Loading
འཕགས་པ་ངེས་པ་དང་མི་ངེས་པར་འགྲོ་བའི་ཕྱག་རྒྱ་ལ་འཇུག་པ་ཞེས་བྱ་བ་ཐེག་པ་ཆེན་པོའི་མདོ།
མ
not checked
།།རྒྱ་གར་གྱི་མཁན་པོ་སུ་རེནྡྲ་
བོ་དྷི་དང༌། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།རྒྱ་གར་སྐད་དུ། ཨཱཪྻ་ནི་ཡ་ཏ་ཨ་ནི་ཡ་ཏ་ག་ཏི་མུ་དྲཱ་ཨ་བ་ཏཱ་ར་ནཱ་མ་
མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ངེས་པ་དང༌། མ་ངེས་པར་འགྲོ་བའི་ཕྱག་རྒྱ་ལ་འཇུག་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང༌། བྱང་ཆུབ་སེམས་དཔའ་
ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་
དགེ་སློང་གི་དགེ་འདུན་ཆེན་པོ་དང༌། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་ཅུ་ལ། འདི་ལྟ་སྟེ། འཇམ་དཔལ་གཞོན་ནུར་གྱུར་པ་དང༌། སྤྱན་རས་གཟིགས་
དབང་ཕྱུག་དང༌། མཐུ་ཆེན་ཐོབ་དང༌། སྨན་གྱི་རྒྱལ་པོ་དང༌། སྨན་གྱི་ཡང་དག་འཕགས་དང༌། མཆོད་རྟེན་མངོན་པར་བསྒྲགས་པའི་སྒྲ་སྐད་རྒྱལ་པོ་དང༌། དེ་དག་ལ་སོགས་
པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་ཅུ་ཐམས་ཅད་ཀྱང་རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་ལ་གནས་པ། ཟ་བ་ཅིང་བརྟན་པའི་ཚུལ་
རྒྱ་མཚོའི་དུས་རླབས་ཀྱི་ཏིང་ངེ་འཛིན་འཐོབ་པ། དབང་བསྐུར་བའི་གཟུངས་ཐོབ་པ། སངས་རྒྱས་ཀྱི་སྐུ་མདོག་མཐའ་ཡས་པ་ཡོངས་སུ་འགྲུབ་པའི་གཟུངས་ཐོབ་པ་ཤ་སྟག་
དང་ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། ཕྱག་རྒྱ་གང་གིས་བྱང་ཆུབ་
སེམས་དཔའ་འདི་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་ངེས་ཏེ། བླ་ན་མེད་པའི་ཡི་ཤེས་ཀྱི་ལམ་ལས་ཕྱིར་ལྡོག་པར་འགྱུར་བའོ། །བྱང་ཆུབ་སེམས་
དཔའ་འདི་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་ཏེ། བླ་ན་མེད་པའི་ཡེ་ཤེས་ཀྱི་ལམ་ལས་ཕྱིར་མི་ལྡོག་པའོ་ཞེས་བགྱི་བར་བདག་གིས་འཚལ་བར་
འགྱུར་བ་བྱང་ཆུབ་སེམས་དཔའ་རྣམས་ཀྱི་ངེས་པ་དང༌། མ་ངེས་པར་འགྲོ་བའི་ཕྱག་རྒྱལ་འཇུག་པ་ཞེས་བགྱི་བའི་ཆོས་ཀྱི་རྣམ་གྲངས་བསྟན་དུ་གསོལ། དེ་སྐད་ཅེས་གསོལ་པ་དང༌།
བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་ལྔ་པོ་འདི་དག་ཡིན་ཏེ།
༄༅། །ལྔ་གང་ཞེ་ན། འདི་ལྟ་སྟེ། ཕྱུགས་ཀྱི་ཤིང་རྟས་འགྲོ་བ་ལྟ་བུ་དང༌། གླང་པོ་ཆེའི་ཤིང་རྟས་འགྲོ་བ་ལྟ་བུ་དང༌། ཟླ་བ་དང༌། ཉི་མས་འགྲོ་བ་ལྟ་བུ་
དང༑ ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུ་དང༌། དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུ་སྟེ། འཇམ་དཔལ། ལྔ་པོ་དེ་དག་ནི་བྱང་ཆུབ་སེམས་དཔའ་
རྣམས་ཀྱི་འགྲོ་བ་ཡིན་ནོ། །འཇམ་དཔལ། དེ་ལ་བྱང་ཆུབ་སེམས་དཔའ་གཉིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་ངེས་པའི་འགྲོ་བ་པ་ཡིན་ནོ། །བྱང་
ཆུབ་སེམས་དཔའ་གསུམ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པའི་འགྲོ་བ་པ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས། བྱང་
ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་ངེས་པའི་འགྲོ་བ་པ་བླ་ན་མེད་པའི་ཡེ་ཤེས་ཀྱི་ལམ་ལས་སླར་ལྡོག་པ་དག་གང་ལགས། བཅོམ་
ལྡན་འདས་ཀྱིས་བཀའ་སྩལ་པ། འཇམ་དཔལ། བྱང་ཆུབ་སེམས་དཔའ་ཕྱུགས་ཀྱི་ཤིང་རྟས་འགྲོ་བ་ལྟ་བུ་དང༌། གླང་པོ་ཆེའི་ཤིང་རྟས་འགྲོ་བ་ལྟ་བུ་ཡིན་ཏེ། འཇམ་
དཔལ། བྱང་ཆུབ་སེམས་དཔའ་འདི་གཉིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་ངེས་ཏེ། བླ་ན་མེད་པའི་ཡེ་ཤེས་ཀྱི་ལམ་ལས་ཕྱིར་ལྡོག་པ་ཡིན་
ནོ༑ ༑འཇམ་དཔལ། བྱང་ཆུབ་སེམས་དཔའ་ཟླ་བ་དང༌། ཉི་མས་འགྲོ་བ་ལྟ་བུ་པ་དང༌། བྱང་ཆུབ་སེམས་དཔའ་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུ་པ་དང༌། བྱང་ཆུབ་སེམས་
དཔའ་དེ་བཞིན་གཤེགས་པའི་རྫུ་འཕྲུལ་གྱི་འགྲོ་བ་ལྟ་བུ་པ་འདི་གསུམ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་ཏེ། བླ་ན་མེད་པའི་ཡེ་ཤེས་ཀྱི་ལམ་ལས་
ཕྱིར་མི་ལྡོག་པ་ཡིན་ནོ། །འཇམ་དཔལ། ཇི་ལྟར་བྱང་ཆུབ་སེམས་དཔའ་ཕྱུགས་ཀྱི་ཤིང་རྟས་འགྲོ་བ་ལྟ་བུ་པ་ཡིན་པར་རིག་པར་བྱ་ཞེ་ན། འཇམ་དཔལ། འདི་ལྟ་སྟེ། དཔེར་
ན། སྐྱེས་བུ་ལ་ལ་ཞིག་སངས་རྒྱས་ཀྱི་ཞིང་ལྔ་བརྒྱའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་རྣམས་འདའ་བར་འདོད་ལ། དེར་ཡང་དེའི་བྱ་བ་དང༌། བྱ་བ་ཆེན་པོ་དང༌།
དོན་དང༌། དོན་ཆེན་པོ་དང༌། ཆེད་ཆེ་བ་དང༌། ཆེད་ཆེ་རབ་གཅིག་ཡོད་ནས་དེ་འདི་སྙམ་དུ་སེམས་ཏེ། བདག་གིས་བཞོན་པ་ཇི་ལྟ་བུ་ཞིག་གིས་འཇིག་རྟེན་གྱི་ཁམས་དེ་དག་འདའ་
བར་བྱ་སྙམ་མོ། །དེའང་འདི་སྙམ་དུ་དཔྱོད་དེ། མ་ལ་བདག་ཕྱུགས་ཀྱི་ཤིང་རྟ་ལ་ཞོན་ལ་འཇིག་རྟེན་གྱི་ཁམས་དེ་དག་འདའ་བར་བྱ་གོར་མ་ཆག་སྙམ་སྟེ། འཇམ་དཔལ། མི་དེ་
ཕྱུགས་ཀྱི་ཤིང་རྟ་ལ་ཞོན་ཏེ་ལམ་དེར་ཞུགས་ནས་དེ་ཡུན་རིང་ཞིང་དུས་རིང་མོ་ཞིག་ན་དཔག་ཚད་བརྒྱར་ཕྱིན་པ་ལས། དེ་རླུང་གི་དཀྱིལ་འཁོར་ཆེན་པོས་དེ་ནས་བཟློག་ནས་དཔག་
༄༅། །ཚད་བརྒྱད་ཅུར་ཕྱིར་དེད་དེ་ཕུལ་ན། འཇམ་དཔལ། འདི་ཇི་སྙམ་དུ་སེམས། མི་དེས་བསྐལ་པ་གཅིག་གམ། བསྐལ་པ་བརྒྱའམ། བསྐལ་པ་
སྟོང་ངམ། བསྐལ་པ་བྱེ་བ་ཕྲག་འབུམ་མམ། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པས་ཀྱང་འཇིག་རྟེན་གྱི་ཁམས་དེ་དག་འདའ་བའམ། འཇིག་རྟེན་གྱི་ཁམས་
གཅིག་ཀྱང་འདའ་བར་ནུས་སམ། འཇམ་དཔལ་གྱིས་གསོལ་པ། བཅོམ་ལྡན་འདས། དེ་ནི་གནས་མ་མཆིས་སོ། །བཅོམ་ལྡན་འདས། དེ་ནི་སྐབས་མ་མཆིས་ཏེ། ཕྱུགས་
ཀྱི་ཤིང་རྟ་ལ་འཚལ་བའི་མི་དེས་བསྐལ་པ་གཅིག་གམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བྱེ་བ་ཕྲག་འབུམ་མམ། བསྐལ་པ་བརྗོད་དུ་མེད་པའི་ཡང་
བརྗོད་དུ་མེད་པས་ཀྱང་འཇིག་རྟེན་གྱི་ཁམས་གཅིག་ཀྱང་འདའ་བར་ནུས་པ་དེ་ནི་གནས་མ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ།
དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ་ཐེག་པ་ཆེན་པོ་མི་འཛིན་མི་ཀློག་པར་
ཉན་ཐོས་ཀྱི་ཐེག་པ་པ་རྣམས་དང་ལྷན་ཅིག་གནས་ཏེ། ཉན་ཐོས་ཀྱི་ཐེག་པ་པ་དག་ལ་སྙེན་ཅིང་སྟེན་ལ་བསྙེན་བཀུར་བྱེད་ཅིང་དེ་དག་དང་ལྷན་ཅིག་ཏུ་འདྲིས་པར་བྱེད་ལ་
ཀུན་ཏུ་སྤྱོད་ཅིང་ལོངས་སྤྱོད་པར་བྱེད་ལ། ཀུན་དགའ་ར་བའམ། གཙུག་ལག་ཁང་ངམ། འཆག་སར་སྤྱོད་ཡུལ་མཐུན་པར་གནས་པར་བྱེད། ཉན་ཐོས་ཀྱི་ཐེག་པ་ཀློག་ཅིང་
ཁ་ཏོན་བྱེད། དཔྱོད་ཅིང་ཁོང་དུ་ཆུད་པར་བྱེད་ལ་གཞན་དག་ཀྱང་ཀློག་ཏུ་འཇུག་པ་ནས་ཁོང་དུ་ཆུད་པའི་བར་དུ་བྱེད་ན། དེ་ཉན་ཐོས་ཀྱི་ཐེག་པ་འཛིན་པའི་དགེ་བའི་རྩ་བ་སྐྱེད་
པ་མངོན་པར་འདུ་བྱེད་པ་དེས་ཤེས་རབ་རྟུལ་པོར་འགྱུར་ཏེ། བླ་ན་མེད་པའི་ཡེ་ཤེས་ཀྱི་ལམ་ལས་ཕྱིར་འདྲེན་ཅིང་ཕྱིར་ཟློག་གོ །བྱང་ཆུབ་སེམས་དཔའ་དེའི་བྱང་ཆུབ་ཀྱི་
སེམས་བསྒོམས་པ་ལས་བྱུང་བའི་ཤེས་རབ་ཀྱི་དབང་པོ་ཤེས་རབ་ཀྱི་མིག་གང་ཡིན་པ་དེའང་དེ་ཉན་ཐོས་ཀྱི་ཐེག་པ་འཛིན་ཅིང་འཆང་བའི་དགེ་བའི་རྩ་བ་བསྐྱེད་པ་མངོན་
པར་འདུ་བྱེད་པ་དེས་རྟུལ་པོར་བྱེད་ཅིང་ཉམས་པར་བྱེད་དོ། །འཇམ་དཔལ། དཔེར་ན། མི་ལ་ལ་ཞིག་མིག་ནད་ཀྱི་མིག་ཟུམ་པར་གྱུར་ནས། དེ་མིག་དབྱེ་བ་དང་མཐོང་དུ་
རུང་བར་བྱ་བའི་ཕྱིར་ཟླ་བ་གཅིག་གི་བར་དུ་དཔྱད་བྱས་ཏེ། ཟླ་བ་གཅིག་ལོན་ནས་མིག་འབྱེད་ཅིང་འཛུམས་པར་བྱེད་པ་ལས་དེའི་དགྲའམ། མི་མཛའ་བ་གཞན་ཞིག་
གིས་པི་པི་ལིང་གི་ཕྱེ་མ་སྤར་གང་གིས་མིག་བཀང་ནས་དེའང་ལོང་བར་བྱས་པ་དེ་བཞིན་དུ། འཇམ་དཔལ། བྱང་ཆུབ་སེམས་དཔའ་དེའི་བྱང་ཆུབ་ཀྱི་སེམས་བསྒོམས་པ་ལས་
༄༅། །བྱུང་བའི་ཤེས་རབ་ཀྱི་དབང་པོ་ཤེས་རབ་ཀྱི་མིག་གང་ཡིན་པ་དེའང་དེ་ཉན་ཐོས་ཀྱི་ཐེག་པ་འཛིན་ཅིང་འཆང་བའི་དགེ་བའི་རྩ་བ་བསྐྱེད་པ་
མངོན་པར་འདུ་བྱེད་པ་དེས་རྟུལ་པོར་བྱེད་ཅིང་ཉམས་པར་བྱེད་དེ། འཇམ་དཔལ། འདི་ནི་བྱང་ཆུབ་སེམས་དཔའ་ཕྱུགས་ཀྱི་ཤིང་རྟས་འགྲོ་བ་ལྟ་བུ་པ་ཡིན་པར་རིག་
པར་བྱའོ། །འཇམ་དཔལ། ཇི་ལྟར་བྱང་ཆུབ་སེམས་དཔའ་གླང་པོ་ཆེའི་ཤིང་རྟས་འགྲོ་བ་ལྟ་བུ་པ་ཡིན་པར་རིག་པར་བྱ་ཞེ་ན། འཇམ་དཔལ། དཔེར་ན། མི་ལ་ལ་
ཞིག་འཇིག་རྟེན་གྱི་ཁམས་དེ་དག་ཉིད་འདའ་བར་འདོད་ལ། དེར་ཡང་དེའི་བྱ་བ་དང༌། བྱ་བ་ཆེན་པོ་དང༌། དོན་དང༌། དོན་ཆེན་པོ་དང༌། ཆེད་ཆེ་བ་དང༌། ཆེད་ཆེ་རབ་
ཅིག་ཡོད་ནས་དེ་འདི་སྙམ་དུ་སེམས་ཏེ། བདག་གི་བཞོན་པ་ཇི་ལྟ་བུ་ཞིག་གིས་འཇིག་རྟེན་གྱི་ཁམས་དེ་དག་འདའ་བར་བྱ་སྙམ་མོ། །དེའང་འདི་སྙམ་དུ་དཔྱོད་དེ། མ་
ལ་བདག་གླང་པོ་ཆེའི་ཤིང་རྟ་ཡན་ལག་བརྒྱད་དང་ལྡན་པ་ལ་ཞོན་ཏེ་འཇིག་རྟེན་གྱི་ཁམས་དེ་དག་འདའ་བར་བྱ་གོར་མ་ཆག་སྙམ་ནས། འཇམ་དཔལ། མི་དེ་གླང་པོ་ཆེའི་
ཤིང་རྟ་ཡན་ལག་བརྒྱད་དང་ལྡན་པ་ལ་ཞོན་ཏེ་ལམ་དེར་ཞུགས་ནས། དེ་ལོ་བརྒྱས་དཔག་ཚད་ཉིས་སྟོང་དུ་སོན་པ་ལས་རླུང་གི་དཀྱིལ་འཁོར་ཆེན་པོས་དེ་ནས་ཕྱིར་ཕུལ་
ཏེ་བཟློག་ན། འཇམ་དཔལ། འདི་ཇི་སྙམ་དུ་སེམས། གླང་པོ་ཆེའི་ཤིང་རྟ་ལ་ཞོན་པས་མི་དེས་བསྐལ་པ་གཅིག་གམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་
པ་བྱེ་བ་ཕྲག་འབུམ་མམ། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པས་ཀྱང་འཇིག་རྟེན་གྱི་ཁམས་གཅིག་ཀྱང་འདའ་བར་ནུས་སམ། འཇམ་དཔལ་གྱིས་གསོལ་པ། བཅོམ་
ལྡན་འདས། དེ་ནི་གནས་མ་མཆིས་ལགས་སོ། །བཅོམ་ལྡན་འདས། དེ་ནི་སྐབས་མ་མཆིས་ཏེ། གླང་པོ་ཆེའི་ཤིང་རྟ་འཚལ་བའི་མི་དེས་བསྐལ་པ་གཅིག་གམ། བསྐལ་པ་
བརྒྱ་འམ། བསྐལ་པ་སྟོང་ངམ། བསྐལ་པ་བྱེ་བ་ཕྲག་འབུམ་མམ། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པས་ཀྱང་འཇིག་རྟེན་གྱི་ཁམས་གཅིག་ཀྱང་འདའ་བར་
ནུས་པ་དེ་ནི་གནས་མ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ་ཉན་ཐོས་ཀྱི་ཐེག་པ་པ་དག་དང་ལྷན་ཅིག་གནས་ཏེ། ཉན་ཐོས་ཀྱི་ཐེག་པ་པ་དག་ལ་སྙེན་ཅིང་སྟེན་ལ་བསྙེན་
བཀུར་བྱེད་ཅིང་དེ་དག་དང་ལྷན་ཅིག་ཏུ་འདྲིས་པར་བྱེད་ལ་ཀུན་སྤྱོད་ཅིང་ལོངས་སྤྱོད་པར་བྱེད་ལ། ཀུན་དགའ་ར་བའམ། གཙུག་ལག་ཁང་ངམ། འཆག་སར་སྤྱོད་ཡུལ་
༄༅། །མཐུན་པར་གནས་པར་བྱེད། ཉན་ཐོས་ཀྱི་ཐེག་པ་ཀློག་ཅིང་ཁ་ཏོན་བྱེད། དཔྱོད་ཅིང་ཁོང་དུ་ཆུད་པར་བྱེད་ལ་གཞན་དག་ཀྱང་ཀློག་ཏུ་འཇུག་
པར་བྱེད་ཅིང་ཁ་ཏོན་བྱེད་དུ་འཇུག་ལ་ཡོངས་སུ་སྤྱོད་པར་བྱེད་དུ་འཇུག་ན་དེ་ཉན་ཐོས་ཀྱི་ཐེག་པ་འཛིན་པའི་དགེ་བའི་རྩ་བ་བསྐྱེད་པ་མངོན་པར་འདུ་བྱེད་པ་དེས་ཤེས་རབ་
རྟུལ་པོར་འགྱུར་ཏེ། བླ་ན་མེད་པའི་ཡེ་ཤེས་ཀྱི་ལམ་ལས་ཕྱིར་འདྲེན་ཅིང་ཕྱིར་ཟློག་གོ །བྱང་ཆུབ་སེམས་དཔའ་དེའི་བྱང་ཆུབ་ཀྱི་སེམས་བསྒོམས་པ་ལས་བྱུང་བའི་དགེ་བའི་རྩ་
བ་བསྐྱེད་པ་མངོན་པར་འདུ་བྱེད་པའི་ཤེས་རབ་ཀྱི་དབང་པོ། ཤེས་རབ་ཀྱི་མིག་གང་ཡིན་པ་དེའང་དེའི་ཉན་ཐོས་ཀྱི་ཐེག་པ་འཛིན་ཅིང་འཆད་པའི་དགེ་བའི་རྩ་བ་བསྐྱེད་པ་
མངོན་པར་འདུ་བྱེད་པ་དེས་རྟུལ་པོར་བྱེད་ཅིང་ཉམས་པར་བྱེད་དོ། །འཇམ་དཔལ། དཔེར་ན། ཤིང་གི་སྡོང་པོ་ཆེན་པོ་སྲིད་དུ་དཔག་ཚད་སྟོང་པ་ཞིག་ཡོད་ལ། དེའང་རྒྱ་
མཚོ་ཆེན་པོས་ཁྱེར་བ་ལས་བར་སྣང་ལ་གནས་པའི་གནོད་སྦྱིན་དག་གིས་དེ་རྒྱ་མཚོ་ཆེན་པོའི་ལམ་ལས་ཕྱིར་ཕུལ་ཏེ་བཟློག་ནས། དེ་ལ་ལྕགས་ཀྱི་གར་བུ་དཔག་ཚད་ལྔ་
སྟོང་ཡོད་པ་ཞིག་བཏགས་ན། འཇམ་དཔལ། འདི་ཇི་སྙམ་དུ་སེམས། ཤིང་གི་སྡོང་པོ་ཆེན་པོ་དེ་རྒྱ་མཚོ་ཆེན་པོ་ལ་འགྲོ་བའམ། སེམས་ཅན་བསྒྲལ་བའི་ཕྱིར་སྤྱད་པར་
ནུས་སམ། འཇམ་དཔལ་གྱིས་གསོལ་བ། བཅོམ་ལྡན་འདས། དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེ་བཞིན་དུ་བྱང་ཆུབ་སེམས་
དཔའ་དེའི་བྱང་ཆུབ་ཀྱི་སེམས་བསྒོམས་པ་ལས་བྱུང་བའི་ཤེས་རབ་ཀྱི་ཤིང་ཆེན་པོའང་ཉན་ཐོས་ཀྱི་ཐེག་པ་འཛིན་པའི་དགེ་བའི་རྩ་བ་བསྐྱེད་པ་མངོན་པར་འདུ་བྱེད་པ་དེས། ཐམས་
ཅད་མཁྱེན་པའི་ཡེ་ཤེས་ཀྱི་རྒྱ་མཚོ་ལས་ཕྱིར་ཕུལ་ཞིང་བཟློག་སྟེ། ཐམས་ཅད་མཁྱེན་པའི་ཡེ་ཤེས་ཀྱི་རྒྱ་མཚོར་འགྲོ་བར་ཡང་མི་འགྱུར། འཁོར་བའི་རྒྱ་མཚོ་ལས་ཀྱང་སེམས་
ཅན་རྣམས་སྒྲོལ་མི་ནུས་ཏེ། འཇམ་དཔལ། འདི་ནི་བྱང་ཆུབ་སེམས་དཔའ་གླང་པོ་ཆེའི་ཤིང་རྟས་འགྲོ་བ་ལྟ་བུ་པ་ཡིན་པར་རིག་པར་བྱའོ། །འཇམ་དཔལ། ཇི་ལྟར་བྱང་ཆུབ་
སེམས་དཔའ་ཉི་མ་དང་ཟླ་བས་འགྲོ་བ་ལྟ་བུ་བ་ཡིན་པར་རིག་པར་བྱ་ཞེ་ན། འཇམ་དཔལ། དཔེར་ན། མི་ལ་ལ་འཇིག་རྟེན་གྱི་ཁམས་དེ་དག་ཉིད་འདའ་བར་འདོད་ལ། དེར་
ཡང་དེའི་ཕྱ་བ་དང༌། བྱ་བ་ཆེན་པོ་དང༌། དོན་དང༌། དོན་ཆེན་པོ་དང༌། ཆེད་ཆེ་བ་དང༌། ཆེད་ཆེ་རབ་ཅིག་ཡོད་ནས་དེ་འདི་སྙམ་དུ་སེམས་ཏེ། བདག་གིས་རྫུ་འཕྲུལ་ཇི་ལྟ་བུ་ཞིག་
གིས་འཇིག་རྟེན་གྱི་ཁམས་དེ་དག་འདའ་བར་བྱ་སྙམ་མོ། །དེའང་འདི་སྙམ་དུ་དཔྱོད་དེ། མ་ལ་བདག་གིས་ཉི་མ་དང་ཟླ་བའི་འགྲོ་བས་འཇིག་རྟེན་གྱི་ཁམས་དེ་དག་འདའ་བར་
༄༅། །བྱ་གོར་མ་ཆག་སྙམ་ནས། འཇམ་དཔལ། མི་དེ་ཉི་མ་དང༌། ཟླ་བའི་འགྲོ་བས་ལམ་དེར་ཞུགས་ན། འཇམ་དཔལ། འདི་ཇི་སྙམ་དུ་སེམས། མི་དེས་
ཉི་མ་དང༌། ཟླ་བའི་འགྲོ་བས་འཇིག་རྟེན་གྱི་ཁམས་དེ་དག་འདའ་བར་ནུས་སམ། འཇམ་དཔལ་གྱིས་གསོལ་པ། བཅོམ་ལྡན་འདས། རྡོ་ཐོགས་ལགས་སོ། །བདེ་བར་གཤེགས་
པ༑ རྒྱུད་དེའི་ལོ་དུས་རིང་མོ་ཞིག་གིས་རྡོ་ཐོགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་གང་
ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ་ཉན་ཐོས་ཀྱི་ཐེག་པ་པ་དག་དང་ལྷན་ཅིག་ཏུ་མི་གནས་ཏེ། ཉན་ཐོས་ཀྱི་ཐེག་པ་པ་བདག་ལ་མི་སྙེན་
ཅིང་མི་སྟེན་ལ། བསྙེན་བཀུར་མི་བྱེད། ཉན་ཐོས་ཀྱི་ཐེག་པ་པ་དེ་དག་དང་ལྷན་ཅིག་ཏུ་འདྲིས་པར་མི་བྱེད། ཀུན་ཏུ་སྤྱོད་ཅིང་ལོངས་སྤྱོད་པར་མི་བྱེད། ཀུན་དགའ་ར་བའམ།
གཙུག་ལག་ཁང་ངམ། འཆག་སར་སྤྱོད་ཡུལ་མཐུན་པར་གནས་པར་མི་བྱེད་ལ། ཉན་ཐོས་ཀྱི་ཐེག་པ་ཀློག་པར་མི་བྱེད། ཁ་ཏོན་མི་བྱེད། སེམས་པར་མི་བྱེད་ལ། གཞན་དག་
ཀྱང་ཐ་ན་ཚིགས་སུ་བཅད་པ་གཅིག་ཙམ་ཡང་ཀློག་ཏུ་འཇུག་པར་མི་བྱེད། ཁ་ཏོན་བྱེད་དུ་འཇུག་པར་མི་བྱེད་དེ། དེ་གང་ཀློག་པ་དེའང་ཐེག་པ་ཆེན་པོ་ཁོ་ན་ཀློག་ལ། གང་སྟོན་
པ་དེའང་ཐེག་པ་ཆེན་པོ་ཁོ་ན་སྟོན་ན། འཇམ་དཔལ། འདི་ནི་བྱང་ཆུབ་སེམས་དཔའ་ཟླ་བ་དང༌། ཉི་མའི་འགྲོ་བ་ལྟ་བུ་བ་ཡིན་པར་རིག་པར་བྱའོ། །འཇམ་དཔལ། དཔེར་ན། ནམ་མཁའ་
ལྡིང་གི་དབང་པོའི་རྒྱལ་པོ་ཆེན་པོ་ལང་ཚོ་དང༌། སྟོབས་དང༌། མཐུ་ཆེན་པོ་ཐོབ་པ་ནི་འདོད་ན་རི་རབ་ཀྱི་རྩེ་མོ་ནས་རི་རབ་ཀྱི་རྩེ་མོར་འགྲོའོ། །འཇམ་དཔལ། དེ་བཞིན་དུ་ཟླ་བ་དང༌། ཉི་མའི་འགྲོ་
བ་ལྟ་བུ་པའི་བྱང་ཆུབ་སེམས་དཔའ་ཚུལ་ཁྲིམས་དང༌། ཐོས་པ་དང༌། བསམ་པ་དང༌། ལྷག་པའི་བསམ་པའི་སྟོབས་དང༌། ལང་ཚོ་དང༌། མཐུ་ཆེན་པོ་ཐོབ་པའང་འདོད་ན། སངས་རྒྱས་
ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྣམས་སུ་སྟོན་པར་བྱེད་དོ། །འཇམ་དཔལ། ཇི་ལྟར་བྱང་ཆུབ་སེམས་དཔའ་ཉན་ཐོས་ཀྱི་རྫུ་
འཕྲུལ་གྱིས་འགྲོ་བ་ལྟ་བུ་པ་ཡིན་པར་རིག་པར་བྱ་ཞེ་ན། འཇམ་དཔལ། དཔེར་ན། མི་ལ་ལ་ཞིག་འཇིག་རྟེན་གྱི་ཁམས་དེ་དག་ཉིད་འདའ་བར་འདོད་ལ། དེར་ཡང་དེའི་བྱ་བ་དང༌།
བྱ་བ་ཆེན་པོ་དང༌། དོན་དང༌། དོན་ཆེན་པོ་དང༌། ཆེད་ཆེ་བ་དང༌། ཆེད་ཆེ་རབ་ཅིག་ཡོད་ནས་དེ་འདི་སྙམ་དུ་སེམས་ཏེ། བདག་གི་རྫུ་འཕྲུལ་ཇི་ལྟ་བུ་ཞིག་གིས་འཇིག་རྟེན་གྱི་ཁམས་
དེ་དག་འདའ་བར་བྱ་སྙམ་མོ། །དེའང་འདི་སྙམ་དུ་དཔྱོད་དེ། མ་ལ་བདག་ཉན་ཐོས་ཀྱི་རྫུ་འཕྲུལ་གྱིས་འཇིག་རྟེན་གྱི་ཁམས་དེ་དག་འདའ་བར་བྱའོ་སྙམ་ན། འཇམ་དཔལ། འདི་
༄༅། །ཇི་སྙམ་དུ་སེམས། མི་དེས་ཉན་ཐོས་ཀྱི་རྫུ་འཕྲུལ་གྱིས་འཇིག་རྟེན་གྱི་ཁམས་དེ་དག་འདའ་བར་ནུས་སམ། འཇམ་དཔལ་གྱིས་གསོལ་བ། བཅོམ་ལྡན་
འདས། རྡོ་ཐོགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སེམས་བསྐྱེད་ལ། ཉན་ཐོས་ཀྱི་ཐེག་པ་བ་དག་དང་ལྷན་ཅིག་ཏུ་མི་གནས། ཉན་ཐོས་ཀྱི་ཐེག་པ་བ་དག་ལ་མི་སྙན་མི་སྟེན་ཅིང་བསྙེན་བཀུར་
མི་བྱེད་ལ། ཉན་ཐོས་ཀྱི་ཐེག་པ་པ་དེ་དག་དང་ལྷན་ཅིག་ཏུ་འདྲིས་པར་མི་བྱེད། ཀུན་ཏུ་སྤྱོད་ཅིང་ལོངས་སྤྱོད་པར་མི་བྱེད། ཀུན་དགའ་ར་བའམ། གཙུག་ལག་ཁང་
མ༑ འཆག་སར་སྤྱོད་ཡུལ་མཐུན་པར་གནས་པར་མི་བྱེད་ལ་ཉན་ཐོས་ཀྱི་ཐེག་པ་ཀློག་པར་མི་བྱེད། ཁ་ཏོན་མི་བྱེད། དཔྱོད་ཅིང་ཁོང་དུ་ཆུད་པར་མི་བྱེད་ལ། གཞན་དག་
ཀྱང་ཐ་ན་ཚིགས་སུ་བཅད་པ་གཅིག་ཙམ་ཡང་ཀློག་ཏུ་འཇུག་པར་མི་བྱེད། ཁ་ཏོན་བྱེད་དུ་འཇུག་པར་མི་བྱེད་དེ། དེ་གང་ཀློག་པ་དེའང་ཐེག་པ་ཆེན་པོ་ཁོ་ན་ཀློག་ལ། གང་
སྟོན་པ་དེའང་ཐེག་པ་ཆེན་པོ་ཁོ་ན་སྟོན་ཅིང་དེ་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་རྣམས་དང༌། ཐེག་པ་ཆེན་པོ་ཀློག་པ་རྣམས་དང༌། ཐེག་པ་ཆེན་པོ་ཡོངས་སུ་
འཛིན་པ་རྣམས་ལ་གུས་པ་དང་བཅས། ཞེ་ས་དང་བཅས་པར་བྱེད་ཅིང་དེར་གཞོལ། དེར་འབབ། དེར་བབ་ལ། དེ་དག་དང་ལྷན་ཅིག་ཏུ་གནས་ཏེ། དེ་དག་ལ་སྙེན་ཅིང་
སྟེན་ལ་བསྙེན་བཀུར་བྱེད། དེ་དག་དང་ལྷན་ཅིག་ཏུ་འདྲིས་པར་བྱེད། ཀུན་ཏུ་སྤྱོད་ཅིང་ལོངས་སྤྱོད་པར་བྱེད། དེ་དག་དང་ཀུན་དགའ་ར་བའམ། གཙུག་ལག་ཁང་ངམ། འཆག་
སར་སྤྱོད་ཡུལ་མཐུན་པར་གནས་པར་བྱེད་ལ། དེ་ཐེག་པ་ཆེན་པོ་ཡོངས་སུ་འཚོལ་ཞིང་སྡུད་ལ་འཆང་བར་བྱེད། མར་མེ་དང༌། བདུག་པ་དང༌། མེ་ཏོག་དང༌། སྤོས་དང༌། མེ་
ཏོག་ཕྲེང་དང༌། བྱུག་པ་དག་གིས་མཆོག་ཏུ་གུས་པར་མཆོད་པར་བྱེད། དེ་ཐེག་པ་ཆེན་པོ་ཀློག་ཅིང་ཁ་ཏོན་བྱེད་ལ། དགའ་བ་དང༌། མཆོག་ཏུ་དགའ་བས་ལུང་འབོག་པར་བྱེད།
མ་བསླབས་པའི་བྱང་ཆུབ་སེམས་དཔའ་རྣམས་ལ་བརྙས་པའི་སེམས་མི་སྐྱེད། བཞིན་འཛུམ་པ་དང༌། གསོང་པོར་སྨྲ་ལ། ཚིག་མི་བརླང་མི་གཏུམ་མི་རྩུབ་པ་དང༌། དགའ་བ་དང༌། སྙན་
པར་སྨྲ་ཞིང༌། དེ་སྲོག་གི་ཕྱིར་ཡང་ཐེག་པ་ཆེན་པོ་མི་སྤོང་ལ་དེ་ཐེག་པ་ཆེན་པོ་ལ་ཞུགས་པའི་བྱང་ཆུབ་སེམས་དཔའ་རྣམས་དང༌། ཐེག་པ་ཆེན་པོ་ཀློག་པ་རྣམས་དང༌། ཐེག་པ་
ཆེན་པོ་ཡོངས་སུ་འཛིན་པ་རྣམས་ལ་ཅི་ནུས་ཅི་ལྕོགས་ཀྱིས་སྙིང་ནས་ལྷག་པའི་བསམ་པས་ཡོངས་སུ་འཛིན་པར་བྱེད་ཅིང༌། དེ་སུ་དང་ཡང་ལྷན་ཅིག་འགྱེད་པ་དང༌། རྩོད་པར་མི་བྱེད་
༄༅། །ལ༑ དེ་སྔོན་མ་བྱུང་བ་དང༌། མ་ཐོས་པའི་མདོ་སྡེ་རྣམས་འཚོལ་བའི་རང་བཞིན་ཅན་ཡིན་ཞིང༌། གང་དག་ལས་ཐོས་པ་དེ་དག་ལ་སྟོན་པ་ལ་གུས་པ་
དྲག་པོ་ལྟ་བུ་སྐྱེད་པར་བྱེད། བྱང་ཆུབ་སེམས་དཔའ་གཞན་བྱང་ཆུབ་སེམས་དཔའི་སྤྱོད་པ་ལ་མ་བསླབས་པ་དག་ལ་ཁྱད་དུ་གསོད་པར་མི་བྱེད་ལ། ཉེས་པ་བདེན་པ་དང༌། མི་
བདེན་པས་གཞན་དག་ལ་གླེང་བར་མི་བྱེད་ལ། ཉེས་པ་གཞན་གྱི་འཁྲུལ་པའང་མི་འཚོལ་ཞིང་བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ལ་སློབ་པ་འདི་
ནི༑ འཇམ་དཔལ། བྱང་ཆུབ་སེམས་དཔའ་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུ་བ་ཡིན་པར་རིག་པར་བྱའོ། །འཇམ་དཔལ། ཇི་ལྟར་བྱང་ཆུབ་སེམས་དཔའ་དེ་བཞིན་
གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུ་པ་ཡིན་པར་རིག་པར་བྱ་ཞེ་ན། འཇམ་དཔལ། དཔེར་ན། མི་ལ་ལ་ཞིག་འཇིག་རྟེན་གྱི་ཁམས་དེ་དག་ཉིད་འདའ་བར་འདོད་ལ།
དེར་ཡང་དེའི་བྱ་བ་དང༌། བྱ་བ་ཆེན་པོ་དང༌། དོན་དང༌། དོན་ཆེན་པོ་དང༌། ཆེད་ཆེ་བ་དང༌། ཆེད་ཆེ་རབ་ཅིག་ཡོད་ནས་དེ་འདི་སྙམ་དུ་སེམས་ཏེ། བདག་གིས་རྫུ་འཕྲུལ་ཇི་ལྟ་བུ་ཞིག་
གིས་འཇིག་རྟེན་གྱི་ཁམས་དེ་དག་མྱུར་དུ་འདའ་བར་བྱ་སྙམ་མོ། །དེའང་འདི་སྙམ་དུ་དཔྱོད་དེ། མ་ལ་བདག་གིས་འཇིག་རྟེན་གྱི་ཁམས་དེ་དག་འདའ་བར་བྱ་བའི་ཕྱིར་དེ་བཞིན་
གཤེགས་པ་ལ་གསོལ་བ་གདབ་པར་གོར་མ་ཆག་སྙམ་ནས། འཇམ་དཔལ། མི་དེའང་དེ་བཞིན་གཤེགས་པའི་ཐད་དུ་སོང་ནས་གསོལ་བ་བཏབ་སྟེ། བཅོམ་ལྡན་
འདས། བདག་སངས་རྒྱས་ཀྱི་ཞིང་ལྔ་བརྒྱའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདའ་བར་འཚལ་ཏེ། དེར་ཡང་བདག་གིས་བགྱི་བ་དང༌། བགྱི་བ་ཆེན་པོ་དང༌། དོན་
དང༑ དོན་ཆེན་པོ་དང༌། ཆེད་ཆེ་བ་དང༌། ཆེད་ཆེ་རབ་ཅིག་མཆིས་ན། བཅོམ་ལྡན་འདས་ཀྱིས་བདག་འཇིག་རྟེན་གྱི་ཁམས་དེ་དག་འདའ་བར་མཛད་དུ་གསོལ་ཞེས་བྱས་ལ།
འཇམ་དཔལ། དེ་བཞིན་གཤེགས་པས་ཀྱང་མི་དེ་འཇིག་རྟེན་གྱི་ཁམས་དེ་དག་འདའ་བར་མཛད་ན། འཇམ་དཔལ། འདི་ཇི་སྙམ་དུ་སེམས། དེ་བཞིན་གཤེགས་པས་འཇིག་
རྟེན་གྱི་ཁམས་དེ་དག་མྱུར་དུ་འདའ་བར་མཛད་སྤྱོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས། སྤྱོད་ལགས་སོ། །བདེ་བར་གཤེགས་པ། སྤྱོད་ལགས་སོ། །
བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་ལ། ཉན་ཐོས་ཀྱི་ཐེག་པ་པ་དག་དང་ལྷན་ཅིག་ཏུ་མི་གནས་ཏེ། ཉན་ཐོས་ཀྱི་ཐེག་པ་པ་དག་ལ་མི་སྙེན་མི་སྟེན་ཅིང་བསྙེན་བཀུར་མི་བྱེད་ལ། ཉན་ཐོས་ཀྱི་ཐེག་པ་པ་དེ་
༄༅། །དག་དང་ལྷན་ཅིག་འདྲིས་པར་མི་བྱེད། ཀུན་ཏུ་སྤྱོད་ཅིང་ལོངས་སྤྱོད་པར་མི་བྱེད། ཀུན་དགའ་ར་བའམ། གཙུག་ལག་ཁང་ངམ། འཆག་སར་
སྤྱོད་ཡུལ་མཐུན་པར་གནས་པར་མི་བྱེད་ལ། ཉན་ཐོས་ཀྱི་ཐེག་པ་ཀློག་པར་མི་བྱེད། ཁ་ཏོན་མི་བྱེད། དཔྱོད་ཅིང་ཁོང་དུ་ཆུད་པར་མི་བྱེད་ལ། གཞན་དག་ཀྱང་ཐ་ན་ཚིགས་
སུ་བཅད་པ་གཅིག་ཙམ་ཡང་ཀློག་ཏུ་འཇུག་པར་མི་བྱེད། ཁ་ཏོན་བྱེད་དུ་འཇུག་པར་མི་བྱེད་དེ། དེ་གང་ཀློག་པ་དེའང་ཐེག་པ་ཆེན་པོ་ཁོ་ན་ཀློག །གང་ཁ་ཏོན་བྱེད་པ་དེའང་
ཐེག་པ་ཆེན་པོ་ཁོ་ན་ཁ་ཏོན་བྱེད། གང་སྟོན་པ་དེའང་ཐེག་པ་ཆེན་པོ་ཁོ་ན་སྟོན་ཅིང་དེ་ལུས་དང༌། ངག་དང༌། ཡིད་ཡོངས་སུ་དག་ལ། ཚུལ་ཁྲིམས་དང་ལྡན་ཞིང་དགེ་བའི་
ཆོས་ཅན་ཡིན་ལ་གཞན་དག་ཀྱང་ལུས་དང༌། ངག་དང༌། ཡིད་ཡོངས་སུ་དག་པ་ལ་དགོད། ཚུལ་ཁྲིམས་དང༌། དགེ་བའི་ཆོས་ཅན་ལ་དགོད། ཐེག་པ་ཆེན་པོ་ལ་ཞུགས་
པའི་བྱང་ཆུབ་སེམས་དཔའ་རྣམས་དང༌། ཐེག་པ་ཆེན་པོ་ཀློག་པ་རྣམས་དང༌། ཐེག་པ་ཆེན་པོ་ཡོངས་སུ་འཛིན་པ་རྣམས་ལ་གུས་པ་དང་བཅས། ཞེས་དང་བཅས་པར་བྱེད་
ལ༑ དེར་གཞོལ། དེར་འབབ། དེར་བབ་ཅིང་དེ་དག་དང་ལྷན་ཅིག་ཏུ་གནས་ཏེ། དེ་དག་ལ་སྙེན་ཅིང་སྟེན་ལ་བསྙེན་བཀུར་བྱེད་ཅིང་དེ་དག་དང་ལྷན་ཅིག་ཏུ་འདྲིས་པར་བྱེད།
ཀུན་ཏུ་སྤྱོད་ཅིང་ལོངས་སྤྱོད་པར་བྱེད་ལ། དེ་དག་དང་ཀུན་དགའ་ར་བའམ། གཙུག་ལག་ཁང་ངམ། འཆག་སར་སྤྱོད་ཡུལ་མཐུན་པར་གནས་པར་བྱེད། དེ་ཐེག་པ་ཆེན་པོ་ཡོངས་
སུ་འཚོལ་ཞིང་སྡུད་ལ་འཆང་བར་བྱེད། མར་མེ་དང༌། བདུག་པ་དང༌། མེ་ཏོག་དང༌། སྤོས་དང༌། མེ་ཏོག་ཕྲེང་དང༌། བྱུག་པ་དག་གིས་མཆོག་ཏུ་གུས་པ་དྲག་པོས་མཆོད་པར་བྱེད་དེ།
ཐེག་པ་ཆེན་པོ་ཀློག་ཅིང་ཁ་ཏོན་བྱེད་ལ། གཞན་དག་ཀྱང་དགའ་བ་དང༌། མཆོག་ཏུ་དགའ་བ་ཆེན་པོ་དྲག་པོས་ཀློག་ཏུ་འཇུག་ཅིང་ཁ་ཏོན་བྱེད་དུ་འཇུག། མ་བསླབས་པའི་བྱང་ཆུབ་སེམས་
དཔའ་རྣམས་ལ་བརྙས་པའི་སེམས་མ་སྐྱེད་ལ། བྱང་ཆུབ་སེམས་དཔའ་གཞན་དག་ཀྱང་བསླབ་པ་དེ་ཁོ་ན་ལ་འགོད་པར་བྱེད། དེ་བཞིན་དུ་འཛུམ་ཞིང་གསོང་པོར་སྨྲ་ལ། གཞན་དག་
ཀྱང་བཞིན་འཛུམ་ཞིང་གསོང་པོར་སྨྲ་བ་ལ་དགོད། དེ་ཚིག་མི་བརླང༌། མི་གཏུམ། མི་རྩུབ་ལ། གཞན་དག་ཀྱང་བསླབ་པ་དེ་ཁོ་ན་ལ་འགོད་ཅིང༌། དེ་དགའ་བ་དང༌། སྙན་པར་སྨྲ་ལ།
སྲོག་གི་ཕྱིར་ཡང་ཐེག་པ་ཆེན་པོ་མི་སྤོང་ཞིང༌། དེ་ཐེག་པ་ཆེན་པོ་ལ་ཞུགས་པའི་བྱང་ཆུབ་སེམས་དཔའ་རྣམས་དང༌། ཐེག་པ་ཆེན་པོ་ཀློག་པ་རྣམས་དང༌། ཐེག་པ་ཆེན་པོ་ཡོངས་སུ་འཛིན་
རྣམས་ལ་གུས་པ་དྲག་པོ་དང༌། དགའ་བ་དང༌། མཆོག་ཏུ་དགའ་བ་ཆེན་པོས་སྲི་ཞུ་བྱ་བའི་ཕྱིར་ཉེ་བར་གནས་ལ། གཞན་དག་ཀྱང་བསམ་པ་ཆེན་པོ་དང༌། ལྷག་པའི་བསམ་པས་
༄༅། །བསླབ་པ་དེ་ཁོ་ན་ལ་འགོད་པར་བྱེད། སུ་དང་ཡང་ལྷན་ཅིག་འགྱེད་པ་དང༌། རྩོད་པར་མི་བྱེད། དེ་སྔོན་མ་བྱུང་བ་དང༌། མ་ཐོས་པའི་མདོ་སྡེ་རྣམས་གུས་
པ་དྲག་པོས་དོན་དུ་གཉེར་ཞིང་འཚོལ་བ་དང༌། གང་དག་ལས་ཐོས་པ་དེ་དག་ལ་སྟོན་པ་ལ་གུས་པ་དྲག་པོ་ལྟ་བུ་སྐྱེད་པར་བྱེད་ལ། གཞན་དག་ཀྱང་བསླབ་པ་དེ་ཁོ་ན་ལ་འགོད། གཞན་
བྱང་ཆུབ་སེམས་དཔའི་སྤྱོད་པ་ལ་མ་བསླབས་པ་རྣམས་ལའང་རློམ་སེམས་མི་བྱེད། ཉེས་པ་བདེན་པ་དང༌། མི་བདེན་པས་གཞན་དག་ལ་གླེང་བར་མི་བྱེད། ཉེས་པ་གཞན་གྱི་
འཁྲུལ་པའང་མི་འཚོལ། གཞན་དག་ཀྱང་བསླབ་པ་དེ་ཁོ་ན་ལ་འགོད་པར་བྱེད། དེ་བྱང་ཆུབ་སེམས་དཔའི་ལས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད།
གཞན་དག་ཀྱང་བྱང་ཆུབ་སེམས་དཔའི་ལས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་དཔའི་ལམ་ཆུད་ཟོས་པའི་སེམས་
ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་ལམ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་
ཆུབ་སེམས་དཔའི་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་སྤྱོད་པ་ཆུད་ཟོས་པའི་སེམས་ཅན་གྱི་
ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་དཔའི་རྒྱུ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་
རྒྱུ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་དཔའི་ཐབས་ལ་མཁས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་
བྱེད་ལ། གཞན་དག་ཀྱང་བྱང་ཆུབ་སེམས་དཔའི་ཐབས་ལ་མཁས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་དཔའི་བྱ་བ་ཆུད་ཟོས་
པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་བྱ་བ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་
ཆུབ་སེམས་དཔའི་མངོན་པར་འདུ་བྱེད་པའི་སྤྱོད་པའི་སྟོབས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་མངོན་པར་འདུ་
བྱེད་པའི་སྤྱོད་པའི་སྟོབས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་དཔའི་སྤྱོད་པའི་གནས་ཆུད་ཟོས་པའི་སེམས་ཅན་གྱི་ཁམས་
ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་སྤྱོད་པའི་གནས་ཆུད་ཟོད་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱམས་པ་དང༌།
༄༅། །སྙིང་རྗེ་དང༌། དགའ་བ་དང༌། བཏང་སྙོམས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱམས་པ་དང༌། སྙིང་རྗེ་
དང༑ དགའ་བ་དང༌། བཏང་སྙོམས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བགོ་བཤའི་རང་བཞིན་ཅན་ཡིན་ལ། གཞན་དག་ཀྱང་བགོ་བཤའི་
རང་བཞིན་ཅན་ལ་འགོད་པར་བྱེད། དེ་སངས་རྒྱས་ཀྱི་ཆོས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་སངས་རྒྱས་ཀྱི་ཆོས་ཆུད་ཟོས་པའི་སེམས་
ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་དགེ་བའི་ཆོས་ལ་འདུན་པ་དང་བྲལ་བའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་དགེ་བའི་
ཆོས་ལ་འདུན་པ་དང་བྲལ་བའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བཅིང་བས་བཅིངས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ།
གཞན་དག་ཀྱང་བཅིང་བས་བཅིངས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ཡུན་རིང་པོ་ནས་ན་བའི་སེམས་ཅན་གྱི་ཁམས་ལ་རྣམ་པར་ལྟ་བར་
བྱེད་ལ། གཞན་དག་ཀྱང་ཡུན་རིང་པོ་ནས་ན་བའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་སངས་རྒྱས་ལ་དགེ་བའི་རྩ་བ་བསྐྱེད་པ་ཆུད་ཟོས་པའི་སེམས་
ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་སངས་རྒྱས་ལ་དགེ་བའི་རྩ་བ་བསྐྱེད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་མགོན་མེད་པའི་
སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་མགོན་མེད་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ཡུན་རིང་པོ་ནས་གཉིད་ཀྱིས་ལོག་པའི་སེམས་
ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཡུན་རིང་པོ་ནས་གཉིད་ཀྱི་ལོག་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་རིགས་ངན་དུ་སྐྱེས་པའི་
སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་རིགས་ངན་དུ་སྐྱེས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་ཀྱི་སེམས་ཆུད་
ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་ཀྱི་སེམས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་
སེམས་དཔའི་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་
ལྟ་བ་ལ་འགོད་པར་བྱེད། དེ་ཆོས་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཆོས་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་
༄༅། །རྣམ་པར་ལྟ་བ་ལ་འགོད་པར་བྱེད། དེ་བསོད་ནམས་དང༌། ཡེ་ཤེས་ཀྱི་ཚོགས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་
ཀྱང་བསོད་ནམས་དང༌། ཡེ་ཤེས་ཀྱི་ཚོགས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ཐེག་པ་ཆེན་པོ་ལ་མོས་པ་ཆུད་ཟོས་པའི་སེམས་ཅན་གྱི་
ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཐེག་པ་ཆེན་པོ་ལ་མོས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ཚུལ་ཁྲིམས་ཀྱི་
སྡོམ་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཚུལ་ཁྲིམས་ཀྱི་སྡོམ་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་
དགོད་པར་བྱེད། དེ་ཆོས་ཀྱི་རྗེས་སུ་མཐུན་པའི་ཆོས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཆོས་ཀྱི་རྗེས་སུ་མཐུན་པའི་ཆོས་ཆུད་ཟོས་པའི་
སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བཟོད་པ་དང༌། དེས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བཟོད་པ་དང༌།
དེས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ཞི་གནས་དང༌། ལྷག་མཐོང་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ།
གཞན་དག་ཀྱང་ཞི་གནས་དང༌། ལྷག་མཐོང་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་སྦྱིན་པ་དང༌། དུལ་བ་དང༌། ལེགས་པར་སྡོམ་པ་དང༌། དེས་
པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་སྦྱིན་པ་དང༌། དུལ་བ་དང༌། ལེགས་པར་སྡོམ་པ་དང༌། ངེས་པ་ཆུད་བྲོས་པའི་སེམས་ཅན་གྱི་ཁམས་
ལ་རྣམ་པར་ལྟ་བ་ལ་འགོད་པར་བྱེད། དེ་དྲན་པ་དང༌། བློ་གྲོས་དང༌། བརྟན་པ་དང༌། རྟོགས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་དྲན་པ་
དང༑ བློ་གྲོས་དང༌། བརྟན་པ་དང༌། རྟོགས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ཕ་རོལ་ཏུ་ཕྱིན་པའི་ལམ་གྱི་ཚུལ་ལ་འཇུག་པ་ཆུད་ཟོས་
པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཕ་རོལ་ཏུ་ཕྱིན་པའི་ལམ་གྱི་ཚུལ་ལ་འཇུག་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་
པར་བྱེད། དེ་སངས་རྒྱས་ཀྱི་རིགས་སུ་སྐྱེ་བ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་སངས་རྒྱས་ཀྱི་རིགས་སུ་སྐྱེ་བ་ཆུད་ཟོས་པའི་སེམས་
ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་དགེ་བའི་བཤེས་གཉེན་ཆུང་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་དགེ་བའི་
༄༅། །བཤེས་གཉེན་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་སེམས་ཅན་ལ་ཕན་པར་འདོད་པ་ཆུད་ཟོས་པའི་སེམས་ཅན་གྱི་
ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་སེམས་ཅན་ལ་ཕན་པར་འདོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ཆོས་ལ་རྟོན་པ་
ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཆོས་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ཡེ་
ཤེས་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཡེ་ཤེས་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་
པར་བྱེད། དེ་དོན་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་དོན་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་
ལ་འགོད་པར་བྱེད། དེ་ངེས་པའི་དོན་གྱི་མདོ་སྡེ་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ངེས་པའི་དོན་གྱི་མདོ་སྡེ་ལ་རྟོན་པ་ཆུད་
ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ཡང་དག་པར་སྤོང་བ་བཞི་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་
དག་ཀྱང་ཡང་དག་པར་སྤོང་བ་བཞི་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བདེན་པའི་ཆོས་དང༌། དོན་དང༌། འདུལ་བ་སྨྲ་བ་ལ་མཁས་པ་ཡིན་ལ་
གཞན་དག་ཀྱང་བདེན་པའི་ཆོས་དང༌། དོན་དང༌། འདུལ་བ་སྨྲ་བ་ལ་མཁས་པ་ལ་འགོད་པར་བྱེད། དེ་དབུལ་པོའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ཅིང་གཞན་དག་ཀྱང་
དབུལ་པོའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་འཇིག་རྟེན་གྱི་ཁམས་ཐམས་ཅད་བྱམས་པས་ཁྱབ་པར་བྱེད་དེ། ཀྱེ་མ། སེམས་ཅན་འདི་དག་ནི་མགོན་མེད་
པ༑ སེམས་ཅན་འདི་དག་ནི་སྐྱབས་མེད་པ། སེམས་ཅན་འདི་དག་ནི་དཔུང་གཉེན་མེད་པ། སེམས་ཅན་འདི་དག་ནི་གླིང་མེད་པ། སེམས་ཅན་འདི་དག་ནི་གནས་མེད་པ། སེམས་ཅན་འདི་
དག་ནི་སྐྱོབ་པ་མེད་པ་ཡིན་ན། ཀྱེ་མ་ནམ་ཞིག་ན་བདག་སེམས་ཅན་འདི་དག་གི་མགོན་དུ་འགྱུར་ཞིག་གུ། སྐྱབས་སུ་འགྱུར་ཞིག་གུ། དཔུང་གཉེན་དུ་འགྱུར་ཞིག་གུ། གླིང་དུ་འགྱུར་
ཞིག་གུ། གནས་སུ་འགྱུར་ཞིག་གུ། སྐྱོབ་པར་འགྱུར་ཞིག་གུ་སྙམ་པའོ། །འཇམ་དཔལ། དཔེར་ན། བྱའི་རྒྱལ་པོ་ནམ་མཁའི་ལྡིང་ལང་ཚོ་དང༌། སྟོབས་དང༌། མཐུ་ཆེན་པོ་ཐོབ་
པ་དེ་ནི་འདོད་ན་རི་རབ་ཀྱི་རྩེ་མོ་ནས་རི་རབ་ཀྱི་རྩེ་མོར་འགྲོའོ། །འཇམ་དཔལ། དེ་བཞིན་དུ་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུའི་བྱང་ཆུབ་སེམས་དཔའ་ཡང་དགེ་བའི་
༄༅། །རྩ་བའི་སྟོབས་དང༌། མགྱོགས་པ་དང༌། ཤུགས་དང༌། རྟུལ་བ་ཆེན་པོས་དེ་བཞིན་གཤེགས་པའི་འཁོར་གྱི་དཀྱིལ་འཁོར་གང་དུ་སྐྱེ་བར་འདོད་པ་དེར་ཡང་
སྐྱེ་བར་འགྱུར་ལ། ངན་སོང་ངན་འགྲོ་ལོག་པར་ལྟུང་བར་སྐྱེས་པའི་སེམས་ཅན་ཐམས་ཅད་ཀྱི་མགོན་དང༌། སྐྱབས་དང༌། དཔུང་གཉེན་དང༌། གླིང་དང༌། གནས་དང༌། སྐྱོབ་པར་
ཡང་འགྱུར་བ་དེ་ནི། འཇམ་དཔལ། བྱང་ཆུབ་སེམས་དཔའ་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུ་པ་ཡིན་པར་རིག་པར་བྱའོ། །འཇམ་དཔལ། རིགས་ཀྱི་བུའམ། རིགས་
ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་དེ་བཞིན་གཤེགས་པ་རྣམས་ལ་ཉིན་གཅིག་བཞིན་དུ་ལྷའི་ཞལ་ཟས་རོ་བརྒྱ་
དང་ལྡན་པ་ཕུལ་ཞིང༌། ལྷའི་ན་བཟའ་དག་ཀྱང་ཕུལ་ཏེ་དེ་བཞིན་གཤེགས་པ་རེ་རེ་ལའང་ཉིན་གཅིག་བཞིན་དུ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ནོར་བུ་རིན་པོ་ཆེ་དབང་
གི་རྒྱལ་པོས་ཡོངས་སུ་གང་བར་བྱས་ནས་སྦྱིན་པ་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་ཕུལ་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་
སེམས་ཅན་གཅིག་རྒྱུན་དུ་ཞུགས་པའི་འབྲས་བུ་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། གལ་ཏེ་རིགས་ཀྱི་བུའམ། རིགས་ཀྱི་
བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་རྒྱུན་དུ་ཞུགས་པའི་འབྲས་བུ་ལ་བཀོད་ལ། རིགས་ཀྱི་
བུའམ། རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་ལན་གཅིག་ཕྱིར་འོང་བའི་འབྲས་བུ་ལ་བཞག་ན། འདི་ནི་དེ་བས་ཆོས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་
གལ་ཏེ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་ལན་གཅིག་ཕྱིར་འོང་
བའི་འབྲས་བུ་ལ་བཀོད་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་ཕྱིར་མི་འོང་བའི་འབྲས་བུ་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་
མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་
ཅད་ཕྱིར་མི་འོང་བའི་འབྲས་བུ་ལ་བཀོད་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་དགྲ་བཅོམ་པ་ཉིད་ལ་བཞག་ན། འདི་ནི་དེ་བས་ཆེས་བསོད་ནམས་
གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་
༄༅། །ཅན་ཐམས་ཅད་དགྲ་བཅོམ་པ་ཉིད་ལ་བཀོད་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་རང་སངས་རྒྱས་ཉིད་ལ་བཞག་
ན༑ འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་
ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་རང་སངས་རྒྱས་ཉིད་ལ་བཀོད་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་རའི་ཤིང་
རྟས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་
གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་རའི་ཤིང་རྟས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཀོད་ལ། རིགས་
ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་གླང་པོ་ཆེའི་ཤིང་རྟས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་
མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་
ཐམས་ཅད་གླང་པོ་ཆེའི་ཤིང་རྟས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཀོད་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་ཟླ་བ་དང༌། ཉི་མས་འགྲོ་བ་ལྟ་བུའི་
བྱང་ཆུབ་ཀྱི་སེམས་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་
གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་ཟླ་བ་དང༌། ཉི་མས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཀོད་ལ། རིགས་ཀྱི་བུའམ། རིགས་ཀྱི་བུ་མོ་གཞན་
ཞིག་གིས་ནི་སེམས་ཅན་གཅིག་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་
ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་
བུའི་བྱང་ཆུབ་ཀྱི་སེམས་ལ་བཀོད་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུའི་བྱང་ཆུབ་ཀྱི་སེམས་
ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་
༄༅། །ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་
པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་དགེ་བསྙེན་དད་པ་ཅན་གསུམ་ལ་སྐྱབས་སུ་སོང་བ། བསླབ་པའི་གཞི་ལྔ་དང་
ལྡན་པ། བཅོམ་ལྡན་འདས་ཀྱི་བསྟན་པ་ལ་མངོན་པར་དགའ་བ་གཅིག་ལ་ཉིན་གཅིག་ཟན་གཅིག་བྱིན་ན་འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ།
རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་དགེ་བསྙེན་དད་པ་ཅན་གསུམ་ལ་སྐྱབས་སུ་
སོང་བ། བསླབ་པའི་གཞི་ལྔ་དང་ལྡན་པ། བཅོམ་ལྡན་འདས་ཀྱི་བསྟན་པ་ལ་མངོན་པར་དགའ་བ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་
དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གི་ནི་གང་ཟག་བརྒྱད་པ་ལ་ཉིན་གཅིག་ཟན་གཅིག་
བྱིན་ན་འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་
ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་གང་ཟག་བརྒྱད་པ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་
གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་རྒྱུན་དུ་ཞུགས་པ་གཅིག་ལ་ཉིན་གཅིག་ཟན་གཅིག་བྱིན་ན་འདི་ནི་དེ་བས་ཆེས་བསོད་ནམས་གྲངས་
མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་རྒྱུན་དུ་ཞུགས་པ་རྣམས་
ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་
གཞན་ཞིག་གིས་ནི་ལན་གཅིག་ཕྱིར་འོང་བ་གཅིག་ལ་ཉིན་གཅིག་ཟན་གཅིག་བྱིན་ན་འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་
ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ལན་གཅིག་ཕྱིར་འོང་བ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་
དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་ཕྱིར་མི་འོང་བ་
༄༅། །གཅིག་ལ་ཉིན་གཅིག་ཟན་གཅིག་བྱིན་ན་འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་
གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ཕྱིར་མི་འོང་བ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་
བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་དགྲ་བཅོམ་པ་
གཅིག་ལ་ཉིན་གཅིག་ཟན་གཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་
ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་དགྲ་བཅོམ་པ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་
གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་རང་སངས་རྒྱས་གཅིག་
ལ་ཉིན་གཅིག་ཟན་གཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་
བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་རང་སངས་རྒྱས་རྣམས་ལ། ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་
ཏེ༑ དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་རའི་ཤིང་རྟས་འགྲོ་བ་ལྟ་བུའི་བྱང་ཆུབ་སེམས་དཔའ་གཅིག་
ལ་ཉིན་གཅིག་ཟན་གཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །དེ་ཅིའི་ཕྱིར་ཞེ་ན། འཇམ་དཔལ། བྱང་ཆུབ་སེམས་དཔའ་གང་གི་ཚེ་གང་དང༌། གང་ལས་
བརྩམས་ཏེ་བྱང་ཆུབ་ཀྱི་སེམས་བསྐྱེད་པ་དེའི་ཚེ་དེས་སེམས་དེ་ལ་མི་དགེ་བའི་ལས་མ་སྤངས་པ་ཅིའང་མེད་ལ། དེས་སངས་རྒྱས་ཀྱི་ཆོས་གང་ཡང་མ་བཟུང་པ་མེད་པའི་ཕྱིར་ཏེ། འཇམ་
དཔལ། དེ་ལྟར་ན་བྱང་ཆུབ་སེམས་དཔའ་རྣམས་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །འཇམ་དཔལ། དཔེར་ན། བྱའི་རྒྱལ་པོ་ཀ་ལ་པིངྐ་སྒོ་ངའི་སྤུབས་ན་
འདུག་ཅིང་མིག་མ་བྱེ་བ་དག་གིས་ཀྱང་སྒྲ་སྐད་ཀྱི་གདངས་ཟབ་ཅིང་སྙན་པས་བྱའི་ཚོགས་ཐམས་ཅད་ཟིལ་གྱིས་གནོན་པར་བྱེད་དོ། །འཇམ་དཔལ། དེ་བཞིན་དུ་དང་པོ་སེམས་བསྐྱེད་
པའི་བྱང་ཆུབ་སེམས་དཔའ་མ་རིག་པའི་སྒོ་ངའི་སྤུབས་ན་འདུག་ཅིང་མིག་ལས་དང༌། ཉོན་མོངས་པའི་མུན་པའི་རབ་རིབ་ཀྱི་དྲིས་ཡོག་པའང་དགེ་བའི་རྩ་བ་ཡོངས་སུ་བསྔོ་བའི་སྦྱོར་བ་
༄༅། །བསྒྲུབ་པའི་སྒྲ་སྐད་ཀྱིས་ཉན་ཐོས་དང༌། རང་སངས་རྒྱས་ཐམས་ཅད་ཟིལ་གྱིས་གནོན་པར་བྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་
ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་རའི་ཤིང་རྟས་འགྲོ་བ་ལྟ་བུ་པའི་བྱང་ཆུབ་སེམས་དཔའ་རྣམས་ལ་ཉིན་གཅིག་བཞིན་དུ་ལྷའི་
ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་གླང་
པོ་ཆེའི་ཤིང་རྟས་འགྲོ་བ་ལྟ་བུ་པའི་བྱང་ཆུབ་སེམས་དཔའ་གཅིག་ལ་ཉིན་གཅིག་ཟན་གཅིག་ཕྱིན་ན་འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་
བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་གླང་པོ་ཆེའི་ཤིང་རྟས་འགྲོ་བ་ལྟ་བུ་པའི་བྱང་ཆུབ་སེམས་དཔའ་
རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ།
རིགས་ཀྱི་བུ་མོ་གཞན་ཞིག་གིས་ནི་ཟླ་བ་དང༌། ཉི་མས་འགྲོ་བ་ལྟ་བུ་པའི་བྱང་ཆུབ་སེམས་དཔའ་གཅིག་ལ་ཉིན་གཅིག་ཟན་གཅིག་བྱིན་ན་འདི་ནི་དེ་བས་ཆེས་བསོད་ནམས་གྲངས་མེད་པ་
སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ཟླ་བ་དང༌། ཉི་མས་འགྲོ་བ་ལྟ་བུ་
པའི་བྱང་ཆུབ་སེམས་དཔའ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ།
རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུ་པའི་བྱང་ཆུབ་སེམས་དཔའ་ཉིན་གཅིག་ཟན་གཅིག་བྱིན་ན་འདི་ནི་དེ་བས་ཆེས་བསོད་ནམས་གྲངས་
མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ཉན་ཐོས་ཀྱི་རྫུ་འཕྲུལ་
གྱིས་འགྲོ་བ་ལྟ་བུ་པའི་བྱང་ཆུབ་སེམས་དཔའ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་
སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུ་པའི་བྱང་ཆུབ་སེམས་དཔའ་གཅིག་ལ་ཉིན་གཅིག་ཟན་གཅིག་
བྱིན་ན་འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་
༄༅། །ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུ་པའི་བྱང་ཆུབ་སེམས་དཔའ་རྣམས་ལ་ཉིན་གཅིག་བཞིན་དུ་ལྷའི་ཟས་
རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་
ཆོས་ཀྱི་རྣམ་གྲངས་འདི་ཐོས་ནས་མོས་ཤིང་ཡིད་ཆེས་པར་བྱེད་ན་འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་
མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ཁ་ཟས་བྱེད་དུ་བཅུག་ལ། སྟོང་གསུམ་གྱི་སྟོང་ཆེན་པོ་བཅུའི་རྡུལ་ཕྲ་
རབ་ཀྱི་རྡུལ་སྙེད་ཀྱི་རང་སངས་རྒྱས་རྣམས་ཀྱི་གནས་ཛམྦུ་ཆུ་བོའི་གསེར་ལས་བྱས་ལ། ནོར་བུ་རིན་པོ་ཆེ་གློག་གི་སྒྲོན་མས་སྤྲས་པ། ནོར་བུ་རིན་པོ་ཆེ་སྣང་བ་ཐམས་ཅད་
བརྩེགས་པའི་སྟེགས་བུས་བསྐོར་བ། ནོར་བུ་དང༌། མུ་ཏིག་དང༌། རིན་པོ་ཆེའི་ཆུན་པོས་མཛེས་པར་བྱས་པ། གདུགས་དང༌། རྒྱལ་མཚན་དང༌། བདན་བསྒྲེང་བ། ནོར་
བུ་རིན་པོ་ཆེ་དབང་གི་རྒྱལ་པོའི་དྲ་བས་བཀབ་པ། དྲིལ་བུ་གཡེར་ཀའི་དྲ་བའི་བླ་བྲེ་བྲེས་པ། ཙནྡན་སྦྲུལ་གྱི་སྙིང་པོས་བྱུགས་པ། མེ་ཏོག་མནྡཱ་ར་བ་དང༌། མནྡཱ་ར་བ་ཆེན་པོ་
དང༑ མཉྫུ་ཥ་ཀ་དང༌། མཉྫུ་ཥ་ཀ་ཆེན་པོ་དང༌། སྣ་མའི་མེ་ཏོག་དང༌། ཀླུ་ཤིང་གི་མེ་ཏོག་དང༌། ཏ་ར་ནི་བར་ན་དང༌། གོ་ཏ་ར་ནི་དང༌། དྲི་མཆོག་དང༌། དྷ་ནུ་སྐ་རི་དང༌། ལྷའི་སྣ་མའི་
མེ་ཏོག་དང༌། ཨུཏྤ་ལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོ་དང༌། མེ་ཏོག་ཆེན་པོ་རྣམས་བཀྲམ་པ་བྱེད་དུ་བཅུག་སྟེ། རང་སངས་རྒྱས་དེ་དག་ལ་ལྷའི་ཟས་རོ་བརྒྱ་དང་ལྡན་པ་
བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་ལ་རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་སངས་རྒྱས་ཞེས་བྱ་བའམ། ཐམས་
ཅད་མཁྱེན་པ་ཞེས་བྱ་བའམ། འཇིག་རྟེན་གྱི་མགོན་པོ་ཞེས་བྱ་བའི་སྒྲ་ཐོས་སམ། རི་མོར་བྲིས་པ་མཐོང་ངམ། གཟུགས་སུ་བྱས་པ་མཐོང་ན་འདི་ནི་དེ་བས་ཆེས་བསོད་ནམས་གྲངས་
མེད་པ་སྐྱེད་པར་འགྱུར་ན། གང་སོར་མོ་བཅུའི་ཐལ་མོ་སྦྱར་བ་ལྟ་ཅི་སྨོས་ཏེ། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །གང་མར་མེའམ། བདུག་པའམ། མེ་ཏོག་
གམ༑ སྤོས་འབུལ་བ་ལྟ་ཅི་སྨོས་ཏེ། ཐ་ན་དེའི་ཡོན་ཏན་བསྔགས་པ་གཅིག་ཙམ་བརྗོད་ནའང་འདི་ནི་དེ་བས་ཆེས་བསོད་ནམས་མང་དུ་སྐྱེད་དོ། །ལོངས་སྤྱོད་ཆེན་པོར་འགྲུབ་པར་
བྱེད་ཅིང་མཐར་གྱིས་ཐམས་ཅད་མཁྱེན་པ་ཉིད་དུ་འགྲོ་བར་འགྱུར་རོ། །འཇམ་དཔལ། དཔེར་ན། ཆུའི་ཐིགས་པ་ཆུང་དུ་རྒྱ་མཚོ་ཆེན་པོར་སོང་བའང་སྲེག་པའི་བསྐལ་པའི་མེ་མ་བྱུང་
༄༅། །གི་བར་དུ་བར་མདོར་ཡོངས་སུ་ཟད་པར་མི་འགྱུར་རོ། །འཇམ་དཔལ། དེ་བཞིན་དུ་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པ་ཇི་ལྟར་ཆུང་བའང་
ཐམས་ཅད་མཁྱེན་པའི་ཡེ་ཤེས་ཀྱི་མེ་མ་བྱུང་གི་བར་དུ་བར་མདོར་ཡོངས་སུ་ཟད་པའམ། མཐར་ཐུག་པར་མི་འགྱུར་རོ། །འཇམ་དཔལ། དཔེར་ན། ཟླ་བའི་དཀྱིལ་འཁོར་ནི་ཇི་
ལྟར་ཆུང་ཡང༌། འདི་ལྟ་སྟེ། བོང་དང༌། ཁྱོན་དང༌། ཆེ་བས་སྐར་མའི་ཚོགས་ཐམས་ཅད་ཟིལ་གྱིས་མནན་ནས་ལྷང་ངེར་འདུག་ཅིང་ཀུན་ཏུ་ལྷང་ངེར་འདུག་གོ །འཇམ་དཔལ། དེ་
བཞིན་དུ་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པ་ཇི་ལྟར་ཆུང་བའང༌། འདི་ལྟ་སྟེ། མཐོ་བ་དང༌། ཡངས་པ་དང༌། ཆེ་བས་དགེ་བའི་རྩ་བ་ཐམས་ཅད་ཟིལ་གྱིས་མནན་ནས་ལྷང་
ངེར་འདུག་གོ། འཇམ་དཔལ། དེ་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །འཇམ་དཔལ།
རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་དེ་བཞིན་གཤེགས་པ་ཐམས་ཅད་བྱང་ཆུབ་སེམས་
དཔའ་རྣམས་དང༌། ཉན་ཐོས་རྣམས་དང་བཅས་པ་ལ་ཉིན་གཅིག་བཞིན་དུ་ལྷའི་ཞལ་ཟས་རོ་བརྒྱ་དང་ལྡན་པ་ཕུལ་ཞིང་ལྷའི་ན་བཟའ་དག་ཀྱང་ཕུལ་ཏེ། དེ་ལྟར་སྦྱིན་པ་བསྐལ་པ་
གངྒཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་ཆོས་ཀྱི་རྣམ་གྲངས་འདི་ཐོས་ནས་མོས་པར་བྱེད་ན། འདི་ནི་དེ་བས་ཆེས་བསོད་ནམས་ཚད་མེད་
པ་སྐྱེད་པར་འགྱུར་ན། གང་ཡི་གེར་འདྲི་བའམ། ཡི་གེར་འདྲིར་འཇུག་པའམ། སྟོན་པར་བྱེད་པ་ལྟ་ཅི་སྨོས་ཏེ། འདི་ནི་དེ་བས་སངས་རྒྱས་ཀྱི་ཡེ་ཤེས་ཐོབ་པར་འགྱུར་བའི་བསོད་ནམས་
ཆེས་མང་དུ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་སྡང་བའི་སེམས་ཀྱི་ཉན་ཐོས་དང༌། རང་སངས་རྒྱས་དཔག་ཏུ་མེད་པ་དག་གི་ཟས་དང༌། གོས་བཅད་
ལ༑ རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་ཁྲོས་ཏེ་སྡང་བའི་སེམས་ཀྱིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའི་ཟན་གཅིག་ཕྲོགས་སམ། ཟན་གཅིག་གཅོད་དུ་
བཅུག་ན་འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །དེ་ཅིའི་ཕྱིར་ཞེ་ན། འཇམ་དཔལ། འདས་པ་དང༌། མ་འོངས་པ་དང༌། ད་ལྟར་བྱུང་བའི་ཉན་ཐོས་དང༌། རང་སངས་རྒྱས་ཐམས་
ཅད་ཀྱི་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ལ་སོགས་པ་བསྐལ་པ་བྱེ་བ་གྲངས་མེད་པ་ནས་ཡང་དག་པར་བསྒྲུབས་པ་
གང་ཡིན་པ་དེ་དག་ཐམས་ཅད་ནི་རང་གི་སེམས་ཀྱི་རྒྱུད་ལས་སྐྱེས་པའི་ཉོན་མོངས་པ་རྣམས་འཇོམས་པར་བྱེད་པར་ཟད་ཀྱི། བྱང་ཆུབ་སེམས་དཔའ་ནི་ཐ་ན་དུད་འགྲོའི་སྐྱེ་གནས་སུ་སྐྱེས་
༄༅། །པའི་སེམས་ཅན་ལ་ཁམ་གཅིག་ཙམ་ཡོངས་སུ་བཏང་བའང་དཀོན་མཆོག་གསུམ་གྱི་གདུང་མི་འཆད་པར་འགྱུར་བར་བྱེད་པའི་ཕྱིར་རོ། །འཇམ་དཔལ།
ནན་གྱིས་དཔེར་བྱ་ན། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཁྲོས་ཏེ་སྡང་བའི་སེམས་ཀྱིས་ཉན་ཐོས་དང༌། རང་སངས་རྒྱས་དཔག་ཏུ་མེད་པ་དག་གི་ཚུལ་ཁྲིམས་ཀྱི་
ཕུང་པོ་དང༌། ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་མེད་པར་བྱས་ལ། རིགས་
ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་སྡང་བའི་སེམས་ཀྱིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའི་ཚུལ་ཁྲིམས་ཐ་ན་བསླབ་པ་གཅིག་བླངས་པ་ཙམ་ཡང་མེད་
པར་བྱས་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །དེ་ཅིའི་ཕྱིར་ཞེ་ན། ཉན་ཐོས་དང༌། རང་སངས་རྒྱས་ཐམས་ཅད་ཀྱི་ཚུལ་ཁྲིམས་ཀྱི་ཕུང་པོ་དང༌། ཏིང་ངེ་འཛིན་གྱི་ཕུང་
པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ནི་རང་གི་སེམས་ཀྱི་རྒྱུད་ལས་སྐྱེས་པའི་ཉོན་མོངས་པ་རྣམས་
འཇོམས་པར་བྱེད་པར་ཟད་ཀྱི། བྱང་ཆུབ་སེམས་དཔའ་ནི་ཐ་ན་ཉི་མ་གཅིག་གི་བསླབ་པ་གཅིག་ལས་བྱུང་བའི་ཚུལ་ཁྲིམས་ཀྱི་ཕུང་པོ་དང༌། ཏིང་ངེ་འཛིན་གྱི་ཕུང་པོ་དང༌། ཤེས་
རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཐམས་ཅད་ཀྱི་སེམས་ཅན་ཐམས་ཅད་ཀྱི་ཉོན་མོངས་པ་ཐམས་ཅད་འཇོམས་པར་
བྱེད་པ་ནས་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཐོབ་པར་འགྱུར་བའི་ཕྱིར་རོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཁྲོས་ཏེ། གནོད་སེམས་ཀྱི་སེམས་
ཀྱིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་བཙོན་རར་བཅུག་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི། བྱང་ཆུབ་སེམས་དཔའ་ལ་
ཁྲོས་ཏེ། གནོད་སེམས་ཀྱི་སེམས་ཀྱིས་འདི་དང་ཕྲད་པར་མ་གྱུར་ཅིག་ཅེས་རྒྱབ་ཀྱིས་ཕྱོགས་ཏེ་འདུག་ན། འདི་ནི་དེ་བས་ཆེས་སྡིག་པ་གྲངས་མད་པ་སྐྱེད་དོ། །འཇམ་དཔལ། རིགས་ཀྱི་བུའམ།
རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་ཀྱི་མིག་ཕྱུང་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་
ཁྲོས་ཏེ་གནོད་སེམས་ཀྱི་སེམས་ཀྱིས་བྱང་ཆུབ་སེམས་དཔའ་ལས་བལྟས་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །འཇམ་དཔལ། ནན་གྱིས། དཔེར་བྱ་ན། གལ་ཏེ་ཕྱོགས་
བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་ཀྱི་མིག་ཕྱུང་བར་གྱུར་ལ། དེ་ནས་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་བྱམས་པའི་སེམས་
༄༅། །ཀྱིས་མིག་བསྐྱེད་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་དགའ་བའི་སེམས་ཀྱིས་
བལྟས་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་
ཐམས་ཅད་ཀྱི་སེམས་ཅན་ཐམས་ཅད་བཙོན་རར་འདུག་པ་ལས་བཙོན་ར་ནས་ཐར་བར་བྱས་ནས་འཁོར་ལོས་བསྒྱུར་བའི་བདེ་བ་ལའང་བཀོད་ལ། རིགས་ཀྱི་བུའམ། རིགས་ཀྱི་བུ་མོ་
གཞན་ཞིག་གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་དགའ་བའི་སེམས་ཀྱིས་མཐོང་བར་འདོད་ཅིང༌། དགའ་བའི་སེམས་ཀྱིས་དེའི་བསྔགས་པ་བརྗོད་ན།
འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། བྱང་ཆུབ་སེམས་དཔའ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་
ཅན་ཐམས་ཅད་རང་སངས་རྒྱས་ཉིད་ལ་བཀོད་ལ། བྱང་ཆུབ་སེམས་དཔའ་གཞན་ཞིག་གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའི་དགེ་བའི་རྩ་བ་སངས་རྒྱས་ལ་
བསྐྱེད་པ་གཅིག་ཙམ་འཕེལ་བར་བྱས་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ། ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་གང་ལ་
ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་བྱང་ཆུབ་ཀྱི་སེམས་ལ་བཀོད་ལ། ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་གཞན་
ཞིག་གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ཕུང་པོ་མེད་པའི་ཚིགས་སུ་བཅད་པ་གཅིག་ཙམ་འདོན་དུ་བཅུག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་
དོ༑ ༑འཇམ་དཔལ། ནན་གྱིས་དཔེར་བྱ་ན། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ནི་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་རང་
སངས་རྒྱས་རྣམས་སེམས་ཅན་དམྱལ་བ་དང༌། དུད་འགྲོ་དང༌། ཡི་དྭགས་རྣམས་སུ་སྐྱེས་པར་བྱས་ལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ནི་བྱང་ཆུབ་སེམས་དཔའ་
གཅིག་བྱང་ཆུབ་ཀྱི་སེམས་ལས་མོས་པ་བཟློག་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །འཇམ་དཔལ། གལ་ཏེ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་
ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་བྱང་ཆུབ་ཀྱི་སེམས་ལས་མོས་པ་བཟློག་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་ཐ་ན་ཐེག་
པ་ཆེན་པོ་ལ་མོས་པའི་བྱང་ཆུབ་སེམས་དཔའ་གཅིག་ཐེག་པ་ཆེན་པོ་ལས་མོས་པ་བཟློག་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །འཇམ་དཔལ། གལ་ཏེ་ཕྱོགས་
༄༅། །བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་དམྱལ་བ་དང༌། དུད་འགྲོ་དང༌། ཡི་དྭགས་དང༌། གཤིན་རྗེའི་འཇིག་རྟེན་དུ་སྐྱེས་པར་གྱུར་ལ། དེ་ནས་
བྱང་ཆུབ་སེམས་དཔའ་གང་ལ་ལ་ཞིག་གིས་སེམས་ཅན་དེ་དག་ཐམས་ཅད་སེམས་ཅན་དམྱལ་བ་དང༌། དུད་འགྲོ་དང༌། གཤིན་རྗེའི་འཇིག་རྟེན་ནས་བཏོན་ནས་བྱང་ཆུབ་ཀྱི་སེམས་ལ་
བཀོད་ལ། བྱང་ཆུབ་སེམས་དཔའ་གཞན་ཞིག་གིས་ནི་སེམས་ཅན་གཅིག་ཐེག་པ་ཆེན་པོ་ལ་མོས་པ་ལ་འཇུག་པར་བྱེད་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ།།
འཇམ་དཔལ། གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་རང་སངས་རྒྱས་རྣམས་རང་སངས་རྒྱས་ལས་ཉམས་པར་བྱས་ལ།
གཅིག་གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་གཅིག་བྱང་ཆུབ་སེམས་དཔའ་ལས་ཉམས་པར་བྱས་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །འཇམ་
དཔལ། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་རང་སངས་རྒྱས་རྣམས་ཀྱི་རྙེད་པ་དང༌། བཀུར་སྟི་གཅད་པའི་ཕྱིར་རྙེད་པ་དང༌། བཀུར་སྟི་
ལ་སེར་སྣའི་སེམས་བསྐྱེད་ཅིང་ཕྱོགས་དང་ཕྱོགས་མཚམས་སུ་དེ་དག་གི་གྲགས་པ་དང༌། སྒྲ་དང༌། ཚིགས་སུ་བཅད་པ་མ་ཡིན་པ་བསྒྲགས་ལ། རིགས་ཀྱི་བུའམ། རིགས་ཀྱི་
བུ་མོ་གཞན་ཞིག་གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་གཅིག་གི་རྙེད་པ་དང༌། བཀུར་སྟི་གཅད་པའི་ཕྱིར་རྙེད་པ་དང༌། བཀུར་སྟི་ལ་སེར་སྣའི་སེམས་བསྐྱེད་ཅིང་
བསྔགས་པ་མ་ཡིན་པ་བསྒྲགས་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །འཇམ་དཔལ། གང་ལ་ལ་ཞིག་གིས་ནི་དམ་པའི་ཆོས་ཡོངས་སུ་གཟུང་བའི་ཕྱིར་ཐེག་པ་ཆེན་པོ་
ལ་མོས་པའི་བྱང་ཆུབ་སེམས་དཔའ་ལ་དགའ་བའི་སེམས་ཀྱིས་ཐ་ན་ཆུ་རའི་ཆུ་ཙམ་བྱིན་ནའང་ལས་དེས་དེ་འཁོར་ལོས་བསྒྱུར་བའི་རྒྱལ་སྲིད་དུ་མ་མྱོང་བར་འགྱུར་ན། བྱང་ཆུབ་སེམས་
དཔའ་ཀློག་པ་དང༌། ཁ་ཏོན་བྱེད་པ་ལ་མོས་པ་ལ་ལྟ་ཅི་སྨོས། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་དེ་དག་དང༌། ཉན་ཐོས་དེ་དག་དང༌། ལྷ་དང༌།
མི་དང༌། ལྷ་མ་ཡིན་དང༌། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ངེས་པ་དང༌། མ་ངེས་པར་འགྲོ་བའི་ཕྱག་
རྒྱ་ལ་འཇུག་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་པྲཛྙཱ་ཝརྨ་དང༌། སུ་རེནྡྲ་བོ་དྷི་དང༌། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་
པས་བསྒྱུར་ཅིང་ཞུས་ཏེ་གཏན་ལ་ཕབ་པ།།
Copyright © 2012 by the Asian Classics Input Project. All rights reserved.