Loading

འཕགས་པ་དེ་བཞིན་གཤེགས་པའི་སྙིང་པོ་ཞེས་བྱ་བ་ཐེག་པ་ཆེན་པོའི་མདོ།
མདོ་སྡེ།
not checked
༄༅༅། །རྒྱ་གར་སྐད་དུ། ཨཱཪྻ་ཏ་ཐཱ་ག་ཏ་གརྦྷ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་ པ་དེ་བཞིན་གཤེགས་པའི་སྙིང་པོ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་ སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ ལྡན་འདས་མངོན་པར་རྫོགས་པར་སངས་རྒྱས་ནས་ལོ་བཅུ་བཞེས་པ་དང་ཤིན་ཏུ་ཚ་བའི་དུས་ཀྱི་ཚེ་ ༄༅། །རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་རིན་པོ་ཆེའི་གདུགས་ཀྱི་ཁང་བཟང་ཙནྡན་གྱི་སྙིང་པོའི་ཁང་བ་ བརྩེགས་པ་ན་སློབ་པ་དང༌། མི་སློབ་པའི་ཉན་ཐོས་ཀྱི་དགེ་སློང་འབུམ་དུ་ཚང་བའི་དགེ་སློང་གི་དགེ་འདུན་ཆེན་པོ་ཕལ་ ཆེར་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་ བ༑ ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་ བ༑ བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་ རྣམ་པར་གྲོལ་བ། སེམས་ཐམས་ཅད་ཀྱི་དབང་གི་དམ་པའི་ཕ་རོལ་ཏུ་སོན་པ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་འོད་སྲུང་ཆེན་ པོ་དང༌། ཚེ་དང་ལྡན་པ་ལྟེང་རྒྱས་འོད་སྲུང་དང༌། ཚེ་དང་ལྡན་པ་ཆུ་ཀླུང་འོད་སྲུང་དང༌། ཚེ་དང་ལྡན་པ་གཱ་ཡཱ་འོད་སྲུང་དང༌། ཚེ་དང་ ལྡན་པ་ཀཱ་ཏྱྰྸི་བུ་ཆེན་པོ་དང༌། ཚེ་དང་ལྡན་པ་གསུས་པོ་ཆེ་དང༌། ཚེ་དང་ལྡན་པ་བ་ཀུ་ལ་དང༌། ཚེ་དང་ལྡན་པ་ནམ་གྲུ་དང༌། ཚེ་དང་ལྡན་ པ་རབ་འབྱོར་དང༌། ཚེ་དང་ལྡན་པ་བྱམས་མའི་བུ་གང་པོ་དང༌། ཚེ་དང་ལྡན་པ་ངག་དབང་དང༌། ཚེ་དང་ལྡན་པ་ཤཱ་རིའི་བུ་དང༌། ཚེ་དང་ ལྡན་པ་མཽངྒལ་གྱི་བུ་ཆེན་པོ་དང༌། ཚེ་དང་ལྡན་པ་ཅང་ཤེས་ཀཽ་ཌི་ནྱ་དང༌། ཚེ་དང་ལྡན་པ་འཆར་ཀ་དང༌། ཚེ་དང་ལྡན་པ་སྒྲ་གཅན་ཟིན་ དང༌། ཚེ་དང་ལྡན་པ་དགའ་བོ་དང༌། ཚེ་དང་ལྡན་པ་ཉེ་དགའ་དང༌། ཚེ་དང་ལྡན་པ་ཀུན་དགའ་བོ་དང༌། དེ་དག་ལ་སོགས་པ་དགེ་སློང་འབུམ་དུ་ ༄༅། །ཚང་བ་དང་ཐབས་ཅིག་ཏུ་བཞུགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཐ་དད་པ་ནས་ འདུས་པ་གངྒཱའི་ཀླུང་དྲུག་ཅུའི་བྱེ་མ་སྙེད་ཐམས་ཅད་ཀྱང་སྐྱེ་བ་གཅིག་གིས་ཐོགས་པ། མངོན་པར་ཤེས་པ་ཆེན་པོ་དང༌། སྟོབས་དང༌། མི་འཇིགས་པ་ཐོབ་པ། སངས་རྒྱས་བྱེ་བ་ཁྲག་ཁྲིག་འབུམ་ཕྲག་མང་པོ་ལ་བསྙེན་བཀུར་བྱས་པ། ཕྱིར་མི་ལྡོག་པའི་ཆོས་ཀྱི་འཁོར་ལོ་ རབ་ཏུ་བསྐོར་བ། གང་དག་གི་མིང་ཐོས་པ་ཙམ་གྱིས་འཇིག་རྟེན་གྱི་ཁམས་ཚད་མེད་གྲངས་མེད་པའི་སེམས་ཅན་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ ཆེན་པོ་ཆོས་ཀྱི་བློ་གྲོས་དང༌། སེངྒེའི་བློ་གྲོས་དང༌། སྟག་གི་བློ་གྲོས་དང༌། དོན་གྱི་བློ་གྲོས་དང༌། རིན་པོ་ཆེའི་བློ་གྲོས་དང༌། རབ་ མཆོག་བློ་གྲོས་དང༌། ཟླ་འོད་དང༌། རིན་ཆེན་ཟླ་འོད་དང༌། ཟླ་བ་ཉ་བའི་འོད་དང༌། རྣམ་པར་གནོན་པ་ཆེན་པོ་དང༌། རྣམ་པར་གནོན་པ་དཔག་མེད་པ་དང༌། རྣམ་པར་གནོན་པ་ མཐའ་ཡས་དང༌། འཇིག་རྟེན་གསུམ་རྣམ་པར་གནོན་པ་དང༌། མི་གཡོ་བའི་གནས་རྣམ་པར་གནོན་པ་དང༌། མཐུ་ཆེན་ཐོབ་དང༌། སྤྱན་རས་གཟིགས་དབང་ཕྱུག་དང༌། སྤོས་ཀྱི་གླང་པོ་དང༌། སྤོས་དགའ་དང༌། སྤོས་དགའི་དཔལ་དང༌། དཔལ་གྱི་སྙིང་པོ་དང༌། ཉི་མའི་སྙིང་པོ་དང༌། ཏོག་དང༌། ཏོག་ཆེན་པོ་དང༌། ཏོག་དྲི་མ་མེད་པ་དང༌། རིན་ཆེན་ མཐའ་ཡས་དབྱུག་གུ་དང༌། རིན་ཆེན་དབྱུག་གུ་འདོར་དང༌། རིན་ཆེན་དྲི་མེད་དབྱུག་གུ་དང༌། མཆོག་ཏུ་དགའ་བའི་རྒྱལ་པོ་དང༌། རྟག་ཏུ་རབ་དགའ་དང༌། ལག་ན་རིན་པོ་ཆེ་ དང༌། ནམ་མཁའ་མཛོད་དང༌། རི་བོ་དང༌། རི་རབ་དང༌། རི་བོ་ཆེན་པོ་དང༌། ཡོན་ཏན་རིན་ཆེན་སྣང་དང༌། གཟུངས་ཀྱི་དབང་ཕྱུག་གི་རྒྱལ་པོ་དང༌། ས་འཛིན་དང༌། སེམས་ཅན་ ཐམས་ཅད་ཀྱི་ནད་སེལ་དང༌། རབ་ཏུ་ཡིད་དགའ་དང༌། ཡིད་སྐྱོ་དང༌། སྐྱོ་མེད་དང༌། འོད་བྱེད་དང༌། ཙནྡན་དང༌། གཡོ་བཟློག་དང༌། དཔག་མེད་མངོན་བསྒྲགས་དབྱངས་དང༌། བྱང་ཆུབ་ཀུན་ནས་བསླང་དང༌། མཐོང་བ་དོན་ཡོད་དང༌། ཆོས་ཐམས་ཅད་ལ་དབང་བསྒྱུར་བ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང༌། འཇམ་དཔལ་ ༄༅། །གཞོན་ནུར་གྱུར་པ་དང༌། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་གངྒཱའི་ཀླུང་དྲུག་ཅུའི་བྱེ་མ་སྙེད་དང་ཡང་ཐབས་ཅིག་གོ །ལྷ་ དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་དཔག་ཏུ་མེད་པ་དང་ ཡང་ཐབས་ཅིག་གོ །དེ་ནས་བཅོམ་ལྡན་འདས་འཁོར་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ཏེ་རྒྱལ་པོ་དང༌། བློན་པོ་ཆེན་པོ་དང༌། ཚོང་དཔོན་ དང༌། ཁྱིམ་བདག་དང༌། བློན་པོ་དང༌། གྲོང་རྡལ་བ་དང༌། ཡུལ་གྱི་མི་རྣམས་ཀྱིས་བསྟི་སྟང་དུ་བྱས། བླ་མར་བྱས། རིམ་གྲོ་བྱས་ཤིང་མཆོད་དོ། །དེའི་ཚེ་བཅོམ་ ལྡན་འདས་བཤོས་གསོལ་བའི་འོག་ཏུ་ཙནྡན་གྱི་སྙིང་པོའི་ཁང་བ་བརྩེགས་པ་དེ་ཉིད་ཀྱི་ནང་དུ་ཡང་དག་འཇོག་ལ་ཞུགས་པར་གྱུར་ཏོ། །དེ་ནས་སངས་རྒྱས་ཀྱི་མཐུས་ ཙནྡན་གྱི་སྙིང་པོའི་ཁང་པ་བརྩེགས་པ་དེ་ལས་པདྨ་འདབ་མ་བྱེ་བ་ཁྲག་ཁྲིག་ཕྲག་འབུམ་ཡོད་པ། ཚད་ཤིང་རྟའི་ཕང་ལོ་ཙམ་པ། ཁ་དོག་དང་ལྡན་པ། ཁ་མ་བྱེ་བ་བྱེ་ བ་ཁྲག་ཁྲིག་ཕྲག་འབུམ་བྱུང་བར་གྱུར་ཏེ། དེ་དག་སྟེང་གི་ནམ་མཁའ་བར་སྣང་ལ་མངོན་པར་འཕགས་ནས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་འདི་ཁེབས་ པར་གྱུར་ཏེ། འདི་ལྟ་སྟེ། དཔེར་ན། རིན་པོ་ཆེའི་བླ་རེ་བཞིན་དུ་ཀུན་ཏུ་གནས་པར་གྱུར་ཏོ། །པདྨའི་སྙིང་པོ་རེ་རེ་ལའང་དེ་བཞིན་གཤེགས་པའི་སྐུ་སྐྱིལ་མོ་ཀྲུང་བཅས་ཏེ་བཞུགས་ ཤིང་འོད་ཟེར་འབུམ་དག་རབ་ཏུ་འགྱེད་པར་ཀུན་ཏུ་སྣང་ལ། པདྨ་དེ་དག་ཐམས་ཅད་ཀྱང་ཤིན་ཏུ་ཁ་བྱེ་བར་གྱུར་ཏོ། །དེ་ནས་སངས་རྒྱས་ཀྱི་བྱིན་གྱི་རླབས་ཀྱིས་པདྨ་དེ་དག་གི་ འདབ་མ་དེ་དག་ཐམས་ཅད་ཀྱང་མོག་མོག་པོ་དང༌། ནོག་ནོག་པོ་དང༌། དྲི་ང་བ་དང༌། སྨད་པར་འོས་པ་དང༌། མངོན་པར་དགའ་བར་འགྱུར་བ་མ་ཡིན་པར་གྱུར་ཏོ། །འོན་ཀྱང་ པདྨའི་སྙིང་པོ་དེ་དག་ལ་དེ་བཞིན་གཤེགས་པའི་སྐུ་རྣམས་སྐྱིལ་མོ་ཀྲུང་བཅས་ཏེ་བཞུགས་ཤིང་འོད་ཟེར་འབུམ་དག་རབ་ཏུ་འགྱེད་པར་ཀུན་ཏུ་སྣང་ངོ༌། །དེ་བཞིན་གཤེགས་ པའི་སྐུ་པདྨའི་སྙིང་པོ་ལ་བཞུགས་པ་དེ་དག་གིས་ཀྱང་ཐམས་ཅད་དང་ལྡན་པའི་སངས་རྒྱས་ཀྱི་ཞིང་འདི་ཁྱབ་པར་གྱུར་ཏེ། དེའི་ཚེ་སངས་རྒྱས་ཀྱི་ཞིང་འདི་ཤིན་ཏུ་མཛེས་པར་ གྱུར་ཏོ༑ ༑དེ་ནས་དེའི་ཚེ་བྱང་ཆུབ་སེམས་དཔའི་ཚོགས་ཐམས་ཅད་དང༌། འཁོར་བཞིའང་ཤིན་ཏུ་ངོ་མཚར་དུ་གྱུར་ཅིང་དགའ་བར་གྱུར་ཏོ། །བཅོམ་ལྡན་འདས་ཀྱི་རྫུ་འཕྲུལ་ མངོན་པར་འདུ་མཛད་པ་དེ་མཐོང་ནས་ཐེ་ཚོམ་དུ་གྱུར་ཏེ། གང་པདྨ་བྱེ་བ་ཁྲག་ཁྲིག་ཕྲག་འབུམ་འདི་དག་གི་འདབ་མ་རྣམས་འདི་ལྟར་ཁ་དོག་ངན་ཅིང་ཆུ་བ་རྣམས་ཀྱང་ ༄༅། །ཁ་དོག་ངན་ལ་སྨད་པའི་འོས་སུ་གྱུར་ཏེ། མངོན་པར་དགའ་བར་འགྱུར་བ་མ་ཡིན་པ་དང༌། པདྨའི་སྙིང་པོ་དེ་དག་ལའང་དེ་བཞིན་གཤེགས་པའི་སྐུ་རེ་རེ་ སྐྱིལ་མོ་ཀྲུང་བཅས་ཏེ་བཞུགས་ཤིང་འོད་ཟེར་འབུམ་དག་རབ་ཏུ་འགྱེད་པས་ཤིན་ཏུ་མཛེས་པར་ཀུན་ཏུ་སྣང་བ་འདིའི་རྒྱུ་ནི། གང་ཡིན། རྐྱེན་ནི། གང་ཡིན་སྙམ་མོ། །དེ་ ནས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དང༌། འཁོར་བཞི་པོ་ཐེ་ཚོམ་དུ་གྱུར་པ་རྣམས་འདོང་བར་བྱ་བའི་མཚན་མ་བྱས་སོ། །དེའི་ཚེ་ཙནྡན་གྱི་སྙིང་པོ་ ཁང་པ་བརྩེགས་པ་དེར་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་བློ་གྲོས་ཞེས་བྱ་བ་འདུས་པར་གྱུར་ཏེ་འདུག་གོ །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ སེམས་དཔའ་ཆེན་པོ་རྡོ་རྗེའི་བློ་གྲོས་ལ་བཀའ་སྩལ་པ། རིགས་ཀྱི་བུ། ཁྱོད་ཀྱིས་ཆོས་ཅན་གྱི་གཏམ་ལས་བརྩམས་ཏེ་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་ལ་ཡོངས་སུ་ཞུ་བར་སྤོབས་པར་གྱིས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་བློ་གྲོས་བཅོམ་ལྡན་འདས་ ཀྱིས་གནང་བས་ལྷ་དང༌། མི་དང༌། ལྷ་མ་ཡིན་དང་བཅས་པའི་འཇིག་རྟེན་དང༌། བྱང་ཆུབ་སེམས་དཔའ་ཐམས་ཅད་དང༌། འཁོར་བཞི་པོ་དག་གི་ཐེ་ཚོམ་གྱི་ཟུག་རྡུ་རིག་ ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་གྱི་ཁམས་འདི་ཐམས་ཅད་པདྨ་ཁ་དོག་ངན་ཅིང་དྲི་མི་བདའ་བ་འདི་ལྟ་བུ་བྱེ་བ་ཁྲག་ཁྲིག་ ཕྲག་འབུམ་འདི་དག་གིས་ཁེབས་པ་དང༌། དེ་དག་གི་དབུས་ནའང་དེ་བཞིན་གཤེགས་པའི་སྐུ་སྐྱིལ་མོ་ཀྲུང་བཅས་ཤིང་བཞུགས་ཏེ་འོད་ཟེར་འབུམ་དག་རབ་ཏུ་འགྱེད་པར་ཀུན་ཏུ་ གདའ་བ་དང༌། དེ་བཞིན་གཤེགས་པའི་སྐུ་དེ་དག་མཐོང་ནས་ཀྱང་སྲོག་ཆགས་བྱེ་བ་ཁྲག་ཁྲིག་ཕྲག་འབུམ་ཐལ་མོ་སྦྱར་ཏེ་ཕྱག་འཚལ་བའི་རྒྱུ་ནི། གང་ལགས། རྐྱེན་ནི། གང་ ལགས༑ དེ་ནས་དེའི་ཚེ་བྱང་ཆུབ་སེམས་དཔའི་རྡོ་རྗེའི་བློ་གྲོས་ཀྱིས་ཚིགས་སུ་བཅད་པ་འདི་དག་གསོལ་ཏོ། །སངས་རྒྱས་སྟོང་ཕྲག་བྱེ་བ་མི་གཡོ་བར། །པདྨ་དག་གི་དབུས་ན་ བཞུགས་པར་ནི། །ཁྱོད་ཀྱིས་འདི་འདྲའི་རྫུ་འཕྲུལ་སྟོན་མཛད་པ། །བདག་གིས་སྔོན་ཆད་ནམ་ཡང་འདི་མ་མཐོང༌། །འོད་ཟེར་སྟོང་རྣམས་རབ་ཏུ་འགྱེད་མཛད་ཅིང༌། །སངས་ རྒྱས་ཞིང་འདི་ཐམས་ཅད་ཁེངས་པར་མཛད། །ངོ་མཚར་ཆོས་ཀྱི་རྣམས་ལ་རོལ་མཛད་པའི། །འདྲེན་པ་རྣམས་ཀྱིས་བར་ཆད་མ་མཆིས་མཛོད། །འདབ་མ་དག་དང་ཆུ་བ་སྨད་འོས་ ལ༑ ༑ཁ་དོག་ངན་པའི་པདྨ་རྣམས་དབུས་དེར། །དེ་དག་རིན་ཆེན་རང་བཞིན་འདྲར་བཞུགས་པ། །ཅི་ཡི་སླད་དུ་རྫུ་འཕྲུལ་འདི་དག་སྤྲུལ། །བདག་གིས་སངས་རྒྱས་གངྒཱའི་བྱེ་ ༄༅། །སྙེད་མཐོང༌། །དེ་ཡི་རྫུ་འཕྲུལ་ཁྱད་འཕགས་བདག་མཐོང་སྟེ། །དེ་རིང་དགའ་བའི་རྣམ་སྤྲུལ་ཅི་འདྲ་བ། །སྔོན་ཆད་ནམ་ཡང་འདི་འདྲ་འདི་མ་མཐོང༌། ། རྐང་གཉིས་གཙོ་བོ་ལྷས་ནི་བསྟན་དུ་གསོལ། །རྒྱུ་གང་རྐྱེན་གང་ལགས་པ་བཤད་དུ་གསོལ། །འཇིག་རྟེན་དོན་མཛད་ཐུགས་བརྩེ་གསུང་དུ་གསོལ། །ལུས་ཅན་ཀུན་གྱི་ ཐེ་ཚོམ་དགུམ་དུ་གསོལ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་བློ་གྲོས་ལ་སོགས་པ་ཐམས་ཅད་དང་ལྡན་པའི་བྱང་ཆུབ་ སེམས་དཔའི་ཚོགས་ལ་བཀའ་སྩལ་པ། རིགས་ཀྱི་བུ་དག །དེ་བཞིན་གཤེགས་པའི་སྙིང་པོ་ཞེས་བྱ་བའི་མདོ་ཤིན་ཏུ་རྒྱས་པ་ཡོད་དེ། དེ་རབ་ཏུ་བསྟན་པའི་ཕྱིར་དེ་བཞིན་ གཤེགས་པས་སྣང་བའི་མཚན་མ་འདི་ལྟ་བུ་འདི་བྱས་སོ། །དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་བཤད་དོ། །བྱང་ཆུབ་སེམས་དཔའ་སེམས་ དཔའ་ཆེན་པོ་རྡོ་རྗེའི་བློ་གྲོས་དང༌། ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེས་བཅོམ་ལྡན་འདས་ལ་ལེགས་སོ་ལེགས་སོ། །ཞེས་གསོལ་ཏེ་བཅོམ་ལྡན་ འདས་ཀྱི་ལྟར་ཉན་པ་དང༌། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག །ཇི་ལྟར་དེ་བཞིན་གཤེགས་པས་སྤྲུལ་པའི་པདྨ་ཁ་དོག་ངན་པ། དྲི་ ང་བ༑ སྨད་པར་འོས་པ། མངོན་པར་དགའ་བར་འགྱུར་པ་མ་ཡིན་པ་འདི་དག་དང༌། དེ་བཞིན་གཤེགས་པའི་གཟུགས་མཛེས་པ། གཟུགས་བཟང་བ། བལྟ་ན་སྡུག་པ་དག་པདྨའི་ སྙིང་པོ་འདི་དག་ལ་སྐྱིལ་མོ་ཀྲུང་བཅས་ཤིང་འཁོད་དེ། འོད་ཟེར་འབུམ་དག་རབ་ཏུ་འགྱེད་ཅིང་འཁོད་པ་དེ་དག་ཀྱང་རིག་ནས་ལྷ་དང༌། མི་རྣམས་ཕྱག་འཚལ་ཞིང་མཆོད་པའི་ ལས་ཀྱང་བྱེད་པ་དེ་བཞིན་དུ་རིགས་ཀྱི་བུ་དག། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཀྱང་རང་གི་ཤེས་རབ་དང༌། ཡེ་ཤེས་དང༌། དེ་ བཞིན་གཤེགས་པའི་མིག་གིས་སེམས་ཅན་སྲོག་ཆགས་སུ་གྱུར་པ། འདོད་ཆགས་དང༌། ཞེ་སྡང་དང༌། གཏི་མུག་དང༌། སྲེད་པ་དང༌། མ་རིག་པའི་ཉོན་མོངས་པ་བྱེ་བ་ཕྲག་ འབུམ་གྱི་སྤུབས་སུ་གྱུར་པ་ཐམས་ཅད་དང༌། རིགས་ཀྱི་བུ་དག །སེམས་ཅན་ཉོན་མོངས་པའི་སྦུབས་སུ་གྱུར་པ་དེ་དག་གི་ནང་ན་ང་འདྲ་བར་ཡེ་ཤེས་དང་ལྡན་པ། མིག་དང་ལྡན་ བའི་དེ་བཞིན་གཤེགས་པ་མང་པོ་འཁོད་ཅིང་སྐྱིལ་མོ་ཀྲུང་བཅས་ནས་མི་གཡོ་བར་འཁོད་པ་མཐོང་སྟེ། ཉོན་མོངས་པ་ཐམས་ཅད་ཀྱིས་ཉོན་མོངས་པ་ཅན་དུ་གྱུར་པ་དེ་དག་གི་ ནང་ན་དེ་བཞིན་གཤེགས་པའི་ཆོས་ཉིད་མི་གཡོ་ཞིང་སྲིད་པའི་འགྲོ་བ་ཐམས་ཅད་ཀྱིས་མ་གོས་པ་དག་མཐོང་ནས་དེ་བཞིན་གཤེགས་པ་དེ་དག་ནི། ང་དང་འདྲའོ། །ཞེས་སྨྲའོ། ། ༄༅། །རིགས་ཀྱི་བུ་དག །དེ་བཞིན་གཤེགས་པའི་མིག་ནི། དེ་ལྟར་མཛེས་པ་ཡིན་ཏེ། དེ་བཞིན་གཤེགས་པའི་མིག་དེས་སེམས་ཅན་ཐམས་ཅད་དེ་བཞིན་གཤེགས་ པའི་སྙིང་པོ་ཅན་དུ་མཐོང་ངོ༌། །རིགས་ཀྱི་བུ་དག །འདི་ལྟ་སྟེ། དཔེར་ན། སྐྱེས་བུ་ལྷའི་མིག་ཅན་ལ་ལ་ཞིག་གིས་ལྷའི་མིག་གིས་འདི་ལྟར་ཁ་དོག་ངན་ཅིང་འདི་ལྟར་དྲི་ང་བའི་པདྨ་ ཁ་མ་བྱེ་ཞིང་མ་གྱེས་པ་དག་ལ་བལྟས་ཏེ། དེའི་དབུས་ན་པདྨའི་སྙིང་པོ་ལ་དེ་བཞིན་གཤེགས་པ་སྐྱིལ་མོ་ཀྲུང་བཅས་ཤིང་འདུག་པར་རིག་ནས་དེ་བཞིན་གཤེགས་པའི་གཟུགས་ བལྟ་བར་འདོད་དེ་དེ་བཞིན་གཤེགས་པའི་གཟུགས་དེ་ཡང་དག་པར་སྦྱང་བའི་ཕྱིར་པདྨའི་འདབ་མ་ཁ་དོག་ངན་ཅིང་དྲི་ང་བ་སྨད་པར་འོས་པ་དེ་དག་འབྱེད་ཅིང་སེལ་བ་དེ་བཞིན་ དུ་རིགས་ཀྱི་བུ་དག །དེ་བཞིན་གཤེགས་པས་ཀྱང་སངས་རྒྱས་ཀྱི་མིག་གིས་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོར་མཐོང་ནས་སེམས་ཅན་དེ་དག་གི་འདོད་ ཆགས་དང༌། ཞེ་སྡང་དང༌། གཏི་མུག་དང༌། སྲིད་པ་དང༌། མ་རིག་པའི་ཉོན་མོངས་པའི་སྦུབས་དབྱེ་བའི་ཕྱིར་ཆོས་སྟོན་ཏེ། དེ་སྒྲུབ་པའི་དེ་བཞིན་གཤེགས་པ་རྣམས་ནི། ཡང་ དག་པ་ཉིད་དུ་གནས་སོ། །རིགས་ཀྱི་བུ་དག །འདི་ནི། ཆོས་རྣམས་ཀྱི་ཆོས་ཉིད་དེ། དེ་བཞིན་གཤེགས་པ་རྣམས་བྱུང་ཡང་རུང༌། མ་བྱུང་ཡང་རུང༌། སེམས་ཅན་འདི་ དག་ནི། རྟག་ཏུ་དེ་བཞིན་གཤེགས་པའི་སྙིང་པོ་ཅན་ཡིན་ན། རིགས་ཀྱི་བུ་དག །སྨད་པར་འོས་པའི་ཉོན་མོངས་པའི་སྦུབས་རྣམས་ཀྱིས་གཡོགས་པས། དེ་དག་གི་ཉོན་ མོངས་པའི་སྤུབས་གཞིག་པ་དང༌། དེ་བཞིན་གཤེགས་པའི་ཡེ་ཤེས་ཀྱང་ཡོངས་སུ་སྦྱང་བའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་བྱང་ཆུབ་སེམས་དཔའ་རྣམས་ལ་ཆོས་སྟོན་ཏེ། བྱ་བ་འདི་ལའང་མོས་པར་བྱེད་དོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དེ་དག་ལ་མངོན་པར་བརྩོན་ པར་གནས་པ་དེ་དག་གང་གི་ཚེ་ཉོན་མོངས་པ་དང༌། ཉེ་བའི་ཉོན་མོངས་པ་ཐམས་ཅད་ལས་ཡོངས་སུ་གྲོལ་བར་གྱུར་པ་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་ཞེས་བྱ་བའི་གྲངས་སུ་འགྲོ་སྟེ། དེ་བཞིན་གཤེགས་པའི་བྱ་བ་ཐམས་ཅད་ཀྱང་བྱེད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་ སུ་བཅད་པ་འདི་དག་བཀའ་སྩལ་ཏོ། །ཇི་ལྟར་པདྨ་སྨད་པར་འོས་གྱུར་པ། །དེ་ཡི་འདབ་མ་སྤུབས་གྱུར་མ་གྱེས་ལ། །དེ་བཞིན་གཤེགས་པའི་སྙིང་པོ་མ་གོས་དེ། །མི་ འགའ་ལ་ལས་ལྷ་ཡི་མིག་གིས་མཐོང༌། །དེ་ནི་དེ་ཡི་འདབ་མ་འབྱེད་པ་ན། །དབུས་ན་རྒྱལ་བའི་ལུས་ནི་མཐོང་གྱུར་ནས། །རྒྱལ་བ་ཉེ་བའི་ཉོན་མོངས་ཕྱིས་མི་འགྱུར། །དེ་ནི་འཇིག་ ༄༅། །རྟེན་ཀུན་ཏུ་རྒྱལ་བར་འགྱུར། །དེ་བཞིན་ངས་ཀྱང་སྲོག་ཆགས་ཐམས་ཅད་ཀྱི། །དཀྱིལ་དེར་གནས་པའི་རྒྱལ་བ་རྣམས་ཀྱི་ལུས། །ཇི་ལྟར་སྨད་འོས་པདྨའི་སྦུབས་ འདྲ་བའི། །ཉོན་མོངས་སྟོང་ཕྲག་བྱེ་བས་ཁེབས་པར་མཐོང༌། །ང་ཡང་དེ་དག་གིས་ནི་གསལ་བའི་ཕྱིར། །མཁས་པ་རྣམས་ལ་རྟག་ཏུ་ཆོས་སྟོན་ཏོ། །སེམས་ཅན་འདི་དག་སངས་ རྒྱས་འགྱུར་བྱ་ཞེས། །རྒྱལ་བའི་ཕྱིར་ནི་ཉོན་མོངས་རྣམ་པར་སྦྱོང༌། །ང་ཡི་སངས་རྒྱས་མིག་ནི་དེ་འདྲ་སྟེ། །དེ་ཡི་རྒྱལ་བའི་ལུས་སུ་གནས་པ་ཡི། །སེམས་ཅན་འདི་དག་ཐམས་ཅད་ མཐོང་གྱུར་ཏེ། །དེ་དག་རྣམ་པར་སྦྱང་ཕྱིར་ཆོས་སྨྲའོ། །རིགས་ཀྱི་བུ་དག །གཞན་ཡང་འདི་ལྟ་སྟེ། དཔེར་ན། སྦྲང་ཚང་ཟླུམ་པོ་ཤིང་གི་ཡལ་ག་ལ་འཕྱང་བ། བུང་བ་འབུམ་ གྱིས་ཀུན་ཏུ་བསྲུངས་ཤིང་སྦྲང་རྩིས་ཡོངས་སུ་གང་བ་ཞིག་ཡོད་ལ། དེ་ནས་སྦྲང་རྩི་འདོད་པའི་མི་ཞིག་གིས་སྲོག་ཆགས་ཀྱི་རྣམ་པ་བུང་བ་དེ་དག་ཐབས་མཁས་པས་བསྐྲད་ ན༑ སྦྲང་རྩི་དེས་སྦྲང་རྩིའི་བྱ་བ་བྱེད་དོ། །རིགས་ཀྱི་བུ་དག །དེ་བཞིན་དུ་སེམས་ཅན་ཐམས་ཅད་ཀྱང་སྦྲང་ཚང་དང་འདྲ་སྟེ། དེ་ལ་སངས་རྒྱས་ཉིད་ཉོན་མོངས་པ་དང༌། ཉེ་བའི་ཉོན་ མོངས་པ་བྱེ་བ་ཕྲག་འབུམ་གྱིས་ཀུན་ཏུ་བསྲུངས་པ་དེ་བཞིན་གཤེགས་པའི་ཡེ་ཤེས་མཐོང་བས་རིག་གོ། རིགས་ཀྱི་བུ་དག། ཇི་ལྟར་སྦྲང་ཚང་གི་ནང་ན་སྦྲང་རྩི་བུང་བ་བྱེ་ བ་ཕྲག་འབུམ་གྱིས་ཀུན་ཏུ་བསྲུངས་པ་ཡོད་པར་སྐྱེས་བུ་མཁས་པ་ཞིག་གིས་ཤེས་པར་རིག་པ་དེ་བཞིན་དུ་སེམས་ཅན་ཐམས་ཅད་ལའང་སངས་རྒྱས་ཉིད་ཉོན་མོངས་པ་དང༌། ཉེ་ བའི་ཉོན་མོངས་པ་བྱེ་བ་ཕྲག་འབུམ་གྱིས་ཀུན་ཏུ་བསྲུངས་པ་ཡོད་པར་དེ་བཞིན་གཤེགས་པའི་ཡེ་ཤེས་མཐོང་བས་རིག་སྟེ། རིགས་ཀྱི་བུ་དག །དེ་ལ་དེ་བཞིན་གཤེགས་པའང་ ཐབས་ལ་མཁས་པས་ལུང་བ་བསལ་བ་དེ་བཞིན་དུ་སེམས་ཅན་དེ་དག་གི་འདོད་ཆགས་དང༌། ཞེ་སྡང་དང༌། གཏི་མུག་དང༌། ང་རྒྱལ་དང༌། རྒྱགས་པ་དང༌། འཆབ་པ་དང༌། ཁྲོ་བ་ དང༌། གནོད་སེམས་དང༌། ཕྲག་དོག་དང༌། སེར་སྣ་ལ་སོགས་པའི་ཉོན་མོངས་པ་དང༌། ཉེ་བའི་ཉོན་མོངས་པ་རྣམས་བསལ་ནས་ཇི་ལྟར་སེམས་ཅན་དེ་དག་ལའང་ཉོན་མོངས་པ་ དང༌། ཉེ་བའི་ཉོན་མོངས་པ་དེ་དག་གིས་ཉེ་བའི་ཉོན་མོངས་པ་ཅན་དུ་མི་འགྱུར་བ་དང༌། གནོད་པར་མི་འགྱུར་བ་དེ་ལྟ་དེ་ལྟར་ཆོས་སྟོན་ཏོ། །དེ་བཞིན་གཤེགས་པའི་ཡེ་ཤེས་ མཐོང་བ་དེ་རྣམ་པར་སྦྱངས་ནས་འཇིག་རྟེན་ན་དེ་བཞིན་གཤེགས་པའི་བྱ་བ་བྱེད་དེ། རིགས་ཀྱི་བུ་དག །ངའི་དེ་བཞིན་གཤེགས་པའི་མིག་ཡོངས་སུ་དག་པ་དེས་ངས་སེམས་ཅན་ ཐམས་ཅད་དེ་ལྟར་མཐོང་ངོ༌། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །ཇི་ལྟར་འདི་ན་སྦྲང་ཚང་ཡོད་པ་ལ། །བུང་བས་ཀུན་ཏུ་བསྲུངས་ ༄༅། །ཤིང་སྦས་གྱུར་པ། །མི་གང་སྦྲང་རྩི་འདོད་པས་དེ་མཐོང་ནས། །དེ་ནི་བུང་བ་རབ་ཏུ་སྐྲོད་པར་བྱེད། །དེ་བཞིན་འདིར་ཡང་སྦྲང་ཚང་ལྟ་བུ་ནི། །སྲིད་པ་གསུམ་ གྱི་སེམས་ཅན་ཐམས་ཅད་དོ། །དེ་དག་ཉོན་མོངས་བྱེ་བ་མང་བ་སྟེ། །ཉོན་མོངས་དབུས་ན་དེ་བཞིན་གཤེགས་འདུག་མཐོང༌། །ང་ཡང་སངས་རྒྱས་རྣམ་པར་སྦྱང་དོན་དུ། །བུང་ བ་སྐྲོད་པ་ལྟ་བུར་ཉོན་མོངས་སེལ། །གང་གིས་ཉོན་མོངས་བྱེ་བས་གནོད་འགྱུར་བ། །ཆོས་རྣམས་འདིར་ནི་ཐབས་ཀྱིས་རབ་སྟོན་ཏེ། །དེ་དག་ཇི་ལྟར་དེ་བཞིན་གཤེགས་ གྱུར་ལ༑ ༑འཇིག་རྟེན་ཀུན་ཏུ་རྟག་ཏུ་བྱ་བྱེད་ཅིང༌། །སྤོབས་ལྡན་ཇི་ལྟར་སྦྲང་མའི་སྦྲང་རྩི་ཡི། །སྣོད་འདྲའི་ཆོས་སྟོན་འགྱུར་བར་བྱ་ཕྱིར་རོ། །རིགས་ཀྱི་བུ་དག །གཞན་ ཡང་འདི་ལྟ་སྟེ། དཔེར་ན། འབྲས་སཱ་ལུའམ། ནས་སམ། ཅི་ཙིའམ། འབྲུ་རྣམས་ནི། སྙིང་པོ་ཕུབ་མ་ནས་ཡོངས་སུ་བསྲུངས་པ་ཡིན་ཏེ། དེ་རང་གི་ཕུབ་མ་ནས་མ་ཕྱུང་གི་ བར་དུ་བཟའ་བ་དང༌། བཅའ་བ་དང༌། མྱང་བའི་བྱ་བ་མི་བྱེད་ཀྱི། རིགས་ཀྱི་བུ་དག །སྐྱེས་བ་དང༌། བུད་མེད་གང་དག་བཟའ་བ་དང༌། བཅའ་བ་ལ་སོགས་པ་ཟས་སྐོམ་གྱི་ བྱ་བ་འདོད་པ་དེ་དག་གིས་བརྡུངས་ཤིང་བརྡུངས་ཏེ་ཕུབ་མའི་སྦུབས་དང་ཕྱི་ཤུན་སེལ་ཏོ། །རིགས་ཀྱི་བུ་དག །དེ་བཞིན་དུ་དེ་བཞིན་གཤེགས་པའང་དེ་བཞིན་གཤེགས་ པའི་སྤྱན་གྱིས་སེམས་ཅན་ཐམས་ཅད་ལ་དེ་བཞིན་གཤེགས་པ་ཉིད། སངས་རྒྱས་ཉིད། རང་བྱུང་ཉིད་ཉོན་མོངས་པའི་སྦུབས་ཀྱི་ཤུན་པས་དཀྲིས་ཤིང་གནས་པར་མཐོང་ངོ༌། ། རིགས་ཀྱི་བུ་དག །དེ་ལ་དེ་བཞིན་གཤེགས་པའང་ཉོན་མོངས་པའི་སྦུབས་ཀྱི་ཤུན་པ་བསལ་བ་དང༌། དེ་བཞིན་གཤེགས་པ་ཉིད་ཡོངས་སུ་སྦྱང་བ་དང༌། སེམས་ཅན་འདི་དག་ ཇི་ལྟར་ཉོན་མོངས་པའི་སྦུབས་ཀྱི་ཤུན་པ་ཐམས་ཅད་ལས་གྲོལ་ཏེ་འཇིག་རྟེན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བའི་གྲངས་ སུ་འགྲོ་བར་འགྱུར་སྙམ་ནས་སེམས་ཅན་རྣམས་ལ་ཆོས་སྟོན་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །ཇི་ལྟར་འབྲུའམ་སཱ་ ལུའི་འབྲས་ཀྱང་རུང༌། །ཅི་ཙེ་འམ་ནི་འོན་ཏེ་ནས་ཀྱང་རུང༌། །ཇི་སྲིད་བར་དུ་དེ་དག་ཕུབ་བཅས་པ། །དེ་སྲིད་བར་དུ་བྱ་བ་མི་བྱེད་དེ། །དེ་དག་གིས་ནི་བརྡུངས་ནས་ཕུབ་བསལ་ན། ། བྱ་བ་རྣམ་པ་མང་པོ་དག་ཀྱང་བྱེད། །སྙིང་པོ་ཕུབ་མ་ལྡན་པ་དེ་དག་ནི། །སེམས་ཅན་རྣམས་ལ་བྱ་བ་མི་བྱེད་དོ། །དེ་བཞིན་སེམས་ཅན་ཀུན་གྱི་སངས་རྒྱས་ས། །ཉོན་མོངས་རྣམས་ ཀྱིས་ཁེབས་པར་ངས་མཐོང་ནས། །ངས་ནི་དེ་དག་རྣམ་པར་སྦྱང་བ་དང༌། །སངས་རྒྱས་མྱུར་ཐོབ་བྱ་ཕྱིར་ཆོས་སྟོན་ཏོ། །སེམས་ཅན་ཀུན་ལ་ང་འདྲའི་ཆོས་ཉིད་ནི། །ཉོན་མོངས་ ༄༅། །བརྒྱ་ཡིས་དཀྲིས་ནས་གང་ཡོད་པ། །དེ་ནི་རྣམ་སྦྱང་ཐམས་ཅད་ཇི་ལྟ་བུར། །རྒྱལ་བར་མྱུར་འགྱུར་བྱ་ཕྱིར་ཆོས་སྟོན་ཏོ། །རིགས་ཀྱི་བུ་དག །གཞན་ཡང་ འདི་ལྟ་སྟེ་དཔེར་ན། རུལ་བ་དང༌། ཉལ་ཉིལ་གྱི་གནས་བཤང་གཅི་དྲི་མི་ཞིམ་པས་ཀུན་ཏུ་གང་བ་ཞིག་ཏུ་མི་གཞན་གསེབ་ལམ་ནས་སོང་བ་ཞིག་གི་གསེར་གྱི་གར་བུ་ཟླུམ་ པོ་ཞིག་ལྷུང་བར་གྱུར་ལ། །བཤང་གཅི་དྲི་ང་བས་ཀུན་ཏུ་གང་བ། རུལ་བ་དང༌། ཉལ་ཉིལ་གྱི་གནས་དེར་མི་གཙང་བ་གཞན་དང་གཞན་གྱིས་བསྣན་པས་བལྟར་མི་སྣང་བར་ གྱུར་ཅིང༌། དེར་དེས་ལོ་བཅུའམ། ཉི་ཤུའམ། སུམ་ཅུའམ། བཞི་བཅུའམ། ལོ་ལྔ་བཅུའམ། ལོ་བརྒྱའམ། ལོ་སྟོང་དུ་མི་གཙང་བས་ཆུད་མི་ཟ་བའི་ཆོས་ཅན་དེ་སེམས་ཅན་ གང་ལའང་ཕན་པར་མི་བྱེད་དོ། །རིགས་ཀྱི་བུ་དག། དེ་ནས་ལྷས་ལྷའི་མིག་གིས་གསེར་གྱི་གར་བུ་ཟླུམ་པོ་དེ་ལ་བལྟས་ནས་མི་ཞིག་ལ་ཀྱེ་མི་ཁྱོད་སོང་ལ་འདི་ནི། རིན་པོ་ ཆེའི་མཆོག་གསེར་རུལ་པ་དང༌། ཉལ་ཉིལ་གྱི་རྣམ་པས་ནོན་པ་དེ་བྱི་དོར་གྱིས་ལ། གསེར་གྱི་བྱ་བ་གྱིས་ཤིག་ཅེས་བསྒོ་ན། རིགས་ཀྱི་བུ་དག། རུལ་པ་དང༌། ཉལ་ཉིལ་གྱི་ རྣམ་པ་ཞེས་བྱ་བ་དེ་ནི། ཉོན་མོངས་པ་རྣམ་པ་སྣ་ཚོགས་ཀྱི་ཚིག་བླ་དྭགས་སོ། །གསེར་གྱི་གར་བུ་ཞེས་བྱ་བ་དེ་ནི། ཆུད་མི་ཟ་བའི་ཆོས་ཅན་གྱི་ཚིག་བླ་དྭགས་སོ། །ལྷས་ པའི་མིག་ཅེས་བྱ་བ་དེ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཚིག་བླ་དྭགས་སོ། །རིགས་ཀྱི་བུ་དག། དེ་ལྟར་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སེམས་ཅན་ཐམས་ཅད་ལ་དེ་བཞིན་གཤེགས་པའི་ཆོས་ཉིད་ཆུད་མི་ཟ་བ་ཡོད་པའི་ཉོན་མོངས་པ་རུལ་པ་དང༌། འདམ་རྫབ་ ལྟ་བུ་རྣམས་བསལ་བའི་ཕྱིར་སེམས་ཅན་རྣམས་ལ་ཆོས་སྟོན་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །ཇི་ལྟར་མི་ཡི་གསེར་གྱི་གར་བུ་ནི།། ཉལ་ཉིལ་རྣམ་པའི་ནང་དུ་ལྷུང་གྱུར་ལ། །དེར་དེ་ལོ་ནི་མི་ཉུང་བ་ཞིག་ཏུ། །དེ་ལྟར་གནས་ཀྱང་མི་འཇིག་ཆོས་ཅན་ནོ། །ལྷ་ཡིས་ལྷ་ཡི་མིག་གིས་དེ་མཐོང་ནས། །རྣམ་པར་སྦྱང་ཕྱིར་ གཞན་ལ་སྨྲས་པ་ནི། །འདི་ན་རིན་ཆེན་མཆོག་གི་གསེར་ཡོད་པ། །རྣམ་པར་སྦྱོངས་ལ་དེས་ནི་བྱ་བ་གྱིས། །དེ་བཞིན་ངས་ནི་སེམས་ཅན་ཐམས་ཅད་ཀྱང༌། །ཉོན་མོངས་རྣམས་ཀྱིས་ ཡུན་རིང་རྟག་ནོན་མཐོང༌། །དེ་དག་གིས་ནི་གློ་བུར་ཉོན་མོངས་ཞེས། །རང་བཞིན་སྦྱང་ཕྱིར་ཐབས་ཀྱིས་ཆོས་སྟོན་ཏོ། །རིགས་ཀྱི་བུ་དག། གཞན་ཡང་འདི་ལྟ་སྟེ། དཔེར་ན། དབུལ་ པོ་ཞིག་གི་ཁྱིམ་གྱི་ནང་གི་མཛོད་ཀྱི་འོག་གིས་ལ་གཏེར་ཆེན་པོ་དབྱིག་དང༌། གསེར་གྱིས་རབ་ཏུ་གང་བ་མཛོད་ཀྱི་ཚོད་ཙམ་ཞིག་མི་བདུན་སྲིད་ཀྱི་སས་གཡོགས་པའི་འོག་ན་ཡོད་ལ། ༄༅། །གཏེར་ཆེན་པོ་དེ་མི་དབུལ་པོ་དེ་ལ་འདི་སྐད་དུ་ཀྱེ་མི་ང་ནི། གཏེར་ཆེན་པོ་སྟེ། སས་གཡོགས་ཤིང་འདུག་གོ །ཞེས་མི་སྨྲ་སྟེ། འདི་ལྟ་སྟེ། གཏེར་ཆེན་པོ་ ནི༑ སེམས་ཀྱི་ངོ་བོ་ཉིད་ཀྱིས་སེམས་ཅན་མ་ཡིན་པའོ། །མི་དབུལ་པོ་ཁྱིམ་གྱི་བདག་པོ་དེ་ནི། དབུལ་བའི་སེམས་ཀྱིས་རྗེས་སུ་སེམས་ཤིང་དེ་ཉིད་ཀྱི་སྟེང་ན་རྣམ་པར་རྒྱུའང་ སའི་འོག་ན་གཏེར་ཆེན་པོ་ཡོད་པ་དེ་མ་ཐོས་མི་ཤེས་མ་མཐོང་ངོ༌། །རིགས་ཀྱི་བུ་དག། དེ་བཞིན་དུ་སེམས་ཅན་ཐམས་ཅད་ཀྱི་མངོན་བར་ཞེན་པའི་ཡིད་ལ་བྱེད་པ་ཁྱིམ་ལྟ་བུར་ གྱུར་པའི་འོག་ན་དེ་བཞིན་གཤེགས་པའི་སྙིང་པོ་སྟོབས་དང༌། མི་འཇིགས་པ་དང༌། མ་འདྲེས་པ་དང༌། སངས་རྒྱས་ཀྱི་ཆོས་ཐམས་ཅད་ཀྱི་མཛོད་ཀྱི་གཏེར་ཆེན་པོ་ཡོད་ཀྱང་སེམས་ ཅན་དེ་དག་གཟུགས་དང༌། སྒྲ་དང༌། དྲི་དང༌། རོ་དང༌། རེག་པ་ལ་ཆགས་པས་སྡུག་བསྔལ་བས་འཁོར་བ་ན་འཁོད་དེ། ཆོས་ཀྱི་གཏེར་ཆེན་པོ་དེ་མ་ཐོས་པས་ཐོབ་པར་མ་གྱུར་ ཅིང་ཡོངས་སུ་སྦྱང་བའི་ཕྱིར་བརྩོན་པར་ཡང་མི་བྱེད་དོ། །རིགས་ཀྱི་བུ་དག། དེ་ནས་དེ་བཞིན་གཤེགས་པ་འཇིག་རྟེན་དུ་བྱུང་སྟེ་བྱང་ཆུབ་སེམས་དཔའི་ནང་དུ་འདི་ལྟ་ བུའི་ཆོས་ཀྱི་གཏེར་ཆེན་པོ་ཡང་དག་པར་རབ་ཏུ་སྟོན་ཏོ། །དེ་དག་ཀྱང་ཆོས་ཀྱི་གཏེར་ཆེན་པོ་དེ་ལ་མོས་ནས་གོ་སྟེ། དེའི་ཕྱིར་འཇིག་རྟེན་ན་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཞེས་བྱ་སྟེ། ཆོས་ཀྱི་གཏེར་ཆེན་པོ་ལྟ་བུར་གྱུར་ནས་སེམས་ཅན་རྣམས་ལ་སྔོན་མ་བྱུང་བའི་གཏན་ཚིགས་ཀྱི་རྣམ་པ་དང་ དཔེ་དང་བྱེད་པའི་གཏན་ཚིགས་དང༌། བྱ་བ་རྣམས་སྟོན་པ་གཏེར་ཆེན་པོའི་མཛོད་ཀྱི་སྦྱིན་བདག་ཆགས་པ་མེད་པའི་སྤོབས་པ་དང་ལྡན་ཞིང་སྟོབས་དང༌། མི་འཇིགས་པ་དང༌། སངས་ རྒྱས་ཀྱི་ཆོས་མང་པོའི་མཛོད་དུ་གྱུར་པ་ཡིན་ནོ། །རིགས་ཀྱི་བུ་དག །དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་དེ་བཞིན་གཤེགས་ པའི་མིག་ཤིན་ཏུ་ཡོངས་སུ་དག་བས་སེམས་ཅན་ཐམས་ཅད་དེ་ལྟ་བུར་མཐོང་ནས་དེ་བཞིན་གཤེགས་པའི་ཡེ་ཤེས་དང༌། སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་མ་ འདྲེས་པའི་མཛོད་ཡོངས་སུ་སྦྱང་བའི་ཕྱིར་བྱང་ཆུབ་སེམས་དཔའ་རྣམས་ལ་ཆོས་སྟོན་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། ། ཇི་ལྟར་དབུལ་པོའི་ཁྱིམ་གྱི་འོག་ལོགས་ན། །དབྱིག་དང་གསེར་གྱིས་གང་བའི་གཏེར་ཡོད་པ། །དེ་ལ་གཡོ་བའམ་རློམ་སེམས་ཡོད་མིན་ཏེ། །ང་ནི་ཁྱོད་ཀྱི་ཡིན་ཞེས་དེ་མི་སྨྲ། ། དེ་ཡི་ཚེ་ན་སེམས་ཅན་ཁྱིམ་བདག་དེ། །དབུལ་བར་གྱུར་ལ་རྣམ་པར་མི་ཤེས་ཤིང༌། །སུས་ཀྱང་དེ་ལ་བསྙད་པ་མེད་པས་ན། །དབུལ་པོ་དེ་ནི་དེ་ཡི་སྟེང་ན་འདུག །དེ་ལྟར་ངས་ ༄༅། །ནི་སངས་རྒྱས་མིག་གིས་སུ། །སེམས་ཅན་དེ་དག་ཐམས་ཅད་དབུལ་འདྲ་ལ། །དེ་དག་རྣམས་ལ་གཏེར་ཆེན་ཡོད་པ་དང༌། །གཡོ་བ་མེད་ཅིང་བདེ་གཤེགས་ ལུས་སུ་མཐོང༌། །ངས་ནི་དེ་མཐོང་བྱང་ཆུབ་སེམས་དཔའ་ལ། །ཁྱོད་ཀྱིས་ང་ཡི་ཡེ་ཤེས་མཛོད་ཟུངས་ལ། །དབུལ་བ་མེད་ཅིང་འཇིག་རྟེན་མགོན་གྱུར་དང༌། །བླ་མེད་ཆོས་གཏེར་ འགྱུར་བར་གྱིས་ཞེས་བསྟན། །གང་དག་ངས་བསྟན་པ་ལ་མོས་གྱུར་ལ། །སེམས་ཅན་དེ་དག་ཀུན་ལ་གཏེར་ཡོད་དོ། །གང་དག་མོས་ནས་བདག་ཉིད་རྩོལ་བྱེད་པ། །དེ་ དག་མྱུར་དུ་བྱང་ཆུབ་མཆོག་ཐོབ་འགྱུར། །རིགས་ཀྱི་བུ་དག །གཞན་ཡང་འདི་ལྟ་སྟེ། དཔེར་ན། ཤིང་ཨ་མྲའི་འབྲས་བུའམ། ཛམྦུའི་འབྲས་བུའམ། ཏ་ལའི་འབྲས་བུའམ་ སྤའི་འབྲས་བུའང་རུང་སྟེ། ཕྱི་ཤུན་གྱི་སྦུབས་ཀྱི་ནང་ན་མྱུ་གུའི་ས་བོན་ཆུད་མི་ཟ་བའི་ཆོས་ཅན་ཡོད་པ་གང་གིས་ས་ལ་བཏབ་ན། ཤིང་གི་རྒྱལ་པོར་ཆེན་པོར་འགྱུར་རོ། རིགས་ཀྱི་བུ་དག། དེ་བཞིན་དུ་དེ་བཞིན་གཤེགས་པའང་འཇིག་རྟེན་ན་གནས་པ། འདོད་ཆགས་དང༌། ཞེ་སྡང་དང༌། གཏི་མུག་དང༌། སྲེད་པ་དང༌། མ་རིག་པའི་ཉོན་ མོངས་པའི་ཕྱི་ཤུན་གྱི་སྦུབས་ཀྱིས་ཀུན་ཏུ་ཁྲིས་པར་མཐོང་ངོ༌། །དེ་ལ་འདོད་ཆགས་དང༌། ཞེ་སྡང་དང༌། གཏི་མུག་དང༌། སྲེད་པ་དང༌། མ་རིག་པའི་ཉོན་མོངས་པའི་ སྦུབས་ཀྱི་ནང་ན་སྙིང་པོར་གྱུར་པ་དེ་བཞིན་གཤེགས་པའི་ཆོས་ཉིད་དེ་ནི། སེམས་ཅན་ཞེས་བྱ་བའི་མིང་དུ་ཆགས་སོ། །དེ་ལ་གང་བསིལ་བར་གྱུར་པ་དེ་ནི། མྱ་ངན་ན་ལས་འདས་ པ་སྟེ། མ་རིག་པའི་ཉོན་མོངས་པའི་སྦུབས་ཡོངས་སུ་སྦྱངས་པའི་ཕྱིར་སེམས་ཅན་གྱི་ཁམས་ཀྱི་ཡེ་ཤེས་ཆེན་པོའི་ཚོགས་སུ་གྱུར་པ་གང་ཡིན་པ་དེ་ནི། རྙེད་པའོ། །སེམས་ཅན་གྱི་ ཁམས་ཀྱི་ཡེ་ཤེས་ཆེན་པོའི་ཚོགས་དམ་པ་དེ་ནི། དེ་བཞིན་གཤེགས་པ་ཇི་ལྟ་བ་དེ་བཞིན་དུ་སྨྲ་བར་ལྷ་དང་བཅས་པའི་འཇིག་རྟེན་གྱིས་མཐོང་ནས་དེ་བཞིན་གཤེགས་པ་ཞེས་ བྱ་བའི་འདུ་ཤེས་སུ་བྱེད་དོ། །རིགས་ཀྱི་བུ་དག། དེ་ལ་དེ་བཞིན་གཤེགས་པས་དེ་ལྟར་མཐོང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་དེ་བཞིན་གཤེགས་ པའི་ཡེ་ཤེས་ཁོང་དུ་ཆུད་པར་བྱ་བའི་ཕྱིར་དོན་དེ་ཉེ་བར་སྟོན་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །ཇི་ལྟར་སྤ་ཡི་འབྲས་བུ་ ཐམས་ཅད་ནི། །ནང་ན་སྤ་ཡི་མྱུ་གུ་ཡོད་པ་སྟེ། །ཏ་ལ་དང་ནི་ཛམྦུ་ཀུན་ལའང་ཡོད། །ནང་ན་ཡོད་པའི་འབྲས་བུ་བསྐྱེད་ན་སྐྱེ། །དེ་བཞིན་ཆོས་ཀྱི་དབང་ཕྱུག་འདྲེན་པ་ཡང༌། །སེམས་ ཅན་ཐམས་ཅད་སྤ་ཡི་ས་བོན་འདྲ། །དེ་ཀུན་ནང་ན་བདེ་གཤེགས་ལུས་ཡོད་པར། །ཟག་མེད་སངས་རྒྱས་མིག་ནི་དམ་པས་ཐོབ། །སྦུབས་བཤིག་མ་གྱུར་ད་ནི་སེམས་ཅན་ ༄༅། །བརྗོད༑ ༑མི་ཤེས་གང་ན་གནས་ཀྱང་རློམ་སེམས་མེད། །ཏིང་འཛིན་ཐོབ་སྟེ་གནས་ནས་རབ་ཞི་སྟེ། །དེ་ལ་གཡོ་བ་ཅི་ཡང་ཡོད་མ་ཡིན། །དཔེར་ན་སྡོང་ཆེན་ ས་བོན་ལས་བྱུང་ལྟར། །སེམས་ཅན་འདི་དག་ཇི་ལྟར་འཚང་རྒྱ་ཞིང༌། །ལྷ་དང་བཅས་པའི་འཇིག་རྟེན་སྐྱབས་འགྱུར་ཞེས། །ཡོངས་སུ་སྦྱང་བའི་དོན་དུ་ཆོས་གཏམ་སྨྲ། ། རིགས་ཀྱི་བུ་དག། གཞན་ཡང་འདི་ལྟ་སྟེ། དཔེར་ན། སྐྱེས་བུ་དབུལ་པོ་ཞིག་ལ་དེ་བཞིན་གཤེགས་པའི་གཟུགས་རིན་པོ་ཆེ་སྣ་བདུན་ལས་བྱས་པ་ལག་མཐིལ་ཙམ་ཞིག་ ཡོད་ལ༑ དེ་ནས་སྐྱེས་བུ་དབུལ་པོ་དེས་དེ་བཞིན་གཤེགས་པའི་སྐུ་གཟུགས་དེ་ཁྱེར་ཏེ་འབྲོག་དགོན་པ་ལས་ཤིན་ཏུ་འདའ་བར་འདོད་པར་གྱུར་ནས་ཅི་ནས་ཀྱང་དེ་གཞན་ གྱིས་མི་ཚོར་ཞིང་རྐུན་པོས་མི་འཁྱེར་བར་བྱ་བའི་ཕྱིར་དེས་དེ་རས་རུལ་པ་དྲི་མི་ཞིམ་པའི་དུམ་བུ་དུ་མས་དཀྲིས་ཏེ་དེ་ནས་སྐྱེས་བུ་དེ་འབྲོག་དགོན་པ་དེ་ཉིད་དུ་ཉེས་པ་གང་ གིས་ཀྱང་འཆི་བའི་དུས་བྱས་པར་མ་གྱུར་ལ། དེའི་ཚེ་དེ་བཞིན་གཤེགས་པའི་སྐུ་གཟུགས་རིན་པོ་ཆེ་ལས་བྱས་པ་རས་རུལ་པའི་དུམ་བུས་དཀྲིས་པའང་རྡོག་ལམ་དེ་ན་ འཕྱན་ཞིང་འདུག་པ་དང༌། མགྲོན་པོ་རྣམས་ཀྱིས་མ་ཤེས་ནས་འགོམས་ཤིང་འགོམས་ཤིང་དོང་ལ། རས་རུལ་པ་དྲི་མི་ཞིམ་པའི་དུམ་བུའི་ཐུམ་བུ་ཀུན་ཏུ་འདྲིལ་བ་འདི་ གང་ནས་རླུང་གིས་བདས་ཞེས་སྨད་པའི་དངོས་པོར་ཡང་སྟོན་པ་དང༌། འབྲོག་ན་གནས་པའི་ལྷས་ལྷའི་མིག་གིས་རྣམ་པར་བལྟས་ནས་མི་གཞན་དག་ཅིག་ལ་བསྟན་ཏེ། ཀྱེ་ སྐྱེས་བུ་དག །རས་ཀྱི་དུམ་བུ་འདིའི་ཐུམ་བུ་འདིའི་ནང་ན་དེ་བཞིན་གཤེགས་པའི་སྐུ་གཟུགས་རིན་པོ་ཆེ་ལས་བྱས་པ། འཇིག་རྟེན་ཐམས་ཅད་ཀྱིས་ཕྱག་བྱ་བར་འོས་པ་ཡོད་ཀྱི། ཕྱེ་ཞིག་ཅེས་བསྒོའོ། །རིགས་ཀྱི་བུ་དག །དེ་བཞིན་དུ་དེ་བཞིན་གཤེགས་པའང་སེམས་ཅན་ཐམས་ཅད་ཉོན་མོངས་པའི་དཀྲི་བས་དཀྲིས་ཏེ་སྨད་པའི་འོས་སུ་གྱུར་ཅིང་ཡུན་ རིང་པོར་འཁོར་བའི་འབྲོག་དགོན་པ་ན་རྟག་ཏུ་འཁྱམས་པར་མཐོང་སྟེ་རིགས་ཀྱི་བུ་དག །ཐ་ན་དུད་འགྲོའི་སྐྱེ་གནས་སུ་སོང་བ་རྣམས་ཀྱང་རུང་སྟེ། སེམས་ཅན་ཉོན་མོངས་པ་ སྣ་ཚོགས་ཀྱི་དཀྲི་བས་དཀྲིས་པར་གྱུར་པ་རྣམས་ཀྱི་ནང་ནའང་དེ་བཞིན་གཤེགས་པའི་ལུས་ང་ཅི་འདྲ་བ་ཡོད་པ་མཐོང་ངོ༌། །རིགས་ཀྱི་བུ་དག། དེ་ལ་དེ་བཞིན་གཤེགས་པ་ནི། ཇི་ལྟར་དེ་བཞིན་གཤེགས་པའི་ཡེ་ཤེས་མཐོང་བ་ཉེ་བའི་ཉོན་མོངས་པ་དང་བྲལ་ཞིང་ཡོངས་སུ་དག་པར་གྱུར་ལ། ཇི་ལྟར་ད་ལྟར་ང་བཞིན་དུ་འཇིག་རྟེན་ཐམས་ཅད་ཀྱིས་ཕྱག་ བྱ་བའི་འོས་སུ་འགྱུར་སྙམ་ནས་ཉོན་མོངས་པའི་དཀྲི་བས་དཀྲིས་པ་ལས་ཐར་པར་བྱ་བའི་ཕྱིར་བྱང་ཆུབ་སེམས་དཔའ་ཐམས་ཅད་ལ་ཆོས་སྟོན་ཏོ། །དེ་ནས་དེའི་ཚེ་བཅོམ་ལྡན་ ༄༅། །འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །ཇི་ལྟར་དྲི་ང་སྨྲད་པའི་འོས་རྣམས་ཀྱིས། །ཡོངས་སུ་དཀྲིས་པ་བདེ་བར་གཤེགས་ཀྱི་གཟུགས། ། རིན་ཆེན་བྱས་པ་རས་དུམ་དཀྲིས་པ་དེ། །ལམ་གྱི་བར་ན་འབོར་དེ་འཁྱམས་གྱུར་པ། །ལྷ་ཡི་མིག་གིས་དེ་ནི་མཐོང་ནས་སུ། །ལྷ་དེས་གཞན་ཞིག་ལ་ནི་རབ་སྨྲས་པ། །འདི་ན་ དེ་བཞིན་གཤེགས་པ་རིན་ཆེན་ཡོད། །རས་དུ་མ་ཐུམ་བུ་འདི་ནི་མྱུར་དུ་ཕྱེ། །དེ་བཞིན་ང་ཡི་ལྷ་མིག་འདི་འདྲ་བ། །དེས་ནི་སེམས་ཅན་འདི་དག་ཐམས་ཅད་ཀྱང༌། །ཉོན་ མོངས་དཀྲི་པས་དཀྲིས་ནས་རབ་སྡུག་བསྔལ། །འཁོར་བའི་སྡུག་བསྔལ་གྱིས་ནི་རྟག་གཅེས་མཐོང༌། །ངས་ནི་ཉོན་མོངས་དཀྲིས་པའི་ནང་དག་ན། །རྒྱལ་བའི་སྐུ་ནི་མཉམ་ བར་བཞག་གྱུར་ལ། །དེ་ནི་གཡོ་བ་མེད་ཅིང་མི་འགྱུར་ཡང༌། །དེ་ཡོངས་ཐར་བྱེད་གང་ཡང་མེད་པར་མཐོང༌། །ངས་མཐོང་དེ་ནས་སྐུལ་མ་བཏབ་པ་ནི། །བྱང་ཆུབ་མཆོག་ཏུ་ གང་དག་ཞུགས་པ་ཉོན། །དེ་ལྟར་སེམས་ཅན་ཆོས་ཉིད་འདི་འདྲར་རྟག །འདི་ན་ཡོངས་སུ་དཀྲིས་པའི་རྒྱལ་བ་བཞུགས། །བདེ་བར་གཤེགས་ཀྱིས་ཡེ་ཤེས་ཡོངས་བཀྲོལ་ ནས༑ ༑གང་ཚེ་ཉོན་མོངས་ཐམས་ཅད་རབ་ཞི་བ། །དེ་ཚེ་འདི་ནི་སངས་རྒྱས་མིང་ཐོབ་སྟེ། །ལྷ་དང་མི་རྣམས་སེམས་ནི་རབ་ཏུ་དགའ། །རིགས་ཀྱི་བུ་དག །གཞན་ཡང་འདི་ལྟ་ སྟེ། དཔེར་ན། བུད་མེད་མགོན་མེད་པར་གྱུར་པ། མདོག་ངན་པ། དྲི་མི་ཞིམ་པ། སྨད་པར་འོས་པ། འཇིགས་སུ་རུང་བ། བལྟ་ན་མི་སྡུག་པ། འདྲེ་མོ་འདྲ་བ་ཞིག་མགོན་མེད་པའི་ ཁང་པར་ཞུགས་ནས་གནས་སོ། །དེ་དེར་གནས་པ་དང་སྦྲུམ་པར་གྱུར་ཏེ། གང་གིས་གདོན་མི་ཟ་བར་འཁོར་ལོས་བསྒྱུར་བའི་རྒྱལ་སྲིད་བྱེད་པར་འགྱུར་བའི་སེམས་ཅན་དེ་འདྲ་བ་ ཞིག་དེའི་མངལ་དུ་ཞུགས་ཀྱང་བུད་མེད་དེའི་མངལ་ན་འདུག་པའི་སེམས་ཅན་དེ་ལ་བདག་གི་མངལ་དུ་ཞུགས་པའི་སེམས་ཅན་འདི་ཅི་འདྲ་བ་ཞིག་སྙམ་དུའང་དེ་ཡིད་ལ་མི་བྱེད། བདག་གི་མངལ་དུ་ཞུགས་སམ། མ་ཞུགས་སྙམ་དུའང་དེ་དེ་ན་ཡིད་ལ་མི་བྱེད་ཀྱི། གཞན་དུ་ན་དེ་དབུལ་བའི་སེམས་དང༌། ཞུམ་པ་དང༌། དམན་པ་དང༌། ཁོ་རུ་ཆུང་བ་སྙམ་པའི་ སེམས་རྗེས་སུ་སེམས་ཤིང་མདོག་ངན་པ་དང༌། དྲི་མི་ཞིམ་པ་ཉིད་ཀྱིས་མགོན་མེད་པའི་ཁང་པ་ན་གནས་ཏེ་དུས་འདའ་བར་བྱེད་དོ། །རིགས་ཀྱི་བུ་དག །དེ་བཞིན་དུ་སེམས་ཅན་ ཐམས་ཅད་ཀྱང་མགོན་མེད་པར་གྱུར་ཅིང་འཁོར་བའི་སྡུག་བསྔལ་གྱིས་གཙེས་པར་གྱུར་ལ། སྲིད་པར་སྐྱེ་བའི་གནས་མགོན་མེད་པའི་ཁང་པ་ན་གནས་སོ། །དེ་ན་སེམས་ ཅན་རྣམས་ལ་དེ་བཞིན་གཤེགས་པའི་རིགས་བཞུགས་ཏེ་ཁོང་ན་ཡོད་ཀྱང་སེམས་ཅན་དེ་དག་གིས་ཁོང་དུ་མ་ཆུད་དོ། །རིགས་ཀྱི་བུ་དག །དེ་ལ་དེ་བཞིན་གཤེགས་ ༄༅། །པ་ནི༑ སེམས་ཅན་དག་བདག་ཉིད་ལ་ཁྱད་དུ་མི་གསད་པར་བྱ་བའི་ཕྱིར་རིགས་ཀྱི་བུ་དག། ཁྱེད་བདག་ཉིད་སྲོ་ཤི་བར་མ་བྱེད་པར་ཁྱེད་བརྩོན་འགྲུས་ བརྟན་པར་གྱིས་ཤིག་དང༌། ཁྱེད་ལ་དེ་བཞིན་གཤེགས་པ་ཞུགས་པ་ཡོད་པ་དུས་ཤིག་ན་འབྱུང་བར་འགྱུར་ཏེ། ཁྱེད་བྱང་ཆུབ་སེམས་དཔའ་ཞེས་བྱ་བའི་གྲངས་སུ་འགྲོ་ བར་འགྱུར་གྱི། སེམས་ཅན་ཞེས་བྱ་བར་ནི། མ་ཡིན་ནོ། །དེར་ཡང་སངས་རྒྱས་ཞེས་བྱ་བའི་གྲངས་སུ་འགྲོའི། བྱང་ཆུབ་སེམས་དཔའ་ཞེས་བྱ་བར་ནི། མ་ཡིན་ནོ། །ཞེས་ ཆོས་སྟོན་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །ཇི་ལྟར་བུད་མེད་མགོན་མེད་གྱུར་བ་ཞིག། ཁ་དོག་ངན་ཅིང་གཟུགས་ ནི་མི་སྡུག་ལ། །བྱིས་པ་ཡིན་ཏེ་མགོན་མེད་ཁེང་པར་གནས། །རེ་ཞིག་དུས་ན་དེ་ནི་དེར་སྦྲུམ་གྱུར། །དེ་ཡི་མངལ་དུ་གང་ཞིག་ངེས་པར་ནི། །འཁོར་ལོས་བསྒྱུར་བའི་ རྒྱལ་པོ་ཆེ་བ་ཉིད། །རིན་ཆེན་རྣམས་ཀྱི་འཕགས་པའི་གླིང་བཞི་ཡི། །བདག་པོ་བྱེད་པར་འགྱུར་བ་དེ་འདྲ་ཞུགས། །བུད་མེད་བྱིས་པ་དེ་ནི་འདི་ལྟ་བུར། །མངལ་དུ་ཞུགས་ སམ་མ་ཞུགས་མི་ཤེས་ལ། །མགོན་མེད་ཁང་པ་ན་ནི་གནས་བྱེད་དེ། །དབུལ་བསྙམ་དུ་སེམས་ཤིང་དུས་འདའ་བྱེད། །དེ་བཞིན་ངས་ནི་སེམས་ཅན་ཐམས་ཅད་ཀྱང༌།། མགོན་མེད་གྱུར་ལ་སྡུག་བསྔལ་ཆོས་ཀྱིས་ཉེན། །ཁམས་གསུམ་པ་ཡི་བདེ་བ་ཆུང་ལ་གནས། །ནང་ན་ཆོས་ཉིད་མངལ་གནས་འདྲ་ཡོད་མཐོང༌། །དེ་འདྲ་མཐོང་ནས་བྱང་ཆུབ་སེམས་ དཔའ་ལ། །འཇིག་རྟེན་ཕན་པར་བྱེད་པ་མངལ་གནས་ན། །སེམས་ཅན་ཀུན་གྱིས་ཆོས་ཉིད་མ་ཤེས་ཀྱི། །བདག་དམན་འདུ་ཤེས་མ་སྐྱེད་ཅིག་ཅེས་བསྟན། །ཁྱེད་ཅག་བརྩོན་འགྲུས་ བརྩམ་པ་བརྟན་གྱིས་དང༌། །རང་ལུས་རིང་པོར་མི་ཐོགས་རྒྱལ་བར་འགྱུར། །དུས་ཤིག་བྱང་ཆུབ་སྙིང་པོ་ཐོབ་གྱུར་ནས། །སྲོག་ཆགས་སྟོང་ཕྲག་བྱེ་བ་གྲོལ་བྱེད་འགྱུར། །རིགས་ཀྱི་ བུ་དག །གཞན་ཡང་འདི་ལྟ་སྟེ། དཔེར་ན། སྤྲ་ཚིལ་ལས་རྟའི་གཟུགས་སམ། གླང་པོ་ཆེའི་གཟུགས་སམ། བུད་མེད་ཀྱི་གཟུགས་སམ། སྐྱེས་པའི་གཟུགས་དག་བྱས་ཏེ་འཇིམ་ པའི་ནང་དུ་བཅུག་ནས་གཡོགས་ལ་བཞུ་སྟེ། ཟགས་པར་བྱས་ལ་གསེར་བཞུ་སྟེ་ཞུ་བར་གྱུར་པས་བཀང་ནས་རིམ་གྱིས་གྲང་བར་གྱུར་པ་ན་མཉམ་པར་གནས་པར་གྱུར་པའི་ གཟུགས་དེ་དག་ཐམས་ཅད་ཕྱི་རོལ་གྱི་འཇིམ་པ་ནག་ཅིང་ཁ་དོག་མི་སྡུག་ཀྱང་ནང་གི་རྣམས་ནི། གསེར་ལས་བྱས་པ་དག་གོ །དེ་ནས་མགར་བའམ། མགར་བའི་སློབ་མ་ ཞིག་གིས་དེ་ལས་གཟུགས་གང་དང་གང་དག་གྲང་བར་གྱུར་པ་མཐོང་བ་དེ་དང་དེ་དག་གི་ཕྱིར་རིམ་གྱིས་འཇིམ་པ་ཐོ་བས་བཀོགས་ན། དེ་ནས་སྐད་ཅིག་དེ་ལ་ནང་ན་གསེར་ལས་ ༄༅། །བྱས་པའི་གཟུགས་ཡོད་པ་དག་ཡོངས་སུ་དག་པར་འགྱུར་རོ། །རིགས་ཀྱི་བུ་དག །དེ་བཞིན་དུ་དེ་བཞིན་གཤེགས་པ་ལ་དེ་བཞིན་གཤེགས་པའི་རིགས་ དེས་སེམས་ཅན་ཐམས་ཅད་འཇིམ་པའི་གཟུགས་ལྟ་བུ་ཡིན་ལ། ཕྱི་རོལ་གྱི་ཉོན་མོངས་པ་དང༌། ཉེ་བའི་ཉོན་མོངས་པའི་སྦུབས་ཀྱི་ནང་གི་སྦུ་གུ་སངས་རྒྱས་ཀྱི་ཆོས་ཀྱིས་གང་ སྟེ་ཟག་པ་མེད་པའི་ཡེ་ཤེས་རིན་པོ་ཆེའི་ནང་ན་དེ་བཞིན་གཤེགས་པ་མཛེས་པར་འདུག་པ་མཐོང་ངོ༌། །རིགས་ཀྱི་བུ་དག །དེ་ལ་དེ་བཞིན་གཤེགས་པས་སེམས་ཅན་ ཐམས་ཅད་དེ་ལྟར་མཐོང་ནས་བྱང་ཆུབ་སེམས་དཔའི་ནང་དུ་སོང་སྟེ་འདི་ལྟ་བུའི་ཆོས་ཀྱི་རྣམ་གྲངས་འདི་དག་ཡང་དག་པར་རབ་ཏུ་སྟོན་ཏོ། །དེ་ལ་བྱང་ཆུབ་སེམས་དཔའ་ སེམས་དཔའ་ཆེན་པོ་གང་དག་ཞི་ཞིང་བསིལ་བར་གྱུར་པ་དེ་དག་གིས་དེ་བ་བཞིན་གཤེགས་པའི་ཡེ་ཤེས་རིན་པོ་ཆེ་ཡོངས་སུ་སྦྱོང་བའི་ཕྱིར་དེ་བཞིན་གཤེགས་པ་ཆོས་ ཀྱི་རྡོ་རྗེའི་ཐོབས་ཕྱི་རོལ་གྱི་ཉོན་མོངས་པ་ཐམས་ཅད་འགོགས་སོ། །རིགས་ཀྱི་བུ་དག །མགར་བ་ཞེས་བྱ་བ་དེ་ནི། དེ་བཞིན་གཤེགས་པའི་ཚིག་བླ་དྭགས་སོ། །རིགས་ཀྱི་བུ་ དག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སངས་རྒྱས་ཀྱི་མིག་གི་སེམས་ཅན་ཐམས་ཅད་དེ་ལྟར་མཐོང་ནས་ཉོན་མོངས་པ་ དེ་དག་ལས་ཐར་པར་བྱས་ཏེ་སངས་རྒྱས་ཀྱི་ཡེ་ཤེས་ལ་རབ་ཏུ་བགོད་པའི་ཕྱིར་ཆོས་སྟོན་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། ། ཇི་ལྟར་གཟུགས་ནི་ཕྱི་རོལ་འཇིམ་པས་གཡོགས། །ནང་ནི་སྦུ་གུ་ཡོད་ཅིང་གསོག་ཡིན་པ། །རིན་ཆེན་བཞུས་པས་རབ་ཏུ་བཀང་ན་ནི། །བརྒྱ་སྟོང་ཕྲག་ནི་མང་པོར་འགྱུར་བ་ཡིན། ། མགར་བས་ཤིན་ཏུ་གྲང་བར་གྱུར་ཤེས་ནས། །འདི་ལྟར་རིན་ཆེན་ལས་ནི་བྱས་པ་འདི། །རྣམ་དག་གཟུགས་འགྱུར་ལས་གང་བྱ་སྙམ་སྟེ། །གཟུགས་ལ་གཡོགས་པའི་འཇིམ་པ་ འགོགས་པར་བྱེད། །དེ་བཞིན་ངས་ནི་སེམས་ཅན་ཐམས་ཅད་ཀྱང༌། །གསེར་གཟུགས་འཇིམ་པས་གཡོགས་པ་འདྲ་བ་སྟེ། །ཕྱི་རོལ་ཤུན་པ་ཉོན་མོངས་སྦུབས་ཡིན་ལ། །ནང་ན་ སངས་རྒྱས་ཡེ་ཤེས་ཡོད་པར་མཐོང༌། །དེ་ལ་བྱང་ཆུབ་སེམས་དཔའ་གང་དག་ནི། །ཞི་ཞིང་ཤིན་ཏུ་བསིལ་བར་གྱུར་པ་དག །གང་གིས་དེ་དག་ཉོན་མོངས་མ་ལུས་འབྱིན། ། ཆོས་ཀྱི་ལག་ཆས་དེ་ལ་འགོགས་པར་བྱེད། །རིན་ཆེན་གཟུགས་ནི་བལྟ་ན་སྡུག་པ་ལྟར། །རྒྱལ་སྲས་གང་ཞིག་འདིར་ནི་དག་གྱུར་པ། །སྟོབས་བཅུ་དག་གིས་ལུས་རྣམས་ ཡོངས་གང་སྟེ། །ལྷར་བཅས་འཇིག་རྟེན་འདི་ན་མཆོད་པར་འགྱུར། །ངས་ནི་སྲོག་ཆགས་ཐམས་ཅད་དེ་ལྟར་མཐོང༌། །བྱང་ཆུབ་སེམས་དཔའང་ངས་ནི་དེ་ལྟར་མཐོང༌། ། ༄༅། །དེ་ལྟར་དག་པ་བདེ་བར་གཤེགས་འགྱུར་ཏེ། །བདེ་གཤེགས་དག་ནི་སངས་རྒྱས་ཚུལ་སྟོན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ རྡོ་རྗེའི་བློ་གྲོས་ལ་བཀའ་སྩལ་པ། རྡོ་རྗེའི་བློ་གྲོས། རིགས་ཀྱི་བུའམ། རིགས་ཀྱི་བུ་མོ་ཁྱིམ་པའམ་རབ་ཏུ་བྱུང་བའང་རུང་སྟེ། གང་ཞིག་དེ་བཞིན་གཤེགས་པའི་སྙིང་ པོའི་ཆོས་ཀྱི་རྣམ་གྲངས་འདི་འཛིན་པ་དང༌། འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། གླེགས་བམ་དུ་བྱས་ཏེ་འཇོག་པ་དང༌། གཞན་དག་ལའང་རྒྱ་ཆེར་ འཆད་པ་དང༌། ཡང་དག་པར་རབ་ཏུ་སྟོན་པ་དེ་བསོད་ནམས་མང་དུ་སྐྱེད་པར་འགྱུར་རོ། །རྡོ་རྗེའི་བློ་གྲོས། ཡང་བྱང་ཆུབ་སེམས་དཔའ་གཞན་གང་ཞིག་དེ་བཞིན་ གཤེགས་པའི་ཡེ་ཤེས་བསྒྲུབ་པའི་ཕྱིར་བརྩོན་པར་གྱུར་ལ། འཇིག་རྟེན་གྱི་ཁམས་རེ་རེར་ཡང་སངས་རྒྱས་ཐམས་ཅད་ལ་མཆོད་པའི་ཕྱིར་རྫུ་འཕྲུལ་བསྒྲུབས་ནས་འདི་ ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཏིང་ངེ་འཛིན་གྱི་སྟོབས་བསྐྱེད་པ་དེས་སངས་རྒྱས་ཀྱི་ཞིང་བྱེ་བ་བྑྲག་ཁྲིག་འབུམ་ཕྲག་གངྒཱའི་ཀླུང་གི་བྱེ་མ་བས་ཀྱང་ མང་བ་རྣམས་སུ་གངྒཱའི་ཀླུང་གི་བྱེ་མ་བས་ཀྱང་མང་བའི་སངས་རྒྱས་བཅོམ་ལྡན་འདས་བྱང་ཆུབ་སེམས་དཔའ་རྣམས་དང་བཅས་པ། ཉན་ཐོས་ཀྱི་དགེ་འདུན་དང་ བཅས་པ་བཞུགས་ཤིང་གནས་པའི་དེ་བཞིན་གཤེགས་པ་རེ་རེ་ལའང་ཁང་བ་བརྩེགས་བ་དུས་སུ་བདེ་བ། རྒྱར་དཔག་ཚད་ཙམ་ལ་འཕང་དུ་དཔག་ཚད་བཅུ་པ། རིན་པོ་ཆེ་ ཐམས་ཅད་ལས་བྱས་པ། ལྷའི་དྲི་ཞི་མ་པོ་དང་ལྡན་པ། མེ་ཏོག་སིལ་མ་སྣ་ཚོགས་བཀྲམ་པ། ལོངས་སྤྱོད་ཁ་ན་མ་ཐོ་བ་མེད་པ་ཐམས་ཅད་དང་ལྡན་པ་འབུམ་ཕྲག་གངྒཱའི་ ཀླུང་ལྔ་བཅུའི་བྱེ་མ་སྙེད་ཉིན་རེ་ཞིང་ཕུལ་ཏེ་བསྐལ་པ་འབུམ་དུ་ཚང་བའི་བར་དུ་འདི་ལྟ་བུའི་མཆོད་པ་བྱེད་པ་བས། རིགས་ཀྱི་བུ་འམ་རིགས་ཀྱི་བུ་མོ་གང་གཞན་ཞིག་བྱང་ ཆུབ་ཏུ་སེམས་བསྐྱེད་དེ། དེ་བཞིན་གཤེགས་པའི་སྙིང་པོའི་ཆོས་ཀྱི་རྣམ་གྲངས་འདི་ལས་དཔེ་གཅིག་ཙམ་ལུས་ལ་འཆང་ངམ། གླེགས་བམ་དུ་གནས་པར་བྱེད་ན། རྡོ་རྗེའི་ བློ་གྲོས༑ དེའི་བསོད་ནམས་མངོན་པར་འདུ་བྱེད་པ་དེ་ལ་བསོད་ནམས་མངོན་པར་འདུ་བྱེད་པ་སྔ་མས་བརྒྱའི་ཆ་དང༌། སྟོང་གི་ཆ་དང༌། འབུམ་གྱི་ཆ་དང༌། གྲངས་དང༌། ཆ་དང་ བགྲང་བ་དང༌། དཔེར་ཡང་ཉེ་བར་མི་འགྲོ་སྟེ། རྒྱུར་ཡང་མི་བཟོད་དོ། །རྡོ་རྗེའི་བློ་གྲོས། ཡང་བྱང་ཆུབ་སེམས་དཔའ་གང་སངས་རྒྱས་ཀྱི་ཆོས་ཡོངས་སུ་ཚོལ་བས་སངས་རྒྱས་ བཅོམ་ལྡན་འདས་དེ་དག་ལས་དེ་བཞིན་གཤེགས་པ་རེ་རེ་ལའང་བསྐལ་པ་འབུམ་ཚང་གི་བར་དུ་ཤིང་མནྡཱ་ར་བའི་མེ་ཏོག་ཁལ་བཞི་འབུམ་འཐོར་ལ། རྡོ་རྗེའི་བློ་གྲོས། ༄༅། །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་ཞིག་གིས་བྱང་ཆུབ་ཏུ་སེམས་བསྐྱེད་དེ། དེ་བཞིན་གཤེགས་པའི་སྙིང་པོའི་ཆོས་ཀྱི་ རྣམ་གྲངས་འདི་ཐོས་ནས་ཐལ་མོ་ལན་གཅིག་སྦྱར་ཏེ་རྗེས་སུ་ཡི་རང་ངོ༌། །ཞེས་ཚིག་གཅིག་སྨྲས་ན། རྡོ་རྗེའི་བློ་གྲོས། བསོད་ནམས་མངོན་པར་འདུ་བྱ་བ་དང༌། དགེ་བ་ མངོན་པར་འདུ་བྱ་བ་དེ་ལ་མེ་ཏོག་དང༌། མེ་ཏོག་ཕྲེང་ཕུལ་བ་དང་ལྡན་པ། དེ་བཞིན་གཤེགས་པ་ལ་བཞག་པའི་བསོད་ནམས་མངོན་པར་འདུ་བྱ་བ་དང༌། དགེ་བ་མངོན་ པར་འདུ་བྱ་བ་སྔ་མ་དེས་བརྒྱའི་ཆ་དང༌། སྟོང་གི་ཆ་དང༌། འབུམ་གྱི་ཆ་དང༌། གྲངས་དང༌། ཆ་དང༌། བགྲང་བ་དང༌། དཔེར་ཡང་ཉེ་བར་མི་འགྲོ་སྟེ། རྒྱུར་ཡང་མི་བཟོད་དོ། ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དགེ་བཀའ་སྩལ་ཏོ། །སེམས་ཅན་ལ་ལ་གང་ཞིག་བྱང་ཆུབ་ལ། །མོས་པ་བསྐྱེད་ནས་འདི་ཉན་འཛིན་ པའམ༑ ༑ཡི་གེར་[?] འམ་གླེགས་བམ་གཞག་བྱེད་ཅིང༌། །གུས་དང་བཅས་པས་ཚིགས་བཅད་གཅིག་བཤད་དམ། །དེ་བཞིན་གཤེགས་པའི་སྙིང་པོ་འདི་ཐོས་ནས། ། གང་ཞིག་བྱང་ཆུབ་མཆོག་འདི་ཚོལ་བྱེད་ན། །བསོད་ནམས་ཕུང་པོ་ཇི་ཙམ་སྐྱེད་འགྱུར་པ། །དེ་ཡི་ཕན་ཡོན་འདིར་ནི་མཉན་པར་གྱིས། །རྫུ་འཕྲུལ་སྟོབས་མཆོག་འདི་ལ་ གནས་ནས་སུ། །དཔའ་བོ་བསྐལ་པ་དག་ནི་སྟོང་བར་དུ། །ཕྱོགས་བཅུ་རྣམས་སུ་མི་ཡི་གཙོ་བོ་དག །ཉན་ཐོས་བཅས་པ་རྣམས་ལ་བསྟི་སྟང་བྱེད། །ཇི་ལྟར་གངྒཱའི་སྟོང་མང་བྱེ་བ་ བས༑ ༑དེ་བས་ལྷག་པ་བསམ་གྱིས་མི་ཁྱབ་པ། །གཞལ་མེད་ཁང་མཆོག་རིན་ཆེན་ལས་བྱས་པ། །འཇིག་རྟེན་སློབ་དཔོན་རེ་རེ་ལ་ཡང་ཕུལ། །དེ་དག་འཕང་དུ་དཔག་ཚད་བཅུ་ ཡོད་ལ༑ ༑ཆུ་དང་རྒྱར་ནི་དཔག་ཚད་གཅིག་ཡོད་པ། །སྤོས་དང་བདུག་པ་དག་དང་རབ་ལྡན་ལ། །དེ་ན་རིན་ཆེན་ལས་བྱས་ཁྲི་བཤམས་ཤིང༌། །དར་དང་བཅོས་བུའི་རས་ནི་བརྒྱ་བཏིང་ བའི༑ ༑ཁྲི་དག་དང་ནི་ཁྲི་སྟན་གཞན་རྣམས་ཀྱང༌། །ཇི་ལྟར་གངྒཱའི་ཀླུང་བཞིན་དཔག་མེད་པ། །རྒྱལ་བ་གཅིག་ལ་དབུལ་བ་བྱས་གྱུར་ལ། །རྒྱལ་བ་གང་དག་འཇིག་རྟེན་ཁམས་ བཞུགས་པ། །ཇི་ལྟར་གངྒཱའི་བྱེ་མ་བས་མང་བ། །རྒྱལ་པ་དེ་དག་རྣམས་ལ་དེ་ལྟར་ཕུལ། །ཀུན་ལ་གུས་པར་མཆོད་པ་བྱེད་པ་བས། །མཁས་པ་གང་ཞིག་མདོ་སྡེ་འདི་ཐོས་ ནས༑ ༑དཔེ་གཅིག་ཙམ་ཞིག་ཡང་དག་འཛིན་བྱེད་དམ། །བཟུང་ནས་མི་འགའ་ཞིག་ལ་འཆད་བྱེད་ན། །དེ་ནི་དེ་བས་བསོད་ནམས་ཕུང་པོ་མང༌། །དཔའ་བོས་བཟུང་བའི་ བསོད་ནམས་འདི་ལ་ནི། །ཆ་དང་དཔེར་ཡང་དེ་ནི་ཉེར་མི་འགྲོ། །སྲོག་ཆགས་དག་ནི་ཀུན་གྱི་སྐྱབས་འགྱུར་ཞིང༌། །དེ་ནི་མྱུར་དུ་བྱང་ཆུབ་མཆོག་འཚང་རྒྱ། །དེ་བཞིན་ ༄༅། །གཤེགས་ཀྱི་སྙིང་པོ་འདྲ་ཡོད་པ། །སེམས་ཅན་དག་ནི་ཀུན་གྱི་ཆོས་ཉིད་འདི། །བྱང་ཆུབ་སེམས་དཔའ་མཁས་པ་གང་སེམས་པ། །དེ་ནི་རང་བྱུང་སངས་རྒྱས་ མྱུར་དུ་འགྱུར། །རྡོ་རྗེའི་བློ་གྲོས། རྣམ་གྲངས་འདིས་ཀྱང་འདི་ལྟར་ཆོས་ཀྱི་རྣམ་གྲངས་འདི་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཐམས་ཅད་ མཁྱེན་པའི་ཡེ་ཤེས་སྒྲུབ་པར་འགྱུར་བས་གཅེས་སྤྲས་བྱེད་པར་རིག་པར་བྱའོ། །རྡོ་རྗེའི་བློ་གྲོས། སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་ཤིན་ཏུ་རྒྱས་ པ༑ ཚད་མེད་པ། བསམ་གྱིས་མི་ཁྱབ་པ། མཚུངས་པ་མེད་པ། བརྗོད་དུ་མེད་པ་དེའི་ཕ་རོལ་བས་ཀྱང་ཆེས་ཕ་རོལ་ཏུ་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་འཁོར་ལོས་སྒྱུར་ བ༑ བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་རྟག་ཏུ་འོད་ཟེར་གཏོང་ཞེས་བྱ་བ་འཇིག་རྟེན་དུ་བྱུང་ངོ༌། །རྡོ་རྗེའི་བློ་གྲོས། ཅིའི་ཕྱིར་དེ་ བཞིན་གཤེགས་པ་དེ་རྟག་ཏུ་འོད་ཟེར་གཏོང་ཞེས་བྱ་ཞེ་ན། རྡོ་རྗེའི་བློ་གྲོས། བཅོམ་ལྡན་འདས་དེ་བཞིན་གཤེགས་པ་རྟག་ཏུ་འོད་ཟེར་གཏོང་དེ་བྱང་ཆུབ་སེམས་ དཔར་གྱུར་པ་ན་མའི་མངལ་དུ་ཞུགས་མ་ཐག་ཏུ་དེ་མའི་མངལ་ན་འདུག་བཞིན་དུ་ལུས་ལས་འོད་བྱུང་སྟེ་ཤར་ཕྱོགས་སུ་འཇིག་རྟེན་གྱི་ཁམས་འབུམ་ཕྲག་སངས་རྒྱས་ཀྱི་ཞིང་ བཅུའི་རྡུལ་ཕྲ་རབ་ཀྱི་རྡུལ་སྙེད་དག་སྣང་བས་རྟག་ཏུ་ཁྱབ་པར་གྱུར་ཏོ། །དེ་བཞིན་དུ་ལྷོ་དང༌། ནུབ་དང༌། བྱང་དང༌། ཤར་ལྷོ་དང༌། ལྷོ་ནུབ་དང༌། ནུབ་བྱང་དང༌། བྱང་ཤར་དང༌། འོག་དང༌། སྟེང་གི་ཕྱོགས་དང༌། ཕྱོགས་བཅུའི་འཇིག་རྟེན་གྱི་ཁམས་འབུམ་ཕྲག་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་དག་སྣང་བས་རྟག་ཏུ་ཁྱབ་པར་གྱུར་ཏེ། བྱང་ཆུབ་སེམས་དཔའ་དེའི་ལུས་ཀྱི་འོད་དགའ་བར་འགྱུར་བ། སྡུག་པ། མཆོག་ཏུ་དགའ་བར་བྱེད་པ། མགུ་བར་འགྱུར་བས་འཇིག་རྟེན་གྱི་ཁམས་འབུམ་ཕྲག་དེ་སྙེད་ སྣང་བས་རྟག་ཏུ་ཁྱབ་པར་གྱུར་ཏོ། །རྡོ་རྗེའི་བློ་གྲོས། བྱང་ཆུབ་སེམས་དཔའ་མའི་མངལ་ན་གནས་པ་དེའི་འོད་ཀྱིས་འཇིག་རྟེན་གྱི་ཁམས་འབུམ་དེ་དག་ཏུ་སེམས་ཅན་ གང་དག་ལ་རེག་པར་གྱུར་པ་དེ་དག་ཐམས་ཅད་གཟི་བརྗིད་དང་ལྡན་པ་དང༌། ཁ་དོག་དང་ལྡན་པ་དང༌། དྲན་པ་དང་ལྡན་པ་དང༌། བློ་གྲོས་དང་ལྡན་པ་དང༌། རྟོགས་པ་དང་ལྡན་ པ་དང༌། སྤོབས་པ་དང་ལྡན་པར་གྱུར་ཏོ། །འཇིག་རྟེན་གྱི་ཁམས་འབུམ་དེ་དག་ན་སེམས་ཅན་གང་དག་སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་ ༄༅། །རྗེའི་འཇིག་རྟེན་དང༌། ལྷ་མ་ཡིན་རྣམས་ཀྱི་ནང་དུ་སྐྱེས་པར་གྱུར་པ་དེ་དག་ཐམས་ཅད་བྱང་ཆུབ་སེམས་དཔའ་དེའི་འོད་ཀྱིས་རེག་པ་ཙམ་གྱིས་རང་གི་འགྲོ་ བ་དག་ནས་ཤི་འཕོས་ཏེ་ལྷ་དང༌། མི་རྣམས་ཀྱི་ནང་དུ་སྐྱེས་སོ། །དེ་དག་རེག་པ་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ གྱུར་ཏོ༑ ༑ཡང་ཕྱིར་མི་ལྡོག་པ་གང་དག་ལ་འོད་དེས་རེག་པ་དེ་དག་རེག་མ་ཐག་ཏུ་དེ་དག་ཐམས་ཅད་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཡོན་ཏན་ལྔ་བརྒྱ་བའི་ ལེའུ་ཞེས་བྱ་བའི་གཟུངས་ཀྱང་ཐོབ་བོ། །བྱང་ཆུབ་སེམས་དཔའ་མའི་མངལ་ན་གནས་པ་དེའི་ལུས་ཀྱི་འོད་ཀྱིས་འཇིག་རྟེན་གྱི་ཁམས་འབུམ་གང་དག་ལ་རེག་པར་གྱུར་པ་ དེ་དག་ཐམས་ཅད་བཻཌཱུཪྻ་ལས་གྲུབ་པར་ཡོངས་སུ་གནས་པར་གྱུར་ཏེ། གསེར་གྱི་སྐུད་པས་མིག་མང་རིས་སུ་བྲིས་པར་གྱུར་ལ། མིག་མང་རིས་ཐམས་ཅད་ནས་ཀྱང་ རིན་པོ་ཆེའི་ཤིང་ལྗོན་པ་མེ་ཏོག་དང༌། འབྲས་བུ་དང༌། དྲི་དང༌། ཁ་དོག་དང་ལྡན་པ་རྣམས་ཐོན་པར་གྱུར་ཏོ། །རིན་པོ་ཆེའི་ཤིང་དེ་དག་རླུང་གིས་ བསྐྱོད་ཅིང་རླུང་གིས་བསྐུལ་ན་འདི་ལྟ་སྟེ། སངས་རྒྱས་ཀྱི་སྒྲ་དང༌། ཆོས་ཀྱི་སྒྲ་དང༌། དགེ་འདུན་གྱི་སྒྲ་དང༌། བྱང་ཆུབ་སེམས་དཔའི་སྒྲ་དང༌། བྱང་ཆུབ་སེམས་ དཔའི་སྟོབས་དང༌། དབང་པོ་དང༌། བྱང་ཆུབ་ཀྱི་ཡན་ལག་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པའི་སྒྲ་སྙན་པ་ཡིད་དུ་འོང་བ་འདི་ལྟ་བུ་ འདི་དག་བྱུང་ངོ༌། །རིན་པོ་ཆེའི་ཤིང་ལྗོན་པའི་སྒྲ་དེས་ཀྱང་འཇིག་རྟེན་གྱི་ཁམས་འབུམ་དེ་དག་ཐམས་ཅད་ན་སེམས་ཅན་རྣམས་དགའ་བ་དང༌། མཆོག་ཏུ་དགའ་བ་ཐོབ་ནས་ གནས་སོ། །སངས་རྒྱས་ཀྱི་ཞིང་དེ་དག་ཐམས་ཅད་ནའང་སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དང༌། ལྷ་མ་ཡིན་གྱི་རིས་རྣམས་ མེད་པར་གྱུར་ཏོ། །བྱང་ཆུབ་སེམས་དཔའ་མའི་མངལ་ན་གནས་པ་དེའང་སེམས་ཅན་དེ་དག་ཐམས་ཅད་ལ་ཟླ་བའི་དཀྱིལ་འཁོར་བཞིན་དུ་སྣང་བར་གྱུར་ཏོ། །མངལ་ན་ གནས་པ་ཉིད་ལ་ཉིན་ལན་གསུམ་མཚན་ལན་གསུམ་དུ་ཐལ་མོ་སྦྱར་བའི་ལས་བྱས་སོ། །རྡོ་རྗེའི་བློ་གྲོས། དེ་ལྟར་བྱང་ཆུབ་སེམས་དཔའ་དེ་བཅས་པ་དང༌། མངོན་པར་ བྱུང་བ་དང༌། བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་བྱང་ཆུབ་སེམས་དཔའ་དེའི་ལུས་ལས་འོད་རྟག་ཏུ་བྱུང་བར་གྱུར་ཏོ། །མངོན་པར་རྫོགས་པར་སངས་ རྒྱས་ནས་ཀྱང་བཅོམ་ལྡན་འདས་དེའི་ལུས་ལས་འོད་རྟག་ཏུ་བྱུང་བར་གྱུར་ཏོ། །ཚུལ་དེ་བཞིན་དུ་ཡོངས་སུ་མྱ་ངན་ལས་འདའ་བའི་དུས་ཀྱི་བར་དུ་བཅོམ་ལྡན་འདས་དེའི་ ༄༅། །ལུས་ཀྱི་འོད་དེ་རྟག་ཏུ་བྱུང་བར་གྱུར་ཏོ། །དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་ཏེ་རིང་བསྲེལ་མཆོད་རྟེན་ན་གནས་པའི་ཆེའང་ལུས་ ཀྱི་འོད་དེ་རྟག་ཏུ་བྱུང་བར་གྱུར་ཏེ། རྡོ་རྗེའི་བློ་གྲོས། དེའི་ཕྱིར་བཅོམ་ལྡན་འདས་དེ་རྟག་ཏུ་འོད་ཟེར་གཏོང་བ་ཞེས་བྱ་བར་ལྷ་དང་མི་རྣམས་ཀྱིས་མཚན་གསོལ་ཏོ། །རྡོ་རྗེའི་ བློ་གྲོས༑ ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟག་ཏུ་འོད་ཟེར་གཏོང་བ་དེ་མངོན་པར་རྫོགས་པའི་སངས་ རྒྱས་པའི་བསྟན་པ་ལ་བྱང་ཆུབ་སེམས་དཔའ་འོད་ཟེར་མཐའ་ཡས་ཞེས་བྱ་བ་གཡོག་སྟོང་དང་ལྡན་པ་ཞིག་བྱུང་སྟེ། རྡོ་རྗེའི་བློ་གྲོས། བྱང་ཆུབ་སེམས་དཔའ་འོད་ ཟེར་མཐའ་ཡས་དེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟག་ཏུ་འོད་ཟེར་གཏོང་དེ་ལ་དེ་བཞིན་གཤེགས་ པའི་སྙིང་པོའི་ཆོས་ཀྱི་རྣམ་གྲངས་འདི་ལས་བརྩམས་ཏེ་ཡོངས་སུ་དྲིས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་རྟག་ཏུ་འོད་ཟེར་གཏོང་བ་དེས་བྱང་ཆུབ་སེམས་དཔའ་དེ་དག་རྗེས་སུ་གཟུང་བ་དང༌། ཡོངས་སུ་གཟུང་བའི་ཕྱིར་སྟན་གཅིག་ལ་འདུག་བཞིན་དུ་བསྐལ་བ་ ཆེན་པོ་ལྔ་བརྒྱར་དེ་བཞིན་གཤེགས་པའི་སྙིང་པོའི་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་བཤད་དེ། དེས་དེ་བཞིན་གཤེགས་པའི་སྙིང་པོའི་ཆོས་ཀྱི་རྣམ་གྲངས་འདི་ ཚིག་རྣམ་པར་ཤེས་པར་བྱ་བས་ཆོས་བསྒྲུབ་པ་དང༌། ངེས་པའི་ཚིག་དང༌། དཔེ་འབུམ་ཕྲག་དུ་མས་བྱང་ཆུབ་སེམས་དཔའ་དེ་དག་ལ་ཡང་དག་པར་རབ་ཏུ་བཤད་པའི་ཕྱོགས་ བཅུ་རྣམས་སུ་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་སུའང་ཚེགས་ཆུང་དུས་གོ་བར་གྱུར་ཏོ། །རྡོ་རྗེའི་བློ་གྲོས། དེ་ལ་བྱང་ཆུབ་སེམས་དཔའ་ གང་དག་གིས་དེ་བཞིན་གཤེགས་པའི་སྙིང་པོའི་ཆོས་ཀྱི་རྣམ་གྲངས་འདི་ཐ་ན་དེ་བཞིན་གཤེགས་པའི་སྙིང་པོ་ཞེས་བྱ་བའི་མིང་ཐོས་པ་དེ་དག་ཐམས་ཅད་མཐར་གྱིས་དགེ་བའི་རྩ་ བ་ཡོངས་སུ་སྨིན་ནས་ཡོན་ཏན་བཀོད་པ་དེ་འདྲ་བ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། བྱང་ཆུབ་སེམས་དཔའ་སེམས་ དཔའ་ཆེན་པོ་བཞི་ནི། མ་གཏོགས་སོ། །རྡོ་རྗེའི་བློ་གྲོས། དེའི་ཚེ་དེའི་དུས་ན་བྱང་ཆུབ་སེམས་དཔའ་འོད་ཟེར་མཐའ་ཡས་ཞེས་བྱ་བར་གྱུར་བ་གཞན་ཞིག་ཡིན་པ་སྙམ་དུ་ཁྱོད་ སེམས་ན། དེ་དེ་ལྟར་མི་བལྟ་སྟེ། རྡོ་རྗེའི་བློ་གྲོས། ཁྱོད་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔའ་འོད་ཟེར་མཐའ་ཡས་ཞེས་བྱ་བར་གྱུར་ཏེ། །བཅོམ་ལྡན་འདས་དེའི་བསྟན་ ༄༅། །པ་ལ་གང་དག་ད་དུང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་མ་རྒྱས་པའི་བྱང་ཆུབ་སེམས་དཔའ་བཞི་པོ་དེ་དག་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་འཇམ་དཔལ་དང༌། མཐུ་ཆེན་ཐོབ་པ་དང༌། སྤྱན་རས་གཟིགས་དབང་ཕྱུག་དང༌། རྡོ་རྗེའི་བློ་གྲོས་ཁྱོད་ཉིད་དེ། བཞི་པོའོ། །རྡོ་རྗེའི་བློ་གྲོས། དེ་ལྟར་དེ་བཞིན་གཤེགས་པའི་སྙིང་པོའི་ཆོས་ཀྱི་རྣམ་གྲངས་འདི་ཆོས་པ་ཙམ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སངས་རྒྱས་ཀྱི་ཡེ་ཤེས་སྒྲུབ་པས་ དོན་ཆེ་བ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །འདས་པའི་དུས་ནི་བསྐལ་པ་མཐའ་ཡས་ན། །བཅོམ་ལྡན་འོད་ཟེར་ གཏོང་ཞེས་བྱ་བ་བྱུང༌། །དེ་ཡི་ལུས་ལས་འདི་འདྲའི་འོད་བྱུང་བས། །ཞིང་རྣམས་བྱེ་བ་སྟོང་དག་སྣང་བར་གྱུར། །རྒྱལ་བ་དང་པོར་མངོན་རྫོགས་སངས་རྒྱས་རིག །བྱང་ཆུབ་ སེམས་དཔའ་འོད་ཟེར་མཐའ་ཡས་ཀྱིས། །དེ་ཚེ་བདེ་གཤེགས་རྒྱལ་དབང་དེ་ལ་ཞུས། །མདོ་འདི་རྟག་ཏུ་ཡང་དག་རབ་ཏུ་བཤད། །གང་གིས་རྒྱལ་དེའི་བསྟན་ལས་མདོ་སྡེ་ འདི༑ ༑འདྲེན་པ་ལས་ནི་མངོན་སུམ་ཐོས་གྱུར་པ། །དེ་ཀུན་མྱུར་དུ་བྱང་ཆུབ་དམ་པ་ཐོབ། །བྱང་ཆུབ་སེམས་དཔའ་བཞི་ནི་མ་གཏོགས་ཏེ། །མཐུ་ཆེན་ཐོབ་དང་སྤྱན་རས་ གཟིགས་དབང་ཕྱུག །བྱང་ཆུབ་སེམས་དཔའ་འཇམ་དཔལ་གསུམ་བ་སྟེ། །རྡོ་རྗེའི་བློ་གྲོས་ཁྱོད་ཉིད་བཞི་པ་ཡིན། །དེ་ཚེ་དེ་དག་གིས་ནི་མདོ་འདི་ཐོས། །བྱང་ཆུབ་སེམས་དཔའ་ འོད་ཟེར་མཐའ་ཡས་པ། །དེ་ཚེ་གང་གིས་རྒྱལ་ལ་ཞུས་བྱུང་སྟེ། །དེ་ཡི་དབང་བྱས་བདེ་གཤེགས་སྲས་པོ་ནི། །དེ་ཚེ་རྡོ་རྗེའི་བློ་གྲོས་ཁྱོད་ཉིད་ཡིན། །ང་ཡང་སྔོན་གྱི་སྤྱད་པ་སྤྱོད་པའི་ ཚེ༑ ༑བདེ་བར་གཤེགས་པ་སེངྒེའི་རྒྱལ་མཚན་ལས། །མདོ་སྡེ་འདི་ཡི་མིང་ནི་ཐོས་པར་གྱུར། །གུས་པར་བྱས་ཏེ་ཐོས་ནས་ཐལ་མོ་སྦྱར། །ང་ནི་ལེགས་པར་བྱས་པའི་ལས་དེ་ཡིས།། བྱང་ཆུབ་དམ་པ་མྱུར་དུ་ཐོབ་པར་གྱུར། །དེ་བས་བྱང་ཆུབ་སེམས་དཔའ་མཁས་རྣམས་ཀྱིས། །རྟག་ཏུ་མདོ་མཆོག་འདི་ནི་གཟུང་བར་བྱ། །རྡོ་རྗེའི་བློ་གྲོས། །རིགས་ཀྱི་བུའམ། རིགས་ཀྱི་བུ་མོ་ལས་ཀྱི་སྒྲིབ་པས་བསྒྲིབས་པ་གང་དག་དེ་བཞིན་གཤེགས་པའི་སྙིང་པོའི་ཆོས་ཀྱི་རྣམ་གྲངས་འདི་ཉན་ཏམ། ལུང་ནོད་དམ། ཁ་ཏོན་དུ་བྱེད་དམ། སྟོན་ཀྱང་ རུང༌། ཆོས་ཀྱི་རྣམ་གྲངས་འདི་ཉན་པ་དང༌། ལུང་ནོད་པ་དང༌། ཁ་ཏོན་བྱེད་པ་དང༌། རབ་ཏུ་འཆད་པ་དང༌། ཡི་གེར་འབྲི་བ་དེ་དག་ལ་ཚེགས་ཆུང་དུས་ཆོས་དེ་དག་ཀྱང་མངོན་ སུམ་དུ་འགྱུར། ལས་ཀྱི་སྒྲིབ་པ་དེ་བྱང་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་། ༄༅། །རིགས་ཀྱི་བུའམ། རིགས་ཀྱི་བུ་མོ་གང་ལས་ཀྱིས་གྲིབ་པས་བསྒྲིབ་པར་མི་འགྱུར་ཞིང་ཆོས་ཀྱི་རྣམ་གྲངས་འདི་ལ་བརྩོན་པར་བགྱིད་པ་དེ་དག་སངས་རྒྱས་ བཅོམ་ལྡན་འདས་ཇི་སྙེད་ཅིག་ལས་མང་དུ་ཐོས་པས་ཆོས་བསྟན་པའི་སླད་དུ་ངེས་པར་འབྱུང་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་ བོ༑ རིགས་ཀྱི་བུའམ། རིགས་ཀྱི་བུ་མོ་གང་དག་སངས་རྒྱས་བརྒྱའི་ཆོས་བསྟན་པ་ཀུན་ཏུ་གཟུང་བའི་ཕྱིར་ངས་པར་འབྱུང་བ་དེ་དག་ཀྱང་ཡོད་དོ། །ཀུན་དགའ་བོ། རིགས་ ཀྱི་བུའམ། རིགས་ཀྱི་བུ་མོ་གང་དག་སངས་རྒྱས་ཉིས་བརྒྱ་དང༌། སུམ་བརྒྱ་དང༌། བཞི་བརྒྱ་དང༌། ལྔ་བརྒྱ་དང༌། སྟོང་དང༌། ཉིས་སྟོང་དང༌། སུམ་སྟོང་དང༌། བཞི་སྟོང་དང༌། ལྔ་སྟོང་དང༌། དྲུག་སྟོང་དང༌། བདུན་སྟོང་དང༌། བརྒྱད་སྟོང་དང༌། དགུ་སྟོང་དང༌། ཁྲི་དང༌། སངས་རྒྱས་འབུམ་ནས་སངས་རྒྱས་བྱེ་བ་ཁྲག་ཁྲིག་འབུམ་གྱི་བར་དག་གི་ཆོས་ སྟོན་པ་ཀུན་ཏུ་གསུང་བའི་ཕྱིར་ངེས་པར་འབྱུང་བར་འགྱུར་བདག་ཀྱང་ཡོད་དོ། །ཀུན་དགའ་བོ། བྱང་ཆུབ་སེམས་དཔའ་གང་ཆོས་ཀྱི་རྣམ་གྲངས་འདི་འཆང་བ་དང༌། ཀློག་པ་དང༌། གཞན་དག་ལའང་རྒྱ་ཆེར་ཡང་དག་པར་རབ་ཏུ་སྟོན་པ་དང༌། གླེགས་པ་མ་དུ་བྱས་ཏེ་འཆང་བ་དེས་འདི་སྙམ་དུ་བདག་གིས་དེང་ཉིད་བླ་ན་མེད་པ་ཡང་དག་ བར་རྫོགས་པའི་བྱང་ཆུབ་ཐོབ་བོ་སྙམ་དུ་སེམས་བསྐྱེད་བར་བྱ་སྟེ། དེ་ནི། ཇི་ལྟར་ད་ལྟར་དེ་བཞིན་དུ་ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བྱ་ བའི་འོས་དང༌། མཆོད་པའི་འོས་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་ཆུབ་སེམས་དཔས་མདོ་སྡེ་འདི་ཐོས་ ནས༑ ༑བདག་གིས་བྱང་ཆུབ་དམ་པ་ཐོས་པར་བསམ། །གང་གི་ལག་ན་མདོ་སྡེ་འདི་ཡོད་པ། །དེ་ནི་དེ་ལྟར་འཇིག་རྟེན་ཕྱག་བྱའི་འོས། །དེ་ནི་འཇིག་རྟེན་མགོན་པོ་རྣམ་པར་ འདྲེན༑ ༑ཁྲིད་བྱེད་རྣམ་པར་ཁྲིད་བྱེད་བསྔགས་པའི་འོས། །གང་གི་ལག་ན་མདོ་སྡེ་འདི་ཡོད་པ། །དེ་ནི་དེ་ལྟར་ཆོས་ཀྱི་རྒྱལ་ཞེས་བྱ། །གང་གི་ལག་ན་མདོ་སྡེ་འདི་ཡོད་ པ༑ ༑མི་ཡི་ཁྱུ་མཆོག་ཆོས་ཀྱི་སྒྲོན་མ་འཛིན། །དེ་ནི་ཉི་ཟླ་ལྟ་བུར་བལྟ་བའི་འོས། །འཇིག་རྟེན་མགོན་པོ་ལྟ་བུར་ཕྱག་བྱའི་གནས། །བཅོམ་ལྡན་འདས་ཀྱིས་དེ་སྐད་ཅེས་བཀའ་ སྩལ་ནས་བྱང་ཆུབ་སེམས་དཔའ་རྡོ་རྗེའི་བློ་གྲོས་དང༌། ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་དག་དང༌། ཉན་ཐོས་ཆེན་པོ་དེ་དག་དང༌། འཁོར་བཞི་ པོ་དང༌། ལྷ་དང༌། མི་དང༌། ལྷ་མ་ཡིན་དང༌། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དེ་བཞིན་ ༄༅། །གཤེགས་པའི་སྙིང་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཤཱཀྱ་བྲ་བྷ་དང༌། ཞུ་ཆེན་གྱི་ལོ་ཙྪ་བ་བནྡྷེ་ཡེ་ཤེས་ སྡེས་བསྒྱུར་ཅིང་ཞུས་ཏེ་སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ། Copyright © 2012 by the Asian Classics Input Project. All rights reserved.