Loading
འཕགས་པ་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ།
ཐ
not checked
རྒྱ་གར་སྐད་དུ། ཨཱཪྻ་སརྦ་པུ་ཎྱེ་ས་མུཙྪ་ཡ་ས་མཱ་དྷི་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོ་
མདོ༑ བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡངས་པ་ན་ཨ་
མྲས་བསྲུངས་པའི་ཚལ་ཆེན་པོའི་ཁང་པ་བརྩེགས་པའི་གནས་ན་དགེ་སློང་ཁྲིའི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ།
༄༅། །དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་
བྱས་པ༑ ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཐམས་ཅད་ཀྱི་
དབང་གི་དམ་པའི་ཕ་རོལ་ཏུ་སོན་པ་ཤ་སྟག་དང༌། བྱང་ཆུབ་སེམས་དཔའ་ཉི་ཁྲི་ཐམས་ཅད་ཀྱང་ཕྱིར་མི་ལྡོག་པ། གཟུངས་ཐོབ་པ། སྤོབས་པ་ཐོགས་པ་མེད་པ། མངོན་པར་ཤེས་
པ་ཐོབ་པ། ཏིང་ངེ་འཛིན་སྒྲུབ་པ་ལ་མཁས་པ། དྲན་པ་དང༌། བློ་གྲོས་དང༌། རྟོགས་པ་དང༌། བརྟན་པ་དང༌། ཤེས་རབ་དང༌། ཐབས་ལ་མཁས་པའི་དམ་པའི་ཕ་རོལ་ཏུ་སོན་པ་ཤ་
སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པའི་བློ་གྲོས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་སེངྒེའི་བློ་གྲོས་དང༌། བྱང་ཆུབ་སེམས་
དཔའ་སེམས་དཔའ་ཆེན་པོ་བློ་གྲོས་བླ་མ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཁྱད་པར་བློ་གྲོས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་འཕེལ་བའི་
བློ་གྲོས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་བློ་གྲོས་དང༌། བྱང་ཆུབ་སེམས་
དཔའ་སེམས་དཔའ་ཆེན་པོ་བྱམས་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་སྲེད་མེད་ཀྱི་བུ་དང༌།
དེ་དག་ལ་སོགས་པ་བྱང་ཆུབ་སེམས་དཔའ་ཉི་ཁྲི་དང༌། ལྷའི་བུ་བཞི་ཁྲི་ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པ་ཤ་སྟག་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་
མང་པོ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་འཁོར་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཆོས་སྟོན་ཏོ། །དེའི་ཚེ་བཅོམ་ལྡན་འདས་ཀྱི་བསྟན་པ་ཤིན་
ཏུ་སྙིང་པོར་གྱུར་ཏེ་མུ་སྟེགས་བྱེད་ཀྱི་ཚོགས་ཐམས་ཅད་ཟིལ་གྱིས་མནན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྲེད་མེད་ཀྱི་བུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་
ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བཅོམ་
ལྡན་འདས་ཀྱི་བསྟན་པ་འདི་ཤིན་ཏུ་སྙིང་པོར་གྱུར་ཏེ་མུ་སྟེགས་ཅན་ངན་པ་སྤྱོད་པ་ཅན་དང༌། ཀུན་ཏུ་རྒྱུ་གྲངས་མ་མཆིས་པ་དང༌། གཅེར་པུ་པ་ལ་སོགས་པ་ཐམས་ཅད་ཟིལ་གྱིས་མནན་ཏེ་མཛེས་
པར་གྱུར་ལགས་སོ། །བཅོམ་ལྡན་འདས། དེའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལེགས་པར་ཡོངས་སུ་གཟུད་དུ་གསོལ། བྱང་ཆུབ་སེམས་དཔའ་སེམས་དཔའ་ཆེན་པོ་
༄༅། །རྣམས་ལ་ཕན་གདགས་སུ་གསོལ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་བསྐྱང་དུ་གསོལ། བྱང་ཆུབ་སེམས་དཔའ་སེམས་དཔའ་ཆེན་
པོ་རྣམས་ཀྱི་དགེ་བའི་རྩ་བ་བསྐྱེད་པར་གསོལ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཟེངས་བསྟོད་པ་དང༌། ཡང་དག་པར་དགའ་བར་མཛད་པ་དང༌། ཡང་དག་པར་
བསྟན་པར་གསོལ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སངས་རྒྱས་ཀྱི་གདུང་རྒྱུན་མི་འཆད་པའི་ཆོས་ཀྱི་ཚུལ་ཡོངས་སུ་གཟུང་དུ་གསོལ། སེམས་ཅན་ཐམས་
ཅད་ཡོངས་སུ་མི་གཏོང་བར་གསོལ། ཇི་ལྟ་བུའི་ཚུལ་གྱི་ཆོས་ཀྱི་ཕན་གདགས་པས་མྱ་ངན་ལས་འདས་པར་མཆི་བའི་ལམ་བསྟན་པར་གསོལ། དེ་བཞིན་གཤེགས་པ་ཡོངས་སུ་མྱ་
ངན་ལས་འདས་པ་ནའང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཉམས་པར་མི་འགྱུར་བ་དང༌། ཡོངས་སུ་ཉམས་པར་
མི་འགྱུར་བ་དང༌། སངས་རྒྱས་མཐོང་བ་དང༌། ཆོས་ཉན་པ་དང༌། དགེ་འདུན་ལ་བསྙེན་བཀུར་བགྱིད་པ་དང་མི་འབྲལ་བ་དང༌། བསྐྱུད་ངས་བ་མ་མཆིས་པའི་ཆོས་ཅན་གྱི་སླད་དུ་དྲན་
པ་དང་ལྡན་པར་འགྱུར་པ་དང༌། ཆོས་ཀྱི་དགོངས་པ་རྟོགས་པར་འགྱུར་བའི་སླད་དུ་བློ་གྲོས་དང་ལྡན་པར་འགྱུར་བ་དང༌། དོན་རྟོགས་པ་རྗེས་སུ་འཐོབ་པའི་སླད་དུ་རྟོགས་པ་དང་ལྡན་པར་
འགྱུར་བ་དང༌། རང་གི་སེམས་ཡོངས་སུ་དག་པའི་སླད་དུ་ངོ་ཚ་དང་ལྡན་པར་འགྱུར་བ་དང༌། སྡིག་པའི་ལས་ཐམས་ཅད་སྤང་བའི་སླད་དུ་ཁྲེལ་ཡོད་པ་ཕུན་སུམ་ཚོགས་པར་འགྱུར་བ་དང༌། ཆོ་
ག་དང་སྤྱོད་པ་ཕུན་སུམ་ཚོགས་པའི་སླད་དུ་བརྟན་པ་དང་ལྡན་པར་འགྱུར་བ་དང༌། ཉོན་མོངས་པ་ཐམས་ཅད་བསལ་བའི་སླད་དུ་དཔའ་བར་འགྱུར་བ་དང༌། འཁོར་ཐམས་ཅད་ཀྱི་ནང་དུ་
བག་ཚ་བ་དང་བྲལ་བའི་སླད་དུ་སྲན་ཐུབ་པར་འགྱུར་བར་མཛད་དུ་གསོལ། བཅོམ་ལྡན་འདས། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསོད་ནམས་ཡོངས་
སུ་མི་ཉམས་པ་དང༌། ཆོས་ཡོངས་སུ་མི་ཉམས་པ་དང༌། ཤེས་རབ་ཡོངས་སུ་མི་ཉམས་པ་དང༌། ཡེ་ཤེས་ཡོངས་སུ་མི་ཉམས་པར་འགྱུར་བ་ལགས། ཇི་ལྟར་ན། ལྷག་པའི་
བསམ་པ་བརྟན་པས་བྱང་ཆུབ་ཀྱི་སེམས་ཡོངས་སུ་མི་ཉམས་པ་དང༌། མྱ་ངན་ལས་འདས་པའི་མཐར་ཐུག་གི་བར་དུ་སེམས་ཅན་ཐམས་ཅད་ལ་མཛའ་བ་བརྟན་པ་དང༌། ཇི་སྐད་
སྨྲས་པ་དེ་བཞིན་དུ་བགྱིད་པ་དང༌། སངས་རྒྱས་ཀྱི་ཆོས་ཡོངས་སུ་རྫོགས་པར་བགྱི་བའི་སླད་དུ་གནས་པས་སེམས་ཅན་རྣམས་ལ་མི་སླུ་བ་དང༌། གཏོང་བ་ཐམས་ཅད་རྗེས་སུ་འཇུག་པས་
མ་བསྟན་པའི་སྦྱིན་པ་དང་ལྡན་པ་དང༌། སྡོམ་པ་གསུམ་ཡོངས་སུ་དག་པ་ལ་གནས་པས་མ་བསྟན་པའི་ཚུལ་ཁྲིམས་དང་ལྡན་པ་དང༌། གནོད་སེམས་མེད་པའི་ཡིད་ཀྱིས་སེམས་ཅན་ཐམས་
༄༅། །ཅད་ལ་སེམས་སྙོམས་པས་མ་བསྟན་པའི་བཟོད་པ་དང་ལྡན་པ་དང༌། ཡོངས་སུ་མི་སྐྱོ་བའི་ཡིད་ཀྱིས་དོན་ཐམས་ཅད་ཡོངས་སུ་བསྒྲུབ་པས་མ་བསྟན་པའི་
བརྩོན་འགྲུས་དང་ལྡན་པ་དང༌། དྲན་པ་དང༌། ཤེས་བཞིན་ལ་མཁས་ཏེ་བསམ་གཏན་དང༌། ཏིང་ངེ་འཛིན་དང༌། སྙོམས་པར་འཇུག་པ་ཐམས་ཅད་ལ་མི་གནས་པས་མ་བསྟན་པའི་
བསམ་གཏན་དང་ལྡན་པ་དང༌། ལྟ་བ་ཐམས་ཅད་དང་བྲལ་ཞིང་སངས་རྒྱས་ཀྱི་ཆོས་ཐམས་ཅད་ལ་སྣང་བ་ཐོབ་པས་མ་བསྟན་པའི་ཤེས་རབ་དང་ལྡན་པ་དང༌། སེམས་ཅན་རྣམས་
བསྡུ་བའི་དངོས་པོ་བཞིས་བསྡུ་བ་ལ་ཤིན་ཏུ་བརྩོན་པས་བསྡུ་བ་ཤིན་ཏུ་བསྡུས་པ་དང༌། ལྷ་དང་མིའི་སྐྱེ་བ་ཐམས་ཅད་ལ་མི་རྟག་པར་ཡིད་ལ་བགྱིད་པ་ལ་བརྩོན་པས་རེ་བ་མ་
མཆིས་པ་དང༌། ཐམས་ཅད་མཁྱེན་པ་ཉིད་ཀྱི་སེམས་ལ་ལེགས་པར་གནས་ཤིང་ཉན་ཐོས་དང༌། རང་སངས་རྒྱས་འདོད་པ་དང་བྲལ་བས་སྒོའི་ཐེམ་པའི་རྟེན་ལྟ་བུ་དང༌། ཆོས་ཀྱི་དབང་
དུ་བགྱིད་ཀྱི་འདོད་པའི་དབང་དུ་མི་བགྱིད་པ་དང༌། ཆོས་ཀྱི་རྒྱལ་སྲིད་དོན་དུ་གཉེར་བར་བགྱིད་ཀྱི། ལྷ་དང་མིའི་རྒྱལ་སྲིད་དོན་དུ་མི་གཉེར་བ་དང༌། སངས་རྒྱས་ཀྱིས་གནང་བའི་ཚིག་དང་
ལྡན་པའི་ཆོས་སྨྲ་བར་འགྱུར་བ་དང༌། ཆོས་ཀྱིས་འཚོ་བར་འགྱུར་གྱི་ཟང་ཟིང་གིས་མི་འཚོ་བ་དང༌། ཡོངས་སུ་འཛིན་པ་ཐམས་ཅད་ལ་འདོད་ཆགས་དང་བྲལ་བར་འགྱུར་བ་དང༌།
སེམས་ཅན་ཐམས་ཅད་ལ་ཞེ་འགྲས་པ་མ་མཆིས་པའི་སེམས་དང་ལྡན་པས་ཞེ་སྡང་དང་བྲལ་བར་འགྱུར་བ་དང༌། ཆོས་ཐམས་ཅད་ལ་གཏི་མུག་གི་མུན་པ་དང་བྲལ་བས་གཏི་མུག་དང་བྲལ་
བར་འགྱུར་བ་དང༌། ཉེ་བའི་ཉོན་མོངས་པ་དང་བྲལ་བས་བདུད་ཐམས་ཅད་ལས་ཡང་དག་པར་འདའ་བར་འགྱུར་བ་དང༌། སྒོ་ཐམས་ཅད་ནས་ཡོངས་སུ་བསྔོ་བ་ལ་མཁས་པས་ཐབས་ལ་
མཁས་པར་འགྱུར་བ་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་གསུམ་གྱི་བདག་པོ་སྲེད་མེད་ཀྱི་བུ་ལ་འདི་སྐད་ཅེས་
བཀའ་སྩལ་ཏོ། །སྲེད་མེད་ཀྱི་བུ། ཁྱོད་ལེགས་སོ། །ལེགས་སོ། །ཁྱོད་ཀྱིས་དེ་བཞིན་གཤེགས་པ་ལ་བྱང་ཆུབ་སེམས་དཔའ་རྣམས་ཀྱི་ཕྱིར་དོན་འདི་འདྲི་བར་སེམས་པ་ནི། སྲེད་མེད་ཀྱི་བུ།
ཁྱོད་ལེགས་སོ། །སྲེད་མེད་ཀྱི་བུ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོན་ཏན་གྱི་ཁྱད་པར་འདི་དག་དང༌། གཞན་དག་ཀྱང་ཐོབ་པར་
འགྱུར་བ་ངས་བཤད་དོ། །བཅོམ་ལྡན་འདས། ལེགས་སོ། །ཞེས་གསོལ་ཏོ། བྱང་ཆུབ་སེམས་དཔའ་སེམས་དཔའ་ཆེན་པོ་སྲེད་མེད་ཀྱི་བུ་བཅོམ་ལྡན་འདས་ཀྱི་ལྟར་ཉན་པ་དང༌། བཅོམ་
ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །སྲེད་མེད་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་བསོད་ནམས་ཐམས་ཅད་བསྡུས་པ་ཞེས་བྱ་བ་
༄༅། །ཡོད་དེ༑ དེ་ལ་བརྟེན་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསོད་ནམས་ཡོངས་སུ་ཉམས་པར་མི་འགྱུར། ཆོས་ཡོངས་སུ་ཉམས་པར་
མི་འགྱུར། ཤེས་རབ་ཡོངས་སུ་ཉམས་པར་མི་འགྱུར། ཡེ་ཤེས་ཡོངས་སུ་ཉམས་པར་མི་འགྱུར། སངས་རྒྱས་མཐོང་བ་དང༌། ཆོས་ཉན་པ་དང༌། དགེ་འདུན་ལ་བསྙེན་
བཀུར་བྱེད་པ་དང་འབྲལ་བར་མི་འགྱུར། བསྡུ་བའི་དངོས་པོ་བཞི་ལ་བརྩོན་པ་དང༌། སེམས་ཅན་ཐམས་ཅད་ཡོངས་སུ་མི་གཏོང་བར་གནས་པ་ནས་སྒོ་ཐམས་ཅད་ནས་ཡོངས་སུ་
བསྔོ་བ་ལ་མཁས་པས་ཐབས་མཁས་པར་འགྱུར་བའི་བར་དེ་དག་དང༌། ཡོན་ཏན་གྱི་ཁྱད་པར་གཞན་དག་དང་ཡང་ལྡན་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བསོད་
ནམས་ཐམས་ཅད་བསྡུས་པའི་ཏིང་ངེ་འཛིན་འདིའི་མིང་ཙམ་བཀའ་སྩལ་ནས་ཅང་མི་གསུང་བར་གྱུར་ཏོ། །དེ་ནས་དེའི་ཚེ་དྲི་མ་མེད་པའི་གཟི་བརྗིད་ཅེས་བྱ་བ་ཚན་པོ་ཆེ་ཆེན་པོ་སྟོབས་
ཆེན་པོ་དང་ལྡན་པ་ཞིག་ཡངས་པའི་གྲོང་ཁྱེར་ཆེན་པོ་ན་གནས་སོ། །དེ་ནས་དེ་འདི་སྙམ་དུ་སེམས་ཏེ། བདག་ནི། ཚན་པོ་ཆེ་ཆེན་པོ་སྟོབས་པོ་ཆེའི་ཤུགས་དང་ལྡན་པ་སྟེ། ཛམྦུའི་
གླིང་འདིའི་སེམས་ཅན་ལ་འདི་ལྟ་སྟེ། སྟོབས་སམ་སྤྲོ་བ་བདག་དང་མཉམ་པའང་མེད་ན། ལྷག་པ་ལྟ་ག་ལ་ཡོད་སྙམ་མོ། །དེས་དགེ་སྦྱོང་གཽ་ཏ་མ་སྟོབས་པོ་ཆེའི་ཤུགས་དང་
ལྡན་ཏེ༑ སྟོབས་བཅུའི་སྟོབས་དང་ལྡན་ཞིང་སྲེད་མེད་ཀྱི་བུའི་ལུས་ཐོབ་བོ། །ཞེས་གྲག་གོ་སྙམ་མོ། །དེའང་འདི་སྙམ་དུ་སེམས་ཏེ། བདག་དགེ་སྦྱོང་གཽ་ཏ་མའི་ཐད་དུ་སོང་ལ་བཅོམ་ལྡན་
འདས་དེ་ཅི་འདྲ་བ་དང༌། བདག་ཅི་འདྲ་བ་སད་པར་བྱ་གོར་མ་ཆག་སྙམ་མོ། །དེ་ནས་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཡངས་པའི་གྲོང་ཁྱེར་ཆེན་པོ་ནས་བྱུང་ནས་ཨ་མྲས་བསྲུངས་
པའི་ཚལ་ཆེན་པོའི་ཁང་པ་བརྩེགས་པའི་གནས་ག་ལ་བ་དེར་སོང་སྟེ་ཕྱིན་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་འབུམ་ཕྲག་དུ་
མས་ཡོངས་སུ་བསྐོར་ཅིང་མདུན་གྱིས་བལྟས་ཏེ་སངས་རྒྱས་ཀྱི་མཐུ་ཆེན་པོས་ཆོས་སྟོན་ཅིང༌། རིའི་རྒྱལ་པོ་རི་རབ་རྒྱ་མཚོའི་ནང་ནས་མངོན་པར་འཕགས་པ་དང་འདྲ་ལ་ཀུན་ནས་མཛེས་
ཤིང་བལྟ་བས་ཆོག་མི་ཤེས་པ་མཐོང་ངོ༌། །དེ་ནས་བཅོམ་ལྡན་འདས་མཐོང་མ་ཐག་ཏུ་དགའ་བ་དང༌། དང་བ་དང༌། མཆོག་ཏུ་དགའ་བ་ཆེན་པོ་ཐོབ་བོ། །དེ་དགའ་བ་དང༌། དང་བ་དང༌།
མཆོག་ཏུ་དགའ་བ་ཆེན་པོ་ཐོབ་ནས་བཅོམ་ལྡན་འདས་ཀྱི་ཞབས་ལ་གཏུགས་ཏེ་བཅོམ་ལྡན་འདས་ལ་བསྐོར་བ་བྱས་ནས་ཕྱོགས་གཅིག་ཏུ་འདུག་སྟེ་བཅོམ་ལྡན་འདས་འབའ་ཞིག་ལ་
ཕྱག་འཚལ་ཞིང་མགོ་བོར་ཐལ་མོ་སྦྱར་ནས་བཅོམ་ལྡན་འདས་ལ་རྟོག་ཅིང་འདུག་གོ །དེ་ནས་བཅོམ་ལྡན་འདས་ཀྱིས་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཀྱི་ལྷག་པའི་བསམ་
༄༅། །པ་ཐུགས་སུ་ཆུད་ནས་ང་རྒྱལ་དང༌། །རྒྱགས་པ་དང༌། དྲེགས་པ་གདུལ་བའི་ཕྱིར་གནས་བརྟན་མཽངྒལ་གྱི་བུ་ཆེན་པོ་ལ་བཀའ་སྩལ་པ། མཽངྒལ་གྱི་བུ། ཁྱོད་སོང་
ལ་ང་བྱང་ཆུབ་སེམས་དཔར་གྱུར་པ་ན་ཤཱཀྱའི་བུ་མོ་ས་འཚོ་མའི་ཕྱིར་མདའ་འཕངས་པ་གང་ཡིན་པ་དེ་འདིར་ལོངས་ཤིག །དེ་སྐད་ཅེས་བཀའ་སྩལ་པ་དང༌། བཅོམ་ལྡན་
འདས་ལ་ཚེ་དང་ལྡན་པ་མཽངྒལ་གྱི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། གནམ་མདའ་དེ་ག་ལ་མཆིས་པ་བདག་གིས་མ་མཐོང་ལགས་སོ། །དེ་ནས་བཅོམ་ལྡན་འདས་
ཀྱིས་དེའི་ཚེ་ཕྱག་གཡས་པ་ནས་སྣང་བར་བྱེད་པ་ཞེས་བྱ་བའི་འོད་ཟེར་ཞིག་བཏང་སྟེ། འོད་ཟེར་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བར་བྱས་སོ། །དེ་ནས་
སངས་རྒྱས་ཀྱི་ཞིང་འདིའི་ཁོར་ཡུག་ཆེན་པོ་གང་ཡིན་པ་དེ་ན་མདའ་དེ་འདུག་པ་སྣང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽངྒལ་གྱི་བུ་ཆེན་པོ་ལ་བཀའ་སྩལ་པ།
མཽངྒལ་གྱི་བུ། འཇིག་རྟེན་གྱི་ཁམས་འདིའི་ཁོར་ཡུག་ཆེན་པོ་ན་མདའ་འདུག་པ་དེ་ཁྱོད་ཀྱིས་མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། །བཅོམ་ལྡན་འདས་
ཀྱིས་བཀའ་སྩལ་པ། མཽངྒལ་གྱི་བུ། ཁྱོད་སོང་ལ་མདའ་དེ་ལོངས་ཤིག །བཅོམ་ལྡན་འདས། ལེགས་སོ། །ཞེས་གསོལ་ནས་ཚེ་དང་ལྡན་པ་མཽངྒལ་གྱི་བུ་ཆེན་པོས་བཅོམ་ལྡན་འདས་
ཀྱི་ལྟར་མཉན་ཏེ་འཁོར་ཐམས་ཅད་ཀྱི་ནང་ནས་མི་སྣང་བར་གྱུར་ནས་དཔེར་ན། སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ། བརྐྱང་པ་ལས་བསྐུམ་པ་བཞིན་དུ་སྐད་
ཅིག་ཐད་གཅིག་ཡུད་ཙམ་དེ་ལ་འཇིག་རྟེན་གྱི་ཁམས་ཀྱི་ཁོར་ཡུག་ཆེན་པོ་དེ་ནས་མདའ་དེ་བླངས་ཏེ་བཅོམ་ལྡན་འདས་ལ་ཕུལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས། ཅི་གནམ་མདའ་འདི་བྱང་ཆུབ་སེམས་དཔའ་བབ་ཡུམ་ལས་བྱུང་བའི་སྟོབས་ཀྱིས་འཕངས་པ་ལགས་སམ། གལ་ཏེ་རྫུ་འཕྲུལ་གྱི་སྟོབས་ཀྱིས་འཕངས་པ་ལགས། བཀའ་སྩལ་
པ། མཽངྒལ་གྱི་བུ། ཡབ་ཡུམ་ལས་བྱུང་བའི་སྟོབས་ཀྱིས་མདའ་འཕངས་པ་ཡིན་གྱི། རྫུ་འཕྲུལ་གྱི་སྟོབས་ཀྱིས་འཕངས་པ་ནི། མ་ཡིན་ནོ། །མཽངྒལ་གྱི་བུ། གལ་ཏེ་རྫུ་འཕྲུལ་གྱི་སྟོབས་ཀྱིས་
འཕངས་སུ་ཟིན་ན། འཇིག་རྟེན་གྱི་ཁམས་མཐའ་ཡས་མུ་མེད་པར་འགྲོ་བར་འགྱུར་རོ། །གསོལ་པ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོའི་ཡབ་ཡུམ་ལས་བྱུང་
བའི་སྟོབས་རང་གི་སྟོབས་བསོད་ནམས་ཡོངས་སུ་སྨིན་པ་ལས་སྐྱེས་པ་དེ་ཇི་ལྟ་བུ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། མཽངྒལ་གྱི་བུ། མི་བཅུའི་སྟོབས་གང་ཡིན་པ་དེ་ནི། གླང་
གཅིག་གི་སྟོབས་སོ། །གླང་བཅུའི་སྟོབས་གང་ཡིན་པ་དེ་ནི། གླང་སྔོན་པོ་གཅིག་གི་སྟོབས་སོ། །གླང་སྔོན་པོ་བཅུའི་སྟོབས་གང་ཡིན་པ་དེ་ནི། གླང་པོ་ཆེ་ཐ་མལ་པ་གཅིག་གི་སྟོབས་སོ། །གླང་པོ་ཆེ་
༄༅། །ཐ་མལ་པ་བཅུའི་སྟོབས་གང་ཡིན་པ་དེ་ནི། གླང་པོ་ཆེ་འཇིགས་སུ་རུང་བ་གཅིག་གི་སྟོབས་སོ། །གླང་པོ་ཆེ་འཇིགས་སུ་རུང་བ་བཅུའི་སྟོབས་གང་ཡིན་པ་དེ་ནི།
གླང་པོ་ཆེ་གླང་པོ་ཆེ་མོ་འདྲ་བ་གཅིག་གི་སྟོབས་སོ། །གླང་པོ་ཆེ་གླང་པོ་ཆེ་མོ་འདྲ་བ་བཅུའི་སྟོབས་གང་ཡིན་པ་དེ་ནི། དགོན་པའི་གླང་པོ་ཆེ་གཅིག་གི་སྟོབས་སོ། །དགེན་པའི་གླང་པོ་ཆེ་བཅུའི་
སྟོབས་གང་ཡིན་པ་དེ་ནི། རི་འབིགས་བྱེད་ཀྱི་གླང་པོ་ཆེ་གཅིག་གི་སྟོབས་སོ། །རི་འབིགས་བྱེད་ཀྱི་གླང་པོ་ཆེ་བཅུའི་སྟོབས་གང་ཡིན་པ་དེ་ནི། གླང་པོ་ཆེ་མཚོན་ཆའི་སྡེར་མོ་ཅན་གཅིག་གི་
སྟོབས་སོ། །གླང་པོ་ཆེ་མཚོན་ཆའི་སྡེར་མོ་ཅན་བཅུའི་སྟོབས་གང་ཡིན་པ་དེ་ནི། གླང་པོ་ཆེ་གཤོལ་མདའ་འཛིན་གཅིག་གི་སྟོབས་སོ། །གླང་པོ་ཆེ་གཤོལ་མདའ་འཛིན་བཅུའི་སྟོབས་གང་
ཡིན་པ་དེ་ནི། གླང་པོ་ཆེ་སྟང་ཟིལ་མདོག་གཅིག་གི་སྟོབས་སོ། །གླང་པོ་ཆེ་སྟང་ཟིལ་མདོག་བཅུའི་སྟོབས་གང་ཡིན་པ་དེ་ནི། གླང་པོ་ཆེ་གེལ་པ་གཅིག་གི་སྟོབས་སོ། །གླང་པོ་ཆེ་གེལ་བ་
བཅུའི་སྟོབས་གང་ཡིན་པ་དེ་ནི། གླང་པོ་ཆེ་སྔོན་པོ་གཅིག་གི་སྟོབས་སོ། །གླང་པོ་ཆེ་སྔོན་པོ་བཅུའི་སྟོབས་གང་ཡིན་པ་དེ་ནི། གླང་པོ་ཆེ་སེར་པོ་གཅིག་གི་སྟོབས་སོ། །གླང་པོ་ཆེ་སེར་པོ་བཅུའི་
སྟོབས་གང་ཡིན་པ་དེ་ནི། གླང་པོ་ཆེ་དམར་པོ་གཅིག་གི་སྟོབས་སོ། །གླང་པོ་ཆེ་དམར་པོ་བཅུའི་སྟོབས་གང་ཡིན་པ་དེ་ནི། གླང་པོ་ཆེ་སྐྱ་བོ་གཅིག་གི་སྟོབས་སོ། །གླང་པོ་ཆེ་སྐྱ་བོ་བཅུའི་
སྟོབས་གང་ཡིན་པ་དེ་ནི། གླང་པོ་ཆེ་ཀུ་མུ་ད་གཅིག་གི་སྟོབས་སོ། །གླང་པོ་ཆེ་ཀུ་མུ་ད་བཅུའི་སྟོབས་གང་ཡིན་པ་དེ་ནི། གླང་པོ་ཆེ་པདྨ་དཀར་པོ་གཅིག་གི་སྟོབས་སོ། །གླང་པོ་ཆེ་པདྨ་དཀར་པོ་བཅུའི་
སྟོབས་གང་ཡིན་པ་དེ་ནི། གླང་པོ་ཆེ་པདྨ་གཅིག་གི་སྟོབས་སོ། །གླང་པོ་ཆེ་པདྨ་བཅུའི་སྟོབས་གང་ཡིན་པ་དེ་ནི། སྤོས་ཀྱི་གླང་པོ་ཆེ་གཅིག་གི་སྟོབས་སོ། །སྤོས་ཀྱི་གླང་པོ་ཆེ་བཅུའི་སྟོབས་
གང་ཡིན་པ་དེ་ནི། སྤོས་ཀྱི་གླང་པོ་ཆེ་ཆེན་པོ་གཅིག་གི་སྟོབས་སོ། །སྤོས་ཀྱི་གླང་པོ་ཆེ་ཆེན་པོ་བཅུའི་སྟོབས་གང་ཡིན་པ་དེ་ནི། སེངྒེ་རལ་པ་ཅན་ཐབས་ཅན་གཅིག་གི་སྟོབས་སོ། །སེངྒེ་རལ་
པ་ཅན་ཐབས་ཅན་བཅུའི་སྟོབས་གང་ཡིན་པ་དེ་ནི། ཚན་པོ་ཆེ་གཅིག་གི་སྟོབས་སོ། །ཚན་པོ་ཆེ་བཅུའི་སྟོབས་གང་ཡིན་པ་དེ་ནི། ཚན་པོ་ཆེ་ཆེན་པོ་གཅིག་གི་སྟོབས་སོ། །ཚན་པོ་ཆེ་ཆེན་པོ་
བཅུའི་སྟོབས་གང་ཡིན་པ་དེ་ནི། སྟོབས་མཆོག་གཅིག་གི་སྟོབས་སོ། །སྟོབས་མཆོག་བཅུའི་སྟོབས་གང་ཡིན་པ་དེ་ནི། སྟོབས་མཆོག་ཆེན་པོ་གཅིག་གི་སྟོབས་སོ། །སྟོབས་མཆོག་
ཆེན་པོ་བཅུའི་སྟོབས་གང་ཡིན་པ་དེ་ནི། རབ་གནོན་གཅིག་གི་སྟོབས་སོ། །རབ་གནོན་བཅུའི་སྟོབས་གང་ཡིན་པ་དེ་ནི། རབ་གནོན་ཆེན་པོ་གཅིག་གི་སྟོབས་སོ། །རབ་གནོན་ཆེན་པོ་བཅུའི་
སྟོབས་གང་ཡིན་པ་དེ་ནི། ས་བླའི་ལྷའི་བུ་གཅིག་གི་སྟོབས་སོ། །ས་བླའི་ལྷའི་བུ་བཅུའི་སྟོབས་གང་ཡིན་པ་དེ་ནི། གཞལ་མེད་ཁང་ན་གནས་པའི་ལྷའི་བུ་གཅིག་གི་སྟོབས་སོ། །གཞལ་མེད་
༄༅། །ཁང་ན་གནས་པའི་ལྷའི་བུ་བཅུའི་སྟོབས་གང་ཡིན་པ་དེ་ནི། ལྷའི་བུ་གཤོལ་གདའ་འཛིན་གཅིག་གི་སྟོབས་སོ། །ལྷའི་བུ་གཤོལ་གདའ་འཛིན་བཅུའི་
སྟོབས་གང་ཡིན་པ་དེ་ནི། ལྷའི་བུ་ལག་ན་ཕྲེང་ཐོགས་གཅིག་གི་སྟོབས་སོ། །ལྷའི་བུ་ལག་ན་ཕྲེང་ཐོགས་བཅུའི་སྟོབས་གང་ཡིན་པ་དེ་ནི། ལྷའི་བུ་རྟག་ཏུ་མྱོས་གཅིག་གི་སྟོབས་
སོ༑ ༑ལྷའི་བུ་རྟག་ཏུ་མྱོས་བཅུའི་སྟོབས་གང་ཡིན་པ་དེ་ནི། རྒྱལ་ཆེན་བཞིའི་རིས་ཀྱི་ལྷའི་བུ་གཅིག་གི་སྟོབས་སོ། །རྒྱལ་ཆེན་བཞིའི་རིས་ཀྱི་ལྷའི་བུ་ཐམས་ཅད་ཀྱི་སྟོབས་གང་
ཡིན་པ་དེ་ནི། ལུས་ངན་གཅིག་གི་སྟོབས་སོ། །ལུས་ངན་བཅུའི་སྟོབས་གང་ཡིན་པ་དེ་ནི། སུམ་ཅུ་རྩ་གསུམ་པའི་ལྷའི་བུ་གཅིག་གི་སྟོབས་སོ། །སུམ་ཅུ་རྩ་གསུམ་པའི་
ལྷའི་བུ་ཐམས་ཅད་ཀྱི་སྟོབས་གང་ཡིན་པ་དེ་ནི། ལྷའི་དབང་པོ་བརྒྱ་བྱིན་གཅིག་གི་སྟོབས་སོ། །ལྷའི་དབང་པོ་བརྒྱ་བྱིན་བཅུའི་སྟོབས་གང་ཡིན་པ་དེ་ནི། འཐབ་བྲལ་གྱི་
ལྷའི་བུ་གཅིག་གི་སྟོབས་སོ། །འཐབ་བྲལ་གྱི་ལྷའི་བུ་ཐམས་ཅད་ཀྱི་སྟོབས་གང་ཡིན་པ་དེ་ནི། ལྷའི་བུ་རབ་འཐབ་བྲལ་གཅིག་གི་སྟོབས་སོ། །ལྷའི་བུ་རབ་འཐབ་བྲལ་བཅུའི་
སྟོབས་གང་ཡིན་པ་དེ་ནི། དགའ་ལྡན་གྱི་ལྷའི་བུ་གཅིག་གི་སྟོབས་སོ། །དགའ་ལྡན་གྱི་ལྷའི་བུ་ཐམས་ཅད་ཀྱི་སྟོབས་གང་ཡིན་པ་དེ་ནི། ལྷའི་རྒྱལ་པོ་ཡོངས་སུ་དགའ་ལྡན་
གཅིག་གི་སྟོབས་སོ། །ལྷའི་རྒྱལ་པོ་ཡོངས་སུ་དགའ་ལྡན་བཅུའི་སྟོབས་གང་ཡིན་པ་དེ་ནི། འཕྲུལ་དགའི་ལྷའི་བུ་གཅིག་གི་སྟོབས་སོ། །འཕྲུལ་དགའི་ལྷའི་བུ་ཐམས་ཅད་གྱི་
སྟོབས་གང་ཡིན་པ་དེ་ནི། ལྷའི་རྒྱལ་པོ་རབ་འཕྲུལ་གཅིག་གི་སྟོབས་སོ། །ལྷའི་རྒྱལ་པོ་རབ་འཕྲུལ་བཅུའི་སྟོབས་གང་ཡིན་པ་དེ་ནི། གཞན་འཕྲུལ་དབང་བྱེད་ཀྱི་ལྷའི་བུ་གཅིག་
གི་སྟོབས་སོ། །གཞན་འཕྲུལ་དབང་བྱེད་ཀྱི་ལྷའི་བུ་ཐམས་ཅད་ཀྱི་སྟོབས་གང་ཡིན་པ་དེ་ནི། ལྷའི་རྒྱལ་པོ་དབང་བྱེད་གཅིག་གི་སྟོབས་སོ། །ལྷའི་རྒྱལ་པོ་དབང་བྱེད་བཅུའི་སྟོབས་
གང་ཡིན་པ་དེ་ནི། བདུད་ཀྱི་རིས་ཀྱི་ལྷའི་བུ་གཅིག་གི་སྟོབས་སོ། །བདུད་ཀྱི་རིས་ཀྱི་ལྷའི་བུ་ཐམས་ཅད་ཀྱི་སྟོབས་གང་ཡིན་པ་དེ་ནི། བདུད་སྡིག་ཅན་གཅིག་གི་སྟོབས་སོ། །བདུད་སྡིག་
ཅན་བཅུའི་སྟོབས་གང་ཡིན་པ་དེ་ནི། སྲེད་མེད་ཀྱི་བུ་ཕྱེད་པ་གཅིག་གི་སྟོབས་སོ། །སྲེད་མེད་ཀྱི་བུ་ཕྱེད་པ་བཅུའི་སྟོབས་གང་ཡིན་པ་དེ་ནི། སྲེད་མེད་ཀྱི་བུ་གཅིག་གི་སྟོབས་སོ། །སྲེད་
མེད་ཀྱི་བུ་བཅུའི་སྟོབས་གང་ཡིན་པ་དེ་ནི། སྲེད་མེད་ཀྱི་བུ་ཆེན་པོ་གཅིག་གི་སྟོབས་སོ། །སྲེད་མེད་ཀྱི་བུ་ཆེན་པོ་བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་ངེས་པར་
བྱུང་ནས་བསྐལ་པ་བརྒྱ་ལོན་པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བརྒྱ་ལོན་པ་བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་ངེས་
༄༅། །པར་བྱུང་ནས་བསྐལ་པ་སྟོང་ལོན་པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་སྟོང་ལོན་པ་བཅུའི་སྟོབས་གང་ཡིན་པ་དེ་ནི།
བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་ཁྲི་ལོན་པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་ཁྲི་ལོན་པ་བཅུའི་སྟོབས་གང་ཡིན་
པ་དེ་ནི༑ བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་འབུམ་ལོན་པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་འབུམ་ལོན་པ་
བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་ས་ཡ་ལོན་པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་པར་བྱུང་ནས་
བསྐལ་པས་པ་ལོན་པ་བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་བ་ལོན་པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་
པར་བྱུང་ནས་བསྐལ་པ་བྱ་བ་ལོན་པ་བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་བ་ཕྲག་བཅུ་ལོན་པ་གཅིག་གི་སྟོབས་སོ༑ །བྱང་
ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་བ་ཕྲག་བཅུ་ལོན་པ་བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་བ་ཕྲག་བརྒྱ་ལོན་
པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་བ་ཕྲག་བརྒྱ་ལོན་པ་བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་
བ་ཕྲག་སྟོང་ལོན་པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་བ་ཕྲག་སྟོང་ལོན་པ་བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་ངེས་པར་བྱུང་
ནས་བསྐལ་པ་བྱེ་བ་ཕྲག་ཁྲི་ལོན་པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་བ་ཁྲག་ཁྲི་ལོན་པ་བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་
དཔའ་ངེས་པར་བྱུང་ནས་བསྐལ་པ་བྱེ་བ་ཕྲག་འབུམ་ལོན་པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་བ་ཕྲག་འབུམ་ལོན་པ་བཅུའི་སྟོབས་གང་ཡིན་
པ་དེ་ནི། བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་བ་ཕྲག་ས་ཡ་ལོན་པ་གཅིག་གི་སྟོབས་སོ། །བྱང་ཆུབ་སེམས་དཔའ་ངེས་པར་བྱུང་ནས་བསྐལ་པ་བྱེ་བ་ཕྲག་ས་ཡ་ལོན་པ་
བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པ་གཅིག་གི་སྟོབས་སོ། །བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པ་བཅུའི་
སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་ས་བཅུ་ལ་གནས་པ་སྲིད་པ་ཐམ་པ་གཅིག་གི་སྟོབས་ཡིན་ཏེ། མཽངྒལ་གྱི་བུ། སྟོབས་དེ་དང་ལྡན་ན། བྱང་ཆུབ་སེམས་དཔའ་སེམས་དཔའ་
༄༅། །ཆེན་པོ་བཙས་མ་ཐག་ཏུ་ས་ལ་གོམ་པ་བདུན་འགྲོ་བར་འགྱུར་རོ། །མཽངྒལ་གྱི་བུ། གལ་ཏེ་འཇིག་རྟེན་གྱི་ཁམས་གཞན་ན་བཞུགས་པའི་སངས་རྒྱས་བཅོམ་ལྡན་
འདས་རྣམས་ཀྱིས་བྱང་ཆུབ་སེམས་དཔའ་ག་ལ་འདུག་པའི་འཇིག་རྟེན་གྱི་ཁམས་དེ་རྡོ་རྗེའི་རང་བཞིན་དུ་བྱིན་གྱིས་མ་བརླབས་སུ་ཟིན་ན། བཙས་མ་ཐག་ཏུ་གོམ་པ་བདུན་འདོར་བའི་
ཆེ་འཇིག་རྟེན་གྱི་ཁམས་དེའི་ས་ཆེན་པོ་ཐུར་དུ་དཔག་ཚད་དྲུག་ཁྲི་བརྒྱད་སྟོང་ཞོམ་པར་འགྱུར་ཏེ། དེའི་འོག་ནས་ཆུའི་ཕུང་པོ་ལས་ཆུའི་རྒྱུན་ཤིང་རྟའི་སྲོག་ཤིང་ཙམ་ས་གཞི་ཆེན་
པོ་བརྟོལ་ཏེ་འབྱུང་བར་འགྱུར་བ་ཞིག་ན། འོན་ཀྱང་སངས་རྒྱས་ཀྱི་མཐུས་ས་ཆེན་པོ་དེའང་ཞོམ་པས་མི་འགྱུར་ལ། སེམས་ཅན་རྣམས་ལའང་གནོད་པར་མི་འགྱུར་ཏེ། བྱང་
ཆུབ་སེམས་དཔའ་སེམས་དཔའ་ཆེན་པོ་སྲིད་པ་ཐ་མ་པ་བཙས་མ་ཐག་པའི་སྟོབས་དང༌། མྱུར་བ་དང༌། ཤུགས་དང༌། མཐུ་ནི། དེ་འདྲའོ། །མཽངྒལ་གྱི་བུ། བྱང་ཆུབ་སེམས་
དཔའ་སྲིད་པ་ཐ་མ་པ་བཙས་མ་ཐག་པ་བཅུའི་སྟོབས་གང་ཡིན་པ་དེ་ནི། བྱང་ཆུབ་སེམས་དཔའ་ལང་ཚོའི་མཆོག་ལ་བབ་པ་གཅིག་གི་སྟོབས་ཡིན་ཏེ། སྟོབས་དེ་དང་ལྡན་པའི་བྱང་
ཆུབ་སེམས་དཔའ་སེམས་དཔའ་ཆེན་པོ་ནི། བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་བའི་ཕྱིར་བྱང་ཆུབ་ཀྱི་སྙིང་པོར་འགྲོའོ། །ཇི་ལྟ་བུའི་སྟོབས་དང་ལྡན་པས་བྱང་ཆུབ་
སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སྙིང་པོར་འགྲོ་བ་དེ་བས་འབུམ་གྱུར་གྱིས་ལྷག་པའི་སྟོབས་ཀྱིས་ནི། བྱང་ཆུབ་ཀྱི་སྙིང་པོ་ལ་འཇུག་གོ །དེ་བས་ཀྱང་ཆེས་གྲངས་མེད། དཔག་ཏུ་མེད་
བརྗོད་དུ་མེད། བསམ་གྱིས་མི་ཁྱབ་པའི་སྟོབས་དང་ལྡན་པས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །མཽངྒལ་གྱི་བུ། གལ་ཏེ་འཇིག་རྟེན་གྱི་
ཁམས་ཐམས་ཅད་ཀྱི་སེམས་ཅན་གང་ཡིན་པ་དེ་དག་ཐམས་ཅད་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་དེ། བྱང་ཆུབ་སེམས་དཔའི་སྟོབས་དང་ལྡན་པར་གྱུར་ནའང་དེ་དག་ནི། དེ་
བཞིན་གཤེགས་པའི་གནས་དང་གནས་མ་ཡིན་པའི་མཁྱེན་པའི་སྟོབས་གཅིག་གི་འབུམ་གྱི་ཆར་ཡང་མི་ཕོད་པ་ནས་དཔེའི་བར་དུའང་མི་བཟོད་དེ། སྟོབས་དེ་ལྟ་བུ་བརྙེས་པས་སྟོབས་བཅུའི་
སྟོབས་དང་ལྡན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ། །མཽངྒལ་གྱི་བུ། བྱང་ཆུབ་སེམས་དཔའི་སྟོབས་འདི་ནི། སྔོན་གྱི་དགེ་བའི་རྩ་བ་
ཡོངས་སུ་སྨིན་པས་བསྡུས་པ་སྟེ། དེ་ལས་ཆུང་བའང་མེད། ལྷག་པའང་མེད་དོ། །དེ་ནི། རྫུ་འཕྲུལ་ཡང་མ་ཡིན། ཆོ་འཕྲུལ་ཡང་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ཀྱི་རྫུ་འཕྲུལ་གྱི་སྟོབས་ནི། སྟོབས་གང་དང་ལྡན་ན་བྱང་ཆུབ་སེམས་དཔས་རྐང་པའི་མཐེ་བོའི་སྤུའི་ཁུང་བུ་གཅིག་གིས་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་བགྲངས་ནས་འཇིག་
༄༅། །རྟེན་གྱི་ཁམས་མཐའ་ཡས་མུ་མེད་པ་དག་ཏུ་འཕངས་ཀྱང་སེམས་ཅན་འགའ་ཙམ་ལའང་གནོད་པར་མི་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ཀྱི་རྫུ་འཕྲུལ་དང༌། ཆོ་འཕྲུལ་གྱི་སྟོབས་ནི། དེ་ལྟར་དཔག་ཏུ་མེད། བསམ་གྱིས་མི་ཁྱབ། མཚུངས་པ་མེད། གྲངས་མེད་དོ། །དེ་བཞིན་གཤེགས་པ་ནི། མི་མཉམ་པ་དང་མཉམ་
མོ། །མཽངྒལ་གྱི་བུ། གལ་ཏེ་དེ་བཞིན་གཤེགས་པའི་སྟོབས་དེ་བསྟན་དུ་ཟིན་ན་ནི། ཁྱེད་ཀྱིས་ཀྱང་ཡིད་ཆེས་པར་མི་ནུས་ན། སེམས་ཅན་གཞན་གྱིས་ལྟ་ཅི་སྨོས། མཽངྒལ་གྱི་བུ། གང་གི་ཚེ་བྱང་
ཆུབ་སེམས་དཔའ་བྱང་ཆུབ་ཀྱི་སྙིང་པོར་འགྲོ་བ་དེའི་ཚེ་ཁམས་བཞི་པོས་དང༌། ཆུ་དང༌། མེ་དང༌། ཀླུང་གི་ཁམས་འདི་དག་ཁམས་གཅིག་པུ་འདི་ལྟ་སྟེ། ནམ་མཁའི་ཁམས་སུ་བྱིན་གྱིས་
རློབ་སྟེ༑ དེས་ནས་ཆེན་པོ་དེ་ཞོམ་པར་མི་འགྱུར་ལ། སེམས་ཅན་རྣམས་ལའང་གནོད་པར་མི་འགྱུར་རོ། །དེ་ནས་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཀྱིས་དེ་བཞིན་གཤེགས་པ་
ལས་བྱང་ཆུབ་སེམས་དཔའི་ཡབ་ཡུམ་ལས་བྱུང་བའི་སྟོབས་འདི་ཐོས་ནས་དགའ་ཞིང་སྤུ་ཟིང་ཞེས་བྱེད་ལ་ངོ་མཚར་དུ་གྱུར་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་
པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས།
བཅོམ་ལྡན་འདས་ལས་བྱང་ཆུབ་སེམས་དཔའི་སྟོབས་ཐོས་ནས་བདག་གི་ང་རྒྱལ་དང༌། དྲེགས་པ་ཆག་སྟེ་མ་མཆིས་པར་གྱུར་ལགས་སོ། །བཅོམ་ལྡན་འདས།
བདག་སངས་རྒྱས་དང༌། ཆོས་དང༌། དགེ་སློང་གི་དགེ་འདུན་ལ་སྐྱབས་སུ་མཆིའོ། །སེམས་ཅན་ཐམས་ཅད་ལ་སྨན་པ་དང༌། བདེ་བའི་སླད་དུ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུའང་སེམས་བསྐྱེད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྟོབས་བཅུ་ཅི་འདྲ་བ་
དེ་ལྟ་བུའང་བདག་གིས་ཐོབ་པར་གྱུར་ཅིག །ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ལས་ལྷའི་བུ་ཁྲིས་ཚིག་འདི་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་སེམས་བསྐྱེད་དེ་འདི་སྐད་དུ། བཅོམ་ལྡན་འདས། བདག་ཅག་ཀྱང་ད་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཅི་འདྲ་བ་དེ་
ལྟ་བུའི་སྟོབས་དང་ལྡན་པར་གྱུར་ཅིག། ཅེས་སྨྲས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྲེད་མེད་ཀྱི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བཅོམ་
ལྡན་འདས་ཀྱིས་གང་གི་མིང་བཀའ་སྩལ་ནས་ཅང་མི་གསུང་བར་གྱུར་བའི་ཏིང་ངེ་འཛིན་བསོད་ནམས་ཐམས་ཅད་བསྡུས་པ་ཞེས་བགྱི་བ་དེ་གང་ལགས། བཅོམ་ལྡན་འདས་
༄༅། །ཅི་ནས་བྱང་ཆུབ་སེམས་དཔའ་རྣམས་ཀྱིས་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་ཐོབ་པར་འགྱུར་བའི་སླད་དུ་བསོད་ནམས་ཐམས་ཅད་བསྡུས་པའི་
ཏིང་ངེ་འཛིན་དེ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་སྟོང་གསུམ་གྱི་བདག་པོ་བྱང་ཆུབ་སེམས་དཔའ་སྲེད་མེད་ཀྱི་བུ་ལ་བཀའ་སྩལ་པ། སྲེད་མེད་ཀྱི་བུ། བྱང་ཆུབ་སེམས་
དཔའ་སེམས་དཔའ་ཆེན་པོ་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེས་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཡོངས་སུ་མ་
བཟུང་བ་དེ་ནི། གང་ཡང་མེད་དོ། །དེ་ཅིའི་ཕྱིར་ཞེ་ན། བསོད་ནམས་བྱ་བའི་དངོས་པོ་ཐམས་ཅད་ནི། བྱང་ཆུབ་ཀྱི་སེམས་བསྐྱེད་པ་དེའི་ཁོངས་སུ་འདུས་ཤིང་རྗེས་སུ་ཞུགས་པའི་
ཕྱིར་རོ༑ ༑སྲེད་མེད་ཀྱི་བུ། དཔེར་ན་།ཆུ་མིག་ཐམས་ཅད་དང༌། མཚོ་ཕྲན་ཐམས་ཅད་དང༌། མཚེའུ་ཐམས་ཅད་དང༌། ཆུ་ཀླུང་ཐམས་ཅད་དང༌། ཆུ་བྲན་ཐམས་ཅད་དང༌། མཚོ་
ཐམས་ཅད་དང༌། ལྟེང་ཀ་ཐམས་ཅད་ནི། རྒྱ་མཚོ་ཆེན་པོའི་ཁོངས་སུ་འདུས་ཤིང་རྗེས་སུ་ཞུགས་པ་དེ་བཞིན་དུ་སྲེད་མེད་ཀྱི་བུ། བསོད་ནམས་བྱ་བའི་དངོས་པོ་ཅིའང་རུང་བ་སྦྱིན་
པ་ལས་བྱུང་བ་རྣམས་དང༌། ཚུལ་ཁྲིམས་ལས་བྱུང་བ་རྣམས་དང༌། བསྒོམས་པ་ལས་བྱུང་བ་རྣམས་དང༌། ཟག་པ་དང་བཅས་པ་རྣམས་དང༌། ཟག་པ་མེད་པ་རྣམས་དང༌། འཇིག་
རྟེན་པ་རྣམས་དང༌། འཇིག་རྟེན་ལས་འདས་པ་རྣམས་དང༌། ལྷ་རྣམས་དང༌། མི་རྣམས་ཀྱི་བསོད་ནམས་བྱ་བའི་དངོས་པོ་ཇི་སྙེད་པའི་བསོད་ནམས་བྱ་བའི་དངོས་པོ་དེ་དག་ཐམས་ཅད་
ནི། བྱང་ཆུབ་ཀྱི་སེམས་ཀྱི་ཁོངས་སུ་འདུས་ཤིང་རྗེས་སུ་ཞུགས་པ་དག་གོ། སྲེད་མེད་ཀྱི་བུ། དེའི་ཕྱིར་བསོད་ནམས་ཐམས་ཅད་ཡོངས་སུ་གཟུང་བར་འདོད་པའི་རིགས་ཀྱི་བུའམ་རིགས་
ཀྱི་བུ་མོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །སྲེད་མེད་ཀྱི་བུ། དཔེར་ན། རིན་པོ་ཆེའི་རི་ཆེན་པོ་གང་དག་ཡིན་པ་འདི་ལྟ་སྟེ། ལྷུན་པོ་དང༌།
ལྷུན་པོ་ཆེན་པོ་དང༌། བཏང་བཟུང་དང༌། བཏང་བཟུང་ཆེན་པོ་དང༌། ཁོར་ཡུག་དང༌། ཁོར་ཡུག་ཆེན་པོ་དང༌། གཞན་ཡང་རི་ནག་པོ་རྣམས་དང༌། རྩྭ་དང༌། ཤིང་གེལ་པ་དང༌། སྨན་དང༌།
ནགས་ཚལ་ཐམས་ཅད་དང༌། གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་དང༌། ཛམྦུའི་གླིང་དང༌། ཤར་གྱི་ལུས་འཕགས་དང༌། ནུབ་
ཀྱི་བ་ལང་སྤྱོད་དང༌། བྱང་གི་སྒྲ་མི་སྙན་དང༌། གླིང་བཞི་པའི་འཇིག་རྟེན་གྱི་ཁམས་དང༌། སྟོང་གི་འཇིག་རྟེན་གྱི་ཁམས་དང༌། སྟོང་གཉིས་ཀྱི་འཇིག་རྟེན་གྱི་ཁམས་དང༌། སྟོང་གསུམ་
གྱི་འཇིག་རྟེན་གྱི་ཁམས་དང༌། འདོད་པའི་ཁམས་དང༌། གཟུགས་ཀྱི་ཁམས་དང༌། གཟུགས་མེད་པའི་ཁམས་དང༌། ཟླ་བ་དང༌། ཉི་མ་དང༌། གཟའ་དང༌། རྒྱུ་སྐར་ཇི་སྙེད་ཡོད་པ་ནས་
༄༅། །གླིང་ཆེན་པོ་བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱའི་བར་འདི་དག་ཐམས་ཅད་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཁོངས་སུ་
འདུས་ཤིང་རྗེས་སུ་ཞུགས་པར་བལྟ་བར་བྱ་བ་དེ་བཞིན་དུ་སྲེད་མེད་ཀྱི་བུ། སོ་སོ་སྐྱེ་བའི་བསོད་ནམས་རྣམས་དང༌། སློབ་པའི་བསོད་ནམས་རྣམས་དང༌། མི་སློབ་པའི་བསོད་ནམས་
རྣམས་དང༌། རང་སངས་རྒྱས་ཀྱི་བསོད་ནམས་རྣམས་དང༌། བྱང་ཆུབ་སེམས་དཔའ་བསོད་ནམས་རྣམས་ཅིའང་རུང་བ་ཇི་སྙེད་པ་དེ་དག་ཐམས་ཅད་ནི། བྱང་ཆུབ་སེམས་དཔའ་སེམས་
དཔའ་ཆེན་པོ་སེམས་དང་པོ་བསྐྱེད་པའི་ཁོངས་སུ་འདུས་ཤིང་རྗེས་སུ་ཞུགས་ཏེ། སྲེད་མེད་ཀྱི་བུ། རྣམ་གྲངས་དེས་ཀྱང་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་སེམས་བསྐྱེད་པའི་སེམས་ཅན་དེ་དག་གིས་བསོད་ནམས་ཐམས་ཅད་ཡོངས་སུ་བཟུང་བ་དེ་ལྟར་རིག་བར་བྱའོ། །སྲེད་མེད་ཀྱི་བུ། གླིང་བཞི་པའི་འཇིག་རྟེན་གྱི་ཁམས་ཀྱི་སེམས་
ཅན་ལས་ཐེག་པ་ཆེན་པོ་ལ་ཡང་དག་པར་ཞུགས་པ་མ་གཏོགས་པ་ཇི་སྙེད་པ་དེ་དག་གི་ནང་ན་འཁོར་ལོས་བསྒྱུར་བ་ནི། བསོད་ནམས་དང་ཤེས་རབ་ཀྱིས་མཆོག་ཏུ་བརྗོད་དོ། །
སྲེད་མེད་ཀྱི་བུ། གླིང་བཞི་བའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་འཁོར་ལོས་བསྒྱུར་བའི་བསོད་ནམས་ཀྱི་ཕུང་པོ་དང་ལྡན་པར་གྱུར་ཏེ། སེམས་
ཅན་རེ་རེའང་འཁོར་ལོས་བསྒྱུར་བའི་རྒྱལ་པོའི་བསོད་ནམས་ཅི་འདྲ་བ་དེ་ལྟ་བུའི་བསོད་ནམས་དང་ལྡན་པར་གྱུར་ན། སྲེད་མེད་ཀྱི་བུ། འདི་སྙམ་དུ་སེམས། ཅི་བསོད་ནམས་ཀྱི་ཕུང་པོ་དེ་
མང་ངམ། བྱང་ཆུབ་སེམས་དཔའ་སྲེད་མེད་ཀྱི་བུས་གསོལ་པ། བཅོམ་ལྡན་འདས། འཁོར་ལོས་བསྒྱུར་བ་གཅིག་གི་བསོད་ནམས་ཀྱི་ཕུང་པོའང་མང་ལགས་ན། སེམས་ཅན་གྲངས་མ་
མཆིས་པ་དེ་དག་གི་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཀྱིས་བཀའ་སྩལ་པ། སྲེད་མེད་ཀྱི་བུ། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་
སྙེད་ཡོད་པ་སེམས་ཅན་དུ་བསྡུ་བར་བསྡུས་པ་དེ་དག་རེ་རེ་ནས་འཁོར་ལོས་བསྒྱུར་བའི་བསོད་ནམས་ཀྱི་ཕུང་པོ་དང་ལྡན་པའམ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
ཀྱི་སེམས་ཅན་རྣམས་འཁོར་ལོས་བསྒྱུར་བའི་བསོད་ནམས་ཀྱི་ཕུང་པོ་དང་ལྡན་པ་ལྟ་ཞོག་གི །སྲེད་མེད་ཀྱི་བུ། གལ་ཏེ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་
གང་དག་ཡིན་པ་དེ་དག་ཐམས་ཅད་འཁོར་ལོས་བསྒྱུར་བའི་བསོད་ནམས་ཀྱི་ཕུང་པོ་དང་ལྡན་པར་གྱུར་ན། སྲེད་མེད་ཀྱི་བུ། འདི་ཇི་སྙམ་དུ་སེམས་།ཅི་སེམས་ཅན་དེ་དག་གི་བསོད་
ནམས་ཀྱི་ཕུང་པོ་མང་ངམ། བྱང་ཆུབ་སེམས་དཔའ་སྲེད་མེད་ཀྱི་བུས་གསོལ་པ། བཅོམ་ལྡན་འདས། སེམས་ཅན་གཅིག་འཁོར་ལོས་བསྒྱུར་བ་དང་མཉམ་པར་གྱུར་པའི་བསོད་ནམས་
༄༅། །ཀྱི་ཕུང་པོའང་དཔག་ཏུ་མ་མཆིས་གྲངས་མ་མཆིས་ན། སེམས་ཅན་གྲངས་མ་མཆིས་པ་འཁོར་ལོས་བསྒྱུར་བའི་རྒྱལ་པོར་གྱུར་བ་དེ་དག་གི་བསོད་ནམས་ཀྱི་
ཕུང་པོ་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཀྱིས་བཀའ་སྩལ་པ། སྲེད་མེད་ཀྱི་བུ། ཁྱོད་མོས་པར་བྱ། ཁྱོད་དུ་ཆུད་པར་བྱ་སྟེ། དེ་བས་ན། སེམས་དང་པོ་བསྐྱེད་པའི་བྱང་
ཆུབ་སེམས་དཔའི་བསོད་ནམས་ཀྱི་ཕུང་པོ་ཡོངས་སུ་བཟུང་བ་ཆེས་མང་ལ་ཆེས་དཔག་ཏུ་མེད་དེ། འཁོར་ལོས་བསྒྱུར་བའི་བསོད་ནམས་ཀྱི་ཕུང་པོས་ནི། བསོད་ནམས་ཀྱི་ཕུང་པོ་
དེའི་བརྒྱའི་ཆར་ཡང་མི་ཕོད། སྟོང་གི་ཆ་དང༌། འབུམ་གྱི་ཆ་དང༌། བྱེ་བ་ཕྲག་བརྒྱའི་ཆ་དང༌། བྱེ་བ་ཕྲག་སྟོང་གི་ཆ་དང༌། བྱེ་བ་ཕྲག་འབུམ་གྱི་ཆར་ཡང་མི་ཕོད། གྲངས་དང༌།
ཆ་དང༌། བགྲང་བ་དང༌། དཔེ་དང༌། རྒྱུར་ཡང་མི་བཟོད་དེ། སྲེད་མེད་ཀྱི་བུ། འདི་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་ལ་འཇུག་པ་དང་པོའོ། །སྲེད་མེད་ཀྱི་བུ།
གཞན་ཡང་སྟོང་གི་བདག་པོ་ཚངས་པ་ནི། སྟོང་གི་འཇིག་རྟེན་གྱི་ཁམས་བྱམས་པས་ཁྱབ་པར་བྱེད་དོ། །སྲེད་མེད་ཀྱི་བུ། འདི་ཇི་སྙམ་དུ་སེམས། གལ་ཏེ་མི་ལ་ལ་ཞིག་གིས་
སྟོང་གི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་གང་བར་བྱས་ཏེ་སྦྱིན་པ་བྱིན་ན། སྦྱིན་པ་ལས་བྱུང་བའི་བསོད་ནམས་ཀྱི་ཕུང་པོ་དེ་དང༌། ཚངས་པའི་བྱམས་པ་དང་ལྡན་པའི་
བསོད་ནམས་ཀྱི་ཕུང་པོ་དེ་གཉིས་གང་མང༌། བྱང་ཆུབ་སེམས་དཔའ་སྲེད་མེད་ཀྱི་བུས་གསོལ་པ། བཅོམ་ལྡན་འདས། ཚངས་པའི་བསོད་ནམས་ཀྱི་ཕུང་པོ་དེ་ཉིད་ཆེས་མང་གི། སྦྱིན་པ་
ལས་བྱུང་བ་ནི། དེ་ལྟ་མ་ལགས་སོ། །སྲེད་མེད་ཀྱི་བུ། སྟོང་གི་བདག་པོ་ཚངས་པའི་བསོད་ནམས་ཀྱི་ཕུང་པོ་ལྟ་ཞོག་གི། སྲེད་མེད་ཀྱི་བུ། འདི་ཇི་སྙམ་དུ་སེམས། སྟོང་གཉིས་ཀྱི་བདག་
པོ་ཚངས་པས་སྟོང་གཉིས་ཀྱི་འཇིག་རྟེན་གྱི་ཁམས་བྱམས་པས་ཁྱབ་པར་བྱེད་ལ། སྲེད་མེད་ཀྱི་བུ། གལ་ཏེ་མི་ལ་ལ་ཞིག་གིས་སྟོང་གཉིས་ཀྱི་འཇིག་རྟེན་གྱི་ཁམས་རིན་པོ་ཆེ་སྣ་བདུན་
གྱིས་ཡོངས་སུ་གང་བར་བྱས་ཏེ་སྦྱིན་པ་བྱིན་ན། སྲེད་མེད་ཀྱི་བུ། སྦྱིན་པ་ལས་བྱུང་བ་དང༌། བྱམས་པ་ལས་བྱུང་བའི་བསོད་ནམས་ཀྱི་ཕུང་པོ་དེ་གཉིས་གང་མང༌། བྱང་ཆུབ་སེམས་དཔའ་
སྲེད་མེད་ཀྱི་བུས་གསོལ་པ། བཅོམ་ལྡན་འདས། སྟོང་གཉིས་ཀྱི་བདག་པོ་ཚངས་པའི་བྱམས་པ་དང་ལྡན་པའི་བསོད་ནམས་ཀྱི་ཕུང་པོ་གང་ལགས་པ་དེ་ཉིད་ཆེས་མང་གི །སྦྱིན་པ་ལས་
བྱུང་བ་ནི། དེ་ལྟ་མ་ལགས་སོ། །སྲེད་མེད་ཀྱི་བུ། སྟོང་གཉིས་ཀྱི་བདག་པོ་ཚངས་པའི་བསོད་ནམས་ཀྱི་ཕུང་པོ་ལྟ་ཞོག་གི །སྲེད་མེད་ཀྱི་བུ། འདི་ཇི་སྙམ་དུ་སེམས། སྟོང་གསུམ་གྱི་བདག་པོ་
ཚངས་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱམས་པས་ཁྱབ་པར་བྱེད་ལ། སྲེད་མེད་ཀྱི་བུ། མི་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་
༄༅། །པོ་ཆེ་སྣ་བདུན་གྱིས་གང་བར་བྱས་ཏེ་སྦྱིན་པ་བྱིན་ན། སྲེད་མེད་ཀྱེ་བུ། སྦྱིན་པ་ལས་བྱུང་བ་དང༌། ཚངས་པ་ཆེན་པོའི་བྱམས་པ་དང་ལྡན་པའི་བསོད་ནམས་ཀྱི་
ཕུང་པོ་དེ་གཉིས་གང་མང༌། བྱང་ཆུབ་སེམས་དཔའ་སྲེད་མེད་ཀྱི་བུས་གསོལ་པ། བཅོམ་ལྡན་འདས། སྦྱིན་པ་ལས་བྱུང་བའི་བསོད་ནམས་ཀྱི་ཕུང་པོ་ནི། ཚངས་པ་ཆེན་པོའི་བྱམས་པ་
དང་ལྡན་པའི་བསོད་ནམས་ཀྱི་ཕུང་པོའི་བརྒྱའི་ཆར་ཡང་མི་ཕོད་པ་ནས་རྒྱུའི་བར་དུའང་མི་བཟོད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྲེད་མེད་ཀྱི་བུ། སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་ཀྱི་ཚངས་པ་ཆེན་པོའི་བྱམས་པ་དང་ལྡན་པའི་བསོད་ནམས་ཀྱི་ཕུང་པོ་ལྟ་ཞོག་གི །སྲེད་མེད་ཀྱི་བུ། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་ཀྱི་སེམས་ཅན་དུ་བསྡུ་བར་བསྡུས་པ་ཇི་སྙེད་པ་དེ་དག་ཐམས་ཅད་ཚངས་པ་ཆེན་པོའི་བྱམས་པ་སྒོམ་པ་དང་ལྡན་པའི་བསོད་ནམས་ཀྱི་ཕུང་པོ་དང་ལྡན་པར་གྱུར་པའི་
སེམས་ཅན་དེ་དག་ཐམས་ཅད་ཀྱི་བསོད་ནམས་ཀྱི་ཕུང་པོ་དེ་བས་ནི། སེམས་དང་པོ་བསྐྱེད་པའི་བྱང་ཆུབ་སེམས་དཔའ་ལྷག་པའི་བསམ་པ་ལ་ཞུགས་པ་སེམས་ཅན་ཐམས་ཅད་
ཡོངས་སུ་དགྲོལ་བ་ལ་བརྩོན་པ། གཡོ་མེད་ཅིང་སྒྱུ་མེད་པའི་བྱམས་པ་ཆེན་པོ་དང༌། སྙིང་རྗེ་ཆེན་པོ་བསྒོམས་པ་ལས་བྱུང་བའི་བསོད་ནམས་ཀྱི་ཕུང་པོ་གང་ཡིན་པའི་བྱང་ཆུབ་སེམས་
དཔའི་བསོད་ནམས་ཀྱི་ཕུང་པོ་འདི་ཉིད་དེ་བས་ཆེས་མང་སྟེ། ཚངས་པའི་བསོད་ནམས་ཀྱི་ཕུང་པོ་དེ་ནི། བྱང་ཆུབ་སེམས་དཔའ་དེའི་བསོད་ནམས་ཀྱི་ཕུང་པོའི་བརྒྱའི་ཆར་ཡང་མི་ཕོད་པ་
ནས་རྒྱུའི་བར་དུའང་མི་བཟོད་དོ། །སྲེད་མེད་ཀྱི་བུ། དེ་ལྟར་ན། སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བསོད་ནམས་ཀྱི་ཕུང་བོ་ནི། དཔག་ཏུ་མེད་
པ་ཡིན་ཏེ། སྲེད་མེད་ཀྱི་བུ། རྣམ་གྲངས་འདིས་ཀྱང་རིགས་ཀྱི་བུའམ་རིགས་ཀྱི་བུ་མོ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང༌། བསྐྱེད་
པར་འགྱུར་བ་དེ་དག་གིས་བསོད་ནམས་ཐམས་ཅད་ཡོངས་སུ་བསྡུས་པ་དེ་ལྟར་རིག་པར་བྱ་སྟེ། སྲེད་མེད་ཀྱི་བུ། འདི་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་ལ་འཇུག་
པ་གཉིས་པའོ། །སྲེད་མེད་ཀྱི་བུ། འདི་ཇི་སྙམ་དུ་སེམས། ཤར་ཕྱོགས་སུ་འཇིག་རྟེན་གྱི་ཁམས་ཇི་སྙེད་ཅིག་ཡོད། ལྷོ་དང༌། ནུབ་དང༌། བྱང་དང༌། འོག་དང༌། སྟེང་དང༌། ཕྱོགས་བཅུར་
འཇིག་རྟེན་གྱི་ཁམས་ཇི་སྙེད་ཅིག་ཡོད། བྱང་ཆུབ་སེམས་དཔའ་སྲེད་མེད་ཀྱི་བུས་གསོལ་པ། བཅོམ་ལྡན་འདས། དཔག་ཏུ་མ་མཆིས་སོ། །བདེ་བར་གཤེགས་པ། དཔག་ཏུ་མ་
མཆིས་སོ། །ཕྱོགས་བཅུའི་འཇིག་རྟེན་གྱི་ཁམས་དེ་དག་ནི། བརྗོད་པའམ། བརྡ་སྤྲད་པར་རྔོ་མི་ཐོགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྲེད་མེད་ཀྱི་བུ། གལ་
༄༅། །ཏེ་དཔེར་བླང་བ་བསྟན་པས་བསྐལ་པ་འབུམ་གྱི་བར་དུ་བསྟན་དུ་ཟིན་ཀྱང་ཕྱོགས་བཅུ་ན་འཇིག་རྟེན་གྱི་ཁམས་ཇི་སྙེད་ཡོད་པ་ནི། བསྟན་པར་སླ་བ་མ་ཡིན་ནོ། །སྲེད་
མེད་ཀྱི་བུ། འོན་ཀྱང་དོན་འདི་ཉིད་བརྡ་སྤྲོད་པ་དང༌། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་ཡོངས་སུ་རྫོགས་པར་བྱ་བ་དང༌། སེམས་ཅན་བསོད་ནམས་འདོད་པ་རྣམས་
ཕྱིར་ཞིང་འབོགས་པར་བྱ་བ་དང༌། བྱང་ཆུབ་སེམས་དཔའི་ཐེགས་པ་པའི་སེམས་ཅན་རྣམས་ཀྱི་བརྩོན་འགྲུས་ཆེན་པོ་ཡོངས་སུ་རྫོགས་པར་བྱ་བའི་ཕྱིར་ངས་ཁྱོད་ལ་དཔེས་བསྟན་ཏོ། །
སྲེད་མེད་ཀྱི་བུ། དཔེར་ན། མི་ལ་ལ་ཐིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཆུའི་ཕུང་པོ་ཡན་ཆད་སྲིད་པའི་རྩེ་མོ་མན་ཆད་ཡུངས་འབྲུས་ཡོངས་སུ་གང་
བར་བྱས་ལ། སྲེད་མེད་ཀྱི་བུ། དེ་ལས་ཤར་ཕྱོགས་སུ་ཡུངས་འབྲུ་དེ་དག་ཇི་སྙེད་པ་དེ་སྙེད་ཀྱི་འཇིག་རྟེན་གྱི་ཁམས་འདས་ནས་ཡུངས་འབྲུ་གཅིག་པོར་ཏེ། དེ་ལྟ་བུའི་ཚུལ་གྱིས་
ཡུངས་འབྲུ་དེ་དག་ཐམས་ཅད་ཡོངས་སུ་ཟད་པར་བྱས་ཀྱང་ཤར་ཕྱོགས་ཀྱི་འཇིག་རྟེན་གྱི་ཁམས་རྣམས་ཀྱི་མཐའ་རྟོགས་པར་མི་ནུས་སོ། །ལྷོ་དང༌། ནུབ་དང༌། བྱང་དང༌། འོག་དང༌།
སྟེང་དང༌། ཕྱོགས་བཅུ་ཀུན་ཏུའང་དེ་བཞིན་དུ་སྦྱར་རོ། །སྲེད་མེད་ཀྱི་བུ། གལ་ཏེ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཡུངས་འབྲུས་ཡོངས་སུ་གང་བར་གྱུར་པ་དེ་ལས་
མི་ལ་ལ་ཞིག་གིས་ཡུངས་འབྲུ་རེ་རེ་འང་ཡུངས་འབྲུ་དེ་དག་ཇི་སྙེད་ཡོད་པ་དེ་སྙེད་ཀྱི་ཆར་གསེས་ན། སྲེད་མེད་ཀྱི་བུ། འདི་ཇི་སྙམ་དུ་སེམས། ཡུངས་འབྲུའི་ཆ་གསེས་པ་དེ་དག་བགྲང་
བའི་ཚུལ་གྱིས་མཐའ་རྟོགས་པར་ནུས་སམ། བྱང་ཆུབ་སེམས་དཔའ་སྲེད་མེད་ཀྱི་བུས་གསོལ་པ། བཅོམ་ལྡན་འདས། ཡུངས་འབྲུ་གཅིག་གི་ཆ་གསེས་པའི་ཕྱོགས་གང་ལགས་པ་
དེའང་གླིང་བཞི་པའི་སེམས་ཅན་ཐམས་ཅད་ཤཱ་རིའི་བུ་དང་འདྲ་བར་གྱུར་པས་ཀྱང་བསྐལ་པར་ཡང་རྟོགས་པར་རྡོ་མི་ཐོགས་ལགས་ན། ཡུངས་འབྲུའི་ཆ་གསེས་པ་ཐམས་ཅད་ལྟ་སྨོས་
ཀྱང་ཅི་འཚལ། སྲེད་མེད་ཀྱི་བུ། གལ་ཏེ་མི་ལ་ལ་ཞིག་གིས་ཤར་ཕྱོགས་སུ་ཡུངས་འབྲུའི་ཆ་གསེས་པ་དེ་དག་ཇི་སྙེད་པ་དེ་སྙེད་ཀྱི་འཇིག་རྟེན་གྱི་ཁམས་འདས་ནས་ཡུངས་འབྲུའི་ཆ་
གསེས་པ་རེ་རེ་བོར་ཏེ། སྲེད་མེད་ཀྱི་བུ། དེ་ལྟ་བུའི་ཚུལ་གྱིས་ཡུངས་འབྲུའི་ཆ་གསེས་པ་ཐམས་ཅད་ཟད་པར་བྱས་ཀྱང་ཤར་ཕྱོགས་ཀྱི་འཇིག་རྟེན་གྱི་ཁམས་རྣམས་ཀྱི་མཐའ་རྟོགས་
པར་མི་ནུས་སོ། །ལྷོ་དང༌། ནུབ་དང༌། བྱང་དང༌། འོག་དང༌། སྟེང་དང༌། ཕྱོགས་བཅུ་ཀུན་ཏུའང་དེ་བཞིན་དུ་སྦྱར་རོ། །སྲེད་མེད་ཀྱི་བུ། དེ་ལྟར་ཕྱོགས་བཅུའི་འཇིག་རྟེན་གྱི་ཁམས་ནམ་
མཁས་ཡོངས་སུ་ཁྱབ་པ་ཇི་སྙེད་པ་དེ་དག་ཐམས་ཅད་མི་ལ་ལ་ཞིག་གིས་རིན་པོ་ཆེ་སྣ་བདུན་གྱིས་ཡོངས་སུ་གང་བར་བྱས་ཏེ་སྦྱིན་པ་བྱིན་ན། སྲེད་མེད་ཀྱི་བུ། འདི་ཇི་སྙམ་དུ་སེམས། མི་
༄༅། །དེ་གཞི་དེ་ལས་བསོད་ནམས་མང་དུ་སྐྱེད་དམ། བྱང་ཆུབ་སེམས་དཔའ་སྲེད་མེད་ཀྱི་བུས་གསོལ་པ། བཅོམ་ལྡན་འདས། དཔག་ཏུ་མ་མཆིས་སོ། །བདེ་བར་གཤེགས་
པ༑ དཔག་ཏུ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། སྲེད་མེད་ཀྱི་བུ། དེ་ལྟ་བུའི་སྦྱིན་པ་ལས་བྱུང་བའི་བསོད་ནམས་ཀྱི་ཕུང་པོ་བསྡུས་པ་གང་ཡིན་པ་དེ་ནི། སེམས་
དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ལྷག་པའི་བསམ་པ་ཕུན་སུམ་ཚོགས་པ་གཡོ་མེད་པ། སྒྱུ་མེད་པ། སེམས་ཅན་ཐམས་ཅད་ཡོངས་སུ་དགྲོལ་བ་ལས་
བརྩོན་པའི་སྙིང་རྗེ་ཆེན་པོ་དང༌། བྱམས་པ་ཆེན་པོ་སྒོམ་པ་དང་ལྡན་པའི་བསོད་ནམས་ཀྱི་ཕུང་པོ་བསྡུས་པའི་བརྒྱའི་ཆར་ཡང་མི་ཕོད་པ་ནས་རྒྱུའི་བར་དུའང་མི་བཟོད་དོ། །སྲེད་མེད་
ཀྱི་བུ༑ དཔེར་ན། གཟུགས་ཀྱི་རྣམ་པ་ནམ་མཁའི་ཁམས་ཀྱིས་མ་ཁྱབ་པ་ཅིའང་མེད་པ་དེ་བཞིན་དུ། སྲེད་མེད་ཀྱི་བུ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་བྱམས་
པ་དེས་ནི། ཕྱོགས་བཅུའི་འཇིག་རྟེན་ན་འཇིག་རྟེན་གྱི་ཁམས་ཇི་སྙེད་ཡོད་པ་དང༌། སངས་རྒྱས་ཀྱི་ཞིང་ཇི་སྙེད་ཡོད་པ་དེ་དག་མ་ཁྱབ་པ་གང་ཡང་མེད་དེ། འཇིག་རྟེན་གྱི་ཁམས་དེ་དག་
ན་སེམས་ཅན་འཁོད་པ་དེ་དག་ཐམས་ཅད་བྱང་ཆུབ་སེམས་དཔའི་བྱམས་པས་ཡོངས་སུ་ཁྱབ་བོ། །འཇིག་རྟེན་གྱི་ཁམས་དེ་དག་ན་སེམས་ཅན་གང་དག་སེམས་ཅན་དུ་བསྡུ་བར་
བསྡུས་པ་དེ་དག་ཐམས་ཅད་འཁོར་ལོས་བསྒྱུར་བའི་བསོད་ནམས་ཀྱི་ཕུང་པོ་དང་ལྡན་པར་གྱུར་ཏམ། དེ་བཞིན་དུབ་རྒྱ་བྱིན་གྱིས་བསོད་ནམས་ཀྱི་ཕུང་པོ་དང་ལྡན་པར་གྱུར་ཏམ། དེ་བཞིན་
དུ་ཚངས་པའི་བསོད་ནམས་ཀྱི་ཕུང་པོ་དང་ལྡན་པར་གྱུར་ཀྱང་བྱང་ཆུབ་སེམས་དཔའ་ལྷག་པའི་བསམ་པ་ལ་ཞུགས་པ། གཡོ་མེད་པ། སྒྱུ་མེད་པ། སེམས་ཅན་ཡོངས་སུ་དགྲོལ་པ་ལ་
བརྩོན་པ། སྙིང་རྗེ་ཆེན་པོ་ལ་ཞུགས་པ། བྱམས་པ་ཆེན་པོ་ལ་གནས་པའི་གོམ་པ་བདུན་ལ་བསོད་ནམས་ཀྱི་ཕུང་པོ་བསྡུས་པ་གང་ཡིན་པ་དེ་ནི། དེ་བས་ཆེས་མང་སྟེ། སེམས་ཅན་
ཐམས་ཅད་འཁོར་ལོས་བསྒྱུར་བ་དང༌། བརྒྱ་བྱིན་དང༌། ཚངས་པའི་བསོད་ནམས་དང་ལྡན་པར་གྱུར་པའི་བསོད་ནམས་ཀྱི་ཕུང་པོ་ནི། དེ་ལྟ་མ་ཡིན་ནོ། །སྲེད་མེད་ཀྱི་བུ། འདི་ནི། བསོད་
ནམས་ཐམས་ཅད་བསྡུས་པའི་ཏིང་ངེ་འཛིན་ལ་འཇུག་པ་གསུམ་པའོ། །སྲེད་མེད་ཀྱི་བུ། གཞན་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་
ཅན་ཇི་སྙེད་པ་དེ་དག་ཐམས་ཅད་འཁོར་ལོས་བསྒྱུར་བ་དང་མཉམ་པའི་བསོད་ནམས་ཀྱི་ཕུང་པོ་དང་ལྡན་པར་གྱུར་ཀྱང་དེ་དག་ཐམས་ཅད་བརྒྱ་བྱིན་གྱི་བསོད་ནམས་ཀྱི་ཕུང་པོའི་བརྒྱའི་ཆར་
ཡང་མི་ཕོད་པ་ནས་རྒྱུའི་བར་དུའང་མི་བཟོད་དོ། །སྲེད་མེད་ཀྱི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་བརྒྱ་བྱིན་དང་མཉམ་
༄༅། །པའི་བསོད་ནམས་ཀྱི་ཕུང་པོ་དང་ལྡན་པར་གྱུར་ཀྱང་དེ་དག་ཐམས་ཅད་ནི། ཚངས་པ་ཆེན་པོའི་བསོད་ནམས་ཀྱི་ཕུང་པོ་བརྒྱའི་ཆར་ཡང་མི་ཕོད་པ་ནས་རྒྱུའི་
བར་དུའང་མི་བཟོད་དོ། །སྲེད་མེད་ཀྱི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་ཚངས་པ་ཆེན་པོ་དང་མཉམ་པའི་བསོད་
ནམས་ཀྱི་ཕུང་པོ་དང་ལྡན་པར་གྱུར་ཀྱང་དེ་དག་ཐམས་ཅད་ནི། དགེ་བསྙེན་ནག་པོའི་མཆོག་གི་བསོད་ནམས་ཀྱི་ཕུང་པོའི་བརྒྱའི་ཆར་ཡང་མི་ཕོད་པ་ནས་རྒྱུའི་བར་དུའང་མི་བཟོད་
དོ༑ ༑སྲེད་མེད་ཀྱི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་དགེ་བསྙེན་ནག་པོའི་མཆོག་དང་མཉམ་པའི་བསོད་ནམས་ཀྱི་
ཕུང་པོ་དང་ལྡན་པར་གྱུར་ཀྱང་དེ་དག་ཐམས་ཅད་ནི། ཤཱ་རིའི་བུའི་ཤེས་རབ་དང༌། ཡེ་ཤེས་དང༌། བསོད་ནམས་ཀྱི་ཕུང་པོའི་བརྒྱའི་ཆར་ཡང་མི་ཕོད་པ་ནས་རྒྱུའི་བར་དུའང་མི་བཟོད་
དོ༑ ༑སྲེད་མེད་ཀྱི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་ཤཱ་རིའི་བུ་དང་མཉམ་པའི་ཤེས་རབ་དང༌། ཡེ་ཤེས་དང༌།
བསོད་ནམས་ཀྱི་ཕུང་པོ་དང་ལྡན་པར་གྱུར་ཀྱང་དེ་དག་ཐམས་ཅད་ནི། རང་སངས་རྒྱས་གཅིག་གི་ཤེས་རབ་དང༌། ཡེ་ཤེས་དང༌། བསོད་ནམས་ཀྱི་ཕུང་པོའི་བརྒྱའི་ཆར་ཡང་མི་ཕོད་
པ་ནས་རྒྱུའི་བར་དུའང་མི་བཟོད་དོ། །སྲེད་མེད་ཀྱི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་རང་སངས་རྒྱས་ཀྱི་ཤེས་རབ་དང༌།
ཡེ་ཤེས་དང༌། བསོད་ནམས་ཀྱི་ཕུང་པོ་དང་ལྡན་པར་གྱུར་ཀྱང་དེ་དག་ཐམས་ཅད་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ངེས་པར་བྱུང་ནས་བསྐལ་པ་ལྔ་བརྒྱ་ལོན་པའི་ཤེས་
རབ་དང༌། ཡེ་ཤེས་དང༌། བསོད་ནམས་ཀྱི་ཕུང་པོའི་བརྒྱའི་ཆར་ཡང་མི་ཕོད་པ་ནས་རྒྱུའི་བར་དུའང་མི་བཟོད་དོ། །ཐམས་ཅད་ལའང་དེ་བཞིན་དུ་སྦྱར་ཏེ། སྲེད་མེད་ཀྱི་བུ། འདི་ནི། བསོད་
ནམས་ཐམས་ཅད་བསྡུས་པའི་ཏིང་ངེ་འཛིན་ལ་འཇུག་པ་བཞི་པའོ། །བསྟན་པ་འདི་བཤད་པ་ན། མི་སུམ་ཁྲི་ཉིས་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་རྣམ་པ་དྲུག་ཏུ་གཡོས་སོ། །ལྷ་དང་མིའི་སིལ་སྙན་དག་ཀྱང་གྲག་གོ །ལྷ་དང་མིའི་མེ་ཏོག་གི་སྤྲིན་དག་ཀྱང་བབ་
སྟེ༑ མེ་ཏོག་གི་སྤྲིན་དེ་དག་གིས་ས་ཆེན་པོ་འདི་པུས་མོ་ནུབ་ཙམ་དུ་བཀྲམ་མོ། །ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མི་འམ་ཅི་དང༌།
ལྟོ་འཕྱེ་ཆེན་པོ་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དེ་དག་ཐམས་ཅད་ཀྱིས་ཀྱང་ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ། རིགས་ཀྱི་
༄༅། །བུ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང༌། སྐྱེད་པ་དང༌། བསྐྱེད་པར་འགྱུར་བ་གང་དག་ལགས་པ་དེ་དག་གིས་ནི།
བདག་ཅག་ཟིལ་གྱིས་གནོན་ཏོ། །བཅོམ་ལྡན་འདས། བདག་ཅག་ནི། སེམས་ཅན་དེ་དག་གི་དོན་བགྱིད་པ་ལགས་སོ། །བཅོམ་ལྡན་འདས་ཀྱིས་གསུངས་པའི་དོན་བདག་ཅག་
གིས་འཚལ་བ་ལྟར་ན། སེམས་ཅན་གང་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་མ་ཞུགས་པ་དེ་དག་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་
ལས་མངོན་པར་བྱུང་བའང་མ་ལགས། དེ་དག་ཐམས་ཅད་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ལ་ཡང་དག་པར་གཞོལ་བའང་མ་ལགས་ཀྱི། བཅོམ་ལྡན་
འདས༑ གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་དག་ཐམས་ཅད་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་ལས་མངོན་
པར་བྱུང་བའང་ལགས། དེ་དག་ཐམས་ཅད་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་དེ་ལ་ཡང་དག་པར་གཞོལ་བའང་ལགས་སོ། །ལེའུ་དང་པོའོ།། །།
བམ་པོ་གཉིས་པ། དེ་ནས་བཅོམ་ལྡན་འདས་ལ་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བསོད་ནམས་ཐམས་ཅད་བསྡུས་
པའི་ཏིང་ངེ་འཛིན་འདི་ཐོབ་པར་བགྱིད་པའི་ཆོས་རྣམས་གང་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ལ་འདི་སྐད་ཅེས་
བཀའ་སྩལ་ཏོ། །རིགས་ཀྱི་བུ། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའི་ཆོས་གཅིག་སྟེ། གཅིག་གང་ཞེ་ན། འདི་ལྟ་སྟེ། ཐམས་ཅད་མཁྱེན་པ་ཉིད་ཀྱི་
སེམས་མི་གཏོང་བ་སྟེ། རིགས་ཀྱི་བུ། ཆོས་གཅིག་པུ་འདི་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའོ། །རིགས་ཀྱི་བུ། གཞན་ཡང་བསོད་ནམས་
ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའི་ཆོས་གཉིས་ཏེ། གཉིས་གང་ཞེ་ན། འདི་ལྟ་སྟེ། མཉན་པའི་ཆོས་ཡོངས་སུ་ཚོལ་བས་ཆོག་མི་ཤེས་པ་དང༌། ཇི་ལྟར་ཐོས་པའི་
ཆོས་ལ་ཚུལ་བཞིན་དུ་སོ་སོར་རྟོག་པ་སྟེ། རིགས་ཀྱི་བུ། ཆོས་འདི་གཉིས་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའོ། །རིགས་ཀྱི་བུ། གཞན་ཡང་
བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའི་ཆོས་གསུམ་སྟེ། གསུམ་གང་ཞེ་ན། འདི་ལྟ་སྟེ། སྡིག་པ་ཐམས་ཅད་ཡོངས་སུ་སྤོང་བ་དང༌། དགེ་བའི་ཆོས་
རྣམས་མངོན་པར་འདུ་བྱེད་པ་དང༌། ཡོངས་སུ་བསྔོ་བ་ལ་མཁས་པ་སྟེ། རིགས་ཀྱི་བུ། ཆོས་གསུམ་པོ་དེ་དག་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་
༄༅། །པའོ༑ ༑རིགས་ཀྱི་བུ། གཞན་ཡང་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའི་ཆོས་བཞི་སྟེ། བཞི་གང་ཞེ་ན། འདི་ལྟ་སྟེ། ཚུལ་
ཁྲིམས་ཡོངས་སུ་དག་པ་དང༌། ལྟ་བ་ཡོངས་སུ་དག་པ་དང༌། སེམས་ཡོངས་སུ་དག་པ་དང༌། ཤེས་རབ་ཡོངས་སུ་དག་པ་སྟེ། རིགས་ཀྱི་བུ། ཆོས་བཞི་པོ་དེ་དག་ནི། བསོད་ནམས་
ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའོ། །རིགས་ཀྱི་བུ། གཞན་ཡང་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའི་ཆོས་ལྔ་སྟེ། ལྔ་གང་
ཞེ་ན༑ འདི་ལྟ་སྟེ། ལྷག་པའི་བསམ་པས་བྱང་ཆུབ་ལ་ཞུགས་པ་དང༌། རྟག་ཏུ་བདེན་པའི་ཚིག་སྨྲ་བ་དང༌། གཡོ་མེད་པ་དང༌། ཕྲག་དོག་མེད་པ་དང༌། སེམས་ཅན་ཐམས་ཅད་ལ་སེམས་
སྙོམས་པ་སྟེ། རིགས་ཀྱི་བུ། ལྔ་པོ་དེ་དག་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའོ། །རིགས་ཀྱི་བུ། གཞན་ཡང་བསོད་ནམས་ཐམས་ཅད་བསྡུས་
པའི་ཏིང་ངེ་འཛིན་འདི་ཐོབ་པར་བྱེད་པའི་ཆོས་དྲུག་སྟེ། དྲུག་གང་ཞེ་ན། འདི་ལྟ་སྟེ། དགེ་བའི་བཤེས་གཉེན་ལ་བསྟེན་པ་དང༌། སྡིག་པའི་གྲོགས་པོ་ཡོངས་སུ་སྤོང་བ་དང༌། ཚོགས་
ཀྱི་ཁ་མི་འདྲེན་པ་དང༌། དབེན་པའི་གནས་ན་གནས་པ་དང༌། བྱམས་པ་ཆེན་པོ་མི་གཏོང་བ་དང༌། སེམས་ཅན་ཐམས་ཅད་ལ་སྙིང་རྗེ་ཆེན་པོ་དང་ལྡན་པ་སྟེ། རིགས་ཀྱི་བུ། ཆོས་
དྲུག་པོ་དེ་དག་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའོ། །རིགས་ཀྱི་བུ། གཞན་ཡང་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་
བྱེད་པའི་ཆོས་བདུན་ཏེ། བདུན་གང་ཞེ་ན། འདི་ལྟ་སྟེ། ཞི་གནས་ཡོངས་སུ་ཚོལ་བ་དང༌། ལྷག་མཐོང་ལ་མཁས་པ་དང༌། རྒྱུ་ཡོངས་སུ་ཤེས་པ་དང༌། རྟེན་ཅིང་འབྲེལ་པར་འབྱུང་བ་ལ་
མཁས་པ་དང༌། ཡང་དག་པར་སྒྲུབ་པ་དང༌། ལམ་གྱི་ཚོགས་ཡོངས་སུ་ཚོལ་བ་དང༌། ལམ་སྒོམ་པ་ལ་ལེ་ལོ་མེད་པ་སྟེ། རིགས་ཀྱི་བུ། བདུན་པོ་དེ་དག་ནི། བསོད་ནམས་ཐམས་ཅད་
བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའོ། །རིགས་ཀྱི་བུ། གཞན་ཡང་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའི་ཆོས་བརྒྱད་དེ། བརྒྱད་གང་ཞེ་ན།
འདི་ལྟ་སྟེ། ལུས་ལས་སུ་རུང་བ་ཉིད་དང༌། སེམས་ལས་སུ་རུང་བ་ཉིད་དང༌། ཚོར་བ་ལ་སོ་སོར་རྟོག་པ་ཉིད་དང༌། ཆོས་ལ་རྗེས་སུ་ལྟ་བ་ཉིད་དང༌། སྡིག་པ་མི་དགེ་བའི་ཆོས་མ་སྐྱེས་
པ་རྣམས་མི་བསྐྱེད་པ་དང༌། སྡིག་པ་མི་དགེ་བའི་ཆོས་སྐྱེས་པ་རྣམས་སྤང་བ་དང༌། དགེ་བའི་ཆོས་མ་སྐྱེས་པ་རྣམས་སྐྱེད་པ་དང༌། དགེ་བའི་ཆོས་སྐྱེས་པ་རྣམས་ཀུན་ནས་སྲུང་ཞིང་
ཡོངས་སུ་སྦྱོང་བ་སྟེ། རིགས་ཀྱི་བུ། ཆོས་བརྒྱད་པོ་དེ་དག་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའོ། །རིགས་ཀྱི་བུ། གཞན་ཡང་བསོད་ནམས་ཐམས་
༄༅། །ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའི་ཆོས་དགུ་སྟེ། དགུ་གང་ཞེ་ན། འདི་ལྟ་སྟེ། འདས་པ་མི་ཟད་པའི་ཆོས་ཉིད་དང༌། མ་འོངས་པ་མི་ཟད་པའི་
ཆོས་ཉིད་དང༌། ད་ལྟར་བྱུང་བ་མི་ཟད་པའི་ཆོས་ཉིད་དུ་སོ་སོར་རྟོག་པ་དང༌། སྒྱུ་མའི་ཆོས་ལ་སོ་སོར་རྟོག་པ་དང༌། དུས་གསུམ་མཉམ་པ་ཉིད་དུ་ཁོང་དུ་ཆུད་པ་དང༌། ཆོས་ཐམས་
ཅད་ལ་ཇི་ལྟ་བ་བཞིན་དུ་ཆོས་ཀྱི་བཟོད་པ་དང་ལྡན་པ་དང༌། སྟོང་པ་ཉིད་མི་སྤོང་བ་དང༌། མཚན་མ་མེད་པ་རྣམ་པར་བསྒོམས་པས་སྨོན་པ་དང་བྲལ་བ་དང༌། བསམ་བཞིན་དུ་སྲིད་
པར་སྐྱེ་བ་སྟེ། རིགས་ཀྱི་བུ། ཆོས་དགུ་པོ་དེ་དག་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའོ། །རིགས་ཀྱི་བུ། གཞན་ཡང་བསོད་ནམས་ཐམས་ཅད་
བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའི་ཆོས་བཅུ་སྟེ། བཅུ་གང་ཞེ་ན། འདི་ལྟ་སྟེ། བདག་མེད་པ་ལ་མོས་པ་དང༌། སྲོག་མེད་པ་ལ་བཟོད་པ་དང༌། གང་ཟག་མེད་པ་ལ་གཅིག་
ཏུ་ངེས་པ་དང༌། མི་རྟག་པ་ལ་ཡིད་ཆེས་པ་དང༌། སྐྱེ་བ་ཐམས་ཅད་ལ་སེམས་ཅན་དམྱལ་བར་འདུ་ཤེས་པ་དང༌། ཕུང་པོ་རྣམས་ལ་གཤེད་མར་འདུ་ཤེས་པ་དང༌། ཁམས་རྣམས་
ལ་སྤྲུལ་གདུག་པར་འདུ་ཤེས་པ་དང༌། སྐྱེ་མཆེད་རྣམས་ལ་གྲོང་སྟོང་པར་འདུ་ཤེས་པ་དང༌། སྲིད་པ་རྣམས་ལ་ངེས་པར་འབྱུང་བར་འདུ་ཤེས་པ་དང༌། རྣམ་པར་ཐར་པའི་སྒོ་རྣམས་
ལ་འདྲིས་པར་འདུ་ཤེས་པ་སྟེ། རིགས་ཀྱི་བུ། ཆོས་བཅུ་པོ་དེ་དག་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་བྱེད་པའོ། །དེ་སྐད་ཅེས་བཀའ་སྩལ་པ་དང༌། བཅོམ་
ལྡན་འདས་ལ་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བསོད་ནམས་ཀྱི་ཚོགས་ཡང་དག་པར་བསྡུས་པར་འཚལ་བའི་བྱང་ཆུབ་སེམས་
དཔའ་སེམས་དཔའ་ཆེན་པོས་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་མཉན་པར་བགྱིའོ། །བསོད་ནམས་གསོག་པར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་
པོས་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་མཉན་པར་བགྱིའོ། །བསོད་ནམས་བསམ་གྱིས་མི་ཁྱབ་པ་ཐོབ་པར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་
བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་མཉན་པར་བགྱི། མོས་པར་བགྱིའོ། །བསོད་ནམས་མི་ཟད་པ་ཐོབ་པར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་
ཏིང་ངེ་འཛིན་འདི་ལ་བརྩོན་པར་བགྱིའོ། །བསོད་ནམས་རྒྱ་མཚོ་ཐོབ་པར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་འདི་གཟུང་བར་བགྱི། བཅང་བར་བགྱི། བཀླག་
པར་བགྱི། བཤད་པར་བགྱིའོ། །བསོད་ནམས་བརྒྱའི་མཚན་ཡོངས་སུ་གཟུང་བར་འཚལ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་འདི་སྒོམ་པའི་རྣལ་འབྱོར་ལ་
༄༅། །བརྩོན་པར་བགྱིའོ། །དེ་ནས་ཡང་བཅོམ་ལྡན་འདས་ལ་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་
སེམས་དཔའ་སེམས་དཔའ་ཆེན་པོ་མངོན་པར་བརྩོན་པས་འདི་ལྟ་སྟེ། བསོད་ནམས་མི་ཟད་པ་དང༌། བསོད་ནམས་རྒྱ་མཚོ་དང༌། བསོད་ནམས་བསམ་གྱིས་མི་ཁྱབ་པ་དང༌། བསོད་ནམས་
གསོག་པ་དང༌། བསོད་ནམས་བརྒྱའི་མཚན་གྱིས་ཆོས་འདི་དག་ཇི་ལྟར་ཡོངས་སུ་རྫོགས་པར་བགྱིད་པ་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚན་པོ་ཆེ་ཆེན་པོ་
དྲི་མ་མེད་པའི་གཟི་བརྗིད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། གསུམ་པོ་འདི་དག་ནི། བསོད་ནམས་ཉེ་བར་རྟོན་པ་དང༌། བསོད་ནམས་ཀྱི་ཚོགས་དང༌། བསོད་ནམས་འདུ་
བ་དང༌། བསོད་ནམས་རྒྱས་པ་དང༌། བསོད་ནམས་མི་ཟད་པ་དང༌། བསོད་ནམས་བསམ་གྱིས་མི་ཁྱབ་པ་དང༌། བསོད་ནམས་རྒྱ་མཚོ་ཡིན་ཏེ། གསུམ་གང་ཞེ་ན། འདི་ལྟ་སྟེ། སྦྱིན་པའི་
ཚོགས་དང༌། ཚུལ་ཁྲིམས་ཀྱི་ཚོགས་དང༌། ཐོས་པའི་ཚོགས་སོ། །རིགས་ཀྱི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ཚོགས་ལ་ཇི་ལྟར་བརྩོན་པར་བྱ་ཞེ་ན།
རིགས་ཀྱི་བུ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་དངོས་པོ་གང་ལ་དེའི་གཏོང་བའི་སེམས་མི་སྐྱེ་ཞིང་གཏོང་བའི་བློ་མི་འབྱུང་བའི་དངོས་པོ་དེ་བླང་པར་མི་བྱའོ། །
ཡོངས་སུ་གཟུང་བ་གང་ལ་བཏང་བའི་སེམས་མི་སྐྱེ་བའི་ཡོངས་སུ་གཟུང་བ་དེ་ཡོངས་སུ་གཟུང་བར་མི་བྱའོ། །གང་ལ་སློང་བ་རྣམས་ཀྱིས་བསླངས་ན་ཡོངས་སུ་འཛིན་པའི་བློ་སྐྱེ་བའི་གཡོག་
འཁོར་དེ་གཟུང་བར་མི་བྱའོ། །དངོས་པོ་གང་ལ་སློང་བ་རྣམས་ཀྱིས་བསླངས་ན་བྱང་ཆུབ་སེམས་དཔའ་མི་གཏོང་བའི་བློ་སྐྱེ་བར་འགྱུར་བའི་རྒྱལ་སྲིད་དེ་བླང་བར་མི་བྱའོ། །ལོངས་སྤྱོད་དེ་དག་
དང༌། ནོར་དེ་དང༌། རྫས་དེ་དང༌། རིན་པོ་ཆེ་དེ་དག་བླང་བར་མི་བྱ་བ་ནས་དེ་ལྟ་བུའི་དངོས་པོ་ཅིའང་རུང་བའི་བར་དུ་བླང་བར་མི་བྱའོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་སེམས་
དཔའ་ཆེན་པོས་འདི་སྙམ་དུ་སེམས་བསྐྱེད་པར་བྱ་སྟེ། བདག་གི་ལུས་འདིའང་སེམས་ཅན་ཐམས་ཅད་ལ་བཏང་སྟེ་ཡོངས་སུ་བཏང་ན། ཕྱི་རོལ་གྱི་དངོས་པོ་རྣམས་ལྟ་ཅི་སྨོས་སྙམ་དུ་སེམས་
བསྐྱེད་པར་བྱའོ། །གཞན་ཡང་སེམས་ཅན་གང་དང་གང་ལ་དངོས་པོ་གང་དང་གང་གིས་དངོས་པོ་གང་དང་གང་བྱེད་པར་འགྱུར་བ་དེ་ཡོད་ན། དེ་དང་དེ་ལ་དེ་དང་དེ་མི་དགའ་བ་མེད་པ་དང༌།
འགྱོད་པ་མེད་པར་སྦྱིན་པར་བྱ་སྟེ། ལག་པ་འདོད་པ་རྣམས་ལ་ལག་པའང་སྦྱིན་ནོ། །རྐང་པ་འདོད་པ་རྣམས་ལ་རྐང་པ་དང༌། མིག་འདོད་པ་རྣམས་ལ་མིག་ཀྱང་སྦྱིན་ནོ། །ཤ་འདོད་པ་
རྣམས་ལ་ཤ་དང༌། ཁྲག་འདོད་པ་རྣམས་ལ་ཁྲག་དང༌། རྐང་འདོད་པ་རྣམས་ལ་རྐང་དང༌། ཡན་ལག་དང་ཉིང་ལག་འདོད་པ་རྣམས་ལ་ཡན་ལག་དང་ཉིད་ལག་དང༌། མགོ་བོ་འདོད་པ་
༄༅། །རྣམས་ལ་མགོ་བོའང་ཡོངས་སུ་གཏོང་བར་བྱ་ན། ཕྱི་རོལ་གྱི་དངོས་པོ་འདི་ལྟ་སྟེ། ནོར་དང༌། འབྲུ་དང༌། གསེར་དང༌། དངུལ་དང༌། རིན་པོ་ཆེ་དང༌། རྒྱན་དང༌། རྟ་
དང༌། གླང་པོ་ཆེ་དང༌། ཤིང་རྟ་དང༌། བཞོན་པ་དང༌། གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་དང༌། ཚོང་འདུས་དང༌། རི་འོར་བ་དང༌།
བྲན་པོ་དང༌། བྲན་མོ་དང༌། ལས་བྱེད་པ་དང༌། བུ་དང༌། བུ་མོ་དང༌། ཆུང་མ་དང༌། འཁོར་རྣམས་ལྟ་ཅི་སྨོས། གཞན་ཡང་སེམས་ཅན་གང་དང་གང་ལ་གང་དང་གང་གིས་དོན་
བྱེད་པར་འགྱུར་བ་དེ་དང་དེ་ཡོད་ན། དེ་དང་དེ་ལ་དངོས་པོ་དེ་དང་དེ་སྦྱིན་པར་བྱ་སྟེ། མི་དགའ་བ་མེད་པ་དང༌། འགྱོད་པ་མེད་པ་དང༌། རྣམ་པར་སྨིན་པ་ལ་མི་རེ་བར་ཡོངས་སུ་གཏང་
པར་བྱའོ། །མི་ལྟ་བར་སྦྱིན་པར་བྱའོ། །གཞན་དུ་ན་སེམས་ཅན་ལ་ཕན་གདགས་པ་དང༌། སེམས་ཅན་ལ་སྙིང་རྗེ་བ་དང༌། སེམས་ཅན་དེ་ལ་སྙིང་བརྩེ་བ་དང༌། སེམས་ཅན་དེ་དག་ཉིད་
བསྡུ་བའི་ཕྱིར་བྱ་བར་ཟད་དོ། །བདག་གིས་བྱང་ཆུབ་ཐོབ་པ་ན་ཅི་ནས་སེམས་ཅན་འདི་དག་ཆོས་ཀུན་རྟོགས་པར་གྱུར་ཅིག་སྙམ་དུ་སེམས་བསྐྱེད་པར་བྱའོ། །རིགས་ཀྱི་བུ། བྱང་ཆུབ་
སེམས་དཔའ་གང་སུ་དག་དེ་ལྟར་སེམས་སྐྱེད་པར་བྱེད་པ་དེ་དག་ནི། བྱང་ཆུབ་སེམས་དཔའ་ཞེས་བྱའོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་ནི། ལུས་དང་སྲོག་ལའང་
མི་ལྟ་བ་ཡིན་ཏེ། དེ་ནི། སྲོག་གི་ཕྱིར་ཡང་སྡིག་པའི་ལས་མངོན་པར་འདུ་མི་བྱེད་དོ། །ལུས་བརྟས་པར་བྱ་བའི་ཕྱིར་ཡང་བའི་འཚོ་བས་འཚོ་བར་མི་བྱེད་དོ། །དེ་ནི། སྲོག་གི་ཕྱིར་
ཡང་གཞན་ལ་སློང་ཁྲོ་མི་བྱེད་དོ། །ལོངས་སྤྱོད་ཀྱི་ཕྱིར་མི་དགེ་བ་མངོན་པར་འདུ་མི་བྱེད་དོ། །གཡོག་འཁོར་གྱི་ཕྱིར་ཡང་རྩོད་པ་དང་འཐབ་མོ་སློང་བར་མི་བྱེད་དོ། །ཆུང་མ་དང༌། བུ་དང༌།
བུ་མོ་རྣམས་ཀྱི་ཕྱིར་ཡང་གཞན་དག་ལ་འདྲིད་པར་མི་བྱེད་དོ། །གཞན་གྱི་ལོངས་སྤྱོད་དག་ལའང་བརྣབ་སེམས་སྐྱེད་པར་མི་བྱེད། སེར་སྣའི་སེམས་སྐྱེད་པར་མི་བྱེད་དོ། །དེ་འདོད་པ་
ཉུང་སྟེ་སེམས་བསྐྱེད་པ་གཅིག་ཀྱང་དགེ་བ་དང་མི་ལྡན་པ་སྐྱེད་པར་མི་བྱེད་ན། མང་པོ་ལྟ་ཅི་སྨོས། དེ་དེ་ལྟར་བརྩོན་ན། འདོད་ཆེན་དང་ཆགས་པ་སྤོང་བར་འགྱུར་རོ། །འདོད་ཆེན་དང་
ཆགས་པ་སྤངས་ན། བཙལ་བར་བྱ་བ་ཚོལ་བར་མི་བྱེད་དོ། །བཙལ་བར་བྱ་བ་མི་ཚོལ་ན། ཡང་དག་པ་ལ་བརྩོན་པར་འགྱུར་རོ། །ཡང་དག་པ་ལ་བརྩོན་ན། ཡང་དག་པར་འགྲོ་བ་
ཐོབ་པར་འགྱུར་རོ། །ཡང་དག་པར་སོང་ན། ཡང་དག་པའི་སྒྲུབ་པ་ལ་གནས་པར་འགྱུར་རོ། །ཡང་དག་པ་ལ་ཞུགས་ན། ཡང་དག་པའི་དགེ་བའི་བཤེས་གཉེན་རྣམས་མཉེས་པར་
བྱེད་དོ༑ ༑ཡང་དག་པའི་དགེ་བའི་བཤེས་གཉེན་རྣམས་མཉེས་པར་བྱས་ནས་སྟེན་པར་བྱེད། འགྲོགས་པར་བྱེད། བསྙེན་བཀུར་བྱེད་དོ། །དེ་དགེ་བའི་བཤེས་གཉེན་རྣམས་དང་
༄༅། །བསྟེན་ཅིང་འགྲོགས་ལ་བསྙེན་བཀུར་བྱེད་ན། དགེ་བའི་བཤེས་གཉེན་རྣམས་ལས་ཡང་དག་པར་ངེས་པའི་ཆོས་རྣམས་ཐོས་པར་འགྱུར་རོ། །ཐོས་ནས་
ཀྱང་སྒྲུབ་པར་བྱེད་དོ། །དེ་ཡང་དག་པའི་ཆོས་ལ་ཞུགས་ནས་ལོག་པར་སྒྲུབ་པ་ལ་གནས་པའི་སེམས་ཅན་རྣམས་ཀྱི་དོན་ཐམས་ཅད་བྱེད་དོ། །དེ་སེམས་ཅན་གྱི་དོན་ལ་བརྩོན་ན། མི་
རིགས་པར་ལྟུང་བར་མི་འགྱུར་རོ། །དེ་རིགས་པ་ལ་ཞུགས་ན། འདི་ལྟ་སྟེ། སེམས་ཅན་རྣམས་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པའི་ཚུལ་དང་ཚུལ་མ་ཡིན་པ་ལ་མཁས་
པ་ཐོབ་པར་འགྱུར་ཏེ། རིགས་ཀྱི་བུ། དེ་ལྟར་ན། སྦྱིན་པའི་ཚོགས་ལ་སྤྱོད་པའི་བྱང་ཆུབ་སེམས་དཔའ་རྣམས་ནི། ཡོན་ཏན་གྱི་ཁྱད་པར་དེ་ལྟ་བུ་དག་ཐོབ་པར་འགྱུར་རོ། །རིགས་ཀྱི་
བུ༑ གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ནི། ནང་དང་ཕྱི་རོལ་གྱི་ཆོས་རྣམས་ལ་གཅིག་གི་འདུ་ཤེས་བསྐྱེད་པར་བྱའི། གཉིས་ཀྱི་འདུ་ཤེས་བསྐྱེད་པར་མི་བྱ་
སྟེ༑ ནང་གི་སའི་ཁམས་གང་ཡིན་པ་དང༌། ཕྱི་རོལ་གྱི་སའི་ཁམས་གང་ཡིན་པ་འདི་ལ་གཉིས་སུ་མེད་དེ་གཉིས་སུ་བྱར་མེད་དོ། །དེ་ཅིའི་ཕྱིར་ཞེ་ན། ལུས་འདི་ནི། རྩྭ་དང༌། ཤིང་
དང༌། རྩིག་པ་དང༌། ལམ་སྣང་བ་དང་འདྲ་སྟེ། སྤྱོད་པ་མེད་པ། བྱེད་པ་མེད་པ། སེམས་པ་མེད་པ། སྙིང་པོ་མེད་པ། ཁམས་ཀྱིས་བསྡུས་པ་ཡིན་པའི་ཕྱིར་རོ། །གལ་ཏེ་འདི་ལ་ལ་ལ་
ཞིག་གིས་བཅད་དམ། གཏུབས་སམ། དབྱུག་པའམ། མཚོན་ཆའམ། ཤིང་ངམ། བོང་བས་བསྣུན་ཀྱང་རུང་སྟེ། དེ་ལ་བདག་གིས་ཚོར་བའི་རྣམ་པར་རིག་པ་བསྐྱེད་པར་མི་བྱའོ། །ལུས་
ལ་བལྟ་བར་མི་བྱའོ། །སྲོག་ལ་ཆགས་པ་བསྐྱེད་པར་མི་བྱའོ། །སེམས་ཅན་དེ་དག་ལའང་ཐ་བ་དང་སྡང་བའི་སེམས་བསྐྱེད་པར་མི་བྱའོ། །སྙམ་པའི་སྟེང་དུ་དེས་སེམས་ཅན་དེ་དག་ལ་
བྱམས་པའི་སེམས་བསྐྱེད་པར་བྱའོ། །རིགས་ཀྱི་བུ། དཔེར་ན། སྨན་གྱི་ཤིང་ལྗོན་པ་ནི། རྩ་བ་ལས་ཁྱེར་རམ། སྡོང་པོའམ། ཡལ་གའམ། ཤུན་ལྤགས་སམ། ལ་མའམ། མེ་ཏོག་
གམ༑ འབྲས་བུའམ། སྙིང་པོ་ལས་ཁྱེར་ན། འདི་སྙམ་དུ་བདག་གི་རྩ་བ་ཁྱེར་ལ་སྡོང་པོ་མ་ཁྱེར་ཅིག་ཅེའམ། བདག་གི་སྡོང་པོ་ཁྱེར་ལ་རྩ་བ་མ་ཁྱེར་ཅིག་ཅེའམ། བདག་གི་ཡལ་ག་
ཁྱེར་ལ་ལོ་མ་མ་ཁྱེར་ཅིག་ཅེའམ། བདག་གི་ལོ་མ་ཁྱེར་ལ་ཡལ་ག་མ་ཁྱེར་ཅིག་ཅེའམ། དེ་བཞིན་དུ་བདག་གི་ཡལ་ག་ཕྲེའུ་དང༌། མེ་ཏོག་དང༌། འབྲས་བུ་དང༌། ཤུན་ལྤགས་དང༌།
སྙིང་པོ་ལས་ཁྱེར་ལ་སྙིང་པོ་མེད་པ་ལས་མ་ཁྱེར་ཅིག་ཅེའམ། བདག་གི་སྙིང་པོ་མེད་པ་ལས་ཁྱེར་ལ་སྙིང་པོ་ལས་མ་ཁྱེར་ཅིག་སྙམ་དུ་རྟོག་པར་མི་བྱེད་དེ། དེ་ལྟར་ན། སྨན་གྱི་ཤིང་
ལྗོན་པ་ནི། ཐམས་ཅད་ཀྱི་ཐམས་ཅད་དུ་རྣམ་པར་རྟོག་པར་མི་བྱེད་མོད་ཀྱི། འོན་ཀྱང་སྨན་གྱི་ཤིང་ལྗོན་པ་ནི། རྣམ་པར་མི་རྟོག་བཞིན་དུ་ནད་རབ་དང༌། འབྲིང་དང༌། ཐ་མ་སེལ་བར་བྱེད་
༄༅། །པ་དེ་བཞིན་དུ་རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོས་འབྱུང་བ་ཆེན་པོ་བཞིའི་ལུས་འདི་ལ་སྨན་གྱི་ཤིང་ལྗོན་པ་ལྟ་བུའི་འདུ་ཤེས་
བསྐྱེད་པར་བྱའོ། །སེམས་ཅན་གང་དང་གང་དག་ལ་ཅི་དང་ཅི་དགོས་པ་དེ་དང་དེ་དེ་བཞིན་དུ་ཁྱེར་ཅིག་ཅེས་བྱས་ཏེ། ལག་པ་འདོད་པ་ལ་ནི། ལག་པ། རྐང་པ་འདོད་པ་ལ་ནི། རྐང་པ།
མིག་འདོད་པ་ལ་ནི། མིག། ཤ་འདོད་པ་ལ་ནི། ཤ། ཁྲག་འདོད་པ་ལ་ནི། ཁྲག། རུས་པ་འདོད་པ་ལ་ནི། རུས་པ། རྐང་འདོད་པ་ལ་ནི། རྐང༌། མགོ་བོ་འདོད་པ་ལ་ནི། མགོ་བོ། ཡན་
ལག་དང་ཉིང་ལག་ཐམས་ཅད་འདོད་པ་ལ་ནི། བདག་གི་ཡན་ལག་དང་ཉིང་ལག་ཐམས་ཅད་ཁྱེར་ཅིག་སྙམ་སྟེ། རིགས་ཀྱི་བུ། དེ་ལྟར་སེམས་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་ནི། སྦྱིན་པའི་ཚོགས་ཀྱི་བསོད་ནམས་མི་ཟད་པས་མངོན་པར་འབྱུང་བ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེས་སྦྱིན་པ་སྦྱིན་པ་ན་སེམས་ཅན་
སེར་སྣ་ཅན་རྣམས་ཀྱི་གཏོང་བ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱའོ། །སེམས་ཅན་དབུལ་པོ་རྣམས་ཀྱིས་ལོངས་སྤྱོད་ཆེན་པོ་འཐོབ་པར་བྱ་བའི་ཕྱིར་
ཡོངས་སུ་བསྔོ་བར་བྱའོ། །དེས་ཡན་ལག་དང་ཉིང་ལག་རྣམས་ཡོངས་སུ་གཏོང་བ་ན་སེམས་ཅན་ཐམས་ཅད་ཀྱི་ཡན་ལག་དང༌། ཉིང་ལག་ཐམས་ཅད་ཡོངས་སུ་རྫོགས་པར་
འགྱུར་བའི་ཕྱིར་ཡོངས་སུ་བསྔོ་བར་བྱའོ། །དེས་སྦྱིན་པ་སྦྱིན་པ་ན་དུས་ཐམས་ཅད་དུ་ཆོས་གསུམ་དུ་ཡོངས་སུ་བསྔོ་བར་མི་བྱ་སྟེ། གསུམ་གང་ཞེ་ན། འདི་ལྟ་སྟེ། འདོད་པའི་དགའ་བ་
དང༌། རྒྱལ་སྲིད་དང༌། ལོངས་སྤྱོད་དང༌། དབང་ཕྱུག་ཐོབ་པར་བྱ་བའི་ཕྱིར་ཡོངས་སུ་བསྔོ་བར་མི་བྱ་བ་དང༌། བདག་ཉིད་བསོད་ནམས་དང་ལྡན་པར་བྱ་བའི་ཕྱིར་ཡོངས་སུ་བསྔོ་བར་མི་བྱ་བ་
དང༌། ཉན་ཐོས་དང་རང་སངས་རྒྱས་ཀྱི་ས་འཐོབ་པར་བྱ་བའི་ཕྱིར་ཡོངས་སུ་བསྔོ་བར་མི་བྱའོ། །དེས་སྦྱིན་པ་སྦྱིན་པ་ན་སྦྱིན་པ་དེ་ཡན་ལག་བཞི་ཡོངས་སུ་དག་པ་ཡོངས་སུ་རྫོགས་པར་
བྱ་བའི་ཕྱིར་ཡོངས་སུ་བསྔོ་བར་བྱ་སྟེ། དེ་ལ་ཡན་ལག་བཞི་ཡོངས་སུ་དག་པ་ཡོངས་སུ་རྫོགས་པ་གང་ཞེ་ན། སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཕྱིར་ཡོངས་སུ་བསྔོ་བར་བྱ་
བ་དང༌། བྱང་ཆུབ་སེམས་དཔའི་དགེ་འདུན་ཡོངས་སུ་དག་པར་བྱ་བའི་ཕྱིར་ཡོངས་སུ་བསྔོ་བར་བྱ་བ་དང༌། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་ཡོངས་སུ་བསྔོ་བར་
བྱ་བ་དང༌། ཐམས་ཅད་མཁྱེན་པའི་ཡེ་ཤེས་ཡོངས་སུ་དག་པར་བྱ་བའི་ཕྱིར་ཡོངས་སུ་བསྔོ་བར་བྱ་བ་སྟེ། དེ་ལྟར་ན། ཡན་ལག་བཞི་ཡོངས་སུ་དག་པ་ཡོངས་སུ་རྫོགས་པར་བྱ་བའི་
ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པ་དེ་ཡོངས་སུ་བསྔོ་བར་བྱའོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པ་ཉེ་བར་བརྟན་
༄༅། །པར་བྱའི། ཟད་པར་མི་བྱའོ། །དེ་ལ་བྱང་ཆུབ་སེམས་དཔའ་རྣམས་ཀྱི་སྦྱིན་པ་ཇི་ལྟར་ཟད་པར་འགྱུར་ཞེ་ན། རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་
དང་ལྡན་པ་རྣམས་ཀྱི་སྦྱིན་པ་ནི། ཟད་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ཡོངས་སུ་མ་བསྔོས་པ་དང༌། ཐབས་མི་མཁས་པ་དང༌། དམའ་བར་སྐྱེ་བར་འདོད་པ་དང༌། སྡིག་པའི་
གྲོགས་པོ་ལ་བསྟེན་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་པ་རྣམས་ཀྱི་སྦྱིན་པ་ནི། ཟད་པར་འགྱུར་རོ། །རིགས་ཀྱི་བུ། བྱང་ཆུབ་སེམས་དཔའ་
སེམས་དཔའ་ཆེན་པོ་ཆོས་བཞི་དང་ལྡན་པ་རྣམས་ཀྱི་སྦྱིན་པ་ནི། ཡོངས་སུ་ཟད་པར་མི་འགྱུར་ལ་ཉེ་བར་བརྟན་པར་འགྱུར་རོ། །བཞི་གང་ཞེ་ན། འདི་ལྟ་སྟེ། བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བ་དང༌། ཐབས་ལ་མཁས་པ་དང༌། ཆོས་ཀྱི་རྒྱལ་སྲིད་འདོད་པ་དང༌། དགེ་བའི་བཤེས་གཉེན་ལ་སྟེན་པ་སྟེ། རིགས་ཀྱི་བུ། བྱང་ཆུབ་
སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་པ་རྣམས་ཀྱི་སྦྱིན་པ་ནི། ཡོངས་སུ་ཟད་པར་མི་འགྱུར་ལ་ཉེ་བར་བརྟན་པར་འགྱུར་རོ། །རིགས་ཀྱི་བུ། གཞན་ཡང་
བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་བཞི་མངོན་དུ་བྱས་ལ་སྦྱིན་པ་སྦྱིན་པར་བྱ་སྟེ། བཞི་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མི་གཏོང་བ་དང༌། སེམས་ཅན་
ལ་སྙིང་བརྩེ་བ་དང༌། དེ་བཞིན་གཤེགས་པའི་བཀའ་དང་མི་འགལ་བ་དང༌། ཆོས་དང་ཟང་ཟིང་གི་སྦྱིན་པའི་རྣམ་པར་སྨིན་པ་ལ་མི་རེ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་སེམས་
དཔའ་ཆེན་པོས་ཆོས་བཞི་པོ་དེ་དག་མངོན་དུ་བྱས་ལ་སྦྱིན་པ་སྦྱིན་པར་བྱའོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་གསུམ་ལ་དགོད་པའི་ཕྱིར་
སྦྱིན་པ་སྦྱིན་པར་བྱ་སྟེ། གསུམ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་བྱང་ཆུབ་ལ་དགོད་པ་དང༌། ཆོས་བསྟན་པ་དེ་ཉིད་ལ་དགོད་པ་དང༌། སེམས་ཅན་ཐམས་ཅད་བླ་ན་མེད་པའི་
བདེ་བ་ལ་དགོད་པའི་ཕྱིར་ཏེ། རིགས་ཀྱི་བུ། ཆོས་གསུམ་པོ་དེ་དག་ལ་སེམས་ཅན་རྣམས་དགོད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པ་སྦྱིན་པར་བྱའོ། །རིགས་ཀྱི་
བུ༑ གཞན་ཡང་ཆོས་གཉིས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པ་སྦྱིན་པར་བྱ་སྟེ། གཉིས་གང་ཞེ་ན། འདི་ལྟ་སྟེ། ལོངས་སྤྱོད་ཆེན་པོ་དང༌། གཏོང་བའི་སེམས་
ཏེ༑ ཆོས་དེ་གཉིས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པ་སྦྱིན་པར་བྱའོ། །རིགས་ཀྱི་བུ། གཞན་ཡང་ཆོས་གཉིས་ཡོངས་སུ་སྤང་བའི་ཕྱིར་བྱང་ཆུབ་སེམས་
དཔའ་སེམས་དཔའ་ཆེན་པོས་སྦྱིན་པ་སྦྱིན་པར་བྱ་སྟེ། གཉིས་གང་ཞེ་ན། འདི་ལྟ་སྟེ། ཆགས་པ་དང༌། སེར་སྣ་སྟེ། རིགས་ཀྱི་བུ། ཆོས་དེ་གཉིས་ཡོངས་སུ་སྤང་བའི་ཕྱིར་བྱང་ཆུབ་
༄༅། །སེམས་དཔའ་སེམས་དཔའ་ཆེན་པོས་སྦྱིན་པ་སྦྱིན་པར་བྱའོ། །རིགས་ཀྱི་བུ། གཞན་ཡང་ཆོས་གཉིས་ཡོངས་སུ་རྫོགས་པར་བྱ་བའི་ཕྱིར་བྱང་ཆུབ་སེམས་
དཔའ་སེམས་དཔའ་ཆེན་པོས་སྦྱིན་པ་སྦྱིན་པར་བྱ་སྟེ། གཉིས་གང་ཞེ་ན། འདི་ལྟ་སྟེ། ཤེས་རབ་དང༌། ཡེ་ཤེས་ཏེ། རིགས་ཀྱི་བུ། ཆོས་འདི་གཉིས་ཡོངས་སུ་རྫོགས་པར་བྱ་བའི་
ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པ་སྦྱིན་པར་བྱའོ། །རིགས་ཀྱི་བུ། གཞན་ཡང་ཆོས་གཉིས་ཐོབ་པར་བྱ་བའི་ཕྱིར་བྱང་ཆུབ་སེམས་དཔའ་སེམས་དཔའ་
ཆེན་པོས་སྦྱིན་པ་སྦྱིན་པར་བྱ་སྟེ། གཉིས་གང་ཞེ་ན། འདི་ལྟ་སྟེ། ཟད་པ་ཤེས་པ་དང༌། མི་སྐྱེ་བ་ཤེས་པ་སྟེ། རིགས་ཀྱི་བུ། ཆོས་འདི་གཉིས་ཐོབ་པར་བྱ་བའི་ཕྱིར་བྱང་ཆུབ་སེམས་
དཔའ་སེམས་དཔའ་ཆེན་པོས་སྦྱིན་པ་སྦྱིན་པར་བྱའོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔས་གང་དག་སྦྱིན་པར་བྱ་བའི་སྦྱིན་པ་དག་ནི། རྣམ་པ་བཞི་སྟེ། བཞི་གང་
ཞེ་ན༑ འདི་ལྟ་སྟེ། སེམས་སྙོམས་པའི་སྦྱིན་པ་དང༌། རྣམ་པར་སྨིན་པ་ལ་མི་རེ་བའི་སྦྱིན་པ་དང༌། བྱང་ཆུབ་ཏུ་ཡོངས་སུ་བསྔོ་བའི་སྦྱིན་པ་དང༌། དུལ་བ་དང༌། ཞི་བ་དང༌། ཉེ་བར་ཞི་བ་
ཡོངས་སུ་རྫོགས་པའི་སྦྱིན་པ་སྟེ། རིགས་ཀྱི་བུ། སྦྱིན་པ་བཞི་པོ་དེ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པར་བྱ་བ་དག་གོ །རིགས་ཀྱི་བུ། དེ་ལྟ་བས་ན། བྱང་
ཆུབ་སེམས་དཔའ་བསོད་ནམས་མི་ཟད་པ་མངོན་པར་འབྱུང་བར་འདོད་པས་སྦྱིན་པའི་ཚོགས་འདི་ལྟ་བུ་ལ་བརྩོན་པར་བྱའོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚན་པོ་
ཆེ་ཆེན་པོ་དྲི་མ་མེད་པའི་གཟི་བརྗིད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་དེ་བཞིན་གཤེགས་པས་སངས་རྒྱས་ཀྱི་ཆོས་ཐམས་ཅད་ཡོངས་སུ་གཟུང་བའི་སླད་དུ་སྦྱིན་པའི་
ཚོགས་འདི་བཀའ་སྩལ་པ་ངོ་མཚར་ལགས་སོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སྦྱིན་པའི་ཚོགས་འདི་ལྟ་བུ་དང་ལྡན་པ་དེ་དག་ནི། ནམ་ཡང་
བསོད་ནམས་ཡོངས་སུ་ཉམས་པའམ། ཡེ་ཤེས་ཡོངས་སུ་ཉམས་པའམ། ཤེས་རབ་ཡོངས་སུ་ཉམས་པར་མི་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ།
དེ་དེ་བཞིན་ནོ། །ཁྱོད་ཇི་སྐད་ཟེར་བ་བཞིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སྦྱིན་པའི་ཚོགས་འདི་ལྟ་བུ་དང་ལྡན་པ་དེ་དག་ནི། བསོད་ནམས་མི་ཟད་པ་དང༌། བསོད་
ནམས་རྒྱ་མཚོས་མངོན་པར་འབྱུང་བར་འགྱུར་རོ། །དེ་དག་ནི། འཕགས་པའི་ཆོས་དང་ལྡན་པས་དབུལ་པོར་ཡང་མི་འགྱུར་རོ། །དེ་དག་ནི། ཆོས་ཀྱི་རྒྱུན་དང་ལྡན་པས་ལོངས་སྤྱོད་ཆེན་པོར་
ཡང་འགྱུར་རོ། །དེ་དག་ནི། ནོར་བདུན་དང་ལྡན་པས་ཕྱུག་པོར་འགྱུར་རོ། །དེ་དག་ནི། བསོད་ནམས་བརྒྱའི་མཚན་ཡོད་པས་བསོད་ནམས་ཆེན་པོ་དང་ལྡན་པའང་ཡིན་ནོ། །དེ་དག་ནི།
༄༅། །སེམས་ཅན་ཐམས་ཅད་ཉེ་བར་འཚོ་བས་བསོད་ནམས་ཀྱི་ཞིང་ཡང་ཡིན་ནོ། །བཅོམ་ལྡན་འདས་ཀྱིས་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ལ་གཞན་ཡང་
བཀའ་སྩལ་པ། རིགས་ཀྱི་བུ། དེ་ལ་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཚོགས་གང་ཞེ་ན། གང་ཚུལ་ཁྲིམས་མ་ཉམས་པ་དང༌། བསླབ་པ་ཡོངས་སུ་མི་གཏོང་བ་དང༌།
ཚུལ་ཁྲིམས་འཆལ་བ་རྣམས་ལ་སྙིང་རྗེ་བ་དང༌། ཚུལ་ཁྲིམས་དང་ལྡན་པ་རྣམས་ལ་གུས་པ་དྲག་པོ་དང་ལྡན་པ་དང༌། ལུས་ཀྱི་ཡན་ལག་གསུམ་ཡོངས་སུ་དག་པ་དང༌། ངག་གི་
ཡན་ལག་བཞི་ཡོངས་སུ་དག་པ་དང༌། ཡིད་ཀྱི་ཡན་ལག་གསུམ་ཡོངས་སུ་དག་པ་དགེ་བ་བཅུའི་ལས་ཀྱི་ལམ་ཡང་དག་པར་བླང་བ་རྗེས་སུ་སྒྲུབ་པ་སྟེ། གཞན་དག་ཀྱང་དེ་ལ་
འཛུད་པ་དང༌། དེ་དག་ལ་འགོད་པར་བྱེད་པ་དང༌། བདག་ལ་མི་བསྟོད་པ་དང༌། གཞན་དག་ལ་མི་སྨོད་པ་དང༌། ཚུལ་ཁྲིམས་དག་ལ་དེའི་ངང་ཅན་དུ་གྱུར་པ་དང༌། ཚུལ་ཁྲིམས་ཀྱིས་
མི་རློམ་པ་དང༌། བརྩོན་པ་མི་འདོར་བ་དང༌། སྦྱངས་པའི་ཡོན་ཏན་དང་ཡོ་བྱད་བསྙུངས་པ་དག་ལས་མི་གཡོ་བ་དང༌། འཕགས་པའི་རིགས་ལ་གནས་པར་བྱེད་པ་དང༌། རང་གི་
སེམས་སྲུང་བ་དང༌། གཞན་གྱི་འཁྲུལ་པ་དག་ལ་སྐྱོན་དུ་མི་ལྟ་བ་དང༌། སྡིག་པ་ཐམས་ཅད་མི་བྱེད་པ་དང༌། སྲིད་པ་མངོན་པར་འགྲུབ་པ་ལ་མངོན་པར་མི་དགའ་བ་དང༌། གཞན་
རྣམས་དགེ་བའི་རྩ་བ་དག་ལ་འཛུད་པ་དང༌། གཞན་གྱི་བྱ་བ་དག་ལ་སྤྲོ་བ་དང༌། བདེ་བ་དག་ལ་དེའི་ངང་ཅན་དུ་མི་འགྱུར་བ་དང༌། དགོན་པར་གནས་པ་མི་འདོར་བ་དང༌། ནད་པ་རྣམས་ཀྱི་
གཡོག་བྱེད་པ་དང༌། བྱས་ནས་ཀྱང་དགའ་བ་དང༌། མཆོག་ཏུ་དགའ་བར་འགྱུར་བ་དང༌། ཇི་སྐད་སྨྲས་པ་དེ་བཞིན་བྱེད་པ་དང༌། བཀུར་སྟི་མི་བྱེད་པ་དག་ལ་དང་དུ་ལེན་པ་དང༌། བཀུར་སྟི་བྱེད་
པ་རྣམས་ལ་ཁེངས་པར་མི་བྱེད་པ་དང༌། རྙེད་པ་དང་མ་རྙེད་པ་དང༌། གྲགས་པ་དང་མ་གྲགས་པ་དང༌། སྨད་པ་དང་བསྔགས་པ་དང༌། བདེ་བ་དང་སྡུག་བསྔལ་པ་དག་ལ་ཁེངས་པར་ཡང་མི་
འགྱུར༑ ཞུམ་པར་ཡང་མི་འགྱུར་བ་དང༌། རྗེས་སུ་ཆགས་པ་དང༌། ཁོང་ཁྲོ་བ་སྤོང་བ་དང༌། འཁོན་དུ་མི་འཛིན་པ་དང༌། རྟག་ཏུ་རྒྱུན་མི་ཆད་པར་བྱམས་པ་ལ་གནས་པ་དང༌། མཛའ་
བཤེས་དང་དགྲ་རྣམས་ལ་སེམས་སྙོམས་པར་ལྟ་བ་དང༌། ཚུལ་ཁྲིམས་ཀྱི་ཕུང་པོ་ལ་མཆོག་ཏུ་མི་འཛིན་པ་དང༌། ཐེག་པ་གཞན་དུ་ཡོངས་སུ་མི་བསྔོ་བ་དང༌། ལྷ་གཞན་ལ་ཕྱག་མི་
འཚལ་བ་དང༌། ལྟ་བར་གྱུར་པ་ཐམས་ཅད་དང་བྲལ་བ་དང༌། བག་ལ་ཉལ་བ་དང༌། ཀུན་ནས་ལྡང་བ་རྣམ་པར་གནོན་པ་དང༌། འགྱོད་པ་སྤོང་བ་དང༌། ཡིད་ལ་གཅགས་པ་མེད་པ་དང༌།
དངོས་པོ་ཐམས་ཅད་ཡོངས་སུ་གཏོང་བ་ལ་མཆོག་ཏུ་དགའ་བ་དང༌། སྐྱེ་བའི་གནས་ཐམས་ཅད་ལ་ལྷག་པར་ཆགས་པ་མེད་པ་དང༌། བསམ་བཞིན་དུ་སྲིད་པའི་འགྲོ་བར་སྐྱེ་བ་དང༌། མི་
༄༅། །དགའ་བ་བཟོད་པ་དང༌། བརྩོན་འགྲུས་རྩོམ་པ་དང༌། སེམས་རབ་ཏུ་འཛིན་པ་དང༌། དམིགས་པ་ལ་རྣམ་པར་གཡེང་བ་མེད་པ་དང༌། མི་སྐྱེ་བའི་ཆོས་ལ་བཟོད་
ཅིང་མི་སྐྲག་པ་སྟེ། རིགས་ཀྱི་བུ། དེ་ལྟར་ན། འདི་ནི། བྱང་ཆུབ་སེམས་དཔའི་ཚུལ་ཁྲིམས་ཀྱི་ཚོགས་ཡིན་ཏེ། ཚུལ་ཁྲིམས་ཀྱི་ཚོགས་དེ་ལ་བརྟེན་ནས་སྲོག་གི་ཕྱིར་ཡང་བསླབ་པ་
ཉམས་པར་མི་བྱེད་དེ། དེ་ནི། རྒྱལ་སྲིད་ཀྱི་ཕྱིར་ཚུལ་ཁྲིམས་སྲུང་བར་མི་བྱེད་དོ། །མཐོ་རིས་ཀྱི་ཕྱིར་མ་ཡིན། བརྒྱ་བྱིན་དུ་འགྱུར་བའི་ཕྱིར་མ་ཡིན། ཚངས་པར་འགྱུར་བའི་ཕྱིར་མ་
ཡིན༑ ལོངས་སྤྱོད་ཀྱི་ཕྱིར་མ་ཡིན། དབང་ཕྱུག་གི་ཕྱིར་མ་ཡིན། ཁ་དོག་གི་ཕྱིར་མ་ཡིན། གྲགས་པའི་ཕྱིར་མ་ཡིན། སྙན་པ་དང་སྒྲ་དང་ཚིགས་སུ་བཅད་པའི་ཕྱིར་མ་ཡིན།
རྙེད་པའི་ཕྱིར་མ་ཡིན། བཀུར་སྟིའི་ཕྱིར་མ་ཡིན། སྲོག་གི་ཕྱིར་མ་ཡིན། གོས་ཀྱི་ཕྱིར་མ་ཡིན། ཟས་ཀྱི་ཕྱིར་མ་ཡིན། མལ་ཆ་དང་སྟན་གྱི་ཕྱིར་མ་ཡིན་ཏེ། ན་བའི་གསོས་དང་
སྨན་ཟོང་གི་ཕྱིར་ཚུལ་ཁྲིམས་སྲུང་བར་མི་བྱེད་དོ། །མིག་དང༌། རྣ་བ་དང༌། སྣ་དང༌། ལྕེ་དང༌། ལུས་ལ་བརྟེན་ཏེ་ཚུལ་ཁྲིམས་སྲུང་བར་མི་བྱེད་དོ། །གཟུགས་དང༌། སྒྲ་དང༌། དྲི་དང༌། རོ་
དང༌། རེག་བྱ་དང༌། ཆོས་ལ་བརྟེན་ཏེ་ཚུལ་ཁྲིམས་སྲུང་བར་མི་བྱེད་དོ། །གཟུགས་ལ་བརྟེན་ཏེ་ཚུལ་ཁྲིམས་སྲུང་བར་མི་བྱེད་དོ། །ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་
ཤེས་པ་ལ་བརྟེན་ཏེ་ཚུལ་ཁྲིམས་སྲུང་བར་མི་བྱེད་དོ། །འདོད་པའི་ཁམས་ལ་བརྟེན་ཏེ་ཚུལ་ཁྲིམས་སྲུང་བར་མི་བྱེད་དོ། །གཟུགས་ཀྱི་ཁམས་ལ་བརྟེན་ཏེ་ཚུལ་ཁྲིམས་སྲུང་བར་མི་བྱེད་དོ། །
གཟུགས་མེད་པའི་ཁམས་ལ་བརྟེན་ཏེ་ཚུལ་ཁྲིམས་སྲུང་བར་མི་བྱེད་དོ། །སེམས་ཅན་དམྱལ་བའི་འཇིགས་པས་སྐྲག་སྟེ། ཚུལ་ཁྲིམས་སྲུང་བར་མི་བྱེད་དོ། །དུད་འགྲོའི་སྐྱེ་གནས་ཀྱི་
འཇིགས་པས་སྐྲག་སྟེ། ཚུལ་ཁྲིམས་སྲུང་བར་མི་བྱེད་དོ། །གཤིན་རྗེའི་འཇིག་རྟེན་གྱི་འཇིགས་པས་སྐྲག་སྟེ་སྐྱབས་འདོད་པའི་ཕྱིར་ཚུལ་ཁྲིམས་སྲུང་བར་མི་བྱེད་དོ། །མི་དབུལ་པོའི་
འཇིགས་པས་སྐྲག་སྟེ་ཚུལ་ཁྲིམས་སྲུང་བར་མི་བྱེད་དོ། །ལྷ་དབུལ་པོའི་འཇིགས་པས་སྐྲག་པ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མི་
འམ་ཅི་དང༌། ལྟོ་འཕྱེ་ཆེན་པོའི་དབུལ་པོའི་འཇིགས་པས་སྐྲག་སྟེ་ཚུལ་ཁྲིམས་སྲུང་བར་མི་བྱེད་དེ། གཞན་དུ་ན་སངས་རྒྱས་ཀྱི་ཚུལ་གནས་པར་བྱ་བའི་ཕྱིར་ཚུལ་ཁྲིམས་སྲུང་བར་བྱེད་
དོ༑ ༑སངས་རྒྱས་ཀྱི་རིགས་གནས་པར་བྱ་བ་དང༌། ཆོས་ཀྱི་རིགས་གནས་པར་བྱ་བ་དང༌། དགེ་འདུན་གྱི་རིགས་གནས་པར་བྱ་བའི་ཕྱིར་ཚུལ་ཁྲིམས་སྲུང་བར་བྱེད་དོ། །སྐྱེ་བ་དང༌།
རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་ལས་ཡང་དག་པར་འདའ་བར་བྱ་བའི་ཕྱིར་ཚུལ་
༄༅། །ཁྲིམས་སྲུང་བར་བྱེད་དོ། །སེམས་ཅན་ཐམས་ཅད་རབ་ཏུ་དགྲོལ་བར་འདོད་དེ་ཚུལ་ཁྲིམས་སྲུང་བར་བྱེད་དོ། །སེམས་ཅན་ཐམས་ཅད་ལ་ཕན་པ་དང༌། བདེ་བ་དང༌།
གྲུབ་པ་དང༌། བདེ་བ་འདོད་དེ་ཚུལ་ཁྲིམས་སྲུང་བར་བྱེད་དོ། །སངས་རྒྱས་ཀྱི་ཆོས་གནས་པར་འདོད་དེ་ཚུལ་ཁྲིམས་སྲུང་བར་བྱེད་དོ། །ཆོས་ཀྱི་འཁོར་ལོ་བསྐོར་བར་འདོད་དེ་ཚུལ་ཁྲིམས་
སྲུང་བར་བྱེད་དོ། །འཕགས་པའི་དགེ་འདུན་ཡོངས་སུ་བསྡུ་བར་འདོད་དེ་ཚུལ་ཁྲིམས་སྲུང་བར་བྱེད་དོ། །སངས་རྒྱས་ཀྱི་རིགས་མི་འཆད་པར་འདོད་པ་དང༌། ཆོས་ཀྱི་རིགས་མི་འཆད་
པར་འདོད་པ་དང༌། དགེ་འདུན་གྱི་རིགས་མི་འཆད་པར་འདོད་དེ་ཚུལ་ཁྲིམས་སྲུང་བར་བྱེད་དོ། །འཕགས་པའི་རིགས་ཡོངས་སུ་སྤྱད་པར་འདོད་དེ་ཚུལ་ཁྲིམས་སྲུང་བར་བྱེད་དོ། །ལྷའི་
མངོན་པར་ཤེས་པ་འདོད་པ་དང༌། ཏིང་ངེ་འཛིན་འདོད་པ་དང༌། ཤེས་རབ་འདོད་པ་དང༌། རྣམ་པར་གྲོལ་བ་འདོད་པ་དང༌། རྣམ་པར་གྲོལ་བའི་ཡེ་ཤེས་མཐོང་བ་འདོད་དེ་ཚུལ་ཁྲིམས་
སྲུང་བར་བྱེད་དོ། །རྫུ་འཕྲུལ་འདོད་པ་དང༌། ཆོ་འཕྲུལ་འདོད་དེ་ཚུལ་ཁྲིམས་སྲུང་བར་བྱེད་དེ། དེའི་ཚུལ་ཁྲིམས་དེའང་མ་ཉམས་པ་དང༌། མ་ཞིག་པ་དང༌། མ་འདྲེས་པ་དང༌། མ་འཆོལ་
བ་དང༌། རང་དབང་ཡོད་པ་དང༌། ལེགས་པར་ཚར་ཕྱིན་པ་དང༌། ལེགས་པར་བསམ་པ་དང༌། མ་ནོགས་པ་དང༌། རྨ་མེད་པ་དང༌། གཙང་བ་དང༌། དྲི་ཞིམ་པ་དང༌། མཁས་པས་བསྔགས་
པ་དང༌། སངས་རྒྱས་ཐམས་ཅད་ཀྱིས་བསྟོད་པ་དང༌། མ་སྨད་པ་དང༌། ཆོས་ཀྱི་རྗེས་སུ་མཐུན་པའི་ཆོས་སྒྲུབ་པ་སྙིང་པོར་བྱེད་པ་ཡིན་ནོ། །དེ་ཚུལ་ཁྲིམས་ཀྱི་ཕུང་པོ་དེ་ལྟ་བུ་དང་ལྡན་པས་ཆོས་
བཅུ་ལས་ཉམས་པར་མི་འགྱུར་ཏེ། བཅུ་གང་ཞེ་ན། འདི་ལྟ་སྟེ། འཁོར་ལོས་བསྒྱུར་བའི་རྒྱལ་སྲིད་ལས་ཡོངས་སུ་ཉམས་པར་མི་འགྱུར་ཏེ། དེ་ལའང་བག་ཡོད་ལ་བྱང་ཆུབ་འདོད་པ་
དང༌། བརྒྱ་བྱིན་ལས་ཡོངས་སུ་ཉམས་པར་མི་འགྱུར་ཏེ། དེ་ལའང་བག་ཡོད་ལ་བྱང་ཆུབ་འདོད་ཅིང་སངས་རྒྱས་མཐོང་བ་འབའ་ཞིག་འདོད་པ་དང༌། ཚངས་པ་ལས་ཡོངས་སུ་ཉམས་
པར་མི་འགྱུར་ཏེ། དེ་ལའང་བག་ཡོད་ལ་བྱང་ཆུབ་འདོད་པ་དང༌། ཤེས་ནས་དད་པ་ཐོབ་པའི་ཕྱིར་སངས་རྒྱས་མཐོང་བ་ལས་ཡོངས་སུ་ཉམས་པར་མི་འགྱུར་བ་དང༌། ཇི་ལྟར་ཐོས་པའི་
ཆོས་ལ་ནན་ཏན་དུ་བསྒྲུབ་པའི་ཕྱིར་ཆོས་ཐོས་པ་ལས་ཡོངས་སུ་ཉམས་པར་མི་འགྱུར་བ་དང༌། བྱང་ཆུབ་སེམས་དཔའི་དམ་བཅས་པ་ཤེས་པ་ལས་ཡོངས་སུ་ཉམས་པར་མི་འགྱུར་
བ་དང༌། དགེ་བའི་རྩ་བའི་ཆོས་ཐམས་ཅད་ཤེས་པ་འདོད་པའི་ཕྱིར་སྤོབས་པ་མི་ཆོད་པ་ལས་ཡོངས་སུ་ཉམས་པར་མི་འགྱུར་བ་དང༌། བསམ་གཏན་ལས་ཡོངས་སུ་ཉམས་པར་མི་
འགྱུར་པ་དང༌། སངས་རྒྱས་དང༌། རང་སངས་རྒྱས་དང༌། ཉན་ཐོས་དང༌། བྱང་ཆུབ་སེམས་དཔའ་ཐམས་ཅད་ཀྱིས་བསྔགས་པ་ལས་ཡོངས་སུ་ཉམས་པར་མི་འགྱུར་བ་དང༌། མངོན་
༄༅། །པར་ཤེས་པ་མྱུར་བ་དང༌། ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱ་བ་ལས་ཡོངས་སུ་ཉམས་པར་མི་འགྱུར་བ་སྟེ། ཚུལ་ཁྲིམས་ཀྱི་ཕུང་པོ་དེ་ལྟ་
བུ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཆོས་བཅུ་པོ་དེ་དག་ལས་ཡོངས་སུ་ཉམས་པར་མི་འགྱུར་རོ། །ཚུལ་ཁྲིམས་ཀྱི་ཕུང་པོ་དེ་ལྟ་བུ་ལ་གནས་པའི་བྱང་ཆུབ་
སེམས་དཔའ་སེམས་དཔའ་ཆེན་པོ་ནི། ལྷ་རྣམས་ཀྱིས་རྟག་ཏུ་ཕྱག་བྱས་པ་ཡིན་ནོ། །ཀླུ་རྣམས་ཀྱིས་རྟག་ཏུ་བསྔགས་པ་ཡིན་ནོ། །གནོད་སྦྱིན་རྣམས་ཀྱིས་རྟག་ཏུ་བཀུར་སྟི་བྱས་པ་
ཡིན་ནོ༑ ༑དྲི་ཟ་རྣམས་ཀྱིས་རྟག་ཏུ་མཆོད་པ་ཡིན་ནོ། །ཀླུའི་དབང་པོ་དང༌། ལྷ་མ་ཡིན་རྣམས་ཀྱིས་རྟག་ཏུ་བསྙེན་བཀུར་བྱས་པ་ཡིན་ནོ། །རྒྱལ་རིགས་དང༌། བྲམ་ཟེ་དང༌། ཚོང་དཔོན་
དང༌། ཁྱིམ་བདག་རྣམས་ཀྱིས་རྟག་ཏུ་བཀུར་བ་ཡིན་ནོ། །མཁས་པ་རྣམས་ཀྱིས་རྟག་ཏུ་ཐད་དུ་འགྲོ་བར་བྱ་བ་ཡིན་ནོ། །སངས་རྒྱས་རྣམས་ཀྱིས་རྟག་ཏུ་དགོངས་པ་ཡིན་ནོ། །ལྷ་དང་
བཅས་པའི་འཇིག་རྟེན་གྱིས་རྟག་ཏུ་སྟོན་པར་བཀུར་བ་ཡིན་ནོ། །སེམས་ཅན་ཐམས་ཅད་ལ་སྙིང་བརྩེ་བ་ཅན་ཡིན་ནོ། །དེ་ལྟར་ཚུལ་ཁྲིམས་ཀྱི་ཕུང་པོ་ཡང་དག་པར་སྲུང་བའི་བྱང་ཆུབ་
སེམས་དཔའ་སེམས་དཔའ་ཆེན་པོ་དེ་ནི། འགྲོ་བ་བཞིར་འགྲོ་བར་མི་འགྱུར་ཏེ། བཞི་གང་ཞེ་ན། འདི་ལྟ་སྟེ། སེམས་ཅན་ཡོངས་སུ་སྨིན་པར་བྱ་བའི་ཆེད་མ་གཏོགས་པར་མི་ཁོམ་
པའི་འགྲོ་བར་འགྲོ་བར་མི་འགྱུར་བ་དང༌། སངས་རྒྱས་མི་བཞུགས་པའི་སངས་རྒྱས་ཀྱི་ཞིང་གི་འགྲོ་བར་འགྲོ་བར་མི་འགྱུར་བ་དང༌། ལོག་པར་ལྟ་བའི་རིགས་སུ་སྐྱེ་བའི་འགྲོ་བར་འགྲོ་
བར་མི་འགྱུར་བ་དང༌། ངན་འགྲོ་ཐམས་ཅད་ཀྱི་འགྲོ་བར་འགྲོ་བར་མི་འགྱུར་བ་སྟེ། དེ་ལྟར་ཚུལ་ཁྲིམས་ཀྱི་ཕུང་པོ་ལེགས་པར་ཡང་དག་པར་སྲུང་བའི་བྱང་ཆུབ་སེམས་དཔའ་སེམས་
དཔའ་ཆེན་པོ་ནི། འགྲོ་བ་བཞི་པོ་དེ་དག་ཏུ་འགྲོ་བར་མི་འགྱུར་རོ། །གཞན་ཡང་དེ་ལྟར་ཚུལ་ཁྲིམས་ཀྱི་ཕུང་པོ་ཡང་དག་པར་སྲུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི།
ཆོས་བཞི་ལས་ཡོངས་སུ་ཉམས་པར་མི་འགྱུར་ཏེ། བཞི་གང་ཞེ་ན། འདི་ལྟ་སྟེ། རྫོགས་པའི་བྱང་ཆུབ་ཀྱི་སེམས་ལས་ཡོངས་སུ་ཉམས་པར་མི་འགྱུར་བ་དང༌། སངས་རྒྱས་རྗེས་སུ་
དྲན་པ་ལས་ཡོངས་སུ་ཉམས་པར་མི་འགྱུར་བ་དང༌། ཇི་ལྟར་ཐོས་པ་དང༌། ཀུན་ཆུབ་པར་བྱེད་པའི་ཆོས་རྣམས་ལས་ཡོངས་སུ་ཉམས་པར་མི་འགྱུར་བ་དང༌། བསྐལ་པ་གྲངས་མེད་པ་
རྗེས་སུ་དྲན་པ་ལས་ཡོངས་སུ་ཉམས་པར་མི་འགྱུར་བ་སྟེ། དེ་ལྟར་ཚུལ་ཁྲིམས་ཀྱི་ཕུང་པོ་ཡང་དག་པར་སྲུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཆོས་བཞི་པོ་དེ་དག་
ལས་ཡོངས་སུ་ཉམས་པར་མི་འགྱུར་རོ། །རིགས་ཀྱི་བུ། དེ་ལྟར་ཚུལ་ཁྲིམས་ཀྱི་ཕུང་པོ་ཡང་དག་པར་སྲུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། རྣམ་པར་འཇིག་པ་བཞི་
༄༅། །དང་ཕྲད་པར་མི་འགྱུར་ཏེ། བཞི་གང་ཞེ་ན། འདི་ལྟ་སྟེ། དམ་པའི་ཆོས་རྣམ་པར་འཇིག་པ་དང་ཕྲད་པར་མི་འགྱུར་བ་དང༌། མཚོན་གྱི་བར་གྱི་བསྐལ་པ་དང་
ཕྲད་པར་མི་འགྱུར་བ་དང༌། མུ་གེའི་བར་གྱི་བསྐལ་པ་དང་ཕྲད་པར་མི་འགྱུར་བ་དང༌། ནད་ཀྱི་བར་གྱི་བསྐལ་པ་དང་ཕྲད་པར་མི་འགྱུར་བ་སྟེ། རིགས་ཀྱི་བུ། དེ་ལྟར་ཚུལ་ཁྲིམས་ཀྱིས་
ཕུང་པོ་ཡང་དག་པར་སྲུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། རྣམ་པར་འཇིག་པ་བཞི་པོ་དེ་དག་དང་ཕྲད་པར་མི་འགྱུར་རོ། །རིགས་ཀྱི་བུ། གཞན་ཡང་དེ་ལྟར་ཚུལ་
ཁྲིམས་ཀྱི་ཕུང་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། མངོན་པར་མཐོ་བ་བཞི་ཐོབ་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། སངས་རྒྱས་བཅོམ་ལྡན་
འདས་རྣམས་ལ་མི་སླུ་བ་དང༌། ལྷ་ལ་མི་སླུ་བ་དང༌། སེམས་ཅན་རྣམས་ལ་མི་སླུ་བ་དང༌། རང་གི་སེམས་ལ་མི་སླུ་བ་སྟེ། དེ་ལྟར་ཚུལ་ཁྲིམས་ཀྱི་ཕུང་པོ་ལ་ངས་པའི་བྱང་ཆུབ་
སེམས་དཔའ་སེམས་དཔའ་ཆེན་པོ་ནི། མངོན་པར་མཐོ་བ་བཞི་པོ་དེ་དག་ཐོབ་པར་འགྱུར་རོ། །རིགས་ཀྱི་བུ། གཞན་ཡང་དེ་ལྟར་ཚུལ་ཁྲིམས་ཀྱི་ཕུང་པོ་ལ་གནས་པའི་བྱང་ཆུབ་སེམས་
དཔའ་སེམས་དཔའ་ཆེན་པོ་ནི། འཇིགས་པ་བཅུ་ལས་ཡང་དག་པར་འདའ་བར་འགྱུར་ཏེ། བཅུ་གང་ཞེ་ན། འདི་ལྟ་སྟེ། སེམས་ཅན་དམྱལ་བའི་འཇིགས་པ་ལས་ཡང་དག་པར་
འདའ་བར་འགྱུར་བ་དང༌། དུད་འགྲོའི་སྐྱེ་གནས་ཀྱི་འཇིགས་པ་ལས་ཡང་དག་པར་འདའ་བར་འགྱུར་བ་དང༌། གཤིན་རྗེའི་འཇིག་རྟེན་གྱི་འཇིགས་པ་ལས་ཡང་དག་པར་འདའ་བར་འགྱུར་
བ་དང༌། དབུལ་པོའི་འཇིགས་པ་ལས་ཡང་དག་པར་འདའ་བར་འགྱུར་བ་དང༌། བསྔགས་པ་དང༌། སྙན་པ་དང༌། གྲགས་པ་དང༌། སྒྲ་དང༌། ཚིགས་སུ་བཅད་པ་མ་ཡིན་པའི་འཇིགས་པ་
དང༌། བདུད་ཀྱིས་ཀུན་ནས་དཀྲིས་པའི་འཇིགས་པ་དང༌། ཉན་ཐོས་དང༌། རང་སངས་རྒྱས་ཀྱི་ངེས་པའི་འཇིགས་པ་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌།
ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། གྲུལ་བུམ་དང༌། སྲིན་པོའི་འཇིགས་པ་དང༌། དུག་དང༌། མཚོན་དང༌། མེ་དང༌། ཆུའི་འཇིགས་པ་དང༌། སེངྒེ་དང༌། སྟག་དང༌།
སྤྲུལ་དང༌། དོམ་དང༌། དྲེད་དང༌། གཟིག་དང༌། ཁྱི་དང༌། ཝ་དང༌། ཆུ་སྲིན་མ་ཀ་ར་དང༌། ཆུ་སྲིན་བྱིས་པ་གསོད་དང༌། ཆུ་སྲིན་ཀུམྦྷི་ར་དང༌། བྱི་ལ་དང༌། བྱི་བ་དང༌། སྡིག་པ་དང༌། སྲིན་
གྱི་མེ་དང༌། སྤྲུལ་གདུག་པ་དང༌། རྒྱལ་པོ་དང༌། ཆོམ་རྐུན་གྱི་འཇིགས་པ་རྣམས་ལས་ཡང་དག་པར་འདའ་བར་འགྱུར་བ་སྟེ། དེ་ལྟར་ཚུལ་ཁྲིམས་ཀྱི་ཕུང་པོ་ལ་གནས་པའི་བྱང་ཆུབ་
སེམས་དཔའ་སེམས་དཔའ་ཆེན་པོ་ནི། འཇིགས་པ་བཅུ་པ་དེ་དག་ལས་ཡང་དག་པར་འདའ་བར་འགྱུར་རོ། །རིགས་ཀྱི་བུ། སངས་རྒྱས་ཀྱི་ཆོས་རྣམས་ཀྱི་རྟེན་ནི། ཚུལ་ཁྲིམས་ཡིན་ཏེ།
༄༅། །བྱང་ཆུབ་དང་སངས་རྒྱས་ཀྱི་ཆོས་རྣམས་ནི། ཚུལ་ཁྲིམས་ཀྱི་ཕུང་པོ་ལ་ངས་སོ། །གང་ལ་ཚུལ་ཁྲིམས་ཡོད་པ་དེ་ལ་ནི། ཏིང་ངེ་འཛིན་འདི་ཡོད་དོ། །གང་ལ་ཚུལ་
ཁྲིམས་ཡོད་པ་དེ་ལ་ནི། ཤེས་རབ་འདི་ཡོད་དོ། །གང་ལ་ཚུལ་ཁྲིམས་ཡོད་པ་དེ་ལ་ནི། རྣམ་པར་གྲོལ་བ་འདི་ཡོད་དོ། །གང་ལ་ཚུལ་ཁྲིམས་ཡོད་པ་དེ་ལ་ནི། རྣམ་པར་གྲོལ་བའི་
ཡེ་ཤེས་མཐོང་བ་འདི་ཡོད་དོ། །རིགས་ཀྱི་བུ། དེ་ལ་གང་ཉོན་མོངས་པ་རྣམས་རབ་ཏུ་ཞི་བའི་ཚུལ་ཁྲིམས་ནི། གང་ཡིན། ཅིའི་ཕྱིར་ན་ཉོན་མོངས་པ་རྣམས་ཞེས་བྱ་ཞེ་ན། ཉོན་མོངས་
པར་བྱེད་པས་ན། ཉོན་མོངས་པ་རྣམས་ཏེ། འདི་ལྟར་ཁམས་གསུམ་དུ་སེམས་ཅན་རྣམས་ཉོན་མོངས་པར་བྱེད་པས་ན། ཉོན་མོངས་པ་རྣམས་ཞེས་བྱའོ། །དེ་དག་ཞི་བར་བྱེད་པ་གང་
ཞེ་ན༑ གང་རྟོག་པ་མེད་པ་དང༌། རྣམ་པར་རྟོག་པ་མེད་པ་དང༌། ཡོངས་སུ་རྟོག་པ་མེད་པ་དང༌། རྒྱུ་བ་མེད་པ་དང༌། སྐྱེ་བ་མེད་པ་དང༌། ཀུན་ཏུ་རྟོག་པ་མེད་པ་དང༌། ཡིད་ལ་བྱེད་པ་མེད་
པ་སྟེ༑ འདི་ནི། ཉོན་མོངས་པ་རྣམས་རྣམ་པར་ཞི་བ་ཞེས་བྱའོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་སུ་དག་ཉོན་མོངས་པ་རབ་ཏུ་ཞི་བ་མི་ཤེས་པ་དེ་དག་
གི་ཚུལ་ཁྲིམས་ཀྱི་ཕུང་པོ་ནི། ཡོངས་སུ་དག་པ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་ནི། ཚངས་པའི་འཇིག་རྟེན་དུ་སོང་ཡང་ཉོན་མོངས་པ་དང་བཅས་པར་ཟད་དོ། །དེ་དག་ནི། སྲིད་
པའི་རྩེ་མོར་སོང་ཡང་ཉོན་མོངས་པ་དང་བཅས་པར་ཟད་དོ། །རིགས་ཀྱི་བུ། དེ་བས་ན། རྣམ་གྲངས་འདིས་ཀྱང་ཁྱོད་ཀྱིས་གང་ལ་ཁམས་གསུམ་པའི་ཉོན་མོངས་པ་རྣམས་མེད་པ་དེའི་ཚུལ་
ཁྲིམས་ཀྱི་ཕུང་པོ་ནི། ཡོངས་སུ་དག་པ་ཡིན་པར་དེ་ལྟར་རིག་པར་བྱའོ། །དེ་ནས་བཅོམ་ལྡན་འདས་ལ་ཚན་པོ་ཆེ་དྲི་མ་མེད་པའི་གཟི་བརྗིད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་
འདས༑ གལ་ཏེ་ཁམས་གསུམ་པའི་ཉོན་མོངས་པ་རྣམས་མ་མཆིས་པ་དེའི་ཚུལ་ཁྲིམས་ཀྱི་ཕུང་པོ་ཡོངས་སུ་དག་པ་ལགས་ན། བཅོམ་ལྡན་འདས། ཉོན་མོངས་པ་དང་བྲལ་བའི་བྱང་
ཆུབ་སེམས་དཔའ་དེ་ཇི་ལྟར་ཁམས་གསུམ་པར་སྨོན་པར་བགྱིད། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ལ་འདི་སྐད་ཅེས་
བཀའ་སྩལ་ཏོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། ཀུན་ནས་ཉོན་མོངས་པར་བྱ་བའི་ཕྱིར་ཁམས་གསུམ་པར་སྨོན་པར་མི་བྱེད་དེ། རིགས་ཀྱི་བུ།
གང་དག་བདག་ཉིད་ཀྱང་ཉོན་མོངས་པ་མེད་ལ་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཁམས་གསུམ་དུའང་ཀུན་ནས་ཉོན་མོངས་པར་འགྱུར་བ་དེ་ནི། བྱང་ཆུབ་སེམས་དཔའ་རྣམས་
ཀྱི་ཐབས་ཡིན་ནོ། །རིགས་ཀྱི་བུ། འདི་ལྟ་སྟེ། མི་ལ་ལ་ཞིག་གིས་ནམ་མཁའ་ལ་རི་མོ་རྣམ་པར་སྣ་ཚོགས་བཀྲ་བ་སྟོན་པར་བྱེད་ན། རིགས་ཀྱི་བུ། འདི་ཇི་སྙམ་དུ་སེམས། ཅི་མི་དེ་དཀའ་
༄༅། །བ་བྱེད་པ་ཡིན་ནམ། གསོལ་པ། བཅོམ་ལྡན་འདས། དེ་དེ་ལྟ་ལགས་སོ། །བདེ་པར་གཤེགས་པ། དེ་དེ་ལྟ་ལགས་ཏེ། མི་དེ་ནི། དཀའ་བ་བགྱིད་པ་ལགས་སོ། །
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་གང་དག་བདག་ཉིད་ཀྱང་ཉོན་མོངས་པ་མེད་ལ་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཁམས་
གསུམ་དུའང་ཀུན་ནས་ཉོན་མོངས་པར་འགྱུར་བ་དང༌། སེམས་ཅན་ཡོངས་སུ་སྨིན་པར་བྱས་ནས་ཀྱང་ཐེག་པ་གསུམ་སྟོན་པར་བྱེད་པ་དེ་དག་ནི། དེ་བས་ཀྱང་ཆེས་དཀའ་བ་བྱེད་པ་
ཡིན་ནོ༑ ༑གསོལ་པ༑ བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཐར་པའི་སྒོའང་མཐོང་ལ། སེམས་ཅན་རྣམས་ལ་སྙིང་བརྩེ་བའི་སླད་དུ་ཁམས་
གསུམ་ནའང་གནས་པ་དེ་དག་ནི། སྙིང་རྗེ་ཆེན་པོ་དང་ལྡན་པ་ལགས་སོ། །བཅོམ་ལྡན་འདས། དཔེར་བགྱི་ན། དགུ་མ་པའི་གནོད་པ་ལས་ཐར་པ་ལགས་པའི་མི་སླར་དགུམ་པའི་
གནོད་པའི་གནས་སུ་མཆིས་ཏེ། དགུམ་པའི་གནོད་པ་བགྱིད་པ་རྣམས་ལ་འདི་སྐད་དུ་བདག་སོད་ཅིག། གཞན་མ་གསད་ཅིག །ཅེས་མཆི་བ་དེ་བཞིན་དུ་བཅོམ་ལྡན་འདས། དགུམ་
པའི་གནོད་པའི་གནོད་པ་ལྟ་བུ་ནི། ཁམས་གསུམ་ལགས་སོ། །དགོན་པར་བགྱི་བ་ལྟ་བུ་ནི། འཇིག་རྟེན་གནས་པ་ལགས་སོ། །དགུམ་པའི་གནོད་པ་བགྱིད་པ་ལྟ་བུ་ནི། འདུ་བྱེད་
རྣམས་ལགས་སོ། །དགུམ་པའི་གནོད་པ་སྤངས་པ་ལྟ་བུ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཁམས་གསུམ་ལས་རྣམ་པར་གྲོལ་བ་དེ་དག་ལགས་ཏེ། སེམས་ཅན་
ཡོངས་སུ་སྨིན་པར་བགྱིད་པ་དང༌། སེམས་ཅན་ཡོངས་སུ་དགྲོལ་བར་བགྱི་པའི་སླད་དུ་ཁམས་གསུམ་འབའ་ཞིག་ཏུ་རྒྱུ་ལགས་སོ། །བཅོམ་ལྡན་འདས། བྱང་ཆུབ་སེམས་དཔའ་སེམས་
དཔའ་ཆེན་པོ་རྣམས་ཀྱིས་ནི། སྙིང་རྗེ་ཆེན་པོའི་སེམས་བསྐྱེད་པ་དེས་ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་གནོན་ཏོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཉན་
ཐོས་དང༌། རང་སངས་རྒྱས་ཐམས་ཅད་ལ་ནི། དེ་ལྟ་བུའི་སྙིང་རྗེ་ཆེན་པོའང་མ་མཆིས། ཐབས་ལ་མཁས་པའང་མ་མཆིས་པའི་སླད་དུའོ། །དེ་ནས་ཡང་བཅོམ་ལྡན་འདས་ཀྱིས་ཚན་པོ་
ཆེ་ཆེན་པོ་དྲི་མ་མེད་པའི་གཟི་བརྗིད་ལ་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོས་ཐོས་པའི་ཚོགས་ལ་ནི། ཇི་ཏླར་བརྩོན་པར་བྱ། དེས་ཐོས་པ་ནི།
ཇི་ལྟར་བཙལ་པར་བྱ་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་མཁན་པོ་དང༌། སློབ་དཔོན་ལ་ང་རྒྱལ་བཅོམ་པ་དང༌། བཀའ་བློ་བདེ་བས་བླ་མའི་སྲི་
ཞུ་དང༌། གུས་པ་དང༌། ཕངས་པ་དང༌། གཅེས་པའི་སེམས་བསྐྱེད་པར་བྱའོ། །དེས་ཆོས་ལ་ནི། སྨན་གྱི་འདུ་ཤེས་བསྐྱེད་པར་བྱའོ། །མཁན་པོ་དང་སློབ་དཔོན་རྣམས་ལ་ནི། སྟོན་པའི་འདུ་ཤེས་
༄༅། །བསྐྱེད་པར་བྱའོ། །དེས་བདག་ལ་ནི། ནད་པའི་འདུ་ཤེས་བསྐྱེད་པར་བྱའོ། །དེས་ཆོས་ཀྱི་གདམས་ངག་སྟོན་པ་ལ་ནི། སྨན་པའི་འདུ་ཤེས་བསྐྱེད་པར་བྱའོ། །
དེས་སེམས་ཅན་ཐམས་ཅད་ལ་ནི། ནད་པའི་འདུ་ཤེས་བསྐྱེད་པར་བྱའོ། །དེས་སངས་རྒྱས་ཀྱི་ཆོས་ཚོལ་བ་ནི། ལུས་ལ་ཕངས་པར་མི་བྱའོ། །སྲོག་ལ་ལྷག་པར་ཆགས་པ་བསྐྱེད་
པར་མི་བྱའོ། །དངོས་པོ་སྣ་ཚོགས་ཡོངས་སུ་འཛིན་པ་རྣམས་ལའང་དེས་ཤིན་ཏུ་ཉོན་མོངས་པའི་འདུ་ཤེས་བསྐྱེད་པར་མི་བྱའོ། །ནོར་ཕུན་སུམ་ཚོགས་པ་ལའང་དེས་ཆགས་པ་
བསྐྱེད་པར་མི་བྱའོ། །ཆོས་གཙོ་བོར་བྱས་ཏེ་ནོར་ཐམས་ཅད་ཡོངས་སུ་གཏང་བར་བྱའོ། །དམ་པའི་ཆོས་ཀྱི་དོན་དང་དམ་པའི་ཆོས་ཡོངས་སུ་གཟུང་བའི་ཕྱིར་འཇིག་རྟེན་པ་ཐམས་
ཅད་ཡོངས་སུ་གཏང་བར་བྱའོ། །ཆོས་ཀྱི་རྙེད་པ་འདོད་པས་རྙེད་པ་དང༌། བཀུར་སྟི་དང༌། ཚིགས་སུ་བཅད་པ་ཡོངས་སུ་གཏང་བར་བྱའོ། །ཆོས་ཀྱི་རྒྱལ་སྲིད་འདོད་པའི་ཕྱིར་རྒྱལ་
སྲིད་ཐམས་ཅད་ཡོངས་སུ་གཏང་བར་བྱའོ། །ཉོན་མོངས་པ་ཐམས་ཅད་ཡོངས་སུ་གཏང་བར་འདོད་པས་དམ་པའི་ཆོས་ཡོངས་སུ་བཙལ་བ་ལ་བརྩོན་པར་བྱའོ། །སེམས་ཅན་
སེམས་ཅན་ཡོངས་སུ་བསྐྱབ་པར་འདོད་པས་དམ་པའི་ཆོས་ཡོངས་སུ་གཟུང་བ་ལ་བརྩོན་པར་བྱའོ། །དམ་པའི་ཆོས་ཡོངས་སུ་འཛིན་པའི་བྱང་ཆུབ་སེམས་པྡའ་སེམས་དཔའ་ཆེན་
པོ་རྣམས་ཀྱིས་དགེ་བའི་རྩ་བ་ཐམས་ཅད་ཡོངས་སུ་འཛིན་པར་ཐོབ་པར་འགྱུར་རོ། །རིགས་ཀྱི་བུ། དེ་བས་ན། བྱང་ཆུབ་འདོད་པ་དང༌། བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་
པ་དང༌། ཤེས་རབ་ཀྱི་ཀ་བ་སྒྲེང་བར་འདོད་པ་རྣམས་ཀྱིས་ཐོས་པ་ལ་བརྩོན་པར་བྱའོ། །རིགས་ཀྱི་བུ། འདི་ལྟ་སྟེ། དཔེར་ན། ཁང་བཟང་རྣམ་པར་རྒྱལ་བྱེད་ནི། ཀ་བས་བརྟན་པ་སུམ་
ཅུ་རྩ་གསུམ་པའི་ལྷ་རྣམས་འདུ་བར་འགྱུར་བ་དེ་བཞིན་དུ། རིགས་ཀྱི་བུ། ཤེས་རབ་ཀྱི་ཀ་བ་ནི། ཐོས་པའི་སྟོབས་ཀྱིས་ཡོངས་སུ་བཟུང་བས་གནས་པ་ལ་བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་དང༌། ལྷ་དང༌། བཅས་པའི་འཇིག་རྟེན་འདུ་བར་འགྱུར་རོ། །རིགས་ཀྱི་བུ། བྱང་ཆུབ་སེམས་དཔའ་གང་བྱང་ཆུབ་ཏུ་སེམས་བསྐྱེད་ནས་བྱང་ཆུབ་སེམས་དཔར་
དམ་བཅས་ཏེ་བདག་སངས་རྒྱས་སུ་གྱུར་ཅིག །ཅེས་སྨྲས་པ་དེའང་ཐོས་པ་ཡོངས་སུ་ཚོལ་བ་ལ་མི་བརྩོན་ན། སེམས་ཅན་ཐམས་ཅད་ཤེས་རབ་འཆལ་པར་བྱ་བ་ལ་ཞུགས་པ་ཡིན་
ནོ༑ ༑རིགས་ཀྱི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཐོས་པ་ཡོངས་སུ་ཚོལ་བ་ལ་བརྩོན་འགྲུས་རྩོམ་པར་བྱེད་ན། དེས་ནི། སེམས་ཅན་ཐམས་ཅད་ཀྱི་ཤེས་
རབ་ཡོངས་སུ་རྫོགས་པར་བྱ་བའི་ཕྱིར་ཉེ་བར་བརྟན་པ་བྱས་པ་ཡིན་ནོ། །ལྷ་རྣམས་ཀྱང་དེའི་ཚེ་དེ་ལ་མགུ་ཞིང་ཡིད་བདེ་བར་གྱུར་ནས་ཨ་ལ་ལ་སྐྱེས་བུ་དམ་པ་འདིས་ནི། ཐོས་པ་
༄༅། །དང༌། བརྩོན་འགྲུས་དང༌། ཤེས་རབ་སྦྱངས་པའི་བློས་པའི་སྟོབས་བཅུ་ཐོབ་པར་ནུས་སོ། །ཨ་ལ་ལ་སྐྱེས་བུ་དམ་པ་འདིས་ནི། ཤེས་རབ་ཀྱི་མཚོན་གྱིས་ཉོན་མོངས་པའི་
དྲ་བའི་རྒྱུད་ཐམས་ཅད་རྣམ་པ་ཐམས་ཅད་དུ་གཅད་པར་ནུས་སོ། །ཨ་ལ་ལ་སྐྱེས་བུ་དམ་པ་འདིས་ནི། སེམས་ཅན་ཐམས་ཅད་ཀྱི་ཉོན་མོངས་པ་སྤང་པའི་ཕྱིར་ཆོས་སྟོན་པར་ནུས་སོ། །ཨ་
ལ་ལ་སྐྱེས་བུ་དམ་པ་འདིས་ནི། སྔོན་གྱི་རྒྱལ་བ་བཞུགས་བཞུགས་པའི་བྱང་ཆུབ་ཀྱི་སྙིང་པོ་ལ་འདུག་པར་ནུས་སོ། །ཨ་ལ་ལ་སྐྱེས་བུ་དམ་པ་འདིས་ནི། བདུད་དཔུང་དང་བཞོན་པ་
དང་བཅས་པ་ཕམ་པར་བྱེད་ནུས་སོ། །ཨ་ལ་ལ་བྱང་ཆུབ་སེམས་དཔའ་འདིས་ནི། རྣམ་པ་བཅུ་གཉིས་དང་ལྡན་པའི་ཆོས་ཀྱི་འཁོར་ལོ་བསྐོར་བར་ནུས་སོ། །ཞེས་ཆེད་དུ་རྗོད་པར་བྱེད་
དོ༑ ༑རིགས་ཀྱི་བུ། གང་གི་ཚེ་བྱང་ཆུབ་སེམས་དཔའ་ཆོས་ཉན་པ་ལ་བརྩོན་པ་དེའི་ཚེ་རིགས་ཀྱི་བུ། བདུད་ཀྱི་གནས་ཐམས་ཅད་མོག་མོག་པོར་འགྱུར་རོ། །སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་ཀྱི་བདུད་སྡིག་ཅན་རྣམས་དང༌། བདུད་ཀྱི་རིས་ཀྱི་ལྷ་གང་དག་ཡིན་པ་དེ་དག་ཐམས་ཅད་དེའི་ཚེ་སྡུག་བསྔལ་ཞིང་ཡིད་མི་བདེ་བར་འགྱུར་ཏེ། འདི་ནི།
བདག་ཆག་གི་དབང་དུ་མི་འགྱུར་རོ། །འདི་ལ་ནི། བདག་ཅག་དབང་མེད་དོ། །འདིས་ནི། བདག་ཅག་རྣམ་པ་ཐམས་ཅད་དུ་བཅོམ་མོ། །འདིས་ནི། བདག་ཅག་དབང་དུ་བྱས་སོ་སྙམ་མོ། །
དེ་ཅིའི་ཕྱིར་ཞེ་ན། རིགས་ཀྱི་བུ། འདི་ལྟར་ཐོས་པ་དང་ལྡན་ན། ཤེས་རབ་སྐྱེ་བར་འགྱུར་རོ། །ཤེས་རབ་དང་ལྡན་ན། ཉོན་མོངས་པ་ཞི་བར་འགྱུར་རོ། །ཉོན་མོངས་པ་མེད་ན། བདུད་ཀྱིས་གླགས་མི་རྙེད་དོ། །
ཐོས་པ་དང་ལྡན་ན། རྟོག་པར་འགྱུར་རོ། །རྟོག་པ་ཡོད་ན། ཚུལ་བཞིན་དུ་ཆོས་ཡོངས་སུ་ཚོལ་བར་འགྱུར་རོ། །ཚུལ་བཞིན་དུ་ཆོས་ཡོངས་སུ་ཚོལ་བ་ལ་བརྩོན་ན། བདུད་སྡིག་ཅན་གྱིས་གླགས་མི་རྙེད་དོ། །ཐོས་
པ་དང་ལྡན་ན། ལོག་པར་ལྟ་བ་དང་བྲལ་བར་འགྱུར་ལ་ཡང་དག་པའི་ལྟ་བའང་སྐྱེད་པར་འགྱུར་རོ། །ཡང་དག་པར་ཞུགས་ན། བདུད་ཀྱིས་གླགས་མི་རྙེད་དོ། །ཡང་དག་པར་ཞུགས་ན། དོན་
ལ་ཉེ་བར་རྟོག་པ་དང་གནོད་པ་དང་འབྲལ་བར་འགྱུར་རོ། །དོན་འདོད་ན། དོན་ལ་ཡང་དག་པར་འབྲང་བར་འགྱུར་ཏེ། རིགས་ཀྱི་བུ། རྣམ་གྲངས་དེས་ཀྱང་ཐོས་པ་མང་པོ་ལ་བརྩོན་པའི་
བྱང་ཆུབ་སེམས་དཔའ་སེམས་དཔའ་ཆེན་པོ་ནི། བདུད་བཞི་ཕམ་པར་བྱེད་ནུས་པར་འགྱུར་བ་དེ་ལྟར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། ཕུང་པོའི་བདུད་དང༌། ཉོན་མོངས་
པའི་བདུད་དང༌། འཆི་བདག་གི་བདུད་དང༌། ལྷའི་བུའི་བདུད་དེ། བཞི་པོ་འདི་དག་ཕམ་པར་བྱེད་ནུས་སོ། །རིགས་ཀྱི་བུ། གཞན་ཡང་ཇི་ལྟར་སྔོན་གྱི་བྱང་ཆུབ་སེམས་དཔའ་ཆོས་དོན་
དུ་གཉེར་བ་དང༌། ཆོས་འདོད་པ་རྣམས་ཀྱིས་ཐོས་པ་ཡོངས་སུ་བཙལ་བ་དེ་ལས་ཅུང་ཟད་ཙམ་ཁྱོད་ལ་བསྟན་པར་བྱའོ། །རིགས་ཀྱི་བུ། སྔོན་བྱུང་བ་འདས་པའི་དུས་བསྐལ་པ་གྲངས་
༄༅། །མེད་པ་བས་ཀྱང་ཆེས་གྲངས་མེད་པ་ཡུན་རིང་པོ་ཚད་མེད་བསམ་གྱིས་མི་ཁྱབ་པ་འདས་པ་དེའི་ཚེ་དེའི་དུས་ན་དྲང་སྲོང་ཆེན་པོ་མཆོག་ཅེས་བྱ་བ་ནགས་དང༌། ནགས་འདབས་དང༌།
རིལ་གནས་པ། མངོན་པར་ཤེས་པ་ལྔ་དང་ལྡན་པ། རྟག་ཏུ་བྱམས་པ་ལ་གནས་པ་དང༌། སྙིང་རྗེ་ལ་གནས་པ་ཞིག་བྱུང་སྟེ། དྲང་སྲོང་དེ་མཆོག་ཏུ་གྱུར་ཏོ། །དེ་ནགས་ཁུང་དེ་དག་ན་གནས་
པ་ན་འདི་སྙམ་དུ་སེམས་ཏེ། བདག་བྱམས་པ་ལ་གནས་པ་འདི་ནི་སེམས་ཅན་རྣམས་ཀྱི་དགའ་བ་སྐྱེད་པར་ཡང་མི་འགྱུར་ལ། བྱམས་པ་འདིས་ནི་སེམས་ཅན་རྣམས་ཀྱི་འདོད་ཆགས་དང༌།
ཞེ་སྡང་དང༌། གཏི་མུག་རྣམས་དང༌། བསྐལ་པ་མཐའ་ཡས་པ་ནས་བསགས་པའི་ཉོན་མོངས་པ་ཐམས་ཅད་ཀྱང་ཉེ་བར་ཞི་བར་བྱེད་མི་ནུས་སོ། །བྱམས་པ་འདིས་ནི་འཕགས་
པའི་ཡང་དག་པའི་ལྟ་བའང་བསྐྱེད་པར་མི་ནུས་སོ་སྙམ་མོ། །དེའང་འདི་སྙམ་དུ་སེམས་ཏེ། འཕགས་པའི་ཡང་དག་པའི་ལྟ་བ་གང་ལས་སྐྱེ་ཞིག་གུ་སྙམ་མོ། །དེ་ལ་རྟོག་
པ་འདི་ལྟ་བུ་ཞིག་བྱུང་སྟེ། འཕགས་པའི་ཡང་དག་པའི་ལྟ་བ་སྐྱེ་བ་ལ་ནི་རྒྱུ་གཉིས་དང༌། རྐྱེན་གཉིས་ཡོད་དེ། གཉིས་གང་ཞེ་ན། འདི་ལྟ་སྟེ། གཞན་གྱི་སྒྲ་དང༌། སོ་སོར་
རང་གི་ཚུལ་བཞིན་ཡིད་ལ་བྱེད་པ་སྟེ། འདི་གཉིས་ནི་འཕགས་པའི་ཡང་དག་པའི་ལྟ་བ་སྐྱེ་བའི་རྒྱུ་གཉིས་དང༌། རྐྱེན་གཉིས་སོ་སྙམ་མོ། །དེ་དེའི་ཚེ་ཆོས་ཡོངས་སུ་ཚོལ་བ་ལ་བརྩོན་
པའི་བློ་སྐྱེས་ཏེ། ལེགས་པར་གསུངས་པ་བདག་གིས་ག་ལས་རྙེད་པར་འགྱུར་སྙམ་མོ། །དེ་ཆོས་ཀྱི་ཕྱིར་ཆོས་ཡོངས་སུ་ཚོལ་བ་ལ་བརྩོན་ནས་གྲོང་དང༌། གྲོང་ཁྱེར་དང༌། གྲོང་རྡལ་དང༌།
ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་དུ་སོང་ནས་ཆོས་བཙལ་ཏོ། །བཙལ་ཀྱང་ཆོས་སྨྲ་བ་འགའ་ཡང་མ་རྙེད་དོ། །དེ་ནས་དེའི་མདུན་དུ་བདུད་ཀྱི་རིས་ཀྱི་ལྷ་ཞིག་བྱུང་སྟེ། དེ་
དྲང་སྲོང་དེའི་ཐད་དུ་སོང་ནས་འདི་སྐད་ཅེས་སྨྲས་སོ། །སངས་རྒྱས་བཅོམ་ལྡན་འདས་རྣམས་ལས་སངས་རྒྱས་ཀྱིས་གསུངས་པའི་སངས་རྒྱས་ཀྱི་མཚན་གྱི་ཚིགས་སུ་བཅད་པ་གཅིག་
གཟུང་བ་ང་ལ་ཡོད་དོ། །དྲང་སྲོང་དེས་སྨྲས་པ། སྨྲོས་ཤིག །ལྷ་དེས་སྨྲས་པ། གལ་ཏེ་ཁྱོད་ཀྱིས་རང་གི་ལུས་ལས་པགས་པ་བཤུས་ཏེ་ཉི་མ་ལ་བསྐམས་ནས་ཤོག་བུར་བྱས་ཏེ་རང་གི་
ཁྲག་དང་སྦྱར་བས་སྣགས་ཚ་བྱས་ལ། རང་གི་རུས་པས་སྨྱུག་གུ་བྱས་ཏེ་ང་ལས་ཚིགས་སུ་བཅད་པ་དེ་འབྲིན། དེ་ལྟ་ན། སངས་རྒྱས་ཀྱིས་གསུངས་པའི་ཚིགས་སུ་བཅད་པ་དེ་ངས་ཁྱོད་ལ་
སྦྱིན་ནོ༑ ༑རིགས་ཀྱི་བུ། དེ་ནས་དྲང་སྲོང་ཆེན་པོ་མཆོག་འདི་སྙམ་དུ་སེམས་ཏེ། བདག་གི་ལུས་འདིའི་འཁོར་བ་ཐོག་མ་མེད་པ་ནས་སྐྱེ་བ་དེ་དང་དེ་དག་དང༌། སྐྱེ་བའི་གནས་དེ་དང་དེ་
དག་ཏུ་བསྐལ་པ་འབུམ་ཕྲག་མང་པོར་ཉེས་པ་བྱས་ནས་དགྲ་དང་གཤེད་མའི་ལག་ཏུ་སོང་ནས་ཆོམ་རྐུན་དང༌། རྒྱལ་པོས་བཀྲ་བས་པ་ལ་སོགས་པས་མཚོན་རྣོན་པོས་ཡན་ལག་
༄༅། །དང༌། ཉིང་ལག་ཐམས་ཅད་དུམ་བུ་དུ་མར་བཅད་ཅིང་གཏུབས་ཏེ་འདོད་པའི་ཕྱིར་དང༌། ནོར་གྱི་ཕྱིར་དང༌། བ་སད་པ་དང༌། བཅད་པ་དང༌། བཅིང་བ་དང༌།
བརྡེག་པ་དང༌། བསྡིགས་པ་ལ་སོགས་པ་དཀའ་བ་འབུམ་ཉམས་སུ་མྱོང་མོད་ཀྱི། འོན་ཀྱང་བདག་གི་ལུས་དེ་དག་དང༌། ཚོར་བ་དེ་དག་གིས་སེམས་ཅན་སུ་ལའང་དོན་ཅིའང་བྱས་
པ་མེད་ན། ད་བདག་གིས་སྙིང་པོ་མེད་པའི་ལུས་འདིས་ཆོས་རྙེད་པར་འགྱུར་བ་ནི། བདག་གིས་རྙེད་པ་ལེགས་པར་རྙེད་དོ་སྙམ་ནས་དགའ་ཞིང་མགུ་ལ་ཡིད་རངས་ཏེ། ལྷ་དེ་ལའང་
སློབ་དཔོན་གྱི་འདུ་ཤེས་བསྐྱེད་ནས་མཚན་རྣོན་པོས་རང་གི་ལུས་ལས་པགས་པ་བཤུས་ཏེ་ཉི་མ་ལ་བསྐམས་ནས་ཤོག་བུར་བྱས་ཏེ་རང་གི་ལུས་ལས་ཁྲག་གཟགས་ནས་རང་གི་
ཁྲག་གིས་སྣག་ཚ་སྦྱར་ཏེ། རང་གི་རུས་པས་སྨྱུག་གུ་བྱས་ནས་ལྷ་ད་ལ་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །ལྷ། སངས་རྒྱས་ཀྱིས་གསུངས་པའི་སངས་རྒྱས་ཀྱི་མཚན་བསྡུས་
པའི་ཚིགས་སུ་བཅད་པ་དེ་བདག་ལ་གསུངས་ཤིག །ཁྱོད་ཀྱིས་ཇི་སྐད་བསྒོ་བ་བཞིན་དུ་བདག་གིས་བགྱིས་ལགས་ཏེ། བདག་གིས་པགས་པ་བཤུས་ནས་བསྐམས་ཏེ་ཤོག་བུར་
བགྱིས་ནས་རང་གི་ཁྲག་གིས་སྣག་ཚ་སྦྱར་ཏེ་རང་གི་རུས་པས་སྨྱུག་གུ་བགྱིས་ལགས་སོ། །ཞེས་བྱས་སོ། །རིགས་ཀྱི་བུ། དེ་ནས་བདུད་ཀྱི་རིས་ཀྱི་ལྷ་དེས་དྲང་སྲོང་ཆེན་པོ་མཆོག་དེའི་
གུས་པ་དང༌། དོན་དུ་གཉེར་བ་དེ་ལྟ་བུ་མཐོང་ནས་གནོང་གནོང་ལྟར་བྱས་ཏེ། དེ་ཉིད་དུ་མི་སྣང་བར་གྱུར་ཏེ། རིགས་ཀྱི་བུ། དེ་ནས་དྲང་སྲོང་ཆེན་པོ་མཆོག་དེས་དེའི་ཚེ་ལྷ་དེ་མི་སྣང་བར་
གྱུར་པར་རིག་ནས་འདི་སྙམ་དུ་སེམས་ཏེ། བདག་གིས་ཚིགས་སུ་བཅད་པ་ད་མ་ཐོས་སུ་ཟིན་ཀྱང་གང་གི་ཕྱིར་བདག་གིས་ཆོས་ལ་གུས་པ་ཆེན་པོས་སྣག་ཚ་འདི་རང་གི་པགས་པ་
བཤུས་ཏེ་བསྐམས་ནས་རང་གི་ཁྲག་དང་སྦྱར་བ་དང༌། རང་གི་རུས་པ་ཕྱུང་སྟེ་སྨྱུག་གུ་བྱས་པས་བདག་གི་ཆོས་ལ་གུས་པའི་དགེ་བའི་རྩ་བ་འདི་ཆུད་ཟ་བར་མི་འགྱུར་རོ། །སླུ་བར་
ཡང་མི་འགྱུར་རོ། །འོན་ཀྱང་བདག་གིས་ལྷག་པའི་བསམ་པ་དང༌། གཡོ་བ་མེད་པས་སེམས་ཅན་རྣམས་ལ་སྙིང་རྗེའི་སེམས་བསྐྱེད་ནས་ལུས་དང༌། སྲོག་ལ་མི་ལྟ་བར་པགས་པ་
ཤོག་བུར་བྱས་ཏེ་རང་གི་ཁྲག་གིས་སྦྱར་ནས། རུས་པས་སྨྱུག་གུ་བྱས་པའི་ཆོས་ལ་གུས་པའི་བདེན་པ་དང་བདེན་པའི་ཚིག་གང་ཡིན་པའི་བདེན་པ་དང་བདེན་པའི་ཚིག་དེས་ན། འཇིག་
རྟེན་གྱི་ཁམས་འདི་དང་འཇིག་རྟེན་གྱི་ཁམས་གཞན་དག་ན་ཆོས་གསུང་ཞིང་ཆོས་སྟོན་པ་བདག་ཉིད་ཆེན་པོ་སུ་བཞུགས་ཀྱང་རུང་སྟེ། དེ་དག་གིས་བདག་ལ་ཞལ་བསྟན་པར་གསོལ་
བདག་ལ་ཆོས་ཀྱང་ཐོས་པར་མཛད་དུ་གསོལ་ཞེས་བྱས་སོ། །རིགས་ཀྱི་བུ། དེ་ལྟར་དྲང་སྲོང་ཆེན་པོ་མཆོག་གིས་ཚིག་དེ་སྐད་ཅིག་སྨྲས་མ་ཐག་ཏུ་སྐད་ཅིག་དེ་དང༌། ཐང་གཅིག་དེ་དང༌། ཡུད་
༄༅། །ཙམ་དེ་ཉིད་ལ་འོག་གི་ཕྱོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་སུམ་ཅུ་རྩ་གཉིས་འདས་པ་ན་འཇིག་རྟེན་གྱི་ཁམས་ཀུན་ནས་དྲི་མ་མེད་པ་ཞེས་
བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་བར་རྫོགས་པའི་སངས་རྒྱས་དྲི་མ་མེད་པར་གྲགས་པའི་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་
ཆོས་ཀྱང་སྟོན་ཏོ། །དེས་དྲང་སྲོང་ཆེན་པོ་མཆོག་དེའི་ལྷག་པའི་བསམ་པ་ཐུགས་སུ་ཆུད་དེ། ཛམྦུའི་གླིང་འདིའི་སེམས་ཅན་ཡོངས་སུ་སྨིན་པའང་གཟིགས་ནས་དཔེར་ན། སྐྱེས་བུ་
སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ། བརྐྱང་བ་ལས་བསྐུམ་པ་བཞིན་དུ་སྐད་ཅིག་ཐང་གཅིག་ཡུད་ཙམ་དེ་ལ་དེ་བཞིན་གཤེགས་པ་དྲི་མ་མེད་པར་གྲགས་
པའི་རྒྱལ་པོ་དེ་བྱང་ཆུབ་སེམས་དཔའ་ལྔ་བརྒྱ་དང་ཐབས་ཅིག་ཏུ་དེ་ནས་མི་སྣང་བར་གྱུར་ནས་དྲང་སྲོང་ཆེན་པོ་མཆོག་གི་མདུན་དུ་བཞུགས་ཏེ། བཅོམ་ལྡན་འདས་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མ་མེད་པར་གྲགས་པའི་རྒྱལ་པོ་དེ་བྱོན་མ་ཐག་ཏུ་དེའི་མོད་ལ་ནགས་ཁུང་དེ་སྣང་བ་ཆེན་པོས་ཁྱབ་པར་གྱུར་
ཏོ༑ ༑མེ་ཏོག་གི་ཆར་ཆེན་པོའང་བབ་བོ། །དེའི་ཚེ་ནགས་ཁུང་དེ་ན་ཤིང་གི་ཡལ་ག་དང༌། ལོ་མ་དང༌། མགོ་ལྕོགས་དང༌། མེ་ཏོག་དང༌། འབྲས་བུ་ཐམས་ཅད་ལས་ཆོས་སྟོན་པའི་
སྒྲ་དག་བྱུང་ངོ༌། །དེའི་ཚེ་ལྷ་བྱེ་བ་ཁྲག་ཁྲིག་འབུམ་ཕྲག་དུ་མ་འདུས་པར་གྱུར་ཏོ། །དེ་ནས་དྲང་སྲོང་ཆེན་པོ་མཆོག་ལ་བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་གྲགས་པའི་
རྒྱལ་པོ་དེའི་འོད་ཀྱིས་ཕོག་མ་ཐག་ཏུ་དེ་ནས་དེའི་མོད་ལ་ཁ་དོག་དང་གཟུགས་སྔ་མཁོ་བཞིན་དུ་གྱུར་ཏེ་རྨ་དང༌། སྣད་པ་མེད་པར་གྱུར་ཏོ། །དེ་ནས་དྲང་སྲོང་ཆེན་པོ་མཆོག་གིས་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་སོར་
མོ་བཅུའི་ཐལ་མོ་སྦྱར་བ་སྤྱི་བོར་བཞག་ནས་དེ་བཞིན་གཤེགས་པ་དྲི་མ་མེད་པར་གྲགས་པའི་རྒྱལ་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ནི། བདག་གི་སྟོན་པ་ལགས་
སོ༑ ༑བདེ་བར་གཤེགས་པ་ནི། བདག་གི་སྟོན་པ་ལགས་སོ། །བདག་ནི། བཅོམ་ལྡན་འདས་དང༌། ཆོས་དང༌། དགེ་སློང་གི་དགེ་འདུན་ལ་སྐྱབས་སུ་མཆིའོ། །ཅི་ནས་བདག་གིས་ཆོས་
ཐོས་ནས་ལོག་པར་ཞུགས་པའི་སེམས་ཅན་ལྟ་བར་གྱུར་པའི་གླག་གླག་པ་སྤྱོད་ཡུལ་པ་རྣམས་ཀྱི་ལོག་པར་ལྟ་བའི་མུན་པ་བསལ་ནས་ཡང་དག་པའི་ལྟ་བའི་ཆོས་སྟོན་པར་འགྱུར་
བར་བཅོམ་ལྡན་འདས་ཀྱིས་བདག་ལ་ཆོས་བསྟན་དུ་གསོལ། བདེ་བར་གཤེགས་པས་བདག་ལ་ཆོས་བསྟན་དུ་གསོལ། རིགས་ཀྱི་བུ། དེ་ནས་དེ་བཞིན་གཤེགས་པ་དྲི་མ་མེད་པར་
༄༅། །གྲགས་པའི་རྒྱལ་པོ་དེས་དྲང་སྲོང་ཆེན་པོ་མཆོག་གཙོ་བོར་མཛད་ནས་ལྷའི་བུ་དེ་དག་དང༌། བྱང་ཆུབ་སེམས་དཔའ་དེ་དག་ལ་བསོད་ནམས་ཐམས་ཅད་བསྡུས་
པའི་ཏིང་ངེ་འཛིན་འདི་ཉིད་ལས་བརྩམས་ཏེ། ཅི་ནས་ལྷའི་བུའི་འཁོར་དེའི་ནང་ནས་སྔོན་དགེ་བའི་རྩ་བ་ཡོངས་སུ་སྦྱངས་པའི་ལྷའི་བུ་བརྒྱ་སྟོང་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་སེམས་བསྐྱེད་པར་འགྱུར་བ་དང༌། དྲང་སྲོང་ཆེན་པོ་མཆོག་དེའང་དགའ་བ་དང༌། དང་བ་དང༌། མཆོག་ཏུ་དགའ་བ་རྒྱ་ཆེན་པོ་དང༌། སྤོབས་པ་མི་ཆོད་པ་ཐོབ་པར་འགྱུར་
བ་དེ་ལྟ་བུའི་ཆོས་བསྟན་ཏོ། །བམ་པོ་གསུམ་པ། བཅོམ་ལྡན་འདས་དེས་རྡོ་རྗེའི་ཚིག་བརྒྱད་པོ་འདི་དག་ཀྱང་བསྟན་ཏེ། བརྒྱད་གང་ཞེ་ན། འདི་ལྟ་སྟེ། ཆོས་ཐམས་ཅད་
ནི༑ ཉོན་མོངས་པ་དང་བྲལ་བའི་ཕྱིར་རང་བཞིན་གྱིས་ཡོངས་སུ་དག་པའོ། །ཆོས་ཐམས་ཅད་ནི། ཟག་པ་ཐམས་ཅད་ཡོངས་སུ་ཆད་པའི་ཕྱིར་ཟག་པ་མེད་པའོ། །ཆོས་ཐམས་
ཅད་ནི༑ གནས་ཐམས་ཅད་ལས་ཡང་དག་པར་འདས་པའི་ཕྱིར་གནས་མེད་པའོ། ཆོས་ཐམས་ཅད་ནི། གཉིས་སུ་མེད་པའི་ཕྱིར་སྒོ་མེད་པའོ། །ཆོས་ཐམས་ཅད་ནི། རྣམ་
པར་ཐར་པའི་སྒོ་ཀུན་ནས་སྟོན་པའི་ཕྱིར་ཀུན་ནས་སྒོའོ། །ཆོས་ཐམས་ཅད་ནི། འགྲོ་བ་མེད་པའི་ཚུལ་གྱིས་འཕོ་བ་མེད་པའོ། །ཆོས་ཐམས་ཅད་ནི། འགྲོ་བ་ཐམས་ཅད་ཡང་དག་
པར་ཆད་པའི་ཕྱིར་འགྲོ་བ་མེད་པའོ། །ཆོས་ཐམས་ཅད་ནི། འདས་པ་དང༌། མ་འོངས་པ་དང༌། ད་ལྟར་བྱུང་བ་གཉིས་སུ་དབྱེར་མེད་པའི་ཕྱིར་དུས་གསུམ་མཉམ་པ་སྟེ། རྡོ་རྗེའི་ཚིག་བརྒྱད་
པོ་དེ་དག་ནི། བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་གྲགས་པའི་རྒྱལ་པོ་དེས་ཆོས་ཐམས་ཅད་ངེས་པར་འབྱེད་པའི་ཕྱིར་བསྟན་ཏོ། །མཆོག། གཞན་ཡང་ཆོས་ཀྱི་སྒོའི་
ཚིག་བརྒྱད་པོ་འདི་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཡིང་རྟུལ་བར་མི་འགྱུར་བ་སྟེ། བརྒྱད་གང་ཞེ་ན། འདི་ལྟ་སྟེ། མིང་ནི། ཆོས་ཐམས་ཅད་ཀྱི་སྒོ་སྟེ། སྒོ་སྣ་ཚོགས་
རྣམ་པར་གཞག་པའི་ཕྱིར་རོ། །སྒྲ་ནི། ཆོས་ཐམས་ཅད་ཀྱི་སྒོ་སྟེ། ངག་ཐ་དད་པར་བརྗོད་པའི་ཕྱིར་རོ། །བརྡ་ནི། ཆོས་ཐམས་ཅད་ཀྱི་སྒོ་སྟེ། ཆོས་ཐམས་ཅད་མངོན་པར་ཞེན་པ་མེད་
པའི་ཕྱིར་རོ། །རྣམ་པར་རིག་པ་ནི། ཆོས་ཐམས་ཅད་ཀྱི་སྒོ་སྟེ། གསོ་བ་དང༌། གསོག་དང༌། ཡ་མ་བརླ་ཡིན་པའི་ཕྱིར་རོ། །བདག་གི་ངོ་བོ་ཉིད་ནི། ཆོས་ཐམས་ཅད་ཀྱི་སྒོ་སྟེ།
བདག་གི་ངོ་བོ་ཉིད་མེད་པའི་ཕྱིར་རོ། །ཟད་པ་ནི། ཆོས་ཐམས་ཅད་ཀྱི་སྒོ་སྟེ། ཡོད་པ་མ་ཡིན་པའི་ཕྱིར་རོ། །གདགས་པ་ནི། ཆོས་ཐམས་ཅད་ཀྱི་སྒོ་སྟེ། གདགས་པ་འབྱུང་བ་
མེད་པའི་ཕྱིར་རོ། །མཉམ་པ་ཉིད་ནི། ཆོས་ཐམས་ཅད་ཀྱི་སྒོ་སྟེ། རོ་གཅིག་པའི་ཕྱིར་རོ། །མཆོག། ཆོས་ཀྱི་སྒོའི་ཚིག་དེ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཡིད་
༄༅། །རྟུལ་བར་མི་འགྱུར་བའོ། །མཆོག །གཞན་ཡང་ས་བོན་གྱི་ཚིག་བརྒྱད་པོ་འདི་དག་ནི། སྤོབས་པ་མི་ཟད་པར་འགྱུར་བ་སྟེ། བརྒྱད་གང་ཞེ་ན། འདི་ལྟ་སྟེ།
མཆོག །ཨ་ཞེས་བྱ་བ་ས་བོན་གྱི་ཚིག་ནི། ཆོས་ཐམས་ཅད་གཟོད་མ་ནས་མ་སྐྱེས་པར་སྟོན་ཏོ། །མཆོག། པ་ཞེས་བྱ་བ་ས་བོན་གྱི་ཚིག་ནི། ཆོས་ཐམས་ཅད་དོན་དམ་པར་
སྟོན་ཏོ༑ ༑མཆོག །ན་ཞེས་བྱ་བ་ས་བོན་གྱི་ཚིག་ནི། ཆོས་ཐམས་ཅད་ཀྱི་མིང་དང༌། གཟུགས་ཡོངས་སུ་ཤེས་པར་སྟོན་ཏོ། །མཆོག །ད་ཞེས་བྱ་བ་ས་བོན་གྱི་ཚིག་ནི།
ཆོས་ཐམས་ཅད་དུལ་བ་དང༌། ཞི་བར་སྟོན་ཏོ། །མཆོག །ས་ཞེས་བྱ་བ་ས་བོན་གྱི་ཚིག་ནི། ཆོས་ཐམས་ཅད་ལས་ཡང་དག་པར་འདས་པར་སྟོན་ཏོ། །མཆོག །ཏ་ཞེས་བྱ་བ་
ས་བོན་གྱི་ཚིག་ནི། ཆོས་ཐམས་ཅད་དེ་བཞིན་ཉིད་དུ་དབྱེར་མེད་པར་སྟོན་ཏོ། །མཆོག །ཀ་ཞེས་བྱ་བ་ས་བོན་གྱི་ཚིག་ནི། ཆོས་ཐམས་ཅད་ཟད་པ་ཉིད་དུ་སྟོན་ཏོ། །མཆོག །མ་
ཞེས་བྱ་བ་ས་བོན་གྱི་ཚིག་ནི། ཆོས་ཐམས་ཅད་དབུས་དང༌། མཐའ་ཡོངས་སུ་ཆད་པར་སྟོན་ཏོ། །མཆོག །ས་བོན་གྱི་ཚིག་བརྒྱད་པོ་དེ་དག་ནི། སྤོབས་པ་མི་ཟད་པར་འགྱུར་
པའོ༑ ༑དེ་ལྟ་བས་ན། ས་བོན་གྱི་ཚིག་འདི་དག་དང༌། ཆོས་ཀྱི་སྒོའི་ཚིག་འདི་དག་དང༌། རྡོ་རྗེའི་ཚིག་འདི་དག་ལ་དྲན་པ་དང༌། ཤེས་བཞིན་དུ་སྤྱོད་པ་མཉམ་པ་ཉིད་ལ་
བརྩོན་པར་བྱའོ། །རྟག་ཏུ་འདུ་འཛི་མེད་པར་སྤྱོད་པས་ཚུལ་བཞིན་དུ་སོ་སོར་བརྟག་པ་ལ་བརྩོན་པར་བྱའོ། །རྟག་ཏུ་དགེ་བ་གང་ཡིན་ཞེས་ཚོལ་ཞིང་འདོད་པ་ལ་བརྩོན་པར་བྱའོ། །
རིགས་ཀྱི་བུ། དེ་ལྟར་བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་གྲགས་པའི་རྒྱལ་པོ་དེས་ཆོས་ཀྱི་ཚིག་ཞུས་པ་དེ་དག་གི་ལན་བཏབ་ནས་འཇིག་རྟེན་གྱི་ཁམས་དེ་
སྣང་བར་མཛད་ཅིང་རབ་ཏུ་གཡོས་པར་མཛད་ནས་བྱང་ཆུབ་སེམས་དཔའ་དེ་དག་དང་ཐབས་གཅིག་ཏུ་མི་སྣང་བར་གྱུར་ཏེ། སྐད་ཅིག་ཐང་གཅིག་ཡུད་ཙམ་དེ་ལ་རང་གི་སངས་རྒྱས་ཀྱི་
ཞིང་དུ་བཞུགས་པར་གྱུར་ཏོ། །སངས་རྒྱས་ཀྱི་ཞིང་དེ་ནས་ཀྱང་གང་དུའང་གཤེགས་པའམ་སླར་གཤེགས་པར་མངོན་པ་མེད་དོ། །རིགས་ཀྱི་བུ། དེ་ནས་དྲང་སྲོང་ཆེན་པོ་མཆོག་དེ་
སྤོབས་པ་མི་ཆོད་པ་དེ་དང་ལྡན་པར་གྱུར་ཏེ། བརྗེད་ངས་པ་མེད་པའི་དྲན་པ་དེ་དང་ཡང་ལྡན་པར་གྱུར་ནས་ལྷས་ཡོངས་སུ་བཟུང་བ་ཐོབ་པར་གྱུར་ཏོ། །ལྷས་ཡོངས་སུ་བཟུང་བ་དེས་
ན༑ བདུད་ཕྱིར་རྒོལ་བའང་བཅོམ་ནས་གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་དུ་སོང་ནས་སེམས་ཅན་རྣམས་ལ་ཆོས་སྟོན་ཏེ།
བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཉིད་རྒྱས་པར་བཤད་ཅིང་རབ་ཏུ་བསྟན་ཏོ། །དེས་ལོ་སྟོང་ཐམ་པར་ཆོས་བསྟན་ཏེ་སྲོག་ཆགས་བརྒྱད་ཁྲི་བཞི་སྟོང་ནི། ཉན་
༄༅། །ཐོས་སུ་ཡོངས་སུ་སྨིན་པར་བྱས་སོ། །སྲོག་ཆགས་བརྒྱད་ཁྲི་བཞི་སྟོང་ནི། རང་སངས་རྒྱས་སུ་ཡོངས་སུ་སྨིན་པར་བྱས་སོ། །སྲོག་ཆགས་བརྒྱད་ཁྲི་བཞི་སྟོང་ནི།
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སྲོག་ཆགས་བརྒྱད་ཁྲི་བཞི་སྟོང་ནི། འཁོར་ལོས་བསྒྱུར་བར་ཡོངས་སུ་སྨིན་པར་བྱས་སོ། །སྲོག་ཆགས་
བརྒྱད་ཁྲི་བཞི་སྟོང་ནི། བརྒྱ་བྱིན་དུ་ཡོངས་སུ་སྨིན་པར་བྱས་སོ། །སྲོག་ཆགས་བརྒྱད་ཁྲི་བཞི་སྟོང་ནི། ཚངས་པར་ཡོངས་སུ་སྨིན་པར་བྱས་སོ། །སྲོག་ཆགས་བརྒྱད་ཁྲི་བཞི་སྟོང་ནི།
བྱམས་པ་སྒོམ་པ་ལ་བཀོད་དོ། །སྲོག་ཆགས་བརྒྱད་ཁྲི་བཞི་སྟོང་ནི། སྙིང་རྗེ་སྒོམ་པ་ལ་བཀོད་དོ། །སྲོག་ཆགས་བརྒྱད་ཁྲི་བཞི་སྟོང་ནི། དགའ་བསྒོམ་པ་ལ་བཀོད་དོ། །སྲོག་ཆགས་
བརྒྱད་ཁྲི་བཞི་སྟོང་ནི། བཏང་སྙོམས་སྒོམ་པ་ལ་བཀོད་དོ། །སྲོག་ཆགས་དཔག་ཏུ་མེད་པ་ཞིག་ནི། མཐོ་རིས་ཀྱི་འཇིག་རྟེན་དུ་ཉེ་བར་འགྲོ་བར་བྱས་སོ། །དེའི་འོག་ཏུ་དྲང་སྲོང་ཆེན་
པོ་མཆོག་དེ་ཤི་ནས་ལྷའི་བུ་བརྒྱད་ཁྲི་བཞི་སྟོང་དང་ལྷན་ཅིག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མ་མེད་པར་གྲགས་པའི་རྒྱལ་པོ་དེ་
ཉིད་ཀྱི་སངས་རྒྱས་ཀྱི་ཞིང་ཀུན་ནས་དྲི་མ་མེད་པའི་འཇིག་རྟེན་གྱི་ཁམས་སུ་སྐྱེས་སོ། །རིགས་ཀྱི་བུ། དེའི་ཚེ་དེའི་དུས་ན་དྲང་སྲོང་ཆེན་པོ་མཆོག་དེ་གཞན་ཞིག་ཡིན་པར་ཁྱོད་སོམ་
ཉིའམ༑ ཡིད་གཉིས་སམ། ཐེ་ཚོམ་ཟ་ན། རིགས་ཀྱི་བུ། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་དྲང་སྲོང་ཆེན་པོ་མཆོག་ཏུ་གྱུར་ཏེ། ངས་ཆོས་འདོད་པ་དང༌།
ཆོས་ལ་གུས་པར་གནས་པའི་བདེན་པའི་བྱིན་གྱི་རླབས་དེས་འོག་གི་ཕྱོགས་ནས་བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པར་གྲགས་པའི་རྒྱལ་པོ་དེ་སྤྱན་དྲངས་སོ། །དྲི་མ་
མེད་པའི་གཟི་བརྗིད། རྣམ་གྲངས་དེས་ཀྱང་ཁྱོད་ཀྱིས་ཆོས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི། ནམ་ཡང་དེ་བཞིན་གཤེགས་པ་མྱ་ངན་ལས་འདའ་བར་
མི་འགྱུར་ལ། དམ་པའི་ཆོས་ཀྱང་ནུབ་པར་མི་འགྱུར་བ་དེ་ལྟར་རིག་པར་བྱའོ། །དེ་ཅིའི་ཕྱིར་ཞེ་ན། དྲི་མ་མེད་པའི་གཟི་བརྗིད། ཆོས་འདོད་པའི་བྱང་ཆུབ་སེམས་དཔའ་སེམས་དཔའ་
ཆེན་པོ་བསམ་པ་ཕུན་སུམ་ཚོགས་པ། གུས་པ་དང་བཅས་པ་རྣམས་ནི། འཇིག་རྟེན་གྱི་ཁམས་གཞན་ན་འདུག་ཀྱང་སངས་རྒྱས་བཅོམ་ལྡན་འདས་རྣམས་ཞལ་སྟོན་པར་མཛད་ཅིང་ཆོས་
ཀྱང་ཐོས་པར་མཛད་དོ། །དྲི་མ་མེད་པའི་གཟི་བརྗིད། ཆོས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་གཏེར་རི་དང༌། རི་སུལ་དང༌། ཤིང་དག་གི་ནང་དུ་བཅུག་
པ་དག་ཡོད་དེ། གཟུངས་དང༌། ཆོས་ཀྱི་སྒོ་མཐའ་ཡས་པ་གླེགས་བམ་དུ་བྱས་པ་དག་ཀྱང་ལག་ཏུ་འོང་བར་འགྱུར་རོ། །དྲི་མ་མེད་པའི་གཟི་བརྗིད། ཆོས་འདོད་པའི་བྱང་ཆུབ་སེམས་དཔའ་
༄༅། །སེམས་དཔའ་ཆེན་པོ་རྣམས་ལ་ནི། སྔོན་སངས་རྒྱས་མཐོང་བའི་ལྷ་རྣམས་སྤོབས་པ་སྒྲུབ་པར་བྱེད་དོ། །དྲི་མ་མེད་པའི་གཟི་བརྗིད། ཆོས་འདོད་པའི་བྱང་ཆུབ་
སེམས་དཔའ་སེམས་དཔའ་ཆེན་པོ་རྣམས་ནི། ཚེ་ཟང་ནའང་སངས་རྒྱས་བཅོམ་ལྡན་འདས་རྣམས་དང༌། ལྷ་རྣམས་ཀྱིས་ཚེ་དང༌། སྟོབས་སྒྲུབ་པར་བྱེད་དེ། སངས་རྒྱས་ཀྱི་བྱིན་གྱི་
རླབས་དང༌། ལྷའི་བྱིན་གྱི་རླབས་ཀྱིས་དེ་དག་འདོད་ན་ལོ་སྟོང་དུའང་འཁོད་དོ། །ལོ་འབུམ་ཕྲག་གཉིས་སམ། གསུམ་མམ། བཞིའམ། ལྔའི་བར་དུའང་འཁོད་པ་ནས་བསྐལ་པ་
དང༌། བསྐལ་པ་ལས་ལྷག་པའམ། ཡང་ན་ཇི་སྲིད་འདོད་པའི་བར་དུའང་འཁོད་དོ། །དྲི་མ་མེད་པའི་གཟི་བརྗིད། ཆོས་ལ་གུས་པ་སྐྱེས་པའི་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ལ་ནི། སངས་རྒྱས་བཅོམ་ལྡན་འདས་རྒ་བའང་སེལ་བར་མཛད་དོ། །ནད་ཀྱང་སེལ་བར་མཛད་དོ། །དྲན་པའང་སྒྲུབ་པར་མཛད་དོ། །རྟོགས་པ་དང༌། སྤོབས་པའང་
སྒྲུབ་པར་མཛད་དོ། །ཆོས་ལ་གུས་པ་སྐྱེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སངས་རྒྱས་བཅོམ་ལྡན་འདས་རྣམས་ལྟ་བར་གྱུར་པ་རྣམས་ནི། སེལ་
བར་མཛད་ལ། ཡང་དག་པའི་ལྟ་བ་ནི། སྒྲུབ་པར་མཛད་དོ། །དྲི་མ་མེད་པའི་གཟི་བརྗིད། ཆོས་ལ་གུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་གཞན་གྱི་
གནོད་པ་ཐམས་ཅད་འབྱུང་བར་མི་འགྱུར་རོ། །དྲི་མ་མེད་པའི་གཟི་བརྗིད། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོས་ཐོས་པའི་ཚོགས་ལ་མཁས་པ་ལ་བརྩོན་པར་བྱའོ། །
ཐོས་པའི་ཚོགས་ལ་མཁས་པ་ལ་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཡོན་ཏན་གྱི་ཁྱད་པར་དེ་ལྟ་བུ་དག་འབྱུང་བར་འགྱུར་བའམ། ཡང་ན་དེ་བས་ཀྱང་གོང་
མའམ༑ དེ་བས་ཀྱང་ལྷག་པར་འགྱུར་ཏེ། དྲི་མ་མེད་པའི་གཟི་བརྗིད། གསུམ་པོ་འདི་དག་ནི། བསོད་ནམས་ཉ་བར་རྟོན་པ་དང༌། བསོད་ནམས་ཀྱི་ཚོགས་དང༌། བསོད་ནམས་འབྱུང་བ་
དང༌། བསོད་ནམས་རྒྱས་པ་དང༌། བསོད་ནམས་ཀྱི་རྒྱུ་མཐུན་པ་དང༌། བསོད་ནམས་མི་ཟད་པ་དང༌། བསོད་ནམས་བསམ་གྱིས་མི་ཁྱབ་པ་དང༌། བསོད་ནམས་རྒྱ་མཚོ་ཡིན་ཏེ། དེ་ལ་
གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་གི་བསོད་ནམས་རྣམས་ཀྱི་མཐའམ་ཚད་ནི། རྟོགས་པར་མི་ནུས་སོ། །དྲི་མ་མེད་པའི་གཟི་བརྗིད། རྒྱ་མཚོ་ཆེན་པོའི་
ཐིགས་པ་རྣམས་ཀྱི་ཚད་དང༌། མཐའ་ནི། རྟོགས་པར་ནུས་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྦྱིན་པའི་ཚོགས་དང༌། ཚུལ་ཁྲིམས་ཀྱི་ཚོགས་དང༌། ཐོས་
པའི་ཚོགས་བསགས་པའི་བསོད་ནམས་ཀྱི་ཕུང་པོའི་ཚད་དང༌། མཐའ་ནི། རྟོགས་པར་མི་ནུས་སོ། །དྲི་མ་མེད་པའི་གཟི་བརྗིད། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
༄༅། །ཁམས་ན་ས་ལ་རི་དང༌། ཤིང་ལྗོན་པ་དང༌། ནགས་ཚལ་དང༌། རྩྭ་ཡོད་པ་ཐམས་ཅད་ནི། སྲང་ཚད་ཀྱིས་ཚད་དང༌། མཐའ་རྟོགས་པའམ་ཤེས་པར་ནུས་ཀྱི།
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྦྱིན་པའི་ཚོགས་དང༌། ཚུལ་ཁྲིམས་ཀྱི་ཚོགས་དང༌། ཐོས་པའི་ཚོགས་བསགས་པའི་བསོད་ནམས་ཀྱི་ཕུང་པོ་ནི།
ཚད་གཟུང་བར་མི་ནུས་སོ༑ །ཞེས་བ་སྨྲའོ། །དེ་ནས་བཅོམ་ལྡན་འདས་ལ་ཚན་པོ་ཆ་ཆེན་པོ་དྲི་མ་མེད་པའི་གཟི་བརྗིད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཚོགས་
གསུམ་པོ་སྦྱིན་པའི་ཚོགས་དང༌། ཚུལ་ཁྲིམས་ཀྱི་ཚོགས་དང༌། ཐོས་པའི་ཚོགས་དེ་དག་གི་ནང་ན་ཚོགས་གང་ཆེས་མཆོག་དང༌། ཆེས་གཙོ་བོ་ལགས། བཅོམ་ལྡན་
འདས་ཀྱིས་བཀའ་སྩལ་བ། དྲི་མ་མེད་པའི་གཟི་བརྗིད། ཚོགས་གསུམ་པོ་སྦྱིན་པའི་ཚོགས་དང༌། ཚུལ་ཁྲིམས་ཀྱི་ཚོགས་དང༌། ཐོས་པའི་ཚོགས་དེ་དག་གི་ནང་ན་ཐོས་
པའི་ཚོགས་འབའ་ཞིག་མཆོག་ཅེས་བྱ། རབ་མཆོག་ཅེས་བྱ། གྱ་ནོམ་པ་ཞེས་བྱ། གཙོ་བོ་ཞེས་བྱ། ཁྱད་པར་དུ་འཕགས་པ་ཞེས་བྱ། བླ་མ་ཞེས་བྱ། བླ་ན་མེད་པ་ཞེས་བྱའོ།།
གོང་ན་མེད་པ་ཞེས་བྱའོ། །གོང་མའི་ཡང་གོང་མ་ཞེས་བྱའོ། །རིགས་ཀྱི་བུ། འདི་ལྟ་སྟེ། དཔེར་ན། རིའི་རྒྱལ་པོ་རི་རབ་ཀྱི་མདུན་ན་ཡུངས་འབྲུ་གཅིག་འདུག་པ་བཞིན་དུ་སྦྱིན་
པའི་ཚོགས་དང༌། ཚུལ་ཁྲིམས་ཀྱི་ཚོགས་ཀྱང་དེ་དང་འདྲ་བར་བལྟ་བར་བྱའོ། །རིའི་རྒྱལ་པོ་རི་རབ་ཇི་ལྟ་བ་དེ་བཞིན་དུ་ནི། ཐོས་པའི་ཚོགས་བལྟ་བར་བྱའོ། །རིགས་ཀྱི་བུ། འདི་ལྟ་སྟེ། དཔེར་ན།
ནམ་མཁའ་ལ་བྱའི་རྗེས་ཇི་ལྟ་བ་བཞིན་དུ་སྦྱིན་པའི་ཚོགས་དང༌། ཚུལ་ཁྲིམས་ཀྱི་ཚོགས་ཀྱང་དེ་དང་འདྲ་བར་བལྟ་བར་བྱའོ། །ཕྱོགས་བཅུའི་ནམ་མཁའ་མཐའ་ཡས་པ་ཇི་ལྟ་བ་དེ་བཞིན་དུ་ནི།
ཐོས་པའི་ཚོགས་བལྟ་བར་བྱའོ། །རིགས་ཀྱི་བུ། སྦྱིན་པའི་ཚོགས་ནི། བྱ་བ་གཉིས་བྱེད་དེ། གཉིས་གང་ཞེ་ན། འདི་ལྟ་སྟེ། དབུལ་བ་སེལ་བ་དང༌། ལོངས་སྤྱོད་ཆེན་པོ་སྒྲུབ་པ་སྟེ། བྱ་
བ་འདི་གཉིས་བྱེད་དོ། །ཚུལ་ཁྲིམས་ཀྱི་ཚོགས་ཀྱང་བྱ་བ་གཉིས་བྱེད་དེ། གཉིས་གང་ཞེ་ན། འདི་ལྟ་སྟེ། ངན་འགྲོ་སེལ་བ་དང༌། བདེ་འགྲོ་སྒྲུབ་པ་སྟེ། བྱ་བ་འདི་གཉིས་བྱེད་དོ། །ཤེས་
རབ་ཀྱི་ཚོགས་ཀྱང་བྱ་བ་གཉིས་བྱེད་དེ། གཉིས་གང་ཞེ་ན། འདི་ལྟ་སྟེ། ལྟ་བར་གྱུར་པ་ཐམས་ཅད་སེལ་བ་དང༌། ཤེས་རབ་སྒྲུབ་པ་སྟེ། བྱ་བ་འདི་གཉིས་བྱེད་དོ། །རིགས་ཀྱི་བུ། སྦྱིན་
པའི་ཚོགས་ནི། ཟག་པ་དང་བཅས་པ་དང༌། ལེན་པ་དང་བཅས་པ་དང༌། ཕུང་པོར་རྣམ་པར་སྨིན་པའོ། །རིགས་ཀྱི་བུ། ཚུལ་ཁྲིམས་ཀྱི་ཚོགས་ནི། ཟག་པ་དང་བཅས་པ་དང༌། ལེན་པ་དང་
བཅས་པ་དང༌། ཕུང་པོར་རྣམ་པར་སྨིན་པའོ། །རིགས་ཀྱི་བུ། ཐོས་པའི་ཚོགས་ནི། ཟག་པ་མེད་པ་དང༌། ལེན་པ་མེད་པ་དང༌། ཕུང་པོར་རྣམ་པར་སྨིན་པ་མ་ཡིན་པའོ། །རིགས་ཀྱི་བུ། དེ་
༄༅། །ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་རྣམས་ཀྱིས་ཐོས་པའི་ཚོགས་ལ་བརྩོན་པར་བྱའོ། །སྦྱིན་པའི་ཚོགས་དང༌།
ཚུལ་ཁྲིམས་ཀྱི་ཚོགས་དང༌། ཐོས་པའི་ཚོགས་འདི་དག་བསྟན་པ་ན། སྔོན་དགེ་བའི་རྩ་བ་བསྐྱེད་པའི་སྲོག་ཆགས་སུམ་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
སེམས་བསྐྱེད་དོ། །ལྷའི་བུ་ལྔ་སྟོང་ནི། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཀྱིས་ཀྱང་རྗེས་སུ་
མཐུན་པའི་ཆོས་ཀྱི་བཟོད་པ་ཐོབ་བོ། །དེ་ནས་བཅོམ་ལྡན་འདས་ལ་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་
དཔའ་སེམས་དཔའ་ཆེན་པོ་ཆོས་དུ་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱང་
ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ལུས་ལ་གཟུགས་
བརྙན་དང་འདྲ་བར་མོས་པ་དང༌། ངག་ལ་བྲག་ཅ་དང་འདྲ་བར་མོས་པ་དང༌། སེམས་ལ་སྒྱུ་མ་དང་འདྲ་བར་མོས་པ་དང༌། ཆོས་ཐམས་ཅད་ལ་མི་ཟད་པའི་ཆོས་ཉིད་དུ་མོས་པ་སྟེ༑
རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་རོ། །རིགས་ཀྱི་བུ། གཞན་ཡང་
བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་
ལ་བྱམས་པས་ཁྱབ་པར་ཡང་བྱེད་ལ་སེམས་ཅན་དུ་འདུ་ཤེས་པའང་མེད་པ་དང༌། ཆོས་ཐམས་ཅད་ལ་སྟོང་པ་དང༌། མི་རྟག་པར་ཡང་མོས་པར་བྱེད་ལ་གཞིར་ཡང་མི་བྱེད་པ་དང༌། སངས་
རྒྱས་ཐམས་ཅད་ཀྱང་མཐོང་ལ་ཤའི་མིག་ལའང་མངོན་པར་ཞེན་པ་མེད་པ་དང༌། སེམས་རབ་ཏུ་རྣམ་པར་འབྱེད་པ་ལའང་མཁས་ལ་སེམས་ཀྱང་སེམས་ལ་གཏོད་པར་མི་བྱེད་པ་སྟེ།
རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་རོ། །རིགས་ཀྱི་བུ། གཞན་
ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ལྟ་བ་སྤང་
པའི་ཕྱིར་བདོག་པ་ཐམས་ཅད་ཡོངས་སུ་གཏོང་བ་དང༌། ཉོན་མོངས་པ་ཐམས་ཅད་རབ་ཏུ་ཞི་བའི་ཕྱིར་ཚུལ་ཁྲིམས་ཡོངས་སུ་དག་པ་དང༌། ཆོས་ཀྱིས་ལྷག་པའི་ཕྱིར་བཟོད་པའི་སྟོབས་
༄༅། །དང་ལྡན་པ་དང༌། དབེན་པའི་ཆོས་ཀྱིས་རྣམ་པར་གྲོལ་བའི་ཕྱིར་བརྩོན་འགྲུས་བརྩམས་པ་སྟེ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་
པོ་ཆོས་བཞི་པོ་དེ་དག་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་རོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་
ཆོས་བཞི་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། བསམ་གཏན་ཡང་ཐོབ་ལ་བསམ་གཏན་ལའང་མི་རྟེན་པ་
དང༌། ཤེས་རབ་ཀྱིས་ཀྱང་རྣམ་པར་བརྟགས་ལ་སྤྲོས་པའང་མེད་པ་དང༌། ཐབས་ལ་མཁས་པའང་རབ་ཏུ་འཛིན་ལ་སེམས་ཅན་ཡང་སྡུད་པ་དང༌། སྤྱོད་པ་ཐམས་ཅད་ལའང་
གེགས་མེད་ལ་སྤྱོད་པའང་ཁོང་དུ་ཆུད་པར་བྱེད་པ་སྟེ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན། མི་སྐྱེ་བའི་ཆོས་རྣམས་
ལ་བཟོད་པ་མྱུར་དུ་ཐོབ་པར་འགྱུར་རོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་
མྱུར་དུ་ཐོབ་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། བྱམས་པ་ཆེན་པོས་སེམས་ཅན་ཐམས་ཅད་ཡོངས་སུ་སྐྱོབ་པ་དང༌། སྙིང་རྗེ་ཆེན་པོས་འཁོར་བ་ལས་ཡོངས་སུ་མི་སྐྱོ་
བ་དང༌། དགའ་བ་ཆེན་པོས་ཆོས་ལ་དགའ་ཞིང་མཆོག་ཏུ་དགའ་བ་དང༌། བཏང་སྙོམས་ཆེན་པོས་རྗེས་སུ་ཆགས་པ་དང༌། ཁོང་ཁྲོ་བ་སྤོང་བ་སྟེ། རིགས་ཀྱི་བུ། བྱང་ཆུབ་སེམས་དཔའ་
སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་རོ། །རིགས་ཀྱི་བུ། གཞན་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་ཆོས་བཞི་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། རྣམ་པར་ཐར་པའི་སྒོ་གསུམ་མངོན་སུམ་དུ་བྱེད་
པ་དང༌། དུས་གསུམ་ཡོངས་སུ་ཤེས་པ་དང༌། ཁམས་གསུམ་ལས་ཡང་དག་པར་འདའ་བ་དང༌། ཆོས་ཐམས་ཅད་རང་བཞིན་གྱིས་ས་མ་སྐྱེས་པ་ལ་ཡིད་ཆེས་པ་སྟེ། རིགས་ཀྱི་བུ།
བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན། མི་སྐྱེ་བའི་ཆོས་རྣམས་ལ་བཟོད་པ་མྱུར་དུ་ཐོབ་པར་འགྱུར་རོ། །བཞི་པ་སྒྲུབ་བའི་ཆོས་ཀྱི་རྣམ་གྲངས་
འདི་བཤད་པ་ན་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་སྟེ། དེ་དགའ་བ་དང༌། མཆོག་ཏུ་དགའ་བ་ཐོབ་པ་དེ་ཁོ་ནས་ཏ་ལ་བདུན་སྲིད་ཙམ་གྱི་
ནམ་མཁའ་ལ་མངོན་པར་འཕགས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་རྣམ་པ་དྲུག་ཏུ་གཡོས་སོ། །ལྷ་དང་མིའི་སིལ་སྙན་འབུམ་ཡང་འཁྲོལ་ལོ། །པདྨའི་
༄༅། །སྤྲིན་གྱི་ཆར་ཆེན་པོའང་མངོན་པར་བབ་པོ། །འཇིག་རྟེན་འདིའང་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་འཛུམ་པ་མཛད་དེ།
འདི་ནི༑ དེ་བཞིན་གཤེགས་པ་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་སྣ་ཚོགས་འདི་ལྟ་སྟེ། སྔོན་པོ་དང༌། སེར་
པོ་དང༌། དམར་པོ་དང༌། དཀར་པོ་དང༌། བཙོད་ཀ་དང༌། ཤེལ་དང༌། དངུལ་གྱི་ཁ་དོག་ལྟ་བུ་དག་བྱུང་ངོ༌། །དེ་དག་བྱུང་ནས་འཇིག་རྟེན་གྱི་ཁམས་མཐའ་ཡས་མུ་མེད་པ་འོད་ཀྱིས་ཁྱབ་
པར་གྱུར་ནས་ཉི་མ་དང༌། ཟླ་བ་རྣམས་ཀྱི་འོད་ཀྱང་ཟིལ་གྱིས་མནན་ཏེ་ཚངས་པའི་འཇིག་རྟེན་དུ་ཐུག་ནས་ཕྱིར་ལོག་སྟེ་བཅོམ་ལྡན་འདས་ཀྱི་སྤྱི་གཙུག་ཏུ་ནུབ་པར་གྱུར་ཏོ། །དེ་ནས་
ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་
ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ནི། རྒྱུ་མ་མཆིས། རྐྱེན་མ་མཆིས་པར་
འཛུམ་པ་མི་མཛད་ན། འཛུམ་པ་མཛད་པའི་རྒྱུ་ནི། གང་ལགས། རྐྱེན་ནི། གང་ལགས། དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ཡེ་ཤེས་མཆོག་བརྙེས་ཡོངས་དག་
ཡངས་པའི་སྤྱན་མངའ་བ། །དབང་པོ་ཞི་བ་ཞི་གནས་ཕ་རོལ་ཕྱིན་མཆོག་བརྙེས། །སྐུ་མདོག་གསེར་གྱི་རི་བོ་ལྷ་ཡི་འོང་འདྲ་བ། །ཅི་ཡི་སླད་དུ་བཅོམ་ལྡན་འཛུམ་པ་འདི་སྟོན་མཛད། །
གང་གི་བློ་གྲོས་ཅི་འདྲ་དུས་གསུམ་ལྡན་པ་དང༌། །ལྷ་དང་མི་རྣམས་སེམས་ཀྱི་སྤྱོད་པ་མཁྱེན་བཞིན་དུ། །འདུ་ཤེས་མི་མངའ་རྟག་ཏུ་ཡེ་ཤེས་མཆོག་བརྙེས་པ། །ཞལ་རས་ཟླ་འདྲ་འཛུམ་
པའི་དོན་ནི་བསྟན་པར་གསོལ། །འདས་པའི་སངས་རྒྱས་ཇི་སྙེད་གང་དག་མ་འོངས་དུས། །གང་དག་གནས་པའི་རྒྱལ་བ་དེ་དག་མཚུངས་པ་སྟེ། །སེམས་ཅན་གང་དག་དཀར་པོ་སྤྱོད་པ་སྣ་
ཚོགས་པ། །སྦྱོར་མཁྱེན་ལུང་བསྟན་སླད་དུ་ཐམས་ཅད་ཡང་དག་གསུངས། །སངས་རྒྱས་ཞིང་འདི་དག་ནི་སྐུ་ཡིས་ཐམས་ཅད་ཁྱབ། །ཁྱོད་ཀྱི་གསུང་ནི་སངས་རྒྱས་ཞིང་མང་ཡངས་པར་
གྲག །འདིར་ནི་ཐུགས་ཀྱིས་འགྲོ་བ་ཀུན་ལ་བྱམས་པ་བསྐྱེད། །རྒྱལ་བ་ཡེ་ཤེས་མཐའ་ཡས་ལྡན་པ་གང་སླད་གསུངས། །ཆོས་རྣམས་ཡ་མ་བརླ་སྟེ་ཆུ་ཟླ་འདྲ་བ་དང༌། །སྒྱུ་མ་ལྟ་བུར་
འཇིག་པ་རྨི་ལམ་ངོ་བོ་ཉིད། །སྤྲིན་ལྟར་མི་བརྟན་འཇིག་པའི་ཆོས་ཅན་མཁྱེན་པ་པོ། །མི་ཡི་སེངྒེ་གང་སླད་འཛུམ་དོན་བསྟན་པར་གསོལ། །སྟོང་པ་མཚན་མེད་སྨོན་མེད་རྟོགས་པས་རྣམ་
པར་གྲོལ། །རྟག་ཏུ་ཐུགས་དུལ་ཆོས་ཀྱི་ངོ་བོ་ཉིད་ལ་མཁས། །རླུང་སྲུབ་མཁའ་ལ་འཚུབ་ཀྱང་སྤྲོས་མེད་འདྲ་བ་པོ། །ཅི་སླད་འཛུམ་མཛད་འདི་ལ་དོན་ནི་ཅི་མཆིས་གསུངས། །གང་གི་
༄༅། །སེམས་དེང་སངས་རྒྱས་ཡེ་ཤེས་མཆོག་ལ་བཏུད། །གང་གིས་དེ་རིང་ཤིང་རྒྱལ་དྲུང་དུ་བདུད་ཀྱང་བཅོམ། །གང་གིས་རྒྱལ་བ་མཆོག་རྣམས་གདན་ནི་ཡོངས་
སུ་བཟུང༌། །སྐྱེས་བུ་ཁྱུ་མཆོག་གིས་ནི་ཅི་ཕྱིར་འཛུམ་པ་བསྟན། །འདི་ན་རྒྱལ་བའི་ཉན་ཐོས་དེ་རྣམས་ས་མ་མཆིས། །འདི་ལ་རང་སངས་རྒྱས་ཀྱི་ཡུལ་ཡང་ཅི་མ་མཆིས། །འདི་ནི་
སངས་རྒྱས་ཡོན་ཏན་རྒྱ་མཚོ་རྣམས་ཀྱི་ཡུལ། །འཇིག་རྟེན་མཆོག་གིས་འཛུམ་པའི་རྒྱུ་ནི་བསྟན་པར་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་པོ་ལ་འདི་
སྐད་ཅེས་བཀའ་སྩལ་ཏོ། །ཀུན་དགའ་བོ། ཁྱོད་ཀྱིས་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཏ་ལ་བདུན་སྲིད་ཙམ་གྱི་སྟེང་གི་བར་སྣང་ལ་མངོན་པར་འཕགས་ཏེ་འདུག་པ་
མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། །བདེ་བར་གཤེགས་པ། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཚན་པོ་
ཆེ་ཆེན་པོ་དྲི་མ་མེད་པའི་གཟི་བརྗིད་འདི་བསྐལ་པ་གྲངས་མེད་པ་གསུམ་པ་ཕྲག་འབུམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་
བར་འགྱུར་ཏེ། ཤར་ཕྱོགས་ཀྱི་འཇིག་རྟེན་གྱི་ཁམས་རྣམ་པར་དག་པར་བྱེད་པ་ཞེས་བྱ་བར་བསྐལ་པ་ཚངས་པས་བསྟོད་པ་ཞེས་བྱ་བ་ལ་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་
སྟོན་པ་སངས་རྒྱས་བཅོམ་ལྡན་འདས་བཀོད་པ་མང་པོའི་རྒྱལ་པོ་ཞེས་བྱ་བར་འཇིག་རྟེན་དུ་འབྱུང་ངོ༌། །ཀུན་དགའ་བོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་བཀོད་པ་མང་པོའི་རྒྱལ་པོའི་སངས་རྒྱས་ཀྱི་ཞིང་རྣམ་པར་དག་པར་བྱེད་པའི་འཇིག་རྟེན་གྱི་ཁམས་དེའང་འབྱོར་པ་དང༌། རྒྱས་པ་དང༌། བདེ་བ་དང༌། ལོ་ལེགས་པ་དང༌། ཉམས་
དགའ་བ་དང༌། སྐྱེ་པོ་དང༌། མི་མང་པོས་གང་བར་འགྱུར་ཏེ། ཀུན་དགའ་བོ། དཔེར་ན། དགའ་ལྡན་གྱི་ལྷ་རྣམས་ཀྱི་ལོངས་སྤྱོད་དང༌། ཡོངས་སུ་སྤྱད་པ་ཇི་ལྟ་བ་བཞིན་དུ་སངས་རྒྱས་
གྱི་ཞིང་རྣམ་པར་དག་པའི་འཇིག་རྟེན་གྱི་ཁམས་ཀྱི་སེམས་ཅན་དེ་དག་གི་ལོངས་སྤྱོད་དང༌། ཡོངས་སུ་སྤྱད་པའང་དེ་འདྲ་བར་འགྱུར་རོ། །དེ་བཞིན་གཤེགས་པ་བཀོད་པ་མང་པོའི་
རྒྱལ་པོ་དེའང་གཏམ་གཞན་མི་གསུང་བར་བྱང་ཆུབ་སེམས་དཔའ་བསྡུ་བའི་ཕྱིར་བྱང་ཆུབ་སེམས་དཔའི་སྡེ་སྣོད་འབའ་ཞིག་སྟོན་ཏོ། །དེ་ན་ཉན་ཐོས་དང༌། རང་སངས་རྒྱས་རྣམས་
ཀྱི་མིང་ཡང་མེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པ་ཐོབ་པའི་བྱང་ཆུབ་སེམས་དཔའི་དགེ་འདུན་ཆེན་པོ་འབའ་ཞིག་འབྱུང་བར་འགྱུར་རོ། །དེ་བཞིན་གཤེགས་
༄༅། །པ་དེའང་ཚེ་དཔག་ཏུ་མེད་པར་འགྱུར་རོ། །དེའི་སངས་རྒྱས་ཀྱི་ཞིང་དེ་ན་མི་ཁོམ་པ་བརྒྱད་མེད་དེ། དེ་བདུད་དང་ཕྱིར་རྒོལ་བ་བཅོམ་པ། གཞན་མུ་སྟེགས་ཅན་མེད་པ་
དང༌། བཻ་ཌཱུཪྻ་ལས་གྲུབ་ལ་ཛམྦུ་ཆུ་བོའི་གསེར་གྱི་པདྨས་སྤྲས་པའི་སངས་རྒྱས་ཀྱི་ཞིང་དུ་འགྱུར་རོ། །དེ་ནས་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་བར་སྣང་དེ་ལས་བབས་ཏེ་
བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་བཅོམ་ལྡན་འདས་ལ་རབ་ཏུ་འབྱུང་བར་གསོལ་ཏེ་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་ངོ༌། །དེ་ནས་བཅོམ་ལྡན་
འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྲེད་མེད་ཀྱི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཆོས་འདུལ་བ་ལེགས་པར་གསུངས་པ་ནི། བཅོམ་
ལྡན་འདས། ངོ་མཚར་ལགས་སོ། །བདེ་བར་གཤེགས་པ། ངོ་མཚར་ལགས་ཏེ། འདི་ལྟར་དེ་བཞིན་གཤེགས་པ་ལ་སྐུར་པ་འདེབས་པའམ། ཀླན་ཀ་ཚོལ་བའམ། མཐོ་
འཚམ་པའམ། བསྟིང་བའི་སླད་དུ་མཆིས་པ་གང་དག་ལྷགས་པ་དེ་དག་ཀྱང་དེ་བཞིན་གཤེགས་པ་མཐོང་མ་ཐག་ཏུ་དགའ་བ་དང༌། དང་བ་དང༌། མཆོག་ཏུ་དགའ་བ་དྲག་པོ་ཐོབ་
པར་འགྱུར་ལ། ང་རྒྱལ་དང༌། རྒྱགས་པ་དང༌། དྲེགས་པ་ངེས་པར་བཅོམ་ནས་དེ་བཞིན་གཤེགས་པ་ཉག་གཅིག་ལ་འདུད་ཅིང༌། བཅོམ་ལྡན་འདས་ཉག་གཅིག་ལ་ཐལ་མོ་སྦྱར་
བ་བཏུད་པ་དང༌། བཅོམ་ལྡན་འདས། འདི་ལྟར་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་འདི་ང་རྒྱལ་དང༌། རྒྱགས་པ་དང༌། དྲེགས་པ་དྲག་པོས་མཆིས་ལ། ཆོས་འདི་ལྟ་བུ་འདི་
ཐོས་ནས་བདག་ཉིད་ཆེན་པོ་འདི་ལྟ་བུ་ཐོབ་སྟེ། སེམས་ཅན་དཔག་ཏུ་མ་མཆིས་གྲངས་མ་མཆིས་པའི་ང་རྒྱལ་དང༌། རྒྱགས་པ་དང༌། དྲེགས་པ་སྤངས་པའི་སླད་དུ་ཆོས་སྟོན་པར་འགྱུར་
ལགས་སོ། །བཅོམ་ལྡན་འདས། སྔོན་འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་ཚན་པོ་ཆེ་ཆེན་པོ་དྲི་མ་མེད་པའི་
གཟི་བརྗིད་ཀྱིས་ཡང་དག་པར་རྫོགས་པའི་བྱང་ཆུབ་འཚལ་བའི་སླང་དུ་དགེ་བའི་རྩ་བ་བསྐྱེད་ནས་དེས་ན། ད་ལྟར་འདི་ལྟ་བུའི་མངོན་པར་ཤེས་པ་མྱུར་བ་ཐོབ་པར་གྱུར་ལགས། དེ་
སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྲེད་མེད་ཀྱི་བུ་ལ་འདི་སྐད་ཅེས་བཀའ་སྩལ་ཏོ། །སྲེད་མེད་ཀྱི་བུ། ཚན་པོ་ཆེ་ཆེན་
བོ་དྲི་མ་མེད་པའི་གཟི་བརྗིད་ཀྱིས་ནི། འདས་པའི་དུས་ན་ཡང་དག་པར་རྫོགས་པའི་བྱང་ཆུབ་འདོད་པའི་ཕྱིར་སངས་རྒྱས་བྱེ་བ་ཕྲག་དྲུག་ཅུ་རྩ་གཉིས་ལ་དགེ་བའི་རྩ་བ་བསྐྱེད་དོ། །
དེ་ཕྱིན་ཆད་ཀྱང་སངས་རྒྱས་བཅོམ་ལྡན་འདས་དཔག་ཏུ་མེད། གྲངས་མེད་པ་ལ་བཀུར་སྟིར་བྱེད། བླ་མར་བྱེད། རི་མོར་བྱེད། མཆོད་པར་བྱེད་པར་འགྱུར་ཏེ། ཚངས་པར་སྤྱད་པ་སྤྱོད་
༄༅། །པར་འགྱུར་རོ། །སྲེད་མེད་ཀྱི་བུས་གསོལ་པ། བཅོམ་ལྡན་འདས། མི་དགེ་བའི་རྩ་བ་གང་གིས་ན། དེའི་བྱང་ཆུབ་ཀྱི་སེམས་མ་མཆིས་པར་གྱུར་ནས་དེས་ན་
འདི་བརྩད་པའི་བསམ་པས་དེ་བཞིན་གཤེགས་པའི་སྤྱན་སྔར་མཆིས་ལ་འདི་ལྟ་བུའི་ང་རྒྱལ་དང༌། རྒྱགས་པ་དང༌། དྲེགས་པ་དང་ལྡན་པར་གྱུར་ལགས། དེ་སྐད་ཅེས་གསོལ་
པ་དང༌། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྲེད་མེད་ཀྱི་བུ་ལ་འདི་སྐད་ཅེས་བཀའ་སྩལ་ཏོ། །སྲེད་མེད་ཀྱི་བུ། བྱང་ཆུབ་སེམས་དཔའ་ཆོས་
བཞི་དང་ལྡན་ན། བྱང་ཆུབ་ཀྱི་སེམས་བརྗེད་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ལྷག་པའི་ང་རྒྱལ་དང༌། ཆོས་ལ་མ་གུས་པ་དང༌། དགེ་བའི་བཤེས་གཉེན་ལ་ཁྱད་
དུ་གསོད་པ་དང༌། ལོག་པའི་ཚིག་སྨྲ་བ་སྟེ། སྲེད་མེད་ཀྱི་བུ། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན། བྱང་ཆུབ་གྱི་སེམས་བརྗེད་པར་འགྱུར་རོ། །སྲེད་མེད་ཀྱི་བུ།
གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། བྱང་ཆུབ་ཀྱི་སེམས་བརྗེད་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ཉན་ཐོས་དང༌། རང་སངས་རྒྱས་ཀྱི་ཐེག་པ་
པའི་རྣལ་འབྱོར་སྤྱོད་པ་དག་དང་འདྲིས་པར་བྱེད་པ་དང༌། ཐེག་པ་དམན་པ་ལ་མོས་པ་རྣམས་དང༌། བྱང་ཆུབ་སེམས་དཔའ་ལ་སྡང་ཞིང་སྐུར་པ་འདེབས་པ་དང༌། ཆོས་རྣམས་ལ་སློབ་
དཔོན་གྱི་དཔེ་མ་ཁྱུད་བྱེད་པ་སྟེ། སྲེད་མེད་ཀྱི་བུ། བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན། བྱང་ཆུབ་ཀྱི་སེམས་བརྗེད་པར་འགྱུར་རོ། །སྲེད་མེད་ཀྱི་བུ། གཞན་ཡང་
བྱང་ཆུབ་སེམས་དཔའ་ཆོས་བཞི་དང་ལྡན་ན། བྱང་ཆུབ་ཀྱི་སེམས་བརྗེད་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། སྒྱུ་བྱེད་པ་དང༌། སེམས་ཅན་རྣམས་ལ་གཡོས་བསྟེན་པར་
བྱེད་པ་དང༌། དགེ་བའི་བཤེས་གཉེན་རྣམས་ལ་ལྕེ་གཉིས་བྱེད་པ་དང༌། རྙེད་པ་དང་བཀུར་སྟི་ལ་ལྷག་པར་ཞེན་པ་སྟེ། སྲེད་མེད་ཀྱི་བུ། བྱང་ཆུབ་སེམས་དཔའ་ཆོས་བཞི་པོ་དེ་དག་
དང་ལྡན་ན། བྱང་ཆུབ་ཀྱི་སེམས་བརྗེད་པར་འགྱུར་རོ། །སྲེད་མེད་ཀྱི་བུ། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། བྱང་ཆུབ་ཀྱི་སེམས་བརྗེད་པར་འགྱུར་ཏེ། བཞི་
གང་ཞེ་ན། འདི་ལྟ་སྟེ། བདུད་ཀྱི་ལས་མ་རྟོགས་པ་དང༌། ལས་ཀྱི་སྒྲིབ་པས་བསྒྲིབས་པ་དང༌། ལྷག་པའི་བསམ་པ་སྟོབས་ཆུང་བ་དང༌། ཤེས་རབ་དང་ཐབས་མེད་པ་སྟེ། སྲེད་མེད་
ཀྱི་བུ༑ བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན། བྱང་ཆུབ་ཀྱི་སེམས་བརྗེད་པར་འགྱུར་རོ། །སྲེད་མེད་ཀྱི་བུ། ཡང་གང་གི་ཕྱིར་ཚན་པོ་ཆེ་ཆེན་པོ་དྲི་མ་མེད་པའི་གཟི་
བརྗིད་ཀྱི་བྱང་ཆུབ་སེམས་བརྗེད་པར་གྱུར་པ་དེ་ཉོན་ཅིག །སྲེད་མེད་ཀྱི་བུ། སྔོན་བྱུང་བ་འདས་པའི་དུས་ན་བསྐལ་པ་བཟང་པོ་འདི་ཉིད་ལ་དེ་བཞིན་གཤེགས་པ་དགྲ་བཅོམ་པ་
༄༅། །ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་
མེད་པ༑ ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཁོར་བ་འཇིག་ཅེས་བྱ་བ་འཇིག་རྟེན་དུ་བྱུང་སྟེ། དེའི་བསྟན་པ་གནས་པ་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ་
ནོར་བཟང་ཞེས་བྱ་བ་ཞིག་བྱུང་སྟེ། དེ་བདུད་ཀྱིས་བསླུས་ནས་ལྷག་པའི་ང་རྒྱལ་ཅན་དུ་གྱུར་ཏེ། དེ་བཞིན་གཤེགས་པའི་ཐད་དུ་མི་འགྲོ་བའི་སྟེང་དུ་ང་རྒྱལ་གྱིས་ཟིལ་གྱིས་ནོན་
ནས་བྲམ་ཟེ་དང༌། ཁྱིམ་བདག་ཆོས་སྨྲ་བ་རྣམས་དང་ལྷན་ཅིག་ཏུ་འཐབ་པ་དང༌། རྩོད་པ་དང༌། འགྱེད་པ་ལ་ཞུགས་ཏེ། ཆོས་དང༌། ཆོས་སྨྲ་བ་རྣམས་ལའང་མ་གུས་པ་བསྐྱེད་དོ།།
དེའི་ཚེ་དེ་ཉིད་ལ་ཆོས་ལྔ་དང་བྲལ་བར་གྱུར་ཏེ། ལྔ་གང་ཞེ་ན། འདི་ལྟ་སྟེ། སངས་རྒྱས་མཐོང་བ་དང༌། ཆོས་ཐོས་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་
ཆེན་པོ་ལ་ཡང་དག་པར་ཞུགས་པ་དག་དང་འབྲེལ་བའི་གཏམ་སྣ་ཚོགས་དྲི་བར་བྱ་བ་དང༌། དགེ་བའི་རྩ་བ་ཡོངས་སུ་བསྔོ་བ་དང༌། བྱང་ཆུབ་ཀྱི་སེམས་ཤིན་ཏུ་བརྟན་པོར་བྱ་བ་
དང་བྲལ་བར་གྱུར་ནས་དེས་མི་དགེ་བའི་ཆོས་ནི། ཡོངས་སུ་བཟུང་ལ། བྱང་ཆུབ་ཀྱི་སེམས་ནི། ཡོངས་སུ་བཟུང་སྟེ། སྲེད་མེད་ཀྱི་བུ། ཆོས་ལྔ་པོ་དེ་དག་དང་བྲལ་བར་གྱུར་ཏོ། །
སྲེད་མེད་ཀྱི་བུ། དེའི་ཚེ་དེའི་དུས་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནོར་བཟང་གང་ཡིན་པ་དེ་གཞན་ཞིག་ཡིན་པར་ཁྱོད་སོམ་ཉིའམ། ཡིད་གཉིས་སམ། ཐེ་ཚོམ་ཟན། ཁྱོད་ཀྱིས་དེ་
ལྟར་མི་བལྟའོ། །དེ་ཅིའི་ཕྱིར་ཞེ་ན། ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་འདི་ཉིད་དེའི་ཚེ་དེའི་དུས་ན་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནོར་བཟང་དུ་གྱུར་ཏེ་ང་རྒྱལ་དེས་ན། དེའི་བྱང་
ཆུབ་ཀྱི་སེམས་བརྗེད་དོ།། སྔོན་གྱི་དགེ་བའི་རྩ་བས་ཡོངས་སུ་བསྲུངས་པ་དང༌། བྱང་ཆུབ་ཀྱི་སེམས་ཁོ་ནས་བསྐྱབས་པ་དེས་ནི། ངན་སོང་དག་ཏུ་མ་སྐྱེས་སོ། །དེ་ང་རྒྱལ་གྱིས་ཁེངས་
ཏེ༑ ཚན་པོ་ཆེ་ཆེན་པོའི་ཤུགས་ཐོབ་ཀྱང་སངས་རྒྱས་ཀྱི་མཐུས་སངས་རྒྱས་མཐོང་བ་དང་མ་བྲལ་ལོ། །དེ་དེ་བཞིན་གཤེགས་པའི་སྟོབས་ཀྱི་ཤུགས་མ་བཟོད་དེ་འོངས་པ་ལས། དེ་
བཞིན་གཤེགས་པ་དང་བྱང་ཆུབ་སེམས་དཔའི་སྟོབས་ཀྱི་ཤུགས་ཐོས་ནས་ང་རྒྱལ་དང༌། རྒྱགས་པ་དང༌། དྲེགས་པ་ཐམས་ཅད་ཡོངས་སུ་ཆད་དོ། །སྡིག་པ་མ་བྱས་པའི་ཕྱིར་ནི། དེ་
བཞིན་གཤེགས་པ་མཐོང་ངོ༌། །དེའི་སྔོན་གྱི་རྒྱུ་ལས་བྱུང་བའི་དགེ་བའི་རྩ་བ་མངོན་དུ་བྱུང་སྟེ། དེས་ན་མངོན་པར་ཤེས་པ་མྱུར་ལ་བཟོད་པ་ཐོབ་བོ། །དེ་ནས་བྱང་ཆུབ་སེམས་དཔའ་
སྲེད་མེད་ཀྱི་བུས་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་ཀྱིས་ཆོས་གང་བསྐྱེད་ན། དེས་ཁྱོད་ཀྱིས་བཟོད་པ་ཐོབ་པར་གྱུར། དྲི་མ་
༄༅། །མེད་པའི་གཟི་བརྗིད་ཀྱིས་སྨྲས་པ། བདག་གིས་སོ་སོའི་སྐྱེ་བོའི་ཆོས་ཐམས་ཅད་བསྐྱེད་དོ། །སྲེད་མེད་ཀྱི་བུས་སྨྲས་པ། ཁྱོད་ཀྱིས་ཇི་ལྟར་བསྐྱེད། དྲི་མ་མེད་
པའི་གཟི་བརྗིད་ཀྱིས་སྨྲས་པ། ཇི་ལྟར་འབྱུང་བ་མེད་པ་དང༌། འཇིག་པ་མེད་པ་དེ་ལྟར་བསྐྱེད་དོ། །ཇི་ལྟར་མངོན་པར་ཞེན་པ་མེད་པ་དང༌། སྐྱེ་བ་མེད་པ་དེ་ལྟར་བསྐྱེད་དོ། །སྲེད་མེད་ཀྱི་
བུས་སྨྲས་པ། རིགས་ཀྱི་བུ། སོ་སོ་སྐྱེ་བའི་ཆོས་རྣམས་དང༌། སངས་རྒྱས་ཀྱི་ཆོས་རྣམས་ལ་ཁྱད་པར་ནི། ཅི་ཞིག་ཡོད། ཐ་དད་དུ་དབྱེ་བ་ནི། ཅི་ཞིག་ཡོད། དྲི་མ་མེད་པའི་གཟི་
བརྗིད་ཀྱིས་སྨྲས་པ། མིང་ལ་ནི། ཐ་དད་དུ་དབྱེ་བ་ཡོད་ཀྱི། དོན་ལ་ནི། ཐ་དད་དུ་དབྱེ་བ་མེད་དོ། །སྲེད་མེད་ཀྱི་བུས་སྨྲས་པ། དྲི་མ་མེད་པའི་གཟི་བརྗིད། སོ་སོ་སྐྱེ་བོའི་ཆོས་རྣམས་
ཀྱི་དོན་གང་ཡིན། དྲི་མ་མེད་པའི་གཟི་བརྗིད་ཀྱིས་སྨྲས་པ། དེའི་དོན་ནི། མེད་པ་ལས་ཡོངས་སུ་བརྟགས་པ་དང༌། རྣམ་པར་རྟོག་པ་མེད་པའོ། །སྲེད་མེད་ཀྱི་བུས་སྨྲས་པ། དྲི་མ་མེད་
པའི་གཟི་བརྗིད། དོན་གྱིས་ནི། ཅི་ཞིག་སེལ་བར་བྱེད། ཅི་ཞིག་ནི། སྒྲུབ་པར་བྱེད། དྲི་མ་མེད་པའི་གཟི་བརྗིད་ཀྱིས་སྨྲས་པ། སྲེད་མེད་ཀྱི་བུ། དོན་གྱིས་ནི། སོ་སོའི་སྐྱེ་བོའི་ཆོས་
རྣམས་སེལ་བར་བྱེད་དོ། །སངས་རྒྱས་ཀྱི་ཆོས་རྣམས་ནི། སྒྲུབ་པར་བྱེད་དོ། །སྲེད་མེད་ཀྱི་བུས་སྨྲས་པ། དྲི་མ་མེད་པའི་གཟི་བརྗིད། སངས་རྒྱས་ཀྱི་ཆོས་རྣམས་ཀྱི་དོན་གང་ཡིན།
དྲི་མ་མེད་པའི་གཟི་བརྗིད་ཀྱིས་སྨྲས་པ། སྲེད་མེད་ཀྱི་བུ། སངས་རྒྱས་ཀྱི་ཆོས་རྣམས་ཀྱི་དོན་ནི། གཉིས་སུ་དབྱེར་མེད་པའོ། །སྲེད་མེད་ཀྱི་བུས་སྨྲས་པ། རིགས་ཀྱི་བུ། དོན་ལ་རྟོན་པར་
བྱའི༑ ཚིག་འབྲུ་ལ་རྟོན་པར་མི་བྱའོ། །ཞེས་དེ་བཞིན་གཤེགས་པས་གསུངས་པ་དང༌། ཡང་དག་པའི་ལྟ་བ་སྐྱེས་པ་ལ་ནི། རྒྱུ་གཉིས་དང༌། རྐྱེན་གཉིས་ཡོད་དེ། གཉིས་གང་ཞེ་ན།
འདི་ལྟ་སྟེ། གཞན་གྱི་སྒྲ་དང༌། རང་གི་ཚུལ་བཞིན་ཡིད་ལ་བྱེད་པའོ། །ཞེས་གསུངས་ན། ཇི་ལྟར་ཚིག་འབྲུའང་དེ་ཉིད་ཡིན་ལ། དོན་ཀྱང་དེ་ཉིད་ཡིན། དྲི་མ་མེད་པའི་གཟི་བརྗིད་ཀྱིས་
སྨྲས་པ༑ སྲེད་མེད་ཀྱི་བུ། དོན་ལ་རྟོན་པའི་བྱང་ཆུབ་སེམས་དཔས་ནི། ཚིག་འབྲུ་ཕྲི་བའང་མེད་དོ། །ཡང་ཚིག་འབྲུ་དམིགས་སུ་མེད་པ་དེ་ནི། དོན་ཡིན་ལ། དོན་དེའང་བརྗོད་དུ་མེད་
པའི་དོན་ཡིན་ནོ། །དོན་ལ་རྟོན་པ་ལ་ནི། ཆོས་ཀྱང་ཅིའང་མེད་དོ། །དོན་ཀྱང་ཅིའང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི། བརྗོད་དུ་མེད་པ་དང༌། ཡ་མ་བརླ་དང༌། ཡུལ་ན་
མི་གནས་པ་དང༌། ཕྱོགས་ན་མི་གནས་པ་དང༌། གང་ཁོ་ན་གནས་པ་དེ་ཁོ་ནར་འགགས་པའི་ཕྱིར་རོ། །བཅོམ་ལྡན་འདས་ཀྱིས་ཀྱང་དོན་ནི། གཏན་དུ་འགོག་པའི་མཚན་ཉིད་དོ།།
ཞེས་གསུངས་ཏེ། སྲེད་མེད་ཀྱི་བུ། དེ་ལྟ་བས་ན། གང་དོན་ལ་རྟོན་པ་དེ་ནི། ཆོས་གང་ལས་ཀྱང་མི་འཕྲོ་རྣམ་པར་མི་འཕྲོའོ། །གང་མི་འཕྲོ་རྣམ་པར་མི་འཕྲོ་བ་དེ་ནི། དོན་ཏོ། །སྲེད་
༄༅། །མེད་ཀྱི་བུས་སྨྲས་པ། རིགས་ཀྱི་བུ། གང་དོན་ལ་རྟོན་པ་དེ་ཆོས་ཐམས་ཅད་ལ་རྟོན་པའི་རྣམ་གྲངས་ཡོད་དམ། དྲི་མ་མེད་པའི་གཟི་བརྗིད་ཀྱིས་སྨྲས་པ། སྲེད་མེད་ཀྱི་
བུ༑ ཡོད་དེ། འདི་ལྟར་ཆོས་ཐམས་ཅད་ནི། སྟོང་པ། ཆོས་ཐམས་ཅད་ནི། དབེན་པ་སྟེ། དེ་དག་ནི། ཆོས་ཐམས་ཅད་ཇི་ལྟར་སྟོང་པ་དེ་ཁོ་ན་བཞིན་དུ་དེ་ལ་རྟོན་ཏོ། །ཇི་ལྟར་དབེན་
པ་དེ་ཁོ་ན་བཞིན་དུ་ད་ལ་རྟོན་ཏོ། །སྲེད་མེད་ཀྱི་བུ། དེ་ལྟར་ན། གང་དོན་ལ་རྟོན་པ་དེ་ནི། ཆོས་ཐམས་ཅད་ལ་རྟོན་ཏོ། །སྲེད་མེད་ཀྱི་བུས་སྨྲས་པ། དྲི་མ་མེད་པའི་གཟི་བརྗིད། དེ་ལྟ་བས་
ན༑ ཆོས་ཐམས་ཅད་འདི་རྟོན་པ་ཡིན་ནོ། །དྲི་མ་མེད་པའི་གཟི་བརྗིད་ཀྱིས་སྨྲས་པ། སྲེད་མེད་ཀྱི་བུ། དེ་ནི། དེ་བཞིན་ནོ། །ཁྱོད་ཇི་སྐད་ཟེར་བ་བཞིན་ཏེ། ཆོས་ཐམས་ཅད་ནི། དོན་
དམ་པ་ལ་རྟོན་པ་ཡིན་ནོ། །དོན་དམ་པ་ནི། དེ་དག་གི་སྒོ་ཡིན་ཏེ། དོན་དམ་པར་དེ་དག་བཙལ་བར་བྱ་བ་ཡིན་ནོ། །ཇི་ལྟར་ཆོས་ཀྱང་མི་སྒྲུབ། ཆོས་མ་ཡིན་པའང་མི་སྒྲུབ་པ་དེ་ལྟར་
དེ་དག་བཙལ་བར་བྱའོ། །གཉིས་སུ་མེད་པ་བཙལ་བ་ནི། འཕགས་པ་རྣམས་ཀྱི་བཙལ་བ་ཡིན་ནོ། །བཙལ་བ་དེ་ནི། བྱེད་པ་མེད་པའོ། །བཙལ་བ་དེ་ནི། བྱ་བ་མ་ཡིན། རྣམ་པར་
བྱ་བ་མ་ཡིན་ནོ། །གང་གི་ཚེ་མི་བྱེད་ཅིང་རྣམ་པར་མི་བྱེད་པ་དེའི་ཚེ་བཙལ་བ་བྱས་པ་ཡིན་ནོ། །གལ་ཏེ་དོན་དང་འགལ་བར་མི་བྱེད་ན། བཙལ་བར་བྱ་བའི་འོས་ཡིན་ནོ། །དེ་
ནས་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཀྱིས་དོན་འདི་བསྟན་པ་ན་དགེ་སློང་ལྔ་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ལྷའི་བུ་བརྒྱད་སྟོང་ནི།
ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །བྱང་ཆུབ་སེམས་དཔའ་སེམས་དཔའ་ཆེན་པོ་སྲེད་མེད་ཀྱི་བུས་ཀྱི་བྱང་ཆུབ་སེམས་དཔའ་དྲི་མ་མེད་པའི་གཟི་
བརྗིད་ལ་གཞན་ཡང་འདི་སྐད་ཅེས་སྨྲས་སོ། །དྲི་མ་མེད་པའི་གཟི་བརྗིད། དེ་བཞིན་གཤེགས་པས་དོན་ལ་རྟོན་པར་བྱའི། ཚིག་འབྲུ་ལ་མ་ཡིན་ཞེས་གསུངས་པ་དེ་ནི། སེམས་
ཅན་འདི་དག་དོན་ལ་མི་མཁས་ཤིང་གཉིས་ལ་སྤྱོད་པ་དང༌། ཚིག་འབྲུ་ལའང་མི་མཁས་པས་ཚིག་འབྲུ་ལ་སྒྲོ་འདོགས་ཤིང་དོན་མི་ཤེས་པའི་ཕྱིར་དེ་དག་ལ་དོན་ལ་རྟོན་པར་བྱའོ་།ཚིག་
འབྲུ་ལ་མ་ཡིན་ཞེས་དེ་བཞིན་གཤེགས་པས་གསུངས་ཏེ། དེ་དག་དོན་ལ་རྟོན་པས་ཚིག་འབྲུ་ལ་རང་བཞིན་མཉམ་པ་ཉིད་དུ་རྟོགས་པས་ཚིག་འབྲུ་ལས་ཡང་དག་པར་འདའ་བར་
འགྱུར་རོ། །རིགས་ཀྱི་བུ། དེ་བཞིན་གཤེགས་པས་ཡང་དག་པའི་ལྟ་བ་སྐྱེ་བ་ལ་ནི། རྒྱུ་གཉིས་དང༌། རྐྱེན་གཉིས་ཡོད་དོ། །ཞེས་དེ་སྐད་གསུངས་པ་དེ་ནི། འདི་ལྟར་ཆོས་འདུལ་བ་མ་
ཐོས་པས་ཏིང་ངེ་འཛིན་ཙམ་གྱིས་ཆོག་པར་འཛིན་པ་དེ་དག་འཁོར་བ་ལས་རྣམ་པར་མ་གྲོལ་བཞིན་དུ་རང་བཞིན་དུ་རང་བཞིན་གྱིས་མངོན་པའི་ང་རྒྱལ་ཅན་ཡིན་ཏེ། རང་བཞིན་གྱིས་མངོན་པའི་ང་
༄༅། །རྒྱལ་ཅན་དེ་དག་ཐོས་པ་མང་པོ་ལ་གཟུད་པའི་ཕྱིར་ཏེ། དེ་དག་གིས་ཆོས་ཐོས་ནས་གལ་ཏེ་ཚུལ་བཞིན་དུ་སྒྲུབ་ན་ནི། དེ་དག་ཀྱང་ལྷག་པའི་ང་རྒྱལ་མེད་པར་
འགྱུར་ཏེ། ལམ་ལ་གནས་པ་དེ་ལ་དགོངས་ནས་བཅོམ་ལྡན་འདས་ཀྱིས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་པ་བྱེད་མི་འགྱུར། །ཐོས་པས་གནོད་པ་
སྤང་བར་འགྱུར། །ཐོས་པས་མྱ་ངན་འདའ་བ་འཐོབ། །ཅེས་གསུངས་སོ། །བྱང་ཆུབ་སེམས་དཔའ་སྤེད་མེད་ཀྱི་བུས་སྨྲས་པ། རིགས་ཀྱི་བུ། ཇི་ལྟར་ན་དགེ་སློང་རྣལ་འབྱོར་སྤྱོད་པ་
ཚུལ་བཞིན་དུ་ཆོས་ལ་སྦྱོར་བ་ཡིན། དྲི་མ་མེད་པའི་གཟི་བརྗིད་ཀྱིས་སྨྲས་པ། གང་དུའང་སྦྱོར་བ་མེད་ལ་འབྲལ་བར་ཡང་མི་བྱེད་ན། དེ་ལྟར་ན་ཚུལ་བཞིན་དུ་ཆོས་ལ་སྦྱོར་བ་
ཡིན་ནོ༑ ༑སྲེད་མེད་ཀྱི་བུ། ཚུལ་བཞིན་དུ་སྦྱོར་བ་ཞེས་བྱ་བ་དེ་ནི། སྦྱོར་བ་མེད་པའི་ཚིག་བླ་དགས་སོ། །སྲེད་མེད་ཀྱི་བུ། གཞན་ཡང་གང་གི་ཚེ་དགེ་སློང་སྦྱོར་བར་མི་བྱེད་
ན༑ ཉེས་པ་ཀུན་ནས་སློང་བར་མི་བྱེད། བདག་ཀུན་ནས་སློང་བར་མི་བྱེད་དེ། དེ་ནི། དེའི་ཚུལ་བཞིན་དུ་སྦྱོར་བའོ། །གང་གི་ཚེ་སྔོན་གྱི་མཐའ་དང༌། ཕྱི་མའི་མཐའ་ལ་སོ་སོར་
རྟོག་སྟེ༑ གང་ལ་སྨྲ་བ་དང༌། གང་སྨྲ་བར་བྱ་བ་དང༌། གང་ཡོངས་སུ་ཤེས་པར་བྱ་བའི་ཕྱིར་སྨྲ་བ་དང༌། གང་སྤང་བའི་ཕྱིར་སྨྲ་བ་དང༌། གང་རྟོགས་པར་བྱ་བའི་ཕྱིར་སྨྲ་བ་དང༌།
གང་བསྒོམ་པའི་ཕྱིར་སྨྲ་བ་དེ་དག་ཐམས་ཅད་འདས་པའི་རྒྱུས་ཐོབ་པ་མ་ཡིན། མ་འོངས་པའི་རྒྱུས་འཐོབ་པ་མ་ཡིན། ད་ལྟར་བྱུང་བའི་རྒྱུས་འཐོབ་པ་མ་ཡིན་པ་འདི་ནི། ཚུལ་བཞིན་
དུ་སྦྱོར་བ་ཞེས་བྱའོ། །གང་གི་ཚེ་ཆོས་ཐམས་ཅད་ངོ་བོ་ཉིད་ཀྱིས་འགགས་པར་མཐོང་བ་དེའི་ཚེ་ཚུལ་བཞིན་དུ་མཐོང་ངོ༌། །གང་གི་ཚེ་ཆོས་ཐམས་ཅད་རང་བཞིན་གྱིས་རྣམ་པར་ཞི་
བ་དང༌། རང་བཞིན་གྱིས་སྙོམས་པར་ཞུགས་པར་མཐོང་བ་དེའི་ཚེ་ཚུལ་བཞིན་དུ་མཐོང་བ་ཡིན་ནོ། །གང་གི་ཚེ་ཆོས་ཐམས་ཅད་གཏན་དུ་མ་སྐྱེས་པར་མཐོང་བ་དེའི་ཚེ་ཚུལ་བཞིན་
དུ་མཐོང་བ་ཡིན་ནོ། །གང་གི་ཚེ་ཆོས་ཐམས་ཅད་གཏན་དུ་མ་སྐྱེས་པ་དང༌། གཏན་དུ་མ་བྱུང་བ་དང༌། གཏན་དུ་ཡོངས་སུ་མྱ་ངན་ལས་འདས་པར་མཐོང་བ་དང༌། གང་གིས་མཐོང་བ་
དང༌། གང་མཐོང་བ་དེའང་མི་མཐོང་བ་དང༌། ཇི་ལྟར་མི་མཐོང་བ་དང༌། རྣམ་པར་མི་མཐོང་བ་དེ་ལྟར་མཐོང་ན། ཚུལ་བཞིན་དུ་མཐོང་བ་ཞེས་བྱའོ། །དེ་ནས་བཅོམ་ལྡན་འདས་ཀྱིས་
ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ལ་ལེགས་སོ། །ཞེས་བྱ་བ་བྱིན་ཏེ། རིགས་ཀྱི་བུ། ལེགས་སོ། །ལེགས་སོ། །གལ་ཏེ་བསྟན་ནམ་བསྟན་པ་ན་དེ་ལྟར་བསྟན་པར་བྱའོ། །
ཚུལ་བཞིན་དུ་བརྩོན་པ་ནི། ཆོས་གང་ལའང་རྨོངས་པ་མེད་དོ། །ཚུལ་བཞིན་དུ་བརྩོན་པ་ནི། ཆོས་གང་ལའང་སྒྲིབ་པ་མེད་དོ། །ཚུལ་བཞིན་དུ་བརྩོན་པ་ནི། གང་དུའང་བཅིངས་པའང་
༄༅། །མེད་གྲོལ་བའང་མེད་དོ། །དེ་ཅིའི་ཕྱིར་ཞེ་ན། ཚུལ་བཞིན་དུ་བརྩོན་པ་ནི། ཆོས་གང་ཡང་སྤང་བའམ་འབྲལ་བར་བྱ་བའི་ཕྱིར་འབད་པ་མེད་དོ། །གང་ཆོས་ཐམས་
ཅད་ཡང་དག་པར་མཐོང་བ་དང༌། ཇི་ལྟ་བ་བཞིན་དུ་མཐོང་བ་དེ་ནི། དེའི་ཡང་དག་པར་ལྟ་བ་ཡིན་ནོ། །ཆོས་རྣམས་ལ་ཇི་ལྟ་བ་བཞིན་དུ་མཐོང་བ་གང་ཞེ་ན། འདི་ལྟ་སྟེ། མཐོང་
བ་མེད་པ་ཁོ་ནའོ། །མཐོང་བ་མེད་པ་ཞེས་བྱ་བ་དེ་ནི། མ་སྐྱེས་པའི་ཚིག་བླ་དྭགས་སོ། །མ་སྐྱེས་པ་ཞེས་བྱ་བ་དེ་ནི། མ་བྱུང་བའི་ཚིག་བླ་དགས་སོ། །མ་བྱུང་བ་ཞེས་བྱ་བ་དེ་ནི།
མ་མཐོང་བའི་ཚིག་བླ་དྭགས་ཏེ། ངས་དེ་ལས་དགོངས་ནས་ཚིག་འདི་སྐད་དུ་ཆོས་ཐམས་ཅད་མ་སྐྱེས་མ་མཐོང་ན། ཡང་དག་པ་ཉིད་སྐྱོན་མེད་པ་ལ་འཇུག་པར་འགྱུར་རོ། །ཞེས་
གསུངས་སོ། །འདི་ནི། ཡང་དག་པའི་ལྟ་བ་སྟེ། འདི་ལྟ་སྟེ། ཡང་དག་པ་ཉིད་སྐྱོན་མེད་པ་ལ་འཇུག་པའོ། །ཅིའི་ཕྱིར་ཡང་དག་པ་ཉིད་སྐྱོན་མེད་པ་ལ་འཇུག་པ་ཞེས་བྱ་ཞེ་ན།
བདག་མཉམ་པ་གང་ཡིན་པ་དེ་ནི། བདག་མེད་པའི་མཉམ་པའོ། །བདག་མེད་པའི་མཉམ་པ་གང་ཡིན་པ་དེ་ནི། ཆོས་ཐམས་ཅད་མཉམ་པ་སྟེ། དེ་བས་ན། ཡང་དག་པ་
ཉིད་སྐྱོན་མེད་པ་ལ་འཇུག་པ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྲེད་མེད་ཀྱི་བུས་འདི་སྐད་ཅེས་གསོལ་ཏོ། །བཅོམ་ལྡན་
འདས༑ འདི་ལྟར་བྱང་ཆུབ་སེམས་དཔས་ཆོས་ཐམས་ཅད་འདི་ལྟ་བུའི་མཚན་ཉིད་དང༌། རང་བཞིན་གྱིས་ཡོངས་སུ་མྱ་ངན་ལས་འདས་པའི་ཚུལ་དུ་ཆོས་ཀྱི་རྣམ་གྲངས་འདི་ཡང་དག་པར་
ཤེས་ཤིང་ཐོས་ལ་ཡིད་ཆེས་ཤིང་མོས་སུ་ལགས་ཀྱང་བར་མ་དོར་ཡོངས་སུ་མྱ་ངན་ལས་འདའ་བར་མི་འགྱུར་བ་ནི། བཅོམ་ལྡན་འདས། ངོ་མཚར་ལགས་སོ། །བདེ་བར་གཤེགས་
པ༑ ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྲེད་མེད་ཀྱི་བུ། འདི་ལྟར་བྱང་ཆུབ་སེམས་དཔའ་ཐབས་ལ་མཁས་པ་དེ་དག་ནི། ཐབས་ལ་མཁས་པ་དེ་དང་
ལྡན་པས་སེམས་བསྐྱེད་པ་ཐམས་ཅད་ལ་ཆོས་བཞིས་ཡོངས་སུ་སྒོ་བར་བྱེད་དེ། བཞི་གང་ཞེ་ན། འདི་ལྟ་སྟེ། བྱམས་པ་ཆེན་པོ་དང༌། སྙིང་རྗེ་ཆེན་པོ་དང༌། ཐམས་ཅད་མཁྱེན་
པའི་ཡེ་ཤེས་དང༌། སངས་རྒྱས་འབྱུང་བས་ཆོས་ཀྱི་ཚུལ་རྒྱུན་མི་འཆད་པར་བྱ་བ་སྟེ། སྲེད་མེད་ཀྱི་བུ། ཆོས་བཞི་པོ་དེ་དག་གིས་ཆོས་ཐམས་ཅད་ཡོངས་སུ་སྒོ་བར་བྱེད་དེ། ཆོས་
ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་ཤེས་ཤིང་ཐོས་ལ་ཡིད་ཆེས་ཤིང་མོས་སུ་ཟིན་ཀྱང་བར་མ་དོར་ཡོངས་སུ་མྱ་ངན་ལས་འདའ་བར་མི་འགྱུར་རོ། །དེས་
སེམས་ཅན་རྣམས་ཀྱི་དོན་གྱི་ཕྱིར་ཆོས་འདུལ་བ་འདི་ཤེས་ཏེ། ཤེས་ཤིང་མཐོང་ལ་ངེས་པ་ནི། མི་མཐོང་ངོ༌། །དེ་ཅིའི་ཕྱིར་ཞེ་ན། དེས་སེམས་ཅན་ཐམས་ཅད་ཡོངས་སུ་མ་བཏང་བའི་
༄༅། །ཕྱིར་རོ༑ ༑དེ་ནས་བཅོམ་ལྡན་འདས་ལ་ཚན་པོ་ཆེ་ཆེན་པོ་དྲི་མ་མེད་པའི་གཟི་བརྗིད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བཅོམ་ལྡན་འདས་
ཀྱིས་ངེས་པར་ལྟུང་བར་འགྱུར་རོ། །ཞེས་དེ་སྐད་གསུངས་པའི་བྱང་ཆུབ་སེམས་དཔའི་སྐྱོན་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱང་ཆུབ་
སེམས་དཔའ་རྣམས་ལ་ནི། སྐྱོན་གང་ཡིན་པའི་ལྟ་བར་གྱུར་པའང་ཅིའང་མེད་ལ་རྣམ་པར་རྟོག་པའང་ཅིའང་མེད་མོད་ཀྱི། འོན་ཀྱང་ཉན་ཐོས་ཀྱི་ཐེག་པ་ལ་དམིགས་པ་བྱས་ནས་
སེམས་ཅན་ཐམས་ཅད་ལ་མ་དམིགས། སངས་རྒྱས་ཀྱི་རིགས་ལ་མ་དམིགས། ཆོས་དང༌། དགེ་འདུན་གྱི་རིགས་ལ་མི་དམིགས། ཐེག་པ་ཆེན་པོ་ལ་དམིགས་ཏེ། ཐམས་
ཅད་མཁྱེན་པ་ཡལ་བར་བོར་ནས་མི་ལྟ་བ་དང༌། ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་མི་འདེབས་པ་དང༌། འདུས་བྱས་ཐམས་ཅད་ལ་སྐྱོ་བས་ཉན་ཐོས་ཀྱི་སྐྱོན་མེད་
པ་ལ་འཇུག་པར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོས་ནི། སེམས་ཅན་ཐམས་ཅད་ལ་དམིགས་པ་བྱས་ཏེ་དཀོན་མཆོག་གསུམ་གྱི་རིགས་ལ་དམིགས་པ་
བྱས་ཤིང་ཐེག་པ་ཆེན་པོ་ལ་དམིགས་པ་བྱས་ནས་ཐམས་ཅད་མཁྱེན་པའི་ཡེ་ཤེས་ལ་ལྟ་སྟེ། ལུས་དང་སྲོག་ལ་མི་ལྟའོ། །ཆོས་ཐམས་ཅད་མཚན་ཉིད་གཅིག་པར་ཤེས་ཀྱང་
སྐྱོན་མེད་པ་ལ་འཇུག་པར་མི་བྱེད། སེམས་ཅན་ལ་བལྟ་བའི་ཕྱིར་བསམ་གཏན་ཡང་འདྲིས་པར་བྱེད་ལ། ཉན་ཐོས་ཀྱི་སྐྱོན་མེད་པར་ཡང་མི་ལྟུང་སྟེ། རིགས་ཀྱི་བུ། རྣམ་གྲངས་དེས་ཀྱང་
ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་སྐྱོན་ཡང་མེད་ལ། སྐྱོན་མེད་པ་ལའང་འཇུག་པར་མི་བྱེད་པ་དེ་ལྟར་རིག་པར་བྱའོ། །དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་
ཆེན་པོ་ཆེ་ཆེན་པོ་འདྲི་མ་མེད་པའི་གཟི་བརྗིད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྨད་དུ་བྱུང་བའི་ཆོས་དེ་ལ་ཉན་ཐོས་
དང༌། རང་སངས་རྒྱས་ཐམས་ཅད་ཀྱིས་མ་མཆིས་པ་ནི། ངོ་མཚར་ལགས་སོ། །དེ་ནས་འཇམ་དཔལ་གཞོན་ནུར་གྱུར་པ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ །དེ་ནས་བཅོམ་ལྡན་
འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྲེད་མེད་ཀྱི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། འཇམ་དཔལ་གཞོན་ནུར་གྱུར་པ་འདི་བསོད་ནམས་ཐམས་
ཅད་བསྡུས་པའི་ཏིང་ངེ་འཛིན་འདིའི་སྐབས་སུ་བཀའ་མཆིད་ཀྱི་རྒྱུད་ཅིའང་མི་མཆི་ལགས་སོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་
སྲེད་མེད་ཀྱི་བུ་ལ་འདི་སྐད་ཅེས་སྨྲས་སོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ནི། བསོད་ནམས་འདོད་པའི་ཕྱིར་བྱང་ཆུབ་ཏུ་སྤྱོད་པར་མི་བྱེད་དོ། །རྙེད་པ་དང༌།
༄༅། །བཀུར་སྟི་དང༌། ཚིགས་སུ་བཅད་པ་འདོད་པ་དང༌། མཐོ་རིས་འདོད་པ་དང༌། ལོངས་སྤྱོད་འདོད་པ་དང༌། འཁོར་འདོད་པ་དང༌། གྲགས་པ་དང༌། སྙན་པ་དང༌། བསྔགས་
པ་འདོད་པའི་ཕྱིར་བྱང་ཆུབ་ཏུ་སྤྱོད་པ་མི་བྱེད་དོ། །སྲེད་མེད་ཀྱི་བུས་སྨྲས་པ། འཇམ་དཔལ། འོ་ན་ཅིའི་ཕྱིར་བྱང་ཆུབ་སེམས་དཔའ་རྣམས་བྱང་ཆུབ་ཏུ་སྤྱོད་པར་བྱེད། འཇམ་དཔལ་གྱིས་
སྨྲས་པ༑ རིགས་ཀྱི་བུ། བྱང་ཆུབ་སེམས་དཔའ་རྣམས་ནི། སེམས་ཅན་ཐམས་ཅད་ལ་སྙིང་རྗེ་བའི་ཕྱིར་བྱང་ཆུབ་ཏུ་སྤྱོད་པར་བྱེད་དོ། །བྱང་ཆུབ་སེམས་དཔའ་རྣམས་ནི། ཆོས་
འདོད་པ་དང༌། སེམས་ཅན་ཐམས་ཅད་ཀྱི་སྡུག་བསྔལ་བསལ་བར་འདོད་པ་དང༌། ཡང་དག་པ་མ་ཡིན་པའི་ཉོན་མོངས་པ་རབ་ཏུ་ཞི་བར་འདོད་པ་དང༌། བདག་གི་སྡུག་བསྔལ་དང་
འདྲ་བར་འདོད་པ་དང༌། ལན་དུ་ཕན་འདོགས་པ་མི་འདོད་པའི་ཕྱིར་བྱང་ཆུབ་ཏུ་སྤྱོད་པར་བྱེད་དོ། །རིགས་ཀྱི་བུ། བྱང་ཆུབ་སེམས་དཔའ་ལུས་དང་སེམས་ལ་མི་ལྟ་བ་དང༌། ཡོངས་
སུ་འཛིན་པ་མེད་པ་དང༌། མི་འཕྲོག་པ་དང༌། ལྷག་པར་ཞེན་པ་མེད་པ་དང༌། མཚན་མ་མེད་པ་དང༌། ཡིད་ལ་བྱེད་པ་མེད་པ་དང༌། མི་ལྡོག་པ་དང༌། ཕྱིར་མི་ལྡོག་པའི་ཆོས་ཅན་
དང༌། ཡང་དག་པར་རྟོག་པར་མི་བྱེད་པ་དང༌། བསྐྱོད་དུ་མེད་པ་དང༌། རྗེས་སུ་ཆགས་པ་མེད་པ་དང༌། ཁོང་ཁྲོ་བ་མེད་པ་དང༌། གཅིག་ཏུ་དཔའ་བ་དང༌། ཐུབ་པ་མེད་པ་དང༌།
གོང་བ་མེད་པ་དང༌། མི་སྐྲག་པ་དང༌། མི་འཇིགས་པ་དང༌། ཀུན་ཏུ་རབ་ཏུ་མི་འཇིགས་པ་དང༌། མ་ཁེངས་པ་དང༌། མ་དུད་པ་དང༌། བརྟན་པ་དང༌། མི་གཡོ་བ་ཐོབ་པ་དང༌། དབེན་པ་ལས་
སྐྱེས་པ་དང༌། དོན་གཅིག་པ་དང༌། ཚུལ་གཅིག་པ་དང༌། གཅིག་ཏུ་ཆད་པ་དང༌། ཚུལ་གཅིག་ལ་ཞུགས་པ་དང༌། གཅིག་ཏུ་ངེས་པར་བརྩོན་པ་དང༌། སེམས་ཅན་ཐམས་ཅད་བསྒྲལ་བར་འདོད་
བ་དང༌། གཅིག་ཏུ་འདོད་པ་དང༌། དེ་ཉིད་འདོད་པ་རྣམས་ནི། བྱང་ཆུབ་ཏུ་སྤྱོད་པར་བྱེད་དོ། །སྨྲས་པ། འཇམ་དཔལ། ཇི་ལྟར་ན། བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་ལ་སྤྱོད་
པ་ཡིན༑ སྨྲས་པ། རིགས་ཀྱི་བུ། གང་གི་ཚེ་བྱང་ཆུབ་སེམས་དཔའ་བྱང་ཆུབ་དེ་ཟད་པའི་ཕྱིར་དང༌། སྐྱེ་བའི་ཕྱིར་དང༌། མི་ཟད་པའི་ཕྱིར་དང༌། མི་སྐྱེ་བའི་ཕྱིར་མི་སྤྱོད་དེ། གཏན་དུ་ཟད་པ་
དང༌། ཟད་པ་མེད་པའི་ཕྱིར་རློམ་སེམས་སུ་མི་བྱེད་ལ། གཏན་དུ་མི་སྐྱེ་བའང་འཁྲུག་པར་མི་བྱེད་དེ། དེ་ལྟར་སྤྱོད་པའི་བྱང་ཆུབ་སེམས་དཔའ་ནི། བྱང་ཆུབ་སེམས་དཔའི་སྤྱད་པ་ལ་
སྤྱོད་པ་ཡིན་ནོ། །སྲེད་མེད་ཀྱི་བུ། གཞན་ཡང་བྱང་ཆུབ་སེམས་དཔའ་འདས་པའི་སེམས་ཟད་དོ། །ཞེས་སྤྱོད་པར་མི་བྱེད། མ་འོངས་པའི་སེམས་མ་ཕྱིན་ཏོ། །ཞེས་སྤྱོད་པར་མི་བྱེད།
ད་ལྟར་བྱུང་བའི་སེམས་མི་གནས་སོ། །ཞེས་སྤྱོད་པར་མི་བྱེད་ལ། འདས་པ་དང༌། མ་འོངས་པ་དང༌། ད་ལྟར་བྱུང་བའི་སེམས་ཅན་རྣམས་དང༌། ཆགས་པར་མི་བྱེད་དེ། དེ་ལྟར་སྤྱོད་
༄༅། །པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། བྱང་ཆུབ་སེམས་དཔའི་སྤྱད་པ་ལ་སྤྱོད་པ་ཡིན་ནོ། །སྲེད་མེད་ཀྱི་བུ། གཞན་ཡང་བྱང་ཆུབ་སེམས་དཔའ་ནི། སྦྱིན་
པ་དང༌། བྱང་ཆུབ་དང༌། སེམས་ཅན་རྣམས་དང༌། དེ་བཞིན་གཤེགས་པ་འདི་ལ་གཉིས་སུ་མེད་པར་སྤྱོད་དོ། །ཚུལ་ཁྲིམས་དང༌། བྱང་ཆུབ་དང༌། སེམས་ཅན་རྣམས་དང༌། དེ་བཞིན་
གཤེགས་པ་འདི་ལ་གཉིས་སུ་མེད་པར་སྤྱོད་དོ། །བཟོད་པ་དང༌། བྱང་ཆུབ་དང༌། སེམས་ཅན་རྣམས་དང༌། དེ་བཞིན་གཤེགས་པ་འདི་ལ་གཉིས་སུ་མེད་པར་སྤྱོད་དོ། །བརྩོན་འགྲུས་
དང༌། བྱང་ཆུབ་དང༌། སེམས་ཅན་རྣམས་དང༌། དེ་བཞིན་གཤེགས་པ་འདི་ལ་གཉིས་སུ་མེད་པར་སྤྱོད་དོ། །བསམ་གཏན་དང༌། བྱང་ཆུབ་དང༌། སེམས་ཅན་རྣམས་དང༌། དེ་བཞིན་
གཤེགས་པ་འདི་ལ་གཉིས་སུ་མེད་པར་སྤྱོད་དོ། །ཤེས་རབ་དང༌། བྱང་ཆུབ་དང༌། སེམས་ཅན་རྣམས་དང༌། དེ་བཞིན་གཤེགས་པ་འདི་ལ་གཉིས་སུ་མེད་པར་སྤྱོད་དེ། གང་
གི་ཚེ་བྱང་ཆུབ་སེམས་དཔའ་རྣམས་དེ་ལྟར་ཕ་རོལ་ཏུ་ཕྱིན་པ་རྣམས་ལ་སྤྱོད་ལ། སྤྱོད་པའི་མཚན་ཉིད་དང༌། ངོ་བོ་ཉིད་ཀྱང་འཁྲུག་པར་མི་བྱེད་ན། དེ་ཙམ་གྱིས་ན་བྱང་ཆུབ་སེམས་དཔའ་
རྣམས་བྱང་ཆུབ་ཀྱི་སྤྱད་པ་ལ་སྤྱོད་པ་ཞེས་བྱའོ། །སྲེད་མེད་ཀྱི་བུ། གཞན་ཡང་བྱང་ཆུབ་སེམས་དཔའ་གཟུགས་སྟོང་ཞེས་མི་སྤྱོད་དེ། གཟུགས་ཉིད་སྟོང་པ་ཉིད་དང༌། དེ་བཞིན་དུ་
ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་སྟོང་ཞེས་མི་སྤྱོད་དེ། རྣམ་པར་ཤེས་པ་ཉིད་སྟོང་པའོ། །གཟུགས་ནི། སྟོང་པ་ཉིད་ཀྱིས་ཟད་པར་མི་བྱེད་དེ། གཟུགས་
ནི༑ སྟོང་པ་ཉིད་ཀྱི་ངོ་བོ་ཉིད་ཀྱིས་གཏན་དུ་ཟད་པ་ཁོ་ནའོ། །དེ་བཞིན་དུ་སྟོང་པ་ཉིད་ཀྱིས་ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ཟད་པར་མི་བྱེད་དེ། སྟོང་པ་
ཉིད་ཀྱི་ངོ་བོ་ཉིད་ཀྱིས་རྣམ་པར་ཤེས་པ་གཏན་དུ་ཟད་པ་ཁོ་ནའོ། །ཆོས་ཐམས་ཅད་ནི། ངོ་བོ་ཉིད་ཀྱིས་ཟག་པ་ཁོ་ནས་ཟད་པ་ཡིན་ཏེ། གཟུགས་ཟད་པས་ཆོས་ཐམས་ཅད་ཟད་པ་མ་ཡིན་
ནོ༑ ༑ཚོར་བ་ཟད་པ་དང༌། འདུ་ཤེས་ཟད་པ་དང༌། འདུ་བྱེད་རྣམས་ཟད་པ་དང༌། རྣམ་པར་ཤེས་པ་ཟད་པས་ཆོས་ཐམས་ཅད་ཟད་པ་མ་ཡིན་ཏེ། དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་
དཔའ་ཆེན་པོ་ནི། བྱང་ཆུབ་སེམས་དཔའི་སྤྱད་པ་ལ་སྤྱོད་པ་ཡིན་ནོ། །སྲེད་མེད་ཀྱི་བུ། གཞན་ཡང་བྱང་ཆུབ་སེམས་དཔའ་ནི། སོ་སོའི་སྐྱེ་བོའི་ཆོས་རྣམས་སྤང་བའི་ཕྱིར་ཡང་འབད་པར་མི་
བྱེད་ལ༑ སངས་རྒྱས་ཀྱི་ཆོས་རྣམས་བསྐྱེད་པའི་ཕྱིར་ཡང་སྤྱོད་པར་མི་བྱེད་དོ། །འཁོར་བ་ལས་ཡང་དག་པར་འདའ་བའི་ཕྱིར་དང༌། མྱ་ངན་ལས་འདས་པ་ཡོངས་སུ་རྫོགས་པར་བྱ་བའི་
ཕྱིར་སྤྱོད་པར་མི་བྱེད་དོ། །མི་དགེ་བའི་ཆོས་ཡོངས་སུ་འགྲུབ་པར་ཡང་མི་མཐོང་ལ། དགེ་བའི་ཆོས་ཡང་དག་པར་འགྲུབ་པར་ཡང་མི་མཐོང་ངོ༌། །ཤེས་བྱ་ལ་མ་གཏོགས་པར་ཤེས་པ་
༄༅། །ཡང་དག་པར་མི་མཐོང་སྟེ། བྱང་ཆུབ་སེམས་དཔའ་ནི། ཆོས་ཀྱི་དབྱིངས་དབྱེར་མེད་པར་སྤྱོད་པ་ལ་མོས་པ་ཡིན་ཏེ། སྲེད་མེད་ཀྱི་བུ། དེ་ལྟར་སྤྱོད་པའི་བྱང་ཆུབ་
སེམས་དཔའ་ནི། བྱང་ཆུབ་སེམས་དཔའི་སྤྱད་པ་ལ་སྤྱོད་པ་ཡིན་ནོ། །སྲེད་མེད་ཀྱི་བུ། གཞན་ཡང་བྱང་ཆུབ་སེམས་དཔའ་ནི། སེམས་ཅན་གྱི་ཁམས་ཚད་མེད་པ་དང༌། ཆོས་ཀྱི་
དབྱིངས་ཚད་མེད་པར་ཡང་མོས་ལ། སེམས་ཅན་གྱི་ཁམས་ཀྱང་ཟད་པར་མི་བྱེད་ཅིང་ཆུད་གཟན་པའི་ཕྱིར་ཡང་སྤྱོད་པར་མི་བྱེད་དོ། དེ་ཅིའི་ཕྱིར་ཞེ་ན། སེམས་ཅན་གྱི་ཁམས་དང༌།
ཆོས་ཀྱི་དབྱིངས་དེ་གཉིས་སུ་མེད་དེ། གཉིས་སུ་དབྱེར་མེད་ཅིང་མཚན་ཉིད་མེད་པའི་ཕྱིར་རོ། །ཆོས་ཀྱི་དབྱིངས་ཀྱང་འཕེལ་བའང་མེད། ཡོངས་སུ་འགྲིབ་པའང་མེད་ལ། སེམས་ཅན་
གྱི་ཁམས་ཀྱང་འཕེལ་བའང་མེད། ཡོངས་སུ་འགྲིབ་པའང་མེད་དོ། །ཆོས་ཀྱི་དབྱིངས་ཀྱི་མཚན་ཉིད་གང་ཡིན་པ་དེ་ནི། སེམས་ཅན་གྱི་ཁམས་ཀྱི་མཚན་ཉིད་ཀྱང་དེ་ཉིད་ཡིན་ནོ། །སྲེད་
མེད་ཀྱི་བུ། གཞན་ཡང་བྱང་ཆུབ་སེམས་དཔས་ཆོས་ཐམས་ཅད་མཚན་ཉིད་མེད་པར་ཤེས་ནས་ཆོས་ཀྱི་དབྱིངས་དང༌། སེམས་ཅན་གྱི་ཁམས་ཟད་པའི་ཕྱིར་ཡང་མི་སྤྱོད། འཕེལ་
བའི་ཕྱིར་ཡང་མི་སྤྱོད་དོ། །འདི་ལ་ཡང་དག་པ་མ་ཡིན་པར་ཡོངས་སུ་བརྟགས་པ་ལས་བྱུང་བ་དང༌། ཕྱིན་ཅི་ལོག་ལས་བྱུང་བ་དང༌། རྣམ་པར་བསྒྲུབས་པས་ཉེ་བར་གནས་པའི་ཉོན་
མོངས་པ་ཡོངས་སུ་ཤེས་པར་བྱ་བའི་ཕྱིར་སྤྱོད་ཀྱི། འཁོར་བའི་གནོད་པ་གཞིག་པའི་ཕྱིར་དང༌། བདག་དང༌། སེམས་ཅན་དང༌། སྲོག་དང༌། གང་ཟག་གཞིག་པའི་ཕྱིར་སྤྱོད་པར་མི་བྱེད་དེ།
སྲེད་མེད་ཀྱི་བུ། དེ་ལྟར་སྤྱོད་པའི་བྱང་ཆུབ་སེམས་དཔའ་ནི། བྱང་ཆུབ་སེམས་དཔའི་སྤྱོད་པ་ལ་སྤྱོད་པ་ཡིན་ནོ། །བམ་པོ་བཞི་པ་སྟེ་ཐ་མ། འཇམ་དཔལ་གཞོན་ནུར་གྱུར་པས་
སྤྱོད་པའི་ལེའུའི་ཆོས་བསྟན་པ་འདི་བཤད་པ་ན་ཐེག་པ་ཆེན་པོ་ལ་ཡང་དག་ཞུགས་པའི་ལྷའི་བུ་བཅུ་དྲུག་གིས་མི་སྐྱེ་བའི་ཆོས་ལ་བཟོད་པ་ཐོབ་བོ། །དེ་ནས་ཚན་པོ་ཆེ་ཆེན་པོ་དྲི་མ་མེད་པའི་
གཟི་བརྗིད་ཀྱིས་ཆོས་ཀྱི་རྣམ་གྲངས་འདི་ལ་མཆོད་པའི་ལས་བྱ་བ་དང༌། ཡོངས་སུ་གཟུང་བའི་ཕྱིར་བཅོམ་ལྡན་འདས། ཆོས་ཀྱི་རྣམ་གྲངས་འདི་ལ་མོས་པའི་སེམས་ཅན་གང་དག་ལགས་
པ་དེ་དག་གི་དོན་ཐམས་ཅད་འགྲུབ་པར་འགྱུར་ལགས་སོ། །ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་ལྷའི་བུ་བདུད་བྲལ་གྱི་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་
སོ༑ ༑འཇམ་དཔལ། བདག་གིས་ཀྱང་བྱང་ཆུབ་སེམས་དཔའ་སེམས་དྤའྖེན་པོས་ཇི་ལྟར་སྤྱད་ན། བྱང་ཆུབ་སེམས་དཔའི་སྤྱད་པ་སྤྱོད་པ་ལ་སྤོབས་སོ། །འཇམ་དཔལ་གྱིས་སྨྲས་པ། ལྷའི་
བུ༑ ཁྱོད་ཀྱིས་དེའི་དུས་ལ་དབབ་པར་ཤེས་ན། སྤོབས་པར་གྱིས་ཤིག །ལྷའི་བུས་སྨྲས་པ། འཇམ་དཔལ། ཆོས་ཐམས་ཅད་ལ་སྤྱོད་པ་གང་ཡིན་པ་དེ་ནི། བྱང་ཆུབ་སེམས་དཔའི་སྤྱོད་
༄༅། །པའོ༑ ༑བདུད་ཐམས་ཅད་ཀྱི་སྤྱོད་པ་གང་ཡིན་པ་དེ་ནི། བྱང་ཆུབ་སེམས་དཔའི་སྤྱོད་པའོ། །སེམས་ཅན་ཐམས་ཅད་ཀྱི་སྤྱོད་པ་གང་ཡིན་པ་དེ་ནི། བྱང་ཆུབ་སེམས་
དཔའི་སྤྱོད་པའོ། །སློབ་པ་དང་མི་སློབ་པ་ཐམས་ཅད་ཀྱི་སྤྱོད་པ་གང་ཡིན་པ་དེ་ནི། བྱང་ཆུབ་སེམས་དཔའི་སྤྱོད་པའོ། །རང་སངས་རྒྱས་ཐམས་ཅད་ཀྱི་སྤྱོད་པ་གང་ཡིན་པ་དེ་ནི། བྱང་ཆུབ་
སེམས་དཔའི་སྤྱོད་པའོ། །སངས་རྒྱས་ཐམས་ཅད་ཀྱི་སྤྱོད་པ་གང་ཡིན་པ་དེ་ནི། བྱང་ཆུབ་སེམས་དཔའི་སྤྱོད་པའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོས་
ཐམས་ཅད་ལ་བསླབ་དགོས་པའི་ཕྱིར་རོ། །དེ་ནས་བྱང་ཆུབ་སེམས་དཔའ་སྲེད་མེད་ཀྱི་བུས་ལྷའི་བུ་བདུད་བྲལ་ལ་འདི་སྐད་ཅེས་སྨྲས་སོ། །ལྷའི་བུ། བྱང་ཆུབ་སེམས་དཔའ་སེམས་
དཔའ་ཆེན་པོས་ཆོས་ཐམས་ཅད་ཀྱི་སྤྱོད་པ་འདི་ལ་ཇི་ལྟར་སྤྱད་པར་བྱ། ལྷའི་བུས་སྨྲས་པ། སྲེད་མེད་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོས་ནི། སེམས་ཅན་གྱི་སྤྱོད་
པ་བརྒྱད་ཁྲི་བཞི་སྟོང་ལ་བསླབ་པར་བྱ་སྟེ། སེམས་ཅན་གྱི་སྤྱོད་པ་བརྒྱད་ཁྲི་བཞི་སྟོང་པོ་གང་ཞེ་ན། འདི་ལྟ་སྟེ། འདོད་ཆགས་སྤྱོད་པ་རྣམས་ཀྱི་ཉི་ཁྲི་ཆིག་སྟོང་དང༌། ཞེ་སྡང་སྤྱོད་
པ་རྣམས་ཀྱི་ཉི་ཁྲི་ཆིག་སྟོང་དང༌། གཏི་མུག་སྤྱོད་པ་རྣམས་ཀྱི་ཉི་ཁྲི་ཆིག་སྟོང་དང༌། ཆ་མཉམ་པར་སྤྱོད་པ་རྣམས་ཀྱི་ཉི་ཁྲི་ཆིག་སྟོང་ངོ༌། །བྱང་ཆུབ་སེམས་དཔའ་སེམས་དཔའ་ཆེན་
པོས་སེམས་ཅན་དེ་དག་ཐམས་ཅད་ཀྱི་སྤྱོད་པ་དེ་ལའང་འཇུག་པར་བྱ་སྟེ། དེས་འདོད་ཆགས་སྤྱོད་པ་ལ་སྤྱད་པར་བྱ་ཞིང་འདོད་ཆགས་དང་བྲལ་བར་ཡང་བྱའོ། །ཞེ་སྡང་སྤྱོད་པ་ལ་སྤྱད་
པར་བྱ་ཞིང་ཞེ་སྡང་དང་ཡང་བྲལ་བར་བྱའོ། །གཏི་མུག་སྤྱོད་པ་ལ་སྤྱད་པར་བྱ་ཞིང་གཏི་མུག་དང་བྲལ་བར་ཡང་བྱའོ། །ཉེས་པ་ཐམས་ཅད་སྤྱོད་པ་ལ་སྤྱད་པར་བྱ་ཞིང་ཉེས་པ་ཐམས་
ཅད་དང་བྲལ་བར་ཡང་བྱའོ། །བྱང་ཆུབ་སེམས་དཔའ་གང་སྤྱད་པ་ཐམས་ཅད་ལའང་སྤྱོད་ལ། སྤྱོད་པ་ཐམས་ཅད་ཀྱིས་ཀྱང་མི་གོས་པ་དང༌། སེམས་ཅན་ཐམས་ཅད་ཡོངས་སུ་སྨིན་པར་
བྱ་བའི་ཕྱིར་སྤྱོད་པ་ཐམས་ཅད་ཀྱང་འགྲུབ་པར་སྣང་བའི་བྱང་ཆུབ་སེམས་དཔའ་དེ་ནི། བྱང་ཆུབ་སེམས་དཔའི་སྤྱད་པ་སྤྱོད་པ་ཡིན་ནོ། །བྱང་ཆུབ་སེམས་དཔའ་སྲེད་མེད་ཀྱི་བུས་སྨྲས་པ།
ལྷའི་བུ༑ ཇི་ལྟར་ན་བདུད་ཐམས་ཅད་ཀྱི་སྤྱོད་པ་གང་ཡིན་པ་དེ་བྱང་ཆུབ་སེམས་དཔའི་སྤྱོད་པ་ཡིན། ལྷའི་བུས་སྨྲས་པ། བྱང་ཆུབ་སེམས་དཔས་ནི། སེམས་ཀྱི་འཇུག་པ་རྣམས་ལས་
བདུད་ཐམས་ཅད་ཀྱི་སྤྱོད་པ་བལྟ་བར་བྱ་སྟེ། བདུད་ཀྱི་ལས་བྱུང་ངོ་ཅོག་གི་དབང་དུའང་འགྲོ་བར་མི་བྱའོ། །བདུད་ཀྱི་ལས་ཀྱི་ཉིད་མཚམས་སྦྱོར་བར་ཡང་མི་བྱའོ། །སྤྱོད་པ་ཐམས་
ཅད་ལ་འཇུག་པའང་སྦྱོར་བར་བྱའོ། །བདུད་གཅིག་ཏུ་ངེས་པར་ཡང་བསྟན་པར་བྱ་སྟེ། དེའི་དབང་དུ་འགྲོ་བར་ཡང་མི་བྱའོ། །དེས་བདུད་ཀྱི་རྣམ་པར་སྨིན་པ་ལའང་བསླབ་པར་བྱ་སྟེ།
༄༅། །བདུད་ཀྱི་ལས་དང་འབྲལ་བར་ཡང་བྱའོ། །སྨྲས་པ། ལྷའི་བུ། ཇི་ལྟར་ན་སློབ་པ་དང༌། མི་སློབ་པ་དང༌། རང་སངས་རྒྱས་ཐམས་ཅད་ཀྱི་སྤྱོད་པ་གང་ཡིན་པ་དེ་བྱང་ཆུབ་
སེམས་དཔའི་སྤྱོད་པ་ཡིན། སྨྲས་པ། རིགས་ཀྱི་བུ། འདི་ལྟར་བྱང་ཆུབ་སེམས་དཔས་སྤྱོད་པ་ཐམས་ཅད་ངོ་བོ་ཉིད་མེད་པའི་སྤྱོད་པ་དང༌། རྣམ་པར་སྨིན་པ་མེད་པའི་སྤྱོད་པ་དང༌། གནས་པ་
མེད་པའི་སྤྱོད་པ་དང༌། འཕོ་བ་མེད་པའི་སྤྱོད་པ་དང༌། སྐྱེ་བ་མེད་པའི་སྤྱོད་པ་ལ་མོས་པ་རྣམས་ལ་སྦྱོར་བར་བྱའོ། །དེ་ནས་ལྷའི་བུ་བདུད་བྲལ་གྱིས་བསྟན་པ་འདི་བཤད་ནས་འཇམ་དཔལ་
གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བདག་གི་སྤོབས་པ་ནི། དེ་ཙམ་དུ་བས་ཀྱི། སྤྱོད་པ་བཤད་པ་འདི་ལས་བརྩམས་ཏེ་རྒྱས་པར་ཁྱོད་སྤོབས་པར་མཛོད་ཅིག།
དེ་ནས་འཇམ་དཔལ་གཞོན་ནུར་གྱུར་པས་ལྷའི་བུ་དེ་ལ་འདི་སྐད་ཅེས་སྨྲས་སོ། །ལྷའི་བུ། བྱང་ཆུབ་སེམས་དཔའི་སྤྱོད་པ་ནི། ཡུལ་ཐམས་ཅད་ལས་ཡང་དག་པར་འདས་པ་ཡིན་ནོ། །
དེ་ཅིའི་ཕྱིར་ཞེ་ན། སྤྱོད་པ་དེ་ནི། མིག་དང་གཟུགས་ཀྱི་ཡུལ་དུ་བགྲང་བ་མ་ཡིན་པའོ། །རྣ་བ་དང་སྒྲ་དང༌། སྣ་དང་དྲི་དང༌། ལྕེ་དང་རོ་དང༌། ལུས་དང་རེག་བྱ་དང༌། ཡིད་དང་ཆོས་ཀྱི་ཡུལ་
དུ་བགྲང་བ་མ་ཡིན་ཏེ། ལྷའི་བུ། རྣམ་གྲངས་དེས་ཀྱང་ཁྱོད་ཀྱིས་ཅི་ནས་སྐྱེས་བུ་དམ་པ་དེ་དག་གི་སྤྱོད་ཡུལ་ཐམས་ཅད་ལས་ཡང་དག་པར་འདས་པ་ཡིན་པར་དེ་ལྟར་རིག་པར་བྱའོ།།
ལྷའི་བུ༑ གཞན་ཡང་བྱང་ཆུབ་སེམས་དཔའ་སྤྱོད་པ་གང་ལ་སྤྱོད་ན། སངས་རྒྱས་བཅོམ་ལྡན་འདས་རྣམས་མི་མཉེས་པར་མི་བྱེད་པ་དེ་ལྟར་སྤྱོད་པའི་བྱང་ཆུབ་སེམས་དཔའ་ནི། བྱང་ཆུབ་
སེམས་དཔའི་སྤྱད་པ་ལ་སྤྱོད་པ་ཡིན་ནོ། །ལྷའི་བུས་སྨྲས་པ། འཇམ་དཔལ། བྱང་ཆུབ་སེམས་དཔས་ཇི་ལྟར་སྤྱད་ན་སངས་རྒྱས་བཅོམ་ལྡན་འདས་རྣམས་མཉེས་པར་བགྱིད། འཇམ་
དཔལ་གྱིས་སྨྲས་པ། ལྷའི་བུ། དེ་བཞིན་གཤེགས་པས་ནི། ཆོས་ཐམས་ཅད་ཡང་དག་པར་སྟོང་པར་མངོན་པར་རྫོགས་པར་སངས་རྒྱས་ཏེ། གལ་ཏེ་བྱང་ཆུབ་སེམས་དཔའ་ལྟ་བ་
འགའ་ཞིག་ལ་མངོན་པར་ཞེན་ཏེ། ཐ་ན་སངས་རྒྱས་ཀྱི་ཆོས་དང༌། མྱ་ངན་ལས་འདས་པའི་ལྟ་བ་ལ་མངོན་པར་ཞེན་ནའང་དེ་བཞིན་གཤེགས་པ་རྣམས་ཀྱི་སྐུ་སླུ་བ་ཡིན་ནོ། །ལྷའི་བུ། དེ་
བཞིན་གཤེགས་པས་ནི། ཆོས་ཐམས་ཅད་ཡང་དག་པར་མཚན་མ་མེད་པར་མངོན་པར་རྫོགས་པར་སངས་རྒྱས་ཏེ། གལ་ཏེ་བྱང་ཆུབ་སེམས་དཔའ་ཆོས་འགའ་ཞིག་མཚན་མར་བྱེད་
དམ༑ མཚན་མ་དང་འགྲོགས་པར་བྱེད་ན། སངས་རྒྱས་བཅོམ་ལྡན་འདས་རྣམས་ཀྱི་སྐུ་སླུ་བ་ཡིན་ནོ། །དེ་བཞིན་གཤེགས་པས་ནི། ཆོས་ཐམས་ཅད་ཡང་དག་པར་སྨོན་པ་མེད་
པར་མངོན་པར་རྫོགས་པར་སངས་རྒྱས་སོ། །དེ་བཞིན་གཤེགས་པས་ནི། ཆོས་ཐམས་ཅད་མངོན་པར་འདུས་མ་བྱས་པ་དང༌། ཡོད་པ་མ་ཡིན་པ་དང༌། མ་བྱུང་བ་དང༌། མ་སྐྱེས་པ་དང༌།
༄༅། །མ་ཐོན་པ་དང༌། མཚན་མ་མེད་པ་དང༌། མཚན་ཉིད་མེད་པ་དང༌། མ་འོངས་པ་དང༌། མ་སོང་བ་དང༌། མི་གནས་པ་དང༌། རང་བཞིན་གྱིས་ཡོངས་སུ་དག་པ་
དང༌། རང་བཞིན་གྱིས་ཡོངས་སུ་མྱ་ངན་ལས་འདས་པ་དང༌། ཆོས་ཐམས་ཅད་ནམ་མཁའ་དང་འདྲ་བར་མངོན་པར་རྫོགས་པར་སངས་རྒྱས་ཏེ། གལ་ཏེ་བྱང་ཆུབ་སེམས་དཔའ་ཆོས་
སམ༑ ཆོས་ཀྱི་ངོ་བོ་ཉིད་འགའ་ཞིག་ལ་དམིགས་པར་བྱེད་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐུ་སླུ་བ་ཡིན་ནོ། །ལྷའི་
བུ༑ གལ་ཏེ་བྱང་ཆུབ་སེམས་དཔས་ལྟ་བར་གྱུར་པ་ཐམས་ཅད་སྟོང་པ་ཉིད་དུ་ཡང་དག་པར་འདུ་བ་དང༌། ལྟ་བར་གྱུར་པ་ཐམས་ཅད་མཚན་མ་མེད་པར་ཡང་དག་པར་འདུ་བ་དང༌།
ལྟ་བར་གྱུར་པ་ཐམས་ཅད་སྨོན་པ་མེད་པར་ཡང་དག་པར་འདུ་བ་དང༌། ལྟ་བར་གྱུར་པ་ཐམས་ཅད་ཁམས་གསུམ་ལས་ཡང་དག་པར་འདས་པ་ཤེས་ན། ཆོས་ཐམས་ཅད་མངོན་
པར་འདུས་མ་བྱས་པ་དང༌། ཡོད་པ་མ་ཡིན་པ་དང༌། མ་བྱུང་བ་དང༌། མ་སྐྱེས་པ་དང༌། མཐོན་པ་དང༌། མཚན་མ་མེད་པ་དང༌། མཚན་ཉིད་མེད་པ་དང༌། མ་འོངས་པ་དང༌།
མ་སོང་བ་དང༌། མི་གནས་པ་དང༌། རང་བཞིན་གྱིས་ཡོངས་སུ་དག་པ་དང༌། རང་བཞིན་གྱིས་འོད་གསལ་བ་དང༌། རང་བཞིན་གྱིས་ཡོངས་སུ་མྱ་ངན་ལས་འདས་པ་དང༌། ཆོས་
ཐམས་ཅད་ནམ་མཁའ་དང་འདྲ་བ་དང༌། རང་བཞིན་གྱིས་ཀུན་ནས་ཉོན་མོངས་པ་མེད་པར་ཤེས་ཏེ། དེ་ལྟར་ན། བྱང་ཆུབ་སེམས་དཔའ་སངས་རྒྱས་བཅོམ་ལྡན་འདས་ཀྱི་སྐུ་མི་སླུ་བ་
ཡིན་ནོ༑ ༑དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ། །ཞེས་བྱ་བ་བྱིན་ཏེ། འཇམ་དཔལ། ལེགས་སོ། །ལེགས་སོ། །ཁྱོད་ཀྱི་ཚིག་འདི་ལེགས་པར་
སྨྲས་ཏེ༑ དེ་ལྟར་སྤྱོད་པའི་བྱང་ཆུབ་སེམས་དཔའ་ནི། བྱང་ཆུབ་སེམས་དཔའི་སྤྱད་པ་ལ་སྤྱོད་པ་ཡིན་ཏེ། ལུང་བསྟན་པའང་མྱུར་དུ་ཐོབ་པར་འགྱུར་རོ། །འཇམ་དཔལ། ངས་མངོན་
པར་ཤེས་ཏེ། དེ་བཞིན་གཤེགས་པ་མར་མེ་མཛད་ཀྱི་སྔོན་རོལ་ཏུ་དཀར་པོའི་སྤྱོད་པ་གང་ལ་ངས་མ་སྤྱད་པ་ཅིའང་མེད་དེ། འོན་ཀྱང་ངས་ལུང་བསྟན་པ་མ་ཐོབ་བོ། །དེ་ཅིའི་ཕྱིར་
ཞེ་ན༑ འདི་ལྟར་ངས་མཚན་མ་དང་བཅས་པར་སྤྱད་པ་དང༌། རྩོལ་བ་དང་བཅས་པར་སྤྱད་པ་དང༌། དམིགས་པ་དང་བཅས་པར་སྤྱད་པའི་ཕྱིར་རོ། །གང་གི་ཚེ་ངས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་མཐོང་བའི་ཚེ་སྤྱོད་པ་ཐམས་ཅད་ལས་ཡང་དག་པར་འདས་ཏེ། མཐོང་མ་ཐག་ཏུ་བཅོམ་ལྡན་འདས་དེའི་སྤྱོད་
པ་མཐོང་བ་ངས་ཐོབ་པར་གྱུར་ཅིང་ཆོས་ཐམས་ཅད་རང་བཞིན་གྱིས་མ་སྐྱེས་པའང་རྟོགས་ཏེ། དེ་ནས་གདོད་མ་འོངས་པའི་དུས་ན་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་
༄༅། །པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་དེས་ལུང་བསྟན་ཏོ། །དེ་ཉིད་
ཀྱི་ཚེ་ངས་མི་སྐྱེ་བའི་ཆོས་རྣམས་ལ་བཟོད་པའང་ཐོབ་པོ། །འཇམ་དཔལ། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་མི་སྐྱེ་བའི་ཆོས་རྣམས་ལ་བཟོད་པ་
ཐོབ་པར་འདོད་པ་རྣམས་ཀྱིས་སྤྱོད་པའི་ལེའུ་འདི་ལ་དམིགས་སུ་མེད་པ་དང༌། རྩོལ་བ་མེད་པའི་ཆོས་ལ་མོས་པ་དང༌། རྣམ་པར་གྲོལ་བ་ལ་སྦྱོར་བར་བྱའོ། །དེ་ནས་བཅོམ་ལྡན་
འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་ཐོབ་པར་བགྱི་བའི་སླད་དུ་བཟོད་པ་བརྙེས་ལགས། བཅོམ་ལྡན་འདས་ཀྱིས་
བཀའ་སྩལ་པ། འཇམ་དཔལ། ཕུང་པོ་དང༌། ཁམས་དང༌། སྐྱེ་མཆེད་ཐོབ་པར་བྱ་བའི་ཕྱིར་བཟོད་པ་ཐོབ་སྟེ། དེའང་ཆོས་ཐམས་ཅད་ཐོབ་པར་བྱ་བའི་ཕྱིར་བཟོད་པ་ཐོབ་བོ། །
འཇམ་དཔལ། བཟོད་པ་ཐོབ་ཅེས་བྱ་བ་དེ་ནི། མི་ཟད་པའི་ཆོས་ཉིད་དེ་ཐོབ་པའོ། །འཇམ་དཔལ། བཟོད་པ་ཐོབ་ཅེས་བྱ་བ་དེ་ནི། ཡང་དག་པ་ཉིད་ཀྱི་ཚིག་བླ་དྭགས་སོ། །
འཇམ་དཔལ། བཟོད་པ་ཐོབ་པ་དེ་ལ་ནི། འཇིག་རྟེན་གྱི་ཆོས་རྣམས་ཀུན་ཏུ་སྤྱོད་པ་མེད་དོ། །སོ་སོའི་སྐྱེ་བོའི་ཆོས་རྣམས་དང༌། སློབ་པའི་ཆོས་རྣམས་དང༌། མི་སློབ་པའི་ཆོས་
རྣམས་དང༌། རང་སངས་རྒྱས་ཀྱི་ཆོས་རྣམས་དང༌། བྱང་ཆུབ་སེམས་དཔའི་ཆོས་རྣམས་དང༌། སངས་རྒྱས་ཀྱི་ཆོས་རྣམས་ཀུན་ཏུ་སྤྱོད་པ་མེད་དོ། །ཆོས་ཐམས་ཅད་ཀུན་ཏུ་མི་སྤྱོད་པས་ན། དེའི་
ཕྱིར་དེ་ལ་བཟོད་པ་ཐོབ་པ་ཞེས་བྱའོ། །བཟོད་པ་དེ་ནི། ཆོས་ཐམས་ཅད་ཀྱི་མཚན་མ་དང༌། དམིགས་པ་རྣམས་ཀྱི་སྒོ་ནས་སྐད་ཅིག་པ་མ་ཡིན་ཏེ། དེ་བས་ན། བཟོད་པ་ཞེས་བྱའོ། །བཟོད་
པ་འདི་ལ་ནི། མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་དུ་བགྲང་བ་ཅིའང་མེད་དོ། །རློམ་སེམས་སུ་བྱ་བའང་མེད་དོ། །ཟད་པའང་མེད་དོ། །བཟོད་པ་དེ་ལ་ནི། ཟད་པའང་མེད་
དོ༑ ༑བཟོད་པ་དེ་ལ་ནི། ཡུལ་ཡང་མེད་དོ། །བཟོད་པ་དེ་ལ་ནི། ཡུལ་དང་བྲལ་བའང་མེད་དེ། དེ་བས་ན། བཟོད་པ་ཞེས་བྱའོ། །བཟོད་པ་བསྟན་པ་འདི་བཤད་པ་ན་བྱང་ཆུབ་སེམས་དཔའ་
ལྔ་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་སྟེ། ཚིག་འདི་སྐད་དུ་བདག་ཅག་གིས་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་གནས་པར་འགྱུར་བའི་བྱ་བ་བྱས་སོ། །
དཔེ་མེད་པའི་ཆོས་ཐམས་ཅད་ཀྱང་ཡོངས་སུ་རྫོགས་པར་བྱས་སོ། །བཅོམ་ལྡན་འདས། བྱང་ཆུབ་སེམས་དཔའ་རྣམས་ཀྱིས་ནི། ཟབ་མོའི་གནས་ཐམས་ཅད་གུས་པར་མཉན་པར་
བྱའོ༑ ༑བསྒོམ་པར་བྱའོ། །ཞེས་སྨྲས་སོ། །དེ་ནས་བྱང་ཆུབ་སེམས་དཔའ་སྲེད་མེད་ཀྱི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཇི་ལྟར་བྱང་ཆུབ་
༄༅། །སེམས་དཔའ་སེམས་དཔའ་ཆེན་པོ་རྣམས་ཆོས་ཟབ་མོ་འདི་དག་ལ་ཡོངས་སུ་སྦྱང་བ་བྱས་པ་ཡིན། འཇམ་དཔལ་གྱིས་སྨྲས་པ། སྲེད་མེད་ཀྱི་བུ། གང་གི་ཚེ་
བྱང་ཆུབ་སེམས་དཔའ་རྣམས་ཀྱིས་ཆོས་ཐམས་ཅད་མ་བྱས་པ་དང༌། མ་བསྒྱུར་བར་ཤེས་ན། སྲེད་མེད་ཀྱི་བུ། དེ་ཙམ་གྱིས་ན་བྱང་ཆུབ་སེམས་དཔའ་རྣམས་ཡོངས་སུ་སྦྱང་བ་
བྱས་པ་ཡིན་ནོ། །གང་གི་ཚེ་ཆོས་ཐམས་ཅད་མངོན་པར་འདུས་མ་བྱས་པར་ཤེས་པ་དང༌། བྱས་པ་ལ་མི་འགྱོད་པ་དང༌། མ་བྱས་པ་ལའང་རྨོངས་པ་མེད་ན། དེའི་ཚེ་བྱང་ཆུབ་སེམས་
དཔའ་རྣམས་ཡོངས་སུ་སྦྱང་བ་བྱས་པ་ཡིན་ནོ། །བྱ་བ་ལའང་སྦྱོར་བ་དང༌། བྱས་པ་ལ་བྱས་པ་མི་གཟོ་བ་ལས་བྱས་པ་གཟོ་བར་བྱེད་པ་དང༌། བཀུར་སྟི་བྱས་པ་དང༌། བཀུར་སྟི་མ་
བྱས་པས་ཀྱང་སྲོ་སོས་པ་དང༌། སྲོ་ཤི་བར་མི་འགྱུར་བ་དང༌། བྱེད་པ་པོ་དང༌། ཚོར་བ་པོའང་མི་དམིགས་ལ་ཡོངས་སུ་སྦྱང་བའང་བྱས་པ་དང༌། སྦྱིན་པའང་སྦྱིན་ཞིང་དེའང་བྱང་ཆུབ་
ཏུ་ཡོངས་སུ་བསྔོ་བར་བྱེད་ལ་ཡོངས་སུ་སྦྱང་བའང་བྱས་པ་དང༌། སྦྱིན་པ་དང༌། བྱང་ཆུབ་དང༌། བདག་དང༌། ཕ་རོལ་ཀྱང་མི་དམིགས་ལ་ཡོངས་སུ་སྦྱང་བའང་བྱས་པ་དང༌།
ཚུལ་ཁྲིམས་ཀྱང་སྲུང་བར་བྱེད། བཟོད་པའང་སྒོམ་པར་བྱེད། བརྩོན་འགྲུས་ཀྱང་རྩོམ་པར་བྱེད། བསམ་གཏན་ཡང་སྟེན་པར་བྱེད། ཤེས་རབ་ཀྱང་སྒོམ་པར་བྱེད་ཅིང་བྱང་ཆུབ་
ཏུའང་ཡོངས་སུ་བསྔོ་བར་བྱེད་ལ་ཤེས་རབ་དེའང་དམིགས་པར་མི་བྱེད། བྱང་ཆུབ་དང༌། བདག་དང༌། ཕ་རོལ་ཡང་དམིགས་པར་མི་བྱེད་པའི་བྱང་ཆུབ་སེམས་དཔའ་དེ་དག་ནི། ཡོངས་སུ་སྦྱང་
བ་བྱས་པ་ཡིན་པར་རིག་པར་བྱའོ། །ལུས་དང༌། ངག་དང༌། ཡིད་ཀྱི་དགེ་བ་རྣམས་མི་དམིགས་པ་གང་ཡིན་པ་དེའང་བྱང་ཆུབ་སེམས་དཔའ་རྣམས་ཀྱི་ཡོངས་སུ་སྦྱང་བ་བྱས་པ་ཡིན་ནོ། །
ལུས་དང༌། ངག་དང༌། ཡིད་ཀྱི་ཚོགས་ལ་མཁས་པ་མི་དམིགས་པ་གང་ཡིན་པ་དེའང་བྱང་ཆུབ་སེམས་དཔའ་རྣམས་ཀྱི་ཡོངས་སུ་སྦྱང་བ་བྱས་པ་ཡིན་ནོ། །དེ་ནས་བྱང་ཆུབ་སེམས་དཔའ་
རྟག་ཏུ་བརྩོན་འགྲུས་བརྟན་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བདག་ཀྱང་ཇི་ལྟར་བྱང་ཆུབ་སེམས་དཔའ་ཡོངས་སུ་སྦྱང་བ་བྱས་པ་ཡིན་པ་
ལ་སྤོབས་སོ། །འཇམ་དཔལ་གྱིས་སྨྲས་པ། རིགས་ཀྱི་བུ། ཁྱོད་ཀྱིས་དེའི་དུས་ལ་ད་བབ་པར་ཤེས་ནས་སྤོབས་པར་གྱིས་ཤིག །བྱང་ཆུབ་སེམས་དཔའ་རྟག་ཏུ་བརྩོན་པ་བརྟན་གྱིས་སྨྲས་
པ༑ འཇམ་དཔལ། གང་གི་ཚེ་བྱང་ཆུབ་སེམས་དཔས་ཐ་ན་སེམས་ཅན་གཅིག་ཙམ་སངས་རྒྱས་ཀྱི་བསྟན་པ་ལ་འཇུག་པར་བྱེད་ནའང་བྱང་ཆུབ་སེམས་དཔའ་ཡོངས་སུ་སྦྱང་བ་བྱས་པ་
ཡིན་ནོ༑ ༑གང་གི་ཟས་ཟ་བའམ། གང་ལས་ལེན་པར་བྱེད་པའམ། གང་ལ་སྦྱིན་པར་བྱེད་པ་དེ་དག་བྱང་ཆུབ་ལ་འཛུད་པར་བྱེད་ན། གཉིས་ཀ་ལ་བྱང་ཆུབ་སེམས་དཔའི་ཡོན་དག་པར་
༄༅། །འགྱུར་རོ། །ཆོས་སྒྲུབ་པ་ལ་བཙུད་ནའང་སྦྱིན་པ་པོ་དང༌། ལེན་པ་པོ་གཉིས་ཀ་ལ་བྱང་ཆུབ་སེམས་དཔའི་ཡོན་དག་པར་འགྱུར་རོ། །གང་གི་ཚེ་བྱང་ཆུབ་སེམས་
དཔའ་སེམས་ཅན་གཞན་དག་ལ་སངས་རྒྱས་ཀྱི་སྒྲ་སྒྲོག་པར་བྱེད་ཅིང་ཆོས་ཀྱི་སྒྲ་དང༌། དགེ་འདུན་གྱི་སྒྲ་སྒྲོག་པར་བྱེད་ལ། བདག་ཉིད་ཀྱང་སངས་རྒྱས་དང༌། ཆོས་དང༌། དགེ་འདུན་
རྗེས་སུ་དྲན་བཞིན་དུ་སྦྱིན་པ་སྦྱིན་པར་བྱེད་པ་དང༌། སྦྱིན་པའམ། ཚུལ་ཁྲིམས་སམ། བཟོད་པའམ། བརྩོན་འགྲུས་སམ། བསམ་གཏན་ནམ། ཤེས་རབ་ཡིད་ལ་བྱེད་དམ།
གཞན་དག་ལ་ཕ་རོལ་ཏུ་ཕྱིན་པ་དྲུག་སྒྲོག་པར་བྱེད་ཅིང་སེམས་ཅན་རྣམས་ལ་སེམས་པར་བྱེད་ལ། དགེ་བའི་རྩ་བ་དེའང་སེམས་ཅན་དེ་དག་དང་ཐུན་མོང་དུ་བྱས་ནས་བྱང་ཆུབ་ཏུ་
ཡོངས་སུ་བསྔོ་བར་བྱེད་ན། བྱང་ཆུབ་སེམས་དཔའ་ཡོངས་སུ་སྦྱང་བ་བྱས་པ་ཡིན་ཏེ། དེའི་ཚེ་ཟས་ལོངས་སྤྱོད་པའི་འོས་ཡིན་ནོ། །བྱང་ཆུབ་སེམས་དཔའ་གང་བཟོད་པ་སྒོམ་པ་ན་
ཆོམ་རྐུན་པ་རྣམས་དང༌། རིགས་ངན་ཡན་ཆད་ཀྱིས་སྦྱོས་ཤིང་མ་རྒྱད་བཀག་ཀྱང་འཁྲུག་པར་མི་འགྱུར། གནོད་སེམས་མི་བྱེད་དེ། སེམས་ཅན་དེ་དག་ཉིད་ཀྱི་དགའ་བ་བསྐྱེད་པའི་
ཕྱིར་བརྩོན་འགྲུས་རྩོམ་ཞིང་སྟོབས་དང༌། བརྩོན་འགྲུས་དང༌། མཐུ་ཆེན་པོ་སྐྱེད་པར་བྱེད་ན། དེའི་ཚེ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ལ་ཡོངས་སུ་སྦྱང་བ་བྱས་
བ་ཡིན་པར་རིག་པར་བྱའོ། །གལ་ཏེ་བྱང་ཆུབ་སེམས་དཔའ་དབྱིག་བྱེ་བ་ཕྲག་བརྒྱའམ། གླིང་བཞི་པའི་འཇིག་རྟེན་གྱི་ཁམས་དབྱིག་ཐམས་ཅད་ཀྱིས་ཡོངས་སུ་བཀང་བ་བྱིན་ཏེ་བྲིད་
ནའང་ཤེས་བཞིན་དུ་བརྫུན་དུ་མི་སྨྲ་ལ། གཞན་དག་གིས་ཆོས་དྲིས་ནའང་གཟིང་གཟིང་བའི་ཚིག་མི་སྨྲ་ཞིང་ཆོས་ལ་སྐུར་བ་བཏབ་ནས་ཆོས་མ་ཡིན་པ་སྨྲ་བར་མི་བྱེད་ན། བྱང་ཆུབ་
སེམས་དཔའ་ཡོངས་སུ་སྦྱང་བ་བྱས་པ་ཡིན་པར་རིག་པར་བྱའོ། །གལ་ཏེ་བྱང་ཆུབ་སེམས་དཔའ་ཞག་བདུན་གྱི་བར་དུ་ཟན་ཆད་ནས་ཁ་ཟས་བསྟབས་ནའང་ཐམས་ཅད་མཁྱེན་པ་ཉིད་
ཀྱི་སེམས་འབའ་ཞིག་དེ་ལ་མངོན་དུ་འགྱུར་ཞིང༌། སེམས་ཅན་ཐམས་ཅད་རབ་ཏུ་དགྲོལ་བར་བྱ་བ་འབའ་ཞིག་གི་ཕྱིར་དེ་ལ་བྱང་ཆུབ་ཀྱི་སེམས་མངོན་དུ་འགྱུར་ན། བྱང་ཆུབ་སེམས་
དཔས་ཡོངས་སུ་སྦྱང་བ་བྱས་པ་ཡིན་པར་རིག་པར་བྱའོ། །འཇམ་དཔལ། གཞན་ཡང་བྱང་ཆུབ་སེམས་དཔའ་ཆོས་ཉན་པའི་ཕྱིར་ས་གཞི་མཚོན་ཆས་གཏམས་པའམ། མེས་གང་བ་རྒལ་
ཏེ་འགྲོ་བར་བྱེད་ལ་ལུས་ཕངས་པའམ། སྲོག་ཕངས་པར་མི་བྱེད་དེ། ཕུང་པོ་དང༌། ཁམས་དང༌། སྐྱེ་མཆེད་རྣམས་ནི། རྙེད་པར་སླའི། སངས་རྒྱས་བཅོམ་ལྡན་འདས་རྣམས་ནི། རྙེད་
པར་དཀའོ། །ཆོས་སྟོན་པ་ནི། རྙེད་པར་དཀའོ། །ཆོས་ལ་གུས་པའི་སེམས་ཅན་དག་ཀྱང་རྙེད་པར་དཀའོ་སྙམ་དུ་དེ་ལྟར་ཡང་སློབ་སྟེ། གལ་ཏེ་དེ་ལྟ་བུར་འཛིན་པ་ལ་ཞུགས་ན། བྱང་
༄༅། །ཆུབ་སེམས་དཔའ་ཡོངས་སུ་སྦྱང་བ་བྱས་པ་ཡིན་པར་རིག་པར་བྱའོ། །འཇམ་དཔལ། གཞན་ཡང་གལ་ཏེ་བྱང་ཆུབ་སེམས་དཔའ་ཚིག་བཞི་པའི་ཚིགས་སུ་
བཅད་པ་གཅིག་གམ། སྡོམ་པའམ། ཆོས་ཀྱི་གདམས་ངག་གིས་ནི། ཆོས་ཡིད་རངས་པར་འགྱུར་ལ། འཁོར་ལོས་བསྒྱུར་བའི་རྒྱལ་སྲིད་ཀྱིས་ནི། ཡིད་རངས་པར་མི་འགྱུར་བ་
རྡང༌། སེམས་ཅན་གཅིག་ལའང་ཚིག་བཞི་པའི་ཚིགས་སུ་བཅད་པ་བསྒྲགས་པས་ནི། ཆོས་ཡིད་རངས་པར་འགྱུར་ལ། བརྒྱ་བྱིན་དུ་འགྱུར་བ་ཐོབ་པས་ནི། དེ་ལྟ་མ་ཡིན་ན།
བྱང་ཆུབ་སེམས་དཔའ་ཡོངས་སུ་སྦྱང་བ་བྱས་པ་ཡིན་ནོ། །འཇམ་དཔལ། གཞན་ཡང་བྱང་ཆུབ་སེམས་དཔའ་དུད་འགྲོའི་སྐྱེ་གནས་སུ་གྱུར་པ་ཁྱི་ལ་སྦྱིན་པ་བྱེད་པས་ནི། ཆེས་
ཡིད་རངས་པར་འགྱུར་ལ། ཚངས་པར་འགྱུར་བ་ཐོབ་པས་ནི། མ་ཡིན་ན། བྱང་ཆུབ་སེམས་དཔའ་ཡོངས་སུ་སྦྱང་བ་བྱས་པ་ཡིན་པར་རིག་པར་བྱའོ། །འཇམ་དཔལ། གཞན་ཡང་
གལ་ཏེ་བྱང་ཆུབ་སེམས་དཔའ་ཐོས་པ་ལ་གནས་པའི་རྙེད་པ་གཅིག་ཅིག་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པས་ནི། ཆེས་ཡིད་རངས་པར་འགྱུར་ལ། ནོར་གྱི་ཕུང་པོ་
དཔག་ཏུ་མེད་པས་ནི། དེ་ལྟ་མ་ཡིན་པ་དང༌། ཐམས་ཅད་མཁྱེན་པ་ཉིད་ཀྱི་སེམས་ཀྱིས་ནི། ཆེས་ཡིད་རངས་བར་འགྱུར་ལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
རིན་པོ་ཆེ་སྣ་བདུན་གྱིས་ཡོངས་སུ་བཀང་བས་ནི། དེ་ལྟ་མ་ཡིན་པ་དང༌། དགེ་བའི་རྩ་བ་གཅིག་ཅིག་སེམས་ཀྱིས་བྱང་ཆུབ་ཏུ་ཡོངས་སུ་བསྔོས་བས་བྱང་ཆུབ་ཏུ་དམིགས་པ། སེམས་ཅན་
ཐམས་ཅད་ལ་ཕན་པ་དང༌། བདེ་བའི་ཕྱིར་ཡོངས་སུ་བསྔོས་པས་ནི། ཆེས་ཡིད་རངས་པར་འགྱུར་ལ། རྙེད་པ་དང༌། བཀུར་སྟི་དང༌། ཚིགས་སུ་བཅད་པ་ཐམས་ཅད་ཀྱིས་ནི། ཡིད་རངས་པར་
མི་འགྱུར་ཏེ། དེ་ལྟར་སྤྱོད་ན། བྱང་ཆུབ་སེམས་དཔའ་ཡོངས་སུ་སྦྱང་བ་བྱས་པ་ཡིན་པར་རིག་པར་བྱའོ། །འཇམ་དཔལ། གཞན་ཡང་བྱང་ཆུབ་སེམས་དཔས་ནི། སེམས་ཅན་ཡོངས་སུ་
སྨིན་པར་བྱ་བའི་ཕྱིར་རྟག་ཏུ་བརྩོན་པར་བྱའོ། །བྱང་ཆུབ་སེམས་དཔས་ནི། ཐོས་པ་མང་པོ་བཙལ་བའི་ཕྱིར་མཐུ་རྩལ་བརྟན་པོར་བྱའོ། །བྱང་ཆུབ་སེམས་དཔས་ནི། ཡན་ལག་དང༌།
ཉིད་ལག་ཡོངས་སུ་གཏང་བས་མཐུ་དང་ལྡན་པར་བྱའོ། །བྱང་ཆུབ་སེམས་དཔས་ནི། འཇིག་རྟེན་གྱི་ཆོས་རྣམས་དང་དུ་ལེན་པར་སྤྲོ་བར་བྱའོ། །བྱང་ཆུབ་སེམས་དཔས་ནི། སྲོག་གི་
ཕྱིར་ཡང་བསླབ་པ་ཡོངས་སུ་མི་གཏང་བས་སྤྱོད་པ་ལ་བློ་དང་ལྡན་པར་བྱའོ། །བྱང་ཆུབ་སེམས་དཔས་ནི། ཕན་དུ་སྨྲས་པའི་ཚིག་དང་དུ་ལེན་པའི་དང་ཚུལ་ཅན་གྱིས་བཟོད་པའི་སྟོབས་
དང་ལྡན་པར་བྱའོ། །བྱང་ཆུབ་སེམས་དཔས་ནི། སངས་རྒྱས་ཀྱི་ཞིང་ཡོངས་སུ་དག་པ་ཡོངས་སུ་གཟུང་བས་ལེ་ལོ་མེད་པར་བྱའོ། །བྱང་ཆུབ་སེམས་དཔས་ནི། བྱང་ཆུབ་ཀྱི་སེམས་
༄༅། །དང་མི་འབྲལ་བས་རྩེ་གཅིག་ཏུ་བྱའོ། །བྱང་ཆུབ་སེམས་དཔས་ནི། ཕ་རོལ་ཏུ་ཕྱིན་པ་དྲུག་ཡོངས་སུ་བཙལ་བས་བྱང་ཆུབ་ཀྱི་སེམས་མི་བརྗེད་པར་
བྱའོ༑ ༑བྱང་ཆུབ་སེམས་དཔས་ནི། རང་གི་དོན་ལ་བརྩོན་པ་དང་ལྡན་པ་དང༌། སེམས་ཅན་ཐམས་ཅད་ཡོངས་སུ་མི་གཏང་བ་དང༌། སེམས་ཅན་ཐམས་ཅད་ཀྱི་སྐབས་དབྱེ་བའི་ཕྱིར་མི་
འཕྲོག་པར་བྱའོ། །བྱང་ཆུབ་སེམས་དཔས་ནི། སངས་རྒྱས་ཀྱི་རིགས་མི་འཆད་པར་བྱ་བའི་ཕྱིར་དམ་བཅས་པ་ལ་བརྟན་པར་བྱའོ། །བྱང་ཆུབ་སེམས་དཔས་ནི། ལུས་དང༌། ངག་
དང༌། ཡིད་དྲང་པོ་ཡོངས་སུ་དག་པས་གཡོ་ཐམས་ཅད་ཡོངས་སུ་སྤང་བར་བྱའོ། །བྱང་ཆུབ་སེམས་དཔས་ནི། སེམས་ཅན་སྐྱབས་སུ་འོངས་པ་ཡོངས་སུ་བསྐྱབ་པའི་ཕྱིར་ཤིན་ཏུ་
དཀར་པོའི་ཕྱོགས་གཅིག་ཏུ་ངེས་པར་བྱའོ། །བྱང་ཆུབ་སེམས་དཔས་ནི། ལུས་དང་སྲོག་ལ་མ་ཆགས་པས་མི་ལྟ་བར་བྱའོ། །བྱང་ཆུབ་སེམས་དཔས་ནི། ཚུར་ཤོག། འོངས་པ་
ལེགས་སོ། །ཞེས་སྨྲ་བས་འཇམ་པོར་བྱའོ། །བྱང་ཆུབ་སེམས་དཔས་ནི། ཁྲོ་གཉེར་མེད་པའི་བཞིན་གྱིས་གསོད་པོར་སྨྲ་བར་བྱའོ། །བྱང་ཆུབ་སེམས་དཔས་ནི། རྗེས་སུ་
ཆགས་པ་དང༌། ཁོང་ཁྲོ་བ་མེད་པས་ས་དང་འདྲ་བར་བྱའོ། །བྱང་ཆུབ་སེམས་དཔས་ནི། འགྲོགས་ན་བདེ་བས་དེས་པར་བྱའོ། །བྱང་ཆུབ་སེམས་དཔས་ནི། མཐུན་པར་འཛིན་
པས་བཀའ་བློ་བདེ་བར་བྱའོ། །བྱང་ཆུབ་སེམས་དཔས་ནི། སེམས་ཅན་ཐམས་ཅད་ལ་འདུད་པས་ང་རྒྱལ་གཞོམ་པར་བྱའོ། །བྱང་ཆུབ་སེམས་དཔས་ནི། ང་རྒྱལ་བཅག་པས་ཁྱི་
དང་འདྲ་བར་བྱའོ། །བྱང་ཆུབ་སེམས་དཔས་ནི། སྔོན་དམ་བཅས་པ་ཉམས་སུ་ལོན་པར་བྱེད་པས་སླུ་བ་མེད་པར་བྱའོ། །བྱང་ཆུབ་སེམས་དཔས་ནི། སེམས་ཅན་ཐམས་ཅད་ལ་སེམས་
སྙོམས་པར་བྱའོ། །བྱང་ཆུབ་སེམས་དཔས་ནི། འབྱུང་པོ་ཐམས་ཅད་ལ་བྱམས་པའི་སེམས་སུ་བྱའོ། །བྱང་ཆུབ་སེམས་དཔས་ནི། སེམས་ཅན་ཐམས་ཅད་ཀྱི་དོན་ལ་མངོན་བར་བརྩོན་
པས་སྙིང་རྗེ་ཆེན་པོ་དང་ལྡན་པར་བྱའོ། །བྱང་ཆུབ་སེམས་དཔས་ནི། སངས་རྒྱས་ཀྱི་ཆོས་དང༌། དགེ་བའི་རྩ་བ་ཐམས་ཅད་ཡོངས་སུ་བཙལ་བ་ལ་མངོན་པར་བརྩོན་པས་སེམས་དགའ་
བར་བྱའོ། །བྱང་ཆུབ་སེམས་དཔས་ནི། འདོད་པའི་ཡོན་ཏན་གྱི་དགའ་བ་དང༌། རྩེ་བ་ཐམས་ཅད་ལ་མི་ལྟ་བས་བཏང་སྙོམས་སུ་ལྡན་པར་བྱའོ། །བྱང་ཆུབ་སེམས་དཔས་ནི། རང་གི་
ལུས་དང༌། སྲོག་ཡོངས་སུ་གཏོང་བས་སེར་སྣ་མེད་པར་བྱའོ། །བྱང་ཆུབ་སེམས་དཔས་ནི། ཡོངས་སུ་གཟུང་བའི་དངོས་པོ་རྣམས་ལ་བདག་གིར་འཛིན་པ་མེད་པར་བྱའོ། །བྱང་ཆུབ་
སེམས་དཔས་ནི། ཡོངས་སུ་རྟོག་པ་དང༌། ལྟ་བར་གྱུར་པ་ཐམས་ཅད་དོར་བའི་སེམས་སུ་བྱའོ། །བྱང་ཆུབ་སེམས་དཔས་ནི། ནོར་བདུན་གྱི་ནོར་ཆེན་པོས་ཕྱུག་པར་བྱའོ། །བྱང་ཆུབ་སེམས་
༄༅། །དཔས་ནི། སྒྲུབ་པ་ལ་གནས་པས་བརྟན་པ་དང་ལྡན་པར་བྱའོ། །བྱང་ཆུབ་སེམས་དཔས་ནི། སངས་རྒྱས་ཀྱི་ཡོན་ཏན་མཐའ་ཡས་པ་ཚོལ་བས་ཆོག་མི་ཤེས་པར་
བྱའོ༑ ༑བྱང་ཆུབ་སེམས་དཔས་ནི། ཕ་རོལ་ཏུ་ཕྱིན་པ་རྣམས་ཀྱིས་ཡོངས་སུ་རྫོགས་པར་བྱའོ། །བྱང་ཆུབ་སེམས་དཔས་ནི། བདུད་བཞི་ལས་རྣམ་པར་རྒྱལ་བས་དཔའ་བར་བྱའོ། །
བྱང་ཆུབ་སེམས་དཔས་ནི། སེམས་ཅན་ཐམས་ཅད་ཀྱི་ཉོན་མོངས་པའི་ནད་ཞི་བར་བྱ་བ་ལ་མཁས་པས་སྨན་པའི་རྒྱལ་པོར་བྱའོ། །བྱང་ཆུབ་སེམས་དཔས་ནི། བྱང་ཆུབ་ཀྱི་
སེམས་དང་མ་བྲལ་བས་ཡོན་གནས་སུ་བྱའོ། །བྱང་ཆུབ་སེམས་དཔས་ནི། སེམས་ཅན་ཐམས་ཅད་ལ་ལྟ་བས་བསོད་ནམས་ཀྱི་ཞིང་དུ་བྱའོ། །བྱང་ཆུབ་སེམས་དཔས་ནི། འཇིག་རྟེན་
གྱི་ཆོས་ཐམས་ཅད་ཀྱི་འདམ་གྱིས་མི་གོས་པས་པདྨ་ལྟ་བུར་བྱའོ། །བྱང་ཆུབ་སེམས་དཔས་ནི། སེམས་ཅན་ཐམས་ཅད་སྒྲོལ་བས་གྲུ་དང་འདྲ་བར་བྱའོ། །བྱང་ཆུབ་སེམས་དཔས་ནི། རབ་
དང༌། འབྲིང་དང༌། ཐ་མ་ལ་མི་བརྙས་པས་ཟམ་པ་ལྟ་བུར་བྱའོ། །བྱང་ཆུབ་སེམས་དཔས་ནི། དམ་པའི་ཆོས་ཀྱི་ཆུ་མི་ཟད་པའི་བསམ་པས་ཆུ་མིག་དང༌། མཚོ་དང༌། མཚོ་བྲན་དང༌། མཚེའུ་
ལྟ་བུར་བྱའོ། །བྱང་ཆུབ་སེམས་དཔས་ནི། ཐོས་པ་ལ་རྩ་གཅིག་པས་ཆོག་མི་ཤེས་པས་རྒྱ་མཚོ་ལྟ་བུར་བྱའོ། །བྱང་ཆུབ་སེམས་དཔས་ནི། བསྐྱོད་དུ་མེད་པས་ལྷུན་པོ་ལྟ་བུར་བྱའོ། །བྱང་
ཆུབ་སེམས་དཔས་ནི། སྒོའི་ཐེམ་པའི་རྟེན་ལྟ་བུས་ཤིན་ཏུ་བརྟན་པར་བྱའོ། །བྱང་ཆུབ་སེམས་དཔས་ནི། ཕུན་སུམ་ཚོགས་པ་ཐམས་ཅད་ལ་ལྷག་པར་ཆགས་པ་མེད་པར་བྱའོ། །བྱང་ཆུབ་
སེམས་དཔས་ནི། སེམས་ཡོངས་སུ་སྒྱུར་བ་ལ་མཁས་པས་དབང་དང་ལྡན་པར་བྱའོ། །བྱང་ཆུབ་སེམས་དཔས་ནི། རྒྱ་ཆེན་པོ་ལ་མོས་པས་རྒྱལ་པོ་ལྟ་བུར་བྱའོ། །བྱང་ཆུབ་སེམས་དཔས་
ནི༑ སེམས་ཅན་ཐམས་ཅད་ཀྱིས་བསྟེན་པའི་འོས་སུ་གྱུར་པས་བརྒྱ་བྱིན་ལྟ་བུར་བྱའོ། །བྱང་ཆུབ་སེམས་དཔས་ནི། ཆོས་ཐམས་ཅད་ཀྱི་བདག་པོ་བྱེད་པས་ཚངས་པ་ལྟ་བུར་བྱའོ། །བྱང་ཆུབ་
སེམས་དཔས་ནི། གཏན་དུ་བདེ་བའི་མྱ་ངན་ལས་འདས་པ་ལ་འགོད་པས་སེམས་ཅན་ཐམས་ཅད་ཀྱི་བདེ་བ་བསྒྲུབ་པར་བྱའོ། །བྱང་ཆུབ་སེམས་དཔས་ནི། སེམས་ཅན་ཐམས་ཅད་ལ་
ཕན་པ་དང༌། བདེ་བའི་དངོས་པོ་བསྟབས་པས་ཕ་མ་དང་འདྲ་བར་བྱའོ། །བྱང་ཆུབ་སེམས་དཔས་ནི། དགེ་བ་དང༌། མི་དགེ་བའི་ཆོས་ཐམས་ཅད་ཀྱིས་མ་ཉམས་མ་སྨས་པར་བྱའོ། །བྱང་
ཆུབ་སེམས་དཔས་ནི། མཛའ་བཤེས་དང༌། དགྲ་རྣམས་ལ་སེམས་སྙོམས་པས་ཞེ་འགྲས་པ་མེད་པར་བྱའོ། །བྱང་ཆུབ་སེམས་དཔས་ནི། སྐྱེ་བའི་གནས་ཐམས་ཅད་ལ་ཡིད་བརྟན་པར་
མི་བྱའོ༑ ༑བྱང་ཆུབ་སེམས་དཔས་ནི། ལྷུག་པར་གཏོར་བས་ཆོས་ཀྱི་སྦྱིན་བདག་བྱའོ། །བྱང་ཆུབ་སེམས་དཔས་ནི། བག་ཡོད་པས་རྒྱགས་པ་དང༌། བག་མེད་པ་ཐམས་ཅད་དང་བྲལ་
༄༅། །བར་བྱའོ། །འཇམ་དཔལ། བྱང་ཆུབ་སེམས་དཔས་ནི། བྱང་ཆུབ་སེམས་དཔའི་སྤྱོད་པ་ཚོལ་བ་དང༌། སྤྱོད་པ་དང༌། སྔོམ་པ་དང༌། བསླབ་པ་དང༌། བརྩོན་འགྲུས་རྣམས་
ལ་བག་ཡོད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནུས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྟག་ཏུ་བརྩོན་
པ་བརྟན་པ་ལ་ལེགས་སོ། །ཞེས་བྱ་བ་བྱིན་ཏེ། རིགས་ཀྱི་བུ། ལེགས་སོ། །ལེགས་སོ། །བྱང་ཆུབ་སེམས་དཔའ་རྣམས་ཀྱི་སྤྱོད་པ་གནས་པ་ལ་མཁས་པ་འདི་ཁྱོད་ཀྱིས་ལེགས་
པར་སྨྲས་སོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་འདོད་པས་ནི། བསོད་ནམས་མ་ཡིན་པ་
ཐམས་ཅད་དང་བྲལ་བར་བྱ་བ་དང༌། བསོད་ནམས་ཐམས་ཅད་ཡོངས་སུ་གཟུང་བ་ལ་བརྩོན་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྲེད་མེད་ཀྱི་བུས་འདི་
སྐད་ཅེས་གསོལ་ཏོ། །བཅོམ་ལྡན་འདས། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའི་རྣམ་པ་ནི། གང་དག་ལགས། རྟགས་ནི།
གང་དག་ལགས། མཚན་མ་ནི། གང་དག་ལགས། ཡོན་ཏན་ནི། གང་དག་ལགས། ཕན་ཡོན་ནི། གང་དག་ལགས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྲེད་
མེད་ཀྱི་བུ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའ་ནི། མི་ཁོམ་པ་བརྒྱད་ལས་ལོག་པས་ན། ངན་
སོང་དང་བྲལ་བ་ཡིན་ནོ། །བསམ་པ་ཙམ་གྱིས་ཐམས་ཅད་འགྲུབ་པས་ན། དབུལ་བ་ཐམས་ཅད་ཡང་དག་པར་ཆད་པའང་ཡིན་ནོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་
བརྒྱན་པས་ན། དབང་པོ་ཚང་བའང་ཡིན་ནོ། །མི་ཟད་པའི་ཆོས་ཉིད་ཀྱིས་ན། སྤོབས་པ་ཐོབ་པའང་ཡིན་ནོ། །བརྗེད་ངས་པ་མེད་པས་ན། གཟུངས་ཐོབ་པའང་ཡིན་ནོ། །ཆོས་ཀྱི་འཁོར་ལོ་བསྐོར་
བས་ན༑ བསོད་ནམས་ཐམས་ཅད་ཀྱིས་མཐོ་བའང་ཡིན་ནོ། །བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་གི་དབང་ཐོབ་པས་ན། སེམས་ཅན་ཐམས་ཅད་ཀྱི་མཆོད་པའི་གནས་ཀྱི་དབང་
བསྐུར་བ་ཐོབ་པའང་ཡིན་ནོ། །མངོན་པར་ཤེས་པ་མ་ཉམས་པས་ན། མངོན་པར་ཤེས་པ་ཐོབ་པའང་ཡིན་ནོ། །སྐྱེ་བའི་གནས་ཐམས་ཅད་དུ་དབང་ཐོབ་པའང་ཡིན་ནོ། །ཆོས་ཀྱི་ནོར་ཐམས་
ཅད་རྣམ་པར་འཕེལ་བས་ན། ཐབས་ཀྱི་མཛོད་མི་ཟད་པའང་ཡིན་ནོ། །སྡིག་པའི་ལྟ་བ་དང་བྲལ་བས་ན། ཤེས་རབ་ཀྱིས་ཀུན་ཏུ་ལྟ་བའང་ཡིན་ནོ། །ཉན་ཐོས་དང་རང་སངས་རྒྱས་ཀྱིས་ལ་
འདོད་པ་མེད་པའང་ཡིན་ནོ། །ཉན་ཐོས་དང་རང་སངས་རྒྱས་ཐམས་ཅད་ཀྱི་འདུལ་བ་པོའང་ཡིན་ནོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་དབང་པོ་ལ་མཁས་པའང་
༄༅། །ཡིན་ནོ༑ ༑བསམ་གཏན་དང༌། ཏིང་ངེ་འཛིན་དང༌། སྙོམས་པར་འཇུག་པ་དང༌། རྣམ་པར་ཐར་པའི་སྒོ་རྣམས་ལ་རྣམ་པར་རྩེ་བའང་ཡིན་ནོ། །གཏོང་བ་ལ་མོས་པས་ན། མ་
བསྟན་པའི་སྦྱིན་པ་དང་ལྡན་པའང་ཡིན་ནོ། །སྡོམ་པ་གསུམ་ཡོངས་སུ་དག་པས་ན། མ་བསྟན་པའི་ཚུལ་ཁྲིམས་ཅན་ཡང་ཡིན་ནོ། །སེམས་ཀྱི་རྒྱུད་ལ་བྱམས་པ་མངོན་པར་བསྒྲུབས་
བས་ན། བཟོད་པ་དཔག་ཏུ་མེད་པ་དང་ལྡན་པའང་ཡིན་ནོ། །ཡིད་སྐྱོ་བ་མེད་པས་ན། སེམས་ཅན་ཐམས་ཅད་ལ་བརྩོན་འགྲུས་རྩོམ་པའང་ཡིན་ནོ། །དབེན་པ་ལ་མོས་པས་ན། བསམ་
གཏན་གྱི་ཕ་རོལ་ཏུ་སོན་པའང་ཡིན་ནོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་འདོད་པའི་ཁམས་སུའང་སྐྱེ་བར་འགྱུར་རོ། །སྒྲ་དང་སྒྲ་མ་ཡིན་པ་སོ་སོར་བརྟག་
པ་ལ་མཁས་པས་ན། ཤེས་རབ་ཀྱིས་རྣམ་པར་གྲོལ་བ་རྣམ་པར་དག་པ་དང་ལྡན་པའང་ཡིན་ནོ། །ཡ་ང་བའི་ལམ་ཡོངས་སུ་སྤངས་པས་ན། མིག་དང་ལྡན་པའང་ཡིན་ནོ། །ཆོས་ཉིད་དང༌།
སངས་རྒྱས་མཐོང་བ་དང་ཡང་མ་བྲལ་བ་ཡིན་ནོ། །སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། མངོན་པར་འདུ་བྱེད་པ་མེད་པ་དང༌། མ་བྱུང་བ་དང༌། མ་སྐྱེས་པ་དང༌།
དངོས་པོ་མེད་པའི་སྒྲ་དང་ཡང་མ་བྲལ་བ་ཡིན་ནོ། །སངས་རྒྱས་ཀྱིས་གསུངས་པ་ཐམས་ཅད་ཀྱང་འཛིན་ཏོ། །ཕྱིར་མི་ལྡོག་པའི་བྱང་ཆུབ་སེམས་དཔའི་དགེ་འདུན་མཐོང་བ་དང་ཡང་མི་
འབྲལ་བ་ཡིན་ནོ། །སངས་རྒྱས་ཀྱི་ཞིང་གི་ཡོན་ཏན་ཐམས་ཅད་ཡོངས་སུ་འཛིན་པས་ན། སྒྲིབ་པ་མེད་པར་གྲོལ་པའང་ཡིན་ནོ། །བདུད་བཞི་སྤངས་པས་ན། བདུད་དང་ཕྱིར་རྒོལ་བ་བཅོམ་
པའང་ཡིན་ནོ། །ཕྱིར་མི་ལྡོག་པའི་ཆོས་ཅན་ཡིན་པས་ན། ཟབ་མོ་བཟོད་པའང་ཡིན་ནོ། །སངས་རྒྱས་ཀྱི་ཆོས་ཀྱི་ཆོ་འཕྲུལ་གྱིས་ན། མངོན་པར་ཤེས་པ་མྱུར་བའང་ཡིན་ནོ། །དེ་ནི། མ་ཐོས་
པའི་ཆོས་ཀྱི་རྒྱུན་ཀྱང་རྣམ་པར་རིག་པར་ཡང་འགྱུར་རོ། །སངས་རྒྱས་ཀྱི་ཞིང་གི་ཡོན་ཏན་ཡོངས་སུ་དག་པ་རྒྱ་ཆེན་པོ་ཐམས་ཅད་ཡོངས་སུ་འཛིན་པས་ན། བསམ་པ་ཐམས་ཅད་དང་ལྡན་
པའང་ཡིན་ནོ། །དེའི་བག་ཆགས་ཀྱི་ཉིང་མཚམས་སྦྱོར་བ་ཐམས་ཅད་ཀྱང་ཕྱིར་ལོག་པའང་ཡིན་ནོ། །ལུས་དང༌། གཟུགས་དང༌། ལུས་ཀྱི་ངོ་བོ་ཐམས་ཅད་ཀུན་ཏུ་སྟོན་པས་ན། ཡིད་ལས་
བྱུང་བའི་གནས་དང༌། ལུས་ངེས་པའང་ཡིན་ནོ། །ཕས་ཀྱི་རྒོལ་བ་ཐམས་ཅད་ཀྱིས་ཀྱང་མི་ཚུགས་པའང་ཡིན་ནོ། །སངས་རྒྱས་བཅོམ་ལྡན་འདས་རྣམས་ཀྱི་དམ་པའི་ཆོས་ཡོངས་སུ་འཛིན་
པའང་ཡིན་ནོ། །དམ་པའི་ཆོས་ཀུན་ཏུ་བསྲུང་བའི་ཕྱིར་ལུས་དང༌། སྲོག་ཡོངས་སུ་གཏོང་བའང་ཡིན་ནོ། །སངས་རྒྱས་ཀྱི་ཡུལ་ཡང་སྟོན་ལ། གཏན་དུ་ཡོངས་སུ་མྱ་ངན་ལས་འདས་པས་ཡོངས་
སུ་མྱ་ངན་ལས་འདའ་བར་ཡང་མི་བྱེད་དོ། །འཁོར་གྱིས་བག་ཚ་བ་དང༌། འཇིགས་པ་དང་བྲལ་བས་ན། མི་འཇིགས་པ་ཐོབ་པའང་ཡིན་ནོ། །བྱ་བ་ཐམས་ཅད་ཀྱང་ཤེས་པས་བྱེད་ཀྱི་ང་རྒྱལ་
༄༅། །གྱིས་བྱེད་པ་མ་ཡིན་ནོ། །སྒྱུ་མ་ལྟ་བུའི་ཏིང་ངེ་འཛིན་ལ་རྣམ་པར་འཕྲུལ་པས་ན། བཀོད་པ་ཆེན་པོ་དང་ལྡན་པའང་ཡིན་ནོ། །གནོད་པ་ཐམས་ཅད་དང་བྲལ་བས་ན། མི་
གཡོ་བའི་ཤུགས་ཐོབ་པའང་ཡིན་ནོ། །སངས་རྒྱས་ཀྱི་ཞིང་ཐམས་ཅད་དུ་ཚིག་གིས་ཤིན་ཏུ་གོ་བར་བྱེད་བས་ན། སྒྲའི་ཚོགས་ཡོངས་སུ་དག་པའང་ཡིན་ནོ། །བདུད་ཀྱི་དཔུང་ཐམས་ཅད་
འཇོམས་པས་ན༑ སེམས་དཔའ་བའང་ཡིན་ནོ། །སངས་རྒྱས་ཀྱི་ཞིང་ཐམས་ཅད་གཡོ་བར་བྱེད་པས་ན། རྫུ་འཕྲུལ་གྱིས་རྣམ་པར་འཕྲུལ་བའི་ཕ་རོལ་ཏུ་ཕྱིན་པའང་ཡིན་ནོ། །དོན་དང༌།
ཆོས་དང༌། ངེས་པའི་ཚིག་དང༌། སྤོབས་པ་ཕུན་སུམ་ཚོགས་པས་ན། སོ་སོ་ཡང་དག་པར་རིག་པ་ཐོབ་པའང་ཡིན་ནོ། །བག་ཡོད་པས་ན། ཐོགས་པ་མེད་པའི་ཡེ་ཤེས་ལ་མོས་པའང་
ཡིན་ནོ༑ ༑སེམས་ཅན་ཐམས་ཅད་ལ་ཐམས་ཅད་མཁྱེན་པའི་ཡེ་ཤེས་ཡང་དག་པར་སྟོན་པས་ན། སངས་རྒྱས་ཀྱི་འཕྲིན་ལས་ལ་ཉེ་བར་གནས་པའང་ཡིན་ནོ། །སྲེད་མེད་ཀྱི་བུ། དེ་
ལྟར་ན༑ བྱང་ཆུབ་སེམས་དཔའ་བསོད་ནམས་ཐམས་ཅད་སྡུས་པའི་ཏིང་ངེ་འཛིན་འདི་ལ་ངེས་པར་འགྱུར་བ་གང་ཡིན་པ་དེ་དག་གི་རྣམ་པ་ནི། དེ་དག་ཡིན་ནོ། །རྟགས་ནི། དེ་
དག་ཡིན་ནོ། །མཚན་མ་ནི། དེ་དག་ཡིན་ནོ། །ཡོན་ཏན་དང་ཕན་ཡོན་ནི། དེ་དག་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྲེད་མེད་ཀྱི་བུས་འདི་སྐད་ཅེས་
གསོལ་ཏོ། །བཅོམ་ལྡན་འདས། སེམས་ཅན་ཐམས་ཅད་ཀྱིས་ཀྱང་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ཐོབ་པར་གྱུར་ཅིག །བྱང་ཆུབ་སེམས་དཔའ་རྣམས་ཀྱང་ཅི་ནས་ཏིང་ངེ་
འཛིན་འདི་ཐོབ་ནས་ཉན་ཐོས་དང་རང་སངས་རྒྱས་ཐམས་ཅད་ལ་མ་མཆིས་པའི་ཡོན་ཏན་དང༌། ཕན་ཡོན་གང་དག་ལགས་པ་འདི་དག་དང་ལྡན་པར་གྱུར་ཅིག །བཅོམ་ལྡན་འདས། སེམས་ཅན་
གང་དག་ཏིང་ངེ་འཛིན་རིན་པོ་ཆེ་འདི་རྣ་ལམ་དུ་མི་ཐོས་པ་དང༌། ཐོས་ནའང་མོས་པར་མི་འགྱུར་བ་དེ་དག་ནི། བདུད་ཀྱིས་བྱིན་གྱིས་བརླབས་པ་ལགས་སོ། །བཅོམ་ལྡན་འདས་ཀྱིས་བཀའ་
སྩལ་པ༑ སྲེད་མེད་ཀྱི་བུ། དེ་དེ་བཞིན་ཏེ། ཁྱོད་ཚིག་ཇི་སྐད་ཟེར་བ་བཞིན་ནོ། །གཞན་ཡང་བྱང་ཆུབ་སེམས་དཔའ་གང་དག་ཏིང་ངེ་འཛིན་འདིས་ངེས་པར་བྱུང་བ་རྣམས་དང༌། ངེས་པར་
འབྱུང་བ་རྣམས་དང༌། ངེས་པར་འབྱུང་བར་འགྱུར་བ་དེ་དག་ནི། ཡོན་ཏན་དཔག་ཏུ་མེད་པ་དང་ལྡན་པ་དང༌། ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །དེ་ནས་བྱང་ཆུབ་སེམས་
དཔའ་སྲེད་མེད་ཀྱི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་ཐོབ་པར་འདོད་པས་ཆོས་
གང་དག་ལ་སྦྱོར་བར་བྱ། འཇམ་དཔལ་གྱིས་སྨྲས་པ། སྲེད་མེད་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་ཐོབ་པར་འདོད་པས་ནི། སོ་སོ་སྐྱེ་བོའི་ཆོས་རྣམས་
༄༅། །ཀྱང་ཆུད་མི་གཟན་པ་དང༌། སངས་རྒྱས་ཀྱི་ཆོས་རྣམས་ཀྱང་འཐོབ་པར་མི་བྱ་བའི་ཕྱིར་སྦྱོར་བར་བྱའོ། །ཅི་ནས་ཆོས་དང་ཆོས་མ་ཡིན་པ་ལ་སྦྱོར་བར་ཡང་མི་
བྱ༑ འབྲལ་བར་ཡང་མི་བྱ་བ་དེ་ལྟར་དེས་སྦྱོར་བར་བྱའོ། །ཅི་ནས་འཁོར་བའི་ཁོངས་སུའང་གཏོགས་ལ། འཁོར་བར་བྱ་བའི་ཕྱིར་ཡང་སློབ་པར་མི་བྱེད་པ་དང༌། འཁོར་བའི་ཉེ་བའི་
ཉོན་མོངས་པས་ཀྱང་ཉོན་མོངས་པར་མི་འགྱུར་བ་དང༌། མྱ་ངན་ལས་འདའ་བའི་ཕྱིར་ཡང་སློབ་ལ། ཉན་ཐོས་དང༌། རང་སངས་རྒྱས་ཀྱི་ཡོངས་སུ་མྱ་ངན་ལས་འདས་པས་ཀྱང་
ཡོངས་སུ་མྱ་ངན་ལས་འདའ་བར་མི་བྱེད་པ་དེ་ལྟར་དེས་སྦྱོར་བར་བྱའོ། །གཞན་ཡང་སྲེད་མེད་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་ཐོབ་པར་འདོད་
པས་ནི༑ བསོད་ནམས་ཐམས་ཅད་ཡང་དག་པར་འབྱུང་བ་ལ་བསླབ་པར་བྱ་སྟེ། ཟག་པ་དང་བཅས་པ་དང༌། ཟག་པ་མེད་པའི་བསོད་ནམས་དག་ལའང་རྣམ་པར་རྟོག་པ་བསྐྱེད་པར་མི་
བྱའོ༑ ༑ཁ་ན་མ་ཐོ་བ་དང་བཅས་པ་དང༌། ཁ་ན་མ་ཐོ་བ་མེད་པ་དང༌། འདུས་བྱས་དང༌། འདུས་མ་བྱས་དང༌། འཇིག་རྟེན་པ་དང༌། འཇིག་རྟེན་ལས་འདས་པའི་བསོད་ནམས་དང༌། བསོད་
ནམས་མ་ཡིན་པ་དག་ལའང་རྣམ་པར་རྟོག་པ་བསྐྱེད་པར་མི་བྱའོ། །དེས་ཆོས་ཀྱི་དབྱིངས་སུ་ཡང་དག་པར་འདུ་བའི་བསོད་ནམས་ཐམས་ཅད་ལ་མོས་པར་བྱའོ། །དེས་བསོད་ནམས་
དང༌། མི་གཡོ་བའི་འདུ་བྱེད་རྣམས་ལ་མཚན་ཉིད་གཅིག་པར་འཇུག་པར་བྱའོ། །དེས་སེམས་ཅན་ཐམས་ཅད་ཀྱི་བསོད་ནམས་ཀྱང་འདི་དང་འདྲ་བར་བལྟ་བར་བྱ་སྟེ། འཁོར་བ་མེད་པར་
ཉམས་སུ་མྱོང་བའི་ཕྱིར་རོ། །སངས་རྒྱས་གཅིག་གི་བསོད་ནམས་དང༌། སངས་རྒྱས་ཐམས་ཅད་ཀྱི་བསོད་ནམས་ཀྱང་འདྲ་བར་བལྟ་བར་བྱའོ། །འོན་ཀྱང་འདྲ་བ་དང༌། མི་འདྲ་བའང་ཅུང་
ཟད་ཀྱང་བལྟ་བར་མི་བྱ་སྟེ། ཆོས་ཀྱི་དབྱིངས་ལ་ཁྱད་པར་མེད་པའི་ཕྱིར་རོ། །སོ་སོའི་སྐྱེ་བོའི་བསོད་ནམས་གང་དག་ཡིན་པ་དང༌། སློབ་པའི་བསོད་ནམས་གང་དག་ཡིན་པ་དང༌། མི་སློབ་
པའི་བསོད་ནམས་གང་དག་ཡིན་པ་དང༌། རང་སངས་རྒྱས་ཀྱི་བསོད་ནམས་གང་དག་ཡིན་པ་དང༌། བྱང་ཆུབ་སེམས་དཔའི་བསོད་ནམས་གང་དག་ཡིན་པ་དང༌། ཡང་དག་པར་རྫོགས་པའི་
སངས་རྒྱས་ཀྱི་བསོད་ནམས་གང་དག་ཡིན་པ་དེ་དག་ཐམས་ཅད་ཀྱང་ཡང་དག་པ་མ་ཡིན་པ། དངོས་པོ་མེད་པ། ཡུལ་ན་མི་གནས་པ། ཕྱོགས་ན་མི་གནས་པ་ཡིན་པར་མོས་པར་བྱའོ། །
བསོད་ནམས་ཐམས་ཅད་ཀྱང་སེམས་ཅན་ཐམས་ཅད་དང་འབྲེལ་བར་མོས་པར་བྱའོ། །རིགས་ཀྱི་བུ། འདི་ལྟ་སྟེ། དཔེར་ན། གཟུགས་གང་ཅིའང་རུང་བ་དེ་དག་ཐམས་ཅད་ནི། འབྱུང་
བ་ཆེན་པོ་བཞི་བོ་དག་དང༌། འབྱུང་བ་ཆེན་པོ་བཞི་པོ་རྒྱུར་བྱས་པའི་གཟུགས་ཞེས་བྱའོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་བསོད་ནམས་ཀྱང་ཐམས་ཅད་དུ་
༄༅། །འབྲེལ་བར་མོས་པར་བྱའོ། །བསོད་ནམས་ཀྱིས་རྒྱགས་པར་ཡང་མི་བྱ་སྟེ། རྟག་ཏུ་མི་ཟད་པའི་ཆོས་ཉིད་ཡིན་པའི་ཕྱིར་རོ། །སྲེད་མེད་ཀྱི་བུ། བྱང་ཆུབ་སེམས་
དཔའ་སེམས་དཔའ་ཆེན་པོ་ཏིང་ངེ་འཛིན་རིན་པོ་ཆེ་འདི་ཐོབ་པར་འདོད་པས་ནི། བསོད་ནམས་མི་ཟད་པ་དང༌། ཚད་མེད་པ་རྣམ་པ་བཞིས་སྐྲག་པར་མི་བྱ་སྟེ། བཞི་གང་ཞེ་ན། འདི་ལྟ་སྟེ་
སེམས་ཅན་ཐམས་ཅད་ལ་སྙིང་རྗེ་ཆེན་པོ་ཚད་མེད་པ་དང༌། སངས་རྒྱས་ཀྱི་ཞིང་ཚད་མེད་པ་དང༌། སངས་རྒྱས་ཀྱི་ཡེ་ཤེས་ཚད་མེད་པ་དང༌། སེམས་ཅན་ཐམས་ཅད་ཀྱི་སེམས་ཀྱི་སྤྱོད་
པ་ལ་འཇུག་པ་ཚད་མེད་པ་སྟེ། སྲེད་མེད་ཀྱི་བུ། བཞི་པོ་དེ་དག་གིས་བྱང་ཆུབ་སེམས་དཔའ་སྐྲག་པར་མི་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་བསམ་གྱིས་མི་ཁྱབ་
པ་བཞི་ལ་མོས་པར་བྱ་སྟེ། བཞི་གང་ཞེ་ན། འདི་ལྟ་སྟེ། ལས་རྣམས་ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པ་དང༌། སེམས་ཅན་རྣམས་ཀྱི་སྤྱོད་པའི་ཡུལ་ཐ་དད་པ་བསམ་
གྱིས་མི་ཁྱབ་པ་དང༌། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་རྣམ་པར་ཐར་པ་བསམ་གྱིས་མི་ཁྱབ་པ་དང༌། བྱང་ཆུབ་སེམས་དཔའ་རྣམས་ཀྱི་འགྲོ་བར་སྐྱེ་བ་ཡོངས་སུ་
དག་པའི་ཡུལ་བསམ་གྱིས་མི་ཁྱབ་པ་སྟེ། སྲེད་མེད་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོས་བསམ་གྱིས་མི་ཁྱབ་པ་བཞི་པོ་དེ་དག་ལ་མོས་པར་བྱའོ། །རིགས་ཀྱི་བུ།
དེ་ལྟར་མོས་པའི་བྱང་ཆུབ་སེམས་དཔས་ནི། མི་ཟད་པ་བཞི་ཐོབ་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། བསོད་ནམས་མི་ཟད་པ་དང༌། སྨོན་ལམ་ཡོངས་སུ་རྫོགས་པ་མི་ཟད་པ་དང༌། ཐོགས་
པ་མེད་པའི་སྦོབས་པ་མི་ཟད་པ་དང༌། བསོད་ནམས་དང་ཡེ་ཤེས་མི་ཟད་པ་སྟེ། སྲེད་མེད་ཀྱི་བུ། བྱང་ཆུབ་སེམས་དཔའ་མི་ཟད་པ་བཞི་པོ་དེ་དག་ཐོབ་པར་འགྱུར་རོ། །སྲེད་མེད་ཀྱི་བུ། བྱང་
ཆུབ་སེམས་དཔས་ཆོས་བཞི་ལ་སྦྱར་བར་བྱ་སྟེ། བཞི་གང་ཞེ་ན། འདི་ལྟ་སྟེ། དགེ་བའི་རྩ་བའི་ཚོགས་ཀྱིས་ཆོག་མི་ཤེས་པ་དང༌། ཆོས་སྟོན་པས་ཆོག་མི་ཤེས་པ་དང༌། ཡོངས་སུ་བསྔོ་
བ་ཤིན་ཏུ་རྫོགས་པ་ལ་མཁས་པས་ཆོག་མི་ཤེས་པ་དང༌། སངས་རྒྱས་ཀྱི་ཞིང་གི་ཡོན་ཏན་ཐམས་ཅད་བདག་གི་ཞིང་དུ་འཇུག་པར་བྱ་བས་ཆོག་མི་ཤེས་པ་སྟེ། སྲེད་མེད་ཀྱི་བུ། བཞི་པོ་
དེ་དག་ལ་སྦྱར་བར་བྱའོ། །དེ་ནས་བྱང་ཆུབ་སེམས་དཔའ་སྲེད་མེད་ཀྱི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བསོད་ནམས་ཐམས་ཅད་བསྡུས་
པའི་ཏིང་ངེ་འཛིན་འདི་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་པའམ། རབ་ཏུ་བྱུང་བ་ཇི་ལྟ་བུ་དག་གི་ལག་ཏུ་འོང་བར་འགྱུར། གླེགས་བམ་དུ་བྱེད་པའམ། ཁ་ཏོན་དུ་བྱད་
པའམ༑ ངས་པར་སེམས་པའི་བཟོད་པ་དང་ལྡན་པར་འགྱུར། འཇམ་དཔལ་གྱིས་སྨྲས་པ། སྲེད་མེད་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་གི་རྣ་ལམ་དུ་ཐ་ན་ཏིང་
༄༅། །དེ་འཛིན་འདི་གྲག་པར་འགྱུར་བའམ། ལག་ཏུ་འོང་བའམ། གླེགས་བམ་དུ་བྱེད་པའམ། ཁ་ཏོན་དུ་བྱེད་ལ་དེའང་སྤོང་བར་མི་བྱེད་པ་དེ་དག་ནི། ཁྱིམ་ན་གནས་པ་
ཞེས་ང་མི་སྨྲ་སྟེ། དེ་དག་ནི། རབ་ཏུ་བྱུང་བ་ཁོ་ན་ཡིན་པར་བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ཏིང་ངེ་འཛིན་འདི་ཁོང་དུ་ཆུད་པར་བྱ་བའི་ཕྱིར་
བརྩོན་པ་རྣམས་ནི། འདུ་ཤེས་ཐམས་ཅད་དང་བྲལ་བར་གྱུར་ཏེ། གནས་པ་གང་དང་གང་གི་ས་གནས་པ་དེ་དང་དེས་བསོད་ནམས་དང༌། ཡེ་ཤེས་མི་ཟད་པ་ཐམས་ཅད་མི་སྤོང་ངོ༌། །
སྲེད་མེད་ཀྱི་བུ། བྱང་ཆུབ་སེམས་དཔའ་རྣམས་ནི། སེམས་ཅན་ཡོངས་སུ་མིན་པར་བྱ་བའི་ཕྱིར་ཁ་དོག་དང༌། གཟུགས་སྣ་ཚོགས་སྟོན་ཏོ། །སྲེད་མེད་ཀྱི་བུ། གཞན་ཡང་དེ་དག་
ནི༑ ཐམས་ཅད་དུའང་འབྲེལ་ལ་ཐམས་ཅད་དུའང་མ་གཏོགས་ཏེ། སྲེད་མེད་ཀྱི་བུ། འདི་ལྟ་སྟེ། དཔེར་ན། ཟླ་བ་དང༌། ཉི་མ་འདི་གཉིས་ནི། ཐམས་ཅད་དུ་འབྲེལ་ཏེ། གླིང་བཞི་པོ་
དག་ཏུའང་རྒྱུ་ལ་ཐམས་ཅད་དུའང་མ་གཏོགས་པ་དེ་བཞིན་དུ། སྲེད་མེད་ཀྱི་བུ། བྱང་ཆུབ་སེམས་དཔའ་དེ་དག་ནི། སྤྱོད་པ་ཐམས་ཅད་ལའང་མི་རྟེན་ལ་ཁྱིམ་གྱི་ས་ན་གནས་པའང་
མ་ཡིན༑ ཁྱིམ་གྱི་ཆོས་ལའང་མི་རྟེན། རབ་ཏུ་བྱུང་བའང་མ་ཡིན། རབ་ཏུ་བྱུང་བ་ལའང་མི་གནས། དགེ་སྦྱོང་གི་ཆོས་ལའང་མི་རྟེན་ཏེ། དེ་དག་ནི། གཉིས་ཀའི་ཕྱོགས་སུ་བརྗོད་
དུ་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དེ་དག་ནི། སྐྱེ་པའི་གནས་ཐམས་ཅད་ལ་མི་རྟེན་པར་བལྟ་བར་བྱ་བའི་ཕྱིར་རོ། །སྲེད་མེད་ཀྱི་བུ། དཔེར་ན། ནོར་བུ་རིན་པོ་ཆེ་ཆེན་
པོ་བཻ་ཌཱུཪྻ་ནི། སྣོད་གང་དང་གང་ན་གནས་ཀྱང་རུང་སྟེ། དེ་དག་དང་དེ་ཉིད་ན་ནོར་བུ་རིན་པོ་ཆེའི་རང་བཞིན་མི་འདོར་བ་དེ་བཞིན་དུ། སྲེད་མེད་ཀྱི་བུ། བྱང་ཆུབ་སེམས་དཔའ་ཏིང་ངེ་
འཛིན་འདི་ལ་གནས་པ་རྣམས་ནི། ཁྱིམ་གྱི་ས་ན་གནས་པ་དེ་དག་ཀྱང་རབ་ཏུ་བྱུང་བ་ཞེས་བརྗོད་པར་བྱ་སྟེ། ཆོས་ཀྱི་དབྱིངས་ཀྱི་ངོ་བོ་ཉིད་དེ་ཡོང་མི་འདོར་རོ། །དེ་སྐད་ཅེས་སྨྲས་ནས་
བྱང་ཆུབ་སེམས་དཔའ་སྲེད་མེད་ཀྱི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བྱང་ཆུབ་སེམས་དཔའ་སེམས་དཔའ་ཆེན་པོ་གནས་པ་གང་གིས་
གནས་ན། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་ལས་ཡོངས་སུ་ཉམས་པར་མི་འགྱུར་ལ། བསོད་ནམས་ཀྱི་ཚོགས་དང༌། ཡེ་ཤེས་ཀྱི་ཚོགས་མི་ཟད་པའང་འཐོབ་
པར་འགྱུར། འཇམ་དཔལ་གྱིས་སྨྲས་པ། སྲེད་མེད་ཀྱི་བུ། བཞི་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་གནས་པ་ཡིན་ཏེ། བཞི་གང་ཞེ་ན། འདི་ལྟ་སྟེ། བྱང་ཆུབ་
སེམས་དཔའ་རྣམས་ནི། ལུས་དང་སྲོག་ལ་ལྷག་པར་ཞེན་པ་མེད་པར་གནས་པ་ཡིན་ཏེ། དེ་དག་རྙེད་པ་དང༌། བཀུར་སྟ་དང༌། ཚིགས་སུ་བཅད་པ་འདོད་པ་མ་ཡིན་པ་དང༌། བྱང་
༄༅། །ཆུབ་སེམས་དཔའ་རྣམས་ནི། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་ལ་གནས་པ་ཡིན་ཏེ། ཉན་ཐོས་དང༌། རང་སངས་རྒྱས་ཀྱི་ངེས་པ་
ལ་འཇུག་པས་གནས་པ་མ་ཡིན་པ་དང༌། བྱང་ཆུབ་སེམས་དཔའ་རྣམས་ནི། སངས་རྒྱས་ཀྱི་ཡེ་ཤེས་དང༌། སོ་སོ་ཡང་དག་པར་རིག་པ་འདོད་པ་ཡིན་ཏེ། གཡོ་བ་དང༌། རློམ་སེམས་
དང༌། ཀུན་ཏུ་རྟོག་པ་དང༌། རྣམ་པར་རྟོག་པ་མི་འཛིན་པར་ངས་པ་དང༌། བྱང་ཆུབ་སེམས་དཔའ་རྣམས་ནི། སེམས་ཅན་ཐམས་ཅད་འདྲ་བར་ཐར་པ་ལ་གནས་པ་ཡིན་ཏེ།
བདག་དང༌། སེམས་ཅན་དང༌། སྲོག་དང༌། གསོ་བ་དང༌། སྐྱེས་བུ་དང༌། གང་ཟག་ལ་མི་དམིགས་པར་ངས་པའོ། །སྲེད་མེད་ཀྱི་བུ། བྱང་ཆུབ་སེམས་དཔའ་རྣམས་ཀྱི་གནས་
པ་བཞི་པོ་དེ་དག་ནི། གནས་པའི་མཆོག་དང༌། རབ་དང༌། རབ་མཆོག་ཡིན་ཏེ། བསོད་ནམས་ཀྱི་ཚོགས་མི་ཟད་པ་དང༌། ཡེ་ཤེས་ཀྱི་ཚིགས་མི་ཟད་པར་འགྱུར་བ་ནས་ལྟ་བའི་རྣམ་པ་
ཐམས་ཅད་སྤོང་བར་འགྱུར་བ་དང༌། སངས་རྒྱས་ཀྱི་ཆོས་ཐམས་ཅད་ཀྱི་བར་དུ་རྟོགས་པར་འགྱུར་བའོ། །བྱང་ཆུབ་སེམས་དཔའ་སྲེད་མེད་ཀྱི་བུས་སྨྲས་པ། འཇམ་དཔལ། ཇི་
ལྟར་ན༑ བྱང་ཆུབ་སེམས་དཔའ་རྣམས་ཀྱིས་གནས་པ་འདི་དག་ཐོབ་པར་འགྱུར་ཞིང༌། ཁྱིམ་གྱི་གནས་ནས་ཀྱང་མངོན་པར་འབྱུང་བར་འགྱུར། འཇམ་དཔལ་གྱིས་སྨྲས་པ།
སྲེད་མེད་ཀྱི་བུ། བཞི་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་གནས་པ་ཡིན་ཏེ། བཞི་གང་ཞེ་ན། འདི་ལྟ་སྟེ། བྱམས་པ་ལ་གནས་པ་དང༌། སྙིང་རྗེ་ལ་གནས་པ་དང༌། དགའ་བ་
ལ་གནས་པ་དང༌། བཏང་སྙོམས་ལ་གནས་པ་སྟེ། སྲེད་མེད་ཀྱི་བུ། བཞི་པོ་དེ་དག་ནི། བྱང་ཆུབ་སེམས་དཔའ་རྣམས་ཀྱི་གནས་པ་ཡིན་ནོ། །སྲེད་མེད་ཀྱི་བུ། བྱང་ཆུབ་སེམས་དཔའ་གང་
ཡང་རུང་སྟེ། གྲོང་ངམ། དགོན་པ་ན་གནས་ཀྱང་རུང་གནས་པ་བཞི་པོ་དེ་དག་གིས་གནས་པ་དེ་ནི། གནས་པ་ལ་གནས་པ་ཞེས་བརྗོད་པར་བྱའོ། །གལ་ཏེ་རྣམ་པར་རྒྱལ་བྱེད་དང་འདྲ་
བའི་ཁྱམས་དང༌། ཁང་པ་བརྩེགས་པ་དག་ན་གནས་སུ་ཟིན་ཀྱང་གནས་པ་ན་གནས་པ་ཞེས་བརྗོད་པར་མི་བྱའོ། །སྲེད་མེད་ཀྱི་བུ། གལ་ཏེ་བྱང་ཆུབ་སེམས་དཔའ་ཚངས་པའི་གནས་པ་
བཞི་དང་བྲལ་བཞིན་དུ་བདག་ཉིད་གནས་པ་ལ་གནས་སོ་སྙམ་དུ་འཛིན་ན། དེ་ནི། བདག་དང༌། ལྷ་དང༌། མི་དང༌། ལྷ་མ་ཡིན་དང་བཅས་པའི་འཇིག་རྟེན་སླུ་བ་ཡིན་ཏེ། ཡུལ་འཁོར་
གྱི་བསོད་སྙོམས་ཟ་བའང་དོན་མེད་པར་འགྱུར་རོ། །སྲེད་མེད་ཀྱི་བུ། བྱང་ཆུབ་སེམས་དཔའ་ཚངས་པར་སྤྱད་པ་སྤྱོད་པ་གང་དག་སུའང་རུང་བ་དེ་དག་ཐམས་ཅད་ནི། ཚངས་པའི་གནས་པ་
ཆེན་པོ་བཞིས་ངེས་པར་འབྱུང་ངོ༌། །སྲེད་མེད་ཀྱི་བུ། དེ་བས་ན། ཚངས་པའི་གནས་པ་བཞི་པོ་རྣམས་དང༌། འཕགས་པའི་བསམ་གཏན་ཐོབ་པ་ལ་མི་སྣང་བ་གང་དག་ཡིན་པ་དེ་དག་ནི།
༄༅། །ཚངས་པར་སྤྱོད་པ་ལ་གནས་པ་ལས་ཐག་རིང་ལ། ང་རྒྱལ་མ་སྤངས་པའི་ཕྱིར་འཇིག་རྟེན་པའི་འཇིག་ཚོགས་ལ་ལྟ་བས་རློམ་སམས་སུ་བྱེད་པར་འགྱུར་རོ། །བྱང་
ཆུབ་སེམས་དཔའ་སྲེད་མེད་ཀྱི་བསུ་སྨྲས་པ། འཇམ་དཔལ། ཇི་ལྟར་ན། བྱང་ཆུབ་སེམས་དཔའ་རྣམས་བྱམས་པ་ལ་གནས་པ་ཡིན། ཇི་ལྟར་ན། སྙིང་རྗེ་ལ་གནས་པ་ཡིན། ཇི་
ལྟར་ན༑ དགའ་བ་ལ་གནས་པ་ཡིན། ཇི་ལྟར་ན། བཏང་སྙོམས་ལ་གནས་པ་ཡིན། འཇམ་དཔལ་གྱིས་སྨྲས་པ། སྲེད་མེད་ཀྱི་བུ། གལ་ཏེ་བྱང་ཆུབ་སེམས་དཔའ་འདི་ལྟར་
གནས་པར་བྱེད་དེ། བདག་གིས་སེམས་ཅན་ཐམས་ཅད་བསྒྲལ་བར་བྱའོ་སྙམ་དུ་སེམས་ན། བྱམས་པ་ལ་གནས་པ་ཡིན་ནོ། །བདག་གིས་སེམས་ཅན་ཐམས་ཅད་དགྲོལ་བར་
བྱའོ་སྙམ་དུ་སེམས་ན། སྙིང་རྗེ་ལ་གནས་པ་ཡིན་ནོ། །བདག་གིས་སེམས་ཅན་ཐམས་ཅད་སངས་རྒྱས་ཀྱི་ཆོས་རྣམས་ལ་དགོད་པར་བྱའོ་སྙམ་དུ་སེམས་ན། དགའ་བ་ལ་གནས་པ་
ཡིན་ནོ༑ ༑བདག་གིས་སེམས་ཅན་ཐམས་ཅད་འཇིག་རྟེན་གྱི་ཆོས་རྣམས་ལས་རྣམ་པར་གྲོལ་བར་བྱའོ་སྙམ་དུ་སེམས་ཏེ། གལ་ཏེ་བྱང་ཆུབ་སེམས་དཔའ་དེ་ལྟར་གནས་ན།
བཏང་སྙོམས་ལ་གནས་པ་ཡིན་ནོ། །སྲེད་མེད་ཀྱི་བུ། གཞན་ཡང་བྱང་ཆུབ་སེམས་དཔའ་གང་གི་ཚེ་ཆོས་ཀྱི་དབྱིངས་སྟོང་པ་ལ་མོས་པ་དེའི་ཚེ་བྱམས་པ་ལ་གནས་པ་ཡིན་ནོ། །
གང་གི་ཚེ་ཆོས་ཐམས་ཅད་དབེན་པ་ལ་མོས་པ་དེའི་ཚེ་སྙིང་རྗེ་ལ་གནས་པ་ཡིན་ནོ། །གང་གི་ཚེ་ཆོས་ཐམས་ཅད་ཆགས་པ་མེད་པ་དང༑ བཅིངས་པ་མེད་པ་དང༌། གྲོལ་བ་མེད་པར་མོས་པ་
དེའི་ཚེ་དགའ་བ་ལ་གནས་པ་ཡིན་ནོ། །གང་གི་ཚེ་ཆོས་ཐམས་ཅད་ལ་སོང་བ་མེད་པ་དང༌། འོང་བ་མེད་པ་ལ་མོས་པ་དེའི་ཚེ་བཏང་སྙོམས་ལ་གནས་པ་ཡིན་ཏེ། སྲེད་མེད་ཀྱི་བུ། དེ་ལྟར་
ན༑ བྱང་ཆུབ་སེམས་དཔའ་བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ལ་གནས་པ་ཡིན་ནོ། །སྲེད་མེད་ཀྱི་བུ། གཞན་ཡང་བྱང་ཆུབ་སེམས་དཔའ་གང་གི་ཚེ་ཆོས་
བདག་མེད་པས་མི་སྐྲག་པ་དེའི་ཚེ་བྱམས་པ་ལ་གནས་པ་ཡིན་ནོ། །གང་གི་ཚེ་ཆོས་ཐམས་ཅད་དབེན་པས་མི་སྐྲག་པ་དེའི་ཚེ་སྙིང་རྗེ་ལ་གནས་པ་ཡིན་ནོ། །གང་གི་ཚེ་སངས་
རྒྱས་ཀྱི་ཆོས་ཐམས་ཅད་མཉམ་པའི་ཆོས་ཉིད་ཀྱིས་མི་སྐྲག་པ་དེའི་ཚེ་དགའ་བ་ལ་གནས་པ་ཡིན་ནོ། །གང་གི་ཚེ་སངས་རྒྱས་ཀྱི་ཞིང་ཐམས་ཅད་མི་ཟང་པའི་ཆོས་ཉིད་ཀྱིས་མི་སྐྲག་
པ་དེའི་ཚེ་བཏང་སྙོམས་ལ་གནས་པ་ཡིན་ནོ། །སྲེད་མེད་ཀྱི་བུ། གཞན་ཡང་བྱམས་པ་ནི། ཞེ་འགྲས་པ་མེད་པའི་མཚན་ཉིད་དོ། །སྙིང་རྗེ་ནི། ཀུན་ཏུ་སྤྱོད་པ་མེད་པའི་མཚན་ཉིད་དོ། །
དགའ་བ་ནི༑ གནོད་སེམས་མེད་པའི་མཆེན་ཉིད་དོ། །བཏང་སྙོམས་ནི། མ་ཁེངས་མ་དུད་པའི་མཚན་ཉིད་དོ། །སྲེད་མེད་ཀྱི་བུ། གཞན་ཡང་བྱམས་པ་དང༌། སྙིང་རྗེ་ཡིན་ལ། བྱམས་
༄༅། །པ་ཆེན་པོའང་མ་ཡིན། སྙིང་རྗེ་ཆེན་པོའང་མ་ཡིན་པའང་ཡོད་དེ། བྱམས་པ་ཆེན་པོ་དང༌། སྙིང་རྗེ་ཆེན་པོ་གང་ཡིན་པ་དེ་ནི། ཉན་ཐོས་དང༌། རང་སངས་
རྒྱས་ཐམས་ཅད་ལ་མེད་དོ། །ཉན་ཐོས་དང༌། རང་སངས་རྒྱས་ལ་ཡོད་པ་གང་ཡིན་པ་དེ་ནི། བྱམས་པ་དང༌། སྙིང་རྗེ་ཡིན་ཏེ། སེམས་ཅན་ཐམས་ཅད་བདེ་བར་གྱུར་ཅིག །ཅེས་བྱ་
བ་འདི་ནི། བྱམས་པ་དང༌། སྙིང་རྗེ་ཡིན་གྱི། བྱམས་པ་ཆེན་པོ་དང༌། སྙིང་རྗེ་ཆེན་པོ་མ་ཡིན་ནོ། །འོན་བྱམས་པ་ཆེན་པོ་དང༌། སྙིང་རྗེ་ཆེན་པོ་གང་ཡིན་ཞེ་ན། སེམས་ཅན་ཐམས་
ཅད་ལ་སེམས་སྙོམས་པ་གང་ཡིན་པ་དེ་ནི། བྱམས་པ་ཆེན་པོའོ། །སེམས་ཅན་ཐམས་ཅད་སྡུག་བསྔལ་ཐམས་ཅད་ལས་ཡོངས་སུ་གྲོལ་བར་བྱེད་པ་གང་ཡིན་པ་དེ་ནི། སྙིང་རྗེ་
ཆེན་པོའོ། །བདག་གི་བདེ་བ་སྤངས་ནས་འགྲོ་བ་ལྔར་སྐྱེས་པའི་སེམས་ཅན་རྣམས་ཀྱི་ནང་དུ་བསམ་བཞིན་དུ་སྲིད་པར་འགྲོ་བ་ལེན་པ་གང་ཡིན་པ་དེ་ནི། བྱམས་པ་ཆེན་པོ་ཞེས་
བྱའོ༑ ༑བདག་གིས་སེམས་ཅན་འདི་དག་འཁོར་བའི་ལམ་ངན་པ་ལས་བསྒྲལ་ཏེ་ལམ་བཟང་པོར་དགོད་པར་བྱའོ། །སྙམ་པ་གང་ཡིན་པ་དེ་ནི། སྙིང་རྗེ་ཆེན་པོ་ཞེས་བྱས། །སྲེད་
མེད་ཀྱི་བུ༑ དེ་བས་ན། རྣམ་གྲངས་འདིས་ཀྱང་ཁྱོད་ཀྱིས་ཉན་ཐོས་དང༌། རང་སངས་རྒྱས་རྣམས་ཀྱི་ནི། བྱམས་པ་དང༌། སྙིང་རྗེ་ཡིན་ལ། བྱམས་པ་ཆེན་པོ་དང༌། སྙིང་རྗེ་ཆེན་པོ་ནི།
མ་ཡིན་པའང་ཡོད་པ་དེ་ལྟར་རིག་པར་བྱའོ། །སྲེད་མེད་ཀྱི་བུ། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བྱམས་པ་ཆེན་པོ་དང༌། སྙིང་རྗེ་ཆེན་པོ་དང་ལྡན་པར་བྱའོ། །བསྟན་
པ་འདི་བཤད་པ་ན་སྲོག་ཆགས་བརྒྱད་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་ཚིག་འདི་སྐད་དུ། བཅོམ་ལྡན་འདས། བདག་ཅག་ཀྱང་འཇམ་དཔལ་གཞོན་
ནུར་གྱུར་པ་འདིས་བཤད་པ་གང་ལགས་པའི་གནས་པ་འདི་དག་གིས་གནས་པར་བགྱིའོ། །ཞེས་ཀྱང་གསོལ་ཏོ། །བྱང་ཆུབ་སེམས་དཔའ་བརྒྱད་ཁྲིས་ནི། བསོད་ནམས་ཐམས་ཅད་བསྡུས་
པའི་ཏིང་ངེ་འཛིན་འདི་ཐོབ་བོ། །སྲོག་ཆགས་བརྒྱད་སྟོང་ནི། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། དེ་ནས་བཅོམ་ལྡན་འདས་ལ་བྱང་ཆུབ་སེམས་
དཔའ་སྲེད་མེད་ཀྱི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསོད་ནམས་བརྒྱའི་མཚན་དང་ལྡན་པ་
ཞེས་བགྱི་བ་དེ་ལ་བསོད་ནམས་ཇི་ལྟ་བུ་དག་གིས་དེ་བཞིན་གཤེགས་པའི་བསོད་ནམས་བརྒྱའི་མཚན་རྣམས་མངོན་པར་གྲུབ་པ་ལགས། དེ་སྐད་ཅེས་གསོལ་པ་དང༌། བཅོམ་ལྡན་
འདས་ཀྱིས་བྱང་ཆུབ་སེམས་དཔའ་སྲེད་མེད་ཀྱི་བུ་ལ་འདི་སྐད་ཅེས་བཀའ་སྩལ་ཏོ། །སྲེད་མེད་ཀྱི་བུ། འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་
༄༅། །སེམས་ཅན་དུ་བསྡུ་བར་བསྡུས་པ་དེ་དག་ཐམས་ཅད་འཁོར་ལོས་བསྒྱུར་བའི་བསོད་ནམས་ཀྱི་ཕུང་པོ་དང་ལྡན་པར་གྱུར་ལ། སེམས་ཅན་དེ་དག་ཐམས་ཅད་ཀྱི་
འཁོར་ལོས་བསྒྱུར་བའི་བསོད་ནམས་ཀྱི་ཕུང་པོ་གང་ཡིན་པའི་བསོད་ནམས་ཀྱི་ཕུང་པོ་དེ་དག་གཅིག་ཏུ་བསྡོམས་པ་ནི། ལྷའི་དབང་པོ་བརྒྱ་བྱིན་གཅིག་ལ་ཡོད་དོ། །སྲེད་མེད་ཀྱི་
བུ༑ འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་སེམས་ཅན་དུ་བསྡུ་བར་བསྡུས་པ་དེ་དག་ཐམས་ཅད་བརྒྱ་བྱིན་གྱི་བསོད་ནམས་ཀྱི་ཕུང་པོ་
དང་ལྡན་པར་གྱུར་ལ། སེམས་ཅན་དེ་དག་ཐམས་ཅད་ཀྱི་བརྒྱ་བྱིན་གྱི་བསོད་ནམས་ཀྱི་ཕུང་པོ་གང་ཡིན་པའི་བསོད་ནམས་ཀྱི་ཕུང་པོ་དེ་དག་བསྡོམས་པ་ནི། ཚངས་པ་གཅིག་ལ་
ཡོད་དོ༑ ༑སྲེད་མེད་ཀྱི་བུ། འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་སེམས་ཅན་དུ་བསྡུ་བར་བསྡུས་པ་དེ་དག་ཐམས་ཅད་ཚངས་པའི་བསོད་
ནམས་ཀྱི་ཕུང་པོ་དང་ལྡན་པར་གྱུར་ལ། སེམས་ཅན་དེ་དག་ཐམས་ཅད་ཀྱི་ཚངས་པའི་བསོད་ནམས་ཀྱི་ཕུང་པོ་གང་ཡིན་པའི་བསོད་ནམས་ཀྱི་ཕུང་པོ་དེ་དག་གཅིག་ཏུ་བསྡོམས་པ་
ནི༑ ཉན་ཐོས་གཅིག་ལ་ཡོད་དོ། །སྲེད་མེད་ཀྱི་བུ། འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དགྲ་ན་སེམས་ཅན་ཇི་སྙེད་ཡོད་པ་སེམས་ཅན་དུ་བསྡུ་བར་བསྡུས་པ་དེ་དག་ཐམས་
ཅད་ཉན་ཐོས་ཀྱི་བསོད་ནམས་ཀྱི་ཕུང་པོ་དང་ལྡན་པར་གྱུར་ལ། སེམས་ཅན་དེ་དག་ཐམས་ཅད་ཀྱི་ཉན་ཐོས་ཀྱི་བསོད་ནམས་ཀྱི་ཕུང་པོ་གང་ཡིན་པའི་བསོད་ནམས་ཀྱི་ཕུང་པོ་དེ་དག་གཅིག་ཏུ་
བསྡོམས་པ་ནི། རང་སངས་རྒྱས་གཅིག་ལ་ཡོད་དོ། །སྲེད་མེད་ཀྱི་བུ། འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་སེམས་ཅན་དུ་བསྡུ་བར་བསྡུས་པ་དེ་
དག་ཐམས་ཅད་རང་སངས་རྒྱས་ཀྱི་བསོད་ནམས་ཀྱི་ཕུང་པོ་དང་ལྡན་པར་གྱུར་ལ། ཉན་ཐོས་དང་རང་སངས་རྒྱས་དེ་དག་ཐམས་ཅད་ཀྱི་བསོད་ནམས་ཀྱི་ཕུང་པོ་གང་ཡིན་པའི་བསོད་ནམས་ཀྱི་
ཕུང་པོ་དེ་དག་རིལ་གྱིས་བསྡོམས་པ་དེ་ལྟ་བུའི་བསོད་ནམས་ཀྱི་ཕུང་པོ་དང་ལྡན་པའི་བྱང་ཆུབ་སེམས་དཔས་ནི། བསོད་ནམས་ཐམས་ཅད་བསྡུས་པའི་ཏིང་ངེ་འཛིན་ཅེས་བྱ་བ་འདི་ཐོབ་པར་
འགྱུར་རོ། །སྲེད་མེད་ཀྱི་བུ། འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན་སེམས་ཅན་ཇི་སྙེད་ཡོད་པ་སེམས་ཅན་དུ་བསྡུ་བར་བསྡུས་པ་དེ་དག་ཐམས་ཅད་ཀྱིས་བསོད་ནམས་ཐམས་
ཅད་བསྡུས་པའི་ཏིང་ངེ་འཛིན་འདི་ཐོབ་པར་གྱུར་ལ། སེམས་ཅན་དེ་དག་ཐམས་ཅད་ཀྱི་བསོད་ནམས་ཀྱི་ཕུང་པོ་གང་ཡིན་པའི་བསོད་ནམས་ཀྱི་ཕུང་པོ་དེ་དག་བསྡོམས་པས་ནི། ནན་
གྱིས་དཔེར་བྱ་ན། གཏན་པ་མེད་པའི་མཆོད་སྦྱིན་གཅིག་འགྲུབ་པར་འགྱུར་རོ། །སྲེད་མེད་ཀྱི་བུ། དེ་ལྟ་བུའི་མཆོད་སྦྱིན་དང༌། མཆོད་སྦྱིན་གྱི་འབྲས་བུའི་བསོད་ནམས་ཀྱི་ཕུང་པོ་དེ་དག་
༄༅། །བརྒྱ་འགྱུར་དུ་བསྒྲེས་པས་ནི། དེ་བཞིན་གཤེགས་པའི་སྐུ་ལ་སྐྱེས་བུ་ཆེན་པོའི་མཚན་གཅིག་མངོན་པར་འགྲུབ་པར་འགྱུར་ཏེ། དེས་ན། དེ་བཞིན་གཤེགས་པ་བསོད་
ནམས་བརྒྱའི་མཚན་དང་ལྡན་པ་ཞེས་བྱའོ། །ཐབས་དེ་ལྟ་བུའི་དེ་བཞིན་གཤེགས་པའི་སྐུ་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱི་བར་དུ་མངོན་པར་འགྲུབ་སྟེ། དེ་དག་ནི།
སེམས་ཅན་ཐམས་ཅད་ཀྱིས་བསམ་པར་མི་ནུས་སོ། །དེས་ན། དེ་བཞིན་གཤེགས་པ་བསོད་ནམས་བསམ་གྱིས་མི་ཁྱབ་པའི་མཚན་དང་ལྡན་པ་ཞེས་བྱའོ། །བསོད་ནམས་བརྒྱའི་
མཚན་བསྟན་པ་འདི་བཤད་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཏེ་སྣང་བ་ཆེན་པོས་ཀྱང་ཁྱབ་པར་གྱུར་ཏོ། །སིལ་སྙན་འབུམ་ཡང་
མ་བརྡུངས་པར་འཁྲོལ་བར་གྱུར་ཏེ། མེ་ཏོག་གི་ཆར་ཆེན་པོའང་མངོན་པར་བབ་བོ། །ལྷ་དང་བཅས་པའི་འཇིག་རྟེན་ཡང་ངོ་མཚར་དུ་གྱུར་ཏེ། །ཅ་ཅོ་དང་གཞའི་སྒྲ་བཏོན་ནས་ཐལ་
མོ་སྦྱར་ཏེ་དེ་བཞིན་གཤེགས་པ་ལ་ཕྱག་བཙལ་ནས་ཚིག་འདི་སྐད་དུ་སེམས་ཅན་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་དག་ནི།
རྙེད་པ་ལེགས་པར་རྙེད་པ་ལགས་སོ། །བསོད་ནམས་བརྒྱའི་མཚན་འདི་ལྟ་བུ་དང་ལྡན་པར་འགྱུར་བ་དེ་དག་གིས་ནི། བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དེ་དག་
ཐམས་ཅད་དང༌། ཉན་ཐོས་དང༌། རང་སངས་རྒྱས་ཐམས་ཅད་ཀྱང་ཟིལ་གྱིས་ནོན་ལགས་སོ། །ཏིང་ངེ་འཛིན་རིན་པོ་ཆེ་འདི་སེམས་ཅན་གང་དག་གི་རྣ་ལམ་དུ་གྲག་པའམ། ཐོས་ནས་ཀྱང་མ་
ནོར་བར་སྒྲུབ་པ་དེ་དག་ཀྱང་རྙེད་པ་ལེགས་པར་རྙེད་པ་ལགས་སོ། །ས་ཕྱོགས་གང་ན་ཏིང་ངེ་འཛིན་འདི་སྤྱོད་བ་དེ་དག་ཀྱང་སྐལ་པ་དང་ལྡན་པ་ལགས་སོ། །རིགས་ཀྱི་བུའམ། རིགས་ཀྱི་བུ་མོ་
གང་དག་ཏིང་ངེ་འཛིན་རིན་པོ་ཆེ་འདི་རྒྱས་པར་ཡང་དག་པར་སྟོན་པ་དེ་དག་ནི། དེ་བཞིན་གཤེགས་པས་བྱིན་གྱིས་བརླབས་པར་རིག་པར་བགྱིའོ། །གང་དུ་ཏིང་ངེ་འཛིན་གྱི་ཆོས་ཀྱི་
རྣམ་གྲངས་འདི་རྣ་ལམ་དུ་གྲགས་པར་འགྱུར་བ་དེར་ནི། འཇིག་རྟེན་གྱི་ཁམས་གངྒཱའི་ཀླུང་གི་ཕྱེ་མ་སྙེད་ཞུགས་ཀྱིས་གཏམས་པ་ལའང་འབོགས་ཏེ། ཏིང་ངེ་འཛིན་འདི་མཉན་པའི་
སླད་དུ་མཆི་བར་བགྱིའོ། །ཞེས་ཀྱང་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག །དེ་ནི། དེ་བཞིན་ཏེ། ཁྱེད་ཇི་སྐད་ཟེར་བ་བཞིན་ནོ། །རིགས་ཀྱི་བུའམ་
རིགས་ཀྱི་བུ་མོ་གང་དག་ཏིང་ངེ་འཛིན་འདི་མི་ཉན་པ་དང༌། མི་འཆང་བ་དང༌། མི་ཀློག་པ་དང༌། ཀུན་ཆུབ་པར་མི་བྱེད་པ་དང༌། གཞན་དག་ལའང་རྒྱས་པར་ཡང་དག་པར་མི་སྟོན་པ་དེ་
དག་ནི༑ བདུད་ཀྱིས་བྱིན་གྱིས་བརླབས་པར་རིག་པར་བྱའོ། །རིགས་ཀྱི་བུ། བྱང་ཆུབ་སེམས་དཔའ་གང་དག་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་འདི་གཞན་དག་ལ་
༄༅། །རྒྱས་པར་ཡང་དག་པར་མི་སྟོན་པ་དེ་དག་ལ་ནི། མང་དུ་ཐོས་པ་ཞེས་ང་མི་སྨྲའོ། །དེ་ནས་ལྷའི་བུ་དེ་དག་དང༌། བྱང་ཆུབ་སེམས་དཔའ་དེ་དག་གིས་མཐུན་པར་
བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བསོད་ནམས་ཐམས་ཅད་བསྡུས་པའི་ཏིང་ངེ་འཛིན་གྱི་ཆོས་ཀྱི་རྣམ་གྲངས་འདི་ཅི་ནས་སླད་མའི་དུས་ན་སྤྱོད་པ་དང༌། རྒྱས་པར་འགྱུར་
བར་བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། དེ་ནས་བཅོམ་ལྡན་འདས་ཀྱིས་དེའི་ཚེ་སྨིན་མཚམས་ཀྱི་མཛོད་སྤུ་ནས་འོད་ཕྱུང་སྟེ། འོད་དེས་འཇིག་རྟེན་གྱི་ཁམས་མཐའ་
ཡས་མུ་མེད་པ་སྣང་བར་བྱས་སོ། །འོད་དེ་ལས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབས་སོ། །
ཞེས་སྒྲའང་བྱུང་ངོ༌། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། དེ་བཞིན་གཤེགས་པ་ནི། རིང་པོ་མི་ཐོགས་པར་ཟླ་བ་གསུམ་
འདས་པ་ན་ཡོངས་སུ་མྱ་ངན་ལས་འདའ་བར་འགྱུར་ཏེ། ཀུན་དགའ་བོ། ཆོས་ཀྱི་རྣམ་གྲངས་འདི་གཟུང་བ་དང༌། གཞན་དག་ལའང་རྒྱས་པར་ཡང་དག་པར་བསྟན་པའི་བར་གྱི་ཕྱིར་
ཁྱོད་ལ་གཏད་དོ། །ཀུན་དགའ་བོ། སེམས་ཅན་གང་དག་སུའང་རུང་སྟེ། ཆོས་ཀྱི་རྣམ་གྲངས་འདི་འཆང་བར་བྱེད་པ་དེ་དག་ལ་ནི། སངས་རྒྱས་བཅོམ་ལྡན་འདས་རྣམས་ཡོངས་
སུ་མྱ་ངན་ལས་འདའ་བར་མི་འགྱུར་རོ། །ཆོས་ཀྱང་ནུབ་པར་མི་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། གལ་ཏེ་ཆོས་ཀྱི་རྣམ་གྲངས་འདི་ལ་སྒྲུབ་པར་བྱེད་ན། དེ་ནི། སངས་
རྒྱས་མཐོང་བ་ཡིན་ལ། གཞན་དག་ལ་བརྗོད་ཅིང་སྟོན་པ་དེ་ནི། དམ་པའི་ཆོས་ཡོངས་སུ་འཛིན་པའི་ཕྱིར་རོ། །དེ་ནས་ཚེ་དང་ལྡན་པ་ཀུན་དགའ་བོ་དུས་ཏེ་མཆི་མ་ཕྱིས་ནས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །སྐྱེ་བོ་མང་པོ་ལ་སྨན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་ཐུགས་བརྩེ་བ་དང༌། སྐྱེ་བོའི་ཚོགས་ཆེན་པོ་དང༌། ལྷ་དང༌། མི་རྣམས་ཀྱི་
དོན་དང༌། སྨན་པ་དང༌། བདེ་བའི་སླད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་པའམ། བསྐལ་པ་ལས་ལྷག་པར་
བཞུགས་སུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཁྱོད་མྱ་ངན་མ་བྱེད་ཅིག །སྨྲེ་སྔགས་མ་འདོན་ཅིག །ཀུན་དགའ་བོ། ཁྱོད་ཡུན་ཇི་སྲིད་དུ་ཆོས་ཀྱི་རྣམ་
གྲངས་འདི་འཆང་བ་དང༌། ཀློག་པ་དང༌། སྟོན་པར་བྱེད་པ་དེ་སྲིད་དུ་སངས་རྒྱས་མཐོང་བ་དང་འབྲལ་བར་མི་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ། དེ་བཞིན་གཤེགས་པ་ནི།
གཟུགས་དང༌། མཚན་དང༌། དཔེ་བྱད་དུ་བལྟ་བ་མ་ཡིན་ཏེ། ཀུན་དགའ་བོ། ཇི་སྲིད་དུ་ཇི་སྐད་བསྟན་པའི་ཆོས་ཀྱི་རྣམ་གྲངས་འདི་ལྟ་བུ་འདི་དག་མཐོང་བ་དེ་ཉིད་སངས་རྒྱས་མཐོང་བ་
༄༅། །ཡིན་པའི་ཕྱིར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འཇམ་དཔལ་གཞོན་ནུར་གྱུར་པ་དང༌། བྱང་ཆུབ་སེམས་དཔའ་སྲེད་མེད་ཀྱི་བུ་དང༌། ཚན་པོ་ཆེ་
ཆེན་པོ་དྲི་མ་མེད་པའི་གཟི་བརྗིད་དང༌། བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་འདུན་དེ་དག་དང༌། ཉན་ཐོས་ཆེན་པོ་དེ་དག་དང༌། ཚེ་དང་ལྡན་པ་ཀུན་དགའ་བོ་དང༌། ལྷའི་
བུ་མང་པོ་དེ་དག་དང༌། ལྷ་དང༌། མི་དང༌། ལྷ་མ་ཡིན་དང༌། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་
བསོད་ནམས་ཐམས་ཅད་བསྡུས་པའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་པྲཛྙཱ་ཝརྨ་དང༌། ཤཱི་ལེནྡྲ་བོདྷི་དང༌། ཞུ་ཆེན་གྱི་
ལོ་ཙཱ་བ་བནྡྷེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།
Copyright © 2012 by the Asian Classics Input Project. All rights reserved.