Loading

འཕགས་པ་དེ་བཞིན་གཤེགས་པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ།
མདོ་སྡེ།
not checked
།།རྒྱ་གར་སྐད་དུ། ཨཱཪྻ་ཏ་ཐཱ་ག་ཏ་གུ་ཎ་ཛྙཱ་ན་ཨ་ཙིན་ཏྱ་བི་ཥ་ཡ་ཨ་བ་ཏཱ་ར་ནི་རྡེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དེ་བཞིན་ གཤེགས་པའི་ཡོན་ཏན་དང༌། ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པ་ཞེས་བྱ་བ་ཐེག་ཆེན་པོའི་མདོ། བམ་པོ་དང་པོ། སངས་རྒྱས་དང༌། བྱང་ཆུབ་ སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་མ་ག་དྷཱ་ན་ཆོས་ཀྱི་དབྱེ་དགོན་པ་ན་བྱང་ཆུབ་ཀྱི་སྙིང་པོ་ ཀུན་ཏུ་འོད་ཀྱི་ཁང་བཟང༌། བསོད་ནམས་ཀྱི་རྒྱན་གྱི་ཚོགས་ཆེན་པོ་བསགས་པ། དགའ་བ་ཆེན་པོ་སྐྱེ་བ། ཀུན་ནས་མ་སྨད་པ། ཡོན་ཏན་གྱི་ཚོགས་དཔག་ཏུ་མེད་པ་དང་ ལྡན་པ་ན་བཞུགས་ཏེ། བཅོམ་ལྡན་འདས་ཆོས་ཐམས་ཅད་མཉམ་པ་ཉིད་དུ་མངོན་པར་རྫོགས་པར་སངས་རྒྱས་པ། ལེགས་པར་ཐུགས་སུ་ཆུད་པའི་བློ་དང་ལྡན་པ། ཀུན་ཏུ་སྤྱོད་པ་གཉིས་མི་མངའ་བ། མཚན་ཉིད་མེད་པའི་ཆོས་ལ་མཆོག་ཏུ་གཞོལ་བར་མཛད་པ། སངས་རྒྱས་ཀྱི་གནས་པས་གནས་པ། སངས་རྒྱས་ཐམས་ཅད་དང་མཉམ་པ་ ཉིད་བརྙེས་པ། སྒྲིབ་པ་མེད་པའི་རྟོག་པ་བརྙེས་པ། ཕྱིར་མི་ལྡོག་པའི་ཆོས་དང་ལྡན་པ། སྤྱོད་ཡུལ་གྱིས་མི་འཕྲོགས་པ། སངས་རྒྱས་ཀྱི་མཛད་པ་མཐའ་ཡས་པ་རྒྱུན་མི་ གཅོད་པ། བསམ་གྱིས་མི་ཁྱབ་རྣམ་པར་འཇོག་པ། མཚན་ཉིད་མེད་པའི་ཕ་རོལ་ཏུ་བྱོན་པ། དུས་གསུམ་ལ་མཉམ་པ་ཉིད་ཚར་ཕྱིན་པ། འཇིག་རྟེན་གྱི་ཁམས་ཐམས་ཅད་དུ་ ཞུགས་པའི་སྐུ་དང་ལྡན་པ། ཆོས་ཐམས་ཅད་ལ་ཐེ་ཚོམ་མེད་པའི་མཁྱེན་པ་མངའ་བ། སྤྱོད་པ་ཐམས་ཅད་དང་ལྡན་པའི་བློ་མངའ་བ། ཆོས་མཁྱེན་པ་ལ་ནེམ་ནུར་མི་མངའ་བ། རྣམ་པར་མ་བརྟགས་པའི་སྐུ་མངའ་བ། བྱང་ཆུབ་སེམས་དཔའ་ཐམས་ཅད་ཀྱིས་ཡེ་ཤེས་ཡང་དག་པར་བླངས་པ། སངས་རྒྱས་ཀྱི་གནས་པ་གཉིས་སུ་མེད་པ་དམ་པའི་ཕ་རོལ་ཏུ་ བྱོན་པ། དེ་བཞིན་གཤེགས་པའི་མ་འདྲེས་པ་རྣམ་པར་ཐར་པར་མཛད་པའི་ཡེ་ཤེས་ཀྱི་མཐར་ཕྱིན་པ། མཐའ་དང༌། དབུས་མེད་པའི་སངས་རྒྱས་ཀྱིས་མཉམ་པ་ཉིད་ཐུགས་སུ་ ཆུད་པ། ཆོས་ཀྱི་དབྱིངས་དམ་པ་ཅན། ནམ་མཁའི་ཁམས་ཀྱི་མཐས་གཏུགས་པ། ཕྱི་མའི་མཐའི་མུར་ཐུག་པར་བསྐལ་པ་བགྲངས་པ་ཐམས་ཅད་དུ་ཆོས་ཀྱི་འཁོར་ལོ་བསྐོར་བ་ ༄༅། །རྒྱུན་མི་གཅོད་པའི་སྐུ་མངའ་བ། པདྨའི་སྙིང་པོ་ཅན་གྱི་སེང་གེའི་ཁྲི་ལ་བཞུགས་ཏེ། དགེ་སློང་འབུམ་ཕྲག་དྲུག་ཅུ་རྩ་གཉིས་དང་ཐབས་གཅིག་པ་ལ་ འདི་ལྟ་སྟེ། ཚེ་དང་ལྡན་པ་ཤཱ་རིའི་བུ་དང༌། མཽངྒལ་གྱི་བུ་ཆེན་པོ་དང༌། འོད་སྲུང་ཆེན་པོ་དང༌། མ་འགགས་པ་དང༌། རབ་འབྱོར་དང༌། ཀཱ་ཏྱཱའི་བུ་དང༌། ཀ་པི་ན་ཆེན་པོ་དང༌། ནག་པ་དང༌། དགའ་བོ་དང༌། ཆུ་ཀླུང་འོད་སྲུང་དང༌། ག་ཡཱ་འོད་སྲུང་དང༌། ལྟེང་རྒྱས་འོད་སྲུང་དང༌། བྱམས་མའི་བུ་གང་པོ་དང༌། བ་ལང་བདག་དང༌། ལམ་ཕྲན་བསྟན་དང༌། གྱད་བུ་ནོར་དང༌། སེང་ལྡེང་ནགས་པ་དང༌། སྐུལ་བྱེད་དང༌། གསུས་པོ་ཆེ་ཆེན་པོ་དང༌། སྒྲ་གཅན་ཟིན་དང༌། ཀུན་དགའ་བོ་དང༌། དེ་དག་ལ་སོགས་པ་དགེ་སློང་འབུམ་ ཕྲག་དྲུག་ཅུ་རྩ་གཉིས་པོ་དེ་དག་ཐམས་ཅད་ཀྱང་ཆོས་གཅིག་ལ་ཡང་དག་པར་གཞོལ་བ། འཕགས་པའི་སྤྱོད་ཡུལ་ལ་གནས་པ་ཤ་སྟག་གོ །ཐམས་ཅད་ཀྱང་ཆོས་ཐམས་ ཅད་ཀྱི་ངོ་བོ་ཉིད་ཀྱི་ཚུལ་ལ་ཞུགས་པ་ཤ་སྟག་གོ །ཐམས་ཅད་ཀྱང་གཞི་མེད་པ་ནམ་མཁའི་སྤྱོད་ཡུལ་བ་ཤ་སྟག་གོ །ཐམས་ཅད་ཀྱང་མི་རྟེན་པར་གནས་པ་ཤ་སྟག་གོ །ཐམས་ ཅད་ཀྱང་ཉོན་མོངས་པའི་སྒྲིབ་པ་ཀུན་ནས་ལྡང་བ་ཐམས་ཅད་དང་བྲལ་བ་ཤ་སྟག་གོ །ཐམས་ཅད་ཀྱང་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་དང༌། སྤྱོད་ཡུལ་ལ་ཞུགས་ པའི་ཤེས་པ་དང་ལྡན་པ་ཤ་སྟག་གོ །ཐམས་ཅད་ཀྱང་བྱང་ཆུབ་སེམས་དཔའི་བྱ་བ་ལ་ཞུགས་པ་ཤ་སྟག་གོ །ཐམས་ཅད་ཀྱང་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ དབྱིངས་སྣང་བའི་ཚུལ་ལ་ཞུགས་པ་ཤ་སྟག་གོ །ཐམས་ཅད་ཀྱང་ཆོས་ཀྱི་ཚུལ་གཅིག་ལ་ཡང་དག་པར་གཞོལ་བ་ཤ་སྟག་གོ །ཐམས་ཅད་ཀྱང་ཐམས་ཅད་མཁྱེན་པ་ཉིད་ལ་ མངོན་དུ་ཕྱོགས་པ་ཤ་སྟག་གོ །ཐམས་ཅད་ཀྱང་ཐམས་ཅད་མཁྱེན་པ་ཉིད་ཀྱི་ལམ་རྒྱུན་མ་བཅད་པ་ཤ་སྟག་གོ །ཐམས་ཅད་ཀྱང་ཐམས་ཅད་མཁྱེན་པ་ཉིད་ལས་ཡིད་ཕྱིར་མ་ ལོག་པ་ཤ་སྟག་གོ །ཐམས་ཅད་ཀྱང་ཤེས་རབ་དང༌། ཡེ་ཤེས་མངོན་པར་གྲུབ་པའི་ཡིད་དང་ལྡན་པ་ཤ་སྟག་གོ །ཐམས་ཅད་ཀྱང་ཐམས་ཅད་མཁྱེན་པའི་ཡེ་ཤེས་དང༌། ལྷག་ མཐོང་དམ་པའི་ཕ་རོལ་ཏུ་ཕྱིན་པ་ཤ་སྟག་གོ །ཐམས་ཅད་ཀྱང་ཐབས་ཀྱི་ཡུལ་དང༌། སྤྱོད་ཡུལ་ལས་ངེས་པར་བྱུང་བ་ཤ་སྟག་གོ །དགེ་སློང་མ་སྐྱེ་དགུའི་བདག་མོ་ཆེན་མོ་ དང༑ དགེ་སློང་མ་གྲགས་འཛིན་ལ་སོགས་པ་དགེ་སློང་མ་འབུམ་ཕྲག་དྲུག་ཅུ་རྩ་གཉིས་དང་ཡང་ཐབས་གཅིག་སྟེ། ཐམས་ཅད་ཀྱང་དཀར་པོའི་ཆོས་ཤིན་ཏུ་ཡོངས་སུ་ བསྡུས་པ་ཤ་སྟག་གོ །ཐམས་ཅད་ཀྱང་ཐམས་ཅད་མཁྱེན་པའི་ཡེ་ཤེས་ལ་ཉེ་བར་གྱུར་པ་ཤ་སྟག་གོ །ཐམས་ཅད་ཀྱང་ཐམས་ཅད་མཁྱེན་པ་ཉིད་ཀྱི་སྣང་བའི་ཚུལ་ལ་ ༄༅། །ཞུགས་པ་ཤ་སྟག་གོ །ཐམས་ཅད་ཀྱང་ཆོས་ཐམས་ཅད་དངོས་པོ་མེད་པར་རབ་ཏུ་རྟོགས་པ་ཤ་སྟག་གོ །ཆོས་ཐམས་ཅད་ལ་མཚན་ཉིད་མེད་པར་ ཞུགས་པ། ཆོས་ཐམས་ཅད་ཡང་དག་པའི་མཐར་རིག་པ། ཆོས་ཐམས་ཅད་མ་སྐྱེས་པ་དང༌། མ་འགགས་པ་དང༌། གཉེན་པོ་མེད་པར་མོས་པ། བསམ་གྱིས་མི་ཁྱབ་པའི་ རྣམ་པར་ཐར་པ་དང༌། ཏིང་ངེ་འཛིན་ལ་རབ་ཏུ་གནས་པ་ཤ་སྟག་གོ །ཐམས་ཅད་ཀྱང་འདུལ་བའི་སེམས་ཅན་ཇི་ལྟ་བ་དེ་བཞིན་དུ་རྣམ་པར་མི་རྟོག་ཅིང་ལྷུན་གྱིས་གྲུབ་པར་གཟུགས་ དང༑ ལུས་དང༌། ཁ་དོག་དང༌། སྤྱོད་ལམ་ཤིན་ཏུ་སྟོན་པ་ཤ་སྟག་གོ །བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་ འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་བྱང་ཆུབ་སེམས་དཔའི་དགེ་འདུན་ཆེན་པོ་དང་ཡང་ཐབས་གཅིག་པ་ལ། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་ པོ་ཀུན་ཏུ་བཟང་པོ་དང༌། ཀུན་ནས་འདྲེན་དང༌། ཀུན་ཏུ་སྤྲུལ་དང༌། ཀུན་ཏུ་ཤེས་རབ་དང༌། ཀུན་ཏུ་མིག་དང༌། ཀུན་ཏུ་འོད་དང༌། ཀུན་ཏུ་སྣང་བ་དང༌། ཀུན་ཏུ་འོད་ཟེར་དང༌། ཀུན་ ཏུ་རྟོག་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བློ་དང༌། ཤུགས་ཆེན་དང༌། ཤུགས་ཆེན་འཛིན་དང༌། རྣམ་པར་འཕྲུལ་པ་ཆེན་པོ་དང༌། རྣམ་པར་འཕྲུལ་པ་ ཆེན་པོའི་རྒྱལ་པོ་དང༌། བརྩོན་འགྲུས་ཆེན་པོས་རྣམ་པར་གནོན་དང༌། རྩལ་ཆེན་དཔའ་བ་དང༌། ཆེར་བསྒྱིངས་དང༌། བསྒྱིངས་པ་ཆེན་པོའི་སྟོབས་དང༌། ཚོགས་ཀྱི་དབང་པོ་ཆེན་ པོ་དང༌། སྤོས་ཀྱི་བལ་གླང་གླང་པོ་ཆེ་ཆེན་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བ་ཆེན་པོ་དང༌། ཟླ་བ་བཟང་དང༌། ཡོན་ཏན་ཟླ་བ་དང༌། རིན་ཆེན་ཟླ་བ་དང༌། ཀུན་ཏུ་སྣང་བའི་ཟླ་བ་དང༌། །ཆོས་དྲི་མ་མེད་པའི་ཟླ་བ་དང༌། རྣམ་པར་སྣང་བྱེད་ཟླ་བ་དང༌། རྣམ་པར་བསྒྲགས་པའི་ཟླ་བ་དང༌། འོད་ཟེར་རབ་ཏུ་གཏོང་བའི་ཟླ་བ་དང༌། བྱང་ཆུབ་ སེམས་དཔའ་སེམས་དཔའ་ཆེན་པོ་ཟླ་གང་དང༌། ཚངས་པའི་དབྱངས་དང༌། ཚངས་པའི་དབང་པོས་བསྒྲགས་པའི་དབྱངས་དང༌། སའི་སྒྲ་དབྱངས་དང༌། ཆོས་ཀྱི་དབྱིངས་ཀྱི་སྒྲ་ དབྱངས་དང༌། བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇོམས་པའི་དབྱངས་དང༌། ཆོས་ཀྱི་རྔ་ཆེན་སྒྲ་དབྱངས་དང༌། ཀུན་ཏུ་གོ་བར་བྱེད་པའི་དབྱངས་དང༌། མི་རྟོག་རྣམ་པར་མི་ རྟོག་དབྱངས་དང༌། ས་སྟེང་སྒྲ་དབྱངས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དབྱངས་ཀྱི་ཡན་ལག་ཐམས་ཅད་ཟིལ་གྱིས་གནོན་པའི་དབྱངས་དང༌། ཀུན་ནས་སྙིང་པོ་ དང༑ ཀུན་ཏུ་དྲི་མ་མེད་པའི་སྙིང་པོ་དང༌། ཡོན་ཏན་སྙིང་པོ་དང༌། རྣམ་པར་སྣང་མཛད་སྙིང་པོ་དང༌། རིན་ཆེན་སྙིང་པོ་དང༌། ཟླ་བའི་སྙིང་པོ་དང༌། ཉི་མའི་སྙིང་པོ་དང༌། སྣང་བྱེད་ ༄༅། །སྙིང་པོ་དང༌། །པདྨའི་དཔལ་གྱི་སྙིང་པོ་དང༌། རྡོ་རྗེའི་སྙིང་པོ་དང༌། བློ་གྲོས་བཟང་པོ་དང༌། བློ་གྲོས་ཆེན་པོ་དང༌། ཁྱད་པར་བློ་གྲོས་དང༌། རྣམ་གྲགས་ བློ་གྲོས་དང༌། རྒྱལ་ཆེན་བློ་གྲོས་དང༌། བླ་མའི་བློ་གྲོས་དང༌། འཕེལ་བའི་བློ་གྲོས་དང༌། མཐའ་ཡས་བློ་གྲོས་དང༌། ཡངས་པའི་བློ་གྲོས་དང༌། སངས་རྒྱས་བློ་གྲོས་དང༌། བློ་ གྲོས་མི་ཟད་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་རྒྱ་མཚོ་དང༌། བརྟན་པའི་བློ་གྲོས་དང༌། རྡོ་རྗེ་བློ་གྲོས་དང༌། སངས་རྒྱས་མངོན་སུམ་བློ་གྲོས་དང༌། རི་རབ་ མར་མེ་དང༌། མར་མེ་ཆེན་པོ་དང༌། ཆོས་ཀྱི་སྒྲོན་མའི་མར་མེ་དང༌། ཕྱོགས་ཐམས་ཅད་དུ་ཁྱབ་པའི་མར་མེ་དང༌། ཀུན་ཏུ་མར་མེ་དང༌། མུན་པ་ཐམས་ཅད་སེལ་བའི་མར་མེ་དང༌། འགྲོ་བ་ཐམས་ཅད་ལ་སྣང་བའི་མར་མེ་དང༌། གཅིག་ཏུ་སྣང་བའི་མར་མེ་དང༌། ཟླ་བའི་མར་མེ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་མར་མེ་དང༌། འཇམ་དཔལ་གཞོན་ནུར་གྱུར་པ་དང༌། ལག་ན་རིན་ཆེན་གཞོན་ནུར་གྱུར་པ་དང༌། ལག་ན་ཕྱག་རྒྱ་རིན་ཆེན་གཞོན་ནུར་གྱུར་པ་དང༌། རིན་ཆེན་འོད་ཟེར་གཞོན་ནུར་ གྱུར་པ་དང༌། ནམ་མཁའ་མཛོད་གཞོན་ནུར་གྱུར་པ་དང༌། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་སྐོར་བ་གཞོན་ནུར་གྱུར་པ་དང༌། དྲ་བ་ཅན་གྱི་འོད་གཞོན་ནུར་གྱུར་ པ་དང༌། རྣམ་པར་སེལ་བ་གཞོན་ནུར་གྱུར་པ་དང༌། བདོག་པ་ཐམས་ཅད་ཡོངས་སུ་གཏོང་བ་གཞོན་ནུར་གྱུར་པ་དང༌། དཔལ་གྱི་སྙིང་པོ་གཞོན་ནུར་གྱུར་པ་དང༌། སེང་ གེ་གཞོན་ནུར་གྱུར་པ་དང༌། ཟླ་འོད་གཞོན་ནུར་གྱུར་པ་དང༌། ཟླ་བའི་འོད་ཟེར་གཞོན་ནུར་གྱུར་པ་དང༌། མཆོག་གི་བློ་གྲོས་གཞོན་ནུར་གྱུར་པ་དང༌། རྒྱན་བཀོད་པ་གཞོན་ནུར་ གྱུར་པ་དང༌། ལག་ན་པདྨ་དང༌། ལག་ན་རྡོ་རྗེ་དང༌། ཉི་འོད་དང༌། ནོར་བུ་དང༌། གློག་དང༌། ཉི་མ་དང༌། ཟླ་བ་དང༌། བརྒྱ་བྱིན་དང༌། ཚངས་པ་ཐམས་ཅད་ཟིལ་གྱིས་གནོན་པའི་ འོད་དང༌། སྒྲིབ་པ་ཐམས་ཅད་རྣམ་པར་སེལ་བ་དང༌། མྱ་ངན་དང༌། མུན་པ་ཐམས་ཅད་འཇོམས་པའི་བློ་གྲོས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཡུལ་ཐམས་ ཅད་ལས་ངེས་པར་འབྱུང་བའི་བློ་གྲོས་དང༌། རྡུལ་མེད་རྣམ་པར་གནོན་དང༌། རྣམ་དག་རྣམ་པར་གནོན་དང༌། ཕུང་པོ་རྣམ་པར་གནོན་དང༌། སྐྱེ་མཆེད་རྣམ་པར་གནོན་དང༌། ཁམས་རྣམ་པར་གནོན་དང༌། སྟོང་པ་ཉིད་རྣམ་པར་གནོན་དང༌། མཚན་མ་མེད་པ་རྣམ་པར་གནོན་དང༌། སྨོན་པ་མེད་པ་རྣམ་པར་གནོན་དང༌། སྐྱེ་བ་མེད་པ་རྣམ་པར་གནོན་དང༌། འགག་པ་མེད་པ་རྣམ་པར་གནོན་དང༌། འགྲོ་བ་མེད་པ་རྣམ་པར་གནོན་དང༌། འོང་བ་མེད་པ་རྣམ་པར་གནོན་དང༌། འཆི་འཕོ་མེད་པ་རྣམ་པར་གནོན་དང༌། མི་སྐྱེ་བ་རྣམ་པར་ ༄༅། །གནོན་དང༌། རང་བཞིན་འོད་གསལ་རྣམ་པར་གནོན་དང༌། འཇིག་རྟེན་གསུམ་རྣམ་པར་གནོན་དང༌། མཐའ་ཡས་རྣམ་པར་གནོན་དང༌། འཇིག་ རྟེན་གྱི་ཁམས་ཐམས་ཅད་རྣམ་པར་གནོན་དང༌། ཆོས་ཐམས་ཅད་རྣམ་པར་གནོན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པ་ཐམས་ཅད་རྣམ་ པར་གནོན་དང༌། མངོན་པར་ཤེས་པ་དང༌། རིག་པ་རྣམ་པར་གནོན་དང༌། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་རྣམ་པར་གནོན་དང༌། ཡང་དག་པའི་མཐའ་རྣམ་ པར་གནོན་དང༌། དེ་བཞིན་གཤེགས་པས་རྣམ་པར་གནོན་དང༌། མཉམ་པ་ཉིད་རྣམ་པར་གནོན་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དབྱིངས་རྣམ་པར་ གནོན་དང༌། བདུད་ཡུལ་མི་གོས་དང༌། བདུད་ལས་རྒྱལ་དང༌། བདུད་ལས་རྒྱལ་ཆེན་པོ་དང༌། གཙུག་ན་རིན་པོ་ཆེ་དང༌། འོད་ཟེར་སྟོང་གི་འོད་འཕྲོ་དང༌། མངོན་པར་འབྱུང་ དཀའ་དང༌། རབ་ཏུ་ཐུབ་དཀའ་དང༌། རྟོགས་དཀའ་དང༌། བསྙེན་པར་དཀའ་བའི་བློ་དང༌། ངན་འགྲོ་སྐེམ་དང༌། བཟང་སྐྱོང་དང༌། དཀོན་མཆོག་འབྱུང་གནས་དང༌། དེད་དཔོན་བཟང་པོ་དང༌། མིས་བྱིན་དང༌། ཆུ་ལྷའི་ལྷ་དང༌། ཟླ་བའི་ལྷ་དང༌། དྲི་མ་མེད་ཀྱིས་བྱིན་དང༌། དྲི་མ་མེད་པར་གྲགས་པ་དང༌། བྱང་ཆུབ་སེམས་དཔའ་སེམས་དཔའ་ ཆེན་པོ་བྱམས་པ་དང༌། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་འབུམ་ཕྲག་བཅུའི་རྡུལ་ཕྲ་རབ་ ཀྱི་རྡུལ་རྙེད་ཐམས་ཅད་ཀྱང་སྐྱེ་བ་གཅིག་གིས་ཐོགས་པ། འཇིག་རྟེན་གྱིས་ཁམས་གཞན་དང༌། གཞན་དག་ནས་འདུས་པ་ཤ་སྟག་གོ །ཐམས་ཅད་ཀྱང་སེམས་ཅན་ཀྱི་ཁམས་ ཐམས་ཅད་ཡོངས་སུ་སྨིན་པར་བྱ་བ་ལ་དཔྱོད་པ་དང༌། ཐབས་དང༌། ཚུལ་དང༌། འདུལ་བ་དང༌། བྱང་ཆུབ་སེམས་དཔའི་ཆོས་ལ་འགོད་པ་ལ་མཁས་པ་ཤ་སྟག་གོ །ཐམས་ཅད་ ཀྱང་འཇིག་རྟེན་གྱི་ཁམས་རབ་འབྱམས་ཐམས་ཅད་ལ་དཔྱོད་པའི་ཚུལ་ཤེས་པ་རབ་འབྱམས་ལ་ཞུགས་པ་ཤ་སྟག་གོ །ཐམས་ཅད་ཀྱང་མྱ་ངན་ལས་འདས་པའི་སའི་སྤྱོད་ཡུལ་ ཤེས་པ་ལ་དཔྱོད་ཅིང་སོ་སོར་རྟོག་པ་ལ་མཁས་པ་ཤ་སྟག་གོ །ཐམས་ཅད་ཀྱང་སྤྲོས་པ་ཐམས་ཅད་ཤིན་ཏུ་ཆད་ཅིང་སྤྱོད་པ་ལེན་པ་རྣམ་པར་ཆད་དེ་སེམས་ཅན་གྱི་ཁམས་ཐམས་ ཅད་སྡུད་པ་ལ་མཁས་པ་ཤ་སྟག་གོ །ཐམས་ཅད་ཀྱང་མཐའ་དང༌། དཔུས་མེད་པའི་ཆོས་ཀྱི་ཚུལ་ལ་འཇུག་པ་ལ་ཤིན་ཏུ་མཁས་པ་ཤ་སྟག་གོ །ཐམས་ཅད་ཀྱང་སེམས་ཅན་ ཐམས་ཅད་ཀྱི་ལས་ཀྱི་རྣམ་པར་སྨིན་པ་ཆུད་མི་ཟ་བ་མི་དམིགས་པར་དཔྱོད་ཅིང་སོ་སོར་རྟོག་པ་ལ་མཁས་པ་ཤ་སྟག་གོ །ཐམས་ཅད་ཀྱང་སེམས་ཅན་གྱི་ཁམས་ཐམས་ཅད་ཀྱི་ ༄༅། །བསམ་པ་དང༌། བག་ལ་ཉལ་དང༌། དབང་པོ་དང༌། རྩོམ་པ་དང༌། སྦྱོར་བ་ལ་ཤིན་ཏུ་དཔྱོད་ཅིང་སོ་སོར་རྟོག་པ་ལ་མཁས་པ་ཤ་སྟག་གོ །ཐམས་ ཅད་ཀྱང་འདས་པ་དང༌། མ་འོངས་པ་དང༌། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱིས་གསུངས་པའི་དོན་དང༌། ཚིག་དང༌། ཡི་གེ་གཟུང་བ་དང༌། བླང་བ་ཤེས་པ་ ཡང་དག་པར་འཛིན་ཅིང་རྟོག་པ་ལ་མཁས་པ་ཤ་སྟག་གོ །ཐམས་ཅད་ཀྱང་འཇིག་རྟེན་པ་དང༌། འཇིག་རྟེན་ལས་འདས་པ་དང༌། མཐའ་དང༌། དབུས་མེད་པའི་ཆོས་ཀྱི་ཚུལ་ལ་ འཇུག་པ་ཤ་སྟག་གོ །ཐམས་ཅད་ཀྱང་འདུས་བྱས་དང༌། འདུས་མ་བྱས་དང༌། དུས་དང༌། རིམ་པའི་ཚུལ་ལ་སོ་སོར་རྟོག་པ་ལ་མཁས་པ་ཤ་སྟག་གོ །ཐམས་ཅད་ཀྱང་འདས་པ་ དང༌། མ་འོངས་པ་དང༌། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་སྐད་ཅིག་གཅིག་གིས་དེ་མ་ཐག་ཏུ་ཐོབ་པར་གནས་པ་ཤ་སྟག་གོ། ཐམས་ཅད་ཀྱང་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་འཆི་འཕོ་དང༌། འབྱུང་བ་དང༌། སྐྱེ་བ་དང༌། མངོན་པར་འབྱུང་བ་དང༌། དཀའ་བ་སྤྱད་པར་སྦྱོར་བ་དང༌། བྱང་ ཆུབ་ཀྱི་སྙིང་པོར་འགྲོ་བ་དང༌། བདུད་འདུལ་བ་དང༌། མངོན་པར་རྫོགས་པར་འཚང་རྒྱ་བ་དང༌། ཆོས་ཀྱི་འཁོར་ལོ་སྐོར་བ་དང༌། ཡོངས་སུ་མྱ་ངན་ལས་འདས་པ་ཆེན་པོ་ ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་སེམས་ཅན་ཐམས་ཅད་ཀྱི་ཕྱིར་སེམས་བསྐྱེད་ཅིང་བྱང་ཆུབ་རྣམ་པར་འཚང་རྒྱ་བ་དང་མ་བྲལ་བ་ཤ་སྟག་གོ །ཐམས་ ཅད་ཀྱང་སེམས་ཅན་གཅིག་གི་སེམས་ཀྱི་དམིགས་པ་ལ་འཇུག་པས་སེམས་ཅན་མ་ལུས་པ་ཐམས་ཅད་ཀྱི་སེམས་ཀྱི་དམིགས་པ་ལ་མཁས་པ་དང་ལྡན་པ་ཤ་སྟག་གོ །ཐམས་ཅད་ ཀྱང་རང་བྱུང་གི་ཡེ་ཤེས་ཀྱི་ས་ལས་མི་བསྐྱོད་པའི་བྱང་ཆུབ་སེམས་དཔའི་ལུས་དང་ལྡན་པ་ཤ་སྟག་གོ །ཐམས་ཅད་ཀྱང་ཐམས་ཅད་མཁྱེན་པ་ཉིད་ཀྱི་ས་ཐོབ་པར་སྤྱོད་པ་ལས་ ཕྱིར་མི་ལྡོག་པ་ཤ་སྟག་གོ །ཐམས་ཅད་ཀྱང་བྱང་ཆུབ་སེམས་དཔའི་མངོན་པར་འདུ་བྱེད་པའི་སྟོབས་རྒྱུན་མི་གཅོད་ཅིང་མངོན་པར་འདུ་མི་བྱེད་པ་ཤེས་པའི་ཚུལ་ལ་ཞུགས་ པ་ཤ་སྟག་གོ །ཐམས་ཅད་ཀྱང་སེམས་ཅན་གཅིག་གི་བྱ་བ་ལ་བསྐལ་པ་མཐའ་ཡས་པར་སྤྱོད་པ་ཀུན་ཏུ་འཛིན་པར་བྱིན་གྱིས་རློབ་པ་ལ་མཁས་པ་ཤ་སྟག་གོ །ཐམས་ཅད་ཀྱང་ ཁྱད་པར་ཆོས་ཀྱི་འཁོར་ལོ་སྐོར་བར་བྱིན་གྱིས་རློབ་ཅིང་གདུལ་བྱའི་ཁམས་འགྲོ་བ་ཐམས་ཅད་འཛུད་པ་ལ་མཁས་པ་ཤ་སྟག་གོ །ཐམས་ཅད་ཀྱང་འདས་པ་དང༌། མ་འོངས་པ་དང༌། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་རྣམ་པར་དག་པའི་གནས་ལ་འཇུག་པ་དང༌། སྤྱོད་པའི་སྟོབས་ཀྱི་ཁྱད་པར་དང༌། སྨོན་ལམ་ཕུན་སུམ་ཚོགས་པ་ཤ་སྟག་གོ། ༄༅། །ཐམས་ཅད་ཀྱང་ཀུན་ཏུ་བཟང་པོའི་སྤྱོད་པའི་སྨོན་ལམ་གྱི་ཁྱད་པར་གྱི་བསམ་པ་ཕུན་སུམ་ཚོགས་པ་ཤ་སྟག་གོ །ཐམས་ཅད་ཀྱང་སངས་རྒྱས་ འབྱུང་བ་ཐམས་ཅད་ཀྱི་ཐད་དུ་འགྲོ་ཞིང་སྐུལ་བ་ལ་མཁས་པ་ཤ་སྟག་གོ །ཐམས་ཅད་ཀྱང་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་ཀུན་ཏུ་འཛིན་པ་ལ་མཁས་པ་ ཤ་སྟག་གོ །ཐམས་ཅད་ཀྱང་སངས་རྒྱས་ཐམས་ཅད་ཀྱི་རིགས་རྒྱུན་མི་གཅོད་པར་བྱེད་པ་ཤ་སྟག་གོ །ཐམས་ཅད་ཀྱང་སངས་རྒྱས་མེད་པའི་འཇིག་རྟེན་གྱི་ཁམས་སུ་སངས་ རྒྱས་འབྱུང་བ་ཀུན་ཏུ་སྟོན་པར་བྱེད་པ་ཤ་སྟག་གོ །ཐམས་ཅད་ཀྱང་ཀུན་ནས་ཉོན་མོངས་པ་ཅན་གྱི་འཇིག་རྟེན་གྱི་ཁམས་ཡོངས་སུ་སྦྱོང་བར་བྱེད་པ་ཤ་སྟག་གོ །ཐམས་ཅད་ ཀྱང་བྱང་ཆུབ་སེམས་དཔའ་ཐམས་ཅད་ཀྱི་ལས་ཀྱི་སྒྲིབ་པ་རྒྱུན་གཅོད་པར་བྱེད་པ་ཤ་སྟག་གོ །ཐམས་ཅད་ཀྱང་ཆོས་ཀྱི་དབྱིངས་སྒྲིབ་པ་མེད་པ་ལ་ཞུགས་པ་ཤ་སྟག་གོ ། ཐམས་ཅད་ཀྱང་ནམ་མཁའི་ཁམས་ལྟར་ཚད་མེད་པའི་ཆོས་དང་ལྡན་པ་ཤ་སྟག་གོ །ཐམས་ཅད་ཀྱང་ཆོས་ཀྱི་དབྱིངས་ལ་འཇུག་པ་མཉམ་པ་ཉིད་དང་ལྡན་པ་ཤ་སྟག་གོ ། ཐམས་ཅད་ཀྱང་ཡང་དག་པའི་མཐའ་དང༌། ཆོས་ཀྱི་དབྱིངས་མཉམ་པ་ཉིད་དང་ལྡན་པ་ཤ་སྟག་གོ །ཐམས་ཅད་ཀྱང་ལས་ཀྱིས་ཀུན་ནས་བསླང་བ་ཇི་ལྟ་བ་བཞིན་དུ་རྣམ་པར་སྨིན་ པ་ལ་མོས་པ་ཤ་སྟག་གོ །ཐམས་ཅད་ཀྱང་རྒྱུས་ཀུན་བསླང་བ་ཇི་ལྟ་བ་བཞིན་དུ་འབྲས་བུ་ལ་མོས་པ་ཤ་སྟག་གོ །ཐམས་ཅད་ཀྱང་རྒྱའི་འབུར་ཀུན་ཏུ་འབྱུང་བ་ལྟ་བུར་ཆོས་ཐམས་ ཅད་མཉམ་པ་ཉིད་དུ་ཤེས་པ་དང་ལྡན་པ་ཤ་སྟག་གོ །ཐམས་ཅད་ཀྱང་མིག་ཡོར་དང༌། གཟུགས་བརྙན་ལྟར་སྟོན་པའི་ཆོས་མཉམ་པ་ཉིད་དང་ལྡན་པ་ཤ་སྟག་གོ །ཐམས་ ཅད་ཀྱང་ཆོས་ཐམས་ཅད་ཀྱི་སྒྲ་དབྱངས་ཀྱི་རྣམ་པར་རིག་པ་བྲག་ཅ་དང་མཚུངས་པ་དང་ལྡན་པ་ཤ་སྟག་གོ །ཐམས་ཅད་ཀྱང་རྣམ་པར་ཐར་པ་དང༌། ཏིང་ངེ་འཛིན་བསམ་ གྱིས་མི་ཁྱབ་པ་ལ་གནས་པ་ཤ་སྟག་གོ །ཐམས་ཅད་ཀྱང་དཔའ་བར་འགྲོ་བའི་ཏིང་ངེ་འཛིན་གྱིས་རྣམ་པར་རྩེན་པ་ཤ་སྟག་གོ །ཐམས་ཅད་ཀྱང་སངས་རྒྱས་ཀྱི་སྐུ་མཐའ་ ཡས་པའི་མདོག་ཡོངས་སུ་འགྲུབ་པ་སྒྲུབ་པའི་གཟུངས་ལ་གནས་པ་ཤ་སྟག་གོ །ཐམས་ཅད་ཀྱང་སྐྲ་ཙམ་གྱི་ཁྱོན་གཅིག་ལ་འཇིག་རྟེན་གྱི་ཁམས་ཐམས་ཅད་ཀུན་ཏུ་ སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་ཕྱོགས་བཅུ་དག་ཏུ་སྐྲ་ཙམ་གྱི་ཁྱོན་གཅིག་ལ་འཆི་འཕོ་དང༌། འབྱུང་བ་དང༌། སྐྱེ་བ་དང༌། མངོན་པར་འབྱུང་བ་དང༌། དཀའ་བ་སྤྱད་པར་སྦྱོར་བ་དང༌། བྱང་ཆུབ་ཀྱི་སྙིང་པོར་འགྲོ་བ་དང༌། བདུད་འདུལ་བ་དང༌། མངོན་པར་བྱང་ཆུབ་པ་དང༌། ཆོས་ཀྱི་འཁོར་ལོ་སྐོར་བ་དང༌། ཡོངས་སུ་མྱ་ ༄༅། །ངན་ལས་འདས་པ་ཆེན་པོ་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་སྐྱིལ་མོ་ཀྲུང་གཅིག་གིས་ཕྱོགས་བཅུ་དག་གི་འཇིག་རྟེན་ གྱི་ཁམས་ཐམས་ཅད་ཀྱི་ནམ་མཁའ་རྒྱས་པར་འགེངས་པར་ཤེས་པ་དང་ལྡན་པ་ཤ་སྟག་གོ །ཐམས་ཅད་ཀྱང་ཞིང་ཐམས་ཅད་ཀྱི་རྒྱན་ཞིང་གཅིག་ཏུ་སྟོན་པ་ལ་མཁས་ པ་ཤ་སྟག་གོ །ཐམས་ཅད་ཀྱང་ཞིང་གཅིག་གི་རྒྱན་བཀོད་པ་ཞིང་ཐམས་ཅད་དུ་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་ཕྱོགས་བཅུ་དག་གི་འཇིག་རྟེན་ གྱི་ཁམས་རབ་འབྱམས་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་ཀྱི་འཁོར་གང་དག་ཡིན་པ་དེ་དག་དེ་བཞིན་གཤེགས་པ་གཅིག་གི་འཁོར་དུ་སྟོན་པ་ལ་མཁས་ པ་ཤ་སྟག་གོ །དེ་བཞིན་གཤེགས་པ་གཅིག་གི་འཁོར་གང་ཡིན་པ་དེ་ཕྱོགས་བཅུ་དག་གི་འཇིག་རྟེན་གྱི་ཁམས་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་ཀྱི་འཁོར་དུ་ ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་ཆོས་ཐམས་ཅད་མཐའ་དང་དབུས་མེད་པར་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་སེམས་ཅན་ཐམས་ ཅད་ཀྱི་ལུས་རང་གི་ལུས་སུ་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་སངས་རྒྱས་ཐམས་ཅད་ཀྱི་སྐུ་སངས་རྒྱས་གཅིག་གི་སྐུར་ཞུགས་པར་ཀུན་ཏུ་སྟོན་ པ་ལ་མཁས་པ་ཤ་སྟག་གོ །ཐམས་ཅད་ཀྱང་སངས་རྒྱས་གཅིག་གི་སྐུ་སངས་རྒྱས་ཐམས་ཅད་ཀྱི་སྐུར་ཞུགས་པར་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་ཕྱོགས་བཅུའི་ འཇིག་རྟེན་གྱི་ཁམས་ཐམས་ཅད་རང་གི་ལུས་སུ་ཆུད་པར་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་སེམས་ཅན་གཅིག་གི་ལུས་ལ་དུས་གསུམ་གྱི་སེམས་ཅན་རྣམས་ ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་འདས་པའི་དུས་ལ་མ་འོངས་པ་དང༌། ད་ལྟར་བྱུང་བའི་དུས་དང༌། མ་འོངས་པའི་དུས་ལ་འདས་པ་དང༌། ད་ལྟར་བྱུང་བའི་ དུས་དང༌། ད་ལྟར་བྱུང་བའི་དུས་ལ་འདས་པ་དང༌། མ་འོངས་པའི་དུས་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་ལུས་གཅིག་གིས་ཏིང་ངེ་འཛིན་ལ་སྙོམས་པར་ ཞུགས་ལ་ལུས་དཔག་ཏུ་མེད་གྲངས་མེད་པ་ལས་ལྡང་བ་ལ་མཁས་པ་ཤ་སྟག་གོ །ལུས་དཔག་ཏུ་མེད་ཅིང་གྲངས་མེད་པ་དག་གིས་ཏིང་ངེ་འཛིན་ལ་སྙོམས་པར་ཞུགས་ལ། ལུས་གཅིག་ལས་ལྡང་བར་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་སེམས་ཅན་ཐམས་ཅད་ཀྱིས་ལུས་སྙེད་ཀྱི་མངོན་པར་བྱང་ཆུབ་པ་ཀུན་ཏུ་སྟོན་པ་ལ་མཁས་ པ་ཤ་སྟག་གོ །ཐམས་ཅད་ཀྱང་སེམས་ཅན་ཐམས་ཅད་ཀྱི་ལུས་ལ་སེམས་ཅན་གཅིག་གི་ལུས་ཀུན་ཏུ་སྟོན་པ་ལ་མཁས་པ་ཤ་སྟག་གོ །སེམས་ཅན་གཅིག་གི་ལུས་ལ་སེམས་ ༄༅། །ཅན་ཐམས་ཅད་ཀྱི་ལུས་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་སེམས་ཅན་ཐམས་ཅད་ཀྱིས་ལུས་ལས་སངས་རྒྱས་ཀྱི་སྐུ་ཀུན་ཏུ་ སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་སངས་རྒྱས་ཀྱི་སྐུ་ལས་སེམས་ཅན་གྱི་ལུས་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་སེམས་ཅན་གྱི་ ལུས་ཆོས་ཀྱི་སྐུར་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་ཞིང་ཐམས་ཅད་ཀྱི་རྒྱན་བཀོད་པ་དེ་དག་ཞིང་གཅིག་ཏུ་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཞིང་ གཅིག་གི་རྒྱན་བཀོད་པ་དེ་དག་ཞིང་ཐམས་ཅད་དུ་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་ཆོས་ཀྱི་སྐུ་སེམས་ཅན་གྱི་ལུས་སུ་ཀུན་ཏུ་སྟོན་པ་ལ་མཁས་པ་ཤ་ སྟག་གོ །ཐམས་ཅད་ཀྱང་སྤུའི་ཁུང་བུ་གཅིག་ཏུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་འཇུག་པར་བྱེད་པ་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ ཅད་ཀྱང་སངས་རྒྱས་ཐམས་ཅད་ཀྱི་མངོན་པར་རྫོགས་པར་བྱང་ཆུབ་པའི་སྨོན་ལམ་གྱི་སྟོབས་ཀྱི་གནས་མངོན་པར་རྫོགས་པར་བྱང་ཆུབ་པར་ཀུན་ཏུ་སྟོན་པ་ལ་མཁས་ པ་ཤ་སྟག་གོ །ཐམས་ཅད་ཀྱང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་ན་གདུལ་བྱའི་སེམས་ཅན་ཡོངས་སུ་སྨིན་པ་ཇི་ལྟ་བ་དེ་བཞིན་དུ་བླ་ན་མེད་ པ་ཡང་དག་པར་རྫོགས་པའི་བྱང་ཆུབ་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་བསྐལ་པ་བགྲང་བ་ཐམས་ཅད་དུ་འཇིག་རྟེན་གྱི་ཁམས་གཅིག་ཏུ་བྱང་ཆུབ་སེམས་དཔའི་ སྤྱད་པ་སྤྱོད་པ་རྒྱུན་མི་གཅོད་པའི་ལུས་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཐམས་ཅད་ཀྱང་སེམས་བསྐྱེད་པ་གཅིག་གིས་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ ཐམས་ཅད་ཀྱི་འཇིག་རྟེན་གྱི་ཁམས་རེ་རེ་ན་སྒོང་ལས་སྐྱེས་པ་དང༌། མངལ་ནས་སྐྱེས་པ་དང༌། དྲོད་གཤེར་ལས་སྐྱེས་པ་དང༌། རྫུས་ཏེ་སྐྱེས་པ་དང༌། གཟུགས་ཅན་དང༌། གཟུགས་ ཅན་མ་ཡིན་པ་དང༌། འདུ་ཤེས་ཅན་དང༌། འདུ་ཤེས་ཅན་མ་ཡིན་པ་དང༌། རྐང་གཉིས་པ་དང༌། རྐང་བཞི་པ་དང༌། རྐང་མང་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དང༌། མི་དང༌། མི་མ་ཡིན་པ་སེམས་ཅན་གདུལ་ བྱ་ཡོངས་སུ་སྨིན་པ་ཐམས་ཅད་ཇི་ལྟ་བཞིན་དུ་ལྷུན་གྱིས་གྲུབ་ཅིང་རྣམ་པར་མི་རྟོག་པར་སྤྱོད་པ་དང༌། སྤྱོད་ལམ་དང༌། བྱ་བ་ལ་འཇུག་པའི་གནས་ཀུན་ཏུ་སྟོན་པ་ལ་མཁས་ པ་ཤ་སྟག་གོ །ཐམས་ཅད་ཀྱང་རྡུལ་ཕྲ་རབ་ཀྱི་རྡུལ་རེ་རེ་ལ་འཇིག་རྟེན་གྱི་ཁམས་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། ཚད་ ༄༅། །མེད། བརྗོད་དུ་མེད་པའི་ཡང་བརྗོད་དུ་མེད་པ་དག་འཇུག་པར་བྱེད་ཀྱང་སེམས་ཅན་ལ་གནོད་པ་མེད་པ་ལ་མཁས་པ་ཤ་སྟག་གོ །ཐམས་ཅད་ཀྱང་ བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པའི་ཡང་བརྗོད་དུ་མེད་པ་དག་ཡུད་ཙམ་གཅིག་ཏུ་བྱིན་གྱིས་ རློབ་པ་ཀུན་ཏུ་སྟོན་པ་ལ་མཁས་པ་ཤ་སྟག་གོ །ཡུད་ཙམ་གཅིག་བསྐལ་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་ མེད་པའི་ཡང་བརྗོད་དུ་མེད་པ་དག་ཏུ་བྱིན་གྱིས་རློབ་པ་ལ་མཁས་པ་ཤ་སྟག་གོ །ཐམས་ཅད་ཀྱང་སྤྱོད་ལམ་ཇི་ལྟ་བུས་སེམས་ཅན་རྣམས་ཡོངས་སུ་སྨིན་པར་འགྱུར་བ་དེ་ལྟ་ དེ་ལྟར་ལྷུན་གྱིས་གྲུབ་ཅིང་རྣམ་པར་མི་རྟོག་པར་གཟུགས་ཀྱི་ལུས་ཀྱི་ཁ་དོག་དང༌། སྤྱོད་ལམ་ཀུན་ཏུ་སྟོན་པ་ལ་མཁས་པ་ཤ་སྟག་སྟེ། བྱང་ཆུབ་སེམས་དཔའ་སེམས་ དཔའ་ཆེན་པོ་དེ་དག་དང༌། གཞན་དག་ཐམས་ཅད་ཀྱང་ཡོན་ཏན་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་དང་ལྡན་པ་ཤ་སྟག་གོ །སངས་རྒྱས་ཀྱི་ ཞིང་ཐ་དད་པ་ནས་འདུས་པའི་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། ཚད་མེད། བརྗོད་དུ་མེད་པའི་ཡང་བརྗོད་དུ་མེད་པ་ཤ་ སྟག་དང་ཡང་ཐབས་གཅིག་གོ །འཇིག་རྟེན་གྱི་ཁམས་འདི་ནས་ཀྱང་རྒྱལ་ཆེན་བཞིའི་རིས་ཀྱི་ལྷ་བྱེ་བ་ཕྲག་བརྒྱ་རེ་རེའང་གཡོག་འཁོར་མང་པོ་དང་ལྡན་པ་དག་བཅོམ་ལྡན་ འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །བརྒྱ་བྱིན་བྱེ་བ་ ཕྲག་བརྒྱ་དང༌། ལྷའི་རྒྱལ་པོ་རབ་འཐབ་བྲལ་བྱེ་བ་ཕྲག་བརྒྱ་དང༌། ལྷའི་རྒྱལ་པོ་ཡོངས་སུ་དགའ་ལྡན་བྱེ་བ་ཕྲག་བརྒྱ་དང༌། ལྷའི་རྒྱལ་པོ་རབ་འཕྲུལ་བྱེ་བ་ཕྲག་བརྒྱ་དང༌། ལྷའི་རྒྱལ་པོ་གཞན་འཕྲུལ་དབང་བྱེད་བྱེ་བ་ཕྲག་བརྒྱ་ལ་ལྷའི་རྒྱལ་པོ་རེ་རེའང་གཡོག་འཁོར་མང་པོ་དང་ལྡན་པ་དག་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །དེད་དཔོན་ལ་སོགས་པ་བདུད་ཀྱི་རིས་ཀྱི་ ལྷ་བྱེ་བ་ཕྲག་མང་པོ་དག་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ ༄༅། །ལྡན་འདས་ག་ལ་བ་དེར་ལྷགས་སོ། །སྲིན་པོའི་རྒྱལ་པོ་འབུམ་ཕྲག་བཅོ་བརྒྱད་དང༌། འབྱུང་པོའི་རྒྱལ་པོ་འབུམ་ཕྲག་སུམ་ཅུ་རྩ་བརྒྱད་དང༌། ལྷ་མ་ ཡིན་གྱི་རྒྱལ་པོ་འབུམ་ཕྲག་བརྒྱད་ཅུ་དང༌། རིག་སྔགས་འཆང་གི་རྒྱལ་པོ་འབུམ་ཕྲག་དྲུག་ཅུ་རྩ་ལྔ་དང༌། དྲང་སྲོང་འབུམ་ཕྲག་དགུ་བཅུ་རྩ་དགུ་ཐམས་ཅད་ཀྱང་མངོན་པར་ ཤེས་པ་ལྔ་དང་ལྡན་པ་ཤ་སྟག་དང༌། རླུང་གི་རྒྱལ་པོ་ཆེན་པོ་རྣམ་པར་འཐོར་རླུང་དང༌། རྣམ་པར་འཐོར་རླུང་ཆེན་པོ་གཡོག་འཁོར་མང་པོ་དང་ལྡན་པ་དག་དང༌། ཚངས་ པ་བྱེ་བ་ཕྲག་བརྒྱ་དང༌། ཚངས་པ་ཆེན་པོ་བྱེ་བ་ཕྲག་བརྒྱ་དང༌། འོད་ཆུང་བྱེ་བ་ཕྲག་བརྒྱ་དང༌། ཚད་མེད་འོད་བྱེ་བ་ཕྲག་བརྒྱ་དང༌། འོད་གསལ་བྱེ་བ་ཕྲག་བརྒྱ་དང༌། དགེ་ ཆུང་བྱེ་བ་ཕྲག་བརྒྱ་དང༌། ཚད་མེད་དགེ་བྱེ་བ་ཕྲག་བརྒྱ་དང༌། དགེ་རྒྱས་བྱེ་བ་ཕྲག་བརྒྱ་དང༌། སྤྲིན་མེད་བྱེ་བ་ཕྲག་བརྒྱ་དང༌། འབྲས་བུ་ཆེ་བྱེ་བ་ཕྲག་བརྒྱ་དང༌། བསོད་ནམས་ སྐྱེས་བྱེ་བ་ཕྲག་བརྒྱ་དང༌། གྱ་ནོམ་སྣང་བྱེ་བ་ཕྲག་བརྒྱ་དང༌། ཤིན་ཏུ་མཐོང་བྱེ་བ་ཕྲག་བརྒྱ་དང༌། མི་ཆེ་བ་བྱེ་བ་ཕྲག་བརྒྱ་དང༌། མི་གདུང་བ་བྱེ་བ་ཕྲག་བརྒྱ་དང༌། འོག་ མིན་གྱི་ལྷ་བྱེ་བ་ཕྲག་བརྒྱ་དག་ལ་ཚངས་པ་ཆེན་པོ་རེ་རེའང་གཡོག་འཁོར་མང་པོ་དང་ལྡན་པ་དག་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །ལྷའི་བུ་དབང་ཕྱུག་ཆེན་པོ་ལ་སོགས་པ་གནས་གཙང་མའི་ རིས་ཀྱི་ལྷ་བྱེ་བ་ཕྲག་བརྒྱ་དག་ཀྱང་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་ བཅོམ་ལྡན་འདས་ག་ལ་བ་དེར་ལྷགས་སོ། །ཀླུའི་དབང་པོ་བྱེ་བ་ཕྲག་བརྒྱ་དང༌། གནོད་སྦྱིན་གྱི་དབང་པོ་བྱེ་བ་ཕྲག་བརྒྱ་དང༌། དྲི་ཟའི་དབང་པོ་བྱེ་བ་ཕྲག་བརྒྱ་དང༌། ལྷ་མ་ཡིན་གྱི་དབང་ པོ་བྱེ་བ་ཕྲག་བརྒྱ་དང༌། ནམ་མཁའ་ལྡིང་གི་དབང་པོ་བྱེ་བ་ཕྲག་བརྒྱད་ན། མིའམ་ཅིའི་དབང་པོ་བྱེ་བ་ཕྲག་བརྒྱ་དང༌། ལྟོ་འཕྱེ་ཆེན་པོའི་དབང་པོ་བྱེ་བ་ཕྲག་བརྒྱ་རེ་རེའང་གཡོག་ འཁོར་མང་པོ་དང་ལྡན་པ་དག་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་ བཅོམ་ལྡན་འདས་ག་ལ་བ་དེར་ལྷགས་སོ། །མི་དང༌། མི་མ་ཡིན་པ་དཔག་ཏུ་མེད་གྲངས་མེད་པ་དག་ཀྱང་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་ པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །དགེ་བསྙེན་དང༌། དགེ་བསྙེན་མ་བྱེ་བ་ཁྲག་ཁྲིག་འབུམ་ཕྲག་ ༄༅། །མང་པོ་དག་ཀྱང་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་ མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །རྩྭ་དང༌། ཤིང་གེལ་པ་དང༌། སྨན་དང༌། ནགས་ཚལ་གྱི་ལྷ་གང་དག་ཡིན་པ་དག་དང༌། ལྷུན་པོ་དང༌། ལྷུན་པོ་ཆེན་ པོ་དང༌། བཏང་བཟུང་དང༌། བཏང་བཟུང་ཆེན་པོ་དང༌། གངས་རི་དང༌། ཁོར་ཡུག་དང༌། ཁོར་ཡུག་ཆེན་པོ་ལ་སོགས་པ་རི་རྣམས་ཀྱི་ལྷ་གང་དག་ཡིན་པ་དེ་དག་ཐམས་ཅད་གནས་དང་ བཅས་ཏེ། བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ལྡན་འདས་ ག་ལ་བ་དེར་ལྷགས་སོ། །རྒྱ་མཚོ་དང༌། རྒྱ་མཚོ་ཆེན་པོ་དང༌། ཆུ་ཀླུང་དང༌། ཆུ་བྲན་དང༌། མཚོ་བྲན་དང༌། མཚེའུ་དང༌། ཆུ་མིག་དང༌། འབབ་ཆུ་རྣམས་ཀྱི་ལྷ་གང་དག་ཡིན་ པ་དེ་དག་ཐམས་ཅད་ཀྱང་གནས་དང་བཅས་ཏེ། བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་ དང༑ འོར་རྣམས་ཀྱི་ལྷ་གང་དག་ཡིན་པ་དེ་དག་ཀྱང་རང་གི་གནས་དང་ལྷན་ཅིག་ཏུ་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་ དང༑ མིའམ་ཅི་དང༌། ལྟོ་འཕྱེ་ཆེན་པོའི་གནས་རྣམས་ཀྱི་ལྷ་གང་དག་ཡིན་པ་དེ་དག་ཀྱང་རང་རང་གི་གནས་སུ་ཞུགས་ཏེ། བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་ བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་ཏེ། བཅོམ་ལྡན་འདས་ཀྱིས་མཐུས་ སེམས་ཅན་འགའ་ལའང་གནོད་པ་མེད་ཅིང་སྒྲིབ་པ་མེད་དོ། །ཟླ་བ་བྱེ་བ་ཕྲག་བརྒྱ་དང༌། ཉི་མ་བྱེ་བ་ཕྲག་བརྒྱ་དང༌། རྒྱ་མཚོ་བྱེ་བ་ཕྲག་བརྒྱ་རེ་རེའང་གཡོག་འཁོར་མང་པོ་དང་ ལྡན་པ་དག་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ལྡན་འདས་ ག་ལ་བ་དེར་ལྷགས་སོ། །ཀླུའི་རྒྱལ་པོ་ཆེན་པོ་མ་དྲོས་པའང་འཁོར་དང་བཅས་ཏེ་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། ༄༅། །བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་བཅོམ་ལྡན་འདས་ག་ལ་བ་དེར་ལྷགས་སོ། །དུད་འགྲོའི་སྐྱེ་གནས་སུ་སོང་བའི་སེམས་ ཅན་ཐམས་ཅད་ཀྱང་བཅོམ་ལྡན་འདས་ལ་བལྟ་བའི་ཕྱིར་དང༌། ཕྱག་བྱ་བའི་ཕྱིར་དང༌། མཆོད་པའི་ཕྱིར་དང༌། བསྙེན་བཀུར་བྱ་བའི་ཕྱིར་དང༌། ཆོས་མཉན་པའི་ཕྱིར་ བཅོམ་ལྡན་འདས་ག་ལ་བ་དེར་ལྷགས་སོ། །དུད་འགྲོའི་སྐྱེ་གནས་སུ་སོང་བའི་སེམས་ཅན་དེ་དག་ཐམས་ཅད་ཀྱང་ཐེག་པ་ཆེན་པོ་ལ་མོས་པ། ཐེག་པ་ཆེན་པོ་ལ་གཞོལ་བ། ཐམས་ཅད་མཁྱེན་པ་ཉིད་ཀྱི་ཡེ་ཤེས་འདོད་པ་ཤ་སྟག་གོ །དེའི་ཚེ་བཅོམ་ལྡན་འདས་ཀྱིས་ཁ་དོག་དང༌། གཟུགས་དང༌། གཟི་བརྗིད་དང༌། འོད་ཀྱིས་འཁོར་ཐམས་ ཅད་ཀྱང་ཟིལ་གྱིས་མནན་ཏེ། ལྷམ་མེ། ལྷན་ནེ། ལྷང་ངེའོ། །འདི་ལྟ་སྟེ། དཔེར་ན། ཉི་མས་འོད་ཟེར་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་ཕྱུང་སྟེ་སྲིན་བུ་མེ་ཁྱེར་ ཐམས་ཅད་ཟིལ་གྱིས་མནན་ནས་ལྷམ་མེ། ལྷན་ནེ། ལྷང་ངེའོ། །དེ་བཞིན་དུ་བཅོམ་ལྡན་འདས་ཀྱང་བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་ཐམས་ཅད་ཟིལ་གྱིས་ མནན་ཏེ་ལྷམ་མེ། ལྷན་ནེ། ལྷང་ངེའོ། །འདི་ལྟ་སྟེ། དཔེར་ན། ཟླ་བ་ཡར་གྱི་ངོ་ཚེས་བཅོ་ལྔ་ལ་ཟླ་བའི་དཀྱིལ་འཁོར་སྤྲིན་གྱི་དྲ་བ་ལས་གྲོལ་བ་ནི་སྐར་མའི་ཚོགས་ཐམས་ ཅད་ཟིལ་གྱིས་མནན་ནས་ལྷམ་མེ། ལྷན་ནེ། ལྷང་ངེའོ། །དེ་བཞིན་དུ་བཅོམ་ལྡན་འདས་ཀྱང་བརྒྱ་བྱིན་དང༌། ཚངས་བ་དང༌། འཇིག་རྟེན་སྐྱོང་བ་ཐམས་ཅད་སྤ་བཀོང་སྟེ་ཟིལ་ གྱིས་མནན་ནས་ལྷམ་མེ། ལྷན་ནེ། ལྷང་ངེ་སྟེ། རིའི་རྒྱལ་པོ་རི་རབ་ལྟར་དཔལ་གྱིས་རབ་ཏུ་འབར་ཏེ། སྐུ་མི་གཡོ། མི་འགྱུར། མི་འགུལ་བར་ལྷམ་མེ། ལྷན་ནེ། ལྷང་ངེའོ། །དེ་ ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། དེ་ བཞིན་དུ་དེ་བཞིན་གཤེགས་པ་འདི་ནི་སྐུ་མི་གཡོ། མི་འགྱུར། མི་འགུལ་བར་བཞུགས་སོ། །དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ ཅད་རྣམ་པར་སེལ་བས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། དེ་བཞིན་གཤེགས་པ་འདི་ལ་འཁོར་འདི་ཉིད་ཀྱི་ནང་ནས་ཁ་ཅིག་གིས་ནི་ རབ་ཏུ་འབྱུང་བར་མངོན་དུ་ཕྱོགས་ཤིང་ཁྱིམ་ནས་མངོན་པར་འབྱུང་བར་ཤེས་སོ། །ཁ་ཅིག་གིས་ནི་རབ་ཏུ་བྱུང་ཞིང་དཀའ་བ་སྤྱོད་པ་ལ་གནས་པར་ཤེས་སོ། །འཁོར་འདི་ ཉིད་ཀྱི་ནང་ནས་ཁ་ཅིག་གིས་ནི་བྱང་ཆུབ་ཀྱི་སྙིང་པོར་གཤེགས་པར་ཤེས་སོ། །ཁ་ཅིག་གིས་ནི་བྱང་ཆུབ་ཀྱི་སྙིང་པོ་ལ་བཞུགས་པར་ཤེས་སོ། །འཁོར་འདི་ཉིད་ཀྱི་ནང་ ༄༅། །ནས་ཁ་ཅིག་གིས་ནི་བདུད་འཁོར་གྲངས་མེད་དཔག་ཏུ་མེད་པས་བསྐོར་བ་བཅོམ་པར་ཤེས་སོ། ཁ་ཅིག་གིས་ནི་ལྷ་དང༌། ཀླུ་དང༌། གནོད་སྦྱིན་ དང༑ དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དཔག་ཏུ་མེད་གྲངས་ མེད་པ་དག་གིས། དེད་དཔོན་ཆེན་པོ་རྒྱལ་ལོ། །རྒྱལ་ལོ་ཞེས་སྤྲོས་བར་བྱེད་པར་ཤེས་སོ། ཁ་ཅིག་གིས་ནི་མངོན་པར་རྫོགས་པར་སངས་རྒྱས་ནས་བརྒྱ་བྱིན་རྣམས་གསོལ་ བ་འདེབས་པར་ཤེས་སོ། ཁ་ཅིག་གིས་ནི་ཚངས་པ་རྣམས་ལ་གསོལ་བ་འདེབས་པར་ཤེས་སོ། །འཁོར་འདི་ཉིད་ཀྱི་ནང་ནས་ཁ་ཅིག་གིས་ནི་འཇིག་རྟེན་སྐྱོང་བ་རྣམས་བཅོམ་ ལྡན་འདས་ལ་གསོལ་བ་འདེབས་པར་ཤེས་སོ། ཁ་ཅིག་གིས་ནི་བཅོམ་ལྡན་འདས་བདག་ཅག་ལ་སྦྱིན་པའི་གཏམ་སྟོན་པར་ཤེས་སོ། །འཁོར་འདི་ཉིད་ཀྱི་ནང་ནས་ཁ་ཅིག་ གིས་བཅོམ་ལྡན་འདས་བདག་ཅག་ལ་ཚུལ་ཁྲིམས་ཀྱི་གཏམ་སྟོན་པར་ཤེས་སོ། །ཁ་ཅིག་གིས་ནི་བཟོད་པའི་གཏམ། ཁ་ཅིག་གིས་ནི་བརྩོན་འགྲུས་ཀྱི་གཏམ། ཁ་ཅིག་ གིས་ནི་བསམ་གཏན་གྱི་གཏམ། ཁ་ཅིག་གིས་ནི་ཤེས་རབ་ཀྱི་གཏམ། བཅོམ་ལྡན་འདས་བདག་ཅག་ལ་སྟོན་པར་ཤེས་སོ། ཁ་ཅིག་གིས་ནི་ཐབས་ལ་མཁས་པའི་གཏམ་ ཁ་ཅིག་གིས་ནི་རྫུ་འཕྲུལ་གྱི་གཏམ། ཁ་ཅིག་གིས་ནི་སྨོན་ལམ་གྱི་གཏམ། ཁ་ཅིག་གིས་ནི་ཡེ་ཤེས་ཀྱི་གཏམ་བཅོམ་ལྡན་འདས་བདག་ཅག་ལ་སྟོན་པར་ཤེས་སོ། ཁ་ ཅིག་གིས་ནི་ཉན་ཐོས་ཀྱི་ཐེག་པའི་གཏམ། ཁ་ཅིག་གིས་ནི་རང་སངས་རྒྱས་ཀྱི་ཐེག་པའི་གཏམ། ཁ་ཅིག་གིས་ནི་ཐེག་པ་ཆེན་པོའི་གཏམ། བཅོམ་ལྡན་འདས་བདག་ཅག་ལ་ སྟོན་པར་ཤེས་སོ། ཁ་ཅིག་གིས་ནི་སེམས་ཅན་དམྱལ་བར་སྐྱེ་བའི་ཆོས་རྣམས་བཅོམ་ལྡན་འདས་བདག་ཅག་ལ་སྟོན་པར་ཤེས་སོ། ཁ་ཅིག་གིས་ནི་དུད་འགྲོར་སྐྱེ་བའི་ཆོས་རྣམས་བཅོམ་ ལྡན་འདས་བདག་ཅག་ལ་སྟོན་པར་ཤེས་སོ། ཁ་ཅིག་གིས་ནི་ཡི་དྭགས་སུ་སྐྱེ་བའི་ཆོས་རྣམས་བཅོམ་ལྡན་འདས་བདག་ཅག་ལ་སྟོན་པར་ཤེས་སོ། ཁ་ཅིག་གིས་ནི་གཤིན་རྗེའི་འཇིག་ རྟེན་དུ་སྐྱེ་བའི་ཆོས་རྣམས་བཅོམ་ལྡན་འདས་བདག་ཅག་ལ་སྟོན་པར་ཤེས་སོ། ཁ་ཅིག་གིས་ནི་རྒྱལ་ཆེན་བཞིའི་རིས་ཀྱི་ལྷའི་ནང་དུ་སྐྱེ་བའི་ཆོས་རྣམས་བཅོམ་ལྡན་འདས་བདག་ཅག་ ལ་སྟོན་པར་ཤེས་སོ། ཁ་ཅིག་གིས་ནི་སུམ་ཅུ་རྩ་གསུམ་གྱི་གནས་སུ་སྐྱེ་བ་དང༌། ཁ་ཅིག་གིས་ནི་འཐབ་བྲལ་གྱི་གནས་སུ་སྐྱེ་བའི་ཆོས་རྣམས་བཅོམ་ལྡན་འདས་བདག་ཅག་ ལ་སྟོན་པར་ཤེས་སོ། ཁ་ཅིག་གིས་ནི་དགའ་ལྡན་གྱི་གནས་སུ་སྐྱེ་བ་དང༌། ཁ་ཅིག་གིས་ནི་འཕྲུལ་དགའི་གནས་སུ་སྐྱེ་བ་དང༌། ཁ་ཅིག་གིས་ནི་གཞན་འཕྲུལ་དབང་བྱེད་ཀྱི་གནས་ ༄༅། །སུ་སྐྱེ་བ་དང༌། ཁ་ཅིག་གིས་ནི་བདུད་ཀྱི་གནས་སུ་སྐྱེ་བ་དང༌། ཁ་ཅིག་གིས་ནི་ཚངས་པའི་གནས་སུ་སྐྱེ་བའི་ཆོས་རྣམས་བཅོམ་ལྡན་འདས་བདག་ཅག་ལ་སྟོན་ པར་ཤེས་སོ། །དེ་བཞིན་དུ་ཚངས་པའི་མདུན་ན་འདོན་དང༌། ཚངས་འཁོར་དང༌། འོད་ཆུང་དང༌། ཚད་མེད་འོད་དང༌། འོད་གསལ་དང༌། དགེ་ཆུང་དང༌། ཚད་མེད་དགེ་དང༌། དགེ་རྒྱས་དང༌། སྤྲིན་མེད་དང༌། བསོད་ནམས་སྐྱེས་དང༌། འབྲས་བུ་ཆེ་དང༌། མི་ཆེ་བ་དང༌། མི་གདུང་བ་དང༌། གྱ་ནོམ་སྣང་དང༌། ཤིན་ཏུ་མཐོང་དང༌། འོག་མིན་དང༌། ནམ་ མཁའ་མཐའ་ཡས་སྐྱེ་མཆེད་དང༌། རྣམ་ཤེས་མཐའ་ཡས་སྐྱེ་མཆེད་དང༌། ཅིའང་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་སྐྱེ་བའི་ཆོས་ རྣམས་བཅོམ་ལྡན་འདས་བདག་ཅག་ལ་སྟོན་པར་ཤེས་སོ། །འཇམ་དཔལ། འཁོར་འདི་ཉིད་ཀྱི་ནང་ནས་ཁ་ཅིག་གིས་ནི་མིར་སྐྱེ་བའི་ཆོས་རྣམས། ཁ་ཅིག་གིས་ནི་འཁོར་ ལོས་བསྒྱུར་བའི་རྒྱལ་པོར་འགྱུར་བའི་ཆོས་རྣམས། ཁ་ཅིག་གིས་ནི་གླིང་གཉིས་དང༌། གསུམ་དང༌། བཞི་པའི་འཁོར་ལོས་བསྒྱུར་བ་དང༌། སྟོང་གཉིས་དང༌། སྟོང་གསུམ་ གྱི་སྟོང་ཆེན་པོ་དང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་གི་འཁོར་ལོས་བསྒྱུར་བའི་རྒྱལ་པོར་འགྱུར་བའི་ཆོས་རྣམས་ བཅོམ་ལྡན་འདས་བདག་ཅག་ལ་སྟོན་པར་ཤེས་སོ། །འཇམ་དཔལ། འཁོར་འདི་ཉིད་ཀྱི་ནང་ནས་ཁ་ཅིག་གིས་ནི་དེ་བཞིན་གཤེགས་པའི་སྐུ་འདོམ་དོ་ཙམ་དུ་འཕགས་པར་ ཤེས་སོ། །ཁ་ཅིག་གིས་ནི་རྒྱང་གྲགས་ཙམ་དུ་འཕགས། ཁ་ཅིག་གིས་ནི་རྒྱང་གྲགས་གཉིས་ཙམ་དུ་འཕགས། ཁ་ཅིག་གིས་ནི་དེ་བཞིན་གཤེགས་པའི་སྐུ་དཔག་ཚད་ཙམ་ དུ་འཕགས་པར་ཤེས་སོ། །ཁ་ཅིག་གིས་ནི་དེ་བཞིན་གཤེགས་པའི་སྐུ་དཔག་ཚད་གཉིས་ཙམ་དུ་འཕགས་པར་ཤེས་སོ། །ཁ་ཅིག་གིས་ནི་དེ་བཞིན་གཤེགས་པའི་སྐུ་དཔག་ ཚད་བཅུ་ཙམ་དུ་འཕགས་པར་ཤེས་སོ། །འཁོར་འདི་ཉིད་ཀྱི་ནང་ནས་ཁ་ཅིག་གིས་ནི་དེ་བཞིན་གཤེགས་པའི་སྐུ་དཔག་ཚད་སྟོང་དུ་ཤེས་སོ། །ཁ་ཅིག་གིས་ནི་དེ་བཞིན་གཤེགས་པའི་ སྐུ་དཔག་ཚད་སྟོང་ཕྲག་བཅུ་དང༌། ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་པར་ཤེས་སོ། །ཁ་ཅིག་གིས་ནི་དཔག་ཚད་འབུམ་དང༌། ཁ་ཅིག་གིས་ནི་དེ་བཞིན་གཤེགས་ པའི་སྐུ་དཔག་ཚད་འབུམ་ཕྲག་བཅུ་དང༌། ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་པར་ཤེས་སོ། །ཁ་ཅིག་གིས་ནི་དེ་བཞིན་གཤེགས་པའི་སྐུ་ད་པག་ཚད་ འབུམ་ཕྲག་བརྒྱད་ཁྲི་བཞི་སྟོང་པར་ཤེས་སོ། །འཁོར་འདི་ཉིད་ཀྱི་ནང་ནས་ཁ་ཅིག་གིས་ནི་དེ་བཞིན་གཤེགས་པའི་སྐུ་དཔག་ཚད་འབུམ་ཕྲག་བགྲང་བ་ལས་འདས་ ༄༅། །པར་ཤེས་སོ། །འཁོར་འདི་ཉིད་ཀྱི་ནང་ནས་ཁ་ཅིག་གིས་ནི་དེ་བཞིན་གཤེགས་པའི་སྐུ་གསེར་གྱི་ཁ་དོག་ཏུ་མཐོང་ངོ༌། །ཁ་ཅིག་གིས་ནི་ནོར་ བུ་རིན་པོ་ཆེ་བཻ་ཌཱུཪྻའི་ཁ་དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་ཆེན་པོ་ཨནྡྲ་རྙིལ་གྱི་ཁ་དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་མཐོན་ཀ་ཆེན་པོའི་ཁ་དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་སྐར་འོད་ཀྱི་ཁ་དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་པདྨ་རཱ་གའི་ཁ་དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་བརྒྱ་བྱིན་ཐོགས་པའི་ཁ་ དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་རྡོ་རྗེ་སྣང་བའི་ཁ་དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་ལྷ་ཐམས་ཅད་སྣང་བའི་ཁ་དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་ཉི་ ཟླ་སྣང་བའི་ཁ་དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་ཆུ་འདང་གི་ཁ་དོག་ཏུ། ཁ་ཅིག་གིས་ནི་དེ་བཞིན་གཤེགས་པའི་སྐུ་ནོར་བུ་རིན་པོ་ཆེ་ཤེལ་གྱི་ཁ་དོག་ཏུ་ ཤེས་སོ། །ཁ་ཅིག་གིས་ནི་ནོར་བུ་རིན་པོ་ཆེ་དབང་གི་རྒྱལ་པོའི་ཁ་དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་འོད་ཐམས་ཅད་བསྡུས་པའི་ཁ་དོག་ཏུ། ཁ་ཅིག་གིས་ནི་ ནོར་བུ་རིན་པོ་ཆེ་རི་དྭགས་ཀྱི་རྒྱལ་པོ་སེང་གེ་རལ་པ་ཅན་གྱི་ཁ་དོག་ཏུ། ཁ་ཅིག་གིས་ནི་ནོར་བུ་རིན་པོ་ཆེ་སེང་གེའི་རྒྱལ་མཚན་གྱི་རྩེ་མོའི་ཁ་དོག་ཏུ། ཁ་ཅིག་གིས་ནི་ནོར་ བུ་རིན་པོ་ཆེ་རྒྱ་མཚོའི་གནས་རྣམ་པར་དག་པ་རིན་པོ་ཆེ་བཀོད་པ་ཀུན་ནས་འོད་ཟེར་སྣང་བའི་ཁ་དོག་ཏུ་ཤེས་སོ། །འཇམ་དཔལ། འཁོར་འདི་ཉིད་ཀྱི་ནང་ནས་ཁ་ཅིག་ གིས་ནི་དེ་བཞིན་གཤེགས་པས་ཡིད་བཞིན་གྱི་ནོར་བུ་རིན་པོ་ཆེའི་ཁ་དོག་ཏུ་ཤེས་སོ། །འཇམ་དཔལ། ཁ་དོག་དང༌། སྤྱོད་ལམ་དང༌། དབྱིབས་གང་དང༌། གང་ཁོ་ནས་སེམས་ ཅན་རྣམས་འདུལ་བར་འགྱུར་བ། འཇམ་དཔལ། དེ་བཞིན་གཤེགས་པ་ཁ་དོག་དང༌། སྤྱོད་ལམ་དང༌། དབྱིབས་དེ་དང༌། དེ་ཁོ་ནར་སེམས་ཅན་རྣམས་ཀྱིས་མཐོང་ངོ༌། ། འཇམ་དཔལ། ཆོས་བསྟན་པ་གང་དང༌། གང་གིས་སེམས་ཅན་རྣམས་ཡོངས་སུ་སྨིན་པར་འགྱུར་བའི་ཆོས་དེ་དང༌། དེ་ཉིད་དེ་བཞིན་གཤེགས་པ་སྟོན་པར་སེམས་ཅན་རྣམས་ ཀྱིས་ཤེས་སོ། །འཇམ་དཔལ། སྤྱོད་པ་གང་དང༌། གང་གིས་སེམས་ཅན་རྣམས་དེ་བཞིན་གཤེགས་པའི་བསྟན་པ་ལ་འཛུད་ཅིང་འདུལ་བར་འགྱུར་བའི་སྤྱོད་པ་དེ་དང༌། དེ་ལ་ དེ་བཞིན་གཤེགས་པ་བཞུགས་པར་སེམས་ཅན་རྣམས་ཀྱིས་ཤེས་སོ། །འཇམ་དཔལ། གལ་ཏེ་ཤར་ཕྱོགས་ཀྱི་འཇིག་རྟེན་གྱི་ཁམས་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། ཚད་མེད། བརྗོད་དུ་མེད་པའི་ཡང་བརྗོད་དུ་མེད་པ་དག་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ ༄༅། །ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དང༌། མི་དང༌། མི་མ་ ཡིན་པ་རྣམས་ཀྱིས་ཡོངས་སུ་གང་བར་གྱུར་ལ། ཤར་ཕྱོགས་སུ་ཇི་ལྟ་བ་དེ་བཞིན་དུ་ལྷོ་དང༌། དེ་བཞིན་དུ་ནུབ་དང༌། དེ་བཞིན་དུ་བྱང་དང༌། དེ་བཞིན་དུ་ཤར་ལྷོ་དང༌། དེ་ བཞིན་དུ་ལྷོ་ནུབ་དང༌། དེ་བཞིན་དུ་ནུབ་བྱང་དང༌། དེ་བཞིན་དུ་བྱང་ཤར་དང༌། དེ་བཞིན་དུ་སྟེང་དང༌། དེ་བཞིན་དུ་འོག་གི་ཕྱོགས་ཀྱི་འཇིག་རྟེན་གྱི་ཁམས་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། ཚད་མེད། བརྗོད་དུ་མེད་པའི་ཡང་བརྗོད་དུ་མེད་པ་དག་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དང༌། མི་དང༌། མི་མ་ཡིན་ པ་དག་གིས། དཔེར་ན། འདམ་བུའི་ཚལ་ལམ། བུ་རམ་ཤིང་གི་ཚལ་ལམ། ཏིལ་གྱི་ཞིང་བཞིན་དུ་ཡོངས་སུ་གང་བར་གྱུར་པའི་སེམས་ཅན་དེ་དག །འཇམ་དཔལ། གལ་ ཏེ་དེ་བཞིན་གཤེགས་པ་མཐོང་བས་འདུལ་བ་ཡིན་ན། སེམས་ཅན་དེ་དང༌། དེ་དག་གིས་དེ་བཞིན་གཤེགས་པའི་སྤྱན་སྔར་འདོམ་གང་ཙམ་ན་འཁོད་པར་ཤེས་སོ། །འཇམ་ དཔལ། ཁ་དོག་དང༌། སྤྱོད་ལམ་དང༌། གནས་གང་དང༌། གང་གིས་སེམས་ཅན་དེ་དག་འདུལ་བར་འགྱུར་བ་དེ་དང༌། དེ་ཁོ་ནར་དེ་བཞིན་གཤེགས་པ་མདུན་ན་བཞུགས་པར་སེམས་ ཅན་དེ་དག་གིས་མཐོང་ངོ༌། །འཇམ་དཔལ། ཆོས་བསྟན་པ་གང་དང༌། གང་གིས་སེམས་ཅན་རྣམས་ཡོངས་སུ་མིན་པར་འགྱུར་པ་དེ་དང༌། དེ་ཉིད་ཀྱི་ཆོས་སྟོན་པར་ཐོས་སོ། །འཇམ་དཔལ་ སྤྱོད་པ་གང་གིས་སེམས་ཅན་དེ་དག་དེ་བཞིན་གཤེགས་པའི་བསྟན་པ་ལ་འཇུག་པར་འགྱུར་བའི་སྤྱོད་པ་དེ་དང༌། དེ་ལ་དེ་བཞིན་གཤེགས་པ་བཞུགས་ཏེ། དེ་བཞིན་ གཤེགས་པའི་མཛད་པ་ཐམས་ཅད་ལྷུན་གྱིས་གྲུབ་ཅིང་རྣམ་པར་མི་རྟོག་པར་འགྱུར་རོ། །འཇམ་དཔལ། འདི་ལྟ་སྟེ། དཔེར་ན། ཟླ་བ་ཡར་གྱི་ངོའི་དཀྱིལ་འཁོར་ནམ་ཕྱེད་ཀྱི་ དུས་ན་ཛམྦུའི་གླིང་གི་སེམས་ཅན་ཐམས་ཅད་ཀྱིས་སོ་སོའི་མདུན་ན་ཟླ་བའི་དཀྱིལ་འཁོར་འདུག་པར་ཤེས་ཀྱང་ཟླ་བའི་དཀྱིལ་འཁོར་ནི་སེམས་ཅན་དེ་དག་གིས་བདག་ཅིའི་ ཕྱིར་ཟླ་བའི་དཀྱིལ་འཁོར་དུ་ཤེས་པར་འགྱུར་བར་བདག་སེམས་ཅན་དེ་དག་གི་མདུན་ན་འདུག་པར་བྱའོ། །སྙམ་དུ་མི་རྟོག །རྣམ་པར་མི་རྟོག་མོད་ཀྱི་འོན་ཀྱང༌། འཇམ་ དཔལ། ཟླ་བའི་དཀྱིལ་འཁོར་ནི་མ་འདྲེས་པའི་ཆོས་དང་ལྡན་པས་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེ་ལྟ་བུའི་བྱ་བ་འདི་འབྱུང་ངོ༌། །འཇམ་དཔལ། དེ་བཞིན་དུ་དེ་ ༄༅། །བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་འཁོར་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་ མེད༑ གཞལ་དུ་མེད། ཚད་མེད། བརྗོད་དུ་མེད་པའི་ཡང་བརྗོད་དུ་མེད་པའི་དབུས་ན་བཞུགས་ན་དེ་དག་ཐམས་ཅད་ཀྱིས་ཀྱང་དེ་བཞིན་གཤེགས་པ་མདུན་ན་བཞུགས་པར་ མཐོང་མོད་ཀྱི། འཇམ་དཔལ། དེ་བཞིན་གཤེགས་པ་ནི་སེམས་ཅན་དེ་དག་གིས་དེ་བཞིན་གཤེགས་པ་མདུན་ན་བཞུགས་པ་ཤེས་པར་འགྱུར་བར་སེམས་ཅན་དེ་དག་ གིས་མདུན་དུ་འདུག་པར་བྱའོ་སྙམ་དུ་མི་རྟོག །རྣམ་པར་མི་རྟོག་སྟེ། འོན་ཀྱང་སེམས་ཅན་རྣམས་ཇི་ལྟ་བུས་འདུལ་བ་དེ་བཞིན་དུ་དེ་བཞིན་གཤེགས་པ་མདུན་ན་བཞུགས་ པར་ཤེས་སོ། །དེ་ཅིའི་ཕྱིར་ཞེ་ན། མ་འདྲེས་པའི་ཆོས་དང་ལྡན་པའི་ཕྱིར་རོ། །འཇམ་དཔལ། དཔེར་ན། སེམས་ཅན་རྣམས་ཀྱི་ལས་ཐ་མ་དང༌། འབྲིང་དང༌། རབ་ཀྱི་རྣམ་ པར་སྨིན་པའི་དབང་གིས་སེམས་ཅན་རྣམས་ཀྱི་འདུ་བྱེད་ཐ་མ་དང༌། འབྲིང་དང༌། རབ་རྣམས་འབྱུང་བར་འདུ་བྱེད་རྣམས་ནི་མི་རྟོག །རྣམ་པར་མི་རྟོག་སྟེ། འོན་ཀྱང་འདུ་བྱེད་དེ་ དག་ལྷུན་གྱིས་གྲུབ་ཅིང་རྣམ་པར་མི་རྟོག་པར་ཐ་མ་དང༌། འབྲིང་དང༌། རབ་རྣམས་ཀྱི་བྱ་བ་དག་ལ་འཇུག་གོ །འཇམ་དཔལ། དེ་བཞིན་གཤེགས་པ་དགྲ་བཅོམ་པ་ཡང་དག་ དག་པར་རྫོགས་པའི་སངས་རྒྱས་ཀྱང་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ཐ་མ་དང༌། འབྲིང་དང༌། རབ་ཀྱི་དབང་གིས་དེ་བཞིན་གཤེགས་པ་ཐ་མ་དང༌། འབྲིང་དང༌། རབ་ཏུ་སེམས་ཅན་རྣམས་ཀྱིས་མཐོང་ཡང༌། འཇམ་དཔལ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་དེ་བཞིན་གཤེགས་པ་དེའི་མཛད་པ་དེ་ལྟ་བུས་དེ་ ལྷུན་གྱིས་གྲུབ་པར་འབྱུང་ངོ༌། །འཇམ་དཔལ། དཔེར་ན། ནོར་བུ་རིན་པོ་ཆེ་བཻ་ཌཱུཪྻ་རིགས་ལ་ནི་རས་ཐ་དད་པ་ཉིད་ཀྱི་དབང་གིས་ཁ་དོག་ཐ་དད་པ་ཉིད་དུ་འགྱུར་ཏེ། འཇམ་དཔལ་། གལ་ཏེ་ནོར་བུ་རིན་པོ་ཆེ་བཻ་ཌཱུཪྻ་རས་སེར་པོའི་སྟེང་དུ་བཞག་ན་ནི་ནོར་བུ་རིན་པོ་ཆེ་བཻ་ཌཱུཪྻ་ཁ་དོག་སེར་པོར་འགྱུར། གལ་ཏེ་རས་དམར་པོའི་སྟེང་དུ་བཞག་ན་ནི་ནོར་བུ་རིན་ པོ་ཆེ་བཻ་ཌཱུཪྻ་ཁ་དོག་དམར་པོར་འགྱུར། གལ་ཏེ་རས་སྔོན་པོའི་སྟེང་དུ་བཞག་ན་ནི་ནོར་བུ་རིན་པོ་ཆེ་བཻ་ཌཱུཪྻ་ཁ་དོག་སྔོན་པོར་འགྱུར་ཏེ། དེ་ལྟར་རས་ཁ་དོག་ཅི་དང༌། ཅི་འདྲ་བའི་ སྟེང་དུ་བཞག་པ་དེ་དང༌། དེ་ཉིད་ཀྱི་ཁ་དོག་ཁོ་ནར་འགྱུར་ཡང༌། འཇམ་དཔལ། ནོར་བུ་རིན་པོ་ཆེ་བཻ་ཌཱུཪྻ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་ མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། དེ་བཞིན་དུ་དེ་བཞིན་གཤེགས་པའང་སེམས་ཅན་ཐ་དད་པ་ཉིད་ཀྱི་དབང་གིས་ཁ་དོག་ཐ་དད་པ་ཉིད་དུ་འགྱུར་ཏེ། ༄༅། །འཇམ་དཔལ། གལ་ཏེ་སེམས་ཅན་རྣམས་དེ་བཞིན་གཤེགས་པའི་སྐུ་གསེར་གྱི་ཁ་དོག་ཏུ་མཐོང་བས་གདུལ་བར་བྱ་བ་ཡིན་ན་ནི་དེ་དག་གིས་ནི་དེ་བཞིན་ གཤེགས་པའི་སྐུ་གསེར་གྱི་ཁ་དོག་ཏུ་མཐོང་ངོ༌། །གལ་ཏེ་སེམས་ཅན་རྣམས་ནོར་བུ་རིན་པོ་ཆེ་བཻ་ཌཱུཪྻའི་ཁ་དོག་ལྟ་བུས་གདུལ་བར་བྱ་བ་ཡིན་ན་ནི་དེ་དག་གིས་ཀྱང་དེ་བཞིན་ གཤེགས་པའི་སྐུ་ནོར་བུ་རིན་པོ་ཆེ་བཻ་ཌཱུཪྻའི་ཁ་དོག་ཏུ་མཐོང་ངོ༌། །གལ་ཏེ་སེམས་ཅན་རྣམས་མུ་ཏིག་གི་ཁ་དོག་ལྟ་བུས་གདུལ་བར་བྱ་བ་ཡིན་ན་ནི་དེ་དག་གིས་ཀྱང་དེ་བཞིན་ གཤེགས་པའི་སྐུ་མུ་ཏིག་གི་ཁ་དོག་ཏུ་མཐོང་ངོ༌། །གལ་ཏེ་སེམས་ཅན་རྣམས་ནོར་བུ་རིན་པོ་ཆེ་ཨནད་རྙིལ་གྱི་ཁ་དོག་ལྟ་བུས་གདུལ་བར་བྱ་བ་ཡིན་ན་ནི་དེ་དག་གིས་ཀྱང་དེ་བཞིན་ གཤེགས་པའི་སྐུ་ནོར་བུ་རིན་པོ་ཆེ་ཨནད་རྙིལ་གྱི་ཁ་དོག་ཏུ་མཐོང་ངོ༌། །འཇམ་དཔལ། གལ་ཏེ་སེམས་ཅན་རྣམས་ནོར་བུ་རིན་པོ་ཆེ་མཐོན་ཀ་ཆེན་པོའི་ཁ་དོག་ལྟ་བུས་གདུལ་ བར་བྱ་བ་ཡིན་ན་ནི་དེ་དག་གིས་ཀྱང་དེ་བཞིན་གཤེགས་པའི་སྐུ་ནོར་བུ་རིན་པོ་ཆེ་མཐོན་ཀ་ཆེན་པོའི་ཁ་དོག་ཏུ་མཐོང་ངོ༌། །གལ་ཏེ་སེམས་ཅན་རྣམས་ནོར་བུ་རིན་པོ་ཆེ་འོད་ ཐམས་ཅད་བསྡུས་པའི་ཁ་དོག་ལྟ་བུས་གདུལ་བར་བྱ་བ་ཡིན་ན་ནི་དེ་དག་གིས་ཀྱང་དེ་བཞིན་གཤེགས་པའི་སྐུ་ནོར་བུ་རིན་པོ་ཆེ་འོད་ཐམས་ཅད་བསྡུས་པའི་ཁ་དོག་ཏུ་མཐོང་ངོ༌།། གལ་ཏེ་སེམས་ཅན་རྣམས་ནོར་བུ་རིན་པོ་ཆེ་དབང་གི་རྒྱལ་པོའི་ཁ་དོག་ལྟ་བུས་གདུལ་བར་བྱ་བ་ཡིན་ན་ནི་དེ་དག་གིས་ཀྱང་དེ་བཞིན་གཤེགས་པའི་སྐུ་ནོར་བུ་རིན་པོ་ཆེ་དབང་གི་རྒྱལ་ པོའི་ཁ་དོག་ཏུ་མཐོང་ངོ༌། །གལ་ཏེ་སེམས་ཅན་རྣམས་ནོར་བུ་རིན་པོ་ཆེ་རྒྱ་མཚོའི་གནས་རྣམ་པར་དག་པ་རིན་པོ་ཆེ་བཀོད་པ་ཀུན་ནས་འོད་ཟེར་སྣང་བའི་ཁ་དོག་ལྟ་བུས་གདུལ་ བར་བྱ་བ་ཡིན་ན་ནི་དེ་དག་གིས་ཀྱང་དེ་བཞིན་གཤེགས་པའི་སྐུ་ནོར་བུ་རིན་པོ་ཆེ་རྒྱ་མཚོའི་གནས་རྣམ་པར་དག་པ་རིན་པོ་ཆེ་བཀོད་པ་ཀུན་ནས་འོད་ཟེར་སྣང་བའི་ཁ་དོག་ཏུ་ མཐོང་ངོ༌། །གལ་ཏེ་སེམས་ཅན་རྣམས་ནོར་བུ་རིན་པོ་ཆེའི་རྒྱལ་པོ་སེང་གེ་རལ་པ་ཅན་གྱི་ཁ་དོག་ལྟ་བུས་གདུལ་བར་བྱ་བ་ཡིན་ན་ནི་དེ་དག་གིས་ཀྱང་དེ་བཞིན་གཤེགས་པའི་སྐུ་ ནོར་བུ་རིན་པོ་ཆེའི་རྒྱལ་པོ་སེང་གེ་རལ་པ་ཅན་གྱི་ཁ་དོག་ཏུ་མཐོང་ངོ༌། །གལ་ཏེ་སེམས་ཅན་རྣམས་ནོར་བུ་རིན་པོ་ཆེ་སེང་གེའི་རྒྱལ་མཚན་གྱི་རྩེ་མོའི་ཁ་དོག་ལྟ་བུས་གདུལ་བར་ བྱ་བ་ཡིན་ན་ནི། དེ་དག་གིས་ཀྱང་དེ་བཞིན་གཤེགས་པའི་སྐུ་ནོར་བུ་རིན་པོ་ཆེ་སེང་གེའི་རྒྱལ་མཚན་གྱི་རྩེ་མོའི་ཁ་དོག་ཏུ་མཐོང་ངོ༌། །འཇམ་དཔལ། གལ་ཏེ་སེམས་ཅན་རྣམས་ ནོར་བུ་རིན་པོ་ཆེ་གློག་གི་སྒྲོན་མའི་ཁ་དོག་ལྟ་བུས་གདུལ་བར་བྱ་བ་ཡིན་ན་ནི་དེ་དག་གིས་ཀྱང་དེ་བཞིན་གཤེགས་པའི་སྐུ་ནོར་བུ་རིན་པོ་ཆེ་གློག་གི་སྒྲོན་མའི་ཁ་དོག་ཏུ་མཐོང་ ༄༅། །ངོ༑ ༑གལ་ཏེ་སེམས་ཅན་རྣམས་ནོར་བུ་རིན་པོ་ཆེ་ཆུ་འདང་གི་ཁ་དོག་ལྟ་བུས་གདུལ་བར་བྱ་བ་ཡིན་ན་ནི་དེ་དག་གིས་ཀྱང་དེ་བཞིན་གཤེགས་པའི་སྐུ་ ནོར་བུ་རིན་པོ་ཆེ་ཆུ་འདང་གི་ཁ་དོག་ཏུ་མཐོང་ངོ༌། །དེ་བཞིན་དུ་སེམས་ཅན་རྣམས་དེ་བཞིན་གཤེགས་པའི་སྐུ་བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བའི་ཁ་ དོག་ཏུ་མཐོང་བས་གདུལ་བར་བྱ་བའང་ཡིན་ན་ནི་དེ་དག་གིས་ཀྱང་དེ་བཞིན་གཤེགས་པའི་སྐུ་བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བའི་ཁ་དོག་ཏུ་མཐོང་ངོ༌། །དེ་ བཞིན་དུ་སྦྱར་ཏེ་སེམས་ཅན་རྣམས་སེམས་ཅན་དམྱལ་བ་དང༌། དུད་འགྲོ་དང༌། ཡི་དྭགས་དང༌། གཤིན་རྗེའི་འཇིག་རྟེན་དུ་སྐྱེས་པའི་བར་གྱི་ཁ་དོག་གིས་གདུལ་བར་བྱ་བ་ཡིན་ན་ནི་དེ་ དག་གིས་ཀྱང་དེ་བཞིན་གཤེགས་པའི་སྐུ་སེམས་ཅན་དམྱལ་བ་དང༌། དུད་འགྲོ་དང༌། ཡི་དྭགས་དང༌། གཤིན་རྗེའི་འཇིག་རྟེན་དུ་སྐྱེས་པའི་བར་གྱི་ཁ་དོག་ཏུ་ མཐོང་ངོ༌། །གཟུགས་མེད་པར་སྐྱེས་པའི་བར་གྱི་གཟུགས་དང༌། ལུས་དང༌། ཁ་དོག་དང༌། སྤྱོད་ལམ་གང་དང༌། གང་གིས་སེམས་ཅན་རྣམས་འདུལ་བར་འགྱུར་བའི་གཟུགས་ དང༑ ལུས་དང༌། ཁ་དོག་དང༌། སྤྱོད་ལམ་དེ་དང༌། དེ་ལྟ་བུ་དེ་བཞིན་གཤེགས་པ་མཐོང་ངོ༌། །དེ་བཞིན་དུ་སྒོ་ང་ལས་སྐྱེས་པ་དང༌། མངལ་ནས་སྐྱེས་པ་དང༌། དྲོད་གཤེར་ ལས་སྐྱེས་པ་དང༌། རྫུས་ཏེ་སྐྱེས་པ་དང༌། གཟུགས་ཅན་དང༌། གཟུགས་ཅན་མ་ཡིན་པ་དང༌། འདུ་ཤེས་ཅན་དང༌། འདུ་ཤེས་ཅན་མ་ཡིན་པ་དང༌། འདུ་ཤེས་མེད་འདུ་ཤེས་མེད་ མིན་གྱི་སེམས་ཅན་རྣམས་ཀྱི་གཟུགས་དང༌། ལུས་དང༌། ཁ་དོག་དང༌། སྤྱོད་ལམ་གང་དང༌། གང་གིས་འདུལ་བར་འགྱུར་བའི་གཟུགས་དང༌། ལུས་དང༌། ཁ་དོག་དང༌། སྤྱོད་ལམ་ དེ་དང༌། དེར་དེ་བཞིན་གཤེགས་པ་མཐོང་ཡང་དེ་བཞིན་གཤེགས་པ་ནི་སེམས་ཅན་འདི་དག་གིས་གསེར་གྱི་ཁ་དོག་མཐོང་བར་གྱུར་ལ། ནོར་བུ་རིན་པོ་ཆེ་བཻ་ཌཱུཪྻའི་ཁ་དོག་ ཏུ་མཐོང་བར་ནི་མ་གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་བཻ་ཌཱུཪྻའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་ཨནད་རྙིལ་གྱི་ཁ་དོག་ཏུ་མཐོང་བར་ནི་ མ་གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་ཨནད་རྙིལ་གྱི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་མཐོན་ཀ་ཆེན་པོའི་ཁ་དོག་ཏུ་མཐོང་བར་ནི་མ་གྱུར་ ཅིག་༑སེམས་ཅན་འདི་དག་གིས་ནི་ནོར་བུ་རིན་པོ་ཆེ་མཐོན་ཀ་ཆེན་པོའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་འོད་ཐམས་ཅད་བསྡུས་པའི་ཁ་དོག་ཏུ་མཐོང་བར་ནི་མ་ གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་འོད་ཐམས་ཅད་བསྡུས་པའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་དབང་གི་རྒྱལ་པོའི་ཁ་དོག་ཏུ་མཐོང་ ༄༅། །བར་ནི་མ་གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་དབང་གི་རྒྱལ་པོའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་རྒྱ་མཚོའི་གནས་ རྣམ་པར་དག་པ་རིན་པོ་ཆེ་བཀོད་པ་ཀུན་ནས་འོད་ཟེར་སྣང་བའི་ཁ་དོག་ཏུ་མཐོང་བར་ནི་མ་གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་རྒྱ་མཚོའི་གནས་རྣམ་ པར་དག་པ་རིན་པོ་ཆེ་བཀོད་པ་ཀུན་ནས་འོད་ཟེར་སྣང་བའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེའི་རྒྱལ་པོ་སེང་གེ་རལ་པ་ཅན་གྱི་ཁ་དོག་ཏུ་མཐོང་བར་ནི་མ་གྱུར་ ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེའི་རྒྱལ་པོ་སེང་གེ་རལ་པ་ཅན་གྱི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་སེང་གེའི་རྒྱལ་མཚན་གྱི་རྩེ་མོའི་ཁ་དོག་ ཏུ་མཐོང་བར་ནི་མ་གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་སེང་གེའི་རྒྱལ་མཚན་གྱི་རྩེ་མོའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་རྒྱ་བྱིན་ཐོགས་ པའི་ཁ་དོག་ཏུ་མཐོང་བར་ནི་མ་གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་བརྒྱ་བྱིན་ཐོགས་པའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་རྡོ་རྗེ་སྣང་བའི་ ཁ་དོག་ཏུ་མཐོང་བར་ནི་མ་གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་རྡོ་རྗེ་སྣང་བའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་ལྷ་ཐམས་ཅད་སྣང་བའི་ ཁ་དོག་ཏུ་མཐོང་བར་ནི་མ་གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་ལྷ་ཐམས་ཅད་སྣང་བའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་ཉི་ཟླ་སྣང་བའི་ཁ་དོག་ ཏུ་མཐོང་བར་ནི་མ་གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་ཉི་ཟླ་སྣང་བའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེ་གློག་གི་སྒྲོན་མའི་ཁ་དོག་ཏུ་མཐོང་བར་ནི་ མ་གྱུར་ཅིག །སེམས་ཅན་འདི་དག་གིས་ནི་ནོར་བུ་རིན་པོ་ཆེ་གློག་གི་སྒྲོན་མའི་ཁ་དོག་ཏུ་མཐོང་བར་གྱུར་ལ། ནོར་བུ་རིན་པོ་ཆེའི་རྒྱལ་པོ་ཡིད་བཞིན་གྱི་ཁ་དོག་ཏུ་མཐོང་བར་ནི་ མ་གྱུར་ཅིག་ཅེས་མི་རྟོག །རྣམ་པར་མི་རྟོག་གོ །དེ་བཞིན་དུ་སྦྱར་ཏེ། འགྲོ་བ་ཐམས་ཅད་དུ་སྐྱེས་པའི་སེམས་ཅན་རྣམས་ལའང་བརྗོད་པར་བྱ་སྟེ། འཇམ་དཔལ། དེ་བཞིན་ གཤེགས་པ་ནི་མི་རྟོག །རྣམ་པར་མི་རྟོག་མོད་ཀྱི་། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་མཛད་པ་དེ་ལྟ་བུ་དེ་འབྱུང་ངོ༌།། །།བམ་པོ་ གཉིས་པ། འཇམ་དཔལ། དཔེར་ན། ནོར་བུ་རིན་པོ་ཆེ་དབང་གི་རྒྱལ་པོ་གང་དུ་འབྱུང་བ་དེར་ལྕགས་དང༌། ལྕགས་ལས་བྱས་པའི་ཡོ་བྱད་རྣམས་མི་འབྱུང་མོད་ཀྱི། འཇམ་དཔལ། འོན་ཀྱང་ ནོར་བུ་རིན་པོ་ཆེ་དབང་གི་རྒྱལ་པོ་ནི་མི་རྟོག །རྣམ་པར་མི་རྟོག་སྟེ། འདི་སྙམ་དུ་བདག་གང་དུ་འབྱུང་བ་དེར་ལྕགས་དང༌། ལྕགས་ལས་བྱས་པའི་ཡོ་བྱད་རྣམས་འབྱུང་བར་མ་ ༄༅། །གྱུར་ཅིག་སྙམ་དུ་མི་སེམས་མོད་ཀྱི། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། དེ་ བཞིན་དུ་སངས་རྒྱས་ཀྱི་ཞིང་གང་དུ་དེ་བཞིན་གཤེགས་པ་བྱུང་བ་དེར་མུ་སྟེགས་ཅན་སྤྱོད་པ་པ་དང༌། ཀུན་ཏུ་རྒྱུ་དང༌། གཅེར་བུ་པ་ལ་སོགས་པ་མུ་སྟེགས་ཅན་གྱི་གནས་ ཐམས་ཅད་མི་འབྱུང༌། དེར་ལྟ་བར་གྱུར་པ་ཐམས་ཅད་མི་འབྱུང༌། དེར་འཁྲུག་པ་ཐམས་ཅད་མི་འབྱུང༌། དེར་མཚམས་མེད་པ་ལྔ་པོ་དག་མི་འབྱུང༌། དེར་མི་དགེ་བ་བཅུའི་ ལས་ཀྱི་ལམ་རྣམས་མི་འབྱུང༌། དེར་རྒྱལ་པོའི་བཀའ་ལུང་དང༌། ཆོས་གཅེས་པ་འདོར་བ་མི་འབྱུང༌། དེར་ཉི་ཟླའི་འོད་དག་མི་འབྱུང༌། དེར་བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དག་དང་ལྷ་ཐམས་ཅད་ཀྱི་འོད་དག་མི་འབྱུང༌། དེར་ནོར་བུ་རིན་པོ་ཆེའི་འོད་རྣམས་དང༌། མེའི་འོད་རྣམས་དང༌། གློག་གི་འོད་རྣམས་མི་འབྱུང༌། དེར་ཡུད་ ཙམ་དང༌། ཡུད་ཙམ་ཕྱེད་དང༌། ཟླ་བ་དང༌། ཟླ་བ་ཕྱེད་དང༌། ལོར་བགྲང་བ་རྣམས་མི་འབྱུང་སྟེ། འཇམ་དཔལ། གཞན་དུན་སེམས་ཅན་ཡོངས་སུ་སྨིན་པར་བྱ་བའི་ཕྱིར་དེ་ བཞིན་གཤེགས་པའི་བྱིན་གྱི་རླབས་ནི་མ་གཏོགས་སོ། །འཇམ་དཔལ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་སེམས་ཅན་གྱི་དབང་གིས་ ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་མཛད་པ་དེ་ལྟ་བུ་དེ་འབྱུང་ངོ༌། །འཇམ་དཔལ། དཔེར་ན། ནོར་བུ་རིན་པོ་ཆེ་མཐོང་ཀ་ཆེན་པོའི་འོད་ཀྱིས་རེག་པ་དེ་དག་ཐམས་ ཅད་ནོར་བུ་རིན་པོ་ཆེ་མཐོན་ཀ་ཆེན་པོའི་ཁ་དོག་ཏུ་འགྱུར་ཡང་ནོར་བུ་རིན་པོ་ཆ་མཐོན་ཀ་ཆེན་པོ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་ པར་དེའི་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། དེ་བཞིན་དུ་གང་དག་དེ་བཞིན་གཤེགས་པ་ལ་དམིགས་པའི་ཡིད་ལ་བྱེད་པའི་འོད་ཀྱིས་རེག་པ་དེ་དག་ཐམས་ ཅད་ཐམས་ཅད་མཁྱེན་པ་ཉིད་ཀྱི་ཁ་དོག་ཏུ་འགྱུར་ཡང་དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་འཇམ་དཔལ་ལྷུན་གྱིས་གྲུབ་ཅིང་རྣམ་པར་མི་རྟོག་ པར་དེ་བཞིན་གཤེགས་པའི་མཛད་པ་དེ་ལྟ་བུ་དེ་འབྱུང་ངོ༌། །འཇམ་དཔལ། དཔེར་ན། ནོར་བུ་རིན་པོ་ཆེ་ཆེན་པོ་བཻ་ཌཱུཪྻ་བྱི་དོར་ལེགས་པར་བྱས་པ་མགོའི་རྒྱན་ནམ་།མགུལ་ བའི་རྒྱན་ནམ། ལག་པའི་རྒྱན་ནམ། རྐང་པའི་རྒྱན་ཡང་རུང་སྟེ། གང་དང༌། གང་གིས་ལོགས་ན་རྒྱན་དུ་འདུག་པ་དེ་དང༌། དེར་རྒྱན་དུ་ཤིན་ཏུ་ལམ་མེ། ལྷན་ནེ། ལྷང་ངེའོ། །ནོར་བུ་ རིན་པོ་ཆེ་བཻ་ཌཱུཪྻ་དེ་ཉིད་ཀྱི་མཐུས་རྒྱན་དེ་དག་ཀྱང་ཤིན་ཏུ་ལམ་མེ། ལྷན་ནེ། ལྷང་ངེར་འདུག་ཀྱང་ནོར་བུ་རིན་པོ་ཆེ་ཆེན་པོ་བཻ་ཌཱུཪྻ་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་ ༄༅། །ཀྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་ཀྱང་སྤྱོད་ལམ་གྱི་གནས་གང་དང༌། གང་གིས་ཉན་ཐོས་ཀྱི་སྤྱོད་པའམ། རང་སངས་རྒྱས་ཀྱི་སྤྱོད་པའམ། བྱང་ཆུབ་སེམས་དཔའི་སྤྱོད་པ་ འམ༑ དེ་བཞིན་གཤེགས་པའི་སྤྱོད་པའམ། སྤྱོད་པ་པོ་དང༌། ཀུན་ཏུ་རྒྱུ་དང༌། གཅེར་བུ་པའི་སྤྱོད་པའམ། དུད་འགྲོ་དང༌། ཡི་དྭགས་དང༌། གཤིན་རྗེའི་འཇིག་ རྟེན་དང༌། ཤ་ཟ་དང༌། གྲུལ་བུམ་དང༌། སྲིན་པོའི་སྤྱོད་པའམ། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟའི་སྤྱོད་པའམ། སྤྱོད་པ་གང་དང༌། གང་ལ་གནས་པའི་སྤྱོད་ པ་དེ་དང༌། དེ་ཉིད་ཤིན་ཏུ་ལམ་མེ། ལྷན་ནེ། ལྷང་ངེའོ། །དེ་བཞིན་གཤེགས་པ་དེ་ཉིད་ཀྱི་མཐུས་སྤྱོད་པ་དེ་ཤིན་ཏུ་ལམ་མེ། ལྷན་ནེ། ལྷང་ངེར་རྣམ་པར་མཛེས་ཀྱང་ འཇམ་དཔལ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་མཛད་པ་དེ་ལྟ་བུ་དེ་འབྱུང་ངོ༌། །འཇམ་ དཔལ། དཔེར་ན། ས་ལ་གནས། ས་ལ་བརྟེན་ནས་ས་བོན་ཐམས་ཅད་དང༌། རྩྭ་དང༌། ཤིང་གེལ་པ་དང༌། སྨན་དང༌། ནགས་ཚལ་རྣམས་སྐྱེ་ཞིང་འཕེལ་ལ་ཤིན་ཏུ་ རྒྱས་པ་ཉིད་དུ་འགྱུར་ཡང༌། འཇམ་དཔལ། ས་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ༌། ། འཇམ་དཔལ། དེ་བཞིན་དུ་དེ་བཞིན་གཤེགས་པ་ལ་གནས། དེ་བཞིན་གཤེགས་པ་ལ་བརྟེན་ནས་སེམས་ཅན་ཐམས་ཅད་ཀྱི་དགེ་བའི་རྩ་བ་ཐམས་ཅད་སྐྱེ་ཞིང་ འཕེལ་ཏེ། ཤིན་ཏུ་རྒྱས་པ་ཉིད་དུ་འགྱུར་ཡང་དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་མཛད་པ་ དེ་ལྟ་བུ་དེ་འབྱུང་ངོ༌། །འཇམ་དཔལ། དཔེར་ན། སྤྲིན་ཆེན་པོས་ཛམྦུའི་གླིང་ཐམས་ཅད་ཁེབས་པར་བྱས་ནས་རྩྭ་དང༌། ཤིང་གེལ་བ་དང༌། སྨན་དང༌། ནགས་ཚལ་རྣམ་པ་ཐ་ དད་པ་རྣམས་སུ་ཆར་པ་ཆེན་པོ་རབ་ཏུ་བབ་སྟེ། རོ་གཅིག་པའི་ཆུའི་རྒྱུན་དེས་རྩྭ་དང༌། ཤིང་གེལ་བ་དང༌། སྨན་དང༌། ནགས་ཚལ་རྣམ་པ་ཐ་དད་པ་རྣམས་སྐྱེ་བར་ བྱེད་ཅིང་གནས་རྣམ་པ་ཐ་དད་པ་རྣམས་སུ་ཆུ་དེ་རོ་ཐ་དད་པ་དང༌། ཁ་དོག་ཐ་དད་པར་ཡང་གནས་ལ། འཇམ་དཔལ། སྤྲིན་ནི་མི་རྟོག། རྣམ་པར་མི་རྟོག་སྟེ། འོན་ཀྱང་ ལྷུན་གྱིས་གྲུབ་ཅིང་རྣམ་པར་མི་རྟོག་པར་བྱ་བ་ཐ་དད་པ་རྣམས་འབྱུང་ངོ༌། །འཇམ་དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ ༄༅། །སངས་རྒྱས་ཀྱང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་སངས་རྒྱས་ཀྱི་སྐུའི་སྤྲིན་གྱིས་ཁྱབ་པར་མཛད་དེ། སེམས་ཅན་དགེ་ བའི་རྩ་བ་སྣ་ཚོགས་བསགས་པ། སྨོན་ལམ་དང༌། ལྷག་པའི་བསམ་པ་དང༌། མོས་པ་ཐ་དད་ཅིང་མོས་པ་ཐ་དད་པ་ལ་གནས་པ། ཐམས་ཅད་ལ་ཆོས་ཀྱི་ཆར་ཆེན་པོ་མངོན་ པར་ཕབ་སྟེ། འཇམ་དཔལ། ཆོས་ཀྱི་ཆར་དེའང་རོ་གཅིག་པ་ཡིན་མོད་ཀྱི། འཇམ་དཔལ། སེམས་ཅན་དགེ་བའི་རྩ་བ་སྣ་ཚོགས་བསགས་པ། སྨོན་ལམ་དང༌། ལྷག་ པའི་བསམ་པ་དང༌། མོས་པ་ཐ་དད་ཅིང་མོས་པ་ཐ་དད་པ་ལ་གནས་པ། དགེ་བའི་རྩ་བ་དང༌། སྨོན་ལམ་དང༌། ལྷག་པའི་བསམ་པ་དང༌། མོས་པ་ཐ་དད་པ་ལ་ཞུགས་ པ་རྣམས་ལ་རྣམ་པ་ཐ་དད་པ་ཉིད་ཀྱི་ཆོས་ཐ་དད་པ་ཁོ་ནའི་ཆར་བས་ནུས་པ་ཇི་ལྟ་བ་དང༌། མཐུ་ཇི་ལྟ་བ་བཞིན་དུ་དགེ་བའི་རྩ་བ་བསྐྱེད་ཀྱང༌། འཇམ་དཔལ། དེ་ བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། འདི་ལྟ་སྟེ། སེམས་ཅན་འདི་དག་ལ་ནི་ཉན་ཐོས་ཀྱི་ཡེ་ཤེས་སུ་འགྱུར་བའི་དགེ་བའི་རྩ་བ་དག་རྣམ་ པར་བསྐྱེད་པར་བྱའོ། །སེམས་ཅན་འདི་དག་ལ་ནི་སངས་རྒྱས་ཀྱི་ཡེ་ཤེས་སུ་འགྱུར་བའི་དགེ་བའི་རྩ་བ་དག་རྣམ་པར་བསྐྱེད་པ་བྱའོ། །སེམས་ཅན་འདི་དག་ལ་ནི་སངས་ རྒྱས་ཀྱི་ཡེ་ཤེས་སུ་འགྱུར་བའི་དགེ་བའི་རྩ་བ་དག་རྣམ་པར་བསྐྱེད་པར་བྱའོ། །སེམས་ཅན་འདི་དག་ལ་ནི་རྒྱལ་ཆེན་བཞི་པའི་ལྷའི་གནས་སུ་སྐྱེ་བའི་དགེ་བའི་རྩ་བ་དག་ རྣམ་པར་བསྐྱེད་པར་བྱའོ། །སེམས་ཅན་འདི་དག་ལ་ནི་སུམ་ཅུ་རྩ་གསུམ་གྱི་གནས་སུ་སྐྱེ་བའི་དགེ་བའི་རྩ་བ་དག་རྣམ་པར་བསྐྱེད་པར་བྱའོ། །དེ་བཞིན་དུ་སྦྱར་ཏེ་འཐབ་བྲལ་ རྣམས་དང༌། དགའ་ལྡན་རྣམས་དང༌། འཕྲུལ་དགའ་རྣམས་དང༌། གཞན་འཕྲུལ་དབང་བྱེད་རྣམས་དང༌། དེ་བཞིན་དུ་ཚངས་པ་རྣམས་དང༌། ཚངས་ཆེན་རྣམས་དང༌། ཚངས་པའི་མདུན་ན་འདོན་རྣམས་དང༌། འོད་ཆུང་རྣམས་དང༌། ཚད་མེད་འོད་རྣམས་དང༌། འོད་གསལ་རྣམས་དང༌། དགེ་ཆུང་རྣམས་དང༌། ཚད་མེད་དགེ་རྣམས་དང༌། དགེ་ རྒྱས་རྣམས་དང༌། སྤྲིན་མེད་རྣམས་དང༌། བསོད་ནམས་སྐྱེས་རྣམས་དང༌། འབྲས་བུ་ཆེ་བ་རྣམས་དང༌། མི་ཆེ་བ་རྣམས་དང༌། མི་གདུང་བ་རྣམས་དང༌། གྱ་ནོམ་སྣང་རྣམས་ དང༑ ཤིན་ཏུ་མཐོང་རྣམས་དང༌། གནས་གཙང་མའི་རིས་རྣམས་དང༌། འོག་མིན་རྣམས་ཀྱི་དགེ་བའི་རྩ་བ་དག་རྣམ་པར་བསྐྱེད་པར་བྱའོ། །བདུད་ཀྱི་རིས་ཀྱི་ལྷ་རྣམས་ ཀྱི་དགེ་བའི་རྩ་བ་དག་རྣམ་པར་བསྐྱེད་པར་བྱའོ་སྙམ་དུ། འཇམ་དཔལ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་གོ །སེམས་ཅན་འདི་དག་ལ་ནི་རྒྱལ་པོར་སྐྱེ་བའི་ ༄༅། །དགེ་བའི་རྩ་བ་སྣ་ཚོགས་དག་རྣམ་པར་བསྐྱེད་པར་བྱའོ། །སེམས་ཅན་འདི་དག་ལ་ནི་མིར་སྐྱེ་བའི་དགེ་བའི་རྩ་བ་སྣ་ཚོགས་དག་རྣམ་པར་བསྐྱེད་ པར་བྱའོ། །སེམས་ཅན་འདི་དག་ལ་ནི་དབང་ཕྱུག་ཏུ་འགྱུར་བའི་དགེ་བའི་རྩ་བ་སྣ་ཚོགས་དག་རྣམ་པར་བསྐྱེད་པར་བྱའོ་སྙམ་དུ། འཇམ་དཔལ། དེ་བཞིན་གཤེགས་ པ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་དེ་བཞིན་གཤེགས་པ་ནི་ལྷུན་གྱིས་གྲུབ་ཅིང་རྣམ་པར་མི་རྟོག་པར་སེམས་ཅན་སྨོན་ལམ་དང༌། ལྷག་པའི་བསམ་པ་དང༌། མོས་པ་ཇི་ལྟ་བ་དང༌། དགེ་བའི་རྩ་བ་ཇི་ལྟར་བསགས་པ་བཞིན་དུ་མཛད་པ་དེ་ལྟ་བུ་དེ་འབྱུང་སྟེ། དེ་བཞིན་གཤེགས་པ་ནི་ཐམས་ཅད་དུ་བཏང་སྙོམས་སུ་བཞུགས་ཤིང་ བཏང་སྙོམས་ལ་རྣམ་པར་མི་རྟོག་གོ །འཇམ་དཔལ། དཔེར་ན། ཉི་མའི་དཀྱིལ་འཁོར་ཤར་མ་ཐག་ཏུ་འོད་ཟེར་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་བཏང་བས་ ཛམྦུའི་གླིང་གི་མུན་པ་མུན་ནག་ཐམས་ཅད་མེད་པར་འགྱུར་ཡང་ཉི་མའི་དཀྱིལ་འཁོར་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་ པར་བྱ་བ་དེ་ལྟ་བུ་ད་འབྱུང་ངོ༌། །འཇམ་དཔལ། དེ་བཞིན་དུ་དེ་བཞིན་གཤེགས་པའི་ཉི་མའི་དཀྱིལ་འཁོར་ཤར་མ་ཐག་ཏུ་ཡེ་ཤེས་ཀྱི་འོད་ཟེར་བྱེ་བ་ཁྲག་ཁྲིག་འབུམ་ཕྲག་ གྲངས་མེད་པ་བཏང་བས་སེམས་ཅན་རྣམས་ཀྱི་ལྟ་བར་འགྱུར་བའི་མུན་པ་ཐམས་ཅད་མེད་པར་གྱུར་ཏེ། སེམས་ཅན་ཡོངས་སུ་སྨིན་པར་བྱ་བའི་ཕྱིར་དེ་བཞིན་གཤེགས་ པའི་བྱིན་གྱི་རླབས་ཀྱིས་འཇིག་རྟེན་གྱི་ཁམས་སུ་ལྟ་བར་གྱུར་པ་འབྱུང་བ་ནི་མ་གཏོགས་སོ། །འཇམ་དཔལ། དེ་བཞིན་གཤེགས་པ་ནི་ངས་སེམས་ཅན་རྣམས་ཀྱི་ལྟ་བར་ གྱུར་པ་བསལ་ལ་སྙམ་མམ། བསལ་བར་བྱའོ་སྙམ་དུ་མི་རྟོག །རྣམ་པར་མི་རྟོག་མོད་ཀྱི་འོན་ཀྱང༌། འཇམ་དཔལ། ལྷུན་གྱིས་གྲུབ་ཅིང་རྣམ་པར་མི་རྟོག་པར་དེ་བཞིན་ གཤེགས་པའི་མཛད་པ་དེ་ལྟ་བུ་དེ་འབྱུང་སྟེ། འཇམ་དཔལ། དེ་བཞིན་གཤེགས་པ་ནི་ཐམས་ཅད་དུ་རྣམ་པར་མི་རྟོག་ཅིང་མཉམ་སྟེ་བཏང་སྙོམས་པའོ། །འཇམ་དཔལ། དཔེར་ན། སྒྱུ་མ་སྤྲུལ་པ་ནི་སྒྱུ་མ་མཁན་གྱི་དབང་གིས་བྱ་བ་རྣམ་པ་སྣ་ཚོགས་དང༌། ལུས་ཐ་དད་པ་སྣ་ཚོགས་སྟོན་ཀྱང༌། འཇམ་དཔལ། སྒྱུ་མ་སྤྲུལ་པ་དེ་ནི་བརྗོད་དུ་མེད་ པ༑ མ་སྐྱེས་པ། མ་འགགས་པ། ཡི་གེ་མེད་པ། སྒྲ་མེད་པ། ཡུལ་མེད་པ། དངོས་པོ་མེད་པ། བསམ་གྱིས་མི་ཁྱབ་པ། མཚན་ཉིད་མེད་པ། གཉིས་སུ་མེད་པ། ཀུན་ཏུ་སྤྱོད་པ་ མེད་པ། ཆོས་ཀྱི་དབྱིངས་དང་མཉམ་ཞིང་གཉེན་པོ་མེད་པ་ཡིན་ཡང༌། འཇམ་དཔལ། སྒྱུ་མ་སྤྲུལ་པ་ནི་སྒྱུ་མ་མཁན་གྱི་དབང་གིས་ལྷུན་གྱིས་གྲུབ་ཅིང་རྣམ་པར་མི་རྟོག་པར་ ༄༅། །བྱ་བ་སྣ་ཚོགས་སྟོན་ཏོ། །འཇམ་དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སེམས་ ཅན་གྱི་དབང་གིས་འཁོར་གྱི་ནང་ན་གཟུགས་ཀྱི་སྐུ་དང༌། ཁ་དོག་དང༌། སྦྱོད་པ་དང༌། སྤྱོད་ལམ་དང༌། བྱ་བ་ལ་འཇུག་པའི་གནས་སྣ་ཚོགས་འབྱུང་མོད་ཀྱི། འཇམ་ དཔལ། དེ་བཞིན་གཤེགས་པ་དེ་ནི་བརྗོད་དུ་མེད་པ། མ་སྐྱེས་པ། མ་འགགས་པ། ཡི་གེ་མེད་པ། སྒྲ་མེད་པ། ཡུལ་མེད་པ། དངོས་པོ་མེད་པ། བསམ་གྱིས་མི་ ཁྱབ་པ། མཚན་ཉིད་མེད་པ། གཉིས་སུ་མེད་པ། ཀུན་ཏུ་སྤྱོད་པ་མེད་པ། ཆོས་ཀྱི་དབྱིངས་དང་མཚུངས་ཤིང་གཉེན་པོ་མེད་པ། ཁམས་གསུམ་ལས་ཡང་དག་པར་ འདས་པ་སྟེ། འོན་ཀྱང་འཇམ་དཔལ་དེ་བཞིན་གཤེགས་པ་ནི་ལྷུན་གྱིས་གྲུབ་ཅིང་རྣམ་པར་མི་རྟོག་པར་སེམས་ཅན་གྱི་དབང་གིས་མཛད་པ་སྣ་ཚོགས་དག་སྟོན་ཏོ། འཇམ་དཔལ། དཔེར་ན། ཉི་མ་ནི་གཅིག་ཁོ་ན་ཡིན་ན་རིའི་རྒྱལ་པོ་རི་རབ་ཀྱི་དབང་གིས་གླིང་བཞི་རྣམས་སུ་སེམས་ཅན་རྣམས་ཀྱིས་རྣམ་པ་མང་པོ་ལ་མཐོང་སྟེ། ཁ་ ཅིག་གིས་ནི་དེ་འཆར་བར་མཐོང༌། ཁ་ཅིག་གིས་ནི་ཤར་ཟིན་པར་མཐོང༌། ཁ་ཅིག་གིས་བག་དྲོས་པ་ཙམ་དུ་མཐོང༌། ཁ་ཅིག་གིས་ནི་དྲོས་ཆེན་ཙམ་དུ་ཤེས། ཁ་ ཅིག་གིས་ནི་ནམ་ཕྱེད། ཁ་ཅིག་གིས་ནི་ཉི་མ་ཕྱེད། ཁ་ཅིག་གིས་ནི་ཉི་མ་མེལ་ཚེ་ཐུན་གཅིག་ཙམ་དུ་ཤར་བར་ཤེས། ཁ་ཅིག་གིས་ནི་ཉི་མ་ཕྱེད་ཡོལ་ཙམ་དུ་ཤེས། ཁ་ཅིག་ གིས་ནི་ཉི་མ་སྣུར་ཙམ་དུ་ཤེས། ཁ་ཅིག་གིས་ནི་ཐོ་རངས་ཙམ་དུ་ཤེས་ཏེ། ཉི་མའི་དཀྱིལ་འཁོར་གཅིག་ཡིན་མོད་ཀྱི། འོན་ཀྱང་གླིང་བཞི་དག་ཏུ་སེམས་ཅན་རྣམས་ཀྱི་ གཞན་དང༌། གཞན་དག་ཏུ་མཐོང་ཡང་ཉི་མའི་དཀྱིལ་འཁོར་ནི་མི་རྟོག །རྣམ་པར་མི་རྟོག་སྟེ། ལྷུན་གྱིས་གྲུབ་ཅིང་རྣམ་པར་མི་རྟོག་བཞིན་དུ་རི་རབ་ཀྱི་དབང་གིས་གླིང་བཞི་པའི་ འཇིག་རྟེན་གྱི་ཁམས་སུ་བྱ་བ་སྣ་ཚོགས་སྟོན་ཏོ། །འཇམ་དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་ཡང་དག་པར་རྫོགས་པའི་སངས་རྒྱས་ཀྱང་སེམས་ཅན་ གྱི་དབང་གིས་འཁོར་གཅིག་ཁོ་ནའི་ནང་ནས་ཀྱང་སེམས་ཅན་ཁ་ཅིག་གིས་ནི་དེ་བཞིན་གཤེགས་པ་མངོན་པར་རྫོགས་པར་འཚང་རྒྱ་བར་ཤེས། ཁ་ཅིག་གིས་ནི་ ཡོངས་སུ་མྱ་ངན་ལས་འདའ་བར་ཤེས། ཁ་ཅིག་གིས་ནི་བཅོམ་ལྡན་འདས་མངོན་པར་རྫོགས་པར་སངས་རྒྱས་པར་ཤེས་སོ། །འཁོར་དེ་ཉིད་ཀྱི་ནང་ནས་ཁ་ཅིག་གིས་ནི་ བཅོམ་ལྡན་འདས་ཡོངས་སུ་མྱ་ངན་ལས་འདས་བར་ཤེས། ཁ་ཅིག་གིས་ནི་དེ་བཞིན་གཤེགས་པ་བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་ལོ་བཅུ་ལོན་ ༄༅། །པར་ཤེས། ཁ་ཅིག་གིས་ནི་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ལོ་བཅུ་ལོན་པར་ཤེས། ཁ་ཅིག་གིས་ནི་བཅོམ་ལྡན་ འདས་ཀྱིས་བསྟན་པ་སྙིང་པོར་གྱུར་པར་ཤེས། ཁ་ཅིག་གིས་ནི་བཅོམ་ལྡན་འདས་ཀྱིས་བསྟན་པ་ནུབ་པར་ཤེས། ཁ་ཅིག་གིས་ནི་བཅོམ་ལྡན་འདས་ཀྱིས་ཆོས་བསྟན་ ནས་ལོ་བཅུ་དང༌། ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་ལོན་པར་ཤེས། ཁ་ཅིག་གིས་ནི་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ལོ་བཅུ་ དང༑ ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་ལོན་པར་ཤེས། ཁ་ཅིག་གིས་ནི་བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་ལོ་བརྒྱ་དང༌། ལོ་ སྟོང་ལོན་པར་ཤེས། ཁ་ཅིག་གིས་ནི་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ལོ་བརྒྱ་དང༌། ལོ་སྟོང་ལོན་པར་ཤེས། ཁ་ཅིག་གིས་ནི་བཅོམ་ལྡན་འདས་ མངོན་པར་རྫོགས་པར་སངས་རྒྱས་ནས་ལོ་སྟོང་ཕྲག་བཅུ་དང༌། ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་ལོན་པར་ཤེས། ཁ་ཅིག་གིས་ནི་བཅོམ་ལྡན་འདས་ཡོངས་ སུ་མྱ་ངན་ལས་འདས་ནས་ལོ་སྟོང་ཕྲག་བཅུ་དང༌། ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་ལོན་པར་ཤེས། ཁ་ཅིག་གིས་ནི་བཅོམ་ལྡན་འདས་མངོན་པར་རྫོགས་ པར་སངས་རྒྱས་ནས་བསྐལ་པ་བྱེ་བ་ཁྲག་ཁྲིག་འབུམ་ཕྲག་བཅུ་དང༌། ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་ལོན་པར་ཤེས། ཁ་ཅིག་གིས་ནི་བཅོམ་ལྡན་འདས་ཡོངས་ སུ་མྱ་ངན་ལས་འདས་ནས་བསྐལ་པ་བྱེ་བ་ཁྲག་ཁྲིག་འབུམ་ཕྲག་བཅུ་དང༌། ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་ལོན་པར་ཤེས་སོ། །འཇམ་དཔལ། འཁོར་འདི་ཉིད་ ཀྱི་ནང་ནས་ལྷ་དང༌། མི་ཁ་ཅིག་གིས་ནི་བཅོམ་ལྡན་འདས་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་ནས་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་ལོན་པར་ཤེས། འཇམ་དཔལ། འཁོར་འདི་ཉིད་ཀྱི་ནང་ནས་ལྷ་དང༌། མི་ཁ་ཅིག་གིས་ནི་བཅོམ་ལྡན་འདས་ཤཱཀྱ་ཐུབ་པ་ཡོངས་སུ་མྱ་ངན་ལས་འདས་ནས་བསྐལ་པ་བརྗོད་དུ་མེད་པའི་ཡང་བརྗོད་ དུ་མེད་པ་ལོན་པར་ཤེས་ཀྱང༌། འཇམ་དཔལ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་བཞིན་དུ་སེམས་ཅན་ གྱི་དབང་གིས་དེ་བཞིན་གཤེགས་པའི་མཛད་པ་དེ་ལྟ་བུ་དེ་འབྱུང་ངོ༌། །འཇམ་དཔལ། དཔེར་ན། ཛམྦུའི་གླིང་དུ་རླུང་གི་དཀྱིལ་འཁོར་ཆེན་པོ་ལངས་པས་རྩྭ་དང༌། ཤིང་ གེལ་པ་དང༌། སྨན་དང༌། ནགས་ཚལ་དང༌། ལོ་མ་ཐམས་ཅད་གཡོ། རབ་ཏུ་གཡོ། ཀུན་ཏུ་རབ་ཏུ་གཡོ། །འགུལ། རབ་ཏུ་འགུལ། ཀུན་ཏུ་རབ་འགུལ། འུར་འུར། རབ་ཏུ་ ༄༅། །འུར་འུར། ཀུན་ཏུ་རབ་ཏུ་འུར་འུར། འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་ཤིང་ལོ་མ་ཁ་ཅིག་ནི་ཤར་ཕྱོགས་སུ་དམའ་ལ་ནུབ་ ཕྱོགས་སུ་མཐོ། ཁ་ཅིག་ནི་ནུབ་ཕྱོགས་སུ་དམའ་ལ་ཤར་ཕྱོགས་སུ་མཐོ། ལོ་མ་ཁ་ཅིག་ནི་མཐའ་དམའ་ལ་དབུས་སུ་མཐོ། །ཁ་ཅིག་ནི་བྱང་ཕྱོགས་དམའ་ལ་ལྷོ་ ཕྱོགས་སུ་མཐོའང་རྩྭ་དང༌། ཤིང་གེལ་པ་དང༌། སྨན་དང༌། ནགས་ཚལ་དང༌། ལོ་མ་རྣམས་མི་རྟོག །རྣམ་པར་མི་རྟོག་སྟེ། འོན་ཀྱང༌། འཇམ་དཔལ། རླུང་གི་དཀྱིལ་ འཁོར་གྱི་དབང་གིས་བྱ་བ་སྣ་ཚོགས་སྟོན་ཏོ། །འཇམ་དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་མི་རྟོག །རྣམ་ པར་མི་རྟོག་སྟེ། འོན་ཀྱང་སེམས་ཅན་གྱི་དབང་གིས་རྟག་ཏུ་སྐད་ཅིག་སྐད་ཅིག་ལ་གཟུགས་ཀྱི་སྐུ་དང༌། ཁ་དོག་དང༌། སྤྱོད་པ་དང༌། སྨོན་ལམ་དང༌། བྱ་ བ་ལ་འཇུག་པའི་གནས་གྲངས་མེད་པ་དག་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་རྣམས་སུ་འབྱུང་ངོ༌། །འཇམ་དཔལ། སེམས་ཅན་རྣམས་ཀྱི་ དེ་བཞིན་གཤེགས་པ་ལ་དམིགས་པ་ཡིད་ལ་བྱེད་པ་ཇི་སྙེད་འབྱུང་བ་དེ་སྙེད་ཀྱི་བསྐལ་པར་སེམས་ཅན་དམྱལ་བ་དང༌། དུད་འགྲོ་དང༌། ཡི་དྭགས་དང༌། གཤིན་རྗེའི་ འཇིག་རྟེན་དུ་སྐྱེ་བའི་རྒྱུན་ཆད་ཅིང་ལྡོག་སྟེ། འཇམ་དཔལ། དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཡོན་ཏན་ཚད་མེད་པ་ དང་ལྡན་ཏེ། དེ་བཞིན་གཤེགས་པ་གཅིག་ལ་དམིགས་པའི་ཡོན་ཏན་གྱི་མཐའ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པ་དང༌། ཏིང་ངེ་འཛིན་ བསམ་གྱིས་མི་ཁྱབ་པ་ལ་གནས་པ་རྣམས་ཀྱིས་ཀྱང་བསྐལ་པ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་པ་གྲངས་མེད་པ་དག་གིས་ཀྱང་རྟོགས་པར་མི་ནུས་སོ། །འཇམ་ དཔལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ལྷ་རྣམས་དང༌། མི་རྣམས་ནི་ཆེས་ཉུང་གི་ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་དང་ལྡན་པ་འདོད་ པ་དག་ལ་འདོད་ཆགས་དང་བྲལ་བ་རྣམས་ཀྱིས་ལྷའི་མིག་གིས་ཤིང་རྟའི་ཕང་ལོའི་ཚད་ཙམ་གྱི་ས་ཕྱོགས་གཅིག་ན་སེམས་ཅན་དག་མཐོང་བ་ནི་ཆེས་མང་ངོ༌། །འཇམ་ དཔལ། ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་དང་ལྡན་པ་འདོད་པ་དག་ལ་འདོད་ཆགས་དང་བྲལ་བ་རྣམས་ཀྱིས་ལྷའི་མིག་གིས་སྟོང་གསུམ་གྱི་སྟོང་ཆེན་པོའི་འཇིག་ རྟེན་གྱི་ཁམས་ན་སེམས་ཅན་དག་མཐོང་བ་ནི་ཆེས་ཉུང་གི །དེ་བཞིན་གཤེགས་པའི་ཉན་ཐོས་དགྲ་བཅོམ་པ། ཟག་པ་ཟད་པ། རྣམ་པར་ཐར་པ་བརྒྱད་ལ་བསམ་གཏན་ ༄༅། །པས་ལྷའི་མིག་གིས་ཤིང་རྟའི་ཕང་ལོའི་ཚད་ཙམ་གྱི་ས་ཕྱོགས་གཅིག་ན་སེམས་ཅན་དག་མཐོང་བ་ནི་ཆེས་མང་ངོ༌། །འཇམ་དཔལ། དེ་བཞིན་ གཤེགས་པའི་ཉན་ཐོས་དགྲ་བཅོམ་པ། ཟག་པ་ཟད་པ། རྣམ་པར་ཐར་པ་བརྒྱད་ལ་བསམ་གཏན་པས་ལྷའི་མིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་ གྱི་ཁམས་ན་སེམས་ཅན་ཇི་སྙེད་མཐོང་བ་དེ་བས་ནི། འཇམ་དཔལ། རང་སངས་རྒྱས་ཀྱིས་ལྷའི་མིག་གིས་ཤིང་རྟའི་ཕང་ལོའི་ཚད་ཙམ་གྱི་ས་ཕྱོགས་གཅིག་ན་ སེམས་ཅན་དག་མཐོང་བ་ནི་ཆེས་མང་ངོ༌། །འཇམ་དཔལ། རང་སངས་རྒྱས་ཀྱིས་ལྷའི་མིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། སེམས་ཅན་ ཇི་སྙེད་མཐོང་བ་དེ་བས་ནི། འཇམ་དཔལ། བྱང་ཆུབ་སེམས་དཔའ་རྣམ་པར་ཐར་པ་དང༌། ཏིང་ངེ་འཛིན་བསམ་གྱིས་མི་ཁྱབ་པ་ལ་གནས་པས་ལྷའི་མིག་གིས་ཤིང་རྟའི་ཕང་ལོའི་ཚད་ ཙམ་གྱི་ས་ཕྱོགས་གཅིག་ན་སེམས་ཅན་དག་མཐོང་བ་ནི་ཆེས་མང་ངོ༌། །འཇམ་དཔལ། བྱང་ཆུབ་སེམས་དཔའ་རྣམ་པར་ཐར་པ་དང༌། ཏིང་ངེ་འཛིན་བསམ་གྱིས་མི་ཁྱབ་ པ་ལ་གནས་པས་ལྷའི་མིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་མཐོང་བ་དེ་བས་ནི། འཇམ་དཔལ། དེ་བཞིན་གཤེགས་པས་ ལྷའི་སྦྱན་གྱིས་ཤིང་རྟའི་ཕང་ལོའི་ཚད་ཙམ་གྱི་ས་ཕྱོགས་གཅིག་ན་སེམས་ཅན་དག་གཟིགས་པ་ནི་ཆོས་གྲངས་མེད་དོ། །འཇམ་དཔལ། དེ་བཞིན་དུ་ཕྱོགས་བཅུའི་ འཇིག་རྟེན་གྱི་ཁམས་རབ་འབྱམས་ཐམས་ཅད་ན་ཤིང་རྟའི་ཕང་ལོའི་ཚད་ཙམ་གྱི་ས་ཕྱོགས་ཐམས་ཅད་ན་གནས་པའི་སེམས་ཅན་རེ་རེའི་སེམས་དང༌། སེམས་ལས་བྱུང་བའི་ ཆོས་བྱུང་བ་དང༌། འབྱུང་བ་དང༌། འབྱུང་བར་འགྱུར་བ་གང་དག་གཟིགས་པ་དེ་དག་ནི་བྱང་ཆུབ་སེམས་དཔའ་རྣམ་པར་ཐར་པ་དང་ཏིང་ངེ་འཛིན་བསམ་གྱིས་མི་ཁྱབ་པ་ལ་ གནས་པ་རྣམས་ཀྱིས་ཀྱང་བསྐལ་པ་གངྒཱའི་ཀླུང་གི་བྱེ་མ་སྙེད་དུའང་བགྲང་བའམ། བསམ་པའམ། གྲངས་སུ་བྱ་བར་སླ་བ་མ་ཡིན་ཏེ། འཇམ་དཔལ། སེམས་ཅན་འདས་ པ་དང༌། མ་འོངས་པ་དང༌། ད་ལྟར་བྱུང་བ་དེ་དག་གིས་སེམས་དང་སེམས་ལས་བྱུང་བ་དེ་དག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་ཀྱིས་ལྷུན་གྱིས་གྲུབ་པར་སྐད་ཅིག་ཐང་ཅིག་ཡུད་ཙམ་ཅིག་ལ་རབ་ཏུ་མཁྱེན་ཏོ། །འཇམ་དཔལ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ ཅན་ཐམས་ཅད་ཀྱི་སེམས་དང་སེམས་ལས་འབྱུང་བ་རྣམས་རྒྱུ་གང་དང༌། དམིགས་པ་གང་དང༌། རྐྱེན་གང་གིས་ཇི་ལྟར་བྱུང་བ་དང༌། འབྱུང་བ་དང༌། འབྱུང་བར་འགྱུར་ ༄༅། །བ་དང༌། སེམས་ཅན་དེ་དག་གི་སྤྱོད་པ་དང༌། སྤྱོད་ལམ་དང༌། བྱ་བ་ལ་འཇུག་པའི་གནས་གང་དག་བྱུང་བ་དང༌། འབྱུང་བ་དང༌། འབྱུང་བར་འགྱུར་ བ་དེ་དག་དེ་བཞིན་གཤེགས་པས་ལྷུན་གྱིས་གྲུབ་པའི་ཡེ་ཤེས་ཀྱིས་རྣམ་པར་མི་རྟོག་པར་སྐད་ཅིག་ཐང་ཅིག་ཡུད་ཙམ་ཅིག་ལ་ཡང་དག་པ་ཇི་ལྟ་བ་བཞིན་དུ་རབ་ཏུ་ མཁྱེན་ཏོ། །འཇམ་དཔལ། སེམས་ཅན་དེ་དག་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འདུལ་བའང་ལྷུན་གྱིས་གྲུབ་པའི་ཡེ་ཤེས་ཀྱི་རྣམ་པར་མི་ རྟོག་པར་སྐད་ཅིག་ཐང་ཅིག་ཡུད་ཙམ་ཅིག་ལ་རབ་ཏུ་མཁྱེན་ཏོ། །འཇམ་དཔལ། སེམས་ཅན་རེ་རེའི་མ་རིག་པའི་གནས་ཀྱི་སའི་ཉོན་མོངས་པ་གངྒཱའི་ཀླུང་གི་བྱེ་མ་བས་ མང་བ་དེ་དག་ཀྱང་དེ་བཞིན་གཤེགས་པས་ལྷུན་གྱིས་གྲུབ་པའི་ཡེ་ཤེས་ཀྱིས་རྣམ་པར་མི་རྟོག་པར་སྐད་ཅིག་ཐང་ཅིག་ཡུད་ཙམ་ཅིག་ལ་རབ་ཏུ་མཁྱེན་ཏོ། །འཇམ་ དཔལ། རྒྱུ་གང་དང༌། དམིགས་པ་གང་དང༌། རྐྱེན་གང་གིས་ཉོན་མོངས་པ་དེ་དག་ཇི་ལྟར་འབྱུང་བ་དང༌། ཐབས་ཀྱི་ཤེས་པ་གང་གིས་སེམས་ཅན་དེ་དག་གིས་ཉོན་མོངས་ པ་ཇི་ལྟར་ཞི་བར་འགྱུར་བ་དེ་དག་ཀྱང་ལྷུན་གྱིས་གྲུབ་པའི་ཡེ་ཤེས་ཀྱིས་རྣམ་པར་མི་རྟོག་པར་སྐད་ཅིག་ཐང་ཅིག་ཡུད་ཙམ་ཅིག་ལ་རབ་ཏུ་མཁྱེན་ཏོ། །འཇམ་དཔལ། དེ་ལྟར་ ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཡེ་ཤེས་བསམ་གྱིས་མི་ཁྱབ་པ་དང་ལྡན་ནོ། །འཇམ་དཔལ། དཔེར་ན། ཟླ་བའི་ དཀྱིལ་འཁོར་ནི་ཉི་མའི་དབང་གིས་ཛམྦུའི་གླིང་དུ་གཟུགས་དང༌། ཁ་དོག་དང༌། གཟི་བརྗིད་དང༌། འོད་རབ་འབྲིང་ཐ་མར་སྣང་ཡང་ཟླ་བའི་དཀྱིལ་འཁོར་ནི་འབྲི་བ་དང༌། འཕེལ་ བའང་མེད་དེ། འོན་ཀྱང་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པས་ཉི་མ་བགྲང་བ་དང༌། ཡུད་ཙམ་དང༌། ཡུད་ཙམ་ཕྱེད་ཀྱི་གྲངས་བརྩི་བར་བྱ་བ་དེ་ལྟ་བུ་དེ་འང་འབྱུང་ ལ༑ འཇམ་དཔལ། ཟླ་བའི་དཀྱིལ་འཁོར་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ༌། །འཇམ་ དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་དུ་ བསམ་པ་རབ་འབྲིང་ཐ་མས་སེམས་ཅན་རྣམས་ཀྱིས་དེ་བཞིན་གཤེགས་པ་གཟུགས་དང༌། ཁ་དོག་དང༌། གཟི་བརྗིད་དང༌། འོད་རབ་འབྲིང་ཐ་མར་མཐོང་ཡང༌། འཇམ་ དཔལ༑ སེམས་ཅན་གང་གི་དགེ་བའི་རྩ་བ་དང༌། སྤྱོད་པ་དང༌། མོས་པ་དང༌། སྨོན་ལམ་གྱི་སྟོབས་དང༌། བྱིན་གྱི་རླབས་ཅི་འདྲ་བ་ཡིན་པ་དེ་འདྲ་བར་དེ་བཞིན་གཤེགས་པ་ ༄༅། །མཐོང་སྟེ། འཇམ་དཔལ། དེ་བཞིན་གཤེགས་པ་ལ་ནི་རབ་འབྲིང་ཐ་མ་མེད་དོ། །དེ་ཅིའི་ཕྱིར་ཞེ་ན། འཇམ་དཔལ། དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་ནི་ཆོས་ཀྱི་སྐུ་སྟེ། ཤིན་ཏུ་མ་སྐྱེས་པ། མ་བྱུང་བ། མ་འགགས་པ་ཡིན་ན། འཇམ་དཔལ། འོན་ཀྱང་སེམས་ཅན་རྣམས་ ཀྱི་བསམ་པ་རབ་འབྲིང་ཐ་མས་དེ་བཞིན་གཤེགས་པ་རབ་འབྲིང་ཐ་མར་མཐོང་ཡང༌། འཇམ་དཔལ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། འོན་ ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དང༌། མི་དང༌། མི་མ་ཡིན་པ་རྣམས་དང༌། ཐ་ན་དུད་འགྲོའི་སྐྱེ་གནས་སུ་སོང་བའི་སེམས་ཅན་གང་དག་དེ་བཞིན་གཤེགས་པ་ལ་བཤོས་གསོལ་བ་དང༌། གང་དག་བཤོས་མི་གསོལ་ བ་དང༌། གང་དག་མཐོང་བ་དང༌། གང་དག་མི་མཐོང་བ་དང༌། གང་དག་སྟོང་པ་དང༌། གང་དག་མི་སྟོང་པ་དང༌། གང་དག་གཤེ་བ་དང༌། གང་དག་མི་གཤེ་བ་དང༌། གང་ དག་རེག་པ་དང༌། གང་དག་མི་རེག་པ་དེ་དག་ཐམས་ཅད་ཀྱི་བྱ་བ་དེ་ལྟ་བུ་རྣམས་ཀྱང་སངས་རྒྱས་ཀྱི་མཐུས་ལྷུན་གྱིས་གྲུབ་ཅིང་རྣམ་པར་མི་རྟོག་པར་འབྱུང་ངོ༌། །འཇམ་དཔལ། དཔེར་ ན༑ གང་དག་གིས་ནོར་བུ་རིན་པོ་ཆེ་མཐོན་ཀ་ཆེན་པོ་མཐོང་བ་དང༌། རེག་པ་དང༌། སྤྱོད་ཡུལ་དུ་གནས་པ་དེ་དག་ཐམས་ཅད་ནི་ནོར་བུ་རིན་པོ་ཆེ་མཐོན་ཀ་ཆེན་པོའི་ཁ་དོག་ཏུ་འགྱུར་ ཡང་ནོར་བུ་རིན་པོ་ཆེ་མཐོན་ཀ་ཆེན་པོ་ནི་མི་རྟོག །རྣམ་པར་མི་རྟོག་གོ །འཇམ་དཔལ། དེ་བཞིན་དུ་སེམས་ཅན་གང་དག་གིས་དེ་བཞིན་གཤེགས་པ་ཐ་ན་རི་མོར་བྲིས་པ་དང༌། གཟུགས་ སུ་བྱས་པ་མཐོང་བ་དང༌། རེག་པ་དང༌། དེའི་སྤྱོད་ཡུལ་ཡང་ཤེས་པ་དེ་དག་ཐམས་ཅད་ནི་གཟུགས་དང༌། ཁ་དོག་བསམ་གྱིས་མི་ཁྱབ་པ་ཡོངས་སུ་འགྲུབ་པ་ཐོབ་པར་འགྱུར་ཡང་ དེ་བཞིན་གཤེགས་པ་ནི་མི་རྟོག་གོ །རྣམ་པར་མི་རྟོག །འཇམ་དཔལ། དཔེར་ན་རྩིའི་རྒྱལ་པོ་ལེགས་པར་མཐོང་ཞེས་བྱ་བ་སེམས་ཅན་གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པའང་རུང༌། གང་དག་གིས་མཐོང་བ་དེ་དག་གི་མིག་རྣམ་པར་དག་པར་འགྱུར། གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པའང་རུང༌། གང་ དག་གིས་རྣ་བས་དེ་རླུང་གིས་བསྐྱེད་པའི་སྒྲ་ཐོས་པ་དེ་དག་གིས་རྣ་བ་རྣམ་པར་དག་པར་འགྱུར། གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པའང་རུང་ ༄༅། །གང་དག་གིས་དྲི་ཚོར་བ་དེ་དག་གི་སྣ་རྣམ་པར་དག་པར་འགྱུར། གནོད་སེམས་ཀྱི་སེམས་དང་ལྡན་པའམ། དད་པའི་སེམས་དང་ལྡན་པའང་ རུང༑ གང་དག་གི་ལྕེས་དེའི་རོ་མྱོང་བ་དེ་དག་གི་ལྕེའི་དབང་པོ་རྣམ་པར་དག་པར་འགྱུར། །གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པའང་རུང༌། གང་དག་ ལུས་ཀྱིས་རེག་པ་དེ་དག་གི་ལུས་རྣམ་པར་དག་པར་འགྱུར་ཡང༌། འཇམ་དཔལ། རྩིའི་རྒྱལ་པོ་ལེགས་པར་མཐོང་བ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་ གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ༌། འཇམ་དཔལ། དེ་བཞིན་དུ་གནོད་སེམས་ཀྱི་སེམས་དང་ལྡན་པའམ། དད་པའི་སེམས་དང་ལྡན་པའང་རུང༌། གང་དག་ གིས་དེ་བཞིན་གཤེགས་པ་ཐན་རི་མོར་བྲིས་པ་དང༌། གཟུགས་སུ་བྱས་པ་མཐོང་བ་དེ་དག་གི་དགེ་བའི་རྩ་བ་དེས་མིག་རྣམ་པར་དག་པར་འགྱུར། ཐ་ན་དུད་འགྲོའི་སྐྱེ་གནས་ སུ་སོང་བའང་རུང་སྟེ། གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པའང་རུང༌། གང་དག་གིས་དེ་ལ་སངས་རྒྱས་ཞེས་བྱ་བའམ། དེ་བཞིན་ གཤེགས་པ་ཞེས་བྱ་བའམ། འཇིག་རྟེན་མགོན་པོ་ཞེས་བྱ་བའམ། ཐམས་ཅད་མཁྱེན་པ་ཞེས་བྱ་བའི་སྒྲ་ཐོས་པ་དེ་དག་དགེ་བའི་རྩ་བ་དེས་རྣ་བའི་དབང་པོ་རྣམ་པར་དག་ པར་འགྱུར། གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པའང་རུང༌། གང་དག་གིས་དེའི་ཡོན་ཏན་གྱི་དྲི་ཚོར་བ་དེ་དག་དགེ་བའི་རྩ་བ་དེས་སྣ་རྣམ་ པར་དག་པར་འགྱུར། གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པའང་རུང༌། གང་དག་གིས་དེའི་ཆོས་ཀྱི་རོ་མྱོང་བ་དེ་དག་དགེ་བའི་རྩ་བ་དེས་ལྕེ་རྣམ་ པར་དག་པར་འགྱུར། གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པའང་རུང༌། གང་དག་གིས་ལུས་ཀྱི་རེག་པ་དེ་དག་དགེ་བའི་རྩ་བ་དེས་ལུས་རྣམ་པར་ དག་པར་འགྱུར་ཡང༌། འཇམ་དཔལ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། མ་འདྲེས་པའི་ཆོས་དང་ལྡན་པའི་ཕྱིར་ལྷུན་གྱིས་གྲུབ་ཅིང་རྣམ་པར་མི་རྟོག་ པར་དེའི་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། དཔེར་ན། རྩིའི་རྒྱལ་པོ་འབྲལ་བ་ཞེས་བྱ་བས་བསྐུས་པའི་རྔ་སྒྲ་སེམས་ཅན་ཟུག་རྡུས་ཟུག་པ་དང་བཅས་པ། དུག་དང་ བཅས་པ་གང་དག་གིས་ཐོས་པ་དེ་དག་གིས་ཟུག་རྡུ་ཐམས་ཅད་འབྱུང་ཞིང་དུག་ཀྱང་མི་གདུག་པར་འགྱུར་ཡང༌། འཇམ་དཔལ། རྩིའི་རྒྱལ་པོ་འབྲལ་བ་ནི་མི་རྟོག །རྣམ་པར་ མི་རྟོག་སྟེ། འོན་ཀྱང་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པའི་དབང་དང༌། རྒྱུ་རྐྱེན་ཚོགས་པས་ལྷུན་གྱིས་གྲུབ་ཅིང་རྣམ་པར་མི་རྟོག་པར་རྩིའི་རྒྱལ་པོ་འབྲལ་བའི་བྱ་བ་ ༄༅། །དེ་ལྟ་བུ་དེ་འབྱུང་ངོ༌། །འཇམ་དཔལ། དེ་བཞིན་དུ་དེ་བཞིན་གཤེགས་པའི་མཚན་ཐོས་མ་ཐག་ཏུ་སེམས་ཅན་རྣམས་ཀྱི་ལྟ་བར་གྱུར་པའི་ཟུག་ རྡུ་དག་འབྱུང་ཞིང་འདོད་ཆགས་དང༌། ཞེ་སྡང་དང༌། གཏི་མུག་གི་དུག་ཀྱང་མི་གདུག་པར་འགྱུར་ཡང༌། འཇམ་དཔལ། དེ་བཞིན་གཤེགས་པ་ནི་མི་རྟོག །རྣམ་པར་མི་ རྟོག་སྟེ། འོན་ཀྱང༌། འཇམ་དཔལ། ལྷུན་གྱིས་གྲུབ་ཅིང་རྣམ་པར་མི་རྟོག་པར་དེ་བཞིན་གཤེགས་པའི་མཛད་པ་དེ་ལྟ་བུ་དེ་འབྱུང་ངོ༌། །དེ་ཅིའི་ཕྱིར་ཞེ་ན། མ་འདྲེས་ བའི་ཆོས་དང་ལྡན་པའི་ཕྱིར་རོ། །འཇམ་དཔལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྱི་རྡུལ་ཕྲ་རབ་ཀྱི་རྡུལ་རྣམས་ནི་ཆེས་ཉུང་གི །བཅོམ་ལྡན་ འདས་ཤཱཀྱ་ཐུབ་པས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ཏུ་འཇིག་རྟེན་གྱི་ཁམས་རེ་རེར་ ཡང་རྡུལ་ཕྲ་རབ་ཀྱི་རྡུལ་རེ་རེ་ལ་བསྡུ་བའི་དངོས་པོ་བཞི་པོ་དག་གིས་སེམས་ཅན་ཡོངས་སུ་སྨིན་པར་མཛད་པ་དག་ནི་ཆེས་མང་ངོ༌། །འཇམ་དཔལ། ཕྱོགས་བཅུའི་འཇིག་ རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་གི་རྡུལ་ཕྲ་རབ་ཀྱི་རྡུལ་རྣམས་ནི་ཆེས་ཉུང་གི །བཅོམ་ལྡན་འདས་ཤཱཀྱ་ཐུབ་པས་རྒྱུན་མི་གཅོད་པར་ལྷུན་གྱིས་གྲུབ་ཅིང་རྣམ་ པར་མི་རྟོག་པར་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ཏུ་རྡུལ་ཕྲ་རབ་ཀྱི་རྡུལ་རེ་རེ་ལ་སེམས་ཅན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ ཡོངས་སུ་སྨིན་པར་མཛད་ཟིན་པ་དང༌། ཡོངས་སུ་སྨིན་པར་མཛད་པ་དང༌། ཡོངས་སུ་སྨིན་པར་མཛད་པར་འགྱུར་བ་དག་ནི་ཆེས་མང་སྟེ། འཇམ་དཔལ། དེ་ལྟར་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་སེམས་ཅན་ཡོངས་སུ་སྨིན་པར་མཛད་པ་བསམ་གྱིས་མི་ཁྱབ་པ་དང་ལྡན་ནོ། །འཇམ་དཔལ། དཔེར་ན། ཟླ་བའི་དཀྱིལ་འཁོར་ནི་ཉི་མའི་དབང་གིས་འབྲི་བ་དང༌། སྐྱེ་བ་དང༌། མི་སྣང་བར་འགྱུར་བར་ཡང་སྣང་ལ། ཟླ་བའི་དཀྱིལ་འཁོར་ལ་ནི་འབྲི་བ་དང༌། མི་སྣང་བ་དང༌། སྐྱེ་བ་ མེད་དེ། འོན་ཀྱང་སེམས་ཅན་རྣམས་ཀྱི་སྔོན་གྱི་དགེ་བའི་ལས་ཀྱི་རྣམ་པར་སྨིན་པས་ཉི་མའི་གྲངས་དང༌། ཡུད་ཙམ་དང༌། ཡུད་ཙམ་ཕྱེད་དང༌། ཟླ་བ་ཕྱེད་དང༌། ཟླ་བ་དང༌། ལོ་བགྲང་བའི་གྲངས་བཞག་པའི་ཕྱིར། དེ་བཞིན་གཤེགས་པའི་བྱིན་གྱི་རླབས་ཀྱི་ས་བྱ་བ་དེ་ལྟ་བུ་དག་འབྱུང་ཡང༌། འཇམ་དཔལ། ཟླ་བའི་དཀྱིལ་འཁོར་ལ་ནི་འབྲི་བའམ། འཕེལ་བའམ། མི་སྣང་བར་འགྱུར་བ་མེད་དེ། འོན་ཀྱང༌། འཇམ་དཔལ། སེམས་ཅན་རྣམས་ཀྱི་སྡོན་གྱི་དགེ་བའི་ལས་ཀྱི་རྣམ་པར་སྨིན་པ་དང༌། ཉི་མའི་དབང་གིས་ལྷུན་ ༄༅། །གྱིས་གྲུབ་ཅིང་རྣམ་པར་མི་རྟོག་པར་ཟླ་བའི་དཀྱིལ་འཁོར་གྱི་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། དེ་བཞིན་དུ་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སྔོན་དགེ་བའི་རྩ་བའི་ཚོགས་བསགས་པའི་སེམས་ཅན་རྣམས་ཀྱི་ང་རྒྱལ་དང༌། རྒྱགས་པ་དང༌། དྲེགས་པ་ ཡང་དག་པར་གཞོམ་པའི་ཕྱིར་དང༌། སྔོན་གྱི་དགེ་བའི་རྩ་བའི་ཚོགས་རྣམས་ཡོངས་སུ་སྨིན་པར་བྱ་བའི་ཕྱིར་དང༌། དེ་བཞིན་གཤེགས་པའི་བསྟན་པ་ལ་གཟུད་པའི་ ཕྱིར་དེ་བཞིན་གཤེགས་པའི་དམ་པའི་ཆོས་འགྲིབ་པ་དང་ནུབ་པར་ཀུན་ཏུ་སྟོན་ཏེ། འཇམ་དཔལ། སེམས་ཅན་གྱི་དབང་གིས་དེ་བཞིན་གཤེགས་པའི་དམ་པའི་ ཆོས་ནུབ་པ་དང༌། འགྲིབ་པ་དང༌། འཕེལ་བར་འགྱུར་མོད་ཀྱི། འོན་ཀྱང་འཇམ་དཔལ་སེམས་ཅན་གྱི་དབང་གིས་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེ་བཞིན་གཤེགས་ པའི་མཛད་པ་དེ་ལྟ་བུ་དེ་འབྱུང་ངོ༌། འཇམ་དཔལ། དཔེར་ན། ནམ་མཁའ་ལ་གནས། ནམ་མཁའ་ལ་བརྟེན་ནས་སེམས་ཅན་ཐམས་ཅད་ཀྱི་བྱ་བ་སྣ་ཚོགས་དག་འབྱུང་ཡང་ ནམ་མཁའ་ནི་མ་སྐྱེས་པ། མ་འགགས་པ། འདུས་མ་བྱས་པ། ཡི་གེ་མེད་པ། སྒྲ་མེད་པ། བརྗོད་དུ་མེད་པ། བརྗོད་པར་བྱ་བ་མ་ཡིན་ནམ། གཉིས་སུ་མེད་པ། གཉེན་ པོ་མེད་པ་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་སྣ་ཚོགས་དག་འབྱུང་ངོ༌། །འཇམ་དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་ལ་གནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བརྟེན་ནས་སེམས་ཅན་ཐམས་ཅད་ཀྱི་བྱ་བ་ཐམས་ཅད་ འབྱུང་ཡང༌། འཇམ་དཔལ། དེ་བཞིན་གཤེགས་པ་ནི་མི་སྐྱེ་མི་འགགས་ཏེ། འཇམ་དཔལ། དེ་བཞིན་གཤེགས་པ་ནི་འདུས་མ་བྱས་པ། ཡི་གེ་མེད་པ། སྒྲ་མེད་པ། བརྗོད་ དུ་མེད་པ། བརྗོད་པར་བྱ་བ་མ་ཡིན་པ། གཉིས་སུ་མེད་པ། གཉེན་པོ་མེད་པ་སྟེ། འོན་ཀྱང་སྔོན་གྱི་དགེ་བའི་རྩ་བ་དང༌། སྤྱོད་པ་དང༌། སྨོན་ལམ་གྱི་སྟོབས་དང༌། བྱིན་གྱི་རླབས་ ཀྱིས་ལྷུན་གྱིས་གྲུབ་ཅིང་རྣམ་པར་མི་རྟོག་པར་སེམས་ཅན་རྣམས་ལ་དེའི་ཆོས་ཀྱི་མཛད་པ་སྣ་ཚོགས་དག་ཀྱང་འབྱུང་ངོ༌། །འཇམ་དཔལ། ཐེག་པ་ཆེན་པོ་ལ་མོས་པའི་བྱང་ ཆུབ་སེམས་དཔའ་སངས་རྒྱས་ལ་དམིགས་པའི་ཡིད་ལ་བྱ་བ་གཅིག་གིས་ཀྱང་ཕྱོགས་བཅུའི་འཇིག་རྟེན་གྱིས་ཁམས་གྲངས་མེད་དཔག་ཏུ་མེད་པ་དག་ཏུ་རྡུལ་ཕྲ་རབ་ཀྱི་རྡུལ་ རེ་རེ་ལ་སེམས་ཅན་དཔག་ཏུ་མེད་གྲངས་མེད་པ་དག་ནི་བླ་ན་མེད་པའི་ཡེ་ཤེས་རྟོགས་པར་འགྱུར་བར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་ཉན་ཐོས་དང༌། ༄༅། །རང་སངས་རྒྱས་ཉིད་དུ་འགྱུར་བར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་ཚངས་པ་ཐོབ་པར་བྱེད། སེམས་ཅན་དཔག་ཏུ་མེད་གྲངས་ མེད་པ་དག་ནི་གཞན་འཕྲུལ་དབང་བྱེད་ཀྱི་ལྷའི་འཇིག་རྟེན་དུ་སྐྱེ་བ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་འཕྲུལ་དགའི་ལྷའི་འཇིག་རྟེན་དུ་སྐྱེ་བ་ཐོབ་ པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་དགའ་ལྡན་གྱི་ལྷའི་འཇིག་རྟེན་དུ་སྐྱེ་བ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་འཐབ་བྲལ་གྱི་ལྷའི་ གནས་སུ་སྐྱེ་བ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་སུམ་ཅུ་རྩ་གསུམ་ལྷའི་གནས་སུ་སྐྱེ་བ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་ བདག་ནི་རྒྱལ་ཆེན་བཞི་པའི་ལྷའི་གནས་སུ་སྐྱེ་བ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་ལྷའི་རྒྱལ་པོ་ཐོབ་པར་བྱེད། སེམས་ཅན་དཔག་ཏུ་མེད་གྲངས་ མེད་པ་དག་ནི་འཁོར་ལོས་བསྒྱུར་བའི་རྒྱལ་པོ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་སྟོབས་ཀྱི་འཁོར་ལོས་བསྒྱུར་བའི་རྒྱལ་པོ་ཐོབ་པར་བྱེད། སེམས་ ཅན་དཔག་ཏུ་མེད་གྲངས་མེད་པ་དག་ནི་ཀླུའི་དབང་པོ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་གནོད་སྦྱིན་གྱི་དབང་པོ་ཐོབ་པར་བྱེད། སེམས་ཅན་ དཔག་ཏུ་མེད་གྲངས་མེད་པ་དག་ནི་དྲི་[?] པའི་[?] དབང་པོ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་ལྷ་མ་ཡིན་གྱི་དབང་པོ་ཐོབ་པར་བྱེད། སེམས་ཅན་དཔག་ཏུ་ མེད་གྲངས་མེད་པ་དག་ནི་མིའམ་ཅིའི་དབང་པོ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་ལྟོ་འཕྱེ་ཆེན་པོའི་དབང་པོ་ཐོབ་པར་བྱེད། སེམས་ཅན་དཔག་ཏུ་ མེད་གྲངས་མེད་པ་དག་ནི་མིའི་དབང་[?] པོ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ནི་མིར་སྐྱེ་བ་ཐོབ་པར་བྱེད། སེམས་ཅན་དཔག་ཏུ་མེད་གྲངས་མེད་པ་དག་ ནི་རིགས་ཆེན་པོར་སྐྱེ་བ་ཐོབ་པར་བྱེད་ན་ཐལ་མོ་སྦྱོར་བ་ལྟ་ཅི་སྨོས། བདུག་པ་ཕུལ་བ་ལྟ་ཅི་སྨོས། དེ་བཞིན་དུ་མར་མེ་ཕུལ་བ་ལྟ་ཅི་སྨོས། སྤོས་ཕུལ་བ་ལྟ་ཅི་སྨོས། མེ་ཏོག་ ཕུལ་བ་ལྟ་ཅི་སྨོས། མཆོད་པ་རྣམ་པ་མང་པོ་གཞན་ཕུལ་བ་ལྟ་ཅི་སྨོས། ཚིགས་སུ་བཅད་པ་གཅིག་ཙམ་ཡང་ཉན་པ་དང༌། ཀློག་པ་དང༌། འཛིན་པ་ལྟ་ཅི་སྨོས། དམ་པའི་ཆོས་ རྣམ་པ་མང་པོ་ཡོངས་སུ་འཛིན་པ་ལྟ་ཅི་སྨོས་ཏེ། དེ་བས་ཆོས་གྲངས་མེད་པའི་སངས་རྒྱས་ཀྱི་མཛད་པས་ཉེ་བར་གནས་པར་འགྱུར་རོ། །འཇམ་དཔལ། བྱང་ཆུབ་སེམས་དཔའ་ བསྐལ་པའམ། བསྐལ་པ་བརྒྱའམ། བསྐལ་པ་དཔག་ཏུ་མེད་གྲངས་མེད་པར་སེམས་ཅན་དམྱལ་བ་དང༌། དུད་འགྲོ་དང༌། ཡི་དྭགས་དང༌། གཤིན་རྗེའི་འཇིག་རྟེན་དུ་སྐྱེ་བ་ ༄༅། །ཐོབ་པ་ནི་སླ་ཡི། བྱང་ཆུབ་སེམས་དཔའ་སངས་རྒྱས་མཉེས་པར་མ་བྱས། ཆོས་དང༌། དགེ་འདུན་མཉེས་པར་མ་བྱས་པ་ནི་དེ་ལྟ་མ་ཡིན་ནོ། །འཇམ་ དཔལ། དེ་ལས་སངས་རྒྱས་མི་མཉེས་པར་བྱེད་པ་དང༌། ཆོས་དང༌། དགེ་འདུན་མི་མཉེས་པར་བྱེད་པ་ནི་ཐ་ན་བདག་གི་ཆུང་མ་ལ་མི་ཚངས་པར་སྤྱོད་པ་ལས་བྱུང་བའི་ ཚུལ་བཞིན་མ་ཡིན་པ་ཡིད་ལ་བྱེད་པ་དང༌། བྱང་ཆུབ་སེམས་དཔའ་ལ་རྣམ་པར་ཞེ་སྡང་བ་དང༌། བྱང་ཆུབ་སེམས་དཔའ་ལ་བརྙས་པ་དང༌། བྱང་ཆུབ་སེམས་དཔའ་ ལ་ཁྱད་དུ་གསོད་པ་དང༌། ཆོས་སྤོང་བ་དང༌། ཆོས་འདོར་བ་དང༌། བྱང་ཆུབ་སེམས་དཔའ་ལ་གུས་པར་མི་བྱེད་པ་དང༌། དགེ་བའི་བཤེས་གཉེན་ལ་བསྙེན་བཀུར་མི་ བྱེད་པ་དང༌། སེམས་ཅན་ཡོངས་སུ་སྨིན་པར་བྱེད་པ་འདོར་བ་དང༌། བླ་མ་དང༌། སྦྱིན་པའི་གནས་དང༌། སློབ་དཔོན་དང༌། ཕ་མ་དང༌། དགེ་སྦྱོང་དང༌། བྲམ་ཟེ་ཡང་ དག་པར་སོང་བ་དང༌། ཡང་དག་པར་ཞུགས་པ་ལ་གུས་པར་མི་བྱེད་པ་དང༌། ཆོས་སྨྲ་བ། ཆོས་ཁྱད་པར་ཅན་རྟོགས་པ། ཆོས་རྒྱ་ཆེན་པོ་སྟོན་པ་ཐེག་པ་ཆེན་པོ་ལ་ ཡང་དག་པར་གནས་པ། མྱ་ངན་ལས་འདས་པའི་ལམ་གྱི་བྱ་བ་ཤེས་པ། གཟུངས་དང༌། མདོ་སྡེའི་རྒྱལ་པོ་ཐོབ་པ་རྣམས་ལ་མི་འདུད་ཅིང་བརྗིད་བྱེད་པ་དང༌། ཁེངས་ པ་ཡིན། ཆོས་དང༌། ཆོས་སྨྲ་བ་ལ་མི་གུས་པ་སྐྱེད་པ་དང༌། སྲི་ཞུ་དང༌། རིམ་གྲོ་མི་བྱེད་པ་དང༌། ཆོས་རྒྱ་མཚོ་ཆེན་པོ་བསྒྲགས་པ་བྱུང་ན་ལ་ལ་ཞིག་དད་པར་གྱུར་ན་མི་རུང་ ངོ་སྙམ་ནས་ཆོས་སྨྲQABA'I་གང་ཟག་ལ་ལེགས་སོ་ཞེས་བྱ་བ་སྦྱིན་པར་མི་བྱེད་པ་དང༌། བདག་ཤེས་པ་ལ་མི་འཇུག་པ་དང༌། ཆོས་ལ་ངེས་པར་སེམས་པ་མི་སྐྱེད་པ་དང༌། མངོན་ པའི་ང་རྒྱལ་བསྐྱེད་དེ་བསྔགས་པར་འོས་པའི་གང་ཟག་རྣམས་ཀྱི་བསྔགས་པ་བཅབས་ཤིང་མི་སྙན་པ་བརྗོད་པ་དང༌། ཕ་རོལ་གྱི་ཡོན་ཏན་དང༌། བསྔགས་པ་ལ་མི་ དགའ་བ་ཡིན། གང་ཟག་ལ་ཞེ་སྡང་བས་ཆོས་ལ་ཞེ་སྡང་བར་བྱེད་ཅིང་ཆོས་སྤོང་བ་དང༌། གཞན་དག་ཀྱང་རྩོད་དུ་འཇུག་པ་དང༌། སྟན་མཐོན་པོ་འདོད་ཅིང་ ཐབས་ཚོལ་བ་དང༌། གཞན་ལས་རིམ་གྲོར་བྱ་བ་བདག་གིས་བྱེད་ཅིང་མངོན་པར་དགའ་བ་དང༌། གནས་བརྟན་རྒན་ཞིང་ཡུན་རིང་དུ་ཚངས་པར་སྤྱད་པ་རྣམས་ལ་ རིམ་གྲོ་མི་བྱེད་ཅིང་བསུ་བར་མི་བྱེད་ལ་བཞིན་ཁྲོ་གཉེར་ཅན་ཡིན། རྟག་ཏུ་སེམས་རྩུབ་ཅིང་ཀླན་ཀ་ཚོལ་བ་དང༌། གླགས་ལྟ་བ་དང༌། ང་རྒྱལ་བསྐྱེད་ནས་མཁས་པའི་ གན་དུ་མི་འགྲོ་།མི་སྟེ་ན། སྙེན་པར་མི་བྱེད། བཀུར་སྟི་མི་བྱེད་ཅིང་དག་བ་ནི་གང༌། མི་དགེ་བ་ནི་གང༌། བྱ་བ་ནི་གང༌། མི་བྱ་བ་ནི་གང༌། བྱ་བ་མ་ཡིན་པ་ནི་གང༌། ཅི་ཞིག་ ༄༅། །བྱས་ན་ཡུན་རིང་པོའི་དོན་དང༌། ཕན་པ་དང༌། བདེ་བར་འགྱུར་ཞེས་མི་འདྲི་བ་དང༌། ངེས་པར་འབྱུང་བར་མི་ལྟ་ཞིང་རྩོད་པ་མང་བ་ཡིན་ཏེ། འཇམ་དཔལ། དེ་ལྟར་ན་སངས་རྒྱས་དང༌། ཆོས་དང༌། དགེ་འདུན་མི་མཉེས་པར་བྱེད་པ་ཡིན་ནོ། །འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ ནི་དབང་སྐུར་བར་འགྱུར་བའི་གཟུངས་ཐོབ་པར་འགྱུར། རྒྱ་མཚོ་དམ་པའི་སྙིང་པོ་དྲི་མ་མེད་པར་སྣང་བ་འོད་གསལ་བའི་གཟུངས་ཐོབ་པར་འགྱུར་རོ། །འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་བསྐལ་བ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ཏུ་སེམས་ཅན་དམྱལ་ བ་དང༌། དུད་འགྲོ་དང༌། ཡི་དྭགས་དང༌། གཤིན་རྗེའི་འཇིག་རྟེན་དུ་གནས་པར་འགྱུར་བའི་ལས་རྣམས་ཚེ་འདི་ལ་རྣམ་པར་སྨིན་པར་འགྱུར་ཏེ། ཀླད་པ་ཚ་བས་སམ་། རིམས་ཚ་བས་སམ། རྩི་བ་ལོགས་ན་བས་སམ། རྒྱལ་སྲིད་འཁྲུགས་པས་སམ། ཀླ་ཀློ་འཁྲུགས་པས་སམ། མུ་གེའི་འཁྲུགས་པས་སམ། ལུས་ལ་གནོད་པ་དང༌། ཡིད་ལ་གནོད་པ་གང་ཡང་རུང་བས་བརྒྱད་བཀག་པས་ཀྱང་ཚེ་གཅིག་ལ་བྱང་བར་འགྱུར་ཏེ། ཐ་ན་རྨི་ལམ་ཙམ་གྱིས་ཀྱང་བྱང་བར་འགྱུར་རོ། །འཇམ་དཔལ། དགེ་བའི་བཤེས་ གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་སངས་རྒྱས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་པ་དག་ལས་དགེ་བའི་རྩ་བ་བསྐྱེད་པ། སྦྱིན་པ་ལས་བྱུང་བ་དང༌། མཆོད་པ་ལས་བྱུང་བ་དང༌། དེ་དག་གི་ཐད་ནས་བསླབ་པ་བཟུང་བ་ལས་བྱུང་བ་རྣམས་སྔ་དྲོ་གཅིག་གིས་ཟིལ་གྱིས་གནོན་ཏེ། དེ་ལྟར་དགེ་བའི་བཤེས་གཉེན་ལ་བསྙེན་བཀུར་ བྱ་བ་ནི་ཡོན་ཏན་བསམ་གྱིས་མི་ཁྱབ་བོ། །འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་གཏེར་བཅུ་རྙེད་པར་འགྱུར་ཏེ། བཅུ་ གང་ཞེ་ན། སངས་རྒྱས་ཀྱི་ཆོས་ཐམས་ཅད་ལ་བགྲང་བར་སྦྱོར་པའི་གཏེར་དང༌། སངས་རྒྱས་ཀྱི་ཆོས་ཐམས་ཅད་ལ་ངེས་པར་སེམས་པའི་གཏེར་དང༌། སངས་ རྒྱས་ཀྱི་ཆོས་ཐམས་ཅད་ལ་གཟུངས་སྣང་བའི་གཏེར་དང༌། སངས་རྒྱས་ཀྱི་ཆོས་ཐམས་ཅད་ལ་སོ་སོ་ཡང་དག་པར་རིག་པ་རབ་ཏུ་སྟོན་པའི་གཏེར་དང༌། སངས་རྒྱས་ ཀྱི་ཆོས་ཐམས་ཅད་ལ་བརྗོད་དུ་མེད་པའི་ཚུལ་ལ་མཁས་པ་རྟོགས་པར་བྱེད་པའི་གཏེར་དང༌། སངས་རྒྱས་ཀྱི་རྣམ་པར་འཕྲུལ་པ་དང༌། ཆོ་འཕྲུལ་ཐམས་ཅད་མངོན་ སུམ་དུ་མཐོང་བའི་གཏེར་དང༌། སངས་རྒྱས་ཀྱི་ཆོས་ཐམས་ཅད་ལ་མཉམ་པ་ཉིད་དུ་སྒྲུབ་པ་ལ་མཁས་པའི་གཏེར་དང༌། སངས་རྒྱས་ཐམས་ཅད་མཐོང་བ་དང་མི་འབྲལ་ ༄༅། །བའི་གཏེར་དང༌། སྒྱུ་མར་གྱུར་པའི་བསྐལ་པ་བསམ་གྱིས་མི་ཁྱབ་པ་ཡོངས་སུ་འགྲུབ་པར་འཇུག་པ་ལ་མཁས་པའི་གཏེར་དང༌། སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ལ་དགའ་བ་དང༌། མཆོག་ཏུ་དགའ་བ་དང༌། དང་བ་ཆེན་པོ་འཐོབ་པའི་གཏེར་རོ། །འཇམ་དཔལ། དགེ་བའི་བཤེས་གཉེན་གྱིས་ཡོངས་ སུ་ཟིན་པའི་བྱང་ཆུབ་སེམས་དཔའ་ནི་དབང་བཅུ་ཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། ཚེའི་ཚད་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་དག་ཏུ་ བྱིན་གྱིས་རློབ་པའི་ཕྱིར་ཚེ་ལ་དབང་བ་དང༌། ཏིང་ངེ་འཛིན་དཔག་ཏུ་མེད་གྲངས་མེད་པ་དག་ལ་ངེས་པར་སེམས་པའི་ཡེ་ཤེས་ལ་འཇུག་པའི་ཕྱིར་སེམས་ལ་དབང་བ་དང༌། འཇིག་རྟེན་གྱི་ཁམས་ཐམས་ཅད་བཀོད་པ་དང༌། རྒྱན་དུ་མས་བརྒྱན་པའི་བྱིན་གྱི་རླབས་ཀུན་ཏུ་སྟོན་པའི་ཕྱིར་ཡོ་བྱད་ལ་དབང་པ་དང༌། འཇིག་རྟེན་གྱི་ཁམས་ཐམས་ ཅད་དུ་སྐྱེ་བ་ཀུན་ཏུ་སྟོན་པའི་ཕྱིར་སྐྱེ་བ་ལ་དབང་བ་དང༌། དུས་ཇི་ལྟ་བ་བཞིན་དུ་ལས་ཀྱི་རྣམ་པར་སྨིན་པ་བྱིན་གྱིས་རློབ་པ་ཀུན་ཏུ་སྟོན་པའི་ཕྱིར་ལས་ལ་དབང་བ་དང༌། འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱིས་གང་བར་བྱིན་གྱིས་རློབ་པ་ཀུན་ཏུ་སྟོན་པའི་ཕྱིར་མོས་པ་ལ་དབང་བ་དང༌། དུས་གང་དང༌། གང་གི་ཚེ་བྱང་ཆུབ་མངོན་ པར་རྫོགས་པར་འཚང་རྒྱ་བར་འདོད་པའི་དུས་དེ་དང༌། དེར་བྱང་ཆུབ་མངོན་པར་རྫོགས་པར་འཚང་རྒྱ་བ་དང༌། སངས་རྒྱས་ཀྱི་ཞིང་གང་དང༌། གང་དུ་འདོད་པའི་སངས་རྒྱས་ཀྱི་ཞིང་དེ་ དང༑ དེར་བྱང་ཆུབ་མངོན་པར་རྫོགས་པར་འཚང་རྒྱ་བའི་ཕྱིར་སྨོན་ལམ་ལ་དབང་བ་དང༌། སངས་རྒྱས་ཀྱི་ཞིང་ཐམས་ཅད་རྫུ་འཕྲུལ་དང༌། རྣམ་པར་འཕྲུལ་པ་ཀུན་ཏུ་སྟོན་པའི་ ཕྱིར་རྫུ་འཕྲུལ་ལ་དབང་བ་དང་མཐའ་དང༌། དབུས་མེད་པའི་ཆོས་ཀྱི་སྒོ་སྣང་བ་ཀུན་ཏུ་སྟོན་པའི་ཕྱིར་ཆོས་ལ་དབང་བ་དང༌། དེ་བཞིན་གཤེགས་པའི་སྟོབས་བཅུ་དང༌། མི་ འཇིགས་པ་དང༌། མཚན་དང༌། དཔེ་བྱད་བཟང་པོ་རྣམས་དང༌། རྫོགས་པའི་བྱང་ཆུབ་ཀུན་ཏུ་སྟོན་པའི་ཕྱིར་ཡེ་ཤེས་ལ་དབང་བའོ། །འཇམ་དཔལ། དགེ་བའི་བཤེས་གཉེན་ གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་སྐྲའི་ཁྱོན་ཙམ་གཅིག་ལ་ཕྱོགས་བཅུའི་ནམ་མཁའ་མཐས་ཀླས་པའི་འཇིག་རྟེན་གྱི་ཁམས་རྣམས་འཇུག་པར་བྱེད་ཀྱང་ སེམས་ཅན་གང་ལའང་གནོད་པ་དང༌། སྒྲིབ་པ་མེད་དེ། སྔོན་ཇི་ལྟ་བར་ཕྱིས་ཀྱང་དེ་བཞིན་ནོ། །བསྐལ་པ་དཔག་ཏུ་མེད་གྲངས་མེད། །བསམ་གྱིས་མི་ཁྱབ། མཚུངས་པ་ མེད་པ་རྣམས་ཡུད་ཙམ་གཅིག་ཏུ་བྱིན་གྱིས་རློབ་ཅིང་ཡུད་ཙམ་གཅིག་ནི་བསྐལ་པ་དཔག་ཏུ་མེད་གྲངས་མེད། བསམ་གྱིས་མི་ཁྱབ་པར་བྱིན་གྱིས་རློབ་སྟེ། བསྐལ་པ་རེ་རེ་ ༄༅། །ལའང་མེས་འཇིག་པ་དང༌། ཆུས་འཇིག་པ་དང༌། རླུང་གིས་འཇིག་པ་བྱིན་གྱིས་རློབ་ཀྱང་སེམས་ཅན་གང་ལའང་ཡོ་བྱད་ཅིས་ཀྱང་ཕོངས་པར་མི་ འགྱུར་ཞིང་ལུས་ལ་གནོད་པའམ། སེམས་ལ་མི་བདེ་བའང་མི་འབྱུང་ལ། སེམས་ཅན་གང་ཇི་ལྟར་ཡོངས་སུ་སྨིན་པར་འགྱུར་བ་དེས་བྱ་བ་དེ་ལྟ་བུའང་ཤེས་སོ། །འཇམ་ དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་འདོད་ན་ཕྱོགས་བཅུའི་ཕྱོགས་རེ་རེའང་སངས་རྒྱས་ཀྱི་ཡུལ་གྱི་མཐའ་ཀླས་པའི་བར་ གྱི་འཇིག་རྟེན་གྱི་ཁམས་རྣམས་སུ། འཇིག་རྟེན་གྱི་ཁམས་རེ་རེ་ན་རྡུལ་ཕྲ་རབ་ཀྱི་རྡུལ་རེ་རེ་ལ་སངས་རྒྱས་ཀྱི་ཡུལ་གྱི་མཐའ་ཀླས་པའི་ལུས་རྣམས་ཀྱིས་ལུས་རེ་རེས་ཀྱང་ དགའ་ལྡན་གྱི་གནས་ནས་ཤི་འཕོས་པ་དང༌། སྐྱེ་བ་དང༌། མངོན་པར་འབྱུང་བ་དང༌། དཀའ་བ་སྤྱོད་པར་སྦྱོར་བ་དང༌། བྱང་ཆུབ་ཀྱི་སྙིང་པོར་འགྲོ་བ་དང༌། བདུད་འདུལ་ བ་སྟོན་པ་དང༌། མངོན་པར་རྫོགས་པར་བྱང་ཆུབ་པ་དང༌། ཆོས་ཀྱི་འཁོར་ལོ་བསྐོར་བར་བསྐུལ་བ་དང༌། ཡོངས་སུ་མྱ་ངན་ལས་འདས་པ་ཆེན་པོའང་སྟོན་ཏོ། །འཇམ་ དཔལ༑ དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་འདོད་ན་ཕྱོགས་བཅུའི་འཇིག་རྟེན་གྱི་ཁམས་རེ་རེར་རྡུལ་ཕྲ་རབ་ཀྱི་རྡུལ་རེ་རེ་ལ་ སངས་རྒྱས་ཀྱི་ཡུལ་གྱི་མཐའ་ཀླས་པའི་སངས་རྒྱས་ཀྱི་ཞིང་རྣམས་འཇུག་པར་བྱེད་ཅིང༌། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ཀྱི་རྒྱན་གྱི་ཡོན་ཏན་བཀོད་པ་གང་དག་ ཡིན་པ་དེ་དག་ཞིང་གཅིག་ཏུ་སྟོན་པར་བྱེད། ཞིང་གཅིག་གི་རྒྱན་གྱི་ཡོན་ཏན་བཀོད་པ་གང་དག་ཡིན་པ་དེ་དག་ཞིང་ཐམས་ཅད་དུ་སྟོན་པར་བྱེད། སངས་རྒྱས་ཀྱི་ཞིང་ཐམས་ ཅད་དུ་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་ནང་ནའང་སྣང་ལ་གནས་ནས་ཀྱང་མི་གཡོའོ། །འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ ཆུབ་སེམས་དཔའ་ནི་འདོད་ན་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་ཀྱི་ལུས་སེམས་ཅན་གཅིག་གི་ལུས་སུ་སྟོན་ཏེ། སེམས་ཅན་གཅིག་ གི་ལུས་སེམས་ཅན་ཐམས་ཅད་ཀྱི་ལུས་སུ་སྟོན་ཀྱང་ལུས་འདྲེས་པར་ཡང་མི་བྱེད་དེ། སེམས་ཅན་གང་ལའང་གནོད་པར་མི་འགྱུར་ཞིང་བྱ་བ་དེ་ལྟ་བུ་དེའང་སྟོན་ཏེ། ལྷུན་གྱིས་ གྲུབ་ཅིང་རྣམ་པར་མི་རྟོག་པར་སེམས་ཅན་རྣམས་ཀྱང་ཡོངས་སུ་སྨིན་པར་བྱེད་དོ། །འཇིག་རྟེན་གྱི་ཁམས་རབ་འབྱམས་ཐམས་ཅད་ཀྱི་སངས་རྒྱས་ཐམས་ཅད་སངས་རྒྱས་གཅིག་ཏུ་ བྱིན་གྱིས་རློབ་ཅིང༌། དེ་བཞིན་གཤེགས་པ་གཅིག་ཀྱང་སངས་རྒྱས་ཀྱི་ཡུལ་གྱི་མཐས་ཀླས་པའི་དེ་བཞིན་གཤེགས་པ་ཐམས་ཅད་དུ་བྱིན་གྱིས་རློབ་ལ་དེ་བཞིན་གཤེགས་པ་ ༄༅། །རྣམས་འདྲེས་པར་ཡང་མི་འགྱུར་ཏེ། ལྷུན་གྱིས་གྲུབ་ཅིང་རྣམ་པར་མི་རྟོག་པར་བྱ་བ་དེ་ལྟ་བུ་ཐམས་ཅད་ཀྱང་སྟོན་ཏོ། །ལུས་གཅིག་གིས་མཉམ་ པར་འཇོག་ལ། ལུས་དཔག་ཏུ་མེད་གྲངས་མེད་པ་དག་གིས་ལྡང་ཞིང་ལུས་དཔག་ཏུ་མེད་གྲངས་མེད་པ་དག་གིས་མཉམ་པར་བཞག་ལ་ལུས་གཅིག་གིས་ལྡང་ངོ༌།། །། བམ་པོ་གསུམ་པ་སྟེ་ཐ་མ། འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ཆོས་ཀྱི་དབྱིངས་ལ་སྤྱོད་ཡུལ་བའང་ཡིན་ལ་སེམས་ ཅན་གྱི་ཁམས་ལ་སྤྱོད་ཡུལ་བར་ཡང་སྣང་ངོ༌། །སངས་རྒྱས་ཀྱི་སྤྱོད་ཡུལ་ལ་མངོན་པར་དགའ་བའང་ཡིན་ལ་བདུད་ཀྱི་སྤྱོད་ཡུལ་བར་ཡང་རྣམ་པར་སྣང་ངོ༌། །མྱ་ངན་ལས་འདས་ པའི་སྤྱོད་ཡུལ་བའང་ཡིན་ལ་འཁོར་བའི་སྤྱོད་ཡུལ་བར་ཡང་སྣང་ངོ༌། །ཐམས་ཅད་མཁྱེན་པའི་ཡེ་ཤེས་སྤྱོད་ཡུལ་པའང་ཡིན་ལ་བྱང་ཆུབ་སེམས་དཔའི་སྤྱོད་ཡུལ་བར་ཡང་ སྣང་ངོ༌། །ཞི་བའི་སྤྱོད་ཡུལ་བ་ཡང་ཡིན་ལ་མ་ཞི་བ་དང༌། རབ་ཏུ་མ་ཞི་བ་དང༌། ཉེ་བར་མ་ཞི་བའི་སྤྱོད་ཡུལ་བའང་སྣང་སྟེ། སེམས་ཅན་རྣམས་ཀྱང་འདུལ་ལོ། །བླང་བ་ མེད་པ་དང༌། དོར་བ་མེད་པ་དང༌། སྤྲོས་པ་མེད་པ་དང༌། མ་སྤྲོས་པ་དང༌། མཚན་མ་མེད་པ་དང༌། དངོས་པོ་མེད་པ་དང༌། ཤེས་པར་བྱ་བ་མེད་པ་དང༌། བར་སྣང་དང་མཚུངས་ པ་སྤྱོད་ཡུལ་བའང་ཡིན་ལ་སྤྲོས་པ་དང༌། མཚན་མ་དང༌། དམིགས་པ་སྤྱོད་ཡུལ་བའི་སེམས་ཅན་ཐམས་ཅད་ཀྱི་ནང་ནའང་སྣང་ངོ༌། །སྟོབས་བཀོད་པའི་སྤྱོད་ཡུལ་བའང་ཡིན་ལ་ གཟུགས་བཟང་པོའི་སྤྱོད་ཡུལ་བར་ཡང་སྣང་ངོ༌། །ཆོས་ཐམས་ཅད་སྐྱེ་བ་མེད་པ་དང༌། འགག་པ་མེད་པས་གཉེན་པོ་སྤྱོད་ཡུལ་པའང་ཡིན་ལ་སེམས་ཅན་ཡོངས་སུ་སྨིན་པར་སྐྱེད་ པའི་སྤྱོད་ཡུལ་བར་ཡང་སྣང་ངོ༌། །ཡེ་ཤེས་དང༌། རྣམ་པར་ཐར་པ་དང༌། མངོན་པར་ཤེས་པ་དང༌། རིག་པ་དང༌། རྣམ་པར་གྲོལ་བའི་སྤྱོད་ཡུལ་བའང་ཡིན་ལ་ཕྱོགས་བཅུའི་ འཇིག་རྟེན་གྱི་ཁམས་རབ་འབྱམས་ཐམས་ཅད་ཀྱི་ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མི་འམ་ཅི་དང༌། ལྟོ་འཕྱེ་ཆེན་པོ་དང༌། བརྒྱ་ བྱིན་དང༌། ཚངས་པ་དང༌། འཇིག་རྟེན་སྐྱོང་བ་དང༌། སྲིན་པོ་དང༌། འབྱུང་པོ་དང༌། ཡི་དྭགས་དང༌། ཤ་ཟ་དང༌། གྲུལ་བུམ་དང༌། སྲུལ་པོ་དང༌། ལུས་སྲུལ་པོ་དང༌། སེམས་ཅན་ དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དུ་སྐྱེས་པ་དང༌། སྒོ་ང་ལས་སྐྱེས་པ་དང༌། མངལ་ནས་སྐྱེས་པ་དང༌། དྲོད་གཤེར་ལས་སྐྱེས་པ་དང༌། རྫུས་ཏེ་ སྐྱེས་པ་དང༌། གཟུགས་ཅན་དང༌། གཟུགས་ཅན་མ་ཡིན་པ་དང༌། འདུ་ཤེས་ཅན་དང༌། འདུ་ཤེས་ཅན་མ་ཡིན་པ་དང༌། འདུ་ཤེས་མེད་འདུ་ཤེས་མེད་མིན་ནས་གཟུགས་མེད་ ༄༅། །པའི་བར་གྱི་སེམས་ཅན་རྣམས་ཡོངས་སུ་སྨིན་པར་བྱེད་པར་ཡང་སྣང་ངོ༌། །དེ་བཞིན་གཤེགས་པའི་སྤྱོད་པ་དང༌། མངོན་པར་རྫོགས་པར་བྱང་ཆུབ་ པ་དང༌། སངས་རྒྱས་ཀྱི་བཀོད་པ་ཐམས་ཅད་ཀྱི་སྤྱོད་ཡུལ་ཐོབ་པའང་ཡིན་ལ་ཉན་ཐོས་དང༌། རང་སངས་རྒྱས་ཐམས་ཅད་ཀྱི་ཆོ་ག་དང༌། སྤྱོད་ལམ་ཡང་ཀུན་ཏུ་སྟོན་ཏོ། །འཇམ་ དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་སེམས་ཅན་ཐམས་ཅད་ཀྱི་སྒྲ་སེམས་ཅན་གཅིག་གི་སྒྲར་འཇུག་པར་བྱེད་ལ། སེམས་ཅན་ གཅིག་གི་སྒྲ་སེམས་ཅན་ཐམས་ཅད་ཀྱི་སྒྲར་འཇུག་པར་བྱེད་ཅིང༌། སྒྲ་རྣམས་འདྲེས་པར་ཡང་མི་འགྱུར་སེམས་ཅན་གང་གི་སྒྲ་ལའང་སྒྲིབ་པར་མི་འགྱུར་རོ། །འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ལྷུན་གྱིས་གྲུབ་ཅིང་རྣམ་པར་མི་རྟོག་པར་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ ཐམས་ཅད་དུ་རང་གི་ལུས་སའི་ཁམས་དང༌། ཆུའི་ཁམས་དང༌། མེའི་ཁམས་དང༌། རླུང་གི་ཁམས་སུ་བྱིན་གྱིས་རློབ་བོ། །འཇམ་དཔལ། དགེ་བའི་བཤེས་གཉེན་གྱིས་ ཡོངས་སུ་ཟིན་པའི་བྱང་ཆུབ་སེམས་དཔའ་ནི་སེམས་ཅན་གྱི་ལུས་ལ་ཞིང་གི་ལུས་ཀུན་ཏུ་སྟོན་ཀྱང་སེམས་ཅན་གྱི་ལུས་དང་འདྲེས་པར་ཡང་མི་བྱེད། ཞིང་གི་ལུས་ལ་སེམས་ ཅན་གྱི་ལུས་ཀུན་ཏུ་སྟོན་ཀྱང་ཞིང་གི་ལུས་དང་འདྲེས་པར་ཡང་མི་བྱེད་དོ། །སངས་རྒྱས་ཀྱི་སྐུ་ལ་ཉན་ཐོས་དང༌། རང་སངས་རྒྱས་ཀྱི་ལུས་སུ་ཀུན་ཏུ་སྟོན་ཀྱང་སངས་རྒྱས་ཀྱི་སྐུ་དམན་ པར་ཡང་མི་བྱེད་དོ། །ཉན་ཐོས་དང༌། རང་སངས་རྒྱས་ཀྱི་ལུས་ལ་སངས་རྒྱས་ཀྱི་སྐུ་ཀུན་ཏུ་སྟོན་ཀྱང་ཉན་ཐོས་དང༌། རང་སངས་རྒྱས་ཀྱི་ལུས་རྒྱ་ཆེན་པོར་ཡང་མི་བྱེད་དོ། །སྤྱོད་པའི་ལུས་ ལ་མངོན་པར་རྫོགས་པར་བྱང་ཆུབ་པའི་སྐུ་ཀུན་ཏུ་སྟོན་ཀྱང་སྤྱོད་པའི་རྒྱུན་ཆད་པར་ཡང་མི་བྱེད་དོ། །མངོན་པར་རྫོགས་པར་བྱང་ཆུབ་པའི་སྐུ་ལ་སྤྱོད་པའི་ལུས་ཀུན་ཏུ་སྟོན་ཀྱང་ མངོན་པར་རྫོགས་པར་བྱང་ཆུབ་པའི་སྐུ་ཉམས་པར་ཡང་མི་བྱེད་དོ། །མྱ་ངན་ལས་འདས་པ་འཁོར་བའི་རྒྱུན་དུ་སྟོན་ཀྱང་མྱ་ངན་ལས་འདས་པ་ལ་མངོན་པར་ཞེན་པ་འང་མི་སྐྱེད་དོ། ། འཁོར་བ་མྱ་ངན་ལས་འདས་པ་ཀུན་ཏུ་སྟོན་ཀྱང་གཏན་དུ་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་ཡང་མི་བྱེད་དོ། །མཉམ་པར་ཡང་བཞག་ལ་བྱ་བ་ ཐམས་ཅད་ཀྱང་སྟོན་ཏེ། འདི་ལྟ་སྟེ། འོང་བ་དང༌། འགྲོ་བ་དང༌། འགྲེང་བ་དང༌། ཉལ་བར་བྱེད་དོ། །སྤྱོད་ལམ་ཐམས་ཅད་ཀྱང་ཀུན་ཏུ་སྟོན་ལ་ཏིང་ངེ་འཛིན་རྣམ་པར་འཁྲུག་པར་མི་ བྱེད་དོ། །དེ་བཞིན་གཤེགས་པ་གཅིག་གི་ཞབས་ཀྱི་དྲུང་ན་ཆོས་ཉན་པར་ཡང་སྣང་ལ། ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་ན་དེ་བཞིན་གཤེགས་པ་ཐམས་ ༄༅། །ཅད་ཀྱི་འཁོར་གྱི་དཀྱིལ་འཁོར་དག་ན་གཟུགས་དང༌། ལུས་དང༌། ཁ་དོག་ཡོངས་སུ་འགྲུབ་པ་གཞན་དང༌། གཞན་དག་གིས་ཀྱང་ཆོས་ཉན་ལ་ཏིང་ངེ་ འཛིན་ཐ་དད་པར་ཡང་མི་བྱེད་ཅིང༌། ཆོས་ཀྱང་ལེན་ལ་འཛིན་ཏེ། འདོན་ཅིང་ཀུན་ཆུབ་པར་ཡང་བྱེད་ལ་སངས་རྒྱས་དེ་དག་ལས་ཆོས་ཉན་པའི་རྒྱུན་ཆད་པར་ཡང་མི་བྱེད་དོ། །ཕྱོགས་ བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་དུ་གཟུགས་དང༌། ལུས་དང༌། ཁ་དོག་ཡོངས་སུ་འགྲུབ་པ་ཐ་དད་པས་སེམས་ཅན་རྣམས་ཡོངས་སུ་སྨིན་པར་ཡང་བྱེད་ལ་ ལུས་ཐ་དད་པར་ཡང་མི་བྱེད་ཅིང་གནས་ནས་ཀྱང་མི་གཡོའོ། །ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་དུ་བྱ་བ་ཐམས་ཅད་ཀུན་ཏུ་སྟོན་ཀྱང་ཏིང་ངེ་འཛིན་ཐ་དད་ པར་ཡང་མི་བྱེད་དོ། །སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་ཏིང་ངེ་འཛིན་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ཀྱང་མངོན་པར་སྒྲུབ་ལ་ཏིང་ངེ་འཛིན་ཐ་ དད་པར་ཡང་མི་བྱེད་དེ། འཇམ་དཔལ། རྣམ་གྲངས་དེས་ན་རྣམ་པར་ཐར་པ་དང༌། ཏིང་ངེ་འཛིན་བསམ་གྱིས་མི་ཁྱབ་པ་ལ་གནས་པའི་བྱང་ཆུབ་སེམས་དཔའ་སངས་རྒྱས་ཀྱི་ཞིང་ གི་མཐས་ཀླས་པའི་བསྐལ་པར་ཏིང་ངེ་འཛིན་གྱི་སྒོ་བསྐྱབ་པ་མངོན་པར་སྒྲུབ་ཀྱང་བྱང་ཆུབ་སེམས་དཔའི་ཏིང་ངེ་འཛིན་གྱི་སྒོ་བསྒྲུབ་པ་རྣམས་ཀྱི་མཐར་ཐུག་པར་མི་འགྱུར་རོ། ། འཇམ་དཔལ། བྱང་ཆུབ་སེམས་དཔའི་ཏིང་ངེ་འཛིན་ཕུན་སུམ་ཚོགས་པ་དེ་ཐམས་ཅད་ནི་དགེ་བའི་བཤེས་གཉེན་ལས་ངེས་པར་བྱུང་ངོ༌། །འཇམ་དཔལ། དེ་བཞིན་དུ་གཟུངས་ཀྱི་སྒོ་ བརྗོད་དུ་མེད་པ། མངོན་པར་བསྒྲུབ་པ། མཐའ་ཡས་དཔག་ཏུ་མེད་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། ཚད་མེད་པ་དག་དང༌། གཟུངས་ཐོབ་པ་ཕུན་ སུམ་ཚོགས་པ་དེ་དག་ཐམས་ཅད་ཀྱང་དགེ་བའི་བཤེས་གཉེན་ལས་ངེས་པར་བྱུང་ངོ༌། །སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་མ་འདྲེས་པ་དཔག་ཏུ་མེད། གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། ཚད་མེད། བརྗོད་དུ་མེད་པ་ཕུན་སུམ་ཚོགས་པ་རྣམས་ཀྱང་དེ་བཞིན་ནོ། །འཇམ་དཔལ། མདོར་བསྡུ་ན་དེ་ལྟར་བྱང་ཆུབ་ སེམས་དཔའི་སངས་རྒྱས་ཀྱི་ཆོས་བསྒྲུབ་པ་མཐའ་ཡས་པ་ཐམས་ཅད་དང༌། སངས་རྒྱས་ཀྱི་ཆོས་ཕུན་སུམ་ཚོགས་པ་ཐམས་ཅད་ནི་དགེ་བའི་བཤེས་གཉེན་ལས་ངེས་པར་བྱུང་བ་ཡིན་ ནོ༑ ༑འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ཆོས་ཀྱི་དབྱིངས་མཐའ་ཡས་པའི་སྒོ་ལ་འཇུག་པ་སེམས་ཅན་ལ་ཀུན་ཏུ་སྟོན་པའི་ ཡུལ་དང༌། འཇིག་རྟེན་གྱི་ཁམས་ཐམས་ཅད་ཀྱི་རྒྱན་སྣ་ཚོགས་དུ་མ་མངོན་པར་སྒྲུབ་པ་འགྲོ་བ་ཐམས་ཅད་ཤེས་པར་བྱེད་པའི་ཡུལ་དང༌། འཇིག་རྟེན་གྱི་ཁམས་ཐམས་ཅད་དུ་སྤྲུལ་ ༄༅། །པ་མངོན་པར་བསྒྲུབ་པའི་ཡུལ་དང༌། དེ་བཞིན་གཤེགས་པའི་སྐུ་བྱང་ཆུབ་སེམས་དཔའི་ལུས་སུ་མངོན་པར་བསྒྲུབ་པ་དང༌། བྱང་ཆུབ་སེམས་དཔའི་ ལུས་དེ་བཞིན་གཤེགས་པའི་སྐུར་མངོན་པར་བསྒྲུབ་པའི་ཡུལ་དང༌། ནམ་མཁའི་ཁམས་འཇིག་རྟེན་གྱི་ཁམས་སུ་མངོན་པར་བསྒྲུབ་པ་དང༌། འཇིག་རྟེན་གྱི་ཁམས་ནམ་མཁའི་ ཁམས་སུ་མངོན་པར་བསྒྲུབ་པའི་ཡུལ་དང༌། འཁོར་བ་མྱ་ངན་ལས་འདས་པར་མངོན་པར་བསྒྲུབ་པ་དང༌། མྱ་ངན་ལས་འདས་པ་འཁོར་བར་མངོན་པར་བསྒྲུབ་པའི་ཡུལ་དང༌། སེམས་ཅན་གྱི་སྐད་བརྗོད་པ་གཅིག་གིས་སངས་རྒྱས་ཀྱི་ཆོས་ཐམས་ཅད་བསྟན་པའི་ཡུལ་དང༌། གདོང་དང༌། ལུས་མཐའ་ཡས་པ་ཀུན་ཏུ་བསྟན་པ་ལུས་གཅིག་ཏུ་བྱིན་གྱིས་བརླབ་ ཅིང་ལུས་ཀྱི་རིམ་པ་ཐམས་ཅད་མངོན་པར་བསྒྲུབ་པའི་ཡུལ་དང༌། ལུས་གཅིག་གིས་ཆོས་ཀྱི་དབྱིངས་རྒྱས་པར་འགེངས་པའི་ཡུལ་དང༌། སེམས་ཅན་གཅིག་གིས་སེམས་བསྐྱེད་ པ་རྣམས་ལ་སེམས་ཀྱི་སྐད་ཅིག་སེམས་ཀྱི་སྐད་ཅིག་རེ་རེ་ལའང་སྒོ་མཐའ་ཡས་པས་བསྒྲུབ་པའི་བྱང་ཆུབ་རྣམ་པར་མི་རྟོག་པའི་ཡུལ་དང༌། འཇམ་དཔལ། དེ་ལ་སོགས་པ་ ཡུལ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད། གྲངས་མེད། བསམ་གྱིས་མི་ཁྱབ་པ་དེ་དག་བྱང་ཆུབ་སེམས་དཔའ་ལ་ཡང་དག་པར་འགྲུབ་བོ། །འཇམ་དཔལ། དགེ་བའི་བཤེས་ གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་འཇིག་རྟེན་གྱི་ཁམས་ཐམས་ཅད་འཇིག་རྟེན་གྱི་ཁམས་གཅིག་ཏུ་མོས་ཤིང་འཇུག་གོ །འཇིག་རྟེན་གྱི་ཁམས་གཅིག་འཇིག་ རྟེན་གྱི་ཁམས་ཐམས་ཅད་དུ་མོས་ཤིང་འཇུག་གོ །འཇིག་རྟེན་གྱི་ཁམས་ཐམས་ཅད་པདྨའི་གདན་གཅིག་དང༌། དེ་བཞིན་གཤེགས་པའི་སྐུ་གཅིག་གིས་ཡོངས་སུ་ཁྱབ་པར་མོས་ ཤིང་འཇུག་གོ །འཇིག་རྟེན་གྱི་ཁམས་ཐམས་ཅད་ནམ་མཁའི་ངོ་བོ་ཉིད་དུ་ཀུན་ཏུ་སྟོན་པར་མོས་ཤིང་འཇུག་གོ །འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་རྒྱན་དུ་མོས་ཤིང་ འཇུག་གོ །འཇིག་རྟེན་གྱི་ཁམས་ཐམས་ཅད་བྱང་ཆུབ་སེམས་དཔའི་ལུས་ཀྱིས་ཡོངས་སུ་ཁྱབ་པར་མོས་ཤིང་འཇུག་གོ །འཇིག་རྟེན་གྱི་ཁམས་ཐམས་ཅད་སྐྲ་ཙམ་གྱི་ཁྱོན་གཅིག་ལ་ འཇོག་པར་མོས་ཤིང་འཇུག་གོ །འཇིག་རྟེན་གྱི་ཁམས་ཐམས་ཅད་ལུས་གཅིག་ཏུ་འཇུག་པ་དང་ལྡན་པར་མོས་ཤིང་འཇུག་གོ །འཇིག་རྟེན་གྱི་ཁམས་ཐམས་ཅད་དེ་བཞིན་གཤེགས་ པ་གཅིག་གི་བྱང་ཆུབ་ཀྱི་ཤིང་དང༌། བྱང་ཆུབ་ཀྱི་སྙིང་པོས་ཡོངས་སུ་ཁྱབ་པར་མོས་ཤིང་འཇུག་གོ །འཇིག་རྟེན་གྱི་ཁམས་ཐམས་ཅད་སྒྲ་སྐད་གཅིག་གིས་གོ་བར་བྱེད་ཅིང་སེམས་ཅན་ གྱི་ཁམས་སྣ་ཚོགས་ཀྱི་སྒྲ་ལ་འཇུག་པས་ཚིམ་པར་བྱེད་པར་མོས་ཤིང་འཇུག་གོ །སེམས་ཅན་ཐམས་ཅད་ཀྱི་ངོ་བོ་ཉིད་དང༌། ལུས་སུ་མོས་ཤིང་འཇུག་གོ །སེམས་ཅན་གྱི་ཁམས་ཐམས་ ༄༅། །ཅད་སེམས་ཅན་གཅིག་གི་ལུས་ལ་འཇུག་པ་དང་ལྡན་པར་མོས་ཤིང་འཇུག་གོ །སེམས་ཅན་གྱི་ཁམས་ཐམས་ཅད་བྱང་ཆུབ་སེམས་དཔའི་ཁོང་དུ་སོང་བར་མོས་ཤིང་ འཇུག་གོ །སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་ཁོང་དུ་ཞུགས་པར་མོས་ཤིང་འཇུག་གོ །སེམས་ཅན་གྱི་ཁམས་ཐམས་ཅད་སེམས་ཅན་གཅིག་གི་ ལུས་ལ་བརྟེན་པར་མོས་ཤིང་འཇུག་གོ །སེམས་ཅན་གྱི་ཁམས་ཐམས་ཅད་སངས་རྒྱས་ཀྱི་ཆོས་ཀྱི་སྣོད་དུ་མོས་ཤིང་འཇུག་གོ། སེམས་ཅན་གྱི་ཁམས་ཐམས་ཅད་བརྒྱ་བྱིན་ དང༑ ཚངས་པ་དང༌། འཇིག་རྟེན་སྐྱོང་བ་གང་འདོད་པ་དང༌། མོས་པའི་གཟུགས་དང༌། ལུས་དང༌། ཁ་དོག་དང༌། རྟགས་ལ་མངོན་དུ་ཕྱོགས་པ་སྟོན་པར་མོས་ཤིང་འཇུག་གོ། ། སེམས་ཅན་གྱི་ཁམས་ཐམས་ཅད་ཉན་ཐོས་དང༌། རང་སངས་རྒྱས་ཀྱི་གཟུགས་དང༌། ལུས་དང༌། ཁ་དོག་དང༌། རྟགས་དང༌། ཚུལ་དུ་སྟོན་པར་མོས་ཤིང་འཇུག་གོ །སེམས་ཅན་ གྱི་ཁམས་ཐམས་ཅད་བྱང་ཆུབ་སེམས་དཔའི་ཡོན་ཏན་གྱི་ས་ལེགས་པར་བརྒྱན་པའི་བྱིན་གྱི་རླས་ཀུན་ཏུ་སྟོན་པར་མོས་ཤིང་འཇུག་གོ །སེམས་ཅན་གྱི་ཁམས་ཐམས་ ཅད་དེ་བཞིན་གཤེགས་པའི་གཟུགས་དང༌། མཚན་དང༌། དཔེ་བྱད་བཟང་པོ་དང༌། གཟུགས་དང༌། ལུས་དང༌། ཁ་དོག་སྣ་ཚོགས་དང༌། སྤྱོད་ལམ་དང༌། སྤྱོད་པ་ཀུན་ཏུ་ སྟོན་པ་གཞན་ཤེས་པར་བྱེད་པར་མོས་ཤིང་འཇུག་གོ །འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་འདོད་པའི་ཁམས་ནས་ཀྱང་མི་ གཡོ་ལ། གཟུགས་དང༌། གཟུགས་མེད་པ་ན་སྤྱོད་པའི་བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་ལ་སྙོམས་པར་འཇུག་པ་རྣམས་ལའང་སྙོམས་པར་འཇུག་ཅིང་དེ་དག་ གི་དབང་གིས་ཀྱང་མི་སྐྱེའོ། །ཉན་ཐོས་ཀྱི་ལམ་མངོན་དུ་ཤེས་པ་ལ་ཞུགས་པའང་ཡིན་ལ་སྙིང་རྗེ་ཆེན་པོའི་སྟོབས་ཀྱང་རྒྱུན་མི་གཅོད་དོ། །རང་སངས་རྒྱས་ཀྱི་ལམ་མངོན་དུ་ཤེས་ ཤིང་མཐོང་བ་ལ་མཁས་པའང་ཡིན་ལ་སྙིང་རྗེ་ཆེན་པོའི་སྟོབས་ཀྱང་རྒྱུན་མི་གཅོད་དོ། །གཡོག་འཁོར་མང་པོས་ཡོངས་སུ་བསྐོར་བའང་ཡིན་ལ། ལྷ་དང༌། མིའི་གཡོག་འཁོར་མང་ པོ་རྣམ་པར་དག་པ་དང་ཡང་ལྡན་ནོ། །ལྷའི་བུ་མོ་འབུམ་དག་གླུ་དབྱངས་རྗེས་སུ་སྒྲོགས་ཤིང་སིལ་སྙན་འབུམ་དག་སིལ་ཁྲོལ་འབྱིན་པ་དང་ཡང་ལྡན་ལ་བྱང་ཆུབ་སེམས་དཔའི་ལམ་ དང་ལྡན་པའི་བསམ་གཏན་དང༌། ཏིང་ངེ་འཛིན་དང༌། སྙོམས་པར་འཇུག་པ་རྣམས་ཀྱང་མི་འདོར་རོ། །འགྲོ་བའི་དགའ་བ་དང༌། རྩེ་བ་དང༌། བཞད་གང་དང༌། འཇོ་སྒེག་ཐམས་ཅད་ དང༑ སེམས་ཅན་བརྐམ་ཆགས་པའི་འདུ་འཇི་ཐམས་ཅད་ཀྱི་ནང་ན་གནས་པའང་ཡིན་ལ་སེམས་ཀྱི་སྐད་ཅིག་གཅིག་ལའང་བྱང་ཆུབ་ཀྱི་སེམས་ཀྱི་མཉམ་པ་ཉིད་ཀྱང་མི་འདོར་རོ། ། ༄༅། །འཇིག་རྟེན་ལས་འདས་པའང་ཡིན་ཏེ། འཇིག་རྟེན་ཐམས་ཅད་དང་མ་འདྲས་ལ་ཕ་རོལ་ཏུ་འགྲོ་བའི་ལམ་ལ་སློབ་པར་ཡང་སྣང་ཞིང་ལས་དང༌། ཉོན་མོངས་ པར་བྱིང་བའི་སེམས་ཅན་རྣམས་ཡོངས་སུ་སྨིན་པར་ཡང་བྱེད་དོ། །ལམ་ལ་གནས་ཤིང་ལམ་ལ་ཇི་ལྟ་བ་བཞིན་དུ་ཤེས་པ་མཐོང་བ་ལ་ཞུགས་པའང་ཡིན་ལ། ལམ་ངན་པར་ ལྷུང་བའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་ལ་མ་ངན་པ་ནའང་སྣང་ཞིང་ལམ་དེ་ལ་སྙིང་པོར་འདུ་ཤེས་པའང་མ་ཡིན་ལ་དེས་དག་པར་འདོད་པའང་མ་ཡིན་ནོ། །ལུས་དང༌། ངག་དང༌། ཡིད་ཀྱི་ལས་ཀྱི་མཐའ་ཁ་ན་མ་ཐོ་བ་མེད་པའང་ཡིན་ཏེ། རྟག་ཏུ་ཚུལ་ཁྲིམས་ལེགས་པར་བསྲུང་ཞིང་དེ་བཞིན་གཤེགས་པའི་ཚུལ་ཁྲིམས་རྣམ་པར་དག་པ་ལའང་ གཞོལ་ལ་སེམས་ཅན་ཚུལ་ཁྲིམས་འཆལ་པ་ཡོངས་སུ་སྨིན་པར་བྱ་བའི་ཕྱིར་བྱིས་པ་སོ་སོའི་སྐྱེ་བོ་ཕལ་པོའི་སྤྱོད་ཡུལ་བ་ལའང་ཀུན་ཏུ་སྣང་ངོ༌། །བསོད་ནམས་དང༌། ཡེ་ཤེས་ ཀྱི་ཚོགས་བསགས་ཤིང་བྱང་ཆུབ་སེམས་དཔའི་འགྲོ་བ་ལའང་གཞོལ་ལ་ངན་འགྲོར་སྐྱེས་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དང༌། མི་ཁོམ་པ་དང༌། དབུལ་པོའི་ཁྱིམ་དུ་སྐྱེ་བའི་འགྲོ་བའང་ཀུན་ཏུ་སྟོན་ལ་འགྲོ་བ་དེར་ཡང་དག་པར་གཞོལ་བའང་མ་ ཡིན་ནོ། །ཡེ་ཤེས་དང༌། སྤོབས་པ་ཐོགས་པ་མེད་པའི་སངས་རྒྱས་ཀྱི་ཆོས་ལ་ཞུགས་པས་གཞན་གྱི་དྲིང་ལ་མི་འཇོག་པའི་ཡེ་ཤེས་ལ་མཁས་པའང་ཡིན་ནོ། །དེ་བཞིན་གཤེགས་པ་ ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པ་དང༌། སངས་རྒྱས་ཐམས་ཅད་ཀྱི་སྐུ་དང༌། ལུས་གཟུགས་གཅིག་ཏུ་གྱུར་བ་དང༌། སེམས་ཅན་ཐམས་ཅད་དང་ཐུན་མོང་མ་ཡིན་ པའི་ཆོས་ཀྱི་ཚུལ་དང༌། དགོངས་པ་སྣང་བ་རྟོགས་པ་དང༌། ཐེག་པ་ཐམས་ཅད་མཉམ་པ་ཉིད་ཀྱིས་བྱིན་གྱིས་བརླབས་པ་དང༌། སངས་རྒྱས་ཐམས་ཅད་ཀྱི་སྤྱོད་ཡུལ་ལ་མངོན་དུ་ཕྱོགས་ པ་དང༌། འགྲོ་བ་ཐམས་ཅད་ཀྱིས་བསྔགས་པར་འོས་པ་དང༌། སེམས་ཅན་གྱི་ཁམས་ཐམས་ཅད་ཀྱིས་གདོང་དུ་ལྟ་བ་དང༌། འགྲོ་བ་ཐམས་ཅད་ཀྱི་སློབ་དཔོན་དུ་གྱུར་པ་དང༌། ཟབ་ཅིང་ བརྟན་པའི་རྒྱ་མཚོའི་ཆུའི་དུས་རླབས་ལྟ་བུའི་ཏིང་ངེ་འཛིན་གྱིས་རྣམ་པར་རྩེ་བ་དང༌། སངས་རྒྱས་ཀྱི་སྐུ་དང༌། ཁ་དོག་མཐའ་ཡས་པ་ཡོངས་སུ་འགྲུབ་པ་སྒྲུབ་པའི་གཟུངས་ཐོབ་པའང་ ཡིན་ལ་ཆོས་ཡོངས་སུ་ཚོལ་བའི་རྒྱུན་ཡང་མི་གཅོད་དོ། །ལྷ་དང༌། མི་དང༌། ལྷ་མ་ཡིན་དང༌། དྲི་ཟར་བཅས་པའི་འཇིག་རྟེན་གྱི་སློབ་དཔོན་དམ་པའང་ཡིན་ལ། ཙོག་ཙོག་པོར་འདུག་ སྟེ་ཐལ་མོ་སྦྱར་ནས་མཁན་པོ་དང༌། སློབ་དཔོན་ལས་ཆོས་ལེན་པར་ཡང་ཀུན་ཏུ་སྟོན་ཅིང་གུས་པར་བྱ་བ་ཐམས་ཅད་ཀྱི་ཉེ་བར་གནས་པར་ཡང་སྣང་སྟེ། བྱང་ཆུབ་སེམས་དཔའི་ ༄༅། །ལམ་ལ་གནས་ནས་ཐབས་གང་དང༌། གང་གིས་སེམས་ཅན་རྣམས་ཡོངས་སུ་སྨིན་པའམ། འདུལ་བར་འགྱུར་བའི་ཐབས་དེ་དང༌། དེ་ཉིད་སེམས་ཅན་རྣམས་ ལ་སྟོན་ཏོ། །དགེ་བའི་རྩ་བ་ཐམས་ཅད་ཤིན་ཏུ་བསྡུས་པ་དང༌། བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་རྩེ་མོར་ཕྱིན་པ་དང༌། དེ་བཞིན་གཤེགས་པ་ཐམས་ཅད་ཀྱིས་ དབང་བསྐུར་བས་དབང་བསྐུར་བ་དང༌། ཆོས་ཀྱི་དབང་ཕྱུག་གི་བདག་པོ་དམ་པའི་མཆོག་ཐོབ་པ་དང༌། ཆོས་ཀྱི་ཅོད་པན་ཐོགས་པ་མེད་ཅིང་དྲི་མ་མེད་པས་བཅིངས་པ་དང༌། འཇིག་རྟེན་གྱི་ཁམས་ཐམས་ཅད་དུ་ཐོགས་པ་མེད་པར་དེ་བཞིན་གཤེགས་པའི་སྐུ་ཀུན་ཏུ་སྟོན་པ་དང༌། ཐོགས་པ་མེད་པར་ཆོས་ཀྱི་འཁོར་ལོ་སྐོར་བའི་བྱིན་གྱི་རླབས་དང༌། ལྡན་པ་དང༌། ལུས་གཟུགས་འཇིག་རྟེན་གྱི་ཁམས་ཐམས་ཅད་དུ་ཞུགས་པ་དང་ལྡན་པ་དང༌། ཆོས་ཐམས་ཅད་ཀྱི་དབང་ཕྱུག་དམ་པའི་མཆོག་ཐོབ་པ་དང་ལྡན་པ་དང༌། བྱང་ཆུབ་སེམས་དཔའི་དབང་ཐམས་ཅད་ཐོབ་པ་དང༌། འགྲོ་བའི་ཞིང་ཐམས་ཅད་དུ་སྐྱེ་བ་སྟོན་པའི་ཤེས་པ་དང་ལྡན་པ་དང༌། འདས་པ་དང༌། མ་འོངས་པ་དང༌། ད་ལྟར་བྱུང་བའི་དེ་ བཞིན་གཤེགས་པ་ཐམས་ཅད་དང་ཡུལ་གཅིག་ཏུ་གྱུར་པའང་ཡིན་ལ་བྱང་ཆུབ་སེམས་དཔའི་སྤྱད་པའི་རྒྱུན་ཡང་མི་གཅོད། བྱང་ཆུབ་སེམས་དཔའ་མངོན་པར་འདུ་བྱ་བའི་ སྟོབས་ལས་ཀྱང་ཡོངས་མི་ཉམས། བྱང་ཆུབ་སེམས་དཔའི་སྤྱོད་པའི་བྱིན་གྱི་རླབས་ལས་ཀྱང་ཐག་རིང་དུ་མི་འགྱུར། བྱང་ཆུབ་སེམས་དཔའི་ཆོས་ཉིད་ཀྱང་མི་འདོར། བྱང་ ཆུབ་སེམས་དཔའི་ལས་ཀྱི་མཐའ་ལས་ཀྱང་མི་འདའ། བྱང་ཆུབ་སེམས་དཔའི་ལམ་ལས་ཀྱང་ཕྱིར་མི་ལྡོག །བྱང་ཆུབ་སེམས་དཔའི་བྱ་བ་ལ་ཞུམ་པར་ཡང་མི་བྱེད་དོ། །འཇམ་ དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ཆོས་ཐམས་ཅད་ལ་བླང་བ་མེད་པ་དང༌། དོར་བ་མེད་པ་དང༌། འདེགས་པ་མེད་པ་དང༌། འཇོག་པ་ མེད་པ་དང༌། སྒྱུ་མ་དང༌། སྨིག་རྒྱུ་དང༌། རྨི་ལམ་དང༌། མི་ག་ཡོར་དང༌། གཟུགས་བརྙན་དང༌། ཆུ་ཟླ་དང༌། སྟོང་པ་ཉིད་དང༌། མཚན་མ་མང་པོ་དང༌། སྨོན་པ་མེད་པ་དང༌། མངོན་པར་ འདུ་བྱ་བ་མེད་པ་དང༌། བརྗོད་དུ་མེད་པ་དང༌། སྨྲར་མེད་པ་དང༌། བསྙད་དུ་མེད་པ་དང༌། དེ་བཞིན་ཉིད་དང༌། ཡང་དག་པའི་མཐའ་དང༌། རྣམ་པར་འཇིག་པ་མེད་པ་དང༌། མཉམ་པ་ ཉིད་དང༌། དབྱེར་མེད་པ་དང༌། གཉིས་སུ་མེད་པ་ཞེས་བྱ་བ་དེ་ནི་དེའི་དམིགས་པ་ཡིན་ཏེ། ཆོས་ཐམས་ཅད་ནི་གཉེན་པོ་མེད་པའི་ཕྱིར་རོ། །ཆོས་ཐམས་ཅད་ཅེས་བྱ་བ་དེ་ནི་དེའི་དམིགས་ པ་སྟེ༑ འདུ་ཤེས་པ་འཛིན་པའི་ཕྱིར་དམིགས་པའོ། །དེ་ཅིའི་ཕྱིར་ཞེ་ན། སེམས་མེད་པ་ལ་སེམས་སུ་དམིགས་པ་ནི་འདུ་ཤེས་ཕྱིན་ཅི་ལོག་ཡིན་པའི་ཕྱིར་ཏེ། སེམས་ཕྱིན་ཅི་ ༄༅། །ལོག་ཏུ་གྱུར་ན་སེམས་མྱོས་པར་འགྱུར་རོ། །སེམས་མྱོས་ན་སེམས་བསླད་པར་འགྱུར་རོ། །སེམས་བསླད་པ་ལས་སེམས་སྐྲག་པར་འགྱུར་རོ། ། སེམས་སྐྲག་པ་ལས་བྱང་ཆུབ་ཀྱི་སེམས་ཉམས་པར་འགྱུར་རོ། །འཇམ་དཔལ། དེ་ལྟ་བས་ན་བྱང་ཆུབ་སེམས་དཔས་སེམས་ལ་སེམས་ཀྱི་རྗེས་སུ་བལྟ་བར་བྱའོ། །འཇམ་ དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་དབང་བཅུ་ཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། ཚེ་ལ་དབང་བ་དང༌། སེམས་ ལ་དབང་བ་དང༌། ཡོ་བྱད་ལ་དབང་བ་དང༌། ལས་ལ་དབང་བ་དང༌། སྐྱེ་བ་ལ་དབང་བ་དང༌། མོས་པ་ལ་དབང་བ་དང༌། སྨོན་ལམ་ལ་དབང་བ་དང༌། རྫུ་འཕྲུལ་ལ་དབང་བ་དང༌། ཆོས་ལ་དབང་བ་དང༌། ཡེ་ཤེས་ལ་དབང་བའོ། །རྣམ་པར་སྤྲུལ་པ་བཅུའང་ཐོབ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་རྣམ་པར་སྤྲུལ་པ་དང༌། ཞིང་རྣམ་པར་སྤྲུལ་པ་དང༌། ། ཆོས་རྣམ་པར་སྤྲུལ་པ་དང༌། ལུས་རྣམ་པར་སྤྲུལ་པ་དང༌། སྨོན་ལམ་རྣམ་པར་སྤྲུལ་པ་དང༌། སྤྱོད་ཡུལ་རྣམ་པར་སྤྲུལ་པ་དང༌། ཡེ་ཤེས་རྣམ་པར་སྤྲུལ་པ་དང༌། མངོན་པར་ ཤེས་པ་རྣམ་པར་སྤྲུལ་པ་དང༌། རྫུ་འཕྲུལ་རྣམ་པར་སྤྲུལ་པ་དང༌། སྟོབས་རྣམ་པར་སྤྲུལ་པའོ། །འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་ སེམས་དཔའ་ནི་སེམས་ཅན་གྱི་ཁམས་ཐམས་ཅད་ཀྱི་མོས་པ་ལ་འཇུག་པ་དང༌། སངས་རྒྱས་ཀྱི་ཞིང་ཐ་དད་པ་ཉིད་ལ་འཇུག་པ་དང༌། ཕྱོགས་ཐམས་ཅད་ཀྱི་དྲི་བ་རྣམ་པར་འབྱེད་ པ་ལ་འཇུག་པ་དང༌། འཇིག་རྟེན་གྱི་ཁམས་སྟེང་གཡོགས་མེད་ཅིང་གཞི་ཕྱལ་བའི་རྒྱུད་ཐམས་ཅད་ལ་འཇུག་པ་དང༌། ཆོས་ཐམས་ཅད་གཅིག་པ་དང༌། ཐ་དད་པ་ཉིད་རབ་འབྱམས་ རྣམ་པར་བཞག་པ་ལ་མཁས་པ་ལ་འཇུག་པ་དང༌། ལས་ཐམས་ཅད་བསྒྱུར་བར་གཞུག་པ་ལ་འཇུག་པ་དང༌། འདུ་ཤེས་ཕྱིན་ཅི་ལོག་གིས་ཕྱིན་ཅི་ལོག་ཏུ་གྱུར་པའི་འཇིག་རྟེན་ གནས་པ་ཐ་དད་པ་ཉིད་ཀྱི་འདུ་ཤེས་ཅན་ཐ་དད་པ་ཉིད་ལ་འཇུག་པ་དང༌། ཆོས་ཐམས་ཅད་བསྒྱུར་བ་ལ་འཇུག་པའི་མཐའ་ངེས་པར་འབྱུང་བ་གཅིག་ལ་འཇུག་པ་དང༌། ཆོས་ཀྱི་དབྱིངས་ ཐམས་ཅད་དེ་བཞིན་གཤེགས་པའི་རྣམ་པར་སྤྲུལ་པར་བྱིན་གྱིས་རློབ་པ་ལ་འཇུག་པ་དང༌། འགྲོ་བ་ཐམས་ཅད་དུས་གསུམ་ལ་འཇུག་པ་དང༌། སངས་རྒྱས་ཐམས་ཅད་ཀྱི་གདུང་ རྒྱུན་མི་ཆད་པ་ལ་བཞུགས་པའི་ཡེ་ཤེས་མངོན་པར་སྒྲུབ་བོ། །འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་སངས་རྒྱས་བྱེ་བ་ཁྲག་ ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ལས་དགེ་བའི་རྩ་བ་བསྐྱེད་པ་སྦྱིན་པ་ལས་བྱུང་བ་དང༌། མཆོད་པ་ལས་བྱུང་བ་དང༌། དེ་དག་གི་ཐད་ནས་བསླབ་པ་བཟུང་བ་ ༄༅། །ལས་བྱུང་བ་རྣམས་སྔ་དྲོ་གཅིག་གིས་ཟིལ་གྱིས་གནོན་ཏེ། འཇམ་དཔལ། དེ་ལྟར་དགེ་བའི་བཤེས་གཉེན་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་ ནོ༑ ༑འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་རྣམས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་ རྒྱ་སྟེ་དེ་དག་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་པ་མུ་མེད་པ་དག་ཏུ་འཇིག་རྟེན་གྱི་ཁམས་རེ་རེ་ནའང་རྡུལ་ཕྲ་རབ་ཀྱི་རྡུལ་རེ་རེ་ལ་དུས་གསུམ་ལ་འཇུག་ཅིང་བསྐལ་བའི་ ཕྱི་མའི་མཐའི་མུར་ཐུག་པར་བསྐལ་པར་བྱིན་གྱིས་བརླབས་ཏེ། དུས་གསུམ་ལ་འཇུག་པའི་ཆོས་སྟོན་ཏོ། །དེ་ཅིའི་ཕྱིར་ཞེ་ན། འཇམ་དཔལ། དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་རྣམས་ནི་རྟག་པ། བརྟན་པ། ཐེར་ཟུག་པ་ཡིན་པའི་ཕྱིར་རོ། །འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ ཆུབ་སེམས་དཔའ་རྣམས་ཀྱི་འདུ་ཤེས་ཕྱིན་ཅི་ལོག་ཏུ་མི་འགྱུར་རོ། །འཇམ་དཔལ། འདུ་ཤེས་ཕྱིན་ཅི་ལོག་གིས་སེམས་ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་འདི་ དག་ནི་སངས་རྒྱས་ཀྱི་ཆོས་སོ། །འདི་དག་ནི་སངས་རྒྱས་ཀྱི་ཆོས་མ་ཡིན་ནོ་ཞེས་མངོན་པར་ཞེན་ནས་ཆོས་སྤོང་བར་བྱེད་དོ། །མི་དགེ་བའི་ལས་སྣ་ཚོགས་ཀྱང་བྱེད་དོ། ། འཇམ་དཔལ། སངས་རྒྱས་ཀྱི་ཆོས་རྣམས་ནི་སྐྱེ་བའམ། འགག་པ་མེད་དེ། འཇམ་དཔལ། སངས་རྒྱས་ཀྱི་ཆོས་རྣམས་ནི་མ་སྐྱེས་པ། མ་འགགས་པ། ཡི་གེ་མེད་པ། སྒྲ་མེད་ པ༑ གཉིས་སུ་མེད་པ། གཉེན་པོ་མེད་པ། སྒྲ་ལས་ཡང་དག་པར་འདས་པའོ། །དེ་ཅིའི་ཕྱིར་ཞེ་ན། གཉེན་པོ་མེད་པའི་ཕྱིར་རོ། །འཇམ་དཔལ། འདི་དག་ནི་སངས་རྒྱས་ཀྱི་ཆོས་སོ། ། འཇམ་དཔལ། འདི་དག་ནི་སངས་རྒྱས་ཀྱི་ཆོས་མ་ཡིན་ནོ། །ཞེས་བྱ་བ་འདི་གཉིས་ནི་མཐའ་སྟེ། འཇམ་དཔལ། མཐའ་གང་ཡིན་པ་དེ་ནི་སངས་རྒྱས་ཀྱི་ཆོས་མ་ཡིན་ཏེ། འཇམ་ དཔལ། སངས་རྒྱས་ཀྱི་ཆོས་ནི་མཐའ་མེད་པའི་ངོ་བོ་ཉིད་དོ། །འཇམ་དཔལ། མཐའ་མེད་པའི་ངོ་བོ་ཉིད་ནི་མི་སྐྱེ་མི་འགག་གོ །འཇམ་དཔལ། མི་སྐྱེ་མི་འགག་པ་གང་ཡིན་པ་དེ་ནི་ མཐའ་དང༌། མཐའ་མེད་པ་ཡོངས་སུ་སྤངས་པ་སྟེ། ཡི་གེ་མེད་པ་དང༌། སྒྲ་མེད་པ། སྒྲ་ལས་ཡང་དག་པར་འདས་པ། གདགས་པར་བྱ་བ་མ་ཡིན་པ། གཉིས་སུ་མེད་པ། གཉེན་ པོ་མེད་པའོ། །འཇམ་དཔལ། གང་[?] གཉེན་པོ་མེད་པ་དེ་ནི་མི་སྐྱེ་མི་འགག་གོ །གང་མི་སྐྱེ་མི་འགག་པ་དེ་ནི་སངས་རྒྱས་ཀྱི་བཀའ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ། དེ་ བཞིན་གཤེགས་པ་ནི་ཆོས་ཀྱི་སྐུ་སྟེ། ཤིན་ཏུ་མ་སྐྱེས་པ། མ་བྱུང་བ། མ་འགགས་པའོ། །དེ་ལ་ནི་ཚིགས་མེད་མོད་ཀྱི་སྔོན་གྱི་དགེ་བའི་རྩ་བ་དང༌། སྤྱོད་པ་དང༌། སྨོན་ལམ་ ༄༅། །གྱི་སྟོབས་བསྐྱེད་པའི་བྱིན་གྱི་རླབས་ཀྱིས་སེམས་ཅན་དག་གིས་དེ་བཞིན་གཤེགས་པ་མཐོང་ངོ༌། །འཇམ་དཔལ། དཔེར་ན། ནོར་བུ་རིན་པོ་ཆེ་ཆུ་འདང་ བར་བྱེད་པ་ཆུའི་ནང་དུ་བཅུག་མ་ཐག་ཏུ་འདམ་རྫབ་དང༌། རྙོག་པ་ཐམས་ཅད་འདང་བར་བྱེད་ཀྱང༌། འཇམ་དཔལ། ནོར་བུ་རིན་པོ་ཆེ་ཆུ་འདང་བར་བྱེད་པ་ནི་མི་རྟོག །རྣམ་པར་མི་རྟོག་ སྟེ༑ འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་འབྱུང་ངོ༌། །འཇམ་དཔལ། དེ་བཞིན་དུ་དེ་བཞིན་གཤེགས་པ་བྱུང་མ་ཐག་ཏུ་ཕྱོགས་བཅུའི་འཇིག་རྟེན་གྱི་ ཁམས་རབ་འབྱམས་ཐམས་ཅད་ཀྱི་སེམས་ཅན་ཐམས་ཅད་ཀྱི་ཉོན་མོངས་པའི་འདམ་རྫ་བ་དང༌། རྙོག་པ་ཐམས་ཅད་དང་བར་བྱེད་ཀྱང་དེ་བཞིན་གཤེགས་པ་ནི་མི་རྟོག །རྣམ་པར་མི་ རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། དཔེར་ན། རྫ་མཁན་གྱི་འཁོར་ལོ་ཤིན་ཏུ་མྱུར་ཞིང་སྟོབས་ཀྱི་ ཤུགས་ཀྱིས་འཕངས་པ་ནི་རྫ་མཁན་གྱི་དབང་གིས་སྣོད་སྤྱད་སྣ་ཚོགས་མངོན་པར་འདུ་བྱེད་ཀྱང༌། འཇམ་དཔལ། རྫ་མཁན་གྱི་འཁོར་ལོ་ནི་མི་རྟོག །རྣམ་པར་མི་རྟོག་སྟེ་། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་ཀྱང་སྔོན་གྱི་དགེ་བའི་རྩ་བ་དང༌། སྤྱོད་པ་དང༌། སྨོན་ལམ་གྱི་སྟོབས་ཀྱི་བྱིན་གྱི་རླབས་ཀྱི་ཤུགས་ཀྱིས་སེམས་ཅན་གྱི་དབང་གིས་སེམས་ཅན་རྣམས་ལ་དགེ་བའི་ རྩ་བ་སྣ་ཚོགས་མངོན་པར་འདུ་མཛད་ཀྱང་དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། འོན་ཀྱང་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ སྟེ༑ སངས་རྒྱས་ཀྱི་ཆོས་མ་འདྲེས་པ་དང་ལྡན་པའི་ཕྱིར་རོ། །འཇམ་དཔལ། སེམས་ཅན་གང་དག་དེ་བཞིན་གཤེགས་པ་ལ་བཤོས་གསོལ་བ་དང༌། གང་དག་བཤོས་མི་ གསོལ་བ་དང༌། གང་དག་གིས་མཐོང་བ་དང༌། གང་དག་གིས་མ་མཐོང་བ་དང༌། གང་དག་གིས་བསྟོད་པ་དང༌། གང་དག་མི་བསྟོད་པ་དང༌། གང་དག་གཤེ་བ་དང༌། གང་དག་མི་ གཤེ་བ་དང༌། གང་དག་ཞུ་བ་བྱེད་པ་དང༌། གང་དག་ཞུ་བ་མི་བྱེད་པ་དེ་དག་ཐམས་ཅད་ཀྱི་བྱ་བ་རྣམས་ཀྱང་སངས་རྒྱས་ཀྱི་བྱིན་གྱི་རླབས་ཀྱིས་ལྷུན་གྱིས་གྲུབ་ཅིང་རྣམ་པར་མི་རྟོག་ པར་འབྱུང་ངོ༌། །འཇམ་དཔལ། དེ་བཞིན་གཤེགས་པའི་ཁྱུ་མཆོག་ཏུ་གྱུར་པ་ཐམས་ཅད་ཀྱང་དགེ་བའི་བཤེས་གཉེན་གྱིས་ཡོངས་སུ་ཟིན་པ་ལས་འབྱུང་ངོ༌། །འཇམ་དཔལ། དགེ་ བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔས་སངས་རྒྱས་ཀྱི་སྐུ་དང༌། ཁ་དོག་མཐའ་ཡས་པ་ཡོངས་སུ་འགྲུབ་པ་གྲུབ་པའི་གཟུངས་ཐོབ་སྟེ། གཟུངས་དེ་ ༄༅། །ཐོབ་པས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་སྐུས་ཁྱབ་པར་བྱེད་དོ། །འཇིག་རྟེན་གྱི་ཁམས་རེ་རེར་ཡང་མངོན་པར་རྫོགས་ པར་བྱང་ཆུབ་པའི་སྐུ་སྟོན་ཏོ། །ལྷུན་གྱིས་གྲུབ་ཅིང་རྣམ་པར་མི་རྟོག་པར་ཆོས་ཀྱི་འཁོར་ལོ་བསྐོར་བ་གྲངས་མེད་པ་དང༌། ཆོས་ཐ་དད་པ་ཉིད་གྲངས་མེད་པ་སྟོན་ཏེ་གནས་ནས་ ཀྱང་མི་གཡོའོ། །འཇམ་དཔལ། དེ་ལྟར་ན་དགེ་བའི་བཤེས་གཉེན་རྣམས་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །འཇམ་དཔལ། དེ་ལྟ་བས་ན་བྱང་ཆུབ་སེམས་ དཔས་དེ་བཞིན་གཤེགས་པ་ལ་བྱ་བ་བཞིན་དུ་དགེ་བའི་བཤེས་གཉེན་རྣམས་ལ་བསྟེན་པར་བྱའོ། །བསྙེན་པར་བྱའོ། །བསྙེན་བཀུར་བྱའོ། །འཇམ་དཔལ། མི་དགེ་བའི་བཤེས་ གཉེན་རྣམས་ནི་བྲག་གི་བྱ་སྐྱིབས་རབ་ཏུ་འབར་བ་བཞིན་དུ་ཡོངས་སུ་སྤང་བར་བྱའོ། །དེ་ཅིའི་ཕྱིར་ཞེ་ན། འཇམ་དཔལ། མི་དགེ་བའི་བཤེས་གཉེན་ལ་བསྟེན་ན་བྱང་ཆུབ་སེམས་ དཔའི་སེམས་དང༌། འདུ་ཤེས་ཕྱིན་ཅི་ལོག་ཏུ་འགྱུར་རོ། །སེམས་ཕྱིན་ཅི་ལོག་ཏུ་གྱུར་ན་ཀུན་ཏུ་འཁྲུལ་བར་འགྱུར་རོ། །སེམས་ཀུན་ཏུ་འཁྲུལ་བར་གྱུར་ན་རྣམ་པར་རྨོངས་པར་ འགྱུར་རོ། །སེམས་རྣམ་པར་རྨོངས་ན་སྐྲག་པར་འགྱུར་རོ། །སེམས་སྐྲག་པར་གྱུར་ན་བྱང་ཆུབ་ཀྱི་སེམས་འདོར་བར་འགྱུར་རོ། །བྱང་ཆུབ་ཀྱི་སེམས་བོར་ན་ལྷ་ཡོངས་སུ་གཏོང་ བར་འགྱུར་རོ། །ལྷ་ཡོངས་སུ་གཏོང་ན་ལྷ་རྣམས་ཀྱང་དེ་ལ་བསྔགས་པ་མ་ཡིན་པ་སྨྲ་བར་འགྱུར་རོ། །ཀླུ་རྣམས་དང༌། གནོད་སྦྱིན་རྣམས་དང༌། དྲི་ཟ་རྣམས་དང༌། མི་འམ་ཅི་རྣམས་དང༌། ལྟོ་འཕྱེ་ཆེན་པོ་རྣམས་དང༌། མི་རྣམས་དང༌། མི་མ་ཡིན་པ་རྣམས་ནས་སངས་རྒྱས་ཀྱི་བར་དག་ཀྱང་དེ་ལ་བསྔགས་པ་མ་ཡིན་པ་སྨྲ་བར་འགྱུར་རོ། །འཇམ་དཔལ། དེ་ལྟ་བས་ན་བྱང་ཆུབ་ སེམས་དཔས་དགེ་བའི་བཤེས་གཉེན་རྣམས་ལ་བསྟེན་པར་བྱའོ། །བསྙེན་པར་བྱའོ། །བསྙེན་བཀུར་བྱའོ། །འཇམ་དཔལ། དཔེར་ན། སྐྱབས་ཞེས་བྱ་བའི་སྨན་ནི་གནོད་སེམས་ ཀྱི་སེམས་དང་ལྡན་པའམ། དང་བའི་སེམས་དང་ལྡན་པས་མཐོང་ཡང་རུང་སྟེ། ཐ་ན་དུད་འགྲོའི་སྐྱེ་གནས་སུ་སོང་བ་དེ་དག་གི་ནད་ཐམས་ཅད་མེད་པར་འགྱུར་ཡང་སྐྱབས་ཞེས་བྱ་བའི་ སྨན་ནི་མི་རྟོག །རྣམ་པར་མི་རྟོག་སྟེ། མ་འདྲེས་པའི་ཆོས་དང་ལྡན་པའི་ཕྱིར་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། དེ་བཞིན་དུ་ གནོད་སེམས་ཀྱི་སེམས་དང་ལྡན་པའམ། དང་བའི་སེམས་དང་ལྡན་པ་གང་གིས་དེ་བཞིན་གཤེགས་པའི་སྐུ་རི་མོར་བྲིས་པའམ། གཟུགས་སུ་བྱས་པ་མཐོང་ན་ཐ་ན་དུད་འགྲོའི་ སྐྱེ་གནས་སུ་སོང་བའང་རུང་སྟེ་། དེ་དག་གི་ཉོན་མོངས་པའི་ནད་ཐམས་ཅད་མེད་པར་འགྱུར་ཡང་དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། མ་འདྲེས་པའི་ཆོས་དང་ ༄༅། །ལྡན་པའི་ཕྱིར་ལྷུན་གྱིས་གྲུབ་ཅིང་རྣམ་པར་མི་རྟོག་པར་བྱ་བ་དེ་ལྟ་བུ་དེ་འབྱུང་ངོ༌། །འཇམ་དཔལ། དཔེར་ན། ཉི་མའི་དཀྱིལ་འཁོར་རྒྱ་མཚོ་ཆེན་པོ་ལས་ མངོན་པར་འཕགས་ཏེ། ནམ་མཁའི་སྤྱོད་ཡུལ་ལ་གནས་ནས་འོད་ཟེར་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་བཏང་བས་གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་ དང༑ ཡུལ་འཁོར་དང༌། རྒྱལ་པོའི་ཕོ་བྲང་འཁོར་ཐམས་ཅད་དུ་མཐོང་བ་སྦྱིན་པར་བྱེད་ཅིང་མུན་པ་སེལ་བར་བྱེད། འདམ་རྫབ་དང༌། རྙོག་པ་ཐམས་ཅད་སྐམ་པར་བྱེད། པདྨ་ རྣམས་ཀྱང་ཁ་འབྱེ་བར་བྱེད་དོ། །རྩྭ་དང༌། ཤིང་གེལ་བ་དང༌། སྨན་དང༌། ནགས་ཚལ་ཐམས་ཅད་ཀྱང་སྐྱེད་པར་བྱེད། སྨན་ཐམས་ཅད་ཀྱང་ཡོངས་སུ་སྨིན་པར་བྱེད། ལས་ཀྱི་གནས་ ཐམས་ཅད་ནི་གནས་པར་བྱེད་ལ། ཆུ་ཀླུང་དང༌། མཚེའུ་དང༌། མཚོ་བྲན་ཐམས་ཅད་ལའང་དུས་གཅིག་ཏུ་སྣང་བ་ཐོབ་པར་འགྱུར་ཡང་གནས་ལས་ཀྱང་མི་གཡོ་ཞིང༌། འཇམ་དཔལ། ཉི་མའི་དཀྱིལ་འཁོར་ནི་མི་རྟོག །རྣམ་པར་མི་རྟོག་སྟེ། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་ལྷུན་གྱིས་གྲུབ་ཅིང་རྣམ་པར་མི་རྟོག་པར་དེའི་བྱ་བ་དེ་ལྟ་བུ་དེ་རྟག་ཏུ་འབྱུང་ངོ༌།། འཇམ་དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སྲིད་པའི་རྒྱ་མཚོ་ལས་མངོན་པར་འཕགས་ཏེ། ཆོས་ཀྱི་དབྱིངས་ཀྱི་ ནམ་མཁའི་སྤྱོད་ཡུལ་ལ་གནས་ནས་ཡེ་ཤེས་ཀྱི་འོད་ཟེར་བྱེ་བ་ཁྲག་ཁྲིག་གྲངས་མེད་པ་བཏང་བས་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་དུ་སྣང་བ་སྦྱིན་པར་ མཛད་ཅིང་སེམས་ཅན་ཐམས་ཅད་ཀྱི་མ་རིག་པའི་མུན་པ་མུན་ནག་དང༌། རབ་རིབ་དང༌། ལིང་ཏོག་རྣམས་རྣམ་པར་སེལ་བར་མཛད། ཉོན་མོངས་པའི་འདམ་རྫབ་དང༌། རྙོག་པ་ཐམས་ ཅད་སྐེམ་པར་མཛད། ཡུན་རིང་པོ་ནས་གཉིད་ཀྱིས་ལོག་པའི་སེམས་ཅན་གྱི་ཁམས་ནི་སད་པར་མཛད། སེམས་ཅན་ཐམས་ཅད་ཀྱི་དགེ་བའི་རྩ་བ་ཐམས་ཅད་ནི་སྐྱེ་བར་མཛད། སེམས་ ཅན་ཐམས་ཅད་ཀྱི་དགེ་བའི་རྩ་བའི་ཚོགས་ཐམས་ཅད་ནི་ཡོངས་སུ་སྨིན་པར་མཛད། དགེ་བའི་རྩ་བའི་སྒོ་ཐམས་ཅད་ནི་རབ་ཏུ་འཇོག་པར་མཛད་དེ། དུས་གཅིག་ཏུ་དེའི་མཛད་པ་ཐམས་ ཅད་འབྱུང་ཡང་གནས་ནས་ཀྱང་མི་གཡོ་ཞིང༌། འཇམ་དཔལ། དེ་བཞིན་གཤེགས་པ་ནི་མི་རྟོག། རྣམ་པར་མི་རྟོག་སྟེ། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་ལྷུན་གྱིས་གྲུབ་ ཅིང་རྣམ་པར་མི་རྟོག་པར་དེའི་མཛད་པ་དེ་ལྟ་བུ་དེ་འབྱུང་ངོ༌། །འཇམ་དཔལ། དེ་ལྟར་དེ་བཞིན་གཤེགས་པའི་ལྷུན་གྱིས་གྲུབ་ཅིང་རྣམ་པར་མི་རྟོག་པར་སེམས་ཅན་ཡོངས་སུ་སྨིན་པར་ མཛད་པའི་གནས་ཀྱང་དགེ་བའི་བཤེས་གཉེན་གྱིས་ཡོངས་སུ་ཟིན་པ་ལས་འབྱུང་ངོ༌། །འཇམ་དཔལ། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་ནི་ ༄༅། །ཆོས་རབ་ཏུ་རྣམ་པར་འབྱེད་ཅིང་དཔྱོད་པ་ལ་མཁས་པར་འགྱུར་ཏེ། དེ་ཆོས་རྣམས་ལ་འདི་ལྟར་དཔྱོད་དོ། །མིག་ནི་གཟུགས་ཀྱི་དམིགས་པའི་རྒྱུ་མ་ ཡིན༑ གཟུགས་ཀྱང་མིག་དམིགས་པའི་རྒྱུ་མ་ཡིན་ལ་དམིགས་པའི་རྒྱུ་རྐྱེན་ཉིད་ཀྱིས་ཀྱང་རྣམ་པར་ཤེས་པ་འབྱུང་སྟེ། རྣམ་པར་ཤེས་པ་དེའང་མིག་ལས་ཀྱང་མ་བྱུང༌། གཟུགས་ ལས་ཀྱང་མ་བྱུང་ཞིང་རྣམ་པར་ཤེས་པ་དེ་ནི་བྱུང་ནས་ཞིག་ལ་ཞུ་ཞིང་མི་གནས་པའོ། །རྣ་བ་དང༌། སྣ་དང༌། ལྕེ་དང༌། ལུས་ཀྱང་དེ་བཞིན་ནོ། །ཡིད་ཀྱང་ཆོས་ཀྱི་རྐྱེན་མ་ཡིན་ཞིང་ ཆོས་ཀྱང་ཡིད་ཀྱི་རྐྱེན་མ་ཡིན་ལ་དམིགས་པའི་རྒྱུ་རྐྱེན་ཉིད་ཀྱིས་ཀྱང་རྣམ་པར་ཤེས་པ་འབྱུང་སྟེ། རྣམ་པར་ཤེས་པ་དེ་ནི་ཡིད་ལས་ཀྱང་མ་བྱུང༌། ཆོས་རྣམས་ལས་ཀྱང་མ་ བྱུང་ཞིང་ཡིད་ཀྱི་རྣམ་པར་ཤེས་པ་དེ་ནི་བྱུང་ནས་ཞིག་ལ་ཞུ་ཞིང་མི་གནས་པའོ། །དེ་བཞིན་དུ་དགེ་བའི་རྩ་བའང་བྱང་ཆུབ་ཀྱི་རྐྱེན་མ་ཡིན། བྱང་ཆུབ་ཀྱང་དགེ་བའི་རྩ་བའི་ རྐྱེན་མ་ཡིན་མོད་ཀྱི། དགེ་བའི་རྩ་བ་དེའང་བྱང་ཆུབ་ཀྱི་རྐྱེན་ལ་དམིགས་པ་ལས་སེམས་སྐྱེ་བ་རྣམས་ཀྱི་ས་སྐྱེ་སྟེ། དེ་དག་ཀྱང་སྐྱེས་ནས་ཞིག་ཅིང་ཞུ་ལ་མི་གནས་པའོ། །དེ་ལ་ སེམས་གང་གིས་དགེ་བའི་རྩ་བ་མངོན་པར་འདུས་བྱས་པ་དང༌། སེམས་གང་གིས་བྱང་ཆུབ་ཏུ་ཡོངས་སུ་བསྔོས་པ་དེ་གཉིས་ནི་ཕན་ཚུན་མི་སྦྱོར་རོ། །དཔེར་ན། མེ་ནི་གང་ནས་ ཀྱང་མི་འོང༌། གང་དུ་མི་འགྲོ་སྟེ། འོན་ཀྱང་རྒྱུ་དང༌། རྐྱེན་གྱིས་འབར་རོ། །འཇམ་དཔལ། དེ་བཞིན་དུ་བྱང་ཆུབ་སེམས་དཔའི་ཤེས་རབ་ཀྱི་མེ་འབར་བའང་གང་ནས་ཀྱང་མི་འོང༌། གང་དུའང་མི་འགྲོ་སྟེ། འོན་ཀྱང་དགེ་བའི་རྩ་བའི་རྒྱུ་ལ་བརྟེན་ནས་བྱང་ཆུབ་སེམས་དཔའི་ཤེས་རབ་ཀྱི་མེ་འབར་ཏེ། ཤེས་པ་དེ་ལྟ་བུ་དང་ལྡན་པ་དེ་ནི་མྱུར་དུ་བླ་ན་མེད་པ་ཡང་དག་ པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །འཇམ་དཔལ། དེ་ལྟར་ན་དགེ་བའི་བཤེས་གཉེན་རྣམས་ནི་ཡོན་ཏན་རྒྱ་མཚོ་ཚད་མེད་པ་ཡིན་ནོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་སངས་རྒྱས་བཅོམ་ལྡན་འདས་བྱང་ཆུབ་སེམས་དཔའ་དང་བཅས། ཉན་ཐོས་དང་བཅས་པ་རྣམས་ལ་རྟག་པར་ཉིན་གཅིག་བཞིན་དུ་ཞལ་ཟས་རོ་བརྒྱ་དང་ལྡན་པ་དང༌། ལྷའི་ན་བཟའ་དག་ཕུལ་ལ། དེ་ལྟར་འབུལ་བ་བསྐལ་པ་གངྒཱའི་ཀླུང་གི་བྱེ་མ་སྙེད་ དག་ཏུ་ཕུལ་ཞིང་དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་ནས་དེ་བཞིན་གཤེགས་པ་རེ་རེའི་ཕྱིར་ཡང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ ཅད་དུ་འཇིག་རྟེན་གྱི་ཁམས་རེ་རེར་ཡང་མཆོད་རྟེན་ཛམྦུའི་ཆུ་བོའི་གསེར་ལས་བྱས་པ། ནོར་བུ་རིན་པོ་ཆེ་གློག་གི་སྒྲོན་མས་སྤྲས་པ། ནོར་བུ་རིན་པོ་ཆེ་འོད་ཐམས་ཅད་བསྡུས་པའི་ ༄༅། །སྟེགས་བུས་ཡོངས་སུ་བསྐོར་བ། ནོར་བུ་དང༌། མུ་ཏིག་དང༌། རིན་པོ་ཆེའི་ཕྲེང་བས་མཛེས་པར་བྱས་པ། གདུགས་དང༌། རྒྱལ་མཚན་དང༌། བ་དན་ བསྒྲེང་བ། དྲིལ་བུ་གཡེར་ཀའི་དྲ་བའི་བླ་བྲེ་བྲེས་པ། ཙནྡན་སྤྲུལ་གྱི་སྙིང་པོའི་བྱུག་པས་བྱུག་པ། ནོར་བུ་རིན་པོ་ཆེ་དབང་གི་རྒྱལ་པོའི་དྲ་བས་ཁེབས་པར་བྱས་པ། ཕྱོགས་ བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དག་བྱས་ཏེ། མཆོད་རྟེན་དེ་དག་ལ་སྟོང་གསུམ་གྱི་སྟོང་ཆེན་པོའི་ཚད་ཙམ་གྱི་ལྷའི་ན་བཟའ་དག་དང༌། གདུགས་ཀྱི་སྤྲིན་ དག་དང༌། རྒྱལ་མཚན་གྱི་སྤྲིན་དག་དང༌། བ་དན་གྱི་སྤྲིན་དག་དང༌། མེ་ཏོག་གི་སྤྲིན་དག་དང༌། སྤོས་ཀྱི་སྤྲིན་དག་དང༌། ནོར་བུ་རིན་པོ་ཆེ་དབང་གི་རྒྱལ་པོའི་སྤྲིན་དག་དང༌། ཡིད་བཞིན་གྱི་ནོར་བུ་རིན་པོ་ཆེའི་སྤྲིན་དག་གིས་གཏོར། མངོན་པར་གཏོར་ལ་ཉིན་གཅིག་བཞིན། དེ་ལྟར་མཆོད་ཅིང་བསྐལ་པ་གངྒཱའི་ཀླུང་གི་བྱེ་མ་སྙེད་དུ་མཆོད་ལ། སེམས་ཅན་གཞན་དཔག་ཏུ་མེད་གྲངས་མེད་པ་དག་ཀྱང་མཆོད་པ་དེ་ཉིད་ལ་འགོད་པ་བས། འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གཞན་གང་གིས་དེ་བཞིན་གཤེགས་ པའི་ཡོན་ཏན་དང༌། ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པའི་ཆོས་ཀྱི་རྣམ་གྲངས་འདི་ལ་ཐ་ན་མོས་པར་བྱེད་ན་འདི་ཉིད་དེ་བས་བསོད་ནམས་ཆེས་གྲངས་ མེད་པར་བསྐྱེད་དོ། །འཇམ་དཔལ། ཆོས་ཀྱི་རྣམ་གྲངས་འདི་ལ་མོས་པའི་བྱང་ཆུབ་སེམས་དཔའ་ནི་ཕ་རོལ་ཏུ་ཕྱིན་པ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ ཡོངས་སུ་རྫོགས་པར་བྱེད་དོ། །ས་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་གནོན་ཏོ། །བསྐལ་པ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་ ཕྱིར་སྙིལ་བར་བྱེད་དོ། །སངས་རྒྱས་ཀྱི་རྣམ་པར་རོལ་པ་བྱེ་བ་ཁྲག་ཁྲིག་འབུམ་ཕྲག་དཔག་ཏུ་མེད་གྲངས་མེད་པ་དག་རབ་ཏུ་ཤེས་སོ། །ང་རྒྱལ་གྱི་རི་དཔག་ཏུ་མེད་གྲངས་མེད་པ་དག་ རྣམ་པར་འཇིག་པར་བྱེད་དོ། །ཕྲག་དོག་དང༌། སེར་སྣའི་རྒྱལ་མཚན་དཔག་ཏུ་མེད་གྲངས་མེད་པ་དག་སྙོལ་བར་བྱེད་དོ། །སྲིད་པའི་ཆུ་ཀླུང་དཔག་ཏུ་མེད་གྲངས་མེད་པ་དག་སྐེམ་ བར་བྱེད་དོ། །སྐྱེ་བའི་རྒྱ་མཚོ་དཔག་ཏུ་མེད་གྲངས་མེད་པ་དག་ལས་རྒལ་བར་བྱེད་དོ། །བདུད་ཀྱི་ཞགས་པ་དཔག་ཏུ་མེད་གྲངས་མེད་པ་དག་གཅོད་དོ། །ཉི་ཟླ་རྣམས་དང༌། བརྒྱ་ བྱིན་དང༌། ཚངས་པ་དང༌། འཇིག་རྟེན་སྐྱོང་བ་རྣམས་ཀྱི་གཟི་བརྗིད་ཟིལ་གྱིས་མནན་ཏེ་འདུག་གོ །སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོའོ། །སེམས་ཅན་དམྱལ་ པ་དང༌། དུད་འགྲོའི་སྐྱེ་གནས་དང༌། ཡི་དྭགས་དང༌། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་རྣམས་ཀྱི་སྐྱབས་སུ་འགྱུར་རོ། །སངས་རྒྱས་རྣམས་དང༌། བྱང་ཆུབ་སེམས་དཔའ་ ༄༅། །རྣམས་དང་ཡང་ཕྲད་པར་འགྱུར་རོ། །རྒྱ་མཚོའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཆོས་ཐམས་ཅད་ཡང་དག་པར་འདུ་བ་ཞེས་བྱ་བའི་ ཏིང་ངེ་འཛིན་ཀྱང་འཐོབ་བོ། །ཆོས་ཐམས་ཅད་ལ་དབང་བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྣམ་པར་བཀོད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རིན་ པོ་ཆེ་འབྱུང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །དགའ་བར་བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །པདྨ་བཀོད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། ། ནམ་མཁའ་མཛོད་ཅེས་བྱ་བའི་ཏིང་ངེ་འཛིན་ཀྱང་འཐོབ་བོ། །འཇིག་རྟེན་ཐམས་ཅད་ཀྱི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །དམ་པའི་ཆོས་པདྨ་དཀར་པོ་ ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཡུལ་ལ་དབང་བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཆེར་བསྒྱིངས་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྣམ་པ་ དང༌། སེམས་ལ་དབང་བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །སེང་གེ་བསྒྱིངས་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཉི་མའི་སྒྲོན་མ་ཞེས་བྱ་བའི་ཏིང་ངེ་འཛིན་ ཀྱང་འཐོབ་བོ། །མཐའ་ཡས་འཁྱིལ་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རབ་ཏུ་གཡོ་བའི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྡོ་རྗེའི་དཀྱིལ་འཁོར་ ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྡོ་རྗེའི་རྒྱལ་མཚན་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྡོ་རྗེ་ལྟ་བུ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྡོ་རྗེ་ལྟེ་བ་ཞེས་བྱ་བའི་ཏིང་ངེ་ འཛིན་ཀྱང་འཐོབ་བོ། །ས་འཛིན་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ལྷུན་པོ་སྒྲོན་མ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ལྷུན་པོ་རྒྱལ་མཚན་ཞེས་བྱ་བའི་ཏིང་ངེ་འཛིན་ཀྱང་ འཐོབ་བོ། །རིན་པོ་ཆེའི་མཛོད་ཅེས་བྱ་བའི་ཏིང་ངེ་འཛིན་ཀྱང་འཐོབ་བོ། །སེམས་ལ་དབང་བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །སེམས་ཅན་ཐམས་ཅད་ཀྱི་སེམས་ལ་དབང་ བྱེད་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །སྤྱོད་པ་ཐམས་ཅད་ཀྱི་ཡུལ་ལས་ངེས་པར་འབྱུང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །སྦྱོར་བ་ཟབ་ཅིང་གསང་བ་ཞེས་བྱ་བའི་ ཏིང་ངེ་འཛིན་ཀྱང་འཐོབ་བོ། །སྣ་ཚོགས་སྣང་བའི་སྤོབས་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །བལྟར་མི་མཐོང་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཆོས་ཐམས་ཅད་ ལ་རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །མངོན་པར་ཤེས་པ་ཐམས་ཅད་ལས་ངེས་པར་སྐྱེས་པ་ཞེས་བྱ་ བའི་ཏིང་ངེ་འཛིན་ཀྱང་འཐོབ་བོ། །བདུད་ཀྱི་དཀྱིལ་འཁོར་རྣམ་པར་འཇོམས་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །གཟུགས་ཐམས་ཅད་ཀུན་ཏུ་སྟོན་པ་ཞེས་བྱ་བའི་ཏིང་ངེ་འཛིན་ ༄༅། །ཀྱང་འཐོབ་བོ། །གཟུགས་ཐམས་ཅད་ཀྱི་ཁྱད་པར་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ལུས་རྣམ་པར་འཇིག་པ་ཞེས་བྱ་བའི་ཏིང་ངེ་འཛིན་ཀྱང་ འཐོབ་བོ། །སྤྱོད་པ་ཐམས་ཅད་ལ་འཇུག་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཤེས་རབ་སྒྲོན་མ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །མངོན་སུམ་དུ་བྱང་ཆུབ་སྣང་བ་ཞེས་ བྱ་བའི་ཏིང་ངེ་འཛིན་ཀྱང་འཐོབ་བོ། །སོ་སོ་ཡང་དག་པར་རིག་པ་རིན་པོ་ཆེ་བསྟན་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཡོན་ཏན་གྱི་རྣམ་པ་ཐམས་ཅད་ལ་འཇུག་པ་ཞེས་ བྱ་བའི་ཏིང་ངེ་འཛིན་ཀྱང་འཐོབ་བོ། །ཆོས་ཐམས་ཅད་འདུལ་བར་རྣམ་པར་ངེས་པར་བསྟན་པ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་ ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །དཔའ་བར་འགྲོ་བ་ཞེས་བྱ་བའི་ཏིང་ངེ་འཛིན་ཀྱང་འཐོབ་བོ། །ཟབ་ཅིང་བརྟན་པའི་རྒྱ་མཚོའི་ཆུའི་དུས་རླབས་ཞེས་བྱ་བའི་ཏིང་ངེ་འཛིན་ ཀྱང་འཐོབ་སྟེ། དེ་དག་ལ་སོགས་པའི་ཏིང་ངེ་འཛིན་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་དག་འཐོབ་བོ། །སངས་རྒྱས་ཀྱི་སྐུ་དང༌། ཁ་དོག་མཐའ་ཡས་པ་ཡོངས་སུ་འགྲུབ་པ་ སྒྲུབ་པའི་གཟུངས་ཀྱང་འཐོབ་བོ། །ཡེ་ཤེས་དང་ལྡན་པ་ཞེས་བྱ་བའི་གཟུངས་ཀྱང་འཐོབ་བོ། །སྒྲ་དབྱངས་རྣམ་པར་དག་པ་ཞེས་བྱ་བའི་གཟུངས་ཀྱང་འཐོབ་བོ། །མི་ཟད་པའི་ཟ་ མ་ཏོག་ཅེས་བྱ་བའི་གཟུངས་ཀྱང་འཐོབ་བོ། །མཐའ་ཡས་འཁྱིལ་བ་ཞེས་བྱ་བའི་གཟུངས་ཀྱང་འཐོབ་བོ། །རྒྱ་མཚོའི་ཕྱག་རྒྱ་ཞེས་བྱ་བའི་གཟུངས་ཀྱང་འཐོབ་བོ། །པདྨ་བཀོད་པ་ ཞེས་བྱ་བའི་གཟུངས་ཀྱང་འཐོབ་བོ། །ཆགས་པ་མེད་པའི་སྒོར་འཇུག་པ་ཞེས་བྱ་བའི་གཟུངས་ཀྱང་འཐོབ་བོ། །སོ་སོ་ཡང་དག་པར་རིག་པ་རྣམ་པར་ངེས་པ་ལ་འཇུག་པ་ཞེས་བྱ་བའི་ གཟུངས་ཀྱང་འཐོབ་བོ། །སངས་རྒྱས་ཀྱི་རྒྱན་གྱིས་བྱིན་གྱིས་བརླབས་པ་ཞེས་བྱ་བའི་གཟུངས་ཀྱང་འཐོབ་བོ། །སངས་རྒྱས་ཀྱི་སྐུ་དང༌། ཁ་དོག་མཐའ་ཡས་པ་ཡོངས་སུ་འགྲུབ་པ་ཞེས་བྱ་ བའི་གཟུངས་ཀྱང་འཐོབ་སྟེ། དེ་དག་ལ་སོགས་པ་གཟུངས་བྱེ་བ་ཁྲག་ཁྲིག་འབུམ་ཕྲག་གྲངས་མེད་པ་དག་ཀྱང་འཐོབ་བོ། །ཆོས་ཐམས་ཅད་ལ་སྤྱོད་པའི་ཁྱད་པར་ཉིད་ཀྱང་འཐོབ་བོ། །ཆོས་ ཐམས་ཅད་ལ་གཞན་ལ་རག་མ་ལས་པའི་ཤེས་པའང་འཐོབ་བོ། །ཆོས་ཐམས་ཅད་ལ་སོམ་ཉི་གཅོད་པ་ཉིད་ཀྱང་འཐོབ་བོ། །སངས་རྒྱས་ཀྱི་རྣམ་པར་རོལ་པ་སྟོང་ཕྲག་གྲངས་མེད་པ་ དག་ཀྱང་འཐོབ་བོ། །སེམས་ཅན་ཐམས་ཅད་ཀྱི་སྤྱོད་པའི་བྱེ་བྲག་ལ་མཁས་པའང་འཐོབ་བོ། །འཇམ་དཔལ། དཔེར་ན། རིའི་རྒྱལ་པོ་རི་རབ་ནི་རི་ཐམས་ཅད་ཟིལ་གྱིས་མནན་ནས་ ལམ་མེ། ལྷན་ནེ། ལྷང་ངེའོ། །འཇམ་དཔལ། དེ་བཞིན་དུ་ཆོས་ཀྱི་རྣམ་གྲངས་འདི་ལ་མོས་པའི་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་ཀྱི་དགེ་བའི་རྩ་བ་ཐམས་ཅད་ ༄༅། །ཟིལ་གྱིས་མནན་ནས་ལམ་མེ། ལྷན་ནེ། ལྷང་ངེའོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་ པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། བྱང་ཆུབ་སེམས་དཔས་གང་དག་ལ་མོས་པས་ཡོན་ཏན་གྱི་ཁྱད་པར་འདི་དག་དང༌། གཞན་དག་ ཀྱང་འཐོབ་པའི་ཆོས་ཀྱི་བྱེ་བྲག་གཞན་དག་ཀྱང་ཡོད་དམ། དེ་སྐད་ཅེས་སྨྲས་པ་དང༌། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འཇམ་དཔལ་གཞོན་ནུར་ གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བྱང་ཆུབ་སེམས་དཔས་གང་དག་ལ་མོས་ན། ཡོན་ཏན་གྱི་ཁྱད་པར་འདི་དག་དང༌། གཞན་དཔག་ཏུ་མེད་པ་དག་ཀྱང་འཐོབ་ པའི་ཆོས་ལྔ་པོ་འདི་དག་སྟེ། ལྔ་གང་ཞེ་ན། ཆོས་ཐམས་ཅད་གཉེན་པོ་མེད་པ་དང༌། མ་སྐྱེས་པ་དང༌། མ་འགགས་པ་དང༌། བརྗོད་དུ་མེད་པར་མོས་པ་དང༌། རྟག་ཏུ་རྒྱུན་མི་ འཆད་པར་སྐད་ཅིག་སྐད་ཅིག་ལ་དེ་བཞིན་གཤེགས་པའི་སྤྱོད་པ་དང༌། སྤྱོད་ལམ་ལ་འཇུག་པའི་གནས་ཛམྦུའི་གླིང་གི་རྡུལ་ཕྲ་རབ་ཀྱི་རྡུལ་ལས་ཀྱང་ལྷག་པ་དག་ལ་ ལྷུན་གྱིས་གྲུབ་ཅིང་རྣམ་པར་མི་རྟོག་པར་འཇུག་པར་མོས་པ་དང༌། སེང་གེ་བྲན་བཟང་གི་བུའི་རྟོགས་པ་བརྗོད་པས་སེམས་ཅན་ཡོངས་སུ་སྨིན་པར་བྱས་པ་དེ་བཅོམ་ལྡན་ འདས་ཤཱཀྱ་ཐུབ་པས། བསྐལ་པ་གངྒཱའི་ཀླུང་གི་བྱེ་མ་སྙེད་ནས་མངོན་པར་རྫོགས་པར་སངས་རྒྱས་ཏེ་མཛད་པར་མོས་པ་དང༌། མར་མེ་མཛད་ཀྱིས་ལུང་བསྟན་པ་ནས་བཟུང་སྟེ་ མངོན་པར་རྫོགས་པར་བྱང་ཆུབ་པའི་བར་དེར། བཅོམ་ལྡན་འདས་ཤཱཀྱ་ཐུབ་པའི་བྱང་ཆུབ་སེམས་དཔའི་སྤྱོད་པ་གང་ཡིན་པ་དེ་ཐམས་ཅད་སངས་རྒྱས་ཀྱི་ཡུལ་གྱི་མཐའ་ཀླས་པའི་ བསྐལ་པ་ནས་མངོན་པར་རྫོགས་པར་སངས་རྒྱས་ནས་བསྟན་པ་ཡིན་པར་མོས་པ་དང༌། ཤཱཀྱ་ཐུབ་པས་བསྟན་པས་སེམས་ཅན་ཡོངས་སུ་སྨིན་པར་བྱས་པ་གང་ཡིན་པ་དེ་སངས་ རྒྱས་ཀྱི་ཡུལ་གྱིས་མཐས་ཀླས་པའི་བསྐལ་པ་ནས་བཅོམ་ལྡན་འདས་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་ནས་མཛད་པ་ཡིན་པར་མོས་པ་སྟེ། འཇམ་དཔལ། ལྔ་པོ་ དེ་དག་ནི་བྱང་ཆུབ་སེམས་དཔས་གང་དག་ལ་མོས་པས་ཡོན་ཏན་གྱི་ཁྱད་པར་འདི་དག་དང་གཞན་དཔག་ཏུ་མེད་པ་དག་ཀྱང་ཐོབ་པ་ཡིན་ནོ། །འཇམ་དཔལ། རིགས་ཀྱི་བུའམ། རིགས་ ཀྱི་བུ་མོ་གང་ལ་ལ་ཞིག་གིས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་དགྲ་བཅོམ་པ་མངོན་པར་ཤེས་པ་དྲུག་དང་ལྡན་པ། རྣམ་པར་ཐར་པ་བརྒྱད་ལ་བསམ་གཏན་པ་རྣམས་ ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་དང༌། ལྷའི་གོས་དག་བྱིན་ཏེ། དེ་ལྟར་བྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དག་ཏུ་བྱིན་པ་བས། འཇམ་དཔལ། རིགས་ ༄༅། །ཀྱི་བུའམ། རིགས་ཀྱི་བུ་མོ་གཞན་གང་ཞིག་གིས་རང་སངས་རྒྱས་གཅིག་ལ་ཉི་མ་གཅིག་ཟས་བྱིན་ན་དེ་ནི་དེ་བས་བསོད་ནམས་ཆེས་གྲངས་མེད་པར་ བསྐྱེད་དེ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་འཇིག་རྟེན་གྱི་ཁམས་རེ་རེར་ཡང་གཙུག་ལག་ཁང་ཛམྦུའི་ཆུ་བོའི་གསེར་ལས་བྱས་པ། ནོར་ རིན་པོ་ཆེ་གློག་གི་སྒྲོན་མས་སྤྲས་པ། ནོར་བུ་རིན་པོ་ཆེ་འོད་ཐམས་ཅད་བསྡུས་པའི་སྟེགས་བུས་ཡོངས་སུ་བསྐོར་བ། ནོར་བུ་དང༌། མུ་ཏིག་དང༌། རིན་པོ་ཆེའི་ཕྲེང་བས་མཛེས་ པར་བྱས་པ། གདུགས་དང༌། རྒྱལ་མཚན་དང༌། བ་དན་བསྒྲེང་བ། དྲིལ་བུ་གཡེར་ཀའི་དྲ་བའི་བླ་བྲེ་བྲེས་པ། ཙནྡན་སྤྲུལ་གྱི་སྙིང་པོའི་བྱུག་པས་བྱུགས་པ། ནོར་བུ་རིན་པོ་ ཆེ་དབང་གི་རྒྱལ་པོས་ཁེབས་པར་བྱས་པ། རྒྱ་མཚོ་ན་གནས་པའི་རིན་པོ་ཆེ་རྣམ་པར་དག་པ་བཀོད་པ་ཀུན་ནས་འོད་ཟེར་སྣང་བའི་ནོར་བུ་རིན་པོ་ཆེའི་ཀ་བ་མང་པོས་དཀྲིགས་ པ༑ ནོར་བུ་རིན་པོ་ཆེའི་སེང་གེ་རལ་པ་ཞེས་བྱ་བའི་སྤང་ལེབ་བྲེས་པ། ནོར་བུ་རིན་པོ་ཆེ་སེང་གེ་རྒྱལ་མཚན་གྱི་རྩེ་མོ་ལས་བྱས་པའི་སྒོ་ཁང་དང༌། རྟ་བབས་དང༌། སྐར་ཁུང་ གིས་བརྒྱན་པ། དར་གྱི་ལྡ་ལྡི་མང་པོས་བྲེས་པ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དག་བྱས་ཏེ། རང་སངས་རྒྱས་ཀྱི་གནས་སྟོང་ཕྲག་གྲངས་མེད་པ་ དག་དང༌། རང་སངས་རྒྱས་དེ་དག་ལ་ཉིན་གཅིག་བཞིན་ལྷའི་ཟས་རོ་བརྒྱ་དང་ལྡན་པ་དང༌། ལྷའི་གོས་དག་ཀྱང་བྱིན་ཞིང་དེ་ལྟར་བྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དག་ཏུ་ བྱིན་པ་བས། འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གཞན་གང་ཞིག་གིས་སངས་རྒྱས་ཤེའམ། འཇིག་རྟེན་གྱི་མགོན་པོ་ཞེའམ། དེ་བཞིན་གཤེགས་པ་ཞེའམ། ཐམས་ཅད་མཁྱེན་པ་ཞེས་བྱ་བའི་སྒྲ་ཐོས་ན་འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་ན་གང་གིས་དེ་བཞིན་གཤེགས་པའི་སྐུ་རི་མོར་བྲིས་པའམ། གཟུགས་སུ་བྱས་ པ་མཐོང་བ་ལྟ་ཅི་སྨོས་ཏེ། འདི་ཉིད་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །གང་གིས་མར་མེ་ཕུལ་བའམ། བདུག་པའམ། སྤོས་སམ། མེ་ཏོག་དག་གམ། རོལ་མོའི་སྒྲའམ། མཆོད་པ་སྣ་ཚོགས་གཞན་དག་བྱེད་པ་ལྟ་ཅི་སྨོས་ཏེ། འདི་ཉིད་དེ་བས་ཆེས་བསོད་ནམས་གྲངས་མེད་པར་བསྐྱེད་དོ། །གང་གིས་དེ་བཞིན་གཤེགས་པའི་ ཕྱིར་ཉི་མ་གཅིག་བསླབ་པ་གཅིག་སྲུང་བ་ལྟ་ཅི་སྨོས་ཏེ། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ ཞིག་གིས་དེ་བཞིན་གཤེགས་པ་བྱང་ཆུབ་སེམས་དཔའ་དང་བཅས་པ། ཉན་ཐོས་དང་བཅས་པ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་སྙེད་རྣམས་ལ་ཉིན་ ༄༅། །གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་དང༌། ལྷའི་ན་བཟའ་དག་ཀྱང་འབུལ་ལ། དེ་ལྟར་འབུལ་བ་བསྐལ་པ་གངྒཱའི་ཀླུང་གི་བྱེ་མ་སྙེད་དག་ཏུ་ འབུལ་ཞིང་སངས་རྒྱས་བཅོམ་ལྡན་འདས་དེ་དག་ཡོངས་སུ་མྱ་ངན་ལས་འདས་ནས་ཀྱང་དེ་བཞིན་གཤེགས་པ་རེ་རེའི་ཕྱིར་མཆོད་རྟེན་ཚད་གླིང་བཞི་པ་ཙམ། རྣམ་པ་ཐམས་ ཅད་ཀྱི་མཆོག་དང་ལྡན་པ། ཡོན་ཏན་ཐམས་ཅད་ཡོངས་སུ་རྫོགས་པ་དང་ལྡན་པ་དང༌། ཛམྦུའི་ཆུ་བོའི་གསེར་ལས་བྱས་པ། ནོར་བུ་རིན་པོ་ཆེ་གློག་གི་སྒྲོན་མས་སྤྲས་པ། ནོར་ བུ་རིན་པོ་ཆེ་འོད་ཐམས་ཅད་བསྡུས་པའི་སྟེགས་བུས་ཡོངས་སུ་བསྐོར་བ། ནོར་བུ་དང༌། མུ་ཏིག་དང༌། རིན་པོ་ཆེའི་ཕྲེང་བས་མཛེས་པར་བྱས་པ། གདུགས་དང༌། རྒྱལ་མཚན་ དང༑ བ་དན་བསྒྲེང་བ། དྲིལ་བུ་གཡེར་ཀའི་དྲ་བའི་བླ་བྲེ་བྲེས་པ། ཙནྡན་ན་སྤྲུལ་གྱི་སྙིང་པོའི་བྱུག་པས་བྱུགས་པ། ནོར་བུ་རིན་པོ་ཆེ་དབང་གི་རྒྱལ་པོའི་དྲ་བས་གཡོགས་པ་། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དག་བྱས་ཏེ། མཆོད་རྟེན་དེ་དག་ལ་ཉིན་གཅིག་བཞིན་དུ་སྟོང་གསུམ་གྱི་སྟོང་ཆེན་པོའི་ཚད་ཙམ་གྱི་ལྷའི་གོས་དག་ དང༑ གདུགས་ཀྱི་སྤྲིན་དག་དང༌། རྒྱལ་མཚན་གྱི་སྤྲིན་དག་དང༌། བ་དན་གྱི་སྤྲིན་དག་དང༌། མེ་ཏོག་གི་སྤྲིན་དག་དང༌། སྤོས་ཀྱི་སྤྲིན་དག་དང༌། རིན་པོ་ཆེའི་སྤྲིན་དག་དང༌། དང༑ རོལ་མོའི་སྒྲའི་སྤྲིན་དག་དང༌། རྒྱན་གྱི་སྤྲིན་དག་དང༌། སེང་གེ་རྒྱལ་མཚན་གྱི་རྩེ་མོའི་ཟླ་བའི་སྤྲིན་དག་དང༌། ལྷའི་སིལ་སྙན་དང༌། ཕེག་རྡོབ་པ་དང༌། གླུ་དབྱངས་ཀྱི་སྒྲའི་སྤྲིན་ རྣམས་ཀྱིས་གཏོར། མངོན་པར་གཏོར་ལ་ཆོས་ཀྱི་རྣམ་གྲངས་འདི་ལ་མོས་པ་བས། འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གཞན་གང་ཞིག་དེ་བཞིན་གཤེགས་པའི་ ཡོན་ཏན་དང༌། ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པའི་ཆོས་ཀྱི་རྣམ་གྲངས་འདི་ལ་མོས་ཤིང་ཐ་ན་དུད་འགྲོའི་སྐྱེ་གནས་སུ་སོང་བའི་སེམས་ཅན་གཅིག་ལ་ ཟན་ཁམ་གཅིག་བྱིན་ན་འདི་ཉིད་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ། མདོ་སྡེ་འདི་ལ་མོས་པའི་བྱང་ཆུབ་སེམས་དཔའ་གང་ལ་ལ་ཞིག་གིས་ མདོ་འདི་ལས་ཇི་སྐད་སྨོས་པའི་དེ་བཞིན་གཤེགས་པ་རྣམས་ལ་མཆོད་པ་བྱེད་པ་བས། བྱང་ཆུབ་སེམས་དཔའ་མདོ་འདི་ཉིད་ལ་མོས་པ་གཞན་གང་ཞིག་གིས་མདོ་འདི་ཉིད་ལ་ མོས་པའི་བྱང་ཆུབ་སེམས་དཔའ་གཞན་ཞིག་མཐོང་ནས་བྱང་ཆུབ་སེམས་དཔའ་འདི་ནི་མདོ་འདི་ཉིད་ལ་མོས་པའོ་སྙམ་སྟེ་དགའ་བ་དང༌། མཆོག་ཏུ་དགའ་བ་ཆེན་པོ་ རྙེད་ལ། དེ་སེམས་དད་པས་ལངས་ཏེ། དེ་ལ་ཐལ་མོ་སྦྱར་ནས་ཕྱག་བཙལ་ཏེ་ཅི་ནུས་ཅི་ལྕོགས་སུ་དེ་ལ་ཡོངས་སུ་བཟུང་བ་བྱས་ན། འདི་ཉིད་དེ་བས་ཆེས་སངས་རྒྱས་ཀྱི་ཡེ་ཤེས་ཐོབ་ ༄༅། །པར་འགྱུར་བའི་བསོད་ནམས་གྲངས་མེད་པ་སྐྱེད་དོ། །འཇམ་དཔལ། དེ་ལྟ་བས་ན་སངས་རྒྱས་ཀྱི་ཡེ་ཤེས་འདོད་པའི་བྱང་ཆུབ་སེམས་དཔས་ཆོས་ཀྱི་རྣམ་ གྲངས་འདི་མཉན་པའི་ཕྱིར་འཇིག་རྟེན་གྱི་ཁམས་མེས་ཡོངས་སུ་གང་བ་གངྒཱའི་ཀླུང་གི་བྱེ་མ་སྙེད་དག་ཀྱང་བརྒལ་ཏེ་འགྲོ་བར་བྱའོ། །འཇམ་དཔལ། བྱང་ཆུབ་སེམས་དཔའ་ གང་ལ་ལ་ཞིག་གིས་བསྐལ་པ་བྱེ་བ་སྟོང་ཕྲག་བརྒྱད་དུ་ཕ་རོལ་ཏུ་ཕྱིན་པ་ལྔ་ལ་སྤྱད་པ་བས། འཇམ་དཔལ། བྱང་ཆུབ་སེམས་དཔའ་གཞན་གང་ཞིག་དེ་བཞིན་གཤེགས་ པ་ནི་རྟག་པའོ་སྙམ་དུ་མོས་པར་བྱེད་ན་འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ། བྱང་ཆུབ་སེམས་དཔའ་གང་ལ་ལ་ཞིག་གིས་སངས་རྒྱས་ ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་དག་ལ་ལྷའི་ཟས་རོ་བརྒྱ་དང་ལྡན་པ་དང༌། ལྷའི་ན་བཟའ་དག་ཉིན་གཅིག་བཞིན་དུ་འབུལ་ཞིང༌། དེ་ ལྟར་འབུལ་བ་བསྐལ་པ་གངྒཱའི་ཀླུང་གི་བྱེ་མ་སྙེད་དག་ཏུ་འབུལ་བ་བས། འཇམ་དཔལ། བྱང་ཆུབ་སེམས་དཔའ་གཞན་གང་ཞིག་དེ་བཞིན་གཤེགས་པའི་ཡོན་ཏན་དང༌། ཡེ་ ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པའི་ཆོས་ཀྱི་རྣམ་གྲངས་འདི་ལ་མོས་པའི་བྱང་ཆུབ་སེམས་དཔའ་ལ་ངོ་མཚར་དུ་འཛིན་པར་གྱུར་ནས་ཁྱོད་ཆོས་ཀྱི་ རྣམ་གྲངས་འདི་ལ་མོས་པ་ལེགས་སོ། །ལེགས་སོ། །ཁྱོད་ནི་ལྷ་དང་བཅས་པའི་འཇིག་རྟེན་གྱིས་ཕྱག་བྱ་བའི་འོས་ཡིན་ནོ། །ཞེས་བསམ་པ་ཐག་པ་ནས་ལེགས་སོ་ཞེས་བྱ་ བ་བྱིན་ལ། ཁྱོད་དེ་བཞིན་གཤེགས་པ་ཐམས་ཅད་ཀྱི་གསང་བའི་གནས་རྣམས་སུ་ཞུགས་ལ་ཆོས་ཀྱི་འཁོར་ལོ་སྐོར་ཅིག་ཅེས་བྱས་ནས། འཇམ་དཔལ། བྱང་ཆུབ་སེམས་ དཔའ་དེ་ནི་དེ་བས་ཆེས་བསོད་ནམས་གྲངས་མེད་པར་འཕེལ་ཏེ། བསོད་ནམས་མངོན་པར་འདུ་བྱ་བ་འདི་ལ་སྦྱིན་པ་ལས་བྱུང་བའི་བསོད་ནམས་སྔ་མ་དེས་བརྒྱའི་ཆར་ཡང་ཉེ་བར་ མི་འགྲོ་།སྟོང་གི་ཆ་དང༌། འབུམ་གྱི་ཆ་དང༌། བྱེ་བའི་ཆ་དང༌། བྱེ་བ་བརྒྱའི་ཆ་དང༌། བྱེ་བ་སྟོང་གི་ཆ་དང༌། བྱེ་བ་འབུམ་གྱི་ཆ་དང༌། བྱེ་བ་ཁྲག་ཁྲིག་ཕྲག་འབུམ་གྱི་ཆ་དང༌། གྲངས་ དང༑ ཆ་དང༌། བགྲང་བ་དང༌། དཔེ་དང༌། ཟླ་དང༌། རྒྱུར་ཡང་མི་བཟོད་དོ། །བཅོམ་ལྡན་འདས་ཀྱིས་གནང་སྟེ། བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་ དེ་སྐད་ཅེས་སྨྲས་ནས། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དང༌། བྱང་ཆུབ་སེམས་དཔའ་དེ་དག་དང༌། ཉན་ཐོས་ཆེན་པོ་དེ་དག་དང༌། ལྷ་དང༌། མི་ དང༑ ལྷ་མ་ཡིན་དང༌། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དེ་བཞིན་གཤེགས་པའི་ཡོན་ཏན་ ༄༅། །དང༑ ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་ མཁན་པོ་ཛྙཱ་ན་གརྦྷ་དང༌། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། Copyright © 2012 by the Asian Classics Input Project. All rights reserved.