Loading
འཕགས་པ་ཡོངས་སུ་མྱ་ངན་ལས་འདས་པ་ཆེན་པོ་ཐེག་པ་ཆེན་པོའི་མདོ།
ཉ
not checked
༄༅༅། །རྒྱ་གར་སྐད་དུ། ཨཱཪྻ་མ་ཧཱ་པ་རི་ནིརྦཱ་ཎ་ནཱ་མ་མ་ཧཱ་ཡཱ་ན་སཱུ་ཏྲ། བོད་
སྐད་དུ༑ འཕགས་པ་ཡོངས་སུ་མྱ་ངན་ལས་འདས་པ་ཆེན་པོ་ཐེག་པ་ཆེན་པོའི་མདོ།
བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །
འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོང་ཁྱེར་ཀུ་ཤི་ན་ཆུ་ཀླུང་
༄༅། །གསེར་ལྡན་གྱི་འགྲམ་གྱད་ཀྱི་ཉེན་ཀོར་ཤིང་སཱ་ལ་ཟུང་གི་ཚལ་ན་བཞུགས་ཏེ། དེ་ན་
བཅོམ་ལྡན་འདས་དགེ་སློང་བྱེ་བ་འབུམ་ཕྲག་བརྒྱད་ཅུས་བསྐོར་ཞིང་མདུན་གྱིས་བལྟས་ཏེ། དཔྱིད་ཟླ་ཐ་ཆུང་ཟླ་བ་ཉ་
བའི་ནང་པར་ཡོངས་སུ་མྱ་ངན་ལས་འདའ་བའི་དུས་དང་ཉེ་བར་གྱུར་པ་ན། སེམས་ཅན་ཐམས་ཅད་ཀྱི་རང་རང་གི་
ཡུལ་གྱི་སྐད་དུ་ཤིན་ཏུ་ཟུར་ཕྱིན་པར་དོན་བརྡ་སྤྲོད་པའི་ཚིག་རྣམས་ཀྱིས་སྲིད་པའི་རྩེ་མོ་མན་ཆད་གོ་བར་མཛད་དེ། དེང་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་ཐམས་ཅད་ལ་ཐུགས་བརྩེ་བ་ཅན།
འཇིག་རྟེན་ཐམས་ཅད་སྐྱོབ་པ། སེམས་ཅན་ཐམས་ཅད་ལ་སྒྲ་གཅན་ཟིན་དང་འདྲ་བར་གཟིགས་པ། སྐྱབས་ཆེན་པོའི་
གནས་དང་གཞི་པོར་གྱུར་པ་ཐུབ་པ་ཆེན་པོ་ཡོངས་སུ་མྱ་ངན་ལས་འདའ་བར་འགྱུར་རོ། །ཞེས་བཀའ་སྩལ་ཏེ། སེམས་ཅན་
ཐམས་ཅད་ཀྱི་ཞུ་བ་ལུང་བསྟན་པ་ཐ་མ་ལ་དེ་ལྟ་བུའི་གསུང་རྣམས་བྱུང་བར་གྱུར་ཏོ། །གཞན་ཡང་དེའི་ཚེ་བཅོམ་ལྡན་འདས་ཉིད་
ཀྱི་ཞལ་ནས་འོད་ཟེར་སྣ་ཚོགས་འདི་ལྟ་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་དང༌། ཤེལ་གྱི་ཁ་དོག་དང༌།
རྡོའི་སྙིང་པོའི་ཁ་དོག་ལྟ་བུ་དག་བྱུང་སྟེ། འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དང༌། ཕྱོགས་
བཅུའི་སངས་རྒྱས་ཀྱི་ཞིང་ཐམས་ཅད་དུ་སེམས་ཅན་དམྱལ་བ་དང༌། དུད་འགྲོ་དང༌། ཡི་དྭགས་དང༌། ལྷ་མ་ཡིན་དང༌། གཤིན་
༄༅། །རྗེའི་འཇིག་རྟེན་གྱི་སེམས་ཅན་དེ་དག་ལ་ཕོག་པས་དེའི་མོད་ལ་ཉོན་མོངས་པའི་མུན་པ་ཐམས་ཅད་དང༌།
ངན་སོང་དང༌། མི་ཁོམ་པ་ཐམས་ཅད་རྒྱུན་ཆད་པར་གྱུར་ཏོ། །དེ་ནས་མྱ་ངན་ཆེན་པོས་ནོན་ཏེ་ཚིག་མཐུན་པར་ཀྱེ་མ་ཁེབས་སོ། །
ཁེབས་སོ། །ཞེས་ཀྱང་ཟེར་ཏོ། །ཀྱི་ཧུད་ཀྱི་ཧུད་ཅེས་ཀྱང་སྐད་ཆེར་འབོད་ཅིང་ལག་པ་བརྐྱང་བས་ཀྱང་མགོ་བོ་ལ་རྡོབ་ཅིང་ལུས་
འདར་ཞིང་ཤིན་ཏུ་དུའོ། །དེའི་ཚེ་ས་ཆེན་པོ་ནགས་ཚལ་དང་བཅས། རི་དང་བཅས་པའི་རྒྱ་མཚོའི་མཐས་གཏུགས་པའང་རབ་ཏུ་
གཡོས་ཏེ། སེམས་ཅན་དེ་དག་ཀྱང་གཅིག་ལ་གཅིག་འཛིན་ཅིང་འདི་སྐད་དུ། གྲོགས་པོ་དག་རིངས། གྲོགས་པོ་དག་རིངས། གྱད་
ཡུལ་གྱི་གྲོང་ཁྱེར་ཀུ་ཤིར་འདོང་ངོ་འདོང་ངོ༌། །དེ་བཞིན་གཤེགས་པའི་ཞབས་ལ་ཕྱག་འཚལ་ཏེ། ཡོངས་སུ་མྱ་ངན་ལས་འདའ་
བར་གཤེགས་པ་ལས་ལྡོག་ལ་བསྒྲིམ་མི་དགོས་པར་བསྐལ་པའམ། བསྐལ་པ་ལས་ལྷག་པར་ཡན་བཞུགས་པར་གསོལ་བ་གདབ་བོ། །ཞེས་ཟེར་ཏེ། གཅིག་ལ་གཅིག་འཇུས་
ནས་འདི་སྐད་དུ། ཀྱེ་མ་འཇིག་རྟེན་སྟོངས་པར་འགྱུར་རོ། །ཀྱེ་མ་འཇིག་རྟེན་སྟོངས་པར་འགྱུར་རོ། །ཀྱེ་མ་སེམས་ཅན་རྣམས་ཀྱི་བསོད་ནམས་ཀྱི་ལས་ཀྱི་རྣམ་པར་སྨིན་པ་ནི། ཟད་དོ། །
ལས་མི་བཟད་པ་ནི། བྱུང་ངོ༌། །ཚེ་དང་ལྡན་པ་དག །མྱུར་ཅིག །ཚེ་དང་ལྡན་པ་དག །མྱུར་ཅིག །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་དེང་གི་ཡུད་ཙམ་འདི་ལ་
ཡོངས་སུ་མྱ་ངན་ལས་འདའ་བར་འགྱུར་རོ། །ཀྱེ་མ་འཇིག་རྟེན་སྟོངས་པར་འགྱུར་རོ། །ཀྱེ་མ་འཇིག་རྟེན་སྟོངས་པར་འགྱུར་རོ། །དེ་བཞིན་གཤེགས་པ་མི་བཞུགས་ན་བདག་ཅག་མགོན་
མེད་པ་དང༌། རྩ་ལག་མེད་པ་དང༌། ཕོངས་པར་ཇི་ལྟར་མི་འགྱུར་ཞིག་གུ། བདག་ཅག་གི་ཐེ་ཚོམ་དང༌། སོམ་ཉི་ཅི་དང་ཅི་ཡོད་པ་དེ་དང༌། དེ་དག་ཞུ་བར་བྱའོ། །ཞེས་ཀྱང་ཟེར་ཏོ། །ཉན་ཐོས་ཆེན་
པོ་འདི་དག་ཀྱང་དེ་ན་འཁོད་དེ། འདི་ལྟ་སྟེ། གནས་བརྟན་ཀཱ་ཏྱཱ་ཡ་ན་ཆེན་པོ་དང༌། གནས་བརྟན་པ་ཀུ་ལ་དང༌། གནས་བརྟན་ཉེ་དགའ་བོ་དང༌། དེ་དག་ལ་སོགས་པ་གཞན་དག་ཀྱང་དེ་ན་འཁོད་
དེ༑ དེ་དག་ལ་འོད་ཟེར་གྱིས་ཕོག་ནས་འདར། རབ་ཏུ་འདར། དམ་དམ། རབ་ཏུ་དམ་དམ། འཁྲུགས། རབ་ཏུ་འཁྲུགས། བརྟབས། རབ་ཏུ་བརྟབས། འུར་འུར། རབ་ཏུ་འུར་འུར།
༄༅། །འཁམས། རབ་ཏུ་འཁམས། རྨུགས། རབ་ཏུ་རྨུགས། རེངས། རབ་ཏུ་རེངས་ཏེ། དེ་དག་ལ་སོགས་པ་དག་ཏུ་གྱུར་ནས་ཆས་སོ། །དེའི་ཚེ་དགེ་སློང་ས་
ཡ་ཕྲག་བརྒྱད་སོ་ཤིང་ཟོས་ནས་ཕྱིར་བྱུང་སྟེ། གནས་བརྟན་དེ་དག་ལ་འོད་ཟེར་གྱི་སྣང་བ་དེས་ཕོག་ནས་ཤིན་ཏུ་རིངས་པར་ཁ་གདོང་བཀྲུས་ཏེ་གཅིག་ལ་གཅིག་འཇུས་སོ། །དེ་
བཞིན་གཤེགས་པའི་སྲས་དེ་དག་ཐམས་ཅད་ཀྱང་དགྲ་བཅོམ་པ། དབང་ཐོབ་པ། བྱ་བ་བྱས་པ། བྱེད་པ་བྱས་པ། ཅང་ཤེས་པ། གཙོ་བོ་ཆེན་པོ། ཆེན་པོ་སྟོང་པ་ཉིད་ཀྱིས་རང་གི་
དོན་ཐོབ་པ། ཙནྡན་ཆེན་པོ་ལྟ་བུའི་གཡོག་འཁོར་དང་ལྡན་པ། སེངྒེ་ལྟ་བུའི་གཡོག་འཁོར་དང་ལྡན་པ་ཤ་སྟག་སྟེ། དེ་ལ་སོགས་པའི་ཡོན་ཏན་དཔག་ཏུ་མེད་པ་དང་ལྡན་པ་
དེ་དག་ཐམས་ཅད་སྔ་དྲོ་ཉི་མ་འཆར་ཀར་ཡན་ལག་ཐམས་ཅད་ཀྱི་བ་སྤུ་རྒྱ་སྐྱེགས་ཀྱི་ཤིང་གི་མེ་ཏོག་ལྟར་རྩ་དམར་བ་ནི། ལངས། མིག་ནི། མཆི་མ་ཁྲག་ལྟ་བུས་གང་སྟེ། མཆོག་
ཏུ་སྡུག་བསྔལ་བའི་ཚོར་བ་དང་ལྡན་ནས་སེམས་ཅན་ཐམས་ཅད་ལ་ཕན་པ་དང་བདེ་བ་དང་སྙིང་བརྩེ་བའི་ཕྱིར་དང༌། གདུལ་བར་བྱ་བའི་དབང་གི་དོན་དུ་ཐེག་པ་ཆེན་པོའི་མཆོག་
ཏུ་གསང་བ། སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་ཆོས་ཀྱི་སྒོའི་ཚུལ་བཤད་པར་བྱ་བའི་ཕྱིར་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་
ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་ལན་འབུམ་བསྐོར་བ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་ཏུ་
འཁོད་དོ། །དེའི་ཚེ་ཀོ་ཏ་ཀའི་བུ་མོ་རབ་བཟང་མ་ལ་སོགས་པ་དགེ་སློང་མ་བྱེ་བ་འབུམ་ཕྲག་དྲུག་ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། དབང་ཐོབ་པ། བྱ་བ་བྱས་པ། བྱེད་པ་བྱས་པ།
ཁུར་བོར་བ། ཉོན་མོངས་པ་མེད་པ། གཙོ་མོ་ཆེན་མོ། ཆེན་པོ་སྟོང་པ་ཉིད་ཀྱིས་རང་གི་དོན་ཐོབ་པ་ཤ་སྟག་སྟེ། འདི་ལྟ་སྟེ། ཀོ་ཏ་ཀའི་བུ་མོ་དགེ་སློང་མ་རབ་བཟང་མ་དང༌། དགེ་སློང་མ་
ཉེ་དགའ་མོ་དང༌། དགེ་སློང་མ་རྒྱ་མཚོ་བློ་གྲོས་དང༌། དེ་དག་ལ་སོགས་པ་དགེ་སློང་མ་བྱེ་བ་འབུམ་ཕྲག་དྲུག་སྔ་དྲོ་ཉི་མ་འཆར་ཀར་ཡན་ལག་ཐམས་ཅད་ཀྱི་བ་སྤུ་རྒྱ་སྐྱེགས་ཀྱི་ཤིང་གི་
མེ་ཏོག་ལྟར་རྩ་དམར་བ་ནི། ལངས། མིག་ནི། མཆི་མ་ཁྲག་ལྟ་བུས་གང་སྟེ། མཆོག་ཏུ་སྡུག་བསྔལ་བའི་ཚོར་བ་དང་ལྡན་ནས་སེམས་ཅན་ཐམས་ཅད་ལ་ཕན་པ་དང༌། བདེ་བ་དང༌།
སྙིང་བརྩེ་བའི་ཕྱིར་དང༌། གདུལ་བར་བྱ་བའི་དབང་གི་དོན་དུ་ཐེག་པ་ཆེན་པོའི་མཆོག་ཏུ་གསང་བ། སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་ཆོས་ཀྱི་སྒོའི་ཚུལ་
བཤད་པར་བྱ་བའི་ཕྱིར་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་ལན་འབུམ་བསྐོར་བ་
༄༅། །བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་ཏུ་འཁོད་དོ། །འཁོར་དེ་ན་དགེ་སློང་མ་འཁོད་པ་རྣམས་ཀྱང་བྱང་
ཆུབ་སེམས་དཔའ་མི་མཆོག་ས་བཅུ་ཐོབ་པ་ཤ་སྟག་སྟེ། གདུལ་བའི་དབང་གི་ཕྱིར་བུད་མེད་ཀྱི་གཟུགས་དང༌། བུད་མེད་ཀྱི་དབྱིབས་དང༌། ཤ་དང༌། ཁྲག་དང༌། རྒྱུས་པ་མང་པོ་དང༌།
རུས་པའི་ལུས་འཆང་བ་རྟག་ཏུ་ཚད་མེད་པ་བཞི་བསྒོམ་པ་དང་ལྡན་པ། བདག་ཉིད་ཀྱིས་སངས་རྒྱས་ཀྱི་ཡུལ་གྱི་ཆོ་འཕྲུལ་ཆེན་པོའི་དོན་བྱེད་ནུས་པ་ཤ་སྟག་གོ། །གཞན་ཡང་དེའི་ཚེ་བྱང་
ཆུབ་སེམས་དཔའ་རྒྱ་མཚོས་བྱིན་ལ་སོགས་པ་བྱང་ཆུབ་སེམས་དཔའ་གངྒཱའི་ཀླུང་གི་བྱེ་མ་སྙེད་ཐམས་ཅད་ཀྱང་མི་མཆོག་ས་བཅུ་ཐོབ་པ། ཐབས་ཀྱིས་ལུས་འཆང་བ་ཤ་སྟག་ལ་
འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱ་མཚོས་བྱིན་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་དང༌། དེ་དག་ལ་སོགས་པ་བྱང་ཆུབ་
སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་ཐེག་པ་ཆེན་པོ་ཐོས་པར་འདོད་པ། ཐེག་པ་ཆེན་པོ་ལ་ཞུགས་པ། ཐེག་པ་ཆེན་པོས་བཀྲེས་པ། ཐེག་པ་ཆེན་པོ་ལ་སྲེད་པ། ཐེག་
པ་ཆེན་པོ་ལ་སེར་སྣ་མེད་པ། འཇིག་རྟེན་ཐམས་ཅད་དང་མཐུན་པར་བྱེད་ནུས་པ་ཤ་སྟག་དང༌། བདག་ཅག་རྒལ་ནས་གཞན་བསྒྲལ་བར་བྱའོ། །སྙམ་སྟེ་སྔོན་གྱི་བསྐལ་པ་བྱེ་བ་
སྙེད་དུ་ཚུལ་ཁྲིམས་ཀྱི་བཀོད་པའི་དམ་བཅའ་བ་ལེགས་པར་བླངས་པ་འཛིན་པའི་སྤྱད་པ་སྤྱོད་པ་ཤ་སྟག་དང༌། དེ་བཞིན་དུ་བདག་ཅག་གྲོལ་ནས་གཞན་དགྲོལ་བར་བྱའོ། །སྙམ་པ་དང༌།
དེ་བཞིན་དུ་དཀོན་མཆོག་གསུམ་གྱིས་གདུང་མི་འཆད་པར་བྱའོ། །སྙམ་པ་དང༌། ཆོས་ཀྱི་འཁོར་ལོ་བསྐོར་བར་བྱའོ། །སྙམ་པ་དང༌། གོ་ཆ་ཆེན་པོ་བགོ་བར་བྱའོ། །སྙམ་དུ་སེམས་པ་ཤ་
སྟག་དང༌། དེ་བཞིན་དུ་ཡོན་ཏན་དཔག་ཏུ་མེད་པ་དང་ལྡན་པ་དང༌། བུ་གཅིག་པ་ལ་བྱ་བ་བཞིན་དུ་སེམས་ཅན་ཐམས་ཅད་ལ་སྙོམས་པར་ལྟ་བ་ཤ་སྟག་སྟེ། དེ་དག་ཐམས་ཅད་སྔ་དྲོའི་ཉི་མ་
འཆར་ཀར་ཡན་ལག་ཐམས་ཅད་ཀྱི་བ་སྤུ་རྒྱ་སྐྱེགས་ཀྱི་ཤིང་གི་མེ་ཏོག་ལྟར་རྩ་དམར་བ་ནི། ལངས། མིག་ནི། མཆི་མ་ཁྲག་ལྟ་བུས་གང་སྟེ། མཆོག་ཏུ་སྡུག་བསྔལ་བའི་ཚོར་བ་དང་ལྡན་
ནས་སེམས་ཅན་ཐམས་ཅད་ལ་ཕན་པ་དང༌། བདེ་བ་དང༌། སྙིང་བརྩེ་བའི་ཕྱིར་དང༌། གདུལ་བར་བྱ་བའི་དབང་གི་དོན་དུ་ཐེག་པ་ཆེན་པོའི་མཆོག་ཏུ་གསང་བ། སྟོང་པ་ཉིད་ཀྱི་རྣམ་པ་དགོངས་
པའི་ཚིག་རྣམ་པ་སྣ་ཚོགས་ཀྱི་སྒོའི་ཚུལ་བཤད་པར་བྱ་བའི་ཕྱིར་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་
ལྡན་འདས་ལ་ལན་འབུམ་བསྐོར་བ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་ཏུ་འཁོད་དོ། །ཡང་དེའི་ཚེ་བསླབ་པའི་གཞི་ལྔ་བླངས་ཤིང༌།
༄༅། །ཚུལ་ཁྲིམས་དང༌། ཆོ་ག་དང༌། ཡོན་ཏན་དང་ལྡན་པའི་དགེ་བསྙེན་འོད་དྲི་མ་མེད་པར་གྲགས་པའི་རྒྱལ་པོ་ལ་སོགས་པ་དགེ་བསྙེན་གངྰྒའི་ཀླུང་གཉིས་ཀྱི་བྱེ་མ་
སྙེད་ཐམས་ཅད་ཀྱང་ཟུང་དང་ཟུང་དུ་ཤེས་པར་འདོད་པ་ཤ་སྟག་སྟེ། སྡུག་བསྔལ་བ་དང༌། བདེ་བ་དང༌། རྟག་པ་དང༌། མི་རྟག་པ་དང༌། བདག་ཡོད་པ་དང༌། བདག་མེད་པ་དང༌། སྟོང་
པ་དང༌། སྟོང་པ་མ་ཡིན་པ་དང༌། དེ་ཁོ་ན་དང༌། དེ་ཁོ་ན་མ་ཡིན་པ་དང༌། སྐྱབས་དང༌། སྐྱབས་མ་ཡིན་པ་དང༌། སེམས་ཅན་དང༌། སེམས་ཅན་མེད་པ་དང༌། བརྟན་པ་དང༌། བརྟན་པ་མ་
ཡིན་པ་དང༌། ཞི་བ་དང༌། ཞི་བ་མ་ཡིན་པ་དང༌། འདུས་བྱས་དང༌། འདུས་མ་བྱས་དང༌། ཐེར་ཟུག་དང༌། ཐེར་ཟུག་མ་ཡིན་པ་དང༌། ཡོངས་སུ་མྱ་ངན་ལས་འདས་པ་དང༌། ཡོངས་སུ་མྱ་
ངན་ལས་འདས་པ་མ་ཡིན་པ་ལ་སོགས་པའི་ཁྱད་པར་དང༌། ཁྱད་པར་དུ་འཕགས་པ་ཤེས་པར་འདོད་པ་ཤ་སྟག་སྟེ། འདི་ལྟ་སྟེ། དགེ་བསྙེན་འོད་དྲི་མ་མེད་པར་གྲགས་པའི་རྒྱལ་
པོ་ཞེས་བྱ་བ་དང༌། དགེ་བསྙེན་རབ་སྦྱིན་ལ་སོགས་པ་དགེ་བསྙེན་ཐེག་པ་ཆེན་པོ་ཐོས་པར་འདོད་ལ་ཐོས་ནས་ཀྱང་གཞན་དག་ལ་བསྟན་པར་བྱའོ། །སྙམ་དུ་དམ་བཅས་ཤིང་ཚུལ་ཁྲིམས་
བླངས་པ། ཐེག་པ་ཆེན་པོས་སྐོམ་ལ་ངོམས་ནས་ཀྱང་གཞན་སྐོམ་པ་དག་ངོམ་པར་བྱའོ། །སྙམ་དུ་དམ་བཅས་པ། ཐེག་པ་ཆེན་པོ་ལ་སྲེད་པ། ཐེག་པ་ཆེན་པོ་ལ་སེར་སྣ་མེད་པ། འཇིག་
རྟེན་ཐམས་ཅད་དང་མཐུན་པར་བྱེད་ནུས་པ་ཤ་སྟག་དང༌། བདག་ཅག་རྒལ་ནས་གཞན་བསྒྲལ་བར་བྱའོ། །བདག་ཅག་གྲོལ་ནས་གཞན་དགྲོལ་བར་བྱའོ། །དཀོན་མཆོག་གསུམ་གྱི་གདུང་མི་
འཆད་པར་བྱའོ། །ཆོས་ཀྱི་འཁོར་ལོ་བསྐོར་བར་བྱའོ། །སྙམ་དུ་སློབ་པར་འདོད་པ། གོ་ཆ་ཆེན་པོ་བགོས་པ། བསླབ་པ་རྣམས་ལ་སེམས་གུས་པ་དང༌། དེ་བཞིན་དུ་ཡོན་ཏན་གྲངས་མེད་པ་
དང་ལྡན་པ། བུ་གཅིག་པ་ལ་བྱ་བ་བཞིན་དུ་སེམས་ཅན་ཐམས་ཅད་ལ་སྙིང་རྗེ་དང་ལྡན་པ་ཤ་སྟག་སྟེ། དེ་དག་ཀྱང་ཉི་མ་འཆར་ཀར་དེ་བཞིན་གཤེགས་པའི་གདུང་ཞུགས་ལ་བཞེན་པའི་ཕྱིར་
རེ་རེས་ཀྱང་ཙནྡན་དང༌། ཨ་ག་རུ་དང༌། ཐང་ཤིང་གི་མཆོག་དང༌། ཙནྡན་ས་མཆོག་པའི་བུད་ཤིང་རྣམས་དང༌། ཡམ་བསྲེག་ཤིང་དྲི་བསུང་དང་ལྡན་པ་ཡོན་ཏན་ཅན་ལྔ་སྟོང་ལྔ་སྟོང་ཁྱེར་ཏེ་འོངས་
སོ༑ ༑དེ་ལ་ཡམ་བསྲེག་ཤིང་སྣ་རེ་ཞིང་ཡང་གསེར་གྱི་སྐུད་པ་རིན་པོ་ཆེ་སྣ་བདུན་རིགས་བདུན་དང་ལྡན་པས་སྤྲས་པས་དཀྲིས་པ། རི་མོ་ལ་བྲིས་པ་ཁོ་ན་བཞིན་དུ་འདུག་པ། རང་བཞིན་གྱིས་
གཞོན་ཤ་ཅན་ལེགས་པར་བཅོས་པ་ཤ་སྟག་སྟེ། སྣ་རེ་ཞིང་ཡང་འོད་རྣམ་པ་སྣ་ཚོགས་དང་ལྡན་པའི་ཕུང་པོ་ཆེན་པོ། །མདོག་སྔོ་བ་དང༌། བར་བར་ཁ་ཅིག་ཏུ་མདོག་དཀར། ཁ་ཅིག་ཏུ་སྔོ་
སྐྱ། ཁ་ཅིག་ཏུ་རྩ་དམར། ཁ་ཅིག་ཏུ་སེར་པ་མིག་ཏུ་སྡུག་པར་བྱས་པ་ཤ་སྟག་གོ །བམ་པོ་རེ་རེའི་གཡོགས་མའི་ཕྱར་བུའང་རིན་པོ་ཆེ་སྣ་བདུན་ལས་བྱས་པ་ཤ་སྟག་གོ། །ཆིངས་མའི་ཐེ་
༄༅། །གུ་མང་པོ་རེ་རེ་ཞིང་ཡང་ལྡོང་རོས་ཀྱི་མདོག་ལྟ་བུ་དང༌། ཟར་མའི་མེ་ཏོག་གི་མདོག་ལྟ་བུ་དང༌། སྔོན་པོ་དང༌། སེར་པོ་རྣམས་ཀྱིས་བར་བར་དུ་སྤེལ་བ་ཤ་སྟག་གོ །
དེ་ལ་ཆིངས་མའི་ཐེ་གུ་མང་པོ་རེ་རེ་ཞིང་ཡང་གསེར་ཐགས་ཀྱི་མཆོག་རྣམ་པར་དག་པ། ཡུལ་མང་པོར་གྲགས་པ་དག་གིས་སྤེལ་བ་ཤ་སྟག་གོ །དེ་ལ་ཡམ་བསྲེག་ཤིང་སྣ་རེ་ཞིང་ཡང་
སྤོས་དྲི་བསུང་ཞིམ་པོ་དང༌། མེ་ཏོག་ཕྲེང་དང༌། གུར་གུམ་གྱི་ཕྱེ་མ་དང་ལྡན་པར་བྱས་པ། གསེར་ཐགས་ཀྱིས་གཡོགས་པ་དར་སྣས་བརྒྱན་པ་རིན་པོ་ཆེ་སྣ་བདུན་གྱི་ཤུབས་སྔོན་པོ་དང༌།
སེར་པོ་དང༌། སྔོ་སྐྱ་དང༌། དཀར་པོ་དང༌། བཙོད་ཀ་ལྟ་བུ་དག་གི་ནང་དུ་བཅུག་པ། ཡུལ་ཀ་ལི་དཀའི་རས་དང༌། ཟར་མའི་རས་དང༌། ཟབ་དར་དང༌། རྒྱ་དར་གྱི་མཆོག་རྣམས་ཀྱིས་དཀྲིས་པ།
མེ་ཏོག་མང་པོས་བརྒྱན་པ། བྱུག་པ་དྲི་བསུང་ཞིམ་པོ་དག་གིས་བྱུགས་པ་ཤ་སྟག་གོ །ཡམ་བསྲེག་ཤིང་སྣ་རེའི་ཤིང་རྟ་རེ་རེ་ཞིང་ཡང་རིན་པོ་ཆེ་སྣ་བདུན་གྱིས་བརྒྱན་པ་གསེར་གྱིས་མཛེས་
པར་བྱས་པ་ཁ་ཅིག །ཁ་ཅིག་ཏུ་སྔོན་པོ་དང༌། དཀར་པོ་དང༌། བབ་ལའི་ཁ་དོག་དང༌། ལི་ཁྲིའི་ཁ་དོག་པས་ལྷག་པའི་འོད་གསལ་བ་དང་ལྡན་པ་ཤ་སྟག་གོ །ཤིང་རྟ་དེ་དག་གི་གཉའ་
ཤིང་རྣམས་ཀྱང་རིན་པོ་ཆེ་སྣ་བདུན་གྱིས་བརྒྱན་པ། དཔེ་མེད་པ། རྟ་ཅང་ཤེས་མགྱོགས་པ་དག་དང་སྦྱར་བ་ཤ་སྟག་གོ །རྟ་དེ་དག་ཀྱང་རླུང་གི་ཤུགས་པས་མགྱོགས་པ། སྤུ་ཁ་ཆུ་སྐྱར་
གྱི་མདོག་དང༌། ལྡོང་རོས་ཀྱི་མདོག་དང༌། སྤྲིན་གྱི་མདོག་ཅན་ཤ་སྟག་སྟེ། ཐབས་དེ་འདྲ་བའི་ཤིང་རྟ་རེ་རེའི་མདུན་ལོགས་དང༌། རྒྱབ་ལོགས་སུ་རྒྱལ་མཚན་དང་བ་དན་བསྒྲེང་སྟེ། རྒྱལ་མཚན་
ཐམས་ཅད་ཀྱང་རིན་པོ་ཆེ་ལས་བྱས་པ། གསེར་གྱི་དྲ་བས་གཡོགས་པ་ཤ་སྟག་གོ །རྒྱལ་མཚན་གྱི་མདུན་ལོགས་སུའང་གདུགས་རྩིབས་དང༌། རྩ་བ་ནོར་བུ་དྲི་མ་མེད་པ་འོད་ཅན་ལས་བྱས་པ།
མུ་ཏིག་གི་ཆུན་པོ་དབྱངས་པ་ཤ་སྟག་ཁྱེར་རོ། །གདུགས་རེ་རེའི་མདུན་ལོགས་སུའང་གསེར་གྱི་མེ་ཏོག་ཀུ་མུ་ད་དང༌། ཨུཏྤ་ལ་དང༌། པདྨ་དཀར་པོ་སྡོང་བུ་བཻཌཱུཪྻ་ལས་བྱས་པ། ཟེ་བ་རྡོ་རྗེ་
ལས་བྱས་པ། བུང་བ་མང་པོ་སྐད་འབྱིན་པ། དྲི་བསུང་ཞིམ་པོ་དང་ལྡན་པ། ཡིད་དུ་འོང་བ། འོད་དང་ལྡན་པ། ཆེ་བ། མང་བ་ཤ་སྟག་དང༌། ལྡ་ལྡི་ཆེན་པོ་ཤ་སྟག་ཁྱེར་རོ། །ལྡ་ལྡི་ཆེན་པོ་
རྣམས་ཀྱི་མདུན་དུའང་བྱང་ཆུབ་སེམས་དཔའི་སྐྱེས་པའི་རབས་ཀྱི་སྤྱོད་པ་རི་མོར་བྲིས་པ་ཆེན་པོ་དག་ཐོགས་སོ། །རི་མོའི་གཟུགས་རེ་རེའི་གློ་གཡས་གཡོན་ནས་ཀྱང་ཟློས་གར་གྱི་གར་ཐབས་ཡུལ་
དབུས་ནས་བྱུང་བ་རྣམ་པ་སྣ་ཚོགས་བྱེད་དེ། གར་ཐབས་བྱེད་པ་དེའི་ནང་ན་སིལ་སྙན་རིན་པོ་ཆེ་ལས་བྱས་པའི་རྫ་རྔ་དང༌། འཁར་རྔ་དང༌། རྔ་ཟླུམ་དང༌། པི་ཝང་དང༌། གླིང་བུ་དང༌། པི་ཝང་རྒྱུད་གཅིག་
པ་དང༌། རྔ་བོ་ཆེ་དང༌། དུང་ལ་སོགས་པ་དག་བརྡུང་ཞིང་འབུད་དོ། །གར་ཐབས་ཀྱི་སིལ་སྙན་དེ་དག་ལས་ཀྱང་ཀྱེ་མ་འཇིག་རྟེན་སྟོངས་པར་འགྱུར་རོ། །ཞེས་བྱ་བ་དེ་ལྟ་བུའི་རྣམ་པ་བརྗོད་ཅིང་གདུང་
༄༅། །གདུང་སྐད་དུ་དབྱངས་ལེན་ཏོ། །གར་ཐབས་ཀྱི་སིལ་སྙན་རེ་རེའི་མདུན་དུའང་མེ་ཏོག་དྲི་ཞིམ་པོ་སྣ་ཚོགས་རྣམ་པར་འཚེར་བ་རྣམས་ཀྱི་ཕྱེ་མས་རིན་པོ་ཆེའི་
སྐོན་བུ་ལེགས་པར་བཅོས་པ་གཞོན་ཤ་ཅན་དག་གིས་བཀང་བ་ཤ་སྟག་དང༌། དེ་མ་ཡིན་པའི་སྐོན་བུ་མང་པོ་བལྟ་ན་སྡུག་པ། གུར་གུམ་གྱི་ཕྱེ་མས་བཀང་བ་ཤ་སྟག་ཐོགས་སོ། །དེ་
དག་གི་མདུན་དུའང་བཅོམ་ལྡན་འདས་དགེ་སློང་གི་དགེ་འདུན་གྱིས་འཁོར་དང་བཅས་པ་ཁྱབ་པར་འགྱུར་བའི་ཞལ་ཟས་དག་ཁྱེར་ཞིང་འདོང་ངོ༌། །ཞལ་ཟས་དེ་དག་ཀྱང་བུད་ཤིང་ཙནྡན་
དམར་པོ་དང༌། ཨ་ག་རུ་དང༌། ཐང་ཤིང་གི་མེ་ཆུང་དུས་བཙོས་པ་དང༌། གངྒཱའི་ཀླུང་གི་ཆུས་བཙོས་པ་ཤ་སྟག་སྟེ། སྐྱུར་བ་དང༌། ལན་ཚྭའི་རོ་དང༌། མངར་བ་དང༌། བསྐ་བ་དང༌། ཚ་
བ་དང༌། ཁ་བའི་རོ་དང་ལྡན་པ། མདངས་སྐྱེད་པ། ཕན་པར་འགྱུར་བ་ཤ་སྟག་ག །སཱ་ལ་ཟུང་གི་དྲུང་གི་ཉེན་ཀོར་ཐམས་ཅད་ཀྱང་གསེར་གྱི་བྱེ་མ་འཇམ་པོས་བརྡལ་ཏེ། ག་བུ་ཤའི་
རས་དང༌། སྣམ་བུ་དང༌། བཙོས་སྣམ་དང༌། དྲེའུ་རྡོག་དང༌། ཀ་ལིངྐའི་རས་དང༌། ཟབ་དར་འཇམ་ཞིང་མདོག་དཀར་བ་རྣམས་ཀྱང་བཏིང་ངོ༌། །གྲུབ་པའི་གནས་དེའི་གཞི་དཔག་ཚད་
སུམ་ཅུ་རྩ་གཉིས་ཁོར་ཁོར་ཡུག་ཀྱང་གུར་གུམ་གྱིས་བྱུགས་སོ། །བཅོམ་ལྡན་འདས། དགེ་སློང་གི་དགེ་འདུན་བཅས་པའི་སེངྒེའི་ཁྲི་ཆེན་པོ་གསེར་ལས་བྱས་པ། རིན་པོ་ཆེ་སྔ་[?] བདུན་
གྱིས་སྤྲས་ཤིང་སྣང་བར་བྱས་པ། རི་རབ་ལྟར་ཆེ་ཞིང་འཕང་མཐོ་བ་དག་ཀྱང་བཤམས་སོ། །གཡོགས་མའང་དེ་དག་གི་རྐྱེན་དུ་འཚམ་པ་ཤ་སྟག་གིས་གཡོགས་ཏེ། གསེར་གྱི་དྲིལ་བུ་གཡེར་ཀ་
སྒྲ་སིལ་ལི་ལི་དང༌། ཁྲོལ་ཤིང་གི་སྒྲ་འབྱུང་བའི་དྲ་བ་ཅན་གྱི་ཡོལ་བ་རྣམས་ཀྱིས་ནི། བསྐོར། རྒྱ་དར་སྤུ་སྡུག་ཡུག་ཁྱིམ་ཆེན་པོའི་བླ་རེ་རྣམས་ནི། བྲེས། གདུགས་དཀར་པོ་རྣམས་ཀྱིས་ནི།
ཉི་མཚན་བསྒྲིབས། རྔ་ཡབ་དཀར་པོ་རྣམས་ཀྱིས་ནི། གཡབས། རྒྱབ་རྟེན་གླང་པོ་ཆེའི་མཆེ་བ་ལ་ཆུ་སྲིན་མ་ཀ་ར་བརྟེན་པའི་ཁ་ནས་ཟླ་བ་ཉ་བའི་འོད་ཟེར་ལྟར་དཀར་བའི་མུ་ཏིག་གི་ཆུན་པོ་
འབྱུང་ཞིང་དབྱངས་པ་དང་ལྡན་པ་རྣམས་ནི། བཅས། ས་ཕྱོགས་རྣམས་ནི། མེ་ཏོག་དྲི་ཞིམ་པོའི་སིལ་མས་གཏོར་ཏོ། །དགེ་བསྙེན་དེ་དག་རེ་རེ་ནས་ཀྱང་འདི་སྙམ་དུ་སེམས་ཏེ། བདག་གིས་
སེམས་ཅན་ཐམས་ཅད་ལ་ཟས་འདོད་པ་རྣམས་ལ་ནི། ཟས་སྦྱིན་ནོ། །སྐོམ་འདོད་པ་རྣམས་ལ་ནི། སྐོམ་སྦྱིན་ནོ། །མགོ་བོ་དང་མིག་ལ་སོགས་པ་ཡན་ལག་དང་ཉིད་ལག་ཐམས་ཅད་
འདོད་པ་རྣམས་ལའང་ཇི་ལྟར་འདོད་པ་བཞིན་དུ་སྦྱིན་ནོ། །དབུལ་པོ་དང༌། བཀྲེན་པ་དང༌། ཕོངས་པ་རྣམས་ལའང་འདོད་པ་དང༌། དུག་དང༌། གནོད་པ་དང༌། མ་བརྟགས་པའི་སྦྱིན་པ་རྣམས་
མ་གཏོགས་པར་གང་དང་གང་དག་ཅི་དང་ཅི་འདོད་པ་དེ་དག་ཆོག་པར་སྦྱར་རོ། །སྙམ་དུ་སེམས་ཀྱི། གཞན་ནི། ཅིའང་མི་སེམས་སོ། །དེ་བཞིན་དུ་དགེ་བའི་བཤེས་གཉེན་གྱི་སྡེ་ཚན། བྱང་
༄༅། །ཆུབ་སེམས་དཔའི་སྤྱོད་པ་ལ་གནས་པ་དེ་དག་ཐམས་ཅད་ཀྱིས་བསམ་པ། དེ་བཞིན་གཤེགས་པ་ལ་བདག་གིས་བཤོས་གསོལ་ཏེ་ཡོངས་སུ་མྱ་ངན་ལས་
འདའ་བར་བྱའོ། །དེ་བཞིན་གཤེགས་པ་ལ་བདག་གིས་བཤོས་གསོལ་ཏེ་ཡོངས་སུ་མྱ་ངན་ལས་འདའ་བར་བྱའོ། །སྙམ་སྟེ། སོ་སོ་ནས་དེ་འབའ་ཞིག་སྙིང་ལ་སེམས་ཤིང་ཡན་
ལག་ཐམས་ཅད་ཀྱི་བ་སྤུ་རྒྱ་སྐྱེགས་ཀྱི་ཤིང་གི་མེ་ཏོག་ལྟར་རྩ་དམར་བ་ནི། ལངས། མིག་ནི། མཆི་མ་ཁྲག་ལྟ་བུས་གང་སྟེ། མཆོག་ཏུ་སྡུག་བསྔལ་བའི་ཚོར་བ་དང་ལྡན་ནས་རང་
རང་གི་མཆོད་པའི་ཡོ་བྱད་བུད་ཤིང་དང༌། ཡམ་བསྲེག་ཤིང་དང༌། ཤིང་རྟ་དང༌། རྒྱལ་མཚན་དང༌། གདུགས་དང༌། བ་དན་རྣམས་དང་ཆས་ཏེ་ཞལ་ཟས་ཀྱི་མཆོག་གིས་སྦྱར་བའི་སྣོད་
རྣམས་ཐོགས་ནས་བཅོམ་ལྡན་འདས་ག་ལ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་སྤོས་དང༌། མེ་ཏོག་ཕྲེང་དང༌། ཕྱེ་
མ་དང༌། ཕྱེ་མ་ཞིབ་བུ་དང༌། གདུགས་དང༌། རྒྱལ་མཚན་དང༌། བ་དན་དང༌། བླ་རེ་རྒྱ་ཆེན་པོ་དག་གིས་མཆོད་ནས་ལན་འབུམ་བསྐོར་བ་བྱས་ཏེ་མིག་ནས་མཆི་མ་རྒྱུན་མི་ཆད་པར་ཆར་
བཞིན་དུ་ཕབ་ནས་བདག་ཉིད་ལ་སྡུག་བསྔལ་གྱི་རྣམ་པ་མང་པོ་བྱེད་ཅིང༌། ཀྱེ་མ་འཇིག་རྟེན་སྟོངས་པར་འགྱུར་རོ། །ཀྱེ་མ་འཇིག་རྟེན་སྟོངས་པར་འགྱུར་རོ། །ཞེས་དེ་སྐད་དུ་སྐད་པོ་ཆེ་
འདོན་ཏེ། དེ་བཞིན་གཤེགས་པའི་ཞབས་དྲུང་ན་སྲོག་ཆགས་ཤི་ཤུ་མ་ར་བཞིན་དུ་འགྲེ་ལྡོག་ཅིང་གསོལ་བ་འདེབས་ཏེ། བཅོམ་ལྡན་འདས་དེ་བཞིན་གཤེགས་པ་དགེ་སློང་གི་དགེ་འདུན་
གྱི་འཁོར་དང་བཅས་པས་བདག་གིས་སྦྱར་བའི་བཤོས་གསོལ་བར་ཅི་གནང༌། བཅོམ་ལྡན་འདས། བདག་ལ་ཐུགས་བརྩེ་བའི་སླད་དུ་སྦྱིན་པའི་ཐ་མ་དེ་བཞིན་གཤེགས་པས་བཞེས་སུ་
གསོལ་ཞེས་གསོལ་བ་འདེབས་སོ། །དེ་ནས་བཅོམ་ལྡན་འདས་ཐམས་ཅད་མཁྱེན་བཞིན་དུ་ཅང་མི་གསུང་བར་གྱུར་ཏོ། །དེ་དག་གིས་ལན་གཉིས་ལན་གསུམ་དུ་དེ་སྐད་ཅེས་གསོལ་ཀྱང་
ལན་གཉིས་ལན་གསུམ་དུ་བཅོམ་ལྡན་འདས་ཅང་མི་གསུང་བར་གྱུར་ཏོ། །དེ་ནས་དགེ་བསྙེན་གྱི་ཚོགས་དེ་དག་རེ་ཐག་ཆད་དེ་ཅང་མི་ཟེར་བར་འཁོད་ནས་བུ་གཅིག་པ་ཤི་ནས་དུར་ཁྲོད་དུ་བོར་
མ་ཐག་པའི་ཕ་མ་འགྲེ་ལྡོག་པ་བཞིན་དུ་ཤིན་ཏུ་སྡུག་བསྔལ་བར་གྱུར་ཏོ། །དེ་བཞིན་དུ་དགེ་བསྙེན་དེ་དག་ཐམས་ཅད་མཆོག་ཏུ་སྡུག་བསྔལ་བར་གྱུར་པ་ལས་ལངས་ཏེ། རང་རང་གི་མཆོད་
པའི་ཡོ་བྱད་རྣམས་བསྡུས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་བསླབ་པའི་གཞི་ལྔ་བླངས་ཤིང་ཚུལ་ཁྲིམས་དང༌། ཆོ་ག་དང༌། ཡོན་ཏན་དང་ལྡན་པ་དང༌། དམ་པའི་ཆོས་ཀྱི་
གཅེས་པ་འཛིན་པའི་དགེ་བསྙེན་མ་ཚོང་དཔོན་གྱི་བུ་མོ་འཚོ་བའི་དཔལ་ལ་སོགས་པ་དགེ་བསྙེན་མ་གངྒཱའི་ཀླུང་གསུམ་གྱི་བྱེ་མ་སྙེད་ཐམས་ཅད་ཀྱང་བུད་མེད་ཀྱི་གཟུགས་ཀྱིས་སེམས་ཅན་བྱ་བ་ཕྲག་
༄༅། །མང་པོ་ངེས་པར་སྒྲོལ་བ། ཁྱིམ་གྱི་གནས་ལ་སྨོད་པ་ཤ་སྟག་སྟེ། ལུས་འདི་ནི། ཉེས་པའི་ཁམས་བརྒྱད་ཅུ་རྩ་བཞི་ལས་ལྷགས་པས་བསྡུས་པའོ། །ལུས་
འདི་ནི༑ སྲིན་བུའི་རིགས་བྱེ་བ་ཕྲག་བརྒྱད་ཅུ་རྩ་བཞིའི་ཟས་སོ། །ལུས་འདི་ནི། རྒྱལ་པོའི་ཁྲི་མོན་དུ་བྲུབས་པའི་དྲི་མ་ནམ་པའོ། །ལུས་འདི་ནི། ཁྱི་རོ་རུལ་པའི་དྲི་བམ་གྱིས་ལྷག་
པར་སྦགས་པའོ། །ལུས་འདི་ནི། སྒོ་དགུ་ནས་མི་གཙང་བ་འཛགས་པའོ། །ལུས་འདི་ནི། ཤ་དང༌། ཆུ་བ་དང༌། རུས་པ་དང༌། ཁྲག་དང༌། པགས་པའི་ཞལ་ཞལ་ཅན། རྐང་ལག་གི་ཕྱི་
སྒོ་དང༌། ར་བ་དང༌། བ་གམ་ཅན། མིག་གི་སྐར་ཁུང་ཅན། མགོ་བོའི་ཡང་ཏོག་ཅན། ཡིད་རྒྱལ་པོ་ལྟ་བུའི་ཕོ་བྲང་གྲོང་ཁྱེར་ལྟ་བུའོ། །ལུས་འདི་ནི། མཁས་པ་ཐམས་ཅད་ཀྱིས་
སྦངས་ཤིང་བྱིས་པའི་སྐྱེ་བོ་དགའ་བར་བྱེད་པའི་འདོད་ཆགས་དང༌། ཞེ་སྡང་དང༌། གཏི་མུག་ལ་སོགས་པའི་ཉོན་མོངས་པ་བྱེ་བ་སྙེད་ཀྱི་སྲིན་པོ་བརྟེན་པ། འདམ་བུ་དང༌། ཨེ་རཎྜ་དང༌། དབུ་
བ་དང༌། ཆུ་ཤིང་ལྟ་བུར་སྙིང་པོ་མེད་པ། གློག་དང༌། རི་གཟར་པོའི་འབབ་ཆུའི་དབའ་རླབས་ལྟར་ཤིན་ཏུ་མི་བརྟན་པའོ། །སྒྱུ་མ་དང༌། སྨིག་རྒྱུ་དང༌། བྲག་ཅ་དང༌། ཟླ་བའི་གཟུགས་
བརྙན་ལྟར་སླུ་བར་བྱེད་པ། རླུང་ཤུགས་དྲག་པོས་རྣམ་པར་དཀྲུགས་པའི་ཆུའི་ཤུགས་ཀྱིས་བརྐོས་པའི་འགྲམ་གྱི་སྡོང་པོ་ལྟར་གཡང་ས་ན་འདུག་པའི་ཆོས་ཅན། སྤྱང་ཀི་དང༌། ཝ་
དང༌། བྱ་རྒོད་དང༌། བྱ་རོག་རྣམས་ཀྱི་ཟས་ཡིན་ན། སུ་ཞིག་འདི་ལྟ་བུ་འཆང་བ་ལ་དགའ་བར་བྱད། རྒྱ་མཚོའི་ཆུ་ཐམས་ཅད་སྐྲའི་རྩེ་མོས་བླངས་ཏེ་བ་ལང་གི་མིག་རྗེས་སུ་བླུགས་པར་ནི། ནུས་སྲིད་
ཀྱི༑ ལུས་ནད་བཞི་བརྒྱ་རྩ་གཞིས་གཟིར་བ་འདི་སྙིང་པོ་མེད་པའམ་མི་གཙང་བ་ནི། ཚིག་ཙམ་གྱིས་བསྟན་པར་མི་ནུས་སོ། །ས་ཆེན་པོ་འདི་རྒྱ་ཤུག་གི་འབྲས་བུའི་རུས་པའི་འབྲུ་ཙམ་ཤ་སྟག་ཏུ་
བྱས་པའམ། ཡུངས་འབྲུ་ཙམ་མམ། རྡུལ་ཕྲ་རབ་ཀྱི་རྡུལ་ཙམ་ཤ་སྟག་ཏུ་བྱས་པས་ནི། ཟད་པར་འགྱུར་ཡང་སྲིད་ཀྱི། ལུས་འདི་ཡོད་ཀྱི་བར་དུ་འདིའི་ཉེས་དམིགས་ནི། མཐར་ཐུག་པར་མི་འགྱུར་
ཏེ༑ དེ་བས་ན་དམ་པའི་ཆོས་བསྲུང་བའི་ཕྱིར་འདི་མཆིལ་མ་བཞིན་དུ་དོར་བར་བྱའོ། །སྙམ་སྟེ། འདི་ལྟར་དགེ་བསྙེན་མ་དེ་དག་ཐམས་ཅད་ཆེན་པོ་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་
པ་བསྒོམས་པས་སེམས་བསྒོམས་པ་ཤ་སྟག་སྟེ། འདི་ལྟ་སྟེ། དགེ་བསྙེན་མ་འཚོ་བའི་དཔལ་ཞེས་བྱ་བ་དང༌། དགེ་བསྙེན་མ་དཔལ་ཕྲེང་ཞེས་བྱ་བ་དང༌། དགེ་བསྙེན་མ་ས་ག་ཞེས་བྱ་བ་དང༌། དེ་ལ་སོགས་
པ་ཐམས་ཅད་ཀྱང་ཐེག་པ་ཆེན་པོ་ཐོས་པར་འདོད་ལ། ཐོས་ནས་ཀྱང་གཞན་དག་ལ་བསྟན་པར་བྱའོ། །སྙམ་དུ་དམ་བཅས་པ། སྲུང་བ་ལྷུར་ལེན་པ། བུད་མེད་ཀྱི་ལུས་ངན་ནོ། །སྙམ་དུ་སྨོད་པ་དང༌།
ལུས་སྙིང་པོ་མེད་དོ། །སྙམ་དུ་སྨོད་པ་སོ་སོ་ནས་ཤས་ཆེར་སྒོམ་པ་དང༌། འཁོར་བའི་འཁོར་ལོ་གཞིག་གོ། །སྙམ་དུ་སེམས་པ་ཤ་སྟག་དང༌། ཐེག་པ་ཆེན་པོས་སྐོ་མ་ལ་ངོམས་ནས་ཀྱང་གཞན་
༄༅། །སྐོམ་པ་དག་ངོམ་པར་བྱའོ། །སྙམ་དུ་དམ་བཅས་པ་ཤ་སྟག་དང༌། ཐེག་པ་ཆེན་པོ་ལ་སྲེད་པ། ཐེག་པ་ཆེན་པོ་ལ་སེར་སྣ་མེད་པ། འཇིག་རྟེན་ཐམས་ཅད་
དང་མཐུན་པར་སློབ་པར་འདོད་པ་དང༌། གྲོལ་ནས་གཞན་དགྲོལ་བར་བྱའོ། །རྒལ་ནས་གཞན་བསྒྲལ་བར་བྱའོ། །དཀོན་མཆོག་གསུམ་གྱི་གདུང་མི་འཆད་པར་བྱའོ། །ཆོས་ཀྱི་འཁོར་ལོ་
བསྐོར་བར་བྱའོ། །སྙམ་དུ་སློབ་པར་འདོད་པ་ཤ་སྟག་དང༌། གོ་ཆ་ཆེན་པོ་བགོས་པ། བསླབ་པ་རྣམས་ལ་བརྟུལ་ཞུགས་བརྟན་པ་དང༌། དེ་བཞིན་དུ་ཡོན་ཏན་དུ་མ་དང་ལྡན་པ་དང༌། བུ་གཅིག་
པ་ལ་བྱ་བ་བཞིན་དུ་སེམས་ཅན་ཐམས་ཅད་ལ་སྙིང་རྗེ་དང་ལྡན་པ་ཤ་སྟག་སྟེ། དེ་དག་ཀྱང་ཉི་མ་འཆར་ཀར་ཤིན་ཏུ་རིགས་པར་གཅིག་ལ་གཅིག་འཇུས་ཏེ། དེ་བཞིན་གཤེགས་པའི་གདུང་
ཞུགས་ལ་བཞེན་པའི་ཕྱིར་ཡམ་བསྲེག་ཤིང་དགེ་བསྙེན་པ་རྣམས་ཀྱི་ཉིས་འགྱུར་ཁྱེར་བ་ལས་བཅོམ་ལྡན་འདས་ཀྱི་ཞལ་ཟས་མ་བཞེས་ནས་བུ་ཤི་བ་བཞིན་དུ་མཆོག་ཏུ་སྡུག་བསྔལ་བར་གྱུར་
ཏེ༑ ངུས་ནས་ལངས་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལི་ཙ་བའི་གཞོན་ནུ་གཙང་མ་དྲི་མ་མེད་པའི་སྙིང་པོ་ལ་སོགས་པ་ཡངས་པ་ཅན་ན་གནས་པའི་ལི་ཙ་བཱི་གཞོན་ནུ་གྲོང་
ཁྱེར་གྱི་ནང་ན་གནས་པ་དང༌། ཕྱི་རོལ་ན་གནས་པ་དང་བཅས་པ་རྣམས་དང༌། ཛམྦུའི་གླིང་ན་གནས་པའི་རྒྱལ་ཕྲན་བློན་པོ་དང་བཅས་པ་གངྒཱའི་ཀླུང་བཞིའི་བྱེ་མ་སྙེད་ཐམས་ཅད་ཀྱང་དམ་
པའི་ཆོས་སྲུང་བ་ལ་མཁས་པ། ཚུལ་ཁྲིམས་དང་ཆོ་ག་དང་ཡོན་ཏན་དང་ལྡན་པ། དམ་པའི་ཆོས་སུན་འབྱིན་ཅིང་རྟགས་ཅན་འཆལ་པ་རྣམས་ཀྱི་སེར་བ་ལྟ་བུར་གྱུར་པ་ཤ་སྟག་ལ་དེ་དག་ཐམས་
ཅད་ཀྱང་འདི་ལྟ་བུར་འདོད་དེ། བདག་ཅག་གི་ནོར་དང༌། འབྲུའི་ཚོགས་དང༌། མཛོད་དང༌། པང་བའི་ཚོགས་གང་ཡིན་པ་དེ་དག་ཐམས་ཅད་ནི། བདུད་རྩི་མི་ཟད་པར་བྱ་བ་དང༌། བདུད་རྩི་གནས་
པར་བྱ་བའི་ཕྱིར་ཡིན་གྱི། བདག་ཅག་གིས་དམ་པའི་ཆོས་ལ་ནན་ཏན་བྱའོ། །དམ་པའི་ཆོས་ལ་སུན་འབྱིན་ཅིང་ལོག་བར་ལྟ་བ་རྣམས་ཀྱི་ལྕེ་གཅད་པར་བྱའོ། །ཞེས་ལེགས་པར་དམ་བཅས་
པ༑ ཚུལ་ཁྲིམས་འཆལ་པ། ཚུལ་ཁྲིམས་ལ་མི་གནས་པ་རྣམས་ནི། གོས་དཀར་པོ་གྱོན་དུ་བཅུག་སྟེ། ཁྱིམ་པའི་ལས་བྱེད་དུ་གཞུག་གོ །སྙམ་དུ་སེམས་བརྟུལ་བ། དམ་པའི་ཆོས་སྡུག་པ་ལ་
ནི༑ བླ་མ་བཞིན་དུ་རིམ་གྲོ་བྱའོ། །སྙམ་དུ་དམ་བཅས་པ། དགེ་འདུན་ལ་ཕན་པ་དང་བདེ་བར་གནས་པར་བྱ་བའི་ཡོངས་སུ་རྫོགས་པར་བྱས་ཀྱང་དེས་ཆོག་གོ །སྙམ་དུ་སེམས་པ་དང༌། ཐེག་པ་ཆེན་
པོ་ཐོས་པར་འདོད་ལ་ཐོས་ནས་ཀྱང་གཞན་དག་ལ་བསྟན་པར་བྱའོ། །སྙམ་དུ་ཡི་དམ་བཅས་པ་ལ་བརྟན་པ་དང༌། དེ་ལ་སོགས་པའི་ཡོན་ཏན་དཔག་ཏུ་མེད་པ་དང་ལྡན་པ་ཤ་སྟག་སྟེ། འདི་ལྟ་སྟེ་
ལི་ཙ་བཱི་གཞོན་ནུ་གཙང་མ་དྲི་མ་མེད་པའི་སྙིང་པོ་ཞེས་བྱ་བ་དང༌། སྒྲིབ་པ་དག་པ་ཞེས་བྱ་བ་དང༌། གངྒཱའི་ཆུ་དྲི་མ་མེད་པས་བྱིན་པ་ཞེས་བྱ་བ་དང༌། དེ་ལ་སོགས་པ་ལི་ཙ་བཱི་གཞོན་ནུ་དེ་དག་ཀྱང་
༄༅། །གཅིག་ལ་གཅིག་འཇུས་ཏེ། རེ་རེས་ཀྱང་གདུང་ཞུགས་ལ་བཞེན་པའི་བུད་ཤིང་ཐང་ཤིང་གི་མཆོག་དང༌། ཙནྡན་དང༌། ཨ་ག་རུ་རྣམས་དང༌། ཡམ་བསྲེག་ཤིང་བྱེ་
བ་ཕྲག་བརྒྱད་ཅུ་རྩ་བཞི་དང༌། མཆོད་པ་སྔ་མའི་ཉིས་འགྱུར་རྣམས་ཁྱེར་ནས་མཆོད་པ་རྣམས་བསྒྲགས་ཏེ་བཅོམ་ལྡན་འདས་ཀྱི་ཐད་དུ་དོང་ངོ༌། །ལི་ཙ་བཱི་གཞོན་ནུ་རེ་རེ་ཞིང་ཡང་གླང་པོ་
ཆེ་བརྒྱད་ཁྲི་བཞི་སྟོང་དང༌། རྟ་བརྒྱད་ཁྲི་བཞི་སྟོང་དང༌། ཤིང་རྟ་བརྒྱད་ཁྲི་བཞི་སྟོང་དང་ཆས་སོ། །ནོར་བུ་ཆུ་ཤེལ་བརྒྱད་ཁྲི་བཞི་སྟོང་དང་ཆས་སོ། །གླང་པོ་ཆེ་རེ་རེའི་མདུན་དུའང་ཆེ་བ་ལ་
འོས་པའི་གདུགས་དང༌། རྒྱལ་མཚན་དང༌། བ་དན་དང༌། དར་གྱི་བླ་རེ་ཆེན་པོ་རྣམས་ཐོགས་སོ། །གདུགས་རྣམས་ཀྱི་ནང་ན་ཐུང་དུ་གང་ཡིན་པ་དེ་ལའང་ཁོ་ར་ཁོར་ཡུག་ཏུ་དཔག་ཚད་གཅིག་
ཡོད་དོ༑ ༑དར་གྱི་བླ་རེ་ཆེན་པོ་རྣམས་ཀྱི་ནང་ན་ཆུང་དུ་གང་ཡིན་པ་དེ་ལའང་ཆུ་ཞེང་དུ་དཔག་ཚད་སུམ་ཅུ་རྩ་གཉིས་ཡོད་དོ། །རྒྱལ་མཚན་རྣམས་ཀྱི་ནང་ན་ཐུང་དུ་གང་ཡིན་པ་དེ་ལའང་
འཕང་དུ་དཔག་ཚད་བརྒྱ་ཡོད་དོ། །བ་དན་རྣམས་ཀྱི་ནང་ན་ཐུང་དུ་གང་ཡིན་པ་དེས་ཀྱང་དཔག་ཚད་སྟོང་དུ་ཕྱིན་ནོ། །དེ་ལྟར་དེ་དག་མཆོད་པ་རྣམས་དང་བཅས་ཏེ་བཅོམ་ལྡན་འདས་ཀྱི་ཐད་
དུ་དོང་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཞལ་ཟས་ཕུལ་བ་ལས་བཅོམ་ལྡན་འདས་ཅང་མི་གསུང་སྟེ། མ་བཞེས་ནས་མཆོག་ཏུ་སྡུག་བསྔལ་བར་གྱུར་ཏེ།
རེ་ཐག་ཆད་ནས་ལངས་ཏེ་བཅོམ་ལྡན་འདས་ཀྱི་མཐུས་ཏ་ལ་བདུན་གྱི་སྲིད་ཙམ་དུ་འཕགས་ཏེ་འཁོད་དོ། །གཞན་ཡང་དེའི་ཚེ་ཛམྦུ་གླིང་པའི་བློན་པོ་དང༌། ཚོང་དཔོན་དང༌། ཁྱིམ་བདག་གངྒཱ་ལྔའི་བྱེ་
མ་སྙེད་ཐམས་ཅད་ཀྱང་ཐེག་པ་ཆེན་པོ་ལ་དད་པ། ཚུལ་ཁྲིམས་དང་ཆོ་ག་དང་ཡོན་ཏན་རྣམ་པར་དག་པ་དང་ལྡན་པ། དམ་པའི་ཆོས་སུན་འབྱིན་པ་རྣམས་ཀྱི་སེར་བ་ལྟ་བུར་གྱུར་པ་ཤ་སྟག་སྟེ།
འདི་ལྟ་སྟེ། ཁྱིམ་བདག་གི་རྒྱལ་པོ་རྣམ་པར་སྣང་བྱེད་ཅེས་བྱ་བ་དང༌། འགྲོ་བ་སྐྱོང་ཞེས་བྱ་བ་དང༌། ཆོས་སྐྱོང་ཞེས་བྱ་བ་དང༌། དེ་ལ་སོགས་པ་དག་ཀྱང་དེའི་ཚེ་དེར་ལྷགས་ཏེ། དེ་དག་ཐམས་ཅད་
ཀྱིས་ཀྱང་རང་རང་གི་མཆོད་པས་མཆོད་པ་སྔ་མ་རྣམས་ཟིལ་གྱིས་མནན་ནས་བཅོམ་ལྡན་འདས་ལ་མཆོད་པ་ཆེན་པོའི་ཚོགས་ཀྱིས་མཆོད་ནས་ཞལ་ཟས་མ་བཞེས་པའི་ཕྱིར་མཆོག་ཏུ་སྡུག་བསྔལ་
བར་གྱུར་ཏེ། རེ་ཐག་ཆད་ནས་ལངས་ཏེ་བཅོམ་ལྡན་འདས་ཀྱི་མཐུས་ཏ་ལ་བདུན་གྱི་སྲིད་ཙམ་དུ་འཕགས་ཏེ་འཁོད་དོ། །གཞན་ཡང་དེའི་ཚེ་རྒྱལ་པོ་མ་སྐྱེས་དགྲ་མ་གཏོགས་པར་ཡངས་པ་ཅན་གྱི་
རྒྱལ་པོ་ཟླ་བ་དྲི་མ་མེད་པའི་སྙིང་པོ་གྲོང་ཁྱེར་གྱི་ནང་ན་གནས་པ་དང༌། ཕྱི་རོལ་ན་གནས་པའི་གཡོག་འཁོར་དང་བཅས་པ་ལ་སོགས་པ་ཛམྦུ་གླིང་ཐམས་ཅད་ཀྱི་གྲོང་ཁྱེར་དང༌། རི་ཁྲོད་ཀྱི་གྲོང་དང༌།
ཡུལ་པོ་ཆེ་དང༌། ཁ་ལུངས་ཀྱི་རྒྱལ་པོ་གངྒཱའི་ཀླུང་དྲུག་གི་བྱེ་མ་སྙེད་དང་ལྷན་ཅིག་ཏུ་དཔུང་གི་ཚོགས་ཡན་ལག་བཞི་དང་བཅས་ཏེ་ལྷགས་སོ། །རྒྱལ་པོ་དེ་རྣམས་རེ་རེ་ལའང་དམག་འཁྲུགས་ཡ་
༄༅། །ཕྲག་བཅོ་བརྒྱད་བཅོ་བརྒྱད་ཡོད་དོ། །དེ་དག་ལ་གླང་པོ་ཆེ་རྟག་ཏུ་འགྲམ་པ་ནས་རྡུལ་འཛག་པ་དག་དང༌། རྟ་རླུང་གི་ཤུགས་པས་ལྷག་པར་མགྱོགས་པ་དག་ཀྱང་
ཡོད་དོ༑ ༑དེ་དག་གི་མཆོད་པའི་ཡོ་བྱད་གང་ཡིན་པ་དེ་དག་ཀྱང་མཆོད་པའི་ཡོ་བྱད་སྔ་མ་དེ་དག་ལས་ཉིས་འགྱུར་གྱིས་ཆེས་བཟང་ལ་ཆེས་མང་སྟེ། དེ་ལྟ་བུའི་མཆོད་པའི་ཕུལ་དག་ཁྱེར་
ནས་དཔུང་གི་ཚོགས་ཡན་ལག་བཞི་དང་བཅས་ཏེ་ལྷགས་སོ། །དེ་དག་གི་མཆོད་པ་ད་རྣམས་ཀྱི་ནང་ན་གདུགས་ཐུང་ངུ་གང་ཡིན་པ་དེའང་དཔག་ཚད་བརྒྱད་ཅུ་ཆུ་ཞེང་གབ་པར་འདུག་གོ །བ་
དན་གྱི་ནང་ན་ཆུང་དུ་གང་ཡིན་པས་ཀྱང་དཔག་ཚད་བརྒྱ་སྟོང་དུ་ཕྱིན་ནོ། །རྒྱལ་མཚན་ཕལ་པ་གང་ཡིན་པ་དེ་ལའང་འཕང་དུ་དཔག་ཚད་སུམ་ཅུ་ཡོད་དོ། །དེ་ལྟར་ཡངས་པ་ཅན་གྱི་རྒྱལ་པོ་ཟླ་བ་
དྲི་མ་མེད་པའི་སྙིང་པོ་དང༌། ཉི་འོད་ཅེས་བྱ་བ་དང༌། དེ་ལ་སོགས་པ་རྒྱལ་པོ་རྣམས་ཉི་མ་འཆར་ཀར་ལྷགས་ཏེ། དེ་དག་ཀྱང་དམ་པའི་ཆོས་སུན་འབྱིན་ཅིང་རྟགས་ཅན་འཆལ་པ་རྣམས་ཀྱི་
སེར་བ་ལྟ་བུར་གྱུར་པ། མཐུས་ཀྱང་སེམས་ཅན་རྣམས་དམ་པའི་ཆོས་ལ་འགོད་པར་བྱེད་པ་དང༌། བདག་ཅག་གི་ནོར་དང༌། འབྲུའི་ཚོགས་དང༌། མཛོད་དང༌། བང་པའི་ཚོགས་གང་ཡིན་པ་དེ་
དག་ནི། དམ་པའི་ཆོས་གནས་པར་བྱ་བའི་ཕྱིར་རོ། །སྙམ་དུ་སེམས་པ་ཤ་སྟག་དང༌། བདག་ཅག་གིས་དམ་པའི་ཆོས་ལ་ནན་ཏན་བྱའོ། །དམ་པའི་ཆོས་སུན་འབྱིན་པ་རྣམས་ཀྱི་ལྕེ་ནི་དྲུང་ནས་
གཅད་དོ། །ཞེས་དམ་བཅས་པ་བརྟན་པོར་བྱས་པ་ཤ་སྟག་དང༌། ཐེག་པ་ཆེན་པོ་འདོད་པ་དང༌། འཇིག་རྟེན་ཐམས་ཅད་ལ་སྙིང་བརྩེ་བ་ཤ་སྟག་སྟེ། དེ་དག་གི་མཆོད་པ་རྣམས་ཀྱིས་ཡངས་པ་ཅན་
ནས་གྲོང་ཁྱེར་ཀུ་ཤིའི་བར་ཐམས་ཅད་ཀུན་ཏུ་གང་བར་གྱུར་ཏོ། །དེ་དག་གི་གདུགས་ཀྱི་གྲིབ་མ་འདབ་ཆགས་སུ་འདུག་པས་ནི། ཉི་མའི་འོད་ཀྱིས་མི་ཕོག་གོ །དེ་དག་གི་ཁ་ཟས་ཀྱི་དྲི་བསུང་གིས་
ནི༑ དཔག་ཚད་བཞིར་ཁྱབ་པར་གྱུར་ཏོ། །དེ་དག་གིས་བཅོམ་ལྡན་འདས་ལ་རང་རང་གིས་སྦྱར་བའི་ཞལ་ས་བཞེས་པར་ལན་གསུམ་གྱི་བར་དུ་གསོལ་པ་བཏབ་ཀྱང་ཞལ་ཟས་མ་བཞེས་ནས་ཡིད་
མི་དགའ་སྟེ་ལངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་རྒྱལ་པོ་མ་སྐྱེས་དགྲའི་བཙུན་མ་མེ་གཏོགས་པར་ཡངས་པ་ཅན་གྱི་རྒྱལ་པོའི་བཙུན་མོ་འཇིག་རྟེན་གསུམ་ན་མཛེས་མ་ལ་
སོགས་པ་ཛམྦུ་གླིང་པའི་རྒྱལ་པོ་དང༌། ཚོང་དཔོན་དང༌། ཁྱིམ་བདག་རྣམས་ཀྱི་ཆུང་མ་གངྒཱའི་ཀླུང་བདུན་གྱི་བྱེ་མ་སྙེད་དང་ལྷན་ཅིག་ཏུ་ལྷགས་ཏེ། དེ་དག་ཐམས་ཅད་ཀྱང་བུད་མེད་ཀྱི་གཟུགས་
ཀྱིས་སེམས་ཅན་མང་པོ་ངེས་པར་སྒྲོལ་པ། རྟག་ཏུ་ལུས་[?] དམ་པ་དང་ལྡན་པ། ཆེན་པོ་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པས་སེམས་རྣམ་པར་དག་པ་ཤ་སྟག་སྟེ། འདི་ལྟ་
སྟེ༑ ཡངས་པ་ཅན་གྱི་རྒྱལ་པོའི་བཙུན་མོ་འཇིག་རྟེན་གསུམ་ན་མཛེས་མ་ཞེས་བྱ་བ་དང༌། བཙུན་མོ་བྲི་ཡང་གུ་ཞེས་བྱ་བ་དང༌། དེ་ལ་སོགས་པ་ཐམས་ཅད་ཀྱང་སེམས་ཅན་ཐམས་ཅད་ལ་བུ་
༄༅། །གཅིག་པ་ལ་བྱ་བ་བཞིན་དུ་སྙིང་རྗེ་དང་ལྡན་པ་ཤ་སྟག་སྟེ། གཅིག་ལ་གཅིག་འཇུས་ནས་དེ་བཞིན་གཤེགས་པའི་གདུང་ཞུགས་ལ་བཞེན་པའི་ཕྱིར་ཡམ་བསྲེག་ཤིང་
རྣམས་ཁྱེར་ཏེ་མཆོད་པ་སྔ་མ་ཐམས་ཅད་རང་རང་གི་མཆོད་པ་རྣམས་ཀྱིས་ཟིལ་གྱིས་མནན་ནས་བཅོམ་ལྡན་འདས་ལ་ཉིས་འགྱུར་དུ་མཆོད་པ་བྱས་ཏེ། དེ་དག་གི་མཆོད་པའི་ཡོ་བྱད་
རྣམས་ཀྱི་རྒྱལ་མཚན་དང༌། བ་དན་དང༌། གདུགས་རྣམས་ཀྱི་འཕང་དང་ཆུ་ཞེང་གི་ཚད་ཀྱང་སྔ་མའི་ཉིས་འགྱུར་བས་ལྷག་གོ །ཁ་ཟས་རྣམས་ཀྱི་དྲི་བསུང་ནི། དཔག་ཚད་བརྒྱད་དུ་ཁྱབ་
པར་གྱུར་ཏེ། བཅོམ་ལྡན་འདས་ལ་ཕྱག་བཙལ་ནས་ཞལ་ཟས་བཞེས་པར་གསོལ་བ་བཏབ་ཀྱང་ཞལ་ཟས་མ་བཞེས་ནས་བཅོམ་ལྡན་འདས་ལ་བསྐོར་བ་བྱེད་ཅིང་སྐྲ་འབལ་ལ་རང་རང་
གི་རྒྱན་རྣམས་འཐོར་ཞིང༌། སྐད་མི་སྙན་པས་དུ་སྟེ་བུ་གཅིག་པ་ཤི་བ་བཞིན་དུ་མཆོག་ཏུ་སྡུག་བསྔལ་བར་གྱུར་ནས་བཅོམ་ལྡན་འདས་ཀྱི་མཐུས་སཱ་ལ་ཟུང་གི་དྲུང་ཉིད་དུ་ཕྱོགས་གཅིག་
ཏུ་འཁོད་དོ། །གཞན་ཡང་དེའི་ཚེ་ལྷ་མིག་ཡངས་ཞེས་བྱ་བ་ལ་སོགས་པ་ལྷའི་ཚོགས་གངྒཱའི་ཀླུང་བརྒྱད་ཀྱི་བྱེ་མ་སྙེད་དང་ལྷན་ཅིག་ཏུ་ལྷགས་ནས་ལྷ་དེ་དག་གིས་འདི་སྐད་ཅེས་སྨྲས་སོ།།
གྲོགས་པོ་དག །ལྟོས། གྲོགས་པོ་དག །ལྟོས། མི་རྣམས་ཀྱི་མཆོད་པའི་ཡོ་བྱད་མཆོག་ཏུ་ཁྱད་པར་དུ་འཕགས་ལ། དེ་བཞིན་གཤེགས་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ལ་མཆོད་པ་བཀུར་སྟི་ཐམས་ཅད་ཀྱིས་མཆོད་པར་འདོད་དེ། མི་རྣམས་ཀྱི་ཞལ་ཟས་ཀྱི་ཐ་མ་བཞེས་པའི་ཕྱིར་བཅོམ་ལྡན་འདས་ལ་གསོལ་བ་འདེབས་ཀྱི། གྲོགས་པོ་དག །བདག་ཅག་
གིས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སོ་སོ་ནས་མཆོད་པ་བྱ་ཞིང་ཐ་མའི་དུས་སུ་ཞལ་ཟས་དབུལ་བར་བྱ་ན། ཇི་ལྟར་བདག་ཅག་གིས་ཕུལ་
པའི་ཞལ་ཟས་དེ་བཞིན་གཤེགས་པས་གསོལ་ཏེ་ཡོངས་སུ་མྱ་ངན་ལས་འདའ་བར་དེ་བཞིན་གཤེགས་པས་མཛོད་ཅིག་གུ་།གྲོགས་པོ་དག །སངས་རྒྱས་འབྱུང་བ་ནི། ཤིན་ཏུ་དཀོན་ནོ། །
དེ་བས་ཀྱང་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ནི། ཆེས་དཀོན་ནོ། །ཀྱེ་མ་བཅོམ་ལྡན་འདས་ཡོངས་སུ་མྱ་ངན་ལས་འདས་ན་ནི། འཇིག་རྟེན་སྟོངས་པར་
འགྱུར་རོ། །ཞེས་སྨྲས་སོ། །ལྷ་དེ་དག་ཐམས་ཅད་ཀྱང་ཐེག་པ་ཆེན་པོ་ཐོས་པར་འདོད་ལ་ཐོས་ནས་ཀྱང་གཞན་དག་ལ་བསྟན་ཏོ། །སྙམ་དུ་དམ་བཅས་པ། ཐེག་པ་ཆེན་པོས་སྐོམ་ལ་ངོམས་
ནས་ཀྱང་གཞན་སྐོམ་པ་རྣམས་ངོམ་པར་བྱའོ། །སྙམ་དུ་དམ་བཅས་པ། ཐེག་པ་ཆེན་པོ་ལ་སྲེད་པ། ཐེག་པ་ཆེན་པོ་ལ་སེར་སྣ་མེད་པ། ཐེག་པ་ཆེན་པོ་ལ་ཕྲག་དོག་དང་དུས་ཆེ་བ་དང་འཆབ་
པ་དང་སྒྱུ་མེད་པ། ཐེག་པ་ཆེན་པོ་སུན་འབྱིན་པའི་སེམས་ཅན་རྣམས་ཀྱི་སེར་བ་ལྟ་བུར་གྱུར་པ། དམ་པའི་ཆོས་སྲུང་པའི་ཚུལ་ཁྲིམས་བླངས་པ། འཇིག་རྟེན་དང་མཐུན་པར་སློབ་པར་འདོད་པ།
༄༅། །བདག་ཅག་རྒལ་ནས་གཞན་བསྒྲལ་བར་བྱའོ། །བདག་ཅག་གོལ་ནས་གཞན་དགྲོལ་བར་བྱའོ། །ཆོས་ཀྱི་འཁོར་ལོ་བསྐོར་བར་བྱའོ། །དཀོན་མཆོག་གསུམ་
གྱི་གདུང་མི་འཆད་པར་བྱའོ། །སྙམ་དུ་སློབ་པར་འདོད་པ། གོ་ཆ་ཆེན་པོ་བགོས་པ། བསླབ་པ་རྣམས་ལ་དམ་བཅས་པ་བརྟན་པ་དང༌། དེ་བཞིན་དུ་ཡོན་ཏན་དཔག་ཏུ་མེད་པ་དང་ལྡན་པ།
བུ་གཅིག་པ་ལ་བྱ་བ་བཞིན་དུ་འཇིག་རྟེན་ཐམས་ཅད་ལ་སྙིང་རྗེས་ལྟ་བ་ཤ་སྟག་སྟེ། དེ་དག་ཀྱང་ཉི་མ་འཆར་ཀར་སྟོན་པ་ཡོངས་སུ་མྱ་ངན་ལས་འདའ་བའི་གདུང་ཞུགས་ལ་བཞེན་པའི་
ཕྱིར་བུད་ཤིང་དང༌། ཡམ་བསྲེག་ཤིང་རྣམས་ཁྱེར་ཏེ། དེ་དག་ཀྱང་སྔ་མས་ཕུལ་བའི་ཡམ་བསྲེག་ཤིང་གི་ཉིས་འགྱུར་བས་བཟང་པའི་ལྷ་རྫས་དྲི་བསུང་དང་ལྡན་པ། ཡིད་དུ་འོང་བ། མི་ལ་དཀོན་
པ་ཤ་སྟག་གོ །ཤིང་རྟའང་རྟའི་མཆོག་མགྱོགས་པ་དག་དང་སྦྱར་པ། དར་ལ་དཀར་པོས་གཡོགས་པ། གཟུགས་དང་དབྱིབས་རི་མོ་བྲིར་ཡང་མི་ནུས་པ། དྲིལ་བུ་གཡེར་ཀའི་དྲ་བ་ཅན་
གྱི་ཡོལ་བས་བསྐོར་བ། དར་ཡུག་ཁྱིམ་ཆེན་པོའི་བླ་རེ་རྒྱ་ཆེན་པོ་རྩ་བ་རི་མོ་ཅན་དག་ལ་བཙུགས་པ་དང༌། གར་ཐབས་དང་རོལ་མོ་ཡིད་དུ་འོང་བ་རྣམས་ཀྱིས་མདུན་དུ་དྲངས་པ། ཁ་ཟས་
ཞིམ་པོ་མང་པོ་དག་དང༌། སེངྒེའི་ཁྲི་བཻཌཱུཪྻའི་རྒྱབ་རྟེན་རྩེ་མོ་ནོར་བུའི་འོད་ཀྱིས་སྣང་བར་བྱས་པ། ཞབས་རྟེན་གསེར་ལས་བྱས་པ་དག་ཀྱང་བཤམས་པ་དང༌། ས་ཕྱོགས་ཀྱང་མེ་ཏོག་
དྲི་བསུང་ཞིམ་པོ་སྣ་ཚོགས་ཀྱིས་མཛེས་པར་བྱས་པ། མེ་ཏོག་གི་སིལ་མ་བཀྲམ་ཞིང་བཀོད་པ། དཔུང་གི་ཚོགས་ཡན་ལག་བཞི་ཕྱི་བཞིན་འབྲང་བ་ཤ་སྟག་སྟེ། སོ་སོ་ནས་མཆི་མ་ཁྲག་ལྟ་བུ་
མི་ཐུབ་ཅིང་མཆོག་ཏུ་སྡུག་བསྔལ་བས་གདུངས་ནས་སེམས་ཅན་ཐམས་ཅད་ལ་ཕན་པ་དང༌། བདེ་བ་དང༌། སྙིང་བརྩེ་བའི་ཕྱིར་དང༌། གདུལ་བར་བྱ་བའི་དབང་གི་དོན་དུ་ཐེག་པ་ཆེན་པོའི་མཆོག་
ཏུ་གསང་བ། སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་ཆོས་ཀྱི་སྒོའི་ཆུལ་བཤད་པར་བྱ་བའི་ཕྱིར་བཅོམ་ལྡན་འདས་ཀྱི་ཐད་དུ་དོང་སྟེ་བཅོམ་ལྡན་འདས་ཀྱི་ཞབས་ལ་མགོ་
བོས་ཕྱག་བཙལ་ནས་མཆོད་པ་དང༌། བཀུར་སྟིའི་མཆོག་རྣམ་པོ་མང་པོ་དག་བྱས་ཏེ་བསྐོར་བའང་བྱས་ནས་བཅོམ་ལྡན་འདས་ཀྱི་འཁོར་རྣམས་ཀྱི་ཕྱིར་རང་རང་གི་བླ་གོས་ས་ལ་བཏིང་སྟེ་རང་རང་
གི་རྒྱན་རྣམས་ཕོག་ཅིང་གཏོར་ནས་རང་རང་གི་སྐྲ་འབལ་ཅིང་སྐད་མི་སྙན་པས་དུ་སྟེ། བཅོམ་ལྡན་འདས་ལ་ཚིག་མཐུན་པར་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་གིས་སྦྱར་
བའི་བཤོས་གསོལ་ཏེ་ཡོངས་སུ་མྱ་ངན་ལས་འདའ་བར་མཛད་དུ་གསོལ་ཞེས་ལན་གཉིས་ལན་གསུམ་དུ་གསོལ་བ་བཏབ་ཀྱང་བཅོམ་ལྡན་འདས་ཀྱིས་མ་བཞེས་ཏེ་ཅང་མི་གསུང་ནས་དེ་དག་རེ་
ཐག་ཆད་དེ་ལངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ཀླུའི་རྒྱལ་པོ་ཕྱོགས་བཞི་ན་གནས་པ་ཀླུའི་རྒྱལ་པོ་ནོར་རྒྱས་ཀྱི་བུ་དང༌། དགའ་བོ་དང༌། ཉེ་དགའ་བོལ་སོགས་པ་ཀླུའི་
༄༅། །རྒྱལ་པོ་གངྒཱའི། ཀླུང་དགུའི་བྱེ་མ་སྙེད་ཤིན་ཏུ་རིངས་པར་ཉི་མ་འཆར་ཀར་ལྷ་རྣམས་ཀྱི་མཆོད་པ་ལས་ཀྱང་ཉིས་འགྱུར་བས་ལྷག་པའི་མཆོད་པའི་ཡོ་བྱད་རང་རང་
གི་འབྱོར་པ་དང་འཚམ་པ་དག་ཁྱེར་ནས་བཅོམ་ལྡན་འདས་ཀྱི་ཐད་དུ་དོང་སྟེ་ཕྱག་བཙལ་ནས་ཞལ་ཟས་བཞེས་པར་གསོལ་བ་བཏབ་ཀྱང་བསམ་པ་བཞིན་དུ་མ་གྲུབ་ནས་ལངས་ཏེ་ཕྱོགས་གཅིག་
ཏུ་འཁོད་དོ། །གཞན་ཡང་དེའི་ཚེ་རྣམ་ཐོས་ཀྱི་བུ་ལ་སོགས་པ་གནོད་སྦྱིན་གྱི་བདག་པོ་གཡོག་འཁོར་དང་བཅས་པ་གངྒཱའི་ཀླུང་བཅུའི་བྱེ་མ་སྙེད་གཅིག་ལ་གཅིག་འཇུས་ནས་རང་རང་གི་
མཆོད་པ་རྣམས་ཀྱིས་ཀླུའི་རྒྱལ་པོ་རྣམས་ཀྱི་མཆོད་པ་སྔ་མ་ཟིལ་གྱིས་མནན་ནས་ཚོགས་ཆེན་པོ་དང་ཆས་ཏེ་ལྷགས་ནས་བཅོམ་ལྡན་འདས་ལ་ཕྱག་བཙལ་ཏེ་ཞལ་ཟས་བཞེས་པར་གསོལ་
བ་བཏབ་ཀྱང་བཅོམ་ལྡན་འདས་ཀྱིས་ཞལ་ཟས་མ་བཞེས་ནས་ཡིད་མི་དགའ་སྟེ་ལངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ནམ་མཁའ་ལྡིང་གི་བདག་པོ་དགྲའི་མཛའ་བོ་ཞེས་
བྱ་བ་ལ་སོགས་པ་ནམ་མཁའ་ལྡིང་གི་རྒྱལ་པོ་གངྒཱའི་ཀླུང་ཉི་ཤུའི་བྱེ་མ་སྙེད་ཀྱིས་རང་རང་གི་མཆོད་པས་གནོད་སྦྱིན་གྱི་རྒྱལ་པོ་སྔ་མ་དག་གི་མཆོད་པ་རྣམས་ཟིལ་གྱིས་མནན་ནས་བཅོམ་ལྡན་
འདས་ལ་ཕྱག་བཙལ་ཏེ་ཞལ་ཟས་བཞེས་པར་གསོལ་བ་བཏབ་ཀྱང་ཞལ་ཟས་མ་བཞེས་ནས་ཡིད་མི་དགའ་སྟེ་ལངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་དྲི་ཟའི་བདག་པོ་མིས་བྱིན་
གྱི་བུ་ལ་སོགས་པ་དྲི་ཟའི་བདག་པོ་གངྒཱའི་ཀླུང་སུམ་ཅུའི་བྱེ་མ་སྙེད་ཀྱིས་མཆོད་པ་སྔ་མ་ཐམས་ཅད་པས་ཀྱང་ཆེས་མཆོག་ཏུ་གྱུར་པའི་མཆོད་པ་རྣམས་ཁྱེར་ཏེ་འོངས་ནས་དེ་བཞིན་གཤེགས་པ་ལ་
མཆོད་པ་བྱས་ཏེ་རོལ་མོ་སྙན་རྒུ་བྱས་ནས་ཕྱག་བཙལ་ཏེ་བཅོམ་ལྡན་འདས་ལ་ཞལ་ཟས་བཞེས་པར་གསོལ་བ་བཏབ་ཀྱང་བཅོམ་ལྡན་འདས་ཀྱིས་མ་བཞེས་ནས་དེ་དག་ཀྱང་ཡིད་མི་དགའ་བར་གྱུར་
ཏེ་ལངས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་མིའམ་ཅིའི་བདག་པོ་ལེགས་མཐོང་ལ་སོགས་པ་མིའམ་ཅིའི་བདག་པོ་གངྒཱའི་ཀླུང་བཞི་བཅུའི་བྱེ་མ་སྙེད་ལྷགས་ཏེ་སྔ་མ་རྣམས་ཀྱི་
མཆོད་པ་དེ་དག་བསྡོམས་པ་བས་ཀྱང་དེ་དག་རེ་རེའི་མཆོད་པ་ཆེས་ཁྱད་པར་འཕགས་པར་གྱུར་ཏེ། དེ་དག་ཀྱང་ཞལ་ཟས་མ་བཞེས་ནས་ཡིད་མི་དགའ་བར་གྱུར་ཏེ་ཕྱོགས་གཅིག་ཏུ་འཁོད་དོ། །གཞན་
ཡང་དེའི་ཚེ་ལྟོ་འཕྱེ་ཆེན་པོའི་བདག་པོ་ལེགས་མཐོང་ཆེན་པོ་ལ་སོགས་པ་ལྟོ་འཕྱེ་ཆེན་པོའི་བདག་པོ་གངྒཱའི་ཀླུང་ལྔ་བཅུའི་བྱེ་མ་སྙེད་ཀྱིས་མཆོད་པ་སྔ་མའི་ཉིས་འགྱུར་ཁྱེར་བ་ལས་སྡམ་བཞིན་དུ་ཞལ་ཟས་
མ་བཞེས་ནས་ཡིད་མི་དགའ་སྟེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷ་མ་ཡིན་གྱི་བདག་པོ་བདེ་མཆོག་རིགས་ལ་སོགས་པ་ལྷ་མ་ཡིན་གྱི་བདག་པོ་གངྒཱའི་ཀླུང་དྲུག་ཅུའི་བྱེ་མ་སྙེད་ལུས་ཆེ་
ཞིང་སྣང་བ་ཆེན་པོ་དང་ལྡན་པ། ལྷ་མ་ཡིན་གྱི་བསམ་པ་མེད་པ་ཤ་སྟག་གིས་མཆོད་པ་སྔ་མའི་ཉིས་འགྱུར་ཉིས་འགྱུར་གྱི་མཆོད་པ་དག་ཁྱེར་ཏེ་འོངས་ཏེ། བཅོམ་ལྡན་འདས་ལ་ཕྱག་བཙལ་ནས་ཞལ་ཟས་
༄༅། །མ་བཞེས་ཏེ་ཡིད་མི་དགའ་བར་གྱུར་ནས་ལངས་ཏེ་ཤིང་སཱ་ལ་ཟུང་གི་དྲུང་དུ་རང་རང་གི་གཟི་བྱིན་གྱིས་སྣང་བར་བྱས་ཏེ་འཁོད་དོ། །གཞན་ཡང་དེའི་ཚེ་སྦྱིན་བྱེད་མའི་
བུའི་བདག་པོ་གངྒཱའི་ཆུ་དྲི་མ་མེད་པ་རྗེས་བྱིན་ལ་སོགས་པ་སྦྱིན་བྱེད་མའི་བུ་གངྒཱའི་ཀླུང་བདུན་ཅུའི་བྱེ་མ་སྙེད་ལུས་ཆེ་ཞིང་སྣང་བ་ཆེན་པོ་དང་ལྡན་པ། སྦྱིན་བྱེད་མའི་བུའི་བསམ་པ་མེད་པ་ཤ་
སྟག་གིས་མཆོད་པ་སྔ་མ་ཐམས་ཅད་ལས་མཆོད་པ་ཉིས་འགྱུར་ཉིས་འགྱུར་བས་བཟང་བ་དག་ཁྱེར་བ་ལས་སྔ་མ་བཞིན་དུ་ཞལ་ཟས་མ་བཞེས་ནས་ཡིད་མི་དགའ་བར་གྱུར་ཏེ་ཤིང་སཱ་ལ་ཟུང་གི་
དྲུང་དུ་རང་རང་གི་གཟི་བརྗིད་ཀྱིས་སྣང་བར་བྱས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་སྲིན་པོའི་བདག་པོ་འཇིགས་བྱེད་ལ་སོགས་པ་སྲིན་པོའི་དབང་པོ་གངྒཱའི་ཀླུང་བརྒྱད་ཅུའི་བྱེ་མ་
སྙེད་སྲིན་པོའི་བསམ་པ་མེད་པ་ཤ་སྟག་གིས་གཟི་བརྗིད་ཆེན་པོའི་ཚོགས་ཀྱིས་སཱ་ལ་ཟུང་གི་དྲུང་དུ་སྣང་བར་བྱས་ནས། བཅོམ་ལྡན་འདས་ལ་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །གཞན་
ཡང་དེའི་ཚེ་འབྲས་བུའི་ཤིང་གི་བདག་པོ་དྲི་སིལ་ལ་སོགས་པ་འབྲས་བུའི་ཤིང་གི་བདག་ལོ་གྡྒཱའི་ཀླུང་དགུ་བཅུའི་བྱེ་མ་སྙེད་ཀྱིས་སྔ་མའི་མཆོད་པ་ཐམས་ཅད་བས་ཉིས་འགྱུར་ཉིས་འགྱུར་
གྱིས་ལྷག་པའི་མཆོད་པའི་ཚོགས་ཁྱེར་ནས་ཁུ་བྱུག་པོ་རྒྱགས་པ་རྣམས་དང་བུང་པ་རྣམས་སྐད་འབྱིན་པ་དང་ལྡན་པའི་མེ་ཏོག་འཚེར་བའི་འཁྲི་ཤིང་མང་པོའི་དོག་པ་དང༌། ལོ་མ་ཁ་འབུས་
པ་རྣམས་ཀྱིས་ས་ཕྱོགས་བརྒྱན་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་རིག་སྔགས་འཆང་གི་རྒྱལ་པོ་སྒྱུ་འཕྲུལ་ཆེན་པོ་ལ་སོགས་པ་རིག་སྔགས་འཆང་གི་རྒྱལ་པོ་གངྒཱའི་ཀླུང་སྟོང་གི་
བྱེ་མ་སྙེད་ཀྱིས་མཆོད་པ་སྔ་མའི་ཉིས་འགྱུར་བས་ལྷག་པའི་མཆོད་པ་དག་ཁྱེར་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷ་མོ་འདོད་རྒྱུར་སྒྱུར་བའི་གཟུགས་ཅན་ལགས་མཐོང་མ་ལ་སོགས་
པ་གངྒཱའི་ཀླུང་བྱེ་བའི་བྱེ་མ་སྙེད་ཀྱིས་ཡངས་པ་ཅན་གྱི་རྒྱལ་པོའི་བཙུན་མོའི་མཆོད་པ་ཉིས་འགྱུར་བས་ལྷག་པ་དག་ཁྱེར་ཏེ། རང་རང་གི་རྒྱན་རྣམས་བཅོམ་ལྡན་འདས་ཀྱི་སྤྱན་སྔར་ས་ལ་སྤུངས་
ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷའི་བུ་མོ་རམྦྷ་དང༌། ཨུརྦ་ཤི་ལ་སོགས་པ་ལྷའི་བུ་མོ་གངྒཱའི་ཀླུང་བྱེ་བ་ཕྲག་བརྒྱའི་བྱེ་མ་སྙེད་མཆོད་པ་སྔ་མའི་ཉིས་འགྱུར་ཉིས་འགྱུར་
བས་ཆེས་ལྷག་པར་མང་ཞིང་སྤ་བ་དག་གིས་མདུན་དུ་དྲངས་ཏེ་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་འབྱུང་པོའི་ཚོགས་པ་བ་སངས་ལྟར་འཁོར་བ་ཞེས་བྱ་བ་ལ་
སོགས་པ་གདྒཱའི་ཀླུང་བྱེ་བ་ཕྲག་སྙོང་གི་བྱེ་མ་སྙེད་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་འཇིག་རྟེན་སྐྱོང་བ་བཞིའི་ལྷའི་བུ་གདྒཱའི་ཀླུང་བྱེ་བ་ཕྲག་འབུམ་དང་ལྷན་ཅིག་ཏུ་
མཆོད་པ་སྔ་མའི་ཉིས་འགྱུར་ཉིས་འགྱུར་བས་ལྷག་པ་དག་ཁྱེར་ནས་བཅོམ་ལྡན་འདས་ལ་ཕྱག་བཙལ་ཏེ་ཞལ་ཟས་བཞེས་པར་གསོལ་བ་བཏབ་ཀྱང་བཅོམ་ལྡན་འདས་ཀྱིས་མ་བཞེས་ནས་སྔ་མ་
༄༅། །བཞིན་དུ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་རླུང་ལྷ་བཞི་རླུང་གཏོང་བའི་ལྷ་གངྒཱའི་ཀླུང་བྱེ་བ་ཕྲག་འབུམ་དང་ལྷན་ཅིག་ཏུ་དུས་མ་ཡིན་པར་ཡང་ཤིང་
ལྗོན་པ་དང༌། འཁྲི་ཤིང་དང༌། ཤིང་གེལ་པ་དང༌། ནགས་མ་རྣམས་དང༌། སྙེ་མ་དང༌། མེ་ཏོག་གི་འཁྲི་ཤིང་དང༌། བྱུ་རུ་རྣམས་ཀྱིས་ས་ཕྱོགས་བརྒྱན་པར་བྱེད་ཅིང་དུས་ཚིགས་ཐམས་ཅད་ཀྱི་
མེ་ཏོག་གི་དཔལ་རྣམས་ཕྱོགས་སུ་རྒྱས་པར་བྱེད་ལ། ལོ་མ་ཁ་འབུས་པ་རྩ་བ་དམར་པ་རྣམས་ཀྱིས་ཤིང་སཱ་ལ་ཟུང་ཉི་མ་འཆར་ཀའི་འོད་ཟེར་སེར་པོ་ཇ་ཧོང་ཁར་འདུག་པ་བཞིན་དུ་བྱས་ནས་
མཆོད་པ་སྔ་མའི་ཉིས་འགྱུར་བས་ལྷག་པའི་མཆོད་པ་དག་ཁྱེར་ཏེ། བཅོམ་ལྡན་འདས་ལ་མཆོད་པ་བྱས་ནས་སྔ་མ་བཞིན་དུ་ཤིང་སཱ་ལ་ཟུང་གི་དྲུང་དུ་འཁོད་དོ། །གཞན་ཡང་དེའི་ཚེ་ཆར་པ་
འབེབས་པའི་ལྷ་གངྡྒཱའི་ཀླུང་གི་བྱེ་མ་སྙེད་སྤྲིན་ཆེན་པོ་དང༌། ཆུ་སྐྱར་རྣམས་ཕྱི་བཞིན་འབྲང་ཞིང་གློག་འགྱུ་བའི་གསེབ་ནས་རྨ་བྱའི་མགྲིན་པ་ལྟར་མདོག་སྡེ་བའི་ཆར་གྱི་རྒྱུན་འབབ་ལ།
འབྲུག་སྒྲ་དལ་ནས་སྒྲོག་པའི་སྤྲིན་དང་ལྡན་པས་ཆར་ཟིམ་བུ་བསིལ་བ་དང་འདྲེས་པའི་མེ་ཏོག་གི་ཆར་འབེབས་ཤིང༌། བཅོམ་ལྡན་འདས་ལ་ཕྱག་བཙལ་ཏེ་ཞལ་ཟས་མ་བཞེས་ནས་རེ་ཐག་
ཆད་དེ། དེ་བཞིན་གཤེགས་པའི་གདུང་ཞུགས་ལ་བཞེན་པའི་མེ་གསད་པའི་ཕྱིར་ནམ་མཁའ་ཉིད་ལ་འཁོད་དོ། །གཞན་ཡང་དེའི་ཚེ་སྤོས་ཀྱི་གླང་པོ་སྒྲ་གཅན་དང༌། ལུང་ཏང་མདོག་དང༌།
སྦྲང་རྩི་མདོག་སེལ་དང༌། འདོད་རྒུའི་སྤོས་ལྡན་ལ་སོགས་པ་སྤོས་ཀྱི་གླང་པོ་གངྒཱའི་ཀླུང་ཉི་ཤུའི་བྱེ་མ་སྙེད་ཐེག་པ་ཆེན་པོ་འདོད་པ་ཤ་སྟག་གིས་སྟོན་པ་ཡོངས་སུ་མྱ་ངན་ལས་འདའ་བའི་ཕྱིར་གངས་
ཀྱི་སྨན་དང༌། པདྨའི་རྩ་བ་དང༌། སྡོང་བུ་ཤིང་རྟ་ཆེན་པོའི་འཕང་ལོ་ཙམ་ཤ་སྟག་དང༌། དགོན་པ་ཆེན་པོ་དག་ནས་པདྨ་དང༌། ཨུཏྤ་ལ་དང༌། ཀུ་མུ་ད་དང༌། པདྨ་དཀར་པོ་དང༌། རྩ་བ་དང༌། འབྲས་བུ་
དང༌། རྡོ་གུ་སྣ་ཐ་དད་པ་དུ་མ་དག་སྣའི་ཐོར་ཏོས་བྱུང་ཞིང་ཕུང་ཞིང་ཁྱེར་ཏེ་རླུང་གི་ཤུགས་པས་ཀྱང་ཆེས་མགྱོགས་པ་དང༌། ཤིན་ཏུ་རིངས་པར་དབྱར་གྱི་འབྲུག་སྒྲ་བཞིན་དུ་སྒྲོག་ཅིང་ལྷགས་ནས་པདྨའི་
འདབ་མ་བཅེར་བའི་སེངྒེའི་ཁྲི་ལྡ་ལྡི་དག་བཤམས་ཏེ་བཅོམ་ལྡན་འདས་ལ་མཆོད་པ་བྱས་ནས་ཞལ་ཟས་མ་བཞེས་ནས་རེ་ཐག་ཆད་དེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་སེདྒེ་སེདྒེའི་
སྒྲ་སྒྲོག་པ་ཞེས་བྱ་བ་ལ་སོགས་པ་སེདྒེ་གདྒཱའི་གྐླུང་སུམ་ཅུའི་བྱེ་མ་སྙེད་སེམས་ཅན་ཐམས་ཅད་ལ་མི་འཇིགས་པ་སྦྱིན་པ་ཤ་སྟག་གིས་སེདྒེའི་རྩལ་ཆེན་པོས་སྤོས་ཀྱི་གླང་པོ་ཆེ་རྣམས་དང་འདྲ་བར་མེ་
ཏོག་དང་འབྲས་བུ་རྣམས་ཁྱེར་ཏེ་རིངས་པར་ལྷགས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཆེ་བྱ་ངང་པ་དང༌། ཁྲུང་ཁྲུང་དང༌། ངུར་པ་དང༌། ཀ་དམ་པ་དང༌། ཟལ་མོ་དང༌། བཞད་དང༌། ཁུ་བྱུག་
དང༌། བ་ལི་ཀ་དང༌། ཀ་ལ་པིངྐ་དང༌། ཤང་ཤང་ཏེའུ་ལ་སོགས་པས་ཀྱང་སྤོས་ཀྱི་གླང་པོ་ཆེ་རྣམས་དང་འདྲ་བར་མེ་ཏོག་དང་འབྲས་བུ་ཁྱེར་ཏེ་རང་རང་གི་སྐད་ཕུང་ནས་ཕྱོགས་གཅིག་ཏུ་འཁོད་དོ། །
༄༅། །གཞན་ཡང་དེའི་ཚེ་སའི་སྟེང་ན་བ་དང༌། མ་ཧེ་མོ་དང༌། ར་མ་མོ་ཡོད་དོ་ཅོག་གིས་ཀྱང་ནུ་མའོ་མས་བཀང་སྟེ་ཤིན་ཏུ་རིངས་པར་ལྷགས་ནས་ཤིང་སཱ་ལ་ཟུང་གི་
དྲུང་ནས་ཕྱོགས་གཤོང་ཞིག་མཐོང་ནས་དེར་རང་རང་གི་ནུ་མའོ་མས་གང་བ་དེ་དག་ལས་འོ་མ་གསེག་མ་དང༌། ཕྱེ་མ་དང༌། བ་ཚྭས་མ་འབགས་ཤིང་ཚ་བའི་སྐྱོན་དུ་འགྱུར་བ་མེད་པ་དག་
གཟིགས་ཏེ། འོ་མ་དེ་དག་གི་ནང་ནས་སྦྲང་བུ་དག་བསལ་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་དྲང་སྲོང་བཟོད་པར་སྨྲ་བ་ལ་སོགས་པ་གླིང་བཞི་ན་གནས་པའི་དྲང་སྲོང་
མངོན་པར་ཤེས་པ་ལྔ་དང་ལྡན་པ་ཐེག་པ་ཆེན་པོ་འདོད་པ་ཤ་སྟག་ལ་གངྒཱའི་ཀླུང་དཀྲིགས་ཀྱི་བྱེ་མ་སྙེད་རང་རང་གི་རྫུ་འཕྲུལ་གྱི་སྟོབས་ཀྱིས་ཡམ་བསྲེག་ཤིང༌། ཞལ་ཟས་དག་ཁྱེར་ནས་
བཅོམ་ལྡན་འདས་ལ་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་འོད་སྲུང་ཆེན་པོ་ལ་སོགས་པ་དགེ་སློང་གི་དགེ་འདུན་ཁ་ཅིག་དང༌། གནས་བརྟན་ཀུན་དགའ་བོ་ལ་
སོགས་པ་མ་གཏོགས་པར་ཡུལ་ཕྱོགས་ན་གནས་པའི་དགེ་སློང་དང༌། དགེ་སློང་མ་ཇི་སྙེད་ཡོད་པ་དེ་དག་ཐམས་ཅད་ཀྱང་མ་ལུས་པར་དེར་ལྷགས་སོ། །གྷན་ཡང་དེའི་ཚེ་རི་རབ་ལ་སོགས་
པ་རི་ཆེན་པོ་རྣམས་དང༌། འཇིག་རྟེན་གྱི་བར་མཚམས་ཀྱི་རི་གངྒཱའི་ཀླུང་གྲངས་མེད་པའི་བྱེ་མ་སྙེད་ཀྱང་ཤིང་ལྗོན་པ་དང༌། འཁྲི་ཤིང་མང་པོ་ཉིན་མཚན་གྱི་གྲིབ་མ་བྱེད་པ་དང༌། བྲག་ཟང་
ཡགས་གྲིབ་མ་ཆེ་བ་དང༌། བྲག་ཁ་ནས་འབབ་པའི་ཆུས་གང་བ་དང༌། སྨན་གཤོང་རྔོ་གུ་དང༌། རྩ་བ་དང༌། འབྲས་བུས་གང་བ་དག་ཀྱང་དེར་ལྷགས་སོ། །ལྷའི་བུ་མཐུ་བོ་ཆེའི་འདུན་མ་ཆེན་པོ་དག་ཀྱང་
རི་རབ་དང་བཅས་ཏེ་མཆོད་པའི་ཕྱིར་ལྷགས་ནས་བཅོམ་ལྡན་འདས་ལ་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷའི་བུ་མཐུ་བོ་ཆེ་འོད་ཆེན་པོ་རྒྱ་མཚོ་ཆེན་པོ་བཞིའི་ནང་ན་
གནས་པ་དང༌། ཆུ་ཀླུང་ཆེན་པོ་དག་གི་ནང་ན་གནས་པ་གངྒཱའི་ཀླུང་གྲངས་མེད་པའི་བྱེ་མ་སྙེད་མཆོད་པ་ལྔ་མ་བས་ཉིས་འགྱུར་གྱིས་མཛེས་པའི་མཆོད་པ་སྔོན་དུ་བཏང་ནས་ཉི་མའི་འོད་ཀྱིས་མར་མེའི་
འོད་ཟིལ་གྱིས་མནན་པ་བཞིན་དུ་རང་རང་གི་འོད་ཀྱིས་ཉི་མའི་འོད་ཟིལ་གྱིས་མནན་ཏེ་ཉི་མ་འཆར་ཀའི་འོད་ཀྱིས་ཤིང་མྱ་ངན་འཚང་གི་ལོ་མ་ཐམས་ཅད་དམར་ལམ་མེར་སྣང་བར་བྱེད་པ་དེ་
བཞིན་དུ་རང་རང་གི་འོད་ཀྱིས་ཆུ་ཀླུང་གསེར་ལྡན་གྱི་ཆུ་དམར་ལམ་མེར་སྣང་བར་བྱས་ནས་བཅོམ་ལྡན་འདས་ལ་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་གྲོང་ཁྱེར་ཀུ་ཤི་
ནས་ཤིང་སཱ་ལ་ཟུང་གི་དྲུང་གི་བར་སྐབས་ཀྱི་བར་སྣང་ལ་ཁང་བཟང་རིའི་དབང་པོའི་རྩེ་མོ་ལྟ་བུ་དང་པའི་ཐལ་གོང་ལྟར་དཀར་ལ་ཤ་སྟག་གིས་འཁྲིགས་པར་གྱུར་ཏོ། །ས་གཞི་ནི། སྐྱེད་མོས་ཚལ་དང༌།
རྫིང་བུའི་ཆུ་པདྨས་མཛེས་པར་བྱས་པ་དག་གིས་གང་བར་འདུག་སྟེ། བྱང་གི་སྒྲ་མི་སྙན་གྱི་སྐྱེད་མོས་ཚལ་བས་ཀྱང་ལྷག་པར་མཛེས་སོ། །གཅིག་ཏུ་ན་དགའ་བའི་ཚལ་དང༌། ཤིང་རྟ་སྣ་ཚོགས་ཅན་
༄༅། །དང་འདྲ་བར་གྱུར་ཏེ། ས་ཕྱོགས་དེ་དག་དེ་ལྟར་དགའ་དགའ་ལྟར་འདུག་ཀྱང་ལྷ་དང༌། ལྷ་མ་ཡིན་དང༌། མི་དེ་དག་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་
བའི་ཕྱིར་ཤིན་ཏུ་དུའོ། །གཞན་ཡང་དེའི་ཚེ་རྒྱལ་ཆེན་བཞིའི་རིས་ཀྱི་ལྷ་རྣམས་རང་རང་གི་འཁོར་ལ་འདི་སྐད་ཅེས་ཟེར་ཏེ། གྲོགས་པོ་དག་ལྟོས། གྲོགས་པོ་དག་ལྟོས། ལྷ་དང༌། ལྷ་མ་
ཡིན་དང༌། མི་རྣམས་ཀྱི་དེ་བཞིན་གཤེགས་པའི་མཆོད་པའི་ལས་ཁྱད་པར་དུ་འཕགས་ལ། དེ་བཞིན་གཤེགས་པ་ལ་ཞལ་ཟས་ཀྱི་ཐ་མ་འབུལ་བ་ལ་བརྩོན་གྱི། གྲོགས་པོ་དག །
བདག་ཅག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སོ་སོ་ནས་མཆོད་པ་བྱའོ། །ཞལ་ཟས་ཀྱི་ཐ་མའང་དབུལ་བར་བྱའོ། །གལ་ཏེ་བདག་ཅག་གིས་
ཕུལ་བའི་ཞལ་ཟས་ཀྱི་ཐ་མ་བཅོམ་ལྡན་འདས་ཀྱིས་བཞེས་པར་གྱུར་ན། དེ་ལས་བདག་ཅག་གིས་སྦྱིན་པའི་ཕ་རོལ་ཏུ་ཕྱིན་པ་ཆེན་པོ་ཐོབ་པར་འགྱུར་རོ། །ཞེས་དེ་དག་གིས་དེ་སྐད་ཅེས་
སྨྲས་ནས་གཡོག་འཁོར་མང་པོ་གྲངས་མེད་པ་དང་བཅས་པས་མཆོད་པ་སྔ་མའི་ཉིས་འགྱུར་གྱི་མཆོད་པ་དང༌། ཞལ་ཟས་མང་པོ་དག་ཁྱེར་རོ། །མེ་ཏོག་མང་པོ་དག་ཀྱང་ཁྱེར་ཏེ། འདི་ལྟ་སྟེ།
མནྡཱ་ར་བ་རྣམས་དང༌། མནྡཱ་ར་བ་ཆེན་པོ་རྣམས་དང༌། ཀེ་ཀེ་རུ་ཀ་རྣམས་དང༌། ཀེ་ཀེ་རུ་ཀ་ཆེན་པོ་རྣམས་དང༌། མཉྫུ་ཥ་ཀ་རྣམས་དང༌། མཉྫུ་ཥ་ཀ་ཆེན་པོ་རྣམས་དང༌། སནྟ་ན་ཀ་རྣམས་
དང༌། སནྟ་ཀ་ཆེན་པོ་རྣམས་དང༌། འོད་ཅན་རྣམས་དང༌། འོད་ཅན་ཆེན་པོ་རྣམས་དང༌། ཀུན་ཏུ་འོད་ཅན་རྣམས་དང༌། འོད་མཐའ་ཡས་པ་རྣམས་དང༌། མཛེས་སྡུག་རྣམས་དང༌། མཛེས་སྡུག་
ཆེན་པོ་རྣམས་དང༌། དགའ་བྱེད་རྣམས་དང༌། དགའ་བྱེད་ཆེན་པོ་རྣམས་དང༌། དྲི་མཆོག་རྣམས་དང༌། དྲི་མཆོག་ཆེན་པོ་རྣམས་དང༌། སྔོས་གྱི་ངད་ལྡང་རྣམས་དང༌། སྤོས་ཀྱི་ངད་ལྡང་ཆེན་པོ་
རྣམས་དང༌། ཀུན་ཏུ་ངད་ལྡང་རྣམས་དང༌། ཀུན་ཏུ་ངད་ལྡང་ཆེན་པོ་རྣམས་དང༌། མཐའ་ཡས་ངད་ལྡང་རྣམས་དང༌། མཐའ་ཡས་ངད་ལྡང་ཆེན་པོ་རྣམས་དང༌། ལྷ་རྫས་ཀྱི་འདབ་མ་རྣམས་དང༌།
ཀླུང་གི་མེ་ཏོག་རྣམས་དང༌། ཡོང་འདུས་བརྟོལ་རྣམས་དང༌། དེ་ལྟ་བུ་གཞན་དག་ཀྱང་ཁྱེར་ནས་བཅོམ་ལྡན་འདས་ག་ལ་བ་དེར་དོང་སྟེ་ཉི་མའི་གཟི་བྱིན་གྱིས་སྲིན་བུ་མེ་ཁྱེར་གྱི་འོད་ཟིལ་གྱིས་མནན་
པ་བཞིན་དུ་རང་རང་གི་གཟི་བྱིན་གྱིས་ཐམས་ཅད་ཀྱི་འོད་ཟིལ་གྱིས་མནན་ཏེ་ཞལ་ཟས་མ་བཞེས་ནས་ཕྱོགས་གཅིག་ཏུ་འཁོད་དོ། །གཞན་ཡང་དེའི་ཚེ་ལྷའི་དབང་པོ་བརྒྱ་བྱིན་སུམ་ཅུ་རྩ་གསུམ་
པའི་ལྷ་རྣམས་ཀྱི་འཁོར་དང་བཅས་པས་མཆོད་པ་སྔ་མ་དེའི་ཉིས་འགྱུར། དེའི་རྐྱེན་དུ་འཚམ་པ། དེ་ན་ཡོད་པའི་མེ་ཏོག་གི་སྣ་གྲངས་དུ་མ་ཡིད་དུ་འོང་བ་རྣམས་དང༌། ཡིད་དུ་འོང་བ་ཆེན་པོ་རྣམས་
དང༌། དྲི་བསུང་ཆེན་པོ་རྣམས་ཁྱེར་རོ། །ཁང་བཟང་ཆེན་པོ་རྡོ་ཐལ་གྱི་མདོག་ལྟར་དཀར་བ། ཐམ་སྐས་ཀྱི་རིམ་པ་དང་ལྡན་པ། སྐར་ཁུང་གི་ཕྲེང་བ་དུ་མ་ཕུག་རོན་ཤུག་རྩེ་བ་དང་ལྡན་པ་དག་ཀྱང་སྤྲུལ་ནས་
༄༅། །བཅོམ་ལྡན་འདས་ག་ལ་བ་དེར་དོང་སྟེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་
བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ནི། ཐེག་པ་ཆེན་པོའི་མདོའི་སྡེ་ཚན་སྲུང་པ་ལགས་ན། བདག་ཅག་ལ་ཐུགས་བརྩེ་བའི་སླད་
དུ་བདག་ཅག་གིས་ཕུལ་བའི་ཞལ་ཟས་བཞེས་སུ་གསོལ། དེ་སྐད་ཅེས་གསོལ་ཀྱང་ཞལ་ཟས་མ་བཞེས་ནས་ཕྱོགས་གཅིག་ཏུ་འཁོད་དོ། །འཕགས་པ་ཡོངས་སུ་མྱ་ངན་ལས་འདས་
པ་ཐེག་པ་ཆེན་པོའི་མདོ། བམ་པོ་གཉིས་པ། དེའི་རྗེས་ལ་མཐར་གྱིས་འདོད་པ་ན་སྤྱོད་པའི་ལྷའི་རིས་དྲུག་པོ་རྣམས་ཀྱིས་སྟེང་གི་བར་སྣང་ལ་མཆོད་པ་དང༌། འོད་སྔ་མ་ལས་ཁྱད་པར་དུ་
སྤགས་ནས་བཅོམ་ལྡན་འདས་ག་ལ་བ་དེར་དོང་སྟེ། དེ་དག་གི་མཆོད་པའི་ནང་ན་གདུགས་ཕལ་པ་གང་ཡིན་པའང་ཁོ་ར་ཁོར་ཡུག་ཏུ་གླིང་བཞི་པའི་ཁྱོན་ཙམ་མོ། །བ་དན་ཕལ་པ་གང་ཡིན་པ་
དེའང་རྒྱ་མཚོ་ཆེན་པོ་བཞིའི་མཐར་ཐུག་སྟེ། ཤར་ཕྱོགས་ཀྱི་རྒྱ་མཚོ་ནས་ནུབ་ཕྱོགས་ཀྱི་རྒྱ་མཚོར་ཐུག་སྟེ། རླུང་གིས་བསྐྱོད་དམ། རླུང་གིས་ཕྱར་ན། བ་དན་དེ་དག་ལས་པི་ཝང་གི་སྒྲ་སྙན་པ་ཁོང་
ནས་འཁྱིལ་བ་ལྟ་བུར་སྙན་པ་དག་འབྱུང་སྟེ། དེ་དག་བཅོམ་ལྡན་འདས་ལ་ཕྱག་བཙལ་ནས་ཞལ་ཟས་བཞེས་པར་གསོལ་བ་བཏབ་ཀྱང་བཅོམ་ལྡན་འདས་ཅང་མི་གསུང་ནས་རེ་ཐག་ཆད་དེ་ཕྱོགས་
གཅིག་ཏུ་འཁོད་དོ། །དེའི་ཚེ་སྲིད་པའི་རྩེ་མོར་སྐྱེས་པ་རྣམས་མ་གཏོགས་པར་གོང་མ་གོང་མའི་སེམས་ཅན་གཞན་གང་ཡིན་པ་དེ་དག་ཐམས་ཅད་བཅོམ་ལྡན་འདས་ལ་མཆོད་པ་བྱ་བའི་ཕྱིར་
མཆོད་པ་རྒྱ་ཆེན་པོའི་ཚོགས་དང་ཆས་ཏེ་ལྷགས་ནས་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །མི་མཇེད་ཀྱི་བདག་པོ་ཚངས་པའང་ཚངས་རིས་ཀྱི་ལྷའི་བུ་དཔག་ཏུ་མེད་པ་དག་གིས་བསྐོར་
ཞིང་མདུན་དུ་བདར་ཏེ་རང་གི་གཟི་བྱིན་གྱིས་ལྷ་ཐམས་ཅད་ཀྱི་གཟི་བྱིན་ཟིལ་གྱིས་མནན་ནས་མཆོད་པའི་ཚོགས་ཆེན་པོ་དང་ཆས་ཏེ་བཅོམ་ལྡན་འདས་ཀྱི་ཐད་དུ་དོང་སྟེ། དེ་དག་གི་བ་དན་ཕལ་པ་གང་
ཡིན་པ་དེའང་ཚངས་པའི་འཇིག་རྟེན་ནས་འཕྱང་སྟེ་ཤིང་སཱ་ལ་ཟུང་གི་དྲུང་དུ་ཐུག་གོ། །དེས་ཀྱང་བཅོམ་ལྡན་འདས་ལ་ཞལ་ཟས་བཞེས་པར་གསོལ་བ་ལས་བཅོམ་ལྡན་འདས་ཀྱིས་མ་བཞེས་ནས་
ཕྱོགས་གཅིག་ཏུ་འཁོད་དོ། །དེ་ནས་དེའི་ཚེ་ལྷ་མ་ཡིན་གྱི་དབང་པོ་ཐགས་བཟང་རིས་ལྷ་མ་ཡིན་གྱི་གཡོག་འཁོར་དཔག་ཏུ་མེད་པ་དང་བཅས་པས་ཚངས་པ་དང༌། དབང་པོ་གཉིས་མ་གཏོགས་པར་
དེའི་བར་གྱི་ལྷ་ཡོད་དོ་ཅོག་གི་འོད་རང་གི་འོད་ཀྱིས་མོག་མོག་པོར་བྱས་ནས་དེའི་རྐྱེན་དུ་འཚམ་པའི་མཆོད་པའི་ཚོགས་ལ། རྐྱེན་དུ་འཚམ་པའི་ཞལ་ཟས་དག་དང་ཆས་ཏེ་བཅོམ་ལྡན་འདས་ཀྱི་ཐད་དུ་
སོང་ངོ༌། །དེའི་གདུགས་ཕལ་པའང་ཆུ་ཞེང་དུ་འཇིག་རྟེན་གྱི་ཁམས་ཆུང་ངུ་ཁྱབ་པ་ཙམ་སྟེ། དེས་ཀྱང་བཅོམ་ལྡན་འདས་ལ་ཞལ་ཟས་བཞེས་པར་གསོལ་བ་ལས་བཅོམ་ལྡན་འདས་ཀྱིས་མ་བཞེས་
༄༅། །ནས་ལངས་ཏེ་ཕྱོགས་གཅིག་ཏུ་འདུག་གོ །དེ་ནས་བདུད་སྡིག་ཅན་ཆུང་མ་གྲངས་མེད་པའི་འཁོར་དང་ཆས་ཏེ་སེམས་ཅན་དམྱལ་བ་ཐམས་ཅད་ཀྱི་བར་སྲང་ཐམས་
ཅད་ཕྱེ་ནས་དེ་དག་ལ་ཆུ་དང་ཁ་ཟས་ལ་སོགས་པ་ཅི་འདོད་པ་བྱིན་ཏེ། དེ་དག་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲན་པར་གྱིས་ཤིག །སྦྱིན་པའི་ཐ་
མ་ལ་རྗེས་སུ་ཡི་རང་བར་གྱིས་ཤིག །ཅེས་སྨྲས་ནས་དེ་དག་ལ་ཁྱེད་བདེ་བར་གྱུར་ཅིག་ཅེས་ཀྱང་དབུགས་ཕྱུང་ངོ༌། །སེམས་ཅན་དམྱལ་བའི་གྲོང་ཁྱེར་མཚོན་ཆས་གང་ཞིང་མེ་ཆེན་པོ་འབར་
བ་རྣམས་སུའང་སྤྲིན་ཆེན་པོ་བཞིན་དུ་ཆུ་ཆེན་པོ་ཕབ་ནས་སེམས་ཅན་དམྱལ་བ་པ་རྣམས་ཀྱིས་སྔོན་མ་མྱོང་བའི་བདེ་བ་དང་ལྡན་པའི་འདུ་ཤེས་བསྐྱེད་དེ་དེ་བཞིན་གཤེགས་པའི་མཐུས་
བདུད་ཀྱི་སེམས་ཀྱི་གནས་སྐབས་དེ་ལྟ་བུར་གྱུར་ཏོ། །དེའི་འཁོར་གང་ཡིན་པ་དེ་དག་གིས་ཀྱང་གཞུ་དང༌། རལ་གྲི་དང༌། ཐོ་བ་དང༌། དགྲ་སྟ་དང༌། རྡོ་རྗེ་རྩེ་གཅིག་པ་དང༌། མཚོན་ཀམྦ་ན་དང༌།
ལྕགས་ཀྱི་བེར་ཀ་དང༌། ལྕགས་མདའ་དང༌། ཤ་ཏ་ཀ་ནི་ཧ་དང༌། མདའ་དང༌། འཕང་མདུང་དང༌། མདུང་རྩེ་གཅིག་པ་ལ་སོགས་པ་མཚོན་ཆ་རྣམ་པ་དུ་མ་ཡོངས་སུ་སྤངས་ཏེ་ཆོས་ལྷུར་ལེན་པར་
གྱུར་ཏོ། །དེའི་མཆོད་པའང་ལྷ་སྔ་མ་རྣམས་ལ་མེད་པ་དེ་ལྟ་བུར་གྱུར་ཏེ། དེའི་གདུགས་ཕལ་པའི་ཆུ་ཞེང་དུའང་འཇིག་རྟེན་གྱི་ཁམས་བར་མའི་ཁྱོན་ཙམ་མོ། །དེ་ལྟར་དེ་མཐུ་ཆེན་པོ་དང་ལྡན་
ཞེང་རང་གི་ཆུང་མ་རྣམས་ཀྱིས་རྔ་ཡབ་ཀྱིས་གཡོབ་བཞིན་དུ་བཅོམ་ལྡན་འདས་ག་ལ་བ་དེར་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཐལ་མོ་སྦྱར་ནས་འདི་སྐད་ཅེས་
གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་དང༌། འཁོར་དང་བཅས་པས་བདག་ཅག་གིས་ཕུལ་བའི་ཞལ་ཟས་བཞེས་སུ་གསོལ། །བཅོམ་ལྡན་འདས། བདག་ཅག་གིས་
དེ་སླན་ཆད་ཐེག་པ་ཆེན་པོའི་སླད་དུ་ཡི་དམ་བཅའ་བར་འཚལ་ཏེ། རིགས་ཀྱི་བུའམ་རིགས་ཀྱི་བུ་མོ་གང་སུའང་རུང་འཇིགས་པའི་སླད་དུའམ། རྙེད་པ་དང་བཀུར་སྟི་འཚལ་བའི་སླད་དུའམ། ཐོབ་
ཏུ་རེ་བའི་སླད་དུའམ། གཞན་གྱིས་བགྱིད་དུ་སྩལ་པའམ། གཞན་གྱི་ཡིད་བསྲུང་བའི་སླད་དུའང་རུང་སྟེ། ཐེག་པ་ཆེན་པོ་རྗོད་པར་བགྱིད་ན། དེའི་དོན་དུ་འཇིགས་པ་དང༌། མི་དགའ་བ་
ཐམས་ཅད་བསལ་བའི་གསང་སྔགས་བཤད་པར་འཚལ་ལོ། །ཏདྱ་ཐཱ། ཐཀྐེ། ཊ་ཊ་ར་ཐཀྐེ། རོ་རུ་རེ། མ་དྷ་རོ་རུ་རེ། ཨཱ་ལ་མཱ་ལ་ཏཱ་ལ་སྭཱ་ཧཱ། ཆོས་སྨྲ་བ་འཁྲུལ་པ་དང༌། འཇིགས་པས་
གནོད་པར་གྱུར་པ་རྣམས་ཆོས་ཀྱི་ཚུལ་ལ་སྤོབས་པ་བསྐྱེད་པར་བགྱི་བ་དང༌། མུ་སྟེགས་པ་རྣམས་མྱོས་པར་བགྱི་བ་དང༌། དམ་པའི་ཆོས་བསྲུང་བ་དང༌། བདག་དང་གཞན་བསྲུང་བའི་སླད་དུ་
བདག་གིས་རང་གི་དམ་ཚིག་གིས་མྲས་[?] པའི་གསང་སྔགས་འདི་གླང་པོ་ཆེའི་འཇིགས་པའམ། ནགས་ཁུང་གི་འཇིགས་པའམ། ཆུ་ཀླུང་གི་འཇིགས་པའམ། མེའི་འཇིགས་པ་རྣམས་ཀྱི་ནང་དུ་སྲུང་
༄༅། །སྔགས་ཀྱི་དོན་དུ་བརྗོད་པ་གང་ལགས་པ་དེ་དག་ནི། བརྗོད་པ་ཙམ་གྱིས་ཇི་ལྟར་རུས་སྦལ་རང་གི་ལུས་སྲུང་བ་དེ་བཞིན་དུ་བདག་གིས་གཡོ་དང༌། སྒྱུ་མ་མཆིས་པར་དེ་
དག་འཇིགས་པ་ཐམས་ཅད་ལས་བསྲུང་བར་བགྱི། སྟོབས་དང་ལྡན་པར་ཡང་བགྱིད་ལགས་ན། བཅོམ་ལྡན་འདས་ཀྱིས་ད་ཞལ་ཟས་འདི་བཞེས་པར་གསོལ་ཞེས་བསྐུལ་ཏོ། །དེ་ནས་
བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན། ཁྱོད་ཁ་ཟས་ཀྱི་ཕྱིར་གསོལ་བ་མ་འདེབས་ཤིག །གསང་སྔགས་ཀྱི་ཚིག་འདིས་སེམས་ཅན་
ཐམས་ཅད་ལ་ཕན་པའི་ཕྱིར་ཆོས་ཀྱི་སྦྱིན་པར་འགྱུར་བས་ན། བཞེས་པར་བྱའི། ཟང་ཟིང་གི་སྦྱིན་པ་ནི། དེ་ལྟ་མ་ཡིན་གྱི། སྡིག་ཅན། ཁྱོད་གསོལ་བ་མ་འདེབས་ཤིག །ཅེས་བཀའ་
སྩལ་ནས་བཅོམ་ལྡན་འདས་ཅང་མི་གསུང་བར་གྱུར་ཏོ། །ལན་གཉིས་ལན་གསུམ་གྱི་བར་དུའང་བདུད་དང་བདུད་ཀྱི་བུ་མོ་རྣམས་ཀྱིས་བཅོམ་ལྡན་འདས་ལ་གསོལ་བ་བཏབ་པ་ལས་མ་བཞེས་ཏེ་རེ་
ཐག་ཆད་ནས་ཕྱོགས་གཅིག་ཏུ་འཁོད་དོ། །དེ་ནས་དེའི་ཚེ་ལྷའི་བུ་དབང་ཕྱུག་ཆེན་པོ་ལྷའི་བུ་དཔག་ཏུ་མེད་པ་མཐུ་དཔག་ཏུ་མེད་པ་དག་གིས་མདུན་དུ་བདར་ཏེ་རང་གི་འོད་ཀྱིས་ཚངས་པ་དང༌། ལྷའི་
དབང་པོ་དང༌། ལྷ་མ་ཡིན་དང༌། བདུད་ཀྱི་འོད་རྣམས་སྣག་ཚའི་གོང་བུ་བཞིན་དུ་འོད་མི་གསལ་བར་བྱས་ཏེ། བཅོམ་ལྡན་འདས་ཀྱི་མཆོད་པ་རྒྱ་ཆེན་པོ་ཉིས་འགྱུར་གཉིས་འགྱུར་བས་ལྷག་པ་
དག་ཁྱེར་ནས་དེར་སོང་སྟེ་དེའི་མཆོད་པ་རྣམས་ཀྱི་ནང་ན་གདུགས་ཕལ་པ་གང་ཡིན་པ་དེའང་ཆུ་ཞེང་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྱབ་པར་འདུག་སྟེ་མཆོད་པ་དེ་ལྟ་བུ་སྔོན་དུ་
བཏང་ནས་བཅོམ་ལྡན་འདས་ཀྱི་ཐད་དུ་ཕྱིན་ཏེ་ལན་དུ་མ་བསྐོར་བ་བྱས་ནས་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལ་བདག་མཆོད་པ་བགྱིད་པ་ནི། སྦྲང་བུ་མཆོད་པ་བགྱིད་པ་དང་འདྲ་སྟེ། བདག་སྦྲང་བུ་དང་འདྲ་བས་བཅོམ་ལྡན་འདས་ལ་མཆོད་པ་བགྱིད་
པའི་རྔོ་ག་ལ་ཐོགས་ཀྱིས་ཀྱང་བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་ཞལ་ཟས་ཀྱི་ཐ་མ་གསོལ་བར་ཅི་གནང་ཞེས་ལན་གཉིས་ལན་གསུམ་དུ་གསོལ་བ་བཏབ་ཀྱང་ལན་གཉིས་
ལན་གསུམ་དུ་བཅོམ་ལྡན་འདས་ཅང་མི་གསུང་བར་གྱུར་ཏེ། རེ་ཐག་ཆད་ནས་ལངས་ཏེ་ཕྱོགས་གཅིག་ཏུ་འདུག་གོ། །དེ་ནས་དེའི་ཚེ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་འཇིག་རྟེན་
གྱི་ཁམས་གངྒཱའི་ཀླུང་གྲངས་མེད་པ་གཏམས་ཁྲག་ཁྲིག་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་ཡིད་འཕྲོག་སྒྲ་སྙན་མུ་ཏུག་ཅེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ནམ་མཁའ་དང་མཉམ་པ་ཞེས་བྱ་བ་བཞུགས་ཏེ། དེས་སྲས་ཀྱི་ཐུ་བོ་ཉན་ཐོས་ལུས་ཆེན་མཐའ་ཡས་ལ་བཀའ་སྩལ་པ། རིགས་ཀྱི་བུ། ཁྱོད་མི་མཇེད་
༄༅། །ཀྱི་འཇིག་རྟེན་གྱི་ཁམས་སུ་སོང་ལ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རིང་པོ་མི་ཐོགས་པར་
ཡོངས་སུ་མྱ་ངན་ལས་འདའ་བར་འགྱུར་གྱི། རིགས་ཀྱི་བུ། ཁྱོད་ཀྱིས་དེའི་དོན་དུ་འཇིག་རྟེན་གྱི་ཁམས་འདི་ནས་ཞལ་ཟས་ཞིམ་པོ་ཕན་པ་དག་ཁྱེར་ཏེ་སོང་ཞིག །མཆོད་པ་ཆེན་པོ་དག་
ཀྱང་ཁྱེར་ཏེ་སོང་ལ་དེ་ལ་འདི་སྐད་དུ། དེ་བཞིན་གཤེགས་པ་བཅོམ་ལྡན་འདས་ཀྱི་ཞལ་ཟས་འདི་གསོལ་ཏེ་ཡོངས་སུ་མྱ་ངན་ལས་འདའ་བར་མཛད་དུ་གསོལ་ཞེས་གྱིས་ཤིག །ཁྱོད་ཀྱི་
ཐེ་ཚོམ་དང༌། ཡིད་གཉིས་ཅི་དང་ཅི་ཡོད་པ་དེ་དང༌། དེ་དག་ཀྱང་དེ་བཞིན་གཤེགས་པ་དེ་ཁོ་ན་ལ་ལེགས་པར་ཞུས་ཤིག་དང༌། དེས་ཁྱོད་ལ་ལུང་སྟོན་པར་འགྱུར་རོ། །ཞེས་བཀའ་སྩལ་ཏོ། །
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་དེས་ལེགས་སོ། །ལེགས་སོ། །ཞེས་གསོལ་ནས་དེ་བཞིན་གཤེགས་པ་དེ་ལ་བསྐོར་བ་བྱས་ནས་ཞབས་ལ་མགོ་བོས་
ཕྱག་བཙལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་པོ་གྲངས་མེད་པས་བསྐོར་ཅིང་མདུན་དུ་བདར་ནས་མི་མཇེད་ཀྱི་འཇིག་རྟེན་གྱི་ཁམས་འདིར་འོངས་སོ། །དེ་ནས་དེའི་
ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གཡོས། རབ་ཏུ་གཡོས། འགུལ། རབ་ཏུ་འགུལ། འཁྲུགས། རབ་ཏུ་འཁྲུགས། འཁོར། རབ་ཏུ་འཁོར། འུར་འུར། རབ་ཏུ་འུར་འུར།
ཤིག་ཤིག །རབ་ཏུ་ཤིག་ཤིག །མེར་མེར། རབ་ཏུ་མེར་མེར། ལྡེམ་ལྡེམ། རབ་ཏུ་ལྡེམ་ལྡེམ། དེ་ལ་སོགས་པ་བྱས་ཏེ་ས་ཆེན་པོ་རབ་ཏུ་གཡོས་སོ། །དེ་ནས་འཁོར་དེ་དག་གི་ནང་ན་ཚངས་པ་
དང༑ དབང་པོ་དང༌། འཇིག་རྟེན་སྐྱོང་དང༌། ལྷ་མ་ཡིན་དང༌། དབང་ཕྱུག་ཆེན་པོ་ལ་སོགས་པ་ལྷ་རྣམས་ཀྱིས་ས་གཞི་དེ་ལྟ་བུར་གྱུར་པ་མཐོང་ནས་སྐྱི་བུང་ཞེས་བྱས་ཏེ་འཇིགས་ཤིང༌། ཁ་དང་
ལྐོག་མ་བསྐམས་ནས་འབྲོས་པར་ཆས་ཏེ་རང་རང་གི་འོད་ཀྱང་མི་མཐོང་ཞིང་འོད་ཉམས་པར་གྱུར་ཏོ། །དེ་ནས་འཁོར་དེ་ཉིད་ཀྱི་ནང་ནས་འཇམ་དཔལ་གཞོན་ནུར་གྱུར་པ་ལངས་ཏེ་ལྷའི་ཚོགས་
དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག །མ་འཇིགས་ཤིག །མ་འཇིགས་ཤིག །ཤར་ཕྱོགས་ལོགས་སུ་འཇིག་རྟེན་གྱི་ཁམས་གངྒཱའི་ཀླུང་གྲངས་མེད་པ་གཏམས་ཕྲག་དཀྲིགས་
ཀྱི་བྱེ་མའི་རྡུལ་ཕྲ་རབ་གྲངས་མེད་པ་སྙེད་འདས་པ་ན་འཇིག་རྟེན་གྱི་ཁམས་ཡིད་འབྲོག་སྒྲ་སྙན་མུ་ཏུག་ཅེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ནམ་མཁའ་དང་མཉམ་པ་ཞེས་བྱ་བ་ད་ལྟར་བཞུགས་ལ་འཚོ་ཞིང་གཞེས་ཏེ། དེ་བཞིན་གཤེགས་པ་དེས་རང་གི་སྲས་ཀྱི་ཐུ་བོ་ཉན་ཐོས་ལ་བོས་ཏེ་བཀའ་སྩལ་པ། རིགས་ཀྱི་
བུ། ཁྱོད་མི་མཇེད་ཀྱི་འཇིག་རྟེན་གྱི་ཁམས་སུ་སོང་ལ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ཡོངས་སུ་མྱ་ངན་ལས་
༄༅། །འདའ་བར་འགྱུར་གྱི། དེ་དགེ་སློང་གི་དགེ་འདུན་དང་བཅས་པ་ལ་ཞལ་ཟས་ཀྱི་ཐ་མ་ཕུལ་ལ། ཁྱོད་ཀྱི་ཐེ་ཚོམ་དང༌། ཡིད་གཉིས་ཅི་དང་ཅི་ཡོད་པ་དེ་དག་ཀྱང་
ལེགས་པར་ཞུས་ཤིག་དང༌། དེས་ཁྱེད་ལ་ལུང་བསྟན་པར་འགྱུར་རོ། །ཞེས་བཀའ་སྩལ་ཏོ། །བཅོམ་ལྡན་འདས་དེས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་
ཡས་འདི་བཏང་སྟེ། བྱང་ཆུབ་སེམས་དཔའ་གྲངས་མེད་པས་བསྐོར་ཞིང་མདུན་དུ་བདར་ནས་འདིར་འོངས་པ་དེའི་གཟི་བརྗིད་ཀྱིས་ཁྱོད་ཀྱི་འོད་ཉམས་པར་གྱུར་ཏོ། །དེ་འོང་བ་ལ་རྗེས་
སུ་ཡི་རང་བར་གྱིས་ཤིག །དེ་བཞིན་གཤེགས་པ་ནམ་མཁའ་དང་མཉམ་པས་བདག་ཅག་གི་དེ་བཞིན་གཤེགས་པ་ལ་མཆོད་པ་མཛད་པ་ལའང་ལྟོས་ཤིག །ཅེས་བྱས་སོ། །དེ་
ནས་འཁོར་དེ་དག་ཐམས་ཅད་ཀྱིས་མེ་ལོང་གི་ངོས་ལ་བདག་གི་གཟུགས་མཐོང་བ་བཞིན་དུ་འཇིག་རྟེན་གྱི་ཁམས་ཐག་རིང་པོ་ན་བཞུགས་པའི་དེ་བཞིན་གཤེགས་པ་དེ་དང༌། འཇིག་
རྟེན་གྱི་ཁམས་དེ་མཐོང་ངོ༌། །དེ་ནས་འཇམ་དཔལ་གཞོན་ནུར་གྱུར་པས་འཁོར་དེ་དག་ལ་འདི་སྐད་ཅེས་སྨྲས་སོ། །ཇི་ལྟར་ཁྱོད་ཀྱིས་འཇིག་རྟེན་གྱི་ཁམས་འདི་དང༌། དེ་བཞིན་གཤེགས་
པ་འདི་མཐོང་བ་དེ་བཞིན་དུ་ཕྱོགས་བཅུའི་དེ་བཞིན་གཤེགས་པ་རྣམས་དང༌། འཇིག་རྟེན་གྱི་ཁམས་གཞན་དག་ཀྱང་ལྟོས་ཤིག །དེ་བཞིན་གཤེགས་པ་རྣམས་ནི། འདི་ལྟར་བདག་
ཉིད་ཆེ་བ་ཡིན་ཏེ། རང་གི་གནས་ན་བཞུགས་བཞིན་དུའང་ཁྱེད་ལ་ཞལ་སྟོན་པར་མཛད་དོ། །འཁོར་དེ་དག་གིས་སྨྲས་པ། ཀྱེ་མ་དེ་བཞིན་གཤེགས་པ་དེ་ལྟར་བདག་ཉིད་ཆེ་བའང་ཡོངས་སུ་མྱ་
ངན་ལས་འདའ་བར་འགྱུར་བ་ལྟ་ཀྱི་ཧུད་ཅེས་བླ་ཞིང་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་བྱང་ཆུབ་སེམས་དཔའ་དཔག་ཏུ་མེད་པ་དག་གིས་
བསྐོར་བའང་མཐོང་སྟེ། བྱང་ཆུབ་སེམས་དཔའ་དེའི་ལུས་ཀྱི་བ་སྤུའི་ཁུང་བུ་རེ་རེ་ནས་པདྨ་ཆེན་པོ་བྱུང་ངོ༌། །པདྨ་ཆེན་པོ་རེ་རེ་ལའང་གྲོང་ཁྱེར་བདུན་ཁྲི་བརྒྱད་སྟོང་བདུན་ཁྲི་བརྒྱད་སྟོང་ཡོད་ལ། གྲོང་
ཁྱེར་དེ་དག་ཀྱང་ཡུལ་ཡངས་པ་ཅན་གྱི་ཐག་གྲུ་ཙམ་ཤ་སྟག་སྟེ། རིན་པོ་ཆེ་སྣ་བདུན་གྱི་ར་བ་དང་འོབས་བདུན་རིམ་གྱིས་བསྐོར་བ་ཤིང་ཏ་ལའི་ཕྲེང་བ་བདུན་རིམ་གྱིས་མཛེས་པར་བྱས་པ་ཤ་
སྟག་སྟེ། འབྱོར་པ་དང༌། རྒྱས་པ་དང༌། བདེ་བ་དང་ལྡན་ཞིང་དགའ་དགའ་ལྟར་འདུག་ལ་ར་བ་དེ་དག་ཀྱང་ཛམྦུ་ཆུ་བོའི་གསེར་གྱི་བ་གམ་ཆེན་པོ་ཤ་སྟག་གིས་བསྐོར་ཏེ། བ་གམ་ཐམས་ཅད་
ཀྱི་བར་བར་ནའང་ཤིང་ལྗོན་པ་གཞོན་ཤ་ཅན་འབྲས་བུ་དང༌། མེ་ཏོག་དང་ལྡན་པ་སྣ་མང་པོ་དག་ཡོད་དོ། །ཤིང་ལྗོན་པ་དེ་དག་གི་ཡལ་ག་རླུང་གིས་བསྐྱོད་པ་ལས་ཀྱང་སིལ་སྙན་དགའ་བར་བྱེད་
པའི་སྒྲ་སྙན་ཞིང་ཆགས་སུ་རུང་བ་འབྱུང་བ་སྣ་ལྔ་ལྔ་སྒྲོག་སྟེ། སྒྲ་དེ་དག་གིས་སེམས་ཅན་དེ་དག་རྩེ་ཞིང་དགའ་ལ་>
>
དགའ་མགུར་སྤྱོད་དོ། །འོབས་དེ་དག་ཐམས་ཅད་ཀྱང་ཆུ་བསིལ་ཞིང་ཤེལ་
༄༅། །བཞིན་དུ་དང་བདག་གིས་གང་བར་འདུག་སྟེ། དེ་དག་གི་ནང་ཁོ་ར་ཁོར་ཡུག་ཏུ་སེམས་ཅན་དེ་དག་རིན་པོ་ཆེའི་གྲུ་དག་གིས་དགའ་ཞིང་རྒྱུ་བར་བྱེད་དོ། །ཆུ་དེ་དག་
ཀྱང་པདྨ་དང༌། ཨུཏྤ་ལ་དང༌། ཀུ་མུ་ད་ཤིང་རྟའི་འཕང་ལོ་ཙམ་ཤ་སྟག་གིས་བརྒྱན་ཏོ། །འོབས་ཀྱི་ཁོ་ར་ཁོར་ཡུག་ཀྱང་སྐྱེད་མོས་ཚལ་གྱི་ཕྲེང་བས་མཛེས་པར་བྱས་ཏེ། སྐྱེད་མོས་ཚལ་
རེ་རེ་ལའང་རྫིང་བུ་ཐག་གྲུ་དཔག་ཚད་ཕྱེད་པ་ལྔ་ལྔ་ཡོད་དོ། །རྫིང་བུའི་ཆུ་དག་ཀྱང་པདྨ་དང༌། ཨུཏྤ་ལ་དང༌། ཀུ་མུ་ད་ཁ་དོག་སྣ་ཚོགས་དྲི་ཞིམ་པོ་ཤིང་རྟའི་འཕང་ལོ་ཙམ་ཤ་སྟག་གིས་
ཁེབས་པར་འདུག་ལ་ཤིང་ལྗོན་པ་མེ་ཏོག་རྒྱས་པའི་ཕྲེང་བས་མཛེས་པར་བྱས་སོ། །སྐྱེད་མོས་ཚལ་ཁོ་ར་ཁོར་ཡུག་ནའང་ངང་ངུར་དང༌། ཟལ་མོ་དང༌། ཁྲུང་ཁྲུང་ཤུག་དག་གིས་པདྨའི་
ཟེ་འབྲུ་མྱང་བར་བྱེད་དོ། །ཁོ་ར་ཁོར་ཡུག་གི་སྐྱེད་མོས་ཚལ་དེ་དང༌། དེ་དག་ནའང་ཁང་ཁྱིམ་དག་ཡོད་ལ། ཁང་པ་རེ་རེ་ལའང་ཆུ་ཞེད་དུ་དཔག་ཚད་བཞི་བཞི་ཡོད་དེ། རྩིག་པ་ནི། གསེར་
དང་དངུལ་དང་བཻཌཱུཪྻ་དང་ཤེལ་ལས་བྱས། ས་གཞི་ནི། ཀེ་ཀེ་རུ་ལས་གྲུབ་པ་སྟེ། ནོར་བུའི་འཇོ་ཚར་གྱིས་སྤེལ་ཞིང་སྣང་བར་བྱས་པའི་མུ་ཏིག་གི་དོ་ཤལ་དཔྱངས་པ་དང་ལྡན་པ།
གསེར་གྱི་རྟ་བབས་ཆེན་པོ་དང༌། སྐར་ཁུང་དང༌། དྲ་བ་དག་གིས་བརྒྱན་པའི་ཁང་བཟང་མཐོན་པོ་ས་གཞི་ནི། གསེར་གྱི་བྱེ་མ་བརྡལ་བ་དང་ལྡན་པ་ཤ་སྟག་གོ། །རྫིང་བུ་རྣམས་ཀྱང་
འབྲུལ་པའི་ལམ་གསེར་གྱི་ཐེམ་སྐས་ཐེམ་པ་བཅོ་བརྒྱད་དང་ལྡན་པ་དང༌། མཐའ་ཐོག་ཐག་ཏུ་གསེར་གྱི་ཆུ་ཤིང་གི་ཕྲེང་བས་མཛེས་པར་བྱས་པའི་ལྷའི་ཙནྡན་གྱི་དྲི་བསུང་ཅན་གྱི་ཆུ་དང་ལྡན་པ་
ཤ་སྟག་གོ། །གྲོང་ཁྱེར་ཆེན་པོ་དེ་དག་རེ་རེའི་ནང་ནའང་རྒྱལ་པོ་བརྒྱད་ཁྲི་བཞི་སྟོང་བརྒྱད་ཁྲི་བཞི་སྟོང་ཡོད་དེ། དེ་དག་ཐམས་ཅད་ཀྱང་བུད་མེད་ཀྱི་ཚོགས་དཔག་ཏུ་མེད་པ་དཔག་ཏུ་མེད་པ་དག་གིས་
བསྐོར་ཞིང་འདོད་པའི་ཡོན་ཏན་ལྔ་དང་ལྡན་ཏེ་རྩེ་ཞིང་དགའ་ལ་དགའ་མགུར་སྤྱོད་དོ། །སེམས་ཅན་གཞན་དག་ཀྱང་དེ་དང་འདྲ་སྟེ། ས་ཕྱོགས་ཀ་ཙ་ལིནདའི་གོས་ལྟར་རེག་ན་བདེ་བ། ཙནྡན་གྱི་ཆུས་
ཆག་ཆག་བཏབ་པ། མེ་ཏོག་གི་སིལ་མས་གཏོར་བ། གཞན་དག་ན་རྩེ་ཞིང་དགའ་ལ་དགའ་མགུར་སྤྱོད་དོ། །གྲོང་ཁྱེར་ཆེན་པོ་དག་ན་ཐེག་པ་ཆེན་པོའི་སྒྲ་མ་གཏོགས་པར་ཐེག་པ་གཞན་གྱི་སྒྲ་མེད་དོ། །
པདྨ་ཆེན་པོ་དེ་དག་ལའང་སེངྒེའི་ཁྲི་ཆེན་པོ་རྐང་པ་གསེར་དང༌། དངུལ་དང༌། བཻཌཱུཪྻ་དང༌། ཤེལ་ལས་བྱས་པ། ཀ་ལིངྐའི་རས་ཀྱིས་གཡོགས་པ། ཆེ་བ་ལ་འོས་པ། འཇིག་རྟེན་གསུམ་ན་ཕུལ་དུ་
བྱ་བ་ཤ་སྟག་གིས་དཀྲིས་ཏེ། སེངྒེའི་ཁྲི་དེ་དག་ལ་རྒྱལ་པོ་དེ་དག་འཁོད་ཅིང་སེམས་ཅན་གཞན་དག་ཐེག་པ་ཆེན་པོའི་མདོ་སྡེ་རྣམས་སློབ་པར་བྱེད་དེ། རྒྱལ་པོ་དེ་དག་གི་མདུན་ན་ལ་ལ་ནི། ཡི་གེ་
འབྲི༑ ལ་ལ་ནི། ཀློག །ལ་ལ་ནི། ཁ་ཏོན་སློབ་བོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་ཀྱི་བ་སྤུའི་ཁུང་བུ་ནས་སྐྱེས་པའི་པདྨ་དག་ལ་འཁོད་པའི་སེམས་ཅན་
༄༅། །དེ་དག་འདོད་པའི་ཡོན་ཏན་ལྔའི་དགའ་བ་དང་ལྡན་ཡང་དེ་དག་ཡོངས་སུ་སྤངས་ནས་མྱ་ངན་གྱིས་གདུངས་ཏེ་སྨྲེ་སྔགས་འདོན་ཅིང་ཀྱི་ཧུད་ཀྱི་ཧུད་ཅེས་བླ་ཞིང་འཁོད་དེ་ཉིས་
འགྱུར་དུ་མཆོད་པའི་ཚོགས་འབུལ་བར་བྱེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་བྱང་ཆུབ་སེམས་དཔའ་དཔག་ཏུ་མེད་པས་བསྐོར་ཏེ། དེ་ལྟ་བུའི་
འབྱོར་པའི་རྣམ་པ་དག་སྟོན་ཅིང་མཆོད་པའི་ཚོགས་ཆེན་པོ་དང༌། ཞལ་ཟས་ཆེས་རྒྱ་ཆེ་བ་དག་ཁྱེར་ཏེ་འོངས་ནས་ཞལ་ཟས་དེ་དག་དང༌། པདྨ་དེ་དག་གི་དྲི་བསུང་ཚོར་བ་གང་ཡིན་པ་དེ་དག་
ཀྱང་ཉོན་མོངས་པ་དང་བྲལ་བར་གྱུར་ཏོ། །བྱང་ཆུབ་སེམས་དཔའི་མཐུ་ཆེན་པོས་འཇིག་རྟེན་གྱི་ཁམས་ཐམས་ཅད་ཀྱང་མཐོང་བར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ལུས་
ཆེན་མཐའ་ཡས་ཀྱི་ལུས་ཀྱི་ཚད་ཀྱང་ནམ་མཁའ་དང་མཉམ་པར་འདུག་སྟེ། སུས་ཀྱང་མཐོང་བར་མི་ནུས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་བཅོམ་
ལྡན་འདས་ཀྱི་ཐད་དུ་སོང་སྟེ་ཞབས་ལ་མགོ་བོས་ཕྱག་བཙལ་ནས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། །བདག་གིས་ཕུལ་བའི་ཞལ་ཟས་བཅོམ་ལྡན་འདས་ཀྱིས་བཞེས་སུ་གསོལ། དེ་
ནས་བཅོམ་ལྡན་འདས་ཅང་མི་གསུང་བར་གྱུར་ཏེ། ལན་གཉིས་ལན་གསུམ་དུ་གསོལ་ཀྱང་བཅོམ་ལྡན་འདས་ཅང་མི་གསུང་བར་བཞུགས་ནས་བྱང་ཆུབ་སེམས་དཔའ་དེ་ལངས་ཏེ་ཕྱོགས་
གཅིག་ཏུ་འདུག་གོ །དེ་བཞིན་དུ་ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་ལོགས་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་ཞེས་བྱ་བ་འཁོར་གྱི་ཚོགས་ཆེན་པོ་
དང་ལྡན་པ་ཤ་སྟག་ལྷགས་ཏེ། དེ་དག་གི་པདྨ་དང༌། གྲོང་ཁྱེར་གྱི་ཚད་ཀྱང་སྔ་མ་སྔ་མ་ལས་ཉིས་འགྱུར་ཉིས་འགྱུར་གྱིས་ཆེ་བ་དང༌། འབྱོར་པ་ཉིས་འགྱུར་ཉིས་འགྱུར་གྱིས་ཆེ་བ་ཤ་སྟག་དང་ཆས་
ཏེ༑ དེ་དག་དེར་ལྷགས་ནས་བཅོམ་ལྡན་འདས་ལ་པདྨ་དག་གིས་མཆོད་པ་བྱས་ཏེ་སྔ་མ་བཞིན་དུ་ཕྱོགས་གཅིག་ཏུ་འཁོད་དོ། །ཤིང་སཱ་ལ་ཟུང་གི་དྲུང་གྲུབ་པའི་གནས་དེ་ཉིད་ན་དཀྱིལ་འཁོར་སུམ་ཅུ་
རྩ་གཉིས་ཀྱི་ཚད་ཀྱི་ཁྱོན་གྱི་ས་གཞི་ལ་སེམས་ཅན་མི་འཁོད་པའི་སྒོ་སྐབས་ཅིའང་མེད་དོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ལུས་ཆེ་བ་རང་རང་གི་གཡོག་འཁོར་དག་དང་
བཅས་པ་དེ་རྣམས་ཀྱང་ཁ་ཅིག་ནི། ས་ཕྱོགས་སྨྱུང་བུའི་རྩེ་མོའི་ཁྱོན་ཙམ་ལ་འཁོད་དོ། །ཁ་ཅིག་ནི། ཁབ་ཀྱི་རྩེ་མོའི་ཁྱོན་ཙམ་ལ་འཁོད་དོ། །ཁ་ཅིག་ནི། རྡུལ་ཕྲ་རབ་ཀྱི་ཁྱོན་ཙམ་ལ་བག་ཡོངས་སུ་
འཁོད་དོ། །འཇིག་རྟེན་གྱི་ཁམས་རྡུལ་ཕྲ་རབ་ཀྱི་རྡུལ་སྙེད་དག་ན་བྱང་ཆུབ་སེམས་དཔའ་འཁོད་པ་གང་ཡིན་པ་དེ་དག་ཀྱང་ཐབས་དེ་ལྟ་བུར་ལྷགས་ཏེ་འཁོད་དོ། །ཛམྦུའི་གླིང་གི་སེམས་ཅན་ཡང་ཚེ་དང་
ལྡན་པ་འོད་སྲུང་དང༌། གནས་བརྟན་ཀུན་དགའ་བོ་དང༌། རྒྱལ་པོ་མ་སྐྱེས་དགྲ་རྣམས་མ་གཏོགས་པར་དེར་མ་འོངས་པ་སུའང་མེད་དེ། ཐ་ན་མི་གདུག་པ་དང༌། སྦྲུལ་གདུག་པ་དང༌། སྡིག་པ་དང༌། སྡོམ་
༄༅། །ལ་སོགས་པ་ལས་མི་བཟད་པ་བཅུ་དྲུག་བྱེད་པ་ཡན་ཆད་ཀྱང་དེར་ལྷགས་སོ། །སྦྱིན་བྱེད་མའི་བུ་དང༌། ལྷ་མ་ཡིན་རྟག་ཏུ་འཁོན་གྱི་བསམ་པ་ཅན་ཐམས་ཅད་ཀྱང་སྡིག་
པའི་ལས་སྤངས་ནས་གཅིག་ལ་གཅིག་བུ་དང༌། མ་དང༌། སྲིང་མོ་དང་འདྲ་བར་སེམས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འཁོད་པའི་སེམས་ཅན་ཐམས་ཅད་
ཀྱང་གཅིག་ལ་གཅིག་བུ་གཅིག་པ་ལ་བྱ་བ་བཞིན་དུ་བྱམས་པར་བྱེད་དེ། འདོད་ཆེན་པ་ནི། མ་གཏོགས་སོ། །མི་མཇེད་ཀྱི་འཇིག་རྟེན་གྱི་ཁམས་འདིའང་དེ་བཞིན་གཤེགས་པའི་མཐུས་བོང་བ་
དང༌། རྡོ་དང༌། གསེག་མ་དང༌། རྡུ་བ་དང༌། ཚེར་མ་མེད་པར་གྱུར་ཏེ་ཤིང་ལྗོན་པ་རིན་པོ་ཆེའི་འཁྲི་ཤིང་གིས་དཀྲིས་པ་མཉེན་ཞིང་རེག་ན་འཇམ་པ་དག་དང་ལྡན་ཞིང་འཇིག་རྟེན་གྱི་ཁམས་བདེ་
བ་ཅན་དང་འདྲ་བར་གྱུར་ཏོ། །སེམས་ཅན་དེར་ལྷགས་པ་ཐམས་ཅད་ཀྱིས་ཀྱང་དེ་ན་འཁོད་བཞིན་དུ་ཇི་ལྟར་མེ་ལོང་གི་ངོས་ལ་རང་གི་གཟུགས་བརྙན་སྣང་བ་བཞིན་དུ་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་
རྟེན་གྱི་ཁམས་དང༌། སངས་རྒྱས་ཀྱི་ཞིང་འབྱོར་པ་དང་ལྡན་པ་གཞན་དག་ཀྱང་མཐོང་ངོ༌། །དེ་ནས་དེ་བཞིན་གཤེགས་པའི་ཞལ་ནས་འོད་ཟེར་ཁ་དོག་སྣ་ཚོགས་སྔོན་པོ་དང༌། སེར་པོ་དང༌། དམར་
པོ་དང༌། དཀར་པོ་དང༌། བཙོད་ཀ་དང༌། ཤེལ་གྱི་ཁ་དོག་ལྟ་བུ་དང༌། མེ་ལྕེ་ལྟ་བུ་དག་བྱུང་བ་གང་ཡིན་པ་དེ་དག་གིས་བྱ་བ་གང་ཡིན་པ་དེ་དག་གི་བྱ་བ་ཐམས་ཅད་བྱས་ཏེ་ཕྱིར་ལོག་ནས་བཅོམ་
ལྡན་འདས་ཉིད་ཀྱི་ཞལ་དུ་ཞུགས་ཏེ་མི་སྣང་བར་གྱུར་ཏོ། །འཁོར་ཐམས་ཅད་ཀྱི་འོད་ཀྱང་དེས་ཟིལ་གྱིས་གནོན་པར་གྱུར་ཏོ། །དེ་ནས་ལྷ་དང༌། མི་དང༌། ལྷ་མ་ཡིན་དང་བཅས་པའི་འཇིག་རྟེན་གྱིས་འོད་
ཟེར་དེ་དག་བཅོམ་ལྡན་འདས་ཀྱི་ཞལ་དུ་མི་སྣང་བར་གྱུར་པ་མཐོང་ནས་འཇིགས་ཤིང་སྐྱི་བུར་ཞེས་བྱས་ཏེ་རྒྱུ་མེད་པར་བཅོམ་ལྡན་འདས་ཀྱི་འོད་ཟེར་རྣམས་ཕྱིར་ལོག་ནས་མི་སྣང་བར་འགྱུར་
བའི་མི་རིགས་ན། གོར་མ་ཆག་པར་ཕྱོགས་བཅུ་དག་ཏུ་བྱ་བ་རྣམས་ཟིན་ནས་ད་ནི། གདོན་མི་ཟ་བར་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་འགྱུར་རོ། །བཅོམ་ལྡན་འདས་ཀྱིས་
གང་ལས་ཀྱང་ཞལ་ཟས་མ་བཞེས་ན། ཀྱེ་མ་སེམས་ཅན་ཐམས་ཅད་ལ་ཚད་མེད་པ་བཞི་སྤངས་སམ། ཅི་སྨྱུང་བར་བཞུགས་པར་ཆད་དམ། ཀྱེ་མ་ཅི་ཉི་མ་དང་ཟླ་བ་ནུབ་བམ། ཅི་དམ་པའི་ཆོས་ཀྱི་
གྲུ་བྱིང་ངམ། ཀྱི་ཧུད་ཀྱི་ཧུད་ཅེས་བླ་ཞིང་འཁོད་དོ། །དེ་ནས་དེ་དག་རང་རང་གི་ཡན་ལག་རྣམས་རྨས་པར་བྱས་པའི་ཁྲག་གིས་ས་གཞི་འདམ་དུ་གྱུར་ཏོ། །ཆུ་ཀླུང་གསེར་ལྡན་ཡང་ཁྲག་ཏུ་འབབ་པར་
གྱུར་ཏོ༑ ༑དེ་ནས་འཁོར་དེ་དག་གི་ནང་ན་གྲོང་ཁྱེར་ཀུ་ཤི་པ་མགར་བའི་བུ་དགེ་བསྙེན་སྐུལ་བྱེད་ཅེས་བྱ་བ་དེ་མགར་བའི་བུ་བཅོ་ལྔ་དང་ཐབས་ཅིག་ཏུ་ལངས་ཏེ་རང་རང་གི་སྤྱོད་ལམ་བཅོས་ནས་འཇིག་རྟེན་དག་
ལ་བལྟས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་མཆི་མ་མི་ཐུབ་བཞིན་དུ་ཞབས་ལ་
༄༅། །ཕྱག་བཙལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ནི། སེམས་ཅན་ཐམས་ཅད་ངེས་པར་བསྒྲལ་བའི་སླད་དུ་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ་ལ་ཞལ་ཟས་ཀྱི་ཐ་མ་དབུལ་བར་འཚལ་ཏེ། བདག་ནི། མགོན་མ་མཆིས་
པ་ལགས། རྩ་ལག་མ་མཆིས་པ་ལགས། སྐྱབས་མ་མཆིས་པ་ལགས། ཕོངས་ཏེ་རེ་བ་ལགས་ན། བཅོམ་ལྡན་འདས་ཀྱིས་བདག་གིས་ཕུལ་བའི་ཞལ་ཟས་བཞེས་ཏེ་ཡོངས་སུ་མྱ་ངན་ལས་
མི་འདའ་བར་མཛད་དུ་གསོལ། །བཅོམ་ལྡན་འདས། དཔེར་གསོལ་ན། ཁྱིམ་བདག་གམ། བྲམ་ཟེ་ཤིན་ཏུ་དབུལ་པོ་འགའ་ཞིག་གཞན་གྱི་ཡུལ་དུ་མཆིས་ལ། བདག་ཉིད་སྤྲོ་བ་བསྐྱེད་དེ་མཐར་
གྱིས་ཞིང་ལས་བརྩམས་ནས་དེས་རྨོན་གླང་རྨོ་སྐྱེན་པ་ཐོང་གཤོལ་དང་སྦྱར་བ་དག་གིས་ཞིང་ལ་རྡོ་དང༌། རྡུ་བ་དང༌། ཚོར་མ་མ་མཆིས་པར་བགྱིས་ཏེ་རེ་བ་ཆེན་པོ་བསྐྱེད་ནས་སྤྲིན་ཆེན་པོ་ལས་
ཆང་འབབ་པ་ལ་སྡོད་ཅིང་མཆིས་པ་དེ་བཞིན་དུ། བཅོམ་ལྡན་འདས། བདག་ནི། ལུས་ཀྱི་ཞིང་ལ་ཉེས་པ་གསུམ་དང༌། བཞི་དང་བྲལ་བའི་ཡིད་དང༌། ངག་གི་རྨོན་གླང་དང་ཤེས་པའི་ཐོང་གཤོལ་
གྱིས་ཉོན་མོངས་པ་རྣམ་པ་སྣ་ཚོགས་ཀྱི་རྡོ་དང༌། རྡུ་བ་དང༌། ཚེར་མ་མ་མཆིས་པར་བགྱིས་ནས་ཁྱོད་ཀྱི་ཆོས་ཀྱི་སྤྲིན་ཆེན་པོ་ལས་ཆོས་ཀྱི་ཆར་འབབ་པ་ལ་སྡོད་ཅིང་མཆིས་ཏེ་དགེ་སློང་གི་དགེ་
འདུན་དང་བཅས་པར་སྤྱན་འདྲེན་ན། བདག་གི་དབུལ་བ་བསལ་བ་དང༌། སེམས་ཅན་ཐམས་ཅད་ལ་སྨན་པའི་སླད་དུ་བདག་གིས་ཕུལ་བའི་ཞལ་ཟས་བཞེས་སུ་གསོལ། བདག་ནི། མགོན་མ་
མཆིས་པ། སྐྱབས་མ་མཆིས་པ་ལགས་ན། དེ་བཞིན་གཤེགས་པས་བདག་ལ་སྒྲ་གཅན་ཟིན་བཞིན་དུ་གཟིགས་པར་གསོལ། དེ་ནས་བཅོམ་ལྡན་འདས་ཐམས་ཅད་མཁྱེན་པ་རྒྱལ་བ་གང་ཟག་
བླ་ན་མེད་པས་མགར་བའི་བུ་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ། །སྐུལ་བྱེད། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཁྱོད་ཀྱི་ཞལ་ཟས་ཐ་མ་སྦྱིན་པའི་
ཕ་རོལ་ཏུ་ཕྱིན་པ་ཆེན་པོ་བཞེས་པར་མཛད་དོ། །དེ་ནས་ལྷ་དང༌། མི་དང༌། ལྷ་མ་ཡིན་དེ་དག་གིས་སྐུལ་བྱེད་ཀྱིས་ཕུལ་བའི་ཞལ་ཟས་ཀྱི་ཐ་མ་སྦྱིན་པའི་ཕ་རོལ་ཏུ་ཕྱིན་པ་ཆེན་པོ་དེ་བཞིན་གཤེགས་
པ་དགེ་སློང་གི་དགེ་འདུན་དང་བཅས་པས་བཞེས་སོ། །ཞེས་ཐོས་ནས་ངོ་མཚར་རྨད་དུ་བྱུང་བའི་ཆོས་ཐོབ་སྟེ། ལེགས་སོ། །ལེགས་སོ། །ཞེས་སྐད་ཆེན་པོ་ཕྱུང་ནས་མགར་བའི་བུ་སྐུལ་བྱེད་ལ་
འདི་སྐད་ཅེས་སྨྲས་སོ། །ཀྱེ་མགར་བའི་བུ་སྐུལ་བྱེད། ཁྱོད་སྐྱིད་དེ་བ་ཁྱོད་ཀྱིས་མི་ལུས་ཐོབ་པ་ནི། ཕན་ཐོགས་པར་གྱུར་ཏོ། །ལེགས་པར་ཐོབ་བོ། །སྐུལ་བྱེད། འཇིག་རྟེན་ན་ཨུ་དུམ་བ་རའི་མེ་
ཏོག་བཞིན་དུ་མཛེས་པ་ནི། རྙེད་པར་དཀའོ། །དེ་བས་ཀྱང་ཆེས་དེ་བཞིན་གཤེགས་པ་འབྱུང་བ་རྙེད་པར་དཀའོ། །དེ་བས་ཀྱང་དད་པ་རྙེད་པ་ཤིན་ཏུ་དཀའོ། །དེ་བས་ཀྱང་ཆེས་ཆོས་ཐོས་པ་
༄༅། །རྙེད་པར་དཀའོ། །དེ་བས་ཀྱང་ཆེས་དེ་བཞིན་གཤེགས་པ་ལ་ཞལ་ཟས་ཀྱི་ཐ་མ་དབུལ་བ་རྙེད་པར་དཀའོ། །དེ་བས་ན། ཞལ་ཟས་ཀྱི་ཐ་མ་སྦྱིན་པའི་ཕ་རོལ་ཏུ་ཕྱིན་
པ་ཐོབ་པར་དཀའོ། །མགར་བའི་བུ་སྐུལ་བྱེད་ཁྱོད་ལ་ཕྱག་འཚལ་ལོ། །དཔེར་ན། སྟོན་ཟླ་འབྲིང་པོ་ཉ་ལ་སྤྲིན་མེད་པའི་ཚེ་ཟླ་བའི་དཀྱིལ་འཁོར་དྲི་མ་མེད་པ་མཛེས་པ་མཐོང་བ་ན་ཟླ་བ་འབའ་
ཞིག་མངོན་དུ་སྣང་བ་དེ་བཞིན་དུ་ཁྱོད་ཀྱིས་ཕུལ་བའི་ཞལ་ཟས་ཀྱི་ཐ་མ་དེ་བཞིན་གཤེགས་པས་བཞེས་པས་ན། ཁྱོད་འབའ་ཞིག་སེམས་ཅན་ཐམས་ཅད་ལ་མངོན་དུ་སྣང་ངོ༌། །ཁྱོད་ལ་ཡང་དང་ཡང་
དུ་ཕྱག་འཚལ་ལོ། །སྐུལ་བྱེད། ཁྱོད་ནི། མིའི་ལུས་བྱེད་བཞིན་དུ་ལྷའི་ཡང་ལྷ་ཡིན་ནོ། །དེ་བཞིན་གཤེགས་པའི་སྲས་སྒྲ་གཅན་ཟིན་དང་འདྲའོ། །ཞེས་བྱས་ནས་ཚིགས་སུ་བཅད་པ་འདི་དག་
ཀྱང་སྨྲས་སོ། །ཁྱོད་ནི་མི་མ་ཡིན་ཏེ་ལྷ་མཆོག་ཡིན། །མི་མཆོག་གཙོ་བོ་ཁྱད་པར་འཕགས་པ་སྟེ། །དེ་ཕྱིར་ཁྱོད་ལ་གསོལ་བ་འདི་སྐད་འདེབས། །སྟོན་པ་ཡོངས་སུ་མྱ་ངན་འདའ་བར་ཆས། །
བདག་ཅག་ཀུན་ལ་བརྩེ་བས་སྐུལ་བྱེད་ཁྱོད། །སྐྱེ་བོ་རྣམས་ལ་ཡུན་དུ་ཕན་པའི་ཕྱིར། །འདིར་ནི་སྟོན་པ་དཔག་མེད་མགོན་པོ་ལ། །བཞུགས་ཤིང་རྒྱུན་དུ་བདུད་རྩི་སྟོན་ཅེས་གསོལ། །སྲིད་ལས་
རྣམ་གྲོལ་མྱ་ངན་འདའ་བཞེད་ལ། །གལ་ཏེ་ཁྱོད་ཀྱིས་དེ་རིང་མ་གསོལ་ན། །བདག་ཅག་ཐམས་ཅད་མ་རུང་ཤེས་པར་གྱིས། །དེ་བས་ཕན་ཕྱིར་མགོན་ལ་གསོལ་བ་ཐོབ། །དེ་ནས་ལ་ལ་ཞིག་ཕ་
མ་གཉིས་ཤི་བ་ལས་ཕྱིར་སོས་ཏེ་གསོན་པོར་འདུག་པ་མཐོང་ན། མཆོག་ཏུ་དགའ་བར་གྱུར་པ་དེ་ཁོ་ན་བཞིན་དུ་མགར་བའི་བུ་སྐུལ་བྱེད་དེ་མཆོག་ཏུ་དགའ་བར་གྱུར་ནས་ལག་པ་བརྐྱང་སྟེ་བཅོམ་
ལྡན་འདས་ལ་མགོ་བོས་ཕྱག་བཙལ་ནས་ལངས་ཏེ་ཚིགས་སུ་བཅད་པ་འདི་དག་སྨྲས་སོ། །ཀྱེ་མ་དེང་བདག་རྙེད་པ་ལེགས་པར་རྙེད། །མི་ཡི་འཇིག་རྟེན་སྐྱེས་པ་འབྲས་བུ་ཡོད། །ད་ནི་རྙེད་ལ་སོགས་
ལས་འབྲལ་མི་འགྱུར། །མི་བཟད་དམྱལ་བར་ཡང་ནི་ལྟུང་མི་འགྱུར། །དེང་འདིར་རྙེད་པ་ཆེན་པོ་རྙེད་པ་འདི། །གསེར་གྱི་ཕུང་པོ་བས་ཀྱང་ལྷག་པ་ཡིན། །དཔའ་བོ་དེ་གཤེགས་མགོན་དང་ཕྲད་པས་
ན༑ ༑ཕྱིན་ཆད་བདག་ནི་དུད་འགྲོས་འཇིགས་པ་མེད། །སངས་རྒྱས་ལ་ནི་དད་པ་གཏིང་ཟུག་པ། །དེང་རྙེད་ཨུ་དུམ་ཝ་རའི་མེ་ཏོག་བཞིན། །རབ་འཇིགས་ཡི་དྭགས་འགྲོ་བ་ཡོངས་སྤངས་ཤིང༌། །
ལྷ་མིན་སྐྱེ་བའི་ས་བོན་མི་བཟོད་བཅོམ། །དེ་བཞིན་གཤེགས་འབྱུང་དཀོན་དང་དེང་ཕྲད་པ། ཁབ་ཀྱི་རྩེ་མོར་ཡུངས་འབྲུ་ཆགས་པ་བཞིན། །དེ་ལ་ཕ་རོལ་ཕྱིན་མཆོག་སྦྱིན་ཕུལ་བས། རྟག་
ཏུ་ལྷ་ཡི་འགྲོ་བར་འཕར་བར་འགྱུར། །ཆུ་གནས་པདྨ་ཆུས་མི་ཆགས་པ་ལྟར། །དྲང་སྲོང་ཆེན་པོ་འཇིག་རྟེན་ཆོས་རྣམས་ཀྱིས། །ཆགས་མེད་ཕྲད་པས་སྲིད་རྩེའི་ས་བོན་ཀུན། །དྲུངས་ཕྱུང་བདག་
ཉིད་འཁོར་བའི་མཚོ་ཆེན་རྒལ། །རྒྱ་མཚོའི་ནང་གི་རུས་སྦལ་ཞར་བའི་མགྲིན། །གཉའ་ཤིང་མིག་ཏུ་ཆུད་དཀའ་འདྲ་བ་ལས། །བདེ་གཤེགས་དེང་ཕྲད་དེ་ལ་སྦྱིན་པ་ཕུལ། །དེ་ན་བདག་གིས་
༄༅། །ཉོན་མོངས་གསོག་ཀུན་བཅོམ། །ལྷ་རྣམས་ཀྱིས་ནི་ཞལ་ཟས་བཟང་པོ་དག །ཕུལ་ཡང་བདེ་གཤེགས་མ་བཞེས་བདག་ལས་ནི། །ཨེ་རཎྜ་ཡི་མེ་ཏོག་འདྲ་
ཞེས་དེས། །བདག་ནི་འཇིག་རྟེན་རབ་མཆོག་དཔལ་ཡོན་ཅན། །ཚངས་པ་བརྒྱ་བྱིན་ལ་སོགས་འཇིག་རྟེན་འདི། །ཐམས་ཅད་ལྷགས་ཏེ་གུས་པར་བདག་ལ་མཆོད། །ཁྱུ་མཆོག་གནས་སུ་
སོན་པ་གང་ཡིན་འདི། །སྐྱེ་བ་འདི་ཉིད་ལ་ནི་བདག་གིས་ཐོབ། །དེ་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །མགོན་ཁྱོད་མྱ་ངན་འདའ་བ་མཐོང་ནས་ནི། །འཇིག་
རྟེན་འདི་ཀུན་སྡུག་བསྔལ་གཟིར་བར་གྱུར། །དབང་མེད་ཀྱི་ཧུད་ཅེས་ནི་སྐད་ཆེར་བླ། །འདི་དག་མ་དོར་རྟག་ཏུ་སྲས་བཞིན་གཟིགས། །ལྷུན་པོའི་གསེར་གྱི་རྩེ་མོ་རབ་མཐོ་བ། །མཚོ་ཆེན་དབུས་ན་
མཛེས་པར་གནས་པ་ལྟར། །ཆོས་ཀྱི་མངའ་བདག་ཁྱོད་ནི་ཆོས་སྟོན་ཅིང༌། །དགེ་འདུན་དབུས་སུ་མཛེས་པར་བཞུགས་སུ་གསོལ། །ཇི་ལྟར་ཉི་མ་གཟི་ཅན་ཤར་བ་ན། །འོད་ཟེར་དག་གིས་སྤྲིན་
སྲབ་སེལ་བ་ལྟར། །དྲང་སྲོང་ཆེན་པོ་ཡེ་ཤེས་སྒྲོན་ཆེན་གྱིས། །སྐྱེ་བོ་མང་པོའི་མྱ་ངན་དེང་བསལ་མཛོད། །སེམས་ཅན་འདི་དག་དུད་མོས་མིག་སྐྲངས་ཤིང༌། །སྡུག་བསྔལ་གཅིག་བུའི་རྒྱ་
མཚོའི་གཏིང་དུ་ཞུགས། །དེ་ཕྱིར་དད་པ་རྙེད་དཀའ་བསྐྱེད་མཛད་ཅིང༌། །འདི་རྣམས་སྡུག་བསྔལ་ཆོད་ལ་ཡུན་དུ་བཞུགས། །དེ་ནས་བཅོམ་ལྡན་འདས་ཀྱིས་སྐུལ་བྱེད་ལ་བཀའ་སྩལ་པ། སྐུལ་
བྱེད༑ དེ་ནི། དེ་བཞིན་ནོ། །དེ་ནི། དེ་བཞིན་ཏེ། སངས་རྒྱས་འབྱུང་བ་ནི། ཨུ་དུ་མ་ཝ་རའི་མེ་ཏོག་བཞིན་ཤིན་ཏུ་རྙེད་པར་དཀའོ། །དད་པའང་རྙེད་པར་དཀའོ། །ཆོས་ཐོས་པའང་རྙེད་པར་དཀའོ། །དེ་
བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ཚེ་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པའང་རྙེད་པར་དཀའོ། །སྐུལ་བྱེད། གཞན་ཡང་ཁྱོད་མངུ༌། མྱ་ངན་
མ་བྱེད་པར་བདག་གིས་དེ་བཞིན་གཤེགས་པ་ལ་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ཐོབ་བོ། །སྙམ་དུ་དགའ་བ་སྐྱེད་ཅིག་དང༌། དེ་བཞིན་གཤེགས་པ་ལ་བཅོམ་ལྡན་
འདས་བཞུགས་སུ་གསོལ་ཞེས་དེ་སྐད་དུ་ཁྱོད་གསོལ་བ་མ་འདེབས་ཤིག །སངས་རྒྱས་རྣམས་ཀྱི་ཆོས་ཀྱི་དེ་ཁོ་ན་ཉིད་ལ་རྟོགས་ཤིག །མི་རྟག་པ་ཉིད་ལ་འཇུག་པར་གྱིས་ཤིག །འདུ་བྱེད་
རྣམས་ཀྱི་རང་བཞིན་ཤེས་པར་གྱིས་ཤིག །ཅེས་བཀའ་སྩལ་ནས་ཚིགས་སུ་བཅད་པ་འདི་དག་གསུངས་སོ། །ཚེ་ནི་ཤིན་ཏུ་རིང་ཡང་འཇིག་པར་འགྱུར། །འདིར་ནི་ཐམས་ཅད་ངེས་པར་འཆི་བར་
འགྱུར༑ ༑འཚོ་བའི་འཇིག་རྟེན་འཇིག་པའི་ཆོས་ཅན་ཡིན། །འབྱོར་པ་ཐམས་ཅད་རྒུད་པར་གཞོལ་བར་འགྱུར། །རྟག་ཏུ་ལང་ཚོ་རྒ་བས་ངེས་པར་འཇོམས། །གཟུགས་བཟང་ནད་མེད་ནད་ཀྱིས་
འཇིག་པར་འགྱུར། །སྲོག་ནི་འཆི་བས་རྩ་ནས་འབྱིན་པར་བྱེད། །འཇིག་རྟེན་ཀུན་ན་རྟག་པ་ཅི་ཡང་མེད། །དབང་ཕྱུག་མི་རྟག་ཚེ་ཡང་མི་རྟག་སྟེ། །སྐྱེ་བོ་སྡུག་བསྔལ་འཁོར་ལོ་རྟག་ཏུ་འཁོར། །འཇིག་
༄༅། །རྟེན་གསུམ་ན་བརྟན་པོ་ཅི་ཡང་མེད། །སྲིད་པ་དག་ན་འགྲོ་ཀུན་སྲོག་ཏུ་འདུག །སྲིད་པ་འཇིག་པའི་ཆོས་ཅན་རབ་གཡོ་བ། །འདི་དག་ན་ནི་བདེ་བ་ཅི་ཡང་མེད། །རྒ་དང་
འཆི་དང་ནད་དང་རྒུད་རྣམས་ཀྱི། །འཇིགས་པས་རྟག་ཏུ་ཀུན་ནས་གཙེ་བར་བྱེད། །སྲིད་པ་མཐའ་མེད་མི་བརྟན་སྙིང་པོ་མེད། །ཐམས་ཅད་དགྲ་དང་འཁུ་བར་ཤེས་པར་གྱིས། །དེ་ན་འཁོར་ཞིང་
ཉོན་མོངས་དྲ་བ་ཡིས། །འཇིག་རྟེན་དཀྲིས་ཏེ་དར་གྱི་སྲིན་བུ་བཞིན། །འཇིག་རྟེན་དག་ན་ཐེར་ཟུག་གནོད་པའི་གཞི། །རྟག་ཏུ་འབྲས་ལྟར་སྡུག་བསྔལ་འབྲེལ་བ་གང༌། །མི་གཙང་ལུས་དང་འདོད་པ་
དེ་དག་ལ། །ཕན་འདོད་སྡུག་བསྔལ་བསལ་འདོད་སུ་ཞིག་དགའ། །མི་རྟག་འདོད་པ་རྣམས་ལ་ཆགས་པ་མེད། །ཚུལ་བཞིན་རྟོག་པས་འདོད་ཆགས་འབྲལ་བར་འགྱུར། །དེ་ནས་ཡང་དག་མཐོང་
ན་འདོད་ཆགས་འབྲལ། །དེ་དག་སྤངས་བཅད་གྲོལ་པ་ཉིད་དུ་འགྱུར། །ད་ནི་སྲིད་པའི་ཆུ་ཆེན་ལེགས་པར་རྒལ། །ང་ནི་སྡུག་བསྔལ་རྣམས་འདས་བདེ་བར་ཞུགས། །དེ་ཕྱིར་ངས་ནི་མཐའ་
ཡས་སྤྲོས་མེད་པ། །ཆགས་པ་ཀུན་བསལ་ཐར་པ་ཐོབ་པར་འགྱུར། །ང་ལ་རྒ་དང་ན་དང་འཆི་བ་མེད། །ང་ལ་རྟག་ཏུ་ཚེ་ཡང་ཟད་པ་མེད། །ང་ནི་མེ་ལྟར་འབར་ཏེ་འགྲོ་འགྱུར་གྱིས། །ཁྱོད་ཀྱིས་ང་ནི་མེད་
འགྱུར་མ་སེམས་ཤིག །དེ་བཞིན་གཤེགས་ཉིད་ལྷུན་པོ་འདྲ་བར་ལྟོས། །ང་དེང་ཡང་དག་མྱ་ངན་འདའ་བར་འགྱུར། །བདེ་མཆོག་དེ་ནི་ང་ཡི་ཆོས་ཉིད་དེ། །རྒྱལ་རྣམས་སྤྱོད་ཡུལ་ཡིན་གྱི་
ཁྱེད་མ་ངུ༌། །དེ་ནས་བཅོམ་ལྡན་འདས་ལ་མགར་བའི་བུ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་ནི། དེ་ལགས་སོ། །དེ་ནི། དེ་ལགས་ཏེ། མྱ་ངན་ལས་འདས་པ་ནི། བདག་
གིས་ཀྱང་བསམ་གྱིས་མི་ཁྱབ་ལགས་ན། སྦྲང་བུ་དང་འདྲ་བའི་སེམས་ཅན་ཐེག་པ་དམན་པ་གཞན་དག་གིས་ལྟ་སྨོས་ཀྱང་ཅི་འཚལ། བཅོམ་ལྡན་འདས། ཀྱེ་མ་བདག་དེང་དུ་བྱང་ཆུབ་
སེམས་དཔའ་མི་མཆོག་སྐལ་བ་ཆེན་པོ་དང་ལྡན་པ། མཆོད་པར་འོས་པ་འཇམ་དཔལ་གཞོན་ནུར་གྱུར་པ་ལ་སོགས་པ་དང༌། ཟག་པ་ཟད་པ་རྣམས་དང་མཉམ་པ་ཉིད་དུ་གྱུར་ཏོ། །བཅོམ་ལྡན་
འདས༑ དཔེར་གསོལ་ན། གསར་དུ་བསྙེན་པར་རྫོགས་པ་གཞོན་ནུའང་རབ་ཏུ་བྱུང་བ་དེ་ཉིད་ཀྱི་ཉིན་པར་ནས་དགེ་འདུན་གྱི་ནང་ན་དགེ་འདུན་གྱི་ནང་ན་དགེ་འདུན་དུ་བགྲང་ཞིང་ཡང་དག་པར་འདུས་པར་འགྱུར་བ་
དེ་བཞིན་དུ་བདག་ཀྱང་དེ་བཞིན་གཤེགས་པའི་མཐུས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གྲངས་སུ་གཏོགས་ཤིང་ཡང་དག་པར་འདུས་ལགས་སོ། །བཅོམ་ལྡན་འདས།
བདག་ནི། དེ་བཞིན་གཤེགས་པ་ཡུན་དུ་བཞུགས་པར་འཚལ་གྱི། ཁ་ཟས་ཚིག་པ་བཞིན་དུ་མྱ་ངན་ལས་འདའ་བར་གཤེགས་པར་ནི། མི་འཚལ་ལགས་སོ། །དེ་ནས་དེའི་ཚེ་འཇམ་དཔལ་
གཞོན་ནུར་གྱུར་པས་མགར་བའི་བུ་སྐུལ་བྱེད་ལ་འདི་སྐད་ཅེས་སྨྲས་སོ། །སྐུལ་བྱེད། ཁྱོད་འདི་སྐད་དུ་བདག་ནི། དེ་བཞིན་གཤེགས་པ་ཡུན་དུ་བཞུགས་པར་འཚལ་གྱི། །ཁ་ཟས་ཚིག་པ་བཞིན་
༄༅། །དུ་མྱ་ངན་ལས་འདའ་བར་གཤེགས་པར་ནི་མི་འཆལ་ལོ། །ཞེས་དེ་སྐད་མ་ཟེར་ཅིག། འདུ་བྱེད་ཀྱི་རང་བཞིན་བལྟ་བར་བྱ་མོད། དེ་ལྟར་ལྟ་བ་གང་ཡིན་པ་དེ་ནི།
སྟོང་པ་ཉིད་སྒོམ་པ་ཡོངས་སུ་རྫོགས་པར་འགྱུར་ཏེ། དམ་པའི་ཆོས་འདོད་པས་ན་དེ་ལྟར་བསླབ་པར་བྱའོ། །སྐུལ་བྱེད་ཀྱིས་སྨྲས་པ། བཙུན་པ་འཇམ་དཔལ། འོ་ན་ཇི་ལྟར་དེ་བཞིན་གཤེགས་
པ་ལྷའི་ཡང་ལྷ་མཆོག་ཏུ་གྱུར་པ་ལ་གལ་ཏེ་འདུ་བྱེད་དུ་གྱུར་ན། ལྷའི་ཡང་ལྷར་འོས་པ་མ་ཡིན་ནོ། །འདུ་བྱེད་རྣམས་ནི། ཆུ་བུར་བཞིན་དུ་ཤེས་ཤིང་ཤིང་རྟའི་འཕང་ལོ་བཞིན་དུ་འཁོར་བ་
ཡིན་ནོ༑ ༑ལྷ་རྣམས་ནི། མཆོག་ཏུ་ཚེ་རིང་ཞེས་གྲག་ལ། དེ་བཞིན་གཤེགས་པས་ནི། ལོ་བརྒྱའང་མ་ཐུབ་སྟེ། དེ་བས་ན། དེ་བཞིན་གཤེགས་པ་ལྷའི་ཡང་ལྟར་འོས་པ་མ་ཡིན་ནོ། །
དཔེར་ན། མི་ལ་ལ་ཞིག་གྲོང་དཔོན་བྱེད་པ་ལས་དེ་མཐར་གྱིས་དབང་ཕྱུག་ཆེན་པོར་གྱུར་ནས་བློན་པོ་ཆེན་པོའི་དབང་ཕྱུག་ལས་ཀྱང་འདས་ཏེ། རང་གི་དབང་ཕྱུག་གི་འབྲས་བུ་ཆོས་ཀྱིས་རྙེད་
པ་ལ་ལོངས་སྤྱོད་པ་ལས་དེ་ཕྱིར་ཡང་བསོད་ནམས་ཟད་ཅིང་དབང་ཕྱུག་ལས་ཉམས་པར་གྱུར་ན། གཞན་གྱིས་བཀོལ་ཞིང་བརྙས་པར་འགྱུར་པ་སྟེ། ཅིའི་ཕྱིར་ཞེ་ན། དབུལ་པོར་གྱུར་
པའི་ཕྱིར་རོ། །དེ་དང་འདྲ་བར་གལ་ཏེ་དེ་བཞིན་གཤེགས་པ་འདུ་བྱེད་དུ་གྱུར་དུ་ཟིན་ན། འཆི་བའི་རྒྱུ་ཡིན་པའི་ཕྱིར་ལྷའི་ཡང་ལྷར་འོས་པ་མ་ཡིན་ནོ། །བཙུན་པ་འཇམ་དཔལ་དེ་བས་ན།
ལྷའི་ཡང་ལྷ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དེ་ལྟར་འདུ་བྱེད་དང་འདྲ་བར་མ་ལྟ་ཞིག །འཇམ་དཔལ། གཞན་ཡང་ཅི་ཁྱོད་ཤེས་བཞིན་དུ། དེ་བཞིན་
གཤེགས་པ་ལ་འདུ་བྱེད་ཀྱི་རང་བཞིན་དུ་རྟོག་པར་བྱེད་དམ། འོན་ཏེ་མ་ཤེས་པས་རྟོག་པར་བྱེད། གལ་ཏེ་དེ་བཞིན་དུ་དེ་བཞིན་གཤེགས་པ་འདུ་བྱེད་དང་འདྲུ་ན་ནི། འཇིག་རྟེན་གསུམ་པོ་དག་ན་ཆོས་ཀྱི་
དབང་ཕྱུག་རྙེད་པ་ལྷའི་ལྷ་མཛད་པའི་འོས་མ་ཡིན་ནོ། །དཔེར་ན། རྒྱལ་པོའི་དབང་པོ་ལ་ལ་ཞིག་ལ་གྱད་སྟོང་གི་མཆོག་ཏུ་གྱུར་བའི་གྱད་ཅིག་ཡོད་ལ། དེ་གྱད་ཐམས་ཅད་ཀྱིས་མི་ཐུབ་པའི་ཕྱིར་གྱད་
སྟོང་ཐུབ་ཅེས་བྱ་བའི་མིང་ཐོབ་སྟེ། དེ་ལ་གྱད་ཟླ་མེད་པའི་ཕྱིར་བླ་ནས་དབང་ཐང་ཆེན་པོ་འགྲུབ་ན། ཅི་གྱད་སྟོང་ཐུབ་པ་དེའི་མིང་དེ་ཐོས་ན་སྐད་གྲགས་པ་དེ་མི་བདེན་པ་ཡིན་ནམ། འོན་ཏེ་ཡོན་ཏན་ཡོད་
ན་ནི། ཡོན་ཏན་ཅན་གྱི་མིང་ཐོབ་པ་ཡིན་ནོ། །དེ་བཞིན་དུ་དེ་བཞིན་གཤེགས་པའང་ཉོན་མོངས་པའི་བདུད་དང༌། ཕུང་པོའི་བདུད་དང༌། ལྷའི་བུའི་བདུད་དང༌། རང་བཞིན་གྱི་བདུད་ཀྱི་གྱད་ཐམས་ཅད་བཅོམ་
པས་ན༑ གྱད་སྟོང་ཐུབ་བཞིན་དུ་ཡང་དག་པའི་ཡོན་ཏན་གྱི་སྒོ་ནས་འཇིག་རྟེན་གསུམ་པོ་དག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བ་ཡིན་གྱི། བཙུན་
པ་འཇམ་དཔལ། ཁྱོད་དེ་བཞིན་གཤེགས་པ་ལ་འདུ་བྱེད་དང་འདྲ་བར་ཡོངས་སུ་མ་རྟོག་ཅིག། དཔེར་ན། ལ་ལ་ཞིག་ཕྱུག་ཅིང་ནོར་མང་བའི་རིགས་སུ་སྐྱེ་བ་བླངས་ལ་ཚེ་ཐུང་བར་འགྱུར་བ་ཞིག་སྟེ།
༄༅། །དེ་སྐར་མཁན་དག་གིས་མཐོང་ནས་ཁྱེའུ་འདི་ནི། ཚེ་ཐུང་ངོ༌། །ཞེས་བསྟན་ཏེ། དེའི་ཕ་མས་དེ་སྐད་ཐོས་ན། འདི་ནི། བདག་ཅག་གི་ཁྱིམ་དུ་ཕན་པར་འགྱུར་བ་མ་ཡིན་
ནོ༑ ༑སྙམ་ནས་གྲངས་སུའང་མི་རྩི་ཞིང་དེ་ལ་བྱམས་པར་མི་བྱེད་དོ། །དེ་ལྟར་སྐྱེས་པའམ། བུད་མེད་དམ། ལྷའམ། ཚངས་པའང་རུང་སྟེ། གང་ཚེ་ཐུང་བ་དེ་ལ་ཁྱད་དུ་གསོད་པར་གྱུར་ན། གལ་ཏེ་
དེ་བཞིན་གཤེགས་པ་ཆོས་འབའ་ཞིག་ལ་ཡང་དག་པར་གཞོལ་བ་ཉིད་འདུ་བྱེད་དུ་གྱུར་དུ་ཟིན་ན། འཇིག་རྟེན་ཐམས་ཅད་ཀྱིས་བརྙས་པར་འགྱུར་རོ། །ཆོས་ཐམས་ཅད་ཀྱི་ནང་ན་ནི། ཕྱིར་
ལྟུང་བ་མེད་ཅིང་ཟད་པ་མེད་པ་ལ་ཐར་པ་ཞེས་བཤད་ན། གལ་ཏེ་དེ་ལྟར་གྱུར་ན་དོན་མེད་པར་གྱུར་གྱི། བཙུན་པ་འཇམ་དཔལ། དེ་བཞིན་གཤེགས་པ་འདུ་བྱེད་དུ་གྱུར་ཅེས་དེ་སྐད་དུ་མ་
གསུང་ཞིག །དཔེར་ན། བུད་མེད་གཞོན་ནུ་དབུལ་མོ། །བཀྲེན་མ། མགོན་མེད་པ། ནད་ཀྱིས་ཐེབས་པ། བར་མ་དོར་སྡུག་བསྔལ་བར་གྱུར་པ། སྦྲུམ་པས་ཉེན་པ་ཞིག་མགོན་མེད་པ་ཁང་པ་
ཞིག་ཏུ་སོང་བ་ལས་བུ་མོ་དེ་བུ་བྱུང་ནས་དེ་ན་སྔ་ནས་གནས་པ་གཞན་དག་གིས་དེ་དེའི་ནང་ནས་བསྐྲད་དེ་ཉོན་མོངས་མ་དེ་བུ་བཙས་མ་ཐག་ཏུ་བྱིས་པ་ཁ་དམར་ཁྱེར་ནས་ལོ་ལེགས་པའི་ཡུལ་ཞིག་ཏུ་
ཆས་ཏེ་སོང་བ་ལས་ལམ་དུ་ཤ་སྦྲང་དང༌། སྦྲང་བུ་དང༌། རླུང་དང༌། ཉི་ཚན་དང༌། སྡིག་སྦྲུལ་གྱི་གནོད་པས་ཉེན་པར་གྱུར་ཏོ། །གངྒཱའི་ཀླུང་ཆེན་པོ་རྒལ་བར་འདོད་པ་ལས་དེ་རྒལ་བར་མ་ནུས་སོ། །
ཁྱེའུ་དེ་ཁྱེར་བཞིན་དུ་གངྒཱའི་ནང་དུ་ཤི་ནས་དེ་བུ་དེ་ལ་བྱམས་པའི་བསོད་ནམས་ཀྱི་ཁྱད་པར་གྱིས་ལུས་དང་བྲལ་ཏེ་ཤི་བའི་འོག་ཏུ་ཚངས་པའི་འཇིག་རྟེན་དུ་སྐྱེས་ཏེ། བྱམས་པའི་བསོད་ནམས་ཀྱི་
ཁྱད་པར་ཇི་ལྟ་བུ་ཞིག་གིས་སྐྱེས་ཤ་ན། བདག་ནི། ཤིའང་བླའི། ཁྱེའུ་འདི་ཉེ་ཞོ་མེད་པར་ཐར་པར་བྱའོ། །སྙམ་པའི་བསོད་ནམས་ཀྱི་ཁྱད་པར་གྱིས་སྐྱེས་པ་དེ་བཞིན་དུ། བཙུན་པ་འཇམ་
དཔལ༑ སྐྱེས་བུ་དམ་པ་དམ་པའི་ཆོས་དབྱུང་བར་འདོད་པས། དེ་བཞིན་གཤེགས་པ་འདུ་བྱེད་དུ་གྱུར་པར་བལྟ་བར་མི་བྱ་ཞིང༌། འདུ་ཤེས་ཀྱང་བསྒྱུར་བར་མི་བྱའོ། །གལ་ཏེ་དེ་ལྟ་བུའི་མིག་
ལུས་ལ་མེད་ནའང་བཅོམ་ལྡན་འདས་ནི། བསམ་གྱིས་མི་ཁྱབ་བོ། །སྙམ་དུ་ཡང་དག་པའི་ལྟ་བ་ཅན་དུ་བྱའོ། །སེམས་ཅན་ཐམས་ཅད་ལ་ཕན་པའི་གདམས་ངག་སྟོན་པས་ནི། དེ་བཞིན་
གཤེགས་པ་འདུས་མ་བྱས་པ་ཡིན་ནོ། །ཞེས་བསྟན་པར་བྱའོ། །དམ་པའི་ཆོས་འབྱིན་པར་བྱེད་པས་ནི། ཇི་ལྟར་བུད་མེད་གཞོན་ནུ་དབུལ་མོས་གངྒཱའི་ཀླུང་ལས་བུ་བསྒྲལ་བའི་ཕྱིར་རང་གི་
སྲོག་དང་བསྡོས་ཏེ་འབད་པ་དེ་བཞིན་དུ་བྱའོ། །དམ་པའི་ཆོས་དབྱུང་བའི་ཐབས་བྱ་བའི་ཕྱིར་དེ་བཞིན་གཤེགས་པ་ནི། འདུས་མ་བྱས་པའོ། །སྙམ་དུ་སེམས་བསྐྱེད་པར་བྱའོ། །དེ་བཞིན་གཤེགས་
པ་འདུས་མ་བྱས་པར་མཐོང་ན་བདག་ཉིད་ཀྱིས་དོན་དུ་བྱ་བའི་ཐར་པའི་དོན་རྟོགས་པར་འགྱུར་རོ། །བཙུན་པ་འཇམ་དཔལ། དཔེར་ན། མི་ལ་ལ་ཞིག་ལམ་དུ་འགྲོ་བས་དུབ་པར་གྱུར་ཏེ་ཁྱིམ་གྱི་ནང་དུ་
༄༅། །ཉལ་བ་ལས་དེའི་ཚེ་ཁྱིམ་དེ་ཐོག་ཐག་ནས་མེ་ཆེན་པོ་འབར་ཏེ། མི་དེ་མེས་འཚིག་ན། ད་ནི། སྲོག་མེད་ཟིན་ཏོ། །སྙམ་ནས་ངོ་ཚ་ཤེས་པ་དང་ཁྲེལ་ཡོད་པ་དང་ལྡན་པས་
བདག་ཉིད་གོས་ཀྱིས་དམ་དུ་དཀྲིས་ཏེ་སེམས་དྲན་པ་དང་ལྡན་བཞིན་དུ་ཤི་ནས་དེ་ངོ་ཚ་ཤེས་ཤིང་ཁྲེལ་ཡོད་པར་སེམས་པའི་བསོད་ནམས་ཀྱི་འབྲས་བུས་སུམ་ཅུ་རྩ་གསུམ་པའི་རྒྱལ་སྲིད་དེ། ལན་
བརྒྱད་ཅུ་བྱས། ཚངས་པའི་རྒྱལ་སྲིད་ནི། ལན་འབུམ་བྱས། མིའི་འཇིག་རྟེན་དུའང་འཁོར་ལོས་བསྒྱུར་བའི་རྒྱལ་སྲིད་ལན་དུ་མ་བྱས་ཏེ་ངན་སོང་རྣམས་སུའང་མི་སྐྱེ་ལ་ལན་མང་དུ་བདེ་བ་གཅིག་
ནས་གཅིག་ཏུ་བརྒྱུད་པ་འབའ་ཞིག་ཐོབ་པ་དེ་བཞིན་དུ། འཇམ་དཔལ། ཁྱོད་སྐྱེས་བུ་དམ་པ་དག་ལྟར་འཛེམ་པར་གྱིས་ཤིག། ངོ་ཚ་ཤེས་པར་གྱིས་ཤིག །དེ་བཞིན་གཤེགས་པ་འདུ་བྱེད་
ཀྱི་ཐབས་ལ་འཇུག་པ་སྤྱོད་དུ་མ་གཞུག་ཅིག །དགེ་སློང་ཚུལ་ཁྲིམས་ཕུན་སུམ་ཚོགས་པ་དེ་བཞིན་གཤེགས་པ་འདུས་མ་བྱས་པ་ལ་དེ་བཞིན་གཤེགས་པ་འདུས་བྱས་ཡིན་ནོ། །ཞེས་
ཟེར་བས་ནི། མུ་སྟེགས་པར་གྱུར་ཏེ་ཤིའང་བླའོ། །དེ་བཞིན་གཤེགས་པ་འདུས་མ་བྱས་ཡིན་བཞིན་དུ་དེ་བཞིན་གཤེགས་པ་འདུས་བྱས་ཡིན་ནོ། །ཞེས་ཟེར་པ་གང་ཡིན་པ་དེ་དག་ནི།
བརྫུན་དུ་སྨྲ་བ་ཡིན་ནོ། །དེ་བཞིན་གཤེགས་པ་འདུས་བྱས་པ་ཡིན་ནོ། །ཞེས་ཟེར་བ་རྣམས་ནི། རང་གི་ཁྱིམ་དང་འདྲ་བར་སེམས་ཅན་དམྱལ་བར་འགྲོ་བར་འགྱུར་རོ། །བཙུན་པ་འཇམ་
དཔལ༑ དེ་བཞིན་གཤེགས་པ་ལ་འདུས་བྱས་དང་འདྲ་བར་མ་ལྟ་ཞིག །ད་ཕྱིན་ཆད་འཁོར་བར་རྒྱུ་བ་ན་མི་ཤེས་པ་ལ་བཟླས་ཏེ་བཅོམ་ལྡན་འདས་ནི། འདུས་མ་བྱས་པའོ། །སྙམ་པའི་ཤེས་པ་འབའ་
ཞིག་རྟོགས་པར་གྱིས་ཤིག། དེ་ལྟར་བྱས་པ་དང་སྒོམ་པ་དེའི་འབྲས་བུས་ཁྱོད་མྱུར་བ་ཁོ་ནར་དེ་བཞིན་གཤེགས་པ་བཞིན་དུ་མཚན་སུམ་ཅུ་རྩ་གཉིས་དང་ལྡན་པར་འགྱུར་རོ། །དེ་ནས་འཇམ་དཔལ་
གཞོན་ནུར་གྱུར་པས། མགར་བའི་བུ་སྐུལ་བྱེད་ལ་འདི་སྐད་ཅེས་སྨྲས་སོ། །ལེགས་སོ། །ལེགས་སོ། །ཚེ་རིང་བར་གྱུར་ཅིག །རིགས་ཀྱི་བུས་ནི། དེ་ལྟར་བྱ་བ་ཡིན་ནོ། །རིགས་ཀྱི་བུ། ཁྱོད་ཀྱིས་དེ་བཞིན་
གཤེགས་པ་རྟག་པ་དང༌། ཐེར་ཟུག་དང༌། འདུས་མ་བྱས་པ་དང༌། བརྟན་པར་ཤེས་སོ། །ད་ལྟར་ཁྱོད་ཀྱིས་འདི་ཁོ་ན་ལྟར་འདུས་བྱས་ཁོང་བརླག་ཏུ་བཏང་བའི་སྒོ་ནས་ཤེས་པ་ལས་ན། ཁྱོད་ཀྱང་རིང་པོ་མི་
ཐོགས་པར་དེ་བཞིན་གཤེགས་པ་ཇི་ལྟ་བ་བཞིན་དུ་འགྱུར་རོ། །སངས་རྒྱས་ཉིད་ཀྱིས་ཀྱང་དེ་ལྟར་འུ་བུ་ཅག་གཉིས་ཀྱིས་ཁྱད་པར་དུ་འཕགས་པའི་བསྔགས་པ་བརྗོད་དོ། །ཞེས་ཕྱིས་བསྔགས་པར་
འགྱུར་རོ། །སྐུལ་བྱེད། དེ་བཞིན་གཤེགས་པའི་བཤོས་མྱུར་ཅིག །སྦྱིན་པ་ཐམས་ཅད་ཀྱི་ནང་ན་ནི། སྨྱུར་ཏེ་སྦྱིན་པ་མཆོག་ཡིན་ནོ། །དེ་ལ་སྨྱུར་ཏེ་སྦྱིན་ན་ཞེས་བྱ་བ་ནི། སྦྱིན་པའི་ཕ་རོལ་ཏུ་ཕྱིན་པ་
ཐམས་ཅད་ཀྱི་ས་བོན་ལས་མྱུ་གུ་འབྱུང་བར་བྱ་བའི་ཕྱིར་གང་གི་ཚེ་དགེ་སློང་དམ། དགེ་སློང་མའམ། དགེ་བསྙེན་ནམ། དགེ་བསྙེན་མའང་རུང་སྟེ། དོན་འགའ་ཞིག་གི་ཕྱིར་ལམ་དུ་ཞུགས་ནས་
༄༅། །དུབ་པར་གྱུར་པ་དེ་དག་ལ་ཅི་ཡོད་པ་དང༌། དེའི་རྐྱེན་དུ་འཚམ་པ་དང༌། བརྟགས་པའི་སྦྱིན་པ་བྱེད་པ་དེ་ནི། སྨྱུར་ཏེ་སྦྱིན་པ་ཞེས་བྱའོ། །སྐུལ་བྱེད། དེ་བཞིན་དུ་ཁྱོད་ཀྱིས་
ཅི་ཡོད་པ་ལས་ཞལ་ཟས་ཀྱི་ཐ་མ་མང་ཡང་རུང༌། ཉུང་ཡང་རུང༌། །དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་ཁྱེད་པར་ཡོད་ཀྱང་རུང༌། ཁྱེད་པར་མེད་ཀྱང་རུང་སྟེ། འབྲིམ་དུ་ཆུག་
ཅིག །བཅོམ་ལྡན་འདས་ཡོངས་སུ་མྱ་ངན་ལས་འདའ་བར་གཤེགས་སུ་ཉེའོ། །དེ་ནས་སྐུལ་བྱེད་ཀྱིས་སྨྲས་པ། བཙུན་པ་འཇམ་དཔལ། ཁྱོད་ཁ་ཟས་ལ་ཆགས་སམ། ཅི་ན་ཞལ་ཟས་མང་
ཡང་རུང༌། ཉུང་ཡང་རུང༌། བྲིམས་ཤིག །ཅེས་བདག་གི་གཞེན་འདེབས་པར་བྱེད། བཅོམ་ལྡན་འདས་ཀྱིས་ལོ་དྲུག་གི་བར་དུ་དཀའ་བ་སྤྱོད་པ་མཛད་མཛད་ན། ཅི་ད་སྐད་ཅིག་ཙམ་ཡང་གཞེས་
མི་སྤྱོད་དམ། དེ་བཞིན་གཤེགས་པ་ནི། ཆོས་ཀྱི་སྐུ་ཡིན་ཏེ། ཞལ་ཟས་ཀྱི་སྐུ་མ་ཡིན་ན། ཅི་བཅོམ་ལྡན་འདས་ཞལ་ཟས་གསོལ་ལམ། བཅོམ་ལྡན་འདས་ཀྱིས་བཀའ་སྩལ་པ། འཇམ་
དཔལ༑ སྐུལ་བྱེད་ཀྱིས་ཇི་སྐད་སྨྲས་པ་དེ་ནི། དེ་བཞིན་ནོ། །སྐུལ་བྱེད། ལེགས་སོ། །ལེགས་སོ། །ཁྱོད་ནི། ཐེག་པ་ཆེན་པོ་ལ་ཤེས་རབ་ཆེ་བའོ། །ཁྱོད་ནི། ཐེག་པ་ཆེན་པོ་ལ་ཤེད་བྱེད་པའོ། །
འཇམ་དཔལ་གྱིས་ཀྱང་འདི་སྐད་ཅེས་སྨྲས་སོ། །གལ་ཏེ་དེ་ལྟར་བཞེད་པར་གྱུར་ན། དེ་བཞིན་གཤེགས་པ་སྐུ་ཚེ་རིང་བར་ཤོག་ཅིག །སྐུལ་བྱེད་ཀྱིས་སྨྲས་པ། ཅི་བདག་འབའ་ཞིག་ལ་
བཅོམ་ལྡན་འདས་མཉེས་སམ། འོན་ཏེ་སེམས་ཅན་ཐམས་ཅད་ལའང་མཉེས། འཇམ་དཔལ་གྱིས་སྨྲས་པ། ཅི་བཅོམ་ལྡན་འདས་ལྟ་ཁྱོད་དང༌། བདག་དང༌། སེམས་ཅན་ཐམས་ཅད་ལའང་མི་
མཉེས་སམ། སྐུལ་བྱེད་ཀྱིས་སྨྲས་པ། དེ་སྐད་མ་ཟེར་ཅིག །གང་ལ་མགུ་བ་ཡོད་པ་དེ་ལ་ཕྱིན་ཅི་ལོག་གི་འདུ་ཤེས་ཡོད་དེ། འུ་བུ་ཅག་ནི། དེ་ལ་སྤྱོད་དོ། །དེ་བཞིན་གཤེགས་པ་ལ་ནི། མཉེས་པའམ་
དགྱེས་པ་མེད་དོ། །འདི་ལྟར་དེ་བཞིན་གཤེགས་པ་ནི། བ་བེའུ་ལ་བྱམས་པའི་ཕྱིར་རྩྭ་ཟོས་ཤིང་ཟོས་ཤིང་གྲོང་ཉིད་དུ་འོང་བ་དེ་ལྟ་བུའི་བྱམས་པ་དང་ལྡན་པ་མ་ཡིན་གྱི། སེམས་ཅན་ཐམས་ཅད་
ལའང་སྒྲ་གཅན་ཟིན་དང་འདྲ་བར་གཟིགས་ཏེ། སངས་རྒྱས་ཀྱི་ཤེས་རབ་ཀྱི་ཡུལ་ནི། དེ་ལྟ་བུ་ཡིན་ནོ། །བཙུན་པ་འཇམ་དཔལ། དཔེར་ན། རྟ་ཅང་ཤེས་དང་སྦྱར་བའི་ཤིང་རྟ་རྒྱུག་པའི་ཟླ་ལ་བོང་
བུའི་ཤིང་རྟ་རྒྱུག་པ་མི་སྲིད་པ་དེ་བཞིན་དུ་འུ་བུ་ཅག་བོང་བུའི་ཤིང་རྟ་དང་འདྲ་བ་དག་གིས་དེ་བཞིན་གཤེགས་པའི་ཤེས་རབ་དང་འདྲ་བ་དང༌། དགོངས་པའི་ཚིག་དང་མཉམ་དུ་འགྲོ་བར་ནུས་རེ་སྐན།
དཔེར་ན། ནམ་མཁའ་ལྡིང་དཔག་ཚད་དུ་མར་འགྲོ་བ་ནམ་མཁའ་ལ་གནས་པས་ཆུའི་ནང་ན་ཉ་དང་རུས་སྦལ་འཁོད་པ་རྣམས་མེ་ལོང་གི་ངོས་ལ་རང་གི་གཟུགས་བརྙན་སྣང་བ་བཞིན་དུ་གསལ་
བར་མཐོང་ཡང་བྱིས་པ་རྣམས་ཀྱིས་ནི། མིག་མི་གསལ་བའི་ཕྱིར་དེའི་མིག་གི་རྩལ་བརྗོད་པར་མི་ནུས་པ་དེ་བཞིན་དུ་དེ་བཞིན་གཤེགས་པའི་ཡང་དེ་དང་འདྲའོ། །འཇམ་དཔལ་གྱིས་སྨྲས་པ། སྐུལ་
༄༅། །བྱེད༑ དེ་ནི། དེ་བཞིན་ཏེ། བདག་གིས་ནི། བྱང་ཆུབ་སེམས་དཔའ་རྣམས་ཀྱི་ཆེ་བ་ཉིད་གླེང་བའི་ཕྱིར་དེ་སྐད་དུ་བརྒལ་བར་ཟད་དོ། །དེ་ནས་དེའི་ཚེ་བཅོམ་ལྡན་འདས་ཀྱི་
ཞལ་ནས་འོད་ཟེར་རྣམ་པ་སྣ་ཚོགས་བཀྱེ་ནས་དེ་དག་གི་འཇམ་དཔལ་གཞོན་ནུར་གྱུར་པའི་ལུས་ལ་ཕོག་གོ །དེ་ནས་འཇམ་དཔལ་གྱིས་དེ་རྟོགས་ནས་མགར་བའི་བུ་སྐུལ་བྱེད་ལ་སྨྲས་པ།
སྐུལ་བྱེད། དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་རིངས་ཀྱི། དུས་སུ་བཅོམ་ལྡན་འདས་ལ་བཤོས་འབྲིམ་དུ་ཆུག་ཅིག །མ་ཐོགས་ཤིག །རྒྱུ་མེད་པར་བཅོམ་ལྡན་འདས་
ཀྱི་ཞལ་ནས་འོད་ཟེར་རྣམས་འབྱུང་བར་མི་འགྱུར་རོ། །དེ་ནས་སྐུལ་བྱེད་ཅང་མི་ཟེར་བར་འདུག་གོ། །དེ་ནས་བཅོམ་ལྡན་འདས་ཀྱིས་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ། །སྐུལ་བྱེད། ང་
ཡོངས་སུ་མྱ་ངན་ལས་འདའ་བར་འགྲོར་ངེས། དགེ་སློང་གི་དགེ་འདུན་ལ་དུས་སུ་ཟས་འབྲིམ་དུ་ཆུག་ཅིག །ཅེས་ལན་གཉིས་ལན་གསུམ་དུ་བཀའ་སྩལ་ཏོ། །དེ་ནས་སྐུལ་བྱེད་ཀྱིས་འདི་སྐད་
སྨྲས་སོ༑ ༑ཀྱེ་མ་བཅོམ་ལྡན་འདས་མི་བཞུགས་ན་ནི། འཇིག་རྟེན་སྟོངས་པར་འགྱུར་རོ། །བདག་ཅག་ཐམས་ཅད་ཀྱིས་དུ་ཞིང་བཅོམ་ལྡན་འདས་ལ་གསོལ་བ་གདབ་བོ། །དེ་ནས་བཅོམ་ལྡན་འདས་
ཀྱིས་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ། །སྐུལ་བྱེད། མ་དུ་ཞིག །དེ་ལྟར་ལུས་ལ་རྨ་མ་འབྱིན་ཅིག། མིའི་ལུས་ལ་ཆུ་ཤིང་བཞིན་དུ་སྙིང་པོ་མེད་པར་རྟོགས་ཤིག །སྨིག་རྒྱུ་བ་དང༌། དབུ་བ་
རྡོས་པ་དང༌། སྒྱུ་མ་དང༌། རྫ་མཁན་གྱིས་བྱས་པའི་སྣོད་དང༌། གློག་ལྟ་བུར་ཁོང་དུ་ཆུད་པར་གྱིས་ཤིག །འདུས་བྱས་ནི། ཉེས་པ་གྲངས་མེད་པའི་འབྱུང་གནས་ཡིན་ནོ། །སྙམ་དུ་ཤེས་པར་གྱིས་ཤིག །
འདུས་བྱས་ཀྱི་རང་བཞིན་ལ་ལྟོས་ཤིག །དེ་ནས་བཅོམ་ལྡན་འདས་ལ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་དང་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་དེ་
བཞིན་གཤེགས་པ་ཡུན་རིང་དུ་བཞུགས་སུ་མི་གནང་ན། བདག་ཅིའི་སླད་དུ་མི་ངུ་ལགས། འཇིག་རྟེན་སྟོངས་ཀྱི། མ་མཆིས་སོ། །དེ་ནས་བཅོམ་ལྡན་འདས་ཀྱིས་སྐུལ་[?] བྱེད་ལ་འདི་སྐད་ཅེས་
བཀའ་སྩལ་ཏོ། །ང་ནི། ཁྱོད་ལ་སྙིང་བརྩེ་བ་དང༌། སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་ཡོངས་སུ་མྱ་ངན་ལས་འདའ་བར་བྱེད་དེ། འདི་ནི། སངས་རྒྱས་རྣམས་ཀྱི་ཆོས་ཉིད་དང༌། འདུས་
བྱས་ཀྱི་ཆོས་ཉིད་དོ། །འདུ་བྱེད་ཐམས་ཅད་མི་རྟག་གོ །ཞེས་བྱ་བའི་ཚིགས་སུ་བཅད་པ་ཁོང་དུ་ཆུད་པར་གྱིས་ཤིག །ཆོས་ཐམས་ཅད་ནི། འདུ་བྱེད་དང་འདྲེས་པའི་ཕྱིར་སྡུག་བསྔལ་བའོ། །སྙམ་དུ་
རྟོགས་ཤིག །ཆོས་ཐམས་ཅད་ནི། བདག་མེད་པའོ། །སྙམ་དུ་དཔྱོད་ཅིག །མི་བརྟན་པ། བརྙན་པ། ཕྱིན་ཅི་ལོག་པའོ། །སྙམ་དུ་སོམས་ཤིག །ལུས་འདི་ནི། ཉེས་དམིགས་མཐའ་ཡས་པ་དང་
ལྡན་པའོ། །སྙམ་དུ་ཤེས་པར་གྱིས་ཤིག །འདི་ནི། དབུ་བ་དང་འདྲ་བར་ལྟོས་ལ་མ་ངུ་ཞིག །ཡི་མ་ཆད་ཅིག །དེ་ནས་བཅོམ་ལྡན་འདས་ལ་སྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་
༄༅། །འདས༑ དེ་ནི། དེ་བཞིན་དུ་འཇལ་ལགས་ནས། ཧ་ཅང་སྡུག་བསྔལ་ཆེན་པོ་མི་བཟོད་ལགས་སོ། །བཅོམ་ལྡན་འདས་ཐབས་ཀྱིས་ཡོངས་སུ་མྱ་ངན་ལས་འདའ་བར་
མཛད་པ་ལ་ནི། བདག་གློ་བ་རངས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྐུལ་བྱེད། ལེགས་སོ། །ལེགས་སོ། །རིགས་ཀྱི་བུས་ནི། ངའི་མྱ་ངན་ལས་འདས་པ་ཐབས་དེ་
ལྟར་བལྟ་བར་བྱའོ། །སྐུལ་བྱེད། སངས་རྒྱས་གཤེགས་པ་ནི། བྱ་བཞད་གཟས་ལ་འགྲོ་བ་ལྟ་བུར་ཤེས་པར་གྱིས་ཤིག །སྐུལ་བྱེད། ཚེ་རིང་བ་དང༌། ཚེ་རིང་བ་མ་ཡིན་པའི་རྟགས་ཤེས་པར་
གྱིས་ཤིག །སྐུལ་བྱེད། ཆོས་ཐམས་ཅད་ནི། སྒྱུ་མའི་ཆོས་ཅན་ནོ། །དེ་བཞིན་གཤེགས་པ་ནི། ཆོས་ཐམས་ཅད་ལ་ཐབས་ཀྱི་ཆོས་ཅན་ཡིན་ལ། དེ་རྣམས་ཀྱིས་ཀྱང་གོས་པར་མི་
འགྱུར་བ་དེ་ནི། སངས་རྒྱས་བཅོམ་ལྡན་འདས་རྣམས་ཀྱི་རང་བཞིན་ནོ། །སྐུལ་བྱེད། ཁྱོད་སྲིད་པའི་རྒྱ་མཚོ་ལས་ངེས་པར་བརྒལ་བར་བྱ་བ་ནི་ཕྱིར་ཞལ་ཟས་སྨྱུར་ཏེ་འོན་ཅིག །ལྷ་དང༌། ལྷ་
མ་ཡིན་དང༌། མི་རྣམས་ཀྱིས་ཀྱང་ང་ལ་རང་རང་གི་མཆོད་པ་བྱས་ནས་མི་གཡོ་བའི་བདེ་བ་ཐོབ་པར་གྱུར་ཅིག །ཁྱོད་ཀྱིས་ཀྱང་སྣོད་དུ་གྱུར་པ་ལ་དུས་སུ་སྦྱིན་པ་གྱིས་ཤིག །མ་ཐོགས་ཤིག།
སྣོད་དུ་གྱུར་པ་དང༌། ང་དང༌། དེ་བཞིན་གཤེགས་པ་ཞེས་བྱ་བ་ནི། དོན་ཐ་དད་པ་མ་ཡིན་ནོ། །དེ་ནས་སྐུལ་བྱེད་ཀྱིས་སེམས་ཅན་ཐམས་ཅད་ངེས་པར་བསྒྲལ་བའི་ཕྱིར་མགོ་སྨད་དེ་མཆི་མ་
བླགས་ནས་གསོལ་པ། ལེགས་ལགས་སོ། །ལེགས་ལགས་སོ། །བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་དེ་བཞིན་དུ་བདག་གིས་བགྱིའོ། །དེ་བཞིན་གཤེགས་པ་ཡོངས་སུ་མྱ་ངན་
ལས་འདས་པའི་འོག་ཏུ་ཇི་ལྟར་བལྟ་བ་དེ་ནི། བདག་ཅག་སྦྲང་བུ་དང་འདྲ་བ་རྣམས་ཀྱི་ཡུལ་ཡང་མ་ལགས། ཉན་ཐོས་དང་རང་སངས་རྒྱས་ཀྱི་ཡུལ་ཡང་མ་ལགས་སོ། །ཞེས་གསོལ་ཏོ། །དེ་ནས་
མྱ་ངན་བྱེད་ཅིང་དུ་བཞིན་དུ་གཡོག་འཁོར་དང་བཅས་པས་བཅོམ་ལྡན་འདས་ལ་བསྐོར་བ་བྱས་ཏེ་མཆོད་པ་ཆེན་པོའི་ལས་བྱས་ནས་བཅོམ་ལྡན་འདས་དང༌། འཇམ་དཔལ་གཞོན་ནུར་གྱུར་པ་
ལ་ཕྱག་བཙལ་ཏེ་ཞལ་ཟས་ལེན་དུ་སོང་ངོ༌། །འཕགས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ། བམ་པོ་གསུམ་པ། དེ་ནས་དེའི་ཚེ་ས་ཆེན་པོ་གཡོས། རབ་ཏུ་གཡོས།
འགུལ༑ རབ་ཏུ་འབུལ། འཁྲུགས། རབ་ཏུ་འཁྲུགས། འཁོར། རབ་ཏུ་འཁོར། འུར་འུར། རབ་ཏུ་འུར་འུར། ཤིག་ཤིག། རབ་ཏུ་ཤིག་ཤིག །མེར་མེར། རབ་ཏུ་མེར་མེར། ལྡེམ་ལྡེམ།
རབ་ཏུ་ལྡེམ་ལྡེམ་མོ། །དེ་ལ་སོགས་པ་བྱས་ཏེ་མི་མཁྲིས་པའི་ནད་ཀྱིས་བརྒྱལ་བའི་གནོད་པས་ཐེབས་པ་བཞིན་དུ་ས་ཆེན་པོ་འདི་རྒྱ་མཚོ་དུག་ཅན་པའི་མཐས་གཏུགས་པ་ཚངས་པའི་འཇིག་རྟེན་མན་
ཆད་ཐོག་ཐག་ཏུ་རབ་ཏུ་གཡོས་སོ། །དེ་ནས་ལྷ་དང༌། ལྷ་མ་ཡིན་དང༌། མི་དེ་དག་ཐམས་ཅད་མགོ་རྨོངས་ཏེ་འཇིགས་ཤིང་སྐྱི་བུང་ཞེས་བྱས་ནས་དུ་བཞིན་དུ་ཆིག་མཐུན་པར་ཚིགས་སུ་བཅད་
༄༅། །པ་འདི་དག་གསོལ་ཏོ། །མགོན་པོ་ཁྱོད་ལ་བདག་ཅག་རྣམས། །མགོ་བོས་ཕྱག་འཚལ་གསོལ་བ་འདེབས། །རྒྱལ་བ་ཁྱུ་མཆོག་ཁྱོད་དང་ནི། །བྲལ་ན་བདག་
ཅག་མགོན་མེད་འགྱུར། །དེང་ཁྱོད་མྱ་ངན་འདའ་འགྱུར་འདི་བསམ་ན། །བདག་ཅག་སྡུག་བསྔལ་ཤིན་ཏུ་གཏིང་ཟབ་བྱིང༌། །ཐུབ་པ་བདག་ཅག་སྙིང་ནི་སྟོར་བར་གྱུར། །བ་གཞོན་རྐུན་
ཁྱེར་བེའུ་ལ་ཆགས་པ་བཞིན། །མགོན་མེད་དབུལ་པོའི་མི་ནི་ལ་ལ་ཞིག །ནད་ཀྱིས་ཐབས་ལ་སྨན་པ་མེད་པ་དང༌། །རང་དགར་བྱེད་ཅིང་ཁ་ཟས་གནོད་པ་རྣམས། །ཟ་བ་ཇི་ལྟར་འཆི་
བར་འགྱུར་བ་བཞིན། །སྐྱེ་བོ་འདི་དག་ཉོན་མོངས་ནད་ཀྱིས་ཐབས། །ཁྱོད་མེད་ཁྱོད་ཀྱི་ཆོས་ཀྱི་གསོས་མེད་པས། །ལྟ་བའི་ཉེས་པ་བྱེ་འདྲར་འཆི་བར་འགྱུར། །དེ་བས་ཕན་ཕྱིར་
འཇིག་རྟེན་མ་དོར་ཅིག །ཇི་ལྟར་གྲོང་ཁྱེར་རྒྱལ་དང་བྲལ་བ་དང༌། །དབུལ་པོ་རྣམས་ལ་མུ་གེ་བྱུང་བ་དང༌། །ཇི་ལྟར་དགོན་པར་སྐོམ་གྱིས་གདུངས་པ་བཞིན། །ཁྱོད་འདས་འོག་ཏུ་
བདག་ཅག་དེ་འདྲར་འགྱུར། །སེམས་ཅན་གཅེས་ཁྱོད་མྱ་ངན་འདའ་བཞེད་པས། །ས་གཞི་རབ་ཏུ་གཡོས་ཤིང་ཕྱོགས་ཀྱང་ཚོལ། །རྒྱ་མཚོ་ཆེན་པོ་དག་ཀྱང་རྣམ་པར་འཁྲུགས། །བདག་
ཅག་ཀུན་ཀྱང་སྡུག་ཅིང་བསྔལ་བར་གྱུར། །དྲང་སྲོང་ཆེན་པོ་དེང་ཁྱོད་མྱ་ངན་ལས། །འདས་ན་ཉི་མའང་ས་ལ་སྟུང་ཡང་དག །རྒྱ་མཚོ་ཆེན་པོ་དག་ཀྱང་སྐམ་པར་འགྱུར། །བདག་ཅག་ཀུན་
ཀྱང་དེང་དུ་འགུམ་ལགས་གྲང༌། །ཇི་ལྟར་སྟོབས་ལྡན་མིས་ནི་སྒོ་གསེབ་ནས། །གླང་ཆེན་ཁྱེར་ཏེ་ནང་དུ་འཛུལ་བགྱིད་ན། །ཤིན་ཏུ་ཉོན་མོངས་འགྱུར་བ་དེ་བཞིན་དུ། །བདག་ཅག་ཐམས་ཅད་རབ་
ཏུ་ཉོན་མོངས་གྱུར། །ཇི་ལྟར་བུ་གཅིག་འགུམ་པར་མི་འཚལ་ཞིང༌། །མྱ་ངན་ཁྱོད་འདའ་བདག་ཅག་དེ་མི་འཚལ། །གལ་ཏེ་ཁྱོད་ནི་མྱ་ངན་འདའ་བ་ལས། །མི་གཞེས་བདག་ཅག་ཐམས་
ཅད་ཕོངས་པར་འགྱུར། །ཁྱོད་ནི་མྱ་ངན་འདས་ལམ་གཤེགས་མཐོང་བས། །དུད་འགྲོ་མང་པོའང་གཡར་ངན་ཆེར་བགྱིད་ན། །བདག་ཅག་ཇི་ལྟར་གཡར་ངན་མི་འཚལ་ལགས། །བདག་
ཅག་མཆིལ་མ་བཞིན་དུ་མ་དོར་ཅིག །ཉི་མ་འཆར་ཀར་རང་གི་འོད་གསལ་བས། །མུན་ནག་རྣམ་པར་བཅོམ་པ་དེ་བཞིན་དུ། །འཕྲུལ་ཅན་ཁྱོད་ཀྱིས་སྡུག་བསྔལ་མུན་བསལ་ཏེ། །དགེ་འདུན་
དབུས་སུ་རི་རབ་བཞིན་དུ་བཞུགས། །བཅོམ་ལྡན་འདས། དཔེར་གསོལ་ན། རྒྱལ་པོ་ལ་ལ་ཞིག་གི་བུ་སྡུག་ཅིང་ཕངས་པ་ཞིག་མཆིས་ལ། དེས་དེ་ཆོས་ལུགས་ཀྱི་བསྟན་བཅོས་བསླབ་ནས་
འདི་སོད་ཅིག །ཅེས་བཀའ་སྩལ་པ་དེ་བཞིན་དུ་བདག་ཅག་བཅོམ་ལྡན་འདས་དམ་པའི་ཆོས་ཀྱི་འཁོར་ལོས་བསྒྱུར་བའི་སྲས་རྣམས་ཀྱང་ཡང་དག་པའི་ལྟ་བ་བསྐྱེད་ནས་བཀུམ་གྱིས་མ་མཆིས་ན།
བཅོམ་ལྡན་འདས། རྒྱལ་པོའི་བུ་ཇི་ལྟ་བ་དེ་བཞིན་དུ་བདག་ཅག་མི་འགུམ་པར་བཅོམ་ལྡན་འདས་དེའི་སླད་དུ་ཡུན་རིང་དུ་བཞུགས་སུ་གསོལ། །ཇི་ལྟར་ལ་ལ་ཞིག་གཞུང་གིས་རྩོད་པའི་
༄༅། །བསྟན་བཅོས་ལ་བརྟེན་པ་ན་སྐྲག་པར་འགྱུར་བ་དེ་བཞིན་དུ་ཁྱོད་ཀྱིས་སྐྲག་པར་མ་མཛད་ཅིག །དེ་ཁོ་ན་ཉིད་མཁྱེན་བཞིན་དུ་བདག་ཅག་སེམས་ཅན་དམྱལ་བར་
མཆི་བར་མ་མཛད་ཅིག །དམ་པའི་ཆོས་ཀྱི་བདུད་རྩིའི་བཅུད་ཀྱིས་ཚིམ་པར་མཛད་ཅིང་དེ་བཞིན་གཤེགས་པ་ཡུན་རིང་དུ་བཞུགས་སུ་གསོལ། །ཇི་ལྟར་རྒྱལ་པོའི་བཙོན་རར་གནོད་པའི་ལས་
རྣམས་ཀྱིས་དང་པོ་ཉོན་མོངས་པ་ལ་ལ་ལ་ཞིག་གིས་ཁྱོད་ཀྱིས་ན་ཚ་ཇི་ལྟ་བུ་ཞིག་མྱོང་ཞེས་སྨྲས་ན། དེས་དེ་ལ་སྨྲས་པ། དེ་ནི། དེ་བཞིན་ཏེ། གང་གི་ཚེ་བདག་སྡུག་བསྔལ་གྱི་ཚོར་བ་ལས་
ཐར་པར་འགྱུར་བ་དེའི་ཚེ་མྱ་ངན་ལས་འདས་པ་ཡིན་ཏེ། བདེ་བ་ཉམས་སུ་མྱོང་བར་འགྱུར་རོ། །ཞེས་མཆི་བ་དེ་བཞིན་དུ་བདག་ཅག་ཐམས་ཅད་ཀྱང་ཁྱོད་བཞུགས་ནས། རྒྱལ་པོའི་བཙོན་ར་
ནས་ཐར་པ་བཞིན་དུ་མྱ་ངན་ལས་འདས་པ་ལགས་ན། དེའི་སླད་དུ་དེ་བཞིན་གཤེགས་པ་ཡུན་རིང་དུ་བཞུགས་སུ་གསོལ། །བཅོམ་ལྡན་འདས། དཔེར་གསོལ་ན། སྨན་པ་ཚེའི་རིག་
བྱེད་ཡན་ལག་བརྒྱད་ལ་མཁས་པས་བདག་གི་བུ་ལ་ནི། རྒྱུད་ཕྱི་མ་སློབ་པར་བགྱིས་ཀྱི། སློབ་མ་ལ་ནི། བདག་དང་མཉམ་པར་འགྱུར་དུ་དོགས་ནས་སློབ་པར་མི་བགྱིད་པ་དེ་བཞིན་དུ་ཆོས་
ཀྱི་རྒྱལ་པོ་སྨན་པ་ཆེན་པོ་སེར་སྣ་མི་མངའ་བ་ཁྱོད་ཀྱིས་ཐེག་པ་ཆེན་པོའི་རྒྱུད་ཕྱི་མ་ལ་དེ་ལྟར་མི་མཛད་པར་བཅོམ་ལྡན་འདས་ཡུན་རིང་དུ་བཞུགས་སུ་གསོལ། །དེ་བཞིན་དུ་ཤིང་རྟ་ལ་
ཤིང་རྟའི་རིག་བྱེད་ལ་མཁས་པས་བདག་གི་བུ་ལ་ནི། །རྒྱུད་ཕྱི་མ་སྒྲ་གྲགས་པར་ཕོག་པའི་དཔྱད་ཐམས་ཅད་སློབ་པར་བགྱིད་ཀྱི། སློབ་མ་ལ་ནི། སློབ་པར་མི་བགྱིད་པ་དང༌། རིག་པའི་གནས་
གཞན་དག་ལའང་དེ་བཞིན་དུ་སྦྱར་རོ། །བཅོམ་ལྡན་འདས། དཔེར་གསོལ་ན། བྱིས་པའམ། རྒན་པོའམ། ནད་པ་ལ་ལ་ཞིག་ལམ་བཟང་པོ་ལས་གོལ་ཏེ་ལམ་ངན་པར་མཆིས་ན། ཤིན་ཏུ་
སྡུག་བསྔལ་བར་འགྱུར་བ་དེ་བཞིན་དུ། བཅོམ་ལྡན་འདས། སེམས་ཅན་ལམ་ངན་པར་མཆིས་པ་རྣམས་ལུས་དང་བྲལ་བའི་འོག་ཏུ་སེམས་ཅན་དམྱལ་བ་རྣམས་སུ་སྡུག་བསྔལ་མྱང་བར་
འགྱུར་ལགས་ན། བཅོམ་ལྡན་འདས་ལམ་སྟོན་པ་ཡུན་རིང་དུ་བཞུགས་སོ། །ཡ་མཚན་ཅན་དགུ་བཅུ་རྩ་དྲུག་དང༌། ཚིགས་U་བཅད་པ་བཞི་བཅུ་རྩ་ལྔ་ལའང་དེ་བཞིན་དུ་རྒྱས་པར་
སྦྱར་རོ༑ ༑དེ་ནས་དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང༌། ཁྱེད་ལྷ་དང་མི་རྣམས་ལྟར་བྱིས་པའི་སྨྲེ་སྔགས་འདོན་པ་དག་མ་བྱེད་པར་བརྩོན་འགྲུས་རྩོམས་ཤིག།
དེ་ནས་ལྷ་དང་ལྷ་མ་ཡིན་དང་མི་རྣམས་ཀྱིས་བཅོམ་ལྡན་འདས་ཀྱི་གསུང་བློ་གྲོས་དང་ལྡན་པ་དང༌། དེ་ཁོ་ན་ཉིད་དུ་འགྲོ་བ་ཐོས་ནས་ཇི་ལྟར་བུ་གཅིག་པ་ཤི་ནས་དུར་ཁྲོད་དུ་བོར་བ་བཞིན་དུ་དེ་དག་སྡུག་
བསྔལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེ་དག་ལ་ཚིགས་སུ་བཅད་དེ་བཀའ་སྩལ་པ། ཁྱེད་རྣམས་ངེས་པར་བདེར་གྱུར་ཅིག །མྱ་ངན་མ་བྱེད་མ་དུ་ཞིག །འདི་ནི་སངས་རྒྱས་རྣམས་ཀྱི་
༄༅། །ཆོས༑ ༑ཐམས་ཅད་མི་སྨྲ་འཁོད་པར་གྱིས། །བག་མེད་པར་ནི་མ་གནས་པར། །བག་ཡོད་པ་ལ་དགའ་བར་གྱིས། །ཁྱེད་སྟོང་པ་དང་སྟོང་པ་མ་ཡིན་པའམ། རྟག་པ་དང་
མི་རྟག་པའམ། སྐྱབས་དང་སྐྱབས་མ་ཡིན་པའམ། འགྲོ་བ་དང་མི་འགྲོ་བའམ། རྟེན་དང་རྟེན་མ་ཡིན་པའམ། ཐེར་ཟུག་དང་ཐེར་ཟུག་མ་ཡིན་པའམ། བརྟན་པ་དང་བརྟན་པ་མ་ཡིན་པའམ།
སེམས་ཅན་དང་སེམས་ཅན་མེད་པའམ། ཡང་དག་པ་དང་ཡང་དག་པ་མ་ཡིན་པའམ། བདེན་པ་དང་བདེན་པ་མ་ཡིན་པའམ། མྱ་ངན་ལས་འདས་པ་དང་མྱ་ངན་ལས་འདས་པ་མ་ཡིན་པའམ།
གསང་བ་དང་གསང་བ་མ་ཡིན་པའམ། གཉིས་དང་གཉིས་སུ་མེད་པའམ། དེ་བཞིན་དུ་ཆོས་རྣམ་པ་དུ་མ་དག་ལ་སོམ་ཉིའམ། ཡིད་གཉིས་སམ། ཐེ་ཚོམ་ཟ་བ་ཅི་དང་ཅི་ཡོད་པ་དེ་དང༌། དེ་དག་
ང་ལ་ཞུས་ཤིག་དང་ཐམས་ཅད་གཅད་པར་བྱའོ། །བདུད་རྩིའི་མཆོག་ཀྱང་ཁྱེད་ལ་བསྟན་པར་བྱ་སྟེ། དེའི་འོག་ཏུ་ཡོངས་སུ་མྱ་ངན་ལས་འདའ་བར་བྱའོ། །དགེ་སློང་དག། སངས་རྒྱས་འབྱུང་བ་
རྙེད་པར་དཀའོ། །མིའི་ལུས་ཐོབ་པ་རྙེད་པར་དཀའོ། །དད་པ་ཕུན་སུམ་ཚོགས་པ་རྙེད་པར་དཀའོ། །བཟོད་པ་དང་ཚུལ་ཁྲིམས་ཕུན་སུམ་ཚོགས་པ་མ་ཞིག་མ་རལ་པའང་ཤིན་ཏུ་རྙེད་པར་
དཀའོ༑ ༑འཇིག་རྟེན་ན་དགྲ་བཅོམ་པ་ཐོབ་པ་ནི། གསེར་གྱི་ཕྱེ་མ་དང༌། ཨུ་དུམ་ཝ་རའི་མེ་ཏོག་བཞིན་དུ་རྙེད་པར་དཀའོ། །དགེ་སློང་དག །འདི་ལྟ་སྟེ། ས་ནི། ཐམས་ཅད་ཀྱི་སྒོ་ནས་སེམས་
ཅན་ཐམས་ཅད་ཀྱི་འཚོ་བ་ཡིན་ཏེ། དེ་བཞིན་དུ་ངའི་ཆོས་བསྟན་པ་རྣམ་པ་སྣ་ཚོགས་གསང་བ་ཐར་པའི་གྲོང་ཁྱེར་གྱི་བདུད་རྩིའི་ཟས་ཀྱང་དེ་དང་འདྲ་བར་བལྟ་བར་བྱའོ། །སེམས་ཅན་ཐམས་ཅད་དང་ངའི་
སྲས་དགེ་སློང་ཐམས་ཅད་ལ་དམ་པའི་ཆོས་མང་པོ་བརྟན་པོར་བཞག་གོ །གཞན་ཡང་སེམས་ཅན་ཐམས་ཅད་ལ་ཕན་པའི་ཕྱིར་དེ་བཞིན་གཤེགས་པའི་ཡོན་ཏན་ཆེ་བ་ཉིད་བསྒྲགས་ཏེ། ཡི་གེ་འབྲུ་
གཅིག་པའི་ཐིག་ལེའི་གཏམ་ཡང་བཞག་ནས་ཡོངས་སུ་མྱ་ངན་ལས་འདའ་བར་བྱའོ། །དེ་ནས་དགེ་སློང་དེ་དག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ། །ཞེས་ཐོས་ནས་མི་དགའ་
གྱུར་ཏེ༑ སྐྱི་བུང་ཞེས་བྱས་ནས་མིག་མཆི་མས་གང་བཞིན་དུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་མང་དུ་བསྐོར་བ་བྱས་ནས་བཅོམ་ལྡན་འདས་ལ་
འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སྡུག་བསྔལ་བ་དང༌། མི་རྟག་པ་དང༌། བདག་མེད་པ་དང༌། རྗེས་ཐམས་ཅད་ཀྱི་ནང་ན་གླང་པོ་ཆེའི་རྗེས་ཆེས་མཆོག་ཡིན་པར་བསྟན་ཏོ། །ཞེས་
གསུངས་ཏེ། དེ་ལྟར་མི་རྟག་པའི་འདུ་ཤེས་བསྟེན་ཅིང་བསྒོམས་ཏེ་མང་དུ་བགྱིས་པས་འདོད་པའི་འདོད་ཆགས་ཐམས་ཅད་ཟད་པར་འགྱུར། གཟུགས་ཀྱི་འདོད་ཆགས་ཐམས་ཅད་ཟད་པར་
འགྱུར༑ གཟུགས་མེད་པའི་འདོད་ཆགས་ཐམས་ཅད་ཟད་པར་འགྱུར། མ་རིག་པ་ཐམས་ཅད་ཟད་པར་འགྱུར། ལྷག་པའི་ང་རྒྱལ་ཐམས་ཅད་མ་ལུས་པ་ཡང་དག་པར་ཆད་པར་འགྱུར་བ་ལགས་སོ། །
༄༅། །བཅོམ་ལྡན་འདས། དཔེར་གསོལ་ན། སྟོན་གྱི་དུས་སུ་ཞིང་པས་རྨོས་ཆེར་བཏབ་སྟེ་རྩ་བ་འཛིངས་པ་ཐམས་ཅད་སེལ་བར་བགྱིད་པ་དེ་བཞིན་དུ། བཅོམ་ལྡན་འདས་
མི་རྟག་པའི་འདུ་ཤེས་བསྟེན་ཅིང་བསྒོམས་ཏེ་མང་དུ་བགྱིས་པས་འདོད་པའི་འདོད་ཆགས་ཐམས་ཅད་ཟད་པར་འགྱུར། གཟུགས་ཀྱི་འདོད་ཆགས་ཐམས་ཅད་ཟད་པར་འགྱུར། གཟུགས་
མེད་པའི་འདོད་ཆགས་ཐམས་ཅད་ཟད་པར་འགྱུར། མ་རིག་པ་ཐམས་ཅད་ཟད་པར་འགྱུར། ལྷག་པའི་ང་རྒྱལ་ཐམས་ཅད་མ་ལུས་པར་ཡང་དག་པར་ཟད་པར་འགྱུར་རོ། །ཞིང་སླས་ཐམས་
ཅད་ཀྱི་ནང་ན་ནི། སྟོན་གྱི་ཞིང་སླས་མཆོག་ཏུ་བསྟན་ཏོ། །ཞེས་བྱ་བ་ལ་སོགས་པ་གླང་པོ་ཆེའི་རྗེས་ལྟ་བུའི་མདོ་ལས་འབྱུང་བ་བཞིན་དུ་རྒྱས་པར་སྦྱར་རོ། །བཅོམ་ལྡན་འདས། དཔེར་
གསོལ་ན། རྒྱལ་པོ་འཆི་བའི་ཚེ་བ་དག་གི་བཙོན་ར་བསལ་ཏེ། སེམས་ཅན་རྣམས་བཙོན་རའི་གནོད་པས་སྙོན་སྨོངས་པ་ལས་ཐར་པར་བགྱིས་ནས་དེའི་འོག་ཏུ་འཆི་བར་བགྱིད་པ་དེ་
བཞིན་དུ། བཅོམ་ལྡན་འདས། ཁྱོད་ཀྱིས་ཀྱང་སེམས་ཅན་མི་ཤེས་པ་རྣམ་པ་སྣ་ཚོགས་ཀྱི་བཙོན་རར་བྲུབས་པ་རྣམས་ཀྱི་མི་ཤེས་པའི་འཆིང་བ་རྣམས་བཅད་ནས་དེའི་འོག་ཏུ་ཡོངས་སུ་
མྱ་ངན་ལས་འདའ་བར་གཤེགས་སུ་གསོལ། བཅོམ་ལྡན་འདས། གཞན་ཡང་དཔེར་གསོལ་ན། སེམས་ཅན་འབྱུང་པོ་དང༌། ཤ་ཟའི་གདོན་གྱིས་བརླམས་པ་ལས་
སྨན་པ་ཆེན་པོ་དང་ཕྲད་ན་འབྱུང་པོ་དང༌། ཤ་ཟའི་གདོན་རྣམས་ཀྱིས་ཐེབས་པ་ཐམས་ཅད་ལས་ཐར་པར་འགྱུར་བ་དེ་བཞིན་དུ་ཁྱོད་དང་མཇལ་ན། ཉན་ཐོས་ཀྱི་ཚོགས་ཐམས་ཅད་མི་
ཤེས་པ་རྣམ་པ་སྣ་ཚོགས་ཀྱི་འབྱུང་པོ་དང༌། ཤ་ཟའི་གདོན་རྣམས་ལས་ཡོངས་སུ་ཐར་པར་འགྱུར་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཁོང་དུ་ཆུད་པར་བགྱིད་ལགས་སོ། །
བཅོམ་ལྡན་འདས། དཔེར་གསོལ་ན། གླང་པོ་ཆེའི་འདུལ་སྦྱོང་གི་མཁན་པོས་སྤོས་ཀྱི་གླང་པོ་ཆེ་ཞགས་པ་ཆེན་པོས་བཅིངས་པ་ལས་གླང་པོ་ཆེའི་ཞགས་པ་དེ་བཅད་དེ་བྲོས་པ་དེ་
བཞིན་དུ། བཅོམ་ལྡན་འདས། བདག་ཅག་ཀྱང་བདག་ཏུ་འཛིན་པ་དང༌། བདག་གིར་འཛིན་པ་དང༌། ཕྲག་དོག་དང༌། དང་ན་འཐེན་དང༌། སེར་སྣ་དང༌། གཡོའི་ཞགས་པ་ཆེན་པོ་བཅད་
ནས་གླང་པོ་ཆེའི་འདུལ་སྦྱོང་གི་མཁན་པོ་དེ་བཞིན་གཤེགས་པའི་ལག་ཏུ་འོངས་ན་སེམས་ཅན་ཐམས་ཅད་ལས་ཉོན་མོངས་པའི་གླང་པོ་ལྔ་བཅུ་རྩ་བདུན་ཡོངས་སུ་བསལ་བར་བགྱིའོ། །
བཅོམ་ལྡན་འདས། དཔེར་གསོལ་ན། གྲང་བའི་རིམས་ཀྱིས་ཐེབས་པ་སྨན་པ་ཆེན་པོའི་ཐད་དུ་མཆིས་ན། སྡུག་བསྔལ་ལས་ཐར་པར་འགྱུར་བ་དེ་བཞིན་དུ། བཅོམ་ལྡན་འདས། བདག་
ཅག་ཀྱང་ཉོན་མོངས་པ་དང༌། ལོག་པར་ལྟ་བ་དང༌། ལོག་པའི་འཚོ་བའི་ཉེས་དམིགས་མཐའ་ཡས་པའི་གྲང་བའི་རིམས་ནད་ཅན་གྱི་ལུས་དང་ལྡན་པ་ལས་སྨན་པ་ཆེན་པོ་བཅོམ་ལྡན་
༄༅། །འདས་ཀྱི་ཐད་དུ་མཆིས་ནས་སྡུག་བསྔལ་ཐམས་ཅད་ལས་རྣམ་པར་ཐར་པར་གྱུར་ཏེ་མི་གཡོ་བའི་བདེ་བའང་ཐོབ་ལགས་སོ། །བཅོམ་ལྡན་འདས། གཞན་ཡང་
དཔེར་གསོལ་ན། མི་ཞིག་གིས་འབྲས་སྐྱེམས་འཚལ་ཏེ་ར་རོ་བར་གྱུར་ནས་བདག་ཉིད་ཀྱིས་ཀྱང་བདག་ཉིད་མ་འཚལ་ཏེ། ཆོས་ཀྱང་མ་འཚལ། ཆོས་མ་ལགས་པའང་མ་འཚལ།
འདི་ནི༑ བདག་གི་མའོ། །འདི་ནི། བདག་གི་སྲིང་མོའོ། །འདི་ནི། བདག་གི་བུ་མོའོ། །སྙམ་དུའང་མ་འཚལ་ལ། སྨད་ཅིང་བླ་སྟེ། ཕྱི་ས་དང་གཅིན་གྱིས་རང་གི་ལུས་ཀུན་བསྒོས་ཤིང་
མཆིས་པ་ལས་དེའི་འོག་ཏུ་བདག་ཉིད་སངས་ཏེ་གཞི་ཅི་ལས་གྱུར་པ་ལ་མཁས་པར་གྱུར་ནས་ཆང་ནི། ཅིར་ཡང་མི་རུང་ངོ༌། །སྙམ་དུ་སེམས་ཏེ། བདག་ནི། སྡིག་པ་ཐམས་ཅད་
ལས་ཐར་ཏོ། །སྙམ་ནས་ཆང་བཏུང་བ་ཅིར་ཡང་མི་རུང་བར་ཤས་ཆེར་བསྒོམས་ཏེ་སྤོང་བར་བགྱིད་པ་དེ་བཞིན་དུ། བཅོམ་ལྡན་འདས། འཚོ་བའི་འཇིག་རྟེན་འདི་ནི། ཟློས་གར་
མཁན་བཞིན་དུ་ཐོག་མ་མ་མཆིས་པ་ནས་འཁོར་བ་ན་འཁོར་ཞིང་ཡོངས་སུ་འཁྱམས་པ་ན། འདི་ནི། བདག་གི་མའོ། །འདི་ནི། བདག་གི་སྲིང་མོའོ། །འདི་ནི། བདག་གི་བུ་མོའོ། །སྙམ་དུ་
མ་འཚལ་ནས་མ་དང༌། སྲིང་མོ་དང༌། བུ་མོ་རྣམས་དང་ལྷན་ཅིག་ཏུ་འདོད་པའི་འདུ་ཤེས་སྤྱོད་པར་བགྱིད་དེ། འབྲས་སྐྱེམས་ཀྱིས་ར་རོ་བར་གྱུར་པ་དེ་བཞིན་དུ་སྡུག་བསྔལ་རྙེད་པར་གྱུར་
ལ༑ དེ་ནས་ངོ་ཚ་ཤེས་པའི་མི་དེ་དག་འབྲས་སྐྱེམས་ཀྱིས་ར་རོ་བ་ལས་སངས་པ་བཞིན་ཅིར་ཡང་མི་རུང་བར་ཤས་ཆེར་བསྒོམས་ནས་སྡུག་བསྔལ་ལས་ཡང་དག་པར་འདའ་བར་འགྱུར་ལགས་
སོ༑ ༑གཞན་ཡང་ཨེ་རཎྜ་ལ་ནི། སྙིང་པོ་མཆིས་མི་སྲིད་པ་དེ་བཞིན་དུ་ལུས་འདི་ལའང་བདག་དང༌། སེམས་ཅན་དང༌། སྲོག་དང༌། གང་ཟག་དང༌། ཤེད་ལས་སྐྱེས་པ་དང༌། ཤེད་བུ་དང༌།
བྱེད་པ་པོ་མཆིས་མི་སྲིད་དེ། དེ་ལྟ་བུར་བདག་ཅག་གིས་བདག་མ་མཆིས་པའི་འདུ་ཤེས་བསྒོམས་ཏེ་མང་དུ་བགྱིས་ལགས་སོ། །དཔེར་གསོལ་ན། ཕུབ་མ་སྐོན་པ་བྱེ་བ་སྙེད་བོར་བ་ནི། ཅིར་
ཡང་མི་གཅེས་པ་དེ་བཞིན་དུ་ལུས་འདི་ལའང་བདག་མ་མཆིས་སོ། །དཔེར་གསོལ་ན། ཁ་སྲལ་གྱི་མེ་ཏོག་ལ་དྲི་བདའ་བ་མ་མཆིས་པ་དེ་བཞིན་དུ་ལུས་འདི་ལའང་བདག་མ་མཆིས་ཏེ། དེ་ལྟར་
བདག་ཅག་གིས་བདག་མ་མཆིས་པའི་འདུ་ཤེས་བསྒོམས་ཏེ་མང་དུ་བགྱིས་ལགས་སོ། །བཅོམ་ལྡན་འདས་ཀྱིས་ཀྱང་དགེ་སློང་དག །ཆོས་ཐམས་ཅད་ནི། བདག་མེད་པ་སྟེ། དེ་ལྟར་སྒོམས་
ཤིག་དང༌། དེ་ལྟར་བསྒོམས་པ་རྣམས་ཀྱིས་བདག་ཏུ་འཛིན་པ་སྤང་པར་འགྱུར་རོ། །བདག་ཏུ་འཛིན་པ་ཡོངས་སུ་སྤངས་ན། མྱ་ངན་ལས་འདས་པ་ཐོབ་པར་འགྱུར་རོ། །ཞེས་བཀའ་སྩལ་ཏེ།
བཅོམ་ལྡན་འདས། དེ་ལྟར་ཆོས་ཐམས་ཅད་བདག་མ་མཆིས་པའི་སླད་དུ་བདག་མ་མཆིས་པའི་འདུ་ཤེས་བསྒོམས་ཏེ་མང་དུ་བགྱིས་ལགས་སོ། །གཞན་ཡང་ཇི་ལྟར་ནམ་མཁའ་ལ་བྱའི་རྗེས་
༄༅། །གདའ་བ་ནི། མི་སྲིད་པ་དེ་བཞིན་དུ་བདག་མ་མཆིས་པའི་འདུ་ཤེས་བསྒོམས་ན། ལྟ་བའི་རྣམ་པ་ཐམས་ཅད་དང་བྲལ་བར་འགྱུར་ལགས་སོ། །བཅོམ་ལྡན་འདས་ཀྱིས་
བཀའ་སྩལ་པ། བསྒོམ་པ་དེ་ལྟར་སྒོམ་པ་ཁྱེད་ཀྱིས་ཤེས་སམ། དགེ་སློང་རྣམས་ཀྱིས་གསོལ་པ། བཅོམ་ལྡན་འདས། སྡུག་བསྔལ་དང༌། མི་རྟག་པ་དང༌། བདག་མེད་པའི་འདུ་ཤེས་དེ་
མ་ལགས་པ་བསྒོམས་ན་ནི། ཇི་ལྟར་མི་ར་རོ་ཞིང་འཁྱམས་པས་ལྷ་ཁང་དང༌། སྤོ་དང༌། ས་གཞི་དང༌། ཉི་མ་དང༌། ཟླ་བ་དང༌། ཤིང་དང༌། རི་རྣམས་མི་འཁོར་བཞིན་དུ་འཁོར་བར་
མཐོང་བ་དེ་བཞིན་དུ་གང་དག་གིས་སྡུག་བསྔལ་དང༌། མི་རྟག་པ་དང༌། བདག་མེད་པའི་འདུ་ཤེས་མ་བསྒོམས་པའི་སེམས་ཅན་འཇིག་རྟེན་པ་དེ་དག་ནི། ར་རོ་བ་དང་འདྲ་བར་བལྟ་བར་བགྱིའོ།
བཅོམ་ལྡན་འདས། བདག་ཅག་གིས་ནི། ཡང་དག་པར་བསྒོམས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག། །ད་ནི། དཔེ་འདིའི་དོན་དེ་ངས་བཤད་པར་བྱའོ། །ཁྱེད་
ཀྱིས་ཚིགས་སུ་བཅད་པའི་དོན་འདི་ལ་དོན་ནི། འདིའོ། །ཡི་གེ་ནི། འདིའོ། །ཞེས་གསལ་བར་མི་ཤེས་ཏེ། ཇི་ལྟར་མི་ར་རོ་བས་ལྷ་ཁང་དང༌། སྤོ་དང༌། ས་གཞི་དང༌། ཉི་མ་དང༌། ཟླ་བ་དང༌།
ཤིང་དང༌། རི་རྣམས་མི་འཁོར་བཞིན་དུ་འཁོར་བར་མཐོང་བ་དེ་བཞིན་དུ་འདུ་ཤེས་ཕྱིན་ཅི་ལོག་དུ་མས་ཟིན་ཅིང་ཀུན་ཏུ་རྨོངས་པ་རྣམས་བདག་གོ །སྙམ་པ་དང༌། རྟག་གོ། སྙམ་པ་དང༌།
བདེའོ། །སྙམ་པ་དང༌། སྡུག་གོ །སྙམ་པའི་འདུ་ཤེས་ཀུན་ཏུ་སྤྱོད་དོ། །དེ་ལ་བདག་ཅེས་བྱ་བ་ནི། སངས་རྒྱས་ཞེས་བྱ་བའི་དོན་ཏོ། །རྟག་ཅེས་བྱ་བ་ནི། ཆོས་ཀྱི་སྐུ་ཞེས་བྱ་བའི་དོན་ཏོ། །བདེ་ཞེས་བྱ་བ་ནི།
མྱ་ངན་ལས་འདས་པ་ཞེས་བྱ་བའི་དོན་ཏོ། །སྡུག་ཅེས་བྱ་བ་ནི། ཆོས་ཀྱི་ཚིག་བླ་དྭགས་སོ། །དགེ་སློང་དག །ཁྱེད་ཀྱིས་བཅོམ་ལྡན་འདས། བདག་ཅག་གིས་ནི། སྡུག་བསྔལ་དང༌། མི་རྟག་པ་དང༌།
བདག་མེད་པའི་འདུ་ཤེས་བསྒོམས་ལགས་སོ། །ཞེས་རྒྱགས་པ་དང༌། ང་རྒྱལ་གྱིས་དྲེགས་པར་མ་བྱེད་ཅིག །དེ་ལྟར་རྣམ་པ་གསུམ་བསྒོམས་པར་གྱུར་ན་ནི། ངའི་བསྟན་པ་ལ་ཁྱེད་ཀྱིས་
སྒོམ་པ་རྣམ་པ་གསུམ་བསྒོམས་པ་དེ་སྒོམ་པ་དོན་མེད་པར་འགྱུར་རོ། །སྡུག་བསྔལ་ཤེས་པར་བྱ་བ་སྒོམ་པ་རྣམ་པ་གསུམ་པོ་ནི། ཁྱད་པར་དང༌། ཁྱད་པར་གྱིའང་ཁྱད་པར་རོ། །སྡུག་བསྔལ་
ལ་བདེའོ། །སྙམ་དུ་འདུ་ཤེས་པ་ནི། ཕྱིན་ཅི་ལོག་པའོ། །བདེ་བ་ལ་སྡུག་བསྔལ་ལོ། །སྙམ་དུ་འདུ་ཤེས་པ་ནི། ཕྱིན་ཅི་ལོག་པའོ། །མི་རྟག་པ་ལ་རྟག་གོ། །སྙམ་དུ་འདུ་ཤེས་པ་ནི། ཕྱིན་ཅི་ལོག་
པའོ༑ ༑རྟག་པ་ལ་མི་རྟག་གོ །སྙམ་དུ་འདུ་ཤེས་པ་ནི། ཕྱིན་ཅི་ལོག་པའོ། །བདག་མེད་པ་ལ་བདག་ཏུ་འདུ་ཤེས་པ་ནི། ཕྱིན་ཅི་ལོག་པའོ། །བདག་ཡོད་པ་ལ་བདག་མེད་པར་འདུ་ཤེས་པ་ནི། ཕྱིན་
ཅི་ལོག་པའོ། །མི་སྡུག་པ་ལ་སྡུག་གོ། །སྙམ་དུ་འདུ་ཤེས་པ་ནི། ཕྱིན་ཅི་ལོག་པའོ། །སྡུག་པ་ལ་མི་སྡུག་གོ། །སྙམ་དུ་འདུ་ཤེས་པ་ནི། ཕྱིན་ཅི་ལོག་པ་སྟེ། ཕྱིན་ཅི་ལོག་བཞི་པོ་འདི་དག་ཡང་དག་
༄༅། །པར་མ་ཤེས་པར་ཁྱེད་ཀྱིས་བསྒོམ་པར་བྱ་བ་བསྒོམས་ཏེ་མང་དུ་བྱས་སོ། །ཁྱེད་ཀྱིས་བདེ་བ་ལ་སྡུག་བསྔལ་བར་བསྒོམས་སོ། །རྟག་པ་ལ་མི་རྟག་པ་དང༌། བདག་
ཡོད་པ་ལ་བདག་མེད་པ་དང༌། སྡུག་པ་ལ་མི་སྡུག་པར་བསྒོམས་སོ། །འཇིག་རྟེན་པ་རྣམས་ལའང་བདེ་བ་དང༌། བདག་དང༌། རྟག་པ་དང༌། སྡུག་པ་རྣམས་ཡོད་དོ། །འཇིག་རྟེན་ལས་འདས་པ་
རྣམས་ལའང་བདེ་བ་དང༌། བདག་དང༌། རྟག་པ་དང༌། སྡུག་པ་རྣམས་ཡོད་དེ། འདི་ལ་ཕན་ཚུན་མི་མཐུན་པ་ཡོད་དོ། །ཡི་གེ་ཞེས་བྱ་བ་ནི། འཇིག་རྟེན་པ་ཞེས་བྱ་བའི་ཐ་ཚིག་གོ། །དོན་ཅེས་བྱ་
བ་ནི༑ འཇིག་རྟེན་ལས་འདས་པའི་ཡེ་ཤེས་སོ། །དེ་ནས་བཅོམ་ལྡན་འདས་ལ་དགེ་སློང་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འདུ་ཤེས་བཞི་ལ་སོགས་པ་ཕྱིན་ཅི་ལོག་
དེ་བཞིན་གཤེགས་པས་ལུས་སུ་བཞག་པ་རྣམས་ནི། བདག་ཅག་གིས་ཡུན་རིང་མོ་ཞིག་ནས་མཐོང་ཡང་མཐོང༌། བསྒོམས་ཀྱང་བསྒོམས་ལགས་ན། ད་ཇི་ལྟར་འཚལ་བ་བཀའ་སྩལ་དུ་
གསོལ༑ དེ་བཞིན་གཤེགས་པ་བསྐལ་པའམ། བསྐལ་པ་ལས་ལྷག་པར་ཡང་བཞུགས་སུ་གསོལ། དེ་བཞིན་གཤེགས་པས་ཅི་དང་ཅི་སྐད་དུ་བཀའ་སྩལ་པ་དེ་དག་དེ་དག་དེ་བཞིན་
དུ་བདག་ཅག་གིས་བགྱི་བར་འཚལ་ལོ། །གལ་ཏེ་དེ་བཞིན་གཤེགས་པ་བཞུགས་སུ་མི་གནང་ན། བདག་ཅག་ཀྱང་སྦྲུལ་གདུག་པ་དང་ཁྱིམ་གཅིག་གི་ནང་དུ་ལྷན་ཅིག་མཆིས་པ་མི་འཚལ་ཏེ།
དེ་བཞིན་གཤེགས་པ་མི་བཞུགས་ན། ཚངས་པར་སྤྱོད་ཅིང་མཆིས་པའི་རྔོ་མི་ཐོགས་ཀྱི། ཁྱོད་ཉིད་ཀྱི་སླད་བཞིན་དུ་བདག་ཅག་ཀྱང་ཡོངས་སུ་མྱ་ངན་ལས་འདའ་བར་འཚལ་ལོ། །དེ་ནས་བཅོམ་
ལྡན་འདས་ཀྱི་དགེ་སློང་དེ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག །ཁྱེད་དེ་སྐད་མ་ཟེར་ཅིག །དགེ་སློང་དག །ངས་འོད་སྲུང་གི་ལག་ཏུ་བསྟན་པ་གཏད་པར་བྱ་སྟེ། འདི་ནི། དེ་བཞིན་
གཤེགས་པ་དང་འདྲ་བར་དགེ་སློང་རྣམས་ཀྱི་རྟེན་ལྟ་བར་འགྱུར་རོ། །དགེ་སློང་རྣམས་དང་སེམས་ཅན་རྣམས་ཀྱི་སྐྱབས་ལྟ་བུར་འགྱུར་རོ། །དཔེར་ན། རྒྱལ་པོ་གྲོང་ཁྱེར་མང་པོའི་མངའ་བདག་
གྲོང་ཁྱེར་ཞིག་ཏུ་སོང་སྟེ། ཁྱིམ་བདག་ཅིག་རྒྱལ་པོར་དབང་བསྐུར་བ་དེ་བཞིན་དུ་འཇིག་རྟེན་གྱི་ཁམས་འདིར་ངས་འོད་སྲུང་ཆེན་པོ་ལ་དབང་བསྐུར་རོ། །དགེ་སློང་དག །ཁྱེད་ཀྱིས་སྡུག་བསྔལ་དང༌། མི་
རྟག་པ་དང༌། བདག་མེད་པ་དང༌། མི་སྡུག་པའི་འདུ་ཤེས་ཇི་ལྟར་བསྒོམ་ཞེ་ན། དགེ་སློང་དག །དཔེར་ན། སོ་ཀའི་དུས་ལ་བབ་པ་ན་སྐྱེ་བོ་རྣམས་ཀྱིས་ནགས་ཚལ་གྱི་ནང་དུ་ཆུ་བསྐྱིལ་ཏེ་རང་རང་གི་
རྐྱལ་བའི་ཡོ་བྱད་ཐོགས་ནས་ཆུའི་ནང་དུ་རྩེ་བར་བྱེད་ལ། ཆུ་དེའི་ནང་དུ་གཅིག་གིས་ནོར་བུ་རིན་པོ་ཆེ་བཻཌཱུཪྻ་རིགས་དང་ལྡན་པ་ཞིག་བཞག་ནས་བཻཌཱུཪྻ་དེ་འདོད་པའི་ཕྱིར་དེ་དག་ཐམས་ཅད་ཀྱིས་རྐྱལ་པ་
རྣམས་བོར་ཏེ། ཆུ་དེའི་ནང་དུ་འཛུལ་ནས་དེའི་ནང་ན་གྱོ་མོའམ་གསེག་མ་ཅི་ཡོད་པ་དག་ལ་ནོར་བུ་ཡིན་སྙམ་སྟེ་བླངས་ནས་ནོར་བུ་བདག་གིས་རྙེད་དོ། །བདག་གིས་རྙེད་དོ། །ཞེས་ཟེར་ཞིང་སོ་སོ་ནས་
༄༅། །སྟེང་དུ་བྱུང་སྟེ། རྫིང་གི་འགྲམ་དུ་འཁོད་ནས་འདི་ནི། ནོར་བུ་མ་ཡིན་ནོ། །སྙམ་པའི་འདུ་ཤེས་སྐྱེས་པར་གྱུར་ལ། རྫིང་བུ་དེའི་ཆུའང་ནོར་བུའི་འོད་ཀྱིས་ཟླ་བའི་
འོད་བཞིན་དུ་མཛེས་པར་འདུག་སྟེ། དེ་དག་གིས་མཛེས་པ་དེ་མཐོང་ནས་ཨེ་མ་ནོར་བུ་སྙམ་དུ་ཡོན་ཏན་གྱི་འདུ་ཤེས་སྐྱེ་བར་འགྱུར་ཏེ། དེ་དག་གི་ནང་ནས་ཐབས་ལ་མཁས་ཤིང་ཡིད་རྣོ་
བ་ཞིག་གིས་ནོར་བུ་དེ་ཡང་དག་པར་རྙེད་པ་དེ་བཞིན་དུ། དགེ་སློང་དག །ཁྱེད་ཀྱིས་ཐམས་ཅད་སྡུག་བསྔལ་བའོ། །ཐམས་ཅད་བདག་མེད་པའོ། །ཐམས་ཅད་མི་རྟག་པའོ། །ཐམས་ཅད་མི་སྡུག་པའོ། །
ཞེས་ཐམས་ཅད་ཀྱི་མུ་བཟུང་ནས་བསྒོམས་ཤིང་མང་དུ་བྱས་པ་གང་ཡིན་པ་དེ་དག་ཐམས་ཅད་རྫིང་གི་ནང་གི་གྱོ་མོ་དང༌། གསེག་མ་བཞིན་དུ་ནོར་ཞིང་དོན་མེད་པར་གྱུར་ཏ་རེ། སྐྱེས་བུ་ཐབས་
ལ་མཁས་པ་བཞིན་དུ་གྱིས་ཤིག །ཁྱེད་ཀྱིས་ཐམས་ཅད་ཀྱི་མུ་བཟུང་ནས་གང་དང་གང་བསྒོམས་པ་དེ་དང་དེ་ཉིད་ལ་བདེ་བ་དང༌། བདག་དང༌། རྟག་པ་དང༌། སྡུག་པ་ཡོད་དེ། རྣམ་པ་བཞི་པོ་
དེ་དག་ནི། ཕྱིན་ཅི་མ་ལོག་པ་ཞེས་བརྗོད་པར་བྱའོ། །དེ་བས་ན། ནོར་བུ་དང་འདྲ་བར་ཆོས་ཀྱི་དེ་ཁོ་ན་ཉིད་རྟག་པའི་འདུ་ཤེས་སྒོམས་ཤིག །དེ་ནས་བཅོམ་ལྡན་འདས་ལ་དགེ་སློང་རྣམས་
ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དགེ་སློང་དག །ཆོས་ཐམས་ཅད་ནི། བདག་མེད་པ་སྟེ། དེ་ལྟར་སྒོམས་ཤིག་དང༌། དེ་ལྟར་སྒོམ་པ་རྣམས་ཀྱིས་ནི། བདག་ཏུ་འཛིན་
པ་སྤོང་བར་འགྱུར་རོ། །བདག་ཏུ་འཛིན་པ་སྤངས་ན། མྱ་ངན་ལས་འདས་པ་ཐོབ་པར་འགྱུར་རོ། །ཞེས་བཀའ་སྩལ་ལགས་ན། བཀའ་སྩལ་པ་དེའི་དོན་ཇི་ལྟ་བུ་ལགས། བཅོམ་ལྡན་འདས། དེ་
བཞིན་གཤེགས་པས་དེའི་རྣམ་པར་དབྱེ་བ་བཀའ་སྩལ་དུ་གསོལ། བཅོམ་ལྡན་འདས་ཀྱིས་དགེ་སློང་དེ་དག་ལ་བཀའ་སྩལ་པ། དགེ་སློང་དག །ལེགས་སོ། །ལེགས་སོ། །དགེ་སློང་དག།
བདག་གི་ཐེ་ཚོམ་ངེས་པར་གཅད་པར་འདོད་པས་ནི། དེ་སྐད་ཅེས་དྲི་དགོས་ཏེ། ལེགས་སོ། །དགེ་སློང་དག །དཔེར་ན། གྲོང་ཁྱེར་འགའ་ཞིག་ན་རྒྱལ་པོ་ཤེས་རབ་འཆལ་བ་ཞིག་རྒྱལ་པོ་བྱེད་དེ།
རྒྱལ་པོ་དེ་ལ་སྨན་པ་ངན་པ་ཞིག་བདོག་ལ། དེའང་སྨན་པ་འཆལ་བ་ཞིག་སྟེ། བླ་ནས་དབང་ཐང་ཆེར་དབང་ལ་རྒྱལ་པོས་ཀྱང་བཀུར་བ་ཞིག་ཡོད་པ་དེས་འོ་མ་འབའ་ཞིག་སྨན་ཡིན་པར་འཛིན་ལ། ནད་
ཀྱི་གཞི་ནི། མི་ཤེས་ནས་འོ་མའི་དཔྱད་ལོག་པར་ཟིན་པ་དེ་སྐྱེ་བ་ཐམས་ཅད་ཀྱི་རླུང་ནད་ཀྱི་སྣ་གྲངས་རྣམས་ལའང་གཏོང་བར་བྱེད། མཁྲིས་པའི་ནད་རྣམས་དང༌། བད་ཀན་གྱི་ནད་རྣམས་ལ་ཡང་གཏོང་
བར་བྱེད་དེ། དེ་དེ་ལྟར་བྱེད་ཀྱང་སྨན་པ་གཅེས་པ་ཁོ་ནར་འགྱུར་ལ་རྒྱལ་པོ་དེའང་འཆལ་བའི་བྱེ་བྲག་མི་ཕྱེད་པ་ཞིག་གོ། །དེ་ནས་སྨན་པ་ཚེའི་རིག་བྱེད་ཡན་ལག་བརྒྱད་ལ་མཁས་པ། རྒྱུད་ཕྱི་མ་ཤེས་པ་
གཞན་ཞིག་ཡུལ་གཞན་ནས་གསར་དུ་འོངས་ནས་སྨན་པ་དེའི་ཐད་དུ་རྟེན་བཅས་ཏེ་སྨྲས་པ། ཁྱོད་ཀྱི་མིང་ཐོས་ནས་སློབ་པར་འཚལ་བའི་སླད་དུ་བདག་མཆིས་ཀྱི། ཁྱོད་ཀྱིས་བདག་གི་མཁན་པོ་
༄༅། །མཛད་དུ་གསོལ། །དེ་ནས་སྨན་པ་འཆལ་བ་དེས་དེ་སྐད་ཅེས་ཐོས་ནས་སྨན་པ་གསར་དུ་འོངས་པ་དེ་ལ་སྨྲས་པ། ལོ་བཞི་བཅུ་རྩ་བརྒྱད་ཀྱི་བར་དུ་ང་ལ་ལེགས་པར་
བསྒྲིམས་ཏེ་དཀའ་བ་སྤྱད་པས་རིམ་གྲོ་གྱིས་ལ་དེའི་འོག་ཏུ་སློབས་ཤིག་དང་ཁྱོད་སྨན་པར་འགྱུར་རོ། །དེ་ནས་དེས་དེ་བཞིན་དུ་མཉན་ཏེ། དེ་ལྟར་བགྱིའོ། །ཞེས་བྱས་ནས་དེས་མཐར་གྱིས་
སྨན་པ་འཆལ་བ་དེ་མགུ་བར་བྱས་ཏེ་རྒྱལ་པོའི་ཕོ་བྲང་དུ་སོང་ནས་རྒྱལ་པོ་དེ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ། ཁྱེད་ཀྱིས་རྟག་ཏུ་བསྟན་བཅོས་ཐམས་ཅད་ལ་བརྩོན་པར་མཛོད་
ཅིག་དང༌། དེ་ལྟར་མཛད་ན། རྒྱལ་པོར་འོས་པར་འགྱུར་རོ། །རྒྱལ་པོས་ཀྱང་དེ་ནི། བདེན་ཏེ། རྣར་འོང་ངོ༌། །ཞེས་བྱས་ནས་རྒྱལ་པོ་དེས་སྨན་པ་འཆལ་བ་དེ་དང་སྨན་པ་གཅིག་ཤོས་ཀྱི་བྱེ་བྲག་
ཕྱེད་པར་གྱུར་ནས་སྨན་པ་ངན་པ་དེ་ཡུལ་ཕྱོགས་ནས་བསྐྲད་དེ་སྨན་པ་བཟང་པོ་གཅིག་ཤོས་བཀུར་བར་གྱུར་ལ། དེ་ནས་སྨན་པ་དེས་ད་ནི། དུས་ལ་བབ་བོ། །སྙམ་ནས་རྒྱལ་པོ་ལ་འདི་སྐད་ཅས་
གསོལ་ཏོ། །རྒྱལ་པོ་ཆེན་པོ། གལ་ཏེ་བདག་ལ་མཉེས་པར་གྱུར་ན། གསོལ་བ་སྣ་གཅིག་གསོལ་གྱི། གལ་ཏེ་རྒྱལ་པོ་ཆེན་པོའང་དགྱེས་པ་ལྟ་ན། གནང་བར་མཛད་དུ་གསོལ། རྒྱལ་པོས་སྨན་
པ་ལ་བཀའ་སྩལ་པ། ངའི་ལག་པ་གཡས་པ་མན་ཆད་ནོར་རེ་ཅོག་ལས་གསོལ་ཅིག །སྨན་པས་རྒྱལ་པོ་ལ་གསོལ་པ། རྒྱལ་པོ་ཆེན་པོའི་སྨན་པ་འཆལ་བ་དེའི་འོ་མའི་དཔྱད་གང་ལགས་པ་དེ་ནི།
དུག་ཧ་ལ་ཧ་ལ་ལགས་ན། དེས་གློ་བར་མ་ཆུད་ཀྱི། རྒྱལ་པོ་ཁྱོད་ཀྱི་ཡུལ་ཁམས་ཐམས་ཅད་དུ་བཀས་བཏགས་ལ་སྔོན་གྱི་སྨན་པ་དེའི་འོ་མའི་དཔྱད་གང་ཡིན་པ་དེ་ནི། དུག་ཧ་ལ་ཧ་ལ་ཡིན་གྱི།
སུ་སྨན་དུ་འོ་མ་འཐུང་བ་དེ་མགོ་བོ་གཅད་དོ། །ཞེས་བཀའ་གདགས་པར་གསོལ། །དེ་ལྟར་མ་བགྱིས་ན། སེམས་ཅན་རྣམས་དུས་མ་ཡིན་པའི་འཆི་བས་འཆི་བར་འགྱུར་རོ། །བདག་ནི། འཚོ་
བར་འགྱུར་པ་དང༌། ནད་མ་མཆིས་པར་འགྱུར་བར་འཚལ་ཏེ། ལྷ། བདག་ནི། གསོལ་བ་དེ་འཚལ་ལགས་སོ། །དེ་ནས་རྒྱལ་པོས་སྨན་པ་དེ་ལ་བཀའ་སྩལ་པ། དེ་ལྟ་ན། གསོལ་བ་ཆུང་ངུ་ཞིག་
གསོལ་ཏེ་བཀའ་གདགས་པར་བྱའོ། །ཞེས་བྱས་ནས་བཀའ་ཡང་བཏགས་སོ། །དེ་ནས་བཀའ་བཏགས་པ་བཞིན་དུ་ཐམས་ཅད་དུ་ལུགས་སུ་ཆུད་པར་གྱུར་ཏོ། །དེ་ནས་སྨན་པ་དེས་རྒྱལ་པོ་དེ་ལའང་
འདི་སྐད་ཅེས་གསོལ་ཏོ། །ད་དུང་ཡང་ལན་གཉིས་ལན་གསུམ་གྱི་བར་དུ་དེ་བཞིན་དུ་བཀའ་གདགས་པར་གསོལ་ཞེས་བྱས་ནས་སྨན་པ་དེ་རོ་མངར་བ་དང༌། སྐྱུར་བ་དང༌། ལན་ཚྭའི་རོ་དང༌། ཚ་བ་དང༌།
བསྐ་བ་དང༌། ཁ་བ་རྣམས་ཀྱིས་མི་རྣམས་ཀྱི་ནད་སོས་པར་བྱས་སོ། །དེ་ནས་རེ་ཞིག་ན་རྒྱལ་པོ་ནད་ཀྱིས་ཐེབས་ནས་སྨན་པ་དེ་བཀུག་སྟེ་བསྒོ་བ། ང་ནི། ཤི་ལ་ཐུག་གི། རྒྱལ་པོའི་རྐྱེན་དང་འཚམ་
པའི་གསོལ་བ་ཅི་འདོད་པ་ཁྱོད་ལ་སྦྱིན་ནོ། །ཞེས་བྱས་སོ། །དེ་ནས་སྨན་པ་དེས་རྒྱལ་པོ་དེ་ལ་གསོལ་བ། རྒྱལ་པོ་ཆེན་པོ། བདག་ནི། བརྫུན་དུ་སྨྲ་བ་ལགས་སོ། །འོ་མ་ནི། བདུད་རྩི་ལགས་ཏེ། ཁྱེད་
༄༅། །ཀྱི་ཞལ་ཟས་འོ་མ་དང་སྦྱར་བ་གསོལ་འཚལ་ལོ། །དེ་ནས་རྒྱལ་པོ་དེས་སྨན་པ་དེ་ལ་བཀའ་སྩལ་པ། ཅི་ཁྱོད་མཁྲིས་པས་མྱོས་པར་བྱས་སམ། འོན་ཏེ་ང་སླུ་བར་
བྱེད་དམ། ཅ་ན། སྔར་ནི། འོ་མ་དུག་ཡིན་ཟེར་ལ། ད་ནི། འོ་མ་སྨན་གྱི་མཆོག་ཡིན་ནོ། །ཞེས་ཟེར། ཀྱེ་མ་སྨན་པ་སྔ་མ་བསྐྲད་པས་ཕུང་ངོ༌། །དེས་ཀྱང་འོ་མའི་དཔྱད་བསྔགས་པ་ལས་ན། དེ་ནི་
སྨན་པ་ཆེན་པོ་ཡིན་གྱི། སྨན་པ་ངན་པ་མ་ཡིན་ནོ། །ཁྱོད་ཀྱིས་འོ་མའི་དཔྱད་བྱས་པ་ནི། ཁྱོད་བདག་བསྐྲད་པའི་རྒྱུ་ཡིན་ནོ། །ཞེས་བྱས་སོ། །སྨན་པས་གསོལ་བ། རྒྱལ་པོ་ཆེན་པོ། དེ་
ལྟར་གཞན་དུ་མི་དགོངས་པར་གསོལ། །དཔེར་ན། ཤིང་ངམ། རྩིག་པ་ལ་སྲིན་བུས་བརྐོས་ཏེ་ཡི་གེའི་འབྲུ་འདྲ་བར་གྱུར་པ་མཐོང་ཡང་མཁས་པ་རྣམས་གྱིས་སྲིན་བུས་ཡི་གེ་ཤེས་སོ།
ཞེས་བརྗོད་པར་མི་བགྱི། ཡི་གེ་སྦྱར་བ་ལྟ་བུར་གྱུར་ཀྱང་ཡ་མཚན་དུ་གཟུང་བར་མི་བགྱི་བ་དེ་བཞིན་དུ། ཁྱོད་ཀྱི་སྨན་པ་སྔ་མའི་འོ་མའི་དཔྱད་ཀྱི་ལས་ཀྱང་སྲིན་བུས་བརྐོས་པའི་ཡི་གེ་
བཞིན་དུ་བལྟ་བར་བགྱི་སྟེ། དེ་ནི། འོ་མ་སོ་སོའི་བྱེ་བྲག་ཀྱང་མ་འཚལ་བ་ལགས་སོ། །རྒྱལ་པོས་སྨན་པ་དེ་ལ་སྨྲས་པ། ཀྭའི་སྨན་པ་ངན་པ་དེས་འོ་མ་སོ་སོའི་བྱེ་བྲག་ཇི་ལྟར་མི་ཤེས། སྨན་
པས་གསོལ་པ། རྒྱལ་པོ་ཆེན་པོ། འོ་མ་ནི། བདུད་རྩིའང་ལགས། དུག་ཀྱང་ལགས་ཏེ། དེ་ལ་བདུད་རྩི་ཞེས་བགྱི་བ་ནི། བ་གང་བེའུ་ཧ་ཅང་སྟོབས་དང་ལྡན་པ་མ་ལགས་པ་དང༌། ཆང་
གི་སྙིགས་མ་མི་འཐུང་བ་དང༌། ནགས་ཁུང་དང༌། གཤོང་དང༌། ཆུ་འདམ་རྫབ་ཅན་ན་མི་གནས་པ་དང༌། བ་ལང་རྫིས་ནུ་མ་མ་བཞིབས་པ་དང༌། རྩྭ་བརྔས་པ་མི་གཟན་པ་དང༌། རང་གི་ཁྱུ་ན་
འདུག་པ་དང༌། མ་ཧེའི་ཁྱུ་དང་ལྷན་ཅིག་མི་འགྲོགས་པ་དང༌། དེ་ལ་སོགས་པའི་ཡོན་ཏན་རྣམས་དང་ལྡན་ལ། དེའི་འོ་མ་ལྷག་མ་ཟག་མ་བཅད་པར་རན་ཙམ་བཞོས་པའི་འོ་མ་དེ་ནི། ནད་དོ་
ཅོག་ཞི་བར་བགྱིད་པ་ལགས་སོ། །དེ་ནས་རྒྱལ་པོ་ངོ་མཚར་དུ་གྱུར་ནས་སྨན་པ་དེ་ལ་བཀའ་སྩལ་པ། མཁན་པོ། ད་ནི། ངས་ཁྱོད་ཀྱི་འོ་མའི་དཔྱད་བཟང་པོའང་ཤེས་སོ། །ངན་པའང་ཤེས་
སོ༑ ༑དེ་ནས་རྒྱལ་པོས་བཀའ་བཏགས་ཏེ་འོ་མ་འཐུང་ཞིག་ཅེས་བསྒོ་བ་དང༌། འབངས་ཐམས་ཅད་ཀྱིས་རྒྱལ་པོས་ཕྱིར་ཡང་འོ་མ་འཐུང་ཞིག་ཅེས་བསྒོ་བ་ཐོས་ནས་སེམས་འཁྲུགས་ཏེ། ཅི་
རྒྱལ་པོ་གདོན་གྱིས་ཐེབས་སམ། འོན་ཏེ་བདག་ཅག་ལ་མཐོ་འཚམ་མམ་ཞེས་ཟེར་ཞིང༌། དེ་ལྟར་གྲོང་ཁྱེར་གྱི་མི་དང་འབངས་ཐམས་ཅད་རྒྱལ་པོའི་དྲུང་དུ་ལྷགས་ཏེ་རྒྱལ་པོས་དེ་དག་མཐོང་ནས་
སྨྲས་པ། སྨན་པ་འདི་ན་རེ། འོ་མ་དེ་འདྲའོ། །ཞེས་ཟེར་ན། ཁྱེད་གཤེར་ཅི་ཡོད་ཅེས་བྱས་སོ། །དེ་ནས་རྒྱལ་པོ་དང༌། གྲོང་ཁྱེར་གྱི་མི་དང༌། འབངས་ཐམས་ཅད་མགུ་བར་གྱུར་ནས་སྨན་པ་ལ་མི་
མཚུངས་པའི་བསྙེན་བཀུར་བྱས་ནས་འོ་མའི་དཔྱད་ལ་ཡང་བསྟེན་པར་བྱེད་པ་དེ་བཞིན་དུ། དགེ་སློང་དག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་
༄༅། །པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་
བཅོམ་ལྡན་འདས་སྨན་པ་བཟང་པོ་དང་འདྲ་བར་འཇིག་རྟེན་དུ་བྱུང་ནས་མུ་སྟེགས་པ་སྨན་པ་ངན་པ་དང་འདྲ་བ་ཐམས་ཅད་ཀྱི་ཐད་དུ་གཤེགས་ཏེ། ཐམས་ཅད་ངེས་པར་བཏུལ་ཞིང་ངེས་པར་
བཤིག་ནས་རྒྱལ་པོ་དུ་མ་མགུ་བར་མཛད་དེ། མུ་སྟེགས་པ་རྣམས་ཚར་གཅད་པའི་ཕྱིར་བདག་མེད་དོ། །སེམས་ཅན་མེད་དོ། །སྲོག་མེད་དོ། །གང་ཟག་མེད་དོ། །ཞེས་གསུང་ངོ༌། །མུ་
སྟེགས་པ་རྣམས་ཀྱིས་བདག་བསྟན་པ་ནི། སྲིན་བུས་བརྐོས་པའི་ཡི་གེ་དང་འདྲ་སྟེ། དེའི་ཕྱིར་ངས་སེམས་ཅན་ཐམས་ཅད་ལ་བདག་མེད་དོ། །ཞེས་བསྟན་པ་སྟོན་པར་མཛད་དོ། །བདག་
མེད་པ་ནི། སངས་རྒྱས་ཀྱི་ཚིག་ཡིན་ནོ། །ཞེས་ཆོས་ཀྱི་བཀའ་འདོགས་པར་མཛད་ནས་ཡང་གདུལ་བར་བྱ་བ་རྣམས་ཀྱི་དབང་དང༌། སེམས་ཅན་རྣམས་ལ་ཕན་པའི་ཕྱིར་དུས་མཁྱེན་པར་
མཛད་ནས་ཆོས་ཐམས་ཅད་བདག་མེད་པར་བསྟན་པའི་སྐབས་དེ་ཉིད་དུ་སྨན་པ་བཟང་པོ་བཞིན་དུ་བདག་ཡོད་དོ། །ཞེས་ཡང་དག་པར་སྟོན་པར་མཛད་དེ། འཇིག་རྟེན་པ་རྣམས་ཀྱི་བདག་
མཐེ་བོ་ཙམ་དང༌། ཁྲེ་རྒོད་ཀྱི་འབྲུ་ཙམ་ཞེས་བྱ་བ་དེ་ལྟ་བུ་ནི། མ་ཡིན་ནོ། །འཇིག་རྟེན་པ་རྣམས་ཀྱི་བདག་ཏུ་ལྟ་བ་གང་ཡིན་པ་དེ་ལྟ་བུ་ཡང་མ་ཡིན་ཏེ། འདིར་ཆོས་ཐམས་ཅད་ནི། བདག་མེད་
པ་ཞེས་བྱའོ། །ཆོས་ཐམས་ཅད་ནི། བདག་མེད་པའང་མ་ཡིན་ཏེ། བདག་ནི། དེ་ཁོ་ན་ཉིད་དོ། །བདག་ནི། རྟག་པ་ཉིད་དོ། །བདག་ནི། ཡོན་ཏན་ཉིད་དོ། །བདག་ནི། ཐེར་ཟུག་པ་ཉིད་དོ། །བདག་ནི། བརྟན་
པ་ཉིད་དོ། །བདག་ནི། ཞི་བ་ཉིད་དོ། །ཞེས་སྨན་པ་བཟང་པོའི་འོ་མ་བཞིན་དུ་དེ་བཞིན་གཤེགས་པའང་དེ་ཁོ་ན་ཉིད་དང་ལྡན་པ་སྟོན་པར་མཛད་དེ། དེ་སྒོམ་པ་ལ་འཁོར་བཞི་པོ་རྣམས་ཀྱིས་བརྩོན་
པར་གྱིས་ཤིག །དགེ་སློང་དག །གཞན་ཡང་ཚུལ་ཁྲིམས་ཀྱི་གཞི་མ་གཏོགས་པར་ཐེ་ཚོམ་དང༌། སོམ་ཉི་ཅི་དང་ཅི་ཡོད་པ་དེ་དག་ཁྱེད་ཀྱིས་ང་ལ་ཞུས་ཤིག་དང༌། ངས་ལེགས་པར་གསུངས་པས་
ཁྱེད་རངས་པར་བྱའོ། །ང་ནི། སྒོམ་པ་ཐམས་ཅད་ལས་གྲོལ་བ་དང༌། རང་བཞིན་གྱིས་སྟོང་པ་ཆེན་པོ་སྟོན་ཏེ། དགེ་སློང་ཁྱེད་དེ་བཞིན་གཤེགས་པས་བདག་ཅག་ལ་རང་བཞིན་གྱིས་སྟོན་པ་ཆེན་པོ་
མ་བསྟན་ཏོ། །ཞེས་དེ་སྐད་མ་ཟེར་ཅིག །དགེ་སློང་དག །གཞན་ཡང་ཚུལ་ཁྲིམས་ཀྱི་གཞི་མ་གཏོགས་པར་ཐེ་ཚོམ་དང༌། སོམ་ཉི་ཅི་དང་ཅེ་ཡོད་པ་དེ་དག་ཁྱེད་ཀྱིས་ང་ལ་ཞུས་ཤིག །དེ་ནས་དགེ་
སློང་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཞུ་བ་ནི། བདག་ཅག་གི་ཡུལ་མ་ལགས་ཏེ། བདག་
ཅག་གིས་རྔོ་མི་ཐོགས་ལགས་སོ། །སངས་རྒྱས་བཅོམ་ལྡན་འདས་ཀྱང་བསམ་གྱིས་མི་ཁྱབ། ཏིང་ངེ་འཛིན་རྣམས་ཀྱང་བསམ་གྱིས་མི་ཁྱབ། ཁྱོད་ཀྱི་གདམས་ངག་ཀྱང་བསམ་གྱིས་མི་ཁྱབ་པས་
༄༅། །ན༑ བདག་ཅག་གིས་ཞུ་བའི་རྔོ་མི་ཐོགས་ལགས་སོ། །བཅོམ་ལྡན་འདས། དཔེར་གསོལ་ན། མི་ལ་ལ་རྒས་ཤིང་འཁོགས་ལ་གཏུགས་པ། ལོ་བརྒྱ་ཉི་ཤུ་
རྩ་དྲུག་ལོན་པ། ནད་ཀྱིས་ཐེབས་པ། མལ་ཁྲི་ལ་མཆིས་པའི་ནད་པ་ཞིག་མཆིས་ལ། མི་ལ་ལ་ཞིག་གིས་དེའི་སུག་པར་གཏེར་གཏམས་ཏེ། ཀྱེ་མི་ཁྱོད་ཀྱིས་གཏེར་འདི་ལོངས་
ལ་གང་གི་ཚེ་བདག་ལོ་བཅུའམ་ལོ་ཉི་ཤུ་ན་ཕྱེས་ནས་ཕྱིར་འོངས་པ་དང༌། དེའི་ཚེ་འདི་བདག་ལ་ཕྱིར་བྱིན་ཅིག །ཅེས་བགྱིས་ནས་དེས་གཏད་དེ་མཆིས་ལ། རྒན་པོ་དེའང་བུ་མ་
མཆིས་པ་ཞིག་སྟེ། མི་དེ་མཆིས་ནས་རིང་པོ་མ་ལགས་པར་མི་རྒན་པོ་དེ་གུམ་ན། མི་དེ་སླར་མཆིས་ཏེ། དེ་དེ་ལྟར་ནོར་གྱི་ཕུང་པོ་ཆེན་པོ་དང་བྲལ་བར་གྱུར་ཀྱང་སུ་ལའང་ཇི་སྐད་བགྱིར་
ཡང་མ་མཆིས་པ་དེ་བཞིན་དུ་བཅོམ་ལྡན་འདས། ཚུལ་ཁྲིམས་ཀྱི་གཞི་མ་གཏོགས་པར་བདག་ཅག་གིས་ཞུས་པ་དེའང་ཉན་ཐོས་ལ་ཡུན་རིང་དུ་གནས་པར་མི་འགྱུར་ལ། བདག་ཅག་
ལའང་ཇི་སྐད་དུ་ཞུ་བའི་ཆ་མ་མཆིས་ལགས་སོ། །བཅོམ་ལྡན་འདས་ཀྱིས་དེ་དག་ལ་བཀའ་སྩལ་པ། དགེ་སློང་རྣམས་ཀྱིས་ཞུས་པ་ནི། སེམས་ཅན་ཐམས་ཅད་ལ་ཕན་པར་འགྱུར་ཏེ།
དེའི་ཕྱིར་ངས་ཞུ་བའི་སྐབས་ཕྱེ་བ་ཡིན་ནོ། །དེ་ནས་དགེ་སློང་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དཔེར་གསོལ་ན། མི་གཞོན་ནུ་ལ་ལ་ལོ་ཉི་ཤུ་རྩ་དྲུག་ལོན་ཏེ།
ཕྱུག་ཅིང་འཁོར་ཕུན་སུམ་ཚོགས་པ་དང་ལྡན་པ་ཞིག་མཆིས་ལ། མི་ལ་ལ་ཞིག་གིས་དེའི་སུག་པར་གཏེར་གཏམས་ཏེ་འདི་སྐད་དུ་ཀྱེ་བདག་ནི། དོན་གཉེར་དུ་འགྲོའི། བདག་ཕྱིར་འོངས་པ་
དང་མི་ཁྱོད་ཀྱིས་གཏེར་འདི་བདག་ལ་ཕྱིར་བྱིན་ཅིག །ཅེས་བགྱིས་ནས་མི་དེས་གཏེར་དེ་ལེགས་པར་སྦས་ཤིང་ལེགས་པར་བསྲུངས་ཏེ། ད་སླར་མཆིས་ནས་སླར་སྩལ་པ་དེ་བཞིན་དུ་བཅོམ་ལྡན་
འདས༑ དམ་པའི་ཆོས་ཀྱི་དབྱིག་ལེགས་པར་གསུངས་པ་དགེ་སློང་ཀུན་དགའ་བོ་ལ་སོགས་པ་ཉན་ཐོས་ཐམས་ཅད་ལ་གཏད་ན་ནི། ཡུན་རིང་དུ་གནས་པར་མི་འགྱུར་ལགས་སོ། །དེ་ཅིའི་སླད་དུ་ཞེ་
ན༑ འོད་སྲུང་ཆེན་པོ་ལ་སོགས་པ་ཉན་ཐོས་ཐམས་ཅད་ནི། མི་རྟག་པའི་སླད་དུའོ། །བྱང་ཆུབ་སེམས་དཔས་ཞུས་པའི་དབྱིག་བྱང་ཆུབ་སེམས་དཔའ་རྣམས་ལ་གཏད་ན་ནི། ལོ་འབུམ་ཕྲག་མང་པོར་
གནས་པར་འགྱུར་ལ། འཕེལ་བར་ཡང་འགྱུར་ཞིང་བྱང་ཆུབ་སེམས་དཔའ་ཐམས་ཅད་ལའང་སྨན་པར་འགྱུར་ལགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ནི། དེ་
བཞིན་གཤེགས་པ་ལ་ཞུ་བའི་རྔོ་ཐོགས་ལ། བདག་ཅག་སྦྲང་བུ་དང་འདྲ་བས་ནི། དེ་བཞིན་གཤེགས་པ་ལ་ཞུ་བའི་རྔོ་མི་ཐོགས་ལགས་སོ། །ཞེས་གསོལ་ནས་ཅང་མི་ཟེར་བར་འཁོང་དོ། །དེ་
ནས་བཅོམ་ལྡན་འདས་ཀྱིས་དགེ་སློང་དེ་དག་ལ་འདི་སྐད་ཅེས་བཀའ་སྩལ་ཏེ། དགེ་སློང་དག། ལེགས་སོ། །ལེགས་སོ། །དགེ་སློང་དག། ཁྱེད་ཟག་པ་མེད་པས་ནི། དེ་སྐད་བྱ་བ་ཡིན་ནོ། །དགྲ་
༄༅། །བཅོམ་པས་ནི། དེ་སྐད་བྱ་བ་ཡིན་ཏེ། ལེགས་སོ། །དགེ་སློང་དག །ངས་ཀྱང་ཁྱོད་ཀྱིས་བསམ་པའི་དོན་དེ་སྔ་ནས་བསམ་མོ། །ངའི་ཐེག་པ་ཆེན་པོ་ནི། བྱང་ཆུབ་
སེམས་དཔའི་ལག་ཏུ་གཏད་ན། རྒྱུ་གཉིས་ཀྱིས་ཡུན་རིང་དུ་གནས་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་འཁོར་རྣམས་ལ་བཀའ་སྩལ་པ། རིགས་ཀྱི་བུའམ་རིགས་ཀྱི་བུ་མོ་
ཚེ་རིང་པོ་དག །གཞི་གསུམ་མ་གཏོགས་པ་དང༌། ཚུལ་ཁྲིམས་ཀྱི་གཞི་མ་གཏོགས་པར་ཁྱེད་ཀྱི་ཡིད་གཉིས་དང༌། སོམ་ཉི་དང༌། ཐེ་ཚོམ་ཅི་ཡོད་པ་ང་ལ་ཞུས་ཤིག །ཅེས་ལན་གཉིས་ལན་
གསུམ་དུ་བཀའ་སྩལ་ཏོ། །དེ་ནས་འཁོར་དེ་ཉིད་ཀྱི་ནང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྡོང་བུའི་གྲོང་དུ་སྐྱེས་པ་བྲམ་ཟེའི་རིགས་ཆེ་ཞིང་མཐོ་བའི་བུ་འོད་སྲུང་ཆེན་པོ་དང་
རུས་གཅིག་པ་ཞེས་བྱ་བ་དེ་བཞིན་གཤེགས་པའི་མཐུས་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེར་སོང་ནས་ཕྱག་བཙལ་ཏེ་ལན་འབུམ་བསྐོར་བ་བྱས་ནས་ལྷའི་མཆོད་པའི་
ལས་ཆེན་པོ་བྱས་ཏེ་བླ་གྲོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་
དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །
བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་བྲམ་ཟེའི་རིགས་ཆེ་ཞིང་མཐོ་བའི་བུ་འོད་སྲུང་ཆེན་པོ་དང་རུས་གཅིག་པ། ཁྱོད་ཅི་དང་ཅི་འདོད་པ་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཞུས་ཤིག་དང༌། ངས་ཞུ་བ་ཞུས་པ་དེ་དང་དེ་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་ནས་བཅོམ་ལྡན་
འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྲམ་ཟེའི་རིགས་ཆེ་ཞིང་མཐོ་བའི་བུ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་
གཤེགས་པའི་མཐུ་དང༌། སེམས་ཅན་ཐམས་ཅད་ཀྱི་དགེ་བའི་རྩ་བའི་མཐུས་བདག་གིས་ཞུ་བར་མི་འཚལ་ན། བདག་ནི། སྦྲང་བུ་དང་འདྲ་ལ། དེ་བཞིན་གཤེགས་པ་ནི། ཙནྡན་ལྟ་བུའི་འཁོར་
ཆེན་པོ་དང་ལྡན་པ་ལགས། སེངྒེ་ལྟ་བུའི་འཁོར་ཆེན་པོ་དང་ལྡན་པ་ལགས། བཻཌཱུཪྻ་དང༌། རྡོ་རྗེ་ཆེན་པོ་ལྟར་མི་ཕྱེད་པའི་སྐུ་མངའ་བ་ལགས། མི་ཕྱེད་པའི་འཁོར་དང་ལྡན་པ་ལགས། ཡེ་
ཤེས་རྒྱ་མཚོ་དང་ལྡན་པའི་འཁོར་ཆེན་པོ་མངའ་བ་ལགས། བྱང་ཆུབ་སེམས་དཔའ་སེམས་དཔའ་ཆེན་པོ་ཁ་ཅིག་ཡོན་ཏན་དཔག་ཏུ་མ་མཆིས་པ་དང་ལྡན་པ་དག་ཀྱང་མཆིས་ཏེ། དེ་ལྟར་དཔག་
ཏུ་མ་མཆིས་པའི་འཁོར་མངའ་བའི་དེ་བཞིན་གཤེགས་པ་ལ་དེ་བཞིན་གཤེགས་པའི་མཐུས་བདག་གིས་ཞུ་བའི་རྔོ་ཐོགས་པར་གྱུར་ན། འདིར་བགྱི་བ་མང་དུ་མཆིས་ཏེ། དེ་བཞིན་གཤེགས་
༄༅། །པའི་མཐུས་བདག་སྦྲང་བུ་དང་འདྲ་བས་ཞུ་བར་འཚལ་ལོ། །ཞེས་བྱས་ནས་ཚིགས་སུ་བཅད་དེ་གསོལ་པ། ཐུབ་པ་ཅིས་ན་ཚེ་རིང་འགྱུར། །རྡོ་རྗེ་ལྟ་བུར་ཅིས་འགྱུར་
ལགས༑ ༑གང་གིས་མི་ཤིགས་ཐོབ་པར་འགྱུར། །ཅིས་ན་ལུས་བརྟན་སྟོབས་ཆེན་འགྱུར། །ཇི་ལྟར་བགྱིས་ན་མདོ་སྡེ་འདིའི། །ཕ་རོལ་ཕྱིན་པར་འགྱུར་བ་ལགས། །ཇི་ལྟར་སྲོག་ཆགས་
རྣམས་ཀྱི་སེམས། སྣ་ཚོགས་རྟོགས་ནས་སྟོན་པར་འགྱུར། །ཐུབ་པ་ཆེན་པོ་ཇི་ལྟར་ན། །རྒྱ་ཆེན་ཐོབ་ནས་སྐྱབས་སུ་འགྱུར། །ཇི་ལྟར་དགྲ་བཅོམ་མ་ལགས་ཀྱང༌། །དགྲ་བཅོམ་རྣམས་
དང་མཚུངས་པར་འགྱུར། །བཅོམ་ལྡན་ཇི་ལྟར་བགེགས་བགྱིད་པའི། །བདུད་ནི་འཁོར་དུ་ཆུད་པར་འགྱུར། །བདུད་ཀྱི་ཚིག་ཀྱང་འཚལ་བ་དང༌། །རྫོགས་པའི་སངས་རྒྱས་གསུང་ཡང་
འཚལ༑ ༑འདྲེན་པ་ཇི་ལྟར་དགའ་བཞིན་དུ། །འཕགས་པའི་ལམ་ཡང་སྟོན་པར་འགྱུར། །དགེ་དང་ཡང་དག་ལྡན་གྱུར་ནས། །ཕྱིན་ཅི་མ་ལོག་སྟོན་པར་འགྱུར། །ཐུབ་པ་ཆེན་པོ་ཇི་ལྟར་ན། །
ལེགས་བྱེད་འགྱུར་བ་བསྟན་དུ་གསོལ། །ཐུབ་པ་བྱང་ཆུབ་སེམས་རྣམས་ཀྱིས། །ཇི་ལྟར་བརྟག་དཀའ་ཁམས་མཐོང་འགྱུར། །ཐུབ་པ་ཇི་ལྟར་ཡི་གེ་ཡི། །ཕྱེད་ནི་རྫོགས་པར་འགྱུར་བ་
ལགས༑ ༑ཇི་ལྟར་བཞད་དང་ཟལ་མོ་ཡི། །སྤྱོད་པ་དག་དང་འདྲ་བར་འགྱུར། །ཇི་ལྟར་ཕུར་བུ་པ་སངས། །ཉི་མ་དག་ཏུ་སྐྱེ་བར་འགྱུར། །ཐུབ་པ་བྱང་ཆུབ་སེམས་དཔའ་རྣམས། །ཇི་ལྟར་
སེམས་ནི་མ་སྐྱེས་པར། །འདིར་ནི་འཇིགས་པ་མེད་པར་འགྱུར། །ཇི་ལྟར་ཀ་ཏའི་འབྲས་བུ་འདྲ། །ཇི་ལྟར་རྩོད་དུས་སྐྱེས་པ་ན། །གོས་པ་མ་མཆིས་བགྱིད་པ་དང༌། །ཉེས་པའི་དབྱིངས་སུ་པདྨ་ལྟར། །ཉེས་
དག་གིས་མི་གོས་ལགས། །ཇི་ལྟར་བྱང་ཆུབ་སེམས་དཔའ་རྣམས། །ཡུལ་ཁམས་སྨན་པ་ཆེན་པོར་འགྱུར། །ཆུ་འགྲམ་ཀུན་ཏུ་མཉན་པར་འགྱུར། །དེ་འདིར་བདག་ལ་ལུང་བསྟན་གསོལ། །ཇི་ལྟར་
སྦྲུལ་རྣམས་པགས་པ་རྙིང༌། །འདོར་བ་བཞིན་དུ་འགྱུར་བ་ལགས། །རིན་ཆེན་མང་པོའི་འབྱུང་གནས་དང༌། །འབྲུ་དང་ཤིང་འདྲ་ཇི་ལྟར་ལགས། །བརྟན་པོ་དེ་དག་ཉན་ཐོས་དང༌། །རང་སངས་རྒྱས་
ཀྱི་བྱང་ཆུབ་ཀྱིས། །སྐུ་གདུང་ཇི་ལྟར་སྟོན་པར་བགྱིད། །མཐའ་ཡས་སྒོ་ཡང་ཇི་ལྟར་སྟོན། །རྒྱལ་སྲས་བརྟུལ་ཞུགས་བརྟན་པོ་རྣམས། །ཇི་ལྟར་མི་ཕྱེད་འཁོར་དང་ལྡན། །དེ་དག་འཇིག་རྟེན་དམུས་ལོང་བའི་
མིག་དང་འདྲ་བར་ཇི་ལྟར་འགྱུར། །ཐུབ་པ་ཆེན་པོ་ཇི་ལྟར་ན། །མགོ་མང་བྱེ་བ་སྟོན་པར་འགྱུར། །ཇི་ལྟར་ཟླ་བ་ཚེས་འདྲ་བར། །འཇིག་རྟེན་རྣམས་ལ་ཆོས་ཀྱང་སྟོན། །ཇི་ལྟ་བུར་ནི་གཞའ་གསང་དུ།
ཡོངས་སུ་མྱ་ངན་འདས་པ་སྟོན། །ཇི་ལྟར་ལྷ་དང་བདུད་འདྲ་བར། །བརྟན་པོར་འགྱུར་ཞིང་དཔའ་བར་འགྱུར། །ཇི་ལྟར་ཆོས་ཀྱི་སྒོ་རྟོགས་ནས། །ཆོས་ཉིད་ཀྱང་ནི་འཚལ་བར་འགྱུར། །ཇི་ལྟར་བྱང་ཆུབ་
སེམས་དཔའ་རྣམས། །ནད་མེད་པར་ཡང་འགྱུར་བ་ལགས། །སེམས་ཅན་ཀུན་ལ་སྨན་པའི་ཕྱིར། །དེ་དག་ཇི་ལྟར་དགོངས་པ་འཆང༌། །ཇི་ལྟར་དགེ་བ་ལྷག་མར་བཅས། །ཇི་ལྟར་ཐེ་ཚོམ་སྤོང་བར་འགྱུར་
༄༅། །བློ་གྲོས་ཆེན་པོ་ཇི་ལྟར་ན། །བྱང་ཆུབ་མཆོག་ཏུ་ཉེ་བར་འགྱུར། །ཆ་ཕྲ་གཟིགས་བ་ཁྱོད་ཉིད་ཀྱིས། །བྱང་ཆུབ་སེམས་དཔའི་སྤྱོད་པ་གསུངས། །ཆོས་རྣམས་དུ་མའི་
སྒོ་དག་ཀྱང༌། །འདྲེན་པ་ཁྱོད་ཀྱིས་བཀའ་སྩལ་ཅིག །སེམས་ཅན་ཀུན་གྱི་སྨན་པ་པོ། །རྐད་གཉིས་རྣམས་ལ་སྨན་སྟོན་ཅིག །ཐུབ་པའི་ཕུང་པོ་འདི་དག་ལས། །བདག་གིས་ཞུ་བའི་ཡུལ་མ་
མཆིས༑ ༑བྱང་ཆུབ་སེམས་དཔའ་བརྟན་རྣམས་ཀྱི། །ཡུལ་ནི་ཐམས་ཅད་མཁྱེན་པ་ལགས། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྲམ་ཟེའི་རིགས་
ཆེ་ཞིང་མཐོ་བའི་བུ་འོད་སྲུང་ཆེན་པོ་དང་རུས་གཅིག་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ལེགས་སོ། །ལེགས་སོ། །རིགས་ཀྱི་བུ། ཁྱོད་ཇི་ལྟར་དེ་བཞིན་གཤེགས་པའི་གསང་
བའི་མདོ་ཆེན་པོ་ལས་ཐམས་ཅད་མཁྱེན་པ་དང༌། ཐམས་ཅད་མཁྱེན་པ་ནང་འདྲི་བར་མཛད་པ་བཞིན་དུ་འདྲི་བ་ནི། ལེགས་ཏེ། འཇིག་རྟེན་གྱི་ཁམས་གངྒཱའི་ཀླུང་མང་པོ་གྲངས་མེད་པའི་བྱེ་མ་སྙེད་
ཀྱི་ཕ་རོལ་ན་ཐམས་ཅད་མཁྱེན་པ་རང་རང་གི་འཇིག་རྟེན་གྱི་ཁམས་ན་བཞུགས་པ་དག་ང་དང་ཐབས་ཅིག་ཏུ་བྱང་ཆུབ་ཀྱི་ཤིང་དྲུང་དུ་བྱང་ཆུབ་ཀྱི་ཕྱིར་རོལ་ཏེ། བྱང་ཆུབ་ཙམ་པས་དེ་བཞིན་གཤེགས་
པའི་གསང་བ་བསྟན་པའི་དོན་དུ་བྱང་ཆུབ་ཀྱི་ཕྱིར་རོལ་བ་དེ་བཞིན་དུ་ཁྱོད་ཀྱང་སེམས་ཅན་ཐམས་ཅད་ལ་ཕན་པའི་ཕྱིར་ཡོན་ཏན་མིང་གཅིག་པའི་ཚུལ་ཐམས་ཅད་མཁྱེན་པའི་ཡུལ་འདྲི་ཞིང་
འདུག་གོ། །དེ་ནས་བཅོམ་ལྡན་འདས་ལ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ནི། ཐམས་ཅད་མཁྱེན་པའི་ཡུལ་ཞུ་བའི་རྔོ་མི་ཐོགས་མོད་
ཀྱི་ཅུང་ཟད་ཅིག་ཞུ་བར་འཚལ་ལོ། །བཅོམ་ལྡན་འདས། དཔེར་གསོལ་ན། སྦྲང་བུས་གནམ་དང་རྒྱ་མཚོའི་ཕ་མཐར་མཆི་བའམ། རྒྱ་མཚོའི་ཆབ་འཚལ་བའི་རྔོ་ཐོགས་པ་དེ་ནི། མི་སྲིད་ལགས་
སོ༑ ༑བཅོམ་ལྡན་འདས། དེ་བཞིན་དུ་བདག་ནི། སྦྲང་བུ་འདྲ་ལ། བཅོམ་ལྡན་འདས་ནི། ནམ་མཁའ་དང༌། རྒྱ་མཚོ་དང་འདྲ་ཞིང་ཡེ་ཤེས་ཟབ་མོ་ཆོས་དང་ལྡན་པ་ལགས་སོ། །བཅོམ་ལྡན་འདས་
དཔེར་གསོལ་ན། རྒྱལ་པོའི་གཙུག་གི་ནོར་བུ་དཀོར་བས་རང་གི་སྤྱི་བོས་བླང་བ་དེ་བཞིན་དུ་བདག་གིས་ཀྱང་ཆོས་བཀའ་སྩལ་པ་ཡང་དག་པར་བླང་བར་འཚལ་ན། ཤེས་རབ་རྒྱ་བསྐྱེད་པའི་སླད་
དུ་བཅོམ་ལྡན་འདས་ཀྱིས་བཀའ་སྩལ་དུ་གསོལ། བཅོམ་ལྡན་འདས་ཀྱིས་མཚུངས་པ་མེད་པ་ཡོངས་སུ་བཤད་དུ་གསོལ། བདག་ཞུ་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་
པ༑ རིགས་ཀྱི་བུ་ཉོན་ཅིག །ལས་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཚེ་རིང་བར་འགྱུར་བ་དང༌། ལས་གང་གིས་བྱང་ཆུབ་ཀྱི་རྒྱུར་འགྱུར་བ་དེ་གཟུང་བའི་སེམས་ཀྱིས་ཉོན་ཅིག་
དང༌། ལས་ཀྱི་འབྲས་བུ་དེས་ན། བྱང་ཆུབ་ཀྱི་རྒྱུ་སྐྱེ་བར་འགྱུར་རོ། །ཐོས་ནས་ཀྱང་གཞན་དག་ལ་སྟོན་ཅིག །རིགས་ཀྱི་བུ། ངས་ཀྱང་ལས་དེ་བྱས་ཤིང་གཞན་དག་ལའང་བསྟན་པས་བླ་ན་མེད་པ་ཡང་
༄༅། །དག་པར་རྫོགས་པའི་བྱང་ཆུབ་ཐོབ་པར་གྱུར་ཏོ། །རིགས་ཀྱི་བུ། དཔེར་ན། མི་ལ་ལ་ཞིག་བུ་གཅིག་པ་ཐར་པར་བྱ་བའི་ཕྱིར་རྒྱལ་པོའི་བཙོན་རའི་ནང་དུ་འགྲོ་བ་དེ་བཞིན་
དུ་བྱང་ཆུབ་སེམས་དཔའ་ཚེ་རིང་བར་འདོད་པས་ཀྱང་སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམ་པར་བྱའོ། །དེ་ལྟར་བསྒོམས་ན། འཚེ་བ་ཐམས་ཅད་སྤོང་བར་འགྱུར་ལ།
བྱམས་པ་ཆེན་པོ་དང༌། སྙིང་རྗེ་ཆེན་པོ་དང༌། དགའ་བ་ཆེན་པོ་དང༌། བཏང་སྙོམས་ཆེན་པོ་དང་ལྡན་པར་འགྱུར་ཞིང༌། སྲོག་གཅོད་པ་སྤོང་བར་འགྱུར་བ་དང༌། ཆོས་སྤྱོད་པར་འགྱུར་རོ། །རིགས་
ཀྱི་བུ༑ གཞན་ཡང་སེམས་ཅན་དཔག་ཏུ་མེད་པ་དག་བསླབ་པའི་གཞི་ལ་འགོད་པར་འགྱུར། དགེ་བ་བཅུའི་ལས་ཀྱི་ལམ་ལའང་འགོད་པར་འགྱུར་རོ། །གལ་ཏེ་ནུས་ན། སེམས་ཅན་དམྱལ་བ་
དང༌། ལྷ་མ་ཡིན་དང༌། གཤིན་རྗེའི་འཇིག་རྟེན་དང༌། དུད་འགྲོར་སྐྱེས་པ་རྣམས་དང༌། ལས་མི་བཟད་པ་བྱེད་པའི་སེམས་ཅན་རྣམས་ངེས་པར་བསྒྲལ་བའི་ཕྱིར་འགྲོ་བ་ཐམས་ཅད་ཀྱི་རྗེས་སུ་
འཇུག་པར་བྱེད་ཅིང༌། གྲོལ་ནས་གཞན་དགྲོལ་བར་བྱའོ། །སྙམ་ནས་དེ་ལ་འཛིན་པ་དང་དྲན་པའི་སེམས་དང་ལྡན་པར་འགྱུར་ཏེ། ལེགས་པར་བྱས་པའི་རྣམ་པར་སྨིན་པ་དང༌། རྒྱུ་དང་མཐུན་པ་
དེས་ན༑ བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མཆོག་ཏུ་ཚེ་རིང་བར་འགྱུར་ལ། ཡེ་ཤེས་ཀྱི་དབང་ཕྱུག་ཏུ་འགྱུར་ཞིང་འཆི་བ་མེད་པར་འགྱུར་རོ། །དེ་ནས་བཅོམ་ལྡན་འདས་ལ་
བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོས་ཅི་ལས་བསམ་སྟེ་
སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམ་པར་བགྱི། བཀའ་སྩལ་པ། དེའི་དོན་ཇི་ལྟ་བུ་ལགས། བཅོམ་ལྡན་འདས། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོས་
སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམ་པར་བགྱི་འཚལ་ན། ཚིག་དེ་ནི། མི་འདོད་པར་བགྱི་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། བསྟན་པ་འདི་ལ་
སེམས་ཅན་ཁ་ཅིག་ཚུལ་ཁྲིམས་འཆལ་བ་དང༌། མཚམས་མ་མཆིས་པར་བགྱིད་པ་དང༌། དམ་པའི་ཆོས་སུན་འབྱིན་པ་དག་ཀྱང་མཆིས་ན། ཅི་ལགས། སེམས་ཅན་དེ་ལྟ་བུ་དག་ལའང་བུ་
གཅིག་པའི་འདུ་ཤེས་བསྒོམ་པར་བགྱི་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ། དེ་ལྟ་ལོས་ཀྱང་མོད། ང་ནི། སེམས་ཅན་ཐམས་ཅད་ལ་སྒྲ་གཅན་
ཟིན་བཞིན་དུ་ལྟའོ། །འོད་སྲུང་ཆེན་པོ་དང་རུས་གཅིག་པས་གསོལ་པ། བཅོམ་ལྡན་འདས། འོ་ན་བསྙེན་པར་རྫོགས་པའི་འཁོར་དག་པ་རྣམས་ཀྱིས་བཅོ་ལྔའི་གསོ་སྦྱོང་ལ་བབ་པའི་ཚེ་གཞོན་ནུ་མ་
དྲངས་པ། ལུས་མ་སྦྱངས་པ། བསྙེན་པར་མ་རྫོགས་པ་ཞིག་རྩིག་པའི་གྲ་ཞིག་ཏུ་ཡིབས་ཏེ་ཉན་པ་ན། ཅིའི་སླད་དུ་བཅོམ་ལྡན་འདས་ཀྱིས་གནང་ནས་གནོད་སྦྱིན་གྱི་རྒྱལ་པོ་ལག་ན་རྡོ་རྗེས་རྡུལ་ཞི་བ་
༄༅། །མོ་བཞིན་ཕྱེ་མར་བརླགས་ལགས། ཀྱེ་མ་དེས་དེ་བཀུམ་པ་ནི། ལག་ན་རྡོ་རྗེས་ཧ་ཅང་དྲགས་ལགས་སོ། །དེ་ལྟ་ན། ཇི་ལྟར་བཅོམ་ལྡན་འདས་སེམས་ཅན་ཐམས་
ཅད་ལ་སྒྲ་གཅན་ཟིན་དང་འདྲ་བར་གཟིགས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་སྐད་མ་ཟེར་ཅིག །གཞོན་ནུ་དེ་ནི། སྦྲུལ་བ་ཡིན་ཏེ། དམ་པའི་ཆོས་
སུན་འབྱིན་པ་རྣམས་ཚར་གཅད་པ་དང༌། བསྐྲད་པར་བྱ་བའི་ཕྱིར་གནོད་སྦྱིན་གྱི་རྒྱལ་པོ་ལག་ན་རྡོ་རྗེས་དེ་ལྟར་བསྟན་པར་ཟད་ཀྱི། དམ་པའི་ཆོས་སུན་ཕྱུང་ཡང་རུང༌། འདོད་ཆེན་པའང་
རུང་སྟེ། གསང་དུ་མི་རུང་ངོ༌། །རྒྱུ་གསོག་པའི་སྲོག་གཅོད་པ་ནི། བྱེད་མི་ཕོད་དོ། །རིགས་ཀྱི་བུ། གཞན་ཡང་ཇི་ལྟར་རྒྱལ་པོའམ། བློན་པོ་ཆེན་པོ་དག་དམ་པའི་ཆོས་སུན་འབྱིན་པ་བརླག་
པར་བྱེད་པ་དེ་བཞིན་དུ་ང་ནི། བརླག་པར་བྱ་ཞེས་མི་ཟེར་མོད་ཀྱི། དེ་དག་ཉིད་ཀྱི་ཆོས་མ་ཡིན་པའི་འབྲས་བུ་མངོན་སུམ་དུ་སྨིན་པར་ཟད་དོ། །དེ་བཞིན་གཤེགས་པ་ཐམས་ཅད་མཁྱེན་པ་ནི།
དེ་རྣམས་ཀྱི་དོན་དུ་མི་འཇིགས་པ་སྦྱིན་ཞིང་འོད་ཟེར་གཅིག་གམ། གཉིས་གཏོང་བར་མཛད་དེ། གལ་ཏེ་འོད་ཟེར་དེས་དེ་དག་ལམ་ཕོག་ན་ནི། འཆི་བར་འགྱུར་ཏེ། དེར་དེ་བཞིན་གཤེགས་
པས་ཅི་བྱར་ཡང་མེད་དོ། །རིགས་ཀྱི་བུ། གཞན་ཡང་གལ་ཏེ་ཁྱོད་ཀྱིས་བརྟག་དཀའ་བ་བལྟ་བར་ནུས་པ་ལྟ་ན། ངས་ཁྱོད་ལ་རྒྱུ་གཞན་ཡང་བསྟན་པར་བྱ་སྟེ། ཡུལ་སོ་སོ་ན་ཚུལ་ཁྲིམས་
དང༑ ཆོ་ག་དང༌། ཡོན་ཏན་རྣམས་ཐ་དད་པ་ཡོད་ལ། དེར་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་འོག་ཏུ་དགེ་སློང་དག་དམ་པའི་ཆོས་ཁོལ་དུ་འབྱིན་པར་འདོད་པ་ལ་རྒྱལ་པོས་སྟོན་པ་
མེད་པའི་ཕྱིར་གནོད་པ་བྱེད་པ་ལས་རྒྱལ་པོ་དེ་རྒྱལ་པོ་གཞན་གྱིས་བཟློག་སྟེ། དེས་མཐུ་ཆུང་བར་བྱས་ནས་རྒྱལ་པོ་དེ་ཆོས་ལ་གནས་པར་གྱུར་ན། རྒྱལ་པོ་གཅིག་ཤོས་དེ་ལ་བསོད་ནམས་ཆེན་པོར་
འགྱུར་ཞེས་ང་སྨྲའོ། །དེ་ཅིའི་ཕྱིར་ཞེ་ན། རྒྱལ་པོ་གཅིག་ཤོས་ཀྱི་ཉེས་པ་ཆེན་པོའི་གཞི་ཞི་བར་བྱེད་པའི་ཕྱིར་རོ། །རིགས་ཀྱི་བུ། གཞན་ཡང་དཔེར་ན། ཞིང་ངམ་ཁྱིམ་དུ་དུག་ཤིང་ངམ། སྙེ་
ལོང་སྐྱེས་ན། རྩ་ནས་དབྱུང་དགོས་པ་དེ་བཞིན་དུ་ཚུལ་ཁྲིམས་འཆལ་པ་རྣམས་དང༌། དམ་པའི་ཆོས་སུན་འབྱིན་པ་རྣམས་བྲན་བཞིན་དུ་ཚར་གཅད་པར་ངས་གནང་ངོ༌། །གང་དག་དེ་རྣམས་ཚར་གཅོད་
པར་མི་བྱེད་པ་དེ་དག་ནི། ངའི་བསྟན་པ་ལས་ཤིན་ཏུ་རིང་བ་ཡིན་ནོ། །གང་དག་དེ་རྣམས་ཚར་གཅོད་པར་བྱེད་པ་དེ་དག་ནི། ངའི་སློབ་མ་དང༌། ངའི་ཉན་ཐོས་ཡིན་ནོ། །འོད་སྲུང་ཆེན་པོ་དང་རུས་གཅིག་
པས་གསོལ་པ། གལ་ཏེ་དེ་བཞིན་གཤེགས་པ་དེ་སྐད་གསུང་ན་ནི། སེམས་ཅན་ཐམས་ཅད་ལ་སྒྲ་གཅན་ཟིན་བཞིན་དུ་གཟིགས་པའང་མ་ལགས། སྟེའུ་དང་ཙནྡན་ལྟ་བུ་ཞེས་བགྱི་བའི་མིང་ཡང་
བརླག་པར་འགྱུར་ན། དམ་པའི་ཆོས་སུན་འབྱིན་པ་རྣམས་ཇི་ལྟར་ཚར་གཅད་པའི་རིགས་ལགས། དེ་བཞིན་གཤེགས་པས་དེ་ལྟར་བགྱིད་དུ་སྩལ་བའི་མི་རིགས་ལགས་སོ། །བཅོམ་ལྡན་འདས་
༄༅། །ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ། དཔེར་ན། ཁྱིམ་བདག་གམ། ཚོང་དཔོན་ནམ། སྡེ་དཔོན་ནམ། བློན་པོའམ། རྒྱལ་པོའང་རུང་པ་ཞིག་གིས་རང་
གི་བུ་སྡུག་ཅིང་ཕངས་ལ་མཆོག་ཏུ་མཛེས་ཤིང་བྱད་གཟུགས་ཕུན་སུམ་ཚོགས་པ་རྣམས་སློབ་དཔོན་གྱི་ལག་ཏུ་གཏད་ནས་སློབ་དཔོན་དེ་ལ་འདི་སྐད་སྨྲས་ཏེ། བདག་གི་བུ་འདི་རྣམས་འདུལ་
བ་དང༌། ཆོ་ག་དང༌། སྤྱོད་ཡུལ་དང༌། རིག་པ་རྣམས་བསླབ་པའི་ཕྱིར་ཁྱོད་ལ་གཏད་ཀྱི། འདི་རྣམས་ཁྱོད་ཀྱིས་འདུལ་བ་དང༌། ཆོ་ག་དང༌། སྤྱོད་ཡུལ་དང༌། རིག་པ་རྣམས་སློབས་ཤིག། ཆོས་ཤིག།
གལ་ཏེ་བདག་གི་བུ་འདི་བཞི་ལས་གསུམ་ནི། བརྡེག་པ་དང༌། བསྡིགས་པ་དང༌། ཚར་བཅད་པ་རྣམས་ཀྱིས་ཤི་བར་གྱུར་ལ། གཅིག་ནི། གསོན་པོར་འདུག་སྟེ། གཅིག་ལོབས་པར་གྱུར་ན།
གསུམ་ནི། ཤིའང་བླ་སྟེ། གསུམ་ནི། ཤི་།གཅིག་ནི། ལོབས་པ་དེ་ལ་ཅི་སློབ་དཔོན་གྱིས་ནི། སྡིག་པ་མི་དགེ་བའི་ལས་བྱས་ཞེས་བྱ་འམ། བཅོམ་ལྡན་འདས། དེ་ནི། མ་ལགས་ཏེ། དེ་ལ་ནི།
གཉིས་ཀ་ལའང་སྡིག་པའི་ལས་སུ་མི་འགྱུར་ལགས་སོ། །དེ་ཅིའི་སླད་དུ་ཞེ་ན། དེ་ལ་ནི། འཁོན་གྱི་བསམ་པ་མ་མཆིས་ཏེ། དེ་ལྟར་བགྱིས་ན། བསོད་ནམས་མང་པོ་འཕེལ་བར་འགྱུར་
ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་བཞིན་དུ་དེ་བཞིན་གཤེགས་པ་ནི། དམ་པའི་ཆོས་སུན་འབྱིན་པའི་སེམས་ཅན་རྣམས་ལ་སྒྲ་གཅན་ཟིན་བཞིན་དུ་གཟིགས་
ཏེ༑ བུ་རྣམས་སློབ་དཔོན་གྱི་ལག་ཏུ་གཏོད་པ་བཞིན་དུ་རྒྱལ་པོ་དང༌། བློན་པོ་དང༌། དགེ་བསྙེན་རྣམས་ཀྱི་ལག་ཏུ་གཏོད་པར་མཛད་དོ། །དེ་ནས་རྒྱལ་པོ་དང༌། བློན་པོ་དང༌། དགེ་བསྙེན་དེ་དག་གིས་བྱིས་པ་
གཡེལ་བ་དེ་དག་ཚར་གཅོད་པར་བྱེད་ན། ཅི་དེ་ལ་དེ་བཞིན་གཤེགས་པ་ལ་སྡིག་པའི་ལས་སུ་འགྱུར་ཞེས་བྱའམ། བཅོམ་ལྡན་འདས། དེ་ནི། མ་ལགས་ཏེ། རྒྱལ་པོ་དང༌། བློན་པོ་དང༌། དགེ་
བསྙེན་རྣམས་ལའང་སྡིག་པའི་ལས་སུ་མི་འགྱུར་ན། དེ་བཞིན་གཤེགས་པ་གོས་པ་མི་མངའ་བ་ལྟ་ལ་གོས་པར་ག་ལ་འགྱུར་ཏེ། དེ་དག་ཉིད་ཀྱི་ཡོན་ཏན་དང་སྤྱོད་པ་བསྲུང་བའི་སླད་དུ་མི་འདོད་བཞིན་དུ་
ཚར་གཅོད་པར་བས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་ན། བུ་གཅིག་པའི་འདུ་ཤེས་སྒོམ་པ་ཡིན་ཏེ། གང་དག་དེ་ལྟར་སྒོམ་པ་དེ་དག་གིས་ནི། བུ་གཅིག་པའི་འདུ་ཤེས་བསྒོམས་པར་
འགྱུར་རོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམ་པར་བྱའོ། །དེ་ལྟར་བྱས་ན། སེམས་ཅན་ཐམས་ཅད་ལ་ཏིང་ངེ་འཛིན་
བསྒོམ་པ་བསྒོམས་པར་འགྱུར་རོ། །དེས་ན་མཆོག་ཏུ་འཚེ་བ་མེད་པ་དག་པར་འགྱུར་ཏེ། དེས་ན། བྱང་ཆུབ་སེམས་དཔའ་ཚེ་རིང་བ་དང༌། མཆོག་ཏུ་ཚེ་རིང་བ་དང༌། ཚེ་རབས་དྲན་པར་འགྱུར་རོ། །འོད་
སྲུང་ཆེན་པོ་དང་རུས་གཅིག་པས་གསོལ་པ། སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམས་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཚེ་རིང་བར་འགྱུར་ལགས་སམ།
༄༅། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་ལོས་ཀྱང་མོད། འོད་སྲུང་ཆེན་པོ་དང་རུས་གཅིག་པས་གསོལ་པ། བཅོམ་ལྡན་འདས། དཔེར་གསོལ་ན། གཏམ་རྒྱུད་
མཁན་ཞིག་གིས་ལྟད་མོ་པའི་འཁོར་གྱི་ནང་དུ་མ་ལ་ཕུ་དུད་བྱ་བའི་རིགས་པའི་གཏམ་སྣ་ཚོགས་བགྱིས་ལ། རང་གི་ཁྱིམ་དུ་མཆིས་ནས་མཆོག་ཏུ་དཀའ་བ་བགྱིད་བགྱིད་པའི་མ་ལ་དབྱུག་པ་
དང༌། ཕག་དུ་མ་དང༌། བོང་བ་དང༌། རྡོ་དག་གིས་གནོད་པ་བགྱིད་པ་དེ་བཞིན་དུ། བཅོམ་ལྡན་འདས་ཀྱིས་བཀའ་སྩལ་པ། སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམས་ན།
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཚེ་རིང་བ་དང༌། མཆོག་ཏུ་ཚེ་རིང་བ་དང༌། ཚེ་རབས་དྲན་པ་དང༌། མི་འཆི་བ་དང༌། ཐེར་ཟུག་པ་དང༌། བརྟན་པར་འགྱུར་རོ། །ཞེས་གསུངས་ནས།
ཅིའི་སླད་དུ་བཅོམ་ལྡན་འདས་ཉིད་སྐུ་ཚེ་ཐུང་ལགས། ཅི་སླུ་བ་མཛད་དམ། འོན་ཏེ་བཅོམ་ལྡན་འདས་ཉིད་ཀྱིས་སེམས་ཅན་ཐམས་ཅད་ལ་དགྲ་བཞིན་དུ་གཟིགས་གཟིགས་སམ། ཀྱེ་མ་
བཅོམ་ལྡན་འདས་ཀྱིས་ནི། དཀའ་བ་མཛད་མཛད་དོ། །མིའི་ལྟར་བརྩིས་ན། ལོ་བརྒྱའང་མི་ཐུབ་སྟེ། དེ་བཞིན་གཤེགས་པ་འདི་ཁོ་ན་ལྟར་སྐུ་ཚེ་ཐུང་བ་ལགས་ན། བཅོམ་ལྡན་འདས་ཀྱིས་
སྔོན་བྱང་ཆུབ་སེམས་དཔའ་མཛད་པའི་ཚེ་དེ་སྙེད་ཀྱི་སྲོག་ཅིག་བཅད་ལགས། འདི་ཁོ་ན་ལྟར་སྐུ་ཚེ་ཐུང་བ་ལས་ན། དེ་བཞིན་གཤེགས་པ་ཉིད་ཀྱིས་མཆོག་ཏུ་མི་བཟད་པའི་ལས་མཛད་
ལགས་གྲང༌། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་འདི་ཁོ་ན་ལྟར་མ་རྒྱ་ཞིག།
མ་རྒྱ་ཞིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། མཆོག་ཏུ་སྐུ་ཚེ་རིང་ངོ༌། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ནི༑ མཆོག་ཏུ་བརྟན་པའོ། །མཆོག་ཏུ་ཞི་བའོ། །མཆོག་ཏུ་ཐེར་ཟུག་པའོ། །མཆོག་ཏུ་རྟག་པའོ། །འོད་སྲུང་ཆེན་པོ་དང་རུས་གཅིག་པས་གསོལ་པ། བཅོམ་ལྡན་འདས། ཇི་ལྟར་ན། དེ་བཞིན་
གཤེགས་པ་མཆོག་ཏུ་སྐུ་ཚེ་རིང་ལགས། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ། དཔེར་ན། ཆུ་ཀླུང་གངྒཱ་དང༌། ཡ་མུ་ན་དང༌། ས་ར་ཡུ་དང༌། ཧིངྒུ་ལ་ལ་
སོགས་པ་ཆུ་ཀླུང་ཆེན་པོ་རྣམས་དང༌། ཆུ་བྲན་གཞན་རྣམས་རྒྱ་མཚོ་ཆེན་པོ་ཁོ་ནའི་ནང་དུ་འབབ་པ་དེ་བཞིན་དུ། འོད་སྲུང་ཆེན་པོ་དང་རུས་གཅིག་པ། ལྷ་ཡུལ་དང༌། སའི་སྟེང་གི་ཚེའི་ཆུ་ཀླུང་
ཡོད་དོ་ཅོག་ཐམས་ཅད་ནི། དེ་བཞིན་གཤེགས་པའི་རྒྱ་མཚོ་ཁོ་ནར་འབབ་སྟེ། དེ་ལྟར་ན། དེ་བཞིན་གཤེགས་པ་མཆོག་ཏུ་སྐུ་ཚེ་རིང་ངོ༌། །འོད་སྲུང་ཆེན་པོ་དང་རུས་གཅིག་པ། གཞན་
ཡང་འདི་ལྟར་ཆུ་ཀླུང་ཆེན་པོ་བཞི་མ་དྲོས་པའི་ནང་ནས་འབྱུང་བ་དེ་བཞིན་དུ་ཚེ་རིང་པའི་ཚོགས་ཐམས་ཅད་ཀྱང་དེ་བཞིན་གཤེགས་པ་ལས་འབྱུང་ངོ༌། །འདི་ལྟར་རྟག་པ་ཐམས་ཅད་ཀྱི་ནང་ན་ནི།
༄༅། །ནམ་མཁའ་མཆོག་ཏུ་རྟག་པ་ཡིན་ལ། དེ་བཞིན་གཤེགས་པའང་ནམ་མཁའ་བཞིན་དུ་རྟག་གོ །འདི་ལྟར་ཞི་བར་བྱེད་པ་ཐམས་ཅད་ཀྱི་ནང་ན་ནི། མར་འབའ་ཞིག་
མཆོག་ཏུ་ཞི་བར་བྱེད་པ་ཡིན་ལ། དེ་བཞིན་གཤེགས་པ་ཞི་བ་དང༌། བསིལ་བར་གྱུར་པའང་མར་དང་འདྲ་བའི་ཆོས་སྟོན་ཏོ། །འོད་སྲུང་ཆེན་པོ་དང་རུས་གཅིག་པས་གསོལ་པ། བཅོམ་ལྡན་
འདས༑ གལ་ཏེ་དེ་བཞིན་གཤེགས་པ་མཆོག་ཏུ་སྐུ་ཚེ་རིང་བ་ལགས་ན། སེམས་ཅན་ཐམས་ཅད་ལ་སྨན་པའི་སླད་དུ་བཅོམ་ལྡན་འདས་བསྐལ་པའམ། བསྐལ་པ་ལས་ལྷག་པར་ཡང་
ཡུན་རིང་དུ་བཞུགས་ཤིང་སྤྲིན་ཆེན་པོ་བཞིན་དུ་དམ་པའི་ཆོས་ཀྱི་ཆར་ཡང་རབ་ཏུ་འབབ་ཏུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་མཐར་ཐུག་པར་འགྱུར་བའི་འདུ་ཤེས་མ་སྐྱེད་ཅིག །འོད་སྲུང་ཆེན་པོ་དང་རུས་གཅིག་པ། འདི་ན་དགེ་སློང་
ངམ༑ དགེ་སློང་མའམ། དགེ་བསྙེན་ནམ། དགེ་བསྙེན་མའམ། འདི་ལས་ཕྱི་རོལ་པའང་རུང་སྟེ། མངོན་པར་ཤེས་པ་ལྔ་ལ་དབང་ཐོབ་པ་དེའང་བསྐལ་པའམ། བསྐལ་པ་ལས་ལྷག་
པར་གནས་ཤིང་ནམ་མཁའ་ལ་འཆག་པར་ཡང་བྱེད། ཉལ་བར་ཡང་བྱེད་ལ། མཆན་གཡོན་ལོགས་ནས་མེ་དང་འདྲ་བར་འབར་བར་བྱེད་པ་དང༌། དེ་བཞིན་དུ་ཆོས་གཞན་དུ་དུད་པ་འཐུལ་
བ་ལྟ་བུར་ཡང་སྟོན། ཚེའི་ཚད་ཀྱང་ཇི་སྲིད་དུ་འདོད་པ་དེ་སྲིད་དུ་སྣུར་བར་བྱེད་དོ། །མདོར་ན་ཇི་ཙམ་དུ་འདོད་པ་དང༌། ཇི་ཙམ་དུ་དགའ་བ་དེ་ཙམ་དུ་སྟོན་པར་བྱེད་དེ། འདི་དག་ནི། མངོན་པར་ཤེས་པ་ལྔ་
ལ་དབང་ཐོབ་པའི་ཡོན་ཏན་ཡིན་ནོ། །གལ་ཏེ་མངོན་པར་ཤེས་པ་ལྔ་ཐོབ་པའང་དེ་ལྟར་བདག་ཉིད་འཚོ་བའི་དབང་ཕྱུག་ལ་དབང་བྱེད་ན། དེ་བཞིན་གཤེགས་པ་དབང་དུ་མ་བརྙེས་པ་ལྟ་ཅི་སྟེ། དེ་ལྟ་བུ་ལ་
མངའ་མི་མཛད། དེ་བཞིན་གཤེགས་པ་བསྐལ་པའམ། བསྐལ་པ་ལས་ལྷག་པར་ཅི་སྟེ་མི་བཞུགས་ཀྱི། དེ་བཞིན་གཤེགས་པ་རྟག་པ་དང༌། བརྟན་པ་དང༌། ཐེར་ཟུག་པ་ཡིན་པར་ཁོང་དུ་ཆུད་པར་
གྱིས་ཤིག །འཇིག་རྟེན་འདི་ན་སྤྲུལ་པའི་ལུས་ནི། ཤའི་ལུས་མ་ཡིན་ཏེ། དེང་དེ་བཞིན་གཤེགས་པ་དུག་སྨན་ལ་རྟོན་པའི་སྐུ་ཡོངས་སུ་འདོར་བར་མཛད་དོ། །སྙམ་དུའང་ཁོང་དུ་ཆུད་པར་གྱིས་ཤིག།
རྟག་པ་དང༌། བརྟན་པ་དང༌། ཐེར་ཟུག་ཅེས་བྱ་བའི་བརྟན་པ་མཆོག་ལའང་བརྩོན་པར་གྱིས་ཤིག །འོད་སྲུང་ཆེན་པོ་དང་རུས་གཅིག་པས་གསོལ་པ། གལ་ཏེ་དེ་བཞིན་གཤེགས་པ་རྟག་པ་ལགས་
ན༑ འཇིག་རྟེན་པ་དང༌། འཇིག་རྟེན་ལས་འདས་པར་ཁྱད་པར་ཅི་མཆིས་ལགས། འཇིག་རྟེན་པའང་བདག་ཅག་གི་ཚངས་པ་ནི། རྟག་པ་སྟེ། ཐོག་མའི་དུས་ནས་བྱུང་བ་ཡིན་ནོ། །ཞེས་མཆི་བ་དང་ཁྱད་པར་
ཅི་མཆིས། གལ་ཏེ་དེ་བཞིན་གཤེགས་པ་རྟག་པ་ལགས་ན། ཁྱད་པར་མ་མཆིས་པར་འགྱུར་ལགས་སོ།། །།འཕགས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ། བམ་པོ་བཞི་
༄༅། །པ༑ བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དཔེར་ན། ཚོང་དཔོན་ནམ། ཁྱིམ་བདག་གཅིག་ལ་བ་ལང་སྣ་ཚོགས་སྤུ་མདོག་དུ་མ་རིགས་དང་རྒྱུད་
མང་པོ་ཁྱུ་གཅིག་ཅིང་ལྷས་གཅིག་པ་དུ་མ་བྱེ་བ་སྙེད་ཡོད་ལ། དེས་བ་ལང་དེ་དག་བ་ལང་རྫིའི་ལག་ཏུ་གཏད་དེ་མར་ཞིམ་པོ་ཟ་ལ། བ་ལང་རྫི་རྣམས་ཀྱང་ལྷས་སྐྱོང་ཞིང་ཞོ་དང་འོ་མ་སྲུབ་པ་
ལས་ཕྱི་ཞིག་ན་བ་ལང་གི་བདག་པོ་དེ་རང་གི་ཚེ་ཟད་ནས་ཤི་སྟེ། ཤི་བའི་འོག་ཏུ་ནགས་ན་རྒྱུ་བའི་ཆོམ་ཤོད་ཀྱིས་བ་ལང་དེ་དག་འཕྲོག་ནས་དེ་དག་ཆུང་མ་མེད་པས་རང་རང་གིས་འོ་མ་བསྲུབས་
ཏེ༑ དེ་དག་གིས་བསྲུབས་པ་ལས་འོས་མ་ཡིན་པའི་ཕྱིར་འོ་མ་དེ་དག་ལས་མར་གྱི་དྲིའང་མི་བྲོ་ལ། ཞོར་ཡང་མ་རུང༌། དར་བར་ཡང་མ་རུང༌། སྤྲིས་མར་ཡང་མ་རུང་ན། མར་དུ་ལྟ་ག་ལ་
འགྱུར་ཏེ། འོ་མའི་རང་བཞིན་ལས་ཀྱང་ཉམས་ནས་དེ་དག་གིས་དེ་ཆུས་བསླད་དེ་བདག་གིས་མར་ལོངས་སྤྱད་པར་བྱའོ། །བདག་གིས་མར་ལོངས་སྤྱད་པར་བྱའོ། །སྙམ་དུ་སེམས་པ་བཞིན་དུ་
འཇིག་རྟེན་པ་སངས་རྒྱས་ཀྱི་ཆོས་ཀྱི་རྒྱུ་མཐུན་པ་ལས་བྱུང་བ་ནོར་དང་ཆོས་རྒྱས་པ་རྣམས་ཀྱང་དེ་དང་འདྲ་སྟེ། གང་གི་ཚེ་སངས་རྒྱས་བཅོམ་ལྡན་འདས་རྣམས་ལ་རང་གི་ལྷས་ཀྱི་བདག་པོ་བཞིན་
དུ་ཡོངས་སུ་མྱ་ངན་ལས་འདས་པའི་འོག་ཏུ་འཇིག་རྟེན་པ་ཆོམ་ཤོད་དང་འདྲ་བ་རྣམས་ཀྱིས་ཀྱང་ཚུལ་ཁྲིམས་དང༌། ཆོ་ག་དང༌། འདུལ་བ་དང༌། སྤྱོད་ཡུལ་རྣམས་དང༌། སེམས་ཅན་གྱི་ཁམས་
རྣམས་གུད་དུ་བསྒྱུར་ནས་སེམས་ཅན་ཡོད་དོ། །སྲོག་ཡོད་དོ། །གང་ཟག་ཡོད་དོ། །སྙམ་དུ་སེམས་ཤིང༌། ཐར་པ་ནི། འདི་ལྟ་བུ་ཞིག་གོ །སྤྱོད་པ་ནི། འདི་ལྟ་བུ་ཞིག་གོ །སྙམ་ནས་སྤྱོད་པ་དང༌། སེམས་
ཅན་དང༌། ཐར་པ་དང༌། རྟག་པ་དང༌། དེ་ཁོ་ན་ཉིད་མ་ཤེས་ཏེ། དོན་གཞན་ལ་བརྩོན་པས་ཐར་པའང་མི་ཐོབ་ལ། ཚུལ་ཁྲིམས་དང༌། ཆོ་ག་དང༌། སྤྱོད་ཡུལ་དང༌། འདུལ་བ་དང༌། རྟག་པ་དང༌། དེ་ཁོ་ན་
ཉིད་ཀྱང་མི་རྙེད་དེ། མི་རྒོད་ཀྱི་མར་བཞིན་དུ་འཇིག་རྟེན་པ་རྣམས་ཀྱིས་ཆོས་ཀྱི་དེ་ཁོ་ན་ཉིད་མི་འཐོབ་ལ། དེ་དག་སེམས་ཅན་ཚངས་པས་སྤྲུལ་པ་ནི། རྟག་གོ །སྙམ་དུ་འཛིན་ཅིང༌། བདག་གི་ནི། ཐར་
པ་ཡིན་ནོ། །སྙམ་དུའང་འཛིན་ལ། ཆོམ་ཤོད་པ་རྣམས་ཀྱི་འོ་མ་བཞིན་དུ་དེ་ཁོ་ན་ཉིད་ནི། མི་ཤེས་སོ། །དེ་དག་ཚངས་པར་སྤྱོད་པའི་རྒྱུ་དང༌། གཞན་གྱི་ཆུང་མ་སྤང་པའི་རྒྱུ་དང༌། ཕ་མ་ལ་ཕུ་དུད་བྱས་
པའི་རྒྱུས་ན། ཆོམ་ཤོད་པ་རྣམས་ཀྱི་འོ་མ་མ་རུང་པའི་ལྷག་མ་ཙམ་ཞིག་ཡོད་པ་བཞིན་དུ་མཐོ་རིས་ཀྱི་བདེ་བ་ཆ་ཤས་ཙམ་ཞིག་ཐོབ་སྟེ་ལོངས་སྤྱོད་པར་བྱེད་ལ། དེ་དག་གིས་ཕ་མ་ལ་ཕུ་དུད་བྱ་
བ་ཇི་ལྟ་བུ་ཡིན་པའང་མི་ཤེས། གསུམ་ལ་སྐྱབས་སུ་འགྲོ་བ་ཇི་ལྟ་བུ་ཡིན་པའང་མི་ཤེས། གཞན་གྱི་ཆུང་མ་སྤང་བ་ཇི་ལྟ་བུ་ཡིན་པའང་མི་ཤེས། རྟག་པ་ཇི་ལྟ་བུ་ཡིན་པའང་མི་ཤེས་སོ། །དེ་
ལ་སངས་རྒྱས་ཀྱི་སྤྲུལ་པ་ནི། མི་རྟག་པ་ཡིན། རྫུན་པ་ཡིན་ཏེ། དེས་ན། འཇིག་རྟེན་པ་རྣམས་དེ་བཞིན་གཤེགས་པ་མི་རྟག་གོ། །མི་བརྟན་ནོ། །སྙམ་དུ་འཛིན་ཏེ། དེ་བས་ན། མི་རྟག་པའི་གཉེན་
༄༅། །པོར་དེ་བཞིན་གཤེགས་པ་རྟག་གོ །ཞེས་བྱ་བ་ལ་བརྩོན་པར་བྱའོ། །རིགས་ཀྱི་བུ། དེ་ནས་བ་ལང་གི་ལྷས་དེའི་སྐལ་པ་ཅན་གྱི་འཁོར་ལོས་བསྒྱུར་པའི་རྒྱལ་པོ་
འཇིག་རྟེན་དུ་བྱུང་ལ་ཆོམ་ཤོད་པ་དེ་དག་གིས་ཀྱང་འཁོར་ལོས་བསྒྱུར་བའི་རྒྱལ་པོའི་བསོད་ནམས་ཀྱི་མཐུས་དེ་བ་ལང་གཅིག་ཀྱང་མེད་པར་མི་བྱེད་དོ། །དེ་ནས་ནགས་ན་རྒྱུ་བའི་ཆོམ་ཤོད་
པ་དེ་དག་གིས་བ་ལང་གི་ལྷས་དེ་བོར་ཏེ་འགྲོ་བར་འགྱུར་རོ། །དེ་ནས་འཁོར་ལོས་བསྒྱུར་བའི་རྒྱལ་པོའི་ཁྱིམ་བདག་རིན་པོ་ཆེས་བ་ལང་གི་ལྷས་དེ་ཉམས་སུ་ལེན་པར་འགྱུར་ཏེ། ཁྱིམ་
བདག་རིན་པོ་ཆེ་དེས་རང་གི་བློས་བ་ལང་གི་ལྷས་དེའི་འོ་མའི་དེ་ཁོ་ན་ཉིད་ཀྱི་ཐབས་ཤེས་པར་འགྱུར་ལ། བ་རྣམས་ཀྱི་འོ་མའང་འཁོར་ལོས་བསྒྱུར་བའི་རྒྱལ་པོའི་བསོད་ནམས་ཀྱིས་
ཉིད་འགྱུར་དུ་བཞོར་ཡོད་པར་འགྱུར་བ་དེ་བཞིན་དུ་ཆོས་ཀྱི་འཁོར་ལོས་བསྒྱུར་བའི་སངས་རྒྱས་འཇིག་རྟེན་དུ་བྱུང་ནས་བ་ལང་གི་ལྷས་དང་འདྲ་བའི་འཇིག་རྟེན་པ་ཐམས་ཅད་ཡོངས་སུ་
འཛིན་པར་མཛད་པས་ན། རྟག་པའི་སྒྲ་ནི། དེ་བཞིན་གཤེགས་པ་འབའ་ཞིག་གི་རྗེས་སུ་མཐུན་གྱི། འཇིག་རྟེན་པ་ཆོམ་ཤོད་དང་འདྲ་བ་རྣམས་ཀྱིས་ནི། སངས་རྒྱས་ཀྱི་སྒྲ་དང༌། རྟགས་
ཀྱིས་གནས་ཀྱང་ཐོབ་པར་མི་འགྱུར་རོ། །དེ་བཞིན་གཤེགས་པའི་ཉན་ཐོས་རྣམས་ནི། ཁྱིམ་བདག་རིན་པོ་ཆེ་བཞིན་དུ་དམ་པའི་ཆོས་ཀྱིས་བ་ལང་གི་ལྷས་ཉམས་སུ་ལེན་པར་བྱེད་དེ། སེམས་
ཅན་བསོད་ནམས་དང་ལྡན་པ་རྣམས་ཀྱི་དོན་དུ་ཆོས་ཀྱི་འོ་མ་འཇོ་བར་བྱེད་དོ། །རིགས་ཀྱི་བུ། རྒྱུ་དེས་ན། དེ་བཞིན་གཤེགས་པ་རྟག་པ་དང༌། བརྟན་པ་དང༌། ཐེར་ཟུག་པ་ཡིན་ལ། འཇིག་རྟེན་པ་རྣམས་
ལ་ནི༑ རྟག་པའི་ཆོས་མེད་དེ། རྟག་པའི་སྒྲ་དེ་ནི། དེ་བཞིན་གཤེགས་པ་སངས་རྒྱས་རྣམས་འབའ་ཞིག་ལ་ཡོད་ཅེས་ང་ཟེར་རོ། །དེ་ལྟར་ན། རིགས་ཀྱི་བུའམ། རིགས་ཀྱི་བུ་མོ་རྣམས་ཀྱིས་སངས་རྒྱས་
བཅོམ་ལྡན་འདས་ནི། རྟག་པའོ། །སངས་རྒྱས་བཅོམ་ལྡན་འདས་ནི། ཐེར་ཟུག་པའོ། །ཞེས་དེ་ལྟར་ཤེས་པར་གྱིས་ཤིག །སེམས་ཅན་གང་དག་རྟག་ཅེས་བྱ་བའི་ཡི་གེ་གཉིས་སྒོམ་པ་དེ་དག་ནི།
རིང་པོ་མི་ཐོགས་པ་ཁོ་ནར་ངའི་གོ་འཕང་དང་ལྷག་ཆད་མེད་པ་ཐོབ་པར་འགྱུར་རོ། །རིགས་ཀྱི་བུ། གང་གི་ཚེ་རྟག་གོ། །ཞེས་བྱ་བའི་ཡི་གེ་གཉིས་སྒོམ་པ་ནུབ་པར་འགྱུར་བ་དེའི་ཚེ་དེ་བཞིན་གཤེགས་
པ་ཡོངས་སུ་མྱ་ངན་ལས་འདའ་བར་འགྱུར་ཏེ། དེ་ནི། སངས་རྒྱས་རྣམས་ཀྱི་ཆོས་ཉིད་དོ། །གསོལ་པ། སངས་རྒྱས་རྣམས་ཀྱི་ཆོས་ཉིད་ཅེས་བཀའ་སྩལ་པ་དེའི་དོན་ཅི་ལགས། བཅོམ་ལྡན་འདས།
བདག་ནི། ཆོས་གླེང་པ་འདི་རྟོགས་པར་འཚལ་ན། བཅོམ་ལྡན་འདས་ཀྱི་ཚིག་འདི་ཇི་ལྟ་བུ་ལགས་པ་རྒྱས་པར་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཆོས་ཉིད་ཅེས་བྱ་བ་
ནི༑ ལུས་ཡོངས་སུ་འདོར་བ་སྟེ། ལུས་ཡོངས་སུ་འདོར་བ་ཞེས་བྱ་བ་དེ་ནི། སྨད་པའི་ཚིག་ཡིན་པར་ཤེས་པར་གྱིས་ཤིག །གསོལ་པ། དེ་བཞིན་གཤེགས་པས་སྐུ་བོར་ནས་སླར་ཡང་སྐུ་ལེན་ཏམ་
༄༅། །མི་ལེན་པ་བདག་ཞུ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་སྐད་མ་ཟེར་ཅིག །འདི་ནི། ཆོས་ཉིད་དཔྱོད་པ་ཡིན་ཏེ། རིགས་ཀྱི་བུ། དཔེར་
ན༑ འདུ་ཤེས་མེད་པ་རྣམས་ལ་གཟུགས་ཀྱི་ཕུང་པོ་དང༌། འདུ་ཤེས་ཀྱི་ཕུང་པོ་གཉིས་མེད་ན། སེམས་ཅན་དེ་དག་ཇི་ལྟར་གནས། ཇི་ལྟར་གདའ་།ཇི་ལྟར་སྣང༌། དེ་དག་གི་འདུ་ཤེས་ཇི་ལྟར་
འཇུག །ཅེས་འདྲི་བ་འདི་ནི། སངས་རྒྱས་ཀྱི་ཡུལ་ཡིན་ནོ། །རིགས་ཀྱི་བུ། འདུ་ཤེས་མེད་པའི་ལྷ་རྣམས་ཀྱི་གཟུགས་དང༌། གནས་དང༌། སྤྱོད་ལམ་དང༌། བདེ་བ་རྣམས་ཇི་ལྟར་བསྟན་པར་བྱ་
ཞེས་ཕྱིན་ཆད་དེ་སྐད་མ་འདྲི་ཞིག །འདི་ནི། ཉན་ཐོས་དང༌། རང་སངས་རྒྱས་ཀྱི་ཡུལ་མ་ཡིན་ཏེ། འདི་ནི། སངས་རྒྱས་ཀྱི་སྤྱོད་ཡུལ་ཡིན་ནོ། །རིགས་ཀྱི་བུ། དེ་ལྟར་ན། དེ་བཞིན་གཤེགས་
པའི་སྐུ་ནི། སངས་རྒྱས་འབའ་ཞིག་གི་ཡུལ་ཡིན་གྱི། ཉན་ཐོས་དང༌། རང་སངས་རྒྱས་ཀྱི་ཡུལ་མ་ཡིན་ནོ། །དེ་བཞིན་གཤེགས་པ་གང་ན་གནས་པ་དང༌། གང་ན་སྣང་བ་ནི། ཁྱོད་ཀྱི་ཡུལ་
ཡང་མ་ཡིན་གྱི། སངས་རྒྱས་བཅོམ་ལྡན་འདས་ནི། ཐབས་བསམ་གྱིས་མི་ཁྱབ་པའི་སྐུ་ཡིན་ནོ། །སྙམ་དུ་ཁྱེད་ཀྱིས་གནས་པར་གྱིས་ཤིག །རིགས་ཀྱི་བུ། ཆོས་དང༌། དགེ་སློང་གི་
དགེ་འདུན་ལའང་རྟག་པའི་འདུ་ཤེས་ཡང་དང༌། ཡང་དུ་སྒོམ་པར་གྱིས་ཤིག །གཞི་གསུམ་ལ་ཐ་དད་པར་མ་བྱེད་ཅིག །མི་རྟག་པའམ། མི་བརྟན་པའམ། ཐེར་ཟུག་པ་མ་ཡིན་པའམ།
ཞི་བ་མ་ཡིན་པའམ། ཐར་པ་མ་ཡིན་པའི་རྣམ་པར་ཡང་མ་སྒོམས་ཤིག །རིགས་ཀྱི་བུའམ་རིགས་ཀྱི་བུ་མོ་གང་དག་གཞི་གསུམ་གྱི་བདག་ཉིད་ཆེན་པོ་ལ་དེ་ལྟར་མི་སྒོམ་པ་དེ་དག་གི་སྐྱབས་
སུ་འགྲོ་བ་ནི། དག་པ་ཡིན་ནོ། །ཞེས་ང་ཟེར་རོ། །དེ་ལྟར་ན། རྟག་པ་སྒོམ་པ་ནི། བསམ་གྱིས་མི་ཁྱབ་སྟེ། རིགས་ཀྱི་བུ། དཔེར་ན། ཤིང་ཡོད་ན། གྲིབ་མ་ཡོད་ཀྱི། ཤིང་མེད་ན། གྲིབ་མ་མེད་
པ་དེ་བཞིན་དུ་དེ་བཞིན་གཤེགས་པ་རྟག་པ་དང༌། སྐྱབས་སུ་འགྱུར་གྱི། གལ་ཏེ་མི་རྟག་ན། ལྷ་དང་མི་རྣམས་ཀྱི་སྐྱབས་སུ་འོས་པ་མ་ཡིན་ནོ། །གསོལ་པ། བཅོམ་ལྡན་འདས། ཅི་ལགས། མཚན་
མོ་མུན་པའི་ནང་ན་ཤིང་ལྗོན་པའི་གྲིབ་མ་སྣང་ཞེས་བགྱིའམ་མི་སྣང་ཞེས་བགྱི། བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ། ཤིང་ལྗོན་པ་ཡོད་པའི་གྲིབ་མ་ཅིའི་ཕྱིར་མེད་ཅེས་བརྗོད་པར་བྱའོ། །
དེ་ལྟ་མོད་ཀྱི། ཤའི་མིག་གིས་ནི། མི་མཐོང་སྟེ། དེ་བཞིན་དུ་དེ་བཞིན་གཤེགས་པའང་རྟག་པ་དང༌། བརྟན་པ་དང༌། ཐེར་ཟུག་པ་ཡིན་ཏེ། ཐེར་ཟུག་པ་ཡིན་གྱིས་ཀྱང་མཚན་མོ་མུན་པའི་ནང་ན་
ཤིང་ལྗོན་པའི་གྲིབ་མ་ཤའི་མིག་གིས་མི་མཐོང་བ་དེ་བཞིན་དུ་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་མཛད་པས་རྟག་པ་དང༌། བརྟན་པ་དང༌། ཐེར་ཟུག་པ་ཡིན་བཞིན་དུ་མཚན་མོ་
མུན་པའི་ནང་ན་ཤིང་ལྗོན་པའི་གྲིབ་མ་བལྟར་མི་སྣང་བས་སེམས་ཅན་རྣམས་དེ་བཞིན་གཤེགས་པ་མི་རྟག་གོ །སྙམ་དུ་ཡོངས་སུ་རྟོག་གོ །གལ་ཏེ་ང་དང༌། ཆོས་དང༌། དགེ་འདུན་རྟག་པའི་འདུ་ཤེས་
༄༅། །ཁྱོད་ཀྱི་ཕ་མ་ལ་མེད་ན། གསུམ་ལ་སྐྱབས་སུ་འགྲོ་བ་མ་དག་གོ །ཞེས་ང་ཟེར་རོ། །ཕ་མ་གཉིས་ལ་གཞི་གསུམ་རྟག་པར་བསྟན་ན་ནི། བྱང་ཆུབ་སེམས་དཔའ་
སེམས་དཔའ་ཆེན་པོ་གསུམ་ལ་སྐྱབས་སུ་སོང་བའི་དགེ་བསྙེན་ཞེས་བྱ་བའི་མིང་ཁྱོད་ཀྱིས་ཐོབ་པར་འགྱུར་རོ། །གསོལ་པ། དེང་སླན་ཆད་བདུན་རྒྱུད་ཀྱི་རིགས་ཚུན་ཆད་དང༌། ཕ་མ་གཉིས་
ལ་བཅོམ་ལྡན་འདས་དང༌། ཆོས་དང༌། དགེ་འདུན་རྟག་གོ། །ཞེས་བགྱི་བར་འཚལ་ལོ། །ཀྱེ་མ་སངས་རྒྱས་བཅོམ་ལྡན་འདས་ནི། བསམ་གྱིས་མི་ཁྱབ་བོ། །ཞེས་ཀྱང་བསླབ་པར་འཚལ་ལོ། །
གཞན་དག་ལའང་བསྟན་པར་འཚལ་ལོ། །གང་དག་བདག་གིས་བསྟན་པ་ལྟར་མི་འཛིན་ཅིང་མི་རྟག་པར་སྨྲ་བའི་སེམས་ཅན་ངན་པ་དེ་དག་ལ་ནི། བདག་གིས་སེར་བ་བཞིན་དུ་བགྱིའོ། །བཅོམ་
ལྡན་འདས་ཀྱིས་བཀའ་སྩལ་བ། རིགས་ཀྱི་བུ། ལེགས་སོ། །ལེགས་སོ། དམ་པ་ཆོས་སྲུང་བའི་རིགས་ཀྱི་བུས་ནི། དེ་ལྟར་བྱ་དགོས་ཏེ། རིགས་ཀྱི་བུ། ཁྱོད་ལེགས་སོ། །དེ་ལྟར་ན། འཚེ་
བ་མེད་པ་ལ་ཞུགས་པ་ཡིན་ཏེ། འཚེ་བ་མེད་པའི་ལས་ཀྱི་འབྲས་བུ་ཆེན་པོ་དེས་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཚེའང་རིང་བར་འགྱུར་ལ། ཚེ་རབས་ཀྱང་དྲན་པར་
འགྱུར་རོ། །འཚེ་བ་མེད་པའི་ཕུང་པོའི་ལེའུ་ཞེས་བྱ་སྟེ། དང་པོའོ།། །།རིགས་ཀྱི་བུ། ད་ནི། དེ་བཞིན་གཤེགས་པ་རྟག་པའི་སྐུ་དང༌། མི་ཤིགས་པའི་སྐུ་དང༌། རྡོ་རྗེའི་
སྐུ་དང༌། ཤའི་སྐུ་མ་ཡིན་པ་དང༌། ཆོས་ཀྱི་སྐུར་ལྟོས་ཤིག །གསོལ་བ། གལ་ཏེ་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་མཛད་ན་ནི། བདག་དེ་ལྟར་མི་ལྟ་ལགས་སོ། །གལ་ཏེ་
ཡོངས་སུ་མྱ་ངན་ལས་འདའ་བར་གྱུར་ན། གཞིག་ཏུ་རུང་བའི་སྐུ་དང༌། ཐལ་བའི་སྐུ་དང༌། ཤའི་སྐུར་བལྟ་བར་འཚལ་ལོ། །བཀའ་སྩལ་བ། རིགས་ཀྱི་བུ། མིའི་ལྟ་བུར་སོབ་སོབ་པོའི་ལུས་
དང༌། གཞིག་ཏུ་རུང་བའི་ལུས་ཞེས་དེ་སྐད་མ་ཟེར་ཅིག །འོད་སྲུང་ཆེན་པོ་དང་རུས་གཅིག་པ། དེ་བཞིན་གཤེགས་པ་ནི། བསྐལ་པ་བྱེ་བ་ཕྲག་དུ་མ་ནས་མི་ཤིགས་པའི་སྐུ་དང་ལྡན་ཞིང་མིའི་
ལུས་མ་ཡིན། ལྷའི་ལུས་མ་ཡིན། སྲིད་པ་ཐམས་ཅད་ཀྱི་ལུས་མ་ཡིན། ཤའི་ལུས་མ་ཡིན་ཏེ། དེ་བཞིན་པའི་སྐུ་ནི། ལུས་མེད་པ། མ་སྐྱེས་པ། མ་འགགས་པ། ཡོད་པ་མ་ཡིན་པ།
འཇུག་པ་མེད་པ། མཐར་ཐུག་པ་མེད་པ། གནས་པ་མེད་པ། རྣམ་པར་ཤེས་པ་མེད་པ། ཀུན་ཏུ་སྤྱོད་པ་མེད་པ། ཤིན་ཏུ་དག་པ། ཅིའང་མ་ཡིན་པ། ཟིན་པ་མ་ཡིན་པ། རྐང་པ་མེད་པ།
གནས་པ་མེད་པ། འགྱུར་བ་མེད་པ། མྱོང་བ་མེད་པ། མ་འདྲེས་པ། མི་ཤེས་པ། ཤེས་པར་བྱར་མེད་པ། རྣམ་པར་རིག་ཏུ་མི་བཟོད་པ། བསམ་གྱིས་མི་ཁྱབ་པ། བསམ་དུ་མེད་པ། རྣམ་
པར་ཤེས་པ་མེད་པ། སེམས་དང་བྲལ་བ། སེམས་མཉམ་པ་ཉིད། སེམས་མཉམ་པ་ཉིད་དུ་འགྲོ་བ། འབབ་པ་མེད་པ། འོང་བ་དང༌། འགྲོ་བ་ཡོངས་སུ་ཆད་པ། མ་བཅད་པ། གཅད་དུ་མེད་པ།
༄༅། །གླགས་མེད་པ། རྫས་མ་ཡིན་པ། མ་བྱུང་བ། སྤྱོད་པ་མེད་པ། རྟོག་པ་མེད་པ། མིང་མེད་པ། ཡོངས་སུ་མ་གྲུབ་པ། མྱོང་བ་མ་ཡིན་པ། མི་མངོན་པ། ཡུལ་མེད་པ།
གཞི་མེད་པ། མུན་པ་མེད་པ། སྣང་བ་མེད་པ། ཞི་བ་མ་ཡིན་པ། རབ་ཏུ་ཞི་བ་མ་ཡིན་པ། ཞི་བ་དང་བྲལ་བ། དག་པ། རྣམ་པར་དག་པ། ཅིའང་མེད་པ། ལེན་པ་མེད་པ། ཆགས་པ་མེད་པ། ཉོན་
མོངས་པ་མེད་པ། ཉོན་མོངས་པ་དང་བྲལ་བ། མི་གནས་པའི་ཚུལ་གྱིས་གནས་པ། གཟུང་དུ་མེད་པ། འཕོ་བ་མེད་པ། འཕོ་བར་བྱར་མེད་པ། ཆོས་མ་ཡིན་པ། ཆོས་མ་ཡིན་པ་མེད་པ།
ཞིང་མ་ཡིན་པ། ཞིང་དུ་མ་གྱུར་པ་མ་ཡིན་པ། མི་ཟད་པ། ཟད་པར་བྱར་མེད་པ། ཟད་པ་དང་བྲལ་བ། ཟད་པ་མེད་པ། སྐད་ཅིག་པ། སྐད་ཅིག་པ་དང་བྲལ་བ། སྐད་ཅིག་པ་མ་ཡིན་པ།
མ་འཁྲུགས་པ། ཡི་གེ་དང་ཐིག་ལེ་ཡོངས་སུ་སྤངས་པ། སྒྲ་ཡོངས་སུ་སྤངས་པ། བཤད་པ་ཡོངས་སུ་སྤངས་པ། སྒོམ་པ་ཡོངས་སུ་སྤངས་པ། བསམ་པ་ཡོངས་སུ་སྤངས་པ། ལྡན་
པ་མ་ཡིན་པ། མི་ལྡན་པ་མ་ཡིན་པ། ཚད་མེད་པ། ཚད་མེད་པ་མ་ཡིན་པ། འགྲོ་བ་མེད་པ། འོང་བ་མེད་པ། གཉིས་སུ་མེད་པ། རྩོམ་པ་མེད་པ། ནུས་པ་མེད་པ། མཚན་མེད་པ། མཚན་གྱིས་
རྟོགས་པར་བྱར་མེད་པ། མཚན་གྱིས་བརྒྱན་པ། ཤིན་ཏུ་བརྟན་པ། ཤིན་ཏུ་ཞི་བ། གདུང་བ་དང་བྲལ་བ། ལྟུང་བར་མི་བྱེད་པ། བལྟར་མེད་པ། རྗེས་སུ་ཕྱེ་བ། དེ་བཞིན་ཉིད། དེ་ཁོ་ན་ཉིད།
སྒྲོལ་བ་མེད་པའི་ཚུལ་གྱིས་སེམས་ཅན་ཐམས་ཅད་སྒྲོལ་བ། ཐར་པར་བྱེད་པ་མེད་པའི་ཚུལ་གྱིས་ཐར་པར་བྱེད་པ། དག་པར་བྱེད་པ་མེད་པའི་ཚུལ་གྱིས་དག་པར་བྱེད་པ། གྲོལ་བར་བྱེད་པ་མེད་པའི་ཚུལ་
གྱིས་གྲོལ་བར་བྱེད་པ། སྟོན་པ་པོ་གཉིས་སུ་མེད་པའི་ཚུལ་གྱིས་སྟོན་པ་པོ་མཉམ་པ། མཉམ་པ་མེད་པ་དང་མཉམ་པ། དཔག་ཏུ་མེད་པ་དང་མཉམ་པ། ནམ་མཁའ་དང་མཉམ་པ། གནས་མེད་པ་
དང་མཉམ་པ། སྐྱེ་བ་མེད་པ་དང་མཉམ་པ། དམིགས་སུ་མེད་པ་དང་མཉམ་པ། མཉམ་པ་མེད་པ་དང་མཉམ་པར་གྱུར་པ། ཞི་བ། རབ་ཏུ་ཞི་བ། ཉེ་བར་ཞི་བ། རྟེན་མེད་པ། ཚད་མེད་པ། སྤྱོད་པ་སྒྱུར་
བ༑ མི་ལྡོག་པར་ངེས་པར་འཛིན་པ་ཐམས་ཅད་བཅད་པ། ཕུལ་བ་མེད་པ། གཉིས་སུ་མེད་པ་སྟོན་པ། རྣམ་པར་རིག་པར་བྱེད་པ་མེད་པའི་ཚུལ་དང༌། སྦྱོར་བ་མེད་པའི་ཚུལ་གྱིས་རང་བཞིན་གྱི་ངོ་བོ་
ཉིད༑ རིང་པོ་མ་ཡིན་པ། ཟླུམ་པོ་མ་ཡིན་པ། ཕུང་པོས་རབ་ཏུ་ཕྱེ་བ་མ་ཡིན་པ། ཁམས་ཀྱིས་རབ་ཏུ་ཕྱེ་བ་མ་ཡིན་པ། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན་པ། འདུས་བྱས་ཀྱི་རྣམ་པར་རྟོག་པ་མེད་པ་
འདུས་བྱས་ཀྱི་རྣམ་པར་རྟོག་པའི་གནས་མེད་པ། འཕེལ་བ་མེད་པ། འགྲིབ་པ་མེད་པ། གཞལ་དུ་མེད་པ། གཞལ་དུ་མེད་པ་མ་ཡིན་པ། རྣོ་བ་རྣོ་བ་མ་ཡིན་པ། མཆོད་དུ་མེད་པ་མཆོད་དུ་མེད་པ་མ་ཡིན་
པ་སྟེ༑ དེ་ལྟར་དེ་དེ་བཞིན་གཤེགས་པའི་སྐུ་ནི། ཡོན་ཏན་དཔག་ཏུ་མེད་ཅིང་བསམ་གྱིས་མི་ཁྱབ་པ་དང་ལྡན་པ་ཡིན་ལ། སུས་ཀྱང་མ་ཤེས། མ་མཐོང༌། མ་ཐོས། བྱེ་བྲག་མ་ཕྱེད། རྣམ་པར་མ་ཤེས།
༄༅། །ཡོད་པ་མ་ཡིན་པ། ཚིག་ཏུ་བརྗོད་དུ་མི་རུང་བ། འཇིག་རྟེན་གྱི་ཁོངས་སུ་མ་འདུས་པ། རྒྱུ་ལས་ཀྱང་མ་བྱུང་བ། རྒྱུ་མེད་པ་ལས་ཀྱང་མ་བྱུང་བ། སྐུ་དེ་ནི། ཐམས་ཅད་
དུ་རྣམ་པར་རྟོག་པ་དང༌། རྣམ་པར་རྟོག་པ་མེད་པའི་མཚན་ཉིད་རྣམས་དང༌། མཚན་གྱི་གཞི་དང༌། མཚན་དང༌། བགྲང་བ་དང༌། བསྒྲེ་བ་རྣམས་ཀྱིས་རྣམ་པར་རིག་པར་བྱེད་མི་ནུས་ལ། མྱ་
ངན་ལས་འདའ་བར་གཤེགས་པའང་མ་ཡིན། མི་གཤེགས་པའང་མ་ཡིན་ཏེ། དེ་བཞིན་གཤེགས་པ་ནི། ཡོན་ཏན་དཔག་ཏུ་མེད་པ་དང་ལྡན་ནོ། །འོད་སྲུང་ཆེན་པོ་དང་རུས་གཅིག་པ།
དེ་བཞིན་གཤེགས་པའི་སྐུ་ནི། དེ་བཞིན་གཤེགས་པ་ཉིད་ཀྱིས་མཚན་མའི་དངོས་པོ་རྣམས་ཀྱི་སྒོ་ནས་ཐུགས་སུ་ཆུད་པར་སྤྱོད་ཀྱི། ཉན་ཐོས་དང༌། རང་སངས་རྒྱས་ཐམས་ཅད་
ཀྱིས་ནི། མི་ནུས་སོ། །དེ་བཞིན་གཤེགས་པ་དེ་ལྟ་བུའི་ཡོན་ཏན་དང་ལྡན་པ་ཤའི་སྐུ་མ་ཡིན་པ་ལ་ཁམ་པའི་སྣོད་བཞིན་དུ་ནད་དམ། གནོད་པའམ། འཇིག་པར་ག་ལ་འགྱུར། འཇིག་
པ་དང༌། ན་བ་དང༌། མྱ་ངན་ལས་འདའ་བར་སྟོན་པ་གང་ཡིན་པ་དེ་ནི། གདུལ་བར་བྱ་བའི་དབང་གི་ཕྱིར་ཡིན་པར་བལྟ་བར་བྱའོ། །དེ་བས་ན། དེང་ཕྱིན་ཆད་དེ་བཞིན་གཤེགས་པའི་སྐུ་རྡོ་རྗེ་
ལྟར་མི་ཤིགས་ཤིངས་མཁྲེགས་པར་ཡིད་ལ་གྱིས་ཤིག །གཞན་དག་ལ་ཡང་ཤའི་སྐུ་མ་ཡིན་ནོ། །ཞེས་སྟོན་ཅིག །དེ་བཞིན་གཤེགས་པ་ནི། ཆོས་ཀྱི་སྐུ་ཡིན་པར་ཁོང་དུ་ཆུད་པར་གྱིས་
ཤིག །འོད་སྲུང་ཆེན་པོ་དང་རུས་གཅིག་པས་གསོལ་བ། བཅོམ་ལྡན་འདས། དེ་ལྟར་ན། དེ་བཞིན་གཤེགས་པ་ཡོན་ཏན་དེ་ལྟ་བུ་དང་ལྡན་པ་ལ་སྙུན་དང༌། མི་རྟག་པ་དང༌། འཇིག་པ་ག་ལ་ཞིག་
མཆིས་ཏེ། དེང་སླན་ཆད་དེ་བཞིན་གཤེགས་པ་ནི། ཆོས་ཀྱི་སྐུ་སྟེ། རྟག་པ་དང༌། བརྟན་པ་དང༌། ཐེར་ཟུག་པ་དང༌། ཞི་བའོ། །ཞེས་གཞན་དག་ལའང་བསྟན་པར་འཚལ་ན། རྡོ་རྗེ་ལྟ་བུར་མི་
ཤིགས་པའི་སྐུ་འདི་ཇི་ལྟར་འགྲུབ་པར་འགྱུར་ལགས། སྐུ་འདི་ལྟ་བུར་རྒྱུ་ཅིས་འགྲུབ་ལགས། བཅོམ་ལྡན་འདས་ཀྱིས་བཀའ་སྩལ་པ། ངའི་སྐུ་འདི་ལྟ་བུ་ནི། དམ་པའི་ཆོས་སྲུང་བའི་བསོད་
ནམས་ཀྱི་རྒྱུས་གྲུབ་པ་ཡིན་ནོ། །རིགས་ཀྱི་བུ་དམ་ཆོས་སྲུང་བའི་དགེ་བསྙེན་གྱིས་ནི། བསླབ་པའི་གཞི་ལྔ་བླང་བར་མི་བྱའོ། །དགེ་བསྙེན་གྱི་འདུལ་བའང་སྤྱད་པར་མི་བྱའོ། །ཚུལ་ཁྲིམས་དང༌། ཆོ་ག་དང༌།
ཡོན་ཏན་དང་ལྡན་པའི་དགེ་སློང་རྣམས་བསྲུང་བའི་ཕྱིར་མདའ་གཞུ་དང༌། རལ་གྲི་དང༌། མདུང་ཐུང་ཁ་ལེབ་ལག་ཏུ་ཐོགས་པར་བྱའོ། །གསོལ་བ། དགེ་སློང་དག་ལས་སྲུང་མ་དང་ལྷན་ཅིག་མི་འཁོད་
པར་གཅིག་བུ་ཤིང་དྲུང་དུ་སྟན་བཏིང་བ་ལ་མཆིས་པ་གང་ལགས་པ་དེ་དག་ནི། དགེ་སློང་ཞེས་བགྱི་བ་ལགས་སོ། །སྲུང་མ་དང་ལྷན་ཅིག་འཁོད་པ་གང་ལགས་པ་དེ་དག་ནི། ཁྱིམ་བདག་མགོ་རེག་
ཅེས་བགྱི་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་བ། རིགས་ཀྱི་བུ། ཁྱིམ་བདག་མགོ་རེག་ཅེས་དེ་སྐད་མ་ཟེར་ཅིག །འདི་ན་དགེ་སློང་ལ་ལ་མ་ལ་སྟན་གསར་པ་ལ་འདུག་ཅིང༌། དེ་
༄༅། །ཟན་ཟོས་ནས་གཅིག་པུ་ཕྱོགས་གཅིག་ན་མི་སྨྲ་བར་འདུག་སྟེ་བསམ་གཏན་བྱེད་ལ། ལུས་ཀྱི་རང་བཞིན་ལའང་ལྟ་བར་བྱེད་དོ། །སེམས་ཅན་འོངས་པ་རྣམས་ལའང་
སྦྱིན་པའི་གཏམ་དང༌། ཚུལ་ཁྲིམས་ཀྱི་གཏམ་དང༌། བསོད་ནམས་ཀྱི་གཏམ་དང༌། བསོད་ནམས་ཀྱི་རྣམ་པར་སྨིན་པའི་གཏམ་དང༌། ཆོག་ཤེས་པ་དང་བསྙུང་པའི་ཆོས་སྟོན་ལ། སེངྒེའི་
སྒྲ་སྒྲོག་པར་ཡང་མི་བྱེད། སེངྒེ་ལྟ་བུའི་འཁོར་ཡང་མི་འཆད། རྟགས་ཅན་འཆལ་བ་ཚར་གཅད་པའི་ཕྱིར་ཡང་སྟོན་པར་མི་བྱེད་པའི་དགེ་སློང་དེ་ནི། སྐྱེ་བོ་ཐམས་ཅད་ལ་ཕན་པའི་ཕྱིར་
ཞུགས་པའང་མ་ཡིན། བདག་ལ་ཕན་པའི་ཕྱིར་ཞུགས་པའང་མ་ཡིན་ཏེ། ཉོན་མོངས་པ་ཞན་པ་ཡིན་པས་ཚུལ་ཁྲིམས་དང་ལྡན་པ་ཚངས་པར་སྤྱོད་ཙམ་དུ་ཟད་དོ། །དགེ་སློང་ཚུལ་
ཁྲིམས་དང་ལྡན་པ་དགེ་བའི་ཆོས་ཅན་གཞན་ཞིག་གནས་གཞན་ཞིག་ན་མལ་སྟན་གསར་པ་ལ་འདུག་ཅིང་སེངྒེའི་སྒྲ་སྒྲོག་སྟེ། སེམས་ཅན་ཐམས་ཅད་ལ་ཕན་པ་དང༌། བདེ་བའི་ཕྱིར་གསུང་
རབ་ཡན་ལག་དགུ་མདོའི་སྡེ་དང༌། དབྱངས་ཀྱིས་བསྙད་པའི་སྡེ་དང༌། ལུང་དུ་བསྟན་པའི་སྡེ་དང༌། ཚིགས་སུ་བཅད་པའི་སྡེ་དང༌། ཆེད་དུ་བརྗོད་པའི་སྡེ་དང༌། དེ་ལྟ་བུ་བྱུང་བའི་སྡེ་དང༌། སྐྱེས་
པ་རབས་ཀྱི་སྡེ་དང༌། ཤིན་ཏུ་རྒྱས་པའི་སྡེ་དང༌། རྨད་དུ་བྱུང་བའི་ཆོས་ཀྱི་སྡེ་རྣམས་སྟོན་ཏེ། མདོ་འདི་ལ་དགེ་སློང་བྲན་དང༌། བྲན་མོ་དང༌། བ་ལང་དང༌། མ་ཧེ་ལ་སོགས་པ་རྫས་ངན་པ་
འཆང་བ་རྣམས་ཆད་པས་བཅད་པར་བཤད་པ་ནི། བདག་ཅག་གི་རྐྱེན་དུ་འཚམ་པ་ཡིན་ཏེ། མདོ་ཆེ་གེ་མོ་ཞིག་ལས་ཀྱང་རབ་ཏུ་བྱུང་བ་རྫས་ངན་པ་འཆང་བ་རྣམས་བཅོམ་ལྡན་འདས་ཀྱིས་རྒྱལ་པོ་ཆེ་
གེ་མོ་ཞིག་ལ་ཆད་པས་གཅོད་དུ་བཅུག་སྟེ། ཚུལ་ཁྲིམས་འཆལ་བ་རྣམས་ནི། གོས་སྐྱ་བོ་གྱོན་དུ་བཅུག་གོ །ཞེས་སྟོན་ཅིང་དེ་དེ་ལྟར་སེངྒེའི་སྒྲ་སྒྲོག་པ་ལ་ཚུལ་ཁྲིམས་འཆལ་བ་རྣམས་ཀྱིས་དཀྲུགས་
མ་བྱས་ཏེ། སྲོག་གཅད་དུ་ཟིན་ཀྱང་དགེ་སློང་དེ་ལ་ནི། ཚུལ་ཁྲིམས་དང་ལྡན་པ། བདག་ལ་ཕན་པ་དང༌། གཞན་ལ་ཕན་པ་ལ་ཞུགས་པ་ཞེས་ང་ཟེར་རོ། །རྒྱུ་དེས་ན། རྒྱལ་པོ་དང༌། བློན་པོ་དང༌།
དགེ་བསྙེན་རྣམས་ལ་དམ་པའི་ཆོས་བསྲུང་བའི་ཕྱིར་ངས་དགེ་སློང་རྣམས་སྲུང་བར་ཡང་གནང༌། ཁྱིམ་བདག་མགོ་རེག་རྣམས་ཆད་པས་གཅོད་དུའང་གནང་ངོ༌། །དེ་ལ་ཚུལ་ཁྲིམས་འཆལ་
བ་གང་ཡིན་པ་དེ་དག་ནི། ཁྱིམ་བདག་མགོ་རེག་ཅེས་བྱ་སྟེ། དེ་ནི། ཚུལ་ཁྲིམས་དང་ལྡན་པའི་ཚིག་བླ་དྭགས་མ་ཡིན་ནོ། །རིགས་ཀྱི་བུ། སྔོན་བྱུང་བ་འདས་པའི་དུས་ན་བསྐལ་བ་གྲངས་
མེད་པའི་སྔ་རོལ་ཏུ་གྲོང་ཁྱེར་ཀུ་ཤི་འདི་ཉིད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགའ་སྐྱེད་ཅེས་བྱ་བ་འཇིག་རྟེན་དུ་བྱུང་སྟེ། དེའི་ཚེ་འཇིག་རྟེན་གྱི་
ཁམས་འདི་བདེ་བ་ཅན་བཞིན་དུ་ཡངས་པར་གྱུར་ཏེ། དེའི་ཚེ་སེམས་ཅན་དག་བདེ་བ་ཅན་གྱི་བྱང་ཆུབ་སེམས་དཔའ་རྣམས་བཞིན་དུ་བྲུ་བས་ཉམ་ཆུང་བ་མེད་དོ། །དེ་ནས་དེ་བཞིན་གཤེགས་པ་དེ་ལོ་བྱེ་
༄༅། །བ་ཕྲག་དུ་མའི་བར་དུ་བཞུགས་བཞུགས་ནས་གྲོང་ཁྱེར་འདི་ཉིད་དང༌། གནས་འདི་ཉིད་དུ་མྱ་ངན་ལས་འདས་སོ། །དེ་ནས་དེའི་བསྟན་པ་ལོ་བྱེ་བ་ཕྲག་དུ་མའི་
པར་དུ་གནས་གནས་ནས་གང་གི་ཚེ་བསྟན་པ་གནས་པ་དེའི་ལྷག་མ་ལོ་བཞི་བཅུ་ལུས་པ་དེའི་ཚེ་དམ་པའི་ཆོས་ནུབ་ཏུ་ཆེ་བའི་དུས་ན་དགེ་སློང་སངས་རྒྱས་བྱིན་ཞེས་བྱ་བ་གཡོག་འཁོར་མང་
པོ་དང་ལྡན་པ། སེངྒའི་སྒྲ་སྒྲོག་པ། གསུང་རབ་ཡན་ལག་དགུའི་ཆོས་སྟོན་བ་ཞིག་བྱུང་སྟེ། དེ་བྲན་དང༌། བྲན་མོ་དང༌། བ་ལང་དང༌། མ་ཧེ་ལ་སོགས་པ་རྫས་ངན་པ་འཆང་བ། ལོག་པའི་
ཆོས་སྟོན་པ། ཚུལ་ཁྲིམས་འཆལ་པ། སྡང་བའི་སེམས་དང་ལྡན་པ་རྣམས་ཀྱིས་ཐོས་ནས་གསད་པའི་སེམས་བསྐྱེད་དེ། ཚུལ་ཁྲིམས་འཆལ་བའི་ཕྱོགས་རྣམས་གཅིག་ཏུ་བསྡོངས་ནས་
མཚོན་ཆ་སྣ་ཚོགས་ལག་ན་ཐོགས་ཏེ་དགེ་སློང་དེའི་ཐད་དུ་དེང་ངོ༌། །ངའང་དེའི་ཚེ་རྒྱལ་པོ་སྲིད་སྦྱིན་ཞེས་བྱ་བར་གྱུར་ཏེ། རྒྱལ་པོ་དེས་གཏམ་དེ་ཐོས་ནས་དམ་པའི་ཆོས་བསྲུང་བའི་ཕྱིར་དགེ་སློང་
དེའི་ཐད་དུ་སོང་སྟེ། དེ་དག་དང་གཡུལ་བཀྱེའོ། །དེ་ནས་ཆོས་སྨྲ་བ་དེ་ལ་དེ་དག་གིས་མ་ཚུགས་སོ། །རྒྱལ་པོ་དེ་ནི། རལ་གྲི་དང༌། མདུང་ཐུང་ཁ་ལེབ་དང༌། རྡོ་རྗེ་རྩེ་གཅིག་པ་དང༌། མདའ་རྣམས་
ཀྱི་ལུས་ལ་མ་གཙགས་པའི་ས་མཚམས་ཡུངས་འབྲུ་ཙམ་ཡང་མེད་པར་གྱུར་ཏོ། དེ་ནས་དགེ་སློང་དེས་རྒྱལ་པོ་དེ་དེ་ལྟར་གྱུར་པ་མཐོང་ནས་ལེགས་སོ། །ཞེས་སྨྲས་ཏེ་དམ་པའི་ཆོས་སྲུང་བས་ནི། དེ་
ལྟར་བྱ་དགོས་སོ། །ཁྱོད་ནི། ཆོས་དཔག་ཏུ་མེད་པའི་སྐལ་བ་ཅན་དུ་འགྱུར་རོ། །ཞེས་བྱས་སོ། །དེ་ནས་རྒྱལ་པོ་དེས་དགེ་སློང་དེའི་ཚིག་ཐོས་ནས་ཤི་བའི་འོག་ཏུ་དེ་བཞིན་གཤེགས་པ་མི་འཁྲུགས་པའི་
འཇིག་རྟེན་གྱི་ཁམས་སུ་སྐྱེས་སོ། །དེར་སེམས་ཅན་གང་རྗེས་སུ་ཡི་རང་བར་གྱུར་བ་རྣམས་དང༌། གཡུལ་འགྱེད་པ་གང་ཡིན་པ་དེ་དག་ཐམས་ཅད་ཀྱིས་ཀྱང་བྱང་ཆུབ་ཐོབ་པར་གྱུར་ཏོ། །དེ་བཞིན་གཤེགས་
པ་མི་འཁྲུགས་པའི་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བའི་འཇིག་རྟེན་གྱི་ཁམས་སུ་དེ་བཞིན་གཤེགས་པ་མི་འཁྲུགས་པའི་རྣམ་པ་ཞེས་བྱ་བ་ཞིག་ཀྱང་བྱུང་ངོ༌། །དགེ་སློང་སངས་
རྒྱས་བྱིན་ཡང་རྒྱལ་པོ་དེ་ཤི་བའི་རྗེས་ལ་ཤི་ནས་དེ་བཞིན་གཤེགས་པ་མི་འཁྲུགས་པའི་བསྟན་པ་ལ་ཉན་ཐོས་ཀྱི་མཆོག་ཏུ་གྱུར་ཏོ། །རྒྱལ་པོ་དེའང་ཉན་ཐོས་གཉིས་པར་གྱུར་ཏོ། །དེ་ལྟར་ན།
དམ་པའི་ཆོས་ནུབ་པའི་ཚེ་དམ་པའི་ཆོས་བསྲུང་བར་བྱའོ། །དེའི་ཚེ་རྒྱལ་པོར་གྱུར་བ་དེ་ནི། ང་ཡིན་ནོ། །དགེ་སློང་དེ་ནི། སངས་རྒྱས་འོད་སྲུང་ཡིན་ཏེ། དེ་ནི། ཡོངས་སུ་མྱ་ངན་ལས་འདས་སོ། །
དེ་ལྟར་ན། དམ་པའི་ཆོས་སྲུང་བའི་འབྲས་བུ་ནི། དཔག་ཏུ་མེད་དེ། འབྲས་བུ་རྣམ་པར་དག་པ་དེས་ན། ངའང་རྨ་བྱ་མདོངས་རི་མོ་ཅན་མང་པོས་བརྒྱན་པ་ལྟ་བུར་གྱུར་ཏེ། མི་ཤིགས་པའི་སྐུ་
དང༌། ཆོས་ཀྱི་སྐུ་བརྙེས་པར་གྱུར་ཏོ། །འོད་སྲུང་ཆེན་པོ་དང་རུས་གཅིག་པས་གསོལ་བ། དེ་བཞིན་གཤེགས་པ་ནི། རྡོ་ལ་བརྐོས་པའི་ཡི་གེ་བཞིན་དུ་རྟག་པའི་སྐུ་དང་ལྡན་ལགས་སོ། །བཀའ་སྩལ་
༄༅། །པ༑ རིགས་ཀྱི་བུ། དེ་བས་ན། དམ་པའི་ཆོས་སྲུང་བར་འདོད་པས་ནི། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ན་ཡོད་པ་དེར་བསྲུང་
བར་བྱའོ། །དགེ་བསྙེན་དམ་པའི་ཆོས་སྲུང་བའི་འབྲས་བུ་ནི། རྒྱ་ཆེའོ། །རིགས་ཀྱི་བུ། དེ་བས་ན། དགེ་སློང་རྣམས་མཚོན་ཆ་ལག་ན་ཐོགས་པའི་དགེ་བསྙེན་དག་གིས་མདུན་དུ་བདར་ཏེ་རྒྱུ་
བར་བྱའོ། །ཐེག་པ་ཆེན་པོ་འདི་ལ་ནི། དགེ་བསྙེན་གྱིས་བསླབ་པའི་གཞི་ལྔ་བླང་བར་མི་བྱ་སྟེ། དམ་པའི་ཆོས་བསྲུང་བའི་ཕྱིར་ལག་ན་མཚོན་ཆ་ཐོགས་ཤིང་དགེ་སློང་རྣམས་བསྲུང་བར་བྱའོ། །
གསོལ་བ། ཅི་ལགས། དགེ་སློང་གང་དག་དེ་ལྟ་བུའི་དགེ་བསྙེན་ལག་ན་མཚོན་ཆ་ཐོགས་པ་དང་ལྷན་ཅིག་འགྲོགས་ཤིང་རྒྱུ་བ་དེ་དག་སློབ་དཔོན་ལགས་སམ། འོན་ཏེ་སློབ་དཔོན་མ་ལགས།
ཚུལ་ཁྲིམས་འཆལ་བ་ཞེས་བགྱིའམ། འོན་ཏེ་མི་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་འོག་ཏུ་
ནང་འཁྲུག་འབྱུང་བ་དང༌། ཡུལ་བཅོམ་པ་དག་འབྱུང་བར་འགྱུར་ཏེ། དུས་ངན་པར་གྱུར་པ་དེའི་ཚེ་མུ་གེའི་ཉེས་པས་ཆེར་རབ་ཏུ་འབྱུང་ཞིང་མགོ་རེག་ཏུ་འགྱུར་ཏེ། དེ་དག་གིས་དགེ་སློང་
ཚུལ་ཁྲིམས་དང༌། ཆོ་ག་དང༌། ཡོན་ཏན་དང༌། སྤྱོད་པ་ཕུན་སུམ་ཚོགས་པ་དང་ལྡན་པ་དག་སྐྲོད་པར་འགྱུར། གསོད་པར་འགྱུར་ཏེ། དེར་དགེ་སློང་ཚུལ་ཁྲིམས་དང་ལྡན་པ་རྣམས་ཀྱི་
གྲོང་དང༌། གྲོང་ཁྱེར་དང༌། རི་ཁྲོད་ཀྱི་གྲོང་དག་ཏུ་ཇི་ལྟར་རྒྱུ་བར་བྱ་སྟེ། དེ་ལྟ་བུ་དག་གི་དུས་ན་དགེ་སློང་ཚུལ་ཁྲིམས་དང་ལྡན་པ་སློབ་དཔོན་དུ་གྱུར་པ་རྣམས་ལམ་དུ་འགྲོ་བ་ན་རང་གི་སྲོག་བསྲུང་བའི་
ཕྱིར་མཚོན་ཆ་ལག་ན་ཐོགས་པ་དག་དེར་འགྲོ་བར་ངས་གནང་ངོ༌། །དགེ་བསྙེན་རྣམས་དང༌། ཁྱིམ་བདག་དང༌། རྒྱལ་པོ་དང༌། བློན་པོ་རྣམས་ཀྱིས་དགེ་སློང་ཚུལ་ཁྲིམས་དང་ལྡན་པ་བསྲུང་བའི་ཕྱིར་
མཚོན་ཆ་འཆང་བ་དེའང་ཚུལ་ཁྲིམས་ཡིན་ཞེས་ང་ཟེར་ཏེ། འོན་ཀྱང་གསད་པར་ནི། མི་བྱའོ། །དགག་པའི་ཕྱིར་མཚོན་ཆ་བཅད་བར་བྱ་སྟེ། དེ་ནི། མཆོག་ཏུ་མཁས་པའི་ཚུལ་ཁྲིམས་ཡིན་
ནོ༑ ༑སློབ་དཔོན་ནི། ཐེག་པ་ཆེན་པོའི་གདམས་ངག་སྟོན་པ་དང༌། ཡང་དག་པར་ལྟ་བ་དང༌། རུང་བ་མ་ཡིན་པའི་གདུགས་དང༌། འབྲུ་མར་གྱི་སྣོད་དང༌། འབྲས་བུའི་རྣམ་གྲངས་རྣམས་སྤངས་པ་
དང༌། རྒྱལ་པོ་དང༌། བློན་པོ་རྣམས་ལ་མི་བརྟེན་པ་དང༌། རྙེད་པའི་ཕྱིར་སྦྱིན་པ་པོ་རྣམས་ལ་དགའ་བ་དང༌། སྙན་པར་སྨྲ་བ་མ་ཡིན་པ་དང༌། སྤྱོད་ལམ་ཕུན་སུམ་ཚོགས་པ་དང༌། ཚུལ་མེད་པའི་དགེ་སྦྱོང་
གི་དངོས་པོ་སེལ་བ་དང༌། ཚུལ་ཁྲིམས་དང་ལྡན་པ་དང༌། དགེ་བའི་ཆོས་ཅན་དང༌། རྒྱ་མཚོ་དང་འདྲ་བའི་བློ་གྲོས་འཆང་བ་དང༌། བྱད་གཟུགས་དང༌། ཆ་བྱད་དང༌། རྙེད་པ་དང༌། བཀུར་སྟི་གཞན་མི་
འདོད་པ་དང༌། ཆོ་ག་ཤེས་ཤིང་ཡོ་བྱད་བསྙུངས་པ་སྟོན་པ་གང་ཡིན་པ་སྟེ། དེ་ནི་སློབ་དཔོན་ཞེས་བྱའོ། །དེའི་འཁོར་རྙེད་པ་དང་བཀུར་སྟི་འདོད་པའི་རང་གི་འཁོར་གྱི་དགེ་འདུན་གང་ཡིན་པ་དེ་
༄༅། །དག་ནི༑ ཟློག་པར་བྱེད་དོ། །དེ་ལ་དགེ་འདུན་ཡང་རྣམ་པ་གསུམ་སྟེ། ཚུལ་ཁྲིམས་འཆལ་པ་དང་འདྲེས་པ་དང༌། བྱིས་པའི་དགེ་འདུན་དང༌། རང་བཞིན་གྱི་དགེ་
འདུན་ནོ། །དེ་ལ་ཚུལ་ཁྲིམས་འཆལ་པ་དང་འདྲེས་པའི་དགེ་འདུན་ནི། དེས་ཟློག་པར་བྱེད་དེ། ཚུལ་ཁྲིམས་འཆལ་པ་དང་འདྲེས་པའི་དགེ་འདུན་ཞེས་བྱ་བ་ནི། ཚུལ་ཁྲིམས་འཆལ་བ་རྣམས་
འབའ་ཞིག་དང་མཐུན་པར་བྱེད་དེ། དེ་དག་ཚར་གཅོད་པར་མི་བྱེད་ཅིང་ཟང་ཟིང་གི་ཕྱིར་དེ་དག་དང་ལྷན་ཅིག་ཏུ་སྤྱོད་པར་མཐུན་པར་བྱེད་པ་གང་ཡིན་པ་སྟེ། ཚུལ་ཁྲིམས་དང་ལྡན་དུ་ཟིན་
ཀྱང་དེ་དག་དང་ལྷན་ཅིག་ཏུ་གནས་པས་ཚུལ་ཁྲིམས་འཆལ་པ་ཁོ་ན་ཡིན་པའི་གྲངས་སུ་འགྲོ་བར་འགྱུར་རོ། །འདི་ནི། ཚུལ་ཁྲིམས་འཆལ་པ་དང་འདྲེས་པ་ཞེས་བྱ་སྟེ། དེའི་ཚུལ་མེད་པ་ཟློག་
པར་བྱེད་པའི་ཕྱིར་སློབ་དཔོན་ཞེས་བྱའོ། །བྱིས་པའི་དགེ་འདུན་ཞེས་བྱ་བ་ནི། དགོན་པ་དང༌། བསོད་ནམས་ཞན་པ་དང༌། རྨུགས་པ་རྣམས་ཡིན་ཏེ། སྐབས་དབྱེ་བ་དང༌། གསོ་སྦྱོང་
རྣམས་ཀྱི་དུས་སུ་རང་གི་འཁོར་ཉི་ཚེ་དག་བར་བྱེད་ཀྱི། ཚུལ་ཁྲིམས་འཆལ་པ་རྣམས་དག་པར་མི་བྱེད་པར་དེ་དག་དང་ལྷན་ཅིག་ཏུ་འདྲེ་བར་གནས་པ་དེ་ནི། བྱིས་པའི་དགེ་འདུན་ཞེས་བྱ་སྟེ།
རྨུགས་པ་དེ་དག་གི་ཚུལ་མ་ཡིན་པ་སེལ་བར་བྱེད་པའི་ཕྱིར་སློབ་དཔོན་ཞེས་བྱའོ། །རང་བཞིན་གྱི་དགེ་འདུན་ནི། བདུད་བྱེ་བ་སྙེད་ཀྱིས་ཀྱང་མི་ཤིགས་པ་ཡིན་ཏེ། དེ་ནི། བྱང་ཆུབ་སེམས་
དཔའི་དགེ་འདུན་རང་བཞིན་གྱིས་རྣམ་པར་དག་པའོ། །ཚུལ་ཁྲིམས་འཆལ་བའི་དགེ་འདུན་རྣམ་པ་གཉིས་ཟློག་པར་བྱེད་པ་གང་ཡིན་པ་དེ་དག་ནི། སློབ་དཔོན་ཞེས་བྱའོ། །འདུལ་བ་འཛིན་པ་ཞེས་བྱ་
བ་ནི། གདུལ་བར་བྱ་བའི་དབང་གིས་བསླབ་པའི་གཞི་དེ་དང་དེ་དག་ཤེས་ཏེ། རྔམས་ཆེན་པོའང་ཤེས་སོ། །རྔམས་ཆུང་དུའང་ཤེས་སོ། །འདུལ་བ་མ་ཡིན་པ་ནི། བཙན་པར་མི་བྱེད་དོ། །
འདུལ་བ་ནི། བཙན་པར་བྱེད་དོ། །འདུལ་བར་བྱ་བའི་དབང་ཇི་ལྟར་ཤེས་ཤེ་ན། བྱང་ཆུབ་སེམས་དཔའ་གདུལ་བར་བྱ་བའི་དབང་གིས་གྲོང་ཁྱེར་དུ་འགྲོ་བ་ཡོད་དོ། །དེ་ནི། བུད་མེད་དང༌།
གར་མཁན་མོའི་འདུན་ཁང་དང༌། ཡུགས་ས་མོའི་ཁྱིམ་དང༌། སྨད་ཚོང་མའི་མ་གཏོགས་པར་ཁྱིམ་གྱི་ནང་ངམ། འདུན་ཁང་གང་དུ་འགྲོ་འདོད་ཀྱང་རུང་སྟེ། དེ་ལ་དེར་འགྲོ་བའི་དུས་ངེས་པ་
མེད་དོ༑ ༑བྱང་ཆུབ་སེམས་དཔའི་དགེ་སློང་གིས་ནི། ལོ་གྲངས་མང་པོར་ཡང་གྲོང་ཁྲོད་དུ་རྒྱུ་བར་བཟོད་ཀྱི། ཉན་ཐོས་ཀྱི་དགེ་སློང་གིས་ནི། མི་བཟོད་དོ། །རྔམས་ཆེན་པོ་དང༌། རྔམས་ཆུང་དུ་ཇི་ལྟར་
ཤེས་ཤེ་ན། རྔམས་ཆེན་པོ་ཞེས་བྱ་བ་ནི། དེ་བཞིན་གཤེགས་པས་དོན་གྱི་དམིགས་བྱུང་བ་གང་གཟིགས་ན་ནི། དེ་ལྟར་གཟིགས་པའི་འོག་ཏུ་ཕས་ཕམ་པ་བཞི་པོ་འདི་ལྟ་བུ་ཕྱིན་ཆད་མ་བྱེད་
ཅིག །གལ་ཏེ་ཁྱེད་ཀྱིས་བྱས་ན། རབ་ཏུ་འབྱུང་དུ་མེད་པར་འགྱུར་རོ། ཞེས་བསླབ་པའི་གཞི་འཆའ་བར་མཛད་པ་དེ་ནི། རྔམས་ཆེན་པོ་ཞེས་བྱའོ། །རྔམས་ཆུང་ངུ་ཞེས་བྱ་བ་ནི། འདི་ན་ལ་
༄༅། །ལ་ཞིག་གིས་དོན་གྱི་དམིགས་བྱུང་བ་གཅིག་ཅིག་བྱས་ལ། བསླབ་པའི་གཞི་དེ་དམ་པོར་མ་བྱས་པ་དེ་བཞིན་གཤེགས་པས་ལན་གསུམ་གྱི་བར་དུ་གཟིགས་
ཀྱང་བསླབ་པའི་གཞི་གཞན་འཆའ་བར་མཛད་དེ། དེ་ནི། ཕྱིར་གསོ་བ་ཚང་བ་ཞེས་བྱ་སྟེ། རྔམས་ཆུང་དུ་ཞེས་བྱའོ། །དེའང་ལྷག་མ་དང་བཅས་པའི་འདུལ་བ་ནི། བཙན་པར་བྱེད་དོ། །
རུང་བ་མ་ཡིན་པའི་སྦྱིན་པའི་ཕན་ཡོན་གང་ལས་འབྱུང་བའི་འདུལ་བ་དེ་ནི། བཙན་པར་མི་བྱེད་དོ། །འདུལ་བ་ལ་སློབ་པར་བྱེད་དོ། །ཚུལ་ཁྲིམས་འཆལ་བ་ནི། ཚུལ་ཁྲིམས་སྤངས་
ལ་ཆོས་གོས་རྣམས་དང་བཅས་ཤིང་གཞོན་ནུ་ཆེན་པོ་ཡིན་ནོ། །དེ་ནི། དེའི་འདུལ་བའང་བཙན་པར་མི་བྱེད་ལ་གང་འདུལ་བ་ལ་སྣང་བ་དེ་ལ་དེ་མཆོག་ཏུ་ཆོག་ཤེས་པར་བྱེད་དོ། །སངས་
རྒྱས་ཀྱི་གསུང་རབ་ལས་གང་རྐྱེན་དུ་འཚམ་པ་སྟོན་པར་བྱེད་དོ། །དེ་ལས་བཏུས་པ་དེ་ལའང་འདུལ་བ་ཞེས་ང་ཟེར་ཏེ། དེ་ནི། འདུལ་བ་འཛིན་པ་ཡིན་ནོ། །ཡི་གེ་གཅིག་ཀྱང་ཤེས་ཏེ། གང་
ཡི་གེ་གཅིག་ཤེས་པ་དེ་ལྟ་བུ་ནི། འཇིག་རྟེན་ན་འདུལ་བ་འཛིན་པ་ཡིན་ཏེ། འདི་ནི། མདོ་སྡེ་བ་འདུལ་བ་འཛིན་པ་ཞེས་བྱའོ། །དེ་ལྟར་ན། དེ་བཞིན་གཤེགས་པའི་བསྟན་པ་ནི། དཔག་
ཏུ་མེད་དོ། །དེ་བཞིན་གཤེགས་པ་ནི། བསམ་གྱིས་མི་ཁྱབ་བོ། །གསོལ་པ། བཅོམ་ལྡན་འདས། དེ་བཞིན་གཤེགས་པ་ལྟ་ལགས་ཀྱང་བསམ་གྱིས་མི་ཁྱབ་ལགས། རྟག་པ་དང༌།
བརྟན་པ་དང༌། ཐེར་ཟུག་དང༌། ཞི་བ་ལགས་ཏེ། བསམ་གྱིས་མི་ཁྱབ་བོ། ཞེས་གཞན་དག་ལའང་བསྟན་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་བ། འོད་སྲུང་ཆེན་པོ་དང་རུས་
གཅིག་པ། ལེགས་སོ། །ལེགས་སོ། །དེ་བཞིན་གཤེགས་པ་ནི། རྡོ་རྗེ་ལྟར་མི་ཤིགས་པའི་སྐུ་འཛིན་པ་ལ་ཞུགས་པ་ཡིན་ཏེ། དེ་ལྟར་ཡང་དག་པའི་ལྟ་བ་དང༌། བསླབ་པ་ལ་གུས་པར་བྱའོ། །
དེ་བཞིན་གཤེགས་པ་རྡོ་རྗེ་ལྟར་མི་ཤིགས་པའི་སྐུ་དང་ལྡན་པར་ཡང་དག་པར་ལྟ་བའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི། ཇི་ལྟར་མེ་ལོང་གི་ངོས་ལ་རང་བཞིན་གྱི་གཟུགས་
བརྙན་སྣང་བ་དེ་བཞིན་དུ་དོན་དམ་པའི་སྐུ་གསལ་བར་མཐོང་ངོ༌། རྡོ་རྗེ་ལྟར་མི་ཤིགས་པའི་སྐུའི་ཕུང་པོའི་ལེའུ་ཞེས་བྱ་སྟེ། གཉིས་པའོ།། །།རིགས་ཀྱི་བུ། གཞན་ཡང་ད་ནི།
མདོ་འདིའི་མིང་དང༌། ཡོན་ཏན་དང༌། ཚུལ་ཡང་དག་པར་གཟུང་བར་གྱིས་ཤིག །མདོ་འདིའི་མདི་ཐོས་ན། སེམས་ཅན་རྣམས་འགྲོ་བ་བཞིར་འགྲོ་བར་འགྱུར་པ་དེ་ནི། མི་སྲིད་དེ། མདོ་ཆེན་
པོ་འདིའི་ཡོན་ཏན་དང་ཚུལ་སངས་རྒྱས་མང་པོས་བསྟན་པ་དེ་ལྟ་བུ་ངས་བསྟན་པར་བྱའོ། །གསོལ་བ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཇི་ལྟར་མདོ་འདིའི་མིང་ཡང་དག་པར་
འཛིན་པ་ལགས། ཇི་ལྟར་མདོ་འདིའི་མིང་འཛིན་པའི་གྲངས་སུ་གཏོགས་པ་ལགས། བཀའ་སྩལ་བ། མདོ་འདི་ནི། ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་སྟེ། ཚངས་པར་སྤྱོད་པ། ཐོག་མར་
༄༅། །དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་བ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། རྡོ་རྗེ་ལྟ་བུའི་
གཏེར་དང༌། ཆེ་བར་གྲགས་པ་ཡིན་ནོ། །རིགས་ཀྱི་བུ། དཔེར་ན། གངྒཱ་དང༌། ཡ་མུ་ན་ལ་སོགས་པ་ཆུ་ཀླུང་བརྒྱད་ནི། རྒྱ་མཚོ་ཆེན་པོ་ཁོ་ནར་འབབ་པ་དེ་བཞིན་དུ། ཉོན་མོངས་པ་རྣམ་པ་སྣ་ཚོགས་
བྱེ་བ་སྙེད་ཀྱི་རང་བཞིན་གྱི་བདུད་ལ་སོགས་པ་བདུང་ཐམས་ཅད་ལས་རྣམ་པར་རྒྱལ་བ་ནི། ཡོངས་སུ་མྱ་ངན་ལས་འདས་པ་ཆེན་པོ་ལུས་འདོར་ཞིང་འཆི་ལ་འདི་ཁོ་ན་ཉིད་དུ་འདུ་བར་འགྱུར་ཏེ།
དེ་བས་ན། ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །གཞན་ཡང་དཔེར་ན། སྨན་དཔྱད་རིག་པ་གསུམ་ལ་སོགས་པའི་རིག་པ་རྣམས་ནི། རང་རང་གི་རྒྱུད་ཕྱི་མ་ཁོ་ནའི་ཁོངས་སུ་
འདུ་བར་འགྱུར་བ་དེ་བཞིན་དུ་དེ་བཞིན་གཤེགས་པས་གསུངས་པའི་དགོངས་པའི་ཚིག་གསང་བའི་ཆོས་ཀྱི་སྒོ་རྣམ་པ་སྣ་ཚོགས་ཐམས་ཅད་ཀྱང་ཡོངས་སུ་མྱ་ངན་ལས་འདས་པ་ཆེན་པོ་ཁོ་ནའི་
ཁོངས་སུ་འདུ་བར་འགྱུར་བས་ན། དེའི་ཕྱིར་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །དཔེར་ན། དབྱར་གྱི་དུས་སུ་ཞིང་པས་གཤོལ་ཆེན་པོས་རྨོས་ཏེ་ས་བོན་བཏབ་ནས་ས་བོན་
འགྲུབ་པར་འདོད་ལ། གྲུབ་ནས་ནི། ཐམས་ཅད་གྲུབ་པའི་མཐར་ཐུག་པ་དེ་ཡིན་པའི་ཕྱིར་འདོད་པ་མེད་པར་འགྱུར་བ་དེ་བཞིན་དུ་སེམས་ཅན་རྣམས་ཀྱིས་མདོ་ཐམས་ཅད་ཀྱི་ཏིང་ངེ་འཛིན་
བསྒོམས་ཟིན་ནས་ཀྱང་མདོ་གཞན་གྱི་བཅུད་འདོད་པར་བྱེད་ལ། མདོ་འདིའི་བཅུད་ནི། ཐམས་ཅད་གྲུབ་པའི་མཐར་ཐུག་པ་དང༌། འདིས་སེམས་ཅན་ཐམས་ཅད་སྲིད་པ་ཐམས་ཅད་ལས་བརྒལ་བར་
འགྱུར་བ་ཡིན་ནོ། །རིགས་ཀྱི་བུ། དཔེར་ན། རྗེས་ཀྱི་སྣ་གྲངས་ཅིའང་རུང་བ་དེ་དག་ཐམས་ཅད་ནི། གླང་པོའི་རྗེས་ཀྱི་ཁོངས་སུ་འདུ་བར་འགྱུར་ཏེ། གླང་པོ་ཆེའི་རྗེས་ནི། དེ་དག་གི་ནང་ན་མཆོག་ཅེས་
བྱ༑ རབ་མཆོག་ཅེས་བྱ། གཙོ་བོ་ཞེས་བྱ་བ་དེ་བཞིན་དུ། རིགས་ཀྱི་བུ། མདོ་འདིའི་ཏིང་ངེ་འཛིན་ཅིའང་རུང་བ་དེ་དག་ཐམས་ཅད་ནི། ཡོངས་སུ་མྱ་ངན་ལས་འདས་པ་ཆེན་པོ་ཁོ་ནའི་ཁོངས་སུ་འདུ་
བར་འགྱུར་ཏེ། མདོ་འདིའི་ཏིང་ངེ་འཛིན་ཐམས་ཅད་ཀྱི་ནང་ན་ཡོངས་སུ་མྱ་ངན་ལས་འདས་པའི་མདོ་ཆེན་པོ་མཆོག་ཅེས་བྱ། རབ་མཆོག་ཅེས་བྱ། །གཙོ་བོ་ཞེས་བྱའོ། །རིགས་ཀྱི་བུ། གཞན་ཡང་དཔེར་
ན༑ སྟོན་གྱི་དུས་སུ་ལོ་ཏོག་བཏབ་པ་ནི། རྨོས་ཐམས་ཅད་ཀྱི་མཆོག་ཅེས་བྱ། རབ་མཆོག་ཅེས་བྱ། གཙོ་བོ་ཞེས་བྱ་བ་དེ་བཞིན་དུ། ཡོངས་སུ་མྱ་ངན་ལས་འདས་པའི་མདོ་ཆེན་པོའི་རྟག་པ་ཉིད་ཀྱི་
གཤོལ་ཆེན་པོའི་རྨོས་པ་ནི། མདོ་ཐམས་ཅད་ཀྱི་མཆོག་ཅེས་བྱ། རབ་མཆོག་ཅེས་བྱ། གཙོ་བོ་ཞེས་བྱའོ། །དེ་བཞིན་དུ་ཐམས་ཅད་ལའང་སྦྱར་བ་བྱ་སྟེ། འདིར་དཀར་པོའི་ཕྱོགས་ཀྱི་ཐབས་དང་
སྦྱར་རོ༑ ༑ཉན་ཐོས་ཀྱི་ཐེག་པའི་ཡང་དག་པར་ལྡན་པའི་མདོའི་རྣམ་པར་དབྱེ་བའང་འདིར་སྦྱར་བར་བྱའོ། །རིགས་ཀྱི་བུ། གཞན་ཡང་དཔེར་ན། མཁྲིས་པ་རྒྱས་པའི་ནད་ཀྱིས་ཐེབས་པ་ལ་ནི། མར་དང༌།
༄༅། །མངར་བ་བརྒྱད་ཀྱི་སྨན་འབའ་ཞིག་ལྷག་པར་ཕན་པ་དེ་བཞིན་དུ། དེ་བཞིན་གཤེགས་པའི་དགོངས་པའི་ཚིག་གི་མཁྲིས་བ་རྒྱས་པའི་ནད་ཀྱིས་ཟིན་པ་ལའང་ཐེག་པ་
ཆེན་པོའི་མདོ་སྡེ་དང༌། མྱ་ངན་ལས་འདས་པ་ཆེན་པོའི་མངར་བ་བརྒྱད་ཀྱི་སྨན་འབའ་ཞིག་ལྷག་པར་ཕན་ཏེ། འདིར་མངར་བ་བརྒྱད་གང་ཞེ་ན། རྟག་པ་དང༌། བརྟན་པ་དང༌། ཐེར་ཐུག་དང༌། ཞི་
བ་དང༌། བསིལ་བའི་རང་བཞིན་དང༌། རྒ་བ་མེད་པ་དང༌། འཆི་བ་མེད་པ་དང༌། དྲི་མ་མེད་པ་དང༌། བདེ་བ་སྟེ། འདི་རྣམས་ནི། འདིར་མངར་བ་བརྒྱད་ཅེས་བྱ་སྟེ། གང་གི་ཕྱིར་མངར་བ་ཆེན་པོ་ཡིན་པས་
ན༑ དེའི་ཕྱིར་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མིང་དང༌། ཡོན་ཏན་དང༌། ཚུལ་དེ་ལ་གནས་ན། ཡོངས་སུ་མྱ་ངན་ལས་
འདས་པ་རྣམ་པ་དུ་མ་སྟོན་ཏེ། དེ་བས་ན། ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །རིགས་ཀྱི་བུའམ། རིགས་ཀྱི་བུ་མོ་ཡོངས་སུ་མྱ་ངན་ལས་འདས་པ་ཆེན་པོ་འདིས་མྱ་ངན་ལས་
འདའ་བར་འདོད་པས་ནི། དེ་བཞིན་གཤེགས་པ་དང༌། ཆོས་དང༌། དགེ་འདུན་རྟག་གོ །ཞེས་བྱ་བ་ལ་བརྩོན་པར་བྱའོ། །རིགས་ཀྱི་བུའམ། རིགས་ཀྱི་བུ་མོ་ཡོངས་སུ་མྱ་ངན་ལས་འདས་
པ་ཆེན་པོའི་སྤྱད་པ་སྤྱོད་པར་འདོད་པས་ནི། དེ་བཞིན་གཤེགས་པ་རྟག་གོ །ཞེས་བྱ་བ་ལ་བརྩོན་པར་བྱའོ། །གསོལ་པ། ཀྱེ་མ་བཅོམ་ལྡན་འདས། དེ་བཞིན་གཤེགས་པ་བསམ་གྱིས་མི་
ཁྱབ་ལགས་སོ། །ཆོས་བསྟན་པ་བསམ་གྱིས་མི་ཁྱབ་ལགས་སོ། །དགེ་འདུན་ཡོན་ཏན་གྱི་ཚེགས་དང་ལྡན་པ་བསམ་གྱིས་མི་ཁྱབ་ལགས་སོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་
མདོ་འདིའང་བསམ་གྱིས་མི་ཁྱབ་ལགས་སོ། །འདི་ལ་གང་དག་བཀའ་བཞིན་དུ་བྱེད་པ་དེ་དག་ནི། ཡང་དག་པར་འཛིན་པའི་སེམས་ཅན་ལགས་སོ། །དེ་དག་ནི། མཆོད་རྟེན་ལྟ་བུ་ལགས་སོ། །
གཞན་ནི། མྱ་ངན་དུ་བགྱི་བ་ལགས། མིང་ཤེས་པའི་དགོན་པ་ན་འཁོད་པ་ལགས་སོ། །མདོའི་མིང་གི་གཏན་ཚིགས་དང༌། ཡོན་ཏན་གྱི་ཚུལ་གྱི་ལེའུ་ཞེས་བྱ་སྟེ། གསུམ་པའོ།། །།
རིགས་ཀྱི་བུ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། མྱ་ངན་ལས་འདས་པ་ཆེན་པོའི་མདོ་ཆེན་པོ་ལས་ཆོས་ཀྱི་སྣ་གྲངས་རྣམ་པ་བཞི་སྟོན་པར་བྱེད་དེ། སྣ་གྲངས་རྣམ་པ་
བཞི་གང་ཞེ་ན། རང་གི་ལྷག་པའི་བསམ་པ་ཞེས་བྱ་བ་དང༌། གཞན་གྱི་ལྷག་པའི་བསམ་པ་ཞེས་བྱ་བ་དང༌། འདྲི་བའི་དབང་ཞེས་བྱ་བ་དང༌། དོན་གྱི་དམིགས་བྱུང་བའི་དབང་ཞེས་བྱ་བ་སྟེ། བཞི་
པོ་ནི། དེ་དག་ཡིན་ནོ། །དེ་ལ་རང་གི་ལྷག་པའི་བསམ་པ་ཞེས་བྱ་བ་ནི། དེ་བཞིན་གཤེགས་པས་གང་ལ་གཟིགས་ནས་ཆོས་སྟོན་པར་མཛད་པ་སྟེ། དཔེར་ན། ཤིང་གི་ཕུང་པོ་འབར་ཞིང་སྣང་
བར་གྱུར་བ་གཟིགས་ནས་དགེ་སློང་དག །གང་དག་དེ་བཞིན་གཤེགས་པ་ལས་གསང་བ་སྣ་ཚོགས་ཐོས་ན། འདི་ནི། བདུད་ཀྱིས་སྨྲས་པ་ཡིན་ནོ། །ཞེས་གཞན་དག་ལ་ཟེར་ཞིང༌། རང་བཟོའི་ཚིག་
༄༅། །འབྲུ་སྣ་ཚོགས་རྣམས་ལ་དེ་བཞིན་གཤེགས་པས་གསུངས་པ་ཡིན་ནོ། །ཞེས་བྱས་ནས་སངས་རྒྱས་བཅོམ་ལྡན་འདས་དང༌། ཆོས་དང༌། དགེ་སློང་གི་དགེ་འདུན་ནི།
མི་རྟག་གོ །ཞེས་ཟེར་བ་བས་ནི། ཤིང་གི་ཕུང་པོ་འབར་བ་འདི་ལ་ཀུན་ནས་རེག་ཅིང་པང་དུ་བླངས་ཀྱང་བླའོ། །གང་དག་བདུད་ཀྱིས་སྨྲས་པའོ། །ཞེས་ཟེར་བ་དང༌། གང་དག་ཕྱིན་ཅི་ལོག་གི་
ཆོས་དེ་འཛིན་པར་བྱེད་པ་དེ་དག་ནི། བརྫུན་དུ་སྨྲ་བའོ། །དེ་བཞིན་གཤེགས་པ་མི་རྟག་གོ། ཞེས་བྱ་བའི་ཚིག་སྨྲ་བ་བས་ནི། ཤིང་གི་ཕུང་པོ་འབར་བ་འདི་ལ་ལྕེས་ཀུན་ནས་རེག་པར་བྱས་
ཏེ་ཤིའང་བླའི། ཚིག་དེ་ནི། མཉན་པར་ཡང་མི་བྱའོ། །དེ་བཞིན་གཤེགས་པ་རྟག་པའོ། །ཞེས་འདོགས་མི་ནུས་པ་དེ་དག་ནི། མྱ་ངན་དུ་བྱ་བ་ཡིན་ནོ། །སངས་རྒྱས་བཅོམ་ལྡན་འདས་
ནི༑ བསམ་གྱིས་མི་ཁྱབ་བོ། །དེ་བཞིན་དུ་དེའི་རྗེས་སུ་བསྟན་པ་དང༌། ཉན་ཐོས་ཀྱི་དགེ་འདུན་ཡང་བསམ་གྱིས་མི་ཁྱབ་པོ། །སྙམ་དུ་གཟུང་བར་བྱའོ། །དེ་ལ་སོགས་པ་ཤིང་གི་ཕུང་པོ་
འབང་བ་ཞེས་བྱ་བ་མན་ཆད་ནི། རང་གི་ལྷག་པའི་བསམ་པ་ཞེས་བྱ་བའི་སྣ་གྲངས་སོ། །གཞན་གྱི་ལྷག་པའི་བསམ་པ་ཞེས་བྱ་བ་ནི། བཅོམ་ལྡན་འདས་ཆོས་སྟོན་ཅིང་བཞུགས་པ་ན་བུད་
མེད་གཞོན་ནུ་གསར་དུ་བུ་བྱུང་བ་ལ་ལ་ཞིག་བཅོམ་ལྡན་འདས་ཀྱི་ཐད་དུ་འོངས་ནས་ཕྱོགས་གཅིག་ཏུ་འདུག་སྟེ་སེམས་ཤིང་འདུག་གོ། དེ་ནས་བཅོམ་ལྡན་འདས་ཀྱིས་དེའི་བསམ་པ་ཐུགས་སུ་
ཆུད་ནས་ཆོས་སྟོན་པར་མཛད་དེ། དཔེར་ན། བུད་མེད་བུ་ལ་བྱམས་པའི་ཐབས་མཁས་པས་ཇི་ཙམ་འཇུ་ནུས་པའི་དྲོད་ཤེས་ནས་རང་གི་མཛུབ་མོའི་ཐོར་ཏོས་བདག་གི་བུ་ཆུང་དུ་མར་བལྡག་ཏུ་
བཅུག་པ་བཞིན་ནོ། །ཞེས་གསུངས་སོ། །དེ་ནས་བུད་མེད་དེས་འདི་སྐད་ཅེས་གསོལ་ཏོ། །ཀྱེ་མ། བཅོམ་ལྡན་འདས་ཀྱིས་ནི། བདག་གི་སེམས་ཀྱི་རྟོག་པ་ཐུགས་སུ་ཆུད་ནས་ལྷག་ཆད་མེད་པར་
བཀའ་སྩལ་ཏེ། བདག་སློབ་ཏུ་སྩལ་བ་ཁོ་ན་བཞིན་ལགས་སོ། །བཅོམ་ལྡན་འདས། བདག་གིས་དེང་བྱིས་པ་ལ་མཛུབ་མོའི་ཐོར་ཏོས་ཆབ་མར་སྩལ་བ་དྲག་པར་འགྱུར་ཏེ། དེས་ན། འདི་མ་ཞུ་
བར་གྱུར་ལགས་སོ། །བཅོམ་ལྡན་འདས། ཅི་ལགས། བདག་གི་ཁྱེའུ་འདི་ཚེ་རིང་བར་འགྱུར་རམ། འོན་ཏེ་ཚེ་ཐུང་བར་འགྱུར་བ་བཅོམ་ལྡན་འདས་དེ་བཞིན་གཤེགས་པས་བསྟན་དུ་གསོལ། བཀའ་
སྩལ་པ། ཁྱོད་ཀྱི་བུ་འདི་བདེ་བ་དང་ལྡན་ཞིང་ཚེ་རིང་བར་འགྱུར་རོ། །དེ་ནས་བུད་མེད་དེ་མགུ་བར་གྱུར་ནས་གསོལ་པ། ཁྱོད་ཀྱི་བདེན་པའི་ཚིག་གིས་བདག་ཤིན་ཏུ་མགུ་ལགས་སོ། །དེ་ལྟར་དེ་བཞིན་
གཤེགས་པ་ནི། གདུལ་བར་བྱ་བའི་དབང་ལ་གཟིགས་ཤིང་འཇུ་བ་དང་མི་འཇུ་བའི་ཉམ་སྟོབས་དང་སྦྱར་ནས་ཆོས་ཐམས་ཅད་བདག་མེད་པ་དང༌། སྡུག་བསྔལ་བར་སྟོན་པར་མཛད་དོ། །གལ་ཏེ་
བཅོམ་ལྡན་འདས་ཀྱིས་སྟོབས་ཆེ་ཆུང་དང་མ་སྦྱར་བར་སེམས་ཅན་རྣམས་ལ་རྟག་པའི་གསང་བ་བསྟན་པ་ལགས་ན། ཆབ་མར་མ་ཞུ་བ་དང་འདྲ་བར་སེམས་ཅན་རྣམས་ཆབ་འཚལ་བར་འགྱུར་ལགས་
༄༅། །སོ༑ ༑བཀའ་སྩལ་པ། ཆེ་ཞེ། ལེགས་སོ། །ལེགས་སོ། །རིགས་ཀྱི་བུ་མོས་ནི། དེ་ལྟར་བྱ་དགོས་སོ། །ཆེ་ཞེ། གཞན་ཡང་གང་གི་ཚེ་ཁྱོད་ཀྱི་བུ་གོམ་པ་འདོར་ནུས་པར་
གྱུར་པ་དེའི་ཚེ་ཁ་ཟས་སྣུམ་པ་གང་དང་གང་བྱིན་པ་དེ་དང་དེ་འཇུ་ནུས་པར་འགྱུར་རོ། །བཅོམ་ལྡན་འདས། དེ་ནི། བཀའ་མད་དོ། །བཀའ་སྩལ་པ། ཅི་དང་བོའི་ཟས་ཀྱིས་མགུ་བར་འགྱུར་རམ།
གསོལ་པ། བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། ཆེ་ཞེ། དེ་བཞིན་དུ་གང་གི་ཚེ་ངའི་ཉན་ཐོས་རྣམས་ཀྱིས་བྱིས་པ་ཆུང་དུ་ཉུང་དུ་ཟ་བ་དང་འདྲ་བ་དེའི་ཚེ་ང་མར་དང་འདྲ་
བ་སྡུག་བསྔལ་དང༌། མི་རྟག་པ་དང༌། སྟོང་པ་དང༌། བདག་མེད་པའི་དོན་དུ་སྟོན་ཏོ། །གང་གི་ཚེ་ཁྱོད་ཀྱི་བུ་སྐྱེས་པ་བཞིན་དུ་ཉན་ཐོས་ཆེན་པོར་གྱུར་ཏེ། སྟོབས་ཆེར་སྐྱེས་ཤིང་ཐེག་
པ་ཆེན་པོ་འདོད་པར་གྱུར་པ་དེའི་ཚེ་ནི། ངའང་རོ་དྲུག་དང་ལྡན་པའི་ཁ་ཟས་ཆེན་པོ་དང་འདྲ་བའི་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་སྟོན་ཏོ། །དེ་ལ་རོ་དྲུག་པོ་རྣམས་གང་
ཞེ་ན༑ སྡུག་བསྔལ་གྱི་སྐྱུར་དང༌། མི་རྟག་པའི་ལན་ཚྭ་དང༌། བདག་མེད་པའི་ཚ་བ་དང༌། བདེ་བའི་མངར་བ་དང༌། བདག་ཡོད་པའི་བསྐ་བ་དང༌། རྟག་པའི་ཁ་བ་རྣམས་ཏེ། རོ་དྲུག་པོ་འདི་
རྣམས་ཉོན་མོངས་པའི་བུད་ཤིང་དང༌། སྒྱུ་མའི་མེས་བཙོས་པའི་ཟས་ཡོངས་སུ་མྱ་ངན་ལས་འདས་པ་ཆེན་པོའི་དེ་ཁོ་ན་ཉིད་ཀྱི་འབྲས་ཆན་ཞིམ་པོ་ངའི་ཉན་ཐོས་རྣམས་ཟ་བར་འགྱུར་རོ། །
ཆེ་ཞེ། གཞན་ཡང་དབེར་ན། ཁྱོད་གཞན་གྱིས་བོས་སམ། གཞན་གྱི་གཙུག་ཕུད་བཅའ་བའི་ཕྱིར་གྲོང་གཞན་དུ་འགྲོ་བར་འདོད་པ་ན་བུ་ངན་པ་རྣམས་བོར་ཏེ་བུ་བཟང་པོ་རྣམས་བླངས་ནས་གཏེར་
གསང་བ་རྣམས་སྟོན་པར་བྱེད་དམ། བཅོམ་ལྡན་འདས། དེ་ནི། བཀའ་མད་དེ། བུ་ངན་པ། ཚུལ་མ་མཆིས་པ། ནོར་གྱི་སྐལ་བ་ཅན་མ་ལགས་པ་དེ་དག་ལ་ནི། བདག་ནོར་སྟོན་པར་མི་
བགྱིད་ལགས་ཀྱི། བདག་ནི། བུ་བཟང་པོ། །ཁྱིམ་སོ་འཛིན་པ། ཁྱིམ་གྱི་དོན་སྒྲུབ་པ། རྫས་བསྟན་པར་འོས་པ་དེ་དག་ལ་སྟོན་པར་བགྱིད་ལགས་སོ། །བཀའ་སྩལ་པ། ཆེ་ཞེ། དེ་བཞིན་དུ་
གང་གི་ཚེ་ཡོངས་སུ་མྱ་ངན་ལས་འདས་པ་ཆེན་པོར་འགྲོ་བའི་བྱ་བ་བྱེད་པ་དེའི་ཚེ་དེ་བཞིན་གཤེགས་པ་གསང་བ་སྣ་ཚོགས་ཀྱི་དགོངས་པའི་ཚིག་མ་ལུས་པར་ཉན་ཐོས་རྣམས་ལ་སྟོན་ཏེ། དེར་སྲས་
རྣམས་ལ་དད་པ་སྦྱིན་པར་མཛད་དོ། །ཆེ་ཞེ། དཔེར་ན། ཁྱོད་བྱེས་སུ་སོང་བ་ན་བུ་ངན་པ་རྣམས་ཁྱོད་མ་ཤི་བར་ཤིའོ། །སྙམ་དུ་སེམས་སམ། བཅོམ་ལྡན་འདས། དེ་ནི། བཀའ་མད་དོ། །བཀའ་
སྩལ་པ༑ དེ་ནས་ཁྱེད་ཕྱིར་འོངས་པ་དེ་དག་གིས་མཐོང་བ་དེ་བཞིན་དུ་ཆེ་ཞེ། ང་ལ་མི་རྟག་གོ། སྙམ་དུ་འདུ་ཤེས་མ་བྱེད་ཅིག །དེང་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་འགྱུར་རོ། །
ཞེས་ཤི་བའི་འདུ་ཤེས་བཞིན་དུ་དེ་ལྟར་མ་འཛིན་ཅིག །གང་དག་རྟག་ཏུ་དེ་བཞིན་གཤེགས་པ་རྟག་པ་དང༌། བརྟན་པ་དང༌། ཐེར་ཟུག་པའོ། །སྙམ་དུ་འཛིན་པ་དེ་དག་གི་ཁྱིམ་ན་ནི། དེ་བཞིན་གཤེགས་
༄༅། །པ་བཞུགས་ཏེ། འདི་ནི། གཞན་གྱི་ལྷག་པའི་བསམ་པ་ཞེས་བྱའོ། །འདྲི་བའི་དབང་ཞེས་བྱ་བ་ནི། འདི་ན་ལ་ལ་ཞིག་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ལ་ཞུ་བར་བྱེད་དེ། བཅོམ་ལྡན་འདས། ཇི་ལྟར་བགྱིས་ན། བདག་གིས་སུ་ལའང་ཅིའང་མ་སྩལ་བར་འཇིག་རྟེན་དུ་སྦྱིན་པ་པོར་གྲགས་པའི་གཏམ་སྙན་པ་ཐོབ་པར་
འགྱུར་ལགས། དེ་བཞིན་གཤེགས་པས་དེ་ལ་དེ་སྐད་ཅེས་བཀའ་སྩལ་ཏོ། །ཆགས་པ་མེད་པ་ལ་བྲན་དང༌། བྲན་མོ་བླང་བར་སྟོབས་ཤིག །གཏན་དུ་ཚངས་པར་སྤྱོད་པ་ལ་བུ་མོའི་སྦྱིན་པ་
གྱིས་ཤིག །ཤ་མི་ཟ་བ་ལ་ཤ་ཟར་ཆུ་གཅིག །ཆང་མི་འཐུང་བ་ལ་ཆང་འཐུང་ངུ་ཆུག་ཅིག །ངུས་སུ་ཟ་བ་ལ་དུས་མ་ཡིན་པར་ཟས་བྱིན་ཅིག །མེ་ཏོག་ཕྲེང་དང༌། རྒྱན་མི་ཐོགས་པ་ལ་ཕྱེ་མ་དང༌།
སྤོས་དང༌། མེ་ཏོག་དང༌། བདུག་པ་རྣམས་བྱིན་ཅིག །དེ་དག་གི་དུས་ཤེས་པར་གྱིས་ལ་མགྲོན་དུ་བོས་ཤིག་དང༌། ཁྱོད་ཀྱིས་དེ་ལྟར་བྱས་ན། འཇིག་རྟེན་འདིར་སྦྱིན་བདག་གི་རྒྱལ་པོ་ཡིན་ནོ། །
ཞེས་གྲགས་པ་ཆེན་པོར་འགྱུར་ཏེ། བསོད་ནམས་འཕེལ་བར་ནི། མི་འགྱུར་རོ། །འཕགས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ། །བམ་པོ་ལྔ་པ། དེ་ནས་འོད་
སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །ཤ་མི་འཚལ་བ་ལ་གཟུང་བ་ནི། ཆེད་ཆེར་བགྱི་བ་ལགས་ན། ཤ་མི་འཚལ་བ་ལའང་འཚལ་དུ་སྩལ་ན། ནོངས་པར་མི་
འགྱུར་ལགས་སམ། བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །ཁྱོད་ཀྱིས་ངའི་དགོངས་པ་རིག་སྟེ། དམ་པའི་ཆོས་སྲུང་བས་ནི། དེ་ལྟར་བྱ་དགོས་སོ། །རིགས་ཀྱི་བུ། ད་ཕྱིན་
ཆད་ངའི་ཉན་ཐོས་རྣམས་ཤ་ཟ་བར་མི་གནང་ངོ༌། །ཡུལ་འཁོར་གྱི་བསོད་སྙོམས་ནི། བུའི་ཤ་དང་འདྲའོ། །ཞེས་བྱ་ན། ཤ་བཟའ་བར་ངས་ཇི་ལྟར་གནང༌། ཤ་ཟ་བ་ནི། བྱམས་པ་ཆེན་པོ་
ཆད་པར་འགྱུར་རོ། །ཞེས་ངས་བསྟན་ཏོ། །གསོལ་པ། བཅོམ་ལྡན་འདས། འོ་ན་ཇི་ལྟར་མུ་གསུམ་ཡོངས་སུ་དག་པའི་ཤ་བཟའ་བར་གནང་ལགས། བཀའ་སྩལ་པ། མུ་གསུམ་ཡོངས་སུ་
དག་པ་འདི་ནི། ངས་རིམ་གྱིས་བསླབ་པའི་གཞི་བསྡམ་པའི་ཕྱིར་དེང་ངས་བོར་རོ། །གསོལ་པ། བཅོམ་ལྡན་འདས། ཅི་ལས་དགོངས་ཏེ་དོན་ཆེད་ཀྱི་མུ་དགུ་དང༌། ཤ་རྣམ་པ་བཅུ་སྤང་བ་བཀའ་
སྩལ་ལགས། བཀའ་སྩལ་པ། ཚིག་བཞག་པ་དེ་དག་ཀྱང་ཤ་མི་བཟའ་བར་བསྔམ་པའི་ཕྱིར་བཅད་དོ། །གསོལ་པ། བཅོམ་ལྡན་འདས་ཅི་ལས་དགོངས་ཏེ་ཤ་དང༌། ཉ་ཤ་བཟའ་བའང་ཁ་
ཟས་བཟང་པོར་གསུང་ལགས། བཀའ་སྩལ་པ། ངས་ནི། ཤ་དང༌། ཉ་ཤ་ཁ་ཟས་བཟང་པོར་མ་གསུངས་ཀྱི། ངས་ནི། བུར་རམ་ཤིང་དང༌། འབྲས་སཱ་ལུ་དང༌། འབྲུ་དང༌། གྲོ་དང༌། ནས་དང༌།
སྭན་སྡེའུ་དང༌། སྲན་གྲེའུ་རྣམས་དང༌། མངར་བག་ཁ་ར་དང༌། ལི་ཁ་ར་དང༌། སྦྲང་རྩི་དང༌། མར་དང༌། འོ་མ་དང༌། འབྲུ་མར་རྣམས་ཁ་ཟས་བཟང་པོར་གསུངས་པོ། ངས་ནི། ལུས་གཡོགས་
༄༅། །པའི་ཕྱིར་གོས་སྣ་ཚོགས་ཀྱང་ཁ་དོག་ངན་པར་བསྒྱུར་བར་བྱའོ། །ཞེས་བསྟན་ན། ཤ་བཟའ་བའི་རོ་ལ་ཆགས་པ་ལྟ་ཅི་སྨོས། གསོལ་པ། དེ་ལྟ་ན་ནི། བའི་བཅུད་
རྣམ་ལྔ་དང༌། ཏིལ་དང༌། འབྲུ་མར་ཤིང་གི་ཁུ་བ་དང༌། དུང་དང༌། ཟབ་དར་ལ་སོགས་པའང་ཁྲིམས་སུ་བཅའ་བའི་རིགས་ལགས་སོ། །བཀའ་སྩལ་པ། གཅེར་བུ་བའི་ལྟ་བ་མ་འཛིན་ཅིག །ད་
ནི༑ འདུ་ཤེས་གཞན་གྱིས་ད་ཁྱོད་ལ་བསླབ་པའི་གཞི་བཅའ་བར་བྱ་སྟེ། མུ་གསུམ་གྱི་ཤའང་མི་བཟའ་བར་བསྡམས་སོ། །དོན་ཆེད་དུ་བྱས་པ་ཁྱོད་ཀྱིས་རིག་པ་དེའང་བསྔམས་སོ། །
ཤ་རྣམ་པ་བཅུ་ལ་མ་གཏོགས་པ་དེའང་སྤངས་སོ། །ཤི་བའི་ཤའང་སྤངས་སོ། །ཤ་ཟ་བ་ནི། འགྲོའང་རུང༌། འདུག་ཀྱང་རུང་སྟེ། སྲོག་ཆགས་ཐམས་ཅད་དེའི་དྲི་ཚོར་ནས་དེས་འཇིགས་
ཏེ༑ དཔེར་ན། མིས་ཤིང་ཀུན་ནམ་སྒོག་པ་ཟོས་ན། མིའོ་ཅོག་གི་སེམས་མ་དད་པར་འགྱུར་ཞིང་མི་མཐུན་པར་འགྱུར་ལ། མི་མང་པོ་ཚོགས་པའམ། སྐྱེ་བོ་མང་པོས་གང་བའི་ནང་དུ་
སེམས་ཅན་དེ་དག་གིས་ཆེ་ག་མོ་ཞིག་གི་ཤ་ཟོས་སོ། །ཞེས་ཤེས་པ་དེ་བཞིན་དུ་སྲོག་ཆགས་ཐམས་ཅད་ཀྱིས་ཤ་ཟ་བའི་མི་ངོ་ཤེས་ཏེ། དེ་དག་གི་དྲི་ཚོར་ནས་འཆི་བའི་འཇིགས་པས་སྐྲག་
པར་འགྱུར་ཏེ། དེ་རྒྱུ་ཞིང་འགྲེ་བ་ན་ཆུ་དང༌། སྐམ་དང༌། ནམ་མཁའ་ལ་གནས་པའི་སྐྱེ་བོ་རྣམས་སྐྲག་སྟེ། བདག་ཅག་འདིས་གསད་དུ་འོང་ངོ༌། །སྙམ་ནས་འཁམས་ནས་ཀྱང་འཆི་བར་
འགྱུར་རོ། །རྒྱུ་དེ་དག་གིས་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤ་མི་ཞའོ། །གདུལ་བར་བྱ་བའི་དབང་གིས་ནི། ཤ་ཟ་བ་ལྟ་བུར་ཡང་སྟོན་མོད་ཀྱི། ཁ་ཟས་ཐ་མལ་པའང་མི་ཟ་ན། ཤ་
ལྟ་ཅི་སྨོས། རིགས་ཀྱི་བུ། ང་འདས་པའི་འོག་ཏུ་ལོ་བརྒྱ་ཕྲག་མང་པོ་འདས་པ་ན་རྒྱུན་དུ་ཞུགས་པ་དང༌། ལན་གཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་རྣམས་མེད་པར་གྱུར་ལ།
དམ་པའི་ཆོས་གཏན་ཞིག་པའི་ཚེ་དགེ་སློང་འདུལ་བ་དང་མ་མོ་འཛིན་པ། རྟོག་པ་སྣ་ཚོགས་ཅན། རང་གི་ལུས་གསོ་བར་བྱེད་པ། ཤ་སྣ་ཚོགས་གཅེས་པར་འཛིན་པ། ཁམས་འཁྲུགས་པ་དང༌།
བཀྲེས་པ་དང༌། སྐོམ་པས་གཟིར་བ། ཆ་ལུགས་འཇིགས་འཇིགས་ལྟར་འདུག་པ། བ་ལང་རྫི་འདྲ་བ། བྱ་བ་འདྲ་བ། ཆོས་གོས་ཚོན་ཅན་ཀྱི་རྟགས་འཆང་བ། བྱི་ལའི་བརྟུལ་ཞུགས་སྤྱོད་
པ༑ བདག་ནི། དགྲ་བཅོམ་པ་ཡིན་ནོ། །ཞེས་ཁས་འཆེ་བ། གནོད་པ་མང་པོས་ཉེན་པ། རང་གི་གཅིན་དང་ཕྱི་སས་ལུས་གོས་པ། ཐུབ་པ་བཞིན་དུ་ཆ་ལུགས་བཟང་པོར་འཆོས་པ། དགེ་སྦྱོང་མ་
ཡིན་པར་དགེ་སྦྱོང་ལྟར་འཆོས་པ། དམ་པའི་ཆོས་ལྟར་བཅོས་མའི་ཡི་གེ་འཆང་བ་དག་འབྱུང་བར་འགྱུར་ཏེ། དེ་དག་གིས་ངས་བཅས་པའི་འདུལ་བ་དང༌། ཆོ་ག་དང༌། སྤྱོད་ཡུལ་དང་ལྡན་པའི་
ཚུལ་དང༌། རུང་བ་མ་ཡིན་པ་ལ་ཆགས་པ་ལགས་རྣམ་པར་གྲོལ་བ། ཐར་བའི་དེ་ཁོ་ན་ཉིད་ཀྱི་ཡི་གེ་བཤིག་ནས་འདུལ་བ་དང༌། མདོ་སྡེ་སོ་སོ་ནས་ཅི་དགའ་མགུར་འཆོས་ཤིང་སྨྲ་བར་བྱེད་དེ། འདི་
༄༅། །ལྟར་བདག་ཅག་གི་འདུལ་བ་ལས་བཅོམ་ལྡན་འདས་ཀྱིས་ཤའི་བཅུད་ཀྱི་སྦྱིན་པ་ནི། རུང་བ་ཡིན་ནོ། །ཞེས་གསུངས་སོ། །ཞེས་ཟེར་ཞིང༌། ཤཱཀྱའི་བུའི་དགེ་
སྦྱོང་རྣམས་བདག་ཉིད་ཀྱིས་རང་བཟོར་བྱེད་ཅིང་འགལ་བར་སྨྲ་བ་དག་འབྱུང་བར་འགྱུར་རོ། །རིགས་ཀྱི་བུ། གཞན་ཡང་རུང་བ་མ་ཡིན་པའི་འབྲས་རྗེན་པ་དང༌། ཤ་དང་ཉ་ཤ་ལེན་པ་དང༌།
སྣམས་སུ་སྦྱོར་བ་དང༌། འབྲུ་མར་གྱི་སྣོད་དང༌། གདུགས་བྱེད་པ་དང༌། ལྷམ་བྱེད་པ་དང༌། རྒྱལ་པོ་ལ་བརྟེན་པ་དང༌། མོ་ཡིག་འཆང་བ་དང༌། སྨན་པའི་དཔྱད་ལ་བརྩོན་པ་དང༌། བྲན་དང༌།
བྲན་མོ་དང༌། གསེར་དང༌། དངུལ་དང༌། བྱུ་རུ་དང༌། དུང་དང༌། མན་ཤེལ་དང༌། མུ་ཏིག་གི་དོ་ཤལ་དང༌། ཤིང་ཏོག་རྣམས་ལེན་པ་དང༌། རིག་པ་དང༌། རི་མོ་མཁན་དང༌། གཟུགས་
མཁན་དང༌། སྐྱེ་ཤིང་འཛུགས་པ་དང༌། གསང་སྔགས་དང༌། སྨན་དང༌། བྱིས་པའི་རྩེད་མོ་དང༌། གར་ཐབས་ཀྱི་ཡན་ལག་དང༌། མིག་འཁྲུལ་དང༌། རེངས་པར་བྱ་བའི་སྦྱོར་བ་དང༌།
གླུ་གར་དང༌། མེ་ཏོག་ཕྲེང་དང༌། སོ་རྩི་དང༌། སྨན་མར་ཆེན་པོ་བསྐོལ་བ་དང༌། སྤོས་དང་བྱུག་པ་འཆང་བ་དང༌། འགྲོས་འཆོས་པ་རྣམས་སློབ་པ་དང༌། སྒེག་པའི་སྦྱོར་བ་ལ་བརྩོན་པ་དག་
འབྱུང་བར་འགྱུར་ཏེ། དེ་དག་སྤངས་པ་ལ་ནི། དགེ་སློང་ཞེས་ང་ཟེར་རོ། །གསོལ་པ། བཅོམ་ལྡན་འདས། འོ་ན་ཇི་ལྟར་བགྱི་ལགས། དགེ་སློང་ངམ། དགེ་སློང་མའམ། དགེ་བསྙེན་ནམ།
དགེ་བསྙེན་མ་གཞན་གྱིས་སྩལ་པས་འཚོ་བ་རྣམས་ཀྱི་ཡུལ་གང་མ་བརྟགས་པའི་ཟས་མོད་པ་དེར་བསོད་སྙོམས་ཤ་དང་འདྲེས་པ་ཇི་ལྟར་དག་པར་བགྱི་ལགས། བཀའ་སྩལ་པ། རིགས་ཀྱི་བུ།
ཅི་ནས་འདུལ་བ་དང་མི་འགལ་བར་ཆུས་བཀྲུས་ཏེ་བཟའ་བར་བྱའོ། །ཞེས་ངས་བསྟན་ཏོ། །ཡུལ་དེ་ལྟ་བུ་ན་ཟས་དང༌། སྐོམ་ཤའི་ཟས་ཀྱིས་ཤས་ཆེར་འདྲེས་པར་སྣང་བ་དེ་ལྟ་བུ་ནི། སྤང་བར་བྱའོ།།
སྣོད་གཅིག་ལ་གཅིག་རེག་སྟེ་ཁ་ཟས་དངོས་མ་འདྲེས་པ་དེ་ལ་ནི། ཉེས་པ་མེད་དོ། །ཤའམ། ཉ་ཤའམ། རི་དྭགས་ཀྱི་ཤའམ། རྨིག་པ་སྐམ་པོའམ། ཤའི་བག་གཞན་གྱིས་འབགས་པ་རྣམས་
ཀྱང་ལྟུང་བྱེད་དུ་འགྱུར་རོ། །ཞེས་ང་ཟེར་རོ། །སྔར་ནི། དོན་གྱི་དམིགས་བྱུང་བའི་སྐབས་སུ་བསྟན་ཏོ། །ད་འདིར་ནི། ཤ་ཟ་བ་ལས་གནོད་པར་འགྱུར་བར་ངས་བསྟན་ཏོ། །འདི་ནི། ང་ཡོངས་སུ་མྱ་
ངན་ལས་འདའ་བའི་ཚེ་མང་དུ་བཤད་པ་ཡིན་ཏེ། འདི་ནི། འདྲི་བའི་དབང་ཞེས་བྱའོ། །དེ་ལ་དོན་གྱི་དམིགས་བྱུང་བའི་དབང་ཞེས་བྱ་བ་ནི། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་
བསྙེན་མ་དག་ང་ལ་འདི་སྐད་ཅེས་འདྲི་བར་བྱེད་དེ། དེ་བཞིན་གཤེགས་པས་ཐོག་མར་མགོ་གཅིག་ཁོ་ནར་བཀའ་སྩལ་ན། བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་དོན་དང་ཚིག་འདི་རྣམས་ཅིའི་སླད་དུ་བཀའམ་སྩལ། བཅོམ་ལྡན་འདས། དེ་བཞིན་གཤེགས་པས་ཆོས་ཀྱི་སྒོ་དེ་ལྟར་བཀའ་སྩལ་པ་
༄༅། །ནི༑ ལེགས་པར་གསུངས་པ་ལ་མ་ལགས་སོ། །ཞེས་ཟེར་ན། ཉེས་པར་འགྱུར་རོ། །ཞེས་ང་ཟེ་རོ། །སྲུང་བ་ཞེས་བྱ་བ་ནི། ཇི་སྐད་བཤད། འདུལ་བ་ཞེས་བྱ་བ་ནི།
ཇི་སྐད་བཤད། སོ་སོར་ཐར་པ་ཞེས་བྱ་བ་ནི། ཇི་སྐད་བཤད་ཅེ་ན། ཉེས་པ་གཞན་ཡང་དུ་མ་ཡོད་དེ། དེ་དག་ཉོན་ཅིག །དེ་ལ་སོ་སོར་ཐར་པ་ཇི་སྐད་བཤད་ཅེ་ན། སོ་སོར་ཐར་པ་ཞེས་བྱ་བ་ནི།
ཆོ་ག་ཤེས་པ་དང༌། ཡོ་བྱད་བསྙུངས་པ་དང༌། ལེན་པ་མེད་པའོ། །གཅིག་ཏུ་ན་སོ་སོར་ཐར་པ་ཞེས་བྱ་བ་ནི། གཉིས་ཀའི་དོན་ལས་གསོ་བར་བྱེད་པའི་ཕྱིར་རོ། །ལོག་པའི་ཚིག་ལས་གྲོལ་བར་
བྱེད་པས་ན། ཐར་པའོ། །སྲུང་བ་ཞེས་བྱ་བ་ནི། རུང་བ་མ་ཡིན་པ་ཐམས་ཅད་ཀྱིས་འཚོ་བས་འགྲོ་བ་བཞི་པོ་རྣམས་སུ་ལྟུང་བར་བྱེད་པ་དང༌། སེམས་ཅན་དམྱལ་བ་མནར་མེད་པ་ལ་སོགས་པ་
འཇིགས་པའི་གནས་ཐམས་ཅད་དུ་བཙོ་བར་འགྱུར་བ་དེ་ལས་སྲུང་བའི་ཕྱིར་རོ། །འདུལ་བ་ཞེས་བྱ་བ་ནི། ཐོབ་པར་བྱེད་པ་དང༌། འདུལ་བར་བྱེད་པ་དང༌། ཆོ་ག་སྟོན་པའི་ཕྱིར་དང༌། རྫས་ངན་
པ་ལེན་པ་ལ་ངེས་པར་འབྱུང་བ་མེད་པའི་ཕྱིར་རྫས་ངན་པ་ལེན་པའང་མེད། རྫས་ངན་པ་སྦྱིན་པའང་མེད་པ་དེ་ནི། འདུལ་བ་ཞེས་བྱའོ། །འོ་ན་འདུལ་བའི་བསླབ་པའི་གཞི་དེ་ཅིའི་ཕྱིར་གཅིག་ཅར་
མ་བཅས་ཤེ་ན། དེའི་ཚེ་ཁ་ཅིག་ཕམ་པ་བཞིའི་ཉེས་པ་བྱུང་བ་དག་ཀྱང་ཡོད། དགེ་འདུན་གྱི་ལྷག་མ་བཅུ་གསུམ་གྱི་ཉེས་བ་བྱུང་བ་དག་ཀྱང་ཡོད། སྤང་བའི་ལྟུང་བ་སུམ་ཅུའི་ཉེས་པ་བྱུང་བ་དག་
ཀྱང་ཡོད། ལྟུང་བའི་ཉི་ཚེ་བ་དགུ་བཅུ་རྩ་གཅིག་གི་ཉེས་པ་བྱུང་བ་དག་ཀྱང་ཡོད། སོ་སོར་བཤགས་པར་བྱ་བ་བཞིའི་ཉེས་པ་བྱུང་བ་དག་ཀྱང་ཡོད། བསླབ་པ་མང་པོའི་ཆོས་ཀྱི་ཉེས་པ་བྱུང་བ་དག་ཀྱང་
ཡོད༑ རྩོད་པ་ཞི་བར་བྱ་བ་བདུན་གྱི་ཉེས་པ་བྱུང་བ་དག་ཀྱང་ཡོད། རྟག་ཏུ་བསླབ་པ་ཐམས་ཅད་ལས་འགལ་བར་བྱེད་པ་དག་ཀྱང་ཡོད། མཚམས་མེད་པ་བྱེད་པ་དག་ཀྱང་ཡོད། མདོ་སྡེ་སྤོང་བ་དག་
ཀྱང་ཡོད། འདོད་ཆེན་པོའི་མཐར་ཐུག་པའི་རྒྱུའི་མཚན་ཉིད་རྫོགས་པ་དག་ཀྱང་ཡོད་དེ། འདི་ན་དགེ་སློང་སྡིག་པའི་ལས་བྱེད་པ་ཆོས་ཐམས་ཅད་ལས་ཐལ་བ་དེ་དག་གཞན་དག་གིས་བསྐུལ་
ནའང་བདག་ཉིད་མཁས་པ་ཡིན་པར་མངོན་པའི་ང་རྒྱལ་བྱེད་ཅིང་འཆགས་པར་མི་བྱེད་དེ། གསོར་རུང་བའང་གསུངས་ཏེ། གསོར་མི་རུང་བར་བྱེད་པ་དག་ཀྱང་ཡོད། ཁ་ཅིག་ནི། རུས་སྦལ་གྱི་
ལུས་བཞིན་དུ་སྦེད་པའང་ཡོད་དེ། དེ་ལྟར་བདག་གི་ཉེས་པ་ཡུན་རིང་དུ་བཅབས་པའི་ཉེས་པ་འབྱུང་ཞིང་སྡིག་པ་བསགས་པར་འགྱུར་བས་ན། དེའི་ཕྱིར་དེ་བཞིན་གཤེགས་པ་ཐམས་ཅད་མཁྱེན་པ་
ཡིན་པས་སྡིག་ཅན་རྣམས་ལ་གནས་རེ་རེ་ནས་འདྲི་བར་མཛད་དེ། ཐོག་མ་ཁོ་ནར་གཅིག་བཅས་པ་ན་བསླབ་པའི་གཞི་ཐམས་ཅད་གཅིག་ཅར་འཆའ་བར་མི་མཛད་དོ། །གསོལ་པ། དེ་བཞིན་གཤེགས་
པས་མཁྱེན་བཞིན་དུ་དེ་དག་མནར་མེད་པ་ཤིན་ཏུ་འཇིགས་པའི་སར་གཏང་བར་མཛད་དམ་ཅི་ལགས། དཔེར་གསོལ་ན། མགྲོན་པོ་དག་གཅིག་ཤུལ་དུ་ཞུགས་ཏེ་ཤུལ་དྲང་པོ་མ་འཚལ་བ་ལས་དེར་
༄༅། །ཤུལ་གཅིག་ནི། ལོགས་ཤིག་ཏུ་མཆི་བ་ལགས་ལ། དེ་དག་གིས་ཀྱང་ཤུལ་པོར་ཏེ་ལོག་པར་ཞུགས་ཤིང་མ་རུང་བར་གྱུར་ཀྱང་བདག་ཅག་ནི། ཤུལ་ལོག་པར་
ཞུགས་སོ། །སྙམ་དུ་མ་ཚོར་ནས་འདི་ནི། ཤུལ་བཟང་པོ་ལགས་སོ། །སྙམ་དུ་འཛིན་ཅིང་དོང་ལ། ཕས་རྒྱུ་བའི་མགྲོན་པོའང་མ་མཐོང་བ་དེ་བཞིན་དུ་ཆོས་ལ་རྨོངས་པའི་སེམས་ཅན་དམ་པའི་ཆོས་ཀྱི་
དེ་ཁོ་ན་ཉིད་མ་མཐོང་བ་རྣམས་ལ་བཅོམ་ལྡན་འདས་ཀྱིས་ཐོག་མ་ཁོ་ནར་ཤུལ་བསྟན་འཚལ་བ་ལས་སྔར་ནོངས་པ་རྔམས་ཆེ་ཆུང་མ་བསྟན་པས་དགེ་སློང་རྣམས་ཉེས་པ་རྣམས་ཀྱི་ནང་དུ་ལྟུང་བར་གྱུར་
ན༑ འདི་ལྟར་བཅོམ་ལྡན་འདས་བདེན་པའི་མགྲོན་པོ། །བདེན་པའི་ལམ་གྱི་ཁྱད་པར་ཡང་དག་པར་གཟིགས་པ། ཆོས་ཀྱི་ལམ་གྱི་ཡོན་ཏན་གྱི་ཁྱད་པར་གྱི་ཕན་ཡོན་ཡང་དག་པར་གཟིགས་པ། ལྷའི་
ཡང་ལྷ་བཅོམ་ལྡན་འདས་ཀྱིས་དེའི་ཚེད་དུ་བསླབ་པའི་གཞི་བཅའ་བ་བསྟན་དུ་གསོལ། །བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ། ཁྱོད་དེ་བཞིན་གཤེགས་པ་ལ་དེ་སྐད་མ་ཟེར་ཅིག །
དེ་བཞིན་གཤེགས་པ་ནི། ཡོན་ཏན་གྱི་ཁྱད་པར་གྱི་ཆོས་བཅུ་ཡང་དག་པར་གཟིགས་པ་ཡིན་ལ། སེམས་ཅན་ཐམས་ཅད་ལའང་སྒྲ་གཅན་ཟིན་བཞིན་དུ་གཟིགས་ནས། ཇི་ལྟར་དགེ་སློང་རྣམས་མནར་
མེད་པར་འགྲོ་བར་མཛད། དེ་བཞིན་གཤེགས་པ་ནི། གལ་ཏེ་སེམས་ཅན་གཅིག་གི་རྒྱུ་དེ་འདྲ་བ་ཞིག་གཟིགས་ནའང་དེས་ངེས་པར་བསྒྲལ་བའི་ཕྱིར་བསྐལ་པའམ་བསྐལ་པ་ལས་ལྷག་པར་ཡང་
སེམས་ཅན་དམྱལ་བར་བཞུགས་སྤྱོད་ན། ཐུགས་བརྩེ་བ་དང་ལྡན་པ་ཇི་ལྟར་ཉིད་ཀྱི་སྲས་རྣམས་ལ་སླུ་བར་མཛད། འོད་སྲུང་ཆེན་པོ་དང་རུས་གཅིག་པ། དཔེར་ན། གྲོང་ཁྱེར་རམ་རི་ཁྲོད་ཀྱི་གྲོང་ཞིག་ན་ཐག་
པ་ཞིག་ཡོད་ན། དེ་ནི། དེར་རས་བཏགས་པའི་ཡོ་བྱད་ཐགས་ཆ་གང་ཁ་རྒལ་བ་འདོར་བར་བྱེད་པ་དང༌། དཔེར་ན། འཁོར་ལོས་བསྒྱུར་བའི་རྒྱལ་པོ་ནི། ཐོག་མ་ཁོ་ནར་དགེ་བ་བཅུའི་ལས་ཀྱི་ལམ་རྣམས་
གཅིག་ཅར་སྦྱོང་བར་མི་བྱེད་ཀྱི། སེམས་ཅན་གང་དང་གང་ཆོས་མ་ཡིན་པ་ལ་བརྟེན་པ་དེ་དང་དེ་དག་འཁོར་ལོ་རིན་པོ་ཆེས་བཏུལ་ནས་དམ་པའི་ཆོས་ལ་འགོད་པ་དེ་བཞིན་དུ། སངས་རྒྱས་བཅོམ་ལྡན་
འདས་ཀྱང་ཐོག་མ་ཁོ་ནར་སོ་སོར་ཐར་པའི་བསླབ་པའི་གཞི་གཅིག་ཅར་འཆའ་བར་མི་མཛད་ཀྱི། དགེ་སློང་གང་དང་གང་གིས་ཉེས་པ་ཅི་དང་ཅི་བྱས་པའི་དོན་གྱི་དམིགས་བྱུང་བ་དེ་དང་དེ་གླེང་གཞིར་
མཛད་ནས་བསླབ་པའི་གཞི་འཆའ་བར་མཛད་ལ། སེམས་ཅན་ཆོས་འདོད་པ་གང་ཡིན་པ་རྣམས་ཀྱིས་དེ་དང་དེ་མཐོང་ན། ཡིད་ཆེས་པར་འགྱུར་ཏེ། དེ་དག་དབང་དུ་འཇོག་གོ། དེ་ལྟར་ན། ཤིན་ཏུ་
བརྟག་དཀའ་བའི་ཆོས་ཡང་དག་པར་གཟིགས་ནས་ཐ་ག་པ་དང་འཁོར་ལོས་སྒྱུར་བའི་རྒྱལ་པོའི་ཆོས་ཉིད་ཇི་ལྟ་བ་བཞིན་དུ་ཆོས་ཀྱི་འཁོར་ལོ་བསྐོར་བའི་སངས་རྒྱས་རྣམས་ཀྱི་ཆོས་ཉིད་ཀྱང་དེ་དང་
འདྲ་སྟེ། དེ་ལྟར་ན། སངས་རྒྱས་བཅོམ་ལྡན་འདས་རྣམས་བསམ་གྱིས་མི་ཁྱབ་བོ། །ཆོས་བསྟན་པའང་བསམ་གྱིས་མི་ཁྱབ་བོ། །དེ་བཞིན་དུ་ཉན་པ་པོ་རྣམས་དང༌། ཡིད་ཆེས་པ་རྣམས་ཀྱང་བསམ་
༄༅། །གྱིས་མི་ཁྱབ་སྟེ། འདི་ནི། དོན་གྱི་དམིགས་བྱུང་བའི་དབང་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། དོན་གྱི་དམིགས་བྱུང་བའི་ཕྱིར་དང༌། ང་
ཡོངས་སུ་མྱ་ངན་ལས་འདའ་བའི་ཕྱིར་ཆོས་ཀྱི་རྣམ་གྲངས་འདི་བཞིས་ཆོས་ཏོན་པར་བྱེད་དེ། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ནི། དོན་གྱི་དམིགས་བྱུང་བའི་དབང་ཞེས་བྱ་བ་
ཡིན་པར་རིག་པར་བྱའོ། །བདག་གི་ལྷག་པའི་བསམ་པ་ཞེས་བྱ་བ་ནི། དེང་ངའི་ལྷག་པའི་བསམ་པ་བསྟན་པ་བཤད་པས་ན། བདག་གི་ལྷག་པའི་བསམ་པ་ཞེས་བྱ་བའང་ཡོངས་སུ་མྱ་ངན་ལས་འདས་
པ་ཆེན་པོའི་མདོ་ཆེན་པོ་ཡིན་པར་རིག་པར་བྱའོ། །གཞན་གྱི་ལྷག་པའི་བསམ་པ་ཞེས་བྱ་བའང་ངས་དགེ་སློང་རྣམས་ཀྱི་བསམ་པ་རྟོགས་ནས་ང་ནི། རྟག་གོ །ཞེས་བསྟན་པས་ན། གཞན་གྱི་ལྷག་
པའི་བསམ་པའང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ཡིན་པར་རིག་པར་བྱའོ། །འདྲི་བའི་དབང་ཞེས་བྱ་བའང་བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་ཆ་ཕྲ་བའི་ཡེ་
ཤེས་དང་ལྡན་པ། འོད་སྲུང་ཆེན་པོ་དང་རུས་གཅིག་པ་ཁྱོད་ཀྱི་དབང་དུ་བྱས་ནས་ཉན་ཐོས་དང་རང་སངས་རྒྱས་ཐམས་ཅད་ཀྱིས་སྔོན་མ་ཐོས་པའི་ཚིག་ཡི་གེ་འབྲུ་གཅིག་པའི་ཐེག་ལེའི་གཏམ་དགོངས་
པའི་ཚིག་གསང་བ་སྣ་ཚོགས་བསྟན་པས་ན། དེའི་ཕྱིར་འདྲི་བའི་དབང་ཡང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ཡིན་པར་རིག་པར་བྱའོ། །དེ་ལ་ལ་ལ་ཞིག་འདི་ལྟར་ན་ནི། སླུ་བར་
འགྱུར་ལ། འདི་ལྟར་ན་ནི། སླུ་བར་མི་འགྱུར་རོ། །སྙམ་དུ་རྟོག་སྟེ། དཔེར་ན། མི་ལ་ལ་ཞིག་ནམ་མཁའ་ཞེས་ཀྱང་ཟེར། མཁའ་ཞེས་ཀྱང་ཟེར། ཅིའང་མེད་པ་ཞེས་ཀྱང་ཟེར། ཐོགས་པ་མེད་པ་ཞེས་ཀྱང་ཟེར་
ཏེ༑ དེ་དེ་སྐད་ཟེར་ན། གཞན་དག་ལ་སླུ་བ་མ་ཡིན་ནོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོ་འདི་ལས་རིགས་ཀྱི་བུའམ། རིགས་ཀྱི་བུ་མོ་བཅོམ་ལྡན་འདས་ཀྱིས་གསུངས་པའི་རྟག་པ་འདི་ལ་
མོས་ནས་ཆོས་ཀྱི་རྣམ་གྲངས་བཞི་པོ་རྣམས་རྗོད་པར་བྱེད་ན། གཞན་དག་ལ་སླུ་བ་མ་ཡིན་ནོ། །ལྕགས་ཀྱི་གར་བུ་མེ་འབར་བ། །བརྡུང་བའི་ཚེ་ན་ཁད་ཀྱིས་ནི། །གྲང་བར་འགྱུར་ཡང་མེ་ཡི་དྲོད། །གང་དུ་
སོང་བ་མི་རིག་ལྟར། །དེ་བཞིན་ཡང་དག་རྣམ་གྲོལ་བ། །འདོད་པའི་འདམ་དང་ཆུ་བོ་བརྒལ། །མི་གཡོ་བདེ་བ་ཐོབ་རྣམས་ཀྱང་།གང་དུ་སོང་བ་གདགས་སུ་མེད། །ཡང་བཀའ་སྩལ་པ། རིགས་ཀྱི་བུ། དེ་ལྟར་
ཁྱོད་དེ་བཞིན་གཤེགས་པ་རྣམས་མེད་པར་འགྱུར་བའི་འདུ་ཤེས་སུ་ལྟ་བས་སྙིང་མི་དགར་མ་བྱེད་ཅིག །ལྕགས་དང༌། མདོ་ལྕགས་ཞེས་བྱ་བ་ནི། དོན་ཐ་དད་པ་མ་ཡིན་ཏེ། ལྕགས་མེར་འབར་བ་ལས་
གྲང་བར་གྱུར་བ་བཞིན་དུ་དེ་བཞིན་གཤེགས་པ་རྣམས་མེད་པར་འགྱུར་བའི་གནས་མེད་དོ། །ལྕགས་མེར་འབར་བ་ལས་གྲང་བ་བཞིན་དུ་ཉོན་མོངས་པའི་རྣམ་པ་ཞི་བར་འགྱུར་མོད་ཀྱི། གང་གི་ཚེ་ལྕགས་
མེར་འབར་བ་གྲང་བར་འགྱུར་བ་ན་ཚ་ཚ་འཕྲོ་བ་ཐམས་ཅད་དང་བཅས་ཏེ་མེད་པར་འགྱུར་ན་ནི། དེའི་ཚེ་དེ་བཞིན་གཤེགས་པའང་མི་རྟག་པར་འགྱུར་ན། ལྕགས་དེ་འོད་དང་བཅས་པར་མེད་པར་འགྱུར་
༄༅། །བ་ནི༑ མི་སྲིད་དོ། །དེ་བཞིན་དུ་དེ་བཞིན་གཤེགས་པའང་མྱ་ངན་ལས་འདས་པ་ཆེན་པོ་འདི་དང་བཅས་ཏེ་མི་རྟག་པར་འགྱུར་བ་ནི། མི་སྲིད་དེ། ཇི་ལྟར་ལྕགས་ཀྱི་མེ་གྲང་བར་
འགྱུར་བ་དེ་བཞིན་དུ་དེ་བཞིན་གཤེགས་པའང་བསྐལ་པ་མང་པོ་གྲངས་མེད་པ་བྱེ་བ་སྙེད་དུ་བསགས་པའི་ཉོན་མོངས་པ་རྣམས་ཟད་ནས་རྟག་པ་དང༌། བརྟན་པ་དང༌། ཐེར་ཟུག་པར་འགྱུར་ཏེ། དེ་ལྟར་
ན༑ ཡང་དག་པར་རྣམ་པར་གྲོལ་བའི་དེ་བཞིན་གཤེགས་པ་ནི། རྟག་པ་དང༌། བརྟན་པ་དང༌། ཐེར་ཟུག་པ་ཡིན་ནོ། །འདོད་པའི་འདམ་ནི། ཉོན་མོངས་པ་རྣམས་ཞེས་བྱ་བའི་དོན་ཏེ། ཉོན་མོངས་པའི་འདམ་
དེ་ལས་བསྐལ་པ་གྲངས་མེད་པས་བརྒལ་བས་ན། དེའི་ཕྱིར་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ལ་དེ་བཞིན་གཤེགས་པའི་གནས་གདགས་པར་མི་ནུས་ཏེ། དེ་བས་ན། ཡང་དག་
ཤེས་དང་རྣམ་གྲོལ་བ། །འདོད་པའི་འདམ་དང་ཆུ་བོ་བརྒལ། །མི་གཡོ་བདེ་བ་ཐོབ་རྣམས་ཀྱང༌། །གང་དུ་སོང་བ་གདགས་སུ་མེད། །གསོལ་པ། བཅོམ་ལྡན་འདས། ཅི་ལགས། ཇི་ལྟར་ལྕགས་གྲང་
པར་གྱུར་ཀྱང་སླད་ཀྱིས་ཡང་ཞུགས་ཀྱིས་ཚ་བར་འགྱུར་བ་བཞིན་དུ་གལ་ཏེ་དེ་བཞིན་གཤེགས་པའང་དེ་དང་འདྲ་བར་གྱུར་ན་ནི། མི་རྟག་པར་འགྱུར་ལགས་སོ། །བཀའ་སྩལ་པ། དེ་བཞིན་གཤེགས་པ་
ནི༑ རྟག་སྟེ། བདག་ཉིད་མེ་ལྟ་བུར་གྱུར་ནས་ལྕགས་དང་འདྲ་བའི་སེམས་ཅན་མང་པོ་རྣམས་ཡེ་ཤེས་ཀྱི་མེས་བརྡ་སྤྲད་ནས་ཡང་དག་པ་མ་ཡིན་པའི་ཉོན་མོངས་པ་རྣམས་ཟད་པར་མཛད་དོ། །གསོལ་
པ༑ བཅོམ་ལྡན་འདས། ལེགས་ལགས་སོ། །ལེགས་ལགས་སོ། །དེ་བཞིན་གཤེགས་པའི་རྟག་པ་ཉིད་མ་ལུས་པར་བཤད་དུ་གསོལ། བཀའ་སྩལ་པ། རིགས་ཀྱི་བུ། གཞན་ཡང་དཔེར་ན།
འཁོར་ལོས་བསྒྱུར་བའི་རྒྱལ་པོ་རང་གི་བཙུན་མོའི་འཁོར་དུ་སོང་བ་ལས་ཐང་གཅིག་སྐྱེད་མོས་ཚལ་གཞན་ཞིག་ཏུ་བྱུང་སྟེ། དེ་དེར་སོང་ནས་རྩེ་བར་བྱེད་པ་ན་གང་གི་ཚེ་རྒྱལ་པོ་དེ་བཙུན་མོའི་འཁོར་ནས་
མི་སྣང་བར་གྱུར་པ་དེའི་ཚེ་ཤིའོ། །སྙམ་པའི་འདུ་ཤེས་བསྐྱེད་པར་མི་བྱའོ། །རིགས་ཀྱི་བུ། དེ་བཞིན་གཤེགས་པ་ནི། ཆོས་ཉིད་ལས་ཉམས་པར་མི་འགྱུར་ཏེ། རྒྱལ་པོ་དང་འདྲ་བར་ཛམྦུའི་གླིང་
དུ་དེ་བཞིན་གཤེགས་པ་མི་རྟག་པར་གྱུར་ཏོ། །ཞེས་གྲོངས་པའི་འདུ་ཤེས་བསྐྱེད་པར་མི་བྱའོ། །ཇི་ལྟར་རྒྱལ་པོ་བཙུན་མོའི་འཁོར་ནས་སྐྱེད་མོས་ཚལ་དུ་སོང་སྟེ་རྩེ་བ་དེ་བཞིན་དུ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ཉོན་མོངས་པའི་རྣམ་པ་ཉིད་ཀྱི་བཙུན་མོའི་འཁོར་ལྟ་བུ་ལས་ངེས་པར་འབྱུང་སྟེ། ཉོན་མོངས་པ་མེད་པར་བཅོམ་ལྡན་འདས་གཟུངས་སྣ་ཚོགས་
དང༌། བྱང་ཆུབ་ཀྱི་ཡན་ལག་གི་མེ་ཏོག་སྣ་ཚོགས་དང་ལྡན་པའི་སྐྱེད་མོས་ཚལ་དུ་གཤེགས་ནས་དེ་བཞིན་གཤེགས་པ་ཉོན་མོངས་པ་དང་བྲལ་བ་ཉིད་ཀྱི་སྐུའི་ཐབས་སྟོན་པ་སྣ་ཚོགས་ཀྱིས་རོལ་པར་མཛད་
དོ༑ ༑གསོལ་པ། དེ་བཞིན་གཤེགས་པ་བསྐལ་པ་གྲངས་མེད་པ་བྱེ་བ་སྙེད་ཀྱིས་ཉོན་མོངས་པའི་རྒྱ་མཚོ་ངེས་པར་རྒལ་ཅེས་བགྱི་བ་འདི་ལ་གཏན་ཚིག་བཀའ་སྩལ་འཚལ་ལོ། །དེ་ལྟར་མངོན་སུམ་
༄༅། །དུ་དེ་བཞིན་གཤེགས་པ་སྒྲ་གཅན་ཟིན་གྱི་མ་དང་ལྷན་ཅིག་ཏུ་འདོད་པ་རྣམས་བསྟེན་པ་དང༌། སྒྲ་གཅན་ཟིན་གྱི་ཡབ་ཏུ་གྱུར་པར་ཡང་བསྟན་ཏེ། དེ་བས་ན། དེ་བཞིན་
གཤེགས་པ་ནི། བསྐལ་པ་དུ་མ་བྱེ་བ་སྙེད་ཀྱིས་འདོད་པའི་ཆུ་བོ་ལས་ངེས་པར་རྒལ་བ་མ་ལགས་སོ། །བཀའ་སྩལ་པ། རིགས་ཀྱི་བུ། ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ད་ལྟ་མངོན་སུམ་དུ་སྒྲ་གཅན་ཟིན་གྱི་མ་དང་ལྷན་ཅིག་ཏུ་འདོད་པ་རྣམས་བསྟེན་པ་དང༌། སྒྲ་གཅན་ཟིན་གྱི་ཡབ་ཏུ་གྱུར་པར་ཡང་བསྟན་ཏེ། དེ་བས་ན། དེ་བཞིན་གཤེགས་
པ་ནི༑ བསྐལ་པ་དུ་མ་བྱེ་བ་སྙེད་ཀྱིས་འདོད་པའི་ཆུ་བོ་ལས་ངེས་པར་རྒལ་བ་མ་ཡིན་ནོ། །ཞེས་དེ་སྐད་མ་ཟེར་ཅིག །ཡོངས་སུ་མྱ་ངན་ལས་འདས་པ་ཆེན་པོ་ནི། རྟག་པ་ཆེན་པོ་ཞེས་བྱ་སྟེ།
སེམས་གུད་དུ་མ་གཡེང་བར་ཉོན་ལ་ཐོས་ནས་ཀྱང་གཞན་དག་ལ་སྟོན་ཅིག །དེས་སྐྲག་པར་ཡང་མ་བྱེད་ཅིག །ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་
དཔའ་སེམས་དཔའ་ཆེན་པོས་ནི། རིའི་རྒྱལ་པོ་རི་རབ་དེ་ལྟར་མཐོ་ཞིང༌། དེ་ལྟར་ཐ་གྲུ་ཆེ་བ་ཡུངས་འབྲུའི་ཁོང་དུ་འཇུག་པར་བྱེད་ལ་རི་རབ་ལ་གནས་པའི་སེམས་ཅན་རྣམས་ལའང་གནོད་
པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང༌། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ༌། །སེམས་ཅན་གཞན་དག་གིས་ནི། བྱང་ཆུབ་སེམས་དཔའ་
སེམས་དཔའ་ཆེན་པོ་འདིས་རིའི་རྒྱལ་པོ་རི་རབ་ཡུངས་འབྲུའི་ཁོང་དུ་བཅུག་སྟེ་སྦས་སོ། །སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ༌། །དེ་ནས་ཡང་དེ་རང་གི་གནས་སུ་འཇོག་པར་བྱེད་དེ། མདོ་
ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཡུལ་ནི། དེ་ལྟ་བུ་ཡིན་ནོ། །རིགས་ཀྱི་བུ། དེ་བས་ཀྱང་ལྷག་པར་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་པའི་བྱང་ཆུབ་
སེམས་དཔའ་སེམས་དཔའ་ཆེན་པོས་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡུངས་འབྲུའི་ཁོང་དུ་འཇུག་པར་བྱེད་ལ་སེམས་ཅན་གཅིག་ལའང་གནོད་པར་མི་འགྱུར་ཏེ། སེམས་
ཅན་དེ་དག་གིས་བདག་ཅག་གང་དུ་སོང༌། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ༌། །སེམས་ཅན་གཞན་དག་གིས་ནི། འདིས་འདི་ལྟར་བྱས་སོ། །སྙམ་དུ་ཡང་དག་པར་
ཤེས་ཤིང་ཡང་དག་པར་མཐོང་ངོ༌། །དེ་ནས་ཡང་རང་གི་གནས་སུ་འཇོག་པར་བྱེད་དོ། །རིགས་ཀྱི་བུ། གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་
སེམས་དཔའ་ཆེན་པོས་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རང་གི་བ་སྤུའི་ཁུང་བུར་འཇོག་པར་བྱེད་ལ། སེམས་ཅན་གཅིག་ལའང་གནོད་པར་མི་འགྱུར་ཏེ། སེམས་ཅན་དེ་
དག་གིས་བདག་ཅག་གང་དུ་སོང༌། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ༌། །སེམས་ཅན་གཞན་དག་གིས་ནི། འདིས་འདི་ལྟར་བྱས་སོ། །སྙམ་དུ་ཡང་དག་པར་ཤེས་ཤིང༌།
༄༅། །ཡང་དག་པར་མཐོང་ངོ༌། །རིགས་ཀྱི་བུ། གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི། འཇིག་
རྟེན་གྱི་ཁམས་འདི་ན་འདུག་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་རྣམས་ཁབ་ཀྱི་རྩེ་མོས་རྒྱ་ཤུག་གི་ལོ་མ་བཞིན་དུ་བླངས་ཏེ་འཇིག་རྟེན་གྱི་ཁམས་གཞན་དུ་འདོར་བར་བྱེད་ལ་སེམས་ཅན་
གཅིག་ལའང་གནོད་པར་མི་འགྱུར་ཏེ། །སེམས་ཅན་དེ་དག་གིས་བདག་ཅག་གང་དུ་སོང་ངོ༌། །གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ༌། །སེམས་ཅན་གཞན་དག་གིས་ནི།
འདིས་འདི་ལྟར་བྱས་སོ། །སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ༌། །དེ་ནས་ཡང་དེ་རང་གི་གནས་སུ་འཇོག་པར་བྱེད་དོ། །རིགས་ཀྱི་བུ། གཞན་ཡང་ཡོངས་སུ་མྱ་ངན་ལས་འདས་
པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི། ཕྱོགས་བཅུའི་འཇིག་རྟེན་གྱི་ཁམས་རྣམས་ལག་པ་གཡས་པས་བླངས་ཏེ་རྫ་མཁན་གྱི་འཁོར་ལོ་བཞིན་དུ་འཇིག་
རྟེན་གྱི་ཁམས་རྡུལ་ཕྲ་མོའི་རྡུལ་སྙེད་ཀྱི་ཕ་རོལ་གྱིའང་ཆེས་ཕ་རོལ་ཏུ་འཕེན་པར་བྱེད་ལ། སེམས་ཅན་གཅིག་ལའང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང༌།
གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་མི་མཐོང་ངོ༌། །སེམས་ཅན་གཞན་དག་གིས་ནི། འདིས་འདི་ལྟར་བྱས་སོ། །སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ༌། །དེ་
ནས་ཡང་དེ་རང་གི་གནས་སུ་འཇོག་པར་བྱེད་དོ། །རིགས་ཀྱི་བུ། གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི། ཕྱོགས་བཅུའི་
འཇིག་རྟེན་གྱི་ཁམས་རྣམས་རང་གི་ལུས་ལ་འཇུག་པར་བྱེད་ལ་སེམས་ཅན་གཅིག་ལའང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང༌། གང་དུ་ཁྱེར། གང་དུ་བཅུག་
སྙམ་དུ་མི་ཤེས་ཤིང་མི་མཐོང་ངོ༌། །སེམས་ཅན་གཞན་དག་གིས་ནི། འདིས་འདི་ལྟར་བྱས་སོ། །སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ༌། །དེ་ནས་ཡང་རང་གི་གནས་སུ་འཇོག་
པར་བྱེད་དོ། །རིགས་ཀྱི་བུ། གཞན་ཡང་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ནི། ཕྱོགས་བཅུའི་འཇིག་རྟེན་གྱི་ཁམས་རྣམས་
རྡུལ་ཕྲ་རབ་ཀྱི་ཁོང་དུ་འཇུག་པར་བྱེད་ལ། སེམས་ཅན་གཅིག་ལའང་གནོད་པར་མི་འགྱུར་ཏེ། སེམས་ཅན་དེ་དག་གིས་བདག་ཅག་གང་དུ་སོང༌། གང་དུ་ཁྱེར། གང་དུ་བཅུག་སྙམ་དུ་མི་ཤེས་ཤིང་
མི་མཐོང་ངོ༌། །སེམས་ཅན་གཞན་དག་གིས་ནི། འདིས་འདི་ལྟར་བྱས་སོ། །སྙམ་དུ་ཡང་དག་པར་ཤེས་ཤིང་ཡང་དག་པར་མཐོང་ངོ༌། །དེ་ནས་ཡང་དེ་རང་གི་གནས་སུ་འཇོག་པར་བྱེད་དོ། །ཡོངས་
སུ་མྱ་ངན་ལས་འདས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། དེ་ལ་སོགས་པའི་སྒྱུ་འཕྲུལ་ཆེན་པོའི་སྟོབས་རྣམ་པ་སྣ་ཚོགས་སྟོན་པས་ན། མྱ་ངན་ལས་
༄༅། །འདས་པ་ཆེན་པོ་ཞེས་བྱའོ། །ཡོངས་སུ་མྱ་ངན་ལས་འདས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། སེམས་ཅན་ཐམས་ཅད་ཀྱིས་
ཀྱང་འདི་འདྲ་བ་ཞིག་གོ། དེ་འདྲ་བ་ཞིག་གོ། འདི་ལྟར་བྱས་སོ། །འདི་ལྟ་བུ་ཞིག་བྱས་སོ། །སྙམ་དུ་ཤེས་པར་མི་ནུས་ན། རིགས་ཀྱི་བུ། ཁྱོད་ཀྱིས་དེ་བཞིན་གཤེགས་པས་འདོད་པ་རྣམས་
སྤྱད་དོ༑ ༑སྒྲ་གཅན་ཟིན་གྱི་ཕར་གྱུར་ཏོ། །སྙམ་དུ་ཤེས་རེ་སྐན། རིགས་ཀྱི་བུ། གཞན་ཡང་དེང་ངས་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་
གྱི་ཁམས་གང་ན་ཉི་མ་དང༌། ཟླ་བ་ཐེར་འབུམ་ཡོད་པ་དང༌། ཛམྦུའི་གླིང་ཐེར་འབུམ་ཡོད་པའི་སྟོང་ཁམས་དག་ཏུ་ཆོ་འཕྲུལ་ཆེན་པོ་བསྟན་པར་བྱའོ། །དེ་ལ་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་ནི། དཔའ་བར་འགྲོ་བའི་ཏིང་ངེ་འཛིན་གྱི་ལུགས་བཞིན་དུ་རྒྱས་པར་སྦྱར་བར་བྱའོ། །ང་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་ཛམྦུའི་གླིང་ལ་ལར་ནི། ཡོངས་
སུ་མྱ་ངན་ལས་འདས་པ་ཆེན་པོ་བྱེད་པ་ལྟ་བུར་སྟོན་ལ། ཡོངས་སུ་མྱ་ངན་ལས་འདས་པ་ཆེན་པོར་གཏན་དུ་ཡོངས་སུ་མྱ་ངན་ལས་འདའ་བར་ཡང་མི་བྱེད་དོ། །ཛམྦུའི་གླིང་ལ་ལར་ནི། ངས་ཕ་མ་
གཉིས་ཀྱི་ཟླ་མཚན་གྱི་དུས་སུ་མངལ་དུ་སྐྱེ་བར་སྟོན་ཏེ། དེ་གཉིས་ཀྱིས་ཀྱང་བདག་ཅག་གཉིས་ཀྱི་བུར་འགྱུར་རོ། །སྙམ་དུ་ཡང་དག་པར་ཤེས་སོ། །ང་ནི། བསྐལ་པ་མང་པོ་བྱེ་བ་ཕྲག་གྲངས་
མེད་པ་ནས་ལན་འགའ་ཡང་འཁྲིག་པ་ལས་མ་སྐྱེས་ཏེ། འཁྲིག་པ་ལས་སྐྱེས་པའི་ལུས་ལས་རྒལ་བས་ན། ཤའི་ལུས་མ་ཡིན་གྱི། ཆོས་ཀྱི་སྐུ་ཡིན་ནོ། །འཁྲིག་པའི་མངལ་དུ་འཇུག་པ་འདི་ནི།
འཇིག་རྟེན་དང་མཐུན་པར་བྱ་བའི་ཐབས་ཙམ་དུ་ཟད་དོ། །རིགས་ཀྱི་བུ། ཛམྦུའི་གླིང་ལ་ལར་ནི། ང་བུ་བཙའ་བའི་པང་དུ་བུར་སྐྱེ་བར་ཡང་སྟོན་ཅིང་སྐྱེད་མོས་ཚལ་གྱི་གནས་སུ་བཙའ་བའི་བུ་ལྟ་
བུར་གྱུར་ཏེ། སྐྱེན་པར་ལངས་ནས་བྱང་ཕྱོགས་སུ་ཁ་བལྟས་ཏེ་གོམ་པ་བདུན་བོར་ནས་ལྷ་དང༌། མི་དང༌། ལྷ་མ་ཡིན་དང་བཅས་པའི་འཇིག་རྟེན་གྱི་བླ་ན་མེད་པར་འགྱུར་བར་བྱའོ། །ཞེས་ཟེར་ཏེ།
སེམས་ཅན་རྣམས་ཀྱིས་ནི། བྱིས་པ་བཙས་མ་ཐག་ཏུ་གོམ་པ་བདུན་འདོར་བ་སྔོན་ཆད་བདག་གིས་མ་མཐོང་སྟེ། ཀྱེ་མ་བདག་གི་བུ་ནི། ལྷའི་བུ་ཞིག་གོ། སྙམ་དུ་ཡང་དག་པར་ཤེས་སོ། །སེམས་
ཅན་མང་པོ་གཞན་དག་ཀྱང་ངོ་འཚར་དུ་འཛིན་ཏེ། འོན་ཀྱང་ང་ནི། བསྐལ་པ་བྱེ་བ་ཕྲག་གྲངས་མེད་པ་ནས་བྱིས་པའི་དངོས་པོ་ལས་ལོག་པས་ནམ་ཡང་བྱིས་པར་མ་གྱུར་ཏེ། ང་ནི། ཆོས་ཀྱི་སྐུ་ཡིན་
གྱི༑ རུས་པ་དང༌། རྒྱུས་པ་དང༌། ཤ་དང༌། ཁྲག་གི་ལུས་མ་ཡིན་ལ། བྱིས་པར་འགྱུར་བའང་སྟོན་པ་འདི་ནི། འཇིག་རྟེན་དང་མཐུན་པར་བྱ་བ་ཙམ་དུ་ཟད་དོ། །བྱང་ནས་ལངས་ཏེ་ལྷོའི་ཕྱོགས་ཆ་ལོགས་
སུ་གོམ་པ་བདུན་བོར་ནས་འཇིག་རྟེན་ཐམས་ཅད་དུ་ཡོན་གནས་སུ་འགྱུར་བར་བྱའོ། །ཞེས་ཟེར་རོ། །ནུབ་ཀྱི་ཕྱོགས་ཆ་ལོགས་སུ་གོམ་པ་བདུན་བོར་ནས་སྐྱེ་བ་དང༌། རྒ་བ་དང༌། ན་བ་དང༌། འཆི་བ་
༄༅། །རྣམས་སྤངས་ཏེ་ལུས་ཀྱི་ཐ་མར་གཏུགས་པར་བྱའོ། །ཞེས་ཟེར་རོ། །ཤར་ཕྱོགས་སུ་ཁ་བལྟས་ཏེ་གོམ་པ་བདུན་བོར་ནས་སེམས་ཅན་ཐམས་ཅད་ཀྱི་ཐོག་མར་འགྲོ་བར་
བྱའོ༑ ༑ཞེས་ཟེར་རོ། །ཕྱོགས་མཚམས་རྣམས་སུ་གོམ་པ་བདུན་བདུན་བོར་ནས་ཉོན་མོངས་པ་རྣམ་པ་སྣ་ཚོགས་ཀྱི་རང་བཞིན་གྱི་བདུད་བཅོམ་སྟེ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་སུ་འགྱུར་བར་བྱའོ། །ཞེས་ཟེར་རོ། །སྟེང་གི་ཕྱོགས་ཆ་ལོགས་སུ་གོམ་པ་བདུན་བོར་ནས་མྱུར་དུ་ནམ་མཁའ་བཞིན་དུ་རུང་བ་མ་ཡིན་པའི་ཆོས་ཐམས་ཅད་ཀྱིས་ལུས་མི་གོས་པར་
བྱའོ༑ ༑ཞེས་ཟེར་རོ། །འོག་གི་ཕྱོགས་ཆ་ལོགས་སུ་གོམ་པ་བདུན་བོར་ནས་སེམས་ཅན་དམྱལ་བ་པ་ཐམས་ཅད་ཀྱི་སེམས་ཅན་དམྱལ་བའི་མེ་གསད་པའི་ཕྱིར་སྤྲིན་ཆེན་པོ་ལྟར་ཆོས་ཀྱི་
ཆར་དབབ་པར་བྱ་སྟེ། དེ་དག་བདེ་བ་དང་ལྡན་པར་བྱའོ། །ཚུལ་ཁྲིམས་འཆལ་བ་རྣམས་ལ་ནི། སེར་བ་ལྟ་བུར་འགྱུར་བར་བྱའོ། །ཞེས་ཟེར་རོ། །ཛམྦུའི་གླིང་ལ་ལར་ནི། ང་གཙུག་ཕུད་འཆའ་
བར་སྟོན་ཏེ། སེམས་ཅན་རྣམས་ཀྱིས་བྱིས་པའི་གཙུག་ཕུད་བཅས་སོ། །སྙམ་དུ་ཡང་དག་པར་ཤེས་མོད་ཀྱི། ལྷ་དང་བཅས་པའི་འཇིག་རྟེན་ན་ངའི་མགོ་བོ་ནས་འཛིན་ཅིང་སྐྲ་གཅོད་ནུས་པའི་མི་
སུའང་མེད་དེ། སྔོན་བསྐལ་པ་གྲངས་མེད་པ་ནས་ཀྱང་ངས་གཙུག་ཕུད་བཅའ་བའི་མཐར་གཏུགས་ཟིན་པས་ན། སྤུ་གྲིས་ངའི་སྐྲ་གཅོད་པར་འགྱུར་བ་ནི། མི་སྲིད་དོ། །འདི་ནི། འཇིག་རྟེན་དང་
མཐུན་པར་བྱ་བ་ཙམ་དུ་ཟད་དེ། གཙུག་ཕུད་བཅའ་བ་ནི། བྱིས་པ་འབའ་ཞིག་ལ་བྱ་བ་ཡིན་ནོ། །ཛམྦུའི་གླིང་ལ་ལར་ནི། ང་དབང་ཕུག་ཆེན་པོའི་ལྷ་ཁང་དུ་འགྲོ་བར་ཡང་སྟོན་ཏེ། དེར་དབང་ཕུག་ཆེན་པོ་དང༌།
ཚངས་པ་དང༌། འཇིག་རྟེན་སྐྱོང་བ་རྣམས་ཀྱིས་ང་མཐོང་ན། ངའི་ཞབས་ལ་ཕྱག་འཚལ་ཏེ་ཐལ་མོ་སྦྱར་ཞིང་འདུག་གོ། །ང་ནི། སྔོན་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་ལྷ་དང༌། མི་དང༌། ལྷ་མ་
ཡིན་རྣམས་ཀྱི་ལྷའི་ཡང་ལྷ་ཡིན་པས་ན། ནམ་ཡང་དབང་ཕྱུག་ཆེན་པོའི་ལྷ་ཁང་དུ་མི་འགྲོ་སྟེ། དེར་འགྲོ་བ་ལྟ་བུར་བསྟན་པ་འདི་ནི། འཇིག་རྟེན་དང་མཐུན་པར་བྱ་བ་ཙམ་དུ་ཟད་དོ། །ཛམྦུའི་གླིང་ལ་ལར་
ནི༑ ངས་རྣ་བ་དབུག་པ་བསྟན་མོད་ཀྱི། ངའི་རྣ་བ་འབིགས་ནུས་པའི་མི་མེད་དོ། །ཛམྦུའི་གླིང་ལ་ལར་ནི། ངས་རྣ་ཆ་གདུབ་ཀོར་སེངྒེ་ཅན་ཐོགས་པར་བསྟན་ཏེ། དེས་སེམས་ཅན་རྣམས་ཀྱིས་བྱིས་པ་འདི་
ནི༑ རྣ་ཆ་གདུབ་ཀོར་སེངྒེ་ཅན་ཐོགས་པའོ། །སྙམ་དུ་ཡང་དག་པར་ཤེས་མོད་ཀྱི། ང་ནི། སྔོན་བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་བྱིས་པའི་དངོས་པོ་ལས་ལོག་པས་ན། ང་ལ་རྣ་ཆ་གདུབ་ཀོར་
སེངྒེ་ཅན་བཏགས་པ་མེད་དེ། རྣ་ཆ་གདུབ་ཀོར་སེངྒེ་ཅན་ཐོགས་པར་བསྟན་པ་ནི། འཇིག་རྟེན་དང་མཐུན་པར་བྱ་བ་ཙམ་དུ་ཟད་དོ། །ཛམྦུའི་གླིང་ལ་ལར་ནི། ངས་ཡི་གེ་སློབ་པའི་སར་འགྲོ་བ་བསྟན་
མོད་ཀྱི༑ འཇིག་རྟེན་གསུམ་ན་ངའི་མཁན་པོར་རུང་བ་མ་མཐོང་སྟེ། ང་ཉིད་སེམས་ཅན་ཐམས་ཅད་ཀྱི་མཁན་པོ་ཡིན་ནོ། །དེ་བས་ན། ངའི་མིང་ཐམས་ཅད་མཁྱེན་པ་ཞེས་བྱའོ། །ང་ནི། བསྐལ་པ་བྱེ་
༄༅། །བ་ཕྲག་གྲངས་མེད་པ་ནས་ཀྱང་ཡི་གེ་སློབ་པའི་ས་ན་གནས་པ་ལས་འདས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྙེས་ན། འོན་ཀྱང་སེམས་ཅན་རྣམས་
ཀྱིས་ཁྱེའུ་འདི་ཡི་གེ་སློབ་པའི་སར་སོང་ངོ༌། །སྙམ་དུ་ཡང་དག་པར་ཤེས་ཏེ། འདི་ནི། འཇིག་རྟེན་དང་མཐུན་པར་བྱ་བ་ཙམ་དུ་ཟད་པར་ཁོང་དུ་ཆུད་པར་གྱིས་ཤིག །ཛམྦུའི་གླིང་ལ་ལར་ནི། ངས་
གླང་པོ་ཆེ་དང༌། རྟ་དང༌། ཤིང་རྟ་དང༌། དབུང་བུ་ཆུང་དང༌། རིན་པོ་ཆེ་སྣ་ཚོགས་དང༌། གཏེར་དང༌། རྒྱལ་སྲིད་ཀྱི་དབང་ཕྱུག་རྣམས་ཀྱང་བསྟན། རྒྱལ་ཚབ་བྱེད་པའང་བསྟན་ཏེ། ངས་ནི། སྔོན་
བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་འདོད་པའི་ལོངས་སྤྱོད་རྣམས་སྤངས་མོད་ཀྱི། སེམས་ཅན་རྣམས་ཀྱིས་རྒྱལ་ཚབ་ནི། འདོད་པ་རྣམས་ལ་ལོངས་སྤྱོད་དོ། །སྙམ་དུ་ཡང་དག་པར་
ཤེས་སོ༑ ༑ཛམྦུའི་གླིང་ལ་ལར་ནི། ངས་འཁོར་ལོས་སྒྱུར་བའི་རྒྱལ་པོར་གྱུར་པ་བསྟན་ཏེ། ངས་ནི། བསྐལ་པ་བྱེ་བ་ཕྲག་མང་པོ་གྲངས་མེད་པ་ནས་དེ་སྤངས་ནས་ཆོས་ཀྱི་འཁོར་ལོ་བསྐོར་
ཏེ་ངས་དེ་བུའི་ཤ་བཞིན་དུ་བོར་ནས་རྒྱལ་སྲིད་ཀྱི་ལོངས་སྤྱོད་ཡོངས་སུ་འཛིན་པ་སྤངས་ན། འོན་ཀྱང་སེམས་ཅན་རྣམས་ཀྱིས་འཁོར་ལོས་བསྒྱུར་བའི་རྒྱལ་པོའོ་སྙམ་དུ་ཡང་དག་པར་ཤེས་ཏེ། འདི་
ནི༑ འཇིག་རྟེན་དང་མཐུན་པར་བྱ་བ་ཙམ་དུ་ཟད་དོ། །ཛམྦུའི་གླིང་ལ་ལར་ནི། ངས་རྒན་པོ་དང༌། ནད་པ་དང༌། ཤི་བ་མཐོང་ནས་སྐྱོ་བར་གྱུར་ཏེ། གར་ཐབས་ལྟ་བུའི་བདེ་བ་ཐམས་ཅད་སྤངས་ནས་
རབ་ཏུ་འབྱུང་བ་བསྟན་ཏེ། སེམས་ཅན་རྣམས་ཀྱིས་ཀྱེ་མ་གཞོན་ནུ་ནི། རབ་ཏུ་བྱུང་ངོ༌། །སྙམ་དུ་ཡང་དག་པར་ཤས་སོ། །ངས་ནི། བསྐལ་པ་བྱེ་བ་ཕྲག་གྲངས་མེད་པ་ནས་རབ་ཏུ་བྱུང་བའི་བྱ་བ་མཐར་
གཏུགས་ཟིན་མོད་ཀྱི། སྐྱོ་བར་གྱུར་ནས་རབ་ཏུ་བྱུང་བ་ལྟ་བུར་སྟོན་པ་ནི། འཇིག་རྟེན་དང་མཐུན་པར་བྱ་བ་ཙམ་དུ་ཟད་དོ། །ངས་བསྙེན་པ་རྫོགས་པ་ལྟ་བུར་བསྟན་པ་དེའང་འཇིག་རྟེན་ངེས་པར་བསྒྲལ་
བའི་ཕྱིར་རོ། །ངས་རྒྱུན་དུ་ཞུགས་པ་དང༌། ལན་གཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་ཉིད་ལ་སོགས་པ་དང༌། མཐར་གྱིས་གནས་པའི་སྙོམས་པར་འཇུག་པ་རྣམས་ཀྱང་བསྟན་
ཏེ༑ སེམས་ཅན་རྣམས་ཀྱིས་ཀྱེ་མ་མྱུར་བ་ཁོ་ནར་བླ་ན་མེད་པའི་དགྲ་བཅོམ་པར་གྱུར་ཏོ། །སྙམ་དུ་ཡང་དག་པར་ཤེས་སོ། །ང་ནི། བསྐལ་པ་བྱེ་བ་ཕྲག་གྲངས་མེད་པ་ནས་ཀྱང་དགྲ་བཅོམ་པའི་བྱ་བ་
མཐར་གཏུགས་ཟིན་མོད་ཀྱི། བྱང་ཆུབ་ཀྱི་ཤིང་དྲུང་དུ་རྩྭ་བཏིང་བ་ལ་འདུག་པ་དང༌། བདུད་འདུལ་བར་བསྟན་པ་འདི་ནི། འཇིག་རྟེན་ངེས་པར་བསྒྲལ་བའི་ཕྱིར་ཏེ། བདུད་ཕམ་པར་བྱས་ནས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ། །སྙམ་དུ་སེམས་ཅན་རྣམས་ཀྱིས་ཡང་དག་པར་ཤེས་སོ། །ང་ནི། བསྐལ་པ་བྱེ་བ་ཕྲག་གྲངས་མེད་པ་ནས་ཉོན་མོངས་པའི་རྣམ་པ་དང༌། ལྷ་དང༌།
རང་བཞིན་གྱི་བདུད་ཕམ་པར་བྱས་ནས་བདུད་རྩིའི་མཆོག་རྟོགས་སོ། །ངས་ནི། བཤད་བ་དང༌། གཅི་བ་དང༌། དབུགས་རྡུལ་པ་དང༌། དབུགས་འབྱུང་བའི་བྱ་བ་སྟོན་མོད་ཀྱི། ངའི་ལུས་ལ་རྒྱུ་དང་
༄༅། །མཐུན་པ་དང༌། རྣམ་པར་སྨིན་པ་མེད་དོ། །སེམས་ཅན་རྣམས་ཀྱིས་ནི། མི་དང་འདྲའོ། །སྙམ་དུ་ཡང་དག་པར་ཤེས་ཏེ། འདི་ནི། འཇིག་རྟེན་དང་མཐུན་པར་བྱ་བ་ཙམ་དུ་
ཟད་དོ༑ ༑སེམས་ཅན་རྣམས་ཀྱིས་ང་ཁ་ཟས་ཟའོ། །སྙམ་དུ་ཡང་དག་པར་ཤེས་མོད་ཀྱི། ངའི་ལུས་ལ་བཀྲེས་པས་ཉམ་ཆུང་བ་མེད་དེ། འདི་ནི། འཇིག་རྟེན་དང་མཐུན་པར་བྱ་བ་ཙམ་དུ་ཟད་
དོ༑ ༑ངས་ནི། བསྐལ་པ་བྱེ་བ་ཕྲག་གྲངས་མེད་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒྲུབས་ཏེ་སྲེད་པ་རྣམ་པར་སྤངས་ཀྱང་ཉལ་བ་ལྟ་བུར་སྟོན་ཏེ། འོན་ཀྱང་ངའི་ལུས་ལ་གཉིད་དང༌། སྐྱིགས་བུ་
དང༌། གླལ་བ་དང༌། རུ་ཤིང་ན་བ་དང༌། ཀླད་པ་ན་བ་རྣམས་མེད་དོ། །ཉལ་བར་བྱེད་པ་ནི། འཇིག་རྟེན་དང་མཐུན་པར་བྱ་བ་ཙམ་དུ་ཟད་དོ། །འགྲེང་བ་དང༌། འཆག་པ་དང༌། མིག་འཛུམ་པ་དང༌།
རྐང་པ་རྨྱང་བ་དང༌། ལུས་ཀྱི་སྤྱོད་ལམ་བྱེད་པར་སྣང་མེད་ཀྱི། ངའི་ལུས་ལ་དེ་ལྟ་བུའི་གནོད་པ་རྣམས་མེད་དོ། །རྐང་པ་འཁྲུ་བ་དང༌། སྣུམ་གྱིས་བྱུག་པ་དང༌། ཆུ་སྤྱད་པ་དང༌། སོ་ཤིང་ཟ་བ་དང༌།
མིག་སྨན་གྱིས་སྐུད་པར་སྣང་མེད་ཀྱི། ངའི་ལུས་ལ་དེ་ལྟ་བུའི་གནོད་པ་རྣམས་མེད་དོ། །རྐང་པ་པདྨའི་འདབ་མའི་མདོག་འདྲ་བ་དང༌། ཁ་ནས་ཨུཏྤ་ལའི་དྲི་འབྱུང་བ་དང༌། མིག་དཔེ་མེད་པར་བཟང་བ་དེ་
དག་ཀྱང་འཇིག་རྟེན་དང་མཐུན་པར་བྱ་བ་ཙམ་དུ་ཟད་དོ། །སེམས་ཅན་རྣམས་ཀྱིས་ནི། ཐམས་ཅད་མིའི་ཚུལ་དང་འདྲའོ། །སྙམ་དུ་ཡང་དག་པར་ཤེས་སོ། །ཕྱག་དར་ཁྲོད་ཀྱི་གོས་ས་ལས་བླངས་ཏེ་
འཁྲུ་བ་ལྟ་བུར་སྣང་མོད་ཀྱི། ང་ལ་དེ་དགོས་པ་མེད་དོ། །སེམས་ཅན་རྣམས་ཀྱིས་ནི། མིའི་དངོས་པོར་ཡང་དག་པར་ཤེས་ཏེ། སྒྲ་གཅན་ཟིན་གྱི་ཕར་བསྟན་པ་དང༌། ཟས་གཙང་མ་དང༌། སྒྱུ་འཕྲུལ་ཕ་
མར་བསྟན་པའང་འཇིག་རྟེན་གྱི་དོན་ཡིན་ནོ། །འཇིག་རྟེན་གྱི་བདེ་བ་མྱོང་ནས་ངེས་པར་བྱུང་སྟེ་ནགས་ཚལ་དུ་རབ་ཏུ་བྱུང་བ་དང༌། རྒྱལ་པོའི་བུ་གཽ་ཏ་མ་ཞེས་བྱ་བ་ནི། འདོད་པ་དང༌། འདོད་པ་མ་ཡིན་པ་
དང༌། བདེ་བ་དང༌། བདེ་བ་མ་ཡིན་པ་བྱེ་བྲག་ཕྱེད་པར་གྱུར་ནས་མྱ་ངན་ལས་འདས་པའི་བདེ་བ་ཚོལ་ལོ། །ཞེས་བྱ་བ་འདིའང་བྱིས་པའི་སེམས་ཅན་རྣམས་ངེས་པར་བསྒྲལ་བའི་ཕྱིར་རོ། །དེ་བཞིན་གཤེགས་
པ་ནི༑ འཁྲིག་པ་ལས་བྱུང་བ་མ་ཡིན་ཏེ། སྒྲ་གཅན་ཟིན་གྱི་ཕར་གྱུར་པར་བསྟན་པ་དང༌། རང་གི་ཕ་མ་བསྟན་པའང་འཇིག་རྟེན་དང་མཐུན་པར་བྱ་བ་ཙམ་དུ་ཟད་དོ། །ལྷ་དང༌། མི་དང༌། ལྷ་མ་ཡིན་
རྣམས་ཀྱིས་ནི། མིའི་དེ་བཞིན་གཤེགས་པའོ། །སྙམ་དུ་ཡང་དག་པར་ཤེས་སོ། །རིགས་ཀྱི་བུ། ཛམྦུའི་གླིང་ལ་ལར་ནི། ང་ཡང་དང་ཡང་དུ་ཡོངས་སུ་མྱ་ངན་ལས་འདའ་བ་ལྟ་བུར་སྟོན་ཏེ། འོན་ཀྱང་
གཏན་དུ་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་མི་བྱེད་དོ། །རེས་འགའ་ནི། སེམས་ཅན་རྣམས་ཀྱིས་དེ་བཞིན་གཤེགས་པ་གྲོངས་སོ། །སྙམ་དུ་ཡང་དག་པར་ཤེས་མོད་ཀྱི། དེ་
བཞིན་གཤེགས་པ་ནི། དུས་ཐམས་ཅད་དུ་རྟག་པ་དང༌། བརྟན་པ་དང༌། ཐེར་ཟུག་པ་ཡིན་ཏེ། ཡོངས་སུ་མྱ་ངན་ལས་འདའ་བར་སྟོན་པ་ནི། སངས་རྒྱས་རྣམས་ཀྱི་ཆོས་ཉིད་དོ། །ཛམྦུའི་གླིང་ལ་ལར་ནི། སྐྱེ་
༄༅། །བར་སྟོན་ཏེ། སེམས་ཅན་རྣམས་ཀྱིས་སྐྱེས་སོ། །སྙམ་དུ་ཡང་དག་པར་ཤེས་སོ། །ང་ནི། བསྐལ་པ་བྱེ་བ་ཕྲག་གྲངས་མེད་པ་ནས་བྱ་བ་བྱས་ཟིན་མོད་ཀྱི། དེར་
ཡང་གོ་འཕང་ཐམས་ཅད་ཀྱི་དོན་ཐོབ་པའི་མཐར་ཐུག་པར་བསྟན་ཏེ། འདི་ནི། འཇིག་རྟེན་དང་མཐུན་པར་བྱ་བ་ཙམ་དུ་ཟད་དོ། །ཛམྦུའི་གླིང་ལ་ལར་ནི། ངས་ཚུལ་ཁྲིམས་འཆལ་པ་ཕམ་པ་
བྱུང་བ་ལྟ་བུར་བསྟན་ཏེ། སེམས་ཅན་རྣམས་ཀྱིས་ཀྱེ་མ་ཕམ་པ་བྱུང་བའོ། །སྙམ་དུ་ཡང་དག་པར་ཤེས་མོད་ཀྱི། ང་ནི། སྔོན་ཆད་གཡེལ་བར་གྱུར་པ་མེད་དོ། །ཛམྦུའི་གླིང་ལ་ལར་ནི། ངས་བདག་
ཉིད་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང༌། དགྲ་བཅོམ་པ་གསོད་པ་དང༌། ཕ་མ་གསོད་པ་དང༌། བདག་ཉིད་དགེ་འདུན་གྱི་དབྱེན་བྱེད་པར་བསྟན་ཏེ། སེམས་ཅན་རྣམས་
ཀྱིས་ཀྱེ་མ་སེམས་ཅན་འདི་ནི། མཚམས་མེད་པ་ལྔའི་ལས་བྱེད་པ་ཡིན་ནོ། །སྙམ་དུ་ཡང་དག་པར་ཤེས་མོད་ཀྱི། ངའང་དེ་ལྟ་བུའི་ལས་བྱེད་པ་མ་ཡིན་ལ་ལྷ་དང་བཅས་པའི་འཇིག་རྟེན་ནའང་སུས་
ཀྱང་དགེ་འདུན་འབྱེད་མི་ནུས་སོ། །ཛམྦུའི་གླིང་ལ་ལར་ནི། ངས་དམ་པའི་ཆོས་སྤོང་བ་དང༌། བདག་ཉིད་འདོད་ཆེན་པར་སྟོན་ཏེ། སེམས་ཅན་རྣམས་ཀྱིས་ཀྱེ་མ་སེམས་ཅན་འདི་ནི། དམ་པའི་ཆོས་
སྤོང་བ་དང༌། འདོད་ཆེན་པའོ། །སྙམ་དུ་ཡང་དག་པར་ཤེས་ལ། འདོད་ཆེན་པ་ལྟ་བུར་བསྟན་པ་ནི། མ་འོངས་པའི་སེམས་ཅན་རྣམས་ཀྱི་ཕྱིར་ཏེ། འཇིག་རྟེན་པ་ནི། རྟག་ཏུ་འདོད་ཆེན་པ་
ཡིན་གྱི༑ སངས་རྒྱས་ནི། འདོད་ཆེན་པ་མ་ཡིན་ནོ། །ཛམྦུའི་གླིང་ལ་ལར་ནི། ངས་དམ་པའི་ཆོས་འཛིན་པར་བསྟན་ཏེ། སེམས་ཅན་རྣམས་ཀྱིས་ཀྱེ་མ་དམ་པའི་ཆོས་ཀྱི་ཕྱོགས་འཛིན་པའོ། །སྙམ་དུ་
ཡང་དག་པར་ཤེས་སོ། །འདི་ནི། སངས་རྒྱས་རྣམས་ཀྱི་རང་བཞིན་ཏེ། འདི་ནི། ཆོས་ཉིད་ཡིན་པས་ངོ་མཚར་ཆེ་བ་མེད་དོ། །ཛམྦུའི་གླིང་ལ་ལར་ནི། ང་བདུད་བགེགས་བྱེད་པ་ལྟ་བུར་སྟོན་ཏེ།
སེམས་ཅན་རྣམས་ཀྱིས་ཀྱེ་མ་བདུད་སྡིག་ཅན་སྙམ་དུ་ཡང་དག་པར་ཤེས་ལ། པདྨ་ཆུས་མི་གོས་པ་བཞིན་དུ་ང་ལ་བདུད་ཀྱི་ཉེས་པས་མི་གོས་སོ། །ཛམྦུའི་གླིང་ལ་ལར་ནི། ང་བུད་མེད་ཀྱི་གཟུགས་
ཀྱིས་འཚང་རྒྱ་བར་སྟོན་ཏེ། སེམས་ཅན་ཡིད་གཉིས་ཟ་བ་རྣམས་ཀྱིས་བུད་མེད་འཚང་རྒྱ་བར་བྱེད་དོ། །སྙམ་དུ་ཡང་དག་པར་ཤེས་ལ། དེ་བཞིན་གཤེགས་པ་ནི། རྟག་ཏུ་སྐྱེས་པ་ཁོ་ན་ཡིན་བཞིན་དུ་
སེམས་ཅན་རྣམས་གདུལ་བའི་ཕྱིར་གཉིས་ཀར་ཡང་སྟོན་ཏོ། །དེ་བཞིན་དུ་གཟུགས་དུ་མའི་ཐབས་ཀྱི་ཕྱོགས་ལ་འཇུག་པ་བསྟན་ཏེ། དེ་དག་ཐམས་ཅད་ཀྱང་འཇིག་རྟེན་དང་མཐུན་པར་བྱ་བ་ཙམ་དུ་ཟད་
དོ༑ ༑ཛམྦུའི་གླིང་ལ་ལར་ནི། ངས་འགྲོ་བ་བཞི་པོ་རྣམས་སུ་སྐྱེ་བར་བསྟན་ཏེ། དེའི་ལས་བྱེད་པའང་མ་ཡིན་ནོ། །དུད་འགྲོའི་སྐྱེ་གནས་སུ་འཇུག་པའང་འཇིག་རྟེན་དང་མཐུན་པར་བྱ་བ་ཙམ་དུ་ཟད་དོ།།
ཛམྦུའི་གླིང་ལ་ལར་ནི། ངས་ཚངས་པའི་གཟུགས་བསྟན་ཏེ། ཚངས་པ་ལ་དད་པའི་སེམས་ཅན་རྣམས་ལ་བགེགས་བྱ་བ་བསྟན་ནས་དམ་པའི་ཆོས་ལ་དགོད་པར་བྱེད་ལ། དེའི་ལས་བྱེད་པའང་མ་
༄༅། །ཡིན་ཏེ། སེམས་ཅན་རྣམས་ཀྱིས་ཚངས་པའི་བདག་པོའོ། །སྙམ་དུ་ཡང་དག་པར་ཤེས་སོ། །དེ་བཞིན་དུ་ལྷ་ཐམས་ཅད་ཀྱི་གནས་སུ་དེའི་གཟུགས་ཀྱི་བགེགས་
བྱས་ནས་སེམས་ཅན་ཐམས་ཅད་དམ་པའི་ཆོས་ལ་འགོད་པར་བྱེད་དེ། སེམས་ཅན་རྣམས་ཀྱི་ལྷ་ཐམས་ཅད་ཀྱི་གནས་ཀྱི་བདག་པོའོ། །སྙམ་དུ་ཡང་དག་པར་ཤེས་སོ། །ཛམྦུའི་གླིང་ལ་ལར་
ནི༑ ངས་སྨད་ཚོང་མ་རྣམས་ངེས་པར་བསྒྲལ་བའི་ཕྱིར་སྨད་ཚོང་མའི་ཁྱིམ་དུ་འགྲོ་བ་བསྟན་ལ། ང་ལ་འདོད་པའི་ཉེས་པའང་མི་སྐྱེ་སྟེ། ཆུའི་ནང་གི་པདྨ་བཞིན་དུ་ང་ལ་འདོད་པ་རྣམས་ཀྱི་ཉེས་
པས་མི་གོས་སོ། །ང་ནི། འདོད་པ་ལ་ཆགས་པའི་སེམས་ཅན་རྣམས་འདོད་པའི་ཆུ་བོ་ལས་ངེས་པར་བསྒྲལ་བའི་ཕྱིར་བཞི་མདོ་དང༌། སུམ་མདོ་ཐམས་ཅད་དུའང་སྣང་མོད་ཀྱི། དེའི་ལས་བྱེད་
པའང་མ་ཡིན་ཏེ། སེམས་ཅན་རྣམས་ཀྱིས་ནི། འདི་ནི། ཡུལ་རྒྱུ་བ་ཡིན་ནོ། །སྙམ་དུ་ཡང་དག་པར་ཤེས་སོ། །ཛམྦུའི་གླིང་ལ་ལར་ནི། དམངས་མོ་རྣམས་དམ་པའི་ཆོས་ལ་གཟུད་པའི་ཕྱིར་
ང་རོལ་མོའི་གནས་སུ་འགྲོ་བར་བྱེད་མོད་ཀྱི། ང་ནི། ལས་དེ་བྱེད་པའང་མ་ཡིན་ནོ། །ཛམྦུའི་གླིང་ལ་ལར་ནི། བྱིས་པ་རྣམས་ངེས་པར་བསྒྲལ་བའི་ཕྱིར་ཡི་གེ་སློབ་པའི་སར་སོང་སྟེ། གྲྭ་
དཔོན་བྱེད་ཅིང་བྱིས་པ་རྣམས་སློབ་པར་བྱེད་དོ། །ཛམྦུའི་གླིང་ལ་ལར་ནི། སེམས་ཅན་དེ་དག་བསྒྲལ་བའི་ཕྱིར་ང་ཆང་འཐུང་བར་བྱེད། རྒྱན་པོས་རྩེ་བར་བྱེད། གཡེང་པ་ལ་དགའ་བར་བྱེད་
དེ༑ ལས་ཆེན་པོ་དེ་དག་བྱེད་མོད་ཀྱི། ང་ནི། ལས་ཆེན་པོ་དེ་བྱེད་པའང་མ་ཡིན་ལ་སེམས་ཅན་རྣམས་ཀྱིས་ནི། འདི་ནི། ལས་དེ་བྱེད་པ་ཡིན་ནོ། །སྙམ་དུ་ཡང་དག་པར་ཤེས་སོ། །ཛམྦུའི་གླིང་ལ་
ལར་ནི། བྱ་རྒོད་དང༌། ཁྭ་ཏ་རྣམས་ངེས་པར་བསྒྲལ་བའི་ཕྱིར་ང་དུར་ཁྲོད་དུ་འགྲོ་བར་བྱེད་མོད་ཀྱི། དེར་ང་ལྟ་བའི་འདུ་ཤེས་མི་འཇུག་གོ། ཛམྦུའི་གླིང་ལ་ལར་ནི། དམ་པའི་ཆོས་གནས་པར་
བྱ་བའི་ཕྱིར་ང་ཁྱིམ་བདག་ཏུའང་སྟོན་ཏོ། །དམ་པའི་ཆོས་སྐྱོང་བ་དང༌། འཇིག་རྟེན་སྐྱོང་བ་བསྲུང་བའི་ཕྱིར་བློན་པོ་རྣམས་ཀྱི་ནང་དུ་བློན་པོར་བཀུར་རོ། །གཞོན་ནུ་རྣམས་ལ་དམ་པའི་ཆོས་ཡང་དག་
པར་བསྟན་པའི་ཕྱིར་གཞོན་ནུ་རྣམས་ཀྱི་ནང་དུ་གཞོན་ནུར་བཀུར་རོ། །དམ་པའི་ཆོས་ཀྱི་རྒྱལ་པོའི་ཆོས་ལུགས་ཡང་དག་པར་བསྟན་པའི་ཕྱིར་རྒྱལ་པོ་རྣམས་ཀྱི་ནང་དུ་རྒྱལ་པོར་བཀུར་རོ། །ཛམྦུའི་
གླིང་ལ་ལར་ནི། ནད་ཀྱི་བར་གྱི་བསྐལ་པའི་ནང་དུ་སེམས་ཅན་རྣམས་ལ་སྨན་བྱིན་ནས་དེ་དག་དམ་པའི་ཆོས་ལ་གཟུད་པར་བྱེད་དེ། སེམས་ཅན་རྣམས་ཀྱིས་ནད་ཀྱི་བར་གྱི་བསྐལ་པའོ། །སྙམ་དུ་
ཡང་དག་པར་ཤེས་སོ། །ཛམྦུའི་གླིང་ལ་ལར་ནི། མུ་གེའི་བར་གྱི་བསྐལ་པའི་ནང་དུ་བཀྲེས་ཤིང་ཉམ་ཆུང་བའི་སེམས་ཅན་རྣམས་བདུད་རྩིའི་ཟས་ཀྱིས་ཚིམ་པར་བྱས་ནས་དམ་པའི་ཆོས་ལ་འཛུད་པར་
བྱེད་དེ༑ སེམས་ཅན་རྣམས་ཀྱིས་མུ་གེའི་བར་གྱི་བསྐལ་པའོ། །སྙམ་དུ་ཡང་དག་པར་ཤེས་སོ། །ཛམྦུའི་གླིང་ལ་ལར་ནི། མཚོན་གྱི་བར་གྱི་བསྐལ་པ་བསྟན་ཏེ། དེ་དག་ཚོགས་ཤིང་གཅིག་ལ་
༄༅། །གཅིག་གསོད་པའི་དུས་ལ་བབ་པ་ན་དེ་དག་དམ་པའི་ཆོས་ལ་འཛུད་པར་བྱེད་དེ། སེམས་ཅན་རྣམས་ཀྱིས་མཚོན་གྱི་བར་གྱི་བསྐལ་པའོ། །སྙམ་དུ་ཡང་དག་པར་
ཤེས་སོ༑ ༑ཛམྦུའི་གླིང་ལ་ལར་ནི། སེམས་ཅན་རྟག་པའི་འདུ་ཤེས་ཅན་རྣམས་ལ་མི་རྟག་པའི་འདུ་ཤེས་བསྟན་པའི་ཕྱིར་སྲེག་པའི་བསྐལ་པ་སྟོན་ཏེ། སེམས་ཅན་རྣམས་ཀྱིས་སྲེག་པའི་
བསྐལ་པའོ། །སྙམ་དུ་ཡང་དག་པར་ཤེས་སོ། །ཛམྦུའི་གླིང་ལ་ལར་ནི། སེམས་ཅན་རྣམས་ལ་སྒྲ་སྐད་བསྟན་ཏེ། དེ་དག་སྒྲ་སྐད་ཀྱིས་དྲངས་ནས་ངེས་པར་སྒྲོལ་བར་བྱེད། ཛམྦུའི་གླིང་
ལ་ལར་ནི། སེམས་ཅན་རྣམས་ངེས་པར་བསྒྲལ་བའི་ཕྱིར་བདག་ཉིད་ཁམས་བཞི་པོ་རྣམས་སུ་སྒྱུར་བར་བྱེད་ཅིང་སེམས་ཅན་རྣམས་ཀྱི་ནད་བསལ་བའི་ཕྱིར་བདག་ཉིད་སྨན་དང༌། ཤིང་
ཐམས་ཅད་དུ་སྒྱུར་བར་བྱེད་དོ། །ཛམྦུའི་གླིང་ལ་ལར་ནི། ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་འབྱུང་བར་ཡང་སྟོན་ཏེ། ཐམས་ཅད་དུ་མཁན་པོ་བྱེད་ཅིང་མཆོད་པར་འགྱུར་རོ། །དེ་བཞིན་
གཤེགས་པ་ནི། སྔོན་བསྐལ་པ་བྱེ་བ་ཕྲག་གྲངས་མེད་པ་ནས་རབ་ཏུ་བྱུང་བའི་དེ་ཁོ་ན་ཉིད་ཀྱི་དོན་མཐར་ཐུག་ཟིན་བཞིན་དུ་ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་འབྱུང་བ་སྟོན་ཏེ། དེ་དག་
ངེས་པར་བསྒྲལ་བའི་ཕྱིར་རོ། །དེ་བཞིན་གཤེགས་པ་ནི། རྟག་ཏུ་རང་བཞིན་གྱི་སྐུར་གནས་མོད་ཀྱི། སེམས་ཅན་ཐམས་ཅད་ངེས་པར་བསྒྲལ་བའི་ཕྱིར་བཟོའི་གནས་ཐམས་ཅད་དུའང་སློབ་
དཔོན་བྱེད་དེ། རིག་སྔགས་དང༌། གསང་སྔགས་དང༌། སྤྲུལ་པ་ཐམས་ཅད་ཀྱང་སྟོན་ལ། ཡ་མཚན་ཅན་ཐམས་ཅད་ཀྱིས་རྒྱགས་པ་དང༌། ང་རྒྱལ་བཅོམ་ནས་དེ་དག་ལ་ཤིང་བལ་ལྟ་བུར་སྙིང་པོ་
མེད་པ་ཡང་དག་པར་སྟོན་ཅིང་དེ་དག་དམ་པའི་ཆོས་ལ་འཛུད་པར་བྱེད་པ་འདི་ནི། འཇིག་རྟེན་དང་མཐུན་པར་བྱ་བ་ཡིན་ཏེ། དེར་སེམས་ཅན་ལྟ་བའི་འདུ་ཤེས་ཅན་རྣམས་ཀྱིས་སེམས་ཅན་འདི་ནི།
འཇིག་རྟེན་པའོ། །སྙམ་དུ་ཡང་དག་པར་ཤེས་མོད་ཀྱི། དེ་བཞིན་གཤེགས་པ་ནི། འཇིག་རྟེན་མ་ཡིན་གྱི། འཇིག་རྟེན་ལས་འདས་པའི་ཆོས་གཟིགས་པ་ཡིན་ནོ། །ཛམྦུའི་གླིང་ལ་ལར་ནི། འཇིག་
རྟེན་དང་མཐུན་པར་བྱ་བས་ངེས་པར་བསྒྲལ་བར་བྱ་བའི་ཕྱིར་བྲན་དང༌། བྲན་མོར་ཡང་སྟོན་ཏེ། སེམས་ཅན་རྣམས་ཀྱིས་བྲན་དང༌། བྲན་མོའོ། །སྙམ་དུ་ཡང་དག་པར་ཤེས་པ་དེ་ནི། རིགས་དམའ་
བར་སྟོན་པ་ཡིན་ནོ། །ཛམྦུའི་གླིང་ལ་ལར་ནི། ངས་འཇིག་རྟེན་གྱི་བྱ་བ་ཐམས་ཅད་བསྟན་ཏེ། སེམས་ཅན་རྣམས་ཀྱིས་སེམས་ཅན་འདི་ནི། འཇིག་རྟེན་ལྷུར་བྱེད་པ་ཡིན་ནོ། །སྙམ་དུ་ཡང་དག་པར་
ཤེས་སོ༑ ༑དེ་ལྟར་སྟོན་དུ་ཟིན་ཀྱང་དེ་བཞིན་གཤེགས་པ་ནི། ལས་དེ་བྱེད་པ་མ་ཡིན་ཏེ། འཇིག་རྟེན་ཐམས་ཅད་དང་མཐུན་པར་བྱ་བ་ནི། འཇིག་རྟེན་བསྒྲལ་བའི་ཕྱིར་རོ། །དེ་བཞིན་དུ་བྱང་གི་སྒྲ་མི་
སྙན་དང༌། ཤར་གྱི་ལུས་འཕགས་དང༌། ནུབ་ཀྱི་བ་ལང་སྤྱོད་རྣམས་དང༌། སྲིད་པ་ཉི་ཤུ་རྩ་ལྔ་དག་ཏུའང་འཇིག་རྟེན་པ་དང་མཐུན་པར་བྱ་བའི་སྒོ་ནས་དེ་དང་དེ་དག་དེ་བཞིན་དུ་སྦྱར་ཏེ། སྟོང་གསུམ་གྱི་
༄༅། །སྟོང་ཆེན་པོའི་འཇིག་རྟེན་གྱི་ཁམས་བརྗོད་པའང་དཔའ་བར་འགྲོ་བའི་ཏིང་ངེ་འཛིན་གྱི་ལུགས་བཞིན་དུ་སྦྱར་བར་བྱའོ། །དེ་བཞིན་གཤེགས་པས་བྱ་བ་ཆེན་པོ་ཐམས་
ཅད་བསྟན་པའི་ཕྱིར་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་སྟེ། འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། བྱ་བ་ཆེན་པོ་ཐམས་ཅད་དང༌། ཆོ་འཕྲུལ་ཆེན་པོ་
དང༌། མི་འཇིགས་པ་ལ་འགོད་པར་བྱེད་པས་ན། རྟག་པ་ཆེན་པོ་ཞེས་བྱ་སྟེ། ཇི་ལྟར་བྱེད་ཅེས་འདྲི་བར་མི་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་
ནི༑ སྒྲ་གཅན་ཟིན་གྱི་ཕར་གྱུར་པར་བསྟན་པའི་ཐབས་ལ་འཇུག་པ་ལྟ་བུར་འཇིག་རྟེན་དང་མཐུན་པར་མཛད་དོ། །སྙམ་དུ་ཁོང་དུ་ཆུད་པར་བྱ་སྟེ། བསྐལ་པ་བྱེ་བ་ཕྲག་དུ་མ་ནས་འདོད་པའི་ཆུ་བོ་
ལས་བརྒལ་ཟིན་པས་ན། དེའི་ཕྱིར་དེ་བཞིན་གཤེགས་པ་ནི། རྟག་པ་དང༌། བརྟན་པ་དང༌། ཐེར་ཟུག་པ་ཡིན་ནོ། །གསོལ་བ། འདིར་ཇི་ལྟར་མར་མེ་གུམ་པ་གང་དུ་མཆི་བའི་གནས་གདགས་
སུ་མ་མཆིས་པར་བཀའ་སྩལ་པ་དེ་བཞིན་དུ་དེ་བཞིན་གཤེགས་པའི་མྱ་ངན་ལས་འདས་པའི་གནས་ཀྱང་དེ་དང་འདྲ་བར་གསུངས་ན། ཇི་ལྟར་དེ་བཞིན་གཤེགས་པ་རྟག་པ་དང༌། བརྟན་པ་
དང༌། ཐེར་ཟུག་པ་ལགས། བཀའ་སྩལ་པ། རིགས་ཀྱི་བུ། མྱ་ངན་ལས་འདས་པ་ནི། མར་མེའི་གནས་དང་འདྲ་བར་མ་བཤད་དེ། རིགས་ཀྱི་བུ། འདི་ལྟར་སྐྱེས་པའམ། བུད་མེད་གང་
ཡང་རུང་བ་ཞིག་གིས་སྣོད་ཆེན་པོའམ། ཆུང་ངུའང་རུང་སྟེ། མར་རམ་ཏིལ་མར་གྱིས་བཀང་ནས་མར་མེ་སྦར་ན། མར་མེའི་མེ་ལྕེ་དེ་ཏིལ་མར་ཇི་སྲིད་ཡོད་པ་དེ་སྲིད་དུ་འབར་ལ། ཏིལ་མར་ཟད་ནས་
མར་མེ་ཟད་པར་འགྱུར་རོ། །དེ་ལ་ཉོན་མོངས་པ་ཟད་པ་ནི། མར་མེ་ཟད་པ་དང་འདྲ་བར་བསྟན། དེ་བཞིན་གཤེགས་པ་ནི། སྣོད་བཞིན་དུ་རྟག་པ་ཡིན། ཉོན་མོངས་པ་ཟད་པ་ནི། མར་མེ་དང་ཏིལ་མར་
འདྲ་ན། ཅི་སྣོད་ཀྱང་མར་མེ་དང་མགོ་མཉམ་དུ་མེད་པར་འགྱུར་རམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། སྣོད་ནི། མ་མཆིས་པར་མི་འགྱུར་ལགས་ན། ཅི་ལགས། དེ་བཞིན་
གཤེགས་པའང་སྣོད་དང་འདྲ་བར་བས་པར་འགྱུར་རམ། གལ་ཏེ་དེ་བཞིན་གཤེགས་པའང་ཏིལ་མར་གྱི་སྣོད་དང་འདྲ་ན་ནི། དེ་བཞིན་གཤེགས་པའང་ཟད་པར་འགྱུར་བར་བཀའ་སྩལ་པར་
མི་འགྱུར་ལགས་སམ། བཀའ་སྩལ་པ། དེ་བཞིན་གཤེགས་པ་ནི། སྣོད་དང་འདྲ་བ་མ་ཡན་ཏེ། མཆོག་ཏུ་རྟག་པ་གང་ཡིན་པ་དེ་ནི། དེ་བཞིན་གཤེགས་པ་སྟེ། དེ་བས་ན། མྱ་ངན་ལས་འདས་
པ་རྟག་ཏུ་མཆོག་ཏུ་བདེ་བ་ཡིན་ནོ། །རིགས་ཀྱི་བུ། གཞན་ཡང་མར་མེའི་གནས་དང་འདྲ་བ་ནི། དགྲ་བཅོམ་པ་ཡིན་ཏེ། དེ་བས་ན། མྱ་ངན་ལས་འདས་པའི་གནས་དགྲ་བཅོམ་པ་ཉིད་ཐོབ་པ་ནི།
འབྲས་བུའི་མཆོག་ཅེས་བྱའོ། །དགྲ་བཅོམ་པ་ཐམས་ཅད་ནི། ཟང་ཟིང་ལ་ཞེན་པ་དང་བྲལ་ཏེ། ཟང་ཟིང་མེད་པ་དང༌། མར་མེའི་གནས་བཞིན་དུ་མཐར་ཐུག་པ་དང༌། ཟང་ཟིང་མེད་པ་ལ་དགའ་བ་
༄༅། །ཡིན་ནོ༑ ༑ཕྱིར་མི་འོང་བའང་ཟང་ཟིང་མེད་པའི་དོན་ཡིན་པར་ངས་དགོངས་པའི་ཚིག་གིས་བསྟན་ཏེ། མྱ་ངན་ལས་འདས་པའི་གནས་ནི། མ་ཡིན་ནོ། །གསོལ་པ།
ཕྱིར་མི་འོང་བ་ཞེས་བཀའ་སྩལ་པ་དེའི་དོན་ཅི་ལགས། བཀའ་སྩལ་པ། ཡང་སྲིད་པ་མི་ལེན་པ་གང་ཡིན་པ་དེ་ནི། ཕྱིར་མི་འོང་བ་ཞེས་བྱའོ། །གསོལ་པ། བཅོམ་ལྡན་འདས། ཕྱིར་
མི་འོང་བ་ཞེས་བགྱི་བ་ལགས་ན། ཕྱིར་མི་འོང་བ་གང་ལགས་པ་དེ་ལའང་སྲིད་པ་ལེན་པ་མཆིས་པར་འགྱུར་ན། ཅིའི་སླད་དུ་ཕྱིར་མི་འོང་བའང་སླར་འདི་རང་བཞིན་གྱིས་མི་གཙང་བའི་སྲིན་
བུ་འཚལ་བའི་ལུས་ཅན་དུ་སྐྱེ་བར་མི་འགྱུར་ལགས། བཀའ་སྩལ་པ། ལུས་དེ་ནི། མི་ལེན་མོད་ཀྱི། དུག་སྨན་བཞིན་དུ་ལུས་ལེན་ཏོ། །དེ་བས་ན། ཕྱིར་མི་འོང་བ་ཞེས་བྱའོ། །ཕྱིར་མི་
འོང་བ་ཞེས་བྱ་བ་ནི། ལུས་ཞེས་བྱ་བའི་ཐ་ཚིག་གོ །ཕྱིར་མི་འོང་བ་ཞེས་བྱ་བ་ནི། ཕན་ཚུན་འགྲོ་ཞེས་བྱ་བའི་ཐ་ཚིག་གོ། གསོལ་པ། བཅོམ་ལྡན་འདས། ཅི་ལགས། བཅོམ་ལྡན་འདས་ཀྱིས་
བསྟན་པ་ལ་གསང་བ་མཆིས་སམ། དགོངས་པའི་ཚིག་དགོངས་པའི་ཚིག་ཅེས་གསང་བར་མི་མཛད་དུ་གསོལ། བཅོམ་ལྡན་འདས། ཅི་ལགས། སངས་རྒྱས་ཀྱི་གསུང་མིག་འཕྲུལ་མཁན་གྱི་
འཁྲུལ་འཁོར་དང༌། སྒྱུ་མ་མཁན་གྱིས་བགྱིས་པའི་འཁྲུལ་འཁོར་གྱི་སྒྱུ་མའི་བུད་མེད་དང་འདྲ་ལགས་སམ། བཀའ་སྩལ་པ། ངའི་བསྟན་པ་ལ་ནི། གསང་བ་མེད་དེ། སངས་རྒྱས་ཀྱི་
གསུང་ནི། སྟོན་གྱི་ཟླ་བ་རྒྱས་པ་བཞིན་དུ་སྐྱོན་མེད་པ་དང༌། མཚན་མས་མ་བཏབ་པ་དང༌། རྨོངས་པ་མེད་པ་དང༌། གསང་བ་དང་གསང་ཆེན་དང་བྲལ་བ་དང༌། གསལ་བ་ཡིན་ནོ། །འཕགས་པ་
ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ། བམ་པོ་དྲུག་པ། རིགས་ཀྱི་བུ། དཔེར་ན། ཁྱིམ་བདག་བྲན་བཟའ་ཅན་ནོར་བྱེ་བ་བདོག་པ་ཞིག་ལ་བུ་གཅིག་པ་སྡུག་ཅིང་ཕངས་ལ་གཅེས་
ཤིང་ཡིད་དུ་འོང་བ་ཞིག་ཡོད་དེ། དེས་བུ་དེ་བུའི་སློབ་དཔོན་ལས་ཕྱིར་བཀུག་ནས་བུ་ལ་བྱམས་པའི་ཕྱིར་བདག་ཉིད་ཀྱིས་བསྒྲིམས་ཏེ་ཡི་གེ་ཕྱེད་པ་སློབ་པར་བྱེད་ན། དེས་བསྒྲིམས་ཏེ་ཡི་
གེ་ཕྱེད་པ་བསླབ་ཏུ་ཟིན་ཀྱང་ཅི་བརྡ་སྤྲོད་པའི་དོན་གྱིས་བྱེ་བྲག་སྟོན་པར་ནུས་སམ། བསྟན་པར་ནུས་སུ་ཟིན་ཀྱང་ཅི་དེས་ཡི་གེ་ཕྱེད་པ་བསླབ་པས་བརྡ་སྤྲོད་པའི་དོན་ཤེས་པར་འགྱུར་རམ། ཅི་
ཁྱིམ་བདག་བྲན་བཟའ་ཅན་རང་གི་བུ་ལ་གསང་བར་བྱེད་དམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། བུའི་ཤེས་པའི་རྩལ་དང༌། ཡིད་རྣོ་རྟུལ་དེ་འདྲ་བ་དང༌། ཤེས་པའི་
རྩལ་དང་མི་ལྡན་པའི་རྒྱུས་ན། དེ་ལ་གསང་བ་དང་འདྲ་བར་གདའ་བར་གྱུར་ལགས་སོ། །དེ་ལ་ཡིད་མི་བདེ་བ་དང༌། གཡོ་དང༌། སེར་སྣ་གང་ལགས་པ་དེ་ནི། གསང་བ་ལགས་པར་རིག་པར་
བགྱིའོ༑ ༑དང་བ་དང་དགའ་བས་བུ་གཅིག་པའི་འདུ་ཤེས་དང་ལྡན་པ་གང་ལགས་པ་དེ་ནི། གསང་བ་ཞེས་མི་བགྱི་ལགས་སོ། །བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །རིགས་
༄༅། །ཀྱི་བུ༑ ཁྱོད་ལེགས་སོ། །སྡང་བ་དང༌། གཡོ་དང༌། སེར་སྣ་དང་ལྡན་པ་གང་ཡིན་པ་དེ་ནི། གསང་བ་ཡིན་ཏེ། དེའི་སྟོབས་དང༌། བྱམས་པས་ཀྱང་ཁྱིམ་བདག་བྲན་བཟའ་ཅན་
དེ་སྟོན་པར་མི་བྱེད་པ་དེ་བཞིན་དུ་ཁྱིམ་བདག་བྲན་བཟའ་ཅན་ལྟར་ང་སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་བསྒོམས་པ་དང་ལྡན་མོད་ཀྱི། བྱིས་པ་དེ་དག་གིས་མི་བཟོད་པའི་ཕྱིར་
ང་དགོངས་པའི་ཚིག་མི་སྟོན་ཏེ། ངས་ཡི་གེ་ཕྱེད་པ་དང་འདྲ་བར་ནི། གསུང་རབ་ཡན་ལག་དགུ་སྟོན་ཏོ། །བརྡ་སྤྲོད་དང་འདྲ་བར་ནི། སྟོབས་བཅུ་དང༌། འཕགས་པའི་བདེན་པ་བཞི་དང༌། འཕགས་
པའི་ལམ་ཡན་ལག་བརྒྱད་པ་དང༌། ཐེག་པ་ཆེན་པོ་ཤིན་ཏུ་རྒྱས་པའི་བརྡ་སྤྲོད་པ་བསྟན་ཏོ། །རིགས་ཀྱི་བུ། གཞན་ཡང་གང་གི་ཚེ་ཡི་གེ་ཕྱེད་པ་བསླབ་ནས་སྒྲ་རིག་པའི་འོས་སུ་གྱུར་པ་
དེའི་ཚེ་ཁྱིམ་བདག་བྲན་བཟའ་ཅན་གྱིས་གལ་ཏེ་བརྡ་སྤྲོད་པའི་དོན་སློབ་པར་མི་བྱེད་ན་ནི། དེ་ལྟ་ན་སེར་སྣ་བྱེད་པའི་ཕྱིར་གསང་བ་ཞེས་བྱའོ། །གལ་ཏེ་བརྡ་སྤྲོད་པའི་དོན་བསྟན་ནས་ནི། བྱིས་
པས་བརྡ་སྤྲོད་པ་རྫོགས་པར་ལོབས་པར་འགྱུར་བ་དེ་བཞིན་དུ་ངའང་ཉན་ཐོས་རྣམས་ལ་ཇི་སྲིད་དུ་ཐེག་པ་ཆེན་པོའི་སྣོད་དུ་གྱུར་པ་དེ་སྲིད་དུ་གསུང་རབ་ཡན་ལག་དགུ་སྟོན་ཏེ། གལ་ཏེ་
ངས་སེམས་ཅན་སྣོད་དུ་གྱུར་པ་རྣམས་ལ་ཐེག་པ་ཆེན་པོ་བསླབ་པ་གསང་བར་བྱས་ན་ནི། དེ་ལྟར་ན་ང་ལ་བརྡ་སྤྲོད་པ་དང་འདྲ་བར་གསང་བར་བྱས་སོ། །ཞེས་སྨྲ་བའི་རིགས་སོ། །དེ་ནི། ངས་
བརྡ་སྤྲོད་པ་དང་འདྲ་བར་དེ་བཞིན་གཤེགས་པ་རྟག་པ་དང༌། བརྟན་པར་བསྟན་ཏེ། ཁྱིམ་བདག་བྲན་བཟའ་ཅན་དང་འདྲ་བར་རང་གི་སྲས་ཚར་ཕྱིན་པར་མཛད་དོ། །དེ་ལྟར་ན། རིག་པ་ཐམས་ཅད་
ཚར་ཕྱིན་པར་བྱེད་པ་བཞིན་དུ་ཚར་ཕྱིན་པར་བྱེད་དོ། །རིགས་ཀྱི་བུ། གཞན་ཡང་དཔེར་ན། དབྱར་གྱི་སྤྲིན་ཆེན་པོ་རྣམས་འབྲུག་དིར་རི་རི་སྒྲོག་ཅིང་ཆར་ཆེན་པོ་འབེབས་སུ་ཟིན་ཀྱང་སེམས་ཅན་ཁ་ཅིག་
གི་ས་བོན་མ་སྐྱེས་ན། ཅི་དེ་ལ་སྤྲིན་ཆེན་པོ་རྣམས་ཀྱིས་ཉེས་སམ། ཅི་སྤྲིན་ཆེན་པོ་རྣམས་ཆར་མི་འབེབས་སམ། དེ་བཞིན་དུ་དེང་ངས་ཡོངས་སུ་མྱ་ངན་ལས་འདས་པ་ཆེན་པོ་གསང་ཆེན་མ་ལུས་
པར་བསྟན་ཀྱང་སེམས་ཅན་སྣོད་དུ་མ་གྱུར་པ་གང་ཡིན་པ་དེ་དག་གིས་མི་ཐོས་སོ། །ཡང་བཀའ་སྩལ་པ། གང་དག་ལ་ནི་ཡོངས་བསགས་མེད། །གང་དག་གི་ནི་ཟས་མི་རྟོགས། །མཁའ་ལ་
བྱ་རྣམས་རྗེས་འདྲ་བར། །དེ་དག་རྗེས་གཅད་དཀའ་བ་ཡིན། །བསྟན་པ་འདིའི་དོན་ཇི་ལྟ་བུ་ཞེ་ན། སུ་དག་ལ་ནི་ཡོངས་བསགས་མེད། །སུ་དག་གི་ནི་ཟོས་མི་རྟོགས། །གང་དག་གི་ནི་རྗེས་གཅད་
དཀའ༑ ༑སུ་སོང་གང་དུ་སོང་བ་ན། །དེ་དག་རྗེས་གཅད་དཀའ་བ་ཡིན། །དེ་ལ་རིན་པོ་ཆེ་ལ་སོགས་པ་ནི། བསགས་པའོ། །ཡོངས་ཞེས་བྱ་བ་ནི། ཕྲད་ཀྱི་བྱེ་བྲག་གི་ཐ་ཚིག་གོ །ཡོངས་ཞེས་བྱ་བ་ནི།
བསྡུས་པའི་དོན་ཏེ། འདིར་རྫས་བཟང་པོ་བསྒྲུབས་པའི་ཐ་ཚིག་གོ། །བསགས་པ་ཞེས་བྱ་བ་དང༌། ནོར་ཞེས་བྱ་བ་ནི། དོན་གཅིག་གོ། གང་ནོར་ཡོངས་སུ་བསགས་པར་བྱེད་པ་དེ་ནི། དེ་དག་གི་ཡོངས་
༄༅། །སུ་བསགས་པ་ཞེས་བྱའོ། །དེ་ལ་ཡོངས་སུ་བསགས་པ་ཞེས་བྱ་བ་ནི། རྣམ་པ་གཉིས་ཏེ། འདུས་བྱས་ཡོངས་སུ་བསགས་པ་དང༌། འདུས་མ་བྱས་ཡོངས་སུ་
བསགས་པའོ། །དེ་ལ་ཉན་ཐོས་ནི། འདུས་བྱས་ཡོངས་སུ་བསགས་པའི་རྣམ་པའོ། །དེ་བཞིན་གཤེགས་པ་ནི། འདུས་མ་བྱས་ཡོངས་སུ་བསགས་པའི་རྣམ་པའོ། །དགེ་འདུན་ནི། རྣམ་
པ་གཉིས་ཏེ། འདུས་བྱས་ཀྱི་དགེ་འདུན་དང༌། འདུས་མ་བྱས་ཀྱི་དགེ་འདུན་ནོ། །དེ་ལ་འདུས་བྱས་ཀྱི་དགེ་འདུན་ཞེས་བྱ་བ་ནི། ཉན་ཐོས་ཀྱི་དགེ་འདུན་ཡིན་ཏེ། ཉན་ཐོས་ཀྱི་དགེ་འདུན་ལ་ནི། ཡོངས་
སུ་བསགས་པའང་མེད་ན། བྲན་དང་བྲན་མོ་ལ་སོགས་པ་རྫས་ངན་པ་རྣམས་དང༌། མཛོད་དང༌། བང་བ་ཡོངས་སུ་འཛིན་པ་ལྟ་ག་ལ་ཡོད་དེ། འོས་མ་ཡིན་པས་ན། དེ་ནི། ལན་ཚྭ་དང༌། ཏིལ་
ཙམ་ཡང་ཡོངས་སུ་བསགས་པར་མི་བྱེད་དོ། །གང་དག་བཅོམ་ལྡན་འདས་ཀྱིས་བདག་ཅག་ལ་བྲན་དང་བྲན་མོ་ལ་སོགས་པ་འཆང་དུ་གནང་ངོ༌། །ཞེས་ཟེར་བ་དེ་དག་གི་ལྕེ་ནི། ལྐུག་པར་འགྱུར་
སྲིད་དོ༑ ༑ཉན་ཐོས་དེ་དག་ནི། ཡོངས་སུ་བསགས་པ་མེད་པའི་རྣམ་པ་ཡིན་ཏེ། དེ་དག་ནི། ཟས་ཡོངས་སུ་ཤེས་པའོ། །གང་དག་ཟས་ལ་ཞེན་པ་མེད་པ་དེ་དག་ནི། ཟས་ཡོངས་སུ་ཤེས་པ་ཡིན་ནོ།།
དེ་དག་ནི། འགྲོ་བའི་ལམ་དུ་རྗེས་གཅད་པར་དཀའོ། །དེ་དག་ནི། མྱུར་བ་ཁོ་ནར་སངས་རྒྱས་ཉིད་དུ་ཉེ་བར་གནས་སོ། །དེ་དག་གི་འགྲོ་བ་ནི། རྗེས་གཅད་དཀའོ། །ཞེས་དེ་བཞིན་གཤེགས་པ་གསུང་
ངོ༌། །ཡང་བཀའ་སྩལ་པ། གལ་ཏེ་འདུས་བྱས་ཀྱི་དགེ་འདུན་ལའང་ཡོངས་སུ་བསགས་པ་མེད་ན། འདུས་མ་བྱས་པའི་དགེ་འདུན་ལྟ་ག་ལ་ཡོད། འདུས་མ་བྱས་པའི་དགེ་འདུན་ནི། དེ་བཞིན་གཤེགས་པ་སྟེ། དེ་བཞིན་གཤེགས་
པ་ལ་གསང་བའི་ཆོས་བསྟན་པ་ག་ལ་ཡོད། གསང་བ་གང་ཡིན་པ་དེ་ནི། ཡོངས་སུ་བསགས་པའོ། །རྗེས་གཅད་དུ་མེད་པ་ནི། མི་གཡོ་བའི་བདེ་བ་སྟེ། མྱ་ངན་ལས་འདས་པའི་དོན་ཏེ། །དེ་ལ་ནི། ནམ་
མཁའ་ཡང་མེད། ལོ་དང༌། ཉི་མ་དང༌། ཟླ་བ་རྣམས་ཀྱིས་ཀྱང་བྱར་མེད། མཇུག་རིང་དང༌། སྐར་མའི་ཚོགས་རྣམས་དང༌། རི་རྣམས་དང༌། དུས་དང༌། སྤྲིན་རྣམས་ཀྱང་མེད་དེ། སྐྱེ་བའི་རྒྱུན་ཆད་པ་
འཆི་བ་དང༌། ན་བ་དང༌། རྒ་བ་དང༌། སྲིད་པ་ཉི་ཤུ་རྩ་ལྔ་སྤངས་པ་སྡུག་བསྔལ་གྱི་རྣམ་པ་དང༌། ཉོན་མོངས་པ་དང་བྲལ་བ་སྟེ། དེ་བཞིན་གཤེགས་པ་རྟག་པ་དང༌། བརྟན་པ་དང༌། བདེ་བ་དང༌། མི་གཡོ་
བ་དང༌། གནས་མེད་པ་ནི། ཡོངས་སུ་མྱ་ངན་ལས་འདས་པ་སྟེ། དེར་འགྲོ་བའི་ཕྱིར་དེང་དེ་བཞིན་གཤེགས་པ་གྲོང་ཁྱེར་ཆེན་པོར་གཤེགས་སོ། །ཆེན་པོ་ཞེས་བྱ་བ་དང༌། ཆེ་བ་ཞེས་བྱ་བ་ནི། དོན་གཅིག་
གོ །ཆེན་པོ་ཞེས་བྱ་བ་ནི། ལྷག་མ་དང་བཅས་པའི་ཚིག་བླ་དྭགས་ཏེ། འདི་ན་མི་ལ་ལ་ཚེ་དཔག་ཏུ་མེད་པར་གྱུར་ན། མི་དེ་སྐྱེས་བུ་ཆེན་པོ་ཞེས་བྱ་བའི་གྲངས་སུ་གཏོགས་ཏེ། གལ་ཏེ་ཆོས་དང་ལྡན་ན། མི་
དེ་སྐྱེས་བུ་ཐམས་ཅད་ཀྱི་མཆོག་ཡིན་ནོ། །ཡང་འདིར་སྐྱེས་བུ་ཆེན་པོའི་རྣམ་པར་རྟོག་པ་བརྒྱད་ཀྱིས་སྐྱེས་བུ་གཅིག་པུར་འགྱུར་ཏེ། སྐྱེས་བུ་ཆེན་པོ་དུ་མ་ཡོད་པའི་ནང་ན་གང་ལ་སྐྱེས་བུ་ཆེན་པོའི་རྣམ་
༄༅། །པར་རྟོག་པ་བརྒྱད་ཡོད་པ་དེ་ནི། སྐྱེས་བུ་ཆེན་པོ་ཐམས་ཅད་ཀྱི་ནང་ན་འང་སྐྱེས་བུ་ཆེན་པོའོ། །ཞེས་ངས་བཤད་པས་ན། དེའི་ཕྱིར་ཆེ་བ་ཞེས་བྱའོ། །ལྷག་མ་དང་
བཅས་པའི་མྱ་ངན་ལས་འདས་པ་ཞེས་བྱ་བ་ལ། གང་ལ་རྨ་མེད་པ་དེ་ནི། མྱ་ངན་ལས་འདས་པ་ཞེས་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ། དཔེར་ན། འདི་ན་མི་ལ་ལ་ཞིག་གདུག་པའི་ཟུག་རྡུས་
ཕོག་སྟེ༑ བབ་རྡོའི་གནོད་པས་ཐེབས་ནས་བབ་རྡོའི་གནོད་པས་ཐེབས་པའི་མི་དེ་ཟུག་རྡུ་འབྱིན་པའི་སྨན་པ་ཆེན་པོ་ཞིག་གིས་གསོས་ཏེ་གདུག་པའི་ཟུག་རྔུ་བསལ་ནས་བདེ་བར་བྱས་ཏེ་དེ་གནོད་པ་
མེད་པར་སྔ་མཁོ་བཞིན་དུ་བྱས་ནས་སྨན་པ་དེས་མི་དེ་བོར་ཏེ་ཡུལ་གཞན་ནམ། གྲོང་གཞན་ནམ། ཁྱིམ་གཞན་གང་ན་རྨས་པ་ཡོད་པ་དང༌། གང་ན་རྨའི་ལས་བྱར་ཡོད་པ་དེ་ན་གནས་པ་དེ་
བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་པ་ཆེན་པོ་ཟུག་རྔུ་འབྱིན་པས་ཀྱང་ཛམ་བུའི་གླིང་པའི་སེམས་ཅན་བསྐལ་པ་བྱེ་བ་ཕྲག་གྲངས་མེད་པ་
ཚུན་ཆད་ནས་འདོད་ཆགས་དང༌། ཞེ་སྡང་དང༌། གཏི་མུག་ལ་སོགས་པ་ཉོན་མོངས་པའི་དུག་གིས་ཕོག་པའི་སེམས་ཅན་ཤིན་ཏུ་རྨས་པ་ཐམས་ཅད་ཀྱི་ཟུག་རྡུ་རྣམས་ཐེག་པ་ཆེན་པོའི་
མདོའི་སྡེ་ཚན་སྣ་ཚོགས་ཀྱི་དགེ་བའི་རྩ་བའི་སྨན་རྣམས་ཀྱིས་གསོ་བར་མཛད་དོ། །གསོས་ནས་ཀྱང་དེ་རྣམས་མྱ་ངན་ལས་བཟླས་ཏེ་གང་ན་སེམས་ཅན་རྨས་པ་རྣམས་ཡོད་པ་དེར་བཅོམ་ལྡན་
འདས་ཡང་དག་པར་སྣང་བར་འགྱུར་རོ། །དེ་བས་ན། མྱ་ངན་ལས་འདས་པ་ཆེན་པོ་ནི། ཡང་དག་པའི་དོན་ལ་སྟོན་པ་ཡིན་ནོ། །ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་བ་ནི། སྲིད་པ་ཐམས་
ཅད་ན་ཐར་པའི་གྲོང་ཁྱེར་གྱི་ཚིག་བླ་དྭགས་ཡིན་ཏེ། གང་ན་འདུལ་བར་བྱ་བ་རྣམས་ཡོད་པ་དེར་རྫོགས་པར་སངས་རྒྱས་པར་སྣང་བ་འདི་ནི། ཚིག་གྲགས་པའོ། །གསལ་བའོ། །ཡང་དག་པའི་
དོན་ནི། ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །གསོལ་པ། བཅོམ་ལྡན་འདས། ཅི་ལགས། སྨན་པས་རྨས་པ་ཐམས་ཅད་སོས་པར་བགྱིས་ནས་ཡུལ་དང༌། གྲོང་ཁྱེར་དང༌།
ཡུལ་འཁོར་དང༌། རྒྱལ་པོའི་ཕོ་བྲང་འཁོར་གཞན་གང་ན་རྨས་པ་རྣམས་མཆིས་པ་དེར་སྣང་བར་འགྱུར་རོ། །ཞེས་བགྱི་ལགས་སམ། བཀའ་སྩལ་པ། རིགས་ཀྱི་བུ། སྲོག་ཆགས་རྨས་པ་
ཐམས་ཅད་ཀྱི་ནད་གསོ་བར་བྱེད་ཅེས་དེ་སྐད་མ་ཟེར་ཅིག །གསོར་མི་རུང་བའི་སེམས་ཅན་གཞན་རྣམས་ནི། གསོ་བར་མི་བྱེད་དོ། །དེ་ཅིའི་ཕྱིར་ཞེ་ན། དེ་དག་གི་ནད་ནི། གསོར་མི་རུང་བ་ཡིན་
ཏེ༑ དེ་དག་དེ་བཞིན་དུ་དེ་བཞིན་གཤེགས་པ་ནི། གསོར་མི་རུང་བའི་ནང་འདོད་ཆེན་པོ་མ་གཏོགས་པ་ནད་ཐམས་ཅད་གསོ་བར་མཛད་དེ། གང་མྱ་ངན་ལས་འདས་པ་དེ་དག་གསོལ་བ་ཡིན་ནོ། །
གསོལ་པ། ཐར་པ་ཇི་ལྟ་བུ་ལགས། གཟུགས་ཅན་ལགས་སམ། གཟུགས་མ་མཆིས་པ་ལགས། བཀའ་སྩལ་པ། ཁ་ཅིག་ནི། གཟུགས་ཅན་ནོ། །ཁ་ཅིག་ནི། གཟུགས་ཅན་མ་ཡིན་པ་སྟེ།
༄༅། །གཟུགས་ཅན་མ་ཡིན་པ་ནི། ཉན་ཐོས་དང༌། རང་སངས་རྒྱས་རྣམས་ཀྱིའོ། །སངས་རྒྱས་བཅོམ་ལྡན་འདས་རྣམས་ཀྱི་ནི། གཟུགས་ཅན་ཡིན་ནོ། །ཐར་པ་དེ་ནི།
གཟུགས་དང་གཟུགས་མེད་པ་ཡིན་ལ་གཟུགས་ཡིན་ནོ། །ཞེས་བྱར་ཡང་མི་རུང་ངོ༌། །གསོལ་བ། ཅིའི་སླད་དུ་ལགས། བཀའ་སྩལ་པ། འོད་སྲུང་ཆེན་པོ་དང་རུས་གཅིག་པ། དཔེར་ན།
འདུས་ཤེས་མེད་འདུས་ཤེས་མེད་མིན་གྱི་ལྷ་རྣམས་ཀྱི་ལུས་ནི། གཟུགས་དང་གཟུགས་མེད་པ་ཡིན་ལ་གཟུགས་ཡིན་ནོ། །ཞེས་བྱར་ཡང་མི་རུང་བ་བཞིན་ནོ། །གསོལ་པ། འདུ་ཤེས་
མེད་འདུ་ཤེས་མེད་མིན་གྱི་ལྷ་རྣམས་གཟུགས་དང་གཟུགས་མ་མཆིས་པ་ལགས་ལ་གཟུགས་ཀྱང་མ་ལགས་ན། དེ་དག་ཇི་ལྟར་མཆིས་པ་དང༌། ཇི་ལྟར་རྒྱུ་བ་བསྟན་དུ་གསོལ། བཀའ་སྩལ་
པ༑ འདི་ནི། སངས་རྒྱས་ཀྱི་ཡུལ་ཡིན་ཏེ། ཉན་ཐོས་དང༌། རང་སངས་རྒྱས་ཀྱི་ཡུལ་མ་ཡིན་གྱི། ཞོག་ཅིག །དེ་བཞིན་དུ་ཐར་པའང་གཟུགས་དང་གཟུགས་མེད་པ་ཡིན་ལ་གཟུགས་ཀྱང་མ་
ཡིན་པས་ན། སངས་རྒྱས་ཀྱི་ཡུལ་ཡིན་གྱི། ཉན་ཐོས་དང༌། རང་སངས་རྒྱས་ཀྱི་ཡུལ་མ་ཡིན་ནོ། །གསོལ་པ། བཅོམ་ལྡན་འདས། དེ་བཞིན་གཤེགས་པས་ཡོངས་སུ་མྱ་ངན་ལས་
འདས་པ་ཆེན་པོའི་ཚུལ་གྱིས་ཐར་པ་བསྟན་དུ་གསོལ། བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །ཐར་པ་ཞེས་བྱ་བ་ནི། འཆིང་བ་ཐམས་ཅད་དང་བྲལ་བའོ། །ཡང་
བཀའ་སྩལ་པ། ཐར་པ་ཞེས་བྱ་བ་གང་ཡིན་པ་དེ་ནི། མ་སྐྱེས་པའི་ཕྱིར་དེ་ནི། འཆིང་བ་ཐམས་ཅད་དང་ཤིན་ཏུ་བྲལ་བ་སྟེ། ཇི་ལྟར་ཕ་མ་ཕྲད་པའི་ཡོན་ཏན་ལས་བུ་སྐྱེ་བ་དེ་བཞིན་དུ་སྐྱེས་པ་
མ་ཡིན་ཏེ། ཐར་པ་ནི། རང་གི་ཡུལ་དུ་གནས་པའོ། །མ་སྐྱེས་པ་ཞེས་བྱ་བ་ནི། འདི་ལྟར་མར་གྱི་ཉིང་ཁུ་རང་བཞིན་གྱིས་རང་གི་ངོ་བོ་ཉིད་དུ་འདུག་པ་དེ་བཞིན་དུ་དེ་བཞིན་གཤེགས་པ་ནི། ཡབ་ཡུམ་
འཁྲིག་པ་ལས་བྱུང་བའང་མ་ཡིན་ལ། དེ་བཞིན་གཤེགས་པས་ནི། གདུལ་བར་བྱ་བའི་དབང་གིས་ཡབ་ཡུམ་གཉིས་ཀྱང་བསྟན་ཏོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པ་སྟེ།
མ་བྱུང་བ་བྱུང་བའི་ཕྱིར་རོ། །དཔེར་ན། སྲན་སྡེའུ་འམ། སྲན་གྲེའུ་དཔྱིད་ཟླ་ར་བའི་ངོའམ། དབྱར་གྱིས་དུས་སམ། སྟོན་ཟླ་ཐ་ཆུང་གི་ངོ་ལས་བོན་བཏབ་ན། དེ་དག་ལས་མྱུ་གུ་འབྱུང་བར་འགྱུར་བ་དེ་
བཞིན་དུ་ཐར་པ་ནི། དེ་ལྟ་མ་ཡིན་ནོ། །མ་བྱུང་བ་གང་ཡིན་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པ་སྟེ། མ་བྱུང་བའོ། །དེ་བཞིན་གཤེགས་པ་ནི། མ་བྱུང་བ་ཁོ་ན་སྟེ། དེ་
བཞིན་གཤེགས་པ་ནི། མྱུ་གུ་ཡོད་པ་དང༌། མེད་པར་འགྱུར་བ་བཞིན་དུ་ཡོངས་སུ་བརྟག་པར་མི་བྱའོ། །དེ་བཞིན་གཤེགས་པ་ནི། རང་བཞིན་གྱིས་མ་བྱུང་བ་སྟེ། དེ་བས་ན། མ་བྱུང་བའོ། །མ་བྱུང་བ་
ཞེས་བྱ་བ་ནི། མ་བྱས་པའོ། །མ་བྱས་པ་ཞེས་བྱ་བ་ནི། ཇི་ལྟར་གྲོང་ཁྱེར་དང༌། གྲའི་ཡང་ཏོག་དང༌། སྒོ་ཁང་བྱང་བ་དེ་བཞིན་དུ་ཐར་པ་ནི། དེ་ལྟ་མ་ཡིན་ཏེ། མ་བྱས་པ་གང་ཡིན་པ་དེ་ནི། ཐང་པའོ། །
༄༅། །དེ་ནི༑ དེ་བཞིན་གཤེགས་པའོ། །འདུས་མ་བྱས་ཞེས་བྱ་བ་ནི། ཇི་ལྟར་རྫ་མཁན་གྱིས་སྣོད་བྱས་ནས་དེའི་འོག་ཏུ་ཞིག་པར་འགྱུར་བ་བཞིན་དུ་ཐར་པ་ནི། དེ་ལྟ་མ་
ཡིན་ནོ༑ ༑ཐར་པ་ནི། སྐྱེ་བའང་མེད། འགག་པའང་མེད་དོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པ་སྟེ། སྐྱེ་བའང་མེད། འཆི་བའང་མེད་དོ། །གང་མ་སྐྱེས་པ་དང༌། མ་ཞི་བ་
དང༌། རྒ་བ་མེད་པ་དང༌། འཆི་བ་མེད་པ་དང༌། འདུས་མ་བྱས་པ་དེ་ནི། དེ་བཞིན་གཤེགས་པ་སྟེ། དེ་བས་ན། དེ་བཞིན་གཤེགས་པ་ནི། ཡོངས་སུ་མྱ་ངན་ལས་འདས་པ་ཆེན་པོར་འགྲོ་
བའོ༑ ༑རྒ་བ་མེད་པ་དང༌། འཆི་བ་མེད་པ་ཞེས་བྱ་བ་ནི། མགོ་དཀར་བ་དང༌། རྒ་བ་དང༌། ན་བ་དང༌། འཆི་བའི་ཆོས་དང༌། འདུས་བྱས་ཀྱི་རང་བཞིན་གྱི་རྟོག་པ་དེ་ལྟ་བུ་ནི། ཐར་པ་མ་ཡིན་གྱི།
གང་ལ་གོང་དུ་སྨོས་པ་རྣམས་མེད་པ་ནི། ཐར་པ་ཡིན་ཏེ། དེ་བས་ན། རྒ་བ་མེད་པ་ཞེས་བྱའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པ་སྟེ། དེ་བཞིན་གཤེགས་པ་ལ་ནི། མགོ་
དཀར་བ་དང༌། རྒ་བ་དང༌། འདུས་བྱས་རྣམ་པར་འགྱུར་བ་མེད་དོ། །དེ་བས་ན། དེ་བཞིན་གཤེགས་པ་ནི། རྒ་བ་མེད་པའི་སྐུ་ཡིན་ན། འཆི་བར་ལྟ་ག་ལ་འགྱུར། ནད་མེད་པ་ནད་མེད་པ་ཞེས་
བྱ་བ་ནི༑ གློ་བུར་གྱི་ནད་བཞི་བརྒྱ་རྩ་བཞིས་གནོད་པར་གྱུར་པ་དང༌། ཉེས་དམིགས་དུ་མ་དང་ལྡན་པའི་ལུས་གང་ལ་མེད་པ་དེ་ལྟ་བུའི་རང་བཞིན་ཏེ། དེ་བས་ན། ཐར་པ་ནི། ནད་མེད་པའོ། །ཐར་
པ་གང་ཡིན་པ་དེ་ནི། དེ་བཞིན་གཤེགས་པ་སྟེ། དེ་བཞིན་གཤེགས་པ་ལའང་ནད་ཀྱི་བག་ཡོད་མེད་ན། ཆོས་ཀྱི་སྐུ་ལ་ནད་ག་ལ་ཡོད། དེ་བས་ན། དེ་བཞིན་གཤེགས་པ་ནི། ནད་མེད་པའོ། །འཆི་བ་
མེད་པ་འཆི་བ་མེད་པ་ཞེས་བྱ་བ་ནི། གང་ལ་མིའི་ལུས་བཞིན་དུ་འཆི་བ་མེད་པའོ། །དེ་ནི། ཐར་པ་ཡིན་ཏེ། དེ་ལ་ནི། དུས་འདི་ཙམ་གྱིས་ན་ཟད་པའི་མཐར་འགྱུར་བའམ། འཆི་བའི་མཐར་འགྱུར་རོ། །
ཞེས་བྱ་བའི་མིང་ཡང་མེད་དེ། འཆི་བ་དང་བྲལ་བ་ནི་།ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །དེ་ལྟ་བུའི་ཡོན་ཏན་དང་ལྡན་པ་འཆི་བར་འགྱུར་བ་ཞེས་བྱ་བ་དེ་ནི། མི་སྲིད་
དེ༑ སྐུ་རྡོ་རྗེ་ལྟར་མཁྲེགས་པ་མི་རྟག་པར་ག་ལ་ཞིག་འགྱུར་ཏེ། དེ་བས་ན། འཆི་བ་མེད་པ་ནི། དེ་བཞིན་གཤེགས་པའོ། །ཉོན་མོངས་པ་ཅན་ཉོན་མོངས་པ་ཅན་ཞེས་བྱ་བ་ལ། ཐར་པ་ནི། ནུར་ནུར་
པོ་མི་གཙང་བས་མ་རུང་བར་གྱུར་པ་མ་ཡིན་ཏེ། ཐར་པ་ནི། ཇི་ལྟར་མེ་ཏོག་ཀུ་མུ་ད་དཀར་པོ་བཞིན་དུ་གསལ་བའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །འདོད་པའི་ཉེས་པ་སྣ་
ཚོགས་བསྟན་པ་ནི། ཐབས་ཡིན་པར་བལྟ་བར་བྱའོ། །དེ་བས་ན། དེ་བཞིན་གཤེགས་པ་ནི། ཉོན་མོངས་པ་ཅན་མ་ཡིན་པའོ། །ཟག་པ་མེད་པ་ཟག་པ་མེད་པ་ཞེས་བྱ་བ་ནི། རྨ་མེད་པའི་དོན་ཏེ།
དེ་ནི། ཐར་པ་ཡིན་ནོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པ་སྟེ། དེ་བས་ན། ཟག་པ་མེད་པ་ཞེས་བྱའོ། །གནོད་པ་མེད་པ་གནོད་པ་མེད་པ་ཞེས་བྱ་བ་ནི། ཇི་ལྟར་བཀྲེས་པས་གཡོས་
༄༅། །བྱེད་པ་མ་མཐོང་ན། གནོད་པར་འགྱུར་བ་དེ་བཞིན་དུ་ཐར་པ་ནི། དེ་ལྟ་མ་ཡིན་ཏེ། གནོད་པ་མེད་པ་གང་ཡིན་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་
གཤེགས་པའོ། །ཞི་བ་ཞི་བ་ཞེས་བྱ་བ་ནི། འཇིག་རྟེན་པ་རྣམས་ཀྱི་ནི། ལྷའི་གཟུགས་ལ་ཞི་བ་ཞི་བ་ཞེས་བྱ་བས་ན། དེ་ནི། རྫུན་ཏེ། ཐར་པ་མ་ཡིན་ནོ། །རང་བཞིན་གྱིས་ཞི་བ་གང་ཡིན་པ་
དེ་ནི། ཐར་པ་སྟེ། གང་གི་ཕྱིར་སེམས་ཅན་ཐམས་ཅད་ཀྱི་ཞི་བའི་མཆོག་ཡིན་པས་ན། དེའི་ཕྱིར་ཞི་བ་ཞེས་བྱའོ། །ཞི་བ་གང་ཡིན་པ་དེ་ནི། ཐར་པའོ། །ཐར་པའོ། །ཐར་པ་གང་ཡིན་པ་དེ་ནི། དེ་བཞིན་
གཤེགས་པའོ། །བདེ་བ་བདེ་བཞེས་བྱ་བ་ནི། ཇི་ལྟར་ཆོམ་རྐུན་གྱིས་འཇིགས་ནས་ལམ་བདེ་བར་འགྲོ་བ་བཞིན་དུ་ཐར་པ་ནི། དེ་ལྟ་མ་ཡིན་ཏེ། རང་བཞིན་གྱིས་བདེ་བ་དེ་ལ་ནི། འཇིགས་
པའི་མིང་ཡང་མེད་དེ། དེ་བས་ན། བཅོས་མ་མ་ཡིན་པའི་བདེ་བ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །སེམས་ཅན་ཐམས་ཅད་ལ་བདེ་བ་བྱེད་པ་ནི། དེ་
བཞིན་གཤེགས་པའོ། །གཉེན་པོ་མེད་པ་གཉེན་པོ་མེད་པ་ཞེས་བྱ་བ་ལ། གཉེན་པོ་མེད་པ་ཞེས་བྱ་བ་ནི། ཇི་ལྟར་རྒྱལ་པོ་ཤིར་དོགས་ཤིང་འཇིགས་པ་བཞིན་དུ་ཐར་པ་ནི། དེ་ལྟ་མ་ཡིན་
ཏེ༑ ཐར་པ་ནི། ཡེ་རང་བཞིན་གྱིས་གཉེན་པོ་མེད་པའོ། །གཉེན་པོ་མེད་པ་ཞེས་བྱ་བ་ནི། འཁོར་ལོས་བསྒྱུར་བའི་རྒྱལ་པོ་ལྟ་བུ་སྟེ། དེ་ལ་གཞན་སླར་འཇིགས་པར་བྱེད་ནུས་པ་སུའང་མེད་དེ།
ཡོང་མི་སྲིད་དོ། །དེ་བཞིན་དུ་ཐར་པ་ལའང་ཐར་པའི་ཆོས་གཞན་ཟླར་གྱུར་པ་མེད་དེ། ཡོང་མི་སྲིད་དོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །དེ་བཞིན་གཤེགས་པ་ཆོས་ཀྱི་འཁོར་
ལོ་བསྐོར་བ་ལ་ནི། དགྲ་གཞན་མེད་དེ། དེ་བས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། གཉེན་པོ་མེད་པའོ། །ཐར་པ་གང་ཡིན་པ་དེ་ནི། དེ་བཞིན་
གཤེགས་པའོ། །མྱ་ངན་མེད་པ་མྱ་ངན་མེད་པ་ཞེས་བྱ་བ་ནི། གང་ལ་མྱ་ངན་མེད་པ་སྟེ། ཇི་ལྟར་རྒྱལ་པོ་དཀྲུགས་མ་བྱེད་པའི་རྒྱལ་པོ་གཞན་གྱིས་རྒྱལ་སྲིད་འཕྲོག་སྟེ་ཡུལ་འཁོར་བཅོམ་ཞིང་
བཤིག་པ་ན་ཤིན་ཏུ་མྱ་ངན་གྱིས་ཐེབས་པ་བཞིན་དུ་མྱ་ངན་ལས་འདས་པ་ནི། དེ་ལྟ་མ་ཡིན་ཏེ། ཇི་ལྟར་རྒྱལ་པོ་གཞན་གྱིས་མ་ཚུགས་ཏེ་དགྲ་དང་བྲལ་བར་གྱུར་ནས་མྱ་ངན་མེད་པ་བཞིན་
དུ་ཐར་པ་ཐོབ་པ་རྣམས་ཀྱང་མྱ་ངན་མེད་པའོ། །ཐར་པ་གང་ཡིན་པ་དེ་ནི། མྱ་ངན་ལས་འདས་པའོ། །མྱ་ངན་ལས་འདས་པ་གང་ཡིན་པ་དེ་ནི། དེ་བཞིན་གཤེགས་པའོ། །མྱ་ངན་དང་བྲལ་བ་མྱ་
ངན་དང་བྲལ་བ་ཞེས་བྱ་བ་ནི། ཇི་ལྟར་བུད་མེད་རང་གི་བུ་དམག་ཏུ་སོང་ནས་ཤིའོ། །ཞེས་ཐོས་པ་ལས་ཕྱིར་འོངས་པ་མཐོང་ནས་མྱ་ངན་དང་བྲལ་བར་འགྱུར་བ་བཞིན་དུ་མྱ་ངན་ལས་འདས་པ་ནི། དེ་
ལྟ་མ་ཡིན་ཏེ། ཐར་པ་ནི། རྟག་ཏུ་མྱ་ངན་དང་བྲལ་བའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །རྡུལ་མེད་པ་རྡུལ་མེད་པ་ཞེས་བྱ་བ་ལ། རྡུལ་ཞེས་བྱ་བ་ནི། ས་རྡུལ་དང༌། ཉལ་ཉིལ་
༄༅། །ཡིན་ཏེ༑ ཇི་ལྟར་དཔྱིད་ཀྱི་དུས་ན་ཕྱི་དྲོ་རླུང་ལངས་པས་ས་རྡུལ་བསླང་བ་བཞིན་དུ་ཐར་པ་ནི། དེ་ལྟ་མ་ཡིན་ནོ། །རྡུལ་མེད་པ་ཞེས་བྱ་བ་ནི། ཇི་ལྟར་རྒྱལ་པོའི་གཙུག་གི་
ནོར་བུ་དག་པ་དེ་བཞིན་དུ་རང་བཞིན་གྱི་རྡུལ་མེད་པ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །རྡུལ་དང་བྲལ་བ་རྡུལ་དང་བྲལ་པ་ཞེས་བྱ་བ་ནི། ཇི་ལྟར་གསེར་ཡོངས་
སུ་དག་པ་སྟེ། གསེག་མ་དང༌། རྡོ་མེད་པར་གྱུར་པ། དབྱིག་ཏུ་རེད་པ། རང་བཞིན་དུ་གྱུར་པ་དེ་བཞིན་དུ་སྐྱོན་བྱང་བའི་རང་བཞིན་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་
གཤེགས་པའོ། །སོབ་སོབ་པོ་མ་ཡིན་པ་སོབ་སོབ་པོ་མ་ཡིན་པ་ཞེས་བྱ་བ་ནི། ཁམ་པའི་ཞོའི་བུམ་པ་གས་པ་བཞིན་དུ་ཐར་པ་ནི། དེ་ལྟ་མ་ཡིན་ཏེ། དེ་ལྟ་མ་ཡིན་ཏེ། ལྕགས་དང་རྡོ་རྗེའི་བུམ་པ་བཞིན་དུ་སོབ་
སོབ་པོ་མ་ཡིན་པ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །སོབ་སོབ་པོ་མ་ཡིན་པའི་ཆོས་ཅན་སོབ་སོབ་པོ་མ་ཡིན་པའི་ཆོས་ཅན་ཞེས་བྱ་བ་ནི། ཇི་ལྟར་ཨེ་
རཎྜའི་འབྲས་བུ་བྔས་ནས་སོ་གའི་དུས་སུ་ཁབ་ཐོག་ཏུ་བཏིང་ན། ཀུན་ནས་ཙེག་ཙེག་ཟེར་ཞིང་ཀུན་ནས་འགས་པ་དེ་བཞིན་དུ་ཐར་པ་ནི། དེ་ལྟ་མ་ཡིན་ནོ། །སོབ་སོབ་པོ་མ་ཡིན་པའི་
ཆོས་ཅན་ཞེས་བྱ་བ་ནི། ཇི་ལྟར་ལྕགས་དང་རྡོ་རྗེའི་བུམ་པ་ཤིང་སྟག་པ་སྟོང་གི་མདས་འཕངས་ཀྱང་ཕིགས་པར་མི་ནུས་པ་དེ་བཞིན་དུ་སོས་སོབ་པོ་མ་ཡིན་པའི་ཆོས་ཅན་ནི། ཐར་
བའོ༑ ༑ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཅི་བྱར་ཡང་མེད་པ་ཅི་བྱར་ཡང་མེད་པ་ཞེས་བྱ་བ་ནི། ཇི་ལྟར་མི་དབུལ་པོ་ཞིག་ལ་བུ་ལོན་ཆགས་པ་ལས་ཕྱུག་པོའི་ལག་ཏུ་འོངས་
ནས་ཉོན་མོངས་སུ་ཟིན་ཀྱང་ཅིའང་འཇལ་དུ་མེད་ནས་བཏང་བ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཅི་བྱར་ཡང་མེད་པ་ཞེས་བྱ་བ་ནི། ཇི་ལྟར་མི་ནོར་བྱེ་བ་བདོག་པ་སུའི་བུ་ལོན་ཡང་མ་ཆགས་
པ་དེ་བཞིན་དུ་ཆོས་བྱེ་བ་ཕྲག་མང་པོ་བདོག་པའི་མཆོག་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཅི་བྱར་ཡང་མེད་པའི་ཆོས་ཅན་ཅི་བྱར་ཡང་མེད་པའི་ཆོས་ཅན་ཞེས་བྱ་
བ་ནི༑ ཇི་ལྟར་མི་དབུལ་པོས་རང་གི་ཁྱིམ་ན་གང་ནའང་ནོར་མེད་དེ། བདག་གིས་སྐྱིན་པ་བླང་ངོ༌། །སྙམ་ནས་དེས་སེམས་ཁོང་དུ་ཆུད་པ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཅི་བྱར་ཡང་མེད་
པའི་ཆོས་ཅན་ཞེས་བྱ་བ་ནི། ཇི་ལྟར་ཁྱིམ་བདག་ནོར་བྱེ་བ་བདོག་པ་ཉི་མ་དང་ཟླ་བ་ལའང་རག་མ་ལུས་ཏེ། དེ་ལྟར་འབྱོར་བ་དང་ལྡན་པའི་ཁྱིམ་བདག་གིས་ནི། ཉི་མ་ལྷན་ནེར་འདུག་གོ། །ཞེའམ་
ཟླ་བ་ཤར་ཏོ། །ཞེས་བྱ་བའི་སྒྲའང་མི་ཐོས་སོ། །དེ་ལྟར་མཆོག་ཏུ་སྐྱིད་པའི་ཁྱིམ་བདག་འཁོར་ལོས་བསྒྱུར་བའི་རིགས་སུ་སྐྱེས་པ་དེ་ནི། ཕྱི་སྲིད་དུ་བྱེ་བའི་ཕྱིར་གཞན་ལས་སྐྱིན་མ་ལེན་ཅེའམ།
ཡང་ན་གཞན་གྱིས་འདི་ནི། ཕ་རོལ་ལས་སྐྱིན་མ་ལེན་ཅིང་ཟའོ། །ཞེས་བརྗོད་པ་མེད་དེ། དེ་ནི། མི་སྲིད་དོ། །དེ་བཞིན་དུ་ཐར་པའང་ཐར་པའི་གནས་ལེན་ཏོ། །ཞེས་བྱ་བ་དེ་ནི། མི་སྲིད་དོ། །དེ་བས་
༄༅། །ན༑ ཅི་བྱར་ཡང་མེད་པའི་ཆོས་ཅན་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །གནོད་པ་མེད་པ་གནོད་པ་མེད་པ་ཞེས་བྱ་བ་ནི། ཇི་ལྟར་སོ་གའི་
དུས་སུ་ཧ་ཅང་ཚ་ཆེས་པ་བསྟེན་པ་དང༌། དབྱར་གྱི་དུས་སུ་ཧ་ཅང་མངར་ཆེས་པ་བསྟེན་པ་དང༌། དགུན་གྱི་དུས་སུ་ཧ་ཅང་བསིལ་ཆེས་པ་བསྟེན་པས་བདག་ཉིད་གནོད་པ་རྣམས་ཀྱིས་ཉེས་པ་དེ་ལས་
གནོད་པ་རྣམས་འབྱུང་བར་འགྱུར་བ་བཞིན་དུ་ཐར་པ་ནི། དེ་ལྟར་ནད་མང་པོས་གནོད་པར་འགྱུར་བ་མ་ཡིན་ནོ། །གཞན་ཡང་གནོད་པ་ཞེས་བྱ་བ་ནི། ཇི་ལྟར་ཤ་དང༌། ཉ་ཤ་ཟོས་པའི་འོག་ཏུའོ་
མ་འཐུང་བ་ནི། འཆི་བར་འགྱུར་བ་བཞིན་དུ་ཐར་པ་ནི། གནོད་པའི་ཆོས་ཅན་མ་ཡིན་ནོ། །གནོད་པ་མེད་པ་ཞེས་བྱ་བ་ནི། ཇི་ལྟར་ཁ་ཟས་མཐུན་པར་ཟ་བས་རོ་ཞིམ་པའང་མྱོང་ལ་བདུད་རྩིའང་ཟོས་
པར་འགྱུར་བ་དེ་བཞིན་དུ་ཐར་པ་ནི། རང་བཞིན་གྱིས་བདུད་རྩི་ལྟ་བུ་ཡིན་ཏེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །གནོད་པ་མེད་པའི་ཆོས་ཅན་གནོད་པ་མེད་པའི་ཆོས་ཅན་ཞེས་
བྱ་བ་ནི། ཇི་ལྟར་ང་རྒྱལ་གྱིས་ཁེངས་པའི་མི་ང་རྒྱལ་གྱིས་དྲེགས་ཤིང་མྱོས་ནས་ང་མི་འཆིའོ། །སྙམ་སྟེ། སྦྲུལ་ལམ་སྟག་ལ་འཛིན་དུ་རྩོལ་བ་ལས། དེས་ཟིན་ནས་དུས་མ་ཡིན་པའི་འཆི་བས་
འཆི་བར་འགྱུར་བ་དེ་བཞིན་དུ་ང་རྒྱལ་གྱིས་ཁེངས་པ་ནི། ཐར་པར་མི་འགྱུར་རོ། །གནོད་པ་མེད་པའི་ཆོས་ཅན་ཞེས་བྱ་བ་ནི། ཇི་ལྟར་འཁོར་ལོས་བསྒྱུར་བའི་རྒྱལ་པོའི་འཁར་བ་རིན་པོ་ཆེའི་གཟི་
བརྗིད་ཀྱིས་སྲོག་ཆགས་གདུག་པ་སྤུར་བུ་དང༌། སྦྲུལ་དང༌། ཀ་ན་བྷ་དང༌། སྡོམ་ལ་སོགས་པའི་རིགས་དགུ་བཅུ་རྩ་དྲུག་པོ་རྣམས་ཀྱིས་ཐག་རིང་པོ་ནས་དེའི་དྲི་ཚོར་བ་ཙམ་གྱིས་འཁར་བ་རིན་པོ་ཆེའི་རང་
བཞིན་གྱི་དྲིས་སྐྲག་ནས་དུག་མེད་པར་འགྱུར་བ་དེ་བཞིན་དུ་ཐར་པ་ནི། རང་བཞིན་གྱིས་སྲིད་པའི་ཉེས་པ་ཉི་ཤུ་རྩ་ལྔ་དང་བྲལ་བ་ཡིན་ཏེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཉེན་མེད་
པ་ཉེན་མེད་པ་ཞེས་བྱ་བ་ལ། ཐར་པ་ནི། ས་ལ་སྔོན་པོ་དང༌། ལྡང་གུའི་མདོག་ལྟ་བུ་མ་ཡིན་ནོ། །ཉེན་མེད་པ་ཞེས་བྱ་བ་ནི། ཇི་ལྟར་ནམ་མཁའ་ལ་ཉེན་མེད་པ་བཞིན་དུ་ཐར་པའང་དེ་དང་འདྲ་སྟེ། ཐར་པ་
གང་ཡིན་པ་དེ་ནི། དེ་བཞིན་གཤེགས་པའོ། །ཉེན་མེད་པའི་ཆོས་ཅན་ཉེན་མེད་པའི་ཆོས་ཅན་ཞེས་བྱ་བ་ནི། ཇི་ལྟར་རྟེན་ལ་མར་མེ་ཉེན་དུ་གྱུར་པ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཉེན་མེད་པའི་ཆོས་
ཅན་ཞེས་བྱ་བ་ནི། ཇི་ལྟར་བླ་བའི་འོད་སེམས་ཅན་ཐམས་ཅད་ལ་ཉེན་མེད་པ་བཞིན་དུ་ཐར་པའང་དེ་དང་འདྲ་སྟེ། སེམས་ཅན་ཐམས་ཅད་ལ་ཉེན་མེད་པའི་ཚུལ་ཅན་ཡིན་ནོ། །དེ་བས་ན། ཉེན་
མེད་པ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཅིའང་མེད་པ་ཅིའང་མེད་པ་ཞེས་བྱ་བ་ནི། ཇི་ལྟར་མི་མཛའ་བོ་དང༌། དགྲ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཅིའང་
མེད་པ་ཞེས་བྱ་བ་ནི། ཇི་ལྟར་འཁོར་ལོས་བསྒྱུར་བའི་རྒྱལ་པོ་ལ་དགྲ་ཡོད་ཅེས་བྱ་བ་ནི། མི་སྲིད་དེ། ཐར་པའང་དེ་དང་འདྲའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཅིའང་མེད་པ་ཞེས་
༄༅། །བྱ་བ་ནི། ཇི་ལྟར་རས་དཀར་པོ་དགོས་པ་འགའི་ཕྱིར་བསྒྱུར་ན། སྔོན་པོ་དང་དམར་པོར་འགྱུར་བ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཅིའང་མེད་པ་ཞེས་བྱ་བ་ནི། ཇི་ལྟར་ཀླུ་ཤིང་
གི་མེ་ཏོག་དྲི་ང་བར་འགྱུར་བའམ་སྔོན་པོར་འགྱུར་མི་སྲིད་པ་བཞིན་དུ་ཐར་པའང་དེ་དང་འདྲ་སྟེ། ཅུང་ཟད་ཅིག་ཡོད་དོ། །ཞེས་བྱ་བ་མི་སྲིད་དེ། མེ་ཏོག་དེའི་དྲི་གཅིག་པུ་ཁོ་ནར་ཟད་པ་བཞིན་ནོ། །
ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ངོ་མཚར་ངོ་མཚར་ཞེས་བྱ་བ་ནི། ཇི་ལྟར་ཆུའི་ནང་ན་པདྨ་ཡོད་པ་ངོ་མཚར་མི་ཆེ་བ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ངོ་མཚར་
ཞེས་བྱ་བ་ནི། ཇི་ལྟར་མེའི་ནང་དུ་མེ་ཏོག་པདྨ་རྒྱས་པ་མཐོང་ན། དགའ་བ་བསྐྱེད་པ་དེ་བཞིན་དུ་ཐར་པ་ཡོད་ན། དགའ་བ་སྐྱེ་བར་འགྱུར་རོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །
རྨད་དུ་བྱུང་བ་རྨད་དུ་བྱུང་བ་ཞེས་བྱ་བ་ནི། ཇི་ལྟར་བྱིས་པའི་སོ་རྣམས་ཕྱིས་སྐྱེ་བ་དེ་བཞིན་དུ་ཐར་པ་ནི། དུས་ལ་བབ་པ་དང༌། དུས་ལ་མ་བབ་པ་ལས་འགྱུར་བ་མེད་དོ། །ཡ་མཚན་ཞེས་བྱ་བ་
ནི༑ ཇི་ལྟར་འདོད་ཆེན་པ་རྣམས་ཀྱིས་འདོད་ཆེན་པོར་ལྷུང་བ་སངས་རྒྱས་སུ་འགྱུར་ཞེས་བྱ་བ་ནི། མི་སྲིད་དོ། །གང་གི་ཚེ་དམ་པའི་ཆོས་ལ་དད་པ་དང་ལྡན་པའམ་དགེ་བསྙེན་དུ་གྱུར་པ་དེའི་ཚེ་
ཐར་པ་ཟད་པར་འགྱུར་རོ། །ཞེས་བྱ་བ་ནི། མི་སྲིད་དེ། ཁམས་དེ་ནི། རང་བཞིན་གྱིས་རྨད་དུ་བྱུང་བའོ། །དེ་བས་ན། ཐར་པ་ནི། རྨད་དུ་བྱུང་བ་ཞེས་བྱའོ། །འདོད་ཆེན་པོའི་ལྟར་དེ་བཞིན་
གཤེགས་པ་ནི། ཟད་པ་མེད་དོ། །དགེ་བའི་རྩ་བའི་སེམས་ལ་དམིགས་པ་ལ་ནི། ཆོས་རྣམས་སྐྱེ་བ་མེད་དོ། །སྐྱེ་བ་མེད་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། ད་བཞིན་གཤེགས་པའོ། །
དཔག་ཏུ་མེད་པ་དཔག་ཏུ་མེད་པ་ཞེས་བྱ་བ་ནི། ཇི་ལྟར་འབྲུའི་ཕུང་པོའམ་འབྲས་སཱ་ལུའི་ཕུང་པོ་གཞལ་དུ་ཡོད་པ་བཞིན་དུ་ཐར་པ་ནི། དེ་ལྟ་མ་ཡིན་ནོ། །དཔག་ཏུ་མེད་པ་ཞེས་བྱ་བ་ནི། ཇི་ལྟར་རྒྱ་མཚོའི་
ཆུ་དཔག་ཏུ་མེད་པ་དེ་བཞིན་དུ་ཐར་པའང་དེ་དང་འདྲ་བར་དཔག་ཏུ་མེད་དོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཚད་མེད་པའི་ཆོས་ཅན་ཚད་མེད་པའི་ཆོས་ཅན་ཞེས་བྱ་བ་ནི། ཇི་
ལྟར་སེམས་ཅན་གཅིག་གི་ལས་ཀྱི་རྣམ་པར་སྨིན་པ་ཚད་ཡོད་པའི་ཆོས་ཅན་ཡིན་པ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཚད་མེད་པའི་ཆོས་ཅན་ཞེས་བྱ་བ་ནི། ཇི་ལྟར་སེམས་ཅན་རྣམས་ཀྱི་འཁོར་
བའི་མཐའ་ལས་ངེས་པར་འབྱུང་བ་ཚད་མེད་པ་བཞིན་དུ་ཐར་པའང་དེ་དང་འདྲའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །མཆོག་དང༌། ཕུལ་དང༌། གཙོ་བོ་མཆོག་དང༌། ཕུལ་དང༌།
གཙོ་བོ་ཞེས་བྱ་བ་ནི། གང་ལ་མཆོག་དང༌། ཕུལ་དང༌། གཙོ་བོར་གྱུར་པའི་ཐར་པ་གཞན་མེད་པ་སྟེ། ཇི་ལྟར་རྒྱ་མཚོ་ཆེན་པོ་ལ་དེ་དང་འདྲ་བའི་ཆུ་ཆེན་པོ་གཞན་མེད་པ་བཞིན་དུ་ཐར་པའང་དེ་དང་འདྲ་
སྟེ༑ ཐར་པ་རང་ཉིད་མཆོག་དང༌། ཕུལ་དང༌། གཙོ་བོ་ཡིན་ནོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །རབ་རབ་ཅེས་བྱ་བ་ནི། ཇི་ལྟར་ནམ་མཁའི་གོང་ན་ནམ་མཁའ་གཞན་ནམ་
༄༅། །ནམ་མཁའ་ལས་ལྷག་པའི་ཆོས་གཞན་མེད་པ་དེ་བཞིན་དུ་ཐར་པའི་གོང་ན་ཐར་པའི་ཆོས་གཞན་མེད་དེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ།།
ཀུན་ཏུ་རབ་ཀུན་ཏུ་རབ་ཅེས་བྱ་བ་ནི། ཇི་ལྟར་རི་དྭགས་ཐམས་ཅད་ལས་འདས་པ་ནི། སེངྒེའི་ས་ཡིན་པ་དེ་བཞིན་དུ་ཐར་པ་ནི། ཆོས་ཐམས་ཅད་ལས་འདས་ཏེ། གཅིག་ཏུ་འོད་གསལ་
བའོ༑ ༑ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །བླ་མ་བླ་མ་ཞེས་བྱ་བ་ནི། ཇི་ལྟར་ཕྱོགས་ཐམས་ཅད་ཀྱི་ནང་ན་བྱང་ཕྱོགས་མཆོག་ཅེས་བྱ་བ་དེ་བཞིན་དུ་ཐར་པའང་དེ་དང་འདྲ་སྟེ།
ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །བླ་ན་མེད་པ་བླ་ན་མེད་པ་ཞེས་བྱ་བ་ནི། ཇི་ལྟར་ཡུལ་ཐམས་ཅད་ཀྱི་ནང་ན་ནི། བྱང་ཕྱོགས་པ་ལ་ཡུལ་བླ་ན་མེད་པ་ཞེས་བྱ་བ་བཞིན་དུ་
ཐར་པའང་དེ་དང་འདྲ་སྟེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ངེས་པ་ངེས་པ་ཞེས་བྱ་བ་ནི། ཇི་ལྟར་ལྷ་རྣམས་དང༌། མི་རྣམས་ཀྱི་འཆི་བ་ནི། ངེས་ལ། སྲོག་ནི། མ་ངེས་པ་སྟེ།
ཐར་པ་ནི། ལྷ་དང་མི་རྣམས་འཆི་བར་ངེས་པ་བཞིན་དུ་ངེས་པ་དང་གནས་པའི་ཆོས་ཅན་ཡིན་ཏེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །མི་བརྟན་པ་མ་ཡིན་པ་མི་བརྟན་པ་
མ་ཡིན་པ་ཞེས་བྱ་བ་ནི། ཇི་ལྟར་འདམ་བུ་དང༌། ཨེ་རཎྜ་བ་དང༌། ལྦུ་བ་རྣམས་མི་བརྟན་པ་བཞིན་དུ་ཐར་པ་ནི། དེ་ལྟ་མ་ཡིན་ནོ། །མི་བརྟན་པ་ཞེས་བྱ་བ་ནི། མར་གྱི་ཉིད་ཁུ་ལྟ་བུའོ། །ཐར་པ་
ནི། མི་བརྟན་པ་མ་ཡིན་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །འཇིག་པའི་ཆོས་ཅན་མ་ཡིན་པ་འཇིག་པའི་ཆོས་ཅན་མ་ཡིན་པ་ཞེས་བྱ་བ་ནི། ཇི་ལྟར་རྩིག་ངོས་ལ་སྦྲང་བུ་
འཁོད་པ་རྣམས་ཁ་ཅིག་ནི། འབྱར། ཁ་ཅིག་ནི། འཁོད། ཁ་ཅིག་ནི། འགྲོ། ཁ་ཅིག་ནི། རྩེ་བ་བཞིན་དུ་ཐར་པ་ནི། དེ་ལྟ་མ་ཡིན་ནོ། །འཇིག་པའི་ཆོས་ཅན་མ་ཡིན་པ་ཞེས་བྱ་བ་ནི། ཇི་ལྟར་རི་
མོ་མཁན་གྱིས་རི་མོ་བྲིས་པའི་རྩིག་ངོས་ལ་དེ་དག་འཁོད་པར་མི་ནུས་ཤིང་འབྱར་བར་མི་འགྱུར་བ་དེ་བཞིན་དུ་ཐར་པ་ནི། ཉེས་པ་ཐམས་ཅད་ཀྱིས་མི་གོས་པ་སྟེ། ཐར་པ་གང་ཡིན་པ་དེ་ནི། དེ་བཞིན་
གཤེགས་པའོ། །མཐའ་ཡས་པ་མཐའ་ཡས་པ་ཞེས་བྱ་བ་ལ། ཐར་པ་ནི། གྲོང་ཕྲག་ལྟ་བུ་མ་ཡིན་ཏེ། མཐའ་ཡས་པ་ནི། ཇི་ལྟར་ནམ་མཁའ་ལ་མཐའ་མེད་པ་དེ་བཞིན་དུ་བདེ་བའི་རྣམ་པ་མཐའ་ཡས་པ་
ནི༑ ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །བསྟན་དུ་མེད་པ་བསྟན་དུ་མེད་པ་ཞེས་བྱ་བ་ནི། ཇི་ལྟར་ནམ་མཁའ་ལ་བྱའི་རྗེས་མི་སྣང་བ་དེ་བཞིན་དུ་ཐར་པ་ནི། བརྟག་པར་དཀའ་བ་
སྟེ༑ ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཟབ་མོ་ཟབ་མོ་ཞེས་བྱ་བ་ནི། ཤིན་ཏུ་ཤ་ཐང་བས་འཇུག་པའི་ཆོས་ཅན་ཡིན་ཏེ། ཇི་ལྟར་ཕ་མ་དཀའ་བ་བྱེད་པའི་ཡོན་ཏན་རྣམས་ཤིན་ཏུ་
ཤ་ཐབས་འཇུག་པའི་སྒོ་ནས་ཤིན་ཏུ་ཟབ་པ་དེ་བཞིན་དུ་ཐར་པ་[?]ཡིན་པ་དེ་ནི། དེ་བཞིན་གཤེགས་པའོ། །ཤིན་རྩ་བ་ལྟ་དགའ་བ་ཤིན་ཏུ་བལྟ་དཀའ་བ་ཞེས་བྱ་བ་ནི། ཇི་ལྟར་མིས་
༄༅། །རང་གི་མགོ་བོའི་སྟེང་ཤིན་ཏུ་བལྟ་དཀའ་བ་དེ་བཞིན་དུ་ཐར་པ་ནི། ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་ཤིན་ཏུ་བལྟ་བར་དཀའ་སྟེ། ཐར་པ་གང་ཡིན་པ་དེ་
ནི༑ དེ་བཞིན་གཤེགས་པའོ། །གནས་མེད་པ་གནས་མེད་པ་ཞེས་བྱ་བ་ནི། ཁྱིམ་དང༌། ནམ་མཁའི་ཚིག་བླ་དྭགས་ཏེ། ཐར་པ་ནི། དེ་ལྟ་མ་ཡིན་ནོ། །གནས་མེད་པ་ཞེས་བྱ་བ་ནི། གོ་སྐབས་མེད་
པའི་ཚིག་བླ་དྭགས་ཏེ། གང་ལ་སྲིད་པའི་གནོད་པ་ཉི་ཤུ་རྩ་ལྔ་མེད་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཉོན་མོངས་པ་མེད་པ་ཉོན་མོངས་པ་མེད་པ་ཞེས་བྱ་བ་
ནི༑ ཇི་ལྟར་མིའི་ཆང་བར་སྐྱུ་རུ་ར་གཟུང་དུ་ཡོད་པ་བཞིན་དུ་ཐར་པ་ནི། དེ་ལྟ་མ་ཡིན་ནོ། །ཉོན་མོངས་པ་མེད་པ་ཞེས་བྱ་བ་ནི། ཇི་ལྟར་སྒྱུ་མ་མཁན་གྱིས་སྤྲུལ་པའི་སྒྱུ་མ་ལ་ཅིའང་གཟུང་དུ་མེད་པ་
བཞིན་དུ་ཐར་པའང་དེ་དང་འདྲ་སྟེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །སྐྱོན་མེད་པའི་ལུས་སྐྱོན་མེད་པའི་ལུས་ཞེས་བྱ་བ་ནི། ཇི་ལྟར་མིའི་ལུས་ལ་རྨེ་བ་དང༌། ཤུ་བ་དང༌། མཛེ་
དང༌། པགས་པའི་ནད་དང༌། སྐྱོན་རྣམས་མེད་པར་གྱུར་པ་བཞིན་དུ་ཐར་པ་ནི། དེ་ལྟ་མ་ཡིན་ནོ། །སྐྱོན་མེད་པའི་ལུས་ཞེས་བྱ་བ་ནི། ཇི་ལྟར་བའི་འོ་མ་རང་བཞིན་གྱིས་མདོག་གཅིག་པ་བཞིན་
དུ་ཐར་པའང་མཚན་ཉིད་གཅིག་པ་སྟེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །དག་པ་དག་པ་ཞེས་བྱ་བ་ནི། ཇི་ལྟར་རྙོག་པའི་དྲི་མ་དང་འདྲེས་པའི་ཆུའི་ནང་དུ་ཀེ་ཏ་ཀའི་འབྲས་བུ་བརྡར་
ན་ཆུའི་རང་བཞིན་དག་པར་འགྱུར་བ་བཞིན་དུ་ཐར་པ་ནི། དེ་ལྟ་མ་ཡིན་ནོ། །དག་པ་ཞེས་བྱ་བ་ནི། ཇི་ལྟར་ནམ་མཁའ་ལ་ཆར་པའི་ཆུ་རོ་གཅིག་ཅིང་རྣམ་པར་དག་པ་བཞིན་དུ་ཐར་པའང་དེ་དང་འདྲ་སྟེ། ཐར་
པ་གང་ཡིན་པ་དེ་ནི། དེ་བཞིན་གཤེགས་པའོ། །གྲོལ་བ་གྲོལ་བ་ཞེས་བྱ་བ་ལ། ཐར་པ་ནི། ཟླ་བ་ཚེས་བཅོ་ལྔ་དྲི་མ་མེད་པ་དང་འདྲ་སྟེ། ཟླ་བ་སྤྲིན་གྱིས་གཡོགས་པ་ལྟ་བུ་མ་ཡིན་ནོ། །ཐར་པ་གང་ཡིན་པ་
དེ་ནི༑ དེ་བཞིན་གཤེགས་པའོ། །ཞི་བ་ཞི་བ་ཞེས་བྱ་བ་ནི། ཇི་ལྟར་སེམས་ཅན་རིམས་ནད་ཀྱིས་ཐེབས་པ་ལས་རིམས་ནད་དང་བྲལ་བར་འགྱུར་བ་དེ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཞི་བ་ཞེས་བྱ་
བ་ལ༑ ཐར་པ་ནི། སེམས་ཅན་ནད་མེད་ཅིང་གནོད་པ་མེད་པ་བཞིན་ཏེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །མཉམ་པ་ཉིད་མཉམ་པ་ཉིད་ཅེས་བྱ་བ་ནི། ཇི་ལྟར་ལུག་ཐུག་རེ་གཉིས་
ཕན་ཚུན་འཐབ་པ་ན་སྟོབས་མཉམ་པ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཇི་ལྟར་མ་དང་བུ་མཐུན་པར་སྨྲ་བ་དེ་བཞིན་དུ་ཐར་པའང་དེ་དང་འདྲ་སྟེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །
ཉེ་བར་ཞི་བ་ཉེ་བར་ཞི་བ་ཞེས་བྱ་བ་ལ། གནས་ཀྱི་མཆོག་དེ་ཐོབ་པ་ནི། གནས་གཞན་འདོད་མི་སྲིད་དོ། །ཆོག་མི་ཤེས་པ་ཞེས་བྱ་བ་ནི། ཇི་ལྟར་ཉམ་ཆུང་བའི་ཚེ་ཁ་ཟས་ཀྱི་མཆོག་ཟོས་པའི་འོག་ཏུ་
དར་བ་བཏུང་པའི་སེམས་སྐྱེ་བར་འགྱུར་བ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཆད་པ་ཆད་པ་ཞེས་བྱ་བ་ལ། སྲེད་པའི་ཞགས་པ་ལྟ་བུའི་ནང་
༄༅། །གི་འདོད་པ་ཆད་པ་གང་ཡིན་པ་དེ་ནི། ཆད་པའི་སྒོ་ནས་ཐར་པ་ཡིན་ནོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཕ་རོལ་ཕ་རོལ་ཞེས་བྱ་བ་ནི། ཇི་
ལྟར་ཆུ་ཀླུང་ལ་ཚུ་རོལ་དང༌། ཕ་རོལ་གྱི་འགྲམ་གཉིས་ཡོད་པ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཐར་པ་ནི། ཕ་རོལ་ཡིན་ནོ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཆུ་ཀླུང་
ཞེས་བྱ་བ་ལ། ཆུ་ཀླུང་ཉིད་དཔེར་རུང་བར་ཟད་ཀྱི། འཇིག་རྟེན་ན་ཆུ་ཀླུང་གཞན་དཔེར་རུང་བ་མེད་དོ། །ཆུ་ཀླུང་ཞེས་བྱ་བ་ནི། རྒྱ་མཚོ་ལ་བྱ་སྟེ། ཆུ་ཀླུང་ཐམས་ཅད་ཀྱི་ནང་ན་རྒྱ་མཚོ་འབའ་
ཞིག་ཆུ་ཀླུང་ཡིན་པས་ན། རྒྱ་མཚོ་ནི། ཆུ་ཀླུང་ཞེས་བྱ་བའི་གྲངས་སུ་གཏོགས་སོ། །ཆུ་ཀླུང་ཞེས་བྱ་བ་ནི། སྒྲ་ཆེན་པོ་སྒྲོག་པའི་ཕྱིར་ཏེ། ཐར་པ་ནི། ཆུ་ཀླུང་རྒྱ་མཚོའི་ཕ་རོལ་དང་འདྲའོ། །ཐར་
པ་གང་ཡིན་པ་དེ་ནི། དེ་བཞིན་གཤེགས་པའོ། །བཟང་པོ་བཟང་པོ་ཞེས་བྱ་བ་ནི། གང་ལ་ཀོ་ཤ་ཏ་ཀའི་འབྲས་བུ་ལྟ་བུའི་རོ་ཚ་བ་མེད་པ་སྟེ། ཐར་པ་ནི། ཀོ་ཤ་ཏ་ཀའི་འབྲས་བུ་མ་ཡིན་
གྱི༑ ཐར་པ་ནི། རྒྱུན་འབྲུམ་ལྟ་བུ་ཡིན་ནོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཇི་ལྟར་སྨན་པ་རྩི་དང་སྨན་ཐམས་ཅད་ཀྱིས་སེམས་གནས་པར་བྱས་ནས་ནད་དོ་ཅོག་སེལ་བ་དེ་
བཞིན་དུ་ཐར་པའང་ཉེས་པ་ཐམས་ཅད་དང་བྲལ་བའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །འདུན་པ་དྲག་པོ་འདུན་པ་དྲག་པོ་ཞེས་བྱ་བ་ནི། ཇི་ལྟར་གྲོང་ཆུང་ངུར་སྐྱེ་བོ་ཕལ་པོ་
ཆེ་འཇུག་པའི་སྐབས་མེད་པ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །སྲིད་པ་དགའ་བ་ཟད་པ་ཞེས་བྱ་བ་ནི། སྒྱུ་མ་སྤྲུལ་པ་དང་བྲལ་བ་ལྟ་བུ་སྟེ། གང་
ལ་སྐྱེས་པ་དང་བུད་མེད་འཁྲིག་པའི་ཆོས་ཅན་རྣམས་ཀྱི་ཕན་ཚུན་དུ་གཏམ་ཟེར་བ་ཡོད་པ་བཞིན་དུ་ཐར་པ་ནི། དེ་ལྟ་མ་ཡིན་ཏེ། རང་བཞིན་གྱིས་ངོ་བོ་ཉིད་ཀྱི་ཆོས་ཅན་འདོད་ཆགས་དང༌། ཞེ་སྡང་དང༌།
གཏི་མུག་དང་བྲལ་བ་གང་ཡིན་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །སྐོམ་པ་འདུལ་བ་སྐོམ་པ་འདུལ་བ་ཞེས་བྱ་བ་ནི། གང་ལ་སྲེད་པའི་བག་ཙམ་ཡང་མེད་པའོ། །ཡི་
དྭགས་ཀྱི་སྲེད་པ་མེད་པ་ནི། ཆོས་ཀྱི་སྲེད་པའོ། །ཆོས་ཀྱི་སྲེད་པ་ཞེས་བྱ་བ་ནི། སེམས་ཅན་ཐམས་ཅད་ལ་སྙིང་བརྩེ་བའོ། །ཐར་པ་ནི། ཡི་དྭགས་ཀྱི་སྲེད་པ་ལྟ་བུ་མ་ཡིན་ཏེ། བདག་དང་བདག་གིར་འཛིན་པ་
དང་བྲལ་བ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །འགོག་པ་འགོག་པ་ཞེས་བྱ་བ་ནི། ཐར་པ་སྟེ། སྲིད་པ་ལ་ཞེན་པ་མེད་པའོ། །ཐར་པ་གང་ཡིན་པ་དེ་ནི། དེ་བཞིན་
གཤེགས་པའོ། །གནས་གནས་ཞེས་བྱ་བ་ནི། ཐར་པ་སྟེ། སྲེད་པ་ཐམས་ཅད་ལས་ངེས་པར་སྒྲོལ་ཞིང་སྐྱོབ་པ་ཡིན་ནོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །སྐྱབས་སྐྱབས་
ཞེས་བྱ་བ་ནི། ཇི་ལྟར་དེ་བཞིན་གཤེགས་པ་ལ་སྐྱབས་སུ་སོང་ནས་སྐྱབས་གཞན་མི་ཚོལ་བ་ལྟ་བུའོ། །ཇི་ལྟར་རྒྱལ་པོ་ལ་སྐྱབས་སུ་འགྲོ་བ་མི་བརྟན་པ་བཞིན་དུ་ཐར་པ་ནི། དེ་ལྟ་མ་ཡིན་ཏེ། བདེ་
༄༅། །བ་བརྟན་པ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །དཔུང་གཉེན་དཔུང་གཉེན་ཞེས་བྱ་བ་ནི། ནགས་ཁུང་དགོན་པ་མཆོག་ཏུ་འཇིགས་
པ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཇི་ལྟར་རི་དྭགས་ཀྱི་རྒྱལ་པོའི་དཔུང་གཉེན་རི་དྭགས་གཞན་རྣམས་ལ་མེད་པ་བཞིན་ནོ། །རི་དྭགས་ཀྱི་རྒྱལ་པོ་ནི། འཆི་བས་འཇིགས་པ་ཐམས་ཅད་
ཀྱིས་འཇིགས་པ་མེད་པ་དེ་བཞིན་དུ་ཐར་པ་ནི། དཔུང་གཉེན་ཡིན་ནོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །བདེ་བ་བདེ་བ་ཞེས་བྱ་བ་ནི། རིན་པོ་ཆེའི་གླིང་དང་འདྲ་སྟེ། དེ་བཞིན་
དུ་ཐར་པ་ནི། འབྱུང་ཁུང་ངོ༌། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཉམ་ང་བ་མེད་པ་ཉམ་ང་བ་མེད་པ་ཞེས་བྱ་བ་ནི། ཇི་ལྟར་སྟགས་གིས་འཇིགས་ཤིང་སྐྲག་ནས་ཁྲོན་པར་སོང་
བའི་འོག་ཏུ་ཁྲོན་པའི་ནང་ནས་བདག་འབྱིན་ནུས་པ་སུ་ཡོད་ཅེས་ཟེར་བ་དེ་བཞིན་དུ་ཐར་པ་ནི། ཁྲོན་པ་ལྟ་བུ་མ་ཡིན་ནོ། །ཉམ་ང་བ་མེད་པ་ཞེས་བྱ་བ་ནི། ཇི་ལྟར་གྲུ་ཆག་པ་ལས་གྲུ་གཞན་ཞིག་
རྙེད་དེ་རྒྱ་མཚོ་ཆེན་པོ་ལས་ངེས་པར་རྒལ་ནས་ཉམ་ང་བ་མེད་ཅིང་བདེ་བར་གྱུར་པ་དེ་བཞིན་དུ་ཐར་པ་ནི། ཉམ་ང་བ་མེད་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །གནས་
བཅོམ་པ་ཞེས་བྱ་བ་ནི། གོ་སྐབས་ཟད་པ་སྟེ། ཇི་ལྟར་འོ་མ་ལས་ཞོ་བྱུང༌། ཞོ་ལས་མར་གསར་འབྱུང༌། མར་གསར་ལས་ཞུན་མར་འབྱུང༌། ཞུན་མར་ལས་མར་གྱི་ཉིང་ཁུ་འབྱུང་བ་
བཞིན་དུ་ཐར་པ་ནི། གནས་ཐམས་ཅད་ཡོངས་སུ་ཆད་པ་སྟེ། མར་གྱི་ཉིང་ཁུ་ལྟར་རང་བཞིན་དུ་གནས་སོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ང་རྒྱལ་འདུལ་བ་ང་རྒྱལ་འདུལ་བ་
ཞེས་བྱ་བ་ནི། ཇི་ལྟར་སའི་མངའ་བདག་རྒྱལ་པོ་ང་ནི། རྒྱལ་པོ་ཐམས་ཅད་ཀྱི་མཆོག་ཡིན་ནོ། སྙམ་པའི་ང་རྒྱལ་འདུལ་བ་བཞིན་དུ་ཐར་པ་ནི། དེ་ལྟ་མ་ཡིན་ཏེ། ཐར་པ་ནི།
ང་རྒྱལ་མེད་ཅིང་ང་རྒྱལ་དུ་འཛིན་པ་མེད་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །རྒྱགས་པ་འདུལ་བ་རྒྱགས་པ་འདུལ་བ་ཞེས་བྱ་བ་ནི། གང་ལ་འཁྲིག་པའི་འདུན་
པའི་མིང་ཡང་མེད་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །མ་རིག་པ་འདུལ་བ་མ་རིག་པ་འདུལ་བ་ཞེས་བྱ་བ་ནི། ཇི་ལྟར་འོ་མ་ལས་གཅིག་ནས་གཅིག་ཏུ་
བརྒྱུད་དེ་དྲི་མའི་ཉེས་པ་གང་དང་གང་ཟད་པར་གྱུར་པ་དེ་དང་དེ་ལས་མར་གྱི་ཉིང་ཁུ་འབའ་ཞིག་འབྱུང་བར་འགྱུར་བ་དེ་བཞིན་དུ་མ་རིག་པ་ལས་རིག་པ་འབའ་ཞིག་འབྱུང་བར་འགྱུར་ཏེ།
རིག་པ་གང་ཡིན་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །དབེན་པ་དབེན་པ་ཞེས་བྱ་བ་ནི། གང་ལ་ཟླའི་ཆོས་གཞན་མེད་པ་སྟེ། གླང་པོ་ཆེའི་དགོན་པ་ན་གླང་པོ་ཆེ་
གཅིག་པུ་རྒྱུ་ཞིང་གཅིག་པུ་གནས་པ་བཞིན་དུ་ཐར་པའང་དེ་དང་འདྲའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །རྣམ་པར་སྤོང་བ་རྣམ་པར་སྤོང་བ་ཞེས་བྱ་བ་ནི། བདག་མེད་པ་གཟུང་
༄༅། །བར་བསྟན་ཏེ། དེ་ནི། དེ་བཞིན་གཤེགས་པའི་སྙིང་པོ་ལ་འཇུག་པའོ། །ཇི་ལྟར་ཨེ་རཎྜ་དང༌། འདམ་བུའི་སྡོང་བུ་ནི། འབྲས་བུ་མ་གཏོགས་པར་ཐོག་ཐག་
ཏུ་སྙིང་པོ་མེད་པ་དེ་བཞིན་དུ་ལྷ་དང༌། མི་དང༌། ལྷ་མ་ཡིན་གྱི་ལུས་ཐམས་ཅད་ནི། དེ་བཞིན་གཤེགས་པའི་སྙིང་པོ་མ་གཏོགས་པ་ཐམས་ཅད་ཨེ་རཎྜ་དང༌། འདམ་བུ་བཞིན་དུ་
སྙིང་པོ་མེད་དོ། །སྲིད་པ་སྙིང་པོ་མེད་པ་ཐམས་ཅད་རྣམ་པར་སྤངས་པ་ནི། ཐར་པའོ། །ཐར་པ་ནི། རང་ལ་བརྡ་སྤྲོད་པ་ཡིན་ཏེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །སྤོང་
བ་སྤོང་བ་ཞེས་བྱ་བ་ནི། ཁ་ཟས་མ་ཞུ་བས་ཁ་ཟས་མ་ཚོས་པ་སྤོང་བ་བཞིན་དུ་སྲིད་པ་ཐམས་ཅད་བཅད་པ་དང་སྤངས་པ་སྟེ། དེ་ལྟར་ན། ཐར་པ་ནི། མཁས་པའོ། །ཐར་པ་གང་ཡིན་པ་དེ་ནི།
དེ་བཞིན་གཤེགས་པའོ། །རང་སངས་རྒྱས་ཀྱི་ཆོས་རང་སངས་རྒྱས་ཀྱི་ཆོས་ཞེས་བྱ་བ་ནི། ཇི་ལྟར་ཀླུ་ཤིང་གི་མེ་ཏོག་བ་མཁལ་གྱི་མེ་ཏོག་མ་ཡིན་པ་བཞིན་དུ་ཐར་པའང་དེ་དང་འདྲ་སྟེ།
ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཁམས་ཁམས་ཞེས་བྱ་བ་ལ། ཁམས་དེ་ནི། སེམས་ཅན་ཐམས་ཅད་ཀྱི་ཁམས་སོ། །སྲོག་དེ་ནི། སེམས་ཅན་ཐམས་ཅད་ཀྱི་
སྲོག་གོ། ཐར་པའང་དེ་དང་འདྲ་སྟེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །སྐྱེ་མཆེད་སྐྱེ་མཆེད་ཅེས་བྱ་བ་ནི། གང་ལ་འབྱུང་བའི་སྒོ་ཡོད་པ་སྟེ། བདག་མེད་པ་
བསྒོམས་ནས་བདག་གི་ལམ་ལ་འཇུག་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །དགེ་བ་དགེ་བ་ཞེས་བྱ་བ་ནི། ཇི་ལྟར་རྗེས་སུ་བསྟན་པར་བྱ་བ་རྣམས་ལ་
བླ་མའི་ཚིག་གཅིག་ཏུ་མེད་པ་ལྟ་བུའོ། །དགེ་བ་ཞེས་བྱ་བ་ནི། ལེགས་པ་ཡིན་ཏེ། དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །འཇིག་རྟེན་ལས་འདས་
པ་འཇིག་རྟེན་ལས་འདས་པ་ཞེས་བྱ་བ་ནི། ཆོས་ཐམས་ཅད་ཀྱི་ནང་ན་གནས་ཀྱི་དམ་པ་སྟེ། དེ་ནི། ཐར་པའོ། །ཇི་ལྟར་བཅུད་ཐམས་ཅད་ཀྱི་ནང་ན་མཆོག་ནི། བའི་འོ་མ་ཡིན་པ་བཞིན་དུ་
འཇིག་རྟེན་ལས་འདས་པ་དེ་ནི། ཐར་པ་ཡིན་ནོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །མི་གཡོ་བ་མི་གཡོ་བ་ཞེས་བྱ་བ་ནི། ཇི་ལྟར་སྒོ་གཏན་གྱི་རྟེན་མ་ཕྱོགས་བཞིའི་རླུང་
གིས་བསྐྱོད་མི་ནུས་པ་བཞིན་དུ་ཐར་པའང་དེ་དང་འདྲ་བར་བརྟན་ཞིང་མི་གཡོ་བ་ཡིན་ནོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །རྒྱ་མཚོའི་རླབས་ནི། མི་བརྟན་པའི་རང་
བཞིན་ཅན་ཡིན་ཏེ། ཐར་པ་ནི། དེ་ལྟ་མ་ཡིན་ནོ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །གནས་གནས་ཞེས་བྱ་བ་ནི། རྒྱལ་པོའི་ཕོ་བྲང་ཁང་བཟང་འཕན་སྐྱོན་མེད་པ་དེའང་བཅོས་མ་
ཡིན་ནོ། །ཐར་པ་དེ་ནི། དེ་ལྟ་མ་ཡིན་ཏེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ངེས་པ་ངེས་པ་ཞེས་བྱ་བ་ནི། ཇི་ལྟར་ཛམྦུ་ཆུ་བོའི་གསེར་སྐྱོན་མེད་ཅིང་ཐམས་ཅད་དུ་
༄༅། །ལས་སུ་རུང་བ་བཞིན་དུ་ཐར་པའང་དེ་དང་འདྲ་སྟེ། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཐར་བ་ནི། བྱིས་པའི་སྤྱོད་པ་ལྟ་བུ་མ་ཡིན་ནོ། །
ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཤིན་ཏུ་སྤངས་པ་ཤིན་ཏུ་སྤངས་པ་ཞེས་བྱ་བ་ནི། ཇི་ལྟར་རྒྱལ་སྲིད་ཀྱི་དབང་ཕྱུག་ཐོབ་ནས་མཐུ་ཆེ་ཞིང་བག་ཡངས་སུ་འདུག་
པ་བཞིན་དུ་ཕུང་པོ་ཡོངས་སུ་སྤངས་པ་ནི། ཐར་པ་ཡིན་ནོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །མཐར་ཐུག་པ་མཐར་ཐུག་པ་ཞེས་བྱ་བ་ནི། ཉོན་མོངས་པ་མི་གཙང་
བ་ཟད་པ་སྟེ། ཐར་པ་ནི། རྒྱལ་པོའི་བཙོན་ར་ནས་ཕྱིན་པའི་མི་དང་འདྲའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པ་སྟེ། བཅོས་མ་མ་ཡིན་པའི་བདེ་བའོ། །འདོད་ཆགས་དང༌།
ཞེ་སྡང་དང༌། གཏི་མུག་སྤོང་བ་འདོད་ཆགས་དང༌། ཞེ་སྡང་དང༌། གཏི་མུག་སྤོང་བ་ཞེས་བྱ་བ་ནི། གསུམ་གྱི་བཏང་བ་སྟེ། ཇི་ལྟར་མི་སྤྲུལ་གདུག་པས་ཟིན་པ་བདག་ཉིད་སོས་པར་བྱ་
བའི་ཕྱིར་བད་ཀན་སྐྱུག་པར་བྱེད་པ་བཞིན་དུ་ཉོན་མོངས་པའི་བད་ཀན་ཟད་པ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཉོན་མོངས་པ་སྤོང་བ་ཉོན་མོངས་པ་
སྤོང་བ་ཞེས་བྱ་བ་ལ། སྤྲུལ་གདུག་པ་འདྲ་བའི་ཉོན་མོངས་པ་ཟད་པ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཕུང་པོ་སྤོང་བ་ཕུང་པོ་སྤོང་བ་ཞེས་བྱ་བ་ལ།
སྡུག་བསྔལ་ཐམས་ཅད་བོར་ཏེ་ཤས་ཆེར་བདེ་བ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །འདོད་ཆགས་དང༌། ཞེ་སྡང་དང༌། གཏི་མུག་ཟད་པ་འདོད་ཆགས་དང༌།
ཞེ་སྡང་དང༌། གཏི་མུག་ཟད་པ་ཞེས་བྱ་བ་ལ། གསུམ་ཟད་པར་བྱས་ཏེ་རྩ་ནས་བཏོན་པ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཕུང་པོ་ཐམས་ཅད་སྤངས་པ་
ཕུང་པོ་ཐམས་ཅད་སྤངས་པ་ཞེས་བྱ་བ་ནི། ཉེས་པ་ཐམས་ཅད་སྤངས་པ་སྟེ། ལེགས་པར་མཐོང་བའི་ཕྱིར་རོ། །དེ་ནི། ཐར་པ་ཡིན་ཏེ། ཐར་པ་གང་ཡིན་པ་དེ་ནི། དེ་བཞིན་གཤེགས་
པའོ༑ ༑འདུས་བྱས་ཐམས་ཅད་སྤངས་པའི་དོན་འདུས་བྱས་ཐམས་ཅད་སྤངས་པའི་དོན་ཞེས་བྱ་བ་ནི། ཐར་པ་སྟེ། དགེ་བ་ཐམས་ཅད་སྒྲུབ་པའོ། །ཐར་པ་གང་ཡིན་པ་དེ་ནི། དེ་
བཞིན་གཤེགས་པའོ། །ལམ་ཆད་པ་ལམ་ཆད་པ་ཞེས་བྱ་བ་ནི། བདག་མེད་པ་བསྒོམས་ནས་རྒྱུན་མི་འཆད་པའི་ཚུལ་གྱིས་བདག་མེད་པ་འཛིན་པ་དང༌། བདག་བསྒོམས་ནས་
རྒྱུན་མི་འཆད་པའི་ཚུལ་གྱིས་བདག་འཛིན་པ་དང༌། གཉིས་ཀའི་ཕྱོགས་བསྒོམས་ནས་སངས་རྒྱས་ཀྱི་ཁམས་གང་ཡིན་པ་དེ་ནི། ཡོད་དོ། །ཞེས་དེ་འཛིན་པ་གང་ཡིན་པ་དེ་ནི།
ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །སྟོང་པ་ཉིད་སྟོང་པ་ཉིད་ཅེས་བྱ་བ་ནི། གང་གི་ཚེ་བཙལ་ཀྱང་ཅིའང་མ་རྙེད་པ་སྟེ། ཅིའང་མེད་པ་ཞེས་བྱ་བ་ནི། གཅེར་
༄༅། །བུ་པ་རྣམས་ལའང་ཡོད་མོད་ཀྱི། ཐར་པ་ནི། དེ་ལྟ་མ་ཡིན་ནོ། །སྟོང་པ་ཉིད་ཅེས་བྱ་བ་ནི། ཇི་ལྟར་སྦྲང་རྩི་དང༌། ཞུན་མར་དང༌། འབྲུ་མར་དང༌།
ཆུ་དང༌། ཞོའི་བུམ་པ་རྣམས་ལ་ཞོ་ཡོད་ཀྱང་རུང༌། མེད་ཀྱང་རུང༌། ཞོའི་བུམ་པ་ཞེས་བྱ་བ་དང༌། དེ་བཞིན་དུ་སྦྲང་རྩི་དང༌། ཆུ་ཡོད་ཀྱང་རུང༌། མེད་ཀྱང་རུང༌། སྦྲང་རྩི་དང༌།
ཆུའི་བུམ་པ་ཞེས་བྱ་ན། ཅི་དེ་ལ་བུམ་པ་སྟོང་པ་ཞེས་བྱའམ། དེ་དག་མེད་པ་ལ་བུམ་པ་རང་ཉིད་སྟོང་ངམ། གཟུགས་ཀྱང་ཡོད། ཁ་དོག་ཀྱང་ཡོད་ན། ཇི་ལྟར་སྟོང་པ་ཞེས་བྱ། ཐར་
པ་ནི། དེ་ལྟ་བུར་སྟོང་པ་མ་ཡིན་ཏེ། ཐར་པ་ལ་ནི། གཟུགས་དང་ཁ་དོག་ཕུན་སུམ་ཚོགས་པའང་ཡོད་ན། ཇི་ལྟར་ཞོའི་བུམ་པ་སྟོང་པ་མ་ཡིན་དུ་ཟིན་ཀྱང་ཞོ་མེད་པའི་ཕྱིར་
སྟོང་པ་ཞེས་བྱ་བ་བཞིན་དུ་ཐར་པའང་སྟོང་པ་མ་ཡིན་བཞིན་དུ་སྟོང་པ་ཞེས་བྱ་བ་སྟེ། གཟུགས་ཡོད་བཞིན་དུ་ཇི་ལྟར་སྟོང་པ་ཞེས་བྱ་ཞེ་ན། སྟོང་པ་ཞེས་བྱ་བ་ནི། ཉོན་མོངས་པའི་རྣམ་
པ་དང༌། སྲིད་པའི་ཐ་སྙད་ཉི་ཤུ་རྩ་ལྔ་དང༌། སྡུག་བསྔལ་དང༌། འཇིག་རྟེན་གྱི་ཆོས་ལུགས་དང༌། ཆོ་ག་དང༌། སྤྱོད་ཡུལ་འབྱུང་བ་རྣམས་མེད་པའི་ཕྱིར་ཞོའི་བུམ་པ་ཞོ་མེད་པ་བཞིན་
དུ་ཐར་པ་ལ་སྟོང་པ་ཞེས་བྱ་བ་སྟེ། དེ་ལ་ནི། བུམ་པའི་གཟུགས་མི་གཡོ་བ་བཞིན་དུ་ཤས་ཆེར་བདེ་བ་དང༌། དགའ་བ་དང༌། རྟག་པ་དང༌། བརྟན་པ་དང༌། ཐེར་ཟུག་དང༌། འཇིག་
རྟེན་ལས་འདས་པའི་ཆོས་དང༌། ཆོ་ག་དང༌། སྤྱོད་ཡུལ་རྣམས་ཡོད་དོ། ཐར་པ་ནི། བུམ་པའི་གཟུགས་བཞིན་དུ་རྟག་པ་དང༌། བརྟན་པ་དང༌། ཐེར་ཟུག་པ་མ་ཡིན་གྱི། བུམ་པ་ནི།
ཆག་པར་འགྱུར་ཏེ། རྒྱུའི་སྒོ་ནས་བཞག་པ་ཙམ་དུ་ཟད་དོ། །ཐར་པ་ནི། བྱས་པ་མ་ཡིན་པའི་ཕྱིར་ཆག་པར་མི་འགྱུར་ལ། ཐར་པ་གང་ཡིན་པ་དེ་ནི། བཅོས་མ་མ་ཡིན་པའི་
ཁམས་ཡིན་ཏེ། དེ་ནི། དེ་བཞིན་གཤེགས་པའོ། །སྲེད་པ་ཟད་པ་སྲེད་པ་ཟད་པ་ཞེས་བྱ་བ་ནི། སངས་རྒྱས་སུ་གྱུར་པའི་མོད་ལ་བདག་དབང་པོར་གྱུར་ཅིག་ཅེའམ། དབང་
ཕྱུག་ཆེན་པོའམ། མི་མཇེད་ཀྱི་བདག་པོ་ཚངས་པར་གྱུར་ཅིག་ཅེས་བྱ་བའི་སྲེད་པ་དང༌། འདོད་པ་གཞན་དེ་ན་མེད་དེ། ཡོད་ཅེས་བྱ་བའམ། སྐྱེ་བར་འགྱུར་ཞེས་བྱ་བ་མི་སྲིད་དོ། །
སྲེད་པ་ཟད་པ་གང་ཡིན་པ་དེ་ནི། སངས་རྒྱས་སོ། །དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །འདོད་ཆགས་དང་བྲལ་བ་འགོག་པ་འདོད་ཆགས་དང་
བྲལ་བ་འགོག་པ་ཞེས་བྱ་བ་ལ། སྲེད་པ་ཐམས་ཅད་ལ་ཞེན་པ་དང༌། འདོད་པ་མ་ལུས་པ་ལུས་པ་མེད་པ། ལྷག་པ་མེད་པ། ཐམས་ཅད་ལས་འདོད་ཆགས་དང་བྲལ་བ་རྣམས་
གཏན་དུ་རབ་ཏུ་ཞི་བར་གྱུར་པ་ནི། ཐར་པ་ཡིན་ཏེ། འཆིང་བ་ཐམས་ཅད་འགོག་པའོ། །དེ་ལྟར་འགོག་པ་གང་ཡིན་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །
༄༅། །མྱ་ངན་ལས་འདས་པ་མྱ་ངན་ལས་འདས་པ་ཞེས་བྱ་བ་ནི། ཇི་ལྟར་རི་དྭགས་ཀྱི་ཁྱུ་རྔོན་པའི་ལག་ནས་ཤོར་བ་འཆི་བས་འཇིགས་ཤིང་སྐྲག་ནས་ཐབས་ཅི་ཡོད་
པས་རྒྱུག་ཅིང་དྲང་སྲོང་གི་གནས་སུ་ཕྱིན་ནས་བདེ་བར་འགྱུར་ཞིང་དབུགས་ཕྱིན་པར་འགྱུར་པ་དེ་བཞིན་དུ་ཇི་ལྟར་དབུགས་ཕྱིན་ཅིང་བདེ་བར་འགྱུར་བ་དེ་ལྟ་བུར་སེམས་ཅན་མང་པོ་
མྱ་ངན་ལས་འདས་པ་ཟད་མི་ཤེས་པ་སྲིད་པ་མངོན་པར་འདུ་བྱེད་པ་དང༌། ཉོན་མོངས་པའི་རྣམས་པ་སྒྲ་ཐམས་ཅད་ཀྱི་ལག་ན་ས་ཐལ་ཏེ་ཤོར་ནས་འཆི་བས་འཇིགས་ཤིང་སྐྲག་སྟེ།
ཐབས་ཅི་ཡོད་པས་རྒྱུག་ཅིང་ཆོས་ཀྱི་དྲང་སྲོང་གི་གནས་དེ་བཞིན་གཤེགས་པ་ཐུབ་པའི་བཞུགས་ཡུལ་ཟླ་མེད་པའི་སྐྱབས་སུ་དོད་ནས་དབུགས་ཕྱིན་པར་གྱུར་ཏེ། དེ་དག་གང་
གི་ཚེ་དབུགས་ཕྱིན་ཅིང་བདེ་བར་གྱུར་པ་དེ་ནི། མྱ་ངན་ལས་འདས་པ་ཟད་མི་ཤེས་པའི་མྱ་ངན་ལས་འདས་པའོ།། །།འཕགས་པ་ཡོངས་སུ་མྱ་ངན་ལས་འདས་པ་
ཐེག་པ་ཆེན་པོའི་མདོ། །བམ་པོ་བདུན་པ། དེ་ནས་བཅོམ་ལྡན་འདས་ལ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །གལ་ཏེ་དེ་ལྟ་ལགས་ན། དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཐམས་ཅད་མཁྱེན་པ་རྣམས་མ་མཆིས་པའི་སླད་དུ་ལུས་ཡོངས་སུ་གཏོང་བའི་སྒོ་ནས་མྱ་ངན་ལས་འདས་པ་མཆོག་ཏུ་བདེ་བ་འཐོབ་
བར་མི་འགྱུར་ཏེ། གསུམ་ལ་སྐྱབས་སུ་མཆིས་པ་རྣམས་མྱ་ངན་ལས་འདའ་བར་མི་འགྱུར་ལགས་སོ། །བཀའ་སྩལ་བ། ཇི་ལྟར་མི་བརྒྱལ་བ་ལས་སངས་བའི་དྲུང་བའི་མི་དག་དོང་སྟེ།
ཁྱོད་སངས་ཤིང་བདེ་བར་གྱུར་ཏམ་ཞེས་དྲིས་ན། དེ་སངས་ནས་བདག་སངས་ཏེ་བདེ་བར་གྱུར་ཏོ། །ཞེས་ཟེར་ཏེ། དེ་བརྒྱལ་བ་ལས་སངས་བ་བཞིན་དུ་སྲིད་པ་ཉི་ཤུ་རྩ་ལྔ་པོ་ཐམས་ཅད་
ལས་གྲོལ་ན་སངས་རྒྱས་ཀྱི་ཡོངས་སུ་མྱ་ངན་ལས་འདས་པ་ཐོབ་པ་ཡིན་ནོ། །མཆོག་ཏུ་བདེ་བ་ཞེས་བྱ་བ་ནི། དེར་ཟད་མི་ཤེས་པའི་འདུ་ཤེས་ཀྱིས་མཆོག་ཏུ་བདེ་བའི་རྣམ་པ་མང་བ་
གང་ཡིན་པ་སྟེ། དེ་ནི། ཡོངས་སུ་མྱ་ངན་ལས་འདས་པ་ཡིན་ནོ། །དེ་ནི། ཐར་པ་ཡིན་ནོ། །མཆོག་ཏུ་བརྟན་པ་དང༌། མི་གཡོ་བ་དང༌། དབྱེ་བ་དང༌། རྟག་པ་མྱོང་བ་གང་ཡིན་པ་དེ་ནི། ཐར་
པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །དེ་ནས་བཅོམ་ལྡན་འདས་ལ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །མ་སྐྱེས་པ་དང༌། མ་བྱུང་བ་
གང་ལགས་པ་དེ་ཐར་པ་ལགས། དེ་དེ་བཞིན་གཤེགས་པ་ལགས་ཞེས་བགྱིའམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་ལྟ་ལོས་ཀྱང་སྟེ། དེ་ནི། ཐར་པ་
ཡིན་ནོ། །དེ་ནི། དེ་བཞིན་གཤེགས་པ་ཡིན་ནོ། །གསོལ་བ། འོ་ན་ནམ་མཁའི་ཁམས་ཀྱང་མ་སྐྱེས་པ་མ་བྱུང་བ་ལགས་ན། ཐར་པའང་དེ་དང་འདྲ། དེ་བཞིན་གཤེགས་པའང་
༄༅། །དེ་དང་འདྲ་ཞེས་བགྱིའམ། བཀའ་སྩལ་བ། དེ་ལྟ་མ་ཡིན་ཏེ། ཐར་པ་ནི། ནམ་མཁའི་ཁམས་དང་འདྲ་བ་མ་ཡིན་ནོ། །གསོལ་བ། འོ་ན་ཅི་ལྟ་བུ་ལགས་
བཀའ་སྩལ་པ། རིགས་ཀྱི་བུ། དཔེར་ན། བྱ་ཤང་ཤང་ཏེའུའམ། ཀ་ལ་པིང་ཀ་གང་གི་ཚེ་སྐད་འབྱིན་པ་དེའི་ཚེ་ཁྭ་ལྟར་སྐད་འབྱིན་ཅེས་བྱའམ། གསོལ་བ། བཅོམ་ལྡན་འདས།
དེ་ནི། མ་ལགས་ཏེ། བྱ་གཞན་རྣམས་ཀྱི་སྐད་ནི། དེ་དག་གི་སྐད་ཀྱི་དཔེར་ཡང་མི་རུང་ལགས་སོ། །ཁྭའི་སྐད་ནི། ཤང་ཤང་ཏེའུ་དང༌། ཀ་ལ་པིངྐའི་སྐད་ཀྱི་བརྒྱའི་ཆར་ཡང་མི་
སྤྱོད། སྟོང་གི་ཆར་ཡང་མི་སྤྱོད། གྲངས་དང༌། ཆ་དང༌། དཔེ་དང༌། རྒྱུར་ཡང་མི་བཟོད་ལགས་སོ། །བྱ་དེ་དག་ནི། དཔེ་མ་མཆིས་པ་ལགས་སོ། །བཅོམ་ལྡན་འདས། དེ་བཞིན་
གཤེགས་པའི་གསུང་ནི། རྒྱུའི་སྒོ་ནས་དཔེ་མ་མཆིས་པ་ལགས་སོ། །བཀའ་སྩལ་བ། རིགས་ཀྱི་བུ། ལེགས་སོ། །ལེགས་སོ། །རིགས་ཀྱི་བུ། ཁྱོད་ཀྱིས་དེ་ལྟར་ཟབ་པར་བྱ་
བར་རིགས་ཏེ་ལེགས་སོ། །དེ་བས་ན། ཐར་པ་གང་ཡིན་པ་དེ་ནི། དེ་བཞིན་གཤེགས་པའོ། །ཐར་པའི་རྒྱུ་དང༌། དཔེ་གཞན་ནི། ལྷ་དང༌། མི་དང༌། ལྷ་མ་ཡིན་དང་བཅས་པའི་འཇིག་
རྟེན་མེད་དེ། དཔེ་མེད་བཞིན་དུ་གདུལ་བར་བྱ་བའི་དབང་གིས་ཡོན་ཏན་འདི་འདྲའོ། །དེ་འདྲའོ། །ཞེས་དཔེས་བསྟན་ཏོ། །ཐར་པའི་དཔེ་ནི། དེ་བཞིན་གཤེགས་པ་ཡིན་ཏེ། དེ་
ཅིའི་ཕྱིར་ཞེ་ན། དེ་བཞིན་གཤེགས་པ་གང་ཡིན་པ་དེ་ནི། ཐར་པའོ། །ཐར་པ་གང་ཡིན་པ་དེ་ནི། དེ་བཞིན་གཤེགས་པ་སྟེ། འདི་ལ་གཉིས་སུ་བྱར་མེད་ཅིང་ཐ་དད་པར་བྱར་མེད་
དོ། །རིགས་ཀྱི་བུ། དཔེར་ན། དཔེ་མེད་བཞིན་དུ་རྒྱུའི་དོན་གྱིས་དཔེར་ལེན་པའང་ཡོད་དེ། ཀྱེ་མ་བཞིན་བཟང༌། ཁྱོད་ཟླ་བ་ན་བཞིན་ཞེས་བྱ་བ་དང༌། གླང་པོ་ཆེ་བཟང་ཁྱད་གང་ཀྱི་རི་
བཞིན་ཞེས་བྱ་མོད་ཀྱི། ཅི་ཟླ་བ་བཞིན་དང་འདྲའམ། བཞིན་ཡང་ཟླ་བ་དང་འདྲའམ། ཅི་གླང་པོ་ཆེ་རི་དང་འདྲའམ། རིའང་གླང་པོ་ཆེ་དང་འདྲའམ། རིགས་ཀྱི་བུ། དེ་བཞིན་དུ་ཐར་
པའང་དཔེ་མེད་བཞིན་དུ་སེམས་ཅན་ངེས་པར་བསྒྲལ་བའི་ཕྱིར་འདིར་རྒྱུའི་དབང་གིས་དཔེས་བསྟན་པར་རིག་པར་བྱའོ། །ཆོས་ཀྱི་དེ་ཁོ་ན་ཉིད་ཀྱང་རྒྱུའི་དབང་གིས་ཆོས་ཀྱི་དེ་ཁོ་ན་ཉིད་
དུ་རིག་པར་བྱའོ། །གསོལ་བ། ཅིའི་སླད་དུ་དེ་བཞིན་གཤེགས་པ་རྣམས་པ་གཉིས་སུ་སྟོན་ལགས། བཀའ་སྩལ་པ། རིགས་ཀྱི་བུ། གཞན་ཡང་དཔེར་ན། མི་ལ་ལ་ཞིག་རལ་གྲི་
ཐོགས་ནས་ངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསད་དོ། །སྙམ་སྟེ་གསོད་པར་བྱེད་ལ། དེ་བཞིན་གཤེགས་པ་ནི། ལོག་པ་ཅུང་ཟད་
ཀྱང་མི་མཛད་དེ། ཞུམ་པ་མེད་ཅིང་དགྱེས་བཞིན་དུ་བཞུགས་ན། ཅི་མི་དེ་མཚམས་མེད་པ་བྱེད་པ་ཞེས་བྱའམ། འོན་ཏེ་མི་བྱ། གསོལ་བ། དངོས་པོའི་སྒོ་ནས་མཚམས་མེད་པ་
༄༅། །བགྱིས་པ་ཞེས་མི་བགྱི་ལགས་སོ། །དེ་ཅིའི་སླད་དུ་ཞེ་ན། བསགས་པའི་ཁམས་མ་བཤིག་པས་ན། དངོས་པོའི་སྒོ་ནས་མཚམས་མེད་པ་བགྱིད་པ་མ་ལགས་སོ། །
དེ་བཞིན་གཤེགས་པའི་སྐུ་ལ་ནི། བསགས་པའི་ཁམས་ཀྱི་བག་ཀྱང་མ་མཆིས་ཏེ། ཆོས་ཀྱི་ཁམས་ལགས་ན། ཇི་ལྟར་བགྲོངས་སུ་རུང༌། དེ་བས་ན། སེམས་བསྐྱེད་པ་དང་བརྩམས་
པ་ཙམ་ལས་མཚམས་མེད་པ་བགྱིད་པ་ཞེས་བགྱི་སྟེ། འདིར་རྒྱུའི་དབང་གིས་ཆོས་ཀྱི་དེ་ཁོ་ན་ཉིད་རིག་པར་བགྱི་བ་ལགས་སོ། །བཀའ་སྩལ་པ། རིགས་ཀྱི་བུ། ལེགས་སོ་ལེགས་
སོ། །ངས་ཀྱང་ཚིག་དེ་སྐད་དུ་སྨྲ་བར་བསམ་མོ། །རིགས་ཀྱི་བུ། གཞན་ཡང་འདི་ན་མི་སྡིག་ཅན་ལ་ལ་ཞིག་བདག་གི་མ་གསད་དོ། །སྙམ་ནས་དགོན་པ་ཞིག་ན་ཁྲེ་རྒོད་དང༌། སྲན་
ཆུང་གི་གཡུལ་དུ་བྱ་ར་བྱས་ནས་མ་དེར་འོངས་པ་དང༌། ཁྱོད་ཀྱི་ངའི་ཐུགས་པ་ལེགས་པར་ཁྱེར་ཏེ་མ་འོངས་སོ། །ཞེས་ཟེར་ཏེ། དགྲ་སྟ་བརྡར་ནས་བསད་པར་བྱས་པ་དང༌། དགྲ་སྟ་
བརྡར་བའི་བར་དེའི་སྐབས་སུ་དེའི་མ་སྐྲག་ནས་སོག་མའི་ཕུང་པོའི་ནང་དུ་ཞུགས་སོ། །དེ་ནས་དེ་དགྲ་སྟ་ཐོགས་ཏེ་སོག་མའི་ཕུང་པོ་ལ་བསྣུན་ནས་ད་ནི། བདག་གི་མ་ཤིའོ་སྙམ་
སྟེ༑ མི་གཞན་གྱིས་འཇིགས་ནས་སོག་མ་ལེགས་པར་མ་བརྟགས་སོ། །དེ་ནས་མ་དེ་དེའི་ནང་ནས་བྱུང་སྟེ་སོང་ངོ༌། །དེ་ནས་དེ་བདག་གི་མ་ཤི་ཟིན་ནོ། །སྙམ་སྟེ་སེམས་དགའ་
བར་གྱུར་ན། མཚམས་མེད་པ་བྱེད་པ་ཞེས་བྱའམ། འོན་ཏེ་མི་བྱ། གསོལ་བ། མ་སོད་པ་ཞེས་མི་བགྱི་ལགས་སོ། །ཡང་གསོལ་བ། ཅི་ལགས། མཚམས་མ་མཆིས་པའི་ལས་ཀྱི་
རྒྱུའི་དངོས་པོ་ཞུ་བར་འཚལ་ལམ། བཀའ་སྩལ་པ། ཕ་མའི་ཕུང་པོ་བཤིག་པས་མཚམས་མེད་པ་བྱེད་པ་ཞེས་བྱ་བས་དེའི་ཕྱིར་དེ་མཚམས་མེད་པ་བྱེད་པ་ནི། མ་ཡིན་གྱི། མ་གསོད་
པའི་སེམས་བསྐྱེད་པ་བརྩམས་པས་ན། མཚམས་མེད་པ་བྱེད་པ་དང་འདྲ་བ་ཡིན་ནོ། །ཕུང་པོ་དང༌། ཁམས་དང་སྐྱེ་མཆེད་ཀྱི་དངོས་པོ་མ་བཤིག་གི་བར་དུ་མཚམས་མེད་པ་བྱེད་
པ་རྫོགས་པ་ཞེས་མི་བྱ་སྟེ། འདིར་རྒྱུའི་དབང་གིས་ཆོས་དེ་ཁོ་ན་ཉིད་རིག་པར་བྱའོ། །གསོལ་བ། བཅོམ་ལྡན་འདས། ལེགས་ལགས་སོ། །ལེགས་ལགས་སོ། །དེ་ལྟར་རྒྱུའི་དབང་
གིས་རིག་པར་ཡང་བགྱི། རིག་པར་ཡང་མི་བགྱི་ལགས་སོ། །བཀའ་སྩལ་པ། རིགས་ཀྱི་བུ། དེ་བཞིན་དུ་ངས་རྒྱུའི་དབང་གིས་ཐར་པ་བརྗོད་པ་ཡིན་ནོ། །རྒྱུའི་སྒོ་ནས་མྱ་ངན་ལས་འདས་
པ་ཡོན་ཏན་དཔག་ཏུ་མེད་པ་དང་ལྡན་པ་དཔེ་མེད་པ་ཁོ་ན་ཡིན་ནོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོར་འགྲོ་བའང་ཡོན་ཏན་དཔག་ཏུ་མེད་པ་དང་ལྡན་པ་ཡིན་ནོ། །དེང་
དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་མཛད་དེ། དེ་བས་ན། ཡོངས་སུ་མྱ་ངན་ལས་འདས་པ་ཆེན་པོའི་དོན་ནི། དེ་ཡིན་ནོ། །གསོལ་བ། དེ་བཞིན་གཤེགས་པ་ནི།
༄༅། །ཟད་པར་འགྱུར་བ་མ་ལགས་སོ། །དེ་བཞིན་གཤེགས་པ་ནི། སྐུ་ཚེ་ཟད་མི་ཤེས་པ་ལགས་པར་བལྟ་བར་བགྱིའོ། །བཀའ་སྩལ་པ། རིགས་ཀྱི་བུ། ལེགས་
སོ༑ ༑ལེགས་སོ། །དམ་པའི་ཆོས་སྲུང་བས་ནི། དེ་སྐད་བྱ་བའི་རིགས་སོ། །བདག་གི་ཐེ་ཚོམ་ངེས་པར་བྱེད་འདོད་པས་ནི། དེ་ལྟར་བྱ་བའི་རིགས་སོ། །དེ་ལྟར་ན། བྱང་ཆུབ་སེམས་
དཔའ་སེམས་དཔའ་ཆེན་པོ་ནི། སྣ་གྲངས་འདི་བཞིས་ཆོས་སྟོན་པར་བྱེད་དོ། །བྱང་ཆུབ་སེམས་དཔའ་སྣ་གྲངས་བཞིས་ཆོས་སྟོན་པའི་ལེའུ་སྟེ། བཞི་པའོ།། །།ཡོངས་
སུ་མྱ་ངན་ལས་འདས་པ་ཆེན་པོའི་མདོ་འདི་ལ་དམ་པའི་ཆོས་ཀྱི་ཚུལ་ཐོབ་པ་དང༌། དམ་པའི་ཆོས་འབྱིན་པ་དང༌། རྟེན་དུ་གྱུར་པའི་གང་ཟག་བཞི་ཡོད་དེ། སྐྱེ་བོ་མང་པོ་ལ་ཕན་པ་
དང༌། སྐྱེ་བོ་མང་པོ་ལ་བདེ་བའི་ཕྱིར་འཇིག་རྟེན་དུ་བྱུང་ངོ༌། །བཞི་གང་ཞེ་ན། ཀུན་ནས་ཉོན་མོངས་པའི་རང་བཞིན་ཅན་གྱི་མི་གང་ཟག་དེ་ལྟ་བུ་སྐྱེ་བོ་མང་པོ་ལ་བདེ་བ་དང༌། སྐྱེ་བོ་མང་
པོ་ལ་ཕན་པའི་ཕྱིར་འཇིག་རྟེན་དུ་འབྱུང་སྟེ། འདི་ནི། གང་ཟག་དང་པོའོ། །རྒྱུན་དུ་ཞུགས་པའི་འབྲས་བུ་དང༌། ལན་གཅིག་ཕྱིར་འོང་བའི་འབྲས་བུ་དང་ལྡན་པའི་གང་ཟག་དེ་ལྟ་
བུ་ནི༑ གཉིས་པའོ། །ཕྱིར་མི་འོང་བ་ནི། གསུམ་པའོ། །དགྲ་བཅོམ་པ་ནི། བཞི་པ་སྟེ། གང་ཟག་བཞི་པོ་འདི་རྣམས་ནི། རྟེན་དུ་གྱུར་པ་ཡིན་ནོ། །དེ་ལ་སོ་སོའི་སྐྱེ་བོ་ཞེས་བྱ་བ་
ནི༑ གང་བདག་ཉིད་ཚུལ་ཁྲིམས་དང༌། ཆོ་ག་དང༌། ཡོན་ཏན་དང་ལྡན་པར་གྱུར་ནས་ཆོས་འབྱིན་པར་བྱེད་པ་དང༌། དེ་བཞིན་གཤེགས་པའི་རྩ་བ་དང་ལྡན་པ་གང་ཡིན་པ་དེ་དག་ཐོག་མ་ཁོ་
ནར་རྒྱས་པར་བྱེད་ཅིང་དོན་ཡང་རྟོགས་པར་བྱེད་ལ། ཆོས་འདི་ནི། འདོད་ཆེན་ཆུང་བའི་ཡིན་གྱི། ཆོས་འདི་ནི། འདོད་ཆེན་ཆེ་བའི་མ་ཡིན་ནོ། །ཞེས་དོན་བརྡ་སྤྲོད་པར་བྱེད་པ་དང༌། སྐྱེས་བུ་
ཆེན་པོའི་རྣམ་པར་རྟོག་པ་བརྒྱད་སྟོན་པར་བྱེད་པ་དང༌། ཉེས་པ་བྱུང་ན་དེ་ལས་བསླང་བའི་ཕྱིར་གཞན་དག་ལ་འཆགས་པར་བྱེད་པ་དང༌། བྱང་ཆུབ་སེམས་དཔའི་སྤྱད་པ་སྤྱོད་པ་ན་
དགོངས་པའི་ཚིག་ལ་མཁས་ཤིང་དམ་པའི་ཆོས་འབྱིན་པར་བྱེད་པ་འདི་ནི། གང་ཟག་དང་པོ་སྟེ། སོ་སོའི་སྐྱེ་བོའི་གྲངས་སུ་གཏོགས་མོད་ཀྱི། འདི་ནི། སོ་སོའི་སྐྱེ་བོ་ཐོས་པ་དང་མི་
ལྡན་པ་མ་ཡིན་ཏེ། བརྒྱད་པའི་སོ་སོའི་སྐྱེ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་རྣམས་ཀྱིས་སངས་རྒྱས་སུ་འགྱུར་བར་གསུང་སྟེ་ལུང་བསྟན་པས་
ལུང་བསྟན་པ་ཡིན་ནོ། །དེ་ལ་རྒྱུན་དུ་ཞུགས་པ་དང༌། ལན་གཅིག་ཕྱིར་འོང་བ་ཞེས་བྱ་བ་ནི། གང་ཐོབ་ནས་དམ་པའི་ཆོས་འབྲི་བ་དང༌། འཆང་བ་དང༌། འབྲལ་བར་འགྱུར་བ་མི་སྲིད་པ་
དང༌། །གཞན་དག་ལའང་སངས་རྒྱས་ཀྱིས་གསུངས་པ་མ་ཡིན་པ་རང་བཟོའི་ཚིག་དང༌། ཡི་གེ་སྣ་ཚོགས་དང༌། བྲན་དང་བྲན་མོ་ཡོངས་སུ་འཛིན་པ་སྟོན་མི་སྲིད་པ་སྟེ། རྒྱུན་དུ་ཞུགས་
༄༅། །པ་དང༌། ལན་གཅིག་ཕྱིར་འོང་བའི་གྲངས་སུ་ནི། གཏོགས་མོད་ཀྱི། རྒྱུན་དུ་ཞུགས་པ་དང༌། ལན་གཅིག་ཕྱིར་འོང་བ་ནི། མ་ཡིན་ནོ། །དེ་ལྟར་ས་དང་པོ་དང༌།
གཉིས་པ་དང༌། གསུམ་པ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། མངོན་སུམ་དུ་ལུང་བསྟན་པས་སངས་རྒྱས་ཀྱི་གནས་སུ་སངས་རྒྱས་སུ་འགྱུར་བར་ལུང་
བསྟན་ཏོ། །ཕྱིར་མི་འོང་བ་ཞེས་བྱ་བ་ནི། ཆོས་དེ་ཐོབ་ནས་འབྲལ་མི་སྲིད་པ་དང༌། གཞན་དག་ལའང་སངས་རྒྱས་ཀྱིས་གསུངས་པ་མ་ཡིན་པར་རུང་བ་མ་ཡིན་པའི་མདོ་རང་བཟོ་སྣ་
ཚོགས་ཀྱི་ཚིག་དང༌། ཡི་གེ་དང༌། བྲན་དང་བྲན་མོ་ལ་སོགས་པ་ཡོངས་སུ་འཛིན་པ་སྟོན་མི་སྲིད་པ་དང༌། གློ་བུར་གྱི་ཉེ་བའི་ཉོན་མོངས་པ་རྣམས་ཀྱིས་དེ་ལ་གནོད་པར་འགྱུར་མི་
སྲིད་པ་དང༌། ནང་གི་ཉོན་མོངས་པ་རྣམས་ཀྱིས་དེ་ལ་གནོད་པར་འགྱུར་མི་སྲིད་པ་དང༌། དེ་བཞིན་གཤེགས་པའི་ཁམས་བཅབས་ཏེ་ཆོས་སྟོན་མི་སྲིད་པ་དང༌། ཁམས་བཞིའི་སྦྲུལ་
གདུག་པ་ལ་བརྟེན་པའི་གློ་བུར་གྱི་ནད་རྣམས་ཀྱིས་དེ་ལ་གནོད་པར་བྱེད་པར་འགྱུར་མི་སྲིད་པ་དང༌། བདག་ཏུ་སྨྲ་བའང་མ་ཡིན། བདག་མེད་པར་སྨྲ་བ་ཚར་གཅོད་པའང་ཡིན་ལ།
འཇིག་རྟེན་པའི་བདག་རྣམ་པར་སྤངས་པ་དང༌། འཇིག་རྟེན་པའི་བྱ་བ་རྣམས་ཀྱིས་ཀྱང་འཇིག་རྟེན་ན་མཐུན་པར་བྱེད་པ་དང༌། ཐེག་པ་ཆེན་པོ་མ་ཡིན་པའི་ཐེག་པ་གཞན་འབར་བར་
བྱེད་མི་སྲིད་པ་དང༌། སྲིན་བུའི་རིགས་བརྒྱད་ཅུ་དང༌། ཉེས་དམིགས་ཆེན་པོའི་ལུས་འཛིན་པ་མ་ཡིན་པ་དང༌། འདོད་པའི་བསམ་པ་རྣམ་པར་སྤངས་པ་དེའི་ལུས་ལ་རྨི་ལམ་དུ་བྱུང་ཡང་
ཁུ་ཆུ་འབྱུང་མི་སྲིད་པ་དང༌། འཆི་བའི་འཇིགས་པ་རྣམས་འོངས་པ་མཐོང་ན་འཇིགས་མི་སྲིད་པའོ། །གང་ཟག་དེ་ལྟ་བུ་ནི། ཕྱིར་མི་འོང་བ་ཞེས་བྱ་སྟེ། གང་ཟག་གསུམ་པའོ། །དེའང་ངེས་
པར་ཕྱིར་མི་འོང་བས་ན། ཕྱིར་མི་འོང་བ་ཞེས་བྱ་སྟེ། གང་ཟག་དེ་ལ་ནི། ཕྱིར་མི་འོང་བ་ཐོབ་པ་ཞེས་ཀྱང་མི་བྱའོ། །སྔར་བསྟན་པའི་ཡོན་ཏན་རྣམས་ཀྱང་ཡོད་ལ་འདིར་སྐྱེས་ནའང་སྔར་
བསྟན་པའི་ཉེས་པ་རྣམས་ཀྱིས་མི་གོས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། འོང་བ་དང་འགྲོ་བའི་ཚུལ་གྱིས་རྒྱུ་བར་བྱེད་ཀྱང་ཕྱིར་མི་འོང་བའི་གྲངས་སུ་གཏོགས་
ཏེ༑ སེམས་བསྐྱེད་མ་ཐག་པའི་ལུང་བསྟན་པས་སངས་རྒྱས་སུ་ལུང་བསྟན་པ་དང༌། སེམས་བསྐྱེད་མ་ཐག་ཏུ་རིང་པོ་མི་ཐོགས་པར་སངས་རྒྱས་སུ་འགྱུར་བ་ཡིན་ཏེ། གང་
ཟག་དེ་ལྟ་བུ་ནི། གང་ཟག་གསུམ་པའོ། །དགྲ་བཅོམ་པ་ཟག་པ་ཟད་པ་ནི། གང་ཟག་བཞི་པ་སྟེ། དགྲ་བཅོམ་པ་ཞེས་བྱ་བ་ནི། ཉོན་མོངས་པ་མེད་པ། ཁུར་བོར་བ།
རང་གི་དོན་གྱི་བྱ་བ་བྱས་བ། དོན་གྲུབ་པ། ས་བཅུ་ཐོབ་པ་ཞེས་བྱ་བའི་དོན་ཏོ། །དོན་གཞན་ཡང་རྒྱས་པར་བྱེད་དེ། མི་སྐྱེ་བའི་ཆོས་ལ་བཟོད་པའི་ལུང་བསྟན་པས་ལུང་བསྟན་པ་དང༌།
༄༅། །བདག་ཉིད་ཀྱིས་ཇི་ལྟར་ནུས་པའི་གཟུགས་དང༌། ཇི་ལྟར་འདོད་པའི་གཟུགས་མངོན་པར་སྤྲུལ་པར་བྱེད་པ་དང༌། གང་གི་ལུས་ཀྱིས་སངས་རྒྱས་སྶུ་འགྱུར་བར་འདོད་པ་དེའི་
ལུས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བར་བྱེད་དེ། ཡོན་ཏན་འདི་རྣམས་དང་ལྡན་པ་ནི། དགྲ་བཅོམ་པ་ཞེས་བྱ་སྟེ། ཡོངས་
སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ལ་གང་ཟག་བཞི་པོ་འདི་རྣམས་སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བའི་ཕྱིར་འཇིག་རྟེན་དུ་འབྱུང་ངོ༌། །དེ་དག་ནི། དེ་
བཞིན་གཤེགས་པ་བཞིན་དུ་ལྷ་དང༌། མི་རྣམས་ཀྱི་སྟོན་པ་ཡིན་ཏེ། བཞི་ཆར་ཡང་སྐྱེས་བུ་ཚད་མ་ཡིན་ནོ། །རྟེན་དུ་གྱུར་པ་ཡིན་ནོ། །གསོལ་པ། གང་ཟག་བཞི་པོ་དེ་དག་ནི། བདག་
གི་ཚད་མའང་མ་ལགས། དེ་དག་ནི། རྟེན་དུ་གྱུར་པའང་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་ཁྱིམ་བདག་གདངས་ཅན་ལས་བརྩམས་ཏེ་བདུད་ཚར་བཅད་
པར་བཀའ་སྩལ་པའི་ཚེ་གལ་ཏེ་ལྷའམ་བདུད་དམ་ཚངས་པའང་རུང་སྟེ། ང་དང་འདྲ་བར་ལུས་མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་བརྒྱན་པ་དང༌། འོད་
འདོམ་གང་དང་ལྡན་པ་དང༌། བཞིན་མཛོད་སྤུས་བརྒྱན་པའི་སངས་རྒྱས་ཀྱི་སྐུའི་ཚུལ་གྱིས་འོས་སུ་ཟིན་ཀྱང་དེ་ཁྱེད་ཀྱིས་ཚར་ཆོད་ཅིག །ཅེས་ངས་གནང་སྟེ། སྡིག་ཅན། ཁྱོད་འདི་
ལྟར་དགྲ་བཅོམ་པའི་གཟུགས་ཀྱི་དགྲ་བཅོམ་པ་བཞིན་དུ་བདག་ཉིད་མ་འདུག་ཅིག །སྡིག་ཅན། ཁྱོད་ནམ་མཁའ་ལ་ཉལ་བར་བྱེད་ཅིང་གློ་གཡོན་ཕྱོགས་ནས་མེ་འབར་བར་བྱེད་པ་དང༌།
གཡས་ཕྱོགས་ནས་ཆུ་འབེབས་པ་དང༌། མེ་བཞིན་དུ་འབར་ཞིང་གཟི་བྱིན་དང་ལྡན་ལ་དུད་པར་འཐུལ་དུ་ཟིན་ཀྱང་ང་ཁྱོད་ཀྱི་ཚིག་མི་ཉན་ཏོ། །ཡིད་ཆེས་པར་མི་བྱེད་དོ། །གསུང་རབ་ཡན་
ལག་དགུ་ལྟ་བུ་སྟོན་དུ་ཟིན་ཀྱང་ང་དད་པར་མི་བྱེད་དོ། །ཞེས་གྱིས་ཤིག །རིགས་ཀྱི་བུ། ཁྱེད་དེ་ལྟར་དོགས་ན། ངའང་ཚར་ཆོད་ཅིག །རིགས་ཀྱི་བུ། དཔེར་ན། མཚན་མོ་མུན་པའི་ནང་དུ་
ཁྱི་རྐུན་འོངས་པ་ཚོར་ན། ཁྱིམ་བདག་མོའམ་བྲན་མོས་དེ་ལ་འདི་སྐད་དུ་ཁྱི་རྐུན་ཁྱོད་ངས་མ་གསད་པར་སྐྱེན་པར་ཕྱིར་སོང་ཞིག་ཅེས་བྱས་ནས། ཁྱི་རྐུན་དེས་དེ་སྐད་ཐོས་པ་དང༌། ཕྱིར་
བརྒྱུགས་ཏེ་སོང་ལ་ཕྱིན་ཆད་ཀྱང་ཁྱིམ་དེར་མི་འོང་བ་དེ་བཞིན་དུ་ཁྱེད་ཀྱིས་བདུད་སྡིག་ཅན་ཁྱི་རྐུན་བཞིན་དུ་ཚར་ཆོད་ལ། སྡིག་ཅན། དེ་ལྟར་མ་བྱེད་པར་ངས་བཅིང་བ་རྣམ་པ་ལྔས་མ་བཅིངས་
པར་སྐྱེན་པར་ཕྱིར་སོང་ཞིག་ཅེས་དེ་ལ་དེ་སྐད་གྱིས་ཤིག་དང༌། དེས་དེ་སྐད་ཐོས་མ་ཐག་ཏུ་ཁྱི་རྐུན་བཞིན་དུ་ཕྱིར་ལྡོག་པར་འགྱུར་ཏེ། དེ་ལྟར་བདུད་ཚར་གཅོད་པར་བྱེད་པ་གང་ཡིན་པ་དེ་དག་
ནི༑ དམ་པ་ཡིན་ཏེ། མྱ་ངན་ལས་འདས་པའི་དྲུང་ཁོ་ན་འདུག་གོ །ཞེས་བཅོམ་ལྡན་འདས་ཀྱིས་ཁྱིམ་བདག་གདངས་ཅན་ལས་གླེངས་ཏེ་བདུད་ཚར་གཅོད་པ་ན་བཀའ་སྩལ་ལགས་ན།
༄༅། །བཅོམ་ལྡན་འདས། ཅིའི་སླད་དུ་གང་ཟག་བཞི་པོ་རྣམས་རྟེན་དུ་གྱུར་པར་བཞག་པར་མཛད་ལགས། བདག་ནི། དེ་རྣམས་ལ་མི་ཉན་ཅིང་གློ་བ་མི་ཆེས་ལགས་
སོ༑ ༑བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་ནི། དེ་བཞིན་ཏེ། ངས་ཇི་སྐད་སྨྲས་པ་དེ་ནི། དེ་ཁོ་ན་བཞིན་ནོ། །དེ་ལྟ་མོད་ཀྱི། ངས་བདུད་ཚར་གཅད་པར་སྨྲས་པ་ནི།
བྱིས་པ་ཉན་ཐོས་ཀྱི་ཐེག་པ་པ་ཤའི་མིག་དང་ལྡན་པ་རྣམས་ཀྱི་དོན་དུ་སྨྲས་པ་ཡིན་གྱི། ཐེག་པ་ཆེན་པོ་པ་རྣམས་ཀྱི་དོན་དུ་བདུད་ཚར་བཅད་པར་སྨྲས་པ་མ་ཡིན་ནོ། །ཉན་ཐོས་ཀྱི་
ཐེག་པ་པ་རྣམས་ལའང་ལྷའི་མིག་དང་ལྡན་པ་དག་ཡོད་མོད་ཀྱི། དེ་དག་ནི། ཤའི་མིག་ཅེས་བྱ་བའི་གྲངས་སུ་གཏོགས་སོ། །ཐེག་པ་ཆེན་པོ་པ་རྣམས་ལའང་ཤིང་མིག་དང་ལྡན་པ་
དག་ཡོད་མོད་ཀྱི། དེ་དག་ནི། སངས་རྒྱས་ཀྱི་སྤྱན་ཞེས་བྱ་བའི་གྲངས་སུ་གཏོགས་སོ། །དེ་ཅིའི་ཕྱིར་ཞེ་ན། ཐེག་པ་ཆེན་པོ་སངས་རྒྱས་ཀྱི་ཐེག་པའི་མདོའི་དེ་ཁོ་ན་ཉིད་འཛིན་པའི་ཕྱིར་
རོ༑ ༑རིགས་ཀྱི་བུ། གཞན་ཡང་དཔེར་ན། མི་དཔའ་བོ་ཡུལ་ཕྱོགས་སུ་གྲགས་པ་སྙིང་སྟོབས་ཅན་རྟུལ་ཕོད་པ་འགའ་ཞིག་ཡོད་ལ། དེ་ལ་མི་སྔར་མ་འགའ་ཞིག་བརྟེན་ཏེ་སྔར་མ་དེ་
དཔའ་བོ་དེ་ལ་དཔའ་སློབ་པ་ན་དེ་ལ་བསྒོ་བ། ཀྱེ་མི་ཁྱོད་དཔའ་བོར་འགྱུར་བར་འདོད་ན། རལ་གྲིའི་སོ་གཏམས་པའི་སྟེང་དུ་འགྲོ་བར་གྱིས་ཤིག །གང་དང་གང་གི་ཚེ་འཐབ་པ་དེ་དང་
དེའི་ཚེ་སུས་ཀྱང་མི་འཇིགས་པར་གྱིས་ཤིག །ལྷའང་རུང༌། གཏུམ་པོའང་རུང་སྟེ། རྩྭ་ཙམ་དུ་ལྟོས་ཤིག །སྙིང་སྟོབས་དང༌། རྟུལ་ཕོད་པ་ལ་བརྩོན་པར་གྱིས་ཤིག །རུ་བ་ངན་པ་ཁ་ཅིག་དཔའ་བོའི་
ཆ་ལུགས་སུ་བསྒྱུར་ནས་དཔའ་བོའི་མཚོན་ཆ་ཐོགས་ཏེ་ཨུར་མོའི་རལ་གྲི་ཤུབས་ནས་ཕྱུང་ནས་ཕྱེ་མར་རློག་པ་ལྟར་བྱེད་ཅིང་འོང་ལ། རལ་གྲི་གཅིག་ལ་གཅིག་བརྡབས་པ་ལས་མེ་སྟག་
འཕྲོ་བར་བྱེད། ཁུས་འདེབས་ཤིང་ཁྲོམ་གྱི་ནང་དུ་འོང་བ་དེ་ལྟ་བུ་དག་མཐོང་ན་མ་འབྲོས་ཤིག་དང༌། རུ་བ་ངན་པ་གང་ཡིན་པ་དེ་དག་གིས་དེ་དག་མཐོང་ནས་འདི་དག་ནི། དཔའ་བོ་ཡིན་ནོ། །
སྙམ་དུ་རིག་ནས་ཁྱི་རྐུན་བཞིན་དུ་འབྱེར་བར་འགྱུར་ལ། རུ་བ་བཟང་པོ་གང་ཡིན་པ་དེ་དག་ནི། ཁྲེལ་གྱིས་དོགས་ཏེ་འཐེན་པར་བྱེད་དོ། །རུ་བ་ངན་པ་དེ་དག་ནི། དེ་དག་གིས་སྐྲག་ནས་
འབྱེར་བར་འགྱུར་བ་དེ་བཞིན་དུ་དེ་བཞིན་གཤེགས་པའང་ཉན་ཐོས་ཀྱི་ཐེག་པ་པ་རྣམས་དཔའ་བོ་སློབ་པར་མཛད་དེ་ཁྱེད་བདུད་སྡིག་ཅན་རུ་བ་སྔར་མ་ལྟ་བུས་མ་འཇིགས་པར་དཔའ་
སློབ་པ་བཞིན་དུ་རྟུལ་ཕོད་པར་གྱིས་ཤིག་དང༌། བདུད་ཡིད་མི་བདེ་བར་འགྱུར་རོ། །ཞེས་སྟོན་ཏོ། །རིགས་ཀྱི་བུ། གཞན་ཡང་རིགས་ཆེན་པོ་དཔའ་བོའམ། དཔའ་བོའི་བུ་ལ་ལ་ཞིག་
སུ་ལའང་དཔའ་མ་བསླབ་སྟེ། དེ་སློབ་དཔོན་སུའང་མེད་བཞིན་དུ་དེ་རང་བཞིན་གྱིས་དཔའ་ལ། རིགས་ཀྱི་བུ། ཆོས་ལུགས་སུ་གྱུར་པ་རང་གི་དཔའ་རིགས་ཀྱི་རྐྱེན་དུ་འཆེམ་པར་དཔའ་
༄༅། །བ་དེ་བཞིན་དུ། ཐེག་པ་ཆེན་པོ་པ་སྐྱེས་པའམ། བུད་མེད་དམ། ཁྱེའུ་འམ། བུ་མོའང་རུང་སྟེ། དེ་དག་གིས་དགོངས་ཏེ་གསུངས་པའི་མདོའི་ཚིག་སྣ་ཚོགས་
ཐོས་ན༑ དེ་མི་སྐྲག །མི་དངང་བ་དེ་དག་ནི། སྔོན་སངས་རྒྱས་དུ་མ་ལ་བསྙེན་བཀུར་བྱེད་བྱེད་པ་ཡིན་ཏེ། དེས་ན། དེ་དག་གིས་ཐེག་པ་ཆེན་པོ་འདི་ཁོང་དུ་ཆུང་ནས་མངོན་པར་དད་པར་
འགྱུར་ཏེ། བདུད་དམ། བདུད་བྱེ་བའང་རུང་དེ་དག་མཐོང་ན། ཐེག་པ་ཆེན་པོ་པ་རྣམས་སྐྲག་པར་མི་འགྱུར་ཏེ། ཅུང་ཟད་ཀྱང་ཡ་མཚན་དུ་མི་འཛིན་ཏོ། །དཔེར་ན། སྦྲུལ་འཛིན་པའི་མི་
ལ་ལ་ཞིག་གིས་སྨན་གནོད་སེལ་དང་སྔགས་ཀྱི་མཐུས་སྦྲུལ་གདུག་པ་རྣམས་ཀྱི་དུག་མེད་པར་བྱེད་ལ་དེ་དག་གིས་མི་འཇིགས་པ་དེ་བཞིན་དུ་བདུད་བྱེ་བ་རྣམས་ཀྱང་ཐེག་པ་
ཆེན་པོའི་མདོའི་ཚིག་གི་སྔགས་ཀྱི་གཟི་བྱིན་དང་མཐུས་རྒྱགས་པ་མེད་པར་འགྱུར་རོ། །རིགས་ཀྱི་བུ། གཞན་ཡང་ཀླུའི་སྦྲུལ་གདུག་པ་རྣམས་ཀྱིས་ནི། གླང་པོ་ཆེ་དང༌། སྟག་དང༌། གཟིག་
དང༌། ཁྱི་རྣམས་ཀྱང་བལྟས་པ་ཙམ་གྱིས་སྐྲག་པར་བྱེད་དེ། ཁ་ཅིག་ནི། འཆི་བར་ཡང་འགྱུར། ཁ་ཅིག་ནི། ཤིར་དོགས་ནས་སྒྲ་ཐོས་པ་ཙམ་གྱིས་ཀྱང་འབྱེར་བར་འགྱུར་རོ། །
མི་ཁ་ཅིག་ནི། ཀླུའི་སྦྲུལ་གདུག་པ་དང༌། ནམ་མཁའ་ལྡིང་དང༌། གླང་པོ་ཆེ་དང༌། སེངྒེ་དང༌། སྟག་རྣམས་ལ་ཞོན་ཏེ་རྒྱུ་བར་བྱེད་པའང་ཡོད་དོ། །མི་ཁ་ཅིག་ནི། ཀླུ་དང༌། ནམ་མཁའ་
ལྡིང་དང༌། སེངྒེ་དང༌། སྲིན་པོ་དེ་དག་མཐོང་ན་རྒྱགས་པ་མེད་པར་འགྱུར་ཏེ། མི་སྔར་མ་དེ་དང་འདྲ་བར་ཉན་ཐོས་དང་རང་སངས་རྒྱས་རྣམས་ནི། བདུད་མཐོང་ན། སྐྲག་པར་འགྱུར་ལ། བདུད་
ནི༑ དེ་དག་གིས་འཇིགས་པ་མེད་དེ། བདུད་ཀྱི་ལས་ཀྱང་བྱེད་དོ། །ཐེག་པ་ཆེན་པོ་པ་རྣམས་ནི། བདུད་ལ་ཞོན་ཏེ་དེ་དག་གི་གར་བྱིན་ཆེན་པོ་དང༌། སྟོབས་ཆེན་པོ་དང༌། སྙིང་སྟོབས་བཏུལ་
ནས་ཆོས་སྟོན་པར་བྱེད་དེ། ཀླུ་ལ་སོགས་པ་དང་འདྲ་བའི་བདུད་སྟོབས་པོ་ཆེ་དེ་དག་སྐྲག་ནས་མོད་ལ་དམ་པའི་ཆོས་ལ་དགའ་བར་འགྱུར་ཏེ། འདི་སྐད་དུ་ད་ཕྱིན་ཆད་དམ་པའི་ཆོས་ཀྱི་
བར་ཆད་མི་བགྱིད་དོ། །ཞེས་ཀྱང་ཟེར་རོ། །ཉན་ཐོས་ཀྱི་ཐེག་པ་པ་རྣམས་ནི། ཉོན་མོངས་པའི་རྣམ་པས་སྐྲག་གོ །ཐེག་པ་ཆེན་པོ་པ་རྣམས་ནི། ཉོན་མོངས་པ་རྣམས་ཆུང་བར་འཛིན་ཏེ།
དེ་ལྟར་ན། ཐེག་པ་ཆེན་པོ་པ་རྣམས་ནི། རྟུལ་ཕོད་པ་ཡིན་ནོ། །དེ་བས་ན། ངས་བཤད་པའི་རྒྱུ་ནི། དེ་ཡིན་ཏེ། ཉན་ཐོས་ཀྱི་ཐེག་པ་པ་རྣམས་ཀྱི་དོན་དུ་ངས་བདུད་ཚར་གཅད་པར་བསྟན་པ་
ཡིན་ནོ༑ ༑དེ་ལྟར་ན། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ནི། མཆོག་ཏུ་བཟོད་པར་དཀའོ། །ཀྱེ་མ་མདོ་སྡེ་ཆེན་པོ་འདི་དང༌། དེ་བཞིན་གཤེགས་པ་རྟག་ཅེས་བྱ་བ་ཐོས་ན་
ཡིད་ཆེས་པར་བྱེད་པ་གང་ཡིན་པ་དེ་དག་ནི། མཆོག་ཏུ་དཀའ་བ་བྱེད་པ་ཡིན་ཏེ། འཇིག་རྟེན་ན་ཨུ་དུམ་ཝ་རའི་མེ་ཏོག་བཞིན་དུ་ཤིན་ཏུ་དཀོན་ནོ། ང་འདས་པའི་འོག་ཏུ་མདོ་སྡེ་ཆེན་པོ་འདི་
༄༅། །ཤིན་ཏུ་རྙེད་དཀའ་པར་འགྱུར་ཏེ། མ་འོངས་པའི་དུས་ན་སེམས་ཅན་གང་དག་མདོ་སྡེ་ཆེན་པོ་འདི་ཐོས་པར་བྱ་བའི་ཕྱིར་སྒྲུབ་པར་བྱེད་པ་དེ་དག་ནི། སེམས་ཅན་
མང་པོས་སྤོང་བར་འགྱུར་རོ། །གསོལ་པ། ཡུན་ཇི་སྲིད་ཅིག་ན་སེམས་ཅན་རྣམས་ཀྱིས་སྤང་བར་འགྱུར་ལགས། སེམས་ཅན་ཇི་ལྟ་བུ་དག་ནི། དམ་པའི་ཆོས་འབྱིན་པར་འགྱུར་
ལགས། བཀའ་སྩལ་པ། རིགས་ཀྱི་བུ། ང་འདས་པའི་འོག་ཏུ་ལོ་བཞི་སྟོང་གི་བར་དུ་ཛམྦུའི་གླིང་དུ་སྤྱོད་པར་འགྱུར་ཏེ། དེའི་རྗེས་ལ་སའི་འོག་ཏུ་ནུབ་པར་འགྱུར་རོ། །རིགས་ཀྱི་བུ།
དཔེར་ན། ཡུལ་གང་ན་བུ་རམ་ཤིང་དང༌། འབྲས་སཱ་ལུ་དང༌། འབྲུ་དང༌། སྦྲང་རྩི་དང༌། ཁ་ར་དང༌། བའི་འོ་མ་དང༌། མར་གྱི་ཉིང་ཁུ་རྣམས་མོད་པ་དེ་ཉིད་ན་སེམས་ཅན་རྣམ་པར་སྨིན་
པས་དམན་ཞིང་བསོད་ནམས་མ་བྱས་པ་གཞན་དག་ཀྱང་ཡོད་དེ། དེ་དག་འདི་སྐད་དུ་བདག་ཅག་གི་ལུས་ཀྱི་ཁམས་འདི་ནི། ཁ་ཟས་བཟང་པོ་ཟོས་ན་ནད་དུ་འགྱུར་རོ། །ཞེས་ཟེར་
ནས་ཅི་ཚེ་དང༌། ཁྲེ་དང༌། ཁྲེ་རྒོད་རྣམས་ཟ་བར་བྱེད་དོ། །ཡུལ་དེ་ཉིད་ན་གཞན་ཁ་ཅིག་ནི། ཅི་ཚེ་དང༌། ཁྲེ་དང༌། ཁྲེ་རྒོད་རྣམས་ཀྱི་མིང་ཡང་ཐོས་པར་མི་འདོད་དེ། བུ་རམ་ཤིང་དང༌།
འབྲས་སཱ་ལུ་དང༌། འབྲུ་རྣམས་འབའ་ཞིག་ཟ་བར་བྱེད་པ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའང་སེམས་ཅན་གཞན་ཁ་ཅིག་ཐོས་པར་ཡང་
མི་འདོད་དེ། བསོད་ནམས་མ་བྱས་པ་རྣམས་ཅི་ཚེ་དང༌། ཁྲེ་དང༌། ཁྲེ་རྒོད་ཟ་ཞིང་བུ་རམ་ཤིང་དང༌། འབྲས་སཱ་ལུ་ལ་སྡང་བ་བཞིན་དུ་ཉན་ཐོས་ཀྱི་ཐེག་པ་པ་རྣམས་ཐེག་པ་ཆེན་པོ་ལ་སྡང་
བར་འགྱུར་རོ། །དེ་ན་ཉན་པ་བསོད་ནམས་བྱེད་བྱེད་པ་གཞན་ཁ་ཅིག་ནི། འབྲས་སཱ་ལུ་ཟ་བ་བཞིན་དུ་ཐེག་པ་ཆེན་པོ་པར་འགྱུར་རོ། །རིགས་ཀྱི་བུ། དཔེར་ན། རི་ཁྲོད་གཅོང་རོང་ཡུལ་
ངན་པ་ན་གནས་པའི་རྒྱལ་པོ་རྣམས་བུ་རམ་ཤིང་དང༌། འབྲས་སཱ་ལུ་རྣམས་ལྡན་པར་ཡོད་དུ་ཟིན་ཀྱང་འབྲུ་འདི་རྣམས་ནི། དཀོན་པ་ཡིན་ཏེ། ཟད་ན་མི་རུང་ངོ༌། །སྙམ་ནས་བདག་ཅག་མི་
ཟ་བར་ཅི་ཚེ་དང༌། ཁྲེ་དང༌། ཁྲེ་རྒོད་ཟ་ཞིང་བུ་རམ་ཤིང་དང་འབྲས་སཱ་ལུ་དང་འབྲུ་རྣམས་ནི། ཤིང་རྟ་རྣམས་བཀང་ནས་རྒྱལ་པོ་ཆེན་པོ་ལ་འབུལ་བར་བྱེད་དེ། དེ་ན་སེམས་ཅན་གཞན་
དག་རང་གི་ཡུལ་ན་འབྲས་སཱ་ལུ་ལ་སོགས་པ་སྔོན་མ་མཐོང་དུ་ཟིན་ཀྱང་རྒྱལ་པོའི་ལོངས་སྤྱོད་ཀྱི་མཐུས་ཟ་བར་བྱེད་དོ། །རིགས་ཀྱི་བུ། དེ་བཞིན་དུ་གང་ན་གང་ཟག་ཆོས་ཀྱི་སྡེ་དཔོན་
བྱེད་པ་བཞི་པོ་དེ་དག་གནས་པ་དེ་ཉིད་དུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་གཅིག་ཀྱང་འཇིག་རྟེན་དུ་བྱུང་ངམ་ཡང་ན་གང་ན་གནས་ཀྱང་རུང་སྟེ། དེར་དེའི་དོན་དུ་
དེ་དག་གིས་ཐེག་པ་ཆེན་པོའི་མདོའི་སྡེ་ཚན་དག་གླ་རྔན་གྱིས་འབྲི་ཞིང་འབྲིར་འཇུག་སྟེ་བསྒྲུབས་ནས་གླེགས་བམ་ཕྱི་ཚས་སུ་བཅུག་སྟེ། རྙེད་པ་དང་བཀུར་སྟིའི་ཕྱིར་རམ། ཆོས་སྤྱོད་
༄༅། །པའི་ཕྱིར་རམ། རྟེན་བཅའ་བའི་ཕྱིར་བཀུར་བར་བྱེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་བསྙེན་བཀུར་བྱེད་ཅིང་སྐྱེ་བོ་མང་པོ་ཐེག་པ་ཆེན་
པོའི་བཅུད་ཀྱིས་ལོངས་སྤྱོད་པར་འགྱུར་ཏེ། རྒྱལ་པོའི་མཐུས་འབྲས་སཱ་ལུ་ཟ་བ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་གཟི་བརྗིད་ཀྱི་མཐུས་སེམས་ཅན་རྣམས་
ཀྱིས་སྔོན་མ་ཐོས་པའི་ཚིག་གི་ཡི་གེ་འབྲུ་གཅིག་པའི་ཐིག་ལེ་ཐོས་པར་འགྱུར་རོ། །ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ས་ཕྱོགས་གང་ན་སྤྱོད་པའི་ས་ཕྱོགས་
ནི༑ རྡོ་རྗེའི་རང་བཞིན་དུ་འགྱུར་རོ། །སེམས་ཅན་དེ་དག་ཀྱང་རྡོ་རྗེའི་རང་བཞིན་དུ་འགྱུར་རོ། །ཞེས་ང་ཟེར་རོ། །སེམས་ཅན་ཕལ་བ་བསོད་ནམས་ཆུང་ངུ་རྣམས་ཐེག་པ་ཆེན་པོ་ཐོས་
ན་ཐེག་པ་ཆེན་པོའི་མདོའི་སྡེ་ཚན་གྱི་དོན་འཛིན་པར་མི་བྱེད་དེ། ཐོས་ན་དོན་འཛིན་པར་མི་བྱེད་པའི་སེམས་ཅན་གང་ཡིན་པ་དེ་དག་ནི། ཁྲེ་རྒོད་ཟ་བ་བཞིན་དུ་མྱ་ངན་དུ་བྱ་བ་ཡིན་
ནོ༑ ༑གསོལ་པ། དེ་བཞིན་གཤེགས་པ་འདས་ནས་ལོ་བཞི་སྟོང་གི་བར་དུ་ཛམྦུའི་གླིང་དུ་གནས་པའི་རྗེས་ལ་སའི་འོག་ཏུ་ནུབ་པར་གྱུར་ནས་ཡུན་ཇི་སྲིད་ཅིག་ན་སླར་ཡང་འབྱུང་བར་
འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། གང་གི་ཚེ་ངའི་དམ་པའི་ཆོས་ཀྱི་མཇུག་ལོ་བརྒྱད་ཅུ་ལུས་པར་གྱུར་ཏེ། དམ་པའི་ཆོས་ནུབ་ཏུ་ཆེ་བ་ན་
ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཛམྦུའི་གླིང་དུ་འབྱུང་བར་འགྱུར་ཏེ། ལོ་བཞི་བཅུའི་བར་དུ་དམ་པའི་ཆོས་ཀྱི་ཆར་ཕབ་ནས་ནུབ་པར་འགྱུར་རོ། །གསོལ་པ།
དམ་པའི་ཆོས་ནུབ་པའི་དུས་དང༌། ཚུལ་ཁྲིམས་ཅན་ཟད་པའི་དུས་དང༌། དམ་པའི་ཆོས་མ་ཡིན་པ་རྣམ་པར་འཕེལ་བའི་དུས་དང༌། སྒྲུབ་པ་མ་མཆིས་པའི་དུས་ན་མྱ་ངན་ལས་འདས་པ་ཆེན་
པོའི་མདོ་ཆེན་པོ་འདི་འབྱུང་བའི་ཚེ་འདི་ཉན་པ་ནི། ཅི་འདྲ་བ་དག་ཅིག་འབྱུང་བར་འགྱུར་ལགས། འཆང་བ་ནི། ཅི་འདྲ་བ་དག་ཅིག་ལགས། ཀློག་པ་ནི། ཅི་འདྲ་བ་དག་ཅིག་ལགས། སུ་
དག་ནི། སྲུང་བར་འགྱུར། འཛིན་པར་འགྱུར། མཆོད་པ་བགྱིས་ནས་སྟོན་པར་འགྱུར་ལགས། འབྲིར་འཇུག་པ་ནི། ཅི་འདྲ་བ་དག་ཅིག་ལགས་པ་དེ་བཅོམ་ལྡན་འདས་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སེམས་ཅན་ཐམས་ཅད་ལ་སྨན་པའི་སླད་དུ་བཀའ་སྩལ་དུ་གསོལ། བྱང་ཆུབ་སེམས་དཔའ་ཡང་དག་པར་སློབ་པར་
འཚལ་བ་དག་མཆིས་ཏེ། དེ་དག་གིས་ཐོས་ན། ཅི་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཡོངས་སུ་ཉམས་པར་མི་འགྱུར་བར་སྒྲུབ་པར་འབྱུང་བ་ལགས་སོ། །
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། རིགས་ཀྱི་བུ། ཁྱོད་དོན་འདི་འདྲི་བ་ནི། ལེགས་སོ། རིགས་ཀྱི་བུ། གང་དག་གིས་སངས་རྒྱས་ཆུ་
༄༅། །ཀླུང་གསེར་ལྡན་གྱི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི། ཕྱི་མའི་དུས་ན་བྱང་ཆུབ་ཀྱི་སེམས་ཉམས་སུ་ལེན་པར་འགྱུར་ཏེ། ཉམས་སུ་མི་
ལེན་པར་མི་འགྱུར་རོ། །མདོ་སྡེ་སྤོང་བར་ཡང་མི་འགྱུར་རོ། །གང་དག་གིས་སངས་རྒྱས་གངྒཱའི་ཀླུང་གི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི། ཕྱི་མའི་དུས་ན་མཚུངས་
པ་མེད་པ་སྤོང་བའི་སེམས་སྐྱེད་པར་མི་བྱེད་དེ། མོས་པར་བྱེད་ཅིང་དེར་ཚིག་གིས་སྐྱེ་བོ་ཐམས་ཅད་ལ་རྒྱས་པར་གོ་བར་བྱེད་པར་འགྱུར་རོ། །གང་དག་གིས་སངས་རྒྱས་གངྒཱའི་
ཀླུང་གཉིས་ཀྱི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི། ཕྱི་མའི་དུས་ནའང་བྱང་ཆུབ་ཏུ་སེམས་བསྐྱེད་པར་འགྱུར་ཏེ་སྤོང་བར་མི་འགྱུར་རོ། །གང་དག་གིས་སངས་རྒྱས་
གངྒཱའི་ཀླུང་གསུམ་གྱི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ཕྱི་མའི་དུས་ན་མཚུངས་པ་མེད་པ་སྤོང་བར་མི་བྱེད་དེ། ལུང་ནོད་པར་བྱེད། ཉན་པར་བྱེད། འདྲི་བར་བྱེད་
ལ། དོན་ནི། རྟོགས་པར་མི་འགྱུར་རོ། །གང་དག་གིས་སངས་རྒྱས་རྒྱུས་གངྒཱའི་ཀླུང་བཞིའི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི། ཕྱི་མའི་དུས་ནའང་བྱང་ཆུབ་ཏུ་སེམས་
བསྐྱེད་པར་འགྱུར་ཏེ། མཚུངས་པ་མེད་པ་སྤོང་བར་མི་བྱེད་ཅིང་ལུང་ནོད་པར་བྱེད། ཉན་པར་བྱེད། འདྲི་བར་བྱེད་ལ་དོན་ནི། བཅུ་དྲུག་ཆ་གཅིག་རྟོགས་པར་འགྱུར་ཏེ། དོན་རྫོགས་
པར་རྟོགས་པར་མི་འགྱུར་རོ། །གང་དག་གིས་སངས་རྒྱས་གངྒཱའི་ཀླུང་ལྔའི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི། ཕྱི་མའི་ཚེ་མཚུངས་པ་མེད་པ་སྤོང་བར་མི་འགྱུར་ཏེ།
ལུང་ནོད་པར་བྱེད། ལྟ་བར་བྱེད། འདྲི་བར་བྱེད་དེ། བྲིས་ནས་ཀྱང་བདག་ཉིད་འཆང་བར་བྱེད་ལ། དོན་ནི། བརྒྱད་ཆ་གཅིག་རྟོགས་པར་འགྱུར་ཏེ། དོན་རྫོགས་པར་རྟོགས་པར་མི་འགྱུར་
རོ༑ ༑གང་དག་གིས་སངས་རྒྱས་གངྒཱའི་ཀླུང་དྲུག་གི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི། ཕྱི་མའི་དུས་ན་མཚུངས་པ་མེད་པ་སྤོང་བར་མི་བྱེད་དེ། ལུང་ནོད་པར་བྱེད། འདི་བར་
བྱེད༑ བྲིས་ནས་ཀྱང་འཛིན་པར་བྱེད་ལ། དོན་ནི། བཞི་ཆ་གཅིག་རྟོགས་པར་འགྱུར་ཏེ། དོན་རྫོགས་པར་རྟོགས་པར་མི་འགྱུར་རོ། །གང་དག་གིས་སངས་རྒྱས་གངྒཱའི་ཀླུང་བདུན་གྱི་བྱེ་
མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི། ཕྱི་མའི་དུས་ན་མཚུངས་པ་མེད་པ་སྤོང་བར་མི་བྱེད་དེ། ལུང་ནོད་པར་བྱེད། འདྲི་བར་བྱེད། བྲིས་ནས་ཀྱང་འཛིན་པར་བྱད་ལ། དོན་ནི།
ཕྱེད་རྟོགས་པར་འགྱུར་ཏེ། དོན་རྫོགས་པར་རྟོགས་པར་མི་འགྱུར་རོ། །གང་དག་གིས་སངས་རྒྱས་གངྒཱའི་ཀླུང་བརྒྱད་ཀྱི་བྱེ་མ་སྙེད་ལ་བྱང་ཆུབ་ཏུ་སེམས་བསྐྱེད་པ་དེ་དག་ནི། ཕྱི་མའི་
དུས་ན་མཚུངས་པ་མེད་པ་སྤོང་བར་མི་བྱེད་དེ། ལུང་ནོད་པར་བྱེད། ཉན་པར་བྱེད། འདྲི་བར་བྱེད། བྲིས་ནས་འཛིན་པར་བྱེད། འཆང་བར་བྱེད། ཀློག་པར་བྱེད། སྟོན་པར་བྱེད། སྦ་བར་
༄༅། །བྱེད། སྲུང་བར་བྱེད། འཆད་པར་བྱེད། འཇིག་རྟེན་ཐམས་ཅད་ལ་སྙིང་བརྩེ་བའི་ཕྱིར་གླེགས་བམ་རྣམས་ལ་མཆོད་པ་དང་བཀུར་སྟི་བྱེད། གཞན་དག་ཀྱང་བྱེད་
དུ་འཇུག་ཅིང་བླ་མ་ལ་གུས་པ་ལྟ་བུར་ལྟ་བར་བྱེད་ལ། དོན་ཀྱང་རྫོགས་པར་རྟོགས་པར་འགྱུར་ཏེ། བཅོམ་ལྡན་འདས་ནི། རྟག་པ་དང༌། བརྟན་པ་དང༌། ཐེར་ཟུག་པ་དང༌། མི་གཡོ་བ་
དང༌། ཤིན་ཏུ་བདེ་བའོ་ཞེས་བྱ་བ་དང༌། སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ། །ཞེས་སྟོན་པར་བྱེད་དོ། །དེ་ལྟར་ན། སྔོན་སངས་རྒྱས་དུ་མ་ལ་བསྙེན་
བཀུར་བྱེད་བྱེད་པའི་སེམས་ཅན་རྣམས་ནི། དམ་པའི་ཆོས་འབྱིན་པར་འགྱུར་ཞིང་དམ་པའི་ཆོས་ཀྱི་ཕྱོགས་འཛིན་པར་འགྱུར་རོ། །གང་དག་གིས་ད་ལྟར་བྱང་ཆུབ་ཏུ་སེམས་བསྐྱེད་
པ་དེ་དག་ནི། ཕྱི་མའི་དུས་ན་དམ་པའི་ཆོས་འབྱིན་པར་འགྱུར་ཞིང་དམ་པའི་ཆོས་ཀྱི་ཕྱོགས་འཛིན་པར་འགྱུར་ཏེ། དེའི་ཚེ་སེམས་ཅན་དེ་ལྟ་བུ་དག་འབྱུང་བར་འགྱུར་གྱི། རིགས་
ཀྱི་བུ། ཁྱོད་མ་འོངས་པའི་དུས་ན་སེམས་ཅན་དམ་པའི་ཆོས་འབྱིན་པ་རྣམས་ལ་དེ་ལྟར་མ་ལྟ་ཞིག །གང་དག་གིས་[?] བྱང་ཆུབ་ཏུ་སེམས་བསྐྱེད་པ་དེ་དག་ནི། མ་འོངས་པའི་
དུས་ནའང་བྱང་ཆུབ་ཏུ་སེམས་བསྐྱེད་ནས་དམ་པའི་ཆོས་འབྱིན་པར་བྱེད་པར་ཤེས་པར་གྱིས་ཤིག །རིགས་ཀྱི་བུ། གང་དག་ང་ཡོངས་སུ་མྱ་ངན་ལས་འདས་པ་ཆེན་པོས་ཡོངས་སུ་
མྱ་ངན་ལས་འདའ་བ་ལ་ཡིད་མི་དགའ་བར་མི་བྱེད་ཅིང་རབ་ཏུ་དགའ་བར་བྱེད་དེ། སངས་རྒྱས་བདག་ཅག་གི་རྙེད་པ་དང༌། བཀུར་སྟི་ལ་བགེགས་བྱེད་པ་དེ། ང་ནི། གྲོངས་པར་འགྱུར་
གྱི༑ བདག་ཅག་དགའོ། །སྙམ་སྟེ། དེ་ལྟར་སངས་རྒྱས་གྲོངས་པར་འགྱུར་རོ། །སྙམ་ནས་རབ་ཏུ་དགའ་སྟེ། ཡིད་མི་དགའ་བར་མི་བྱེད་པ་དེ་དག་ནི། དེའི་ཚེ་གཡེལ་བར་འགྱུར་ཏེ། ཆོས་
གོས་ཀྱི་མཚན་མ་ཅན་[?] སྡེ་སྤོང་བར་འགྱུར་བར་རིག་པར་གྱིས་ཤིག །སེམས་ཅན་གང་དག་ཡོན་ཏན་དཔག་ཏུ་མེད་པ་དང་ལྡན་པ་དེ་དག་ནི། ཐེག་པ་ཆེན་པོ་ཐོས་ན། མངོན་པར་
དད་པར་འགྱུར་ཏེ། དམ་པའི་ཆོས་འདོད་པའི་རིགས་ཀྱི་བུ་དེ་དག་གི་ནི། སྡིག་པའི་ལས་གྲངས་མེད་པ་བྱས་པ་རྣམས་ཀླད་པ་ན་བ་དང༌། རིམས་ཀྱིས་གདུང་བ་དང༌། ཟུག་རྔུ་དང༌། སྐུར་
པ་ཙམ་གྱིས་འབྱང་བར་འགྱུར་རོ། །གཞན་ཡང་ཕྱི་མའི་དུས་ན་གཞན་གྱིས་བརྙས་པར་འགྱུར་བ་དང༌། མདོག་ངན་པར་འགྱུར་བ་དང༌། མལ་ཆ་དང༌། སྟན་དང༌། ཁ་ཟས་ངན་པར་འགྱུར་
བ་དང༌། རྙེད་པ་མེད་པར་འགྱུར་བ་དང༌། དབུལ་པོའི་རིགས་སུ་སྐྱེ་བ་དང༌། ཕལ་བའི་རིགས་སུ་སྐྱེ་བ་དང༌། ལོག་པར་ལྟ་བའི་རིགས་སུ་སྐྱེ་བ་དང༌། རྒྱལ་པོ་འཁྲུག་པ་དང༌། ཡུལ་འཁྲུག་
པ་དང༌། སྡུག་པའི་དངོས་པོ་འཁྲུག་པ་དང༌། དགེ་བའི་བཤེས་གཉེན་མི་མཐོང་བ་དང༌། གོས་དང༌། ཟས་དང༌། མལ་ཆ་དང༌། སྟན་དང༌། ནད་གསོས་དང༌། སྨན་ཟོང་མེད་པ་དང༌། རྙེད་
༄༅། །པ་ཆུང་བ་དང༌། བཀྲེས་པ་དང༌། སྐོམ་པས་ཉམ་ཆུང་བའི་གནོད་པ་དང་ལྡན་པ་དང༌། སྐྱེ་བོ་ཕལ་པས་དགའ་བར་བྱ་བ་དང༌། རྒྱལ་པོ་དང་བློན་པོ་དང༌། ཕོ་བྲང་
འཁོར་གྱི་མི་རྣམས་ཀྱི་ཆོས་ཀྱི་གཏམ་མི་འཛིན་པ་དང༌། ཆོས་སྨྲ་བའི་ཕྱོགས་མི་བྱེད་པ་དང༌། བློན་པོ་དང༌། སྡེ་དཔོན་གང་དག་ཕྱོགས་དང༌། མགོན་བྱེད་དུ་རེ་བ་དེ་དག་ཀྱང་སུ་ཤི་
གཏོལ་མེད་པར་འགྱུར་བ་དང༌། དམ་པའི་ཆོས་ཀྱི་ཕྱོགས་མི་བྱེད་པ་དང༌། བཟང་ནའང་མི་མཛེས་པ་དང༌། བལྟན་སྡུག་ནའང་བལྟ་ན་མི་སྡུག་པར་འགྱུར་ཏེ། དེ་ལྟར་ན། ངའི་ཉན་
ཐོས་གང་དག་འཇིག་རྟེན་ན་མདོ་སྡེ་ཆེན་པོ་སྟོན་པ་རྣམས་ནི། དཀའ་བ་བྱེད་པ་ཡིན་ནོ། །རིགས་ཀྱི་བུ། དཔེར་ན། ལྷོ་བུར་ཤིན་ཏུ་སྟུག་པོའང་ཉི་མ་ཤར་གྱི་བར་དུ་ནི། གནས་
ལ་ཉི་མ་ཤར་མ་ཐག་ཏུ་ནི། མ་ལུས་པར་སངས་པར་རྒྱས་པར་འགྱུར་པ་དེ་བཞིན་དུ། རིགས་ཀྱི་བུ། སེམས་ཅན་དེ་དག་གི་སྡིག་པ་གྲངས་མེད་པའང་གང་གི་ཚེ་ཡོངས་སུ་མྱ་ངན་ལས་
འདས་པ་ཆེན་པོའི་ཉི་མ་མ་ཤར་གྱི་བར་དུ་ནི། གནས་ལགས། གང་གི་ཚེ་ཡོངས་སུ་མྱ་ངན་ལས་འདས་པ་ཆེན་པོའི་ཉི་མ་ཤར་བ་དེའི་ཚེ་ནི། སྡིག་པ་དེ་དག་མ་ལུས་པར་འབྱང་བར་
འགྱུར་རོ། །རིགས་ཀྱི་བུ། གཞན་ཡང་དཔེར་ན། ལ་ལ་ཞིག་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འདོད་ལ། ད་དུང་གཞོན་ནུའི་ཚུལ་ཁྲིམས་ཀྱང་མ་བླངས་པར་མི་ལ་ལ་ཞིག་
གིས་དེ་བཞིན་གཤེགས་པ་ལ་སོགས་པ་དགེ་སློང་གི་དགེ་འདུན་མཆོད་སྟོན་གསོལ་བ་དེའི་ཚེ་ཁྱིམ་པ་དེའང་ཆོས་གོས་བགོས་ནས་དེ་བཞིན་གཤེགས་པའི་ཉན་ཐོས་རྣམས་དང་
ཐབས་ཅིག་ཏུ་གྲོང་གི་ནང་དུ་སོང་སྟེ་བཀོད་ན། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱི་གྲངས་སུ་གཏོགས་པ་དེ་བཞིན་དུ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་
ཆེན་པོ་མདོ་སྡེ་འདི་ལ་སློབ་པ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་ཐོབ་པ་རྣམས་ཀྱི་གྲངས་སུ་གཏོགས་སོ། །འདི་ལས་ཕྱི་རོལ་ཏུ་གྱུར་པ་རྫས་ཀྱིས་བྲིད་པའི་ཕྱིར་རམ་
གཏམ་ཟླར་བྱ་བའི་ཕྱིར་རམ། རྙེད་པ་དང༌། བཀུར་སྟི་དང༌། ཚིགས་སུ་བཅད་པ་འདོད་པའི་ཕྱིར་ཐོས་པ་ཙམ་དུ་ཟད་དེ། མདོ་སྡེ་སྤོང་བར་མི་བྱེད་ན་ང་རྒྱལ་གྱི་དབང་གིས་སྤོང་བ་མ་གཏོགས་
པར་སེམས་ཅན་གཞན་དེ་དག་ནི། སངས་རྒྱས་དགྲ་བཅོམ་པ་རྣམས་ཀྱི་ཡང་དག་པར་རྫོགས་པའི་བྱང་ཆུབ་གང་ཡིན་པ་དེ་རིམ་གྱིས་ཐོབ་པར་འགྱུར་རོ། །རིགས་ཀྱི་བུ། དེ་བས་ན།
སྔར་བསྟན་པའི་གང་བྲག་བཞི་པོ་རྣམས་རྟེན་དུ་གྱུར་པ་ཡིན་ཏེ། དེ་དག་ནི། སངས་རྒྱས་ཀྱིས་གསུངས་པ་མ་ཡིན་པའི་མདོ་སྡེ་ལ་སངས་རྒྱས་ཀྱིས་གསུངས་སོ། །ཞེས་སྟོན་མི་སྲིད་
དེ༑ སྐབས་མེད་དོ། །དེ་བས་ན། རྟེན་དུ་གྱུར་པ་ཡིན་ནོ། །གང་ཟག་བཞེ་པོ་འདི་རྣམས་ཀྱི་ནང་ནས་གཅིག་ཙམ་གཞིག་འདུག་ནའང་དེ་ལ་མཆོད་པ་གྱིས་ཤིག། སྲུང་བར་གྱིས་ཤིག །གསོལ་
༄༅། །པ༑ དེ་ལ་མཆོད་པ་ཇི་ལྟར་འཚལ། བཀའ་སྩལ་པ། གང་ཟག་དེ་ནི། བདག་གི་སྲོག་ཡོངས་སུ་བཏང་ནས་དམ་པའི་ཆོས་འབྱིན་པ་ཡིན་གྱི། དེ་ལས་དམ་
པའི་ཆོས་སྲུང་བ་བསླབ་པར་གྱིས་ཤིག །བསླབ་ནས་ཀྱང་སློབ་དཔོན་དེ་ལ་མཆོད་པ་གྱིས་ཤིག །ཉན་ཐོས་ཀྱི་ཐེག་པ་ལས་ཀྱང་ངས་བསྟན་ཏེ། རྒན་ནམ་ཡང་ན་གཞོན་ཡང་རུང༌། །
གང་ལས་ཆོས་ནི་རྟོགས་འགྱུར་བ། བྲམ་ཟེ་སྲེག་སྦྱིན་མེ་བཞིན་དུ། །དེ་ལ་བཀུར་སྟིས་ཕྱག་ཀྱང་བྱ། །རྒན་ནམ་ཡང་ན་གཞོན་ཡང་རུང༌། །གང་ལས་ཆོས་ནི་རྟོགས་འགྱུར་བ། །དབང་
ཆེན་ལྷ་ལ་བྱ་བ་བཞིན། །དེ་ལ་བཀུར་སྟིས་ཕྱག་ཀྱང་བྱ། །ཞེས་བསྟན་པ་ཡིན་ནོ། །གསོལ་པ། སློབ་དཔོན་ལ་མཆོད་པ་བགྱི་བ་ནི། རིགས་ལགས་ན། དགེ་སློང་རྒན་པོ་ཚུལ་ཁྲིམས་
དང་ལྡན་པས་གསར་བུ་ལ་ཕྱག་བགྱི་བ་ནི། མི་རིགས་ཏེ། འདི་ནི། དཔྱད་འཚལ་ལགས་སོ། །ཅི་ལགས། གལ་ཏེ་དགེ་སློང་རྒན་པོ་གསར་བུ་ལ་སློབ་ནའང་དེས་གསར་བུ་ལ་ཕྱག་
བགྱི་འཚལ་ལམ། གལ་ཏེ་ཕྱག་བགྱི་འཚལ་བར་གྱུར་ན་ནི། དེ་ལྟ་ན་རྒན་པོ་དེ་ཚུལ་ཁྲིམས་དང་ལྡན་པའི་དགེ་སློང་མ་ལགས་པར་འགྱུར་ལགས་སོ། །གཞན་ཡང་གླེང་འཚལ་
བ་མཆིས་ཏེ། གལ་ཏེ་དགེ་སློང་རྒན་པོ་ནི། ཚུལ་ཁྲིམས་འཆལ་པ་ལགས། གསར་བུ་ནི། ཚུལ་ཁྲིམས་དང་ལྡན་པ་ལགས་ལ། དེ་ལས་ཆོས་ཀྱི་དེ་ཁོ་ན་ཉིད་རྟོགས་པར་འགྱུར་
ན༑ ཅི་ལགས། གསར་བུས་གློ་བར་ཆུད་བཞིན་དུ་རྒན་པོ་ཚུལ་ཁྲིམས་འཆལ་པ་ཕྱག་བགྱི་འཚལ་ལམ། གཞན་ཡང་གླེང་འཚལ་བ་མཆིས་ཏེ། ཅི་ལགས། ཁྱིམ་ན་གནས་པ་ལས་
ཆོས་རྟོགས་པར་འགྱུར་ནའང་ཁྱིམ་ན་གནས་པ་ལ་ཕྱག་བགྱི་འཚལ་ལམ། ཧ་ཅང་ཞེས་ཆེར་བགྱི་བའི་མི་རིགས་ལགས་སོ། །ཁྱིམ་ན་གནས་པ་རྣམས་ནི། རབ་ཏུ་བྱུང་བའི་མཆོད་པའི་
འོས་དང༌། ཡོན་གནས་མ་ལགས་སོ། །བསྟན་པ་འདི་ལ་ནི། གཞོན་ནུས་རྒན་པོ་རྣམས་ལ་མཆོད་པ་བགྱི་བའི་རིགས་ལགས་སོ། །རྒན་པོ་མཆོད་པའི་འོས་ཞེས་བགྱི་བ་ནི། བསྙེན་
པར་རྫོགས་པ་འདུལ་བ་དང༌། ཆོ་ག་དང༌། སྤྱོད་ཡུལ་ལ་གནས་པ་ལགས་ལ། བཅོམ་ལྡན་འདས་ཀྱིས་ཀྱང་ཚུལ་ཁྲིམས་འཆལ་པ་རྣམས་ནི། ཞིང་གི་ནང་ན་ཞིང་གི་རྡོ་དང་འདྲའོ། །
ཞེས་གསུངས་ན། ད་ནི། རྒན་ནམ་ཡང་ན་གཞོན་ཡང་རུང༌། །གང་ལས་ཆོས་ནི་རྟོགས་འགྱུར་བ། །དབང་ཆེན་ལྷ་ལ་བྱ་བ་བཞིན། །དེ་ལ་བཀུར་སྟིས་ཕྱག་ཀྱང་བྱ། །ཞེས་ཀྱང་
གསུང་ངམ། ཚིག་གི་དོན་འདི་གཉིས་ནི། དཔྱད་འཚལ་ལགས་སོ། །དེ་མ་ལགས་ན། དེ་ལྟར་བགྱིས་དང་ཆད་པའི་གནས་སུ་འགྱུར་ལགས་སོ། །བཅོམ་ལྡན་འདས། དགེ་སློང་
ཚུལ་ཁྲིམས་དང་ལྡན་པ་རྣམས་སླུ་བར་མཛད་ལགས་སམ། འདི་ལ་ནོངས་པ་མང་དུ་མཆིས་ལགས་ན། བཅོམ་ལྡན་འདས་ཀྱིས་མདོ་མང་པོ་དག་ལས་ཚུལ་ཁྲིམས་འཆལ་པ་རྣམས་
༄༅། །ཆད་པས་གཅད་པར་བཀའ་སྩལ་ན། ཅི་ལགས། དེ་བཞིན་གཤེགས་པས་འདིར་དགོངས་ཏེ་གསུངས་ལགས་སམ། བཅོམ་ལྡན་འདས་ཀྱིས་བཀའ་སྩལ་
པ༑ རྒན་ནམ་ཡང་ན་གཞོན་ཡང་རུང༌། །གང་ལས་ཆོས་ནི་རྟོགས་འགྱུར་བ། །དབང་ཆེན་ལྷ་ལ་བྱ་བ་བཞིན། །དེ་ལ་བཀུར་སྟིས་ཕྱག་ཀྱང་བྱ། །ཞེས་བྱ་བ་ནི། མ་འོངས་པའི་དུས་
ཀྱི་བྱང་ཆུབ་སེམས་དཔའ་རྣམས་ཀྱི་ཕྱིར་ངས་བསྟན་པ་ཡིན་གྱི། ཉན་ཐོས་ཀྱི་ཐེག་པ་པ་རྣམས་ཀྱི་ཕྱིར་དེ་སྐད་བསྟན་པ་ནི། མ་ཡིན་ནོ། །རིགས་ཀྱི་བུ། ངས་སྔར་བསྟན་པ་དམ་
པའི་ཆོས་ནུབ་པའི་དུས་དང༌། ཚུལ་ཁྲིམས་དང་ལྡན་པ་འགྲིབ་པའི་དུས་དང༌། ཚུལ་ཁྲིམས་འཆལ་པའི་ཕྱོགས་རྣམ་པར་འཕེལ་བའི་དུས་དང༌། ངེས་པར་གྲོལ་བ་དང༌། ཆགས་
པ་མེད་པ་ཟད་པའི་དུས་དང༌། བྲན་དང་བྲན་མོ་ལ་སོགས་པ་རྫས་ངན་པ་དུ་མ་ཡོངས་སུ་འཛིན་པར་བྱེད་པའི་དུས་ན་སྐྱེས་བུ་བཞིའི་ནང་ནས་གཅིག་ཙམ་ཡང་བྲན་དང་བྲན་མོ་
ལ་སོགས་པ་རྫས་ངན་པ་དུ་མ་ཡོངས་སུ་འཛིན་པའི་དགེ་འདུན་གྱི་ནང་དུ་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་རྣམས་ཀྱི་རུང་བ་དང༌། རུང་བ་མ་ཡིན་པ་དང༌། འདུལ་བ་དང༌།
འདུལ་པ་མ་ཡིན་པའི་བྱེ་བྲག་ཀྱང་ཤེས། དེ་དག་གི་གཡེལ་བ་དང༌། བདག་ཉིད་ཀྱི་ཉེས་པ་མང་པོའི་གཞིའང་ཤེས་ཏེ། སྤྱོད་པ་འདི་ནི། བཅོམ་ལྡན་འདས་ཀྱི་སྤྱོད་པ་མ་ཡིན་ནོ། །
སྙམ་དུའང་ཤེས་ནས་ཡུལ་དང་དུས་ལ་བལྟས་ཏེ་གསར་བུ་རྣམས་ལས་གསུང་རབ་ཡན་ལག་དགུ་སློབ་པར་བྱེད་ཅིང༌། དེ་དག་ཕམ་པ་བྱུང་བ་ཡིན་པར་ཤེས་སུ་ཟིན་ཀྱང་དམ་པའི་
ཆོས་དབྱུང་བར་བྱའོ། །སྙམ་སྟེ། བ་རོག་པར་འདུག་ནས་དེ་འབའ་ཞིག་སེམས་ཤིང་དམ་པའི་ཆོས་སྲུང་བ་ཁོ་ནའི་ཕྱིར་འཇིག་རྟེན་དུ་འབྱུང་ངོ༌། །རིགས་ཀྱི་བུ། དཔེར་ན། འགའ་ཞིག་
གི་རྒྱལ་པོ་ཞིག་ཤི་ནས་དེའི་བུ་རྣམས་ཀྱི་ནང་ན་རྒྱལ་པོ་ནུས་པ་མེད་དེ། རྒྱལ་པོ་དེ་ཉིད་ཀྱི་ཁམས་ཀྱི་གདོལ་པ་འབྲུག་སྒྲ་ལྟ་བུའི་སིལ་སྙན་དང་ལྡན་པ་ཞིག་གིས་གདོལ་པ་དག་དེང་
དེ་མཐུས་རྒྱལ་སྲིད་འཕྲོག་ནས་རྒྱལ་པོ་བྱེད་ལ། གདོལ་པ་དེའང་རང་བཞིན་གྱིས་ནོར་དང་ལྡན་པ་ཞིག་སྟེ། དེ་ནས་གདོལ་པ་དེ་རྒྱལ་པོ་བྱེད་པ་ན་བྲམ་ཟེ་དང༌། ཁྱིམ་བདག་དེ་ན་གནས་
པ་རྣམས་གདོལ་པས་བཀོལ་ན་མི་རུང་ངོ༌། །སྙམ་ནས་ཡུལ་བོར་ཏེ། གང་ན་རྒྱལ་པོའི་རིགས་རྒྱལ་པོ་བྱེད་པའི་ཡུལ་དེར་འགྲོ་བར་བྱེད་ལ། བྲམ་ཟེ་དང་ཁྱིམ་བདག་གཞན་ཁ་ཅིག་ནི། བདག་
གི་ཡུལ་འདོར་མ་ཕོད་ནས་ཇི་ལྟར་ཤིང་གང་དུ་སྐྱེས་པ་དེ་ཉིད་དུ་སྐམ་པར་འགྱུར་བ་བཞིན་དུ་དེ་དག་ཀྱང་ཤིང་དང་འདྲ་བར་ཡུལ་དེ་ཉིད་ན་འཁོད་དོ། །དེ་ནས་གདོལ་པ་དེས་མི་མང་པོ་བྱེར་
རོ༑ ༑སྙམ་ནས་གདོལ་པ་རྣམས་ལམ་ཐམས་ཅད་སྲུང་དུ་བཅུག་སྟེ། མི་ལྷག་མ་རྣམས་བསྲུང་བའི་ཕྱིར་ཡང་བྲམ་ཟེ་གཙང་སྦྲ་ཅན་རིག་བྱེད་ཀྱི་མཐར་ཕྱིན་པ་གང་ངའི་རྒྱལ་སྲིད་ཀྱི་
༄༅། །ཕྱེད་ལོངས་སྤྱད་པར་འདོད་པ་དེས་ནི། ངའི་མདུན་ན་འདོན་གྱིས་ཤིག་ཅེས་བསྒྲགས་ཏེ། དེ་ལྟར་གྲོང་ཁྱེར་དུ་ཞག་བདུན་གྱི་བར་དུ་རྔ་བོ་ཆེ་བརྡུངས་ཀྱང་བྲམ་ཟེ་
གཙང་སྦྲ་ཅན་གདོལ་པའི་བླ་མཁྱེན་བྱེད་པ་སུ་ཡོད་ཅེས་ཟེར་ནས་སུའང་མ་བཏུབ་བོ། །དེ་ནས་གདོལ་པ་དེས་བསྒོ་བ། གལ་ཏེ་སུའང་དེ་ལྟར་བྱེད་དུ་མི་བཏུབ་ན། བྲམ་ཟེ་ཐམས་ཅད་
གདོལ་པའི་ཁྱིམ་དུ་གདོལ་པ་རྣམས་དང་ལྷན་ཅིག་ཏུ་ཟན་ཟོ་ཞིག །ཉོལ་ཅིག །གལ་ཏེ་མི་བཏུབ་ན། དེའང་ངས་ནན་གྱིས་བྱེད་དུ་གཞུག་གོ །དེ་སྟེ་ལ་ལ་ཞིག་བཏུབ་ན་ནི། ངས་རྒྱལ་
སྲིད་ཀྱི་ཕྱེད་ཀྱང་སྦྱིན་ནོ། །སུམ་ཅུ་རྩ་གསུམ་པའི་ལྷ་རྣམས་ཀྱི་བདུད་རྩི་འཐུངས་ན། ལྷར་འགྱུར་བ་ཐོབ་པར་འགྱུར་བ་འཇིག་རྟེན་ན་དཀོན་པ་གང་ཡིན་པ་དེ་ང་དང་ལྷན་ཅིག་ཏུ་
འཐུངས་ལ་ལྷར་འགྱུར་བར་བྱའོ། །ཞེས་བསྒོའོ། །དེ་ནས་དེར་བྲམ་ཟེའི་གཞོན་ནུ་གཙང་སྦྲ་ཅན་ཐོར་ཚུགས་དང་ལྡན་པ། རིག་བྱེད་ཀྱི་མཐར་ཕྱིན་པ། གཞོན་ནུ་ཚངས་པར་སྤྱོད་པ་
ཞིག་གིས་བསྒོ་བ་དེ་ཐོས་ནས་རང་གི་ཐོར་ཚུགས་བཤིག་སྟེ་གདོལ་པ་དེའི་ཐད་དུ་སོང་ནས་དེ་ལ་ཕྱག་བཙལ་ཏེ་སྨྲས་པ། རྒྱལ་པོའི་ཞལ་སྔ་ནས་བཀའ་ཅི་སྩལ་པ་དེ་བཞིན་དུ་
བགྱིའོ། །ཞེས་བྱས་ཏེ། དེ་ནས་རྒྱལ་པོ་དེས་དེ་མདུན་ན་འདོན་དུ་དབང་བསྐུར་ཏོ། །དེ་ནས་བྲམ་ཟེ་རྣམས་ན་རེ། གདོལ་པའི་མདུན་ན་འདོན་བར་ཁས་བླངས་པ་ངན་པ་འདི་ངན་པ་འདི་
ཞེས་འཛེར་ཏོ། །དེ་ནས་དེ་བཞིན་དུ་རྒྱལ་པོས་དེ་ལ་རྒྱལ་སྲིད་ཀྱི་ཕྱེད་བྱིན་ནས་དེ་དང་ལྷན་ཅིག་ཏུ་རྒྱལ་པོ་བྱེད་དོ། །དེ་ནས་སྐབས་ཤིག་ཏུ་བྲམ་ཟེ་དེས་གདོལ་པའི་རྒྱལ་པོ་དེ་ལ་སྨྲས་པ། རྒྱལ་
པོ་ཆེན་པོ། །བདག་གི་བྲམ་ཟེའི་ཚུལ་བོར་ནས་ཁྱོད་ཀྱི་མདུན་ན་འདོན་བགྱི་བར་ཁས་བླངས་ཏེ་ཁྱོད་ལ་རིག་པ་རེ་རེ་ནས་བསླབ་སྙམ་ན། ཁྱོད་ད་དུང་བདག་ལ་ཐུགས་མི་རྟོན་ཏོ། །དེ་ནས་རྒྱལ་
པོ་དེས་དེ་ལ་སྨྲས་པ། ཁྱོད་ལ་ང་ཅི་སྟེ་ཡིད་མི་རྟོན། འདི་ལྟ་བུའི་ཡོན་ཏན་དང་ལྡན་པ་ཁྱོད་ལ་ཡིད་རྟོན་གྱི། ད་ནི། རྒྱལ་པོ་ཤི་བ་དེའི་བདུད་རྩིའི་བུམ་པ་འདི་ཕྱེད་ཕྱེད་མཉམ་དུ་བཏུང་ངོ༌།།
ཞེས་བྱས་སོ། །དེ་ནས་ཐོག་མ་ཁོ་ནར་བློན་པོ་དེས་འཐུངས་པའི་འོག་ཏུ་བདུད་རྩི་དེའི་ནང་དུ་ཐབས་ཀྱིས་བཏུང་བ་གཞན་བླུགས་ནས་རྒྱལ་པོ་དེས་འཐུངས་པ་དང༌། བརྒྱལ་ཏེ་ཤི་བ་
བཞིན་དུ་འདུག་གོ། །དེ་ནས་བྲམ་ཟེ་དེས་རྒྱལ་པོ་སྔ་མའི་བུ་རྒྱལ་པོ་ནུས་པ་རྒྱལ་པོར་བཅུག་ནས་སྨྲས་པ། རྒྱལ་སྲིད་འདི་ལོངས་ལ་ཆུད་མ་ཟོས་པར་གྱིས་ཤིག །གདོལ་པ་ནི། རྒྱལ་
སྲིད་འདི་ལ་རྒྱལ་པོའི་འོས་མ་ཡིན་ཏེ། ཁྱོད་ཉིད་རྒྱལ་པོར་འོས་པ་ཡིན་ནོ། །གདོལ་པས་རྒྱལ་པོ་བྱ་བ་ནི། མི་སྲིད་དོ། །ཞེས་བྱས་སོ། །དེ་ནས་གདོལ་པ་དེ་བརྒྱལ་བ་ལས་སངས་པར་
འགྱུར་བའི་སྨན་བྱིན་ཏེ་སོས་པར་བྱས་ནས་དེ་སྤྱུགས་ཏེ་འགལ་བ་བྱེད་པའི་ཆད་པས་བཅད་དོ། །དེ་ལྟར་བྲམ་ཟེ་དེས་རྒྱལ་སྲིད་སླར་བཙུགས་ཏེ་གདོལ་པ་དེ་སྤྱུགས་ན། དེ་བྲམ་ཟེ་ལས་
༄༅། །ཉམས་པར་ཡང་མ་གྱུར་ལ། བྲམ་ཟེ་དང༌། ཁྱིམ་བདག་རྣམས་ཀྱང་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ནོ། །ཞེས་ཟེར་ཞིང་དེ་ལ་ལེགས་
སོ། །ལེགས་སོ་ཞེས་བྱས་ཏེ། མཆོད་པར་བྱེད་པ་དེ་བཞིན་དུ་བྱང་ཆུབ་སེམས་དཔའ་ཡང་ང་འདས་པའི་འོག་ཏུ་དམ་པའི་ཆོས་དབྱུང་བའི་དོན་དུ་ཐབས་ཅིའང་བྱེད་དེ། རྫས་ངན་
པ་འདུན་ཅིང་སྤྱོད་པ་ངན་པ་དང་ལྡན་པ་དགེ་འདུན་གྱི་ནང་དུ་ཚུལ་ཁྲིམས་འཆལ་པ་དག་དང་ཆུལ་མཐུན་པར་ཡང་སྟོན་ཏེ། ཚུལ་ཁྲིམས་འཆལ་པ་དེ་རྣམས་ཀྱི་ཆོས་གོས་དང༌།
གླེགས་བམ་དང༌། ཡོ་བྱད་དེ་རྣམས་དེ་དག་ལས་འཕྲོག་ནས་དགེ་སློང་ཚུལ་ཁྲིམས་དང་ལྡན་པ་རྣམས་ལ་སྦྱིན་པར་གང་གིས་ནུས་པ་དང༌། སྒྲུབ་པ་དང༌། བཙོ་བ་དང༌། འབྲུ་
བསྡུ་བའང་བསྟེན་ཏེ་རུང་བ་མ་ཡིན་པ་བརྒྱད་ཀྱི་དངོས་པོ་ལེན་པར་བྱེད་པ་རྣམས་མེད་པར་བྱེད་པར་གང་གིས་ནུས་པ་དང༌། བྲམ་ཟེས་གདོལ་པའི་རྒྱལ་པོ་ལ་བྱས་པ་བཞིན་
དུ་དེ་དག་དང་ལྷན་ཅིག་ཏུ་སྐབས་དབྱེ་བ་དང༌། གསོ་སྦྱོང་དང༌། ཐལ་མོ་སྦྱར་བས་འདུད་པའི་ལས་བྱེད་ཅིང་འགལ་བ་བྱེད་པ་ཚར་གཅོད་པར་གང་གིས་ནུས་པ་དང༌། གཡེལ་
བ་རྣམས་ཀྱང་དག་པའི་དགེ་འདུན་དུ་བསྒྱུར་ཞིང་སྐྱེ་བོ་མང་པོ་ལ་ཕན་པའི་ཕྱིར་ཐེག་པ་ཆེན་པོའི་མདོའི་སྡེ་ཚན་སྟོན་པར་གང་གིས་ནུས་པའི་བྱང་ཆུབ་སེམས་དཔའ་སེམས་དཔའ་
ཆེན་པོ་གང་ཡིན་པ་དེའི་ཆེད་དུ་ཚིགས་སུ་བཅད་པ་དེ་དག་གསུངས་པ་ཡིན་ཏེ། དེ་ལྟར་བྱེད་པ་ལ་ནི། དམ་པའི་ཆོས་འབྱིན་པའི་ཕྱིར་བྲམ་ཟེ་དང༌། ཁྱིམ་བདག་རྣམས་མགུ་བར་འགྱུར་ཏེ།
བྲམ་ཟེ་ཡིན་བཞིན་དུ་འདིས་རྒྱལ་སྲིད་དང༌། དམ་པའི་ཆོས་བཙུགས་སོ། །སྙམ་ནས་དེ་ལ་མཆོད་པ་བྱེད་དོ། །གང་དེ་ལྟར་སྟོན་པ་དེ་ནི། བྱང་ཆུབ་སེམས་དཔའ་ཁོ་ན་ཡིན་ཏེ། ཐབས་
དང་སྦྱར་ཞིང་བྱེད་པས་ན། དེ་ལ་ཉེས་པ་བསྐྱེད་པར་མི་བྱའོ། །དེ་ལ་ཉེས་པ་བསྐྱེད་ན། ཕྱིར་ཉེས་པ་ཐོབ་པར་འགྱུར་ཏེ། བཤགས་པར་འོས་པའི་ཉེས་པ་ལྟ་བུར་འགྱུར་ལ་ང་རྒྱལ་གྱི་
དབང་གིས་འཆགས་པར་ཡང་མི་བྱེད་དོ། །བྱང་ཆུབ་སེམས་དཔའ་སློབ་དཔོན་དེ་ནི། མཆོག་ཏུ་གཡེལ་བ་ལྟ་བུར་སྟོན་ཀྱང་ཉེས་པར་མི་འགྱུར་ཏ། དགོངས་པའི་ཚིག་འདི་ནི། བྱང་ཆུབ་
སེམས་དཔའི་ཆེད་དུ་བསྟན་ཏོ། །རྒན་ནམ་ཡང་ན་གཞོན་ཡང་རུང༌། །གང་ལས་ཆོས་ནི་རྟོགས་འགྱུར་བ། །བྲམ་ཟེ་སྲེག་སྦྱིན་མེ་བཞིན་དུ། །དེ་ལ་བཀུར་སྟིས་ཕྱག་ཀྱང་བྱ། །རྫོགས་
སངས་རྒྱས་ཀྱིས་བསྟན་པ་ཡི། །ཆོས་ནི་གང་ལས་རྟོགས་འགྱུར་བ། །དབང་ཆེན་ལྷ་ལ་བྱ་བ་བཞིན། །དེ་ལ་བཀུར་སྟིས་ཕྱག་ཀྱང་བྱ། །ཞེས་བྱ་བ་ནི། ཉན་ཐོས་རྣམས་ཀྱི་ཆེད་དུ་བསྟན་
པ་མ་ཡིན་གྱི། བྱང་ཆུབ་སེམས་དཔའ་རྣམས་ཀྱི་ཆེད་དུ་བསྟན་པ་ཡིན་ནོ། །གསོལ་པ། བཅོམ་ལྡན་འདས་།ཅི་ལགས། བྱང་ཆུབ་སེམས་དཔའ་གཡེལ་བ་དེ་ལྟ་བུ་དག་བསྙེན་པར་
༄༅། །རྫོགས་པར་རུང་ངམ། འོན་ཏེ་མི་རུང་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་སྐད་མ་ཟེར་ཅིག །དེ་ཉིད་དེ་དག་གི་བསྙེན་པར་རྫོགས་
པ་ཡིན་ཏེ། དེ་དག་གི་ཉེས་པ་གང་དང༌། གང་བཤགས་པ་དེ་དག་ནི། བཤགས་བཟོད་པ་ཡིན་ནོ། །རིགས་ཀྱི་བུ། དཔེར་ན། རྫིང་རྙིང་པ་རལ་པའི་ཆུ་ནི། ཐམས་ཅད་ཟག་པར་འགྱུར་
རོ༑ ༑དེ་ཅིའི་ཕྱིར་ཞེ་ན། སྐྱེ་བོ་ཆོས་བཞིན་དུ་བྱེད་པ་རྣམས་ནི། འགྲིབ། སྐྱེ་བོ་ཆོས་བཞིན་དུ་མི་བྱེད་པ་རྣམས་ནི། འཕེལ་བའི་ཕྱིར་རོ། །གལ་ཏེ་རྫིང་དེ་ལ་ལ་ཞིག་གིས་ཕྱིར་བཅོས་
ན་ནི། དེས་དེའི་ནང་ནས་ཆུ་འཛག་པར་མི་འགྱུར་བ་དེ་བཞིན་དུ་བྱང་ཆུབ་སེམས་དཔའ་ཡང་དགེ་སློང་ཚུལ་ཁྲིམས་དང་ལྡན་པ་རྣམས་མེད་པའི་ཕྱིར་དང༌། དགེ་འདུན་གྱི་སྒྲུབ་པ་ཉམས་
པའི་ཕྱིར་དང༌། ཐེག་པ་ལ་གཡེལ་བ་ཡོངས་སུ་འཕེལ་བའི་ཕྱིར་གཡེལ་བ་རྣམས་དང་ལྷན་ཅིག་ཏུ་བསྙེན་པར་རྫོགས་པ་དང༌། སྐབས་འབྱེད་པ་དང༌། གསོ་སྦྱོང་དང༌། ཐལ་མོ་
སྦྱར་བས་འདུད་པའི་ལས་བྱེད་པས་རྫིང་ཟགས་པ་བཞིན་དུ་ཚུལ་ཁྲིམས་དང༌། ཆོ་ག་ཟགས་པར་འགྱུར་མོད་ཀྱི། རིགས་ཀྱི་བུ། བྱང་ཆུབ་སེམས་དཔའ་དམ་པའི་ཆོས་འབྱིན་པར་
འདོད་པ་དང༌། ཚུལ་ཁྲིམས་དང་ལྡན་པའི་མི་ནི། རྫིང་བཅོས་པ་བཞིན་དུ་དེ་ཉིད་བསྙེན་པར་རྫོགས་པ་ཡིན་ཏེ། དྲི་མ་མེད་པ་དང༌། བཤགས་པས་བདག་ཉིད་དག་པར་བྱས་ནས་
མདོ་སྡེ་དང༌། འདུལ་བ་དེ་ཁོ་ན་ཉིད་ཀྱིས་རྫིང་བཅོས་པ་བཞིན་དུ་འཆོས་བར་བྱེད་དོ།། །།འཕགས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ། བམ་པོ་བརྒྱད་
པ། གསོལ་པ། བཅོམ་ལྡན་འདས་ཀྱིས་ཨ་མྲའི་འབྲས་བུ་རྣམ་པ་བཞི་ལྟ་བུའི་མདོ་ལས་གསུངས་པའི་ཚུལ་ཁྲིམས་དང་ལྡན་པ་དང༌། ཚུལ་ཁྲིམས་འཆལ་པ་དེ་ཇི་ལྟར་རྟོགས་པར་
བགྱི་ལགས། བཀའ་སྩལ་པ། རིགས་ཀྱི་བུ། ཚུལ་ཁྲིམས་དང་ལྡན་པ་དང༌། ཚུལ་ཁྲིམས་འཆལ་པ་ནི། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ལས་རྟོགས་པར་བྱའོ།།
གསོལ་པ། ཇི་ལྟར་རྟོགས་པར་བགྱི་ལགས། བཀའ་སྩལ་པ། ཁྱིམ་བདག །ཞིང་པ་ལ་ཞིག་གིས་འབྲས་སཱ་ལུ་དང༌། འབྲུ་དང༌། ཁྲེ་རྒོད་ཀྱི་ཞིང་ལ་ཐོག་མ་ཁོ་ནར་ཞིང་གི་རྔོ་དང་
སྙེ་ལོང་རྣམས་བསལ་ཏེ་དག་པར་བྱས་པ་དེ་ལ་དེ་ཕྱིན་ཆད་ནས་ནམ་འབྲས་བུར་མ་བྱུང་གྱི་བར་དུ་ཤའི་མིག་གིས་ཞིང་གི་གྲངས་སུ་རྩི་བར་བྱེད་ལ་འབྲས་བུར་གྱུར་པའི་ཚེ་ནི། ཕུབ་
མ་དང༌། ཁོང་སྟོང་དང༌། འབྲས་བུ་དང༌། སྙིང་པོའི་བྱེ་བྲག་དང༌། འདི་ནི། འབྲུ་ཡིན་ནོ། །འདི་ནི། འབྲུ་མ་ཡིན་ནོ། །སྙམ་དུ་ཡང་དག་པར་ཤེས་པ་དེ་བཞིན་དུ་གཞི་ཆེན་པོ་བརྒྱད་ནི།
དགེ་འདུན་གྱི་སྐྱོན་ཡིན་ཏེ། དེ་རྣམས་ཞིང་གི་རྔོ་དང་སྙ་ལོང་བཞིན་དུ་བསལ་ནས་དེའི་འོག་ཏུ་ཤའི་མིག་གིས་དགེ་འདུན་གྱི་ནང་དུ་ཚུལ་ཁྲིམས་དང་ལྡན་པའི་དགེ་སློང་གི་གྲངས་སུ་
༄༅། །རྩི་བར་བྱེད་དོ། །སུའང་རུང་སྟེ་ནམ་སྐྱོན་ཅན་དུ་མ་གྱུར་པ་དང༌། ཡོན་ཏན་གྱི་འབྲས་བུ་གསལ་བར་མ་གྱུར་གྱི་བར་དུ་འདི་ནི། འབྲས་བུའོ། །འདི་ནི། འབྲུ་
ངན་པའོ། །ཞེས་བྱ་བ་དེ་ལྟ་བུར་ཤའི་མིག་གིས་རྟོགས་པར་མི་ནུས་ཏེ། དེའི་དུས་ཀྱི་བར་སྐབས་སུ་ནི། ཞིང་བཞིན་དུ་དགེ་འདུན་གྱི་གྲངས་སུ་མགོ་མཉམ་དུ་རྩི་བར་འགྱུར་རོ། །
དེ་ཅིའི་ཕྱིར་ཞེ་ན། ཞིང་གི་སྐྱོན་ནི། ཞིང་གི་རྔོ་ཡིན་ལ། དགེ་འདུན་གྱི་སྐྱོན་ནི། གཞི་ཆེན་པོ་བརྒྱད་ཡིན་པའི་ཕྱིར་རོ། །ཉེས་པའི་མཆོག་སྦྲུལ་གདུག་པ་ལྟ་བུ་དང་བྲལ་བའི་
དགེ་འདུན་ནི། ཞིང་ཞེས་བྱ་སྟེ། དགེ་སློང་སུའང་རུང་ཞིང་རྣམ་པར་དག་པ་ལྟ་བུར་གྱུར་པ་དེ་ནི། ལྷ་བཞིན་དུ་མཆོད་པར་བྱ་བ་དང༌། ཡོན་གནས་སུ་བྱ་བ་ཡིན་ནོ། །འབྲས་བུར་
གྱུར་པ་དེའི་སྔ་རོལ་ཏུ་ནི། ཤའི་མིག་གིས་སྐྱོན་དང༌། ཡོན་ཏན་རྟོགས་པར་མི་ནུས་སོ། །རིགས་ཀྱི་བུ། གཞན་ཡང་དཔེར་ན་གྲོང་གིས་ཁོར་གཅིག་གི་ནང་ན་ཤིང་ཀ་ར་ཀ་མང་
པོའང་ཡོད། དེའི་ནང་ན་ཤིང་ཏེན་ཏུ་ཀ་གཅིག་ཀྱང་ཡོད་ལ་ཏེན་ཏུ་ཀའི་ཤིང་དེ་ལའང་འབྲས་བུ་ཡོད། ཀ་ར་ཀའི་ཤིང་དེ་དག་ལའང་འབྲས་བུ་ཡོད་པ་ལས། དེ་ནས་བུ་མོ་གཞོན་
ནུ་དབུལ་མོ་ཤིང་ཏོག་འཐུ་བ་ཞིག་གིས་ཏེན་ཏུ་ཀའི་འབྲས་བུ་བཏུས་ནས་ཀ་ར་ཀའི་འབྲས་བུའང་དེའི་བཅུ་འགྱུར་ཙམ་དུ་བཏུས་ཏེ། ཏེན་ཏུ་ཀའི་འབྲས་བུ་ཡིན་ནོ། །སྙམ་ནས་དེ་
རྣམས་ཀྱིས་སྐོན་པ་བཀང་སྟེ་གྲོང་དེ་ཉིད་དུ་འཚོང་བར་བྱེད་ལ། དེ་ནས་བྱིས་པ་རྣམས་ཀྱིས་འབྲས་བུ་རྣམ་པ་གཉིས་ཏེན་ཏུ་ཀའི་འབྲས་བུ་ཡིན་ནོ། །སྙམ་ནས་ཉོས་ཏེ་ཟོས་པ་དང་ཤིའོ།།
དེ་ན་བྱེ་བྲག་ཕྱེད་པའི་མི་ཏེན་ཏུ་ཀའི་འབྲས་བུ་ཟ་འདོད་པ་གང་ཡིན་པ་དེ་དག་གིས་ནི། བུ་མོ་གཞོན་ནུ་དེ་ལ་ལེགས་པར་དྲིས་ཏེ། ཆེ་ཞེ། འདི་དག་ཕྱོགས་གང་ལོགས་ནས་བླངས་ཞེས་
བྱས་པ་དང༌། དེས་དེ་དག་ལ་ས་ཕྱོགས་བསྟན་ཏེ། དེ་དག་ལ་ས་ཕྱོགས་བསྟན་པ་དང༌། དེ་ན་ཀ་ར་ཀའི་ཤིང་ནི། མང་ལ། ཏེན་ཏུ་ཀའི་ཤིང་ནི། གཅིག་པུ་ལས་མེད་པར་ཤེས་ཏེ། འདི་
དག་ནི༑ དེ་ནས་བླངས་སོ། །སྙམ་དུ་རིག་ལ། ཏེན་ཏུ་ཀའི་འབྲས་བུ་དེ་དག་བཙལ་ཏེ་མ་རྙེད་ནས་ཀ་ར་ཀའི་འབྲས་བུས་འཇིགས་ཤིང་སྐྲག་སྟེ། འཇིགས་པ་དེ་ཉིད་ཀྱིས་འཕྱ་བར་བྱེད་ཅིང་
མ་ཉོས་པར་ཕྱིར་དོང་བ་དེ་བཞིན་དུ་རིགས་ཀྱི་བུ། དགེ་འདུན་གང་དག་གཞི་ཆེན་པོ་བརྒྱད་ཤེས་བཞིན་དུ་སྤྱོད་པར་བྱེད་པ་དེར་སྤྱོད་པར་བྱེད་པ་དེས་གལ་ཏེ་ཚུལ་ཁྲིམས་དང་ལྡན་པའི་
དགེ་སློང་དག་འཁོད་ན། དེ་དག་ཇི་ལྟར་ཀ་ར་ཀའི་ཚལ་ན་ཏེན་ཏུ་ཀའི་ཤིང་འདུག་པ་བཞིན་དུ་དེ་དག་མཐོང་ན། དེ་ཚུལ་ཁྲིམས་དང་ལྡན་པ་ཡིན་དུ་ཟིན་ཀྱང་དགེ་བསྙེན་ཤེས་རབ་ཅན་
གྱིས་དེ་དག་ལ་ཕྱག་མི་བྱ་ཞིང་མཆོད་པའི་གནས་སུ་མི་བྱའོ། །གལ་ཏེ་དེ་དག་ལ་ཕྱག་བྱ་བར་འདོད་ན། ཅི་ཁྱོད་གཞི་ཆེན་པོ་བརྒྱད་ལེན་པར་བྱེད་དམ། འོན་ཏེ་ལེན་པར་མི་བྱེད་ཅེས་དྲིས་
༄༅། །ནས་གདོད་ཕྱག་བྱ་སྟེ། ལེན་པར་བྱེད་པ་གང་ཡིན་པ་དེ་དག་དང་ལྷན་ཅིག་ཏུ་སྐབས་དབྱེ་བ་དང༌། གསོ་སྦྱོང་གི་ལས་རྣམས་བྱེད་དང་མི་བྱེད་ཅེས་དྲི་བར་བྱའོ། །
གལ་ཏེ་འདི་སྐད་ཅེས་ཟེར་ཏེ། དགེ་འདུན་གྱི་གཞི་ཆེན་པོ་བརྒྱད་ནི། ལེན་པར་བྱེད་དེ། བཅོམ་ལྡན་འདས་སེམས་ཅན་ཐམས་ཅད་ལ་ཐུགས་བརྩེ་བས་ཀྱང་རྒྱལ་བུ་རྒྱལ་བྱེད་ཀྱི་ཚལ་
དུ་གསེར་དངུལ་དག་བཞེས་སོ། །ཟེར་ལ། དེའི་ནང་ན་ཁ་ཅིག་ལེན་པར་མི་བྱེད་དེ། བདག་ཅག་ནི། ལེན་པར་བྱེད་པ་དག་དང་ལྷན་ཅིག་ཏུ་སྐབས་འབྱེད་པ་དང༌། གསོ་སྦྱོང་དང༌། ཐལ་
མོ་སྦྱར་བས་འདུད་པའི་ལས་ཀྱང་མི་བྱེད། ཐུག་པའང་མི་འཐུང༌། དེ་དག་ལས་རྙེད་པ་དང༌། བཀུར་སྟིའང་མི་ལེན་ནོ། །ཞེས་ཟེར་བ་དང༌། ལྷའི་ཡང་ལྷ་སངས་རྒྱས་བཅོམ་ལྡན་འདས་
དེས་ཀྱང་བཞེས་ན། དགེ་འདུན་གྱིས་བཞེས་པ་ལ་མི་བཟོད་པ་ཅི་ཡོད་ཅེས་དེ་སྐད་ཟེར་དུ་ཟིན་ཀྱང་དེ་དག་དང་ལྷན་ཅིག་ཏུ་ཁྱེད་སྐབས་འབྱེད་པ་དང༌། གསོ་སྦྱོང་དང༌། ཐལ་མོ་སྦྱར་བས་
གདུད་པའི་ལས་མ་བྱས་གྲང་ཞེས་སྨྲ་བར་བྱེད་དེ། གལ་ཏེ་ཚིག་ཉན་དུ་མི་བཏུབ་པ་དེ་དག་ནི། ཡང་དག་པའི་མདོ་སྡེ་ཤེས་པ་ཡིན་ནོ། །ལེན་པར་བྱེད་པ་བྱིས་པ་དང་འདྲ་བ་དེ་དག་ནི།།
སེམས་ཅན་དམྱལ་བ་པ་ཡིན་པར་རིག་པར་བྱ་སྟེ། སེམས་ཅན་དེ་དག་ནི། བྱིས་པ་འཆི་བ་དང་འདྲའོ། །རིགས་ཀྱི་བུ། གཞན་ཡང་དཔེར་ན། གྲོང་ཁྱེར་ཆེན་པོ་ཞིག་གི་སྤོས་ཀྱི་ཚོང་
འདུས་དག་ན་སྤོས་མ་དུ་ར་ཀ་དང༌། གཞན་ཡང་སྤོས་ཀྱི་སྣ་གྲངས་དང༌། སྨན་རྣམས་ཚོང་པ་དག་འཚོང་བར་བྱེད་ལ། དེ་ན་ཉོ་བའི་སེམས་ཅན་རྣམས་ཀྱིས་གངས་ཀྱི་རི་ལས་བྱུང་བའི་སྨན་ཅི་
འདྲ་བ་མི་ཤེས་ནས་དེ་དག་གིས་དྲིས་ཏེ། གལ་ཏེ་གངས་ཀྱི་རི་ལས་བྱུང་བའི་སྤོས་མ་དུ་ར་ཀ་ལྟ་ཅུང་ཟད་ཅི་ཡོད་ན་བྱིན་ཅིག་ཅེས་བྱས་པ་དང༌། དེ་གངས་ཀྱི་རི་ལས་བྱུང་བའི་སྤོས་ལྟར་བཅོས་
པ་ལ་གངས་ཀྱི་རི་ལས་བྱུང་བའི་སྤོས་ཡིན་ནོ། །ཞེས་བྱས་ཏེ་བྱིན་ནས་དེ་དག་གིས་འདི་ནི། གངས་ཀྱི་རི་ལས་བྱུང་བ་ཡིན་ནོ། །སྙམ་དུ་ཡང་དག་པར་ཡིད་ཆེས་ཏེ་བཅོས་མའི་སྤོས་རྣམས་
ལེན་པར་བྱེད་པ་དེ་བཞིན་དུ། ཚུལ་ཁྲིམས་འཆལ་པའམ། ཚུལ་ཁྲིམས་དང་ལྡན་པའང་རུང་སྟེ། དེ་དག་ལ་འདི་དག་ནི། ཉན་ཐོས་ཀྱི་དགེ་འདུན་ཡང་དག་པ་ཡིན་ནོ། །འདི་དག་ནི། དགེ་
འདུན་ཡང་དག་པ་ཡིན་ནོ། །འདི་དག་ནི། དགེ་འདུན་མཐུན་པ་ཡིན་ནོ། །སྙམ་དུ་བསམ་སྟེ། ཤའི་མིག་དང་ལྡན་པའི་དགེ་བསྙེན་དེས་དེ་དག་ལ་ཕྱག་ཀྱང་བྱའོ། །སྦྱིན་པའང་སྦྱིན་པར་བྱའོ།།
ཤའི་མིག་དང་ལྡན་པའི་དགེ་བསྙེན་གྱིས་སྤོས་ཀྱི་ཚོང་འདུས་སུ་གངས་ཀྱི་རི་ལས་བྱུང་བའི་སྨན་བཞིན་དུ་བཅོས་མ་མ་ཡིན་པ་རྟོགས་པར་དཀའོ། །དེ་བཞིན་དུ་ལྷ་རི་མིག་མེད་པ་བྱེ་བྲག་
མི་ཕྱེད་པས་གངས་ཀྱི་རི་ལས་བྱུང་བའི་སྨན་བཞིན་དུ་འདི་ནི། ཚུལ་ཁྲིམས་དང་ལྡན་པའོ། །འདི་ནི། ཚུལ་ཁྲིམས་འཆལ་པའོ། །དགེ་འདུན་འདི་དག་གཞི་ཆེན་པོ་བརྒྱད་ཀྱི་ཉེས་པ་
༄༅། །དང་བྲལ་བ་ཡིན་ནོ། །སྙམ་དུ་རྟོགས་པར་མི་ནུས་སོ། །ཚུལ་ཁྲིམས་དང་ལྡན་པ་དང༌། ཚུལ་ཁྲིམས་འཆལ་པ་ནི། ལྷའི་མིག་དང་ལྡན་པ་རྣམས་ཀྱི་ཡུལ་ཡིན་གྱི།
ཤའི་མིག་དང་ལྡན་པ་རྣམས་ཀྱི་ཡུལ་མ་ཡིན་ནོ། །གལ་ཏེ་མ་དག་པ་མཐོང་ན་ནི། ཇི་སྲིད་དུ་བཤགས་སུ་རུང་བའི་ཉེས་པ་བྱུང་བ་མ་བཤགས་ཀྱི་བར་དུ་དེ་དག་ལ་ཕྱག་ཀྱང་མི་
བྱའོ༑ ༑སྦྱིན་པའང་སྦྱིན་པར་མི་བྱའོ། །གཞི་ཆེན་པོ་བརྒྱད་ལེན་པའི་དགེ་འདུན་དག་ལ་ཇི་སྲིད་དུ་བདག་ཉིད་ཀྱི་ཉེས་པ་བཤགས་སུ་རུང་བ་བཤགས་པས་གངས་ཀྱི་རི་ལས་བྱུང་
བའི་སྨན་བཞིན་དུ་དག་པར་མ་གྱུར་གྱི་བར་དུ་གོས་ཚོན་ཅན་བགོས་པ་ཙམ་ལ་ཡིད་རྟོན་ཏེ་ཕྱག་མི་བྱའོ། །དེ་དག་ལ་སྦྱིན་པའང་སྦྱིན་པར་མི་བྱའོ། །གསོལ་པ། བཅོམ་ལྡན་
འདས༑ ལེགས་ལགས་སོ། །ལེགས་ལགས་སོ། །བཅོམ་ལྡན་འདས་ཀྱི་བཀའ་འདི་ནི། ལེགས་པར་གསུངས་པ་ལགས་ཏེ། རྡོ་རྗེ་རིན་པོ་ཆེ་བཞིན་དུ་སྤྱི་བོས་མནོད་པར་
འཚལ་ལོ། །འདི་ལ་བཅོམ་ལྡན་འདས་ཀྱིས་གསུངས་པ། དགེ་སློང་དག། བཞི་པོ་འདི་དག་ནི། རྟེན་བཞི་ཡིན་ཏེ། བཞི་གང་ཞེ་ན། དགེ་སློང་དག །ཁྱེད་ཀྱི་རྟེན་ནི། ཆོས་ཉིད་ཡིན་
གྱི༑ གང་ཟག་མ་ཡིན་ནོ། །དགེ་སློང་དག །ཁྱེད་ཀྱི་རྟེན་ནི། ངེས་པའི་དོན་ཡིན་གྱི། དྲང་བའི་དོན་མ་ཡིན་ནོ། །དགེ་སློང་དག །ཁྱེད་ཀྱི་རྟེན་ནི། ཡེ་ཤེས་ཡིན་གྱི། རྣམ་པར་ཤེས་པ་མ་
ཡིན་ནོ༑ ༑དགེ་སློང་དག །ཁྱེད་ཀྱི་རྟེན་ནི། དོན་ཡིན་གྱི། ཡི་གེ་མ་ཡིན་ནོ། །བདག་ཅག་ལ་ནི། རྟེན་བཞི་པོ་འདི་དག་ཚད་མ་ཡིན་གྱི། གང་ཟག་བཞི་པོ་རྣམས་ཚད་མ་མ་ཡིན་ནོ། །ཞེས་
བགྱི་བ་ལེགས་པར་གསུངས་སོ། །བཀའ་སྩལ་པ། ཆོས་ཉིད་ཅེས་བྱ་བ་ནི། དེ་བཞིན་གཤེགས་པའི་ཡོངས་སུ་མྱ་ངན་ལས་འདས་པའོ། །དེ་བཞིན་གཤེགས་པ་རྟག་པ་དང༌། བརྟན་པ་
དང༌། ཐེར་ཟུག་པའོ། །ཞེས་བྱ་བ་འདི་ནི། སངས་རྒྱས་ཐམས་ཅད་ཀྱི་ཆོས་ཉིད་དོ། །དེ་བཞིན་གཤེགས་པ་མི་རྟག་པར་མཐོང་བ་གང་ཡིན་པ་དེ་དག་ནི། ཆོས་ཉིད་མི་ཤེས་པ་ཡིན་
ནོ༑ ༑ཞེས་ང་ཟེར་རོ། །དེ་དག་ནི། གང་ཟག་ཡིན་ནོ། །ཞེས་ང་ཟེར་རོ། །དེ་དག་ནི། ཚད་མ་མ་ཡིན་ནོ། །ཞེས་ང་ཟེར་རོ། །དེ་མ་ཡིན་པའི་གང་ཟག་བཞི་པོ་རྣམས་ནི། ཚད་མ་ཡིན་ནོ། །
གང་ཟག་བཞི་པོ་དགོངས་པའི་ཚིག་ལ་མཁས་པ་དང༌། དེ་བཞིན་གཤེགས་པའི་གསང་བའི་དེ་ཁོ་ན་ཉིད་ཤེས་པ་དང༌། རྟག་པ་ཡིན་པར་ཤེས་པ་གང་ཡིན་པ་དེ་དག་ནི། དེ་བཞིན་
གཤེགས་པ་མི་རྟག་གོ །ཞེས་སེམས་བསྐྱེད་ཀྱང་མི་སྲིད་དེ། གང་ཟག་བཞི་པོ་དེ་དག་ནི། རང་ཉིད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཡིན་ནོ༑ ༑སེམས་ཅན་གཞན་གང་དག་དེ་བཞིན་གཤེགས་པ་རྟག་གོ །ཞེས་བྱ་བའི་དགོངས་པའི་ཚིག་ཐམས་ཅད་ལ་མཁས་པའི་གང་ཟག་དེ་དག་ཀྱང་ཚད་མ་དང་རྟེན་དུ་གྱུར་པ་ཡིན་
༄༅། །ནོ༑ ༑ཞེས་ང་ཟེར་ན། བཞི་པོ་དེ་དག་ལྟ་རྟེན་ཅི་སྟེ་མ་ཡིན། དགེ་སློང་དག །ཁྱེད་ཀྱི་རྟེན་ནི། ཆོས་ཉིད་ཡིན་ཏེ། ཉན་ཐོས་རྣམས་ཀྱི་མངོན་པར་ཤེས་པ་ཞེས་བྱ་
བའི་དོན་དང༌། ཆོས་ཉིད་མ་བརྗེད་པར་གྱིས་ཤིག་ཅེས་བྱ་བའི་དོན་ཏོ། །ཆོས་ཉིད་ཅེས་བྱ་བ་ནི། དེ་བཞིན་གཤེགས་པ་རྟག་གོ །ཞེས་བྱ་བ་ལ་བརྩོན་པར་བྱ་བ་ཡིན་གྱི་གང་ཟག་ལ་
བརྩོན་པ་མ་ཡིན་ཏེ། གལ་ཏེ་གང་ཟག་ཚུལ་ཁྲིམས་འཆལ་ལ་ཟང་ཟིང་ལ་བརྐམ་པ་རྣམས་དེ་བཞིན་གཤེགས་པ་མི་རྟག་གོ །ཞེས་ཟེར་ན། གང་ཟག་དེ་དག་ནི། ཚད་མ་མ་ཡིན་ནོ། །
ཞེས་བྱ་བའི་དོན་ཏོ། །དགེ་སློང་དག །ཁྱེད་ཀྱི་རྟེན་ནི། ངེས་པའི་དོན་ཡིན་གྱི། དྲང་བའི་དོན་མ་ཡིན་ནོ། །ཞེས་བྱ་བ་ལ། ངེས་པའི་དོན་ཞེས་བྱ་བ་ནི། ཐེག་པ་ཆེན་པོ་རྣམས་ཡིན་ཏེ།
དགོངས་པའི་ཚིག་དེ་བཞིན་གཤེགས་པའི་གསང་བ་ཐོས་ན། ཐེ་ཚོམ་གྱི་ཉེས་པ་མེད་པའི་ཕྱིར་ངེས་པ་ཞེས་བྱ་སྟེ། ཡེ་ཤེས་ཀྱི་རྒྱ་མཚོ་ཆེན་པོ་ལས་བརྒལ་ཞིང་དེ་ལས་བྱུང་ཞེས་
བྱ་བའི་དོན་ཏོ། །ངེས་པའི་ཡེ་ཤེས་ཐེག་པ་ཆེན་པོ་ཞེས་བྱ་བ་ནི། ཐོགས་པ་མེད་པའི་ཡེ་ཤེས་ལ་བྱའོ། །ཐོགས་པའི་ཡེ་ཤེས་ནི། ཉན་ཐོས་ཀྱི་ཐེག་པའོ། །ངེས་པའི་ཡེ་ཤེས་ནི།
ཡེ་ཤེས་ཆེན་པོ་དང་ཐེག་པ་ཆེན་པོ་ཞེས་བྱ་སྟེ། བྱང་ཆུབ་སེམས་དཔའ་གང་དག་དེ་བཞིན་གཤེགས་པ་རྟག་པར་ཡང་དག་པར་ཁོང་དུ་ཆུད་པ་དེ་དག་ངེས་པར་བྱེད་པས་ན། དེའི་ཕྱིར་
བྱང་ཆུབ་སེམས་དཔའ་རྣམས་ཀྱི་ཚིག་ནི། ཚད་མ་ཡིན་གྱི། དྲང་བའི་དོན་ནི། དེ་ལྟ་མ་ཡིན་ནོ། །དེ་བཞིན་གཤེགས་པ་ནི། ཤའི་སྐུ་ཡིན་ཏེ། བུད་ཤིང་ཟད་པའི་མེ་བཞིན་དུ་ཡོངས་སུ་མྱ་
ངན་ལས་འདས་སོ། །ཞེས་བྱ་བ་འདི་ནི། ཉན་ཐོས་ཀྱི་ཐེག་པ་ཡིན་ཏེ་ཚད་མ་མ་ཡིན་ནོ། །མདོ་སྡེ་དེ་དག་ནི། གདུལ་བར་བྱ་བའི་དབང་གིས་གསུངས་པ་ཡིན་ཏེ། ཉན་ཐོས་ཀྱི་ཐེག་པ་ནི།
ཡི་གེའི་ཕྱེད་སྦྱར་བ་དང་འདྲ་ཞིང་བྱེ་བྲག་ཏུ་འབྱེད་པ་ཡིན་ཏེ། སློབ་དཔོན་བྱེད་པ་མ་ཡིན་ནོ། །ཉན་ཐོས་ཀྱི་ཐེག་པ་པ་རྣམས་ནི། དྲང་བའི་དོན་རྣམས་ཀྱི་གྲངས་སུ་གཏོགས་སོ། །ཡེ་ཤེས་
ལས་གསུངས་པའི་དེ་བཞིན་གཤེགས་པའི་ཆེ་བ་ཉིད་ཁོང་དུ་མ་ཆུད་པའི་ཤེས་པ་གང་ཡིན་པ་དེ་ནི། ཉན་ཐོས་ཀྱི་ཐེག་པ་ཡིན་ཏེ། དེ་བས་ན། དྲང་བའི་དོན་ནི། ཚད་མ་མ་ཡིན་ནོ། །གང་
ཟག་བཞི་པོ་དེ་དག་ཚད་མ་མ་ཡིན་ཏེ། ངེས་པའི་དོན་ཡིན་གྱི། དྲང་བའི་དོན་མ་ཡིན་ནོ། །དེ་བས་ན། དེ་དག་ནི། རྟེན་དུ་གྱུར་པ་དང༌། ངེས་པའི་དོན་ཡིན་ནོ། །དགེ་སློང་དག །ཁྱེད་ཀྱི་རྟེན་ནི་
ཡེ་ཤེས་ཡིན་ནོ། །ཞེས་བྱ་བ་ནི། དེ་བཞིན་གཤེགས་པའི་ཚིག་བླ་དྭགས་སོ། །ཆོས་ཀྱི་སྐུ་གང་ཡིན་པ་དེ་ནི། ཚད་མ་མ་ཡིན་ནོ། །ཐབས་ཀྱི་སྐུ་གང་ཡིན་པ་དེ་ནི། ཚད་མ་མ་ཡིན་ནོ། །ཐབས་
ཀྱི་སྐུ་ལ་བལྟས་ན། དེ་བཞིན་གཤེགས་པའི་སྐུ་ལ་ཕུང་པོ་དང༌། ཁམས་དང༌། སྐྱེ་མཆེད་རྣམས་ཇི་ལྟར་ཡོད། གལ་ཏེ་མེད་ནའང་སྐུ་གདུང་གི་ཕུང་པོ་ག་ལས་འོངས། དེ་བས་ན། སྐུ་
༄༅། །གདུང་གི་ཕྱིར་འཇིག་རྟེན་ན་མཆོད་རྟེན་འབྱུང་བ་ཡོད་ཀྱི། ཆོས་ཀྱི་སྐུ་ནི། འབྱུང་བ་མེད་དོ། །དེ་བཞིན་གཤེགས་པ་ཤའི་སྐུའོ། །ཞེས་བྱ་བ་ནི། རྣམ་པར་ཤེས་པ་
བརྟག་པ་ལས་བསྟན་ཏེ། རྣམ་པར་ཤེས་པ་ནི། ཚད་མ་མ་ཡིན་ནོ། །དེ་བས་ན་རྣམ་པར་ཤེས་པ་ཚད་མ་མ་ཡིན་ཞེས་བྱའོ། །སེམས་ཅན་གང་དག་དེ་ལྟར་རྟོག་པ་དེ་དག་ཀྱང་ཚད་
མ་མ་ཡིན་ནོ། །དེ་ལྟ་བུའི་མདོ་སྡེ་རྣམས་ཀྱང་ཚད་མ་མ་ཡིན་ནོ། །དགེ་སློང་དག །ཁྱེད་ཀྱི་རྟེན་ནི། དོན་ཡིན་ནོ། །ཞེས་བྱ་བ་ལ། དོན་ཞེས་བྱ་བ་ནི། གསལ་བའི་དོན་ཏོ། །གསལ་
བའི་དོན་ཞེས་བྱ་བ་ནི། སྣང་བའི་དོན་ཏོ། །སྣང་བའི་དོན་ཞེས་བྱ་བ་ནི། ཞན་པ་མ་ཡིན་པའི་དོན་ཏོ། །ཞན་པ་མ་ཡིན་པའི་དོན་ཞེས་བྱ་བ་ནི། དེ་བཞིན་གཤེགས་པ་རྟག་ཅེས་བྱ་
བའི་ཕྱིར་རོ། །དེ་བཞིན་གཤེགས་པ་རྟག་པའི་དོན་ཞེས་བྱ་བ་ནི། ཆོས་རྟག་པའི་དོན་ཏོ། །ཆོས་རྟག་པའི་དོན་ཞེས་བྱ་བ་ནི། དགེ་འདུན་རྟག་པའི་དོན་ཏོ། དོན་ནི། དེ་ཡིན་ནོ། །རྟེན་
ནི༑ དེ་ཡིན་ནོ། །ཡི་གེ་མ་ཡིན་ནོ། །ཞེས་བྱ་བ་ནི། ཆོག་མི་ཤེས་པ་དང༌། ཡོ་བྱད་མ་བསྙུངས་པ་དང༌། འདོད་ཆེན་དང༌། ཚུལ་འཆོས་པ་དང༌། ཁ་གསག་བྱེད་པར་འགྱུར་བའི་རང་
བཟོའི་ཡི་གེ་དང༌། ཚིག་སྣ་ཚོགས་སངས་རྒྱས་ཀྱིས་གསུངས་པ་མ་ཡིན་པའི་མདོ་སྡེ་རྣམས་ཡིན་ཏེ། བཅོམ་ལྡན་འདས་ཀྱིས་བདག་ཅག་ལ་ཐུགས་བརྩེ་ནས་མུ་གེ་བྱུང་བའི་ཚེ་
ཉིད་ཀྱི་སྲས་རྣམས་ཉོན་མོངས་པར་མི་འགྱུར་བར་མཛད་པའི་ཕྱིར་བྲན་དང་བྲན་མོ་ལ་སོགས་པ་དང༌། གཡོས་སུ་བྱས་པ་རྣམ་པ་དུ་མ་གནང་བའི་བསླབ་པའི་གཞི་གསུངས་ཏེ། བྲན་
དང་བྲན་མོ་ལ་སོགས་པ་དང༌། གསེར་དང༌། དངུལ་དང༌། བ་ལང་དང༌། མ་ཧེ་དང༌། འབྲུ་རྣམས་བསྡུ་བ་དང༌། ཉོ་ཚོང་དང༌། ཞིང་རྨོ་བ་ལ་སོགས་པ་ངས་གནང་ངོ༌། །ཞེས་གསུངས་སོ། །ཞེས་
བྱ་བ་དེ་དག་ནི། ཡི་གེ་ཞེས་བྱ་སྟེ། དེ་ལྟ་བུའི་མདོ་སྡེ་དང༌། འདུལ་བ་ནི། ཚད་མ་མ་ཡིན་ནོ། །དེ་བས་ན། ཡི་གེ་འདོན་པའི་གང་ཟག་དེ་དག་ཀྱང་ཚད་མ་མ་ཡིན་ཏེ། དེའི་ཕྱིར་དགེ་སློང་
དག །ཁྱོད་ཀྱི་རྟེན་ནི། དོན་ཡིན་ནོ། །ཞེས་གསུངས་སོ། །དོན་མེད་པ་ཞེས་བྱ་བ་ནི། གཞི་གསུམ་ལ་འཇིག་པ་དང༌། ལྟུང་བ་དང༌། རྣམ་པར་འཐོར་བ་དང༌། རྣམ་པར་འཇིག་པ་ལ་སོགས་
པའི་མི་རྟག་པ་ཉིད་ཡོད་པར་ལྟ་བ་སྟེ། འདི་ནི། དོན་མེད་པ་ཞེས་བྱའོ། །འདི་ནི། ཡི་གེ་ཞེས་བྱའོ། །དེ་བས་ན། དགེ་སློང་དག །ཁྱེད་ཀྱི་རྟེན་ནི། དོན་ཡིན་གྱི། ཡི་གེ་མ་ཡིན་ནོ། །ཞེས་
གསུངས་སོ། །དོན་གྱི་ཕྱོགས་ནི། ཐེག་པ་ཆེན་པོ་པ་རྣམས་ཡིན་ཏེ། དེ་བས་ན། ཐེག་པ་ཆེན་པོ་པ་རྣམས་ཆད་མ་ཡིན་གྱི། འདི་ལས་ཕྱི་རོལ་པ་ཡི་གེ་ལ་རྟོན་པ་རྣམས་ནི། དེ་ལྟ་མ་
ཡིན་ཏེ། དེ་བས་ན། དེ་དག་ནི། རྟེན་མ་ཡིན་མོད་ཀྱི། ཤའི་མིག་དང་ལྡན་པ་རྣམས་ཀྱི་ཕྱིར་བཞག་པ་ཡིན་ནོ། །གསོལ་པ། སྔར་བཀའ་སྩལ་པའི་གང་ཟག་བཞི་པོ་རྣམས་རྟེན་དུ་གྱུར་
༄༅། །པ་ཞེས་བགྱི་ལགས་སམ། བཀའ་སྩལ་པ། རིགས་ཀྱི་བུ། དེ་ནི། དེ་བཞིན་ཏེ། བཞི་པོ་རྣམས་རྟེན་ཡིན་པར་རིག་པར་བྱའོ། །དེ་མ་ཡིན་པ་བཞི་པོ་རྣམས་
ནི༑ བདུད་ཡིན་ནོ། །ཞེས་ང་ཟེར་རོ། །གསོལ་པ། ཅིའི་སླད་དུ་དེ་ལྟ་ལགས། བཀའ་སྩལ་པ། དེ་དག་ནི། བདུད་ཀྱིས་སྨྲས་པའི་མདོ་སྡེ་འཛིན་པའི་ཕྱིར་རོ། །གསོལ་པ། དེ་ཇི་ལྟ་
བུ་ལགས། བཀའ་སྩལ་པ། ཇི་ལྟར་བདུད་བཞི་དེ་བཞིན་གཤེགས་པ་ལ་བསྔོ་ཞིང་འདི་ནི། བདུད་ཀྱིས་སྨྲས་པ་ཡིན་གྱི། སངས་རྒྱས་ཀྱིས་གསུངས་པ་མ་ཡིན་ནོ། །སེམས་ཅན་
འདི་དག་ནི། བདུད་དང་མཐུན་པར་བྱེད་པ་ཡིན་གྱི། སངས་རྒྱས་དང་མཐུན་པར་བྱེད་པ་མ་ཡིན་ནོ། །ཞེས་ཟེར་བ་ལྟ་བུའོ། །གསོལ་པ། བཅོམ་ལྡན་འདས། བདག་ནི། བདུད་ཀྱིས་
སྨྲས་པ་དང༌། སངས་རྒྱས་ཀྱིས་གསུངས་པ་ཁོང་དུ་ཆུད་པར་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བདུད་སྡིག་ཅན་གྱིས་ནི་ང་འདས་པའི་
འོག་ལོ་བདུན་བརྒྱ་ལོན་པ་ན། ངའི་བསྟན་པ་ཕྱི་ཞིང་བཤིག་པར་འགྱུར་ཏེ། དམ་པའི་ཆོས་ནུབ་པའི་ཚེ་བདུད་སྡིག་ཅན་ཟག་པ་ཅན་གྱིས་ཟག་པ་མེད་པ་ལྟ་བུར་བསྒྱུར་ཏེ། བྱ་བའི་
རྟགས་ཀྱི་ཚུལ་སྦེད་པ་བཞིན་དུ་དགེ་སློང་གི་གཟུགས་དང༌། དགེ་སློང་མའི་གཟུགས་དང༌། དགེ་བསྙེན་གྱི་གཟུགས་དང༌། དགེ་བསྙེན་མའི་གཟུགས་དང༌། རྒྱུན་དུ་ཞུགས་པ་དང༌།
ལན་གཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་དང༌། རང་སངས་རྒྱས་ཀྱི་གཟུགས་དང་སངས་རྒྱས་ཀྱི་གཟུགས་ཀྱིས་བཤིག་པར་འགྱུར་ཏེ། དེ་འདི་སྐད་ཅེས་ཟེར་ཞིང་
སངས་རྒྱས་ནི། དགའ་ལྡན་གྱི་གནས་ནས་ཤི་འཕོས་ཏེ། རྒྱལ་པོ་ཟས་གཙང་དང་བཙུན་མོ་སྒྱུ་འཕྲུལ་ཕྲད་པ་ན་ཟླ་མཚན་གྱི་བྱེ་བྲག་གིས་འཁྲིག་པའི་ཆོས་ལས་སྐྱེས་སོ། །ཞེས་ཟེར་བ་དེ་
བཞིན་གཤེགས་པ་ནི། འཁྲིག་པ་ལས་སྐྱེ་མི་སྲིད་དོ། །དེ་ལ་མི་ཙམ་དུ་སྐྱེས་པ་ལས་སྔོན་དཀའ་ཐུབ་སྤྱད་པའི་ཡོན་ཏན་གྱིས་ལྷ་དང༌། མི་དང༌། ལྷ་མ་ཡིན་དང་བཅས་པའི་འཇིག་རྟེན་
གྱིས་མཆོད་ཅིང་བརྗོད་པར་འགྱུར་ཏེ། བདག་ནི། ཆུང་མ་དང་འདོད་པ་རྣམ་པ་སྣ་ཚོགས་ཀྱི་སྦྱིན་པ་བྱིན་པས་ན། སངས་རྒྱས་སུ་གྱུར་ཏོ། །ཞེས་ཟེར་བ་དེ་ལྟ་བུ་ནི། བདུད་ཀྱིས་སྨྲས་
པའི་མདོ་སྡེ་དང༌། འདུལ་བ་ཡིན་པར་རིག་པར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ནི། གདུལ་བར་བྱ་བའི་དབང་གིས་སྐྱེས་པ་
ལྟ་བུར་བདག་ཉིད་ཀྱིས་བསྟན་མོད་ཀྱི། འཁྲིག་པ་ལས་སྐྱེས་པ་མ་ཡིན་ནོ། །དེ་བཞིན་གཤེགས་པས་ཡབ་ཡུམ་གཉིས་ཡོད་པ་ལྟ་བུར་བསྟན་པ་འདི་ནི། འཇིག་རྟེན་དང་མཐུན་པར་
མཛད་པ་ཡིན་ནོ། །ཞེས་ཟེར་བ་དེ་ལྟ་བུ་ནི། དེ་བཞིན་གཤེགས་པས་གསུངས་པའི་མདོ་སྡེ་དང༌། འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཚད་མར་
༄༅། །བྱེད་པའི་སེམས་ཅན་གང་ཡིན་པ་དེ་དག་ནི། བདུད་དང་མཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང་འདུལ་
བ་ཚད་མར་བྱེད་པ་གང་ཡིན་པ་དེ་དག་ནི། བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་འཇིག་རྟེན་དུ་བྱུང་ནས་ཕྱོགས་དང་ཕྱོགས་མཚམས་རྣམས་
སུ་གོམ་པ་བདུན་བདུན་གཤེགས་པར་བསྟན་ཏེ། །ཞེས་བྱ་བ་འདི་ནི། ཡིད་ཆེས་པར་བྱ་བར་མི་རུང་སྟེ། དེ་ལྟ་བུའི་མདོ་སྡེ་དང་འདུལ་བ་ནི། བདུད་ཀྱིས་སྨྲས་པ་ཡིན་པར་རིག་
པར་བྱའོ། །དེ་བཞིན་གཤེགས་པ་བྱུང་ནས་ཕྱོགས་དང་ཕྱོགས་མཚམས་རྣམས་སུ་གོམ་པ་བདུན་བདུན་གཤེགས་པར་བསྟན་པ་ནི། དེ་བཞིན་གཤེགས་པའི་ཐབས་ཀྱི་སྐུ་འཛིན་
པ་ཡིན་ནོ། །ཞེས་ཟེར་བ་དེ་ལྟ་བུ་ནི། སངས་རྒྱས་ཀྱིས་གསུངས་པའི་མདོ་སྡེ་དང༌། འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཚད་མར་བྱེད་པའི་
སེམས་ཅན་གང་ཡིན་པ་དེ་དག་ནི། བདུད་དང་མཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང༌། འདུལ་བ་ཚད་མར་བྱེད་པ་གང་ཡིན་པ་དེ་
དག་ནི༑ བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་ལྷ་ཁང་དུ་གཤེགས་ཏེ་བྱོན་ནས་ལྷ་རྣམས་ཀྱི་ཞབས་ལ་ཕྱག་བཞེས་ཏེ། ལྷ་རྣམས་ནི། དེ་བཞིན་
གཤེགས་པའི་ཞབས་ལ་མགོ་བོས་ཕྱག་མི་འཚལ་ལོ། །ལྷ་རྣམས་ལ་མཆོད་པ་མཛད་པའི་འོག་ཏུ་དེ་བཞིན་གཤེགས་པར་གྱུར་ནས་མངོན་པར་སངས་རྒྱས་ཏེ། ལྷ་རྣམས་ནི། སྔ། འདི་
ནི༑ འཕྱིས་པས་ན། དེའི་ཕྱིར་མངོན་པར་རྫོགས་པར་སངས་རྒྱས་པ་ཞེས་བྱའོ། །ཞེས་ཟེར་བ་ལ་སོགས་པ་ནི། བདུད་ཀྱིས་སྨྲས་པ་ཡིན་པར་རིག་པར་བྱའོ། །དེ་བཞིན་གཤེགས་པ་ལྷ་
ཁང་དུ་གཤེགས་ཏེ་བྱོན་པ་མཐོང་ནས་དབང་ཕྱུག་དང༌། དབང་ཕྱུག་ཆེན་པོ་དང༌། ཚངས་པ་དང༌། བརྒྱ་བྱིན་ལ་སོགས་པ་ལྷ་ཐམས་ཅད་ཀྱིས་ཐལ་མོ་ལེགས་པར་སྦྱར་ཏེ་ཞབས་ལ་སྤྱི་
བོས་གཏུགས་སོ། །ཞེས་ཟེར་བ་ལྟ་བུ་ནི། དེ་བཞིན་གཤེགས་པས་གསུངས་པའི་མདོ་སྡེ་དང༌། འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཚད་
མར་བྱེད་པའི་སེམས་ཅན་གང་ཡིན་པ་དེ་དག་ནི། བདུད་དང་མཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང༌། འདུལ་བ་ཚད་མར་བྱེད་པ་གང་
ཡིན་པ་དེ་དག་ནི། བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་རྒྱལ་ཚབ་ཏུ་གྱུར་ཏེ་ཉེ་འདབ་ཀྱི་རྒྱལ་པོའི་བུ་མོ་དག་དང་ལྷན་ཅིག་ཏུ་འདོད་པ་ཤིན་ཏུ་བསྟེན་
ཏོ༑ ༑ཞེས་ཟེར་བ་ལ་སོགས་པ་ནི། བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཡིན་པར་རིག་པར་བྱའོ། །དེ་བཞིན་གཤེགས་པས་ནི། ལྷའི་བུ་མོ་རམྦྷ་ལྟ་བུའི་བུད་མེད་དག་ཀྱང་
༄༅། །མཆིལ་མ་བཞིན་དུ་བོར་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །ཞེས་ཟེར་བ་དེ་ལྟ་བུའི་མདོ་སྡེ་དང༌། འདུལ་བ་ནི་སངས་རྒྱས་ཀྱིས་གསུངས་པ་ཡིན་པར་རིག་པར་
བལྟ་བར་བྱའོ། །བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི་བདུད་དང་མཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་
གསུངས་པའི་མདོ་སྡེ་དང༌། འདུལ་བ་ཚད་མར་བྱེད་པ་གང་ཡིན་པ་དེ་དག་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཀྱིས་འཇིག་རྟེན་ཐམས་ཅད་ལ་ཐུགས་བརྩེ་བའི་ཕྱིར་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་དབྱིག་དང༌། གསེར་དང༌། བྲན་དང༌། བྲན་
མོ་དང༌། བ་ལང་དང༌། མ་ཧེ་དང༌། ར་དང༌། ལུག་དང༌། བྱ་གག་དང༌། ཕག་དང༌། ཁྱི་དང༌། བྱི་ལ་དང༌། སྦྲུལ་དང༌། ནེའུ་ལེ་དང༌། ཟངས་དང༌། ལྕགས་ཟངས་དང༌།
ནོར་བུ་དང༌། མུ་ཏིག་དང༌། དུང་དང༌། མན་ཤེལ་དང༌། བྱུ་རུ་དང༌། ས་ལེ་སྦྲམ་དང༌། དངུལ་དང༌། འཚོག་ཆས་རྣམ་པ་སྣ་ཚོགས་དང༌། ཞིང་ས་དང༌། ཚོང་འདུས་དང༌། སྲང་དང༌། ཉོ་ཚོང་
བྱེད་པ་དང༌། ཁྱེའུ་དང༌། བུ་མོ་དང༌། མཛོད་དང༌། བར་བ་རྣམས་བཞེས་སོ། །ཞེས་ཟེར་བ་དེ་ལྟ་བུ་ནི་བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཡིན་པར་རིག་པར་བྱའོ། །རྒྱལ་བུ་རྒྱལ་བྱེད་
ཀྱི་ཚལ་ན་འདམ་བུ་དང༌། ཨེ་རཎྜའི་ཚལ་དང༌། ཤིང་པི་ཙུ་མརདའི་དྲུང་ན་བཞུགས་པའི་ཚེ་བྲམ་ཟེ་ལུག་དཔལ་དང༌། ཀོ་ས་ལའི་རྒྱལ་པོ་གསལ་རྒྱལ་ལས་བརྩམས་ཏེ་བཀའ་སྩལ་པ།
དབྱིག་དང༌། གསེར་དང༌། བྲན་དང༌། བྲན་མོ་དང༌། བ་ལང་དང༌། མ་ཧེ་དང༌། ར་དང༌། ལུག་དང༌། བྱ་གག་དང༌། ཕག་དང༌། ཁྱི་དང༌། བྱི་ལ་དང༌། སྦྲུལ་དང༌། ནིའུ་ལེ་དང༌། ཟངས་དང༌། ལྕགས་
ཟངས་དང༌། ནོར་བུ་དང༌། མུ་ཏིག་དང༌། དུང་དང༌། མན་ཤེལ་དང༌། བྱུ་རུ་དང༌། ས་ལེ་སྦྲམ་དང༌། དངུལ་དང༌། ནོར་དང༌། འཚོག་ཆས་རྣམ་པ་སྣ་ཚོགས་འཆང་བ་དང༌། ཞིང་ས་དང༌། ཚོང་
འདུས་དང༌། སྲང་དང༌། ཉོ་ཚོང་བྱེད་པ་དང༌། ཁྱེའུ་དང༌། བུ་མོ་དང༌། མཛོད་དང༌། བང་པ་འཆང་བ་དང༌། རང་ལག་དར་ཏེ་གཡོས་བྱེད་པ་དང༌། འཚོད་པ་དང༌། འཚོད་དུ་འཇུག་པ་དང༌། ལྟས་
དང༌། ཡན་ལག་གི་རིག་པ་དང༌། མོ་ཡིག་དང༌། ཁ་དོག་འདོད་པ་དང༌། བྱ་ལྟས་ཤེས་པ་དང༌། སྒྲ་གཅན་དང༌། ཉི་མ་དང༌། ཟླ་བ་དང༌། པ་བ་སངས་དང༌། གཟའ་ལྷག་རྒྱུ་བ་དང༌། མེ་ཏོག་གི་
ཤིང་རྟ་དང༌། ལག་སྲུབ་ལྟ་བ་དང༌། རྨི་ལྟས་དང༌། སྐྱེས་པ་དང༌། བུད་མེད་དང༌། མ་ནིང་གི་མཚན་མ་ལྟ་བ་དང༌། སྒྱུ་རྩལ་དྲུག་ཅུ་རྩ་བཞི་དང༌། རིག་པའི་གནས་བཅོ་བརྒྱད་དང༌། མཁན་
བཟོ་པ་དང༌། བཟོའི་ལས་ཐམས་ཅད་སྟོན་པ་དང༌། སྒྲུབ་གཏམ་བྱེད་པ་དང༌། སྤོས་ཀྱི་ཕྱེ་མས་འདེབས་པ་དང༌། མེ་ཏོག་དང༌། བདུག་པ་དང༌། སྤོས་དང༌། མེ་ཏོག་ཕྲེང་དང༌། བྱུག་པ་
༄༅། །འཆང་བ་དང༌། མགོ་བོ་ལ་འོ་བྱེད་པ་དང༌། ཚུལ་འཆོས་པ་དང༌། ཁ་གསག་བྱེད་པ་དང༌། ཆོག་མི་ཤེས་པ་དང༌། འདོད་ཆེན་ཅན་དང༌། འདུ་འཛི་ལ་དགའ་བ་
དང༌། སྨྲ་འདོད་པ་དང༌། ནོར་དང༌། འབྲུ་དང༌། ཤ་དང༌། ཉ་ཤ་དང༌། དུག་སྦྱོར་བ་དང༌། སྤོས་ཀྱི་ཏིལ་མར་དང༌། སྨན་གྱི་སྡུ་གུ་དང༌། གདུགས་དང༌། ལྷམ་དང༌། ཏ་ལའི་ལོ་མའི་
བསིལ་ཡབ་དང༌། ཆབ་སྣོད་དང༌། བུ་དོན་དང༌། བེང་དཔུང་འཆང་བ་དང༌། ཤིང་ཏོག་སྡུད་པ་དང༌། སོ་རྩི་དང༌། སྨན་མར་དང༌། བཙོ་བའི་ཕྱེ་མ་བཟང་པོ་དང༌། ཀ་ཀོ་ལ་དང༌། འབྲས་
བུ་ཚ་བ་བསྟེན་པ་དང༌། རྒྱལ་པོ་བསྟེན་པ་དང༌། གཞན་ལ་བསྟེན་པ་དང༌། དྲོད་མི་ཐུབ་པ་དང༌། མི་སྨྲ་བ་དང༌། བུད་མེད་ལྟར་རྟོག་པའི་ཤས་ཆེ་བ་དང༌། མང་དུ་སྨྲ་བ་དང༌། ངུ་བ་དང༌།
བཟང་ངན་དཔྱོད་པ་དང༌། སུན་འབྱིན་པ་དང༌། འགྲོས་འཆོས་པ་དང༌། གོས་དཀར་པོ་དང༌། ཨརྨོ་ནི་ག་དང༌། ཁང་བཟང་དང༌། གཙང་ཁང་ཕྱུར་བུའི་ལས་ལ་སོགས་པ་བྱེད་པ་དང༌།
རུང་བ་མ་ཡིན་པ་དང༌། རྫས་ངན་པ་ཡོངས་སུ་འཛིན་པ་དང༌། སྦྱིན་པ་པོའི་བསྔགས་པ་བརྗོད་པ་དང༌། ཆང་བསྟེན་པ་དང༌། སྨད་ཚོང་མའི་ཁྱིམ་དུ་འགྲོ་བ་རྣམས་དང༌། དེ་ལྟ་བུ་བྱེད་
པ་དམ་པ་མ་ཡིན་པ་ཚུལ་ངན་པ་དང་ལྡན་པ་དེ་དག་ལ་ནི། གོས་དཀར་པོ་དག་བྱིན་ལ་འཇིག་རྟེན་པའི་ལས་རྣམས་བྱེད་དུ་གཞུག་པར་ངས་གནང་ངོ༌། །ཡང་ན་འབྲས་སཱ་ལུའི་
ཞིང་གི་རྔོ་བསལ་བ་བཞིན་དུ་ཡུལ་ཕྱོགས་ནས་བསྐྲད་པར་ངས་གནང་ངོ༌། །ཞེས་ཟེར་བ་དེ་ལྟ་བུའི་མདོ་སྡེ་དང༌། འདུལ་བ་ནི། སངས་རྒྱས་ཀྱིས་གསུངས་པ་ཡིན་པར་རིག་པར་བྱའོ། །
བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི། བདུད་དང་མཐུན་པར་བྱེད་པ་ཡིན་པར་རིག་པར་བྱའོ། །སངས་རྒྱས་ཀྱིས་གསུངས་
པའི་མདོ་སྡེ་དང༌། འདུལ་བ་ཚད་མར་བྱེད་པ་གང་ཡིན་པ་དེ་དག་ནི། བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་པ་ནི། ཚངས་པ་དང༌། འབྱུང་པོ་དང༌། སྐེམ་བྱེད་
དང༌། གཞོན་ནུ་དང༌། འཇིག་རྟེན་གྱི་མེས་པོ་དང༌། ཀ་ཏ་ཡ་ན་ལ་སོགས་པའི་ལྷའི་གནས་ཐམས་ཅད་དུ་དེ་དག་གི་རྒྱགས་པ་གཞོམ་པའི་ཕྱིར་མི་གཤེགས་ཏེ་གཤེགས་མི་སྲིད་དོ། ཡ་
མཚན་ཅན་ཐམས་ཅད་ཀྱི་ནང་དུ་རབ་ཏུ་མི་འབྱུང་ངོ༌། །སེམས་ཅན་ཐམས་ཅད་ཀྱི་ཀུན་ཏུ་རྟོག་པའི་སྟོན་པ་མ་ཡིན་ནོ། །གསང་སྔགས་དང༌། རིག་སྔགས་ཐམས་ཅད་མི་འཆང་ངོ༌། །ཁོལ་
པོ་དང༌། བྲན་དང༌། བྲན་མོ་དང༌། འདུམ་པ་དང༌། འཐབ་པ་སྦྱོར་བ་མི་མཛད་དོ། །སྐྱེས་པ་དང༌། བུད་མེད་དང༌། སྨན་དང༌། རྒྱལ་པོ་དང༌། བློན་པོ་གཅེས་པར་མི་མཛད་དོ། །གལ་ཏེ་དེ་བཞིན་
གཤེགས་པ་དེ་ལྟ་བུར་གྱུར་ན། དེ་བཞིན་གཤེགས་པའང་མ་ཡིན་ཏེ། ལོག་པར་ལྟ་བ་ཞེས་བརྗོད་པར་བྱའོ། །དེ་བཞིན་གཤེགས་པ་ནི། སྟེའུ་དང་ཙནྡན་དུ་མཚུངས་ཏེ། སུ་ལའང་ཚར་
༄༅། །གཅོད་པར་མི་མཛད། ཕན་འདོགས་པའང་མི་མཛད་དོ། །དེ་བས་ན། དེ་བཞིན་གཤེགས་པ་ནི། དབུ་མའི་ལམ་གཟིགས་པ་ཞེས་བྱའོ། །ཞེས་ཟེར་བ་དེ་ལྟ་བུ་
ནི༑ མགོ་རྨོངས་པར་བྱེད་པའི་མདོ་སྡེ་བདུད་ཀྱིས་སྨྲས་པ་ཡིན་པར་རིག་པར་བྱའོ། །དེ་བཞིན་གཤེགས་པ་ནི། ལྷའི་གནས་ཐམས་ཅད་དུ་གཤེགས་སོ། །ཡ་མཚན་ཅན་ཐམས་
ཅད་ཀྱི་ནང་དུ་རབ་ཏུ་འབྱུང་ངོ༌། །སེམས་ཅན་ཐམས་ཅད་ཀྱི་ཀུན་ཏུ་རྟོག་པ་སྟོན་ཏོ། །གསང་སྔགས་དང༌། རིག་སྔགས་དང༌། སྨན་ནོ་ཅོག་ལྟ་བུར་གྱུར་པ་དེ་དག་སྦྱོར་བར་མཛད་དོ། །
འདུན་མའི་ནང་དང༌། རོལ་མོའི་གནས་སུ་གཤེགས་སོ། །བྲན་དང༌། བྲན་མོ་དང༌། སེམས་ཅན་ཐམས་ཅད་སྡུད་པར་མཛད་དོ། །གཞོན་ནུ་དང༌། གཞོན་ནུ་མ་དང༌། བཙུན་མོའི་
འཁོར་དང༌། ཕོ་བྲང་འཁོར་གྱི་མི་དང༌། ཡུལ་མི་དང༌། ཁྱིམ་བདག་དང༌། བྲམ་ཟེ་དང༌། ཡི་དྭགས་དང༌། མགོན་མེད་པ་དང༌། སྐྱེས་པ་དང༌། བུད་མེད་རྣམས་ཀྱི་ལུས་རྣམ་པ་སྣ་
ཚོགས་ཀྱང་སྟོན་ལ། འཇིག་རྟེན་ཐམས་ཅད་སྡུག་བསྔལ་ལས་བསྒྲལ་བའི་ཕྱིར་དེ་དང༌། དེར་གཤེགས་པ་ནའང་པདྨ་ཆུས་མི་ཆགས་པ་བཞིན་དུ་ལྟ་བ་རྣམས་ཀྱིས་གོས་པར་
མི་འགྱུར་བར་ཁོང་དུ་ཆུད་པ་སྟེ། འདི་ནི། འཇིག་རྟེན་ཐམས་ཅད་དང་མཐུན་པར་མཛད་པ་ཡིན་ནོ། །ཞེས་ཟེར་བ་དེ་ལྟ་བུ་ནི། སངས་རྒྱས་ཀྱིས་གསུངས་པའི་མདོ་སྡེ་དང༌། འདུལ་བ་
ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དག་ནི། བདུད་དང་མཐུན་པར་བྱེད་པ་ཡིན་པར་རིག་པར་བྱའོ། །སངས་
རྒྱས་ཀྱིས་གསུངས་པའི་མདོ་སྡེ་དང༌། འདུལ་བ་ཚད་མར་བྱེད་པ་གང་ཡིན་པ་དེ་དག་ནི། བྱང་ཆུབ་སེམས་དཔའ་ཡིན་པར་རིག་པར་བྱའོ། །འདི་ལྟར་ངེད་ཀྱི་འདུལ་བ་ལས་ནི། སྡིག་པ་
དང༌། ཉེས་བྱས་དང༌། ཉེས་པ་ཡང་བ་དང༌། ལྕི་བ་དང༌། ཉེས་པ་སྦོམ་པོ་དག་རང་བཞིན་གྱིས་སྤང་བར་བྱ་བ་ཡིན་པའི་ཕྱིར་སྤང་བར་བཅོམ་ལྡན་འདས་ཀྱི་གསུངས་ཏེ། དེ་ལྟ་བུ་ནི།
ངེད་ཀྱི་འདུལ་བ་དང་མཐུན་པ་ཡིན་གྱི། ཁྱེད་ཀྱི་འདུལ་བ་དང་མཐུན་པ་མ་ཡིན་ནོ། །ཅིའི་ཕྱིར་བདག་ཅག་ཉིད་ཀྱི་འདུལ་བ་ལས་འགལ་བར་བྱས་ཏེ་ཁྱེད་ཀྱི་འདུལ་བ་བླང་བར་བྱ།
ཁྱེད་ཀྱི་འདུལ་བ་ནི། རང་བཟོ་བྱས་པ་ཡིན་ལ། ངེད་ཀྱི་འདུལ་བ་ནི། བཅོམ་ལྡན་འདས་ཀྱིས་གསུངས་པ་ཡིན་ནོ། །བཅོམ་ལྡན་འདས་ཀྱིས་ནི། གསུང་རབ་
ཡན་ལག་དགུ་ལས་ཕྱག་རྒྱ་དགུ་མཛད་ཅེས་གྲག་སྟེ། བཅོམ་ལྡན་འདས་ཀྱིས་ཕྱག་རྒྱ་དགུ་པོ་དང་དེ་རྣམས་ཀྱིས་ཕྱག་རྒྱས་བཏབ་བོ། །བདག་ཅག་གིས་ནི། ཤིན་ཏུ་རྒྱས་པ་ཞེས་བྱ་བའི་
སྒྲ་ཚིག་དང༌། ཡི་གེ་དང༌། ཐིག་ལེ་གཅིག་ཀྱང་སྔོན་མ་ཐོས་སོ། །བཅོམ་ལྡན་འདས་ཀྱིས་མདོ་སྡེ་དུ་ཞིག་གསུངས། མདོ་སྡེ་བཅུ་ཞིག་གསུངས་སམ། བདག་ཅག་གི་གསུང་རབ་
༄༅། །ལ་ཤིན་ཏུ་རྒྱས་པ་ཞེས་བྱ་བའི་སྒྲའང་མེད་དོ། །འདི་དག་ནི། མ་ལུས་པར་ལྷས་བྱིན་གྱིས་བྱས་པ་ཡིན་ཏེ། དོན་ཐམས་ཅད་མ་རུངས་པར་བྱས་ནས་
རྩོད་པར་བྱེད་དེ། ཤིན་ཏུ་རྒྱས་པ་ནི། རང་གིས་རང་བཟོར་བྱས་པས་མི་བཙན་གྱི། ངེད་ཀྱི་འདུལ་བ་ནི། དམ་པ་ཡིན་ནོ། ངེད་ཀྱི་ནི། འདི་ལྟ་བུ་ཡིན་ནོ། །ངེད་ཀྱི་ནི། འདི་ལྟ་བུ་
ཡིན་ནོ༑ ༑ཞེས་བསྟན་པ་མ་རུང་བར་བྱ་བའི་ཕྱིར་སྦྱར་བ་ཤིན་ཏུ་རྒྱས་པ་སྤོང་བར་བྱེད་པ་འདི་ནི། བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཡིན་པར་རིག་པར་བྱའོ། །མ་
འོངས་པའི་དུས་ནའང་ངེད་ཀྱི་འདུལ་བ་ནི། འདི་ལྟ་བུ་ཡིན་ནོ། །ངེད་ཀྱི་འདུལ་བ་ལས་ནི། བཅོམ་ལྡན་འདས་ཀྱིས་འདི་སྐད་ཅེས་གསུངས་སོ། །ཞེས་ལོག་པའི་འདུལ་བ་དང༌།
མདོ་སྡེ་སྨྲ་བའི་དགེ་སློང་དག་འབྱུང་བར་འགྱུར་རོ། །ངས་ནི། ཐེག་པ་ཆེན་པོ་གསུང་རབ་ཡན་ལག་དགུ་ལས་རྒྱུད་ཕྱི་མ་ཐེག་པ་ཆེན་པོ་ཤིན་ཏུ་རྒྱས་པར་བསྟན་ཏོ། །ངའི་དྲུང་
ན་ལྷན་ཅིག་ཏུ་སྒྲུབ་པ་གང་ཡིན་པ་དེ་དག་ནི། ལོག་པའི་འདུལ་བ་དང༌། ལྟ་བ་སྨྲ་བ་མ་ཡིན་ནོ། །ངའི་བསྟན་པ་ནི། རུང་བ་མ་ཡིན་པ་ཐམས་ཅད་སྤངས་པ། རྣམ་པར་དག་པ། དྲི་
མ་མེད་པ། ཟླ་བ་ཉ་བ་དང་འདྲ་བ་ཡིན་ཏེ། མདོ་སྡེ་རེ་རེ་དང༌། འདུལ་བ་རེ་རེ་དང༌། བསླབ་པའི་གཞི་རེ་རེའི་དོན་གངྒཱའི་ཀླུང་གི་བྱེ་མ་སྙེད་དུ་བསྟན་ལ་དེ་དག་ཀྱང་སྒྲའི་རྣམ་གྲངས་
རྣམ་པ་སྣ་ཚོགས་ཀྱིས་བསྟན་ཏོ། །ངེད་ཀྱི་འདུས་བ་ལ་བསླབ་པའི་གཞི་གང་དང་གང་མེད་པ་དེ་དང་དེ་དག་ནི། བཅོམ་ལྡན་འདས་ཀྱིས་མ་གསུངས་སོ། །ཞེས་དེ་སྐད་ཟེར་བ་གང་ཡིན་པ་
དེ་དང་དེ་དག་ལ་ནི། ཉེས་པ་འབྱུང་བར་འགྱུར་རོ། །གང་དག་བདག་ཅག་གིས་གཟུང་བས་མི་ལང་སྟེ། ཆོག་ཤེས་པ་དང༌། ཡོ་བྱད་བསྙུངས་པ་ལྷུར་ལེན་པ་དང༌། སངས་རྒྱས་ཀྱིས་གསུངས་
པ་ཡིན་པར་འོས་པ་གང་དང༌། གང་ཡིན་པ་དེ་དང༌། དེ་དག་ནི། སེམས་ཅན་ཐམས་ཅད་ལ་ཕན་པ་དང༌། ཐུགས་བརྩེ་བའི་ཕྱིར་ཐེག་པ་ཆེན་པོའི་ཚུལ་དུ་གསུངས་པས་ན། བདག་ཅག་
གིས་ཀྱང་ཤིན་ཏུ་རྒྱས་པ་ཞེས་བྱ་བ་བཤད་པར་བྱའོ། །ཞེས་ད་ལྟར་དམ་འཆའ་བར་བྱེད་པ་གང་ཡིན་པ་དེ་དག་གི་སྟོན་པ་ནི། ང་ཡིན་གྱི། དེ་མ་ཡིན་པ་རྣམས་ཀྱི་སྟོན་པ་ནི། ང་མ་ཡིན་
ནོ༑ ༑དེ་དག་ནི། ངའི་ཕྱིར་རབ་ཏུ་བྱུང་བ་མ་ཡིན་ཏེ། དེ་དག་ཐམས་ཅད་ནི། མུ་སྟེགས་པའི་བུ་ཡིན་ནོ། །ཞེས་ཟེར་བ་དེ་ལྟ་བུ་སངས་རྒྱས་ཀྱིས་གསུངས་པའི་མདོ་སྡེ་དང༌། འདུལ་བ་
ཡིན་པར་རིག་པར་བྱའོ། །ཞེས་དེ་སྐད་སྨྲོས་ཤིག་བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི། བདུད་དང་མཐུན་པར་བྱེད་པ་ཡིན་
པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང༌། འདུལ་བ་ཚད་མར་བྱེད་པ་གང་ཡིན་པ་དེ་དག་ནི། བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་བཞིན་གཤེགས་
༄༅། །པ་ནི༑ ཡོན་ཏན་དཔག་ཏུ་མེད་པ་དང་ལྡན་པ་མ་ཡིན་ནོ། །མི་རྟག་གོ། ཡོངས་སུ་མྱ་ངན་ལས་འདས་པའོ། །སྟོང་པར་གྱུར་པའོ། །བདག་མེད་པ་སྟོན་པའོ། །འཇིག་
རྟེན་དང་མཐུན་པར་བྱེད་པ་མ་ཡིན་ནོ། །ཞེས་ཟེར་བ་དེ་ལྟ་བུའི་མདོ་སྡེ་ནི། བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཡིན་པར་རིག་པར་བྱའོ། །སངས་རྒྱས་བཅོམ་ལྡན་འདས་ནི།
བསམ་གྱིས་མི་ཁྱབ་ཅིང་ཡོན་ཏན་བསམ་གྱིས་མི་ཁྱབ། དཔག་ཏུ་མེད་གྲངས་མེད་པ་དང་ལྡན་པ་ཡིན་ནོ། །རྟག་པའོ། །བརྟན་པའོ། །ཐེར་ཟུག་པའོ། །ཞེས་ང་ཟེར་རོ། །ཞེས་དེ་སྐད་
སྨྲ་བ་ལ་ནི། ཏ་ལའི་མགོ་བཅད་པ་བཞིན་དུ་ཕམ་པར་གྱུར་པ་ཞེས་བརྗོད་པར་མི་བྱའོ། །ཕམ་པའི་ཆོས་བཞི་ཞེས་བྱ་བ་ནི། བཅོམ་ལྡན་འདས་ཀྱིས་གསུངས་པ་རྣམ་པ་བཞི་ཆར་
ལྟ་ཅི་སྨོས་ཏེ། ཕམ་པ་བཞིའི་ནང་ནས་ཕམ་པ་གང་ཡང་རུང་བ་ཞིག་བྱུང་ནའང་རྡོ་ཆག་པའི་འཕྲོ་བཞིན་དུ་འགྱུར་རོ། །ཞེས་རྒྱུད་ཕྱི་མའི་ཡང་ཕྱི་མ་གཞུང་རྫོགས་པ་ལས་མིའི་ཆོས་
ལས་བླ་མར་གྱུར་པའི་སྐབས་ནས་གསུངས་པ་ཡིན་ནོ། །དེ་ཅིའི་སླད་དུ་ཞེ་ན། བདག་ནི། འབྲས་བུ་ཐོབ་པ་ཡིན་ནོ། །ཞེས་འཆབ་པའི་དོན་ཏོ། །རྒྱུད་ཕྱི་མའི་ཡང་ཕྱི་མ་ལས་མིའི་
ཆོས་སུ་དབབ་པ་ངས་གསུངས་པ་ནི། འདི་ན་དགེ་སློང་འདོད་པ་ཉུང་བ་ཆོག་ཤེས་པ་ལ་ལ་ཞིག་གནས་པ་དེ་རྒྱལ་པོའམ། རྒྱལ་པོའི་བློན་པོ་ཆེན་པོ་དག་གིས་མཐོང་ན། འབྲས་བུ་
ཐོབ་པ་ཡིན་པར་སེམས་ཏེ། ཚིགས་སུ་བཅད་པའི་ཚུལ་སྦྱར་བའི་ཐབས་སྣ་ཚོགས་ཀྱིས་བསྟོད་པར་བྱེད་ཅིང་བཙུན་པ་འདི་ནི། ལུས་དང་བྲལ་ཏེ་ཤི་བའི་འོག་ཏུ་སངས་རྒྱས་སུ་འགྱུར་རོ། །
ཞེས་ཟེར་བ་དགེ་སློང་དེས་དེ་དག་ལས་མངོན་སུམ་དུ་ཐོས་ནས་འདི་སྐད་ཅེས་ཟེར་ཏེ། འབྲས་བུ་མ་ཐོབ་པའི་གང་ཟག་ལ་འབྲས་བུ་ཐོབ་པ་བཞིན་དུ་བསྟོད་པར་མ་བྱེད་ཅིག །ཆེ་འདོད་པ་
ནི༑ སངས་རྒྱས་ཀྱིས་སྨད་དོ། །ཅང་མི་སྨྲ་བ་ནི། སངས་རྒྱས་ཀྱིས་བསྔགས་སོ། །བདག་ནི། ཇི་སྲིད་འཚོའི་བར་དུའང་ཆོས་འདི་ལྟ་བུ་ལ་དགའ་བ་མ་ཡིན་གྱི། འདི་ལྟར་བདག་ཆེ་འདོད་
པ་ལ་གཞག་པར་མ་བྱེད་ཅིག །བདག་ནི། འབྲས་བུ་ཐོབ་པ་མ་ཡིན་པར་བདག་ཉིད་ཀྱིས་ཤེས་སོ། །ཞེས་ཟེར་བ་དང༌། རྒྱལ་པོ་ཤེས་རབ་ཅན་གྱིས་བཙུན་པ་འདི་ནི། འབྲས་བུ་ཐོབ་
པ་སྟེ། སངས་རྒྱས་ཡིན་ནོ། །སྙམ་ནས་འཇིག་རྟེན་ཐམས་ཅད་དུ་མཁས་པ་རྣམས་ཀྱི་ནང་དུ་སྒྲོག་པར་བྱེད་ཅིང་བཙུན་མོའི་འཁོར་དང་སྲས་རྣམས་ལའང་སྙན་དངགས་བཞིན་དུ་མདོ་རྣམས་
སློབ་ཏུ་འཇུག་སྟེ། དེ་ལྟར་བྱས་ནའང་བསྟོད་པར་བྱེད་པའི་རྒྱལ་པོ་དང༌། བློན་པོ་རྣམས་ལ་བསོད་ནམས་མང་དུ་འཕེལ་བར་འགྱུར་རོ། །དགེ་སློང་དེ་ནི། ཚངས་པར་སྤྱོད་པ་ཚུལ་ཁྲིམས་
དང་ལྡན་པ་ཙམ་དུ་ཟད་དེ། དགེ་སློང་དེའང་ཕམ་པ་བྱུང་བ་མ་ཡིན་ནོ། །ཞེས་ང་ཟེར་རོ། །མིའི་ཆོས་ལས་བླ་མར་གྱུར་པ་བྱེད་པའང་མ་ཡིན་ཏེ། ཚུལ་ཁྲིམས་དང་ལྡན་པ་འདོད་པ་ཉུང་བ་
༄༅། །ཞེས་ང་ཟེར་རོ། །དེ་ལྟར་བསྟོད་དུ་ཟིན་ཀྱང་རང་གི་དད་པའི་སེམས་དང་བས་ན་སངས་རྒྱས་ཀྱི་གསུང་རབ་དང་མཐུན་པར་བྱེད་པའི་དགེ་སློང་ལ་ནི། ཉེས་པ་ཅུང་
ཟད་ཀྱང་མེད་དོ། །ཞེས་ཟེར་རོ། །གཞན་ཡང་འདི་ན་དགེ་སློང་ལ་ལ་དེ་བཞིན་གཤེགས་པའི་སྙིང་པོའི་མདོ་སྡེ་ཆེན་པོ་སྟོན་པར་བྱེད་དོ། །སེམས་ཅན་ཐམས་ཅད་ལ་ནི། སངས་
རྒྱས་ཀྱི་ཁམས་ཡོད་ལ་ཁམས་དེ་རང་རང་གི་ལུས་ལ་ཚང་སྟེ། སེམས་ཅན་རྣམས་ཀྱིས་ཉོན་མོངས་པའི་རྣམ་པ་ཟད་པར་བྱས་ནས་སངས་རྒྱས་སུ་འགྱུར་ཏེ། འདོད་ཆེན་པ་ནི། མ་
གཏོགས་སོ། །དེ་ལ་རྒྱལ་པོའམ་རྒྱལ་པོའི་བློན་པོ་འགའ་ཞིག་འདི་སྐད་ཅེས་ཟེར་ཏེ། དགེ་སློང་ཁྱོད་སངས་རྒྱས་སུ་འགྱུར་རམ་མི་འགྱུར། སངས་རྒྱས་ཀྱི་ཁམས་ཁྱོད་ལ་ཡོད་
དམ་མེད་ཅེས་ཟེར་བ་ལ། དགེ་སློང་དེ་ན་རེ། ཚེ་དང་ལྡན་པ། བདག་སངས་རྒྱས་སུ་འགྱུར་རམ་མི་འགྱུར་བ་ལྟ་སུས་ཤེས་མོད་ཀྱི། འོན་ཀྱང་བདག་གི་ལུས་ལ་སངས་རྒྱས་ཀྱི་
ཁམས་ནི། ཡོད་དོ། །ཞེས་ཟེར་རོ། །དེ་ནས་དེས་དགེ་སློང་དེ་ལ་སྨྲས་པ། དགེ་སློང་ཁྱོད་འདོད་ཆེན་པ་ཁོ་ན་མ་ཡིན་ན། བདག་ནི། སངས་རྒྱས་སུ་འགྱུར་རོ། །སྙམ་དུ་སོམས་ཤིག །
དེ་ནས་དགེ་སློང་དེས་དེ་ལ་སྨྲས་པ། ཚེ་དང་ལྡན་པ། ཆོས་དེ་ནི། བདག་གི་ལུས་ལ་གོར་མ་ཆག་པར་ཡོད་དོ། །ཞེས་གལ་ཏེ་དེ་སྐད་ཟེར་ན། དགེ་སློང་དེ་ལ་མིའི་ཆོས་ལས་བླ་མར་
གྱུར་པའི་ཉེས་པ་ཡོད་ཅེས་བྱའམ། མེད་ཅེས་བྱ་ཞེ་ན། ཁམས་ཡོད་དུ་ཟིན་ཀྱང་སྦྱིན་པ་དང༌། ཚུལ་ཁྲིམས་དང༌། ཤེས་པ་དང༌། ཆོས་དང་ལྡན་པ་རྣམས་ལ་ཡོད་པར་ཟད་དོ། །ཞེས་
བརྗོད་པར་བྱའོ། །གཞན་ཡང་དགེ་སློང་རབ་ཏུ་བྱུང་ནས་སེམས་པར་བྱེད་དེ། ཀྱེ་མ་བདག་སངས་རྒྱས་སུ་འགྱུར་རམ་མི་འགྱུར་སྙམ་པའམ། བདག་གིས་ནི། སངས་རྒྱས་ཉིད་ཐོང་བར་
འགྱུར་བར་མངོན་ནོ། །སྙམ་དུ་སེམས་ན་འབྲས་བུ་མ་ཐོབ་ཏུ་ཟིན་ཀྱང་བསོད་ནམས་མང་པོ་འཕེལ་བར་འགྱུར་རོ། །གལ་ཏེ་དེ་ལྟ་མ་ཡིན་ན། དགེ་སློང་ཐམས་ཅད་ཀྱང་མིའི་ཆོས་ལས་བླ་
མར་འགྱུར་རོ། །དེ་ཅིའི་ཕྱིར་ཞེ་ན། ངས་བསྐལ་པ་བྱེ་བ་ཕྲག་བརྒྱད་ཅུའི་བར་དུ་རུང་བ་མ་ཡིན་པའི་དངོས་པོ་ཡོངས་སུ་འཛིན་པ་སྤངས་ཏེ། ཆོག་ཤེས་པ་དང༌། ཡོ་བྱད་བསྙུངས་པའི་
མཆོག་ལ་གནས་ནས་དེ་བཞིན་གཤེགས་པའི་སྙིང་པོ་ཡོད་པར་བསྒོམས་ཏེ་མངོན་པར་རྫོགས་པར་སངས་རྒྱས་ནས་ཆོས་ཀྱི་ཕུང་པོ་འབུམ་སྟོན་པའི་སངས་རྒྱས་བཅོམ་ལྡན་འདས་
སྙིང་རྗེ་ཆེན་པོ་དང་ལྡན་པར་གྱུར་པའི་ཕྱིར་རོ། །ཞེས་ཟེར་བ་དེ་ལྟ་བུ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་པའི་མདོ་སྡེ་དང༌།
འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི། བདུད་དང་མཐུན་པར་བྱེད་པ་ཡིན་པར་རིག་
༄༅། །པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང༌། འདུལ་བ་ཚད་མར་བྱེད་པ་གང་ཡིན་པ་དེ་དག་ནི། བྱང་ཆུབ་སེམས་དཔའ་ཡིན་པར་རིག་པར་བྱའོ། །ཕམ་པ་
བཞིའང་མེད། དགེ་འདུན་གྱི་ལྷག་མ་བཅུ་གསུམ་ཡང་མེད། མ་ངེས་པ་གཉིས་ཀྱང་མེད། སྤང་བའི་ལྟུང་བྱེད་སུམ་ཅུའང་མེད། ལྟུང་བྱེད་འབའ་ཞིག་པ་དགུ་བཅུ་རྩ་གཅིག་
ཀྱང་མེད། སོ་སོར་བཤགས་པར་བྱ་བ་བཞིའང་མེད། བསླབ་པར་བྱ་བ་མང་པོའང་མེད། རྩོད་པ་ཞི་བར་བྱ་བའི་ཆོས་བདུན་ཡང་མེད། ཉེས་བྱས་རྣམས་ཀྱང་མེད། ཉེས་པ་
སྦོམ་པོ་རྣམས་ཀྱང་མེད། མཚམས་མེད་པ་དང༌། འདོད་ཆེན་པའང་མེད་དེ། སྔར་སྨོས་པའི་བསླབ་པའི་གཞི་དེ་རྣམས་མེད་བཞིན་དུ་གལ་ཏེ་འགལ་བར་བྱས་པས་དགེ་སློང་
དག་སེམས་ཅན་དམྱལ་བར་འགྲོ་བར་འགྱུར་ན། དེ་དག་ནི། མུ་སྟེགས་ཅན་ཡིན་ནོ། །གང་དག་ལ་དེ་རྣམས་མེད་ན། དེ་ལྟ་ན་ནི། མཐོ་རིས་སུ་འགྲོ་བར་འགྱུར་རོ། །བཅོམ་
ལྡན་འདས་ཀྱིས་ནི། བསྡིགས་པའི་ཕྱིར་འདུལ་བ་ལས་བསླབ་པའི་གཞི་རྣམས་བཀའ་སྩལ་ཏོ། །མི་ཚངས་པར་སྤྱོད་པ་བསྟེན་པར་འདོད་པ་གང་ཡིན་པ་དེ་ནི། གོས་ཚོན་
ཅན་དང༌། ཆོས་གོས་སྤངས་ཏེ་གོས་དཀར་པོ་བགོས་ནས་དེ་ལྟ་བུ་བྱས་པའི་འོག་ཏུ་དེ་བདག་ཉིད་ཀྱིས་བསམ་པ། བདག་གིས་ནི། རང་གི་ཡོན་ཏན་ཆུང་བའི་ཕྱིར་མནོག་ཆུང་བའི་འདོད་
པ་བསྟེན་གྱིས་མེད་དོ། །འོན་ཀྱང་བཅོམ་ལྡན་འདས་བཞུགས་པའི་ཚེ་ཡང་དགེ་སློང་དག་གིས་འདོད་པ་རྣམས་བསྟེན་ནས་མཐོ་རིས་དང་ཐར་པ་ཐོབ་པར་གྱུར་ན། ཅི་བདག་ཆོས་ཉིད་ལ་
ཞུགས་པ་ཡིན་ནམ། འདི་ནི། གནའ་ནས་ལུགས་ཀྱིས་ཡོད་པ་ཁོ་ནའོ། །སྙམ་དུ་དེ་ལྟར་སྒོམ་པའི་དགེ་སློང་ནི། ཕམ་པ་བྱུང་དུ་ཟིན་ཀྱང་ཐར་པ་ཐོབ་པར་འགྱུར་རོ། །བསླབ་པའི་གཞི་
ལྔ་ལས་འགལ་བར་བྱས་པ་དང༌། རུང་བ་མ་ཡིན་པ་ཐམས་ཅད་ཡོངས་སུ་བཟུང་ཡང་དེ་དང་འདྲའོ། །དེ་བཞིན་གཤེགས་པས་ཉེས་བྱས་ཀྱི་ཉེས་པ་བྱུང་བས་ཀྱང་སུམ་ཅུ་རྩ་གསུམ་པའི་
ལྷ་རྣམས་ཀྱི་ལོ་གྲངས་པས་ཀྱང་ལྷག་པར་ལོ་བརྒྱད་ཁྲིའི་བར་དུ་སེམས་ཅན་དམྱལ་བར་འཚེད་པར་འགྱུར་རོ། །ཞེས་གསུངས་མོད་ཀྱི། དེའང་བསྡིགས་པར་ཟད་དེ། ཕམ་པ་ལས་ན།
གཅིག་གི་དམའ་བ་ཉེས་པ་སྦོམ་པོའི་སྐྱོན་གང་ཡིན་པ་དེའང་མི་བཟད་པ་མ་ཡིན་ཏེ། འདུལ་བ་འཛིན་པ་མང་པོ་རྣམས་ཀྱིས་བརྩུན་དུ་སྨྲས་མོད་ཀྱི། དེ་ནི། མི་བཙན་ནོ། །ཞེས་དེ་བཞིན་
གཤེགས་པས་གསུངས་སོ། །ཞེས་ཟེར་བ་དེ་ལྟ་བུའི་མདོ་སྡེ་དང༌། འདུལ་བ་ནི། བདུད་ཀྱིས་སྨྲས་པ་ཡིན་པར་རིག་པར་བྱའོ། །བསླབ་པའི་གཞི་ཐམས་ཅད་ཀྱི་ནང་ན་ནི། ཉེས་བྱས་
ཆུང་བ་ཡིན་ལ། དེ་ལྟར་ཆུང་བའི་ཉེས་བྱས་བྱུང་དུ་ཟིན་ཀྱང་བདག་ལ་མ་བྱུང་ངོ༌། །ཞེས་བསྙེན་པར་བྱེད་དེ། ཉེས་པ་བྱུང་བ་རུས་སྦལ་བཞིན་དུ་སྦེད་པར་བྱེད་པ་དེ་ལྟ་བུའི་གང་ཟག་
༄༅། །ལ་བསྟེན་པར་མི་བྱའོ། །བརྫུན་དུ་སྨྲ་བའི་ཆོས་གཅིག་འགལ་བར་བྱས་པའི་སྐྱེ་བོ་འཇིག་རྟེན་ཕ་རོལ་སྤངས་པས་ནི། མི་བྱ་བ་ཅིའང་མེད་དེ། མི་བྱ་བའི་
བག་ཅིའང་མི་བསྟེན་པ་མེད་ཅེས་བྱ་བའི་དོན་ཏོ། །སངས་རྒྱས་ཀྱི་བསྟན་པ་ནི། དེ་ལྟར་ཆ་ཕྲ་བ་ཡིན་ན། ཉེས་པ་སྦོམ་པོ་མི་སྡོམ་པར་ལྟ་ག་ལ་མཛད། གལ་ཏེ་དེ་ཙམ་ཡང་སྡོམ་
པར་མི་བྱེད་པ་ནི། མཆོག་ཏུ་མ་བསྡམས་པ་ཡིན་ནོ། །ཅི་ཞིག་བཟུང་སྟེ་ཚུལ་ཁྲིམས་སྲུང་ཞེ་ན། སངས་རྒྱས་ཀྱི་ཁམས་ཡོད་ལ་གསུང་རབ་ཡན་ལག་དགུའི་ཚུལ་གྱིས་སངས་
རྒྱས་སུ་འགྱུར་བའི་རྟོག་པ་གཅིག་པུས་སེམས་ཅན་ཐམས་ཅད་ལ་སངས་རྒྱས་ཀྱི་ཁམས་ཡོད་དོ། །ཞེས་བྱ་བ་དང༌། ཤིན་ཏུ་རྒྱས་པ་ལས་བདག་མེད་པའི་མཆོག་ཡོད་དོ། །ཞེས་
སྨྲ་བ་ནི། གསུང་རབ་ཡན་ལག་དགུའི་ཚུལ་གྱིས་མདོ་སྡེ་སྤོང་བ་མ་ཡིན་ནོ། །གཞན་དུ་ན་ནི། དེ་ལྟར་འགྱུར་རོ། །གསོལ་བ། སེམས་ཅན་ཐམས་ཅད་ལ་སངས་རྒྱས་ཀྱི་ཁམས་
མཆིས་པར་གསུང་རབ་ཡན་ལག་དགུ་ལས་ངེས་པར་བསྟན་ན། གང་ཟག་ཏུ་ལྟ་བར་ཇི་ལྟར་མི་འགྱུར་ལགས་སོ། །བདག་གིས་ཐོས་པ་བཞིན་དུ་ཇི་ལྟར་གཟུང་བར་བགྱི། དེ་
ལྟར་ན་ནི། མིའི་ཆོས་ལས་བླ་མར་ཡང་འགྱུར་ལགས་སོ། །བཀའ་སྩལ་པ། ཇི་ལྟར་རྒྱ་མཚོའི་ནང་ན་རིན་པོ་ཆེ་ཡོན་ཏན་བརྒྱད་དང་ལྡན་པ་སྣ་ཚོགས་མེད་དོ། །ཞེས་སྨྲ་བ་དེ་བཞིན་
དུ་གསུང་རབ་ཡན་ལག་དགུ་ཤིན་ཏུ་རྒྱས་པའི་ཡེ་ཤེས་ཀྱི་རྒྱ་མཚོ་ཆེན་པོ་ལ་སངས་རྒྱས་ཀྱི་ཁམས་མེད་དོ། །ཞེས་ཟེར་བའང་དེ་དང་འདྲ་སྟེ། སངས་རྒྱས་ཀྱི་གསུང་འདི་ནི། དེ་དག་གི་
ཡུལ་མ་ཡིན་ལ། སངས་རྒྱས་ཀྱི་གསུང་ནི། སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ། །ཞེས་བྱ་བའི་གཏན་ཚིགས་དང༌། རྟགས་རྣམས་ཀྱི་སྒོ་ནས་ཉན་ཐོས་
དང༌། རང་སངས་རྒྱས་ཐམས་ཅད་ཀྱི་ཡུལ་ཡང་མ་ཡིན་པར་མངོན་ནོ། །ཐེག་པ་ཆེན་པོ་ལས་ནི། བདག་དང༌། སྲོག་བཤིག་པའང་མེད་དེ། དེ་བས་ན། སངས་རྒྱས་ནི། དབུ་མའི་ལམ་
ཞེས་བྱའོ། །གང་དག་བདག་གི་ལུས་ལ་སངས་རྒྱས་ཀྱི་ཁམས་ཡོད་དེ། བདག་གིས་སངས་རྒྱས་ཐོབ་པར་འགྱུར་མོད་ཀྱི། ཉོན་མོངས་པ་ཟད་པར་བྱ་དགོས་སོ། །ཞེས་དེ་སྐད་ཟེར་བ་དེ་
དག་ནི། ངའི་ཉན་ཐོས་ཡིན་ནོ། །གཅིག་ཤོས་ནི། མིའི་ཆོས་ལས་བླ་མར་གྱུར་བའི་ཉེས་པ་བྱུང་བ་ཡིན་ནོ། །ཞེས་ང་ཟེར་རོ། །ངས་དེ་སྐད་ཅེས་བསྟན་པའི་ཕྱིར་འདི་སྐད་ཅེས་ཟེར་ཏེ།
བཅོམ་ལྡན་འདས་ཀྱིས་དམ་པའི་ཆོས་ཐོབ་པར་འགྱུར་བའི་སངས་རྒྱས་ཀྱིས་ནས་གཟིགས་པས་ན། བདག་ཀྱང་སངས་རྒྱས་བཅོམ་ལྡན་འདས་སུ་འགྱུར་རོ། །ཞེས་ཟེར་བ་གང་ཡིན་པ་
དེ་མིའི་ཆོས་ལས་བླ་མའི་ཉེས་པར་འགྱུར་རམ་ཞེ་ན། མིའི་ཆོས་ལས་བླ་མར་གྱུར་པའི་ཉེས་པར་མི་འགྱུར་ཏེ། དེ་ནི། རིམ་གྱིས་སངས་རྒྱས་སུ་འགྱུར་རོ། །ཞེས་ང་ཟེར་རོ། །དེ་ལྟར་ན།
༄༅། །སངས་རྒྱས་ཀྱི་གསུང་ནི། ཆ་ཕྲ་ཞིང་ཟབ་པ་ཡིན་ནོ། །གསོལ་པ། འདི་ན་རྒྱལ་པོ་ལ་ལ་ཞིག་འདི་སྐད་ཅེས་མཆི་སྟེ། ཇི་ལྟར་ན། དགེ་སློང་མིའི་ཆོས་ལས་བླ་
མར་གྱུར་པའི་ཉེས་པ་བྱུང་བ་ཞེས་བགྱི་ཞེས་མཆི་བ་ལ་ལན་གདབ་འཚལ་ལགས་སོ། །བཀའ་སྩལ་པ། འདི་ན་དགེ་སློང་རྙེད་པ་དང་བཀུར་སྟིའི་ཕྱིར་རམ། ཟང་ཟིང་གི་ཕྱིར་
ཚུལ་འཆོས་པ་དང༌། ཁ་གསག་བྱེད་པ་ཡོད་དེ། ཇི་ལྟར་བྱས་ན། བདག་བསོད་སྙོམས་པ་ཡིན་པར་གཞན་དག་གིས་ཤེས་པར་འགྱུར་ཞིག་གུ། དེ་ལྟར་བྱས་དང་རྙེད་པ་ཐོབ་
པར་འགྱུར་རོ། །སྙམ་སྟེ། བསྔགས་པ་འདོད་པ་རྨོངས་པའི་རང་བཞིན་ཅན་དུ་གྱུར་པས་བདག་གིས་འབྲས་བུ་མ་ཐོབ་པར་བདག་གིས་འབྲས་བུ་ཐོབ་པར་གཞན་གྱིས་ཤེས་
པར་བྱའོ། །བདག་རྒྱུན་དུ་ཞུགས་པ་དང༌། ལན་གཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་ཡིན་པར་གཞན་དག་གིས་ཤེས་པར་བྱའོ། །དགེ་བསྙེན་མདུན་ན་
འཁོད་པ་རྣམས་ཀྱང་སྐྱེ་བོ་ཐམས་ཅད་ཀྱིས་བདག་དེ་ལྟ་བུ་ཡིན་པར་ཤེས་པར་འགྱུར་བའི་ཚིག་སྨྲར་གཞུག་གོ། །སྙམ་ནས་ཆོས་ཐོབ་པར་བྱ་བའི་ཕྱིར་མ་ཡིན་པར་ཡིད་ལ་
བྱེད་པ་དེ་ལྟ་བུ་རྙེད་པ་དང༌། བཀུར་སྟི་དང༌། བླ་མའི་མཆོད་པ་དང༌། ཕྱག་བྱ་བ་དང༌། ཟང་ཟིང་གི་ཕྱིར་དགྲ་བཅོམ་པ་འདྲ་བར་ཕན་ཚུན་ལྟ་བའི་ཐབས་དང༌། མིག་འཛུམ་པ་
དང༌། འགྲོས་རྣམས་འཆོས་པར་བྱེད་ཅིང༌། ཆོས་གོས་དང༌། སྣམ་སྦྱར་དང༌། ལྷུང་བཟེད་རྣམས་འཆང་ལ། མལ་ཆ་དང༌། སྟན་གསར་པའི་སྟེང་ན་འདུག་པ་དང༌། སྐྱེ་བོ་དག་གིས་བདག་
དགེ་སློང་བཟང་པོ་དགེ་སློང་དཀའ་ཐུབ་ཅན་ཡིན་ནོ། །ཞེས་བརྗོད་པར་འགྱུར་བར་བྱའོ། །འོན་ཀྱང་བདག་འཁོར་དང་སློབ་མ་དག་དང་ལྡན་པར་འགྱུར་རོ། །དེ་ནས་སྡེ་ཚན་བཅས་དང་
བཟའ་བ་དང༌། བཅས་པ་དང༌། བལྡག་པ་དང༌། བཏུང་བའི་ཡོ་བྱད་རྣམས་རྙེད་པར་འགྱུར་རོ། །བུད་མེད་རྣམས་ཀྱིས་ཀྱང་བཀུར་བར་འགྱུར་རོ། །སྙམ་པའི་སེམས་ཀྱི་རྟོག་པས་ནང་མི་དང་
གཡོག་འཁོར་རྣམས་ལ་ཤེས་པར་བྱེད་དེ། དེ་ལྟ་བུར་འཆབ་པའི་དགེ་སློང་ངམ། དགེ་སློང་མ་ནི། མིའི་ཆོས་ལས་བླ་མར་གྱུར་པའི་ཉེས་པ་བྱུང་བ་ཡིན་ནོ། །ཞེས་ང་ཟེར་རོ། །གཞན་
ཡང་འདི་ན་དགེ་སློང་ལ་ལ་དམ་པའི་ཆོས་དབྱུང་བར་བྱའོ། །སྙམ་པའི་སེམས་ཀྱིས་མལ་ཆ་དང་སྟན་གསར་པ་ལ་འདུག་ཅིང༌། སྐྱེ་བོ་ཐམས་ཅད་ཀྱིས་ཀྱེ་མ་དགེ་སློང་འདི་ནི། དགེ་བ་
བཟང་པོ་ཞིག་གོ། །སྙམ་དུ་བདག་དགྲ་བཅོམ་པ་མ་ཡིན་པར་དགྲ་བཅོམ་པ་དང་འདྲ་བར་ཤེས་པར་བྱའོ། །བདག་དེ་ལྟ་བུ་ཡིན་པར་ཤེས་པ་དང༌། དགེ་སློང་མང་པོ་དག་བདག་གི་འཁོར་
དུ་འགྱུར་ལ་འདི་ལས་ཕྱི་རོལ་པ་དག་ཀྱང་དགེ་བསྙེན་དུ་འགྱུར་རོ། །ཚུལ་ཁྲིམས་འཆལ་བ་རྣམས་ཀྱང་ཞུམ་པར་འགྱུར་རོ། །དེ་ནས་བདག་གིས་དམ་པའི་ཆོས་ཀྱང་དབྱུང་བར་བྱའོ། །
༄༅། །དེ་བཞིན་གཤེགས་པའི་ཆེ་བ་ཉིད་ཀྱང་བསྟན་པར་བྱའོ། །ཤིན་ཏུ་རྒྱས་པའི་མདོ་སྡེ་རྣམས་ཀྱང་བསྒྲག་པར་བྱའོ། །སེམས་ཅན་ཐམས་ཅད་ཀྱང་དེས་པར་
བསྒྲལ་བར་བྱའོ། །འདུལ་བ་དང་འདུལ་བ་མ་ཡིན་པའི་བྱེ་བྲག་ཀྱང་ཕྱེད་པར་བྱའོ། །བདག་ལ་སངས་རྒྱས་སུ་འགྱུར་བའི་ས་བོན་དེ་བཞིན་གཤེགས་པའི་སྙིང་པོ་ཞེས་བྱ་བ་ཡོད་
དེ༑ བདག་གིས་སངས་རྒྱས་ཐོབ་པར་འགྱུར་རོ། །བདག་གིས་ཉོན་མོངས་པའི་རྣམ་པ་རྣམས་རྣམ་པར་གཞོམ་པར་བྱའོ། །དགེ་བསྙེན་ཁྱེད་རྣམས་ལའང་སངས་རྒྱས་ཀྱི་ཁམས་ཡོད་
དེ༑ བདག་ཅག་ཀུན་ཀྱང་སངས་རྒྱས་སུ་འགྱུར་ཞིང་དེ་བཞིན་གཤེགས་པའི་ས་ཐོབ་པར་འགྱུར་རོ། །ཉོན་མོངས་པའི་རྣམ་པ་རྣམས་ཟད་པར་བྱའོ། །སྙམ་དུ་སེམས་པ་དེ་ལྟ་བུ་ནི།
དམ་པའི་ཆོས་ཀྱི་རྟོག་པའི་སྒོ་ནས་བྱང་ཆུབ་སེམས་དཔའ་ཡིན་ཏེ། མིའི་ཆོས་ལས་བླ་མར་འགྱུར་བའི་ཉེས་པ་བྱུང་བ་མ་ཡིན་ནོ། །ཞེས་ང་ཟེར་རོ། །ཉེས་བྱས་ཀྱི་ཉེས་པ་བྱུང་བས་
ཀྱང་སུམ་ཅུ་རྩ་གསུམ་པའི་ལྷ་རྣམས་ཀྱི་ལོ་གྲངས་པས་ཀྱང་ལྷག་པར་ལོ་བརྒྱད་ཁྲིའི་བར་དུ་སེམས་ཅན་དམྱལ་བར་འཚེད་པར་འགྱུར་ན། ཉེས་པ་སྤོམ་པོ་ལྟ་ཅི་སྨོས་ཏེ། ཐེག་པ་
ཆེན་པོ་འདི་ལ་ནི། ཉེས་པ་སྤོམ་པོའི་ཉེས་པ་བྱུང་བ་དང་བསྟེན་པར་མི་བྱའོ། །ཉེས་པ་སྤོམ་པོ་ཞེས་བྱ་བ་ནི། བཅོམ་ལྡན་འདས་ཀྱི་མཆོད་རྟེན་བསྲུང་བའི་ཕྱིར་གཞན་ཡོངས་སུ་
གཟུང་བ་ལ་མེ་ཏོག་གི་ཕྲེང་བ་བཏགས་པ་དེ་རྙིངས་ནས་སྲད་བུ་དགོས་པའི་ཕྱིར་ལེན་པར་བྱེད་དེ། དགེ་སློང་རྣམས་ལ་འཛེམ་ནས་དགེ་སློང་རྣམས་ལ་མ་དྲིས་པར་དགེ་སློང་གིས་བླངས་
ན༑ ཉེས་པ་སྤོམ་པོའི་ཉེས་པ་ཅན་དུ་འགྱུར་རོ། །གལ་ཏེ་འདི་ལྟ་ཞིག་གིས་ཅིར་ཡང་མི་འགྱུར་རོ། །སྙམ་དུ་འཛིན་ཏེ། ལེན་པར་བྱེད་ནའང་དེ་ལྟ་བུ་དག་དང་བསྟན་པར་མི་བྱའོ། །རྐུ་བའི་
སེམས་ཀྱིས་མཆོད་རྟེན་བཤིག་ནའང་ཉེས་པ་སྤོམ་པོའི་ཉེས་པ་ཅན་དུ་འགྱུར་ཏེ། དེ་ལྟ་བུ་དག་དང་བསྟེན་པར་མི་བྱའོ། །འདི་ན་ཁྱིམ་བདག་གམ་བློན་པོ་ལ་ལ་ཞིག་གིས་གལ་ཏེ་ཆོས་
ཀྱི་བསམ་པས་སྐུ་གདུང་ལ་བཀུར་སྟི་བྱའམ། ཕག་གུ་དགོས་པའི་ཕྱིར་མཆོད་རྟེན་རྙིང་པ་བཤིག་སྟེ་བླངས་ནས་ཁྱིམ་བདག་གམ་བློན་པོ་དེས་མཆོད་རྟེན་དེ་ལས་གསེར་དངུལ་ཞིག་
བྱུང་ན༑ དེ་དགེ་སློང་འགའ་ཞིག་གི་ལག་ཏུ་གཏད་པ་ལས་དགེ་སློང་དེས་དེ་བླངས་ཏེ། བདག་གི། ནོར་དུ་བྱས་ལ་རྩོད་པར་བྱེད་ན། དགེ་སློང་དེ་ལ་ལེགས་པ་མ་ཡིན་ནོ། །དགེ་བསྙེན་དེ་
དག་ནི༑ ཆོས་ལ་གནས་པ་ཡིན་ནོ། །དགེ་སློང་དེ་ནི། ཡིད་བརྟན་དུ་མི་རུང་སྟེ། བསྟེན་པར་མི་བྱའོ། །མ་ནིང་ཡིན་པར་ཤེས་པར་བྱའོ། །མཚན་གཉིས་པ་ཡིན་པར་ཤེས་པར་བྱའོ། །
མཚན་གཉིས་པ་ཞེས་བྱ་བ་ནི། གང་ལ་མཚན་གཉིས་ཡོད་པ་སྟེ། གང་གི་ཚེ་སྐྱེས་པའི་འདོད་ཆགས་སྐྱེས་པ་དེའི་ཚེ་ནི། བུད་མེད་དང་འདོད་པ་སྤྱོད་པར་བྱེད་ལ། གང་གི་ཚེ་བུད་མེད་
༄༅། །ཀྱི་འདོད་ཆགས་སྐྱེས་པ་དེའི་ཚེ་ནི། སྐྱེས་པ་དང་འདོད་པ་སྤྱོད་པར་བྱེད་དོ། །དེ་བས་ན། མཚན་གཉིས་པ་ཞེས་བྱ་སྟེ། དེ་དང་ཡང་བསྟེན་པར་མི་བྱའོ། །དེ་ལྟར་དེ་
ལྟ་བུ་དག་དང་བསྟེན་པར་མི་བྱ་ན། བསླབ་པའི་གཞི་ལྔའི་ཉེས་པ་བྱེད་པ་དེ་དག་ལྟ་ལ་བསྟེན་དུ་ག་ལ་རུང༌།། །།འཕགས་པ་ཡོངས་སུ་མྱ་ངན་ལས་འདས་པ་ཐེག་པ་
ཆེན་པོའི་མདོ། བམ་པོ་དགུ་པ། དགེ་སློང་རྣམས་ཀྱིས་ནི། ཐོག་མར་དགེ་སྦྱོང་གི་ཆོས་ཀྱིས་གྲོག་སྦུར་རྣམས་ལའང་སྙིང་རྗེ་བྱའོ། །དགེ་སྦྱོང་གི་ཆོས་ཀྱིས་ཆང་གི་དྲི་བྲོ་བའི་
བཏུང་བའང་སྤང་བར་བྱའོ། །དགེ་སྦྱོང་གི་ཆོས་ཀྱིས་རྨི་ལམ་དུའང་བརྫུན་དུ་སྨྲ་བའི་སེམས་བསྐྱེད་པར་མི་བྱའོ། །དགེ་སློང་གི་ཆོས་ཀྱིས་རྨི་ལམ་དུའང་བུད་མེད་དང་ཕྲད་པའི་སེམས་
བསྐྱེད་པར་མི་བྱའོ། །གསོལ་པ། ཅི་ལགས། རྨི་ལམ་དུ་བུད་མེད་དང་ཕྲད་པར་གྱུར་ན། མི་ཚངས་པར་སྤྱོད་པའི་ནོངས་པར་འགྱུར་ལགས་སམ། བཀའ་སྩལ་པ། མི་འགྱུར་ཏེ།
གལ་ཏེ་བློ་གྲོས་དང་དྲན་པ་དང་ལྡན་པ་འདོད་པ་དྲི་ང་བ་དག་ལ་མི་ཚངས་པར་སྤྱོད་པའི་སེམས་མི་སྐྱེད་ན། དེ་ནི། ཉོན་མོངས་པ་དང་བུད་མེད་ཀྱི་གཏམ་སྨད་པས་རྟོག་པ་ཡང་དག་
པར་ཆད་པའི་ཕྱིར་སེམས་བསྐྱེད་མི་སྲིད་དོ། །རྨི་ལམ་དུ་ཕྲད་པར་གྱུར་ནའང་ནང་པར་སད་ན། མུ་གེ་བྱུང་བའི་ཚེ་དགེ་སློང་གིས་རང་གི་བུའི་ཤའི་ཟས་ཟོས་པ་བཞིན་དུ་འགྱོད་པར་
འགྱུར་ན། དེ་ལ་གཙང་ངོ༌། །སྙམ་པའི་བློ་ལྟ་ག་ལ་འབྱུང༌། གལ་ཏེ་སེམས་སྐྱེས་ནའང་ཕྱིར་གཞིལ་བར་བྱའོ། །ཞེས་ཟེར་བ་དེ་ལྟ་བུའི་ཆོས་ཀྱི་སྒོ་ནི། སངས་རྒྱས་ཀྱིས་གསུངས་པའི་མདོ་
སྡེ་དང༌། འདུལ་བ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི། བདུད་དང་མཐུན་པར་བྱེད་པ་
ཡིན་པར་རིག་པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང༌། འདུལ་བ་ཚད་མར་བྱེད་པ་གང་ཡིན་པ་དེ་དག་ནི། བྱང་ཆུབ་སེམས་དཔའ་ཡིན་པར་རིག་པར་བྱའོ། །དཔའ་བོའི་
འདུག་སྟངས་དང༌། མི་སྨྲ་བར་འདུག་པ་དང༌། གཡང་སར་མཆོང་བ་དང༌། དུག་ཟ་བ་དང༌། སྨྱུང་བར་འདུག་པ་དང༌། བདག་ཉིད་འཆིང་བར་བྱེད་པ་དང༌། བདག་ཉིད་གསོད་པྲ་བྱེད་
པ་དང༌། ཞེ་ནོམ་བྱེད་དུ་འཇུག་པ་དང༌། རིག་སྔགས་དང༌། གསང་སྔགས་ཟློས་པ་དང༌། སྐྲུན་པའི་ལས་བྱེད་པར་བཅོམ་ལྡན་འདས་ཀྱིས་གནང་ངོ༌། །གདོལ་བའི་བུ་དང༌། མ་ནིང་དང༌།
མཚན་གཉིས་པ་དང༌། ཡན་ལག་ཉམས་པ་ཐམས་ཅད་རབ་ཏུ་འབྱུང་བར་བཅོམ་ལྡན་འདས་ཀྱིས་གནང་ངོ༌། །དེ་བཞིན་གཤེགས་པས་ནི། བའི་བཅུད་རྣམ་ལྔ་དང༌། སྦྲང་རྩི་དང༌།
འབྲུ་མར་ལ་སོགས་པ་དང༌། ཟབ་དར་དང༌། དུང་དང༌། ལྷ་མ་དང༌། འབྲུ་ལ་སོགས་པ་སྤངས་ཏེ། ཤིང་ངོ་ཅོག་ལ་སྲོག་དང་འདུ་ཤེས་ཡོད་པར་གཟིགས་ནས་ཡོངས་སུ་མྱ་ངན་ལས་
༄༅། །འདས་སོ། །ཞེས་ཟེར་བ་དེ་ལྟ་བུ་ནི། བདུད་ཀྱིས་སྨྲས་པའི་མདོ་སྡེ་དང༌། འདུལ་བར་རིག་པར་བྱ་སྟེ། དཔའ་བོའི་འདུག་སྟངས་ཀྱིས་གནས་པ་དང༌། འཆག་པ་ལ་སོགས་
པ་ཆོས་ཀྱི་བྱ་བ་རྣམས་ནི། མ་གཏོགས་སོ། །དུག་ཟ་བ་དང༌། མེར་མཆོང་བ་དང༌། སྨྱུང་བར་འདུག་པ་དང༌། གཡང་སར་མཆོད་པ་དང༌། བདག་ཉིད་འཆིང་བར་བྱེད་པ་དང༌། བདག་ཉིད་གསོད་
པར་བྱེད་པ་དང༌། ཞེ་ནོམ་བྱེད་དུ་འཇུག་པ་དང༌། རིག་སྔགས་དང༌། གསང་སྔགས་ཟློས་པ་དང༌། སྐྲུན་པའི་ལས་བྱེད་པ་རྣམས་ནི། ངས་མ་གནང་ངོ༌། །བའི་བཅུད་རྣམ་ལྔ་དང༌། སྦྲང་རྩི་དང༌།
འབྲུ་མར་ལ་སོགས་པ་དང༌། ཟབ་དར་དང༌། དུང་དང༌། ལྷམ་དང༌། འབྲུ་ལ་སོགས་པ་ལ་ཤའི་འདུ་ཤེས་མེད་པ་དང༌། ཤིང་ཐམས་ཅད་ལ་སྲོག་མེད་པའི་འདུ་ཤེས་དང༌། སེམས་
པའི་འདུ་ཤེས་མེད་པར་ངས་གནང་ངོ༌། །གཞན་དུ་ལྟ་བ་གང་ཡིན་པ་དེ་དག་ནི། མུ་སྟེགས་ཅན་གྱི་ཉན་ཐོས་ཡིན་ནོ། །ངའི་བཀའ་བཞིན་དུ་བྱེད་པ་གང་ཡིན་པ་དེ་དག་ནི། ངའི་
ཉན་ཐོས་ཡིན་ནོ། །ཞེས་ང་ཟེར་རོ། །ཁམས་བཞི་ལ་ནི། སྲོག་དང་འདུ་ཤེས་ཡོད་ཅེས་ང་མི་ཟེར་རོ། །ཞེས་ཟེར་བ་དེ་ལྟ་བུའི་མདོ་སྡེ་དང༌། འདུལ་བ་ནི། སངས་རྒྱས་ཀྱིས་གསུངས་
པའི་མདོ་སྡེ་ཡིན་པར་རིག་པར་བྱའོ། །བདུད་ཀྱིས་སྨྲས་པའི་མདོ་སྡེ་དང༌། འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི། བདུད་དང་མཐུན་པར་བྱེད་པ་ཡིན་པར་རིག་
པར་བྱའོ། །སངས་རྒྱས་ཀྱིས་གསུངས་པའི་མདོ་སྡེ་དང༌། འདུལ་བ་ཚད་མར་བྱེད་པའི་སེམས་ཅན་གང་ཡིན་པ་དེ་དག་ནི། བྱང་ཆུབ་སེམས་དཔའ་ཡིན་པར་རིག་པར་བྱའོ། །རིགས་ཀྱི་བུ།
འདི་ནི། ངས་བདུད་ཀྱིས་སྨྲས་པ་དང༌། སངས་རྒྱས་ཀྱིས་གསུངས་པའི་བྱེ་བྲག་རྒྱས་པར་བསྟན་པ་ཡིན་ནོ། །གསོལ་པ། བཅོམ་ལྡན་འདས། བདག་ནི། དེང་གདོད་སངས་རྒྱས་ཀྱི་བཀའ་ལ་
ཞུགས་ལགས་སོ། །བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །རིགས་ཀྱི་བུ། ཁྱོད་ལེགས་ཏེ། མཁས་པས་ནི། དེ་ལྟར་བྱ་དགོས་སོ། །ཡང་བཀའ་སྩལ་པ། རིགས་ཀྱི་བུ།
འདི་ནི། སྡུག་བསྔལ་སོ། །ཞེས་བྱ་བ་ནི། འཕགས་པ་རྣམས་ཀྱི་བདེན་པ་ཞེས་མི་བྱ་སྟེ། སྡུག་བསྔལ་དེའང་གང་ཞེ་ན། སྡུག་བསྔལ་ཞེས་བྱ་བ་ནི། བ་ལང་དང༌། བོང་བུ་ལ་སོགས་པ་དང༌།
སེམས་ཅན་དམྱལ་བ་པ་རྣམས་ལའང་ཡོད་དེ། གལ་ཏེ་སྡུག་བསྔལ་དེ་བདེན་པ་ཡིན་དུ་ཟིན་ན། དེ་རྣམས་ཀྱིའང་བདེན་པ་ཡིན་པར་འགྱུར་རོ། །སྡུག་བསྔལ་ཞེས་བྱ་བ་འདི་ནི། ཀྱེ་མ་
སྡུག་བསྔལ་ཤེས་པ་ཞེས་བྱ་བ་ལ་དེ་བཞིན་གཤེགས་པ་རྟག་པའོ། །ཆོས་ཀྱི་སྐུ་ཡིན་ཏེ། ཤའི་སྐུ་མ་ཡིན་ནོ། །ཞེས་དེ་བཞིན་གཤེགས་པའི་ཆེ་བ་ཉིད་ཤེས་པ་ནི། སྡུག་བསྔལ་ཤེས་
པའོ། །དེ་མ་ཐོབ་ཀྱི་བར་དུ་སེམས་ཅན་རྣམས་ཀྱིས་ཆོས་མ་ཡིན་པ་ལ་ཆོས་ཡིན་ནོ། །སྙམ་དུ་ཡོངས་སུ་བརྟགས་ནས་འཁོར་བའི་འཁོར་ལོ་ཤིན་ཏུ་སྡུག་བསྔལ་བའི་གནས་སུ་ཡུན་རིང་པོར་
༄༅། །སྡུག་བསྔལ་ཉམས་སུ་མྱོང་ནས་ངན་འགྲོར་འགྲོ་བར་འགྱུར་རོ། །གང་གི་ཚེ་དེ་བཞིན་གཤེགས་པ་རྟག་པར་ཤེས་པ་དེའི་ཚེ་ནི། ཡི་གེ་འབྲུ་གཉིས་པོ། ཇི་ལྟ་
བུར་ཐོས་ཀྱང་རུང་སྟེ། བདེ་འགྲོར་འགྲོ་བར་འགྱུར་རོ། །དེ་ནས་ཐར་པའང་ཐོབ་པར་འགྱུར་རོ། །དེས་ན་འདི་ནི། རྫུ་འཕྲུལ་གྱི་བདེ་བ་ཡིན་ནོ། །སྙམ་དུ་རང་གིས་རྟོགས་པར་འགྱུར་ཏེ།
དེ་བཞིན་གཤེགས་པ་རྟག་ཅེས་བྱ་བ་ཐོབ་པ་ཙམ་གྱི་རྒྱུ་དེས་ན་བདག་འདིར་འོངས་སོ། །དེ་བཞིན་གཤེགས་པ་རྟག་པར་མ་ཤེས་ཀྱི་བར་དུ་ནི། ཡུན་དེ་སྲིད་ཀྱི་བར་བདག་སྡུག་
བསྔལ་རྣམས་ཀྱི་ནང་དུ་འཁོར་ཏོ། །ང་ནི། སྡུག་བསྔལ་ཤེས་སོ། །ཞེས་བྱ་བ་འདི་ནི། བདེན་པ་ཡིན་ནོ། །གཞན་དག་གི་སྡུག་བསྔལ་བསྒོམ་པ་ནི། དོན་མེད་པའོ། །འདི་ནི། སྡུག་
བསྔལ་ཀུན་འབྱུང་བའོ། །ཞེས་བྱ་བ་ནི། ཆོས་ཀྱི་དེ་ཁོ་ན་ཉིད་ལ་དེ་ཁོ་ན་ཉིད་མ་ཤེས་ནས། ཆོས་ལ་དགོངས་པའི་ཕྱིར་བྲན་དང་བྲན་མོ་ལ་སོགས་པ་རྫས་ངན་པ་དུ་མ་ལེན་པར་
བྱེད་ཅིང་ཆོས་མ་ཡིན་པ་ལ་ཆོས་ཡིན་ནོ། །སྙམ་དུ་འཛིན་ཏེ། དམ་པའི་ཆོས་ནུབ་པར་བྱེད་ཅིང་དམ་པའི་ཆོས་མི་སྣང་བར་བྱེད་པར་འགྱུར་ཏེ། དམ་པའི་ཆོས་གནས་པར་བྱ་བའི་ཐབས་
མི་ཤེས་པས་འདི་ལྟར་འཛིན་ཏེ། དམ་པའི་ཆོས་འཇིག་པར་འགྱུར་ཞེས་བྱ་བ་མེད་དོ། །སྙམ་ནས་དེའི་འབྲས་བུས་འཁོར་བའི་སྡུག་བསྔལ་རྣམས་ཀྱི་ནང་དུ་ཡོངས་སུ་འཁྱམ་མོ། །
དེ་ནས་མཐོ་རིས་དང་ཐར་པ་ཐོབ་པར་འགྱུར་ཏེ། མཐོ་རིས་དང་ཐར་པ་ཐོབ་པའི་སྡུག་བསྔལ་ཀུན་འབྱུང་བའི་དེ་ཁོ་ན་ཉིད་བདག་གིས་མ་ཤེས་པས་དམ་པའི་ཆོས་འཇིག་པའི་རྒྱུར་གྱུར་ཏེ་ཉེས་
པར་སྨྲས་པའི་ཚིག་གིས་ཡུན་འདི་སྲིད་ཀྱི་བར་དུ་ཉོན་མོངས་པར་གྱུར་ཏོ། །སྙམ་དུ་ཤེས་པ་འདི་ནི། སྡུག་བསྔལ་ཀུན་འབྱུང་བ་ཤེས་པ་ཞེས་བརྗོད་པར་བྱའོ། །གཞན་དག་གི་ནི། དེ་ལྟ་
མ་ཡིན་ནོ། །འདི་ནི། སྡུག་བསྔལ་འགོག་པ་ཞེས་བྱ་བ་ལ་སྟོང་པ་ཉིད་སྒོམ་པ་ནི། གཏན་དུ་སྟོང་པ་ཉིད་སྒོམ་པ་ཐམས་ཅད་ཟད་པ་དེ་བཞིན་གཤེགས་པའི་སྙིང་པོ་མེད་པར་བྱེད་པ་དེ་ལྟ་
བུ་མ་ཡིན་ཏེ། སྡུག་བསྔལ་འགོག་པ་སྒོམ་པ་ནི། ཡ་མཚན་ཅན་ཐམས་ཅད་ལའང་དོན་དང་འགལ་བའི་སྟོང་པ་ཉིད་ཡོད་དེ། དེ་རྣམས་ཀྱིའང་སྡུག་བསྔལ་འགོག་པ་ཞེས་བྱ་བར་
འགྱུར་རོ། །སེམས་ཅན་ཐམས་ཅད་ལ་ནི། དེ་བཞིན་གཤེགས་པའི་སྙིང་པོ་ཡོད་དེ། དེ་ནི། གསལ་བར་མི་མངོན་ནོ། །གང་གི་ཚེ་ཉོན་མོངས་པ་ཟད་པ་དེའི་ཚེ་དེ་བཞིན་གཤེགས་པའི་
སྙིང་པོ་ལ་འཇུག་པ་ཁྱེད་ཀྱིས་མཐོང་བར་འགྱུར་རོ། །གང་གི་ཚེ་སེམས་གཅིག་བསྐྱེད་པའི་ལས་ཀྱི་འབྲས་བུས་བདག་གིས་ཆོས་ཀྱི་དབང་ཕྱུག་རྟག་པ་དང༌། བདེ་བ་འཐོབ་བོ། །སྙམ་དུ་
ཁྱོད་ཀྱིས་ཤེས་པར་གྱུར་པ་དེ་ནི། སྡུག་བསྔལ་འགོག་པ་བསྒོམ་པར་བྱ་བ་ལ་སྒོམ་པ་ཡིན་ནོ། དེ་བཞིན་གཤེགས་པའི་སྙིང་པོ་བདག་མེད་པར་བསྒོམས་ཤིང་གཏན་དུ་སྟོང་པ་ཉིད་
༄༅། །བསྒོམས་པས་ནི། སྡུག་བསྔལ་རྣམས་མི་འགོག་པར་ཕྱེ་མ་ལེབ་མར་མེའི་ནང་དུ་སོང་བ་བཞིན་དུ་འགྱུར་རོ། །དེ་ལྟ་མ་ཡིན་པར་དེ་བཞིན་གཤེགས་པའི་སྙིང་པོ་
ཡོད་པར་བསྒོམས་པའི་སེམས་ཅན་རྣམས་ནི། ཉོན་མོངས་པ་རྣམས་ཡོད་བཞིན་དུ་ཉོན་མོངས་པའི་རྣམ་པ་འགོག་པར་བྱེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྙིང་
པོའི་རྐྱེན་གྱི་ཕྱིར་ཏེ། དེ་ཤེས་པ་ནི། ཡང་དག་པར་རྫོགས་པའི་སངས་རྒྱས་ཀྱི་བཀའ་ལས་སྡུག་བསྔལ་འགོག་པའི་ཚིག་བདེན་པ་ཞེས་བྱའོ། །གཞན་ནི། བསྒོམ་པ་མ་ཡིན་པ་ལ་
སྒོམ་པའོ། །འདི་ནི། སྡུག་བསྔལ་འགོག་པར་འགྱུར་བའི་ལམ་ཞེས་བྱ་བ་ནི། དེ་བཞིན་གཤེགས་པ་དང༌། ཆོས་དང༌། དགེ་འདུན་དང༌། ཐར་པ་རྣམས་ཏེ། འདི་ལྟར་དེ་རྣམས་
ལ་ཕྱིན་ཅི་ལོག་བཞིས་ཕྱིན་ཅི་ལོག་ཏུ་གྱུར་པའི་དངོས་པོ་ནི། ཐར་པའོ། །ཐར་པ་ལའང་ཅིའང་མེད་དོ། །སྙམ་པ་དེ་ནི། འདི་ལྟར་སྒྱུ་མར་འདུག་སྟེ། འཁོར་བའི་སྡུག་བསྔལ་གྱི་
ནང་དུ་ཡོངས་སུ་འཁྱམས་པ་ཡིན་ལ། སྒོམ་ཉེས་པ་དེའི་འབྲས་བུས་ནི་ཡུན་རིང་པོར་སྡུག་བསྔལ་ཉམས་སུ་མྱོང་བར་འགྱུར་རོ། །ད་ནི། བདག་གིས་དེ་བཞིན་གཤེགས་པ་དང༌།
ཆོས་དང་དགེ་འདུན་དང༌། ཐར་པ་རྣམས་རྟག་པ་དང༌། བརྟན་པ་དང༌། ཐེར་ཟུག་པ་དང༌། འཇིགས་པར་མི་འགྱུར་བར་སེམས་གཅིག་བསྐྱེད་པའི་འབྲས་བུས་དབང་ཕྱུག་རྟག་པའི་
འབྲས་བུ་ཐོབ་བོ། །ཕྱིན་ཅི་ལོག་བཞི་པོ་སྡུག་བསྔལ་བ་དང༌། བདག་མེད་པ་དང༌། མི་གཙང་བ་རྣམས་ཆོས་མ་ཡིན་པ་ལ་ཆོས་ཡིན་ནོ། །སྙམ་དུ་འཛིན་པས་ལྟ་བ་ངན་པའི་འབྲས་བུ་མྱོང་
བ་འདི་ནི། སྡུག་བསྔལ་འགོག་པར་འགྱུར་བའི་ལམ་ཞེས་བྱའོ། །གཞི་གསུམ་རྟག་པ་བསྒོམ་པ་བསྒྲུབ་པའི་ཕྱིར་མི་རྟག་པ་སྒོམ་པ་གང་ཡིན་པ་དེ་དག་ནི། མི་བདེན་པ་བསྒོམ་པ་
ལ་སྒོམ་པ་ཡིན་ནོ། །དེ་ལྟར་རྟག་པར་སྒོམ་པ་གང་ཡིན་པ་དེ་དག་ནི། ངའི་ཉན་ཐོས་ཡིན་ཏེ། འཕགས་པའི་བདེན་པ་བཞི་ཤེས་པའོ། །ཞེས་ང་ཟེར་རོ། །འདི་རྣམས་ནི། འཕགས་
པའི་བདེན་པ་བཞི་ཡིན་པར་རིག་པར་བྱའོ། །གསོལ་པ། བཅོམ་ལྡན་འདས། འཕགས་པའི་བདེན་པ་བཞི་ལམ་འདིའི་ཚུལ་གྱིས་བསྒོམ་པར་བགྱི་བ་བདག་གིས་ད་གཟོད་རྟོགས་
ལགས་སོ། །བཀའ་སྩལ་པ། སྡུག་བསྔལ་ལ་བདེ་བར་འདུ་ཤེས་པ་ནི། ཕྱིན་ཅི་ལོག་ཡིན་ནོ། །བདེ་བ་ལ་སྡུག་བསྔལ་བར་འདུ་ཤེས་པ་ནི། ཕྱིན་ཅི་ལོག་ཡིན་ནོ། །དེ་ལ་དེ་བཞིན་
གཤེགས་པ་མི་རྟག་ཅེས་བྱ་བ་དེ་ནི། སྡིག་པ་དང༌། སྡུག་བསྔལ་བ་ཡིན་ནོ། །དེ་བཞིན་གཤེགས་པ་བུད་ཤིང་ཟད་པའི་མེ་བཞིན་དུ་ཡོངས་སུ་མྱ་ངན་ལས་འདས་སོ། །ཞེས་བྱ་བ་དེ་ནི།
སྡིག་པ་དང༌། སྡུག་བསྔལ་བ་ཡིན་ནོ། །སྡུག་བསྔལ་བ་མ་ཡིན་པ་ཞེས་བདག་ཉིད་སྒོམ་པར་བྱེད་པ་དང༌། དེ་བཞིན་གཤེགས་པ་མི་རྟག་གོ །ཞེས་བྱ་བ་འདི་ནི། ཕྱིན་ཅི་ལོག་ཡིན་ནོ། །
༄༅། །བདེ་བ་ལ་སྡུག་བསྔལ་བར་འདུ་ཤེས་པ་ནི། ཕྱིན་ཅི་ལོག་ཡིན་ཏེ། དེ་བཞིན་གཤེགས་པ་རྟག་གོ །ཞེས་བསྒོམས་ན། གང་ཟག་ཏུ་ལྟ་བར་འགྱུར་དུ་འོང་ངོ༌། །
སྙམ་ནས་སྒོམ་པ་འདི་ནི། སྡུག་བསྔལ་བའོ། །སྙམ་པ་ནི། བདེ་བར་འདུ་ཤེས་པ་རྣམས་ཀྱི་ཕྱིན་ཅི་ལོག་ཡིན་ཏེ། འདི་ནི། ཕྱིན་ཅི་ལོག་དང་པོའོ། །མི་རྟག་པ་ལ་རྟག་པར་འདུ་ཤེས་
པ་ནི། ཕྱིན་ཅི་ལོག་ཡིན་ནོ། །རྟག་པ་ལ་མི་རྟག་པར་འདུ་ཤེས་པ་ནི། ཕྱིན་ཅི་ལོག་ཡིན་ནོ། །དེ་ལ་གཏན་དུ་སྟོང་པ་ཉིད་བསྒོམས་ན། མི་ཚེ་ཐུང་བར་འགྱུར་རོ། །སྙམ་ནས་དེའི་ཕྱིར་མི་
རྟག་པ་ཉིད་ལ་སྟོང་པ་ཉིད་མ་ཡིན་པར་བསྒོམས་ན། བསྒོམས་པ་དེའི་འབྲས་བུས་ཚེ་རིང་བར་འགྱུར་རོ། །སྙམ་པ་དེའང་ཕྱིན་ཅི་ལོག་ཡིན་ཏེ། འདི་ནི། ཕྱིན་ཅི་ལོག་གཉིས་པའོ། །
བདག་མེད་པ་ལ་བདག་ཏུ་འདུ་ཤེས་པ་ནི། ཕྱིན་ཅི་ལོག་ཡིན་ནོ། །བདག་ཡོད་པ་ལ་བདག་མེད་པར་འདུ་ཤེས་པ་ནི། ཕྱིན་ཅི་ལོག་ཡིན་ནོ། །དེ་ལ་འཇིག་རྟེན་པ་རྣམས་ལ་བདག་ཡོད་
ཅེས་ཏེ། འཇིག་རྟེན་པ་བཞིན་དུ་སངས་རྒྱས་ཀྱི་གསུང་ལའང་བདག་ཡོད་པ་མ་ཡིན་ཏེ། དེ་བཞིན་གཤེགས་པའི་སྙིང་པོའི་མིང་ཡང་མེད་དོ། །ཞེས་བདག་མེད་པ་སྒོམ་པ་འདི་ནི། ཕྱིན་
ཅི་ལོག་གསུམ་པའོ། །མི་གཙང་བ་ལ་གཙང་བར་འདུ་ཤེས་པ་ནི། ཕྱིན་ཅི་ལོག་ཡིན་ནོ། །གཙང་བ་ལ་མི་གཙང་བར་འདུ་ཤེས་པ་ནི། ཕྱིན་ཅི་ལོག་ཡིན་ནོ། །དེ་ལ་དེ་བཞིན་གཤེགས་
པ་རྟག་སྟེ། ཤའི་སྐུ་མ་ཡིན་པ་ལ་ཤའི་སྐུ་ཡིན་ཏེ། ཤ་དང་ཁྲག་དང་རྒྱུས་པས་སྦྲེལ་བ་ཡིན་ནོ། མི་གཙང་བའོ། །ཆོས་དང༌། དགེ་འདུན་གཉིས་ཀྱང་ཐར་པ་ཐོབ་ནས་མི་སྣང་བར་འགྱུར་
རོ༑ ༑སྙམ་པ་ནི། གཙང་བ་ལ་མི་གཙང་བར་ཕྱིན་ཅི་ལོག་པ་ཡིན་ནོ། །བདག་གི་ལུས་ཐམས་ཅད་ནི། མི་གཙང་བ་ཡིན་ཏེ། གཙང་ཞེས་བྱ་བ་ཅིའང་མེད་ན། བདག་གི་ལུས་ནི། གཙང་ངོ༌། །
སྙམ་དུ་སྒོམ་པ་ནི། མི་གཙང་བ་ལ་གཙང་ངོ༌། །སྙམ་དུ་འཛིན་པ་ཡིན་ནོ། །བདག་ཀྱང་གང་ན་ཅིའང་མེད་པ་དེར་འགྲོའོ། །སྙམ་པ་ནི། གཙང་བ་ལ་མི་གཙང་ངོ༌། །སྙམ་དུ་སྒོམ་པ་རྨོངས་པར་
བྱེད་པའི་ཆོས་ཡིན་ཏེ། འདི་ནི། ཕྱིན་ཅི་ལོག་བཞི་པ་ཡིན་པར་རིག་པར་བྱའོ། །གསོལ་པ། བཅོམ་ལྡན་འདས། བདག་ནི། ད་གཟོད་ཡང་དག་པའི་ལྟ་བ་ཅན་དུ་གྱུར་ཏེ། འདི་སྲིད་ཀྱི་བར་
དུ་ལོག་པར་ལྟ་བར་གྱུར་ལགས་སོ། །བཅོམ་ལྡན་འདས། ཅི་ལགས། སྲིད་པ་ཉི་ཤུ་རྩ་ལྔ་བདག་མཆིས་ཞེས་བགྱིའམ། མ་མཆིས་ཞེས་བགྱི། བཀའ་སྩལ་པ། བདག་ཅེས་བྱ་བ་ནི།
དེ་བཞིན་གཤེགས་པའི་སྙིང་པོའི་དོན་ཏོ། །སངས་རྒྱས་ཀྱི་ཁམས་ནི། སེམས་ཅན་ཐམས་ཅད་ལ་ཡོད་མོད་ཀྱི། དེའང་ཉོན་མོངས་པའི་རྣམ་པ་རྣམས་ཀྱིས་བསྒྲིབས་ཏེ་བདག་ཉིད་ལ་
ཡོད་བཞིན་དུ་སེམས་ཅན་རྣམས་ཀྱིས་མཐོང་བར་མི་ནུས་སོ། །འདི་ལྟ་སྟེ། དཔེར་ན། གྲོང་ཁྱེར་ཆེན་པོ་ཞིག་ན་དབུལ་པོའི་ཁྱིམ་ཞིག་ན་གསེར་གྱི་གཏེར་ཟད་མི་ཤེས་པ་ཞིག་ཡོད་ལ།
༄༅། །དེ་ལ་བུད་མེད་དབུལ་མོ་ཞིག་འདུག་པ་དེས་ཀྱང་བདག་གི་ཁྱིམ་གྱ་སའི་འོག་ན་གཏེར་ཡོད་པར་མི་ཤེས་ཏེ། དེར་ཐབས་དང་ལྡན་པའི་མི་ཞིག་གིས་བུད་མེད་དེ་
ལ་སྨྲས་པ། སྲུ་ཚུར་ཤོག །བདག་གིས་ཁྱོད་ལ་གླ་སྦྱིན་གྱི། བདག་གི་ཞིང་ལས་བྱེད་དུ་སོང་ཞིག་ཅེས་བྱས་པ་དང༌། དེས་དེ་ལ་སྨྲས་པ། ཇོ་བོ། །བདག་མི་མཆིའོ། །གལ་ཏེ་ཁྱོད་ཀྱིས་
བདག་གི་བུ་ལ་གཏེར་བསྟན་ན་ནི། གཟོད་བདག་མཆི་བར་འཚལ་ལོ། །ཞེས་འཐད་པས་གྲུབ་པའི་ཚིག་སྨྲས་པ་དང༌། དེས་དེ་ལ་སྨྲས་པ། སྲུ། བདག་གི་བུ་ཁྱོད་ལས་སྐྱེས་མ་ཐག་ཏུ་
བདག་གིས་རིན་པོ་ཆེ་དང་གསེར་གྱི་གཏེར་ཟད་མི་ཤེས་པ་སྦྱིན་པར་བྱའོ། །དེ་ནས་དེས་དེ་ལ་སྨྲས་པ། ཁྱོད་ཀྱིས་ག་ལ་བྱིན་ཏེ། བདག་ལ་མཐོ་འཚམ་པར་ཟད་དོ། །དེ་ནས་དེས་དེ་
ལ་སྨྲས་པ། ཁྱོད་ཉིད་ཀྱི་ཁྱིམ་ན་གཏེར་ཡོད་མོད་ཀྱི། ཁྱོད་བདག་ཀྱང་མི་ཤེས་ན། གཞན་གྱིས་ལྟ་ཤེས་པར་ག་ལ་ནུས། དེ་ནས་དེ་བདག་གིས་ཐོབ་པར་འཚལ་ལོ། །ཞེས་དེ་དེ་ལ་
གསོལ་པ་འདེབས་སོ་།དེ་ནས་དེས་ཁྱིམ་དེའི་ནང་ནས་གཏེར་དེ་བརྐོས་ནས་དེ་ཉིད་ལ་བྱིན་ནོ། །དེ་ནས་དེས་དེ་མཐོང་ནས་ངོ་མཚར་དུ་གྱུར་ཏེ། དེ་ལ་སྐྱབས་སུ་སོང་བ་དེ་བཞིན་དུ་
རིགས་ཀྱི་བུ། དེ་བཞིན་གཤེགས་པའི་སྙིང་པོ་ནི། སེམས་ཅན་ཐམས་ཅད་ལ་ཡོད་ལ་མཐོང་བར་མི་ནུས་པ་ཙམ་དུ་ཟད་དེ། བུད་མེད་དབུལ་མོ་དེ་ཉིད་ལ་གཏེར་ཡོད་པ་དང་འདྲའོ། །
རིགས་ཀྱི་བུ། ངས་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ། །ཞེས་ཡང་དག་པར་བསྟན་པར་བྱ་སྟེ། ཇི་ལྟར་དབུལ་མོ་དེས་གཏེར་ཆེན་པོ་ཡོད་པར་བསྟན་ཀྱང་མི་
ཤེས་པ་དེ་བཞིན་དུ་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་པའང་ཉོན་མོངས་པའི་རྣམ་པས་བསྒྲིབས་པས་སེམས་ཅན་རྣམས་ཀྱིས་མི་ཤེས་ཤིང་མ་མཐོང་ནས་དེ་
དག་ལ་དེ་བཞིན་གཤེགས་པས་བསྟན་ཏེ། དེ་དག་མགུ་ནས་དེ་བཞིན་གཤེགས་པ་ལ་སྐྱབས་སུ་འགྲོའོ། །གསོལ་པ། བཅོམ་ལྡན་འདས། སངས་རྒྱས་ཀྱི་ཁམས་མཆིས་པར་ད་བདག་གིས་
རྟོགས་ཏེ། གདམས་ངག་སྟོན་པར་མཛད་པའི་དེ་བཞིན་གཤེགས་པ་ཉིད་ནི། ཐབས་དང་ལྡན་བའི་མི་དེ་དང་འདྲ་བར་བལྟ་བར་བགྱིའོ། །སེམས་ཅན་ཐམས་ཅད་ནི། བུད་མེད་དབུལ་མོ་
དང་འདྲ་བར་བལྟ་བར་བགྱིའོ། །བཀའ་སྩལ་པ། རིགས་ཀྱི་བུ། གཞན་ཡང་དཔེར་ན། བུད་མེད་ཅིག་ཡོད་ལ་དེའི་བུ་ཤིན་ཏུ་ཆུང་བ་ནད་པ་ཞིག་ཡོད་དེ། དེའི་སྐབས་སུ་བུད་མེད་དེས་སྨན་པ་
བཀུག་ནས་སྨན་པ་དེས་བྱིས་པ་དེ་ཁ་ར་དང་སྦྱར་བའི་སྨན་མར་བླུད་ནས་དེའི་མ་ལ་བསྒོ་བ། ཆེ་ཞེ། ཁྱོད་ཀྱིས་སྨན་མར་མ་ཞུ་བའི་བར་དུ་བྱིས་པ་ལ་ནུ་མ་མ་བླུད་ཅིག །ཅེས་བྱས་ནས་བུད་
མེད་དེས་དེ་ནུར་མི་གཞུག་པར་བྱ་བའི་ཕྱིར་བདག་གི་ནུ་མ་གཉིས་ནིམྤའི་ལོ་མ་བཏགས་པའི་ལྡེ་གུས་བསྐུས་ནས་རང་གི་བུ་ལའང་འདི་སྐད་ཅེས་བསྒོ་སྟེ། བུ་གཅིག །ངའི་ནུ་མ་དུག་གིས་
༄༅། །བསྐུས་ཀྱི། བུ་གཅིག །ཁྱོད་མ་ནུ་ཞིག་ཅེས་བྱས་སོ། །དེ་ནས་ཁྱེའུ་དེ་སྐོམ་སྟེ་ནུ་མ་ནུའོ། །སྙམ་དུ་བསམ་ནའང་ནུ་མ་ནིམྤའི་ལོ་མའི་དྲི་བྲོ་ནས་ངུས་ཏེ་ཆོ་གའི་མཐར་
མ་ཕྱིན་གྱི་བར་དུ་རང་སྡོད་དོ། །དེ་ནས་ཆོ་ག་ཟིན་ནས་བུད་མེད་དེས་རང་གི་ནུ་མ་གཉིས་ཆུས་བཀྲུས་ནས་བུ་དེ་ལ་སྨྲས་པ། ཀྱེ་བུ་གཅིག །ད་ནི། ནུ་མ་ནུས་ཤིག་ཅེས་བྱས་ན། ཁྱེའུ་དེས་
དུག་ཡོད་སྙམ་སྟེ་ནུར་མ་བཏུབ་ནས་ངུ་ཞིང་འདུག་སྟེ་བལྟའང་མི་ལྟའོ། །དེ་ནས་ཡང་སྨྲས་པ། སྔར་ནི། ཁྱོད་ཀྱི་སྨན་མར་དེ་མ་ཞུ་བ་ལ་ཐོགས་ཏེ་ནུ་མ་ནུར་མི་གཞུག་པའི་ཕྱིར་ངས་ནུ་
མ་གཉིས་ནིམྤའི་ལོ་མའི་ལྡེ་གུས་བསྐུས་ཏེ། ཁྱོད་ལ་གནོད་པར་འགྱུར་ཞིང་ཤིར་དོགས་ནས་ནུར་མ་བཅུག་པ་ཡིན་གྱི། ད་ནི། ནུས་ཤིག །ཅེས་བྱས་ནས་ནུར་བཅུག་སྟེ། དེས་ཀྱང་
དལ་བུས་ནུ་མ་ནུས་སོ། །རིགས་ཀྱི་བུ། དེ་བཞིན་དུ་ངས་ཀྱང་སྔར་ནི། གདུལ་པར་བྱ་བའི་དབང་གིས་བྱིས་པའི་སྨན་མར་ཞུ་བར་བྱ་བ་བཞིན་དུ། དགེ་སློང་རྣམས་ཀྱི་འཇིག་རྟེན་པའི་
ལྟ་བ་གཞོམ་པར་བྱ་བའི་ཕྱིར་དང༌། འཇིག་རྟེན་ལས་འདས་པའི་ཆེ་བ་ཉིད་ཡང་དག་པར་བསྟན་པའི་ཕྱིར་དང༌། འཇིག་རྟེན་པའི་བདག་ཉིད་དེ་ཁོ་ན་ཉིད་རྫུན་པར་ཡང་དག་པར་
བསྟན་པའི་ཕྱིར་དང༌། བདག་མེད་པར་སྒོམ་པས་ལུས་རྣམ་པར་དག་པར་བྱ་བའི་ཕྱིར་དགེ་སློང་དག་ཆོས་ཐམས་ཅད་བདག་མེད་པར་སྒོམས་ཤིག །དེ་ལྟར་བསྒོམས་དང་ངར་འཛིན་
པ་སྤོང་བར་འགྱུར་རོ། །ངར་འཛིན་པ་ཡོངས་སུ་སྤངས་ན། མྱ་ངན་ལས་འདས་པ་ཐོབ་པར་འགྱུར་རོ། །ཞེས་བྱས་ཏེ། ཇི་ལྟར་བྱིས་པའི་མས་རང་གི་ནུ་མ་ནིམྤའི་ལོ་མའི་ལྡེ་གུས་བསྐུས་པ་
དེ་བཞིན་དུ་ངས་ཀྱང་ཆོས་ཐམས་ཅད་བདག་མེད་པར་སྟོང་པ་ཉིད་དུ་སྒོམས་ཤིག་ཅེས་བྱས་སོ། །ཇི་ལྟར་བྱིས་པའི་མ་དེས་ཕྱིས་རང་གི་ནུ་མ་བཀྲུས་ཏེ་བུ་ལ་སྨྲས་པ། སྔར་ནི། ཁྱོད་ཀྱི་སྨན་
མར་མ་ཞུ་བར་བྱ་བའི་ཕྱིར་ནུ་མ་ནུར་མ་བཅུག་གི །ད་ནི། ནུས་ཤིག་ཅེས་ཟེར་བ་དེ་བཞིན་དུ། ངས་ཀྱང་འཇིག་རྟེན་པའི་ཆོས་ལས་བསྒྱུར་བའི་ཕྱིར་དེ་སྐད་ཅེས་བསྟན་ཏེ། བདག་མེད་དོ། །
ཞེས་བྱས་ནས་ད་ནི། ང་དེ་བཞིན་གཤེགས་པའི་སྙིང་པོ་ཡོད་ཅེས་སྟོན་གྱི། དགེ་སློང་དག་བྱིས་པ་བཞིན་དུ་མ་སྐྲག་པར་ཇི་ལྟར་བྱིས་པ་དེས་བརྟགས་ནས་ཕྱིར་ཡང་མའི་ནུ་མ་ནུ་བར་བྱེད་པ་དེ་
བཞིན་དུ་དགེ་སློང་དག། ཁྱེད་ཀྱིས་ཀྱང་བདག་ཅག་ལ་དེ་བཞིན་གཤེགས་པའི་སྙིང་པོ་ཡོད་དོ། །སྙམ་དུ་བརྟགས་ནས་སྒོམ་པ་ལ་བརྩོན་པར་གྱིས་ཤིག་དང་ད་བསྟན་ཏོ། །གསོལ་པ། འདི་
ནི། བྱིས་པ་བཙས་མ་ཐག་ཏུ་ཤེས་པ་ཆུང་ལ་ཤེས་པ་མ་མཆིས་པ་ནི། གསལ་བར་འགྱུར་བ་མི་རིགས་ལགས་སོ། །གལ་ཏེ་བདག་མཆིས་ན་ནི། ཤེས་པ་དང༌། བློ་གྲོས་དང་ཡང་ལྡན་པའི་
རིགས་ལགས་སོ། །གལ་ཏེ་ཤེས་པ་ཞན་པ་ལགས་ན་ནི། གསལ་བར་འགྱུར་བའི་ཡང་མི་རིགས་པས་ན། བདག་ནི། བདག་མ་མཆིས་ཞེས་མཆིས་ལགས་སོ། །དེ་ཅིའི་སླད་དུ་ཞེ་ན། བདག་
༄༅། །རྟག་པ་ལགས་ན། སྐྱེས་སླན་ཆད་འགུམ་པའི་མི་རིགས་ལགས་སོ། །གལ་ཏེ་དེ་བཞིན་གཤེགས་པའི་ཁམས་རྟག་པ་ལགས་ན། ཐ་དད་པའི་བྱེ་བྲག་ཀྱང་དེ་ལ་
སྣང་སྟེ། བྲམ་ཟེ་དང༌། རྒྱལ་རིགས་དང༌། རྗེའུ་རིགས་དང༌། དམངས་རིགས་དང༌། གདོལ་པ་དང༌། དུད་འགྲོའི་སྐྱེ་གནས་སུ་གྱུར་པའི་ལས་ཀྱི་བྱེ་བྲག་རྣམས་ལས་སྐྱེ་བའི་བྱེ་བྲག་ཐ་དད་
པ་དག་ཀྱང་སྣང་ལགས་སོ། །གལ་ཏེ་བདག་མཆིས་ན། བྱེ་བྲག་མ་མཆིས་པའི་བདག་ནི། མཉམ་པ་ཉིད་ལགས་ཏེ། དེ་ལྟ་ན། དེ་ལ་ཁམས་མ་མཆིས་ལགས་སོ། །གལ་ཏེ་ཁམས་
མཆིས་ན། གསོད་པ་དང༌། ཕ་རོལ་གྱི་ནོར་རྐུ་བ་དང༌། འཁྲིག་པ་ལ་སོགས་པ་མི་དགེ་བ་བཅུའི་ལས་ཀྱི་ལམ་རྣམས་ལ་ཅིའི་སླད་དུ་འཇུག་ལགས། ཆང་འཐུངས་པས་ཅིའི་སླད་དུ་ར་རོ་བར་
འགྱུར་ལགས། གལ་ཏེ་སེམས་ཅན་གྱི་ཁམས་རྟག་པ་ལགས་ན། དེ་ལྟ་ན་འོན་པ་རྣམས་ཀྱང་རྣ་བས་ཐོས་པར་འགྱུར་བའི་རིགས། ལོང་བ་རྣམས་ཀྱང་མཐོང་བར་འགྱུར་བའི་རིགས།
ལྐུག་པ་རྣམས་ཀྱང་སྨྲ་མཁས་པར་འགྱུར་བའི་རིགས་ལགས་སོ། །གལ་ཏེ་བདག་སེམས་ཅན་གྱི་ཁམས་དེ་རྟག་པ་ལགས་ན། བད་ཀན་དང༌། ནུར་ནུར་པོ་དང༌། སྔོན་པོ་དང༌། སེར་
པོའི་ཚོགས་རྣམས་བདག་གང་གི་ནང་ན་གནས་ལགས། བདག་དེའང་དེ་རྣམས་ཀྱི་གོ་སྐབས་གང་ན་གནས་ལགས། འོན་ཏེ་རླན་དང་འདྲ་བར་ཐམས་ཅད་དུ་གནས་ལགས་སམ།
གལ་ཏེ་དེ་ལྟ་ན་ནི། མི་གཡུལ་དུ་མཆིས་པའི་རྣ་བ་དང༌། སྣ་ཆད་ན། བདག་དེའི་ཡང་ཉིད་ལག་ཉམས་པར་འགྱུར་བའམ། ལག་རྡུམ་དུ་འགྱུར་བའི་རིགས་ལགས་སོ། །བཀའ་སྩལ་པ།
རིགས་ཀྱི་བུ། དཔེར་ན། རྒྱལ་པོ་ལ་ལ་ཞིག་གི་གྱད་ཀྱི་དཔྲལ་བའི་སྨིན་མཚམས་སུ་རིན་པོ་ཆེ་རྡོ་རྗེ་བཏགས་པ་ལས་གྱད་དེ་གྱད་གཞན་ཞིག་དང་སྟོབས་འགྱེད་དེ། དེ་གཉིས་ལུག་
བཞིན་དུ་འགྱེད་པ་ལས་གྱད་གཅིག་ཤོས་ཀྱི་མགོ་བོས་བརྡུངས་ཏེ་གྱད་དེའི་དཔྲལ་བ་སྣད་པར་བྱས་ནས་སྨིན་མཚམས་གྱི་རྒྱན་རིལ་གྱིས་ནང་དུ་ནུབ་པར་བྱས་ན། གྱད་དེས་མ་ཚོར་ཏེ་
བདག་གིས་རྡོ་རྗེ་གར་གཞིག་ཅིག་གུ་སྙམ་སྟེ། དེས་སྨན་པ་བཀུག་ནས་རྨ་ཁ་འཆོས་སུ་བཅུག་གོ །སྨན་པ་དེའང་ཐབས་མཁས་ཤིང་ཡིད་རྣོ་བ་ཞིག་སྟེ། རྨ་འདི་ནི། ནོར་བུ་དེ་ལས་གྱུར་ཏོ། །
སྙམ་དུ་ཤེས་ནས་རྡོ་རྗེ་དེ་དཔྲལ་བའི་ནང་དུ་ནུབ་ཅིང་འདུག་གོ །སྙམ་སྟེ། དེས་གྱད་དེ་ལ་ཀྱི་མི། ཁྱོད་ཀྱི་ནོར་བུ་དེ་གར་སོང་ཞེས་དྲིས་པ་དང༌། དེས་སྨན་པ་དེ་ལ་སྨྲས་པ། ཀྱེ་མ་སྨན་པ། ངའི་
སྨིན་མཚམས་གྱི་རྒྱན་རྡོ་རྗེ་དེ་སྟོར་གོར་མ་ཆག་གོ །ཀྱེ་ཧུད་བདག་གིས་གང་ཙེའི་ནང་དུ་བཅུག་གམ་གར་བཅུག་པ་མ་ཤེས་ཏེ། སྒྲོམ་བུའི་ནང་དུ་བཙལ་ནའང་མ་རྙེད་དོ། །ཀྱེ་ཧུད་ཕུང་གི་མེད་
དོ༑ ༑ཆུའི་ཆུ་བུར་བཞིན་དུ་མེད་པར་གྱུར་ན། ཅི་སྒྱུ་མ་ལྟ་བུར་གྱུར་ཏམ་ཞེས་ཟེར་རོ། །དེ་ནས་དེ་ལ་སྨན་པས་སྨྲས་པ། ཀྱེ་མི། ཁྱོད་དེ་ལྟར་མྱ་ངན་མ་བྱེད་ཅིག །ཁྱོད་ཀྱི་རྡོ་རྗེ་དེ་ནི། རྨའི་ནང་དུ་F
༄༅། །ནུབ་ནས་ཤ་དང༌། ཁྲག་དང༌། རྣག་གི་ནང་ན་འབར་ཞིང་འདུག་སྟེ། ཁྱོད་སྟོབས་འགྱེད་པ་ལ་ཡིད་བྲེལ་ནས་མ་ཚོར་བར་ཟད་དོ། །ཞེས་སྨན་པ་དེས་དེ་སྐད་བྱས་ཀྱང་
ཡིད་མི་ཆེས་ཏེ། འོ་ན་རྣག་ཁྲག་དང་བཅས་ཏེ་ཅིའི་ཕྱིར་མ་བྱུང༌། ཡང་ན་ཆུ་བ་ལ་ཐོགས་ཏེ་འདུག་གམ། ཁྱོད་དེ་སྐད་དུ་མ་སྨྲ་ཞིག་ཅེས་སྨན་པ་དེ་ལ་དེ་སྐད་ཅེས་སྨྲས་སོ། །དེ་ནས་སྨན་
པ་དེས་རྡོ་རྗེ་དེ་ཕྱུང་ནས་དེ་ལ་བསྟན་ཏེ། དེས་མཐོང་ནས་ངོ་མཚར་དུ་གྱུར་པ་དེ་བཞིན་དུ་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་མོད་ཀྱི། སེམས་ཅན་རྣམས་ཀྱིས་
ནི༑ དེ་མི་ཤེས་ཏེ། མི་དགེ་བའི་གྲོགས་པོ་ལ་བརྟེན་པའི་ཉེས་པ་དང༌། འདོད་ཆགས་དང༌། ཞེ་སྡང་དང༌། གཏི་མུག་གིས་ནོན་པས་སེམས་ཅན་རྣམས་སེམས་ཅན་དམྱལ་བ་དང༌།
དུད་འགྲོ་དང༌། ཡི་དྭགས་དང༌། ལྷ་མ་ཡིན་དང༌། གདོལ་པ་དང༌། བྲམ་ཟེ་དང༌། རྒྱལ་རིགས་དང༌། རྗེའུ་རིགས་དང༌། དམངས་རིགས་རྣམས་སུ་སྐྱེ་བར་འགྱུར་རོ། །བདག་གི་ཉེས་
པའི་སྟོབས་དང༌། འདོད་ཆགས་དང༌། ཞེ་སྡང་དང༌། གཏི་མུག་གིས་མི་ཤེས་པས་སེམས་ཅན་རྣམས་གླེན་པ་དང༌། འོན་པ་དང༌། ལོང་བ་དང༌། ལག་རྡུམ་དང༌། གཞོགས་བསྐམས་
དང༌། དྲི་མ་སྣ་ཚོགས་ཀྱིས་གོས་པ་དང༌། མིག་སེར་པ་དང༌། སྲན་སྡེའུའི་མདོག་ལྟར་འདུག་པ་དང༌། མེ་ཏོག་ཀུ་རནྟ་ཀའི་མདོག་ལྟར་འདུག་པ་དང༌། མིག་དམར་སེར་དུ་འདུག་པ་
དང༌། སྲིད་པ་ཉིད་ཤུ་རྩ་ལྔ་དག་ཏུ་རྣམ་པ་སྣ་ཚོགས་སུ་འགྱུར་རོ། །ཇི་ལྟར་གྱད་དེ་རང་གི་ལུས་ལ་རྡོ་རྗེ་འདུག་ཀྱང་འདུ་ཤེས་ཉམས་པས་སྟོར་བའི་འདུ་ཤེས་སུ་རྟོག་པ་དེ་བཞིན་དུ་སེམས་ཅན་
འཇིག་རྟེན་པ་རྣམས་བདག་གི་དེ་ཁོ་ན་ཉིད་མ་རྟོགས་པ་དང༌། མི་དགེ་བའི་གྲོགས་པོའི་དབང་དུ་གྱུར་པ་དང༌། དགོངས་པའི་ཚིག་མི་ཤེས་པས་བདག་ཡོད་བཞིན་དུ་བདག་མེད་པར་སྒོམ་
པར་བྱེད་དོ། །བདག་མེད་པ་མི་སྒོམ་པ་རྣམས་ནི། འཇིག་རྟེན་པའི་བདག་སྒོམ་པར་བྱེད་དོ། །ཇི་ལྟར་འཇིག་རྟེན་པའི་བདག་ཡོད་དོ། །ཞེས་བདག་གི་དེ་ཁོ་ན་ཉིད་མ་རྟོགས་པ་བཞིན་དུ་འཇིག་
རྟེན་ལས་འདས་པའི་ཡང་དེ་དང་འདྲ་སྟེ། མི་དགེ་བའི་གྲོགས་པོ་ལ་བརྟེན་པ་དགོངས་པའི་ཚིག་གི་མཐའ་མི་ཤེས་པས་བདག་མེད་དོ། །བདག་མེད་དོ། །ཞེས་སྒོམ་བཞིན་དུ་བདག་མེད་
པའི་དེ་ཁོ་ན་ཉིད་མི་ཤེས་ཏེ། བདག་ག་ལ་ཡོད། ག་ན་གནས། ཅི་རྫ་མའི་ནང་ན་རྫ་མ་འདུག་པ་ལྟ་བུ་ཞིག་གམ། འོན་ཏེ་རླན་ལྟ་བུར་ཁྱབ་པར་འདུག་གམ། གྱད་རྨོངས་པའི་སྨིན་མཚམས་
ཀྱི་རྒྱན་ལྟ་བུར་འདུག་གམ་སྙམ་པ་ལ་སྨན་པ་བཞིན་དུ་དེ་བཞིན་གཤེགས་པས་དེ་དག་ལ་འདི་སྐད་དུ་བདག་ནི། ཐམས་ཅད་དུ་གནས་པ་མ་ཡིན་ལ། རིན་པོ་ཆེ་རྡོ་རྗེ་ལྟར་འོད་གསལ་ཞིང་
ཉོན་མོངས་པའི་རྣམ་པས་བསྒྲིབས་པ་ཡིན་ནོ། །ཞེས་བཀའ་སྩལ་ཏེ། དེ་སྐད་ཅེས་བཀའ་སྩལ་པ་ལ་སེམས་ཅན་རྣམས་ཡིད་ཆེས་པར་འགྱུར་ལ་ཉོན་མོངས་པ་ཟད་པར་བྱ་དགོས་པ་
༄༅། །ཙམ་དུ་ཟད་དོ། །དེ་ནས་རྡོ་རྗེ་བཞིན་དུ་དེ་བཞིན་གཤེགས་པའི་སྙིང་པོ་མཐོང་བར་འགྱུར་རོ། །རིགས་ཀྱི་བུ། དེ་ལྟར་ན། དེ་བཞིན་གཤེགས་པའི་སྙིང་པོ་ནི། དཔག་ཏུ་མེད་
དོ༑ ༑གཞན་ཡང་རིགས་ཀྱི་བུ། དཔེར་ན། གངས་ཀྱི་རི་ལ་བཅུད་ཀྱི་ཁམས་བུད་པའི་བཅུད་ཅེས་བྱ་བ་ཞིག་ཡོད་དེ། དེ་ཤིང་གེལ་པའི་ནགས་སྟུག་པོས་གཟིངས་ཤིང་འདུག་ཀྱང་དེ་དྲི་བསུང་
གིས་མངོན་ཏེ། སྔོན་འཁོར་ལོས་བསྒྱུར་བའི་རྒྱལ་པོ་ཞིག་གིས་དེའི་དོན་དུ་ངོས་སོ་སོ་ནས་ཝ་བཙུགས་ནས་བཅུད་ཀྱི་ཁམས་དེ་ལས་ཝ་ལ་ལའི་ཁ་ནས་ནི། ཁུ་བ་སྐྱུར་བ་འབྱུང༌། །ལ་ལའི་
ཁ་ནས་ནི། ལན་ཚྭའི་རོ་འབྱུང༌། ལ་ལའི་ཁ་ནས་ནི། མངར་བ་འབྱུང༌། ལ་ལའི་ཁ་ནས་ནི། ཚ་བ་འབྱུང༌། ལ་ལའི་ཁ་ནས་ནི། ཁ་བ་འབྱུང༌། ལ་ལའི་ཁ་ནས་ནི། བསྐ་བ་འབྱུང་སྟེ། བཅུད་
ཀྱི་ཁམས་དེ་ལྟ་བུ་དེ་ནགས་ཀྱི་ནང་ན་ནམ་མཁའ་ལ་ལྡིང་ངོ༌། །བཅུད་རོ་གཅིག་པུ་དེ་འདྲ་བ་དེ་ལས་རོ་ཐ་དད་པ་སྣ་ཚོགས་འབྱུང་ལ་རོ་དེ་དག་ཀྱང་ཕན་ཚུན་འདྲེ་བར་མི་འགྱུར་ཏེ། བཅུད་
ཀྱི་ཁམས་དེའང་ཟླ་བའི་དཀྱིལ་འཁོར་བཞིན་དུ་ཡོངས་སུ་ཁྱབ་པར་འདུག་གོ །དེ་དེ་ལྟར་འདུག་ཀྱང་སེམས་ཅན་གཞན་དག་གིས་ནི། ཤིང་གེལ་པའི་ནགས་དེའི་ནང་དུ་ཞུགས་ཏེ་འཇོར་
དག་གིས་བརྐོས་ཀྱང་སེམས་ཅན་སྐལ་བ་ཆུང་དུ་[?] རྣམས་ཀྱིས་ཐོབ་པར་མི་འགྱུར་ལ། འཁོར་ལོས་བསྒྱུར་བའི་རྒྱལ་པོས་ནི། བསོད་ནམས་ཀྱི་མཐུས་ཐོབ་པར་འགྱུར་བ་དེ་བཞིན་དུ་རིགས་
ཀྱི་བུ། དེ་བཞིན་གཤེགས་པའི་སྙིང་པོ་ནི། [?] ཀྱི་ཁམས་དང་འདྲ་བ་ལ་ཉོན་མོངས་པའི་རྣམ་པས་བསྒྲིབས་ཤིང་འདུག་སྟེ། སངས་རྒྱས་སུ་འགྱུར་བའི་རྒྱུར་རོ་གཅིག་ཏུ་ཟིན་ཀྱང་དེ་ལས་
སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པས་རོ་མང་པོར་འགྱུར་ཏེ། སྐྱེས་པ་དང༌། བུད་མེད་དང༌། མ་ནིང་རྣམས་འབྱུང་བར་འགྱུར་རོ། །དེ་བཞིན་གཤེགས་པའི་ཁམས་དེ་ནི། སྐྱེས་
བུའི་རང་བཞིན་ཡིན་ཏེ། དེ་བས་ན། སྲོག་བཅད་པས་སྲོག་ཆགས་གསད་པར་མི་འགྱུར་རོ། །གལ་ཏེ་སྲོག་ཆགས་བསད་པར་གྱུར་ན་ནི། འཚོ་བ་པོ་གཏན་མེད་པར་བྱས་པར་འགྱུར་ལ།
འཚོ་བ་པོ་གཏན་མེད་པར་འགྱུར་བ་ནི། མི་སྲིད་དོ། །དེ་ལ་འཚོ་བ་པོ་ཞེས་བྱ་བ་ནི། དེ་བཞིན་གཤེགས་པའི་སྙིང་པོ་ཡིན་ལ་ཁམས་དེ་ནི། གཞིག་པའམ། གསད་པའམ། གཏན་མེད་པར་
བྱ་མི་ནུས་ལ་སངས་རྒྱས་ཉིད་མ་ཐོབ་ཀྱི་བར་དུ་ཤིན་ཏུ་རྣམ་པར་དག་པར་མཐོང་བར་ཡང་མི་ནུས་སོ། །དེ་བས་ན། སྲོག་ཆགས་གསོད་པའི་མི་མེད་དོ། །གསོལ་པ། མ་མཆིས་ཞེས་བགྱིར་
མི་རུང་སྟེ། གལ་ཏེ་མ་མཆིས་སུ་ལགས་ན། སྲོག་ཆགས་བཀུམ་པས་སྡིག་པར་མི་འགྱུར་བའི་རིགས་ལགས་སོ། །བཀའ་སྩལ་པ། ཡོད་དོ། །ཞེས་བརྗོད་པར་བྱ་སྟེ། ཇི་ལྟ་ཞེ་ན། ཕྱི་རོལ་
[?] བསགས་པའི་ཁམས་ཤིང་གེལ་པ་དང་འདྲ་བ་དེ་བསད་པ་ལ་སྲོག་གཅོད་པ་ཞེས་བྱ་སྟེ། དེ་བས་ན། སྲོག་བཅད་པས་དེ་སྡིག་པའི་ཚོགས་ཀྱིས་ངན་འགྲོར་འགྲོ་བར་འགྱུར་ལ། ལས་
༄༅། །ངན་པའི་རྣམ་པར་སྨིན་པས་བྲམ་ཟེ་དང༌། རྒྱལ་རིགས་དང༌། རྗེའུ་རིགས་དང༌། དམངས་རིགས་དང༌། གདོལ་པ་དང༌། བྱ་དང༌། རི་དྭགས་དང༌། མཚན་མ་ཐ་དད་པ་གསུམ་
གྱི་མིང་དང༌། བློ་ཐ་དད་པ་དང༌། སྲིད་པ་ཉི་ཤུ་རྩ་ལྔ་དག་ཏུ་སེམས་ཅན་རྣམས་ཉིང་མཚམས་སྦྱོར་བར་འགྱུར་རོ། །འཇིག་རྟེན་པ་རྣམས་ཀྱི་བདག་ནི། ལྡུམ་བུ་ཤ་མ་ཀའི་འབྲས་བུ་ཙམ་དང༌།
འབྲས་ཀྱི་འབྲུ་ཙམ་དང༌། མཐེ་བོ་ཙམ་ཞེས་བྱ་བ་ལ་སོགས་པར་རྟོག་པ་སྟེ། མི་བདེན་པའི་རྟོག་པ་ཡིན་ནོ། །འཇིག་རྟེན་ལས་འདས་པའི་རྟོག་པ་ནི། སངས་རྒྱས་ཀྱི་ཁམས་ཡོད་པར་
རྟོག་པ་གང་ཡིན་པ་སྟེ། དོན་དམ་པའི་བདེན་པའི་རྟོག་པ་ཡིན་ནོ། །རིགས་ཀྱི་བུ། གཞན་ཡང་དཔེར་ན། གཏེར་གྱི་འབྱུང་ཁུང་གི་དཔྱད་ཤེས་པའི་མིས་འཇོར་རམ། རྐོ་བའི་དཔྱད་
གཞན་དག་གིས་གཏར་བརྐོས་ན། རྡོ་དང་གསེག་མ་ཐམས་ཅད་ནི། ཕྱེ་མར་རློག་པར་ནུས་ལ། རྡོ་རྗེ་ནི། ནམ་ཡང་ཅུང་ཟད་ཀྱང་ཆོད་པར་མི་ནུས་ཏེ། མཚོན་ཆ་ཐམས་ཅད་ཀྱིས་ཀྱང་
རྡོ་རྗེ་རིན་པོ་ཆེ་མི་ཆོད་པ་དེ་བཞིན་དུ་རིགས་ཀྱི་བུ། དེ་བཞིན་གཤེགས་པའི་སྙིང་པོ་སྐྱེ་བ་པོའི་བདག་ནི། ལྷ་དང་བདུད་བྱེ་བ་སྙེད་ཀྱིས་ཀྱང་མཚོན་ཆ་ཐམས་ཅད་ཀྱིས་གཅོད་པར་མི་
ནུས་ལ་བསགས་པའི་ཁམས་ནི། རྡོ་དང་གསེག་མ་བཞིན་དུ་ཕྱེ་མར་རློག་ནུས་སོ། །དེ་བཞིན་གཤེགས་པའི་སྙིང་པོ་འཚོ་བ་པོ་ནི། རྡོ་རྗེ་རིན་པོ་ཆེ་དང་འདྲ་སྟེ། དེ་བས་ན། མི་རྣམས་ཀྱི་
སྲོག་བཅད་པས་འཚོ་བ་འཇིག་པར་འགྱུར་ཏེ། དེའི་ཕྱིར་བསགས་པའི་ཁམས་བཤིག་པས་སྲོག་ཆགས་བསད་པར་འགྱུར་རོ། །རིགས་ཀྱི་བུ། དེ་ལྟར་ན། སངས་རྒྱས་ཀྱི་བསྟན་པ་ཤིན་ཏུ་
རྒྱས་པ་ནི། མཆོག་ཏུ་ཆ་ཕྲ་བ་སྟེ། བདུད་རྩིའི་མཆོག་ཀྱང་ཡིན་ནོ། །དུག་གི་མཆོག་ཀྱང་ཡིན་ནོ། །གསོལ་པ། བཅོམ་ལྡན་འདས། ཅི་ལས་དགོངས་ཏེ། ཤིན་ཏུ་རྒྱས་པ་ནི། བདུད་རྩིའི་
མཆོག་ཀྱང་ལགས། དུག་གི་མཆོག་ཀྱང་ལགས་ཞེས་བཀའ་སྩལ་ལགས། བཀའ་སྩལ་པ། རིགས་ཀྱི་བུ། ཁྱོད་དགོངས་པའི་ཚིག་འདི་ཤེས་པར་འདོད་དམ། གསོལ་པ། བཅོམ་
ལྡན་འདས། དགོངས་པའི་ཚིག་གསུང་གི་མཆོག་ཤེས་པར་འཚལ་ལགས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཁ་ཅིག་བདུད་
རྩི་འཐུངས་པས་འཆི་མི་འགྱུར། །ཁ་ཅིག་གིས་ནི་འཐུངས་ན་འཆི་བར་འགྱུར། །ཁ་ཅིག་དུག་འཐུངས་པས་ཀྱང་འཆི་མི་འགྱུར། །ཁ་ཅིག་གིས་ནི་འཐུངས་ན་འཆི་བར་འགྱུར། །ཐེག་པ་ཆེན་
པོ་འདི་ལ་ནི། །ཆགས་མེད་ཡེ་ཤེས་བདུད་རྩི་ཡིན། །མཚུངས་པ་མེད་པའི་ཡེ་ཤེས་མཆོག །དེ་ཉིད་དུག་ཡིན་ཞེས་ཀྱང་བསྟན། །ཞུ་བའི་འོག་ཏུ་ཟ་བ་ལ། །མར་གྱི་ཉིང་ཁུ་སྦྲང་རྩི་དང༌། །ཁ་ར་
རྣམས་ནི་བདུད་རྩི་བཞིན། །མ་ཞུ་ཟ་ལ་དུག་ཏུ་འགྱུར། །དེ་བཞིན་རབ་རྒྱས་བདུད་རྩིའི་མཆོག །དགོངས་པའི་ཚིག་ལ་མི་མཁས་ཤིང༌། །བྱིས་པའི་བློ་དང་ལྡན་རྣམས་ལ། །མི་བཟད་པ་ཡི་
༄༅། །དུག་ཏུ་འགྱུར། །རང་རྒྱལ་ཉན་ཐོས་རྣམས་ཀྱང་ནི། །རྟག་ཏུ་དེ་དང་འདྲ་བ་ཡིན། །ཐེག་ཆེན་སྨན་མཆོག་དེ་དག་ལ། །བ་ཡི་འོ་མ་འཐུང་བ་བཞིན། །བྱང་ཆུབ་སེམས་
དཔའ་འཇིགས་མེད་པ། །མི་མཆོག་བརྟན་པོ་དེ་དག་ནི། །ཐེག་པ་ཆེན་པོས་ངེས་པར་འབྱུང༌། །འོད་སྲུང་དེ་ལྟར་ཤེས་ནས་ནི། །བདུད་རྩི་རྟག་པ་ཁམས་ཀྱི་དབྱིངས། །དེ་ལ་དང་འདིར་
སྐྱབས་མཆོག་སོང༌། །བདུད་རྩི་མཆོག་གི་ཁམས་ད་ནི། །ང་ཡི་ཁམས་ཡིན་སེམས་ཅན་ཁམས། །རྟག་ཏུ་ང་ལ་སྐྱབས་སོང་ན། །སྐྱབས་གསུམ་བདག་ཉིད་ཁམས་སུ་འགྱུར། །ང་
ཡི་སྐུ་ལ་ཁམས་ཡོད་ཀྱི། །བདག་ཉིད་འདི་ལ་ཁྱོད་ཞུགས་ཤིག །སངས་རྒྱས་ཆོས་དང་དགེ་འདུན་རྣམས། །ང་ཡི་ཁམས་ཀྱི་རང་བཞིན་ཏེ། །གསུམ་པོ་རིན་ཆེན་མཆོག་ཡིན་ཞེས།།
བཅོམ་ལྡན་འདས་ཀྱིས་ཚིགས་བཅད་གསུངས། །གསོལ་པ། འཇིགས་མེད་ཇི་ལྟར་སྐྱབས་མཆི་བ། །བདག་གི་གློ་བར་མ་ཆུད་ལགས། །དཀོན་མཆོག་གསུམ་ཡང་མ་འཚལ་ཏེ། །
བདག་མེད་ལ་ནི་ཇི་ལྟར་མཆི། །སངས་རྒྱས་སྐྱབས་སུ་མཆིས་ན་ཡང༌། །ཇི་ལྟར་དབུགས་ནི་ཕྱིན་པར་འགྱུར། །ཅི་ཡི་སླད་དུ་མི་རྣམས་ནི། །ཆོས་ལ་སྐྱབས་སུ་མཆི་བར་བགྱིད། །ཅི་
ཞིག་གིས་ནི་རང་དགར་འགྱུར། །ཅི་ཞིག་གིས་ནི་མི་འགྱུར་ལགས། །དགེ་འདུན་ལ་ནི་སྐྱབས་མཆིས་ན། །སྐྱབས་གསུམ་མཆོག་ཏུ་ཇི་ལྟར་འགྱུར། །མ་འོངས་པ་ན་སངས་རྒྱས་
ཉིད༑ ༑ཡང་དག་བདེན་པར་ཇི་ལྟར་འཐོང༌། །ཕྱི་མའི་དོན་དུ་སྐྱབས་ཀྱི་གཞི། །གསུམ་པོ་དག་ཀྱང་ཇི་ལྟ་བུ། །ཐེམ་སྐས་ལྟ་བུར་བདག་གིས་མཐོང༌། །ཡེ་ཤེས་གུད་ན་གཞན་མ་མཆིས། །བུ་སྐྱེས་
པ་ནི་མ་མཆིས་པར། །བུ་ཞེས་ཀྱང་ནི་ཇི་སྐད་བགྱི། །བུ་ཆགས་ན་ནི་སྐྱེ་འགྱུར་ཏེ། །བསམ་དང་ལས་ཀྱི་དོན་ཀྱང་མཆིས། །ཐུབ་པ་ཁྱོད་ནི་ཅི་གསུང་བ། །བློ་མེད་རྣམས་ཀྱིས་མི་རྟོགས་ཏེ། །འཁོར་
བའི་བཙོན་རར་ཐམས་ཅད་ཀྱང༌། །འཁོར་ལོ་གཅིག་ཏུ་འཁྱམས་པར་འགྱུར། །དེ་ཕྱིར་དེ་དག་མིང་ཙམ་གྱིས། །དགེ་བསྙེན་དུ་ཡང་མི་འགྱུར་ལགས། །ཐུབ་པ་བདག་ལ་ཕྱེ་སྟེ་གསུངས། །ཐེ་ཚོམ་མྱུར་
དུ་གཅད་པར་གསོལ། །ཡེ་ཤེས་ཆེ་ལྡན་དེ་བཞིན་གཤགས། །དགོངས་པ་ཅི་འདྲ་བསྟན་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །བྱང་ཆུབ་སེམས་དཔའ་སེམས་དཔའ་ཆེ། །
འོད་སྲུང་ཆེན་པོ་དམ་པ་མཆོག །དགོངས་པ་དེ་ཡང་བསྟན་པར་བྱ། །ཁྱོད་ཀྱི་ཐེ་ཚོམ་གཅད་པར་བྱ། །སངས་རྒྱས་ལ་ནི་སྐྱབས་སོང་བས། །དགེ་བསྙེན་ཉིད་ནི་ཐོབ་པར་འགྱུར། །ལྷ་རྣམས་དེ་
དག་ཐམས་ཅད་ནི། །དེ་ཚེ་དེ་ཡི་སྐྱབས་མ་ཡིན། །ཆོས་ལ་སྐྱབས་སུ་སོང་ན་ཡང༌། །འདིར་ནི་འཚོ་བ་སྤོང་བར་འགྱུར། །དགེ་འདུན་ལ་ཡང་སྐྱབས་སོང་ན། །དེ་བཞིན་དགེ་བསྙེན་དག་ཏུ་
འགྱུར༑ ༑དེ་ན་འདི་ལས་ཕྱི་རོལ་རྣམས། །དེ་ཡི་ཡོན་གནས་མ་ཡིན་ལ། །དེ་ལྟར་འཇིགས་པ་མེད་པ་རྣམས། །སྐྱབས་ཀྱི་གཞི་གསུམ་ཐོབ་པར་འགྱུར། །གསོལ་པ། དེ་ཕྱིར་དངོས་གསུམ་
༄༅། །འཇིག་པ་ལ། །བདག་ནི་སྐྱབས་སུ་མཆི་བར་བགྱི། །འདི་ནི་དམ་པ་རྣམས་ཀྱི་ལམ། །འདི་ཉིད་སངས་རྒྱས་ཆོས་ཉིད་ལགས། །ཐུབ་པ་ཆེན་པོ་རྟག་ཏུ་ཡང༌། །གཞི་
གསུམ་པོ་ནི་མཉམ་པ་ཉིད། །བདག་ཀྱང་ཁྱོད་དང་འདྲ་བར་ནི། །གནས་འདིར་བླ་ན་མེད་པ་ལགས། །ལམ་འདི་བདེ་བར་གཤེགས་པས་བསྔགས་པ་སྟེ། །དེར་མཆིས་པ་ནི་ཡང་དག་
བཞུགས་པ་ལགས། །ཀུན་ཏུ་སྤྱན་ཡང་དེ་ཡིས་ངེས་པར་འབྱུང༌། །ལམ་འདི་བདེ་བར་གཤེགས་པས་བསྔགས་པ་སྟེ། །དེ་ཕྱིར་བདག་ཀྱང་སངས་རྒྱས་རྣམས་ཀྱི་ལམ། །ལམ་མཆོག་
རྒྱ་ཆེན་འདིར་ནི་མཆིས་པར་བགྱི། །གལ་ཏེ་བདུད་ནི་བདུད་རྩི་དང་སྩོལ་ཀྱང༌། །སྲིད་པ་དག་ན་བདག་ནི་སྐྱབས་མི་མཆི། །དེ་ནས་བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་
པ༑ ཁྱོད་བྱིས་པ་ཉན་ཐོས་ཀྱི་ཐེག་པ་པ་བཞིན་དུ་མ་འཛིན་ཅིག །གཅིག་བུ་ལ་སྐྱབས་སུ་སོང་ཞིག །ཡེ་ཤེས་འདི་ལ་ནི། སྐྱབས་གསུམ་མེད་དེ། ཆོས་དང༌། དགེ་འདུན་འདུ་བའང་མེད་
དོ༑ ༑སངས་རྒྱས་ཉིད་ཆོས་ཀྱང་ཡིན། དགེ་འདུན་ཡང་ཡིན་ཏེ། དེ་བཞིན་གཤེགས་པ་ཉིད་གཞི་གསུམ་པ་ཡིན་ནོ། །ཉན་ཐོས་ཀྱི་ཐེག་པ་ལས་ནི། བྱིས་པ་རྣམས་ཀྱི་འཇིག་རྟེན་
པའི་ལྟ་བ་གསལ་བའི་ཕྱིར་གཞི་གསུམ་པ་གཞག་གོ །གལ་ཏེ་ཁྱོད་འཇིག་རྟེན་པ་དར་མཐུན་པར་བྱེད་ན། དེའི་ཚུལ་གྱིས་སྐྱབས་ཀྱི་གཞི་གསུམ་དུ་འགྲོ་བར་གྱིས་ལ་བདག་
སངས་རྒྱས་ལ་སྐྱབས་སུ་སོང་ནས་སྐུ་གཅིག་པར་གྱུར་ཅིག །དེ་ནས་སངས་རྒྱས་ཉིད་དུ་གྱུར་ནས་དེ་བཞིན་གཤེགས་པའི་རླབས་བྱེད་པར་གྱུར་ཅིག །དེ་བཞིན་གཤེགས་པ་དང་མཉམ་པར་
གྱུར་ནས་སངས་རྒྱས་རྣམས་ལ་ཐལ་མོ་བཏུད་པར་མི་བྱའོ། །བདག་སེམས་ཅན་ཐམས་ཅད་ཀྱི་སྐྱབས་ཆེན་པོ་ལྟ་བུར་གྱུར་ཅིག །བདག་གིས་ཆོས་ཀྱི་སྐུའང་མི་གཏང་བར་སངས་རྒྱས་ཀྱི་
ཁམས་དང་མཆོད་རྟེན་ལ་ཕྱག་བྱའོ། །ཕྱག་བྱེད་མི་འདོད་པའི་སེམས་ཅན་ཐམས་ཅད་ཀྱི་མཆོད་རྟེན་ལྟ་བུར་བདག་གྱུར་ཅིག །བདག་གི་ལུས་སེམས་ཅན་ཐམས་ཅད་ཀྱིས་ཕྱག་བྱ་བའི་
གནས་སུ་གྱུར་ཅིག །བདག་ཆོས་ལ་སྐྱབས་སུ་སོང་ནས་ཆོས་ཀྱི་སྐུར་གྱུར་ཅིག །དེ་ཁོ་ན་ཉིད་མ་ཡིན་པའི་ཆོས་སྒོམ་པའི་སེམས་ཅན་ཐམས་ཅད་བདག་གིས་མདའ་གཅིག་ནས་གཅིག་
ཏུ་བརྒྱུད་པ་བཞིན་དུ་བྱེད་པར་གྱུར་ཅིག །བདག་དགེ་འདུན་ལ་སྐྱབས་སུ་སོང་ནས་སྦྲང་བུ་དང་འདྲ་བའི་དགེ་འདུན་རྣམས་ཀྱི་སྐྱབས་ལྟ་བུར་གྱུར་ཅིག །བདག་སྐྱབས་སུ་འགྲོ་བ་ལ་
འཇུག་པའི་ཚུལ་གྱིས་སེམས་ཅན་རྣམས་ཀྱི་སངས་རྒྱས་དང༌། ཆོས་དང༌། དགེ་འདུན་ལྟ་བུར་གྱུར་ཅིག །བདག་དམུས་ལོང་དང་འདྲ་བའི་དགེ་འདུན་རྣམས་ཀྱི་མིག་ལྟ་བུར་གྱུར་
ཅིག །བདག་ལ་ཉན་ཐོས་དང་རང་སངས་རྒྱས་སྦྲང་བུ་དང་འདྲ་བ་ཐམས་ཅད་སྐྱབས་སུ་འོང་བར་ཤོག་ཅིག །ཅེས་གྱིས་ཤིག །རིགས་ཀྱི་བུ། དེ་ལྟར་ན། བྱང་ཆུབ་སེམས་དཔའ་སེམས་
༄༅། །དཔའ་ཆེན་པོ་རྣམས་ནི། བྱིས་པ་རྣམས་ལ་སྡིག་པའི་ཕུང་པོ་ཟད་མི་ཤེས་པ་ལྟ་བུའང་ཡིན་ནོ། །མཁས་པ་རྣམས་ནི། དེ་དག་ཉིད་སངས་རྒྱས་ལྟ་བུའང་ཡིན་ནོ། །
དཔེར་ན། དཔའ་བོ་ཡང་དག་པ་ནི། གཡུལ་དུ་འཐབ་པ་ན་འདི་སྙམ་དུ་སེམས་ཏེ། བདག་གིས་དཔའ་བོ་ཐམས་ཅད་ཕམ་པར་བྱས་ནས་ཐམས་ཅད་བདག་ལ་སྐྱབས་སུ་འོང་བར་བྱའོ། །
སྙམ་དུ་སེམས་པ་དང༌། དཔེར་ན། རྒྱལ་པོའི་བུ་ནི། རྒྱལ་པོ་བརྗེ་བའི་སྐབས་སུ་རྒྱལ་པོའི་བུ་ཐམས་ཅད་ལས་འདས་པར་བྱས་ཏེ་བདག་གིས་རྒྱལ་པོ་བྱའོ། །རྒྱལ་པོའི་བུ་ཐམས་
ཅད་ཀྱི་མངའ་བདག་ཏུ་འགྱུར་བར་བྱའོ། །བདག་ལ་དེ་དག་སྐྱབས་སུ་འོང་བར་བྱའོ། །བདག་གིས་དམན་པའི་སེམས་བསྐྱེད་པར་མི་བྱའོ། །སྙམ་དུ་སེམས་པ་ལྟ་བུ་སྟེ། དཔའ་བོ་
རྣམས་དང༌། རྒྱལ་པོ་དང༌། བློན་པོའང་རུང་སྟེ། ཤིན་ཏུ་མཆོག་ཏུ་གྱུར་པས་ཁྱད་པར་དུ་འཕགས་པ་དེ་ལྟ་བུའི་རང་བཞིན་ཅན་རྣམས་ནི། །རང་གི་ཡོན་ཏན་དང་འཚམ་པའི་བྱ་བ་སྒྲུབ་
པར་བྱེད་དོ། །རིགས་ཀྱི་བུ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི། གཞི་གསུམ་ལས་འདའ་བར་འགྱུར་བའི་སེམས་དང་ལྡན་པ་ཡིན་ནོ། །དེ་བས་ན་རྒྱལ་
པོའི་བུ་དང་དཔའ་བོ་བཞིན་དུ་མི་འཇིགས་པར་སྙིང་སྟོབས་སྐྱེད་ཅིག་དང༌། ངས་གཞི་གསུམ་ཐ་དད་པ་མེད་པ་དང༌། གསུམ་གྱི་ནང་ན་དེ་བཞིན་གཤེགས་པ་དམ་པ་ཡིན་པར་ངས་
བསྟན་ཏོ། །ལུས་ཐམས་ཅད་ཀྱི་ནང་ན་མགོ་བོ་གཙོ་བོ་ཡིན་པ་དེ་བཞིན་དུ་སངས་རྒྱས་ཉིད་གཙོ་བོ་ཡིན་ལ་ཇི་ལྟར་ལུས་ལས་མགོ་བོ་གུད་ན་འདུག་པའང་མ་ཡིན། ལག་པ་གུད་ན་འདུག་པའང་
མ་ཡིན། རྐང་པ་གུད་ན་འདུག་པའང་མ་ཡིན་པ་དེ་བཞིན་དུ་སངས་རྒྱས་གུད་ན་འདུག་པའང་མ་ཡིན། ཆོས་གུད་ན་འདུག་པའང་མ་ཡིན་།དགེ་འདུན་གུད་ན་འདུག་པའང་མ་ཡིན་ནོ། །
འོན་ཀྱང་ཐ་དད་དུ་དབྱེ་བ་ནི། བྱིས་པ་རྣམས་ངེས་པར་བསྒྲལ་བའི་ཕྱིར་ཐེམ་སྐས་དང་འདྲ་བར་བསྟན་པ་ཡིན་ནོ། །ཆོས་ཀྱི་དེ་ཁོ་ན་ཉིད་དུ་ནི། གཞི་གསུམ་པོ་ལ་ཐ་དད་དུ་དབྱེ་བར་མ་ལྟ་
ཞིག །བྱིས་པ་བཞིན་དུ་རྨོངས་པར་བྱེད་པའི་ཚིག་རྣམས་མ་འཛིན་ཅིག །ཨུར་མོའི་རལ་གྲི་བཞིན་དུ་སེམས་རྣོ་བར་གྱིས་ཤིག །ཡེ་ཤེས་ཆེན་པོ་དང་ལྡན་པར་གྱིས་ཤིག །དེ་ནས་
བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་ཆེན་པོ་དང་རུས་གཅིག་པས་འདི་སྐད་ཅེས་གསོལ་ཏོ། །དཔའ་བོ་ཆེན་པོ་བཅོམ་ལྡན་འདས། གློ་བར་ཆུད་
བཞིན་དུ་བྱང་ཆུབ་སེམས་དཔའི་སྤྱོད་པ་དྲི་མ་མེད་པ་བཤད་པར་གསོལ་བའི་སླད་དུ་བདག་གིས་ཞུས་ལགས་སོ། །བཅོམ་ལྡན་འདས། ཀྱེ་མ་བྱང་ཆུབ་སེམས་དཔའི་སྤྱོད་པ་ཐེག་པ་ཆེན་
པོ་བླ་ན་མེད་པ་ཤིན་ཏུ་རྒྱས་པ་ཨུར་མོའི་རལ་གྲི་ལྟ་བུ་ལེགས་པར་བཀའ་སྩལ་ཏོ། །ཀྱེ་མ་ལེགས་པར་བཞག་གོ། བྱང་ཆུབ་སེམས་དཔའི་སྤྱོད་པ་བཤད་པ་ཐོས་ནས་བདག་གིས་ཀྱང་
༄༅། །སེམས་ཅན་ཐམས་ཅད་ལ་བསྟན་པར་འཚལ་ལོ། །སེམས་ཅན་སུའང་རུང་སྟེ་དེ་བཞིན་གཤེགས་པའི་སྙིང་པོ་རྟོགས་པར་བགྱི་བའི་སླད་དུ་མདོ་འདི་ལ་མངོན་པར་དད་
པ་རྣམས་ནི། རང་ཉིད་སྐྱབས་གསུམ་ལགས་ཏེ། དེས་ནི། བདག་ཉིད་ལ་སྐྱབས་སུ་མཆི་བར་བགྱིའི། གཞི་གསུམ་ལ་ནི། མི་དགོས་ལགས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་
པའི་སྙིང་པོ་སངས་རྒྱས་ཀྱི་ཁམས་མཆིས་པའི་སླད་དུའོ། །རྣམ་པར་བརྟགས་ནས་བདག་གི་ལུས་ལ་སངས་རྒྱས་ཀྱི་ཁམས་མཆིས་སོ། །ཞེས་བརྗོད་པར་བགྱིའོ། །དེ་ལྟར་འཚལ་ནས་དེས་
སྐྱབས་གསུམ་དུའང་མཆི་བར་མི་བགྱི་སྟེ། དེ་ཉིད་ཆོས་དང༌། དགེ་འདུན་གྱི་སྐྱབས་སུ་གྱུར་པ་དང༌། ཉན་ཐོས་དང༌། རང་སངས་རྒྱས་ཀྱི་རྣམས་ཀྱིས་རྟག་ཏུ་ཕྱག་བགྱི་བའི་གནས་ལགས་སོ། །
དེ་བས་ན། ཐེག་པ་ཆེན་པོ་སྒྲུབ་པ་བརྩམ་པར་བགྱིའོ། །དེ་ལྟར་ན། སངས་རྒྱས་ཀྱི་ཁམས་དང༌། མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུ་ནི། བསམ་གྱིས་མི་ཁྱབ་
ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །ཤེས་རབ་རྣོན་པོས་ནི། དེ་ལྟར་བྱ་དགོས་སོ། །རིགས་ཀྱི་བུ། གཞན་ཡང་དེ་བཞིན་
གཤེགས་པའི་སྙིང་པོ་ལ་འཇུག་པ་ངས་བཤད་པར་བྱའོ། །གལ་ཏེ་བདག་བརྟན་པ་དང་ཐེར་ཟུག་པ་ཡིན་ན་ནི། སྡུག་བསྔལ་གྱི་མཐའ་ཡོད་པར་མི་འགྱུར་ལ། གལ་ཏེ་བདག་མེད་ནའང་
ཚངས་པར་སྤྱོད་པ་ཐམས་ཅད་དོན་མེད་པར་འགྱུར་རོ། །ཆོས་ཐམས་ཅད་བདག་མེད་པ་ཡིན་ན་ནི། དེ་ལྟར་ན། ཆད་པར་ལྟ་བར་འགྱུར་ལ། བདག་བརྟན་པ་ཡིན་ན་ནི། རྟག་པར་ལྟ་བར་འགྱུར་
རོ༑ ༑ཆོས་ཐམས་ཅད་མི་རྟག་པ་ཡིན་ན་ནི། དེ་ལྟ་ན། ཆད་པར་ལྟ་བར་འགྱུར་ལ། ཆོས་ཐམས་ཅད་རྟག་པ་ཡིན་ན་ནི། རྟག་པར་ལྟ་བར་འགྱུར་རོ། །ཆོས་ཐམས་ཅད་སྡུག་བསྔལ་བ་ཉིད་
ཡིན་ན་ནི། ཆད་པར་ལྟ་བར་འགྱུར་ལ། ཆོས་ཐམས་ཅད་བདེ་བ་ཡིན་ན་ནི། རྟག་པར་ལྟ་བར་འགྱུར་རོ། །ཐམས་ཅད་རྟག་པར་སྒོམ་ན་ནི། ཆད་པར་འཛིན་པར་འགྱུར་ལ། ཐམས་ཅད་
ཆད་བར་སྒོམ་ན་ནི། མྱུར་དུ་རྟག་པར་འཛིན་པར་འགྱུར་རོ། །དཔེར་ན། སྲིན་བུ་པད་པ་རྣམས་མིའི་མགོ་བོ་ལ་མྱུར་དུ་ཟ་ཞིང་མྱུར་དུ་གནས་གཅིག་ཤོས་འདོར་བ་དེ་བཞིན་དུ་རྟག་པར་
སྒོམ་ན་ནི། ཐམས་ཅད་འཛིན་པས་སྲིན་བུ་པད་པ་བཞིན་དུ་འགྱུར་རོ། །དེ་བས་ན། མི་དགེ་བའི་ཆོས་གཞན་དག་ལ་ནི། སྡུག་བསྔལ་བར་བསྒོམ་པར་བྱའོ། །དགེ་བའི་ཆོས་གཞན་
དག་ལ་ནི། བདེ་བར་བསྒོམ་པར་བྱའོ། །ཉོན་མོངས་པའི་རྣམ་པ་ལ་སོགས་པའི་ཆོས་གཞན་དག་ལ་ནི། བདག་མེད་པར་བསྒོམ་པར་བྱའོ། །མྱ་ངན་ལས་འདས་པ་ལ་ནི། གཞི་དང་
གནས་མེད་པའི་ཕྱིར་དེ་བཞིན་གཤེགས་པའི་སྙིང་པོ་ལ་སོགས་པ་ཆོས་གཞན་དག་ལ་ནི། བདག་ཡོད་པར་བསྒོམ་པར་བྱའོ། །ལོངས་སྤྱོད་ལ་སོགས་པ་ཆོས་གཞན་དག་ལ་ནི། མི་
༄༅། །རྟག་པར་བསྒོམ་པར་བྱའོ། །དེ་བཞིན་གཤེགས་པའི་ཆོས་ལ་སོགས་པ་ཆོས་གཞན་དག་ལ་ནི། རྟག་པར་བསྒོམ་པར་བྱའོ། །གཞི་གསུམ་དང་ཐར་པའི་དེ་
ཁོ་ན་ཉིད་ནི། སྲིན་བུ་པད་པ་ཟ་བ་ལྟ་བུ་མ་ཡིན་ནོ། །སངས་རྒྱས་ཀྱི་གསུང་ནི། དབུ་མའི་ལམ་འདི་ཡིན་ནོ། །ཞེས་ཤེས་པར་གྱིས་ཤིག། སངས་རྒྱས་བཅོམ་ལྡན་འདས་ཀྱིས་
ནི༑ ཆད་པ་དང་རྟག་པ་གཉི་གའི་མཐའ་སྤངས་པ་དབུ་མའི་ལམ་དུ་གསུངས་སོ། །བླུན་པོ་རྣམས་ནི། སངས་རྒྱས་ཀྱི་གསུང་ལ་རྨོངས་ཏེ། ཕོ་བའི་དྲོད་ཆུང་བ་རྣམས་མར་ཆེར་
ཟ་བ་བཞིན་དུ་མྱུར་དུ་མཐའ་གཉིས་སུ་ལྟ་བར་འགྱུར་ལ། ཡོད་ཅེས་བྱ་བའང་མ་གྲུབ། མེད་ཅེས་བྱ་བའང་མི་འཐད་དོ། །དཔེར་ན། སྨན་པ་རྣམས་ནི། མཁྲིས་པ་ལ་སོགས་
པའི་ཁམས་རྣམས་འཁྲུགས་ཏེ་ཕན་ཚུན་མི་མཐུན་དུ་ཟིན་ཀྱང་མཁྲིས་པའི་ནད་ལ་ནི། མཁྲིས་པ་ཞི་བར་བྱེད། རླུང་ཤས་ཆེ་བ་ལ་ནི། རླུང་སེལ་བར་བྱེད། བད་ཀན་ཅན་
ལ་ནི༑ བད་ཀན་མེད་པར་བྱེད། ཆ་འདུས་པ་ལ་ནི། ཆ་འདུས་པའི་གཉེན་པོ་བྱེད་དེ། ཕན་ཚུན་མི་མཐུན་པར་འགྱུར་བའང་མི་བྱེད་ལ་བདེ་བའང་སྐྱེད་པར་བྱེད་པ་དེ་བཞིན་
དུ་སྨན་པ་ལྟར་ཉོན་མོངས་པའི་རྣམ་པའི་ནད་མཐའ་ཡས་པ་རྣམས་མཐར་གྱིས་བསལ་ཏེ། ཡང་དག་པའི་ཁམས་ཀྱང་གསོ་བར་གྱིས་ཤིག །ཡང་དག་པའི་ཁམས་ཞེས་བྱ་བ་
ནི༑ དེ་བཞིན་གཤེགས་པའི་སྙིང་པོ་སྟེ། སངས་རྒྱས་ཀྱི་ཁམས་ཞེས་བྱ་བ་ཡིན་གྱི། ཁམས་ཐམས་ཅད་སྤངས་ཏེ་རྟག་པ་དང་བརྟན་པ་ལ་ནན་ཏན་གྱིས་ཤིག །ཤེས་རབ་ཅན་རྣམས་
ཀྱིས་ནི། ཡོད་པ་ལའང་ཆགས་པར་མི་བྱའོ། །མེད་ཅེས་བྱ་བའང་བརྫུན་དུ་སྨྲ་བ་ལས་བྱུང་བ་ཡིན་ནོ། །ཡོད་ཅེས་བྱ་བའང་ཁ་རོག་སྟེ། ཁས་བླང་བར་མི་བྱའོ། །རྩོད་པར་ཡང་མི་བྱ་སྟེ།
འདི་དག་རང་བཞིན་གྱིས་ཆོས་ཉིད་དུ་ཤེས་པར་བྱའོ། །བླུན་པོ་དགོངས་པའི་ཚིག་མི་ཤེས་པ་རྣམས་ཀྱིས་ནི། ངའི་ལུས་ལ་བདེ་བའི་ས་བོན་དེ་ལྟ་བུ་ཡོད་བཞིན་དུ་སྡུག་བསྔལ་བར་
བསྟན་པའི་ཕྱིར་རྟག་ཏུ་རྩོད་པར་བྱེད་དེ་ཐམས་ཅད་བཟུང་བས་བྱིས་པ་རྣམས་ངའི་ལུས་མི་བརྟན་ནོ། །སྙམ་དུ་སེམས་ཤིང་རྟོག་པར་བྱེད་དོ། །མི་རྟག་པ་བསྟན་ན་ནི། བྱིས་པ་རྣམས་
རྫ་མཁན་གྱི་སྣོད་བཞིན་དུ་མི་རྟག་གོ། སྙམ་དུ་འཛིན་ཏོ། །ཤེས་རབ་ཅན་རྣམས་ཀྱིས་ནི། ངའི་ལུས་ལ་ཆོས་ཀྱི་སྐུའི་ས་བོན་དེ་ལྟ་བུ་ཡོད་དོ། །སྙམ་དུ་ཤེས་པས་ཐམས་ཅད་འཛིན་པར་མི་
བྱེད་དོ༑ ༑བདག་མེད་པ་བསྟན་ན་ནི། བྱིས་པ་རྣམས་བསྟན་པ་བདག་མེད་དོ་སྙམ་དུ་འཛིན་ཏོ། །ཤེས་རབ་ཅན་རྣམས་ཀྱིས་ནི། ཐ་སྙད་དུ་ཡོད་དོ་སྙམ་དུ་ཤེས་ཏེ། ཐེ་ཚོམ་མེད་དོ། །དེ་
བཞིན་གཤེགས་པའི་སྙིང་པོ་ནི། སྟོང་པ་ཡིན་ནོ། །ཞེས་བསྟན་ན་ནི། བྱིས་པ་རྣམས་ཆད་པ་འཇིགས་སུ་རུང་བའི་ཡོན་པོ་སྒོམ་པར་བྱེད་དོ། །ཤེས་རབ་ཅན་རྣམས་ཀྱིས་ནི། རྟག་པ་
༄༅། །དང༌། བརྟན་པ་དང༌། ཐེར་ཟུག་པ་དེ་སྒྱུ་མ་ཙམ་དུ་ཡོད་པར་ཤེས་སོ། །ཐར་པ་བསྟན་ན་ནི། བྱིས་པ་རྣམས་སངས་རྒྱས་རྣམས་ཀྱིས་ཐར་པ་རྙེད་ནས་མེད་པར་
འགྱུར་རོ་སྙམ་དུ་འཛིན་ཏོ། །ཤེས་རབ་ཅན་རྣམས་ཀྱིས་ནི། །སངས་རྒྱས་བྱོན་པ་དང༌། གཤེགས་པ་ཡོད་པར་ཤེས་ཏེ་མིའི་སེངྒེའི་བྱོན་ཏོ། །ཞེས་ཟེར་རོ། །བྱིས་པ་རྣམས་ནི། མ་རིག་
པའི་རྐྱེན་གྱིས་འདུ་བྱེད་རྣམས་ཞེས་བྱ་བ་ལ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི། མ་རིག་པ་དང༌། རིག་པ་ཐ་དད་པ་གཉིས་སུ་མེད་པར་ཤེས་སོ། །བྱིས་པ་རྣམས་ནི།
འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བ་ལ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི། འདུ་བྱེད་རྣམས་དང༌། འདུ་བྱེད་པ་མེད་པ་ཐ་དད་པ་མེད་པ་གཉིས་སུ་
མེད་པར་ཤེས་སོ། །དེ་བཞིན་དུ་བྱིས་པ་རྣམས་དགེ་བ་དང༌། མི་དགེ་བ་ཐམས་ཅད་ལ་ཐ་དད་པ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི། གཉིས་སུ་མེད་པར་
ཤེས་སོ། །ཞེས་གསུངས་སོ། །བྱིས་པ་རྣམས་ནི། ཁ་ན་མ་ཐོ་བ་དང༌། ཁ་ན་མ་ཐོ་བ་མེད་པ་ལ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི། དེ་བཞིན་དུ་གཉིས་སུ་མེད་
པར་ཤེས་སོ། །ཞེས་གསུངས་ཏེ། དེ་ནི། ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པ་རྣམས་ནི། ལམ་དང༌། ལམ་མ་ཡིན་པ་ཞེས་བྱ་བ་ལ་གཉིས་སུ་འཛིན་ཏོ། །ཤེས་
རབ་ཅན་རྣམས་ཀྱིས་ནི། གཉིས་སུ་མེད་པར་ཤེས་སོ། །ཞེས་གསུངས་ཏེ། དེ་ནི། ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པ་རྣམས་ནི། ཆོས་ཐམས་ཅད་ནག་པོ་དང༌། དཀར་
པོའོ། །ཞེས་བྱ་བ་ལ་གཉིས་སུ་འཛིན་ཏོ། །ཤེས་རབ་ཅན་རྣམས་ཀྱིས་ནི། གཉིས་སུ་མེད་པར་ཤེས་སོ། །ཞེས་གསུངས་ཏེ། དེ་ནི། ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་
པ་རྣམས་ནི། ཆོས་ཐམས་ཅད་སྡུག་བསྔལ་བ་དང༌། བདེ་བ་ཐ་དད་པ་གཉིས་སུ་སྒོམ་པར་བྱེད་དོ། །ཤེས་རབ་ཅན་རྣམས་ནི། གཉིས་སུ་མེད་པར་སྒོམ་མོ། །ཞེས་གསུངས་ཏེ།
དེ་ནི། ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པའི་བློ་ཅན་རྣམས་ནི། དེ་བཞིན་གཤེགས་པའི་སྙིང་པོ་ལ་འདུས་བྱས་ཐམས་ཅད་མི་རྟག་པའོ། །ཞེས་སྒོམ་པར་བྱེད་དོ། །
ཤེས་རབ་ཅན་རྣམས་ཀྱིས་ནི། གཉིས་སུ་མེད་པར་ཤེས་སོ། །ཞེས་གསུངས་ཏེ། དེ་ནི། ཤེས་རབ་ཅན་རྣམས་ཀྱི་རང་བཞིན་ཡིན་ནོ། །བྱིས་པ་རྣམས་ནི། སངས་རྒྱས་ཀྱིས་བདག་མེད་
པར་གསུངས་པ་ལ་ཆོས་ཐམས་ཅད་བདག་མེད་པར་འཛིན་ཏོ། །ཤེས་རབ་ཅན་རྣམས་ཀྱིས་ནི། བདག་ཡོད་པ་དང༌། བདག་མེད་པ་གཉིས་སུ་མེད་པར་ཤེས་ཏེ། དེ་ནི། ཤེས་རབ་ཅན་
རྣམས་ཀྱི་རང་བཞིན་ཡིན་ནོ། །དེ་བཞིན་གཤེགས་པའི་སྙིང་པོ་དཔག་ཏུ་མེད་པ་སངས་རྒྱས་ཀྱིས་བསྔགས་པ་ནི། བསོད་ནམས་ཐམས་ཅད་བསྡུས་པའི་མདོ་ལས་ངས་བསྟན་ཏེ།
༄༅། །བདག་ཡོད་པ་དང༌། བདག་མེད་པ་གཉིས་སུ་མེད་པར་གཟུང་བར་བྱའོ། །རིགས་ཀྱི་བུ། བསོད་ནམས་ཐམས་ཅད་བསྡུས་པའི་མདོ་དང༌། ཤེས་རབ་ཀྱི་ཕ་
རོལ་ཏུ་ཕྱིན་པའི་མདོ་ཆེན་པོ་ལས་གཉིས་སུ་མེད་པ་ལ་འཇུག་པའི་སྣང་བ་དེ་ཉིད་ལས་བདག་ཡོད་པ་དང༌། བདག་མེད་པ་གཉིས་སུ་མེད་པར་ངས་བསྟན་པ་དེ་རྗེས་སུ་དྲན་པར་
གྱིས་ཤིག། །།འཕགས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ། བམ་པོ་བཅུ་པ། དཔེར་ན། འོ་མ་ལས་ཞོ་བྱུང༌། ཞོ་ལས་མར་འབྱུང༌། མར་ལས་ཞུན་
མར་བྱུང༌། ཞུན་མར་ལས་མར་གྱི་ཉིང་ཁུ་འབྱུང་ན། དེ་ལ་ཅི་ཞོ་དེ་འོ་མའི་དངོས་པོ་དང་མགོ་མཉམ་དུ་བྱུང་ངམ། འོན་ཏེ་ཞོ་རང་ཉིད་བྱུང་ངམ། དེ་བཞིན་དུ་ཅི་མར་དེ་ཞོའི་དངོས་
པོ་དང་མགོ་མཉམ་དུ་བྱུང་ངམ། འོན་ཏེ་མར་རང་ཉིད་བྱུང་ངམ། དེ་བཞིན་དུ་ཅི་ཞུན་མར་དེ་མར་གྱི་དངོས་པོ་དང་མགོ་མཉམ་དུ་བྱུང་ངམ། འོན་ཏེ་ཞུན་མར་རང་ཉིད་བྱུང་ངམ། དེ་
བཞིན་དུ་ཅི་མར་གྱི་ཉིངེ་ཁུ་དེ་ཞུན་མར་གྱི་དངོས་པོ་དང་མགོ་མཉམ་དུ་བྱུང་ངམ། འོན་ཏེ་མར་གྱི་ཉིང་ཁུ་རང་ཉིད་བྱུང་ངམ། འོན་ཏེ་སྣུམ་དེ་གཞན་ཞིག་ནས་བྱུང་ངམ། གལ་ཏེ་
གཞན་ཞིག་ལས་བྱུང་ན། དེ་ལྟ་ན་གང་ལས་བྱུང༌། དེ་སྟེ་འོ་མ་མེད་པར་ཞོ་བྱུང་ན་ནི། འོ་མ་མི་དགོས་པར་འགྱུར་རེ། གལ་ཏེ་དེ་ལྟ་ན་ནི། རང་བཞིན་ཅན་དུ་འགྱུར་ལ་ཞོའི་རྒྱུ་
དང་རྟགས་གཉིས་ཀྱང་སྣང་ངོ༌། །དེ་བས་ན། གཅིག་ནས་གཅིག་ཏུ་བརྒྱུད་དེ་བྱུང་བའང་ཡིན་ལ། དངོས་པོ་དེ་དག་དང་མགོ་མཉམ་དུ་གཅིག་ནས་གཅིག་ཏུ་བརྒྱུད་དེ་བྱུང་ཞེས་ཀྱང་མི་བྱའོ། །
གལ་ཏེ་དངོས་པོ་དེ་དག་དང་མགོ་མཉམ་དུ་མ་བྱུང་ནའང་དེ་ལྟ་ན་ཡེ་མེད་དམ། བ་ལས་བྱུང་བའི་ཞུན་མར་ཡང་གཞན་ལས་བྱུང་བ་མ་ཡིན་ལ། རང་བཞིན་ཅན་དེའང་ཐམས་ཅད་ལ་
ཡོད་མོད་ཀྱི། འོན་ཀྱང་ཉེས་པས་བསྒྲིབས་པ་དང༌། ཕན་ཚུན་དུ་འདྲེས་པའི་ཚུལ་དུ་འདུག་པའི་ཕྱིར་མི་མངོན་ཏེ། ངའི་ཟས་ཀྱི་ཉེས་པས་འོ་མ་ཁྲག་གི་དྲི་ང་བ་བྲོ་ལ། བས་རྩྭ་མངར་ཟོས་
ན་ནི། འོ་མའང་མངར་བ་འབྱུང་ངོ༌། །རྩྭ་རོ་ཚ་བ་ཟོས་ན་ནི། འོ་མ་རོ་ཚ་བ་འབྱུང་ངོ༌། །གངས་ཀྱི་རི་ལ་རྩྭའི་རིགས་སྣུམ་ཅན་ཞེས་བྱ་བ་ཞིག་ཡོད་དེ། བས་དེ་ཟོས་ན་ནི། འོ་མ་མར་གྱི་ཉིད་
ཁུའི་རང་བཞིན་ཁོ་ནར་འབྱུང་སྟེ། དཀར་བའང་མ་ཡིན། སྔོ་བའང་མ་ཡིན། །དམར་བ་འང་མ་ཡིན། །སྔོ་སྐྱའང་མ་ཡིན་པ་མར་གྱི་ཉིང་ཁུའི་རང་བཞིན་ཁོ་ནར་འབྱུང་སྟེ། དེ་ལྟར་རྩྭའི་
བྱེ་བྲག་གི་འོ་མ་མདོག་ངན་པ་དང༌། མདོག་བཟང་པོར་འགྱུར་བ་དེ་བཞིན་དུ་མ་རིག་པ་དང༌། རིག་པ་གཉིས་སུ་མེད་མོད་ཀྱི། སེམས་ཅན་རྣམས་ཀྱི་ལས་ཀྱི་ཉེས་པས་རིག་པ་གང་
ཡིན་པ་དེ་ཉིད་མ་རིག་པ་ལྟ་བུར་གྱུར་ཏེ། དགེ་བ་དང༌། མི་དགེ་བའི་ཆོས་ཐམས་ཅད་ཀྱང་གཉིས་སུ་མེད་པ་ཁོ་ནའོ། །དེ་བས་ན། སྔར་བསྟན་པ་ཁོ་ན་བཞིན་དུ་དེ་བཞིན་གཤེགས་
༄༅། །པའི་སྙིང་པོ་ནི། མར་གྱི་ཉིང་ཁུ་ལྟ་བུའི་རང་བཞིན་ཅན་ཡིན་མོད་ཀྱི། ཉོན་མོངས་པའི་རྣམ་པའི་ཉེས་པ་གཞན་དུ་སྣང་བར་གྱུར་ཏོ། །དཔེར་ན། རྒྱ་མཚོའི་ཆུ་ནི།
ལན་ཚྭའི་དོན་གཅིག་པུ་བྱེད་པར་ཟད་མོད་ཀྱི། ལན་ཚྭའི་དོན་གཅིག་པུ་བྱེད་པའོ། །ཞེས་བརྗོད་པར་མི་བྱ་སྟེ། རྒྱ་མཚོའི་ནང་ནའོ་མའི་རྒྱ་མཚོ་ཞེས་བྱ་བའང་ཡོད་དོ། །གངས་ཀྱི་རི་ལའང་
སྨན་ཡོད་པའི་ཕྱིར་ཡོན་ཏན་ལས་སྨོས་ཏེ། གངས་ཀྱི་རི་ལ་ནི། དུག་ཀྱང་ཡོད་མོད་ཀྱི། འོན་ཀྱང་སྨན་གཙོ་བོར་སྨོས་པ་དེ་བཞིན་དུ་ལུས་འདིའང་དེ་དང་འདྲ་སྟེ། སྦྲུལ་གདུག་པ་
ལྟ་བའི་ཁམས་བཞིའི་དུག་དང་ལྡན་མོད་ཀྱི། སྨན་གྱི་རྒྱལ་པོ་དེ་བཞིན་གཤེགས་པའི་སྙིང་པོ་དེ་ཡོད་པས་ན། དེ་བཞིན་གཤེགས་པའི་སྙིང་པོ་ཐོག་མ་ནས་བཅོས་མ་མ་ཡིན་
པའི་ཁམས་ཡིན་ལ། ཉོན་མོངས་པ་རྣམས་ནི། གློ་བུར་དུ་བྱུང་བ་ཡིན་ཏེ། སངས་རྒྱས་སུ་འགྱུར་བར་འདོད་པ་སུའང་རུང་བ་རྣམས་ཀྱིས་ནི། ཉོན་མོངས་པའི་རྣམ་པ་རྣམས་
གཞོམ་པར་བྱའོ། །དཔེར་ན། ནམ་མཁའ་ལས་འབྲུག་སྒྲ་བསྒྲགས་ན། ཤ་མོ་མྱུར་བར་རབ་ཏུ་སྐྱེ་བར་འགྱུར་ལ། སོས་ཀ་ན་ནི། ཤ་མོའི་མིང་ཡང་མེད་དོ། །འབྲུག་སྒྲས་འཐོན་
པར་འགྱུར་པ་དེ་བཞིན་དུ་དེ་བཞིན་གཤེགས་པའི་སྙིང་པོ་དེའང་ཉོན་མོངས་པའི་རྣམ་པས་བསྒྲིབས་པས་བདག་མེད་པ་བཞིན་དུ་སྣང་ལ། མདོ་ཆེན་པོ་འདི་ཐོས་པ་གང་ཡིན་པ་
དེ་དག་ཡོངས་སུ་མྱ་ངན་ལས་འདས་པ་ཆེན་པོ་འདི་ཐོས་མ་ཐག་ཏུ་ཤ་མོ་བཞིན་དུ་དེ་བཞིན་གཤེགས་པའི་སྙིང་པོའི་ཤེས་པ་སྐྱེ་བར་འགྱུར་རོ། །མདོ་སྡེ་ཐམས་ཅད་དང༌། ཏིང་ངེ་འཛིན་
ཐམས་ཅད་ནི། སོས་ཀའི་དུས་དང་འདྲ་སྟེ། མདོ་སྡེ་ཐམས་ཅད་དང༌། ཏིང་ངེ་འཛིན་ཐམས་ཅད་ཐོས་པས་ནི། དེ་བཞིན་གཤེགས་པའི་སྙིང་པོ་ཡོད་པར་ཡང་དག་པར་མི་ཤེས་
སོ༑ ༑དབྱར་གྱི་ནམ་ལ་ཤ་མོ་སྐྱེ་བ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོ་མདོ་ཆེན་པོ་འདི་ལས་དགོངས་པའི་ཚིག་གསང་བ་ཐམས་ཅད་འབྱུང་སྟེ། མདོ་སྡེ་འདི་ཐོས་མ་ཐག་
ཏུ་དབྱར་གྱི་ནམ་ལ་ཤ་མོ་སྐྱེ་བ་བཞིན་དུ་སེམས་ཅན་ཐམས་ཅད་ཀྱིས་དེ་བཞིན་གཤེགས་པའི་སྙིང་པོ་ཡོད་པར་ཡང་དག་པར་ཤེས་པར་འགྱུར་རོ། །དེ་ལ་དོན་ཆེན་པོ་རྒྱས་པར་བྱེད་
པས་ན། ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་སྟེ། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ལ་སློབ་པ་གང་ཡིན་པ་དེ་དག་ནི། ང་ལ་དྲིན་དུ་གཟོ་བ་ཡིན་
ནོ༑ ༑གསོལ་བ། བཅོམ་ལྡན་འདས། ཀྱེ་མ་དེ་བཞིན་གཤེགས་པའི་སྙིང་པོ་ནི། ཉན་ཐོས་དང་རང་སངས་རྒྱས་ཐམས་ཅད་ཀྱིས་མཐོང་བར་ཤིན་ཏུ་དཀའ་བ་དང༌། རྗེས་སུ་ཤེས་
པར་ཤིན་ཏུ་དཀའ་བ་དང༌། བཟོད་པར་ཤིན་ཏུ་དཀའ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་ནི། དེ་བཞིན་ནོ། །རིགས་ཀྱི་བུ། དེ་ནི། དེ་བཞིན་ཏེ།
༄༅། །དའང་དེ་ཁོ་ན་སྐད་ཟེར་རོ། །གསོལ་བ། ཇི་ལྟར་མཐོང་བར་དཀའ་བ་ལགས། བཀའ་སྩལ་པ། རིགས་ཀྱི་བུ། དཔེར་ན། ལོང་བ་བརྒྱ་ཞིག་ཡོད་ལ། ལོང་བ་དེ་དག་
མིག་གིས་མཐོང་བར་འདོད་པའི་ཕྱིར་སྨན་པ་ཆེན་པོ་མིག་མཁན་ཞིག་གཉེར་ནས་སྨན་པ་དེས་དེ་དག་གིས་མིག་དཔྱད་བྱས་ཏེ། དེ་དག་གི་མིག་སྤྲིས་ཡོག་པ་བསལ་ནས་རང་གི་
སོར་མོ་གཅིག་བསྟན་ཏེ་དེ་རེ་རེ་ལ་འདི་སྐད་དུ། ཀྱེ་མི་ཁྱོད་ཀྱིས་ངའི་སོར་མོ་ལྟོས་ཤིག་དང༌། ཁྱོད་ཀྱི་དཔྱད་ལེགས་སམ་མ་ལེགས་པ་མངོན་ནོ། །ཞེས་ཟེར་རོ། །དེ་ནས་དཔྱད་བྱས་
སུ་ཟིན་ཀྱང་དེའི་སོར་མོ་ཐབས་ཇི་ལྟར་བསྟན་ཀྱང་མི་དེ་དག་གིས་མ་མཐོང་ངོ༌། །དེ་ནས་ལན་གཉིས་ལན་གསུམ་གྱི་བར་དུ་བསྟན་པ་དང་དེའུ་མ་མཐོང་སྟེ་མཐོང་བ་དེ་བཞིན་དུ། རིགས་
ཀྱི་བུ། ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་སྦྱང་བའི་དཔྱད་ཐམས་ཅད་བྱས་པ་རྣམས་ཀྱང་དེ་དང་འདྲ་སྟེ། དེ་ལྟར་ཡོངས་སུ་སྦྱང་བ་བྱས་ཀྱང་
མི་དེ་དག་དང་འདྲ་བར་བདག་ཉིད་ལ་དེ་བཞིན་གཤེགས་པའི་སྙིང་པོ་ཡོད་པར་ལན་གཉིས་ལན་གསུམ་གྱི་བར་དུ་ངས་བསྟན་པ་དང་དེའུ་མ་མཐོང་སྟེ་མཐོང་ནས་འདི་སྐད་ཅེས་
ཟེར་ཏེ། བདག་ཅག་ཀྱང་ཡུན་འདི་སྲིད་ཀྱི་བར་དུ་བདག་མེད་པའི་འཁོར་ལོ་གཅིག་པུས་ཡོངས་སུ་བསྐོར་ན། ཉན་ཐོས་དང་རང་སངས་རྒྱས་རྣམས་ཀྱིས་ལྟ་མཐོང་རེ་སྐན་ཞེས་ཟེར་
ཏེ། རིགས་ཀྱི་བུ། དེ་ལྟར་ན། ངའི་ཁམས་ཀྱི་བསྟན་བཅོས་ལ་འཇུག་པ་ནི། མཐོང་བར་དཀའ་བ་ཡིན་ནོ། །རིགས་ཀྱི་བུ། གཞན་ཡང་དཔེར་ན། མི་ལ་ལ་ཞིག་གིས་ནམ་མཁའ་ལ་
དང་བ་སྤྲེངས་ཤིང་ལྡིང་བ་མཐོང་ལ་དེས་དེ་ལྟར་མཐོང་ནས་ཐེ་ཚོམ་སྐྱེས་ཏེ། ཅི་འདི་ནམ་མཁའ་ཡིན་ནམ། འོན་ཏེ་དང་པ་ལྡིང་པ་ཡིན་ཞིག་གུ་སྙམ་ནས་དེས་ལེགས་པར་བརྟགས་
སོ། ངང་པ་ལྡིང་བ་ཡིན་པར་འོལ་སྤྱིར་མཐོང་བ་དེ་བཞིན་དུ་ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་བདག་ཅག་གིས་རང་རང་ལ་དེ་བཞིན་
གཤེགས་པའི་སྙིང་པོ་ཡོད་པར་འོལ་སྤྱིར་མཐོང་ངོ་སྙམ་དུ་སེམས་ན། ཉན་ཐོས་དང་རང་སངས་རྒྱས་ཐམས་ཅད་ཀྱིས་ལྟ་མཐོང་རེ་སྐན། དཔེར་ན། མི་ལ་ལ་ལམ་དུ་ཞུགས་པ་ལས་
མཁྲིས་པ་འཁྲུགས་ཏེ་ཕྱོགས་བསླད་ནས་ལེགས་པར་བརྟགས་ན། ལམ་དང་གཟུགས་འོལ་སྤྱིར་མཐོང་བ་དེ་བཞིན་དུ་ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ཀྱིས་ཀྱང་ལེགས་པར་བརྟགས་ན། རང་གི་ལུས་ལ་དེ་བཞིན་གཤེགས་པའི་སྙིང་པོ་བྱས་པ་མ་ཡིན་པའི་ཁམས་ཡོད་པར་འོལ་སྤྱིར་མཐོང་བར་ཟད་དོ། །དཔེར་ན། མགྲོན་པོ་
ལ་ལ་ཞག་སྐོམ་གྱིས་གདུངས་ནས་དབྱེ་དགོན་པ་ན་ཆུ་མི་རྙེད་ད། ཆུ་འདོད་ཅིང་འདུག་པ་ལས་ཤིང་ཀ་ན་བྱ་གར་འཁོད་པ་དག་མཐོང་ནས་ཅི་འདི་ཁང་བཟང་ཞིག་ཡིན་ནམ། འོན་ཏེ་
༄༅། །ནམ་མཁའ་ཡིན་སྙམ་པ་ལས་ལེགས་པར་བརྟགས་ན། བྱ་གར་ཡིན་པར་འོལ་སྤྱིར་མཐོང་བ་དེ་བཞིན་དུ། རིགས་ཀྱི་བུ། ས་བཅུ་ཐོབ་པའི་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱིས་ཀྱང་རང་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་བཞིན་དུ་ཡོད་པར་འོལ་སྤྱིར་མཐོང་བར་ཟད་དོ། །རིགས་ཀྱི་བུ། དཔེར་ན། རྒྱ་
མཚོའི་གྲུང་ཞུགས་པའི་མིས་དཔག་ཚད་མང་པོ་ཞིག་གི་ཕ་རོལ་ནས་གྲོང་ཁྱེར་གྱི་ནང་ན་ཁང་བཟང་དཀར་པོ་ཞིག་མཐོང་ནས་འདི་སྙམ་དུ་རྟོག་སྟེ། ཅི་འདི་ནམ་མཁའ་ཡིན་
ནམ༑ ཁང་བཟང་ཡིན་ཞིག་གུ་སྙམ་པ་ལས་ལེགས་པར་བརྟགས་ན། འོལ་སྤྱིར་མཐོང་བ་དེ་བཞིན་དུ་ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ཀྱིས་ཀྱང་རང་གི་ལུས་ལ་སངས་རྒྱས་ཀྱི་ཁམས་ཡོད་བཞིན་དུ་ཡོད་པར་འོལ་སྤྱིར་མཐོང་བར་ཟད་དོ། །རིགས་ཀྱི་བུ། དཔེར་ན། རྒྱལ་པོའི་བུ་གཞོན་ནུ་སྐྱིད་དེ་བར་འདུག་པ་
ཞིག་མཚན་ཡལ་ནངས་སུ་རོལ་མོ་ལ་ལྟད་མོ་ལྟ་ལྟ་བ་ལས་ལངས་ཏེ་ཉི་མའི་འོད་ཀྱིས་མིག་འཁྲུགས་པར་གྱུར་པས་ལེགས་པར་བརྟགས་ན། རང་གི་སྐ་རགས་འོལ་སྤྱིར་ཙམ་
མཐོང་བ་དེ་བཞིན་དུ། ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་རང་གི་ལུས་ལ་སངས་རྒྱས་ཀྱི་ཁམས་ཡོད་པར་འོལ་སྤྱིར་མཐོང་བར་ཟད་
དོ༑ ༑དཔེར་ན། རྒྱལ་པོའི་ཞམ་རིང་ལ་ལ་ཞིག་མཚན་མོ་མུན་ནག་སྤྲིན་སྟུག་པོས་འཁྲིགས་པའི་ནང་ན་རྒྱལ་པོའི་ཕོ་བྲང་ནས་བྱུང་སྟེ་རང་གི་ཁྱིམ་དུ་འགྲོ་བ་གློག་འགྱུར་བའི་སྐབས་
སུ་གླང་ཁྱབ་པ་མདུན་ལོགས་ནས་འོང་བ་མཐོང་ནས་འདི་སྙམ་དུ་རྟོག་སྟེ། ཅི་སྤྲིན་ནམ། འོན་ཏེ་ཁྱིམ་མམ། སྒོ་ཁང་ངམ། ཡང་ཐོག་ཅིག་གམ་སྙམ་པ་ལས་ལེགས་པར་བརྟགས་
ན༑ འོལ་སྤྱིར་མཐོང་བ་དེ་བཞིན་དུ་ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་རང་གི་ལུས་ལ་སངས་རྒྱས་ཀྱི་ཁམས་ཡོད་བཞིན་དུ་བདག་གིས་ལུས་
ལ་དེ་བཞིན་གཤེགས་པའི་སྙིང་པོ་ཡོད་དོ་སྙམ་དུ་འོལ་སྤྱིར་མཐོང་བར་ཟད་དོ། །དཔེར་ན། དགེ་སློང་ཚུལ་ཁྲིམས་སྲུང་བ་ལ་གུས་པ་ལ་ལ་ཞིག་གིས་ཆུ་སྲོག་ཆགས་མེད་པ་ལ་རང་
གི་བློས་སྲོག་ཆགས་ཡོད་པ་མཐོང་ནས་འདི་སྙམ་དུ་རྟོག་སྟེ། ཅི་སྲོག་ཆགས་ཡིན་ནམ། འོན་ཏེ་རྡུལ་ཡིན་ནམ། ཡང་ན་གློ་བུར་དུ་འོངས་བའི་རྡུལ་ལམ། སྲོག་ཆགས་ཤིག་གམ་
སྙམ་པ་ལས་ལེགས་པར་བརྟགས་ན། འོལ་སྤྱིར་མཐོང་བ་དེ་བཞིན་དུ། ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་རང་གི་ལུས་ལ་དེ་བཞིན་
གཤེགས་པའི་སྙིང་པོ་ཡོད་བཞིན་དུ་ཡོད་པར་འོལ་སྤྱིར་མཐོང་བར་ཟད་དོ། །དཔེར་ན། མི་ལ་ལ་སྔ་དྲོ་ལྷོ་བུར་འཁྲིགས་པ་ན་ཕན་ཚུན་དུ་འགྲོ་བ་ལས་བྱིས་པ་དག་མཐོང་ནས་འདི་སྙམ་
༄༅། །དུ་རྟག་སྟེ། ཅི་བ་ལང་ངམ། མ་ཧེའམ། འོན་ཏེ་བྱ་རྒོད་དམ་སྙམ་པ་ལས། དེའི་འོག་ཏུ་བྱིས་པ་ཡིན་པར་འོལ་སྤྱིར་མཐོང་བ་དེ་བཞིན་དུ། ས་བཅུ་ཐོབ་པའི་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་རང་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་བཞིན་དུ་ཡོད་པར་འོལ་སྤྱིར་མཐོང་བར་ཟད་དོ། །དཔེར་ན། བྱང་ཆུབ་
སེམས་དཔའི་གཟུགས་རས་ཆེན་པོ་ལ་བྲིས་པ་མཚན་མོ་མུན་པའི་ནང་དུ་བཀྲམ་པ་ལ་མི་མིག་ཡོད་པ་དག་གིས་བརྟགས་ན། ཅི་སངས་རྒྱས་ཀྱི་སྐུ་གཟུགས་ཤིག་ཡིན་ནམ།
འོན་ཏེ་རས་དམར་པོ་ཞིག་གམ། འོན་ཏེ་དབང་ཕྱུག་ཆེན་པོ་དང༌། ཚངས་པའི་གཟུགས་ཤིག་གམ་སྙམ་པ་ལས། དེའི་འོག་ཏུ་བྱང་ཆུབ་སེམས་དཔའི་གཟུགས་ཡིན་པར་འོལ་
སྤྱིར་མཐོང་བ་དེ་བཞིན་དུ་རིགས་ཀྱི་བུ། ས་བཅུ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཀྱང་རང་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་
བཞིན་དུ་ཡོད་པར་འོལ་མཐོང་བར་ཟད་དོ། །རིགས་ཀྱི་བུ། དེ་ལྟར་ན། དེ་བཞིན་གཤེགས་པའི་སྙིང་པོ་ནི། མཐོང་བར་ཤིན་ཏུ་དཀའ་སྟེ། དེ་བཞིན་གཤེགས་པའི་
ཡུལ་ཡིན་ཀྱི། ཉན་ཐོས་དང༌། རང་སངས་རྒྱས་ཀྱི་ཡུལ་མ་ཡིན་ནོ། །རིགས་ཀྱི་བུ། དེ་ལྟར་ན། ངའི་བསྟན་པ་ནི། མཁས་པས་རིག་པར་བྱ་བ་ཡིན་ཏེ། འཇིག་རྟེན་ཐམས་
ཅད་དང་མི་མཐུན་ནི། གསོལ་པ། གལ་ཏེ་དེ་ལྟ་ལགས་ན། ཤའི་མིག་དང་ལྡན་པ་རྣམས་ཀྱིས་ཆ་ཕྲ་བ་ཇི་ལྟར་བལྟ་བར་བགྱི་བ་ལགས། བཀའ་སྩལ་པ། འདུ་ཤེས་མེད་འདུ་ཤེས་
མེད་མིན་གྱི་ལྷ་རྣམས་ཀྱང་ཇི་ལྟར་བལྟ་བར་བྱ། འདི་ནི། སངས་རྒྱས་ཉིད་ཀྱི་ཡུལ་ཡིན་གྱི། ཉན་ཐོས་དང༌། རང་སངས་རྒྱས་ཐམས་ཅད་ཀྱི་ཡུལ་མ་ཡིན་ཏེ། དེ་དག་གིས་ནི། མདོ་
འདི་རྗེས་སུ་མཐུན་པ་ལས་ཡིད་ཆེས་པར་བྱའོ། །དེ་ལྟར་བྱས་དང་དེ་དག་ཀྱང་ཡང་དག་པའི་ལྟ་བ་ཅན་དུ་འགྱུར་རོ། །རིགས་ཀྱི་བུ། དེ་ལྟར་ན། ཉན་ཐོས་དང༌། རང་སངས་རྒྱས་ཐམས་
ཅད་ཀྱིས་ཀྱང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའི་ཚུལ་གྱིས་བདག་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་པར་ཡིད་ཆེས་པར་བྱ་སྟེ། མདོ་སྡེ་དང་
རྗེས་སུ་མཐུན་པར་བརྩོན་པར་བྱའོ། །དེ་བཞིན་གཤེགས་པའི་སྙིང་པོ་དེ་བཞིན་གཤེགས་པའི་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱི་ཡུལ་མ་ཡིན་ནོ། །གསོལ་པ། བཅོམ་
ལྡན་འདས། འཇིག་རྟེན་པ་རྣམས་ལའང་སེམས་ཅན་གྱི་ཁམས་གང་ཟག་བཞག་པ་མཆིས་ལགས་སོ། །བཀའ་སྩལ་པ། རིགས་ཀྱི་བུ། དཔེར་ན། མི་གཉིས་ཤིག་མཛའ་སྟེ། གཅིག་
ནི། རྒྱལ་པོའི་བུ། གཅིག་ནི། དབུལ་པོ་ཞིག་ཡིན་ལ། དེ་གཉིས་ཕན་ཚུན་བྱམས་པས་གཅིག་གི་ཁྱིམ་དུ་གཅིག་འགྲོ་ཞིང་རྩེ་བར་བྱེད་ལ། དེ་ནས་མི་དབུལ་པོ་དེས་རྒྱལ་པོའི་བུ་
༄༅། །དེའི་རལ་གྲི་དེ་ལ་མདོག་བཟང་པོ་དེ་མཐོང་བ་ལས་རྒྱལ་པོའི་བུ་དེས་རལ་གྲི་དེ་ཁྱེར་ནས་ཡུལ་གཞན་དུ་སོང་ངོ༌། །དེ་ནས་མི་དབུལ་པོ་དེ་མཚན་མོ་མགོན་མེད་
པའི་རྟེན་ཁང་ཞིག་ཏུ་ཉལ་བ་ལས་བརྡོལ་ཏེ། རལ་གྲི་རལ་གྲི་ཞེས་ཟེར་ནས་དེའི་ཚིག་གྲོང་སྲུང་རྣམས་ཀྱིས་ཐོས་ནས་རྒྱལ་པོ་ལ་གསོལ་ཏེ། རྒྱལ་པོ་དེས་མི་དེ་བཀུག་ནས་ཀྭའི་རལ་
གྲི་ཅི་འདྲ་བ་ཞིག །ག་ལས་འོངས་ཞེས་སྨྲས་པ་དང༌། དེས་སྐབས་དེའི་གཏམ་རྒྱལ་པོ་དེ་ལ་གསོལ་ནས་ལྷ། གལ་ཏེ་བདག་གིས་བརྐུས་པར་གྱུར་ན། བདག་གི་རྐང་ལག་འདི་
དག་བཅད་དུ་གསོལ། བདག་གིས་ནི། མཛའ་བོ་དང་ལྷན་ཅིག་རྩེ་བའི་ཚེ་མཐོང་བར་བས་ཏེ། རེག་ཀྱང་མ་རེག་ལགས་སོ། །ཞེས་བྱས་སོ། །དེ་ནས་རྒྱལ་པོ་དེས་དེ་ལ་སྨྲས་པ།
རལ་གྲི་དེའི་དབྱིབས་དང༌། མདོག་ཅི་འདྲ་བ་ཞིག་ཅེས་བྱས་ནས་དེས་རྒྱལ་པོ་ལ་གསོལ་བ། ལྷ། རལ་གྲི་དེ་ནི། ར་རུ་འདྲ་བ་ཞིག་ལགས་སོ། །ཞེས་བྱས་སོ། །དེ་ནས་རྒྱལ་པོ་དེས་མི་
དེ་བཏང་སྟེ་མི་ཁྱོད་མ་འཇིགས་ཤིག །མ་འཇིགས་ཤིག །སྐྱེན་པར་གར་བདེ་བར་སོང་ཞིག །ཁྱོད་ཀྱིས་སྔོན་རལ་གྲི་དེ་རྒྱལ་པོའི་ཕོ་བྲང་འདིར་མཐོང་ཡང་མ་མཐོང་སྟེ། རྒྱལ་པོའི་
བུས་རང་གི་ཡུལ་དུ་ཚོང་འདུས་ནས་རྙེད་པ་ལྟ་ཞིག་སྟེ། དེ་ནི། རྒྱལ་པོས་ཀྱང་རྙེད་པར་དཀའོ། །ཞེས་བྱས་སོ། །དེ་ནས་རྒྱལ་པོ་དེས་མདུན་ན་འདོན་དང༌། བློན་པོ་རྣམས་ལ་རལ་གྲི་
དེ་མཐོང་ངམ་ཞེས་བྱས་ནས་ཤིའོ་།གཞན་ཡང་ཆེའོ་ཅོག་གིས་རལ་གྲི་དེ་བཙལ་ཀྱང་མ་རྙེད་དོ། །དེ་ནས་རྒྱལ་པོའི་བུ་གཞན་ཞིག་རྒྱལ་སར་བཅུག་ནས་དེས་རལ་གྲི་དེ་རྙེད་དོ། །གཞན་
དག་ནི། མ་རྙེད་བཞིན་དུ་རྒྱལ་པོ་བྱེད་དོ། །དེ་ལྟར་གཅིག་ནས་གཅིག་ཏུ་བརྒྱུད་པའི་རྒྱལ་པོ་དེ་དག་གིས་ནི། རལ་གྲི་དེ་མ་མཐོང་སྟེ། རལ་གྲི་དེ་འདི་ལྟ་བུ། འདི་འདྲ་བ་ཞིག་གོ །ལུག་
རུ་འདྲ་བ་ཞིག་གོ། ར་རུ་འདྲ་བ་ཞིག་གོ། །སྙམ་དུ་རྟོག་པར་བྱེད་དོ། །ཁ་ཅིག་ནི། ཅི་དགའ་མགུར་རྟོག་པར་བྱེད་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའང་མཐའི་
རྒྱལ་པོའི་བུ་དེ་འདྲ་བར་འཇིག་རྟེན་དུ་འབྱུང་སྟེ། བདག་གི་དེ་ཁོ་ན་ཉིད་བསྟན་ནས་འཆི་བར་བྱེད་དོ། །དེ་ནས་བློ་ཆུང་བ་གང་ཡིན་པ་དེ་དག་ནི། སེམས་ཅན་ཐམས་ཅད་ལ་བདག་འདི་ལྟ་
བུ༑ འདི་འདྲ་བ་ཞིག་ཡོད་དོ། །སྙམ་སྟེ་ལོག་པར་མཐོང་ནས་ཤེས་རབ་མེད་པ་རྣམས་ལ་རྨི་ལམ་དུ་རྨིས་པ་བཞིན་དུ་སྟོན་པར་བྱེད་དོ། །འཇིག་རྟེན་པ་དེ་དག་གིས་ཀྱང་དེ་སྐད་དུ་ཐོས་
ནས་རང་གི་ལུས་ལ་བདག་གི་ཁམས་ཡོད་དོ། །སྙམ་དུ་རྟོག་པར་བྱེད་ལ། དེ་དག་གིས་བདག་དེའི་རང་བཞིན་ནོ། །མི་ཤེས་སོ། །དེ་ལྟར་བྱང་ཆུབ་སེམས་དཔའི་ཚིག་ཐོས་ནས་ལོག་པར་
བཟུང་སྟེ་རལ་གྲི་ར་རུ་འདྲ་བར་རྟོག་པ་དེ་བཞིན་དུ་རྣམ་པ་མང་པོར་རྟོག་པར་བྱེད་དོ། །འཇིག་རྟེན་པ་རྣམས་སྐྱེས་བུ་མཐེ་བོ་ཙམ་ཞེས་བྱ་བ་དང༌། ལྡུམ་བུ་ཤ་མ་དཀའི་འབྲས་བུ་ཙམ་དང་
༄༅། །འབྲས་ཀྱི་འབྲུ་ཙམ་ཞིག་སྙིང་ལ་གནས་ཏེ་འབར་རོ་ཞེས་ལོག་པར་རྟོག་པར་བྱེད་དེ། དེ་དག་གི་ལྟ་བ་དེ་ནི། ལོག་པར་ལྟ་བ་གཅིག་ནས་གཅིག་ཏུ་བརྒྱུད་དེ་
འོངས་པ་ཡིན་ཏེ། དོན་དུ་འགྱུར་བ་དང༌། བདེ་བར་འགྱུར་བ་མ་ཡིན་ནོ། །དེ་བས་ན། ངས་བདག་མེད་པར་བསྟན་ཏོ། །འོན་ཀྱང་ད་དུང་འཇིག་རྟེན་པ་རྣམས་བདག་ཡོད་དོ་སྙམ་དུ་
ལོག་པར་རྟོག་པར་བྱེད་དོ། །རིགས་ཀྱི་བུ། དེ་བས་ན། ཡང་ངའི་བསྟན་པ་ལས་རལ་གྲི་ཡང་དག་པ་དང་འདྲ་བར་བདག་ནི། འདི་ལྟ་བུ་ཞིག་གོ །ཞེས་དེ་བཞིན་གཤེགས་པའི་
སྙིང་པོ་ངས་བཤད་པར་བྱའོ། །ལེགས་པར་སྨྲས་པ་ཆོས་དང་འཚམ་པ་གང་ཡིན་པ་དེ་ནི། འཇིག་རྟེན་པ་རྣམས་ཀྱི་ཡིན་ནའང་འཇིག་རྟེན་ལས་འདས་པ་ཡིན་པར་རིག་པར་བྱའོ། །
འཇིག་རྟེན་པའི་ནང་ན་རྣམ་པ་ཐམས་ཅད་དུ་ཆོས་ཀྱི་མཆོག་ནི། བྱང་ཆུབ་སེམས་དཔའ་སྤྲུལ་པ་ཡིན་པར་རིག་པར་བྱ་སྟེ། བསྟན་བཅོས་སམ། རིག་སྔགས་སམ། གསང་སྔགས་
ཅིའང་རུང་བ་དེ་དག་ཐམས་ཅད་ནི། རྫོགས་པའི་སངས་རྒྱས་ཀྱིས་གསུངས་པ་ཡིན་པར་ཤེས་པར་གྱིས་ཤིག །གསོལ་པ། བཅོམ་ལྡན་འདས་ཀྱིས་ཡི་གེའི་ཕྱི་མོ་ཇི་ལྟར་བཀའ་
སྩལ་ལགས། བཅོམ་ལྡན་འདས་ཀྱིས་བཀའ་སྩལ་པ། ཡི་གེའི་ཕྱི་མོ་ཐམས་ཅད་ནི། ཐོག་མར་ཡི་གེ་ཕྱེད་པ་སྤྲུལ་ཏེ། ཕྱི་མོ་རྣམས་ལ་རིག་སྔགས་དང༌། གསང་སྔགས་
དང༑ ཆོས་ཀྱི་དེ་ཁོ་ན་ཉིད་དང༌། ཕུང་པོ་ཐམས་ཅད་ཀྱི་གཟུངས་སུ་འགྱུར་རོ། །དེའང་དམ་པའི་ཆོས་ཀྱི་ཚུལ་ཡི་གེའི་ཕྱི་མོ་བསླབ་ན། ཆོས་དང༌། ཆོས་མ་ཡིན་པའི་བྱེ་བྲག་ཕྱེད་པར་
འགྱུར་བའི་ཕྱིར་ངས་སྤྲུལ་པ་ཡིན་གྱི། ཆོས་མ་ཡིན་པའི་ཕྱིར་ནི། མ་ཡིན་ནོ། །གསོལ་པ། ཡི་གེ་ཞེས་བགྱི་བའི་དོན་གང་ལགས། བཀའ་སྩལ་པ། སྒྲ་བཅུ་བཞི་ལ་ནི། ཡི་གེ་ཞེས་
བྱ་སྟེ༑ གང་གི་ཕྱིར་ཡི་གེ་ཐམས་ཅད་ངེས་པ་ཡིན་པའི་ཕྱིར་ཏེ། མི་ཟད་པའི་དོན་ཏོ། །ཡི་གེའི་སྒྲ་བཅུ་བཞི་ཞེས་བྱ་བ་གང་གི་མི་ཕྱེད་པའི་དོན་གང་ཡིན་ཞེ་ན། མི་ཟག་པའི་དོན་ཏོ། །ཡི་
གེ་ཞེས་བྱ་བ་ནི། དེ་བཞིན་གཤེགས་པའི་དོན་ཏོ། །དེ་བཞིན་གཤེགས་པ་ནི། རྡོ་རྗེའི་སྐུ་མི་ཕྱེད་པ་ཡིན་ཏེ། དེ་བཞིན་གཤེགས་པ་ལ་སྒོ་དགུ་ནས་འཛག་ཅེས་བྱ་བའང་མེད་ལ་སྒོ་
དགུ་པོ་ཉིད་ཀྱང་མེད་དོ། །དེ་བས་ན། མི་ཟག་པའི་དོན་ནི། དེ་བཞིན་གཤེགས་པ་སྟེ། ངེས་པ་ཡིན་པའི་ཕྱིར་ཡི་གེ་ཞེས་བྱ་སྟེ། བྱས་པ་མ་ཡིན་པའི་དོན་ཏོ། །ཨ་ཞེས་བྱ་བ་ནི། བཀྲ་
ཤིས་ཀྱི་དོན་ཏེ། གཞི་གསུམ་ཞེས་བྱ་བའི་ཐ་ཚིག་གོ །ཡང་ཨ་ཞེས་བྱ་བ་ནི། འཕགས་པ་རྣམས་ཀྱི་ཡེ་ཤེས་ཀྱི་ཚིག་བླ་དྭགས་སོ། །འཕགས་པ་གང་དག་ཡིན་ཞེ་ན། འཇིག་རྟེན་
ན་ཕྱུག་པ་དང༌། ཆགས་པ་མེད་པ་དང༌། རུང་བ་ཐམས་ཅད་ཀྱིས་ཆོག་པར་འཛིན་པ་གང་ཡིན་པ་རྣམས་དང༌། སེམས་ཅན་ཐམས་ཅད་སྲིད་པའི་རྒྱ་མཚོ་ཐམས་ཅད་ལས་ངེས་པར་སྒྲོལ་
༄༅། །བ་གང་ཡིན་པ་དེ་དག་ལ་ནི། འཕགས་པ་ཞེས་བྱའོ། །ཨཱ་ཞེས་བྱ་བ་ནི། ཆོས་ལུགས་སུ་སྟན་པ་སྟེ། ཆོ་ག་དང༌། སྤྱོད་ཡུལ་དང༌། འདུལ་བ་དང༌། འཇིག་རྟེན་དང་
མཐུན་པར་འཇུག་པ་ཞེས་བྱ་བས་ན། དོན་ཐ་དད་པ་མ་ཡིན་ནོ། །ཡང་ཨཱ་ཞེས་བྱ་བས་དོན་ཅི་ཞིག་རྒྱས་པར་བྱེད་ཅེ་ན། འཕགས་པ་རྣམས་ལ་བརྟེན་ནས་སེམས་ཅན་ཐམས་ཅད་ཀྱིས་
ཆོ་ག་དང༌། སྤྱོད་ཡུལ་དང༌། ཕ་མ་དང༌། སློབ་དཔོན་དང༌། འདུལ་བ་དང༌། གཅེས་པ་ཡིན་པར་ཤེས་ཤིང༌། འདི་ནི། ཆོས་ཉིད་ཡིན་ནོ། །སྙམ་དུ་ཤེས་པར་འགྱུར་བའོ། །འཕགས་པ་
གང་ཡིན་པ་དེ་དག་ནི། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཞུགས་པ་རྣམས་ཏེ། དགེ་སློང་ཚུལ་ཁྲིམས་དང་ལྡན་པ་རྣམས་དང༌། བྱང་ཆུབ་སེམས་དཔའ་སེམས་དཔའ་
ཆེན་པོ་དེ་དག་ལ་འཕགས་པ་ཞེས་བྱའོ། །ཡང་ཨཱ་ཞེས་བྱ་བ་ནི། ཁྲིམས་སུ་སྟོན་པ་སྟེ། ཁྲིམས་ཞེས་བྱ་བ་ནི། ཀྱེ་མི་ཁྱོད་ཚུར་ཤོག །ཁྱོད་ཀྱིས་ཚུལ་མ་ཡིན་པ་བྱས་ཀྱི། ཕྱིན་ཆད་
དེ་ལྟར་མ་བྱེད་ཅིག །ཅེས་བྱ་བ་དེ་ལྟ་བུ་ཚུལ་མ་ཡིན་པ་རྣམས་དེའི་ཚེ་དྲན་པར་བྱེད་པའི་དོན་ཏོ། །ཨི་ཞེས་བྱ་བ་ནི། འདི་ཞེས་བྱ་བའི་དོན་ཏེ། བསྟན་པ་འདི་ནི། ཚངས་པར་སྤྱོད་པ་ཟླ་
བ་ཉ་བ་བཞིན་དུ་དྲི་མ་མེད་ཅིང་རྣམ་པར་དག་པའོ། །བསྟན་པ་འདི་ནི། བཅོམ་ལྡན་འདས་ཀྱིའོ། །འདི་ནི། བྱོས་ཤིག །འདི་ནི། དོན་ཡོད་པའོ། །འདི་ནི། དོན་མེད་པའོ། །འདི་ནི།
བདུད་ཀྱིས་སྨྲས་པའོ། །འདི་ནི། སངས་རྒྱས་ཀྱིས་གསུངས་པའོ། །སྙམ་དུ་སྙམས་སུ་མྱོང་བར་བྱ་བའི་དོན་ཏོ། །ཨཱི་ཞེས་བྱ་བ་ནི། དབང་ཕྱུག་སྟེ། ངའི་བསྟན་པ་ནི། དབང་ཕྱུག་དང༌། དབང་
ཕྱུག་ཆེན་པོ་དང༌། ཚངས་པ་དང༌། ཤིན་ཏུ་དཀོན་པའོ། །དབང་ཕྱུག་ནི། ཆོས་སྐྱོང་བ་སྟེ། ཆོས་སྐྱོང་བས་ན། རྒྱལ་པོའོ། །དེའི་ཕྱིར་དེ་ལ་འཇིག་རྟེན་སྐྱོང་བ་ཞེས་བྱའོ། །ཡོངས་སུ་མྱ་
ངན་ལས་འདས་པ་ཆེན་པོའི་མདོ་ཆེན་པོ་འདི་ནི། སེམས་ཅན་གཞན་དག་གི་དོན་གྱི་ཕྱིར་དབང་ཕྱུག་རྣམས་ཀྱིས་ཞུས་སོ། །དབང་ཕྱུག་རྣམས་ཀྱིས་ཡོངས་སུ་བཟུང་ངོ༌། །དབང་ཕྱུག་
རྣམས་ཀྱིས་བཤད་དོ། །དབང་ཕྱུག་རྣམས་ཀྱིས་དམ་པའི་ཆོས་མཆོག་ཏུ་འབར་བར་བྱེད་དོ། །དབང་ཕྱུག་རྣམས་ཀྱི་ཕྱིར་ངས་བསྟན་ཏེ། ངས་ཅི་བསྟན་ཅེ་ན། ཡོངས་སུ་མྱ་ངན་ལས་འདས་
པ་ཆེན་པོའི་མདོ་ཆེན་པོ་བསྟན་ཏོ། །དེ་བས་ན། དབང་ཕྱུག་དང་ལྡན་པ་རྣམས་ཀྱི་ཤིན་ཏུ་རྒྱས་པ་ཡིན་ཏེ། འདི་ལ་ཕྲག་དོག་བྱེད་པ་རྣམས་ནི། ཞིང་ལ་ཞིང་གི་རྔོ་བསལ་བ་བཞིན་
དུ་ཚར་གཅད་པར་བྱའོ། །དེ་ལ་སོགས་པའི་དོན་དུ་མ་རྒྱས་པར་བྱེད་པས་ན། དེའི་ཕྱིར་ངས་ཨཱི་ཞེས་བྱ་བ་བསྟན་ཏོ། །ཨུ་ཞེས་བྱ་བ་ནི། རྒྱུད་ཕྱི་མ་སྟེ། མདོ་སྡེ་འདིས་མདོ་སྡེ་ཐམས་
ཅད་ཀྱི་དོན་གྱི་ཕྱི་མའི་ཡང་ཕྱི་མ་བསྟན་ཏོ། །ངས་ཉན་ཐོས་དང༌། རང་སངས་རྒྱས་ཐམས་ཅད་ཀྱིས་སྔོན་མ་ཐོས་པའི་ཡི་གེ་གཅིག་པའམ། ཐིག་ལེ་གཅིག་བསྟན་ཏོ། །མདོ་སྡེ་ཆེན་པོ་འདི་
༄༅། །ནི༑ མཆོག་དམ་པ་ཡིན་ཏེ། དཔེར་ན། བྱང་གི་སྒྲ་མི་སྙན་གྱི་སེམས་ཅན་རྣམས་བསོད་ནམས་དང་ལྡན་པ་དེ་བཞིན་དུ་མདོ་སྡེ་ཆེན་པོ་འདི་ཉན་པ་གང་ཡིན་པ་
དེ་དག་ནི། འཇིག་རྟེན་ལས་འདས་པ་སྟེ། དེ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་རིག་པར་བྱའོ། །དེ་བས་ན། ཆེ་བ་ཞེས་བྱ་སྟེ། རྒྱུད་ཕྱི་མ་ཞེས་བྱ་བའི་
དོན་ཏོ༑ ༑དེ་བས་ན། ཨུ་ཞེས་བྱ་བ་ནི། ངས་དེ་ལྟར་བསྟན་ཏོ། །ཨུ་ཞེས་བྱ་བ་ནི། བའི་ནུ་སོར་ལྟ་བུའི་དོན་ཏེ། དཔེར་ན། བའི་འོ་མ་ཞིམ་པ་བཞིན་དུ་མདོ་འདིའི་རོའང་དེ་དང་འདྲའོ།།
མདོ་སྡེ་འདི་ལས་དེ་བཞིན་གཤེགས་པའི་སྙིང་པོ་བསྟན་པ་སྤོང་བར་བྱེད་པ་གང་ཡིན་པ་དེ་དག་ནི། བ་ལང་དང་འདྲ་སྟེ། དཔེར་ན། དྲིན་དུ་མི་གཟོ་བ་བདག་གིས་བདག་གས་པར་སེམས་
པ་དེ་དག་མཆོག་ཏུ་མྱ་ངན་དུ་བྱ་བ་དེ་བཞིན་དུ། དེ་བཞིན་གཤེགས་པའི་སྙིང་པོ་སྤངས་ནས་བདག་མེད་པ་སྟོན་པའི་སེམས་ཅན་གང་ཡིན་པ་དེ་དག་ནི། མཆོག་ཏུ་མྱ་ངན་དུ་བྱ་
བ་ཡིན་པར་རིག་པར་བྱའོ། །དེ་བས་ན། ཨཱུ་ཞེས་བྱའོ། །ཨེ་ཞེས་བྱ་བ་ནི། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ཞེས་བྱ་བ་འདི་ནི། སངས་རྒྱས་རྣམས་ཀྱི་ཆོས་
ཉིད་དེ༑ དེ་བས་ན། ཨེ་ཞེས་བྱའོ། །ཨེ་ཞེས་བྱ་བ་ནི། དེ་བཞིན་གཤེགས་པའི་དོན་ཏེ། ཨཻ་ཞེས་བྱ་བ་ནི། འོང་བ་དང༌། འགྲོ་བའི་དོན་ཡིན་པས་ན། ཇི་ལྟར་སོང་བ་དེ་བཞིན་
དུ་འོངས་པས་ན། དེའི་ཕྱིར་ཨཻ་ཞེས་བྱའོ། །ཨོ་ཞེས་བྱ་བ་ནི། ཉོན་མོངས་པ་རྣམས་ཀྱི་དོན་ཏེ། སྨན་དུ་འགྱུར་བས་མི་ལས་དེ་བཞིན་གཤེགས་པར་འགྱུར་རོ། །དེ་བས་ན། ཨོ་ཞེས་
བྱའོ༑ ༑ཨཽ་ཞེས་བྱ་བ་ནི། ཐེག་པ་ཆེན་པོའི་དོན་ཏེ། སྒྲ་བཅུ་བཞི་པོ་ཐམས་ཅད་ཀྱི་མཇུག་ནི། ཨཽ་ཡིན་པས་ན། ཐེག་པ་ཆེན་པོ་ནི། རྒྱུད་ཐམས་ཅད་ཀྱི་རྒྱུད་ཕྱི་མའི་ཡང་ཕྱི་མ་ཞེས་བྱ་
སྟེ༑ དེ་བས་ན། ཨཽ་ཞེས་བྱའོ། །ཨཾ་ཞེས་བྱ་བ་ནི། ངའི་བསྟན་པ་ལ་རུང་བ་མ་ཡིན་པ་ཐམས་ཅད་བཟློག་པ་དང༌། གསེར་དང་དངུལ་སྤངས་པ་སྟེ། དེ་བས་ན། བཟློག་པའི་དོན་དུ་ཨཾ་
ཞེས་བྱའོ། །ཨཿ་ཞེས་བྱ་བ་ནི། ཐེག་པ་མཆོག་གི་དོན་ཏེ། དེ་བས་ན། ཨཿ་ཞེས་བྱའོ། །དེ་བཞིན་དུ་སངས་རྒྱས་ཀྱིས་གསུངས་པའི་མདོ་སྡེ་ཐམས་ཅད་དང༌། རྒྱུད་ཐམས་ཅད་ཀྱི་
མཐའ་ནི། ཐེག་པ་ཆེན་པོ་ཡིན་ནོ། །ཀ་ཞེས་བྱ་བ་ནི། སྙིང་རྗེས་སེམས་ཅན་ཐམས་ཅད་ལ་དགྲ་གཅན་ཟིན་བཞིན་དུ་བལྟ་བའི་དོན་ཏེ། བདག་གིས་སེམས་ཅན་ཐམས་ཅད་ཀྱི་
དོན་བྱའོ། །སྙམ་དུ་དེ་ལྟར་བསམ་པར་བྱ་བ་ཡིན་པས་ན། དེའི་ཕྱིར་ཀ་ཞེས་བྱའོ། །ཁ་ཞེས་བྱ་བ་ནི། དེ་བཞིན་གཤེགས་པའི་གསང་བའི་དོན་ཏེ། མི་བགྲུངས་པ་རྣམས་ཀྱིས་
ཤེས་པར་མི་ནུས་པས་ན། དེའི་ཕྱིར་ཁ་ཞེས་བྱའོ། །ག་ཞེས་བྱ་བ་ནི། སྙིང་པོའི་དོན་ཏེ། སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་པས་ན། དེའི་ཕྱིར་ག་
༄༅། །ཞེས་བྱའོ། །གྷ་ཞེས་བྱ་བ་ནི། དེ་བཞིན་གཤེགས་པ་རྟག་ཅེས་བྱ་བའི་དོན་ཏེ། དེ་བས་ན། དེ་བཞིན་གཤེགས་པ་ནི། རྟག་པ་ཡིན་ནོ། །ང་ཞེས་བྱ་
བ་ནི༑ འདུ་བྱེད་མི་རྟག་ཅེས་བྱ་བའི་དོན་ཏེ། དེ་བས་ན། ང་ཞེས་བྱའོ། །ཙ་ཞེས་བྱ་བ་ནི། སྤྱོད་པའི་དོན་ཏེ། སེམས་ཅན་ཐམས་ཅད་ཡོངས་སུ་སྨིན་པར་བྱ་བས་ན། དེའི་ཕྱིར་
ཙ་ཞེས་བྱའོ། །ཚ་ཞེས་བྱ་བ་ནི། དེ་བཞིན་གཤེགས་པ་དཀར་པོའི་ཆོས་རྣམས་ཀྱིས་གདུགས་གཅིག་པ་ལམ་མེར་བཞུགས་པ་ཡིན་ཏེ། དེ་བས་ན། ཚ་ཞེས་བྱའོ། །ཛ་ཞེས་
བྱ་བ་ནི༑ ཛ་དང་འདྲ་བར་ཐར་པ་དེ་ཞིག་པ་མ་ཡིན་ཏེ། དེ་བས་ན། ཛ་ཞེས་བྱའོ། །ཛྷ་ཞེས་བྱ་བ་ནི། ཉོན་མོངས་པ་རྣམས་སྐྱོན་པར་སྤྲུག་པར་བྱ་བའི་དོན་ཏེ། དེ་བས་ན། ཛྷ་
ཞེས་བྱའོ། །ཉ་ཞེས་བྱ་བ་ནི། དེ་ཁོ་ན་ཉིད་ཀྱི་ཆོས་ཤེས་པའི་ཚིག་བླ་དྭགས་ཏེ། དེ་བས་ན། ཉ་ཞེས་བྱའོ། །ཊ་ཞེས་བྱ་བ་ནི། ཊ་བཞིན་དུ་ཛམྦུའི་གླིང་ཁ་ཅིག་ཏུ་དེ་བཞིན་གཤེགས་
པའི་མཚུངས་པ་མེད་པའི་སྐུ་སྟོན་པར་མཛད་དེ། དེ་བས་ན། ཊ་ཞེས་བྱའོ། །ཋ་ཞེས་བྱ་བ་ནི། ཆོས་ཀྱི་སྐུའི་དོན་ཏེ། ཋ་བཞིན་དུ་ཡོངས་སུ་རྫོགས་པས་ན། དེའི་ཕྱིར་ཋ་ཞེས་བྱའོ།།
ཌ་ཞེས་བྱ་བ་ནི། དགེ་འདུན་གཞོན་ནུ་ཞེས་བྱ་བའི་དོན་ཏེ། ནུབ་པར་མི་འགྱུར་བའི་ཕྱིར་ཌ་ཞེས་བྱའོ། །ཌྷ་ཞེས་བྱ་བ་ནི། ངོ་ཚ་མི་ཤེས་པའི་དོན་ཏེ། བླ་མ་རྣམས་ལ་དྲིན་དུ་མི་
གཟོ་བས་ན། དེའི་ཕྱིར་ཌྷ་ཞེས་བྱའོ། །ཎ་ཞེས་བྱ་བ་ནི། འདི་ལས་ཕྱི་རོལ་པ་རྣམས་འཕགས་པ་མ་ཡིན་པའི་དོན་ཏེ། དེ་བས་ན། ཎ་ཞེས་བྱའོ། །ཏ་ཞེས་བྱ་བ་ནི། སྲིད་པ་ཐམས་
ཅད་དུ་ལྟུང་བ་ལས་བཟློག་པའི་དོན་ཏེ། དེ་བས་ན། ཏ་ཞེས་བྱའོ། །ཐ་ཞེས་བྱ་བ་ནི། མི་ཤེས་པའི་དོན་ཏེ། དར་གྱི་སྲིན་བུ་བཞིན་དུ་དཀྲིས་པས་ན། དེའི་ཕྱིར་ཐ་ཞེས་བྱའོ། །ད་
ཞེས་བྱ་བ་ནི། ཐེག་པ་ཆེན་པོ་ལ་བརྩོན་པར་བྱ་བ་ལ་དགའ་བར་གྱིས་ཤིག་པའི་དོན་ཏེ། དེ་བས་ན། ད་ཞེས་བྱའོ། །དྷ་ཞེས་བྱ་བ་ནི། གཞི་གསུམ་རི་རབ་བཞིན་དུ་བརྟན་ཞིང་ནུབ་
པར་མི་འགྱུར་བའི་དོན་ཏེ། དེ་བས་ན། དྷ་ཞེས་བྱའོ། །ན་ཞེས་བྱ་བ་ནི། གཞི་གསུམ་གྲོང་ཁྱེར་གྱི་སྒོ་གཏན་གྱི་རྟན་མ་བཞིན་དུ་ཤིན་ཏུ་བརྟན་པས་ན། དེའི་ཕྱིར་ན་ཞེས་བྱའོ། །པ་
ཞེས་བྱ་བ་ནི། ཕྱིན་ཅི་ལོག་གི་དོན་ཏེ། གཞི་གསུམ་ནུབ་པར་མི་འགྱུར་བ་ལ་བདག་ཉིད་ཡོངས་སུ་རྨོངས་པར་འགྱུར་བས་ན། དེའི་ཕྱིར་པ་ཞེས་བྱའོ། །ཕ་ཞེས་བྱ་བ་ནི། འཇིག་
རྟེན་ཐམས་ཅད་འཇིག་པའི་དོན་ཏེ། འཇིག་རྟེན་འཇིག་པ་ན་གཞི་གསུམ་འཇིག་པར་འགྱུར་རོ། །ཞེས་ཟེར་བ་ནི། བདག་ཉིད་ཀྱི་འབྲས་བུ་འཇིག་པར་བྱེད་པ་སྟེ། སྒྲུབ་པ་ལས་
ཉམས་པས་ན། དེའི་ཕྱིར་ཕ་ཞེས་བྱའོ། །བ་ཞེས་བྱ་བ་ནི། དེ་བཞིན་གཤེགས་པ་རྣམས་ཀྱི་སྟོབས་རྣམས་ཀྱི་ཚིག་བླ་དྭགས་ཏེ། སྟོབས་བཅུ་དང་ལྡན་པས་ན། དེའི་ཕྱིར་བ་
༄༅། །ཞེས་བྱའོ། །བྷ་ཞེས་བྱ་བ་ནི། བྱང་ཆུབ་སེམས་དཔའ་རྣམས་ནི། དམ་པའི་ཆོས་ཀྱི་ཁུར་ཁྱེར་བ་ཡིན་ནོ། །ཞེས་བྱ་བའི་དོན་ཏེ། དེ་བས་ན། བྷ་ཞེས་བྱའོ། །མ་
ཞེས་བྱ་བ་ནི། ངེས་པར་རང་གི་ཁུར་ཁྱེར་བར་བྱེད་པ་འདི་ནི། བྱང་ཆུབ་སེམས་དཔའ་རྣམས་ཀྱི་ཆོས་ལུགས་ཡིན་ཏེ། དེ་བས་ན། མ་ཞེས་བྱའོ། །ཡ་ཞེས་བྱ་བ་ནི། དོན་བཞི་
པ་རྣམས་བྱང་ཆུབ་སེམས་དཔས་བྱ་དགོས་པས་ན། དེའི་ཕྱིར་ཡ་ཞེས་བྱའོ། །ར་ཞེས་བྱ་བ་ནི། འདོད་ཆགས་དང༌། ཞེ་སྡང་དང༌། གཏི་མུག་གི་འཇིགས་པ་བསལ་བས་དེ་ཁོ་
ན་ཉིད་ཀྱི་དོན་ལ་ཆོས་ལ་འཇུག་པས་ན། དེའི་ཕྱིར་ར་ཞེས་བྱའོ། །ལ་ཞེས་བྱ་བ་ནི། ཉན་ཐོས་ཀྱི་ཐེག་པ་ལས་གྱེན་དུ་བསྐྱོད་ནས་ཐེག་པ་ཆེན་པོ་མི་གཡོ་བ་ཉིད་བརྩམ་པར་བྱ་
བ་ཡིན་པས་ན། དེའི་ཕྱིར་ལ་ཞེས་བྱའོ། །ཝ་ཞེས་བྱ་བ་ནི། འཇིག་རྟེན་ཐམས་ཅད་ཀྱི་རིག་སྔགས་དང༌། གསང་སྔགས་དང༌། སྨན་རྣམས་བྱང་ཆུབ་སེམས་དཔའ་མཆོག་
རྣམས་ཀྱིས་བསྟན་པས་ན། དེའི་ཕྱིར་ཝ་ཞེས་བྱའོ། །ཤ་ཞེས་བྱ་བ་ནི། ཟུག་རྔུ་གསུམ་དང་བྲལ་བའི་དོན་ཏེ། དེ་བས་ན། ཤ་ཞེས་བྱའོ། །ཥ་ཞེས་བྱ་བ་ནི། ཡོངས་སུ་
རྫོགས་པའི་དོན་ཏེ། མདོ་སྡེ་ཆེན་པོ་འདི་ཐོས་ན་ཤིན་ཏུ་རྒྱས་པ་ཐམས་ཅད་ཐོས་པར་འགྱུར་བས་ན། དེའི་ཕྱིར་ཥ་ཞེས་བྱའོ། །ས་ཞེས་བྱ་བ་ནི། དམ་པའི་ཆོས་དབྱུང་བའི་སེམས་
ཀྱི་དོན་ཏེ། དེ་བས་ན། ས་ཞེས་བྱའོ། །ཧ་ཞེས་བྱ་བ་ནི། ཀྱེ་མ་བདག་གིས་འཁོར་བ་མཐར་གཏུགས་སོ། །ཀྱེ་མ་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ། །སྙམ་དུ་དགའ་བ་དང་
ཡོངས་སུ་གདུང་བའི་དོན་ཏེ། དེ་བས་ན། ཧ་ཞེས་བྱའོ། །ཀྵ་ཞེས་བྱ་བ་ནི། བདུད་ཀྱི་དོན་ཏེ། བདུད་བྱེ་བ་སྙེད་ཀྱིས་ཀྱང་དགེ་འདུན་དབྱེ་བར་མི་ནུས་མོད་ཀྱི། དེ་བཞིན་གཤེགས་པ་ནི།
འཇིག་རྟེན་དང་མཐུན་པར་མཛད་པ་སྟོན་ཏོ། །ཡང་ཀྵ་ཞེས་བྱ་བ་ནི། འཇིག་རྟེན་ཐམས་ཅད་མཐུན་པར་བྱ་བའི་ཕྱིར་མ་ལ་སོགས་པ་བསྟན་པའི་དོན་ཏེ། དེ་བས་ན། ཀྵ་ཞེས་བྱའོ། །རྀ་
རཱྀ་ལྀ་ལཱྀ་ཞེས་བྱ་བའི་ཡི་གེ་བཞི་པོ་འདི་རྣམས་ཀྱིས་ནི། སངས་རྒྱས་དང༌། ཆོས་དང༌། དགེ་འདུན་དང༌། གཉེན་པོ་སྟོན་པའི་དོན་བཞི་རྒྱས་པར་བྱེད་དོ། །འཇིག་རྟེན་དང་མཐུན་པར་
བྱ་བ་དེ་ནི། གཉེན་པོ་ཡིན་ཏེ། དཔེར་ན། ལྷས་བྱིན་གྱིས་དགེ་འདུན་ཕྱེ་བ་ལྟ་བུའོ། །དགེ་འདུན་ཕྱེ་བ་སྟོན་པ་ན་བསླབ་པའི་གཞི་བཅའ་བའི་ཕྱིར་ཚུལ་གཞན་དག་ཀྱང་སྤྲུལ་ཏེ་ཐབས་
སྟོན་པ་དེ་མཐོང་ན་ཤེས་རབ་ཅན་སྐྲག་པར་མི་བྱ་བ་འདི་ནི། འཇིག་རྟེན་དང་མཐུན་པར་བྱ་བ་ཡིན་ནོ། །སྙམ་དུ་ཡིད་ཆེས་པར་བྱ་སྟེ། དེ་བས་ན། རྀ་རཱྀ་ལྀ་ལཱྀ་ཞེས་བྱའོ། །མཆུ་གཉིས་
ལས་བྱུང་བ་དང༌། ལྕེ་དྲུང་ནས་བྱུང་བ་དང༌། ཁ་སྣ་གཉིས་ནས་བྱུང་བ་དང༌། རིང་པོ་དང༌། རྒྱུན་རིང་དུ་དྲང་བ་རྣམས་ནི། དོན་དང་ལྷན་ཅིག་ཏུ་སྦྱར་བ་ཡིན་ནོ། །ཡི་གེ་རྣམས་ལྷན་
༄༅། །ཅིག་ཏུ་སྦྱར་བས་ནི། བྱེད་པ་ལ་འཇུག་པར་འགྱུར་རོ། །ལྕེ་དང་སོ་ལ་སོགས་པ་རྣམས་ནི། ལུས་ཀྱི་ཁམས་ཡིན་ཏེ། ཁམས་དེའང་རང་བཞིན་གྱིས་ཡོངས་
སུ་དག་པའོ། །ཕུང་པོ་དང༌། ཁམས་དང༌། སྐྱེ་མཆེད་རྣམ་པ་སྣ་ཚོགས་དེ་དག་ལྟ་བུའང་མགོ་མཉམ་དུ་ཆོས་ཀྱི་དེ་ཁོ་ན་ཉིད་དུ་ཉེ་བར་ཞི་བའི་ཁོངས་སུ་འདུའོ། །དེ་བཞིན་གཤེགས་
པའི་སྙིང་པོས་ཁྱབ་པའི་ཁམས་དེའི་གཟི་བརྗིད་ཀྱིས་ལྷན་ཅིག་ཏུ་སྦྱར་བས་བྱེད་པ་ལ་འཇུག་པར་འགྱུར་ཏེ། དེ་བས་ན་།ཡི་གེ་ཕྱེད་པ་ཞེས་བྱའོ། །རྒྱུད་ཐམས་ཅད་དང༌། གསང་
སྔགས་ཐམས་ཅད་དང༌། ཆོས་ཐམས་ཅད་ནི། ཡི་གེ་ཕྱི་མོ་སྦྱར་བའི་ཐ་སྙད་ཡིན་ཏེ། དེ་བས་ན། དེ་བཞིན་གཤེགས་པ་དང༌། ཐར་པ་དེ་ཁོ་ན་ཉིད་དུ་མཐོང་ངོ༌། །ཡི་གེ་བརྗོད་པ་
དང༌། རྟོག་པའི་འདུ་ཤེས་དང༌། ཡི་གེ་དང༌། འབྲུའི་འདུ་ཤེས་དེ་ཉིད་སྤངས་པ་ནི། དེ་བཞིན་གཤེགས་པ་དང༌། ཐར་པ་སྟེ། དེ་བས་ན། ཐར་པ་ནི། ཐམས་ཅད་དུ་གྲོལ་བ་དང༌། རབ་
ཏུ་གྲོལ་བ་ཡིན་ནོ། །དེ་བཞིན་གཤེགས་པ་དེ་ཉིད་ཡི་གེ་ཕྱེད་པའི་ཆོས་ཀྱི་དོན་ཁོ་ནའི་ཕྱིར་བྱུང་བ་ཡིན་ནོ། །སྙམ་དུ་ཡང་དག་པར་གཤེགས་པ་གང་ཡིན་པ་དེ་དག་ནི། ཡི་གེ་
ཤེས་པ་ཞེས་བྱའོ། །གཞན་དག་ནི། ཡི་གེ་ཕྱེད་པ་ཤེས་པ་ཞེས་བྱའོ། །ཡི་གེ་མེད་པ་གང་དག་ཡིན་ཞེ་ན། ཆོས་མ་ཡིན་པ་བསྟེན་པ་གང་ཡིན་པ་རྣམས་སོ། །ཆོས་ལ་བསྟེན་པ་
ཡིན་དུ་ཟིན་ཀྱང་དེ་བཞིན་གཤེགས་པ་རྟག་པ་དང༌། གཞི་གསུམ་པོ་དང༌། ཐར་པ་ཐེར་ཟུག་པ་དང༌། མདོ་སྡེ་དང༌། མདོ་སྡེ་མ་ཡིན་པ་དང༌། འདུལ་བ་དང༌། འདུལ་བ་མ་ཡིན་པ་དང༌།
བདུད་ཀྱིས་སྨྲས་པ་དང༌། སངས་རྒྱས་ཀྱིས་གསུངས་པའི་བྱེ་བྲག་མི་ཕྱེད་པ་གང་ཡིན་པ་དེ་དག་ཐམས་ཅད་ནི། ཁོང་ན་ཡི་གེ་མེད་པ་ཞེས་ང་ཟེར་རོ། །རིགས་ཀྱི་བུ། དེ་བས་ན། ཁྱོད་
ཀྱིས་ཚུལ་འདི་དག་ལ་ཡི་གེ་ཕྱེད་པ་རྣམས་སློབས་ཤིག་དང༌། དེ་ལྟར་བྱས་ན། ཡི་གེ་ཤེས་པ་ཞེས་བྱ་བའི་གྲངས་སུ་གཏོགས་པར་འགྱུར་རོ། །གསོལ་པ། བཅོམ་ལྡན་འདས།
བདག་གིས་གྲངས་སུ་ཆུད་པར་བགྱི་སྟེ། དེ་ལྟར་འཚལ་བས་ན། ཡི་གེ་ཕྱེད་པ་རྣམས་བསླབ་པར་བགྱི་འཚལ་ལགས་སོ། །བཅོམ་ལྡན་འདས། བདག་གིས་ད་གཟོད་སློབ་དཔོན་
གྱི་མཆོག་ཁྱོད་ལྟ་བུ་རྙེད་ལགས་སོ། །བཅོམ་ལྡན་འདས། བདག་ནི། ད་གཟོད་ཡིག་རྩིས་ཀྱི་གནས་སུ་ཞུགས་ལགས་སོ། །བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ།།
དམ་པའི་ཆོས་འདོད་པས་ནི། དེ་ལྟར་འདོད་པར་བྱ་དགོས་སོ། །རིགས་ཀྱི་བུ། དེ་ལ་ཟལ་མོ་ཞེས་བྱ་བ་ནི། རྣམ་པ་གཉིས་ཏེ། སྡུག་བསྔལ་དང༌། མི་རྟག་པ་དང༌། བདག་མེད་པ་
རྣམས་ཀྱི་ཟལ་མོ་རྣམས་དང༌། བཞད་དང་འགྲོགས་པའི་ཟལ་མོ་རྣམས་ཏེ། དེ་ནི། བྱའི་དོན་ཏོ། །གསོལ་པ། སྡུག་བསྔལ་དང༌། མི་རྟག་པ་དང༌། བདག་མེད་པ་ལ་ཇི་ལྟར་ཟལ་མོ་
༄༅། །ཞེས་བགྱི་ལགས། བཀའ་སྩལ་པ། ཆོས་ཁ་ཅིག་ནི། མི་རྟག་ལ། ཆོས་ཁ་ཅིག་ནི། རྟག་པའི་ཕྱིར་དང༌། ཆོས་ཁ་ཅིག་ནི། སྡུག་བསྔལ་ལ། ཆོས་ཁ་
ཅིག་ནི༑ བདེ་བའི་ཕྱིར་དང༌། ཆོས་ཁ་ཅིག་ནི། བདག་མེད་ལ། ཆོས་ཁ་ཅིག་ནི། བདག་ཡོད་པའི་ཕྱིར་ཏེ། དཔེར་ན། བུ་རམ་ཤིང་དང༌། འབྲས་སཱ་ལུ་དང༌། འབྲུ་དང༌། ཁྲེ་དང༌། ཁྲེ་
རྒོད་དང༌། སྲན་མ་དང༌། སྲན་སྡེའུ་དང༌། སྲན་གྲེའུ་ལ་སོགས་པ་འབྲུའི་སྣ་གྲངས་རྣམས་མེ་ཏོག་གི་དུས་ནས་འབྲས་བུའི་དུས་ཀྱི་བར་དུ་མི་རྟག་པའི་ཁོངས་སུ་འདུས་སོ། །ཕུབ་
མ་མེད་པར་གྱུར་ནས་ནི། སེམས་ཅན་ཐམས་ཅད་ལ་ཕན་འདོགས་པར་འགྱུར་ལ་འབྲུའི་གྲངས་ཀྱི་ཁོངས་སུ་འདུས་ཏེ། དེས་ན། རྟག་པ་ཞེས་བྱའོ། །དེ་ཅིའི་ཕྱིར་ཞེ་ན། རང་བཞིན་
དུ་གྱུར་པའི་ཕྱིར་རོ། །གསོལ་པ། བཅོམ་ལྡན་འདས། ཅི་ལགས། དེ་དག་སླད་ཀྱིས་མ་མཆིས་པར་མི་འགྱུར་ལགས་སམ། དེ་དག་སླད་ཀྱིས་མ་མཆིས་པར་མི་འགྱུར་བ་དེ་
བཞིན་དུ་དེ་བཞིན་གཤེགས་པ་རྟག་པ་ཞེས་བགྱི་ལགས་སམ། བཀའ་སྩལ་པ། དེ་བཞིན་གཤེགས་པ་རི་རབ་བཞིན་ཞེས་དཔེར་བླངས་མོད་ཀྱི། རིའི་རྒྱལ་པོ་རི་རབ་ཀྱང་
འཇིག་པའི་བསྐལ་པས་འཇིག་པར་འགྱུར་བ་དེ་བཞིན་དེ་བཞིན་གཤེགས་པ་ལ་ཁྱོད་དེ་ལྟར་མ་འཛིན་ཅིག །མྱ་ངན་ལས་འདས་པ་མ་གཏོགས་པར་འཇིག་རྟེན་ཐམས་ཅད་ན་
འཇིག་པར་མི་འགྱུར་བ་ཅུང་ཟད་ཀྱང་མེད་ཀྱི། འཇིག་རྟེན་དང་མཐུན་པའི་ཚུལ་གྱིས་ཀུན་རྫོབ་ཀྱི་ཐ་སྙད་ཀྱི་རྗེས་སུ་འཇུག་པར་གྱིས་ཤིག །གསོལ་པ། བཅོམ་ལྡན་འདས། ལེགས་
སོ༑ ༑ལགས་སོ། །བཀའ་སྩལ་པ། རིགས་ཀྱི་བུ། དེ་བཞིན་དུ་མདོ་སྡེ་ཐམས་ཅད་དང༌། ཏིང་ངེ་འཛིན་ཐམས་ཅད་ཀྱི་བསྒོམ་པ་བསྒོམས་པའི་འབྲས་བུ་ཡོངས་སུ་མྱ་ངན་ལས་འདས་པ་
ཆེན་པོའི་མདོ་སྡེ་ཆེན་པོ་འདི་སེམས་ཅན་རྣམས་ཀྱིས་ནམ་མ་ཐོས་ཀྱི་བར་དུ་ན། མི་རྟག་པའི་ཁོངས་སུ་འདུས་སོ། །མདོ་སྡེ་རིན་པོ་ཆེ་འདི་ཐོས་ནས་ནི། རིགས་ཀྱི་བུའམ། རིགས་ཀྱི་
བུ་མོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ་སེམས་ཅན་ཐམས་ཅད་ལ་ཕན་འདོགས་པར་ཡང་འགྱུར་ཏེ། ཅིའི་ཕྱིར་ཞེན།
བདག་ལ་དེ་བཞིན་གཤེགས་པའི་སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་དེ་དག་འཇུག་པར་འགྱུར་རོ། །རིགས་ཀྱི་བུ། གཞན་ཡང་དཔེར་ན། ཤིང་
ཨ་མྲའམ་ཤིང་ཏ་ལའང་རུང་སྟེ། མེ་ཏོག་གི་དུས་ནས་འབྲས་བུའི་དུས་ཀྱི་བར་དུ་ནི། མི་རྟག་པའི་ཆོས་ཀྱི་ཁོངས་སུ་འདུས་སོ། །འབྲས་བུ་སྨིན་པར་གྱུར་ནས་ནི། སེམས་ཅན་ཐམས་
ཅད་ལ་ཕན་འདོགས་པར་འགྱུར་ཏེ། རྟག་པའི་ཆོས་ཀྱི་ཁོངས་སུ་འདུས་པར་འགྱུར་རོ། །རིགས་ཀྱི་བུ། དེ་བཞིན་དུ་མདོ་སྡེ་ཐམས་ཅད་དང༌། ཏིང་ངེ་འཛིན་ཐམས་ཅད་ཀྱི་བསྒོམ་པ་བསྒོམས་
༄༅། །པའི་འབྲས་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཆེན་པོ་འདི་སེམས་ཅན་རྣམས་ཀྱིས་ནམ་མ་ཐོས་ཀྱི་བར་དུ་ནི། མི་རྟག་པའི་ཁོངས་སུ་འདུས་
སོ༑ ༑མདོ་སྡེ་རིན་པོ་ཆེ་འདི་ཐོས་ནས་ནི། རིགས་ཀྱི་བུའམ། རིགས་ཀྱི་བུ་མོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ་སེམས་
ཅན་ཐམས་ཅད་ལའང་ཕན་འདོགས་པར་འགྱུར་ཏེ། དེ་ཅིའི་ཕྱིར་ཞེ་ན། བདག་ལ་དེ་བཞིན་གཤེགས་པའི་སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་
དེ་དག་འཇུག་པར་འགྱུར་རོ། །རིགས་ཀྱི་བུ། གཞན་ཡང་དཔེར་ན། གསེར་ཁུང་ངམ། ཟངས་ཁུང་ཡང་རུང་སྟེ། བརྐོ་བའི་དུས་ཀྱི་བར་དུ་ནི། མི་རྟག་པའི་ཁོངས་སུ་འདུས་སོ། །
གསེག་མ་དང༌། རྡོ་དང༌། སྐྱོན་རྣམས་མེད་པར་གྱུར་ནས་ནི། སེམས་ཅན་ཐམས་ཅད་ལ་ཕན་འདོགས་པར་འགྱུར་ཏེ། རྟག་པའི་རྫས་རིན་པོ་ཆེའི་ཁོངས་སུ་འདུས་སོ། །རིགས་
ཀྱི་བུ༑ དེ་བཞིན་དུ་མདོ་སྡེ་ཐམས་ཅད་དང༌། ཏིང་ངེ་འཛིན་ཐམས་ཅད་ཀྱི་བསྒོམ་པ་བསྒོམས་པའི་འབྲས་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་སེམས་
ཅན་རྣམས་ཀྱིས་ནམ་མ་ཐོས་ཀྱི་བར་དུ་ནི། མི་རྟག་པའི་ཁོངས་སུ་འདུས་སོ། །མདོ་སྡེ་རིན་པོ་ཆེ་འདི་ཐོས་ནས་ནི། རིགས་ཀྱི་བུའམ། རིགས་ཀྱི་བུ་མོ་རྣམས་ཉོན་མོངས་པ་དང་
བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ་སེམས་ཅན་ཐམས་ཅད་ལའང་ཕན་འདོགས་པར་འགྱུར་ཏེ། ཅིའི་ཕྱིར་ཞེ་ན། བདག་ལ་དེ་བཞིན་གཤེགས་པའི་
སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་དེ་དག་འཇུག་པར་འགྱུར་རོ། །རིགས་ཀྱི་བུ། གཞན་ཡང་དཔེར་ན། བུ་རམ་ཤིང་ངམ། ཏིལ་ཡང་རུང་སྟེ། ཁུ་
བ་དང་མར་དུ་གྱུར་པའི་དུས་ཀྱི་བར་དུ་ནི། མི་རྟག་པའི་ཁོངས་སུ་འདུས་སོ། །བུ་རམ་ཤིང་གི་ཚིགས་མ་དང༌། ཏིལ་གྱི་ཚིགས་མ་མེད་པར་གྱུར་ནས་ནི། སེམས་ཅན་ཐམས་ཅད་ལའང་
ཕན་འདོགས་པར་འགྱུར་ལ་རྫས་རྟག་པའི་ཁོངས་སུའང་འདུས་པར་འགྱུར་རོ། །རིགས་ཀྱི་བུ། དེ་བཞིན་དུ་མདོ་སྡེ་ཐམས་ཅད་དང༌། ཏིང་ངེ་འཛིན་ཐམས་ཅད་ཀྱི་བསྒོམ་པ་བསྒོམས་
པའི་འབྲས་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་སེམས་ཅན་རྣམས་ཀྱིས་ནམ་མ་ཐོས་ཀྱི་བར་དུ་ནི། མི་རྟག་པའི་ཁོངས་སུ་འདུས་སོ། །མདོ་སྡེ་རིན་པོ་ཆེ་འདི་
ཐོས་ནས་ནི། རིགས་ཀྱི་བུའམ། རིགས་ཀྱི་བུ་མོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་ཁོངས་སུ་འདུས་ལ་སེམས་ཅན་ཐམས་ཅད་ལའང་ཕན་
འདོགས་པར་འགྱུར་ཏེ། ཅིའི་ཕྱིར་ཞེ་ན། བདག་ལ་དེ་བཞིན་གཤེགས་པའི་སྙིང་པོ་ཡོད་པར་ཤེས་པའི་ཕྱིར་རོ། །མཆོག་ཏུ་རྟག་པར་ཤེས་ནས་ཀྱང་དེ་དག་འཇུག་པར་འགྱུར་རོ། །
༄༅། །རིགས་ཀྱི་བུ། གཞན་ཡང་དཔེར་ན། ཆུ་ཀླུང་ཐམས་ཅད་ནི། རྒྱ་མཚོའི་ཁོངས་སུ་འདུས་སོ། །རིགས་ཀྱི་བུ། དེ་བཞིན་མདོ་སྡེ་ཐམས་ཅད་དང༌། ཏིང་ངེ་
འཛིན་ཐམས་ཅད་དང༌། ཐེག་པ་ཆེན་པོ་ནི། ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདིའི་ཁོངས་སུ་འདུས་སོ། །ཅིའི་ཕྱིར་ཞེ་ན། འདི་ལས་དེ་བཞིན་གཤེགས་པའི་
སྙིང་པོ་ཤིན་ཏུ་ཡོངས་སུ་མཐར་ཐུག་པ་གསལ་བར་བསྟན་པའི་ཕྱིར་ཏེ། མཆོག་ཏུ་མཐར་ཕྱིན་པ་གང་ཡིན་པ་དེ་ནི། རྒྱུ་ཞེས་བྱའོ། །དེ་བས་ན། ཆོས་ཁ་ཅིག་ནི། མི་རྟག་ལ། ཆོས་
ཁ་ཅིག་ནི། རྟག་ཅེས་བྱའོ། །གསོལ་པ། སངས་རྒྱས་ལའང་མྱ་ངན་གྱི་ཟུག་རྔུ་མཛད་པ་མངའོ་ཞེས་སྨོས་ཏེ། རྫོགས་པའི་སངས་རྒྱས་ཀྱི་ནི། མིའི་མྱ་ངན་ལྟ་བུའང་མ་ལགས།
ལྷའི་མྱ་ངན་ལྟ་བུའང་མ་ལགས། བདུད་ཀྱི་མྱ་ངན་ལྟ་བུའང་མ་ལགས། སངས་རྒྱས་ནི། དུད་འགྲོར་སྐྱེས་པ་ལྟ་བུའང་མྱ་ངན་མི་མཛད་ལགས་ན། ཇི་ལྟ་བུ་ཞིག་ལགས།
བཀའ་སྩལ་པ། འདུ་ཤེས་མེད་པ་པ་རྣམས་ཀྱི་འདུ་ཤེས་ཀྱང་ཇི་ལྟ་བུ་ཞིག །འདུ་ཤེས་མེད་ན་ནི། གསོན་པའང་མི་རིགས་ཏེ། འདུ་ཤེས་མེད་པ་པ་རྣམས་ནི། གསོན་པོ་ཡིན་ནོ།།
ཕུང་པོ་དང༌། ཁམས་དང༌། སྐྱེ་མཆེད་རྣམས་མེད་པ་དེ་དག་ལ་འདུ་ཤེས་ག་ལ་ཞིག་ཡོད་དེ། །དཔེར་ན། ཤིང་རྣམས་ལ་ལྷ་རྣམས་གནས་མོད་ཀྱི། ལྷ་དེ་དག་ཤིང་གི་ཡལ་ག་
རྣམས་སམ། རྩ་བ་རྣམས་གང་ན་གནས་པ་མི་མངོན་པ་དེ་བཞིན་དུ་བསྟན་པའང་ཟབ་བོ། །དེ་བཞིན་གཤེགས་པའང་ཟབ་བོ། །སྒྲ་གཅན་ཟིན་ལ་བྱ་བ་བཞིན་དུ་བྱམས་པས་རྟག་
ཏུ་མྱ་ངན་བྱེད་པ་ནི། འདུ་ཤེས་མེད་འདུ་ཤེས་མེད་མིན་གྱི་ལྷ་རྣམས་མྱ་ངན་བྱེད་པ་དང་འདྲའོ། །དེ་དག་ནི། སངས་རྒྱས་རྣམས་ཀྱི་སྤྱོད་ཡུལ་ཡིན་ཏེ། སངས་རྒྱས་རྣམས་ཀྱི་དེ་ལྟ་བུ་ཡིན་
ནོ༑ ༑སངས་རྒྱས་རྣམས་ཀྱི་ཆོས་ཉིད་ཅི་འདྲ་བ་དང༌། སྐུ་ཅི་འདྲ་བ་དང༌། རང་བྱུང་རྣམས་ཀྱི་གསུང་ཅི་འདྲ་བ་དང༌། ཐུགས་ཅི་འདྲ་བ་ནི། སངས་རྒྱས་རྣམས་ཀྱིས་མཁྱེན་པར་ཟད་དེ། ཡིད་ཀྱི་
རང་བཞིན་ལ་མྱ་ངན་ག་ལ་ཡོད། མྱ་ངན་མེད་ནའང་བསྟན་པ་ཤིན་ཏུ་རྒྱས་པ་ཡོད་པ་དང་འགལ་ལོ། །མྱ་ངན་མེད་དོ། །ཞེས་བྱས་ན་ནི། སྒྲ་གཅན་ཟིན་དང་འདྲ་བར་གཟིགས་ཞེས་བྱ་བ་
རྫུན་པར་འགྱུར་རོ། །ཆོས་ཐམས་ཅད་རྫུན་པའོ། །ཞེས་བྱ་བ་ནི། བསམ་གྱིས་མི་ཁྱབ་པར་བསྟན་ནོ། །དེ་བཞིན་དུ་སངས་རྒྱས་བཅོམ་ལྡན་འདས་ཀྱང་བསམ་གྱིས་མི་ཁྱབ་བོ། །ཆོས་
ཀྱང་བསམ་གྱིས་མི་ཁྱབ་བོ། །བསྟན་པའང་བསམ་གྱིས་མི་ཁྱབ་སྟེ། དེ་ལྟར་ན། སངས་རྒྱས་རྣམས་ཀྱི་ཡང་དག་པའི་ཆོས་ཉིད་ནི། དེ་ཡིན་ནོ། །ཇི་སྲིད་དུ་ནམ་མཁའ་ཡིན་པ་དེ་སྲིད་དུ་
ཁྱིམ་གནས་པའང་མེད། ཀ་བའང་མེད། རྡུལ་ཡང་མེད་དེ། ནམ་མཁའི་ངོ་བོ་ཉིད་ཁོ་ནར་འདུག་པ་དེ་མཐོང་ནས་བྱིས་པའི་རང་བཞིན་ཅན་རྣམས་ཀྱིས་ནམ་མཁའ་ཇི་ལྟར་འདུག་པ་དེ་
༄༅། །བཞིན་དུ་སེམས་ཡོངས་སུ་བསྒྱུར་བར་བྱའོ་།དེ་ལྟར་བསམ་གྱིས་མི་ཁྱབ་པ་ལ་མྱ་ངན་ག་ལ་ཡོད། མྱ་ངན་མེད་པར་ཡང་སྒྲ་གཅན་ཟིན་བཞིན་དུ་གཟིགས་
ཞེས་བྱ་བ་དོན་མེད་པར་འགྱུར་ཏེ། དེ་བཞིན་གཤེགས་པའི་མྱ་ངན་ནི། ནམ་མཁའ་དང་འདྲའོ། །སྒྱུ་མ་ལ་སེམས་གཞན་མེད་པ་བཞིན་དུ་དེ་བཞིན་གཤེགས་པ་ལ་མྱ་ངན་མངའ་
ཞེས་བྱ་བ་དེའང་སྒྱུ་མའི་ཚུལ་ཙམ་དུ་ཟད་ན། ཡོངས་སུ་མྱ་ངན་ལས་འདས་པ་ལྟ་ལ་མྱ་ངན་ག་ལ་ཡོད། མི་རྟག་པ་ལ་ནི། མྱ་ངན་ཡོད་དེ། དེ་དག་གི་སེམས་ཅན་ལས་གྱུར་པ་ཡིན་
ནོ༑ ༑དེ་བས་ན། དེ་བཞིན་གཤེགས་པ་ནི། རྟག་གོ །མི་རྟག་པ་ལ་ནི། མྱ་ངན་ཡོད་ན། དེ་བཞིན་གཤེགས་པ་ནི། མི་རྟག་པ་མ་ཡིན་པས་ན། མྱ་ངན་ཡོད་ཅེས་བྱ་བ་དང༌། མེད་ཅེས་
བྱ་བར་རྟོག་པར་མི་ནུས་ཏེ། དེ་བཞིན་གཤེགས་པ་ནི། མྱ་ངན་དང་བྲལ་བ་ཡིན་ནོ། །དམའ་བས་ནི། དམའ་བ་ཤེས་ཀྱི། དམའ་བས་ནི། འབྲིང་མི་ཤེས་སོ། །འབྲིང་གིས་ཀྱང་
འབྲིང་ཤེས་ཀྱི། འབྲིང་གིས་ནི། རབ་མི་ཤེས་སོ། །རབ་ཀྱིས་ནི། དམའ་བ་དང༌། འབྲིང་དང༌། རབ་རྣམས་ཤེས་སོ། །ཉན་ཐོས་དང༌། རང་སངས་རྒྱས་རྣམས་ཀྱིས་ནི། རང་གི་སའི་
བདག་ཤེས་པར་ཟད་དོ། །སངས་རྒྱས་རྣམས་ཀྱིས་ནི། ཐམས་ཅད་ཐུགས་སུ་ཆུད་དེ། དེ་བས་ན། ཡང་དག་པར་རྫོགས་པའི་སངས་རྒྱས་རྣམས་ནི། ཡེ་ཤེས་སྒྲིབ་པ་མི་མངའ་བ་
ཞེས་བྱའོ། །དེ་ལྟར་ན། ལྷའི་ཡུལ་དང༌། སའི་སྟེང་དག་ཏུ་སྒྱུ་མ་རྣམ་པ་སྣ་ཚོགས་སྟོན་ཏོ། །དེ་ལྟར་སངས་རྒྱས་བཅོམ་ལྡན་འདས་རྣམས་ནི། འཇིག་རྟེན་དང་མཐུན་པར་སྟོན་ཏོ། །སྙམ་དུ་
ཤེས་ནས་ཤའི་མིག་དང་ལྡན་པའི་བྱིས་པ་རྣམས་ཀྱིས་ཀྱང་ཐོགས་པ་མེད་པའི་ཡེ་ཤེས་ཐོབ་པར་བྱ་བའི་ཕྱིར་མཁས་པའི་ཤེས་པ་ལ་གནས་པར་བྱའོ། །དེ་ལྟར་ན། མྱ་ངན་དང༌། མྱ་ངན་
མེད་པ་ཞེས་བྱ་བ་ནི། རྫོགས་པའི་སངས་རྒྱས་ཀྱིས་བཏགས་པ་ཡིན་གྱི། བྱིས་པ་རྣམས་ཀྱི་ཡུལ་མ་ཡིན་ནོ། །དེ་བས་ན། ཆོས་ཁ་ཅིག་ནི། བདག་ཡོད་ལ། ཆོས་ཁ་ཅིག་ནི། བདག་
མེད་དེ༑ འདི་ནི། ཟལ་མོ་ལྟ་བུར་བསྟན་པ་ཡིན་ནོ། །རིགས་ཀྱི་བུ། གཞན་ཡང་སངས་རྒྱས་ཀྱི་སྤྱོད་ཡུལ་བྱ་བཞད་ཟས་ལ་འགྲོ་བ་ལྟ་བུ་བསྟན་པར་བྱ་སྟེ། དཔེར་ན། བྱ་བཞད་རྣམས་
དང་ཟལ་མོ་རྣམས་ནི། དབྱར་ཆུ་ཀླུང་རྣམས་ཀྱི་ཆུ་ཤིན་ཏུ་བྲུག་པའི་ཚེ་རང་གི་སྒོ་ངའི་ཚིས་བྱ་བའི་ཕྱིར་ཐང་ག་ལས་གཞི་བརྟན་པོར་གནས་འཆའ་བར་བྱེད་ལ། སྤྱོད་ཡུལ་གང་ཡིན་པ་
དེར་འདོང་བར་བྱེད་དེ། དེ་ནི། དེ་དག་གི་ཆོས་ཉིད་དོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སྐྱེས་ནས་སེམས་ཅན་བྱེ་བ་ཕྲག་མང་
པོ་དམ་པའི་ཆོས་ལ་བཀོད་དེ། བཞད་དང་ཟལ་མོ་བཞིན་དུ་གདུལ་བར་བྱ་བ་ཇི་སྙེད་ཡོད་པ་དེ་དག་གི་དོན་རྣམས་བྱས་ཟིན་ནས་གདུལ་བར་བྱ་བ་གཞན་དག་ག་ལ་ཡོད་པ་དེར་སྣང་བར་
༄༅། །གྱུར་ཏོ༑ ༑དེ་ལྟར་ན། ཆོས་ཁ་ཅིག་ནི། སྡུག་བསྔལ་ལ། ཆོས་ཁ་ཅིག་ནི། བདེ་ཞེས་བྱ་སྟེ། འདུ་བྱེད་གང་ཡིན་པ་དེ་དག་ནི། སྡུག་བསྔལ་བ་དང༌། འཇིག་པ་
ཡིན་ནོ༑ ༑མྱ་ངན་ལས་འདས་པ་གང་ཡིན་པ་དེ་ནི། མཆོག་ཏུ་བདེ་བ་ཡིན་ཏེ། འདུ་བྱེད་སྤངས་པའི་ཕྱིར་བདེ་བ་དང་ལྡན་ནོ། །གསོལ་པ། དེ་ཇི་ལྟ་བུ་ལགས། བཀའ་སྩལ་པ།
ཇི་ལྟ་བ་བཞིན་ནོ། །གསོལ་པ། མྱ་ངན་ལས་འདས་པ་ཐོབ་པའི་སེམས་ཅན་རྣམས་ཇི་ལྟར་དེ་བདེ་བ་ལགས། བཀའ་སྩལ་པ། རིགས་ཀྱི་བུ། ངས་བསྟན་པ་ལ་རྒ་བ་དང༌། འཆི་བ་
ནི༑ འདུ་བྱེད་རྣམས་ལས་བྱུང་བའོ། །བག་ཡོད་པ་ནི། འཆི་ང་མེད་པའི་གནས་སོ། །བག་མེད་པ་ནི། འཆི་བའི་གནས་སོ། །བག་ཡོད་པ་དང་ལྡན་པ་རྣམས་ནི། འཆི་བར་མི་
འགྱུར་རོ། །བག་མེད་པ་དང་ལྡན་པ་རྣམས་ནི། རྟག་ཏུ་ཤི་བ་དང་འདྲའོ། །བག་མེད་པ་དང་ལྡན་པ་གང་ཡིན་པ་དེ་ནི། འདུ་བྱེད་ཡིན་ཏེ། དེ་ནི། མཆོག་ཏུ་སྡུག་བསྔལ་བའོ། །མྱ་ངན་
ལས་འདས་པ་ནི། འཆི་བ་མེད་པའོ། །བག་མེད་པ་དང་ལྡན་པ་རྣམས་ནི། འདུ་བྱེད་དུ་གྱུར་པ་ཡིན་ཏེ། དེ་དག་ནི། མཆོག་ཏུ་སྡུག་བསྔལ་བའོ། །མྱ་ངན་ལས་འདས་པ་གང་ཡིན་པ་
དེ་དག་ནི། འཆི་བ་མེད་པ་ཡིན་ནོ། །ཞེས་ང་ཟེར་རོ། །བག་ཡོད་པ་དང་ལྡན་པ་གང་ཡིན་པ་དེ་དག་ནི། འདུ་བྱེད་དུ་གྱུར་པ་མ་ཡིན་ཏེ། དེ་དག་ནི། འདུ་བྱེད་རྣམས་ལ་སྤྱོད་ཀྱང་རྒ་བ་
མེད་པ་དང༌། འཆི་བ་མེད་པ་དང༌། གཞིག་ཏུ་མེད་པ་ཞེས་ང་ཟེར་རོ། །དེ་ལ་བག་མེད་པ་དང་ལྡན་པ་རྣམས་ནི། གང་ཡིན། བག་ཡོད་པ་དང་ལྡན་པ་རྣམས་ནི། གང་ཡིན་ཞེ་ན། འཇིག་རྟེན་
པ་རྣམས་ནི། བག་མེད་པ་དང་ལྡན་པ་ཡིན་ཏེ། ཤི་བ་དང་འདྲའོ། །འཇིག་རྟེན་ལས་འདས་པ་རྣམས་ནི། རྒ་བ་མེད་པ་དང༌། འཆི་བ་མེད་པའོ། །བག་ཡོད་པ་དང་ལྡན་པ་རྣམས་ནི། མྱ་ངན་
ལས་འདས་པ་མཆོག་ཏུ་བདེ་བ་ཐོབ་པའོ། །དེ་བས་ན། ཆོས་ཁ་ཅིག་ནི། སྡུག་བསྔལ་ལ། ཆོས་ཁ་ཅིག་ནི། བདེ་བ་ཡིན་ནོ། །ཞེས་ངས་བསྟན་ཏོ། །ཆོས་ཁ་ཅིག་ནི། བདག་མེད་ལ།
ཆོས་ཁ་ཅིག་ནི། བདག་ཡོད་པ་ནི། དཔེར་ན། ས་ལ་འདུག་པའི་མི་ལྷའི་མིག་མེད་པས་ནམ་མཁའ་ལ་བྱ་འཕུར་བའི་རྗེས་མི་མཐོང་བ་དེ་བཞིན་དུ། ཉོན་མོངས་པ་ལ་གནས་པ་རྣམས་
ཀྱིས་བདག་ཉིད་ལ་སྙིང་པོའི་མཆོག་ཡོད་པ་བདག་གིས་མི་མཐོང་སྟེ། དེ་བས་ན། ངས་དགོངས་པའི་ཚིག་གིས་བདག་མེད་དོ། །ཞེས་བསྟན་ཏོ། །ལྷའི་མིག་མེད་པའི་མི་རྣམས་ཀྱིས་
ནི༑ བདག་ལ་བདག་ཡོད་དུ་ཟིན་ཀྱང་མི་མཐོང་སྟེ། ཉོན་མོངས་པ་ཡིན་ནོ། །ཞེས་ང་ཟེར་རོ། །ཉོན་མོངས་པའི་རྣམ་པའི་འདུ་བྱེད་རྣམས་གང་ཡིན་པའི་ཆོས་དེ་དག་ནི། མི་རྟག་པ་ཞེས་
བྱའོ། །དེ་བས་ན། ཆོས་ཁ་ཅིག་ནི། མི་རྟག་པའོ། །ཞེས་ངས་བསྟན་ཏོ། །རྒྱུ་དེས་ན། ཤེས་རབ་ལྡན་པ་རི་ཁར་འདུག་པ་ཡིས། །བྱིས་པ་ས་ལ་འདུག་པ་ལེགས་པར་མཐོང༌། །ཤེས་རབ་
༄༅། །ཁང་བཟང་སྟེང་ན་འདུག་པ་ཡིས། །མྱ་ངན་མེད་ཀྱང་སྐྱེ་རྒུ་མྱ་ངན་མཐོང༌། །ཞེས་བྱ་བ་ལྟ་བུ་སྟེ། དེ་ལྟར་ཉོན་མོངས་པའི་རྣམ་པ་བཅད་ནས་ཤེས་རབ་ཅན་རི་ཁ་ན་
གནས་པས་ཉོན་མོངས་པའི་རྣམ་པ་དང་འབྲེལ་པའི་བྱིས་པ་མཐོང་བ་བཞིན་ནོ། །གསོལ་པ། ཤེས་རབ་ཁང་ཐོག་མཆིས་པ་གང་དག་ལགས། །མྱ་ངན་མ་མཆིས་གང་ལགས་འཇིག་
རྟེན་ན༑ ༑མྱ་ངན་མ་མཆིས་མྱ་ངན་འདས་པ་ལ། །མྱ་ངན་དག་ནི་ཇི་ལྟར་མཆིས་པར་འགྱུར། །གལ་ཏེ་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ན། བྱིས་པ་རྣམས་
ཀྱིས་ཇི་ལྟར་མཐོང་ལགས། ཤེས་རབ་ཀྱི་ཁང་བཟང་གི་སྟེང་དུའང་ཇི་ལྟར་བཞུགས་ལགས། མི་རི་ཁ་ན་མཆིས་པས་ནི། མཐོང་དུ་རུང་སྟེ། འདི་ནི། མཆིས་ན་གདོད་རུང་བ་ལགས་
ན༑ ཡོངས་སུ་མྱ་ངན་ལས་འདས་པས་ཇི་ལྟར་མཐོང་ལགས། བཀའ་སྩལ་པ། ཤེས་རབ་ཀྱི་ཁང་བཟང་ནི། མྱ་ངན་ལས་འདས་པའོ། །མྱ་ངན་མེད་པ་ནི། དེ་བཞིན་གཤེགས་
པའོ༑ ༑མྱ་ངན་གྱི་ཤས་ཆེ་བ་ནི། སྐྱེ་རྒུ་རྣམས་ཡིན་ཏེ། དེ་དག་ནི། མྱ་ངན་ཅན་ཡིན་ལ། དེ་བཞིན་གཤེགས་པ་ནི། མྱ་ངན་མེད་པའོ། །རི་ཞེས་བྱ་བ་ནི། ཐར་པ་ཡིན་ཏེ། རི་
རབ་བཞིན་དུ་བརྟན་པའི་ཕྱིར་རོ། །ས་ཞེས་བྱ་བ་ནི། འདུ་བྱེད་རྣམས་སོ། །བྱིས་པ་ཐམས་ཅད་ནི། ས་ལ་འཁོད་པའོ། །ཤེས་རབ་ཅན་ཞེས་བྱ་བ་ནི། རྫོགས་པའི་སངས་རྒྱས་ཀྱི་
དོན་ཏེ། དེ་བཞིན་གཤེགས་པ་ནི། མྱ་ངན་མེད་ཅིང་བརྟན་པའི་ཕྱིར་རོ། །སངས་རྒྱས་ནི། མྱ་ངན་ཅན་གྱི་ནང་ན་མྱ་ངན་མེད་པ་སྟེ། སེམས་ཅན་རྣམས་ཀྱི་མྱ་ངན་གྱི་ཟུག་རྔུ་སེལ་བའོ། །
གསོལ་པ། གལ་ཏེ་དེ་བཞིན་གཤེགས་པ་མྱ་ངན་ལས་མ་འདས་ན་ནི། ད་དུང་མྱ་ངན་འདའ་སྟེ། རྫོགས་པར་སངས་མ་རྒྱས་པ་ཞེས་བགྱིའོ། །བཀའ་སྩལ་པ། རྒྱུ་ཡོད་དེ། གང་ན་གདུལ་
བར་བྱ་བ་རྣམས་ཡོད་པ་དེར་ནི། རྫོགས་པའི་སངས་རྒྱས་སྣང་སྟེ། དེར་སྐྱེ་བ་ལྟ་བུར་སྟོན་ཏོ། །དེ་བས་ན། དེ་བཞིན་གཤེགས་པ་ནི། རྟག་པ་ཡིན་ཏེ། སངས་རྒྱས་བྱ་བཞད་དང༌། ཟལ་
མོ་ལྟ་བུ་ཞེས་བྱའོ།། །།འཕགས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ། བམ་པོ་བཅུ་གཅིག་པ། རིགས་ཀྱི་བུ། དཔེར་ན། ཟླ་བ་ནི། ཉིན་པར་སྣང་བ་ན་ཁ་
ཅིག་ཏུ་ལྟུང་བ་ལྟ་བུར་སྣང་སྟེ། དེ་ནས་སེམས་ཅན་རྣམས་ཀྱི་ཟླ་བ་ལྟུང་ངོ་སྙམ་དུ་འཛིན་ཏོ། །ཟླ་བ་ནི། མེད་པར་མི་འགྱུར་ཏེ། གླིང་གཞན་དུ་འཆར་བར་འགྱུར་ལ་དེར་ཡང་ཟླ་བ་སྐྱེས་པ་
མེད་དོ། །སེམས་ཅན་རྣམས་ཀྱིས་ནི། ཟླ་བ་ཤར་ཏོ་སྙམ་དུ་འཛིན་ཏེ། ཟླ་བ་ནི། ལྷུང་བ་ལྟ་བུར་སྣང་ཡང་འཇིག་པར་མི་འགྱུར་ལ་འཆར་བ་ལྟ་བུར་སྣང་ཡང་སྐྱེ་བ་མེད་དེ། རིའི་རྒྱལ་པོ་རི་
རབ་ཀྱིས་བསྒྲིབས་པས་མི་སྣང་བར་ཟད་ལ། ཟླ་བ་ནི། རང་བཞིན་གྱིས་སྐྱེས་ཟིན་པ་ཡིན་ཏེ། སྣང་བྱེད་རྣམས་ཀྱི་ཆོས་ཉིད་ནི། དེ་ཡིན་ནོ། དེ་བཞིན་དུ་དེ་བཞིན་གཤེགས་པ་དགྲ་བཅོམ་
༄༅། །པ་ཡང་དག་པར་རྫོགས་པའི་སངས་རྒྱས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཛམྦུའི་གླིང་ལ་ལར་ནི། ཕ་མ་ཕྲད་པ་ལས་སྐྱེས་པར་
ཡང་སྣང་སྟེ། སེམས་ཅན་རྣམས་ཀྱིས་སྐྱེས་སོ་སྙམ་དུ་འཛིན་ལ། དེ་བཞིན་གཤེགས་པ་ལ་ནི། སྐྱེས་པ་མེད་དོ། །ཛམྦུའི་གླིང་ལ་ལར་ནི། ཡོངས་སུ་མྱ་ངན་ལས་འདའ་བ་ལྟ་
བུར་སྣང་ལ་དེ་བཞིན་གཤེགས་པ་ལ་ནི། འཆི་བ་མེད་དོ། །སེམས་ཅན་རྣམས་ཀྱིས་ནི། ཤིའོ་སྙམ་དུ་འཛིན་ཏེ། དེ་བཞིན་གཤེགས་པ་ནི། ལྷུང་བ་དང༌། སྐྱེ་བ་ལྟ་བུར་སྣང་ཡང་
སྐྱེ་བའང་མེད། འཆི་བའང་མེད་དོ། །གདུལ་བར་བྱ་བའི་དབང་གིས་ནི། ཟླ་བ་བཞིན་དུའང་རྒྱུ་བར་མཛད་དོ། །ཟླ་བ་ནི། གླིང་ཁ་ཅིག་ཏུ་ཟླ་བ་ཉ་བ་ཡོངས་སུ་རྒྱས་པ་ལྟ་བུར་སྣང་
སྟེ༑ སེམས་ཅན་རྣམས་ཟླ་བ་ཉའོ་སྙམ་དུ་འཛིན་ཏོ། །ཟླ་བ་ནི། གླིང་ཁ་ཅིག་ཏུ་ཡི་གེ་ཏ་འདྲ་བར་ཟླ་བ་ཚེས་པར་ཡང་སྣང་སྟེ། ཛམྦུའི་གླིང་བ་རྣམས་ཀྱིས་དེང་ཟླ་བ་ཚེས་གཅིག་
ཡིན་ནོ་སྙམ་དུ་འཛིན་ཏོ། །དེ་ནས་ཟླ་བ་ཕྱེད་པར་འཛིན་ཏོ། །དེ་ནས་ཚེས་བཅོ་ལྔ་ཡིན་ནོ་སྙམ་སྟེ་ཟླ་བ་ཉ་བར་འཛིན་ཏོ། །ཁ་ཅིག་གིས་ནི། ཟླ་བ་ཕྱེད་ཡིན་པར་འཛིན་ཏེ། ཟླ་བ་ནི།
ཕྱེད་དུ་འགྱུར་ཞིང་འཆར་བའང་མེད། ལྟུང་བའང་མེད་དེ། ཟླ་བ་ནི། རི་རབ་ཀྱི་རྐྱེན་གྱིས་དེ་ལྟར་སྣང་ངོ༌། །རིགས་ཀྱི་བུ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་ཀྱང་ཛམྦུའི་གླིང་ལ་ལར་ནི། ཡོངས་སུ་མྱ་ངན་ལས་འདའ་བ་ལྟ་བུར་སྣང་སྟེ། སེམས་ཅན་རྣམས་ཀྱིས་དེ་བཞིན་གཤེགས་པ་ཡོངས་སུ་མྱ་ངན་ལས་
འདས་སོ་སྙམ་དུ་འཛིན་ཏོ། །ཛམྦུའི་གླིང་ལ་ལར་ནི། ཟླ་བ་ཚེས་པ་བཞིན་དུ་སྐྱེ་བ་ལྟ་བུར་སྣང་སྟེ། སེམས་ཅན་རྣམས་ཀྱིས་ཁྱེའུ་འདི་སྐྱེས་སོ་སྙམ་དུ་འཛིན་ཏོ། །ཟླ་བ་ཚེས་གཉིས་དང་འདྲ་
བར་ནི། ལྷའི་ཐད་དུ་འགྲོ་བར་འཛིན་ཏོ། །ཟླ་བ་ཚེས་གསུམ་དང་འདྲ་བར་ནི། ཡི་གེ་སློབ་པའི་སར་འགྲོ་བར་འཛིན་ཏོ། །ཟླ་བ་ཚེས་བརྒྱད་ལྟ་བུར་ནི། རབ་ཏུ་འབྱུང་བར་སྟོན་ཏོ། །ཟླ་བ་ཉ་
བ་ལྟ་བུར་ནི། འོད་ཀྱིས་མུན་པ་བསལ་བ་བཞིན་དུ་བདུད་བྱེ་བ་སྙེད་བརླགས་ནས་ལམ་མེར་བཞུགས་སོ། །ཟླ་བ་ནུབ་པ་ལྟ་བུར་ནི། ཡོངས་སུ་མྱ་ངན་ལས་འདའ་བར་སྟོན་ཏེ། ཟླ་བ་
གཟའ་རྣམས་ཀྱིས་བསྐོར་བ་བཞིན་དུ་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་ཏོ། །དེར་ཁ་ཅིག་གིས་ནི། ལྷུང་བར་འཛིན། ཁ་ཅིག་གིས་ནི། སྐྱེ་བར་འཛིན་
ལ་སྐྱེས་པའང་མེད། འགག་པའང་མེད་དེ། དེ་བཞིན་གཤེགས་པ་ནི། ཟླ་བ་ཉ་བ་བཞིན་དུ་དུས་ཐམས་ཅད་དུ་རྟག་པ་ཡིན་ནོ། །དེ་བས་ན། དེ་བཞིན་གཤེགས་པ་རྟག་པ་དང༌། བརྟན་
པ་ཞེས་བྱའོ། །དཔེར་ན། ཟླ་བ་ནི། ཐམས་ཅད་དུ་སྣང་སྟེ། ཆུ་དང༌། དགོན་པ་དང༌། ཁྱིམ་དང༌། གྲོང་ཁྱེར་དང༌། ཆུ་ར་ཆུས་གང་བ་རྣམས་དང༌། ཁྲོན་པ་དང༌། གཞན་ཡང་དཔག་ཚད་སྟོང་
༄༅། །སྲིད་དུའང་རུང་སེམས་ཅན་རྣམས་གང་དུ་འགྲོ་བ་དེ་དག་ཐམས་ཅད་དུ་སྣང་སྟེ། དེར་བྱིས་པ་རྣམས་ཀྱིས་ཡིད་ལ་ཟླ་བ་འདི་ནི། བདག་ཁོ་ནའི་ཕྱི་བཞིན་འབའ་
ཞིག་ཏུ་འོང་ངོ༌། །སྙམ་དུ་འཛིན་ཏོ། །གང་གི་ཚེ་ཁྱིམ་གྱི་ནང་དུ་མཐོང་བ་དེའི་ཚེ་ནི། ང་ནི། འདི་ན་སྣང་ན། ཟླ་བ་འདི་དེ་ཉིད་ཡིན་ནམ། འོན་ཏེ་གཞན་ཞིག་ཡིན་ཞིག་གུ་སྙམ་དུ་རྟོག་
གོ། །དེ་ལ་བྱིས་པ་ཁ་ཅིག་གིས་ནི། ཟླ་བ་ཆུ་ར་ཙམ་དུ་འཛིན་ཏོ། །བར་མ་རྣམས་ཀྱིས་ནི། ཤིང་རྟའི་འཕང་ལོའི་ཚད་ཙམ་དུ་འཛིན་ཏོ། །རབ་རྣམས་ཀྱིས་ནི། ཟླ་བ་དཔག་ཚད་ལྔ་བཅུ་
པ་ཙམ་ལ་ཟླུམ་པོ་ཡིན་པར་ཤེས་སོ། །དུད་འགྲོ་རྣམས་ཀྱིས་ནི། ཟླ་བ་སྲིན་བུ་མེ་ཁྱེར་ཙམ་དུ་མཐོང་སྟེ། སྐྱེ་གནས་ཐམས་ཅད་དང་ལྡན་པའི་དུད་འགྲོ་རྣམས་ཀྱིས་ཟླ་བ་ལ་རང་
རང་གི་རྣམ་པར་ཤེས་པས་བརྟགས་ནས་སོ་སོར་མཐོང་ངོ༌། །དེ་བཞིན་དུ་དེ་བཞིན་གཤེགས་པའང་འཇིག་རྟེན་དུ་བྱུང་ན་ཐམས་ཅད་དུ་སྣང་སྟེ། སེམས་ཅན་ཁ་ཅིག་གིས་དེ་
བཞིན་གཤེགས་པ་ཟླ་བ་དང་འདྲ་བར་འཛིན་ཏེ། བདག་ལ་ཐུགས་བརྩེ་བའི་ཕྱིར་བདག་གི་ཁྱིམ་གྱི་ཕུགས་ན་བཞུགས་སོ་སྙམ་མོ། །དུད་འགྲོ་རྣམས་ཀྱིས་ནི། རང་རང་གི་
སྐྱེ་གནས་ཀྱི་ལུས་ལྟ་བུར་མཐོང་ངོ༌། །སེམས་ཅན་ལྐུག་པ་རྣམས་ཀྱིས་ནི། དེ་བཞིན་གཤེགས་པ་ལྐུག་པར་མཐོང་ངོ༌། །འོན་པ་དང་ལག་རྡུམ་རྣམས་ཀྱིས་ཀྱང་བདག་ཉིད་དང་
འདྲ་བར་མཐོང་ངོ༌། །སྐད་དང༌། འདུ་ཤེས་དང༌། ཡི་གེ་ཐ་དད་པ་རྣམས་ཀྱིས་ཀྱང་བདག་ཅག་དང་འདྲའོ་སྙམ་དུ་འཛིན་ཏེ། བདག་གི་སྐད་དུ་སྨྲའོ། །བདག་གི་འདུ་ཤེས་དང་མཐུན་ནོ། །
བདག་གི་ཁ་ཟས་ཟའོ་སྙམ་དུ་འཛིན་ཏོ། །ལུས་ཆེ་བ་རྣམས་ཀྱང་དེ་བཞིན་གཤེགས་པ་ནི། བདག་ཅག་དང་འདྲའོ་སྙམ་དུ་འཛིན་ཏོ། །ཁ་ཅིག་གིས་ནི། ཉན་ཐོས་དང་རང་སངས་རྒྱས་ཡིན་
ནོ་སྙམ་དུ་འཛིན་ཏོ། །ཁ་ཅིག་གིས་ནི། ཡ་མཚན་ཅན་ཐམས་ཅད་ཀྱི་ནང་དུ་རབ་ཏུ་བྱུང་བར་མཐོང་ངོ༌། །ཁ་ཅིག་གིས་ནི། དེ་བཞིན་གཤེགས་པ་བདག་ཅག་གི་ཕྱིར་འཇིག་རྟེན་དུ་བྱུང་
ངོ་སྙམ་དུ་འཛིན་ཏོ། །དཔེར་ན། ཟླ་བ་རང་བཞིན་དུ་གནས་པས་སོ་སོའི་རང་བཞིན་དུ་ཐམས་ཅད་མགུ་བར་བྱེད་པ་དེ་བཞིན་དུ། །དེ་བཞིན་གཤེགས་པའང་ཆོས་ཀྱི་སྐུ་ཡིན་བཞིན་
དུ་[?] ཀྱི་སྐུ་དུག་སྨན་གྱི་སྡོང་པོ་དང་འདྲ་བར་འཛིན་པའི་སེམས་ཅན་རྣམས་མགུ་བར་མཛད་དེ། འཇིག་རྟེན་ཐམས་ཅད་དང་མཐུན་པར་མཛད་པ་དག་གིས་སྐྱེས་པའི་རབས་སྟོང་
ཕྲག་མང་པོ་སྟོན་པར་མཛད་དོ། །དེ་བས་ན། དེ་བཞིན་གཤེགས་པ་ནི། ཐམས་ཅད་དུ་སྐྱེ་བ་སྟོན་པའི་ཕྱིར་སྐྱེས་པའི་རབས་ཀྱི་ཟླ་བ་ཞེས་བྱའོ། །དེ་བས་ན། དེ་བཞིན་གཤེགས་
[?] པ་དང༌། བརྟན་པ་ཡིན་ནོ། །རིགས་ཀྱི་བུ། གཞན་ཡང་དཔེར་ན། ཟླ་བ་དང༌། ལྷ་མ་ཡིན་གྱི་དབང་པོ་སྒྲ་གཅན་ཕྲད་པའི་ཚེ་འཇིག་རྟེན་པ་རྣམས་ཀྱི་ཟླ་བ་གཟས་ཟིན་ཏོ་སྙམ་དུ་
༄༅། །འཛིན་ཏེ། སྒྲ་གཅན་ནི། ཟླ་བ་ལ་འཛིན་པར་ཡང་མི་བྱེད་ལ། དེས་ནི། དེ་ལ་ཟ་བར་ཡང་མི་ནུས་ཏེ། སྒྲ་གཅན་གྱི་ལག་པས་ཟླ་བ་བསྒྲིབས་ནས་འོད་མི་སྣང་
བར་བྱེད་པར་ཟད་དེ། ཟླ་བ་ལ་རྨའང་མེད། ཉོན་མོངས་པའང་མེད་དོ། །ཇི་ཙམ་དུ་སྒྲ་གཅན་གྱི་ལག་པས་ཟླ་བ་བཀབ་པ་དེ་ཙམ་དུ་ཟླ་བའི་འོད་མི་སྣང་བར་འགྱུར་ལ། སྒྲ་གཅན་
གྱིས་ཟླ་བ་བཏང་བའི་ཚེ་ནི། ཁ་ནས་བྱུང་བ་ལྟ་བུར་སྣང་སྟེ། མི་རྣམས་ཀྱིས་ཟླ་བ་ནི། སྡུག་བསྔལ་ཞིང་འདུག་གོ་སྙམ་དུ་འཛིན་ཏོ། །ཟླ་བ་ནི། རང་བཞིན་ཁོ་ནར་འདུག་བཞིན་
དུ་བདག་ཉིད་སྒྲ་གཅན་དང་ལྷན་ཅིག་འདུག་པར་སྟོན་ཏེ། འདི་ནི། འཇིག་རྟེན་གྱི་ཆོས་ཉིད་དོ། །སྒྲ་གཅན་བྱེ་བ་སྙེད་ཀྱིས་ཀྱང་ཟླ་བ་གསད་པའམ་གཞིག་པར་མི་ནུས་ཏེ། ཟླ་བ་རང་
ཉིད་དེ་ལྟར་སྟོན་ཏོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉིད་ཟླ་བ་ལྟ་བུར་སྟོན་པར་མཛད་དེ། མ་འོངས་པའི་དུས་ཀྱི་དོན་དུ་
ངན་སེམས་ཀྱིས་ཁྲག་ཕྱུང་བའི་མཚམས་མེད་པའི་ལས་བསྟན་པའི་ཕྱིར་དེ་ལ་སོགས་པའི་འདོད་ཆེན་པའི་མཐའ་དང༌། དགེ་འདུན་གྱི་དབྱེན་གྱི་ཆོས་ཐ་དད་པའང་སྟོན་པར་
མཛད་དོ། །དེ་བཞིན་གཤེགས་པའི་སྐུ་ལ་ནི། བདུད་བྱེ་བ་ཕྲག་འབུམ་གྱིས་ཀྱང་ཁྲག་དབྱུང་བར་མི་ནུས་ལ། དེ་བཞིན་གཤེགས་པའི་སྐུ་ལ་ནི། ཁྲག་དང༌། རུས་པ་དང༌། རྒྱུས་
པའང་མེད་དེ། སྡུག་བསྔལ་བའི་བག་ཀྱང་མེད་དོ། །སེམས་ཅན་རྣམས་ཀྱིས་ནི། གཞི་གསུམ་མ་རུང་ངོ༌། །དེ་བཞིན་གཤེགས་པ་ལ་རྨ་བྱུང་ངོ་སྙམ་དུ་འཛིན་ཏོ། །དེ་བཞིན་གཤེགས་པ་
ནི༑ རང་བཞིན་ཁོ་ནར་བཞུགས་མོད་ཀྱི། དེ་ལྟར་འཇིག་རྟེན་དང་མཐུན་པར་སྟོན་ཏོ། །འདི་ལྟ་སྟེ། མི་ལ་ལས་མི་ཞིག་ལ་འབྲེང་པའམ། དབྱུག་པས་བསྣུན་ཏེ་ཁྲག་ཕྱུང་བའམ།
གསད་པའི་སེམས་ཀྱིས་དེ་བསད་ནས་དེའི་འོག་ཏུ་དེ་བཞིན་གཤེགས་པས་ལས་དེ་བཙན་པར་མཛད་པར་དགོངས་ཏེ་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ན། མི་
དེའི་སེམས་ཐུགས་སུ་ཆུད་ནས་མཚམས་མེད་པའི་ལས་ཡང་དག་པར་སྟོན་པར་མཛད་དོ་།དེ་ལྟར་ན། དེ་བཞིན་གཤེགས་པ་ནི། མ་འོངས་པའི་དོན་གྱི་ཕྱིར་ལས་ཀྱི་རྣམ་པར་དབྱེ་བ་
སྟོན་པར་མཛད་དོ། །དཔེར་ན། སྨན་པ་ལ་ལ་ཞིག་གིས་རང་གི་བུ་ལ་རྩ་བའི་མིང་གི་རྣམ་གྲངས་སློབ་པར་བྱེད་དེ། འདི་ནི། རྩ་བ་ལྔའོ། །འདི་ནི། ཁ་བའོ། །ཞེས་རྩ་བའི་རྣམ་པར་དབྱེ་བ་
དག་གི་སྒོ་ནས་ངོ་སྟོན་པར་བྱེད་དེ། ཁྱེའུ་དེས་ཀྱང་དེ་ལྟར་བསླབ་ནས་རྩ་བའི་རྣམ་པར་དབྱེ་བ་ཤེས་པར་གྱུར་ལ། དེ་ནས་སྨན་པ་དེ་ཤི་ནས་ཁྱེའུ་དེ་ན་རེ། །ཀྱི་ཧུད་ཕ་གཅིག། ཀྱི་ཧུད་ཕ་
གཅིག །ཁྱོད་ཀྱི་བདག་རྩ་བའི་རྣམ་པར་དབྱ་བ་བསླབ་པ་སྟེ་རྩ་བ་འདི་ནི། འདི་འདྲའོ། །ལོ་མ་ནི། འདི་འདྲའོ། །ཞེས་དེ་སྐད་ཟེར་བ་དེ་བཞིན་དུ་དེ་བཞིན་གཤེགས་པས་ཀྱང་བསླབ་པའི་
༄༅། །གཞི་ཐམས་ཅད་ཀྱི་སྤྲུལ་པ་སྤྲུལ་པར་མཛད་དེ། གསོར་རུང་བ་དང༌། གསོར་མི་རུང་བ་དང༌། མཚམས་མེད་པ་དང༌། མདོ་སྡེ་སྤོང་པ་དང༌། འདོད་ཆེན་པའི་
མཐའ་རྣམས་སྟོན་པར་མཛད་དེ། མ་འོངས་པའི་དུས་ན་འདི་ལྟ་བུར་འགྱུར་རོ། །ཞེས་བྱ་བའི་དོན་ཏོ། །དེ་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་དགེ་
སློང་རྣམས་ཀྱིས་སྨན་པའི་བུ་བཞིན་དུ་དེ་བཞིན་གཤེགས་པས་མདོ་སྡེ་ལས་འདི་སྐད་ཅེས་བཀའ་སྩལ་ཏེ། ལས་འདི་ནི། འདི་ཡིན་ནོ། །སྙམ་དུ་ཤེས་སོ། །དཔེར་ན། ཟླ་བ་ལ་
གཟའ་འཇུག་པ་ན་མི་རྣམས་ཀྱིས་ནི། ཟླ་བ་དྲུག་ཅིང་ཟླ་བ་ལ་གཟའ་འཇུག་པར་ཤེས་སོ། །སྟེང་གི་ལྷ་རྣམས་ཀྱིས་ནི། ཉིན་གཅིག་བཞིན་དུ་ཟླ་བ་ལ་གཟའ་འཇུག་པར་ཤེས་
ཏེ། ཅིའི་ཕྱིར་ཞེ་ན། དེ་དག་གི་ལོ་ཚིགས་རིང་ལ་མི་རྣམས་ཀྱི་ལོ་ཚིགས་ཐུང་བའི་ཕྱིར་རོ། །རིགས་ཀྱི་བུ། དེ་བཞིན་དུ་ལྷ་རྣམས་དང༌། མི་རྣམས་ཀྱིས་ནི། དེ་བཞིན་གཤེགས་
པ་སྐུ་ཚེ་ཐུང་ངོ་སྙམ་དུ་འཛིན་ཏོ། །ཇི་ལྟར་ལྷ་གོང་མ་གོང་མ་རྣམས་ཀྱིས་སྐད་ཅིག་སྐད་ཅིག་ལ་ཟླ་བ་ལ་གཟའ་འཇུག་པར་འཛིན་པ་དེ་བཞིན་དུ། ལྷ་གོང་མ་གོང་མ་རྣམས་ཀྱིས་
སྐད་ཅིག་སྐད་ཅིག་ལ་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བ་བྱེ་བ་སྙེད་ཀྱང་སྟོན་པར་མཛད་དོ། །ཉོན་མོངས་པ་དང༌། ཕུང་པོ་དང༌། ལྷ་དང༌། འཆི་བདག་གི་
བདུད་བྱེ་བ་སྙེད་ཀྱང་སྟོན་པ་དང༌། སྐྱེས་པའི་རབས་སྟོང་སྙེད་ཀྱང་སྟོན་པ་དང༌། འཇིག་རྟེན་དང་མཐུན་པར་བྱ་བ་མང་པོ་དག་སྟོན་པར་ཤེས་སོ། །དེ་ལྟར་ན། དེ་བཞིན་གཤེགས་པ་ནི།
དཔག་ཏུ་མེད་པ་ཡིན་ཏེ། དེ་བས་ན། རྟག་པ་དང༌། བརྟན་པ་ཡིན་ནོ། །དཔེར་ན། ཟླ་བ་ནི། སེམས་ཅན་ཐམས་ཅད་ཀྱི་ཡིད་དུ་འོང་ཞིང་བལྟ་ན་སྡུག་པ་ཡིན་པས་ན། དེའི་ཕྱིར་མིང་ཟླ་བ་
ཞེས་བྱའོ། །འདོད་པའི་དབང་དུ་གྱུར་པ་འདོད་ཆགས་དང༌། ཞེ་སྡང་དང༌། གཏི་མུག་སྤྱོད་པ་རྣམས་ཀྱི་ཡིད་དུ་འོང་བ་ནི། མ་ཡིན་ནོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཀྱང་རང་བཞིན་གྱིས་སེམས་ཅན་ཆོས་འདོད་པ་རྣམས་ཀྱི་ཡིད་དུ་འོང་བ་དང༌། མཆོག་ཏུ་བལྟ་ན་སྡུག་པ་ཡིན་ནོ། །སྡང་བའི་སེམས་དང་
ལྡན་པ་གཞན་དག་གི་ཡིད་དུ་འོང་བ་ནི། མ་ཡིན་ཏེ། དེ་བས་ན། དེ་བཞིན་གཤེགས་པ་ཟླ་བ་དང་འདྲ་བ་ཡིན་ནོ། །དཔེར་ན། ཉི་མ་དུས་ཚིགས་གསུམ་དུ་འགྱུར་ཞིང་འཕོ་སྟེ། དགུན་
དང༌། དབྱར་དང༌། སོས་ཀའི་དུས་གསུམ་དུ་རྒྱུ་བར་བྱེད་ལ། དགུན་ནི། ཉི་མ་མྱུར་བ་ཁོ་ནར་འགོའོ། །དབྱར་ནི། ཉི་མ་འབྲིང་ཙམ་དུ་འགྲོའོ། །སོས་ཀར་ནི། ཉི་མ་རིང་དུ་ཐོགས་ཤིང་འགྲོ་
སྟེ། འོད་ཤིན་ཏུ་ཚའོ། །དེ་བཞིན་གཤེགས་པའང་འཇིག་རྟེན་གསུམ་དུ་སྐྱེ་བ་རྣམ་པ་གསུམ་སྟོན་པར་མཛད་དེ། སེམས་ཅན་ཚེ་ཐུང་དུ་རྣམས་ཀྱི་ནང་དུ་ནི། མཆོག་ཏུ་སྐུ་ཚེ་ཐུང་
༄༅། །བར་སྟོན་ཏེ། སེམས་ཅན་རྣམས་ཀྱིས་སངས་རྒྱས་སྐུ་ཚེ་ཐུང་ངོ་སྙམ་དུ་འཛིན་ཏོ། །ཉན་ཐོས་ཀྱི་ཐེག་པ་པ་རྣམས་ལ་ནི། དགུན་གྱི་ཉི་མ་བཞིན་དུ་སྐུ་ཚེ་ཐུང་བར་
སྟོན་ཏོ། །བྱང་ཆུབ་སེམས་དཔའ་སམས་དཔའ་ཆེན་པོ་རྣམས་ལ་ནི། དབྱར་གྱི་ཉི་མ་བཞིན་དུ་སྐུ་ཚེ་འབྲིང་དུ་སྟོན་ཏོ། །སངས་རྒྱས་རྣམས་ལ་ནི། སོས་ཀའི་ཉི་མ་བཞིན་དུ་བསྐལ་
པའམ། བསྐལ་པ་ལས་ལྷག་པར་བཞུགས་པར་སྣང་ངོ༌། །རིགས་ཀྱི་བུ། ཐེག་པ་ཆེན་པོ་འདི་ལས་དགོངས་པའི་ཚིག་དེ་བཞིན་གཤེགས་པའི་གསང་བའི་དམ་པའི་ཆོས་ཀྱི་
ཆར་ངས་ཡང་དག་པར་བསྟན་པར་བྱ་སྟེ། མ་འོངས་པའི་དུས་ན་དམ་པའི་ཆོས་ཐེག་པ་ཆེན་པོའི་མདེའི་སྡེ་ཚན་གྱི་ཕན་པའི་གདམས་ངག་སྟོན་པ་གང་ཡིན་པ་དེ་དག་ནི། དབྱར་གྱི་
ནམ་གྱི་སྤྲིན་དང་འདྲ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་རིག་པར་བྱའོ། །ཉན་ཐོས་དང་རང་སངས་རྒྱས་རྣམས་ནི། དགོངས་པའི་ཚིག་ཐོས་ན། དགུན་གྱི་
གྲང་ནད་ཀྱིས་ཐེབས་པ་དང་འདྲ་སྟེ། དེའི་ཕྱིར་ངས་སྐུ་ཚེ་ཐུང་པ་དང༌། ངེས་པར་མྱོང་བར་འགྱུར་བ་ཡང་དག་པར་བསྟན་ཏོ། །སངས་རྒྱས་ཀྱི་ཚེ་བསྟན་པ་སངས་རྒྱས་ཀྱི་གནས་རྒྱ་
ཆེན་པོ་ལས་ནི། སོས་ཀའི་ཉི་མ་བཞིན་དུ་ངས་རྟག་པ་དང༌། བརྟན་པར་བསྟན་ཏོ། །ང་ནི། ཉི་མ་བཞིན་དུ་གང་དུའང་ལྟུང་བ་མེད་དེ། ཉི་ཟླའི་ཆོས་ཉིད་ཀྱང་སྤྱོད་དོ། །དེ་ལྟར་ན།
དེ་བཞིན་གཤེགས་པ་ནི། འཇིག་རྟེན་གསུམ་དུ་ཡང་དག་པར་སྣང་སྟེ། འདི་ནི། སངས་རྒྱས་རྣམས་ཀྱི་ཆོས་ཉིད་དོ། །རིགས་ཀྱི་བུ། གཞན་ཡང་པ་བ་སངས་དང༌། ཕུར་བུ་དང༌།
མིག་དམར་དང༌། མཇུག་རིང་དང༌། གཟའ་ལྷག་ལ་སོགས་པ་ཉི་མ་དང་ཟླ་བ་གཉིས་དང་ལྷན་ཅིག་འགྲོ་བ་ནི། སེམས་ཅན་རྣམས་ཀྱིས་བལྟ་བར་མི་ནུས་ལ་དེ་དག་ཀྱང་ལྡོག་པར་
ཡང་མི་འགྱུར། ལྟུང་བར་ཡང་མི་འགྱུར་ཏེ། དེ་དག་གི་འོད་ཆེས་ཆ་ཕྲ་ལ་ཉི་མ་དང་ཟླ་བའི་འོད་ཤིན་ཏུ་ཆེ་བས་ཟིལ་གྱིས་ནོན་པའི་ཕྱིར་རོ། །དེ་བཞིན་དུ་དེ་བཞིན་གཤེགས་པ་ནི། རྟག་
ཏུ་ཉན་ཐོས་དང་རང་སངས་རྒྱས་ཀྱི་གཟའི་ཚོགས་རྣམས་དང་ལྷན་ཅིག་ཏུ་སྐྱེ་བ་ལྟ་བུར་ཡང་སྟོན་ལ་ཡོངས་སུ་མྱ་ངན་ལས་འདའ་བར་ཡང་སྟོན་མོད་ཀྱི། ཉན་ཐོས་དང་རང་སངས་རྒྱས་
དེ་དག་མི་རྟག་པའང་མ་ཡིན། མི་བརྟན་པའང་མ་ཡིན་ཏེ། དེ་དག་ནི། རྟག་པ་དང༌། བརྟན་པ་ཡིན་བཞིན་དུ་ཉིན་པར་གྱི་གཟའ་དང་འདྲ་བར་སེམས་ཅན་གྱིས་མཐོང་བར་མི་ནུས་སོ། །
ཉི་མ་དང་འདྲ་བ་འདི་ནི། རང་སངས་རྒྱས་རྣམས་ཀྱི་ཆོས་ཉིད་ཡིན་ནོ། །དཔེར་ན། ཉི་མ་དང་ཟླ་བ་སྤྲིན་གྱིས་གཡོགས་པའི་ཚེ་མི་སྣང་སྟེ། སེམས་ཅན་རྣམས་ཀྱིས་མི་སྣང་ངོ་སྙམ་དུ་
འཛིན་མོད་ཀྱི། དེ་གཉིས་མེད་པར་ཡང་མི་འགྱུར་རོ། །རིགས་ཀྱི་བུ། དེ་བཞིན་དུ་དེ་བཞིན་གཤེགས་པ་འཇིག་རྟེན་ན་མི་བཞུགས་པའི་ཚེ་ཉི་ཟླ་སྤྲིན་གྱིས་གཡོགས་པ་བཞིན་དུ་
༄༅། །གཞི་གསུམ་འཇིག་པ་ལྟ་བུར་སྣང་མོད་ཀྱི། གཞི་གསུམ་མེད་པར་ཡང་མི་འགྱུར་ལ་རྟག་པ་དང༌། བརྟན་པ་དང༌། ཐེར་ཟུག་པར་འདུག་བཞིན་དུ་ཉེས་པ་
རྣམས་ཀྱིས་ཀྱང་གོས་པར་མི་འགྱུར་བ་འདི་ནི། སངས་རྒྱས་རྣམས་ཀྱི་ཆོས་ཉིད་དོ། །རིགས་ཀྱི་བུ། དཔེར་ན། ཟླ་བ་ཡར་གྱི་ངོའང་མ་ཡིན། མར་གྱི་ངོའམ་མ་ཡིན་པ་གནམ་སྟོང་གི་
ཉིན་པར་ཉི་མ་དང་ཟླ་བ་མེད་པའི་སྐབས་སུ་གཟའ་མཇུག་རིང་གཟི་བརྗིད་དྲག་པོ་དང་ལྡན་པ་ཞེས་བྱ་བ་ཤར་ནས་འཇིག་རྟེན་ཐམས་ཅད་ཀྱིས་མ་ཚོར་བར་སྐད་ཅིག་གཅིག་ཁོ་ན་ལ་
མི་སྣང་བར་འགྱུར་རོ། །རིགས་ཀྱི་བུ། དེ་བཞིན་དུ་རང་སངས་རྒྱས་རྣམས་ཀྱང་སངས་རྒྱས་རྣམས་མི་བཞུགས་པའི་ཚེ་གནམ་སྟོང་གི་ཉིན་པར་གཟའ་མཇུག་རིང་འཆར་བ་བཞིན་དུ་
བྱུང་ནས་སེམས་ཅན་བྱེ་བ་ཕྲག་མང་པོ་དམ་པའི་ཆོས་ལ་བཀོད་ནས་མི་སྣང་བར་འགྱུར་ལ། མཇུག་རིང་ཡང་རྟག་ཏུ་ཡོད་དེ། སེམས་ཅན་རྣམས་ཀྱིས་ནི། མཐོང་བར་མི་ནུས་སོ། །དེ་
བཞིན་དུ་རང་སངས་རྒྱས་རྣམས་ཀྱང་རྟག་ཏུ་ཡོད་བཞིན་དུ་དེ་དག་སེམས་ཅན་རྣམས་ཀྱིས་མཐོང་བར་མི་ནུས་ཏེ། བདག་ཉིད་ཡང་དག་པར་སྟོན་ཅིང་མི་མངོན་པར་བྱེད་པ་འདི་ནི། དེ་
དག་གི་ཆོས་ཉིད་དོ། །རིགས་ཀྱི་བུ། དཔེར་ན། ཉི་མ་ཤར་ན། ལྷོ་བུར་མེད་པར་འགྱུར་བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་བྱུང་ན། ཐོས་པ་
ཙམ་གྱིས་ཀྱང་ཕམ་པ་རྣམས་དང༌། མཚམས་མེད་པའི་ལས་རྣམས་ཀྱི་སྡིག་པའི་ཕུང་པོ་རྒྱུར་དུ་མེད་པར་འགྱུར་རོ། །དེ་ལྟར་ན། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་
བསམ་གྱིས་མི་ཁྱབ་པའི་ཡུལ་འདི་ནི། དེ་བཞིན་གཤེགས་པའི་སྙིང་པོ་སྟོན་པ་ཡིན་པའི་ཕྱིར་དཔག་ཏུ་མེད་དོ། །དེ་བས་ན། རིགས་ཀྱི་བུའམ། རིགས་ཀྱི་བུ་མོ་རྣམས་ཀྱིས་དེ་བཞིན་
གཤེགས་པ་རྟག་གོ། །དམ་པའི་ཆོས་ནུབ་པར་མི་འགྱུར་རོ། །དགེ་འདུན་མེད་པར་མི་འགྱུར་རོ་སྙམ་དུ་མདོའི་ཤེས་པ་ལ་དེ་ལྟར་བརྩོན་པར་བྱའོ། །དེ་ལྟར་བྱས་ཀྱང་དེ་དག་ཀྱང་ང་དང་འདྲ་
བར་སངས་རྒྱས་ཀྱི་གནས་སུ་གསོན་པར་འགྱུར་རོ། །གསོལ་བ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཇི་ལྟ་བུ་ལགས། བཀའ་སྩལ་པ། སེམས་
བསྐྱེད་པའང་རུང༌། སེམས་མ་བསྐྱེད་པའང་རུང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སུ་འགྱུར་རོ། །གསོལ་པ། དེ་ཇི་ལྟ་བུ་ལགས། བཀའ་སྩལ་པ། རིགས་ཀྱི་
བུ། དཔེར་ན། དགུན་མར་འཁྱགས་པ་ཉི་ཚན་གྱིས་ཀྱང་བཞུ་མི་ནུས་པ་དེ་བཞིན་དུ་མདོ་སྡེ་དང༌། ཏིང་ངེ་འཛིན་ཐམས་ཅད་བསྒོམ་པར་བྱ་བ་བསྒོམས་པའི་འབྲས་བུའི་སྒོ་ནས་ནི།
སེམས་བསྐྱེད་པ་རྣམས་ཀྱིས་ཀྱང་བྱང་ཆུབ་ཐོབ་པར་མི་འགྱུར་རོ། །སེམས་མ་བསྐྱེད་པས་ཀྱང་བྱང་ཆུབ་ཐོབ་པར་མི་འགྱུར་རོ། །དེ་ཅིའི་ཕྱིར་ཞེ་ན། དགུན་གྱི་ཉི་མ་བཞིན་དུ་བརྩོན་
༄༅། །འགྲུས་ཞན་པའི་ཕྱིར་རོ། །མདོ་སྡེ་བསྒོམ་པར་བྱ་བ་བསྒོམས་པའི་འབྲས་བུའི་མཆོག་ནི། དཔེར་ན། སོ་གའི་ཉི་མ་ཚ་བའི་ཚེ་ཉི་མ་མ་ཤར་བར་མཚན་མོའང་
མར་ཤིན་ཏུ་འཁྱགས་པའང་ཞུ་བར་བྱེད་ལ་རྒྱ་མཚོ་ཆེན་པོའང་དྲོ་བར་བྱེད་དོ། །དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་གང་དག་གིས་ཡོངས་སུ་མྱ་ངན་ལས་འདས་པ་
ཆེན་པོའི་མདོ་འདི་ཐོས་མ་ཐག་ཏུ་འགྲན་ཏོར་བྱས་ཀྱང་རུང༌། གཞན་གྱིས་བྱེད་དུ་བཅུག་ཀྱང་རུང༌། གཞན་གྱི་དྲིང་འཇོག་ཀྱང་རུང༌། རྙེད་པ་དང༌། བཀུར་སྟི་དང༌། ཚིགས་སུ་
བཅད་པའི་དོན་དུ་བྱས་ཀྱང་རུང་སྟེ། བདག་ལ་བྱང་ཆུབ་མི་དགོས་སོ་སྙམ་པའམ། སེམས་བསྐྱེད་པར་ཡང་མི་འདོད་དུ་ཟིན་ཀྱང་གང་ཟག་དེ་འདྲ་བའི་ལུས་ཀྱི་བ་སྤུའི་ཁུང་བུ་
ཐམས་ཅད་དུ་བྱང་ཆུབ་ཀྱི་རྒྱུས་སོ་གའི་ཉི་མ་བཞིན་དུ་འཇུག་པར་འགྱུར་རོ། །དེ་བས་ན། རིགས་ཀྱི་བུ་དེ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ནོ། །ཞས་ང་ཟེར་
རོ། །དེ་ལྟར་ན། བྱང་ཆུབ་ཟད་མི་ཤེས་པའི་མདོ་ཆེན་པོ་འདི་ནི། བསོད་ནམས་ཀྱི་ཕུང་པོ་ཆེན་པོ་ཡིན་ཏེ། དེ་བས་ན། ཆེ་བ་ཞེས་བྱའོ། །སྔ་བ་དང༌། ཡངས་པ་དང༌། སོ་གའི་ཉི་མ་
བཞིན་དུ་གཟི་བརྗིད་དང་ལྡན་པ་ཡིན་ཏེ། དེ་བས་ན། ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །དེ་ཅིའི་ཕྱིར་ཞེ་ན། འདི་ལས་དེ་བཞིན་གཤེགས་པའི་སྙིང་པོ་རྟག་པར་
བསྟན་པའི་ཕྱིར་རོ། །རིགས་ཀྱི་བུ། གཞན་ཡང་སྐར་མ་དང་སྲིན་བུ་མེ་ཁྱེར་གྱི་འོད་ནི། ཉི་ཟླའི་འོད་ལས་འདས་ཏེ་ཐལ་ལེར་སྣང་བར་མི་འགྱུར་རོ། །ཉི་ཟླའི་འོད་ནི། འོད་ཐམས་ཅད་
ལས་འདས་ཏེ་ལམ་མེར་འདུག་གོ །དེ་བཞིན་དུ་གཞན་གྱི་འོད་རྣམས་ནི། མདོ་སྡེ་ཐམས་ཅད་དང༌། ཏིང་ངེ་འཛིན་ཐམས་ཅད་བསྒོམ་པར་བྱ་བ་བསྒོམས་པའི་ཡོངས་སུ་མྱ་ངན་ལས་
འདས་པ་ཆེན་པོའི་མདོ་ཆེན་པོའི་འོད་ལས་འདས་ཏེ་ཐལ་ལེར་མི་འདུག་གོ །ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་འོད་ནི། འོད་ཐམས་ཅད་ལས་འདས་ཏེ་ཐལ་ལེར་
སྣང་ལ། སེམས་ཅན་ཐམས་ཅད་ཀྱི་སྤུ་དྲུང་དུ་ཞུགས་ནས་བྱང་ཆུབ་ཀྱི་སེམས་མི་དགོས་སོ་སྙམ་སྟེ་མ་བསྐྱེད་དུ་ཟིན་ཀྱང་བྱང་ཆུབ་ཀྱི་རྒྱུ་ངེས་པར་ཐོབ་པར་འགྱུར་ཏེ། དེ་བས་ན། མིང་
ཡང་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །གསོལ་པ། བྱང་ཆུབ་ཀྱི་སམས་མི་དགོས་པར་འཛིན་ཀྱང་སེམས་ཅན་ཐམས་ཅད་ཀྱི་ལུས་ཀྱི་བ་སྤུའི་ཁུང་བུ་ཐམས་ཅད་དུ་
ལགས་ནས་བྱང་ཆུབ་ཀྱི་རྒྱུ་མངོན་པར་འགྲུབ་པར་འགྱུར་ཞེས་བགྱི་བ་འདི་ལ་གཏན་ཚིགས་བཀའ་སྩལ་འཚལ་ལགས་སོ། །བཅོམ་ལྡན་འདས། བསྟན་པ་འདི་ལ་ཕམ་པ་
ཀྱིད་པ་དང༌། མཚམས་མ་མཆིས་པ་བགྱིད་པ་དང༌། མདོ་སྡེ་སྤོང་པ་དང༌། འདོད་ཆེན་པོ་དག་ཀྱང་གདའ་ལགས་ན། གལ་ཏེ་སེམས་མ་བསྐྱེད་དེ་མི་དགོས་པར་འཛིན་ཀྱང་བྱང་
༄༅། །ཆུབ་པའི་བྱང་ཆུབ་ཀྱི་རྒྱུར་འགྱུར་དུ་ལགས་ན། སངས་རྒྱས་ཀྱིས་གསུངས་པ་ལ་བྱེ་བྲག་ཅི་མཆིས་ཏེ། ཡང་ན་བཞི་པོ་དེ་དག་མ་མཆིས་ཞེས་བཤད་འཚལ་
ལགས་སོ། །ཡང་ན་དེས་སྡིག་པ་འབྱང་བར་འགྱུར་ཞེས་བཤད་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འདོད་ཆེན་པ་མ་གཏོགས་པར་ཡོངས་སུ་མྱ་ངན་
ལས་འདས་པའི་མདོ་ཆེན་པོ་འདི་རྣ་ལམ་དུ་གྲག་ཅིང་ཐོས་པ་ཙམ་གྱིས་ཀྱང་ཐམས་ཅད་ལ་བྱང་ཆུབ་ཀྱི་རྒྱུ་ཡོད་པར་འགྱུར་ཏེ། སངས་རྒྱས་གྲངས་མེད་པ་ལ་བཀུར་སྟི་བྱས་པ་རྣམས་
ཀྱིས་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཐོས་པར་ནུས་ལ། དགེ་བའི་རྩ་བ་ངན་ངོན་མ་ཡིན་པས་བྱང་ཆུབ་ཀྱི་རྒྱུ་ཐོབ་པར་འགྱུར་རོ། །དེ་བས་ན། དེ་བཞིན་
གཤེགས་པའི་སྙིང་པོ་ཡང་དག་པར་སྟོན་པའི་ཕྱིར་མདོ་ཆེན་པོ་མཐུ་ཆེ་བ་ཡིན་ནོ། །གསོལ་པ། སེམས་མ་བསྐྱེད་དེ་མི་དགོས་པར་འཛིན་པས་ཇི་ལྟར་བྱང་ཆུབ་པའི་བྱང་ཆུབ་
ཀྱི་རྒྱུར་འགྱུར་ལགས། བཀའ་སྩལ་པ། བྱང་ཆུབ་ཏུ་སེམས་བསྐྱེད་ནས་མི་དགོས་པར་འཛིན་ཅིང་མདོ་སྡེ་ཁྱད་དུ་གསོད་པ་གང་ཡིན་པ་དེ་དག་ལ་ནི། རྨི་ལམ་དུ་སྲིན་པོ་ཆེན་པོ་
འཇིགས་པའི་གཟུགས་ཅན་གྱིས་བསྡིགས་ཏེ། འདི་སྐད་དུ་ངས་མ་བསད་པར་སྐྱེན་པར་བྱང་ཆུབ་ཏུ་སེམས་བསྐྱེད་ཅིག་ཅེས་ཀྱང་ཟེར་རོ། །དེ་ནས་དེ་དག་རྨི་ལམ་དུ་འཇིགས་ཤིང་
སྐྲག་སྟེ་སད་ནས་ནང་པར་བྱང་ཆུབ་ཏུ་སེམས་སྐྱེད་པར་བྱེད་དེ། དེ་དག་ཤི་ནས་སེམས་ཅན་དམྱལ་བ་རྣམས་སུ་འཚེད་པའམ། ཡི་དྭགས་ཀྱི་འཇིག་རྟེན་ནས་མཐོ་རིས་སུ་སྐྱེས་ཀྱང་རུང་
སྟེ། རྗེས་སུ་དྲན་ནས་དེའི་འོག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོར་འགྱུར་རོ། །དེ་ལྟར་ན། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ནི། མཐུ་ཆེ་སྟེ། མི་
དགོས་པར་འཛིན་ཅིང་སེམས་མ་བསྐྱེད་ཀྱང་བྱང་ཆུབ་ཀྱི་རྒྱུ་སྐྱེད་པར་བྱེད་དོ། །རྒྱུ་ནི། དེ་ཡིན་ནོ། །རྐྱེན་ནི། དེ་ཡིན་ཏེ། ཐེག་པ་ཆེན་པོ་འདི་ལ་རྒྱུ་མེད་པ་མ་ཡིན་ནོ། །དེ་བས་ན། ངའི་བསྟན་
པ་ནི། སངས་རྒྱས་ཀྱིས་གསུངས་པ་ཞེས་བྱའོ། །རིགས་ཀྱི་བུ། གཞན་ཡང་ནམ་མཁའ་ལས་སྤྲིན་ཆེན་པོ་ཆར་འབེབས་པ་ན་ས་ཆེན་པོ་ཆུས་གང་བར་འགྱུར་ལ། གྲམ་པའི་ས་ཕྱོགས་
སུ་ནི། ཆར་ཆེན་པོ་བབ་ཏུ་ཟིན་ཀྱང་ཆུ་ཅུང་ཟད་ཀྱང་གནས་པར་མི་འགྱུར་ཏེ། གར་གཞོལ་བར་འབབ་ལ། བབ་ནས་ཀྱང་དེར་གནས་པར་འགྱུར་ཏེ། སེམས་ཅན་ཐམས་ཅད་ལའང་ཕན་
འདོགས་པར་འགྱུར་བ་དེ་བཞིན་དུ་མདོ་སྡེ་ཆེན་པོ་འདི་ལས་དམ་པའི་ཆོས་ཀྱི་ཆར་འབབ་མོད་ཀྱི། འདོད་ཆེན་པ་ལ་ནི། བྱང་ཆུབ་ཀྱི་རྒྱུ་སྐྱེ་བར་མི་འགྱུར་ཏེ། སྐྱེ་མི་སྲིད་དོ། །གཞན་
དག་ལ་ནི། ས་གཞོལ་བའི་ཆུ་བཞིན་དུ་སྐྱེད་པར་བྱེད་དོ། །རིགས་ཀྱི་བུ། གཞན་ཡང་དཔེར་ན། སྲན་སྔེའུ་འམ། སྲན་GRE'UAM། སྲན་མའམ། སྦའི་ས་བོན་ཚིག་པ་རྣམས་ལ་སྤྲིན་
༄༅། །ཆེན་པོའི་ཆར་སྟོང་དུ་བབ་ཀྱང་མྱུ་གུ་སྐྱེ་བར་མི་ནུས་ཏེ། དེ་དག་ལས་མྱུ་གུ་འབྱུང་མི་སྲིད་དོ། །དེ་བཞིན་དུ་འདོད་ཆེན་པ་རྣམས་ཀྱིས་ཡོངས་སུ་མྱ་ངན་ལས་འདས་
པ་ཆེན་པོ་འདི་ཐོས་སུ་ཟིན་ཀྱང་བྱང་ཆུབ་ཀྱི་རྒྱུ་ཐོབ་མི་སྲིད་དེ། དེ་དག་ནི། དགེ་བའི་རྩ་བ་ཟད་པ་ཡིན་པའི་ཕྱིར་ས་བོན་ཚིག་པ་དང་འདྲའོ། །རིགས་ཀྱི་བུ། དཔེར་ན། ཀེ་ཏ་ཀའི་འབྲས་
བུ་ཆུ་རྙོག་པ་ཅན་གྱི་ནང་དུ་བཅུག་ན། རྙོག་པ་བསལ་ཏེ་ཆུ་དང་བར་བྱེད་པ་དེ་བཞིན་དུ་ཡོངས་སུ་མྱ་ངན་ལས་འདས་པའི་མདོ་ཆེན་པོ་འདིའང་ཀེ་ཏ་ཀའི་འབྲས་བུ་བཞིན་དུ་སེམས་
ཅན་རྣམས་ཀྱི་ཕམ་པ་རྣམས་དང༌། མཚམས་མེད་པའི་ལས་རྣམས་ཀྱི་ལས་ཀྱི་འདམ་རྫབ་དང་རྙོག་པ་བསལ་ནས་བྱང་ཆུབ་ཀྱི་རྒྱུ་ལ་འགོད་པར་བྱེད་དེ། འདོད་ཆེན་པ་ནི། མ་
གཏོགས་སོ། །ཀེ་ཏ་ཀའི་འབྲས་བུས་ཀྱང་རྙོག་པ་དང་བར་བྱེད་པར་ཟད་ཀྱི། ལོ་སྟོང་གི་བར་དུ་བདར་དུ་ཟིན་ཀྱང་འདམ་རྫབ་དེ་ལས་ཆུ་དབྱུང་བ་ནི། མི་ནུས་སོ། །དེ་བཞིན་དུ་
འདོད་ཆེན་པའང་དགེ་བའི་རྩ་བ་ཟད་ཅིང་གཞི་མེད་པར་འགྱུར་བ་ཡིན་པས་དེ་ནི། ཡོངས་སུ་མྱ་ངན་ལས་འདས་པ་ཆེན་པོ་འདི་ལ་བྱེ་བར་ཐོས་སུ་ཟིན་ཀྱང་བྱང་ཆུབ་ཀྱི་རྒྱུ་སྐྱེད་
པར་ཡོང་ཡེ་མི་ནུས་ཏེ། དེ་ལ་དགེ་བ་མེད་པའི་ཕྱིར་རོ། །རིགས་ཀྱི་བུ། དཔེར་ན། དུག་སྨན་གྱི་སྡོང་པོ་སྨན་གྱི་རྒྱལ་པོ་ཆེན་པོ་ནི། དར་བའམ། བུ་རམ་མམ། ཞུན་མར་རམ།
ལ་མའམ། ཆུ་དང་སྦྱར་རམ། ཕྱེའམ། ལྡེ་གུའམ། ཐུག་པར་བྱས་སམ། ཁ་བསྐུས་སམ། དུད་པས་བདུགས་སམ། མིག་བསྐུས་སམ། དྲི་ཚོར་རམ། མཐོང་ངམ། རེག་པར་གྱུར་ཀྱང་
རུང་སྟེ། སེམས་ཅན་ཐམས་ཅད་ཀྱི་ནད་སེལ་བར་བྱེད་ལ། ཤིང་ལྗོན་པ་དེ་འདི་སྙམ་དུ་བདག་གི་ལོ་མ་ཁྱེར་ན་རུང་ངོ༌། །རྩ་བ་ཁྱེར་ན་མི་རུང་ངོ་སྙམ་པའམ། བདག་གི་རྩ་བ་ཁྱེར་ན་རུང་
ངོ༌། །ལོ་མ་ཁྱེར་ན་མི་རུང་ངོ་སྙམ་པའམ། སྡོང་བུ་ཁྱེར་ན་རུང་ངོ༌། །ཤུན་ལྤགས་ཁྱེར་ན་མི་རུང་ངོ་སྙམ་པའམ། ཤུན་ལྤགས་ཁྱེར་ན་རུང་ངོ༌། །སྡོང་བུ་ཁྱེར་ན་མི་རུང་ངོ་སྙམ་དུ་མི་
སེམས་ཏེ། དེ་དེ་ལྟར་སེམས་མི་སྐྱེད་མོད་ཀྱི། འོན་ཀྱང་དེ་ནི། སྨན་ཁོ་ན་ཡིན་ཏེ། ནད་ཐམས་ཅད་སེལ་བར་བྱེད་དོ། །རིགས་ཀྱི་བུ། དེ་བཞིན་དུ་ཡོངས་སུ་མྱ་ངན་ལས་འདས་པ་
ཆེན་པོའི་མདོ་ཆེན་པོ་འདིའང་སེམས་ཅན་ཐམས་ཅད་ཀྱི་སྡིག་པའི་ལས་ཀྱི་ནད་རྣམས་སེལ་བར་བྱེད་དེ། ཕམ་པ་བྱེད་པ་རྣམས་ཀྱང་རུང༌། མཚམས་མེད་པ་བྱེད་པ་རྣམས་ཀྱང་རུང༌།
འདི་ལས་ཕྱི་རོལ་པ་རྣམས་ཀྱང་རུང་སྟེ། བྱང་ཆུབ་དགོས་པར་མི་འཛིན་ཅིང་སེམས་མ་བསྐྱེད་ཀྱང་བྱང་ཆུབ་ཀྱི་རྒྱུ་སྐྱེད་པར་བྱེད་དོ། །དེ་ཅིའི་ཕྱིར་ཞེ་ན། སྡིག་པ་ཐམས་ཅད་ཀྱི་དུག་སྨན་
གྱི་སྡོང་པོའི་སྨན་ནི། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་ཡིན་པའི་ཕྱིར་རོ། །ལུས་བསྒོམས་པ་རྣམས་ཀྱང་རུང༌། ལུས་མ་བསྒོམས་པ་རྣམས་ཀྱང་རུང་སྟེ། མདོ་སྡེ་
༄༅། །འདིའི་མིང་ཙམ་ཐོས་ནའང་མདོ་སྡེ་འདི་ནི། ཡོད་དོ་སྙམ་དུ་ཤེས་ན། སྡིག་པའི་ནད་ཐམས་ཅད་འབྱང་བར་འགྱུར་རོ། །གསོར་མི་རུང་བའི་ནད་ཨ་ན་རྒ་ལ་
ཞེས་བྱ་བ་དེ་ནི། ཇི་ལྟར་བྱས་ཀྱང་གསོར་མི་རུང་ངོ༌། །དེ་ཅིའི་ཕྱིར་ཞེ་ན། དེ་ནི། འཆི་བར་འགྱུར་བའི་ནད་ཡིན་པའི་ཕྱིར་ཏེ། དུས་མ་ཡིན་པར་འཆི་བའི་ནད་མ་ཡིན་ནོ། །དེ་བཞིན་
དུ་འདོད་ཆེན་པའང་མདོ་སྡེ་འདིས་བྱང་ཆུབ་ཏུ་གཞོག་པར་མི་ནུས་ཏེ། དེ་ནི། རྒྱུ་མེད་པ་དང༌། ཤི་བ་ཡིན་པའི་ཕྱིར་རོ། །དཔེར་ན། ལག་མཐིལ་རྨ་མེད་པལ་དུག་གིས་མི་ཚུགས་
ལ༑ རྨ་ཡོད་པ་ལ་ནི། དུག་གིས་ཚུགས་པར་འགྱུར་བ་དེ་བཞིན་དུ། འདིར་ཡང་འདོད་ཆེན་པ་ལ་བྱང་ཆུབ་ཀྱི་རྒྱུ་མི་སྐྱེའོ། །དེ་ལ་རྨ་ཞེས་བྱ་བ་ནི། བྱང་ཆུབ་ཀྱི་རྒྱུའོ། །དུག་ཅེས་བྱ་
བ་ནི༑ མཆོག་ཏུ་བདེ་བའོ། །ལག་མཐིལ་རྨ་མེད་པ་ལྟ་བུ་ནི། འདོད་ཆེན་པོ་སྡིག་ཅན་ཡིན་ནོ། །དཔེར་ན། རྡོ་རྗེ་རིན་པོ་ཆེ་གཟི་བྱིན་ཆེན་པོ་ནི། ཅིས་ཀྱང་བཅག་མི་ནུས་ལ་སྣ་གྲངས་
གཞན་ཐམས་ཅད་ནི། དེས་ཆོམ་པར་འགྱུར་མོད་ཀྱི། ལུག་རུ་ནི། མཆོད་དོ། །དེ་བཞིན་དུ་ཡོངས་སུ་མྱ་ངན་ལས་འདས་པའི་མདོ་ཆེན་པོ་འདིས་ཀྱང་ཤིན་ཏུ་སྡིག་པའི་ལས་བྱེད་
པ་འདོད་ཆེན་པ་ནི། བྱང་ཆུབ་ཏུ་གཞག་པར་མི་ནུས་ཏེ། རྒྱུ་མེད་པའི་ཕྱིར་རྡོ་རྗེས་ལུག་རུ་ལ་མི་ཚུགས་པ་བཞིན་ནོ། །དཔེར་ན། ཤིང་ས་ལ་ཀི་དང༌། དོང་ཀའི་ཤིང་དང༌། ཀ་ན་ག་
པྲ་བྷ་དང༌། ཤིང་བལ་གྱི་ཤིང་དང༌། བལ་མི་ཀི་དང༌། ཀར་ན་བལ་ལྱ་དང༌། སྐན་ད་སྟ་བ་དང༌། ཀེ་ཏ་ཀི་དང༌། པཏྟྲ་ཀ་དང༌། བིར་ན་དང༌། རོ་ཙ་ན་རྣམས་ནི། བཅད་དེ་དུམ་བུར་གཏུབས་ནས་
ཁྱེར་ཏེ་ཁྱིམ་དུ་བཞག་ཀྱང་གལ་ཏེ་ཆུའི་རླན་དང་ཕྲད་ཕན་ཆད་མྱུར་དུ་སྐྱེ་བར་འགྱུར་ཏེ། ལོ་མ་ཁ་འབུ་བ་དང༌། སྙེ་མ་དང་ལྡན་ཞིང་ཡལ་ག་དང་སྡོང་བུ་དང་ལྡན་ཏེ་ཤིང་ལྗོན་པ་ཞེས་བྱ་
བའི་གྲངས་སུ་གཏོགས་པར་འགྱུར་རོ། །དེ་བཞིན་དུ་བསྟན་པ་འདི་ལའང་ཕམ་པ་བྱེད་པ་རྣམས་དང༌། མཚམས་མེད་པ་བྱེད་པ་རྣམས་ཤིང་ཏ་ལའི་མགོ་བཅད་པ་བཞིན་དུ་གྱུར་པ་
ལས༑ མདོ་སྡེ་འདི་ཐོས་མ་ཐག་ཏུ་སེམས་བསྐྱེད་པ་དགོས་པར་མི་འཛིན་གྱིས་ཀྱང་མི་མཆོག་དེ་དག་ནི། ཤིང་ས་ལ་ཀི་དང༌། དོང་ཀའི་ཤིང་ལ་སོགས་པ་བཞིན་དུ་བྱང་ཆུབ་ཏུ་འཁྲུངས་
པར་འགྱུར་རོ། །དཔེར་ན། སེང་ལྡེང་དང༌། ཏིནྡུ་ཀའི་ཤིང་ལྗོན་པ་རྣམས་ནི། བཅད་ཕན་ཆད་ས་བོན་ཚིག་པ་བཞིན་དུ་སྐྱེ་བར་མི་འགྱུར་བ་དེ་བཞིན་དུ་འདོད་ཆེན་པོའི་སེམས་ཅན་རྣམས་
ཀྱིས་ཀྱང་མདོ་སྡེ་འདི་ལན་མང་དུ་ཐོས་ཀྱང་ས་བོན་ཚིག་པ་བཞིན་དུ་བྱང་ཆུབ་ཏུ་འཁྲུངས་པར་མི་འགྱུར་རོ། །དཔེར་ན། སྤྲིན་ཆེན་པོ་ལས་ཆར་བབ་ཏུ་ཟིན་ཀྱང་ས་ཕྱོགས་བྱིལ་བོར་
ལྡུག་[?] པ་ལ་ཆུ་མི་ཆགས་པ་བཞིན་དུ་མདོ་སྡེ་ཆེན་པོའི་སྤྲིན་འདི་ལས་ཆོས་ཀྱི་ཆར་འབབ་མོད་ཀྱི། འདོད་ཆེན་པ་ལ་བྱང་ཆུབ་ཀྱི་རྒྱུ་མི་ཆགས་ཏེ། དེ་ནི། རྡོ་རྗེ་བཞིན་དུ་བྱིལ་བོར་འདུག་
༄༅། །པའི་ཕྱིར་རོ། །འདོད་ཆེན་པ་རྣམས་ཀྱིས་ནི། དགེ་བ་བྱས་པ་ནི། མི་མཐོང་གི། སྨད་པ་དང༌། བཤུང་བའི་སྡིག་པ་གང་ཡིན་པ་ནི། མཐོང་ངོ༌། །ལེགས་པར་བྱས་
པ་ནི། བྱང་ཆུབ་ཀྱི་དོན་ཏོ། །མི་འོང་བ་ནི། མི་ཕྲད་པའི་དོན་ཏོ། །དགོངས་པ་ནི། དགེ་བའི་དོན་ཏོ། །དགོངས་པ་ལས་ཁྱད་པར་དུ་འཕགས་པའི་དགེ་བ་སུ་ལ་མི་འོང་ཞེ་ན། ལས་བཟང་པོ་
ནི༑ འདོད་ཆེན་པ་ལ་མི་འོང་ངོ༌། །དགེ་བའི་སེམས་སུ་ལ་མི་འོང་ཞེ་ན། འདོད་ཆེན་པ་ཞེས་གྲགས་པ་ནི། དགེ་བ་མེད་པའི་སེམས་ཅན་ང་རྒྱལ་གྱི་དབང་དུ་གྱུར་པ་ཡིན་ཏེ། འདོད་
ཆེན་པོ་དེ་ལ་མི་འོང་ངོ༌། །གཞིའི་ཡན་ལག་ཅི་ཞེ་ན། མདོ་སྡེ་སྤོང་བའོ། །དེ་བས་ན། མདོ་སྡེ་སྤོང་བ་ནི། འཇིགས་སུ་རུང་བ་ཡིན་ཏེ། དེས་འཇིགས་པར་གྱིས་ཤིག །དེ་ཡི་ཕྱིར་
ན་མཁས་པ་བརྟན་པོ་རྣམས། །ལམ་པོ་ཆེ་ན་འདུ་བྱེད་ཡོད་པས་འཇིགས། །བྱས་པ་རྣམས་ནི་ལམ་ཆེན་འཇིགས་པ་མེད། །ང་རྒྱལ་དབང་གིས་མི་བཟད་འགྲོ་བར་འགྱུར། །དེས་
ན་བློ་ངན་རྣམས་ཀྱིས་དེ་མི་ཐོབ། །སྤྲེའུ་རྣམས་ཟླ་བ་སྙབ་པར་བྱེད་པ་བཞིན། །མི་ཡི་དབང་པོ་ལམ་ཆེན་ཞུགས་པ་ལྟར། །མཁས་པ་བརྟན་པོ་རྣམས་ཀྱིས་ཐོབ་པར་འགྱུར། །གང་
གིས་བྱས་པ་མི་མཐོང་ཞེ་ན། འདོད་ཆེན་པ་སྡིག་ཅན་གྱིས་བྱས་པ་མི་མཐོང་སྟེ། དེས་འཁོར་བའི་མཐའི་བར་གྱི་བྱས་པ་མི་མཐོང་ངོ༌། །ངས་དེའི་དོན་མདོར་བསྡུས་ཏེ་བསྟན་གྱི།
མཆོག་ཏུ་འཇིགས་སུ་རུང་བ་འཇིགས་པར་གྱིས་ཤིག། གང་གི་ཚེ་སེམས་ཅན་ཐམས་ཅད་སེམས་རྩེ་གཅིག་ཏུ་མཐུན་པར་གྱུར་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་འཚང་རྒྱ་བར་འགྱུར་སྲིད་ན། དེའི་ཚེ་འདོད་ཆེན་པ་སྡིག་ཅན་བྱང་ཆུབ་མཆོག་ཏུ་མངོན་པར་རྫོགས་པར་འཚང་རྒྱའང་སྲིད་པ་ཞིག་ན། དེ་ནི། བྱས་པ་མི་མཐོང་བ་ཡིན་ཏེ།
དཔའ་བོ་ཁྱོད་ཀྱིས་དེ་ལྟར་ཤེས་པར་གྱིས་ཤིག །སུའི་བྱས་པ་ཆུད་མི་ཟ་ཞེ་ན། དེ་བཞིན་གཤེགས་པའི་བྱས་པ་ཆུད་མི་ཟའོ། །གང་གི་ཚེ་འཁོར་བ་ན་གནས་པའི་སེམས་ཅན་ཐམས་
ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེའི་ཚེ་དེ་བཞིན་གཤེགས་པའི་བྱས་པ་ཆུད་ཟ་བར་འགྱུར་ཏེ། དེའི་ཚེ་གཏན་དུ་ཡོངས་སུ་མྱ་ངན་
ལས་འདས་པ་ཡོངས་སུ་མྱ་ངན་ལས་འདས་ནས་མར་མེ་དང་ཤིང་ཟད་པའི་མེ་བཞིན་དུ་སངས་རྒྱས་མི་རྟག་པར་འགྱུར་རོ། །དེ་བཞིན་དུ་འདོད་ཆེན་པོའི་སྡིག་པའི་ལས་ཀྱང་སྨད་པ་དང༌།
བཤུང་བ་ཡིན་ནོ། །བྱང་ཆུབ་ཀྱི་རྒྱུའི་བསོད་ནམས་གང་ཡིན་པ་དེ་གལ་ཏེ་བྱང་ཆུབ་སེམས་དཔའ་སྤོང་བར་བྱེད་ན། དེའང་ཐེག་པ་ཆེན་པོ་ལ་སྨོད་པ་དང༌། བཤུང་བ་ཞེས་བྱའོ། །དེ་སྟེ་
མི་སྤོང་ན་ནི། དེ་ལྟ་ན། རྫོགས་པའི་སངས་རྒྱས་ཞེས་བྱ་བའི་མིང་ཐོགས་པར་འགྱུར་ཏེ། དེ་ནི། སངས་རྒྱས་རྣམས་ཀྱི་ཆོས་ཉིད་ཡིན་ནོ། །འོ་མ་དང་ནི་སྡིག་པའི་ལས། །མོད་ལ་ལྡང་བར་མི་
༄༅། །འགྱུར་ཏེ། །མེ་ནི་ཐལ་བས་གཡོགས་པ་ལ། །བྱིས་པ་སོང་ན་འཚིག་པ་བཞིན། །འདོད་ཆེན་པ་ལོང་བ་གཅིག་པུ་དགྲ་བཅོམ་པ་ཡིན་པར་འདོད་པ་ནི། ལམ་མི་
ཟད་པ་ཆེན་པོར་འགྲོ་འདོད་དོ། །བྱམས་པ་དང་ལྡན་པའི་དགྲ་བཅོམ་པ་ཡིན་པར་འདོད་ལ་ཤིན་ཏུ་རྒྱས་པ་སུན་དབྱུང་བར་འདོད་དེ། དགྲ་བཅོམ་པ་ཡིན་པར་འདོད་ཅིང་ཉན་ཐོས་ཀྱི་
ཐེག་པ་སུན་ཕྱུང་ནས་ང་ནི། བྱང་ཆུབ་སེམས་དཔའ་སྟེ། ཤིན་ཏུ་རྒྱས་པ་སྟོན་པ་ཡིན་ནོ། །སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོའི་ཡོན་ཏན་རྣམས་ཡོད་དོ། །
སངས་རྒྱས་ཡོད་དོ། །ཞེས་ཟེར་ཞིང་སངས་རྒྱས་སུ་ལུང་སྟོན་པར་བྱེད་དེ། ང་དང་ཁྱེད་ཀྱིས་ཉོན་མོངས་པའི་རྣམ་པ་ཆུའི་བུམ་པ་བཞིན་དུ་གཞོམ་པར་བྱའོ། །ཐེ་ཚོམ་མེད་པར་བྱང་
ཆུབ་བསྒོམ་པར་བྱ་སྟེ། མདོ་སྡེའི་མན་ངག་ནི། དེ་ལྟ་བུ་ཡིན་ནོ། །ཞེས་ཟེར་རོ། །དཔེར་ན། རྒྱལ་པོའི་ཕོ་ཉ་གཙང་ཞིང་སྙིང་ཉེ་ལ་སྨྲ་མཁས་ཤིང་གཟི་བྱིན་ཆེ་བ། དགྲའི་ནང་དུ་རང་གི་
སྲོག་དང་བསྡོས་ཏེ་རྒྱལ་པོ་ལ་ཚིག་རྫོགས་པར་སྨྲ་བ་དེ་བཞིན་དུ་ཤེས་རབ་ཅན་ཤིན་ཏུ་རྒྱས་པ་གཅེས་པར་འཛིན་པ་ནི། བྱིས་པ་རྣམས་ཀྱི་ནང་དུ་རང་གི་སྲོག་དང་བསྡོས་ནས་
སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་པས་སངས་རྒྱས་སུ་ལུང་སྟོན་པར་བྱེད་དོ། །དགོན་པ་པ། མདོ་སྡེ་སྦོང་བ། བྱིས་པ་བླུན་པོ་དགྲ་བཅོམ་པ་ཡིན་
པར་འདོད་པ་གང་ཡིན་པ་དེ་ལ་དགྲ་བཅོམ་པ་དང་འདྲ་བར་ལྟ་ཞིང་སེམས་ཅན་ཆེན་པོ་དང་འདྲ་བར་ལྟ་སྟེ། འདོད་ཆེན་པ་དགེ་སློང་སྡིག་ཅན་དེ་དགོན་པ་ན་གནས་ཤིང་བདག་ཉིད་
དགྲ་བཅོམ་པ་དང་འདྲ་བར་རྩི་བར་བྱེད་དེ། དགོན་པ་ན་གནས་པའི་དགེ་སློང་རྣམས་གཞན་གྱིས་བོས་པ་མི་བཟོད་ལ་རྐྱེན་བཞི་ལས་ཤིན་ཏུ་རྒྱས་པ་ནི། བདུད་ཀྱིས་སྨྲས་པ་
ཡིན་ནོ༑ ༑བཅོམ་ལྡན་འདས་ནི། མི་རྟག་གོ། ཆོས་དང༌། དགེ་འདུན་ཡང་མེད་པར་འགྱུར་རོ། །དམ་པའི་ཆོས་མེད་པར་འགྱུར་བའི་ལྟས་དེ་ལྟ་བུ་དག་ཀྱང་སྣང་ངོ༌། །ཞེས་བྱ་བ་འདི་
ཐེག་པ་ཆེན་པོ་ལས་ལེགས་པར་བཤད་དོ། །ཞེས་ཟེར་ཏེ། དེ་སྐད་དུ་དམ་པའི་ཆོས་མ་ཡིན་པར་སྨྲ་བ་ནི། འོ་མ་བཞིན་དུ་མོད་ལ་ལྡང་བར་མི་འགྱུར་ཏེ། མེ་ཐལ་བས་བཀབ་པ་
ལ་བབ་པ་བཞིན་དུ་བྱིས་པ་འདོད་ཆེན་པ་རྣམས་ཕྱིས་འཚིག་པར་འགྱུར་རོ། །དེ་ལྟར་ན། སངས་རྒྱས་ཀྱི་བསྟན་པ་ཐེག་པ་ཆེན་པོ་ཆ་ཕྲ་བ་ཡིན་ཏེ། མདོ་སྡེ་འདི་ནི། ཀེ་ཏ་ཀའི་
འབྲས་བུ་དང་འདྲའོ། །རིགས་ཀྱི་བུ། དཔེར་ན། མེ་ཏོག་པདྨ་ཁ་ཟུམ་པ་ཉི་མའི་འོད་ཀྱིས་ཕོག་ན། འབྱེ་བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་
ཐོས་མ་ཐག་ཏུ་བྱང་ཆུབ་ཀྱི་སེམས་མིང་ཙམ་བསྐྱེད་པའང་མི་དགོས་པར་འཛིན་པའི་སེམས་ཅན་ཐམས་ཅད་ཀྱང་དབང་མེད་པར་བྱང་ཆུབ་ཀྱི་རྒྱུ་སྤུ་དྲུང་ཐམས་ཅད་དུ་འཇུག་པར་འགྱུར་
༄༅། །རོ༑ ༑འདོད་ཆེན་པ་རྣམས་ལའང་དེ་བཞིན་གཤེགས་པའི་སྙིང་པོ་ཡོད་མོད་ཀྱི། འོན་ཀྱང་གཡོགས་མ་བཞིན་དུ་སྟུག་པོར་འདུག་གོ། །དཔེར་ན། དར་གྱི་སྲིན་བུ།
རང་ཉིད་ཀྱི་ཀུན་ནས་དཀྲིས་ཏེ་སྒོ་མ་གཏོད་པར་ཕྱིར་འབྱུང་མི་ནུས་པ་དེ་བཞིན་དུ་དེ་བཞིན་གཤེགས་པའི་སྙིང་པོའང་དེའི་ལས་ཀྱི་ཉེས་པས་འདོད་ཆེན་པའི་ཁོང་ནས་དབྱུང་བར་མི་
ནུས་སོ༑ ༑དེ་བས་ན། འཁོར་བའི་མཐའ་ལས་བྱང་ཆུབ་ཀྱི་རྒྱུ་མི་འཐོབ་བོ། །རིགས་ཀྱི་བུ། དཔེར་ན། པྡྨ་དང༌། ཨུཏྤ་ལ་དང༌། ཀུ་མུ་ད་དང༌། པདྨ་དཀར་པོ་རྣམས་འདམ་གྱི་ནང་ནས་
སྐྱེས་ཀྱང་འདམ་གྱིས་མི་གོས་པ་དེ་བཞིན་དུ་མདོ་སྡེ་ཆེན་པོ་འདི་ལའང་ཐེག་པ་ཆེན་པོ་རྣམས་ཉོན་མོངས་པ་དང་བཅས་པ་ཡིན་དུ་ཟིན་ཀྱང་ཉོན་མོངས་པ་མེད་པའི་གྲངས་སུ་གཏོགས་
སོ༑ ༑ཅིའི་ཕྱིར་མི་གོས་ཤེ་ན། དེ་བཞིན་གཤེགས་པའི་སྙིང་པོའི་བྱིན་གྱི་རླབས་ཀྱིས་མི་ཤེས་སོ། །དཔེར་ན། སེར་བུ་བསིལ་བ་ལངས་པའི་ཚེ་དབང་མེད་པར་སེམས་ཅན་ཐམས་
ཅད་ཀྱི་སྤུ་དྲུང་ཐམས་ཅད་དུ་ཞུགས་ནས་ཚ་བ་ཐམས་ཅད་ཞི་བར་བྱེད་པ་དེ་བཞིན་དུ་མདོ་སྡེ་ཆེན་པོ་འདིའང་སེམས་ཅན་ཐམས་ཅད་ཀྱི་སྤུ་དྲུང་ཐམས་ཅད་དུ་ཞུགས་ནས་དབང་མེད་
པར་བྱང་ཆུབ་ཀྱི་རྒྱུ་ལ་འཇོག་པར་བྱེད་དེ། འདོད་ཆེན་པ་སེམས་བསྐྱེད་པ་དགོས་པར་མི་འཛིན་པ་ནི། མ་གཏོགས་སོ། །རིགས་ཀྱི་བུ། དཔེར་ན། སྨན་པ་ཚེའི་རིག་བྱེད་ཡན་ལག་
བརྒྱད་ལ་མཁས་པ་ནི། ནད་པ་ཐམས་ཅད་གསོ་བར་བྱེད་མོད་ཀྱི། གསོར་མི་རུང་བ་ནི། གསོ་བར་མི་ནུས་པ་དེ་བཞིན་དུ་མདོ་སྡེ་དང༌། ཏིང་ངེ་འཛིན་ཐམས་ཅད་ཀྱང་འདོད་ཆགས་དང༌།
ཞེ་སྡང་དང༌། གཏི་མུག་གི་ནད་ཀྱིས་ཐེབས་པ་ཐམས་ཅད་གསོ་བར་བྱེད་ལ། ཉོན་མོངས་པའི་ཟུག་རྔུ་ཐམས་ཅད་ཀྱང་སེལ་བར་བྱེད་མོད་ཀྱི། ཕམ་པ་བྱེད་པ་རྣམས་དང༌། མཚམས་
མེད་པ་བྱེད་པ་རྣམས་ནི། གསོ་བར་མི་ནུས་སོ། །དཔེར་ན། སྨན་པ་ཚེའི་རིག་བྱེད་ཡན་ལག་བརྒྱད་ཀྱི་རྒྱུ་ཕྱི་མ་ཤེས་པ་ནི། སེམས་ཅན་ཐམས་ཅད་ཀྱི་ནད་གསོ་བར་བྱེད་མོད་ཀྱི། དེས་
ཀྱང་འཆི་བའི་དུས་ལ་བབ་པའི་ནད་གསོ་མི་ནུས་པ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའང་སེམས་ཅན་ཐམས་ཅད་ཀྱི་ཉོན་མོངས་པའི་ནད་ཐམས་
ཅད་བསལ་ནས་སེམས་ཅན་རྣམས་བྱང་ཆུབ་ཀྱི་རྒྱུ་ལ་འགོད་པར་བྱེད་མོད་ཀྱི། འཆི་བའི་དུས་ལ་བབ་པ་ལྟ་བུའི་འདོད་ཆེན་[?] པོ་ནི། མ་གཏོགས་སོ། །དཔེར་ན། དམུས་ལོང་གིས་
ཉི་ཟླའི་འོད་ཀྱང་མི་ཤེས་པ་གསལ་བར་ལྟ་ག་ལ་མཐོང་སྟེ། སྨན་པ་ཆེན་པོས་ཀྱང་མིག་རྟུལ་བ་རྣམས་ཀྱིས་མིག་བཅོས་ནས་མཐོང་བར་ཟད་དེ། དམུས་ལོང་ནི། མ་གཏོགས་སོ། །དེ་
བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའང་ལོང་བ་ལྟ་[?] བུའི་ཉན་ཐོས་དང༌། རང་སངས་རྒྱས་ཐམས་ཅད་ཀྱི་མིག་བཅོས་ནས་མྱུར་བ་ཁོ་ནས་ཐེག་པ་ཆེན་པའི་མིག་
༄༅། །མཐོང་བར་བྱེད་ལ། ཕམ་པ་བྱེད་པ་རྣམས་དང༌། མཚམས་མེད་པ་བྱད་པ་སེམས་བསྐྱེད་མི་དགོས་པར་འཛིན་པ་རྣམས་ཀྱང་བྱང་ཆུབ་ལ་འགོད་པར་བྱེད་མོད་
ཀྱི༑ ཤིན་ཏུ་དམུས་ལོང་དུ་འདུག་པ་འདོད་ཆེན་པ་ནི། མ་གཏོགས་སོ། །རིགས་ཀྱི་བུ། དཔེར་ན། སྨན་པ་ཆེན་པོ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་ནི། སྨན་སྣར་
བླུགས་པ་དང༌། ཁོང་དུ་བཏུང་བ་དང༌། ལུས་ལ་བསྐུ་བ་དང༌། དུད་པས་བདུག་པའི་ལས་རྣམས་ཀྱིས་སེམས་ཅན་ཐམས་ཅད་ཀྱི་ནད་སེལ་བར་བྱེད་དོ། །མགོན་མེད་པ་རྣམས་དང༌།
བདག་ཅག་ལ་སྨན་མི་དགོས་སོ། །སྙམ་སྟེ། སེམས་མི་བསྐྱེད་པ་རྣམས་ཀྱང་ཁྱིམ་དག་གི་ནང་ངམ། རྩྭ་དག་གི་ཁྲོད་དུ་བཞག་སྟེ། སྔགས་དང༌། སྨན་དང༌། སྨན་གནོད་སེལ་གྱི་
མཐུས་དུག་རྣམས་དང༌། ནད་རྣམས་སེལ་བར་བྱེད་ལ། བུད་མེད་སྦྲུམ་མ་བུ་བཙའ་བར་འདོད་ན་བཙར་མི་བཏུབ་པ་རྣམས་ཀྱང་སྨན་གནོད་སེལ་གྱི་མཐུས་བདེ་བར་བཙའ་བར་
བྱེད་ལ། བྱིས་པའང་ནད་མེད་པར་བྱེད་པ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་གླེགས་བམ་དུ་བྱས་པ་སེམས་ཅན་ཐམས་ཅད་ཀྱི་ཁྱིམ་ན་འཚང་
པ་དེ་དག་ཀྱང་ཐེག་པ་ཆེན་པོའི་མཐུས་བདེ་བར་བྱེད་ལ་མདོ་ཆེན་པོ་འདིས་བྱང་ཆུབ་སེམས་དཔའ་སེམས་དཔའ་ཆེན་པོར་ཡང་འགྱུར་རོ། །ཕམ་པ་བྱེད་པ་རྣམས་དང༌། མཚམས་
མེད་པ་བྱེད་པ་སེམས་བསྐྱེད་མི་དགོས་པར་འཛིན་པ་རྣམས་ཀྱང་བྱང་ཆུབ་ལ་འགོད་པར་བྱེད་དེ། འདོད་ཆེན་པ་ཤི་བ་དང་འདྲ་བ་ནི། མ་གཏོགས་སོ། །གསོལ་པ། ཕམ་པ་བགྱིད་པ་རྣམས་
དང༌། མཚམས་མ་མཆིས་པ་མི་བཟད་པ་ཏ་ལའི་མགོ་བཅད་པ་དང་འདྲ་བ་དེ་དག་བདག་ཅག་གིས་བྱང་ཆུབ་ཏུ་སེམས་བསྐྱེད་མི་དགོས་སོ། །སྙམ་དུ་འཛིན་ན། སེམས་མ་བསྐྱེད་པར་དེ་
དག་ལ་བྱང་ཆུབ་ཀྱི་རྒྱུ་ཇི་ལྟར་སྐྱེ་བར་འགྱུར་ལགས། བཀའ་སྩལ་པ། རིགས་ཀྱི་བུ། དེ་དག་ནི། རྨི་ལམ་དུའང་རུང༌། ཤི་བའི་འོག་ཏུའང་རུང་སྟེ། སེམས་ཅན་དམྱལ་བ་རྣམས་
སུ་འཚེད་པ་ན། འདི་སྙམ་དུ་སེམས་ཏེ། བདག་ཅག་གིས་ནི། མ་ལེགས་པ་བྱས་སོ། །གལ་ཏེ་འདི་ནས་ཐར་པར་འགྱུར་བ་ཞིག་ཡོད་ན་ནི། ཤིན་ཏུ་འཇིགས་པ་འདི་མཐོང་བས་
བདག་ཅག་གང་དང་གང་དུ་སྐྱེས་པ་དེ་དང་དེར་བྱང་ཆུབ་ཏུ་སེམས་བསྐྱེད་པར་བྱའོ། །སྙམ་དུ་སེམས་ཏེ། དམ་པའི་ཆོས་དབྱུང་བར་སེམས་པ་ནི། འབྲས་བུ་ཆེ་བ་ཡིན་ནོ། །དཔེར་ན།
བྱིས་པ་ལ་ལ་ཤེད་བྱེ་ནས་བདག་ཉིད་ཤེས་པར་བྱེད་ཅིང་འདི་ལྟར་བདག་མའི་མངལ་ན་འདུག་པའི་ཚེ་སྨན་པ་འདིས་སྔགས་དང་སྨན་གནོད་སེལ་གྱི་མཐུས་བདག་གི་མ་བདེ་བར་བྱས་
པས་ན་སྲོག་འདི་ནི། ཁྱོད་ཀྱི་དྲིན་ནོ། །ཀྱེ་མ་བདག་གི་མ་གང་གིས་བདག་ཟླ་བ་བཅུ་གཉིས་ཀྱི་བར་དུ་མའི་མངལ་ན་འཆང་ཞིང་ཤིན་ཏུ་ཉོན་མོངས་པར་གྱུར་ནས་དེའི་འོག་ཏུ་དེས་བདག་
༄༅། །ཤིན་ཏུ་ཚེགས་ཆེན་པོས་བཙས་པ་དང༌། བདག་མངལ་གྱི་དྲི་མ་ལྗན་ལྗིན་དང༌། ཁྲག་གིས་གཡོགས་པ་བཀྲུས་པ་དང༌། བདག་གི་མཆུ་ཁ་ཆུ་ནལ་ནལ་པོར་གཤེར་
བར་འདུག་པ་ལ་འོ་བྱས་པ་དང༌། ཐབས་ཅི་ཡོད་པས་གསོས་པ་ནི། མཆོག་ཏུ་དཀའ་བ་བྱེད་བྱེད་པ་ཡིན་ཏེ། ད་ནི། ཁྱོད་ཀྱི་བཀའ་དྲིན་ལ་བདག་སྐྱེས་པས་བླ་མའི་མཆོད་པ་བྱ་དགོས་
ཏེ༑ དེ་དང་འཚམ་པར་བྱའོ། །ཞེས་ཟེར་བ་དེ་བཞིན་དུ་ཕམ་པ་བྱེད་བྱེད་པ་རྣམས་དང༌། མཚམས་མེད་པ་བྱེད་བྱེད་པ་རྣམས་འཆི་བའི་ཚེ་དྲན་པ་མ་བརྗེད་པའི་འབྲས་བུས་ལྷའི་
འཇིག་རྟེན་དུ་སྐྱེ་བར་འགྱུར་ཏེ། དེ་ནས་ཕམ་པ་བྱེད་བྱེད་པ་དང༌། མཚམས་མེད་པ་བྱེད་བྱེད་པའང་དྲན་པ་མ་བརྗེད་པའི་འབྲས་བུས་སེམས་ཅན་དམྱལ་བའམ། མིའི་འཇིག་རྟེན་
དུ་བྱང་ཆུབ་ཀྱི་རྒྱུར་འགྱུར་ཏེ། འདོད་ཆེན་པ་ནི། མ་གཏོགས་སོ། །དཔེར་ན། སྨན་པའམ། སྨན་པའི་བུ་རྒྱུད་ཕྱི་མ་ཤེས་པས་སྦྲུལ་གདུག་པ་དང༌། མི་གདུག་པ་དང༌། ཀླུ་བྱ་གག་
ཅེས་བྱ་བ་ལ་སོགས་པ་སྨན་གནོད་སེལ་དང༌། རིག་སྔགས་ཀྱི་མཐུས་རང་གི་ལམ་ལ་དབང་བྱ་བ་བཞིན་དུ་བཏུལ་ནས་དུག་མེད་པར་བྱེད་དེ། ཀླུ་ཤིན་ཏུ་དྲག་པོ་ནི། མ་གཏོགས་
སོ༑ ༑དེ་བཞིན་དུ་མདོ་སྡེ་ཆེན་པོ་སྨན་གནོད་སེལ་དང་འདྲ་བ་འདིས་ཀྱང་ཕམ་པ་བྱེད་པ་རྣམས་དང༌། མཚམས་མེད་པའི་ལས་བྱེད་པའི་སྡིག་ཅན་གྱི་ཀླུ་མཆོག་ཏུ་དྲག་པ་སེམས་བསྐྱེད་
མི་དགོས་པར་འཛིན་པ་རྣམས་བཏུལ་ནས་བྱང་ཆུབ་ཀྱི་གནས་ཆེན་པོར་འགོད་པར་བྱེད་དེ། དེ་བས་ན། སེམས་ཅན་ཐམས་ཅད་ཀྱི་བདེ་བ་བསྐྱེད་པའི་ཕྱིར་ཡོངས་སུ་མྱ་ངན་ལས་འདས་
པ་ཆེན་པོའི་མིང་སྨན་གནོད་སེལ་ཆེན་པོ་ཡོན་ཏན་གྱི་ཚུལ་ཅན་ཞེས་བྱ་སྟེ། འདོད་ཆེན་པའི་ཀླུ་དྲག་པོ་མི་བཟད་པ་ནི། མ་གཏོགས་སོ། །དཔེར་ན། སྨན་པས་དུག་སྨན་ཟུག་རྔུ་འབྱིན་
པའི་སྨན་གྱི་རྒྱལ་པོ་བསྒྲུབས་ཏེ། དེས་རྔ་བོ་ཆེ་ལ་བསྐུས་ནས་ཕོ་བྲང་འཁོར་དུ་རྔ་དེ་བརྡུངས་ན་སྒྲ་དེའི་མཐུས་སྐྱེ་བོ་ཇི་སྙེད་ཀྱིས་སྒྲ་ཐོས་པ་དེ་དག་གི་ཟུག་རྔུ་ཐམས་ཅད་འབྱུང་བར་འགྱུར་
ཏེ༑ དེ་ཉིད་ན་འཆི་བའི་དུས་ལ་ཉེ་བ་རྣམས་ཀྱིས་ནི། འབྱུང་བར་མི་འགྱུར་རོ། །དེ་ཅིའི་ཕྱིར་ཞེ་ན། དེ་དག་གི་ལས་ཀྱི་རྣམ་པར་སྨིན་པ་མི་བཟད་པ་ཡོད་པའི་ཕྱིར་རོ། །དེ་བཞིན་དུ་ཡོངས་
སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་སྒྲ་གང་དུ་ཐོས་ཀྱང་རུང་སྟེ། འདུ་བྱེད་ཀྱི་ཕོ་བྲང་འཁོར་ན་གནས་པའི་སེམས་ཅན་ཐམས་ཅད་ཀྱི་འདོད་ཆགས་དང༌། ཞེ་སྡང་དང༌། གཏི་
མུག་གི་ཟུག་རྔུ་རྣམས་འབྱིན་པར་བྱེད་ལ་འདུ་བྱེད་པ་མེད་པར་ཡང་བྱེད་དོ། །ཕོ་བྲང་འཁོར་ན་གནས་པ་དེ་དག་གི་ཡིད་ལ་འདི་སྙམ་དུ་ཟུག་རྔུ་འབྱུང་བར་མི་འགྱུར་རོ་སྙམ་དུ་སེམས་
མོད་ཀྱི། དེ་དག་གི་ཡིད་ལ་ཟུག་རྔུ་རྣམས་འབྱུང་བར་འགྱུར་རོ་སྙམ་དུ་ཇི་ག་སེམས་སམ། དེ་བཞིན་དུ་གཅིག་ཤོས་རྣམས་ལའང་འདོད་ཆགས་དང༌། ཞེ་སྡང་དང༌། གཏི་མུག་གི་ཟུག་
༄༅། །རྔུ་རྣམས་འབྱུང་བར་འགྱུར་རོ་སྙམ་པའི་སེམས་མེད་དེ། དེ་དག་གི་སེམས་ནི། འདོད་པ་རྣམས་ལ་གནས་སོ། །དེ་བཞིན་དུ་ཕམ་པ་བྱེད་པ་རྣམས་དང༌། མཚམས་
མེད་པའི་ལས་བྱེད་པ་སེམས་བསྐྱེད་མི་དགོས་པར་འཛིན་པ་རྣམས་ཀྱིའང་བྱང་ཆུབ་ཀྱི་རྒྱུ་སྐྱེད་པར་བྱེད་དེ། འདོད་ཆེན་པ་འཆི་བའི་དུས་ལ་བབ་པ་དང་འདྲ་བ་ནི། མ་གཏོགས་སོ། །
རིགས་ཀྱི་བུ། དཔེར་ན། མཚན་མོ་མུན་པའི་ནང་ན་ཛམྦུའི་གླིང་པའི་སེམས་ཅན་རྣམས་ཞིང་བླས་ལ་སོགས་པའི་ལས་བྱ་བ་ལ་འཇུག་པ་མེད་དེ། ཉི་མ་འཆར་བ་ལ་སྡོད་ཅིང་འཁོད་
དོ༑ ༑དེ་ནས་ཉི་མ་ཤར་བ་དང་ཞིང་བླས་ལ་སོགས་པ་བྱེད་པ་ལ་འཇུག་གོ། །དེ་བཞིན་དུ་ཐེག་པ་ཆེན་པོ་པ་རྣམས་ཀྱིས་ཀྱང་མདོ་སྡེ་དང༌། ཏིང་ངེ་འཛིན་ཐམས་ཅད་ཐོས་ཤིང་བསྒོམས་ནས་
ཞིང་བླས་བྱེད་འདོད་པའི་སེམས་ཅན་མཚན་མོ་སྡོད་པ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་ཉི་མ་འཆར་བ་ལ་སྡོད་དོ། །དེ་ནས་མདོ་ཆེན་པོ་འདི་ལས་
དགོངས་པའི་ཚིག་ཐོས་ནས་དམ་པའི་ཆོས་ཀྱི་གནས་སུ་ལས་རྩོམ་པར་བྱེད་དོ། །དེ་ནས་ཞིང་བླས་ཇི་ལྟར་བྱས་པ་ལ་ཆར་ཆེན་པོ་བབ་པས་ལོ་ཐོག་སྐྱེ་བར་འགྱུར་ལ་ལོའང་ལེགས་
བར་འགྱུར་རོ། །དེ་བཞིན་དུ་དམ་པའི་ཆོས་ཀྱི་ཞིང་བླས་བྱས་པ་ལ་དེ་བཞིན་གཤེགས་པའི་སྙིང་པོའི་མདོ་ཆེན་པོའི་སྤྲིན་ཆེན་པོ་ལས་ཐོས་པའི་ཆོས་ཀྱི་ཆར་བབ་ན། རིམས་ནད་རྣམ་
པ་བརྒྱད་ལས་རྣམ་པར་གྲོལ་བ་དང༌། བདེ་བ་དང༌། ལོ་ལེགས་པ་དང༌། ཡིད་དུ་འོང་བར་བྱེད་པའི་ལུང་བསྟན་པ་ཆེན་པོའི་ལོ་ཐོག་སྐྱེ་བར་འགྱུར་ཏེ། དམ་པའི་ཆོས་པདྨ་དཀར་པོའི་མདོ་
ཆེན་པོ་ལས་ཉན་ཐོས་ཆེན་པོ་བརྒྱད་ཅུ་དཔྱིད་ཟླ་ར་བ་ལ་[?]རྣམས་མཐར་ཐུག་པ་བཞིན་དུ་ལུང་བསྟན་པ་ཆེན་པོའི་ལོ་ཐོག་སྐྱེ་བའི་མཐར་ཐུག་པ་དང་འདྲ་བར་འགྱུར་ཏེ། འདོད་ཆེན་པ་
ནི༑ མ་གཏོགས་སོ།། །།འཕགས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ། བམ་པོ་བཅུ་གཉིས་པ། རིགས་ཀྱི་བུ། དཔེར་ན། སྨན་པ་ཆེན་པོས་འབྱུང་
པོས་ཟིན་པའམ། སྦྲུལ་གྱིས་ཟིན་པའི་དོན་དུ་སྨན་གྱི་རི་ལུའམ། སྨན་གནོད་སེལ་རྒྱང་གྲགས་མང་པོ་ཞིག་ཏུ་བསྐུར་ཏ། འདི་སྐད་དུ་སྨན་འདི་མྱུར་དུ་ཁྱེར་ནས་ཀྱང་དེའི་དཔྱད་
གྱིས་ཤིག་དང༌། དེ་ལྟར་བྱས་ན། དེའི་ལྷ་དང༌། ཀླུ་དང༌། གནོད་སྦྱིན་དང༌། སྲིན་པོའི་གདོན་རྣམས་མེད་པར་འགྱུར་རོ། །དེ་སྟེ་མ་ཁྱེར་ན། བདག་ཉིད་འགྲོ་བར་བྱའོ། དེར་བར་མ་དོར་ཆུད་
ཟོས་ན་མི་རུང་ངོ༌། །ཞེས་ཀྱང་ཟེར་ལ། དེ་ནས་སྨན་པའམ། སྨན་པའི་འཕྲིན་པ་དེ་ཐག་རིང་པོ་ཞིག་ནས་མཐོང་ནས་སྔགས་དེའི་གཟི་བྱིན་དང༌། མཐུས་གནོད་པ་ཐམས་ཅད་ཞི་བར་
འགྱུར་ཏེ། དེའང་བདེ་བར་འགྱུར་བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་མཐུ་ཆེ་བ་འདི་ཡི་གེར་བྲིས་པ་ཞིག་ག་ཞིག་གི་གནས་ཞིག་ན་ཡོད་དོ། །ཞེས་དགེ་
༄༅། །སློང་ངམ། དགེ་སློང་མའམ། འདི་ལས་ཕྱི་རོལ་པ་གཞན་གྱིས་ཤེས་སམ། གཞན་ལས་ཐོས་ན་དེ་དག་གི་བྱང་ཆུབ་ཀྱི་རྒྱུར་འགྱུར་ལ། ཕམ་པ་བྱེད་པ་
དང༌། མཚམས་མེད་པའི་ལས་བྱེད་པའི་འབྱུང་པོ་དང༌། ཤ་ཟའི་གདོན་གྱིས་ཟིན་པ་ཇི་སྙེད་ཀྱིས་ཐོས་ཀྱང་རུང་སྟེ། དེ་དག་ཐམས་ཅད་ཀྱང་སྨན་པ་ཆེན་པོ་མཐོང་བ་བཞིན་དུ་གནོད་
པ་དང་བྲལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྟག་པའི་མདོ་སྡེ་ཆེན་པོའི་མཐུའི་རྒྱུས་དེ་ལྟར་འགྱུར་ཏེ། དེ་ལྟ་ན།
གང་དག་གིས་མདོ་སྡེ་ཆེན་པོ་གླེགས་བམ་པ་ལ་བྲིས་པ་བཀླགས་སམ། ཐོས་སམ། བྲིས་ཀྱང་རུང༌། དེ་དག་ལྟ་བྱང་ཆུབ་སེམས་དཔའ་སེམས་དཔའ་ཆེན་པོར་ཅི་སྟེ་མི་འགྱུར། འདོད་
ཆེན་པ་ནི། མ་གཏོགས་སོ། །དཔེར་ན། འོན་པས་སྒྲ་མི་ཐོས་པ་དེ་བཞིན་དུ་འདོད་ཆེན་པས་ཀྱང་མདོ་སྡེ་འདི་ཐོས་པར་མི་ནུས་ཏེ། དེ་ལ་རྒྱུ་མེད་པའི་ཕྱིར་རོ། །རིགས་ཀྱི་བུ། གཞན་
ཡང་དཔེར་ན། སྨན་པ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་ཞིག་གིས་རྒྱལ་པོ་ཆེན་པོ་མཐོང་ནས་རྒྱལ་པོ་ཆེན་པོ་ཁྱོད་ལ་གྲོངས་ལ་ཐུག་པ་ཙམ་གྱི་སྙུན་གྱིས་
ཐེབས་པར་འགྱུར་རོ། །ཞེས་ལུང་བསྟན་པ་དང༌། རྒྱལ་པོ་དེས་དེ་ལ་བཀའ་སྩལ་པ། ཁྱོད་ཀྱིས་མ་མཐོང་བར་ནད་ཚབས་པོ་ཆེ་འབྱུང་བར་ཇི་ལྟར་ཤེས། དེ་ནས་སྨན་པ་དེས་རྒྱལ་
པོ་ལ་གསོལ་པ། གལ་ཏེ་ཐུགས་མི་ཆེས་ན། སྨན་གསོལ་ཅིག་དང་མངོན་ནོ། །ཞེས་བྱས་ན། འོན་ཀྱང་རྒྱལ་པོ་དེ་སྨན་འཐུང་ངུའང་མ་བཏུབ་བོ། །དེ་ནས་སྨན་པ་ཆེན་པོ་དེས་རིག་པའི་
སྟོབས་ཀྱིས་གཞང་ཀར་གཞང་འབྲུམ་ཐོན་པར་བྱས་སོ། །དེ་ནས་རྒྱལ་པོ་དེས་གཞང་འབྲུམ་དེ་དག་མཐོང་ནས་སྐྲག་ཅིང་མི་དགའ་སྟེ་ཀྱི་བུང་ཞེས་བྱས་ནས་སྨན་པའི་ཚིག་བདེན་ནོ་སྙམ་
དུ་སེམས་ཏེ། གཞང་འབྲུམ་ཐོན་པར་ཤེས་ནས་ཀྱེ་མ་སྨན་པ་རིག་པའི་སྟོབས་ངོ་མཚར་ཏོ་སྙམ་སྟེ། སྨན་པ་དེ་ལ་ཕ་མ་ལ་གུས་པར་བྱ་བ་བཞིན་དུ་བཀུར་སྟི་བྱེད་པ་དེ་བཞིན་དུ་ཡོངས་
སུ་མྱ་ངན་ལས་འདས་པ་ཆེན་པོའི་མདོ་སྡེ་ཆེན་པོ་འདི་ནི། སེམས་བསྐྱེད་མི་དགོས་པར་འཛིན་པའི་སེམས་ཅན་ཐམས་ཅད་ལའང་སྨན་པ་ཆེན་པོས་རྒྱལ་པོ་ལ་བྱ་བ་བཞིན་དུ་བདེ་བླག་ཏུ་
བྱང་ཆུབ་ཀྱི་རྒྱུ་ལ་འཇོག་པར་བྱེད་དེ། དེ་དག་ལ་རྨི་ལམ་དུའམ། འཆི་བའི་ཚེའང་རུང་སྟེ། སེམས་ཅན་དེ་དག་གིས་མི་ཤེས་བཞིན་དུ་བྱང་ཆུབ་ཀྱི་རྒྱུ་འཇུག་པར་འགྱུར་རོ། །འདོད་ཆེན་
པ་ནི། །མ་གཏོགས་ཏེ། སྨན་པ་ཆེན་པོས་ཀྱང་འདི་ནི། གསོར་མི་རུང་ངོ་སྙམ་ནས་ལས་མི་བཟད་པ་དང་ལྡན་པའི་འཆི་བར་འགྱུར་བའི་ནད་གསོ་བར་མི་བྱེད་དོ། །འཆི་བར་འགྱུར་བ་
དང་འདྲ་བ་ནི། འདོད་ཆེན་པ་ཡིན་ནོ། །རིགས་ཀྱི་བུ། དཔེར་ན། སྨན་པ་ཚེའི་རིག་བྱེད་ཡན་ལག་བརྒྱད་ཀྱི་རྒྱུད་ཕྱི་མ་ཤེས་པ་ཞིག་གིས་རང་གི་བུ་ཐོག་མར་རྒྱུད་ཀྱི་ཡན་ལག་ཐང་དང༌། ཆུ་
༄༅། །དང༌། རི་ལས་སྐྱེས་པའི་སྨན་རྣམས་སློབ་པར་བྱེད་ཀྱི། ཐོག་མ་ཡན་ལག་སློབ་པ་ཙམ་ན་རྒྱུད་ཕྱི་མ་སློབ་པར་མི་བྱེད་དེ། གང་གི་ཚེ་ཚེའི་རིག་བྱེད་ཡན་
ལག་བརྒྱད་བསླབ་ཟིན་པ་དེའི་ཚེ་ནི། རྒྱུད་ཕྱི་མ་ལས་སྔགས་དང་སྨན་གྲུབ་པའི་ལས་སློབ་པར་བྱེད་པ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཀྱང་ཉིད་ཀྱི་སྲས་དགེ་སློང་དག་ལ་ཐོག་མའི་ཡན་ལག་ཉོན་མོངས་པའི་རྣམ་པ་སྦྱང་བ་དང༌། ལུས་སྙིང་པོ་མེད་པར་སྒོམ་པ་དང༌། ཐང་དང༌། ཆུ་དང༌། རི་ལས་
སྐྱེས་པ་ལྟ་བུ་རྣམ་པ་གསུམ་སྒོམ་པ་སློབ་པར་མཛད་དོ། །དེ་ལ་ཐང་ཞེས་བྱ་བ་ནི། ལུས་ཀྱི་སྡུག་བསྔལ་རྣམ་པ་དུ་མ་རྣམས་སོ། །ཆུ་ཞེས་བྱ་བ་ནི། ལུས་འདི་ཆུའི་ཆུ་བུར་ལྟ་
བུར་མི་རྟག་པའོ། །རི་ཞེས་བྱ་བ་ནི། ཉོན་མོངས་པའི་རྣམ་པ་རྣམས་ལ་བདག་མེད་པ་སྟེ། དེ་བས་ན། དེ་བཞིན་གཤེགས་པ་ནི། ལུས་འདི་ནི། བདག་མེད་པའོ། །ཞེས་སློབ་པར་
མཛད་དོ། །གལ་ཏེ་དགེ་སློང་རྣམས་ཀྱིས་གསུང་རབ་ཡན་ལག་དགུའི་དོན་མ་མཐོང་ན་ནི། ཐེག་པ་ཆེན་པོའི་མཆོག་འདི་སློབ་པར་མི་མཛད་དོ། །ད་ནི། སྨན་པ་ཆེན་པོ་བཞིན་དུ་
དེ་བཞིན་གཤེགས་པའི་གསུང་རབ་ཡན་ལག་དགུ་ལ་དོན་གྱི་བྱ་བ་བྱས་ཟིན་པའི་དགེ་སློང་རྣམས་ལ་དེ་བཞིན་གཤེགས་པའི་སྙིང་པོའི་རྒྱུད་ཕྱི་མ་ལས་དེ་བཞིན་གཤེགས་
པའི་སྙིང་པོ་རྟག་གོ །ཞེས་སྟོན་པར་མཛད་དོ། །དེ་ལྟར་དེ་བཞིན་གཤེགས་པས་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་བསྟན་པ་ཐོས་ན་སེམས་བསྐྱེད་མི་དགོས་པར་
འཛིན་པའི་སེམས་ཅན་རྣམས་ལའང་བྱང་ཆུབ་ཀྱི་རྒྱུར་འགྱུར་ཏེ། འདོད་ཆེན་པ་ནི། མ་གཏོགས་སོ། །རིགས་ཀྱི་བུ། དེ་ལྟར་ན། ཡོངས་སུ་མྱ་ངན་ལས་འདས་པ་ཆེན་པོའི་མདོ་
ཆེན་པོ་འདི་ནི། དེ་ལྟར་བསམ་གྱིས་མི་ཁྱབ་སྟེ། སྨན་ཆེན་པོ་བཞིན་དུ་སྨན་པ་རྣམས་ཀྱི་མཆོག་ཡིན་ཏེ། མདོ་སྡེ་འདི་ནི། མདོ་སྡེའི་རྒྱལ་པོའི་མཆོག་ཡིན་ནོ། །རིགས་ཀྱི་བུ། གཞན་
ཡང་གྲུ་ནི། སེམས་ཅན་རྣམས་བསྒྲལ་བའི་ཕྱིར་ཕ་རོལ་གྱི་འགྲམ་ནས་ཚུ་རོལ་གྱི་འགྲམ་དུ་འོང་ཞིང༌། ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་འགྲོ་བ་དེ་བཞིན་དུ་དེ་བཞིན་
གཤེགས་པ་ཡོངས་སུ་མྱ་ངན་ལས་འདས་པ་ཆེན་པོས་ཡོངས་སུ་མྱ་ངན་ལས་འདས་ནས་གྲུ་ཕ་རོལ་ཏུ་འགྲོ་བ་བཞིན་དུ་སེམས་ཅན་རྣམས་སྒྲོལ་དུ་གཤེགས་ཏེ། གང་དང་གང་དུ་
གདུལ་བར་བྱ་བ་རྣམས་ཡོད་པ་དེ་དང་དེར་རྫོགས་པའི་སངས་རྒྱས་སྟོན་པར་མཛད་དོ། །དེ་བས་ན། ཇི་ལྟར་གྲུ་གང་དང་གང་དུ་སེམས་ཅན་སྒྲོལ་བར་འདོད་པ་དེ་དང་དེར་འགྲོ་བ་དེ་
བཞིན་དུ་དེ་བཞིན་གཤེགས་པའང་དེ་དང་འདྲ་སྟེ། དེ་བས་ན། མཉན་པ་ཆེན་པོ་ཞེས་བྱའོ། །དེ་ནས་དེ་བཞིན་གཤེགས་པ་རྟག་པ་དང༌། བརྟན་པ་ཡིན་ནོ། །གྲུ་ཡོད་ན་མཉན་པས་
༄༅། །སྒྲོལ་བར་བྱེད་ལ། དེ་བཞིན་གཤེགས་པ་རྟག་པར་ཡོད་པ་དང༌། ད་དུང་དུ་སེམས་ཅན་སྒྲོལ་ཞིང་སྐྱེ་བར་འགྱུར་རོ། །རིགས་ཀྱི་བུ། གཞན་ཡང་དཔེར་ན། རྒྱ་
མཚོ་ཆེན་པོའི་ནང་དུ་གྲུ་བོ་ཆེ་འགྲོ་བ་རླུང་དང་ཕྲད་ན་དྲང་པོར་འགྲོ་ཞིང་སྐད་ཅིག་ཙམ་གྱིས་དཔག་ཚད་དུ་མར་འགྲོ་ལ། གལ་ཏེ་རླུང་དང་མ་ཕྲད་ན་ནི། ལོ་དུ་མར་ཡང་མལ་གཅིག་ན་འདུག་
པའམ༑ ཡང་ན་བུབ་པར་འགྱུར་བ་དེ་བཞིན་དུ་མི་ཤེས་པའི་རྒྱ་མཚོ་ཆེན་པོར་ལྷུང་བའི་སེམས་ཅན་རྣམས་ཀྱང་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་རླུང་གི་རྒྱལ་
པོ་དང་ཕྲད་ན་ནི། གྲུ་བཞིན་དུ་མྱུར་བ་ཁོ་ནར་བྱང་ཆུབ་ཀྱི་ཕ་རོལ་ཏུ་ཕྱིན་པར་འགྱུར་རོ། །གང་དག་མདོའི་རླུང་གི་རྒྱལ་པོ་འདི་དང་མ་ཕྲད་པ་དེ་དག་ནི། གྲུ་རྒྱ་མཚོ་ཆེན་པོར་བུབ་པ་
བཞིན་དུ་འཁོར་བའི་འཁོར་ལོར་བརླག་པར་འགྱུར་རོ། །རིགས་ཀྱི་བུ། གཞན་ཡང་དཔེར་ན། རྒྱ་མཚོ་ཆེན་པོ་འཇིགས་པའི་གནས་སུ་རླུང་དང་མ་ཕྲད་ན། དེ་ནི། ཤི་བ་ཉིད་འདི་ཡིན་
ནོ༑ ༑སྙམ་སྟེ་དཀོས་ཐག་པར་གྱུར་པའི་སེམས་ཅན་རྣམས་མི་ཤེས་བཞིན་དུ་རླུང་གི་རྒྱལ་པོས་ཡུད་ཙམ་གྱིས་ཁྱེར་ནས་དེ་དག་འདི་སྙམ་དུ་སེམས་ཏེ། ཀྱེ་མ་བདག་ཅག་ཐར་པར་གྱུར་
པ་འདི་ནི། ངོ་མཚར་ཆེའོ་སྙམ་པ་དེ་བཞིན་དུ། མདོ་ཆེན་པོའི་མདོའི་རླུང་གི་རྒྱལ་པོ་འདིའང་མི་ཤེས་པའི་རྒྱ་མཚོ་ཆེན་པོ་ན་འཁོད་པའི་སེམས་ཅན་བྱང་ཆུབ་ཏུ་སེམས་བསྐྱེད་མི་
དགོས་པར་འཛིན་པ་རྣམས་མི་ཤེས་བཞིན་དུ་བྱང་ཆུབ་ཀྱི་རྒྱུ་ལ་འགོད་པར་བྱེད་དོ། །རིགས་ཀྱི་བུ། གཞན་ཡང་དཔེར་ན། སྤྲུལ་གྱིས་པགས་པ་རྙིང་པ་བོར་ན། ཇི་ག་ཤི་བའམ། མེད་
པར་སོང་བ་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། རིགས་ཀྱི་བུ། དེ་བཞིན་དུ་དེ་བཞིན་གཤེགས་པའང་པགས་པ་རྙིང་པ་འདོར་བ་བཞིན་དུ་
ཐབས་ཀྱི་སྐུ་དུག་སྨན་གྱི་སྡོང་པོ་རྙིང་པ་སྤོང་བར་མཛད་པ་ལ། ཇི་ག་དེ་བཞིན་གཤེགས་པ་མི་རྟག་པར་འགྱུར་རམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། སྤྲུལ་
པགས་པ་བརྗེས་པ་བཞིན་དུ་ཛམྦུའི་གླིང་ཁ་ཅིག་ཏུ་ཐབས་ཀྱི་སྐུ་གཞན་བོར་ནས་ཐབས་ཀྱི་སྐུ་གཞན་སྟོན་པར་མཛད་ལགས་སོ། །བཀའ་སྩལ་པ། རིགས་ཀྱི་བུ། དེ་བས་ན། དེ་བཞིན་
གཤེགས་པ་རྟག་པ་ཡིན་ནོ། །རིགས་ཀྱི་བུ། གཞན་ཡང་དཔེར་ན། གསེར་མགར་གྱིས་གསེར་གྱི་འབྱུང་གནས་ནས་གསེར་བཞུས་ཏེ་སྐྱོན་དང་བྲལ་བར་གྱུར་ནས་རྒྱན་བཟང་པོ་ཇི་དང་ཇི་
ལྟ་བུའི་གཟུགས་སུ་འདོད་པའི་གསེར་མགར་བྱེད་དུ་བཅུག་ན། དེ་དང་དེ་ལྟ་བུར་བྱེད་པ་དེ་བཞིན་དུ་དེ་བཞིན་གཤེགས་པས་ཀྱང་སྲིད་པ་ཉི་ཤུ་རྩ་ལྔ་དག་ཏུ་གདུལ་བར་བྱ་བ་རྣམས་
ཅི་དང་ཅི་ལྟ་བུར་འདོད་པ་དེ་དང་དེ་ལྟ་བུའི་ཐབས་ཀྱིས་གཟུགས་མངོན་པར་སྤྲུལ་ནས་སེམས་ཅན་རྣམས་སྒྲོལ་བར་མཛད་དོ། །དེ་བས་ན། དེ་བཞིན་གཤེགས་པའི་སྐུ་ནི། མཐའ་ཡས་ཏེ།
༄༅། །རྟག་པ་ཡིན་ནོ། །རིགས་ཀྱི་བུ། གཞན་ཡང་དཔེར་ན། ཨ་མྲའི་ཤིང་ངམ། ཛམྦུའི་ཤིང་ཡང་རུང༌། དུས་ཚིགས་རྣམ་པ་གསུམ་གྱི་དབང་གིས་འགྱུར་ཏེ། རེས་
འགའ་ནི། སྦལ་མིག་བྱེ་བ་དང༌། ལོ་མ་ཁ་འབུ་བར་འགྱུར་རོ། །རེས་འགའ་ནི། ལོ་མ་རྒྱས་ཤིང་གྲིབ་མ་བསིལ་བར་འགྱུར་རོ། །རེས་འགའ་ནི། ཤིང་སྐམ་པོ་བཞིན་དུ་ལོ་མ་
ལྷགས་པར་འགྱུར་ན། ཇི་ག་ཤིང་དེ་དག་ཤི་ཞེས་བྱའམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། རིགས་ཀྱི་བུ། དེ་བཞིན་དུ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉིད་གདུལ་བར་བྱ་བའི་དབང་གིས་འཇིག་རྟེན་གསུམ་དུ་ཐབས་ཀྱི་སྐུ་རྣམ་པ་གསུམ་དུ་སྟོན་པར་མཛད་དེ། སྐྱེ་བ་ལྟ་བུ་
དང༌། འཚོ་ཞིང་བཞུགས་པ་ལྟ་བུ་དང༌། ཡོངས་སུ་མྱ་ངན་ལས་འདས་པ་ལྟ་བུར་སྟོན་ན། ཇི་ག་དེ་བཞིན་གཤེགས་པ་མི་རྟག་པ་ཡིན་ནམ། གསོལ་པ། བཅོམ་ལྡན་འདས། དེ་ནི།
མ་ལགས་སོ། །བཀའ་སྩལ་པ། རིགས་ཀྱི་བུ། དེ་བས་ན། དེ་བཞིན་གཤེགས་པ་ནི། རྟག་པ་ཡིན་ནོ། །རིགས་ཀྱི་བུ། དེ་ལྟར་ན། དེ་བཞིན་གཤེགས་པའི་སྐུ་དང༌། དེ་བཞིན་
གཤེགས་པའི་དགོངས་པའི་ཚིག་ཀྱང་ཤེས་པར་དཀའོ། །དཔེར་ན། རྒྱལ་པོ་ལ་ལ་ཞིག་གིས་རང་གི་བློན་པོ་ལ་སེནྡྷ་པ་འོན་ཅིག་ཅེས་དེ་སྐད་བསྒོ་ན། དེ་ལ་སེནྡྷ་པ་ཞེས་བྱ་བ་ནི།
ལན་ཚྭ་དང༌། སྐོམ་སྣོད་དང༌། རལ་གྲི་དང༌། རྟ་རྣམས་ལ་བྱ་སྟེ། འདི་བཞིའི་མིང་སེནྡྷ་པ་ཞེས་བྱ་བ། འདི་ལྟར་མིང་གཅིག་ལ་དོན་མང་པོ་ཡོད་པས། གང་གི་ཚེ་རྒྱལ་པོ་བཤོས་གསོལ་
བ་ན་སེནྡྷ་པ་ཞེས་ཟེར་ན་ནི། དེའི་ཚེ་བློན་པོས་སེནྡྷ་པ་ལན་ཚྭ་ཡིན་པར་རིག་ནས་ལན་ཚྭ་འབུལ་བར་བྱེད་དོ། །གང་གི་ཚེ་རྒྱལ་པོ་བཤོས་གསོལ་ཟིན་ནས་སེནྡྷ་པ་ཞེས་ཟེར་ན་ནི།
དེའི་ཚེ་བློན་པོས་སྐོམ་སྣོད་ཡིན་པར་རིག་ནས་སྐོམ་སྣོད་འབུལ་བར་བྱེད་དོ། །གང་གི་ཚེ་རྒྱལ་པོ་སྐྱེད་མོས་ཚལ་དུ་འགྲོ་བའི་ཚེ་སེནྡྷ་པ་ཞེས་ཟེར་ན་ནི། དེའི་ཚེ་བློན་པོས་རྟ་ཡིན་པར་རིག་
ནས་རྟ་འབུལ་བར་བྱེད་དོ། །གང་གི་ཚེ་རྒྱལ་པོ་འཐབ་པའི་ཚེ་སེནྡྷ་པ་ཞེས་ཟེར་ན་ནི། དེའི་ཚེ་བློན་པོས་རལ་གྲི་ཡིན་པར་རིག་ནས་རལ་གྲི་འབུལ་བར་བྱེད་དེ། དེ་ལྟར་རྒྱལ་པོའི་དགོངས་
བའི་ཚིག་རྣམ་པ་བཞི་བློན་པོ་རྣམས་ཀྱིས་ཁོང་དུ་ཆུད་པར་འགྱུར་རོ། །རིགས་ཀྱི་བུ། དེ་བཞིན་དུ་ཐེག་པ་ཆེན་པོ་འདི་ལའང་མི་རྟག་པ་རྣམ་པ་བཞི་ཞེས་བྱ་བ་ཡོད་པར་ཐེག་པ་ཆེན་པོ་
པོ་བློན་པོ་དང་འདྲ་བས་དེ་བཞིན་དུ་རིག་པར་བྱ་སྟེ། གང་གི་ཚེ་དེ་བཞིན་གཤེགས་པ་འཇིག་རྟེན་དུ་བྱུང་ནས་སངས་རྒྱས་ཡོངས་སུ་མྱ་ངན་ལས་འདའོ། །ཞེས་སྟོན་ན་ནི། དེའི་ཚེ་ཐེག་
པ་ཆེན་པོ་བས་མི་རྟག་པ་སྟོན་ཏོ་སྙམ་དུ་ཤེས་པར་བྱ་སྟེ། མི་རྟག་པའི་འདུ་ཤེས་བསྒོམ་པར་བྱའོ། །གང་གི་ཚེ་དེ་བཞིན་གཤེགས་པ་དམ་པའི་ཆོས་ནུབ་པ་དང༌། ཞིག་པར་འགྱུར་
༄༅། །རོ༑ ༑ཞེས་སྟོན་ན་ནི། དེའི་ཚེ་སྡུག་བསྔལ་སྟོན་ཏོ་སྙམ་དུ་ཤེས་པར་བྱ་སྟེ། སྡུག་བསྔལ་བསྒོམ་པར་བྱའོ། །གང་གི་ཚེ་དེ་བཞིན་གཤེགས་པ་དགེ་སློང་རྣམས་
དང༌། དགེ་སློང་མ་རྣམས་ལ་ངའི་ལུས་ནད་ཆེན་པོ་མཐའ་ཡས་པས་གཟིར་ཏོ། །དགེ་འདུན་འཇིག་པར་འགྱུར་རོ། །ཞེས་སྟོན་ན་ནི། དེའི་ཚེ་བདག་མེད་པ་སྟོན་ཏོ་སྙམ་དུ་ཤེས་པར་བྱ་
སྟེ༑ བདག་མེད་པ་སྒོམ་པ་བསྒོམ་པར་བྱའོ། །གང་གི་ཚེ་དེ་བཞིན་གཤེགས་པ་ཐར་པ་ནི། མཚན་མ་མེད་པ་དང༌། སྟོང་པ་དང༌། ཅིའང་མེད་པའོ། །ཞེས་སྟོན་ན་ནི། དེའི་ཚེ་ཐར་
པ་ནི། སྲིད་པ་ཉི་ཤུ་རྩ་ལྔ་དང་བྲལ་བ་ཡིན་ནོ། །ཞེས་སྟོན་པར་ཤེས་པར་བྱ་སྟེ། དེ་བས་ན། སྟོང་པ་ཞེས་བྱའོ། །གང་གི་ཕྱིར་དེ་ལ་སྡུག་བསྔལ་མེད་པས་ན། དེའི་ཕྱིར་སྡུག་
བསྔལ་ཅིའང་མེད་པ་དང༌། མཆོག་ཏུ་བདེ་བ་དང༌། མཚན་མ་མེད་པ་ཡིན་ནོ། །གང་གི་ཕྱིར་དེ་ལ་མི་རྟག་པ་དང༌། མི་བརྟན་པ་དང༌། ཐེར་ཟུག་མ་ཡིན་པ་དང༌། ཞི་བའི་རང་བཞིན་མ་
ཡིན་པ་མེད་པས་ན། དེའི་ཕྱིར་ཐར་པ་ནི། རྟག་པ་དང༌། བརྟན་པ་དང༌། ཐེར་ཟུག་དང༌། ཞི་བ་སྟེ། དེ་ཉིད་དེ་བཞིན་གཤེགས་པ་ཡིན་ནོ། །གང་གི་ཚེ་དེ་བཞིན་གཤེགས་པ་སེམས་
ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དོ། །ཞེས་སྟོན་ན་ནི། དེའི་ཚེ་ཡང་དག་པར་རྟག་པ་སྒོམ་པ་བསྒོམ་པར་བྱའོ། །དགེ་སློང་གང་དག་དེ་ལྟར་སྒོམ་པ་དེ་དག་ནི།
ངའི་ཉན་ཐོས་ཡིན་ནོ། །ཞེས་ང་ཟེར་རོ། །རྒྱལ་པོའི་བློན་པོ་བཞིན་དུ་དགོངས་པའི་ཚིག་ལ་མཁས་པ་ཡིན་ནོ། །ཞེས་ང་ཟེར་རོ། །དེ་ལྟར་རྒྱལ་པོའི་ལུགས་ལའང་དགོངས་པའི་ཚིག་ཡོད་ན།
ངའི་བསྟན་པ་ལ་དགོངས་པའི་ཚིག་ག་ལ་ཞིག་མེད་དེ། མཁས་པ་མང་པོ་དག་གིས་དེ་ལྟར་རིག་པར་བྱའོ། །ངའི་བསྟན་པ་ནི། འཇིག་རྟེན་ཐམས་ཅད་དང་མི་མཐུན་ནོ། །རིགས་ཀྱི་བུ།
གཞན་ཡང་དཔེར་ན། ཤིང་པ་ལ་ཤ་དང༌། མྱ་ངན་འཚང་དང༌། དོང་ཀའི་ཤིང་རྣམས་ནི། ཆར་པ་དཀོན་པའི་ཚེ་མེ་ཏོག་ཀྱང་ངན་པར་འགྱུར། འབྲས་བུའང་ངན་པར་འགྱུར་རོ། །ཆུ་དང་
ཐང་ལས་སྐྱེས་པའི་མེ་ཏོག་གཞན་རྣམས་ཀྱང་ཁྲུན་ཐུང་པ་དང༌། མདོག་ངན་པ་དང༌། གཟི་བྱིན་ཆུང་བ་དང༌། དྲི་ཆུང་བར་འགྱུར་ཏེ། དེ་ལྟར་ན། མ་འོངས་པའི་དུས་ན་མེ་ཏོག་དང་སྨན་
རྣམས་གཟི་བྱིན་དང༌། དྲི་ལ་སོགས་པ་ཉམས་པར་འགྱུར་རོ། །རིགས་ཀྱི་བུ། དེ་བཞིན་དུ་ང་འདས་པའི་འོག་ཏུ་མ་འོངས་པའི་དུས་ན་དུས་ངན་པ་འབྱུང་བའི་ཚེ་དམ་པའི་ཆོས་འཇིག་པ་ན་
སེམས་ཅན་རྣམས་བསོད་ནམས་ཆུང་བའི་ཕྱིར་ཆར་པ་དཀོན་པའི་ཚེ་མེ་ཏོག་གཟི་བྱིན་མེད་པར་འགྱུར་བ་དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའི་དགོངས་
པའི་ཚིག་གི་ཚིགས་སུ་བཅད་པའི་དོན་འཇིག་རྟེན་དུ་བརྡ་སྤྲོད་པའི་ཚིགས་སུ་བཅད་པ་དང༌། ཚིག་དང༌། ཚིག་སིལ་བུའི་ཕྱེད་ཙམ་སྤྲོད་པར་འགྱུར་རོ། །དགེ་སློང་སྡིག་ཅན་རྣམས་
༄༅། །ཀྱིས་ཀྱང་རང་ལ་མཐུ་མེད་པས་དགོངས་པའི་ཚིག །གསང་བའི་ཚིགས་སུ་བཅད་པ་བདུད་རྩིའི་ཚིག་རྣམས་བོར་ནས་གཞན་འདོན་པར་བྱེད་དེ། རྐུན་པོ་དག་
གིས་ཕུབ་མ་ཁུར་དུ་འཁྱེར་ལ་ཆེ་བ་ལ་འོས་པའི་རིན་པོ་ཆེ་འདོར་བ་བཞིན་དུ་དགེ་སློང་གཡེལ་བ་རྣམས་ཀྱང་མདོ་འདིའི་ཚིགས་སུ་བཅད་པ་དགོངས་པའི་ཚིག་རྣམས་འདོར་བར་
བྱེད་དོ༑ ༑ཀྱེ་མ་མ་འོངས་པའི་དུས་མཆོག་ཏུ་འཇིགས་ཤིང་མཆོག་ཏུ་སྐྲག་ཏུ་རུང་བ་འབྱུང་བར་འགྱུར་རོ། །ཀྱེ་མ་མ་འོངས་པའི་སེམས་ཅན་རྣམས་ཤིན་ཏུ་དཔལ་ཡོན་ཆུང་བ་དག་
འབྱུང་བར་འགྱུར་ཏེ། དེ་དག་ནི། མདོ་སྡེ་ཆེན་པོ་འདི་ཉན་པར་མི་འགྱུར་རོ། །གང་དག་ཉན་པར་བྱེད་པ་དེ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ཏེ། དེ་ཁོ་ན་
ཉིད་ཀྱི་དོན་འཛིན་པར་འགྱུར་གྱི། ཡི་གེ་ལྷུར་མི་འཛིན་ཏོ། །མདོ་སྡེའི་དོན་ཇི་སྙེད་པ་དེ་ཁོ་ན་སྙེད་གཞན་དག་ལ་སྟོན་པར་བྱེད་ཀྱི། དོན་མེད་པ་སྟོན་པར་མི་བྱེད་དོ། །རིགས་ཀྱི་བུ།
དཔེར་ན། ཕྱུགས་རྫི་མོ་ཞིག་གིས་ཁེ་ཕྱིན་པར་བྱ་བའི་ཕྱིར་འོ་མའི་གཞི་ལས་ཆུ་བུ་རམ་དང་སྦྱར་བས་བསླད་ནས་ཕྱུགས་ཀྱི་གནས་ནས་འོ་མའི་བུམ་པ་ཁྱེར་ཏེ་སོང་ནས་དེས་
ཕྱུགས་རྫི་མོ་ཟླ་ལ་བཙོངས་ལ། དེ་ནས་ཕྱུགས་རྫི་མོ་ཟླ་དེས་ཀྱང་འོ་མ་དེ་ཆུ་ཉིས་འགྱུར་གྱིས་བསླད་ནས་བར་ལོང་མ་ལ་བཙོངས། བར་ལོང་མ་དེས་ཀྱང་འོ་མ་དེ་ཆུ་ཉིས་འགྱུར་གྱིས་
བསླད་ནས་བར་ལོང་མའི་ཟླ་ལ་བཙོངས། བར་ལོང་མའི་ཟླ་དེས་ཀྱང་ཆུ་ཉིས་འགྱུར་གྱིས་བསླད་ནས་གྲོང་ཁྱེར་རམ། ཚོང་འདུས་སུ་ཉོ་བའི་མི་ཞིག་གིས་བུའི་གཙུག་ཕུད་འཇོག་པའི་དུས་སྟོན་
གྱི་འོ་ཐུག་བྱ་བའི་ཕྱིར་འདི་དཀོན་པ་ཡིན་ནོ་སྙམ་སྟེ་འོ་མ་དེ་ཉེས་ནས་འོ་མ་ཆུས་བསླད་པ་དེས་འོ་ཐུག་བཙོས་ནས་ཟས་ཀྱི་རོ་མཆོག་དེ་རོ་ཆུང་བར་གྱུར་ཏོ། །འོན་ཀྱང་རོ་བྲོ་བ་ཐམས་ཅད་ཀྱི་
ནང་ན་བའི་བཅུད་རྣམས་གཙོ་བོ་ཡིན་ལ། དེའི་ནང་ནའང་འོ་མ་དམ་པ་ཡིན་པས་ན། ཟས་ཀྱི་མཆོག་དེ་རོ་ཚ་བས་ཆེས་སྟོང་འགྱུར་གྱིས་ཞིམ་མོ། །རིགས་ཀྱི་བུ། དེ་བཞིན་དུ་ང་འདས་པའི་
འོག་ཏུ་ལོ་བརྒྱ་ཕྲག་དུ་མ་ལོན་པ་ན། གང་གི་ཚེ་དམ་པའི་ཆོས་གནས་པའི་ལྷག་མ་ལོ་བརྒྱད་ཅུ་ལུས་པ་དེའི་ཚེ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ཛམྦུའི་གླིང་དུ་
སྤྱོད་པར་འགྱུར་ཏེ། དེའི་ཚེ་དེ་ལྟར་མདོ་སྡེ་སྤྱོད་པ་དེ་ལས་དགེ་སློང་སྡིག་ཅན་མཆོག་ཏུ་གཡེལ་བ་དམ་པའི་ཆོས་ཀྱི་མེ་ཏོག་གི་དྲི་མེད་པར་བྱེད་པ་རྣམས་ཀྱིས་གླེགས་བམ་འཆོས་
པར་བྱེད་དེ། མདོ་སྡེ་འདི་ཀློག་པ་ན་དོན་དང་ཚིག་རྟོགས་པར་དཀའ་བ་དགོངས་པའི་ཚིག་གསང་བ་རྣམས་ལས་ན་དང༌། མ་དང༌། ཀུ་ལ་སོགས་པ་དགག་པའི་ཡི་གེ་རྣམས་བོར་ཞིང་
གཞན་འདོན་པར་བྱེད་དོ། །དགེ་སློང་རང་གི་རྙེད་པ་སྒྲུབ་པར་རུང་བ་མ་ཡིན་པའི་རྫས་འཆང་བ་དེ་དག་ནི། བདུད་ཀྱི་ཕྱོགས་ཡིན་ཏེ། ཕྱུགས་རྫི་མོས་བུ་རམ་གྱི་ཆུས་འོ་མ་བསླད་པ་བཞིན་
༄༅། །དུ་མདོ་སྡེ་འདི་མ་རུང་བར་བྱེད་དོ། །གཞན་ཡང་ཀློག་མི་ཤེས་པ་དང༌། ཆོས་སྨྲ་བ་ངན་པ་དང༌། ཡི་གེ་ངན་པའི་ཉེས་པ་དང༌། ཆོས་ལ་མི་གནས་པ་དང༌།
བླ་མ་ལ་སྲི་ཞུ་མི་བྱེད་པ་དང༌། མི་ངན་པས་ཁྱད་དུ་བསད་པ་དང༌། ཚས་ཉེས་པ་དང༌། ཡུན་རིང་པ་དང༌། ལག་བརྒྱུད་པའི་ཉེས་པ་ཚིག་དོན་ཕྱེད་ཕྱེད་ཙམ་དུ་གྱུར་པ་སྤྱོད་ཅིང་
མདོ་སྡེའི་ལྷག་མ་ཆུང་ཤས་ཙམ་ཞིག་ལུས་པར་ཟད་དོ། །བར་ལོང་མ་ལས་ཉིང་དོར་ཉོས་པའི་འོ་མས་ཟས་ཀྱི་མཆོག་བཙོས་པ་རོ་མེད་པར་གྱུར་ཀྱང་ཟས་ཀྱི་མཆོག་དེ་ནི། རོ་བྲོ་བ་
ཐམས་ཅད་ཀྱི་དམ་པ་ཡིན་པ་དེ་བཞིན་དུ་མདོ་སྡེ་ཆེན་པོ་འདིའང་དེ་ལྟར་ལྷག་མ་ཅུང་ཟད་ཅིག་ལུས་པར་ཟད་མོད་ཀྱི། ཉན་ཐོས་ཀྱི་ཐེག་པའི་མདོ་སྡེ་ཐམས་ཅད་པས་སྟོང་འགྱུར་
གྱིས་གཙོ་བོར་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། མདོ་སྡེ་དང༌། ཏིང་ངེ་འཛིན་ཐམས་ཅད་ནི། ཡོངས་སུ་མྱ་ངན་ལས་འདས་པའི་མཐུ་ཡིན་པས་ན། དེའི་ཕྱིར་ཡོངས་སུ་མྱ་ངན་
ལས་འདས་པ་ཆེན་པོ་མཆོག་ཅེས་བྱ་སྟེ། མིང་ཆེ་བ་ཡིན་ནོ། །རིགས་ཀྱི་བུ། གཞན་ཡང་རིགས་ཀྱི་བུའམ། རིགས་ཀྱི་བུ་མོས་སྐྱེས་པའི་རང་བཞིན་དུ་འགྱུར་བར་བསྒོམ་པར་
བྱའོ༑ ༑ཅིའི་ཕྱིར་ཞེ་ན། བུད་མེད་ཀྱི་རང་བཞིན་ནི། ཆོས་མ་ཡིན་པ་ཐམས་ཅད་ཀྱི་རྒྱུའི་སྒོ་ནས་འབྱུང་ཁུངས་ཡིན་ཏེ། དཔེར་བྱ་ན། སྦྲང་བུའི་གཅིན་གྱིས་ནི། ནམ་ཡང་ས་ཆེན་
པོ་བརླན་པར་ཡང་མི་འགྱུར། ངོམས་པར་ཡང་མི་འགྱུར་བ་དེ་བཞིན་དུ་བུད་མེད་ཀྱང་ནམ་ཡང་འདོད་པས་ངོམས་པར་མི་འགྱུར་ཏེ། བུད་མེད་ནི། གལ་ཏེ་ས་ཆེན་པོ་རྒྱ་ཤུག་གི་རུས་པ་
ཙམ་མམ། ཡུངས་འབྲུ་ཙམ་གྱི་རི་ལུར་བྱས་པ་དེ་ལ་རི་ལུ་ཇི་སྙེད་ཡོད་པ་དེ་སྙེད་ཀྱི་སྐྱེས་པ་དང་ལྷན་ཅིག་ཏུ་འདོད་པས་ཞེན་པར་བསྟེན་དུ་ཟིན་ཀྱང་སྦྲང་བུའི་གཅིན་གྱིས་ས་བརླན་ཞིང་
ངོམས་པར་མི་འགྱུར་བ་བཞིན་དུ་བུད་མེད་རྣམས་འདོད་པས་ངོམས་པར་མི་འགྱུར་རོ། །རིགས་ཀྱི་བུ། གཞན་ཡང་བུད་མེད་ཇི་ལྟར་མི་བཟད་པ་ཉོན་ཅིག །བུད་མེད་ནི། གལ་ཏེ་སྐྱེས་པ་
གངྒཱའི་ཀླུང་གི་བྱེ་མ་སྙེད་དམ། གཏམས་སྙེད་དམ། དཀྲིགས་སྙེད་དང་ལྷན་ཅིག་ཏུ་འདོད་པ་ཞེན་པར་བསྟེན་དུ་ཟིན་ཀྱང་སྦྲང་བུའི་གཅིན་གྱིས་ས་བརླན་ཞིང་ངོམས་པར་མི་འགྱུར་བ་
བཞིན་དུ་བུད་མེད་རྣམས་ཀྱང་འདོད་པས་ངོམས་པར་མི་འགྱུར་རོ། །རིགས་ཀྱི་བུ། གཞན་ཡང་དཔེར་ན། རྒྱ་མཚོ་ཆེན་པོ་ནི། སྤྲིན་ཆེན་པོའི་ཆར་འབབ་པའི་ཆུ་དང༌། ཆུ་ཀླུང་རྣམས་ཀྱི་
ཆུ་དེར་འབབ་ཀྱང་ངོམས་པ་མེད་པ་བཞིན་དུ་བུད་མེད་རྣམས་ཀྱང་འདོད་པས་ངོམས་པ་མེད་དོ། །རིགས་ཀྱི་བུ། གཞན་ཡང་དཔེར་ན། མེ་ཏོག་གི་ཤིང་མྱ་ངན་འཚང་དང༌། དོང་ཀའི་
ཤིང་དང༌། པཊ་ལ་སོགས་པ་མེ་ཏོག་རྒྱས་པ་ན་བུང་བ་རྣམས་མེ་ཏོག་གི་ཁུ་བས་ངོམས་པར་མི་འགྱུར་ཏེ། བུང་བ་རྣམས་ཀྱིས་མཁས་པ་དང༌། ཆ་ཕྲ་བ་དང༌། ཟབ་མོར་མེ་ཏོག་གི་
༄༅། །ཁུ་བ་འཐུང་བར་བྱེད་པ་དེ་བཞིན་དུ་བུད་མེད་རྣམས་ཀྱིས་ཀྱང་སྐྱེས་པ་རྣམས་ཀྱི་ནོར་དང༌། འདོད་པ་དང༌། ཁུ་བ་རྣམས་འཐུང་བར་བྱེད་དེ། བུང་བ་བཞིན་
དུ་དོམས་པར་མི་འགྱུར་རོ། །རིགས་ཀྱི་བུ། དེ་བས་ན། ཡོངས་སུ་མྱ་ངན་ལས་འདས་པ་ཆེན་པོ་འདི་ཐོས་ནས་བུད་མེད་ཀྱི་རང་བཞིན་ལ་མ་ཆགས་པའི་སེམས་བསྐྱེད་པར་བྱ་
སྟེ། སྐྱེས་པའི་རང་བཞིན་དུ་འགྱུར་བར་སེམས་བསྐྱེད་པར་བྱའོ། །ཅིའི་ཕྱིར་ཞེ་ན། མདོ་འདི་ནི། སྐྱེས་པའི་རང་བཞིན་དེ་གཤེགས་པའི་སྙིང་པོ་ཡང་དག་པར་སྟོན་པའི་ཕྱིར་
རོ། །སྐྱེས་པའི་རང་བཞིན་ནི། མི་ཞེས་བྱའོ། །དེ་བཞིན་གཤེགས་པའི་རང་བཞིན་ནི། སྐྱེས་པའོ། །འཇིག་རྟེན་ན་སྐྱེས་པ་ཡོད་པ་གང་ཡིན་པ་དེ་དག་ཀྱང་བདག་ཉིད་ལ་དེ་བཞིན་གཤེགས་
པའི་སྙིང་པོ་ཡོད་པར་མི་ཤེས་པའི་ཕྱིར་སྐྱེས་པའི་རང་བཞིན་མ་ཡིན་ནོ། །དེ་བཞིན་གཤེགས་པའི་སྙིང་པོ་མི་ཤེས་པ་གང་ཡིན་པ་དེ་དག་ནི། བུད་མེད་ཡིན་ནོ། །ཞེས་ང་ཟེར་རོ། །དེ་
བཞིན་གཤེགས་པའི་སྙིང་པོ་བདག་ལ་ཡོད་དོ་སྙམ་དུ་ཡང་དག་པར་ཤེས་པ་གང་ཡིན་པ་དེ་དག་ནི། སྐྱེས་པའི་མཆོག་ཏུ་གཏོགས་ཏེ། བུད་མེད་ཡིན་དུ་ཟིན་ཀྱང་སྐྱེས་པའི་མཆོག་
ཏུ་གཏོགས་སོ། །དེ་ལྟར་ན། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདི་ནི་དེ་བཞིན་གཤེགས་པའི་སྙིང་པོ་སྟོན་པའི་ཕྱིར་དཔག་ཏུ་མེད་པ་ཡིན་ནོ། །རིགས་ཀྱི་
བུའམ། རིགས་ཀྱི་བུ་མོ་མདོ་སྡེའི་གནས་འདི་མྱུར་དུ་རྟོགས་པར་འདོད་པས་ནི། དེ་བཞིན་གཤེགས་པའི་སྙིང་པོ་ལ་བརྩོན་པར་བྱའོ། །གསོལ་པ། བཅོམ་ལྡན་འདས། དེ་ནི། དེ་ལགས་
སོ། །བཅོམ་ལྡན་འདས། དེ་ནི། དེ་ལགས་ཏེ། བདག་ཀྱང་དེང་དུ་དེ་བཞིན་གཤེགས་པའི་སྙིང་པོ་བསྒོམ་པའི་སླད་དུ་སྐྱེས་པའི་རང་བཞིན་ལ་ཞུགས་ལགས་སོ། །མངོན་པར་ཕྱེ་
ལགས་སོ། །བརྡ་མཇལ་བར་བགྱིས་ལགས་སོ། །བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །འཇིག་རྟེན་དང་མཐུན་པར་བྱེད་པས་ནི་དེ་ལྟར་བལྟ་བར་བྱའོ། །གསོལ་
བ། བཅོམ་ལྡན་འདས། འཇིག་རྟེན་དང་མཐུན་པ་མ་ལགས་སོ། །བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །དེ་ལྟར་བུང་བ་ཤིང་གི་མེ་ཏོག་ཟ་བ་བཞིན་དུ་ཟབ་མོའི་
ཆོས་ཀྱི་ཟས་བཟའ་བར་བྱའོ། །རིགས་ཀྱི་བུ། གཞན་ཡང་དཔེར་ན། སྤྲང་བུའི་གཅིན་ཉུང་ཤས་ཀྱིས་ས་ཆེན་པོ་ངོམས་པར་མི་འགྱུར་བ་དེ་བཞིན་དུ་སྦྲང་བུའི་གཅིན་དང་འདྲ་བར་མ་
འོངས་པའི་དུས་ན་མདོ་སྡེ་ཆེན་པོ་འདི་འཇིག་རྟེན་དུ་ཆུང་ཤས་ཙམ་ཞིག་སྤྱོད་པར་འགྱུར་ཏེ། དམ་པའི་ཆོས་འཇིག་པའི་ཐ་མར་སྦྲང་བུའི་གཅིན་ས་ཆེན་པོ་ལ་སོང་བ་བཞིན་དུ་ཟད་པར་
འགྱུར་རོ། །འདི་ནི། དམ་པའི་ཆོས་ནུབ་པའི་ལྟས་བདུན་པ་སྟེ། ལྟས་གཞན་ཡང་ཡོད་པར་མཁས་པས་ཤེས་པར་བྱའོ། །རིགས་ཀྱི་བུ། གཞན་ཡང་དཔེར་ན། དབྱར་ཟད་པའི་མཇུག་
༄༅། །དགུན་གྱི་ཟླ་བ་དང་པོ་ནི། སྟོན་ཞེས་བྱ་སྟེ། སྟོན་གྱི་དུས་ལ་བབ་པ་ན་མ་སྨིན་པ་སྨིན་པར་བྱ་བའི་ཕྱིར་སྤྲིན་རྣམས་ཀྱིས་ཆར་ཕབ་ནས་མྱུར་བ་མྱུར་བར་འགྱེས་པ་
དེ་བཞིན་དུ། མདོ་ཆེན་པོ་འདི་ཡང་སྟོན་གྱི་སྤྲིན་གྱིས་ཆར་བབ་ནས་མྱུར་དུ་འགྱེས་པ་དེ་བཞིན་དུ་ལྷོ་ཕྱོགས་སུ་སོང་ནས་ཡོངས་སུ་མྱ་ངན་ལས་འདས་པ་ཆེན་པོའི་དགོངས་པའི་ཚིག་
ཐམས་ཅད་ཀྱི་ཆོས་ཀྱི་ཆར་འབེབས་སོ། །དེ་ནས་ལྷོ་ཕྱོགས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་དམ་པའི་ཆོས་འཇིག་པར་ཤེས་ནས་དགུན་གྱི་དུས་དང་ཉེ་
བར་གྱུར་པའི་སྤྲིན་བཞིན་དུ་ཁ་ཆེ་ཡུལ་དུ་སོང་ནས་ས་ལ་ནུབ་པར་གྱུར་ཏེ། ཐེག་པ་ཆེན་པོའི་མདོ་སྡེ་ཤིན་ཏུ་རྒྱས་པ་བདུད་རྩིའི་མཆོག་གི་དམ་པའི་ཆོས་ཐམས་ཅད་ནུབ་པར་
འགྱུར་རོ། །ད་ལྟར་ནི། དེ་བཞིན་གཤེགས་པས་མཁྱེན་པའི་མདོ་སྡེ་འདི་ལག་ཏུ་འོངས་མོད་ཀྱི། དམ་པའི་ཆོས་ནུབ་པར་འགྱུར་རོ་སྙམ་དུ་བྱང་ཆུབ་སེམས་དཔའ་སེམས་དཔའ་
ཆེན་པོ་མི་མཆོག་རྣམས་ཀྱིས་ཤེས་པར་བྱའོ། །གསོལ་བ། དེ་བཞིན་གཤེགས་པ་དང༌། རང་སངས་རྒྱས་དང༌། ཉན་ཐོས་དང༌། བྱང་ཆུབ་སེམས་དཔའི་ཁམས་ཐ་དད་པ་མ་
མཆིས་པ་སེམས་ཅན་ཐམས་ཅད་ཀྱིས་བདེ་བླག་ཏུ་རྟོགས་པར་བགྱི་བའི་སླད་དུ་བཅོམ་ལྡན་འདས་ཀྱིས་གསལ་ཞིང་ཟུར་ཕྱིན་པར་བཀའ་སྩལ་དུ་གསོལ། བཅོམ་ལྡན་
འདས་ཀྱིས་བཀའ་སྩལ་པ། རིགས་ཀྱི་བུ། དཔེར་ན། ཁྱིམ་བདག་གམ་ཁྱིམ་བདག་གི་བུ་ཞིག་ལ་བ་ལང་གི་ལྷས་མང་པོ་ཡོད་དེ། བ་ལང་སྤུ་ཁ་ཐ་དད་པ་དག་བདོག་ལ་དེའི་ནང་ན་བ་
སྔོན་མོ་དག་ཀྱང་ཡོད་དེ། བ་དེ་དག་བ་རྫི་གཅིག་འཚོར་བཅུག་གོ། དེ་ནས་ཁྱིམ་བདག་དེས་ལན་གཅིག་ན་རང་གི་ལྷ་མཆོད་པའི་ཕྱིར་བ་ལང་གི་ལྷས་རྣམས་གཅིག་ཏུ་བསྡུས་ནས་འོ་
མ་འཇོར་བཅུག་གོ །དེ་ནས་འོ་མ་དེ་དག་དུང་གི་མདོག་བཞིན་དུ་དཀར་པོར་འདུག་པ་མཐོང་ནས་ངོ་མཚར་དུ་བཟུང་སྟེ་བསམ་པ། འདི་ན་བ་འདི་དག་སྤུ་ཁ་ཐ་དད་པར་འདུག་ན།
བ་སྔོན་མོ་འདི་རྣམས་ཀྱི་འོ་མའང་སྔོན་པོར་མི་འདུག་ལ། བ་དཀར་མོ་རྣམས་ཀྱིའང་དེ་དང་འདྲ་སྟེ། དུང་གི་མདོག་ལྟར་འདུག་གོ །སྙམ་མོ། །དེ་ནས་ཕྱིས་དེས་རྟོགས་ཏེ་སེམས་ཅན་
རྣམས་ཀྱི་ལས་ཀྱི་རྣམ་པར་སྨིན་པའི་རྒྱུ་ལས་གྱུར་པ་ཡིན་པར་བལྟ་བར་བྱའོ། །སྙམ་མོ། །རིགས་ཀྱི་བུ། དེ་བཞིན་དུ་ཉན་ཐོས་དང༌། རང་སངས་རྒྱས་དང༌། དེ་བཞིན་གཤེགས་
པ་ཐམས་ཅད་ཀྱི་རང་བཞིན་ཡང་འོ་མ་དང་འདྲའོ། །ཅིའི་ཕྱིར་ཞེ་ན། དེ་དག་ནི། ཟག་པ་ཟད་པའི་ཕྱིར་རོ། །སེམས་ཅན་ཐམས་ཅད་ཀྱིས་ནི། ཉན་ཐོས་དང༌། རང་སངས་རྒྱས་དང༌།
དེ་བཞིན་གཤེགས་པ་ཐམས་ཅད་ཀྱི་རང་བཞིན་ཐ་དད་པ་དང༌། དབྱིབས་ཐ་དད་པར་འཛིན་མོད་ཀྱི། དེ་དག་གིས་ཀྱང་ཁྱིམ་བདག་བཞིན་དུ་མཐར་གྱིས་ཤེས་པར་འགྱུར་རོ། །རིགས་
༄༅། །ཀྱི་བུ། དཔེར་ན། གསེར་ཁུང་ངམ། ཟངས་ཁུང་ནས་རྡོ་དང༌། གསེག་མ་མེད་པའི་གསེར་གྱི་རང་བཞིན་རིན་ཐང་མེད་པར་འབྱུང་བ་དེ་བཞིན་དུ། ཉན་ཐོས་
དང༌། རང་སངས་རྒྱས་དང༌། དེ་བཞིན་གཤེགས་པ་ཐམས་ཅད་ཀྱང་གསེར་དང་འདྲ་བར་རིན་ཐང་དང་རང་བཞིན་གཅིག་གོ། །ཅིའི་ཕྱིར་ཞེ་ན། རྡོ་དང༌། གསེག་མ་ལྟ་བུའི་ཉོན་
མོངས་པ་དང་བྲལ་བའི་ཕྱིར་ཏེ། དེ་བས་ན། སངས་རྒྱས་ཀྱི་ཡེ་ཤེས་འདི་ལ་ནི། དབྱེར་མེད་དོ། །སེམས་ཅན་ཐམས་ཅད་ལ་སངས་རྒྱས་ཀྱི་ཁམས་ཡོད་པའང་དེ་དང་འདྲ་སྟེ། །
ཁྱིམ་བདག་གིས་འོ་མ་ཇི་ལྟ་བ་བཞིན་དུ་དེ་དག་གིས་ཀྱང་དེ་བཞིན་གཤེགས་པའི་སྙིང་པོའི་མདོ་སྡེ་ཐོས་ནས་ཉོན་མོངས་པའི་རྣམ་པ་ཟད་པར་བྱས་ཏེ་སངས་རྒྱས་ཀྱི་ཁམས་
རྟོགས་པར་འགྱུར་རོ། །གསོལ་པ། བཅོམ་ལྡན་འདས། ཅི་ལགས། སེམས་ཅན་ཐམས་ཅད་དང༌། དེ་བཞིན་གཤེགས་པ་རྣམས་ཐ་དད་པ་མ་མཆིས་ལགས། གལ་ཏེ་དེ་
བཞིན་གཤེགས་པ་བསྟན་པ་དེ་ལྟར་སྟོན་པར་གྱུར་ན་འདི་ལ་སྐྱོན་ཆེན་པོ་མཆིས་ཏེ། ད་དེའི་གཏན་ཚིགས་བཀའ་སྩལ་དུ་འཚལ་ལགས་སོ། །སེམས་ཅན་ཐམས་ཅད་དང༌།
རང་སངས་རྒྱས་རྣམས་ལྟ་ཞོག་ལགས་ཀྱི། དེ་ལྟར་ན། ཤཱ་རིའི་བུ་དང༌། མཽངྒལ་གྱི་བུ་གཉིས་ཅིའི་སླད་དུ་ཉན་ཐོས་ཀྱི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་
འདའ་བར་བགྱིད་ལགས། རང་སངས་རྒྱས་རྣམས་ཀྱང་ཅིའི་སླད་དུ་རང་སངས་རྒྱས་རྣམས་ཀྱི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའ་བར་བགྱིད་ལགས། བྱང་ཆུབ་
སེམས་དཔའ་རྣམས་ཀྱང་ཅིའི་སླད་དུ་བྱང་ཆུབ་སེམས་དཔའི་ཡོངས་སུ་མྱ་ངན་ལས་འདས་པ་ཆེན་པོས་ཡོངས་སུ་མྱ་ངན་ལས་འདའ་བར་བགྱིད་ལགས། །བཀའ་སྩལ་པ། སངས་རྒྱས་
རྣམས་ཀྱི་ཡོངས་སུ་མྱ་ངན་ལས་འདས་པ་ཆེན་པོ་ནི། ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་རྣམས་ཀྱི་མ་ཡིན་ཏེ། ཡོངས་སུ་མྱ་ངན་ལས་འདས་པ་ཆེན་པོ་
འདི་ལ་ནི། སངས་རྒྱས་རྣམས་མ་གཏོགས་པར་གཞན་དག་གི་གནས་མེད་དོ། །གསོལ་པ། ཇི་ལྟ་བུ་ལགས། བཀའ་སྩལ་པ། དེ་བཞིན་གཤེགས་པ་ནི། བསྐལ་པ་བྱེ་བ་ཕྲག་
གྲངས་མེད་པ་མང་པོ་ཞིག་ན་དེ་བཞིན་གཤེགས་པ་འབྱུང་བ་སྟོན་པར་མཛད་ན། དེ་བཞིན་གཤེགས་པ་དང༌། ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་རྣམས་
ལ་ཁྱད་པར་ཅི་ཡོད་ཅེ་ན། རིགས་ཀྱི་བུ། དེ་བཞིན་གཤེགས་པའི་མྱ་ངན་ལས་འདས་པ་གསང་བ་ལ་དགྲ་བཅོམ་པ་རྣམས་ཀྱི་གནས་མེད་དོ། །ཞེས་ངེས་བསྟན་ཏེ། དེ་ནི། གནས་མེད་
པ་ཡིན་ནོ། །དེ་བས་ན། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་འདིའི་ཚུལ་གྱིས་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་མེད་དོ། །དེ་བས་ན། ཡོངས་སུ་མྱ་ངན་
༄༅། །ལས་འདས་པ་ཆེན་པོ་ཞེས་བྱའོ། །གསོལ་པ། ཐ་དད་པ་ཁོ་ནར་གདའ་ལགས་སོ། །བཀའ་སྩལ་པ། ཇི་ལྟར་སྣང༌། གསོལ་པ། ཉན་ཐོས་དང༌། རང་སངས་
རྒྱས་དང༌། བྱང་ཆུབ་སེམས་དཔའ་རྣམས་ཀྱང་ཡོངས་སུ་མྱ་ངན་ལས་འདས་པ་ཆེན་པོས་ཡོངས་སུ་མྱ་ངན་འདས་པར་འགྱུར་ཏེ། ཆུ་ཀླུང་རྣམས་རྒྱ་མཚོར་འབབ་པ་བཞིན་དུ་དེ་
དག་གི་གནས་ཀྱང་དེ་ལགས་སོ། །དེ་བས་ན། དེ་དག་ཀྱང་རྟག་པ་ཞེས་བགྱིའོ། །བཀའ་སྩལ་པ། དེ་དག་ནི། ངའི་མཆོག་ཏུ་རྟག་པ་ཡིན་ནོ། །གསོལ་པ། བཅོམ་ལྡན་འདས།
ཁམས་ཐ་དད་པ་མ་མཆིས་པ་དང༌། ཐ་དད་པ་ཇི་ལྟ་བུ་ལགས། བཀའ་སྩལ་པ། ཐ་དད་དོ། །གསོལ་པ། ཇི་ལྟ་བུ་ལགས། བཀའ་སྩལ་པ། དཔེར་ན། བའི་འོ་མ་ནི། མཆོག་
ཏུ་མངར་བ་ཡིན་ཏེ། ཁམས་ཀྱང་དེ་དང་འདྲའོ། །ཉན་ཐོས་རྣམས་དང༌། རང་སངས་རྒྱས་རྣམས་ཀྱི་ཁམས་ནི། ཞོ་དང་འདྲའོ། །བྱང་ཆུབ་སེམས་དཔའ་རྣམས་ཀྱི་ཁམས་ནི། མར་
དང་འདྲའོ། །སངས་རྒྱས་རྣམས་ཀྱི་ཁམས་ནི། མར་གྱི་ཉིང་ཁུ་དང་འདྲ་སྟེ། དེ་ལྟར་ཡོངས་སུ་མྱ་ངན་ལས་འདས་པ་ཆེན་པོ་ལས་གདམས་ངག་སྟོན་པའི་དེ་བཞིན་གཤེགས་
པས་རྣམ་པ་བཞིར་བསྟན་ཏོ། །གསོལ་པ། སེམས་ཅན་ཐམས་ཅད་ཀྱི་ཁམས་ཇི་ལྟ་བུ་ལགས། བཀའ་སྩལ་པ། བ་བེའུ་འབྲངས་མ་ཐག་པའི་འོ་མ་ཁྲག་དང་འདྲེས་པ་
བཞིན་དུ་ཉོན་མོངས་པའི་ཁྲག་དང་འདྲེས་པའི་ཁམས་དེས་དེ་བཞིན་གཤེགས་པའི་ཁམས་མར་གྱི་ཉིང་ཁུ་དང་འདྲ་བ་ཁྱབ་པར་འདུག་གོ །གསོལ་པ། བཅོམ་ལྡན་འདས་ཀྱིས་ཀུ་
ཤིའི་གྲོང་ཁྱེར་འདི་ན་གནས་པའི་གདོལ་པ་འཇིག་རྟེན་གྱི་ཁམས་འདིར་སངས་རྒྱས་སྟོང་དང་ལྷན་ཅིག་ཏུ་དེ་དག་གི་ནང་དུ་དེ་བཞིན་གཤེགས་པ་གཅིག་ཏུ་གྱུར་ཏེ་དེ་བཞིན་གཤེགས་
པ་རབ་ཏུ་དགའ་བ་ཞེས་བྱ་བར་འགྱུར་ཏེ། སེམས་བསྐྱེད་པ་གཅིག་ཁོ་ནས་དུས་འདི་སྲིད་ཅིག་ན་མྱུར་དུ་སངས་རྒྱས་སུ་འགྱུར་རོ། །ཞེས་སངས་རྒྱས་སུ་ལུང་བསྟན་པས་ལུང་བསྟན་
ལགས་ན། ཅིའི་སླད་དུ་ཤཱ་རིའི་བུ་དང༌། མཽངྒལ་གྱི་བུ་གཉིས་ཆེས་མྱུར་དུ་སངས་རྒྱས་སུ་འགྱུར་བས་སངས་རྒྱས་སུ་འགྱུར་རོ། །ཞེས་སངས་རྒྱས་སུ་ལུང་བསྟན་པས་ལུང་བསྟན་
དང༌། རང་སངས་རྒྱས་དང༌། བྱང་ཆུབ་སེམས་དཔའ་ཁ་ཅིག་དམ་པའི་ཆོས་དབྱུང་བའི་ཕྱིར་ཡུན་རིང་པོར་སྨོན་ལམ་འདེབས་པའང་ཡོད། ཁ་ཅིག་ནི། མྱུར་བར་སྨོན་ལམ་འདེབས་
པའང་ཡོད་དེ། ང་ནི། དེའི་སྨོན་ལམ་གྱི་དབང་གིས་ན། ཆེས་མྱུར་བར་སངས་རྒྱས་ཀྱི་གནས་མཆོག་ཏུ་ལུང་སྟོན་པར་བྱེད་དོ། །རིགས་ཀྱི་བུ། གཞན་ཡང་མཉན་པ་ཆེན་པོ་ལ་ལ་ཞིག་
གདོལ་བའི་གྲོང་ཁྱེར་དུ་སོང་སྟེ་རིན་པོ་ཆེ་རིན་ཐང་མེད་པ་ཚོང་བ་ལས་གདོལ་པ་བྱེ་བྲག་མི་ཕྱེད་པ་དེ་དག་གིས་རིན་པོ་ཆེ་དེ་མཐོང་ན་འཕྱས་འདོགས་ཤིང་འཐིང་སླད་བྱེད་དེ། མཉན་
༄༅། །པས་རིན་ཆེ་བ་ཡིན་ནོ། །ཞེས་བྱས་ཀྱང་དེ་དག་གི་བརྡ་མི་ཕྲད་ནས་འདི་ནི། ཤེལ་ཡིན་ནོ། །ཞེས་དེ་སྐད་ཟེར་རོ། །རིགས་ཀྱི་བུ། དེ་བཞིན་དུ་ངས་ཀྱང་ཉན་
ཐོས་རྣམས་གལ་ཏེ་སངས་རྒྱས་ཀྱི་གནས་སུ་མྱུར་དུ་སངས་རྒྱས་སུ་ལུང་བསྟན་པས་ལུང་བསྟན་དུ་ཟིན་ཀྱང་ནོར་བུ་དཀོན་པ་ཚོང་བའི་མཉན་པ་བཞིན་དུ་འགྱུར་རོ། །གདོལ་པ་རྣམས་
ལྟ་བུ་ནི། མ་འོངས་པའི་དུས་ན་དགེ་སྦྱོང་བླུན་པོ། གཡེལ་བ། དགེ་བའི་རྩ་བ་སྤངས་པ། འཚོ་བས་ཕོངས་པ། བཀྲེས་ཤིང་སྐོམ་པས་གཟིར་བ། མུ་གེས་མནར་བ། རང་གི་
ལུས་ཙམ་གསོ་བར་བྱེད་པ། འཚོ་བ་དོན་དུ་གཉེར་བ། མི་བརྟན་པ་རྣམས་འབྱུང་བར་འགྱུར་བ་དེ་དག་ཡིན་ཏེ། དེ་དག་གིས་ངའི་ཉན་ཐོས་ལུང་བསྟན་པ་ཐོས་ན་འཕྱས་འདོགས་
ཤིང་གཤེ་བར་འགྱུར་ལ། བརྡ་མི་ཕྲད་ནས་ཚུལ་ཁྲིམས་འཆལ་པ་ཡིན་ནོ། །ཞེས་བླ་བར་བྱེད་དོ། །ངའི་ཉན་ཐོས་དེ་དག་ནི། དགེ་སྦྱོང་མ་ཡིན་ཏེ། །གདོལ་བ་རྣམས་དང༌། མཉན་
པ་ཇི་ལྟ་བ་བཞིན་ནོ། །རིགས་ཀྱི་བུ། དེ་བས་ན། ང་ནི། སེམས་ཅན་མྱུར་བའི་སྨོན་ལམ་ཅན་རྣམས་ནི། སངས་རྒྱས་སུ་ལུང་སྟོན་པར་བྱེད་དོ། །དམ་པའི་ཆོས་དབྱུང་བའི་སྦྱོར་བ་
ཅན་དེ་དག་ནི། ཇི་ལྟར་འདོད་པ་བཞིན་དུ་ཡུན་རིང་པོ་ཞིག་གིས་སངས་རྒྱས་ཀྱི་གནས་སུ་ལུང་སྟོན་པར་བྱེད་དོ། །གསོལ་པ། ཇི་ལྟར་ན། བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་གཡོག་འཁོར་མི་ཕྱེད་པ་དང་ལྡན་པར་འགྱུར་ལགས། བཀའ་སྩལ་པ། བྱང་ཆུབ་སེམས་དཔའ་མི་མཆོག་རྣམས་ནི། དམ་པའི་ཆོས་དབྱུང་བར་བྱའོ་སྙམ་དུ་དེའི་
སྦྱོར་བ་བརྟན་པོར་བྱས་ན། གཡོག་འཁོར་མི་ཕྱེད་པ་དང་ལྡན་པར་འགྱུར་རོ། །གསོལ་པ། སེམས་ཅན་མ་རུངས་པ། འཇིགས་སུ་རུང་བ། ལྕེ་དང༌། རྐན་དང༌། ལྐོག་མ་ཚིག་པ་རྣམས་
ཅི་ལས་འགྱུར་ལགས། བཀའ་སྩལ་བ། གཞི་གསུམ་མི་ཤེས་པ་གང་ཡིན་པ་དེ་དག་ནི། སེམས་ཅན་མ་རུངས་པ། འཇིགས་སུ་རུང་བ། ལྕེ་དང༌། རྐན་དང༌། ལྐོག་མ་ཚིག་པར་
འགྱུར་རོ། །དཔེར་ན། མི་དང༌། དུད་འགྲོའི་ལྕེ་ཚིག་བ་རྣམས་ཀྱིས་རོ་དྲུག་སྟེ། མངར་བ་དང༌། སྐྱུར་བ་དང༌། ལན་ཚྭའི་རོ་དང༌། ཚ་བ་དང༌། ཁ་བ་དང༌། བསྐ་བ་རྣམས་ཟ་བ་ན་རོའི་བྱེ་བྲག་
མི་ཕྱེད་པ་དེ་བཞིན་དུ་སེམས་ཅན་མི་ཤེས་པ། ལྕེ་དང༌། རྐན་དང༌། ལྐོག་མ་ཚིག་པ། མ་རུངས་པ། འཇིགས་སུ་རུང་བ། གཞི་གསུམ་ཝྲྟག་པར་མི་ཤེས་པ་གང་ཡིན་པ་དེ་དག་ནི།
ལྕེ་དང༌། རྐན་དང༌། ལྐོག་མ་ཚིག་པ་ཞེས་བྱའོ། །རིགས་ཀྱི་བུ། གཞན་ཡང་དེ་བཞིན་གཤེགས་པ་རྟག་པར་མི་ཤེས་པ་གང་ཡིན་པ་དེ་དག་ནི། དམུས་ལོང་གི་མཆོག་ཡིན་
ནོ། །ཞེས་པ་ཟེར་རོ། །དེ་བཞིན་གཤེགས་པ་རྟག་པར་ཤེས་པ་གང་ཡིན་པ་དེ་དག་ནི། ཤའི་མིག་དང་ལྡན་པ་ཡིན་དུ་ཟིན་ཀྱང་ལྷའི་མིག་དང་ལྡན་པ་ཡིན་ནོ། །ཞེས་ང་ཟེར་རོ། །རིགས་
༄༅། །ཀྱི་བུ༑ གཞན་ཡང་མདོ་སྡེ་འདི་ཐོས་ནས་དེ་བཞིན་གཤེགས་པ་རྟག་པར་ཤེས་ཤིང་ཁོང་དུ་ཆུད་པ་གང་ཡིན་པ་དེ་དག་ནི། ལྷའི་མིག་དང་ལྡན་པ་ཡིན་ནོ། །
ཞེས་ང་ཟེར་རོ། །ལྷའི་མིག་དང་ལྡན་དུ་ཟིན་ཀྱང་དེ་བཞིན་གཤེགས་པ་རྟག་པར་མི་ཤེས་པ་གང་ཡིན་པ་དེ་དག་ནི། ཤའི་མིག་དང་ལྡན་པ་ཡིན་ནོ། །ཞེས་ང་ཟེར་རོ། །དེ་དག་ནི།
ད་དུང་བསྐལ་པ་བྱེ་བ་མང་པོར་ཡང་བདག་གི་མགོ་མཇུག་ཅི་འདྲ་བའང་མཐོང་བའམ། བསྟན་པར་མི་ནུས་ཏེ། དེ་བས་ན། དེ་དག་ནི། དེ་བཞིན་གཤེགས་པ་རྟག་པར་བསྒོམ་
པ་དང་བྲལ་བའི་ཕྱིར་ཤའི་མིག་དང་ལྡན་པ་ཞེས་ང་ཟེར་རོ། །རིགས་ཀྱི་བུ། གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། འཇིག་
རྟེན་ཐམས་ཅད་ཀྱི་ཕ་མ་ལྟ་བུ་ཡིན་ནོ། །ཅིའི་ཕྱིར་ཞེ་ན། སེམས་ཅན་རྐང་གཉིས་དང༌། རྐང་མང་ཐམས་ཅད་ལ་རང་རང་གི་ཡུལ་བཞིན་དུ་ཆོས་སྟོན་ཅིང་ཚིག་གཅིག་གིས་སེམས་
ཅན་ཐམས་ཅད་ཀྱིས་རང་རང་གི་ཡུལ་བཞིན་དུ་ཤེས་པར་འགྱུར་ཏེ། ཀྱེ་མ་བདག་ཅག་གི་རང་བཞིན་དང༌། འདུ་ཤེས་རྣམས་རྟོགས་པར་བྱ་བའི་ཕྱིར་ཆོས་སྟོན་ཏོ་སྙམ་དུ་
འཛིན་ཏོ། །རིགས་ཀྱི་བུ། གཞན་ཡང་དཔེར་ན། ཁྱིམ་བདག་གམ། ཚོང་དཔོན་ཡང་རུང་སྟེ། རང་གི་བུ་ཟླ་བ་བཅུ་དྲུག་ལོན་པ་དང་ལྷན་ཅིག་ཏུ་ལྐུག་པ་བཞིན་དུ་སྨྲ་བར་བྱེད་
དེ། དེའི་དབང་གིས་པུ་དེ་མིའི་སྐད་སློབ་པར་བྱེད་ན། ཅི་དེའི་ཕ་ལྐུག་པ་ཞེས་བྱའམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། བུ་དེའི་དབང་གིས་བགྱིད་པར་བལྟ་
ལགས་སོ། །བཀའ་སྩལ་པ། རིགས་ཀྱི་བུ། དེ་བཞིན་དུ་དེ་བཞིན་གཤེགས་པའང་ལྐུག་པ་བཞིན་དུ་གསུང་སྟེ། སེམས་ཅན་ཐམས་ཅད་དམ་པའི་ཆོས་ལ་དགོད་པའི་ཕྱིར་དེ་ལྟ་
བུའི་སྐུ་སྟོན་པར་མཛད་ན། ཅི་དེ་བཞིན་གཤེགས་པ་ལྐུག་པ་ཞེས་བྱའམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་བཞིན་གཤེགས་པ་ནི། རྟག་ཏུ་སེངྒེའི་སྒྲ་
སྒྲོག་པ་ལགས་ན། ལྐུག་པ་ལྟར་གསུང་བ་དེ་ནི། འཇིག་རྟེན་དང་མཐུན་པར་མཛད་པར་བལྟ་བར་བགྱི་ལགས་སོ། །དེ་ནས་དེའི་ཚེ་བཅོམ་ལྡན་འདས་ཉིད་ཀྱི་ཞལ་ནས་འོད་ཟེར་སྣ་
ཚོགས་བཀྱེ་སྟེ། འོད་ཟེར་དེ་དག་གིས་མགར་བའི་བུ་ཙུནད་ལ་ཕོག་ནས་ཀྱེ་མ་དེ་བཞིན་གཤེགས་པ་ལ་ཕྱིན་ཆད་དབུལ་དུ་མེད་པའི་སྦྱིན་པ་ནི། དཀོན་པ་ཡིན་ནོ་སྙམ་ནས་ཤིན་ཏུ་རིངས་
པར་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་ཆིམ་པར་འགྱུར་བའི་ཞལ་ཟས་ཁྱེར་ཏེ་རང་གི་འཁོར་རྣམས་དང་ལྷན་ཅིག་ཏུ་རིངས་པར་ཛམྦུ་ཆུ་ཀླུང་གི་གསེར་དྲི་མ་མེད་
པའི་སྣོད་དཀྱིལ་དུ་ནོར་བུའི་འབུར་མཐོན་པོ་འོད་ཅན་གྱིས་སྤྲས་པ་རྣམས་དང༌། ཁ་ཅིག་ནི། དངུལ་གྱི་སྣོད་རིན་པོ་ཆེ་སྣ་ཚོགས་ཀྱིས་སྦྲས་པ་རྣམས་ཞལ་ཟས་སྐྱུ་རུམ་སྣ་ཚོགས་དང་སྦྱར་
༄༅། །བས་བཀང་བ་དང༌། མཆོད་པའི་ཡོ་བྱད་མང་པོ་དག་ཁྱེར་ནས་གྲོང་ཁྱེར་གྱི་བར་ནས་བྱུང་སྟེ་བཅོམ་ལྡན་འདས་ག་ལ་བ་དེར་ཆས་སོ། །དེ་ནས་ལྷའི་བུ་མཐུ་ཆེན་པོ་དང་
ལྡན་པ་རྣམས་ཀྱིས་མགར་བའི་བུ་ཙུནད་བསྐོར་ནས་འདི་སྐད་ཅེས་སྨྲས་སོ། །ཙུནད། རེ་ཞིག་ཞལ་ཟས་མ་དབུལ་བར་དེ་བཞིན་གཤེགས་པ་ཐང་གཅིག་ཞོག་ཅིག་ཅེས་བྱས་སོ། །
དེ་ནས་ཡང་བཅོམ་ལྡན་འདས་ཀྱིས་ཉིད་ཀྱི་འོད་ཟེར་དག་བཀྱེ་སྟེ། འོད་ཟེར་དེ་དག་གིས་ལྷའི་བུ་རྣམས་ལ་ཕོག་ནས་ཙུནད་བཏང་ངོ༌། །དེ་ནས་ལྷ་ལ་སོགས་པ་དེར་འདུས་པ་གང་ཡིན་པ་
དེ་དག་ཐམས་ཅད་ཀྱིས་བཅོམ་ལྡན་འདས་ལ་མཆོད་པ་ཆེན་པོ་བྱས་ཏེ། ཙུནད་དང་ལྷན་ཅིག་ཏུ་བཅོམ་ལྡན་འདས་ཀྱི་ཐད་དུ་དོང་ནས་འདི་སྐད་ཅེས་གསོལ་ཏོ། །དགེ་སློང་རྣམས་
ཀྱིས་གདུགས་ཚོད་ལ་བབ་ན་གནང་བར་མཛད་དུ་གསོལ། དེ་ནས་དགེ་སློང་རྣམས་ཀྱིས་གདུགས་ཚོད་ལ་བབ་པར་ཤེས་ནས་སྤྱོད་ལམ་བཟང་པོར་བྱས་ཏེ་ལྷུང་བཟེད་ལག་ཏུ་
བླངས་ནས་སྡོད་དོ། །དེ་ནས་མགར་བའི་བུ་ཙུནྡས་སེངྒེའི་ཁྲི་སྣ་ཚོགས་ཚིག་ཏུ་བཟླས་སུའང་མི་ནུས་པ་འཇིག་རྟེན་གྱི་ཁམས་བདེ་བ་ཅན་གྱི་རྐྱེན་དུ་རུང་བ་ལྟ་བུ་དག་ཀྱང་བཤམས་
ཞལ་ཟས་ཀྱང་སྟ་གོན་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་བསྐལ་པའམ། བསྐལ་པ་ལས་ལྷག་པར་ཡང་ཡུན་རིང་དུ་བཞུགས་
སུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཙུནད། གལ་ཏེ་ང་ཡུན་རིང་དུ་འདུག་པར་འདོད་ན། སྦྱིན་པའི་ཕ་རོལ་ཏུ་ཕྱིན་པ་ཐ་མའི་དུས་ལ་བབ་ཀྱི། མྱུར་དུ་ཕུལ་ཅིག།
དེ་ནས་ལྷ་དང༌། མི་ཐམས་ཅད་དང༌། བྱང་ཆུབ་སེམས་དཔའ་རྣམས་ཀྱིས་འདི་སྐད་ཅེས་སྨྲས་སོ། །ཀྱེ་མ་ཙུནད་སྐྱིད་དེ་བ་འདིས་ཕུལ་བའི་ཞལ་ཟས་དེ་བཞིན་གཤེགས་པས་
གསོལ་བར་ཆད་པ་ལྟ། བདག་ཅག་ནི། དཔལ་ཡོན་མེད་དེ། བདག་ཅག་གིས་ཞལ་ཟས་སྟ་གོན་བྱས་པ་ནི། དོན་མེད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཉིད་ཀྱི་སྤུའི་
ཁུང་བུ་ཐམས་ཅད་ནས་བ་སྤུ་རེ་རེའི་ཁུང་བུ་ནས་ཀྱང་སངས་རྒྱས་རེ་རེ་མངོན་དུ་སྤྲུལ་ནས་དེར་འཁོར་རེ་རེའི་ནང་དུའང་དེ་བཞིན་གཤེགས་པ་རེ་རེའི་དགེ་སློང་གི་དགེ་འདུན་དང་
བཅས་པ་ཐམས་ཅད་བཤོས་གསོལ་བ་ལྟ་བུར་བསྟན་ཏོ། །དེ་བཞིན་གཤེགས་པ་ཉིད་ནི། ཙུནྡས་ཕུལ་བའི་ཞལ་ཟས་གསོལ་ལོ། །ཙུནྡས་འབྲས་སཱ་ལུ་ཡུལ་མ་ག་དྷའི་ན་ལི་ཏ་
བརྒྱད་ལས་ཞལ་ཟས་སྦྱར་བའང་དེ་བཞིན་གཤེགས་པའི་མཐུས་དགེ་སློང་གི་དགེ་འདུན་ཐམས་ཅད་ཞལ་ཟས་ཀྱིས་ཁྱེད་པར་མཛད་དོ། །དེ་ནས་ཙུནདའང་དགའ་བར་གྱུར་ཏེ། བདག་
གི་སྦྱིན་པ་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པས་གསོལ་ནས་ཡོངས་སུ་མྱ་ངན་ལས་འདས་པར་མཛད་དོ་སྙམ་མོ། །འཁོར་དེ་དག་ཐམས་ཅད་འདི་སྙམ་དུ་
༄༅། །སེམས་ཏེ། བདག་ཅག་གིས་ཕུལ་བའི་ཞལ་ཟས་དེ་བཞིན་གཤེགས་པས་བཞེས་ཀྱི། ཙུནདའི་མ་བཞེས་སོ། །བདག་ཅག་གིས་ཕུལ་བའི་ཞལ་ཟས་
གསོལ་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་མཛད་དོ་སྙམ་སྟེ་མཆོག་ཏུ་དགའ་བར་གྱུར་ཏོ། །འཁོར་ཆེན་པོ་དེ་ན་དེ་བཞིན་གཤེགས་པ་རྣམས་བཤོས་
གསོལ་ཞིང་བཞུགས་པའི་བར་མཚམས་སྙུང་བུའི་རྩེ་མོའི་ཁྱོན་ཙམ་གྱིས་མཆོད་པར་སྣང་ངོ༌། །ཁ་ཅིག་ནི། ཁབ་ཀྱི་རྩེ་མོ་ཁྱོན་ཙམ་གྱིས་ཕྱོགས་དག་ན་བཞུགས་ཤིང་ཞལ་ཟས་
དང༌། མཆོད་པ་རྣམས་འདྲ་བར་མངར་བར་སྣང་ངོ༌། །དེ་ནས་དེའི་ཚེ་ལྷ་དང་མི་དང་ལྷ་མ་ཡིན་དེ་དག་ངུ་ཞིང་ཆོ་ངེ་འདོན་པར་བྱེད་དེ། བདག་ཅག་གིས་སོ་སོ་ནས་ཕུལ་བའི་ཞལ་ཟས་
གསོལ་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ། །ཕྱིན་ཆད་བདག་ཅག་གིས་སུ་ལ་ཞལ་ཟས་དབུལ་བར་བྱ། བདག་ཅག་ནི། མགོན་དང་བྲལ་ཏེ་མགོན་མེད་པར་
འགྱུར་རོ། །ཞེས་འཛེར་ཏོ། །དེ་ནས་བཅོམ་ལྡན་འདས་ཀྱིས་འཁོར་དེ་དག་ཐམས་ཅད་ལ་ཚིགས་སུ་བཅད་པ་འདི་དག་གསུངས་སོ།། །།འཕགས་པ་ཡོངས་སུ་མྱ་ངན་ལས་
འདས་པ་ཐེག་པ་ཆེན་པོའི་མདོ། བམ་པོ་བཅུ་གསུམ་པ་སྟེ། ཐ་མ། སངས་རྒྱས་ཆོས་ཉིད་འདི་ཡིན་གྱི། །གདུང་ཞིང་ངུ་བར་མ་བྱེད་ཅིག །ང་ནི་མྱ་ངན་འདའ་བ་ན། །བསྐལ་པ་བྱེ་བ་ཟད་
པར་འགྱུར། །ང་ཡི་རྟག་བདེ་དམ་པ་ཡི། །མྱ་ངན་འདའ་བ་ང་ལས་ཉོན། །ང་ནི་ཁ་ཟས་མི་ཟ་སྟེ། །བྲུ་བ་ཚ་བ་ཡོང་གིས་མེད། །སེམས་ཅན་ཀུན་ལ་ཕན་བདེ་བའི། །རྗེས་སུ་ཡི་རང་ངས་བཤད་
ཀྱི༑ ༑ཐོས་ནས་ཡང་དག་རྫོགས་སངས་རྒྱས། །རྟག་པ་དེ་ཉིད་ཤེས་པར་གྱིས། །གང་ཚེ་འུག་པ་བྱ་རོག་རྣམས། །ཤིང་གཅིག་ལ་ནི་གནས་ནས་ཀྱང༌། །སྤུན་དང་བུ་དང་འདྲ་བར་ནི། །ཕན་ཆུན་
རྟག་ཏུ་ཚིམ་པར་བྱེད། །དེའི་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །
གང་ཚེ་སྦྲུལ་དང་ནེའུ་ལེ་དག །ཤིང་གཅིག་དྲུང་དུ་གནས་ནས་ཀྱང༌། །སྤུན་དང་བུ་དང་འདྲ་བར་ནི། །ཕན་ཚུན་རྟག་ཏུ་ཚིམ་པར་བྱེད། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་
པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །གང་ཚེ་སབ་ཏ་པར་ན་ཡི། །མེ་ཏོག་བར་ཤིའི་དྲིར་འགྱུར་ཞིང༌། །ཀ་ར་ཀ་ཡི་ཤིང་
རྣམས་ལས། །ཏེནྡུ་ཀ་ཡི་འབྲས་བུ་འབྱུང༌། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་
འདའ་བས་གྲོངས། །གང་ཚེ་སྡིག་ཅན་འདོད་ཆེན་པ། །བྱང་ཆུབ་མངོན་པར་རྫོགས་འཚང་རྒྱ། །མཆོག་ཏུ་བདེ་བ་ཐོབ་ནས་ཀྱང༌། །ཉེས་པ་ཐམས་ཅད་རྣམ་སྤངས་པ། །དེ་ཚེ་སྒྲ་གཅན་ཟིན་
༄༅། །བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །གང་ཚེ་སེམས་ཅན་ཐམས་
ཅད་ནི༑ ༑བསམ་པ་མཐུན་པར་གནས་གྱུར་ཏེ། །བྱང་ཆུབ་མཆོག་ཏུ་རྫོགས་སངས་རྒྱས། །ཉེས་པ་ཐམས་ཅད་རྣམ་སྤངས་པ། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་
སེམས་ཅན་གཟིགས། །སེམས་ཅན་ཀུན་གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །གང་ཚེ་སྦྲང་བུའི་གཅིན་ཙམ་གྱིས། །རྒྱ་མཚོ་བཞི་ཡི་མཐས་ཀླས་པ། །ནགས་
ཚལ་རི་རྣམས་བཅས་པ་ཡི། །ས་གཞི་ངོམས་པར་གྱུར་པ་ན། །དེ་ཚེ་སྒྲ་གཅན་ཟིན་བཞིན་དུ། །དེ་བཞིན་གཤེགས་པས་སེམས་ཅན་གཟིགས། །སེམས་ཅན་ཀུན་
གྱི་མཆོག་གྱུར་པ། །གཏན་དུ་མྱ་ངན་འདའ་བས་གྲོངས། །དེ་བས་ན། ཆོས་དང་ལྡན་པ། ཆོས་ལ་གུས་པ་ཁྱེད་མྱ་ངན་མ་བྱེད་ཅིག །མ་ངུ་ཞིག །དེ་བཞིན་གཤེགས་
པ་ནི༑ རང་ལ་དབང་ཡོད་ཀྱི། མི་རྟག་པའི་འདུ་ཤེས་མ་བྱེད་པར་རྟག་པ་དང༌། ཐེར་ཟུག་པ་དང༌། མཆོག་ཏུ་བརྟན་པ་ཡིན་པར་ཡང་དག་པར་ལྟོས་ཤིག །གཞི་གསུམ་རྟག་པའི་
གསང་སྔགས་ཀྱི་སྦ་བ་དང༌། སྲུང་བ་འདིས་བསྲུང་བར་གྱིས་ཤིག །གཞི་གསུམ་རྟག་པའི་གསང་སྔགས་ཀྱིས་ནི། གནམ་ལྕགས་ཀྱིས་ཚིག་པའི་ཤིང་རྣམས་ཀྱང་སྐྱེ་བར་
འགྱུར་ཏེ། ཡལ་ག་ཕྲེའུ་དང༌། སྦལ་མིག་བྱེ་བ་དང༌། ལོ་མ་ཁ་འབུས་པ་དང་ལྡན་པར་འགྱུར་རོ། །འཁོར་བཞི་པོ་ལས་གཞི་གསུམ་རྟག་པར་རྗེས་སུ་ཡི་རང་བའི་གཏམ་འདི་ཕན་ཚུན་
ཐོས་ན༑ བྱང་ཆུབ་ཀྱི་སེམས་བསྐྱེད་མི་དགོས་པར་འཛིན་ཀྱང་གཞི་གསུམ་མཆོག་ཏུ་རྟག་པའི་རྒྱུས་ན་བྱང་ཆུབ་ཀྱི་རྒྱུ་སྐྱེ་བར་འགྱུར་ཏེ། འདི་ནི། སངས་རྒྱས་ཀྱི་རྗེས་སུ་ཡི་རང་བ་ཞེས་
བྱའོ༑ ༑གཞི་གསུམ་རྟག་པ་ལས་བྱུང་བའི་རྗེས་སུ་ཡི་རང་བ་འདི་དགེ་སློང་ངམ། དགེ་སློང་མ་གང་དག་སེམས་ཅན་རྣམས་ལ་སྟོན་པར་བྱེད་པ་དེ་དག་ནི། ཡུལ་འཁོར་གྱི་བསོད་སྙོམས་
ཟ་བར་འོས་པ་ཡིན་ནོ། །གཅིག་ཤོས་དག་ནི། འོས་པ་མ་ཡིན་ནོ། །ཇི་ལྟར་རྗེས་སུ་ཡི་རང་བ་འདིས་གཏོལ་བ་དེ་འཇིག་རྟེན་ཐམས་ཅད་དུ་བདེ་བར་གྱུར་པའི་ཆོས་ཀྱི་བདེན་པ་དེས་ནི། དམ་
བའི་ཆོས་འདོད་པ་རྣམས་ལ་བགེགས་མེད་པ་དང༌། གནོད་པ་མེད་པར་གྱུར་ཅིག །དེ་ནས་ལྷ་དང༌། ལྷ་མ་ཡིན་དང༌། མི་དང་བཅས་པའི་འཇིག་རྟེན་གྱིས་དེ་བཞིན་གཤེགས་པ་རྟག་པར་
ཁོང་དུ་ཆུད་ནས་རབ་ཏུ་དགའ་བའི་སེམས་དང༌། དགེ་བའི་སེམས་དང༌། སྒྲིབ་པ་དང་བྲལ་བའི་སེམས་དང༌། གཞོལ་བ་མེད་པའི་སེམས་དང༌། པདྨ་ཁ་བྱེ་བ་ལྟ་བུའི་བཞིན་དང་ལྡན་པར་
གྱུར་ནས་ལྷའི་མཆོད་པ་ཆེན་པོའི་ལས་བྱས་ཏེ། མེ་ཏོག་དང༌། ཕྱེ་མ་དང༌། བདུག་པ་དང༌། སྤོས་ཀྱིས་བསྒོ་བ་ལ་སོགས་པ་གཏོར་ཏོ། །སིལ་སྙན་ལ་སོགས་པའང་དཀྲོལ་ཏོ། དེ་ནས་བཅོམ་
༄༅། །ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་ཆེན་པོ་དང་རུས་གཅིག་པ་ལ་བཀའ་སྩལ་པ། རིགས་ཀྱི་བུ། ཁྱོད་ཀྱིས་དེང་འདིར་ངོ་
མཚར་རྨད་དུ་བྱུང་བ་ཅི་མཐོང༌། གསོལ་པ། བཅོམ་ལྡན་འདས། བདག་གིས་སྔོན་ལན་འགའ་ཡང་མ་མཐོང་བའི་ངོ་མཚར་རྨད་དུ་བྱུང་བ་མཐོང་སྟེ། འཁོར་རེ་རེས་ཕུལ་བའི་
ཞལ་ཟས་དེ་བཞིན་གཤེགས་པ་རེ་རེ་དགེ་སློང་གི་དགེ་འདུན་དང་བཅས་པས་གསོལ་བ་མཐོང་བ་ལགས་སོ། །འཁོར་འདི་ན་སྙུང་བུའི་རྩེ་མོ་ཙམ་གྱིས་ཁྱོན་དག་ལའང་ཇི་ལྟར་
བཤམས་པའི་གདན་དག་ལ་དེ་བཞིན་གཤེགས་པ་སྐུ་ཆེན་པོ་དུ་མ་བདེ་བར་བཞུགས་ཏེ་རྗེས་སུ་ཡི་རང་བ་བཅུ་གསུམ་གྱི་ཚིགས་སུ་བཅད་པ་དག་སྟོན་ཅིང་བཞུགས་པ་མཐོང་
ལགས་སོ། །སེམས་ཅན་ཐམས་ཅད་ཀྱིས་ནི། སྒྱུ་འཕྲུལ་འདི་མ་འཚལ་ཏེ། བཅོམ་ལྡན་འདས་ནི། བདག་གིས་ཕུལ་བའི་ཞལ་ཟས་གསོལ་ཞིང་བཞུགས་སོ་སྙམ་དུ་འཛིན་
ལགས་སོ། །མི་མཆོག་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ལ་སོགས་པས་ནི། ཙུནྡས་དེ་ལྟར་འབྲས་སཱ་ལུ་ཡུལ་མ་ག་དྷའི་ན་ལི་ཀ་
བརྒྱད་ལས་ཞལ་ཟས་སྦྱར་བའང་རྡུལ་ཙམ་ཡང་དགེ་སློང་གི་དགེ་འདུན་གྱིས་མི་གསོལ་བ་དང༌། དེ་བཞིན་གཤེགས་པ་ཞལ་ཟས་མི་གསོལ་བའི་ཡ་མཚན་རྨད་དུ་བྱུང་བ་འདི་
ཡང་དག་པར་འཚལ་ཏེ། འདི་ནི། ཐབས་ཙམ་དུ་མཛད་པར་བས་སོ་སྙམ་དུ་སེམས་ལགས་སོ། །ཉན་ཐོས་ཀྱི་ཚོགས་རྣམས་ཀྱིས་ནི། ཀྱེ་མ་དེ་བཞིན་གཤེགས་པ་ནི། དཔག་ཏུ་མེད་
པ་དང༌། རྟག་པ་ལགས་སོ་སྙམ་དུ་མ་འཚལ་ལགས་སོ། །དེ་ནས་བཅོམ་ལྡན་འདས་ཀྱིས་མགར་བའི་བུ་ཙུནད་ལ་བཀའ་སྩལ་པ། ཙུནད། ཁྱོད་ཀྱིས་ངོ་མཚར་རྨད་དུ་བྱུང་བ་ཅི་མཐོང༌།
གསོལ་པ། བཅོམ་ལྡན་འདས། སྔར་ནི། དེ་བཞིན་གཤེགས་པ་ཡ་མཚན་གྱི་མཆོག་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུ་མངའ་བ་དུ་མ་མཐོང་བ་ལས། ད་ནི། རང་
རང་གིས་བསྒྱུར་ནས་འདི་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་པོ་དག་ཏུ་སྣང་ལགས་སོ། །དེ་བཞིན་གཤེགས་པ་ནི། དུག་སྨན་གྱི་སྡོང་པོ་ལྟ་བུའི་སྐུ་གཅིག་པུར་
གྱུར་ཏེ༑ བྱང་ཆུབ་སེམས་དཔའ་རྣམས་ཀྱིས་བསྐོར་བར་གདའ་ལགས་སོ། །བཀའ་སྩལ་པ། སངས་རྒྱས་སྔ་མ་གང་ཡིན་པ་དེ་དག་ནི། སེམས་ཅན་ཐམས་ཅད་ལ་ཕན་པ་དང༌། བདེ་
བ་དང༌། ཡིད་དགའ་བར་བྱ་བ་དང༌། བསོད་ནམས་མི་ཟད་པར་བྱ་བའི་ཕྱིར་སྤྲུལ་པ་ཡིན་ཏེ། སྒྱུ་འཕྲུལ་འདི་ནི། བྱང་ཆུབ་སེམས་དཔའ་རྣམས་མ་གཏོགས་པར་སེམས་ཅན་རྣམས་ཀྱིས་
མི་ཤེས་སོ། །དེ་ལྟར་ན། བྱང་ཆུབ་སེམས་དཔའི་སྤྱོད་པ་ནི། དཔག་ཏུ་མེད་དོ། །དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། དཔག་ཏུ་མེད་དོ། །བྱང་ཆུབ་སེམས་དཔའ་
༄༅། །མི་མཆོག་རྣམས་ལ་ནི། སངས་རྒྱས་ཀྱི་རྣམ་པར་འཕྲུལ་པའི་མཐུ་ཡོད་དོ། །མགར་བའི་བུ་ཙུནདའང་བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་ཐོབ་
པ་ཡིན་ཏེ། བྱང་ཆུབ་སེམས་དཔའ་རྣམས་ཀྱི་མཆོག་གི་མཐར་ཐུག་པ་ནི། དེ་ལྟ་བུ་ཡིན་ནོ། །འོད་སྲུང་ཆེན་པོ་དང་རུས་གཅིག་པས་གསོལ་པ། བཅོམ་ལྡན་འདས། དེ་ནི། དེ་
ལགས་ཏེ། བྱང་ཆུབ་སེམས་དཔའ་རྣམས་ཀྱི་ནང་ན་མི་མཆོག་ཙུནད་ལ་བདག་རྗེས་སུ་ཡི་རང་ལགས་སོ། །བཅོམ་ལྡན་འདས། ད་ནི། མདོ་སྡེ་རྣམས་བཤད་པའི་སླད་དུ་གནང་བ་
མཛད་པའི་རིགས་སོ། །བཅོམ་ལྡན་འདས། ཅི་ལགས། མདོ་སྡེ་ཐམས་ཅད་ལྷག་མ་མཆིས་པའི་དོན་ལགས་སམ། འོན་ཏེ་ལྷག་མ་མ་མཆིས་པའི་དོན་ལགས། བཀའ་སྩལ་པ།
ལྷག་མ་ཡོད་པའི་དོན་ཀྱང་ཡིན། ལྷག་མ་མེད་པའི་དོན་ཀྱང་ཡིན་ནོ། །གསོལ་པ། སྦྱིན་པ་ཀུན་ཏུ་བསྔགས་པ་ཡིན། །སྦྱིན་པ་གང་དུའང་སྨད་པ་མེད། ཅེས་བགྱི་བ་འདིར་ལྷག་
མ་མཆིས་པའི་དོན་དུ་ཇི་ལྟར་བཤད་ལགས། ཚིགས་སུ་བཅད་པའི་དོན་ནི། གང་ལགས། ཚུལ་ཁྲིམས་དང་ལྡན་པ་དང༌། ཚུལ་ཁྲིམས་འཆལ་བའི་བྱེ་བྲག་ནི། ཅི་མཆིས།
བཀའ་སྩལ་པ། གཅིག་མ་གཏོགས་པར་སྦྱིན་པ་ནི། ཐམས་ཅད་དུ་བསྔགས་སོ། །གསོལ་པ། མ་གཏོགས་པ་གང་ལགས། བཀའ་སྩལ་པ། མདོ་འདི་ལས་ཚུལ་ཁྲིམས་
འཆལ་བར་བརྩི་བ་གང་ཡིན་པའོ། །གསོལ་པ། བཅོམ་ལྡན་འདས། བཅོམ་ལྡན་འདས་ལ་དེང་བདག་འདི་ཁོ་ན་ཞུ་ལགས་ན། མྱུར་དུ་བཀའ་སྩལ་དུ་གསོལ། བཀའ་སྩལ་པ། འདོད་ཆེན་པ་མ་
གཏོགས་པར་སྦྱིན་པ་ནི། ཐམས་ཅད་དུ་བསྔགས་པ་ཡིན་ནོ། །གསོལ་པ། འདོད་ཆེན་པ་ཇི་ལྟ་བུ་ལགས། བཀའ་སྩལ་པ། དགེ་སློང་དམ། དགེ་སློང་མའམ། དགེ་བསྙེན་ནམ། དགེ་བསྙེན་
མའང་རུང་སྟེ། ཚིག་ངན་པས་མདོ་སྡེ་སྤངས་ནས་ཕྱིས་བཟོད་པ་གསོལ་བར་ཡང་མི་བྱེད་པ་དེ་ལྟ་བུ་གང་ཡིན་པ་དེ་ནི། འདོད་ཆེན་པའི་ལམ་དུ་ཞུགས་པ་ཡིན་ནོ། །ཕ་མ་པ་བཞི་བྱུང་བ་རྣམས་
དང༌། མཚམས་མེད་པ་ལྔ་བྱེད་བྱེད་པ་གང་ཡིན་པ་དེ་དག་ནི། བདག་ཅག་འཇིགས་པའི་གནས་སུ་ཞུགས་སོ་སྙམ་དུ་ཤེས་ཀྱང་འཇིགས་པར་མི་ལྟ་བ་དམ་པའི་ཆོས་ཀྱི་ཕྱོགས་ཀྱང་མི་འཛིན་
དམ་པའི་ཆོས་དབྱུང་ངོ་སྙམ་དུ་འབད་པར་ཡང་མི་བྱེད་ལ། དེ་ཉིད་ཀྱི་བསྔགས་པ་མ་ཡིན་པར་ཡང་རྗོད་པར་བྱེད་པ་དེ་དག་ཀྱང་འདོད་ཆེན་པའི་ལམ་དུ་ཞུགས་པ་ཡིན་ནོ། །སངས་རྒྱས་མེད་དོ། །
ཆོས་མེད་དོ། །དགེ་འདུན་མེད་དོ། །ཞེས་ཟེར་བ་གང་ཡིན་པ་དེ་དག་ཀྱང་འདོད་ཆེན་པའི་ལམ་དུ་ཞུགས་པ་ཡིན་ནོ། །ཞེས་ང་ཟེར་ཏོ། །འདོད་ཆེན་པོ་དེ་དག་མ་གཏོགས་པར་སྦྱིན་པ་ཐམས་ཅད་
དུ་བསྔགས་སོ། །གསོལ་པ། དེ་ལ་ཚུལ་ཁྲིམས་འཆལ་བ་ཞེས་བགྱི་བ་གང་དག་ལགས། བཀའ་སྩལ་པ། ཕམ་པ་བཞི་བྱེད་བྱེད་པ་རྣམས་དང༌། མཚམས་མེད་པ་ལྔ་བྱེད་བྱེད་པ་རྣམས་
༄༅། །དང༌། མདོ་སྡེ་སྤོང་བར་བྱེད་པ་དེ་དག་ཉིད་དོ། གསོལ་པ། བཅོམ་ལྡན་འདས། ཅི་ལགས། དེ་དག་རྟག་ཏུ་ཚུལ་ཁྲིམས་འཆལ་བ་ཁོ་ན་ལགས་སམ། བཀའ་སྩལ་
པ༑ འདི་ལ་རྒྱུ་ཡོད་དེ། དེས་ན་ཡེ་རྟག་པའང་ཡོད། ཡེ་མི་རྟག་པའང་ཡོད་དེ། གང་དག་གོས་ཆོན་ཅན་གྱི་རྟགས་ཅན་རྣམས་དང་ལྷན་ཅིག་ཏུ་མི་གནས་ཤིང༌། ཀྱེ་མ་བདག་ཅག་ནི། ཕམ་
པ་བྱུང་བ་ཡིན་ཏེ། བདག་ཅག་གིས་ཉེས་པ་བྱས་སོ་སྙམ་ནས་འཇིགས་པར་ལྟ་ལ། དེ་དག་དམ་པའི་ཆོས་དབྱུང་བར་བྱའོ་སྙམ་ནས་ཉམས་སུ་ལེན་པར་བྱེད་ཅིང་དམ་པའི་ཆོས་ཀྱི་
ཕྱོགས་འཛིན་པ་རྣམས་ཀྱི་བསྔགས་པ་བརྗོད་པར་བྱའོ། །ཆོས་མ་ཡིན་པའི་ཕྱོགས་རྣམས་ནི། ཚར་གཅད་པར་བྱའོ། །མཚུངས་པ་མེད་པའི་མདོ་སྡེ་རྣམས་ནི། གདོན་པར་བྱའོ་སྙམ་དུ་
བརྩོན་པར་བྱེད་པ་གང་ཡིན་པ་དེ་དག་ཚུལ་ཁྲིམས་འཆལ་བ་ཡིན་ནོ། །ཞེས་ང་མི་ཟེར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ། དཔེར་ན། ཉི་མ་ཤར་ན་ལྷོ་བུར་གྱི་རྡུལ་སངས་པར་འགྱུར་
བདེ་བཞིན་དུ་མདོ་སྡེ་ཆེན་པོའི་ཉི་མ་འདི་ཤར་བ་ན་དེ་ལྟར་སྒོམ་བྱེད་པའི་སེམས་ཅན་རྣམས་ཀྱི་སྡིག་པའི་ཕུང་པོ་གྲངས་མེད་པ་བྱས་པ་རྣམས་ཟད་པར་འགྱུར་ཏེ། དེ་ལྟར་ན། དམ་པའི་
ཆོས་འབྱིན་པ་ནི། འབྲས་བུ་ཆེ་བ་ཡིན་ནོ། །མཚམས་མེད་པ་བྱེད་བྱེད་པ་རྣམས་དང༌། མདོ་སྡེ་སྤོང་བ་གང་ཡིན་པ་དེ་དག་གལ་ཏེ་ཀྱེ་མ་བདག་ཅག་གིས་མདོ་སྡེ་སྤང་བ་བྱས་པ་འདི་
ནི། བདག་ཅག་བརླག་པར་འགྱུར་བ་ཡིན་ཏེ། ཉེས་པ་བྱས་སོ་སྙམ་དུ་འགྱོད་ཅིང་གདུང་བར་གྱུར་ནས་བདག་ཅག་གི་སྐྱབས་ནི། མདོ་སྡེ་ཉིད་ཡིན་ཏེ། འཁྲ་ས་གཞན་མ་མཐོང་ངོ་སྙམ་དུ་
སེམས་བསྐྱེད་པར་བྱེད་ན། དེ་དག་ནི། ཟླ་བ་ཕྱེད་དམ་ཟླ་བ་གཅིག་གམ། དུས་ཇི་སྲིད་ཀྱི་བར་དུ་མདོ་སྡེ་ལ་སྐྱབས་སུ་མ་སོང་བའི་བར་དུ་ནི། དེ་དག་ལ་བྱིན་པ་འབྲས་བུ་ཆུང་བར་འགྱུར་
རོ། །གང་གི་ཚེ་མདོ་སྡེ་ལ་སྐྱབས་སུ་སོང་བ་དེའི་ཚེ་ནི། དེ་དག་ཀྱང་ཡོན་གནས་སུ་འགྱུར་རོ། །གལ་ཏེ་མཚམས་མེད་པ་བྱེད་བྱེད་པའང་འགྱོད་དེ། ཀྱེ་མ་བདག་གིས་མི་རིགས་པ་བྱས་ཀྱི།
བདག་གིས་དམ་པའི་ཆོས་དབྱུང་བར་བྱའོ་སྙམ་དུ་སེམས་ན། དེའང་མཚམས་མེད་པ་བྱེད་བྱེད་པ་མ་ཡིན་པར་རིག་པར་བྱ་སྟེ། དེ་ལ་ནི། ཆུང་ངུ་ཞིག་བྱིན་ནའང་འབྲས་བུ་ཡོད་དོ། །མཆོག་
ཏུ་ཚུལ་ཁྲིམས་འཆལ་བ་གཅིག་ཤོས་དེ་དག་ལ་བྱིན་པ་ནི། འབྲས་བུ་ཆུང་ཟད་ཀྱང་མེད་དོ། །རིགས་ཀྱི་བུ། གཞན་ཡང་ཕམ་པ་བྱེད་བྱེད་པས་ཇི་ལྟར་བྱ་བ་ཉོན་ཅིག །ཕམ་པ་བྱེད་བྱེད་པས་
ནི། ཆོས་ཀྱི་དེ་ཁོ་ན་ཉིད་དེ་བཞིན་གཤེགས་པའི་སྙིང་པོ་ཁོང་དུ་ཆུད་པར་བྱས་ནས་དམ་པའི་ཆོས་དབྱུང་བར་བྱའོ་སྙམ་དུ་བསམ་ན། དེ་ལ་བྱིན་པའང་ཆོས་ཁྱད་པར་ཅན་དུ་འགྱུར་རོ། །
རིགས་ཀྱི་བུ། དཔེར་ན། བུད་མེད་སྦྲུམ་མ་ཞིག་ཡུལ་འཁྲུགས་ནས་ཡུལ་གཞན་དུ་སོང་སྟེ་ལྷ་གང་ཞིག་གི་ནང་དུ་བུ་ཁྱེའུ་ཞིག་བཙས་ཏེ། དེ་བདེ་བར་གྱུར་ནས་ཁྱེའུ་དེ་ཁྱེར་ཏེ་བདག་གི་
༄༅། །ཡུལ་ཞི་བར་གྱུར་པའི་འོག་ཏུ་དེ་ལོངས་སུ་ཆས་པ་ལས་ཆུ་ཀླུང་ཆེན་པོ་ཞིག་དང་ཕྲད་ནས་ཆུ་དེ་བརྒལ་བ་ན་བུ་དང་བཅས་ཏེ་ཆུའི་ནང་དུ་ཉམ་ཐག་པར་གྱུར་
ནས་བདག་ནི། ཤིའང་བླའི། ཁྱེའུ་འདི་ཐར་པར་བྱའོ་སྙམ་ནས་དེ་དེའི་དོན་དུ་འབད་པ་ལས་བུ་དང་ལྷན་ཅིག་ཏུ་ཤི་ན། སྔོན་མཆོག་ཏུ་འཇིགས་པའི་ལས་བྱས་སུ་ཟིན་ཀྱང་བུ་ལ་
བྱམས་ཤིང་ཐར་པར་བྱའོ་སྙམ་པའི་འབྲས་བུས་མཐོ་རིས་སུ་སྐྱེས་པ་དེ་བཞིན་དུ་ཕམ་པ་བྱེད་བྱེད་པ་དང༌། མཚམས་མེད་པ་བྱེད་བྱེད་པ་ལས་དམ་པའི་ཆོས་འབྱིན་པར་བྱེད་པ་དེ་
དག་ནི། སྔོན་སྡིག་པའི་ལས་བྱས་སུ་ཟིན་ཀྱང་དམ་པའི་ཆོས་འབྱིན་པའི་འབྲས་བུས་བུད་མེད་དེ་དང་འདྲ་བར་སེམས་ཅན་ཐམས་ཅད་ཀྱི་ཡོན་གནས་སུ་གྱུར་ཏེ། དམ་པའི་ཆོས་འབྱིན་
པའི་འབྲས་བུ་ནི། དེ་ལྟར་ཆེའོ། །གསོལ་པ། བཅོམ་ལྡན་འདས། འདོད་ཆེན་པར་ལྟུང་བར་གྱུར་པ་ལས་སླད་ཀྱིས་གཞི་གསུམ་ལ་འཆགས་པར་བགྱིད་ཅིང་བཟོད་པ་གསོལ་བར་བགྱིད་
ན། ཅི་ལགས། དེ་ལ་སྩལ་པའང་འབྲས་བུ་ཆེ་བར་འགྱུར་ལགས་སམ། བཀའ་སྩལ་པ། རིགས་ཀྱི་བུ། དེ་སྐད་མ་ཟེར་ཅིག །དཔེར་ན། མི་ལ་ལ་ཞིག་གིས་ཤིང་ཏོག་ཨ་མྲ་ཟོས་
ནས་རུས་པ་ས་ལ་བོར་བའི་འོག་ཏུ་དེས་འདི་སྙམ་དུ་བསམ་སྟེ་ནང་གི་ཚིག་གུ་ཞིམ་ཡང་དག་སྙམ་ནས་དེས་དེའི་ཕྱི་རོལ་གྱི་རུས་པ་བོར་ཏེ་ཚིག་གུ་ཟོས་པ་དང༌། དེས་དེའི་རོ་མི་ཞིམ་
པར་ཚོར་ནས་ཡང་པོར་རོ། །དེ་ནས་དེས་ཀྱི་ཧུད་བདག་གིས་ས་བོན་ངན་པ་མ་རུང་བར་བྱས་སོ་སྙམ་དུ་བསམ་ནས་ས་བོན་དེ་ཕྱིར་རུས་པའི་ནང་དུ་བཅུག་ནས་ས་བརྐོས་པའི་འོག་ཏུ་བཅུག་
སྟེ། འོ་མ་དང་མར་ཁུས་བླུགས་ལ་ཆར་ཆེན་པོ་རབ་ཏུ་ཟིན་ཀྱང་ས་བོན་ངན་པ་མ་རུངས་པར་བྱས་པ་སྐྱེ་བར་མི་འགྱུར་ཏེ། སྐྱེ་མི་སྲིད་དོ། །དེ་ནས་ས་བོན་འདི་ནི། མ་རུང་བར་བྱས་པ་ཡིན་
ཏེ། སྐྱེ་བར་མི་འགྱུར་རོ་སྙམ་ནས་ངལ་བར་གྱུར་ཏེ་ཅང་མི་ཟེར་བར་འདུག་པ་དེ་བཞིན་དུ་འདོད་ཆེན་པ་ལའང་ས་བོན་མེད་དེ། འདོད་ཆེན་པ་འཆགས་ཤིང་བཟོད་པ་གསོལ་བའི་སེམས་
བསྐྱེད་པ་ནི། མི་སྲིད་དོ། །དེ་བས་ན། འདོད་ཆེན་པ་དེ་ལྟ་བུ་ལ་ནི། ཐམས་ཅད་དུ་སྦྱིན་པ་འབྲས་བུ་ཆེ་བ་མ་ཡིན་ནོ། །དགྲ་བཅོམ་པ་རྣམས་ལ་ཕུལ་བའི་འབྲས་བུའང་ཐ་དད་དོ། །རང་
སངས་རྒྱས་རྣམས་ལ་ཕུལ་བའི་འབྲས་བུའང་ཐ་དད་དོ། །དེ་བཞིན་གཤེགས་པ་རྣམས་ལ་ཕུལ་བའི་འབྲས་བུའང་ཐ་དད་དོ། །དེ་བས་ན། ཐམས་ཅད་དུ་སྦྱིན་པའི་འབྲས་བུ་ཆེ་བ་མ་
ཡིན་ནོ། །གསོལ་པ། ཅིའི་སླད་དུ་བཅོམ་ལྡན་འདས་ཀྱིས་ཚིགས་སུ་བཅད་པ་འདིའི་དོན་རྣམ་པ་གཉིས་སུ་བཀའ་སྩལ་ལགས། བཀའ་སྩལ་པ། རྒྱུ་ལས་འགྱུར་ཏེ། སྔོན་རྒྱལ་
པོའི་ཁབ་ཀྱི་དགེ་བསྙེན་དད་པ་མེད་པ་གཅེར་བུ་པ་ལ་དགའ་བ་ཞིག་ཡོད་པ་དེས་ང་ལ་སྦྱིན་པ་བྱས་པ་ཅིར་འགྱུར་བ་དྲིས་པ་དེའི་ཚེ་དེ་དྲང་བའི་ཕྱིར་སྦྱིན་པ་ཀུན་ཏུ་བསྔགས་པ་ཡིན་
༄༅། །ཞེས་པའི་ཚིགས་སུ་བཅད་པ་དེ་དེ་ལ་བསྟན་ཏོ། །དེ་ནི། བྱང་ཆུབ་སེམས་དཔའ་རྣམས་ཀྱི་དོན་དུ་ཚིགས་སུ་བཅད་པའི་དོན་དགོངས་པའི་ཚིག་ཏུ་བསྟན་ཏེ་དུས་
ཐམས་ཅད་དུ་ཚིགས་སུ་བཅད་པའི་དོན་འདྲ་བར་བསྟན་པ་མ་ཡིན་ནོ། །ཐམས་ཅད་ཅེས་བྱ་བ་ནི། སྐབས་དང་སྦྱར་ཏེ་ཚིག་གི་ལྷག་མ་ཡོད་པར་རིག་པར་བྱའོ། །བྱང་ཆུབ་སེམས་
དཔའ་མི་མཆོག་གིས་ནི། ཚུལ་ཁྲིམས་འཆལ་བ་རྣམས་ཞིང་གི་རྔོ་བཞིན་དུ་ཚར་གཅད་པར་བྱའོ། །རིགས་ཀྱི་བུ། གཞན་ཡང་ངས་སྔོན་ཚིགས་སུ་བཅད་པ་འདི་བསྟན་ཏེ། འདི་
ལྟ་སྟེ། ཆུ་ཀླུང་ཆུ་ཀུན་གྱ་གྱུར་འབབ། །ནགས་ཚལ་ཀུན་ནི་ཤིང་ཉིད་ཡིན། །བུད་མེད་ཀུན་ལ་གཡོ་སྒྱུ་ཡོད། །དབང་ཕྱུག་ཐམས་ཅད་བདེ་བ་ཡིན། །བུད་མེད་རྣམས་ཀྱི་སེམས་ནི།
གཡོ་སྒྱུ་ཅན་དང༌། འཇིགས་སུ་རུང་བ་ཡིན་ནོ། །དེ་བས་ན། འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་
བཅོམ་ལྡན་འདས་ལ་སླར་ཚིགས་སུ་བཅད་དེ་གསོལ་པ། ཆུ་ཀུན་གྱ་གྱུར་འབབ་མ་ལགས། །ནགས་ཚལ་ཀུན་ཀྱང་ཤིང་མ་ལགས། །བུད་མེད་ཀུན་ལའང་གཡོ་མ་མཆིས། །
དབང་ཕྱུག་ཀུན་ཀྱང་བདེ་མ་ལགས། །དེ་བས་ན། བཅོམ་ལྡན་འདས་ཀྱིས་ཆོས་ཀྱི་སྒོ་དེ་སྐད་དུ་བཀའ་སྩལ་པ་དེ་ནི། ལེགས་པར་བཀའ་སྩལ་པ་མ་ལགས་ཏེ། འདི་ལ་རྒྱུ་ཅི་
མཆིས་པ་བཀའ་སྩལ་འཚལ་ལགས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གླིང་ཐ་དད་པ་ནུབ་ཀྱི་བ་ལང་སྤྱོད་ཅེས་བགྱི་བ་མཆིས་ཏེ། དེ་ན་ཆུ་ཀླུང་གི་མིང་དྲང་པོར་
འབབ་ཅེས་བགྱི་བ་ཤིང་མཁན་གྱི་ཐིག་སྐུད་བཞིན་དུ་ནུབ་ཕྱོགས་ཀྱི་རྒྱ་མཚོ་ནས་ཤར་ཕྱོགས་ཀྱི་རྒྱ་མཚོར་དྲང་པོར་འབབ་པ་ཞིག་མཆིས་ལ། ཐམས་ཅད་ཅེས་བགྱི་བ་ནི། ཤིན་ཏུ་རྒྱས་
པའི་ལུང་ལས་ལྷག་མ་ཡོད་པའི་དོན་ལགས་པར་བཅོམ་ལྡན་འདས་ཀྱིས་བཀའ་སྩལ་ན། ཆུ་ཀླུང་དྲང་པོར་འབབ་ཅེས་བགྱི་བ་དེ་ཤིན་ཏུ་རྒྱས་པའི་ལུང་གི་མདོ་གང་ལས་བཤད་པ་བཅོམ་
ལྡན་འདས་བདེན་པ་སྲུང་བས་བཀའ་སྩལ་དུ་གསོ། །དཔེར་ན། ནོར་གྱི་འབྱུང་ཁུངས་ཀྱི་རྒྱུས་མཁན་འབྱུང་ཁུངས་ལ་མི་མཁན་པ་ཞིག་གིས་དེ་ཁོ་ན་ན་གསེར་མཆོས་བཞིན་དུ་འདི་
ན་གསེར་མ་མཆིས་སོ། །ཞེས་མཆི་བས་ནི། གནས་ཀྱི་ཕྱོགས་ཆའི་བྱེ་བྲག་ཙམ་ཉི་ཚེ་ཤེས་པར་བགྱི་འཚལ་ལགས་སོ། །ནགས་ཚལ་ཀུན་ནི་ཤིང་ཉིད་ཡིན། །ཞེས་བགྱི་བ་ནི། ལྷག་
མ་ཡོད་པའི་དོན་ལགས་ལ། ནགས་ཚལ་ནི། རྣམ་པ་མང་དུ་མཆིས་ཏེ། འདི་ལྟ་སྟེ། གསེར་དང༌། བཻཌཱུཪྻའི་ནགས་ཚལ་ཡང་མཆིས་ལགས་སོ། །དེ་བཞིན་དུ། བུད་མེད་ཀུན་ལ་གཡོ་
སྒྱུ་ཡོད། །ཅེས་བགྱི་བ་དེའང་ལྷག་མ་ཡོད་པའི་དོན་ལགས་ཏེ། བུད་མེད་ལའང་ཚུལ་ཁྲིམས་དང་ལྡན་པ་དང༌། འདོད་ཆགས་དང་བྲལ་བ་དང༌། སེར་སྣ་མ་མཆིས་པ་དུ་མ་མཆིས་
༄༅། །ལགས་སོ། །དབང་ཕྱུག་ཐམས་ཅད་བདེ་བ་ཡིན། །ཞེས་བགྱི་བ་དེའང་ལྷག་མ་ཡོད་པའི་དོན་ལགས་ཏེ། དབང་ཕྱུག་ཅེས་བགྱི་བ་ནི། འཁོར་ལོས་བསྒྱུར་
བའི་རྒྱལ་པོ་དང༌། སངས་རྒྱས་རྣམས་དབང་ཕྱུག་གི་མཆོག་ལགས་མོད་ཀྱི། དེ་དག་ཀྱང་འཆི་འཕོའི་དབང་དུ་འགྱུར་ཞིང་ཟད་པའི་ཆོས་ཅན་ལགས་ལ། ཚངས་པའི་དབང་
ཕྱུག་འདི་དག་ཀྱང་ལྷུང་བའི་ཆོས་ཅན་ལགས་ཏེ། དེ་བས་ན། དེ་དག་ནི། དབང་ཕྱུག་མ་ལགས་ཞེས་བདག་མཆིས་ལགས་སོ། །རྟག་པ་དང་བརྟན་པའི་དབང་ཕྱུག་གང་
ལགས་པ་དེ་ནི། མྱ་ངན་ལས་འདས་པ་མཆོག་ཏུ་བདེ་བའི་དབང་ཕྱུག་ལགས་སོ། །བཀའ་སྩལ་པ། འཇམ་དཔལ། དཔེར་ན། སྨན་པ་ཞིག་གིས་ཁྱིམ་བདག་གི་བུ་ཞིག་
གི་ནད་གསོ་བར་བྱེད་དེ་སྨན་མར་བསྐོལ་ནས་དེ་འཐུང་དུ་བཅུག་ཕ་ན་ནད་པ་དེ་མར་མང་དུ་འཐུང་བར་རྩོལ་ལོ། །དེ་ནས་སྨན་བ་དེས་དེ་ལ་སྨྲས་པ། ཉམ་སྟོབས་དང་ལྡན་པས་
ནི། མར་མང་དུ་བཏུང་བར་བརྩལ་ཀྱང་དེས་འཇུ་བར་ནུས་ཀྱི། ཁྱོད་ནི། ཉམ་སྟོབས་མེད་པས་མར་ཧ་ཅང་མང་དུ་མ་འཐུང་ཞིག། །མར་ནི། ནད་སེལ་བའང་ཡིན་མོད་ཀྱི། མང་དུ་
འཐུངས་ན། དེ་ཉིད་ཀྱིས་ཁྱོད་ཡེ་འབྲོག་ཏུ་འཆི་བར་འགྱུར་རོ། །ཞེས་བྱས་ན། ཅི་སྨན་པ་ཕན་པར་འདོད་ཅིང་སྙིང་བརྩེ་བ་དེས་ཡང་དག་པའི་དོན་དེ་མ་རུང་བར་བྱས་པ་ཡིན་ནམ། དེ་
བཞིན་དུ་སངས་རྒྱས་བཅོམ་ལྡན་འདས་ཀྱིས་ཀྱང་རྒྱལ་པོ་དང༌། བློན་པོ་དང༌། བཙུན་མོ་རྣམས་ཀྱི་ང་རྒྱལ་བསལ་བ་དང༌། ཀོ་ས་ལའི་རྒྱལ་པོ་གསལ་རྒྱལ་གྱི་བཙུན་མོ་རྣམས་གཞན་དང་
གཡེམ་པ་ལ་འཇིགས་པ་དང༌། སྐྱོ་བ་བསྐྱེད་པའི་ཕྱིར་སྨན་པ་བཞིན་དུ་དེ་བཞིན་གཤེགས་པས་རྒྱལ་པོ་གསལ་རྒྱལ་ལས་བརྩམས་ནས། ཆུ་ཀླུང་ཆུ་ནི་གྱ་གྱུར་འབབ། །ཅེས་ཚིགས་སུ་
བཅད་པ་འདི་བཀའ་སྩལ་ཏེ། ཆུ་ཀླུང་གྱ་གྱུར་འབབ་ཅེས་བྱ་བ་ལ་དེ་བཞིན་གཤེགས་པ་འཁྲུལ་པ་མེད་དོ། །གང་གི་ཚེ་འཁྲུལ་བ་ཞིག་ཏུ་གྱུར་ན། གནམ་ས་ལོག་པར་འགྱུར་རོ། །དེ་
བས་ན། ཐམས་ཅད་སྨོས་ཏེ་གསུངས་པ་ནི། ལྷག་མ་ཡོད་པའང་ལྷག་མ་མེད་པ་དང་འདྲ་བར་གསུངས་སོ། །འཇམ་དཔལ། བྱང་ཆུབ་སེམས་དཔའི་ཁྱུ་མཆོག་དམ་པ་ཁྱོད་ཀྱིས་སེམས་
ཅན་ཐམས་ཅད་ལ་ཕན་པའི་ཕྱིར་ཤེས་རབ་རྒྱས་པར་བྱ་བ་འདི་ལེགས་སོ། །ལེགས་སོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་ཡང་ཚིགས་སུ་བཅད་དེ་གསོལ་
པ། བདག་གིས་བྱས་དང་མ་བྱས་རྣམས། །བརྟག་པར་བྱ་ཡི་གཞན་དག་གི། བྱས་དང་མ་བྱས་རྣམས་དང་ནི། གཞན་གྱི་མི་མཐུན་བརྟག་མི་བྱ། །ཞེས་བཅོམ་ལྡན་འདས་དེ་བཞིན་གཤེགས་
པས་ཆོས་ཀྱི་སྒོ་དེ་སྐད་དུ་བཀའ་སྩལ་པ་ནི། ལེགས་པར་བཀའ་སྩལ་པ་མ་ལགས་ཏེ། འདི་ལ་ཅིའི་སླད་དུ། དེ་སྐད་ཅེས་བཀའ་སྩལ་བའི་རྒྱུ་བཀའ་སྩལ་འཚལ་ལགས་སོ། །
༄༅། །བཅོམ་ལྡན་འདས་ཀྱིས་གསུང་རབ་ཡན་ལག་དགུ་ལས་འདི་ན་གཅེར་བུ་བ་སེམས་ཅན་དམྱལ་བ་ཐམས་ཅད་དང༌། ཡ་མཚན་ཅན་དགུ་བཅུ་རྩ་དྲུག་པོ་རྣམས་
ལ་ནི༑ ལམ་ངན་པར་ཞུགས་པ་ཡིན་ནོ། །སངས་རྒྱས་ཀྱི་སྲས་ཐམས་ཅད་ནི། མྱ་ངན་ལས་འདས་པ་ལ་ཞུགས་པ་ཡིན་ནོ། །དྲང་པོ་དང༌། ཚུལ་ཁྲིམས་དང༌། ཆོ་ག་དང་ལྡན་པ་དང༌།
དབང་པོ་ཐུལ་བ་གང་ཡིན་པ་དེ་དག་ཐམས་ཅད་ནི། མཐོ་རིས་སུ་འགྲོ་བ་དང༌། ཆོས་ཀྱི་སྤྱོད་ཡུལ་ཅན་ཡིན་ནོ། །ཞེས་བདག་བསྟོད་པ་དང༌། གཞན་སྨོད་པ་དང༌། གཞུན་གཤུང་བ་བཀའ་
སྩལ་ཏེ། བཅོམ་ལྡན་འདས་ཀྱིས་དེ་ལྟར་གཞན་དང་མི་མཐུན་པ་རྣམས་ཀྱང་བཀའ་སྩལ་པ། གཞན་དག་དང་མི་མཐུན་པ་ཞེས་བགྱི་བའང་མ་ལགས་པ་དེ་ཅི་ལྟ་བུ་ལགས། དེ་
ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ངས། གཞན་གྱི་མི་མཐུན་བརྟག་མི་བྱ། །ཞེས་བསྟན་པ་དེ་གང་ལས་
ནི། བརྩམས། ཅིའི་ཕྱིར་ནི། བསྟན་ཅེ་ན། མ་སྐྱེས་དགྲ་ལས་བརྩམས་ནས་བསྟན་པ་ཡིན་ཏེ། སངས་རྒྱས་བཅོམ་ལྡན་འདས་ནི། རྒྱུ་མེད་པར་དོན་དང་འགལ་བ་སྟོན་པར་མི་མཛད་
ཀྱི། རྒྱུ་དང་བཅས། རྐྱེན་དང་བཅས་པར་སྟོན་པར་མཛད་དེ། སྔོན་མ་སྐྱེས་དགྲས་ཕ་བསད་ནས་ངའི་ཐད་དུ་འོངས་ནས་འདི་ལྟར་བརྙས་ཐབས་སུ་དྲི་བ་དྲིས་ཏེ། ཅི་ལགས། བཅོམ་
ལྡན་འདས་ཐམས་ཅད་མཁྱེན་པ་ལགས་སམ། འོན་ཏེ་ཐམས་ཅད་མཁྱེན་པ་མ་ལགས། གལ་ཏེ་ཐམས་ཅད་མཁྱེན་པ་ལགས་ན། ཅིའི་སླད་དུ་ལྷས་བྱིན་རབ་ཏུ་ཕྱུང་ལགས། དེ་ཚེ་རབས་
སྟོང་ཕྲག་མང་པོར་ཕྱི་བཞིན་འབྲང་ཞིང་གནོད་པ་བགྱིད་པར་གཟིགས་ན། ད་ལྟར་ཡང་རྒོལ་དུ་འོང་བར་ཐམས་ཅད་མཁྱེན་པ་ཁྱོད་ཀྱིས་ཇི་ལྟར་མ་གཟིགས་ཞེས་ཟེར་ནས་ངས་དེ་ལ་འདི་
སྐད་དུ། གཞན་དང་མི་མཐུན་བརྟག་མི་བྱ། །ཞེས་བྱ་བའི་ཚིགས་སུ་བཅད་པ་བསྟན་ཏོ། །ད་ནི། རྒྱལ་པོ་ཆེན་པོ་ཁྱོད་བདག་གིས་ཕ་བསད་དེ་མཚམས་མེད་པའི་ལས་ཀྱི་རབ་དུག་ཆེན་པོ་
བྱས་པ་དེ་སྦྱང་བར་གྱིས་ཤིག །རྒྱལ་པོ་གཞན་གྱི་ཉེས་པ་ལ་མ་རྟོག་པར་དེ་ལྟ་བུ་ཁོང་དུ་ཆུད་པར་གྱིས་ཤིག་ཅེས་བྱས་སོ། །གཞན་ཡང་མི་མཐུན་པ་བརྟག་པར་ཡང་བྱ་སྟེ། ཚུལ་ཁྲིམས་དང༌།
ཆོ་ག་ལ་བརྟེན་པ་གང་ཡིན་པ་དེ་དག་གི་སྐྱོན་བརྟག་པ་ལྷུར་བླང་བར་བྱ་སྟེ། དེ་ནི། སངས་རྒྱས་ཀྱི་བསྟན་པ་ཡིན་ནོ། །གཞན་གྱི་མི་མཐུན་པ་ལ་རྟོག་པ་རྣམས་ཀྱིས་ནི། བདག་དང༌།
གཞན་དག་གི་བྱས་པ་དང༌། མ་བྱས་པ་ནི། བདག་དང༌། གཞན་དག་གི་ཡིན་པར་ཤེས་པར་བྱའོ། །དེ་ལྟ་བུའི་ཚུལ་གྱིས་གཞན་གྱིས་བྱས་པ་རྟག་ཏུ་ཡང་དག་པར་མཐོང་བ་གང་ཡིན་
པ་དེ་དག་ནི། ངའི་ཉན་ཐོས་ཡིན་ནོ། །ཞེས་ང་ཟེར་རོ། །དེ་ནས་ཡང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །ཚད་པ་དག་གིས་ཐམས་ཅད་
༄༅། །སྐྲག །ཀུན་ལ་སྲོག་ནི་ཕངས་པ་ཡིན། །བདག་གི་ཉམས་ལས་དཔག་བྱ་ཞིང༌། །བརྡེག་པར་མི་བྱ་གསད་མི་བྱ། །དེ་ནས་བཅོམ་ལྡན་འདས་ལ་འཇམ་དཔལ་
གཞོན་ནུར་གྱུར་པས་འདི་སྐད་ཅེས་གསོལ་ཏོ། །ཆད་པས་ཐམས་ཅད་སྐྲག་མི་འགྱུར། །སྲོག་ཀྱང་ཀུན་ལ་ཕངས་མ་ལགས། །བདག་གི་ཉམས་ལས་དཔག་བགྱི་ཞིང༌། །ཐབས་
ཀྱིས་བགྱི་བ་རྟོགས་པར་བགྱི། །དེ་བས་ན། བཅོམ་ལྡན་འདས་ཀྱིས་ཆོས་ཀྱི་སྒོ་དེ་སྐད་དུ་བཀའ་སྩལ་བ་ནི། ལེགས་པར་བཀའ་སྩལ་བ་མ་ལགས་ཏེ། དགྲ་བཅོམ་དང་ནི་འཁོར་
ལོས་བསྒྱུར། །གླང་ཆེན་བུད་མེད་རིན་ཆེན་དང༌། །ཁྱིམ་བདག་རིན་ཆེན་རྟ་རྣམས་ནི། །གནོད་པ་ཅིས་ཀྱང་མི་ཚུགས་སོ། །འདི་རྣམས་ལ་ནི། ལྷ་དང༌། མི་དང༌། ལྷ་མ་ཡིན་དུ་བཅས་པའི་
འཇིག་རྟེན་ན་སུས་ཀྱང་གནོད་པ་བགྱིད་པའི་རྔོ་མི་ཐོགས་ཏེ། དགྲ་དྲག་ཤུལ་གྱི་སྟོབས་ཅན་རྣམས་ཀྱིས་ཀྱང་དེ་དག་ལ་གནོད་པས་ཚུགས་མི་སྲིད་ལགས་སོ། །དེ་དག་ནི། ལྷ་དང༌།
བདུད་དང༌། ཚངས་པ་རྣམས་ཀྱིས་ཀྱང་མི་འཇིགས་ལགས་སོ། །དེ་བས་ན། སེམས་ཅན་དེ་དག་ནི། ཅིས་ཀྱང་མི་ཚུགས་པ་ཞེས་བགྱི་ལགས་སོ། །གཡུལ་ངོར་གཅིག་ཏུ་དཔའ་བ་དང༌།
གཅིག་ཏུ་ཁྱིམ་ཐབ་ལ་མི་འཁྲུལ་བའི་ཆུང་མ་དང༌། སེངྒེ་དང༌། སིནྡུ་བའི་རྟ་ཅང་ཤེས་དང༌། དགེ་སློང་ཚུལ་ཁྲིམས་དང་ལྡན་པ་འདི་རྣམས་ནི། གནོད་པས་ཚུགས་པ་ལགས་ཀྱིས་ཀྱང་
ཅིས་ཀྱང་མི་འཇིགས་ལགས་སོ། །དེ་ལ། ཆད་པ་དག་གིས་ཐམས་ཅད་སྐྲག །ཅེས་བགྱི་བ་ནི། འདིར་ལྷག་མ་ཡོད་པའི་དོན་ལགས་པས་ན། མདོར་བསྡུས་པ་ལགས་སོ། །བདག་
གི་ཉམས་ལས་དཔག་བྱ་ཞིང༌། །ཞེས་བགྱི་བ་དེའང་ལྷག་མ་ཡོད་པའི་དོན་ལགས་ཏེ། དགྲ་བཅོམ་པ་རྣམས་ནི། བདག་དང་མི་མཉམ་མོ། །ཞེས་དེ་ལྟར་འཇིག་རྟེན་དུ་གྲགས་ལགས་
སོ༑ ༑གལ་ཏེ་དགྲ་བཅོམ་པ་རྣམས་ཀྱི་བདག་ཏུ་འདུ་ཤེས་པ་དང༌། དགྲ་བཅོམ་པ་རྣམས་ཀྱི་སྲོག་ཏུ་འདུ་ཤེས་པ་གསུངས་པ་ལགས་སོ། །ཞེས་དེ་ལྟ་བུའི་བློ་ཆུང་ངུ་རྣམས་ཀྱིས་ནི། དགྲ་
བཅོམ་པ་གནས་ངན་པར་བཞག་པ་ལགས་ཏེ། དེ་ལྟར་བགྱིས་པས་སྲོག་ཏུ་འདུ་ཤེས་པའི་ལྟ་བ་ངན་པས་རྨོངས་པའི་འབྲས་བུས་མྱུར་དུ་མནར་མེད་པར་སྐྱེ་བར་འགྱུར་ལགས་སོ། །
གཅིག་ཏུ་ན་གལ་ཏེ་དགྲ་བཅོམ་པ་རྣམས་གསད་པའི་སེམས་བསྐྱེད་དུ་ལགས་ཀྱང་སེམས་ཅན་དེ་དག་གིས་གསོད་པར་འགྱུར་མི་སྲིད་དེ། སེམས་ཅན་མང་པོ་ལོག་ཀྱང་དེ་དག་གསོད་
པའི་རྡོ་མི་ཐོགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྲོག་ཆགས་རྣམས་ལ་སྙིང་བརྩེ་བའི་ཕྱིར་བདག་དང་འདྲ་བར་བལྟའོ། །དགྲ་བཅོམ་པ་ནི། འཚེ་བ་མེད་པའི་
སྒོ་ནས་དཔག་ཏུ་མེད་པ་དང༌། མཚུངས་པ་མེད་པར་བལྟ་བར་བྱ་སྟེ། དེ་དག་ལ་གསད་པའི་སེམས་བསྐྱེད་པར་མི་བྱའོ། །དེ་ལྟར་ན། སངས་རྒྱས་ནི། རྒྱུ་མེད་པར་དོན་དང་འགལ་བ་མི་སྟོན་
༄༅། །ཏེ༑ ཚིགས་སུ་བཅད་པ་འདི་ནི། རྒྱལ་པོའི་ཁབ་ཀྱི་རི་དྭགས་ཀྱི་རྔོན་པ་ལས་བརྩམས་ནས་བསྟན་ཏེ། དེས་རི་དྭགས་བསད་ནས་ཤ་དང་ལྡན་པའི་ཟས་ཀྱི་སྦྱིན་
པ་ལ་ང་སྤྱན་དྲངས་ནས་ངས་ཀྱང་དེས་སྤྱན་དྲངས་པ་ལ་གནང་ནས་སྒྲ་གཅན་ཟིན་དང་འདྲ་བར་ལྟ་བའི་ཚུལ་གྱིས་ཚིགས་སུ་བཅད་པ་འདི་སྐད་ཅེས་བྱས་སོ། །ཆད་པ་དག་གིས་ཐམས་
ཅད་སྐྲག །ཀུན་ལ་སྲོག་ནི་ཕངས་པ་ཡིན། །བདག་གི་ཉམས་ལས་དཔག་བྱ་ཞིང༌། །བརྡེག་པར་མི་བྱ་གསད་མི་བྱ། །མིག་རྒྱང་རིང་དུ་ལྟོས་ལ་རིང་དུ་འཚོ་བར་གྱིས་ཤིག །འཚེ་
བ་མེད་པའི་རྟགས་ཀྱི་དོན་ཁོང་དུ་ཆུད་པར་གྱིས་ཤིག །བྱང་ཆུབ་སེམས་དཔའ་རྣམས་ཀྱི་ནང་ན་མིའི་ཁྱུ་མཆོག་འཇམ་དཔལ། ལེགས་སོ། །ལེགས་སོ། །སེམས་ཅན་ཐམས་ཅད་
ལ་ཕན་པའི་ཕྱིར་དགོངས་པའི་ཚིག་འདི་དྲིས་པ་དེ་ནི། ལེགས་སོ། །དེ་ནས་བཅོམ་ལྡན་འདས་འཇམ་དཔལ་གཞོན་ནུར་གྱུར་པས་ཚིགས་སུ་བཅད་པ་འདི་སྐད་ཅེས་གསོལ་
ཏོ༑ ༑མ་ལ་མཆོད་པའི་ཚུལ་གྱིས་ནི། །ཕ་མ་གཉིས་ལ་མཆོད་བགྱིས་ན། །བླ་མ་ལ་ཡང་གུས་གྱུར་ལ། །མནར་མེད་འཇིགས་པར་ཇི་ལྟར་མཆི། །དེ་ནས་བཅོམ་ལྡན་འདས་ཀྱིས་ཚིགས་སུ་
བཅད་དེ་འདི་སྐད་ཅེས་བཀའ་སྩལ་ཏེ། འདིར་ནི་སྲེད་པ་མ་ཞེས་བྱ། །གཏི་མུག་ལ་ནི་ཕ་ཞེས་བྱ། །ཆོས་འདི་གཉིས་ལ་གང་མཆོད་པ། །དེ་ནི་མནར་མེད་འཇིགས་པར་འགྲོ། །དེ་ནས་
བཅོམ་ལྡན་འདས་ཀྱིས་ཡང་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་པ་འདི་སྐད་ཅེས་བཀའ་སྩལ་ཏོ། །གཞན་གྱི་དབང་གྱུར་ཐམས་ཅད་སྡུག། རང་དབང་ཅན་ནི་ཐམས་
ཅད་བདེ། །ང་རྒྱལ་དབང་གྱུར་ཀུན་མི་ཟད། །དགའ་བ་ཐམས་ཅད་བཟང་བ་ཡིན། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་
འདས་ཀྱིས་ཆོས་ཀྱི་སྒོ་དེ་སྐད་དུ་བཀའ་སྩལ་བ་ནི། ལེགས་པར་བཀའ་སྩལ་བ་མ་ལགས་ཏེ། འདི་ན་ཁྱིམ་བདག་ལ་ལ་ཞིག་གིས་བདག་གི་བུ་བྱིས་པའི་སློབ་དཔོན་ལ་གཏད་ན། ཅི་ལགས་
ཁྱེའུ་དེ་གཞན་གྱི་དབང་དུ་གྱུར་པ་ཞེས་མི་བགྱི་ལགས་སམ། །དེ་ལ་གཞན་གྱི་དབང་དུ་གྱུར་བ་མ་ལགས་སོ། །ཞེས་བགྱིས་ནའང་དོན་དང་འགལ་བར་འགྱུར་ལ། དེ་ལ་རང་དབང་ཅན་ལགས་སོ། །
ཞེས་བགྱིས་ནའང་དོན་དང་འགལ་བར་འགྱུར་ཏེ། ཆོས་འདི་ནི། ཤིན་ཏུ་བརྟག་དཀའ་བ་ལགས་སོ། །འདི་ན་རྒྱལ་པོའི་བུ་ལ་ལ་བཅོས་སུ་མི་རུང་བར་གྱུར་ཏེ། དེ་ཅིའང་སློབ་མི་འཚལ་ནས་རང་
དགའ་དང་རང་ཉམ་དུ་འཁྱམས་པ་དེ་ལ་རང་དབང་ཅན་ཞེས་བགྱིས་ན་ནི། དོན་དང་ཚབས་ཚེར་འགལ་བར་འགྱུར་ལ། གཞན་གྱི་དབང་དུ་གྱུར་ཏོ། །ཞེས་བགྱིས་ན་ནི། དོན་དང་འགལ་བར་
མི་འགྱུར་ཏེ། ཆོས་འདི་ནི། ཤིན་ཏུ་བརྟག་དཀའ་བ་ལགས་སོ། །གཞན་གྱི་དབང་དུ་གྱུར་ཅེས་བགྱི་བའི་ཚིག་བླ་དྭགས་ནི། དེ་རང་དབང་དུ་གྱུར་ན། སྡིག་པ་བགྱིད་པ་དང་འགུམ་པར་
༄༅། །འགྱུར་བས་ན། བཀའ་སྩལ་བ་འདི་ནི། ལྷག་མ་ཡོད་པའི་དོན་ལགས་ཏེ། དེ་བས་ན། གཞན་གྱི་དབང་དུ་གྱུར་པ་ཐམས་ཅད་སྡུག་པའང་མ་ལགས་ལ། རང་དབང་
ཅན་ཐམས་ཅད་བདེ་བའང་མ་ལགས་སོ། །ང་རྒྱལ་དབང་གྱུར་ཀུན་མི་ཟད། །ཅེས་བགྱི་བ་དེའང་ལྷག་མ་ཡོད་པའི་དོན་ལགས་ཀྱི། །ང་རྒྱལ་གྱི་དབང་དུ་གྱུར་པ་ཀུན་མི་ཟད་པའང་མ་
ལགས་ཏེ། འདི་ན་ལ་ལ་ཞིག་ང་རྒྱལ་གྱི་དབང་གིས་རབ་ཏུ་བྱུང་ན། ཅི་ལགས། རབ་ཏུ་བྱུང་བ་དེ་ལ་ང་རྒྱལ་གྱི་དབང་དུ་གྱུར་པ་ཀུན་མི་ཟད་ཅེས་བགྱི་ལགས་སམ། དེ་ནི། ང་རྒྱལ་
མ་མཆིས་པ་དང༌། བསོད་ནམས་དང་ལྡན་པ་དང༌། ཚུལ་ཁྲིམས་དང་།ཆོ་ག་དང༌། ལྡན་པ་དང༌། དབང་པོ་བསྲུངས་པ་ལགས་ཏེ། དེ་བས་ན། ང་རྒྱལ་གྱི་དབང་དུ་གྱུར་པ་ཀུན་མི་ཟད་
པའང་མ་ལགས་སོ། །དགའ་བ་ཐམས་ཅད་བཟང་བ་ཡིན། །ཞེས་བགྱི་བ་དེའང་ལྷག་མ་ཡོད་པའི་དོན་ལགས་ཀྱི། དགའ་བ་ཐམས་ཅད་ཀྱང་བཟང་བ་མ་ལགས་ཏེ། བསྟན་པ་འདི་
ལ་ཕམ་པ་བྱུང་བ་རྣམས་གོས་ཚོན་ཅན་གྱི་རྟགས་ཅན་རྣམས་དང་ལྷན་ཅིག་འཁོད་པ་བདག་ཉིད་ཀྱིས་རུང་བར་མཐོང་ཡང་སེམས་ཅན་དམྱལ་བ་རྣམས་སུ་སྐྱེ་བར་འགྱུར་ཏེ། དེ་ལྟ་
བུ་དག་ལ་བཟང་ཞེས་བགྱིས་ན། དོན་དང་འགལ་བར་འགྱུར་ལགས་སོ། །ཕམ་པ་བྱེད་བྱེད་པ་དེ་དག་གོས་དཀར་པོ་གྱོན་དུ་འཇུག་པ་དེ་དག་ནི། བཟང་པོའི་མཆོག་དོན་རྒྱ་ཆེན་
པོ་བགྱིས་པ་ལགས་སོ། །ཕམ་པ་བགྱིས་པ་རྣམས་ནི། མི་བཟང་བ་ཞེས་བགྱི་སྟེ། དེ་དག་ཕུང་བར་བགྱིད་པ་དེ་དག་ནི། མི་བཟང་བ་ཞེས་བགྱིའོ། །དེ་བས་ན། དགའ་བ་ཐམས་ཅད་
བཟང་བ་མ་ལགས་ན། ལྷའི་ཡང་ལྷ་སངས་རྒྱས་དེ་བཞིན་གཤེགས་པས་ཅི་ལས་དགོངས་ཏེ་དེ་སྐད་ཅེས་བཀའ་སྩལ་ལགས། དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་
གྱུར་པ་ལ་འདི་སྐད་ཅེས་བཀའ་སྩལ་ཏོ། །སངས་རྒྱས་ནི། རྒྱུ་མེད་པའི་དོན་དང་འགལ་བར་མི་གསུང་གི། རྒྱུ་དང་བཅས། རྐྱེན་དང་བཅས་པར་གསུང་སྟེ། རྒྱལ་པོའི་ཁབ་ན་ཁྱིམ་བདག་
ཀོ་ཏ་ཀའི་བུ་མོ་རབ་བཟང་ཕའི་ཁྱིམ་དུ་སོང་ནས་རབ་ཏུ་འགྱུར་བའི་སེམས་སྐྱེས་ཏེ་དེ་བཞིན་གཤེགས་པའི་ཐད་དུ་སོང་ནས་བུད་མེད་དུ་གྱུར་པ་ནི། གཞན་གྱི་དབང་དུ་གྱུར་པ་ཡིན་ལ།
སྐྱེས་པར་གྱུར་པ་ནི། རང་དབང་ཅན་ཡིན་ནོ་སྙམ་དུ་བསམ་ནས་དེ་བཞིན་གཤེགས་པ་དང༌། ཆོས་དང༌། དགེ་སློང་གི་དགེ་འདུན་ལ་སྐྱབས་སུ་སོང་སྟེ། དེའི་རྟོག་པ་ཐུགས་སུ་ཆུད་ནས་བཅོམ་
ལྡན་འདས་ཀྱིས། །གཞན་གྱི་དབང་གྱུར་ཐམས་ཅད་སྡུག། ཅེས་ཚིགས་སུ་བཅད་པ་དེ་སྐད་གསུངས་སོ། །བྱང་ཆུབ་སེམས་དཔའ་རྣམས་ཀྱི་ནང་ན་མིའི་ཁྱུ་མཆོག་འཇམ་དཔལ།
ལེགས་སོ། །ལེགས་སོ། །སེམས་ཅན་ཐམས་ཅད་ལ་ཕན་པའི་ཕྱིར་དགོངས་པའི་ཚིག་[?] འདི་ང་ལ་ཞུས་པ་ལེགས་སོ། །དེ་ནས་བཅོམ་ལྡན་འདས་ཀྱིས་ཡང་འཇམ་དཔལ་གཞོན་ནུར་
༄༅། །གྱུར་པ་ལ་ཚིགས་སུ་བཅད་དེ་བཀའ་སྩལ་པ། ཐམས་ཅད་ཟས་ལ་བརྟེན་པ་ཡིན། །སེར་སྣ་མེད་པ་ཐམས་ཅད་གཡོ། ཟས་ཀྱི་ཉེས་པར་ནད་དུ་འགྱུར། །
ཚངས་པར་སྤྱོད་དང་འགྲོགས་ན་བདེ། །འཇམ་དཔལ་གྱིས་གསོལ་བ། བཅོམ་ལྡན་འདས། ཅི་ལགས། ཙུནདའི་སྦྱིན་པ་ཆེར་གསོལ་ནས་ཞལ་ཟས་ཀྱི་ཉེས་པས་བསྙེངས་ལགས་
སམ༑ དེ་ནས་བཅོམ་ལྡན་འདས་ཀྱིས་འཇམ་དཔལ་ལ་འདི་སྐད་ཅེས་བཀའ་སྩལ་ཏོ། །སེམས་ཅན་ཐམས་ཅད་ཀྱང་ཟས་ལ་བརྟེན་པ་མ་ཡིན་ནོ། །སེར་སྣ་མེད་པ་ཐམས་ཅད་ཀྱང་
གཡོ་བ་མ་ཡིན་ནོ། །ཐམས་ཅད་ལའང་ཟས་ཀྱི་ཉེས་པས་ནད་དུ་འགྱུར་བ་མ་ཡིན་ནོ། །ཆོས་སྤྱོད་པ་རྣམས་དང་འགྲོགས་སོ་ཅོག་ཀྱང་བདེ་བ་མ་ཡིན་ནོ། །འཇམ་དཔལ། གང་གི་
ཚེ་ཁྱོད་ནད་ཀྱིས་ཐེབས་པ་དེའི་ཚེ་ངའང་ནད་ཀྱིས་ཐེབས་སོ། །དགྲ་བཅོམ་དང་ནི་རང་སངས་རྒྱས། །བྱང་ཆུབ་སེམས་དཔའ་དེ་བཞིན་གཤེགས། །དེ་དག་རྟག་ཏུ་ཟས་མེད་དེ། །
དེ་ནི་སངས་རྒྱས་ཆོས་ཉིད་དོ། །དགྲ་བཅོམ་པ་རྣམས་དང༌། རང་སངས་རྒྱས་དང༌། བྱང་ཆུབ་སེམས་དཔའ་རྣམས་དང༌། དེ་བཞིན་གཤེགས་པ་རྣམས་ནི། ཞལ་ཟས་
ཀྱང་མི་གསོལ་ལ། སྦྱིན་པ་འབུམ་ཕྲག་མང་པོའང་བཞེས་པར་མཛད་དོ། །སྦྱིན་པ་བླང་བར་བྱ་བའི་གདམས་ངག་ཀང་སྟོན་པར་མཛད་དོ། །སེམས་ཅན་རྣམས་སེམས་ཅན་
དམྱལ་བ་དང༌། དུད་འགྲོ་དང༌། ཡི་དྭགས་ཀྱི་རྒྱ་མཚོ་ལས་ངེས་པར་བསྒྲལ་བའི་ཕྱིར་སྦྱིན་པའི་ཕ་རོལ་ཏུ་ཕྱིན་པ་བསྔགས་པར་ཡང་མཛད་ལ་གསོལ་བར་ཡང་མི་མཛད་དོ། །དེ་
བཞིན་གཤེགས་པ་ལོ་དྲུག་གི་བར་དུ་དཀའ་བ་སྤྱད་པས་ཉམ་ཆུང་བར་གྱུར་ཏོ། །ཞེས་སངས་རྒྱས་ལ་སེམས་ཅན་ཐམས་ཅད་དང་འདྲ་བར་བལྟ་བར་མི་བྱའོ། །འདོད་པའི་ཆུ་བོ་
ལས་བརྒལ་བ་དེ་དག་ནི། བརྟན་པོ་ཡིན་ཏེ། དཔའ་བོ་དེ་དག་ནི། མིའི་ཡུལ་ལ་སྤྱོད་པ་མ་ཡིན་ནོ། །དེ་བཞིན་དུ་ངའི་ཉན་ཐོས་རྣམས་ཀྱི་སྟོབས་དང༌། སྤྱོད་ཡུལ་ཡང་བསམ་གྱིས་མི་
ཁྱབ་བོ༑ ༑སེམས་ཅན་ཐམས་ཅད་ཟས་ལ་བརྟེན། །ཅེས་བྱ་བའང་ལྷག་མ་ཡོད་པའི་དོན་ཡིན་པར་ཤེས་པར་བྱའོ། །སེར་སྣ་མེད་པ་ཐམས་ཅད་གཡོ་བ་ཡིན་ཞེས་བྱ་བ་དེའང་ལྷག་མ་
ཡོད་པའི་དོན་ཡིན་ཏེ། བདག་ལ་སེར་སྣ་བྱེད་པ་མི་གཡོ་བའི་བདེ་བར་འགྲོ་བ་དམ་པ་འགའ་ཡང་ཡོད་དོ། །ཐམས་ཅད་ཟས་ཀྱི་ཉེས་པས་ནད་དུ་འགྱུར་ཞེས་བྱ་བ་དེའང་ལྷག་མ་ཡོད་
པའི་དོན་ཡིན་ཏེ། ཚེར་མས་ཟུག་པ་ལ་སོགས་པའི་ནད་གློ་བུར་དག་ཀྱང་ཡོད་དོ། །ཆོས་སྤྱོད་པ་རྣམས་དང་འགྲོགས་པ་ཐམས་ཅད་བདེ་ཞེས་བྱ་བ་དེའང་ལྷག་མ་ཡོད་པའི་དོན་
ཡིན་ཏེ། འཇིག་རྟེན་པ་རྣམས་ལའང་ཆོས་འཛིན་པ་རྣམས་དང་འཚམ་པའི་ཆོས་རྣམ་པ་མང་པོ་དག་ཡོད་དེ། དེ་དག་ལའང་བྱ་བ་སྣ་ཚོགས་ཡོད་མོད་ཀྱི་སྨྱུང་བ་རྣམ་པ་སྣ་ཚོགས་ཅན་
༄༅། །ལུས་ཉོན་མོངས་པ་དེ་དག་དང་གལ་ཏེ་ལ་ལ་ཞིག་འགྲོགས་པར་གྱུར་ན། ཅི་བདེ་བ་ལ་བརྟེན་པར་འགྱུར་རམ། དེ་ལྟ་ན་ནི། དོན་དང་འགལ་བར་འགྱུར་རོ།།
དེ་བས་ན། སངས་རྒྱས་ནི། རྒྱུ་མེད་པར་དོན་དང་འགལ་བ་སྟོན་པར་མི་མཛད་དེ། གདུལ་བར་བྱ་བའི་དབང་གིས་རྒྱུ་དང་བཅས། རྐྱེན་དང་བཅས་པར་སྟོན་པར་ཤེས་པར་གྱིས་
ཤིག །འཇིག་རྟེན་ལས་འདས་པའི་ཆོས་ནི། མཆོག་ཏུ་བདེ་བ་ཡིན་ནོ། །ཚིགས་སུ་བཅད་པ་འདི་ནི། གྲོང་ཁྱེར་གྱེན་དུ་རྒྱལ་ཞེས་བྱ་བའི་བྲམ་ཟེ་ལུག་དཔལ་ཞེས་བྱ་བ་ལས་
བརྩམས་ནས་བསྟན་པ་ཡིན་ཏེ། བྲམ་ཟེ་ལུག་དཔལ་ཞག་བཞི་པའི་སྨྱུང་བ་བྱེད་ཅིང་ངའི་ཐད་དུ་འོངས་ནས་ངས་དེའི་ཞག་བཞི་པའི་སྨྱུང་བའི་ལྟ་བ་བསལ་བའི་ཕྱིར་སེམས་
ཅན་ཐམས་ཅད་ཟས་ལ་བརྟེན་ཅེས་བྱ་བའི་ཚིགས་སུ་བཅད་པ་འདི་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་ཆེན་པོ་དང་
རུས་གཅིག་པས་འདི་སྐད་ཅེས་གསོལ་ཏོ། །བཅོམ་ལྡན་འདས། ཐམས་ཅད་མ་ལུས་པ་ཇི་ལྟ་བུ་ལགས། ཐམས་ཅད་ཅེས་བགྱི་བའང་ཇི་ལྟ་བུ་ལགས། བཀའ་སྩལ་
པ༑ མ་ལུས་པའི་དོན་ནི། དགེ་བའི་ཕྱོགས་ཐམས་ཅད་རྟག་པའོ། །བདེ་བའོ། །ཞེས་བྱ་བ་ལྟ་བུའོ། །དེ་ལྟར་ན། ཁ་ཅིག་ནི། ལྷག་མ་ཡོད་པའོ། །ཁ་ཅིག་ནི། ལྷག་མ་
མེད་པ་ཡིན་པར་ཆོས་འདོད་པའི་རིགས་ཀྱི་བུས་རིག་པར་བྱའོ། །གསོལ་པ། ཀྱེ་མ་དེ་བཞིན་གཤེགས་པ་ནི། སེམས་ཅན་ཐམས་ཅད་ལ་སྒྲ་གཅན་ཟིན་བཞིན་དུ་གཟིགས་
པ་ལགས་ཏེ། བདག་ཤིན་ཏུ་རངས་ལགས་སོ། །བཀའ་སྩལ་པ། རིགས་ཀྱི་བུ། ལེགས་སོ། །ལེགས་སོ། །དེ་ལྟར་ཆ་ཕྲ་བར་རྟག་དགོས་སོ། །གསོལ་པ། བཅོམ་ལྡན་འདས་
ད་ནི༑ ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོའི་བསོད་ནམས་ཇི་ལྟར་སྐྱེ་བ་བཀའ་སྩལ་དུ་གསོལ། །བཀའ་སྩལ་པ། སངས་རྒྱས་ཀྱི་ཡུལ་འདི་ནི། བསམ་
གྱིས་མི་ཁྱབ་པའི་ཕྱིར་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་མདོ་སྡེ་འདིའི་མིང་ཡང་ཚིག་ཙམ་དུའང་ཉན་པ་རྣམས་ལ་བརྗོད་པར་མི་ནུས་སོ། །དེ་ནས་བཅོམ་ལྡན་
འདས་ལ་ལྷ་དང༌། མི་དང༌། ལྷ་མ་ཡིན་རྣམས་ཀྱིས་ཚིག་མཐུན་པར་ཚིགས་སུ་བཅད་དེ་གསོལ་པ། སངས་རྒྱས་བསམ་ཡས་བསམ་ཡས་ཆོས་གསུང་བ། །ཆོས་དང་དགེ་འདུན་
རྟག་ཏུ་ཁྱོད་ལ་བརྟེན། །དེ་ཕྱིར་དགེ་སློང་འོད་སྲུང་ཀུན་དགའ་བོ། །མ་མཆིས་བར་དུ་མགོན་པོ་བཞུགས་པར་གསོལ། །བི་ཏེ་ཧ་ཡི་རྒྱལ་པོ་མ་སྐྱེས་དགྲ་།ཁྱོད་ཀྱི་མཛའ་མཆོག་
ཐུགས་འདྲ་ཆེ་བ་ཡང༌། །ད་དུང་མ་མཆིས་མཐར་ཐུག་ཁྱོད་མ་གཤེགས། །ཀུན་མཁྱེན་ཁྱོད་ཀྱིས་བདག་ཅག་ཐེ་ཚོམ་ཆོད། །དེ་ནས་བཅོམ་ལྡན་འདས་ཀྱིས་དེ་དག་ལ་འདི་སྐད་
༄༅། །ཅེས་བཀའ་སྩལ་ཏོ། །ང་ཡི་སྲས་མཆོག་ཐུ་བོ་འོད་སྲུང་དང༌། །བློ་ལྡན་ཀུན་དགའ་ཁྱོད་ཀྱི་ཐེ་ཙོམ་གཅོད། །ཁྱོད་ཀྱིས་ང་ཡི་ཞལ་ལྟོས་རྟག་པ་དང༌། །
མི་རྟག་ཤེས་བྱོས་མྱ་ངན་ལ་བྱེད་ཅིག །དེ་ནས་འཁོར་དེ་དག་ཐམས་ཅད་ཀྱིས་བཅོམ་ལྡན་འདས་ལ་མཆོད་པ་ཆེན་པོ་བྱས་ཏེ་བླ་ན་མེད་པ་ཡང་དག་པར་རྫོགས་པ་བྱང་
ཆུབ་ཏུ་སྨོན་ལམ་བཏབ་ནས་དེར་སེམས་ཅན་གངྒཱའི་ཀླུང་གཏམས་ཕྲག་དཀྲིགས་སྙེད་ཀྱི་བྱེ་མའི་གྲངས་སྙེད་ཀྱིས་སེམས་བསྐྱེད་ནས་བྱང་ཆུབ་སེམས་དཔའི་ས་དང་
པོའི་གནས་ཐོབ་བོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་དང༌། བྲམ་ཟེ་ཆེ་ཞིང་མཐོ་བ་འོད་སྲུང་ཆེན་པོ་དང་རུས་གཅིག་པ་ལ་བཀའ་སྩལ་
ཏེ༑ མགར་བའི་བུ་ཙུནད་བྱང་ཆུབ་ཏུ་དབང་བསྐུར་ནས་བྱང་ཆུབ་སེམས་དཔའ་དེ་གསུམ་ལ་བཀའ་སྩལ་པ། རིགས་ཀྱི་བུ་དག །བག་ཡོད་པར་གྱིས་ཤིག །བག་ཡོད་
པར་གྱིས་ཤིག །ང་རྐེད་པའི་ནད་དྲག་པོས་བཏབ་སྟེ། གཞོན་ནུ་དག །ང་རེ་ཞིག་ཐབས་ཀྱི་ནང་ཕོ་བྲང་དུ་ཉལ་བར་འདོད་ཀྱི། ཉལ་དུ་ཆུག་ཅིག །འཇམ་དཔལ། ཁྱོད་ཀྱིས་
འཁོར་ཐམས་ཅད་ལ་ཆོས་སྟོན་ཅིག །སེངྒེའི་སྒྲ་སྒྲོགས་ཤིག །གནས་བརྟན་འོད་སྲུང་ཆེན་པོ་དང༌། ཀུན་དགའ་བོ་གཉིས་མ་འོངས་པའི་བར་དུ་ངས་ཁྱོད་ལ་བསྟན་པ་
འདི་གཏད་ཀྱི། ནམ་འོངས་པ་ན་དེ་གཉིས་ལ་གཏོད་ཅིག་ཅེས་དེ་སྐད་བཀའ་སྩལ་ནས་བཅོམ་ལྡན་འདས་གདུལ་བར་བྱ་བའི་དབང་གིས་ནད་པའི་ཚུལ་དུ་བཞུགས་པར་བསྟན་ཏེ་
གཟིམས་ཁང་ལོགས་སུ་ཟུར་གྱིས་གཟིམས་སོ། །ཡོངས་སུ་མྱ་ངན་ལས་འདས་པ་ཆེན་པོའི་མདོ་ཆེན་པོ་དམ་པའི་ཆོས་གསུང་རབ་ཐམས་ཅད་ཀྱི་སྙིང་པོར་གྱུར་པ། རྒྱུད་ཕྱི་མ་ལྟ་
བུ་རྟོགས་པར་དཀའ་བའི་ཆོས་ཀྱི་འབྱུང་གནས། གཅིག་ཏུ་དེ་བཞིན་གཤེགས་པའི་སྙིང་པོ་སྟོན་པའི་མདོ་ལ་ལེའུ་ཉི་ཁྲི་ལྔ་སྟོང་ཡོད་པ་ལས། ལྷ་དང༌། མི་དང༌། ལྷ་མ་ཡིན་དང༌།
མིའམ་ཅི་དང༌། རིགས་སྔགས་འཆང་དང༌། སྲིན་པོ་ལ་སོགས་པ་འདུས་པས་ཞུས་པ་ཞེས་བྱ་བའི་ལེའུ་རྫོགས་སོ།། །།ཤླཽ་ཀ་སུམ་སྟོང་དགུ་བརྒྱ་མཆིས། རྒྱ་གར་
གྱི་མཁན་པོ་ཛི་ན་མི་ཏྲ་དང༌། ཛྙཱ་ན་གརྦྷ་དང༌། ཞུ་ཆེན་གྱི་ལོ་ཙཱ་བ་བནྡྷེ་དེ་བ་ཙནྡྲས་བསྒྱུར་ཏེ་གཏན་ལ་བབ་པ།
Copyright © 2012 by the Asian Classics Input Project. All rights reserved.