གང་ཟག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཡང་དག་པར་ཞུགས་པ་གང་ཡིན་པ་དེ་དག་དེ་ལས་སླར་ལྡོག་
པར་སེམས་བསྐྱེད་པ་གཅིག་ཀྱང་མི་སྐྱེ་སྟེ། སེམས་ཅན་རྣམས་ཀྱི་འཁོར་བ་ན་སྤྱོད་པའི་སྡུག་བསྔལ་རྣམས་ཡང་དག་པར་མཐོང་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་རྒྱ་ཆེར་སྐྱེད་
པར་འགྱུར་རོ། །དེ་ཅིའི་སླད་དུ་ཞེ་ན། གང་དག་སེམས་བསྐྱེད་པ་འདི་ལྟ་བུ་འདི་དག་དང་ལྡན་ཏེ། ཇི་ལྟར་བདག་བརྒལ་བས་སེམས་ཅན་རྣམས་བསྒྲལ་བར་བགྱི། གྲོལ་བས་དགྲོལ་བར་བགྱི། དབུགས་
༄༅། །བྱུང་བས་དབུགས་དབྱུང་བར་བགྱི། ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའ་བར་བགྱིའོ། །ཞེས་དེ་ལྟ་བུའི་སེམས་བསྐྱེད་པ་དེ་དག་གིས་གནས་པ་
དེ་དག་ནི། སྙིང་རྗེ་ཆེན་པོ་དེ་དོན་དུ་འཚལ་བ་དང༌། སྨན་པར་འཚལ་བ་དང༌། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་ལ་སྙིང་བརྩེ་བས་སྙིང་བརྩེ་བར་བགྱིད་པ་ལགས་སོ། །བཅོམ་ལྡན་འདས།
གང་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ལ་དང་པོར་ཞུགས་པ་དེ་དག་གི་སེམས་བསྐྱེད་པ་དེ་དག་ལ་རྗེས་སུ་ཡི་རང་བ་དང༌། བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་སེམས་
བསྐྱེད་པ་དེ་དག་ལའང་རྗེས་སུ་ཡི་རང་བ་དང༌། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཕྱིར་མི་ལྡོག་པའི་ཆོས་ཉིད་ལ་ཡང་རྗེས་སུ་ཡི་རང་བ་དང༌། སྐྱེ་བ་གཅིག་
གིས་ཐོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྐྱེ་བ་གཅིག་གིས་ཐོགས་པའི་ཆོས་ཉིད་ལའང་རྗེས་སུ་ཡི་རང་བར་བགྱིད་ན། བཅོམ་ལྡན་འདས། རིགས་ཀྱི་བུའམ་རིགས་
ཀྱི་བུ་མོ་དེ་བསོད་ནམས་ཇི་ཙམ་ཞིག་བསྐྱེད་པར་འགྱུར། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །ཡང་
རི་རབ་རིའི་རྒྱལ་པོ་སྲང་གྲངས་སུ་གཅལ་བའི་ཚད་ནི། གཟུང་བར་ནུས་ཀྱི། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའ་སེམས་དཔའ་ཆེན་པོའི་རྗེས་སུ་ཡི་རང་བ་དང་
ལྡན་པའི་སེམས་བསྐྱེད་པ་དེའི་བསོད་ནམས་ཀྱི་ཚད་ནི། གཟུང་བར་མི་ནུས་སོ། །ཀཽ་ཤི་ཀ །ཡང་གླིང་ཆེན་པོ་བཞི་པའི་འཇིག་རྟེན་གྱི་ཁམས་སྲང་གྲངས་སུ་གཅལ་བའི་ཚད་ནི། གཟུང་བར་ནུས་ཀྱི། ཀཽ་
ཤི་ཀ །རྗེས་སུ་ཡི་རང་བ་དང་ལྡན་པའི་སེམས་བསྐྱེད་པ་དེའི་བསོད་ནམས་ཀྱི་ཚད་ནི། གཟུང་བར་མི་ནུས་སོ། །ཀཽ་ཤི་ཀ །ཡང་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་སྲང་གྲངས་སུ་གཅལ་བའི་ཚད་ནི། གཟུང་
བར་ནུས་ཀྱི། ཀཽ་ཤི་ཀ །རྗེས་སུ་ཡི་རང་བ་དང་ལྡན་པའི་སེམས་བསྐྱེད་པ་དེའི་བསོད་ནམས་ཀྱི་ཚད་ནི། གཟུང་བར་མི་ནུས་སོ། །ཀཽ་ཤི་ཀ །ཡང་སྟོང་གཉིས་པ་བར་མའི་འཇིག་རྟེན་གྱི་ཁམས་སྲང་
གྲངས་སུ་གཅལ་བའི་ཚད་ནི། གཟུང་བར་ནུས་ཀྱི། ཀཽ་ཤི་ཀ །རྗེས་སུ་ཡི་རང་བ་དང་ལྡན་པའི་སེམས་བསྐྱེད་པ་དེའི་བསོད་ནམས་ཀྱི་ཚད་ནི། གཟུང་བར་མི་ནུས་སོ། །ཀཽ་ཤི་ཀ །ཡང་སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་སྲང་གྲངས་སུ་གཅལ་བའི་ཚད་ནི། གཟུང་བར་ནུས་ཀྱི། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའ་སེམས་དཔའ་ཆེན་པོའི་རྗེས་སུ་ཡི་
རང་བ་དང་ལྡན་པའི་སེམས་བསྐྱེད་པ་དེའི་བསོད་ནམས་ཀྱི་ཚད་ནི། གཟུང་བར་མི་ནུས་སོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་
ཅེས་གསོལ་ཏོ། །བཅོམ་ལྡན་འདས། སེམས་ཅན་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་དང་པོ་བསྐྱེད་པ་ནས་བཟུང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
༄༅། །མངོན་པར་རྫོགས་པར་སངས་རྒྱས་པའི་བར་རྣམས་ཀྱི་རྗེས་སུ་ཡི་རང་བ་དང་ལྡན་པའི་སེམས་བསྐྱེད་པའི་བསོད་ནམས་དེ་ལྟར་གཞལ་དུ་མ་མཆིས་པ་ལེགས་
པར་མི་ཉན། མ་འཚལ། མ་མཐོང༌། རྗེས་སུ་ཡི་རང་བར་མི་སེམས་པ་དེ་དག་ནི། བདུད་ཀྱིས་བྱིན་གྱིས་བརླབས་པར་རིག་པར་བགྱིའོ། ། །བཅོམ་ལྡན་འདས། སེམས་ཅན་གང་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱི་སེམས་བསྐྱེད་པ་འདི་ལ་རྗེས་སུ་ཡི་རང་བར་མི་བགྱིད་པ་དེ་དག་ནི། བདུད་ཀྱི་ཕྱོགས་སུ་གྱུར་པ་ལགས་སོ། །བཅོམ་ལྡན་འདས། སེམས་ཅན་གང་བྱང་
ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སེམས་བསྐྱེད་པ་འདི་ལ་རྗེས་སུ་ཡི་རང་བར་མི་བགྱིད་པ་དེ་དག་ནི། བདུད་ཀྱི་གནས་ནས་ཤི་འཕོས་པ་ལགས་སོ། །དེ་ཅིའི་སླད་དུ་ཞེ་ན།
བཅོམ་ལྡན་འདས། གང་གིས་སེམས་བསྐྱེད་པ་འདི་དག་མངོན་པར་བསྒྲུབས་པ་དང༌། སེམས་བསྐྱེད་པ་འདི་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་
པའམ༑ སེམས་བསྐྱེད་པ་འདི་དག་ལ་རྗེས་སུ་ཡི་རང་བར་བགྱིས་པ་དེ་དག་གིས་ནི། བདུད་ཀྱི་གནས་རྣམ་པར་འཇིག་པར་བགྱིད་པ་ལགས་སོ། །བཅོམ་ལྡན་འདས། བྱང་ཆུབ་སེམས་དཔའ་
སེམས་དཔའ་ཆེན་པོ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་སེམས་བསྐྱེད་པ་
དེ་དག་ནི། རྗེས་སུ་ཡི་རང་བར་བགྱི་བ་ལགས་སོ། །བཅོམ་ལྡན་འདས། གང་གིས་དེ་བཞིན་གཤེགས་པ་ཡོངས་སུ་མ་བཏང་བ་དང༌། ཆོས་ཡོངས་སུ་མ་བཏང་བ་དང༌། དགེ་འདུན་ཡོངས་སུ་མ་
བཏང་བའི་རིགས་ཀྱི་བུའམ་རིགས་ཀྱི་བུ་མོ་དེ་དག་གིས་སེམས་བསྐྱེད་པ་འདི་ལ་རྗེས་སུ་ཡི་རང་བར་བགྱིའོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་
བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །དེ་དེ་བཞིན་ནོ། །དེ་དེ་བཞིན་ཏེ། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་གང་དག་གིས་དེ་བཞིན་གཤེགས་པ་ཡོངས་སུ་མ་བཏང་བ་དང༌།
ཆོས་ཡོངས་སུ་མ་བཏང་བ་དང༌། དགེ་འདུན་ཡོངས་སུ་མ་བཏང་བ་དེ་དག་གིས་སེམས་བསྐྱེད་པ་འདི་དག་ལ་རྗེས་སུ་ཡི་རང་བར་བྱའོ། །ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་
སེམས་དཔའི་ཐེག་པ་པའམ། རང་སངས་རྒྱས་ཀྱི་ཐེག་པ་པའམ། ཉན་ཐོས་ཀྱི་ཐེག་པ་པ་གང་དག་གིས་སེམས་བསྐྱེད་པ་འདི་ལ་རྗེས་སུ་ཡི་རང་བར་བྱས་ན། དེ་དག་མྱུར་དུ་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མཉེས་པར་བྱེད་པར་འགྱུར་གྱི། མི་མཉེས་པར་བྱེད་པར་མི་འགྱུར་རོ། །དེ་སྐད་ཅེས་བཀའ་སྩལ་པ་དང༌། བཅོམ་
ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་དེ་བཞིན་ནོ། །བདེ་བར་གཤེགས་པ། དེ་དེ་བཞིན་ཏེ། རིགས་ཀྱི་བུའམ་རིགས་ཀྱི་
༄༅། །བུ་མོ་བྱང་ཆུབ་སེམས་དཔའི་ཐེག་པ་པའམ། རང་སངས་རྒྱས་ཀྱི་ཐེག་པ་པའམ། ཉན་ཐོས་ཀྱི་ཐེག་པ་པ་གང་དག་གིས་སེམས་བསྐྱེད་པ་འདི་དག་ལ་རྗེས་སུ་ཡི་རང་
བ་དེ་དག་ནི། ཤིན་ཏུ་མྱུར་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མཉེས་པར་བགྱིད་པར་འགྱུར་གྱི། མི་མཉེས་པར་བགྱིད་པར་མི་འགྱུར་རོ། །
དེ་ལྟར་རྗེས་སུ་ཡི་རང་བ་དང་ལྡན་པའི་སེམས་བསྐྱེད་པའི་དགེ་བའི་རྩ་བ་དེ་དག་གིས་གང་དང་གང་དུ་སྐྱེ་བར་གྱུར་པ་དེ་དང་དེར་བཀུར་སྟིར་བགྱིས་པར་འགྱུར། བླ་མར་བགྱིས་པར་འགྱུར། རྗེད་
པར་བགྱིས་པར་འགྱུར། མཆོད་པར་བགྱིས་པར་འགྱུར། རི་མོར་བགྱིས་པར་འགྱུར། བསྙེན་བཀུར་བགྱིས་པར་འགྱུར་ཏེ། དེ་དག་ཡིད་དུ་མི་འོང་བའི་གཟུགས་མཐོང་བར་མི་འགྱུར། དེ་དག་
ཡིད་དུ་མི་འོང་བའི་སྒྲ་ཐོས་པར་མི་འགྱུར། དེ་དག་ཡིད་དུ་མི་འོང་བའི་དྲི་སྣོམ་པར་མི་འགྱུར། དེ་དག་ཡིད་དུ་མི་འོང་བའི་རོ་ཡོངས་སུ་མྱོང་བར་མི་འགྱུར། དེ་དག་ཡིད་དུ་མི་འོང་བའི་རེག་བྱ་ལ་རེག་
པར་མི་འགྱུར་རོ། །དེ་དག་ངན་སོང་དུ་མི་སྐྱེ་བར་རིག་པར་བགྱི་སྟེ། དེ་དག་མཐོ་རིས་སུ་སྐྱེ་བར་རིག་པར་བགྱིའོ། །དེ་ཅིའི་སླད་དུ་ཞེ་ན། འདི་ལྟར་རིགས་ཀྱི་བུའམ་རིགས་ཀྱི་བུ་མོ་དེ་དག་གིས་སེམས་
ཅན་གཞལ་དུ་མེད་པ་དང༌། གྲངས་མེད་པའི་དགེ་བའི་རྩ་བ་སེམས་ཅན་ཐམས་ཅད་བདེ་བར་བྱེད་པ་ལ་རྗེས་སུ་ཡི་རང་བའི་སླད་དུའོ། །བཅོམ་ལྡན་འདས། གང་གིས་འདུན་པ་བསྐྱེད་དེ་གང་ཟག་
བྱང་ཆུབ་སེམས་དཔའི་ཐེག་པ་ཅན་རྣམས་ཀྱི་སེམས་བསྐྱེད་པ་དེ་དག་ལ་རྗེས་སུ་ཡི་རང་བར་བགྱིས་པ་དེ་དག་གི་སེམས་བསྐྱེད་པ་དེ་དག་ཀྱང་རྣམ་པར་འཕེལ་བས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཐོབ་པར་བགྱིད་པར་འགྱུར་རོ། །དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་གཞལ་དུ་མ་མཆིས། གྲངས་མ་མཆིས་པ་
རྣམས་ཡོངས་སུ་མྱ་ངན་ལས་འདའ་བར་བགྱིད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ །དེ་བཞིན་གཤེགས་པའི་མཐུས་ཁྱོད་ཀྱིས་ཚིག་ཇི་སྐད་སྨྲས་པ་དེ་དེ་བཞིན་ནོ། །དེ་དེ་
བཞིན་ཏེ། ཀཽ་ཤི་ཀ །རིགས་ཀྱི་བུའམ་རིགས་ཀྱི་བུ་མོ་གང་གིས་གང་ཟག་བྱང་ཆུབ་སེམས་དཔའི་ཐེག་པ་པ་རྣམས་ཀྱི་སེམས་བསྐྱེད་པ་དེ་དག་ལ་རྗེས་སུ་ཡི་རང་བར་བྱས་ན། ཀཽ་ཤི་ཀ །རྣམ་གྲངས་
འདིས་རིགས་ཀྱི་བུའམ་རིགས་ཀྱི་བུ་མོ་དེས་གང་ཟག་བྱང་ཆུབ་སེམས་དཔའི་ཐེག་པ་པ་རྣམས་ཀྱི་སེམས་བསྐྱེད་པ་དེ་དག་ལ་རྗེས་སུ་ཡི་རང་བར་བྱས་པས་སེམས་ཅན་གཞལ་དུ་མེད། བགྲང་དུ་མེད་པ་
དག་གི་དགེ་བའི་རྩ་བ་ལ་རྗེས་སུ་ཡི་རང་བར་འགྱུར་བསྐྱེད་པ་དང༌། མངོན་པར་བསྒྲུབས་པར་འགྱུར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། སེམས་སྒྱུ་མ་ལྟ་བུ་ཇི་ལྟར་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་
༄༅། །སྩལ་ཏོ༑ ༑རབ་འབྱོར། འདི་ཇི་སྙམ་དུ་སེམས། ཁྱོད་ཀྱིས་སེམས་སྒྱུ་མ་ལྟ་བུར་ཡང་དག་པར་རྗེས་སུ་མཐོང་ངམ། རབ་འབྱོར་གྱིས་གསོལ་པ། བཅོམ་ལྡན་
འདས༑ དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཁྱོད་ཀྱིས་སྒྱུ་མ་ཡང་དག་པར་རྗེས་སུ་མཐོང་ངམ། རབ་འབྱོར་གྱིས་གསོལ་
པ༑ བཅོམ་ལྡན་འདས། དེ་ནི། མ་ལགས་ཏེ། བཅོམ་ལྡན་འདས། བདག་གིས་སེམས་སྒྱུ་མ་ལྟ་བུ་དང༌། སྒྱུ་མ་ཡང་དག་པར་རྗེས་སུ་མ་མཐོང་ངོ༌། །བཅོམ་ལྡན་འདས་ཀྱིས་བཀའ་སྩལ་
པ༑ རབ་འབྱོར། འདི་ཇི་སྙམ་དུ་སེམས། སྒྱུ་མ་དང༌། སེམས་སྒྱུ་མ་ལྟ་བུ་ཡང་ཡང་དག་པར་རྗེས་སུ་མ་མཐོང་བ་གང་ཡིན་པ་ཁྱོད་ཀྱིས་ཅི་སྒྱུ་མའམ། སེམས་སྒྱུ་མ་ལྟ་བུ་ལས་གཞན་ན་
ཆོས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་ཆོས་དེ་ཡང་དག་པར་རྗེས་སུ་མཐོང་ངམ། །རབ་འབྱོར་གྱིས་གསོལ་པ། བཅོམ་ལྡན་འདས།
དེ་ནི༑ མ་ལགས་ཏེ། བཅོམ་ལྡན་འདས། བདག་གིས་སྒྱུ་མའམ། སེམས་སྒྱུ་མ་ལྟ་བུ་ལས་གཞན་ན་ཆོས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
རྒྱ་བའི་ཆོས་དེ་ཡང་དག་པར་རྗེས་སུ་མ་མཐོང་ངོ༌། །བཅོམ་ལྡན་འདས། བདག་གིས་སྒྱུ་མའམ། སེམས་སྒྱུ་མ་ལྟ་བུ་ལས་གཞན་དུ་ཆོས་དེ་ཡང་དག་པར་རྗེས་སུ་མ་མཐོང་ན། མཆིས་
པའོ༑ ༑ཞེའམ། མ་མཆིས་པའོ། །ཞེས་ཆོས་།གང་ཞིག་བརྗོད་པར་བགྱི། ཆོས་ཤིན་ཏུ་དབེན་པ་དེ་ནི། མཆིས་པའོ། །ཞེའམ། མ་མཆིས་པའོ། །ཞེས་རྟོགས་སུ་མ་མཆིས་ཏེ། ཆོས་གང་ཤིན་ཏུ་དབེན་
པ་དེ་ནི༑ བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་མ་མཆིས་པ་ནི། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་མི་རྒྱའོ། །བཅོམ་ལྡན་འདས། དེ་ལྟ་བས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཤིན་ཏུ་དབེན་པ་ལགས་ལ། ཆོས་གང་ཤིན་ཏུ་དབེན་པའི་ཆོས་དེ་ནི། །
བསྒོམ་པར་བགྱི་བ་མ་ལགས་ཏེ། དེས་ནི། ཆོས་གང་ཡང་ཐོབ་པར་བགྱིད་པའམ། སྤོང་བར་བགྱིད་པ་མ་ལགས་ན། བཅོམ་ལྡན་འདས། ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཤིན་ཏུ་དབེན་
པ་ལ་བརྟེན་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། བཅོམ་ལྡན་འདས། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཀྱང་ཤིན་ཏུ་དབེན་པ་ལགས་ཏེ། བཅོམ་ལྡན་འདས། གང་གི་ཚེ་ཤེས་རབ་ཀྱི་ཕ་རོལ་ཏུ་ཕྱིན་པ་ཤིན་ཏུ་དབེན་པ་ལགས་ལ། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཀྱང་ཤིན་ཏུ་དབེན་པ་ལགས་ན། བཅོམ་ལྡན་འདས། དེའི་ཚེ་ཇི་ལྟར་དབེན་པས་དབེན་པ་མངོན་པར་རྫོགས་པར་འཚང་རྒྱ་བར་འགྱུར། དེ་སྐད་ཅེས་གསོལ་པ་དང༌། བཅོམ་ལྡན་
༄༅། །འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། ལེགས་སོ། ལེགས་སོ། །རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་
འབྱོར༑ ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཤིན་ཏུ་དབེན་པའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཤིན་ཏུ་དབེན་པ་ཡིན་ཏེ། རབ་འབྱོར། གང་གི་ཕྱིར་ཤེས་རབ་ཀྱི་ཕ་རོལ་
ཏུ་ཕྱིན་པ་ཤིན་ཏུ་དབེན་པ་ཉིད་ཀྱི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཤིན་ཏུ་དབེན་པ་མངོན་པར་རྫོགས་པར་འཚང་རྒྱའོ། །རབ་འབྱོར། གལ་ཏེ་བྱང་ཆུབ་སེམས་དཔའ་སེམས་
དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཤིན་ཏུ་དབེན་པའོ། །ཞེས་ཡང་དག་པར་ཤེས་ན། དེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་ནོ། །རབ་འབྱོར། དེ་ལྟར་བྱང་ཆུབ་སེམས་དཔའ་
སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། རབ་འབྱོར། ཤེས་རབ་ཀྱི་ཕ་
རོལ་ཏུ་ཕྱིན་པ་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའམ་མེད་དོ། །དབེན་པས་དབེན་པ་མངོན་པར་རྫོགས་པར་འཚང་
མི་རྒྱ་མོད་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་ཡང་རྒྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་
ལ་མ་བརྟེན་པར་ཡང་མངོན་པར་རྫོགས་པར་འཚང་མི་རྒྱའོ། །རབ་འབྱོར་གྱིས་གསོལ་པ། བཅོམ་ལྡན་འདས། ཇི་ལྟར་བདག་གིས་བཅོམ་ལྡན་འདས་ཀྱིས་བཀའ་སྩལ་པའི་དོན་འཚལ་
པ་དེ་ལྟར་ན། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ནི། དོན་ཟབ་མོ་ལ་སྤྱོད་དོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ།
རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཟབ་མོ་ལ་སྤྱོད་དོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་དོན་ཟབ་མོ་ལའང་སྤྱོད་ལ། འདི་ལྟ་སྟེ། ཉན་ཐོས་
ཀྱི་སའམ་རང་སངས་རྒྱས་ཀྱི་སར་དོན་དེ་མངོན་སུམ་དུ་མི་བྱེད་པ་ནི། དཀའ་བ་བྱེད་པ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། ཇི་ལྟར་བདག་གིས་བཅོམ་ལྡན་འདས་ཀྱིས་བཀའ་སྩལ་
པའི་དོན་འཚལ་བ་དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་དཀའ་བ་བགྱིད་པ་ཅང་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། འདི་ལྟར་གང་ཞིག་མངོན་སུམ་དུ་བགྱིད་
པའི་ཆོས་དེ་ཉིད་ཀྱང་མི་དམིགས། གང་མངོན་སུམ་དུ་བགྱི་བའི་ཆོས་དེའང་མི་དམིགས། གང་གིས་མངོན་སུམ་དུ་བགྱི་བའི་ཆོས་དེའང་མི་དམིགས་པའི་སླད་དུའོ། །བཅོམ་ལྡན་འདས། གལ་ཏེ་
འདི་སྐད་བཤད་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་མི་ཞུམ། མི་འགོང༌། ཀུན་ཏུ་མི་ཞུམ། ཡིད་ཕྱིར་ཕྱོགས་པར་མི་འགྱུར། མི་དངང༌། ཀུན་ཏུ་མི་སྐྲག །ཀུན་ཏུ་སྐྲག་པ་དང་
༄༅། །ལྡན་པར་མི་འགྱུར་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །གལ་ཏེ་སྤྱོད་དོ། །སྙམ་དུ་ཡང་དག་པར་རྗེས་སུ་མི་མཐོང་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་
སྤྱོད་དོ༑ ༑གལ་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་གྱུར་ཏོ། །སྙམ་དུ་དེ་ལྟར་ཡང་ཡང་དག་པར་རྗེས་སུ་མི་མཐོང་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །
གལ་ཏེ་བདག་གིས་ཉན་ཐོས་དང་རང་སངས་རྒྱས་ཀྱི་ས་རྒྱང་རིང་དུ་བསྲིངས་སོ། །སྙམ་དུ་དེ་ལྟར་ཡང་དེ་མི་སེམས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །བཅོམ་ལྡན་འདས། འདི་ལྟ་
སྟེ༑ དཔེར་ན། ནམ་མཁའ་ནི། འདི་སྙམ་དུ། བདག་ཁ་ཅིག་དང་ནི། ཉེའོ། །ཁ་ཅིག་དང་ནི། རིང་ངོ༌། །ཞེས་སྙམ་དུ་མི་སེམས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ནམ་མཁའ་ལ་
རྣམ་པར་རྟོག་པ་མ་མཆིས་པའི་སླད་དུ་སྟེ། བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡང་བདག་ནི། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་དང་ཉེ་བར་གྱུར་ཏེ། ཉན་ཐོས་ཀྱི་ས་དང༌། རང་སངས་རྒྱས་ཀྱི་ས་ནི། བདག་དང་རྒྱང་རིང་ངོ༌། །སྙམ་དུ་མི་སེམས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཤེས་
རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་རྟོག་པ་མ་མཆིས་པའི་སླད་དུའོ། །བཅོམ་ལྡན་འདས། འདི་ལྟ་སྟེ། དཔེར་ན། སྒྱུ་མའི་སྐྱེས་བུ་ནི། འདི་སྙམ་དུ། སྒྱུ་མ་བྱེད་པ་ནི། བདག་དང་ཉེའི།
ཡང་སྐྱེ་བོའི་ཚོགས་གཞན་འདུས་པ་འདི་ནི། བདག་དང་རྒྱང་རིང་ངོ༌། །ཞེས་མི་སེམས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། སྒྱུ་མའི་སྐྱེས་བུ་ལ་རྣམ་པར་རྟོག་པ་མ་མཆིས་པའི་སླད་དུ་སྟེ།
བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡང་འདི་སྙམ་དུ། བདག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་
ཉེ་བར་གྱུར་ཏེ། ཉན་ཐོས་ཀྱི་ས་དང༌། རང་སངས་རྒྱས་ཀྱི་ས་ནི། བདག་དང་རྒྱང་རིང་ངོ༌། །ཞེས་མི་སེམས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་རྟོག་པ་
མ་མཆིས་པའི་སླད་དུའོ། །བཅོམ་ལྡན་འདས། འདི་ལྟ་སྟེ། དཔེར་ན། གཟུགས་བརྙན་ནི། འདི་སྙམ་དུ། དམིགས་པ་གང་གིས་གཟུགས་བརྙན་འབྱུང་བ་དེ་ནི། བདག་དང་ཉེ་བ་ཡིན་གྱི། ཡང་གང་
དག་མེ་ལོང་ངམ་སྣོད་ཆུས་བཀང་བ་དེའི་དྲུང་དུ་ཉེ་བར་མ་འོངས་པ་དེ་དག་ནི། བདག་དང་རྒྱང་རིང་ངོ༌། །ཞེས་མི་སེམས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། གཟུགས་བརྙན་ལ་རྣམ་པར་རྟོག་པ་
མ་མཆིས་པའི་སླད་དུ་སྟེ། བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡང་འདི་སྙམ་དུ། བདག་ནི། བླ་ན་མེད་པ་ཡང་དག་
པར་རྫོགས་པའི་བྱང་ཆུབ་དང་ཉེ་བར་གྱུར་ཏེ། ཉན་ཐོས་ཀྱི་ས་དང༌། རང་སངས་རྒྱས་ཀྱི་ས་ནི། བདག་དང་རྒྱང་རིང་ངོ༌། །ཞེས་མི་སེམས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཤེས་རབ་ཀྱི་ཕ་
༄༅། །རོལ་ཏུ་ཕྱིན་པ་ལ་རྣམ་པར་རྟོག་པ་མ་མཆིས་པའི་སླད་དུའོ། །བཅོམ་ལྡན་འདས། འདི་ལྟ་སྟེ། དཔེར་ན། དེ་བཞིན་གཤེགས་པ་ནི། སུ་ལའང་སྡུག་པའམ། མི་
སྡུག་པ་མི་མངའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པས་རྟོག་པ་དང་རྣམ་པར་རྟོག་པ་ཐམས་ཅད་སྤངས་པའི་སླད་དུ་སྟེ། བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའ་
སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡང་སུ་ལའང་སྡུག་པའམ། མི་སྡུག་པ་མ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་
པ་ལ་རྣམ་པར་རྟོག་པ་མ་མཆིས་པ་ཉིད་ཀྱི་སླད་དུའོ། །བཅོམ་ལྡན་འདས། ཇི་ལྟར་དེ་བཞིན་གཤེགས་པས་རྟོག་པ་དང༌། རྣམ་པར་རྟོག་པ་ཐམས་ཅད་སྤངས་པ་དེ་བཞིན་དུ་བཅོམ་ལྡན་
འདས༑ ཤེས་རབ་ཀྱི་ཕ་རོལ་ཏུ་ཕྱིན་པ་ཡང་རྟོག་པ་དང༌། རྣམ་པར་རྟོག་པ་ཐམས་ཅད་སྤངས་པ་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་ན། དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཀྱིས་སྤྲུལ་པ་གང་མངོན་པར་སྤྲུལ་པ་དེ་འདི་སྙམ་དུ། བདག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བར་གྱུར་ཏེ། ཉན་ཐོས་
དང༌། རང་སངས་རྒྱས་ཀྱི་ས་ནི། བདག་དང་རྒྱང་རིང་ངོ༌། །ཞེས་མི་སེམས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། སྤྲུལ་པ་ལ་རྣམ་པར་རྟོག་པ་མ་མཆིས་པའི་སླད་དུ་སྟེ། བཅོམ་ལྡན་
འདས། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའང་འདི་སྙམ་དུ། བདག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་
ཉེ་བར་གྱུར་ཏེ། ཉན་ཐོས་ཀྱི་ས་དང༌། རང་སངས་རྒྱས་ཀྱི་ས་ནི། བདག་དང་རྒྱང་རིང་ངོ༌། །ཞེས་མི་སེམས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་
པར་རྟོག་པ་མ་མཆིས་པའི་སླད་དུའོ། །བཅོམ་ལྡན་འདས། འདི་ལྟ་སྟེ། དཔེར་ན། སྤྲུལ་པ་དེ་བགྱི་བ་གང་བགྱི་བའི་སླད་དུ་སྤྲུལ་པའི་བགྱི་བ་དེའང་བགྱིད་ལ། སྤྲུལ་པ་དེའང་རྣམ་པར་རྟོག་པ་མ་
མཆིས་སོ། །དེ་ཅིའི་སླད་དུ་ཞེ་ན། སྤྲུལ་པ་དེ་ལ་རྣམ་པར་རྟོག་པ་མ་མཆིས་པའི་སླད་དུ་སྟེ། བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་བགྱི་བ་གང་བགྱི་བའི་
སླད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བསྒོམ་པར་བགྱི་བ་དེ་ཡང་བགྱིད་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཡང་རྣམ་པར་རྟོག་པ་མ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཤེས་
རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་རྟོག་པ་མ་མཆིས་པའི་སླད་དུའོ། །བཅོམ་ལྡན་འདས། འདི་ལྟ་སྟེ། དཔེར་ན། ཤིང་མཁན་མཁས་པའམ་ཤིང་མཁན་གྱི་སློབ་མས་ཤིང་ལས་བགྱིས་པའི་
སྐྱེས་པའམ་བུད་མེད་ཀྱི་འཁྲུལ་འཁོར་སྦྱར་བ་བགྱིས་ན། དེ་བགྱི་བ་གང་བགྱི་བའི་སླད་དུ་བགྱིས་པའི་བགྱི་བ་དེ་བགྱིད་ཀྱང་ཤིང་གི་ཚོགས་དེ་ནི། རྣམ་པར་རྟོག་པ་མ་མཆིས་སོ། །དེ་ཅིའི་སླད་དུ་
༄༅། །ཞེ་ན༑ བཅོམ་ལྡན་འདས། ཤིང་གི་ཚོགས་དེ་ལ་རྣམ་པར་རྟོག་པ་མ་མཆིས་པའི་སླད་དུ་སྟེ། བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའ་སེམས་དཔའ་
ཆེན་པོའང་བགྱི་བ་གང་བགྱི་བའི་སླད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བསྒོམ་པར་བགྱི་བ་དེའང་བགྱིད་ལ། ཤེས་རབ་ཀྱི་ཕ་རོལ་ཏུ་ཕྱིན་པ་དེའང་རྣམ་པར་རྟོག་པ་མ་མཆིས་སོ། །དེ་
ཅིའི་སླད་དུ་ཞེ་ན། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་རྟོག་པ་མ་མཆིས་པའི་སླད་དུའོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། སྒྱུ་མ་
ལྟ་བུའི་ལེའུ་ཞེས་བྱ་སྟེ། ཉི་ཤུ་དྲུག་པའོ།། །།དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར། ཀྱེ་མ་བྱང་
ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ནི། སྙིང་པོ་ལ་སྤྱོད་དོ། །དེ་སྐད་ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ཚེ་དང་ལྡན་པ་ཤཱ་རིའི་བུ་
ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ། ཀྱེ་མ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ནི། སྙིང་པོ་མ་ཡིན་པ་ལ་སྤྱོད་པའོ། །དེ་ནས་
འདོད་པ་ན་སྤྱོད་པའི་ལྷའི་བུ་སྟོང་ཕྲག་མང་པོ་རྣམས་འདི་སྙམ་དུ་སེམས་ཏེ། གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་མངོན་པར་སྒྲུབ་པའི་སེམས་ཅན་
དེ་དག་ནི། ཕྱག་བྱ་བ་ཡིན་ནོ། །གང་དག་ཤེས་རབ་ཀྱི་ཕ་རོལ་ཕྱིན་པ་ཟབ་མོ་འདི་ལ་སྤྱོད་ཅིང་དེ་ལྟར་སྤྱོད་ཀྱང་འདི་ལྟ་སྟེ། ཉན་ཐོས་ཀྱི་སའམ་རང་སངས་རྒྱས་ཀྱི་སར་ཡང་དག་པའི་མཐའ་མངོན་
སུམ་དུ་མི་བྱེད་པ་དང༌། གང་ཆོས་རྣམས་ཀྱི་ཆོས་ཉིད་ལ་སྤྱོད་ཀྱང་ཆོས་ཉིད་མངོན་སུམ་དུ་མི་བྱེད་པའི་རྣམ་གྲངས་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དཀའ་བ་བྱེད་པ་
ཡིན་པར་རིག་པར་བྱའོ། །དེ་ནས་ཚེ་དང་ལྡན་པ་རབ་འབྱོར་གྱིས་འདོད་པ་ན་སྤྱོད་པའི་ལྷའི་བུ་སྟོང་ཕྲག་མང་པོ་དེ་དག་གི་སེམས་ཀྱི་རྟོག་པ་སེམས་ཀྱིས་ཤེས་ནས་འདོད་པ་ན་སྤྱོད་པའི་ལྷའི་བུ་སྟོང་
ཕྲག་མང་པོ་དེ་དག་ལ་སྨྲས་པ། ལྷའི་བུ་དག །གང་དག་ཡང་དག་པའི་མཐའ་དེ་མངོན་སུམ་དུ་མི་བྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། དཀའ་བ་བྱེད་པ་མ་ཡིན་གྱི། ལྷའི་
བུ་རྣམས། གང་གི་ཚེ་སེམས་ཅན་གཞལ་དུ་མེད་གྲངས་མེད་པ་རྣམས་ཡོངས་སུ་མྱ་ངན་ལས་བཟླ་བར་བྱའོ། །སྙམ་དུ་གོ་ཆ་བགོས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི།
དཀའ་བ་བྱེད་པ་ཡིན། མཆོག་ཏུ་དཀའ་བ་བྱེད་པ་ཡིན་ཏེ། སེམས་ཅན་རྣམས་ནི། དབེན་པའི་ཕྱིར་སེམས་ཅན་དེ་དག་ཀྱང་ཤིན་ཏུ་ཡང་དག་པར་མེད་དེ། ཡང་དག་པར་མེད་པས་དམིགས་སུ་
མེད་དོ༑ ༑དེ་བཞིན་དུ་གདུལ་བར་བྱ་བ་རྣམས་ཤིན་ཏུ་ཡང་དག་པར་མེད་དེ། ཡང་དག་པར་མེད་པས་དེ་དག་དམིགས་སུ་མེད་དོ། །དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་
༄༅། །རྣམས་སེམས་ཅན་རྣམས་གདུལ་བར་བྱའོ། །སྙམ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཡང་དག་པར་ཞུགས་
པའོ༑ ༑ལྷའི་བུ་དག །གང་སེམས་ཅན་རྣམས་གདུལ་བར་བྱའོ། །སྙམ་དུ་སེམས་པ་དེ་ནི། ནམ་མཁའ་གདུལ་བར་བྱའོ། །སྙམ་དུ་སེམས་པའོ། །དེ་ཅིའི་ཕྱིར་ཞེ་ན། ལྷའི་བུ་དག །ནམ་མཁའ་
དབེན་པའི་ཕྱིར་སེམས་ཅན་རྣམས་དབེན་པར་རིག་པར་བྱའོ། །ལྷའི་བུ་དག །བྱང་ཆུབ་སེམས་དཔའ་སེམས་དཔའ་ཆེན་པོ་གང་སེམས་ཅན་རྣམས་ཡང་དག་པར་མེད་ཅིང་དམིགས་སུ་མེད་
པ་རྣམས་ཀྱི་ཕྱིར་གོ་ཆ་བགོས་ན། རྣམ་གྲངས་འདིས་དཀའ་བ་བྱེད་པ་ཡིན་ནོ། །ལྷའི་བུ་དག །གང་སེམས་ཅན་རྣམས་ཀྱི་ཕྱིར་གོ་ཆ་བགོ་བར་བྱའོ། །སྙམ་དུ་སེམས་པ་དེ་ནི། ནམ་མཁའ་དང་
ལྷན་ཅིག་རྩོད་པར་བྱའོ། །སྙམ་དུ་སེམས་པའོ། །བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་རྣམས་ཀྱི་ཕྱིར་གོ་ཆ་འདི་བགོས་པ་ཡིན་ནོ། །དེའང་སེམས་ཅན་དེ་དག་ཀྱང་
ཤིན་ཏུ་དམིགས་སུ་མེད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་ཏེ། དེའང་སེམས་ཅན་དབེན་པའི་ཕྱིར་དེ་ལྟར་རིག་པར་བྱའོ། །དེ་
ལྟར་གདུལ་བར་བྱ་བ་དབེན་པའི་ཕྱིར་བྱང་ཆུབ་སེམས་དཔའ་དབེན་པར་རིག་པར་བྱའོ། །གལ་ཏེ་འདི་ལྟར་བཤད་པ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཞུམ་པར་མ་གྱུར་
ན༑ ལྷའི་བུ་དག །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། སེམས་ཅན་དབེན་པའི་ཕྱིར་གཟུགས་
དབེན་པར་རིག་པར་བྱའོ། །དེ་བཞིན་དུ་སེམས་ཅན་དབེན་པའི་ཕྱིར་ཚོར་བ་དང༌། འདུ་ཤེས་དང༌། འདུ་བྱེད་རྣམས་དབེན་པ་དང༌། སེམས་ཅན་དབེན་པའི་ཕྱིར་རྣམ་པར་ཤེས་པ་དབེན་པར་
རིག་པར་བྱའོ། །དེ་བཞིན་དུ་སེམས་ཅན་དབེན་པའི་ཕྱིར་ཆོས་ཐམས་ཅད་ཀྱི་བར་དུ་དབེན་པར་རིག་པར་བྱའོ། །ལྷའི་བུ་དག །དེ་ལྟར་ན། ཆོས་ཐམས་ཅད་དབེན་པ་ཉིད་དུ་བལྟའོ། །ལྷའི་བུ་དག །དེ་
ལྟར་ཆོས་ཐམས་ཅད་དབེན་པ་ཉིད་དུ་བཤད་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཞུམ་པར་མི་བྱེད་ན། འདི་ལྟར་ཞུམ་པར་མི་བྱེད་པ་དེའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་
པའོ༑ ༑དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར། ཅིའི་ཕྱིར་དེ་ལྟར་ཆོས་ཐམས་ཅད་དབེན་པ་ཉིད་དུ་བཤད་པ་ལ་བྱང་ཆུབ་སེམས་
དཔའ་སེམས་དཔའ་ཆེན་པོ་ཞུམ་པར་མི་བྱེད། རབ་འབྱོར་གྱིས་གསོལ་པ། བཅོམ་ལྡན་འདས། དབེན་པའི་སླད་དུ་ཞུམ་པར་མི་བགྱིད་དོ། །བཅོམ་ལྡན་འདས། རྒྱུ་འདིས་བྱང་ཆུབ་སེམས་
དཔའ་སེམས་དཔའ་ཆེན་པོ་ཆོས་ཐམས་ཅད་དབེན་པ་ཉིད་དུ་བཤད་པ་ལ་ཞུམ་པར་མི་བགྱིད་དོ། །བཅོམ་ལྡན་འདས། ཆོས་གང་ལའང་ཞུམ་པར་འགྱུར་བ་མ་མཆིས་སོ། །དེ་ཅིའི་སླད་དུ་ཞེ་ན།
༄༅། །བཅོམ་ལྡན་འདས། གང་ཞུམ་པར་འགྱུར་བའི་ཆོས་དེ་དག་ནི། གང་ཡང་དམིགས་སུ་མ་མཆིས་ཏེ། བཅོམ་ལྡན་འདས། ཆོས་གང་གིས་ཆོས་གང་ཞུམ་པར་
འགྱུར་བའི་ཆོས་དེ་ཡང་དམིགས་སུ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། འོན་ཀྱང་གལ་ཏེ་དེ་སྐད་དུ་བརྗོད་པ་
དང༌། བཤད་པ་དང༌། བསྟན་པ་དང༌། དེ་ལྟར་ཉེ་བར་བསྟན་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཞུམ་པར་མི་འགྱུར། བག་མི་ཚ། བག་ཚ་བ་དང་མི་ལྡན། ཀུན་ཏུ་མི་ཞུམ། ཡང་
དག་པར་མི་ཞུམ། ཡིད་ཕྱིར་ཕྱོགས་པར་མི་བྱེད། བཅོམ་ཞིང་ཕྱིར་ཕྱོགས་པར་མི་བྱེད། མི་དངང༌། ཀུན་ཏུ་མི་སྐྲག །ཀུན་ཏུ་སྐྲག་པ་དང་མི་ལྡན་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་
སྤྱོད་པའོ། །རབ་འབྱོར་གྱིས་གསོལ་པ། བཅོམ་ལྡན་འདས། དེ་དེ་བཞིན་ནོ། །བདེ་བར་གཤེགས་པ། དེ་དེ་བཞིན་ཏེ། བཅོམ་ལྡན་འདས། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་
པོ་དེ་ལྟར་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་དབང་པོ་དང་བཅས་པའི་ལྷ་རྣམས་དང༌། ཚངས་པ་དང་བཅས་
པ་དང༌། སྐྱེ་དགུའི་བདག་པོ་དང་བཅས་པ་དང༌། དབང་ལྡན་དང་བཅས་པ་དང༌། དྲང་སྲོང་དང་བཅས་པ་དང༌། སྐྱེས་པ་དང་བུད་མེད་ཀྱི་ཚོགས་རྣམས་ཀྱིས་རྒྱང་མ་ནས་ཐལ་མོ་སྦྱར་ཏེ། ཕྱག་
འཚལ་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་དབང་པོ་དང་བཅས་པའི་ལྷ་རྣམས་དང༌། ཚངས་
པ་དང་བཅས་པ་དང༌། སྐྱེ་དགུའི་བདག་པོ་དང་བཅས་པ་དང༌། དབང་ལྡན་དང་བཅས་པ་དང༌། དྲང་སྲོང་དང་བཅས་པ་དང༌། སྐྱེས་པ་དང་བུད་མེད་ཀྱི་ཚོགས་རྣམས་འབའ་ཞིག་རྒྱང་མ་ནས་ཐལ་མོ་
སྦྱར་ཏེ་ཕྱག་འཚལ་བར་འགྱུར་བར་མ་ཟད་ཀྱི། རབ་འབྱོར། ཚངས་རིས་ཀྱི་ལྷ་རྣམས་དང༌། ཚངས་པའི་མདུན་ན་འདོན་དང༌། ཚངས་པ་ཀུན་འཁོར་དང༌། ཚངས་པ་ཆེན་པོ་དང༌། འོད་ཆུང་
དང༌། ཚད་མེད་འོད་དང༌། འོད་གསལ་དང༌། དགེ་ཆུང་དང༌། ཚད་མེད་དགེ་དང༌། དགེ་རྒྱས་དང༌། སྤྲིན་མེད་དང༌། བསོད་ནམས་འཕེལ་དང༌། འབྲས་བུ་ཆེ་བ་དང༌། འདུ་ཤེས་མེད་པའི་སེམས་ཅན་
རྣམས་དང༌། མི་ཆེ་བ་དང༌། མི་གདུང་བ་དང༌། གྱ་ནོམ་སྣང་དང༌། ཤིན་ཏུ་མཐོང་དང༌། འོག་མིན་གྱི་ལྷ་གང་དག་ཡོད་པ་དེ་དག་ཀྱང་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་
པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ལ་སྤྱོད་པ་ལ་ཕྱག་འཚལ་བར་འགྱུར་རོ། །རབ་འབྱོར། ཡང་འཇིག་རྟེན་གྱི་ཁམས་གཞལ་དུ་མེད་གྲངས་མེད་པ་དག་ན་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་གང་དག་ད་ལྟར་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དེ་ལྟར་སྤྱོད་པའི་
༄༅། །བྱང་ཆུབ་སེམས་དཔའ་སེམས་དཔའ་ཆེན་པོ་ལ་སངས་རྒྱས་ཀྱི་སྤྱན་གྱིས་གཟིགས་ཏེ། རབ་འབྱོར། དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་
པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་ལ་ཕན་འདོགས་ཤིང་དགོངས་པར་མཛད་དོ། །རབ་འབྱོར། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་
ཏུ་ཕྱིན་པ་ལ་སྤྱོད་པ་དེ་དག་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཕན་འདོགས་ཤིང་དགོངས་པར་མཛད་དེ། རབ་འབྱོར། བྱང་ཆུབ་སེམས་
དཔའ་སེམས་དཔའ་ཆེན་པོ་དེ་དང་དེ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གཟུང་བར་བྱའོ། །དེ་དག་ལ་བདུད་དམ། གཞན་དག་གི་བར་
ཆད་འབྱུང་བར་མི་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་བདུད་སྡིག་ཅན་དུ་
གྱུར་ལ༑ བདུད་སྡིག་ཅན་དེ་དག་རེ་རེས་ཀྱང་དེ་སྙེད་ཀྱི་བདུད་ཀྱི་སྡེ་མངོན་པར་སྤྲུལ་ཀྱང་རབ་འབྱོར། བདུད་སྡིག་ཅན་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སངས་
རྒྱས་ཀྱིས་དགོངས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བར་ཆད་བྱ་བར་མི་ནུས་སོ། །རབ་འབྱོར། ཡང་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་བདུད་སྡིག་ཅན་དུ་གྱུར་པ་ལྟ་ཞོག །རབ་འབྱོར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་
བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱང་བདུད་སྡིག་ཅན་དུ་གྱུར་ལ། བདུད་སྡིག་ཅན་དེ་དག་རེ་རེས་ཀྱང་བདུད་ཀྱི་སྡེ་དེ་སྙེད་མངོན་པར་སྤྲུལ་ཀྱང་རབ་འབྱོར། བདུད་
སྡིག་ཅན་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱིས་དགོངས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་ལ་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ལས་བར་ཆད་བྱ་བར་མི་ནུས་སོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཉིས་དང་ལྡན་ན། བདུད་སྡིག་ཅན་རྣམས་སམ། བདུད་ཀྱི་རིས་ཀྱི་ལྷ་རྣམས་ཀྱིས་དེའི་
ཚེ་ཐུབ་པར་དཀའ་བ་ཡིན་ཏེ། གཉིས་པོ་གང་ཞེ་ན། འདི་ལྟ་སྟེ། དེས་སེམས་ཅན་ཐམས་ཅད་ཡོངས་སུ་མ་བཏང་བ་ཡིན། དེས་ཆོས་ཐམས་ཅད་སྟོང་པ་ཉིད་དུ་རྟོགས་པ་ཡིན་ཏེ། རབ་
འབྱོར། ཆོས་དེ་གཉིས་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། བདུད་སྡིག་ཅན་རྣམས་སམ། བདུད་ཀྱི་རིས་ཀྱི་ལྷ་རྣམས་ཀྱིས་ཐུབ་པར་དཀའ་བ་ཡིན་ནོ། །རབ་འབྱོར།
བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཉིས་པོ་གཞན་དང་ལྡན་ན། བདུད་སྡིག་ཅན་རྣམས་སམ། བདུད་ཀྱི་རིས་ཀྱི་ལྷ་རྣམས་ཀྱིས་ཐུབ་པར་དཀའ་བ་ཡིན་ཏེ། གཉིས་པོ་
༄༅། །གང་ཞེ་ན། འདི་ལྟ་སྟེ། ཇི་སྐད་དུ་སྨྲས་པ་དེ་བཞིན་བྱེད་པ་ཡིན། སངས་རྒྱས་བཅོམ་ལྡན་འདས་རྣམས་ཀྱིས་དགོངས་པ་ཡིན་ཏེ། རབ་འབྱོར། བྱང་ཆུབ་
སེམས་དཔའ་སེམས་དཔའ་ཆེན་པོ་ཆོས་དེ་གཉིས་དང་ལྡན་པ་ནི། བདུད་སྡིག་ཅན་རྣམས་སམ། བདུད་ཀྱི་རིས་ཀྱི་ལྷ་རྣམས་ཀྱིས་ཐུབ་པར་དཀའ་བ་ཡིན་ནོ། །རབ་འབྱོར། དེ་ལྟར་
སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ལྷ་རྣམས་ཀྱང་ཉེ་བར་འོང་བར་སེམས་པར་འགྱུར། ཉེ་བར་འོངས་ནས་ཀྱང་ཡོངས་སུ་འདྲི་བར་སེམས། ཡོངས་སུ་འདྲི་བར་བྱ་
བར་སེམས། བསྙེན་བཀུར་བྱ་བར་སེམས་སོ། །དེ་ལ་སྤྲོ་བའང་སྐྱེད་པར་བྱེད་དེ། རིགས་ཀྱི་བུ། ཁྱོད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
འཚང་རྒྱ་བར་འགྱུར་གྱི། རིགས་ཀྱི་བུ། ཁྱོད་དེ་ལྟ་བས་ན། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པའི་གནས་པ་འདི་ཉིད་ཀྱིས་གནས་པར་བྱའོ། །དེ་ཅིའི་ཕྱིར་ཞེ་ན། རིགས་
ཀྱི་བུ༑ ཁྱོད་དེ་ལྟར་གནས་པ་དེ་ཉིད་ཀྱིས་གནས་ཤིང་དེ་ལྟར་སྤྱོད་ན། སེམས་ཅན་མགོན་མེད་པ་རྣམས་ཀྱི་མགོན་དུ་འགྱུར། སེམས་ཅན་སྐྱོབ་པ་མེད་པ་རྣམས་ཀྱི་སྐྱོབ་པར་འགྱུར།
སེམས་ཅན་སྐྱབས་མེད་པ་རྣམས་ཀྱི་སྐྱབས་སུ་འགྱུར། སེམས་ཅན་གནས་མེད་པ་རྣམས་ཀྱི་གནས་སུ་འགྱུར། སེམས་ཅན་དཔུང་གཉེན་མེད་པ་རྣམས་ཀྱི་དཔུང་གཉེན་དུ་འགྱུར།
སེམས་ཅན་གླིང་མེད་པ་རྣམས་ཀྱི་གླིང་དུ་འགྱུར། སེམས་ཅན་ལྡོངས་པ་རྣམས་ཀྱི་སྣང་བར་འགྱུར། སེམས་ཅན་ཡོངས་སུ་འདྲེན་པ་མེད་པ་རྣམས་ཀྱི་ཡོངས་སུ་འདྲེན་པར་འགྱུར། སེམས་ཅན་རྟེན་
མེད་པ་རྣམས་ཀྱི་རྟེན་དུ་འགྱུར། སེམས་ཅན་ལམ་ལས་རབ་ཏུ་ཉམས་པ་རྣམས་དང༌། ངེས་པར་འབྱུང་བ་མེད་པ་རྣམས་ཀྱི་ལམ་གྱི་དམ་པ་དང༌། ངེས་པར་འབྱུང་བར་འགྱུར་རོ། །ཞེས་ལྷའི་བུ་དེ་
དག་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་སྤྲོ་བ་སྐྱེད་དོ། །དེ་ཅིའི་ཕྱིར་ཞེ་ན། རབ་འབྱོར། འཇིག་རྟེན་གྱི་ཁམས་གཞལ་དུ་མེད་པ་བགྲང་དུ་མེད་པ་དག་ན་སངས་རྒྱས་བཅོམ་
ལྡན་འདས་གང་དག་ཉན་ཐོས་ཀྱི་དགེ་འདུན་གྱིས་ཡོངས་སུ་བསྐོར་ཅིང༌། བྱང་ཆུབ་སེམས་དཔའི་དགེ་འདུན་གྱིས་མདུན་དུ་བྱས་ནས་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་
འདས་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་འདིས་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང༌། འདི་ལྟ་བུའི་རང་བཞིན་
གྱི་ཡོན་ཏན་འདི་དག་དང་ལྡན་པ་སྟེ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་ཡོན་ཏན་དང་ལྡན་པའི་མིང་དང༌། རུས་དང༌། སྟོབས་དང༌། ཁ་དོག་དང༌། གཟུགས་ཡོངས་སུ་སྒྲོག་
པའི་ཚུལ་གྱིས་ཆོས་སྟོན་ཅིང༌། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་ཆེད་དུ་བརྗོད་པའང་ཆེད་དུ་བརྗོད་པར་མཛད་དོ། །རབ་འབྱོར་།འདི་ལྟ་སྟེ། དཔེར་ན། ད་ལྟར་ང་ཉིད་བྱང་ཆུབ་
༄༅། །སེམས་དཔའ་སེམས་དཔའ་ཆེན་པོ་རིན་པོ་ཆེའི་ཏོག་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ཕུད་ཅན་དང༌། བྱང་ཆུབ་སེམས་དཔའ་སེམས་
དཔའ་ཆེན་པོ་གཞན་གང་དག་ད་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་བསྐྱོད་པའི་དྲུང་ན་ཚངས་པར་སྤྱད་པ་སྤྱོད་པ་དག་གི་མིང་དང༌། རུས་དང༌།
སྟོབས་དང༌། ཁ་དོག་དང༌། གཟུགས་ཡོངས་སུ་སྒྲོག་པའི་ཚུལ་གྱིས་ཆོས་སྟོན་ཅིང་ཆེད་དུ་བརྗོད་པའང་ཆེད་དུ་རྗོད་པ་དང༌། དེ་བཞིན་དུ་རབ་འབྱོར། སངས་རྒྱས་བཅོམ་ལྡན་འདས་དེ་
དག་ཀྱང་ད་ལྟར་ངའི་སངས་རྒྱས་ཀྱི་ཞིང་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཚངས་པར་སྤྱད་པ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་འདིས་གནས་པའི་
བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་མིང་དང༌། རུས་དང༌། སྟོབས་དང༌། ཁ་དོག་དང༌། གཟུགས་ཡོངས་སུ་སྒྲོག་པའི་ཚུལ་གྱིས་ཆོས་སྟོན་ཅིང་ཆེད་དུ་བརྗོད་པའང་ཆེད་
དུ་བརྗོད་དོ། །རབ་འབྱོར་གྱིས་གསོལ་པ། བཅོམ་ལྡན་འདས། ཅི་སངས་རྒྱས་བཅོམ་ལྡན་འདས་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱི་མིང་དང༌། རུས་དང༌།
སྟོབས་དང༌། ཁ་དོག་དང༌། གཟུགས་ཡོངས་སུ་སྒྲོག་པའི་ཚུལ་གྱིས་ཆོས་སྟོན་ཅིང་ཆེད་དུ་བརྗོད་པའང་ཆེད་དུ་རྗོད་དམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ནི།
མ་ཡིན་ཏེ། རབ་འབྱོར། སངས་རྒྱས་བཅོམ་ལྡན་འདས་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱི་མིང་དང༌། རུས་དང༌། སྟོབས་དང༌། ཁ་དོག་དང༌། གཟུགས་
ཡོངས་སུ་སྒྲོག་པའི་ཚུལ་གྱིས་ཆོས་སྟོན་ཅིང་ཆེད་དུ་བརྗོད་པའང་ཆེད་དུ་རྗོད་པ་མ་ཡིན་ནོ། །རབ་འབྱོར། འོན་ཀྱང་སངས་རྒྱས་བཅོམ་ལྡན་འདས་དེ་དག་ནི། གང་དག་ཕྱིར་མི་ལྡོག་པའི་
བྱང་ཆུབ་སེམས་དཔའ་སེམས་དཔའ་ཆེན་པོ་ཆགས་པ་ཐམས་ཅད་དང་བྲལ་བ་དེ་དག་གི་མིང་དང༌། རུས་དང༌། སྟོབས་དང༌། ཁ་དོག་དང༌། གཟུགས་ཡོངས་སུ་སྒྲོག་པའི་ཚུལ་གྱིས་ཆོས་
སྟོན་ཅིང་ཆེད་དུ་བརྗོད་པའང་ཆེད་དུ་རྗོད་དོ། །རབ་འབྱོར་གྱིས་གསོལ་པ། བཅོམ་ལྡན་འདས། སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་
ལྡོག་པ་རྣམས་མ་གཏོགས་པར་དེ་མ་ལགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྱི་མིང་དང༌། རུས་དང༌། སྟོབས་དང༌། ཁ་དོག་དང༌། གཟུགས་ཡོངས་སུ་སྒྲོག་
པའི་ཚུལ་གྱིས་ཆོས་སྟོན་ཅིང་ཆེད་དུ་བརྗོད་པའང་ཆེད་དུ་རྗོད་པར་མཛད་པ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་
ཆེན་པོ་ཕྱིར་མི་ལྡོག་པ་རྣམས་མ་གཏོགས་པར་སངས་རྒྱས་བཅོམ་ལྡན་འདས་དེ་དག་གང་གི་མིང་དང༌། རུས་དང༌། སྟོབས་དང༌། ཁ་དོག་དང༌། གཟུགས་ཡོངས་སུ་སྒྲོག་པའི་ཚུལ་
༄༅། །གྱིས་ཆོས་སྟོན་ཅིང་ཆེད་དུ་བརྗོད་པའང་ཆེད་དུ་རྗོད་པའི་གང་ཟག་བྱང་ཆུབ་སེམས་དཔའི་ཐེག་པ་པ་གཉེན་པོའི་སྟོབས་ཅན་དེ་དག་ནི། ཡོད་དོ། །དེ་དག་ཀྱང་
གང་ཞེ་ན། གང་ད་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་བསྐྱོད་པའི་བྱང་ཆུབ་སེམས་དཔའི་སྤྱོད་པའི་རྗེས་སུ་སློབ་པའི་ཚུལ་དུ་བྱང་
ཆུབ་སེམས་དཔའི་སྤྱད་པ་སྤྱོད་ཅིང་རྗེས་སུ་སློབ་པའི་ཚུལ་དུ་གནས་པ་རྣམས་ཏེ། རབ་འབྱོར། འདི་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པ་རྣམས་མ་
གཏོགས་པར་སངས་རྒྱས་བཅོམ་ལྡན་འདས་དེ་དག་གིས་གང་གི་མིང་དང༌། རུས་དང༌། སྟོབས་དང༌། ཁ་དོག་དང༌། གཟུགས་ཡོངས་སུ་སྒྲོགས་པའི་ཚུལ་གྱིས་ཆོས་སྟོན་ཅིང་ཆེད་དུ་བརྗོད་
པའང་ཆེད་དུ་རྗོད་པའི་བྱང་ཆུབ་སེམས་དཔའི་ཐེག་པ་པའི་གང་ཟག་ཡིན་ནོ། །རབ་འབྱོར། ཡང་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་ཏོག་གི་བྱང་ཆུབ་
སེམས་དཔའི་སྤྱོད་པའི་རྗེས་སུ་སློབ་པའི་ཚུལ་དུ་བྱང་ཆུབ་སེམས་དཔའི་སྤྱད་པ་སྤྱོད་ཅིང་དེ་རྗེས་སུ་སློབ་པའི་ཚུལ་དུ་གནས་པ་རྣམས་ཏེ། རབ་འབྱོར། འདི་དག་ཀྱང་བྱང་ཆུབ་སེམས་
དཔའ་སེམས་དཔའ་ཆེན་པོ་ཕྱིར་མི་ལྡོག་པ་རྣམས་མ་གཏོགས་པར་སངས་རྒྱས་བཅོམ་ལྡན་འདས་དེ་དག་གང་གི་མིང་དང༌། རུས་དང༌། སྟོབས་དང༌། ཁ་དོག་དང༌། གཟུགས་
ཡོངས་སུ་སྒྲོག་པའི་ཚུལ་གྱིས་ཆོས་སྟོན་ཅིང་ཆེད་དུ་བརྗོད་པའང་ཆེད་དུ་རྗོད་པ་ཡིན་ནོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་རབ་ཀྱི་ཕ་
རོལ་ཏུ་ཕྱིན་པ་ལ་སྤྱོད་ཅིང་ཆོས་ཐམས་ཅད་མི་སྐྱེ་བའོ། །ཞེས་དེ་ལྟར་མོས་ལ་ད་དུང་མི་སྐྱེ་བའི་ཆོས་ལ་བཟོད་པ་མ་ཐོབ་པར་གྱུར་པ་དང༌། ཆོས་ཐམས་ཅད་ཞི་བའོ། །ཞེས་མོས་ལ་ཆོས་
ཐམས་ཅད་ལ་ཕྱིར་མི་ལྡོག་པའི་དབང་ཐོབ་ཅིང་ནོན་པར་མ་གྱུར་པ་སྟེ། སངས་རྒྱས་བཅོམ་ལྡན་འདས་དེ་དག་གིས་ནི། གནས་པ་འདིས་གནས་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་དེ་དག་གིའང་མིང་དང༌། རུས་དང༌། སྟོབས་དང༌། ཁ་དོག་དང༌། གཟུགས་ཡོངས་སུ་སྒྲོག་པའི་ཚུལ་གྱིས་ཆོས་སྟོན་ཅིང་ཆེད་དུ་བརྗོད་པ་ཡང་ཆེད་དུ་རྗོད་དོ། །རབ་འབྱོར། གཞན་
ཡང་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་གི་མིང་དང༌། རུས་དང༌། སྟོབས་དང༌། ཁ་དོག་དང༌། གཟུགས་ཡོངས་སུ་སྒྲོག་པའི་
ཚུལ་གྱིས་ཆོས་སྟོན་ཅིང་ཆེད་དུ་བརྗོད་པའང་ཆེད་དུ་རྗོད་པ་དེ་དག་ནི། ཉན་ཐོས་ཀྱི་ས་དང༌། རང་སངས་རྒྱས་ཀྱི་ས་སྤངས་པ་ཡིན་ཞིང༌། དེ་དག་གིས་ནི། སངས་རྒྱས་ཀྱི་ས་ཉིད་ལ་རེ་བར་
བྱ་སྟེ༑ དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་
༄༅། །སེམས་དཔའ་སེམས་དཔའ་ཆེན་པོ་གང་དག་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་དག་གི་མིང་དང༌། རུས་དང༌། སྟོབས་དང༌། ཁ་དོག་དང༌།
གཟུགས་ཡོངས་སུ་སྒྲོག་པའི་ཚུལ་གྱིས་ཆོས་སྟོན་ཅིང་ཆེད་དུ་བརྗོད་པའང་ཆེད་དུ་རྗོད་པ་དེ་དག་ཀྱང་ཕྱིར་མི་ལྡོག་པ་ཉིད་ལ་གནས་པར་འགྱུར་རོ། །རབ་འབྱོར། གཞན་ཡང་བྱང་ཆུབ་
སེམས་།སེམས་དཔའ་ཆེན་པོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་བཤད་པ་ཐོས་ནས་མོས་པར་བྱེད་ཅིང་རྨོངས་པར་མི་འགྱུར། ནེམ་ནུར་མི་བྱེད། ཐེ་ཚོམ་
མི་ཟ་སྟེ༑ ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བཤད་པ་དེ་བཞིན་ནོ། །ཞེས་མོས་ནས་རྒྱས་པར་ཉན་ཅིང་འདི་སྙམ་དུ།
བདག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་བསྐྱོད་པ་དང༌། གང་དག་དེའི་སངས་རྒྱས་ཀྱི་ཞིང་
ན་ཚངས་པར་སྤྱད་པ་སྤྱོད་པའི་གང་ཟག་བྱང་ཆུབ་སེམས་དཔའི་ཐེག་པ་པ་དེ་དག་གི་ཐད་ནས་རྒྱས་པར་ཉན་ཏོ། །སྙམ་དུ་སེམས་བསྐྱེད་པར་འགྱུར་རོ། །དེ་དག་གི་ཐད་ནས་ཀྱང་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་མཉན་ནས་མོས་པར་འགྱུར་ཏེ། དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མོས་པ་ན་ཇི་ལྟར་དེ་བཞིན་གཤེགས་པས་གསུངས་
པ་དེ་བཞིན་དུ་མོས་ཏེ། དེ་ལྟར་མོས་པས་ཕྱིར་མི་ལྡོག་པ་ཉིད་ལ་གནས་པར་འགྱུར་རོ། །རབ་འབྱོར། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་ཚལ་འདི་ཐོས་པའང་བྱེད་པ་མང་བ་ཡིན་པར་
བསྟན་ན། གང་དག་མོས་པར་བྱེད་ཅིང་མོས་ནས་ཀྱང་དེ་བཞིན་ཉིད་ཀྱི་དོན་དུ་གནས་ཤིང༌། དེ་བཞིན་ཉིད་ཀྱི་དོན་དུ་སྒྲུབ་པ་དང༌། དེ་བཞིན་ཉིད་ཀྱི་དོན་དུ་གནས་ཤིང༌། དེ་བཞིན་ཉིད་ཀྱི་དོན་དུ་
བསྒྲུབས་ནས་ཀྱང་དེ་བཞིན་ཉིད་ལ་གནས་པར་གྱུར་པ་དང༌། ཐམས་ཅད་མཁྱེན་པ་ཉིད་ལ་གནས་པར་གྱུར་ནས་ཆོས་སྟོན་པ་ལྟ་སྨོས་ཀྱང་ཅི་དགོས། རབ་འབྱོར་གྱིས་གསོལ་པ། བཅོམ་ལྡན་འདས།
གང་གི་ཚེ་དེ་བཞིན་ཉིད་མ་གཏོགས་པར་ཆོས་གཞན་དམིགས་སུ་མ་མཆིས་ན། བཅོམ་ལྡན་འདས། དེའི་ཚེ་ཆོས་གང་ཞིག་དེ་བཞིན་ཉིད་ལ་གནས་པར་འགྱུར། གང་ཞིག་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། གང་ཞིག་ཆོས་འདི་སྟོན་པར་འགྱུར། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་
སྐད་ཅེས་བཀའ་སྩལ་ཏོ། །རབ་འབྱོར། གང་འདི་སྐད་དུ། གང་གི་ཚེ་དེ་བཞིན་ཉིད་མ་གཏོགས་པར་ཆོས་གཞན་གང་ཡང་དམིགས་སུ་མེད་ན། དེའི་ཚེ་ཆོས་གང་ཞིག་དེ་བཞིན་ཉིད་ལ་གནས་
པར་འགྱུར། གང་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། གང་ཞིག་ཆོས་འདི་སྟོན་པར་འགྱུར་ཞེས་སྨྲས་པ་ནི། རབ་འབྱོར། དེ་བཞིན་
༄༅། །ཉིད་མ་གཏོགས་པར་ཆོས་གཞན་གང་དེ་བཞིན་ཉིད་ལ་གནས་པར་འགྱུར་བའི་ཆོས་གང་ཡང་དམིགས་སུ་མེད་དོ། །རབ་འབྱོར། རེ་ཞིག་དེ་བཞིན་ཉིད་དེ་ཉིད་
དམིགས་སུ་མེད་ན། གང་དེ་བཞིན་ཉིད་ལ་གནས་པར་འགྱུར་བ་ལྟ་ཅི་སྨོས། རབ་འབྱོར། དེ་བཞིན་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་
མི་རྒྱ་སྟེ༑ རབ་འབྱོར། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའམ། མངོན་པར་རྫོགས་པར་འཚང་རྒྱ་བར་འགྱུར་བའམ། མངོན་པར་
རྫོགས་པར་འཚང་རྒྱ་བའི་ཆོས་དེ་ནི། གང་ཡང་དམིགས་སུ་མེད་དོ། །རབ་འབྱོར། དེ་བཞིན་ཉིད་ནི། ཆོས་མི་སྟོན་ཏོ། །རབ་འབྱོར། ཆོས་གང་བསྟན་པར་བྱ་བའི་ཆོས་དེ་ཡང་དམིགས་སུ་
མེད་དོ༑ ༑དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཟབ་བོ། །བཅོམ་ལྡན་འདས།
གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་ནི། དཀའ་བ་བགྱིད་པ་
ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། དེ་བཞིན་ཉིད་ལ་ཆོས་གང་ཡང་གནས་པ་མ་མཆིས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་འཚང་རྒྱ་བའི་ཆོས་ཀྱང་གང་ཡང་མ་མཆིས། ཆོས་སྟོན་པའང་གང་ཡང་མ་མཆིས་པ་དང༌། འདི་ལ་དེ་ཞུམ་པར་མི་འགྱུར། ནེམ་ནུར་མི་བགྱིད། རྨོངས་པར་ཡང་མི་འགྱུར་བའི་སླད་དུའོ། །དེ་
ནས་ཚེ་དང་ལྡན་པ་རབ་འབྱོར་གྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ །གང་འདི་སྐད་དུ། གང་དག་ཆོས་ཟབ་མོ་འདི་ལྟ་བུ་བཤད་པ་ལ་ནེམ་ནུར་མི་བྱེད་པ་དང༌།
རྨོངས་པར་མི་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་ནི། དཀའ་བ་བྱེད་པའོ། །ཞེས་ཟེར་བ། ཀཽ་ཤི་ཀ །ཆོས་ཐམས་ཅད་སྟོང་པ་ན་འདི་ལ་སུ་ཞིག་ནེམ་ནུར་བྱེད་ཅིང་རྨོངས་
པར་འགྱུར། བརྒྱ་བྱིན་གྱིས་སྨྲས་པ། འཕགས་པ་རབ་འབྱོར་གྱིས་གང་དང་གང་བཤད་པ་དེ་དང་དེ་ནི། སྟོང་པ་ཉིད་ལས་བརྩམས་ཏེ་བཤད་པས་ཅི་ལའང་ཐོགས་པ་མེད་དོ། །འདི་ལྟ་སྟེ།
དཔེར་ན། བར་སྣང་ལ་མདའ་འཕངས་ན། ཅི་ལའང་ཐོགས་པ་མེད་དོ། །དེ་བཞིན་དུ་འཕགས་པ་རབ་འབྱོར་གྱིས་ཆོས་བསྟན་པ་ཡང་ཅི་ལའང་ཐོགས་པ་མེད་དོ། །དེ་ནས་བཅོམ་ལྡན་འདས་ལ་ལྷ་
རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་ཡང་བདག་གིས་གནས་བརྟན་རབ་འབྱོར་ལས་བརྩམས་ཏེ་འདི་སྐད་དུ་བཤད་ཅིང་འདི་སྐད་དུ་བསྟན་པ་
དེ་བཞིན་གཤེགས་པས་གསུངས་པ་བཞིན་སྨྲ་བ་ལགས་སམ། ཆོས་སྨྲ་བའམ། ཆོས་དང་རྗེས་སུ་མཐུན་པའི་ཆོས་ལུང་བསྟན་པས་ལུང་སྟོན་པ་ལགས་སམ། དེ་སྐད་ཅེས་གསོལ་པ་
༄༅། །དང༌། བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །གང་ཁྱོད་ཀྱིས་དེ་ལྟར་བཤད་པ་དེ་དེ་བཞིན་ནོ། །
ཀཽ་ཤི་ཀ །དེ་དེ་བཞིན་ཏེ། འདི་སྐད་དུ་བཤད་ཅིང་འདི་སྐད་དུ་བསྟན་པ་དེ་ནི། དེ་བཞིན་གཤེགས་པས་གསུངས་པ་བཞིན་སྨྲ་བ་ཡིན་ནོ། །ཆོས་སྨྲ་བ་ཡིན་ནོ། །ཆོས་ཀྱི་རྗེས་སུ་མཐུན་
པའི་ཆོས་ལུང་བསྟན་པས་ལུང་སྟོན་པ་ཡིན་ནོ། །དེ་ཅིའི་ཕྱིར་ཞེ་ན། ཀཽ་ཤི་ཀ །གནས་བརྟན་རབ་འབྱོར་གང་དང་གང་སྤོབས་པར་གྱུར་པ་དེ་དང་དེ་ནི། ཀཽ་ཤི་ཀ །སྟོང་པ་ཉིད་ལས་
བརྩམས་ཏེ་སྤོབས་སོ། །དེ་ཅིའི་ཕྱིར་ཞེ་ན། ཀཽ་ཤི་ཀ །གནས་བརྟན་རབ་འབྱོར་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཡང་རེ་ཞིག་ཡང་དག་པར་རྗེས་སུ་མི་མཐོང་ཞིང་མི་དམིགས་ན།
གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ལྟ་ག་ལ་ཡོད། བྱང་ཆུབ་ཉིད་ཀྱང་རེ་ཤིག་མི་དམིགས་ན། གང་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ལྟ་ཅི་སྨོས། ཐམས་
ཅད་མཁྱེན་པ་ཉིད་ཀྱང་རེ་ཤིག་མི་དམིགས་ན། ཡང་གང་ཐམས་ཅད་མཁྱེན་པ་ཉིད་ཐོབ་པར་འགྱུར་བ་ལྟ་ག་ལ་ཡོད། དེ་བཞིན་ཉིད་ཀྱང་རེ་ཞིག་མི་དམིགས་ན། ཡང་གང་དེ་བཞིན་
གཤེགས་པར་འགྱུར་བ་ལྟ་ག་ལ་ཡོད། མི་སྐྱེ་བ་ཉིད་ཀྱང་རེ་ཞིག་མི་དམིགས་ན། ཡང་གང་མི་སྐྱེ་བ་མངོན་སུམ་དུ་བྱེད་པར་འགྱུར་བ་ལྟ་ག་ལ་ཡོད། བྱང་ཆུབ་སེམས་དཔའ་ཉིད་ཀྱང་
རེ་ཞིག་མི་དམིགས་ན། ཡང་གང་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ལྟ་ག་ལ་ཡོད། སྟོབས་ཉིད་ཀྱང་རེ་ཞིག་མི་དམིགས་ན། ཡང་གང་སྟོབས་དང་ལྡན་པར་འགྱུར་
བ་ལྟ་ག་ལ་ཡོད། མི་འཇིགས་པ་ཉིད་ཀྱང་རེ་ཞིག་མི་དམིགས་ན། ཡང་གང་མི་འཇིགས་པར་འགྱུར་བ་ལྟ་ག་ལ་ཡོད། ཆོས་ཁོ་ན་རེ་ཞིག་མི་དམིགས་ན། ཡང་གང་ཆོས་སྟོན་པར་འགྱུར་བ་
ལྟ་ག་ལ་ཡོད། ཀཽ་ཤི་ཀ །གནས་།བརྟན་རབ་འབྱོར་ནི། ཆོས་ཐམས་ཅད་དབེན་པར་གནས་པ་དང༌། ཆོས་ཐམས་ཅད་མི་དམིགས་པར་གནས་པས་གནས་སོ། །ཀཽ་ཤི་ཀ །ཡང་གནས་བརྟན་
རབ་འབྱོར་གྱི་ཆོས་ཐམས་ཅད་དབན་[*DBEN] པར་གནས་པ་དང༌། ཆོས་ཐམས་ཅད་དམིགས་སུ་མེད་པར་གནས་པའི་གནས་པ་གང་ཡིན་པ་འདིས་ནི། ཀཽ་ཤི་ཀ །བྱང་ཆུབ་སེམས་དཔའ་སེམས་
དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་གནས་པའི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆར་ཡང༌། བརྒྱ་སྟོང་གི་ཆར་ཡང༌། བྱེ་བའི་ཆར་ཡང༌། བྱེ་བ་བརྒྱའི་ཆར་ཡང༌།
བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང་ཉེ་བར་མི་འགྲོའོ། །བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོའོ། །གྲངས་སུའང་ཉེ་བར་མི་འགྲོའོ། །བགྲང་བར་ཡང༌། དཔེར་
ཡང༌། དཔེས་བསྟན་པར་བྱ་བར་ཡང༌། རྟེན་དུ་ཡང༌། རྒྱུར་ཡང་མི་བཟོད་དོ། །ཀཽ་ཤི་ཀ །བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་གནས་པའི་
༄༅། །གནས་པ་གང་ཡིན་པའི་གནས་པ་འདིས་ནི། དེ་བཞིན་གཤེགས་པའི་གནས་པ་མ་གཏོགས་པར་དེ་མ་ཡིན་པའི་གནས་པ་གཞན་ཐམས་ཅད་ཟིལ་གྱིས་གནོན་
ཏོ༑ ༑ཀཽ་ཤི་ཀ །འདི་ནི། གནས་པ་དེ་དག་ཐམས་ཅད་པས་མཆོག་ཅེས་བྱའོ། །དམ་པ་ཞེས་བྱའོ། །གཙོ་བོ་ཞེས་བྱའོ། །རབ་ཅེས་བྱའོ། །མཆོག་རབ་ཅེས་བྱའོ། །གྱ་ནོམ་པ་ཞེས་བྱའོ། །བླ་
མ་ཞེས་བྱའོ། །བླ་ན་མེད་པ་ཞེས་བྱའོ། །གོང་ན་མེད་པ་ཞེས་བྱའོ། །མཉམ་པ་མེད་པ་ཞེས་བྱའོ། །མི་མཉམ་པ་དང་མཉམ་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་
ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་གནས་པའི་གནས་པ་གང་ཡིན་པ་འདིས་ནི། ཉན་ཐོས་དང༌། རང་སངས་རྒྱས་ཀྱི་གནས་པ་ཐམས་ཅད་ཟིལ་གྱིས་གནོན་ཏོ། །ཀཽ་ཤི་ཀ །དེ་
ལྟ་བས་ན། སེམས་ཅན་ཐམས་ཅད་ཀྱི་མཆོག་ཏུ་ཕྱིན་པར་འདོད་པ་དང༌། དམ་པར་ཕྱིན་པར་འདོད་པ་དང༌། གཙོ་བོར་ཕྱིན་པར་འདོད་པ་དང༌། རབ་ཏུ་ཕྱིན་པར་འདོད་པ་དང༌། མཆོག་རབ་
ཏུ་ཕྱིན་པར་འདོད་པ་དང༌། གྱ་ནོམ་པར་ཕྱིན་པར་འདོད་པ་དང༌། བླ་མར་ཕྱིན་པར་འདོད་པ་དང༌། བླ་ན་མེད་པར་ཕྱིན་པར་འདོད་པ་དང༌། གོང་ན་མེད་པར་ཕྱིན་པར་འདོད་པ་དང༌། མཉམ་
པ་མེད་པར་ཕྱིན་པར་འདོད་པ་དང༌། མི་མཉམ་པ་དང་མཉམ་པར་ཕྱིན་པར་འདོད་པའི་རིགས་ཀྱི་བུའམ་རིགས་ཀྱི་བུ་མོས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཤེས་
རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་གནས་པའི་གནས་པ་འདིས་གནས་པར་བྱའོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། སྙིང་པོའི་ལེའུ་ཞེས་བྱ་སྟེ། ཉི་ཤུ་རྩ་བདུན་
པའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་ཉི་ཤུ་གཉིས་པ། དེ་ནས་དེའི་ཚེ་ལྷའི་བུ་གཞན་ཞིག་སུམ་ཅུ་རྩ་གསུམ་པའི་ལྷ་རྣམས་དང་ལྷན་ཅིག་
མེ་ཏོག་མནྡཱ་ར་བ་དང༌། མནྡཱ་ར་བ་ཆེན་པོ་ཐོགས་ནས་བཅོམ་ལྡན་འདས་ག་ལ་བ་དེར་ལོགས་སུ་དོང་ངོ༌། །དེའི་ཚེ་ན་དགེ་སློང་བརྒྱ་ཕྲག་དྲུག་ཅུ་འཁོར་དེར་འདུས་ཏེ་འཁོད་པར་གྱུར་ནས་དེ་དག་ཀྱང་སྟན་
ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེར་ལོགས་སུ་ཐལ་མོ་སྦྱར་ཏེ་ཕྱག་འཚལ་བ་དང༌། སངས་རྒྱས་ཀྱི་མཐུས་
དགེ་སློང་དེ་དག་གི་སྙིམ་པར་མེ་ཏོག་མནྡཱ་ར་བ་དང༌། མནྡཱ་ར་བ་ཆེན་པོས་གང་བར་གྱུར་ནས་དེ་དག་གིས་མེ་ཏོག་མནྡཱ་ར་བ་དང༌། མནྡཱ་ར་བ་ཆེན་པོ་དེ་དག་གིས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ནས་ཚིག་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། བདག་ཅག་གིས་ཤེས་རབ་ཀྱི་ཕ་རོལ་
ཏུ་ཕྱིན་པ་འདི་སྤྱད་པར་བགྱིའོ། །བཅོམ་ལྡན་འདས། བདག་ཅག་གིས་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པ་བླ་ན་མེད་པ་འདིས་གནས་པར་བགྱིའོ། །དེ་ནས་བཅོམ་ལྡན་འདས་དེའི་ཚེ་
༄༅། །འཛུམ་པ་མཛད་དོ། །འདི་ནི། ཆོས་ཉིད་ཡིན་ཏེ། གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་འོད་ཟེར་ཁ་དོག་སྣ་ཚོགས་པ་ཁ་
དོག་དུ་མ་འདི་ལྟ་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་དང༌། བཙོད་ཀ་དང༌། ཤེལ་དང༌། དངུལ་དང༌། གསེར་གྱི་ཁ་དོག་རྣམས་བཅོམ་ལྡན་འདས་ཀྱི་ཞལ་གྱི་སྒོ་
ནས་བྱུང་སྟེ། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་ཐུག་པ་མེད་པ་ཀུན་ཏུ་སྣང་བར་བྱས་ནས་གྱེན་དུ་ཚངས་པའི་འཇིག་རྟེན་མན་ཆད་དུ་མངོན་པར་འཕགས་ཏེ་སླར་
ལོག་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་དབུའི་གཙུག་ཏུ་ནུབ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་
ཕྲག་པ་གཅིག་ཏུ་གཟར་ཏེ་བུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །རྒྱུ་མ་མཆིས། རྐྱེན་མ་མཆིས་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཛུམ་པ་མི་མཛད་ན། བཅོམ་ལྡན་འདས་འཛུམ་པ་
མཛད་པའི་རྒྱུ་གང་ལགས། རྐྱེན་གང་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ།
མ་འོངས་པའི་དུས་ན་བསྐལ་པ་སྐར་མ་ལྟ་བུ་ལ་དགེ་སློང་བརྒྱ་ཕྲག་དྲུག་ཅུ་པོ་འདི་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མངོན་པར་
རྫོགས་པར་སངས་རྒྱས་ནས་ཀྱང་སེམས་ཅན་རྣམས་ལ་ཆོས་སྟོན་པར་འགྱུར་རོ། །ཐམས་ཅད་ཀྱང་མིང་གཅིག་པར་འགྱུར་ཏེ། འདི་ལྟ་སྟེ། མེ་ཏོག་བཀྲམ་པ་ཞེས་བྱ་བ་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་རྣམས་འཇིག་རྟེན་དུ་འབྱུང་བར་འགྱུར་རོ། །ཀུན་དགའ་བོ། ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མེ་ཏོག་བཀྲམ་པ་ཞེས་བྱ་བ་དེ་དག་གི་ཉན་ཐོས་ཀྱི་དགེ་འདུན་དེ་དག་ཐམས་ཅད་མཉམ་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
མེ་ཏོག་བཀྲམ་པ་ཞེས་བྱ་བ་དེ་དག་ཐམས་ཅད་ཀྱི་ཚེའི་ཚད་ཀྱང་བསྐལ་པ་སྟོང་ཕྲག་ཉི་ཤུར་མཉམ་པར་འགྱུར་རོ། །དེ་དག་ཐམས་ཅད་སོ་སོའི་གསུང་རབ་ཀྱང་རྒྱས་པར་འགྱུར་ཏེ། ལྷ་དང༌། མིའི་ནང་
དུ་ཡངས་ཤིང་རྒྱ་ཆེ་བར་འགྱུར་རོ། །དེ་དག་ཐམས་ཅད་སོ་སོའི་དམ་པའི་ཆོས་ཀྱང་བསྐལ་པ་སྟོང་ཕྲག་ཉི་ཤུའི་བར་དུ་མཉམ་པར་གནས་པར་འགྱུར་རོ། །དེ་དག་ཐམས་ཅད་གྲོང་དང༌། གྲོང་ཁྱེར་དང༌།
གྲོང་རྡལ་དང༌། ལྗོངས་དང༌། ཡུལ་འཁོར་དང༌། ཕོ་བྲང་འཁོར་གང་དང་གང་ནས་མངོན་པར་འབྱུང་བར་འགྱུར་བ་དང༌། མངོན་པར་བྱུང་ནས་ཀྱང་གང་དང་གང་དུ་ཆོས་ཀྱི་འཁོར་ལོ་བསྐོར་བར་
༄༅། །འགྱུར་བ་དང༌། རབ་ཏུ་བསྐོར་ནས་ཀྱང་གང་དང་གང་དུ་གནས་པར་འགྱུར་བ་དང༌། གང་དང་གང་ནས་གང་དང་གང་དུ་འཇུག་པ་དང༌། གང་དང་གང་གིས་གང་
དང་གང་ནས་འབྱུང་བར་འགྱུར་བ་དེ་དང་དེ་ནས་དེ་དང་དེར་འཇུག་པ་དང༌། འབྱུང་བ་དང༌། གནས་པ་དེ་དག་ལ་མེ་ཏོག་ཁ་དོག་རྣམ་པ་ལྔ་དང་ལྡན་པའི་མེ་ཏོག་གི་ཆར་རབ་ཏུ་འབབ་པར་འགྱུར་
རོ༑ ༑ཀུན་དགའ་བོ། དེ་ལྟ་བས་ན། གནས་པ་མཆོག་གིས་གནས་པར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པས་གནས་
པར་བྱའོ། །ཀུན་དགའ་བོ། དེ་བཞིན་གཤེགས་པའི་གནས་པས་གནས་པར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པས་གནས་པར་བྱའོ། །ཀུན་དགའ་བོ། བྱང་ཆུབ་
སེམས་དཔའ་སེམས་དཔའ་ཆེན་པོ་གང་སུ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་དག་ནི། མི་ལས་ཤི་འཕོས་ཏེ་འདིར་སྐྱེས་པའམ། དགའ་ལྡན་གྱི་ལྷའི་རིས་ནས་ཤི་འཕོས་ནས་
མིའི་ནང་དུ་སྐྱེས་པར་རྟོགས་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་མི་རྣམས་དང༌། དགའ་ལྡན་གྱི་ལྷ་རྣམས་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་རྒྱས་པར་རབ་ཏུ་སྤྱོད་དོ། །ཀུན་དགའ་
བོ༑ ཡང་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། དེ་བཞིན་གཤེགས་པས་གཟིགས་པར་རིག་པར་བྱའོ། །གང་
ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་
ཏོན་བྱེད་པ་དང༌། ཆུང་ངུ་ན་ཡི་གེར་འབྲི་བ་དང༌། བཟུང༌། བཅངས། བཀླགས། ཀུན་ཆུབ་པར་བྱས། རབ་ཏུ་བཏོན། བསྟན། ཉེ་བར་བསྟན། ལུང་ཕོག། ཁ་ཏོན་དུ་བྱས། ཆུང་ངུ་ན་ཡི་གེར་
བྲིས་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འདོམས་ཤིང་རྗེས་སུ་སྟོན་པ་དང༌། ཡང་དག་པར་སྟོན་པ་དང༌། ཡང་དག་པར་འགོད་པ་དང༌། ཡང་དག་པར་གཟེངས་བསྟོད་
པ་དང༌། རབ་ཏུ་དགའ་བར་བྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། ཀུན་དགའ་བོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་
དགེ་བའི་རྩ་བ་བསྐྱེད་པ་ཡིན་པར་རིག་པར་བྱའོ། །གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སློབ་པ་དེ་དག་ནི། ཉན་ཐོས་དང༌། རང་སངས་རྒྱས་འབའ་ཞིག་གི་དྲུང་དུ་དགེ་བའི་རྩ་བ་བསྐྱེད་པ་
མ་ཡིན་གྱི། ཀུན་དགའ་བོ། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་གདོན་མི་ཟ་
བར་དགེ་བའི་རྩ་བ་བསྐྱེད་པ་ཡིན་ནོ། །ཀུན་དགའ་བོ། གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སློབ་ཅིང་སྐྲག་པར་མི་བྱེད་པ་དང༌། གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌།
༄༅། །འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌།
ཆུང་ངུ་ན་ཡི་གེར་འབྲི་བ་དང༌། དེ་ལྟར་དོན་དང་ཆོས་ཉིད་ཀྱི་ཚུལ་གྱིས་རྗེས་སུ་རྟོགས་པར་བྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། ཀུན་དགའ་བོ། ངེས་པར་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མངོན་སུམ་དུ་གྱུར་པ་ཡིན་པར་རྟོགས་པར་བྱའོ། །ཀུན་དགའ་བོ། གང་དག་ཤེས་རབ་ཀྱི་ཕ་
རོལ་ཏུ་ཕྱིན་པ་འདི་ལ་སྨོད་པར་མི་བྱེད། འགལ་བར་མི་བྱེད། འཁྲུག་པར་མི་བྱེད། འཇིག་པར་མི་བྱེད། སྤོང་བར་མི་བྱེད། འགོག་པར་མི་བྱེད། གནོད་པར་བྱ་བར་མི་སེམས་ན།
བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་སྔོན་གྱི་རྒྱལ་བ་དག་ལ་བྱ་བ་བྱས་པས་ཡིན་པར་རིག་པར་བྱའོ། །ཀུན་དགའ་བོ། འདི་ལྟར་ཡང་གལ་ཏེ་བྱང་ཆུབ་སེམས་དཔའ་
སེམས་དཔའ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་པ་སླུ་བར་མི་འགྱུར་བ་དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐད་དུ་དགེ་བའི་རྩ་བ་བསྐྱེད་པས་ཉན་ཐོས་དང༌། རང་སངས་རྒྱས་ཀྱི་དོན་དུ་རྣམ་པར་སྨིན་པ་སྒྲུབ་པར་མི་བྱེད་ཀྱི། ཀུན་
དགའ་བོ། འོན་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ནི། ཕལ་ཆེར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱ་བ་ཡིན་ནོ། །ཀུན་དགའ་བོ། དེ་ལྟ་བས་ན། ཤེས་རབ་ཀྱི་ཕ་རོལ་
ཏུ་ཕྱིན་པ་འདི་ཅི་ནས་ནུབ་པར་མི་འགྱུར་བར་ཁྱོད་ལ་གཏད་དོ། །རྗེས་སུ་གཏད་དོ། །ཡི་གེ་ཙམ་ཡང་ནུབ་པར་མི་འགྱུར་བར་ཟུངས་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །རབ་
ཏུ་ཐོན་ཅིག །ཡུན་རིང་པོར་གནས་པར་གྱིས་ཤིག །ཀུན་དགའ་བོ། ཁྱོད་ཀྱིས་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་མ་གཏོགས་པར་ཆོས་གང་ངས་མངོན་སུམ་དུ་བཤད་པའི་ཆོས་བཤད་པ་དེ་
དག་ཐམས་ཅད་བཟུང་ནས་ཕྱིས་རྣམ་པར་ཆུད་གཟན་ཏམ། ཕྱིས་བཏང་ངམ། བརྗེད་པར་བྱས་ན། ཀུན་དགའ་བོ། ཁྱོད་དེ་ཙམ་གྱིས་ངས་ཉེས་པར་བརྩི་བར་མི་འགྱུར་གྱི། ཀུན་དགའ་བོ། ཡང་འདི་
ལྟར་ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཚིག་གི་ཡན་ལག་ཀྱང་རུང་སྟེ། ཆུད་གཟན་ཏམ། བཏང་ངམ། བརྗེད་པར་བྱས་ན། ཀུན་དགའ་བོ། ཁྱོད་ཀྱིས་དེ་ཙམ་དུ་ང་ལ་ཉེས་པ་བྱས་
པར་འགྱུར་ཏེ། ཁྱོད་ཀྱིས་ངའི་སེམས་ཀྱང་མགུ་བར་མ་བྱས་སོ། །ཀུན་དགའ་བོ། ཡང་ཁྱོད་ཀྱིས་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་བཟུང་ནས་ཕྱིས་ཆུད་གཟན་ཅིང་བཏང་སྟེ་བརྗེད་པར་བྱས་ན། ཁྱོད་
ཀྱིས་ང་ལ་བཀུར་སྟིར་མ་བྱས། བླ་མར་མ་བྱས། རྗེད་པར་མ་བྱས། མཆོད་པར་མ་བྱས། རི་མོར་མ་བྱས། བསྙེན་བཀུར་མ་བྱས་སོ། །ཀུན་དགའ་བོ། གང་དག་འདས་པ་དང༌། མ་འོངས་པ་དང༌།
༄༅། །ད་ལྟར་བྱུང་བའི་སངས་རྒྱས་བཅོམ་ལྡན་འདས་དེ་དག་ལའང་ཀུན་དགའ་བོ། ཁྱོད་ཀྱིས་བཀུར་སྟིར་མ་བྱས། བླ་མར་མ་བྱས། རྗེད་པར་མ་བྱས། མཆོད་པར་མ་
བྱས༑ རི་མོར་མ་བྱས། བསྙེན་བཀུར་མ་བྱས་པ་ཡིན་ནོ། །ཀུན་དགའ་བོ། གལ་ཏེ་ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་བཟུང་ནས་ཕྱིས་ཆུད་གཟན་ཅིང་བཏང་སྟེ་བརྗེད་པར་བྱས་ན། ཀུན་
དགའ་བོ། ཁྱོད་ཀྱིས་དེ་ཙམ་དུ་ང་ལ་ཉེས་པ་བྱས་པར་འགྱུར་ཏེ། ཁྱོད་ཀྱིས་ངའི་སེམས་ཀྱང་མགུ་བར་མ་བྱས་སོ། །དེ་ཅིའི་ཕྱིར་ཞེ་ན། ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི།
འདས་པ་དང༌། མ་འོངས་པ་དང༌། ད་ལྟར་བྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡུམ་སྟེ། སྐྱེད་པ། འབྱིན་པ། ཐམས་ཅད་
མཁྱེན་པ་ཉིད་ཐོབ་པར་བྱེད་པ་ཡིན་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་སོ། །ཀུན་དགའ་བོ། དེ་ལྟ་བས་ན། ཤེས་རབ་ཀྱི་ཕ་
རོལ་ཏུ་ཕྱིན་པ་འདི་ཅི་ནས་ཀྱང་ནུབ་པར་མི་འགྱུར་བར་ཁྱོད་ལ་གཏད་དོ། །རྗེས་སུ་གཏད་དོ། །ཀུན་དགའ་བོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་གཟུང་བར་བྱའོ། །ཀུན་དགའ་བོ། ཤེས་རབ་
ཀྱི་ཕ་རོལ་ཏུ་ཕྱིན་པ་འདི་བཅང་བར་བྱའོ། །ཀུན་དགའ་བོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་བཀླག་པར་བྱའོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཀུན་ཆུབ་པར་བྱའོ། །ཀུན་
དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་རབ་ཏུ་གདོན་པར་བྱའོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་བསྟན་པར་བྱའོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉེ་
བར་བསྟན་པར་བྱའོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལུང་འབོགས་པར་བྱའོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཁ་ཏོན་དུ་བྱའོ། །ཀུན་དགའ་བོ། ཤེས་རབ་
ཀྱི་ཕ་རོལ་ཏུ་ཕྱིན་པ་འདི་བྲི་བར་བྱ་སྟེ། ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་བསྒོམ་པར་བྱ། ཀུན་དགའ་བོ། ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལེགས་པར་ཡིད་ལ་བྱ་བ་
དང༌། ལེགས་པར་ཟིན་པར་བྱ་བ་དང༌། ལེགས་པར་ཀུན་ཆུབ་པར་བྱ་བ་དང༌། ལེགས་པར་རབ་ཏུ་འདོན་པར་བྱ་སྟེ། ཡི་གེ་དང༌། ཚིག་དང༌། གསལ་བྱེད་ཤིན་ཏུ་གསལ་བས་ཡིག་འབྲུ་དང༌། ངེས་
པའི་ཚིག་བཟང་པོར་གཟུང་བར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ། འདས་པ་དང༌། མ་འོངས་པ་དང༌། ད་ལྟར་བྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་རྣམས་ཀྱི་ཆོས་ཀྱི་སྐུ་ཡིན་ནོ། །ཞེས་ཆོས་ཉིད་དེ་ཚད་མར་བྱའོ། །ཀུན་དགའ་བོ། ད་ལྟར་བཞུགས་ཏེ་འཚོ་ཞིང་གཞེས་པའི་དེ་བཞིན་གཤེགས་པ་ང་ལ་ཁྱོད་ཀྱིས་ཇི་ལྟར་དེ་དང་
དེས་ཕན་པར་སེམས་པ་དང༌། དགའ་བ་དང༌། གུས་པ་དང༌། དགེ་བར་བྱ་བའམ། བདེ་བར་གནས་པར་བྱ་བའམ། དབུལ་བའམ། བསམ་པར་བྱ་བར་སེམས་པ་དེ་བཞིན་དུ་ཀུན་དགའ་བོ།
༄༅། །ཁྱོད་ཀྱིས་ཕན་པར་སེམས་པ་དེ་དང༌། དགའ་བ་དེ་དང༌། གུས་པ་དེ་དང༌། ཡོན་ཏན་དང་ལྡན་པ་དེས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གཟུང་བར་བྱ། བཅང་བར་
བྱ༑ བཀླག་པར་བྱ། ཀུན་ཆུབ་པར་བྱ། རབ་ཏུ་གདོན་པར་བྱ། བསྟན་པར་བྱ། ཉེ་བར་བསྟན་པར་བྱ། ལུང་འབོགས་པར་བྱ། ཁ་ཏོན་དུ་བྱ། བྲི་བར་བྱ། བསྒོམ་པར་བྱ། བཀུར་སྟིར་བྱ།
བླ་མར་བྱ། རྗེད་པར་བྱ། མཆོད་པར་བྱ། རི་མོར་བྱ། བསྙེན་བཀུར་བྱ་སྟེ། ཀུན་དགའ་བོ། དེ་ལྟར་ན། ཁྱོད་ཀྱིས་ང་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་མཆོད་པར་
འགྱུར་ཞིང༌། འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་དྲུང་དུ་ཡང་དགའ་བ་དང༌། དད་པ་དང༌། གུས་པ་བྱས་པ་ཡིན་ནོ། །ཀུན་དགའ་བོ།
གལ་ཏེ་དེ་བཞིན་གཤེགས་པ་ང་ལ་ཁྱོད་དགའ་བ་དང༌། ཡིད་དུ་འོང་བ་ཡོངས་སུ་མི་གཏོང་ན། ཀུན་དགའ་བོ། ཁྱོད་ཀྱིས་ཅི་ནས་ཚིག་གཅིག་ཀྱང་ཆུད་མ་ཟོས་ཤིང་མི་ནུབ་པར་
འགྱུར་བ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཁྱོད་དགའ་བ་དང༌། ཡིད་དུ་འོང་བ་ཡོངས་སུ་མི་གཏང་བར་གྱིས་ཤིག ། ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་
ཡོངས་སུ་གཏད་པ་ལས་བརྩམས་ཏེ་ངས་ཁྱོད་ལ་མང་དུ་བཤད་ན། བསྐལ་པའམ། བསྐལ་པ་ལས་ལྷག་པའམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བྱེ་
བ་བརྒྱའམ། བསྐལ་པ་བྱེ་བ་སྟོང་ངམ། བསྐལ་པ་བྱེ་བ་ཕྲག་བརྒྱ་སྟོང་ངམ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ངམ། དེ་བས་ཀྱང་ལྷག་པར་ཡོད་མོད་ཀྱི། ཀུན་དགའ་བོ། མདོར་ན་
ཇི་ལྟར་ཁྱོད་ཀྱི་སྟོན་པ་ང་ཡིན་པ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་སྟོན་པ་ཡིན་ནོ། །ཀུན་དགའ་བོ། ཇི་ལྟར་འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་རྒྱས་
བཅོམ་ལྡན་འདས་རྣམས་ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་རྣམས་ཀྱི་སྟོན་པ་ཡིན་པ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ང་ལྷ་དང༌། མི་དང༌། ལྷ་མ་ཡིན་དུ་
བཅས་པའི་འཇིག་རྟེན་རྣམས་ཀྱི་སྟོན་པ་ཡིན་ནོ། །ཀུན་དགའ་བོ། དེ་ལྟ་བས་ན། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཚད་མེད་པ་ཡིན་ཏེ། ལྷ་དང༌། མི་དང༌། ལྷ་མ་ཡིན་དུ་བཅས་
པའི་འཇིག་རྟེན་རྣམས་ལ་ཕན་པ་དང་བདེ་བར་བྱ་བའི་ཕྱིར་ཚད་མེད་པའི་ཡོངས་སུ་གཏད་པས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཁྱོད་ལ་ཡོངས་སུ་གཏད་དོ། །རྗེས་སུ་གཏད་དོ། །ཀུན་
དགའ་བོ། གང་གིས་དེ་བཞིན་གཤེགས་པ་ཡོངས་སུ་མ་བཏང་བ་དང༌། ཆོས་ཡོངས་སུ་མ་བཏང་བ་དང༌། དགེ་འདུན་ཡོངས་སུ་མ་བཏང་བ་དང༌། འདས་པ་དང༌། མ་འོངས་པ་དང༌། ད་ལྟར་
བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ཡོངས་སུ་མ་བཏང་བ་དེས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་མི་གཏང་བར་བྱ་སྟེ། འདི་ནི། ངའི་རྗེས་སུ་བསྟན་པའོ། །
༄༅། །ཀུན་དགའ་བོ། གང་ལ་ལ་ཞིག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་
དང༑ སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་དུ་བྱེད་པ་དང༌། འབྲི་བ་དང༌། སྒོམ་པར་བྱེད་པ་དེས་འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་
རྒྱས་བཅོམ་ལྡན་འདས་རྣམས་ཀྱི་བྱང་ཆུབ་རྗེས་སུ་ཡོངས་སུ་བཟུང་བར་འགྱུར་རོ། །ཀུན་དགའ་བོ། གང་ལ་ལ་ཞིག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་རབ་ཏུ་འཇིག་པའི་ཚེ་རྗེས་
སུ་བཟུང་ན། དེས་འདས་པ་དང༌། མ་འོངས་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་རྗེས་སུ་ཡོངས་སུ་བཟུང་བར་འགྱུར་རོ། །དེ་ཅིའི་ཕྱིར་ཞེ་ན། ཀུན་
དགའ་བོ། སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལས་སྐྱེས་སོ། །ཀུན་དགའ་བོ། གང་དག་འདས་པའི་དུས་སུ་བྱུང་བར་གྱུར་པའི་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པར་སངས་རྒྱས་པའི་སངས་རྒྱས་བཅོམ་ལྡན་འདས་དེ་དག་གི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཀུན་
དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་ལས་སྐྱེས་སོ། །ཀུན་དགའ་བོ། གང་དག་མ་འོངས་པའི་དུས་ན་འབྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པར་སངས་རྒྱས་པའི་སངས་རྒྱས་བཅོམ་ལྡན་འདས་དེ་དག་གི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་ལས་སྐྱེའོ། །ཀུན་
དགའ་བོ། གང་དག་འཇིག་རྟེན་གྱི་ཁམས་གཞལ་དུ་མེད་གྲངས་མེད་པ་དག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པར་སངས་རྒྱས་པ་ད་ལྟར་བཞུགས་ཏེ་
འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་གི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་སྐྱེས་སོ། །
ཀུན་དགའ་བོ། ངའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་སྐྱེས་སོ། །ཀུན་དགའ་བོ། དེ་ལྟ་བས་ན། བྱང་ཆུབ་སེམས་དཔའ་སེམས་
དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་འདོད་པ་དང༌། ཕ་རོལ་ཏུ་ཕྱིན་པ་དྲུག་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་
རོལ་ཏུ་ཕྱིན་པ་འདི་ཉིད་མཉན་པར་བྱ། གཟུང་བར་བྱ། བཅང་བར་བྱ། བཀླག་པར་བྱ། ཀུན་ཆུབ་པར་བྱ། རབ་ཏུ་གདོན་པར་བྱ། བསྟན་པར་བྱ། ཉེ་བར་བསྟན་པར་བྱ། ལུང་འབོགས་
པར་བྱ། ཁ་ཏོན་དུ་བྱ། བྲི་བར་བྱ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བསླབ་པར་བྱ། རྣལ་འབྱོར་དུ་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་
༄༅། །འདི་ནི༑ བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡུམ་སྟེ། སྐྱེད་པ། འབྱིན་པའོ། །ཀུན་དགའ་བོ། བྱང་ཆུབ་སེམས་དཔའ་སེམས་དཔའ་
ཆེན་པོ་གང་དག་ཕ་རོལ་ཏུ་ཕྱིན་པ་དྲུག་པོ་རྣམས་ལ་བསླབས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་བྱུང་བར་གྱུར་པ་དང༌། ངེས་པར་འབྱུང་བར་འགྱུར་བ་
དང༌། ངེས་པར་འབྱུང་བ་དེ་དག་ཐམས་ཅད་ཀྱང་ཀུན་དགའ་བོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས་ཕ་རོལ་ཏུ་ཕྱིན་པ་དྲུག་ལ་བསླབས་པ་ཡིན་ནོ། །དེ་དག་ཐམས་ཅད་
ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ནས་ཕ་རོལ་ཏུ་ཕྱིན་པ་དྲུག་ལས་སྐྱེས་སོ། །དེ་ཅིའི་ཕྱིར་ཞེ་ན། ཀུན་དགའ་བོ་ཕ་རོལ་ཏུ་ཕྱིན་པ་ཐམས་ཅད་ནི། ཤེས་རབ་ཀྱི་ཕ་
རོལ་ཏུ་ཕྱིན་པ་ལས་སྐྱེས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱེད་པ་ཡིན་ནོ། །ཀུན་དགའ་བོ། དེ་ལྟ་བས་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཅི་ནས་ཀྱང་
ནུབ་པར་མི་འགྱུར་བར་ལན་གཉིས་སུ་ཁྱོད་ལ་ཡོངས་སུ་གཏད་དོ། །རྗེས་སུ་གཏད་དོ། །ཀུན་དགའ་བོ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཆོས་ཀྱི་མཛོད་མི་ཟད་པའོ། །དེ་ཅིའི་ཕྱིར་ཞེ་ན། ཀུན་དགའ་བོ། འདས་པའི་དུས་ཀྱི་ཐོག་མ་མེད་པའི་འཁོར་བར་
སེམས་ཅན་རྣམས་ལ་སངས་རྒྱས་བཅོམ་ལྡན་འདས་རྣམས་ཀྱིས་ཆོས་བཤད་པ་གང་ཡིན་པ་དེ་དག་ཐམས་ཅད་ནི། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ཀྱི་མཛོད་འདི་ཉིད་
ལས་བཤད་དོ། །ཀུན་དགའ་བོ། སངས་རྒྱས་བཅོམ་ལྡན་འདས་གང་དག་མ་འོངས་པའི་དུས་ཀྱི་དཔག་ཏུ་མེད་པའི་འཁོར་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་
རྫོགས་པར་སངས་རྒྱས་ནས་སེམས་ཅན་རྣམས་ལ་ཆོས་སྟོན་པར་འགྱུར་བའི་སངས་རྒྱས་བཅོམ་ལྡན་འདས་དེ་དག་ཀྱང་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ཀྱི་མཛོད་འདི་
ཉིད་ལས་འཆད་དོ། །ཀུན་དགའ་བོ། གང་ད་ལྟར་འཇིག་རྟེན་གྱི་ཁམས་གཞལ་དུ་མེད་གྲངས་མེད་པ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་ལ་ཆོས་
སྟོན་པའི་སངས་རྒྱས་བཅོམ་ལྡན་འདས་དེ་དག་ཀྱང་ཀུན་དགའ་བོ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ཀྱི་མཛོད་འདི་ཉིད་ལས་རབ་ཏུ་འབྱེད་པར་འགྱུར་རོ། །ཀུན་དགའ་
བོ༑ དེ་ལྟ་བས་ན། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་མཛོད་འདི་དག་ནི། མི་ཟད་པའི་ཆོས་ཀྱི་མཛོད་དོ། །ཀུན་དགའ་བོ། གལ་ཏེ་ཁྱོད་ཀྱིས་གང་ཟག་ཉན་ཐོས་ཀྱི་ཐེག་པ་པ་
རྣམས་ལ་ཉན་ཐོས་ཀྱི་སའི་ཆོས་བཤད་པར་གྱུར་ལ། ཆོས་དེ་བཤད་པ་ནའང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གང་དག་ཡོད་པ་དེ་དག་ཐམས་ཅད་དགྲ་
༄༅། །བཅོམ་པ་ཉིད་མངོན་སུམ་དུ་བྱས་པར་གྱུར་ན། དེ་ལྟ་ནའང་ངའི་ཉན་ཐོས་ཆོས་ཀྱི་འཁོར་ལོ་བསྐོར་ཅིང་རྗེས་སུ་བསྐོར་ནས་ཆོས་སྟོན་པ་ཁྱོད་ཀྱིས་ཉན་ཐོས་
ཀྱི་བྱ་བ་བྱས་པར་མི་འགྱུར་རོ། །ཀུན་དགའ་བོ། གལ་ཏེ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་གཅིག་ཙམ་ཡང་
བཤད་དམ་རབ་ཏུ་བསྟན་ན། དེ་ལྟར་ན། ངའི་ཉན་ཐོས་ཆོས་ཀྱི་འཁོར་ལོ་བསྐོར་ཅིང་རྗེས་སུ་བསྐོར་ནས་ཆོས་སྟོན་པ་ཁྱོད་ཀྱིས་ང་མགུ་བར་བྱས་པར་འགྱུར་གྱི། སྔར་གྱི་ཆོས་
བཤད་པ་དེས་ནི། མ་ཡིན་ནོ། །གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དག་ན་སེམས་ཅན་གང་དག་ཇི་སྙེད་ཡོད་པ་དེ་དག་ཐམས་ཅད་དགྲ་བཅོམ་པ་ཉིད་ཐོབ་
པར་བྱས་ན། ཀུན་དགའ་བོ། དེ་ཇི་སྙམ་དུ་སེམས། དགྲ་བཅོམ་པ་དེ་དག་གི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང༌། ཚུལ་ཁྲིམས་ལས་བྱུང་བའི་བསོད་ནམས་བྱ་
བའི་དངོས་པོ་དང༌། བསྒོམས་པ་ལས་བྱུང་བའི་བསོད་ནམས་བྱ་བའི་དངོས་པོའི་བསོད་ནམས་ཀྱི་ཕུང་པོ་དེ་མང་བ་ཡིན་ནམ། ཀུན་དགའ་བོས་གསོལ་པ། བཅོམ་ལྡན་འདས། མང་ངོ༌། །བདེ་
བར་གཤེགས་པ། མང་ངོ༌། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཉན་ཐོས་ཀྱི་ཐེག་པ་པའི་གང་ཟག་དེ་དག་པས་གང་བྱང་ཆུབ་སེམས་དཔའ་སེམས་དཔའ་ཆེན་
པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་སྟོན་པ་དེ་བསོད་ནམས་ཆེས་མང་དུ་བསྐྱེད་དོ། །ཀུན་དགའ་བོ། དེ་བས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་གང་བྱང་ཆུབ་
སེམས་དཔའ་སེམས་དཔའ་ཆེན་པོ་གཞན་ལ་ཆུང་ངུ་ན་ཉི་མ་གཅིག་ཙམ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་སྟོན་ན། དེ་བསོད་ནམས་ཆེས་མང་དུ་བསྐྱེད་དོ། །
ཀུན་དགའ་བོ། ཉི་མ་གཅིག་ལྟ་ཞོག་གི །ཆུང་ངུ་ན་སྔ་དྲོ་ཙམ་མམ། ཀུན་དགའ་བོ། སྔ་དྲོ་ཆོས་སྟོན་པ་ལྟ་ཞོག །ཆུང་ངུ་ན་ཆུ་ཚོད་གཅིག་ཙམ་མམ། ཀུན་དགའ་བོ། ཆུ་ཚོད་གཅིག་ལྟ་ཞོག་
ཆུང་ངུ་ན་ཡུད་ཙམ་གཅིག་གམ། ཀུན་དགའ་བོ། ཡུད་ཙམ་གཅིག་ལྟ་ཞོག །ཐང་གཅིག་གམ། ཀུན་དགའ་བོ། ཐང་གཅིག་ལྟ་ཞོག་ཆུང་ངུ་ན་སྐད་ཅིག་གཅིག་ཙམ་དུའང་རུང་སྟེ། ཀུན་དགའ་
བོ༑ བྱང་ཆུབ་སེམས་དཔའ་སེམས་དཔའ་ཆེན་པོ་གང་སྐད་ཅིག་དང༌། ཐང་གཅིག་དང༌། ཡུད་ཙམ་དུའང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་
པའི་ཆོས་སྟོན་ན། འདི་ནི། དེ་བས་བསོད་ནམས་ཆེས་མང་དུ་བསྐྱེད་དོ། །ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་དེའི་ཆོས་ཀྱི་སྦྱིན་པ་འདིས་ནི། ཉན་ཐོས་དང༌། རང་སངས་
རྒྱས་ཀྱི་ཐེག་པ་པའི་གང་ཟག་ཐམས་ཅད་ཀྱི་དགེ་བའི་རྩ་བ་ཟིལ་གྱིས་གནོན་ཏོ། །ཀུན་དགའ་བོ། དེ་ལྟ་བུའི་དགེ་བའི་རྩ་བ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དང༌། དེ་ལྟ་
༄༅། །བུའི་དགེ་བའི་རྩ་བ་ལ་སེམས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པ་ནི།
ཀུན་དགའ་བོ། གནས་མེད། སྐབས་མེད་དེ། འདི་ནི། གནས་མ་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཇི་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་པས་
དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མའི་འཁོར་བཞི་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་
ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་དེ་དག་ཐམས་ཅད་ཀྱིས་སངས་རྒྱས་ཀྱི་མཐུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་བསྐྱོད་
པ་དགེ་སློང་གི་དགེ་འདུན་གྱིས་ཡོངས་སུ་བསྐོར་ཅིང་བྱང་ཆུབ་སེམས་དཔའི་ཚོགས་ཀྱིས་མདུན་དུ་བྱས་པ་མི་བསྐྱོད་པ་རྒྱ་མཚོ་ལྟ་བུ་ཟབ་པ། འཁོར་བྱང་ཆུབ་སེམས་དཔའ་སེམས་དཔའ་ཆེན་
པོ་བསམ་གྱིས་མི་ཁྱབ་པའི་ཡོན་ཏན་དང་ལྡན་པ་དང༌། དགྲ་བཅོམ་པ་ཐམས་ཅད་ཀྱང་ཟག་པ་ཟད་པ། ཉོན་མོངས་པ་མེད་པ། དབང་དུ་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་
ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་སྦྱོར་བ་ཡོངས་སུ་ཟད་པ། ཡང་དག་པར་ཀུན་
ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཐམས་ཅད་ཀྱི་དབང་དམ་པའི་ཕ་རོལ་ཏུ་སོན་པ་རྣམས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ་ཆོས་སྟོན་པ་མཐོང་བར་འགྱུར་བ་དེ་ལྟར་
རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་དོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་དག་སླར་བརྟུལ་ཏོ། །བཅོམ་ལྡན་འདས་ཀྱིས་རྫུ་འཕྲུལ་མངོན་པར་
འདུ་མཛད་པ་དེ་སླར་བརྟུལ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་བསྐྱོད་པའང་མི་སྣང་བར་གྱུར། བྱང་ཆུབ་སེམས་དཔའ་སེམས་དཔའ་
ཆེན་པོ་དེ་དག་དང༌། ཉན་ཐོས་ཆེན་པོ་དེ་དག་དང༌། སངས་རྒྱས་ཀྱི་ཞིང་དེ་དག་ཐམས་ཅད་འཁོར་བཞི་པོ་དེ་དག་དང་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་
དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་དེ་དག་གི་མིག་ལམ་དུ་མི་སྣང་བར་གྱུར་ཏོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་བརྟུལ་བར་གྱུར་པས་དེ་དག་ཐམས་ཅད་དེ་དག་གི་མིག་ལམ་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་
ཀུན་དགའ་བོ་ལ་བཀའ་སྩལ་པ། ཀུན་དགའ་བོ། དེ་ལྟར་ཆོས་ཐམས་ཅད་ནི། མིག་ལམ་དུའང་སྣང་བར་མི་འགྱུར་ཏེ། ཆོས་རྣམས་ལ་ཆོས་རྣམས་སྣང་བར་མི་འགྱུར། ཆོས་རྣམས་ཀྱིས་
༄༅། །ཆོས་རྣམས་མི་མཐོང༌། ཆོས་རྣམས་ཀྱིས་ཆོས་རྣམས་མི་ཤེས་སོ། །དེ་ཅིའི་ཕྱིར་ཞེ་ན། ཀུན་དགའ་བོ། ཆོས་ཐམས་ཅད་ནི། ཤེས་པ་པོ་མ་ཡིན། མཐོང་བ་
པོ་མ་ཡིན། དགོས་པ་བྱེད་ནུས་པ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ། ནམ་མཁའ་བྱེད་པ་མེད་པའི་ཕྱིར་ཆོས་ཐམས་ཅད་བྱེད་པ་མེད་པའོ། །ཀུན་དགའ་བོ། ཆོས་ཐམས་ཅད་
ནི༑ སྒྱུ་མའི་སྐྱེས་བུ་ལྟར་བསམ་གྱིས་མི་ཁྱབ་པའོ། །ཀུན་དགའ་བོ། ཆོས་ཐམས་ཅད་ནི། དངོས་པོ་མེད་པའི་ཕྱིར་ཚོར་བ་པོ་མ་ཡིན་ནོ། །ཀུན་དགའ་བོ། བྱང་ཆུབ་སེམས་དཔའ་སེམས་
དཔའ་ཆེན་པོ་དེ་ལྟར་སྤྱོད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་ཆོས་གང་ལའང་མངོན་པར་ཆགས་པ་མེད་དོ། །ཀུན་དགའ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་
དེ་ལྟར་སློབ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སློབ་བོ། །བསླབ་པ་ཐམས་ཅད་ཀྱི་དམ་པའི་ཕ་རོལ་ཏུ་ཕྱིན་པའི་བྱང་ཆུབ་ཆེན་པོ་རྗེས་སུ་ཐོབ་པར་འདོད་པའི་བྱང་ཆུབ་སེམས་དཔའ་
སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ། བསླབ་པ་འདི་དག་ནི། བསླབ་པ་ཐམས་ཅད་ཀྱི་མཆོག་ཅེས་བྱའོ། །དམ་པ་
ཞེས་བྱའོ། །གཙོ་བོ་ཞེས་བྱའོ། །རབ་ཅེས་བྱའོ། །མཆོག་རབ་ཅེས་བྱའོ། །གྱ་ནོམ་པ་ཞེས་བྱའོ། །བླ་མ་ཞེས་བྱའོ། །བླ་ན་མེད་པ་ཞེས་བྱའོ། །གོང་ན་མེད་པ་ཞེས་བྱའོ། །མཉམ་པ་མེད་པ་ཞེས་
བྱའོ༑ ༑མི་མཉམ་པ་དང་མཉམ་པ་ཞེས་བྱའོ། །འཇིག་རྟེན་ཐམས་ཅད་ལ་ཕན་པ་ཐོབ་པར་བྱེད་པའོ། །འཇིག་རྟེན་ཐམས་ཅད་ལ་བདེ་བ་ཐོབ་པར་བྱེད་པའོ། །མགོན་མེད་པ་རྣམས་ཀྱི་མགོན་དུ་
གྱུར་པའོ། །སངས་རྒྱས་ཀྱིས་གནང་ཞིང་སངས་རྒྱས་ཀྱིས་བསྔགས་པ་སྟེ། ཀུན་དགའ་བོ། བསླབ་པ་འདི་ལ་བསླབས་ཤིང་བསླབ་པ་འདི་ལ་གནས་ནས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རྣམས་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཞབས་ཀྱི་མཐེ་བོང་གཅིག་གིས་བཏེག་སྟེ་སླར་བཞག་ཀྱང་སངས་རྒྱས་བཅོམ་ལྡན་
འདས་དེ་དག་འདི་སྙམ་དུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་བཏེག་པའམ། བཞག་པར་མི་དགོངས་སོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ནི། གཞལ་
དུ་མེད་གྲངས་མེད་པའི་ཡོན་ཏན་དང་ལྡན་ཏེ། ཀུན་དགའ་བོ། སངས་རྒྱས་བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་བསླབ་པ་འདི་ལ་བསླབས་ནས་འདས་པ་དང༌། མ་འོངས་པ་
དང༑ ད་ལྟར་བྱུང་བའི་ཆོས་རྣམས་ལ་ཆགས་པ་མེད་པ་ཉིད་རྗེས་སུ་བརྙེས་སོ། །ཀུན་དགའ་བོ། འདས་པ་དང༌། མ་འོངས་པ་དང༌། ད་ལྟར་བྱུང་བའི་དུས་ཀྱི་བསླབ་པ་ཇི་སྙེད་ཡོད་པའི་བསླབ་པ་
དེ་དག་ཐམས་ཅད་ལས། ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པའི་བསླབ་པ་འདི་ནི། མཆོག་ཅེས་བྱའོ། །དམ་པ་ཞེས་བྱའོ། །གཙོ་བོ་ཞེས་བྱའོ། །རབ་ཅེས་བྱའོ། །མཆོག་རབ་
༄༅། །ཅེས་བྱའོ། །གྱ་ནོམ་པ་ཞེས་བྱའོ། །བླ་མ་ཞེས་བྱའོ། །བླ་ན་མེད་པ་ཞེས་བྱའོ། །གོང་ན་མེད་པ་ཞེས་བྱའོ། །མཉམ་པ་མེད་པ་ཞེས་བྱའོ། །མི་མཉམ་པ་དང་མཉམ་
པ་ཞེས་བྱའོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཚད་མ་མེད་པའོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མི་ཟད་པའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་
རོལ་ཏུ་ཕྱིན་པ་མེད་པ་ཉིད་ཡིན་པའི་ཕྱིར་རོ། །ཀུན་དགའ་བོ། གང་ཤེས་རབ་ཀྱི་ཕ་རོལ་ཏུ་ཕྱིན་པའི་ཚད་མའམ། ཟད་པའམ། མཐའ་མ་བཟུང་བར་སེམས་པ་དེ་ནི། ནམ་མཁའི་ཚད་
མའམ༑ ཟད་པའམ། མཐའ་མ་བཟུང་བར་སེམས་སོ། །དེ་ཅིའི་ཕྱིར་ཞེ་ན། ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཚད་མ་མེད་པའོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་
ཕྱིན་པ་ནི། མི་ཟད་པའོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མཐའ་མ་མེད་པའོ། །ཀུན་དགའ་བོ། ངས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚད་མའམ། ཟད་པའམ། མཐའ་
མ་ནི། མ་བཤད་དེ། ཀུན་དགའ་བོ། ཡང་མིང་གི་ཚོགས་དང༌། ཚིག་གི་ཚོགས་དང༌། ཡི་གེའི་ཚོགས་རྣམས་ལ་ནི། ཚད་མ་དང་འབྲེལ་བ་ཡོད་ཀྱི། ཀུན་དགའ་བོ། ཤེས་རབ་ཀྱི་ཕ་
རོལ་ཏུ་ཕྱིན་པ་ལ་ནི། ཚད་མ་དང་འབྲེལ་བ་མེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ། མིང་གི་ཚོགས་དང༌། ཚིག་གི་ཚོགས་དང༌། ཡི་གེའི་ཚོགས་ནི། ཤེས་རབ་ཀྱི་ཕ་རོལ་ཏུ་ཕྱིན་པ་མ་
ཡིན་ཏེ༑ ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཚད་མ་དང་ལྡན་པ་མ་ཡིན་ནོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཚད་མེད་པའོ། །ཀུན་དགའ་བོས་གསོལ་པ།
བཅོམ་ལྡན་འདས། ཡང་ཅིའི་སླད་དུ་བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚད་མ་མ་གསུངས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཤེས་རབ་ཀྱི་ཕ་
རོལ་ཏུ་ཕྱིན་པ་མི་ཟད་པའི་ཕྱིར་དེ་བཞིན་གཤེགས་པས་ཚད་མ་མ་བསྟན་ཏོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་དབེན་པའི་ཕྱིར་དེ་བཞིན་གཤེགས་པས་ཚད་མ་མ་བརྗོད་དོ། །
ཀུན་དགའ་བོ། དབེན་པའི་ཆོས་ལ་དབེན་པ་དམིགས་སུ་མེད་ན། དེའི་ཚད་མ་ལྟ་ག་ལ་ཡོད། ཀུན་དགའ་བོ། དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་གཞལ་དུ་མེད་པའི་ཕྱིར་ཚད་མ་མེད་ཅིང་ཚད་
མེད་པ་ཡིན་ནོ། །ཀུན་དགའ་བོ། འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་བྱུང་བར་གྱུར་པ་དེ་དག་ཀྱང་ཀུན་དགའ་བོ། ཤེས་རབ་ཀྱི་
ཕ་རོལ་ཏུ་ཕྱིན་པ་འདི་ཉིད་ཀྱིས་རབ་ཏུ་ཕྱེ་བ་ཡིན་ཡང་ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཟད་པའམ། ཡོངས་སུ་ཟད་པར་འགྱུར་བ་མ་ཡིན་ནོ། །ཀུན་དགའ་བོ། མ་འོངས་པའི་དུས་ན་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་འབྱུང་བར་འགྱུར་བ་དེ་དག་ཀྱང་ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ཀྱིས་རབ་ཏུ་འབྱེད་པར་
༄༅། །འགྱུར་ཡང་ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཟད་པའམ། ཡོངས་སུ་ཟད་པར་འགྱུར་བ་མ་ཡིན་ནོ། །ཀུན་དགའ་བོ། ད་ལྟར་གཞལ་དུ་
མེད་གྲངས་མེད་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་བཞུགས་ཏེ་འཚོ་ཞིང་གཞེས་པ་དེ་དག་ཀྱང་ཀུན་དགའ་
བོ༑ ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ཀྱིས་རབ་ཏུ་ཕྱེ་བ་ཡིན་ཡང་ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཟད་པའམ། ཡོངས་སུ་ཟད་པར་འགྱུར་བ་མ་ཡིན་ནོ། །ཀུན་དགའ་
བོ༑ ད་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངའང་ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ཀྱིས་རབ་ཏུ་ཕྱེ་བ་ཡིན་ཡང་ཀུན་
དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཟད་པའམ། ཡོངས་སུ་ཟད་པར་འགྱུར་བ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ། གང་ཤེས་རབ་ཀྱི་ཕ་རོལ་ཏུ་ཕྱིན་པ་ཟད་པར་བྱ་བར་སེམས་
པ་དེ་ནི། ནམ་མཁའ་ཟད་པར་བྱ་བར་སེམས་ཏེ། ཀུན་དགའ་བོ། དེ་ལྟ་བས་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། མི་ཟད་པའོ། །དེ་ནས་ཚེ་དང་ལྡན་པ་རབ་འབྱོར་འདི་སྙམ་དུ་སེམས་ཏེ། དེ་
བཞིན་གཤེགས་པས་གསུངས་པའི་གནས་འདི་ནི། ཟབ་མོ་ཞིག་ཡིན་གྱི། དེ་བཞིན་གཤེགས་པ་ལ་བདག་གིས་གནས་འདི་ཞུའོ། །སྙམ་མོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་
འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་མི་བསོ་བ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཤེས་རབ་ཀྱི་ཕ་རོལ་
ཏུ་ཕྱིན་པ་ནི། མི་ཟད་པ་སྟེ། འདི་ལྟ་སྟེ། ནམ་མཁའ་མི་ཟད་པའི་ཕྱིར་ཆོས་ཐམས་ཅད་སྐྱེ་བ་མེད་པའོ། །རབ་འབྱོར་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་
ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཇི་ལྟར་མངོན་པར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོས་གཟུགས་
ཟད་པ་མེད་པ་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པར་བྱའོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་ཚོར་བ་དང༌། འདུ་ཤེས་དང༌། འདུ་
བྱེད་རྣམས་དང༌། རྣམ་པར་ཤེས་པ་ཟད་པ་མེད་པ་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པར་བྱ་སྟེ། རབ་འབྱོར། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་
རབ་ཀྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པར་བྱའོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོས་མ་རིག་པ་མི་ཟད་པ་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་
བསྒྲུབ་པར་བྱའོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་འདུ་བྱེད་མི་ཟད་པ་དང༌། རྣམ་པར་ཤེས་པ་མི་ཟད་པ་དང༌། མིང་དང་གཟུགས་མི་ཟད་པ་དང༌། སྐྱེ་
༄༅། །མཆེད་དྲུག་མི་ཟད་པ་དང༌། རེག་པ་མི་ཟད་པ་དང༌། ཚོར་བ་མི་ཟད་པ་དང༌། སྲེད་པ་མི་ཟད་པ་དང༌། ལེན་པ་མི་ཟད་པ་དང༌། སྲིད་པ་མི་ཟད་པ་དང༌། སྐྱེ་བ་མི་ཟད་
པ་དང༌། རྒ་ཤི་མི་ཟད་པ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་མི་ཟད་པ་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་
པར་བསྒྲུབ་པར་བྱའོ། །རབ་འབྱོར། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་རྟེན་ཅིང་འབྲེལ་པར་འབྱུང་བ་ལ་རྣམ་པར་ལྟ་བ་མཐའ་གཉིས་སྤངས་པའོ། །རབ་འབྱོར། དེ་
ལྟར་རྣམ་པར་ལྟ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། རྟེན་ཅིང་འབྲེལ་པར་འབྱུང་བ་མཐའ་དང༌། དབུས་མེད་པར་རྣམ་པར་ལྟ་སྟེ། རབ་འབྱོར། གང་རྟེན་ཅིང་འབྲེལ་
པར་འབྱུང་བ་ལ་དེ་ལྟར་ལྟ་བ་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སྙིང་པོ་ལ་འདུག་པའི་མ་འདྲེས་པའི་ཆོས་སོ། །རབ་འབྱོར། བྱང་ཆུབ་སེམས་དཔའ་སེམས་
དཔའ་ཆེན་པོ་གང་དེ་ལྟར་རྟེན་ཅིང་འབྲེལ་པར་འབྱུང་བ་ལ་ལྟ་བ་ནི། ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་
ལ་མི་ཟད་པ་མངོན་པར་སྒྲུབ་པ་འདིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་རྟེན་ཅིང་འབྲེལ་པར་འབྱུང་བ་ལ་རྣམ་པར་ལྟ་ན། དེ་ནི། ཉན་ཐོས་ཀྱི་སའམ། རང་སངས་རྒྱས་ཀྱི་ས་ལ་
གནས་པར་མི་འགྱུར་ཏེ། འོན་ཀྱང་ཐམས་ཅད་མཁྱེན་པ་ཉིད་ལ་གནས་པར་འགྱུར་ཏེ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ལས་ཕྱིར་ལྡོག་པ་དེ་དག་ཐམས་ཅད་ནི། ཡིད་ལ་བྱེད་པ་འདི་དང༌། ཐབས་མཁས་པ་འདི་ལ་མ་བརྟེན་པས་མི་ཤེས་སོ། །ཇི་ལྟར་བྱང་ཆུབ་སེམས་དཔའ་སེམས་དཔའ་
ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས་མི་ཟད་པ་མངོན་པར་སྒྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པར་བྱ། ཇི་ལྟར་མི་ཟད་པ་མངོན་པར་སྒྲུབ་པས་ཤེས་རབ་
ཀྱི་ཕ་རོལ་ཏུ་ཕྱིན་པ་ལ་རྟེན་ཅིང་འབྲེལ་པར་འབྱུང་བ་ལ་རྣམ་པར་བལྟ་ཞེ་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ལས་ཕྱིར་ལོག་པ་དང༌། ཕྱིར་ལྡོག་པ་དང༌། ཕྱིར་ལྡོག་པར་འགྱུར་བ་དེ་དག་ཐམས་ཅད་ནི། ཐབས་མཁས་པ་འདི་ལ་མ་བརྟེན་པས་ཕྱིར་ལོག་གོ། ཕྱིར་ལྡོག་གོ །ཕྱིར་ལྡོག་པར་
འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མ་ལོག་པ་དང༌། ཕྱིར་མི་ལྡོག་པ་དང༌། ཕྱིར་
ལྡོག་པར་མི་འགྱུར་བ་དེ་དག་ཐམས་ཅད་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་ཕྱིར་མ་ལོག་གོ །ཕྱིར་མི་ལྡོག་གོ །ཕྱིར་ལྡོག་པར་མི་འགྱུར་རོ། །དེ་ལྟར་བྱང་ཆུབ་སེམས་དཔའ་
༄༅། །སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས་མི་ཟད་པ་མངོན་པར་སྒྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མངོན་པར་བསྒྲུབ་པར་བྱའོ། །དེ་
ལྟར་མི་ཟད་པ་མངོན་པར་སྒྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྟེན་ཅིང་འབྲེལ་པར་འབྱུང་བ་ལ་རྣམ་པར་བལྟའོ། །རབ་འབྱོར། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་
དེ་ལྟར་རྟེན་ཅིང་འབྲེལ་པར་འབྱུང་བ་ལ་རྣམ་པར་ལྟ་བས་ཆོས་གང་ཡང་རྒྱུ་མེད་པར་འབྱུང་བར་ཡང་དག་པར་རྗེས་སུ་མི་མཐོང་ངོ༌། །ཆོས་གང་ཡང་རྟག་པའམ། བརྟན་པའམ། ཐེར་
ཟུག་པའམ། རྣམ་པར་འགྱུར་བ་མེད་པའི་ཆོས་ཅན་དུ་ཡང་དག་པར་རྗེས་སུ་མི་མཐོང་ངོ༌། །ཆོས་གང་ཡང་བྱེད་པ་པོའམ། ཚོར་བ་པོར་ཡང་དག་པར་རྗེས་སུ་མི་མཐོང་ངོ༌། །རབ་འབྱོར། འདི་
ནི༑ བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མི་ཟད་པ་མངོན་པར་སྒྲུབ་པས་མངོན་པར་སྒྲུབ་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་རྟེན་ཅིང་འབྲེལ་པར་འབྱུང་བ་
ལ་རྣམ་པར་ལྟ་བ་ཡིན་ནོ། །རབ་འབྱོར། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་མི་ཟད་པ་མངོན་པར་སྒྲུབ་པས་མངོན་པར་བསྒྲུབ་པ་རྟེན་
ཅིང་འབྲེལ་པར་འབྱུང་བ་ལ་རྣམ་པར་ལྟ་བ་དེའི་ཚེ་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གཟུགས་ཡང་དག་པར་རྗེས་སུ་མི་མཐོང༌། དེ་བཞིན་དུ་ཚོར་བ་མ་ཡིན། འདུ་
ཤེས་མ་ཡིན། འདུ་བྱེད་རྣམས་མ་ཡིན། རྣམ་པར་ཤེས་པ་ཡང་དག་པར་རྗེས་སུ་མི་མཐོང༌། མ་རིག་པ་ཡང་དག་པར་རྗེས་སུ་མི་མཐོང༌། དེ་བཞིན་དུ་འདུ་བྱེད་རྣམས་མ་ཡིན། རྣམ་པར་
ཤེས་པ་མ་ཡིན། མིང་དང་གཟུགས་མ་ཡིན། སྐྱེ་མཆེད་དྲུག་མ་ཡིན། རེག་པ་མ་ཡིན། ཚོར་བ་མ་ཡིན། སྲེད་པ་མ་ཡིན། ལེན་པ་མ་ཡིན། སྲིད་པ་མ་ཡིན། སྐྱེ་བ་མ་ཡིན། རྒ་ཤི་མ་ཡིན།
མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་ཡང་ཡང་དག་པར་རྗེས་སུ་མི་མཐོང་ངོ༌། །སངས་རྒྱས་ཀྱི་ཞིང་འདིའོ། །ཞེས་ཀྱང་ཡང་དག་པར་རྗེས་
སུ་མི་མཐོང༌། སངས་རྒྱས་ཀྱི་ཞིང་གཞན་ཡིན་ནོ། །ཞེས་ཡང་དག་པར་རྗེས་སུ་མི་མཐོང༌། ཆོས་གང་གིས་སངས་རྒྱས་ཀྱི་ཞིང་འདིའམ། གཞན་ནོ། །ཞེས་ཡང་དག་པར་རྗེས་སུ་མི་མཐོང་བར་
འགྱུར་བའི་ཆོས་དེ་ཡང་ཡང་དག་པར་རྗེས་སུ་མི་མཐོང་སྟེ། རབ་འབྱོར། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའོ། །རབ་འབྱོར། གང་གི་ཚེ་
བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེའི་ཚེ་བདུད་སྡིག་ཅན་ཤིན་ཏུ་མྱ་ངན་གྱི་ཟུག་རྔུ་དང་ལྡན་པར་འགྱུར་རོ། །རབ་འབྱོར། འདི་ལྟ་སྟེ། དཔེར་ན།
མི་ཞིག་ཕ་མ་འཆི་བའི་དུས་བྱས་པར་གྱུར་ན། ཤིན་ཏུ་མྱ་ངན་གྱི་ཟུག་རྔུ་དང་ལྡན་པར་འགྱུར་བ་དེ་བཞིན་དུ། རབ་འབྱོར། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་
༄༅། །ཕ་རོལ་ཏུ་ཕྱིན་པ་ལ་སྤྱོད་པ་དེའི་ཚེ་བདུད་སྡིག་ཅན་ཡང་ཤིན་ཏུ་མྱ་ངན་གྱི་ཟུག་རྔུ་དང་ལྡན་པར་འགྱུར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། ཅི་བདུད་
སྡིག་ཅན་གཅིག་ཅིག་ཤིན་ཏུ་མྱ་ངན་གྱི་ཟུག་རྔུ་དང་ལྡན་པར་འགྱུར་རམ། འོན་ཏེ་བདུད་སྡིག་ཅན་མང་པོ་ཤིན་ཏུ་མྱ་ངན་གྱི་ཟུག་རྔུ་དང་ལྡན་པར་འགྱུར་རམ། འོན་ཏེ་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་ན་བདུད་སྡིག་ཅན་ཇི་སྙེད་མཆིས་པ་དེ་དག་ཐམས་ཅད་ཀྱང་དེའི་ཚེ་ཤིན་ཏུ་མྱ་ངན་གྱི་ཟུག་རྔུ་དང་ལྡན་པར་འགྱུར། དེ་སྐད་ཅེས་གསོལ་པ་དང༌། བཅོམ་ལྡན་འདས་
ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་པས་གནས་པ་
དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བདུད་སྡིག་ཅན་ཇི་སྙེད་ཡོད་པ་དེ་དག་ཐམས་ཅད་ཤིན་ཏུ་མྱ་ངན་གྱི་ཟུག་རྔུ་དང་ལྡན་པར་འགྱུར་ཏེ། རང་རང་གི་སྟན་ལ་ཡང་
ཉམས་མི་དགའ་བར་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པས་གནས་པ་ལ་ནི། ལྷ་དང༌། མི་དང༌། ལྷ་མ་ཡིན་
དུ་བཅས་པའི་འཇིག་རྟེན་གྱིས་བདག་ཅག་གིས་འདི་བཟུང་ལ་མཐོ་བཙམ་མོ། །སྙམ་པ་དང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་བཟློག་པར་བྱའོ། །སྙམ་པའི་གླགས་
རྙེད་པར་མི་འགྱུར། གཏིང་རྙེད་པར་མི་འགྱུར་རོ། །རབ་འབྱོར། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་བྱང་ཆུབ་པར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་
པས་ན། སྦྱིན་པའི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར། དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་པའི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་
ཏུ་ཕྱིན་པ་དང༌། བསམ་གཏན་གྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་
སྤྱོད་པ་ནི། ཕ་རོལ་ཏུ་ཕྱིན་པ་དྲུག་པོ་ཐམས་ཅད་བསྒོམ་པ་ཡོངས་སུ་རྫོགས་པར་འགྱུར་རོ། །ཐབས་མཁས་པ་ཐམས་ཅད་བསྒོམ་པ་ཡོངས་སུ་རྫོགས་པར་འགྱུར་ཏེ། བྱང་ཆུབ་སེམས་དཔའ་
སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེས་ནི། བདུད་ཀྱི་ལས་གང་ཅུང་ཟད་འབྱུང་བར་འགྱུར་བ་དེ་དག་ཐམས་ཅད་འབྱུང་བའི་ཚེ་རབ་ཏུ་ཤེས་པར་འགྱུར་ཏེ། རབ་ཏུ་ཤེས་
ནས་རྣམ་པར་སྤོང་བར་འགྱུར་རོ། །རབ་འབྱོར། ཐབས་མཁས་པ་ཐམས་ཅད་ཡོངས་སུ་གཟུང་བར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་
༄༅། །པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་བྱའོ། །རབ་འབྱོར། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་
པ་ལ་སྤྱོད་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་སྒྲུབ་པར་བྱེད་པ་དེའི་ཚེ་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོས་འཇིག་རྟེན་གྱི་ཁམས་གཞལ་དུ་མེད་གྲངས་
མེད་པ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་པ་དེ་དག་ལ་དེ་དག་གི་ཐམས་ཅད་མཁྱེན་པ་ཉིད་ཀྱང་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་
སྐྱེས་སོ༑ ༑སྙམ་དུ་བསམ་པར་བྱའོ། །དེ་ལྟར་བསམས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཀྱང་སེམས་འདི་ལྟར་བསྐྱེད་པར་བྱ་སྟེ། ཇི་ལྟར་སངས་རྒྱས་བཅོམ་ལྡན་འདས་
དེ་དག་གིས་ཆོས་གང་དག་རྗེས་སུ་བརྙེས་པ་དེ་བཞིན་དུ་བདག་གིས་ཀྱང་ཆོས་དེ་དག་རྗེས་སུ་ཐོབ་པར་བྱའོ། །སྙམ་སྟེ། རབ་འབྱོར། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་
ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས་ཉིན་གཅིག་འདས་ཀྱི་བར་ལ་ཐ་ན་སེ་གོལ་གཏོགས་པ་སྲིད་ཙམ་དུ་ཡང་སེམས་བསྐྱེད་པ་འདི་དག་བསྐྱེད་པར་བྱ། མངོན་པར་བསྒྲུབ་པར་བྱའོ། །
རབ་འབྱོར། གང་ཡང་དམིགས་པ་དང་བཅས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་སྦྱིན་པ་བྱིན་པའི་བྱང་ཆུབ་སེམས་དཔའ་
སེམས་དཔའ་ཆེན་པོ་དམིགས་པ་ཅན་དེ་བས་ནི། བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་ཉི་མ་གཅིག་འདས་ཀྱི་བར་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཆུང་ངུ་ན་སེ་གོལ་
གཏོགས་པ་གཅིག་ཙམ་དུ་མངོན་པར་སྒྲུབ་ན། བསོད་ནམས་ཆེས་མང་དུ་བསྐྱེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། ཕྱིར་མི་ལྡོག་པའི་ས་ལ་གནས་པར་འགྱུར་རོ། །བྱང་ཆུབ་
སེམས་དཔའ་སེམས་དཔའ་ཆེན་པོ་གང་ཉིན་གཅིག་འདས་ཀྱི་བར་ལ་ཆུང་ངུ་ན་སེ་གོལ་གཏོགས་པ་སྲིད་ཙམ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སྤྱོད་ཅིང་སེམས་བསྐྱེད་པ་འདི་བསྐྱེད་པ་
དེ༑ དེ་བཞིན་གཤེགས་པས་དགོངས་པར་རིག་པར་བྱ་ན། གང་སེམས་བསྐྱེད་པ་འདི་ཉིན་ཐོག་ཐག་རྗེས་སུ་འཇུག་པར་བྱེད་པ་ལྟ་ཅི་སྨོས། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་
པོ་དེ་བཞིན་གཤེགས་པས་དགོངས་པས་འགྲོ་བ་གང་ཞིག་ལ་རེ་བར་བྱ་ཞེ་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པས་དགོངས་པས་ནི། བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མ་གཏོགས་པར་འགྲོ་བ་གཞན་དུ་དོགས་པར་མི་བྱ་སྟེ། དེ་ནི། སྐལ་བ་མེད་པ་དང༌། ངན་སོང་རྣམས་སུ་སྐྱེ་བར་མི་འགྱུར་གྱི། མཐོ་རིས་སུ་སྐྱེ་བར་རེ་བར་
བྱའོ༑ ༑དེར་ཡང་དེ་བཞིན་གཤེགས་པ་རྣམས་དང་མི་འབྲལ་བར་འགྱུར་ཞིང༌། དེ་བཞིན་གཤེགས་པ་དང་མ་བྲལ་བའི་སངས་རྒྱས་ཀྱི་ཞིང་དུ་སྐྱེ་བར་འགྱུར་ཏེ། སེམས་ཅན་ཡོངས་སུ་སྨིན་
༄༅། །པར་བྱེད་པར་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་ཆུང་ངུ་ན་སེ་གོལ་གཏོགས་པ་གཅིག་ཙམ་དུའང་ཤེས་རབ་ཀྱི་
ཕ་རོལ་ཏུ་ཕྱིན་པ་ལ་སྤྱོད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་སྒྲུབ་ཅིང་སེམས་བསྐྱེད་པ་འདི་སྐྱེད་པར་བྱེད་པའི་ཡོན་ཏན་འདི་དག་དང༌། ཕན་ཡོན་འདི་དག་ཡིན་ན། གང་ཞིག་
སེམས་བསྐྱེད་པ་འདི་ཉིན་ཐོག་ཐག་རྗེས་སུ་འཇུག་པར་བྱེད་པ་ལྟ་ཅི་སྨོས། རབ་འབྱོར། འདི་ལྟ་སྟེ། དཔེར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་མི་བསྐྱོད་པའི་དྲུང་ན་ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་གླང་པོ་ཞེས་བྱ་བ་ཚངས་པར་སྤྱད་པ་སྤྱོད་པ་བཞིན་ནོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་
པ་བརྒྱད་སྟོང་པ་ལས། མེ་ཏོག་བཀྲམ་པའི་ལེའུ་ཞེས་བྱ་སྟེ། ཉི་ཤུ་རྩ་བརྒྱད་པའོ།། །།རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་
ཕ་རོལ་ཏུ་ཕྱིན་པ་ལ་འདི་ལྟར་རྗེས་སུ་རིག་པར་བྱ་སྟེ། ཆོས་ཐམས་ཅད་ཆགས་པ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་དབྱེར་མི་ཕྱེད་པའི་
ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་འབྱུང་བ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་འགྱུར་བ་མེད་
པར་མཉམ་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་བདག་མེད་པ་དང་རྣམ་པར་རིག་པ་མེད་པར་ཤེས་རབ་ཀྱིས་རྗེས་སུ་རྟོགས་པས་ཤེས་རབ་ཀྱི་ཕ་
རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་མིང་ཙམ་དང་ཐ་སྙད་གདགས་པ་ཙམ་གྱིས་བརྗོད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཐ་སྙད་གདགས་
པའང་གང་ལ་ཡང་མ་ཡིན། གང་གིས་ཀྱང་མ་ཡིན། གང་ཡང་ཐ་སྙད་གདགས་པ་མེད་དོ། །ཆོས་ཐམས་ཅད་ཐ་སྙད་མེད་པ། བརྗོད་དུ་མེད་པ། སྨྲར་མེད་པ། ཚིག་མེད་པའི་ཕྱིར་ཤེས་རབ་
ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་ཚད་མ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །གཟུགས་ཚད་མ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་
ཕྱིན་པར་རྗེས་སུ་རིག་པར་བྱའོ། །དེ་བཞིན་དུ་ཚོར་བ་ཚད་མ་མེད་པ་དང༌། འདུ་ཤེས་ཚད་མ་མེད་པ་དང༌། འདུ་བྱེད་རྣམས་ཚད་མ་མེད་པ་དང༌། རྣམ་པར་ཤེས་པ་ཚད་མ་མེད་པའི་ཕྱིར་ཤེས་
རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་མཚན་མ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་ངེས་པར་འབྱེད་པའི་ཕྱིར་
ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་རང་བཞིན་གྱིས་ཡོངས་སུ་དག་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་
༄༅། །ཚིག་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་འགོག་པ་མེད་པས་སྤང་བར་བྱ་བ་མཉམ་པའི་ཕྱིར་ཤེས་རབ་
ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་མྱ་ངན་ལས་འདས་པ་ཐོབ་ཅིང་དེ་བཞིན་ཉིད་དང་མཉམ་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་
བྱའོ༑ ༑ཆོས་ཐམས་ཅད་མི་འོང་མི་འགྲོ་མི་ཤེས་མི་སྐྱེ་ཤིན་ཏུ་མི་སྐྱེ་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །བདག་དང་གཞན་དུ་མི་ལྟ་བའི་ཕྱིར་ཤེས་རབ་ཀྱི་
ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་འཕགས་པ་དགྲ་བཅོམ་པ་རང་བཞིན་གྱིས་ཡོངས་སུ་དག་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་
ཐམས་ཅད་ཁུར་བོར་ཞིང་ཁུར་མི་འཁྱེར་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་ཡུལ་མེད་ཅིང་ཕྱོགས་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་
སུ་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་ནི། རང་བཞིན་གྱི་ངོ་བོ་ཉིད་ཀྱིས་ཡུལ་དང༌། ཕྱོགས་མེད་པའོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་
རྣམས་དང༌། རྣམ་པར་ཤེས་པ་ནི། རང་བཞིན་གྱིས་ངོ་བོ་ཉིད་ཀྱིས་ཡུལ་དང༌། ཕྱོགས་མེད་པའོ། །ཆོས་ཐམས་ཅད་འགོག་པ་རབ་ཏུ་སིམ་པར་བྱེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་
རྗེས་སུ་རིག་པར་བྱའོ། །དགའ་བ་མེད་ཅིང་དགའ་བ་དང་བྲལ་བ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །འདོད་ཆགས་པ་མེད་ཅིང་འདོད་ཆགས་དང་བྲལ་བ་མེད་པའི་
ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར། གཟུགས་ནི། དེ་ཁོ་ན་དང་བཅས་པའི་ངོ་བོ་ཉིད་ཀྱིས་ན་འདོད་ཆགས་པར་མི་བྱེད། འདོད་ཆགས་དང་
བྲལ་བར་མི་བྱེད་དོ། །རབ་འབྱོར། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། དེ་ཁོ་ན་དང་བཅས་པའི་ངོ་བོ་ཉིད་ཀྱིས་ན་འདོད་ཆགས་པར་མི་བྱེད། འདོད་
ཆགས་དང་བྲལ་བར་མི་བྱེད་དོ། །རང་བཞིན་གྱིས་ཡོངས་སུ་དག་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་ཆགས་པ་དང་མ་ཆགས་པའི་ཞེན་པ་དང་བྲལ་
བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །སངས་རྒྱས་ཀྱི་ཡེ་ཤེས་ཁོང་དུ་ཆུད་པས་ཆོས་ཐམས་ཅད་བྱང་ཆུབ་བོ། །ཞེས་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་
བྱའོ༑ ༑ཆོས་ཐམས་ཅད་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །བྱམས་པ་ཆེན་པོ་སྔོན་དུ་འགྲོ་བས་ཆོས་
ཐམས་ཅད་སྨན་ལྟ་བུའོ། །ཞེས་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་བྱམས་པ་ལ་གནས་པ་དང༌། སྙིང་རྗེ་ལ་གནས་པ་དང༌། དགའ་བ་ལ་གནས་པ་
༄༅། །དང༑ བཏང་སྙོམས་ལ་གནས་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་ཚངས་པར་གྱུར་པས་ཞེ་སྡང་མི་བསྐྱེད་ཅིང་ཞེ་
སྡང་ཐམས་ཅད་མི་ལེན་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་སྨོན་པ་མེད་པའི་ཕྱིར་དང༌། ཁོང་ཁྲོ་བ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་
པར་རྗེས་སུ་རིག་པར་བྱའོ། །རྒྱ་མཚོ་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་སུ་རིག་པར་བྱའོ། །ནམ་མཁའ་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་
མེད་པར་རྗེས་སུ་རིག་པར་བྱའོ། །རི་རབ་སྣ་ཚོགས་པ་ཉིད་ཀྱི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་སྣ་ཚོགས་པར་རྗེས་སུ་རིག་པར་བྱའོ། །གཟུགས་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་
ཕྱིན་པ་མུ་མེད་པར་རྗེས་སུ་རིག་པར་བྱའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་
པར་རྗེས་སུ་རིག་པར་བྱའོ། །ཉི་མའི་འོད་ཟེར་གྱི་དཀྱིལ་འཁོར་མུ་མེད་པར་སྣང་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་སུ་རིག་པར་བྱའོ། །སྒྲ་ཐམས་ཅད་མུ་མེད་པའི་
ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་སུ་རིག་པར་བྱའོ། །སངས་རྒྱས་ཀྱི་ཆོས་ཐམས་ཅད་ཡང་དག་པར་སྒྲུབ་པ་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་
རྗེས་སུ་རིག་པར་བྱའོ། །སེམས་ཅན་གྱི་ཁམས་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་སུ་རིག་པར་བྱའོ། །སའི་
ཁམས་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་སུ་རིག་པར་བྱའོ། །དེ་བཞིན་དུ་ཆུའི་ཁམས་དང༌། མེའི་ཁམས་དང༌། རླུང་གི་ཁམས་དང༌། ནམ་མཁའི་ཁམས་
དང༌། རྣམ་པར་ཤེས་པའི་ཁམས་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་སུ་རིག་པར་བྱའོ། །དགེ་བ་དང་མི་དགེ་བའི་ཆོས་བསགས་པ་ཚད་མེད་པའི་ཕྱིར་ཤེས་རབ་
ཀྱི་ཕ་རོལ་ཏུ་ཕྱིན་པ་ཚད་མེད་པར་རྗེས་སུ་རིག་པར་བྱའོ། །ཆོས་ཐམས་ཅད་བསགས་པ་ཚད་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཚད་མེད་པར་རྗེས་སུ་རིག་པར་བྱའོ། །ཆོས་ཐམས་ཅད་ཀྱི་
ཏིང་ངེ་འཛིན་མུ་མེད་པ་ཐོབ་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་སུ་རིག་པར་བྱའོ། །སངས་རྒྱས་ཀྱི་ཆོས་ཐམས་ཅད་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་
སུ་རིག་པར་བྱའོ། །ཆོས་ཐམས་ཅད་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་སུ་རིག་པར་བྱའོ། །སྟོང་པ་ཉིད་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་
སུ་རིག་པར་བྱའོ། །སེམས་དང་སེམས་ལས་བྱུང་བ་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པར་རྗེས་སུ་རིག་པར་བྱའོ། །སེམས་ཀྱི་སྤྱོད་པ་མུ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་
༄༅། །པ་མུ་མེད་པར་རྗེས་སུ་རིག་པར་བྱའོ། །དགེ་བ་དང་མི་དགེ་བའི་ཆོས་ཚད་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཚད་མེད་པར་རྗེས་སུ་རིག་པར་བྱའོ། །སེངྒེའི་
སྒྲ་སྒྲོག་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །ཆོས་ཐམས་ཅད་འཁྲུག་པ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་འཁྲུག་པ་མེད་པར་རྗེས་སུ་རིག་པར་
བྱའོ༑ ༑དེ་ཅིའི་ཕྱིར་ཞེ་ན། རབ་འབྱོར། གཟུགས་ནི། རྒྱ་མཚོ་དང་མཚུངས་པའོ། །དེ་བཞིན་དུ་རབ་འབྱོར། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། རྒྱ་
མཚོ་དང་མཚུངས་པའོ། །གཟུགས་ནི། ནམ་མཁའ་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། ནམ་མཁའ་དང་མཚུངས་པའོ། །
གཟུགས་ནི། རི་རབ་སྣ་ཚོགས་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། རི་རབ་སྣ་ཚོགས་དང་མཚུངས་པའོ། །གཟུགས་
ནི༑ མུ་མེད་པ་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། མུ་མེད་པ་དང་མཚུངས་པའོ། །གཟུགས་ནི། ཉི་མའི་དཀྱིལ་འཁོར་
གྱི་འོད་ཟེར་འབྱུང་བ་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། ཉི་མའི་དཀྱིལ་འཁོར་གྱི་འོད་ཟེར་འབྱུང་བ་དང་མཚུངས་པའོ། །
གཟུགས་ནི། སྒྲ་ཐམས་ཅད་མུ་མེད་པ་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། སྒྲ་ཐམས་ཅད་མུ་མེད་པ་དང་མཚུངས་
པའོ༑ ༑གཟུགས་ནི། སངས་རྒྱས་ཀྱི་ཆོས་ཐམས་ཅད་ཡང་དག་པར་སྒྲུབ་པ་མུ་མེད་པ་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། སངས་
རྒྱས་ཀྱི་ཆོས་ཐམས་ཅད་ཡང་དག་པར་སྒྲུབ་པ་མུ་མེད་པ་དང་མཚུངས་པའོ། །གཟུགས་ནི། སེམས་ཅན་གྱི་ཁམས་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་མུ་མེད་པ་དང་མཚུངས་པའོ། །
དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། སེམས་ཅན་གྱི་ཁམས་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་མུ་མེད་པ་དང་མཚུངས་པའོ། །
གཟུགས་ནི། ས་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། ས་དང་མཚུངས་པའོ། །གཟུགས་ནི། ཆུ་དང་མཚུངས་པའོ། །དེ་བཞིན་
དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། ཆུ་དང་མཚུངས་པའོ། །གཟུགས་ནི། མེ་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་
དང༌། རྣམ་པར་ཤེས་པ་ནི། མེ་དང་མཚུངས་པའོ། །གཟུགས་ནི། རླུང་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། རླུང་དང་
༄༅། །མཚུངས་པའོ། །གཟུགས་ནི། ནམ་མཁའ་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། ནམ་མཁའ་
དང་མཚུངས་པའོ། །གཟུགས་ནི། རྣམ་པར་ཤེས་པ་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། རྣམ་པར་ཤེས་པ་དང་
མཚུངས་པའོ། །གཟུགས་ནི། དགེ་བ་དང་མི་དགེ་བའི་ཆོས་བསགས་པ་དང་བྲལ་བའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། དགེ་བ་དང་མི་
དགེ་བའི་ཆོས་བསགས་པ་དང་བྲལ་བའོ། །གཟུགས་ནི། ཆོས་ཐམས་ཅད་བསགས་པ་དང་བྲལ་བའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་
ནི༑ ཆོས་ཐམས་ཅད་བསགས་པ་དང་བྲལ་བའོ། །གཟུགས་ནི། ཆོས་ཐམས་ཅད་ཏིང་ངེ་འཛིན་མུ་མེད་པ་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་
དང༌། རྣམ་པར་ཤེས་པ་ནི། ཆོས་ཐམས་ཅད་ཏིང་ངེ་འཛིན་མུ་མེད་པ་དང་མཚུངས་པའོ། །གཟུགས་ནི། བྲལ་བ་སྟེ། གཟུགས་ཀྱི་ངོ་བོ་ཉིད་དང༌། གཟུགས་ཀྱི་དེ་བཞིན་ཉིད་ནི། སངས་
རྒྱས་ཀྱི་ཆོས་སོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། བྲལ་བ་སྟེ། རྣམ་པར་ཤེས་པའི་ངོ་བོ་ཉིད་དང༌། རྣམ་པར་ཤེས་པའི་དེ་བཞིན་
ཉིད་ནི༑ སངས་རྒྱས་ཀྱི་ཆོས་སོ། །གཟུགས་ནི། ཆོས་ཐམས་ཅད་མུ་མེད་པའི་ཆོས་ཉིད་དོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། ཆོས་ཐམས་
ཅད་མུ་མེད་པའི་ཆོས་ཉིད་དོ། །གཟུགས་ནི། སྟོང་པ་མུ་མེད་པའི་ཆོས་ཉིད་དོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། སྟོང་པ་མུ་མེད་པའི་ཆོས་
ཉིད་དོ༑ ༑གཟུགས་ནི། སེམས་དང་སེམས་ལས་བྱུང་བ་མུ་མེད་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། སེམས་དང་སེམས་ལས་
བྱུང་བ་མུ་མེད་པའོ། །གཟུགས་ནི། སེམས་ཀྱི་སྤྱོད་པ་ལས་བྱུང་བའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། སེམས་ཀྱི་སྤྱོད་པ་ལས་བྱུང་
བའོ༑ ༑གཟུགས་ནི། དགེ་བ་དང༌། མི་དགེ་བ་དང༌། མི་དམིགས་པའི་བར་དུའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། དགེ་བ་དང༌། མི་དགེ་
བ་དང༌། མི་དམིགས་པའི་བར་དུའོ། །གཟུགས་ནི། སེངྒེའི་སྒྲ་དང་མཚུངས་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། སེངྒེའི་སྒྲ་དང་
མཚུངས་པའོ། །གཟུགས་ནི། འཁྲུག་པ་མེད་པའོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ནི། འཁྲུག་པ་མེད་པའོ། །རབ་འབྱོར། དེ་ལྟར་ན།
༄༅། །བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པར་རྗེས་སུ་རིག་པར་བྱའོ། །རབ་འབྱོར། གང་གི་ཚེ་བྱང་ཆུབ་སེམས་དཔའ་
སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལྟར་རྗེས་སུ་རིག་པར་བྱེད་པ་དང༌། རྣམ་པར་དཔྱོད་པ་དང༌། འཇུག་པ་དང༌། རྟོགས་པར་བྱེད་པ་དང༌། སེམས་པ་དང༌། འཇལ་བ་
དང༌། ཉེ་བར་རྟོག་པ་དང༌། སྒྱུ་དང་གཡོ་ཐམས་ཅད་རྣམ་པར་སྤངས་པའི་ཡིད་ལ་བྱེད་པ་དང༌། ལེ་ལོ་ཐམས་ཅད་རྣམ་པར་སྤངས་པའི་ཡིད་ལ་བྱེད་པ་དང༌། རློམ་སེམས་ཐམས་ཅད་རྣམ་པར་
སྤངས་པའི་ཡིད་ལ་བྱེད་པ་དང༌། བདག་བསྟོད་པ་རྣམ་པར་སྤངས་པའི་ཡིད་ལ་བྱེད་པ་དང༌། གཞན་ལ་སྨོད་པ་རྣམ་པར་སྤངས་པའི་ཡིད་ལ་བྱེད་པ་དང༌། བདག་ཏུ་འདུ་ཤེས་པ་རྣམ་པར་སྤངས་
པའི་ཡིད་ལ་བྱེད་པ་དང༌། སེམས་ཅན་དུ་འདུ་ཤེས་པ་རྣམ་པར་སྤངས་པའི་ཡིད་ལ་བྱེད་པ་དང༌། རྙེད་པ་དང་བཀུར་སྟི་དང་ཚིགས་སུ་བཅད་པ་རྣམ་པར་སྤངས་པའི་ཡིད་ལ་བྱེད་པ་དང༌། སྒྲིབ་
པ་ལྔ་རྣམ་པར་སྤངས་པའི་ཡིད་ལ་བྱེད་པ་དང༌། ཕྲག་དོག་དང་སེར་སྣ་རྣམ་པར་སྤངས་པའི་ཡིད་ལ་བྱེད་པ་དང༌། སྐྱེ་བོ་ཐམས་ཅད་སྤངས་པའི་ཡིད་ལ་བྱེད་པ་དག་གིས་སྒོམ་པར་འགྱུར་བ་དེའི་ཚེ་
དེ་ལ་ཡོན་ཏན་ཐམས་ཅད་ཡོངས་སུ་རྫོགས་པ་དང༌། སངས་རྒྱས་ཀྱི་ཞིང་བླ་ན་མེད་པ་དང༌། སངས་རྒྱས་ཀྱི་ཆོས་རྣམས་ཡོངས་སུ་རྫོགས་པར་རྙེད་དཀའ་བར་མི་འགྱུར་རོ། །འཕགས་པ་ཤེས་
རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། རྗེས་སུ་རིག་པའི་ལེའུ་ཞེས་བྱ་སྟེ། ཉི་ཤུ་རྩ་དགུ་པའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་
ཉི་ཤུ་གསུམ་པ། རབ་འབྱོར། གཞན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་གང་ད་ལྟར་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་སྒྲ་དབྱངས་མི་ཟད་པར་སྒྲོག་པའི་དྲུང་ན་ཚངས་པར་སྤྱད་པ་སྤྱོད་པ་དེས་ཡོངས་སུ་བཙལ་བ་དེ་བཞིན་དུ་།ཡོངས་སུ་བཙལ་བར་བྱའོ། །དེ་སྐད་ཅེས་བཀའ་
སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་ཤེས་རབ་ཀྱི་
ཕ་རོལ་ཏུ་ཕྱིན་པ་འདི་ཚོལ་བ་ན་ཇི་ལྟར་ཡོངས་སུ་བཙལ་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། བྱང་
ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་སྔོན་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་ཚོལ་བ་ན་ལུས་ལ་ཆེད་ཆེར་མི་བྱེད། སྲོག་ལ་མི་ལྟ། རྙེད་པ་དང་བཀུར་སྟི་དང་ཚིགས་སུ་བཅད་
པ་དག་ལ་མི་གནས་པར་ཡོངས་སུ་བཙལ་བས་ཡོངས་སུ་བཙལ་ཏོ། །དེས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་ཚོལ་ཞིང་འབྲོག་དགོན་པ་ཞིག་ཏུ་ཕྱིན་པ་ན་བར་སྣང་ལས་རིགས་ཀྱི་བུ། ཁྱོད་ཤར་
༄༅། །ཕྱོགས་སུ་སོང་ཤིག་དང་ཤེས་རབ་ཀྱི་ཕ་རོལ་ཏུ་ཕྱིན་པ་ཐོས་པར་འགྱུར་གྱི། ཇི་ལྟར་ལུས་ངལ་བ་ཡིད་ལ་བྱེད་པ་མི་སྐྱེད་པ་དང༌། གཉིད་དང་རྨུགས་པ་ཡིད་ལ་བྱེད་
པ་མི་སྐྱེད་པ་དང༌། བཟའ་བ་ཡིད་ལ་བྱེད་པ་མི་སྐྱེད་པ་དང༌། བཏུང་བ་ཡིད་ལ་བྱེད་པ་མི་སྐྱེད་པ་དང༌། མཚན་མོ་ཡིད་ལ་བྱེད་པ་མི་སྐྱེད་པ་དང༌། ཉིན་མོ་ཡིད་ལ་བྱེད་པ་མི་སྐྱེད་པ་དང༌། གྲང་
བ་ཡིད་ལ་བྱེད་པ་མི་སྐྱེད་པ་དང༌། ཚ་བ་ཡིད་ལ་བྱེད་པ་མི་སྐྱེད་པ་དེ་ལྟར་སོང་ཤིག །ནང་ངམ་ཕྱི་རོལ་གང་ལའང་སེམས་སྨོན་པར་མ་བྱེད་ཅིག །རིགས་ཀྱི་བུ། གཡོན་དུ་མ་ལྟ་བར་སོང་ཤིག།
གཡས་སུ་མ་ཡིན། ཤར་དུ་མ་ཡིན། ལྷོ་རུ་མ་ཡིན། ནུབ་ཏུ་མ་ཡིན། བྱང་དུ་མ་ཡིན། སྟེང་དུ་མ་ཡིན། འོག་ཏུ་མ་ཡིན། ཕྱོགས་མཚམས་སུའང་མ་ལྟ་བར་སོང་ཤིག །རིགས་ཀྱི་བུ། ཇི་
ལྟར་བདག་ལས་མ་གཡོས་ཤིང་འཇིག་ཚོགས་ལས་ཀྱང་མ་ཡིན་པ་དང༌། ཇི་ལྟར་གཟུགས་ལས་ཀྱང་མ་གཡོས་པ་དང༌། ཇི་ལྟར་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། ཇི་
ལྟར་རྣམ་པར་ཤེས་པ་ལས་ཀྱང་མ་གཡོས་པ་དེ་ལྟར་སོང་ཤིག །གང་འདི་ལས་གཡོས་པ་དེ་ནི། རྣམ་པར་ཉམས་པར་འགྱུར་རོ། །ཅི་ལས་ཉམས་པར་འགྱུར་ཞེ་ན། སངས་རྒྱས་ཀྱི་
ཆོས་རྣམས་ལས་ཉམས་པར་འགྱུར་རོ། །གང་སངས་རྒྱས་ཀྱི་ཆོས་རྣམས་ལས་ཉམས་པར་འགྱུར་བ་དེ་ནི། འཁོར་བ་ལ་སྤྱོད་དོ། །གང་འཁོར་བ་ལ་སྤྱོད་པ་དེ་ནི། ཤེས་རབ་ཀྱི་
ཕ་རོལ་ཏུ་ཕྱིན་པ་ལ་མི་སྤྱོད་དེ། དེས་ཤེས་རབ་ཀྱི་ཕ་རོལ་ཏུ་ཕྱིན་པ་རྗེས་སུ་མི་འཐོབ་བོ། །ཞེས་བྱ་བའི་སྒྲ་ཐོས་པར་གྱུར་ཏོ། །དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་སེམས་དཔའ་
ཆེན་པོ་རྟག་ཏུ་ངུས་སྒྲ་དེ་ལ་འདི་སྐད་ཅེས། དེ་བཞིན་དུ་བྱའོ། །དེ་ཅིའི་ཕྱིར་ཞེ་ན། ང་ནི། སེམས་ཅན་ཐམས་ཅད་ལ་སྣང་བར་བྱེད་འདོད་པ་དང༌། སངས་རྒྱས་ཀྱི་ཆོས་ཐམས་ཅད་སྒྲུབ་པར་
འདོད་པའི་ཕྱིར་རོ། །ཞེས་སྨྲས་སོ། །དེ་སྐད་ཅེས་སྨྲས་པ་དང༌། སྒྲ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས། རིགས་ཀྱི་བུ་རྟག་ཏུ་ངུ་ལེགས་སོ། །ལེགས་
སོ༑ ༑ཞེས་སྨྲས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་ཡང་སྒྲ་ཐོས་ཏེ་འདི་སྐད་དུ། རིགས་ཀྱི་བུ། ཁྱོད་ཀྱིས་སྟོང་པ་ཉིད་དང༌། མཚན་མ་མེད་པ་དང༌། སྨོན་
པ་མེད་པར་ཆོས་ཐམས་ཅད་ལ་མོས་པ་བསྐྱེད་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བཙལ་བར་བྱའོ། །ཁྱོད་ཀྱིས་མཚན་མ་ཡོངས་སུ་སྤང་བ་དང༌། དངོས་པོ་ཡོངས་སུ་སྤང་བ་དང༌། སེམས་
ཅན་དུ་ལྟ་བ་ཡོངས་སུ་སྤང་བར་བྱའོ། །རིགས་ཀྱི་བུ། ཁྱོད་ཀྱིས་སྡིག་པའི་གྲོགས་པོ་དག་ཡོངས་སུ་སྤང་བར་བྱའོ། །དགེ་བའི་བཤེས་གཉེན་གང་ཆོས་ཐམས་ཅད་སྟོང་པ་ཉིད་དང༌། མཚན་མ་
མེད་པ་དང༌། སྨོན་པ་མེད་པ་དང༌། མ་བྱུང་བ་དང༌། མ་སྐྱེས་པ་དང༌། མ་འགགས་པ་དང༌། དངོས་པོ་མེད་པར་ཆོས་རྣམས་སྟོན་པ་དག་ལ་ཁྱོད་ཀྱིས་བསྙེན་པར་བྱ། གུས་པར་བྱ། བསྙེན་
༄༅། །བཀུར་བྱའོ། །རིགས་ཀྱི་བུ། ཁྱོད་ཀྱིས་དེ་ལྟར་བསྒྲུབས་ན། རིང་པོར་མི་ཐོགས་པར་ཤེས་རབ་ཀྱི་ཕ་རོལ་ཏུ་ཕྱིན་པ་གླེགས་བམ་དུ་ཆུད་པའམ། དགེ་སློང་ཆོས་
སྨྲ་བའི་ལུས་ལ་ཡོད་པ་ཐོས་པར་འགྱུར་ཏེ། རིགས་ཀྱི་བུ། གང་ལས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་པ་དེ་ལ་ཁྱོད་ཀྱིས་སྟོན་པར་འདུ་ཤེས་བསྐྱེད་པར་བྱ་ཞིང༌། ཁྱོད་ཀྱིས་བྱས་
པ་གཟོ་བ་དང༌། བྱས་པ་ཚོར་བར་བྱ་སྟེ། གང་ལས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཐོས་པ་འདི་ནི། བདག་གི་དགེ་བའི་བཤེས་གཉེན་ཡིན་ཏེ། འདི་བདག་གིས་ཐོས་པས་མྱུར་དུ་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་བསྙེན་པར་
འགྱུར་ཞིང༌། སངས་རྒྱས་ཀྱི་ཞིང་དེ་བཞིན་གཤེགས་པ་དང་མ་བྲལ་པ་རྣམས་སུ་སྐྱེ་བར་འགྱུར་རོ། །མི་ཁོམ་པ་རྣམས་སྤོང་བར་འགྱུར་རོ། །དལ་བ་ཕུན་སུམ་ཚོགས་པ་སྤྱོད་པ་ཐོབ་པར་
འགྱུར་རོ། །རིགས་ཀྱི་བུ། ཕན་ཡོན་འདི་རྣམས་ཁྱོད་ཀྱིས་ཡོངས་སུ་རྟོགས་ལ་དགེ་སློང་ཆོས་སྨྲ་བ་ལ་སྟོན་པ་ཡིན་པར་འདུ་ཤེས་བསྐྱེད་པར་བྱའོ། །རིགས་ཀྱི་བུ། ཁྱོད་ཀྱིས་འཇིག་རྟེན་གྱི་
ཟང་ཟིང་དང་ལྡན་པའི་སེམས་ཀྱི་རྒྱུད་ཀྱིས་དགེ་སློང་ཆོས་སྨྲ་བའི་ཕྱི་བཞིན་འབྲང་བར་མི་བྱའི། ཁྱོད་ཀྱིས་དགེ་སློང་ཆོས་སྨྲ་བ་ལ་ཆོས་དོན་དུ་གཉེར་བ་དང༌། ཆོས་ལ་གུས་པར་བྱ་བས་ཕྱི་
བཞིན་འབྲང་བར་བྱའོ། །ཁྱོད་ཀྱིས་བདུད་ཀྱི་ལས་རྣམས་ཀྱང་རྟོགས་པར་བྱ་སྟེ། རིགས་ཀྱི་བུ། བདུད་སྡིག་ཅན་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་གཟུགས་དང༌། སྒྲ་
དང༌། དྲི་དང༌། རོ་དང༌། རེག་པ་དག་བསྙེན་པ་དང༌། བསྟེན་པ་དང༌། སྤྱད་པར་བྱ་བའི་ཕྱིར་ཉེ་བར་སྒྲུབ་སྟེ། དེ་དག་ཆོས་སྨྲ་བ་དེས་ཟིལ་གྱིས་མནན་ནས་ཐབས་མཁས་པས་འགྲོགས་ཤིང་
བསྟེན་པར་བྱེད་པ་དང༌། བསྙེན་པར་བྱེད་པའང་ཡོད་དེ། རིགས་ཀྱི་བུ། ཁྱོད་ཀྱིས་དགེ་སློང་ཆོས་སྨྲ་བ་དེ་ལ་མ་དད་པ་བསྐྱེད་པར་མི་བྱའོ། །གཞན་དུ་ན་སེམས་འདི་ལྟར་བསྐྱེད་པར་བྱ་སྟེ།
བདག་ནི། ཐབས་མཁས་པ་དེ་མི་ཤེས་ཀྱི། འདི་ནི། ཐབས་མཁས་པ་རབ་ཏུ་ཤེས་སོ། །འདི་ནི། སེམས་ཅན་གདུལ་བའི་ཚུལ་གྱིས་སེམས་ཅན་རྣམས་ཀྱིས་དགེ་བའི་རྩ་བ་ཡོངས་སུ་
གཟུང་བའི་ཕྱིར་ཆོས་འདི་དག་ལ་བརྟེན་ཅིང་འགྲོགས་ཏེ་བསྙེན་པར་བྱེད་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། གང་ལའང་ཆགས་པའམ། སྒྲིབ་པ་མེད་ཀྱི། སྐད་
ཅིག་དེ་ཉིད་ལ་རིགས་ཀྱི་བུ། ཁྱོད་ཉིད་ཀྱིས་ཆོས་རྣམས་ཀྱི་ཡང་དག་པའི་ཚུལ་སོ་སོར་བརྟག་པར་བྱའོ། །རིགས་ཀྱི་བུ། ཆོས་རྣམས་ཀྱི་ཡང་དག་པའི་ཚུལ་གང་ཞེ་ན། འདི་ལྟ་སྟེ། ཆོས་ཐམས་
ཅད་ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི། ངོ་བོ་ཉིད་ཀྱིས་སྟོང་པའོ། །ཆོས་ཐམས་ཅད་ནི། སེམས་ཅན་མེད་པ། སྲོག་མེད་པ།
༄༅། །གསོ་བ་མེད་པ། སྐྱེས་བུ་མེད་པ། གང་ཟག་མེད། སྒྱུ་མ་ལྟ་བུ། རྨི་ལམ་ལྟ་བུ། སྒྲ་བརྙན་ལྟ་བུ། མིག་ཡོར་ལྟ་བུ་སྟེ། རིགས་ཀྱི་བུ། ཁྱོད་ཀྱིས་ཆོས་ཐམས་
ཅད་ཀྱི་ཡང་དག་པའི་ཚུལ་དེ་ལྟར་རྟོག་ཅིང་ཆོས་སྨྲ་བའི་རྗེས་སུ་འབྲང་ན། རིང་པོར་མི་ཐོགས་པར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ངེས་པར་འབྱུང་བར་འགྱུར་རོ། །རིགས་ཀྱི་བུ། གཞན་
ཡང་ཁྱོད་ཀྱིས་བདུད་ཀྱི་ལས་ལ་སོམ་ཤིག །རིགས་ཀྱི་བུ། གལ་ཏེ་ཆོས་སྨྲ་བ་དག་ཤེས་རབ་ཀྱི་ཕ་རོལ་ཏུ་ཕྱིན་པ་དོན་དུ་གཉེར་བའི་རིགས་ཀྱི་བུ་ལ་བརྙས་པར་བྱེད་ཅིང་མི་སེམས་ན།
དེ་ལ་རིགས་ཀྱི་བུ་ཁྱོད་ཀྱིས་ཕྱིར་བསྔོ་བར་མི་བྱ་སྟེ། གཞན་དུ་ན་ཆོས་དོན་དུ་གཉེར་བ་ཉིད་དང༌། ཆོས་ལ་གུས་པར་བྱེད་པ་ཉིད་དང༌། ཡིད་མི་སྐྱོ་བས་དགེ་སློང་ཆོས་སྨྲ་བའི་ཕྱི་
བཞིན་འབྲང་བར་བྱའོ། །ཞེས་དེ་སྐད་ཀྱང་ཐོས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་སྒྲ་དེ་ལས་རྗེས་སུ་བསྟན་པ་འདི་བླངས་ནས་ཤར་ཕྱོགས་ག་ལ་
བ་དེར་སོང་བ་དང༌། རིང་པོར་མ་ཕྱིན་པར་དེ་འདི་སྙམ་དུ་སེམས་ཏེ། བདག་གིས་སྒྲ་དེ་ལ་ཇི་སྲིད་དུ་འགྲོ་བར་བྱ་བ་མ་དྲིས་སོ། །སྙམ་དུ་བསམས་ནས་དེ་ས་ཕྱོགས་དེ་ཉིད་དུ་ངུ་ཞིང་
ཆོ་ངེས་འདེབས་ཏེ། མྱ་ངན་བྱེད་ལ་སྨྲེ་ཞིང་འདུག་སྟེ། དེ་འདི་སྙམ་དུ། ས་ཕྱོགས་འདི་ཉིད་དུ་ཉིན་ཞག་གཅིག་གི་བར་དུ་ཉིན་མཚན་འདའ་བར་བྱའོ། །ཉིན་མཚན་གཉིས་
སམ༑ གསུམ་མམ། བཞིའམ། ལྔའམ། དྲུག་གམ། ཉིན་མཚན་བདུན་ཡང་འདའ་བར་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ཐོས་པར་མ་གྱུར་གྱི་བར་དུ་ལུས་ངལ་བ་ཡིད་ལ་བྱེད་པ་མི་
སྐྱེད༑ རྨུགས་པ་དང་གཉིད་ཡིད་ལ་བྱེད་པ་མི་སྐྱེད། བཟའ་བ་ཡིད་ལ་བྱེད་པ་མི་སྐྱེད། བཏུང་བ་ཡིད་ལ་བྱེད་པ་མི་སྐྱེད། མཚན་མེ་[*MO?] ཡིད་ལ་བྱེད་པ་མི་སྐྱེད། ཉིན་མོ་ཡིད་ལ་བྱེད་པ་མི་སྐྱེད།
གྲང་བ་ཡིད་ལ་བྱེད་པ་མི་སྐྱེད། ཚ་བ་ཡིད་ལ་བྱེད་པ་མི་སྐྱེད་དོ། །སྙམ་དུ་བསམས་སོ། །རབ་འབྱོར། འདི་ལྟ་སྟེ། དཔེར་ན། སྐྱེས་བུ་ལ་ལ་ཞིག་བུ་གཅིག་པ་འཆི་བའི་དུས་བྱས་ན་སྡུག་བསྔལ་
བ་དང༌། ཡིད་མི་བདེ་བ་ཆེན་པོ་དང་ལྡན་པར་འགྱུར་ཏེ། དེ་མྱ་ངན་གྱིས་བུ་གཅིག་པུ་ཡིད་ལ་བྱེད་པ་ཉིད་མ་གཏོགས་པར་ཡིད་ལ་བྱེད་པ་གཞན་གང་ཡང་མི་འབྱུང་སྟེ། རབ་འབྱོར། དེ་བཞིན་
དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་ཡང་དེའི་ཚེ་བདག་གིས་ནམ་ཤེས་རབ་ཀྱི་ཕ་རོལ་ཏུ་ཕྱིན་པ་ཐོས་པར་འགྱུར་སྙམ་པ་མ་གཏོགས་པར་ཡིད་ལ་བྱེད་པ་གཞན་གང་
ཡང་མ་བྱུང་ངོ༌། །རབ་འབྱོར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དེ་ལྟར་གདུང་ཞིང་འདུག་པའི་མདུན་དུ་དེ་བཞིན་གཤེགས་པའི་གཟུགས་ཤིག་བཞུགས་ནས་
ལེགས་སོ། །ཞེས་བྱ་བ་བྱིན་ཏེ་འདི་སྐད་དུ། རིགས་ཀྱི་བུ། ཁྱོད་ཀྱིས་ཚིག་དེ་སྐད་སྨྲ་བ་ལེགས་སོ། །ལེགས་སོ། །ཇི་ལྟར་ཁྱེད་ཀྱིས་ད་ལྟར་ཡོངས་སུ་བཙལ་བ་དེ་བཞིན་དུ། རིགས་ཀྱི་བུ།
༄༅། །སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཤེས་རབ་ཀྱི་ཕ་
རོལ་ཏུ་ཕྱིན་པ་ཡོངས་སུ་བཙལ་ཏོ། །རིགས་ཀྱི་བུ། དེའི་ཕྱིར་ཁྱོད་ཀྱིས་བརྩོན་འགྲུས་འདི་ཉིད་དང༌། སྤྲོ་བ་འདི་ཉིད་དང༌། དོན་དུ་གཉེར་བ་འདི་ཉིད་དང༌། འདོད་པ་འདི་ལྟ་བུ་ཉིད་ཀྱིས་རྗེས་
སུ་འབྲང་ཞིང་ཤར་།ཕྱོགས་ཉིད་དུ་སོང་ཞིག་དང༌། རིགས་ཀྱི་བུ། འདི་ནས་དཔག་ཚད་ལྔ་བརྒྱ་ན་སྤོས་དང་ལྡན་པ་ཞེས་བྱ་བའི་གྲོང་ཁྱེར་རིན་པོ་ཆེ་སྣ་བདུན་གྱི་རང་བཞིན་གྱི་ར་བ་རིམ་པ་བདུན་
གྱིས་བསྐོར་བ། འོབས་རིམ་པ་བདུན་དང༌། ཤིང་ཏ་ལའི་ཕྲེང་བ་རིམ་པ་བདུན་གྱིས་ཡོངས་སུ་བསྐོར་བ། མཆུར་དཔག་ཚད་བཅུ་གཉིས། ཞེང་དུ་དཔག་ཚད་བཅུ་གཉིས་ཡོད་པ། འབྱོར་པ་རྒྱས་
པ༑ བདེ་བ། ལོ་ལེགས་པ། སྐྱེ་བོ་མང་པོ་དང་མིས་གང་བ། བར་གྱི་ཚོང་ཁང་གི་ཕྲེང་བ་རི་མོ་སྣ་ཚོགས་སུ་བྲིས་པ་ལྟ་བུར་བལྟ་ན་སྡུག་པ། ཕིགས་པར་གྱུར་པ། མཉམ་ཞིང་མཚུངས་པ། སྐྱེ་
བོ་དང་ཁྱོགས་ཀྱི་བཞོན་པ་དང༌། རྐང་གིས་འགྲོ་བའི་གནས་འཛེར་དོག་མེད་པར་གནས་པ་ལྔ་བརྒྱ་དག་གིས་ལེགས་པར་བསྒྲུབས་པ། གྲོང་ཁྱེར་གྱི་དེའི་ཁོར་ཡུག་ཏུ་ཞོལ་གྱི་ཕྱིར་རིན་པོ་
ཆེ་སྣ་བདུན་གྱི་རང་བཞིན་གྱིས་བསྐོར་ལ། རིན་པོ་ཆེ་སྣ་བདུན་གྱི་རང་བཞིན་གྱི་ར་བ་དེ་དག་གི་མདའ་ཡབ་རྣམས་ནི། ཛམྦུ་ཆུ་བོའི་གསེར་ལས་བྱས་པ། མཐོ་ཞིང་ཚད་དང་ལྡན་པ།
མདའ་ཡབ་ཐམས་ཅད་ཀྱི་རྩེ་མོ་ལས་ཀྱང་རིན་པོ་ཆེ་སྣ་བདུན་གྱི་རང་བཞིན་གྱི་ཤིང་སྐྱེས་ཏེ། རིན་པོ་ཆེ་སྣ་ཚོགས་བཀྲ་བའི་ཤིང་ཐོག་གི་འབྲས་བུ་ཆགས་པ། མདའ་ཡབ་ལས་ཤིང་སྐྱེས་པ་
ཐམས་ཅད་ལས་ཀྱང་རིན་པོ་ཆེའི་རང་བཞིན་གྱི་ཐག་གུ་བྱུང་བས་མདའ་ཡབ་གཉིས་པའི་ཤིང་གཞན་དང་འབྲེལ་བ། ཐམས་ཅད་དང་ལྡན་པའི་གྲོང་ཁྱེར་དེ་གསེར་གྱི་དྲིལ་བུ་གཡེར་ཀའི་དྲ་
བས་ཁེབས་ཏེ། གསེར་གྱི་དྲིལ་བུ་གཡེར་ཀའི་དྲ་བ་དེ་དག་ལ་རླུང་གིས་བཏབ་ན། སྒྲ་འཇམ་ཞིང་སྙན་པ་ཡིད་དུ་འོང་བ་དག་འབྱུང་བ་འདི་ལྟ་སྟེ། དཔེར་ན། ཡན་ལག་ལྔ་དང་ལྡན་པའི་རོལ་
མོ་སྣ་ཚོགས་པ་རོལ་མོ་མཁན་མཁས་པས་བརྡུངས་ཤིང་བླངས་ན། སྒྲ་འཇམ་ཞིང་སྙན་པ་ཡིད་དུ་འོང་བ་དག་འབྱུང་བ་དེ་བཞིན་དུ། དྲིལ་བུ་གཡེར་ཀའི་དྲ་བ་དེ་དག་ལ་རླུང་གིས་བཏབ་ན།
སྒྲ་འཇམ་ཞིང་སྙན་པ་ཡིད་དུ་འོང་བ་དག་འབྱུང་སྟེ། སྒྲ་དེས་སེམས་ཅན་དེ་དག་རྩེ་དགའ་ཞིང་དགའ་མགུར་སྤྱོད་དོ། །གྲོང་ཁྱེར་དེ་ཁོར་ཡུག་ཏུ་འོབས་ཆུ་རྗེས་སུ་མཐུན་པར་འབབ་པའི་ཆུས་
ཡོངས་སུ་གང་ཞིང༌། ཆུ་ཧ་ཅང་ཡང་མི་གྲང༌། བ་ཧ་ཅང་ཡང་མི་དྲོ་བས་གང་བ་དག་ཡོད་དོ། །ཆུ་དེ་དག་ཉིད་ལ་སེམས་ཅན་རྣམས་ཀྱི་སྔོན་གྱི་ལས་ཀྱི་རྣམ་པར་སྨིན་པས་གྲུབ་པ། རིན་པོ་ཆེ་སྣ་བདུན་
རྣམ་པར་བཀྲ་ཞིང་བལྟ་ན་སྡུག་པའི་གྲུ་དག་ཡོད་དེ། དེར་སེམས་ཅན་དག་ཞུགས་ནས་རྩེ་དགའ་ཞིང་དགའ་མགུར་སྤྱོད་དོ། །ཆུ་དེ་དག་ཐམས་ཅད་ཀྱང་ཨུཏྤལ་དང༌། ཀུ་མུ་ད་དང༌། པདྨ་
༄༅། །དཀར་པོ་དག་གིས་ཁེབས་པ། མེ་ཏོག་གི་རིགས་ཆེ་ཞིང་བཟང་ལ་དྲི་བཟང་པོའི་ངང་དང་ལྡན་པ་གཞན་དག་གིས་ཀྱང་ཁེབས་ཏེ། སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་ན་ཡོད་པའི་མེ་ཏོག་གི་རིགས་ལས་དེ་ན་མེད་པ་གང་ཡང་མེད་དོ། །གྲོང་ཁྱེར་དེའི་ནང་ན་སྐྱེད་མོས་ཚལ་ལྔ་བརྒྱ་ཡོད་དེ། ཐམས་ཅད་ཀྱང་རིན་པོ་ཆེ་སྣ་བདུན་གྱི་
རང་བཞིན་རྣམ་པར་བཀྲ་ཞིང་བལྟ་ན་སྡུག་པ་ཤ་སྟག་སྟེ། སྐྱེད་མོས་ཚལ་དེ་དག་རེ་རེ་ནའང་རྫིང་བུ་ཁོར་ཡུག་ཏུ་རྒྱང་གྲགས་ཀྱི་ཚད་ཙམ་ལྔ་བརྒྱ་ལྔ་བརྒྱ་ཡོད་དེ། རྫིང་བུ་དེ་དག་ཐམས་
ཅད་ནས་རིན་པོ་ཆེ་སྣ་བདུན་གྱི་རང་བཞིན་གྱི་མེ་ཏོག་ཨུཏྤལ་དང༌། ཀུ་མུ་ད་དང༌། པདྨ་དཀར་པོ་རྣམ་པར་བཀྲ་ཞིང་བལྟ་ན་སྡུག་པ་དག་སྐྱེས་ཏེ། དེ་དག་གིས་ཆུ་དེ་དག་ཁེབས་ཤིང༌། ཨུཏྤ་
ལ་དང༌། ཀུ་མུ་ད་དང༌། པདྨ་དཀར་པོ་བཟང་པོ་དེ་དག་ཐམས་ཅད་ཀྱང་མཆུ་ཞེང་དུ་ཤིང་རྟའི་འཁོར་ལོ་ཙམ་སྟེ། དྲི་བཟང་བ། སྔོན་པོ། ཁ་དོག་སྔོན་པོ། སྔོན་པོར་སྟོན་པ། སྔོན་པོར་སྣང་
བ༑ སེར་པོ། ཁ་དོག་སེར་པོ། སེར་པོར་སྟོན་པ། སེར་པོར་སྣང་བ། དམར་པོ། ཁ་དོག་དམར་པོ། དམར་པོར་སྟོན་པ། དམར་པོར་སྣང་བ། དཀར་པོ། ཁ་དོག་དཀར་པོ། དཀར་པོར་
སྟོན་པ༑ དཀར་པོར་སྣང་བ་དག་ཡོད་དོ། །རྫིང་བུ་དེ་དག་ཐམས་ཅད་ན་ངང་ངུར་དང༌། ཁྲུང་ཁྲུང་དང༌། ཀཱ་རཎྜ་དང༌། སཱ་ར་ས་སྒྲ་འབྱིན་པ་དག་ཡོད་དོ། །སྐྱེད་མོས་ཚལ་དེ་དག་ཐམས་
ཅད་ཀྱང་ང་ཡིར་བྱ་བ་མེད་ཅིང་ཡོངས་སུ་འཛིན་པ་མེད་དེ། འདི་ལྟར་ཡུན་རིང་པོར་སེམས་ཅན་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང༌། སངས་རྒྱས་ཀྱི་ཚུལ་ལ་གུས་པར་བྱེད་
པ་རྗེས་སུ་འགྲོ་བའི་ཐོས་པ་དང་སེམས་པ་ལེགས་པར་རྟོགས་པ། ཡུན་རིང་པོར་ཆོས་ཟབ་མོ་ལ་མོས་པའི་སེམས་ཅན་དེ་དག་ཉིད་ཀྱི་སྔོན་གྱི་ལས་ཀྱི་རྣམ་པར་སྨིན་པས་གྲུབ་པ་ཡིན་ནོ། །དེ་ལ་
རིགས་ཀྱི་བུ། གྲོང་ཁྱེར་སྤོས་དང་ལྡན་པ་དེའི་དབུས་ཀྱི་བཞི་མདོ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱི་ཁང་པ་རིན་པོ་ཆེ་སྣ་བདུན་ལས་བྱས་པ། ཁོར་ཡུག་ཏུ་དཔག་
ཚད་ཀྱི་ཚད་ཙམ། རྣམ་པར་བཀྲ་ཞིང་བལྟ་ན་སྡུག་པ། རབ་རིམ་པ་བདུན་དང༌། ཏ་ལའི་ཕྲེང་བ་རིམ་པ་བདུན་གྱིས་ཡོངས་སུ་བསྐོར་བ་ཞིག་ཡོད་དེ། ཁང་པ་དེ་ན་ཁང་པའི་ལོངས་སྤྱད་པ་
དང༌། ཉེ་བར་ལོངས་སྤྱད་པ་དང༌། ཡོངས་སུ་ལོངས་སྤྱོད་པ་དག་ཏུ་རྟག་ཏུ་དགའ་བ་ཞེས་བྱ་བའི་སྐྱེད་མོས་ཚལ་དང༌། མྱ་ངན་མེད་ཅེས་བྱ་བ་དང༌། མྱ་ངན་དང་བྲལ་བ་ཞེས་བྱ་བ་དང༌། མེ་ཏོག་སྣ་
ཚོགས་པ་ཞེས་བྱ་བའི་སྐྱེད་མོས་ཚལ་དང་སྐྱེད་མོས་ཚལ་བཞི་ཡོད་དེ། སྐྱེད་མོས་ཚལ་དེ་དག་རེ་རེ་ནའང་འདི་ལྟ་སྟེ། རྫིང་བུ་བཟང་པོ་ཞེས་བྱ་བ་དང༌། བཟང་མཆོག་ཅེས་བྱ་བ་དང༌། དགའ་
བ་ཞེས་བྱ་བ་དང༌། དགའ་མཆོག་ཅེས་བྱ་བ་དང༌། བདེ་བ་ཞེས་བྱ་བ་དང༌། བདེ་མཆོག་ཅེས་བྱ་བ་དང༌། ངེས་པ་ཞེས་བྱ་བ་དང༌། མི་འབབ་པ་ཞེས་བྱ་བ་བརྒྱད་བརྒྱད་ཡོད་དེ། དེའང་རྫིང་བུ་དེ་
༄༅། །དག་གི་ངོས་གཅིག་ནི། གསེར་གྱི་རང་བཞིན། ངོས་གཉིས་པ་ནི། དངུལ་གྱི་རང་བཞིན། ངོས་གསུམ་པ་ནི། བཻ་ཌཱུཪྻའི་རང་བཞིན། ངོས་བཞི་པ་ནི།
ཤེལ་གྱི་རང་བཞིན། འོག་གི་ས་གཞི་ནི། ཀ་ར་ཀེ་ཏ་ནའི་རང་བཞིན་ལ་གསེར་གྱི་བྱེ་མ་བདལ་བ་སྟེ། རྫིང་བུ་དེ་དག་རེ་རེ་ལའང་ཐེམ་སྐས་ཐེམ་པ་རིན་པོ་ཆེའི་རང་བཞིན་སྣ་ཚོགས་
པ་རྣམ་པ་ཐ་དད་པས་བརྒྱན་པ་བརྒྱད་བརྒྱད་ཡོད་དེ། ཐེམ་སྐས་དེ་དག་ཐམས་ཅད་ཀྱི་བར་ནས་ཀྱང་ཛམྦུ་ཆུ་བོའི་གསེར་གྱི་ཤིང་ལྗོན་པ་དག་སྐྱེས་སོ། །རྫིང་བུ་དེ་དག་ཐམས་ཅད་ཀྱི་ཆུ་ནི།
མེ་ཏོག་ཨུཏྤལ་དང༌། ཀུ་མུ་ད་དང༌། པདྨ་དཀར་པོ་སྣ་ཚོགས་ཀྱིས་ཁེབས་ཤིང༌། ངང་ངུར་དང༌། ཁྲུང་ཁྲུང་དང༌། ཀཱ་རཎྜ་དང༌། སཱ་ར་ས་རྣམས་སྐད་འབྱིན་ཏོ། །རྫིང་བུ་དེ་དག་གི་ཁོར་
ཡུག་ཏུ་མེ་ཏོག་གི་ཤིང་རྣམ་པ་སྣ་ཚོགས་སྐྱེས་ཏེ། མེ་ཏོག་གི་ཤིང་དེ་དག་ལ་རླུང་གིས་བསྐྱོད་པ་དང༌། མེ་ཏོག་རྣམས་རྫིང་བུའི་ནང་དུ་ལྷུང་བས་རྫིང་བུ་དེ་དག་ཐམས་ཅད་ཀྱི་ཆུའང་ཙནྡན་
གྱི་དྲིར་ཕྱོགས་ཤིང༌། ཁ་དོག་དང་ལྡན། དྲི་དང་ལྡན། རོ་དང་ལྡན། རེག་དང་ལྡན་ནོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་འཁོར་དང་བཅས་པ་བུད་མེད་དྲུག་
ཁྲི་བརྒྱད་སྟོང་དང་ལྷན་ཅིག་ཏུ་འདོད་པའི་ཡོན་ཏན་ལྔ་དང་ལྡན་ཞིང་དབང་དུ་གྱུར་པ་སྟེ། རྩེ་དགའ་ཞིང་དགའ་མགུར་སྤྱོད་དོ། །གྲོང་ཁྱེར་དེ་ན་སེམས་ཅན་སྐྱེས་པ་དང༌། བུད་མེད་གང་
གཞན་དག་འཁོད་པ་དེ་དག་ཐམས་ཅད་ཀྱང་སྐྱེད་མོས་ཚལ་ལམ། རྫིང་བུ་དག་ན་རྟག་ཏུ་དགའ་ཞིང་འདོད་པའི་ཡོན་ཏན་ལྔ་དང་ལྡན་ནས་དབང་དུ་གྱུར་ཏེ་རྩེ་དགའ་ཞིང་དགའ་མགུར་སྤྱོད་དོ། །
ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་དེ་དུས་དེ་སྲིད་དུ་འཁོར་རྣམས་དང་ལྷན་ཅིག་ཏུ་རྩེ་དགའ་ཞིང་དགའ་མགུར་སྤྱོད་པར་བྱེད་ཅིང༌། དེ་ན་དུས་གསུམ་དུ་ཤེས་རབ་ཀྱི་
ཕ་རོལ་ཏུ་ཕྱིན་པ་སྟོན་ཏོ། །སེམས་ཅན་གང་དག་གྲོང་ཁྱེར་སྤོས་ལྡན་ན་འཁོད་པ་དེ་དག་ཀྱང་གྲོང་ཁྱེར་གྱི་དབུས་ཀྱི་བཞི་མདོར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱི་ཁྲི་
གསེར་གྱི་རྐང་པ་དང༌། དངུལ་གྱི་རྐང་པ་དང༌། བཻ་ཌཱུཪྻའི་རྐང་པ་དང༌། ཤེལ་གྱི་རྐང་པ་བཙུགས་པ། ཤིང་བལ་བཏིང་བ། སྟན་བར་ཚངས་ཅན་བཏིང་བ། སྟེང་སྙིང་པོ་ཅན་དུ་བྱས་པ། ཀ་ཤི་
ཀའི་གོས་བཏིང་བ། འཕང་དུ་རྒྱང་གྲགས་ཕྱེད་ཡོད་པ་བཤམས་ཏེ། སྟེང་གི་བར་སྣང་ལའང་གོས་ཀྱི་བླ་རེ་མུ་ཏིག་གིས་བརྒྱན་པ་བྲེས་པ་ལ་ཅི་འདི་ལེགས་པར་གནས་སམ་སྙམ་པ། ལེགས་
པར་གནས་པ་སྣ་ཚོགས་པ་རྣམ་པར་སྨིན་པས་ལྷན་ཅིག་ཏུ་མཉམ་པར་རབ་ཏུ་འཛིན་པར་བྱེད་ཅིང༌། ས་ཕྱོགས་དེ་ཁོར་ཡུག་ཏུའང་མེ་ཏོག་ཁ་དོག་སྣ་ལྔ་པ་དག་མངོན་པར་གཏོར། རབ་ཏུ་
གཏེར༑ ཡང་དག་པར་གཏོར་བར་བྱེད་ལ། ཇི་ལྟར་ཡང་འདི་ཆོས་ཀྱི་བསམ་པ་རྣམ་པར་དག་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཆོས་ལ་གུས་པས་ས་
༄༅། །ཕྱོགས་དེའང་དྲི་དང་བདུག་པ་སྣ་ཚོགས་ཀྱིས་ཤིན་ཏུ་བདུག་པར་བྱེད་དོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་འདུག་ནས་ཤེས་
རབ་ཀྱི་ཕ་རོལ་ཏུ་ཕྱིན་པ་སྟོན་ཏེ། རིགས་ཀྱི་བུ། སེམས་ཅན་དེ་དག་ནི། དེ་ལྟར་ཆོས་ལ་གུས་པར་བྱེད་ཅིང་ཆོས་རྣམས་ལ་བརྟེན་པ་དང༌། དད་པ་དང་ལྡན་པས་དད་པ་དང་དང་བ་
བསྐྱེད་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱི་དྲུང་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཉན་ཏོ། །དེ་ན་གང་དག་ཉན་པའི་ལྷ་དང་མི་སྲོག་ཆགས་བརྒྱ་ཕྲག་མང་
པོ༑ ༑སྲོག་ཆགས་སྟོང་ཕྲག་མང་པོ་དང༌། སྲོག་ཆགས་བརྒྱ་སྟོང་ཕྲག་མང་པོ་ཚོགས་པ་དེ་དག་ལས་ལ་ལ་ནི། ལུང་འབོགས། ལ་ལ་ནི། ཁ་ཏོན་བྱེད། ལ་ལ་ནི། ཡི་གེར་འདྲི། ལ་ལ་ནི།
ཚུལ་བཞིན་ཡིད་ལ་བྱེད་པས་རྟོགས་པར་བྱེད་དེ། སེམས་ཅན་དེ་དག་ཐམས་ཅད་ཀྱང་ལོག་པར་མི་ལྟུང་བའི་ཆོས་ཅན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ལས་ཕྱིར་མི་ལྡོག་པ་ཡིན་ནོ། །རིགས་ཀྱི་བུ། ཁྱོད་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་དེའི་དྲུང་དུ་སོང་ཞིག་དང༌། དེ་ལས་ཤེས་རབ་ཀྱི་ཕ་རོལ་ཏུ་
ཕྱིན་པ་ཐོས་པར་འགྱུར་རོ། །རིགས་ཀྱི་བུ། དེ་ནི། ཡུན་རིང་པོ་ནས་ཁྱོད་ཀྱི་དགེ་བའི་བཤེས་གཉེན་ཡིན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་
སྟོན་པ༑ ཡང་དག་པར་འཛིན་དུ་འཇུག་པ། ཡང་དག་པར་གཟེངས་བསྟོད་པ། ཡང་དག་པར་རབ་ཏུ་དགའ་བར་བྱེད་པ་ཡིན་ནོ། །རིགས་ཀྱི་བུ། དེས་ཀྱང་སྔོན་ད་ལྟར་ཁྱོད་ཇི་ལྟར་ཚོལ་བ་དེ་
བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བཙལ་གྱི། རིགས་ཀྱི་བུ། ཁྱོད་ཉིན་མཚན་དུ་ཡིད་ལ་བྱེད་པ་རྒྱུན་མ་བཅད་པར་བསྐྱེད་པས་སོང་ཞིང་དང༌། རིང་པོར་མི་ཐོགས་པར་ཤེས་རབ་
ཀྱི་ཕ་རོལ་ཏུ་ཕྱིན་པ་ཐོས་པར་འགྱུར་རོ། །ཞེས་གསུངས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་དེ་ཐོས་ནས་དགའ་མགུ་ཡི་རངས། རབ་ཏུ་མགུ་ཞིང་དགའ་
བ་དང༌། ཡིད་བདེ་བ་སྐྱེས་པར་གྱུར་པ་འདི་ལྟ་སྟེ། དཔེར་ན། སྐྱེས་བུ་མདེའུ་དུག་ཅན་ཞིག་གིས་ཕོག་ན་ཡིད་ལ་བྱེད་པ་གཞན་མི་སྐྱེད་ཀྱི། གང་བདག་ཟུག་རྔུ་འདི་ལས་སྒྲོལ་ཞིང་བདག་སྡུག་
བསྔལ་འདི་ལས་ཐར་པར་བྱེད་པ། ཟུག་རྔུ་འབྱིན་པའི་སྨན་པ་བདག་གིས་ནམ་རྙེད་སྙམ་སེམས་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ཡང་དེའི་ཚེ་གང་བདག་
ལ་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཐོས་པར་བྱེད་ཅིང༌། ཆོས་གང་ཐོས་ནས་བདག་གི་དམིགས་པ་ཡིད་ལ་བྱེད་པ་སྤོང་བར་འགྱུར་བའི་རིགས་ཀྱི་བུ་དེ་བདག་གིས་ནམ་མཐོང་སྙམ་སེམས་པ་
མ་གཏོགས་པར་ཆོས་གང་ཡང་ཡིད་ལ་མི་བྱེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་ཕྱོགས་དེ་ཉིད་དུ་འདུག་པ་ན་བྱང་ཆུབ་སེམས་དཔའ་སེམས་དཔའ་
༄༅། །ཆེན་པོ་ཆོས་འཕགས་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པ་ཐོས་སོ། །ཐོས་ནས་ཀྱང་ཆོས་ཐམས་ཅད་ལ་མི་གནས་པའི་འདུ་ཤེས་བསྐྱེད་ནས་དེ་ཏིང་ངེ་འཛིན་གྱི་
སྒོ་དུ་མ་མངོན་དུ་གྱུར་པ་འདི་ལྟ་སྟེ། ཆོས་ཐམས་ཅད་ཀྱི་ངོ་བོ་ཉིད་ལ་ལྟ་བ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་ཀྱི་ངོ་བོ་ཉིད་མི་དམིགས་པ་ཞེས་བྱ་བའི་ཏིང་ངེ་འཛིན་དང༌། ཆོས་
ཐམས་ཅད་ཀྱི་ངོ་བོ་ཉིད་ཤེས་པ་ལས་ངེས་པར་འབྱུང་བ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་ཐ་དད་པ་མེད་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་འགྱུར་བ་མེད་པར་
མཐོང་བ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་སྣང་བར་བྱེད་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་མུན་པ་དང་བྲལ་བ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་
ཅད་མི་ཤེས་པ་སེལ་བ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་རྣམ་པར་བསལ་བ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་མི་དམིགས་པ་ཞེས་བྱ་བའི་ཏིང་ངེ་འཛིན་དང༌།
མེ་ཏོག་བཀྲམ་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་བདག་གི་དངོས་པོ་མི་སྒྲུབ་པ་ཞེས་བྱ་བའི་ཏིང་ངེ་འཛིན་དང༌། སྒྱུ་མ་རྣམ་པར་སྤངས་པ་ཞེས་བྱ་བའི་ཏིང་ངེ་འཛིན་དང༌། མེ་
ལོང་གི་དཀྱིལ་འཁོར་སྣང་བ་སྒྲུབ་པ་ཞེས་བྱ་བའི་ཏིང་ངེ་འཛིན་དང༌། སེམས་ཅན་ཐམས་ཅད་ཀྱི་སྒྲ་སྒྲུབ་པ་ཞེས་བྱ་བའི་ཏིང་ངེ་འཛིན་དང༌། རྡུལ་མེད་པ་ཞེས་བྱ་བའི་ཏིང་ངེ་འཛིན་དང༌།
སེམས་ཅན་ཐམས་ཅད་མངོན་པར་དགའ་བ་ཞེས་བྱ་བའི་ཏིང་ངེ་འཛིན་དང༌། སེམས་ཅན་ཐམས་ཅད་ཀྱི་སྒྲ་ལ་མཁས་པའི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་དང༌། སྒྲ་དང་ཚིག་དང་ཡིག་
འབྲུ་སྣ་ཚོགས་མངོན་པར་སྒྲུབ་པ་ཞེས་བྱ་བའི་ཏིང་ངེ་འཛིན་དང༌། ཁེངས་པ་མེད་པ་ཞེས་བྱ་བའི་ཏིང་ངེ་འཛིན་དང༌། རང་བཞིན་གྱིས་ཐ་སྙད་མེད་པ་ཞེས་བྱ་བའི་ཏིང་ངེ་འཛིན་དང༌། སྒྲིབ་པ་མེད་
པའི་རྣམ་པར་ཐར་པ་ཐོབ་པ་ཞེས་བྱ་བའི་ཏིང་ངེ་འཛིན་དང༌། རྡུལ་དང་བྲལ་བ་ཞེས་བྱ་བའི་ཏིང་ངེ་འཛིན་དང༌། མིང་དང་ངེས་པའི་ཚིག་དང་ཡིག་འབྲུ་ཞེས་བྱ་བའི་ཏིང་ངེ་འཛིན་དང༌། ཆོས་
ཐམས་ཅད་ལ་རྣམ་པར་བལྟ་བ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་ཡུལ་དང་བྲལ་བ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་ལ་སྒྲིབ་པ་མེད་པའི་མཐའ་ཞེས་བྱ་བའི་ཏིང་ངེ་
འཛིན་དང༌། ནམ་མཁའ་དང་མཚུངས་པ་ཞེས་བྱ་བའི་ཏིང་ངེ་འཛིན་དང༌། རྡོ་རྗེ་ལྟ་བུ་ཞེས་བྱ་བའི་ཏིང་ངེ་འཛིན་དང༌། གཟུགས་ཀྱི་རྡུལ་སེལ་བ་ཞེས་བྱ་བའི་ཏིང་ངེ་འཛིན་དང༌། ཕུན་སུམ་ཚོགས་པ་
ཞེས་བྱ་བའི་ཏིང་ངེ་འཛིན་དང༌། རྒྱལ་བ་ཐོབ་པ་ཞེས་བྱ་བའི་ཏིང་ངེ་འཛིན་དང༌། ཕྱིར་མི་ལྡོག་པའི་མིག་ཅེས་བྱ་བའི་ཏིང་ངེ་འཛིན་དང༌། ཆོས་ཀྱི་དབྱིངས་སུ་ངེས་པ་ཞེས་བྱ་བའི་ཏིང་ངེ་འཛིན་དང༌། ཆོས་
ཀྱི་དབྱིངས་ལས་ངེས་པར་འབྱུང་བ་ཞེས་བྱ་བའི་ཏིང་ངེ་འཛིན་དང༌། དབུགས་འབྱིན་པ་སྦྱིན་པ་ཞེས་བྱ་བའི་ཏིང་ངེ་འཛིན་དང༌། སེངྒེ་མངོན་པར་སྒྲོག་པ་ཞེས་བྱ་བའི་ཏིང་ངེ་འཛིན་དང༌། སེམས་ཅན་ཐམས་
༄༅། །ཅད་ཟིལ་གྱིས་གནོན་པ་ཞེས་བྱ་བའི་ཏིང་ངེ་འཛིན་དང༌། རྡུལ་དང་རྣམ་པར་བྲལ་བ་ཞེས་བྱ་བའི་ཏིང་ངེ་འཛིན་དང༌། ཀུན་ནས་ཉོན་མོངས་པ་མེད་པ་ཞེས་བྱ་བའི་ཏིང་ངེ་
འཛིན་དང༌། པདྨ་བཀོད་པ་ཞེས་བྱ་བའི་ཏིང་ངེ་འཛིན་དང༌། ནེམ་ནུར་གཅོད་པ་ཞེས་བྱ་བའི་ཏིང་ངེ་འཛིན་དང༌། སྙིང་པོ་ཐམས་ཅད་ཀྱི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་
ཅད་ལས་མངོན་པར་འཕགས་པ་ཞེས་བྱ་བའི་ཏིང་ངེ་འཛིན་དང༌། མངོན་པར་ཤེས་པ་དང་སྟོབས་དང་མི་འཇིགས་པ་ཐོབ་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་ལ་ངེས་པར་
འབིགས་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་ཀྱི་འབྱོར་པའི་ཕྱག་རྒྱ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་ཀྱི་འབྱོར་པའི་རྒྱ་མཚོ་ཞེས་བྱ་བའི་ཏིང་ངེ་འཛིན་དང༌། ཆོས་
ཐམས་ཅད་བྱེ་བྲག་མེད་པར་ལྟ་བ་ཞེས་བྱ་བའི་ཏིང་ངེ་འཛིན་དང༌། ལྟ་བར་གྱུར་པའི་ཐིབས་པོ་ཐམས་ཅད་རྣམ་པར་སྤོང་བ་ཞེས་བྱ་བའི་ཏིང་ངེ་འཛིན་དང༌། མུན་པ་དང་བྲལ་བ་ཞེས་བྱ་བའི་ཏིང་ངེ་
འཛིན་དང༌། ཆོས་ཐམས་ཅད་མཚན་མ་དང་བྲལ་བ་ཞེས་བྱ་བའི་ཏིང་ངེ་འཛིན་དང༌། ཆགས་པ་ཐམས་ཅད་ལས་རྣམ་པར་གྲོལ་བ་ཞེས་བྱ་བའི་ཏིང་ངེ་འཛིན་དང༌། ལེ་ལོ་ཐམས་ཅད་དང་བྲལ་བ་
ཞེས་བྱ་བའི་ཏིང་ངེ་འཛིན་དང༌། ཆོས་ཟབ་མོའི་འོད་བྱེད་པ་ཞེས་བྱ་བའི་ཏིང་ངེ་འཛིན་དང༌། རི་རབ་འདྲ་བ་ཞེས་བྱ་བའི་ཏིང་ངེ་འཛིན་དང༌། མི་འཕྲོག་པ་ཞེས་བྱ་བའི་ཏིང་ངེ་འཛིན་དང༌། བདུད་
ཀྱི་དཀྱིལ་འཁོར་རྣམ་པར་སེལ་བར་བྱེད་པ་ཞེས་བྱ་བའི་ཏིང་ངེ་འཛིན་དང༌། འཇིག་རྟེན་གསུམ་ལ་མངོན་པར་མ་ཆགས་པ་ཞེས་བྱ་བའི་ཏིང་ངེ་འཛིན་དང༌། འོད་ཟེར་སྒྲུབ་པ་ཞེས་བྱ་བའི་ཏིང་ངེ་འཛིན་
དང༌། དེ་བཞིན་གཤེགས་པ་མཐོང་བ་ཞེས་བྱ་བའི་ཏིང་ངེ་འཛིན་དང༌། དེ་བཞིན་གཤེགས་པ་ཐམས་ཅད་མཐོང་བ་ཞེས་བྱ་བའི་ཏིང་ངེ་འཛིན་ཏེ། ཏིང་ངེ་འཛིན་དེ་དག་ལ་གནས་པས་ཕྱོགས་བཅུའི་
འཇིག་རྟེན་གྱི་ཁམས་ན་སངས་རྒྱས་བཅོམ་ལྡན་འདས་གཞལ་དུ་མེད་གྲངས་མེད་པ་དག་བྱང་ཆུབ་སེམས་དཔའ་སེམས་དཔའ་ཆེན་པོ་དག་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་རབ་ཏུ་སྟོན་པ་དག་
མཐོང་སྟེ། དེ་བཞིན་གཤེགས་པ་དེ་དག་གིས་ལེགས་སོ། །ཞེས་བྱ་བ་བྱིན་ནས་དབུགས་དབྱུང་བ་མཛད་དེ། ཚིག་འདི་སྐད་ཅེས། རིགས་ཀྱི་བུ། ངེད་ཀྱིས་ཀྱང་སྔོན་བྱང་ཆུབ་སེམས་དཔའི་སྤྱད་པ་
སྤྱོད་པ་ན་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བཞིན་དུ་ཡོངས་སུ་བཙལ་ཏེ། ཡོངས་སུ་ཚོལ་བ་ནའང་གང་འདིར་ཁྱོད་ཀྱིས་ཐོབ་པའི་ཏིང་ངེ་འཛིན་འདི་ལྟ་བུ་ཉིད་དག་ཐོབ་སྟེ། ཏིང་ངེ་འཛིན་འདི་དག་
ཐོབ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྟོགས་པར་ཁོང་དུ་ཆུད་པར་གྱུར་ཏེ། ཕྱིར་མི་ལྡོག་པའི་སངས་རྒྱས་ཀྱི་ཆོས་ལ་གནས་པར་གྱུར་ཏོ། །ངེད་ཀྱིས་ཏིང་ངེ་འཛིན་འདི་དག་གི་ངོ་བོ་ཉིད་དང་རང་
བཞིན་ལ་བལྟས་ན། གང་མཉམ་པར་གཞག་པར་བྱ་བའམ། ལྡང་བར་བྱ་བའམ། གང་བྱང་ཆུབ་ཏུ་སྤྱད་པར་བྱ་བའམ། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
༄༅། །པར་འཚང་རྒྱ་བར་བྱ་བའི་ཆོས་དེ་གང་ཡང་ཡང་དག་པར་རྗེས་སུ་མ་མཐོང་ངོ༌། །རིགས་ཀྱི་བུ། འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཡིན་ཏེ། ཆོས་གང་
གིས་ཀྱང་རློམ་སེམས་སམ། རློམ་སེམས་མེད་པར་མི་བྱེད་པ་ལ་གནས་ནས་ངེད་ཀྱིས་འདི་འདྲ་བའི་ལུས་གསེར་གྱི་ཁ་དོག་ལྟ་བུ་ཐོབ་སྟེ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང༌།
དཔེ་བྱད་བཟང་པོ་བརྒྱད་ཅུ་དང༌། འོད་འདོམ་གང་བ་དང༌། སངས་རྒྱས་ཀྱི་ཡེ་ཤེས་དང༌། སངས་རྒྱས་ཀྱི་ཤེས་རབ་བསམ་གྱིས་མི་ཁྱབ་པ་བླ་ན་མེད་པ་དང༌། སངས་རྒྱས་ཀྱི་ཏིང་ངེ་འཛིན་བླ་ན་
མེད་པ་དང༌། སངས་རྒྱས་ཀྱི་ཆོས་ཀྱི་ཡོན་ཏན་ཐམས་ཅད་ཀྱི་ཕ་རོལ་ཏུ་ཕྱིན་པ་རྗེས་སུ་ཐོབ་སྟེ། ཡོན་ཏན་གྱི་ཕ་རོལ་ཏུ་ཕྱིན་པ་དེ་ལ་རེ་ཞིག་དེ་བཞིན་གཤེགས་པ་དག་གིས་ཀྱང་ཚད་གཟུང་
བའམ༑ མཐའ་བསྟན་པར་མི་ནུས་ན། ཉན་ཐོས་དང་རང་སངས་རྒྱས་དག་གིས་ལྟ་ཅི་སྨོས། རིགས་ཀྱི་བུ། དེ་ལྟ་བས་ན། ཁྱོད་ཀྱིས་ཆོས་འདི་དག་ཉིད་ལ་རབ་ཏུ་དོན་དུ་གཉེར་བ་དང༌། འདོད་པས་
གུས་པ་མཆོག་ཏུ་བསྐྱེད་པར་བྱ་སྟེ། རིགས་ཀྱི་བུ། དོན་དུ་གཉེར་བ་དང༌། འདོད་པ་ལ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྙེད་པར་དཀའ་བ་མ་ཡིན་ནོ། །རིགས་ཀྱི་བུ། ཁྱོད་
ཀྱིས་དགེ་བའི་བཤེས་གཉེན་ལ་ཤིན་ཏུ་གུས་པ་བསྐྱེད་པར་བྱའོ། །ཕངས་པར་བྱའོ། །རབ་ཏུ་དང་བར་བྱའོ། །དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་ནི། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །ཞེས་ཀྱང་གསུངས་སོ། །དེ་ནས་དེ་བཞིན་གཤེགས་པ་དེ་དག་ལ་བྱང་ཆུབ་སེམས་
དཔའ་སེམས་དཔའ་ཆེན་པོ་རྟག་ཏུ་ངུས་འདི་སྐད་ཅེས། བདག་གི་དགེ་བའི་བཤེས་གཉེན་གང་ལགས་ཞེས་གསོལ་ཏོ། །དེ་དག་གིས་དེ་ལ་འདི་སྐད་ཅེས། རིགས་ཀྱི་བུ། ཁྱོད་ཡུན་རིང་པོ་ནས་བྱང་ཆུབ་
སེམས་དཔའ་སེམས་དཔའ་ཆེན་པོ་ཆོས་འཕགས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་ཤིང་ཡོངས་སུ་བཟུང་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང༌།
ཐབས་མཁས་པ་དང༌། སངས་རྒྱས་ཀྱི་ཆོས་རྣམས་ལ་བསླབས་སོ། །རིགས་ཀྱི་བུ། དེ་ནི། ཁྱོད་ཀྱི་དགེ་བའི་བཤེས་གཉེན་ཡོངས་སུ་འཛིན་པ་ཡིན་ཏེ། བྱས་པ་ཤེས་པ་དང༌། བྱས་པ་ཚོར་
བས་དེས་བསྒོ་བ་དང༌། དེས་བྱས་པ་བཞིན་དུ་ཟུངས་ཤིག །རིགས་ཀྱི་བུ། གལ་ཏེ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་བསྐལ་པ་གཅིག་གམ། བསྐལ་པ་
གཉིས་སམ། བསྐལ་པ་གསུམ་མམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བརྒྱ་སྟོང་ངམ། དེ་བས་ལྷག་པར་ཡང་མགོ་ལ་ཐོད་བཞིན་དུ་ཐོགས་ཤིང༌། བདེ་བའི་ཡོ་བྱད་ཐམས་
ཅད་ཀྱིས་རིམ་གྲོར་བྱས་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གཟུགས་དང༌། སྒྲ་དང༌། དྲི་དང༌། རོ་དང༌། རེག་པ་ཇི་སྙེད་ཡོད་པ་དེ་དག་ཐམས་ཅད་ཕུལ་ཡང༌། རིགས་ཀྱི་བུ།
༄༅། །ཁྱོད་རིགས་ཀྱི་བུ་དེའི་བྱས་པ་དེ་ཉིད་ལ་ལན་ལོན་པ་མ་ཡིན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ། རིགས་ཀྱི་བུ་དེའི་མཐུས་ཁྱོད་ཀྱིས་འདི་ལྟ་བུའི་ཏིང་ངེ་འཛིན་
རྣམས་རྙེད་པར་གྱུར་ཏོ། །ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་ཐོས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པ་ཐོབ་པར་གྱུར་ཏོ། །ཞེས་བཀའ་སྩལ་ཏོ། །དེ་ནས་དེ་བཞིན་གཤེགས་
པ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དབུགས་ཕྱུང་ནས་མི་སྣང་བར་གྱུར་ཏོ། །རིགས་ཀྱི་བུ་དེའང་ཏིང་ངེ་འཛིན་དེ་དག་ལས་ལངས་ཏེ། ལངས་ནས་ཀྱང་འདི་སྙམ་དུ་
སེམས་སོ། །དེ་བཞིན་གཤེགས་པ་དེ་དག་གང་ནས་བྱོན། དེ་བཞིན་གཤེགས་པ་དེ་དག་གང་དུ་བཞུད་སྙམ་སྟེ། དེ་དེ་བཞིན་གཤེགས་པ་དེ་དག་མ་མཐོང་བས་རབ་ཏུ་གདུང་ཞིང་མི་དགའ་བར་
གྱུར་ཏོ༑ ༑ཡང་དེ་འདི་སྙམ་དུ་སེམས་ཏེ། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ནི། གཟུངས་ཐོབ་པ། མངོན་པར་ཤེས་པ་ལྔ་དང་ལྡན་པ། སྔོན་གྱི་རྒྱལ་བ་
རྣམས་ལ་ལྷག་པར་བྱ་བ་བྱས་པ་སྟེ། བདག་གི་དགེ་བའི་བཤེས་གཉེན་ཡང་དག་པར་ཡོངས་སུ་འཛིན་པ། ཡུན་རིང་པོ་ནས་དེས་བདག་གི་དོན་བྱས་པ་ཡིན་གྱི། བདག་བྱང་ཆུབ་སེམས་
དཔའ་སེམས་དཔའ་ཆེན་པོ་ཆོས་འཕགས་ཀྱི་དྲུང་དུ་མངོན་པར་སོང་སྟེ་ཉེ་བར་ཕྱིན་ནས་དེ་བཞིན་གཤེགས་པ་དེ་དག་གང་ནས་བྱོན། དེ་བཞིན་གཤེགས་པ་དེ་དག་གང་དུ་བཞུད་ཅེས་
དོན་འདི་ཉིད་དྲིའོ། །སྙམ་མོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་དགའ་བ་དང༌། དད་པ་དང༌། རི་མོ་དང༌། གུས་
པར་བྱ་བ་ཉེ་བར་བཞག་སྟེ། ཉེ་བར་བཞག་ནས་འདི་སྙམ་དུ་སེམས་སོ། །བདག་གིས་ཇི་ལྟ་བུའི་བཀུར་སྟིར་བྱ་བས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་དེའི་དྲུང་དུ་འགྲོ་བར་བྱ།
བདག་ནི། དབུལ་ཏེ། གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་བདག་གིས་བཀུར་སྟིར་བྱ་བའི་གོས་སམ། རིན་པོ་ཆེའམ། གསེར་རམ། ནོར་བུའམ། མུ་ཏིག་
གམ༑ བཻ་ཌཱུཪྻའམ། དུང་ངམ། མན་ཤེལ་ལམ། བྱི་རུའམ། དངུལ་ལམ། མེ་ཏོག་གམ། བདུག་པའམ། དྲིའམ། ཕྲེང་བའམ། བྱུག་པའམ། ཕྱེ་མའམ། ཆོས་གོས་སམ། གདུགས་སམ་
རྒྱལ་མཚན་ནམ། དྲིལ་བུའམ། བ་དན་དེ་ལྟ་བུའང་བདག་ལ་ཅི་ཡང་མེད་ན། བདག་འདི་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱི་དྲུང་དུ་སོང་ན་ནི། བདག་གིས་མི་
རིགས་པ་བྱས་པར་འགྱུར་ཏེ། བདག་དགའ་བའམ། རངས་པ་ཡང་མི་སྐྱེའོ། །སྙམ་དུ་བསམས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དེ་ལྟ་བུའི་ཡོན་ཏན་དག་དང༌། བླ་
མ་ལ་གུས་པ་ཡིད་ལ་བྱེད་པ་དང་ལྡན་པས་སོང་ནས་མཐར་གྱིས་གྲོང་ཁྱེར་གཞན་ཞིག་ཏུ་ཕྱིན་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་གྲོང་བར་གྱི་སྲང་ག་ལ་
༄༅། །བ་དེར་སོང་སྟེ། དེའི་གྲོང་བར་གྱི་དབུས་སུ་ཕྱིན་ནས་དེ་འདི་སྙམ་དུ། འདི་ལྟར་བདག་གི་ལུས་བཙོངས་ལ། དེའི་རིན་གྱིས་བྱང་ཆུབ་སེམས་དཔའ་སེམས་དཔའ་ཆེན་
པོ་ཆོས་འཕགས་ལ་བཀུར་སྟིར་བྱའོ། །ཡུན་རིང་པོ་ནས་བདག་གི་ལུས་སྟོང་ཞིག་ཅིང་ཟད་དེ་འགགས་པར་བཙོངས་སོ། །འཁོར་བ་དཔག་ཏུ་མེད་པ་ན་འདོད་པའི་རྒྱུ་དང༌། འདོད་པའི་གཞིས་
ཡང་དང་ཡང་སེམས་ཅན་དམྱལ་བའི་སྡུག་བསྔལ་དཔག་ཏུ་མེད་པ་དག་མྱོང་ཡང༌། འདི་ལྟ་བུའི་ཆོས་ཀྱི་ཕྱིར་རམ། འདི་ལྟ་བུའི་སེམས་ཅན་ཆེན་པོ་ལ་བཀུར་སྟིར་བྱ་བའི་ཕྱིར་མ་ཡིན་ནོ། །སྙམ་
དུ་བསམས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་གྲོང་བར་གྱི་ཚོང་དུས་ཀྱི་དབུས་སུ་འདུག་སྟེ་མི་སུ་འདོད། མི་སུ་འདོད། མི་སུ་ཉོ་བར་འདོད་ཅེས་སྒྲ་བསྒྲགས་
ཤིང་སྐད་ཀྱིས་བོས་སོ། །དེ་ནས་བདུད་སྡིག་ཅན་གྱིས་འདི་སྙམ་དུ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་འདི་ནི། ཆོས་འདོད་པའི་ཕྱིར་བདག་ཉིད་བཙོངས་ནས་བྱང་ཆུབ་
སེམས་དཔའ་སེམས་དཔའ་ཆེན་པོ་ཆོས་འཕགས་ལ་བཀུར་སྟིར་བྱེད་ཅིང༌། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་ན། མྱུར་དུ་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་རྫོགས་པར་འགྱུར་ཞེས་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་ལ་མཁས་པ་ཡོངས་སུ་འདྲི་བར་འགྱུར་ཏེ། དེས་ཐོས་པ་རྒྱ་མཚོ་
རྗེས་སུ་ཐོབ་པར་འགྱུར། བདུད་དང་བདུད་ཀྱི་རིས་ཀྱི་ལྷ་དག་གིས་མི་ཐུབ་པར་འགྱུར། ཡོན་ཏན་ཐམས་ཅད་ཀྱི་ཕ་རོལ་ཏུ་ཕྱིན་པ་རྗེས་སུ་ཐོབ་པར་འགྱུར། དེར་སེམས་ཅན་མང་པོ་དག་གི་དོན་བྱེད་
པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དེ་དང༌། གཞན་དག་ཀྱང་ངའི་ཡུལ་ལས་འདའ་བར་བྱེད་པར་འགྱུར་གྱིས། བདག་གིས་འདིའི་བར་
ཆད་བྱའོ། །སྙམ་དུ་བསམས་སོ། །དེ་ནས་བདུད་སྡིག་ཅན་གྱིས་ཅི་ནས་བྲམ་ཟེ་དང་ཁྱིམ་བདག་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་མི་སུ་འདོད། མི་སུ་འདོད། མི་
སུ་ཉོ་བར་འདོད་ཅེས་ཟེར་བའི་སྒྲ་ཇི་ལྟར་མི་ཐོས་པར་འགྱུར་བ་དེ་ལྟར་ཡོངས་སུ་བསྒྲིབས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་གང་གི་ཚེ་བདག་ཉོ་བ་མ་རྙེད་པ་དེའི་ཚེ།
ཕྱོགས་གཅིག་ཏུ་སོང་ནས་ངུས་ཏེ་མཆི་མ་ཕྱུང་ནས་འདི་སྐད་དུ། བདག་གི་ལུས་བཙོངས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་བཀུར་སྟི་བྱ་སྙམ་ན། ལུས་ཉོ་བའང་
བདག་གིས་མ་རྙེད་དེ། ཀྱེ་མ་བདག་ནི། ཐོབ་པ་ངན་པ་ཐོབ་བོ། །ཞེས་སྨྲས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྙམ་དུ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་
པོ་རྟག་ཏུ་ངུ་འདི་ལྟ་སྟེ། ཆོས་འདོད་པའི་ཕྱིར་བདག་གི་ལུས་ཡོངས་སུ་གཏང་བར་ལྷག་པའི་བསམ་པ་ཕུན་སུམ་ཚོགས་པ་ཡིན་ནམ་མ་ཡིན་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་
༄༅། །ཏུ་ངུ་བདག་གིས་སད་པར་བྱའོ། །སྙམ་དུ་བསམས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་བྲམ་ཟེའི་ཁྱེའུའི་ཆ་བྱད་དུ་མངོན་པར་སྤྲུལ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་རྟག་ཏུ་ངུ་ག་ལ་བ་དེར་སོང་སྟེ་འོངས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས་སྨྲས་སོ། །རིགས་ཀྱི་བུ། འདི་ལྟར་ཁྱོད་ཡིད་མི་དགའ་ཞིང་གདུང་
ལ་མཆི་མ་བྱུང་ཞིང་གནས་པ་ཅི་ཉེས། དེ་ལ་རྟག་ཏུ་ངུས་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ། ངའི་ལུས་བཙོང་བར་འདོད་ན། ལུས་འདི་ཉོ་བ་ཡང་མ་རྙེད་དོ། །བརྒྱ་བྱིན་བྲམ་ཟེའི་ཁྱེའུའི་གཟུགས་
ཅན་གྱིས་སྨྲས་པ། རིགས་ཀྱི་བུ། ཁྱོད་ཅིའི་ཕྱིར་བདག་ཉིད་འཚོང་བར་འདོད། རྟག་ཏུ་ངུས་དེ་ལ་སྨྲས་པ། བྲམ་ཟེའི་ཁྱེའུ། ང་ནི། ཆོས་འདོད་པའི་ཕྱིར་བདག་ཉིད་བཙོངས་ཏེ་ཆོས་ལ་མཆོད་པར་
བྱ་བར་འདོད་ཅིང༌། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་ཡང་བཀུར་སྟི་བྱ་བར་འདོད་ན། ལུས་ཉོ་བ་དེ་ངས་མ་རྙེད་ནས་དེ་ལ་ང་འདི་སྙམ་དུ་སེམས་སོ། །ཀྱེ་མ་ང་
ནི༑ བསོད་ནམས་ཆུང་བས་འདི་ལྟར་ལུས་བཙོངས་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་པ་བྱ་བ་དང༌། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལའང་བཀུར་
སྟི་བྱ་སྙམ་ན། བདག་གི་ལུས་ཉོ་བའང་མ་རྙེད་དོ་སྙམ་མོ། །དེ་ནས་བྲམ་ཟེའི་ཁྱེའུ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས་སྨྲས་སོ། །རིགས་ཀྱི་བུ། ང་ལ་མིས་
ནི༑ བྱ་བ་མེད་ཀྱི། འོན་ཀྱང་ང་མཆོད་སྦྱིན་ཞིག་བྱེད་དེ། དེར་མིའི་སྙིང་དང༌། ཁྲག་དང༌། རུས་པ་དང༌། རྐང་དག་ང་ལ་དགོས་ན། དེ་རིན་གྱིས་ཉོར་བྱིན་ཅིག་ཅེས་བྱས་པ་དང༌། དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་རྟག་ཏུ་ངུ་འདི་སྙམ་དུ་སེམས་ཏེ། གང་བདག་གིས་བྲམ་ཟེའི་ཁྱེའུ་འདི་བདག་གི་སྙིང་དང༌། ཁྲག་དང༌། རུས་པ་དང༌། རྐང་ཉོ་བ་རྙེད་པ་འདི་ནི། བདག་གིས་རྙེད་པའི་
མཆོག་ལེགས་པར་རྙེད་དོ། །བདག་གི་ལུས་ནི། ཤེས་རབ་ཀྱི་ཕ་རོལ་ཏུ་ཕྱིན་པ་དང་ཐབས་མཁས་པ་དང༌། སངས་རྒྱས་ཀྱི་ཆོས་རྣམས་ལ་ཡོངས་སུ་རྫོགས་པར་འགྱུར་རོ། །སྙམ་ནས་དེ་སེམས་དགའ་
བ་དང༌། སེམས་བདེ་བ་དང༌། སེམས་རབ་ཏུ་དགའ་བར་གྱུར་ནས་བྲམ་ཟེའི་ཁྱེའུ་དེ་ལ་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ། ངའི་ལུས་འདི་ལས་ཁྱོད་གང་དང༌། གང་འདོད་པ་སྦྱིན་ནོ། །དེས་དེ་
ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་རིན་དུ་ཅི་འདོད་པ་སྦྱིན་ནོ། །ཞེས་བྱས་པ་དང༌། དེས་དེ་ལ་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ། ཁྱོད་ཀྱིས་གང་ཡོངས་སུ་བཏང་བ་དེ་ང་ལ་བྱིན་
ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་མཚོན་རྣོན་པོ་ཐོགས་ནས་ལག་པ་གཡས་པ་ཕུག་སྟེ་ཁྲག་གཟགས་སོ། །བརླ་གཡས་པ་ཤ་མེད་པར་བཏོགས་ནས་རུས་པ་གཅོག་
ཏུ་རྩིག་པའི་དྲུང་དུ་སོང་ངོ༌། །དེ་ནས་ཚོང་དཔོན་གྱི་བུ་མོ་ཞིག་ཁང་པའི་ཡང་ཐོག་ན་འདུག་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ཁྲག་མང་པོ་འཛག་པ་དང༌། བརླ་ཤ་མེད་པར་
༄༅། །བཏོགས་ནས་རུས་པ་གཅོག་ཏུ་རྩིག་པའི་དྲུང་དུ་སོང་བ་མཐོང་ནས་དེ་འདི་སྙམ་དུ་སེམས་ཏེ། རིགས་ཀྱི་བུ། འདི་ཅིའི་ཕྱིར་བདག་ཉིད་ལ་བདག་ཉིད་འདི་ལྟ་བུའི་ན་ཚ་
བྱེད་པ༑ བདག་རིགས་ཀྱི་བུ་དེའི་དྲུང་དུ་སོང་སྟེ་དྲིའོ། །སྙམ་མོ། །དེ་ནས་ཚོང་དཔོན་གྱི་བུ་མོ་དེ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་ཅིའི་ཕྱིར་བདག་ཉིད་ལ་འདི་ལྟ་བུའི་ན་ཚ་དག་བྱེད། ཁྲག་དང༌། རུས་པ་དང༌། རྐང་འདིས་ཅི་ཞིག་བྱ། རྟག་
ཏུ་ངུས་དེ་ལ་སྨྲས་པ། བུ་མོ། བྲམ་ཟེའི་ཁྱེའུ་འདི་ལ་ལུས་བཙོངས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་པར་བྱའོ། །འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་
འཕགས་ལའང་བཀུར་སྟིར་བྱའོ། །དེ་ནས་ཚོང་དཔོན་གྱི་བུ་མོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་འདི་ལྟར་བདག་གི་
སྙིང་དང༌། ཁྲག་དང༌། རུས་པ་དང༌། རྐང་ཡང་བཙོངས་ཏེ་རིགས་ཀྱི་བུ་དེ་ལ་བཀུར་སྟིར་བྱ་བར་འདོད་པ་ཁྱོད་ལ་ཡོན་ཏན་གྱི་རིགས་སམ། ཡོན་ཏན་གྱི་ཁྱད་པར་ཅི་ཞིག་འགྲུབ་པར་འགྱུར། དེས་
བུ་མོ་དེ་ལ་འདི་སྐད་ཅེས། བུ་མོ། རིགས་ཀྱི་བུ་དེ་ནི། གང་ལ་ངས་བསླབ་པར་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་དག་སྟོན་པར་འགྱུར་ཏེ། དེ་ལ་ངས་བསླབས་ན།
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་ཐམས་ཅད་ཀྱི་རྟེན་དུ་འགྱུར། ལུས་གསེར་གྱི་ཁ་དོག་ལྟ་བུའང་ཐོབ་པར་འགྱུར། སྐྱེས་བུ་
ཆེན་པོའི་མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུ་དང༌། འོད་འདོམ་གང་བ་དང༌། འོད་ཟེར་མཐའ་ཡས་པ་དང༌། བྱམས་པ་ཆེན་པོ་དང༌། སྙིང་རྗེ་ཆེན་པོ་དང༌། དགའ་བ་ཆེན་
པོ་དང༌། བཏང་སྙོམས་ཆེན་པོ་དང༌། མི་འཇིགས་པ་བཞི་རབ་ཏུ་ཐོབ་པར་འགྱུར། སོ་སོ་ཡང་དག་པར་རིག་པ་བཞི་རབ་ཏུ་ཐོབ་པར་འགྱུར། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱང་རབ་ཏུ་
ཐོབ་པར་འགྱུར། མངོན་པར་ཤེས་པ་ལྔ་བསམ་གྱིས་མི་ཁྱབ་པ་དང༌། ཚུལ་ཁྲིམས་རྣམ་པར་དག་པ་བསམ་གྱིས་མི་ཁྱབ་པ་དང༌། ཏིང་ངེ་འཛིན་རྣམ་པར་དག་པ་བསམ་གྱིས་མི་ཁྱབ་པ་དང༌། ཤེས་
རབ་རྣམ་པར་དག་པ་བསམ་གྱིས་མི་ཁྱབ་པ་དང༌། དེ་བཞིན་གཤེགས་པའི་སྟོབས་བཅུ་རབ་ཏུ་ཐོབ་པར་འགྱུར། བླ་ན་མེད་པའི་སངས་རྒྱས་ཀྱི་ཡེ་ཤེས་ཀྱང་མངོན་པར་རྫོགས་པར་འཚང་རྒྱ་བར་
འགྱུར༑ གང་གིས་སེམས་ཅན་ཐམས་ཅད་ལ་ཀུན་ཏུ་བགོ་བཤའ་བྱ་བའི་བླ་ན་མེད་པའི་ཆོས་རིན་པོ་ཆེའང་རབ་ཏུ་འཐོབ་པར་འགྱུར་རོ། །ཞེས་སྨྲས་སོ། །དེ་ནས་ཚོང་དཔོན་གྱི་བུ་མོ་དེས་བྱང་ཆུབ་སེམས་
དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས། རིགས་ཀྱི་བུ། ཁྱོད་ཀྱིས་འདི་ལྟར་ཆོས་རྒྱ་ཆེན་པོ་ཕུལ་དུ་བྱུང་བ་འདི་དག་ཡོངས་སུ་བརྗོད་པ་ནི། ངོ་མཚར་ཏེ། རིགས་ཀྱི་བུ། ཆོས་ཀྱི་དོན་
༄༅། །འདི་ལྟ་བུ་རེ་རེའི་ཕྱིར་ཡང་བསྐལ་པ་གངྒཱའི་ཀླུང་གི་བྱེ་མ་སྙེད་དུ་ལུས་ཡོངས་སུ་གཏང་བར་བྱ་བ་ཡིན་ན། མང་པོའི་ཕྱིར་ལྟ་ཅི་སྨོས་ཏེ། དེ་ཙམ་དུ་ཁྱོད་ཀྱིས་ཆོས་འདི་དག་
རྒྱ་ཆེ་ཞིང་ཕུལ་དུ་བྱུང་བ་ཡོངས་སུ་བརྗོད་པ་ཇི་ལྟ་བར་བདག་ཀྱང་འདོད་ཅིང་བཟོད་དོ། །དེ་ལྟ་ནའང་རིགས་ཀྱི་བུ། ཁྱོད་གང་དང་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་
ལ་བཀུར་སྟིར་བྱ་བའི་གསེར་རམ། ནོར་བུའམ། མུ་ཏིག་གམ། བཻ་ཌཱུཪྻའམ། དངུལ་ལམ། མུ་ས་ལ་གརྦྷའམ། ལོ་ཧི་ཏཱ་རཱ་གའམ། ཤེལ་ལམ། མེ་ཏོག་གམ། བདུག་པའམ། དྲིའམ། ཕྲེང་
བའམ༑ བྱུག་པའམ། ཕྱེ་མའམ། གོས་སམ། གདུགས་སམ། རྒྱལ་མཚན་ནམ། དྲིལ་བུའམ། བ་དན་ནམ། མར་མེ་ཁྱོད་ལ་ཅི་དགོས་པ་དེ་དང་དེ་ཁྱོད་ལ་སྦྱིན་གྱི། བདག་ཉིད་ལ་འདི་
ལྟ་བུའི་སྡུག་བསྔལ་མ་བྱེད་ཅིག །བདག་ཀྱང་ཁྱོད་དང་འགྲོགས་ཏེ་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ག་ལ་བ་དེར་དོང་ལ། བདག་ཀྱང་ཁྱོད་དང་ལྷན་ཅིག་
ཏུ་འདི་ལྟ་སྟེ། དེ་ལྟ་བུའི་ཆོས་དེ་དག་ཐོབ་པར་བྱ་བའི་ཕྱིར་དགེ་བའི་རྩ་བ་བསྐྱེད་པར་བྱའོ། །ཞེས་སྨྲས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྲམ་ཟེའི་ཁྱེའུའི་ཆ་བྱད་མི་སྣང་བར་བྱས་
ནས་བདག་ཉིད་ཀྱི་ལུས་སུ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུའི་མདུན་དུ་འདུག་ནས་འདི་སྐད་ཅེས། རིགས་ཀྱི་བུ། ཁྱོད་དེ་ལྟ་བུའི་ཡི་དམ་ལ་བརྟན་པ་དང༌། དེ་ལྟ་བུའི་ཆོས་
དོན་དུ་གཉེར་བ་འདི་ནི། ལེགས་སོ། ལེགས་སོ། །སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་གིས་ཀྱང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་
ཤེས་རབ་ཀྱི་ཕ་རོལ་ཏུ་ཕྱིན་པ་དང་ཐབས་མཁས་པ་ཡོངས་སུ་ཞུས་པས་ཆོས་རིན་པོ་ཆེ་ཤིན་ཏུ་ཐོབ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །རིགས་
ཀྱི་བུ༑ ང་ལ་སྙིང་དང༌། ཁྲག་དང༌། རུས་པ་དང༌། རྐང་གིས་བྱ་བ་མེད་ཀྱི། ང་ཁྱོད་སད་པའི་ཕྱིར་འདིར་འོངས་ཀྱི། རིགས་ཀྱི་བུ། ཁྱོད་ཀྱིས་མཆོག་སློངས་ཤིག །རིགས་ཀྱི་བུ། ཁྱོད་ལ་མཆོག་ཅི་ལྟ་བུ་
ཞིག་སྦྱིན་པར་བྱ་ཞེས་སྨྲས་སོ། །དེས་དེ་ལ་སྨྲས་པ། བརྒྱ་བྱིན། སངས་རྒྱས་ཀྱི་ཆོས་བླ་ན་མེད་པ་དག་བདག་ལ་སྩོལ་ཅིག །བརྒྱ་བྱིན་གྱིས་སྨྲས་པ། རིགས་ཀྱི་བུ། ཡུལ་འདི་ལ་ནི། ངའི་ནུས་པ་ཡོད་པ་
མ་ཡིན་ཏེ། ཡུལ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཡུལ་དུ་གྱུར་པ་ཡིན་གྱི། མཆོག་གཞན་སློངས་ཤིག །རྟག་ཏུ་ངུས་སྨྲས་པ། བདག་གི་ལུས་ཡོངས་སུ་རྫོགས་པར་བྱ་བའི་གནས་
འདི་ལ་ནི། ལྷའི་དབང་པོ་བརྒྱ་བྱིན་ཁྱོད་བརྩོན་པ་ཆུང་བར་གྱིས་ཤིག །ལྷ་རྣམས་ཀྱི་དབང་པོ་ངའི་ལུས་འདི་ལ་བདག་ཉིད་ཀྱིས་བདེན་པའི་བྱིན་གྱི་རླབས་བྱའོ། །ལྷ་རྣམས་ཀྱི་དབང་པོ་བདེན་པ་གང་གིས་
བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ལུང་བསྟན་ཅིང༌། བདག་གི་
༄༅། །ལྷག་པའི་བསམ་པ་གཡོ་མེད་པར་མཁྱེན་ན། བདེན་པ་དེ་དང༌། བདེན་པའི་ཚིག་དེས་བདག་གི་ལུས་སྔོན་གྱི་ཇི་ལྟ་བ་བཞིན་དུ་གྱུར་ཅིག་ཅེས་བྱས་པ་དང༌། དེ་ནས་
སྐད་ཅིག་ཐང་ཅིག་ཡུད་ཙམ་དེ་ལ་སངས་རྒྱས་ཀྱི་མཐུ་དང༌། ལྷག་པའི་བསམ་པ་ཡོངས་སུ་དག་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུའི་ལུས་སྔོན་གྱི་ཇི་ལྟ་བ་བཞིན་དུ་
གནས་པ་དང༌། ནད་མེད་པ་དང༌། གནོད་པ་མེད་པར་གྱུར་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་དང༌། བདུད་སྡིག་ཅན་ཡང་སྤོབས་པ་མེད་པར་གྱུར་ཏེ། བྱང་ཆུབ་སེམས་དཔའ་སེམས་དཔའ་
ཆེན་པོ་རྟག་ཏུ་ངུ་ལ་ལན་གླན་པར་སྤོབས་པ་མ་སྐྱེས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་ཚོང་དཔོན་གྱི་བུ་མོ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས་སྨྲས་
སོ༑ ༑རིགས་ཀྱི་བུ། ཁྱོད་ཚུར་ཤོག །བདག་གི་ཁྱིམ་གང་ན་ཡོད་པ་དེར་འདོང་ངོ༌། །བདག་གིས་ཕ་མའི་དྲུང་ནས་ནོར་བླངས་ཏེ། འདི་ལྟར་ཆོས་འདོད་པའི་ཕྱིར་གང་གིས་ཤེས་རབ་ཀྱི་ཕ་རོལ་ཏུ་
ཕྱིན་པ་དེའང་མཆོད་པར་བྱ་བ་དང༌། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་དེ་ལ་ཡང་བཀུར་སྟིར་བྱ་བ་ཁྱོད་ལ་སྦྱིན་ནོ། །དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་རྟག་ཏུ་ངུ་ཚོང་དཔོན་གྱི་བུ་མོ་དེ་དང་འགྲོགས་ནས་དེའི་རང་གི་ཁྱིམ་གང་ན་ཡོད་པ་དེར་དོང་སྟེ་ཕྱིན་ནས་སྒོ་དྲུང་དུ་བསྡད་དོ། །དེ་ནས་ཚོང་དཔོན་གྱི་བུ་མོ་དེ་རང་གི་ཁྱིམ་དུ་ཕྱིན་ནས་
ཕ་མ་ལ་འདི་སྐད་ཅེས་སྨྲས་སོ། །ཡབ་ཡུམ། གསེར་དང༌། དངུལ་དང༌། རིན་པོ་ཆེ་དང༌། ནོར་བུ་དང༌། གོས་དང༌། མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌།
ཆོས་གོས་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དང༌། རོལ་མོའི་ཆ་བྱད་སྣ་ཚོགས་དག་བདག་ལ་སྩོལ་ཅིག །བདག་ཀྱང་ཁྱེད་ཀྱིས་སྩལ་པའི་གཡོག་མོ་བུ་མོ་ལྔ་བརྒྱ་
འདི་དག་དང་ལྷན་ཅིག་དགྱེར་གསོལ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དང་བདག་ཅག་འགྲོགས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱི་དྲུང་དུ་མཆོད་
པ་བགྱི་བའི་སླད་དུ་མཆིའོ། །དེའང་བདག་ཅག་ལ་ཆོས་སྟོན་པར་འགྱུར་ཞིང་དེས་བདག་གིས་ཀྱང་སངས་རྒྱས་ཀྱི་ཆོས་རྣམས་རྙེད་པར་འགྱུར་རོ། །དེ་ནས་བུ་མོ་དེའི་ཕ་མས་བུ་མོ་དེ་ལ་འདི་སྐད་ཅེས་
སྨྲས་སོ༑ ༑བུ་མོ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ཞེས་བྱ་བ་དེ་སུ་ཞིག །དེ་ད་ལྟ་གང་ན་འདུག །བུ་མོས་སྨྲས་པ། རིགས་ཀྱི་བུ་དེ་ད་ལྟ་འོ་སྐོལ་གྱི་སྒོ་དྲུང་ན་མཆིས་ཏེ། རིགས་
ཀྱི་བུ༑ དེ་ནི། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཡང་དག་པར་ཞུགས་པ་འདི་ལྟ་སྟེ། སེམས་ཅན་ཐམས་ཅད་འཁོར་
བའི་སྡུག་བསྔལ་དཔག་ཏུ་མ་མཆིས་པ་ལས་ཐར་བར་བགྱི་བར་འཚལ་བས་དེ་ཆོས་འཚལ་བའི་སླད་དུ་བདག་ཉིད་བཙོངས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་པར་བགྱི་བར་འཚལ།
༄༅། །འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་ཡང་བཀུར་སྟི་བགྱི་བར་འཚལ་ན། དེའི་ལུས་ཉོ་བ་འགའ་ཡང་མ་རྙེད་ཅིང་མ་རྙེད་པས་
སྡུག་བསྔལ་ཞིང་ཡིད་མི་བདེ་ནས་མི་དགའ་བར་སེམས་ཤིང་མཆི་མ་ཕྱུང་ནས་མཆིས་པ་དང༌། ལྷ་རྣམས་ཀྱི་དབང་པོ་བརྒྱ་བྱིན་བྲམ་ཟེའི་ཁྱེའུའི་གཟུགས་སུ་བསྒྱུར་བས་སྨྲས་པ། རིགས་ཀྱི་བུ།
ཁྱོད་སྡུག་བསྔལ་བ་དང༌། ཡིད་མི་བདེ་བས་མི་དགའ་བར་སེམས་ཤིང་མཆི་མ་ཕྱུང་ནས་གནས་པ་ཅི་ཉེས། དེས་དེ་ལ་སྨྲས་པ། བདག་ཉིད་འཚོང་བར་འདོད་ན། བདག་གི་དེ་ཉོ་བའང་མ་རྙེད་དོ། །
བྲམ་ཟེའི་ཁྱེའུའི་གཟུགས་ཀྱི་བརྒྱ་བྱིན་གྱིས་སྨྲས་པ། རིགས་ཀྱི་བུ། ཁྱོད་གང་གི་ཕྱིར་ལུས་འཚོང་བར་འདོད་ཅེས་བགྱིས་པ་དང༌། རྟག་ཏུ་ངུས་སྨྲས་པ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་
མཆོད་པར་བྱ་བ་དང༌། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་དེ་ལ་ཡང་བཀུར་སྟིར་བྱའོ། །ངའི་སངས་རྒྱས་ཀྱི་ཆོས་རྣམས་ནི། དེ་ལ་རག་ལས་པས་འདི་ལྟ་
སྟེ༑ ཆོས་འདོད་པའི་ཕྱིར་རོ། །ཞེས་བགྱིས་པ་དང༌། བྲམ་ཟེའི་ཁྱེའུའི་གཟུགས་ཀྱི་བརྒྱ་བྱིན་གྱིས་སྨྲས་པ། རིགས་ཀྱི་བུ། ཁྱོད་ནི། ང་མི་འདོད་དེ། འོན་ཀྱང་ང་མཆོད་སྦྱིན་ཞིག་བྱེད་པ་
དེར་མིའི་སྙིང་དང༌། ཁྲག་དང༌། རུས་པ་དང༌། རྐང་དག་དགོས་སོ། །ཞེས་བགྱིས་པ་དང༌། རིགས་ཀྱི་བུ་དེས་ཡི་མ་སད་པར་དེ་ལ་འདི་སྐད་དུ་སྦྱིན་ནོ། །ཞེས་སྨྲས་ནས་དེ་མཚོན་རྣོན་པོ་ཐོགས་
ཏེ་བདག་གི་ལག་པ་ཕུག་ནས་ཁྲག་གཟུགས། བརླ་ཤ་མེད་པར་བཏོགས་ཏེ་རུས་པ་གཅོག་ཏུ་རྩིག་པའི་དྲུང་དུ་སོང་ནས་ཕྱོགས་གཅིག་ཏུ་འདུག་སྟེ། རུས་པ་དང༌། རྐང་སྦྱིན་ནོ། །སྙམ་ནས་རིགས་
ཀྱི་བུ་དེ་ཁྲག་གཟགས་པ་བདག་ཁང་པའི་ཡང་ཐོག་ན་མཆིས་པས་མཐོང་སྟེ། དེ་ལ་བདག་འདི་སྙམ་དུ་བགྱིད་དོ། །མི་འདི་ཅིའི་སླད་དུ་འདི་ལྟ་བུར་བདག་ཉིད་ལ་བདག་ཉིད་ན་ཚ་དག་བགྱིད་སྙམ་སྟེ།
དེའི་ཐད་དུ་བདག་མཆིས་ནས་འདི་སྐད་དུ་བགྱིས་སོ། །རིགས་ཀྱི་བུ། འདི་ལྟར་བདག་ཉིད་ཀྱིས་བདག་ཉིད་ཀྱི་ལུས་ཀྱི་ཁྲག་གཟགས་པ་འདིས་ཅི་ཞིག་བྱ་ཞེས་བགྱིས་པ་དང༌། དེ་བདག་ལ་འདི་སྐད་
ཅེས་མཆི་སྟེ། བུ་མོ། བྲམ་ཟེའི་ཁྱེའུ་འདི་ལ་ཁྲག་དང༌། སྙིང་དང༌། རུས་པ་དང༌། རྐང་སྦྱིན་ནོ། །དེ་ཅིའི་ཕྱིར་ཞེ་ན། ང་ནི། དབུལ་ཏེ། ང་ལ་ནོར་གཞན་ཅིའང་མེད་དོ། །ཞེས་མཆིའོ། །བདག་གིས་
ཁྱོད་ལ་ནོར་གྱིས་ཅི་ཞིག་བྱ་ཞེས་བགྱིས་པ་དང༌། དེ་བདག་ལ་འདི་སྐད་དུ། འདི་ལྟ་སྟེ། ཆོས་འདོད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་པར་བྱའོ། །འཕགས་པ་བྱང་ཆུབ་སེམས་དཔའ་
སེམས་དཔའ་ཆེན་པོ་ཆོས་འཕགས་ལ་ཡང་བཀུར་སྟིར་བྱའོ། །ཞེས་མཆི་ནས་བདག་གིས་དེ་ལ་འདི་སྐད་ཅེས་བགྱིས་ཏེ་རིགས་ཀྱི་བུ། དེས་ཁྱོད་ལ་ཡོན་ཏན་གྱི་རིགས་སམ། ཡོན་ཏན་གྱི་ཁྱད་པར་
ཅི་ཞིག་འབྱུང་བར་འགྱུར། དེས་བདག་ལ་འདི་སྐད་དུ། སངས་རྒྱས་ཀྱི་ཡོན་ཏན་བསམ་གྱིས་མི་ཁྱབ་པ་བརྗོད་པ་དང༌། སངས་རྒྱས་ཀྱི་ཆོས་གཞལ་དུ་མེད་པ་རྣམས་རབ་ཏུ་སྟོན་པར་འགྱུར་རོ། །འདི་
༄༅། །ལྟ་བུའི་སངས་རྒྱས་ཀྱི་ཆོས་རྣམས་དེ་ལས་འབྱུང་བར་འགྱུར་རོ། །ཞེས་བདག་ལ་མཆི་སྟེ། སངས་རྒྱས་ཀྱི་ཡོན་ཏན་བསམ་གྱིས་མི་ཁྱབ་པ་དེ་དག་ཐོས་ནས་བདག་ཀྱང་དགའ་བ་
དང༌། རབ་ཏུ་དགའ་བ་དང༌། མགུ་བ་ཆེན་པོ་སྐྱེས་ནས་འདི་སྙམ་དུ་བགྱིད་དེ། རིགས་ཀྱི་བུ་འདི་ཤིན་ཏུ་ཆོས་འདོད་པའི་ཕྱིར་འདི་ལྟ་བུར་གང་རང་གི་ལུས་ཀྱི་བར་དུའང་མི་གནས་པར་སྤྲོ་བ་ནི། དཀའ་བ་
བགྱིད་པ་སྟེ། ངོ་མཚར་ཏོ། །རིགས་ཀྱི་བུ་འདི་ནི། ཆོས་འདོད་པའི་ཕྱིར་བདག་ཉིད་ཀྱང་ཡོངས་སུ་གཏོང་ན། བདག་ཅག་ལ་ལོངས་སྤྱོད་གང་དག་མང་ཞིང་རྒྱ་ཆེ་བ་དག་ཡོད་ན། ཅིའི་ཕྱིར་བདག་ཅག་ཆོས་
ལ་མཆོད་པ་མི་བགྱིད། འདི་ལྟ་བུའི་གནས་དག་ལ་སྨོན་ལམ་ཅིའི་ཕྱིར་མི་གདབ་སྙམ་ནས་རིགས་ཀྱི་བུ། དེ་ལ་བདག་གིས་འདི་སྐད་ཅེས་བགྱིས་སོ། །རིགས་ཀྱི་བུ། ཁྱོད་བདག་ཉིད་ལ་འདི་ལྟ་བུའི་
སྲོག་འཕྲོག་པའི་ཚུལ་གྱི་ན་ཚ་དག་མ་བྱེད་ཅིག །ཁྱོད་དོན་གང་གིས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་བཀུར་སྟིར་བྱ་བ་དང༌། བླ་མར་བྱ་བའི་ནོར་མང་པོ་
དག་བདག་གིས་ཕ་མ་ལས་བླངས་ཏེ་བདག་ཀྱང་ཁྱོད་དང་འགྲོགས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ག་ལ་བ་དེར་མཆིའོ། །བདག་གིས་ཀྱང་རིགས་ཀྱི་བུ་དེ་ལ་མཆོད་
པར་བགྱིའོ། །གང་ཁྱོད་ཀྱིས་ཡོངས་སུ་བརྗོད་པ་འདི་ལྟ་སྟེ། སངས་རྒྱས་ཀྱི་ཆོས་བླ་ན་མེད་པ་དེ་ལྟ་བུའི་ཆོས་དག་བདག་གིས་ཀྱང་རྫོགས་པར་བགྱིའོ། །ཞེས་བགྱིས་ན། ཡབ་ཡུམ་གྱིས་དཀོར་
གྱི་ཕུང་པོ་ཆེན་པོ་དེ་བདག་ལ་སྩལ་པ་གནང་བར་མཛད་དུ་གསོལ། བདག་གིས་ཀྱང་རིགས་ཀྱི་བུ་དེ་དང་ལྷན་ཅིག་ཏུ་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་མཆོད་
པར་བགྱིའོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། བམ་པོ་ཉི་ཤུ་བཞི་པ། དེ་ནས་བུ་མོ་དེའི་ཕ་མས་བུ་མོ་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེའི་དཀའ་
བའི་གནས་དག་ཁྱོད་ཀྱིས་བསྟན་པ་ལས་ན། ཆོས་དེ་དག་ནི། གཅིག་ཏུ་ངེས་པར་བསམ་གྱིས་མི་ཁྱབ་པ། འཇིག་རྟེན་ཐམས་ཅད་ལས་ཁྱད་པར་དུ་འཕགས་པ། སེམས་ཅན་ཐམས་ཅད་བདེ་བ་ཐོབ་པར་
བྱེད་པའི་བར་ནི། ངོ་མཚར་ཏོ། །རིགས་ཀྱི་བུ་གང་དག་དེ་དག་གི་ཕྱིར་དེ་ལྟ་བུའི་དཀའ་བའི་གནས་དག་ལ་སྤྲོ་བར་བྱེད་ན། ཁྱོད་ངེད་ཀྱིས་གནང་གི། བུ་མོ། ངེད་ཀྱང་ཁྱོད་དང་ལྷན་ཅིག་ཏུ་བྱང་ཆུབ་སེམས་
དཔའ་སེམས་དཔའ་ཆེན་པོ་ཆོས་འཕགས་བལྟ་བ་དང༌། ཕྱག་བྱ་བ་དང༌། བསྙེན་བཀུར་བྱ་བ་དང༌། མཆོད་པ་བྱེད་དུ་འགྲོ་ཡི། ངེད་འགྲོ་བའི་གོ་སྐབས་ཕྱེ་ཞིག །དེ་ནས་ཚོང་དཔོན་གྱི་བུ་མོ་དེ་བྱང་ཆུབ་
སེམས་དཔའ་སེམས་དཔའ་ཆེན་པོ་ཆོས་འཕགས་ལ་མཆོད་པར་བྱ་བ་དང༌། བཀུར་སྟིར་བྱ་བའི་ཕྱིར་ཆས་ཏེ་རང་གི་ཕ་མ་ལ་རིག་པར་བྱས་ནས་འདི་སྐད་ཅེས། ཡབ་ཡུམ་ཇི་སྐད་གསུངས་པ་དེ་བཞིན་
དུ་མཛོད་ཅིག་དང༌། བདག་ནི། དགེ་བའི་ཕྱོགས་གང་གིའང་བར་ཆད་མི་བགྱིད་དོ། །ཞེས་སྨྲས་ནས་ཚོང་དཔོན་གྱི་བུ་མོ་དེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་མཆོད་པ་དང༌།
༄༅། །བཀུར་སྟིར་བྱ་བའི་ཕྱིར་ཆས་པར་གྱུར་ཏོ། །དེ་ནས་ཚོང་དཔོན་གྱི་བུ་མོ་དེས་ཤིང་རྟ་ལྔ་བརྒྱའང་རྒྱན་གྱིས་བརྒྱན། བུ་མོ་ལྔ་བརྒྱ་པོ་དེ་དག་ཀྱང་རྒྱན་གྱིས་བརྒྱན་ཏོ། །རྒྱན་
གྱིས་བརྒྱན་ནས་མེ་ཏོག་ཐ་དད་པ་ཁ་དོག་སྣ་ཚོགས་པ་དག་དང༌། གོས་ཁ་དོག་སྣ་ཚོགས་ཐོགས། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ཆོས་གོས་དང༌།
གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་ཐོགས། རིན་པོ་ཆེ་སྣ་ཚོགས་རྣམ་པ་ཐ་དད་པ་དག་དང༌། རིན་པོ་ཆེ་སྣ་ཚོགས་རྣམ་པ་ཐ་དད་པའི་རང་བཞིན་གྱི་མེ་ཏོག་དག་
ཀྱང་ཐོགས། བཟའ་བ་དང༌། བཅའ་བ་དང༌། མྱང་བ་མང་པོ་ཕ་མས་ཀྱང་ཐོགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དང་ཤིང་རྟ་གཅིག་ཏུ་ལྷན་ཅིག་ཏུ་ཞུགས་ཏེ་བུ་མོ་ལྔ་
བརྒྱ་ཤིང་རྟ་ལྔ་བརྒྱའི་ནང་དུ་ཞུགས་པ་དེ་དག་གིས་ཡོངས་སུ་བསྐོར་ཅིང་མདུན་དུ་བདར་ནས་ཕ་མ་ལ་སོགས་པ་འཁོར་མང་པོ་དང་ཤར་ཕྱོགས་ག་ལ་བ་དེ་ལོགས་སུ་དོང་སྟེ་མཐར་གྱིས་སོང་བ་
དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་རྒྱང་རིང་མོ་ཞིག་ནས་གྲོང་ཁྱེར་སྤོས་ལྡན་རིན་པོ་ཆེ་སྣ་བདུན་རྣམ་པར་བཀྲ་བ་བལྟ་ན་སྡུག་པ་ལས་བྱས་པ། རིན་པོ་ཆེ་སྣ་བདུན་
གྱི་རང་བཞིན་གྱི་ར་བ་རིམ་པ་བདུན་གྱིས་བསྐོར་བ། རྟ་བབས་བདུན་ཡོད་པ། འོབས་རིམ་པ་བདུན་དང༌། ཤིང་ཏ་ལའི་ཕྲེང་བ་རིམ་པ་བདུན་གྱིས་ཡོངས་སུ་བསྐོར་བ། མཆུར་དཔག་ཚད་བཅུ་
གཉིས༑ ཞེང་དུ་དཔག་ཚད་བཅུ་གཉིས་ཡོད་པ། འབྱོར་ཅིང་རྒྱས་པ། བདེ་བ། ལོ་ལེགས་པ། མི་དང་སྐྱེ་བོ་མང་པོས་གང་པ། བར་གྱི་ཚོང་ཁང་གི་ཕྲེང་བ་རི་མོ་སྣ་ཚོགས་སུ་བྲིས་པ་ལྟ་བུ་བལྟ་ན་
སྡུག་པ༑ ཕིགས་པར་གྱུར་པ། མཉམ་ཞིང་མཚུངས་པ། སྐྱེ་བོ་དང་ཁྱོགས་ཀྱི་བཞོན་པ་དང༌། རྐང་གིས་འགྲོ་བའི་གནས་འཛེར་དོག་མེད་པར་གནས་པ་ལྔ་བརྒྱ་དག་གིས་ལེགས་པར་བསྒྲུབས་པ་
གྲོང་ཁྱེར་དེའི་དབུས་ཀྱི་བཞི་མདོ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཆོས་ཀྱི་ཁྲི་ལ་འདུག་ནས་འཁོར་བརྒྱ་ཕྲག་དུ་མ་དང༌། འཁོར་སྟོང་ཕྲག་དུ་མ་དང༌། འཁོར་བརྒྱ་སྟོང་ཕྲག་
དུ་མས་ཡོངས་སུ་བསྐོར་ཅིང་མདུན་དུ་བྱས་ནས་ཆོས་སྟོན་པ་མཐོང་སྟེ། མཐོང་མ་ཐག་ཏུ་དེ་འདི་ལྟ་བུའི་བདེ་བ་ཐོབ་པ་འདི་ལྟ་སྟེ། དཔེར་ན། དགེ་སློང་བསམ་གཏན་དང་པོ་རྩེ་གཅིག་ཏུ་ཡིད་ལ་བྱེད་པས་
སྙོམས་པར་ཞུགས་པ་བཞིན་ནོ། །དེ་མཐོང་ནས་འདི་སྙམ་དུ་སེམས་ཏེ། བདག་ཤིང་རྟའི་ནང་དུ་ཞུགས་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱི་དྲུང་དུ་འགྲོ་བ་ནི། བདག་གིས་
མི་ཆའོ༑ ༑སྙམ་ནས་ཤིང་རྟ་ལས་བབས་སོ། །དེ་ནས་ཤིང་རྟ་དེ་ལས་བབས་པ་དང་གཞན་ཚོང་དཔོན་གྱི་བུ་མོ་དེ་དང༌། བུ་མོ་ལྔ་བརྒྱ་པོ་དེ་དག་ཀྱང་མཉམ་དུ་ཤིང་རྟ་ལས་བབས་སོ། །དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་རྟག་ཏུ་ངུ་ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱས་ཡོངས་སུ་བསྐོར་ཅིང་མདུན་དུ་བདར་ཏེ་མཆོད་པའི་བཀོད་པ་ཚད་མེད་པ་དང་བྱང་ཆུབ་སེམས་དཔའ་སེམས་དཔའ་ཆེན་པོ་
༄༅། །ཆོས་འཕགས་ག་ལ་བ་དེར་དོང་ངོ༌། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཁང་པ་བརྩེགས་པ་རིན་པོ་
ཆེ་སྣ་བདུན་གྱི་རང་བཞིན་ལས་བྱས་པ། ཙནྡན་དམར་པོས་བརྒྱན་ཅིང་མུ་ཏིག་གི་དྲ་བས་གཡོགས་པ་ཞིག་བྱེད་དུ་བཅུག་སྟེ། ཁང་པ་བརྩེགས་པ་དེའི་གྲུ་བཞིར་ནོར་བུ་རིན་པོ་ཆེ་བཞག་པར་གྱུར་ཏེ་དེ་དག་
སྒྲོན་མའི་བྱ་བ་བྱེད་དོ། །བདུག་སྤོས་ཀྱི་སྣོད་དངུལ་ལས་བྱས་པ་བཞིའང་ཕྱོགས་བཞིར་བཏགས་ཏེ་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་པ་བྱ་བའི་ཕྱིར་ཨ་ཀ་རུ་ནག་པོ་འབའ་ཞིག་གིས་
བདུག་པར་བྱེད་དོ། །ཁང་པ་བརྩེགས་པ་དེའི་དབུས་སུ་རིན་པོ་ཆེ་སྣ་བདུན་ལས་བྱས་པའི་ཁྲི་བཞི་བཙུགས་ཏེ་དེའི་སྟེང་དུ་རིན་པོ་ཆེའི་སྒྲོམ་བཞི་བཞག་ནས་དེའི་ནང་དུ་ཤེས་རབ་ཀྱི་ཕ་རོལ་ཏུ་ཕྱིན་པ་གསེར་
གྱི་གླེགས་བམ་ལ་བཻ་ཌཱུཪྻ་བཞུ་བས་བྲིས་པ་བཅུག་སྟེ། ཁང་པ་བརྩེགས་པ་དེའང་དར་གྱི་ཆུན་པོ་སྣ་ཚོགས་རྣམ་པ་ཐ་དད་པ་འཕྱང་བས་བརྒྱན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་
རྟག་ཏུ་ངུ་ཚོང་དཔོན་གྱི་བུ་མོ་ལ་སོགས་ཏེ་བུ་མོ་ལྔ་བརྒྱ་དང་བཅས་པས་ཁང་པ་བརྩེགས་པ་དེ་མཆོད་པའི་བཀོད་པ་ཚད་མེད་པས་བརྒྱན་པ་མཐོང་ཞིང༌། དེ་ན་ལྷ་སྟོང་ཕྲག་དུ་མ་དག་ཀྱང་མཐོང་སྟེ། ལྷ་
རྣམས་ཀྱི་དབང་པོ་བརྒྱ་བྱིན་ཡང་ལྷའི་མེ་ཏོག་མནྡཱ་ར་བ་དང༌། ལྷའི་ཙནྡན་གྱི་ཕྱེ་མ་དང༌། ལྷའི་གསེར་གྱི་ཕྱེ་མ་དང༌། ལྷའི་དངུལ་གྱི་ཕྱེ་མ་དག་གིས་ཁང་པ་བརྩེགས་པ་དེ་ལ་འཐོར། མངོན་པར་འཐོར་
མངོན་པར་རབ་ཏུ་འཐོར་བར་མཐོང་ངོ༌། །ལྷའི་སིལ་སྙན་དག་ཀྱང་ཐོས་སོ། །མཐོང་ཞིང་ཐོས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་
སྨྲས་སོ། །ལྷ་རྣམས་ཀྱི་དབང་པོ། ཁྱོད་ལྷ་སྟོང་ཕྲག་དུ་མ་དག་དང་ལྷན་ཅིག་རིན་པོ་ཆེའི་ཁང་པ་བརྩེགས་པ་འདི་ལ་ཅིའི་ཕྱིར་ལྷའི་མེ་ཏོག་མནྡཱ་ར་བ་དང༌། ལྷའི་ཙནྡན་གྱི་ཕྱེ་མ་དང༌། ལྷའི་གསེར་གྱི་ཕྱེ་མ་
དང༌། ལྷའི་དངུལ་གྱི་ཕྱེ་མ་དག་གིས་འཐོར་ཞིང་མངོན་པར་མཐོར། མངོན་པར་རབ་ཏུ་འཐོར། ལྷའི་སིལ་སྙན་འདི་དག་ཀྱང་ལྷ་རྣམས་པར་སྣང་ལ་ཅིའི་ཕྱིར་རྡུང༌། དེ་སྐད་ཅེས་སྨྲས་པ་དང༌། ལྷ་རྣམས་
ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས་སྨྲས་སོ། །རིགས་ཀྱི་བུ། འདི་ནི། ཤེས་རབ་ཀྱི་ཕ་རོལ་ཏུ་ཕྱིན་པ་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ཀྱི་ཡུམ་དང༌། ཡོངས་སུ་འདྲེན་པ་ཡིན་ཏེ། འདི་ལ་བསླབས་པས་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཡོན་ཏན་ཐམས་ཅད་ཀྱི་ཕ་རོལ་ཏུ་ཕྱིན་པར་རྗེས་སུ་འགྲོ་བ་དང༌། སངས་
རྒྱས་ཀྱི་ཆོས་ཐམས་ཅད་དང༌། རྣམ་པ་ཐམས་ཅད་མཁྱེན་པ་ཉིད་ཀྱང་མྱུར་དུ་ཐོབ་པར་འགྱུར་བ་ཡིན་ན། ཁྱོད་མི་ཤེས་སམ། དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་
ངུས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ །ཤེས་རབ་ཀྱི་ཕ་རོལ་ཏུ་ཕྱིན་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡུམ་དང༌། ཡོངས་སུ་འདྲེན་པ་དེ་གང་ན་
༄༅། །བཞུགས། བརྒྱ་བྱིན་གྱིས་སྨྲས་པ། རིགས་ཀྱི་བུ། དེ་ནི། ཁང་པ་བརྩེགས་པ་འདིའི་ནང་ན་གསེར་གྱི་གླེགས་བམ་ལ་བཻ་ཌཱུཪྻ་བཞུ་བས་བྲིས་པ་འཕགས་པ་བྱང་ཆུབ་
སེམས་དཔའ་སེམས་དཔའ་ཆེན་པོ་ཆོས་འཕགས་ཀྱིས་རྒྱ་རིམ་པ་བདུན་གྱིས་རྒྱས་བཏབ་ནས་བཞག་སྟེ། ངེད་ཀྱིས་ཁྱོད་ལ་བསྟན་པར་དཀའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་
པོ་རྟག་ཏུ་ངུ་ཚོང་དཔོན་གྱི་བུ་མོ་ལ་སོགས་ཏེ་བུ་མོ་ལྔ་བརྒྱ་དག་དང་ལྷན་ཅིག་ཏུ་དེ་དག་གིས་མེ་ཏོག་དང༌། ཕྲེང་བའི་ཆུན་པོ་དང༌། གོས་རིན་པོ་ཆེ་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་
པ་དང༌། ཕྱེ་མ་དང༌། ཆོས་གོས་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་དང༌། གསེར་དང༌། དངུལ་ལས་བྱས་པའི་མེ་ཏོག་གང་དག་ཐོགས་ཏེ་འོངས་པའི་ཚོགས་དེ་
དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་པ་བྱས་ཏེ་འདི་ལྟ་སྟེ། འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་མཆོད་པའི་ཕྱིར་དེ་དག་ལས་གཞན་དང༌།
གཞན་ཆེས་སོ་སོར་བཞག་གོ །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དང༌། ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱ་དག་གིས་མེ་ཏོག་དང་བདུག་པ་དང༌། དྲི་དང༌།
ཕྲེང་བ་དང༌། བྱུག་པ་དང༌། ཕྱེ་མ་དང༌། ཆོས་གོས་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དང༌། ཙནྡན་གྱི་ཕྱེ་མ་དང༌། གསེར་དང༌། དངུལ་ལས་བྱས་པའི་མེ་ཏོག་
དང༌། ལྷའི་རོལ་མོ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྔར་མཆོད་པ་བྱས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ག་ལ་བ་དེར་སོང་སྟེ་ཕྱིན་ནས་ཆོས་ལ་མཆོད་པ་ཉིད་ཀྱི་
ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ཆོས་གོས་དང༌། གདུགས་དང༌། རྒྱལ་མཚན་དང༌།
དྲིལ་བུ་དང༌། བ་དན་དག་དང༌། ཙནྡན་གྱི་ཕྱེ་མ་དང༌། གསེར་དང༌། དངུལ་ལས་བྱས་པའི་མེ་ཏོག་དག་གིས་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །ལྷའི་སིལ་སྙན་དག་ཀྱང་ཡང་
དག་པར་རབ་ཏུ་དཀྲོལ་ལོ། །དེ་ནས་མེ་ཏོག་དེ་དག་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱི་སྤྱི་བོའི་སྟེང་ན་མེ་ཏོག་གི་ཁང་པ་བརྩེགས་པ་ཞིག་ཏུ་གྱུར་ཏོ། །གསེར་དང་དངུལ་ལས་
བྱས་པའི་མེ་ཏོག་དང༌། ཁ་དོག་སྣ་ཚོགས་པའི་མེ་ཏོག་དེ་དག་ནམ་མཁའ་ལ་གཞལ་མེད་ཁང་འདྲ་བར་འདུག་པར་གྱུར་ཏོ། །དེའི་ཆོས་གོས་དང༌། གོས་རིན་པོ་ཆེ་དེ་དག་ཀྱང་བར་སྣང་ལ་རིན་པོ་ཆེ་སྣ་
ཚོགས་ཀྱི་སྤྲིན་གྱི་དཀྱིལ་འཁོར་འདྲ་བར་འདུག་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དང༌། ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱ་པོ་དེ་དག་གིས་བྱང་ཆུབ་སེམས་
དཔའ་སེམས་དཔའ་ཆེན་པོ་ཆོས་འཕགས་ཀྱི་རྫུ་འཕྲུལ་གྱི་ཆོ་འཕྲུལ་དེ་ལྟ་བུ་མཐོང་སྟེ། མཐོང་ནས་དེ་དག་འདི་སྙམ་དུ་སེམས་ཏེ་ངོ་མཚར་ཏོ། །འདི་ལྟར་བྱང་ཆུབ་སེམས་དཔའ་སེམས་དཔའ་
༄༅། །ཆེན་པོ་ཆོས་འཕགས་འདི་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་ལ། འདི་ལྟར་གཟི་བརྗིད་ཆེ་སྟེ། རིགས་ཀྱི་བུ། འདི་བྱང་ཆུབ་སེམས་དཔའི་སྤྱད་པ་སྤྱོད་པ་ཉིད་ནའང་རྫུ་
འཕྲུལ་རྣམ་པར་འཕྲུལ་པ་འདི་འདྲ་ཡང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཚེ་ཅི་འདྲ་བར་འགྱུར་སྙམ་མོ། །དེ་ནས་ཚོང་དཔོན་གྱི་བུ་མོ་ལ་
སོགས་པ་བུ་མོ་ལྔ་བརྒྱ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་དགའ་བ་བསྐྱེད་ནས་ཚོགས་པ་དེ་དག་ཐམས་ཅད་དང་ལྷག་པའི་བསམ་པས་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། འདི་སྐད་དུ། དགེ་བའི་རྩ་བ་འདིས་བདག་ཅག་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་
གྱུར་ཅིག །བྱང་ཆུབ་སེམས་དཔའི་སྤྱད་པ་སྤྱོད་པ་ནའང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱིས་ཆོས་གང་ཐོབ་པར་གྱུར་པ་འདི་ལྟ་བུའི་ཆོས་རྣམས་ཐོབ་པར་གྱུར་ཅིག །ཇི་ལྟར་
བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བཀུར་སྟིར་བྱེད་པ་དང༌། བླ་མར་བྱེད་པ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བཀུར་སྟིར་བྱེད་པ་
དང༌། བླ་མར་བྱེད་པར་ཤོག་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཇི་ལྟར་ཡང་དག་པར་སྟོན་པ་བཞིན་དུ་བདག་ཅག་ཀྱང་སྐྱེ་བོ་མང་པོ་ལ་ཡང་དག་པར་སྟོན་པར་གྱུར་ཅིག །
ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་འདི་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་དང་ལྡན་ཞིང་ཡོངས་སུ་རྫོགས་པ་དེ་བཞིན་དུ་བདག་ཅག་ཀྱང་ཤེས་རབ་ཀྱི་ཕ་
རོལ་ཏུ་ཕྱིན་པ་དང༌། ཐབས་མཁས་པ་དང་ལྡན་ཞིང་ཡོངས་སུ་རྫོགས་པར་ཤོག་ཅིག་ཅེས་སྨྲས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དང༌། ཚོང་དཔོན་གྱི་བུ་མོ་ལ་སོགས་པ་
བུ་མོ་ལྔ་བརྒྱ་པོ་དེ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མཆོད་པ་བྱས། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལའང་བཀུར་སྟི་བྱས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་
ཆོས་འཕགས་ཀྱི་རྐང་པ་ལ་མགོ་བོ་རྣམས་ཀྱིས་མངོན་དུ་ཕྱག་འཚལ་ནས་ཞེ་ས་བྱེད་ཅིང་ཐལ་མོ་སྦྱར་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་
འཕགས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་འདི་སྐད་ཅེས་སྨྲས་སོ། །རིགས་ཀྱི་བུ། འདི་ན་བདག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཚོལ་ཞིང་འབྲོག་དགོན་པར་ཕྱིན་པ་ན། རིགས་
ཀྱི་བུ༑ ཤར་ཕྱོགས་སུ་སོང་ཞིག་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་ཐོས་པར་འགྱུར་རོ། །ཞེས་སྒྲ་ཐོས་ཏེ། བདག་གིས་སྒྲ་དེ་ལས་ཡང་དག་པར་བསྟན་པ་དེ་ཐོས་ནས་ཤར་ཕྱོགས་ག་ལ་བ་དེ་ལོགས་སུ་
མཆིས་ནས་འདི་སྙམ་དུ་བསམས་ཏེ། བདག་གིས་སྒྲ་དེ་ལ་ཇི་སྲིད་གཅིག་ཏུ་མཆི་བར་བགྱི། སུའི་དྲུང་དུ་ཤེས་རབ་ཀྱི་ཕ་རོལ་ཏུ་ཕྱིན་པ་མཉན་ཅིང་རྙེད་པར་འགྱུར་བ་ཡང་དག་པར་འགྲོ་བ་སྒྲ་ཐོས་པ་ལ་བདག་
༄༅། །གིས་མ་དྲིས་སོ། །སྙམ་སྟེ། དེས་བདག་ཡིད་མི་བདེ་ཞིང་ཤིན་ཏུ་གདུང་བར་གྱུར་ནས་ས་ཕྱོགས་དེ་ཉིད་དུ་ཉིན་མཚན་བདུན་འདས་ཏེ། དེ་ལྟར་ཤིན་ཏུ་གདུང་བས་ཟས་
ལ་སེམས་པ་ནི། མ་བྱུང་གི། གཞན་དུ་ན་ཤེས་རབ་ཀྱི་ཕ་རོལ་ཏུ་ཕྱིན་པ་འབའ་ཞིག་ཡིད་ལ་བགྱིས་ཏེ་ཇི་སྲིད་གཅིག་ཏུ་མཆི་བར་བགྱི་བ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་འདི་སུ་ལས་མཉན་པ་རྙེད་
པར་འགྱུར་བ་སྒྲ་དེ་ལ་མ་དྲིས་སོ། །སྙམ་པ་དང༌། དེ་ནས་བདག་གི་མདུན་དུ་དེ་བཞིན་གཤེགས་པའི་སྐུ་ཞིག་བྱུང་སྟེ་དེ་འདི་སྐད་དུ། རིགས་ཀྱི་བུ། ཁྱོད་འདི་ནས་དཔག་ཚད་ལྔ་བརྒྱར་རིམ་གྱིས་སོང་
དང༌། གྲོང་ཁྱེར་སྤོས་ལྡན་ཞེས་བྱ་བ་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་ཅིང་འཆད་པ་མཐོང་བར་འགྱུར་རོ། །ཞེས་གསུངས་ཏེ། དེ་ནས་
བདག་དགའ་བ་དང༌། རབ་ཏུ་དགའ་བ་རྒྱ་ཆེན་པོ་དང་ལྡན་པར་གྱུར་ཏེ། བདག་དགའ་བ་དང༌། རབ་ཏུ་དགའ་བ་རྒྱ་ཆེན་པོ་དེ་ཉིད་ཀྱིས་ཁྱབ་པར་གྱུར་ནས་ས་ཕྱོགས་དེ་ནས་མ་བསྐྱོད་པར་ཁྱོད་ཀྱིས་
ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པ་ཐོས་སོ། །དེ་བདག་གིས་ཐོས་པ་ན་ཏིང་ངེ་འཛིན་གྱི་སྒོ་མང་པོ་སྐྱེས་པར་གྱུར་ཏོ། །བདག་དེ་ན་མཆིས་པ་ན་ཕྱོགས་བཅུའི་འཇིག་རྟེན་གྱི་ཁམས་ཀྱི་སངས་རྒྱས་
བཅོམ་ལྡན་འདས་རྣམས་ཀྱིས་དབུགས་དབྱུང་བ་མཛད་པ་ལེགས་སོ། །ཞེས་བྱ་བ་བྱིན་ཏེ། རིགས་ཀྱི་བུ། ལེགས་སོ། ལེགས་སོ། །ཁྱོད་ཀྱི་ཏིང་ངེ་འཛིན་འདི་དག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་
ལས་སྐྱེས་པ་ཡིན་ཏེ། འདི་ལ་གནས་པས་ངེད་ཀྱིས་ཀྱང་སངས་རྒྱས་ཀྱི་ཆོས་རྣམས་ཡོངས་སུ་རྫོགས་པར་བྱས་སོ། །ཞེས་དེ་བཞིན་གཤེགས་པ་དེ་དག་གིས་བདག་ལ་ཤིན་ཏུ་ལེགས་པར་བསྟན།
ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་དགའ་བར་མཛད་ནས་མི་སྣང་བར་གྱུར་ཏོ། བདག་ཀྱང་དེ་ནས་ཏིང་ངེ་འཛིན་དེ་ལས་ལངས་ནས་འདི་སྙམ་དུ་བསམས་ཏེ། དེ་
བཞིན་གཤེགས་པ་དེ་དག་གང་ནས་བྱོན། དེ་བཞིན་གཤེགས་པ་དེ་དག་གང་དུ་བཞུད་སྙམ་མོ། །དེ་ནས་ཡང་བདག་གིས་འདི་སྙམ་དུ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་ཆོས་
འཕགས་ནི། གཟུངས་ཐོབ་པ། མངོན་པར་ཤེས་པ་ལྔ་དང་ལྡན་པ། སྔོན་གྱི་རྒྱལ་བ་དག་ལ་བགྱི་བ་བགྱིས་པ། དགེ་བའི་རྩ་བ་བསྐྲུན་པ། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་ལ་ཤིན་ཏུ་
བསླབས་པ་ཡིན་ཏེ། དེས་བདག་ལ་དེ་བཞིན་གཤེགས་པ་དེ་དག་གང་ནས་བྱོན་པ་དང༌། དེ་བཞིན་གཤེགས་པ་དེ་དག་གང་དུ་བཞུད་པའི་དོན་འདི་ཇི་ལྟ་བ་བཞིན་དུ་སྟོན་པར་འགྱུར་རོ། །སྙམ་དུ་བསམས་
ཏེ༑ བདག་གིས་དེ་བཞིན་གཤེགས་པའི་སྐུའི་སྒྲ་ཐོས་པ་ལས་ཇི་ལྟར་གདམས་པ་དེ་ལྟར་ཤར་ཕྱོགས་ག་ལ་བ་དེར་མཆིས་ཏེ། མཆིས་ནས་ཀྱང་རྒྱང་རིང་མོ་ཞིག་ནས་བདག་གིས་འཕགས་པ་ཆོས་སྟོན་
པ་མཐོང་སྟེ། མཐོང་མ་ཐག་ཏུ་བདག་ལ་དཔེར་ན། དགེ་སློང་བསམ་གཏན་དང་པོ་ལ་སྙོམས་པར་ཞུགས་པ་རྩེ་གཅིག་པར་ཡིད་ལ་བྱེད་པའི་བདེ་བ་དེ་ལྟ་བུ་སྐྱེས་པར་གྱུར་ཏོ། །རིགས་ཀྱི་བུ། ཁྱོད་ལ་བདག་
༄༅། །དེ་བཞིན་གཤེགས་པ་དེ་དག་གང་ནས་བྱོན། དེ་བཞིན་གཤེགས་པ་དེ་དག་གང་དུ་བཞུད་ཅེས་འདྲི་ན། རིགས་ཀྱི་བུ། ཅི་ནས་བདག་དེ་བཞིན་གཤེགས་པ་དེ་དག་
བྱོན་པ་དང༌། བཞུད་པ་འཚལ་ཅིང༌། དེ་བཞིན་གཤེགས་པ་མཐོང་བ་དང་མི་འབྲལ་བར་འགྱུར་བར་དེ་བཞིན་གཤེགས་པ་དེ་དག་བྱོན་པ་དང༌། བཞུད་པ་བདག་ལ་བཤད་དུ་གསོལ། འཕགས་
པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། རྟག་ཏུ་ངུའི་ལེའུ་ཞེས་བྱ་སྟེ། སུམ་ཅུ་པའོ།། །།དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་
ཆོས་འཕགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས་སྨྲས་སོ། །རིགས་ཀྱི་བུ། དེ་བཞིན་གཤེགས་པ་དེ་དག་ནི། གང་ནས་ཀྱང་མ་བྱོན། གང་དུའང་མ་བཞུད་
ཅིང༌། དེ་བཞིན་ཉིད་ལས་མ་གཡོས་ཏེ། དེ་བཞིན་ཉིད་གང་ཡིན་པ་དེ་ནི། དེ་བཞིན་གཤེགས་པའོ། །རིགས་ཀྱི་བུ། མི་སྐྱེ་བ་ལ་འོང་བའམ་འགྲོ་བ་མེད་དེ། མི་སྐྱེ་བ་གང་ཡིན་པ་དེ་ནི། དེ་བཞིན་
གཤེགས་པའོ། །རིགས་ཀྱི་བུ། ཡང་དག་པའི་མཐའ་ལ་ནི། འོང་བའམ་འགྲོ་བ་ཤེས་པ་མེད་དེ། ཡང་དག་པའི་མཐའ་གང་ཡིན་པ་དེ་ནི། དེ་བཞིན་གཤེགས་པའོ། །རིགས་ཀྱི་བུ། སྟོང་པ་
ཉིད་ལ་འོང་བའམ་འགྲོ་བ་ཤེས་པ་མེད་དེ། སྟོང་པ་ཉིད་གང་ཡིན་པ་དེ་ནི། དེ་བཞིན་གཤེགས་པའོ། །རིགས་ཀྱི་བུ། ཇི་ལྟ་བ་བཞིན་ལ་ནི། འོང་བའམ་འགྲོ་བ་ཤེས་པ་མེད་དེ། ཇི་ལྟ་བ་བཞིན་
གང་ཡིན་པ་དེ་ནི། དེ་བཞིན་གཤེགས་པའོ། །རིགས་ཀྱི་བུ། འདོད་ཆགས་དང་བྲལ་བ་ལ་ནི། འོང་བའམ་འགྲོ་བ་ཤེས་པ་མེད་དེ། འདོད་ཆགས་དང་བྲལ་བ་གང་ཡིན་པ་དེ་ནི། དེ་བཞིན་གཤེགས་
པའོ༑ ༑རིགས་ཀྱི་བུ། འགོག་པ་ལ་ནི། འོང་བའམ་འགྲོ་བ་ཤེས་པ་མེད་དེ། འགོག་པ་གང་ཡིན་པ་དེ་ནི། དེ་བཞིན་གཤེགས་པའོ། །རིགས་ཀྱི་བུ། ནམ་མཁའི་ཁམས་ལ་ནི། འོང་བའམ་འགྲོ་བ་
ཤེས་པ་མེད་དེ། ནམ་མཁའི་ཁམས་གང་ཡིན་པ་དེ་ནི། དེ་བཞིན་གཤེགས་པའོ། །རིགས་ཀྱི་བུ། ཆོས་དེ་དག་ལས་དེ་བཞིན་གཤེགས་པ་གཞན་ན་མེད་དེ། རིགས་ཀྱི་བུ། ཆོས་འདི་དག་གི་དེ་
བཞིན་ཉིད་གང་ཡིན་པ་དང༌། ཆོས་ཐམས་ཅད་ཀྱི་དེ་བཞིན་ཉིད་གང་ཡིན་པ་དང༌། དེ་བཞིན་གཤེགས་པའི་དེ་བཞིན་ཉིད་གང་ཡིན་པ་འདི་དག་ནི། དེ་བཞིན་ཉིད་གཅིག་སྟེ། རིགས་ཀྱི་བུ། དེ་
བཞིན་ཉིད་ལ་ནི། གཉིས་སུ་བྱར་མེད་དོ། །རིགས་ཀྱི་བུ། དེ་བཞིན་ཉིད་གཅིག་སྟེ། འདི་ལྟ་སྟེ། མེད་པའི་ཕྱིར་གཉིས་སམ་གསུམ་དུ་བགྲང་བ་ལས་འདས་པའོ། །རིགས་ཀྱི་བུ། འདི་ལྟ་སྟེ།
དཔེར་ན། སྐྱེས་བུས་སོས་ཀའི་ཟླ་བ་ཐ་མ་ལ་སོས་ཀའི་ཚ་བ་ཉི་མ་གུང་གི་དུས་ལ་བབ་པའི་ཚེ་སྨིག་རྒྱུ་གཡོ་བ་མཐོང་བ་ལ་འདིར་ཆུ་བཏུང་ངོ༌། །སྙམ་ནས་དེ་གང་དུ་ཆུ་མཐོང་བ་དེ་དང་དེར་རྒྱུག་ན། རིགས་
ཀྱི་བུ༑ དེ་ཇི་སྙམ་དུ་སེམས། ཤར་ཕྱོགས་ཀྱི་རྒྱ་མཚོ་ཆེན་པོའམ། ལྷོ་ཕྱོགས་སམ། ནུབ་ཕྱོགས་སམ། བྱང་ཕྱོགས་ལས་ཆུ་དེ་གང་ནས་འོངས། ཆུ་དེ་གང་དུ་སོང༌། རྟག་ཏུ་ངུས་སྨྲས་པ། རིགས་
༄༅། །ཀྱི་བུ༑ སྨིག་རྒྱུ་ལ་ཆུ་མ་མཆིས་ན། འོང་བའམ་འགྲོ་བ་ཤེས་པ་ལྟ་ག་ལ་མཆིས་ཏེ། རིགས་ཀྱི་བུ། སྐྱེས་བུ་དེ་ཉི་མས་གདུངས་ཤིང་བྱིས་པའི་རང་བཞིན་ཅན། ཤེས་རབ་
འཆལ་བའི་རང་བཞིན་ཅན་གྱིས་སྨིག་རྒྱུ་གཡོ་བ་མཐོང་ནས་ཆུ་མ་མཆིས་པ་ལ་ཆུར་འདུ་ཤེས་སྐྱེས་ཀྱི། ཡང་དེ་ལ་ཆུ་ནི། རང་བཞིན་གྱིས་མ་མཆིས་སོ། །ཆོས་འཕགས་ཀྱིས་སྨྲས་པ། རིགས་ཀྱི་བུ།
དེ་དེ་བཞིན་ནོ། །དེ་དེ་བཞིན་ཏེ། དེ་བཞིན་དུ་རིགས་ཀྱི་བུ། གང་སུ་དག་དེ་བཞིན་གཤེགས་པ་ལ་གཟུགས་སམ་སྒྲར་མངོན་པར་ཆགས་པ་དེ་དག་ནི། དེ་བཞིན་གཤེགས་པ་ལ་བྱོན་པའམ་བཞུད་
པར་རྟོག་གོ། །གང་དེ་བཞིན་གཤེགས་པ་ལ་བྱོན་པའམ་བཞུད་པར་རྟོག་པ་དེ་དག་ཐམས་ཅད་ནི། བྱིས་པའི་རང་བཞིན་ཅན། ཤེས་རབ་འཆལ་བའི་རང་བཞིན་ཅན་ཞེས་བྱ་སྟེ། དཔེར་ན། སྐྱེས་
བུ་དེ་ཉིད་ཆུ་མེད་པ་ལ་ཆུར་འདུ་ཤེས་བསྐྱེད་པ་བཞིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི། གཟུགས་ཀྱི་སྐུར་མི་ལྟ་སྟེ། དེ་བཞིན་གཤེགས་པ་ནི། ཆོས་ཉིད་ཀྱི་སྐུའོ། །རིགས་
ཀྱི་བུ༑ ཆོས་ཉིད་ནི། འོང་བའམ་འགྲོ་བ་མེད་དེ། །རིགས་ཀྱི་བུ། དེ་བཞིན་དུ་དེ་བཞིན་གཤེགས་པ་རྣམས་ལ་བྱོན་པའམ་བཞུད་པ་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། སྒྱུ་མ་བྱེད་པས་
སྤྲུལ་པའི་གླང་པོ་ཆེའི་ཚོགས་སམ། རྟའི་ཚོགས་སམ། ཤིང་རྟའི་ཚོགས་སམ། དཔུང་བུ་ཆུང་གི་ཚོགས་ལ་འོང་བའམ་འགྲོ་བ་མེད་དོ། །རིགས་ཀྱི་བུ། དེ་བཞིན་དུ་དེ་བཞིན་གཤེགས་པའི་སྐུ་
ལ་ཡང་བྱོན་པའམ་བཞུད་པ་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། སྐྱེས་བུ་གཉིད་ཀྱིས་ལོག་པའི་རྨི་ལམ་དུ་དེ་བཞིན་གཤེགས་པ་གཅིག་གམ། གཉིས་སམ། གསུམ་མམ། བཞིའམ།
ལྔའམ༑ དྲུག་གམ། བདུན་ནམ། བརྒྱད་དམ། དགུའམ། བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུའམ། བརྒྱའམ། སྟོང་ངམ། བརྒྱ་སྟོང་ངམ། དེ་ལས་ལྷག་པ་ཞིག་མཐོང་
བ་ལས་སད་པ་དང༌། དེས་དེ་བཞིན་གཤེགས་པ་གཅིག་ཀྱང་མ་མཐོང་ན། རིགས་ཀྱི་བུ། དེ་ཇི་སྙམ་དུ་སེམས། དེ་བཞིན་གཤེགས་པ་དེ་དག་གང་ནས་བྱོན། དེ་བཞིན་གཤེགས་པ་དེ་དག་གང་དུ་
བཞུད༑ རྟག་ཏུ་ངུས་སྨྲས་པ། རིགས་ཀྱི་བུ། རྨི་ལམ་ལ་ཆོས་གང་ཡང་ཡོངས་སུ་གྲུབ་པར་ཤེས་པ་མི་གདའོ། །རྨི་ལམ་ནི། རྫུན་ཏེ། ཡང་དག་པ་མ་ལགས་སོ། །ཆོས་འཕགས་ཀྱིས་སྨྲས་པ། རིགས་
ཀྱི་བུ༑ དེ་དེ་བཞིན་ཏེ། ཆོས་ཐམས་ཅད་ནི། བཅོམ་ལྡན་འདས་ཀྱིས་རྨི་ལམ་ལྟ་བུའོ། །ཞེས་གསུངས་སོ། །རིགས་ཀྱི་བུ། གང་སུ་དག་དེ་བཞིན་གཤེགས་པས་ཆོས་ཐམས་ཅད་རྨི་ལམ་ལྟ་བུར་ཡང་དག་
པ་ཇི་ལྟ་བ་བཞིན་དུ་བསྟན་པ་མི་ཤེས་པ་དེ་དག་ནི། དེ་བཞིན་གཤེགས་པ་ལ་མིང་གི་སྐུ་དང༌། གཟུགས་ཀྱི་སྐུར་མངོན་པར་ཞེན་པར་བྱེད་དེ། དེ་ལྟར་ཆོས་ཉིད་མི་ཤེས་པས་དེ་བཞིན་གཤེགས་པ་
ལ་བྱོན་པ་དང༌། བཞུད་པར་རྟོག་གོ། །གང་དག་དེ་བཞིན་གཤེགས་པ་ལ་བྱོན་པ་དང༌། བཞུད་པར་རྟོག་པའི་བྱིས་པ་སོ་སོའི་སྐྱེ་བོ་དེ་དག་ཐམས་ཅད་ནི། འཁོར་བ་འགྲོ་བ་དྲུག་པོ་འདི་དག་ཐམས་ཅད་དུ་
༄༅། །དོང་བ་འདོང་བ་འདོང་བར་འགྱུར་བའོ། །དེ་དག་ཐམས་ཅད་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལས་རྒྱང་རིང་དུ་གྱུར་པའོ། །དེ་དག་ཐམས་ཅད་ནི། སངས་རྒྱས་ཀྱི་ཆོས་ལས་
རྒྱང་རིང་དུ་གྱུར་པའོ། །རིགས་ཀྱི་བུ། ཡང་གང་དག་ཆོས་ཐམས་ཅད་ནི། རྨི་ལམ་ལྟ་བུ་ལ་དེ་བཞིན་གཤེགས་པས་ཆོས་ཐམས་ཅད་རྨི་ལམ་ལྟ་བུའོ། །ཞེས་ཡང་དག་པ་ཇི་ལྟ་བ་བཞིན་དུ་བསྟན་པ་
ཤེས་པ་དེ་དག་ནི། ཆོས་གང་ལའང་འོང་བའམ། འགྲོ་བའམ། སྐྱེ་བའམ། འགག་པར་མི་རྟོག་གོ །གང་དག་ཆོས་གང་ལའང་འོང་བའམ། འགྲོ་བའམ། སྐྱེ་བའམ། འགག་པར་མི་རྟོག་པ་དེ་
དག་ནི༑ དེ་བཞིན་གཤེགས་པའི་ཆོས་ཉིད་རབ་ཏུ་ཤེས་སོ། །གང་དག་དེ་བཞིན་གཤེགས་པའི་ཆོས་ཉིད་རབ་ཏུ་ཤེས་པ་དེ་དག་ནི། དེ་བཞིན་གཤེགས་པ་ལ་བྱོན་པའམ། བཞུད་པར་མི་
རྟོག་གོ །གང་དག་དེ་བཞིན་གཤེགས་པའི་ཆོས་ཉིད་དེ་ལྟ་བུ་རབ་ཏུ་ཤེས་པ་དེ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཉེ་བར་སྤྱོད་པ་སྟེ། དེ་ཤེས་རབ་ཀྱི་ཕ་རོལ་ཏུ་ཕྱིན་པ་
ལ་སྤྱོད་པའོ། །བཅོམ་ལྡན་འདས་ཀྱི་ཉན་ཐོས་དེ་དག་ནི། ཡུལ་འཁོར་གྱི་བསོད་སྙོམས་དོན་ཡོད་པར་ཟ་བ་སྟེ། དེ་དང་དེ་དག་ནི། འཇིག་རྟེན་གྱི་སྦྱིན་གནས་སོ། །རིགས་ཀྱི་བུ། འདི་ལྟ་སྟེ། དཔེར་
ན༑ རྒྱ་མཚོ་ཆེན་པོའི་ནང་ན་རིན་པོ་ཆེ་དག་ཡོད་པ་ནི། ཤར་ཕྱོགས་ནས་ཀྱང་མ་འོངས། ལྷོ་ནས་མ་ཡིན། ནུབ་ནས་མ་ཡིན། བྱང་ནས་མ་ཡིན། ཕྱོགས་མཚམས་ནས་མ་ཡིན། སྟེང་དང་འོག་
ནས་མ་ཡིན། ཕྱོགས་བཅུ་གང་ནས་ཀྱང་མ་འོངས་མོད་ཀྱི། འོན་ཀྱང་སེམས་ཅན་དག་གི་དགེ་བའི་རྩ་བ་ལ་བརྟེན་ནས་རྒྱ་མཚོ་ཆེན་པོའི་ནང་ནས་རིན་པོ་ཆེ་དག་འབྱུང་སྟེ། དེ་དག་ཀྱང་རྒྱུ་མེད་པར་
འབྱུང་བ་མ་ཡིན་གྱི། རྒྱུ་དང༌། རྐྱེན་དང༌། གཞི་ལ་རག་ལས་པ་ཡིན་ཏེ། བརྟེན་ནས་འབྱུང་ངོ༌། །རིན་པོ་ཆེ་དེ་དག་འགག་པའང་ཕྱོགས་བཅུའི་འཇིག་རྟེན་གང་དུའང་མི་འཕོ་མོད་ཀྱི། འོན་ཀྱང་རྐྱེན་
དེ་དག་ཡོད་ན། རིན་པོ་ཆེ་དེ་དག་རབ་ཏུ་འབྱེད་དོ། །རྐྱེན་དེ་དག་མེད་ན། རིན་པོ་ཆེ་དེ་དག་རབ་ཏུ་དབྱེ་བའང་མེད་པར་འགྱུར་རོ། །རིགས་ཀྱི་བུ། དེ་བཞིན་དུ་དེ་བཞིན་གཤེགས་པ་དེ་དག་གི་སྐུ་ཡོངས་སུ་
གྲུབ་པའང་ཕྱོགས་བཅུའི་འཇིག་རྟེན་གང་ནས་ཀྱང་མ་བྱོན། ཕྱོགས་བཅུའི་འཇིག་རྟེན་གང་དུའང་མ་བཞུད་དོ། །སངས་རྒྱས་བཅོམ་ལྡན་འདས་དེ་དག་གི་སྐུ་རྒྱུ་མེད་པའང་མ་ཡིན་ཏེ། སྔོན་གྱི་
སྤྱད་པས་ཡོངས་སུ་གྲུབ་པ་ཡིན་པས་རྒྱུ་ལ་རག་ལས་པ། རྐྱེན་ལ་རག་ལས་པ། སྔོན་གྱི་ཕྲིན་ལས་རྣམ་པར་སྨིན་པ་ལས་བྱུང་བ་ཡིན་ཞིང༌། དེ་ནི། ཕྱོགས་བཅུའི་འཇིག་རྟེན་གྱི་ཁམས་གང་
ནའང་ཡོད་པ་མ་ཡིན་ནོ། །འོན་ཀྱང་རྐྱེན་རྣམས་ཡོད་ན། སྐུ་མངོན་པར་འགྲུབ་པར་འགྱུར་ཏེ། རྐྱེན་དེ་དག་མེད་ན། སྐུ་མངོན་པར་གྲུབ་པའང་མི་སྣང་ངོ༌། །རིགས་ཀྱི་བུ། འདི་ལྟ་སྟེ། དཔེར་ན།
པི་ཝང་གི་སྒྲ་བྱུང་བའང་གང་ནས་ཀྱང་མ་འོངས། འགགས་པའང་གང་དུའང་མི་འགྲོ་།གང་ནའང་མི་འཕོ་སྟེ། རྒྱུ་དང་རྐྱེན་ཚོགས་པ་ལ་བརྟེན་ནས་བྱུང་བ། རྒྱུ་ལ་རག་ལས་པ། རྐྱེན་ལ་རག་ལས་པ།
༄༅། །འདི་ལྟ་སྟེ། པི་ཝང་གི་ཁོག་པ་ལ་བརྟེན། པགས་པ་ལ་བརྟེན། རྒྱུད་ལ་བརྟེན། ཡུ་བ་ལ་བརྟེན། ཤིང་བུ་ལ་བརྟེན། རྒྱུད་རྟེན་ལ་བརྟེན། མི་དེ་ལས་སྐྱེས་པའི་རྩོལ་
བ་ལ་བརྟེན་ནས་འདི་ལྟར་པི་ཝང་དེ་ལས་སྒྲ་བྱུང་སྟེ། རྒྱུ་ལ་རག་ལས་པ། རྐྱེན་ལ་རག་ལས་པའི་སྒྲ་དེའང་པི་ཝང་གི་ཁོག་པ་ལས་མ་བྱུང༌། པགས་པ་ལས་མ་བྱུང༌། རྒྱུད་ལས་མ་བྱུང༌། ཡུ་བ་
ལས་མ་བྱུང༌། ཤིང་བུ་ལས་མ་བྱུང༌། རྒྱུད་རྟེན་ལས་མ་བྱུང༌། མི་དེ་ལས་སྐྱེས་པའི་རྩོལ་བ་ལས་སྒྲ་མ་བྱུང་མོད་ཀྱི། འོན་ཀྱང་དེ་དག་ཐམས་ཅད་འདུས་པ་ལས་ཀྱང་སྒྲར་གདགས་སོ། །སྒྲ་
དེ་འགགས་པའང་གང་དུའང་མི་འགྲོའོ། །དེ་བཞིན་དུ་རིགས་ཀྱི་བུ། སངས་རྒྱས་བཅོམ་ལྡན་འདས་རྣམས་ཀྱི་སྐུ་ཡོངས་སུ་འགྲུབ་པའང་རྒྱུ་ལ་རག་ལས་པ། རྐྱེན་ལ་རག་ལས་པ། དགེ་
བའི་རྩ་བའི་སྦྱོར་བ་དུ་མས་ཡོངས་སུ་གྲུབ་པ་ཡིན་ཏེ། རྒྱུ་གཅིག་གིས་མ་ཡིན། རྐྱེན་གཅིག་གིས་མ་ཡིན། དགེ་བའི་རྩ་བ་གཅིག་གིས་སངས་རྒྱས་ཀྱི་སྐུ་རབ་ཏུ་དབྱེ་བ་མ་ཡིན་ཏེ། རྒྱུ་མེད་
པ་ཡང་མ་ཡིན་ནོ། །རྒྱུ་དང་རྐྱེན་མང་པོ་ཚོགས་པ་ལས་བྱུང་བ་ཡིན་ཏེ། དེ་ནི། གང་ནས་ཀྱང་མ་བྱོན་ཏོ། །རྒྱུ་དང་རྐྱེན་ཚོགས་པ་མེད་ཀྱང་གང་དུའང་མི་བཞུད་དེ། རིགས་ཀྱི་བུ། ཁྱོད་ཀྱིས་དེ་བཞིན་
གཤེགས་པ་དེ་དག་བྱོན་པ་དང༌། བཞུད་པ་དེ་ལྟར་བལྟའོ། །རིགས་ཀྱི་བུ། ཆོས་ཐམས་ཅད་ཀྱི་ཆོས་ཉིད་ཀྱང་ཁྱོད་ཀྱིས་འདི་བཞིན་དུ་ཁོང་དུ་ཆུད་པར་གྱིས་ཤིག །རིགས་ཀྱི་བུ། ཁྱོད་གང་ཚུན་
ཆད་དེ་ལྟར་དེ་བཞིན་གཤེགས་པ་དང༌། ཆོས་ཐམས་ཅད་སྐྱེ་བ་མེད་པ་དང༌། འགག་པ་མེད་པར་ཤེས་པ་དེ་ཚུན་ཆད་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་ཞིང༌།
ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་ལ་ངེས་པར་སྤྱོད་པར་འགྱུར་རོ། །ཡང་དེ་བཞིན་གཤེགས་པ་རྣམས་བྱོན་པ་དང༌། བཞུད་པ་མེད་པ་འདི་བཤད་པའི་ཚེ་ས་གཡོ་བ་ཆེན་པོ་
བྱུང་སྟེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ལྟས་ཆེན་པོ་བཅོ་བརྒྱད་དང༌། རྣམ་པ་དྲུག་ཏུ་གཡོས་པ་འདི་ལྟ་སྟེ། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ། གཡོས་
རབ་ཏུ་གཡོས། ཀུན་ཏུ་རབ་ཏུ་གཡོས། ལྡེག །རབ་ཏུ་ལྡེག །ཀུན་ཏུ་རབ་ཏུ་ལྡེག །འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས། ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ།
འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར་ཏེ། བདུད་ཀྱི་གནས་ཐམས་ཅད་ཀྱང་དཀྲོགས་ཤིང་སྤ་བཀོང་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རྩྭ་དང༌། ཤིང་གེལ་
བ་དང༌། སྨན་དང༌། ནགས་ཚལ་ཇི་སྙེད་ཡོད་པ་དེ་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ག་ལ་བ་དེ་ལོགས་སུ་རབ་ཏུ་འདུད་པར་གྱུར་ཏོ། །དུས་མ་ཡིན་པའི་མེ་ཏོག་
དག་ཀྱང་སྟེང་གི་བར་སྣང་ལས་འཐོར་ཞིང་མེ་ཏོག་གི་ཆར་ཆེན་པོ་དག་ཀྱང་བབ་བོ། །ལྷ་རྣམས་ཀྱི་དབང་པོ་བརྒྱ་བྱིན་དང༌། རྒྱལ་པོ་ཆེན་པོ་བཞི་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་
༄༅། །འཕགས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དག་གི་ཕྱོགས་སུ་ལྷའི་ཙནྡན་གྱི་ཕྱེ་མ་དང༌། ལྷའི་མེ་ཏོག་དག་གིས་འཐོར། མངོན་པར་འཐོར།
མངོན་པར་རབ་ཏུ་འཐོར་ཞིང་ཚིག་འདི་སྐད་ཅེས། རིགས་ཀྱི་བུ། ལེགས་སོ། ལེགས་སོ། །རིགས་ཀྱི་བུ། ཁྱོད་ཀྱི་མཐུས་དེང་བདག་ཅག་གིས་ཀྱང་སེམས་ཅན་གང་འཇིག་ཚོགས་ལ་ལྟ་བའི་ས་ལ་
གནས་པ། ལྟ་བ་དང་བཅས་པ་ཐམས་ཅད་ལ་མངོན་པར་ཞེན་པའི་འཇིག་རྟེན་ཐམས་ཅད་དང་མི་མཐུན་པ། དོན་དམ་པ་ལས་བྱུང་བའི་གཏམ་བསྟན་པ་ཐོས་སོ། །ཞེས་ཟེར་རོ། །དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་ཆོས་འཕགས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་འདི་སྐད་ཅེས་སྨྲས་སོ། །རིགས་ཀྱི་བུ། ས་ཆེན་པོ་གཡོས་པ་འཇིག་རྟེན་དུ་བྱུང་བ་འདིའི་རྒྱུ་གང་
ལགས༑ རྐྱེན་གང་ལགས། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱིས་སྨྲས་པ། རིགས་ཀྱི་བུ། དེ་བཞིན་གཤེགས་པ་རྣམས་མི་བྱོན། མི་བཞུད་པ་བསྟན་པ་འདི་ཁྱོད་
ཀྱིས་དྲིས་ཏེ་བདག་གིས་བསྟན་པས་སྲོག་ཆགས་སྟོང་ཕྲག་བརྒྱད་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་པ་དང༌། སྲོག་ཆགས་ཁྲག་ཁྲིག་ཕྲག་བརྒྱད་ཅུ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་སེམས་བསྐྱེད་པ་དང༌། སྲོག་ཆགས་དྲུག་ཁྲི་བཞི་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་མེད་པ་རྣམ་པར་དག་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་
པོ་རྟག་ཏུ་ངུ་དགའ་བ་དང༌། རངས་པ་མཆོག་ཏུ་རྒྱ་ཆེན་པོ་དང་ལྡན་པར་གྱུར་ཏེ། གང་བདག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། དེ་བཞིན་གཤེགས་པ་རྣམས་བྱོན་པ་དང༌། བཞུད་པ་མེད་པའི་
བསྟན་པ་འདི་དྲིས་པས། སེམས་ཅན་འདི་སྙེད་ཅིག་གི་དོན་བྱས་པར་གྱུར་པ་ནི། བདག་གིས་རྙེད་པ་མཆོག་ཏུ་ལེགས་པར་རྙེད་དོ། །འདི་ཉིད་ཀྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཡོངས་སུ་འགྲུབ་པར་བྱ་བའི་དགེ་བའི་རྩ་བ་མཆོག་ཐོབ་པར་གྱུར་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བདག་སླར་ཡང་ཐེ་ཚོམ་མི་འཇུག་གོ །བདག་ནི། ཐེ་ཚོམ་མེད་པར་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ། །སྙམ་པ་དང༌། དེ་དགའ་བ་དང༌། རངས་པ་དེ་དང་ལྡན་པས་ཏ་ལ་བདུན་ཙམ་དུ་ནམ་མཁའ་ལ་འཕགས་ནས་ཏ་ལ་བདུན་
ཙམ་ན་འདུག་སྟེ། འདི་ལྟར་བདག་ནམ་མཁའ་ལ་འདུག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་བཀུར་སྟི་བྱའོ། །སྙམ་དུ་སེམས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་
བྱིན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་མངོན་པར་འཕགས་པ་མཐོང་སྟེ་དེའི་སེམས་སེམས་ཀྱིས་ཤེས་ནས་དེ་ལ་ལྷའི་མེ་ཏོག་མནྡཱ་ར་བ་དག་བྱིན་ཏེ་འདི་སྐད་དུ། རིགས་ཀྱི་
བུ༑ ཁྱོད་ཀྱིས་ལྷའི་མེ་ཏོག་འདི་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་བཀུར་སྟི་བྱེད་པས་བཀུར་སྟིར་གྱིས་ཤིག །རིགས་ཀྱི་བུ། འདི་ནི། ངས་ཁྱོད་ཡོངས་སུ་བཟུང་བ་
༄༅། །ཡིན་ཏེ༑ རིགས་ཀྱི་བུ། ཁྱོད་ཀྱི་མཐུས་དེང་སྲོག་ཆགས་སྟོང་ཕྲག་མང་པོའི་དོན་བྱས་ཏེ། རིགས་ཀྱི་བུ། གང་སེམས་ཅན་ཐམས་ཅད་ཀྱི་ཕྱིར་ཇི་ལྟར་ཁྱོད་སྤྲོ་བར་
བྱེད་པ་དེ་ལྟར་བསྐལ་པ་གཞལ་དུ་མེད་གྲངས་མེད་པར་སྤྲོ་བར་བྱེད་ཅིང༌། ཁུར་ཆེན་པོ་ཁྱེར་བར་བྱེད་པའི་སེམས་ཅན་དེ་དག་ནི། རྙེད་པར་དཀའོ། །ཞེས་སྨྲས་སོ། །དེ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་རྟག་ཏུ་ངུས་ལྷ་རྣམས་ཀྱི་དབང་པོ་བརྒྱ་བྱིན་གྱི་དྲུང་ནས་མེ་ཏོག་མནྡཱ་ར་བ་དེ་དག་བླངས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་གཏོར། མངོན་པར་
གཏོར༑ མངོན་པར་རབ་ཏུ་གཏོར་ནས་བདག་གི་ལུས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་མངོན་པར་བཀབ་སྟེ་ཚིག་འདི་སྐད་ཅེས། རིགས་ཀྱི་བུ། དེང་སླན་
ཆད་ཁྱོད་ཀྱི་རིམ་གྲོ་དང༌། ཞམ་འབྲིང་བགྱི་བའི་སླད་དུ་བདག་གི་ལུས་ཁྱོད་ལ་འབུལ་ལོ། །ཞེས་སྨྲས་ཏེ། དེས་བདག་གི་ལུས་ཕུལ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་
ཀྱི་མདུན་དུ་ཐལ་མོ་སྦྱར་ཏེ་འདུག་གོ །དེ་ནས་ཚོང་དཔོན་གྱི་བུ་མོ་དེ་དང༌། བུ་མོ་ལྔ་བརྒྱ་པོ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས། རིགས་ཀྱི་བུ། བདག་
ཅག་ཀྱང་ཁྱོད་ལ་ལུས་འབུལ་གྱི། བདག་ཅག་ཀྱང་དགེ་བའི་རྩ་བ་འདིས་ཆོས་དེ་དག་ཐོབ་པར་གྱུར་ཅིག །ཁྱོད་ཉིད་དང་ལྷན་ཅིག་ཏུ་ཡང་དང་ཡང་སངས་རྒྱས་བཅོམ་ལྡན་འདས་རྣམས་དང༌། བྱང་
ཆུབ་སེམས་དཔའ་རྣམས་བཀུར་སྟིར་བགྱི། བླ་མར་བགྱི། དེ་དག་དང་ཉེ་བར་གྱུར་པར་བགྱིའོ། །ཞེས་སྨྲས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་
ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱ་ལ་འདི་སྐད་ཅེས་སྨྲས་སོ། །བུ་མོ་དག །གལ་ཏེ་ཁྱེད་ང་ལ་ལྷག་པའི་བསམ་པས་གནས་པར་བྱེད་ན། ང་ལ་ལྷག་པའི་བསམ་པས་བདག་ཉིད་བྱིན་ཅིག་
དང་དེ་ལྟར་ན་བུ་མོ་ཁྱེད་ངས་བླང་ངོ༌། །བུ་མོ་དེ་དག་གིས་སྨྲས་པ། ཁྱོད་ལ་ལྷག་པའི་བསམ་པ་ཐག་པ་ནས་ཁྱོད་ཀྱི་རྗེས་སུ་མཐུན་པར་འཇུག་གོ །ཁྱོད་ལ་ལྷག་པའི་བསམ་པས་ཅི་དང་ཅི་འདོད་པར་བྱ་བར་
བདག་ཉིད་འབུལ་ལོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱ་དེ་དག་རྒྱན་ཐམས་ཅད་ཀྱིས་བརྒྱན་ཏེ། ཤིང་རྟ་ལྔ་བརྒྱའང་བརྒྱན་ནས་
ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་རིམ་གྲོ་དང༌། ཞམ་འབྲིང་བྱ་བའི་ཕྱིར་ཕུལ་ཏེ། རིགས་ཀྱི་བུ། བདག་ནི། གཡོག་མོ་འདི་དག་འབུལ་ཞིང་ཤིང་རྟ་ལྔ་བརྒྱ་
འདི་དག་ཀྱང་ཡོངས་སུ་ལོངས་སྤྱད་པའི་ཕྱིར་ཁྱོད་ལ་འབུལ་ལོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་རིགས་ཀྱི་བུ་དེ་ལ་ལེགས་སོ། །ཞེས་བྱ་བ་བྱིན་ཏེ། རིགས་ཀྱི་བུ། ལེགས་སོ། ལེགས་སོ། །
རིགས་ཀྱི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་གིས་འབྱོར་པ་ཐམས་ཅད་ཡོངས་སུ་གཏང་བར་བྱའོ། །ཡོངས་སུ་གཏོང་བའི་སེམས་དེ་ལྟ་བུས་བྱང་ཆུབ་སེམས་དཔའ་སེམས་
༄༅། །དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་ལྟར་ན། ཆོས་སྨྲ་བ་དག་ལ་མཆོད་པ་བྱས་ནས་ཤེས་རབ་
ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་ཉན་ནུས་ཏེ། རིགས་ཀྱི་བུ། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་ཀྱང་སྔོན་བྱང་ཆུབ་སེམས་
དཔའི་སྤྱད་པ་སྤྱོད་པ་ན་འདི་ལྟ་བུའི་ཚུལ་དང༌། འདི་ལྟ་བུའི་གཏོང་བ་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་དང༌།
ཐབས་མཁས་པ་ཡོངས་སུ་དྲིས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱིས་ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱ་པོ་དེ་དག་དང༌། ཤིང་རྟ་ལྔ་བརྒྱ་པོ་དེ་
དག་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུའི་དགེ་བའི་རྩ་བ་ཡོངས་སུ་བསྐང་བའི་ཕྱིར་བླངས་ཏེ་བླངས་ནས་རིགས་ཀྱི་བུ་རྟག་ཏུ་ངུ་ལ་སླར་བྱིན་ནོ། །དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་ཆོས་འཕགས་སྟན་ལས་ལངས་ཏེ་བདག་གི་ཁྱིམ་དུ་ཞུགས་པ་དང་ཉི་མ་ནུབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་འདི་སྙམ་དུ་སེམས་པར་
གྱུར་ཏེ༑ འདི་ལྟར་བདག་ཆོས་འདོད་པའི་ཕྱིར་འོངས་ལ། འདུག་པའམ་ཉལ་བར་བྱེད་པ་ནི། བདག་གི་མི་ཆ་ལ། འདི་ནི། མ་ལེགས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་
འཕགས་བདག་གཟུང་བའི་ཕྱིར་འདི་ལྟ་སྟེ། ཆོས་སྟོན་དུ་ཕྱིར་མ་བྱུང་གི་བར་དུ་བདག་འགྲེང་བ་དང༌། འཆག་པའི་སྤྱོད་ལམ་གཉིས་ཀྱིས་དུས་འདའ་བར་བྱའོ། །ཞེས་སེམས་པར་གྱུར་ཏོ། །དེ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལོ་བདུན་གྱི་བར་དུ་ཏིང་ངེ་འཛིན་གཅིག་ལ་སྙོམས་པར་ཞུགས་པར་གྱུར་ཅིང༌། བྱང་ཆུབ་སེམས་དཔའི་ཏིང་ངེ་འཛིན་སྟོང་ཕྲག་གཞལ་དུ་
མེད་གྲངས་མེད་པ་དག་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་ལས་བྱུང་བ་ལ་གནས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུའང་ལོ་བདུན་གྱི་བར་
དུ་གཉིད་དང༌། རྨུགས་པ་མེད་པར་སྤྱོད་ལམ་རྣམ་པ་གཉིས་ཀྱིས་དུས་འདའ་བར་བྱེད་དེ། ལོ་བདུན་གྱི་བར་དུ་འདོད་པའི་རྟོག་པ་མ་བྱུང༌། གནོད་སེམས་ཀྱི་རྟོག་པ་མ་བྱུང༌། རྣམ་པར་འཚེ་བའི་རྟོག་པ་མ་
བྱུང༌། རོ་ལ་བརྐམ་པ་མ་ཡིན། སེམས་ཀྱི་རྣམ་པར་རྟོག་པ་མ་བྱུང་སྟེ། གཞན་དུ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཏིང་ངེ་འཛིན་ལས་ནམ་ལྡང་བར་འགྱུར། བདག་
ཅག་གིས་ཀྱང་ཁྲི་གང་ལ་རིགས་ཀྱི་བུ་དེ་འདུག་ནས་ཆོས་སྟོན་པར་འགྱུར་བ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱི་ཆོས་ཀྱི་ཁྲི་བཤམས་ནས་བདག་གིས་ས་ཕྱོགས་འདི་ཆག་ཆག་
མ་བཏབ་ཀྱི། ས་ཕྱོགས་གང་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་མཁས་པ་རབ་ཏུ་སྟོན་པ་འགྱུར་བ་དེར་ལེགས་པར་བྱུག་པར་བྱ།
༄༅། །མེ་ཏོག་སྣ་ཚོགས་མངོན་པར་དགྲམ་མོ། སྙམ་མོ། །ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱ་པོ་དེ་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུའི་
རྗེས་སུ་སློབ་ཅིང་སྤྱོད་ལམ་གཉིས་ཀྱིས་དུས་འདའ་བར་བྱེད་དེ། བྱ་བ་ཐམས་ཅད་ཀྱང་དེའི་རྗེས་སུ་འཇུག་གོ །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་ལྷའི་སྒྲ་དག་ལས་
བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ད་སྟེ་ཞག་བདུན་ན་ཏིང་ངེ་འཛིན་འདི་ལས་ལྡང་སྟེ་ལངས་ནས་གྲོང་ཁྱེར་གྱི་དབུས་སུ་འདུག་སྟེ་ཆོས་སྟོན་པར་འགྱུར་རོ། །ཞེས་
ཐོས་སོ༑ ༑དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་ལྷའི་སྒྲ་དེ་ཐོས་པ་དང༌། དགའ་མགུ་ཡིད་རངས། རབ་ཏུ་དགའ་མགུ་ཞིང་བདེ་བ་དང་ཡིད་བདེ་བ་སྐྱེས་ཏེ་ཚོང་དཔོན་གྱི་བུ་
མོ་ལ་སོགས་པ་བུ་མོ་ལྔ་བརྒྱ་དང་ལྷན་ཅིག་ཏུ་ས་ཕྱོགས་དེ་ཕྱགས་[*PHYOGS?] ནས་ཆོས་ཀྱི་ཁྲི་རིན་པོ་ཆེ་སྣ་བདུན་གྱི་རང་བཞིན་བཤམས་སོ། །དེ་ནས་བུ་མོ་དེ་དག་གིས་རང་རང་གི་བླ་གོས་ལུས་ལས་ཕུད་དེ་
བླ་གོས་ལྔ་བརྒྱ་པོ་དེ་དག་སྟན་གང་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་འདུག་ནས་ཆོས་སྟོན་པར་འགྱུར་བ་དེར་བཏིང་ངོ༌། །དེ་ལྟར་བྱང་ཆུབ་སེམས་དཔའ་སེམས་དཔའ་
ཆེན་པོ་ཆོས་འཕགས་ཀྱི་ཆོས་ཀྱི་སྟན་བཤམས་པ་ལ་བུ་མོ་དེ་དག་ཐམས་ཅད་དགའ་མགུ་ཡིད་རངས། རབ་ཏུ་དགའ་ཞིང་མགུ་བ་དང་ཡིད་བདེ་བ་སྐྱེས་པར་གྱུར་ཏོ། །དེ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་རྟག་ཏུ་ངུས་ཕྱོགས་དེར་ཆག་ཆག་གདབ་པར་འདོད་ན། ཅི་ནས་ཀྱང་བདུད་སྡིག་ཅན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དེ་ཆུ་མ་རྙེད་ནས་སེམས་མི་
དགའ་ཞིང་སྡུག་བསྔལ་ཏེ་ཡིད་མི་བདེ་བར་གྱུར་ཅིང་སེམས་གཞན་དུ་འགྱུར་བ་དང༌། གང་གིས་དེའི་དགེ་བའི་རྩ་བ་ནུབ་པར་འགྱུར་བ་དང༌། མཆོད་པ་དེའང་མི་མཛེས་པར་བྱ་བའི་ཕྱིར་གང་གིས་
ས་ཕྱོགས་དེར་ཆག་ཆག་འདེབས་པའི་ཆུ་དེ་ཐམས་ཅད་ཀྱང་མི་སྣང་བ་ཉིད་དུ་བྱས་པས་ཀུན་ཏུ་ཆུ་བཙལ་ན་ཆུ་མ་རྙེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་འདི་སྙམ་དུ། མ་ལ་བདག་
གི་ལུས་ཕུག་ལ་ཁྲག་གིས་ས་ཕྱོགས་འདི་ཆག་ཆག་གདབ་བོ། །དེ་ཅིའི་ཕྱིར་ཞེ་ན། ས་ཕྱོགས་འདི་ནི། རྡུལ་ཆེ་སྟེ། ས་ཕྱོགས་འདི་ནས་རྡུལ་གྱི་ཁམས་བྱུང་བས་བྱང་ཆུབ་སེམས་དཔའ་སེམས་
དཔའ་ཆེན་པོ་ཆོས་འཕགས་ཀྱི་ལུས་ལ་ཕོག་ན་མི་རུང་གི །བདག་གི་ལུས་གདོན་མི་ཟ་བར་འཇིག་པའི་ཆོས་ཅན་འདིས་ཅི་ཞིག་བྱ། བདག་གི་ལུས་འདི་ལྟ་བུའི་བྱ་བ་ལ་ཞིག་པ་ནི། བླའི། ནུས་
བ་མེད་པའི་བྱ་བ་ལ་འདོད་པའི་རྒྱུ་དང༌། འདོད་པའི་གཞིས་ཡང་དང་ཡང་དུ་འཁོར་བར་འཁོར་ཞིང་བདག་གི་ལུས་སྟོང་ཕྲག་མང་པོ་དེ་ལྟ་བུའི་གནས་སུ་ཞིག་པ་ནི། འདི་ལྟ་བུའི་གནས་སམ། ཆོས་
ཡོངས་སུ་གཟུང་བའི་ཕྱིར་ནི། མ་ཡིན་ཏེ། འདོད་པ་དེ་ལྟ་བུའི་ཆོས་ཅན་ལ་ཞིག་པ་ཡིན་ནོ། །སྙམ་དུ་བསམས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་དེ་ལྟར་བསམས་
༄༅། །ནས་མཚོན་རྣོན་པོ་བླངས་ཏེ་བདག་གི་ལུས་ཀུན་ཏུ་ཕུག་ནས་རང་གི་ཁྲག་གིས་ས་ཕྱོགས་དེ་ཐམས་ཅད་དུ་ཆག་ཆག་བཏབ་བོ། །བྱང་ཆུབ་སེམས་དཔའ་སེམས་
དཔའ་ཆེན་པོ་རྟག་ཏུ་ངུའི་རྗེས་སུ་སློབ་པ་ཚོང་དཔོན་གྱི་བུ་མོ་ལ་སོགས་པ་བུ་མོ་ལྔ་བརྒྱ་པོ་དེ་དག་ཐམས་ཅད་ཀྱིས་ཀྱང་མཚོན་རྣོན་པོ་བླངས་ཏེ་རང་རང་གི་ལུས་ཕུག་ནས་རང་རང་གི་ཁྲག་
གིས་ས་ཕྱོགས་དེ་ཐམས་ཅད་དུ་ཆག་ཆག་བཏབ་སྟེ། གང་དེ་དག་ལ་བདུད་སྡིག་ཅན་དེས་དགེ་བའི་རྩ་བའི་བར་ཆད་བྱ་བའི་གླགས་གང་དུ་རྙེད་པར་འགྱུར་བ་བྱང་ཆུབ་སེམས་དཔའ་སེམས་
དཔའ་ཆེན་པོ་རྟག་ཏུ་ངུ་དང༌། བུ་མོ་དེ་དག་ཐམས་ཅད་སེམས་གཞན་དུ་གྱུར་པ་མེད་དོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བྱང་ཆུབ་སེམས་དཔའ་སེམས་
དཔའ་ཆེན་པོ་རྟག་ཏུ་ངུ་འདི་ཙམ་དུ་ཆོས་འདོད་པ་དང༌། ཇི་ཙམ་དུ་ཡི་དམ་ལ་བརྟན་པ་དང༌། ཇི་ཙམ་དུ་གོ་ཆ་ཆེན་པོ་བགོས་པ་དང༌། ལུས་དང༌། སྲོག་དང༌། ལོངས་སྤྱོད་རྣམས་ལ་མི་ལྟ་
བ་དང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་པར་བྱ་བའི་ཕྱིར་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་
འཁོར་བའི་སྡུག་བསྔལ་ཡོངས་སུ་དཔག་ཏུ་མེད་པ་ལས་སེམས་ཅན་ཐམས་ཅད་ཐར་བར་བྱའོ། །སྙམ་དུ་ལྷག་པའི་བསམ་པ་ལ་ཡང་དག་པར་ཞུགས་པ་ནི། ངོ་མཚར་ཏོ། སྙམ་མོ། །དེ་
ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཁྲག་དེ་དག་ཐམས་ཅད་ལྷའི་ཙནྡན་གྱི་ཆུར་བྱིན་གྱིས་བརླབས་ཏེ་ལྷའི་ཙནྡན་གྱི་ཆུ་དྲི་དམ་པ། རྒྱ་ཆེ་བ། བསམ་གྱིས་མི་ཁྱབ་པ་དང་ལྡན་པ་དེའི་དྲིས་
ས་ཕྱོགས་དེ་ཁོ་ར་ཁོར་ཡུག་ཏུ་དཔག་ཚད་ལྔ་བརྒྱ་ཚང་བར་དྲིས་ཡོངས་སུ་ཁྱབ་བོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་
སྐད་ཅེས། རིགས་ཀྱི་བུ། ལེགས་སོ། ལེགས་སོ། །རིགས་ཀྱི་བུ། ཁྱོད་ཀྱིས་བརྩོན་འགྲུས་བསམ་གྱིས་མི་ཁྱབ་པ་ལེགས་སོ། ལེགས་སོ། །ཁྱོད་ཀྱི་ཆོས་འདོད་པ་དང༌། ཆོས་ཡོངས་སུ་
ཚོལ་བའང་ལེགས་ཏེ། རིགས་ཀྱི་བུ། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་ཀྱང་ལྷག་པའི་བསམ་པ་འདི་ལྟ་བུ་དང༌། བརྩོན་འགྲུས་
འདི་ལྟ་བུ་དང༌། ཆོས་འདོད་པ་འདི་ལྟ་བུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་སོ། །ཞེས་སྨྲས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་
ཏུ་ངུ་འདི་སྙམ་དུ་སེམས་ཏེ། བདག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱི་ཆོས་ཀྱི་སྟན་ནི། བཏིང༌། ས་ཕྱོགས་འདི་ཕྱག་བདར་ནི། ལེགས་པར་བྱས། ཆག་ཆག་
ནི༑ ལེགས་པར་བཏབ་ན། བདག་གིས་མེ་ཏོག་གང་དག་གིས་ས་ཕྱོགས་འདིར་ལེགས་པར་གཏོར་བར་བྱ་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཆོས་
༄༅། །འཆད་ཅིང་ཆོས་ཀྱི་སྟན་ལ་འདུག་པ་ལ་གཏོར་བར་བྱ་བའི་མེ་ཏོག་དེ་དག་གང་ནས་རྙེད་པར་འགྱུར་སྙམ་མོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་
སེམས་དཔའ་སེམས་དཔའ་ཆེན་པོ་རྟག་ཏུ་ངུ་ལ་འདི་སྐད་ཅེས། རིགས་ཀྱི་བུ། ལྷའི་མེ་ཏོག་མནྡཱ་ར་བ་འདི་དག་ལོངས་ལ་ཁྱོད་ཀྱིས་ས་ཕྱོགས་འདི་དག་ཏུ་མེ་ཏོག་བཀྲམ་པར་གྱིས་ཤིག །
བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཆོས་སྟོན་ཅིང་ཆོས་ཀྱི་ཁྲི་ལ་འདུག་པ་ལ་ཡང་གཏོར་ཅིག་ཅེས་སྨྲས་ནས་དེས་དེ་ལ་ལྷའི་མེ་ཏོག་མནྡཱ་ར་བ་ལྷའི་ཁལ་སྟོང་
བྱིན་ནོ༑ ༑དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་མེ་ཏོག་དེ་དག་བླངས་ཏེ་མེ་ཏོག་ཁ་ཅིག་གིས་ནི། ས་ཕྱོགས་དེར་མེ་ཏོག་བཀྲམ་པར་བྱས་སོ། །མེ་ཏོག་ཁ་ཅིག་
གིས་ནི༑ བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལ་གཏོར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ལོ་བདུན་འདས་པ་དང་ཏིང་ངེ་
འཛིན་དེ་ལས་ལངས་ཏེ་ཆོས་ཀྱི་སྟན་གང་ན་ཡོད་པ་དེར་འོངས་ནས་སྟན་བཏིང་བ་ལ་འདུག་སྟེ། འཁོར་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཤེས་
རབ་ཀྱི་ཕ་རོལ་ཏུ་ཕྱིན་པ་སྟོན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་མཐོང་མ་ཐག་ཏུ་འདི་ལྟ་
སྟེ༑ དཔེར་ན། བསམ་གཏན་དང་པོ་ལ་སྙོམས་པར་ཞུགས་པའི་དགེ་སློང་རྩེ་གཅིག་ཏུ་ཡིད་ལ་བྱེད་པ་བཞིན་དུ་བདེ་བ་དེ་ལྟ་བུ་ཐོབ་བོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་
ཆོས་འཕགས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པ་ནི། འདི་ཡིན་ཏེ། འདི་ལྟ་སྟེ། ཆོས་ཐམས་ཅད་མཉམ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ། །ཆོས་ཐམས་
ཅད་དབེན་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་དབེན་པ་ཉིད་དོ། །ཆོས་ཐམས་ཅད་གཡོ་བ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་གཡོ་བ་མེད་པ་ཉིད་དོ། །ཆོས་ཐམས་ཅད་རློམ་
སེམས་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་རློམ་སེམས་མེད་པ་ཉིད་དོ། །ཆོས་ཐམས་ཅད་ཁེངས་པ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཁེངས་པ་མེད་པ་ཉིད་དོ། །ཆོས་
ཐམས་ཅད་རོ་གཅིག་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་རོ་གཅིག་པ་ཉིད་དོ། །ཆོས་ཐམས་ཅད་མུ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་དོ། །ཆོས་ཐམས་
ཅད་སྐྱེ་བ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་སྐྱེ་བ་མེད་པ་ཉིད་དོ། །ཆོས་ཐམས་ཅད་འགག་པ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་འགག་པ་མེད་པ་ཉིད་དོ། །ནམ་མཁའ་
མུ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་དོ། །རྒྱ་མཚོ་མུ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་དོ། །རི་རབ་སྣ་ཚོགས་པ་ཉིད་པས་ཤེས་རབ་
༄༅། །ཀྱི་ཕ་རོལ་ཏུ་ཕྱིན་པ་སྣ་ཚོགས་པ་ཉིད་དོ། །ནམ་མཁའ་རྟོག་པ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་རྟོག་པ་མེད་པ་ཉིད་དོ། །གཟུགས་མུ་མེད་པ་
ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་དོ། །དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་མུ་མེད་པ་ཉིད་པས་ཤེས་རབ་ཀྱི་ཕ་
རོལ་ཏུ་ཕྱིན་པ་མུ་མེད་པ་ཉིད་དོ། །སའི་ཁམས་མུ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་དོ། །དེ་བཞིན་དུ་ཆུའི་ཁམས་དང༌། མེའི་ཁམས་དང༌། རླུང་གི་ཁམས་
མུ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་དོ། །ནམ་མཁའི་ཁམས་མུ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་དོ། །རྣམ་པར་ཤེས་
པའི་ཁམས་མུ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་དོ། །རྡོ་རྗེ་ལྟ་བུའི་ཆོས་མཉམ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ། །ཆོས་ཐམས་
ཅད་མ་འདྲེས་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མ་འདྲེས་པ་ཉིད་དོ། །ཆོས་ཐམས་ཅད་དམིགས་སུ་མེད་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་དམིགས་སུ་མེད་པ་
ཉིད་དོ། །ཆོས་ཐམས་ཅད་རྣམ་པར་འཇིག་པ་མཉམ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་འཇིག་པ་མཉམ་པ་ཉིད་དོ། །ཆོས་ཐམས་ཅད་བྱེད་པ་མེད་པ་ཉིད་པས་
ཤེས་རབ་ཀྱི་ཕ་རོལ་ཏུ་ཕྱིན་པ་བྱེད་པ་མེད་པ་ཉིད་དོ། །ཆོས་ཐམས་ཅད་བསམ་གྱིས་མི་ཁྱབ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་བསམ་གྱིས་མི་ཁྱབ་པ་ཉིད་དུ་རིག་པར་བྱའོ། །
ཞེས་བྱ་བ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་དེ་ལྟར་འདུག་བཞིན་དུ་དེའི་ཚེ་ཆོས་ཐམས་ཅད་མཉམ་པ་ཉིད་ཅེས་བྱ་བའི་ཏིང་ངེ་འཛིན་གྱི་རྒྱལ་པོ་
སྐྱེས་པར་གྱུར་ཏོ། །ཆོས་ཐམས་ཅད་དབེན་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་གཡོ་བ་མེད་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་རློམ་སེམས་
མེད་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་ཁེངས་པ་མེད་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་རོ་གཅིག་པ་ཞེས་བྱ་བའི་ཏིང་ངེ་འཛིན་དང༌། ཆོས་
ཐམས་ཅད་མུ་མེད་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་སྐྱེ་བ་མེད་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་འགག་པ་མེད་པ་ཞེས་བྱ་བའི་ཏིང་ངེ་
འཛིན་དང༌། ནམ་མཁའ་མུ་མེད་པ་ཞེས་བྱ་བའི་ཏིང་ངེ་འཛིན་དང༌། རྒྱ་མཚོ་མུ་མེད་པ་ཞེས་བྱ་བའི་ཏིང་ངེ་འཛིན་དང༌། རི་རབ་སྣ་ཚོགས་པ་ཞེས་བྱ་བའི་ཏིང་ངེ་འཛིན་དང༌།
ནམ་མཁའ་རྟོག་པ་མེད་པ་ཞེས་བྱ་བའི་ཏིང་ངེ་འཛིན་དང༌། གཟུགས་མུ་མེད་པ་ཞེས་བྱ་བའི་ཏིང་ངེ་འཛིན་དང༌། དེ་བཞིན་དུ་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌།
༄༅། །རྣམ་པར་ཤེས་པ་མུ་མེད་པ་ཞེས་བྱ་བའི་ཏིང་ངེ་འཛིན་དང༌། སའི་ཁམས་མུ་མེད་པ་ཞེས་བྱ་བའི་ཏིང་ངེ་འཛིན་དང༌། དེ་བཞིན་དུ་ཆུའི་ཁམས་
དང༌། མེའི་ཁམས་དང༌། རླུང་གི་ཁམས་མུ་མེད་པ་ཞེས་བྱ་བའི་ཏིང་ངེ་འཛིན་དང༌། ནམ་མཁའི་ཁམས་མུ་མེད་པ་ཞེས་བྱ་བའི་ཏིང་ངེ་འཛིན་དང༌། རྣམ་པར་ཤེས་པའི་
ཁམས་མུ་མེད་པ་ཞེས་བྱ་བའི་ཏིང་ངེ་འཛིན་དང༌། རྡོ་རྗེ་ལྟ་བུ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་མ་འདྲེས་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་
དམིགས་སུ་མེད་པ་ཞེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་རྣམ་པར་འཇིག་པ་མཉམ་པ་ཉིད་ཅེས་བྱ་བའི་ཏིང་ངེ་འཛིན་དང༌། ཆོས་ཐམས་ཅད་བྱེད་པ་མེད་པ་ཞེས་
བྱ་བའི་ཏིང་ངེ་འཛིན་དང༌། ཆོས་ཐམས་ཅད་བསམ་གྱིས་མི་ཁྱབ་པ་ཞེས་བྱ་བའི་ཏིང་ངེ་འཛིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་དེ་ལྟ་བུ་ལ་
སོགས་པའི་ཏིང་ངེ་འཛིན་གྱི་སྒོ་བརྒྱ་སྟོང་ཕྲག་དྲུག་ཅུ་རབ་ཏུ་ཐོབ་པར་གྱུར་ཏོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། ཆོས་འཕགས་ཀྱི་ལེའུ་
ཞེས་བྱ་སྟེ། སུམ་ཅུ་རྩ་གཅིག་པའོ།། །།རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུས་ཏིང་ངེ་འཛིན་གྱི་སྒོ་བརྒྱ་སྟོང་ཕྲག་དྲུག་
ཅུ་ཐོབ་མ་ཐག་ཏུ་ཤར་ཕྱོགས་དང༌། །ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་དང༌། མཚམས་དང༌། འོག་དང༌། སྟེང་གི་ཕྱོགས་དང༌། ཕྱོགས་བཅུའི་འཇིག་རྟེན་སྟོང་
གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་དག་དགེ་སློང་གི་དགེ་འདུན་གྱིས་ཡོངས་སུ་
བསྐོར་ཅིང་བྱང་ཆུབ་སེམས་དཔའི་ཚོགས་ཀྱིས་མདུན་དུ་བྱས་ཏེ་ཚུལ་འདི་ལྟ་བུ་ཉིད་དང༌། མིང་འདི་ཉིད་དང༌། ཡི་གེ་འདི་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པ་མཐོང་
ངོ༌། །འདི་ལྟ་སྟེ། དཔེར་ན། ད་ལྟར་ང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཆོས་སྟོན་པ་དགེ་སློང་གི་དགེ་འདུན་གྱིས་ཡོངས་སུ་བསྐོར་ཅིང་བྱང་ཆུབ་སེམས་
དཔའི་ཚོགས་ཀྱིས་མདུན་དུ་བྱས་ཏེ་ཚུལ་འདི་ཉིད་དང༌། མིང་འདི་ཉིད་དང༌། ཡི་གེ་འདི་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཆད་པ་བཞིན་ནོ། །དེ་མང་དུ་ཐོས་པ་བསམ་གྱིས་
མི་ཁྱབ་པ་དང༌། ཐོས་པ་རྒྱ་མཚོ་དང་ལྡན་པར་གྱུར་ཏེ། གར་སྐྱེས་པ་ཐམས་ཅད་དུའང་ནམ་ཡང་སངས་རྒྱས་དང་བྲལ་བར་མ་གྱུར་ཏོ། །སྐྱེ་བ་ཐམས་ཅད་དུ་ཡང་གང་དང་གང་དུ་
སངས་རྒྱས་བཅོམ་ལྡན་འདས་རྣམས་མངོན་སུམ་དུ་འགྱུར་བ་དེ་དང་དེ་དག་ཏུ་སྐྱེས་ཏེ་ཐ་ན་རྨི་ལམ་ནའང་སངས་རྒྱས་བཅོམ་ལྡན་འདས་དག་དང་མི་འབྲལ་བར་འགྱུར་རོ། །དེས་མི་ཁོམ་
༄༅། །པ་ཐམས་ཅད་ནི། སྤངས། དལ་བ་ཕུན་སུམ་ཚོགས་པ་ནི། བསྒྲུབས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་
སྩལ་པ། ཀུན་དགའ་བོ། རྣམ་གྲངས་འདིས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐམས་ཅད་མཁྱེན་པའི་ཡེ་ཤེས་
སྒྲུབ་པ་ཡིན་པར་རིག་པར་བྱའོ། །ཀུན་དགའ་བོ། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་མཁྱེན་པའི་ཡེ་ཤེས་ཐོབ་པར་འདོད་པ་དག་གིས་ཤེས་
རབ་ཀྱི་ཕ་རོལ་ཏུ་ཕྱིན་པ་འདི་ལ་སྤྱད་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་མཉན་པར་བྱ། གཟུང་བར་བྱ། བཅང་བར་བྱ། བཀླག་པར་བྱ། ཀུན་ཆུབ་པར་བྱ། རབ་ཏུ་
གདོན་པར་བྱ། བསྟན་པར་བྱ། ཉེ་བར་བསྟན་པར་བྱ། ལུང་འབོག་པར་བྱ། ཁ་ཏོན་དུ་བྱ། བྲི་བར་བྱ། དེ་བཞིན་གཤེགས་པའི་བྱིན་གྱིས་རླབས་ཀྱིས་གླེགས་བམ་ཆེན་པོ་ལ་ཡི་གེ་
གསལ་ཞིང་རབ་ཏུ་གསལ་བ་ལེགས་པར་བྲིས་ཏེ་མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། རོལ་མོ་དང༌། ན་བཟའ་དང༌། གདུགས་དང༌། རྒྱལ་
མཚན་དང༌། དྲིལ་བུ་དང༌། བ་དན་དང༌། ཁོར་ཡུག་ཏུ་མར་མེའི་ཕྲེང་བ་དང༌། མཆོད་པ་རྣམ་པ་མང་པོ་དག་གིས་བཀུར་སྟིར་བྱ། བླ་མར་བྱ། རྗེད་པར་བྱ། མཆོད་པར་བྱ། རི་མོར་བྱ།
བསྙེན་བཀུར་བྱ་སྟེ། ཀུན་དགའ་བོ། འདི་ནི། ངའི་རྗེས་སུ་བསྟན་པའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་
འགྱུར་རོ། །ཀུན་དགའ་བོ། འདི་ཇི་སྙམ་དུ་སེམས། དེ་བཞིན་གཤེགས་པ་ཁྱོད་ཀྱི་སྟོན་པ་ཡིན་ནམ། ཀུན་དགའ་བོས་གསོལ་པ། བཅོམ་ལྡན་འདས་བདག་གི་སྟོན་པ་ལགས་སོ། །
བདེ་བར་གཤེགས་པ་བདག་གི་སྟོན་པ་ལགས་སོ། །དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ།
ཁྱོད་ཀྱི་སྟོན་པ་དེ་བཞིན་གཤེགས་པ་ལ་ཀུན་དགའ་བོ། ཁྱོད་ཀྱིས་ལུས་ཀྱི་ལས་བྱམས་པ་ཡིད་དུ་འོང་བ་དང༌། ངག་གི་ལས་བྱམས་པ་ཡིད་དུ་འོང་བ་དང༌། ཡིད་ཀྱི་ལས་བྱམས་པ་ཡིད་དུ་
འོང་བས་རིམ་གྲོར་བྱས་ཏེ། དེ་ལྟ་བས་ན། ཀུན་དགའ་བོ། ད་ལྟར་ང་བཞུགས་ཏེ་འཚོ་ཞིང་གཞེས་པའི་སྐུ་འདི་ལ་ཇི་ལྟར་ཁྱོད་ཀྱིས་དགའ་བ་དང༌། དང་བ་དང༌། དད་པ་དང༌། རི་མོར་བྱས་པ་
ཀུན་དགའ་བོ། དེ་ལྟར་ང་འདས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཡང་བྱོས་ཤིག །ཀུན་དགའ་བོ། །ཅི་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནུབ་པར་མི་འགྱུར་ཞིང༌། ཅི་ནས་ཁྱོད་སྐྱེས་
བུ་ཐ་མར་མི་འགྱུར་བར་ཀུན་དགའ་བོ། ཁྱོད་ལ་ལན་གཉིས་ལན་གསུམ་དུ་ཡོངས་སུ་གཏད་དོ། །རྗེས་སུ་ཡོངས་སུ་གཏད་དོ། །ཀུན་དགའ་བོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཇིག་རྟེན་
༄༅། །ན་ཇི་སྲིད་དུ་རབ་ཏུ་སྤྱོད་པ་དེ་སྲིད་དུ་དེ་བཞིན་གཤེགས་པ་བཞུགས་པར་རིག་པར་བྱའོ། །ཀུན་དགའ་བོ། དེ་སྲིད་དུ་དེ་བཞིན་གཤེགས་པ་ཆོས་སྟོན་པར་
རིག་པར་བྱའོ། །ཀུན་དགའ་བོ། གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉན་པ་དང༌། འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། རབ་ཏུ་འདོན་པ་
དང༌། སྟོན་པ་དང༌། ཉེ་བར་སྟོན་པ་དང༌། ལུང་འབོགས་པ་དང༌། ཁ་ཏོན་བྱེད་པ་དང༌། ཡི་གེར་འབྲི་བ་དང༌། མེ་ཏོག་དང༌། བདུག་པ་དང༌། དྲི་དང༌། ཕྲེང་བ་དང༌། བྱུག་པ་དང༌། ཕྱེ་
མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། དྲིལ་བུ་དང༌། བ་དན་དག་དང༌། ཁོར་ཡུག་ཏུ་མར་མེའི་ཕྲེང་བ་དང༌། མཆོད་པ་རྣམ་པ་མང་པོ་དག་གིས་བཀུར་སྟིར་
བྱེད༑ བླ་མར་བྱེད། རྗེད་པར་བྱེད། མཆོད་པར་བྱེད། རི་མོར་བྱེད། བསྙེན་བཀུར་བྱེད་པའི་སེམས་ཅན་དེ་དག་ནི། སངས་རྒྱས་མཐོང་བ་དང༌། དམ་པའི་ཆོས་ཉན་པ་དང༌། དགེ་འདུན་
ལ་རིམ་གྲོ་བྱེད་པ་དང་མ་བྲལ་བར་རིག་པར་བྱའོ། །ཀུན་དགའ་བོ། སེམས་ཅན་དེ་དག་ནི། དེ་བཞིན་གཤེགས་པའི་དྲུང་ན་སྤྱོད་པར་རིག་པར་བྱའོ། །བཅོམ་ལྡན་འདས་དགྱེས་ཤིང་
དེ་སྐད་ཅེས་བཀའ་སྩལ་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་དང༌། ཚེ་དང་ལྡན་པ་རབ་འབྱོར་དང༌། ཚེ་དང་ལྡན་པ་ཤཱ་རིའི་བུ་དང༌། ཚེ་དང་
ལྡན་པ་ཀུན་དགའ་བོ་དང༌། ལྷ་རྣམས་ཀྱི་དབང་པོ་བརྒྱ་བྱིན་དང༌། ལྷ་དང༌། མི་དང༌། ལྷ་མ་ཡིན་དང༌། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་
པར་བསྟོད་དོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། ཡོངས་སུ་གཏད་པའི་ལེའུ་ཞེས་བྱ་སྟེ། སུམ་ཅུ་རྩ་གཉིས་པའོ།། །།བཅོམ་ལྡན་འདས་མ་
འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་རྫོགས་སོ།། །།རྒྱ་གར་གྱི་མཁན་པོ་ཤཱཀྱ་སེ་ན་དང༌། ཛྙཱ་ན་སིདྡྷི་དང༌། ཞུ་ཆེན་གྱི་ལོ་ཙཱ་བ་བནྡྷེ་དྷརྨ་ཏཱ་ཤཱི་ལ་ལ་སོགས་
པས་བསྒྱུར་ཅིང་ཞུས་ཏེ་གཏན་ལ་ཕབས། སླད་ཀྱིས་དབང་ཕྱུག་དམ་པའི་མངའ་བདག་བོད་ཀྱི་དཔལ་ལྷ་བཙན་པོ་བཀྲ་ཤིས་ལྷ་ལྡེ་བཙན་གྱིས་བཀས་རྒྱ་གར་གྱི་མཁན་པོ་སུ་བྷཱ་ཥི་ཏ་དང༌། སྒྲ་
བསྒྱུར་གྱི་ལོ་ཙཱ་བ་དགེ་སློང་རིན་ཆེན་བཟང་པོས་འགྲེལ་པ་དང་མཐུན་པར་བསྒྱུར། སླད་ཀྱིས་རྒྱ་གར་གྱི་མཁན་པོ་པཎྜི་ཏ་ཆེན་པོ་དཱི་པཾ་ཀ་ར་ཤྲཱི་ཛྙཱ་ན་དང༌། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་
བཟང་པོས་ཡུལ་དབུས་ཀྱི་འགྲེལ་པ་ལ་གཏུགས་ནས་བཅོས་ཤིང་ཞུས་ཏེ་གཏན་ལ་ཕབས། ཡང་སླད་ཀྱིས་སྐྱིད་སྨད་མཉེ་ཐང་ན་མོ་ཆེར་པཎྜི་ཏ་ཆེན་པོ་དཱི་པཾ་ཀ་ར་ཤྲཱི་ཛྙཱ་ན་དང༌། ལོ་ཙཱ་བ་འབྲོམ་
རྒྱལ་བའི་འབྱུང་གནས་གཉིས་ཀྱིས་བརྒྱད་སྟོང་པ་བཤད་པའི་དུས་སུ་ཆེ་ལོང་ཞིག་གཏན་ལ་ཕབས། ཕྱིས་རྭ་སྒྲེང་གི་གཙུག་ལག་ཁང་དུ་ལོ་ཙཱ་བ་འབྲོམ་རྒྱལ་བའི་འབྱུང་གནས་ཀྱིས་རྒྱ་གར་གྱི་
༄༅། །མདོ་གསུམ་ལ་གཏུགས་ནས་ལན་གཉིས་གཏན་ལ་ཕབས། སླད་ཀྱིས་ཡང་ལོ་ཙཱ་བ་དེ་ཉིད་ཀྱིས་བཤད་པ་མཛད་ཅིང་ཕྲན་ཚེགས་ཀྱང་གཏན་ལ་ཕབས།
དུས་ཕྱིས་ལོ་ཙཱ་བ་ཆེན་པོ་ཤཱཀྱའི་དགེ་སློང་བློ་ལྡན་ཤེས་རབ་ཀྱིས་ཁ་ཆེའི་དཔེ་དང༌། ཡུལ་དབུས་ཀྱི་དཔེ་དུ་མ་བསགས་ནས་གཏན་ལ་ཕབས། སླར་ཡང་སྙིགས་དུས་ཀྱི་ཐམས་ཅད་
མཁྱེན་པ་ཆེན་པོ་ཞྭ་ལུ་ལོ་ཙཱ་བ་དཔལ་རིན་ཆེན་ཆོས་སྐྱོང་བཟང་པོའི་ཞལ་སྔ་ནས་ཀྱིས་རྒྱ་བོད་ཀྱི་དཔེ་དུ་མ་དང་བསྟུན་ནས་ཤིན་ཏུ་རྣམ་པར་དག་པར་མཛད་པའི་མ་ཕྱི་ལས་སླར་ཡང་
ཞུས་ཏེ་གཏན་ལ་ཕབས་པའོ།། །།
Copyright © 2012 by the Asian Classics Input Project. All rights reserved.