Tibetan Works reader

འཕགས་པ་བྱང་ཆུབ་སེམས་དཔའི་སྡེ་སྣོད་ཅེས་བྱ་བ་ཐེག་པ་ཆེན་པོའི་མདོ།

དཀོན་བརྩེགས།

ག checked, but not manually proofread ༄༅༅། །རྒྱ་གར་སྐད་དུ། ཨཱཪྻ་བོ་དྷི་སཏྭ་པི་ཊ་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་ སྐད་དུ༑ འཕགས་པ་བྱང་ཆུབ་སེམས་དཔའི་སྡེ་སྣོད་ཅེས་བྱ་བ། ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་དབྱར་གནས་ ༄༅༅། །སུ་གནས་ནས་ཟླ་བ་གསུམ་འདས་ཏེ་དགག་དབྱེ་མཛད་ནས་ཆོས་གོས་མཛད་དེ་ཆོས་གོས་ཟིན་ནས་དགེ་ སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་ལྗོངས་རྒྱུ་ཞིང་གཤེགས་ཏེ། བཅོམ་ལྡན་ འདས་ལ་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་དང༌། རྒྱལ་པོ་དང༌། བློན་པོ་དང༌། མུ་སྟེགས་ ཅན་སྣ་ཚོགས་དང༌། དགེ་སྦྱོང་དང༌། བྲམ་ཟེ་དང༌། ཁྱིམ་བདག་རྣམས་དང༌། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་ དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་རྣམས་ཀྱིས་བླ་མར་བྱས། བཀུར་སྟིར་བྱས། རི་མོར་བྱས། མཆོད་པར་བྱས་སོ། །བཅོམ་ལྡན་འདས་ཀྱིས་ཆོས་གོས་དང༌། ཞལ་ཟས་དང༌། མལ་སྟན་དང༌། ན་བའི་གསོས་སྨན་དང༌། ཡོ་བྱད་མང་པོ་ཡང་བརྙེས་སོ། །འདི་ལྟར་བཅོམ་ལྡན་འདས་དེ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་པ། བླ་ན་མེད་ པ༑ ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡིན་ཏེ། དེས་ལྷར་བཅས་པ་དང༌། བདུད་དུ་བཅས་པ་དང༌། ཚངས་པར་ བཅས་པ་དང༌། དགེ་སྦྱོང་དང༌། བྲམ་ཟེར་བཅས་པའི་སྐྱེ་རྒུའི་འཇིག་རྟེན་འདི་དང༌། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་ རྣམས་ཟིལ་གྱིས་མནན་ཏེ་རང་གི་མངོན་པར་ཤེས་པས་མངོན་དུ་བྱས་ནས་བསྒྲུབས་ཏེ་བཞུགས་ཤིང༌། དེས་ཆོས་སྟོན་པ་ནི། ཚངས་པར་ ༄༅། །སྤྱོད་པ༑ ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་ པ༑ ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་རབ་ཏུ་སྟོན་ཏོ། །ཞེས་བཅོམ་ལྡན་འདས་ཀྱི་དགེ་བར་གྲགས་པའི་སྒྲ་ ཚིགས་སུ་བཅད་པ་རྒྱ་ཆེན་པོ་ཡང་མངོན་པར་བྱུང་ངོ༌། །དེ་ནས་བཅོམ་ལྡན་འདས་ཡུལ་མ་ག་དྷའི་ལྗོངས་རྒྱུ་ཞིང་མཐར་གྱིས་རྒྱལ་ པོའི་ཁབ་ཀྱི་གྲོང་ཁྱེར་ཆེན་པོ་གང་ན་ཡོད་པ་དེར་གཤེགས་ཏེ། བྱོན་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་བྱ་རྒོད་ཀྱི་ཕུང་པོའི་ རི་ལ་བཞུགས་སོ། །དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་ཁྱིམ་བདག་ཚོང་དཔོན་བཟང་སྐྱོང་ཞེས་བྱ་བ་སྔོན་དགེ་བའི་རྩ་བ་ བསྐྱེད་པ། སྔོན་གྱི་སངས་རྒྱས་ལ་བྱ་བ་བྱས་པ། ཕྱུག་ཅིང་ནོར་མང་བ། ལོངས་སྤྱོད་ཆེ་བ། བདག་དབང་བ་མང་བ། ནོར་དང་ཡོ་བྱད་ མང་བ༑ གསེར་དང་དངུལ་མང་བ། ནོར་དང་འབྲུས་ཡོངས་སུ་གང་བའི་མཛོད་དང༌། བང་བ་མང་བ། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱི་ རུ་མང་པ། གླང་པོ་ཆེ་དང༌། རྟ་དང༌། བ་ལང་དང༌། ལུག་མང་བ། བྲན་ཕོ་དང༌། བྲན་མོ་དང༌། ལས་བྱེད་པ་དང༌། ཞོ་ཤས་འཚོ་བ་མང་བ་ཞིག་གནས་ཏེ། དགེ་སྦྱོང་གཽ་ཏ་མ་ ཤཱཀྱའི་རིགས་ལས་མངོན་པར་བྱུང་ནས་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་ཡུལ་མ་ག་དྷའི་ལྗོངས་རྒྱུ་ཞིང་གཤེགས་ཏེ་ རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་བྱོན་ནས་དེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་བྱ་རྒོད་ཕུང་པོའི་རི་ལ་བཞུགས་ཏེ། འདི་ལྟར་བཅོམ་ལྡན་འདས་དེ་ནི། དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཡིན་ཏེ། དེས་ཆོས་སྟོན་པ་ནི། ཚངས་པར་སྤྱོད་པ། ཐོག་མར་དགེ་བ། བར་དུ་ དགེ་བ༑ ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་རབ་ཏུ་སྟོན་ཏོ། །ཞེས་དགེ་སྦྱོང་ ༄༅། །གཽ་ཏ་མ་དེའི་དགེ་བར་གྲགས་པའི་སྒྲ་ཚིགས་སུ་བཅད་པ་རྒྱ་ཆེན་པོ་དེ་ལྟ་བུ་ཡང་མངོན་པར་བྱུང་བ་ཁྱིམ་བདག་ཚོང་དཔོན་བཟང་སྐྱོང་གིས་ཐོས་ ནས་དེ་འདི་སྙམ་དུ་སེམས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལྟ་བུ་དག་མཐོང་ན་ལེགས་པར་འགྱུར་གྱི། བདག་དགེ་སྦྱོང་ གཽ་ཏ་མ་དེ་བལྟ་བའི་ཕྱིར་འགྲོའོ་སྙམ་མོ། །དེ་ནས་ཁྱིམ་བདག་ཚོང་དཔོན་བཟང་སྐྱོང་ཁྱིམ་བདག་ལྔ་བརྒྱ་ཙམ་དང་ལྷན་ཅིག་ཏུ་བཅོམ་ལྡན་འདས་ལ་བལྟ་བའི་ཕྱིར་རྒྱལ་པོའི་ ཁབ་ཀྱི་གྲོང་ཁྱེར་ཆེན་པོ་ནས་བྱུང་ངོ༌། །བཅོམ་ལྡན་འདས་ཀྱང་སྔ་དྲོའི་དུས་ཀྱི་ཚེ་ཤམ་ཐབས་མནབས། ཆོས་གོས་དང་ལྷུང་བཟེད་བསྣམས་ནས་དགེ་སློང་གི་དགེ་འདུན་གྱིས་ བསྐོར་ཞིང༌། དགེ་སློང་གི་དགེ་འདུན་གྱི་མདུན་དུ་བདར་ཏེ་སྤྱོད་ལམ་མཛེས་པ་དང༌། མངོན་དུ་གཤེགས་པ་དང༌། ཕྱིར་ལྡོག་པ་མཛེས་པ་དང༌། གཟིགས་པས་རྣམ་པར་གཟིགས་ པ་མཛེས་པ་དང༌། བརྐྱང་བ་དང་བསྐུམ་པ་མཛེས་པ་དང༌། ཆོས་གོས་སྣམ་སྦྱར་དང༌། ན་བཟའ་དང༌། ལྷུང་བཟེད་བསྣམས་པ་མཛེས་པ་དང༌། ཀུན་ནས་མཛེས་པས་བསོད་སྙོམས་ ཀྱི་ཕྱིར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་སོ། །ཁྱིམ་བདག་ཚོང་དཔོན་བཟང་སྐྱོང་དང༌། ཁྱིམ་བདག་ལྔ་བརྒྱ་ཙམ་པོ་དེ་དག་གིས་བཅོམ་ལྡན་འདས་མཛེས་ཤིང་ དགའ་བར་འགྱུར་བ། དབང་པོ་ཞི་བ། ཡིད་ཞི་བ། དུལ་བ་དང་ཞི་གནས་དམ་པ་བརྙེས་པ། གླང་པོ་ལྟར་དབང་པོ་དུལ་བ། མཚོ་ལྟར་དྭངས་ཤིང་གསལ་བ། རྙོག་པ་མེད་པ། ལྷ་དུ་མས་ མཆོད་པ། གནོད་སྦྱིན་དུ་མས་མཆོད་པ། མི་དུ་མས་མཆོད་པ། གསེར་གྱི་ཁ་དོག་གི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ། དཔེ་བྱད་བཟང་པོ་བརྒྱད་ཅུས་བརྒྱན་ པ༑ མེ་ཏོག་གི་ཆར་ཆེན་པོ་རབ་ཏུ་འབེབས་ཤིང༌། མེ་ཏོག་གི་ཆུ་བོ་ཆེན་པོ་རབ་ཏུ་འབེབས་བཞིན་དུ་རིན་པོ་ཆེ་སྣ་བདུན་གྱི་པདྨ་འདབ་མ་བྱེ་བ་བརྒྱ་ཕྲག་སྟོང་ཡོད་པ་ལ་ཞབས་འདོར་ཞིང་ གཤེགས་པ་རྒྱང་རིང་པོ་ནས་མཐོང་སྟེ། སྤྱོད་ལམ་བརྒྱ་སྟོང་མང་པོས་གཤེགས་པ་རྒྱང་རིང་པོ་ནས་མཐོང་ནས་བཅོམ་ལྡན་འདས་ལ་སེམས་དད་པར་གྱུར་ཏོ། །དེ་དག་སེམས་ དད་པར་གྱུར་ནས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་ སྔར་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་ཁྱིམ་བདག་བཟང་སྐྱོང་དང༌། ཁྱིམ་བདག་ལྔ་བརྒྱ་ཙམ་པོ་དེ་དག་གིས་འདི་སྐད་ཅེས་གསོལ་ཏོ། ། བཅོམ་ལྡན་འདས་གཽ་ཏ་མ་དཔལ་གྱིས་འཁོར་འདི་ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་གཟི་བརྗིད་ཀྱིས་འཁོར་འདི་ཟིལ་གྱིས་གནོན་པར་མཛད་དོ། །བཅོམ་ ༄༅། །ལྡན་འདས་གཽ་ཏ་མ་འོད་ཀྱིས་འཁོར་འདི་དག་ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་གཟུགས་ཀྱིས་འཁོར་འདི་ཟིལ་གྱིས་གནོན་པར་ མཛད་དོ། །བཅོམ་ལྡན་འདས་གཽ་ཏ་མ་སྐུའི་ཁ་དོག་གསེར་ལྟ་བུའོ། །བཅོམ་ལྡན་འདས་གཽ་ཏ་མ་ནི། སྐུས་ལུས་ཅན་བདེ་བ་མྱོང་བར་མཛད་པའོ། །བཅོམ་ལྡན་འདས་གཽ་ཏ་མ་ ནི༑ དངོས་པོ་ཐམས་ཅད་ཀྱིས་མི་མཉམ་པ་དང་མཉམ་པའོ། །བཅོམ་ལྡན་འདས་གཽ་ཏ་མ་ནི། འཇིག་རྟེན་ཐམས་ཅད་ཀྱིས་ངོ་མཚར་རྨད་དུ་བྱུང་བའི་ཆོས་དང་ལྡན་པ་ལགས་ན། བཅོམ་ལྡན་འདས་གཽ་ཏ་མ། བདག་འདི་སྙམ་དུ་སེམས་ཏེ། བཅོམ་ལྡན་འདས་གཽ་ཏ་མས་ཅི་ཞིག་གཟིགས་ནས་ཁབ་ནས་ཁབ་མ་མཆིས་པར་རབ་ཏུ་བྱུང་སྙམ་དུ་སེམས་སོ། །དེ་ ནས་བཅོམ་ལྡན་འདས་ལ་ཁྱིམ་བདག་ཚོང་དཔོན་བཟང་སྐྱོང་གིས་ཚིགས་སུ་བཅད་པ་དག་གིས་མངོན་པར་བསྟོད་དོ། །རྒྱལ་བའི་དཔལ་དང་གྲགས་དང་གཟུགས་དག་ནི། ། སྔོན་ཆད་བདག་གིས་ཇི་སྐད་ཐོས་གྱུར་པ། །དེ་བས་ལྷག་པར་གསེར་གྱི་གཟུགས་བཞིན་དུ། །མཛེས་དང་ལྡན་པར་ལྷམ་མེར་རབ་ཏུ་གདའ། །གཟུགས་ནི་ཤིན་ཏུ་མཛེས་ ཤིང་བལྟ་ན་སྡུག །སྐུ་ཡི་ཁ་དོག་གསེར་གྱི་མདོག་འདྲ་བས། །སྐར་མ་དག་གི་དབུས་ན་ཟླ་བ་ལྟར། །དགེ་སློང་མང་པོའི་དབུས་ན་མཛེས་པར་མཛད། །མི་མཆོག་གི་ནི་ སྤྱི་བོ་བལྟར་མི་གདའ། །རི་རབ་བཞིན་དུ་མངོན་པར་འཕགས་པར་གདའ། །གཙུག་གི་སྤྱི་བོ་ལྷ་ཡི་གདུགས་བཞིན་དུ། །ཀུན་ནས་བྱིན་གྱིས་གཞོལ་བར་གྱུར་པ་ལགས། །དབུ་ ཡི་སྐྲ་ནི་འཇམ་ཞིང་རབ་མཉེན་ལ། །ཨནད་རྙིལ་དང་སྟང་ཟིལ་ཁ་དོག་འདྲ། །གཡས་སུ་འཁྱིལ་ལ་ཤིན་ཏུ་འཇམ་པ་སྟེ། །རྨ་བྱའི་མགྲིན་པ་ཇི་བཞིན་ཉིད་དུ་གདའ། །སྨྲ་བ་མཆོག་ གི་དཔྲལ་བ་ཤིན་དུ་མཉམ། །ཁྱོད་ཀྱི་སྨིན་ཚུགས་འཇའ་ཁུག་ལྟ་བུ་སྟེ། །འོད་གསལ་བ་ནི་སྐར་མའི་རྒྱལ་པོ་ལྟར། །རྡུལ་བྲལ་སྨིན་མཚམས་སྤུ་ནི་ཤིན་ཏུ་མཛེས། །སྤྱན་བཟང་ ཁྱོད་ཀྱི་སྤྱན་ནི་དགར་འགྱུར་བ། །འགྲོ་བ་རྣམས་ལ་མཐོང་ན་མཛེས་ཤིང་དགའ། །བདག་ནི་བལྟ་བས་ངོམས་པར་མི་འགྱུར་ཏེ། །མགོན་པོ་རྣམ་དག་སྤྱན་ལ་བདག་ཕྱག་ འཚལ༑ ༑སྐྱེས་བུ་དམ་པའི་ཤངས་ནི་བྱིན་གྱིས་མཉམ། །ཇི་ལྟར་གསེར་གྱི་རི་ལྟར་རབ་ཏུ་གདའ། །ཁྱོད་ཀྱི་སྒྲོས་ནི་བིམ་པ་བྱི་རུ་བཞིན། །དག་ཅིང་རྣམ་དག་ནོར་བུ་རིན་ཆེན་ འདྲ༑ ༑དུལ་ལ་དགྱེས་པའི་ཚེམས་ནི་མཛེས་པ་སྟེ། །སྣང་བར་བྱེད་པ་རབ་ཏུ་དཀར་བའི་ཚེམས། །པདྨའི་རྩ་བ་བ་ཞོ་ཆུ་སྐྱར་འདྲ། །སྲ་ཞིང་དམ་ལ་ཐགས་བཟང་ཤིན་དུ་དག ། ཚེམས་དང་ཚེམས་ནི་མཉམ་ཞིང་ཤིན་ཏུ་འབྱོར། །རྒྱལ་བའི་མཆེ་བ་མཛེས་ཤིང་རྡུལ་མི་མངའ། །ངང་པའི་ཁྱུ་ན་ངང་བའི་རྒྱལ་པོ་ནི། །རྣམ་དག་དཀར་ཞིང་རབ་ཏུ་དཀར་བ་ ༄༅། །བཞིན༑ ༑བདེ་བར་གཤེགས་པའི་ལྗགས་ཀྱིས་ཞལ་ཁེབས་ཏེ། །ཨུཏྤལ་དམར་པོ་རྣམ་དག་ཟངས་ཀྱི་མདོག །ཉི་མ་འཆར་ཚོ་ནོར་བུ་དག་མདོག་ བཞིན༑ ༑སྲབ་ལ་རིང་ཞིང་སྐྱོན་མེད་ཤིན་དུ་ཡངས། །གཽ་ཏ་མ་ཡི་སྙན་ནི་རབ་ཏུ་ལེགས། །སེངྒེའི་འགྲམ་པ་སེངྒེ་འཇིགས་མེད་བཞིན། །ཚངས་བཅས་འཇིག་རྟེན་ལྷ་ དང་མི་ལ་ཡང༌། །བདག་གིས་གང་ཡང་མ་ཐོས་མ་མཐོང་ངོ༌། །བདེ་གཤེགས་མཐུ་ཡིས་མགུར་ན་མཐོང་བ་ནི། །མགུར་གྱི་མིད་པ་གཙང་ལ་འོད་གསལ་ཏེ། །དྲང་པོ་ དབུས་སུ་འགྲོ་བ་ཡོན་པོ་གསལ། །རོ་ཡི་རོ་མཆོག་མི་དང་ལྷ་ཡི་ལྷ། །དཔུང་མགོ་རབ་ཏུ་ཟླུམ་ཞིང་ཐལ་གོང་རྒྱས། །བདུན་པོ་མཐོ་བ་འཇིག་རྟེན་ཀུན་ཏུ་གྲགས། །མགོན་ པོ་མི་དབང་སྙིང་པོ་དཔལ་གྱིས་ཀྱང༌། རི་ཡི་རྩེ་ལ་ཉི་མ་འཆར་བ་བཞིན། །མཐོ་བ་གཉིས་ནི་ཞབས་ཀྱི་མཐིལ་ནས་སྐྱེས། །ཕྱག་ལས་གཉིས་སྐྱེས་ཐལ་གོང་གཉིས་སྐྱེས་ཏེ། ། མཐོ་བ་གཅིག་ནི་ལྟག་པ་ཉིད་ན་གཅིག། དགེ་ཞིང་དག་སྟེ་འོད་གསལ་རབ་ཏུ་རྒྱས། །བཅོམ་ལྡན་གཽ་ཏ་མ་ཡི་ཕྱག་རིང་བ། །ཇི་ལྟར་གླང་པོའི་རྒྱལ་པོའི་སྣ་བཞིན་ནོ། ། ཕྱག་གཉིས་པོ་ནི་འདུད་པ་མ་བགྱིས་པར། །པུས་མོ་གཉིས་ལ་ཕྱག་གིས་རབ་ཏུ་རེག །སྐུ་ཡི་རོ་སྟོད་སེངྒེ་བཞིན་དུ་འཕགས། །སྐུ་ནི་སྲེད་མེད་བུ་ལྟར་རབ་ཏུ་བརྟན། །ནྱ་གྲོ་དྷ་ བཞིན་ཆུ་ཞེང་གབ་པའི་སྐུ། །བཟོད་པའི་སྟོབས་དང་ལྡན་པ་སྟོབས་པོ་ཆེ། །སྐུ་ཡི་སྤུ་རྣམས་གཡས་འཁྱིལ་གྱེན་དུ་ཕྱོགས། །རེ་རེར་སྐྱེས་ཤིང་ཤིན་ཏུ་འཇམ་པ་སྟེ། །ཇི་ལྟར་པདྨ་ ཆུ་དང་འདམ་མི་གོས། །དེ་བཞིན་རྡུལ་དང་དུ་བས་མི་གོས་སོ། །རྟ་མཆོག་དུལ་བ་ཡི་ནི་ཇི་ལྟ་བར། །འདོམས་ཀྱི་སྦ་བ་སྦུབས་སུ་ནུབ་ཅེས་གདའ། །བརླ་ནི་རབ་ཟླུམ་སྨྱིག་མའི་སྙིང་ པོ་བཞིན། །ཁྱོད་ཀྱི་རྗེ་ངར་བྱིན་གྱིས་རིམ་བཞིན་མཆིས། །ཞབས་གོང་དུང་ལྟར་མཐོ་ཞིང་རྟིང་པ་ཆེ། །ཁྱོད་ཀྱི་ཕྱག་དང་ཞབས་ནི་དྲ་བས་འབྲེལ། །སེན་མོ་རིང་ཞིང་སོར་མོ་ཉི་ཤུ་ མཉམ༑ ༑སེན་མོ་ཟངས་འདྲ་སོར་སེན་མེ་ཏོག་ཅན། །ཁྱོད་ཀྱི་ཞབས་མཐིལ་འཁོར་ལོ་རབ་ཀྱི་མཚན། །རྩིབས་མ་སྟོང་ལྡན་རབ་ཏུ་འོད་གསལ་བ། །ལོང་བུས་ལོང་བུ་འཐབ་པར་མི་འགྱུར་ ཞིང༌། །གོམ་པ་དག་ནི་ས་ལ་ཡོང་མི་འདོར། །ས་ལ་ཀུན་ཏུ་སོར་བཞི་མི་རེག་པར། །འཇིག་རྟེན་རྣམས་ཀྱི་གཙོ་བོ་རབ་གཤེགས་ཏེ། །ཁྱོད་ནི་གང་དུ་གོམ་པ་བོར་བར་ཡང༌། །རིན་ཆེན་པདྨ་ སྐྱེ་བ་ངོ་མཚར་ཏོ། །རྒོད་པར་མ་གྱུར་དལ་ཞིང་བརྟན་པར་གཤེགས། །སྟག་དང་ལྷ་དབང་འགྲོས་ཀྱིས་གཞན་གནོན་ཞིང༌། །བག་ཚ་མེད་པར་སྟབས་ནི་བསྒྱིངས་ཏེ་གཤེགས། །དཔའ་ བོ་ཁྱོད་ཀྱི་འགྲོས་འདྲ་སུ་ལའང་མེད། །མི་མ་ལགས་པ་རྣམས་ཀྱིས་བར་སྣང་ལས། །ལྷ་ཡི་མེ་ཏོག་ཆར་ནི་རབ་འབེབས་ཤིང༌། །གླུ་དབྱངས་སྒྲས་ནི་ཁྱོད་ལ་མཆོད་པར་བགྱིད། །ཆོ་ ༄༅། །འཕྲུལ་འདི་འདྲ་འདི་དག་རྨད་དུ་བྱུང༌། །ཁྱོད་ཀྱི་གཟུགས་ནི་རྣམ་ཐོས་བུ་བས་ལྷག །གཟི་བརྗིད་དག་ནི་ཉི་མ་བརྒྱ་བས་འཕགས། །ཚངས་བཅས་ལྷ་ མིར་བཅས་པའི་འཇིག་རྟེན་ན། །ཁྱོད་འདྲའང་མེད་ན་ལྷག་པ་ག་ལ་མཆིས། །བདག་གིས་ཁྱོད་ཀྱི་ཆོ་འཕྲུལ་མཆོག་མཐོང་ནས། །ཡོན་ཏན་ལྷག་པ་གང་དག་གཟིགས་གྱུར་ ན༑ ༑དེ་བཞེད་པས་ན་མི་དབང་རབ་བྱུང་སྙམ། །བདག་ནི་དེ་ལ་ཐེ་ཚོམ་འཚལ་བར་གྱུར། །དེ་ནས་བཅོམ་ལྡན་འདས་ཀྱིས་ཁྱིམ་བདག་ཚོང་དཔོན་བཟང་སྐྱོང་ལ་འདི་སྐད་ཅེས་ བཀའ་སྩལ་ཏོ། །ཀྱེ་མའོ་ཁྱིམ་བདག། འཇིག་རྟེན་གནས་པ་འདི་ནི། གཙེ་བ་བཅུས་གཙེས་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྐྱེ་བས་གཙེ་བ་དང༌། རྒ་བས་གཙེ་ བ་དང༌། ན་བས་གཙེ་བ་དང༌། འཆི་བས་གཙེ་བ་དང༌། མྱ་ངན་གྱིས་གཙེ་བ་དང༌། སྨྲེ་སྔགས་འདོན་པས་གཙེ་བ་དང༌། སྡུག་བསྔལ་གྱིས་གཙེ་བ་དང༌། ཡིད་མི་བདེ་བས་གཙེ་བ་ དང༌། འཁྲུག་པས་གཙེ་བ་དང༌། འཁོར་བས་གཙེ་བ་དང་བཅུ་སྟེ། ཁྱིམ་བདག། འཇིག་རྟེན་གནས་པ་གཙེ་བ་འདི་བཅུས་གཙེས་པར་མཐོང་ནས་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཐོབ་པར་བྱའོ། །ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། ། འཁོར་བའི་སྒྲོམ་དུ་ཆུད་པ་ཡི། །བྱིས་པ་སོ་སོའི་སྐྱེ་བོ་ཀུན། །སྐྱེ་བས་ཉེ་བར་གཙེས་པ་དང༌། །ནད་དང་རྒ་བས་རབ་ཏུ་གཟིར། །མྱ་ངན་བྱེད་ཅིང་སྨྲེ་སྔགས་འདོན། །འཆི་བའི་དབང་དུ་ སོང་མཐོང་ནས། །སྲིད་པའི་སྒྲོམ་ལས་ཐར་བྱ་ཞེས། །བསྐྱབ་པའི་ཕྱིར་ནི་མངོན་པར་བྱུང༌། །ཀྱེ་མའོ་ཁྱིམ་བདག། འཇིག་རྟེན་གནས་པ་འདི་ནི། ཞེ་སྡང་ཞིང་ཀུན་ནས་མནར་སེམས་ ཀྱི་དངོས་པོ་བཅུས་གཅིག་ལ་གཅིག་མནར་སེམས་སུ་བྱེད་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། བདག་ཉིད་ལ་གནོད་པ་བྱས་སོ། །ཞེས་སེམས་ལ་ཀུན་ནས་མནར་སེམས་སྐྱེ་བ་ དང༌། གནོད་པ་བྱེད་དོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། གནོད་པ་བྱེད་པར་འགྱུར་རོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། བདག་གི་མཛའ་བོ་ལ་ གནོད་པ་བྱས་སོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། བདག་གི་མཛའ་བོ་ལ་གནོད་པ་བྱེད་དོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། བདག་གི་མཛའ་བོ་ ལ་གནོད་པ་བྱེད་པར་འགྱུར་རོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། བདག་དང་མི་མཛའ་བའི་དོན་བྱས་སོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། བདག་ དང་མི་མཛའ་བའི་དོན་བྱེད་དོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། བདག་དང་མི་མཛའ་བའི་དོན་བྱེད་པར་འགྱུར་རོ། །ཞེས་སེམས་ལ་ཀུན་ནས་མནར་སེམས་སྐྱེ་བ་ ༄༅། །དང༌། གནོད་པའི་རབ་ཏུ་སྡང་བ་ཉིད་དང་བཅུའོ། །ཁྱིམ་བདག། ཀུན་ནས་མནར་སེམས་ཀྱི་དངོས་པོ་བཅུ་པོ་ནི། དེ་དག་ཡིན་ཏེ། ཀུན་ནས་མནར་སེམས་ ཐམས་ཅད་སེལ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ། །ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །དེ་ནས་བཅོམ་ལྡན་འདས་ཀྱིས་དོན་དེ་ ཉིད་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཀྱེ་མའོ་སེམས་ཅན་ཞེ་སྡང་སྟེ། གཅིག་ལ་གཅིག་ནི་ཕན་ཚུན་དུ། །ཀུན་ནས་མནར་སེམས་དངོས་ པོ་བཅུས། །ཀུན་ལ་ཀུན་ནས་མནར་སེམས་གྱུར། །བདག་དང་བདག་གི་ཉེ་དུ་ལ། །གནོད་པ་བྱས་དང་བྱེད་པ་དང༌། །གནོད་པ་བྱེད་པར་འགྱུར་རོ་ཞེས། །དེ་ཡི་ཀུན་ནས་མནར་སེམས་ སྐྱེ༑ ༑གང་རྣམས་བདག་དང་མི་མཛའ་བ། །དེ་དག་གི་ནི་དོན་བྱས་དང༌། །བྱེད་དོ་བྱེད་པར་འགྱུར་རོ་ཞེས། །དེ་ཡི་ཀུན་ནས་མནར་སེམས་སྐྱེ། །གནོད་པའི་སྡང་དང་བཅུ་ཡིན་ཏེ། ། གང་གི་མནར་སེམས་འཕེལ་འགྱུར་བ། །དེ་མཐོང་ཀུན་ནས་མནར་སེམས་རྣམས། །མི་འདོད་པས་ན་རབ་ཏུ་བྱུང༌། །ཀྱེ་མའོ་ཁྱིམ་བདག། འཇིག་རྟེན་གནས་པ་འདི་ནི། ལྟ་བར་ བྱས་པ་ལྟ་བ་ངན་པའི་ཐིབས་པོ་བཅུས་ལྟ་བར་བྱས་པ་སྣ་ཚོགས་དང༌། ལྟ་བ་ངན་པའི་ཐིབས་པོ་དག་གིས་ནོན་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། བདག་ཏུ་ལྟ་བར་ གྱུར་པ་ལྟ་བ་ངན་པའི་ཐིབས་པོ་དང༌། སེམས་ཅན་དུ་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། སྲོག་ཏུ་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། གང་ཟག་ཏུ་ལྟ་བར་གྱུར་བ་ ལྟ་བ་ངན་པའི་ཐིབས་པོ་དང༌། ཆད་པར་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། བྱ་བ་མེད་པར་ལྟ་བར་གྱུར་པ་ལྟ་བ་ངན་པའི་ཐིབས་པོ་ དང༌། རྒྱུ་མེད་པར་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། མི་མཐུན་པའི་རྒྱུར་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། ལོག་པར་ལྟ་བར་གྱུར་པ་ལྟ་བ་ངན་པའི་ཐིབས་པོ་ དང་བཅུའོ། །ཁྱིམ་བདག། ལྟ་བར་གྱུར་པ་ལྟ་བ་ངན་པའི་ཐིབས་པོ་དེ་དག་ཡིན་ཏེ། ལྟ་བ་ཐམས་ཅད་གཞིག་པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ། ། ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བྱིས་ པ་སོ་སོའི་སྐྱེ་བོ་ཀུན། །བདག་ཏུ་ལྟ་དང་སེམས་ཅན་ལྟ། །སྲོག་ཏུ་ལྟ་བ་རྣམས་ཀྱི་ཡང༌། །ལྟ་བ་ཐིབས་པོས་རབ་ཏུ་གཡོགས། །རྟག་དང་ཆད་པར་ལྟ་བ་དང༌། །བྱ་མེད་ལྟ་ལ་གནས་ པ་དག །ཡང་དག་ལྟ་ལ་དགོད་དོ་ཞེས། །དེ་ཕྱིར་ང་ནི་རབ་ཏུ་བྱུང༌། །ཀྱེ་མའོ་ཁྱིམ་བདག། འཇིག་རྟེན་གནས་པ་འདི་ནི། ཟུག་རྔུ་ཆེན་པོ་བཅུས་བསྐལ་པ་གྲངས་མེད་པ་བྱེ་བ་ ༄༅། །ཁྲག་ཁྲིག་བརྒྱ་སྟོང་དུ་ཟུག་རྔུས་ཟུག་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྲེད་པའི་ཟུག་རྔུ་དང༌། མ་རིག་པའི་ཟུག་རྔུ་དང༌། འདོད་པའི་ཟུག་རྔུ་དང༌། འདོད་ ཆགས་ཀྱི་ཟུག་རྔུ་དང༌། ཞེ་སྡང་གི་ཟུག་རྔུ་དང༌། གཏི་མུག་གི་ཟུག་རྔུ་དང༌། ང་རྒྱལ་གྱི་ཟུག་རྔུ་དང༌། ལྟ་བའི་ཟུག་རྔུ་དང༌། འབྱུང་བའི་ཟུག་རྔུ་དང༌། འཇིག་པའི་ཟུག་རྔུ་དང་བཅུའོ། ། ཁྱིམ་བདག། ཟུག་རྔུ་ཆེན་པོ་བཅུ་པོ་ནི། དེ་དག་ཡིན་ཏེ། ཟུག་རྔུ་ཐམས་ཅད་བསལ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ། །ཞེས་དད་པས་ཁྱིམ་ ནས་ཁྱིམ་མེད་པར་རབ་ཏུ་བྱུང་ངོ༌། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྲིད་པའི་ཟུག་རྔུས་ཟུག་པ་རྣམས། །ཐོག་མའི་མཐའ་ནི་མི་ ཤེས་ཏེ༑ ༑མ་རིག་པ་ཡིས་མདོངས་བྱས་ནས། །མུན་པ་ནས་ནི་མུན་པར་འགྲོ་།སྲིད་པའི་ཟུག་རྔུས་ཟུག་པ་དང༌། །འདོད་ཆགས་ཟུག་རྔུས་རྒྱུས་པ་དང༌། །ཞེ་སྡང་ཟུག་རྔུས་བརྒྱལ་བས་ ན༑ ༑ཕུང་པོ་དག་ནི་ལེན་པར་བྱེད། །གཏི་མུག་གི་ནི་ཟུག་རྔུས་དཀྲིས། །ང་རྒྱལ་དག་གི་ཟུག་རྔུས་སྙེམས། །འབྱུང་བ་དང་ནི་འཇིག་པ་ན། །ལྟ་བའི་ཟུག་རྔུས་མི་འཕྲོད་འགྱུར། །བྱིས་པ་ སོ་སོའི་སྐྱེ་བོ་ཀུན། །ཕན་ཚུན་ཚིག་གི་མཚོན་ཆ་ཡིས། །འདི་ནི་རྫུན་གྱི་འདི་བདེན་ཞེས། །ཕན་ཚུན་དུ་ནི་རྩོད་པར་བྱེད། །ཟུག་རྔུས་ཟུག་པའི་སེམས་ཅན་གྱི། །སྐྱབས་དང་དཔུང་ གཉེན་འགྱུར་བ་ཡི། །ཟུག་རྔུ་འབྱིན་པ་དེ་བཞིན་གཤེགས། །འཇིག་རྟེན་འདིར་ནི་འབྱུང་བར་འགྱུར། །གཞན་ཡང་ཀྱེ་མའོ་ཁྱིམ་བདག། འཇིག་རྟེན་གནས་པ་འདི་ནི། སྲིད་པའི་རྩ་བ་ ལས་བྱུང་བའི་ཆོས་བཅུ་པོ་དག་གིས་རྩ་བའི་གནས་ལ་རབ་ཏུ་གནས་པ་མཐོང་སྟེ། བཅུ་གང་ཞེ་ན། འདི་ལྟ་སྟེ། སྲེད་པ་ལ་བརྟེན་ནས་ཀུན་ཏུ་ཚོལ་བ་དང༌། ཀུན་ཏུ་ཚོལ་བ་ལ་བརྟེན་ནས་ རྙེད་པ་དང༌། རྙེད་པ་ལ་བརྟེན་ནས་ང་ཡིར་འཛིན་པ་དང༌། ང་ཡིར་འཛིན་པ་ལ་བརྟེན་ནས་རྣམ་པར་ངེས་པ་དང༌། རྣམ་པར་གདོན་མི་ཟ་བ་ལ་བརྟེན་ནས་འདུན་པའི་འདོད་ཆགས་དང༌། འདུན་ པའི་འདོད་ཆགས་ལ་བརྟེན་ནས་ལྷག་པར་ཆགས་པ་དང༌། ལྷག་པར་ཆགས་པ་ལ་བརྟེན་ནས་སེར་སྣ་དང༌། སེར་སྣ་ལ་བརྟེན་ནས་ཡོངས་སུ་འཛིན་པ་དང༌། ཡོངས་སུ་འཛིན་པ་ལ་ བརྟེན་ནས་ཡོངས་སུ་སྲུང་བ་དང༌། ཡོངས་སུ་སྲུང་བ་ལ་བརྟེན་ནས་སྡུག་བསྔལ་བ་སྟེ། ཡོངས་སུ་སྲུང་བའི་གཞི་ལས་དབྱིག་པ་ཐོགས་པ་དང༌། མཚོན་ཆ་ཐོགས་པ་དང༌། འཐབ་པ་དང༌། མཚང་འདྲུ་བ་དང༌། འགྱེད་པ་དང༌། རྩོད་པ་རྣམས་འབྱུང་ངོ༌། །དེའི་ཁྱིར་ཕྲ་མ་ལ་སོགས་པ་སྡིག་པ་མི་དགེ་བའི་ཆོས་རྣམ་པ་མང་པོ་འབྱུང་བར་འགྱུར་ཏེ། ཁྱིམ་བདག། སྲེད་པའི་རྩ་བ་ ལས་བྱུང་བའི་ཆོས་བཅུ་པོ་དེ་དག་གིས་འཇིག་རྟེན་གནས་པ་རབ་ཏུ་གནས་པར་མཐོང་ནས་རྩ་བ་མེད་པ་གནས་མེད་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ། ། ༄༅། །ཞེས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །འདི་ལ་ཆོས་ཉིད་ནི། འདི་ཡིན་ཏེ། དེ་ལ་འདི་སྐད་ཅེས་བྱའོ། །སྲེད་པས་མིད་པའི་སེམས་ཅན་རྣམས། །འདི་ ནས་འདིར་ནི་ཀུན་ཏུ་ཚོལ། །རྙེད་པ་རྙེད་ནས་ང་ཡིར་འཛིན། །དེ་ལས་རྣམ་པར་ངེས་པར་འགྱུར། །བྱ་བ་འདི་དག་བྱའོ་ཞེས། །འདུན་པའི་འདོད་ཆགས་རབ་ཏུ་འཕེལ། །འདུན་པའི་འདོད་ ཆགས་འཕེལ་བས་ན། །ལྷག་པར་ཆགས་ཕྱིར་སེར་སྣ་འགྱུར། །སེར་སྣའི་ཉེས་པས་འཇིག་རྟེན་ན། །ཀུན་ཏུ་འཛིན་པ་སྲ་བར་འགྱུར། །ཡོངས་སུ་འཛིན་པ་ཀུན་སྲུང་བ། །རྒྱུན་ མི་འཆད་པ་འབྱུང་བར་འགྱུར། །བྱས་པ་ཀུན་དུ་བསྲུང་བའི་ཕྱིར། །དབྱིག་པ་དང་ནི་མཚོན་འདེབས་ཤིང༌། །སྡིག་པ་ཐམས་ཅད་བྱེད་པས་ན། །དེ་ལས་སྡུག་བསྔལ་འཕེལ་བར་ འགྱུར༑ ༑སྲེད་པའི་གཞི་ལས་སྡུག་བསྔལ་ཀུན། །ཤིན་ཏུ་འབྱུང་བར་མཐོང་བས་ན། །རྩ་བ་མེད་ཅིང་གནས་པ་ཡི། །བྱང་ཆུབ་དམ་པ་རྟོགས་པར་འདོད། །གཞན་ཡང་ཀྱེ་མའོ་ ཁྱིམ་བདག། འཇིག་རྟེན་གནས་པ་འདི་ནི། ལོག་པའི་ཆོས་བཅུས་ལོག་པ་ཉིད་དུ་ངེས་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། ལོག་པའི་ལྟ་བ་དང༌། ལོག་པའི་རྟོག་པ་དང༌། ལོག་པའི་ངག་དང༌། ལོག་པའི་ལས་ཀྱི་མཐའ་དང༌། ལོག་པའི་འཚོ་བ་དང༌། ལོག་པའི་རྩོལ་བ་དང༌། ལོག་པའི་དྲན་པ་དང༌། ལོག་པའི་ཏིང་ངེ་འཛིན་དང༌། ལོག་པའི་རྣམ་ པར་གྲོལ་བ་དང༌། ལོག་པའི་ཤེས་པ་དང་བཅུ་སྟེ། ཁྱིམ་བདག། འཇིག་རྟེན་གནས་པ་འདི་ནི། ལོག་པའི་ཆོས་བཅུ་པོ་དེ་དག་གིས་ལོག་པར་ངེས་པ་མཐོང་ནས་ལོག་པ་ཐམས་ཅད་ལས་ ཡང་དག་པར་བཟླ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། ། དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །གང་དག་ལོག་པའི་ལྟ་ཆགས་དང༌། །ལོག་པར་རྟོག་པའི་སྤྱོད་ ཡུལ་དང༌། །ལོག་པའི་ཚིག་ཏུ་སྨྲ་བ་དང༌། །ལོག་པའི་ལས་མཐའ་སྤྱོད་པ་དང༌། །ལོག་པའི་འཚོ་དང་ལོག་རྩོལ་དང༌། །ལོག་པའི་དྲན་དང་མཉམ་པར་འཇོག །ལོག་པའི་རྣམ་ གྲོལ་རྫོགས་པ་དང༌། །ལོག་པའི་ཤེས་ལ་གཞོལ་བ་ཡི། །ལོག་པར་ངེས་པའི་ཕུང་པོ་ནི། །བྱིས་པ་དེ་ལ་གནས་པ་དང༌། །ཡང་དག་ཉིད་ལ་དགོད་དོ་ཞེས། །དེ་ཕྱིར་ང་ནི་རབ་ཏུ་ བྱུང༑ །གཞན་ཡང་ཀྱེ་མའོ་ཁྱིམ་བདག །འཇིག་རྟེན་གནས་པ་འདི་ནི། ལམ་ངན་པར་ཞུགས་ཤིང་མི་དགེ་བ་བཅུའི་ལས་ཀྱི་ལམ་རྣམས་ཀྱིས་ཕལ་ཆེར་ངན་སོང་དུ་གཞོལ་བ། ངན་སོང་དུ་འབབ་པ། ངན་སོང་དུ་བབ་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པས་ལོག་པར་གཡེམ་པ་དང༌། བརྫུན་ ༄༅། །དུ་སྨྲ་བ་དང༌། ཕྲ་མ་ཟེར་བ་དང༌། ངག་རྩུབ་པོ་དང༌། ཚིག་ཀྱལ་བ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་དང་བཅུ་སྟེ། ཁྱིམ་བདག ། མི་དགེ་བ་བཅུའི་ལས་ཀྱི་ལམ་རྣམས་ཀྱིས་འཇིག་རྟེན་གནས་པ་འདི་ལམ་ངན་པར་ཞུགས་ཤིང་ཕལ་ཆེར་ངན་སོང་དུ་གཞོལ་བ་དང༌། ངན་སོང་དུ་འབབ་པ། ངན་སོང་དུ་བབ་པར་ མཐོང་ནས་ངན་སོང་ཐམས་ཅད་ལས་ཡང་དག་པར་བཟླ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །ཞེས་དད་པས་ཁྱིམ་ ནས་ཁྱིམ་མེད་པར་རབ་ཏུ་བྱུང་ངོ༌། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྲོག་གཅོད་པ་ཡི་སེམས་ ཅན་དང༌། །གཞན་གྱི་ནོར་ལ་འཕྲོག་པ་དང༌། །འདོད་པས་ལོག་པར་གཡེམ་པ་དག །སེམས་ཅན་དམྱལ་བར་མྱུར་དུ་འགྲོ། དབྱེན་བྱེད་པ་དང་ཚིག་རྩུབ་དང༌། །བརྫུན་དུ་སྨྲ་ཞིང་ མི་སྡོམ་པ། །བྱིས་པ་ཀྱལ་བ་སྨྲ་བ་རྣམས། །སོ་སོའི་སྐྱེ་བོ་སླུ་བས་བཅིངས། །གཞན་གྱི་སྤྱོད་ལམ་བརྣབ་སེམས་དང༌། །གནོད་སེམས་དག་ནི་མང་བ་དང༌། །མི་མང་ལྟ་བ་ལོག་ ཞུགས་པ། །ངན་འགྲོ་དག་ཏུ་འགྲོ་བར་འགྱུར། །ལུས་ཀྱི་སྡིག་པ་རྣམ་གསུམ་དང༌། །ངག་གི་སྡིག་པ་རྣམ་བཞི་དང༌། །ཡིད་ཀྱི་སྡིག་པ་རྣམ་གསུམ་ནི། །སྡིག་བྱེད་པ་དག་རབ་ཏུ་ བྱེད༑ ༑སྡིག་པའི་ལས་རྣམས་བྱས་པས་ན། །དེ་ཕྱིར་ངན་འགྲོར་འགྲོ་བར་འགྱུར། །ཅི་ནས་ངན་འགྲོར་མི་གཏང་པར། །བསྐྱབ་པའི་ཕྱིར་ནི་རབ་ཏུ་བྱུང༌། །གཞན་ཡང་ཀྱེ་མའོ་ཁྱིམ་བདག ། འཇིག་རྟེན་གནས་པ་འདི་ནི། ཀུན་ནས་ཉོན་མོངས་པ་བཅུ་དག་གིས་ཉོན་མོངས་པ་དང༌། ཉེ་བའི་ཉོན་མོངས་པ་དང༌། ཀུན་ནས་ཉོན་མོངས་པའི་དྲི་མ་དང་ལྡན་པར་མཐོང་སྟེ། བཅུ་གང་ ཞེ་ན། འདི་ལྟ་སྟེ། སེར་སྣའི་དྲི་མས་ཀུན་ནས་ཉོན་མོངས་པ་དང༌། འཆལ་པའི་ཚུལ་ཁྲིམས་ཀྱི་དྲི་མས་ཀུན་ནས་ཉོན་མོངས་པ་དང༌། གནོད་སེམས་ཀྱི་དྲི་མས་ཀུན་ནས་ཉོན་མོངས་པ་ དང༌། ལེ་ལོའི་དྲི་མས་ཀུན་ནས་ཉོན་མོངས་པ་དང༌། གཡེང་བའི་དྲི་མས་ཀུན་ནས་ཉོན་མོངས་པ་དང༌། འཆལ་པའི་ཤེས་རབ་ཀྱི་དྲི་མས་ཀུན་ནས་ཉོན་མོངས་པ་དང༌། སྲི་ཞུ་མེད་ པའི་དྲི་མས་ཀུན་ནས་ཉོན་མོངས་པ་དང༌། ཐེ་ཚོམ་གྱི་དྲི་མས་ཀུན་ནས་ཉོན་མོངས་པ་དང༌། མ་མོས་པའི་དྲི་མས་ཀུན་ནས་ཉོན་མོངས་པ་དང༌། མ་གུས་པའི་དྲི་མས་ཀུན་ནས་ ཉོན་མོངས་པ་དང་བཅུ་སྟེ། ཁྱིམ་བདག །འཇིག་རྟེན་གནས་པ་འདི་ནི། ཀུན་ནས་ཉོན་མོངས་པ་བཅུ་པོ་དེ་དག་གིས་ཀུན་ནས་ཉོན་མོངས་པར་མཐོང་ནས་ཀུན་ནས་ཉོན་མོངས་ པ་མེད་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །འདི་ལ་ཆོས་ ༄༅། །ཉིད་ནི། འདི་ཡིན་ཏེ། དེ་ལ་འདི་སྐད་ཅེས་བྱའོ། །འཇིག་རྟེན་འདི་དག་ཕལ་ཆེར་ནི། །ཀུན་ནས་ཉོན་མོངས་བཅུ་ཡིས་གཟིར། །འདུས་བྱས་ཀུན་ནས་ཉོན་མོངས་ དགའ༑ ༑ནམ་ཡང་སྐྱོ་བར་བྱེད་མི་འགྱུར། །བྱིས་པ་སོ་སོའི་སྐྱེ་བོ་ཀུན། །སེར་སྣའི་དྲི་མས་ཉོན་མོངས་ཏེ། །བསླབ་པ་ཡང་དག་བཟུང་ནས་ཀྱང༌། །སྡོམ་པ་མེད་ཅིང་ཉམས་ པར་སྤྱོད། །བྱིས་པ་བཟོད་ལ་རྒྱབ་ཀྱིས་ཕྱོགས། །བརྩོན་འགྲུས་ཆུང་བ་ལེ་ལོ་ཅན། །སེམས་ཀྱང་གནས་པ་མ་ཡིན་པ། །ཤེས་རབ་འཆལ་པ་བླུན་ཞིང་རྨོངས། །ཕ་དང་མ་དང་ བུ་ཕོ་དང༌། །བླ་མ་ལ་ནི་སྲི་ཞུ་སྤངས། །འཇིག་རྟེན་སྣང་མཛད་སངས་རྒྱས་དག །མཐོང་ནས་བློ་ངན་ནེམ་ནུར་བྱེད། །ཟབ་མོ་རྒྱལ་བས་གཟིགས་པ་ཡི། །དམ་པའི་ཆོས་ནི་ སྤོང་བར་བྱེད། །མུན་པའི་ཕུང་པོས་རབ་ཏུ་ཁེབས། །འཕགས་པའི་ཚོགས་ལ་གུས་མི་བྱེད། །ཀུན་ནས་ཉོན་མོངས་འདི་གཟིགས་ནས། །འདུས་བྱས་གང་ལའང་མི་དགའ་སྟེ། ། ཉོན་མོངས་མེད་པ་འདུས་མ་བྱས། །མྱ་ངན་འདས་པ་ཐོབ་པར་བྱ། །གཞན་ཡང་ཀྱེ་མའོ་ཁྱིམ་བདག །འཇིག་རྟེན་གནས་པ་འདི་ནི། འདི་ལྟ་སྟེ། ཕྲག་དོག་དང་སེར་སྣའི་ཀུན་ དུ་སྦྱོར་བ་དང་ལྡན་པར་ཤེས། ཀྱེ་མའོ་ཁྱིམ་བདག །འཇིག་རྟེན་གནས་པ་འདི་ནི། འདི་ལྟ་སྟེ། མ་རིག་པའི་ལིང་ཏོག་གིས་ཁེབས་པར་མཐོང༌། ཀྱེ་མའོ་ཁྱིམ་བདག །འཇིག་ རྟེན་གནས་པ་འདི་ནི། འདི་ལྟ་སྟེ། གཏི་མུག་གི་འོབས་སུ་ཆུད་པར་མཐོང༌། ཀྱེ་མའོ་ཁྱིམ་བདག །འཇིག་རྟེན་གནས་པ་འདི་ནི། འདི་ལྟ་སྟེ། འདོད་པའི་རླུང་གིས་དེད་པར་མཐོང༌། ཀྱེ་མའོ་ཁྱིམ་བདག །འཇིག་རྟེན་གནས་པ་འདི་ནི། འདི་ལྟ་སྟེ། འདོད་པའི་ཟུག་རྔུས་ཤིན་ཏུ་ཟུག་པར་མཐོང༌། ཀྱེ་མའོ་ཁྱིམ་བདག །འཇིག་རྟེན་གནས་པ་འདི་ནི། འདི་ལྟ་སྟེ། ཁྲོ་བ་དང་འཁོན་དུ་འཛིན་པའི་དུ་བས་ཤིན་ཏུ་བདུགས་པར་མཐོང༌། ཀྱེ་མའོ་ཁྱིམ་བདག །འཇིག་རྟེན་གནས་པ་འདི་ནི། འདི་ལྟ་སྟེ། འདོད་ཆགས་ཀྱི་མེས་ཀུན་ཏུ་འབར་བར་མཐོང༌། ཀྱེ་མའོ་ཁྱིམ་བདག །འཇིག་རྟེན་གནས་པ་འདི་ནི། འདི་ལྟ་སྟེ། ཞེ་སྡང་གི་དུག་གིས་ཁེབས་པར་མཐོང༌། ཀྱེ་མའོ་ཁྱིམ་བདག །འཇིག་རྟེན་གནས་པ་འདི་ནི། འདི་ལྟ་སྟེ། སྒྲིབ་ པའི་ཚེར་མས་བསྐོར་བར་མཐོང༌། །ཀྱེ་མའོ་ཁྱིམ་བདག །འཇིག་རྟེན་གནས་པ་འདི་ནི། འདི་ལྟ་སྟེ། འཁོར་བའི་འབྲོག་དགོན་པས་བརྩོན་འགྲུས་ཉམས་པར་མཐོང་སྟེ། ཁྱིམ་བདག། འཇིག་རྟེན་གནས་པ་ཡོངས་སུ་འཁྲི་བ་བཅུ་པོ་དེ་དག་གིས་ཡོངས་སུ་དཀྲིས་པར་མཐོང་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །རྒ་བས་སྐྱེས་བུ་རྣམས་ཀྱི་གཞོན་པ་འཇོམས། །གཟུགས་ཀྱང་རྣམ་པར་འཇིག་ཅིང་གཟུགས་ངན་བྱེད། ། ༄༅། །དྲན་དང་བློ་དང་དགའ་བ་མེད་པར་བྱེད། །འགྲོ་བ་རྣམས་ནི་འཆི་བའི་སྒོ་མོར་ཁྲིད། །ནད་ནི་སྟོབས་དང་དྲག་ཤུལ་རབ་ཏུ་འཇོམས། །མཐུ་དང་ཕ་རོལ་གནོད་ པ་ཐམས་ཅད་འཕྲོག །དབང་པོའི་གྲོང་རྣམས་མཐའ་དག་འཇོམས་པར་བྱེད། །མགོན་མེད་ཤིན་ཏུ་རྟུལ་བ་ཞན་པར་འགྱུར། །འཆི་བ་སྲིན་པོ་ལྟ་བུར་མི་བཟད་དེ། །རྟག་ཏུ་སྐྱེ་ རྒུ་རྣམས་ཀྱི་ཕྱི་བཞིན་འབྲང༌། །སྟོབས་ཀྱིས་རབ་ཏུ་མནན་ནས་འགྲོ་བ་ཡི། །ཕངས་པའི་ཚེ་ནི་མ་ལུས་ཟད་པར་འཐུང༌། །རྒ་བ་དང་ནི་འཆི་བས་སྐྱོ་འགྱུར་ཏེ། །འཇིག་རྟེན་དག་ནི་ནད་ ཀྱིས་གཙེས་རིག་ནས། །མི་དགའ་མི་འཆི་ཞི་ཞིང་བདེ་བ་ཡི། །ཆོས་རྣམས་ཚོལ་ཕྱིར་ང་ནི་རབ་ཏུ་བྱུང༌། །མེ་གསུམ་གྱིས་ནི་འཇིག་རྟེན་རབ་ཚིག་པ། །འགྲོ་བ་དག་ལ་སྐྱབས་ གཞན་མ་མཐོང་ནས། །ང་ནི་སྐྱབས་དང་དཔུང་གཉེན་གྱུར་བྱས་ཏེ། །བདུད་རྩིའི་ཆར་ཕབ་མེ་རྣམས་ཞི་བར་བྱ། །སྐྱེ་རྒུ་དག་ནི་ལམ་རྣམས་རབ་སྟོར་ཅིང༌། །མིག་མེད་ ལྡོངས་པ་རྨོངས་པར་གྱུར་པ་མཐོང༌། །ང་ནི་འཇིག་རྟེན་དག་ལ་མིག་སྦྱིན་ཞིང༌། །ལམ་རྣམས་བསྟན་ཕྱིར་ང་ནི་རབ་ཏུ་བྱུང༌། །སྒྲིབ་པ་དག་གིས་བསྒྲིབས་ཤིང་ཀུན་བསྒྲིབས་ནས། ཐེ་ཚོམ་ཀུན་ནས་ལངས་པའི་སེམས་ཅན་རྣམས། །ཐེ་ཚོམ་རབ་ཏུ་བསལ་བར་འགྱུར་བ་དང༌། །ཆོས་རྣམས་བསྟན་ཕྱིར་ང་ནི་རབ་ཏུ་བྱུང༌། །སེམས་ཅན་འདི་དག་ཕན་ཚུན་ མི་མཐུན་ཏེ། །གླགས་དང་སྐབས་ཚོལ་གནོད་པའི་ཉེས་པ་ཅན། །འགྲས་པ་དག་གི་སྡུམས་ནི་བྱ་བ་དང༌། །འགྲོ་ལ་ཕན་འདོད་ཕྱིར་ནི་ང་རབ་བྱུང༌། །ཕ་དང་མ་དང་སྡུག་པའི་མཆོག་ རྣམས་ལ། །ང་རྒྱལ་དབང་གིས་མི་གུས་སེམས་ཅན་དང༌། །ང་རྒྱལ་རྒྱལ་མཚན་རབ་ཏུ་བསྙལ་བའི་ཕྱིར། །ཁྱིམ་བདག་དེ་ཕྱིར་ང་ནི་རབ་ཏུ་བྱུང༌། །ཆགས་པ་ཡིས་ནི་བསྒྲིབས་པའི་སེམས་ ཅན་རྣམས། །རྫོགས་ཕྱིར་ལྟུང་བར་བྱེད་པ་མཐོང་བ་དང༌། །ནོར་བདུན་རྒྱ་ཆེན་རབ་ཏུ་རྙེད་གྱུར་ཏེ། །དེས་ནི་སེམས་ཅན་དབུལ་བ་མེད་པར་བྱ། །སེམས་ཅན་འདི་དག་ཕན་ཚུན་གསོད་བྱེད་ ཅིང༌། །ལུས་ནི་གདོན་མི་ཟ་བར་དོར་དགོས་ཀྱང༌། །བྱིས་པ་དོན་མེད་བདག་ལུས་གསོ་མཐོང་ནས། །སྲིད་པ་གསུམ་ལས་ང་ནི་རྣམ་པར་ལོག །ཇི་ལྟར་ཁྱོད་ནི་དོན་མི་ཤེས་པ་བཞིན། ། དེ་འདྲ་བས་ནི་འཇིག་རྟེན་གསུམ་པོ་གང༌། །འཇིག་རྟེན་དག་ལ་དོན་རྣམས་བསྟན་པའི་ཕྱིར། །ཕན་པར་འདོད་པས་ང་ནི་རབ་ཏུ་བྱུང༌། །སེམས་ཅན་དམྱལ་བར་ལྷུང་བའི་སེམས་ཅན་ དག །མི་བཟད་རྣམ་པ་སྣ་ཚོགས་མཐའ་ཡས་ཀྱི། །སྡུག་བསྔལ་དྲག་པོ་བྱེད་པར་མཐོང་བས་ན། །དེ་དག་ཐར་པར་བྱ་ཕྱིར་ང་རབ་བྱུང༌། །གཅིག་ལ་གཅིག་ནི་གནོད་བྱེད་སེམས་ཅན་ རྣམས། །བྱོལ་སོང་འགྲོ་བར་རྣམ་པར་སྤྱོད་མཐོང་ནས། །སྐྱེ་རྒུ་མགོན་མེད་མགོན་ནི་བྱ་བའི་ཕྱིར། །སྙིང་རྗེའི་བསམ་པས་ང་ནི་རབ་ཏུ་བྱུང༌། །གཤིན་རྗེ་ཡིས་ནི་གཙེས་པའི་སེམས་ ༄༅། །ཅན་རྣམས། །བཀྲེས་སྐོམ་མི་བཟང་སྡུག་བསྔལ་གཟིར་མཐོང་ནས། །བྱང་ཆུབ་དམ་པ་ཐོབ་ནས་དེ་དག་ལ། །བདུད་རྩི་རོ་མཆོག་ཁ་ཟས་སྦྱིན་པར་བྱ། །མི་ཡི་ ཀུན་ཏུ་ཚོལ་བའི་སྡུག་བསྔལ་དང༌། །ལྷ་རྣམས་ཤི་འཕོས་སྡུག་བསྔལ་རིག་ནས་ནི། །འཇིག་རྟེན་གསུམ་ཀུན་སྡུག་བསྔལ་སྡུག་བསྔལ་གྱིས། །ཉེན་པ་མཐོང་ནས་ང་ནི་རབ་ཏུ་བྱུང་ ཁྲེལ་བ་དང་ནི་ངོ་ཚ་མེད་པ་དག །འདོད་པས་རབ་ཏུ་རྒྱལ་པའི་སེམས་ཅན་རྣམས། །མ་དང་སྲིང་མོ་བླ་མའི་ཆུང་མ་ལ། །ཉལ་བ་ཁྱི་དང་ཕག་རྣམས་ཇི་བཞིན་ནོ། །འདོད་པའི་དགའ་ བ་ཡིས་ནི་འདི་དག་མིད། །སེམས་ཅན་བུད་མེད་དབང་སོང་འདི་མཐོང་ནས། །ཚོང་དཔོན་བུད་མེད་དག་ནི་མི་འདོད་པས། །ཁྱིམ་ཡང་སྤངས་ནས་ང་ནི་རབ་ཏུ་བྱུང༌། །བྱིས་པ་རྣམས་ ནི་འདོད་པའི་དགའ་ལ་གནས། །ཐམས་ཅད་སྡིག་པ་རྩོད་པའི་དབང་དུ་སོང༌། །བདུད་རྣམས་ཐམས་ཅད་ལ་ནི་དབང་བྱས་ཏེ། །བྱང་ཆུབ་རིམ་པར་འཚང་རྒྱར་ང་རབ་བྱུང༌། །ཁྱིམ་ ན་གནས་པ་དག་ནི་ཉེས་པ་སྟོང༌། །འདི་འདྲ་བ་ཡི་གནོད་པ་འདི་མཐོང་ནས། །ས་རྣམས་ཐམས་ཅད་རྣམ་པར་སྤངས་ནས་ནི། །སྐྱེ་བ་ཟད་པར་བྱ་ཕྱིར་ང་རབ་བྱུང༌། །དེ་ནས་ཁྱིམ་ བདག་ལྔ་བརྒྱ་ཙམ་པོ་དེ་དག་ཀྱེ་མའོ་འདི་ནི། སངས་རྒྱས་ཡིན་ནོ། །ཞེས་ངོ་མཚར་ཐོབ་པར་གྱུར་ཏེ། །དེ་དག་གིས་སངས་རྒྱས་སོ། །སངས་རྒྱས་སོ། །སྙམ་དུ་རིག་ནས་སྒྲ་སྐད་ མགྲིན་གཅིག་ཏུ་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །ཚོང་དཔོན་འདུས་པ་ལྔ་བརྒྱ་ཙམ་པོ་དག །རྒ་བས་འཇིགས་སྐྲག་རྒྱལ་པའི་དྲུང་དུ་མཆིས། །འདི་ལ་ཆོས་མཆོག་ དམ་པ་རྒྱ་ཆེ་བ། །རྒ་འཆི་མཐར་འབྱིན་རབ་ཏུ་བཤད་དུ་གསོལ། །སྲིད་པའི་འགྲོ་བ་ཡོངས་དག་བསམ་པ་དག །བཅོམ་ལྡན་སྲིད་བྲལ་འཇིགས་ལས་རྣམ་པར་གྲོལ། །འབྱུང་བ་འཇིག་ པར་མཛད་པ་སྐྱབས་མཛད་དེ། །སྲིད་པའི་ཁྱིམ་ཞུགས་འགྲོ་བ་ཐར་པར་མཛོད། །དཔའ་བོ་འདོད་ཆགས་བྲལ་ཞིང་རྣམ་པར་གྲོལ། །རྡུལ་བྲལ་དྲི་མི་མངའ་ལ་རྣམ་དག་སེམས། །རྡུལ་ ལ་མཁས་པ་ཁ་ལོ་སྒྱུར་བའི་མཆོག །བདུད་རྩི་དམ་པ་ཆོས་ཀྱི་རྒྱུན་ཕྱེ་ཞིག །སྐྱེས་བུ་དམ་པ་གཟུགས་རབ་མཆོག་འཛིན་པ། །ཁྱོད་འདྲ་ས་དང་ལྷ་ཡུལ་གང་ནའང་མེད། །མི་མཉམ་ མཉམ་པ་དམ་པ་འཇིག་རྟེན་གཙོ། །བདེ་བར་གཤེགས་པ་རབ་མཆོག་ཆོས་གསུངས་ཤིག །དྲི་གསུམ་དྲི་མ་སྤངས་ཤིང་སྐྱོན་མི་མངའ། །མུན་པ་རབ་རིབ་མི་མངའ་རྣམ་དག་སྤྱན། ། མུན་དང་བྲལ་ཞིང་གཏི་མུག་དྲ་བ་བསལ། །རྡུལ་མི་མངའ་བ་མཚུངས་མེད་ཆོས་རྣམས་གསུངས། །འགྲོ་བ་མགོན་མེད་སྡུག་བསྔལ་གྱུར་པ་རྣམས། །སྲིད་པའི་མཚོར་ལྷུང་སྐྱབས་ མེད་ཐམས་ཅད་ལ། །ཐུགས་རྗེ་བརྩེ་བ་བསྐྱེད་དེ་བྱམས་པའི་ཐུགས། །རྒྱལ་བ་མྱུར་དྲོངས་ཕ་རོལ་དགོད་པར་མཛོད། །ང་རྒྱལ་གཏི་མུག་རྒྱགས་པས་བརྒལ་དཀའ་ཞིང༌། །ནད་དང་ ༄༅། །རྩོད་མང་རྦ་ཀློང་སྲིད་པའི་ཆུར། །འགྲོ་བ་ལྷུང་ནས་ཁྱེར་བ་སྐྱབས་མེད་ལ། །ཐུགས་རྗེ་སྐྱེད་ལ་སྲིད་པའི་རྒྱུན་ལས་སྒྲོལ། །གསེར་གྱི་རི་ལྟར་རྣམ་པར་དག་པའི་ སྐུ༑ ༑གཟི་བརྗིད་ཉི་མ་བྱེ་བ་བརྒྱ་བས་ལྷག །འཇམ་ཞིང་སྙམ་པ་ཚངས་དབྱངས་མཆོག་མངའ་བ། །ཆོས་མཆོག་བརྗོད་པ་མཛེས་པ་རབ་ཏུ་གསུངས། །ཆོས་འདི་ཀུན་ནི་རང་བཞིན་ རྣམ་པར་དག །རང་བཞིན་འོད་གསལ་ཡེ་ནས་རྩ་བ་དག །མ་བྱས་བྱེད་དང་ཚོར་བ་པོ་དང་བྲལ། །གཞན་ལས་མ་གསན་རྣམ་དག་ཐམས་ཅད་གཟིགས། །སྤྱད་པར་རབ་སྤྱད་ གྲགས་པ་མཐའ་ཡས་པ། །རང་བྱུང་སྟོབས་བཅུ་མངའ་ཞིང་འཇིགས་མེད་པ། །མཐའ་ཡས་ཡེ་ཤེས་ནམ་མཁའ་མཚུངས་པའི་ཐུགས། །རབ་སྦྱིན་དགེ་སྦྱོང་མཆོག་གིས་ཆོས་ བཤད་གསོལ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཀྱེ་མའོ་ཁྱིམ་བདག་ལྔ་བརྒྱ་ཙམ་པོ་འདི་དག་དགེ་བའི་རྩ་བ་ཡོངས་སུ་སྨིན་གྱི། ཅི་ནས་ས་ཕྱོགས་ འདི་ཉིད་དུ་ཁྱིམ་པའི་མཚན་མ་སྤངས་ཏེ་རབ་ཏུ་བྱུང་བ་ཐོབ་ནས་ཐམས་ཅད་ཟག་པ་ཟད་པའི་མཐར་བྱེད་པ་དེ་ལྟ་དེ་ལྟ་བུར་ངས་ཆོས་བསྟན་ཏོ། །སྙམ་དུ་དགོངས་སོ། །དེ་ནས་ བཅོམ་ལྡན་འདས་དེའི་ཚེ་སྟེང་གི་བར་སྣང་ལ་སྐྱིལ་མོ་ཀྲུང་བཅས་ཏེ་བཞུགས་སོ། །དེ་ནས་ཁྱིམ་བདག་ལྔ་བརྒྱ་ཙམ་པོ་དེ་དག་བཅོམ་ལྡན་འདས་ལ་ལྷག་པར་དགའ་བ་དང༌། དད་ པ་དང༌། རི་མོ་དང༌། གུས་པ་ཉེ་བར་གཞོག་གོ །དེ་ནས་བཅོམ་ལྡན་འདས་ཀྱིས་ཁྱིམ་བདག་ལྔ་བ་རྒྱ་ཙམ་པོ་དེ་དག་ལ་བཀའ་སྩལ་པ། ཁྱིམ་བདག་ཁྱེད་རྣམས་གཙེ་བ་བཅུ་ལས་ཐར་ པར་འདོད་དམ། བཅུ་གང་ཞེ་ན། འདི་ལྟ་སྟེ། སྐྱེ་བས་གཙེ་བ་དང༌། རྒ་བས་གཙེ་བ་དང༌། ན་བས་གཙེ་བ་དང༌། འཆི་བས་གཙེ་བ་དང༌། མྱ་ངན་གྱིས་གཙེ་བ་དང༌། སྨྲེ་སྔགས་འདོན་པས་ གཙེ་བ་དང༌། སྡུག་བསྔལ་གྱིས་གཙེ་བ་དང༌། ཡིད་མི་བདེ་བས་གཙེ་བ་དང༌། འཁྲུག་པས་གཙེ་བ་དང༌། འཁོར་བས་གཙེ་བ་སྟེ། ཁྱིམ་བདག་ཁྱེད་རྣམ་གཙེ་བ་བཅུ་པོ་འདི་དག་ལས་ཐར་ པར་འདོད་དམ། གཞན་ཡང་ཁྱིམ་བདག་ཁྱེད་རྣམས་ཀུན་ནས་མནར་སེམས་ཀྱི་དངོས་པོ་བཅུ་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། བདག་ཉིད་ལ་གནོད་པ་བྱས་སོ། ། ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། གནོད་པ་བྱེད་དོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། གནོད་པ་བྱེད་པར་འདོད་པར་འགྱུར་རོ། །ཞེས་སེམས་ལ་ཀུན་ ནས་མནར་སེམས་སྐྱེ་བ་དང༌། བདག་གི་མཛའ་བོ་ལ་གནོད་པ་བྱས་སོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། བདག་གི་མཛའ་བོ་ལ་གནོད་པ་བྱེད་དོ། །ཞེས་སེམས་ལ་ ཀུན་ནས་མནར་སེམས་སྐྱེ་བ་དང༌། བདག་གི་མཛའ་བོ་ལ་གནོད་པ་བྱེད་པར་འགྱུར་རོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། བདག་དང་མི་མཛའ་བའི་དོན་བྱས་སོ། ། ༄༅། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། བདག་དང་མི་མཛའ་བའི་དོན་བྱེད་དོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། བདག་དང་མི་མཛའ་ བའི་དོན་བྱེད་པར་འགྱུར་རོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང༌། གནོད་པའི་རབ་ཏུ་སྡང་བ་ཉིད་དང་བཅུ་སྟེ། ཁྱིམ་བདག་ཁྱེད་རྣམས་ཀུན་ནས་མནར་སེམས་ཀྱི་དངོས་པོ་ བཅུ་པོ་འདི་དག་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་ལྟ་བ་སྣ་ཚོགས་སུ་གྱུར་པ་ལྟ་བ་ངན་པའི་ཐིབས་པོ་བཅུ་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། བདག་ཏུ་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། སེམས་ཅན་དུ་ལྟ་བར་གྱུར་བ་ལྟ་བ་ངན་པའི་ཐིབས་པོ་དང༌། སྲོག་ཏུ་ལྟ་བར་གྱུར་པ་ལྔ་བ་ངན་པའི་ཐིབས་པོ་དང༌། གང་ཟག་ཏུ་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། ཆད་པར་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། རྟག་པར་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། བྱ་བ་མེད་ པར་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། རྒྱུ་མེད་པར་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། མི་མཐུན་པའི་རྒྱུར་ལྟ་བར་གྱུར་པ་ལྟ་བ་ངན་པའི་ཐིབས་པོ་དང༌། ལོག་པར་ལྟ་བར་གྱུར་བ་ལྟ་བ་ངན་པའི་ཐིབས་པོ་སྟེ། ཁྱིམ་བདག་ཁྱེད་རྣམས་ལྟ་བར་གྱུར་བ་ལྟ་བ་ངན་པའི་ཐིབས་པོ་བཅུ་པོ་འདི་དག་ལས་ཐར་པ་འདོད་དམ། གཞན་ཡང་ ཁྱིམ་བདག་ཁྱེད་རྣམས་ཟུག་རྔུ་བཅུ་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། སྲེད་པའི་ཟུག་རྔུ་དང༌། མ་རིག་པའི་ཟུག་རྔུ་དང༌། འདོད་པའི་ཟུག་རྔུ་དང༌། འདོད་ཆགས་ཀྱི་ ཟུག་རྔུ་དང༌། ཞེ་སྡང་གི་ཟུག་རྔུ་དང༌། གཏི་མུག་གི་ཟུག་རྔུ་དང༌། ང་རྒྱལ་གྱི་ཟུག་རྔུ་དང༌། ལྟ་བའི་ཟུག་རྔུ་དང༌། འབྱུང་བའི་ཟུག་རྔུ་དང༌། འཇིག་པའི་ཟུག་རྔུ་དང་བཅུ་སྟེ། ཁྱིམ་བདག་ ཁྱེད་རྣམས་ཟུག་རྔུ་བཅུ་པོ་འདི་དག་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་སྲེད་པའི་རྩ་བ་ལས་བྱུང་བའི་ཆོས་བཅུ་པོ་འདི་དག་ལས་ཐར་པར་འདོད་དམ། བཅུ་ གང་ཞེ་ན། འདི་ལྟ་སྟེ། སྲེད་པ་ལ་བརྟེན་ནས་ཀུན་ཏུ་ཚོལ་བ་དང༌། ཀུན་ཏུ་ཚོལ་བ་ལ་བརྟེན་ནས་རྙེད་པ་དང༌། རྙེད་པ་ལ་བརྟེན་ནས་ང་ཡིར་འཛིན་པ་དང༌། ང་ཡིར་འཛིན་པ་ལ་བརྟེན་ ནས་རྣམ་པར་ངེས་པ་དང༌། རྣམ་པར་ངེས་པ་ལ་བརྟེན་ནས་འདུན་པའི་འདོད་ཆགས་དང༌། འདུན་པའི་འདོད་ཆགས་ལ་བརྟེན་ནས་ལྷག་པར་ཆགས་པ་དང༌། ལྷག་པར་ཆགས་པ་ལ་ བརྟེན་ནས་སེར་སྣ་དང༌། སེར་སྣ་ལ་བརྟེན་ནས་ཡོངས་སུ་འཛིན་པ་དང༌། ཡོངས་སུ་འཛིན་པ་ལ་བརྟེན་ནས་ཡོངས་སུ་སྲུང་བ་དང༌། ཡོངས་སུ་སྲུང་བ་ལ་བརྟེན་ནས་སྡུག་བསྔལ་བ་དང་ བཅུ་སྟེ༑ ཡོངས་སུ་སྲུང་བའི་གཞི་ལས་དབྱིག་པ་ཐོགས་པ་དང༌། མཚོན་ཆ་ཐོགས་པ་དང༌། འཐབ་པ་དང༌། མཚང་འདྲུ་བ་དང༌། འགྱེད་པ་དང༌། རྩོད་པ་རྣམས་འབྱུང་ངོ༌། །དེའི་ ༄༅། །ཕྱིར་ཕྲ་མ་ལ་སོགས་པའི་སྡིག་པ་མི་དགེ་བའི་ཆོས་རྣམ་པ་མང་པོ་འབྱུང་བར་འགྱུར་ཏེ། ཁྱིམ་བདག་ཁྱེད་རྣམས་སྲེད་པའི་རྩ་བ་ལས་བྱུང་བའི་ཆོས་བཅུ་པོ་ འདི་དག་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་ལོག་པ་ཉིད་བཅུ་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། ལོག་པའི་ལྟ་བ་དང༌། ལོག་ པའི་རྟོག་པ་དང༌། ལོག་པའི་ངག་དང༌། ལོག་པའི་ལས་ཀྱི་མཐའ་དང༌། ལོག་པའི་འཚོ་བ་དང༌། ལོག་པའི་རྩོལ་བ་དང༌། ལོག་པའི་དྲན་པ་དང༌། ལོག་པའི་ཏིང་ངེ་འཛིན་དང༌། ལོག་པའི་རྣམ་པར་གྲོལ་བ་དང༌། ལོག་པའི་ཤེས་པ་སྟེ། ཁྱིམ་བདག་ཁྱེད་རྣམས་ལོག་པ་བཅུ་པོ་འདི་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་མི་དགེ་ བའི་ལས་ཀྱི་ལམ་བཅུ་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་ དུ་སྨྲ་བ་དང༌། ཕྲ་མ་དང༌། ངག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་སྟེ། ཁྱིམ་བདག་ཁྱེད་རྣམས་མི་དགེ་བའི་ལས་ཀྱི་ ལམ་བཅུ་པོ་འདི་དག་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་ཀུན་ནས་ཉོན་མོངས་པ་བཅུ་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། སེར་སྣའི་དྲི་མས་ཀུན་ནས་ཉོན་མོངས་པ་དང༌། འཆལ་བའི་ཚུལ་ཁྲིམས་ཀྱི་དྲི་མས་ཀུན་ནས་ཉོན་མོངས་པ་དང༌། གནོད་སེམས་ཀྱི་དྲི་མས་ཀུན་ནས་ཉོན་མོངས་པ་དང༌། ལེ་ལོའི་ དྲི་མས་ཀུན་ནས་ཉོན་མོངས་པ་དང༌། གཡེང་བའི་དྲི་མས་ཀུན་ནས་ཉོན་མོངས་པ་དང༌། འཆལ་བའི་ཤེས་རབ་ཀྱི་དྲི་མས་ཀུན་ནས་ཉོན་མོངས་པ་དང༌། སྲི་ཞུ་མེད་པའི་དྲི་མས་ ཀུན་ནས་ཉོན་མོངས་པ་དང༌། ཐེ་ཚོམ་གྱི་དྲི་མས་ཀུན་ནས་ཉོན་མོངས་པ་དང༌། མ་མོས་པའི་དྲི་མས་ཀུན་ནས་ཉོན་མོངས་པ་དང༌། མ་གུས་པའི་དྲི་མས་ཀུན་ནས་ཉོན་མོངས་པ་སྟེ། ཁྱིམ་བདག་ཁྱེད་རྣམས་ཀུན་ནས་ཉོན་མོངས་པ་བཅུ་པོ་འདི་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་འཁོར་བའི་འཇིགས་པ་བཅུ་ལས་ཐར་བར་འདོད་དམ། བཅུ་གང་ཞེ་ན། འདི་ལྟ་སྟེ། ཕྲག་དོག་དང༌། སེར་སྣའི་ཀུན་ཏུ་སྦྱོར་བ་ལས་ཐར་པར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་མ་རིག་པའི་ལིང་ཏོག་ལས་ཐར་པར་འདོད་ དམ༑ འདི་ལྟ་སྟེ། ཁྱིམ་བདག་ཁྱེད་རྣམས་གཏི་མུག་གི་འོབས་ལས་ཐར་པར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་འདོད་པའི་ཆུ་བོ་ལས་ཐར་པར་འདོད་དམ། འདི་ ལྟ་སྟེ༑ ཁྱིམ་བདག་ཁྱེད་རྣམས་ལོག་པའི་ཟུག་རྔུ་ལས་ཐར་པར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་ཁྲོ་བ་དང་འཁོན་དུ་འཛིན་པ་ལས་ཐར་པར་འདོད་དམ། འདི་ལྟ་ ༄༅། །སྟེ༑ ཁྱིམ་བདག་ཁྱེད་རྣམས་འདོད་ཆགས་ཀྱི་མེ་ལས་ཐར་པར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་ཞེ་སྡང་གི་དུག་ལས་ཐར་པར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་སྒྲིབ་པའི་ཚེར་མ་ལས་ཐར་པར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་འཁོར་བའི་འབྲོག་དགོན་པ་ལས་ཐར་པར་འདོད་དམ། ཁྱིམ་བདག་ཁྱེད་རྣམས་འཁོར་བའི་འཇིགས་པ་བཅུ་པོ་འདི་དག་ལས་ཐར་པར་འདོད་དམ། དེ་ནས་བཅོམ་ལྡན་འདས་ལ་ཁྱིམ་བདག་ལྔ་བརྒྱ་ཙམ་པོ་དེ་དག་གིས་སྒྲ་སྐད་ མགྲིན་གཅིག་ཏུ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གཙེ་བ་བཅུ་ལས་ཐར་པར་འཚལ་ཏེ། བཅུ་གང་ཞེ་ན། འདི་ལྟ་སྟེ། སྐྱེ་བས་གཙེ་བ་དང༌། རྒ་ བས་གཙེ་བ་དང༌། ན་བས་གཅེ་བ་དང༌། འཆི་བས་གཙེ་བ་དང༌། མྱ་ངན་གྱིས་གཙེ་བ་དང༌། སྨྲེ་སྔགས་འདོན་པས་གཙེ་བ་དང༌། སྡུག་བསྔལ་གྱིས་གཙེ་བ་དང༌། ཡིད་མི་ བདེ་བས་གཙེ་བ་དང༌། འཁྲུག་པས་གཙེ་བ་དང༌། འཁོར་བའི་གཙེ་བ་ལས་བཅོམ་ལྡན་འདས། བདག་ཅག་ཐར་པར་འཚལ་ལགས་སོ། །དེ་བཞིན་དུ་འཁོར་བའི་འབྲོག་དགོན་ པའི་བར་དུ་ཆོས་བཅུ་པོ་འདི་དག་ཐམས་ཅད་རྒྱས་པར་བྱའོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་ལྔ་བརྒྱ་ཙམ་པོ་དེ་དག་ལ་བཀའ་སྩལ་པ། ཁྱིམ་བདག་རྣམས། མིག་ནི༑ ཐར་པར་མི་འདོད་དོ། །དེ་ཅིའི་ཕྱིར་ཞེ་ན། མིག་ནི། བྱེད་པ་མེད་པ། གཡོ་བ་མེད་པ་སྟེ། མིག་ནི། མི་སེམས་ཤིང་རྣམ་པར་མི་རིག་གོ། དེ་བས་ན། ཁྱིམ་བདག་རྣམས་མིག་ མེད་དོ། །ཞེས་གནས་པར་བྱའོ། །ཁྱིམ་བདག་རྣམས། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ནི། ཐར་པར་མི་འདོད་དོ། །དེ་ཅིའི་ཕྱིར་ཞེ་ན། ཡིད་ནི། བྱེད་པ་མེད་པ། གཡོ་བ་ མེད་པ་སྟེ། ཡིད་ནི། མི་སེམས་ཤིང་རྣམ་པར་མི་རིག་གོ །དེ་བས་ན། ཁྱིམ་བདག་རྣམས་ཡིད་ལ་ཡང་བདག་མེད་དོ། །ཞེས་གནས་པར་བྱའོ། །ཁྱིམ་བདག་རྣམས། གཟུགས་ནི། ཐར་ པར་མི་འདོད་དོ། །དེ་ཅིའི་ཕྱིར་ཞེ་ན། གཟུགས་ནི། བྱེད་པ་མེད་པ། གཡོ་བ་མེད་པ་སྟེ། གཟུགས་ནི། མི་སེམས་ཤིང་རྣམ་པར་མི་རིག་གོ །དེ་བས་ན། ཁྱིམ་བདག་རྣམས་གཟུགས་ ལ་ཡང་བདག་མེད་དོ། །ཞེས་གནས་པར་བྱའོ། །ཁྱིམ་བདག་རྣམས། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་ནི། ཐར་པར་མི་འདོད་དོ། །དེ་ཅིའི་ཕྱིར་ཞེ་ན། ཆོས་ཀྱི་རབ་ཏུ་ བྱེད་པ་མེད་པ། གཡོ་བ་མེད་པ་སྟེ། ཆོས་ནི། མི་སེམས་ཤིང་རྣམ་པར་མི་རིག་གོ །དེ་བས་ན། ཁྱིམ་བདག་རྣམས་ཆོས་ཀྱི་བར་དུ་ཡང་བདག་མེད་དོ། །ཞེས་གནས་པར་བྱའོ། །ཁྱིམ་ བདག་རྣམས། གཟུགས་ཀྱི་ཕུང་པོ་ནི། ཐར་པར་མི་འདོད་དོ། །དེ་ཅིའི་ཕྱིར་ཞེ་ན། གཟུགས་ཀྱི་ཕུང་པོ་ནི། བྱེད་པ་མེད་པ། གཡོ་ནི། བྱེད་པ་མེད་པ། གཡོ་བ་མེད་པ་སྟེ། རྣམ་པར་ཤེས་པའི་ ༄༅། །ཤིང་རྣམ་པར་མི་རིག་གོ །དེ་བས་ན། ཁྱིམ་བདག་རྣམས། གཟུགས་ཀྱི་ཕུང་པོ་ལ་ཡང་བདག་མེད་དོ། །ཞེས་གནས་པར་བྱའོ། །ཁྱིམ་བདག་རྣམས། ཚོར་ བའི་ཕུང་པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་དང༌། རྣམ་པར་ཤེས་པའི་ཕུང་པོ་ནི། ཐར་པར་མི་འདོད་དོ། །དེ་ཅིའི་ཕྱིར་ཞེ་ན། རྣམ་པར་ཤེས་པའི་ཕུང་པོ་ནི། བྱེད་པ་མེད་པ། གཡོ་བ་མེད་པ་སྟེ། རྣམ་པར་ཤེས་པའི་ཕུང་པོ་ནི། མི་སེམས་ཤིང་རྣམ་པར་མི་རིག་གོ །དེ་བས་ན། ཁྱིམ་བདག་རྣམས་རྣམ་པར་ཤེས་པའི་ཕུང་པོ་ཡང་བདག་ མེད་དོ༑ ༑ཞེས་གནས་པར་བྱའོ། །ཁྱིམ་བདག་རྣམས། སའི་ཁམས་ནི། ཐར་པར་མི་འདོད་དོ། །དེ་ཅིའི་ཕྱིར་ཞེ་ན། སའི་ཁམས་ནི། བྱེད་པ་མེད་པ། །གཡོ་བ་མེད་པ་སྟེ། སའི་ཁམས་ ནི༑ མི་སེམས་ཤིང་རྣམ་པར་མི་རིག་གོ །དེ་བས་ན། ཁྱིམ་བདག་རྣམས་སའི་ཁམས་ལ་བདག་མེད་དོ། །ཞེས་གནས་པར་བྱའོ། །ཁྱིམ་བདག་རྣམས། ཆུའི་ཁམས་དང༌། མེའི་ ཁམས་དང༌། རླུང་གི་ཁམས་དང༌། ནམ་མཁའི་ཁམས་དང༌། རྣམ་པར་ཤེས་པའི་ཁམས་ནི། ཐར་པར་མི་འདོད་དོ། །དེ་ཅིའི་ཕྱིར་ཞེ་ན། རྣམ་པར་ཤེས་པའི་ཁམས་ནི། བྱེད་པ་མེད་པ། གཡོ་བ་མེད་པ་སྟེ། རྣམ་པར་ཤེས་པའི་ཁམས་ནི། མི་སེམས་ཤིང་རྣམ་པར་མི་རིག་གོ །དེ་བས་ན། ཁྱིམ་བདག་རྣམས། རྣམ་པར་ཤེས་པའི་ཁམས་ལ་ ཡང་བདག་མེད་དོ། །ཞེས་གནས་པར་བྱའོ། །དེ་ལྟར་ན་ཁྱིམ་བདག་རྣམས། ཆོས་ཐམས་ཅད་ནི། ཡང་དག་པ་མ་ཡིན་པར་ཡོངས་སུ་རྟོག་པ་ལས་བྱུང་སྟེ། རྐྱེན་ལ་རག་ལས་པ། སྟོབས་མེད་པ། ཉམ་ཆུང་བ། རྐྱེན་རྣམས་ལས་བྱུང་བ། རྐྱེན་རྣམས་ཡོད་ན། ཆོས་རྣམས་གདགས་པར་འགྱུར་གྱི། རྐྱེན་རྣམས་མེད་ན། ཆོས་རྣམས་གདགས་པར་མི་འགྱུར་རོ། ། ཁྱིམ་བདག་རྣམས། ཆོས་ཐམས་ཅད་ནི། བཏགས་པ་ཙམ་སྟེ། འདི་ལ་ལམ་ཆད་པ་མྱ་ངན་ལས་འདས་པ་མ་གཏོགས་པར་སྐྱེ་བའམ། རྒ་བའམ། འཆི་བའམ། འཕོ་བའམ། འབྱུང་ བ་གང་ཡང་མེད་དོ། །དེ་ལྟར་ཁྱིམ་བདག་རྣམས། ཁྱེད་རྣམ་གྲངས་འདིས་ཆོས་ཐམས་ཅད་ནི། ཡང་དག་པ་མ་ཡིན་པ། ཀུན་བརྟགས་པ་ལས་བྱུང་བ། རྐྱེན་ལ་རག་ལས་པ། སྟོབས་ མེད་པ༑ ཉམ་ཆུང་བ། རྐྱེན་རྣམས་ལས་བྱུང་བ་སྟེ། རྐྱེན་རྣམས་ཡོད་ན། ཆོས་རྣམས་གདགས་པར་འགྱུར་གྱི། རྐྱེན་མེད་ན། ཆོས་རྣམས་གདགས་པར་མི་འགྱུར་རོ། །ཆོས་ཐམས་ ཅད་ནི༑ བཏགས་པ་ཙམ་སྟེ། འདི་ལ་ལམ་ཆད་པ་མྱ་ངན་ལས་འདས་པ་མ་གཏོགས་པར་སྐྱེ་བའམ། རྒ་བའམ། འཆི་བའམ། འཕོ་བའམ། འབྱུང་བ་གང་ཡང་མེད་པར་ རིག་པར་བྱའོ། །དེ་ལྟར་ན་ཁྱིམ་བདག་རྣམས། ཡང་དག་པ་མ་ཡིན་པ་ཀུན་རྟོག་པ་ཡོད་ན། ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་འགྱུར་གྱི། ཡང་དག་པ་མ་ ༄༅། །ཡིན་པ་ཀུན་རྟོག་པ་མེད་ན། ཚུལ་བཞིན་མ་ཡིན་པ་ཡིད་ལ་བྱེད་པར་གདགས་པར་མི་འགྱུར་རོ། །ཚུལ་བཞིན་མ་ཡིན་པ་ཡིད་ལ་བྱེད་པ་ཡོད་ན། མ་ རིག་པ་གདགས་པར་འགྱུར་གྱི། ཚུལ་བཞིན་མ་ཡིན་པ་ཡིད་ལ་བྱེད་པ་མེད་ན། མ་རིག་པ་གདགས་པར་མི་འགྱུར་རོ། །མ་རིག་པ་ཡོད་ན། འདུ་བྱེད་རྣམས་གདགས་ པར་འགྱུར་གྱི། མ་རིག་པ་མེད་ན། འདུ་བྱེད་རྣམས་སུ་གདགས་པར་མི་འགྱུར་རོ། །འདུ་བྱེད་ཡོད་ན། རྣམ་པར་ཤེས་པ་གདགས་པར་འགྱུར་གྱི། འདུ་བྱེད་མེད་ན། རྣམ་པར་ཤེས་པ་གདགས་པར་མི་འགྱུར་རོ། །རྣམ་པར་ཤེས་པ་ཡོད་ན། མིང་དང་གཟུགས་གདགས་པར་འགྱུར་གྱི། རྣམ་པར་ཤེས་པ་མེད་ན། མིང་དང་གཟུགས་ གདགས་པར་མི་འགྱུར་རོ། །མིང་དང་གཟུགས་ཡོད་ན། སྐྱེ་མཆེད་དྲུག་གདགས་པར་འགྱུར་གྱི། མིང་དང་གཟུགས་མེད་ན། སྐྱེ་མཆེད་དྲུག་ཏུ་གདགས་པར་མི་འགྱུར་ རོ༑ ༑སྐྱེ་མཆེད་དྲུག་ཡོད་ན། རེག་པར་གདགས་པར་འགྱུར་གྱི། སྐྱེ་མཆེད་དྲུག་མེད་ན། རེག་པར་གདགས་པར་མི་འགྱུར་རོ། །རེག་པ་ཡོད་ན། ཚོར་བ་གདགས་པར་ འགྱུར་གྱི། རེག་པ་མེད་ན། ཚོར་བ་གདགས་པར་མི་འགྱུར་རོ། །ཚོར་བ་ཡོད་ན། སྲེད་པ་གདགས་པར་འགྱུར་གྱི། ཚོར་བ་མེད་ན། སྲེད་པ་གདགས་པར་མི་འགྱུར་ རོ༑ ༑སྲེད་པ་ཡོད་ན། ལེན་པ་གདགས་པར་འགྱུར་གྱི། སྲེད་པ་མེད་ན། ལེན་པ་གདགས་པར་མི་འགྱུར་རོ། །ལེན་པ་ཡོད་ན། སྲིད་པ་གདགས་པར་འགྱུར་གྱི། ལེན་པ་མེད་ན། སྲིད་པ་གདགས་པར་མི་འགྱུར་རོ། །སྲིད་པ་ཡོད་ན། སྐྱེ་བ་གདགས་པར་འགྱུར་གྱི། སྲིད་པ་མེད་ན། སྐྱེ་བ་གདགས་པར་མི་འགྱུར་རོ། །སྐྱེ་བ་ཡོད་ན། རྒ་ཤི་གདགས་པར་འགྱུར་གྱི། སྐྱེ་བ་མེད་ན། རྒ་ཤི་གདགས་པར་མི་འགྱུར་ཏེ། རྒ་བ་ཞེས་བྱ་བ་གང་ཞེ་ན། རྒས་པ་དང༌། གཏུགས་པ་དང༌། སྤྱི་ཐེར་པ་དང༌། སྐྲ་སྐྱ་བ་དང༌། གཉེར་མ་མང་བ་དང༌། ཚེ་ཉམས་ པ་དང༌། དབང་པོ་ཡོངས་སུ་སྨིན་པ་དང༌། འདུ་བྱེད་རྣམས་ཀྱི་དངོས་པོ་རྙིངས་པ་སྟེ། དེ་ནི། རྒ་བ་ཞེས་བྱའོ། །འཆི་བ་ཞེས་བྱ་བ་གང་ཞེ་ན། འདི་ལྟ་སྟེ། འཆི་བ་དང༌། འཕོ་བ་དང༌། འཆི་བའི་དུས་བྱེད་པ་དང༌། ཕུང་པོ་རྣམས་ཞིག་པ་དང༌། ལུས་བོར་བ་དང༌། རིས་མཐུན་པའི་སྐལ་བ་མཉམ་པ་དང་བྲལ་བ་སྟེ། འདི་ནི། འཆི་བ་ཞེས་བྱའོ། །དེ་ལ་རྒ་བ་འདི་དང༌། འཆི་བ་འདི་ལ་རྒ་ཤི་ཞེས་བྱའོ། །དེ་ལྟར་སྐྱེ་བ་ཡོད་ན། རྒ་ཤི་གདགས་པར་འགྱུར་གྱི། སྐྱེ་བ་མེད་ན། རྒ་ཤི་གདགས་པར་མི་འགྱུར་ཏེ། སྐྱེ་བ་ཞེས་བྱ་བ་གང་ཞེ་ན། སྐྱེ་བ་དང༌། རྫོགས་པར་སྐྱེ་བ་དང༌། འཇུག་པ་དང༌། མངོན་པར་འགྲུབ་པ་དང༌། ཕུང་པོ་རྣམས་འབྱུང་བ་དང༌། སྐྱེ་མཆེད་རྣམས་རབ་ཏུ་འཐོབ་པ་དང༌། རིས་མཐུན་པ་དང་ཕྲད་པ་སྟེ། དེ་ནི། ༄༅། །སྐྱེ་བ་ཞེས་བྱའོ། །སྲིད་པ་ཡོད་ན། སྐྱེ་བ་གདགས་པར་འགྱུར་གྱི། སྲིད་པ་མེད་ན། སྐྱེ་བ་གདགས་པར་མི་འགྱུར་ཏེ། སྲིད་པ་ཞེས་བྱ་བ་གང་ཞེ་ན། འདི་ལྟ་ སྟེ༑ འདོད་པའི་སྲིད་པ་དང༌། གཟུགས་ཀྱི་སྲིད་པ་དང༌། གཟུགས་མེད་པའི་སྲིད་པ་སྟེ། དེ་ནི། སྲིད་པ་ཞེས་བྱའོ། །ལེན་པ་ཡོད་ན། སྲིད་པ་གདགས་པར་འགྱུར་གྱི། ལེན་པ་ མེད་ན༑ སྲིད་པ་གདགས་པར་མི་འགྱུར་ཏེ། ལེན་པ་ཞེས་བྱ་བ་གང་ཞེ་ན། འདོད་པའི་ལེན་པ་དང༌། ལྟ་བའི་ལེན་པ་དང༌། ཚུལ་ཁྲིམས་དང་བརྟུལ་ཞུགས་ཀྱི་ལེན་པ་དང༌། བདག་ཏུ་སྨྲ་བའི་ལེན་པ་སྟེ། དེ་ནི། ལེན་པ་ཞེས་བྱའོ། །སྲེད་པ་ཡོད་ན། ལེན་པ་གདགས་པར་འགྱུར་གྱི། སྲེད་པ་མེད་ན། ལེན་པ་གདགས་པར་མི་འགྱུར་ཏེ། སྲེད་པ་ཞེས་ བྱ་བ་གང་ཞེ་ན། འདི་ལྟ་སྟེ། གཟུགས་ལ་སྲེད་པ་དང༌། སྒྲ་ལ་སྲད་པ་དང༌། དྲི་ལ་སྲེད་པ་དང༌། རོ་ལ་སྲེད་པ་དང༌། རེག་བྱ་ལ་སྲེད་པ་དང༌། ཆོས་ལ་སྲེད་པ་སྟེ། དེ་ནི། སྲེད་ པ་ཞེས་བྱའོ། །ཚོར་བ་ཡོད་ན། སྲེད་པ་གདགས་པར་འགྱུར་གྱི། ཚོར་བ་མེད་ན། སྲེད་པ་གདགས་པར་མི་འགྱུར་ཏེ། ཚོར་བ་ཞེས་བྱ་བ་གང་ཞེ་ན། འདི་ལྟ་སྟེ། མིག་གི་ འདུས་ཏེ་རེག་པ་ལས་བྱུང་བའི་ཚོར་བ་དང༌། རྣ་བའི་འདུས་ཏེ་རེག་པ་ལས་བྱུང་བའི་ཚོར་བ་དང༌། སྣའི་འདུས་ཏེ་རེག་པ་ལས་བྱུང་བའི་ཚོར་བ་དང༌། ལྕེའི་འདུས་ཏེ་རེག་པ་ ལས་བྱུང་བའི་ཚོར་བ་དང༌། ལུས་ཀྱི་འདུས་ཏེ་རེག་པ་ལས་བྱུང་བའི་ཚོར་བ་དང༌། ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བ་སྟེ། དེ་ནི། ཚོར་བ་ཞེས་བྱའོ། །རེག་པ་ཡོད་ན། ཚོར་བ་ གདགས་པར་འགྱུར་གྱི། རིག་པ་མེད་ན། ཚོར་བ་གདགས་པར་མི་འགྱུར་ཏེ། རེག་པ་ཞེས་བྱ་བ་གང་ཞེ་ན། འདི་ལྟ་སྟེ། མིག་གི་འདུས་ཏེ་རེག་པ་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་འདུས་ཏེ་རེག་པ་སྟེ། དེ་ནི། རེག་པ་ཞེས་བྱའོ། །སྐྱེ་མཆེད་དྲུག་ཡོད་ན། རེག་པ་གདགས་པར་འགྱུར་གྱི། སྐྱེ་མཆེད་དྲུག་མེད་ན། རེག་པ་གདགས་པར་མི་འགྱུར་ ཏེ༑ སྐྱེ་མཆེད་དྲུག་ཅེས་བྱ་བ་གང་ཞེ་ན། འདི་ལྟ་སྟེ། མིག་གི་སྐྱེ་མཆེད་དང༌། རྣ་བའི་སྐྱེ་མཆེད་དང༌། སྣའི་སྐྱེ་མཆེད་དང༌། ལྕེའི་སྐྱེ་མཆེད་དང༌། ལུས་ཀྱི་སྐྱེ་མཆེད་དང༌། ཡིད་ ཀྱི་སྐྱེ་མཆེད་དེ། དེ་ནི། སྐྱེ་མཆེད་དྲུག་ཅེས་བྱའོ། །མིང་དང་གཟུགས་ཡོད་ན། སྐྱེ་མཆེད་དྲུག་གདགས་པར་འགྱུར་གྱི། མིང་དང་གཟུགས་མེད་ན། སྐྱེ་མཆེད་དྲུག་གདགས་པར་ མི་འགྱུར་ཏེ། མིང་དང་གཟུགས་ཞེས་བྱ་བ་གང་ཞེ་ན། འདི་ལྟ་སྟེ། ཚོར་བ་དང༌། འདུ་ཤེས་དང༌། སེམས་པ་དང༌། རེག་པ་དང༌། ཡིད་ལ་བྱེད་པ་དང༌། འབྱུང་བ་ཆེན་པོ་བཞི་དང༌། འབྱུང་བ་ཆེན་པོ་བཞི་ལ་གནས་པའི་མིང་དང་གཟུགས་ཏེ། འདི་ནི། མིང་དང་གཟུགས་ཞེས་བྱའོ། །རྣམ་པར་ཤེས་པ་ཡོད་ན། མིང་དང་གཟུགས་གདགས་པར་འགྱུར་གྱི། ༄༅། །རྣམ་པར་ཤེས་པ་མེད་ན། མིང་དང་གཟུགས་སུ་གདགས་པར་མི་འགྱུར་ཏེ། རྣམ་པར་ཤེས་པ་ཞེས་བྱ་བ་གང་ཞེ་ན། འདི་ལྟ་སྟེ། མིག་གི་རྣམ་པར་ཤེས་པ་ དང༌། རྣ་བའི་རྣམ་པར་ཤེས་པ་དང༌། སྣའི་རྣམ་པར་ཤེས་པ་དང༌། ལྕེའི་རྣམ་པར་ཤེས་པ་དང༌། ལུས་ཀྱི་རྣམ་པར་ཤེས་པ་དང༌། ཡིད་ཀྱི་རྣམ་པར་ཤེས་པ་སྟེ། དེ་ནི། རྣམ་པར་ ཤེས་པ་ཞེས་བྱའོ། །འདུ་བྱེད་རྣམས་ཡོད་ན། རྣམ་པར་ཤེས་པ་གདགས་པར་འགྱུར་གྱི། འདུ་བྱེད་རྣམས་མེད་ན། རྣམ་པར་ཤེས་པ་གདགས་པར་མི་འགྱུར་ཏེ། འདུ་བྱེད་ རྣམས་ཞེས་བྱ་བ་གང་ཞེ་ན། འདི་ལྟ་སྟེ། གཟུགས་ལ་ཀུན་སེམས་པ་དང༌། སྒྲ་ལ་ཀུན་སེམས་པ་དང༌། དྲི་ལ་ཀུན་སེམས་པ་དང༌། རོ་ལ་ཀུན་སེམས་པ་དང༌། རེག་བྱ་ལ་ཀུན་ སེམས་པ་དང༌། ཆོས་ལ་ཀུན་སེམས་པ་སྟེ། དེ་དག་ནི། འདུ་བྱེད་རྣམས་ཞེས་བྱའོ། །མ་རིག་པ་ཡོད་ན། འདུ་བྱེད་རྣམས་གདགས་པར་འགྱུར་གྱི། མ་རིག་པ་མེད་ན། འདུ་ བྱེད་རྣམས་གདགས་པར་མི་འགྱུར་ཏེ། མ་རིག་པ་ཞེས་བྱ་བ་གང་ཞེ་ན། འདི་ལྟ་སྟེ། སྔོན་གྱི་མཐའ་མི་ཤེས་པ་དང༌། ཕྱི་མའི་མཐའ་མི་ཤེས་པ་དང༌། སྔོན་དང་ཕྱི་མའི་མཐའ་ མི་ཤེས་པ་དང༌། ནང་མི་ཤེས་པ་དང༌། ཕྱི་མི་ཤེས་པ་དང༌། ནང་དང་ཕྱི་མི་ཤེས་པ་དང༌། སྡུག་བསྔལ་མི་ཤེས་པ་དང༌། ཀུན་འབྱུང་བ་མི་ཤེས་པ་དང༌། འགོག་པ་མི་ཤེས་པ་ དང༌། ལམ་མི་ཤེས་པ་སྟེ། དེ་ལྟར་རྐྱེན་མི་ཤེས་པ་དང༌། རྟེན་ཅིང་འབྲེལ་བར་འབྱུང་བ་མི་ཤེས་པ་དང༌། རྟེན་ཅིང་འབྲེལ་བར་འབྱུང་བའི་ཆོས་རྣམས་མི་ཤེས་པ་དང༌། ནག་པོ་དང་ དཀར་པོ་དང༌། རྐྱེན་དང་རྐྱེན་མ་ཡིན་པ་དང༌། སྣང་བ་དང་མི་སྣང་བ་དང༌། ཁ་ན་མ་ཐོ་བ་དང་བཅས་པ་དང་ཁ་ན་མ་ཐོ་བ་མེད་པ་དང༌། བསྟེན་པར་བྱ་བ་དང་བསྟེན་པར་བྱ་བ་མ་ཡིན་ པའི་ཆོས་རྣམས་གང་མི་ཤེས་པ་དང༌། མི་མཐོང་བ་དང༌། མངོན་པར་མི་རྟོགས་པ་དང༌། ཁོང་དུ་མི་ཆུད་པ་དེ་ནི། མ་རིག་པ་ཞེས་བྱའོ། །ཚུལ་བཞིན་མ་ཡིན་པ་ཡིད་ལ་བྱེད་པ་ཡོད་ ན༑ མ་རིག་པ་གདགས་པར་འགྱུར་གྱི། ཚུལ་བཞིན་མ་ཡིན་པ་ཡིད་ལ་བྱེད་པ་མེད་ན། མ་རིག་པ་གདགས་པར་མི་འགྱུར་ཏེ། ཚུལ་བཞིན་མ་ཡིན་པ་ཡིད་ལ་བྱེད་པ་ཞེས་བྱ་བ་གང་ ཞེ་ན༑ འདི་ལྟ་སྟེ། བདག་འདས་པའི་དུས་ན་བྱུང་བ་ཞིག་གམ། བདག་འདས་པའི་དུས་ན་མ་བྱུང་བ་ཞིག་གམ། ཅི་བདག་འདས་པའི་དུས་ན་བྱུང་བ་ཞིག་ན། བདག་འདས་པའི་དུས་ན་ གང་དུ་བྱུང་བ་ཞིག། བདག་འདས་པའི་དུས་ན་ཅིར་གྱུར་པ་ཞིག། བདག་མ་འོངས་པའི་དུས་ན་འབྱུང་བར་འགྱུར་རམ། བདག་མ་འོངས་པའི་དུས་ན་འབྱུང་བར་མི་འགྱུར་རམ། ཅི་ བདག་མ་འོངས་པའི་དུས་ན་འབྱུང་བ་ཞིག་ན། བདག་མ་འོངས་པའི་དུས་ན་གང་དུ་འབྱུང་བར་འགྱུར། བདག་མ་འོངས་པའི་དུས་ན་ཅི་འདྲ་བར་འགྱུར་ཞེས་ནང་དུ་བདག་ཅི། བདག་ ༄༅། །སུ་ཞིག །ཅི་ཡོད་དམ། ཅི་མེད་དམ། ཅི་བྱུང་ངམ། ཅི་མ་བྱུང་ངམ། ཅིར་གྱུར། གང་དུ་བྱུང༌། བདག་ཅིར་གྱུར། གང་དུ་བྱུང་བ་ཞིག །ཅི་བདག་བྱུང་བ་ཞིག་ན། བདག་གང་དུ་བྱུང་བ་ཞིག །བདག་དེར་བྱུང་བ་ཞིག་གམ་ཞེས་ཐེ་ཚོམ་ཟ་ཞིང་ཡིད་གཉིས་སུ་གྱུར་ཏེ། དེ་དེ་ལྟར་ཚུལ་བཞིན་མ་ཡིན་པ་ཡིད་ལ་བྱས་པས་ལྟ་བར་གྱུར་པ་དྲུག་ ལས་ལྟ་བ་གང་ཡང་རུང་བ་ཞིག་འབྱུང་བར་འགྱུར་ཏེ། བདག་ཡོད་ཅེས་ལྟ་བར་འགྱུར་བ་དང༌། བདག་མེད་ཅེས་ལྟ་བར་འགྱུར་བ་དང༌། བདག་ལ་བདག་ཡང་དག་པར་རྗེས་ སུ་མཐོང་ཞེས་ལྟ་བར་འགྱུར་བ་དང༌། བདག་ལ་བདག་ཡང་དག་པར་རྗེས་སུ་མི་མཐོང་ཞེས་ལྟ་བར་འགྱུར་བ་དང༌། དེ་ནི། བདག་སྟེ། དེ་འཇིག་རྟེན་ནོ། །ཞེས་ལྟ་བར་ འགྱུར་བ་དང༌། གལ་ཏེ་རྐྱེན་ལ་བརྟེན་ཏེ་འབྱུང་བ་ནི། རྟག་པ། བརྟན་པ། ཐེར་ཟུག་པ། མི་འགྱུར་བའི་ཆོས་ཅན། ཐེར་ཟུག་པ་ཡང་དག་པར་འདུག་པའམ་འདུག་པར་འགྱུར་ ཞེས་ལྟ་བར་འགྱུར་བ་དེ་ནི། ཚུལ་བཞིན་མ་ཡིན་པ་ཡིད་ལ་བྱེད་པ་ཞེས་བྱའོ། །ཡང་དག་པ་མ་ཡིན་པ་ཀུན་ཏུ་རྟོག་པ་ཡོད་ན། ཚུལ་བཞིན་མ་ཡིན་པ་ཡིད་ལ་བྱེད་པ་གདགས་ པར་འགྱུར་གྱི། ཡང་དག་པ་མ་ཡིན་པ་ཀུན་ཏུ་རྟོག་པ་མེད་ན། ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་མི་འགྱུར་ཏེ། ཡང་དག་པ་མ་ཡིན་པ་ཀུན་ཏུ་རྟོག་པ་གང་ ཞེ་ན། འདི་ལྟ་སྟེ། བདག་དང༌། སེམས་ཅན་དང༌། སྲོག་དང༌། སྐྱེས་བུ་དང༌། གང་ཟག་དང༌། སྐྱེ་བ་པོ་དང༌། ཤེད་ལས་སྐྱེས་དང༌། ཤེད་བུ་དང༌། བྱེད་པ་པོ་དང༌། ཚོར་བ་པོ་སྟེ། དེ་ནི། ཡང་དག་པ་མ་ཡིན་པ་ཀུན་རྟོག་པ་ཞེས་བྱའོ། །སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་བདག་ཅེས་རྟོག་ཅིང་ཡོངས་སུ་རྟོག་པ་དང༌། སེམས་ཅན་དང༌། སྲོག་དང༌། སྐྱེས་བུ་དང༌། ཤེད་ལས་སྐྱེས་དང༌། ཤེད་བུ་དང༌། བྱེད་པ་པོ་དང༌། ཚོར་བ་པོ་ཞེས་རྟོག་ཅིང་ཡོངས་སུ་རྟོག་པ་དེ་ནི། ཡང་དག་པ་མ་ཡིན་པ་ཀུན་ཏུ་རྟོག་པ་ཞེས་བྱའོ། །དེ་ལྟར་ཡང་དག་པ་མ་ཡིན་པ་ ཀུན་ཏུ་མི་རྟོག་པ་ཡོད་ན། ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་འགྱུར་གྱི། ཡང་དག་པ་མ་ཡིན་པ་ཀུན་ཏུ་རྟོག་པ་མེད་ན། ཚུལ་བཞིན་མ་ཡིན་པ་ཡིད་ལ་བྱེད་པ་གདགས་ པར་མི་འགྱུར་ཏེ། ཚུལ་བཞིན་མ་ཡིན་པ་ཡིད་ལ་བྱེད་པ་ཡོད་ན། མ་རིག་པ་གདགས་པར་འགྱུར་གྱི། ཚུལ་བཞིན་མ་ཡིན་པ་ཡིད་ལ་བྱེད་པ་མེད་ན། མ་རིག་པ་གདགས་པར་ མི་འགྱུར་རོ། །མ་རིག་པ་ཡོད་ན། འདུ་བྱེད་རྣམས་གདགས་པར་འགྱུར་གྱི། མ་རིག་པ་མེད་ན། འདུ་བྱེད་རྣམས་གདགས་པར་མི་འགྱུར་བ་ནས་སྐྱེ་བ་ཡོད་ན། རྒ་ཤི་གདགས་པར་ འགྱུར་གྱི། སྐྱེ་བ་མེད་ན། རྒ་ཤི་གདགས་པར་མི་འགྱུར་བའི་བར་དུ་གོང་མ་བཞིན་དུ་སྦྱར་རོ།། །།བམ་པོ་གཉིས་པ། དེ་ལྟར་ན་ཁྱིམ་བདག་རྣམས། ཆོས་ཐམས་ ༄༅། །ཅད་ནི། ཡང་དག་པ་མ་ཡིན་པ་ཀུན་རྟོག་པ་ལས་བྱུང་བ། རྐྱེན་ལ་རག་ལས་པ། སྟོབས་མེད་པ། རྐྱེན་རྣམས་ལས་བྱུང་བ་ཡིན་ཏེ། རྐྱེན་མེད་ན། ཆོས་རྣམས་གདགས་པར་མི་འགྱུར་རོ། །ཁྱིམ་བདག་རྣམས། ཆོས་ཐམས་ཅད་ནི། བཏགས་པ་ཙམ་སྟེ། འདི་ལ་ལམ་ཆད་པ་མྱ་ངན་ལས་འདས་པ་མ་གཏོགས་པར་ སྐྱེ་བའམ། རྒ་བའམ། འཆི་བའམ། འཕོ་བའམ། འབྱུང་བ་གང་ཡང་མེད་དོ། །ཁྱིམ་བདག་རྣམས། འདི་ལྟ་སྟེ། དཔེར་ན། ཆུའི་མཚོ་ཆེན་པོ་ལ་ཉ་གནས་པར་གྱུར་པ། ཁྱིམ་བདག་རྣམས། དེ་ཇི་སྙམ་དུ་སེམས། ཉ་དེ་དག་ཅི་ཞིག་གི་མཐུ། དེ་དག་གིས་གསོལ་པ། བཅོམ་ལྡན་འདས། ཆབ་ཀྱི་མཐུའོ། །བདེ་བར་གཤེགས་པ། ཆབ་ཀྱི་མཐུའོ། ། དེ་ལ་ཁྱིམ་བདག་རྣམས། ཅི་ཆུ་དེ་སེམས་སམ། དེ་དག་གིས་གསོལ་པ། བཅོམ་ལྡན་འདས། དེ་ལྟ་མ་ལགས་སོ། །བདེ་བར་གཤེགས་པ། དེ་ལྟ་མ་ལགས་སོ། །བཀའ་སྩལ་ པ༑ ཁྱིམ་བདག་རྣམས། དེ་ལྟར་ཆུ་སེམས་པ་མེད་པ་ལ་ཅིའི་སྟོབས་ཤིག་ཡོད། བཅོམ་ལྡན་འདས། སྟོབས་མ་མཆིས་སོ། །བདེ་བར་གཤེགས་པ། སྟོབས་ཆུང་ངོ༌། །བཀའ་སྩལ་ པ༑ ཁྱིམ་བདག་རྣམས། དེ་བཞིན་དུ་ཆོས་ཐམས་ཅད་ནི། ཡང་དག་པ་མ་ཡིན་པ་ཀུན་རྟོག་པ་ལས་བྱུང་བ། སྟོབས་མེད་པ། ཉམ་ཆུང་བ། རྐྱེན་རྣམས་ལས་བྱུང་བ་སྟེ། རྐྱེན་རྣམས་ ཡོད་ན༑ ཆོས་རྣམས་གདགས་པར་འགྱུར་རོ། །ཁྱིམ་བདག་རྣམས། ཆོས་ཐམས་ཅད་ནི། བཏགས་པ་ཙམ་སྟེ། འདི་ལ་ལམ་ཆད་པ་མྱ་ངན་ལས་འདས་པ་མ་གཏོགས་པར་སྐྱེ་བའམ། རྒ་བའམ། འཆི་བའམ། འཕོ་བའམ། འབྱུང་བ་གང་ཡང་མེད་དོ། །ཁྱིམ་བདག་ཁྱེད་རྣམས། དེ་བས་ན། རྐྱེན་དེ་དག་ལ་ཚུལ་བཞིན་སོ་སོར་རྟོགས་ལ། དེའི་ཚེ་ཡིད་བརྟན་དུ་མི་རུང་ བ་དང༌། ཡིད་བརྟན་པ་མ་ཡིན་པས་སྐྲག་པར་གྱིས་ཤིག། སྐྲག་པར་གྱུར་པ་དེ་ནས་འབྲོས་པར་གྱིས་ཤིག །ཆོས་གང་ལས་འབྲོས་པའི་ཆོས་དེ་གང་ཞེས་ཚུལ་བཞིན་དུ་སོ་སོར་ རྟོགས་ཤིག །ཚུལ་བཞིན་དུ་སོ་སོར་རྟོགས་པ་དེ་ན་ཆོས་གང་ཆོས་དེ་ལས་འབྲོས་པའི་ཆོས་དེ་རྟོགས་པར་གྱིས་ཤིག །དེ་ཅིའི་ཕྱིར་ཞེ་ན། ཁྱིམ་བདག་རྣམས། རྣམ་པ་ཐམས་ཅད་ དུ་མི་དམིགས་པའི་ཕྱིར་ཆོས་ཐམས་ཅད་ནི། དམིགས་སུ་མེད་པའོ། །ཁྱིམ་བདག་རྣམས། རྡུལ་དང་བྲལ་བའི་ཕྱིར་ཆོས་ཐམས་ཅད་ནི། བདག་མེད་པའོ། །ཁྱིམ་བདག་རྣམས། བདག་ དང་བྲལ་བའི་ཕྱིར་ཆོས་ཐམས་ཅད་ནི། སེམས་ཅན་མེད་པའོ། །ཁྱིམ་བདག་རྣམས། སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་ བསྔལ་བ་དང༌། ཡིད་མི་བདེ་བ་དང༌། འཁྲུག་པ་ལས་ཤིན་ཏུ་འདས་པའི་ཕྱིར་ཆོས་ཐམས་ཅད་ནི། སྲོག་མེད་པའོ། །ཁྱིམ་བདག་རྣམས། དུས་གསུམ་ཡང་དག་པར་ཆད་པའི་ཕྱིར་ ༄༅། །ཆོས་ཐམས་ཅད་ནི། གང་ཟག་མེད་པའོ། །ཁྱིམ་བདག་རྣམས། སྒྲ་དང༌། སྐད་དང༌། དབྱངས་དང༌། ཚིག་གི་ལམ་ནས་བརྗོད་དུ་མེད་པའི་ཕྱིར་ཆོས་ཐམས་ ཅད་ནི༑ ཡི་གེ་མེད་པའོ། །ཁྱིམ་བདག་རྣམས། དམིགས་པ་མེད་པའི་ཕྱིར་ཆོས་ཐམས་ཅད་ནི། ཆགས་པ་མེད་པའོ། །ཁྱིམ་བདག་རྣམས། ཉེ་བར་ཞི་བའི་མཚན་ཉིད་ཀྱི་ཕྱིར་ཆོས་ ཐམས་ཅད་ནི། ཞི་བའོ། །ཁྱིམ་བདག་རྣམས། ནམ་མཁའི་རང་བཞིན་གྱི་ཕྱིར་ཆོས་ཐམས་ཅད་ནི། ཀུན་ཏུ་སོང་བའོ། །ཁྱིམ་བདག་རྣམས། ངེས་པར་འབྱུང་བ་མ་ཡིན་པའི་ཕྱིར་ ཆོས་ཐམས་ཅད་ནི། སྟོང་པ་ཉིད་ལ་ཡང་དག་པར་གནས་པའོ། །ཁྱིམ་བདག་རྣམས། གནས་པ་མེད་པའི་ཕྱིར་ཆོས་ཐམས་ཅད་ནི། མ་གཡོས་པའོ། །ཁྱིམ་བདག་རྣམས། མི་གནས་ཤིང་གཡོ་བ་མེད་པ་དང་ལྡན་པའི་ཕྱིར་ཆོས་ཐམས་ཅད་ནི། ཡང་དག་པའི་མཐའ་ལ་གནས་པའོ། །ཁྱིམ་བདག་རྣམས། རྦ་ཀློང་དང་བྲལ་བའི་ཕྱིར་ཆོས་ཐམས་ཅད་ནི། བརྗོད་དུ་མེད་པའོ། །ཁྱིམ་བདག་རྣམས། མཚན་མ་མེད་དབྱིབས་མེད་པ་ལ་སྣང་བ་རྒྱུ་དང་བྲལ་བའི་ཕྱིར་ཆོས་ཐམས་ཅད་ནི། ཁ་དོག་མེད་པའོ། །ཁྱིམ་བདག་རྣམས། ང་ ཡིར་འཛིན་པ་དང་བྲལ་བའི་ཕྱིར་ཆོས་ཐམས་ཅད་ནི། ང་ཡི་བ་མེད་པའོ། །ཁྱིམ་བདག་རྣམས། སེམས་དང༌། ཡིད་དང༌། རྣམ་པར་ཤེས་པ་དང་བྲལ་བའི་ཕྱིར་ཆོས་ཐམས་ ཅད་ནི། ཤེས་པར་བྱ་བ་མ་ཡིན་པའོ། །ཁྱིམ་བདག་རྣམས། མིག་གི་ལམ་ལས་ཤིན་དུ་འདས་པ་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་ལམ་ལས་ཤིན་དུ་འདས་ པའི་ཕྱིར་ཆོས་ཐམས་ཅད་ནི། ཀུན་གཞི་མེད་པའོ། །ཁྱིམ་བདག་རྣམས། སྐྱེ་བ་དང༌། འཇིག་པ་དང༌། གནས་པ་དང་བྲལ་བའི་ཕྱིར་ཆོས་ཐམས་ཅད་ནི། དོར་བ་མེད་ཅིང་བསྣན་པ་མེད་ པའོ༑ ༑ཁྱིམ་བདག་རྣམས། སེམས་དང༌། ཡིད་དང༌། རྣམ་པར་ཤེས་པ་དང་བྲལ་བའི་ཕྱིར་ཆོས་ཐམས་ཅད་ནི། བྱེད་པ་མེད་པ་གཡོ་བ་མེད་པའོ། །ཁྱིམ་བདག་རྣམས། རང་བཞིན་ གྱིས་ཉམ་ཆུང་བའི་ཕྱིར་ཆོས་ཐམས་ཅད་ནི། རྐྱེན་ལས་རག་ལས་པའོ། །ཁྱིམ་བདག་རྣམས། མིག་ནི། འབྱུང་པོ་ཆེན་པོ་བཞི་ལས་གྱུར་པ། མི་རྟག་པ། མི་བརྟན་པ། ཐེར་ཟུག་མ་ཡིན་ པ༑ སྙིང་པོ་མེད་པ། ཉམ་ཆུང་བ། ཞིགས་པ། ཡུན་ཐུང་བ། ཡིད་བརྟན་དུ་མི་རུང་བ། སྡུག་བསྔལ་བ། ནད་མང་བ། གཙེ་བ་མང་བ་ཡིན་ཏེ། ཁྱིམ་བདག་ཁྱེད་རྣམས་ཀྱིས་མིག་དེ་ལ་ གནས་པར་མི་བྱའོ། །ཁྱིམ་བདག་རྣམས། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ནི། འབྱུང་བ་ཆེན་པོ་བཞི་ལས་གྱུར་པ། མི་རྟག་པ། མི་བརྟན་པ། ཐེར་ཟུག་མ་ཡིན་པ། ཡིད་བརྟན་དུ་མི་རུང་བ། སྙིང་པོ་མེད་པ། ཞིགས་པ། ནད་ཅན། སྡུག་བསྔལ་བ། ནད་མང་བ། གཙེ་བ་མང་བ་ཡིན་ཏེ། ཁྱིམ་བདག་ཁྱེད་རྣམས་ཀྱིས་ཡིད་དེ་ལ་གནས་པར་མི་བྱའོ་། ༄༅། །ཡང་ཁྱིམ་བདག་རྣམས། འདི་ལྟར་བསླབ་པར་བྱ་སྟེ། མིག་འདི་ནི། གཉེར་མི་བཟོད་དེ། ལྦུ་བ་རྡོས་པ་ལྟ་བུའོ། །མིག་འདི་ནི། རིང་དུ་མི་གནས་ཏེ། ཆུའི་ཆུ་བུར་ ལྟ་བུའོ༑ ༑མིག་འདི་ནི། ལས་དང༌། ཉོན་མོངས་པ་དང༌། སྲེད་པ་ལས་བྱུང་བ་སྟེ། སྨིག་རྒྱུ་ལྟ་བུའོ། །མིག་འདི་ནི། རང་བཞིན་གྱིས་སྙིང་པོ་མེད་དེ། ཆུ་ཤིང་ལྟ་བུའོ། །མིག་ འདི་ནི༑ ཕྱིན་ཅི་ལོག་ལས་བྱུང་བ་སྟེ། སྒྱུ་མ་ལྟ་བུའོ། །མིག་འདི་ནི། ལོག་པ་དང༌། ཡང་དག་པ་མ་ཡིན་པ་མཐོང་བ་སྟེ། རྨི་ལམ་ལྟ་བུའོ། །མིག་འདི་ནི། རྐྱེན་ལ་རག་ལས་པ་ སྟེ༑ བྲག་ཅ་ལྟ་བུའོ། །མིག་འདི་ནི། ལས་ཀྱི་མིག་ཡོར་གྱིས་ཀུན་ཏུ་སྣང་བ་སྟེ། མིག་ཡོར་ལྟ་བུའོ། །མིག་འདི་ནི། སེམས་འཁྲུགས་པ་མེད་པར་འགྱུར་བའི་མཚན་ཉིད་དེ། སྤྲིན་ ལྟ་བུའོ༑ ༑མིག་འདི་ནི། སྐད་ཅིག་ཏུ་འཇིག་པ་དང་ལྡན་པ་སྟེ། གློག་ལྟ་བུའོ། །མིག་འདི་ནི། བདག་པོ་མེད་པ་སྟེ། ས་དང་མཚུངས་སོ། །མིག་འདི་ནི། བདག་མེད་དེ། ཆུ་དང་ མཚུངས་སོ། །མིག་འདི་ནི། སེམས་ཅན་མེད་དེ། མེ་དང་མཚུངས་སོ། །མིག་འདི་ནི། སྲོག་མེད་དེ། རླུང་དང་མཚུངས་སོ། །མིག་འདི་ནི། གང་ཟག་མེད་དེ། ནམ་མཁའ་དང་ མཚུངས་སོ། །མིག་འདི་ནི། འབྱུང་བ་ཆེན་པོའི་ཀུན་གཞི་སྟེ། ཡང་དག་པ་མ་ཡིན་པའོ། །མིག་འདི་ནི། བདག་དང་བདག་གི་དང་བྲལ་བ་སྟེ། སྟོང་པའོ། །མིག་འདི་ནི། རྩྭ་དང༌། རྩིག་པ་དང༌། ཤིང་དང༌། རྡོ་དང༌། མིག་ཡོར་ལྟ་བུ་སྟེ། བེམ་པོའོ། །མིག་འདི་ནི། རླུང་གི་འཕྲུལ་འཁོར་དང་ལྡན་པར་འབྱུང་སྟེ། བྱེད་པ་མེད་པའོ། །མིག་འདི་ནི། གསོག་སྟེ། མི་གཙང་བ་ དང༌། རྣག་བསགས་པའོ། །མིག་འདི་ནི། གསོབ་སྟེ། གཡོ་བ། ཀུན་ཏུ་ཉེ་བ། གཞིག་པ། རྣམ་པར་འཐོར་བ། འཇིག་པའི་ཆོས་ཅན་ནོ། །མིག་འདི་ནི། རྟག་ཏུ་རྒ་བའི་ཟིལ་གྱིས་ནོན་ པ་སྟེ༑ ཁྲོན་པ་རྙིང་པ་དང་མཚུངས་སོ། །མིག་འདི་ནི། མཐར་འཆི་བ་སྟེ། མཐར་མི་གནས་པའོ། །ཁྱིམ་བདག་རྣམས། མིག་ཇི་ལྟ་བ་དེ་བཞིན་དུ་རྣ་བ་དང༌། སྣ་དང༌། ལྕེ་དང༌། ལུས་ དང༌། ཡིད་ཀྱང་རིག་པར་བྱའོ། །གོང་མ་བཞིན་དུ་སྦྱར་ཏེ་ཆོས་ཐམས་ཅད་ཀྱི་བར་དུ་རིག་པར་བྱའོ། །ཁྱིམ་བདག་རྣམས། གཞན་ཡང་འདི་ལྟ་སྟེ། མིག་འདི་དང༌། འདི་ལྟ་སྟེ། རྣ་བ་དང༌། སྣ་དང༌། ལྕེ་དང༌། ལུས་འདི་ནི། བྱིས་པ་སོ་སོའི་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཡིད་འདི་ནི། བྱིས་པ་སོ་སོའི་སྐྱེ་བོ་ཐམས་ཅད་ཀྱི་འདོད་པ་ཙམ་མོ། ། འདི་ལྟ་སྟེ། གཟུགས་འདི་དང༌། འདི་ལྟ་སྟེ། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་འདི་ནི། བྱིས་པ་སོ་སོའི་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་ བདག་རྣམས། གཟུགས་ཀྱི་ཕུང་པོ་འདི་ནི། བྱིས་པ་སོ་སོའི་སྐྱེ་བོ་ཐམས་ཅད་ཀྱིས་འདོན་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་ཚོར་བའི་ཕུང་པོ་འདི་ནི། བྱིས་པ་སོ་སོའི་ ༄༅། །སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས། འདུ་ཤེས་ཀྱི་ཕུང་པོ་འདི་ནི། བྱིས་པ་སོ་སོའི་སྐྱེ་བོ་ཐམས་ཅད་ཀྱི་འདོད་པ་ ཙམ་མོ༑ ༑འདི་ལྟ་སྟེ། ཁྱིམ་བདག་རྣམས། འདུ་བྱེད་ཀྱི་ཕུང་པོ་འདི་ནི། བྱིས་པ་སོ་སོའི་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས། རྣམ་ པར་ཤེས་པའི་ཕུང་པོ་འདི་ནི། བྱིས་པ་སོ་སོའི་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས། སའི་ཁམས་འདི་ནི། བྱིས་པ་སོ་སོའི་སྐྱེ་བོ་ཐམས་ ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས། ཆུའི་ཁམས་དང༌། མེའི་ཁམས་དང༌། རླུང་གི་ཁམས་འདི་ནི། བྱིས་པ་སོ་སོའི་སྐྱེ་བོ་ཐམས་ཅད་ཀྱི་འདོད་པ་ ཙམ་མོ༑ ༑འདི་ལྟ་སྟེ། ཁྱིམ་བདག་རྣམས། འདུས་བྱས་དང་འདུས་མ་བྱས་ཞེས་བྱ་བའི་ཆོས་འདི་ནི། བྱིས་པ་སོ་སོའི་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །དེ་བས་ན། ཁྱིམ་ བདག་ཁྱེད་རྣམས་མི་འདོད་པར་གྱིས་ཤིག །མི་འདོད་པར་གྱུར་ནས་བུ་དང་ཆུང་མ་རྣམས་ཉེ་བར་མ་ལེན་ཅིག །ནོར་རྣམས་མ་ལེན་ཅིག། དེ་དག་མི་ལེན་པར་གྱུར་ནས་ དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་གྱིས་ཤིག །དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་མི་འདོད་པར་གྱིས་ཤིག །ཁྱིམ་བདག་རྣམས། རབ་ཏུ་ བྱུང་བའི་མི་འདོད་པ་གང་ཞེ་ན། གང་སོ་སོར་ཐར་པའི་སྡོམ་པས་བསྡམས་ཤིང་ཆོག་དང༌། སྤྱོད་ཡུལ་ཕུན་སུམ་ཚོགས་པ་ཁ་ན་མ་ཐོ་བ་རྡུལ་ཙམ་ལ་ཡང་འཇིགས་པར་ལྟ་ཞིང་ བསླབ་པའི་གཞི་ཡང་དག་པར་བཟུང་ནས་སློབ་སྟེ། ཚུལ་ཁྲིམས་དང་ལྡན་པར་གནས་སོ། །ཚུལ་ཁྲིམས་ཀྱི་ཕུང་པོ་དང་ལྡན་པ་ནི། མིག་མི་ལེན། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་མི་ལེན། གཟུགས་མི་ལེན། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་མི་ལེན། གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་ པའི་ཕུང་པོ་མི་ལེན། སའི་ཁམས་མི་ལེན། ཆུའི་ཁམས་མི་ལེན། མེའི་ཁམས་དང༌། རླུང་གི་ཁམས་དང༌། ནམ་མཁའི་ཁམས་དང༌། རྣམ་པར་ཤེས་པའི་ཁམས་མི་ལེན་ཏེ། ཁྱིམ་བདག་ རྣམས༑ འདི་ནི། རབ་ཏུ་བྱུང་བའི་མི་འདོད་པའོ། །མི་འདོད་ནས་མིག་གི་ཁམས་མི་ལེན་ཏོ། །གོང་མ་བཞིན་དུ་སྦྱར་ཏེ་ཡིད་ཀྱི་ཁམས་ཀྱི་བར་དུ་མི་ལེན་ཏོ། །གོང་མ་བཞིན་དུ་སྦྱར་ཏེ་ གང་མི་ལེན་པ་དེ་ཡོངས་སུ་མི་སྤོང་ངོ༌། །ཅི་ཡོངས་སུ་མི་སྤོང་ཞེ་ན། མིག་ཡོངས་སུ་མི་སྤོང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཡོངས་སུ་མི་སྤོང༌། གཟུགས་ཡོངས་སུ་ མི་སྤོང༌། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་ཡོངས་སུ་མི་སྤོང༌། གཟུགས་ཀྱི་ཕུང་པོ་ཡོངས་སུ་མི་སྤོང༌། ཚོར་བའི་ཕུང་པོ་ཡོངས་སུ་མི་སྤོང༌། འདུ་ཤེས་ཀྱི་ཕུང་པོ་ཡོངས་ ༄༅། །སུ་མི་སྤོང༌། འདུ་བྱེད་ཀྱི་ཕུང་པོ་ཡོངས་སུ་མི་སྤོང༌། རྣམ་པར་ཤེས་པའི་ཕུང་པོ་ཡོངས་སུ་མི་སྤོང༌། སའི་ཁམས་ཡོངས་སུ་མི་སྤོང༌། ཆུའི་ཁམས་དང༌། མེའི་ཁམས་དང༌། རླུང་གི་ཁམས་དང༌། ནམ་མཁའི་ཁམས་དང༌། རྣམ་པར་ཤེས་པའི་ཁམས་ཀྱི་བར་དུ་ཡོངས་སུ་མི་སྤོང་ངོ༌། །དེ་ནམ་མི་སྤོང་བ་དེ་ནི། ཀུན་ནས་ཉོན་མོངས་པར་མི་ འགྱུར་རོ། །ཀུན་ནས་ཉོན་མོངས་པ་མེད་ན་ཡང་བར་འགྱུར་རོ། །དེ་ནས་ནམ་ཡང་བར་གྱུར་པ་དེ་ན་དེ་མི་སྣང་བར་འགྱུར་རོ། །དེ་ནམ་མི་སྣང་བ་དེ་ན་གང་ལ་ཡང་ཁོང་ཁྲོ་པར་མི་ བྱེད་དོ༑ ༑དེ་ནམ་ཁོང་ཁྲོ་བར་མི་བྱེད་པ་དེ་ན་བདག་ལ་གནོད་པར་མི་སེམས། གཞན་ལ་གནོད་པར་མི་སེམས། གཉིས་ཀ་ལ་གནོད་པར་མི་སེམས་ཏེ། དེ་གནོད་པར་མི་སེམས་ པས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའོ། །ཁྱིམ་བདག་རྣམས། དེ་ལ་གང་ཡོངས་སུ་མྱ་ངན་ལས་འདའ་ཞེ་ན། དེ་ལ་མིག་ ཡོངས་སུ་མྱ་ངན་ལས་མི་འདའ། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཡོངས་སུ་མྱ་ངན་ལས་མི་འདའ་མོད་ཀྱི། ཁྱིམ་བདག་རྣམས། གང་མིག་ལ་བརྟེན་ནས་ང་ཞེའམ། ངའི་ཞེས་ཡང་དག་པ་མ་ཡིན་པ་འཛིན་པ་དེ་དང་བྲལ་བ་ནི། ཡོངས་སུ་མྱ་ངན་ལས་འདའ་བའོ། །གང་དང་བྲལ་བ་ནི། ཡོངས་སུ་མྱ་ངན་ལས་འདས་པ་ཡིན་ཞེ་ན། འདོད་ཆགས་ དང་བྲལ་བ་ནི། ཡོངས་སུ་མྱ་ངན་ལས་འདས་པའོ། །ཞེ་སྡང་དང་བྲལ་བ་ནི། ཡོངས་སུ་མྱ་ངན་ལས་འདས་པའོ། །གཏི་མུག་དང་བྲལ་བ་ནི། ཡོངས་སུ་མྱ་ངན་ལས་འདས་པའོ། །མི་ཤེས་ པ་དང་བྲལ་བ་ནི། ཡོངས་སུ་མྱ་ངན་ལས་འདས་པ་སྟེ། ཡང་ཁྱིམ་བདག་རྣམས། མི་ཤེས་པ་ནི། འདས་པ་ལ་མེད་པར་མ་གྱུར། ད་ལྟར་བྱུང་བ་དང༌། མ་འོངས་པ་ལ་མེད་པར་མ་གྱུར་ མོད་ཀྱི༑ མི་ཤེས་པ་དང་བྲལ་ནས་ཤེས་པ་སྐྱེས་སོ། །ཁྱིམ་བདག་རྣམས། དེ་ལ་ཤེས་པ་གང་ཞེ་ན། འདི་ལྟ་སྟེ། ཟད་པ་ཤེས་པའོ། །དེ་ལ་ཟད་པ་ཤེས་པ་གང་ཞེ་མ། འདི་ལྟ་སྟེ། ཟད་པ་ ཤེས་པ་ནི། འདས་པ་མ་ཡིན། ཟད་པ་ཤེས་པ་ནི། མ་འོངས་པ་མ་ཡིན། ཟད་པ་ཤེས་པ་ནི། ད་ལྟར་བྱུང་བ་མ་ཡིན་མོད་ཀྱི། ཁྱིམ་བདག་རྣམས། གང་ལ་བརྟེན་ཏེ་མི་ཤེས་པ་དང་བྲལ་ ནས་ཤེས་པ་སྐྱེས་པར་གྱུར་པ་དེ་ནི། མི་ཤེས་པ་དང་བྲལ་བའི་ཤེས་པའོ། །མིག་ལ་བརྟེན་ནས་མི་ཤེས་པ་དང་བྲལ་ཞིང་ཤེས་པ་སྐྱེས་ཀྱང་མིག་ནི། ང་ཡི་བ་མ་ཡིན་ནོ། །གང་ང་ཡི་བ་མ་ ཡིན་པ་དེ་ཡོངས་སུ་མ་བཟུང་བའོ། །གང་ཡོངས་སུ་མ་བཟུང་བ་དེ་སྤངས་པའོ། །གང་སྤངས་པ་དེ། གྲོལ་བའོ། །གང་ལས་གྲོལ་ཞེ་ན། བདག་ཏུ་འཛིན་པ་ལས་གྲོལ། སེམས་ཅན་དུ་འཛིན་ པ་ལས་གྲོལ། སྲོག་ཏུ་འཛིན་པ་ལས་གྲོལ། གང་ཟག་ཏུ་འཛིན་པ་དང༌། ཆད་པར་འཛིན་པ་དང༌། རྟག་པར་འཛིན་པ་ལས་གྲོལ། འཛིན་པ་ཐམས་ཅད་ལས་གྲོལ། ཡོངས་སུ་རྟོག་པ་ལས་ ༄༅། །གྲོལ་ཏེ༑ དེ་ཡོངས་སུ་མི་རྟོག་གོ། ཡོངས་སུ་མི་རྟོག་པས་མི་རྟོག་རྣམ་པར་མི་རྟོག་གོ། །ཅི་ལ་མི་རྟོག་ཅེ་ན། ང་དང་ངའི་ཞེས་མི་རྟོག་སྟེ། ད་མི་གསོག་ཅིང་གསོག་ པར་མི་བྱེད་ལ་སྤོང་ཞིང་མི་ལེན་ཏོ། །སྤངས་པས་ཡོངས་སུ་མྱ་ངན་ལས་འདས་སོ། །གྲོལ་ལོ། །བྱུང་ངོ༌། །རབ་ཏུ་རྣམ་པར་གྲོལ་ལོ། །བྲལ་ལོ། །གང་ལས་བྱུང་ཞེ་ན། སྡུག་བསྔལ་ ཐམས་ཅད་ལས་བྱུང་ངོ༌། །ཁྱིམ་བདག་ཁྱེད་རྣམས་འབྱུང་བར་འདོད་ན། ཆོས་གང་ཡང་བླང་བར་མི་བྱའོ། །དེ་ཅིའི་ཕྱིར་ཞེ་ན། ཁྱིམ་བདག་རྣམས། ལེན་པས་ནི། སྲིད་པར་འགྱུར་རོ། ། མི་ལེན་པས་ནི། སྲིད་པ་མེད་དོ། །དེ་ལ་ཁྱིམ་བདག་རྣམས། མིག་ཡོངས་སུ་མྱ་ངན་ལས་འདས་པ་མ་ཡིན་ནོ། །གོང་མ་བཞིན་དུ་སྦྱར་ཏེ་རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ ཀྱི་བར་དུ་ཡོངས་སུ་མྱ་ངན་ལས་འདས་པ་མ་ཡིན་པ་ནས་རྣམ་པར་ཤེས་པའི་ཁམས་ཀྱི་བར་དུ་ཡོངས་སུ་མྱ་ངན་ལས་འདས་པ་མ་ཡིན་མོད་ཀྱི། ཁྱིམ་བདག་རྣམས། གང་རྣམ་པར་ ཤེས་པ་ལ་བརྟེན་ཏེ་ང་དང་ངའི་ཞེས་ཡང་དག་པ་མ་ཡིན་པར་འཛིན་པ་དེ་དང་བྲལ་བ་ནི། ཡོངས་སུ་མྱ་ངན་ལས་འདས་པའོ། །གང་དང་བྲལ་ན། ཡོངས་སུ་མྱ་ངན་ལས་འདས་པ་ ཡིན་ཞེ་ན། འདོད་ཆགས་དང་བྲལ་བ་ནི། ཡོངས་སུ་མྱ་ངན་ལས་འདས་པའོ། །ཞེ་སྡང་དང་བྲལ་བ་ནི། ཡོངས་སུ་མྱ་ངན་ལས་འདས་པའོ། །གཏི་མུག་དང་བྲལ་བ་ནི། ཡོངས་སུ་མྱ་ངན་ལས་འདས་པའོ། །མི་ཤེས་པ་དང་བྲལ་བ་ནི། ཡོངས་སུ་མྱ་ངན་ལས་འདས་པ་སྟེ། ཡང་ཁྱིམ་བདག་རྣམས། མི་ཤེས་པ་ནི། འདས་པ་དང༌། ད་ལྟར་དང༌། མ་འོངས་ པ་ལ་མེད་པར་གྱུར་པ་མ་ཡིན་མོད་ཀྱི། མི་ཤེས་པ་དང་བྲལ་ནས་ཤེས་པ་སྐྱེས་སོ། །ཁྱིམ་བདག་རྣམས། དེ་ལ་ཤེས་པ་གང་ཞེ་ན། འདི་ལྟ་སྟེ། ཟད་པ་ཤེས་པའོ། །དེ་ལ་ཟད་པ་ ཤེས་པ་གང་ཞེ་ན། ཟད་པ་ཤེས་པ་ནི། འདས་པ་མ་ཡིན། ཟད་པ་ཤེས་པ་ནི། མ་འོངས་པ་མ་ཡིན། ཟད་པ་ཤེས་པ་ནི། ད་ལྟར་བྱུང་བ་མ་ཡིན་མོད་ཀྱི། ཁྱིམ་བདག་རྣམས། མིག་ལ་ བརྟེན་ཏེ་མི་ཤེས་པ་དང་བྲལ་ནས་ཤེས་པ་སྐྱེས་པར་གྱུར་པ་དེ་ནི། མི་ཤེས་པ་དང་བྲལ་བའི་ཤེས་པའོ། །མིག་ལ་བརྟེན་ཏེ་མི་ཤེས་པ་དང་བྲལ་ནས་ཤེས་པ་སྐྱེས་ཀྱང་ཤེས་པའི་ དབྱིངས་ནི། ང་ཡི་བ་མ་ཡིན་ནོ། །གང་ང་ཡི་བ་མ་ཡིན་པ་དེ་ཡོངས་སུ་མ་བཟུང་བའོ། །གང་ཡོངས་སུ་མ་བཟུང་བ་དེ་སྤངས་བའོ། །གང་སྤང་པ་དེ་གྲོལ་བའོ། །གང་ལས་གྲོལ་ཞེ་ན། བདག་ཏུ་འཛིན་པ་ལས་གྲོལ། སེམས་ཅན་དུ་འཛིན་པ་དང༌། སྲོག་ཏུ་འཛིན་པ་དང༌། གང་ཟག་ཏུ་འཛིན་པ་དང༌། ཆད་པར་འཛིན་པ་དང༌། རྟག་པར་འཛིན་པ་ལས་གྲོལ། ཡོངས་སུ་རྟོག་ པ་ལས་གྲོལ་ཏེ་དེ་ཡོངས་སུ་མི་རྟོག་གོ། ཡོངས་སུ་མི་རྟོག་པས་མི་རྟོག་རྣམ་པར་མི་རྟོག་གོ། ཅི་ལ་མི་རྟོག་ཅེ་ན། བཞེས་མི་རྟོག། ངའི་ཞེས་མི་རྟོག་སྟེ། དེ་མི་གསོག་ཅིང་གསོག་ ༄༅། །པ་མེད་དོ། །ལེན་པ་མེད་ཅིང་སྤངས་པས་ཡོངས་སུ་མྱ་ངན་ལས་འདས་སོ། །གྲོལ་ལོ། །བྱུང་ངོ༌། །རབ་ཏུ་རྣམ་པར་གྲོལ་ལོ། །བྲལ་ལོ། །གང་ནས་བྱུང་ཞེ་ན། སྡུག་བསྔལ་ཐམས་ཅད་ལས་བྱུང་ངོ༌། །ཁྱིམ་བདག་ཁྱེད་རྣམས་འབྱུང་བར་འདོད་ན། ཆོས་གང་ཡང་བླང་བར་མི་བྱའོ། །དེ་ཅིའི་ཕྱིར་ཞེ་ན། ཁྱིམ་བདག་རྣམས། ལེན་པས་ནི། སྲིད་པར་འགྱུར་གྱི། མི་ལེན་པས་ནི། མ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ལེན་པ་ ལས་ནི་འཇིགས་སྐྱེ་སྟེ། །དེ་ཕྱིར་ངན་འགྲོར་འགྲོ་བར་འགྱུར། །འཇིགས་བཅས་ནས་ནི་འདི་མཐོང་ནས། །མཁས་པས་དེ་ནི་མི་ལེན་ཏོ། །ལམ་གང་ཉིད་ལ་བསྒོམ་བྱ་བ། །ཤེས་ རབ་ཀྱིས་ནི་དེ་བལྟ་སྟེ། །ཤེས་རབ་ཀྱིས་ནི་མཐོང་འགྱུར་བས། །རྣམ་པ་གཞན་དུ་མི་འགྱུར་རོ། །སྐྱེ་མཆེད་ཐམས་ཅད་སྟོང་པ་སྟེ། །སྙིང་པོ་མེད་པར་གཡོ་ཞིང་གསོག །སྐྱེ་རྒུ་ རྣམས་ནི་སྲེད་པས་བསླུས། །དེ་ལ་ཆགས་པར་མི་བྱའོ། །ཆོས་རྣམས་སྟོང་པར་ངས་མཁྱེན་ཏེ། །ཆོས་རྣམས་སྙིང་པོ་མེད་པར་མཁྱེན། །བདེ་བརྙེས་མྱ་ངན་མི་མཛད་དེ། །ངས་ ནི་མི་གཡོ་བདེ་བ་བརྙེས། །གང་གིས་འདི་ལྟར་ཆོས་རྣམས་ཀུན། །སྟོང་པ་ཉིད་དུ་ཤེས་པ་སྟེ། །སྡུག་བསྔལ་དག་ནི་ཀུན་ལས་ཐར། །དེ་ལ་རྩོད་པ་མེད་པ་ཡིན། །འདོད་པ་ འདི་ནི་ཡོངས་སུ་འཛིན་ཀུན་དང༌། །གཙེ་བ་ཐམས་ཅད་ཀྱི་ཡང་སྐྱེད་པ་ཡིན། །ཡོངས་སུ་འཛིན་པ་དག་ལས་ལེན་པར་གསུངས། །ལེན་པ་དག་ལས་སྲིད་པ་འབྱུང་བར་འགྱུར། །སྲིད་པ་ ལས་ནི་རྫོགས་སྐྱེ་སྐྱེ་བ་སྟེ། །དེ་ནི་འཇུག་པ་དག་དང་འགྲུབ་པར་འགྱུར། །སྐྱེས་ནས་ནད་དང་རྒ་དང་འཆི་བ་དང༌། །མི་འདོད་སྡུག་བསྔལ་ཆེན་པོ་གཞན་དག་གནོན། །འདོད་པ་མེད་ན་ལེན་ པ་ཡོད་མ་ཡིན། །ལེན་པ་མེད་ན་སྲིད་པར་མི་འགྱུར་ཏེ། །སྲིད་པ་མངོན་པར་འགྲུབ་ལས་འདས་པ་ནི། །སྐྱེ་རྒ་ན་དང་འཆི་བར་མི་འགྱུར་རོ། །དེ་ཕྱིར་ཁྱེད་ཀུན་གཅིག་ཏུ་འདུས་གྱུར་ནས། ། ཡོངས་སུ་འཛིན་པ་རྣམ་པར་སྤང་བྱོས་ལ། །བུ་དང་ཆུང་མ་དག་ལ་དགའ་སྤངས་ཏེ། །དགེ་སློང་ཚུལ་འདི་མྱུར་དུ་བླང་བར་བྱོས། །ཤེས་ཀྱི་ཁེ་འདོད་རྙེད་པ་འདོད་མ་བྱེད། །ངན་ངོན་ ཙམ་དག་གིས་ནི་ཆོག་བྱོས་ལ། །གདོལ་པ་དག་དང་འདྲ་བའི་དམའ་སེམས་ཀྱིས། །གཞན་གྱི་གྲོང་དུ་ཉེ་བར་འགྲོ་བར་བྱ། །ང་ནི་ཚུལ་ཁྲིམས་ལྡན་ཞེས་བདག་མ་སྙེམས། །འདི་ནི་ཚུལ་ ཁྲིམས་ངན་ཞེས་གཞན་མ་བརྙས། །ཚུལ་ཁྲིམས་ཙམ་གྱིས་གཞན་ལ་གང་བརྙས་པ། །སྙེམས་ཕྱིར་དེ་ནི་ཚུལ་ཁྲིམས་འཆལ་ཞེས་བྱ། །ཇི་ལྟར་རི་དྭགས་དག་ནི་རྒྱས་ཟིན་པ། །དེ་དག་ ཉིད་དུ་དེ་ཟིན་གསོད་པ་ལྟར། །དེ་བཞིན་བདུད་ཀྱི་ཞགས་པས་ཟིན་པ་དེ། །སྙེམས་པ་དེ་ཉིད་ཀྱིས་ནི་དེ་བཅོམ་མོ། །འཕྱ་བའི་བསམ་པ་ཅན་གྱི་གང་ཟག་དག །གཞན་ལ་བརྙས་པས་ ༄༅། །བདག་ཉིད་ཉམས་པར་བྱེད། །དེ་བས་ཚུལ་ཁྲིམས་འཆལ་ལའང་མི་བརྙས་ན། །ཁྲིམས་ལྡན་ཚངས་པར་སྤྱོད་ལ་སྨོས་ཅི་དགོས། །དྲང་སྲོང་དེས་པའི་རྗེས་སུ་ སློབ་པ་དག །རྣམ་པར་གྲོལ་བ་ཞི་བ་འདི་ཚོལ་ཞིང༌། །ལུས་དང་སྲོག་རྣམས་ལ་ཡང་མི་ལྟ་བར། །རྟག་ཏུ་དབེན་པར་དགོན་པར་གནས་པར་བྱ། །གནོད་པའི་རྩ་བ་གཅེར་བུ་གསང་ ཚིག་དང༌། །འཇིག་རྟེན་རྒྱང་ཕན་གསང་ཚིག་རྣམ་སྤོངས་ལ། །སྟོང་པ་ཉིད་དང་ལྡན་པར་གང་གསུངས་པ། །ཟབ་མོའི་ཆོས་ལ་དགའ་བ་བསྐྱེད་པར་བྱོས། །ནང་དང་ཕྱི་རོལ་དག་ གི་སྐྱེ་མཆེད་ནི། །བཅུ་གཉིས་པོ་སྟེ་སེམས་ཀྱི་རྩ་བར་བཤད། །དེ་དག་ཀུན་ཀྱང་ལས་ཀྱི་རྒྱུ་ལས་བྱུང༌། །ལས་ཀྱང་རྒྱུན་རིང་སེམས་པས་བཞག་པའོ། །མིག་དང་གཟུགས་ཉིད་ལ་ ནི་བརྟེན་བྱས་ནས། །རྐྱེན་རྣམས་ལས་ཀྱང་རྣམ་པར་ཤེས་པ་སྐྱེ། །འདུ་བ་མ་ཚང་བས་ནི་ནུབ་འགྱུར་ཏེ། །ཇི་ལྟར་ཤིང་མེད་མེ་ནི་མི་འབར་བཞིན། །དེ་ལྟར་ཆོས་འདི་ཐམས་ཅད་ རབ་སྐྱེས་པ། །ཕན་ཚུན་འདུས་པ་ལས་ནི་འབྱུང་བར་འགྱུར། །བྱེད་པ་པོ་དང་ཚོར་བ་མི་དམིགས་ཏེ། །བྱ་བ་དག་ནི་སྒྱུ་མ་ལྟ་བུར་སྣང༌། །ངས་ནི་ནང་དང་ཕྱི་རོལ་ཆོས་རྣམས་ཀུན། ། སྟོང་པ་ཉིད་དེ་སྒྱུ་མ་འདྲ་བར་མཁྱེན། །བྱིས་པ་མི་ཤེས་ལོག་པར་འཛིན་པ་དག །ང་དང་ང་ཡི་ཉེས་ཀྱང་རྣམ་པར་རྟོག །མིག་ནི་ནང་ན་ཅུང་ཟད་ཡོད་མ་ཡིན། །ཕྱི་རོལ་གང་དུའང་ སེམས་ཅན་མི་དམིགས་ཏེ། །མིག་ནི་བདག་མེད་བྱེད་མེད་སྲོག་མེད་དེ། །ཆོས་རྣམས་ཀུན་ཀྱང་དེ་ལྟར་ཤེས་པར་བྱོས། །མིག་ནི་སེམས་ཤིང་གྲོལ་བར་འདོད་མ་ཡིན། །དེ་བཞིན་ རྣ་བ་དང་ནི་སྣ་དང་ལྕེ། །ལུས་དང་ཡིད་དང་གཟུགས་ཀྱང་བྱེད་མེད་དེ། །ཆོས་རྣམས་ཐམས་ཅད་དེ་དང་འདྲ་བར་ལྟོས། །ཇི་ལྟར་རྒྱ་མཚོ་དག་གི་ཆུ་ལས་ནི། །ལྦུ་བ་རྡོས་པ་ཆེན་པོ་མང་ བྱུང་བ༑ ༑དེ་ལ་མིག་ལྡན་ཚུལ་བཞིན་ངེས་བརྟགས་ན། །ལྦུ་བ་རྡོས་པ་ཉམ་ཆུང་སྙིང་པོ་མེད། །དེ་བཞིན་ཕུང་པོ་ལྔ་ཡི་ངོ་བོ་ཉིད། །ལྦུ་བ་ལྟ་བུར་ཉམ་ཆུང་གང་ཤེས་པ། །གཙེ་བ་ཐམས་ ཅད་དང་ནི་སྐྱེ་བ་དང༌། །རྒ་དང་མྱ་ངན་གཙེ་ལས་གྲོལ་བར་འགྱུར། །གང་དག་ང་ཡི་བསྟན་ལ་རབ་བྱུང་ནས། །ཆོས་ཀུན་སྒྱུ་མ་ལྟ་བུར་ཤེས་པ་དེ། །ཡུལ་གྱི་བསོད་སྙོམས་འབྲས་བུ་ ཡོད་པར་ཟ། །དེ་ནི་ཕྱོགས་བཅུའི་སངས་རྒྱས་མཆོད་པར་བྱེད། །དེ་ནས་ཁྱིམ་བདག་ལྔ་བརྒྱ་ཙམ་པོས་ས་ཕྱོགས་དེ་ཉིད་ན་གནས་པ་དེ་དག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་ དྲི་མ་དང་བྲལ་བ་རྣམ་པར་དག་གོ །འདི་ལྟ་སྟེ། དཔེར་ན། གོས་དྲེག་པ་ནག་པོ་དང་བྲལ་བ་ཚོན་དུ་བཅུག་ན་མྱུར་དུ་ཚོན་འཛིན་པ་དེ་བཞིན་དུ་ཁྱིམ་བདག་ལྔ་བརྒྱ་ཙམ་པོ་ས་ཕྱོགས་དེ་ ཉིད་ན་གནས་པ་དེ་དག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །དེ་ནས་བཅོམ་ལྡན་འདས་ཀྱིས་ཁྱིམ་བདག་ལྔ་བརྒྱ་ཙམ་པོ་དེ་དག་ལ་ཆོས་ཀྱི་ ༄༅། །གཏམ་གྱིས་ཡང་དག་པར་བསྟན། ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་སོ། །དེ་ལ་བཅོམ་ལྡན་འདས་ཀྱི་ཆོས་ཀྱི་ གཏམ་ནི། འདི་ཡིན་ཏེ། ཁྱིམ་བདག་རྣམས། མིག་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ན། འདོད་ཆགས་ཀྱི་མེད་དང༌། ཞེ་སྡང་གི་མེ་དང༌། གཏི་མུག་གི་མེས་ཀུན་ཏུ་འབར་ རོ༑ ༑སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པས་ཀུན་ཏུ་འབར་ཏེ། བདག་གིར་ བྱ་བ་སྡུག་བསྔལ་ལོ། །ཞེས་བཤད་དོ། །ཁྱིམ་བདག་རྣམས། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་བར་དུ་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ན། འདོད་ཆགས་ཀྱི་ མེ་དང༌། ཞེ་སྡང་གི་མེ་དང༌། གཏི་མུག་གི་མེ་དང༌། སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་ དང༌། འཁྲུག་པས་ཀུན་དུ་འབར་ཏེ། བདག་གིར་བྱ་བ་སྡུག་བསྔལ་ལོ། །ཞེས་བཤད་དོ། །ཁྱིམ་བདག་རྣམས། གཟུགས་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ན། འདོད་ ཆགས་ཀྱི་མེ་དང༌། ཞེ་སྡང་གི་མེ་དང༌། གཏི་མུག་གི་མེས་ཀུན་ཏུ་འབར་རོ། །དེ་ལྟར་སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་རྣམས་ཀྱང་གོང་མ་བཞིན་དུ་སྦྱར་རོ། །ཁྱིམ་ བདག་རྣམས། གཟུགས་ཀྱི་ཕུང་པོ་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ན། འདོད་ཆགས་ཀྱི་མེ་དང༌། ཞེ་སྡང་གི་མེ་དང༌། གཏི་མུག་གི་མེས་ཀུན་ཏུ་འབར་རོ། །ཚོར་བའི་ཕུང་པོ་ དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་དང༌། རྣམ་པར་ཤེས་པའི་ཕུང་པོ་ཡང་དེ་བཞིན་ནོ། །ཁྱིམ་བདག་རྣམས། སའི་ཁམས་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ ན༑ འདོད་ཆགས་ཀྱི་མེ་དང༌། ཞེ་སྡང་གི་མེ་དང༌། གཏི་མུག་གི་མེས་ཀུན་ཏུ་འབར་རོ། །ཁྱིམ་བདག་རྣམས། ཆུའི་ཁམས་དང༌། མེའི་ཁམས་དང༌། རླུང་གི་ཁམས་དང༌། ནམ་མཁའི་ ཁམས་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ན། འདོད་ཆགས་ཀྱི་མེ་དང༌། ཞེ་སྡང་གི་མེ་དང༌། གཏི་མུག་གི་མེས་ཀུན་ཏུ་འབར་རོ། །སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང་ མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པས་ཀུན་ཏུ་འབར་ཏེ། བདག་གིར་བྱ་བ་སྡུག་བསྔལ་ལོ། །ཞེས་བཤད་དོ། །དེ་བས་ན་ཁྱིམ་ བདག་རྣམས། མིག་བླང་བར་མི་བྱའོ། །ཞེས་ཁྱིམ་བདག་རྣམས་དེ་ལྟར་བསླབ་པར་བྱའོ། །དེ་བཞིན་དུ་ཁྱིམ་བདག་རྣམས་རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་བླང་བར་མི་ བྱའོ༑ ༑ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས། གཟུགས་བླང་བར་མི་བྱ། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་བླང་བར་མི་བྱའོ། །ཞེས་དེ་ལྟར་བསླབ་ ༄༅། །པར་བྱའོ། །ཁྱིམ་བདག་རྣམས། གཟུགས་ཀྱི་ཕུང་པོ་བླང་བར་མི་བྱའོ། །ཚོར་བའི་ཕུང་པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་དང༌། རྣམ་པར་ ཤེས་པའི་ཕུང་པོ་བླང་བར་མི་བྱའོ། །ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས། སའི་ཁམས་བླང་བར་མི་བྱའོ། །ཆུའི་ཁམས་དང༌། མེའི་ཁམས་དང༌། རླུང་གི་ ཁམས་དང༌། ནམ་མཁའི་ཁམས་བླང་བར་མི་བྱའོ། །ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས། རྣམ་པར་ཤེས་པའི་ཁམས་བླང་བར་མི་བྱའོ། །ཞེས་དེ་ལྟར་ བསླབ་པར་བྱའོ། །དེ་བས་ན་ཁྱིམ་བདག་རྣམས། འཇིག་རྟེན་འདི་བླང་བར་མི་བྱའོ། །འཇིག་རྟེན་ཕ་རོལ་བླང་བར་མི་བྱའོ། །ཞེས་ཁྱིམ་བདག་རྣམས་དེ་ལྟར་བསླབ་པར་བྱའོ། ། ཁྱིམ་བདག་ཁྱེད་རྣམས་ནམ་མིག་མི་ལེན་ཅིང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་མི་ལེན་པ་དེ་ན་ཁྱེད་རྣམས་མིག་ནས་ཡིད་ཀྱི་བར་ལ་མི་གནས་པར་འགྱུར་རོ། ། ཁྱིམ་བདག་ཁྱེད་རྣམས་ནམ་གཟུགས་མི་ལེན་ཅིང༌། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་རྣམས་མི་ལེན་པ་དེ་ན་ཁྱེད་རྣམས་ཆོས་ཐམས་ཅད་ལ་མི་གནས་པར་འགྱུར་རོ། ། ཁྱིམ་བདག་ཁྱེད་རྣམས་ནམ་གཟུགས་ཀྱི་ཕུང་པོ་མི་ལེན་ཅིང༌། ཚོར་བའི་ཕུང་པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་མི་ལེན་པ་དེ་ན་ཁྱེད་རྣམས་འདུ་བྱེད་ཀྱི་ཕུང་པོ་ ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་རྣམ་པར་ཤེས་པའི་ཕུང་པོ་མི་ལེན་པ་དེ་ན་ཁྱེད་རྣམས་རྣམ་པར་ཤེས་པའི་ཕུང་པོ་ལ་མི་གནས་པར་འགྱུར་རོ། །ཁྱིམ་ བདག་ཁྱེད་རྣམས་ནམ་སའི་ཁམས་མི་ལེན་ཅིང༌། ཆུའི་ཁམས་དང༌། མེའི་ཁམས་དང༌། རླུང་གི་ཁམས་དང༌། ནམ་མཁའི་ཁམས་མི་ལེན་པ་དེ་ན་ཁྱེད་རྣམས་ནམ་མཁའི་ཁམས་ལ་མི་ གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་རྣམ་པར་ཤེས་པའི་ཁམས་མི་ལེན་པ་དེ་ན་ཁྱེད་རྣམས་རྣམ་པར་ཤེས་པའི་ཁམས་ལ་མི་གནས་པར་འགྱུར་རོ། །ཁྱིམ་བདག་ ཁྱེད་རྣམས་ནམ་འཇིག་རྟེན་འདི་མི་ལེན་ཅིང༌། འཇིག་རྟེན་ཕ་རོལ་མི་ལེན་པ་དེ་ན་ཁྱེད་རྣམས་འཇིག་རྟེན་ཐམས་ཅད་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་ཆོས་ ཐམས་ཅད་མི་ལེན་པ་དེ་ན་ཁྱེད་རྣམས་ཆོས་ཐམས་ཅད་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་ཆོས་ཐམས་ཅད་ལ་མི་གནས་པ་དེ་ན་ཁྱེད་རྣམས་མི་འབྱུང་ མི་འཇིག་གོ། ཁྱེད་རྣམས་ནམ་མི་འབྱུང་མི་འཇིག་པ་དེ་ན་ཁྱེད་རྣམས་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་ལས་ཡོངས་སུ་ཐར་པར་འགྱུར་ཏེ། སྡུག་བསྔལ་ལས་ཡོངས་སུ་ཐར་བར་འགྱུར་རོ། །ཞེས་བཤད་དོ། །དེ་ནས་བཅོམ་ལྡན་འདས་ཀྱིས་དོན་ ༄༅། །དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྐྱེ་བ་དང་ནི་འཆི་བ་ཡིས། །འཇིག་རྟེན་འདི་ཀུན་ཀུན་ནས་འབར། །བྱིས་པ་ སྐྱབས་མེད་གཙེ་བ་སྟེ། །དེ་དག་འཕགས་པའི་ལམ་ལས་ཉམས། །བརྒྱ་ལམ་འཇིག་རྟེན་སྣང་མཛད་པ། །དེ་བཞིན་གཤེགས་པ་འབྱུང་བར་འགྱུར། །དལ་བ་ཆུད་ཟོས་མ་བྱེད་ པར༑ ༑བརྩོན་འགྲུས་བརྟན་པ་རྩོམ་བྱོས་ཤིག །གང་ལ་གནས་ཏེ་རྣམ་སྒོམ་པ། །ཤེས་རབ་ཀྱིས་ནི་དེ་ཡང་ལྟོས། །ཤེས་རབ་ཀྱིས་ནི་དེ་མཐོང་སྟེ། །རྣམ་པ་གཞན་དུ་མི་འགྱུར་ རོ༑ ༑གང་ལ་གནས་ཏེ་སེམས་སྒོམ་པ། །ཐམས་ཅད་སྟོང་པར་ཤེས་པར་བྱ། །ཆོས་རྣམས་སྟོང་པར་རིག་ནས་ནི། །བྱང་ཆུབ་ཉིད་ཀྱང་སྟོང་པ་ཉིད། །འདོད་ཆགས་ཞེ་སྡང་དེ་བཞིན་ གཏི་མུག་དང༌། །མེ་གསུམ་དེ་དག་ཤིན་ཏུ་མི་བཟད་པ། །དེས་ན་འཇིག་རྟེན་འདི་ཀུན་རབ་འབར་ཡང༌། །བྱིས་པ་རིག་ནས་གཉིད་ལོག་ཁོང་མི་ཆུད། །སྐྱེ་དང་རྒ་དང་ན་དང་འཆི་བ་ དང༌། །སྨྲེ་སྔགས་འདོན་ཅིང་སྡུག་བསྔལ་ཡིད་མི་བདེས། །འཇིག་རྟེན་འདི་དག་གཙེས་པར་རིག་ནས་ནི། །ཆོས་རྣམས་ཀུན་ལ་གནས་པར་མ་བྱེད་ཅིག །དེ་ནས་བཅོམ་ལྡན་འདས་ ལ་ཁྱིམ་བདག་ལྔ་བརྒྱ་ཙམ་པོ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་རྣམས་ཀྱིས་བཅོམ་ལྡན་འདས་ལས་རབ་ཏུ་བྱུང་བ་རྙེད་པར་གྱུར་ཅིག །བདག་ ཅག་རྣམས་ཀྱིས་བདེ་བར་གཤེགས་པ་ལས་བསྙེན་པར་རྫོགས་པ་དགེ་སློང་གི་དངོས་པོ་རྙེད་པར་གྱུར་ཅིག། བཅོམ་ལྡན་འདས་ཀྱིས་དགེ་སློང་དག་ཚུར་ཤོག་ཅེས་གསུངས་པ་དང༌། དེ་ ཉིད་ཀྱིས་ཚེ་དང་ལྡན་པ་དེ་དག་རབ་ཏུ་བྱུང་བར་གྱུར་ཏེ། དེ་ཉིད་ཀྱིས་བསྙེན་པར་རྫོགས་པ་དང༌། དེ་ཉིད་ཀྱིས་དགེ་སློང་གི་དངོས་པོར་གྱུར་ཏོ། །འདི་ལ་ཆོས་ཉིད་ནི། འདི་ཡིན་ཏེ། དེ་ལ་ འདི་སྐད་ཅེས་བྱའོ། །དེ་དག་གིས་ནི་ངུར་སྨྲིག་བགོས། །དེ་དག་གིས་ནི་སྐྲ་ཡང་བྲེགས། །ཀུན་ཀྱང་ལྷུང་བཟེད་ཐོགས་གྱུར་ནས། །དེ་ཉིད་དུ་ནི་དགྲ་བཅོམ་གྱུར། །སྟོན་པས་དགྲ་བཅོམ་རབ་ མཁྱེན་ནས། །དགེ་སློང་གི་ནི་དགེ་འདུན་དང༌། །ལྷ་རྣམས་མདུན་དུ་མངོན་སུམ་དུ། །ཆེད་དུ་བརྗོད་པ་ཆེད་དུ་བརྗོད། །འཇིག་རྟེན་གྱི་ནི་མགོན་པོ་ལ། །སྔོན་ཆད་སྦྱིན་པ་བྱིན་པས་ན། །གང་ ན་བདེ་བ་མང་བ་དེར། །ཤིན་ཏུ་དགའ་ཞིང་འོངས་པར་འགྱུར། །དེ་དག་གིས་ནི་ང་མཐོང་ནས། །དད་པ་རབ་ཏུ་སྐྱེས་པར་གྱུར། །དེ་དག་སེམས་ནི་དང་བ་ལ། །ཆོས་རྣམས་ཀྱི་ནི་མཆོག་བསྟན་ ཏོ༑ ༑དགྲ་བཅོམ་གྱི་ནི་གསུང་ཐོས་ནས། །བདག་ཏུ་ལྟ་བ་རྣམ་པར་བཤིག །སྟོང་ཉིད་མངོན་དུ་བྱས་ན་ནི། །དེ་དག་སྐྱེ་པ་ཀུན་ལས་གྲོལ། །ཁྱིམ་བདག་གི་ལེའུ་ཞེས་བྱ་སྟེ། དང་པོའོ།། །། དེ་ནས་བཅོམ་ལྡན་འདས་ཀྱིས་ལམ་གྱི་བར་དུ་ཁྱིམ་བདག་ལྔ་བརྒྱ་ཙམ་པོ་མི་གཡོ་བའི་གནས་ལ་བཀོད་ནས་ཀུན་ནས་མཛེས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་སོ། ། ༄༅། །དེ་ནས་རྒྱལ་པོའི་ཁབ་ཀྱི་གྲོང་ཁྱེར་གྱི་ལྷ་རྣམས་དང༌། གནོད་སྦྱིན་ཅི་འཇིགས་འདི་སྙམ་དུ་སེམས་ཏེ། བདག་ཅག་གིས་འདི་ལྟ་བུའི་སྦྱིན་གནས་འཇིག་རྟེན་ན་ ཤིན་ཏུ་དཀོན་པ་བཅོམ་ལྡན་འདས་ལ་བསོད་སྙོམས་དབུལ་ལོ། །སྙམ་མོ། །དེ་ནས་གནོད་སྦྱིན་ཅི་འཇིགས་ཀྱིས་བསོད་སྙོམས་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་ པ༑ རོ་ཕུན་སུམ་ཚོགས་པ། རེག་ཕུན་སུམ་ཚོགས་པ་བཅོམ་ལྡན་འདས་ལ་ཕུལ་ནས་གནོད་སྦྱིན་ཅི་འཇིགས་ལ་ཐུགས་བརྩེ་བའི་སླད་དུ་བཅོམ་ལྡན་འདས་ཀྱིས་བསོད་སྙོམས་དེ་ བཞེས་སོ། །བཅོམ་ལྡན་འདས་ལ་གནོད་སྦྱིན་ཅི་འཇིགས་ཀྱིས་བསོད་སྙོམས་ཕུལ་མ་ཐག་ཏུ་དེ་ནས་དེའི་ཚེ་སྟེང་གི་བར་སྣང་ལས་ཅི་འཇིགས་ཀྱི་འཁོར་མང་པོ་གནོད་སྦྱིན་དྲུག་ཁྲི་བརྒྱ་ སྟོང་གིས་ལེགས་སོ། །ཞེས་བྱ་བ་བྱིན་ཏེ་རྗེས་སུ་ཡི་རང་བའི་སྒྲ་ཕྱུང་ངོ༌། །དེ་ནས་དེའི་ཕྱིར་གནོད་སྦྱིན་ཅི་འཇིགས་ཀྱིས་རང་གི་འཁོར་རྣམས་ལ་བོས་ཏེ། བདག་གིས་ནི། ད་ གཟོད་དེ་བཞིན་གཤེགས་པ་ལ་བསོད་སྙོམས་ཕུལ་གྱི། ཁྱེད་ཀྱིས་ནི། དགེ་སློང་གི་དགེ་འདུན་རྣམས་ལ་ཕུལ་ཅིག །དེ་ནི། ཁྱེད་རྣམས་ཀྱི་ཡུན་རིང་པོའི་དོན་དང༌། ཕན་པ་དང༌། བདེ་བར་འགྱུར་རོ། །གནོད་སྦྱིན་རྣམས་ཀྱིས་དགེ་སློང་གི་དགེ་འདུན་ལ་བསོད་སྙོམས་ཕུལ་ནས་གནོད་སྦྱིན་དེ་དག་ལ་སྙིང་བརྩེ་བའི་ཕྱིར་དགེ་སློང་གི་དགེ་འདུན་གྱིས་ཀྱང་བསོད་ སྙོམས་བླངས་སོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་པ་ལས་དེས་བསོད་སྙོམས་བླངས་པར་མཁྱེན་ནས་ས་ཕྱོགས་དེ་ནས་སླར་ལོག་གོ །དེ་ ལྟར་དེའི་ཚེ་ལྷ་སྟོང་ཕྲག་དུ་མ་དང༌། ཀླུ་སྟོང་ཕྲག་དུ་མ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་སྟོང་ཕྲག་དུ་མ་ དང༌། མི་དང་མི་མ་ཡིན་པ་སྟོང་ཕྲག་དུ་མ་དང༌། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་དུ་མ་རྣམས་བཅོམ་ལྡན་འདས་གཤེགས་པའི་ཞམ་འབྲིང་དུ་དོང་ངོ༌། །དེ་ནས་བཅོམ་ལྡན་འདས་ ས་ཕྱོགས་ཡངས་ཤིང་རྒྱ་ཆེ་བ་ཞིག་ཏུ་གཤེགས་ཏེ་བྱོན་ནས་གདན་བཤམས་པ་ལ་བཞུགས་སོ། །དེ་ནས་གནོད་སྦྱིན་ཅི་འཇིགས་འཁོར་དང་བཅས་པས་ལྷའི་མེ་ཏོག་མནྡཱ་ར་བ་དང༌། ཨུཏྤ་ལ་དང༌། པདྨ་དང༌། ཀུ་མུ་ད་དང༌། པདྨ་དཀར་པོ་དང༌། ལྷའི་ཙནྡན་གྱི་ཕྱེ་མ་བླངས་ཏེ་བཅོམ་ལྡན་འདས་ལ་མཆོད་པ་བྱ་བའི་ཕྱིར་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་རོ། །གཏོར། མངོན་པར་གཏོར། མངོན་པར་རབ་ཏུ་གཏོར་ནས་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔར་འདུག་གོ། དེ་ནས་བཅོམ་ལྡན་ འདས་ཀྱིས་གནོད་སྦྱིན་ཅི་འཇིགས་ཀྱི་བསམ་པ་ཡང་མཁྱེན། དེའི་འཁོར་གནོད་སྦྱིན་མང་པོའི་བསམ་པ་ཡང་མཁྱེན་ནས་འཛུམ་པ་མཛད་དོ། །ཆོས་ཉིད་ནི། འདི་ཡིན་ཏེ། ནམ་སངས་ ༄༅། །རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེ་ན་ཞལ་གྱི་སྒོ་ནས་འོད་ཟེར་ཁ་དོག་དུ་མ་ཁ་དོག་སྣ་ཚོགས་འདི་ལྟ་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་དང༌། ལེབ་རྒན་དང༌། ཤེལ་དང༌། དངུལ་གྱི་ཁ་དོག་ལྟ་བུ་བྱུང་སྟེ། དེས་འཇིག་རྟེན་གྱི་ཁམས་མཐའ་ཡས་མུ་མེད་པ་སྣང་བས་ཁྱབ་པར་བྱས་ནས་ཉི་མ་དང༌། ཟླ་བའི་གཟི་བརྗིད་ མེད་པར་བྱས་ཏེ་སེམས་ཅན་དམྱལ་བ་པའི་སེམས་ཅན་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ་སླར་ལོག་ནས་བཅོམ་ལྡན་འདས་ལ་ལན་བདུན་བསྐོར་བ་བྱས་ཏེ་ ཁ་ཅིག་ནི། བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །ཁ་ཅིག་ནི། ཕྲག་པར་ནུབ་བོ། །ཁ་ཅིག་ནི། པུས་མོར་ནུབ་བོ། །ཆོས་ཉིད་ནི། འདི་ཡིན་ཏེ། ནམ་སངས་རྒྱས་བཅོམ་ལྡན་ འདས་སེམས་ཅན་དམྱལ་བ་པའི་སེམས་ཅན་རྣམས་ལ་ལུང་སྟོན་པ་དེ་ན་འོད་ཟེར་ཞབས་ཀྱི་འོག་ཏུ་ནུབ་པར་འགྱུར་རོ། །ནམ་དུད་འགྲོའི་སྐྱེ་གནས་པའི་སེམས་ཅན་རྣམས་ལ་ལུང་ སྟོན་པ་དེ་ན་འོད་ཟེར་སྣམ་ལོགས་སུ་ནུབ་པར་འགྱུར་རོ། །ནམ་གཤིན་རྗེའི་འཇིག་རྟེན་པའི་སེམས་ཅན་རྣམས་ལ་ལུང་སྟོན་པ་དེ་ན་འོད་ཟེར་མདུན་དུ་ནུབ་པར་འགྱུར་རོ། །ནམ་མི་ རྣམས་ལ་ལུང་སྟོན་པ་དེ་ན་འོད་ཟེར་གཡོན་དུ་ནུབ་པར་འགྱུར་རོ། །ནམ་ལྷ་རྣམས་ལ་ལུང་སྟོན་པ་དེ་ན་འོད་ཟེར་གཡས་སུ་ནུབ་པར་འགྱུར་རོ། །ནམ་ཉན་ཐོས་རྣམས་ལ་ལུང་སྟོན་པ་ དེ་ན་འོད་ཟེར་པུས་མོར་ནུབ་པར་འགྱུར་རོ། །ནམ་རང་སངས་རྒྱས་རྣམས་ལ་ལུང་སྟོན་པ་དེ་ན་འོད་ཟེར་ཕྲག་པར་ནུབ་པར་འགྱུར་རོ། །ནམ་སངས་རྒྱས་བཅོམ་ལྡན་འདས་རྣམས་ཀྱིས་བྱང་ཆུབ་ སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་དེ་ན་འོད་ཟེར་སྟེང་གི་དབུའི་གཙུག་གི་མཚམས་སུ་ནུབ་པར་འགྱུར་རོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་ འདས་འཛུམ་པ་མཛད་པ་མཐོང་སྟེ། མཐོང་ནས་ཆོས་གོས་ཕྲག་པ་གཅིག་ཏུ་བགོས་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་ མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །ཅི་རྒྱུས་འཇིག་རྟེན་སྣང་མཛད་པ། །འཇིག་རྟེན་ཀུན་ལ་སྨན་པའི་སླད། །འཇིག་རྟེན་མགོན་པོ་འོད་ མཛད་པ། །ཅི་ཞིག་སླད་དུ་འཛུམ་པ་བསྟན། །སངས་རྒྱས་ཀྱི་ནི་བྱང་ཆུབ་ཕྱིར། །དེ་རིང་སུ་ཡིས་ས་བོན་བཏབ། །དེ་རིང་སུ་ལ་ལུང་ཡང་སྟོན། །གང་ཞིག་མཐར་ཕྱིན་རབ་ཏུ་ཞུགས། །དཔའ་ བོ་རྣམ་པར་འདྲེན་པ་རྣམས། །རྒྱུ་མ་མཆིས་པར་འཛུམ་མི་མཛད། །ཐུབ་པ་ཅི་སླད་འཛུམ་པ་བསྟན། །འོད་ཟེར་དོན་ནི་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ ཀུན་དགའ་བོ་ལ་ཚིགས་སུ་བཅད་པ་འདི་དག་གིས་སླར་གསུངས་པ། འཇིག་རྟེན་མགོན་པོ་སྐྱོབ་པ་ལ། །ཅི་འཇིགས་རབ་ཏུ་དང་སེམས་ཀྱིས། །བསོད་སྙོམས་དག་ནི་ཕུལ་བས་ན། ། ༄༅། །དེ་ལྟར་དེ་ཕྱིར་འཛུམ་པ་མཛད། །གནོད་སྦྱིན་འདི་ནས་ཤི་འཕོས་ནས། །སུམ་ཅུ་རྩ་གསུམ་འགྲོ་བར་འགྱུར། །སུམ་ཅུ་གསུམ་ནས་ཤི་འཕོས་ནས། །འཐབ་ བྲལ་དུ་ཡང་འགྲོ་བར་འགྱུར། །འཐབ་བྲལ་ནས་ནི་དགའ་ལྡན་འགྲོ། །འདོད་པ་འདོད་པས་དགར་བྱས་ནས། །མི་ཡི་ནང་དུ་སྐྱེ་འགྱུར་ཏེ། །རྒྱལ་པོ་རྫུ་འཕྲུལ་ལྡན་པར་འགྱུར། །འཁོར་ ལོས་བསྒྱུར་བ་མི་ཡི་དབང༌། །གླིང་བཞི་དག་གི་དབང་པོ་སྟེ། །མི་ཡི་འཇིག་རྟེན་ཤི་འཕོས་ནས། །ཚངས་པའི་འཇིག་རྟེན་འགྲོ་བར་འགྱུར། །བསྐལ་པ་བྱེ་བ་ཉི་ཤུར་ནི། །རྟག་ ཏུ་བསྟི་སྟང་བྱས་པར་འགྱུར། །ལྷ་ཡི་ནང་དང་མི་ནང་དུ། །ཡང་དང་ཡང་དུ་ཀུན་ཏུ་འགྲོ། །ཕྱིས་དེ་རྒྱལ་སྲིད་བོར་ནས་ནི། །ཁྱིམ་མེད་པར་ཡང་རབ་ཏུ་བྱུང༌། །རྐྱེན་གྱིས་བྱང་ཆུབ་ ཐོབ་འགྱུར་ཏེ། །དེ་ནི་མཐར་ཡང་ཐུག་པར་འགྱུར། །གནོད་སྦྱིན་དག་ནི་སུམ་ཁྲི་དག། གནོད་སྦྱིན་སྐྱེ་གནས་འཕོས་གྱུར་ནས། །སུམ་ཅུ་རྩ་གསུམ་སྐྱེ་བར་འགྱུར། །སངས་ རྒྱས་ལ་ནི་གུས་བྱས་ནས། །སངས་རྒྱས་བྱམས་པ་མཐོང་འགྱུར་ཞིང༌། །དེ་ན་མཐར་ནི་ཐུག་འགྱུར་ཏེ། །དགྲ་བཅོམ་པ་ཡང་ཐོབ་འགྱུར་ན། །སྟོན་པ་ལ་ནི་སུ་མི་མཆོད། །གནོད་ སྦྱིན་སྟོང་དུ་ཚང་བ་རྣམས། །བྱང་ཆུབ་མཆོག་ལ་རབ་ཞུགས་པས། །དེ་དག་དགེ་བའི་རྩ་བ་དེས། །ནམ་དུའང་ངན་འགྲོར་འགྲོ་མི་འགྱུར། །ཁ་ཅིག་སྲོག་ཆགས་ཀུན་ཕན་ཕྱིར། ། བྱང་ཆུབ་དམ་པ་རབ་ཚོལ་ཞིང༌། །སངས་རྒྱས་འདྲེན་པ་སྟོང་རྣམས་ལ། །བཀུར་སྟི་དག་ནི་བྱེད་པར་འགྱུར། །ཁ་ཅིག་སངས་རྒྱས་བྱང་ཆུབ་ཕྱིར། །སྟོང་ཕྲག་གཉིས་དང་གསུམ་དག་ ཀྱང༌། །མེ་ཏོག་ཕྲེང་བ་དྲི་རྣམས་ཀྱིས། །མཆོད་པ་དག་ནི་མཆོད་པར་འགྱུར། །དག་པ་བསྒོམས་པའི་བདག་ཉིད་ཅན། །འདྲེན་པ་བྱེ་བ་ཕྲག་སྟོང་ལ། །ཁ་ཅིག་བཀུར་སྟི་བྱེད་འགྱུར་ཏེ། ། འདི་དག་ཕྱིས་ནི་བྱང་ཆུབ་རེག །དེ་ནས་ཅི་འཇིགས་དེ་ཡི་བུ། །རི་བོ་ཞེས་བྱ་རྫུ་འཕྲུལ་ཆེ། །འཇིག་རྟེན་སངས་རྒྱས་བདག་གྱུར་ཅེས། །དེས་ཀྱང་སེམས་ནི་བསྐྱེད་པར་གྱུར། །དེས་ནི་སངས་ རྒྱས་བསྟི་སྟང་བྱས། །ཐམས་ཅད་དུ་ཡང་སྨོན་ལམ་བཏབ། །ང་མཐོང་ནས་ནི་མཆོད་བྱས་ཏེ། །བྱང་ཆུབ་ཕྱིར་ནི་སེམས་བསྐྱེད་དོ། །དེ་ནི་དགེ་བའི་རྩ་བ་དེས། །ངན་འགྲོ་ཐམས་ཅད་སྤངས་ གྱུར་ནས། །སངས་རྒྱས་བྱམས་པ་མཐོང་ནས་ནི། །གདུགས་རྣམས་བྱེ་བ་འབུལ་བར་འགྱུར། །གདུགས་རྣམས་བྱེ་བ་ཕུལ་ནས་ནི། །ན་བཟའ་བྱེ་བ་འབུལ་བར་འགྱུར། །ན་བཟའ་བྱེ་བ་ཕུལ་ ནས་ནི༑ ༑དེ་ཉིད་དུ་ནི་རབ་ཏུ་བྱུང༌། །སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་དམ་པ་རབ་ཚོལ་ཞིང༌། །ལོ་ཡང་ལྔ་བརྒྱ་ཚང་བར་ནི། །ཚངས་པར་སྤྱད་པ་སྤྱོད་པར་འགྱུར། །འདི་ལྟ་ བུ་ཡི་རྣམ་གྲངས་ཀྱིས། །སྦྱིན་དང་ཚུལ་ཁྲིམས་ཡང་དག་སྤྱོད། །གངྒཱའི་བྱེ་མ་ཇི་སྙེད་པ། །དེ་སྙེད་བསྐལ་པར་སྤྱོད་པར་འགྱུར། །དཔེར་གསུངས་པ་ནི་དེ་སྙེད་དུ། །དེ་དག་ཁྱེད་ཀྱིས་ཤེས་ ༄༅། །པར་གྱིས། །དེ་དག་དཔེར་ཡང་ཤེས་ནས་ནི། །དེ་བས་ལྷག་པར་སྤྱད་པར་གྱིས། །སྔར་ནི་དཔེར་རྣམས་གང་སྤྱོད་པ། །གངྒཱའི་ཡི་ནི་བྱེ་སྙེད་ཀྱིས། །བྱེ་སྙེད་སངས་ རྒྱས་མཐོང་གྱུར་ནས། །དེ་དག་ཀུན་ལ་བསྟི་སྟང་བྱེད། །ཨེ་མའོ་ཡེ་ཤེས་ཨེ་མ་ཤེས། །ཨེ་མའོ་བླ་ན་མེད་པའི་སེམས། །སེམས་ཅན་ཀུན་གྱི་འདྲེན་པ་ནི། །དེ་ལྟར་ཞུམ་པར་མི་ འགྱུར་རོ། །དེ་ཕྱིར་སེམས་ཅན་ཀུན་གྱི་མཆོག །སངས་རྒྱས་སུ་ཡང་དེ་འགྱུར་ཏེ། །དེ་ན་དེ་ཡི་མཚན་བཏགས་པ། །སྨན་པའི་རྒྱལ་པོར་རྣམ་པར་གྲགས། །ལོ་ནི་བྱེ་བ་བདུན་ཅུར་ ཡང༌། །སྲོག་ཆགས་རྣམས་ལ་ཆོས་བསྟན་ཏེ། །ཕྱིས་གདོད་རྐང་གཉིས་གཙོ་བོ་ནི། །དེ་ནས་མྱ་ངན་འདས་པར་འགྱུར། །རབ་ཏུ་དུལ་བའི་སེམས་རྣམས་ཀྱི། །འདུས་པ་དག་ནི་ ཉི་ཤུར་འགྱུར། །དེ་ལ་ཐ་མ་གཅིག་པོ་ནི། །དགེ་སློང་བྱེ་བ་ཉི་ཤུར་འགྱུར། །འདུས་པ་རྣམས་ནི་གང་བརྗོད་པའི། །ཉན་ཐོས་དཔག་ཏུ་མེད་པ་སྟེ། །དེ་ཡི་ཉན་ཐོས་ཇི་སྙེད་པ། ། བྱང་ཆུབ་ཞུགས་པའང་དེ་སྙེད་དོ། །སེམས་ཅན་རྣམས་ཀྱི་དོན་མཛད་ནས། །དེ་བཞིན་གཤེགས་པ་མྱ་ངན་འདས། །ལོ་ནི་བརྒྱ་ཕྲག་སྟོང་དག་ཏུ། །དེ་ཡི་དམ་ཆོས་གནས་པར་ འགྱུར༑ ༑བསྐལ་པ་ལྔ་བརྒྱ་ཚང་བར་ནི། །སངས་རྒྱས་མང་པོ་འབྱུང་བར་འགྱུར། །བསྐལ་པ་གཅིག་ལའང་འབྱུང་བ་ནི། །དེ་ན་སྟོང་རྣམས་འབྱུང་བར་འགྱུར། །མི་རྣམས་ མཁས་པ་གང་དག་ནི། །སངས་རྒྱས་ཆོས་རྣམས་བསྙེན་འདོད་པ། །ཚུལ་བཞིན་མང་དུ་ཐོས་པ་དང༌། །རབ་ཏུ་འདུན་པ་ཉིད་དུ་བྱ། །ཚུལ་བཞིན་མ་ཡིན་རྣམ་པར་སྤོངས། །ཚུལ་ བཞིན་ལ་ནི་རྟག་ཏུ་སྒོམས། །མང་དུ་ཐོས་པར་རབ་ཏུ་བྱ། །དེས་ནི་ཤེས་རབ་རྣམ་པར་འཕེལ། །བྱང་ཆུབ་སེམས་དཔའ་སྐྱོབ་པ་ཡི། །རྩ་བའི་དོན་ནི་ཆོས་བཞི་སྟེ། །སྦྱིན་དང་ཚུལ་ ཁྲིམས་ཐོས་དང་གཏོང༌། །བྱང་ཆུབ་ཀྱི་ནི་ལམ་ལ་བཟང༌། །བླ་ན་མེད་པའི་ཐེག་པ་མཆོག །བྱང་ཆུབ་ཀྱི་ནི་ལམ་ཡང་བསྟན། །ཐེ་ཚོམ་གཅོད་པ་བཟང་པོ་ཡིས། །ཉན་ཐོས་ཀྱི་ནི་ལམ་ བསྟན་ཏོ། །སེམས་ཅན་གང་དག་འདི་འདོད་པ། །དེ་ལ་ངས་ནི་སྐབས་དབྱེའོ། །ཆོས་རྣམས་ཀྱི་ནི་མཆོག་སྟོན་པ། །འཇིག་རྟེན་སྣང་མཛད་རྙེད་པར་དཀའ། །དེ་ནས་གནོད་སྦྱིན་ཅི་ འཇིགས་ཀྱི་བུ་རི་བོ་འདི་སྙམ་དུ་སེམས་པར་གྱུར་ཏེ། བཅོམ་ལྡན་འདས་འདི་ནས་རིའི་རྒྱལ་པོ་བྱ་རྒོད་ཀྱི་ཕུང་པོའི་རི་ལ་གཤེགས་ཞེས་གྲག་གི །བདག་གིས་བཅོམ་ལྡན་འདས་ལ་ དགེ་བའི་རྩ་བ་རྒྱ་ཆེན་པོ་ཞིག་བསྐྱེད་དོ། །སྙམ་མོ། །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོས་རང་གི་འཁོར་ལ་སྨྲས་པ། གྲོགས་པོ་དག་ཤེས་པར་གྱིས་ཤིག །བཅོམ་ལྡན་ འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་རིའི་རྒྱལ་པོ་བྱ་རྒོད་ཕུང་པོའི་རི་ལ་གཤེགས་ཀྱི། དེ་ལ་གྲོགས་པོ་དག་མཐུ་ཅི་ཡོད་པ་དང༌། ཅི་ནུས་ཀྱིས་བཅོམ་ལྡན་འདས་ལ་མཆོད་ ༄༅། །པའི་ལས་ལ་སྤྲོ་བ་སྐྱེད་ཅིག །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོ་གཡོག་དང་བཅས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བཟུང་སྟེ་རིའི་རྒྱལ་པོ་བྱ་ རྒོད་ཀྱི་ཕུང་པོའི་བར་གྱི་ལམ་དེ་ཐམས་ཅད་གསེག་མ་དང༌། གྱོ་མོ་དང༌། སྡོང་དུམ་དང༌། ཚེར་མ་རྣམས་མེད་པར་བྱས་སོ། །མེ་ལོང་གི་དཀྱིལ་འཁོར་ལྟར་དག་པར་བྱས་སོ། ། ལམ་དེ་དག་ཐམས་ཅད་བསལ་ནས་སྦོས་ཀྱི་ཆུས་ཀུན་ཏུ་ཆག་ཆག་བཏབ་བོ། །ལམ་དེར་གོས་ནི། མཚམས་མེད་པར་བཏིང་ངོ༌། །ལམ་དེར་མི་གང་ཙམ་དུ་མེ་ཏོག་གིས་ ཆལ་བར་བཀྲམ་མོ། །ལམ་དེ་དག་ཏུ་གདུགས་དང༌། རྒྱལ་མཚན་དང༌། བ་དན་དག་གིས་ཤིན་ཏུ་བརྒྱན་ཏོ། །ལམ་དེར་བདུག་སྤོས་དམ་པའི་སྙིང་པོ་རབ་ཀྱི་སྣོད་ནས་བདུགས་ སོ༑ ༑སྟེང་གི་བར་སྣང་ལས་དར་གྱི་ལྡ་ལྡི་དཔྱངས་ཏེ་ཤིན་ཏུ་བརྒྱན་ཏོ། །ལམ་དེར་སིལ་སྙན་སྣ་ཚོགས་ཀྱི་སྒྲ་འཁྲོལ་བར་བྱས་སོ། །ལམ་དེ་ནས་མདའ་རྒྱང་གང་ཚུན་ཆད་ཙམ་ མེ་ཏོག་ཨུཏྤ་ལ་དང༌། ཀུ་མུ་ཏ་དང༌། པདྨ་དཀར་པོས་ཁེབས་ཤིང་ངུར་པ་སྒྲ་འབྱིན་པར་བྱས་སོ། །ལམ་དེ་གསེར་གླེབས་པས་རབ་ཏུ་གཡོགས་སོ། །ལམ་དེ་གསེར་གྱི་དྲ་བ་དང༌། རིན་པོ་ཆེ་སྣ་བདུན་གྱི་དྲ་བས་རབ་ཏུ་གཡོགས་སོ། །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོས་ལམ་དུ་དེ་ལྟ་བུའི་བཀོད་པ་བྱས་ནས་ལུས་ཆེན་པོ་མངོན་པར་སྤྲུལ་ཏེ་འཁོར་དང་ བཅས་པས་དགའ་མགུ་རངས་རབ་ཏུ་དགའ་སྟེ་མོས་ཤིང་ཡིད་བདེ་བ་སྐྱེས་ནས་དགའ་བའི་སེམས་དང༌། བདེ་བའི་སེམས་དང༌། མཉེན་པའི་སེམས་དང༌། རྣམ་པར་དང་བའི་སེམས་དང༌། སྒྲིབ་པ་མེད་པའི་སེམས་དང༌། རབ་ཏུ་སིམ་པའི་སེམས་དང༌། སངས་རྒྱས་ལ་གཞོལ་བའི་སེམས་དང༌། ཆོས་ལ་གཞོལ་བའི་སེམས་དང༌། དགེ་འདུན་ལ་གཞོལ་བའི་སེམས་དང༌། བྱང་ ཆུབ་ལས་མི་གཡོ་བའི་སེམས་དང༌། མི་བསྐྱོད་པའི་སེམས་དང༌། མི་མཉམ་པ་དང་མཉམ་པའི་སེམས་དང༌། འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་སེམས་ དང༑ སེམས་ཅན་ཐམས་ཅད་ལ་བྱམས་པའི་སེམས་དང༌། སྙིང་རྗེའི་སེམས་དང༌། དགའ་བའི་སེམས་དང༌། བཏང་སྙོམས་ཀྱི་སེམས་དང༌། སངས་རྒྱས་ཀྱི་ཆོས་ཐམས་ཅད་ཀྱི་སྣོད་དུ་ གྱུར་པའི་སེམས་དང༌། སྙིང་པོའི་སེམས་དང༌། བརྟན་པའི་སེམས་དང༌། མི་ཕྱེད་པའི་སེམས་དང༌། མ་ཞིགས་པའི་སེམས་དང༌། ཉན་ཐོས་དང་རང་སངས་རྒྱས་ཀྱི་སར་མི་ལྟུང་བའི་ སེམས་དང༌། བྱང་ཆུབ་སེམས་དཔའི་ས་ཐམས་ཅད་སྒྲུབ་པའི་སེམས་ཀྱིས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་གནོད་སྦྱིན་ཅི་འཇིགས་ཀྱི་བུ་རི་བོས་ཐལ་མོ་སྦྱར་ཏེ་བཅོམ་ ༄༅། །ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །སངས་རྒྱས་འཇིག་རྟེན་རྣམས་ཀྱི་མཆོག །ཆོས་རྣམས་ཀྱི་ནི་དམ་པ་སྟོན། །འཇིག་རྟེན་མགོན་ ལ་བདག་གིས་ནི། །བླ་ན་མ་མཆིས་མཆོད་པར་བགྱིས། །འདྲེན་པ་ཇི་ལྟར་མཛད་པ་བཞིན། །སྟོབས་བཅུ་དང་ནི་རབ་ལྡན་ཏེ། །མི་འཇིགས་པ་ལ་རབ་གནས་ནས། །སེམས་ ཅན་དོན་རྣམས་བགྱིད་པར་ཤོག །སུམ་ཅུ་རྩ་གཉིས་མཚན་རྣམས་དང༌། །དཔེ་བྱད་བཟང་པོ་བརྒྱད་ཅུ་ལྡན། །འཇིག་རྟེན་མགོན་པོ་འོད་བྱེད་པ། །འཇིག་རྟེན་སྣང་བར་བྱེད་པར་ ཤོག །སྲོག་ཆགས་ཀུན་ལ་ཕན་པའི་ཕྱིར། །སྙན་པའི་ཆོས་ནི་ར་བ་སྟོན་ཅིང༌། །རྣམ་པ་བཅུ་གཉིས་དམ་པ་ཡི། །ཆོས་ཀྱི་འཁོར་ལོ་བསྐོར་བར་ཤོག །རྒྱལ་བ་ཇི་ལྟ་དེ་བཞིན་ དུ༑ ༑ཆོ་འཕྲུལ་རྣམས་ནི་རབ་སྟོན་ཅིང༌། །སྲོག་ཆགས་བྱེ་བ་དུ་མ་ཡི། །སེམས་ཅན་རྣམས་ཀྱི་དོན་བགྱིད་ཤོག །དཔའ་ཆེན་གང་རྣམས་མ་བྱོན་པ། །འཇིག་རྟེན་མགོན་པོ་ འོད་མཛད་ལྟར། །བྱང་ཆུབ་དམ་པར་རྟོགས་ནས། །ལམ་དེ་རབ་ཏུ་སྟོན་པར་ཤོག །སེམས་ཅན་ལྡོངས་པ་ཀུན་གྱི་ཕྱིར། །མིག་དང་ལྡན་པ་ཉིད་གྱུར་ཏེ། །གནས་དང་རྟེན་དང་ སྐྱབས་དག་དང༌། །དེ་བཞིན་དཔུང་གཉེན་འགྱུར་བར་ཤོག། ཇི་ལྟར་འདྲེན་པ་གྲོལ་མཛད་བཞིན། །འགྲོ་བ་ལྔར་ནི་སྐྱེས་པ་ཡི། །སྲོག་ཆགས་རྣམས་ཀྱི་མགོན་དུ་ཤོག། བདག་ གི་སྡུག་བསྔལ་ཀུན་ལས་དགྲོལ། །འཇིག་རྟེན་ན་ནི་མཚུངས་པ་ཡོད་མིན་པ། །ལྷ་དབང་ལྷ་མ་ཡིན་དང་ཀླུས་མཆོད་པ། །གཟི་བརྗིད་དག་ནི་མཐའ་ཡས་འོད་མཛད་པ། །རྐང་གཉིས་ མཆོག་ལ་བདག་གིས་མཆོད་པ་བགྱིས། །བདག་ནི་ལས་མཆོག་དམ་པ་འདི་དག་གིས། །མི་དབང་ས་སྟེང་མཆོག་ཏུ་གྱུར་པ་བཞིན། །བསོད་ནམས་རབ་མཆོག་སུམ་ཅུ་གཉིས་ མཚན་ལྡན། །ཆོས་ཀྱི་བདག་པོ་དེ་དང་འདྲ་བར་ཤོག །དེ་ནས་བཅོམ་ལྡན་འདས་ཀྱིས་གནོད་སྦྱིན་ཅི་འཇིགས་ཀྱི་བུ་རི་བོ་ལ་ཚིགས་སུ་བཅད་པ་འདི་དག་གསུངས་པ། ཆོས་ཀྱི་དམ་ པ་རྣམས་ཀྱི་ཕྱིར། །སྟོན་པའི་རིམ་གྲོ་གང་བྱེད་པ། །སེམས་ཅན་རྣམས་ཀྱི་མཆོག་ཡིན་ཏེ། །དེ་དག་བྱང་ཆུབ་རྙེད་མི་དཀའ། །འཇིག་རྟེན་མགོན་པོ་འོད་མཛད་པ། །འཇིག་རྟེན་ སྣང་མཛད་མཆོག་ལ་ནི། །ལྷ་དང་ཀླུ་དང་མི་རྣམས་ཀྱིས། །མཆོད་པ་བྱ་བར་འོས་པར་འགྱུར། །བྱང་ཆུབ་མཆོག་ཏུ་སངས་རྒྱས་ནས། །ཤིང་མཆོག་དྲུང་དུ་རབ་འདུག་སྟེ། །སྡིག་ཅན་ བདུད་ལས་རྒྱལ་ནས་ནི། །སྲོག་ཆགས་རྣམས་ལ་ཆོས་སྟོན་ཏོ། །དེ་ནས་བཅོམ་ལྡན་འདས་ལྷ་སྟོང་ཕྲག་དུ་མ་དང༌། གནོད་སྦྱིན་དང་སྲིན་པོ་སྟོང་ཕྲག་དུ་མ་དང༌། དྲི་ཟ་དང་མིའམ་ ཅི་དང་ལྟོ་འཕྱེ་ཆེན་པོ་སྟོང་ཕྲག་དུ་མ་དང༌། མི་དང་མི་མ་ཡིན་པ་སྟོང་ཕྲག་དུ་མ་དང༌། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་བསྐོར་ཞིང་མདུན་དུ་བདར་ནས་སངས་རྒྱས་ ༄༅། །ཀྱི་མཐུ་ཆེན་པོ་དང༌། སངས་རྒྱས་ཀྱི་རྫུ་འཕྲུལ་ཆེན་པོ་དང༌། སངས་རྒྱས་ཀྱི་ཆོ་འཕྲུལ་ཆེན་པོ་དང༌། སངས་རྒྱས་ཀྱི་རྣམ་པར་འཕྲུལ་པ་ཆེན་པོ་དང༌། སངས་ རྒྱས་ཀྱི་གཟི་བརྗིད་ཆེན་པོས་འོད་ཟེར་ནི། རབ་ཏུ་འགྱེད། ཞིང་ནི། རབ་ཏུ་གཡོ་བར་བྱས། མེ་ཏོག་གི་ཆར་ནི། རབ་ཏུ་འབེབས། སིལ་སྙན་བྱེ་བ་ཁྲག་ཁྲིག་ནི། རབ་ཏུ་འཁྲོལ་ བར་བྱས་ཏེ་གནོད་སྦྱིན་ཅི་འཇིགས་ཀྱི་བུ་རི་བོས་ལམ་དུ་བཀོད་པ་ཇི་ལྟར་མངོན་པར་བྱས་པ་བཞིན་དུ་ཤིང་རྟའི་འཕང་ལོ་ཙམ་གྱི་པདྨ་ལ་ཞབས་བཞག་སྟེ། རིའི་རྒྱལ་པོ་ བྱ་རྒོད་ཀྱི་ཕུང་པོ་ག་ལ་བ་དེར་གཤེགས་ཏེ་བྱོན་ནས་ཚེ་དང་ལྡན་པ་ཀུན་དགའ་བོ་ལ་ཀུན་དགའ་བོ། ཁྱོད་ཀྱིས་དེ་བཞིན་གཤེགས་པའི་གདན་མཆོག །ཆོས་ཀྱི་གདན། གདན་དམ་ པ༑ གདན་བཟང་པོ། འཇིག་རྟེན་གསུམ་པོ་ཀུན་ལས་ཁྱད་པར་འཕགས་པའི་གདན། སངས་རྒྱས་ཀྱི་གདན་ཤོམས་ཤིག །དེ་བཞིན་གཤེགས་པ་གདན་དེ་ལ་བཞུགས་ཏེ་སྐྱེ་བོ་ མང་པོ་ལ་ཕན་པ་དང༌། བདེ་བ་དང༌། འཇིག་རྟེན་རྣམས་ལ་སྙིང་བརྩེ་བ་དང༌། ལྷ་དང་མི་རྣམས་ཀྱི་དོན་དང༌། ཕན་པའི་ཕྱིར་བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་མདོ་སྡེ་ སེམས་ཅན་ཐམས་ཅད་ལ་ཕན་པར་རབ་ཏུ་བསྔགས་པ་བྱང་ཆུབ་སེམས་དཔའི་སྤྱོད་པའི་རྒྱུ་མཐུན་པ་འཆད་པར་འགྱུར་ཏེ། དེའང་སེམས་ཅན་ཐམས་ཅད་ཐེ་ཚོམ་དུ་གྱུར་པ་ལ་ རབ་ཏུ་སྟོན་པ། སེམས་ཅན་ཐམས་ཅད་ཀྱི་ཐེ་ཚོམ་གཅོད་པ། སེམས་ཅན་ཐམས་ཅད་ཀྱི་ཐེ་ཚོམ་སྐྱེ་བ་གཅོད་པ། དེ་བཞིན་གཤེགས་པའི་མདོ་སྡེ་འདི་འཆད་པར་འགྱུར་ཞེས་བཀའ་སྩལ་ པ་དང༌། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་གདན་བཤམས་ཏེ། དེ་ན་ལྷ་བྱེ་བ་དྲུག་ཅུ་རྩ་བརྒྱད་ཀྱིས་རས་བཅོས་བུ་རེ་རེ་དེ་བཞིན་གཤེགས་པ་ལ་ཕུལ་ཏེ། དེ་དག་ཀྱང་ དེར་གདན་དུ་བཏིང་བར་གྱུར་ནས་བཅོམ་ལྡན་འདས་གདན་བཤམས་པ་དེ་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ལྷའི་བུ་དེ་རྣམས་ལ་ཚིགས་སུ་བཅད་པ་འདི་དག་ གསུངས་པ། འཇིག་རྟེན་མགོན་གྱི་གདན་དུ་ནི། །ལྷ་ཡི་གོས་རབ་དམ་པ་མཆོག །ལྷ་ཡིས་རབ་ཏུ་བཏིང་བ་ནི། །དེ་ལ་རྣམ་པར་འདྲེན་པ་བཞུགས། །ཐམས་ཅད་ཆོས་ཀྱི་ཕ་རོལ་ཕྱིན། ། སངས་རྒྱས་བཞུགས་པར་གྱུར་མ་ཐག །འཇིག་རྟེན་རྣམ་པ་དྲུག་གཡོས་ཤིང༌། །སྐྱེ་བོ་རབ་ཏུ་དགའ་བར་གྱུར། །སངས་རྒྱས་ཞིང་ནི་རི་དང་བཅས། །དེ་ན་རབ་ཏུ་སྣང་བར་གྱུར། །དེ་ན་ ཆོས་འདོད་རྣམས་ལ་ནི། །སྐྱོབ་པས་སངས་རྒྱས་རྫུ་འཕྲུལ་སྟོན། །ལྷ་དང་ཀླུ་དང་མི་རྣམས་དང༌། །གྲུལ་བུམ་ཡི་དྭགས་སྲུལ་པོ་རྣམས། །དེ་དག་གཅིག་གིས་གཅིག་མཐོང་སྟེ། །སྒྲིབ་ པ་དག་ནི་མེད་པར་གྱུར། །ལྷ་རྣམས་བྱེ་བ་ཕྲག་སྟོང་དང༌། །ཁྲག་ཁྲིག་ཕྲག་ནི་བརྒྱ་རྣམས་དག །རྙེད་དཀའ་ཡི་ནི་ཚིག་གསུངས་པ། །སངས་རྒྱས་ལ་ནི་དགའ་བས་ལྟ། །རྒྱལ་པོ་ ༄༅། །གཟུགས་ཅན་སྙིང་པོ་ཡང༌། །དེ་ཚེ་བློན་པོས་ཡོངས་བསྐོར་ཞིང༌། །འཇིག་རྟེན་གྱི་ནི་མགོན་པོ་མཆོག །སངས་རྒྱས་དྲུང་དུ་འོངས་པར་གྱུར། །སྟོན་པས་ལྷ་དང་ཀླུ་ རྣམས་དང༌། །མི་རྣམས་འདུས་པར་མཁྱེན་པ་དང༌། །སྲོག་ཆགས་ཀུན་ལ་ཕན་པའི་ཕྱིར། །ཕྱོགས་བཞི་དག་ཏུ་རབ་གཟིགས་ནས། །འཇིག་རྟེན་ཐེ་ཚོམ་གང་ཡོད་པ། །རྐང་ གཉིས་མཆོག་ལ་དྲིས་ཤིག་དང༌། །ཐེ་ཚོམ་དག་ནི་དྲིས་པ་རྣམས། །རྣམ་པར་འདྲེན་པ་ངས་བཤད་དོ། །དེ་ལྟར་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ ཀྱི་སེམས་ཅན་ཇི་སྙེད་འདུས་ནས་ཆོས་ཉན་པ་དེ་དག་ཐམས་ཅད་ཀྱིས་དལ་བར་ཤེས་ནས་སེམས་ཐམས་ཅད་ཀྱིས་བསམ་སྟེ་ཕྱག་འཚལ་ནས་ཆོས་ཉན་པའི་ཕྱིར་རྣ་བ་བླགས་ ཏེ་འདུག་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽ་དགལ་གྱི་བུ་ཆེན་པོ་ལ་བཀའ་སྩལ་པ། མཽ་དགལ་གྱི་བུ་ཆེན་པོ། དགེ་སློང་མ་འདུས་པ་རྣམས་ལ་སོམ་ ལ་མ་ལྷགས་པ་རྣམས་ཀྱང་བཙལ་ཏེ་རྒྱང་རིང་པོ་ན་གནས་པ་རྣམས་ཀྱང་སྡུས་ཤིག །དེའི་ཚེ་ཚེ་དང་ལྡན་པ་འོད་སྲུང་ཆེན་པོ་རིའི་རྒྱལ་པོ་ཁ་བ་ཅན་གྱི་ལྷོ་ཕྱོགས་ཀྱི་ངོས་ལ་གནས་ སོ༑ ༑དེ་ནས་ཚེ་དང་ལྡན་པ་མཽ་དགལ་གྱི་བུ་ཆེན་པོས་བསམ་སྟེ། བསམ་ནས་རྫུ་འཕྲུལ་གྱི་སྟོབས་ཀྱིས་ཚེ་དང་ལྡན་པ་འོད་སྲུང་ཆེན་པོ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་ པ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཅུན་པ་འོད་སྲུང་ཆེན་པོ་ལོངས་ཤིག །བཅོམ་ལྡན་འདས་འདི་ལྟར་ལྷར་བཅས་པའི་འཇིག་རྟེན་དང༌། བདུད་དུ་བཅས་པ་དང༌། ཚངས་ པར་བཅས་པ་དང༌། དགེ་སྦྱོང་དང༌། བྲམ་ཟེར་བཅས་པའི་སྐྱེ་རྒུ་རྣམས་དང༌། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཁོར་གྱི་མདུན་དུ་ཆོས་སྟོན་ཏེ། སྟོན་པས་བཀའ་སྩལ་གྱི། བཅུན་པ་འོད་སྲུང༌། བདག་ཅག་གཉིས་ཀྱི་ཆོས་ཀྱི་བར་ཆད་དུ་འགྱུར་དུ་འོང་གི། འདོང་ངོ༌། །དེ་སྐད་ཅེས་སྨྲས་པ་དང༌། ཚེ་དང་ལྡན་པ་འོད་སྲུང་ཆེན་པོས་ཚེ་དང་ལྡན་པ་མཽ་དགལ་གྱི་བུ་ ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽ་དགལ་གྱི་བུ་ཆེན་པོ། །ཁྱོད་སོངས་ཤིག་དང༌། ཁོ་བོ་ཡང་ཁྱོད་སོང་བའི་རྗེས་བཞིན་དུ་འོང་ངོ༌། །དེ་ནས་ཚེ་དང་ལྡན་པ་འདི་སྲུང་ ཆེན་པོས་སྟན་དེ་ལ་སྤྲུལ་པ་སྤྲུལ་ཏེ་རྫུ་འཕྲུལ་གྱི་སྟོབས་ཀྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་ཞུགས་སོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་འཁོར་བཞིས་བསྐོར་ཅིང་ མདུན་དུ་བདར་ནས་རིའི་རྒྱལ་པོ་བྱ་རྒོད་ཀྱི་ཕུང་པོ་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་འཁོར་ གྱི་ནང་དུ་ཧ་ཅང་ཡང་མི་རིང་བ་ཞིག་ཏུ་ཕྱོགས་གཅིག་ཏུ་འདུག་གོ། དེ་ནས་ཚེ་དང་ལྡན་པ་མཽ་དགལ་གྱི་བུ་ཆེན་པོས་སྤྲུལ་པ་དེ་མཐོང་ནས་རྫུ་འཕྲུལ་གྱི་སྟོབས་ཀྱིས་བཅོམ་ལྡན་ ༄༅། །འདས་ག་ལ་བ་དེར་སོང་ངོ༌། །ཚེ་དང་ལྡན་པ་མཽ་དགལ་གྱི་བུ་ཆེན་པོས་ཚེ་དང་ལྡན་པ་འོད་སྲུང་ཆེན་པོ་བཅོམ་ལྡན་འདས་ཀྱི་སྤྱན་སྔར་ཧ་ཅང་ཡང་མི་རིང་བ་ ཞིག་ཏུ་འཁོར་གྱི་ནང་ན་ཕྱོགས་གཅིག་ཏུ་འདུག་པ་མཐོང་སྟེ་མཐོང་ནས་འདི་སྐད་ཅེས་སྨྲས་སོ། །བཙུན་པ་འོད་སྲུང༌། ཁྱོད་སྟན་ག་ལ་བ་དེ་ནས་སྤྲུལ་ཏེ་སྤྲུལ་ནས་མགྱོགས་པར་ བཅོམ་ལྡན་འདས་ཀྱི་དྲུང་དུ་ཕྱིན་ཏེ་སྤྱན་སྔར་ཧ་ཅང་ཡང་མི་རིང་བ་ཞིག་ཏུ་འཁོར་གྱི་ནང་ན་ཕྱོགས་གཅིག་ཏུ་འདུག་པ་ནི། མྱུར་བ་ལ་བརྟེན་པའི་རྫུ་འཕྲུལ་དང་ལྡན་ནོ། །དེ་སྐད་ ཅེས་སྨྲས་པ་དང༌། ཚེ་དང་ལྡན་པ་འོད་སྲུང་ཆེན་པོས་ཚེ་དང་ལྡན་པ་མཽ་དགལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽ་དགལ་གྱི་བུ་ཆེན་པོ་ནི། བཅོམ་ལྡན་འདས་ ཀྱིས་རྫུ་འཕྲུལ་དང་ལྡན་པའི་མཆོག་ཏུ་གསུངས་ན། འདི་ལ་ཁོ་བོའི་རྫུ་འཕྲུལ་རྣམ་པར་སྤྲུལ་པ་ལྟ་ཅི་ཞིག་ཏུ་འགྱུར། གནོད་སྦྱིན་ཅི་འཇིགས་ཀྱི་ལེའུ་སྟེ། གཉིས་པའོ།། །། བམ་པོ་གསུམ་པ། དེ་ནས་ཚེ་དང་ལྡན་པ་ཤཱ་རིའི་བུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་ སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང༌། བཅོམ་ ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་ དང་ཅི་འདོད་པ་དྲིས་ཤིག་དང༌། དྲིས་པ་དེ་དང་དེ་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་དུ་དང་ལྡན་ན། བྱང་ཆུབ་སེམས་དཔའ་རྣམས་ལུས་ཀྱི་ལས་ཁ་ན་མ་ཐོ་བ་མ་མཆིས་པ་དག་ལགས། ངག་གི་ལས་ ཁ་ན་མ་ཐོ་བ་མ་མཆིས་པ་དང༌། ཡིད་ཀྱི་ལས་ཁ་ན་མ་ཐོ་བ་མ་མཆིས་པ་དང༌། ལུས་ཀྱི་ལས་ཡོངས་སུ་དག་པ་དང༌། ངག་གི་ལས་ཡོངས་སུ་དག་པ་དང༌། ཡིད་ཀྱི་ལས་ཡོངས་སུ་ དག་པ་དང༌། ལུས་ཀྱི་ལས་མ་གཡོས་པ་དང༌། ངག་གི་ལས་མ་གཡོས་པ་དང༌། ཡིད་ཀྱི་ལས་མ་གཡོས་པ་རྣམས་ལགས། ཐམས་ཅད་མཁྱེན་པའི་སེམས་བསྐྱེད་པ་དེ་ལས་བདུད་དམ་ བདུད་ཀྱི་རིས་ཀྱི་ལྷ་རྣམས་ཀྱིས་བསྐྱོད་མི་ནུས་པ་རྣམས་ལགས། ས་ནས་སར་འཕར་བ་ལ་མཁས་པ་རྣམས་ལགས། སེམས་ཅན་ཐམས་ཅད་ཀྱི་འདྲེན་པར་གྱུར་པ་དང༌། རྣམ་པར་ ༄༅། །འདྲེན་པར་གྱུར་པ་དང༌། ཡོངས་སུ་འདྲེན་པར་གྱུར་པ་དང༌། སྒྲོན་མེར་གྱུར་པ་དང༌། སྟེགས་སུ་གྱུར་པ་དང༌། ཟམ་པར་གྱུར་པ་དང༌། གྲུར་གྱུར་པ་དང༌། སྒྲོལ་བ་པོ་དང༌། ཕ་རོལ་ཏུ་འགྲོ་བར་གྱུར་པ་དང༌། གནས་དང༌། མགོན་དང༌། སྐྱབས་དང༌། དཔུང་གཉེན་དུ་གྱུར་པ་དང༌། ཐམས་ཅད་མཁྱེན་པའི་སེམས་བསྐྱེད་པ་དེ་ལས་ བཟློག་པར་མི་ནུས་པ་རྣམས་ལགས། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་ཚིགས་སུ་བཅད་པའི་དབྱངས་ཀྱིས་དོན་དེ་ཉིད་ཀུན་ཞུས་པ། གང་གིས་བྱང་ ཆུབ་རབ་ཞུགས་པ། །དཔའ་པོ་དེ་ཡི་དོན་ཅི་ལགས། །གང་གིས་དམ་པ་འཚང་རྒྱ་བ། །ཡོན་ཏན་ཆོས་རྣམས་བརྗོད་དུ་གསོལ། །སྲོག་ཆགས་ཀུན་ལ་སྨན་སླད་དུ། །དཔའ་བོ་དེ་ དག་ཇི་ལྟར་སྤྱོད། །ཇི་ལྟ་བུ་ཡི་ཆོས་བསྒོམས་པས། །མི་ཡི་དམ་པ་སངས་རྒྱས་འགྱུར། །བྱང་ཆུབ་སྙིང་པོར་རབ་གནས་ནས། །སྡིག་ཅན་དག་ནི་ཇི་ལྟར་འདུལ། །བྱེ་བ་དག་ གི་ཞིང་བསྐྱོད་ནས། །ཇི་ལྟར་བྱང་ཆུབ་མཆོག་འཚང་རྒྱ། །བྱང་ཆུབ་སེམས་དཔའ་གང་གི་དོན། །འདི་འདྲའི་ཚིག་ནི་ཅི་ཞིག་ལགས། །སངས་རྒྱས་ཆོས་ཀྱི་མཆོག་རྣམས་དང༌།། བྱང་ཆུབ་དག་ནི་འདིར་བརྗོད་གསོལ། །སྲོག་ཆགས་ཀུན་ལ་སྨན་སླད་དུ། །པདྨ་བཞིན་དུ་མ་ཆགས་ཤིང༌། །སེམས་ཅན་བྱེ་བ་གྲོལ་མཛད་པར། །འཇིག་རྟེན་འདི་ན་ཇི་ལྟར་ སྤྱོད༑ ༑མཁས་པ་ལྷ་དང་ཀླུ་དག་དང༌། །མི་དང་མི་མ་ལགས་རྣམས་ཀྱིས། །ཇི་ལྟ་བུར་ནི་མཆོད་གྱུར་པ། །ཞུས་པ་དེ་དག་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་ པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། བྱང་ཆུབ་སེམས་དཔའ་ཆོས་གཅིག་དང་ལྡན་ན། སངས་རྒྱས་ཀྱི་ཆོས་འདི་དག་དང༌། གཞན་ཡང་དཔག་ཏུ་མེད་པ་དག་ཡོངས་ སུ་འཛིན་ཏོ། །ཆོས་གཅིག་པོ་གང་ཞེ་ན། འདི་ལྟ་སྟེ། བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་ཏེ། ཤཱ་རིའི་བུ། བྱང་ཆུབ་སེམས་དཔའ་ཆོས་གཅིག་པོ་དེ་དང་ལྡན་ན། སངས་ རྒྱས་ཀྱི་ཆོས་འདི་དག་དང༌། གཞན་ཡང་དཔག་ཏུ་མེད་པ་དག་ཡོངས་སུ་འཛིན་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་ འདས༑ བསམ་པ་ཇི་ལྟ་བུ། བྱང་ཆུབ་ཀྱི་སེམས་ཇི་ལྟ་བུ། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། བསམ་པ་ཞེས་བྱ་བ་ནི། མི་ཕྱེད་པའི་ཕྱིར་སྙིང་པོའོ། །བརྟན་པའི་ཕྱིར་མི་ཕྱེད་པའོ། །མི་གཡོ་བའི་ཕྱིར་བརྟན་པའོ། །མ་འཁྲུལ་པའི་ཕྱིར་མི་གཡོ་བའོ། །ཤིན་ཏུ་གནས་པའི་ཕྱིར་ མ་འཁྲུལ་བའོ། །མི་ལྡོག་པའི་ཕྱིར་ཤིན་ཏུ་གནས་པའོ། །སེམས་ཅན་ལ་བལྟ་བའི་ཕྱིར་མི་བཟློག་པའོ། །སྙིང་རྗེ་ཆེན་པོའི་རྩ་བ་ལས་བྱུང་བའི་ཕྱིར་སེམས་ཅན་ལ་ལྟ་བའོ། །ཡོངས་ ༄༅། །སུ་མི་སྐྱོ་བའི་ཕྱིར་སྙིང་རྗེ་ཆེན་པོའི་རྩ་བའོ། །སེམས་ཅན་ཡོངས་སུ་སྨིན་པར་བྱ་བའི་ཆོ་ག་ཤེས་པའི་ཕྱིར་ཡོངས་སུ་མི་སྐྱོ་བའོ། །བདག་ལ་བདེ་བ་མ་ཡིན་ པའི་ཕྱིར་སེམས་ཅན་ཡོངས་སུ་སྨིན་པར་བྱ་བའི་ཆོ་ག་ཤེས་པའོ། །ལན་དུ་ཕན་འདོགས་པར་རེ་བ་མེད་པའི་ཕྱིར་བདག་བདེ་བ་མ་ཡིན་པའོ། །ཟང་ཟིང་མེད་པའི་ཕྱིར་ལན་དུ་ཕན་ འདོགས་པར་རེ་བ་མེད་པའོ། །སེམས་ཅན་གྱི་ཕྱིར་འབྲང་བས་ཟང་ཟིང་མེད་པའོ། །མཐུ་ཆུང་བའི་སེམས་ཅན་ལ་བལྟ་བའི་ཕྱིར་སེམས་ཅན་གྱི་ཕྱིར་འབྲང་བའོ། །མགོན་དུ་གྱུར་ པའི་ཕྱིར་མཐུ་ཆུང་བའི་སེམས་ཅན་ལ་བལྟ་བའོ། །སྐྱབས་དང་དཔུང་གཉེན་གྱི་ཕྱིར་མགོན་དུ་གྱུར་པའོ། །མ་འཁྲུགས་པའི་ཕྱིར་སྐྱབས་དང་དཔུང་གཉེན་ནོ། །ཤིན་ཏུ་ཡང་དག་ པར་བརྟགས་པའི་ཕྱིར་མ་འཁྲུགས་པའོ། །རྩོད་པ་མེད་པའི་ཕྱིར་ཤིན་ཏུ་ཡང་དག་པར་བརྟགས་པའོ། །བསམ་པ་དགེ་བའི་ཕྱིར་རྩོད་པ་མེད་པའོ། །ཅི་ཡང་མེད་པའི་ཕྱིར་བསམ་ པ་དགེ་བའོ། །ཤིན་ཏུ་ཡོངས་སུ་དག་པའི་ཕྱིར་ཅི་ཡང་མེད་པའོ། །རབ་ཏུ་བྱུང་བར་བྱས་པའི་ཕྱིར་ཤིན་ཏུ་ཡོངས་སུ་དག་པའོ། །ནང་དྲི་མ་མེད་པའི་ཕྱིར་རབ་ཏུ་བྱང་བར་བྱས་པའོ།། ཕྱི་ཤིན་ཏུ་ཡོངས་སུ་དག་པའི་ཕྱིར་ནང་དྲི་མ་མེད་པའོ། །དེ་ལྟར་ཤཱ་རིའི་བུ། མི་ཕྱེད་པས་སྙིང་པོ་ཞེས་བྱ་བ་ནས་ཕྱི་ཤིན་ཏུ་ཡོངས་སུ་དག་པའི་ཕྱིར་ནང་དྲི་མ་མེད་པའི་བར་དུ་སྟེ། བསམ་པ་ནི། དེ་ལྟ་བུའོ། །བྱང་ཆུབ་ཀྱི་སེམས་ཇི་ལྟ་བུ་ཞེ་ན། སེམས་དེ་ནི། ཉོན་མོངས་པ་ཐམས་ཅད་ཀྱིས་མི་རྫི་བའོ། །སེམས་དེ་ནི། ཐེག་པ་གཞན་མི་འདོད་པའི་ཕྱིར་འབྲེལ་པ་ མེད་པའོ། །སེམས་དེ་ནི། ཕ་རོལ་རྒོལ་བ་ཐམས་ཅད་ཀྱིས་མི་འཕྲོག་པའི་ཕྱིར་བརྟན་པའོ། །སེམས་དེ་ནི། བདུད་ཐམས་ཅད་ཀྱིས་མི་ཕྱེད་པའོ། །སེམས་དེ་ནི། དགེ་བའི་རྩ་བའི་ཚོགས་ བསགས་པའི་ཕྱིར་རྟག་པའོ། །སེམས་དེ་ནི། སངས་རྒྱས་ཀྱི་ཆོས་ལ་མོས་པའི་ཕྱིར་མི་གཡོ་བའོ། །སེམས་དེ་ནི། བྱང་ཆུབ་སེམས་དཔའི་ས་ལ་རབ་ཏུ་གནས་པའོ། །སེམས་དེ་ནི། གཉེན་ པོ་མེད་པའི་ཕྱིར་བླ་ན་མེད་པའོ། །སེམས་དེ་ནི། སངས་རྒྱས་ཀྱི་ཆོས་ཐམས་ཅད་ངེས་པར་ཕིགས་པའི་ཕྱིར་རྡོ་རྗེ་ལྟ་བུའོ། །སེམས་དེ་ནི། སེམས་ཅན་ཐམས་ཅད་ཀྱི་བསམ་པ་ལ་མི་མཉམ་ པ་མེད་པའི་ཕྱིར་མཉམ་པའོ། །སེམས་དེ་ནི། རང་བཞིན་གྱིས་ཀུན་ནས་ཉོན་མོངས་པ་མེད་པའི་ཕྱིར་རྣམ་པར་དག་པའོ། །སེམས་དེ་ནི། ཤེས་རབ་ཀྱིས་སྣང་བར་བྱེད་པའི་ཕྱིར་ དྲི་མ་མེད་པའོ། །སེམས་དེ་ནི། སེམས་ཅན་ཐམས་ཅད་ལ་སྐབས་འབྱེད་པའི་ཕྱིར་རྒྱ་ཆེ་བའོ། །སེམས་དེ་ནི། ནམ་མཁའ་དང་མཚུངས་པའི་ཕྱིར་ཡངས་པའོ། །སེམས་དེ་ནི། ཐམས་ཅད་མཁྱེན་པའི་ཡེ་ཤེས་ལ་བཏང་བའི་ཕྱིར་སྒྲིབ་པ་མེད་པའོ། །སེམས་དེ་ནི། སྙིང་རྗེ་ཆེན་པོ་མ་བཅད་པའི་ཕྱིར་ཐམས་ཅད་ཀྱི་རྗེས་སུ་སོང་བའོ། །སེམས་དེ་ནི། མཁས་པས་ ༄༅། །བསྔགས་པའི་ཕྱིར་མངོན་དུ་འགྲོ་བར་བྱས་པའོ། །སེམས་དེ་ནི། སངས་རྒྱས་ཀྱི་ཆོས་ཐམས་ཅད་ཀྱི་ས་བོན་དུ་གྱུར་པའོ། །སེམས་དེ་ནི། བདེ་བའི་དངོས་པོ་ ཐམས་ཅད་ཀྱི་གནས་སོ། །སེམས་དེ་ནི། ཚུལ་ཁྲིམས་ཀྱིས་སྨོན་ལམ་ལས་བྱུང་བའོ། །སེམས་དེ་ནི། བཟོད་པས་བསྙེན་པར་དཀའ་བའོ། །སེམས་དེ་ནི། བརྩོན་འགྲུས་ཀྱིས་ཐུལ་ བར་དཀའ་བའོ། །སེམས་དེ་ནི། བསམ་གཏན་དག་གིས་ཉེ་བར་ཞི་བའོ། །སེམས་དེ་ནི། ཤེས་རབ་ཀྱི་ཚོགས་ཀྱིས་གནོད་པ་མེད་པའོ། །ཡང་སེམས་དེ་ནི། དེ་བཞིན་གཤེགས་པའི་ཚུལ་ ཁྲིམས་ཀྱི་ཕུང་པོ་དང༌། ཏིང་ངེ་འཛིན་གྱི་ཕུང་པོ་དང༌། ཤེས་རབ་ཀྱི་ཕུང་པོ་དང༌། རྣམ་པར་གྲོལ་བའི་ཕུང་པོའི་རྩ་བའོ། །སེམས་དེ་ནི། དེ་བཞིན་གཤེགས་པའི་རྣམ་པར་གྲོལ་ བའི་ཡེ་ཤེས་གཟིགས་པའི་ཕུང་པོའི་རྩ་བའོ། །སེམས་དེ་ནི། དེ་བཞིན་གཤེགས་པའི་སྟོབས་བཅུ་དང༌། མི་འཇིགས་པ་བཞི་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་རྣམས་ ཀྱི་རྩ་བའོ། །ཡང་ཤཱ་རིའི་བུ། སེམས་དེ་ནི། བྱང་ཆུབ་ཀྱི་རང་བཞིན་ཏེ། དེའི་ཕྱིར་བྱང་ཆུབ་ཀྱི་སེམས་ཞེས་བྱའོ། །ཤཱ་རིའི་བུ། བྱང་ཆུབ་སེམས་དཔའ་བསམ་པ་དང༌། བྱང་ཆུབ་ཀྱི་ སེམས་དེ་ལྟ་བུ་དང་ལྡན་པ་ནི། བྱང་ཆུབ་སེམས་དཔའ་ཞེས་བྱའོ། །སེམས་རྒྱ་ཆེན་པོ་སེམས་ཅན་མཆོག་རབ་ཅེས་བྱའོ། །འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་གྱུར་ པའི་སེམས་ཅན་ཞེས་བྱའོ། །ལུས་ཀྱི་ལས་ཁ་ན་མ་ཐོ་བ་མེད་པ་ཡིན། ངག་གི་ལས་ཁ་ན་མ་ཐོ་བ་མེད་པ་ཡིན། ཡིད་ཀྱི་ལས་ཁ་ན་མ་ཐོ་བ་མེད་པ་ཡིན། ལུས་ཀྱི་ལས་ཡོངས་སུ་དག་པ་ཡིན། ངག་གི་ལས་ཡོངས་སུ་དག་པ་ཡིན། ཡིད་ཀྱི་ལས་ཡོངས་སུ་དག་པ་ཡིན། ལུས་ཀྱི་ལས་མ་གཡོས་པ་ཡིན། ངག་གི་ལས་མ་གཡོས་པ་ཡིན། ཡིད་ཀྱི་ལས་མ་གཡོས་པ་ཡིན་ཏེ། ཐམས་ ཅད་མཁྱེན་པའི་སེམས་བསྐྱེད་པ་དེ་ལས་བདུད་དང༌། བདུད་ཀྱི་རིས་ཀྱི་ལྷ་རྣམས་ཀྱིས་བསྐྱོད་མི་ནུས་པ་ཡིན། ས་ནས་སར་འཕར་བ་ལ་མཁས་པ་ཡིན། འཇིག་རྟེན་གྱི་ཆོས་ཐམས་ཅད་ཀྱིས་ མ་གོས་པ་ཡིན། སེམས་ཅན་ཐམས་ཅད་ཀྱི་འདྲེན་པར་གྱུར་པ་ཡིན། རྣམ་པར་འདྲེན་པར་གྱུར་པ་ཡིན། ཡོངས་སུ་འདྲེན་པར་གྱུར་པ་དང༌། སྒྲོན་མེར་གྱུར་པ་དང༌། སྟེགས་སུ་གྱུར་པ་དང༌། ཟམ་པར་གྱུར་པ་དང༌། གྲུར་གྱུར་བ་དང༌། སྒྲོལ་བར་གྱུར་པ་དང༌། ཕ་རོལ་ཏུ་འགྲོ་བ་དང༌། གནས་དང༌། མགོན་དང༌། སྐྱབས་དང༌། དཔུང་གཉེན་ནོ། །ཐམས་ཅད་མཁྱེན་པའི་སེམས་བསྐྱེད་ པ་དེ་ལས་བདུད་དང༌། བདུད་ཀྱི་རིས་ཀྱི་ལྷ་རྣམས་ཀྱིས་བསྐྱོད་མི་ནུས་པ་ཡིན་ནོ། །དེ་ལྟར་ན་ཤཱ་རིའི་བུ། བྱང་ཆུབ་སེམས་དཔའ་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་སེམས་བསྐྱེད་ནས་དད་པ་ཡིན་ནོ། །དད་པ་མང་བ་དང༌། འཕགས་པ་རྣམས་མཐོང་བར་འདོད་པ་དང༌། ཆོས་ཉན་པར་འདོད་པ་ཡིན། སེར་སྣ་མེད་ཅིང་ལྷུག་པར་གཏོང་བ་ ༄༅། །དང༌། ལག་པ་བརྐྱང་ཞིང་རྣམ་པར་གཏོང་བ་ལ་དགའ་བ་དང༌། སྦྱིན་པ་འགེད་པ་ལ་དགའ་བ་ཡིན། སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་སེམས་ ཡིན། རྙོག་པ་མེད་པའི་སེམས་དང༌། འཁྲུག་པ་མེད་པའི་སེམས་དང༌། མ་འདྲེས་པའི་སེམས་དང༌། དེ་ལས་དང༌། ལས་ཀྱི་རྣམ་པར་སྨིན་པ་ལ་མངོན་པར་དད་པ་དང༌། རབ་ཏུ་རྟོག་ ཅིང་ཡིད་ཆེས་པ་དང༌། ཐེ་ཚོམ་མེད་ཅིང་སོམ་ཉི་མེད་པ་ཡིན་ནོ། །དེ་ནག་པོ་དང༌། དཀར་པོའི་ཆོས་རྣམས་ཀྱི་འབྲས་བུ་མི་སྟོར་བར་ཤེས་པས་སྲོག་གི་ཕྱིར་ཡང་སྡིག་པའི་ལས་མི་ བྱེད་པ་ཡིན་ཏེ། དེ་སྲོག་གཅོད་པ་སྤོང་བ་ཡིན། མ་བྱིན་པར་ལེན་པ་དང༌། འདོད་པ་ལ་ལོག་པ་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ངག་རྩུབ་པོ་དང༌། ཚིག་ཀྱལ་པ་ དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བ་སྤོང་བ་ཡིན་ཏེ། མི་དགེ་བ་བཅུའི་ལས་ཀྱི་ལམ་འདི་དག་སྤངས་ནས་དགེ་བ་བཅུའི་ལས་ཀྱི་ལམ་རྣམས་ཡང་དག་པར་ ལེན་ཅིང་སྤྱོད་དོ། །དེ་དད་པ་དང་ལྡན་པས་གང་དགེ་སྦྱོང་དང༌། བྲམ་ཟེ་དག་ཡང་དག་པར་སོང་བ་དང༌། ཡང་དག་པར་ཞུགས་པ་དང༌། ཚུལ་ཁྲིམས་དང་ལྡན་པ་དང༌། དགེ་བའི་ ཆོས་ཅན་དང༌། མང་དུ་ཐོས་པ་དང༌། ཐོས་པ་ལ་བརྩོན་པ་དང༌། ཚུལ་བཞིན་ཡིད་ལ་བྱེད་པ་དང་ལྡན་པ་དང༌། དུལ་བ་དང༌། ཞི་བ་དང༌། ཉེ་བར་ཞི་བ་དང༌། རྩོད་པའི་སྨྲ་བ་མེད་པ་དང༌། མི་ སྙན་པར་སྨྲ་བ་མེད་པ་དང༌། བསམ་པ་དེས་ཤིང་མི་དགེ་བའི་བསམ་པ་མེད་པ་དང༌། དགེ་བ་ལ་ཡང་དག་པར་སྦྱོར་བ་དང༌། མི་དགེ་བའི་ཆོས་ཐམས་ཅད་ཡོངས་སུ་སྤངས་པ་དང༌། རྒོད་པ་ མེད་པ་དང༌། ཁེངས་པ་མ་ཡིན་པ་དང༌། ཡབ་ཡབ་པོ་མེད་པ་དང༌། མུ་ཅོར་མི་སྨྲ་བ་དང༌། ཚིག་མ་འདྲེས་པ་དང༌། དྲན་པ་ཉེ་བར་གནས་པ་དང༌། སེམས་ཤིན་ཏུ་མཉམ་པར་བཞག་པ་དེ་དག་དང་ ཇི་ལྟར་སྲིད་པར་འདྲེན་པ་བཅད་པ་དང༌། ཟུག་རྔུ་ཕྱུང་བ་དང༌། ཁུར་བོར་བ་དང༌། ཐེ་ཚོམ་ལས་བརྒལ་བ་དང༌། སོམ་ཉི་ལས་བརྒལ་བ་དང༌། ཡང་སྲིད་པ་ཟད་པའི་སངས་རྒྱས་བཅོམ་ལྡན་འདས་ དང༌། བྱང་ཆུབ་སེམས་དཔའ་སེམས་དཔའ་ཆེན་པོ་དག་དང༌། དེ་ལྟ་བུའི་དགེ་སྦྱོང་དང༌། བྲམ་ཟེ་དགེ་བའི་བཤེས་གཉེན་དུ་རིག་ནས་དེ་དག་ལ་བསྙེན་ཅིང་བརྟེན་ཏེ་བསྙེན་བཀུར་བྱེད་ཅིང་ མགུ་བར་བྱེད་ཀྱི། ཡིད་བྱུང་བར་མི་བྱེད་དོ། །དགའ་བར་བྱེད་ཀྱི། མི་དགའ་བར་མི་བྱེད་དེ། དེས་དགེ་བའི་བཤེས་གཉེན་མགུ་བར་བྱས་པས་དེ་དག་ལ་ཆོས་ཀྱིས་ཕན་འདོགས་པར་ བྱེད་དེ། ཆོས་ཀྱི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱེད་དེ། སྦྱིན་པས་ལོངས་ སྤྱོད་ཆེན་པོར་འགྱུར་བ་དང༌། ཚུལ་ཁྲིམས་ཀྱིས་མཐོ་རིས་སུ་སྐྱེ་བ་དང༌། ཐོས་པས་ཤེས་རབ་ཆེན་པོར་འགྱུར་བ་དང༌། བསྒོམས་པས་འབྲལ་བར་འགྱུར་རོ། །ཞེས་ཡང་དག་པར་རབ་ཏུ་ ༄༅། །སྟོན་ཏོ། །འདི་ནི། སྦྱིན་པ། འདི་ནི། སྦྱིན་པའི་འབྲས་བུ། འདི་ནི། སེར་སྣ། འདི་ནི། སེར་སྣའི་འབྲས་བུ། འདི་ནི། ཚུལ་ཁྲིམས། འདི་ནི། ཚུལ་ཁྲིམས་ཀྱི་རྣམ་པར་ སྨིན་པ། འདི་ནི། འཆལ་བའི་ཚུལ་ཁྲིམས། འདི་ནི། འཆལ་བའི་ཚུལ་ཁྲིམས་ཀྱི་རྣམ་པར་སྨིན་པ། འདི་ནི། བཟོད་པ། འདི་ནི། བཟོད་པའི་རྣམ་པར་སྨིན་པ། འདི་ནི། གནོད་སེམས། འདི་ནི། གནོད་སེམས་ཀྱི་རྣམ་པར་སྨིན་པ། འདི་ནི། བརྩོན་འགྲུས། འདི་ནི། བརྩོན་འགྲུས་ཀྱི་རྣམ་པར་སྨིན་པ། འདི་ནི། ལེ་ལོ། །འདི་ནི། ལེ་ལོའི་རྣམ་པར་སྨིན་པ། འདི་ནི། བསམ་ གཏན། འདི་ནི། བསམ་གཏན་གྱི་རྣམ་པར་སྨིན་པ། འདི་ནི། སེམས་གཡེང་བ། འདི་ནི། སེམས་གཡེང་བའི་རྣམ་པར་སྨིན་པ། འདི་ནི། ཤེས་རབ། འདི་ནི། ཤེས་རབ་ཀྱི་རྣམ་པར་སྨིན་པ། འདི་ནི། འཆལ་བའི་ཤེས་རབ། འདི་ནི། འཆལ་བའི་ཤེས་རབ་ཀྱི་རྣམ་པར་སྨིན་པ། འདི་ནི། ལུས་ཀྱི་ལེགས་པར་སྤྱོད་པ། འདི་ནི། ལུས་ཀྱི་ལེགས་པར་སྤྱོད་པའི་རྣམ་པར་སྨིན་པ། འདི་ནི། ལུས་ཀྱི་ཉེས་པར་སྤྱོད་པ། འདི་ནི། ལུས་ཀྱི་ཉེས་པར་སྤྱོད་པའི་རྣམ་པར་སྨིན་པ། འདི་ནི། ངག་གི་ལེགས་པར་སྤྱོད་པ། འདི་ནི། ངག་གི་ལེགས་པར་སྤྱོད་པའི་རྣམ་པར་སྨིན་པ། འདི་ནི། ངག་གི་ཉེས་པར་སྤྱོད་པ། འདི་ནི། ངག་གི་ཉེས་པར་སྤྱོད་པའི་རྣམ་པར་སྨིན་པ། འདི་ནི། ཡིད་ཀྱི་ལེགས་པར་སྤྱོད་པ། འདི་ནི། ཡིད་ཀྱི་ལེགས་པར་སྤྱོད་པའི་རྣམ་པར་སྨིན་ པ། འདི་ནི། ཡིད་ཀྱི་ཉེས་པར་སྤྱོད་པ། འདི་ནི། ཡིད་ཀྱི་ཉེས་པར་སྤྱོད་པའི་རྣམ་པར་སྨིན་པ། འདི་ནི། དགེ་བ། འདི་ནི། མི་དགེ་བ། འདི་ནི། བྱ་བ། འདི་ནི། མི་བྱ་བ། འདི་ནི། བྱས་ན་ཡུན་རིང་ པོའི་དོན་དང༌། ཕན་པ་དང༌། བདེ་བར་འགྱུར། འདི་ནི། བྱས་ན་ཡུན་རིང་པོར་གནོད་པ་དང༌། མི་ཕན་པ་དང༌། མི་བདེ་བར་འགྱུར་རོ། །ཞེས་དེ་ལྟར་དེ་ལ་དགེ་བའི་བཤེས་གཉེན་དེ་དག་གིས་ ཆོས་ཀྱི་གཏམ་གྱིས་ཡང་དག་པར་སྟོན་ཏེ། ཡང་དག་པར་འཛིན་དུ་འཇུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱེད་དེ། སྣོད་དུ་གྱུར་པར་ཡང་ཤེས་ནས་ཟབ་མོའི་གཏམ་ ཡང་དག་པར་འཛིན་དུ་འཇུག་སྟེ། འདི་ལྟ་སྟེ། སྟོང་པ་ཉིད་ཀྱི་གཏམ་དང༌། མཚན་མ་མེད་པའི་གཏམ་དང༌། སྨོན་པ་མེད་པའི་གཏམ་དང༌། མངོན་པར་འདུ་མི་བྱེད་པའི་གཏམ་དང༌། མ་ སྐྱེས་པའི་གཏམ་དང༌། མ་བྱུང་བའི་གཏམ་དང༌། བདག་མེད་པ་དང༌། སེམས་ཅན་མེད་པའི་གཏམ་དང༌། སྲོག་མེད་པའི་གཏམ་དང༌། གང་ཟག་མེད་པའི་གཏམ་དང༌། རྟེན་ཅིང་འབྲེལ་བར་ འབྱུང་བ་ཟབ་མོའི་གཏམ་རབ་ཏུ་སྟོན་ཏོ། །འདི་ལྟ་སྟེ། འདི་ཡོད་པས་འདི་འབྱུང༌། འདི་སྐྱེས་པའི་ཕྱིར་འདི་སྐྱེ་བ་སྟེ། འདི་ལྟར་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་ རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག། སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་ ༄༅། །གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་ འབྱུང་བར་འགྱུར་རོ། །འདི་ལྟ་སྟེ། འདི་མེད་ན་འདི་མི་འབྱུང༌། འདི་འགགས་པས་འདི་འགག་སྟེ། འདི་ལྟ་སྟེ། མ་རིག་པ་འགགས་པས་འདུ་བྱེད་འགག་པ་ནས་དེ་ལྟར་སྡུག་བསྔལ་ གྱི་ཕུང་པོ་ཆེན་པོ་འདི་འབའ་ཞིག་འགག་པར་འགྱུར་རོ། །ཞེས་བྱ་བའི་བར་དུ་སྟེ། འདི་ལ་ནི། ཆོས་གང་ཡང་སྐྱེ་བའམ་འགག་པ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ ནི། རྟེན་ཅིང་འབྲེལ་པར་འབྱུང་བ་སྟེ། བདག་པོ་མེད་པ། བྱེད་པ་པོ་མེད་པ། ཚོར་བ་པོ་མེད་པ། རྒྱུ་དང་རྐྱེན་ལས་བྱུང་བ་སྟེ། འདི་ལ་ཆོས་གང་ཡང་འགྲུབ་པ་མེད། ལྡོག་པ་མེད། རྗེས་སུ་འཇུག་པ་མེད་དེ། ཡང་དག་པ་མ་ཡིན་པའི་རྨོངས་པས་ཁམས་གསུམ་འདོགས་པར་འགྱུར་རོ། །ཉོན་མོངས་པའི་ལམ་དང༌། སྡུག་བསྔལ་གྱི་ལམ་འདོགས་པར་འགྱུར་རོ། ། ཡང་དག་པ་མ་ཡིན་པའི་རྨོངས་པ་ཡང་དག་པ་ཇི་ལྟ་བ་བཞིན་དུ་བརྟགས་ནས་ཆོས་གང་ཡང་ཆོས་གང་གི་བྱེད་པ་པོ་མ་ཡིན་ནོ། །གང་ལ་བྱེད་པ་པོ་མེད་པ་དེ་ལ་དོན་དམ་པར་བྱ་བ་ ཡང་མི་དམིགས་ཏེ། དེ་ལ་ཆོས་གང་ཡང་འབྱུང་བ་མེད། འཇིག་པ་མེད་དོ། །ཞེས་བརྗོད་དོ། །དེས་དེ་ལྟ་བུའི་ཆོས་ཟབ་མོ་ཐོས་ནས་ཐེ་ཚོམ་མི་ཟ། སོམ་ཉི་མི་བྱེད་ཅིང་ཆོས་ཐམས་ཅད་ལ་ཆགས་ པ་མེད་པར་འཇུག་སྟེ། དེ་གཟུགས་ལ་མི་ཆགས། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ལ་མི་ཆགས། མིག་དང༌། གཟུགས་དང༌། མིག་གི་རྣམ་པར་ཤེས་པ་ལ་ མི་ཆགས། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་དང༌། ཆོས་དང༌། ཡིད་ཀྱི་རྣམ་པར་ཤེས་པ་ལ་མི་ཆགས་ཏེ། འདི་ལྟར་ཆོས་ཐམས་ཅད་ནི། རང་བཞིན་གྱིས་སྟོང་པའོ། །ཞེས་དད་ དོ། །ཤཱ་རིའི་བུ། དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི། སངས་རྒྱས་ལ་ལྟ་བ་ལས་ཡོངས་སུ་མི་ཉམས། ཆོས་ཉན་པ་ལས་ཡོངས་སུ་མི་ཉམས། དགེ་འདུན་ལ་བསྙེན་ བཀུར་བྱེད་པ་ལས་ཡོངས་སུ་མི་ཉམས་སོ། །དེ་གང་དང་གང་དུ་སྐྱེ་བ་དེ་དང་དེ་དག་ཏུ་སངས་རྒྱས་ལ་བལྟ་བ་དང་བྲལ་བར་མི་འགྱུར། ཆོས་ཉན་པ་དང་བྲལ་བར་མི་འགྱུར། དགེ་འདུན་ ལ་བསྙེན་བཀུར་བྱེད་པ་དང་བྲལ་བར་མི་འགྱུར། སངས་རྒྱས་བཅོམ་ལྡན་འདས་རྣམས་ཀྱི་སྤྱན་སྔར་སྐྱེ་བར་འགྱུར་ཏེ། དེ་དང་དེ་དག་ཏུ་སྐྱེས་ནས་ཀྱང་བརྩོན་འགྲུས་རྩོམ་ཞིང་དགེ་བའི་ ཆོས་ཡོངས་སུ་ཚོལ་བ་ལ་བརྩོན་པར་འགྱུར་རོ། །དེ་བརྩོན་འགྲུས་བརྩམས་པས་ཁྱིམ་གྱི་གནས་མི་འདོད་པར་འགྱུར། བུ་ཕོ་དང་བུ་མོ་འདོད་པར་མི་འགྱུར། བྲན་ཕོ་དང༌། བྲན་མོ་དང༌། ༄༅། །ལས་བྱེད་པ་དང༌། ཞོ་ཤས་འཚོ་བ་དག་མི་འདོད་པར་འགྱུར། ཡོངས་སུ་བཟུང་བ་ཐམས་ཅད་ཀྱི་ངོར་ལྟ་བ་མི་འདོད་པར་འགྱུར་ཏེ། དེ་སྐྱེས་ནས་འདོད་པ་ལ་མ་རྩེས་ པར་ན་ཚོད་གཞོན་ནུར་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་མྱུར་དུ་རབ་ཏུ་འབྱུང་ངོ༌། །དེ་དད་པས་རབ་ཏུ་བྱུང་ནས་དགེ་བའི་བཤེས་ གཉེན་མཆོག་དང་ལྡན་ཞིང་དགེ་བའི་བཤེས་གཉེན་དང་འགྲོགས། དགེ་བའི་བཤེས་གཉེན་ལ་རྟོག་པས་དགེ་བའི་བསམ་པ་རྙེད་པར་འགྱུར་རོ། །དེ་དགེ་བའི་བསམ་པ་དང་ལྡན་པས་ དགེ་བའི་ཆོས་རྣམས་ཉན་ཅིང་སྒྲུབ་པ་སྙིང་པོར་བྱེད་པར་འགྱུར་ཏེ། ཚིག་ལྷུར་ལེན་པའི་བློ་དང་ལྡན་པར་མི་འགྱུར། མང་དུ་ཐོས་པ་ཡོངས་སུ་ཚོལ་བས་ངོམས་པར་མི་འགྱུར། ཇི་ལྟར་ ཐོས་པའི་ཆོས་རྣམས་གཞན་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཏེ། ཟང་ཟིང་མེད་པའི་སེམས་ཀྱིས་རྙེད་པ་དང༌། བཀུར་སྟི་དང༌། ཚིགས་སུ་བཅད་པ་ལ་མི་རེ་ཞིང་རང་གི་ཚིག་ ཡོངས་སུ་མི་སྤོང་བར་གཞན་ལ་ཆོས་སྟོན་ཏེ། ཇི་ལྟར་ཐོས་པ་དང༌། ཇི་ལྟར་གནས་པ་དེ་བཞིན་དུ་གཞན་ལ་ཆོས་སྟོན་ཏོ། །ཆོས་ཉན་པ་རྣམས་ལ་བྱམས་པ་ཆེན་པོ་རྙེད་པར་འགྱུར། སེམས་ཅན་ཐམས་ཅད་ལ་སྙིང་རྗེ་ཆེན་པོ་འཇུག་པར་འགྱུར་རོ། །དེ་མང་དུ་ཐོས་པས་ལུས་དང་སྲོག་ལ་མི་ལྟ་བར་འགྱུར། འདོད་པ་ཉུང་ཞིང་ཆོག་ཤེས་པར་འགྱུར། རབ་ཏུ་དབེན་པ་ དང་དེས་པར་འགྱུར། གསོ་སླ་བ་དང༌། དགང་སླ་བ་དང༌། དགོན་པ་ལ་དགའ་བ་དང༌། ཇི་ལྟར་ཐོས་པའི་ཆོས་རྣམས་ཀྱི་དོན་ལ་ཉེ་བར་རྟོག་པ་དང༌། དོན་ལ་རྟོན་གྱི། ཡི་གེ་ལ་མི་རྟོན་པ་ཡིན། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱི་རྟེན་དུ་གྱུར་པ་དང༌། བདག་འབའ་ཞིག་གི་ཕྱིར་ཞུགས་པ་མ་ཡིན་གྱི། སེམས་ཅན་ཐམས་ཅད་ཀྱི་ཕྱིར་འདི་ལྟ་སྟེ། ཐེག་པ་ཆེན་ པོ་བླ་ན་མེད་པ་སངས་རྒྱས་ཀྱི་ཡེ་ཤེས། མི་མཉམ་པ་དང་མཉམ་པའི་ཡེ་ཤེས། འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་ཡེ་ཤེས་ཡོངས་སུ་ཚོལ་ལོ། །བག་ཡོད་པ་ ལྷུར་བྱེད་པར་འགྱུར་ཏེ། དེ་ལ་བག་ཡོད་པ་གང་ཞེ་ན། འདི་ལྟ་སྟེ། དབང་པོ་ཡང་དག་པར་སྡོམ་པའོ། །དེ་ལ་དབང་པོ་ཡང་དག་པར་སྡོམ་པ་གང་ཞེ་ན། གང་མིག་གིས་གཟུགས་མཐོང་ ནས་མཚན་མར་མི་འཛིན། མངོན་རྟགས་སུ་མི་འཛིན། གཟུགས་ལ་ཆགས་པ་དང༌། ཉེས་དམིགས་དང༌། འབྱུང་བ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་བཞིན་དུ་རྣ་ བས་སྒྲ་དང༌། སྣས་དྲི་དང༌། ལྕེས་རོ་དང༌། ལུས་ཀྱིས་རེག་བྱ་དང༌། ཡིད་ཀྱིས་ཆོས་ཤེས་ནས་མཚན་མར་མི་འཛིན། མངོན་རྟགས་སུ་མི་འཛིན། ཆོས་རྣམས་ལ་ཆགས་པ་དང༌། ཉེས་དམིགས་ ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི། བག་ཡོད་པ་ཞེས་བྱའོ། །གཞན་ཡང་ཤཱ་རིའི་བུ། བག་ཡོད་པ་ཞེས་བྱ་བ་ནི། གང་བདག་གི་སེམས་དུལ་བ་དང༌། གཞན་གྱི་ ༄༅། །སེམས་སྲུང་བ་དང༌། ཉོན་མོངས་པ་ལ་དགའ་བ་སྤོང་བ་དང༌། ཆོས་ལ་དགའ་བའི་རྗེས་སུ་འགྲོ་བ་དང༌། འདོད་པ་ལ་རྣམ་པར་རྟོག་པ་དང༌། གནོད་སེམས་ཀྱི་རྣམ་ པར་རྟོག་པ་རྣམས་མི་འབྱུང་བ་དང༌། རྣམ་པར་འཚེ་བའི་རྣམ་པར་རྟོག་པ་རྣམས་མི་འབྱུང་བ་དང༌། ཆགས་པའི་མི་དགེ་བའི་རྩ་བ་རྣམས་མི་འབྱུང་བ་དང༌། ཞེ་སྡང་གི་མི་དགེ་བའི་རྩ་ བ་རྣམས་མི་འབྱུང་བ་དང༌། གཏི་མུག་གི་མི་དགེ་བའི་རྩ་བ་རྣམས་མི་འབྱུང་བ་དང༌། ལུས་ཀྱི་ཉེས་པར་སྤྱོད་པ་དང༌། ངག་གི་ཉེས་པར་སྤྱོད་པ་དང༌། ཡིད་ཀྱི་ཉེས་པར་སྤྱོད་པ་མི་ འབྱུང་བ་དང༌། ཚུལ་བཞིན་མ་ཡིན་པ་ཡིད་ལ་བྱེད་པ་མི་འབྱུང་བ་དང༌། སྡིག་པ་མི་དགེ་བའི་ཆོས་ཐམས་ཅད་མི་འབྱུང་བ་དེ་ནི། བག་ཡོད་པ་ཞེས་བྱའོ། །དེ་ལྟར་ཤཱ་རིའི་བུ་ བག་ཡོད་པའི་བྱང་ཆུབ་སེམས་དཔའ་ཚུལ་བཞིན་ཡིད་ལ་བྱེད་པ་ལ་རབ་ཏུ་སྦྱོར་བ་ནི། གང་ཡོད་པ་དེ་ཡང་ཡོད་པར་རབ་ཏུ་ཤེས། གང་མེད་པ་དེ་ཡང་མེད་པར་རབ་ཏུ་ཤེས་སོ། །དེ་ ལ་ཅི་ཡོད་ཅི་མེད་ཅེ་ན། ཡང་དག་པ་ལ་རབ་ཏུ་སྦྱོར་བ་ལ་ནི། འཕགས་པའི་རྣམ་པར་གྲོལ་བ་ཡོད་དོ། །ལོག་པ་ལ་རབ་ཏུ་སྦྱོར་བ་ལ་ནི། འཕགས་པའི་རྣམ་པར་གྲོལ་བ་མེད་དོ། ། ལས་ཀྱི་རྣམ་པར་སྨིན་པ་ནི། ཡོད་དོ། །གང་གི་ལས་ཀྱི་རྣམ་པར་སྨིན་པ་དེ་ནི། མེད་དོ། །གཞན་ཡང་མིག་ནི། ཡོད་དོ། །གང་གི་མིག་དེ་ནི། མེད་དོ། །རྣ་བ་དང༌། སྣ་དང༌། ལྕེ་ དང༌། ལུས་དང༌། ཡིད་ནི། ཡོད་དོ། །གང་གི་ཡིད་དེ་ནི། མེད་དོ། །གཞན་ཡང་གཟུགས་མི་རྟག་པ་དང༌། སྡུག་བསྔལ་བ་དང༌། འགྱུར་བའི་ཆོས་ཅན་དེ་ནི། ཡོད་དོ། །གཟུགས་རྟག་པ་དང༌། བརྟན་པ་དང༌། མི་འགྱུར་བའི་ཆོས་ཅན་དང༌། ཐེར་ཟུག་པ་དང༌། དེ་བཞིན་དུ་གནས་སོ། །ཞེས་བྱ་བ་དེ་ནི། མེད་དོ། །ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་མི་རྟག་ པ་དང༌། སྡུག་བསྔལ་བ་དང༌། འགྱུར་བའི་ཆོས་ཅན་དེ་ནི། ཡོད་དོ། །ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་རྟག་པ་དང༌། བརྟན་པ་དང༌། ཐེར་ཟུག་པ་དང༌། མི་ འགྱུར་བའི་ཆོས་ཅན་དང༌། ཡང་དག་པར་དེ་བཞིན་དུ་གནས་སོ། །ཞེས་བྱ་བ་དེ་ནི། མེད་དོ། །གཞན་ཡང་མ་རིག་པའི་རྐྱེན་གྱིས་འདུ་བྱེད་རྣམས་ཡོད་ཀྱི། མ་རིག་པ་མེད་ན། འདུ་བྱེད་ མེད་པ་ནས་སྐྱེ་བའི་རྐྱེན་གྱིས་རྒ་ཤིའི་བར་དུ་ཡོད་ཀྱི། སྐྱེ་བ་མེད་ན། རྒ་ཤི་མེད་དོ། །གཞན་ཡང་སྦྱིན་པས་ལོངས་སྤྱོད་ཆེན་པོར་འགྱུར་བ་ནི། ཡོད་དོ། །སྦྱིན་པས་དབུལ་པོར་འགྱུར་བ་ ནི། མེད་དོ། །ཚུལ་ཁྲིམས་ཀྱིས་མཐོ་རིས་སུ་སྐྱེ་བ་ནི། ཡོད་དོ། །འཆལ་བའི་ཚུལ་ཁྲིམས་ཀྱིས་མཐོ་རིས་སུ་སྐྱེ་བ་ནི། མེད་དོ། །ཐོས་པས་ཤེས་རབ་ཆེན་པོར་འགྱུར་བ་ནི། ཡོད་དོ། ། འཆལ་བའི་ཤེས་རབ་ཀྱིས་ཤེས་རབ་ཆེན་པོར་འགྱུར་བ་ནི། མེད་དོ། །བསྒོམས་པས་འབྲལ་བར་འགྱུར་བ་ནི། ཡོད་དོ། །བསྒོམས་པས་འབྲལ་བར་མི་འགྱུར་བ་ནི། མེད་དོ། །ཚུལ་ ༄༅། །བཞིན་མ་ཡིན་པ་ཡིད་ལ་བྱེད་པས་ཀུན་ཏུ་སྦྱོར་བ་ནི། ཡོད་དོ། །ཚུལ་བཞིན་མ་ཡིན་པ་ཡིད་ལ་བྱེད་པས་འབྲལ་བ་ནི། མེད་དོ། །བརྩོན་འགྲུས་ བརྩམས་པའི་བྱང་ཆུབ་སེམས་དཔའ་ལ་ནི། བྱང་ཆུབ་ཡོད་དོ། །ལེ་ལོ་ཅན་ལ་ནི། བྱང་ཆུབ་མེད་དོ། །ང་རྒྱལ་མེད་པ་ལ་ནི། རབ་ཏུ་བྱུང་བར་ལུང་བསྟན་པ་ཡོད་དོ། །ང་རྒྱལ་ ཅན་ལ་ནི། མྱ་ངན་ལས་འདའ་བ་མེད་དོ། །གཞན་ཡང་ཐམས་ཅད་དུ་སོང་བའི་སྟོང་བ་ཉིད་ནི། བདག་དང༌། སེམས་ཅན་དང༌། སྲོག་དང༌། སྐྱེས་བུ་དང༌། གང་ ཟག་གོ །ཞེས་བྱ་བ་དེ་ནི། མེད་དོ། །དེ་ལྟར་ཤཱ་རིའི་བུ། བག་ཡོད་པའི་བྱང་ཆུབ་སེམས་དཔའ་ཚུལ་བཞིན་ཡིད་ལ་བྱེད་པ་དང་ལྡན་པ་ནི། གང་ཡོད་པར་འཇིག་རྟེན་གྱི་མཁས་པ་ རྣམས་ཀྱིས་ཀུན་ཤེས་པ་དེ་ལ་ནི། ཡོད་དོ། །ཞེས་འདོགས་སོ། །གང་མེད་པར་འཇིག་རྟེན་ན་མཁས་པ་རྣམས་ཀྱིས་ཀུན་ཤེས་པ་དེ་ལ་ནི། མེད་དོ། །ཞེས་འདོགས་སོ། །དེ་ཡོད་ ཅེས་ཐ་སྙད་དུ་འདོགས་པ་ལ་ཡང་ཡང་དག་པར་ཤེས་པར་མི་བྱེད། མེད་ཅེས་ཐ་སྙད་དུ་འདོགས་པ་ལ་ཡང་ཡང་དག་པར་ཤེས་པར་མི་བྱེད་དོ། །སངས་རྒྱས་བཅོམ་ལྡན་འདས་ ཐམས་ཅད་ཀྱིས་གསུངས་པའི་ཡང་དག་པའི་དོན་ཀྱང་ཁོང་དུ་ཆུད་དེ། ཆོས་ཐམས་ཅད་ནི། དེ་བཞིན་གཤེགས་པས་བསྡུས་ཏེ། ཆོས་ཀྱི་མདོ་བཞིར་འདུས་པར་བྱས་སོ། །བཞི་ གང་ཞེ་ན། འདི་ལྟ་སྟེ། འདུ་བྱེད་ཐམས་ཅད་མི་རྟག་པ་དང༌། འདུ་བྱེད་ཐམས་ཅད་སྡུག་བསྔལ་བ་དང༌། ཆོས་ཐམས་ཅད་བདག་མེད་པ་དང༌། མྱ་ངན་ལས་འདས་པ་ཞི་བའོ། །འདུ་ བྱེད་ཐམས་ཅད་མི་རྟག་པ་ཞེས་བྱ་བ་ནི། རྟག་པར་འདུ་ཤེས་པའི་སེམས་ཅན་རྣམས་ཀྱི་རྟག་པར་འདུ་ཤེས་པ་སྤང་བའི་ཕྱིར་དེ་བཞིན་གཤེགས་པས་བཤད་དོ། །འདུ་བྱེད་ཐམས་ ཅད་སྡུག་བསྔལ་ཞེས་བྱ་བ་ནི། བདེ་བར་འདུ་ཤེས་པའི་སེམས་ཅན་རྣམས་ཀྱི་བདེ་བར་འདུ་ཤེས་པ་སྤང་བའི་ཕྱིར་དེ་བཞིན་གཤེགས་པས་བཤད་དོ། །ཆོས་ཐམས་ཅད་བདག་མེད་པ་ ཞེས་བྱ་བ་ནི། བདག་ཏུ་འདུ་ཤེས་པའི་སེམས་ཅན་རྣམས་ཀྱི་བདག་ཏུ་འདུ་ཤེས་པ་སྤང་བའི་ཕྱིར་དེ་བཞིན་གཤེགས་པས་བཤད་དོ། །མྱ་ངན་ལས་འདས་པ་ཞི་བ་ཞེས་བྱ་བ་ནི། དམིགས་ པས་ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་ཀྱི་དམིགས་པས་ཕྱིན་ཅི་ལོག་ཏུ་གྱུར་པ་སྤང་བའི་ཕྱིར་དེ་བཞིན་གཤེགས་པས་བཤད་དོ། །འདུ་བྱེད་ཐམས་ཅད་མི་རྟག་གོ །ཞེས་ ཐོས་ནས་ཤིན་ཏུ་མི་རྟག་པ་ཉིད་ལ་འཇུག་གོ །འདུ་བྱེད་ཐམས་ཅད་སྡུག་བསྔལ་བའོ། །ཞེས་ཐོས་ནས་སྨོན་ལམ་དང་བྲལ་བ་བསྐྱེད་དོ། །ཆོས་ཐམས་ཅད་བདག་མེད་པའོ། །ཞེས་ ཐོས་ནས་སྟོང་པ་ཉིད་ཀྱི་ཏིང་ངེ་འཛིན་དང༌། རྣམ་པར་ཐར་པའི་སྒོ་ལ་སྒོམ་མོ། །མྱ་ངན་ལས་འདས་པ་ཞི་བའོ། །ཞེས་ཐོས་ནས་མཚན་མ་མེད་པ་ཡོངས་སུ་འདྲིས་པར་བྱེད་དེ། དུས་ ༄༅། །མ་ཡིན་པར་ནི། ཡང་དག་པའི་མཐའ་མངོན་སུམ་དུ་མི་བྱེད་དོ། །དེ་ལྟར་ཤཱ་རིའི་བུ། དེ་ལྟ་བུའི་ཆོས་ལ་བརྩོན་པའི་བྱང་ཆུབ་སེམས་དཔའ་ནི། དགེ་བའི་ ཆོས་ལས་ཡོངས་སུ་མི་ཉམས་ཏེ། མྱུར་དུ་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་དོ། །བྱང་ཆུབ་སེམས་དཔའ་བརྟག་པ་ཞེས་བྱ་བའི་ལེའུ་སྟེ། གསུམ་པའོ།། །། གཞན་ཡང་ཤཱ་རིའི་བུ། དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བསམ་གྱིས་མི་ ཁྱབ་པའི་ཆོས་བཅུ་ལ་མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །བཅུ་གང་ ཞེ་ན། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག། ཐེ་ཚོམ་མི་ཟ། རྒྱ་ཆེར་ དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་དབྱངས་བསམ་གྱིས་མི་ ཁྱབ་པ་ལ་མངོན་པར་དད་པ་ནས་ངོ་མཚར་དང༌། རྨད་དུ་འདུ་ཤེས་བསྐྱེད་པའི་བར་དུའོ། །འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་ བསམ་གྱིས་མི་ཁྱབ་པ་དང༌། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་འོད་བསམ་གྱིས་མི་ཁྱབ་པ་དང༌། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་ བཞིན་གཤེགས་པའི་ཚུལ་ཁྲིམས་དང༌། ཏིང་ངེ་འཛིན་བསམ་གྱིས་མི་ཁྱབ་པ་དང༌། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་རྫུ་འཕྲུལ་བསམ་གྱིས་མི་ ཁྱབ་པ་དང༌། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བསམ་གྱིས་མི་ཁྱབ་པ་དང༌། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་ གཤེགས་པའི་མི་འཇིགས་པ་བསམ་གྱིས་མི་ཁྱབ་པ་དང༌། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྙིང་རྗེ་ཆེན་པོ་བསམ་གྱིས་མི་ཁྱབ་པ་དང༌། འདི་ ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །དེ་བཞིན་གཤེགས་པ་ངོ་མཚར་དང༌། རྨད་ཀྱི་ཆོས་བཅུ་པོ་འདི་རྣམས་ཀྱི་ཕྱིར་བརྩོན་འགྲུས་ ཆེར་རྩོམ་ཞིང་མི་ཞུམ། མི་འགོང༌། མི་སྐྱོ་སྟེ། དེ་བཞིན་གཤེགས་པའི་བསམ་གྱིས་མི་ཁྱབ་པ་ངོ་མཚར་དང༌། རྨད་ཀྱི་ཆོས་བཅུ་པོ་མ་ཐོབ་ཀྱི་བར་དུ་ལུས་ཀྱི་པགས་པ་དང༌། རྒྱུས་ ༄༅། །པ་དང༌། བྲི་དང༌། དབུགས་དང༌། རུས་པ་དག་ལྟ་ཞོག་ལ། ལུས་ཀྱི་ཤ་དང༌། ཁྲག་བསྐམས་ཀྱང་བླའི། བརྩོན་འགྲུས་ཉམས་པར་མི་བྱའོ། །སྙམ་དུ་དེ་ལྟར་སེམས་ བསྐྱེད་དོ། །ཤཱ་རིའི་བུ། དེ་ལྟར་དད་པས་མོས་པའི་བྱང་ཆུབ་སེམས་དཔའ་ནི། དེ་བཞིན་གཤེགས་པའི་བསམ་གྱིས་མི་ཁྱབ་པ་ངོ་མཚར་དང༌། རྨད་ཀྱི་ཆོས་བཅུ་པོ་འདི་རྣམས་ལ་ མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་དོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱ་ཆེར་རབ་ཏུ་བསྟན་པའི་ཕྱིར་དེའི་ ཚེ་ཚིགས་སུ་བཅད་པ་འདི་དག་གསུངས་སོ། །སངས་རྒྱས་སྐུ་ནི་བསམ་མི་ཁྱབ། །ཆོས་ཀྱི་སྐུ་ཡིས་རབ་ཏུ་ཕྱེ། །མཚན་མ་མེད་ཅིང་སྣང་མེད་ལ། །རྒྱལ་བའི་ཐུགས་སྲས་དད་ པར་བྱེད། །འགྲོ་བ་ཐ་དད་ཇི་སྙེད་ཀྱི། །སྒྲ་སྐད་བསམ་གྱིས་མི་ཁྱབ་པ། །ཐམས་ཅད་དུ་ནི་ཆོས་སྒྲོག་སྟེ། །སངས་རྒྱས་ཀྱི་ནི་སྤྱོད་ཡུལ་དང༌། །ཇི་ཙམ་སེམས་ཅན་ཐམས་ཅད་ ཀྱི། །དུས་གསུམ་དག་གི་དབང་པོ་ཀུན། །སངས་རྒྱས་ཀྱིས་ནི་རབ་མཁྱེན་ཏེ། །བསམ་མི་ཁྱབ་ལ་རབ་ཏུ་དད། །སངས་རྒྱས་རྣམས་ཀྱི་འོད་མཐའ་ཡས། །འོད་ཟེར་དྲ་བ་བསམ་མི་ ཁྱབ། །ཞིང་རྣམས་རྒྱ་མཚོ་མཐའ་ཡས་པ། །ཐམས་ཅད་ཀྱི་ནི་ཕྱོགས་སུ་ཁྱབ། །ཐུབ་པའི་ཚུལ་ཁྲིམས་འཇིག་རྟེན་འདས། །འཇིག་རྟེན་ཆོས་ལ་མི་གནས་ཏེ། །རྫུ་འཕྲུལ་རྐང་པ་ བསམ་ཡས་ལ། །བྱང་ཆུབ་སེམས་དཔའ་རབ་ཏུ་དད། །སངས་རྒྱས་རྟག་ཏུ་མཉམ་པར་གཞག །རྣམ་པར་ཐར་པ་བསམ་མི་ཁྱབ། །སངས་རྒྱས་རྣམས་ཀྱི་སྤྱོད་ཡུལ་ནི། །སེམས་ཅན་ཀུན་གྱིས་ ཤེས་མི་ནུས། །ཆོས་ཀྱི་དབྱིངས་ནི་དབྱེར་མེད་ལ། །གང་གི་སྟོབས་ཀྱིས་ཤེས་འགྱུར་བ། །དྲང་སྲོང་ཆེན་པོའི་ཡེ་ཤེས་སྟོབས། །ནམ་མཁའ་བཞིན་དུ་མཐའ་ཡས་པ། །སེམས་ཅན་གཅིག་ གི་དོན་ཕྱིར་ཡང༌། །བསྐལ་པ་རྒྱ་མཚོ་མཐའ་ཡས་པར། །འདུལ་བའི་དོན་ལ་བཞུགས་པས་ན། །དེ་དག་སྙིང་རྗེ་དེ་འདྲའོ། །སེམས་ཅན་ཐམས་ཅད་གཞན་དང་གཞན། །དྲི་བ་རྒྱ་མཚོ་ འདྲི་བྱེད་ཀྱང༌། །དྲིས་ལན་གཅིག་གིས་ཚིམ་བྱེད་དེ། །མི་འཇིགས་པ་ནི་བསམ་མི་ཁྱབ། །རྣམ་པ་ཐམས་ཅད་མཆོག་ལྡན་པ། །ཆོས་རྣམས་ཐམས་ཅད་ཐུགས་སུ་ཆུད། །སངས་རྒྱས་ ཆོས་རྣམས་མ་འདྲེས་པ། །ཐམས་ཅད་དུ་ནི་ཡེ་ཤེས་གཟིགས། །དད་པ་ལ་ནི་རབ་གནས་པས། །སངས་རྒྱས་ཀུན་ཆོས་ཆོས་ཉིད་རྣམས། །བསམ་གྱིས་མི་ཁྱབ་འདི་དག་ལ། །དེ་དག་ ཐམས་ཅད་དད་པར་བྱེད། །ཤཱ་རིའི་བུ། ཇི་ལྟར་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་པར་དད། ཡིད་ ཆེས། རབ་ཏུ་རྟོག །ཐེ་ཚོམ་མི་ཟ་།རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་བསྐྱེད་ཅེ་ན། འདི་ལྟ་སྟེ། དེ་བཞིན་གཤེགས་པའི་སྐུ་ནི། མི་དགེ་བའི་ ༄༅། །ཆོས་ཐམས་ཅད་སྤངས་པ། དགེ་བའི་ཆོས་ཐམས་ཅད་དང་ལྡན་པའོ། །འདི་ལྟ་སྟེ། མི་གཙང་བ་དང༌། མཆིལ་མ་དང༌། ངར་སྣབས་དང༌། སྣབས་དང༌། རྣག་དང༌། ཁྲག་དང༌། བཤང་བ་དང༌། གཅི་བ་དང་བྲལ་བ། རུས་པ་དང༌། ཤ་དང༌། ཁྲག་དང༌། རྒྱུས་པ་ལས་རྣམ་པར་གྲོལ་བའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི། རང་བཞིན་གྱིས་འོད་གསལ་བ། ཡོངས་སུ་དག་པ། ཉོན་མོངས་པ་ཐམས་ཅད་ཀྱི་དྲི་མ་དང་བྲལ་བའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི། འཇིག་རྟེན་ལས་འདས་པ་སྟེ། འཇིག་རྟེན་གྱི་ཆོས་ཐམས་ཅད་ཀྱིས་མ་གོས་པའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི། ཡོན་ཏན་དཔག་ཏུ་མེད་པ་དང༌། བསོད་ནམས་དང༌། ཡེ་ཤེས་ཀྱི་ཚོགས་བསགས་ པས་སེམས་ཅན་ཐམས་ཅད་ཀྱི་འཚོ་བའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི། ཚུལ་ཁྲིམས་དཔག་ཏུ་མེད་པ་ཡོངས་སུ་བསྒོམས་པ་དང༌། ཏིང་ངེ་འཛིན་དང༌། ཤེས་རབ་ དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་གཟིགས་པ་དཔག་ཏུ་མེད་པ་ཡོངས་སུ་བསྒོམས་པས་ཡོན་ཏན་ཐམས་ཅད་རབ་ཏུ་རྒྱས་པའོ། །འདི་ལྟ་སྟེ། དེ་བཞིན་ གཤེགས་པའི་སྐུ་ནི། ཡོངས་སུ་དག་པའི་མེ་ལོང་གི་དཀྱིལ་འཁོར་གྱི་གཟུགས་བརྙན་ལྟ་བུ་དང༌། ཆུ་ལ་ཟླ་བ་སྣང་བ་ལྟ་བུའོ། །འདི་ལྟ་སྟེ། དེ་བཞིན་གཤེགས་ པའི་སྐུ་ནི། ནམ་མཁའི་དབྱིངས་སུ་ཡང་དག་པར་འདུ་ཞིང་ཆོས་ཀྱི་དབྱིངས་ཀྱིས་ཀླས་པས་བསམ་གྱིས་མི་ཁྱབ་པའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི། ཟག་པ་ཐམས་ ཅད་ལས་ལོག་པས་ཟད་པའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི། འདུས་བྱས་ཐམས་ཅད་དང་བྲལ་བས་འདུས་མ་བྱས་པའོ། །ནམ་མཁའ་ལྟ་བུའི་སྐུའོ། །མཉམ་པ་མེད་པའི་ སྐུའོ། །འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་སྐུའོ། །དེ་བཞིན་གཤེགས་པའི་སྐུ་ནི། དཔེ་མེད་པ། ཟླ་མེད་པ། མཚུངས་པ་མེད་པའི་སྐུ་སྟེ། དག་པ། དྲི་མ་ མེད་པ། ཀུན་ནས་ཉོན་མོངས་པ་མེད་པ། རང་བཞིན་གྱིས་འོད་གསལ་བའོ། །དེ་ནི། སྔོན་གྱི་མཐས་རབ་ཏུ་ཕྱེ་བ་མ་ཡིན། ཕྱི་མའི་མཐས་རབ་ཏུ་ཕྱེ་བ་མ་ཡིན། ད་ལྟར་བྱུང་བས་རབ་ ཏུ་ཕྱེ་བ་མ་ཡིན། སྐྱེ་བ་དང༌། རུས་དང༌། རིགས་ཀྱིས་རབ་ཏུ་ཕྱེ་བ་མ་ཡིན། གཟུགས་ཀྱིས་རབ་ཏུ་ཕྱེ་བ་མ་ཡིན། མཚན་གྱིས་རབ་ཏུ་ཕྱེ་བ་མ་ཡིན། དཔེ་བྱད་བཟང་པོས་རབ་ཏུ་ཕྱེ་བ་མ་ ཡིན། སེམས་ཀྱིས་རབ་ཏུ་ཕྱེ་བ་མ་ཡིན། ཡིད་ཀྱིས་རབ་ཏུ་ཕྱེ་བ་མ་ཡིན། རྣམ་པར་ཤེས་པས་རབ་ཏུ་ཕྱེ་བ་མ་ཡིན། ལྟ་བས་རབ་ཏུ་ཕྱེ་བ་མ་ཡིན། ཐོས་པས་རབ་ཏུ་ཕྱེ་བ་མ་ཡིན། དྲན་ པས་རབ་ཏུ་ཕྱེ་བ་མ་ཡིན། རྣམ་པར་རིག་པས་རབ་ཏུ་ཕྱེ་བ་མ་ཡིན། ཕུང་པོས་རབ་ཏུ་ཕྱེ་བ་མ་ཡིན། ཁམས་ཀྱིས་རབ་ཏུ་ཕྱེ་བ་མ་ཡིན། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན། སྐྱེ་བས་རབ་ཏུ་ཕྱེ་བ་མ་ ༄༅། །ཡིན༑ གནས་པས་རབ་ཏུ་ཕྱེ་བ་མ་ཡིན། འཇིག་པས་རབ་ཏུ་ཕྱེ་བ་མ་ཡིན། འཛིན་པས་རབ་ཏུ་ཕྱེ་བ་མ་ཡིན། འདོར་བས་རབ་ཏུ་ཕྱེ་བ་མ་ཡིན། ངེས་པར་འབྱུང་བས་ རབ་ཏུ་ཕྱེ་བ་མ་ཡིན། སྤྱོད་པས་རབ་ཏུ་ཕྱེ་བ་མ་ཡིན། ཁ་དོག་གིས་རབ་ཏུ་ཕྱེ་བ་མ་ཡིན། རྟགས་ཀྱིས་རབ་ཏུ་ཕྱེ་བ་མ་ཡིན། དབྱིབས་ཀྱིས་རབ་ཏུ་ཕྱེ་བ་མ་ཡིན། འོང་བས་རབ་ཏུ་ཕྱེ་ བ་མ་ཡིན། འགྲོ་བས་རབ་ཏུ་ཕྱེ་བ་མ་ཡིན། ཚུལ་ཁྲིམས་ཡིད་ལ་བྱེད་པས་རབ་ཏུ་ཕྱེ་བ་མ་ཡིན། ཏིང་ངེ་འཛིན་གྱིས་རབ་ཏུ་ཕྱེ་བ་མ་ཡིན། ཤེས་རབ་ཀྱིས་རབ་ཏུ་ཕྱེ་བ་མ་ཡིན། རྣམ་པར་ གྲོལ་བས་རབ་ཏུ་ཕྱེ་བ་མ་ཡིན། རྣམ་པར་གྲོལ་བའི་ཡེ་ཤེས་མཐོང་བ་ཡིད་ལ་བྱེད་པས་རབ་ཏུ་ཕྱེ་བ་མ་ཡིན། མཚན་ཉིད་ཀྱིས་རབ་ཏུ་ཕྱེ་བ་མ་ཡིན། མཚན་ཉིད་མི་མཐུན་པས་རབ་ཏུ་ ཕྱེ་བ་མ་ཡིན། ཆོས་ཀྱི་མཚན་ཉིད་ཀྱིས་རབ་ཏུ་ཕྱེ་བ་མ་ཡིན། སྟོབས་སུ་སྒྲོ་བཏགས་པས་རབ་ཏུ་ཕྱེ་བ་མ་ཡིན། མི་འཇིགས་པས་རབ་ཏུ་ཕྱེ་བ་མ་ཡིན། སོ་སོ་ཡང་དག་པར་རིག་པས་ རབ་ཏུ་ཕྱེ་བ་མ་ཡིན། རྫུ་འཕྲུལ་གྱིས་རབ་ཏུ་ཕྱེ་བ་མ་ཡིན། སྙིང་རྗེ་ཆེན་པོས་རབ་ཏུ་ཕྱེ་བ་མ་ཡིན། སངས་རྒྱས་ཀྱི་ཆོས་མ་འདྲེས་པར་སྒྲོ་བཏགས་པས་རབ་ཏུ་ཕྱེ་བ་མ་ཡིན་ཏེ། སྒྱུ་ མ་དང༌། སྨིག་རྒྱུ་དང༌། ཆུ་ཟླ་དང༌། རྨི་ལམ་གྱི་རང་བཞིན་ལྟ་བུར་སྐྱེ་བའི་སྐུའོ། །སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་ལས་བྱུང་བའི་སྐུའོ། །མི་འགྱུར་བའི་སྐུའོ།། མི་འཁྲུགས་པའི་སྐུའོ། །རྣམ་པར་མི་རྟོག་པའི་སྐུའོ། །མི་གནས་པའི་སྐུའོ། །མི་སྙེམས་པའི་སྐུའོ། །གནས་པ་དང༌། རབ་ཏུ་གནས་པ་དང༌། མི་གཡོ་བ་ཐོབ་པའི་སྐུའོ། །གཟུགས་མེད་ བ༑ གཟུགས་ཀྱི་རང་བཞིན་མ་ཡིན་པའི་སྐུའོ། །ཚོར་བ་མ་ཡིན། འདུ་ཤེས་མ་ཡིན། འདུ་བྱེད་མ་ཡིན། རྣམ་པར་ཤེས་པ་མ་ཡིན། རྣམ་པར་ཤེས་པའི་རང་བཞིན་མ་ཡིན་པའི་སྐུའོ། ། བྱུང་བ་མ་ཡིན། ཀུན་ཏུ་བྱུང་བ་མ་ཡིན། མ་བྱུང་བ་ཡང་མ་ཡིན་པའི་སྐུའོ། །རྨད་དུ་བྱུང་བ། རྨད་དུ་བྱུང་བའི་ཆོས་ཀྱི་སྐུའོ། །མིག་ལས་བྱུང་བ་མ་ཡིན། །གཟུགས་སུ་གཏོགས་པ་མ་ ཡིན༑ ཕྱི་རོལ་མ་ཡིན། རྣ་བ་ལ་གནས་པ་མ་ཡིན། སྒྲར་གཏོགས་པ་མ་ཡིན། ཕྱི་རོལ་མ་ཡིན། སྣས་རྣམ་པར་ཤེས་པར་བྱ་བ་མ་ཡིན། དྲིར་གཏོགས་པ་མ་ཡིན། ཕྱི་རོལ་མ་ཡིན། ལྕེས་བསྐྱེད་པ་མ་ཡིན། རོར་གཏོགས་པ་མ་ཡིན། ཕྱི་རོལ་མ་ཡིན། ལུས་དང་ལྡན་པ་མ་ཡིན། རེག་བྱར་གཏོགས་པ་མ་ཡིན། ཕྱི་རོལ་མ་ཡིན། སེམས་ལ་འཇུག་པ་མ་ཡིན། ཡིད་ལ་ འཇུག་པ་མ་ཡིན། རྣམ་པར་ཤེས་པ་ལ་འཇུག་པ་མ་ཡིན། ལྡོག་པ་མ་ཡིན། རྗེས་སུ་འཇུག་པ་མ་ཡིན། གནས་པ་དང༌། མི་གཡོ་བ་ཐོབ་པ། ཆོས་ཀྱི་དབྱིངས་ཀྱིས་ཀླས་པ་དང༌། ནམ་ མཁའི་ཁམས་ཀྱིས་མཐས་གཏུགས་པ། ནམ་མཁའ་དང་མཉམ་པའི་སྐུ་སྟེ། ཤཱ་རིའི་བུ། འདི་ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ ༄༅། །སྟེ༑ དེ་ལ་བྱང་ཆུབ་སེམས་དཔའ་མངོན་པར་དང༌། ཡིད་ཆེས། རབ་ཏུ་རྟོག། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་ དུ་འདུ་ཤེས་བསྐྱེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པ་དེ་སྐད་ཅེས་གསུངས་ནས་སྟོན་པས་གཞན་ཡང་འདི་སྐད་གསུངས་སོ། ། བསྐལ་པ་བྱེ་བ་ཁྲག་ཁྲིག་དཔག་མེད་པར། །བྱང་ཆུབ་སེམས་དཔའ་སྤྱོད་པ་རྣམ་སྤྱོད་ཅིང༌། །ལས་རྣམས་གསུམ་ནི་ཤིན་ཏུ་ཡོངས་དག་པར། །མཚུངས་མེད་བདེ་བར་གཤེགས་ པའི་སྐུ་ཚོལ་ལོ། །ཕྱོགས་བཅུའི་འགྲོ་བ་ཀུན་ལ་བྱམས་པ་དང༌། །སྙིང་རྗེ་རྒྱ་ཆེར་བསྐྱེད་ནས་སྦྱིན་པ་བྱིན། །འདོད་ལ་ལོག་པར་གཡེམ་པ་རྟག་སྤོང་ཞིང༌། །ནམ་མཁའ་ལྟ་བུའི་ མཆོག་གི་སྐུ་ཚོལ་ལོ། །གསེར་ལྟར་དག་ཅིང་མཛེས་པའི་གོས་རྣམས་ནི། །དཔག་ཏུ་མེད་པ་གངྒཱའི་བྱེ་མ་སྙེད། །སྦྱིན་པའི་ཕ་རོལ་ཕྱིན་པ་རབ་སྤྱོད་ཅིང༌། །རྒྱལ་བའི་སྲས་ཀྱི་འཇིག་ རྟེན་མཆོག་ལ་ཕུལ། །གཡག་གི་རྔ་མ་བཞིན་དུ་ཚུལ་ཁྲིམས་སྲུང༌། །ཡན་ལག་ཉིང་ལག་བཅད་ཀྱང་དགྲ་ལ་བཟོད། །བརྩོན་འགྲུས་ཀྱི་ནི་ཕ་རོལ་ཕྱིན་སྤྱོད་ཅིང༌། །སངས་རྒྱས་སྐུ་ ལ་སྨོན་པ་ཡོངས་མི་སྐྱེ། །ཤེས་རབ་ཐབས་དགའ་རྒྱ་ཆེར་བསམ་གཏན་པ། །བསམ་གཏན་སྤྱོད་ཡུལ་དགའ་རྒྱལ་རྣམ་པར་ལྟ། །ཆོས་དབྱིངས་དམ་པ་བདེ་བར་གཤེགས་པའི་སྐུ།། དེ་འདྲར་བདག་གྱུར་ཅེས་ནི་དེ་ལ་སྨོན། །སྲིད་པར་འགྲོ་བ་དག་ཏུ་དགེ་བྱེད་ཅིང༌། །མི་མཆོག་གིས་ནི་བྱང་ཆུབ་མཚུངས་མེད་ཐོབ། །དག་པ་དྲི་མེད་གཙང་ཞིང་རྡུལ་བྲལ་བ། །ནམ་མཁའ་ འདྲ་བ་ཡངས་པའི་སྐུ་ཐོབ་བོ། །རང་བཞིན་སྟོང་སྟེ་བདག་དང་སེམས་ཅན་བྲལ། །མཚན་མ་མེད་ཅིང་སྒྲ་དང་བྲལ་བ་ཐོབ། །མིག་གི་ཡུལ་ཀུན་ལས་ནི་རབ་འདས་པ། །དེ་འདྲའི་སྐུ་ནི་ཐུབ་ པས་ཡང་དག་ཐོབ། །གཟོད་མ་ནས་སྟོང་མ་བྱས་མ་བྱུང་བ། །གཟུགས་དང་སྒྲ་བྲལ་ཡིད་ཀྱང་རྣམ་དག་པ། །དེ་བཞིན་གཤེགས་སྐུ་མི་གཡོ་གང་ཐོབ་པ། །དེས་ནི་ཕྱོགས་བཅུའི་བདེ་བར་ གཤེགས་པ་མཐོང༌། །ཇི་ལྟར་སྒྱུ་མ་སྤྲུལ་པ་སྣ་ཚོགས་ལུས། །རྟ་དང་གླང་པོ་བུད་མེད་སྐྱེས་པའི་གཟུགས། །བྱིས་པ་སླུ་བ་རྫུན་ཞིང་ཕྱིན་ཅི་ལོག །དེ་བཞིན་སྟོབས་བཅུ་རྣམས་ལ་ལྟ་ པར་བྱོས། །གང་དག་འདས་པའི་བདེ་གཤེགས་དཔག་མེད་དང༌། །མ་བྱོན་རྒྱལ་བ་དེ་བཞིན་གང་སྣང་དག །ཆོས་ཉིད་གཅིག་གྱུར་མཉམ་པ་མེད་པའི་སྐུ། །ཆོས་ཀྱི་དབྱིངས་ཀྱིས་ཀླས་ ཤིང་ནམ་མཁའ་འདྲ། །དེ་ལྟར་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་ རྟོག། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །ཤཱ་རིའི་བུ། ཇི་ལྟར་ན། བྱང་ཆུབ་སེམས་དཔའ་དེ་བཞིན་གཤེགས་པ་ ༄༅། །རྣམས་ཀྱི་དེ་བཞིན་གཤེགས་པའི་དབྱངས་བསམ་གྱིས་མི་ཁྱབ་པ་ལ་མངོན་པར་དང༌། ཡིད་ཆེས། རབ་ཏུ་རྟོག་པ་ནས་ངོ་མཚར་དང༌། རྨད་ཀྱི་བར་དུ་འདུ་ ཤེས་བསྐྱེད་ཅེ་ན། འདི་ལྟར་ཤཱ་རིའི་བུ། དེ་བཞིན་གཤེགས་པ་ནི། འདུལ་བའི་དབང་གི་ཕྱིར་འཁོར་ཇི་ལྟ་བ་དེ་བཞིན་དུ་སྒྲ་འབྱུང་སྟེ། སེམས་ཅན་ཐམས་ཅད་རབ་ཏུ་དགའ་ བར་བྱ་བའི་ཕྱིར་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་བྱེད་མོད་ཀྱི། ཤཱ་རིའི་བུ། དེ་བཞིན་གཤེགས་པ་འདི་སྙམ་དུ་ངས་དགེ་སློང་གི་འཁོར་ལ་ནི། འདི་ བཤད༑ དགེ་སློང་མའི་འཁོར་ལ་ནི། འདི། དགེ་བསྙེན་མའི་འཁོར་ལ་ནི། འདི། བྲམ་ཟེའི་འཁོར་ལ་ནི། འདི། རྒྱལ་རིགས་ཀྱི་འཁོར་ལ་ནི། འདི། ཁྱིམ་བདག་གི་འཁོར་ལ་ནི། འདི༑ ལྷའི་འཁོར་ལ་ནི། འདི། ཚངས་པའི་འཁོར་ལ་ནི། འདི་སྟེ། འདི་ལྟ་སྟེ། མདོའི་སྡེ་དང༌། དབྱངས་ཀྱིས་བསྙད་པའི་སྡེ་དང༌། ལུང་དུ་བསྟན་པའི་སྡེ་དང༌། ཚིགས་སུ་བཅད་ པའི་སྡེ་དང༌། ཆེད་དུ་བརྗོད་པའི་སྡེ་དང༌། གླེང་གཞིའི་སྡེ་དང༌། རྟོགས་པ་བརྗོད་པའི་སྡེ་དང༌། དེ་ལྟ་བུ་བྱུང་བའི་སྡེ་དང༌། སྐྱེས་པའི་རབས་ཀྱི་སྡེ་དང༌། ཤིན་ཏུ་རྒྱས་པའི་སྡེ་དང༌། རྨད་དུ་བྱུང་བའི་ཆོས་ཀྱི་སྡེ་དང༌། གཏན་ལ་དབབ་པར་བསྟན་པའི་སྡེ་རྣམས་བཤད་པར་བྱའོ། །སྙམ་དུ་མི་དགོངས་མོད་ཀྱི། འོན་ཀྱང་ཤཱ་རིའི་བུ། འཁོར་ཇི་ལྟ་བུ་འདུས་པར་ གྱུར་བ་ཚངས་པའི་འཁོར་གྱི་བར་དུ་འདུས་པར་གྱུར་པ་དེ་དག་གི་དབང་པོའི་རིམ་པ་ཅི་འདྲ་བ་དང༌། སེམས་ཅན་དེ་དག་ལ་ཆོས་ཀྱི་མདོ་ཇི་ལྟ་བུར་ཐོས་པར་བྱ་དགོས་པར་འགྱུར་བ་དེ་ལྟ་བུའི་ ཆོས་ཀྱི་མདོ་ཐོས་པར་བྱ་བ་དེ་བཞིན་གཤེགས་པའི་ཞལ་གྱི་སྒོ་ནས་འབྱུང་བར་ཡང་དག་པར་ཤེས་ཀྱང་ཆོས་བསྟན་པ་དེ་གཅིག་ལ་གཅིག་ངེས་པའི་ཚིག་མནོད་པར་འགྱུར་བའང་མེད་དེ། ཐམས་ཅད་ཀྱང་རང་རང་གི་ཆོས་རྣམ་པར་རིག་པར་ཀུན་ཤེས་སོ། །དེ་བཞིན་གཤེགས་པའི་དབྱངས་ནི། དེ་བཞིན་གཤེགས་པའི་སྔོན་གྱི་བསོད་ནམས་ཀྱི་འབྲས་བུ་རྣམ་པར་སྨིན་པ་ ལས་མངོན་པར་གྲུབ་པ་བདེན་པའི་རྗེས་སུ་འབྲང་བས་འཇུག་གོ །ཡང་ཤཱ་རིའི་བུ། དེ་བཞིན་གཤེགས་པའི་དབྱངས་དེ་ནི། འཇམ་པར་འབྱུང༌། ཡིད་དུ་འོང་བ་དང༌། ཡིད་དགའ་བ་དང༌། དག་པ་དང༌། དྲི་མ་མེད་པ་དང༌། སྙན་པ་དང༌། མཉན་པར་འོས་པ་དང༌། ཤེས་པར་བྱ་བར་འོས་པ་དང༌། མི་རྩུབ་པ་དང༌། མི་བརླིང་བ་དང༌། ལུས་སིམ་པར་བྱེད་པ་དང༌། སེམས་སིམ་པར་ བྱེད་པ་དང༌། སྙིང་དགའ་བར་བྱེད་པ་དང༌། དགའ་བ་དང༌། བདེ་བ་སྐྱེད་པ་དང༌། ཀུན་ཤེས་པར་བྱེད་པ་དང༌། གསལ་ཞིང་འཐད་པ་དང༌། མངོན་པར་དགའ་བར་འགྱུར་བ་དང༌། ཡིད་དུ་ འོང་བ་དང༌། སེངྒེའི་སྐད་ཀྱི་དྲག་ཤུལ་གྱི་ང་རོའི་སྒྲ་དང༌། སྤྲིན་གྱི་སྒྲ་དབྱངས་དང༌། རྒྱ་མཚོའི་སྒྲ་བསྒྲགས་པའི་དབྱངས་དང༌། མིའམ་ཅིའི་གླུའི་དབྱངས་དང༌། ཀ་ལ་པིངྐའི་ང་རོའི་སྒྲ་ ༄༅། །དབྱངས་དང༌། ཚངས་པའི་ང་རོའི་སྒྲ་དབྱངས་དང༌། རྔའི་སྒྲ་དབྱངས་དང༌། དཔལ་དང་ལྡན་པ་དང༌། མཉེན་པ་དང༌། ཟུར་ཕྱིན་པ་དང༌། བསྒྲགས་པ་དང༌། སེམས་ ཅན་ཐམས་ཅད་ཀྱི་དབང་པོ་མགུ་བར་བྱེད་པ་དང༌། འཁོར་ཐམས་ཅད་དུ་གྲགས་པ་དང༌། རྣམ་པ་ཐམས་ཅད་ཀྱི་མཆོག་དང་ལྡན་པ་དང༌། དེ་དག་དང༌། གཞན་ཡོན་ཏན་དཔག་ཏུ་མེད་ པ་དང་ལྡན་པའི་དེ་བཞིན་གཤེགས་པའི་གསུང་གི་དབྱངས་འབྱུང་སྟེ། ཤཱ་རིའི་བུ། འདི་ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་དབྱངས་བསམ་གྱིས་མི་ཁྱབ་པ་ སྟེ༑ དེ་ལ་བྱང་ཆུབ་སེམས་དཔའ་མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །འདི་ ལ་ཆོས་ཉིད་ནི། འདི་ཡིན་ཏེ། དེ་ལ་འདི་སྐད་ཅེས་བྱའོ། །ཚངས་པ་ཡི་ནི་སྒྲ་དབྱངས་སུ། །འདྲེན་པ་གསུང་སྒྲ་རབ་འབྱིན་ཏེ། །ཚངས་པ་རྣམས་ནི་ཚིམ་པར་བྱེད། །འདི་འདྲའི་ཆོས་ནི་ ཕུན་སུམ་ཚོགས། །དེ་ཡི་དབྱངས་ནི་བྱམས་དང་ལྡན། །སྙིང་རྗེ་ལས་ནི་ཡང་དག་འབྱུང༌། །བཏང་སྙོམས་དང་ནི་དགའ་ལྡན་པ། །ཐུབ་པའི་དབྱངས་ནི་རབ་ཏུ་འབྱུང༌། །སྲོག་ཆགས་ཀུན་ གྱི་འདོད་ཆགས་མེ། །ཞེ་སྡང་དུག་ནི་ཞི་བྱེད་ཅིང༌། །གཏི་མུག་མུན་པ་སེལ་བ་སྟེ། །ཕུན་སུམ་ཚོགས་དབྱངས་འདི་འདྲའོ། །འཛམ་བུའི་གླིང་གི་སྣ་ཚོགས་ཕྱོགས་རྣམས་ན། །མིར་ གྱུར་པ་ཡི་སྐད་ནི་མཐའ་ཡས་པ། །ཀུན་ན་དེ་ཡི་སྒྲ་རྣམས་སྣ་ཚོགས་པ། །དབྱངས་འདི་ཐོས་ནས་རྗེས་སུ་རྟོགས་པར་འགྱུར། །ས་བླ་དང་ནི་དེ་བཞིན་བར་སྣང་ལྷ། །དེ་དག་ཅི་འདྲའི་སྐད་ ལ་འཇུག་པ་ལྟར། །དེ་ཕྱིར་ཐུབ་དབང་དབྱངས་ནི་རབ་ཞུགས་ཏེ། །རྣམ་པར་ངེས་ཐོས་མྱ་ངན་འདས་རེག་འགྱུར། །རྐང་གཉིས་དག་དང་རྐང་བཞི་རྣམས་དང་ནི། །རྐང་མང་དག་དང་ རྐང་པ་མེད་པ་རྣམས། །ཐམས་ཅད་ལ་ནི་དེ་ཡི་སྒྲ་དབྱངས་འཇུག། བསྐུལ་ནས་རབ་ཏུ་འཆོས་ཤིང་ཚར་གཅོད་བྱེད། །སྟོང་གསུམ་འདི་ཡི་སྒྲ་རྣམས་ཇི་སྙེད་པ། །ཐ་མ་དང་ནི་འབྲིང་དང་ དེ་བཞིན་རབ། །དེ་དག་རྗེས་སུ་འཇུག་དབྱངས་དེ་སྒྲོག་སྟེ། །འདུལ་བའི་སེམས་ཅན་ཐར་པར་རེག་པར་བྱེད། །རྟོག་པ་མེད་ཅིང་རྣམ་པར་མི་རྟོག་སྟེ། །བཟུང་བ་དང་ནི་བཅིངས་ལས་བྱུང་མ་ ཡིན༑ ༑མཉམ་པར་བཞག་པས་འཕགས་པའི་བདེན་པ་འཆད། །སེམས་ཅན་ཐོས་ནས་ཉོན་མོངས་ཞི་བར་བྱེད། །སངས་རྒྱས་ཆོས་དང་དེ་བཞིན་དགེ་འདུན་སྒྲ། །སྦྱིན་ཐོས་ཚུལ་ཁྲིམས་ དེ་བཞིན་བཟོད་པ་དག། མཐའ་ཡས་སྒྲ་ནི་སེམས་ཅན་ཐོས་བྱེད་དེ། །དེ་བཞིན་གཤེགས་པའི་དབྱངས་ནི་དེ་འདྲའོ། །དབྱངས་ཀྱང་མཐའ་ཡས་ཡེ་ཤེས་མཐའ་ཡས་པ། །དེ་ཡི་དབྱངས་ ཀྱི་ཚད་ནི་ཡོང་མེད་དེ། །དེ་ལ་བྱང་ཆུབ་སེམས་དཔའ་མཁས་དད་ཅིང༌། །དེ་བཞིན་གཤེགས་པའི་དབྱངས་ལ་ཐེ་ཚོམ་མེད། ཤཱ་རིའི་བུ། །ཇི་ལྟར་ན། བྱང་ཆུབ་སེམས་དཔའ་དེ་བཞིན་ ༄༅། །གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། ཐོས་ནས་རྒྱ་ཆེར་ དགའ་མགུ་སྟེ་རངས་པ་རྙེད་ནས་ངོ་མཚར་དང་རྨད་དུ་འདུ་ཤེས་བསྐྱེད་ཅེ་ན། འདི་ལྟར་ཤཱ་རིའི་བུ། ཆོས་ཐམས་ཅད་ལ་དེ་བཞིན་གཤེགས་པའི་ཆགས་པ་མེད་པའི་ཡེ་ཤེས་གཟིགས་ པ་འཇུག་སྟེ། དེ་ལ་བྱང་ཆུབ་སེམས་དཔའ་མངོན་པར་དད། ཡིད་ཆེས། རབ་ཏུ་རྟོག་པ་ནས་དད་པས་ངོ་མཚར་དང༌། རྨད་ཀྱི་བར་དུ་འདུ་ཤེས་བསྐྱེད་དོ། །དེ་བཞིན་གཤེགས་པའི་ ཡེ་ཤེས་ཀྱི་ཕ་རོལ་ཏུ་ཕྱིན་པ་ལས་བརྩམས་ཏེ་ཁྱོད་ལ་དཔེ་བསྟན་པར་བྱའོ། །ཤཱ་རིའི་བུ། ཡོངས་སུ་བརྟག་པ་བཟུང་སྟེ་གངྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་རྩྭ་དང༌། ཤིང་དང༌། ཡལ་ག་དང༌། ལོ་མ་དང༌། འདབ་མ་དང༌། ཆུང་ངུ་ན་སོར་བཞིའི་ཚད་ཙམ་ཡན་ཆད་ཇི་སྙེད་ཡོད་པ། སྐྱེས་བུ་ལ་ལ་ཞིག་གིས་དེ་དག་གཅིག་ཏུ་སྤུངས་ཏེ། གཅིག་ཏུ་ སྤུངས་ནས་མེས་བསྲེགས་ཏེ་ཚིག་པར་གྱུར་ནས་ཐལ་བར་བྱས་སོ། །ཐལ་བར་བྱས་ནས་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་རྒྱ་མཚོ་ཆེན་པོ་ག་ན་ཡོད་པ་དེ་དག་ཏུ་བླུགས་ ཏེ་ལོ་སྟོང་དུ་དཀྲུགས་ཀྱང་ཤཱ་རིའི་བུ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་འདི་ལྟ་བུ་ཡོད་དེ། དེ་བཞིན་གཤེགས་པའི་ཡེ་ཤེས་དེ་དང་ལྡན་པས་ རྒྱ་མཚོ་ཆེན་པོ་དེ་དང་དེ་དག་ནས་ཐལ་བ་དེ་དག་བླངས་ཏེ་འཇིག་རྟེན་གྱི་ཁམས་དེ་དང་དེ་དག་ཏུ་འདི་ནི། འཇིག་རྟེན་གྱི་ཁམས་ཆེ་གེ་མོ་ཞིག་གི་ཤིང་འདི་འདྲ་བ་ཞིག་གི་ཐལ་བའོ། །འདི་ནི། འཇིག་རྟེན་གྱི་ཁམས་ཆེ་གེ་མོ་ཞིག་གི་ཤིང་ཆེ་གེ་མོ་ཞིག་གི་རྩ་བ་དང༌། ཆེ་གེ་མོ་ཞིག་གི་སྡོང་པོ་དང༌། ཆེ་གེ་མོ་ཞིག་གི་ཡལ་ག་དང༌། ཆེ་གེ་མོ་ཞིག་གི་ལོ་མ་དང༌། ཆེ་གེ་མོ་ཞིག་གི་ འབྲས་བུའི་ཐལ་བའོ། །འདི་ནི། ཕྱོགས་ཆེ་གེ་མོ་ཞིག་གི་འདབ་མ་འདི་འདྲ་བ་ཞིག་གི་ཐལ་བའོ། །ཞེས་རབ་ཏུ་འབྱེད་དོ། །དེ་ཅིའི་ཕྱིར་ཞེ་ན། འདི་ལྟར་ཤཱ་རིའི་བུ། དེ་བཞིན་གཤེགས་ པས་ཆོས་དབྱིངས་རབ་ཏུ་རྟོགས་ཏེ། དེ་རབ་ཏུ་རྟོགས་ནས་དེ་བཞིན་གཤེགས་པས་འདི་ལྟར་འདི་ནི། འཇིག་རྟེན་གྱི་ཁམས་ཆེ་གེ་མོ་ཞིག་གི་ཐལ་བའོ། །ཞེས་རབ་ཏུ་མཁྱེན་པ་ནས་ རྒྱས་པར་བྱས་ཏེ། དེ་ལྟར་ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། དེ་ལྟར་རྫུ་འཕྲུལ་ཆེ་བའོ། །དེ་ལྟར་མཐུ་ཆེ་བའོ། །འདི་ལྟར་ དབང་ཆེ་བར་གྲགས་པ་སྟེ། ཤཱ་རིའི་བུ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དེ་བཞིན་གཤེགས་པའི་ཡེ་ཤེས་འདི་ལ་དད། ཡིད་ཆེས། རབ་ཏུ་རྟོག་ཅིང་དེ་བཞིན་གཤེགས་པ་ བྱམས་པས་ཡིད་ལ་བྱེད་པ་དེ་དག་ཐམས་ཅད་ནི། དགེ་བའི་རྩ་བ་འདིའི་མཐའ་མ་མ་ཐོབ་པར་སྡུག་བསྔལ་མཐར་འབྱིན་ཏོ། །དེ་ཅིའི་ཕྱིར་ཞེ་ན། འདི་ལྟར་ཤཱ་རིའི་བུ། དེ་བཞིན་གཤེགས་ ༄༅། །པས་ཆོས་ཀྱི་དབྱིངས་ཤིན་ཏུ་རྟོགས་ཏེ། དེ་ཤིན་ཏུ་རྟོགས་པས་དེ་བཞིན་གཤེགས་པ་རྣམས་ལས་སེམས་བསྐྱེད་པ་གཅིག་ཀྱང་ཆུད་མི་ཟའོ། །ཤཱ་རིའི་བུ། ཁྱོད་ལ་ དཔེར་བྱ་སྟེ། འདི་ལ་སྐྱེས་བུ་མཁས་པ་ཁ་ཅིག་དཔེས་བཤད་པའི་དོན་རྣམས་ཀུན་ཤེས་ཏེ། འདི་ལྟ་སྟེ། དཔེར་ན། ཤཱ་རིའི་བུ། སྐྱེས་བུ་ལ་ལ་ཚེ་ལོ་བརྒྱ་པ་ལོ་བརྒྱར་འཚོ་བ་ཞིག་གིས་ སྐྲའི་རྩེ་མོ་བྱེ་བ་བརྒྱར་བཙལ་བས་ཆུའི་ཐིགས་པ་བླངས་ཏེ་ང་གང་ན་བ་དེར་འོངས་ནས་ཕྱིན་པ་དང་འདི་སྐད་ཅེས། ཀྱེ་གོའུ་ཏ་མ། བདག་གིས་ཆུ་ཐིགས་པ་འདི་ཁྱོད་ལ་གཏམས་ཀྱི། ནམ་ བདག་ལ་དགོས་པར་གྱུར་པ་དེ་ན་སླར་བྱིན་ཅིག་ཅེས་ཟེར་བ་དང༌། དེ་བཞིན་གཤེགས་པས་དེ་བླངས་ཏེ། དེའི་ཆུའི་རྒྱུན་གྱིས་བདས་ཏེ་འདྲེས་ནས་ལྷན་ཅིག་ཏུ་མཐར་གྱིས་རྒྱ་མཚོ་ཆེན་ པོར་ཞུགས་སོ། །དེ་ནས་སྐྱེས་བུ་ཚེ་ལོ་བརྒྱ་པ་དེ་ལོ་བརྒྱ་ལོན་པ་དང་ང་ག་ལ་བ་དེར་འོངས་ཏེ་ཕྱིན་ནས་འདི་སྐད་ཅེས། གོའུ་ཏ་མ། བདག་གི་ཆུའི་ཐིགས་པ་དེ་དགོས་ཀྱི། བདག་ལ་ བྱིན་ཅིག་ཅེས་ཟེར་ན། ཤཱ་རིའི་བུ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་ཡོད་དེ། ཡེ་ཤེས་དེ་དང་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་ཀྱིས་སྐྲའི་རྩེ་མོ་བྱེ་བ་བརྒྱར་བཙལ་བས་ཆུའི་ཐིགས་པ་དེ་རྒྱ་མཚོ་ཆེན་པོ་དེ་ནས་ཆུ་གཞན་དང་མ་འདྲེས་པར་བླངས་ཏེ་སྐྱེས་བུ་དེ་ལ་སླར་བྱིན་ནོ། །ཤཱ་ རིའི་བུ། འདི་ལྟར་དོན་ཤེས་པར་བྱ་བའི་ཕྱིར་ཁྱོད་ལ་དཔེར་བསྟན་ཏེ། དེ་གང་གི་དོན་དུ་བལྟ་ཞེ་ན། འདི་ལྟ་སྟེ། ཤཱ་རིའི་བུ། སྐྱེས་བུའི་ཆུའི་ཐིགས་པ་དེ་བཞིན་གཤེགས་པའི་ལག་ ཏུ་བཞག་པ་ཡུན་རིང་པོ་ཞིག་ལོན་ཡང་ཆུད་མི་ཟ་བ་དེ་བཞིན་དུ་ཤཱ་རིའི་བུ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་དེ་བཞིན་གཤེགས་པའི་ཡེ་ཤེས་འདི་ལྟ་བུ་ལ་དད། ཡིད་ཆེས། རབ་ཏུ་རྟོག་ཅིང༌། དེ་བཞིན་གཤེགས་པ་བྱམས་པས་ཡིད་ལ་བྱེད་པ་དང༌། དེ་བཞིན་གཤེགས་པ་ཉིད་ལ་དམིགས་ནས་དེའི་ཕྱིར་ནམ་མཁའ་ལ་མེ་ཏོག་འཐོར་བ་དེ་དག་ཐམས་ཅད་དགེ་ པའི་རྩ་བ་མཐའ་མ་མ་ཐོབ་པར་སྡུག་བསྔལ་མཐར་འབྱིན་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཤཱ་རིའི་བུ། དེ་བཞིན་གཤེགས་པས་ཆོས་ཀྱི་དབྱིངས་རབ་ཏུ་རྟོགས་ཏེ། རབ་ཏུ་ རྟོགས་པས་དེ་བཞིན་གཤེགས་པ་རྣམས་ལས་སེམས་གཅིག་བསྐྱེད་པ་ཡང་ཆུད་མི་ཟའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ ལྡན་འདས། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་གང་རྣམ་པར་ཤེས་པ་མ་མཆིས་པར་འཇུག་པ་མཆིས་སམ། བཀའ་སྩལ་པ། ཤཱ་རིའི་བུ། དེ་ནི། མ་ཡིན་ ནོ། །བཅོམ་ལྡན་འདས། ཡེ་ཤེས་ནི། གང་ལགས། རྣམ་པར་ཤེས་པ་ནི། གང་ལགས། ཤཱ་རིའི་བུ། འདི་བཞི་ནི། རྣམ་པར་ཤེས་པའི་གནས་ཏེ། རྣམ་པར་ཤེས་པ་དེ་ལ་གནས་སོ། །འདི་ ༄༅། །ལྟ་སྟེ། རྣམ་པར་ཤེས་པ་གཟུགས་ལ་ཉེ་བར་སོང་ཞིང་གནས། གཟུགས་ལ་དམིགས། གཟུགས་ལ་གནས། དགའ་བ་ལ་བརྟེན་པས་སྐྱེ་ཞིང་འཕེལ་ཏེ་རྒྱས་ པར་འགྱུར་བ་དང༌། རྣམ་པར་ཤེས་པ་ཚོར་བ་ལ་ཉེ་བར་སོང་ཞིང་གནས། ཚོར་བ་ལ་དམིགས། ཚོར་བ་ལ་གནས། དགའ་བ་ལ་བརྟེན་པས་སྐྱེ་ཞིང་འཕེལ་ཏེ་རྒྱས་པར་འགྱུར་ བ་དང༌། རྣམ་པར་ཤེས་པ་འདུ་ཤེས་ལ་ཉེ་བར་སོང་ཞིང་གནས། འདུ་ཤེས་ལ་དམིགས། འདུ་ཤེས་ལ་གནས། དགའ་བ་ལ་བརྟེན་པས་སྐྱེ་ཞིང་འཕེལ་ཏེ་རྒྱས་པར་འགྱུར་བ་དང༌། རྣམ་པར་ཤེས་པ་འདུ་བྱེད་ལ་ཉེ་བར་སོང་ཞིང་གནས། འདུ་བྱེད་ལ་དམིགས། འདུ་བྱེད་ལ་གནས། དགའ་བ་ལ་བརྟེན་པས་སྐྱེ་ཞིང་འཕེལ་ནས་རྒྱས་པར་འགྱུར་ཏེ། ཤཱ་རིའི་བུ། འདི་ནི། རྣམ་པར་ཤེས་པ་བྱའོ། །གང་ལེན་པའི་ཕུང་པོ་ལྔ་ལ་མི་གནས་པར་རྣམ་པར་ཤེས་པའི་ཕུང་པོ་ཡོངས་སུ་ཤེས་པ་དེ་ནི། ཡེ་ཤེས་ཞེས་བྱའོ། །གཞན་ཡང་རྣམ་པར་ཤེས་ པ་ཞེས་བྱ་བ་ནི། སའི་ཁམས་རྣམ་པར་ཤེས་པ་དང༌། ཆུའི་ཁམས་དང༌། མེའི་ཁམས་དང༌། རླུང་གི་ཁམས་དང༌། ནམ་མཁའི་ཁམས་རྣམ་པར་ཤེས་པ་སྟེ། འདི་ནི། རྣམ་པར་ ཤེས་པ་ཞེས་བྱའོ། །གང་ཁམས་བཞི་ལ་མི་གནས་པར་རྣམ་པར་ཤེས་པའི་ཆོས་ཀྱི་ཁམས་ཀུན་ཏུ་དབྱེ་བ་ཤེས་པ་འདི་ནི། ཡེ་ཤེས་ཞེས་བྱའོ། །གཞན་ཡང་ཤཱ་རིའི་བུ། རྣམ་ པར་ཤེས་པ་ཞེས་བྱ་བ་ནི། གང་མིག་གིས་ཤེས་པར་བྱ་བའི་གཟུགས་རྣམ་པར་རིག་པ་དང༌། རྣ་བས་ཤེས་པར་བྱ་བའི་སྒྲ་རྣམ་པར་རིག་པ་དང༌། སྣས་ཤེས་པར་བྱ་བའི་དྲི་རྣམ་པར་རིག་པ་ དང༌། ལྕེས་ཤེས་པར་བྱ་བའི་རོ་རྣམ་པར་རིག་པ་དང༌། ལུས་ཀྱིས་ཤེས་པར་བྱ་བའི་རེག་བྱ་རྣམ་པར་རིག་པ་དང༌། ཡིད་ཀྱིས་ཤེས་པར་བྱ་བའི་ཆོས་རྣམ་པར་རིག་པ་སྟེ། འདི་ནི། རྣམ་པར་ ཤེས་པ་ཞེས་བྱའོ། །གང་ནང་ཉེ་བར་ཞི་ཞིང་ཕྱི་རོལ་དུ་མི་རྒྱུ་སྟེ། ཡེ་ཤེས་ཀྱི་ཕྱིར་འབྲང་ཞིང་ཆོས་གང་ལ་ཡང་མི་རྟོག །རྣམ་པར་མི་རྟོག་པ་དེ་ནི། ཡེ་ཤེས་ཞེས་བྱའོ། །རྣམ་པར་ཤེས་པ་ ནི། དམིགས་པ་ལས་སྐྱེས་སོ། །རྣམ་པར་ཤེས་པ་ནི། ཡིད་ལ་བྱེད་པ་ལས་སྐྱེའོ། །རྣམ་པར་ཤེས་པ་ནི། ཡོངས་སུ་རྟོག་པ་ལས་སྐྱེ་སྟེ། དེ་ནི། རྣམ་པར་ཤེས་པ་ཞེས་བྱའོ། །གང་འཛིན་ པ་མེད་པས་སྙེམས་པ་དང༌། དམིགས་པ་མེད་རྣམ་པར་རིག་པ་མེད་ཅིང་མི་རྟོག་པ་དེ་ནི། ཡེ་ཤེས་ཞེས་བྱའོ། །གཞན་ཡང་འདུས་བྱས་ལ་སྤྱོད་པའི་ཆོས་ལ་རྣམ་པར་ཤེས་པ་གནས་ཤིང༌། གང་འདུས་བྱས་ལ་སྤྱོད་པའི་ཆོས་རྣམ་པར་ཤེས་པ་དེ་ནི། རྣམ་པར་ཤེས་པ་ཞེས་བྱའོ། །འདུས་མ་བྱས་ལ་རྣམ་པར་ཤེས་པ་རྒྱུ་བ་མེད་དེ། གང་འདུས་མ་བྱས་ཤེས་པ་དེ་ནི། ཡེ་ཤེས་ ཤེས་བྱའོ། །གཞན་ཡང་གང་སྐྱེ་བ་དང༌། འཇིག་པ་ལ་རབ་ཏུ་གནས་པ་དེ་ནི། རྣམ་པར་ཤེས་པ་ཞེས་བྱའོ། །གང་སྐྱེ་བ་མེད་པ་དང༌། འགག་པ་མེད་པ་ལ་གནས་པ་དེ་ནི། ཡེ་ཤེས་ ༄༅། །ཞེས་བྱའོ། །དེ་ལྟར་ཤཱ་རིའི་བུ། འདི་ནི། རྣམ་པར་ཤེས་པ། འདི་ནི། ཡེ་ཤེས་ཏེ། བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་ པའི་ཡེ་ཤེས་བསམ་གྱིས་མི་ཁྱབ་པ་དེ་ལ་མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་ བསྐྱེད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཇི་ལྟར་གངྒཱའི་ཀླུང་གི་བྱེ་མ་དཔག་མེད་པ། དེ་བཞིན་ ཕྱོགས་བཅུའི་འཇིག་རྟེན་ཁམས་ཀྱི་རྩྭ་རྣམས་ནི། །དེ་དག་སྐྱེས་བུ་ལ་ལས་མེར་བསྲེགས་ཐལ་བར་བྱས། །ལོ་ནི་བརྒྱ་སྟོང་དག་ཏུ་རྒྱ་མཚོར་དཀྲུགས་པ་རྣམས། །དེ་འདྲ་བ་ཡི་སྟོབས་ བཅུ་ཡེ་ཤེས་ཕྲ་མངའ་བས། །ཐལ་བ་བླངས་ནས་འགྲོ་བ་དག་ལ་ལུང་སྟོན་པ། །ཞིང་རྣམས་རབ་འབྱམས་དག་གི་ཤིང་རིགས་འདི། །དེ་ཚིག་ཐལ་བ་འདི་ཞེས་རྣམ་པ་ཐམས་ཅད་ མཁྱེན། །འདི་ལྟར་ཕྱོགས་བཅུ་དག་གི་འཇིག་རྟེན་ཁམས་ཀྱི་རྡུལ། །ཐམས་ཅད་རྡུལ་དུ་བྱས་ནས་རྒྱལ་བ་རྣམས་སྟོན་ཏེ། །དེ་དག་ཐམས་ཅད་བགྲང་ཡང་ཆགས་མེད་ཐེ་ཚོམ་མེད། ། དེ་ལྟར་བདེ་བར་གཤེགས་ཀྱི་ཡེ་ཤེས་ནམ་མཁའ་བཞིན། །ཇི་སྙེད་ཕྱོགས་བཅུའི་འགྲོ་བ་རྣམས་ཀྱི་སེམས་ཀྱི་རྒྱུད། །གང་དག་འདོད་ཆགས་སྤྱོད་དང་ཞེ་སྡང་གཏི་མུག་ལྡན། །སྤྱོད་ པ་ཀུན་གྱི་ཚུལ་ཤེས་བསམ་པ་རྣམས་དང་ནི། །གང་གི་བླངས་ཉམས་གང་གི་ཐར་པར་འགྱུར་བ་མཁྱེན། །འཇིག་རྟེན་མཆོག་གི་སྟོབས་བཅུ་རྣམས་ཀྱི་ཡེ་ཤེས་ནི། །ཇི་སྙེད་ཕྱོགས་ བཅུའི་ཆོས་ཀྱི་དབྱིངས་སུ་རབ་ཞུགས་ཀྱང༌། །འདྲེན་པ་རྣམས་ལ་རྟོག་དང་རྣམ་པར་རྟོག་མི་འབྱུང༌། །བདེར་གཤེགས་སྲས་པོ་དད་པ་རྒྱལ་ལ་དད་པར་བྱེད།། །བམ་པོ་བཞི་པ། ཤཱ་རིའི་བུ། ཇི་ལྟར་ན། བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་འོད་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེར། རབ་ཏུ་རྟོག །ཐེ་ཚོམ་ མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ཅིང་ངོ་མཚར་དང༌། རྨད་དུ་འདུ་ཤེས་བསྐྱེད་ཅེ་ན། འདི་ལ་ཤཱ་རིའི་བུ། དེ་བཞིན་གཤེགས་པས་ཆོས་ཀྱི་དབྱིངས་རབ་ཏུ་རྟོགས་ཏེ། དེ་རབ་ཏུ་ རྟོགས་པས་དེ་བཞིན་གཤེགས་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་མངོན་པར་གཤེགས་ནས་ལྷམ་མེ། ལྷན་ནེ། ལྷང་ངེར་མཛད་དོ། །དེ་འདི་ལྟ་སྟེ། དཔེར་ན། སྤྲིན་མེད་པའི་ནམ་མཁའ་ལ་ཉི་མ་མངོན་པར་ཤར་ནས་ལྷམ་མེ། ལྷན་ནེ། ལྷང་ངེ་བ་བཞིན་དུ། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་མངོན་པར་གཤེགས་ནས་ལྷམ་མེ། ལྷན་ནེ། ལྷང་ངེར་མཛད་དོ། །ཤཱ་རིའི་བུ། སྲིན་བུ་མེ་ཁྱེར་གྱི་འོད་དེ་བས་ནི། གང་ ༄༅། །འབྲུ་མར་གྱི་མར་མེའི་འོད་འདི་ཤིན་ཏུ་འཕགས། ཤིན་ཏུ་མཆོག །ཤིན་ཏུ་ཁ་དོག་དང་ལྡན། ཤིན་ཏུ་འོད་གསལ། ཤིན་ཏུ་རྒྱ་ཆེའོ། །འབྲུ་མར་གྱི་མར་མེའི་ འོད་དེ་བས་ནི། རྩིག་པ་ཆེན་པོའི་འོད་འདི་ཤིན་ཏུ་འཕགས། ཤིན་ཏུ་མཆོག་པ་ནས་ཤིན་ཏུ་རྒྱ་ཆེ་བའི་བར་དུའོ། །གང་རྩིག་པ་ཆེན་པོའི་འོད་དེ་བས་ནི། མེའི་ཕུང་པོ་ཆེན་པོའི་འོད་ གང་ཡིན་པ་དང༌། སྨན་དང༌། སྐར་མའི་འོད་གང་ཡིན་པའི་བར་དུ་རྒྱས་པར་བྱ་སྟེ། ཟླ་བའི་འོད་དང༌། ཉི་མའི་འོད་དང༌། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་འོད་དང༌། གཞལ་མེད་ ཁང་དང༌། ལུས་ཀྱི་རྒྱན་རྣམས་དང༌། དེ་བཞིན་དུ་སུམ་ཅུ་རྩ་གསུམ་པ་རྣམས་དང༌། འཐབ་བྲལ་བ་རྣམས་དང༌། དགའ་ལྡན་པ་རྣམས་དང༌། འཕྲུལ་དགའ་བ་རྣམས་དང༌། གཞན་ འཕྲུལ་དབང་བྱེ་ཀྱི་ལྷ་རྣམས་ཀྱི་ར་བ་དང༌། གཞལ་མེད་ཁང་དང༌། ལུས་ཀྱི་རྒྱན་རྣམས་དང༌། གང་ཚངས་པ་རྣམས་དང༌། ཚངས་རིས་པ་རྣམས་དང༌། ཚངས་པའི་མདུན་ན་འདོན་ པ་རྣམས་དང༌། ཚང་འཁོར་བ་རྣམས་དང༌། ཚངས་ཆེན་གྱི་ལྷ་རྣམས་ཀྱི་ར་བ་དང༌། གཞལ་མེད་ཁང་དང༌། ལུས་ཀྱི་རྒྱན་རྣམས་ཀྱི་འོད་འདི་ཤིན་ཏུ་འཕགས། ཤིན་ཏུ་བཟང༌། ཤིན་ཏུ་མཆོག །ཤིན་ཏུ་ཁ་དོག་དང་ལྡན། ཤིན་ཏུ་འོད་གསལ། ཤིན་ཏུ་རྒྱ་ཆེའོ། །གང་ཚངས་པ་རྣམས་དང༌། ཚངས་རིས་པ་རྣམས་དང༌། ཚངས་པའི་མདུན་ན་འདོན་པ་རྣམས་ དང༌། ཚངས་འཁོར་བ་རྣམས་དང༌། ཚངས་ཆེན་གྱི་ལྷ་རྣམས་ཀྱི་འོད་ཀྱང་རྒྱས་པར་བྱ་སྟེ། འོད་ཆེན་དང༌། འོད་ཆུང་དང༌། ཚད་མེད་འོད་དང༌། འོད་གསལ་ནས་དགེ་རྒྱས་ཀྱི་བར་དང༌། འབྲས་ བུ་ཆེ་བ་དང༌། འདུ་ཤེས་ཅན་དང༌། འདུ་ཤེས་མེད་པ་དང༌། འདུ་ཤེས་མེད་འདུ་ཤེས་མེད་མིན་དང༌། མི་ཆེ་བ་དང༌། མི་གདུང་བ་དང༌། གྱ་ནོམ་སྣང་བ་དང༌། ཤིན་ཏུ་མཐོང་གི་ར་བ་དང༌། གཞལ་ མེད་ཁང་དང༌། ལུས་ཀྱི་འོད་དང༌། གང་འོག་མིན་གྱི་ལྷ་རྣམས་ཀྱི་ར་བ་དང༌། གཞལ་མེད་ཁང་རྣམས་དང༌། ལུས་ཀྱི་འོད་འདི་ཤིན་ཏུ་འཕགས། ཤིན་ཏུ་བཟང༌། ཤིན་ཏུ་མཆོག །ཤིན་ཏུ་ ཁ་དོག་དང་ལྡན་།ཤིན་ཏུ་འོད་གསལ། ཤིན་ཏུ་རྒྱ་ཆེའོ། །གང་འོག་མིན་གྱི་ལྷ་རྣམས་ཀྱི་ར་བ་དང༌། གཞལ་མེད་ཁང་རྣམས་དང༌། ལུས་ཀྱི་འོད་པས་ནི། གང་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་འོད་འདི་ཤིན་ཏུ་འཕགས། ཤིན་ཏུ་བཟང༌། ཤིན་ཏུ་མཆོག །ཤིན་ཏུ་ཁ་དོག་དང་ལྡན། ཤིན་ཏུ་འོད་གསལ། ཤིན་ཏུ་རྒྱ་ཆེའོ། །དེ་ ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་ཚུལ་ཁྲིམས་དཔག་ཏུ་མེད་པ་དང༌། ཏིང་ངེ་འཛིན་དཔག་ཏུ་མེད་པ་དང༌། ཤེས་རབ་དཔག་ཏུ་མེད་པ་དང༌། རྣམ་པར་གྲོལ་བ་དཔག་ཏུ་མེད་ པ་དང༌། རྣམ་པར་གྲོལ་བའི་ཡེ་ཤེས་མཐོང་བ་དཔག་ཏུ་མེད་པའི་ཕྱིར་རོ། །དེ་ལྟར་ཤཱ་རིའི་བུ། ཇི་ཙམ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འོད་དུ་བཏགས་པ་གདགས་པས་བཏགས་ ༄༅། །པ་དེ་ཐམས་ཅད་ནི། དེ་བཞིན་གཤེགས་པའི་འོད་ཀྱི་བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུ་ཡང་ཉེ་བར་མི་འགྲོའོ། །དེ་འདི་ལྟ་སྟེ། དཔེར་ན། ཤཱ་རིའི་ བུ། འཛམ་བུ་ཆུ་བོའི་གསེར་གྱི་ནང་དུ་གསེར་ཐ་མལ་བ་བཞག་ན། སྣག་ཚའི་གར་བུ་བཞིན་དུ་འགྱུར་ཏེ། ལྷམ་མེར་མི་འགྱུར། །ལྷན་ནེར་མི་འགྱུར། །ལྷང་ངེར་མི་འགྱུར་རོ། ། དེ་བཞིན་དུ་ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་འོད་དུ་གདགས་པས་བཏགས་པ་ཇི་སྙེད་ཡོད་པ་དེ་དག་ཐམས་ཅད་དེ་བཞིན་གཤེགས་པའི་ འོད་ཀྱི་མདུན་ན་ལྷམ་མེར་མི་འགྱུར། ལྷན་ནེར་མི་འགྱུར། ལྷང་ངེར་མི་འགྱུར་རོ། །འོད་གསལ་བར་མི་འགྱུར་ཏེ། དེ་བཞིན་གཤེགས་པའི་འོད་ནི། དེ་དག་གི་ནང་ན་མཆོག་ ཅེས་བྱ། རྣམ་པ་ཞེས་བྱ། བླ་ན་མེད་པ་ཞེས་བྱའོ། །ཤཱ་རིའི་བུ། གང་དེ་བཞིན་གཤེགས་པ་ཉི་ཚེ་བའི་འོད། ལས་ཀྱི་རྣམ་པར་སྨིན་པ་ལས་མངོན་པར་གྲུབ་པའི་འོད་དེས་ཀྱང་སྟོང་གསུམ་ གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བས་ཤིན་ཏུ་ཁྱབ་པར་འགྱུར་ཏེ། ཤཱ་རིའི་བུ། ཟླ་བ་དང༌། ཉི་མའི་འོད་ཀྱི་སྣང་བ་ཡང་མི་འབྱུང༌། ཉིན་མོར་ཡང་མི་ཤེས། མཚན་མོར་ ཡང་མི་ཤེས། ཟླ་བ་ཕྱེད་པ་དང༌། ཟླ་བ་གཅིག་པར་ཡང་མི་ཤེས། དུས་དང་ལོར་ཡང་མི་ཤེས་མོད་ཀྱི། འདི་ལྟ་སྟེ། དེ་བཞིན་གཤེགས་པས་སེམས་ཅན་ལ་ཐུགས་བརྩེ་བའི་ཕྱིར་འོད་ འདོམ་གང་ཙམ་དུ་བྱིན་གྱིས་རློབ་སྟེ། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞེད་ན། འཇིག་རྟེན་གྱི་ཁམས་གྲངས་མེད་པ་འོད་ཀྱིས་ཁྱབ་ པར་མཛད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་དམ་པའི་ཕ་རོལ་ཏུ་ཕྱིན་པ་བརྙེས་པ་སྟེ། ཤཱ་རིའི་བུ། དོན་དེ་ཉིད་རབ་ཏུ་རྟོགས་པར་ བྱ་བའི་ཕྱིར་ཁྱོད་ལ་དཔེ་བསྟན་ཏོ། །ཤཱ་རིའི་བུ། སྐྱེས་བུ་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཇི་སྙེ་པ་ཐམས་ཅད་རྡུལ་ཕྲ་རབ་ཏུ་བྱས་ནས་རྡུལ་དེ་དག་ ཐུ་བར་བླུགས་ཏེ་ཤར་ཕྱོགས་སུ་སོང་ནས་རྡུལ་ཕྲ་མོ་དེ་ཇི་སྙེད་པ་དེ་སྙེད་ཀྱི་འཇིག་རྟེན་གྱི་ཁམས་འདས་ནས་རྡུལ་ཕྲ་རབ་གཉིས་པ་བོར་ཞིང་ཤར་ཕྱོགས་སུ་སོང་ན། ཤཱ་རིའི་བུ། རྡུལ་ཕྲ་ རང་དེ་ཐམས་ཅད་ནི། ཟད་བར་འགྱུར་གྱི། ཤཱ་རིའི་བུ། ཤར་ཕྱོགས་ཀྱི་འཇིག་རྟེན་གྱི་ཁམས་ནི། ཟད་པ་མེད་དེ། དེ་བཞིན་དུ་ལྷོ་དང༌། ནུབ་དང༌། བྱང་ནས་ཕྱོགས་བཅུ་ཀུན་གྱི་བར་དུའོ། །ཤཱ་ རིའི་བུ། དེ་ཇི་སྙམ་དུ་སེམས། འཇིག་རྟེན་གྱི་ཁམས་དེ་དག་གི་མཐའ་དང་མུ་གཟུང་བར་ནུས་སམ། གསོལ་པ། བཅོམ་ལྡན་འདས། དེ་ནི། མི་ནུས་སོ། །བདེ་བར་གཤེགས་པ། དེ་ནི། མི་ནུས་ སོ། །བཀའ་སྩལ་པ། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞེད་ན། འཇིག་རྟེན་གྱི་ཁམས་དེ་ཐམས་ཅད་འོད་ཀྱིས་ཁྱབ་པར་མཛད་ ༄༅། །དེ༑ འཇིག་རྟེན་གྱི་ཁམས་དེ་དག་ན་ཇི་ཙམ་འོད་དུ་བཏགས་པ་གདགས་པས་བཏགས་པ་དེ་ཐམས་ཅད་ནི་དེ་བཞིན་གཤེགས་པའི་འོད་ཀྱི་མདུན་ན་བརྒྱའི་ཆར་ཡང་ ཉེ་བར་མི་འགྲོ་བ་ནས་རྒྱུའི་བར་དུ་ཡང་མི་བཟོད་དེ། དེ་ལྟར་ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤེས་རབ་ཀྱི་ཕ་རོལ་ཏུ་ཕྱིན་པའི་དམ་ པའི་ཕ་རོལ་ཏུ་ཕྱིན་པའོ། །ཡང་ཤཱ་རིའི་བུ། དེ་བཞིན་གཤེགས་པའི་འོད་ལ་ནི་རྩིག་པའམ། ཤིང་ངམ། ལྗོན་པའམ། ཁོར་ཡུག་གི་རིའམ། ཁོར་ཡུག་ཆེན་པོའམ། རི་སྤོས་ཀྱི་ངད་ ལྡང་ངམ། རི་བཏང་བཟུང་ངམ། རི་བཏང་བཟུང་ཆེན་པོའམ། གངས་རིའམ། རི་གཉའ་ཤིང་འཛིན་ཏམ། དེ་མ་ཡིན་པ་གཞན་རི་ནག་པོའམ། རིའི་རྒྱལ་པོ་རི་རབ་དང༌། གང་གིས་ཀྱང་ སྒྲིབ་པར་མི་ནུས་ཏེ། དེ་དག་ཐམས་ཅད་ལས་ཐལ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཁྱབ་པར་བྱས་ཀྱང་དམན་པ་ལ་མོས་པའི་སེམས་ཅན་རྣམས་མོས་པར་ མི་འགྱུར་ཏེ། དེ་ལ་སེམས་ཅན་ལ་ལས་ནི་དེ་བཞིན་གཤེགས་པའི་འོད་འདོམ་གང་ཙམ་དུ་མཐོང་ངོ༌། །གང་དེ་བས་རྒྱ་ཆེ་བ་དེ་དག་གིས་ནི་འོད་འདོམ་དོ་ཙམ་དུ་མཐོང་ངོ༌། །གང་དེ་བས་ ཤིན་ཏུ་རྒྱ་ཆེ་བ་དེ་དག་གིས་ནི་འོད་རྒྱང་གྲགས་ཙམ་དུ་མཐོང་བ་ནས་གང་དེ་བས་ཀྱང་ཤིན་ཏུ་རྒྱ་ཆེན་པོས་ནི་འོད་སྟོང་གསུམ་གྱི་སྟོང་ཆེན་པོ་ཙམ་གྱི་བར་དུ་མཐོང་ སྟེ༑ དེ་ལྟར་ན། ཤཱ་རིའི་བུ། སྟོང་ཕྲག་བརྒྱ་པའི་ཚངས་པས་ནི་འཇིག་རྟེན་གྱི་ཁམས་སྟོང་ཕྲག་བརྒྱའི་བར་དུ་འོད་ཀྱིས་ཁྱབ་པར་མཐོང་སྟེ། རྒྱས་པར་བྱའོ། །ས་ཐོབ་པའི་བྱང་ཆུབ་སེམས་དཔས་ དེ་བཞིན་གཤེགས་པའི་འོད་ཀྱིས་འཇིག་རྟེན་གྱི་ཁམས་མུ་མེད་པའི་བར་དུ་ཁྱབ་པར་མཐོང་ངོ༌། །དེ་ལྟར་ཤཱ་རིའི་བུ། ནམ་མཁའི་ཁམས་ཅི་ཙམ་པ་སེམས་ཅན་གྱི་ཁམས་ཀྱང་དེ་ཙམ་ སྟེ༑ དེ་བཞིན་གཤེགས་པ་སེམས་ཅན་ལ་ཐུགས་བརྩེ་བའི་ཕྱིར་དེ་ཙམ་དུ་འོད་ཀྱིས་ཁྱབ་པར་མཛད་དོ། །དེ་བྱང་ཆུབ་སེམས་དཔས་ཐོས་ནས་ཐེ་ཚོམ་མེད། སོམ་ཉི་མི་ཟ། མངོན་པར་དད། ཡིད་ཆེས། རབ་ཏུ་རྟོག །རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །འདི་ལ་ཆོས་ཉིད་ནི་འདི་ཡིན་ཏེ། དེ་ལ་འདི་སྐད་ཅེས་བྱའོ། །ཉི་མ་ཟླ་བའི་ འོད་གང་དང༌། །བརྒྱ་བྱིན་ཚངས་འོད་གང་ཡོད་དང༌། །འོག་མིན་བར་གྱི་འོད་རྣམས་ཀྱིས། །བཅུ་དྲུག་ཆར་ཡང་མི་ཕོད་དོ། །འོག་མིན་གྱི་ནི་འོད་རྣམས་དང༌། །གང་རྣམས་སྟོང་གསུམ་ཁྱབ་ གྱུར་པས། །སངས་རྒྱས་སྤུ་ཡི་འོད་ཟེར་གྱི། །བཅུ་དྲུག་ཆར་ཡང་མི་ཕོད་དོ། །ནམ་མཁའ་དག་ནི་ཇི་ཙམ་པ། །དེ་ཙམ་འོད་ཀྱིས་ཁྱབ་བྱེད་པ། །བློ་གྲོས་རྒྱ་ཆེན་སེམས་ཅན་གྱིས། །དེ་འདྲ་ བར་ནི་འོད་མཐོང་ངོ༌། །སངས་རྒྱས་འོད་ནི་མཐའ་ཡས་ཏེ། །ནམ་མཁའ་དང་ནི་མཚུངས་མཉམ་པ། །ཇི་ལྟར་འདུལ་བར་འགྱུར་རྣམས་ཀྱིས། །དེ་འདྲ་བར་ནི་འོད་མཐོང་ངོ༌། །ཇི་ལྟར་སྐྱེས་ ༄༅། །བུ་དམུས་ལོང་གིས། །ཉི་མའི་འོད་ནི་དེ་འདྲ་བར། །མ་མཐོང་བས་ནི་འོད་དེ་ལ། །འོད་ནི་ཡོད་པ་མིན་ཞེས་སྨྲས། །དེ་བཞིན་སེམས་ཅན་དམན་པ་གང༌། །རྒྱལ་བའི་འོད་ ནི་མི་མཐོང་སྟེ། །མ་མཐོང་བས་ན་རྒྱལ་བ་ཡི། །འོད་ནི་ཡོད་པ་མིན་ཞེས་ཟེར། །ལ་ལས་འདོམ་དོ་ཙམ་དུ་མཐོང༌། །ལ་ལས་རྒྱང་གྲགས་དཔག་ཚད་དང༌། །ལ་ལས་སྟོང་གསུམ་ཐམས་ ཅད་དུ༑ ༑འོད་ཀྱིས་ཁྱབ་པར་གྱུར་པར་མཐོང༌། །ས་བརྒྱད་པ་དང་དགུ་པ་དང༌། །བཅུ་པ་ལ་ནི་གང་གནས་པ། །བྱང་ཆུབ་སེམས་དཔའ་ཤེས་རབ་ཆེ། །ས་ཆེན་ལ་ནི་གང་གནས་པ། །དེ་དག་ སངས་རྒྱས་རྣམས་ཀྱི་འོད། མཐའ་ཡས་དཀྱིལ་འཁོར་འཇུག་བྱེད་ཅིང༌། །བསམ་ཡས་སངས་རྒྱས་ཞིང་རྣམས་སུ། །སངས་རྒྱས་དག་གི་བྱ་བ་བྱེད། །དེ་ལྟར་སངས་རྒྱས་བསམ་ཡས་ ཏེ༑ ༑སངས་རྒྱས་འོད་ཟེར་བསམ་མི་ཁྱབ། །བསམ་མི་ཁྱབ་ལ་དད་བྱས་ནས། །བསོད་ནམས་ཕུང་པོ་བསམ་མི་ཁྱབ། །ཡང་ཤཱ་རིའི་བུ། ཇི་ལྟར་ན། དེ་བཞིན་གཤེགས་པ་ རྣམས་ཀྱི་དེ་བཞིན་གཤེགས་པའི་ཚུལ་ཁྲིམས་བསམ་གྱིས་མི་ཁྱབ་པ་ལ་མངོན་པར་དང༌། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་ རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་བསྐྱེད་པ་དང༌། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཏིང་ངེ་འཛིན་བསམ་གྱིས་མི་ཁྱབ་པ་ལ་མངོན་པར་ དད༑ ཡིད་ཆེས། རབ་ཏུ་རྟོག་པ་ནས་ངོ་མཚར་དང༌། རྨད་ཀྱི་བར་དུ་འདུ་ཤེས་བསྐྱེད་ཅེ་ན། ཤཱ་རིའི་བུ། འདི་ལྟར་ཡང་དག་པར་སྨྲ་བས་སྨྲ་བ་ཚུལ་ཁྲིམས་ཡོངས་སུ་དག་པའི་སེམས་ཅན་འཇིག་ རྟེན་དུ་བྱུང་སྟེ། ལུས་ཀྱི་ལས་ཡོངས་སུ་དག་པ་དང་ལྡན་པ། ངག་གི་ལས་ཡོངས་སུ་དག་པ་དང་ལྡན་པ། ཡིད་ཀྱི་ལས་ཡོངས་སུ་དག་པ་དང་ལྡན་པ་འཇིག་རྟེན་དུ་བྱུང་ཞིང་སྐྱེས་ནས་འཇིག་ རྟེན་གྱི་ཆོས་ཀྱིས་མ་གོས་པ། བྲམ་ཟེ་སྡིག་པ་སྤངས་པ། དགེ་སྦྱོང་ཞི་བ། བསམ་གཏན་པའི་མཆོག། ཏིང་ངེ་འཛིན་དམ་པའི་ཕ་རོལ་ཏུ་སོན་པའི་སེམས་ཅན་འཇིག་རྟེན་དུ་བྱུང་བ་དེ་ནི། དེ་ བཞིན་གཤེགས་པ་ཡིན་པར་ཡང་དག་པར་སྨྲ་བས་སྨྲའོ། །དེ་ཅིའི་ཕྱིར་ཞེ་ན། ཤཱ་རིའི་བུ། ལྷར་བཅས་པའི་འཇིག་རྟེན་དང༌། ཚངས་པར་བཅས་པ་དང༌། བདུད་དུ་བཅས་པ་དང༌། དགེ་སྦྱོང་ དུ་བཅས་པ་དང༌། བྲམ་ཟེར་བཅས་པའི་སྐྱེ་རྒུ་དང༌། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་ན་ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་ལྟར་ཚུལ་ཁྲིམས་དང༌། ཏིང་ངེ་འཛིན་གྱི་ཕུང་པོ་ཡོངས་སུ་དག་པ་ཚད་མེད་པ་དེ་ལྟ་བུ་ངས་མ་མཐོང་ངོ༌། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་ནི། ཚུལ་ཁྲིམས་ དང༑ ཏིང་ངེ་འཛིན་གྱི་ཕ་རོལ་ཏུ་ཕྱིན་པའི་དམ་པའི་ཕ་རོལ་ཏུ་སོན་པའོ། །ཤཱ་རིའི་བུ། ཁྱོད་དེ་བཞིན་གཤེགས་པའི་ཚུལ་ཁྲིམས་དང༌། ཏིང་ངེ་འཛིན་ཚད་མེད་པའི་དཔེ་ཙམ་ཉན་ ༄༅། །པར་འདོད་དམ། གསོལ་པ། བཅོམ་ལྡན་འདས། འདི་ལྟར་དགེ་སློང་དག་ལ་དེ་བཞིན་གཤེགས་པའི་ཚུལ་ཁྲིམས་དང༌། ཏིང་ངེ་འཛིན་གྱི་ཕ་རོལ་ཏུ་ཕྱིན་ པ་ལས་བརྩམས་ཏེ་དཔེ་ཙམ་བཤད་ན། བཅོམ་ལྡན་འདས་ལས་འདི་ལྟར་ཐོས་པ་དེ་བཞིན་དུ་འཛིན་པར་གྱུར་ཏོ། །བཅོམ་ལྡན་འདས། དེའི་དུས་ནི། འདི་ལགས་སོ། །བདེ་ བར་གཤེགས་པ། དེའི་དུས་ནི། འདི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། དེ་ཇི་སྙམ་དུ་སེམས། སེམས་ཅན་གྱི་ཁམས་དང༌། སའི་ཁམས་གང་ མང༑ གསོལ་པ། ཇི་ལྟར་བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན། བཅོམ་ལྡན་འདས། སེམས་ཅན་གྱི་ཁམས་ནི། རབ་ཏུ་མང་གི། སའི་ཁམས་ ནི༑ མ་ལགས་སོ། །བཀའ་སྩལ་པ། དེ་དེ་བཞིན་ནོ། །ཤཱ་རིའི་བུ། དེ་དེ་བཞིན་ཏེ། ཤཱ་རིའི་བུ། སེམས་ཅན་གྱི་ཁམས་རབ་ཏུ་མང་གི། སའི་ཁམས་ནི། མ་ཡིན་ནོ། །ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་སྒོ་ང་ལས་སྐྱེས་པའམ། མངལ་ལས་སྐྱེས་པའམ། དྲོད་གཤེར་ལས་སྐྱེས་པའམ། བརྫུས་ཏེ་སྐྱེས་ པའམ། གཟུགས་ཅན་ནམ། གཟུགས་མེད་པའམ། འདུ་ཤེས་ཅན་ནམ། འདུ་ཤེས་མེད་པའམ། འདུ་ཤེས་མེད་འདུ་ཤེས་མེད་མིན་གྱི་སེམས་ཅན་རྣམས་ཇི་ཙམ་དུ་སེམས་ ཅན་དུ་གདགས་པས་བཏགས་པ་དེ་ཐམས་ཅད་ཡོངས་སུ་བརྟག་པ་བཟུང་སྟེ་སྐད་ཅིག་ཐང་གཅིག་ཡུད་ཙམ་གཅིག་གིས་སྔ་ཕྱི་མེད་པར་མིའི་ལུས་ཐོབ་པར་གྱུར་ལ། ཤཱ་རིའི་བུ། མིར་གྱུར་པའི་སེམས་ཅན་དེ་དག་ཐམས་ཅད་སྐད་ཅིག་ཐང་གཅིག་ཡུད་ཙམ་གཅིག་གིས་སྔ་ཕྱི་མེད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་ གྱུར་ཅིང༌། ཡོངས་སུ་བརྟག་པ་བཟུང་སྟེ་དེ་བཞིན་གཤེགས་པ་རེ་རེས་ཀྱང་དེ་བཞིན་གཤེགས་པ་དེ་དག་ཇི་སྙེད་པ་དེ་སྙེད་ཀྱི་དེ་བཞིན་གཤེགས་པ་མངོན་པར་སྤྲུལ་ཏེ། དེ་བཞིན་གཤེགས་ པ་རེ་རེ་ལ་ཡང་དབུ་སྟོང་སྟོང་དུ་གྱུར། དབུ་རེ་རེ་ལ་ཡང་ཞལ་སྟོང་སྟོང་དུ་གྱུར། ཞལ་རེ་རེ་ལ་ཡང་ལྗགས་སྟོང་སྟོང་དུ་གྱུར་ལ། དེ་བཞིན་གཤེགས་པ་དེ་དག་ཐམས་ཅད་སྟོབས་ བཅུ་དང་ལྡན་པར་གྱུར། མི་འཇིགས་པ་བཞི་དང༌། དེ་བཞིན་གཤེགས་པའི་སོ་སོ་ཡང་དག་པར་རིག་པ་བཞི་དང༌། ཆགས་པ་མེད་པ་སྒྲིབ་པ་མེད་པའི་སངས་རྒྱས་ཀྱི་སྤོབས་པ་དང་ ལྡན་པར་གྱུར་ལ། ཤཱ་རིའི་བུ། དེ་ལྟ་བུའི་དེ་བཞིན་གཤེགས་པས་དེ་བཞིན་གཤེགས་པ་གཅིག་གི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལས་བརྩམས་ཏེ་བསྐལ་པ་བྱེ་བ་ཁྲག་ཁྲིག་བརྒྱ་ སྟོང་དུ་བསྔགས་པ་བརྗོད་ཀྱང་དེ་བཞིན་གཤེགས་པའི་ཚུལ་ཁྲིམས་ཀྱི་ཕུང་པོ་དེ་ནི། དེ་འདྲ་སྟེ། ཤཱ་རིའི་བུ། དེ་བཞིན་གཤེགས་པའི་ཚུལ་ཁྲིམས་ཀྱི་ཕུང་པོ་ཡང་མི་ཟད། དེ་ ༄༅། །བཞིན་གཤེགས་པ་དེ་དག་གི་ཤེས་རབ་དང་སྤོབས་པ་བླ་ན་མེད་པ་ཡང་མི་ཟད་དེ། དེ་བཞིན་གཤེགས་པ་དེ་དག་ཐམས་ཅད་དེའི་བར་དུ་ཡོངས་སུ་མྱ་ ངན་ལས་འདའ་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟ་སྟེ། དེ་བཞིན་གཤེགས་པའི་ཚུལ་ཁྲིམས་ཀྱི་ཕུང་པོ་དང༌། དེ་བཞིན་གཤེགས་པ་དེ་དག་གི་ཤེས་རབ་དང་སྤོབས་ པ་བླ་ན་མེད་པ་དང༌། དེ་གཉིས་ནི། ཚད་མེད། གྲངས་མེད། བསམ་གྱིས་མི་ཁྱབ། ནམ་མཁའ་དང་མཉམ་ཞིང་མཚུངས་སོ། །ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་ རྟེན་གྱི་ཁམས་ཀྱི་སེམས་ཅན་ལྟ་ཞོག་ལ། ཤཱ་རིའི་བུ། ཤར་ཕྱོགས་ཀྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་པ་དང༌། དེ་བཞིན་དུ་ལྷོ་དང༌། ནུབ་ དང༌། བྱང་དང༌། འོག་དང༌། སྟེང་གི་ཕྱོགས་དང༌། དེ་བཞིན་དུ་ཕྱོགས་མཚམས་དང༌། ཕྱོགས་བཅུ་ཀུན་གྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་དེ་དག་ ཐམས་ཅད་སྐད་ཅིག་ཐང་གཅིག་ཡུད་ཙམ་གཅིག་གིས་མིའི་ལུས་ཐོབ་པར་གྱུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་ གྱུར་པའི་བར་དུ་གོང་མ་བཞིན་དུ་རྒྱས་པར་བྱ་སྟེ། འདི་ལྟ་སྟེ། དེ་བཞིན་གཤེགས་པའི་ཚུལ་ཁྲིམས་ཀྱི་ཕུང་པོ་དང༌། སངས་རྒྱས་བཅོམ་ལྡན་འདས་དེ་དག་གི་ཤེས་རབ་དང་ སྤོབས་པ་བླ་ན་མེད་པ་དང༌། དེ་གཉིས་ཚད་མེད། གྲངས་མེད། བསམ་གྱིས་མི་ཁྱབ། ནམ་མཁའ་དང་མཉམ་ཞིང་མཚུངས་ཏེ། དེ་ལྟར་ཤཱ་རིའི་བུ། དེ་བཞིན་གཤེགས་པ་ནི། ཚུལ་ ཁྲིམས་ཀྱི་ཕ་རོལ་ཏུ་ཕྱིན་པའི་དམ་པའི་ཕ་རོལ་ཏུ་སོན་པའོ། །ཤཱ་རིའི་བུ། ཁྱོད་དེ་བཞིན་གཤེགས་པའི་ཏིང་ངེ་འཛིན་གྱི་ཕ་རོལ་ཏུ་ཕྱིན་པའི་དཔེ་ཙམ་དུ་བྱ་བ་ཉན་པར་འདོད་དམ་། གསོལ་པ། འདི་ལྟར་དགེ་སློང་རྣམས་བཅོམ་ལྡན་འདས་ལས་ཐོས་ནས་དེ་བཞིན་དུ་འཛིན་པར་འགྱུར་ཏེ། བཅོམ་ལྡན་འདས། དེའི་དུས་འདི་ལགས་སོ། །བདེ་བར་གཤེགས་པ། དེའི་ ཚོད་འདི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། དེའི་དུས་དེའི་ཚོད་འབྱུང་སྟེ། ཉི་མ་བདུན་འཇིག་རྟེན་དུ་བྱུང་བར་གྱུར་ནས་སྟོང་གསུམ་གྱི་སྟོང་ཆེན་ པོའི་འཇིག་རྟེན་གྱི་ཁམས་འདི་འབར། ཀུན་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འབར་བ་གཅིག་ཏུ་གྱུར་པར་འགྱུར་རོ། །ཤཱ་རིའི་བུ། འཇིག་རྟེན་གྱི་ཁམས་འབར་བ་གཅིག་ ཏུ་གྱུར་པ་དེའི་ཕྱོགས་གང་ན་དེ་བཞིན་གཤེགས་པ་འཆག་གམ། བཞེངས་སམ། བཞུགས་སམ། མནལ་བ་དེའི་ས་ཕྱོགས་དེ་ངོ་མཚར་དང༌། རྨད་ཀྱི་ཆོས་བཅུ་དང་ལྡན་པར་ འགྱུར་རོ། །བཅུ་གང་ཞེ་ན། ས་ཕྱོགས་དེ་ལག་མཐིལ་ལྟར་མཉམ་པར་འགྱུར་ཏེ། ས་ཕྱོགས་དེ་ངོ་མཚར་དང༌། རྨད་ཀྱི་ཆོས་དང་པོ་འདི་དང་ལྡན་པར་འགྱུར་རོ། །གཞན་ཡང་ཤཱ་ ༄༅། །རིའི་བུ། འཇིག་རྟེན་གྱི་ཁམས་འབར། ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འབར་བ་གཅིག་ཏུ་གྱུར་པ་དེར་ས་ཕྱོགས་གང་ན་དེ་བཞིན་ གཤེགས་པ་འཆག་གམ། བཞེངས་སམ། བཞུགས་སམ། མནལ་བའི་ས་ཕྱོགས་དེ་གསེག་མ་དང༌། གྱོ་མོ་མེད་ཅིང་མཐོ་བར་གྱུར་པའི་གཟུགས་སུ་འགྱུར་ཏེ། ས་ཕྱོགས་དེ་ ངོ་མཚར་དང༌། རྨད་ཀྱི་ཆོས་གཉིས་པ་འདི་དང་ལྡན་པར་འགྱུར་རོ། །གཞན་ཡང་ཤཱ་རིའི་བུ། འཇིག་རྟེན་གྱི་ཁམས་འབར། ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འབར་བ་གཅིག་ཏུ་གྱུར་ནས་ཚིག་པ་དེར་ས་ཕྱོགས་གང་ན་དེ་བཞིན་གཤེགས་པ་འཆག་གམ། བཞེངས་སམ། བཞུགས་སམ། མནལ་བའི་ས་ཕྱོགས་དེ་དེ་བཞིན་གཤེགས་པ་ ཡོངས་སུ་ལོངས་སྤྱོད་པའི་ཕྱིར་ཡངས་ཤིང་མཉམ་པར་འགྱུར་ཏེ། ཤཱ་རིའི་བུ། ས་ཕྱོགས་དེ་ངོ་མཚར་དང༌། རྨད་ཀྱི་ཆོས་གསུམ་པ་འདི་དང་ལྡན་པར་འགྱུར་རོ། །གཞན་ཡང་ཤཱ་ རིའི་བུ༑ འཇིག་རྟེན་གྱི་ཁམས་འབར། ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འབར་བ་གཅིག་ཏུ་གྱུར་ནས་ཚིག་པ་དེར་ས་ཕྱོགས་གང་ན་དེ་བཞིན་གཤེགས་པ་འཆག་ གམ༑ བཞེངས་སམ། བཞུགས་སམ། མནལ་བའི་ས་ཕྱོགས་དེར་རྩྭ་སྔོ་བ། འཁྱིལ་བ། འཇམ་པ། གཡས་ཕྱོགས་སུ་འཁྱིལ་པ། ཀ་ཙ་ལིན་དི་ཀ་ལྟར་རེག་ན་བདེ་བ། དྲི་རབ་ཏུ་ ཞིམ་པ་སྐྱེ་བར་འགྱུར་ཏེ། ཤཱ་རིའི་བུ། ས་ཕྱོགས་དེ་ངོ་མཚར་དང༌། རྨད་ཀྱི་ཆོས་བཞི་པ་འདི་དང་ལྡན་པར་འགྱུར་རོ། །གཞན་ཡང་ཤཱ་རིའི་བུ། འཇིག་རྟེན་གྱི་ཁམས་འབར། ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འབར་བ་གཅིག་ཏུ་གྱུར་ནས་ཚིག་པ་དེར་ས་ཕྱོགས་གང་ན་དེ་བཞིན་གཤེགས་པ་འཆག་གམ། བཞེངས་སམ། བཞུགས་སམ། མནལ་བའི་ས་ ཕྱོགས་དེར་ཡན་ལག་བརྒྱད་དང་ལྡན་པའི་ཆུ་གྲང་བ། ཡང་བ། འཇམ་པ། དྭངས་པ། རྙོག་པ་མེད་པ། རབ་ཏུ་དྭངས་པ། འཐུང་འདོད་པ། མང་དུ་འཐུངས་ཀྱང་ནད་དུ་མི་འགྱུར་བ། ཡན་ ལག་འདི་བརྒྱད་དང་ལྡན་པའི་ཆུ་འབྱུང་བར་འགྱུར་ཏེ། ཤཱ་རིའི་བུ། ས་ཕྱོགས་དེ་ངོ་མཚར་དང༌། རྨད་ཀྱི་ཆོས་ལྔ་པ་འདི་དང་ལྡན་པར་འགྱུར་རོ། །གཞན་ཡང་ཤཱ་རིའི་བུ། འཇིག་ རྟེན་གྱི་ཁམས་འབར། ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འབར་བ་གཅིག་ཏུ་གྱུར་ནས་ཚིག་པ་དེར་ས་ཕྱོགས་གང་ན་དེ་བཞིན་གཤེགས་པ་འཆག་གམ། བཞེངས་ སམ༑ བཞུགས་སམ། མནལ་བའི་ས་ཕྱོགས་དེར་དེ་བཞིན་གཤེགས་པའི་སྔོན་གྱི་ལས་ཀྱི་རྣམ་པར་སྨིན་པའི་རབ་ཏུ་བསིལ་བའི་རླུང་ལྡང་བ་དེ་འདི་ལྟ་སྟེ། དཔེར་ན། ཤཱ་རིའི་བུ། སོས་ཀའི་ཐ་མའི་ཟླ་བ་ཚ་བས་གདུངས་པའི་དུས་ན་སྐྱེས་བུ་ལ་ལ་ཞིག་གངྒཱའི་ཀླུང་དུ་ཞུགས་ནས་ལུས་བསིལ་བར་བྱས་ཏེ་རིམས་དང་སྙོམས་པ་ཐམས་ཅད་ཞི་བར་བྱས་ནས་གངྒཱའི་ ༄༅། །ཀླུང་ནས་བྱུང་ཞིང་སླར་བྱུང་ནས་འཆག་ཅིང་འགྲོ་བ་ལས་ཧ་ཅང་ཡང་མི་རིང་བ་ཞིག་ན་ནགས་སྟུག་པོ་ཡལ་ག་དང༌། ལོ་མ་དང༌། འདབ་མ་གྲིབ་མ་སྟུག་པོ་ དང་ལྡན་པ་ཆེན་པོ་ཞིག་མཐོང་ནས་དེ་ནགས་སྟུག་པོ་གང་ན་ཡོད་པ་དེར་སོང་སྟེ་ཕྱིན་པ་དང༌། ནགས་སྟུག་པོའི་དབུས་ན་ཁྲིའི་སྟེང་དུ་ཕྱར་བུ་བཏིང་བ། བེའུ་རས་ཀྱིས་གཡོགས་ པ༑ ཀ་ཙ་ལིན་དི་ཀའི་གདིང་བ་བཏིང་བ། དེའི་སྟེང་དར་གྱིས་གཡོགས་པ། ཡ་ཐོག་མ་ཐོག་ཏུ་སྔས་དམའ་བོ་བཤམས་པ་ཞིག་མཐོང་ནས་དེ་དེ་ལ་འདུག་གོ །དེ་དེ་ལ་འདུག་ སྟེ་འགྲེང་ཞིང་ཕྱོགས་བཞི་ཀུན་ནས་བསིལ་བའི་རླུང་ལྡང་བར་འགྱུར་བ་དེ་བཞིན་དུ། ཤཱ་རིའི་བུ། ས་ཕྱོགས་དེར་བསིལ་བའི་རླུང་ལྡང་བར་འགྱུར་ཏེ། ཤཱ་རིའི་བུ། ས་ཕྱོགས་ དེ་ངོ་མཚར་དང༌། རྨད་ཀྱི་ཆོས་དྲུག་པ་འདི་དང་ལྡན་པར་འགྱུར་རོ། །གཞན་ཡང་ཤཱ་རིའི་བུ། འཇིག་རྟེན་གྱི་ཁམས་འབར། ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ ཏེ༑ འབར་བ་གཅིག་ཏུ་གྱུར་ནས་ཚིག་པ་དེར་ས་ཕྱོགས་གང་ན་དེ་བཞིན་གཤེགས་པ་འཆག་གམ། བཞེངས་སམ། བཞུགས་སམ། མནལ་བའི་ས་ཕྱོགས་དེར་ཆུ་ལས་སྐྱེས་ པའི་མེ་ཏོག་ཨུཏྤལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོ་སྐྱེ་བར་འགྱུར་ཏེ། ཤཱ་རིའི་བུ། ས་ཕྱོགས་དེ་ངོ་མཚར་དང༌། རྨད་ཀྱི་ཆོས་བདུན་པ་འདི་དང་ལྡན་པར་ འགྱུར་རོ། །གཞན་ཡང་ཤཱ་རིའི་བུ། འཇིག་རྟེན་གྱི་ཁམས་འབར། ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འབར་བ་གཅིག་ཏུ་གྱུར་ནས་ཚིག་པ་དེར་ས་ཕྱོགས་གང་ན་དེ་ བཞིན་གཤེགས་པ་འཆག་གམ། བཞེངས་སམ། བཞུགས་སམ། མནལ་བའི་ས་ཕྱོགས་དེར་ཐང་ལས་སྐྱེས་པའི་མེ་ཏོག་འདི་ལྟ་སྟེ། ཨ་དྷི་མུཀྟ་ཀ་དང༌། ཙམ་པ་ཀ་དང༌། སྣ་མའི་མེ་ ཏོག་དང༌། པ་རི་ཤ་ཀ་དང༌། མྱ་ངན་འཚང་དང༌། སྐྱ་སྣར་དང༌། དོང་ཀའི་མེ་ཏོག་དང༌། ཏ་ར་ནི་དང༌། ཀོ་ཏ་ར་ནི་ལ་སོགས་པ་ཐང་ལས་སྐྱེས་པའི་མེ་ཏོག་སྣ་ཚོགས་ཁ་དོག་དང་ལྡན་པ། དྲི་དང་ལྡན་པ་འབྱུང་བར་འགྱུར་ཏེ། ཤཱ་རིའི་བུ། ས་ཕྱོགས་དེ་ངོ་མཚར་དང་རྨད་ཀྱི་ཆོས་བརྒྱད་པ་འདི་དང་ལྡན་པར་འགྱུར་རོ། །གཞན་ཡང་ཤཱ་རིའི་བུ། འཇིག་རྟེན་གྱི་ཁམས་ འབར༑ ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འབར་བ་གཅིག་ཏུ་གྱུར་ནས་ཚིག་པ་དེར་ས་ཕྱོགས་གང་ན་དེ་བཞིན་གཤེགས་པ་འཆག་གམ། བཞེངས་སམ། བཞུགས་ སམ༑ མནལ་བའི་ས་ཕྱོགས་དེ་སྲ་ཞིང་མི་ཤིགས་པ། ས་གཞི་རྡོ་རྗེར་འགྱུར་ཏེ། ཤཱ་རིའི་བུ། ས་ཕྱོགས་དེ་ནི། ངོ་མཚར་དང༌། རྨད་ཀྱི་ཆོས་དགུ་པ་འདི་དང་ལྡན་པར་འགྱུར་རོ། །གཞན་ ཡང་ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལམ་མེ། རབ་ཏུ་ལམ་མེ། ཀུན་ཏུ་རབ་ཏུ་ལམ་མེ། འབར། ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འབར་ ༄༅། །པ་གཅིག་ཏུ་གྱུར་ནས་ཚིག་པ་དེར་ས་ཕྱོགས་གང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཆག་གམ། བཞེངས་ སམ༑ བཞུགས་སམ། མནལ་བའི་ས་ཕྱོགས་དེ་ལྷར་བཅས་པའི་འཇིག་རྟེན་དང༌། བདུད་དུ་བཅས་པ་དང༌། ཚངས་པར་བཅས་པ་དང༌། དགེ་སྦྱོང་དང་བྲམ་ཟེར་བཅས་པའི་སྐྱེ་རྒུ་ དང༑ ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱི་མཆོད་རྟེན་དུ་འགྱུར་ཏེ། ཤཱ་རིའི་བུ། ས་ཕྱོགས་དེ་ནི། ངོ་མཚར་དང༌། རྨད་ཀྱི་ཆོས་བཅུ་པོ་དེ་དག་དང་ལྡན་པར་ འགྱུར་རོ༑ ༑ཡང་ཤཱ་རིའི་བུ། དེ་བཞིན་གཤེགས་པས་ཆོས་ཀྱི་དབྱིངས་ཤིན་ཏུ་རྟོགས་ཏེ། དེ་རྟོགས་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ ཇི་ལྟར་མཉམ་པར་གཞག་པའི་སེམས་ལ་གཅིག་ཏུ་བདེ་བར་སོ་སོ་ཡང་དག་པར་མྱོང་བར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ནས་བསྐལ་བ་གངྒཱའི་ཀླུང་གི་བྱེ་ མ་སྙེད་དུ་བཞུགས་ཀྱང་དེ་བཞིན་གཤེགས་པའི་ཏིང་ངེ་འཛིན་ཡོངས་སུ་འབྲི་བ་མེད་པར་ངས་བཤད་དོ། །ཤཱ་རིའི་བུ། དེ་བཞིན་གཤེགས་པ་བསོད་སྙོམས་གཅིག་གིས་བསྐལ་ པར་གནས་སམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བརྒྱ་སྟོང་ཕྲག་བརྒྱའམ། བསྐལ་པ་བྱེ་བའམ། བསྐལ་པ་བྱེ་བ་བརྒྱའམ། བསྐལ་པ་བྱེ་བ་སྟོང་ངམ། བསྐལ་པ་བྱེ་བ་སྟོང་ཕྲག་བརྒྱའམ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ངམ། དེ་ལས་ལྷག་པར་ཡང་བཞུགས་སོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་ནི། ཕ་རོལ་ཏུ་ཕྱིན་པའི་མཆོག་གི་དམ་པའི་ཕ་རོལ་ཏུ་སོན་པ་སྟེ། ཤཱ་རིའི་བུ། དེ་བཞིན་གཤེགས་པ་ནི། དེ་ལྟར་རྫུ་འཕྲུལ་ཆེ་བ། དེ་ལྟར་ མཐུ་ཆེ་བ། དེ་ལྟར་དབང་ཆེ་བར་གྲགས་པའོ། །འདི་ལྟ་སྟེ། དཔེར་ན། ཤཱ་རིའི་བུ། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་ལྷའི་ནང་དུ་ལྷའི་བུ་སྐྱེས་པ་དེ་དམིགས་པ་གཅིག་ ལ་གནས་པའི་རྣམ་པར་ཤེས་པས་བསྐལ་པ་བརྒྱད་ཁྲི་བཞི་སྟོང་དུ་འདུག་སྟེ། བསམ་གཏན་གྱིས་ཚེའི་མཐའ་འཆི་བའི་དུས་མ་བྱས་ཀྱི་བར་དུ་རྣམ་པར་ཤེས་པ་དེ་ལས་རྣམ་པར་ཤེས་ པ་གཞན་དུ་མི་འགྱུར་རོ། །དེ་བཞིན་དུ་ཤཱ་རིའི་བུ། གང་གི་ནུབ་མོ་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང༌། གང་གི་ནུབ་མོ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དེའི་བར་དུ་དེ་བཞིན་གཤེགས་པ་ཏིང་ངེ་འཛིན་ལས་ཉམས་པ་མེད། སེམས་ འགྱུར་བ་མེད། སེམས་རྒྱུ་བ་མེད། སེམས་རྣམ་པར་རྒྱུ་བ་མེད། སེམས་རབ་ཏུ་རྒྱུ་བ་མེད། སེམས་རྒྱས་པ་མེད། སེམས་ཀྱི་འདྲེན་པ་མེད། སེམས་གཡེང་བ་མེད། སེམས་མཐོ་བ་མེད། ༄༅། །སེམས་དམའ་བ་མེད། སེམས་ཀུན་ཏུ་སྲུང་བ་མེད། སེམས་སྦེད་པ་མེད། སེམས་ཚིམ་པ་མེད། སེམས་མི་མཐུན་པ་མེད། སེམས་འདུད་པ་མེད། སེམས་ གཡོ་བ་མེད། སེམས་རབ་ཏུ་དགའ་བར་བྱེད་པ་མེད། སེམས་ཞུམ་པ་མེད། སེམས་རྟོག་པ་མེད། སེམས་རྣམ་པར་རྟོག་པ་མེད། སེམས་ཡོངས་སུ་རྟོག་པ་མེད། སེམས་ཅན་གྱི་ རྗེས་སུ་འབྲང་བའི་རྣམ་པར་ཤེས་པ་མེད། སེམས་མིག་ལ་གནས་པ་མེད། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ལ་གནས་པ་མེད། གཟུགས་ལ་གནས་པ་མེད། སེམས་ སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་ལ་གནས་པ་མེད། སེམས་ཆོས་ལ་འཇུག་པ་མེད། སེམས་རྣམ་པར་ཤེས་པ་ལ་འཇུག་པ་མེད། སེམས་འདས་པ་ལ་ཡང་མི་ལྟ། སེམས་མ་འོངས་པ་ལ་ཡང་མི་ལྟ། སེམས་ད་ལྟར་བྱུང་བ་ལ་ཡང་མི་ལྟ་སྟེ། དེ་ལྟར་ན། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ ཏིང་ངེ་འཛིན་ལ་གནས་ནས་སེམས་ལས་ཆོས་གང་ཡང་བཙལ་བ་མེད་མོད་ཀྱི། ལྷུན་གྱིས་གྲུབ་པའི་ཚུལ་གྱིས་ཆོས་ཐམས་ཅད་ལ་ཐོགས་པ་མེད་པའི་ཡེ་ཤེས་མཐོང་བར་འཇུག་ གོ །འདི་ལྟར་ཤཱ་རིའི་བུ། དེ་བཞིན་གཤེགས་པའི་ཏིང་ངེ་འཛིན་ནི། སེམས་དང༌། ཡིད་དང༌། རྣམ་པར་ཤེས་པ་དང་བྲལ་མོད་ཀྱི། གནས་ཀྱང་མི་འདོར་ཏེ། ལྷུན་གྱིས་གྲུབ་པའི་ ཚུལ་གྱིས་སངས་རྒྱས་ཀྱི་བྱ་བ་ཐམས་ཅད་ཀྱང་མཛད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པ་དེ་སྐད་གསུངས་ནས་སྟོན་པས་ཡང་འདི་སྐད་གསུངས་ སོ༑ ༑བསྐལ་པ་བརྒྱ་སྟོང་དཔག་ཏུ་མེད་ཅིང་གཞལ་ཡས་པར། །སྔོན་གྱི་སྲིད་པའི་འགྲོ་བར་བྱང་ཆུབ་སྤྱོད་སྤྱད་ཚེ། །ཚུལ་ཁྲིམས་དང་ནི་ཐོས་དང་ཏིང་འཛིན་བག་ཡོད་དང༌། །བཟོད་པ་ དག་ཀྱང་བྱང་ཆུབ་མཆོག་ཕྱིར་འདྲེན་པས་བསྒོམས། །རྒྱལ་བའི་རྟོགས་དང་འབྲས་བུ་དགེ་བ་འདི་འདྲ་བས། །ཚུལ་ཁྲིམས་ཤིན་ཏུ་ཡོངས་དག་འཇིག་རྟེན་ཀུན་གྱི་མཆོག །ཇི་ལྟར་ནམ་ མཁའ་དྲི་མེད་རྣམ་ཤེས་སྤྲོས་མེད་ལྟར། །སྟོབས་བཅུ་ཚུལ་ཁྲིམས་དྲི་མ་མེད་པ་ནམ་མཁའ་བཞིན། །གང་གི་ནུབ་མོ་རྒྱལ་བས་དང་པོ་བྱང་ཆུབ་རྟོགས། །གང་གི་ནུབ་མོ་ཐ་མར་མྱ་ངན་ འདས་གཤེགས་ཚེ། །སྟོབས་བཅུ་རྣམས་ལ་སེམས་རྒྱུ་རབ་ཏུ་རྒྱུ་བ་མེད། །དེ་བཞིན་བསམ་གཏན་ཏིང་འཛིན་ཉམས་པ་ནམ་ཡང་མེད། །སྟོབས་བཅུ་རྣམས་ཀྱི་ཚུལ་ཁྲིམས་ཕུང་པོ་ཉམས་ མེད་དེ༑ ༑རྫུ་འཕྲུལ་སྟོབས་དང་རྣམ་ཐར་ཉམས་པའི་ཆར་འགྱུར་མེད། །བསྐལ་པ་བརྒྱ་ཕྲག་སྟོང་དུ་སེམས་ནི་གཅིག་གིས་གནས། །འདྲེན་པ་ལ་ནི་རྟོག་དང་རྣམ་པར་རྟོག་པ་མེད། ། འདྲེན་པ་རྣམས་ཀྱི་རྣམ་རྟོག་སྤྱོད་ཡུལ་ནམ་མཁའ་འདྲ། །དུས་གསུམ་དག་ལ་སངས་རྒྱས་ཡེ་ཤེས་ཐོགས་མེད་འཇུག །སྟོབས་བཅུ་རྣམས་ལ་སེམས་ཡིད་རྣམ་པར་རྒྱུ་བ་དང༌། །རྟོག་ ༄༅། །དང་གཏོང་བ་མེད་པར་སངས་རྒྱས་སྲས་རྣམས་དད། །དེ་ལྟར་ཤཱ་རིའི་བུ། བྱང་ཆུབ་སེམས་དཔའ་རྣམས་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་ པའི་ཚུལ་ཁྲིམས་དང༌། ཏིང་ངེ་འཛིན་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས་རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་ མཚར་དང༌། རྨད་དུ་འདུ་ཤེས་བསྐྱེད་དོ། །ཤཱ་རིའི་བུ། ཇི་ལྟར་ན། བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་རྫུ་འཕྲུལ་གྱི་སྟོབས་བསམ་གྱིས་ མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག། སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་བསྐྱེད་ཅེ་ན། ཤཱ་ རིའི་བུ༑ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་འདི་སྐད་དུ་གནས་བརྟན་མཽ་དགལ་གྱི་བུ་ཆེན་པོ་འདི་ནི། ངའི་ཉན་ཐོས་རྫུ་འཕྲུལ་ཆེ་བའི་ནང་ ན་མཆོག་གོ། ཞེས་གསུངས་ཏེ། བྱང་ཆུབ་སེམས་དཔའ་ཉན་ཐོས་ཀྱི་རྫུ་འཕྲུལ་དེ་ལ་འཇལ་ཞིང་ཡོངས་སུ་དཔྱོད། བྱང་ཆུབ་སེམས་དཔའི་རྫུ་འཕྲུལ་ལ་ཡང་འཇལ་ཞིང་ཡོངས་སུ་ དཔྱོད་དོ། །གཞལ་ཏེ་ཡོངས་སུ་དཔྱད་ནས་བྱང་ཆུབ་སེམས་དཔའི་རྫུ་འཕྲུལ་དང་མཚུངས་ཤིང་མཉམ་པར་མ་མཐོང་ངོ༌། །བྱང་ཆུབ་སེམས་དཔའི་རྫུ་འཕྲུལ་ལ་གཞལ་ཞིང་ཡོངས་ སུ་དཔྱད་ནས་དེ་བཞིན་གཤེགས་པའི་རྫུ་འཕྲུལ་ལ་འཇལ་ཞིང་ཡོངས་སུ་དཔྱོད་དོ། །གཞལ་ཏེ་ཡོངས་སུ་དཔྱད་ནས་དེ་བཞིན་གཤེགས་པའི་རྫུ་འཕྲུལ་དང་མཚུངས་ཤིང་མཉམ་པར་མ་ མཐོང་ནས་དེ་འདི་སྙམ་དུ་སེམས་ཏེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་རྫུ་འཕྲུལ་ནི། བསམ་གྱིས་མི་ཁྱབ་བོ། །སྙམ་ནས་དེ་བཞིན་གཤེགས་པའི་རྫུ་འཕྲུལ་ ཡོངས་སུ་བསྒྲུབ་པར་བྱ་བའི་ཕྱིར་རྒྱ་ཆེར་བརྩོན་འགྲུས་རྩོམ་མོ། །ཤཱ་རིའི་བུ། དེ་བཞིན་གཤེགས་པའི་རྫུ་འཕྲུལ་ལས་བརྩམས་ཏེ་དཔེ་ཙམ་དུ་བྱ་བ་དེ་བཞིན་གཤེགས་པ་ལས་ཁྱོད་ ཉན་པར་འདོད་དམ། བཅོམ་ལྡན་འདས། དེའི་དུས་འདི་ལགས་སོ། །བདེ་བར་གཤེགས་པ། དེའི་ཚོད་འདི་ལགས་སོ། །འདི་ལྟར་བཅོམ་ལྡན་འདས་ཀྱིས་དགེ་སློང་རྣམས་ལ་དེ་བཞིན་ གཤེགས་པའི་རྫུ་འཕྲུལ་ལས་བརྩམས་ཏེ་དཔེ་བཤད་ན། དགེ་སློང་རྣམས་བཅོམ་ལྡན་འདས་ལས་དེ་ཐོས་ནས་དེ་བཞིན་དུ་འཛིན་པར་འགྱུར་རོ། །བཅོམ་ལྡན་འདས་ཀྱིས་བཀའ་ སྩལ་པ༑ དེའི་ཕྱིར་ཤཱ་རིའི་བུ། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་བཤད་དོ། །བཅོམ་ལྡན་འདས། དེ་བཞིན་ནོ། །ཞེས་གསོལ་ནས་ཚེ་དང་ལྡན་པ་ཤཱ་རིའི་བུ་བཅོམ་ ལྡན་འདས་ཀྱི་ལྟར་ཉན་པ་དང༌། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། དེ་ཇི་སྙམ་དུ་སེམས། གནས་བརྟན་མཽ་དགལ་གྱི་བུ་ཆེན་པོ་རྫུ་འཕྲུལ་ཆེ་བ་ ༄༅། །ཡིན་ནམ། གསོལ་པ། དགེ་སློང་ཉན་ཐོས་རྫུ་འཕྲུལ་ཆེ་བའི་ནང་ན་འདི་ལྟར་གནས་བརྟན་མཽ་དགལ་གྱི་བུ་ཆེན་པོ་འདི་ནི། མཆོག་གོ །ཞེས་བདག་གིས་ བཅོམ་ལྡན་འདས་ལ་མངོན་སུམ་དུ་ཐོས་ཏེ། མངོན་སུམ་དུ་བཟུང་ངོ༌། །བཀའ་སྩལ་པ། ཤཱ་རིའི་བུ། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཉན་ཐོས་རྫུ་ འཕྲུལ་ཆེན་པོ་མཽ་དགལ་གྱི་བུ་ཆེན་པོ་ལྟ་བུས་འདི་ལྟ་སྟེ། དཔེར་ན། བུ་རམ་ཤིང་སྟུག་པོའམ། འདམ་བུ་སྟུག་པོའམ། འོད་མ་སྟུག་པོའམ། ཏིལ་གྱི་ཞིང་ངམ། འབྲས་ཀྱི་ ཞིང་བཞིན་དུ་གང་བར་གྱུར་ལ། དེ་ལྟར་གཅིག་ཏུ་འདུས་པའི་ཉན་ཐོས་ཀྱི་ཚོགས་དེ་ལྟ་བུས་མཐུ་དང༌། བརྩོན་འགྲུས་ཐམས་ཅད་དང༌། རྫུ་འཕྲུལ་དང༌། ཆོ་འཕྲུལ་གྱི་ སྟོབས་ཐམས་ཅད་བསྟན་ཀྱང་དེ་བཞིན་གཤེགས་པའི་ཆོ་འཕྲུལ་གྱི་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆར་ཡང༌། བརྒྱ་སྟོང་གི་ཆར་ཡང༌། བྱེ་བའི་ཆར་ཡང༌། བྱེ་བ་ བརྒྱའི་ཆར་ཡང༌། བྱེ་བ་སྟོང་གི་ཆར་ཡང༌། བྱེ་བ་བརྒྱ་སྟོང་གི་ཆར་ཡང༌། གྲངས་སུ་ཡང༌། ཆར་ཡང༌། བགྲང་བར་ཡང༌། དཔེར་ཡང༌། རྒྱུར་ཡང་ཉེ་བར་མི་འགྲོའོ། །དེ་ཅིའི་ ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། རྫུ་འཕྲུལ་དང༌། ཆོ་འཕྲུལ་གྱི་དམ་པའི་ཕ་རོལ་ཏུ་ཕྱིན་པའོ། །ཤཱ་ རིའི་བུ། གལ་ཏེ་དེ་བཞིན་གཤེགས་པས་ས་འདི་ལ་ཡུངས་ཀར་གྱི་འབྲུ་གཅིག་བཞག་ན། དེ་བཞིན་གཤེགས་པས་ཡུངས་ཀར་གྱི་འབྲུ་བཞག་པ་དེ་ཡང་དེ་ལྟ་བུའི་ཉན་ཐོས་ཀྱི་ཚོགས་ ཐམས་ཅད་ཀྱི་མཐུ་དང༌། སྟོབས་དང༌། བརྩོན་འགྲུས་དང༌། དྲག་ཤུལ་ཐམས་ཅད་དང༌། རྫུ་འཕྲུལ་དང༌། ཆོ་འཕྲུལ་གྱི་སྟོབས་ཐམས་ཅད་བསྟན་ཀྱང་དེ་བཞིན་གཤེགས་པས་བཞག་ པའི་ཡུངས་ཀར་གྱི་འབྲུ་སྐྲའི་རྩེ་མོ་གཅིག་ཙམ་ཡང་བསྐྱོད་པར་མི་ནུས་སོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་ནི། རྫུ་འཕྲུལ་གྱི་ཕ་རོལ་ཏུ་ཕྱིན་པའི་དམ་པའི་ཕ་རོལ་ཏུ་སོན་པའོ། །ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལྟ་ཞོག་ལ། ཤཱ་རིའི་བུ། ཤར་ཕྱོགས་ ཀྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་ཡོད་པ་དང༌། དེ་བཞིན་དུ་ལྷོ་དང༌། ནུབ་དང༌། བྱང་དང༌། འོག་དང༌། སྟེང་དང༌། ཕྱོགས་མཚམས་དང༌། ཕྱོགས་ བཅུ་ཀུན་གྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་ཙམ་སྒོ་ང་ལས་སྐྱེས་པའམ། མངལ་ནས་སྐྱེས་པ་ནས་འདུ་ཤེས་མེད་འདུ་ཤེས་མེད་མིན་གྱི་བར་གྱི་ སེམས་ཅན་དེ་དག་ཐམས་ཅད་ཡོངས་སུ་བརྟག་པ་བཟུང་སྟེ་ཉན་ཐོས་རྫུ་འཕྲུལ་ཆེན་པོ་འདི་ལྟ་སྟེ། དཔེར་ན། མཽ་དགལ་གྱི་བུ་ཆེན་པོ་ལྟ་བུར་གྱུར་ལ། ཤཱ་རིའི་བུ། དེ་ལྟ་བུའི་ཉ་ ༄༅། །ཐོས་ཀྱི་ཚོགས་ཐམས་ཅད་ཀྱི་སྟོབས་དང༌། མཐུ་དང༌། དྲག་ཤུལ་ཐམས་ཅད་དང༌། རྫུ་འཕྲུལ་དང༌། ཆོ་འཕྲུལ་གྱི་སྟོབས་ཐམས་ཅད་བསྟན་ཀྱང་ཡུངས་ འབྲུ་ཡང་གདེག་པར་མི་ནུས་ཏེ། ཐ་ན་སྐྲའི་རྩེ་མོའི་ཆ་ཙམ་ཡང་བསྐྱོད་པར་མི་ནུས་སོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་ནི། རྫུ་འཕྲུལ་གྱི་ཕ་རོལ་ཏུ་ཕྱིན་ པའི་དམ་པའི་ཕ་རོལ་ཏུ་ཕྱིན་པ་སྟེ། ཤཱ་རིའི་བུ། དེ་བཞིན་གཤེགས་པ་ནི། དེ་ལྟར་རྫུ་འཕྲུལ་ཆེ། དེ་ལྟར་མཐུ་ཆེ། དེ་ལྟར་དབང་ཆེ་བར་གྲགས་པའོ། །དེ་ནས་ཡང་བཅོམ་ ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ། ཁྱོད་ཀྱིས་ནམ་འཇིག་པའི་བསྐལ་པའི་དུས་ཀྱི་ཚེར་གྱུར་པ་དེ་ན་ཀུན་ཏུ་འཇོམས་པ་ཞེས་བྱ་བའི་ རླུང་ལྡང་སྟེ། རླུང་དེ་ལངས་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་རིའི་རྒྱལ་པོ་རི་རབ་དང༌། ཁོར་ཡུག་གི་རི་དང༌། ཁོར་ཡུག་གི་རི་ཆེན་པོ་དང༌། གླིང་ ཆེན་པོ་བཞི་དང༌། གླིང་བརྒྱད་ཁྲི་དང༌། རི་ཆེན་པོ་དང༌། རྒྱ་མཚོ་ཆེན་པོ་ཡང་དཔག་ཚད་སྲིད་དུ་མངོན་པར་འཕེན་ཅིང་རབ་ཏུ་འཐོར་བར་འགྱུར་བ་ཁྱོད་ཀྱིས་ཐོས་སམ། གསོལ་པ། བདག་གིས་བཅོམ་ལྡན་འདས་ལས་མངོན་སུམ་དུ་ཐོས་ཏེ་མངོན་སུམ་དུ་བཟུང་ངོ༌། །བཀའ་སྩལ་པ། ཤཱ་རིའི་བུ། ནམ་འཇིག་པའི་རླུང་འབྱུང་བ་དེ་ན་ཀུན་ཏུ་ འཇོམས་པ་ཆེན་པོ་ཞེས་བྱ་བའི་རླུང་ལྡང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རི་རབ་དང་བཅས། ཁོར་ཡུག་དང་བཅས། རི་དང་བཅས། རྒྱ་མཚོ་དང་བཅས་ པ་དཔག་ཚད་བརྒྱར་མངོན་པར་འཕེན་ཞིང་རབ་ཏུ་འཐོར། དཔག་ཚད་ཉིས་བརྒྱ་དང༌། དཔག་ཚད་སུམ་བརྒྱ་དང༌། དཔག་ཚད་བཞི་བརྒྱ་དང༌། དཔག་ཚད་ལྔ་བརྒྱ་དང༌། དཔག་ཚད་ སྟོང་དང༌། དཔག་ཚད་ཉིས་སྟོང་དང༌། སུམ་སྟོང་དང༌། བཞི་སྟོང་དང༌། ལྔ་སྟོང་དུ་མངོན་པར་འཕེན་ཞིང་རབ་ཏུ་འཐོར། དཔག་ཚད་བརྒྱ་ཕྲག་མང་པོ་དང༌། དཔག་ཚད་སྟོང་ཕྲག་མང་ པོ་དང༌། དཔག་ཚད་བརྒྱ་སྟོང་ཕྲག་མང་པོར་མངོན་པར་འཕེན་ཞིང་རབ་ཏུ་འཐོར་ཏེ། དེ་དག་གི་རྡུལ་ཡང་མི་སྣང་ན། རི་དང་རྡོ་རྣམས་ལྟ་ཅི་སྨོས། འཐབ་བྲལ་གྱི་ལྷ་རྣམས་ཀྱི་གཞལ་ མེད་ཁང་རྣམས་ཀྱང་དཀྲུགས། བཅོམ། རབ་ཏུ་གཏོར་ཏེ། དེ་དག་གི་རྡུལ་ཡང་མི་སྣང་ན། གཞལ་མེད་ཁང་རྣམས་ལྟ་ཅི་སྨོས། དགའ་ལྡན་པ་རྣམས་དང༌། འཕྲུལ་དགའ་བ་རྣམས་ དང༌། གཞན་འཕྲུལ་དབང་བྱེད་ཀྱི་བདུད་ཀྱི་རིས་རྣམས་དང༌། ཚངས་པ་རྣམས་དང༌། འོད་གསལ་བ་རྣམས་དང༌། དགེ་རྒྱས་ཀྱི་ལྷ་རྣམས་ཀྱི་གཞལ་མེད་ཁང་གི་བར་དུ་དེ་བཞིན་དུ་རྒྱས་ པར་བྱའོ། །ཇི་ལྟར་འཐབ་བྲལ་གྱི་དཀྲུགས། བཅོམ། རབ་ཏུ་གཏོར་ཏེ། དཀྲུགས། བཅོམ། རབ་ཏུ་གཏོར་བ་དེ་དག་གི་རྡུལ་ཡང་མི་སྣང་ན། གཞལ་མེད་ཁང་དང་ར་བ་རྣམས་ ༄༅། །ལྟ་ཅི་སྨོས། ཤཱ་རིའི་བུ། གལ་ཏེ་དེ་ལྟ་བུའི་རླུང་ལངས་ཀྱང་དེས་དེ་བཞིན་གཤེགས་པའི་ཆོས་གོས་ཀྱི་མཐའ་མའི་རྩེ་མོ་ཙམ་ཡང་གཡོས་པར་མི་ནུས་ན། ཆོས་ གོས་སམ། ཆོས་གོས་ཀྱི་གྲྭ་ལྟ་ཅི་སྨོས། དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། བསམ་གྱིས་མི་ཁྱབ་པའི་རྫུ་འཕྲུལ་ དང༌། བསམ་གྱིས་མི་ཁྱབ་པའི་སྤྱོད་ལམ་དང༌། བསམ་གྱིས་མི་ཁྱབ་པའི་ལམ་དང༌། བསམ་གྱིས་མི་ཁྱབ་པའི་སྙིང་རྗེ་ཆེན་པོ་དང་ལྡན་ནོ། །ཤཱ་རིའི་བུ། གལ་ཏེ་འདི་ལྟ་བུའི་རླུང་གི་ དཀྱིལ་འཁོར་ཤར་ཕྱོགས་དང༌། ལྷོ་དང༌། ནུབ་དང༌། བྱང་དང༌། འོག་དང༌། སྟེང་དང༌། ཕྱོགས་མཚམས་དང༌། ཕྱོགས་བཅུ་ཀུན་གྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ དུ་རླུང་མངོན་པར་ལྡང་ཡང༌། ཤཱ་རིའི་བུ། འཇིག་རྟེན་གྱི་ཁམས་འཇིག་པར་བྱེད་པའི་རླུང་གི་དཀྱིལ་འཁོར་དེ་དེ་བཞིན་གཤེགས་པའི་སོར་མོའི་རྩེ་མོས་བཟློག་ཀྱང་དེ་བཞིན་ གཤེགས་པའི་རྫུ་འཕྲུལ་དང༌། ཆོ་འཕྲུལ་གྱི་སྟོབས་བྲི་བ་ཡང་མེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་རྫུ་འཕྲུལ་ བསམ་གྱིས་མི་ཁྱབ་སྟེ། དེ་ལ་བྱང་ཆུབ་སེམས་དཔའ་མངོན་པར་དད། ཡིད་ཆེས། རྟོག། སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཁམས་གསུམ་སེམས་ཅན་ཇི་སྙེད་ པ༑ ༑གནས་བརྟན་མོ་དགལ་བུ་བཞིན་དུ། །རྫུ་འཕྲུལ་ཕ་རོལ་ཕྱིན་པ་ཡི། །ཉན་ཐོས་མཁས་པར་ཀུན་གྱུར་པས། །རྫུ་འཕྲུལ་ཐམས་ཅད་རབ་བསྟན་ཀྱང༌། །དེ་བཞིན་གཤེགས་པས་ ས་འདི་ལ། །ཡུངས་ཀར་གྱི་ནི་འབྲུ་བཞག་པ། །གཡོ་བར་བྱ་བར་མི་ནུས་སོ། །གང་རྣམས་ཕྱོགས་བཅུའི་འཇིག་རྟེན་ཁམས། །གངྒཱའི་ཀླུང་གི་བྱེ་མ་སྙེད། །རྣམ་འཐོར་རླུང་དང་ཀུན་ འཇོམས་པ། །རླུང་རྣམས་ཕྱོགས་བཅུར་ལངས་པར་གྱུར། །དེ་ལྟ་བུ་ཡི་རླུང་ཆེན་དེས། །ཐམས་ཅད་གཟིགས་པའི་ཆོས་གོས་ཀྱི། །མཐའ་མ་སྐྲ་ཡི་རྩེ་ཙམ་ཡང༌། །གཡོ་བར་བྱ་ བར་མི་ནུས་སོ། །ཐུབ་པ་ཆེན་པོའི་སྤུ་གཅིག་གིས། །རླུང་དེ་རབ་ཏུ་ཟློག་པར་མཛད། །སངས་རྒྱས་རྫུ་འཕྲུལ་འདི་འདྲ་བ། །མཐའ་ཡས་པ་ནི་ནམ་མཁའ་བཞིན། །དེ་ལྟར་ཤཱ་རིའི་ བུ། བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་རྫུ་འཕྲུལ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས་པ་ནས་ངོ་མཚར་དང༌། རྨད་ ཀྱི་བར་དུ་འདུ་ཤེས་བསྐྱེད་དོ། །ཡང་ཤཱ་རིའི་བུ། ཇི་ལྟར་ན། བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བསམ་གྱིས་མི་ཁྱབ་པ་ ༄༅། །ལ་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ ཤེས་བསྐྱེད་ཅེ་ན། ཤཱ་རིའི་བུ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་ནི། བཅུ་པོ་འདི་དག་སྟེ། སྟོབས་དེ་དག་དང་ལྡན་པས་དེ་བཞིན་གཤེགས་པ་ ཁྱུ་མཆོག་གི་གནས་སུ་དམ་འཆའ་ཞིང༌། དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་འཇིག་རྟེན་འདིར་ཆོས་དང་མཐུན་པར་མ་བསྐོར་བའི་ ཚངས་པའི་འཁོར་ལོ་རབ་ཏུ་བསྐོར་རོ། །བཅུ་གང་ཞེ་ན། འདི་ལྟ་སྟེ། གནས་དང་གནས་མ་ཡིན་པ་མཁྱེན་པའི་སྟོབས་དང༌། ལས་དང་རྣམ་པར་སྨིན་པ་མཁྱེན་པའི་སྟོབས་ དང༌། མོས་པ་དུ་མ་དང་མོས་པ་སྣ་ཚོགས་མཁྱེན་པའི་སྟོབས་དང༌། ཁམས་དུ་མ་དང་ཁམས་སྣ་ཚོགས་མཁྱེན་པའི་སྟོབས་དང༌། དབང་པོ་དང་བརྩོན་འགྲུས་ཀྱི་རིམ་པ་ མཁྱེན་པའི་སྟོབས་དང༌། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང༌། བསམ་གཏན་དང་རྣམ་པར་ཐར་པ་དང་ཏིང་ངེ་འཛིན་དང་སྙོམས་པར་འཇུག་པའི་ཀུན་ ནས་ཉོན་མོངས་པ་དང་རྣམ་པར་བྱང་བ་དང་ལྡང་བ་མཁྱེན་པའི་སྟོབས་དང༌། སྔོན་གྱི་གནས་རྗེས་སུ་དྲན་པ་མངོན་སུམ་དུ་བྱེད་པ་མཁྱེན་པའི་སྟོབས་དང༌། འཆི་འཕོ་བ་དང༌། སྐྱེ་བ་མངོན་དུ་བྱེད་པ་མཁྱེན་པའི་སྟོབས་དང༌། ཟག་པ་ཟད་པ་མངོན་སུམ་དུ་བྱེད་པ་མཁྱེན་པའི་སྟོབས་སོ། །ཤཱ་རིའི་བུ། དེ་བཞིན་གཤེགས་པའི་སྟོབས་བཅུ་པོ་དེ་དག་སྟེ། སྟོབས་དེ་ དག་དང་ལྡན་པའི་དེ་བཞིན་གཤེགས་པ་འཁོར་གྱི་ནང་དུ་ཡང་དག་པར་སེངྒེའི་སྒྲ་སྒྲོག་ཅིང་ཁྱུ་མཆོག་གི་གནས་སུ་ཞལ་གྱིས་འཆེ་བ་ནས་སུས་ཀྱང་འཇིག་རྟེན་དུ་ཆོས་དང་མཐུན་པར་ མ་བསྐོར་བ་ཚངས་པའི་འཁོར་ལོ་རབ་ཏུ་བསྐོར་བའི་བར་དུའོ། །དེ་ལ་དེ་བཞིན་གཤེགས་པའི་གནས་དང་གནས་མ་ཡིན་པ་མཁྱེན་པའི་སྟོབས་གང་ཞེ་ན། འདི་ལ་ཤཱ་རིའི་བུ། དེ་བཞིན་ གཤེགས་པས་བླ་ན་མེད་པའི་དེ་བཞིན་གཤེགས་པའི་ཡེ་ཤེས་ཀྱི་སྟོབས་ཀྱིས་གནས་ཀྱང་གནས་སུ། །གནས་མ་ཡིན་པ་ཡང་གནས་མ་ཡིན་པར་ཡང་དག་པ་ཇི་ལྟ་བ་བཞིན་དུ་རབ་ཏུ་ མཁྱེན་ཏོ། །དེ་ལ་གནས་གང༌། གནས་མ་ཡིན་པ་གང་ཞེ་ན། ཤཱ་རིའི་བུ། གང་ལུས་ཀྱིས་ཉེས་པར་སྤྱད་པའི་རྣམ་པར་སྨིན་པ་འདོད་པ་དང༌། སྡུག་པ་དང༌། དགའ་བ་དང༌། ཡིད་ དུ་འོང་བ་མངོན་པར་འགྲུབ་པ་དེ་ནི། གནས་མ་ཡིན་ཏེ། སྐབས་མེད་དོ། །གང་ལུས་ཀྱིས་ཉེས་པར་སྤྱད་པ་དང༌། ངག་གིས་ཉེས་པར་སྤྱད་པ་དང༌། ཡིད་ཀྱིས་ཉེས་པར་སྤྱད་པའི་རྣམ་པར་ སྨིན་པ་མི་འདོད་པ་དང༌། མི་སྡུག་པ་དང༌། མི་དགའ་བ་དང༌། ཡིད་དུ་མི་འོང་བ་མངོན་པར་འགྲུབ་པ་དེ་ནི། གནས་ཡིན་ཏེ། སྐབས་ཡོད་དོ། །གང་ལུས་ཀྱིས་ལེགས་པར་སྤྱད་པ་དང༌། ༄༅། །ངག་གིས་ལེགས་པར་སྤྱད་པ་དང༌། ཡིད་ཀྱིས་ལེགས་པར་སྤྱད་པའི་རྣམ་པར་སྨིན་པ་མི་འདོད་པ་དང༌། མི་སྡུག་པ་དང༌། མི་དགའ་བ་དང༌། ཡིད་དུ་མི་འོང་ བ་མངོན་པར་འགྲུབ་པ་དེ་ནི། གནས་མ་ཡིན་ཏེ། སྐབས་མེད་དོ། །གང་ལུས་ཀྱིས་ལེགས་པར་སྤྱད་པ་དང༌། ངག་གིས་ལེགས་པར་སྤྱད་པ་དང༌། ཡིད་ཀྱིས་ལེགས་པར་སྤྱད་པའི་ རྣམ་པར་སྨིན་པ་འདོད་པ་དང༌། སྡུག་པ་དང༌། དགའ་བ་དང༌། ཡིད་དུ་འོང་བ་མངོན་པར་འགྲུབ་པ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། འདི་ནི། གནས་མ་ ཡིན་ཞིང་སྐབས་མེད་དེ། གང་སེར་སྣས་ལོངས་སྤྱོད་ཆེན་པོ་མངོན་པར་འགྲུབ་པ་དེ་ནི། གནས་མ་ཡིན་ནོ། །གང་སེར་སྣས་དབུལ་པོར་འགྱུར་བ་དེ་ནི། གནས་ཡིན་ཏེ། སྐབས་ ཡོད་དོ༑ ༑ཤཱ་རིའི་བུ། འདི་ནི། གནས་མ་ཡིན་ཞིང་སྐབས་མེད་དེ། གང་སྦྱིན་པས་དབུལ་པོར་འགྱུར་བ་དེ་ནི། གནས་མ་ཡིན་ནོ། །གང་སྦྱིན་པས་ལོངས་སྤྱོད་ཆེན་པོ་མངོན་ པར་འགྲུབ་པ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། འདི་ནི། གནས་མ་ཡིན་ཞིང་སྐབས་མེད་དེ། གང་འཆལ་པའི་ཚུལ་ཁྲིམས་ཀྱིས་ལྷ་དང༌། མིར་སྐྱེ་བ་རྙེད་པ་དེ་ནི། གནས་མ་ཡིན་ནོ། །གང་འཆལ་བའི་ཚུལ་ཁྲིམས་ཀྱིས་སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དུ་སྐྱེ་བ་དེ་ནི། གནས་ཡིན་ཏེ། སྐབས་ ཡོད་དོ༑ ༑ཤཱ་རིའི་བུ། འདི་ནི། གནས་མ་ཡིན་ཞིང་སྐབས་མེད་དེ། གང་ཚུལ་ཁྲིམས་ཀྱིས་སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དུ་སྐྱེ་བ་ དེ་ནི༑ གནས་མ་ཡིན་ནོ། །གང་ཚུལ་ཁྲིམས་ཀྱིས་ལྷ་དང༌། མིར་སྐྱེ་བ་ཐོབ་པ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་གནོད་ སེམས་ཀྱིས་གཟུགས་མཛེས་པ་མངོན་པར་འགྲུབ་པ་དེ་ནི། གནས་མ་ཡིན་ནོ། །གང་གནོད་སེམས་ཀྱིས་གཟུགས་མི་སྡུག་པ་མངོན་པར་འགྲུབ་པ་དེ་ནི། གནས་ཡིན་ཏེ། སྐབས་ ཡོད་དོ༑ ༑ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་བཟོད་པས་གཟུགས་མི་སྡུག་པ་མངོན་པར་འགྲུབ་པ་དེ་ནི། གནས་མ་ཡིན་ནོ། །གང་བཟོད་པས་གཟུགས་མཛེས་པ་ མངོན་པར་འགྲུབ་པ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་ལེ་ལོས་འཐོབ་པ་དང༌། མངོན་པར་རྟོགས་པར་འགྱུར་བ་དེ་ནི། གནས་མ་ཡིན་ནོ། །གང་ལེ་ལོས་འཐོབ་པ་དང༌། མངོན་པར་རྟོགས་པར་མི་འགྱུར་བ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་ བརྩོན་འགྲུས་ཀྱིས་འཐོབ་པ་དང༌། མངོན་པར་རྟོགས་པར་མི་འགྱུར་བ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་སེམས་གཡེང་ ༄༅། །བས་ངེས་པར་གྱུར་པ་ལ་འཇུག་པར་འགྱུར་བ་དེ་ནི། གནས་མ་ཡིན་ནོ། །གང་སེམས་གཡེང་བས་ངེས་པར་གྱུར་པ་ལ་མི་འཇུག་པ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་སེམས་རྩེ་གཅིག་པ་ངེས་པར་གྱུར་པ་ལ་འཇུག་པར་མི་འགྱུར་བ་དེ་ནི། གནས་མ་ཡིན་ནོ། །གང་སེམས་ རྩེ་གཅིག་པ་ངེས་པར་གྱུར་པ་ལ་འཇུག་པར་འགྱུར་བ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་འཆལ་བའི་ཤེས་རབ་ཀྱིས་བག་ ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་འཇོམས་པ་དེ་ནི། གནས་མ་ཡིན་ནོ། །གང་འཆལ་བའི་ཤེས་རབ་ཀྱིས་བག་ཆགས་ཀྱི་མཚམས་སྦྱོར་བ་ཐམས་ཅད་ ཡང་དག་པར་འཇོམས་པར་མི་འགྱུར་བ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་ཤེས་རབ་ཀྱིས་བག་ཆགས་ཀྱི་མཚམས་ སྦྱོར་བ་ཐམས་ཅད་ཡང་དག་པར་འཇོམས་པར་མི་འགྱུར་བ་དེ་ནི། གནས་མ་ཡིན་ནོ། །གང་ཤེས་རབ་ཀྱིས་བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་འཇོམས་ པ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་སྲོག་གཅོད་པའི་སྐྱེས་བུ་གང་ཟག་སྲོག་གཅོད་པའི་རྒྱུས་ཚེ་རིང་པོར་འགྱུར་ པ་འདི་ནི། གནས་མ་ཡིན་ནོ། །ཡང་ཤཱ་རིའི་བུ། སྲོག་གཅོད་པའི་སྐྱེས་བུ་གང་ཟག་ཚེ་ཐུང་བར་འགྱུར་བ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་ སྐབས་མེད་དེ། གང་སྲོག་གཅོད་པ་སྤངས་པའི་སྐྱེས་བུ་གང་ཟག་ཚེ་ཐུང་བར་འགྱུར་བ་དེ་ནི། གནས་མ་ཡིན་ནོ། །ཡང་ཤཱ་རིའི་བུ། གང་སྲོག་གཅོད་པ་སྤངས་པའི་སྐྱེས་བུ་གང་ཟག་ ཚེ་རིང་པོར་འགྱུར་བ་དེ་ནི། གནས་ཡིན་ཏེ། སྐབས་ཡོད་དོ། །ཡང་ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་མ་བྱིན་པར་ལེན་པའི་སྐྱེས་བུ་གང་ཟག་ལོངས་སྤྱོད་ཆེན་པོ་ རྙེད་པ་དེ་ནི། གནས་མ་ཡིན་ནོ། །ཡང་ཤཱ་རིའི་བུ། མ་བྱིན་པར་ལེན་པའི་སྐྱེས་བུ་གང་ཟག་དབུལ་པོར་འགྱུར་བ་དེ་ནི། གནས་ཡིན་ཏེ། སྐབས་ཡོད་དོ། །ཡང་ཤཱ་རིའི་བུ། གནས་ མ་ཡིན་ཞིང་སྐབས་མེད་དེ། གང་མ་བྱིན་པར་ལེན་པ་སྤངས་པའི་སྐྱེས་བུ་གང་ཟག་དབུལ་པོར་འགྱུར་བ་དེ་ནི། གནས་མ་ཡིན་ནོ། །གང་མ་བྱིན་པར་ལེན་པ་སྤངས་པའི་སྐྱེས་ བུ་གང་ཟག་ལོངས་སྤྱོད་ཆེན་པོར་འགྱུར་བ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་འདོད་པ་ལ་ལོག་པར་གཡེམ་པའི་ སྐྱེས་བུ་གང་ཟག་ཆུང་མ་འགྲན་ཟླ་མེད་པ་རྙེད་པ་དེ་ནི། གནས་མ་ཡིན་ནོ། །ཡང་ཤཱ་རིའི་བུ། གང་འདོད་པ་ལ་ལོག་པར་གཡེམ་པའི་སྐྱེས་བུ་གང་ཟག་ཆུང་མ་འགྲན་ཟླ་ཡོད་པ་ ༄༅། །རྙེད་པ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་འདོད་པ་ལ་ལོག་པར་གཡེམ་པ་སྤངས་པའི་སྐྱེས་བུ་ གང་ཟག་ཆུང་མ་འགྲན་ཟླ་དང་བཅས་པ་རྙེད་པ་དེ་ནི། གནས་མ་ཡིན་ནོ། །ཡང་ཤཱ་རིའི་བུ། འདོད་པ་ལ་ལོག་པར་གཡེམ་པ་སྤངས་པའི་སྐྱེས་བུ་གང་ཟག་ཆུང་མ་འགྲན་ཟླ་མེད་ པ་རྙེད་པ་དེ་ནི། གནས་ཡིན་ཏེ། སྐབས་ཡོད་དོ། །གོང་མ་བཞིན་དུ་སྦྱར་ཏེ། དགེ་བ་དང༌། མི་དགེ་བའི་ལས་ཀྱི་ལམ་གསུམ་པོ་དེ་དག་བསྟན་པ་དེ་བཞིན་དུ་མི་དགེ་བ་བཅུའི་ལས་ ཀྱི་ལམ་ཐམས་ཅད་ལའང་བྱའོ། །གང་བརྫུན་དུ་སྨྲ་བ་དེས་སྐུར་བ་ཐོབ་པར་མི་འགྱུར་བ་དེ་ནི། གནས་མ་ཡིན་ནོ། །གང་ཐོབ་པར་འགྱུར་བ་དེ་ནི། གནས་སོ། །གང་བརྫུན་དུ་སྨྲ་བ་ སྤངས་པས་སྐུར་བ་ཐོབ་པར་འགྱུར་བ་དེ་ནི། གནས་མ་ཡིན་ནོ། །གང་ཐོབ་པར་མི་འགྱུར་བ་དེ་ནི། གནས་སོ། །གང་ཕྲ་མ་ཟེར་བས་མི་ཕྱེད་པའི་གཡོག་རྙེད་པ་དེ་ནི། གནས་ མ་ཡིན་ནོ། །གང་རྙེད་པར་མི་འགྱུར་བ་དེ་ནི། གནས་སོ། །གང་ཕྲ་མ་སྤངས་པས་གཡོག་ཕྱེད་པར་འགྱུར་བ་དེ་ནི། གནས་མ་ཡིན་ནོ། །གང་གཡོག་མི་ཕྱེད་པ་རྙེད་པ་དེ་ནི། གནས་ སོ༑ ༑གང་ཚིག་རྩུབ་པོ་སྨྲ་བས་རྟག་པར་ཡིད་དུ་འོང་བ་ཐོས་པར་འགྱུར་བ་དེ་ནི། གནས་མ་ཡིན་ནོ། །གང་ཡིད་དུ་མི་འོང་བ་ཐོས་པར་འགྱུར་བ་དེ་ནི། གནས་སོ། །གང་ཚིག་ རྩུབ་པོ་སྤངས་པས་ཡིད་དུ་མི་འོང་བ་ཐོབ་པར་འགྱུར་བ་དེ་ནི། གནས་མ་ཡིན་ནོ། །གང་ཡིད་དུ་འོང་བ་ཐོབ་པར་འགྱུར་བ་དེ་ནི། གནས་སོ། །གང་ཚིག་ཀྱལ་བ་སྨྲ་བས་ཤིན་ཏུ་གདོན་ མི་ཟ་བའི་སྤོབས་པར་འགྱུར་བ་ནི། གནས་མ་ཡིན་ནོ། །གང་མི་འགྱུར་བ་དེ་ནི། གནས་སོ། །གང་ཚིག་ཀྱལ་པ་སྨྲ་བ་སྤངས་པས་ཤིན་ཏུ་གདོན་མི་ཟ་བའི་སྤོབས་པར་མི་འགྱུར་བ་ ནི། གནས་མ་ཡིན་ནོ། །གང་ཤིན་ཏུ་གདོན་མི་ཟ་བའི་སྤོབས་པར་འགྱུར་བ་ནི། གནས་སོ། །གང་བརྣབ་སེམས་ཅན་ལོངས་སྤྱོད་རབ་ཏུ་ཉམས་པར་མི་འགྱུར་བ་ནི། གནས་མ་ ཡིན་ནོ། །གང་འགྱུར་བ་ནི། གནས་སོ། །གང་བརྣབ་སེམས་སྤངས་པ་ལོངས་སྤྱོད་རབ་ཏུ་ཉམས་པར་འགྱུར་བ་ནི། གནས་མ་ཡིན་ནོ། །གང་མི་འགྱུར་བ་ནི། གནས་སོ། །གང་ གནོད་སེམས་ཅན་སེམས་ཅན་དམྱལ་བར་མི་འགྲོ་བ་ནི། གནས་མ་ཡིན་ནོ། །གང་འགྲོ་བ་ནི། གནས་སོ། །གང་གནོད་སེམས་སྤངས་པ་དེ་མཐོ་རིས་ཀྱི་འཇིག་རྟེན་དུ་མི་འགྲོ་བ་ དེ་ནི། གནས་མ་ཡིན་ནོ། །གང་འགྲོ་བ་ནི། གནས་སོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་ལོག་པར་ལྟ་བའི་སྐྱེས་བུ་གང་ཟག་ལོག་པར་ལྟ་བ་བཟུང་བའི་རྒྱུས་ ལམ་རྙེད་པར་འགྱུར་བ་དེ་ནི། གནས་མ་ཡིན་ནོ། །ཡང་ཤཱ་རིའི་བུ། གང་ལོག་པར་ལྟ་བའི་སྐྱེས་བུ་གང་ཟག་ལོག་པར་ལྟ་བ་བཟུང་བའི་རྒྱུས་ལམ་མི་རྙེད་པ་ནི། གནས་ཡིན་ ༄༅། །ཏེ། སྐབས་ཡོད་དོ། །ཤཱ་རིའི་བུ། གང་ཡང་དག་པར་ལྟ་བའི་སྐྱེས་བུ་གང་ཟག་ཡང་དག་པར་ལྟ་བ་བཟུང་བའི་རྒྱུས་འཕགས་པའི་ལམ་མི་རྙེད་པ་དེ་ནི། གནས་མ་ཡིན་ཏེ། སྐབས་མེད་དོ། །ཡང་ཤཱ་རིའི་བུ། ཡང་དག་པར་ལྟ་བའི་སྐྱེས་བུ་གང་ཟག་ཡང་དག་པར་ལྟ་བ་བཟུང་བའི་རྒྱུས་འཕགས་པའི་ལམ་རྙེད་པ་དེ་ནི། གནས་ ཡིན་ཏེ། སྐབས་ཡོད་དོ། །གང་མཚམས་མེད་པ་བྱེད་པའི་སེམས་གནས་པར་འགྱུར་བ་ནི། གནས་མ་ཡིན་ནོ། །གང་མི་འགྱུར་བ་ནི། གནས་སོ། །གང་ཚུལ་ཁྲིམས་ ཡོངས་སུ་དག་པའི་སེམས་གནས་པར་མི་འགྱུར་བ་ནི། གནས་མ་ཡིན་ནོ། །གང་འགྱུར་བ་ནི། གནས་སོ། །གང་དམིགས་པར་ལྟ་བས་རྗེས་སུ་མཐུན་པའི་བཟོད་པ་ འཐོབ་པ་དེ་ནི། གནས་མ་ཡིན་ནོ། །གང་འཐོབ་པར་མི་འགྱུར་བ་ནི། གནས་སོ། །གང་སྟོང་པ་ཉིད་ལ་མོས་པས་རྗེས་སུ་མཐུན་པའི་བཟོད་པ་མི་འཐོབ་པ་ནི། གནས་མ་ ཡིན་ནོ། །གང་འཐོབ་པར་འགྱུར་བ་ནི། གནས་སོ། །གང་འགྱོད་པ་ལ་གནས་པའི་སེམས་ཤིན་ཏུ་བྱང་བ་རྗེས་སུ་ཐོབ་པར་འགྱུར་བ་ནི། གནས་མ་ཡིན་ནོ། །གང་མི་ འཐོབ་པ་ནི། གནས་སོ། །གང་ཀུན་ཏུ་དཀྲིས་ཏེ་འདུག་པའི་སེམས་ལས་སེམས་ཤིན་ཏུ་བྱང་བར་འགྱུར་བ་ནི། གནས་མ་ཡིན་ནོ། །གང་འགྱུར་བ་ནི། གནས་སོ། ། གང་བུད་མེད་འཁོར་ལོས་བསྒྱུར་བའི་རྒྱལ་པོར་འགྱུར་བ་ནི། གནས་མ་ཡིན་ནོ། །གང་སྐྱེས་བུ་འགྱུར་བ་ནི། གནས་སོ། །གང་བུད་མེད་ལྷའི་དབང་པོ་བརྒྱ་བྱིན་དུ་འགྱུར་བ་ནི། གནས་མ་ཡིན་ནོ། །གང་སྐྱེས་བུ་འགྱུར་བ་ནི། གནས་སོ། །གང་བུད་མེད་ཚངས་པ་དབང་བྱེད་དུ་འགྱུར་བ་ནི། གནས་མ་ཡིན་ནོ། །གང་སྐྱེས་བུ་འགྱུར་བ་ནི། གནས་སོ། །གང་ བུད་མེད་སངས་རྒྱས་སུ་འཇིག་རྟེན་དུ་འབྱུང་བ་ནི། གནས་མ་ཡིན་ནོ། །གང་བུད་མེད་ཀྱི་ལུས་བསྒྱུར་ནས་སངས་རྒྱས་སུ་འཇིག་རྟེན་དུ་འབྱུང་བ་ནི། གནས་སོ། །གང་སྐྱེས་ བུ་གང་ཟག་བརྒྱད་པ་འབྲས་བུ་མ་ཐོབ་པར་ལྡང་བ་ནི། གནས་མ་ཡིན་ནོ། །གང་འབྲས་བུ་ཐོབ་ནས་ལྡང་བ་ནི། གནས་སོ། །གང་རྒྱུན་དུ་ཞུགས་པ་སྲིད་པ་བརྒྱད་པ་མངོན་པར་ སྒྲུབ་པ་ནི། གནས་མ་ཡིན་ནོ། །གང་ཕུང་པོ་དེ་ཉིད་ཀྱིས་ཡོངས་སུ་མྱ་ངན་ལས་འདས་པ་ནི། གནས་སོ། །གང་ལན་གཅིག་ཕྱིར་འོང་བ་སྲིད་པ་གསུམ་པ་མངོན་པར་སྒྲུབ་པ་ནི། གནས་མ་ཡིན་ནོ། །གང་ཕུང་པོ་དེ་ཉིད་ཀྱིས་ཡོངས་སུ་མྱ་ངན་ལས་འདའ་བ་ནི། གནས་སོ། །གང་ཕྱིར་མི་འོང་བ་འཇིག་རྟེན་འདིར་འོང་བ་ནི་གནས་མ་ཡིན་ནོ། །གང་དེ་ཉིད་དུ་ ཡོངས་སུ་མྱ་ངན་ལས་འདའ་བ་ནི། གནས་སོ། །གང་དགྲ་བཅོམ་པ་མཚམས་སྦྱོར་བའི་གནས་སུ་འགྱུར་བ་ནི། གནས་མ་ཡིན་ནོ། །གང་མི་འགྱུར་བ་ནི། གནས་སོ། །གང་ ༄༅། །འཕགས་པའི་གང་ཟག་སྟོན་པ་གཞན་ཚོལ་བའམ། རྒྱལ་མཚན་གཞན་བཟུང་ནས་སྤྱོད་པ་ནི། གནས་མ་ཡིན་ནོ། །ལྷ་གཞན་མེད་པར་ འགྱུར་བ་ནི། གནས་སོ། །གང་མི་སྐྱེ་བ་ལ་བཟོད་པ་ཐོབ་པའི་བྱང་ཆུབ་སེམས་དཔའ་ཕྱིར་ལྡོག་པ་ནི། གནས་མ་ཡིན་ནོ། །གང་བྱང་ཆུབ་རྗེས་སུ་འཐོབ་པར་འགྱུར་བ་ནི། གནས་སོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་བྱང་ཆུབ་ཀྱི་སྙིང་པོ་ལ་འདུ་གནས་བྱང་ཆུབ་མངོན་པར་རྫོགས་པར་སངས་མ་རྒྱས་པའི་བར་ལྡང་བ་དེ་ ནི། གནས་མ་ཡིན་ནོ། །གང་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་ རྒྱས་ནས་ལྡང་བ་དེ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་དེ་བཞིན་གཤེགས་པ་ལ་བག་ཆགས་ཀྱི་མཚམས་ སྦྱོར་བ་སྣང་བ་དེ་ནི། གནས་མ་ཡིན་ནོ། །གང་ཡང་སངས་རྒྱས་བཅོམ་ལྡན་འདས་ཀྱིས་བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་བཅོམ་པ་ནི། གནས་ ཡིན་ཏེ། སྐབས་ཡོད་དོ། །ཤཱ་རིའི་བུ། གང་དེ་བཞིན་གཤེགས་པའི་ཡེ་ཤེས་ཐོགས་པར་འགྱུར་བ་དེ་ནི། གནས་མ་ཡིན་ཏེ། སྐབས་མེད་དོ། །གང་སངས་རྒྱས་བཅོམ་ ལྡན་འདས་རྣམས་ཀྱི་ཡེ་ཤེས་ཐོགས་པ་མེད་པ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་དེ་བཞིན་གཤེགས་པའི་གཙུག་ ཏོར་ལ་ལས་བལྟར་མཐོང་བ་དེ་ནི། གནས་མ་ཡིན་ནོ། །གང་སངས་རྒྱས་བཅོམ་ལྡན་འདས་རྣམས་ཀྱི་གཙུག་ཏོར་བལྟར་མི་མཐོང་བ་ནི། གནས་ཡིན་ཏེ། སྐབས་ཡོད་དོ། ། ཤཱ་རིའི་བུ། གནས་མ་ཡིན་ཞིང་སྐབས་མེད་དེ། དེ་བཞིན་གཤེགས་པའི་སེམས་དང་སྤྱོད་པ་སྣང་བ་ནི། གནས་མ་ཡིན་ནོ། །ཡང་ཤཱ་རིའི་བུ། སངས་རྒྱས་བཅོམ་ལྡན་འདས་ རྣམས་ཀྱི་སེམས་དང་སྤྱོད་པ་མི་སྣང་བ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་དེ་བཞིན་གཤེགས་པ་ལ་མཉམ་པར་མ་ གཞག་པའི་སེམས་དམིགས་པར་འགྱུར་བ་དེ་ནི། གནས་མ་ཡིན་ནོ། །ཡང་ཤཱ་རིའི་བུ། སངས་རྒྱས་བཅོམ་ལྡན་འདས་རྣམས་མཉམ་པར་གཞག་པ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་དེ་བཞིན་གཤེགས་པ་ལ་མི་བདེན་པའི་ཚིག་འབྱུང་བ་དེ་ནི། གནས་མ་ཡིན་ནོ། །གང་སངས་ རྒྱས་བཅོམ་ལྡན་འདས་རྣམས་ལོག་པར་མི་གསུང་ཞིང་གཞན་མ་ཡིན་པར་གསུང་བ་ནི། གནས་ཡིན་ཏེ། སྐབས་ཡོད་དོ། །ཤཱ་རིའི་བུ། གནས་མ་ཡིན་ཞིང་སྐབས་མེད་ ༄༅། །དེ༑ གང་སངས་རྒྱས་བཅོམ་ལྡན་འདས་རྣམས་ལ་འཁྲུལ་བ་དམིགས་པར་འགྱུར་བ་དེ་ནི། གནས་མ་ཡིན་ནོ། །སངས་རྒྱས་བཅོམ་ལྡན་ འདས་རྣམས་ལ་འཁྲུལ་པ་མེད་དེ། སངས་རྒྱས་བཅོམ་ལྡན་འདས་རྣམས་ཚིག་མི་འཁྲུལ་བ་ནི། གནས་ཡིན་ཏེ། སྐབས་ཡོད་དོ། །དེ་བཞིན་དུ་མི་འཇིགས་པ་ བཞི་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་རྣམས་རྒྱས་པར་བྱ་སྟེ། ཤཱ་རིའི་བུ། གནས་མ་ཡིན་ཞིང་སྐབས་མེད་དེ། གང་དེ་བཞིན་གཤེགས་པ་ད་ ལྟར་བྱུང་བའི་དུས་ལ་ཆགས་པ་དང་སྒྲིབ་པར་བཅས་པའི་ཡེ་ཤེས་གཟིགས་པ་འཇུག་པའི་བར་དུ་དེ་ནི། གནས་མ་ཡིན་ནོ། །སངས་རྒྱས་བཅོམ་ལྡན་འདས་རྣམས་ད་ ལྟར་གྱི་དུས་ལ་ཆགས་པ་མེད་ཅིང་སྒྲིབ་པ་མེད་པའི་ཡེ་ཤེས་མཐོང་བ་འཇུག་པ་ནི། གནས་ཡིན་ཏེ། སྐབས་ཡོད་དོ། །དེ་ལྟར་ཤཱ་རིའི་བུ། དེ་བཞིན་གཤེགས་པའི་ གནས་དང་གནས་མ་ཡིན་པ་མཁྱེན་པའི་སྟོབས་མཐའ་ཡས་མུ་མེད་དོ། །འདི་ལྟར་ཤཱ་རིའི་བུ། དེ་བས་ན། དེ་བཞིན་གཤེགས་པའི་གནས་དང་གནས་མ་ཡིན་པ་མཁྱེན་ པའི་སྟོབས་མཐའ་ཡས་མུ་མེད་དེ། ཤཱ་རིའི་བུ། གང་ནམ་མཁའི་མཐའ་འདོད་པ་དེ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ ཀྱི་གནས་དང་གནས་མ་ཡིན་པ་མཁྱེན་པའི་སྟོབས་ཀྱི་མཐའ་འདོད་དོ། །བྱང་ཆུབ་སེམས་དཔའ་དེ་བཞིན་གཤེགས་པའི་གནས་དང་གནས་མ་ཡིན་པ་མཁྱེན་པའི་སྟོབས་བསམ་ གྱིས་མི་ཁྱབ་པ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང༌། རྨད་དུ་འདུ་ ཤེས་བསྐྱེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས་སྟོན་པས་ཡང་འདི་སྐད་གསུངས་སོ། །ཇི་ལྟར་ཕྱོགས་ བཅུའི་ནམ་མཁའ་ཚད་མེད་མཐའ་ཡས་པ། །དེ་བཞིན་རྒྱལ་བའི་གནས་དང་གནས་མིན་མཁྱེན་མཐའ་ཡས། །འགྲོ་བའི་གནས་དང་གནས་མིན་དེ་བཞིན་རབ་མཁྱེན་ ནས། །སྟོན་པ་ཆོས་མཆོག་རྒྱ་ཆེན་ཡང་དག་རབ་ཏུ་འཆད། །མི་གང་ཐར་པ་དག་གི་ལམ་གྱི་སྣོད་གྱུར་པ། །སྟོན་པས་དེ་དག་སྤྱོད་པ་མཁྱེན་ནས་ཆོས་ཀྱང་འཆད། །སེམས་ ཅན་གང་དག་སྣོད་དུ་གྱུར་པ་མ་ཡིན་པ། །གནས་དང་གནས་མིན་རིག་ནས་དེ་དག་བཏང་སྙོམས་འཇོག །ནམ་མཁའི་འདི་གཡོས་ས་ལ་འབྲས་བུ་འབྱུང་ཡང་ནི། །བདེ་བར་ གཤེགས་པའི་གནས་དང་གནས་མིན་གཞན་མི་འགྱུར། །འཇིག་རྟེན་པ་ལས་འཇིག་རྟེན་འདས་པ་སྟོབས་བཅུ་ལྡན། །ཡོན་ཏན་མཆོག་འཆང་རྣམས་ཀྱི་ཡེ་ཤེས་བསམ་མི་ ༄༅། །ཁྱབ༑ ༑ཤཱ་རིའི་བུ། འདི་ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་དང་པོ་སྟེ། སྟོབས་དེ་དང་ལྡན་པས་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་གྱི་ནང་དུ་སེངྒེའི་སྒྲ་ཡང་དག་པར་སྒྲོག་སྟེ་ཁྱུ་མཆོག་གི་གནས་སུ་ཞལ་གྱིས་འཆེ་ཞིང་ཚངས་ པའམ། བརྒྱ་བྱིན་ནམ། སུས་ཀྱང་འཇིག་རྟེན་དུ་ཆོས་དང་མཐུན་པར་མ་བསྐོར་བའི་ཆོས་ཀྱི་འཁོར་ལོ་རབ་ཏུ་བསྐོར་བའི་བར་དུའོ། །དེ་ལ་དེ་བཞིན་གཤེགས་པའི་ལས་ རྣམ་པར་སྨིན་པ་མཁྱེན་པའི་སྟོབས་གང་ཞེ་ན། འདི་ལ་ཤཱ་རིའི་བུ། དེ་བཞིན་གཤེགས་པ་བླ་ན་མེད་པའི་དེ་བཞིན་གཤེགས་པའི་ཡེ་ཤེས་ཀྱི་སྟོབས་ཀྱིས་འདས་པ་དང༌། མ་འོངས་པ་དང༌། ད་ལྟར་བྱུང་བའི་ལས་ལེན་པ་རྣམས་ཀྱི་རྣམ་པར་སྨིན་པ་གནས་དང་རྒྱུ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ ན༑ འདི་ལ་ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་གང་འདས་པའི་ལས་ལེན་པ་དགེ་བའི་རྒྱུ་ལས་བྱུང་བ། མི་དགེ། བ་དང་བྲལ་བ་གང་མ་འོངས་པའི་དུས་ན་དགེ་བའི་རྒྱུ་འབྱིན་པ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ལས་ལེན་པ་གང་མི་དགེ་བའི་རྒྱུ་ལས་བྱུང་བ། དགེ་ བ་དང་བྲལ་བ་གང་མ་འོངས་པའི་དུས་ན་མི་དགེ་བའི་རྒྱུ་འབྱིན་པ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ལས་ལེན་པ་གང་མ་འོངས་པའི་དུས་ན་དམན་པ་ལ་ བརྟེན་པར་འགྱུར་བ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ལས་ལེན་པ་གང་ད་ལྟར་གྱི་དུས་ན་ཁྱད་པར་ལ་བརྟེན་པར་འགྱུར་བ་དེ་ཡང་དེ་བཞིན་གཤེགས་ པས་རབ་ཏུ་མཁྱེན་ཏོ། །ལས་ལེན་པ་གང་ད་ལྟར་གྱི་དུས་ན་ཁྱད་པར་དུ་བརྟེན་ལ་མ་འོངས་པའི་དུས་ན་དམན་པ་ལ་བརྟེན་པར་འགྱུར་པ་དེ་ཡང་དེ་བཞིན་གཤེགས་པས་ རབ་ཏུ་མཁྱེན་ཏོ། །ལས་ལེན་པ་གང་ད་ལྟར་གྱི་དུས་ན་དམན་པ་ལ་བརྟེན་ལ་མ་འོངས་པའི་དུས་ན་ཁྱད་པར་དུ་བརྟེན་པར་འགྱུར་བ་དེ་ཡང་དེ་བཞིན་གཤེགས་པས་རབ་ ཏུ་མཁྱེན་ཏོ། །ལས་ལེན་པ་གང་ད་ལྟར་གྱི་དུས་ན་ཡང་དམན་པ་ལ་བརྟེན་ལ་མ་འོངས་པའི་དུས་ན་ཡང་དམན་པ་ལ་བརྟེན་པར་འགྱུར་བ་དེ་ཡང་དེ་བཞིན་གཤེགས་ པས་རབ་ཏུ་མཁྱེན་ཏོ། །ལས་ལེན་པ་གང་ད་ལྟར་གྱི་དུས་ན་ཡང་ཁྱད་པར་དུ་བརྟེན་ལ་མ་འོངས་པའི་དུས་ན་ཡང་ཁྱད་པར་དུ་བརྟེན་པར་འགྱུར་བ་དེ་ཡང་དེ་བཞིན་ གཤེགས་པས་རབ་ཏུ་མཁྱེན་ཏོ། །ལས་ལེན་པ་གང་འདས་པའི་དུས་ན་སྦྱོར་བ་དམན་ལ་མ་འོངས་པའི་དུས་ན་སྦྱོར་བ་རྒྱ་ཆེན་པོར་འགྱུར་བ་དེ་ཡང་དེ་བཞིན་གཤེགས་ ༄༅། །པས་རབ་ཏུ་མཁྱེན་ཏོ། །ལས་ལེན་པ་གང་རྩོམ་པ་ཆུང་ལ་ཁྱད་པར་ཆེན་པོར་འགྱུར་བ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། ། ལས་ལེན་པ་གང་རྩོམ་པ་ཆེ་ལ་ཁྱད་པར་ཆུང་ངུར་འགྱུར་བ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ལས་ལེན་པ་གང་ཉན་ཐོས་སུ་འགྱུར་བའི་རྒྱུ་འབྱིན་ པ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ལས་ལེན་པ་གང་རང་སངས་རྒྱས་ཀྱི་རྒྱུ་འབྱིན་པ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ལས་ལེན་ པ་གང་སངས་རྒྱས་སུ་འགྱུར་བའི་རྒྱུ་འབྱིན་པ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ལས་ལེན་པ་གང་ད་ལྟར་སྡུག་བསྔལ་ལ་མ་འོངས་པའི་དུས་ན་རྣམ་ པར་སྨིན་པ་བདེ་བ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ལས་ལེན་པ་གང་ད་ལྟར་བདེ་ལ་མ་འོངས་པ་ན་རྣམ་པར་སྨིན་པ་སྡུག་བསྔལ་བ་དེ་ཡང་དེ་བཞིན་ གཤེགས་པས་རབ་ཏུ་མཁྱེན་ཏོ། །ལས་ལེན་པ་གང་ད་ལྟར་ཡང་སྡུག་བསྔལ་ལ་མ་འོངས་པ་ན་ཡང་རྣམ་པར་སྨིན་པ་སྡུག་བསྔལ་བ་དེ་ཡང་དེ་བཞིན་གཤེགས་ པས་རབ་ཏུ་མཁྱེན་ཏོ། །ལས་ལེན་པ་གང་ད་ལྟར་ཡང་བདེ་ལ་མ་འོངས་པ་ན་ཡང་རྣམ་པར་སྨིན་པ་བདེ་བ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །འདི་ལྟར་ ཤཱ་རིའི་བུ། འདས་པ་དང༌། མ་འོངས་པ་དང༌། ད་ལྟར་གྱི་དུས་ན་སེམས་ཅན་ཐམས་ཅད་ཀྱི་ལས་གང་དང༌། རྒྱུ་གང་དང༌། རྣམ་པར་སྨིན་པ་གང་དེ་བཞིན་དང༌། དེ་བཞིན་ཉིད་ དང༌། གཞན་མ་ཡིན་པ་དང༌། གཞན་མ་ཡིན་པར་བསྟེན་པ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །མཁྱེན་ནས་ཀྱང་དེ་བཞིན་དུ་དེ་བཞིན་གཤེགས་པས་ཆོས་ སྟོན་ཏོ༑ ༑དེ་ལྟར་ན། ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་འདས་པ་དང༌། མ་འོངས་པ་དང༌། ད་ལྟར་གྱི་ལས་ལེན་པའི་ རྒྱུ་གང་ཡིན་པ་དང༌། གནས་གང་ཡིན་པ་དང༌། རྣམ་པར་སྨིན་པ་མཁྱེན་པ་གང་ཡིན་པ་དེ་ནི། མཐའ་ཡས་མུ་མེད་དོ། །འདི་ལྟ་སྟེ། དཔེར་ན། ཤཱ་རིའི་བུ། ནམ་མཁའ་མཐའ་ ཡས་མུ་མེད་པ་དེ་བཞིན་དུ་ཤཱ་རིའི་བུ། དེ་བཞིན་གཤེགས་པའི་ལས་ཀྱི་རྣམ་པར་སྨིན་པ་མཁྱེན་པའི་སྟོབས་དེ་ཡང་མཐའ་ཡས་མུ་མེད་དོ། །ཤཱ་རིའི་བུ། གང་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ལས་ཀྱི་རྣམ་པར་སྨིན་པ་མཁྱེན་པའི་སྟོབས་ཀྱི་མཐའ་འདོད་པ་དེ་ནི། ནམ་མཁའི་མཐའ་འདོད་དོ། ། བྱང་ཆུབ་སེམས་དཔའ་དེ་བཞིན་གཤེགས་པའི་ལས་རྣམ་པར་སྨིན་པ་མཁྱེན་པའི་སྟོབས་བསམ་གྱིས་མི་ཁྱབ་པ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ ༄༅། །ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ན་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང༌། རྨད་དུ་འདུ་ཤེས་ བསྐྱེད་དོ། །འདི་ལ་ཆོས་ཉིད་ནི། འདི་ཡིན་ཏེ། དེ་ལ་འདི་སྐད་ཅེས་བྱའོ། །དེ་བཞིན་གཤེགས་པ་རྒྱུ་དང་སྨིན་ལ་མཁས། །སྤྱན་ལྡན་ལས་རྣམས་ཀུན་གྱི་སྒྲུབ་པ་ མཁྱེན༑ ༑དུས་གསུམ་ལ་ནི་རྒྱལ་བ་ཆགས་པ་མེད། །སེམས་ཅན་ཀུན་གྱི་སྤྱོད་པ་རབ་ཏུ་མཁྱེན། །འགྲོ་བ་ལྔ་ཡི་སེམས་ཅན་ཐམས་ཅད་ཀྱི། །བདེ་དང་སྡུག་བསྔལ་ རྒྱུ་ནི་གང་འགྱུར་དང༌། །འཇུག་པ་གང་དག་སྡུག་བསྔལ་རྒྱུར་འགྱུར་བ། །དེ་དག་དེ་བཞིན་བདེ་གཤེགས་རབ་ཏུ་མཁྱེན། །དཀར་ནག་ལས་རྣམས་ཀྱི་ནི་རྣམ་སྨིན་ དང༌། །རྒྱུ་དང་རྣམ་སྨིན་ཇི་ལྟར་འགྱུར་བ་ཡང༌། །དེ་དག་དེ་བཞིན་བདེ་གཤེགས་རབ་མཁྱེན་ཏེ། །ཕྱག་གི་མཐིལ་ན་ཡིད་བཞིན་ནོར་བུ་བཞིན། །ལས་གང་རྣམ་ སྨིན་ཆུང་ངུའི་རྒྱུ་དག་ལས། །འབྲས་བུ་དག་ནི་ཚད་མེད་འབྱིན་པ་དང༌། །ཚད་མེད་གང་དག་ཆུང་ངུའི་རྒྱུར་འགྱུར་བ། །དེ་དག་དེ་བཞིན་བདེ་གཤེགས་རབ་ཏུ་མཁྱེན། ། ཉན་ཐོས་ཉིད་དུ་འབྲས་བུ་སྨིན་འགྱུར་དང༌། །རང་རྒྱལ་བྱང་ཆུབ་རྒྱུར་ནི་གང་འགྱུར་དང༌། །བླ་མེད་ཡེ་ཤེས་སྟོབས་ནི་སྦྱིན་འགྱུར་བ། །དེ་དག་མ་ལུས་བདེ་གཤེགས་ རབ་ཏུ་མཁྱེན། །ལས་ཀྱི་རྒྱུ་གང་སྡུག་བསྔལ་སྨིན་བྱེད་པ། །དེ་ཡང་བདེ་བའི་འབྲས་བུ་སྨིན་བྱེད་དང༌། །ལས་ཀྱི་རྒྱུ་གང་བདེ་བ་སྦྱིན་བྱེད་པ། །སྡུག་བསྔལ་འབྲས་བུ་བྱ་བ་ ཐམས་ཅད་མཁྱེན། །སྡུག་བསྔལ་རྒྱུས་ནི་སྡུག་བསྔལ་ཉིད་གནས་དང༌། །བདེ་བའི་རྒྱུས་ཀྱང་བདེ་བ་ཉིད་གནས་དང༌། །ལས་ཀྱི་རང་བཞིན་རང་བཞིན་མ་ཡིན་པ། །རྒྱུ་ལྡན་ བདེ་བར་གཤེགས་པས་རབ་ཏུ་མཁྱེན། །འགྲོ་བ་ལྔ་ཡི་སེམས་ཅན་ཐམས་ཅད་ཀྱི། །དུས་གསུམ་སྡུག་བསྔལ་བགྲོད་པ་གང་འཇུག་པ། །ཉམས་མེད་དེ་ཉིད་དེ་བཞིན་ གཞན་མིན་པར། །སངས་རྒྱས་མཁྱེན་པས་རྒྱལ་བ་རབ་ཏུ་མཁྱེན། །ཤཱ་རིའི་བུ། འདི་ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་ གཉིས་པ་སྟེ། སྟོབས་དེ་དང་ལྡན་པས། དེ་བཞིན་གཤེགས་པ་འཁོར་གྱི་ནང་དུ་སེངྒེའི་སྒྲ་ཡང་དག་པར་སྒྲོག་ཅིང༌། དགེ་སྦྱོང་ངམ། བྲམ་ཟེའམ། ལྷའམ། བདུད་ དམ༑ ཚངས་པ་གང་གིས་ཀྱང་འཇིག་རྟེན་འདིར་ཆོས་དང་མཐུན་པར་མ་བསྐོར་བ་ཚངས་པའི་འཁོར་ལོ་རབ་ཏུ་བསྐོར་རོ།། །།བམ་པོ་ལྔ་པ། གཞན་ཡང་ཤཱ་རིའི་ བུ༑ དེ་བཞིན་གཤེགས་པས་མོས་པ་དུ་མ་དང༌། མོས་པ་སྣ་ཚོགས་མཁྱེན་པའི་སྟོབས་ཀྱིས་སེམས་ཅན་གཞན་རྣམས་དང༌། གང་ཟག་གཞན་དག་གི་མོས་པ་དུ་ ༄༅། །མ་དང༌། མོས་པ་སྣ་ཚོགས་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །སྐྱེས་བུ་གང་ཟག་གང་འདོད་ཆགས་ལ་གནས་ཤིང་ཞེ་སྡང་ ལ་མོས་པའང་རྒྱས་པར་བྱ་སྟེ། གཏི་མུག་ལ་གནས་ཤིང་ཞེ་སྡང་ལ་མོས་པ་དེ་དག་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །གང་ཟག་གང་མི་དགེ་བ་ལ་ གནས་ཤིང་མི་དགེ་བ་ལ་མོས་པ་དེ་དག་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །གང་ཟག་གང་དགེ་བ་ལ་གནས་ཤིང་དགེ་བ་ལ་མོས་པ་དེ་དག་ཀྱང་དེ་ བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །གང་ཟག་གང་སྦྱོར་བ་དམན་ཞིང་རྒྱ་ཆེན་པོ་ལ་མོས་པ་དེ་དག་ཀྱང་དེ་བཞིན་གཤེགས་པས་ཡང་ དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །གང་ཟག་གང་སྦྱོར་བ་རྒྱ་ཆེ་ཞིང་དམན་པ་ལ་མོས་པ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ ཏོ༑ ༑གང་ཟག་གང་སྦྱོར་བ་དམན་ཞིང་ཁྱད་པར་ལ་གནས་པར་འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་བ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་གིས་ ཁྱད་པར་ལ་སྦྱོར་བ་དམན་པ་ལ་གནས་པར་འགྱུར་བ་དེ་དག་ཀྱང་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་གིས་ལོག་པ་ཉིད་དུ་ ངེས་པའི་ཁམས་ཐོབ་པར་འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་གིས་ཡང་དག་པ་ཉིད་དུ་ངེས་པའི་ཁམས་ཐོབ་ པར་འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་གིས་ཡང་དག་པ་ཉིད་དུ་ངེས་པའི་རྣམ་པར་གྲོལ་བ་འཐོབ་པར་ འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་གིས་འདོད་པའི་ཁམས་སུ་འགྲོ་བར་འགྱུར་བ་དེ་དག་ཀྱང་དེ་བཞིན་གཤེགས་ པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་གིས་གཟུགས་ཀྱི་ཁམས་སུ་འགྲོ་བར་འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ ཏུ་མཁྱེན་ཏོ། །མོས་པ་གང་གིས་གཟུགས་མེད་པའི་ཁམས་སུ་འགྲོ་བར་འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་ གིས་ཁམས་གསུམ་དུ་འགྲོ་བར་འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་གིས་དམན་པ་ལ་བརྟེན་ཅིང་དམན་པ་ ཉིད་གནོན་པ་དང༌། ཁྱད་པར་ལ་བརྟེན་ཅིང་ཁྱད་པར་ལ་གནོན་པ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་གིས་ཁྱད་པར་ ༄༅། །དུ་སོང་ནས་དམན་པ་ལ་གནས་པར་འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་གིས་ སྐྱེ་བ་ཐ་དད་པ་དང༌། ཁ་དོག་ཐ་དད་པ་དང༌། ཡོངས་སུ་ལོངས་སྤྱོད་ཐ་དད་པ་རབ་ཏུ་འཛིན་པར་འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ ཏུ་མཁྱེན་ཏོ། །མོས་པ་གང་གིས་རྩེ་མོ་ལས་ཉམས་པར་འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མོས་པ་གང་གིས་རྣམ་ པར་གྲོལ་བ་ཐོབ་པར་འགྱུར་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །མཁྱེན་ནས་ཀྱང་དེ་བཞིན་དུ་ཆོས་སྟོན་ཏོ། །དེ་ལྟར་ན། ཤཱ་རིའི་བུ། དེ་བཞིན་གཤེགས་པའི་མོས་པ་སྣ་ཚོགས་མཁྱེན་པའི་སྟོབས་གང་ཡིན་པ་དེ་ནི། མཐའ་ཡས་མུ་མེད་དེ། ནམ་མཁའ་དང་མཚུངས་ཤིང་མཉམ་མོ། །བྱང་ཆུབ་ སེམས་དཔའ་དེ་བཞིན་གཤེགས་པའི་མོས་པ་སྣ་ཚོགས་མཁྱེན་པའི་སྟོབས་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་ མགུ་སྟེ་རངས་པ་རྙེད་ནས་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱ་ཆེར་ བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་འདི་མོས་སྣ་ཚོགས་དང༌། །དེ་བཞིན་བློ་གྲོས་ཚད་མེད་པ། །དེ་དག་གི་ནི་མོས་པའི་སེམས། །ཐམས་ཅད་འདྲེན་ པས་རབ་ཏུ་མཁྱེན། །གང་དག་འདོད་ཆགས་མོས་པ་ལ། །ཞེ་སྡང་ལ་ནི་གནས་འགྱུར་དང༌། །ཞེ་སྡང་གནས་ཤིང་གཏི་མུག་ལ། །གང་དག་མོས་པ་རབ་ཏུ་མཁྱེན། །གཏི་མུག་གནས་ཤིང་ འདོད་ཆགས་ཀྱི། །སེམས་རྒྱུད་བསམ་གྱིས་མི་ཁྱབ་པ། །བར་བར་དུ་ནི་འཇུག་པ་དག །དེ་དག་འདྲེན་པས་རབ་ཏུ་མཁྱེན། །གང་དག་སྦྱོར་བ་དམན་གྱུར་ལ། །རྒྱ་ཆེན་ལ་ནི་མོས་པ་དང༌། །སྦྱོར་ བ་དམ་པ་དེ་དག་གི །དམན་པར་འགྱུར་བ་འདྲེན་པས་མཁྱེན། །ལོག་པའི་རྗེས་སུ་སོང་བ་དང༌། །འགྲོ་བ་མེད་པར་འབྱུང་བ་དང༌། །ཁམས་གསུམ་ལས་ནི་རྣམ་གྲོལ་བའི། །མོས་པ་དག་ ཀྱང་རབ་ཏུ་མཁྱེན། །སྐྱེ་དང་ཁ་དོག་ཐ་དད་དང༌། །ཉེ་བར་སྤྱོད་པའི་ཁྱད་པར་དང༌། །གང་དག་སྤྱི་བོ་ལས་ཉམས་པ། །རྐང་གཉིས་གཙོ་བོས་རབ་ཏུ་མཁྱེན། །མོས་པ་སྣ་ཚོགས་རབ་མཁྱེན་ ནས༑ ༑འདྲེན་པ་ཆོས་རྣམས་སྟོན་པ་མཛད། །སངས་རྒྱས་ཀྱི་ནི་སྟོབས་གསུམ་ལ། །རྒྱལ་བའི་ཐུགས་སྲས་རབ་ཏུ་མོས། །ཤཱ་རིའི་བུ། །འདི་ནི། །དེ་བཞིན་གཤེགས་པ་རྣམས་ཀྱི་དེ་བཞིན་ གཤེགས་པའི་སྟོབས་གསུམ་པ་སྟེ། དེ་བཞིན་གཤེགས་པ་སྟོབས་དེ་དག་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁྱུ་མཆོག་གི་ ༄༅། །གནས་སུ་ཞལ་གྱིས་འཆེ་ཞིང་འཁོར་གྱི་ནང་དུ་སེངྒེའི་སྒྲ་ཡང་དག་པར་སྒྲོག་སྟེ། དགེ་སྦྱོང་ངམ། །བྲམ་ཟེའམ། ལྷའམ། བདུད་དམ། ཚངས་པ་སུས་ཀྱང་འཇིག་ རྟེན་དུ་ཆོས་དང་མཐུན་པར་མ་བསྐོར་བ་ཚངས་པའི་འཁོར་ལོ་རབ་ཏུ་བསྐོར་རོ། །གཞན་ཡང་ཤཱ་རིའི་བུ། དེ་བཞིན་གཤེགས་པས་ཁམས་དུ་མ་དང༌། ཁམས་སྣ་ཚོགས་མཁྱེན་པའི་ སྟོབས་ཀྱིས་འཇིག་རྟེན་རྣམས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁམས་གང་གིས་འཇིག་རྟེན་བསོད་ནམས་ཀྱི་འདུ་བྱེད་གསོག་པ་དེ་ཡང་དེ་བཞིན་གཤེགས་པས་ཡང་ དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁམས་གང་གིས་བསོད་ནམས་མ་ཡིན་པའི་འདུ་བྱེད་གསོག་པ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ།། ཁམས་གང་གིས་མི་གཡོ་བའི་འདུ་བྱེད་གསོག་པ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ཁམས་གང་གིས་འབྱུང་བའི་ཁམས་སུ་འཇོག་པར་འགྱུར་བ་དེ་ཡང་དེ་བཞིན་ གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །གཞན་ཡང་ཤཱ་རིའི་བུ། དེ་བཞིན་གཤེགས་པས་མིག་གི་ཁམས་དང༌། གཟུགས་ཀྱི་ཁམས་དང༌། མིག་གི་རྣམ་པར་ ཤེས་པའི་ཁམས་ཀྱང་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། ནང་སྟོང་པ་ཉིད་དང༌། ཕྱི་སྟོང་པ་ཉིད་དང༌། ཕྱི་ནང་སྟོང་པ་ཉིད་དུ་རབ་ཏུ་མཁྱེན་ཏོ། །ཡིད་ཀྱི་ཁམས་དང༌། ཆོས་ཀྱི་ཁམས་དང༌། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་ཡང་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། ནང་སྟོང་པ་ཉིད་དང༌། ཕྱི་སྟོང་པ་ཉིད་དང༌། ཕྱི་ནང་སྟོང་པ་ཉིད་དུ་རབ་ཏུ་མཁྱེན་ཏོ། །སའི་ཁམས་དང༌། ཆུའི་ཁམས་དང༌། མེའི་ཁམས་དང༌། རླུང་གི་ཁམས་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། ནམ་མཁའི་ཁམས་ཇི་ལྟ་བ་དེ་བཞིན་དུ་རབ་ཏུ་མཁྱེན་ཏོ། །འདོད་པའི་ཁམས་དང༌། གཟུགས་ཀྱི་ཁམས་དང༌། གཟུགས་མེད་པའི་ཁམས་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། ཀུན་ཏུ་རྟོག་པ་ལས་མྱུང་[*NYUNG?] བར་རབ་ཏུ་མཁྱེན་ཏོ། །འདུས་བྱས་ཀྱི་ཁམས་ནི། མངོན་ པར་འདུ་བྱེད་པའི་མཚན་ཉིད་དུ་རབ་ཏུ་མཁྱེན་ཏོ། །འདུས་མ་བྱས་ཀྱི་ཁམས་ནི། མངོན་པར་འདུ་མི་བྱེད་པའི་མཚན་ཉིད་དུ་རབ་ཏུ་མཁྱེན་ཏོ། །ཀུན་ནས་ཉོན་མོངས་པའི་ཁམས་ནི། ཕྱིས་འབྱུང་ བའི་ཉོན་མོངས་པའི་མཚན་ཉིད་དུ་རབ་ཏུ་མཁྱེན་ཏོ། །རྣམ་པར་བྱང་བའི་ཁམས་ནི། རང་བཞིན་གྱིས་འོད་གསལ་བའི་མཚན་ཉིད་དུ་རབ་ཏུ་མཁྱེན་ཏོ། །འདུ་བྱེད་ཀྱི་ཁམས་ནི། ཚུལ་བཞིན་ མ་ཡིན་པ་མ་རིག་པའི་མཚན་ཉིད་དུ་རབ་ཏུ་མཁྱེན་ཏོ། །མྱ་ངན་ལས་འདས་པའི་དབྱིངས་ནི། ཚུལ་བཞིན་རིག་པའི་མཚན་ཉིད་དུ་རབ་ཏུ་མཁྱེན་ཏོ། །འདི་ལྟར་འཇིག་རྟེན་གནས་པའི་ཁམས་ གང་ཡིན་པ་དང༌། འཇིག་རྟེན་གནས་པ་ཁམས་གང་ལ་གནས་པ་དང༌། ཁམས་གང་ལ་རྗེས་སུ་ཆགས་པ་དང༌། ཁམས་གང་ལ་གནས་པ་དང༌། ཁམས་གང་ལ་སྦྱོར་བ་དང༌། ཁམས་ ༄༅། །གང་གིས་བསམ་པ་དང༌། ཁམས་གང་ལ་ངེས་པར་སེམས་པ་དང༌། ཁམས་གང་ལ་བརྟེན་པ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ ཏོ༑ ༑མཁྱེན་ནས་ཀྱང་ཆོས་སྟོན་ཏོ། །དེ་ལྟར་ཤཱ་རིའི་བུ། དེ་བཞིན་གཤེགས་པའི་ཁམས་དུ་མ་དང༌། ཁམས་སྣ་ཚོགས་མཁྱེན་པའི་སྟོབས་མཐའ་ཡས་མུ་མེད་དེ། ནམ་མཁའ་དང་མཚུངས་ ཤིང་མཉམ་མོ། །བྱང་ཆུབ་སེམས་དཔའ་དེ་བཞིན་གཤེགས་པ་ཁམས་དུ་མ་དང༌། ཁམས་སྣ་ཚོགས་མཁྱེན་པའི་སྟོབས་ལ་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་ མི་ཟ༑ རྒྱ་ཆེར་དགའ་མགུ་སྟེ་རངས་པ་རྙེད་ནས་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །འདི་ལ་ཆོས་ཉིད་ནི། འདི་ཡིན་ཏེ། འདི་ལ་ འདི་སྐད་ཅེས་བྱའོ། །འཇིག་རྟེན་ཀུན་ན་སེམས་ཅན་གང༌། །སྣ་ཚོགས་ཁམས་ལ་གནས་པ་དག །ཁམས་གང་འཇུག་པ་ཅི་འདྲ་བ། །སངས་རྒྱས་ཀྱིས་ནི་རབ་ཏུ་མཁྱེན། །བསོད་ནམས་ བསོད་ནམས་མིན་མི་གཡོ། །འབྱུང་བར་འགྱུར་བའང་དེ་བཞིན་ཏེ། །ཁམས་རྣམས་གང་ལ་གནས་ནས་སུ། །མྱ་ངན་འདས་པ་ཞི་ལ་རེག །མིག་གི་ཁམས་དང་གཟུགས་ཀྱི་ཁམས། །མིག་ གི་རྣམ་པར་ཤེས་ཉིད་དང༌། །རྣ་བ་སྣ་དང་ལྕེ་དང་ལུས། །ཡིད་ཀྱི་ཁམས་ཀྱང་རབ་ཏུ་མཁྱེན། །ཆོས་ཀྱི་ཁམས་དང་ཡིད་ཀྱི་ནི། །རྣམ་པར་ཤེས་པ་ཉིད་ཀྱང་མཁྱེན། །ནང་གི་ཁམས་ནི་སྟོང་ པ་དང༑ ༑ཕྱི་རོལ་དག་ཀྱང་སྟོང་པར་མཁྱེན། །ས་དང་ཆུ་དང་མེ་དག་དང༌། །རླུང་གི་ཁམས་ཀྱང་དེ་བཞིན་ཏེ། །ཁམས་རྣམས་བཞི་པོ་དེ་དག་ནི། །ནམ་མཁའ་མཚུངས་པར་རབ་ཏུ་མཁྱེན། །འདོད་པའི་ ཁམས་དང་གཟུགས་ཀྱི་ཁམས། །གཟུགས་མེད་པ་ཡི་ཁམས་ཉིད་ཀྱང༌། །ཀུན་ཏུ་རྟོག་ལས་བྱུང་བར་ནི། །དེ་ལྟར་སངས་རྒྱས་རབ་ཏུ་མཁྱེན། །ཇི་ལྟར་ནམ་མཁའ་མཐའ་ཡས་པ། དེ་བཞིན་ཁམས་ རྣམས་མུ་མེད་དེ། །ཐམས་ཅད་སངས་རྒྱས་རབ་མཁྱེན་ཀྱང༌། །མཁྱེན་ཏོ་སྙམ་དུ་རློམ་སེམས་མེད། །ཁམས་ནི་སྐྱེ་བ་མ་ཡིན་ཞིང༌། །རྣམ་པ་ཀུན་ཏུ་འགག་མེད་དེ། །ཁམས་འདི་མྱ་ངན་འདས་པར་ནི། ། སྐྱེས་བུ་དམ་པས་རབ་ཏུ་མཁྱེན། །ཇི་ལྟར་ནམ་མཁའ་མཐའ་ཡས་པ། །སངས་རྒྱས་ཡེ་ཤེས་དེ་འདྲ་སྟེ། །མོས་པ་སྣ་ཚོགས་རབ་སྤྲུལ་པ། །ཡེ་ཤེས་ངེས་ནི་རབ་ཏུ་མཁྱེན། །མོས་པ་སྣ་ཚོགས་མཁྱེན་ ནས་སུ༑ ༑སེམས་ཅན་བྱེ་བ་རྣམ་པར་འདུལ། །སངས་རྒྱས་སྟོབས་ནི་བཞི་པ་ལ། །རྒྱལ་པའི་ཐུགས་སྲས་དད་པར་བྱེད། །ཤཱ་རིའི་བུ། འདི་ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ སྟོབས་བཞི་པ་སྟེ། སུས་ཀྱང་འཇིག་རྟེན་འདིར་ཆོས་དང་མཐུན་པ་ཞེས་བྱ་བའི་བར་དུ་རྒྱས་པར་བྱའོ། །གཞན་ཡང་ཤཱ་རིའི་བུ། དེ་བཞིན་གཤེགས་པའི་དབང་པོ་དང༌། བརྩོན་འགྲུས་ཀྱི་རིམ་པ་མཁྱེན་ པའི་སྟོབས་ཀྱིས་སེམས་ཅན་གཞན་དང༌། གང་ཟག་གཞན་རྣམས་ཀྱི་དབང་པོ་དང༌། བརྩོན་འགྲུས་ཀྱི་རིམ་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། དབང་པོ་ ༄༅། །རྟུལ་བའང་རབ་ཏུ་མཁྱེན་ཏོ། །དབང་པོ་བར་མ་ཡང་རབ་ཏུ་མཁྱེན་ཏོ། །དབང་པོ་རྣོ་བ་ཡང་རབ་ཏུ་མཁྱེན་ཏོ། །དབང་པོ་ཁྱད་པར་དུ་འཕགས་པ་ཡང་རབ་ཏུ་མཁྱེན་ཏོ། །དབང་ པོ་དམན་པ་ཡང་རབ་ཏུ་མཁྱེན་ཏོ། །ཡོངས་སུ་རྟོགས་པའི་དབང་པོ་ཇི་ལྟ་བུས་མཐར་ཕྱིན་པའི་འདོད་ཆགས་སྐྱེ་བ་དང༌། མཐར་ཕྱིན་པའི་ཞེ་སྡང་སྐྱེ་བ་དང༌། མཐར་ཕྱིན་པའི་གཏི་མུག་སྐྱེ་བ་དེ་ ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཡོངས་སུ་རྟོག་པའི་དབང་པོ་ཇི་ལྟ་བུས་འདོད་ཆགས་དང༌། ཞེ་སྡང་དང༌། གཏི་མུག་བརྟན་པ་སྐྱེ་བ་དེ་ཡང་དེ་ བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཡོངས་སུ་རྟོག་པའི་དབང་པོ་ཇི་ལྟ་བུས་འདོད་ཆགས་དང༌། ཞེ་སྡང་དང༌། གཏི་མུག་ཡང་སྐྱེ་བ་དེ་ཡང་དེ་བཞིན་གཤེགས་ པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཡོངས་སུ་རྟོག་པའི་དབང་པོ་ཇི་ལྟ་བུས་སྣྲེལ་ཞིའི་འདོང་ཆགས་དང༌། ཞེ་སྡང་དང༌། གཏི་མུག་སྐྱེ་བ་དེ་ཡང་དེ་བཞིན་གཤེགས་པས་ཡང་དག་ པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཡོངས་སུ་རྟོག་པའི་དབང་པོ་ཇི་ལྟ་བུས་ཚར་བཅད་ཅིང༌། འདོད་ཆགས་དང༌། ཞེ་སྡང་དང༌། གཏི་མུག་སྐྱེ་བ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་ བ་བཞིན་རབ་ཏུ་མཁྱེན་ཏོ། །དབང་པོ་གང་དག་མི་དགེ་བའི་རྒྱུ་ལས་བྱུང་བ་དང༌། དབང་པོ་གང་དག་དགེ་བའི་རྒྱུ་ལས་བྱུང་བ་དང༌། དབང་པོ་གང་དག་མི་གཡོ་བའི་རྒྱུ་ལས་བྱུང་བ་དང༌། དབང་པོ་ གང་དག་འབྱུང་བའི་རྒྱུ་ལས་བྱུང་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །གཞན་ཡང་ཤཱ་རིའི་བུ། དེ་བཞིན་གཤེགས་པས་མིག་གི་དབང་པོ་ཡང་དག་ པ་ཇི་ལྟ་བ་བཞིན་རབ་ཏུ་མཁྱེན་པ་ནས་གོང་མ་བཞིན་རབ་ཏུ་མཁྱེན་པ་ནས་གོང་མ་བཞིན་དུ་སྦྱར་ཏེ། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་དབང་པོ་ཡང་ཡང་དག་པ་ཇི་ལྟ་བ་བཞིན་རབ་ ཏུ་མཁྱེན་ཏོ། །ཕོའི་དབང་པོ་དང༌། མོའི་དབང་པོ་དང༌། སྲོག་གི་དབང་པོ་དང༌། བདེ་བའི་དབང་པོ་དང༌། སྡུག་བསྔལ་གྱི་དབང་པོ་དང༌། ཡིད་མི་བདེ་བའི་དབང་པོ་དང༌། ཡིད་བདེ་བའི་དབང་པོ་དང༌། བཏང་སྙོམས་ཀྱི་དབང་པོ་ཡང་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་པོ་དང༌། ཏིང་ངེ་འཛིན་གྱི་དབང་པོ་དང༌། ཤེས་རབ་ཀྱི་ དབང་པོ་ཡང་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །མི་ཤེས་པ་ཀུན་ཤེས་པར་བྱེད་པའི་དབང་པོ་དང༌། ཀུན་ཤེས་པའི་དབང་པོ་དང༌། ཀུན་ཤེས་པ་དང་ལྡན་པའི་དབང་པོ་ཡང་ཡང་དག་པ་ཇི་ལྟ་ བ་བཞིན་རབ་ཏུ་མཁྱེན་ཏོ། །དབང་པོ་གང་མིག་གི་དབང་པོའི་རྒྱུ་ལས་བྱུང་ལ། རྣ་བའི་དབང་པོ་ལ་གནས་པར་འགྱུར་ཏེ། སྣ་ལ་མ་ཡིན། ལྕེ་ལ་མ་ཡིན། ལུས་ཀྱི་དབང་པོ་ལ་མ་ཡིན་པ་དེ་ཡང་དེ་བཞིན་ གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །གང་རྣ་བའི་དབང་པོའི་རྒྱུ་ལས་བྱུང་ལ། །སྣའི་དབང་པོ་ལ་གནས་པར་འགྱུར་བ་དང༌། གང་སྣའི་དབང་པོའི་རྒྱུ་ལས་བྱུང་ལ། ལྕེའི་དབང་པོ་ ༄༅། །ལ་གནས་པར་འགྱུར་བ་དང༌། གང་ལྕེའི་དབང་པོའི་རྒྱུ་ལས་བྱུང་ལ། ལུས་ཀྱི་དབང་པོ་ལ་གནས་པར་འགྱུར་བ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རང་ ཏུ་མཁྱེན་ཏོ། །སེམས་ཅན་གང་སྦྱིན་པའི་དབང་པོ་ཅན་ཡིན་ལ། དེ་ཡང་ཚུལ་ཁྲིམས་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་མཆོག་མ་ཡིན་པ་མཁྱེན་པས་དེ་ལ་སྦྱིན་པའི་ གཏམ་སྟོན་ཏོ། །གང་ཟག་ཚུལ་ཁྲིམས་ཀྱི་དབང་པོ་ཅན་ཡིན་ལ། དེ་ཡང་སྦྱིན་པ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་མཆོག་མ་ཡིན་པ་མཁྱེན་པས་ཚུལ་ཁྲིམས་ ཀྱི་གཏམ་སྟོན་ཏོ། །སེམས་ཅན་གང་བཟོད་པའི་དབང་པོ་ཅན་ཡིན་ལ། དེ་ཡང་བརྩོན་འགྲུས་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་མཆོག་མ་ཡིན་པ་མཁྱེན་པས་ བཟོད་པའི་གཏམ་སྟོན་ཏོ། །སེམས་ཅན་གང་བརྩོན་འགྲུས་ཀྱི་དབང་པོ་ཅན་ཡིན་ལ། དེ་ཡང་བཟོད་པ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་མཆོག་མ་ཡིན་པ་ མཁྱེན་པས་བརྩོན་འགྲུས་ཀྱི་གཏམ་སྟོན་ཏོ། །སེམས་ཅན་གང་བསམ་གཏན་གྱི་དབང་པོ་ཅན་ཡིན་ལ། དེ་ཡང་ཤེས་རབ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་ མཆོག་མ་ཡིན་པ་མཁྱེན་པས་བསམ་གཏན་གྱི་གཏམ་སྟོན་ཏོ། །སེམས་ཅན་གང་ཤེས་རབ་ཀྱི་དབང་པོ་ཅན་ཡིན་ལ། དེ་ཡང་ཤེས་རབ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་ མཆོག་དང་མཆོག་མ་ཡིན་པ་མཁྱེན་པས་ཤེས་རབ་ཀྱི་གཏམ་སྟོན་ཏོ། །གོང་མ་བཞིན་དུ་སྦྱར་ཏེ་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ལ་ཡང་བྱའོ། །སེམས་ཅན་གང་ཉན་ཐོས་ཀྱི་ཐེག་པའི་དབང་པོ་ ཅན་ཡིན་ལ། །དེ་ཡང་རང་སངས་རྒྱས་ཀྱི་ཐེག་པ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་མཆོག་མ་ཡིན་པ་མཁྱེན་པས་ཉན་ཐོས་ཀྱི་ཐེག་པའི་གཏམ་སྟོན་ཏོ། །སེམས་ཅན་གང་ རང་སངས་རྒྱས་ཀྱི་ཐེག་པའི་དབང་པོ་ཅན་ཡིན་ལ། དེ་ཡང་ཉན་ཐོས་ཀྱི་ཐེག་པ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་མཆོག་མ་ཡིན་པ་མཁྱེན་པས་རང་སངས་རྒྱས་ཀྱི་ཐེག་ པའི་གཏམ་སྟོན་ཏོ། །སེམས་ཅན་གང་ཐེག་པ་ཆེན་པོའི་དབང་པོ་ཅན་ཡིན་ལ། དེ་ཡང་རང་སངས་རྒྱས་ཀྱི་ཐེག་པ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་མཆོག་མ་ཡིན་པ་ མཁྱེན་པས་ཐེག་པ་ཆེན་པོའི་གཏམ་སྟོན་ཏོ། །སེམས་ཅན་གང་ཐ་མའི་དབང་པོ་ཅན་ཡིན་ལ། དེ་ཡང་ཐེག་པ་ཆེན་པོ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་མཆོག་མ་ཡིན་པ་མཁྱེན་ པས་དབང་པོ་ཐ་མའི་གཏམ་སྟོན་ཏོ། །སེམས་ཅན་གང་སྐལ་བ་མེད་པའི་དབང་པོ་ཅན་སྐལ་པ་མེད་པར་སྣང་བ་དེ་དག་དེ་བཞིན་གཤེགས་པས་སྐལ་བ་མེད་ཅིང་སྣོད་མ་ཡིན་པར་རིག་ནས་བཏང་ སྙོམས་སུ་འཇོག་གོ །སེམས་ཅན་སྐལ་པ་ཡོད་པའི་དབང་པོ་ཅན་སྐལ་བ་ཡོད་པར་སྣང་བ་དག་ལ་དེ་བཞིན་གཤེགས་པས་སྐལ་བ་ཡོད་ཅིང་སྣོད་དུ་རིག་ནས་རི་མོར་བྱས་ཤིང་ ༄༅། །ཆོས་སྟོན་ཏེ། དེ་ལྟར་ཤཱ་རིའི་བུ། དེ་བཞིན་གཤེགས་པས་སེམས་ཅན་ཐམས་ཅད་ཀྱི་དབང་པོ་ཡོངས་སུ་སྨིན་པ་རྣམས་ཀྱང་རབ་ཏུ་མཁྱེན། དབང་ པོ་ཡོངས་སུ་མ་སྨིན་པ་རྣམས་ཀྱང་རབ་ཏུ་མཁྱེན། འབྱུང་བའི་དབང་པོ་རྣམས་ཀྱང་རབ་ཏུ་མཁྱེན། འབྱུང་བ་མ་ཡིན་པའི་དབང་པོ་རྣམས་ཀྱང་རབ་ཏུ་མཁྱེན་ཏོ། །སེམས་ཅན་གྱི་ དབང་པོའི་རྣམ་པ་གང་ཡིན་པ་དང༌། སྦྱོར་བ་གང་ཡིན་པ་དང༌། བསམ་པ་གང་ཡིན་པ་དང༌། གང་གི་རྒྱུ་ལས་བྱུང་བ་དང༌། རྐྱེན་གང་ཡིན་པ་དང༌། དམིགས་པ་གང་ཡིན་པ་དང༌། རྒྱུ་མཐུན་པ་གང་ཡིན་པ་དང༌། སེམས་ཅན་གྱི་དབང་པོའི་མཐའ་གང་ཡིན་པ་དེ་དག་ཐམས་ཅད་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །བཅོམ་ལྡན་ འདས་ཀྱིས་དེ་སྐད་གསུངས་ཏེ། བདེ་བར་གཤེགས་པས་དེ་སྐད་བཀའ་སྩལ་ནས་སྟོན་པས་ཡང་འདི་སྐད་གསུངས་སོ། །འགྲོ་བའི་དབང་པོ་དེ་ནི་དབང་པོའི་ཕ་རོལ་སོང༌། །སེམས་ཅན་ རྣམས་ཀྱི་སྤྱོད་དང་བསམ་པའི་ཆོ་ག་མཁྱེན། །འགྲོ་བ་གང་དག་གི་ནི་དབང་པོ་ཅི་འདྲ་བ། །དེ་འདྲར་མི་ཡི་སེངྒེ་དེ་ལ་ཆོས་འཆད་དོ། །དབང་པོ་དག་ནི་རབ་འབྲིང་ཐ་མར་གྱུར་པ་རྣམས། །དེ་ ལ་བདེ་གཤེགས་ཡེ་ཤེས་རྨད་དུ་བྱུང་བ་འཇུག །སེམས་ཅན་བསམ་པ་ཐར་པའི་སྣོད་དུ་གྱུར་མཁྱེན་ནས། །སྤྱོད་པ་མཁྱེན་ཅིང་མཁས་པ་མཆོག་གི་ཆོས་སྟོན་ཏོ། །གང་དག་མཐར་ ཕྱིན་སྐྱེ་ཞིང་ཉོན་མོངས་བརྟེན་པ་དང༌། །མི་གང་རྣམས་ཀྱི་དབང་པོ་ཡང་བར་གྱུར་པ་དང༌། །སྐྱེས་བུ་གང་གི་དབང་པོ་སྣྲེལ་ཞིང་གྱུར་པ་ཡི། །སྤྱོད་པ་མཁྱེན་ནས་དེ་ལྟར་མཐུན་པའི་ཆོས་སྟོན་ཏོ། ། སྐྱེས་བུ་གང་གི་དགེ་བའི་དབང་པོར་གྱུར་པ་དང༌། །མི་དགེ་བ་ཡི་དབང་པོར་གྱུར་པ་རྣམས་ཀྱང་དེ་བཞིན་མཁྱེན། །མིག་ནས་བཟུང་སྟེ་ཡིད་ཀྱི་བར་གྱི་དབང་པོ་དང༌། །ཡིད་མི་བདེ་དང་སྡུག་བསྔལ་ དབང་མཁྱེན་ཆོས་ཀྱང་སྟོན། །དད་བརྩོན་དྲན་དང་ཏིང་འཛིན་དེ་བཞིན་ཤེས་རབ་དང༌། །སྐྱེས་བུ་གང་ལ་དབང་པོ་འདི་དག་ཡོད་པ་ནི། །དེ་ལ་དད་པའི་གཏམ་སྟོན་དེ་བཞིན་བརྩོན་འགྲུས་དང༌། བསམ་གཏན་ཤེས་རབ་དག་ཀྱང་དམ་པའི་དོན་དུ་སྟོན། །མི་ཡི་དབང་པོ་རྣམ་པ་སྤྱོད་པའི་བྱེ་བྲག་གང༌། །མི་གང་བསམ་པ་ཅི་འཇུག་དེ་ཡི་དབང་པོ་ཡང༌། །ཆོས་མཆོག་རྟོགས་པས་དེ་དག་གི་ ནི་སྤྱོད་པ་མཁྱེན། །སྡུག་བསྔལ་ཀུན་ལས་ཐར་པར་བྱེད་པའི་ཆོས་འཆད་དོ། །གང་གི་དབང་པོ་སངས་རྒྱས་བྱང་ཆུབ་ཕྱིར་ངེས་ལ། །ཉན་ཐོས་ཤེས་པའི་རྗེས་འཇུག་ཆོ་ག་མི་ཤེས་ལ། ། དེ་ལ་བྱང་ཆུབ་རེག་འགྱུར་རྒྱ་ཆེན་གཏམ་རབ་སྟོན། །བདེ་གཤེགས་སྟོབས་ནི་མཐའ་ཡས་ཐུལ་དཀའ་ལྔ་པའོ། །འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་ལྔ་པ་ སྟེ༑ སུས་ཀྱང་འཇིག་རྟེན་འདི་ནི་ཆོས་དང་མཐུན་པ་ཞེས་བྱ་བའི་བར་དུའོ། །དེ་ལ་དེ་བཞིན་གཤེགས་པའི་ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་གང་ཞེ་ན། འདི་ལ་ཤཱ་རིའི་བུ། དེ་བཞིན་ ༄༅། །གཤེགས་པས་ཐམས་ཅད་དུ་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། ཡང་དག་པར་ངེས་པའི་སེམས་ཅན་ གྱི་ཁམས་རབ་ཏུ་མཁྱེན། ཡང་དག་པར་མ་ངེས་པའི་སེམས་ཅན་གྱི་ཁམས་རབ་ཏུ་མཁྱེན། ལོག་པར་ངེས་པའི་སེམས་ཅན་གྱི་ཁམས་རབ་ཏུ་མཁྱེན། མ་ངེས་པའི་སེམས་ཅན་ གྱི་ཁམས་ཀྱང་དེ་བཞིན་དུ་རབ་ཏུ་མཁྱེན་ཏོ། །རྒྱུའི་སྟོབས་ཅན་སྔོན་གྱི་སྦྱོར་བ་ཕུན་སུམ་ཚོགས་པ་ཟུར་ཙམ་གྱིས་གོ་བ། དབང་པོ་རྣོ་བའི་སེམས་ཅན་དེ་དག་ལ་དེ་བཞིན་གཤེགས་ པས་ཆོས་བསྟན་ཀྱང་རུང༌། མ་བསྟན་ཀྱང་རུང༌། དེ་རྣམ་པར་གྲོལ་བའི་སྐལ་བ་ཡོད་པ་དེ་དག་དེ་བཞིན་གཤེགས་པས་སྔོན་གྱི་རྒྱུའི་སྟོབས་མཁྱེན་ནས་དེ་བཞིན་དུ་མཐུན་པར་ཆོས་སྟོན་ ཏོ༑ ༑མ་ངེས་པའི་སེམས་ཅན་གྱི་ཁམས་རྐྱེན་གྱི་སྟོབས་ཅན་ཡོངས་སུ་སྨིན་པར་བྱ་བའི་མཚན་ཉིད་ཅན་གལ་ཏེ་མཐུན་པར་འདོམས་ཤིང་རྗེས་སུ་སྟོན་པ་དང་ཕྲད་ན། རྣམ་པར་གྲོལ་བར་ འགྱུར་གྱི། རྗེས་སུ་སྟོན་པ་དང་མ་ཕྲད་ན། རྣམ་པར་གྲོལ་བར་མི་འགྱུར་བ་དེ་དག་ལ་ཡང་དེ་བཞིན་གཤེགས་པས་དེ་ལྟར་རྐྱེན་དང༌། རྒྱུ་དང་ལྡན་པའི་གཏམ་ཡང་དག་པར་གསུངས་ཏེ། འདི་ལྟར་དེ་བཞིན་གཤེགས་པ་ལས་ཆོས་དེ་ཐོས་ནས་ཚུལ་བཞིན་རབ་ཏུ་སྦྱོར་བས་འབྲས་བུ་ཐོབ་པར་འགྱུར་ཏེ། དེ་དག་གི་དོན་དུ་སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་ངོ༌། ། ལོག་པར་ངེས་པའི་སེམས་ཅན་གྱི་ཁམས་ཡོངས་སུ་སྦྱང་བ་མ་བྱས་པ། ཁོ་རེ་ཆུང་བ། བླུན་པ། སྣོད་དུ་མ་གྱུར་པའི་སེམས་ཅན་དེ་དག་ལ་དེ་བཞིན་གཤེགས་པས་ཆོས་བསྟན་ཀྱང་རུང༌། མ་ བསྟན་ཀྱང་རུང་སྟེ། རྣམ་པར་གྲོལ་བའི་སྐལ་པ་མེད་པ་དེ་དག་ཀྱང་དེ་བཞིན་གཤེགས་པས་སྣོད་མ་ཡིན་པར་རིག་ནས་བཏང་སྙོམས་སུ་འཇོག་སྟེ། དེ་དག་གི་ཕྱིར་བྱང་ཆུབ་སེམས་དཔའ་རྣམས་ གོ་གྱོན་ཏོ། །གཞན་ཡང་ཤཱ་རིའི་བུ། དེ་བཞིན་གཤེགས་པས་འདོད་ཆགས་ཀྱི་ལམ་རྣམ་པ་གསུམ་རབ་ཏུ་མཁྱེན་ཏེ། །འདོད་ཆགས་ཀྱི་ལམ་སྡུག་པའི་རྣམ་པ་ལས་སྐྱེ་བ་ཡང་ཡོད། །འདོད་ ཆགས་ཀྱི་ལམ་རྗེས་སུ་ཆགས་པའི་རྣམ་པ་ལས་སྐྱེ་བ་ཡང་ཡོད། འདོད་ཆགས་ཀྱི་ལམ་སྔོན་གྱི་རྒྱུ་ལས་སྐྱེ་བ་ཡང་ཡོད་དོ། །ཞེས་སྡང་གི་ལམ་རྣམ་པ་གསུམ་ཡང་རབ་ཏུ་མཁྱེན་ཏེ། ཞེ་སྡང་གི་ ལམ་ཁོང་ཁྲོ་བའི་མཚན་མ་ལས་སྐྱེ་བ་ཡང་ཡོད། བསམ་པ་ཡོངས་སུ་རྫོགས་པ་ལས་སྐྱེ་བ་ཡང་ཡོད། སྔོན་གྱི་བག་ལ་ཉལ་བ་ལས་སྐྱེ་བ་ཡང་ཡོད་དོ། །གཏི་མུག་གི་ལམ་རྣམ་པ་གསུམ་ ཡང་རབ་ཏུ་མཁྱེན་ཏེ། གཏི་མུག་གི་ལམ་མ་རིག་པའི་རྒྱུ་ལས་སྐྱེ་བ་ཡང་ཡོད། གཏི་མུག་གི་ལམ་འཇིག་ཚོགས་ལ་ལྟ་བའི་རྒྱུ་ལས་སྐྱེ་བ་ཡང་ཡོད། གཏི་མུག་གི་ལམ་ཐེ་ཚོམ་གྱི་རྒྱུ་ལས་སྐྱེ་ བ་ཡང་ཡོད་དོ། །དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །གཞན་ཡང་ཤཱ་རིའི་བུ། དབང་པོ་རྣ་བའི་ཕྱིར་མངོན་པར་ཤེས་པ་མྱུར་ལ་སླ་བའི་ལམ་ཡང་དེ་ ༄༅། །བཞིན་གཤེགས་པས་རབ་ཏུ་མཁྱེན་ཏོ། །དབང་པོ་རྟུལ་པའི་ཕྱིར་མངོན་པར་ཤེས་པ་བུལ་ལ་དཀའ་བའི་ལམ་ཡང་རབ་ཏུ་མཁྱེན་ཏོ། །དབང་པོ་རྣོ་བའི་ ཕྱིར་མངོན་པར་ཤེས་པ་མྱུར་ལ་སླ་བའི་ལམ་ཡང་རབ་ཏུ་མཁྱེན་ཏོ། །དབང་པོ་རྟུལ་པའི་ཕྱིར་མངོན་པར་ཤེས་པ་བུལ་ལ་དཀའ་བའི་ལམ་ཡང་རབ་ཏུ་མཁྱེན་ཏོ། །དམིགས་པ་བོར་བའི་ ཕྱིར་མངོན་པར་ཤེས་པ་བུལ་ལ་བུལ་བའི་ལམ་ཡང་རབ་ཏུ་མཁྱེན་ཏོ། །ལམ་གྱི་རྒྱུན་མ་བཅད་པའི་ཕྱིར་མངོན་པར་ཤེས་པ་མྱུར་ལ་བུལ་བའི་ལམ་ཡང་རབ་ཏུ་མཁྱེན་ཏོ། །ཡོངས་ སུ་ཐུག་པ་མེད་པར་དབུགས་འབྱིན་པའི་ཕྱིར་མངོན་པར་ཤེས་པ་བུལ་ལ་མྱུར་བའི་ལམ་ཡང་རབ་ཏུ་མཁྱེན་ཏོ། །དེ་ལ་མ་ཆགས་པའི་ཕྱིར་མངོན་པར་ཤེས་པ་མྱུར་ལ་བུལ་བའི་ ལམ་ཡང་རབ་ཏུ་མཁྱེན་ཏོ། །སོ་སོར་རྟོག་པའི་སྟོབས་ཡོངས་སུ་རྫོགས་པར་བྱེད་ལ་སྒོམ་པའི་སྟོབས་ལ་མ་ཡིན་པའི་ལམ་ཡང་ཡོད། སྒོམ་པའི་སྟོབས་ཡོངས་སུ་རྫོགས་པར་བྱེད་ ལ་སོ་སོར་རྟོག་པའི་སྟོབས་ལ་མ་ཡིན་པའི་ལམ་ཡང་ཡོད། སྒོམས་པའི་སྟོབས་དང༌། སོ་སོར་རྟོག་པའི་སྟོབས་ཡོངས་སུ་རྫོགས་པར་བྱེད་པའི་ལམ་ཡང་ཡོད། སོ་སོར་རྟོག་པའི་ སྟོབས་དང༌། སྒོམ་པའི་སྟོབས་ཡོངས་སུ་རྫོགས་པར་མི་བྱེད་པའི་ལམ་ཡང་ཡོད་དེ། དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །བསམ་པ་ ཕུན་སུམ་ཚོགས་ལ་སྦྱོར་བ་ཕུན་སུམ་ཚོགས་པ་མ་ཡིན་པའི་ལམ་ཡང་ཡོད། སྦྱོར་བ་ཕུན་སུམ་ཚོགས་ལ་བསམ་པ་ཕུན་སུམ་ཚོགས་པ་མ་ཡིན་པའི་ལམ་ཡང་ཡོད། བསམ་པ་ཡང་ ཕུན་སུམ་ཚོགས་པ་མ་ཡིན་ལ་སྦྱོར་བ་ཡང་ཕུན་སུམ་ཚོགས་པ་མ་ཡིན་པའི་ལམ་ཡང་ཡོད། བསམ་པ་ཡང་ཕུན་སུམ་ཚོགས་ལ་སྦྱོར་བ་ཡང་ཕུན་སུམ་ཚོགས་པའི་ལམ་ཡང་ཡོད། དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ལུས་སྦྱོང་ལ་ངག་ལ་མ་ཡིན་སེམས་ལ་མ་ཡིན་པའི་ལམ་ཡང་ཡོད། ངག་སྦྱོང་ལ་ལུས་ལ་མ་ཡིན་ སེམས་ལ་མ་ཡིན་པའི་ལམ་ཡང་ཡོད། སེམས་སྦྱོང་ལ་ལུས་ལམ་ཡིན་དག་ལམ་ཡིན་པའི་ལམ་ཡང་ཡོད། ལུས་ལམ་ཡིན་ངག་ལམ་ཡིན་ལ་སེམས་ཀྱང་མི་སྦྱོང་བའི་ལམ་ཡང་ཡོད། ལུས་དང་ངག་དང་སེམས་སྦྱོང་བའི་ལམ་ཡང་ཡོད་དེ། དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ལྟར་ཤཱ་རིའི་བུ། སེམས་ཅན་ཐམས་ཅད་ ཀྱི་འཇུག་པའི་རྒྱུ་དང༌། ལྡོག་པའི་རྒྱུའི་ལམ་ཇི་སྙེད་པ་ཐམས་ཅད་དུ་དེ་བཞིན་གཤེགས་པའི་ཡེ་ཤེས་ཐོགས་པ་མེད་པར་འཇུག་གོ། དེ་ལྟར་ཤཱ་རིའི་བུ། དེ་བཞིན་གཤེགས་པའི་ཀུན་ཏུ་འགྲོ་ བའི་ལམ་མཁྱེན་པའི་སྟོབས་དེ་ནི། མཐའ་ཡས་མུ་མེད་ནམ་མཁའ་དང་མཚུངས་ཤིང་མཉམ་མོ། །བྱང་ཆུབ་སེམས་དཔས་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ ༄༅། །ཉི་མེད༑ ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ཅིང་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང༌། རྨད་དུ་འདུ་ཤེས་བསྐྱེད་ དོ༑ ༑དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཐམས་ཅད་ལམ་ནི་བདེ་གཤེགས་རབ་ཏུ་མཁྱེན། །སེམས་ ཅན་ཁམས་ནི་ངེས་རྒྱུ་བཅས་པ་མཁྱེན། །ཡོངས་སུ་སྨིན་པའི་མཚན་ཉིད་མ་ངེས་དང༌། །དེ་བཞིན་དབང་པོ་རྒྱུ་དང་ལྡན་པ་མཁྱེན། །འདོད་ཆགས་ལམ་ནི་རྣམ་པ་གསུམ་དང་ལྡན། ། ཞེ་སྡང་ལམ་གསུམ་དེ་བཞིན་གཏི་མུག་ལྡན། །རྣམ་གསུམ་རྒྱ་ཆེན་མཐའ་ཡས་ཉོན་མོངས་ལྡན། །ལམ་ལ་རྐྱེན་དང་རྒྱུ་ནི་སྟོན་པས་མཁྱེན། །དཀའ་བའི་ལམ་ལ་རྣོ་བར་འགྱུར་ བ་དང༌། །དེ་བཞིན་དབང་པོ་རྟུལ་ཞིང་བུལ་བ་དང༌། །སླ་བའི་ལམ་ལ་རྣོ་བར་འགྱུར་བ་དང༌། །དེ་བཞིན་བུལ་བའང་འཇིག་རྟེན་མགོན་པོས་མཁྱེན། །བུལ་བའི་ལམ་ལ་སྦྱོར་བ་བུལ་ བ་ཡོད༑ ༑དེ་བཞིན་བུལ་བ་ཡིན་ལ་སྦྱོར་བ་རྣོ། །མྱུར་བའི་ལམ་ལ་བུལ་བར་འགྱུར་བ་དང༌། །དེ་བཞིན་དེ་ལ་མ་ཆགས་མྱུར་བའང་ཡོད། །ལམ་ནི་སོ་སོར་རྟོག་པ་སྐྱེད་བྱེད་ལ། །ཡང་ དག་སྒོམ་པ་སྐྱེད་པ་མ་ཡིན་དང༌། །སྒོམ་པ་དག་ནི་སྐྱེད་པར་བྱེད་པ་དང༌། །གཉིས་ཀ་ཁྱད་པར་སྦྱོར་ལྡན་སྐྱེད་པ་ཡོད། །ལམ་ནི་བསམ་པ་ཡོངས་སུ་སྦྱོང་བྱེད་ལ། །སྦྱོར་བ་དག་ནི་སྦྱོང་ བར་མི་བྱེད་ཡོད། །རེས་འགའ་གཉིས་ཀ་སྦྱོང་བར་བྱེད་པའང་ཡོད། །དེ་དག་སངས་རྒྱས་ཐམས་ཅད་གཟིགས་པས་མཁྱེན། །ལུས་ནི་རྣམ་པར་སྦྱོང་ལ་ངག་མི་སྦྱོང༌། །སེམས་ཀྱང་རྣམ་པར་ སྦྱོང་བ་མ་ཡིན་དང༌། །ངག་རྣམས་དང་ནི་ལུས་ཀྱང་རབ་སྦྱོང་ལ། །སེམས་ནི་རེས་འགའ་མི་སྦྱོང་བ་ཡང་ཡོད། །སེམས་ནི་རབ་སྦྱོང་ངག་ལ་མ་ཡིན་ཏེ། །ལུས་ཀྱང་རྣམ་པར་སྦྱོང་བ་མ་ཡིན་ དང༌། །ངག་དང་དེ་བཞིན་སེམས་ཀྱང་རབ་སྦྱོང་ལ། །རེས་འགའ་ལུས་ནི་སྦྱོང་བར་མི་འགྱུར་ཡོད། །ལུས་དང་དེ་བཞིན་ངག་སེམས་སྦྱོང་ལམ་དང༌། །ཇི་ལྟར་ལྡོག་དང་འཇུག་པར་འགྱུར་བ་ རྣམས༑ ༑སངས་རྒྱས་ཐམས་ཅད་གཟིགས་པས་རབ་མཁྱེན་ཏེ། །འདི་ནི་དེ་བཞིན་གཤེགས་ཀྱི་སྟོབས་དྲུག་པའོ། །ཤཱ་རིའི་བུ། འདི་ནི། དེ་བཞིན་གཤེགས་པ་རྣམས་ཀྱི་སྟོབས་དྲུག་པ་ སྟེ༑ སྟོབས་དེ་དང་ལྡན་པས་དེ་བཞིན་གཤེགས་པ་ཁྱུ་མཆོག་གི་གནས་སུ་ཞལ་གྱིས་འཆེ་བ་ནས་སུས་ཀྱང་འཇིག་རྟེན་དུ་ཆོས་དང་མཐུན་པ་ཞེས་བྱ་བའི་བར་དུའོ། །དེ་ལ་དེ་བཞིན་གཤེགས་ པའི་བསམ་གཏན་དང༌། རྣམ་པར་ཐར་བ་དང༌། ཏིང་ངེ་འཛིན་དང༌། སྙོམས་པར་འཇུག་པའི་ཀུན་ནས་ཉོན་མོངས་པ་དང༌། རྣམ་པར་བྱང་བ་དང་ལྡང་བ་མཁྱེན་པའི་སྟོབས་གང་ཞེ་ན། འདི་ ལ་ཤཱ་རིའི་བུ། དེ་བཞིན་གཤེགས་པ་བདག་དང༌། ཕ་རོལ་གྱི་བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པའི་ཀུན་ནས་ཉོན་མོངས་པ་དང༌། ༄༅། །རྣམ་པར་བྱང་བ་དང་ལྡང་བ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། སེམས་ཅན་རྣམས་ཀྱི་ཀུན་ནས་ཉོན་མོངས་པའི་རྒྱུ་གང་ཡིན་པ་ དང༌། རྐྱེན་གང་ཡིན་པ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །སེམས་ཅན་རྣམས་ཀྱི་རྣམ་པར་དག་པའི་རྒྱུ་གང་ཡིན་པ་དང༌། རྐྱེན་གང་ཡིན་པ་དེ་ ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ལ་རྒྱུ་གང༌། རྐྱེན་གང་ཞེ་ན། སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པའི་རྒྱུ་ནི། ཚུལ་བཞིན་མ་ཡིན་ པ་ཡིད་ལ་བྱེད་པའོ། །སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པའི་རྐྱེན་ནི། མ་རིག་པའོ། །མ་རིག་པ་ནི། རྒྱུའོ། །འདུ་བྱེད་ནི། རྐྱེན་ཏོ། །འདུ་བྱེད་ནི། རྒྱུའོ། །རྣམ་པར་ཤེས་པ་ ནི༑ རྐྱེན་ཏོ། །རྣམ་པར་ཤེས་པ་ནི། རྒྱུའོ། །མིང་དང་གཟུགས་ནི། རྐྱེན་ཏོ། །མིང་དང་གཟུགས་ནི། རྒྱུའོ། །སྐྱེ་མཆེད་དྲུག་ནི། རྐྱེན་ཏོ། །སྐྱེ་མཆེད་དྲུག་ནི། རྒྱུའོ། །རེག་པ་ནི། རྐྱེན་ཏོ། ། རེག་པ་ནི། རྒྱུའོ། །ཚོར་བ་ནི། རྐྱེན་ཏོ། །ཆོར་བ་ནི། རྒྱུའོ། །སྲེད་པ་ནི། རྐྱེན་ཏོ། །སྲེད་པ་ནི། རྒྱུའོ། །ལེན་པ་ནི། རྐྱེན་ཏོ། །ལེན་པ་ནི། རྒྱུའོ། །སྲིད་པ་ནི། རྐྱེན་ཏོ། །སྲིད་པ་ནི། རྒྱུའོ། །སྐྱེ་ བ་ནི༑ རྐྱེན་ཏོ། །སྐྱེ་བ་ནི། རྒྱུའོ། །རྒ་ཤི་ནི། རྐྱེན་ཏོ། །ཉོན་མོངས་པ་ནི། རྒྱུའོ། །ལས་ནི། རྐྱེན་ཏོ། །ལྟ་བ་ནི། རྒྱུའོ། །སྲེད་པ་ནི། རྐྱེན་ཏོ། །བག་ལ་ཉལ་བ་ནི། རྒྱུའོ། །ཀུན་ནས་ལྡང་བ་ནི། རྐྱེན་ཏོ། །སེམས་ཅན་རྣམས་ཀྱི་ཀུན་ནས་ཉོན་མོངས་པར་འགྱུར་བའི་རྒྱུ་ནི། འདི། རྐྱེན་ནི། འདི་ཡིན་ཏེ། དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་ལ་ སེམས་ཅན་རྣམས་ཀྱི་རྣམ་པར་དག་པར་འགྱུར་བའི་རྒྱུ་གང༌། རྐྱེན་གང་ཞེ་ན། སེམས་ཅན་རྣམས་ཀྱི་རྣམ་པར་དག་པར་འགྱུར་བའི་རྒྱུ་གཉིས། རྐྱེན་གཉིས་ཏེ། གཞན་ལས་རྗེས་སུ་མཐུན་པའི་ སྒྲ་དང༌། སོ་སོ་བདག་ཉིད་ཚུལ་བཞིན་ཡིད་ལ་བྱེད་པའོ། །འདི་ལྟ་སྟེ། ཞི་གནས་ལ་རྩེ་གཅིག་པ་དང༌། ལྷག་མཐོང་ལ་མཁས་པའོ། །གཞན་ཡང་རྒྱུ་གཉིས་དང༌། རྐྱེན་གཉིས་ཏེ། འགྲོ་བ་ མེད་པར་ཤེས་པ་དང༌། འོང་བ་མེད་པར་ཤེས་པའོ། །གཞན་ཡང་རྒྱུ་གཉིས་དང༌། རྐྱེན་གཉིས་ཏེ། སྐྱེ་བ་མེད་པར་རབ་ཏུ་རྟོག་པ་དང༌། ངེས་པར་གྱུར་བ་ལ་མི་རེག་པའོ། །གཞན་ཡང་རྒྱུ་ གཉིས་དང༌། རྐྱེན་གཉིས་ཏེ། རྐང་པར་ལྡན་པ་དང༌། རིག་པས་རྣམ་པར་གྲོལ་བ་མངོན་སུམ་དུ་བྱེད་པའོ། །གཞན་ཡང་རྒྱུ་གཉིས་དང༌། རྐྱེན་གཉིས་ཏེ། རྣམ་པར་ཐར་པའི་སྒོ་ལ་སྒོམ་པ་ དང༌། རང་བཞིན་ཀྱིས་རྣམ་པར་གྲོལ་བར་ཤེས་པའོ། །གཞན་ཡང་རྒྱུ་གཉིས་དང༌། རྐྱེན་གཉིས་ཏེ། ཟད་པ་ཤེས་པ་དང༌། མི་སྐྱེ་བ་ཤེས་པའོ། །གཞན་ཡང་རྒྱུ་གཉིས་དང༌། རྐྱེན་གཉིས་ཏེ། བདེན་པ་རྗེས་སུ་རྟོགས་པ་དང༌། བདེན་པ་རྗེས་སུ་འཐོབ་པའོ། །རྒྱུ་དེ་དང༌། རྐྱེན་དེ་དག་ནི། སེམས་ཅན་རྣམས་རྣམ་པར་དག་པར་འགྱུར་བ་སྟེ། དེ་དག་ཀྱང་དེ་བཞིན་གཤེགས་པས་ཡང་དག་ ༄༅། །པ་ཇི་ལྟ་བ་བཞིན་རབ་ཏུ་མཁྱེན་ཏོ། །གཞན་ཡང་ཤཱ་རིའི་བུ། སེམས་ཅན་རྣམས་ཀྱི་ཀུན་ནས་ཉོན་མོངས་པ་ལ་དམིགས་པ་ཡང་ཚད་མེད། རྣམ་པར་དག་ པར་དམིགས་པ་ཡང་ཚད་མེད་དོ། །ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པས་ཀུན་ནས་ཉོན་མོངས་པ་ལ་དམིགས་པ་རྣམ་པར་དག་པའི་དམིགས་པ་ལ་འཇོག་པ་ཡང་ཡོད་དོ། །ཡང་ དག་པ་ཇི་ལྟ་བ་བཞིན་དུ་སོ་སོར་རྟོག་པས་རྣམ་པར་དག་པ་ལ་དམིགས་པ་ཡང་ཀུན་ནས་ཉོན་མོངས་པར་དམིགས་པ་ལ་འཇོག་པ་ཡང་ཡོད། མངོན་པའི་ང་རྒྱལ་གྱིས་འཛིན་པས་ཀུན་ནས་ ཉོན་མོངས་པར་དམིགས་པ་ལ་འཇོག་པ་དང༌། རྣམ་པར་དག་པ་དམིགས་པ་ལ་འཇོག་པའང་ཡོད་དེ། དེ་ལ་སྣྲེལ་ཞིའི་རྣམ་གྲངས་ཀྱིས་དེ་བཞིན་གཤེགས་པའི་ཡེ་ཤེས་འཇུག་གོ ། ཤཱ་རིའི་བུ། དེ་བཞིན་གཤེགས་པ་ནི། ཡེ་ཤེས་འདི་ལྟ་བུ་དང་ལྡན་པས་འདོད་པ་དག་ལས་དབེན་པ། སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་པ་དཔྱོད་པ་དང་ བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་རྫོགས་པར་བྱས་ཏེ་གནས་སོ། །བསམ་གཏན་དང་པོ་རྫོགས་པར་བྱས་ཏེ་གནས་ནས་འགོག་པ་ལས་ལྡང་ བ་དང༌། འགོག་པ་ལ་སྙོམས་པར་ཞུགས་ནས་བསམ་གཏན་དང་པོ་ལས་ལྡང་བའི་བར་དུའོ། །རྣམ་པར་ཐར་པ་བརྒྱད་ལ་རྗེས་སུ་མཐུན་པར་སྙོམས་པར་འཇུག་གོ །མི་མཐུན་པར་ཡང་ སྙོམས་པར་འཇུག་གོ །རྗེས་སུ་མཐུན་པ་དང་མི་མཐུན་པར་སྙོམས་པར་འཇུག་སྟེ། བརྒྱད་གང་ཞེ་ན། འདི་ལྟ་སྟེ། གཟུགས་ཅན་གཟུགས་རྣམས་ལ་ལྟ་བ་འདི་ནི། རྣམ་པར་ཐར་པ་དང་པོའོ།། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་འདི་ནི། རྣམ་པར་ཐར་པ་གཉིས་པའོ། །སྡུག་པའི་རྣམ་པར་ཐར་པ་ལ་སྡུག་པ་ཉིད་དུ་མོས་པར་འགྱུར་བ་དེ་ ནི༑ རྣམ་པར་ཐར་པ་གསུམ་པའོ། །ནམ་མཁའ་མཐའ་ཡས་སྐྱེ་མཆེད་ལ་སྙོམས་པར་འཇུག་པ་དེ་ནི། རྣམ་པར་ཐར་པ་བཞི་པའོ། །རྣམ་ཤེས་མཐའ་ཡས་སྐྱེ་མཆེད་ལ་སྙོམས་ པར་འཇུག་པ་དེ་ནི། རྣམ་པར་ཐར་པ་ལྔ་པའོ། །ཅི་ཡང་མེད་པའི་སྐྱེ་མཆེད་ལ་སྙོམས་པར་འཇུག་པ་དེ་ནི། རྣམ་པར་ཐར་པ་དྲུག་པའོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ ལ་སྙོམས་པར་འཇུག་པ་དེ་ནི། རྣམ་པར་ཐར་པ་བདུན་པའོ། །འདུ་ཤེས་དང་ཚོར་བ་འགོག་པ་དེ་ནི། རྣམ་པར་ཐར་པ་བརྒྱད་པ་སྟེ། རྣམ་པར་ཐར་པ་བརྒྱད་པོ་འདི་དག་ལ་རྗེས་སུ་མཐུན་ པ་དང༌། མི་མཐུན་པར་ཡང་སྙོམས་པར་འཇུག །སྣྲེལ་ཞིར་ཡང་སྙོམས་པར་འཇུག་གོ །ཏིང་ངེ་འཛིན་ལ་ཡང་ཏིང་ངེ་འཛིན་སྟོན་ལ། སྙོམས་པར་འཇུག་པས་རྟོགས་པར་སྟོན་ཀྱང་དེ་ བཞིན་གཤེགས་པའི་ཏིང་ངེ་འཛིན་ལ་ཐ་དད་པར་འགྱུར་བ་གང་ཡང་མེད། དེ་བཞིན་གཤེགས་པ་ནི། ཏིང་ངེ་འཛིན་ལ་དམིགས་པ་ལས་ཏིང་ངེ་འཛིན་ལ་མཉམ་པར་གཞག་པར་བྱ་བ་མེད། ༄༅། །དེ་བཞིན་གཤེགས་པ་ནི། ཏིང་ངེ་འཛིན་གཅིག་གིས་ཏིང་ངེ་འཛིན་ཐམས་ཅད་འགྲུབ་བོ། །དེ་བཞིན་གཤེགས་པ་ནི། ཏིང་ངེ་འཛིན་ལས་མ་བཞེངས་པར་ ཏིང་ངེ་འཛིན་ཐམས་ཅད་ལ་སྙོམས་པར་འཇུག་ཀྱང་དེ་བཞིན་གཤེགས་པ་ནི། སེམས་གཅིག་ནས་གཅིག་ཏུ་འཇུག་པ་མེད་དོ། །དེ་བཞིན་གཤེགས་པ་ལ་སེམས་མཉམ་པར་མ་ གཞག་པ་མི་དམིགས་སོ། །དེ་བཞིན་གཤེགས་པའི་ཏིང་ངེ་འཛིན་དེ་སུས་ཀྱང་ལྟ་མི་ནུས་ཏེ། ཉན་ཐོས་ཀྱི་ཏིང་ངེ་འཛིན་ནི། རང་སངས་རྒྱས་ཀྱི་ཏིང་ངེ་འཛིན་གྱིས་ཟིལ་གྱིས་ནོན་ཏོ། ། རང་སངས་རྒྱས་ཀྱི་ཏིང་ངེ་འཛིན་ནི། བྱང་ཆུབ་སེམས་དཔའི་ཏིང་ངེ་འཛིན་གྱིས་ཟིལ་གྱིས་ནོན་ཏོ། །བྱང་ཆུབ་སེམས་དཔའི་ཏིང་ངེ་འཛིན་ནི། སངས་རྒྱས་ཀྱི་ཏིང་ངེ་འཛིན་གྱིས་ཟིལ་གྱིས་ ནོན་ཏོ༑ ༑དེ་བཞིན་གཤེགས་པའི་ཏིང་ངེ་འཛིན་ནི། ཟིལ་གྱིས་མ་ནོན་པ་སྟེ། དེ་བཞིན་གཤེགས་པའི་ཡེ་ཤེས་ནི། ཟིལ་གྱིས་མ་ནོན་པར་འཇུག་གོ །གདམས་པ་གང་དང་རྗེས་སུ་བསྟན་པ་ གང་གིས་ཉན་ཐོས་རྣམས་ཀྱི་ཏིང་ངེ་འཛིན་བསྐྱེད་པ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །དེ་བཞིན་དུ་རང་སངས་རྒྱས་ཀྱི་དང༌། དེ་བཞིན་དུ་བྱང་ཆུབ་སེམས་དཔའ་དེ་དག་ཀྱང་ དེ་བཞིན་གཤེགས་པས་རབ་ཏུ་མཁྱེན་ཏོ། །མཁྱེན་ནས་ཀྱང་དེ་བཞིན་དུ་འདོམས་ཤིང་དེ་བཞིན་དུ་རྗེས་སུ་སྟོན་ཏོ། །དེ་ལྟར་ཤཱ་རིའི་བུ། དེ་བཞིན་གཤེགས་པའི་བསམ་གཏན་དང༌། རྣམ་ པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པའི་ཀུན་ནས་ཉོན་མོངས་པ་དང༌། རྣམ་པར་བྱང་བ་དང་ལྡང་བ་མཁྱེན་པའི་སྟོབས་དེ་ནི། མཐའ་ཡས་མུ་མེད་དེ། ནམ་མཁའ་དང་མཚུངས་ ཤིང་མཉམ་མོ། །བྱང་ཆུབ་སེམས་དཔའ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ཅིང་ནམ་མཁའ་ལྟ་བུར་ བསམ་གྱིས་མི་ཁྱབ་པའི་ཕྱིར་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །འདི་ལ་ཆོས་ཉིད་ནི། འདི་ཡིན་ཏེ། དེ་ལ་འདི་སྐད་ཅེས་བྱའོ། །གང་གིས་སེམས་ཅན་ཉོན་མོངས་ཤིང༌། །གང་ གིས་སེམས་ཅན་རྣམས་དག་འགྱུར། །དེ་ཡང་དཔའ་བོ་ཆེན་པོས་མཁྱེན། །མཁྱེན་ནས་གཏམ་རྣམས་སྟོན་པར་མཛད། །གང་དུ་མ་རིག་སྐྱེ་འགྱུར་བ། །ཉོན་མོངས་རྒྱུ་ནི་ཚུལ་བཞིན་མིན། ། དེ་ཡི་རྐྱེན་ནི་འདུ་བྱེད་དེ། །སྡུག་བསྔལ་རབ་ཏུ་སྐྱེ་བར་འགྱུར། །སྲིད་པའི་ཡན་ལག་སྐྱེད་པ་ཡི། །ཐམས་ཅད་རྩ་བ་ཚུལ་བཞིན་མིན། །དེ་ཉིད་སངས་རྒྱས་རབ་མཁྱེན་ནས། །དེ་བཞིན་དུ་ཡང་སྟོན་ པར་མཛད། །ལས་ཀྱི་རྩ་བ་ཉོན་མོངས་པ། །མི་མཁས་མངོན་པར་འདུ་བྱེད་དེ། །སྡུག་བསྔལ་འབྱུང་བར་འགྱུར་བའི་བར། །དེ་ཡི་རྐྱེན་ནི་རྣམ་པར་ཤེས། །གང་གིས་སེམས་ཅན་དག་འགྱུར་བ། །རྒྱུ་གཉིས་ དང་ནི་རྐྱེན་གཉིས་ཏེ། །གཞན་ལས་རྗེས་སུ་མཐུན་སྒྲ་དང༌། །ནང་དུ་ཚུལ་བཞིན་ལྟ་བའོ། །ཚུལ་བཞིན་རྒྱུ་ནི་ཞི་གནས་ཏེ། །ལྷག་མཐོང་བར་ནི་རྐྱེན་ཡིན་ནོ། །སེམས་ཅན་གང་གིས་འགྲོར་འགྱུར་ ༄༅། །བ༑ ༑དེ་ཡང་འདྲེན་པས་རབ་ཏུ་མཁྱེན། །ཚུལ་ཁྲིམས་ལ་ནི་རྣལ་འབྱོར་གནས། །ཆོས་རྣམས་སྟོང་པར་རབ་ཏུ་རྟོགས། །ཐར་པའི་སྒོ་ནི་བསྒོམས་པས་ན། ། སྲིད་པ་དོག་ལས་ཐར་པར་འགྱུར། །དེ་དག་སངས་རྒྱས་རབ་མཁྱེན་ནས། །རྣམ་སྦྱོང་སྐྱེས་བུ་བུད་མེད་ལ། །སྟོང་པ་ཉིད་དང་མཚན་མེད་དང༌། །རྣམ་པར་ཐར་པ་རབ་ཏུ་སྟོན། །བསམ་གཏན་ ལ་ནི་སྙོམས་ཞུགས་པ། །རང་རྒྱལ་དང་ནི་ཉན་ཐོས་རྣམས། །དེ་དག་རྣམས་ཀྱང་དོག་པར་བཤད། །དེ་ཡི་འགྲན་ཟླ་ཡོད་པར་གསུངས། །སངས་རྒྱས་བསམ་གཏན་རྣམ་ཐར་ལ། །དགྲ་དང་ བཅས་མེད་དོག་པ་མེད། །སངས་རྒྱས་ཀྱི་ནི་སྟོབས་བདུན་པ། །ཕ་རོལ་རྒོལ་བས་ཐུལ་བར་དཀའ། །ཤཱ་རིའི་བུ། འདི་ནི། དེ་བཞིན་གཤེགས་པ་རྣམས་ཀྱིས་དེ་བཞིན་གཤེགས་པའི་སྟོབས་ བདུན་པ་སྟེ། སྟོབས་དེ་དང་ལྡན་པས་དེ་བཞིན་གཤེགས་པ་ཁྱུ་མཆོག་གི་གནས་སུ་ཞལ་གྱིས་འཆེ་བ་ནས་སུས་ཀྱང་འཇིག་རྟེན་འདིར་ཆོས་དང་མཐུན་པར་ཞེས་བྱ་བའི་བར་དུའོ། །དེ་ལ་དེ་ བཞིན་གཤེགས་པའི་སྔོན་གྱི་གནས་རྗེས་སུ་དྲན་པ་མངོན་སུམ་དུ་བྱེད་པ་མཁྱེན་པའི་སྟོབས་གང་ཞེ་ན། འདི་ལ་ཤཱ་རིའི་བུ། དེ་བཞིན་གཤེགས་པས་བླ་ན་མེད་པའི་ཡེ་ཤེས་ཀྱིས་བདག་ དང་སེམས་ཅན་གཞན་རྣམས་དང༌། གང་ཟག་གཞན་དག་གི་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ། །འདི་ལྟ་སྟེ། སྐྱེ་བ་གཅིག་གམ། གཉིས་སམ། གསུམ་མམ། བཞིའམ། ལྔའམ་ བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུའམ། སྐྱེ་བ་བརྒྱའམ། སྐྱེ་བ་སྟོང་ངམ། སྐྱེ་བ་བརྒྱ་སྟོང་ནས་སྐྱེ་བ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་རྗེས་སུ་དྲན་ནོ། །འཇིག་ པའི་བསྐལ་པའམ། འཆགས་པའི་བསྐལ་པའམ། འཇིག་པ་དང་འཆགས་པའི་བསྐལ་པའམ། འཇིག་པའི་བསྐལ་པ་དུ་མའམ། འཆགས་པའི་བསྐལ་པ་དུ་མའམ། འཇིག་པ་དང་ འཆགས་པའི་བསྐལ་པ་དུ་མ་ཞིག་ན་ང་སྔོན་ཆེ་གེ་མོ་ཞིག་ཏུ་བྱུང་སྟེ། མིང་ནི། འདི་ཞེས་བྱ། རུས་ནི། འདི་ཞེས་བྱ། རིགས་ནི། འདི་ཞེས་བྱ། ཟས་ནི། འདི་ལྟ་བུ་ཞིག་ཟ་ཟ། ཁ་དོག་ནི། འདི་ལྟ་བུ། མཚན་མ་ནི། འདི་ལྟ་བུ། དབྱིབས་ནི། འདི་ལྟ་བུ། ཚེ་ནི། འདི་ཙམ་ཞིག་ཐུབ། ཡུན་ནི། འདི་སྲིད་ཅིག་གནས། བདེ་བ་དང༌། སྡུག་བསྔལ་ནི། འདི་ལྟ་བུ་ཞིག་མྱོང་སྟེ། བདག་དེ་ནས་ ཤི་འཕོས་ནས་ཆེ་གེ་མོ་ཞིག་ཏུ་སྐྱེས་སོ། །བདག་དེ་ནས་ཤི་འཕོས་ནས་འདིར་སྐྱེས་སོ། །ཞེས་འདི་ལྟ་བུའི་རྣམ་པ་དང་བཅས། ཡུལ་ཕྱོགས་དང་བཅས། གཞི་ཅི་ལས་གྱུར་པ་དང་བཅས་པར་བདག་ དང་གཞན་གྱི་སྔོན་གྱི་གནས་དུ་མ་རྗེས་སུ་དྲན་ནོ། །སེམས་ཅན་གང་གི་སྔོན་གྱི་རྒྱུ་ཇི་ལྟ་བུ་དང༌། རྒྱུ་གང་གིས་སེམས་ཅན་དུ་འགྱུར་བའི་རྒྱུ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏེ། མཁྱེན་ ནས་ཀྱང་དེ་བཞིན་དུ་ཆོས་སྟོན་ཏོ། །འདས་པའི་སེམས་ཅན་ཐམས་ཅད་ཀྱི་འདས་པའི་སེམས་ཀྱི་རྒྱུད་ཀྱང་རབ་ཏུ་མཁྱེན་ནོ། །སེམས་གང་གི་འོག་ཏུ་གང་ལ་དམིགས་པའི་སེམས་སྐྱེས་པ་དང༌། ༄༅། །དམིགས་པ་གང་མ་ཚང་བས་འགགས་པ་དེ་ཐམས་ཅད་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །དེ་ལྟར་ཤཱ་རིའི་བུ། གང་སེམས་ཅན་གཅིག་གི་སེམས་ གཅིག་ནས་གཅིག་ཏུ་སེམས་འདི་ལྟ་བུ་ཞིག་གི་འོག་ཏུ་སེམས་འདི་ལྟ་བུ་ཞིག་བྱུང་ངོ༌། །ཞེས་བྱ་བ་དེ་ནི། བསྐལ་པ་གངྒཱའི་ཀླུང་གི་བྱེ་མ་སྙེད་དུ་ཡང་ཚིག་གིས་བཤད་པས་སྟོན་པར་མི་ནུས་ཏེ། དེ་བཞིན་དུ་སེམས་ཅན་ཐམས་ཅད་ཀྱི་ཡང་ཐམས་ཅད་དེ་བཞིན་དུ་དེ་བཞིན་གཤེགས་པས་རབ་ཏུ་མཁྱེན་ཏོ། །ཐ་མའི་མཐའི་བར་གྱི་བསྐལ་པར་དེ་བཞིན་གཤེགས་པས་སེམས་ཅན་དེ་ དག་གི་སེམས་རྣམས་བཤད་ཀྱང་དེ་བཞིན་གཤེགས་པའི་ཡེ་ཤེས་མཐར་ཐུག་བར་མི་འགྱུར་རོ། །དེ་ལྟར་ཤཱ་རིའི་བུ། དེ་བཞིན་གཤེགས་པའི་སྔོན་གྱི་གནས་རྗེས་སུ་དྲན་པ་མངོན་སུམ་ དུ་བྱེད་པ་མཁྱེན་པའི་སྟོབས་ནི། བསམ་གྱིས་མི་ཁྱབ། མཚུངས་པ་མེད། ཚད་མེད། གྲངས་མེད། བརྗོད་དུ་མེད་དེ། དེའི་མཐའི་གནས་ནི། བདེ་བར་བསྟན་མི་ནུས་སོ། །སངས་རྒྱས་ ཀྱི་ཁྱུ་མཆོག་ཏུ་གྱུར་པས་དེ་བཞིན་གཤེགས་པ་སེམས་ཅན་དེ་དག་ལ་ཀྱེ་སེམས་ཅན་རྣམས། དགེ་བའི་རྩ་བ་དེ་དང༌། དེ་སངས་རྒྱས་ལ་བསྐྱེད་པའམ། ཉན་ཐོས་ལ་བསྐྱེད་པའམ། རང་ སངས་རྒྱས་ལ་བསྐྱེད་པའམ། ཆོས་ལ་བསྐྱེད་པ་དེ་དག་དྲན་པར་གྱིས་ཤིག་ཅེས་དྲན་པར་མཛད་དོ། །འདི་ལྟ་སྟེ། དེ་དག་ཀྱང་སངས་རྒྱས་ཀྱི་མཐུས་དྲན་པར་འགྱུར་རོ། །དེ་བཞིན་གཤེགས་ པས་དེ་དག་ལ་དགེ་བའི་རྩ་བ་ལ་དམིགས་པ་དེ་ལས་ཆོས་འདི་ལྟ་བུར་སྟོན་ཏེ། ཅི་ནས་སེམས་ཅན་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཞིང་མོས་པ་ ཇི་ལྟ་བ་བཞིན་དུ་ལ་ལ་ནི། ཉན་ཐོས་ཀྱི་ཐེག་པས། ལ་ལ་ནི། རང་སངས་རྒྱས་ཀྱི་ཐེག་པས་འབྱུང་བར་འགྱུར་རོ། །ལ་ལ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ བསྐྱེད་དོ། །དེ་ལྟར་ཤཱ་རིའི་བུ། དེ་བཞིན་གཤེགས་པའི་སྔོན་གྱི་གནས་རྗེས་སུ་དྲན་པ་མངོན་སུམ་དུ་བྱེད་པ་ཤེས་པའི་སྟོབས་ནི། མཐའ་ཡས་མུ་མེད་དེ། ནམ་མཁའ་དང་མཚུངས་ཤིང་མཉམ་ མོ༑ ༑བྱང་ཆུབ་སེམས་དཔའ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ་བ་ནས་ནམ་མཁའ་ལྟ་བུར་བསམ་གྱིས་མི་ཁྱབ་པའི་བར་དུའོ། །བཅོམ་ལྡན་ འདས་ཀྱིས་དེ་སྐད་གསུངས་ཏེ། བདེ་བར་གཤེགས་པས་དེ་སྐད་བཀའ་སྩལ་ནས་སྟོན་པས་ཡང་འདི་སྐད་གསུངས་སོ། །བདག་གི་དང་ནི་དེ་བཞིན་གཞན་དག་གི །འཇིག་རྟེན་སྒྲོན་མས་སྔོན་ གྱི་དྲན་པ་ནི། །བསྐལ་པ་བྱེ་བ་ཁྲག་ཁྲིག་མཐའ་ཡས་པ། །སྐྱུ་རུ་ར་ལྔ་ལག་མཐིལ་བཞག་པ་བཞིན། །མིང་རུས་དེ་བཞིན་ཁ་དོག་རྣམ་པར་རྟོག །ཚེ་དང་གནས་དང་འཆི་འཕོ་འགྲོ་བ་དང༌། གང་གི་རྒྱུ་ལ་སེམས་ཅན་བརྩོན་ལྡན་པ། །དེ་མཁྱེན་པ་ནི་དེ་ལ་ཆོས་ཀྱང་འཆད། །འགྲོ་བ་རྣམས་ཀྱི་སེམས་དང་སེམས་བྱུང་ཆོས། །གང་དག་འདས་པ་མཐའ་ཡས་མུ་མེད་པ། །གང་གི་འོག་ཏུ་ ༄༅། །སེམས་གང་བྱུང་བ་ཀུན། རྒྱལ་བའི་ཡེ་ཤེས་ཆེན་པོ་མངའ་བས་མཁྱེན། །སེམས་ཅན་གཅིག་གི་སེམས་རྒྱུད་སྔོན་འདས་པ། །བདེ་བར་གཤེགས་པས་རབ་ཏུ་མཁྱེན་པ་ནི། །བསྐལ་པ་གངྒཱའི་ ཀླུང་གི་བྱེ་སྙེད་དུ། །བཤད་ཀྱང་དེ་ཡི་མཐའ་མར་ཕྱིན་མི་འགྱུར། །སྔོན་གྱི་སྤྱོད་པ་ཇི་སྙེད་དེ་དག་ནི། །ཕྱི་མའི་མཐའ་ཡི་བར་དུ་ངས་བཤད་ཀྱང༌། །མཚུངས་པ་མེད་པའི་ཡེ་ཤེས་མི་ཟད་དེ། ། བཅོམ་ལྡན་ཡེ་ཤེས་རྒྱ་མཚོ་འདི་འདྲའོ། །སྔོན་གྱི་རྒྱལ་ལ་བསྟི་སྟང་གང་བྱས་ཤིང༌། །སེམས་ཅན་གང་དག་དགེ་བའི་བསམ་གྱུར་པ། །སངས་རྒྱས་རྫུ་འཕྲུལ་སྟོབས་ཀྱི་ཤུགས་ལ་ གནས། །སྔོན་དག་དགེ་བ་བྱས་པ་རྣམས་ཀྱང་དྲན། །སྔོན་ནི་བསོད་ནམས་ཇི་འདྲ་བྱས་པ་རྣམས། །དེ་དག་རྣམས་ཀྱང་སྟོན་པའི་མཐུས་དྲན་ཏེ། །དེ་དག་དྲན་ནས་གནས་ནི་གསུམ་ལ་ འཁོད། །ཐར་པའི་གནས་ལས་ཕྱིར་ཡང་མི་ལྡོག་འགྱུར། །བདེ་གཤེགས་སྔོན་གྱི་སྦྱོར་བ་མཐའ་ཡས་ཏེ། །སེམས་ཅན་ཐམས་ཅད་ཀྱིས་ནི་བསམ་མི་ནུས། །མཐའ་ཡས་གྲགས་པའི་ སྟོབས་ནི་བརྒྱད་པ་ལ། །རྒྱལ་སྲས་བདག་ཉིད་ཆེན་པོ་དད་པར་འགྱུར། །ཤཱ་རིའི་བུ། འདི་ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བརྒྱད་པ་སྟེ། སྟོབས་དེ་དང་ ལྡན་པས་ཞེས་བྱ་བ་ནས་ཆོས་དང་མཐུན་པ་ཞེས་བྱ་བའི་བར་དུའོ། །དེ་ལ་དེ་བཞིན་གཤེགས་པའི་ལྷའི་མིག་རྗེས་སུ་དྲན་པ་མངོན་སུམ་དུ་བྱེད་པ་མཁྱེན་པའི་སྟོབས་གང་ཞེ་ན། འདི་ལ་ཤཱ་རིའི་ བུ༑ དེ་བཞིན་གཤེགས་པས་བླ་ན་མེད་པའི་ཡེ་ཤེས་དང༌། མི་ལས་ཤིན་ཏུ་འདས་པའི་ལྷའི་མིག་རྣམ་པར་དག་པས་སེམས་ཅན་རྣམས་འཆི་འཕོ་བ་དང༌། སྐྱེ་བ་དང༌། བཟང་པོ་དང༌། ངན་ པ་དང༌། ཁ་དོག་མཛེས་པ་དང༌། ཁ་དོག་མི་སྡུག་པ་དང༌། བདེ་འགྲོར་འགྲོ་བ་དང༌། ངན་འགྲོར་འགྲོ་བ་རྣམས་གཟིགས་སོ། །སེམས་ཅན་འདི་དག་ནི། ལུས་ཀྱིས་ཉེས་པར་སྤྱོད་པ་དང་ལྡན། ངག་ གིས་ཉེས་པར་སྤྱོད་པ་དང་ལྡན། ཡིད་ཀྱིས་ཉེས་པར་སྤྱོད་པ་དང་ལྡན་པ། འཕགས་པ་ལ་སྐུར་པ་འདེབས་པ། ལོག་པར་ལྟ་བ་དག་སྟེ། དེ་དག་ལོག་པར་ལྟ་བའི་ལས་ཡང་དག་པར་བླངས་པའི་རྒྱུས་ ལུས་ཞིག་སྟེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེའོ། །དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དུའང་དེ་བཞིན་ནོ། །ཡང་སེམས་ཅན་འདི་དག་ ནི༑ ལུས་ཀྱིས་ལེགས་པར་སྤྱོད་པ་དང་ལྡན། ངག་གིས་ལེགས་པར་སྤྱོད་པ་དང་ལྡན། ཡིད་ཀྱིས་ལེགས་པར་སྤྱོད་པ་དང་ལྡན་ཏེ། འཕགས་པ་རྣམས་ལ་སྐུར་པ་མི་འདེབས་པ། ཡང་དག་པར་ ལྟ་བ་སྟེ༑ དེ་དག་ཡང་དག་པར་ལྟ་བ་ཡང་དག་པར་བླངས་པའི་རྒྱུས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷར་སྐྱེའོ། །ཞེས་སེམས་ཅན་རྣམས་ཀྱི་ལས་ཇི་ལྟར་བསགས་པ་རྣམས་ རབ་ཏུ་མཁྱེན་ཏོ། །དེ་ལ་དེ་བཞིན་གཤེགས་པའི་ལྷའི་མིག་དེ་ནི། ཕྱོགས་བཅུའི་སངས་རྒྱས་ཀྱི་ཞིང་ནམ་མཁའི་མཐའ་ཆོས་ཀྱི་དབྱིངས་ཚད་མེད་པ་བརྗོད་དུ་མེད་པ་གངྒཱའི་ཀླུང་གི་བྱེ་མ་ལས་ ༄༅། །ཀྱང་ཤིན་ཏུ་འདས་པ་ཐམས་ཅད་ན་སངས་རྒྱས་ཀྱི་ཞིང་གང་ཇི་སྙེད་སྣང་བར་གྱུར་པ་དེ་དག་ཐམས་ཅད་ནི། འཚིག་པ་དང༌། འཇིག་པ་དང༌། འཆགས་པར་གཟིགས་ སོ༑ ༑སེམས་ཅན་གང་དག་ཁ་ཅིག་སྣང་བར་གྱུར་པ་དེ་དག་ཐམས་ཅད་ནི། འཆི་འཕོ་བ་དང༌། སྐྱེ་བར་གཟིགས་སོ། །བྱང་ཆུབ་སེམས་དཔའ་གང་དག་ཁ་ཅིག་སྣང་བར་གྱུར་པ་དེ་དག་ ཐམས་ཅད་ནི། དགའ་ལྡན་གནས་ནས་འཆི་འཕོ་བ་དང༌། མའི་རུམ་དུ་འཇུག་པ་དང༌། བཙའ་བ་དང༌། གོམ་པ་བདུན་འདོར་བ་དང༌། བཙུན་མོའི་འཁོར་གྱི་དང་དུ་འཇུག་པ་དང༌། མངོན་པར་ འབྱུང་བར་གཟིགས་སོ། །སངས་རྒྱས་བཅོམ་ལྡན་འདས་གང་དག་ཁ་ཅིག་སྣང་བར་གྱུར་པ་དེ་དག་ཐམས་ཅད་ནི། བྱང་ཆུབ་མངོན་པར་རྫོགས་པར་འཚང་རྒྱ་བར་གཟིགས་སོ། །ཆོས་ཀྱི་འཁོར་ ལོ་རབ་ཏུ་བསྐོར་བ་དང༌། ཚེའི་འདུ་བྱེད་འདོར་བ་དང༌། ཡོངས་སུ་མྱ་ངན་ལས་འདའ་བར་ཡང་གཟིགས་སོ། །ཉན་ཐོས་གང་དག་ཁ་ཅིག་སྣང་བར་གྱུར་པ་དེ་དག་ཐམས་ཅད་ནི། ཤིན་ཏུ་ ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདའ་བར་གཟིགས་སོ། །རང་སངས་རྒྱས་གང་དག་ཁ་ཅིག་སྣང་བར་གྱུར་པ་དེ་དག་ཐམས་ཅད་ནི། རྫུ་འཕྲུལ་སྟོན་ཅིང་ཡོན་སྦྱོང་ བར་གཟིགས་སོ། །སེམས་ཅན་གང་དག་སྣང་བར་མ་གྱུར་པ། ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་དང་ལྡན་པ་རྣམས་ཀྱི་མིག་གི་ལམ་དུ་མི་འགྲོ་བ་དང༌། ཉན་ཐོས་དང༌། རང་ སངས་རྒྱས་དང༌། བྱང་ཆུབ་སེམས་དཔའ་རྣམས་ཀྱིས་ཀྱང་མཐོང་བར་མི་འགྱུར་བ་དེ་དག་དེ་བཞིན་གཤེགས་པའི་ལྷའི་མིག་གིས་གཟིགས་སོ། །ཡང་དེ་བཞིན་གཤེགས་པས་ཤིང་རྟའི་འཕང་ལོའི་ཚད་ ཙམ་ལ་སྣང་བར་མ་གྱུར་པའི་སེམས་ཅན་རྣམས་གཟིགས་པ་དེ་དག་ནི། ཤིན་ཏུ་མང་གི །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ལྷ་དང་མི་རྣམས་ནི། དེ་ལྟར་མ་ཡིན་ཏེ། དེ་ལྟར་མི་ སྣང་བར་གྱུར་པའི་སེམས་ཅན་གྱི་ཁམས་ཀྱང་ཚད་མེད་དོ། །འདི་ལྟར་ཤཱ་རིའི་བུ། དེ་བཞིན་གཤེགས་པ་ནི། ལྷའི་མིག་གིས་སངས་རྒྱས་ཀྱི་ཞིང་ན་སེམས་ཅན་གང་སངས་རྒྱས་ཀྱིས་འདུལ་བར་འགྱུར་ ཞེས་སེམས་ཅན་གྱི་ཁམས་ལ་གཟིགས་ཏེ། སེམས་ཅན་ཇི་ཙམ་སངས་རྒྱས་ཀྱིས་འདུལ་བར་འགྱུར་བ་དེ་དག་གི་མདུན་ན་དེ་བཞིན་གཤེགས་པ་བཞུགས་ཤིང༌། སེམས་ཅན་དེ་དག་འདུལ་ཡང་ སེམས་ཅན་གཞན་གྱིས་མི་ཤེས་སོ། །དེ་ལྟར་ན། ཤཱ་རིའི་བུ། དེ་བཞིན་གཤེགས་པའི་ལྷའི་མིག་རྗེས་སུ་དྲན་པ་མངོན་སུམ་དུ་བྱེད་པ་མཁྱེན་པའི་སྟོབས་ནི། མཐའ་ཡས་མུ་མེད་དེ། ནམ་ མཁའ་དང་མཚུངས་ཤིང་མཉམ་མོ། །བྱང་ཆུབ་སེམས་དཔའ་དེ་ཐོས་ནས་མངོན་པར་དད་པ་ནས་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ཞེས་བྱ་བའི་བར་དུའོ། །དེ་ནས་བཅོམ་ལྡན་འདས་ ཀྱིས་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བདེ་བར་གཤེགས་པའི་ལྷའི་མིག་དྲི་མེད་དེ། བསྐལ་པ་དུ་མར་དགེ་བའི་ལས་ཀྱིས་སྦྱངས། །དེས་ནི་ ༄༅། །རྒྱལ་བས་ཕྱོགས་བཅུའི་སངས་རྒྱས་ཞིང༌། །རྒྱ་ཆེན་བསམ་གྱིས་མི་ཁྱབ་རྣམས་ཀྱང་གཟིགས། །འབྱུང་བ་དང་ནི་འཇིག་པ་ཇི་སྙེད་པ། །ཁ་ཅིག་མེ་ཡིས་འཁོར་ཅིང་ སེམས་ཅན་གནས། ཁ་ཅིག་སངས་རྒྱས་ལྡན་ཞིང་ཁ་ཅིག་སྟོང༌། །ཐམས་ཅད་རང་བྱུང་གི་ནི་སྤྱན་གྱིས་གཟིགས། །སེམས་ཅན་ཁམས་ནི་རྒྱ་ཆེར་བསམ་མི་ཁྱབ། །གཟུགས་ཅན་ གཟུགས་མེད་གང་དག་ཇི་སྙེད་དང༌། །གང་དག་ངན་འགྲོར་འགྲོ་དང་བདེ་འགྲོ་བ། །ཐམས་ཅད་རང་བྱུང་གི་ནི་སྤྱན་གྱིས་གཟིགས། །སངས་རྒྱས་བྱེ་བ་མང་པོ་གང་བཞུགས་དང༌། །རང་ བྱུང་འདྲེན་པ་མྱ་ངན་གང་འདས་དང༌། །རང་རྒྱལ་གང་དང་ཉན་ཐོས་གང་ཡོད་པ། །ཐམས་ཅད་རང་བྱུང་གི་ནི་སྤྱན་གྱིས་གཟིགས། །བྱང་ཆུབ་སེམས་དཔའ་སྲོག་ཆགས་ཕན་འདོགས་པ། ། གང་དག་བྱང་ཆུབ་སྤྱོད་པ་མཆོག་སྤྱོད་ཅིང༌། །ལ་ལ་གཞི་མེད་གནས་ནི་རྟོགས་གྱུར་པ། །ཐམས་ཅད་རང་བྱུང་འདྲེན་པ་དག་གིས་གཟིགས། །གང་གིས་སྲོག་ཆགས་ཤིན་ཏུ་ཕྲ་མཐོང་ བ༑ ༑བདེ་གཤེགས་མིག་ནི་འདི་འདྲ་དྲི་མ་མེད། །མིག་སྟོབས་བསམ་གྱིས་མི་ཁྱབ་དགུ་པ་སྟེ། །རྒྱལ་སྲས་དེས་པ་རྣམས་ནི་མངོན་པར་དད། །ཤཱ་རིའི་བུ། འདི་ནི། དེ་བཞིན་གཤེགས་ པ་རྣམས་ཀྱི་དེ་བཞིན་གཤེགས་པའི་སྟོབས་དགུ་པ་སྟེ། སྟོབས་དེ་དང་ལྡན་པས་ཁྱུ་མཆོག་གི་གནས་སུ་ཞལ་གྱིས་འཆེ་ཞིང་འཁོར་གྱི་ནང་དུ་སེངྒེའི་སྒྲ་ཡང་དག་པར་སྒྲོག་པ་ནས་ སུས་ཀྱང་འཇིག་རྟེན་འདིར་ཆོས་དང་མཐུན་པ་ཞེས་བྱ་བའི་བར་དུའོ། །དེ་ལ་དེ་བཞིན་གཤེགས་པའི་ཟག་པ་ཟད་པ་མངོན་སུམ་དུ་བྱེད་པ་མཁྱེན་པའི་སྟོབས་གང་ཞེ་ན། འདི་ལ་ཤཱ་རིའི་བུ། དེ་ བཞིན་གཤེགས་པས་བླ་ན་མེད་པའི་དེ་བཞིན་གཤེགས་པའི་ཡེ་ཤེས་ཀྱི་སྟོབས་ཀྱིས་ཟག་པ་ཐམས་ཅད་ཟད་པས་བདག་སྐྱེ་བ་ནི། ཟད། ཚངས་པར་སྤྱོད་པ་ལ་ནི། བསྟེན། བྱ་བ་ནི། བྱས་ཏེ། འདི་ལ་སྲིད་པ་གཞན་མི་ཤེས་སོ། །ཞེས་ཟག་པ་མེད་པ། སེམས་རྣམ་པར་གྲོལ་བ། རང་གི་མངོན་པར་ཤེས་པ་ལྔ་མངོན་སུམ་དུ་བྱས་ནས་རྫོགས་པར་བྱས་ཏེ་གནས་སོ། །དེ་ལ་དེ་ བཞིན་གཤེགས་པའི་ཟག་བཟད་པ་མཁྱེན་པའི་སྟོབས་དེ་ནི། བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་བཅོམ་པའོ། །ཉན་ཐོས་ཀྱི་ཐེག་པའི་ཟག་པ་ཟད་པ་ནི། ཚད་དུ་བྱས་ པའི་བག་ཆགས་ཡང་དག་པར་བཅོམ་པའོ། །རང་སངས་རྒྱས་ཀྱི་ཟག་པ་ཟད་པ་ནི། ཚད་ཡོད་པ་སྟེ། སྙིང་རྗེ་ཆེན་པོ་དང་བྲལ་བ། སྤོབས་པ་དང་བྲལ་བའོ། །དེ་བཞིན་གཤེགས་པའི་ཟག་པ་ ཟད་པ་ནི། རྣམ་པ་ཐམས་ཅད་ཀྱི་མཆོག་དང་ལྡན་པ། བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་བཅོམ་པ། སྙིང་རྗེ་ཆེན་པོས་ཀུན་ཏུ་བཟུང་བ། མི་འཇིགས་པ་དང་སྤོབས་པ་ལ་ ལྟ་བ༑ འཇིག་རྟེན་ཐམས་ཅད་ཀྱིས་ཟིལ་གྱིས་མི་ནོན་པ་སྟེ། སྐད་ཅིག་གཅིག་དང་ལྡན་པའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལ་ལས་ཀྱི་བག་ཆགས་མེད། ཉོན་མོངས་པའི་བག་ཆགས་ ༄༅། །མེད༑ སྤྱོད་ལམ་འཁྲུལ་པའི་བག་ཆགས་མེད་དོ། །འདི་ལྟ་སྟེ། ཤཱ་རིའི་བུ། ནམ་མཁའ་ཡོངས་སུ་དག་པས་རྡུལ་དང་དུ་བའི་འཁྲུག་པ་དང་ལྷན་ཅིག་ཏུ་མི་གནས་ པ་དེ་བཞིན་དུ། ཤཱ་རིའི་བུ། དེ་བཞིན་གཤེགས་པའི་ཟག་པ་ཟད་པ་མཁྱེན་པའི་སྟོབས་ཀྱང་ཉོན་མོངས་པའི་བག་ཆགས་ཐམས་ཅད་དང་ལྷན་ཅིག་ཏུ་མི་གནས་སོ། །དེ་ཟག་པ་ཟད་པར་ མཁྱེན་པ་དེ་ལྟ་བུ་ལ་རབ་ཏུ་གནས་ནས་ཟག་པ་དང་བཅས་པ། ལེན་པ་དང་བཅས་པའི་སེམས་ཅན་རྣམས་ལ་ཟག་པ་ཟད་པར་བྱ་བའི་ཕྱིར་ཆོས་སྟོན་ཏོ། །ལེན་པ་སྤང་བར་བྱ་བའི་ཕྱིར་ ཆོས་སྟོན་ཏེ། ཀྱེ་མ་སེམས་ཅན་རྣམས་ནི། ཡང་དག་པ་མ་ཡིན་པ་ཀུན་རྟོག་པ་ལས་བྱུང་སྟེ། ཟག་པ་དང་ལེན་པ་རྣམས་མི་སྐྱེད་པའི་ཕྱིར་ཡང་དག་པ་ཇི་ལྟ་བ་བཞིན་དུ་ཁྱོད་ཀྱིས་རབ་ཏུ་རྟོགས་ ཤིག །ཅེས་དེ་དག་ལ་དེ་བཞིན་གཤེགས་པས་དཔེ་དང་ཚུལ་གྱིས་ཅི་ནས་ཀྱང་ཟག་པ་རྣམས་ཡང་དག་པ་མ་ཡིན་པའོ། །ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པར་འགྱུར་ཞིང༌། ཤེས་ནས་ཀྱང་ཆོས་གང་ཡང་མི་ལེན་ཏེ། ལེན་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་བ་དེ་ལྟ་དེ་ལྟ་བུར་ཆོས་སྟོན་ཏོ། །དེ་ལྟར་ཤཱ་རིའི་བུ། དེ་བཞིན་གཤེགས་པས་སེམས་ཅན་ ཐམས་ཅད་ཀྱི་ཟག་པ་རྣམས་རབ་ཏུ་མཁྱེན་ཏོ། །ཟག་པ་ཀུན་འབྱུང་བ་དང༌། ཟག་པ་འགག་པ་དང༌། ཟག་པ་འགག་པར་འགྱུར་བའི་ལམ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། མཁྱེན་ ནས་ཀྱང་དེ་བཞིན་དུ་ཆོས་སྟོན་ཏོ། །བྱང་ཆུབ་སེམས་དཔའ་དེ་བཞིན་གཤེགས་པའི་ཟག་པ་ཟད་པ་མངོན་སུམ་དུ་བྱེད་པ་མཁྱེན་པའི་སྟོབས་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག་ སོམ་ཉི་མེད་ཅིང་ཐེ་ཚོམ་མི་ཟ་བ་ནས་ངོ་མཚར་དང༌། རྨད་ཀྱི་བར་དུ་འདུ་ཤེས་བསྐྱེད་དོ། །འདི་ལ་ཆོས་ཉིད་ནི། འདི་ཡིན་ཏེ། དེ་ལ་འདི་སྐད་ཅེས་བྱའོ། །འདྲེན་པའི་ཟག་པ་མེད་པའི་ཡེ་ཤེས་ནི། ། རྒྱ་ཆེན་སྒྲིབ་མེད་དག་པ་ཚད་མེད་དོ། །སྟོབས་བཅུའི་སྟོབས་ནི་དེ་དང་ལྡན་པས་ན། ཞི་བའི་བྱང་ཆུབ་མཆོག་འདི་རབ་ཏུ་གསུང༌། །ཉན་ཐོས་རྣམས་ཀྱི་ཟག་ཟད་ཡེ་ཤེས་ནི། བག་ཆགས་མ་བཅོམ་ ཚད་དང་ལྡན་པ་ཡིན། །མི་ཡི་དམ་པ་འདྲེན་པ་མཆོག་རབ་ཀྱི། །བག་ཆགས་བཅོམ་ཞིང་ཚད་དང་ལྡན་མ་ཡིན། །དེ་བཞིན་རང་རྒྱལ་བྱང་ཆུབ་གང་རེག་པ། །དེ་ལ་སྙིང་རྗེ་ཆེ་དང་སྤོབས་པ་མེད། །བཅོམ་ ལྡན་འདས་ནི་ཟག་པ་ཡོངས་ཟད་པ། །སྙིང་རྗེ་ཆེ་དང་སྤོབས་པ་ཚད་མེད་དོ། །སངས་རྒྱས་ཟག་ཟད་མཁྱེན་ལ་གནས་ནས་ནི། །འགྲོ་བའི་ཟག་པ་ཡང་དག་མ་ཡིན་ཞིང༌། །རིགས་པའི་གནས་ཀྱི་ཚུལ་འདིར་ མ་ཤེས་པས། །ཆོས་འདི་ཐམས་ཅད་ལོག་པར་ཞུགས་མཁྱེན་ཏེ། །དེ་ལ་རྒྱལ་བ་སྙིང་རྗེ་ཆེར་བསྐྱེད་ནས། །ཆོས་འདི་མི་རྟག་སྟོང་པ་བདག་མེད་ཆོས། །དངོས་མེད་གསོག་སྟེ་མཆོག་ཏུ་ཞི་བ་ཡི། ། ས་ལ་རྟོགས་ཤིག་ལྟོས་ཞེས་རབ་ཏུ་སྟོན། །འདི་ལ་སྐྱེས་བུ་སྲོག་དང་གང་ཟག་དང༌། །ཤེད་སྐྱེས་ཤེད་བུ་བྱད་པ་བོ་ཡང་མེད། །ཆོས་འདི་ཐམས་ཅད་ལོག་པར་ནགས་པས་ན། །སྟོན་པ་སྙིང་རྗེ་ ༄༅། །བསྐྱེད་ནས་ཐར་སྟོན་ཀྱང༌། །བདེ་བར་གཤེགས་ལ་སྐྱོ་བ་ཡོད་མེད་དེ། །ཡང་དག་ཡེ་ཤེས་ནམ་ཡང་ཉམས་པ་མེད། །དེ་ཕྱིར་རྒྱལ་བ་རྟག་ཏུ་རྣལ་འབྱོར་སྦྱོར། ། འགྲོ་ལ་ཕན་ཕྱིར་ཆོས་རྣམས་རབ་ཏུ་སྟོན། །འདི་ནི་ཕ་རོལ་སྨྲ་བ་འཇོམས་པའི་སྟོབས། །མཐའ་ཡས་ནམ་མཁའ་འདྲ་བ་བཅུ་པ་སྟེ། །མགོན་པོ་སྟོབས་བཅུ་དེ་ལ་གནས་གྱུར་ནས། ། མཚུངས་མེད་འཁོར་ལོ་དམ་པ་རབ་ཏུ་བསྐོར། །ཤཱ་རིའི་བུ། འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བཅུ་པ་སྟེ། སྟོབས་དེ་དང་ལྡན་པས་དེ་བཞིན་ གཤེགས་པ་ཁྱུ་མཆོག་གི་གནས་སུ་ཞལ་གྱིས་འཆེ་ཞིང་འཁོར་གྱི་ནང་དུ་སེངྒེའི་སྒྲ་ཡང་དག་པར་སྒྲོག་སྟེ། འཇིག་རྟེན་འདིར་དགེ་སྦྱོང་ངམ། བྲམ་ཟེའི་བར་དུ་སུས་ཀྱང་ཆོས་དང་མཐུན་ པར་མ་བསྐོར་བ། ཚངས་པའི་འཁོར་ལོ་རབ་ཏུ་བསྐོར་རོ། །དེ་ལྟར་ཤཱ་རིའི་བུ། བྱང་ཆུབ་སེམས་དཔའ་དེ་བཞིན་གཤེགས་པའི་ཡོན་ཏན་བསམ་གྱིས་མི་ཁྱབ་པའི་ཕྱིར་དེ་བཞིན་གཤེགས་ པའི་སྟོབས་རྣམས་ལ་མངོན་པར་དད། ཡིད་ཆེས། རབ་ཏུ་རྟོག་པ་ནས་ངོ་མཚར་དང༌། རྨད་ཀྱི་བར་དུ་འདུ་ཤེས་བསྐྱེད་དོ།། །།བམ་པོ་དྲུག་པ། ཡང་ཤཱ་རིའི་བུ། ཇི་ལྟར་ན། བྱང་ཆུབ་སེམས་དཔའ་ དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མི་བྱེད། ཐེ་ཚོམ་མི་ཟ་བ་ནས་ངོ་མཚར་དང༌། རྨད་ཀྱི་བར་དུ་ འདུ་ཤེས་བསྐྱེད་ཅེ་ན། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་ནི་བཞི་པོ་འདི་དག་སྟེ། མི་འཇིགས་པ་དེ་དག་དང་ལྡན་པས་དེ་བཞིན་གཤེགས་པ་འཁོར་གྱི་ནང་ དུ་སེངྒེའི་སྒྲ་ཡང་དག་པར་སྒྲོག་ཅིང༌། ཁྱུ་མཆོག་གི་གནས་སུ་ཞལ་གྱིས་འཆེ་སྟེ། དགེ་སྦྱོང་ངམ། བྲམ་ཟེའམ། ལྷའམ། བདུད་དམ། སུས་ཀྱང་འཇིག་རྟེན་དུ་ཆོས་དང་མཐུན་པར་མ་ བསྐོར་བ་ཚངས་པའི་འཁོར་ལོ་རབ་ཏུ་བསྐོར་རོ། །བཞི་གང་ཞེ་ན། འདི་ལ་ཤཱ་རིའི་བུ། དེ་བཞིན་གཤེགས་པ་བླ་ན་མེད་པའི་དེ་བཞིན་གཤེགས་པའི་ཡེ་ཤེས་དང་ལྡན་པས། འཁོར་གྱི་ ནང་དུ་ང་ཡང་དག་པར་རྫོགས་པའི་སངས་རྒྱས་སོ། །ཞེས་ཞལ་གྱིས་འཆེ་བ་དེ་ལ་ལྷ་དང་བཅས་པའི་འཇིག་རྟེན་གྱིས་དེ་བཞིན་གཤེགས་པ་ལ་ཁྱོད་ཀྱིས་ཆོས་འདི་མངོན་པར་རྫོགས་པར་སངས་མ་ རྒྱས་སོ། །ཞེས་ཆོས་དང་མཐུན་པར་རྒོལ་བར་བྱེད་མི་ནུས་སོ། །དེ་ལ་ཇི་ལྟར་ན། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཞེས་བྱ་ཞེ་ན། དེ་བཞིན་གཤེགས་པས་ཆོས་ ཐམས་ཅད་མི་མཉམ་པ་མེད་པར་ཡང་དག་པར་མངོན་པར་སངས་རྒྱས་ཏེ་སོ་སོའི་སྐྱེ་བོའི་ཆོས་རྣམས་གང་ཡིན་པ་དང༌། འཕགས་པའི་ཆོས་རྣམས་གང་ཡིན་པ་དང༌། སངས་རྒྱས་ཀྱི་ཆོས་རྣམས་ གང་ཡིན་པ་དང༌། སློབ་པའི་ཆོས་རྣམས་གང་ཡིན་པ་དང༌། མི་སློབ་པའི་ཆོས་རྣམས་གང་ཡིན་པ་དང༌། རང་སངས་རྒྱས་ཀྱི་ཆོས་རྣམས་གང་ཡིན་པ་དང༌། བྱང་ཆུབ་སེམས་དཔའི་ཆོས་རྣམས་ ༄༅། །མཉམ་པ་ཉིད་ཀྱིས་མཉམ་པ་གང་ཡིན་པ་དང༌། འཇིག་རྟེན་གྱི་ཆོས་རྣམས་གང་ཡིན་པ་དང༌། འཇིག་རྟེན་ལས་འདས་པའི་ཆོས་རྣམས་གང་ཡིན་པ་དང༌། ཁ་ན་ མ་ཐོ་བ་དང་བཅས་པ་དང༌། ཁ་ན་མ་ཐོ་བ་མེད་པ་དང༌། ཟག་པ་དང་བཅས་པ་དང༌། ཟག་པ་མེད་པ་དང༌། འདུས་བྱས་དང༌། འདུས་མ་བྱས་དེ་དག་ཐམས་ཅད་མཉམ་པ་ཉིད་ཀྱིས་མཉམ་ པར་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ཏེ། དེའི་ཕྱིར་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཞེས་བྱའོ། །དེ་ལ་མཉམ་པ་ཉིད་གང་ཞེ་ན། ལྟ་བའི་ངོ་བོ་ཉིད་ཀྱིས་སྟོང་པ་ཉིད་དུ་མཉམ་མོ། །མཚན་མའི་ངོ་བོ་ཉིད་ཀྱིས་མཚན་མ་མེད་པར་མཉམ་མོ། །ཁམས་གསུམ་པའི་ངོ་བོ་ཉིད་ཀྱིས་སྨོན་པ་མེད་པར་མཉམ་མོ། །སྐྱེ་བའི་ ངོ་བོ་ཉིད་ཀྱིས་མི་སྐྱེ་བར་མཉམ་མོ། །མངོན་པར་འདུ་བྱེད་པའི་ངོ་བོ་ཉིད་ཀྱིས་མངོན་པར་འདུ་མི་བྱེད་པར་མཉམ་མོ། །འབྱུང་བའི་ངོ་བོ་ཉིད་ཀྱིས་མི་འབྱུང་བར་མཉམ་མོ། །ཀུན་ གཞིའི་ངོ་བོ་ཉིད་ཀྱིས་ཀུན་གཞི་མེད་པར་མཉམ་མོ། །དུས་གསུམ་གྱི་ངོ་བོ་ཉིད་ཀྱིས་ཇི་ལྟ་བ་བཞིན་དུ་མཉམ་མོ། །མ་རིག་པ་དང༌། སྲིད་པ་དང༌། སྲེད་པའི་ངོ་བོ་ཉིད་ཀྱིས་རིག་པ་དང་ རྣམ་པར་གྲོལ་བར་མཉམ་མོ། །འཁོར་བའི་ངོ་བོ་ཉིད་ཀྱིས་མྱ་ངན་ལས་འདས་པར་མཉམ་མོ། །དེ་ལྟར་ཤཱ་རིའི་བུ། དེ་བཞིན་གཤེགས་པས་ཆོས་ཐམས་ཅད་མཉམ་པར་མངོན་པར་ རྫོགས་པར་སངས་རྒྱས་ཏེ། དེའི་ཕྱིར་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཞེས་བྱའོ། །དེ་བཞིན་གཤེགས་པའི་མི་འཇིགས་པ་དེ་ཡང་འཁོར་ཐམས་ཅད་ཤེས་ པར་བྱེད་པ། འཁོར་ཐམས་ཅད་མགུ་བར་བྱེད་པ། འཁོར་ཐམས་ཅད་ཀྱི་ལུས་སིམ་པར་བྱེད་པ། འཁོར་ཐམས་ཅད་ཀྱི་སེམས་ཚིམ་པ་སྐྱེད་པ། འཁོར་ཐམས་ཅད་དགའ་བ་དང༌། རབ་ ཏུ་དགའ་བ་དང༌། དད་པ་སྐྱེད་པ། སྙིང་རྗེ་ཆེན་པོས་སྦྱོར་བ། དེ་བཞིན་ཉིད་ཀྱིས་མཉམ་པ། དེ་ཁོ་ན་ཉིད། དེ་བཞིན་ཉིད། གཞན་མ་ཡིན་པ་ཉིད། མི་འགྱུར་བ་ཉིད། མི་འཁྲུགས་ པ་ཉིད། འབྱུང་བ་མེད་པ་ཉིད། འཇིག་པ་མེད་པ་ཉིད། རྩོད་པ་མེད་པ་ཉིད་དེ། དེ་བཞིན་གཤེགས་པའི་མི་འཇིགས་པ་ལ་རྩོད་པ་གང་ཡང་མེད་དོ། །དེ་བཞིན་གཤེགས་པའི་མི་འཇིགས་ པ་ནི། རྩོད་པ་མེད་པ། འཐབ་པ་མེད་པའོ། །དེ་བཞིན་ཉིད་ཀྱིས་མཉམ་ཞིང་ཆོས་ཀྱི་དབྱིངས་ངོས་མཉམ་པ། ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་མ་ལུས་པ་ཐམས་ ཅད་ལ་ཐོགས་པ་མེད་པའོ། །ཇི་ལྟར་དེ་བཞིན་གཤེགས་པས་འདི་ལྟ་བུའི་ཆོས་ཟབ་མོ་ཕྲ་བ་ཤེས་པར་བཀའ་བ་དེ་དག་མངོན་པར་རྫོགས་པར་སངས་རྒྱས་པ་དེ་བཞིན་དུ། སྙིང་རྗེ་ ཆེན་པོ་ལ་གནས་ནས་བསྟན་པ་སྣ་ཚོགས་དང༌། རྣམ་གྲངས་སྣ་ཚོགས་ཀྱིས་སེམས་ཅན་གཞན་རྣམས་དང༌། གང་ཟག་གཞན་དག་ལ་ཆོས་ཐམས་ཅད་ཡང་དག་པར་རབ་ཏུ་སྟོན་ཏེ། དེའི་ ༄༅། །ཆོས་དེ་ཡང་དེ་བྱེད་པའི་སྡུག་བསྔལ་ཡང་དག་པར་ཟད་པའི་ཕྱིར་འབྱུང་ངོ༌། །གང་སྟོན་པ་མ་ཡིན་ལ་སྟོན་པའོ། །ཞེས་ཁས་འཆེ་བ། ཡང་དག་པར་རྫོགས་པའི་ སངས་རྒྱས་མ་ཡིན་ལ་ཡང་དག་པར་རྫོགས་པའི་སངས་རྒྱས་སོ། །ཞེས་ཁས་འཆེ་བ་དེ་དག་དེ་བཞིན་གཤེགས་པའི་མི་འཇིགས་པས་ཟིལ་གྱིས་ནོན་ནས་དེ་དག་རྒྱགས་པ་ཆད་དེ་ ཕན་ཚུན་དུ་འབྲོས་སོ། །འདི་ལྟར་ཤཱ་རིའི་བུ། དེ་བཞིན་གཤེགས་པའི་མི་འཇིགས་པ་མཐའ་ཡས་མུ་མེད་དེ། འདི་ལྟ་སྟེ། ནམ་མཁའ་མཐའ་ཡས་མུ་མེད་པ་དེ་བཞིན་དུ། ཤཱ་རིའི་བུ། དེ་བཞིན་གཤེགས་པའི་མི་འཇིགས་པ་ཡང་མཐའ་ཡས་མུ་མེད་དེ། ཤཱ་རིའི་བུ། གང་དེ་བཞིན་གཤེགས་པའི་མི་འཇིགས་པའི་མཐའ་འདོད་པ་ནི། ནམ་ མཁའི་མཐའ་འདོད་དོ། །བྱང་ཆུབ་སེམས་དཔའ་དེ་བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག་པ་ནས་ངོ་ མཚར་དང༌། རྨད་ཀྱི་བར་དུ་འདུ་ཤེས་བསྐྱེད་དོ། །འདི་ནི། མི་འཇིགས་པ་དང་པོའོ། །གཞན་ཡང་ཤཱ་རིའི་བུ། དེ་བཞིན་གཤེགས་པ་བླ་ན་མེད་པའི་དེ་བཞིན་གཤེགས་པའི་ ཡེ་ཤེས་དང་ལྡན་པས་འཁོར་གྱི་ནང་དུ་གཤེགས་ནས་ང་ཟག་པ་ཟད་དོ། །ཞེས་ཞལ་གྱིས་འཆེ་སྟེ། དེ་ལ་ཁྱོད་ཀྱིས་ཟག་པ་འདི་དག་མ་ཟད་དོ། །ཞེས་དེ་བཞིན་གཤེགས་པ་ལ་ལྷར་ བཅས་པའི་འཇིག་རྟེན་གྱིས་ཆོས་དང་མཐུན་པར་རྩོད་པར་བྱེད་པ་མེད་དོ། །དེ་བཞིན་གཤེགས་པའི་ཟག་པ་ཟད་པ་ནི། འདི་དག་སྟེ། དེ་བཞིན་གཤེགས་པ་འདོད་པའི་ཟག་པ་ལས་སེམས་རྣམ་ པར་གྲོལ་བས་འདོད་ཆགས་ལ་སྤྱོད་པའི་བག་ཆགས་ཐམས་ཅད་བཅོམ་མོ། །སྲིད་པའི་ཟག་པ་ལས་སེམས་རྣམ་པར་གྲོལ་བས་ཞེ་སྡང་ལ་སྤྱོད་པའི་བག་ཆགས་ཐམས་ཅད་བཅོམ་མོ། །མ་ རིག་པའི་ཟག་པ་ལས་སེམས་རྣམ་པར་གྲོལ་བས་གཏི་མུག་ལ་སྤྱོད་པའི་བག་ཆགས་ཐམས་ཅད་བཅོམ་མོ། །ལྟ་བའི་ཟག་པ་ལས་སེམས་རྣམ་པར་གྲོལ་བས་ཉོན་མོངས་པ་ལ་སྤྱོད་པའི་བག་ ཆགས་ཐམས་ཅད་བཅོམ་སྟེ། དེའི་ཕྱིར་འཇིག་རྟེན་གྱི་ཀུན་རྫོབ་བཟུང་སྟེ་དེ་བཞིན་གཤེགས་པ་ཟག་པ་ཟད་པའོ། །ཞེས་བྱའོ། །དོན་དམ་པར་ན་འཕགས་པའི་ཤེས་རབ་དང་ཡེ་ཤེས་ཀྱི་ མདུན་ན་ཆོས་གང་ཡོངས་སུ་ཤེས་པའམ། སྤང་བའམ། བསྒོམ་པའམ། མངོན་དུ་འགྱུར་བའི་ཆོས་གང་ཡང་མི་འདུག་གོ །དེ་ཅིའི་ཕྱིར་ཞེ་ན། གང་ཟད་པ་ཞེས་བྱ་བ་དེ་ནི། ནམ་དུ་ཡང་མི་ ཟད་པ་མ་ཡིན་ནོ། །དེ་ནི། ཤིན་ཏུ་ཟད་པ་ཉིད་ཡིན་གྱི། གཉེན་པོས་ཟད་པ་ཞེས་མི་བྱ་སྟེ། དེ་ནི། ཇི་ལྟ་བ་བཞིན་དུ་ཟད་པའོ། །གང་ཇི་ལྟ་བ་བཞིན་དུ་ཟད་པ་དེ་ལ་ཟད་པ་གང་ཡང་མེད་དོ། །གང་ ལ་ཟད་པ་གང་ཡང་མེད་པ་དེ་ནི། འདུས་མ་བྱས་པའོ། །དེ་ལ་སྐྱེ་བ་མེད་པ། འཇིག་པ་མེད་པ། གནས་མེད་དེ། དེའི་ཕྱིར་དེ་བཞིན་གཤེགས་པ་བྱུང་ཡང་རུང༌། མ་བྱུང་ཡང་རུང་སྟེ། ཆོས་ ༄༅། །ཉིད་ཆོས་ཀྱི་དབྱིངས་ནི། གནས་པ་ཉིད་དེ། དེ་བཞིན་དུ་དེ་ལ་ཡེ་ཤེས་ཞུགས་སོ། །གང་ལ་འཇུག་པ་མེད་ཅིང་མི་འཇུག་པ་ཡང་མེད་པ་ཡང་དེ་ལྟར་ཞུགས་ཏེ། དེ་ལྟ་ བུའི་ཆོས་ཀྱི་ཚུལ་གྱིས་ཟག་པ་དང་ཟད་པ་སྤོང་བ་མི་དམིགས་ཏེ། དེ་བཞིན་གཤེགས་པ་ནི། སྙིང་རྗེ་ཆེན་པོ་ལ་གནས་ནས་ཟག་པ་སྤོང་བའི་ཕྱིར་ཆོས་སྟོན་ཏོ། །དེ་བཞིན་གཤེགས་པའི་ མི་འཇིགས་པ་དེ་ནི། འཁོར་ཐམས་ཅད་ཤེས་པར་བྱེད་དེ། འཁོར་ཐམས་ཅད་མགུ་བར་བྱེད་པ། འཁོར་ཐམས་ཅད་ཀྱི་ལུས་སིམ་པར་བྱེད་པ། འཁོར་ཐམས་ཅད་ཀྱི་སེམས་ཚིམ་པ་སྐྱེད་ པ༑ འཁོར་ཐམས་ཅད་དགའ་བ་དང༌། རབ་ཏུ་དགའ་བ་དང༌། དད་པ་སྐྱེད་པ། སྙིང་རྗེ་ཆེན་པོས་སྦྱོར་བ། དེ་བཞིན་ཉིད་ཀྱིས་མཉམ་པ། དེ་ཁོ་ན་ཉིད། དེ་བཞིན་ཉིད། གཞན་མ་ཡིན་པ་ཉིད། མི་འགྱུར་བ་ཉིད། མི་འཁྲུགས་པ་ཉིད། འབྱུང་བ་མེད་པ་ཉིད། འཇིག་པ་མེད་པ་ཉིད། རྩོད་པ་མེད་པ་ཉིད་དེ། དེ་བཞིན་གཤེགས་པའི་མི་འཇིགས་པ་ལ་རྩོད་པ་གང་ཡང་མེད་དོ། །དེ་ བཞིན་གཤེགས་པའི་མི་འཇིགས་པ་ནི། རྩོད་པ་མེད་པ། འཐབ་པ་མེད་པའོ། །དེ་བཞིན་ཉིད་ཀྱིས་མཉམ་ཞིང་ཆོས་ཀྱི་དབྱིངས་ངོས་མཉམ་པ། འཇིག་རྟེན་གྱི་ཁམས་རབ་འབྱམས་མ་ལུས་ པ་ཐམས་ཅད་ལ་ཐོགས་པ་མེད་དོ། །དེ་ལྟར་དེ་བཞིན་གཤེགས་པ་ཚད་མེད། བསམ་གྱིས་མི་ཁྱབ། གྲངས་མེད། དཔག་ཏུ་མེད་པའི་ཆོས་དང་ལྡན་ཞིང་སྙིང་རྗེ་ཆེན་པོས་ཡང་དག་པར་ཟིན་ པའི་སེམས་ཀྱིས་ཟག་པ་སྤོང་བའི་ཕྱིར་སེམས་ཅན་རྣམས་ལ་ཆོས་སྟོན་ཏོ། །དེ་ལྟར་ཤཱ་རིའི་བུ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་མཐའ་ཡས་པ་ནས་ གང་དེ་བཞིན་གཤེགས་པའི་མི་འཇིགས་པའི་མཐའ་འདོད་པ་དེ་ནམ་མཁའི་མཐའ་འདོད་དོ། །ཞེས་པའི་བར་དུ་སྟེ། བྱང་ཆུབ་སེམས་དཔའ་དེ་བཞིན་གཤེགས་པའི་མི་འཇིགས་པ་ བསམ་གྱིས་མི་ཁྱབ་པ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག་པས་ངོ་མཚར་དང༌། རྨད་ཀྱི་བར་དུ་འདུ་ཤེས་བསྐྱེད་དོ། །ཤཱ་རིའི་བུ། འདི་ནི། དེ་བཞིན་གཤེགས་པའི་ མི་འཇིགས་པ་གཉིས་པ་སྟེ། དེ་བཞིན་གཤེགས་པ་མི་འཇིགས་པ་དེ་དང་ལྡན་ཞེས་བྱ་བ་ནས་འཇིག་རྟེན་འདིར་ཆོས་དང་མཐུན་པར་ཞེས་བྱ་བའི་བར་དུའོ། །གཞན་ཡང་ཤཱ་རིའི་བུ། དེ་བཞིན་ གཤེགས་པ་བླ་ན་མེད་པའི་དེ་བཞིན་གཤེགས་པའི་ཡེ་ཤེས་དང་ལྡན་པས། འཁོར་གྱི་ནང་དུ་གཤེགས་ནས་བར་དུ་གཅོད་པའི་ཆོས་རྣམས་ལ་བར་དུ་གཅོད་དོ། །ཞེས་ཞལ་གྱིས་འཆེ་བ་དེ་ལ་ གོང་མ་བཞིན་དུ་སྦྱར་ཏེ། དེ་བཞིན་གཤེགས་པ་ལ་ལྷར་བཅས་པའི་འཇིག་རྟེན་གྱིས་འདི་ནི། བར་དུ་གཅོད་པར་འགྱུར་བའི་ཆོས་མ་ཡིན་ནོ། །ཞེས་རྒོལ་བར་བྱེད་པ་མེད་པའི་བར་དུའོ། །དེ་ལ་ བར་དུ་གཅོད་པའི་ཆོས་གང་ཞེ་ན། འདི་ལྟ་སྟེ། བར་དུ་གཅོད་པར་འགྱུར་བའི་ཆོས་གཅིག་སྟེ། གཅིག་གང་ཞེ་ན། འདི་ལྟ་སྟེ། བག་མེད་པའི་སེམས་སོ། །བར་དུ་གཅོད་པར་འགྱུར་བའི་ ༄༅། །ཆོས་གཉིས་ཏེ། གཉིས་གང་ཞེ་ན། འདི་ལྟ་སྟེ། ངོ་ཚ་མི་ཤེས་པ་དང༌། ཁྲེལ་མེད་པའོ། །བར་དུ་གཅོད་པར་འགྱུར་བའི་ཆོས་གསུམ་སྟེ། གསུམ་གང་ཞེ་ན། འདི་ལྟ་ སྟེ། ལུས་ཀྱིས་ཉེས་པར་སྤྱད་པ་དང༌། ངག་གིས་ཉེས་པར་སྤྱད་པ་དང༌། ཡིད་ཀྱིས་ཉེས་པར་སྤྱད་པའོ། །བར་དུ་གཅོད་པར་འགྱུར་བའི་ཆོས་བཞི་སྟེ། བཞི་གང་ཞེ་ན། འདི་ལྟ་སྟེ། འགྲོ་བ་མ་ཡིན་ པར་འགྲོ་བ་བཞི་ལ། འདུན་པས་འགྲོ་བ་མ་ཡིན་པར་འགྲོ་བ་དང༌། ཞེ་སྡང་དང༌། གཏི་མུག་དང༌། འཇིགས་པས་འགྲོ་བ་མ་ཡིན་པར་འགྲོ་བའོ། །བར་དུ་གཅོད་པར་འགྱུར་བའི་ཆོས་ལྔ་སྟེ། ལྔ་ གང་ཞེ་ན། འདི་ལྟ་སྟེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པས་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཆང་འཐུང་བའོ། །བར་དུ་གཅོད་པར་འགྱུར་བའི་ཆོས་དྲུག་སྟེ། དྲུག་གང་ཞེ་ན། འདི་ལྟ་སྟེ། སངས་རྒྱས་ལ་མ་གུས་པ་དང༌། ཆོས་དང༌། དགེ་འདུན་དང༌། བསླབ་པ་དང༌། ཏིང་ངེ་འཛིན་དང༌། གཏོང་བ་ལ་མ་གུས་པའོ། །བར་དུ་གཅོད་པར་འགྱུར་བའི་ཆོས་བདུན་ ཏེ། བདུན་གང་ཞེ་ན། འདི་ལྟ་སྟེ། ང་རྒྱལ་དང༌། ཆེ་བའི་ང་རྒྱལ་དང༌། ང་རྒྱལ་ལས་ཀྱང་ང་རྒྱལ་དང༌། ངའོ་སྙམ་པའི་ང་རྒྱལ་དང༌། ལོག་པའི་ང་རྒྱལ་དང༌། མངོན་པའི་ང་རྒྱལ་དང༌། ཅུང་ཟད་སྙམ་ པའི་ང་རྒྱལ་ལོ། །བར་དུ་གཅོད་པར་འགྱུར་བའི་ཆོས་བརྒྱད་དེ། བརྒྱད་གང་ཞེ་ན། འདི་ལྟ་སྟེ། ལོག་པའི་ལྟ་བ་དང༌། ལོག་པའི་རྟོག་པ་དང༌། ལོག་པའི་ངག་དང༌། ལོག་པའི་ལས་ཀྱི་མཐའ་ དང༌། ལོག་པའི་འཚོ་བ་དང༌། ལོག་པའི་རྩོལ་བ་དང༌། ལོག་པའི་དྲན་པ་དང༌། ལོག་པའི་ཏིང་ངེ་འཛིན་ཏོ། །བར་དུ་གཅོད་པར་འགྱུར་བའི་ཆོས་དགུ་སྟེ། དགུ་གང་ཞེ་ན། འདི་ལྟ་སྟེ། བདག་ ལ་གནོད་པ་བྱས་སོ། །ཞེས་ཀུན་ནས་མནར་སེམས་བསྐྱེད་པ་དང༌། གནོད་པ་བྱེད་དོ། །ཞེས་ཀུན་ནས་མནར་སེམས་བསྐྱེད་པ་དང༌། གནོད་པར་བྱེད་པར་འགྱུར་རོ། །ཞེས་ཀུན་ནས་མནར་ སེམས་བསྐྱེད་པ་དང༌། བདག་གི་མཛའ་བོ་ལ་གནོད་པ་བྱས་སོ། །བྱེད་དོ། །བྱེད་པར་འགྱུར་རོ། །ཞེས་སེམས་ལ་ཀུན་ནས་མནར་སེམས་བསྐྱེད་པ་དང༌། བདག་དང་མི་མཛའ་བའི་དོན་བྱས་ སོ། །བྱེད་དོ། །བྱེད་པར་འགྱུར་རོ། །ཞེས་ཀུན་ནས་མནར་སེམས་བསྐྱེད་པའོ། །བར་དུ་གཅོད་པར་འགྱུར་བའི་ཆོས་བཅུ་སྟེ། བཅུ་གང་ཞེ་ན། འདི་ལྟ་སྟེ། མི་དགེ་བ་བཅུའི་ལས་ཀྱི་ལམ་རྣམས་ ཡིན་ཏེ། འདི་ལྟ་སྟེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ངག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བའོ། །དེ་ལྟར་ཤཱ་རིའི་བུ། ཚུལ་བཞིན་མ་ཡིན་པ་ཡིད་ལ་བྱེད་པ་དང་ལྡན་པའི་ཀུན་ཏུ་སྦྱོར་བ་ཇི་སྙེད་པའི་ཆོས་དེ་དག་གིས་རོ་མྱོང་བ་ལ་རྗེས་ སུ་ལྟ་ཞིང༌། གནས་པ་དང༌། ཕྱིན་ཅི་ལོག་དང་ལྡན་པ་དང༌། འབྱུང་བ་ལ་ཀུན་ནས་ལྡང་བ་དང༌། སྲེད་པ་དང༌། ལྟ་བ་ལ་མངོན་པར་ཞེན་པའི་ཟང་ཟིང་དང་བཅས། ཕུང་པོ་དང་བཅས་པའི་ལུས་ཀྱི་ ༄༅། །ལས་དང༌། ངག་གི་ལས་དང༌། ཡིད་ཀྱི་ལས་དེ་དག་ཐམས་ཅད་དེ་བཞིན་གཤེགས་པས་བར་དུ་གཅོད་པར་མཁྱེན་ཏོ། །བར་དུ་གཅོད་པར་མཁྱེན་ནས་ཀྱང་ཡང་དག་ པ་ཇི་ལྟ་བ་བཞིན་དུ་སྟོན་ཏོ། །ཆོས་བཅུ་པོ་དེ་དག་ནི་བར་དུ་གཅོད་པར་འགྱུར་པ་སྟེ། དེ་དག་ཞི་བར་བྱ་བ་དང༌། ཉེ་བར་ཞི་བར་བྱ་བ་དང༌། སྤོང་བར་བྱ་བའི་ཕྱིར་དེ་བཞིན་གཤེགས་པ་ ཆོས་སྟོན་ཏོ། །དེ་བཞིན་གཤེགས་པའི་མི་འཇིགས་པ་དེ་ཡང་འཁོར་ཐམས་ཅད་ཤེས་པར་བྱེད་པ། འཁོར་ཐམས་ཅད་མགུ་བར་བྱེད་པ། འཁོར་ཐམས་ཅད་ཀྱི་ལུས་སིམ་པར་བྱེད་པ། འཁོར་ཐམས་ཅད་ཀྱི་སེམས་ཚིམ་པ་སྐྱེད་པ། འཁོར་ཐམས་ཅད་དགའ་བ་དང༌། རབ་ཏུ་དགའ་བ་དང༌། དད་པ་བསྐྱེད་པ་དང༌། སྙིང་རྗེ་ཆེན་པོས་སྦྱོར་བ། དེ་བཞིན་ཉིད་ཀྱིས་མཉམ་པ། དེ་ཁོ་ ན་ཉིད། དེ་བཞིན་ཉིད། གཞན་མ་ཡིན་པ་ཉིད། མི་འགྱུར་བ་ཉིད། མི་འཁྲུགས་པ་ཉིད། འབྱུང་བ་མེད་པ་ཉིད། འཇིག་པ་མེད་པ་ཉིད། རྩོད་པ་མེད་པ་ཉིད། དེ་བཞིན་གཤེགས་པའི་མི་ འཇིགས་པ་ལ་རྩོད་པ་གང་ཡང་མེད་དོ། །དེ་བཞིན་གཤེགས་པའི་མི་འཇིགས་པ་ནི་རྩོད་པ་མེད་པ། འཐབ་པ་མེད་པའོ། །དེ་བཞིན་ཉིད་དང་མཉམ་ཞིང་ཆོས་ཀྱི་དབྱིངས་ངོས་མཉམ་པ། འཇིག་རྟེན་གྱི་ཁམས་རབ་འབྱམས་མ་ལུས་པ་ཐམས་ཅད་ལ་ཐོགས་པ་མེད་དོ། །དེ་ལྟར་དེ་བཞིན་གཤེགས་པ་ཚད་མེད། གྲངས་མེད། བསམ་གྱིས་མི་ཁྱབ། གཞལ་དུ་མེད། བརྗོད་དུ་ མེད་པའི་ཆོས་དང་ལྡན་ཞིང་སྙིང་རྗེ་ཆེན་པོས་ཡང་དག་པར་ཟིན་པའི་སེམས་ཀྱི་བར་དུ་གཅོད་པའི་ཆོས་རྣམས་ཞི་བར་བྱ་བ་དང༌། སྤང་བར་བྱ་བའི་ཕྱིར་ཆོས་སྟོན་ཏོ། །དེ་ལྟར་ཤཱ་རིའི་བུ། དེ་བཞིན་ གཤེགས་པའི་མི་འཇིགས་པ་མཐའ་ཡས་མུ་མེད་པ་ནས་གང་དེ་བཞིན་གཤེགས་པའི་མི་འཇིགས་པའི་མཐའ་འདོད་པ་དེ་ནམ་མཁའི་མཐའ་འདོད་པ་ཞེས་བྱ་བའི་བར་དུ་སྟེ། བྱང་ཆུབ་སེམས་དཔའ་ དེ་བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོ་མ་ཉི་མེད། ཐེ་ཚོམ་མི་ཟ་བ་ནས་ངོ་མཚར་དང༌། རྨད་ཀྱི་བར་དུ་འདུ་ཤེས་ བསྐྱེད་དོ། །ཤཱ་རིའི་བུ། འདི་ནི་དེ་བཞིན་གཤེགས་པའི་མི་འཇིགས་པ་གསུམ་པ་སྟེ། མི་འཇིགས་པ་དེ་དང་ལྡན་པས་དེ་བཞིན་གཤེགས་པ་འཁོར་གྱི་ནང་དུ་གཤེགས་ནས་ཞེས་བྱ་བ་ ནས་སུས་ཀྱང་འཇིག་རྟེན་དུ་ཆོས་དང་མཐུན་པར་ཞེས་བྱ་བའི་བར་དུའོ། །གཞན་ཡང་ཤཱ་རིའི་བུ། དེ་བཞིན་གཤེགས་པ་བླ་ན་མེད་པའི་དེ་བཞིན་གཤེགས་པའི་ཡེ་ཤེས་དང་ལྡན་པས། སེམས་ཅན་ རྣམས་གང་ལ་བརྟེན་པས་ངེས་པར་འབྱུང་བར་འགྱུར་བ་འཕགས་པའི་ངེས་པར་འབྱུང་བ་དེ་བྱེད་པའི་སྡུག་བསྔལ་ཡང་དག་པར་ཟད་པར་འགྱུར་བའི་ལམ་རབ་ཏུ་མཁྱེན་ཏེ། དེ་ལ་འདི་ནི་ངེས་པར་འབྱུང་ བའི་ལམ་མ་ཡིན་ནོ། །ཞེས་དེ་བཞིན་གཤེགས་པ་ལ་ལྷ་དང་བཅས་པའི་འཇིག་རྟེན་གྱིས་ཆོས་དང་མཐུན་པས་རྒོལ་བར་བྱེད་མི་ནུས་སོ། །ངེས་པར་འབྱུང་བའི་ལམ་གཅིག་སྟེ་གཅིག་གང་ཞེ་ན། འདི་ ༄༅། །ལྟ་སྟེ། བགྲོད་པ་གཅིག་པུའི་ལམ་སྟེ། གང་སེམས་ཅན་རྣམས་རྣམ་པར་དག་པར་འགྱུར་བའོ། །ངེས་པར་འབྱུང་བའི་ཆོས་གཉིས་ཏེ། གཉིས་གང་ཞེ་ན། འདི་ལྟ་ སྟེ། ཞི་གནས་དང༌། ལྷག་མཐོང་ངོ༌། །ངེས་པར་འབྱུང་བའི་ཆོས་གསུམ་སྟེ། གསུམ་གང་ཞེ་ན། འདི་ལྟ་སྟེ། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའོ། །ངེས་པར་འབྱུང་ བའི་ཆོས་བཞི་སྟེ། བཞི་གང་ཞེ་ན། འདི་ལྟ་སྟེ། ལུས་སུ་གཏོགས་པའི་དྲན་པ་དང༌། ཚོར་བར་གཏོགས་པའི་དྲན་པ་དང༌། སེམས་སུ་གཏོགས་པའི་དྲན་པ་དང༌། ཆོས་སུ་གཏོགས་པའི་ དྲན་པ་སྟེ། འདི་ནི། ངེས་པར་འབྱུང་བའི་ཆོས་བཞིའོ། །ངེས་པར་འབྱུང་བའི་ཆོས་ལྔ་སྟེ། ལྔ་གང་ཞེ་ན། འདི་ལྟ་སྟེ། དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་ པོ་དང༌། ཏིང་ངེ་འཛིན་གྱི་དབང་པོ་དང༌། ཤེས་རབ་ཀྱི་དབང་པོ་སྟེ། འདི་ནི། ངེས་པར་འབྱུང་བའི་ཆོས་ལྔའོ། །ངེས་པར་འབྱུང་བའི་ཆོས་དྲུག་སྟེ། དྲུག་གང་ཞེ་ན། འདི་ལྟ་སྟེ། སངས་རྒྱས་རྗེས་ སུ་དྲན་པ་དང༌། ཆོས་རྗེས་སུ་དྲན་པ་དང༌། དགེ་འདུན་རྗེས་སུ་དྲན་པ་དང༌། ཚུལ་ཁྲིམས་རྗེས་སུ་དྲན་པ་དང༌། གཏོང་བ་རྗེས་སུ་དྲན་པ་དང༌། ལྷ་རྗེས་སུ་དྲན་པ་སྟེ། འདི་ནི། ངེས་པར་ འབྱུང་བའི་ཆོས་དྲུག་གོ །ངེས་པར་འབྱུང་བའི་ཆོས་བདུན་ཏེ། བདུན་གང་ཞེ་ན། འདི་ལྟ་སྟེ། དྲན་པ་ཡང་དག་བྱང་ཆུབ་ཀྱི་ཡན་ལག་དང༌། ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ ལག་དང༌། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང༌། དགའ་བ་ཡང་དག་བྱང་ཆུབ་ཀྱི་ཡན་ལག་དང༌། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང༌། ཏིང་ངེ་འཛིན་ཡང་དག་བྱང་ ཆུབ་ཀྱི་ཡན་ལག་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་སྟེ། འདི་བདུན་ཡང་གོང་མ་བཞིན་ནོ། །ངེས་པར་འབྱུང་བའི་ཆོས་བརྒྱད་དེ། བརྒྱད་གང་ཞེ་ན། འདི་ལྟ་སྟེ། འཕགས་པའི་ ལམ་ཡན་ལག་བརྒྱད་པའོ། །འདི་ལྟ་སྟེ། ཡང་དག་པའི་ལྟ་བ་དང༌། ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་ དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་ཏེ། འདི་བརྒྱད་ཀྱང་གོང་མ་བཞིན་ནོ། །མཆོག་ཏུ་དགའ་བའི་རྩ་བ་ལས་སྐྱེས་པའི་ཆོས་དགུ་སྟེ། དགུ་གང་ཞེ་ན། འདི་ལྟ་སྟེ། མཆོག་ཏུ་དགའ་བ་དང༌། དགའ་བ་དང༌། ཤིན་ཏུ་སྦྱངས་པ་དང༌། བདེ་བ་དང༌། ཏིང་ངེ་འཛིན་དང༌། ཡང་དག་པ་ཇི་ལྟ་བ་བཞིན་དུ་ཡེ་ཤེས་མཐོང་བ་དང༌། མྱ་ངན་ལས་འདས་ པ་དང༌། འདོད་ཆགས་དང་བྲལ་བ་དང༌། རྣམ་པར་གྲོལ་བ་སྟེ། འདི་དགུ་ཡང་གོང་མ་བཞིན་ནོ། །ངེས་པར་འབྱུང་བའི་ཆོས་བཅུ་སྟེ། བཅུ་གང་ཞེ་ན། འདི་ལྟ་སྟེ། དགེ་བ་བཅུའི་ལས་ཀྱི་ ལམ་མོ། །འདི་ལྟ་སྟེ། སྲོག་གཅོད་པ་སྤངས་པ་དང༌། མ་བྱིན་པར་ལེན་པ་སྤངས་པ་དང༌། འདོད་པ་ལ་ལོག་པར་གཡེམ་པ་སྤངས་པ་དང༌། བརྫུན་དུ་སྨྲ་བ་སྤངས་པ་དང༌། ཕྲ་མ་ ༄༅། །སྤངས་པ་དང༌། ངག་རྩུབ་པོ་སྤངས་པ་དང༌། ཚིལ་ཀྱལ་པ་སྤང་པ་དང༌། བརྣབ་སེམས་སྤངས་པ་དང༌། གནོད་སེམས་མེད་པ་དང༌། ཡང་དག་པར་ལྟ་བ་ སྟེ། འདི་ཡང་གོང་མ་བཞིན་ཏེ། ལམ་དེ་ནི། ངེས་པར་འབྱུང་བར་འགྱུར་རོ། །འདི་ལྟར་ཤཱ་རིའི་བུ། བྱང་ཆུབ་ཀྱི་ཕྱོགས་ཀྱི་ཆོས་ཀྱི་དགེ་བ་ཇི་སྙེད་པ། ཚུལ་ཁྲིམས་ཀྱི་ཕུང་པོ་དང་ལྡན་ པའམ། ཏིང་ངེ་འཛིན་གྱི་ཕུང་པོ་དང་ལྡན་པའམ། ཤེས་རབ་ཀྱི་ཕུང་པོ་དང་ལྡན་པའམ། རྣམ་པར་གྲོལ་བའི་ཕུང་པོ་དང་ལྡན་པའམ། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ དང་ལྡན་པའམ། འཕགས་པའི་བདེན་པ་དང་ལྡན་པ་དེ་དག་ཀྱང་ངེས་པར་འབྱུང་བའི་ལམ་ཞེས་བྱའོ། །གཞན་ཡང་ངེས་པར་འབྱུང་བ་ཞེས་པ་ནི། ཡང་དག་པར་སྒྲུབ་པ་གང་ཡིན་པ་སྟེ། གང་ ཡང་དག་པར་སྒྲུབ་པ་དེ་ལ་ནི། ཆོས་གང་ཡང་གསོག་པའམ། འབྲི་བའམ། བླང་བའམ། དོར་བའམ། གཟུང་བའམ། སྤང་བ་མེད་དོ། དེ་ཅིའི་ཕྱིར་ཞེ་ན། ཡང་དག་པར་སྒྲུབ་པ་ལ་ ཞུགས་པ་ནི། གཉིས་ལ་བློ་མི་འཇུག་སྟེ། ཆོས་ཐམས་ཅད་གཉིས་སུ་མེད་པར་ཡང་དག་པ་ཇི་ལྟ་བ་བཞིན་དུ་ཡེ་ཤེས་མཐོང་བ་ནི། ངེས་པར་འབྱུང་བའི་ལམ་སྟེ། དེ་བཞིན་གཤེགས་པ་ སེམས་ཅན་རྣམས་ལ་ངེས་པར་འབྱུང་བའི་ལམ་ཡང་དག་པར་རབ་ཏུ་སྟོན་ཏོ། །དེ་བཞིན་གཤེགས་པའི་མི་འཇིགས་པ་དེ་ཡང་འཁོར་ཐམས་ཅད་ཤེས་པར་བྱེད་པ། འཁོར་ཐམས་ཅད་ མགུ་བར་བྱེད་པ། འཁོར་ཐམས་ཅད་ཀྱི་ལུས་སིམ་པར་བྱེད་པ། འཁོར་ཐམས་ཅད་ཀྱི་སེམས་ཚིམ་པ་སྐྱེད་པ། འཁོར་ཐམས་ཅད་དགའ་བ་དང༌། རབ་ཏུ་དགའ་བ་དང༌། དད་པ་སྐྱེད་པ། སྙིང་རྗེ་ཆེན་པོས་སྦྱོར་བ། དེ་བཞིན་ཉིད་ཀྱིས་མཉམ་པ། དེ་ཁོ་ན་ཉིད། དེ་བཞིན་ཉིད། གཞན་མ་ཡིན་པ་ཉིད། མི་འགྱུར་བ་ཉིད། མི་འཁྲུག་པ་ཉིད། འབྱུང་བ་མེད་པ་ཉིད། འཇིག་པ་མེད་ པ་ཉིད། རྩོད་པ་མེད་པ་ཉིད་དེ། དེ་བཞིན་གཤེགས་པའི་མི་འཇིགས་པ་ལ་རྩོད་པ་གང་ཡང་མེད་དོ། །དེ་བཞིན་གཤེགས་པའི་མི་འཇིགས་པ་ནི། རྩོད་པ་མེད་པ། འཐབ་པ་མེད་པའོ། །དེ་ བཞིན་ཉིད་དང་མཉམ་ཞིང་ཆོས་ཀྱི་དབྱིངས་ངོས་མཉམ་པ། འཇིག་རྟེན་གྱི་ཁམས་རབ་འབྱམས་མ་ལུས་པ་ཐམས་ཅད་ལ་ཐོགས་པ་མེད་པའོ། །དེ་ལྟར་དེ་བཞིན་གཤེགས་པ་ཚད་མེད། གྲངས་མེད། བསམ་གྱིས་མི་ཁྱབ། གཞལ་དུ་མེད། དཔག་ཏུ་མེད། བརྗོད་དུ་མེད་པའི་ཆོས་དང་ལྡན་ཞིང་སྙིང་རྗེ་ཆེན་པོས་ཟིན་པའི་སེམས་ཀྱིས་སེམས་ཅན་རྣམས་ལ་ངེས་པར་འབྱུང་ བའི་ལམ་ཡང་དག་པར་རབ་ཏུ་སྟོན་ཏེ། དེ་སོ་སོར་རྟོག་པས་སེམས་ཅན་དེར་འཇུག་པ་རྣམས་དེ་བྱེད་པའི་སྡུག་བསྔལ་ཡང་དག་པར་ཟད་ཅིང་ངེས་པར་འབྱུང་བར་འགྱུར་རོ། །ཤཱ་རིའི་བུ། འདི་ ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་བཞི་པ་སྟེ། མི་འཇིགས་པ་དེ་དང་ལྡན་པས། དེ་བཞིན་གཤེགས་པ་འཁོར་གྱི་ནང་དུ་སེངྒེའི་སྒྲ་ཡང་དག་པར་ ༄༅། །སྒྲོག་ཅིང༌། ཁྱུ་མཆོག་གི་གནས་སུ་ཞལ་གྱིས་འཆེ་སྟེ། དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་འཇིག་རྟེན་འདིར་ཆོས་ དང་མཐུན་པར་མ་བསྐོར་བ་ཚངས་པའི་འཁོར་ལོ་རབ་ཏུ་བསྐོར་ཏོ། །དེ་ལྟར་ཤཱ་རིའི་བུ། དེ་བཞིན་གཤེགས་པའི་མི་འཇིགས་པ་བཞི་མཐའ་ཡས་མུ་མེད་དོ། །འདི་ལྟ་སྟེ། དཔེར་ན། ཤཱ་རིའི་བུ། ནམ་མཁའ་མཐའ་ཡས་མུ་མེད་པ་དེ་བཞིན་དུ་དེ་བཞིན་གཤེགས་པའི་མི་འཇིགས་པ་བཞི་ཡང་མཐའ་ཡས་མུ་མེད་དོ། །སེམས་ཅན་ཐམས་ཅད་ཀྱིས་ཟད་པར་མི་འགྱུར་ རོ། །ཤཱ་རིའི་བུ། གང་དེ་བཞིན་གཤེགས་པའི་མི་འཇིགས་པའི་མཐའ་འདོད་པ་དེ་ནི། ནམ་མཁའི་མཐའ་འདོད་དོ། །བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་ བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་ པ་རྙེད་ནས་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང༌། རྨད་ཀྱི་བར་དུ་འདུ་ཤེས་བསྐྱེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་ གསུངས་སོ། །ཆོས་ཀུན་མཉམ་པ་ཉིད་མཉམ་པར། །རང་བྱུང་བས་ནི་རྗེས་སུ་རྟོགས། །དེ་ཕྱིར་ཡང་དག་མངོན་སངས་རྒྱས། །དེ་བཞིན་གཤེགས་པས་མཉམ་པ་གཟིགས། །སོ་སོའི་ སྐྱེ་བོའི་ཆོས་གང་ཡིན། །དེ་དག་སངས་རྒྱས་ཆོས་དང་མཉམ། །སློབ་དང་མི་སློབ་ཆོས་རྣམས་དང༌། །རང་རྒྱལ་གྱི་ནི་ཆོས་ཉིད་དང༌། །གང་དག་འཇིག་རྟེན་ཆོས་རྣམས་དང༌། གང་དག་འཇིག་རྟེན་འདས་ ཆོས་དང༌། །དགེ་དང་མི་དགེ་མི་གཡོ་རྣམས། །མྱ་ངན་འདས་པའི་ལམ་དང་འདྲ། །སྟོང་པ་ཉིད་དང་མཚན་མ་མེད། །སྨོན་ལམ་དག་ནི་རྣམ་པར་སྤངས། །མ་སྐྱེས་མངོན་པར་འདུ་མི་བྱེད། །འདི་ ནི་མཉམ་པ་ཉིད་དུ་བསྟན། །འདི་དག་མཉམ་པ་ཉིད་རྟོགས་ནས། །ཐུབ་པ་ཆེན་པོ་མི་འཇིགས་པ། གང་གིས་སེམས་ཅན་གྲོལ་འགྱུར་བ། །དེ་བཞིན་དུ་ཡང་རབ་ཏུ་སྟོན། །འཇིག་རྟེན་གསུམ་ ལས་རྣམ་པར་གྲོལ། །རྣམ་པར་ཐར་པ་རབ་ཏུ་སྟོན། །མི་དབང་གི་ནི་མི་འཇིགས་པ། །གཉིས་པ་ཡང་དག་རབ་ཏུ་བསྟན། །རྒྱལ་བས་གང་ཆོས་རྗེས་སུ་སངས་རྒྱས་པ། །མ་བསྟེན་པར་ནི་རྣམ་ པར་གྲོལ་མི་འཐོབ། །བག་མེད་པ་དང་ཁྲེལ་བ་མེད་གྱུར་དང༌། །གང་ལ་ངོ་ཚ་ཅི་ཡང་མེད་པ་དང༌། །ལུས་དང་ངག་རྣམས་དང་ནི་ཡིད་ཀྱིས་སུ། །གང་དག་སྡོམ་པ་ནམ་ཡང་ཡོད་མིན་དང༌། །འདུན་ དང་ཞེ་སྡང་གཏི་མུག་འཇིགས་པ་དང༌། སྲོག་གཅོད་པ་དང་གཞན་ལ་འཚེ་བ་དང༌། གཞན་གྱི་ཆུང་མ་དེ་བཞིན་བརྫུན་དང་ཆང༌། །ང་རྒྱལ་མི་གུས་དེ་བཞིན་བདུན་པའོ། །གང་དག་ལོག་པར་སྨྲ་ བ་བརྒྱད་པ་སྟེ། ཐམས་ཅད་རྣམ་པར་གྲོལ་བའི་ལམ་རྒྱུད་གཅོད། །གང་དག་མནར་སེམས་དགུ་དང་ཉེས་མང་དང༌། མི་དགེ་བཅུ་ཡི་ལས་ཀྱི་ལམ་རྣམས་དང༌། གང་དག་ཚུལ་མིན་ཞི་བ་མི་ ༄༅། །ཤེས་པ༑ ༑དེ་དག་ལ་ནི་ནམ་ཡང་ཐར་པ་མེད། །ཕྱིན་ཅི་ལོག་ལ་ཞུགས་པར་རིག་གྱུར་ནས། །བག་མེད་ཡང་དག་མ་ཡིན་སྨྲ་ལ་ཆགས། །རྒྱལ་བ་རྣམས་ཀྱི་མི་ འཇིགས་གསུམ་པ་སྟེ། །ཆོས་ཉིད་འདི་དག་ལ་ནི་བསྙེན་པར་བྱ། །གང་དག་རྣམ་སྦྱོང་སྒོ་ནི་ཚད་མེད་ལ། །མི་གང་སྟོན་པ་བྱང་ཆུབ་རེག་པར་འགྱུར། །རྒྱལ་བ་ཉིད་ཀྱིས་མ་ཐོས་ཐམས་ ཅད་རིག །ཤེས་ནས་མི་འཆིར་འགྲོ་བའི་ཆོས་འཆད་དོ། །ཇི་ཙམ་དགེ་བའི་ཆོས་ནི་མང་ཡོད་པ། །བྱང་ཆུབ་ཕྱོགས་དགེ་རྒྱལ་བས་བསྔགས་པ་ལ། །བསྟེན་པ་རྣམ་པར་ཐར་པ་མི་འཐབ་ པ༑ ༑གནས་མེད་པར་ནི་སྟོབས་བཅུ་རྣམས་ཀྱིས་བཤད། །ཚུལ་བཞིན་གྱིས་ནི་ཉོན་མོངས་མང་པོ་ཞི། །ཡང་དག་ཆོས་དགེ་མཉམ་པ་མེད་ལྡན་ཞིང༌། །ཆོས་དང་ཆོས་མ་ཡིན་ལ་དེ་མི་ ཆགས༑ ༑ཞི་བ་མྱ་ངན་མེད་པ་རྣམ་གྲོལ་རེག །གསོག་གསོབ་ནམ་མཁའ་འདྲ་ཞིང་ཡ་མ་བརླ། །སྒྱུ་མའི་གཟུགས་འདྲ་ནམ་མཁའ་ལྟ་བུ་དང༌། །དགེ་ཆོས་རྣམ་པ་གང་གིས་རབ་ཤེས་ པ༑ ༑དེ་ནི་སྲིད་པའི་མཚོ་ལས་ཐར་པར་འགྱུར། །ཐུབ་པ་སྟོབས་བཅུ་རྣམས་ཀྱི་ཆོས་འདི་ནི། །འགྲོ་བ་གང་མོས་སྲིད་པར་འགྲོ་བ་ལ། །སྙིང་རྗེ་སྙིང་བརྩེ་བྱས་ནས་ཐར་བྱེད་དེ། །མི་འཇིགས་ བཞི་པ་ནམ་མཁའ་འདྲ་བའོ། །དེ་ལྟར་ཤཱ་རིའི་བུ། བྱང་ཆུབ་སེམས་དཔའ་དེ་བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་ལ་མངོན་པར་དང༌། ཡིད་ཆེས། རབ་ཏུ་རྟོག་ སོམ་ཉི་མེད། ཐེ་ཚོམ་མི་ཟ་བ་ནས་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང་རྨད་ཀྱི་བར་དུ་འདུ་ཤེས་བསྐྱེད་དོ། །ཤཱ་རིའི་བུ། ཇི་ལྟར་ན། བྱང་ཆུབ་སེམས་དཔའ་དེ་བཞིན་གཤེགས་ པ་རྣམས་ཀྱི་དེ་བཞིན་གཤེགས་པའི་སྙིང་རྗེ་ཆེན་པོ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག། སོམ་ཉི་མེད། ཐེ་ཚོམ་མི་ཟ་བ་ནས་ངོ་མཚར་དང༌། རྨད་ཀྱི་བར་དུ་འདུ་ ཤེས་བསྐྱེད་ཅེ་ན། འདི་ལ་ཤཱ་རིའི་བུ། དེ་བཞིན་གཤེགས་པ་རྣམས་ཀྱི་སྙིང་རྗེ་ཆེན་པོ་ནི། སེམས་ཅན་ཐམས་ཅད་རྗེས་སུ་མི་གཏོང་ཞིང་རྟག་ཏུ་འཇུག་པ། སེམས་ཅན་ཡོངས་སུ་སྨིན་པར་ འགྱུར་བ་སྟེ། མི་ལྡོག་པར་རིག་པར་བྱའོ། །དེ་བཞིན་གཤེགས་པའི་སྙིང་རྗེ་ཆེན་པོ་དེ་ཡང་ཇི་ལྟར་དག་གི་ལས་ཀྱིས་ཀྱང་ཁོང་དུ་ཆུད་པར་བྱ་བ་སླ་བ་མ་ཡིན་པ་དེ་ལྟར་བསམ་གྱིས་མི་ཁྱབ། དེ་ ལྟར་མཚུངས་པ་མེད། དེ་ལྟར་དཔག་ཏུ་མེད། དེ་ལྟར་བརྗོད་དུ་མེད། དེ་ལྟར་མི་བཟད་ཅིང་ཁོང་དུ་ཆུད་པར་དཀའོ། །དེ་ཅིའི་ཕྱིར་ཞེ་ན། ཇི་ལྟར་དེ་བཞིན་གཤེགས་པས་བྱང་ཆུབ་ཐོབ་པ་ དེ་ལྟར་སེམས་ཅན་ལ་དེ་བཞིན་གཤེགས་པས་སྙིང་རྗེ་ཆེན་པོ་འཇུག་སྟེ། བྱང་ཆུབ་ཅི་འདྲ་བ་སྙིང་རྗེ་ཆེན་པོ་ཡང་དེ་འདྲའོ། །དེ་བཞིན་གཤེགས་པས་བྱང་ཆུབ་ཇི་ལྟར་ཐོབ་ཅེ་ན། དེ་བཞིན་ གཤེགས་པས་རྩ་བ་མེད་པ་གནས་མེད་པའི་བྱང་ཆུབ་ཐོབ་བོ། དེ་ལ་རྩ་བ་གང༌། གནས་གང་ཞེ་ན། འཇིག་ཚོགས་ནི། རྩ་བའོ། །ཡང་དག་པ་མ་ཡིན་པ་ཀུན་ཏུ་རྟོག་པ་ནི། གནས་སོ། ། ༄༅། །དེ་བཞིན་གཤེགས་པས་བྱང་ཆུབ་མཉམ་པ་ཉིད་ཀྱི་ཕྱིར་དེ་དག་མཉམ་པར་མཁྱེན་ཏེ། དེའི་ཕྱིར་དེ་བཞིན་གཤེགས་པས་རྩ་བ་མེད་པ་གནས་མེད་པའི་བྱང་ཆུབ་ མངོན་པར་རྫོགས་པར་སངས་རྒྱས་ཞེས་བྱ་སྟེ། སེམས་ཅན་འདི་དག་ནི། རྩ་བ་མེད་པ། གནས་མེད་པ་མི་ཤེས་པ་དེ་དག་ཤེས་པར་བྱའོ། །ཞེས་སེམས་ཅན་རྣམས་ལ་དེ་བཞིན་ གཤེགས་པའི་སྙིང་རྗེ་ཆེན་པོ་འཇུག་གོ །གཞན་ཡང་ཤཱ་རིའི་བུ། བྱང་ཆུབ་ནི། ཞི་བ་དང༌། ཉེ་བར་ཞི་བའོ། །དེ་ཇི་ལྟར་ཞི། ཇི་ལྟར་ཉེ་བར་ཞི་ཞེ་ན། ནང་ཞི་བའོ། །ཕྱི་རོལ་ཉེ་བར་ཞི་ བའོ༑ ༑དེ་ཅིའི་ཕྱིར་ཞེ་ན། མིག་ནི། བདག་གམ་བདག་གིས་སྟོང་སྟེ། དེའི་རང་བཞིན་ནི། འདི་ཡིན་པས་ན། དེའི་ཕྱིར་ཞི་བ་ཞེས་བྱའོ། །དེ་བཞིན་དུ་རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ནི། བདག་དང་བདག་གིས་སྟོང་སྟེ། དེའི་རང་བཞིན་འདི་ཡིན་པས་ན། དེའི་ཕྱིར་ཞི་བ་ཞེས་བྱའོ། །དེ་མིག་སྟོང་པར་ཡོངས་སུ་ཤེས་ནས་གཟུགས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །ཡིད་ཀྱི་བར་དུ་ཡང་སྟོང་པར་ཡོངས་སུ་ཤེས་ནས་ཆོས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་ཞེས་བྱ་ན། སེམས་ཅན་འདི་དག་ནི། ཞི་བ་དང༌། ཉེ་ བར་ཞི་བ་འདི་མི་ཤེས་ཏེ། དེ་དག་ཤེས་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ །གཞན་ཡང་ཤཱ་རིའི་བུ། ངས་ནི། རང་བཞིན་གྱིས་འོད་ གསལ་བ་བྱང་ཆུབ་མངོན་པར་རྫོགས་པར་སངས་རྒྱས་སོ། །ཇི་ལྟར་འོད་གསལ་ཞེ་ན། རང་བཞིན་གང་ཡིན་པ་དེ་ནི། ཀུན་ནས་ཉོན་མོངས་པ་མེད་པ་སྟེ། ནམ་མཁའ་ལྟ་བུའོ། །ནམ་མཁའི་ རང་བཞིན་ནོ། །ནམ་མཁའ་ནི། རྗེས་སུ་འབྲང་བའོ། །ནམ་མཁའ་དང་མཉམ་པ་ཉིད་ཀྱིས་མཉམ་པ་སྟེ། དེ་ནི། རང་བཞིན་གྱིས་ཤིན་ཏུ་འོད་གསལ་བས་ན། རང་བཞིན་གྱིས་འོད་ གསལ་བ་འདི་ཁོང་དུ་མ་ཆུད་པས་བྱིས་པ་སོ་སོའི་སྐྱེ་བོ་རྣམས་གློ་བུར་གྱི་ཉོན་མོངས་པས་ཀུན་ནས་ཉོན་མོངས་ཏེ། སེམས་ཅན་རྣམས་རང་བཞིན་གྱིས་འོད་གསལ་བ་འདི་མི་ཤེས་པས། དེ་དག་རང་བཞིན་གྱིས་འོད་གསལ་བ་ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ། གཞན་ཡང་ཤཱ་རིའི་བུ། ངས་ནི། བླང་ བ་མེད་པ་དང༌། དོར་བ་མེད་པར་བྱང་ཆུབ་མངོན་པར་རྫོགས་པར་སངས་རྒྱས་སོ། །དེ་ལ་བླང་བ་མེད་པ་གང༌། དོར་བ་མེད་པ་གང་ཞེ་ན། བླང་བ་མེད་པ་ཞེས་བྱ་བ་ནི། ཆོས་ཐམས་ཅད་མི་ འཛིན་པའོ། །དོར་བ་མེད་པ་ཞེས་བྱ་བ་ནི། ཆོས་ཐམས་ཅད་རབ་ཏུ་འཛིན་པ་མེད་པའོ། །དེ་ལ་དེ་བཞིན་གཤེགས་པས་བླངས་བ་མེད་པ་དང༌། དོར་བ་མེད་པའི་ངོ་བོ་ཉིད་མཉམ་པ་ཉིད་དུ་གཟིགས་ ཏེ། ཇི་ལྟར་དེ་བཞིན་གཤེགས་པས་ཚུ་རོལ་མེད་པ་དང༌། ཕ་རོལ་མེད་པར་གཟིགས་པ་དེ་ལྟར་ཆོས་ཐམས་ཅད་ཚུ་རོལ་དང༌། ཕ་རོལ་དང་བྲལ་བར་དེ་བཞིན་གཤེགས་པས་མངོན་པར་རྫོགས་ ༄༅། །པར་སངས་རྒྱས་ཏེ། དེའི་ཕྱིར་དེ་བཞིན་གཤེགས་པ་ཞེས་བྱའོ། །བླང་བ་མེད་པ་དང༌། དོར་བ་མེད་པ་འདི་སེམས་ཅན་རྣམས་ཀྱིས་ཁོང་དུ་མ་ཆུད་པས་དེ་ ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ །གཞན་ཡང་ཤཱ་རིའི་བུ། ངས་མཚན་མ་མེད་པ་དང༌། དམིགས་པ་མེད་པར་བྱང་ ཆུབ་ཏུ་མངོན་པར་རྫོགས་པར་སངས་རྒྱས་སོ། །དེ་ལ་མཚན་མ་མེད་པ་གང༌། དམིགས་པ་མེད་པ་གང་ཞེ་ན། མིག་གིས་རྣམ་པར་ཤེས་པ་མི་དམིགས་པ་ནི། མཚན་མ་མེད་པའོ། ། གཟུགས་ཡང་དག་པར་རྗེས་སུ་མི་མཐོང་བ་ནི། དམིགས་པ་མེད་པའོ། །ཡིད་ཀྱིས་རྣམ་པར་ཤེས་པའི་བར་དུ་མི་དམིགས་པ་ནི། མཚན་མ་མེད་པའོ། །ཆོས་ཡང་དག་པར་རྗེས་སུ་མི་ མཐོང་བ་ནི། དམིགས་པ་མེད་པའོ། །དེ་ལྟར་ཤཱ་རིའི་བུ། མཚན་མ་མེད་པ་དང༌། དམིགས་པ་མེད་པ་ནི། འཕགས་པ་རྣམས་ཀྱི་སྤྱོད་ཡུལ་ལོ། །འཕགས་པ་རྣམས་ཀྱི་སྤྱོད་ཡུལ་གང་ ཞེ་ན༑ ཁམས་གསུམ་པ་ནི། འཕགས་པ་རྣམས་ཀྱི་སྤྱོད་ཡུལ་ཏེ། གང་འཕགས་པ་རྣམས་ཀྱི་སྤྱོད་ཡུལ་དེ་ནི། བྱིས་པ་སོ་སོའི་སྐྱེ་བོ་ཐམས་ཅད་ཀྱི་སྤྱོད་ཡུལ་མ་ཡིན་པས། དེ་ ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ །གང་ཤཱ་རིའི་བུ། བྱང་ཆུབ་ནི། འདས་པ་མ་ཡིན། མ་འོངས་པ་མ་ཡིན། ད་ལྟར་ བྱུང་བ་མ་ཡིན་ཏེ། དུས་གསུམ་མཉམ་པ་ཉིད་འཁོར་གསུམ་ཡོངས་སུ་ཆད་པའོ། །དེ་ལ་འཁོར་གསུམ་ཡོངས་སུ་ཆད་པ་གང་ཞེ་ན། གང་འདས་པ་ལ་སེམས་མི་འཇུག་པ་དང༌། མ་འོངས་ པ་ལ་རྣམ་པར་ཤེས་པ་རྗེས་སུ་མི་རྒྱུག་པ་དང༌། ད་ལྟར་བྱུང་བ་ལ་ཡིད་ལ་བྱེད་པ་མི་འཇུག་པ་སྟེ། དེ་སེམས་དང༌། ཡིད་དང༌། རྣམ་པར་ཤེས་པ་ལ་མི་གནས་པས་འདས་པ་ལ་མི་ རྟོག །མ་འོངས་པ་ལ་རློམ་སེམས་སུ་མི་བྱེད། ད་ལྟར་བྱུང་བ་ལ་སྤྲོས་པར་མི་བྱེད་པ་འདི་ནི། དུས་གསུམ་མཉམ་པ་ཉིད་འཁོར་གསུམ་ཡོངས་སུ་དག་པ་ཡིན་ན། སེམས་ཅན་རྣམས་ ཀྱིས་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ །ཤཱ་རིའི་བུ། ངས་བྱང་ཆུབ་ནི། ལུས་མེད་པ། མངོན་པར་འདུས་མ་བྱས་པར་མངོན་པར་རྫོགས་པར་སངས་རྒྱས་ཏེ། དེ་ནི། མིག་གི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་པ་ནས་ཡིད་ཀྱི་རྣམ་པར་ཤེས་པའི་བར་གྱིས་རྣམ་ པར་ཤེས་པར་བྱ་བ་མ་ཡིན་ནོ། །འདུས་མ་བྱས་ཞེས་བྱ་བ་ནི། གང་མ་སྐྱེས་པ། མི་འཇིག་པ། མི་གནས་པ་དེ་ནི། འཁོར་གསུམ་དང་བྲལ་བ་འདུས་མ་བྱས་ཞེས་བྱའོ། །འདུས་མ་བྱས་ཇི་ལྟ་བར་འདུས་ བྱས་ཀྱང་དེ་ལྟར་ཁོང་དུ་ཆུད་པར་བྱའོ། །དེ་ཅིའི་ཕྱིར་ཞེ་ན། གང་ཆོས་ཐམས་ཅད་ཀྱི་རང་བཞིན་དེ་ནི། དངོས་པོ་མེད་པའོ། །གང་དངོས་པོ་མེད་པ་དེ་ལ་གཉིས་སུ་མེད་དེ། ལུས་མེད་པ། ༄༅། །མངོན་པར་འདུས་མ་བྱས་པ་དེ་སེམས་ཅན་རྣམས་ཀྱིས་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་ རྗེ་ཆེན་པོ་འཇུག་གོ །ཤཱ་རིའི་བུ། ངས་བྱང་ཆུབ་ནི། དབྱེར་མེད་པ་དང༌། གནས་སུ་མངོན་པར་རྫོགས་པར་སངས་རྒྱས་སོ། །དེ་ལ་དབྱེར་མེད་པ་གང༌། གནས་གང་ཞེ་ན། དེ་ལ་དེ་ བཞིན་ཉིད་ནི། གནས་སོ། །གནས་མེད་པ་ནི། དབྱེར་མེད་པའོ། །ཆོས་ཀྱི་དབྱིངས་ནི། གནས་སོ། །ཐ་དད་པ་མེད་པ་ནི། དབྱེར་མེད་པའོ། །ཡང་དག་པའི་མཐའ་ནི། གནས་སོ། ། གཡོ་བ་མེད་པ་ནི། དབྱེར་མེད་པའོ། །སྟོང་པ་ཉིད་ནི། གནས་སོ། །དམིགས་སུ་མེད་པ་ནི། དབྱེར་མེད་པའོ། །མཚན་མ་མེད་པ་ནི། གནས་སོ། །རྣམ་པར་མི་རྟོག་པ་ནི། དབྱེར་ མེད་པའོ། །སྨོན་པ་མེད་པ་ནི། གནས་སོ། །འཇུག་པ་མེད་པ་ནི། དབྱེར་མེད་པའོ། །སེམས་ཅན་མེད་པ་ནི། གནས་སོ། །སེམས་ཅན་མེད་པའི་རང་བཞིན་ནི། དབྱེར་མེད་པའོ། ། ནམ་མཁའ་ནི། གནས་སོ། །མི་དམིགས་པ་ནི། དབྱེར་མེད་པའོ། །མི་སྐྱེ་བ་ནི། གནས་སོ། །མི་འགག་པ་ནི། དབྱེར་མེད་པའོ། །འདུས་མ་བྱས་ནི། གནས་སོ། །རྒྱུ་བ་མེད་པ་ནི། དབྱེར་ མེད་པའོ། །བྱང་ཆུབ་ནི། གནས་སོ། །ཉེ་བར་ཞི་བ་ནི། དབྱེར་མེད་པའོ། །མྱ་ངན་ལས་འདས་པ་ནི། གནས་སོ། །མངོན་པར་མི་འགྲུབ་པ་ནི། དབྱེར་མེད་པའོ། །དེ་ལྟར་ཤཱ་རིའི་བུ། དབྱེར་མེད་པའི་གནས་འདི་སེམས་ཅན་རྣམས་ཀྱིས་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ། ཤཱ་རིའི་བུ། བྱང་ཆུབ་ནི། ལུས་ཀྱིས་མངོན་པར་རྫོགས་པར་སངས་མ་རྒྱས་ཏེ། སེམས་ཀྱིས་ཀྱང་མ་ཡིན་ནོ། །དེ་ཅིའི་ཕྱིར་ཞེ་ན། ལུས་ནི། བེམ་པོ། །གཡོ་བ་མེད་པ། བྱེད་པ་མེད་པ། རྩྭ་དང༌། ཤིང་དང༌། རྡོ་དང༌། མིག་ཡོར་ལྟ་བུའོ། །སེམས་ནི། སྒྱུ་མ་དང༌། སྨིག་རྒྱུ་དང༌། ཆུ་ཟླ་ལྟ་བུ་སྟེ། གང་གིས་ལུས་དང༌། སེམས་དེ་ལྟར་ཁོང་དུ་ཆུད་པ་དེ་ནི། བྱང་ཆུབ་ཅེས་བྱའོ། །བྱང་ཆུབ་ ནི༑ ཐ་སྙད་ཙམ་དུ་བཟུང་བ་སྟེ། བྱང་ཆུབ་ནི། ལུས་སམ། སེམས་སམ། ཆོས་མ་ཡིན་པའམ། ཡང་དག་པ་མ་ཡིན་པའམ། བདེན་པའམ། རྫུན་པ་གང་གིས་ཀྱང་ བརྗོད་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་ནི། ཆོས་ཐམས་ཅད་ཀྱིས་བརྗོད་པར་བྱ་བ་མ་ཡིན་ཏེ། བྱང་ཆུབ་ལ་ནི། གང་གིས་ཀྱང་ཚིག་གི་ཐ་སྙད་དུ་འགྱུར་བའི་གནས་ཅུང་ ཟད་ཀྱང་མེད་དོ། །ཇི་ལྟར་ནམ་མཁའ་གནས་མེད་ཅིང་ཚིག་མེད་པ་དེ་བཞིན་དུ་བྱང་ཆུབ་ཀྱང་གནས་མེད་པ། བརྗོད་པར་བྱ་བ་མ་ཡིན་པའོ། །དེ་ལྟར་ཤཱ་རིའི་བུ། ཡང་དག་པ་ཇི་ལྟ་བ་བཞིན་ཚོལ་ བ་ན་ཆོས་ཐམས་ཅད་ཚིག་མེད་པ་སྟེ། ཆོས་ལ་ཚིག་མེད། ཚིག་ལ་ཡང་ཆོས་མེད་དོ། །དེ་ལྟ་བུའི་ཆོས་ཀྱི་ཚུལ་མི་ཤེས་ཤིང་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ། །ཞེས་སེམས་ཅན་ ༄༅། །རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ། ཤཱ་རིའི་བུ། བྱང་ཆུབ་ནི། གཟུང་བ་མེད་པ། ཀུན་གཞི་མེད་པའོ། །དེ་ལ་གཟུང་བ་མེད་པ་གང་ ཀུན་གཞི་མེད་པ་གང་ཞེ་ན། འདི་ལྟ་སྟེ། མིག་ཡོངས་སུ་ཤེས་པ་ནི། གཟུང་བ་མེད་པའོ། །གཟུགས་ཡང་དག་པར་རྗེས་སུ་མི་མཐོང་བ་ནི། ཀུན་གཞི་མེད་པའོ། །ཡིད་ཀྱི་བར་དུ་ ཡོངས་སུ་ཤེས་པ་ནི། གཟུང་བ་མེད་པའོ། །ཆོས་མི་དམིགས་པ་ནི། ཀུན་གཞི་མེད་པ་སྟེ། དེ་ལྟར་ཤཱ་རིའི་བུ། དེ་བཞིན་གཤེགས་པས་གཟུང་བ་མེད་པ། ཀུན་གཞི་མེད་པར་བྱང་ ཆུབ་མངོན་པར་རྫོགས་པར་སངས་རྒྱས་སོ། །མངོན་པར་རྫོགས་པར་སངས་རྒྱས་ནས་མིག་མི་འཛིན་པ་དང༌། གཟུགས་ཀུན་གཞི་མེད་པས་རྣམ་པར་ཤེས་པ་མི་གནས་སོ། །ཡིད་ ཀྱི་བར་དུ་མི་འཛིན་ཅིང་ཆོས་ཀུན་གཞི་མེད་པས་རྣམ་པར་ཤེས་པ་མི་གནས་སོ། །དེ་རྣམ་པར་ཤེས་པ་མི་གནས་པས་སེམས་ཅན་ཐམས་ཅད་ཀྱི་སེམས་ཀྱི་གནས་ཤེས་སོ། །ཇི་ལྟར་ ཤེས་ཤེ་ན། སེམས་ཅན་རྣམས་ཀྱི་སེམས་ཀྱི་གནས་ནི། བཞི་སྟེ། བཞི་གང་ཞེ་ན། འདི་ལྟ་སྟེ། གཟུགས་ནི། སེམས་ཀྱི་གནས་སོ། །ཚོར་བ་དང༌། འདུ་ཤེས་དང༌། འདུ་བྱེད་ ནི༑ སེམས་ཅན་རྣམས་ཀྱི་སེམས་ཀྱི་གནས་ཏེ། འདི་བཞི་ནི། སེམས་ཅན་རྣམས་ཀྱི་སེམས་ཀྱི་གནས་སོ། །གནས་དེ་ཡང་གནས་མེད་པར་དེ་བཞིན་གཤེགས་པས་མཁྱེན་ཏེ། གནས་མེད་པའི་མཐའ་འདི་སེམས་ཅན་རྣམས་ཀྱིས་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ། ཤཱ་རིའི་བུ། བྱང་ཆུབ་ཅེས་བྱ་བ་ནི། སྟོང་པ་ཉིད་ཀྱི་ཚིག་བླ་དྭགས་སོ། །སྟོང་པ་ཉིད་གང་གིས་བྱང་ཆུབ་སྟོང་པའི་སྟོང་པ་ཉིད་དེའི་ཆོས་ཐམས་ཅད་སྟོང་སྟེ། དེ་དག་སྟོང་པ་ཇི་ལྟ་བ་བཞིན་དུ། དེ་ལྟར་དེ་བཞིན་ གཤེགས་པས་ཆོས་ཐམས་ཅད་མངོན་པར་རྫོགས་པར་སངས་རྒྱས་མོད་ཀྱི། སྟོང་པ་ཉིད་ཀྱིས་སྟོང་པ་ཉིད་མངོན་པར་རྫོགས་པར་སངས་རྒྱས་པ་ནི། མ་ཡིན་པས། སྟོང་པ་ཉིད་དམ་ བྱང་ཆུབ་ཅེས་བྱ་བ་འདི་ནི། ཚུལ་གཅིག་པའི་ཡེ་ཤེས་སོ། །དེ་ལ་གཉིས་པོ་གང་གིས་སྟོང་པ་ཉིད་དང༌། བྱང་ཆུབ་ཏུ་གཉིས་སུ་དབྱེ་བའི་གཉིས་གང་ཡང་མེད་དོ། །ཆོས་དེ་ནི། གཉིས་སུ་ མེད་ཅིང་གཉིས་སུ་དབྱར་མེད་དེ། མིང་མེད་པ། མཚན་མ་མེད་པ། འཇུག་པ་མེད་པ། རབ་ཏུ་རྒྱུ་བ་མེད་པ། སྤྱོད་པ་མེད་པའོ། །གང་སྟོང་པ་ཞེས་བྱ་བ་ནི། མངོན་པར་ཆགས་པ་དང༌། འཛིན་པ་དང་བྲལ་བའོ། །དོན་དམ་པའི་ཆོས་གང་ཡང་མི་དམིགས་པས། སྟོང་པ་ཉིད་གང་ཡིན་པ་དེ་སྟོང་ཞེས་བྱའོ། །ཇི་ལྟར་ནམ་མཁའ་ནམ་མཁའ་ཞེས་ཀྱང་བྱ་ལ། ནམ་མཁའ་ནི། བརྗོད་པར་བྱ་བ་ཡང་མ་ཡིན་ནོ། །དེ་བཞིན་དུ་སྟོང་པ་ཞེས་ཀྱང་བྱ་ལ། སྟོང་པ་ཉིད་བརྗོད་པར་བྱ་བ་མ་ཡིན་ནོ། །འདི་ལྟ་སྟེ། མིང་ཙམ་དུ་ཐ་སྙད་འདོགས་པ་འདི་ནི། ཆོས་ཐམས་ཅད་ལ་ ༄༅། །འཇུག་པ་སྟེ། མིང་དེ་ཡང་ཡུལ་ན་མི་གནས། ཕྱོགས་ན་མི་གནས་སོ། །ཇི་ལྟར་མིང་ཡུལ་ན་མི་གནས། ཕྱོགས་ན་མི་གནས་པ་དེ་བཞིན་དུ། ཆོས་མིང་གི་ ཐ་སྙད་དུ་འདོགས་པའི་ཆོས་དེ་ཡང་ཡུལ་ན་མི་གནས། ཕྱོགས་ན་མི་གནས་ཏེ། དེ་ལྟར་དེ་བཞིན་གཤེགས་པས་ཆོས་ཐམས་ཅད་མཁྱེན་ཏོ། །ཐོག་མ་ནས་མ་སྐྱེས་མ་བྱུང་བར་དེ་ལྟར་ མཁྱེན་པས་དེ་ལྟར་རྣམ་པར་གོལ་ཏེ། བཅིངས་པ་ཡང་མེད། གྲོལ་བ་ཡང་མེད་ན། དེ་བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ། །ཞེས་སེམས་ཅན་ རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ །ཤཱ་རིའི་བུ། བྱང་ཆུབ་ནི། ནམ་མཁའ་དང་མཉམ་སྟེ། ནམ་མཁའ་ནི། མཉམ་པ་ཡང་མ་ཡིན། མི་མཉམ་པའང་མ་ ཡིན་ནོ། །བྱང་ཆུབ་ཀྱང་མཉམ་པའང་མ་ཡིན། །མི་མཉམ་པའང་མ་ཡིན་ཏེ། དེ་ཇི་ལྟར་ཆོས་རྣམས་ཡང་དག་པར་ཡོངས་སུ་གྲུབ་པ་མེད་དེ། མཉམ་པའམ་མི་མཉམ་པ་ཞེས་བརྗོད་པ་མ་ ཡིན་ནོ། །དེ་ལྟར་ཤཱ་རིའི་བུ། དེ་བཞིན་གཤེགས་པས་ཆོས་ཐམས་ཅད་མཉམ་པ་ཡང་མ་ཡིན། མི་མཉམ་པ་ཡང་མ་ཡིན་པར་མངོན་པར་རྫོགས་པར་སངས་རྒྱས་སོ། །ཇི་ལྟར་ ཆོས་རྡུལ་ཙམ་ཡང་མཉམ་པར་བྱས་པ་ཡང་མ་ཡིན། མི་མཉམ་པར་བྱས་པ་ཡང་མ་ཡིན་པ་དེ་ལྟར་མངོན་པར་རྫོགས་པར་སངས་རྒྱས་སོ། །ཆོས་ཇི་སྙེད་པ་དེ་དག་ཀྱང་ཡང་དག་པའི་ ཡེ་ཤེས་ཀྱིས་ཤེས་སོ། །ཡང་དག་པའི་ཡེ་ཤེས་གང་ཞེ་ན། ཆོས་མ་བྱུང་བ་རྣམས་འབྱུང་བ་དང༌། བྱུང་ནས་འཇིག་པར་འགྱུར་བ་དེ་དག་ནི། བདག་པོ་མེད་པར་འབྱུང༌། བདག་པོ་མེད་པར་ འཇིག་སྟེ། རྐྱེན་གྱིས་འབྱུང་བ་དང༌། འཇིག་པར་འགྱུར་ཞིང༌། འདི་ལ་འཇུག་པའམ། ལྡོག་པ་གང་ཡང་མེད་དེ། ལམ་བཅད་པའི་ཕྱིར་དེ་བཞིན་གཤེགས་པ་ཆོས་སྟོན་ཏོ། །ལམ་ བཅད་པ་འདི་སེམས་ཅན་རྣམས་ཀྱིས་ཁོང་དུ་མ་ཆུད་པས་ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ། ཤཱ་རིའི་བུ། བྱང་ཆུབ་ དེ་ནི། ཇི་ལྟ་བ་བཞིན་གྱི་གནས་སོ། །བྱང་ཆུབ་ཇི་ལྟ་བར་གཟུགས་ཀྱང་དེ་བཞིན་ཏེ། དེ་བཞིན་ཉིད་ཀྱིས་མི་འབྱུང་ངོ༌། །བྱང་ཆུབ་ཇི་ལྟ་བ་བཞིན་དུ་ཚོར་བ་དང༌། འདུ་ཤེས་དང༌། འདུ་ བྱེད་དང༌། རྣམ་པར་ཤེས་པའང་དེ་བཞིན་ཏེ། དེ་བཞིན་ཉིད་ཀྱིས་མི་འབྱུང་ངོ༌། །བྱང་ཆུབ་ཇི་ལྟ་བ་བཞིན་དུ་སའི་ཁམས་དང༌། ཆུའི་ཁམས་དང༌། མེའི་ཁམས་དང༌། རླུང་གི་ཁམས་ ཀྱང་དེ་བཞིན་ཏེ། དེ་བཞིན་ཉིད་ཀྱིས་མི་འབྱུང་ངོ༌། །བྱང་ཆུབ་ཇི་ལྟ་བ་བཞིན་དུ་མིག་གི་ཁམས་དང༌། གཟུགས་ཀྱི་ཁམས་དང༌། མིག་གི་རྣམ་པར་ཤེས་པའི་ཁམས་ནས་ཡིད་ ཀྱི་ཁམས་དང༌། ཆོས་ཀྱི་ཁམས་དང༌། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུའོ། །ཆོས་རྣམས་ཀྱི་བཏགས་པ་ནི། མིང་ཙམ་དུ་ཟད་དེ། དེ་ནི། ཕུང་པོ་དང༌། ཁམས་དང༌། ༄༅། །སྐྱེ་མཆེད་རྣམས་སུ་བཏགས་པ་སྟེ། དེ་དག་ཀྱང་དེ་བཞིན་གཤེགས་པས་ཇི་ལྟ་བ་བཞིན་དུ་མངོན་པར་རྫོགས་པར་སངས་རྒྱས་སོ། །ཕྱིན་ཅི་མ་ལོག་པར་མངོན་ པར་རྫོགས་པར་སངས་རྒྱས་པས་ན། སྔོན་ཇི་ལྟ་བར་ཕྱིས་ཀྱང་དེ་བཞིན། བར་དུ་ཡང་དེ་བཞིན་ཏེ། སྔོན་གྱི་མཐའ་ནས་མ་སྐྱེས། ཕྱི་མའི་མཐར་མི་འཕོའོ། །བར་དུའང་དབེན་པ་སྟེ། དེ་ལྟར་དེ་དག་ནི། ཇི་ལྟ་བ་བཞིན་གྱི་གནས་ཡིན་ནོ། །གཅིག་ཇི་ལྟ་བ་བཞིན་ཐམས་ཅད་ཀྱང་དེ་བཞིན་ནོ། །ཐམས་ཅད་ཇི་ལྟ་བར་གཅིག་ཀྱང་དེ་བཞིན་ཏེ། ཇི་ལྟ་བ་བཞིན་ནི། གཅིག་ གམ་མང་པོར་མི་འགྱུར་རོ། །ཇི་ལྟ་བ་བཞིན་གྱི་གནས་དེ་སེམས་ཅན་རྣམས་ཀྱིས་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་ སྙིང་རྗེ་ཆེན་པོ་འཇུག་གོ །ཤཱ་རིའི་བུ། བྱང་ཆུབ་ནི། རྣམ་པ་ལ་འཇུག་པ། རྣམ་པ་མེད་པ་ལ་ཞུགས་པའོ། །དེ་ལ་རྣམ་པ་གང༌། རྣམ་པ་མེད་པ་གང་ཞེ་ན། ཤཱ་རིའི་བུ། རྣམ་པ་ ཞེས་བྱ་བ་ནི། དགེ་བའི་ཆོས་རྣམས་རྩོམ་པའོ། །རྣམ་པ་མེད་པ་ཞེས་བྱ་བ་ནི། ཆོས་ཐམས་ཅད་མི་དམིགས་པའོ། །རྣམ་པ་ཞེས་བྱ་བ་ནི། མི་གནས་པའི་སེམས་ཀྱི་གནས་སོ། ། རྣམ་པ་མེད་པ་ཞེས་བྱ་བ་ནི། རྣམ་པར་ཐར་པའི་སྒོ་མཚན་མ་མེད་པའི་ཏིང་ངེ་འཛིན་ཏོ། །རྣམ་པ་ཞེས་བྱ་བ་ནི། སེམས་གཞལ་བ་དང༌། བགྲང་བ་དང༌། སོ་སོར་རྟོག་པའོ། །རྣམ་པ་ མེད་པ་ཞེས་བྱ་བ་ནི། གཞལ་བ་ལས་ཡང་དག་པར་འདས་པའོ། །གཞལ་བ་ལས་ཡང་དག་པར་འདས་པ་གང་ཞེ་ན། གང་ན་རྣམ་པར་ཤེས་པའི་ལས་མེད་པའོ། །རྣམ་པ་ཞེས་བྱ་བ་ ནི། གང་ན་འདུས་བྱས་ལ་སོ་སོར་རྟོག་པའོ། །རྣམ་པ་མེད་པ་ནི། འདུས་མ་བྱས་མངོན་སུམ་དུ་བྱེད་པ་སྟེ། རྣམ་པ་དང༌། རྣམ་པ་མེད་པ་ལ་འཇུག་པ་འདི་བྱིས་པ་སོ་སོའི་སྐྱེ་བོ་ རྣམས་ཀྱིས་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ །ཤཱ་རིའི་བུ། བྱང་ཆུབ་ནི། ཟག་པ་མེད་ པ། ལེན་པ་མེད་པའོ། །དེ་ལ་ཟག་པ་མེད་པ་གང༌། ལེན་པ་མེད་པ་གང་ཞེ་ན། ཟག་པ་མེད་པ་ཞེས་བྱ་བ་ནི། ཟག་པ་བཞི་དང་བྲལ་བ་སྟེ། འདོད་པའི་ཟག་པ་དང་བྲལ་བ་དང༌། སྲིད་ པའི་ཟག་པ་དང་བྲལ་བ་དང༌། མ་རིག་པའི་ཟག་པ་དང་བྲལ་བ་དང༌། ལྟ་བའི་ཟག་པ་དང་བྲལ་བའོ། །ཉེ་བར་ལེན་པ་མེད་པ་ཞེས་བྱ་བ་ནི། ལེན་པ་བཞི་དང་བྲལ་བ་སྟེ། འདོད་པའི་ལེན་ པ་དང་བྲལ་བ་དང༌། སྲིད་པའི་ལེན་པ་དང་བྲལ་བ་དང༌། ལྟ་བའི་ལེན་པ་དང་བྲལ་བ་དང༌། ཚུལ་ཁྲིམས་དང་བརྟུལ་ཞུགས་ཀྱིས་ལེན་པ་དང་བྲལ་བའོ། །དེ་ལ་ཉེ་བར་ལེན་པ་བཞི་པོ་དེ་ དག་ཐམས་ཅད་ནི། མ་རིག་པས་ལྡོངས་པར་བྱས་པ་དང༌། སྲེད་པའི་ཆུས་གཡོགས་པ་དང༌། བདག་ཏུ་མངོན་པར་ཆགས་པས་ཕུང་པོ་དང༌། ཁམས་དང༌། སྐྱེ་མཆེད་ལེན་ཏོ། །དེ་ ༄༅། །ལ་དེ་བཞིན་གཤེགས་པས་བདག་ཉེ་བར་ལེན་པའི་རྩ་བ་ཡོངས་སུ་མཁྱེན་པའི་ཕྱིར་བདག་རྣམ་པར་དག་པས་སེམས་ཅན་རྣམ་པར་དག་པར་མཁྱེན་ཏོ། །བདག་ རྣམ་པར་དག་པ་གང་ཡིན་པ་དེ་ལ་ཡོངས་སུ་རྟོག་པ་གང་གིས་ཚུལ་བཞིན་མ་ཡིན་པ་ཡིད་ལ་བྱེད་པར་འགྱུར་བའི་ཡོངས་སུ་རྟོག་པ་གང་ཡང་མེད་དེ། དེ་ནི། ཚུལ་བཞིན་ཡིད་ལ་བྱེད་པ་ དང་ལྡན་པས་མ་རིག་པ་ཀུན་ནས་མི་སློང་ངོ༌། །མ་རིག་པ་ཀུན་ནས་མི་སློང་བས་སྲིད་པའི་ཡན་ལག་བཅུ་གཉིས་ཀུན་ནས་མི་ལྡང་བ་དེ་ནི། སྐྱེ་བ་མེད་པའོ། །གང་སྐྱེ་བ་མེད་པ་དེ་ནི། ངེས་པར་གྱུར་པའོ། །གང་ངེས་པར་གྱུར་པ་དེ་ནི། ངེས་པའི་དོན་ཏོ། །གང་ངེས་པའི་དོན་དེ་ནི། དོན་དམ་པའོ། །གང་དོན་དམ་པ་དེ་གང་ཟག་མེད་པའི་དོན་ཏོ། །གང་གང་ཟག་མེད་པའི་ དོན་དེ་བརྗོད་དུ་མེད་པའི་དོན་ཏོ། །གང་བརྗོད་དུ་མེད་པའི་དོན་དེ་རྟེན་ཅིང་འབྲེལ་བར་འབྱུང་བའི་དོན་ཏོ། །གང་རྟེན་ཅིང་འབྲེལ་པར་འབྱུང་བའི་དོན་དེ་ཆོས་ཀྱི་དོན་ཏོ། །གང་ཆོས་ཀྱི་དོན་དེ་དེ་ བཞིན་གཤེགས་པའི་དོན་ཏོ། །དེའི་ཕྱིར་སུས་རྟེན་ཅིང་འབྲེལ་བར་འབྱུང་བ་མཐོང་བ་དེས་ཆོས་མཐོང་ངོ༌། །སུས་ཆོས་མཐོང་བ་དེས་དེ་བཞིན་གཤེགས་པ་མཐོང་སྟེ། འདི་ལྟར་དེ་བཞིན་ ཉིད་དུ་བཅལ་ན། ཅི་ཡང་མི་མཐོང་བ་དེ་ལྟར་མཐོང་ངོ༌། །དེ་ལ་ཅི་ཡང་ཞེས་བྱ་བ་གང་ཞེ་ན། འདི་ལྟ་སྟེ། མཚན་མ་མེད་པ་དང༌། དམིགས་པ་མེད་པའོ། །གང་གིས་མཚན་མ་མེད་པ་དང༌། དམིགས་པ་མེད་པ་མཐོང་བ་དེས་ཡང་དག་པ་མཐོང་སྟེ། དེ་ལྟར་དེ་བཞིན་གཤེགས་པས་ཆོས་ཐམས་ཅད་མཉམ་པ་ཉིད་དུ་མཉམ་པར་མངོན་པར་རྫོགས་པར་སངས་རྒྱས་སོ། །ཟག་པ་མེད་ པ་དང༌། ལེན་པ་མེད་པ་འདི་བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་དུ་མ་ཆུད་པས་དེ་ཁོང་དུ་ཆུད་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་འཇུག་གོ་ ཤཱ་རིའི་བུ། བྱང་ཆུབ་ནི། དག་པ། དྲི་མ་མེད་པ། ཉོན་མོངས་པ་མེད་པའོ། །དེ་ལ་དག་པ་གང༌། དྲི་མ་མེད་པ་གང༌། ཉོན་མོངས་པ་མེད་པ་གང་ཞེ་ན། སྟོང་པ་ཉིད་ནི། དག་པའོ། །མཚན་ མ་མེད་པ་ནི། དྲི་མ་མེད་པའོ། །སྨོན་པ་མེད་པ་ནི། ཉོན་མོངས་པ་མེད་པའོ། །སྐྱེ་བ་མེད་པ་ནི། དག་པའོ། །མངོན་པར་འདུ་མི་བྱེད་པ་ནི། དྲི་མ་མེད་པའོ། །ཉེ་བར་ལེན་པ་མེད་པ་ནི། ཉོན་མོངས་པ་མེད་པའོ། །རང་བཞིན་ནི། དག་པའོ། །ཡོངས་སུ་དག་པ་ནི། དྲི་མ་མེད་པའོ། །འོད་གསལ་བ་ནི། ཉོན་མོངས་པ་མེད་པའོ། །སྤྲོས་པ་མེད་པ་ནི། དག་པའོ། །མ་སྤྲོས་པ་ནི། དྲི་མ་མེད་པའོ། །སྤྲོས་པ་ཉེ་བར་ཞི་བ་ནི། ཉོན་མོངས་པ་མེད་པའོ། །དེ་བཞིན་ཉིད་ནི། དག་པའོ། །ཆོས་ཀྱི་དབྱིངས་ནི། དྲི་མ་མེད་པའོ། །ཡང་དག་པའི་མཐའ་ནི། ཉོན་མོངས་པ་མེད་ པའོ། །གོ་འབྱེད་པ་ནི་དག་པའོ། །ནམ་མཁའ་ནི། དྲི་མ་མེད་པའོ། །ནམ་མཁའ་ནི། ཉོན་མོངས་པ་མེད་པའོ། །ནང་ཡོངས་སུ་ཤེས་པ་ནི། དག་པའོ། །ཕྱི་རོལ་ཏུ་མི་རྒྱུ་བ་ནི། དྲི་མ་མེད་ ༄༅། །པའོ། །ཕྱི་དང་ནང་མི་དམིགས་པ་ནི། ཉོན་མོངས་པ་མེད་པའོ། །ཕུང་པོ་ཡོངས་སུ་ཤེས་པ་ནི། དག་པའོ། །ཁམས་ཀྱི་རང་བཞིན་ནི། དྲི་མ་མེད་པའོ། །སྐྱེ་མཆེད་ སྤོང་བ་ནི། ཉོན་མོངས་པ་མེད་པའོ། །འདས་པ་ལ་ཟད་པ་ཤེས་པ་ནི། དག་པའོ། །མ་འོངས་པ་ལ་མི་སྐྱེ་བ་ཤེས་པ་ནི། དྲི་མ་མེད་པའོ། །ད་ལྟར་བྱུང་བ་ལ་ཆོས་ཀྱི་དབྱིངས་ལ་གནས་ པའི་ཡེ་ཤེས་ནི། ཉོན་མོངས་པ་མེད་པ་སྟེ། དེ་ལྟར་དག་པ་དང༌། དྲི་མ་མེད་པ་དང༌། ཉོན་མོངས་པ་མེད་པ་གནས་གཅིག་ཏུ་འཇུག་པར་འགྱུར་བ་ནི། འདི་ལྟ་སྟེ། ཞི་བའི་གནས་སོ། ། གང་ཞི་བ་དེ་ནི། རབ་ཏུ་ཞི་བ། དེ་ནི། ཉེ་བར་ཞི་བ་སྟེ། ཐུབ་པ་ཞེས་བྱའོ། །དེ་ལྟ་བས་ན། །ཇི་ལྟར་ནམ་མཁའ་ཇི་ལྟ་བར་བྱང་ཆུབ་ཀྱང་དེ་བཞིན་ནོ། །བྱང་ཆུབ་ཇི་ལྟ་བར་ཆོས་ཀྱང་དེ་བཞིན་ ནོ། །ཆོས་ཇི་ལྟ་བར་སེམས་ཅན་ཡང་དེ་བཞིན་ནོ། །སེམས་ཅན་ཇི་ལྟ་བར་ཞིང་ཡང་དེ་བཞིན་ནོ། །ཞིང་ཇི་ལྟ་བར་མྱ་ངན་ལས་འདས་པ་ཡང་དེ་བཞིན་ནོ། །དེ་བས་ན། ཆོས་ཐམས་ཅད་ནི། མྱ་ ངན་ལས་འདས་པ་དང་མཉམ་པ་ཞེས་བྱ་སྟེ། མཐར་ཐུག་པའི་རྣམ་པས་གཉེན་པོ་མེད་དོ། །གཉེན་པོ་མེད་པའི་རྣམ་པས་ཐོག་མ་ནས་རྣམ་པར་དག་པའོ། །ཐོག་མ་ནས་དྲི་མ་མེད་པའོ། ། ཐོག་མ་ནས་ཉོན་མོངས་པ་མེད་པའོ། །དེ་ལ་དེ་བཞིན་གཤེགས་པས་འདི་ལྟར་གཟུགས་ཅན་དང༌། གཟུགས་མེད་པའི་ཆོས་ཐམས་ཅད་མངོན་པར་རྫོགས་པར་སངས་རྒྱས་ནས་སེམས་ ཅན་གྱི་ཁམས་ལ་རྣམ་པར་གཟིགས་ཤིང་སེམས་ཅན་རྣམས་ལ་དག་པ་དང༌། དྲི་མ་མེད་པ་དང༌། ཉོན་མོངས་པ་མེད་པས་རྣམ་པར་རོལ་པ་ཞེས་བྱ་བའི་སྙིང་རྗེ་ཆེན་པོ་འཇུག་གོ། དེ་ལྟར་ ཤཱ་རིའི་བུ། དེ་བཞིན་གཤེགས་པའི་སྙིང་རྗེ་ཆེན་པོ་དག་པ་དང༌། དྲི་མ་མེད་པ་དང༌། ཉོན་མོངས་པ་མེད་པར་ལྷུན་གྱིས་གྲུབ་པས་རྟག་ཏུ་འཇུག་སྟེ། ཕྱིས་གཏང་བར་བྱ་བ་མེད་ཅིང༌། ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་མ་ལུས་པར་ཐོགས་པ་མེད་དོ། །དེ་ལྟར་ཤཱ་རིའི་བུ། དེ་བཞིན་གཤེགས་པའི་སྙིང་རྗེ་ཆེན་པོ་ནི། མཐའ་ཡས་མུ་མེད་དེ། གང་དེ་ བཞིན་གཤེགས་པའི་སྙིང་རྗེ་ཆེན་པོའི་མཐའ་འདོད་པ་དེ་ནི། ནམ་མཁའི་མཐའ་འདོད་དོ། །བྱང་ཆུབ་སེམས་དཔའ་དེ་བཞིན་གཤེགས་པའི་སྙིང་རྗེ་ཆེན་པོ་བསམ་གྱིས་མི་ཁྱབ་པ་དེ་ ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ་བ་ནས་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང༌། རྨད་ཀྱི་བར་དུ་འདུ་ཤེས་ བསྐྱེད་དོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །རྩ་བ་མེད་ཅིང་གནས་མེད་པར། །སངས་རྒྱས་ཀྱིས་ནི་ བྱང་ཆུབ་རེག །ཇི་ལྟར་རྟོགས་པ་དེ་བཞིན་དུ། །སྲོག་ཆགས་རྣམས་ནི་ཀུན་ལ་སྟོན། །ནང་གི་མིག་ནི་སྟོང་པ་སྟེ། །ཕྱི་རོལ་གཟུགས་ཀྱང་སྟོང་བའོ། །ཞི་དང་ཉེ་བར་ཞི་བ་དང༌། །སངས་ ༄༅། །རྒྱས་ཀྱིས་ནི་བྱང་ཆུབ་རེག །ཞི་དང་ཉེ་བར་ཞི་བ་སྟེ། །སེམས་ཅན་ཁོང་དུ་མ་ཆུད་བས། །ཚིག་དོན་རྟོགས་ནས་སེམས་ཅན་ལ། །དེ་དག་ལ་ནི་སྙིང་རྗེ་འཇུག་ བྱང་ཆུབ་རང་བཞིན་འོད་གསལ་ཞིང༌། །རྣམ་དག་ནམ་མཁའ་འདྲ་བ་དེ། །སེམས་ཅན་རྣམས་ཀྱིས་མི་ཤེས་པས། །དེ་དག་ལ་ཡང་སྙིང་རྗེ་འཇུག །ཆོས་རྣམས་ཀུན་ལ་འཛིན་པ་དང༌། རབ་ཏུ་འཛིན་པ་ཡོད་མ་ཡིན། །བླང་མེད་དོར་བ་མེད་པ་ཡི། །སངས་རྒྱས་ཀྱི་ནི་བྱང་ཆུབ་རེག །སེམས་ཅན་འདི་དག་མི་ཤེས་པས། །དེ་དག་ལ་ནི་སྙིང་རྗེ་འཇུག། མཚན་མ་མེད་ཅིང་ དམིགས་པ་མེད། །འཕགས་པ་རྣམས་ཀྱི་སྤྱོད་ཡུལ་འདི། །བྱིས་པའི་སྤྱོད་ཡུལ་མ་ཡིན་པ། །སངས་རྒྱས་ཀྱིས་ནི་བྱང་ཆུབ་རེག །གང་དག་མི་མཁས་བཅིངས་པ་ཡི། །སོ་སོའི་ སྐྱེ་བོ་མི་ཤེས་པས། །དེ་བཞིན་གཤེགས་པ་སེམས་ཅན་ལ། །སྙིང་རྗེ་ཆེན་པོ་རབ་ཏུ་འཇུག །རང་བཞིན་གྱིས་ནི་འདུས་མ་བྱས། །སྐྱེ་བ་མེད་ཅིང་འཇིག་པ་མེད། །དེ་ལ་གནས་ པ་ཡོད་མིན་ཏེ། །མཚན་ཉིད་གསུམ་ལས་རྣམ་པར་གྲོལ། །འདུས་བྱས་རྣམས་ཀྱི་རང་བཞིན་ནི། །བྱིས་པས་ཁོང་དུ་མ་ཆུད་པས། །དེ་དག་ལ་ཡང་སྙིང་རྗེ་འཇུག །ཚུལ་འདི་གང་ གིས་སངས་རྒྱས་པ། །བྱང་ཆུབ་ལས་ཀྱིས་མི་རྟོགས་ཏེ། །སེམས་ཀྱིས་ཀྱང་ནི་འཚང་མི་རྒྱ། །ལུས་ནི་བེམ་པོའི་རང་བཞིན་ཏེ། །སེམས་ཀྱང་སྒྱུ་མ་ལྟ་བུའོ། །ལུས་དང་སེམས་ཀྱི་རང་བཞིན་ ཏེ། །བྱིས་པས་ཁོང་དུ་མ་ཆུད་པས། །ཚུལ་འདི་ཁོང་དུ་ཆུད་གྱུར་ནས། །དེ་དག་ལ་ནི་སྙིང་རྗེ་འཇུག །རང་བྱུང་བ་ནི་བྱང་ཆུབ་དམ་པ་རྒྱ་ཆེན་མཆོག་རེག་སྟེ། །ཤིང་མཆོག་དྲུང་དུ་བཞུགས་ནས་ སེམས་ཅན་ཁམས་ལ་རྣམ་པར་གཟིགས། །འཁོར་བའི་འཁོར་ལོར་ཞུགས་ཤིང་འགྲོ་རྒྱུད་སྣ་ཚོགས་འཁྱམས་གྱུར་པ། །དེ་དག་གཟིགས་ནས་སངས་རྒྱས་ཀྱིས་ནི་སྙིང་རྗེ་མི་བཟད་ འཇུག །ང་དང་རྒྱགས་པ་དག་ལ་ཆགས་ཤིང་ལྟ་བའི་དྲ་བས་གཟིངས། །སྡུག་བསྔལ་བདེ་དང་མི་རྟག་རྟག་དང་སྡུག་པར་འདུ་ཤེས་ཤིང༌། །བདག་དང་སེམས་ཅན་དང་ནི་སྲོག་ཏུ་ལྟ་བར་ ཆགས་པ་རྣམས། །གཟིགས་ནས་དེ་དག་ལ་ནི་སངས་རྒྱས་སྙིང་རྗེ་མི་བཟད་འཇུག །སེམས་ཅན་ཁམས་ནི་གཏི་མུག་ལིང་ཏོག་ཁེབས་ཤིང་བསྒྲིབས་པ་ཀུན། །ཉི་མ་སྤྲིན་ཁེབས་བཞིན་ དུ་སྣང་མེད་ལམ་མེད་མི་འགྱུར་བ། །དེ་དག་གཟིགས་ནས་ཡེ་ཤེས་སྣང་བ་དྲི་མེད་འོད་བྱ་ཞེས། །དེ་དག་ལ་ཡང་སངས་རྒྱས་ཀྱི་ནི་སྙིང་རྗེ་མི་བཟད་འཇུག །ངན་སོང་འགྲོ་བར་ཞུགས་ཤིང་ ལམ་སྟོར་རབ་ཏུ་འཁྱམས་པ་རྣམས། །སེམས་ཅན་སེམས་ཅན་དམྱལ་དང་དུད་འགྲོ་ཡི་དྭགས་རྒྱུ་ལྷུང་བ། །དེ་དག་གཟིགས་ནས་སྔོན་གྱི་རྒྱལ་བས་བསྙེན་པའི་ལམ་བསྟན་ཅེས། །དེ་དག་ལ་ ཡང་སངས་རྒྱས་ཀྱི་ནི་སྙིང་རྗེ་མི་བཟད་འཇུག །དེ་བཞིན་ཉིད་ལྟར་དེ་བཞིན་ཉིད་དུ་ཆོས་རྣམས་ཐམས་ཅད་ནི། །ནམ་མཁའ་མཚུངས་འདྲ་དེ་དག་མ་བཅིངས་མ་གྲོལ་རབ་མཁྱེན་ཏེ། །འགྲོ་བ་ ༄༅། །དག་ཅིང་བཟང་བའི་ཆོས་རྣམས་མི་ཤེས་གཟིགས་ནས་སུ། །དེ་དག་ལ་ཡང་སངས་རྒྱས་ཀྱི་ནི་སྙིང་རྗེ་མི་བཟད་འཇུག །དེ་ལྟར་ཤཱ་རིའི་བུ། བྱང་ཆུབ་སེམས་ དཔའ་དེ་བཞིན་གཤེགས་པའི་སྙིང་རྗེ་ཆེན་པོ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ ནས་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང༌། རྨད་དུ་འདུ་ཤེས་བསྐྱེད་དོ།། །།བམ་པོ་བདུན་པ། ཡང་ཤཱ་རིའི་བུ། ཇི་ལྟར་ན། བྱང་ཆུབ་ སེམས་དཔའ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་ལ་མངོན་པར་དད། ཡིད་ཆེས། རབ་ཏུ་རྟོག་པ་ནས་ངོ་མཚར་དང༌། རྨད་ཀྱི་བར་དུ་འདུ་ཤེས་བསྐྱེད་ཅེ་ན། ཤཱ་ རིའི་བུ༑ དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་པོ་འདི་དག་སྟེ། ཆོས་དེ་དག་དང་ལྡན་པས་དེ་བཞིན་གཤེགས་པ་འཁོར་གྱི་ནང་དུ་སེངྒེའི་སྒྲ་ཡང་དག་ པར་སྒྲོག་ཅིང་ཁྱུ་མཆོག་གི་གནས་སུ་ཞལ་གྱིས་འཆེ་སྟེ། དགེ་སྦྱོང་ངམ། བྲམ་ཟེའམ། ལྷའམ། བདུད་དམ། སུས་ཀྱང་འཇིག་རྟེན་དུ་ཆོས་དང་མཐུན་པར་མ་བསྐོར་བ། ཚངས་ པའི་འཁོར་ལོ་རབ་ཏུ་བསྐོར་རོ། །སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་གང་ཞེ་ན། འདི་ལ་ཤཱ་རིའི་བུ། གང་གི་ཕྱིར་ལུས་ཀྱི་འཁྲུལ་པ་གང་ལས་བྱིས་པའམ། མཁས་པ་ ཆོས་དང་མཐུན་པར་རྒོལ་བར་བྱེད་པའི་ལུས་ཀྱི་འཁྲུལ་བ་དེ་བཞིན་གཤེགས་པ་ལ་མེད་དོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་རྣམས་ནི། ལུས་ཀྱིས་ལས་འཁྲུལ་པ་མེད་ པ་སྟེ༑ དེ་བཞིན་གཤེགས་པའི་སྤྱོད་ལམ་མཛེས་པས་ཀུན་ཏུ་གཟིགས་པ་དང༌། རྣམ་པར་གཟིགས་པ་དང༌། བསྐུམ་པ་དང༌། བརྐྱང་བ་དང༌། ཆོས་གོས་སྣམ་སྦྱར་དང༌། ཆོས་གོས་ དང༌། ལྷུང་བཟེད་བསྣམས་པ་དང༌། མངོན་དུ་གཤེགས་པ་དང༌། སླར་གཤེགས་པ་དང༌། བྱོན་པ་དང༌། བཞུད་པ་དང༌། བཞེངས་པ་དང༌། བཞུགས་པ་དང༌། མནལ་བ་དང༌། གྲོང་ དང༌། གྲོང་ཁྱེར་དུ་འཇུག་པ་དང༌། འབྱུང་བ་ན་ཞབས་ཀྱི་མཐིལ་ས་ལ་མི་རེག་སྟེ། འཁོར་ལོ་རྩིབས་སྟོང་པ་ས་ལས་འབྱུང་ཞིང་དྲི་ཡིད་དུ་འོང་བའི་པདྨ་མངོན་པར་འབྱུང་སྟེ། དེ་ལ་དེ་ བཞིན་གཤེགས་པའི་ཞབས་འཇོག་གོ །དེ་ལ་གང་དུད་འགྲོའི་སྐྱེ་གནས་སུ་སོང་བའི་སེམས་ཅན་དག་གིས་དེ་བཞིན་གཤེགས་པའི་ཞབས་ལ་རེག་ན། དེ་དག་ཞག་བདུན་དུ་རབ་ཏུ་ བདེ་བ་དང་ལྡན་པར་འགྱུར། ཤི་འཕོས་ནས་ཀྱང་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར་རོ། །དེ་བཞིན་གཤེགས་པའི་སྐུ་ལ་ཆོས་གོས་སོར་བཞི་ཙམ་གྱིས་མི་རེག་མོད་ཀྱི། རྣམ་ པར་འཐོར་རླུང་གིས་ཀྱང་བཟློག་པར་མི་ནུས་སོ། །སྐུའི་འོད་ཀྱིས་མནར་མེད་པའི་བར་གྱི་སེམས་ཅན་བདེ་བའི་ཚོར་བ་མྱོང་བར་འགྱུར་ཏེ། དེའི་ཕྱིར་དེ་བཞིན་གཤེགས་པའི་སྐུ་ལ་འཁྲུལ་པ་ ༄༅། །མེད་ཅེས་བྱའོ། །ཡང་ཤཱ་རིའི་བུ། གང་གི་ཕྱིར་ངག་འཁྲུལ་པ་གང་ལས་བྱིས་པའམ། མཁས་པ་ཆོས་དང་མཐུན་པར་རྒོལ་བར་བྱེད་པའི་ངག་གི་འཁྲུལ་པ་དེ་ བཞིན་གཤེགས་པ་ལ་མེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་ནི། དུས་སུ་སྨྲ་བ། ཡང་དག་པར་སྨྲ་བ། བདེན་པར་སྨྲ་བ། ཚིགས་སུ་སྨྲ་བ། ཇི་སྐད་ སྨྲ་བ་དེ་བཞིན་དུ་བྱེད་པའོ། །ཤིན་ཏུ་ངེས་པའི་ཚིག་གོ། སེམས་ཅན་ཐམས་ཅད་ཚིམ་པར་བྱེད་པའི་ཚིག་གོ །མི་ཟློས་པའི་ཚིག་གོ །དོན་དང་ཡི་གེས་ཤིན་ཏུ་བརྒྱན་པའི་ཚིག་གོ །སྐད་གཅིག་ བརྗོད་པས་སེམས་ཅན་ཐམས་ཅད་ཀྱི་བསམ་པ་ཚིམ་པར་བྱེད་པ་སྟེ། དེའི་ཕྱིར་སངས་རྒྱས་བཅོམ་ལྡན་འདས་རྣམས་ཀྱི་ངག་གི་ལས་འཁྲུལ་པ་མེད་ཅེས་བྱའོ། །ཡང་ཤཱ་རིའི་བུ། སེམས་ འཁྲུལ་པ་གང་ལས་བྱིས་པའམ། མཁས་པ་ཆོས་དང་མཐུན་པར་རྒོལ་བར་བྱེད་པའི་སེམས་ཀྱི་འཁྲུལ་པ་དེ་བཞིན་གཤེགས་པ་ལ་མེད་དོ། །དེ་ཅིའི་ཕྱིར་ཞེ་ན། འདི་ལ་ཤཱ་རིའི་བུ། དེ་ བཞིན་གཤེགས་པ་ནི། མཉམ་པར་གཞག་པའི་དངོས་པོ་མི་འདོར་ཞིང༌། སངས་རྒྱས་ཀྱི་བྱ་བ་ཐམས་ཅད་བྱེད་ཀྱང་སེམས་དེར་མི་གཏོང་ཞིང་ཆོས་ཐམས་ཅད་ལ་དེའི་ཆགས་པ་མེད་ པའི་ཡེ་ཤེས་མཐོང་བ་འཇུག་སྟེ། དེའི་ཕྱིར་དེ་བཞིན་གཤེགས་པ་ལ་སེམས་འཁྲུལ་པ་མེད་ཅེས་བྱའོ། །ཇི་ལྟར་དེའི་སེམས་འཁྲུལ་པ་མེད་པ་དེ་ལྟར་སེམས་ཅན་རྣམས་ཀྱི་སེམས་ འཁྲུལ་པ་སྤང་བའི་ཕྱིར་ཆོས་སྟོན་ཏོ། །དེ་ནི། སངས་རྒྱས་ཀྱི་ཆོས་མ་འདྲེས་པ་དང་པོའོ། །གཞན་ཡང་ཤཱ་རིའི་བུ། །ཅ་ཅོ་གང་ལས་བདུད་དམ། བདུད་ཀྱི་རིས་ཀྱི་ལྷའི་བུའམ། གཞན་མུ་སྟེགས་ ཅན་གྱིས་གླགས་རྙེད་པར་འགྱུར་བའི་ཅ་ཅོ་དེ་བཞིན་གཤེགས་པར་མེད་དོ། །ཡང་ཤཱ་རིའི་བུ། དེ་བཞིན་གཤེགས་པ་ལ་ཅ་ཅོའམ། རྗེས་སུ་ཅ་ཅོ་འབྱིན་པ་མེད་དེ། དེ་བཞིན་གཤེགས་ པ་ནི༑ རྗེས་སུ་ཆགས་པ་དང༌། ཁོང་ཁྲོ་བ་དང་བྲལ་བ་སྟེ། སེམས་ཅན་ཐམས་ཅད་ཀྱིས་བཀུར་སྟི་བྱས་ཀྱང་མ་ཐོས་པར་མི་སེམས། སེམས་ཅན་ཐམས་ཅད་ཀྱིས་བཀུར་སྟི་མ་བྱས་ཀྱང་འཁྲུག་ པ་མེད་དོ། །དེ་གང་ལས་འགྱོད་པའམ། རྗེས་སུ་ཅ་ཅོ་འབྱིན་པར་འགྱུར་བའི་བྱ་བ་མཆོག་གམ། མཐར་ཕྱིན་པ་ཅིའང་དེ་བཞིན་གཤེགས་པ་ལ་མེད་དེ། དེ་བཞིན་གཤེགས་པ་ནི། འཇིག་ རྟེན་དང་མི་རྩོད་པས་དེའི་ཕྱིར་དེ་བཞིན་གཤེགས་པ་ལ་ཅ་ཅོ་མེད་དོ། །དེ་བཞིན་གཤེགས་པ་ནི། ཉོན་མོངས་པ་མེད་པར་གནས་པ་སྟེ། ང་ཡི་བ་མེད། འཛིན་པ་མེད། ལེན་པ་མེད། མདུད་ པ་ཐམས་ཅད་དང་བྲལ་བ་དང༌། དེའི་ཕྱིར་དེ་བཞིན་གཤེགས་པ་ལ་ཅ་ཅོ་མེད་དོ། །ཇི་ལྟར་དེ་ལ་ཅ་ཅོ་མེད་པ་དེ་ལྟར་སེམས་ཅན་ཐམས་ཅད་ཀྱི་ཅ་ཅོ་ཐམས་ཅད་སྤང་བའི་ཕྱིར་ཆོས་སྟོན་ཏེ། འདི་ནི། སངས་རྒྱས་ཀྱི་ཆོས་མ་འདྲེས་པ་གཉིས་པའོ། །གཞན་ཡང་ཤཱ་རིའི་བུ། བསྙེལ་བ་གང་ལས་ཆོས་གང་ལ་ཡང་རྨོངས་པར་འགྱུར་བའི་བསྙེལ་བ་དེ་བཞིན་གཤེགས་པ་ལ་མེད་དོ།། ༄༅། །བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པ་ལ་ཐོགས་པ་མེད་ཅིང༌། སེམས་ཅན་ཐམས་ཅད་ཀྱི་སེམས་ཀྱི་སྤྱོད་ པ་དང༌། གཡོ་བ་ལ་རྣམ་པར་བལྟ་བའི་ཕྱིར་དེ་བཞིན་གཤེགས་པ་ལ་རྨོངས་པ་མེད་དོ། །སོ་སོར་ཅི་རིགས་པར་ཆོས་སྟོན་པའི་ཕྱིར་ཀུན་ཏུ་ཉམས་པ་མེད་དོ། །འདས་པ་དང༌། མ་ འོངས་པ་དང༌། ད་ལྟར་ལ་ཐོགས་པ་མེད་པའི་ཡེ་ཤེས་མཐོང་བའི་ཕྱིར་དོན་དང༌། ཆོས་དང༌། ངེས་པའི་ཚིག་དང༌། སྤོབས་པ་སོ་སོར་ཡང་དག་པར་རིག་པ་ལ་ཀུན་ཏུ་ཉམས་པ་མེད་དོ།། ཇི་ལྟར་བདག་ཀུན་ཏུ་ཉམས་པ་མེད་ཅིང་འདས་པ་དང༌། མ་འོངས་པ་དང༌། ད་ལྟར་ལ་ཐོགས་པ་མེད་པའི་ཡེ་ཤེས་མཐོང་བ་དེ་ལྟར་སེམས་ཅན་ཐམས་ཅད་བརྗེད་ངས་པར་མི་འགྱུར་ བར་བྱ་བའི་ཕྱིར་ཆོས་སྟོན་ཏེ། འདི་ནི། སངས་རྒྱས་ཀྱི་ཆོས་མ་འདྲེས་པ་གསུམ་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་པ་ལ་མཉམ་པར་མ་བཞག་པའི་སེམས་ མི་དམིགས་ཏེ། དེ་བཞིན་གཤེགས་པ་ནི། འཆག་གམ། བཞེངས་སམ། བཞུགས་སམ། མནལ་ཏམ། བཤོས་གསོལ་ལམ། གསུང་ངམ། ཅང་མི་གསུང་བར་གྱུར་ཀྱང་ རུང་སྟེ། རྟག་ཏུ་མཉམ་པར་བཞག་ཅིང་ཏིང་ངེ་འཛིན་ཟབ་མོ་དམ་པའི་མཐར་ཕྱིན་པ་སྒྲིབ་པ་མེད་པའི་བསམ་གཏན་ལ་བསམ་གཏན་བྱེད་པ་སྟེ། དེ་བཞིན་གཤེགས་པའི་བྱིན་ གྱིས་བརླབས་པ་མ་གཏོགས་པར་སེམས་ཅན་གྱི་རིས་ན་སེམས་ཅན་གང་མཉམ་པར་བཞག་ཀྱང་རུང༌། མཉམ་པར་མ་བཞག་ཀྱང་རུང་སྟེ། སུ་ཡང་དེ་བཞིན་གཤེགས་པའི་སེམས་ལ་ལྟ་བར་ ནུས་པ་མེད་དོ། །ཇི་ལྟར་དེ་བཞིན་གཤེགས་པ་རྟག་ཏུ་མཉམ་པར་བཞག་པ་དེ་ལྟར་ཏིང་ངེ་འཛིན་ལ་ལྟ་བས་སེམས་ཅན་རྣམས་ལ་ཆོས་སྟོན་ཏེ། འདི་ནི། དེ་བཞིན་གཤེགས་པའི་སངས་ རྒྱས་ཀྱི་ཆོས་མ་འདྲེས་པ་བཞི་པའོ། །གཞན་ཡང་ཤཱ་རིའི་བུ། དེ་ཐ་དད་པའི་འདུ་ཤེས་གང་ལས་སེམས་མི་མཉམ་པར་གནས་པར་འགྱུར་བའི་ཐ་དད་པའི་འདུ་ཤེས་དེ་བཞིན་གཤེགས་ པ་ལ་མེད་དེ། དེ་ཅིའི་ཕྱིར་ཞེ་ན། ནམ་མཁའ་བཞིན་དུ་ཞིང་མི་ཟད་པའི་ཕྱིར་དེ་བཞིན་གཤེགས་པ་ལ་ཞིང་ཐ་དད་པའི་འདུ་ཤེས་མེད་དོ། །རང་བཞིན་གྱིས་ཐ་དད་པ་མེད་པའི་ ཕྱིར་དེ་བཞིན་གཤེགས་པ་ལ་སེམས་ཅན་ཐ་དད་པའི་འདུ་ཤེས་མེད་དོ། །ཆོས་ཀྱི་དབྱིངས་དབྱེར་མེད་ཅིང་མཉམ་པ་ཉིད་ཀྱི་ཡེ་ཤེས་ཀྱི་ཕྱིར་དེ་བཞིན་གཤེགས་པ་ལ་སངས་རྒྱས་ ཀྱི་ཞིང་ཐ་དད་པའི་འདུ་ཤེས་མེད་དོ། །འདོད་ཆགས་དང་བྲལ་བའི་ཆོས་ཉིད་ཀྱི་ཕྱིར་དེ་བཞིན་གཤེགས་པ་ལ་ཆོས་ཐ་དད་པའི་འདུ་ཤེས་མེད་དོ། །དེ་བཞིན་གཤེགས་པ་ནི། ཚུལ་ ཁྲིམས་དང་ལྡན་པའི་སེམས་ཅན་ལ་ཡང་རྗེས་སུ་ཆགས་པ་མེད། ཚུལ་ཁྲིམས་འཆལ་བ་ལ་ཡང་ཁོང་ཁྲོ་བ་མེད། ཕན་པར་གྱུར་པ་ལ་ཡང་ལན་དུ་ཕན་འདོགས་པ་མེད། གནོད་ ༄༅། །པར་གྱུར་པ་ལ་ཡང་གནོད་པར་བྱེད་པ་མེད། འདུལ་བར་འོས་པ་ལ་ཡང་མཉམ་པ་ཉིད་དུ་མ་ཡིན། ལོག་པར་ངེས་པའི་སེམས་ཅན་ལ་ཡང་སྨོད་པ་མ་ ཡིན་གྱི༑ དེ་བཞིན་གཤེགས་པ་ནི། ཆོས་ཐམས་ཅད་ལ་མཉམ་པར་གནས་ཏེ། དེའི་ཕྱིར་དེ་བཞིན་གཤེགས་པ་ལ་ཐ་དད་པའི་འདུ་ཤེས་མེད་ཅེས་བྱའོ། །ཇི་ལྟར་དེ་བཞིན་ གཤེགས་པ་ལ་ཐ་དད་པའི་འདུ་ཤེས་མེད་པ་དེ་ལྟར་སེམས་ཅན་ཐམས་ཅད་ཀྱི་ཐ་དད་པའི་འདུ་ཤེས་སྤང་བའི་ཕྱིར་ཆོས་སྟོན་ཏེ། འདི་ནི། དེ་བཞིན་གཤེགས་པའི་ སངས་རྒྱས་ཀྱི་ཆོས་མ་འདྲེས་པ་ལྔ་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་པ་ལ་སོ་སོར་མ་བརྟགས་པའི་བཏང་སྙོམས་མེད་དོ། །དེ་ཅིའི་ཕྱིར་ཞེ་ན། དེ་བཞིན་ གཤེགས་པའི་བཏང་སྙོམས་ནི། ལམ་བསྒོམས་པའི་ཡིན་ཏེ། ལམ་མ་བསྒོམས་པའི་མ་ཡིན་ནོ། །དེ་བཞིན་གཤེགས་པའི་བཏང་སྙོམས་ནི། སེམས་བསྒོམས་པ་དང༌། ཚུལ་ཁྲིམས་བསྒོམས་པ་དང༌། ཤེས་རབ་བསྒོམས་པའི་ཡིན་ཏེ། ཤེས་རབ་མ་བསྒོམས་པའི་མ་ཡིན་ནོ། །དེ་བཞིན་གཤེགས་པའི་བཏང་སྙོམས་ནི། ཡེ་ཤེས་དང་ ལྡན་པའི་ཡིན་ཏེ། གཏི་མུག་དང་ལྡན་པའི་མ་ཡིན་ནོ། །དེ་བཞིན་གཤེགས་པའི་བཏང་སྙོམས་ནི། འཇིག་རྟེན་ལས་འདས་པའི་ཡིན་གྱི། འཇིག་རྟེན་པའི་རྣམ་པར་ལྷུང་ པ་ནི། མ་ཡིན་ནོ། །དེ་བཞིན་གཤེགས་པའི་བཏང་སྙོམས་ནི། འཕགས་པ་ངེས་པར་འབྱུང་བ་ཡིན་ལ་འཕགས་པ་མ་ཡིན་པ་ངེས་པར་མི་འབྱུང་བ་མ་ཡིན་ནོ། །དེ་བཞིན་གཤེགས་ པའི་བཏང་སྙོམས་ནི། ཚངས་པའི་འཁོར་ལོ་བསྐོར་བ་སྟེ། སེམས་ཅན་ལ་སྙིང་རྗེ་དང་བྲལ་བ་ནི། མ་ཡིན་ནོ། །དེ་བཞིན་གཤེགས་པའི་བཏང་སྙོམས་ནི། རང་གི་ངང་གིས་གྲུབ་ པ་སྟེ༑ གཉེན་པོའི་རྗེས་སུ་སོང་བ་ནི། མ་ཡིན་ནོ། །ཡང་ཤཱ་རིའི་བུ། དེ་བཞིན་གཤེགས་པའི་བཏང་སྙོམས་དེ་ནི། མཐོ་བ་ཡང་མ་ཡིན། དམའ་བ་ཡང་མ་ཡིན་སྟེ། མཐོ་དམན་ མེད་པར་གནས་པ། མི་གཡོ་བར་གྱུར་པ། གཉིས་དང་བྲལ་བ། རྟོག་པ་དང་སེལ་བ་ལས་ཤིན་ཏུ་འདས་པ། དུས་ལས་ལྟ་བ། དུས་ལས་མ་ཡོལ་བ། མི་གཡོ་བ། རློམ་སེམས་མེད་པ། མ་བརྟགས་པ། རྣམ་པར་མ་བརྟགས་པ། མ་བསྒོམས་པ། བསྟན་དུ་མེད་པ། ཡང་དག་པ་དེ་ཁོ་ན། དེ་བཞིན་ཉིད། མ་ནོར་བ་དེ་བཞིན་ཉིད། གཞན་མ་ཡིན་པ་དེ་བཞིན་ཉིད་དེ། ཤཱ་ རིའི་བུ༑ དེ་བཞིན་གཤེགས་པ་ནི། དེ་ལྟ་བུའི་བཏང་སྙོམས་ཕུན་སུམ་ཚོགས་པས་སེམས་ཅན་ཐམས་ཅད་བཏང་སྙོམས་ཡོངས་སུ་རྫོགས་པར་བྱ་བའི་ཕྱིར་ཆོས་སྟོན་ཏེ། ཤཱ་རིའི་ བུ༑ འདི་ནི། སངས་རྒྱས་ཀྱི་ཆོས་མ་འདྲེས་པ་དྲུག་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་པ་ལ་འདུན་པ་ཉམས་པ་མེད་དོ། །དེ་ལ་འདུན་པ་གང་ཞེ་ན། འདི་ལྟ་སྟེ། ༄༅། །དགེ་བའི་ཆོས་ལ་འདུན་པའོ། །དེ་ཡང་གང་ཞེ་ན། དེ་བཞིན་གཤེགས་པ་བྱམས་པ་ལ་འདུན་པ་ཉམས་པ་མེད་དོ། །སྙིང་རྗེ་ཆེན་པོ་ལ་འདུན་པ་ཉམས་ པ་མེད་དོ། །ཆོས་སྟོན་པ་ལ་འདུན་པ་ཉམས་པ་མེད་དོ། །སེམས་ཅན་འདུལ་བ་ལ་འདུན་པ་ཉམས་པ་མེད་དོ། །རབ་ཏུ་དབེན་པ་ལ་འདུན་པ་ཉམས་པ་མེད་དོ། །བྱང་ཆུབ་སེམས་ དཔའ་ཡང་དག་པར་འཛུད་པ་ལ་འདུན་པ་ཉམས་པ་མེད་དོ། །དཀོན་མཆོག་གསུམ་རྒྱུན་མི་གཅོད་པ་ལ་འདུན་པ་ཉམས་པ་མེད་དོ། །དེ་བཞིན་གཤེགས་པ་ནི། འདུན་པས་འགྲོ་བ་ མ་ཡིན་གྱི། ཡེ་ཤེས་སྔོན་དུ་འགྲོ་བ་སྟེ། འདི་ནི། དེ་བཞིན་གཤེགས་པའི་འདུན་པའོ། །སེམས་ཅན་ཐམས་ཅད་བླ་ན་མེད་པའི་ཐམས་ཅད་མཁྱེན་པར་འདུན་པ་ཡོངས་སུ་རྫོགས་ པར་བྱ་བའི་ཕྱིར་ཆོས་སྟོན་ཏོ། །འདི་ནི། སངས་རྒྱས་ཀྱི་ཆོས་མ་འདྲེས་པ་བདུན་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་པའི་བརྩོན་འགྲུས་ཉམས་པ་མེད་དོ། །དེ་ལ་ དེ་བཞིན་གཤེགས་པའི་བརྩོན་འགྲུས་འདི་ལྟ་སྟེ། འདུལ་བའི་སེམས་ཅན་ལ་ཡལ་བར་མི་འདོར་བའི་བརྩོན་འགྲུས་དང༌། ཆོས་ཉན་པ་ལ་བརྙས་པ་མེད་པའི་བརྩོན་འགྲུས་སོ། ། གལ་ཏེ་དེ་བཞིན་གཤེགས་པས་ཆོས་ཀྱི་སྡེ་སྣོད་ཉན་པ་གང་བསྐལ་པར་ཉན་ཀྱང་སྐྱོ་བར་མི་འགྱུར་བ་དེ་ལྟ་བུ་བརྙེས་ན། དེ་བཞིན་གཤེགས་པ་ཡང་ཆོས་སྟོན་ཅིང་ཞལ་ཟས་དང་ བྲལ་བའི་རྒྱུད་ཀྱིས་བསྐལ་པར་ཡང་མི་བཞེངས་སོ། །དེ་བཞིན་གཤེགས་པ་སེམས་ཅན་ལ་བལྟ་བས་ཐ་ན་གང་ན་སངས་རྒྱས་ཀྱིས་འདུལ་བའི་སེམས་ཅན་གཅིག་གི་ཕྱིར་ཡང་སངས་རྒྱས་ཀྱི་ ཞིང་གངྒཱའི་ཀླུང་གི་བྱེ་མ་སྙེད་འདའ་ཞིང་བཞུད་དེ། དེ་བཞིན་གཤེགས་པ་ལ་ལུས་ངལ་བའམ། ངག་ངལ་བའམ། སེམས་ངལ་བ་མེད་དོ། །དེ་བཞིན་གཤེགས་པ་ནི། ལུས་དང་ སེམས་ཤིན་ཏུ་སྦྱངས་པའོ། །བརྩོན་འགྲུས་བརྩམས་པའོ། །བརྩོན་འགྲུས་ཀྱི་བསྔགས་པ་གསུང་པ་སྟེ། བརྩོན་འགྲུས་ཀྱིས་ཡང་དག་པར་རབ་ཏུ་སྦྱོར་བ་གང་གིས་སེམས་ཅན་ལ་ འཕགས་པའི་རྣམ་པར་གྲོལ་བ་ཐོབ་པར་འགྱུར་བའི་བརྩོན་འགྲུས་དེ་སེམས་ཅན་རྣམས་ལ་བསྔགས་པར་མཛད་དེ། ཤཱ་རིའི་བུ། འདི་ནི། དེ་བཞིན་གཤེགས་པའི་སངས་རྒྱས་ཀྱི་ ཆོས་མ་འདྲེས་པ་བརྒྱད་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་པ་ནི། ཐམས་ཅད་ཀྱི་ཐམས་ཅད་དུ་རྣམ་པ་ཐམས་ཅད་ཀྱི་ཐམས་ཅད་དུ་དྲན་པ་ཉམས་པ་མེད་ཅིང༌། དེ་ བཞིན་གཤེགས་པའི་དྲན་པ་ནི། བསྙེལ་བ་མེད་དོ། །དེ་ཅིའི་ཕྱིར་ཞེ་ན། གང་དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ མ་ཐག་ཏུ་འདས་པ་དང༌། མ་འོངས་པ་དང༌། ད་ལྟར་གྱི་སེམས་ཅན་གྱི་སེམས་ཀྱི་རྒྱུད་ལ་རྣམ་པར་བལྟས་ཀྱང་དེ་ལ་དེ་བཞིན་གཤེགས་པ་ལ་ཕྱིས་ཤིན་ཏུ་དྲན་པ་བསྙེལ་བ་མེད་དོ། ། ༄༅། །སེམས་ཅན་གྱི་སྤྱོད་པ་ཇི་ལྟ་བ་བཞིན་དུ་ཤེས་ཀྱང་དེ་ལ་དེ་བཞིན་གཤེགས་པའི་ཡེ་ཤེས་ཕྱིས་གཏང་བར་བྱ་བ་མེད་དོ། །ཕུང་པོ་གསུམ་དུ་རྣམ་པར་གཞག་པ་ དང༌། སེམས་ཅན་གྱི་དབང་པོ་ལ་འཇུག་པ་དང༌། སེམས་ཅན་གྱི་བསམ་པར་འཇུག་པ་ལ་སེམས་ཀྱི་སྤྱོད་པ་རྣམ་པར་ལྟ་བས་དེ་བཞིན་གཤེགས་པའི་དྲན་པ་ལ་ཡོངས་སུ་ཉམས་པ་ མེད་དོ། །དེ་བཞིན་གཤེགས་པའི་དྲན་པ་ནི། དྲན་པར་བྱ་བ་དང༌། བསམ་པར་བྱ་བ་དང༌། བརྟག་པར་བྱ་བ་མེད་ཀྱང་སེམས་ཅན་རྣམས་ལ་ཆོས་སྟོན་པ་འབྲི་བར་མི་འགྱུར་ རོ༑ ༑དེ་ཅིའི་ཕྱིར་ཞེ་ན། འདི་ལྟར་དེའི་དྲན་པ་ལ་ཉམས་པ་མེད་དོ། །དེ་ཇི་ལྟར་དྲན་པས་བདག་དྲན་ཅིང་མི་བརྗེད་པ་དེ་བཞིན་དུ་སེམས་ཅན་རྣམས་ལ་ཆོས་སྟོན་ཏེ། འདི་ནི། དེ་ བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་དགུ་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་པའི་ཏིང་ངེ་འཛིན་ཉམས་པ་མེད་དོ། །གང་དེ་བཞིན་གཤེགས་པའི་ ཏིང་ངེ་འཛིན་དེ་ནི། ཆོས་ཐམས་ཅད་མཉམ་པ་ཉིད་དེ། ཆོས་ཐམས་ཅད་མི་མཉམ་པ་མ་ཡིན་ནོ། །ཆོས་ཐམས་ཅད་ནི། ཇི་ལྟ་བ་བཞིན་པའོ། །ཅིའི་ཕྱིར་དེ་ བཞིན་གཤེགས་པ་ཏིང་ངེ་འཛིན་ལས་མི་ཉམས་ཤེ་ན། དེ་བཞིན་ཉིད་གང་དང་མཉམ་པ་ཏིང་ངེ་འཛིན་ཀྱང་དེ་དང་མཉམ་མོ། །ཏིང་ངེ་འཛིན་གང་དང་མཉམ་པ་དེ་བཞིན་ཉིད་ཀྱང་དེ་ དང་མཉམ་སྟེ། མཉམ་པ་ཉིད་དེ་ལ་ཞུགས་པས་དེའི་ཕྱིར་མཉམ་པ་ཞེས་བྱའོ། །འདོད་ཆགས་ཀྱི་མཐའ་གང་དང་མཉམ་པ་འདོད་ཆགས་མེད་པའི་མཐའ་ཡང་དེ་དང་མཉམ་མོ། །ཞེ་ སྡང་གི་མཐའ་གང་དང་མཉམ་པ་ཞེ་སྡང་མེད་པའི་མཐའ་ཡང་དེ་དང་མཉམ་མོ། །གཏི་མུག་གི་མཐའ་གང་དང་མཉམ་པ་གཏི་མུག་མེད་པའི་མཐའ་ཡང་དེ་དང་མཉམ་མོ། །འདུས་ བྱས་ཀྱི་མཐའ་གང་དང་མཉམ་པ་འདུས་མ་བྱས་ཀྱི་མཐའ་ཡས་དེ་དང་མཉམ་མོ། །འཁོར་བའི་མཐའ་གང་དང་མཉམ་པ་མྱ་ངན་ལས་འདས་པའི་མཐའ་ཡང་དེ་དང་མཉམ་མོ། ། མཉམ་པ་ཉིད་དེ་ལ་སྙོམས་པར་ཞུགས་པས་དེའི་ཕྱིར་དེ་བཞིན་གཤེགས་པའི་ཏིང་ངེ་འཛིན་ཉམས་པ་མེད་ཅེས་བྱའོ། །དེ་ཅིའི་ཕྱིར་ཞེ་ན། མཉམ་པ་ཉིད་ལས་མི་ཉམས། ཡོངས་ སུ་མི་ཉམས་སོ། །དེ་བཞིན་གཤེགས་པའི་ཏིང་ངེ་འཛིན་དེ་ཡང་མིག་དང་ལྡན་པ་མ་ཡིན། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་དང་ལྡན་པ་མ་ཡིན་མོད་ཀྱི། དེ་བཞིན་ གཤེགས་པ་དབང་པོ་མཚང་བ་མ་ཡིན་ནོ། །ཏིང་ངེ་འཛིན་ནི། སའི་ཁམས་ལ་མི་གནས། ཆུ་དང༌། མེ་དང༌། རླུང་གི་ཁམས་ལ་མི་གནས། འདོད་པ་དང༌། གཟུགས་དང༌། གཟུགས་མེད་པའི་ཁམས་ལ་མི་གནས། འཇིག་རྟེན་ཕ་རོལ་ལ་མི་གནས་ཏེ། མི་གནས་པས་ན་ཉམས་པ་མེད་དོ། །དེའི་ཕྱིར་དེ་བཞིན་གཤེགས་པའི་ཏིང་ངེ་འཛིན་ཉམས་པ་ ༄༅། །མེད་དོ༑ ༑སེམས་ཅན་ཐམས་ཅད་ཀྱང་དེ་བཞིན་གཤེགས་པའི་ཏིང་ངེ་འཛིན་རྙེད་པར་བྱ་བའི་ཕྱིར་ཆོས་སྟོན་ཏེ། ཤཱ་རིའི་བུ། འདི་ནི། དེ་བཞིན་གཤེགས་ པའི་སངས་རྒྱས་ཀྱི་ཆོས་མ་འདྲེས་པ་བཅུ་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་པའི་ཤེས་རབ་ཉམས་པ་མེད་དོ། །དེ་བཞིན་གཤེགས་པའི་ཤེས་རབ་གང་ཞེ་ན། གང་ཆོས་ཐམས་ཅད་རབ་ཏུ་ཤེས་པ་སྟེ། གཞན་གྱི་དྲིང་མི་འཇོག་པར་ཤེས་པའོ། །སེམས་ཅན་གཞན་རྣམས་དང༌། གང་ཟག་གཞན་དག་ལ་ཆོས་གོ་བར་བྱེད་པའི་ཤེས་པའོ། ། སོ་སོ་ཡང་དག་པར་རིག་པ་མི་ཟད་པ་ལ་མཁས་པའི་ཤེས་པའོ། །ཚིག་ཐམས་ཅད་རབ་ཏུ་དབྱེ་བ་ཤེས་པའོ། །ཚིག་གཅིག་ལ་འཇུག་པས་བསྐལ་པ་བརྒྱ་སྟོང་དུ་མི་ཆད་པར་ སྟོན་པར་ཤེས་པའོ། །ཇི་ལྟ་བུ་ཅི་འདྲ་ཞེས་དྲིས་པ་ཇི་ལྟ་བ་བཞིན་དུ་ཐེ་ཚོམ་གཅོད་པའི་ཤེས་པའོ། །ཐམས་ཅད་དུ་ཐོགས་པ་མེད་པའི་ཤེས་པའོ། །ཐེག་པ་གསུམ་རྣམ་པར་ དགོད་པ་བསྟན་པ་ཤེས་པའོ། །སེམས་ཅན་གྱི་སེམས་ཀྱི་སྤྱོད་པ་བརྒྱད་ཁྲི་བཞི་སྟོང་ཡོངས་སུ་ཤེས་པའི་ཤེས་པའོ། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཅི་རིགས་པར་ ཡང་དག་པར་རབ་ཏུ་སྟོན་པར་ཤེས་པའོ། །འདི་ནི། ཤེས་རབ་མ་ཟད་པ་བསྟན་པའི་ཕྱིར་དེ་བཞིན་གཤེགས་པའི་ཤེས་རབ་མཐའ་ཡས་མུ་མེད་ཟད་མི་ཤེས་པའོ། །གང་གི་ ཕྱིར་དེ་བཞིན་གཤེགས་པའི་ཤེས་རབ་ཉམས་པ་མེད་པ་དེ་བཞིན་དུ། སེམས་ཅན་རྣམས་ཀྱི་ཤེས་རབ་ཀྱང་མི་ཟད་པར་བྱ་བའི་ཕྱིར་ཆོས་སྟོན་ཏེ། ཤཱ་རིའི་བུ། འདི་ནི། དེ་བཞིན་ གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་གཅིག་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་པའི་རྣམ་པར་གྲོལ་བ་ཉམས་པ་མེད་དོ། །དེ་བཞིན་གཤེགས་ པའི་རྣམ་པར་གྲོལ་བ་གང་ཞེ་ན། ཉན་ཐོས་རྣམས་ཀྱི་རྣམ་པར་གྲོལ་བ་ནི། སྒྲའི་རྗེས་སུ་འགྲོ་བའོ། །རང་སངས་རྒྱས་རྣམས་ཀྱི་རྣམ་པར་གྲོལ་བ་ནི། རྐྱེན་ཁོང་དུ་ཆུད་པའོ། ། སངས་རྒྱས་བཅོམ་ལྡན་འདས་རྣམས་ཀྱི་རྣམ་པར་གྲོལ་བ་ནི། ཆགས་པ་དང༌། གཉིས་སུ་འཛིན་པ་ཐམས་ཅད་དང་བྲལ་བས་རྣམ་པར་གྲོལ་ཞེས་བྱ་བ་སྟེ། སྔོན་གྱི་མཐར་ ཡང་མ་བཅིངས། ཕྱི་མའི་མཐར་ཡང་མི་འཕོ། ད་ལྟར་བྱུང་བ་ལ་ཡང་མི་གནས་ཏེ། མིག་དང་གཟུགས་ལ་གཉིས་སུ་འཛིན་པ་ལས་རྣམ་པར་གྲོལ་བའོ། །དེ་བཞིན་དུ་རྣ་བ་ དང་སྒྲ་དང༌། སྣ་དང་དྲི་དང༌། ལྕེ་དང་རོ་དང༌། ལུས་དང་རེག་བྱ་ལ་གཉིས་སུ་འཛིན་པ་ལས་རྣམ་པར་གྲོལ་བ་སྟེ། མི་འཛིན་མངོན་པར་མི་ཆགས་པར་གནས་པའི་རྣམ་པར་ གྲོལ་བའོ། །སེམས་རང་བཞིན་གྱིས་འོད་གསལ་བ་དེ་བཞིན་དུ་ཤེས་པས་དེའི་ཕྱིར་སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་བླ་ན་མེད་པ་ཡང་དག་པར་རྫོགས་ ༄༅། །པའི་བྱང་ཆུབ་མངོན་པར་རྫོགས་པར་སངས་རྒྱས་ཞེས་བྱའོ། །ཇི་ལྟར་མངོན་པར་རྫོགས་པར་སངས་རྒྱས་པ་དེ་ལྟར་དེ་བཞིན་གཤེགས་པ་སེམས་ཅན་ རྣམས་ལ་ཆོས་སྟོན་ཏེ། ཤཱ་རིའི་བུ། འདི་ནི། དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་གཉིས་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་ པའི་ལུས་ཀྱི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ༌། །ལུས་ཀྱི་ལས་དེ་དང་ལྡན་པས་དེ་བཞིན་གཤེགས་པ་གཟིགས་པས་ཀྱང་སེམས་ཅན་ འདུལ༑ གསུངས་པས་ཀྱང་སེམས་ཅན་འདུལ། ཅང་མི་གསུང་བས་ཀྱང་སེམས་ཅན་འདུལ། བཤོས་གསོལ་བས་ཀྱང་སེམས་ཅན་འདུལ། སྤྱོད་ལམ་གྱིས་ཀྱང་སེམས་ ཅན་འདུལ། མཚན་གྱིས་ཀྱང་སེམས་ཅན་འདུལ། དཔེ་བྱད་བཟང་པོས་ཀྱང་སེམས་ཅན་འདུལ། གཙུག་ཏོར་བལྟར་མི་སྣང་བ་དང༌། བལྟས་པ་ཙམ་དང༌། འོད་གཏོང་པ་དང༌། གོམ་པ་འདོར་བ་དང༌། འཇོག་པ་དང༌། གྲོང་ཁྱེར་དུ་འཇུག་པ་དང༌། འབྱུང་བས་ཀྱང་སེམས་ཅན་འདུལ་ཏེ། སངས་རྒྱས་བཅོམ་ལྡན་འདས་ཀྱི་སྤྱོད་ལམ་གང་གིས་ཀྱང་སེམས་ ཅན་འདུལ་བར་མི་འགྱུར་བ་མེད་དོ། །དེའི་ཕྱིར་དེ་བཞིན་གཤེགས་པའི་ལུས་ཀྱི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་ཞེས་བྱ་སྟེ། ཤཱ་རིའི་ བུ༑ འདི་ནི། དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་གསུམ་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་པའི་ངག་གི་ལས་ཐམས་ཅད་ཡེ་ཤེས་སྔོན་ དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ༌། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ནི། འབྲས་བུ་ཡོད་པའི་ཆོས་སྟོན་པའོ། །ཁྱད་པར་ལུང་སྟོན་པའོ། །ཤིན་ཏུ་ངེས་ པའི་ཚིག་སྨྲ་བའོ། །དེ་བཞིན་གཤེགས་པའི་ངག་དེ་ཡང་ཀུན་ཤེས་པར་བྱེད་པ། རྣམ་པར་ཤེས་པར་བྱེད་པ། མི་མཐོ། མི་དམའ་ང༌། མ་ཡོ། འདར་འདར་པོ་མ་ཡིན་པ། གྱ་གྱུ་མེད་པ། མི་བརླང་བ། མི་རྩུབ་པ། གཟིང་གཟིང་བ་མ་ཡིན། མཉེན་པ། ཡིད་དུ་འོང་བ། མ་འཆལ་པ། ལག་ལོག་མེད་པ། མི་འཚེ་བ། མི་མྱུར་བ། རབ་ཏུ་མྱུར་བ་མ་ ཡིན་པ། ཤིན་ཏུ་རྣམ་པར་ཕྱེ་བ། ཤིན་ཏུ་ངེས་པའི་ཚིག་རབ་ཏུ་མཉེན་པ། ཤིན་ཏུ་སྙན་པ། དབྱངས་སྙན་པ། རབ་ཏུ་གསལ་བ། བསྒྲགས་པ། ངེས་པ། འཇམ་པ། ཕན་ པ་དང་བཅས་པ། དགའ་བར་འགྱུར་བ། མཆོད་པར་འགྱུར་བ། མཛེས་པ། རྡུལ་མེད་པ། རྡུལ་དང་བྲལ་བ། ཐ་བ་མེད་པ། དྲི་མ་མེད་པ། མ་རྨོངས་པ། གསལ་པ། ཐོགས་ པ་མེད་པ། ཡང་དག་པར་སྤྱོར་བ། འོད་གསལ་བ། དྲང་བ། འཇུངས་པ་མ་ཡིན་པ། དུམ་བུ་མ་ཡིན་པ། དིག་དིག་པོ་མ་ཡིན་པ། བདེ་བ་སྐྱེད་པ། ལུས་སིམ་པར་བྱེད་པ། སེམས་ ༄༅། །ཚིམ་པར་བྱེད་པ། འདོད་ཆགས་ཞི་བར་བྱེད་པ། ཞེ་སྡང་ཞི་བར་བྱེད་པ། གཏི་མུག་སེལ་བ། བདུད་འཇོམས་པ། སྡིག་པ་སེལ་བ། རྒོལ་བ་འདུལ་བ། གོ་བར་བྱེད་པ། པའི་སྒྲ། མཁས་པ་དགའ་བར་བྱེད་པ། ཀ་ལ་པིངྐའི་སྒྲ་དབྱངས། དབང་པོའི་སྒྲ། ཚངས་པའི་སྒྲ། རྒྱ་མཚོའི་རླབས་ཀྱི་སྒྲ། སྤྲིན་གྱི་སྒྲ། སའི་སྒྲ་དབྱངས། ཁྲུང་ཁྲུང་གི་སྒྲ། རྨ་ བྱའི་སྒྲ༑ ཁུ་བྱུག་གི་སྒྲ། ཤང་ཤང་ཏེའུའི་སྒྲ། ངང་པའི་སྒྲ་སྐད། རི་དྭགས་ཀྱི་རྒྱལ་པོའི་སྒྲ། ཁོང་ཧུ་དང༌། པི་བང་དང༌། མཁར་རྔ་དང༌། དུང་དང༌། སིལ་སྙན་དང༌། རབ་ཏུ་བསྒྲགས་ པའི་སྒྲ༑ ཀུན་ཤེས་པར་འགྱུར་བ། རྣམ་པར་ཤེས་པར་འགྱུར་བ། ཟུར་ཕྱིན་པ། ཡིད་དུ་འོང་བ། མཉན་པར་འོས་པ། ཟབ་པ། ལྐུགས་ཤིང་དིག་པ་མ་ཡིན་པ། བདེ་བ། དགེ་བའི་ རྩ་བ་སྐྱེད་པ། ཚིག་དང་ཡི་གེ་མ་ཉམས་པ། ཤིན་ཏུ་ངེས་པར་སྨྲ་བ། ཚིག་འབྲུ་དང༌། དོན་གྱི་ཚིག་དང་ལྡན་པ། ཆོས་ཀྱི་ཚིག་དང་ལྡན་པ། དུས་དང་ལྡན་པ། ཚོད་དང་ལྡན་པ། དུས་ལས་ མི་འདའ་བ། དབང་པོ་མཆོག་དང་མཆོག་མ་ཡིན་པ་ཤེས་པས་བསྟན་པ། སྦྱིན་པས་བརྒྱན་པ། ཚུལ་ཁྲིམས་ཀྱིས་སྦྱངས་པ། བཟོད་པས་བསྒྲུབས། བརྩོན་འགྲུས་ཀྱིས་འབར་བར་ བྱས་པ། བསམ་གཏན་གྱིས་ཡིད་དུ་འོང་བར་བྱས་པ། ཤེས་རབ་ཀྱིས་ངེས་པར་བརྟགས་པ། བྱམས་པས་ཤིན་ཏུ་བསགས་པ། སྙིང་རྗེས་མི་སྐྱོ་བ། དགའ་བའི་འོད་གསལ་བ། བཏང་སྙོམས་ ཀྱིས་ངེས་པར་བརྟགས་པ། ཐེག་པ་གསུམ་རྣམ་པར་འཇོམས་པ། དཀོན་མཆོག་གསུམ་གྱི་རིགས་མི་གཅོད་པ། ཕུང་པོ་གསུམ་འཇོག་པ། རྣམ་པར་ཐར་པ་གསུམ་སྦྱོང་བ། བདེན་པ་ཡོངས་སུ་བསྒོམས་ པ༑ ཡེ་ཤེས་ཡོངས་སུ་བསྒོམས་པ། མཁས་པས་མ་སྨད་པ། འཕགས་པས་བསྟོད་པ། ནམ་མཁའ་ཚད་མེད་པའི་རྗེས་སུ་སོང་བ། རྣམ་པའི་མཆོག་ཐམས་ཅད་དང་ལྡན་པའོ། །ཤཱ་རིའི་ བུ༑ དེ་བཞིན་གཤེགས་པའི་ངག་ནི། དེ་འདྲ་སྟེ། དེ་ལྟ་བུར་དེ་བཞིན་གཤེགས་པའི་ངག་གི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་ཞེས་བྱ་སྟེ། ཤཱ་རིའི་བུ། འདི་ནི༑ དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་བཞི་པའོ། །གཞན་ཡང་ཤཱ་རིའི་བུ། དེ་བཞིན་གཤེགས་པའི་ཡིད་ཀྱི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ ཡེ་ཤེས་ཀྱི་རྗེས་སུ་འབྲང་བའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི། སེམས་ཀྱིས་བརྗོད་པ་མ་ཡིན། ཡིད་ཀྱིས་མ་ཡིན། རྣམ་པར་ཤེས་པས་མ་ཡིན་གྱི། དེ་བཞིན་གཤེགས་ པ་ནི༑ ཡེ་ཤེས་ཀྱིས་རབ་ཏུ་ཕྱེ་བ་སྟེ། ཡེ་ཤེས་ཀྱི་དབང་དུ་གྱུར་པའོ། །གང་དེ་བཞིན་གཤེགས་པའི་ཡེ་ཤེས་དེ་ཡང་སེམས་ཅན་ཐམས་ཅད་ཀྱི་སེམས་ཀྱི་རྗེས་སུ་སོང་བའོ། །སེམས་ཅན་ཐམས་ ཅད་ཀྱི་ཡིད་ཀྱི་རྗེས་སུ་ཞུགས་པའོ། །སེམས་ཅན་ཐམས་ཅད་ཀྱི་རྣམ་པར་ཤེས་པ་ལས་རབ་ཏུ་དབེན་པའོ། །ཆོས་ཐམས་ཅད་ལ་ངེས་པར་སེམས་པའོ། །ཏིང་ངེ་འཛིན་ཐམས་ཅད་ལ་གཞན་གྱི་དྲིང་མི་ ༄༅། །འཇོག་པའོ། །དམིགས་པ་ལས་ཤིན་ཏུ་འདས་པའོ། །རྐྱེན་ལས་སྐྱེ་བ་དང་བྲལ་བའོ། །སྲིད་པ་གསུམ་གྱི་འགྲོ་བ་སེལ་བའོ། །ང་རྒྱལ་གྱི་རྣམ་པ་ཐམས་ཅད་ ལས་ཤིན་ཏུ་འདས་པའོ། །བདུད་ཀྱི་ལས་ཐམས་ཅད་ལས་ངེས་པར་གྲོལ་བའོ། །སྒྱུ་དང་གཡོ་ཐམས་ཅད་དང་བྲལ་བའོ། །ངར་འཛིན་པ་དང་ང་ཡིར་འཛིན་པ་སྤངས་པའོ། །མ་རིག་པ་ དང༌། གཏི་མུག་གི་མུན་པ་དང༌། ལིང་ཏོག་མེད་པའོ། །ལམ་གྱི་ཡན་ལག་ཤིན་ཏུ་ཡོངས་སུ་བསྒོམས་པའོ། །ནམ་མཁའ་དང་མཚུངས་ཤིང་རྣམ་པར་མི་རྟོག་པའོ། །ཆོས་ཀྱི་དབྱིངས་ དང་དབྱེར་མེད་པ་སྟེ། ཤཱ་རིའི་བུ། དེ་ལྟ་བུ་ནི། དེ་བཞིན་གཤེགས་པའི་ཡེ་ཤེས་སྔོན་དུ་འགྲོ་བའི་ཡིད་ཀྱི་ལས་སོ། །ཤཱ་རིའི་བུ། འདི་ནི། དེ་བཞིན་གཤེགས་པའི་སངས་རྒྱས་ཀྱི་ ཆོས་མ་འདྲེས་པ་བཅོ་ལྔ་པའོ། །གཞན་ཡང་ཤཱ་རིའི་བུ། འདས་པའི་དུས་ལ་དེ་བཞིན་གཤེགས་པའི་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་གོ །ཇི་ལྟར་འཇུག་ཅེ་ན། འདི་ལ་ཤཱ་རིའི་བུ། འདས་པའི་སངས་རྒྱས་ཀྱི་ཞིང་བྱུང་བ་དང་མ་བྱུང་བ་ཇི་སྙེད་པ་དེ་དག་ཐམས་ཅད་བགྲང་བའི་ཚུལ་གྱིས་དེ་བཞིན་གཤེགས་པས་ཡང་དག་པར་མཁྱེན་ཏེ། །སངས་ རྒྱས་ཀྱི་ཞིང་ཇི་སྙེད་པ་དེའི་རྩྭ་དང༌། ཤིང་གེལ་པ་དང༌། སྨན་དང༌། ནགས་ཚལ་བྱུང་བ་དེ་དག་ཐམས་ཅད་རབ་ཏུ་མཁྱེན་ཏོ། །སངས་རྒྱས་ཀྱི་ཞིང་ཇི་སྙེད་པ་དེའི་སེམས་ཅན་གྱི་ཚོགས་ སེམས་ཅན་དུ་བཏགས་པ་བྱུང་བ་དེ་དག་ཐམས་ཅད་རབ་ཏུ་མཁྱེན་ཏོ། །དེ་དག་ན་སེམས་ཅན་སྣ་ཚོགས་བྱུང་བ་ཇི་སྙེད་པ་གཟུགས་ཐ་དད་པ་ལ་སོགས་པ་རྒྱས་པར་བྱ་སྟེ། སངས་རྒྱས་བྱུང་ བ་ཇི་སྙེད་པ་དང༌། དེ་བཞིན་གཤེགས་པ་རེ་རེས་ཆོས་བསྟན་ཅིང་བརྗོད་པ་ཇི་སྙེད་པ་ཡང་གོང་མ་བཞིན་དུ་སྦྱར་རོ། །སེམས་ཅན་ཇི་སྙེད་ཅིག་ཉན་ཐོས་ཀྱི་ཐེག་པས་བཏུལ་བ་དང༌། ཇི་ སྙེད་རང་སངས་རྒྱས་ཀྱི་ཐེག་པས་བཏུལ་བ་ཡང་གོང་མ་བཞིན་དུ་སྦྱར་ཏེ་སངས་རྒྱས་ཀྱི་ཞིང་རྣམ་པར་ཕྱེ་བ་ཡང་རབ་ཏུ་མཁྱེན་ཏོ། །དགེ་སློང་གི་དགེ་འདུན་རྣམ་པར་ཕྱེ་བ་དང༌། ཚེའི་ཚད་ རྣམ་པར་ཕྱེ་བ་ཡང་རབ་ཏུ་མཁྱེན་ཏོ། །ཆོས་གནས་པ་རྣམ་པར་ཕྱེ་བ་ཡང་རབ་ཏུ་མཁྱེན་ཏོ། །དབུགས་ཕྱི་ནང་དུ་རྒྱུ་བ་ཡང་རབ་ཏུ་མཁྱེན་ཏོ། །ཟས་ཀྱི་མཆོག་གི་ལོངས་སྤྱོད་ཀྱང་རབ་ཏུ་ མཁྱེན་ཏོ། །སེམས་ཅན་ཐམས་ཅད་ཀྱི་འདས་པའི་རྣམ་པ་དང༌། ཤ་འཕོ་བ་དང༌། སྐྱེ་བ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །དབང་པོ་ཐ་དད་པ་དང༌། སྤྱོད་པ་ཐ་དད་པ་ དང༌། བསམ་པ་ཐ་དད་པ་ཡང་རབ་ཏུ་མཁྱེན་ཏོ། །སེམས་ཀྱི་རྒྱུད་ཀྱང་རབ་ཏུ་མཁྱེན་ཏོ། །སེམས་གང་གི་འོག་ཏུ་སེམས་གང་འབྱུང་བ་དེ་དག་ཐམས་ཅད་ཀྱང་བགྲང་བའི་ཚུལ་གྱིས་ མངོན་སུམ་གྱི་ཡེ་ཤེས་དང༌། རྗེས་སུ་འགྲོ་བའི་ཡེ་ཤེས་ཀྱིས་རབ་ཏུ་མཁྱེན་ཏོ། །དེ་བཞིན་གཤེགས་པ་ལ་འདས་པར་གཏོང་བའི་སེམས་ཀྱི་རྒྱུད་ཀྱང་མི་དམིགས་ཏེ། དེ་བཞིན་ ༄༅། །གཤེགས་པ་ནི། དེ་ལྟ་བུའི་ཡེ་ཤེས་དང་ལྡན་པས་སེམས་ཅན་གྱི་བསམ་པ་ལ་ཉམས་པ་མེད་པར་ཆོས་སྟོན་ཏེ། ཤཱ་རིའི་བུ། འདི་ནི། དེ་བཞིན་ གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་དྲུག་པའོ། །གཞན་ཡང་ཤཱ་རིའི་བུ། མ་འོངས་པའི་དུས་ལ་དེ་བཞིན་གཤེགས་པ་མ་ཆགས་མ་ཐོགས་པའི་ཡེ་ཤེས་མཐོང་ བ་འཇུག་གོ། མ་འོངས་པའི་དུས་ན་དེ་བཞིན་གཤེགས་པ་གང་དག་འབྱུང་བ་དང༌། འགོག་པ་དང༌། འབྱུང་བར་འགྱུར་བ་དང༌། འབྱུང་བར་མི་འགྱུར་བ་ཐ་དད་པ་དེ་དག་ཀྱང་རབ་ཏུ་ མཁྱེན་ཏོ། །བསྐལ་བ་མེས་ཚིག་པར་འགྱུར་བ་ཇི་སྙེད་པ་དང༌། ཆུས་སྡུད་པར་འགྱུར་བ་ཇི་སྙེད་པ་དང༌། རླུང་གིས་སྡུད་པར་འགྱུར་བ་ཇི་སྙེད་པ་དང༌། སངས་རྒྱས་ཀྱི་ཞིང་གནས་ པར་འགྱུར་བ་ཇི་སྙེད་པ་དང༌། སངས་རྒྱས་ཀྱི་ཞིང་དེ་ན་སའི་ཁམས་ཇི་སྙེད་པ་དང༌། རྡུལ་ཕྲ་རབ་ཇི་སྙེད་པ་དང༌། རྩྭ་དང༌། ཤིང་གེལ་པ་དང༌། སྨན་དང༌། ནགས་ཚལ་ཇི་སྙེད་འབྱུང་ བར་འགྱུར་བ་དང༌། སྐར་མའི་གཟུགས་ཇི་སྙེད་འབྱུང་བར་འགྱུར་བ་དང༌། སངས་རྒྱས་ཀྱི་ཞིང་རབ་འབྱམས་རེ་རེ་ན་སངས་རྒྱས་བཅོམ་ལྡན་འདས་ཇི་སྙེད་འབྱུང་བར་འགྱུར་བ་དང༌། རང་སངས་རྒྱས་ཇི་སྙེད་འབྱུང་བར་འགྱུར་བ་དང༌། ཉན་ཐོས་ཇི་སྙེད་འབྱུང་བར་འགྱུར་བ་དང༌། བྱང་ཆུབ་སེམས་དཔའ་ཇི་སྙེད་འབྱུང་བར་འགྱུར་བ་དང༌། ཟས་ཀྱི་ལོངས་སྤྱོད་དང༌། དབུགས་ཕྱི་ནང་དུ་རྒྱུ་བ་དང༌། འཆགས་པ་དང༌། འདུག་པ་དང༌། སྤྱོད་ལམ་ཇི་སྙེད་འབྱུང་བར་འགྱུར་བ་དང༌། དེ་བཞིན་གཤེགས་པ་རབ་འབྱམས་རེ་རེ་ལས་སེམས་ཅན་ཇི་སྙེད་ཉན་ཐོས་ཀྱི་ཐེག་ པ་དང༌། རང་སངས་རྒྱས་ཀྱི་ཐེག་པས་རྣམ་པར་ཐར་པར་འགྱུར་བ་དང༌། སེམས་ཅན་ཇི་སྙེད་ཐེག་པ་ཆེན་པོས་རྣམ་པར་ཐར་པར་འགྱུར་བ་དེ་དག་ཐམས་ཅད་ཀྱང་དེ་བཞིན་གཤེགས་པས་ རབ་ཏུ་མཁྱེན་ཏོ། །སངས་རྒྱས་ཀྱི་ཞིང་རབ་འབྱམས་རེ་རེ་ན་སེམས་ཅན་སྐྱེ་བའི་གནས་ཇི་སྐད་འབྱུང་བར་འགྱུར་བ་དང༌། སེམས་དང་སེམས་ལས་འབྱུང་བ་སྐྱེ་བ་དང༌། སྐྱེ་བར་འགྱུར་བ་ཇི་སྙེད་ པ་དེ་དག་ཐམས་ཅད་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །དེ་ལྟར་དེ་བཞིན་གཤེགས་པས་རབ་ཏུ་མཁྱེན་ཀྱང་དེ་བཞིན་གཤེགས་པ་མ་འོངས་པའི་སེམས་ཀྱི་རྒྱུད་བསྐལ་པར་འགྱུར་ བ་མ་ཡིན་ཏེ། དེ་བཞིན་གཤེགས་པས་མ་འོངས་པ་ལ་གཟིགས་པས་སེམས་ཅན་རྣམས་ལ་ཆོས་སྟོན་ཏེ། ཤཱ་རིའི་བུ། འདི་ནི། དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅུ་ བདུན་པའོ། །གཞན་ཡང་ཤཱ་རིའི་བུ། ད་ལྟར་གྱི་དུས་ལ་དེ་བཞིན་གཤེགས་པའི་མ་ཆགས་མ་ཐོགས་པའི་ཡེ་ཤེས་མཐོང་པ་འཇུག་གོ །ཇི་ལྟར་འཇུག་ཅེ་ན། འདི་ལ་ཤཱ་རིའི་བུ། དེ་བཞིན་ གཤེགས་པ་ད་ལྟར་གྱི་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་བགྲང་བའི་ཚུལ་རྣམ་པར་གསུམ་གྱིས་རབ་ཏུ་མཁྱེན་ཏོ། །ད་ལྟར་གྱི་ཆོས་ཐམས་ཅད་རབ་ཏུ་མཁྱེན་ཏོ། །ད་ལྟར་གྱི་བྱང་ ༄༅། །ཆུབ་སེམས་དཔའ་ཐམས་ཅད་དང༌། དེ་བཞིན་དུ་ད་ལྟར་གྱི་ཉན་ཐོས་དང་རང་སངས་རྒྱས་རྣམས་ཀྱང་རབ་ཏུ་མཁྱེན་ཏོ། །ད་ལྟར་གྱི་སྐར་མའི་གཟུགས་ཐམས་ཅད་ཀྱང་ རབ་ཏུ་མཁྱེན་ཏོ། །ད་ལྟར་གྱི་རྩ་དང༌། ཤིང་གེལ་པ་དང༌། སྨན་དང༌། ནགས་ཚལ་ཐམས་ཅད་ཀྱང་རབ་ཏུ་མཁྱེན་ཏོ། །ད་ལྟར་གྱི་ཕྱོགས་བཅུའི་སའི་ཁམས་རྡུལ་ཕྲ་རབ་ཀྱི་རྡུལ་གྱི་ཆར་བརླགས་ པ་ཐམས་ཅད་བགྲང་བའི་ཚུལ་གྱིས་རབ་ཏུ་མཁྱེན་ཏོ། །ཕྱོགས་བཅུའི་ཆུའི་ཁམས་སྐྲའི་རྩེ་མོས་བླངས་པའི་ཐིགས་པ་ཐམས་ཅད་ཀྱང་བགྲང་བའི་ཚུལ་གྱིས་རབ་ཏུ་མཁྱེན་ཏོ། །ཕྱོགས་ བཅུའི་མེའི་ཁམས་ཀྱི་འོད་འཕྲོ་བ་སྐྱེས་པ་དང༌། འགགས་པ་ཐམས་ཅད་ཀྱང་བགྲང་བའི་ཚུལ་གྱིས་རབ་ཏུ་མཁྱེན་ཏོ། །ཕྱོགས་བཅུའི་རླུང་གི་ཁམས་ཐམས་ཅད་ཀྱང་གཟུགས་ཀྱི་ཁམས་ སྒྲུབ་པ་བགྲང་བའི་ཚུལ་གྱིས་རབ་ཏུ་མཁྱེན་ཏོ། །ཕྱོགས་བཅུའི་ནམ་མཁའི་ཁམས་ཐམས་ཅད་ཀྱང་སྐྲའི་རྩེ་མོའི་ཆ་ཤས་ཀྱིས་བགྲང་བའི་ཚུལ་གྱིས་རབ་ཏུ་མཁྱེན་ཏོ། །ད་ལྟར་གྱི་སེམས་ ཅན་གྱི་ཁམས་རྣམ་པ་གསུམ་ཡང་རབ་ཏུ་མཁྱེན་ཏོ། །ད་ལྟར་གྱི་སེམས་ཅན་དམྱལ་བའི་སེམས་ཅན་གྱི་ཁམས་ཀྱང་རབ་ཏུ་མཁྱེན་ཏོ། །དེའི་སྐྱེ་བའི་རྒྱུ་ཡང་རབ་ཏུ་མཁྱེན་ཏོ། །ལྡང་བའི་རྒྱུ་ ཡང་རབ་ཏུ་མཁྱེན་ཏོ། །ད་ལྟར་གྱི་དུད་འགྲོའི་སྐྱེ་གནས་སུ་སོང་བའི་སེམས་ཅན་གྱི་ཁམས་ཀྱང་རབ་ཏུ་མཁྱེན་ཏོ། །དེའི་སྐྱེ་བའི་རྒྱུ་ཡང་རབ་ཏུ་མཁྱེན་ཏོ། །ལྡང་བའི་རྒྱུ་ཡང་རབ་ཏུ་མཁྱེན་ ཏོ༑ ༑ད་ལྟར་གྱི་གཤིན་རྗེའི་འཇིག་རྟེན་པའི་སེམས་ཅན་གྱི་ཁམས་ཀྱང་རབ་ཏུ་མཁྱེན་ཏོ། །དེའི་སྐྱེ་བའི་རྒྱུ་ཡང་རབ་ཏུ་མཁྱེན་ཏོ། །ལྡང་བའི་རྒྱུ་ཡང་རབ་ཏུ་མཁྱེན་ཏོ། །ད་ལྟར་གྱི་མིའི་སེམས་ཅན་གྱི་ ཁམས་ཀྱང་རབ་ཏུ་མཁྱེན་ཏོ། །དེའི་སྐྱེ་བའི་རྒྱུ་ཡང་རབ་ཏུ་མཁྱེན་ཏོ། །ད་ལྟར་གྱི་ལྷའི་སེམས་ཅན་གྱི་ཁམས་ཀྱང་རབ་ཏུ་མཁྱེན་ཏོ། །དེའི་སྐྱེ་བའི་རྒྱུ་ཡང་རབ་ཏུ་མཁྱེན་ཏོ། །ད་ལྟར་གྱི་སེམས་ ཅན་ཐམས་ཅད་ཀྱི་སེམས་ཀྱི་རྒྱུད་ཀྱང་རབ་ཏུ་མཁྱེན་ཏོ། །དེ་དག་གི་ཉོན་མོངས་པ་དང་བཅས་པའང་རབ་ཏུ་མཁྱེན་ཏོ། །ཉོན་མོངས་པ་དང་བྲལ་བའང་རབ་ཏུ་མཁྱེན་ཏོ། །ད་ལྟར་གྱི་སེམས་ཅན་ཐམས་ཅད་ ཀྱི་འདུལ་བའི་དབང་པོ་ཡང་རབ་ཏུ་མཁྱེན་ཏོ། །འདུལ་བ་མ་ཡིན་པའི་དབང་པོ་ཡང་རབ་ཏུ་མཁྱེན་ཏོ། །དེ་ལྟར་དེ་བཞིན་གཤེགས་པས་རབ་ཏུ་མཁྱེན་ཀྱང་དེ་བཞིན་གཤེགས་པ་ལ་གཉིས་ཀྱི་རྗེས་སུ་ འབྲང་བའི་རྣམ་པར་ཤེས་པ་མེད་དོ། །གཉིས་སུ་མེད་པ་ལ་ཞུགས་པའི་ཕྱིར་སེམས་ཅན་རྣམས་ལ་ཆོས་སྟོན་ཏེ། ཤཱ་རིའི་བུ། འདི་ནི། དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་ བཅོ་བརྒྱད་པའོ། །ཤཱ་རིའི་བུ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་པ་དེ་དག་དང་ལྡན་པས་དེ་བཞིན་གཤེགས་པ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་མ་ལུས་པ་ཐམས་ཅད་དུ་ འཁོར་གྱི་ནང་དུ་གཟི་བརྗིད་དང༌། གྲགས་པ་དང༌། དཔལ་དང༌། ངོ་མཚར་དང༌། རྨད་དུ་བྱུང་བའི་ཆོས་ཉིད་ཀྱིས་འཁོར་རྣམས་ཟིལ་གྱིས་མནན་ནས་ལྷམ་མེ། ལྷན་ནེ། ལྷང་ངེའོ། །དེ་ལྟར་ཤཱ་རིའི་བུ། ༄༅། །དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་མཐའ་ཡས་མུ་མེད་དོ། །འདི་ལྟ་སྟེ། ཤཱ་རིའི་བུ། ནམ་མཁའ་མཐའ་ཡས་མུ་མེད་ པ་དེ་བཞིན་དུ་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་ཡང་མཐའ་ཡས་མུ་མེད་དོ། །གང་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་རྣམས་ཀྱི་མཐའ་འདོད་ པ་དེ་ནི༑ ནམ་མཁའི་མཐའ་འདོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་དེ་དག་ཐོས་ནས་མངོན་པར་དད། ཡིད་ ཆེས། རབ་ཏུ་རྟོག །སོམ་ཉི་མི་བྱེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ཅིང་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང༌། རྨད་དུ་འདུ་ཤེས་ བསྐྱེད་དོ། །དེ་ནས་བཅོམ་ལྡན་འདས་བདེ་བར་གཤེགས་པས་དོན་འདི་བཀའ་སྩལ་ནས་སྟོན་པས་ཡང་འདི་སྐད་གསུང་ངོ༌། །འདྲེན་པ་ལ་ནི་འཁྲུལ་པ་ཡོད་མེད་དེ། །ལུས་དང་ངག་ རྣམས་དང་ནི་སེམས་མི་གཡོ། དེ་བཞིན་སྲོག་ཆགས་རྣམས་ལ་ཆོས་སྟོན་ཏེ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །ཁེངས་པར་མི་འགྱུར་འདུད་པར་མི་འགྱུར་ཏེ། ཁོང་ཁྲོ་རྗེས་སུ་ ཆགས་ལས་མངོན་པར་འདས། །ཉོན་མོངས་མེད་ལ་གནས་ཤིང་ཉོན་མོངས་གྲོལ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །འདྲེན་པ་ལ་ནི་དྲན་པ་བསྙེལ་བ་མེད། །རྣམ་ཐར་སྤྱོད་ཡུལ་ ཆོས་ནི་མངོན་པར་མཁྱེན། །སོ་སོ་ཡང་དག་རིག་པ་བསྙེལ་མེད་དེ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །མཉམ་པར་བཞག་པས་བཞུགས་ཤིང་བཤོས་ཀྱང་གསོལ། །འཆག་དང་ མནལ་བ་ན་ཡང་མཉམ་པར་བཞག །གཡེང་བ་མེད་ཅིང་སེམས་ཅན་འདུ་ཤེས་མེད། །དེ་ནི་རྒྱལ་པ་རྣམས་ཀྱི་མ་འདྲེས་ཆོས། །རྒྱལ་བ་དང་ནི་ཞིང་དང་སེམས་ཅན་ལ། །ཐ་དད་འདུ་ཤེས་བདེ་ བར་གཤེགས་ལ་མེད། །བསམ་པ་ཆེན་པོ་མཉམ་པ་ཉིད་ལ་གནས། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །དེ་དག་ལ་ནི་མ་བརྟགས་བཏང་སྙོམས་མེད། །ཤིན་ཏུ་ངེས་པའི་ལམ་ནི་རབ་ བསྒོམས་པས། །དེ་ལ་རྟོག་དང་རྣམ་པར་རྟོག་མེད་དེ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །དགེ་བ་ལ་ནི་འདུན་པ་ཉམས་པ་མེད། །སྟོན་པ་རྟག་ཏུ་སྙིང་རྗེ་རབ་སྦྱོར་ཞིང༌། །སེམས་ཅན་རྒྱ་ཆེན་ དཔག་ཏུ་མེད་པ་འདུལ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །རྣམ་ཡང་བརྩོན་འགྲུས་ལ་ནི་ཉམས་པ་མེད། །འདུལ་བ་མཐའ་དང་ཕ་རོལ་མེད་མཐོང་ནས། །ལུས་དང་ངག་རྣམས་དང་ནི་ ཡིད་ཀྱིས་འདུལ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །བྱང་ཆུབ་སེམས་པོར་སངས་རྒྱས་བྱང་ཆུབ་པར། །དེ་ཡི་དྲན་པ་རྣམས་པར་ཆུད་མི་ཟ། །གང་ཆོས་རྟོགས་པ་དེ་ནི་རྟོགས་བྱ་མིན། །དེ་ ནི་རྒྱལ་བ་རྣམས་ཀྱི་མ་འདྲེས་ཆོས། །རྟོག་པ་མེད་ཅིང་རྣམ་པར་རྟོག་མེད་པར། །རང་བྱུང་ཏིང་ངེ་འཛིན་ལ་མཉམ་གནས་ཀྱང༌། །ཆོས་རྣམས་ཀུན་ལ་མི་གནས་བསམ་གཏན་བྱེད། །དེ་ ༄༅། །ནི་རྒྱལ་བ་རྣམས་ཀྱི་མ་འདྲེས་ཆོས། །འདྲེན་པའི་ཤེས་རབ་ཀྱིས་ནི་རབ་སྟོན་ཅིང༌། །སེམས་ཅན་ཀུན་གྱི་སྤྱོད་པ་རབ་མཁྱེན་ཅིང༌། །དེ་དག་ལ་ནི་བསམ་བཞིན་ཆོས་ ཀྱང་འཆད། །འདི་ནི་རྒྱལ་བ་རྣམས་ཀྱི་མ་འདྲེས་ཆོས། །ཉན་ཐོས་རྣམས་ཀྱི་རྣམ་གྲོལ་སྒྲ་ཕྱིར་འགྲོ། །རང་རྒྱལ་གྱི་ནི་རྐྱེན་གྱི་འདུ་ཤེས་ཏེ། སངས་རྒྱས་རྣམས་ཀྱི་བཏང་སྙོམས་བསམ་མི་ཁྱབ། ། ཆགས་ལས་རབ་འདས་དྲི་མེད་ནམ་མཁའ་བཞིན། །སེམས་ཀྱི་རྒྱུད་འདི་རང་བཞིན་རྣམ་གྲོལ་ཏེ། །སེམས་ནི་སྔོན་ནས་བཅིང་བར་འགྱུར་བ་མེད། །ཇི་ལྟར་རྣམ་གྲོལ་དེ་ལྟར་ཆོས་སྟོན་ ཏེ༑ ༑དེ་ནི་རྒྱལ་བ་རྣམས་ཀྱི་མ་འདྲེས་ཆོས། །གཤེགས་དང་བཞུགས་དང་གྲོང་ཁྱེར་འཇུག་པ་དང༌། །སྤྱོད་ལ་མ་དག་ནི་མཐོང་ན་མིག་ཀྱང་འཕྲོག །སངས་རྒྱས་རྣམས་ཀྱི་དཔེ་བྱད་ བཟང་པོ་དང༌། །མཚན་དང་འོད་རྣམས་ཐམས་ཅད་འདུལ་བར་ཞུགས། །སེམས་ཅན་སྙིང་པོ་ནམ་ཞིག་འོད་གཏོང་ཚེ། །སྲོག་ཆགས་བྱེད་བ་མང་པོ་བདེ་འགྱུར་ཏེ། །འོད་ཀྱིས་ རེག་པ་དག་ནི་འདུལ་བར་འགྱུར། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །རང་བྱུང་བ་ནི་གསུང་གཅིག་བརྗོད་པས་ན། །སེམས་ཅན་བསམ་པ་བཞིན་དུ་གསུང་ཐོས་ཏེ། །བྲག་ ཅ་ལྟ་བུར་དེ་ཡི་གསུང་ཡང་ཐོས། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །ཡེ་ཤེས་ཀྱིས་ནི་འདྲེན་པའི་ལས་བྱས་ཏེ། །བདེ་བར་གཤེགས་ལ་སེམས་ལས་ཅུང་ཟད་མེད། ། སེམས་ཅན་བསམ་ལ་ཡེ་ཤེས་རྗེས་སུ་བཞུགས། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །ཏིང་འཛིན་བསམ་གཏན་དང་ནི་རབ་ལྡན་ཏེ། །སྤྲོས་པ་ཐམས་ཅད་ཀྱི་ཡང་རྒྱུ་བ་མེད། །ནམ་ མཁའ་ལྟ་བུར་མཉམ་པ་ཉིད་དུ་གནས། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །འདས་པའི་དུས་ན་དེ་ཡི་ཡེ་ཤེས་ཞུགས། །འགྲོ་བ་སྣ་ཚོགས་རྣམ་འབྱེད་ཤེས་པ་ཡི། །ཆོས་རྣམས་ཀུན་ ལ་སྒྲིབ་པ་མེད་པར་འཇུག །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །མ་འོངས་དུས་ན་གང་དག་འཇིག་རྟེན་དུ། །འབྱུང་བར་འགྱུར་དང་འབྱུང་བར་མི་འགྱུར་དང༌། །སེམས་ཅན་ཞིང་དང་ རྒྱལ་བ་བཤད་པ་དང༌། །དེ་དག་ཐམས་ཅད་སངས་རྒྱས་མ་ལུས་མཁྱེན། །མ་འོངས་དེ་ལ་རྗེས་སུ་རབ་ལྟ་ཞིང༌། །དེ་བཞིན་སེམས་ཅན་རྣམས་ཀྱི་ཆོས་ཀྱང་མཁྱེན། །དེ་ཡི་སེམས་ནི་ གཡེང་བར་མི་འགྱུར་ཏེ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །ད་ལྟར་ལམ་གང་འཇུག་པར་འགྱུར་བ་དག །ཐམས་ཅད་རྒྱལ་བས་ཆགས་མེད་རབ་ཏུ་མཁྱེན། །འདྲེན་པའི་སྤྱོད་ ཡུལ་ནམ་མཁའ་ལྟ་བུ་སྟེ། དེ་ནི་རྒྱལ་བ་རྣམས་ཀྱི་མ་འདྲེས་ཆོས། །དེ་བཞིན་གཤེགས་པའི་ཆོས་ནི་མ་འདྲེས་པ། བཅོམ་བརྒྱད་གསུངས་པ་བསམ་གྱིས་མི་ཁྱབ་སྟེ། །དེ་བཞིན་གཤེགས་ པ་ནམ་མཁའ་དྲ་བར་ནི། །དད་མཁས་བྱང་ཆུབ་སེམས་དཔའ་དད་པར་བྱེད། །ཤཱ་རིའི་བུ། འདི་དག་ནི། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དེ། སངས་རྒྱས་ཀྱི་ཆོས་མ་འདྲེས་པ་དེ་ ༄༅། །དག་དང་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་གྱི་ནང་དུ་གཤེགས་ན་སེངྒེའི་སྒྲ་ཡང་དག་པར་སྒྲོག་ཅིང་ ཁྱུ་མཆོག་གི་གནས་སུ་ཞལ་གྱིས་འཆེ་སྟེ། དགེ་སྦྱོང་ངམ། བྲམ་ཟེའམ། ལྷའམ། བདུད་དམ། སུས་ཀྱང་འཇིག་རྟེན་དུ་ཆོས་དང་མཐུན་པར་མ་བསྐོར་བའི་ཚངས་པའི་འཁོར་ལོ་རབ་ ཏུ་བསྐོར་རོ། །ཤཱ་རིའི་བུ། དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི། བསམ་གྱིས་མི་ཁྱབ་པ་འདི་བཅུས་དེ་བཞིན་གཤེགས་པ་ལ་མངོན་པར་དད། ཡིད་ཆེས། རབ་ ཏུ་རྟོག །སོམ་ཉི་མི་བྱེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ཅིང་ངོ་མཚར་དང༌། རྨད་དུ་འདུ་ཤེས་བསྐྱེད་དོ། །དེ་བཞིན་གཤེགས་པའི་བསམ་གྱིས་མི་ཁྱབ་ པའི་ལེའུ་སྟེ། བཞི་པའོ།། །།བམ་པོ་བརྒྱད་པ། གཞན་ཡང་ཤཱ་རིའི་བུ། དེ་ལྟར་དད་པ་ལ་རབ་ཏུ་གནས་པའི་བྱང་ཆུབ་སེམས་དཔའ་ནི། སངས་རྒྱས་བཅོམ་ལྡན་ འདས་རྣམས་ཀྱི་སྣོད་དུ་རིག །བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱི་སྣོད་དུ་རིག །སངས་རྒྱས་ཀྱི་ཆོས་རྣམས་ཀྱི་སྣོད་དུ་རིག་ནས་དེའི་དྲུང་དུ་གཤེགས་ཏེ་བྱང་ཆུབ་ སེམས་དཔའི་ལམ་ཡང་དག་པར་སྟོན་ཏོ། །དེ་ལྟ་བས་ན། ཤཱ་རིའི་བུ། རྣམ་གྲངས་འདིས་ཀྱང་དེ་ལྟར་དད་པ་ལ་རབ་ཏུ་གནས་པའི་བྱང་ཆུབ་སེམས་དཔའ་ནི། སངས་རྒྱས་བཅོམ་ལྡན་ འདས་རྣམས་ཀྱི་སྣོད་དུ་རིག །བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱི་སྣོད་དུ་རིག །སངས་རྒྱས་ཀྱི་ཆོས་རྣམས་ཀྱི་སྣོད་དུ་རིག་ནས་དེའི་དྲུང་དུ་གཤེགས་ཏེ་བྱང་ཆུབ་ཀྱི་ལམ་ཡང་ དག་པར་རབ་ཏུ་སྟོན་པ་དེ་ལྟ་རིག་པར་བྱའོ། །ཤཱ་རིའི་བུ། སྔོན་བྱུང་བ་འདས་པའི་དུས་ན་བསྐལ་བ་གྲངས་མེད་པ་བས་ཀྱང་ཆེས་གྲངས་མེད་པ། ཡངས་པ། ཚད་མེད་པ། བསམ་གྱིས་ མི་ཁྱབ་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕུང་པོ་ཆེན་པོ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་མི་རྣམས་ཀྱི་སྟོན་པ་སངས་བཅོམ་ལྡན་འདས་འཇིག་རྟེན་དུ་བྱུང་སྟེ། གང་འདི་ལྷར་བཅས་པའི་འཇིག་ རྟེན་དང༌། བདུད་དུ་བཅས་པ་དང༌། ཚངས་པར་བཅས་པ་དན། དགེ་སྦྱོང་དང་བྲམ་ཟེར་བཅས་པའི་སྐྱེ་རྒུ་དང༌། ལྷ་དང༌། མི་དང་ལྷ་མ་ཡིན་ཏུ་བཅས་པའི་འཇིག་རྟེན་རང་གིས་མངོན་པར་ ཤེས་པས་མངོན་སུམ་དུ་བྱས་ཏེ་བསྒྲུབས་ནས་གནས་སོ། །དེ་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་ འདྲེས་པ། ཡོངས་སུ་རྫོགས་པ་ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ ༄༅། །རྒྱས་ཕུང་པོ་ཆེན་པོའི་ཉན་ཐོས་ཁྲག་ཁྲིག་ཕྲག་བདུན་ཅུ་རྩ་གཉིས་ཀྱི་ཉན་ཐོས་ཀྱི་ཚོགས་ཆེན་པོ་བྱུང་སྟེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་ མོངས་པ་མེད་པ། སེམས་ཐམས་ཅད་ཀྱི་དབང་དམ་པའི་ཕ་རོལ་ཏུ་སོན་པ་ཤ་སྟག་གོ །ཤཱ་རིའི་བུ། དེའི་དུས་ན་རྒྱལ་པོ་ཚེ་རྣམ་པར་རྒྱལ་བ་ཞེས་བྱ་བ་ཆོས་ཅན་ཆོས་ཀྱི་རྒྱལ་པོ་ཞིག་ བྱུང་ངོ༌། །ཡང་ཤཱ་རིའི་བུ། རྒྱལ་པོ་ཚེ་རྣམ་པར་རྒྱལ་བའི་གྲོང་ཁྱེར་རྣམ་པར་རྒྱལ་བའི་རྒྱལ་མཚན་ཞེས་བྱ་བ་རྒྱལ་པོའི་གནས་འབྱོར་པ་མོད་པ། བདེ་བ། ལོ་ལེགས་པ། དགའ་ བ༑ འགྲོ་བ་མང་པོ་དང་མིས་གང་བ་ཞིག་ཡོད་དོ། །ཡང་ཤཱ་རིའི་བུ། རྒྱལ་པོ་ཚེ་རྣམ་པར་རྒྱལ་བའི་ཁྱེའུ་གཞོན་ནུ་བརྩོན་འགྲུས་སྤྱོད་པ་ཞེས་བྱ་བ་སྔོན་གྱི་དགེ་བའི་རྩ་བ་སྐྲུན་པ། སྔོན་གྱི་ རྒྱལ་བ་ལ་བྱ་བ་བྱས་པ། སྔོན་གྱི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ་བསྙེན་བཀུར་བྱས་པ། གཟུགས་བཟང་བ། མཛེས་པ། བལྟ་ན་སྡུག་པ། མདོག་བཟང་ཞིང་རྒྱས་པའི་མཆོག་ དང་ལྡན་པ་ཞིག་བྱུང་སྟེ། ཡང་ཤཱ་རིའི་བུ། དེའི་དུས་ན་གཞོན་ནུ་བརྩོན་འགྲུས་སྤྱོད་བཙུན་མོའི་འཁོར་དང་ལྷན་ཅིག་ཏུ་སྐྱེད་མོས་ཚལ་གྱི་སར་བྱུང་བར་གྱུར་ཏོ། །དེ་ནས་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕུང་པོ་ཆེན་པོས་ཨེ་མའོ་གཞོན་ནུ་འདི་ནི། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱི་སྣོད་དོ། །ཨེ་མའོ་ གཞོན་ནུ་བརྩོན་འགྲུས་སྤྱོད་འདི་ནི། སངས་རྒྱས་ཀྱི་ཆོས་རྣམས་ཀྱི་སྣོད་དོ། །ཞེས་དེ་དེ་ལྟར་རིག་ནས་སྐྱེད་མོས་ཚལ་གྱིས་ག་ལ་བ་དང༌། གཞོན་ནུ་བརྩོན་འགྲུས་སྤྱོད་ག་ལ་བ་དེར་སོང་སྟེ་ཕྱིན་ནས་ སྟེང་གི་བར་སྣང་ལ་བཞུགས་ཏེ། གཞོན་ནུ་བརྩོན་འགྲུས་སྤྱོད་ལ་བྱང་ཆུབ་ཀྱི་ལམ་ཡང་དག་པར་རབ་ཏུ་སྟོན་ཏོ། །དེ་ལ་བྱང་ཆུབ་ཀྱི་ལམ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་ བྱམས་པ་དང༌། ཕ་རོལ་ཏུ་ཕྱིན་པ་རྣམས་ལ་བརྩོན་པ་དང༌། བསྡུ་བའི་དངོས་པོ་རྣམས་ཀྱི་རྗེས་སུ་འཇུག་པ་སྟེ། དེ་ནི། བྱང་ཆུབ་ཀྱི་ལམ་ཞེས་བྱའོ། །དེ་ལ་སེམས་ཅན་ཐམས་ཅད་ལ་བྱམས་ པ་གང་ཞེ་ན། འདི་ལ་གཞོན་ནུ། བྱང་ཆུབ་སེམས་དཔའ་ནི། སེམས་ཅན་གྱི་ཁམས་ཇི་ཙམ་པ་དེ་ཙམ་དུ་བྱམས་པས་ཁྱབ་པར་བྱེད་དོ། །སེམས་ཅན་གྱི་ཁམས་ཇི་ཙམ་ཞེ་ན། ནམ་མཁའི་ ཁམས་ཇི་ཙམ་པ་སེམས་ཅན་གྱི་ཁམས་ཀྱང་དེ་ཙམ་མོ། །གཞོན་ནུ། འདི་ལྟ་སྟེ། དཔེར་ན། ནམ་མཁའི་ཁམས་འདིས་ཁྱབ་པར་མ་གྱུར་པ་གང་ཡང་མེད་དོ། །གཞོན་ནུ། དེ་བཞིན་དུ་བྱང་ཆུབ་ སེམས་དཔའི་བྱམས་པ་འདིས་སེམས་ཅན་གྱི་རིས་ན་གང་ཁྱབ་པར་མ་གྱུར་པའི་སེམས་ཅན་དེ་གང་ཡང་མེད་དོ། །འདི་ལྟ་སྟེ། གཞོན་ནུ། སེམས་ཅན་གྱི་ཁམས་དཔག་ཏུ་མེད་པ་དེ་ བཞིན་དུ་གཞོན་ནུ། བྱང་ཆུབ་སེམས་དཔའི་བྱམས་པ་སྒོམ་པ་ཡང་དཔག་ཏུ་མེད་དོ། །གཞོན་ནུ། དེ་ལྟར་ན། ནམ་མཁའ་མཐའ་ཡས་པས་སེམས་ཅན་མཐའ་ཡས་པ། སེམས་ཅན་ ༄༅། །མཐའ་ཡས་པས་བྱམས་པ་མཐའ་ཡས་སོ། །གཞོན་ནུ། ཡང་སེམས་ཅན་གྱི་ཁམས་ནི། ཆེས་མང་གི། སའི་ཁམས་དང༌། ཆུའི་ཁམས་དང༌། མེའི་ཁམས་ དང༌། རླུང་གི་ཁམས་ནི། དེ་ལྟ་མ་ཡིན་མོད་ཀྱི། འོན་ཀྱང་གཞོན་ནུ། སེམས་ཅན་གྱི་ཁམས་ཚད་མེད་པ་ཇི་ཙམ་པ་དེའི་དོན་ཤེས་པར་བྱ་བའི་ཕྱིར་དཔེ་བསྟན་ཏོ། །གཞོན་ནུ། འདི་ལྟ་སྟེ། དཔེར་ན། ཤར་ཕྱོགས་སུ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དང༌། ལྷོ་དང༌། ནུབ་དང༌། བྱང་དང༌། དེ་བཞིན་དུ་ཕྱོགས་མཚམས་དང༌། ཕྱོགས་བཅུ་ཀུན་ཏུ་འཇིག་ རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དང་མཉམ་པ་དེ་དག་ཐམས་ཅད་ཆུས་ཡོངས་སུ་གང་བའི་རྒྱ་མཚོར་གྱུར་པའི་རྒྱ་མཚོ་ཆེན་པོ་གཅིག་ཏུ་གྱུར་པ་ལ་ཡོངས་སུ་བརྟག་པ་བཟུང་ སྟེ་དེ་ལ་སེམས་ཅན་གངྒཱའི་ཀླུང་གི་བྱེ་མ་སྙེད་འདུས་ནས་བརྒྱར་བཙལ་བའི་སྐྲའི་རྩེ་མོས་ཆུའི་ཐིགས་པ་གཅིག་བླངས། གཞན་ཡང་སེམས་ཅན་གངྒཱའི་ཀླུང་གི་བྱེ་མ་སྙེད་འདུས་ ནས་བརྒྱར་བཙལ་བའི་སྐྲའི་རྩེ་མོས་ཆུའི་ཐིགས་པ་གཉིས་བླངས། གཞན་ཡང་སེམས་ཅན་གངྒཱའི་ཀླུང་གི་བྱེ་མ་སྙེད་འདུས་ནས་བརྒྱར་བཙལ་བའི་སྐྲའི་རྩེ་མོས་ཆུའི་ཐིགས་པ་ གསུམ་བླངས་ནས་གཞོན་ནུ། ཡོངས་སུ་བརྟག་པ་བཟུང་སྟེ། དེ་ལྟ་བུའི་ཐབས་ཀྱིས་ཆུའི་ཕུང་པོ་ཆེན་པོ་ཟད་པར་གྱུར་ཀྱང་སེམས་ཅན་གྱི་ཁམས་ནི། ཚད་དང་མཐའ་མེད་དེ། གཞོན་ནུ། སེམས་ཅན་གྱི་ཁམས་དེ་ལྟར་དཔག་ཏུ་མེད་ཅིང་དེ་ལྟར་མཐའ་ཡས་པ་དེ་ཐམས་ཅད་ལ་བྱང་ཆུབ་སེམས་དཔའི་བྱམས་པས་ཁྱབ་པར་བྱེད་དོ། །གཞོན་ནུ། དེ་ཇི་སྙམ་དུ་སེམས། གང་དེ་ལྟར་དཔག་ཏུ་མེད་པར་བྱམས་པ་སྒོམ་པའི་དགེ་བའི་རྩ་བ་དེའི་ཚད་གཟུང་བར་ནུས་སམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བདེ་བར་གཤེགས་པ། དེ་ནི། མ་ ལགས་སོ། །གཞོན་ནུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱམས་པ་ཆེན་པོ་སྒོམ་པའི་དགེ་བའི་རྩ་བ་ནི། དཔག་ཏུ་མེད་པ་ཡིན་ཏེ། གཞོན་ནུ། དེའི་བྱམས་ པ་ནི༑ བདག་སྲུང་བ་ཡིན། གཞན་ལ་ཕན་པར་གནས་པ་ཡིན། མཆོག་ཏུ་གནོད་སེམས་མེད་པ། ཁྲོ་བ་དང་གནོད་སེམས་ཀྱི་ཐ་པ་དང་བྲལ་བ། ཉེ་བར་འཇོམས་པ། རྗེས་སུ་ཆགས་ པའི་ཀུན་ནས་ལྡང་བ་དང་བྲལ་བ། དད་པ་ཀུན་ཏུ་སྟོན་པ། འཁྲུལ་པ་ཐམས་ཅད་ལ་ཉེས་པར་ལྟ་བ། ཡོངས་སུ་གདུང་བ་མེད་པ། ལུས་དང་ངག་དང་སེམས་བདེ་བ་སྐྱེད་པ། གཞན་གྱི་གནོད་ པར་བྱ་བ་ཐམས་ཅད་དུ་མ་ལྷུང་བ། འཇིགས་པ་ཐམས་ཅད་དང་བྲལ་བ། འཕགས་པའི་ལམ་དང་མཐུན་པ། གཤེ་བ་དང༌། ཁྲོས་པ་ལ་དང་བ་སྐྱེད་པ། གཡུལ་ཐམས་ཅད་ལས་སྒྲོལ་ བ༑ དབྱིག་པ་དང་མཚོན་ཆ་མི་ཐོགས་པ། སེམས་ཅན་རབ་ཏུ་ཐར་པར་བྱ་བ་ལ་དགའ་བ། ཁོང་ཁྲོ་བ་ཐམས་ཅད་དང་བྲལ་བ། ཚུལ་འཆོས་པ་དང༌། ཁ་གསག་དང༌། འདྲིད་པ་དང༌། གཞོགས་ ༄༅། །སློང་ཐམས་ཅད་དང་བྲལ་བ། རང་གི་རྙེད་པ་དང༌། བཀུར་སྟི་དང༌། ཚིགས་སུ་བཅད་པས་ཉེ་བར་འཚོ་བ། བརྒྱ་བྱིན་དང༌། ཚངས་པས་ཕྱག་བྱས་པ། རང་གི་ གཟི་བརྗིད་ཀྱིས་བརྒྱན་པ། མཁས་པས་བསྟོད་པ། བྱིས་པ་ཐམས་ཅད་རྗེས་སུ་སྲུང་བ། ཚངས་པའི་ལམ་དང་མཐུན་པ། འདོད་པའི་ཁམས་ལ་མ་འདྲེས་པ། ཐར་པའི་ ལམ་གྱི་གཙོ་བོར་གྱུར་པ། ཐེག་པ་ཐམས་ཅད་ཀྱིས་ཡང་དག་པར་བཟུང་བ། ཟང་ཟིང་མེད་པའི་བསོད་ནམས་ཀྱི་ཚོགས་བསགས་པ། རྫས་ལས་བྱུང་བའི་བསོད་ནམས་བྱ་ བའི་དངོས་པོ་ཐམས་ཅད་ཀྱིས་ཟིལ་གྱིས་མི་ནོན་པ། མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོས་ཡང་དག་པར་བརྒྱན་པ། དབང་པོ་ཉམས་ཤིང་མ་ཚང་བ་ཐམས་ཅད་ སྤངས་པ། བདེ་འགྲོ་དང༌། མྱ་ངན་ལས་འདའ་བའི་ལམ་ཐམས་ཅད་དུ་འགྲོ་བ། ངན་སོང་ཐམས་ཅད་དང༌། མི་ཁོམ་པ་བརྒྱད་ལས་ཟློག་པ། ཆོས་ཀྱི་ཀུན་དགའ་ལ་དགའ་ཞིང་མོས་ པ༑ འདོད་པའི་ལོངས་སྤྱོད་ཐམས་ཅད་དང༌། དབང་པོ་དང༌། རྒྱལ་སྲིད་ལ་མངོན་པར་མི་དགའ་བ་དང༌། སེམས་ཅན་ཐམས་ཅད་ལ་མཉམ་པའི་སེམས་ཀྱིས་སྦྱིན་པ་རབ་ཏུ་སྦྱོར་བ། ཐ་ དད་པའི་འདུ་ཤེས་དང་བྲལ་བ། ཚུལ་ཁྲིམས་དང་བསླབ་པ་ཐམས་ཅད་ཀྱི་སྒོ་དང་ལམ། ཚུལ་ཁྲིམས་འཆལ་པ་ཐམས་ཅད་ཀྱི་སྐྱབས། བཟོད་པའི་སྟོབས་ཀུན་ཏུ་སྟོན་པ། ང་ རྒྱལ་དང༌། རྒྱགས་པ་དང༌། དྲེགས་པ་ཐམས་ཅད་དང་བྲལ་བ། མི་འཁྲུགས་པའི་བརྩོན་འགྲུས་རྩོམ་པ། ཡང་དག་པར་སྦྱོར་བའི་བྱ་བ་སྒྲོལ་བ། བསམ་གཏན་དང༌། རྣམ་པར་ཐར་པ་ དང༌། ཏིང་ངེ་འཛིན་དང༌། སྙོམས་པར་འཇུག་པའི་རྩ་བ། ཉོན་མོངས་པ་ལས་བྱུང་བ། སེམས་ངེས་པར་རྟོག་པ། ཐོས་པ་འཛིན་པ་ཤེས་རབ་ཀྱི་རྒྱུ་སྐྱེད་པའི་བྱམས་པ་དང༌། བདག་གི་ ཕྱོགས་དང་གཞན་གྱི་ཕྱོགས་འཇོམས་པ། བདུད་དང་ཉོན་མོངས་པའི་ཕྱོགས་སེལ་བ། འགྲོགས་ན་བདེ་བ། ལྡང་བ་དང༌། སློང་བ་དང༌། འདུག་པ་དང༌། ཉལ་བའི་སྤྱོད་ལམ་སྲུང་ བར་བྱེད་པ། རྒོད་པའི་རང་བཞིན་ཡིད་ལ་བྱེད་པ་ཐམས་ཅད་སེལ་བ། དྲི་ཞིམ་པོས་བྱུགས་པ། ཁྲེལ་ཡོད་པ་དང༌། ངོ་ཚ་ཤེས་པས་བྱུགས་པ། མི་ཁོམ་པ་དང༌། ཉོན་མོངས་པ་དང༌། ངན་འགྲོ་ཐམས་ཅད་སེལ་བའི་བྱམས་པ། འགྲོ་བ་ཐམས་ཅད་སྐྱོབ་པའི་བྱམས་པ་ཆེན་པོ། བདག་གི་བདེ་བ་བཏང་བ་དང༌། སེམས་ཅན་ཐམས་ཅད་ལ་བདེ་བ་རབ་ཏུ་སྦྱིན་པ་སྟེ། གཞོན་ནུ། ཉན་ཐོས་རྣམས་ཀྱི་བྱམས་པ་ནི། བདག་སྐྱོབ་པའོ། །བྱང་ཆུབ་སེམས་དཔའ་རྣམས་ཀྱི་བྱམས་པ་ནི། སེམས་ཅན་ཐམས་ཅད་ལ་སྐྱོབ་པའོ། །ཡང་གཞོན་ནུ། བྱང་ཆུབ་སེམས་དཔའ་སེམས་ དང་པོ་བསྐྱེད་པ་རྣམས་ཀྱི་བྱམས་པ་ནི། སེམས་ཅན་ལ་དམིགས་པའོ། །བྱང་ཆུབ་སེམས་དཔའ་སྤྱོད་པ་ལ་ཞུགས་པ་རྣམས་ཀྱི་བྱམས་པ་ནི། ཆོས་ལ་དམིགས་པའོ། །བྱང་ཆུབ་སེམས་ ༄༅། །དཔའ་བཟོད་པ་རབ་ཏུ་ཐོབ་པ་རྣམས་ཀྱི་བྱམས་པ་ནི། དམིགས་པ་མེད་པའོ། །གཞོན་ནུ། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱམས་ པ་ཞེས་བྱ་སྟེ། བྱང་ཆུབ་སེམས་དཔའ་བྱམས་པ་དེ་ལ་རབ་ཏུ་གནས་པས་སེམས་ཅན་ཐམས་ཅད་ལ་བྱམས་པས་ཁྱབ་པར་བྱེད་དོ། །དེ་ལ་གཞོན་ནུ། བྱང་ཆུབ་སེམས་དཔའི་སྙིང་རྗེ་ ཆེན་པོ་གང་ཞེ་ན། གཞོན་ནུ། འདི་ལ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་སྔོན་དུ་འགྲོ་བ་ནི། སྙིང་རྗེ་ཆེན་པོའོ། །འདི་ལྟ་སྟེ། དཔེར་ན། གཞོན་ནུ། སྐྱེས་བུའི་སྲོག་གི་དབང་པོའི་སྔོན་དུ་འགྲོ་བ་ནི། དབུགས་འབྱུང་བ་དང༌། རྔུབ་པའོ། །གཞོན་ནུ། དེ་བཞིན་དུ་ཐེག་པ་ཆེན་པོ་ཡང་དག་པར་སྒྲུབ་པའི་བྱང་ ཆུབ་སེམས་དཔའི་སྔོན་དུ་འགྲོ་བ་ནི། སྙིང་རྗེ་ཆེན་པོའོ། །འདི་ལྟ་སྟེ། དཔེར་ན། གཞོན་ནུ་འཁོར་ལོས་བསྒྱུར་བའི་རྒྱལ་པོ་རིན་པོ་ཆེའི་ཐམས་ཅད་ཀྱི་སྔོན་དུ་འགྲོ་བ་ནི། འཁོར་ ལོ་རིན་པོ་ཆེ་ཡིན་ནོ། །གཞོན་ནུ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཆོས་ཐམས་ཅད་ཀྱི་སྔོན་དུ་འགྲོ་བ་ནི། སྙིང་རྗེ་ཆེན་པོ་ཡིན་ཏེ། སྙིང་ རྗེ་ཆེན་པོ་དེ་ཡང་སེམས་ཅན་ཐམས་ཅད་རྗེས་སུ་མི་གཏོང་བའོ། །གཞོན་ནུ། བྱང་ཆུབ་སེམས་དཔའི་སྙིང་རྗེ་ཆེན་པོ་སེམས་ཅན་ཐམས་ཅད་ལ་ཇི་ལྟར་འཇུག་ཅེ་ན། གཞོན་ནུ། འདི་ ལྟར་བྱང་ཆུབ་སེམས་དཔས་འཇིག་ཚོགས་ལ་ལྟ་བས་བཅིངས་ཤིང་ལྟ་བར་གྱུར་བ་རྣམ་བ་མང་པོ་ལ་ཆགས་པའི་སེམས་ཅན་དག་མཐོང་ན། དེ་དག་གི་འཇིག་ཚོགས་ལ་ལྟ་བས་བཅིངས་ པ་སྤང་བའི་ཕྱིར་ཆོས་བསྟན་ཏོ། །ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞན་ཡང་གཞོན་ནུ། བྱང་ཆུབ་སེམས་དཔས་སེམས་ཅན་ཡང་ དག་པ་མ་ཡིན་པ་ཕྱིན་ཅི་ལོག་གི་གནས་ལ་གནས་ཏེ། མི་རྟག་པ་ལ་རྟག་པར་འདུ་ཤེས་པ་དང༌། སྡུག་བསྔལ་བ་ལ་བདེ་བར་འདུ་ཤེས་པ་དང༌། བདག་མེད་པ་ལ་བདག་ཏུ་འདུ་ ཤེས་པ་དང༌། མི་སྡུག་པ་ལ་སྡུག་པར་འདུ་ཤེས་པ་མཐོང་ན། དེ་དག་གི་ཡང་དག་པ་མ་ཡིན་པའི་ཕྱིན་ཅི་ལོག་སྤང་བའི་ཕྱིར་ཆོས་བསྟན་ཏོ། །ཞེས་སེམས་ཅན་རྣམས་ལ་བྱུང་ ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞན་ཡང་གཞོན་ནུ། བྱང་ཆུབ་སེམས་དཔས་ཕྱིན་ཅི་ལོག་གི་འདོད་པ་ལ་སྲེད་པའི་སེམས་ཅན་དེ་དག་མ་ལ་ཡང་གཡེམ་པ་དང༌། སྲིང་ མོ་ལ་ཡང་གཡེམ་པ་མཐོང་ན། བྱང་ཆུབ་སེམས་དཔའ་འདི་སྙམ་དུ་སེམས་ཏེ། ཀྱེ་མའོ་འཇིག་རྟེན་གནས་པ་འདི་དག་ནི། འཕགས་པ་མ་ཡིན་པ་འདུས་པ་སྟེ། མུ་ཅོར་སྨྲ་བས་ཡོངས་ སུ་གང་ཞིང་ངོ་ཚ་མི་ཤེས་པས་ཡོངས་སུ་གང་ངོ༌། །འདི་ལྟར་མའི་རུམ་མངལ་གྱི་མལ་ན་འདུག་འདུག་སྟེ། དེ་ཉིད་ཀྱི་མངལ་གྱི་སྒོ་ནས་བྱུང་ལ་དེ་ཉིད་དང་ཡང་ལྷན་ཅིག་ཏུ་འདོད་པ་སྟེན་པར་བྱེད་ ༄༅། །པ་ལྟ་ག་ལ་སྲིད། མངལ་གཅིག་ན་ལྷན་ཅིག་ཏུ་འདུག་འདུག་པའི་སྲིང་མོ་དང་འདུ་ཞིང་འཁྲིག་པ་བྱེད་པ་ལྟ་ག་ལ་སྲིད་དེ། ཀྱེ་མའོ། །སེམས་ཅན་འདི་དག་ནི། བརླག་གོ །རྣམ་པར་བརླག་གོ །རབ་ཏུ་བརླག་གོ། འདོད་ཆགས་ཀྱིས་གཡེན་སྤྱོའོ། །ཞེ་སྡང་གིས་གཡེན་སྤྱོའོ། །གཏི་མུག་གིས་གཡེན་སྤྱོའོ། །མི་ཤེས་པས་གཡེན་སྤྱོའོ། ། ཆོས་ལས་ཉམས་ཤིང་ཆོས་མ་ཡིན་པ་ལ་གནས་སོ། །མི་མཐུན་པའི་ཆོས་ལ་རབ་ཏུ་སྤྱོད་དོ། །སེམས་ཅན་དམྱལ་བའི་སྤྱོད་ཡུལ་པའོ། །དུད་འགྲོའི་སྐྱེ་གནས་ཀྱི་སྤྱོད་ཡུལ་ པའོ༑ ༑གཤིན་རྗེའི་འཇིག་རྟེན་གྱི་སྤྱོད་ཡུལ་པའོ། །ལོག་པའི་ལམ་ལ་སྤྱོད་ཡུལ་པའོ། །སྙམ་མོ། །གཞོན་ནུ། འདི་ལྟ་སྟེ། དཔེར་ན། ཝ་དུར་ཁྲོད་ཀྱི་མཐར་གཡང་ ས་ཆེན་པོ་དང་ཉེ་བ་ཞིག་ན་མཚན་མོ་ཁྱིས་གཙེས་ནས་གཡང་ས་ཆེན་པོ་ནས་ལྷུང་བ་དེ་བཞིན་དུ་གཞོན་ནུ། སེམས་ཅན་འདི་དག་ཀྱང་ཝ་དང་འདྲའོ། །གཞོན་ནུ། འདི་ལྟ་ སྟེ༑ དཔེར་ན། དམུས་ལོང་ཁྱིས་གཙེས་ན་གཡང་ས་ཆེན་པོ་དང་ཉེ་བར་གྱུར་པ་དེ་བཞིན་དུ་ཀྱེ་མའོ། །གཞོན་ནུ། སེམས་ཅན་འདི་དག་ཀྱང་དམུས་ལོང་དང་འདྲའོ། །གཞོན་ ནུ༑ འདི་ལྟ་སྟེ། དཔེར་ན། ཕག་ནི། མི་གཙང་བ་ཟ་ཞིང་མི་གཙང་བ་ལ་སྤྱོད་ཡུལ་བ་སྟེ། གཞོན་ནུ། ཀྱེ་མའོ། །དེ་བཞིན་དུ་སེམས་ཅན་འདི་དག་ཀྱང་ཕག་དང་འདྲ་སྟེ། དེ་ ཉིད་མ་ཡིན། དེ་ཉིད་སྲིང་མོ་ཡིན་ན། དེ་ཆུང་མར་བྱ་བ་ལྟ་ག་ལ་སྲིད་སྙམ་སྟེ། སེམས་ཅན་ཉོན་མོངས་པས་གཡེན་སྤྱོ་བ་དང༌། བདུད་ཀྱི་ཕྱོགས་ཀྱི་སྤྱོད་ཡུལ་བ་དང༌། བདུད་ཀྱི་ ཞགས་པས་བཅིངས་པ་དང༌། འདོད་པའི་འདམ་དུ་བྱིང་བ་དེ་དག་གི་འདོད་པ་ཐམས་ཅད་སྤང་བའི་ཕྱིར་ཆོས་བསྟན་ཏོ། །ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ ཆེན་པོ་འཇུག་གོ །གཞོན་ནུ། གཞན་ཡང་བྱང་ཆུབ་སེམས་དཔས་སྒྲིབ་པ་ལྔས་བསྒྲིབས་པའི་སེམས་ཅན་འདོད་པའི་ཟུག་རྔུས་ཟུག་པ་མཐོང་ན། སྐྱེ་མཆེད་དྲུག་ལ་ཆགས་ཤིང་ ཞེན་པ། མིག་གིས་གཟུགས་མཐོང་ན། མཚན་མར་འཛིན་པར་འགྱུར་ཞིང་མངོན་རྟགས་སུ་འཛིན་པ་དང༌། རྣ་བས་སྒྲ། སྣས་དྲི། ལྕེས་རོ། ལུས་ཀྱིས་རེག་པ་ལ་རེག་ན། མཚན་ མར་འཛིན་ཅིང་མངོན་རྟགས་སུ་འཛིན་པར་འགྱུར་ཏེ། ཀྱེ་མའོ། །སེམས་ཅན་འདི་དག་ནི། ཁོང་ཁྲོ་བ་མང་ཞིང་ཕན་ཚུན་མི་མཛའ་སྟེ། དེ་དག་དོན་རྙེད་པའི་ཕྱིར་ནི། མཛའ་བོར་ཡང་མི་ཤེས་ གནོད་པར་འགྱུར་བའི་ཕྱིར་ནི། གཅིག་ལ་གཅིག་གསོད་དོ། །ཀྱེ་མའོ། །སེམས་ཅན་འདི་དག་ནི། གཉིད་དང༌། རྨུགས་པ་མང་བ་སྟེ། ཞེན་ཅིང་གླེན་པ་མི་ཤེས་པའི་ལིང་ཏོག་གིས་ཁེབས་ ཤིང་མི་དགེ་བའོ། །ཀྱེ་མའོ། །སེམས་ཅན་འདི་དག་ནི། འགྱོད་པས་ཀུན་ནས་བསྐོར་བ་སྟེ། གློ་བུར་གྱི་ཉོན་མོངས་པས་སེམས་ཀུན་ནས་ཉོན་མོངས་པའོ། །ཀྱེ་མའོ། །སེམས་ཅན་འདི་དག་ ༄༅། །ནི༑ ཐེ་ཚོམ་གྱིས་ཡོངས་སུ་དཀྲིས་པ་ཆོས་ཟབ་མོ་ལ་ངེས་བར་མ་གྱུར་པ་སྟེ། དེ་དག་གི་སྒྲིབ་པ་ཐམས་ཅད་སྤང་བའི་ཕྱིར་ཆོས་བསྟན་ཏོ། །ཞེས་སེམས་ཅན་ རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞོན་ནུ། གཞན་ཡང་བྱང་ཆུབ་སེམས་དཔའ་སེམས་ཅན་ང་རྒྱལ་གྱིས་ནོན་པ། ཆེ་བའི་ང་རྒྱལ་གྱིས་ནོན་པ། ང་རྒྱལ་ལས་ ཀྱང་ང་རྒྱལ་གྱིས་ནོན་པ། ངའོ་སྙམ་པའི་ང་རྒྱལ་གྱིས་ནོན་པ། མངོན་པའི་ང་རྒྱལ་གྱིས་ནོན་པ། ཅུང་ཟད་སྙམ་པའི་ང་རྒྱལ་གྱིས་ནོན་པ། ལོག་པའི་ང་རྒྱལ་གྱིས་ནོན་པ། དམའ་བ་བས་ བདག་མཐོ་བར་སེམས་པ། མཚུངས་པ་བས་ཀྱང་བདག་ཆེས་ལྷག་པར་ལྟ་བ་དེ་དག་གཟུགས་ལ་བདག་ཅེས་ཁས་ལེན་པ་ནས་རྣམ་པར་ཤེས་པའི་བར་ལ་བདག་ཅེས་ཁས་ལེན་པ། ཁོང་ དུ་མ་ཆུད་པར་ཁོང་དུ་ཆུད་སྙམ་དུ་ཤེས་པ། གུས་པར་སྨྲ་བར་འོས་པ་ལ་གུས་པར་མི་སྨྲ་བ། ཕྱག་བྱ་བར་འོས་པ་ལ་ཕྱག་མི་འཚལ་བ། རྒན་པ་དང་གཞོན་པ་ལ་མི་འདུད་པ། བླ་མ་ལ་རིམ་གྲོ་ མི་བྱེད་པ། མཁས་པ་ལ་དགེ་བ་གང༌། མི་དགེ་བ་གང༌། བསྟེན་པར་བྱ་བ་གང༌། བསྟེན་པར་མི་བྱ་བ་གང༌། བྱ་བ་གང༌། མི་བྱ་བ་གང༌། ཁ་ན་མ་ཐོ་བ་དང་བཅས་པ་གང༌། ཁ་ན་མ་ཐོ་ བ་མེད་པ་གང༌། ལམ་གང༌། ཏིང་ངེ་འཛིན་གང༌། རྣམ་པར་གྲོལ་བ་གང་ཞེས་མི་འདྲི་བ་དང༌། བདག་ཉིད་ལ་བདག་ནི། གཙོ་བོའོ། །བདག་ནི། མཆོག་གོ །སྙམ་དུ་རློམ་སེམས་སུ་བྱེད་པ་ མཐོང་ན། འདི་ལྟར་ང་རྒྱལ་གྱི་རྣམ་པ་ཐམས་ཅད་སྤང་བའི་ཕྱིར་ཆོས་བསྟན་ཏོ། །ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞོན་ནུ། གཞན་ཡང་བྱང་ཆུབ་ སེམས་དཔས་སྲིད་པའི་བཅིང་བས་བཅིངས་པ། སྲེད་པས་འཁོལ་བ། ཆུང་མ་དང༌། བུ་ཕོ་དང༌། བུ་མོས་ཟིན་པ། གནོད་པས་ཟིན་པ། དོན་མེད་པས་ཟིན་པ། འཁོར་བའི་གཏན་པས་ཟིན་པ། སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་གྱི་ལམ་གྱིས་ཟིན་པ། སྲིད་པའི་བཅིང་བས་ཟིན་པ། རང་ཉམ་མེད་པ། རང་དབང་མེད་པའི་སེམས་ཅན་ མཐོང་ན། དེ་དག་རང་ཉམ་དང༌། རང་དབང་དང༌། གང་དུ་དགའ་བར་འགྲོ་བ་དང༌། མྱ་ངན་ལས་འདའ་བར་འགྲོ་བར་བྱ་བའི་ཕྱིར་ཆོས་བསྟན་ཏོ། །ཞེས་སེམས་ཅན་རྣམས་ལ་བྱང་ཆུབ་སེམས་དཔའ་ སྙིང་རྗེ་ཆེན་པོ་འཇུག་གོ །གཞོན་ནུ། གཞན་ཡང་བྱང་ཆུབ་སེམས་དཔས་དགེ་བའི་བཤེས་གཉེན་དང་བྲལ་བ། སྡིག་པའི་གྲོགས་པོས་འཁོར་བ་དེ་དག་སྡིག་པའི་གྲོགས་པོས་ནོན་པས་མི་ དགེ་བའི་ལས་ལ་ཆགས་པ་ལ་འདི་ལྟ་སྟེ། སྲོག་གཅོད་པ་དང༌། མ་བྱིན་པར་ལེན་པ་དང༌། འདོད་པ་ལ་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། ཕྲ་མ་དང༌། ངག་རྩུབ་པོ་དང༌། ཚིག་ཀྱལ་བ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བའི་སེམས་ཅན་མཐོང་ན། འདི་ལྟར་དགེ་བའི་བཤེས་གཉེན་བསྡུ་བ་དང༌། མི་དགེ་བའི་ལམ་ལས་བཟློག་པ་ ༄༅། །དང༌། དགེ་བ་བཅུའི་ལས་ཀྱི་ལམ་ཡང་དག་པར་བཟུང་སྟེ་སྤྱོད་བར་བྱ་བའི་ཆོས་བསྟན་ཏོ། །ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་ པོ་འཇུག་གོ །གཞོན་ནུ། གཞན་ཡང་བྱང་ཆུབ་སེམས་དཔས་གཏི་མུག་གིས་བསྒྲིབས་པ། མ་རིག་པའི་མུན་པ་མུན་ནག་གི་ལིང་ཏོག་གིས་ཀུན་ཏུ་བསྒྲིབས་པ། བདག་དང༌། སེམས་ཅན་དང༌། སྲོག་དང༌། སྐྱེ་བ་པོ་དང༌། ཤེད་ལས་སྐྱེས་པ་དང༌། ཤེད་བུ་དང༌། སྐྱེས་བུ་དང༌། གང་ཟག་དང༌། བྱེད་པ་པོ་དང༌། ཚོར་བ་པོ་དང༌། ངར་འཛིན་པ་དང༌། ང་ཡིར་ འཛིན་པ་ལ་མངོན་པར་ཆགས་པའི་སེམས་ཅན་མཐོང་ན། དེ་དག་འཕགས་པའི་ཤེས་རབ་ཀྱི་མིག་རྣམ་པར་སྦྱང་ཞིང་ལྟ་བར་གྱུར་པ་ཐམས་ཅད་སྤང་བའི་ཕྱིར་ཆོས་བསྟན་ཏོ། །ཞེས་ སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞོན་ནུ། གཞན་ཡང་བྱང་ཆུབ་སེམས་དཔའ་འཁོར་བ་ལ་མངོན་པར་དགའ་བའི་སེམས་ཅན་མཐོང་ན། དེ་དག་ ཕུང་པོ་ལྔའི་གཤེད་མ་ལས་རབ་ཏུ་ཐར་པར་བྱ་བ་དང༌། འཁོར་བའི་འབྲོག་དགོན་པ་ལས་རབ་ཏུ་འདའ་བ་དང༌། ཁམས་གསུམ་ཐམས་ཅད་ལས་གདོན་པའི་ཕྱིར་ཆོས་བསྟན་ཏོ། །ཞེས་ སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ། གཞོན་ནུ། གཞན་ཡང་བྱང་ཆུབ་སེམས་དཔས་སེམས་ཅན་འཁྲུགས་པར་གྱུར་པ་རྩྭ་མུན་ཛ་དང༌། བལ་བ་ཛ་ ལྟ་བུར་མི་དྲང་བ། དྲང་བ་ལྟར་འཆོས་པ། འཇིག་རྟེན་འདི་ནས་འཇིག་རྟེན་ཕ་རོལ་ཏུ། འཇིག་རྟེན་ཕ་རོལ་ནས་འཇིག་རྟེན་འདིར་ཀུན་ཏུ་རྒྱུག་ཅིང་འཁོར་བ། འགྲོ་བ་ལྔར་འགྲོ་བ་ལ་ཕྱོགས་པ། མྱ་ངན་ལས་འདས་པར་འགྲོ་བ་ལ་ཕྱིར་བལྟས་པ་མཐོང་ན། དེ་དག་གི་མྱ་ངན་ལས་འདའ་བའི་སྒོ་དབྱེ་བའི་ཕྱིར་ཆོས་བསྟན་ཏོ། །ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་ འཇུག་གོ །གཞོན་ནུ། དེ་ལྟར་བྱང་ཆུབ་སེམས་དཔའ་སེམས་ཅན་གྱི་ཁམས་མཐོང་ན། རྣམ་པ་བཅུ་པོ་འདི་དག་གིས་སྙིང་རྗེ་ཆེན་པོ་འཇུག་གོ །བསམ་པ་ལས་བྱུང་བའི་ཕྱིར་དེའི་སྙིང་རྗེ་ཆེན་ པོ་དེ་ཡང་གཡོ་བ་མེད་པར་འཇུག་གོ །ལྷག་པའི་བསམ་པ་ལས་ཤིན་ཏུ་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་མཉམ་པར་འཇུག་གོ །ལམ་ལས་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་དྲང་ པོ་བཅོས་མ་མ་ཡིན་པར་འཇུག་གོ །སེམས་གྱ་གྱུ་མེད་པའི་སེམས་ལས་ཤིན་ཏུ་གནས་པ་ལས་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་གྱ་གྱུ་མེད་པར་འཇུག་གོ། འདི་ལྟ་སྟེ། སེམས་ཅན་ཐམས་ ཅད་ལ་འདུད་པ་དང༌། ཕྱག་འཚལ་བ་ལས་ཤིན་ཏུ་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་བདག་གི་བདེ་བ་གཏོང་བར་འཇུག་གོ །འདི་ལྟ་སྟེ། བདག་གི་སེམས་ཡོངས་སུ་དག་པ་ལས་བྱུང་བའི་ཕྱིར་ དེའི་སྙིང་རྗེ་ཆེན་པོ་དེ་ཡང་ཕ་རོལ་རྗེས་སུ་སྲུང་བར་འཇུག་གོ །འདི་ལྟ་སྟེ། གཡོ་ཞིང་འགུལ་བའི་སེམས་དང་བྲལ་བ་རབ་ཏུ་གནས་པའི་སེམས་ལས་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་ཤེས་ ༄༅། །རབ་བརྟན་པར་འཇུག་གོ །འདི་ལྟ་སྟེ། ཕ་རོལ་ལ་བདེ་བ་སྦྱིན་པ་ལས་རབ་ཏུ་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་བདག་གི་བདེ་བ་གཏོང་བར་འཇུག་གོ །བརྩོན་ འགྲུས་བརྟན་པ་ལས་རབ་ཏུ་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་སེམས་ཅན་ཐམས་ཅད་ཀྱི་ཁུར་འཁྱེར་བར་འཇུག་སྟེ། གཞོན་ནུ། འདི་ལྟར་བྱང་ཆུབ་སེམས་དཔའི་སྙིང་རྗེ་ ཆེན་པོ་ནི། རྣམ་པ་འདི་དག་དང༌། གཞན་ཡང་རྣམ་པ་བཅུས་འཇུག་གོ །གཞོན་ནུ། འདི་ལྟར་གང་ལ་ལ་ཐེག་པ་ཆེན་པོས་ངེས་པར་འབྱུང་བར་འགྱུར་བ་དེ་དག་ཐམས་ཅད་ཀྱང་ སྙིང་རྗེ་ཆེན་པོས་འབྱུང་སྟེ། དེའི་ཕྱིར་སྙིང་རྗེ་ཆེན་པོ་ཞེས་བྱའོ། །སྦྱིན་པ་བྱེད་པ་དང༌། ཚུལ་ཁྲིམས་བྱེད་པ་དང༌། བཟོད་པ་བྱེད་པ་དང༌། བརྩོན་འགྲུས་བྱེད་པ་དང༌། བསམ་ གཏན་བྱེད་པ་དང༌། ཤེས་རབ་བྱེད་པ་ནི། སྙིང་རྗེ་ཆེན་པོ་ཞེས་བྱ་སྟེ། དེའི་ཕྱིར་སྙིང་རྗེ་ཆེན་པོ་ཞེས་བྱའོ། །དྲན་པ་ཉེ་བར་གཞག་པ་བྱེད་པ་དང༌། ཡང་དག་པར་སྤོང་བ་བྱེད་པས་སྙིང་རྗེ་ ཆེན་པོའོ། །དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། ལམ་དང༌། མཆོག་ཏུ་དགའ་བར་བྱ་བའི་ལས་དང༌། མཐར་གྱིས་སྙོམས་པར་འཇུག་པ་དང༌། དགེ་བ་བཅུའི་ལས་ཀྱི་ ལམ་དང༌། ཚིག་དེ་དག་ཐམས་ཅད་ཀྱང་རྒྱས་པར་བྱའོ། །སྙིང་རྗེ་ཆེན་པོ་ནི། རང་བྱུང་གི་ཡེ་ཤེས་སྒྲུབ་པར་བྱེད་པས་ན། དེའི་ཕྱིར་སྙིང་རྗེ་ཆེན་པོ་ཞེས་བྱའོ། །རང་གི་བྱ་བ་དང༌། ལེགས་ པར་བྱེད་པའི་བྱ་བ་དང༌། མི་འགྱུར་བའི་བྱ་བ་དང༌། སེམས་ཅན་ཐམས་ཅད་ལ་བྱ་བ་ཅི་ཡོད་སྙམ་པ་སྟེ། དེའི་སྙིང་རྗེ་ཆེན་པོ་དེ་ཡང་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་ཡོངས་ སུ་རྫོགས་པར་བྱེད་པས་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་སྙིང་རྗེ་ཆེན་པོ་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་དེ་དང་ལྡན་པས་སེམས་ ཅན་འདི་འདྲ་བའི་གནས་ཐོབ་པ་མཐོང་ན། དེ་དག་ལ་སྙིང་བརྩེ་བ་དང༌། སྙིང་རྗེའི་སེམས་བསྐྱེད་དོ། །དེ་ལ་བྱང་ཆུབ་སེམས་དཔའི་དགའ་བ་གང་ཞེ་ན། གང་དགེ་བའི་ཆོས་རྣམས་དྲན་པ་ དང༌། རྗེས་སུ་དྲན་པ་དང༌། དགའ་བ་དང༌། དད་པ་དང༌། རབ་ཏུ་དགའ་བ་དང༌། དགེ་བའི་ཆོས་ལ་མི་ཞུམ་པ་དང༌། མི་འགོད་པ་དང༌། ཡོངས་སུ་མི་སྐྱོ་བ་དང༌། མི་དགའ་བ་ཐམས་ཅད་སྤོང་ བ་དང༌། ཆོས་ཐམས་ཅད་ལ་དགའ་བར་གནས་པ་དང༌། སེམས་རབ་ཏུ་དགའ་བ་དང༌། ལུས་རབ་ཏུ་ཚིམ་པ་དང༌། བློ་རབ་ཏུ་དགའ་བ་དང༌། ཡིད་རབ་ཏུ་མགུ་བ་དང༌། དེ་བཞིན་གཤེགས་ པའི་སྐུ་ལ་མངོན་པར་དགའ་ཞིང་མོས་པ་དང༌། མཚན་དང་དཔེ་བྱད་བཟང་པོའི་རྒྱན་ཀུན་ཏུ་ཚོལ་བ་ལ་དགའ་བ་དང༌། ཆོས་ཉན་པས་ཡོངས་སུ་མི་སྐྱོ་ཞིང་དགའ་བ་དང༌། ཆོས་ཀྱི་ཕྱིར་འབྲང་བའི་ ནན་ཏན་ལ་རབ་ཏུ་དགའ་བ་དང༌། རབ་ཏུ་དགའ་བའི་ཆོས་ལ་མགུ་བ་དང༌། སེམས་ཅན་རྣམས་ལ་ཁོང་ཁྲོ་བ་མེད་པ་དང༌། བྱང་ཆུབ་ལ་དགའ་བ་དང༌། ཆོས་རྒྱ་ཆེན་པོ་ལ་མོས་པ་དང༌། ཉི་ཚེ་བའི་ ༄༅། །ཐེག་པ་སེལ་བར་སེམས་བསྐྱེད་པ་དང༌། སེར་སྣ་ཚར་གཅོད་པ་དང༌། སློང་བ་ལ་དགའ་བ་དང༌། གཏོང་བ་ལ་རབ་ཏུ་དགའ་བ་དང༌། ཚུལ་ཁྲིམས་འཆལ་བ་དག་ སྡུད་ཅིང་བྱམས་པ་དང༌། ཚུལ་ཁྲིམས་དང་ལྡན་པ་ལ་རྟག་ཏུ་དད་པ་དང༌། བདག་གི་ཚུལ་ཁྲིམས་ཡོངས་སུ་དག་པས་ངན་འགྲོ་དང༌། འཇིགས་པ་ཐམས་ཅད་ལས་རབ་ཏུ་འདའ་བར་ དབུགས་འབྱིན་པ་ལ་རབ་ཏུ་དགའ་བ་དང༌། ཕ་རོལ་ངན་དུ་ཟེར་བ་དང༌། ངན་པར་བརྗོད་པའི་ཚིག་གི་ལམ་བཟོད་ཅིང་རབ་ཏུ་དགའ་བ་དང༌། ལག་པ་དང༌། རྐང་པ་དང༌། མིག་དང༌། མགོ་ བཅད་ཀྱང་བཟོད་པར་ནུས་ཏེ། སེམས་མི་ཉམས་ཤིང་རབ་ཏུ་དགའ་བ་དང༌། རྒན་རབས་ལ་འདུད་ཅིང་ཞེས་བྱེད་པ་ལ་དགའ་བ་དང༌། རྟག་ཏུ་བཞིན་འཛུམ་པ་ལ་དགའ་བ་དང༌། ཁྲོ་ གཉེར་མེད་ཅིང་གསོང་པོར་སྨྲ་བ་ལ་དགའ་བ་དང༌། ཚུལ་འཆོས་པ་དང༌། ཁ་གསག་དང༌། གཞོགས་སློང་མེད་པ་ལ་རབ་ཏུ་དགའ་བ་དང༌། སྙིང་པོ་དང་ལྡན་པའི་ཆོས་འཇུག་ པར་རབ་ཏུ་དགའ་བ་དང༌། བྱང་ཆུབ་སེམས་དཔའ་ལ་སྟོན་པ་བཞིན་དུ་ཕངས་པ་དང༌། ཆོས་ལ་བདག་བཞིན་དུ་ཕངས་པ་དང༌། དེ་བཞིན་གཤེགས་པ་ལ་སྲོག་བཞིན་དུ་ཕངས་པ་དང༌། བླ་མ་ལ་ཕ་མ་བཞིན་དུ་ཕངས་པ་དང༌། སེམས་ཅན་ཐམས་ཅད་ལ་བུ་བཞིན་དུ་ཕངས་པ་དང༌། སློབ་དཔོན་ལ་མིག་བཞིན་དུ་ཕངས་པ་དང༌། ནན་ཏན་ལ་ཡན་ལག་གི་དམ་པ་བགོ་ བཞིན་དུ་ཕངས་པ་དང༌། ཕ་རོལ་ཏུ་ཕྱིན་པ་ལ་ལག་པ་དང༌། རྐང་པ་བཞིན་དུ་ཕངས་པ་དང༌། ཆོས་སྨྲ་བ་ལ་རིན་པོ་ཆེ་ཐམས་ཅད་བཞིན་དུ་ཕངས་པ་དང༌། ཆོས་ཡོངས་སུ་ཚོལ་བ་ལ་སྨན་བཞིན་དུ་ ཕངས་པ་དང༌། བསྐུལ་ཞིང་དྲན་པར་བྱེད་པ་ལ་སྨན་པ་བཞིན་དུ་ཕངས་པར་སེམས་དཔའོ། །གཞོན་ནུ། འདི་ནི། དགའ་བ་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བ་ དེ་ལ་རབ་ཏུ་གནས་ནས་རྟག་ཏུ་ཆོས་ཚོལ་བ་ལ་དགའ་བར་འགྱུར་ཏེ། བྱང་ཆུབ་སེམས་དཔའི་སྤྱད་པ་སྤྱོད་པ་ལ་མི་སྐྱོའོ། །དེ་ལ་བྱང་ཆུབ་སེམས་དཔའ་རྣམས་ཀྱི་བཏང་སྙོམས་གང་ཞེ་ན། བཏང་སྙོམས་རྣམ་པ་གསུམ་སྟེ། རྣམ་པ་གསུམ་གང་ཞེ་ན། འདི་ལྟ་སྟེ། ཉོན་མོངས་པ་ལ་བཏང་སྙོམས་པ་དང༌། བདག་དང་གཞན་རྗེས་སུ་སྲུང་བའི་བཏང་སྙོམས་པ་དང༌། དུས་དང་དུས་ མ་ཡིན་པར་བཏང་སྙོམས་པའོ། །དེ་ལ་ཉོན་མོངས་པའི་བཏང་སྙོམས་པ་གང་ཞེ་ན། གང་བཀུར་སྟི་བྱས་ཀྱང་མཐོར་མི་སེམས་པ་དང༌། བཀུར་སྟི་མ་བྱས་ཀྱང་དམའ་བར་མི་སེམས་པ་དང༌། རྙེད་པས་སྙེམས་པ་མེད་པ་དང༌། མ་རྙེད་བས་ཡི་མི་ཆད་པ་དང༌། ཚུལ་ཁྲིམས་དང་ལྡན་པ་དང་ཚུལ་ཁྲིམས་འཆལ་བལ་གློ་མཉམ་པ་དང༌། གྲགས་པ་ལ་དཀའ་བ་མེད་པ་དང༌། མ་ གྲགས་པ་ལ་ཞུམ་པ་མེད་པ་དང༌། སྨད་པ་ལ་ཡིད་མི་བཟོད་པ་དང༌། བསྟོད་པ་ལ་ཆོས་ཉིད་དུ་ཤིན་ཏུ་གནས་པ་དང༌། སྡུག་བསྔལ་ལ་སོ་སོར་རྟོག་པའི་སྟོབས་དང༌། བདེ་བ་ལ་མི་རྟག་པར་ ༄༅། །རྟོག་པའི་སྟོབས་དང༌། རྗེས་སུ་ཆགས་པ་འདོར་བ་དང༌། ཁོང་ཁྲོ་བ་སྤོང་བ་དང༌། མཇའ་[*MDZA'] བ་དང་མི་མཛའ་བ་ལ་སེམས་མཉམ་པ་དང༌། ལེགས་པར་བྱས་པ་དང་ཉེས་ པར་བྱས་པ་ལ་གཉིས་སུ་མི་བྱེད་པ་དང༌། སྡུག་པ་དང་མི་སྡུག་བ་ལ་མི་ལྟ་བ་དང༌། བསྙེན་བཀུར་བྱེད་པ་དང་བསྙེན་བཀུར་མི་བྱེད་པ་ལ་དགའ་བ་དང༌། མི་དགའ་བར་བྱ་བ་མེད་པ་དང༌། སྙན་ པར་སྨྲ་བ་དང༌། མི་སྙན་པར་སྨྲ་བ་ལ་རྗེས་སུ་ཆགས་པ་དང༌། ཁོང་ཁྲོ་བ་མེད་པ་དང༌། ཀུན་མྱང་བའི་ཉེས་པ་ལ་མཚུངས་པར་ཡོངས་སུ་འཇལ་བ་དང༌། བདག་དང་སེམས་ཅན་གཞན་ ལ་བསམ་པ་མཉམ་པ་དང༌། ལུས་དང་སྲོག་ལ་མི་ལྟ་བ་དང༌། སེམས་ཅན་རབ་འབྲིང་ཐ་མ་ལ་འོད་ཟེར་མཉམ་པ་དང༌། བསྔགས་པ་དང་མི་བསྔགས་པ་ལ་ཆོས་ཉིད་མཉམ་པ་དང༌། བདེན་པ་དང༌། མི་བདེན་པ་ལ་བདག་གི་བདེན་པ་ཡོངས་སུ་དག་པ་སྟེ། གཞོན་ནུ། འདི་ལྟར་གང་བདག་ལ་གནོད་པར་བྱེད་པ་དེ་ལ་བྱང་ཆུབ་སེམས་དཔའ་བཏང་སྙོམས་པ་ཡིན་ནོ། །དེ་ལ་ བདག་དང་གཞན་རྗེས་སུ་སྲུང་བའི་བཏང་སྙོམས་གང་ཞེ་ན། གང་ཡན་ལག་དང༌། ཉིད་ལག་གི་ཤ་བཅད་ཀྱང་བཏང་སྙོམས་པ་ཡིན་ནོ། །ཡན་ལག་དང་ཉིང་ལག་གི་ཤ་བཅད་ཀྱང་འདོད་པ་མེད་ ཅིང་ཚོལ་བ་མེད་དེ། བཏང་སྙོམས་པ་ཡིན་ནོ། །ལུས་ཀྱང་མི་འགྱུར། ངག་ཀྱང་མི་འགྱུར་ཏེ། གཉིས་ཀ་བཟོད་པས་དེའི་ཕྱིར་བཏང་སྙོམས་ཞེས་བྱའོ། །མིག་གི་རྣམ་པས་མ་ཡིན། གཟུགས་ ཀྱི་རྣམ་པས་མ་ཡིན་ཏེ། གཉིས་ཀས་ཀྱང་རྨ་མི་ཕྱིན་པ་ནས་ཡིད་ཀྱི་རྣམ་པ་དང༌། ཆོས་ཀྱི་རྣམ་པའི་བར་གྱིས་རྨ་མི་ཕྱིན་པས་དེའི་ཕྱིར་བཏང་སྙོམས་ཞེས་བྱའོ། །རྨ་མི་ཕྱིན་ཅིང་སྣད་པ་མེད་པས་ དེའི་ཕྱིར་བཏང་སྙོམས་ཞེས་བྱའོ། །རྨ་ཕྱུང་བ་ལ་རྨ་མི་འབྱིན་པས་དེའི་ཕྱིར་བཏང་སྙོམས་ཞེས་བྱའོ། །བདག་དང་ཕ་རོལ་གཉིས་ཀ་ལ་བཟོད་པས་དེའི་ཕྱིར་བཏང་སྙོམས་ཞེས་བྱའོ། །ཕན་ པར་བྱེད་པ་དང༌། ཕན་པར་མི་བྱེད་པ་ལ་མཉམ་པར་སྤྱོད་པས་དེའི་ཕྱིར་བཏང་སྙོམས་ཞེས་བྱའོ། །བཏང་སྙོམས་ནི། རྩོད་པ་མེད་པ་ལྷུར་བྱེད་པའོ། །བཏང་སྙོམས་ནི། རང་གི་སེམས་ངེས་ པར་རྟོག་པའོ། །བཏང་སྙོམས་ནི། བདག་ལ་སོ་སོར་རྟོག་པའོ། །བཏང་སྙོམས་ནི། གཞན་ལ་གནོད་པ་མེད་པའོ། །བྱང་ཆུབ་སེམས་དཔའ་རྣམས་ཀྱི་བཏང་སྙོམས་ནི། མཉམ་པར་ གཞག་པའི་དངོས་པོ་སྟེ། སངས་རྒྱས་བཅོམ་ལྡན་འདས་རྣམས་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ལ་བཏང་སྙོམས་པ་གནང་བར་མི་མཛད་དོ། །དེ་ཅིའི་ཕྱིར་ཞེ་ན། བྱང་ཆུབ་ སེམས་དཔས་རྟག་ཏུ་འབད་པར་བྱའོ། །རྟག་པར་རྒྱུན་མི་འཆད་པར་དགེ་བ་ཡོངས་སུ་བཙལ་བ་ལ་བརྩོན་པར་བྱ་སྟེ། དུས་དུས་སུ་བཏང་སྙོམས་བསྒོམ་པར་བྱའོ། །དེ་ལ་དུས་དུས་སུ་བཏང་ སྙོམས་སྒོམ་པ་གང་ཞེ་ན། འདི་ལྟ་སྟེ། སྣོད་མ་ཡིན་པའི་སེམས་ཅན་ལ་བཏང་སྙོམས་པ་དང༌། བསྙེན་བཀུར་མི་བྱེད་པ་ལ་བཏང་སྙོམས་པ་དང༌། མ་རྙེད་པ་དང༌། སྨད་པ་དང༌། མ་གྲགས་ ༄༅། །པ་དང༌། སྡུག་བསྔལ་བ་ལ་བཏང་སྙོམས་པ་དང༌། ཉན་ཐོས་ཀྱི་ཐེག་པར་ངེས་པར་འགྱུར་བ་ལ་ཞུགས་པ་རྣམས་ལ་བཏང་སྙོམས་པ་དང༌། སྦྱིན་པའི་དུས་ན་ ཚུལ་ཁྲིམས་ཉེ་བར་སྒྲུབ་པ་བཏང་སྙོམས་པ་དང༌། ཚུལ་ཁྲིམས་ཀྱི་དུས་ན་སྦྱིན་པ་ཉེ་བར་སྒྲུབ་པ་བཏང་སྙོམས་པ་དང༌། བཟོད་པའི་དུས་ན་སྦྱིན་པ་དང༌། ཚུལ་ཁྲིམས་དང༌། བརྩོན་ འགྲུས་ཉེ་བར་སྒྲུབ་པ་བཏང་སྙོམས་པ་དང༌། བརྩོན་འགྲུས་ཀྱི་དུས་ན་ཚུལ་ཁྲིམས་ཀྱི་རྗེས་སུ་འཇུག་པ་བཏང་སྙོམས་པ་དང༌། བསམ་གཏན་གྱི་དུས་ན་སྦྱིན་པའི་ཕ་རོལ་ཏུ་ཕྱིན་པ་ཉེ་ བར་སྒྲུབ་པ་བཏང་སྙོམས་པ་དང༌། ཤེས་རབ་ཀྱི་དུས་ན་ཕ་རོལ་ཏུ་ཕྱིན་པ་ལྔ་ལ་དམིགས་པ་ཉེ་བར་སྒྲུབ་པ་བཏང་སྙོམས་པ་སྟེ། འདི་ནི། དུས་དུས་སུ་བཏང་སྙོམས་པ་ཞེས་བྱའོ། ། དེ་ལྟར་གང་མི་བྱ་བའི་ཆོས་མི་བྱེད་པ་འདི་ནི། བཏང་སྙོམས་ཞེས་བྱ་སྟེ། དེ་ལ་གནས་པའི་བྱང་ཆུབ་སེམས་དཔའ་ནི། མི་དགེ་བའི་ཕྱོགས་ཐམས་ཅད་ལ་བཏང་སྙོམས་སུ་བྱེད་དོ། ། གཞོན་ནུ། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་ཅན་ཐམས་ཅད་ལ་བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཞེས་བྱའོ། །དེ་ལྟར་ཤཱ་ རིའི་བུ། བཅོམ་ལྡན་འདས་དེ་བཞིན་གཤེགས་པ་ཕུང་པོ་ཆེན་པོ་དེས་གཞོན་ནུ་བརྩོན་འགྲུས་སྤྱོད་ལ་བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་མདོར་བསྟན་པ་དང༌། བཅས། རྒྱས་པར་བསྟན་པ་དང་བཅས་ཏེ་རྒྱ་ཆེར་ཡང་དག་པར་བསྟན་ཏོ། །གཞོན་ནུ་བརྩོན་འགྲུས་སྤྱོད་པ་དེས་དེ་ཐོས་ནས་ཕ་རོལ་ཏུ་ཕྱིན་པ་ལ་བརྩོན་འགྲུས་བརྩམས་པར་གྱུར་ཏོ། །བྱམས་ པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཀྱི་ལེའུ་སྟེ། ལྔ་པའོ།། །།དེ་ལ་ཤཱ་རིའི་བུ། ཕ་རོལ་ཏུ་ཕྱིན་པ་རྣམས་ལ་བརྩོན་པ་གང་ཞེ་ན། ཤཱ་རིའི་བུ། ཕ་རོལ་ཏུ་ཕྱིན་པ་དྲུག་པོ་འདི་དག་ཉིད་ཡིན་ཏེ། གང་ཕ་རོལ་ཏུ་ཕྱིན་པ་དྲུག་པོ་འདི་དག་ལ་བརྩོན་པའི་བྱང་ཆུབ་སེམས་དཔའ་ནི། བྱང་ཆུབ་སེམས་དཔའི་སྤྱད་པ་སྤྱོད་དོ། །དྲུག་གང་ ཞེ་ན། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང༌། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་པའི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང༌། བསམ་ གཏན་གྱི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། དེ་དག་ནི། ཕ་རོལ་ཏུ་ཕྱིན་པ་དྲུག་རྣམས་སོ། །དེ་ལ་སྦྱིན་པའི་ཕ་རོལ་ཏུ་ཕྱིན་པ་གང་ཞེ་ན། ཤཱ་རིའི་བུ། འདི་ལ་ བྱང་ཆུབ་སེམས་དཔའ་ནི། དགེ་སྦྱོང་དང༌། བྲམ་ཟེ་དང༌། ཕོངས་པ་རྣམས་ཀྱི་སྦྱིན་བདག་ཡིན་ཏེ། འདི་ལྟ་སྟེ། ཟས་ཀྱིས་ཕོངས་པ་ལ་ཟས། སྐོམ་གྱིས་ཕོངས་པ་ལ་སྐོམ། བཞོན་པ་དང༌། གོས་དང༌། སྤོས་དང༌། ཕྲེང་བ་དང༌། བྱུག་པ་དང༌། གནས་དང༌། ཡོ་བྱད་དང༌། ན་བའི་གསོས་སྨན་དང༌། མར་མེ་དང༌། སིལ་སྙན་དང༌། བྲན་ཕོ་དང༌། བྲན་མོ་དང༌། གསེར་དང༌། ནོར་ ༄༅། །བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱི་རུ་དང༌། རིན་པོ་ཆེ་ཐམས་ཅད་དང༌། རྟ་དང༌། གླང་པོ་ཆེ་དང༌། ཤིང་རྟ་དང༌། སྐྱེད་མོས་ ཚལ་དང༌། དཀའ་ཐུབ་ཀྱི་ནགས་ཚལ་དང༌། བུ་དང༌། བུ་མོ་དང༌། ཆུང་མ་དང༌། ནོར་དང༌། འབྲུ་དང༌། མཛོད་དང༌། བང་བ་དང༌། གླིང་བཞིའི་རྒྱལ་པོའི་ལོངས་སྤྱོད་ཀྱི་བདེ་བ་ཐམས་ ཅད་དང༌། རྩེ་བ་དང༌། དགའ་བ་ཐམས་ཅད་དང༌། ལག་པ་དང༌། རྐང་པ་དང༌། རྣ་བ་དང༌། སྣ་དང༌། མིག་དང༌། མགོ་དང༌། ཤ་དང༌། ཁྲག་དང༌། རྐང་དང༌། རུས་པ་དང༌། འཇིག་ རྟེན་གྱི་ཡོ་བྱད་གང་ཡང་སློང་བ་ལ་ཡོངས་སུ་མི་གཏོང་བ་མེད་དོ། །སྦྱིན་པ་དེ་རྣམ་པ་བཅུས་ཡོངས་སུ་དག་པར་སྦྱིན་པར་བྱེད་དེ། བཅུ་གང་ཞེ་ན། བྱང་ཆུབ་སེམས་དཔའ་རྣམས་ ལ་མི་མཐུན་པའི་ལོངས་སྤྱོད་ཡོངས་སུ་ཚོལ་ཞིང་སྦྱིན་པ་མེད། བྱང་ཆུབ་སེམས་དཔའ་རྣམས་ལ་སེམས་ཅན་ལ་གནོད་པའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་འཇིགས་ ཤིང་སྐྲག་ནས་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཡོངས་སུ་མ་བཏང་བ་ལ་མགྲོན་དུ་གཉེར་བའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་གདོང་དུ་བལྟ་ཞིང་ སྦྱིན་པ་མེད། བྱང་ཆུབ་སེམས་དཔའ་རྣམས་ལ་སེམས་ཅན་ལ་ཐ་དད་པར་སྦྱིན་པ་མེད། བྱང་ཆུབ་སེམས་དཔའ་རྣམས་ལ་མཛའ་བས་སྦྱིན་པ་མེད། བྱང་ཆུབ་སེམས་དཔའ་རྣམས་ ལ་སྡང་བས་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཞིང་ཚོལ་ཞིང་སྦྱིན་པ་མེད། བྱང་ཆུབ་སེམས་དཔའ་རྣམས་ལ་སེམས་ཅན་ཐམས་ཅད་ལ་སྦྱིན་གནས་མ་ཡིན་ཞེས་བརྙེས་ཤིང་ སྦྱིན་པ་མེད། ཤཱ་རིའི་བུ། བྱང་ཆུབ་སེམས་དཔའ་སྦྱིན་པ་དེ་རྣམ་པ་དེ་བཅུས་ཡོངས་སུ་དག་པར་སྦྱིན་པར་བྱེད་དོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་སྦྱིན་པ་དེ་གཞན་རྣམ་ པ་བཅུས་ཡོངས་སུ་དག་པར་སྦྱིན་པར་བྱེད་དེ། བཅུ་གང་ཞེ་ན། བྱང་ཆུབ་སེམས་དཔའ་རྣམས་ལ་ལས་ཀྱི་རྣམ་པར་སྨིན་པ་འདོད་ཅིང་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ བསམ་པ་ལོག་པར་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཡོངས་སུ་སྐྱོ་བའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཉེ་བར་བསྟན་ནས་སྦྱིན་པ་མེད། བྱང་ཆུབ་ སེམས་དཔའ་རྣམས་ལ་རྗེས་སུ་མི་དགའ་བའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་འགྱོད་པའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཚུལ་ཁྲིམས་དང་ལྡན་པ་ལ་ བཀུར་ཏེ་སྦྱིན་པ་མེད། ཚུལ་ཁྲིམས་འཆལ་པ་ལ་བརྙས་ཏེ་སྦྱིན་པ་མེད། བྱང་ཆུབ་སེམས་དཔའ་རྣམས་ལ་རྣམ་པར་སྨིན་པ་ལ་རེ་བའི་སྦྱིན་པ་མེད་དེ། ཤཱ་རིའི་བུ། བྱང་ཆུབ་ སེམས་དཔའ་སྦྱིན་པ་དེ་རྣམ་པ་བཅུས་ཡོངས་སུ་དག་པར་སྦྱིན་པར་བྱེད་དོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་སྦྱིན་པ་དེ་གཞན་རྣམ་པ་བཅུས་ཡོངས་སུ་དག་པར་སྦྱིན་ ༄༅། །པར་བྱེད་དེ། བཅུ་གང་ཞེ་ན། བྱང་ཆུབ་སེམས་དཔའ་རྣམས་ལ་སྨད་ནས་སྦྱིན་པ་མེད། བྱང་ཆུབ་སེམས་དཔའ་རྣམས་ལ་གཞན་དུ་ཕྱོགས་ནས་སྦྱིན་པ་མེད། བྱང་ ཆུབ་སེམས་དཔའ་རྣམས་ལ་ཉོན་མོངས་ཤིང་སྦྱིན་པ་མེད། ཁྲོ་བ་དང༌། ཕྲག་དོག་དང༌། གནོད་སེམས་སྟོན་ཅིང་སྦྱིན་པ་མེད། རི་མོར་མི་བྱེད་པར་སྦྱིན་པ་མེད། རང་གི་ལག་ ནས་མ་ཡིན་པར་སྦྱིན་པ་མེད། ཅི་ཙམ་དཔགས་པ་ལས་དབྲི་ཞིང་སྦྱིན་པ་མེད། བྱང་ཆུབ་སེམས་དཔའ་རྣམས་སྐྱེ་བ་འདོད་ཅིང་སྦྱིན་པ་མེད་དེ། ཤཱ་རིའི་བུ། བྱང་ཆུབ་སེམས་དཔའ་སྦྱིན་ པ་དེ་རྣམ་པ་དེ་བཅུས་ཡོངས་སུ་དག་པར་སྦྱིན་པར་བྱེད་དོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་སྦྱིན་པ་དེ་གཞན་རྣམ་པ་བཅུས་ཡོངས་སུ་དག་པར་སྦྱིན་པར་བྱེད་དེ། བཅུ་གང་ ཞེ་ན། བྱང་ཆུབ་སེམས་དཔའ་རྣམས་ལ་མི་བརྟན་པར་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཚོད་འཛིན་ཅིང་སྦྱིན་པ་མེད། ཡོངས་སུ་ཆད་པར་སྦྱིན་པ་མེད། གཞན་གྱི་དྲིང་ འཇོག་སྟེ་སྦྱིན་པ་མེད། ཉུང་ཞེས་ཅུང་ཟད་ཙམ་སྦྱིན་པ་མེད། གཟུགས་དང༌། ལོངས་སྤྱོད་དང༌། དབང་ཕྱུག་ལ་མངོན་པར་དགའ་བའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དང༌། ལྷར་སྐྱེ་བ་ཐམས་ཅད་འདོད་པའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཉན་ཐོས་དང༌། རང་སངས་རྒྱས་ཀྱི་སར་བསྔོ་ ཞིང་སྦྱིན་པ་མེད། བྱང་ཆུབ་སེམས་དཔའ་རྣམས་ལ་མཁས་པས་སྨད་པའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཐམས་ཅད་མཁྱེན་པར་མ་བསྔོས་པའི་སྦྱིན་པ་མེད་དེ། ཤཱ་ རིའི་བུ། བྱང་ཆུབ་སེམས་དཔའ་སྦྱིན་པ་རྣམ་པ་དེ་བཅུས་ཡོངས་སུ་དག་པར་སྦྱིན་པར་བྱེད་དོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་སྦྱིན་པ་དེ་གཞན་རྣམ་པ་བཅུས་ཡོངས་སུ་དག་ པར་སྦྱིན་པར་བྱེད་དེ། བཅུ་གང་ཞེ་ན། ཅི་ཙམ་འདུས་བྱས་ལས་ངེས་པར་འབྱུང་བ་དང༌། འདུས་མ་བྱས་ཐོབ་པར་བྱ་བའི་ཕྱིར་དེ་ལྟར་སྦྱིན་པ་བྱིན་ན། ཤཱ་རིའི་བུ། བྱང་ཆུབ་སེམས་ དཔས་སྦྱིན་པའི་ཕན་ཡོན་བཅུ་འཐོབ་པར་འགྱུར་རོ། །བཅུ་གང་ཞེ་ན། བཟའ་བ་བྱིན་པས་ཚེ་དང༌། སྤོབས་པ་དང༌། བདེ་བ་དང༌། སྟོབས་དང༌། ཁ་དོག་ཕུན་སུམ་ཚོགས་པ་རབ་ཏུ་འཐོབ་བོ། བཏུང་བ་བྱིན་པས་ཉོན་མོངས་པ་དང༌། སྲེད་བ་ཐམས་ཅད་བསལ་བ་ཕུན་སུམ་ཚོགས་པ་རབ་ཏུ་འཐོབ་བོ། །བཞོན་པ་བྱིན་པས་བདེ་བ་ཐམས་ཅད་ཀྱི་དངོས་པོ་ཕུན་སུམ་ཚོགས་པ་རབ་ཏུ་འཐོབ་བོ། ། བགོ་བ་བྱིན་པས་ཁྲེལ་ཡོང་པ་དང༌། ངོ་ཚ་ཤེས་པ་དང༌། གསེར་ལྟར་ཁ་དོག་ཡོངས་སུ་དག་པ་ཕུན་སུམ་ཚོགས་པ་རབ་ཏུ་འཐོབ་བོ། །སྤོས་དང༌། ཕྲེང་བ་བྱིན་པས་ཚུལ་ཁྲིམས་དང༌། ཐོས་པ་དང༌། ཏིང་ངེ་འཛིན་གྱི་དྲི་དང༌། བྱུག་པ་ཕུན་སུམ་ཚོགས་པ་རབ་ཏུ་འཐོབ་བོ། །དྲི་རབ་ཏུ་ཞིམ་པའི་སྤོས་དང༌། ཕྱེ་མ་དང༌། བྱུག་པ་བྱིན་པས་ལུས་ཀྱི་ནན་ཏན་གྱི་དྲི་ཞིམ་པོ་ཕུན་སུམ་ཚོགས་པ་རབ་ཏུ་ ༄༅། །འཐོབ་བོ། །རོ་བྱིན་པས་རོ་བྲོ་བའི་ནང་ན་མཆོག་གི་རོ་བྲོ་བའི་སྐྱེས་བུ་ཆེན་པོའི་མཚན་ཕུན་སུམ་ཚོགས་པ་རབ་ཏུ་འཐོབ་བོ། །གནས་བྱིན་པས་སེམས་ཅན་ ཐམས་ཅད་ཀྱི་གནས་དང༌། རྟེན་དང༌། གླིང་དང༌། སྐྱབས་དང༌། དཔུང་གཉེན་ཕུན་སུམ་ཚོགས་པ་རབ་ཏུ་འཐོབ་བོ། །ནད་པ་ལ་སྨན་བྱིན་པས་མི་རྒ་།མི་འཆི། ཤི་བ་མེད་པའི་ བདེ་བ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །ཡོ་བྱད་སྣ་ཚོགས་བྱིན་པས་བྱང་ཆུབ་ཀྱི་ཕྱོགས་ཀྱི་ཆོས་ཀྱི་ཡོ་བྱད་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་ འཐོབ་སྟེ། ཤཱ་རིའི་བུ། བྱང་ཆུབ་སེམས་དཔའ་བྱང་ཆུབ་འདོད་པས་དེ་ལྟར་སྦྱིན་པ་བྱིན་ན། སྦྱིན་པའི་ཕན་ཡོན་བཅུ་པོ་དེ་དག་ཡོངས་སུ་བཟུང་བར་འགྱུར་རོ། །གཞན་ཡང་ ཤཱ་རིའི་བུ། བྱང་ཆུབ་སེམས་དཔའ་ཕན་ཡོན་གཞན་བཅུ་རབ་ཏུ་འཐོབ་བོ། །བཅུ་གང་ཞེ་ན། འདི་ལྟ་སྟེ། མར་མེ་སྦྱིན་པས་དེ་བཞིན་གཤེགས་པའི་སྤྱན་སྔ་ཡོངས་སུ་དག་ པ་ཕུན་སུམ་ཚོགས་པ་རབ་ཏུ་འཐོབ་བོ། །སིལ་སྙན་བྱིན་པས་ལྷའི་རྣ་བ་ཡོངས་སུ་དག་པ་ཕུན་སུམ་ཚོགས་པ་རབ་ཏུ་འཐོབ་བོ། །གསེར་དང༌། ནོར་བུ་དང༌། མུ་ཏིག་དང༌། བཻཌཱུཪྻ་ དང༌། དུང་དང༌། མན་ཤེལ་དང༌། བྱི་རུ་དང༌། རིན་པོ་ཆེ་ཐམས་ཅད་བྱིན་པས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་ པོ༑ ༑རིན་པོ་ཆེ་ཐ་དད་པ་སྣ་ཚོགས་དང༌། མེ་ཏོག་སྣ་ཚོགས་བྱིན་པས་དཔེ་བྱད་བཟང་པོ་བརྒྱད་ཅུ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །རྟ་དང༌། གླང་པོ་ཆེ་དང༌། ཤིང་རྟ་བྱིན་པས་ རྒྱས་པ་དང༌། ཡངས་པ་དང༌། ཆེ་བ་ཕུན་སུམ་ཚོགས་པ་རབ་ཏུ་འཐོབ་བོ། །སྐྱེད་མོས་ཚལ་དང༌། དཀའ་ཐུབ་ཀྱི་ནགས་ཚལ་བྱིན་པས་བསམ་གཏན་དང༌། རྣམ་པར་ཐར་བ་དང༌། ཏིང་ངེ་འཛིན་ དང༌། སྙོམས་པར་འཇུག་པ་ཡོངས་སུ་རྫོགས་པ་ཕུན་སུམ་ཚོགས་པར་རབ་ཏུ་འཐོབ་བོ། །ནོར་དང༌། འབྲུ་དང༌། མཛོད་དང༌། བང་བ་བྱིན་པས་ཆོས་རིན་པོ་ཆེ་ཐམས་ཅད་ཀྱི་མཛོད་ ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །བྲན་ཕོ་དང༌། བྲན་མོ་དང༌། ལས་བྱེད་པའི་མི་བྱིན་པས་རང་ཉམ་དང༌། རང་དབང་དང༌། རང་བྱུང་གི་ཡེ་ཤེས་ཡོངས་སུ་རྫོགས་པ་ ཕུན་སུམ་ཚོགས་པ་རབ་ཏུ་འཐོབ་བོ། །བུ་ཕོ་དང་བུ་མོ་བྱིན་པས་མཛའ་བ་དང༌། སྡུག་པ་དང༌། འདོད་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་རྫོགས་པ་ཕུན་སུམ་ ཚོགས་པ་རབ་ཏུ་འཐོབ་བོ། །གླིང་བཞིའི་རྒྱལ་པོའི་ལོངས་སྤྱོད་ཐམས་ཅད་བྱིན་པས་བྱང་ཆུབ་སེམས་དཔའ་རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ ཕུན་སུམ་ཚོགས་པ་རབ་ཏུ་འཐོབ་སྟེ། ཤཱ་རིའི་བུ། ཕན་ཡོན་བཅུ་པོ་དེ་དག་ཡོངས་སུ་གཟུང་བར་འགྱུར་རོ། །ཤཱ་རིའི་བུ། བྱང་ཆུབ་སེམས་དཔའ་བྱང་ཆུབ་འདོད་པས་དེ་ལྟར་སྦྱིན་པ་ ༄༅། །བྱིན་ན། ཕན་ཡོན་གཞན་ཡང་བཅུ་འཐོབ་བོ། །བཅུ་གང་ཞེ་ན། འདོད་པའི་ཡོན་ཏན་ལྔ་བྱིན་པས་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དང༌། རྣམ་ པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཡོངས་སུ་དག་པ་ཕུན་སུམ་ཚོགས་པ་རབ་ཏུ་འཐོབ་བོ། །དགའ་བའི་རྩེ་མོ་ཐམས་ཅད་ཡོངས་སུ་གཏོང་བའི་སྦྱིན་པས་དམ་ པའི་ཆོས་ཀྱི་དགའ་བ་དང༌། རྩེ་བ་ཡོངས་སུ་དག་པ་ཕུན་སུམ་ཚོགས་པ་རབ་ཏུ་འཐོབ་བོ། །རྐང་པ་བྱིན་པས་ཆོས་ཀྱི་དོན་གྱི་རྐང་པ་བྱང་ཆུབ་ཀྱི་སྙིང་པོར་འགྲོ་བའི་ཡོངས་སུ་རྫོགས་པ་ ཕུན་སུམ་ཚོགས་པ་རབ་ཏུ་འཐོབ་བོ། །ལག་པ་བྱིན་པས་སེམས་ཅན་ཐམས་ཅད་ལ་ཆོས་ཀྱི་ལག་པ་རབ་ཏུ་བྱིན་པ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །རྣ་བ་དང༌། སྣ་ བྱིན་པས་དབང་པོ་མ་ཚང་བ་མེད་ཅིང་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །ཡན་ལག་དང༌། ཉིང་ལག་བྱིན་པས་ཁ་ན་མ་ཐོ་བ་མེད་ཅིང་མཛེས་པའི་ཡན་ལག་སངས་ རྒྱས་ཀྱི་སྐུ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །མིག་བྱིན་པས་སེམས་ཅན་ཐམས་ཅད་ལ་ཆོས་ཀྱི་མིག་མི་སྒྲིབ་པ་ཡོངས་སུ་དག་པ་ཕུན་སུམ་ཚོགས་པ་རབ་ཏུ་འཐོབ་ བོ༑ ༑ཤ་དང༌། ཁྲག་བྱིན་པས་སེམས་ཅན་ཐམས་ཅད་ཀྱི་ལུས་དང༌། སྲོག་གི་སྙིང་པོ་མེད་པ་ལས་སྙིང་པོ་ལེན་པས་ཉེ་བར་འཚོ་བ་ལ་མཁས་པ་ཕུན་སུམ་ཚོགས་པ་རབ་ཏུ་འཐོབ་བོ། །རྐང་ བྱིན་པས་རྡོ་རྗེ་ལྟར་མི་ཤིགས་པའི་ལུས་ཐོབ་པ་ཕུན་སུམ་ཚོགས་པ་རབ་ཏུ་འཐོབ་བོ། །ཡན་ལག་གི་དམ་པ་མགོ་བྱིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་མཆོག་ བླ་ན་མེད་ཅིང་ལྟག་ན་མེད་པའི་ཐམས་ཅད་མཁྱེན་པའི་ཡེ་ཤེས་ཁོང་དུ་ཆུད་པ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་སྟེ། ཤཱ་རིའི་བུ། བྱང་ཆུབ་སེམས་དཔའ་བྱང་ཆུབ་ འདོད་པས་དེ་ལྟར་སྦྱིན་པ་བྱིན་ན། འདི་ལྟ་བུའི་སངས་རྒྱས་ཀྱི་ཆོས་ཡོངས་སུ་རྫོགས་པའི་ཕན་ཡོན་དེ་དག་ཡོངས་སུ་གཟུང་བར་འགྱུར་རོ། །ཤཱ་རིའི་བུ། བྱང་ཆུབ་སེམས་དཔའ་ མཁས་པ་ཟབ་པ་ཤེས་རབ་ཀྱི་སྣང་བ་ནི། འཇིག་རྟེན་གྱི་ཟང་ཟིང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད། བདུད་རྩི་འདོད། སྙིང་པོ་འདོད། བྱང་ཆུབ་འདོད་དེ། ཡང་ཤཱ་རིའི་བུ། མྱ་ངན་ལས་འདས་པ་འདོད་པ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གནས་ཏེ། འཇིག་རྟེན་གྱི་ཟང་ཟིང་སྦྱིན་པ་ན་འཇིག་རྟེན་གྱི་བདེ་བ་ཐམས་ཅད་ཡོངས་ སུ་མི་གཏོང་བ་གང་ཡང་མེད་དོ། །འདི་ལྟ་སྟེ། ཤཱ་རིའི་བུ། ཁྱིམ་བདག་ཆུན་བ་ཞིང་སྐམས་ལ་གནས་ནས་བ་ལང་དང༌། གནམ་སྟོང་མ་ཡིན་པའི་ཞིང་གི་རྨོ་བརྐོ་རྫོགས་པར་བྱས་ཏེ་ས་བོན་ བཏབ་ནས་རྣམ་གྲངས་འདིས་གཤོལ་གྱིས་འཚོ་བས་གསེར་དང༌། དངུལ་ཡང་འགྲུབ་བོ། །དངོས་པོ་སྣ་ཚོགས་གཞན་ཡང་འགྲུབ་བོ། །དེ་ཅིའི་ཕྱིར་ཞེ་ན། ཤཱ་རིའི་བུ། འབྲུ་དང་མཚུངས་ ༄༅། །པའི་ནོར་མེད་དོ། །ཤཱ་རིའི་བུ། དེ་བཞིན་དུ་བྱང་ཆུབ་སེམས་དཔའ་འདི་ལྟར་འཇིག་རྟེན་གྱི་ཟང་ཟིང་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ མངོན་པར་རྫོགས་པར་འཚང་རྒྱ་བར་འགྱུར་བའི་དུས་དང༌། ཚོད་ཡོད་དོ། །འདི་ལྟ་སྟེ། ཤཱ་རིའི་བུ། བས་རྩྭ་སྐམ་པོ་དང༌། གཤེར་བ་ཟོས་པ་དང༌། ཆུ་གྲང་མོ་དང༌། དྲོན་མོ་འཐུངས་ པ་དེ་ལས་འོ་མ་འགྲུབ་སྟེ། ཞོ་དང༌། མར་གསར་བ་དང༌། མར་གྱི་སྙིང་པོ་ཡང་འགྲུབ་བོ། །ཤཱ་རིའི་བུ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ལ་གནས་ཏེ་འཇིག་རྟེན་གྱི་ཟང་ཟིང་བྱིན་ན། དེ་མི་འདོད་ཀྱང་འཁོར་ལོས་བསྒྱུར་བའི་རྒྱལ་པོ་ཡང་ཡོངས་སུ་འགྲུབ་བོ། །བརྒྱ་བྱིན་དང༌། ཚངས་པ་ཡང་ འགྲུབ་བོ། །གནས་དེ་གསུམ་ཡོངས་སུ་གྲུབ་ནས་བྱང་ཆུབ་སེམས་དཔའི་ས་བཅུ་ཡོངས་སུ་འགྲུབ་བོ། །དེ་བཞིན་གཤེགས་པའི་སྟོབས་བཅུ་དང༌། མི་འཇིགས་པ་བཞི་ཡང་ཡོངས་ སུ་འགྲུབ་བོ། །ལས་སྟོང་གིས་གྲུབ་པའི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་རྣམས་ཀྱང་ཡོངས་སུ་འགྲུབ་བོ། །ལས་སྟོང་གིས་གྲུབ་པའི་རྣམ་པ་དྲུག་ཅུ་དང་ལྡན་པའི་དབྱངས་ ཕུན་སུམ་ཚོགས་པ་ཡང་ཡོངས་སུ་འགྲུབ་བོ། །ལས་བརྒྱས་གྲུབ་པའི་སྐྱེས་བུ་ཆེན་པོའི་མཚན་གཅིག་ཡོངས་སུ་འགྲུབ་བོ། །ལས་ཉིས་བརྒྱས་གྲུབ་པའི་གཙུག་ཏོར་སྤྱི་བོར་འགྲུབ་ བོ༑ ༑རྣམ་པ་དང་ཡོན་ཏན་བརྒྱས་ཡོངས་སུ་རྫོགས་པའི་དེ་བཞིན་གཤེགས་པའི་ཆོས་ཀྱི་དུང་ཆེན་པོ་ཡང་འགྲུབ་བོ། །རྣམ་པ་བྱེ་བ་དང༌། ཡོན་ཏན་བརྒྱ་ཕྲག་སྟོང་དང་ལྡན་པའི་ཚེམས་ ཀྱི་ཕྲེང་བ་ཐགས་བཟང་བ། ཕྲག་མེད་པ་སྙོམས་ཤིང་དཀར་བ་ཡང་ཡོངས་སུ་འགྲུབ་སྟེ། དེ་ལྟར་ཤཱ་རིའི་བུ། དེ་བཞིན་གཤེགས་པ་རྣམས་དེ་བཞིན་གཤེགས་པའི་ལས་ཀྱི་འབྲས་བུ་རྣམ་ པར་སྨིན་པས་མངོན་པར་འགྲུབ་བོ། །ཡང་ཤཱ་རིའི་བུ། གང་བྱམས་པའི་སེམས་བསྐྱེད་ནས་སློང་བ་ལ་སྦྱིན་པ་བྱིན་པ་དེ་ནི། གངྒཱའི་ཀླུང་གི་བྱེ་མ་སྙེད་དུ་སེམས་བསྐྱེད་པས། སངས་རྒྱས་ཀྱི་ ཏིང་ངེ་འཛིན་རྒྱུན་མི་འཆད་པ་གཅིག་འགྲུབ་སྟེ། ཏིང་ངེ་འཛིན་དེ་ལ་གནས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བ་སྤུའི་བུ་ག་རེ་རེ་ནས་ཏིང་ངེ་ འཛིན་བརྒྱ་གངྒཱའི་རྒྱུན་ལྟར་མངོན་པར་སྤྲུལ་པ་མཛད་དེ། ཤཱ་རིའི་བུ། དེ་བཞིན་གཤེགས་པ་ནི། རྫུ་འཕྲུལ་གྱི་བྱ་བ་ཐམས་ཅད་ལ་དབང་ཐོབ་པའོ། །ཤཱ་རིའི་བུ། གངྒཱ་འདི་ལྟ་བུའི་ སངས་རྒྱས་ཀྱི་ཆོས་དེ་དག་ནི། དེ་བཞིན་གཤེགས་པ་སྔོན་བྱང་ཆུབ་སེམས་དཔའ་སྤྱད་པ་སྤྱོད་པ་ན་འཇིག་རྟེན་གྱི་ཟང་ཟིང་གི་སྦྱིན་པས་ཡོངས་སུ་གཟུང་བ་ཡིན་ནོ། །ཤཱ་རིའི་བུ། བྱང་ ཆུབ་སེམས་དཔའ་མི་འཆི་བ་འདོད་པ་དང༌། བྱང་ཆུབ་འདོད་པ་དང༌། མྱ་ངན་ལས་འདས་པ་འདོད་པ་ནི། འཇིག་རྟེན་གྱི་ཟང་ཟིང་སྦྱིན་པར་བྱེད་དོ། །ཤཱ་རིའི་བུ། རྣམ་གྲངས་དེས་ན། ཁྱོད་ ༄༅། །ཀྱིས་བྱང་ཆུབ་སེམས་དཔའ་འཇིག་རྟེན་གྱི་ཟང་ཟིང་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་རིག་པར་ གྱིས་ཤིག །ཤཱ་རིའི་བུ། སྔོན་བྱུང་བ་འདས་པའི་དུས་ཀྱི་བསྐལ་པ་གྲངས་མེད་པ། ཤིན་ཏུ་གྲངས་མེད་པ། ཚད་མེད་པ། བསམ་གྱིས་མི་ཁྱབ་པ་གང་བྱུང་བ་དེའི་ཚེ་དེའི་དུས་ན་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་མོས་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་ བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ༌། །ཡང་ཤཱ་རིའི་བུ། བཅོམ་ལྡན་འདས་དེ་བཞིན་ གཤེགས་པ་ཆོས་མོས་ཀྱི་ཚེའི་ཚད་ནི། ལོ་སྟོང་ཕྲག་བཅུར་གྱུར་ཏོ། །ཡང་ཤཱ་རིའི་བུ། དེ་བཞིན་གཤེགས་པ་ཆོས་མོས་དེའི་དགེ་སློང་སྟོང་ཕྲག་བརྒྱ་ནི། དགྲ་བཅོམ་པ་ཉོན་ མོངས་པ་མེད་པ། དབང་དང་ལྡན་པར་གྱུར་པ་ནས་སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པའི་བར་དུ་སྟེ། དགྲ་བཅོམ་པ་ཤ་སྟག་གི་འདུས་པ་ཆེན་པོ་བྱུང་ངོ༌། ། ཤཱ་རིའི་བུ། དེའི་ཚེ་ཐག་པ་ཞེས་བྱ་བ་ཐགས་འཐག་པ། གཟུགས་བཟང་བ། མཛེས་པ། བལྟ་ན་སྡུག་པ། མདོག་བཟང་ཞིང་རྒྱས་པའི་མཆོག་དང་ལྡན་པ་ཞིག་བྱུང་སྟེ། དེ་ དེ་བཞིན་གཤེགས་པ་ཆོས་མོས་གང་ན་བཞུགས་པའི་ས་ཕྱོགས་དེ་ནས་ཧ་ཅང་མི་རིང་བའི་ས་ཕྱོགས་ཞིག་ན་རང་གི་ལས་བྱེད་དོ། །དེ་ཉིན་པར་ལས་བྱས་ནས་ནུབ་ཀར་ཁྱིམ་དུ་འགྲོ་བའི་ཚེ་རྟག་ ཏུ་དུས་ཐམས་ཅད་དུ་བཅོམ་ལྡན་འདས་དེ་བཞིན་གཤེགས་པ་ཆོས་མོས་དེའི་དྲུང་དུ་འོངས་ནས་རས་ཀྱི་ཁ་ཚར་གཅིག་འབུལ་ཞིང་འདི་སྐད་ཅེས་གསོལ་ཏོ། །བཅོམ་ལྡན་འདས། བསྡུ་ བའི་གནས་ཀྱིས་བདག་བཅོམ་ལྡན་འདས་རས་ཀྱི་ཁ་ཚར་ཕུལ་བའི་དགེ་བའི་རྩ་བ་དེས་བདག་མ་འོངས་པའི་དུས་ན་བསྡུ་བ་ཐམས་ཅད་དང་ལྡན་པའི་དེ་བཞིན་གཤེགས་པ་དགྲ་བཅོམ་པ་ ཡང་དག་པར་རྫོགས་པའི་སངས་རྒྱས་སུ་གྱུར་ཅིག །ཅེས་དེས་རིམ་གྱིས་རས་ཀྱི་ཁ་ཚར་སྟོང་ལྔ་བརྒྱ་ཕུལ་ཏེ། དེས་བསྐལ་པ་བྱེ་བ་ཕྲག་བཅོ་ལྔར་ངན་འགྲོ་ལོག་པར་ལྟུང་བར་མ་སོང་ངོ༌། །དགེ་ བའི་རྩ་བ་དེ་ཉིད་ཀྱིས་འཁོར་ལོས་བསྒྱུར་བའི་རྒྱལ་པོ་བྱེ་བ་ཕྲག་སྟོང་མྱོང་ངོ༌། །དེ་དགེ་བའི་རྩ་བ་དེ་ཉིད་ཀྱིས་བརྒྱ་བྱིན་གྱི་བདག་པོ་བྱེ་བ་ཕྲག་སྟོང་མྱོང་ངོ༌། །དགེ་བའི་རྩ་བ་འཇམ་པ་ཡིད་དུ་འོང་བ་ དང་པོ་བའི་ལས་དེ་ཉིད་ཀྱིས་སངས་རྒྱས་བྱེ་བ་ཕྲག་སྟོང་མཉེས་པར་བྱས་ཏེ། དེས་ཐམས་ཅད་ལ་མེ་ཏོག་དང༌། བདུག་པ་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ཆོས་ གོས་དང༌། གདུགས་དང༌། རྒྱལ་མཚན་དང༌། བ་དན་དང༌། གོས་དང༌། ཞལ་ཟས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་ཀྱིས་བསྟི་སྟང་དུ་བྱས། བླ་མར་བྱས། རི་མོར་ ༄༅། །བྱས་ནས་མཆོད་དོ། །དེ་ཕྱིས་བསྐལ་པ་གྲངས་མེད་པ་ཞིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་རབ་ཏུ་ བསྡུས་པ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་བ་ནས་སངས་རྒྱས་བཅོམ་ལྡན་འདས་ཞེས་བྱ་བའི་བར་དུ་ སྟེ༑ དེ་ལོ་བྱེ་བ་ཕྲག་ཉི་ཤུའི་བར་དུ་གནས་སོ། །དེའི་དགྲ་བཅོམ་པ་བྱེ་བ་ཁྲག་ཁྲིག་ཕྲག་ཉི་ཤུ་ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ་ནས་སེམས་ ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པའི་བར་གྱི་ཉན་ཐོས་འདུས་པ་ཆེན་པོ་བྱུང་ངོ༌། །བྱང་ཆུབ་སེམས་དཔའ་བྱེ་བ་ཕྲག་ལྔ་ཡང་བླ་ན་མེད་པ་ཡང་དག་པར་རྫོགས་པའི་ བྱང་ཆུབ་ལ་བཀོད་དོ། །དེས་ཆོས་བསྟན་ཏེ་སེམས་ཅན་གྲངས་མེད་དཔག་ཏུ་མེད་པའི་དོན་བྱས་ནས་ཡོངས་སུ་མྱ་ངན་ལས་འདས་སོ། །དེར་བཅོམ་ལྡན་འདས་དེ་ཡོངས་སུ་མྱ་ངན་ལས་ འདས་ནས་ལོ་སྟོང་གི་བར་དུ་དམ་པའི་ཆོས་གནས་སོ། །དེའི་སྐུ་གདུང་ཡང་རྒྱས་པར་གྱུར་ཏེ། འདི་ལྟ་སྟེ། དཔེར་ན། ཤཱ་རིའི་བུ། ང་ད་ཡོངས་སུ་མྱ་ངན་ལས་འདའ་བར་འགྱུར་བ་ བཞིན་ནོ། །ཤཱ་རིའི་བུ། རས་ཀྱི་ཁ་ཚར་ཕུལ་བ་དང༌། སེམས་བསྐྱེད་པས་ཀྱང་མཐར་གྱིས་སངས་རྒྱས་ཀྱི་ཆོས་ཡོངས་སུ་རྫོགས་པ་ལ་ལྟོས། ཤཱ་རིའི་བུ། སེམས་ནི། རྒྱ་ཆེ་ལ་ སྦྱིན་པ་ནི། མ་ཡིན་ནོ། །ཤཱ་རིའི་བུ། གལ་ཏེ་སྦྱིན་པ་རྒྱ་ཆེ་ལ་སེམས་ཀྱིས་མ་ཡིན་ན་ནི། སྦྱིན་བདག་རྩུབ་མོ་ཞེས་བྱ་བ་ལྟར་འགྱུར་ཏེ། དེས་སྦྱིན་པ་དེ་སྙེད་བྱིན་ཡང་སེམས་ཡོངས་སུ་ མ་སྦྱངས་སོ། །ཤཱ་རིའི་བུ། འཇིག་རྟེན་གྱི་ཟང་ཟིང་ལ་གནས་ཏེ་ཐམས་ཅད་ཡོངས་སུ་ཐོབ་པར་གྱུར་པ་ལ་ལྟོས། ཤཱ་རིའི་བུ། བྱང་ཆུབ་སེམས་དཔའ་མཁས་པ་ནི། སྦྱིན་པ་ཉུང་ཡང་ མང་པོར་བྱེད་དོ། །ཡེ་ཤེས་ཀྱི་སྟོབས་ཀྱིས་ལྷག་པར་བྱེད་དོ། །ཤེས་རབ་ཀྱི་སྟོབས་ཀྱིས་རྒྱས་པར་བྱེད་དོ། །བསྔོ་བའི་སྟོབས་ཀྱིས་དཔག་ཏུ་མེད་པར་བྱེད་དོ། །དེ་ནས་བཅོམ་ལྡན་འདས་ ཀྱིས་དོན་དེ་ཉིད་རྒྱ་ཆེར་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །གཟུགས་འདོད་ཕྱིར་ནི་སྦྱིན་པ་སྦྱིན་མི་བྱེད། །ལོངས་སྤྱོད་མཐོ་རིས་འདོད་ཕྱིར་མ་ ཡིན་གྱི༑ ༑བླ་ན་མེད་པའི་སངས་རྒྱས་མཆོག་འདོད་ཕྱིར། །དེ་ཕྱིར་སྦྱིན་པ་ཆུང་ཡང་དུ་མར་འགྱུར། །གྲགས་དང་བརྗོད་པ་དག་དང་སྒྲ་དག་དང༌། །གཡོག་དང་བདེ་བ་ནམ་ཡང་མི་འདོད་ཅིང༌། ། འཆི་འཕོ་སྐྱེ་བ་ཀུན་ཀྱང་མི་འདོད་དེ། །དེ་ཕྱིར་སྦྱིན་ཉུང་འབྲས་བུ་ཆེན་པོར་འགྱུར། །ཟས་དང་སྐོམ་དང་ཆོས་གོས་གང་ཕྱིན་པ། །སྲིད་པའི་འགྲོ་བ་འདོད་ཕྱིར་མ་ཡིན་ཏེ། །སྦྱིན་པས་འཆི་བ་ མེད་པའི་སྒོ་བཙལ་ཕྱིར། །དེས་ནི་སྐྲ་རྩེ་ཙམ་ཡང་སྦྱིན་པ་བྱིན། །འཆར་བ་མེད་ཅིང་ཁེངས་པ་མེད་པར་འགྱུར། །གཡོ་དང་སེར་སྣ་དག་ནི་ཐམས་ཅད་སྤོང༌། །དེ་དག་ལེ་ལོ་ནམ་ཡང་ ༄༅། །ཡོད་མིན་ཏེ། །དེ་ལྟར་དེ་དག་འཇིག་རྟེན་ཕན་ཕྱིར་སྤྲོ། །རྒྱལ་པོའི་སྲིད་དང་ནོར་དང་འབྲུ་སྲོག་གཏོང༌། །དེ་དག་སེམས་ནི་གཞན་དུ་མི་འགྱུར་ཏེ། །བྱིན་ནས་ དགའ་བ་ཆེན་པོ་རྙེད་པར་འགྱུར། །སྦྱིན་ཞིང་གཏོང་ལ་བྱང་ཆུབ་རྙེད་མི་དཀའ། །ཕ་དང་མ་དང་བུ་ནི་སྡུག་པ་ལྟར། །སློང་དང་འཇིག་རྟེན་ཀུན་ལ་དེ་བཞིན་ཏེ། །གང་གིས་བྱང་ ཆུབ་མཆོག་སྤྱོད་སྤྱད་པ་རྣམས། །སྦྱིན་ཚེ་རྟག་ཏུ་ཕྲག་དོག་མེད་པར་འགྱུར། །དེ་དག་མཐོང་ན་མི་ཁྲོ་སྟེ། །ཇི་ལྟར་སྔོན་གྱི་བཞིན་དུ་སྨྲ། །མི་མཛའ་དག་དང་རྟག་མཛའ་ཞིང༌།། སྐྲག་པ་རྣམས་ལ་འཇིགས་མེད་སྦྱིན། །དེ་ལ་དངོས་པོ་གང་ཡོད་པ། །སློང་བ་ལ་ནི་སྲི་བ་མེད། །ཆོས་འདོད་པར་ནི་རྟག་འགྱུར་ཏེ། །རྒྱལ་སྲིད་འདོད་པར་མི་འགྱུར་རོ། །འབྱུང་ བར་རྟག་ཏུ་སྨྲ་བྱེད་ཅིང༌། །ཆོས་ཀྱི་སྦྱིན་པའང་སྦྱིན་པར་བྱེད། །འདོད་ལ་བརྐམ་པ་མ་གཏོགས་པར། །སུ་ཞིག་རྒྱལ་སྲིད་འདོད་པར་འགྱུར། །འདོད་པའི་རྒྱལ་སྲིད་མི་འདོད་ཅིང༌། མཐོ་རིས་བདེ་བ་འདོད་མ་ཡིན། །སངས་རྒྱས་བྱང་ཆུབ་ཡོངས་ཚོལ་ཞིང༌། །གྲགས་པ་ཆེན་པོ་སྦྱིན་པ་སྦྱིན། །བདག་དང་ནོར་རྫས་གཞན་དག་ཀྱང༌། །མང་པོ་མྱུར་དུ་གཏོང་བ་ ནི༑ ༑དེ་དག་བྱང་ཆུབ་དམ་པའི་མཆོག །ནམ་ཡང་གཏོང་བར་མི་འགྱུར་རོ། །མཁས་པ་གཟུགས་ནི་མི་འདོད་དེ། །ལོངས་སྤྱོད་དག་ཀྱང་འདོད་མ་ཡིན། །མཐོ་རིས་དག་ཀྱང་དེ་ མི་འདོད། །མྱ་ངན་འདའ་བའང་འདོད་མ་ཡིན། །ལམ་ཤེས་ལམ་ལ་མཁས་པ་གང༌། །གང་དག་བཤེས་པར་གྱུར་པ་ལ། །བརྟན་པ་དག་ཏུ་མི་བྱེད་དེ། །སྲིད་པ་མེད་པ་འདོད་པར་འགྱུར། ཤཱ་རིའི་བུ། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པ་སྟེ། དེ་ལ་བརྩོན་པའི་བྱང་ཆུབ་སེམས་དཔའ་དག་ཀྱང་བྱང་ཆུབ་ཀྱི་སྤྱད་པ་སྤྱོད་ དོ༑ ༑སྦྱིན་པའི་ཕ་རོལ་ཏུ་ཕྱིན་པའི་ལེའུ་སྟེ། དྲུག་པའོ།། །།བམ་པོ་དགུ་པ། དེ་ལ་གང་ལ་བརྩོན་པས་བྱང་ཆུབ་སེམས་དཔའ་བྱང་ཆུབ་ཀྱི་སྤྱད་པ་སྤྱོད་པར་ འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཞེ་ན། ཤཱ་རིའི་བུ། འདི་གསུམ་ནི། བྱང་ཆུབ་སེམས་དཔའ་རྣམས་ཀྱིས་ལེགས་ པར་སྤྱོད་པ་སྟེ། གསུམ་གང་ཞེ་ན། ལུས་ཀྱིས་ལེགས་པར་སྤྱོད་པ་དང༌། ངག་གིས་ལེགས་པར་སྤྱོད་པ་དང༌། ཡིད་ཀྱིས་ལེགས་པར་སྤྱོད་པའོ། །དེ་ལ་ལུས་ཀྱིས་ལེགས་པར་ སྤྱོད་པ་གང་ཞེ་ན། འདི་ལ་ཤཱ་རིའི་བུ། བྱང་ཆུབ་སེམས་དཔའ་ནི། སྲོག་གཅོད་པ་སྤངས་པ་ཡིན། མ་བྱིན་པར་ལེན་པ་སྤངས་པ་ཡིན། འདོད་པ་ལ་ལོག་པར་གཡེམ་པ་སྤངས་ པ་ཡིན་ཏེ། འདི་ནི། ལུས་ཀྱིས་ལེགས་པར་སྤྱོད་པ་ཞེས་བྱའོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་ནི། བརྫུན་དུ་སྨྲ་བ་སྤངས་པ་ཡིན། །ཕྲ་མ་དང༌། ངག་རྩུབ་ ༄༅། །པོ་དང༌། ཚིག་ཀྱལ་པ་སྤངས་པ་ཡིན་ཏེ། འདི་ནི། ངག་གིས་ལེགས་པར་སྤྱོད་པ་ཞེས་བྱའོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་ནི། བརྣབ་སེམས་ མེད༑ གནོད་སེམས་མེད་ཅིང་ཡང་དག་པར་ལྟ་བ་ཡིན་ཏེ། འདི་ནི། ཡིད་ཀྱིས་ལེགས་པར་སྤྱོད་པ་ཞེས་བྱའོ། །དེ་འདི་སྙམ་དུ་སེམས་ཏེ། ལུས་ཀྱིས་ལེགས་པར་སྤྱོད་པ་གང༌། ངག་གིས་ལེགས་པར་སྤྱོད་པ་གང༌། ཡིད་ཀྱིས་ལེགས་པར་སྤྱོད་པ་གང་ཡིན་སྙམ་མོ། །དེ་ཡང་འདི་སྙམ་དུ་སེམས་ཏེ། ལུས་ཀྱི་ལས་གང་སྲོག་གཅོད་པ་དང༌། མ་བྱིན་པར་ ལེན་པ་དང༌། འདོད་པ་ལ་ལོག་པར་གཡེམ་པ་མ་བྱས་པ་དེ་ནི། ལུས་ཀྱིས་ལེགས་པར་སྤྱོད་པ་ཞེས་བྱའོ་སྙམ་མོ། །དེ་ལ་ངག་གིས་ལེགས་པར་སྤྱོད་པ་གང་ཞེ་ན། དེ་འདི་སྙམ་ དུ་སེམས་ཏེ། ངག་གི་ལས་གང་བརྫུན་དུ་སྨྲ་བ་དང༌། ཕྲ་མ་དང༌། ངག་རྩུབ་མོ་དང༌། ཚིག་ཀྱལ་པ་མ་སྨྲས་པ་དེ་ནི། ངག་གིས་ལེགས་པར་སྤྱོད་པ་ཞེས་བྱའོ། །སྙམ་མོ། །དེ་ལ་ཡིད་ ཀྱིས་ལེགས་པར་སྤྱོད་པ་གང་ཞེ་ན། དེ་ལ་འདི་སྙམ་དུ་སེམས་ཏེ། ཡིད་ཀྱི་ལས་གང་བརྣབ་སེམས་དང༌། གནོད་སེམས་དང༌། ལོག་པར་ལྟ་བ་མ་བྱས་པ་དེ་ནི། ཡིད་ཀྱིས་ལེགས་པར་ སྤྱོད་པ་ཞེས་བྱའོ། །སྙམ་མོ། །དེ་འདི་ལྟར་ཚུལ་བཞིན་སོ་སོར་རྟོག་སྟེ། ལས་གང་ལུས་ཀྱིས་མ་བྱས་པ་དང༌། ལས་གང་དག་དང༌། ཡིད་ཀྱིས་མ་བྱས་པ་དེ་ཅི་གདགས་བར་ནུས་སམ། དེ་འདི་ལྟར་ཚུལ་བཞིན་གྱིས་རྟོག་པ་ན་འདི་སྙམ་དུ་སེམས་ཏེ། ལས་གང་ལུས་ཀྱིས་མ་བྱས་པ་དང༌། ལས་གང་དག་དང༌། ཡིད་ཀྱིས་མ་བྱས་པ་དེ། སྔོན་པོའམ། སེར་པོའམ། དམར་པོའམ། དཀར་པོའམ། ལེབ་རྒན་ནམ། ཤེལ་གྱི་ཁ་དོག་ཏུ་གདགས་པར་མི་ནུས་ཏེ། མིག་གིས་ཤེས་པར་བྱ་བ་མ་ཡིན། རྣ་བས་ཤེས་བར་བྱ་བ་མ་ཡིན། སྣས་ཤེས་པར་བྱ་བ་མ་ཡིན། ལྕེས་ཤེས་པར་བྱ་བ་མ་ཡིན། ལུས་ཀྱིས་ཤེས་པར་བྱ་བ་མ་ཡིན། ཡིད་ཀྱིས་ཤེས་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་དེ་ནི། སྐྱེས་པ་མ་ཡིན། བསྐྱེད་པ་མ་ཡིན། བྱུང་ བ་མ་ཡིན། ཟིན་པ་མ་ཡིན་ཏེ། དེ་ནི། ལས་གང་གིས་ཀྱང་ཤེས་པར་བྱ་བ་མ་ཡིན་ནོ། །དེ་འདི་སྙམ་དུ་སེམས་ཏེ། ཚུལ་ཁྲིམས་དེ་ནི། གང་མངོན་པར་འདུས་མ་བྱས་པའོ། །གང་མངོན་ པར་འདུ་མི་བྱེད་པ་དེ་ལ་གདགས་པ་གང་ཡང་མེད་དོ། །གང་གདགས་པ་མེད་པ་དེ་ལ་བདག་མངོན་པར་ཆགས་པར་མི་བྱའོ། །སྙམ་ནས་དེ་འདི་ལྟར་ལེགས་པར་སྤྱད་པའི་ཚུལ་ཁྲིམས་ཀྱང་ཡང་ དག་པར་རྗེས་སུ་མི་མཐོང་ངོ༌། །གང་གི་ཚུལ་ཁྲིམས་དེ་དང༌། ཚུལ་ཁྲིམས་དེ་གང་དུ་བསྔོ་བ་དེ་ཡང་ཡང་དག་པར་རྗེས་སུ་མི་མཐོང་ངོ༌། །དེ་དེ་ལྟར་མཐོང་བས་འཇིག་ཚོགས་ལ་ལྟ་བ་གང་གིས་ ཚུལ་ཁྲིམས་སམ། འཆལ་བའི་ཚུལ་ཁྲིམས་ལ་སོ་སོར་རྟོག་པར་འགྱུར་བའི་འཇིག་ཚོགས་ལ་ལྟ་བ་མི་སློང་ངོ༌། །དེ་དེ་ལྟར་མཐོང་བས་སྡོམ་པ་དང༌། ཆོ་ག་དང༌། སྤྱོད་པ་དང༌། སྤྱོད་ཡུལ་ ༄༅། །ཤེས་བཞིན་དུ་སྤྱོད་པར་འགྱུར་ཏེ། ཤེས་བཞིན་དུ་སྤྱོད་པས་ཚུལ་ཁྲིམས་དང་ལྡན་པ་ཞེས་བྱའོ། །དེ་བདག་ཏུ་དམིགས་ཤིང་མི་སྤྱོད། ཕ་རོལ་ཏུ་དམིགས་ ཤིང་མི་སྤྱོད་དེ། དེ་ཚུལ་ཁྲིམས་མ་ཉམས་པ་དང༌། ཚུལ་ཁྲིམས་མཆོག་ཏུ་མི་འཛིན་པ་ཡིན་ནོ། །བདག་ཏུ་དམིགས་ན། ཚུལ་ཁྲིམས་སུ་དམིགས་པར་འགྱུར་གྱི། གང་བདག་ཏུ་ མི་དམིགས་པ་དེ་ནི། ཚུལ་ཁྲིམས་སུ་མི་དམིགས་སོ། །གང་ཚུལ་ཁྲིམས་སུ་མི་དམིགས་པ་དེ་ནི། བསླབ་པ་ཉམས་པར་མི་བྱེད་དོ། །གང་བསླབ་པ་ཉམས་པར་མི་བྱེད་པ་དེ་ཚུལ་ ཁྲིམས་ཉམས་པར་མི་བྱེད་དེ། ཚུལ་ཁྲིམས་མཆོག་ཏུ་མི་འཛིན་ཏོ། །ཅིའི་ཕྱིར་མཆོག་ཏུ་མི་འཛིན་ཅེ་ན། དེས་གཞན་ལས་ཆོས་ཐམས་ཅད་ཤེས་སོ། །གཞན་གང་ཡིན་པ་དེ་ལ་བདག་ མེད་དོ༑ ༑གང་བདག་མེད་པ་དེ་ལ་ཅི་ཞིག་ཡོངས་སུ་གཟུང་བར་བྱ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ལུས་ཀྱིས་དག་ཅིང་ངག་གིས་དག་པ་ དང༌། །ཡིད་ཀྱིས་དག་ཅིང་རྟག་ཏུ་སྤྱོད་པ་དག །དག་པའི་བརྟུལ་ཞུགས་ལ་ནི་རྟག་གནས་པ། །དེ་ནི་བྱང་ཆུབ་སེམས་དཔའ་ཚུལ་ཁྲིམས་ལྡན། །ཤིན་ཏུ་བཟང་པོའི་ལས་ལམ་བཅུ་པོ་འདི།། གང་དག་སྲུང་བ་བྱང་ཆུབ་སེམས་དཔའ་མཁས། །ལུས་དང་ངག་དང་ཡིད་ཀྱིས་གང་མ་བྱས། །དེ་ནི་མཁས་པ་ཚུལ་ཁྲིམས་ལྡན་ཞེས་བྱ། །གང་དག་མ་བྱས་མ་བསྐྱེད་མི་ལེན་པ། །དེ་ལ་ ཁ་དོག་མེད་ཅིང་དབྱིབས་ཀྱང་མེད། །གང་ལ་ཁ་དོག་མེད་ཅིང་དབྱིབས་མེད་པ། །དེ་ལ་གདགས་པ་ནམ་ཡང་མ་དམིགས་སོ། །རྟག་ཏུ་ཚུལ་ཁྲིམས་མ་བྱས་འདུས་མ་བྱས། །དེ་ནི་མིག་གིས་ བལྟ་བར་མི་ནུས་ཏེ། །རྣ་བ་སྣ་དང་ལྕེ་ཡིས་ཤེས་མ་ཡིན། །ལུས་དང་ཡིད་ཀྱིས་ཤེས་པར་བྱ་མ་ཡིན། །གང་དེ་དབང་པོས་ཤེས་པར་མི་ནུས་པ། །དེ་ལ་སྙིང་རྗེ་འཇུག་པར་ནུས་མ་ཡིན། །དེ་ ལྟར་ཚུལ་ཁྲིམས་ཡང་དག་མཐོང་བ་དེ། །ནམ་ཡང་ཚུལ་ཁྲིམས་དམིགས་པར་མི་གནས་སོ། །ཚུལ་ཁྲིམས་ལྡན་ཞེས་ཡིད་ཀྱིས་མི་སྙེམས་ཤིང༌། །བདག་ཏུ་འཛིན་པ་ཚུལ་ཁྲིམས་མི་ སྲུང་སྟེ༑ ༑ཚུལ་ཁྲིམས་སྲུང་ཡང་ཚུལ་ཁྲིམས་འདུ་ཤེས་མེད། །དེ་ནི་ཁྲིམས་ལྡན་བྱང་ཆུབ་སྤྱད་སྤྱོད་པ། །འཇིག་ཚོགས་ལ་ནི་ལྟ་བ་གང་སེལ་བ། །ད་ནི་ལྟ་བར་ནམ་ཡང་མི་འགྱུར་རོ།། གང་ལ་ལྟ་མེད་དེ་ལ་གནས་མེད་དེ། །ཚུལ་ཁྲིམས་འཆལ་དང་ཚུལ་ཁྲིམས་དེ་མི་སྙེམས། །ཆོས་ཀྱི་ཚུལ་ལ་འཇུག་པ་ཀུན་སྲུང་བ། །དེ་ཡི་ཆོ་ག་བསམ་དུ་མེད་པར་འགྱུར། །རབ་ཏུ་ འབྱུང་ཞིང་རབ་ཏུ་སྲུང་བ་ནི། །ཚུལ་ཁྲིམས་ལྡན་དེ་གཞན་ལ་རྩོད་མི་བྱེད། །བདག་མེད་འདུ་ཤེས་ཚུལ་ཁྲིམས་མི་དམིགས་ཏེ། །བདག་མེད་དེ་ལ་ཚུལ་ཁྲིམས་དམིགས་པའང་མེད། བདག་དང་དེ་བཞིན་ཚུལ་ཁྲིམས་གང་སྙེམས་པ། །རྟག་ཏུ་འཇིག་པའི་མཐའ་ཞེས་ངས་བཤད་དོ། །བདག་མེད་སྨྲ་བ་ཚུལ་ཁྲིམས་མི་སེམས་ཏེ། །བདག་མེད་སྨྲ་བ་ཚུལ་ཁྲིམས་གནས་ ༄༅། །མ་ཡིན༑ ༑བདག་མེད་སྨྲ་བ་ཚུལ་ཁྲིམས་མི་སེམས་ཏེ། །བདག་མེད་སྨྲ་བ་ཚུལ་ཁྲིམས་རྟོག་མ་ཡིན། །ཚུལ་ཁྲིམས་མ་ཉམས་ཚུལ་ཁྲིམས་སྐྱོན་མེད་པ། ། བདག་ནི་ཚུལ་ཁྲིམས་ལྡན་ཞེས་མི་སློང་ངོ༌། །གང་ལ་བདག་མེད་ཚུལ་ཁྲིམས་འདུ་ཤེས་མེད། །ཤེས་རབ་ཟབ་མོ་བྱང་ཆུབ་སྤྱད་པ་སྤྱོད། །འཇིགས་མེད་གང་དག་ཚུལ་ཁྲིམས་ འདི་འདྲ་བ། །ནམ་ཡང་ཚུལ་ཁྲིམས་འཆལ་བར་དེ་མི་འགྱུར། །ཐམས་ཅད་ཆོས་ནི་གང་དག་མི་དམིགས་པ། །དེ་ཡི་ཚུལ་ཁྲིམས་དེ་ནི་འཕགས་པས་བསྔགས། །བྱིས་པ་གང་ དག་བདག་ཏུ་ལྟ་གནས་ཏེ། །བདག་ནི་ཚུལ་ཁྲིམས་ལྡན་ཞེས་ཁྲིམས་སྲུང་ཞིང༌། །བསྲུངས་ཀྱང་ཚུལ་ཁྲིམས་འབྲས་བུ་མྱོང་བ་དེ། །ངན་འགྲོ་གསུམ་པོ་ཀུན་ལས་མི་ཐར་ཏོ། །གང་དག་བདག་ ཏུ་ལྟ་བ་ཀུན་སྤངས་པ། །དེ་ནི་ང་དང་ང་ཞེས་བྱ་མི་འབྱུང༌། །ཚུལ་ཁྲིམས་ལྡན་པ་དེ་ལ་ལྟ་མེད་པ། །དེ་ནི་ཕྱིར་ཡང་ལོག་ལྟུང་མི་འཇིགས་སོ། །འདི་འདྲ་བ་ཡི་ཚུལ་ཁྲིམས་གང་ཤེས་པ། ། དེ་ལ་འཆལ་བའི་ཚུལ་ཁྲིམས་ལྟ་མི་ནུས། །སྲིད་པ་གསུམ་ན་དེ་བདག་མི་མཐོང་ན། །ཁྲིམས་དང་ཚུལ་འཆལ་མཐོང་འགྱུར་སྨོས་ཅི་དགོས། །ཤཱ་རིའི་བུ། དེ་ལྟར་ཚུལ་ཁྲིམས་སྤྱོད་ པའི་བྱང་ཆུབ་སེམས་དཔའི་བསམ་པའི་ཆོས་བཅུ་འདུས་པར་འགྱུར་རོ། །བཅུ་གང་ཞེ་ན། དད་པའི་བསམ་པ་འདུས་པར་འགྱུར་པ་དང༌། བརྩོན་འགྲུས་ཀྱི་བསམ་པ་འདུས་པར་ འགྱུར་བ་དང༌། རབ་ཏུ་འདུན་པ་དང༌། ལས་ཀྱི་རྣམ་པར་སྨིན་པ་རྒྱ་ཆེན་པོ་ལ་དད་པ་དང༌། འཕགས་པ་ལ་ལྡང་བ་བྱེད་པ་དང༌། བླ་མ་ལ་རིམ་གྲོ་བྱེད་པ་དང༌། སློབ་དཔོན་ལ་བསྙེན་བཀུར་ བྱེད་པ་དང༌། ཆོས་ཚོལ་བ་ལ་འཇུག་པར་བྱེད་པ་དང༌། བྱང་ཆུབ་ཡོངས་སུ་ཚོལ་ཞིང་ལུས་དང་སྲོག་ལ་མི་ལྟ་བར་བྱེད་པ་སྟེ། ཤཱ་རིའི་བུ། དེ་ལྟར་ཚུལ་ཁྲིམས་སྤྱོད་པའི་བྱང་ཆུབ་སེམས་ དཔའི་བསམ་པ་ཆོས་བཅུ་པོ་དེ་དག་འདུས་པར་འགྱུར་རོ། །དེ་ཆོས་བཅུ་པོ་དེ་དག་ལ་རབ་ཏུ་གནས་ནས་དགེ་བའི་ཆོས་རྣམས་ཡང་དག་པར་སྒྲུབ་བོ། །དགེ་བའི་ཆོས་གང་ཞེ་ན། འདི་ལྟ་ སྟེ༑ ལེགས་པར་སྤྱོད་པ་གསུམ་པོ་འདི་དག་ཉིད་དོ། །ལུས་དང༌། ངག་དང༌། ཡིད་ཀྱིས་ལེགས་པར་སྤྱོད་པའོ། །ལེགས་པར་སྤྱོད་པ་གསུམ་པོ་དེ་དག་ལ་རབ་ཏུ་གནས་པའི་བྱང་ཆུབ་སེམས་ དཔའ་སེམས་དཔའ་ཆེན་པོ་དེ་ནི། དེའི་བྱང་ཆུབ་གང་དང་འབྲེལ་བའི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་ལོ། །འདི་ལ་དེའི་ཆོས་ཉིད་ནི། འདི་ཡིན་ཏེ། དེ་ ལ་འདི་སྐད་ཅེས་བྱའོ། །སངས་རྒྱས་ངག་གིས་བསྔགས་པ་ཡི། །དགེ་བའི་ལས་རྣམས་ལུས་ཀྱིས་བྱེད། །གང་ལས་ཐོས་པ་རྙེད་འགྱུར་བའི། །སློབ་དཔོན་དང་ཡང་རིམ་གྲོ་བྱེད། །སེམས་ ཅན་ཐམས་ཅད་དོན་གྱི་ཕྱིར། །བྱམས་པའི་སེམས་ལྡན་ཕྲག་དོག་མེད། །ཆོས་ལ་བརྩམས་ཏེ་གང་ཟག་ལ། །རི་མོ་དག་ནི་རབ་ཏུ་བྱེད། །ངག་ནི་ཤིན་ཏུ་སྡོམ་གྱུར་ཏེ། །དེ་ནི་མི་སྙན་ཚིག་ ༄༅། །མི་སྨྲ༑ ༑འདི་ནི་འདུན་དང་ལྡན་པའི་མཚན། །ནམ་དུའང་ངག་རྩུབ་མོ་སྨྲ་འོ། །ཡིད་ནི་དགེ་བའི་ཡིད་དུ་འགྱུར། །ནམ་དུའང་སྡིག་པ་མི་འདོད་དེ། བྱམས་ སེམས་གུས་དང་བཅས་པ་ཡི། །བསམ་པ་ཉིད་ཀྱིས་རྟག་ཏུ་བལྟ། །རྒྱལ་བས་བསྟན་པ་ཐོས་གྱུར་ནས། །ཆོས་འདི་ལ་ནི་གུས་དང་བཅས། །ཆོས་ལ་གུས་པར་བྱས་པས་ན། །མྱུར་དུ་ བྱང་ཆུབ་རྣམ་འཚང་རྒྱ། །ཆོས་བཅུ་པོ་དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་ནི། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཡོངས་སུ་ཚོལ་བས་སློབ་དཔོན་ལ་རིམ་གྲོ་ དང༌། བསྙེན་བཀུར་བྱེད་དེ། ཐ་ན་ཆུ་རྫ་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་སེམས་བསྐྱེད་པ་བཅུ་བསྐྱེད་དེ། བཅུ་གང་ཞེ་ན། ཀྱེ་མའོ་ ལུས་འདི་ནི། ན་བ་སྟེ། ཁམས་ནི། སྦྲུལ་གདུག་པ་བཞིན་དུ་རྟག་པར་ཕན་ཚུན་མི་འཕྲོད་པའོ། །སྡུག་བསྔལ་མང་བའོ། །ཉེས་པ་མང་བའོ། །སྨྱོ་བ་དང༌། འབྲས་དང༌། ཕོལ་ མིག་དང༌། མེ་དཔལ་དང༌། གཡན་པ་དང༌། རླུང་དང༌། མཁྲིས་པ་དང༌། བད་ཀན་གྱིས་གང་སྟེ་ནད་དང་འདྲ། ཕོལ་མིག་དང་འདྲ། ཟུག་རྔུ་དང་འདྲ། ཆུ་བོ་དང་འདྲ། གནོད་པ་དང་ འདྲ༑ གཡོ་བ། འཇིག་པ། སྙིང་པོ་མེད་པ། ཉམ་ཆུང་བ། ཤིག་ཤིག་པོ། །ཡུན་ཐུང་བ། སྐད་ཅིག་པ། དུར་ཁྲོད་དུ་འཇིག་པ་སྟེ། སྙིང་པོ་མེད་པའི་ལུས་ལས་སྙིང་པོ་བླང་ངོ༌། ། སྙམ་དུ་སེམས་བསྐྱེད་པ་དང་པོ་དེ་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དེ། ཐ་ན་ཆུ་ཕོར་ གང་ཙམ་ཡང་འབུལ་ལོ། །བཅོམ་ལྡན་འདས་ཀྱིས་དེ་སྐད་གསུངས་ཏེ་བདེ་བར་གཤེགས་པས་དེ་སྐད་བཀའ་སྩལ་ནས་སྟོན་པས་ཡང་འདི་སྐད་གསུང་ངོ༌། །ཁམས་ནི་སྦྲུལ་གདུག་མ་རུངས་ པ༑ ༑བཞི་པོ་གཅིག་ལ་གཅིག་བརྟེན་ཏེ། །རེ་རེ་ཡང་ནི་འཁྲུགས་པ་ལས། །ནད་པོ་ཆེ་ནི་འབྱུང་བར་འགྱུར། །མིག་ནད་དང་ནི་རྣ་ནད་དང༌། །སྣ་ནད་དང་ནི་དེ་བཞིན་དུ། །སོ་ནད་དང་ནི་མཆུ་ ནད་རྣམས། །གཞན་ཡང་ལུས་ལས་འབྱུང་བར་འགྱུར། །སྨྱོ་དང་འབྲས་དང་ཕོལ་མིག་དང༌། །མེ་དབལ་གཡན་པ་རྣམས་དང་ནི། །ནད་གཞན་རྣམ་པ་མང་པོ་དག །ལུས་ལས་སུ་ནི་འབྱུང་བར་ འགྱུར༑ ༑ལུས་འདི་ནད་དང་མཚུངས་པ་སྟེ། །ལུས་ནི་འབྲུམ་བུ་འདྲ་བའོ། །ལུས་འདི་གནོད་པ་འདྲ་བ་སྟེ། །ཡུན་ཐུང་སྐད་ཅིག་འདུས་པའོ། །དུར་ཁྲོད་དུ་ནི་འགྲོ་ཞིང་འཇིག །མི་རྟག་མི་བརྟན་ གཡོ་བ་སྟེ། །རབ་ཏུ་འཇིག་ཅིང་ན་བ་དང༌། །ལུས་འདི་རྣག་གིས་གང་བ་སྟེ། །ཤིག་ཤིག་པོ་དང་ཡུན་ཐུང་བ། །རྣག་གིས་གང་བའི་ལུས་འདི་ཡིས། །སངས་རྒྱས་ཀྱི་ནི་སྐུ་ཡི་ཕྱིར། །དགེ་ བའི་ལས་རྣམས་བསྒྲུབ་པར་བྱ། །ཐམས་ཅད་དུ་ནི་རབ་ཟག་པ། །རྣག་གིས་གང་བའི་ལུས་འདི་ཡིས། །ཆོས་སྐུ་བསམ་གྱིས་མི་ཁྱབ་པ། །སངས་རྒྱས་ཀྱི་ནི་སྐུ་འགྲུབ་བོ། །གང་ན་གཞན་གྱིས་ ༄༅། །ཐོབ་མེད་པ། །དེ་འདྲའི་ལུས་ནི་ཐོབ་པར་བྱ། །ཚ་བ་དག་ཀྱང་གང་སྒྲིབ་དང༌། །བསིལ་བ་དག་ཀྱང་རབ་སྲུང་བ། །ལུས་འདི་ཡང་ནི་རྒ་བ་དང༌། །འཆི་བ་དག་གིས་ གཞོམ་པར་འགྱུར། །གང་དག་གྲང་དང་ཚ་བཟོད་པ། །ལུས་ཀྱིས་སུ་ནི་ཐམས་ཅད་དུ། །སྐྱེས་བུའི་བྱ་བ་བྱེད་པ་ཡི། །མཆོག་གིས་ལུས་ནི་ཐོབ་པར་འགྱུར། །འཇིག་རྟེན་གྲགས་པའི་བླ་མ་ལ། ། རིམ་གྲོ་དག་ནི་རབ་བྱ་སྟེ། །སྙིང་པོ་མེད་པའི་ལུས་ལས་སུ། །སྙིང་པོ་དག་ནི་བླངས་པར་འགྱུར། །ཤཱ་རིའི་བུ། སེམས་བསྐྱེད་པ་དང་པོ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་ སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དེ། ཐ་ན་ཆུ་རྫ་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ། བྱང་ ཆུབ་སེམས་དཔའ་འདི་ལྟར་སེམས་བསྐྱེད་དེ། ཀྱེ་མའོ་ལུས་འདི་ནི། སྙིང་པོ་མེད་པ་སྟེ། རྟག་ཏུ་དྲིལ་བ་དང༌། བཀྲུ་བ་དང༌། མཉེ་བ་དང༌། འཇིག་པ་དང༌། འགྱེས་པ་དང༌། འབྲལ་ བའི་ཆོས་ཅན་ནོ། །ཤཱ་རིའི་བུ། འདི་ལྟ་སྟེ། དཔེར་ན། ཇི་ཙམ་དུ་རྫ་མཁན་གྱི་བུམ་པ་ཆུང་ཚད་དང༌། ཆ་ཚད་བྱས་པ་ཐམས་ཅད་ཀྱང་མཐར་འཇིག་གོ །དེ་བཞིན་དུ་ཀྱེ་མའོ་ལུས་འདི་ ཡང་སྙིང་པོ་མེད་པ། སོམ་བཏང་བའི་སྣོད་བཞིན་ཏེ། མཐར་འཇིག་པའོ། །ཤཱ་རིའི་བུ། འདི་ལྟ་སྟེ། དཔེར་ན། ཤིང་གི་ཡལ་གའི་འདབ་མ་དང༌། མེ་ཏོག་དང༌། འབྲས་བུ་ཇི་སྙེད་པ་དེ་ ཐམས་ཅད་ཀྱང་མཐར་ལྟུང་བར་འགྱུར་རོ། །ཤཱ་རིའི་བུ། དེ་བཞིན་དུ་ཀྱེ་མའོ་ལུས་འདི་ནི། སྙིང་པོ་མེད་དེ། འབྲས་བུ་སྨིན་པ་བཞིན་དུ་ལྟུང་བའི་ཆོས་ཅན་ནོ། །ཤཱ་རིའི་བུ། འདི་ལྟ་སྟེ། དཔེར་ ན༑ རྩྭའི་རྩེ་མོའི་ཟིལ་བའི་ཐིགས་པ་ཇི་སྙེད་པ་དེ་དག་ཐམས་ཅད་ཀྱང་ཉི་མས་ཕོག་ན་རིང་པོར་མི་གནས་སོ། །ཤཱ་རིའི་བུ། དེ་བཞིན་དུ་ཀྱེ་མའོ་ལུས་འདི་ནི། སྙིང་པོ་མེད་པ་སྟེ། ཟིལ་བའི་ ཐིགས་པ་བཞིན་དུ་རིང་པོར་མི་གནས་པའོ། །ཤཱ་རིའི་བུ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་དང༌། འབབ་ཆུ་དང༌། འབབ་ཆུའི་རྒྱུན་ལ་ལྦུ་བ་རྡོས་པ་ཡོད་པ་ཇི་སྙེད་པ་དེ་དག་ཐམས་ ཅད་ཀྱང་སྙིང་པོ་མེད་དེ། རང་བཞིན་གྱིས་ཉམ་ཆུང་པའོ། །ཤཱ་རིའི་བུ། དེ་བཞིན་དུ་ཀྱེ་མའོ་ལུས་འདི་ནི། སྙིང་པོ་མེད་པ་སྟེ། ལྦུ་བ་རྡོས་པ་ལྟར་རང་བཞིན་གྱིས་ཉམ་ཆུང་བའོ། །ཤཱ་ རིའི་བུ༑ འདི་ལྟ་སྟེ། དཔེར་ན། ཆར་འབབ་པའི་ཆུའི་ཆུ་བུར་གཞན་སྐྱེ་ཞིང་གཞན་འགག་གོ །ཤཱ་རིའི་བུ། དེ་བཞིན་དུ་ཀྱེ་མའོ་ལུས་འདི་ནི། སྙིང་པོ་མེད་པ་སྟེ། ཆུའི་ཆུ་བུར་ལྟར་རང་ བཞིན་གྱིས་ཉམ་ཆུང་བའོ། །འདི་ལྟར་སྙིང་པོ་མེད་པའི་ལུས་ལས་སྙིང་པོ་བླང་ངོ༌། །སྙམ་དུ་སེམས་བསྐྱེད་པ་གཉིས་པ་དེ་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་ ༄༅། །པ་འདི་དག་གསུངས་སོ། །ཇི་ལྟར་རྫ་མའི་མཁན་པོ་ཡིས། །ས་ལས་སྣོད་རྣམས་བྱས་པ་དག །དེ་དག་ཐམས་ཅད་མཐར་འཇིག་སྟེ། །སེམས་ཅན་སྲོག་ཀྱང་ དེ་དང་འདྲ། །ཇི་ལྟར་ཤིང་གི་ཡལ་ག་ཡི། །ལོ་མ་མེ་ཏོག་འབྲས་བུ་རྣམས། །ཐམས་ཅད་ལྟུང་བའི་ཆོས་ཅན་ཏེ། །མི་ཡི་སྲོག་ཀྱང་དེ་བཞིན་ནོ། །རྩྭ་མཆོག་དག་གི་ཟིལ་བའི་ཐིགས། །ཉི་ མ་ཡོངས་སུ་བབ་པ་ན། །ཡུད་ཙམ་གྱིས་ནི་མེད་འགྱུར་ཏེ། །མི་ཡི་སྲོག་ཀྱང་དེ་བཞིན་ནོ། །ཇི་ལྟར་འབབ་ཆུའི་རྒྱུན་རྣམས་ཀྱི། །ལྦུ་བ་རྡོས་པ་ཉམ་ཆུང་བ། །དེ་ལྟར་ལུས་ནི་ཉམ་ཆུང་སྟེ། ། སྙིང་པོ་མེད་པ་ལྦུ་བ་འདྲ། །ཇི་ལྟར་ཆར་བ་བབ་པ་ཡིས། །ཆུ་ཡི་ཆུ་བུར་སྐྱེས་པ་ཡང༌། །སྐད་ཅིག་གིས་ནི་དེ་འཇིག་འགྱུར། །དེ་བཞིན་ལུས་ཀྱང་སྙིང་པོ་མེད། །སྙིང་པོ་མ་ཡིན་སྙིང་པོར་ ཤེས༑ ༑སྙིང་པོ་སྙིང་པོ་མ་ཡིན་འཛིན། །དེ་དག་ལོག་རྟོག་སྤྱོད་ཡུལ་ཏེ། །སྙིང་པོ་ཁོང་དུ་ཆུད་མ་ཡིན། །སྙིང་པོ་མེད་ལ་སྙིང་མེད་པ། །སྙིང་པོ་སྙིང་པོར་ཤེས་པ་ནི། །དེ་དག་ཡང་དག་རྟོག་ པའི་ཡུལ། །སྙིང་པོ་ཁོང་དུ་ཆུད་པ་ཡིན། །སྙིང་པོར་འདུ་ཤེས་བྱས་གྱུར་ཏེ། །རྫ་གང་ཙམ་གྱི་ཆུ་འབུལ་བ། །སྙིང་པོ་མེད་པའི་ལུས་ལས་ནི། །སྙིང་པོ་དག་ནི་ལེན་པར་འགྱུར། །ཤཱ་རིའི་ བུ༑ སེམས་བསྐྱེད་པ་གཉིས་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང༌། བསྙེན་ བཀུར་བྱེད་དེ། ཐ་ན་ཆུ་ཕོར་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བདག་ཡུན་རིང་པོར་དགེ་བའི་བཤེས་གཉེན་དང་བྲལ་ཞིང་ མི་དགེ་བའི་བཤེས་གཉེན་གྱི་དབང་དུ་སོང་སྟེ། ལེ་ལོ་ཅན། བརྩོན་འགྲུས་ཉམས་པ། སྙོམས་ལས་ཅན། བླུན་པ། ལོག་པར་ལྟ་བ་སྟེ། མཆོད་སྦྱིན་ཡང་མེད། སྦྱིན་སྲེག་ཀྱང་མེད། ལེགས་བྱས་དང་ཉེས་བྱས་ཀྱི་ལས་རྣམས་བྱས་པའི་འབྲས་བུ་རྣམ་པར་སྨིན་པ་བསགས་པ་ཡང་མེད་པར་ལྟ་བ་དང༌། འདོད་པའི་ཟིལ་གྱིས་ནོན་ཏེ། བདག་གིས་མི་དགེ་བའི་ལས་མང་པོ་ མངོན་པར་འདུས་བྱས་ཏེ། མི་དགེ་བའི་ལས་ཀྱི་རྣམ་པར་སྨིན་པ་དེས་འདི་ལྟ་སྟེ། ཡི་དྭགས་ཀྱི་ཡུལ་དུ་སྦྱིན་གནས་ཐམས་ཅད་གསོ་བ་མ་ཡིན་པ་འཇིགས་སུ་རུང་བའི་ལུས་ཐོབ་སྟེ། འདི་ ལྟ་བུའི་སྦྱིན་གནས་མཉེས་པར་མ་བྱས་པས་དེས་ན་བདག་ཡི་དྭགས་སུ་གྱུར་ཏེ་ལོ་མང་པོ། །ལོ་སྟོང་ཕྲག་མང་པོ། །ལོ་བརྒྱ་སྟོང་ཕྲག་མང་པོར་མེ་མར་མུར་ཟ་ཞིང་ཆུའི་སྒྲ་ཡང་མི་ཐོས་ན། ལུས་ཀྱིས་ལྟ་ག་ལ་ཞིག་རེག་སྟེ། བདག་གིས་ནི། ད་ལྟར་མཉེས་པར་བྱས་པས་བདག་དགེ་བའི་ལུས་ཐོབ་ཀྱི། །སྦྱིན་གནས་ཐམས་ཅད་ཀྱི་ཉེ་བར་འཚོ་བར་བྱ་ཞིང༌། ལུས་དང༌། སྲོག་ ལ་མི་ལྟ་བར་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་བཙལ་བའི་ཕྱིར་སློབ་དཔོན་ལ་རིམ་གྲོ་བྱའོ། །སྙམ་དུ་སེམས་བསྐྱེད་པ་གསུམ་པ་འདི་བསྐྱེད་ནས་བྱང་ཆུབ་ ༄༅། །སེམས་དཔའ་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དོ། །ཐ་ན་ཆུ་རྫ་གང་ཙམ་ཡང་འབུལ་ལོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་ གསུངས་སོ། །ཇི་ལྟར་གྲོགས་པོ་བསྟེན་པ་དང༌། ཇི་ལྟར་ཉེ་བར་བསྟེན་པ་ལྟར། །དེ་དག་ཡང་དང་ཡང་བསྙེན་པས། །དེ་ཡང་དེ་དང་འདྲ་བར་འགྱུར། །སྡིག་པའི་གྲོགས་པོའི་དབང་སོང་ནས།། དགེ་བའི་བཤེས་གཉེན་རྣམ་པར་སྤངས། །ལེ་ལོ་ཆེ་ཞིང་བརྩོན་འགྲུས་ཉམས། །གཡོ་དང་ཕྲག་དོག་སེར་སྣ་ཅན། །བྱིན་པ་ཡོད་པར་གང་ལྟ་བ། །ཐམས་ཅད་དུ་ནི་རྣམ་སྤངས་པས།། བདག་ནི་ཡི་དྭགས་སྐྱེ་གནས་སུ། །འཇིགས་སུ་རུང་བའི་ལུས་ཐོབ་བོ། །ཡུན་རིང་དུས་སུ་འཁོར་བ་ཡི། །མུན་ནག་ཕུང་པོ་འཇིགས་པ་ན། །བཀྲེས་པ་དང་ནི་སྐོམ་པས་གཟིར། །སྡུག་བསྔལ་ མང་པོ་རྗེས་སུ་མྱོང༌། །སྦྱིན་གནས་རྣམས་ནི་མ་མཐོང་ཞིང༌། །བདག་གིས་འདི་འདྲའི་དལ་མ་ཐོབ། །ལོ་ནི་མང་པོ་སྟོང་རྣམས་སུ། །ཆུ་ཡི་སྒྲ་ཡང་ཡོང་མ་ཐོས། །ད་ལྟར་བདག་གིས་འཇིག་རྟེན་ན། ཤིན་ཏུ་དཀོན་པ་རབ་རྙེད་དེ། །བདག་གིས་སློབ་དཔོན་མཉེས་བྱས་པས། །དལ་བ་འབྱོར་བ་བདག་གིས་ཐོབ། །སྡིག་པའི་གྲོགས་པོ་རྣམ་སྤངས་པས། །བདག་གིས་དགེ་བའི་བཤེས་གཉེན་རྙེད། ། བྱང་ཆུབ་ཐོབ་པར་བྱ་བའི་ཕྱིར། །ལུས་དང་སྲོག་ལ་མི་ལྟའོ། །སངས་རྒྱས་ཀྱི་ནི་བྱང་ཆུབ་ཕྱིར། །སློབ་དཔོན་བླ་མ་མཆོད་གནས་ལ། །རྣམ་པར་དད་པའི་སེམས་ཀྱིས་སུ། །བསྟི་སྟང་གུས་པར་ རབ་ཏུ་བྱ། ཤཱ་རིའི་བུ། སེམས་བསྐྱེད་པ་གསུམ་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བས་སློབ་དཔོན་ལ་རིམ་གྲོ་ དང༌། བསྙེན་བཀུར་བྱེད་དེ། ཐ་ན་ཆུ་ཕོར་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། །བདག་ཡུན་རིང་པོར་དགེ་བའི་བཤེས་གཉེན་ དང་བྲལ་ཞིང་སྡིག་པའི་གྲོགས་པོས་ཟིན་པས་ལེ་ལོ་ཅན། བརྩོན་འགྲུས་ཉམས་པ། སྙོམས་ལས་ཅན། བླུན་པས་སེམས་ཅན་ལ་ཁུ་ཚུར་དང་ཐལ་མོས་བརྡེགས་ཤིང་གཙོས་ནས་བསྡུས་ ཤིང་ཚེ་ངེ་བཏོན་ཏེ། དེའི་གཞི་ལས་སྡིག་པ་ཡང་མེད། དེའི་གཞི་ལས་སྡིག་པ་འབྱུང་བ་ཡང་མེད་དོ། །ཞེས་དེ་ལྟར་ལྟ་བ་དང༌། དེ་ལྟར་བཟོད་པ་དང༌། དེ་ལྟར་མོས་ཤིང་ཞེ་སྡང་གི་ཟིལ་ གྱིས་ནོན་པས་མི་དགེ་བའི་ལས་རྣམས་མངོན་པར་འདུས་བྱས་ཏེ། མི་དགེ་བའི་ལས་ཀྱི་རྣམ་པར་སྨིན་པ་དེས་འདི་ལྟ་སྟེ། དུད་འགྲོའི་གནས་སུ་སྦྱིན་གནས་ཐམས་ཅད་ཉེ་བར་འཚོ་བ་མ་ཡིན་པ་ འཇིགས་སུ་རུང་བའི་ལུས་ཐོབ་སྟེ། འདི་ལྟ་བུའི་སྦྱིན་གནས་མགུ་བར་མ་བྱས་པས་དེས་ན་བདག་རྔ་མོ་དང༌། བ་ལང་དང༌། བོང་བུར་གྱུར་ཏེ་རྩྭ་ཟ་ཞིང་དུ་དབྱུག་པས་བསྡིགས། འཇིགས་པས་ བསྡིགས་ནས་མི་འདོད་བཞིན་དུ་ཁལ་བཀལ་ཏོ། །བདག་གིས་ནི། ད་ལྟར་མཉེས་པར་བྱས་ཏེ་དག་པའི་ལུས་ཐོབ་ཀྱི། ལུས་དང༌། སྲོག་ལ་མི་ལྟ་བར་སློབ་དཔོན་ལ་རིམ་གྲོ་དང༌། བསྙེན་བཀུར་ ༄༅། །བྱའོ། །ཞེས་ཤཱ་རིའི་བུ། སེམས་བསྐྱེད་པ་བཞི་པ་དེ་བསྐྱེད་ནས་བྱང་ཆུབ་སེམས་དཔའ་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ ཡང་འབུལ་ལོ། །འདིའི་ཆོས་ཉིད་ནི། འདི་ཡིན་ཏེ། དེ་ལ་འདི་སྐད་ཅེས་བྱའོ། །ཡུན་རིང་པོར་ནི་འཕགས་པའི་ལམ། །མ་རིག་པར་ནི་གནས་པས་ན། །རྔ་མོ་དག་དང་བོང་བུར་གྱུར། །སྡུག་ བསྔལ་མང་པོ་རྗེས་སུ་མྱོང༌། །མིར་གྱུར་བ་ཡང་བདག་གིས་རྙེད། །གང་གིས་བྱང་ཆུབ་རེག་འགྱུར་བའི། །བཟང་པོ་ཡི་ནི་ལས་བྱ་སྟེ། །དེ་ནི་མཁས་པའི་མཚན་ཉིད་དོ། །སངས་རྒྱས་ཆོས་ལ་ རབ་གནས་ཤིང༌། །གུས་པ་དང་ནི་ལྡན་པར་བྱ། །བྱང་ཆུབ་ཕྱིར་ནི་སློབ་དཔོན་ལ། །རིམ་གྲོ་དང་ནི་བསྟི་སྟང་བྱ། །འདས་པའི་དུས་ཀྱི་བསྐལ་བ་བསམ་མེད་ནས། །འཁོར་བའི་འཁོར་ལོར་ཡོངས་སུ་ འཁྱམས་པ་ན། །སྐྱེ་མཆེད་དག་ནི་དོན་མེད་འདས་གྱུར་ཏེ། །སྦྱིན་གནས་དག་ནི་ཉེ་བར་འཚོ་བ་ཡིན། །དགེ་བའི་བཤེས་གཉེན་ཡོངས་སུ་སྤངས་གྱུར་ནས། །རྟག་ཏུ་སྡིག་པའི་གྲོགས་པོ་རབ་ བསྟེན་ཏེ། །དེ་དག་གིས་ནི་བསྟན་པའི་རྗེས་འཇུག་ཅིང༌། །རྒྱུན་མི་འཆད་པར་ངན་སོངས་ལ་གནས། །གཙེས་པ་དང་ནི་བཅིངས་ཤིང་བརྡེགས་པ་རྣམས། །བྱེད་དུ་འཇུག་ཅིང་གཞན་ལ་སྤྱོད་ བྱས་ནས། །དེ་ཡི་འབྲས་བུ་ངན་སོང་སྐྱེ་གནས་འགྲོ། །སྡིག་པའི་ལས་ཀྱིས་སྡུག་བསྔལ་རྗེས་སུ་མྱོང༌། །དགེ་བའི་བཤེས་གཉེན་རྣམས་ནི་མ་བསྟེན་པས། རྔ་མོ་བ་ལང་དེ་བཞིན་བོང་བུ་ཡི། ། ངན་པའི་མཚམས་ཀྱི་སྐྱེ་མཆེད་བཟུང་གྱུར་ནས། །དབྱུག་པ་དག་གིས་བརྡེགས་ཤིང་ཁལ་ཀྱང་བཀལ། །མིར་གྱུར་བ་ནི་ཤིན་ཏུ་རྙེད་དཀའ་དང༌། །མཐུན་པའི་ཡུལ་དང་དགེ་བའི་བཤེས་ གཉེན་རྙེད། །ཤིན་ཏུ་ཡུན་རིང་དལ་བ་རྙེད་གྱུར་ཏེ། །དཀའ་བའི་ལས་ཀྱིས་བུ་གར་ཆུད་པ་བཞིན། །ལུས་དང་དག་ནི་ཤིན་ཏུ་བསྡམས་གྱུར་ནས། །ཞེན་པ་མེད་པའི་སེམས་ཀྱིས་བརྩོན་འགྲུས་ བརྩམས། །དགེ་བའི་བཤེས་གཉེན་དག་ལ་གཡོ་མེད་པས། །བདག་གི་ལུས་ནི་ཉེ་བར་འཚོ་བར་བྱ། །བདག་གི་སློབ་དཔོན་བླ་མ་གང་དག་དང༌། །གང་དག་བདག་གི་བྱང་ཆུབ་སེམས་བསྐྱེད་པ།། བྱང་ཆུབ་དམ་པ་མཆོག་གི་ལམ་སྟོན་ལ། །སྟོན་པ་བཞིན་དུ་དགའ་བས་བསྙེན་བཀུར་བྱ། །རྣམ་པ་སྣ་ཚོགས་དག་གིས་བྱུག་པ་དང༌། །དྲི་དང་ཕྱེ་མ་རྣམ་པ་སྣ་ཚོགས་དང༌། །གོས་དང་མེ་ཏོག་དག་ གི་ཆུན་པོ་ཡིས། །རྐང་གཉིས་དམ་པ་ལ་ནི་མཆོད་པར་བྱ། །ཕྱོགས་བཅུ་དག་ན་སངས་རྒྱས་གང་བཞུགས་པ། །སེམས་ཅན་དོན་ལ་བརྩོན་ཞིང་དོན་དམ་གཟིགས། །གསེར་གྱི་ཁ་དོག་ལྟ་བུའི་འོད་ མཛད་པ། །ཁ་དོག་མཐའ་ཡས་པ་ལ་མཆོད་པར་བྱ། །སངས་རྒྱས་མི་ཡི་ཁ་ལོ་སྒྱུར་རྣམས་ལ། །འཇིག་རྟེན་སྤྱོད་དང་མཆོད་པ་ཆེར་བྱས་པས། །གང་གིས་བྱང་ཆུབ་སྙིང་པོར་བདག་འགྲོ་བའི། ། བྱང་ཆུབ་ལམ་ནི་ཤིན་ཏུ་སྦྱངས་བར་འགྱུར། །ཤཱ་རིའི་བུ། སེམས་བསྐྱེད་པ་བཞི་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་ ༄༅། །བས་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་འདི་ལྟར་ སེམས་བསྐྱེད་དེ། བདག་ཡུན་རིང་པོར་དགེ་བའི་བཤེས་གཉེན་དང་བྲལ་ཞིང་སྡིག་པའི་གྲོགས་པོས་ཟིན་པ། ལེ་ལོ་ཅན། བརྩོན་འགྲུས་ཉམས་པ། སྙོམས་ལས་ཅན། བླུན་པས་འདི་ ལྟ་བུའི་ལྟ་བ་དང༌། འདི་ལྟ་བུའི་འདོད་པས་སེམས་ཅན་ཐམས་ཅད་དང༌། སྲོག་ཆགས་ཐམས་ཅད་ཀྱི་ཤ་གཅིག་ཏུ་སྒྲུངས་ཤིང་ཤ་གཅིག་ཏུ་བཅེར་ཏེ། བསོད་ནམས་མ་ཡིན་པའི་ལས་ བྱེད་ཀྱང་དེའི་གཞི་ལས་སྡིག་པ་མེད། དེའི་གཞི་ལས་སྡིག་པའི་རྣམ་པ་མེད་དོ། །རྒྱ་མཚོའི་ཚུ་རོལ་གྱི་སེམས་ཅན་ཇི་སྙེད་པ་དེ་དག་ཐམས་ཅད་སྦྱིན་པས་ཚིམ་པར་བྱས་ཀྱང་དེའི་གཞི་ལས་ བསོད་ནམས་མེད། དེའི་གཞི་ལས་བསོད་ནམས་ཀྱི་རྣམ་པ་མེད་དོ། །རྒྱ་མཚོའི་ཕ་རོལ་གྱི་སེམས་ཅན་ཇི་སྙེད་པ་དེ་དག་ཐམས་ཅད་བསད་ཅིང་གཏུབས་ཀྱང་དེའི་གཞི་ལས་སྡིག་པ་མེད། དེའི་ གཞི་ལས་སྡིག་པའི་རྣམ་པ་མེད་དོ། །སྙམ་པས་དེ་ལྟར་བྱས་ཀྱང་བསོད་ནམས་དང༌། སྡིག་པ་ཡོངས་སུ་ཤེས་པར་མ་ནུས་ཏེ། སྡིག་པའི་ལྟ་བ་བསྙེན་པ་དང༌། གཏི་མུག་གིས་ཟིལ་གྱིས་ ནོན་པས། བདག་གིས་སྡིག་པ་མི་དགེ་བའི་ལས་མང་པོ་མངོན་པར་འདུས་བྱས་ཏེ། མི་དགེ་བའི་ལས་དེའི་རྣམ་པར་སྨིན་པས། འདི་ལྟ་སྟེ། སེམས་ཅན་དམྱལ་བར་དམན་པ་འཇིགས་སུ་རུང་ བའི་ལུས་ཐོབ་སྟེ། དེ་ལ་འདི་ལྟ་བུའི་སྦྱིན་གནས་མཉེས་པར་མ་བྱས་པས། དེས་ནི་བདག་ནི། སེམས་ཅན་དམྱལ་བ་བར་གྱུར་བས་ལྕགས་ཀྱི་ཐུ་ལུམ་བསྲེགས་པ་ཟ་ཞིང་གཅིག་ཏུ་སྡུག་བསྔལ་བ། རྩུབ་པ། མི་བཟད་པ། འཚོག་པ། འཆི་བའི་མཐར་ཁྲིད་པ་མྱོང་ཞིང་ལོ་སྟོང་ཕྲག་མང་པོའི་བར་དུ་བདེ་བའི་སྒྲ་ཡང་མི་ཐོས་ན། ལུས་ཀྱིས་ལྟ་ག་ལ་ཞིག་རེག་སྟེ། བདག་གིས་ནི། དེ་ལྟར་མཉེས་པར་བྱས་པས། དགེ་བའི་ལུས་ཐོབ་ཀྱི། སྦྱིན་གནས་རྣམས་ཀྱི་ཉེ་བར་འཚོ་བ་བྱ་ཞིང་ལུས་དང༌། སྲོག་ལ་མི་ལྟ་བར་སློབ་དཔོན་ལ་རིམ་གྲོ་དང༌། བསྙེན་བཀུར་བྱའོ། །ཞེས་ཤཱ་རིའི་བུ། སེམས་བསྐྱེད་པ་ལྔ་པ་དེ་ བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དེ། ཐ་ན་ཆུ་བུམ་བ་གང་ཙམ་ཡང་འབུལ་ ལོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྡིག་པའི་གྲོགས་པོ་བསྙེན་པ་དང༌། །སྡིག་པའི་སེམས་ཀྱིས་བསླུས་པས་ན། །སྡིག་པར་ལྟ་ལ་བརྟན་གྱུར་ཏེ། ། བདག་གིས་སྡིག་པའི་ལས་བྱས་སོ། །རྒྱ་མཚོ་ཡི་ནི་ཚུ་རོལ་ན། །སེམས་ཅན་གནས་པ་ཇི་སྙེད་པ། །ཟས་དང་སྐོམ་གྱིས་ཚིམ་བྱས་ཀྱང༌། །བསོད་ནམས་དག་གི་འབྱུང་གནས་མེད། །རྒྱ་མཚོ་ཡི་ནི་ཕ་ རོལ་ན། །སེམས་ཅན་གནས་པ་ཇི་སྙེད་པ། །ཐམས་ཅད་བསད་ཅིང་བཅོམ་གྱུར་ཀྱང༌། །སྡིག་པའི་འབྱུང་གནས་མེད་དོ་ཞེས། །སྡིག་པའི་ལྟ་བ་འདི་ལྟ་བུ། ཡང་དང་ཡང་དུ་བསྟེན་པས་ན། གཅིག་ ༄༅། །ཏུ་མི་བཟད་མ་རུངས་པའི། །སེམས་ཅན་དམྱལ་བར་རིང་དུ་དེངས། །རྫོགས་པའི་སངས་རྒྱས་འཇིག་རྟེན་གྱི། །ཡོངས་སུ་འདྲེན་པས་མ་མཐོང་བས། །བདག་གི་ལུས་ནི་སྟོང་ རྣམས་ཀྱང༌། །ངན་འགྲོ་དག་ནི་གསུམ་དུ་དེངས། །འདི་ནི་འཇིག་རྟེན་དགེ་བ་སྟེ། །དེ་ཡི་སྒྲ་ནི་ཐོས་གྱུར་ནས། །བདག་གིས་མི་ཡི་དངོས་ཐོབ་ཀྱི། །བཟང་པོ་ཡི་ནི་ལས་བྱའོ། །མིར་གྱུར་པ་ནི་དཀའ་ བ་སྟེ། །མི་སྲོག་ཐོབ་པའང་དཀའ་བ་ཡིན། །དམ་པའི་ཆོས་ཐོས་དཀའ་བ་སྟེ། །སངས་རྒྱས་འབྱུང་བའང་དཀའ་བ་ཡིན། །བདག་གིས་མིར་སྐྱེ་དཀའ་བ་ཡི། །ཚེ་ཐོབ་པ་ནི་གཡོ་ཞིང་འགྱུར། ། བདག་གིས་སངས་རྒྱས་འབྱུང་བ་དང༌། །རྒྱལ་བ་ཀུན་མཁྱེན་བསྟན་པ་རྙེད། །ལུས་ཀྱི་ལས་དང་ངག་གི་ལས། །ཡིད་ཀྱི་ལས་ཀྱང་སྡིག་པ་ཅན། །མི་འདོད་མི་བཟད་འབྲས་བུར་འགྱུར། །ཕྱིན་ ཆད་སྤྱད་པར་མི་བྱའོ། །བསམ་པ་རྣམ་པར་དག་པ་ཡི། །ལུས་དང་ངག་དང་ཡིད་རྣམས་ཀྱི། །འཇིག་རྟེན་རབ་ཏུ་དཀའ་སྤྱོད་པ། །བཟང་པོ་དག་གི་ལས་བྱའོ། །སངས་རྒྱས་ཀྱི་ནི་བྱང་ཆུབ་ཕྱིར། །བདག་ གི་བླ་མར་གང་གྲགས་པའི། །བཀའ་ལས་འདའ་བར་མི་བྱ་སྟེ། །བསྙེན་བཀུར་དག་ནི་རབ་ཏུ་བྱ། །ལམ་ནི་དྲང་བ་ཞེས་བྱ་བ། གཡོ་བ་མེད་པས་ནི་རབ་བསྟེན་ཏེ། །སངས་རྒྱས་ཀྱི་ནི་བྱང་ཆུབ་ཕྱིར། ། སྒྱུ་མར་འགྱུར་བར་མི་བྱའོ། །ཐབས་དང་ཤེས་རབ་ལྡན་པ་ཡི། །བྱང་ཆུབ་སེམས་དཔའ་མི་འཇིགས་པ། །དེ་ལྟ་བུར་ནི་སེམས་བསྐྱེད་ནས། །སྣོད་གང་ཙམ་གྱི་ཆུ་ཡང་འབུལ། །ཤཱ་རིའི་བུ་ སེམས་བསྐྱེད་པ་ལྔ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཡངས་སུ་ཚོལ་བས་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དེ། །ཐ་ན་ཆུ་ བུམ་པ་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། །བདག་ཡུན་རིང་པོར་དགེ་བའི་བཤེས་གཉེན་དང་བྲལ་ཞིང་སྡིག་པའི་གྲོགས་ པོས་ཟིན་པས། །འདུད་པ་དང༌། རབ་ཏུ་འདུད་པ་དང༌། གུས་པར་སྨྲ་བ་དག་ཕྱག་བྱ་བ་དང༌། ལྡང་བ་དང༌། ཐལ་མོ་སྦྱར་བའི་ལས་ཀྱི་རྣམ་པར་སྨིན་པ་མེད་དོ། །ཞེས་དེ་ལྟར་མོས་པའི་བར་གྱིས་ ང་རྒྱལ་གྱིས་ཟིལ་གྱིས་ནོན་པས་སྡིག་པ་མི་དགེ་བའི་ལས་མང་པོ་མངོན་པར་འདུས་བྱས་ཏེ། མི་དགེ་བའི་ལས་དེའི་རྣམ་པར་སྨིན་པས། འདི་ལྟ་སྟེ། མིའི་ནང་དུ་སྦྱིན་གནས་ཐམས་ཅད་ཉེ་བར་ འཚོ་བ་མ་ཡིན་པ་སྨད་པའི་ལུས་ཐོབ་སྟེ། འདི་ལྟ་བུའི་སྦྱིན་གནས་མཉེས་པར་མ་བྱས་པས་ན། དེར་བདག་མིར་གྱུར་པ་ན་མི་བཀྲེན་པ་དང༌། མི་དབུལ་པོ་དང༌། བྲན་དུ་འགྱུར་བ་དང༌། གཞན་ གྱི་དབང་དུ་སོང་བ་དང༌། འདོད་པ་ལ་ཞེན་པའི་སེམས་ཅན་རྣམས་དང༌། འདོད་པ་ལ་ཆགས་པ་རྣམས་དང༌། མི་རིགས་པའི་སྤྱོད་པ་ལ་གནས་པ་རྣམས་དང༌། ལོག་པར་ལྟ་བ་རྣམས་དང༌། ཚུལ་ཁྲིམས་ལོག་པར་ཞུགས་པ་རྣམས་དང༌། ལྟ་བ་ལོག་པར་ཞུགས་པ་རྣམས་དང༌། མི་དགེ་བའི་རྩ་བ་གསུམ་པ་ལ་རབ་ཏུ་གནས་པ་རྣམས་དང༌། འགྲོ་བར་བྱ་བ་མ་ཡིན་པའི་འགྲོ་བ་བཞི་ལ་འགྲོ་ ༄༅། །བར་ཞུགས་པ་རྣམས་དང༌། །སྒྲིབ་པ་ལྔས་བསྒྲིབས་པ་རྣམས་དང༌། བླ་མ་དྲུག་ལ་གུས་པར་མི་གནས་པ་རྣམས་དང༌། དམ་པའི་ཆོས་མ་ཡིན་པ་བདུན་ལ་འཇུག་པ་ རྣམས་དང༌། ལོག་པར་བརྒྱད་ལ་ལོག་པར་ངེས་པ་རྣམས་དང༌། གནོད་པ་དགུའི་དངོས་པོས་གནོད་པར་གྱུར་པ་རྣམས་དང༌། མི་དགེ་བ་བཅུའི་ལས་ཀྱི་ལམ་ངན་པར་ཞུགས་པ་རྣམས་ དང༌། སེམས་ཅན་དམྱལ་བའི་ལམ་ལ་མངོན་པར་ཕྱོགས་པ་རྣམས་དང༌། མཐོ་རིས་ཀྱི་ལམ་ལ་མ་ཕྱོགས་པ་རྣམས་དང༌། དགེ་བའི་བཤེས་གཉེན་དང་བྲལ་བ་རྣམས་དང༌། སྡིག་པའི་གྲོགས་ པོའི་ལག་ཏུ་སོང་བ་རྣམས་དང༌། བདུད་ཀྱི་དབང་དུ་སོང་བ་རྣམས་དང༌། དགེ་བའི་ཆོས་ཡོངས་སུ་སྤངས་པ་རྣམས་དང༌། མི་དགེ་བའི་ཆོས་ལ་སྤྱོད་པ་རྣམས་ཀྱིས་དབྱུག་པས་བསྡིགས། འཇིགས་ པས་བསྡིགས་ནས་མི་འདོད་བཞིན་དུ་བྱེད་ཅིང་རིམ་གྲོ་དང༌། བསྙེན་བཀུར་བྱེད་པར་གྱུར་ཏེ། བདག་གིས་ནི། དེ་ལྟར་དེ་དག་མཉེས་པར་བྱས་པས་དགེ་བའི་ལུས་ཐོབ་ཀྱི། སྦྱིན་གནས་ ཐམས་ཅད་ཉེ་བར་ན་ཚོ་བར་བྱའོ། །ལུས་དང༌། སྲོག་ལ་མི་ལྟ་བར་སློབ་དཔོན་ལ་རིམ་གྲོ་དང༌། བསྙེན་བཀུར་བྱའོ། །ཞེས་ཤཱ་རིའི་བུ། སེམས་བསྐྱེད་པ་དྲུག་པ་དེ་བསྐྱེད་ནས་བྱང་ཆུབ་ སེམས་དཔའ་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དེ། །ཐ་མ་ཆུ་བུམ་པ་གང་ཙམ་ཡང་འབུལ་ལོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་རབ་ཏུ་རྟོགས་སུ་གཞུག་པའི་ ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྡིག་པའི་གྲོགས་ནི་ང་རྒྱལ་རྒྱགས་འཕེལ་བ། །བསྐལ་བ་མང་པོ་རྒྱ་མཚོར་བསྟེན་པས་ན། །མི་ཡི་ནང་དུ་སྐྱེས་ཀྱང་བྲན་དུ་འགྱུར། །འཁོར་བའི་ རྒྱུན་དུ་ཡུན་རིང་དུས་སུ་འཁོར། །མི་ལུས་རབ་ཏུ་རྙེད་པར་དཀའ་བ་ཡང༌། །དེ་ནི་བདག་གིས་དཀའ་བས་ཐོབ་གྱུར་ཏེ། །གནས་པའི་ཡུལ་ནི་མཐུན་པ་བཟང་པོ་དང༌། །སངས་རྒྱས་འབྱུང་དང༌། དལ་འབྱོར་དེ་བཞིན་ནོ། །གྲོགས་པོ་གང་དག་མཆོག་ཏུ་རབ་བཟང་བ། །བྱང་ཆུབ་སེམས་དཔའི་སྤྱོད་དང་ལམ་སྟོང་ཅིང༌། །བྱང་ཆུབ་སེམས་ནི་རིན་ཆེན་འཕེལ་བྱེད་པ། །དེ་དག་བསྐལ་བ་བྱེ་བ་ མང་པོས་རྙེད། །ལུས་ནི་ཉམ་ཆུང་མི་རྟག་མི་བརྟན་ཏེ། །ལྦུ་བ་རྡོས་དང་ཆུ་ཡི་ཆུ་བུར་འདྲ། །སྒྱུ་མ་ལྟ་བུར་གར་ལ་ལྟ་དང་མཚུངས། །རྨི་ལམ་མཐོང་དང་འདྲིད་པར་སྨྲ་བ་བཞིན། །སྲོག་ནི་ཡུན་ ཐུང་ཚེ་ཡང་ཟད་པར་འགྱུར། །ཇི་ལྟར་སྤྲིན་དང་གློག་ནི་མི་གནས་ལྟར། །སྐད་ཅིག་ཏུ་ནི་དེ་བཞིན་སྲོག་ཀྱང་འགྱུར། །སྙིང་པོ་མེད་པས་སྙིང་པོ་ལེན་པར་བྱེད། །གང་གིས་འདས་པའི་དུས་ ཀྱི་བསྐལ་བ་ཡང༌། །རྒྱ་མཚོ་བརྒྱ་ཕྲག་བསམ་ཡས་བསླུས་གྱུར་པ། །ང་རྒྱལ་རི་བོ་མནྡྷར་གཞོམ་པ་ཡི། །དུས་དང་ཚོད་དང་མན་ནི་ཉེ་གནས་ཀྱི། །ལུས་ལ་སྡུག་པ་ཐམས་ཅད་རབ་སྤངས་ ནས། །སྲོག་ལ་ཆགས་པ་མེད་པའི་ཡིད་ཀྱིས་ནི། །ང་དང་རྒྱགས་དང་དྲེགས་པ་སྤངས་གྱུར་ནས། །ཡོན་ཏན་ལྡན་ལ་གུས་བཅས་རིམ་གྲོ་བྱ། །ང་དང་རྒྱགས་པ་དྲེགས་པ་སྤངས་གྱུར་ནས། ། ༄༅། །ཕ་དང་མ་དང་བུ་ཕོ་རྣམས་དང་ནི། །འཇིག་རྟེན་བླ་མ་མཆོག་ཏུ་གང་གྲགས་ལ། །གུས་དང་བཅས་ཤིང་མཆོག་གི་རིམ་གྲོ་བྱ། །བྱང་ཆུབ་སེམས་དཔའ་བྱང་ཆུབ་མཆོག་ ཞུགས་པ། །གང་དག་བདག་དང་བྱང་ཆུབ་མཐུན་སྤྱོད་ལ། །དགའ་དང་གུས་པ་བརྟན་པ་བསྐྱེད་བྱ་སྟེ། །རིམ་གྲོ་བྱ་བའི་ཕྱིར་ནི་བརྩོན་པར་བྱ། །སྐྱེ་རྒུ་ང་རྒྱལ་ལྡན་པ་ང་རྒྱལ་སྤངས། །མི་ མཁས་ང་རྒྱལ་བཅད་ཅིང་འདུལ་བའི་ཕྱིར། །ཡེ་ཤེས་རྡོ་རྗེ་དག་གིས་བཅོམ་བྱས་ནས། །རྒྱགས་དང་ང་རྒྱལ་རི་ནི་བསྙིལ་བར་བྱ། །བྱང་ཆུབ་སྤྱོད་པ་ཡོངས་སུ་རྫོགས་བྱས་ཏེ། །བྱང་ཆུབ་སྙིང་ པོ་མཆོག་ལ་གནས་གྱུར་ནས། །བདུད་ཀྱི་དཀྱིལ་འཁོར་རྩོད་པ་རྣམས་བརྟུལ་ཏེ། །ཆུ་བོ་བཞི་ལས་སྲོག་ཆགས་བསྒྲལ་བར་བྱ། །ཕྱོགས་བཅུ་དག་ན་མི་གང་ན་བ་རྣམས། །རང་གི་མི་ གཙང་བར་ལྷུང་སྨད་པ་ལ། །བྱམས་པ་དང་ནི་སྙིང་རྗེའི་ཡིད་ཀྱིས་སུ། །མགོན་དང་སྐྱབས་དང་དཔུང་གཉེན་འགྱུར་བར་བྱ། །སྦྱིན་པའི་ཕ་རོལ་ཕྱིན་པའི་དུས་ལ་བབ། །སངས་རྒྱས་ཡོན་ ཏན་བསླབ་པ་བསླབ་ནུས་ཞེས། །བཟོད་པ་བསྒོམ་པར་བྱ་བ་ཕུན་སུམ་ཚོགས། །མདུད་པ་མེད་པའི་བརྩོན་འགྲུས་བརྩམ་པར་བྱ། །བསམ་གཏན་ཕ་རོལ་ཕྱིན་ཐོབ་ཕུན་སུམ་ཚོགས། ། སེམས་འདུལ་བ་ཡི་དུས་ནི་ཉེ་བར་གནས། །ཐབས་དང་ཤེས་རབ་མཁས་ལ་གནས་གྱུར་ཏེ། །བླ་མ་ཐམས་ཅད་ལ་ནི་བསྐོར་བ་བྱ། །དེ་ལྟར་བསོད་ནམས་སྟོབས་དང་གཟི་བརྗིད་སྤེལ། ། ཤེས་རབ་ཡེ་ཤེས་མཁས་པ་བསམ་མི་ཁྱབ། །རང་དབང་དམ་པ་དག་གིས་མངོན་འཕགས་ཏེ། །བྱུར་བུར་ཡོངས་སུ་བཀང་བའི་སྣོད་བྱིན་ནོ། །ཤཱ་རིའི་བུ། བྱང་ཆུབ་སེམས་དཔའི་སེམས་བསྐྱེད་ པ་དྲུག་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་འབུལ་ ལོ༑ ༑གཞན་ཡང་ཤཱ་རིའི་བུ། བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བདག་ཡུན་རིང་པོར་དགེ་བའི་བཤེས་གཉེན་དང་བྲལ་ཞིང་སྡིག་པའི་གྲོགས་པོ་དང་ཕྲད་པས་ལེ་ལོ་ཅན། བརྩོན་འགྲུས་ཉམས་པ། སྙོམས་ལས་ཅན། བླུན་པ། ལྐུགས་པར་གྱུར་ཏེ་ལས་ནག་པོ་དང༌། ནག་པོའི་རྣམ་པར་སྨིན་པ་ཡང་མེད། ལས་དཀར་པོ་དང༌། དཀར་པོའི་རྣམ་པར་སྨིན་པ་ ཡང་མེད། ལས་དཀར་ནག་དང༌། དཀར་ནག་གི་རྣམ་པར་སྨིན་པ་ཡང་མེད། མི་ནག་ཅིང་དཀར་བའི་ལས་དང༌། མི་ནག་ཅིང་དཀར་བའི་རྣམ་པར་སྨིན་པའང་མེད་དོ། །ཞེས་དེ་ལྟར་ལྟ། དེ་ ལྟར་བཟོད། དེ་ལྟར་མོས་པས་དགེ་སྦྱོང་དང༌། བྲམ་ཟེ་ལ་བཙུན་པ་དག །དགེ་བ་གང༌། མི་དགེ་བ་གང༌། ཁ་ན་མ་ཐོ་བ་དང་བཅས་པ་གང༌། ཁ་ན་མ་ཐོ་བ་མེད་པ་གང༌། བསྟེན་པར་བྱ་བ་ གང༌། བསྟེན་པར་མི་བྱ་བ་གང༌། བྱ་བའི་རིགས་པ་གང༌། བྱ་བའི་མི་རིགས་པ་གང༌། ཅི་བྱས་ན། ཡུན་རིང་པོར་གནོད་པ་དང༌། མི་ཕན་པ་དང༌། སྡུག་བསྔལ་བར་འགྱུར། ཅི་བྱས་ན། ༄༅། །དོན་དང༌། ཕན་པ་དང༌། བདེ་བར་འགྱུར་ཞེས་མི་འདྲི་བ་དང༌། ང་རྒྱལ་གྱིས་ཟིལ་གྱིས་ནོན་པས་སྡིག་པ་མི་དགེ་བའི་ལས་མངོན་པར་འདུས་བྱས་ཏེ་མི་དགེ་ བའི་ལས་དེའི་རྣམ་པར་སྨིན་པས་འདི་ལྟ་སྟེ། སྦྱིན་གནས་ཐམས་ཅད་ཉེ་བར་འཚོ་བ་མ་ཡིན་པ། དབང་པོ་མ་ཚང་བའི་མིར་གྱུར་ནས་འདི་ལྟ་བུའི་སྦྱིན་གནས་མཉེས་པར་མ་བྱས་ པས་བདག་མིར་གྱུར་པ་ན་ཡང་ལོང་བ། ལྐུག་པ། བླུན་པ། སྒུར་པ། དིག་པ། རྨོངས་པ། འོན་པར་གྱུར་ཏེ་ལེགས་པར་བཤད་པ་དང༌། ཉེས་པར་བཤད་པའི་དོན་ཤེས་ པར་མི་ནུས་སོ། །བདག་གིས་ནི། ད་ལྟར་མཉེས་པར་བྱས་པས་འདི་ལྟ་སྟེ། དབང་པོ་ཚང་བ། དགེ་བའི་ལུས་ཐོབ་ཀྱི། སྦྱིན་གནས་ཐམས་ཅད་ཀྱིས་ཉེ་བར་འཚོ་བར་བྱ། ལུས་ དང་སྲོག་ལ་མི་བལྟ་བར་བྱ། ལེགས་པར་བཤད་པ་དང༌། ཉེས་པར་བཤད་པའི་དོན་ཀུན་ཤེས་པའི་མཐུ་ཡོད་པར་བྱ། སློབ་དཔོན་ལ་བཙུན་པ། དགེ་བ་གང༌། མི་དགེ་བ་གང༌། ཁ་ན་མ་ཐོ་བ་དང་བཅས་པ་གང༌། ཁ་ན་མ་ཐོ་བ་མེད་པ་གང༌། བསྟེན་པ་གང༌། མི་བསྟེན་པ་གང༌། བྱ་བ་གང༌། མི་བྱ་བ་གང༌། ཅི་བྱས་ན། ཉན་ཐོས་དང༌། རང་སངས་རྒྱས་ཀྱི་ཆོས་ མངོན་དུ་འགྱུར། ཅི་བྱས་ན། བྱང་ཆུབ་སེམས་དཔའི་ཆོས་མངོན་དུ་འགྱུར་ཞེས་འདྲི་ཞིང༌། བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་དོན་གྱི་ཕྱིར་སློབ་དཔོན་ ལ་རིམ་གྲོ་དང༌། བསྙེན་བཀུར་བྱེད་དེ། འདི་ལྟར་སྙིང་པོ་མེད་པའི་ལུས་ལས་སྙིང་པོ་བླང་ངོ༌། །སྙམ་ནས་ཐ་ན་ཆུ་བུམ་པ་གང་ཙམ་ཡང་འབུལ་ལོ། །བཅོམ་ལྡན་འདས་ཀྱིས་དེ་སྐད་གསུངས་ཏེ། བདེ་ བར་གཤེགས་པས་དེ་སྐད་བཀའ་སྩལ་ནས་སྟོན་པས་མང་འདི་སྐད་གསུང་ངོ༌། །ཕན་པ་འདོད་ཕྱིར་བསྐལ་པ་བརྒྱ་མང་པོར། །དགེ་བའི་བཤེས་གཉེན་ཡོངས་སུ་སྤངས་གྱུར་ནས། །དགེ་དང་མི་དགེ་ ཁ་ན་མ་ཐོ་དང༌། །ཁ་ན་མ་ཐོ་མེད་བྱས་འབྲས་མི་འདྲི། །ལྷག་པའི་ང་རྒྱལ་དབང་དུ་སོང་བ་ནི། །སེམས་དམྱལ་དུད་འགྲོ་གཤིན་རྗེའི་དབང་དུ་སོང༌། །སྡིག་སེམས་གྲོགས་པོ་བསྟེན་པར་བྱས་པས་ ན༑ ༑བསྐལ་པ་བརྒྱ་མང་གིས་ནི་ངན་འགྲོར་འཕོས། །མི་ཡི་འཇིག་རྟེན་དབང་པོ་མ་ཚང་གྱུར། །བསྐལ་པ་སྟོང་ཕྲག་མང་པོར་འཁྱམས་པའི་ལུས། །དགེ་དང་མི་དགེ་ཁ་ན་མ་ཐོ་དང༌། ཁ་ན་མ་ ཐོ་མེད་བྱས་འབྲས་མི་ཤེས། །རུས་སྦལ་མགྲིན་པ་ཤིང་མིག་ཆུད་འདྲ་བར། །མི་ཡི་ལུས་ནི་ཤིན་ཏུ་དཀའ་བར་འཐོབ། །དབང་པོ་དག་ནི་ཚང་ཞིང་སྐྱེ་མཆེད་དགེ། །མི་དལ་ཡོངས་སུ་སྤངས་ ནས་དལ་བ་རྙེད། །འཇིག་རྟེན་སྒྲོན་མ་མཛད་པ་མཉེས་བྱས་ནས། །རྒྱལ་བས་བསྟན་བཅོས་འདོད་ཆགས་བྲལ་བ་ཐོབ། །དགེ་དང་མི་དགེ་བྱ་བའི་འབྲས་བུ་དག །འཇིག་རྟེན་གཙོ་ལ་བདག་ འདྲི་དུས་ལ་བབ། །འགྲོ་བར་སེར་སྣའི་མིར་འགྱུར་ཇི་ལྟ་བུ། །ཇི་ལྟར་སྦྱིན་བདག་སེར་སྣ་མེད་པར་འགྱུར། །ཇི་ལྟར་གཡོ་ངན་བརྐམ་པ་ཚུལ་ཁྲིམས་འཆལ། །ཚུལ་ཁྲིམས་ནོར་ཀུན་སྲུང་བ་ཇི་ ༄༅། །ལྟ་བུ༑ ༑མི་ནི་ཁྲོ་དང་འཁྲུག་པར་ཇི་ལྟར་འགྱུར། །ཁྲོ་མེད་བཟོད་པའི་སྟོབས་སུ་ཇི་ལྟར་འགྱུར། །ཇི་ལྟར་ལེ་ལོ་ཅན་དང་གཡེང་ཡིད་འགྱུར། །བརྩོན་འཕགས་བསམ་ གཏན་དགའ་བ་ཇི་ལྟ་བུ། །ཇི་ལྟར་འཆལ་བའི་ཤེས་རབ་བླུན་ལྐུགས་འགྱུར། །ཇི་ལྟར་ཤེས་རབ་ལྡན་ཞིང་བདེན་གཏམ་དགའ། །ཇི་ལྟར་བྱང་ཆུབ་སྤྱོད་པ་གཅིག་སེམས་པས། །སྤྱོད་པ་ བཟང་པོ་ཐམས་ཅད་ཚོལ་བར་འགྱུར། །ཇི་ལྟར་འགྲོ་བ་ཀུན་ལ་བྱམས་པ་བགྱིད། །ཇི་ལྟར་ངན་སོང་སོང་བའི་སེམས་ཅན་འདྲེན། །ཇི་ལྟར་ཆོས་ཀྱི་དགའ་བས་མི་ངོམས་ཡིད། །བྱང་ཆུབ་ སྤྱོད་པ་སྡེ་སྣོད་ཡོངས་སུ་ཚོལ། །ཕྱོགས་དང་ཕྱོགས་མཚམས་རབ་འབྱམས་ཞིང་རྣམས་ན། །འཇིག་རྟེན་བླ་མ་བཞུགས་པར་ཇི་ལྟར་འགྲོ། ཕྱག་འཚལ་བསོད་ནམས་བྱེད་པ་ཇི་ལྟ་བུ།། ཀུན་ཏུ་བཟང་པོའི་སྤྱོད་པ་ཅི་འདྲ་འདྲི། །སློབ་དཔོན་བླ་མ་དག་ལ་བདག་འདྲི་བ། །དེ་ཡི་དུས་ནི་དེ་རིང་ཉེར་གནས་ཏེ། །བླ་མའི་གནས་སུ་གནས་ལས་ཉན་དགའ་སྟེ། །སློབ་དཔོན་ཡིད་ མགུ་བྱེད་པ་ཇི་ལྟ་བུ། །སངས་རྒྱས་སྲས་ཀྱིས་སེམས་འདི་བསྐྱེད་གྱུར་ནས། །སྟོབས་དང་བསོད་ནམས་ཡངས་པའི་བློ་གྲོས་ཅན། །ངེས་པར་མཆོག་གི་ཡེ་ཤེས་སྟོབས་ལྡན་པས། དགའ་ བའི་ཡིད་ཀྱིས་སྣོད་གང་ཆུ་ཡང་འབུལ། །ཤཱ་རིའི་བུ། སེམས་བསྐྱེད་པ་བདུན་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་དོན་གྱི་ཕྱིར་སློབ་དཔོན་ལ་རིམ་ གྲོ་དང༌། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བདག་ཡུན་རིང་པོར་དགེ་བའི་བཤེས་གཉེན་ དང་བྲལ་ཞིང་སྡིག་པའི་གྲོགས་པོས་ཟིན་པས་ལེ་ལོ་ཅན། བརྩོན་འགྲུས་ཉམས་པ། སྙོམས་ལས་ཅན། ལྐུགས་པས། གསང་ཚིག་དང༌། ཡི་གེ་དང༌། དོན་དང་ཚིག་ཏུ་ལྡན་པ་དང༌། ཆོས་དང་ ཚིག་ཏུ་ལྡན་པ་དང༌། མྱ་ངན་ལས་འདས་པ་དང་ལྡན་པ་དང༌། འདོད་ཆགས་དང་བྲལ་བ་དང་ལྡན་པ་དང༌། འགོག་པ་དང༌། ཞི་བ་དང༌། རྫོགས་པའི་བྱང་ཆུབ་དང༌། དགེ་སློང་དང༌། བྲམ་ཟེ་དང༌། མྱ་ངན་ལས་འདས་པ་དང་ལྡན་པ་དང་ཐམས་ཅད་ལ་བྱ་སྟེ། དེ་དག་སྤངས་ནས་དོན་དང་ཚིག་ཏུ་མི་ལྡན་པ་དང༌། ཆོས་ཀྱི་ཚིག་དང་མི་ལྡན་པ་ནས་མྱ་ངན་ལས་འདས་པ་དང་མི་ལྡན་པའི་བར་གྱི་ཚིག་ དང༌། ཡི་གེ་དེ་དག་འཛིན་པ་དང༌། ལེན་པ་དང༌། ཀློག་པ་དང༌། ཀུན་ཆུབ་པར་བྱེད་པ་ནི། འདི་ལྟ་སྟེ། སྟོབས་མེད། བརྩོན་འགྲུས་མེད། སྐྱེས་བུའི་སྟོབས་མེད། སྐྱེས་བུའི་མཐུ་མེད། སྐྱེས་ བུའི་རྟུལ་བ་མེད། སྤྱོད་པ་མེད། རྟུལ་བ་མེད། སྤྱོད་པ་ལ་མཐུ་མེད། རྒྱུ་མེད། རྐྱེན་མེད་དེ། སེམས་ཅན་རྣམས་ཀུན་ནས་ཉོན་མོངས་པ་ཡང་རྒྱུ་མེད་རྐྱེན་མེད་པར་སེམས་ཅན་ཀུན་ ནས་ཉོན་མོངས་པར་གྱུར་ཏེ། རྒྱུ་མེད་དོ། །རྐྱེན་མེད་དོ། །སེམས་ཅན་རྣམས་རྣམ་པར་དག་པ་ཡང་རྒྱུ་མེད་རྐྱེན་མེད་པར་སེམས་ཅན་རྣམ་པར་དག་གོ། ཞེས་འདི་ལྟར་རྒྱུ་མེད་པར་ལྟ་བ་ལ་གནས་ ༄༅། །ནས་བདག་གིས་མི་དགེ་བའི་ལས་མང་པོ་མངོན་པར་འདུ་བྱས་ཏེ། ལས་དེའི་རྣམ་པར་སྨིན་པས་འདི་ལྟ་སྟེ། མིའི་ནང་དུ་སྦྱིན་གནས་ཐམས་ཅད་ཉེ་བར་འཚོ་ བ་མ་ཡིན་པ་དབང་པོ་མ་ཚང་བའི་མིའི་ལུས་ཐོབ་སྟེ། དེ་ན་བདག་གླེན་པ། གཡེང་བ། དིག་པ། ལྐུགས་པ། རྨོངས་པ། བླུན་པ། ལོང་བ། འོན་པར་གྱུར་པས། གང་ཚིག་དང༌། ཡི་ གེ་དང༌། དོན་དུ་ལྡན་པ་ནས་མྱ་ངན་འདས་པ་དང་ལྡན་པའི་བར་དུ་དེ་དག་འཛིན་པ་དང༌། ལེན་པ་དང༌། ཀློག་པ་དང༌། ཀུན་ཆུབ་པར་བྱེད་པའི་མཐུ་མེད་པས་འདི་ལྟ་བུའི་སྦྱིན་གནས་མཉེས་པར་མ་བྱས་ སོ༑ ༑བདག་གིས་ནི། ད་ལྟར་སྦྱིན་གནས་མཉེས་པར་བྱས་ཀྱི། ལུས་དང༌། སྲོག་ལ་མི་ལྟ་བའི་བར་དུ་བྱས་ཏེ་གང་ཚིག་དང༌། ཡི་གེ་དང༌། དོན་དུ་ལྡན་པ་ནས་མྱ་ངན་ལས་འདས་པ་དང་ལྡན་པའི་ བར་དུ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཉིད་གཟུང་བ་ནས་ཀུན་ཆུབ་པར་བྱ་བའི་བར་དུ་ནུས་ཀྱི། འོ་ན་བདག་གིས་བརྩོན་འགྲུས་བརྩམས་ཏེ། འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཉིད་བླང་བའི་ཕྱིར་ལུས་ཀྱིས་སློབ་དཔོན་ལ་རིམ་གྲོ་དང༌། བསྙེན་བཀུར་བྱའོ། །འཛིན་པ་དང༌། ཀློག་པ་དང༌། ཁ་ཏོན་དང༌། བསྙེན་ བཀུར་བྱས་ཏེ་སྙིང་པོ་མེད་པའི་ལུས་ལས་སྙིང་པོ་བླངས་པར་འགྱུར། བསོད་ནམས་དང༌། ཡེ་ཤེས་ཀྱི་སྟོབས་ཀྱིས་ཉེ་བར་བརྟན་པ་བྱས་པར་འགྱུར་ཏེ། བསོད་ནམས་དང༌། ཡེ་ཤེས་ཀྱི་ སྟོབས་དེས་ཉེ་བར་བརྟན་པས་བྱང་ཆུབ་སེམས་དཔའི་སྡེ་སྣོད་འདི་དང་ཉེ་བར་འགྱུར་རོ། །སྙམ་ནས་ཆེད་དུ་བསམ་སྟེ་སློབ་དཔོན་ལ་རིམ་གྲོ་དང༌། བསྙེན་བཀུར་བྱད་དེ། ཐ་ན་ཆུ་བུམ་པ་གང་ཙམ་ཡང་འབུལ་ ལོ༑ ༑འདི་ལ་དེའི་ཆོས་ཉིད་ནི། འདི་ཡིན་ཏེ། དེ་ལ་འདི་སྐད་ཅེས་བྱའོ། །ཆོས་གང་དོན་དང་ལྡན་པ་དང༌། །ལམ་གྱི་ཡན་ལག་ལམ་སྒོམ་དང༌། །འགོག་པ་མངོན་དུ་བྱེད་པ་དང༌། །མྱ་ངན་འདས་ལམ་སྙིང་ པོ་ཅན༑ ༑ཆོས་དེ་དག་ནི་ཡོངས་སྤངས་ནས། །གང་ཆོས་ཕན་པ་མེད་པ་དང༌། །དོན་དང་ཚིག་ཏུ་མི་ལྡན་པ། །ཆོས་དེ་དག་ནི་བདག་གིས་བསྙེན། །བརྩོན་འགྲུས་དང་ནི་སྙོམས་མེད་དེ། །སྐྱེས་བུ་ཡི་ནི་མཐུ་ ཡང་མེད། །ཤིན་ཏུ་རྟུལ་བ་མཆོག་རྣམས་དང༌། །དེ་དག་ཐམས་ཅད་མི་དམིགས་སོ། །སངས་རྒྱས་དང་ནི་ཆོས་ཀྱང་མེད། །ཕ་མ་མེད་དེ་དེ་བཞིན་དུ། །དཀར་པོ་དང་ནི་ནག་པོའི་ལས། །རྣམ་པར་སྨིན་པ་ ཀུན་མེད་ཅེས། །དེ་འདྲའི་སྡིག་པར་ལྟ་བ་དག །ཡང་དང་ཡང་དུ་བསྙེན་པས་ན། །གཅིག་ཏུ་མི་བཟད་མ་རུངས་པ། །སེམས་ཅན་ནད་དམྱལ་བར་ཡུན་རིང་གནས། །དེ་བཞིན་དུ་འགྲོའི་སྐྱེ་གནས་དང༌། ། གཤིན་རྗེའི་འཇིག་རྟེན་སྡིག་ཅན་ཏེ། །ནམ་ཚེའང་མིར་ནི་སྐྱེས་གྱུར་ཀྱང༌། །བླུན་ཞིང་ལྕེ་ནི་མེད་པར་གྱུར། །གཡེང་བ་དང་ནི་འོན་པར་འགྱུར། །དིག་པ་ལྐུགས་པ་རྨོངས་པར་འགྱུར། །ཡུན་རིང་ སེམས་དམྱལ་མ་རུངས་པར། །མི་ཤེས་པས་ནི་རབ་ཏུ་ལྟུང༌། །དབང་པོ་ཐམས་ཅད་ཕུན་ཚོགས་ཤིང༌། །བདག་གི་ལུས་འདི་རབ་མཛེས་པ། །ཡུན་རིང་དུས་ན་བདག་གིས་ཐོབ། །འདི་ནི་བདག་བརྩོན་ ༄༅། །བྱ་བའི་དུས། །ཆོས་གང་དོན་དང་ལྡན་པ་དང༌། །མྱ་ངན་འདའ་བའི་གྲོགས་བྱེད་པ། །བྱང་ཆུབ་ལམ་དང་བྱང་ཆུབ་ལ། །བདག་ནི་འབད་པར་བྱ་བའི་དུས། །བྱང་ ཆུབ་སེམས་དཔའི་སྡེ་སྣོད་ནི། །ཟབ་མོའི་དོན་དང་ལྡན་པ་སྟེ། །བསྐལ་པ་སྟོང་ཕྲག་བྱེ་བར་ཡང༌། །དེ་ནི་ཤིན་ཏུ་ཐོབ་པར་དཀའ། །སངས་རྒྱས་ཀྱི་ནི་བྱང་ཆུབ་ཕྱིར། །སངས་རྒྱས་ཆོས་མང་འདི་ དང་ནི། །གཞན་ཡང་བསམ་གྱིས་མི་ཁྱབ་ལ། །རབ་ཏུ་འཇུག་ཅིང་གཟུང་བར་བྱ། །སློབ་དཔོན་ལ་ནི་གུས་བཅས་ཤིང༌། །བསྙེན་བཀུར་དག་ནི་བྱས་པས་ན། །སངས་རྒྱས་བྱང་ཆུབ་སེམས་ དཔའ་རྣམས། །ཐོས་པ་དེ་ནི་རྙེད་པར་འགྱུར། །བྱང་ཆུབ་སེམས་དཔའ་མི་འཇིགས་པ། །ཐབས་དང་ཤེས་རབ་ལྡན་པ་ཡིས། །འདི་ལྟ་བུར་ནི་སེམས་བསྐྱེད་ནས། །རྫ་གང་ཙམ་གྱི་ཆུ་ ཡང་འབུལ། །ཤཱ་རིའི་བུ། སེམས་བསྐྱེད་པ་བརྒྱད་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཕྱིར་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དེ། ཐ་ན་ ཆུ་རྫ་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། ཀྱེ་མའོ་སེམས་ཅན་དེ་དག་ནི། དོན་མེད་པས་ཡོངས་སུ་བསྐོར་བ་ལུས་དང༌། སྲོག་ ལ་ལྟ་བའོ། །དོན་གྱིས་ཡོངས་སུ་བསྐོར་བ་ནི། ལུས་དང༌། སྲོག་ལ་མི་ལྟ་བའོ། །དོན་མེད་པས་ཡོངས་སུ་བསྐོར་བ་གང་ཞེ་ན། འདི་ལྟ་སྟེ། ལུས་དང༌། སྲོག་ལ་ལྟའོ། །བྱང་ཆུབ་ཀྱི་ཕྱོགས་ ཀྱི་ཆོས་རྣམས་ལ་མི་ལྟ་ཞིང༌། ང་ཡིར་འཛིན་པ་སྔོན་དུ་འགྲོ་བས་བདག་སྦ་བ་དང༌། དྲིལ་བ་དང༌། མཉེ་བ་དང༌། བཀྲུ་བ་དང༌། བརྫི་བས་ཡོངས་སུ་བསྐོར་བ་དེ་ནི། དོན་མེད་པས་ཡོངས་སུ་བསྐོར་ བ་ཞེས་བྱའོ། །གཞན་ཡང་དོན་མེད་པས་ཡོངས་སུ་བསྐོར་བ་ནི། འདི་ལྟ་སྟེ། ལུས་དང་སྲོག་ལ་ལྟ་ཞིང་ང་ཡིར་འཛིན་པ་སྔོན་དུ་འགྲོ་བས་ཆུང་མ་དང༌། བུ་ཕོ་དང༌། བུ་མོ་དང༌། མཛའ་བོ་དང༌། ཉེ་དུ་དང༌། སྣག་གི་གཉེན་མཚམས་སྦེད་པ་དང༌། དྲིལ་བ་ནས་ཡོ་བྱད་དང༌། ལོངས་སྤྱོད་ཐམས་ཅད་ཀྱི་བར་གྱིས་ཡོངས་སུ་བསྐོར་བ་དེ་ནི། དོན་མེད་པས་ཡོངས་སུ་བསྐོར་བ་ཞེས་བྱའོ། ། གཞན་ཡང་ང་ཡིར་འཛིན་པ་སྔོན་དུ་འགྲོ་བ་ནས་བྲན་ཕོ་དང༌། བྲན་མོ་དང༌། ལས་བྱེད་པའི་མི་སྦེད་པ་དང༌། མངག་པ་དང༌། ཀུན་ཏུ་སྲུང་བ་དེ་ནི། དོན་མེད་པས་ཡོངས་སུ་བསྐོར་བ་ཞེས་བྱའོ།། དེ་ལ་དོན་གྱིས་ཡོངས་སུ་བསྐོར་བ་གང་ཞེ་ན། འདི་ལྟ་སྟེ། ལུས་དང་སྲོག་ལ་མི་ལྟའི། བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་བྱང་ཆུབ་ཀྱི་སེམས་སྔོན་དུ་འགྲོ་བའི་ལུས་ཀྱི་ལས་དང༌། ངག་ གི་ལས་དང༌། ཡིད་ཀྱི་ལས་ཀྱིས་ཡོངས་སུ་བསྐོར་བ་དེ་ནི། དོན་གྱིས་ཡོངས་སུ་བསྐོར་བར་ཞེས་བྱའོ། །གཞན་ཡང་དོན་གྱིས་ཡོངས་སུ་བསྐོར་བ་ནི། འདི་ལྟ་སྟེ། ལུས་དང་སྲོག་ལ་མི་ལྟའི། བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་བྱང་ཆུབ་ཀྱི་སེམས་སྔོན་དུ་འགྲོ་བའི་སྦྱིན་པའི་ཕ་རོལ་ཏུ་ཕྱིན་པ་སྒྲུབ་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པའི་བར་གྱིས་ཡོངས་སུ་བསྐོར་བ་དེ་ནི། ༄༅། །དོན་གྱིས་ཡོངས་སུ་བསྐོར་བ་ཞེས་བྱའོ། །གཞན་ཡང་དོན་གྱིས་ཡོངས་སུ་བསྐོར་བ་ནི། ལུས་དང༌། སྲོག་ལ་མི་ལྟ་ཡི། བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་ བྱང་ཆུབ་ཀྱི་སེམས་སྔོན་དུ་འགྲོ་བའི་སྦྱིན་པ་དང༌། སྙན་པར་སྨྲ་བ་དང༌། དོན་བྱ་བ་དང༌། དོན་མཐུན་པས་སེམས་ཅན་ཐམས་ཅད་སྡུད་པས་ཡོངས་སུ་བསྐོར་བ་དེ་ནི། དོན་གྱིས་ཡོངས་སུ་བསྐོར་བ་ ཞེས་བྱའོ། །གཞན་ཡང་དོན་གྱིས་ཡོངས་སུ་བསྐོར་བ་ནི། འདི་ལྟ་སྟེ། ལུས་དང༌། སྲོག་ལ་མི་ལྟའི། བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་བྱང་ཆུབ་ཀྱི་སེམས་སྔོན་དུ་འགྲོ་བའི་དྲན་པ་ཉེ་བར་ གཞག་པ་དང༌། ཡང་དག་པར་སྤོང་བ་དང༌། རྫུ་འཕྲུལ་གྱི་རྐང་པ་དང༌། དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། ལམ་སྒོམ་པས་ཡོངས་སུ་བསྐོར་བ་དེ་ནི། དོན་གྱིས་ཡོངས་ སུ་བསྐོར་བ་ཞེས་བྱའོ། །གཞན་ཡང་དོན་གྱིས་ཡོངས་སུ་བསྐོར་བ་ནི། འདི་ལྟ་སྟེ། ལུས་དང༌། སྲོག་ལ་མི་ལྟའི། བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་བྱང་ཆུབ་ཀྱི་སེམས་སྔོན་དུ་འགྲོ་ བའི་ཕ་མ་དང༌། སློབ་དཔོན་ལ་རིམ་གྲོ་བྱེད་ཅིང༌། བླ་མའི་གནས་ལ་བསྙེན་བཀུར་བྱེད་པ་དང༌། འདུད་པ་དང༌། རབ་ཏུ་འདུད་པ་དང༌། གུས་པར་སྨྲ་བ་དང༌། ཕྱག་འཚལ་བ་དང༌། ལྡང་བ་ དང༌། ཐལ་མོ་སྦྱོར་བའི་ལས་ཀྱིས་ཡོངས་སུ་བསྐོར་བ་དེ་ནི། དོན་གྱིས་ཡོངས་སུ་བསྐོར་བ་ཞེས་བྱའོ། །གཞན་ཡང་དོན་གྱིས་ཡོངས་སུ་བསྐོར་བ་ནི། འདི་ལྟ་སྟེ། ལུས་དང༌། སྲོག་ལ་མི་ལྟའི་ བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་བྱང་ཆུབ་ཀྱི་སེམས་སྔོན་དུ་འགྲོ་བའི་དཀོན་མཆོག་གསུམ་གྱི་ཞལ་ཏ་བྱེད་པས་ཡོངས་སུ་བསྐོར་བའོ། །དེ་ལྟར་ཀྱེ་མའོ་སེམས་ཅན་འདི་དག་ནི། དོན་མེད་པས་ཡོངས་ སུ་བསྐོར་བ། ལུས་དང༌། སྲོག་ལ་ལྟའོ། །ཀྱེ་མའོ་བདག་ནི། དོན་གྱིས་ཡོངས་སུ་བསྐོར་བས་ཡོངས་སུ་བསྐོར་གྱི། བདག་ད་བརྩོན་འགྲུས་བརྩམས་ལ་སློབ་དཔོན་ལ་ལུས་ཀྱིས་རིམ་གྲོ་དང༌། བསྙེན་བཀུར་བྱ་སྟེ། དེ་ལྟར་ན་སྙིང་པོ་མེད་པའི་ལུས་ལས་སྙིང་པོ་བླངས་པ་དང༌། བསོད་ནམས་དང༌། ཡེ་ཤེས་ཀྱི་སྟོབས་ཀྱིས་ཉེ་བར་བརྟན་པ་བྱས་པར་འགྱུར་ཏེ། བསོད་ནམས་དང༌། ཡེ་ ཤེས་ཀྱི་སྟོབས་དེས་ཉེ་བར་བརྟན་པས་བྱང་ཆུབ་ཀྱི་སྙིང་པོ་དང་ཉེ་བར་འགྱུར་རོ། །སྙམ་པ་དེ་ནི། ཤཱ་རིའི་བུ། སེམས་བསྐྱེད་པ་དགུ་པ་འདི་བསྐྱེད་ནས་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་ དེ༑ ཐ་ན་ཆུ་རྫ་གང་ཙམ་ཡང་འབུལ་ལོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བྱིས་པ་སོ་སོའི་སྐྱེ་བོ་ཀུན། །ལུས་དང་སྲོག་ ལ་ལྟ་ལྡན་ཞིང༌། །བྱང་ཆུབ་ཕྱོགས་ལ་མི་ལྟ་སྟེ། །རྣམ་པ་སྣ་ཚོགས་ལས་ཀྱང་བྱེད། །སོ་སོའི་སྐྱེ་བོ་དེ་དག་ནི། །བདག་གི་དོན་དང་ཆུང་མའི་དོན། །བུ་ཕོ་དང་ནི་བུ་མོའི་ཕྱིར། །དོན་མེད་པ་ལ་ཆགས་ པར་འགྱུར། །དྲན་དང་ལས་བྱེད་མངག་པ་དག །མི་མཁས་པས་ནི་ཀུན་དུ་མངགས། །རྐང་བཞི་པ་དག་གསོ་བྱེད་དེ། །དེ་དག་དོན་མེད་ཆགས་པར་འགྱུར། །ནོར་དང་འབྲུ་རྣམས་རབ་གསོག་ཅིང༌། ༄༅། །སྦྱིན་པ་མི་བྱེད་མི་སྤྱོད་དེ། །དོན་མེད་ཆགས་པ་དེ་དག་ནི། །གཏེར་གྱི་སྲུང་མར་བརྗོད་པ་ཡིན། །འདི་ནི་དོན་མེད་ཆགས་པ་སྟེ། །སོ་སོའི་སྐྱེ་བོ་དེ་ལ་ཆགས། །བྱང་ ཆུབ་སེམས་དཔའ་བློ་ལྡན་ནི། །དོན་ལ་ཆགས་ཤིང་བརྩོན་པར་བྱེད། །ལུས་དང་སྲོག་ལ་མི་ལྟ་ཡི། །བྱང་ཆུབ་ཕྱོགས་ལ་ལྟ་བྱེད་ཅིང༌། །རྣམ་པ་སྣ་ཚོགས་ལས་བྱེད་པ། །དོན་ལ་ཡོངས་སུ་ ཆགས་ཞེས་བྱ། །སྦྱིན་དང་ཚུལ་ཁྲིམས་བརྩོན་འགྲུས་བཟོད། །བསམ་གཏན་ཤེས་རབ་དེ་བཞིན་དུ། །ཐབས་དང་རབ་ཏུ་ལྡན་པ་ནི། །དོན་ལ་ཡོངས་སུ་ཆགས་ཞེས་བྱ། །ཕ་དང་མ་ལ་ བསྙེན་བཀུར་བྱེད། །བླ་མ་རྒན་རབས་རྗེས་སུ་བསྐྱངས། །དཀོན་མཆོག་གསུམ་གྱི་ཞལ་ཏ་བྱེད། །དོན་ལ་ཡོངས་སུ་ཆགས་ཞེས་བྱ། །ཆོས་ཀུན་ཡང་དག་བསྡུས་པ་ཡི། །བྱང་ཆུབ་སེམས་ དཔའི་སྡེ་སྣོད་འདི། །གློག་ཅིང་རབ་ཏུ་སྟོན་པ་ནི། །དོན་ལ་ཡོངས་སུ་ཆགས་ཞེས་བྱ། །དོན་ལ་ཆགས་པ་དེ་དག་ནི། །སངས་རྒྱས་ཀུན་གྱིས་བསྔགས་པ་སྟེ། །དེ་ལ་བརྩོན་དང་ལྡན་པ་ནི། ། རྒྱལ་སྲས་འཇིགས་པ་མེད་པའོ། །དེ་ལྟ་བུ་ཡི་སེམས་བསྐྱེད་ནས། །རབ་ཏུ་དང་བའི་སེམས་ཀྱིས་ནི། །བླ་མ་རྣམས་ལ་བསྙེན་བཀུར་བྱེད། །སྣོད་གང་ཙམ་གྱི་ཆུ་ཡང་འབུལ། །ཤཱ་རིའི་ བུ༑ སེམས་བསྐྱེད་པ་དགུ་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཕྱིར་སློབ་དཔོན་ལ་རིམ་གྲོ་དང༌། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་ འབུལ་ལོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། ཀྱེ་མའོ་སེམས་ཅན་འདི་དག་ནི། བཀའ་བློ་མི་བདེ་བ་སྟེ། སློབ་དཔོན་གྱི་རྗེས་སུ་བསྟན་པ་དང་མི་མཐུན་པར་ འཛིན་པས་དེ་དག་ཁོང་དུ་མི་ཆུད་དོ། །ཅི་ཁོང་དུ་མི་ཆུད་ཅེ་ན། འདི་ལྟ་སྟེ། སློབ་དཔོན་གྱི་ནོར་ཁོང་དུ་མི་ཆུད་དོ། །སློབ་དཔོན་གྱི་ནོར་གང་ཞེ་ན། འདི་ལྟ་སྟེ། དད་པའི་ནོར་དང༌། ཚུལ་ཁྲིམས་ཀྱི་ནོར་དང༌། ཐོས་པའི་ནོར་དང༌། ཁྲེལ་ཡོད་པའི་ནོར་དང༌། ངོ་ཚ་ཤེས་པའི་ནོར་དང༌། གཏོང་བའི་ནོར་དང༌། ཤེས་རབ་ཀྱི་ནོར་ཏེ། དེ་དག་ནི། སློབ་དཔོན་གྱི་ནོར་ཞེས་བྱ་སྟེ། དེ་དག་ཁོང་དུ་མ་ཆུད་པས་ན། རབ་ཏུ་དབུལ་བ་ཞེས་བྱའོ། །བདག་ནི། བཀའ་བློ་བདེ་ཞིང་སློབ་དཔོན་གྱི་རྗེས་སུ་བསྟན་པ་དང་མཐུན་པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི། ཤིན་ཏུ་བཀའ་བློ་བདེ་བ་སྟེ། སློབ་ དཔོན་གྱི་རྗེས་སུ་བསྟན་པ་དང་མཐུན་པར་འཛིན་ཅིང་ཁོང་དུ་ཆུད་པར་བྱེད་དོ། །ཅི་ཁོང་དུ་ཆུད་ཅེ་ན། འདི་ལྟ་སྟེ། སློབ་དཔོན་གྱི་ནོར་རོ། །བྱང་ཆུབ་སེམས་དཔའི་སློབ་དཔོན་གྱི་ནོར་གང་ཞེ་ན། འདི་ལྟ་ སྟེ༑ བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་སོ། །སློབ་དཔོན་གྱིས་བྱང་ཆུབ་སེམས་དཔའ་རྣམ་པ་ཐམས་ཅད་དུ་བཀའ་བློ་བདེ་བར་རིག་ནས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་ གྲངས་རྒྱ་ཆེར་སྟོན་ཏོ། །རབ་ཏུ་སྟོན་ཏོ། །རབ་ཏུ་འཆད་དོ། །རབ་ཏུ་གཞོག་གོ །རྣམ་པར་འགྲེལ་ཏོ། །རྣམ་པར་འབྱེད་དོ། །གསལ་པོར་གོ་བར་བྱེད་དོ། །ཡང་དག་པར་རབ་ཏུ་སྟོན་ཏོ། །བྱང་ཆུབ་སེམས་ ༄༅། །དཔའི་སྡེ་སྣོད་ལ་རབ་ཏུ་གནས་པའི་བྱང་ཆུབ་སེམས་དཔའ་ནི། དབུལ་བ་ཡོངས་སུ་ཆད་པ་ཁོང་དུ་ཆུད་པར་འགྱུར་ཏེ། འདི་ལྟ་སྟེ། བླ་ན་མེད་པ་ཡང་དག་པར་ རྫོགས་པའི་བྱང་ཆུབ་བོ། །དེ་དེ་ལྟར་སེམས་བསྐྱེད་དེ་བཀའ་བློ་བདེ་ཞིང་སློབ་དཔོན་གྱི་བསྟན་པ་དང་མཐུན་པར་འཛིན་པ་ནི། སྙིང་པོ་མེད་པའི་ལུས་ལས་སྙིང་པོ་བླངས་པར་འགྱུར་རོ། །སྙམ་ པ་ནས་སློབ་དཔོན་གྱི་རིམ་གྲོ་དང༌། བསྙེན་བཀུར་བྱེད་དོ། ཐ་ན་ཆུ་རྫ་གང་ཙམ་ཡང་འབུལ་ལོ། །ཤཱ་རིའི་བུ། སེམས་བསྐྱེད་པ་བཅུ་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་ སེམས་དཔའི་སྡེ་སྣོད་ཡོངས་སུ་ཚོལ་བས་སློབ་དཔོན་ལ་བསྙེན་བཀུར་དང༌། རིམ་གྲོ་བྱེད་དེ། ཐ་ན་ཆུ་རྫ་གང་ཙམ་ཡང་འབུལ་ལོ། །བཅོམ་ལྡན་འདས་ཀྱིས་དེ་སྐད་གསུངས་ཏེ་བདེ་བར་ གཤེགས་པས་དེ་སྐད་བཀའ་སྩལ་ནས་སྟོན་པས་ཡང་འདི་སྐད་གསུང་ངོ༌། །བཀའ་བློ་མི་བདེ་སེམས་ཅན་གང༌། །མི་དྲང་སྒྱུ་དང་གཡོ་ངན་ཅིང༌། །བླ་མ་རྣམས་དང་མི་མཐུན་པ། །ཚིག་བཞིན་དུ་ནི་ བྱེད་མི་འགྱུར། །བསྟན་པ་དང་ནི་མི་མཐུན་ཞིང༌། །བཀའ་བློ་མི་བདེ་ཤེས་གྱུར་ནས། །དྲང་སྲོང་ནོར་ནི་གང་ཡིན་པ། །དེ་ནི་དེ་ལ་མི་སྟོན་ཏོ། །དད་པའི་ནོར་དང་ཚུལ་ཁྲིམས་ནོར། །ཁྲེལ་ཡོད་ངོ་ ཚ་ཤེས་པའི་ནོར། །ཐོས་པའི་ནོར་དང་གཏོང་ནོར་དང༌། །ཤེས་རབ་ཉིད་ནི་ནོར་བདུན་པ། །ནོར་གྱི་རྣམ་པ་འདི་དག་ནི། །མི་ཟད་པ་ཡི་གཏེར་བདུན་ཏེ། །སྣོད་མ་ཡིན་པར་རིག་ནས་ནི། །དེ་ནི་ དེ་ལ་མི་སྟོན་ཏོ། །སེམས་ཅན་གང་དག་རྣམ་པ་ཀུན། །སངས་རྒྱས་ཆོས་ཀྱི་སྣོད་གྱུར་ཅིང༌། །གཡོ་མེད་ཚིག་འཇམ་སྒྱུ་མེད་ལ། །བཀའ་བློ་བདེ་ཞིང་རབ་མཐུན་པ། །སངས་རྒྱས་ཀྱི་ནི་བྱང་ཆུབ་ཕྱིར། ། ལུས་དང་སྲོག་ལ་མི་ལྟ་བར། །གུས་དང་བཅས་པས་ཆོས་འདོད་ཅིང༌། །བརྩོན་འགྲུས་རྩོམ་པར་རབ་ཏུ་སེམས། །ཚུལ་འདི་འཛིན་པར་འགྱུར་པ་ཡི། །སྣོད་དུ་རུང་བར་རིག་གྱུར་ནས། །ཆོས་ཀྱི་ དབྱིངས་ནི་དབྱེར་མེད་པ། །འདྲེན་པས་ཡང་དག་རབ་ཏུ་སྟོན། །གང་ལ་བྱང་ཆུབ་གནས་པ་ཡི། །སངས་རྒྱས་རྣམས་ཀྱི་སྙིང་པོའི་ནོར། །བྱང་ཆུབ་སེམས་དཔའི་སྡེ་སྣོད་ནི། །རྒྱས་པར་རབ་ཏུ་ སྟོན་པར་བྱེད། །ཆོས་རྣམས་ཐམས་ཅད་བདག་མེད་དེ། །མཚན་མེད་སྟོང་པའི་མཚན་ཉིད་ཅན། །སྲོག་ཀྱང་མེད་ཅིང་འགྱུར་བ་མེད། །སྤྲོས་པ་མེད་དེ་ཀུན་གཞི་མེད། །ཆོས་རྣམས་ཐམས་ ཅད་རང་བཞིན་གྱིས། །མ་སྐྱེས་ཤིང་ནི་མཚན་ཉིད་མེད། །བྱུང་བ་མེད་ཅིང་གྲུབ་པ་མེད། །མཚན་མ་མེད་པས་ཕྱེ་བ་སྟེ། །མི་གང་བཀའ་བློ་བདེ་ཞིང་མི་འགལ་བ། །བསྟན་པ་ལ་ནི་རྗེས་སུ་ མཐུན་འཛིན་པ། །དེ་དག་ལ་ཡང་རྒྱལ་བ་རང་བྱུང་རྣམས། །ཐར་སྒོ་སློབ་ཤེས་རང་གི་སྤྱོད་ཡུལ་སྟོན། །དད་ནོར་ཚུལ་ཁྲིམས་ནོར་དང་ཁྲེལ་ཡོད་དང༌། །ངོ་ཚ་ཤེས་དང་ཐོས་གཏོང་ཤེས་རབ་ དང༌། །དེ་ལ་ནོར་འདི་རྣམས་ནི་ཀུན་འགྱེད་ཅིང༌། །བདུན་པོ་མི་ཟད་ཆོས་ཀྱི་མཛོད་ཀྱང་བྱེད། །མི་འགའ་བཀའ་བློ་བདེ་ཞིང་རྗེས་སུ་མཐུན། །དགེ་བའི་བཤེས་གཉེན་སྙམ་དུ་རྟག་བསམ་ ༄༅། །ནས༑ ༑བླ་ན་མེད་པའི་བྱང་ཆུབ་ཚོལ་བའི་ཕྱིར། །བླ་མ་དག་ལ་བདག་གིས་རིམ་གྲོ་བྱ། །དེ་ལྟ་བུ་ཡི་སེམས་ནི་བསྐྱེད་བྱས་ལ། །སྙིང་རྗེ་དགའ་བ་རྒྱ་ཆེར་རབ་ བསྐྱེད་དེ། །ཁམ་སྣོད་དང་བའི་ཆུ་ཡིས་བཀང་བ་ཡང༌། །སྐོམ་པ་དག་ལ་ཉེ་བར་སྦྱིན་པར་བྱ། །ཤཱ་རིའི་བུ། སེམས་བསྐྱེད་པ་བཅུ་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་ དཔའི་སྡེ་སྣོད་ཡོངས་སུ་ཚོལ་བས་སློབ་དཔོན་ལ་ལུས་ཀྱིས་རིམ་གྲོ་དང༌། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་འབུལ་ལོ། །དགེ་བའི་རྩ་བ་དེས་ཆོས་བཞི་ཐོབ་པར་འགྱུར་ ཏེ༑ བཞི་གང་ཞེ་ན། མྱུར་དུ་དགེ་བའི་ཆོས་ལ་འཇུག་པ་དང༌། སློབ་དཔོན་གྱི་བསྔགས་པ་བརྗོད་པར་འགྱུར་བ་དང༌། ནན་ཏན་གྱིས་བསྒྲུབ་ཀྱི། ལོག་པའི་ནན་གྱིས་མ་ཡིན་པ་དང༌། ཆོས་ཀྱི་ཕྱིར་སྡུག་བསྔལ་གྱི། གཞན་དུ་ཕྱོགས་པར་མི་འགྱུར་བ་སྟེ། ཤཱ་རིའི་བུ། བྱང་ཆུབ་སེམས་དཔའ་མིར་གྱུར་པ་ན་ཆོས་བཞི་པོ་དེ་དག་ཐོབ་པར་འགྱུར་རོ། །གཞན་ ཡང་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། སྐྱེ་བོ་མང་པོའི་རྗེས་སུ་བསླབ་ནས་དཀར་པོའི་ཆོས་ལ་གནས་པ་དང༌། སྦས་ཤིང་བཞག་པའི་གནས་སྐྱེ་བོ་མང་པོ་ མགུ་བ་དང༌། རབ་ཏུ་དགའ་བར་བྱེད་པ་མྱུར་དུ་ཐོབ་པ་དང༌། སེམས་དགའ་བཞིན་དུ་ཉིན་མཚན་ཟད་པར་འགྱུར་བ་དང༌། ཀུན་ནས་ལྡང་བ་མེད་པར་འཆི་བའི་དུས་བྱས་ནས་བདེ་ འགྲོ་མཐོ་རིས་སུ་སྐྱེ་བར་འགྱུར་བ་སྟེ། ཤཱ་རིའི་བུ། བྱང་ཆུབ་སེམས་དཔའ་ཆོས་བཞི་པོ་དེ་དག་ཐོབ་པར་འགྱུར་རོ། །དེ་ལྟར་གྱུར་པ་ན་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། ལྷའི་ འཁོར་གྱི་སྟན་མཆོག་རྙེད་པར་འགྱུར་བ་དང༌། ལྷའི་འཁོར་ཐམས་ཅད་དེའི་གདོང་དུ་བལྟ་ཞིང་ཅི་བཤད་པ་དེ་དག་ཐོས་ནས་ཤེས་པར་བྱའོ། །སྙམ་དུ་སེམས་པར་འགྱུར་བ་དང༌། ལྷའི་ དབང་པོ་བརྒྱ་བྱིན་དང༌། དེ་བཞིན་དུ་ལྷའི་བུ་གཞན་ཡང་དེའི་དྲུང་དུ་འོང་གི །དེ་ལྷའི་བུ་གཞན་གྱི་དྲུང་དུ་ཐེ་ཚོམ་ཡོངས་སུ་འདྲི་ཞིང་བཅད་པའི་ཕྱིར་འགྲོ་བ་མ་ཡིན་པ་དང༌། དེའི་ལོངས་སྤྱོད་ ཀྱི་ཕྱིར་གཞལ་མེད་ཁང་ཆེན་པོ་འབྱུང་བ་སྟེ། ཤཱ་རིའི་བུ། བྱང་ཆུབ་སེམས་དཔའི་ཆོས་བཞི་པོ་དེ་དག་ཐོབ་པར་འགྱུར་ཏེ། ལྷར་གྱུར་པ་དང༌། མིར་གྱུར་པ་ན་ཆོས་ཀྱི་སྒོ་བརྒྱད་སྟོང་ཕྲག་དཔག་ཏུ་ མེད་པ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །དེ་ཡི་སྟན་ནི་མཐོན་པོར་འགྱུར། །ལྷ་ཡིས་མངོན་པར་ཕྱག་བྱས་ནས། །གང་ དག་ཆོས་འདི་འཆད་པ་ལ། །ལྷ་རྣམས་དེ་ལ་ལྟ་བར་འགྱུར། །མཁས་པ་སེར་སྣ་བྲལ་བ་ལ། །ཀུན་གྱིས་བསྟི་སྟང་བྱས་པར་འགྱུར། །བརྒྱ་བྱིན་དེ་ག་ན་འདྲིར་འོང་ཞིང༌། །གཞལ་མེད་ཁང་ ཡང་ཡིད་འོང་བཟང༌། །ལྷ་ཡི་འཇིག་རྟེན་གནས་འཕོས་ཏེ། །མི་ཡི་སྲིད་པར་འོངས་གྱུར་ནས། །འཁོར་ལོས་བསྒྱུར་བ་སེར་སྣ་མེད། །རྒྱལ་པོ་རྫུ་འཕྲུལ་ཆེན་པོར་འགྱུར། །མི་ཡི་འཇིག་ ༄༅། །རྟེན་འཕོས་ནས་ཀྱང༌། །ལྷ་ཡི་ནང་དུ་ཡང་འགྲོ་སྟེ། །བླ་མ་དག་ལ་གུས་བྱས་ནས། །ནམ་ཡང་སྡུག་བསྔལ་མི་འགྱུར་རོ། །ཞུམ་པ་མེད་པའི་སེམས་ཀྱིས་སུ། །བླ་མ་དག་ ལ་གུས་བྱས་པས། །གནས་བཞི་པོ་ནི་དེ་དག་རྣམས། །རྒྱ་ཆེར་རྟག་ཏུ་རྙེད་པར་འགྱུར། །དགའ་བ་དང་ནི་གུས་པ་ཡིས། །སྣོད་གང་ཙམ་གྱི་ཆུ་བྱིན་ན། །ལྷ་དང་མི་དང་ཀླུ་རྣམས་ ཀྱིས༑ ༑མཆོད་པ་དག་ཏུ་འོས་པ་ཡིན།། །།བམ་པོ་བཅུ་པ། དེ་ལྟར་གྱུར་ན། གཞན་ཡང་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། སྔོན་གྱི་ལས་ མངོན་པར་འདུས་བྱས་པའི་དགེ་བའི་རྩ་བ་གང་གིས་སྐྱེས་པ་རབ་ཏུ་ཤེས་པ་དང༌། དེ་ན་དགེ་བའི་ཆོས་རྣམས་ཡོངས་སུ་འབྲི་བ་ཡང་རབ་ཏུ་ཤེས་པ་དང༌། དེ་ནས་ཤི་འཕོས་ནས་ གང་དུ་སྐྱེ་བར་འགྱུར་བ་དེ་ཡང་རབ་ཏུ་ཤེས་པ་དང༌། ལྷའི་འཁོར་ལ་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག། ཡང་དག་པར་གཟེངས་བསྟོད། ཡང་ དག་པར་རབ་ཏུ་དགའ་བར་བྱས་ནས་ལྷའི་འཇིག་རྟེན་ནས་འཆི་འཕོ་བར་འགྱུར་བ་སྟེ། ཤཱ་རིའི་བུ། བྱང་ཆུབ་སེམས་དཔའ་ཆོས་བཞི་ཐོབ་པར་འགྱུར་རོ། །གཞན་ཡང་ཤཱ་རིའི་ བུ༑ བྱང་ཆུབ་སེམས་དཔའ་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། དེ་ལྷའི་གནས་ནས་ཤི་འཕོས་ནས་མི་རྣམས་སྐལ་པ་མཉམ་པར་སྐྱེ་བ་དང༌། དེ་མིར་གྱུར་ན་བཙུན་པར་ བྱེད་པ་ལྔ་ཐོབ་པར་འགྱུར་རོ། །ལྔ་གང་ཞེ་ན། འདི་ལྟ་སྟེ། དེ་རིགས་བཙུན་པར་སྐྱེ་བར་འགྱུར་བ་དང༌། གཟུགས་བཙུན་པར་འགྱུར་བ་དང༌། ཚུལ་ཁྲིམས་བཙུན་པར་འགྱུར་བ་དང༌། དེའི་འཁོར་བཙུན་པར་འགྱུར་བ་དང༌། དེའི་སེམས་ཅན་བཙུན་པ་རྣམས་ལ་བྱམས་པ་སྒོམ་པར་འགྱུར་བ་སྟེ། ཤཱ་རིའི་བུ། བཙུན་པར་བྱེད་པའི་ཆོས་ལྔ་པོ་དེ་དག་ཐོབ་པར་འགྱུར་ རོ། །གཞན་ཡང་མི་བྱེད་པར་བྱེད་པའི་ཆོས་ལྔ་ཐོབ་པར་འགྱུར་ཏེ། ལྔ་གང་ཞེ་ན། འདི་ལྟ་སྟེ། དེའི་མཛའ་བོ་མི་བྱེད་པ་དང༌། ལུས་མྱུར་དུ་འཇིག་པར་མི་འགྱུར་བ་དང༌། དེའི་ལོངས་སྤྱོད་ཡོངས་སུ་ཉམས་པར་མི་འགྱུར་བ་དང༌། བྱང་ཆུབ་ཀྱི་སེམས་དང་བྲལ་བར་མི་ནུས་པ་དང༌། ཆོས་ཀྱི་མུ་གེ་འབྱུང་བ་ན་དེ་ལ་ཆོས་ཀྱི་ལོ་ལེགས་པར་འགྱུར་ཏེ། ཤཱ་ རིའི་བུ། མི་ཕྱེད་པར་བྱེད་པའི་ཆོས་ལྔ་པོ་དེ་དག་ཐོབ་པར་འགྱུར་རོ། །གཞན་ཡང་ངོ་མཚར་ཡོངས་སུ་རྫོགས་པའི་ཆོས་ལྔ་ཐོབ་པར་འགྱུར་ཏེ། ལྔ་གང་ཞེ་ན། འདི་ལྟ་སྟེ། གང་ སྣོང་སྟོང་པ། གསོག་བཞག་པར་གྱུར་པ་རྣམས་སུ་དེའི་ལག་པ་གང་དུ་བཅུག་པ་དེ་དག་ཐམས་ཅད་རིན་པོ་ཆེས་ཡོངས་སུ་གང་བར་འགྱུར་ཏེ། ངོ་མཚར་ཡོངས་སུ་རྫོགས་པ་དང་པོ་འདི་ཐོབ་པར་ འགྱུར་རོ། །དེ་སྐོམ་པར་གྱུར་ན་ཡན་ལག་བརྒྱད་དང་ལྡན་པའི་ཆུའི་རྫིང་བུ་འབྱུང་སྟེ། ངོ་མཚར་ཡོངས་སུ་རྫོགས་པ་གཉིས་པ་འདི་ཐོབ་པར་འགྱུར་རོ། །གཞན་ཡང་དེའི་ལུས་ལ་གཞན་ ༄༅། །གྱིས་གནོད་པ་བྱ་བར་མི་འགྱུར་ཏེ། འདི་ལྟ་སྟེ། དུག་དང༌། མཚོན་དང༌། མེ་དང༌། ཆུ་དང༌། མདངས་འཕྲོག་པའི་གནོད་སྦྱིན་གྱིས་གཙེ་བ་ མེད་པ་སྟེ། ངོ་མཚར་ཡོངས་སུ་རྫོགས་པ་གསུམ་པ་འདི་ཐོབ་པར་འགྱུར་རོ། །གཞན་ཡང་མཚོན་གྱི་བསྐལ་པ་བར་མ་བྱུང་བའམ། ནད་ཀྱི་བསྐལ་པ་བར་མ་བྱུང་བའམ། མུ་གེའི་བསྐལ་པ་བར་མ་བྱུང་བའམ། མེའི་བསྐལ་པ་བར་མ་བྱུང་བའམ། ཆུའི་བསྐལ་པ་བར་མ་བྱུང་བའམ། རླུང་གི་བསྐལ་པ་བར་མ་བྱུང་བའམ། སྐོམ་པའི་བསྐལ་ པ་བར་མ་བྱུང་བའམ། ཀུན་ཏུ་གདུང་བའི་བསྐལ་པ་བར་མ་བྱུང་བའམ། གནོད་སྦྱིན་གྱི་བསྐལ་པ་བར་མ་བྱུང་བ་ན། འཛམ་བུའི་གླིང་དུ་སྐྱེ་བར་མི་འགྱུར་གྱི། དེ་ལྟར་ སྐྱེ་སྟེ། དེ་བདེ་བ་དང༌། མཐུ་དང་ལྡན་པར་འགྱུར་ཞིང༌། བདེ་བ་དང་མཐུ་མང་བར་འགྱུར་ཏེ། ངོ་མཚར་ཡོངས་སུ་རྫོགས་པ་བཞི་པ་འདི་ཐོབ་པར་འགྱུར་རོ། །གཞན་ ཡང་ཤཱ་རིའི་བུ། བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་ཀྱིས་མི་དལ་བར་མི་སྐྱེ། ངན་འགྲོར་མི་སྐྱེ། སེམས་ལ་འགྱོད་པས་ཀུན་ནས་དཀྲི་བར་མི་ནུས་ཤིང༌། ངེས་པར་འབྱུང་བ་མྱུར་དུ་མཐོང་བར་འགྱུར་ཏེ། ངོ་མཚར་ཡོངས་སུ་རྫོགས་པ་ལྔ་པ་འདི་ཐོབ་པར་འགྱུར་རོ། །ཤཱ་རིའི་བུ། བྱང་ཆུབ་སེམས་དཔའ་ངོ་མཚར་ཡོངས་སུ་རྫོགས་ པའི་ཆོས་ལྔ་པོ་འདི་དག་ཐོབ་པར་འགྱུར་རོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་ཀྱིས་ཆོས་བཞི་དང་མི་འབྲལ་བར་འགྱུར་ཏེ། བཞི་གང་ ཞེན། བྱང་ཆུབ་སེམས་དཔས་སྡུག་བསྔལ་བའི་སེམས་ཅན་མཐོང་མ་ཐག་ཏུ་སྙིང་རྗེ་ཆེན་པོ་ཐོབ་པ་དང༌། དེ་ལ་དེའི་བུ་དང་བུ་མོ་གུས་པ་དང་བཅས་ཤིང་ཞེས་བྱེད་པར་འགྱུར་ བ་དང༌། རྒ་བས་བཅོམ་ཡང་བརྙས་པར་མི་འགྱུར་བ་དང༌། དེ་ལས་ཀྱི་མཐའ་གང་བྱེད་པ་དེ་དག་ཀྱང་ཉིས་འགྱུར་སུམ་འགྱུར་དུ་ཐོབ་པར་འགྱུར་བ་སྟེ། ཆོས་བཞི་པོ་དེ་དག་ རྟག་ཏུ་རྒྱུན་མི་འཆད་པར་མི་འབྲལ་བར་འགྱུར་རོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་པས་ཆོས་གསུམ་གྱི་མི་འཕྲོག་སྟེ། གསུམ་གང་ཞེ་ན། ཆགས་པས་མི་འཕྲོག་པ་དང༌། ཞེ་སྡང་དང༌། གཏི་མུག་གིས་མི་འཕྲོག་པ་སྟེ། ཆོས་གསུམ་པོ་དེ་དག་གིས་མི་འཕྲོག་པའོ། །གཞན་ཡང་ཤཱ་རིའི་ བུ། བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་པས་ནད་མེད་པར་བྱེད་པའི་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། ནད་རྒྱུན་རིང་པོ་མེད་པ་དང༌། ཡན་ ལག་སྐམ་པར་མི་འགྱུར་བ་དང༌། ལོངས་སྤྱོད་ཉམས་པར་མི་འགྱུར་བ་དང༌། རྒྱལ་པོའམ། རྐུན་མོའམ། དེ་མ་ཡིན་པའི་སེམས་ཅན་འཚོ་བར་བྱེད་པ་གཞན་གྱིས་སྡུག་ ༄༅། །བསྔལ་བ་དང༌། གནོད་པར་བྱ་བར་མི་འགྱུར་བ་སྟེ། ཤཱ་རིའི་བུ། བྱང་ཆུབ་སེམས་དཔའ་ནད་མེད་པར་བྱེད་པའི་ཆོས་བཞི་པོ་དེ་དག་ཐོབ་ པར་འགྱུར་རོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་པས་བླ་མའི་གནས་བཞི་ཐོབ་པར་འགྱུར་ཏེ། བཞི་གང་ཞེ་ན། འཁོར་ ལོས་བསྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་ཞིང་ཆོས་ཅན་ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི། འདི་རྣམས་ཡིན་ནོ། ། འདི་ལྟ་སྟེ། འཁོར་ལོ་རིན་པོ་ཆེ་དང༌། གླང་པོ་རིན་པོ་ཆེ་དང༌། རྟ་རིན་པོ་ཆེ་དང༌། ནོར་བུ་རིན་པོ་ཆེ་དང༌། བུད་མེད་རིན་པོ་ཆེ་དང༌། ཁྱིམ་བདག་རིན་པོ་ཆེ་དང༌། བློན་པོ་ རིན་པོ་ཆེ་སྟེ། བདུན་པོ་དེ་དག་གོ །དེའི་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་ཅན། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཐམ་པར་འགྱུར་རོ། ། གླིང་བཞི་པ་ཡང་དེའི་རྗེས་སུ་འབྲང་བར་འགྱུར། དེ་ལ་གུས་པ་བྱེད་པར་འགྱུར། སྐར་མཁན་དང༌། བློན་པོ་ཆེན་པོ་དང༌། སྒོ་བ་དང༌། འཁོར་དང༌། གྲོང་རྡལ་གྱི་མི་དང༌། ལྗོངས་ཀྱི་མི་དག་དང༌། ཁམས་ཀྱི་རྒྱལ་པོ་ཐམས་ཅད་ཀྱིས་ཀྱང་གུས་པར་བྱེད་པར་འགྱུར་ཏེ། བླ་མའི་གནས་དང་པོ་འདི་ཐོབ་པར་འགྱུར་རོ། །གཞན་ཡང་ཤཱ་རིའི་བུ། བྱང་ ཆུབ་སེམས་དཔའ་འདོད་པའི་ཡོན་ཏན་ལྔ་ལ་ཆགས་པར་མི་འགྱུར་ཏེ། །ལྔ་གང་ཞེ་ན། འདི་ལྟ་སྟེ། མིག་གིས་ཤེས་པར་བྱ་བའི་གཟུགས་དང༌། རྣ་བས་ཤེས་པར་བྱ་བའི་སྒྲ་དང༌། སྣས་ཤེས་པར་བྱ་བའི་དྲི་དང༌། ལྕེས་ཤེས་པར་བྱ་བའི་རོ་དང༌། ལུས་ཀྱིས་ཤེས་པར་བྱ་བའི་རེག་རྣམས་ཏེ། དེ་ལྟར་འདོད་པའི་ཡོན་ཏན་ལྔ་པོ་ལ་ཆགས་པར་མི་འགྱུར་གྱི། དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་མྱུར་དུ་མངོན་པར་ཤེས་པ་ལྔ་ཐོབ་པར་འགྱུར་ཞིང༌། དེ་ལ་མི་དང་མི་མ་ཡིན་པ་རྣམས་གུས་པར་བྱེད་པར་འགྱུར་ཏེ། བླ་མའི་གནས་གཉིས་ པ་འདི་རྗེས་སུ་ཐོབ་པར་འགྱུར་རོ། །གཞན་ཡང་ཤཱ་རིའི་བུ། གང་དང་གང་དུ་སྐྱེས་པ་ཐམས་ཅད་དུ་བློས་མཆོག་ཏུ་འགྱུར། ཤེས་རབ་ཀྱིས་མཆོག་ཏུ་འགྱུར། སྤོབས་པས་མཆོག་ ཏུ་འགྱུར། དེ་རྒྱལ་པོར་གྲགས་པར་འགྱུར་རོ། །འདི་ལྟ་སྟེ། འདས་པའི་དུས་ན་སྨན་ཆེན་པོ་ཞེས་བྱ་བ་ཞིག་བྱུང་བ་དེ་བཞིན་དུ་དེ་རྒྱལ་པོའི་ཕོ་བྲང་གི་སྟན་མཆོག་ཐོབ་སྟེ། དེ་ལ་རྒྱལ་པོ་དང༌། གང་དེ་མ་ཡིན་པ་གཞན་སྐར་མཁན་དང༌། བློན་པོ་ཆེན་པོ་དང༌། སྒོ་བ་དང༌། འཁོར་དང༌། གྲོང་རྡལ་གྱི་མི་དང་ཡུལ་གྱི་མི་རྣམས་གུས་པར་བྱེད་པར་འགྱུར་ཏེ། བླ་མའི་གནས་གསུམ་པ་འདི་རྗེས་སུ་ཐོབ་ པར་འགྱུར་རོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་ལྷ་དང༌། ཀླུ་དང༌། གནོད་སྦྱིན་དང༌། ༄༅། །དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང་མི་མ་ཡིན་པ་དང༌། སེམས་ཅན་ཐམས་ཅད་ཀྱི་མཆོག་ཏུ་ འགྱུར། མངོན་པར་འཕགས་པར་འགྱུར། ཚུལ་ཁྲིམས་དང༌། ཏིང་འཛིན་དང༌། ཤེས་རབ་དང༌། རྣམ་པར་གྲོལ་བའི་ཡེ་ཤེས་མཐོང་བས་མངོན་པར་འཕགས་པར་འགྱུར། ཚུལ་ ཁྲིམས་རྣམ་པར་འཕེལ་བས་མངོན་པར་འཕགས་པར་འགྱུར། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བ་རྣམ་པར་འཕེལ་ བས་མངོན་པར་འཕགས་པར་འགྱུར་ཏེ། བླ་མའི་གནས་བཞི་པ་དེ་ཐོབ་པར་འགྱུར་ཏེ། བླ་མའི་གནས་བཞི་པོ་དེ་དག་ཐོབ་པར་འགྱུར་རོ། །ཤཱ་རིའི་བུ། བྱང་ཆུབ་སེམས་དཔས་འདི་ལྟ་ སྟེ། ཆོས་འདོད་པའི་ཕྱིར་མཁན་པོ་དང༌། སློབ་དཔོན་ལ་ཆུ་བུམ་པ་གང་ཙམ་ཕུལ་ན། དེ་ལྟ་བུའི་ཡོན་ཏན་གྱི་ཆོས་ཚད་མེད་པ་ལེན་པར་འགྱུར་རོ། །ཚུར་ཤོག་ཅེས་བྱས་ནའང་འོང་ཞིང༌། ཇི་ལྟར་སྨྲས་པ་ལས་འགལ་བར་མི་བྱེད་པའི་དགེ་བའི་རྩ་བ་དེ་ཉིད་ཀྱིས་ཡོ་བྱད་བཞི་ཐོབ་པར་འགྱུར་ཏེ། བཞི་གང་ཞེ་ན། སྐྱེ་བོ་མ་རབས་ཀྱི་ཡོ་བྱད་མ་ཡིན་གྱི། རྒྱལ་པོའི་ཡོ་བྱད་ ཐོབ་པར་འགྱུར། དྲང་སྲོང་གི་ཡོ་བྱད་ཐོབ་པར་འགྱུར་ཏེ། འདོད་པ་སྤང་པ་ལ་འཛུད་པ་འདི་ལྟ་སྟེ། དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བ་དེ་ནི། ཆོས་ཀྱི་ཡོ་བྱད་ཅེས་ བྱའོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་སྐྱེ་བ་གང་དང་གང་དུ་སྐྱེས་པ་ན་སྐྱེ་བ་ཐམས་ཅད་དུ་སྐྱེ་བ་དྲན་པར་འགྱུར་ཏེ། དེ་སྐྱེ་བ་དྲན་པས་སྐྱེ་བ་དེ་དང་དེ་དག་ཏུ་བྱང་ཆུབ་ཀྱི་སེམས་ བརྗེད་པར་མི་འགྱུར་བ་དེ་ནི། དྲན་པའི་ཡོ་བྱད་ཅེས་བྱའོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ ནས་འཁོར་བཞིས་བསྐོར་ཅིང་མདུན་དུ་བདར་བར་འགྱུར། ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ ཆེན་པོ་དང༌། མི་དང་མི་མ་ཡིན་པས་ཀུན་ནས་བསྐོར་ཅིང་མདུན་དུ་བདར་བར་འགྱུར་ཏེ། ཡོ་བྱད་བཞི་པོ་དེ་དག་ཐོབ་པར་འགྱུར་རོ། །གཞན་ཡང་ཤཱ་རིའི་བུ། བྱང་ ཆུབ་སེམས་དཔའ་སློབ་དཔོན་གང་དང་གང་ལས་ཚིག་བཞི་པའི་ཚིགས་སུ་བཅད་པ་རྙེད་ཅིང་འཛིན་པར་འགྱུར་ཏེ། དེ་ཚུར་ཤོག་ཅེས་བསྒོ་ན་ཡང་དེ་འོང༌། སོང་ཞིག་ཅེས་ བསྒོ་ན་ཡང་དེ་འགྲོ་བ་དང༌། འདི་ནི། དགེ་བ། འདི་ནི། མི་དགེ་བ། འདི་ནི། ཁ་ན་མ་ཐོ་བ་དང་བཅས་པ། འདི་ནི། ཁ་ན་མ་ཐོ་བ་མེད་པ། འདི་ནི། བསྟེན་པར་ བྱ་བ། འདི་ནི། བསྟེན་པར་བྱ་བ་མ་ཡིན་པ་ཞེས་བྱ་བ་ནས་གོང་མ་བཞིན་དུ་སྦྱར་ཏེ། བྱ་བ་འདི་ནི། གནོད་པ། ཕན་པ་མེད་པ། སྡུག་བསྔལ་བར་འགྱུར་བའོ། །འདི་བྱས་ན། ཡུན་རིང་པོའི་དོན་དང༌། ༄༅། །ཕན་པ་དང་བདེ་བར་འགྱུར་རོ། །ཞེས་ཇི་ལྟར་བསྒོ་བ་བཞིན་དུ་མི་དགེ་བ་མི་བྱེད་ཅིང་དགེ་བ་ལ་བརྟན་ཏེ་སླར་མི་ལྡོག་ཅིང་མི་མཐུན་པར་མི་བྱེད་པ་དེ་ དགེ་བའི་རྩ་བ་དེ་དང་ལྡན་པས་མཐོན་པོར་བྱེད་པའི་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། ཚུལ་ཁྲིམས་མཐོན་པོར་བྱེད་པའི་ཆོས་ཐོབ་པར་འགྱུར། ལུས་མཐོན་པོར་བྱེད་ པའི་ཆོས་ཐོབ་པར་འགྱུར་ཏེ། དེའི་ལུས་རིང་ཞིང་ལུས་ཐམས་ཅད་རྒྱས་པར་འགྱུར། ཤེས་རབ་ཆེ་བར་འགྱུར་ཏེ། ཤེས་རབ་མཐོ་བ། ཤེས་རབ་རྒྱ་ཆེ་བ། ཤེས་རབ་ཡངས་པ། ཤེས་རབ་མགྱོགས་པ། ཤེས་རབ་རྣོ་བ། ཤེས་རབ་མྱུར་བ། ཤེས་རབ་ཟབ་པ། ཤེས་རབ་ངེས་པར་རྟོགས་པར་འགྱུར། ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་ འགྱུར་ཏེ། མཐོན་པོར་བྱེད་པའི་ཆོས་བཞི་པོ་དེ་དག་ཐོབ་པར་འགྱུར་རོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་པས་བལྟར་མི་སྣང་བར་བྱེད་པའི་ ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། འདོམས་ཀྱི་སྦ་བ་སྦུབས་སུ་ནུབ་པ་འཐོབ་སྟེ། འདི་ནི། བལྟར་མི་སྣང་བར་བྱེད་པའི་ཆོས་ཐོབ་པར་འགྱུར་བ་དང་པོའོ། །གཞན་ཡང་ཤཱ་ རིའི་བུ། བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་པས་བྱང་ཆུབ་སེམས་དཔའ་སྐྱེས་ནས་ཕ་དང༌། མ་དང༌། གཞན་ཉེ་དུ་རྣམས་དང༌། ལྷ་དང༌། ཀླུ་དང༌། དྲི་ཟ་དང༌། གནོད་ སྦྱིན་དང༌། སྲིན་པོ་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། མི་དང༌། མི་མ་ཡིན་པ་རྣམས་དང༌། དད་པའི་སེམས་ཀྱིས་ཀྱང་རུང༌། མ་དད་པའི་སེམས་ཀྱིས་ཀྱང་ རུང་སྟེ། སེམས་ཅན་གང་གིས་ཀྱང་བྱང་ཆུབ་སེམས་དཔའི་སྤྱི་གཙུག་མཐོང་བར་མི་ནུས་ཏེ། འདི་ནི། བལྟར་མི་སྣང་བར་བྱེད་པའི་ཆོས་ཐོབ་པར་འགྱུར་བ་གཉིས་པའོ། །གཞན་ཡང་ ཤཱ་རིའི་བུ། བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་པས་སྐྱེས་པ་ནས་རྒྱས་པར་བྱ་སྟེ། ཕ་མ་ནས་མི་དང་མི་མ་ཡིན་པའི་བར་གྱིས་དད་པའི་སེམས་ཀྱིས་ཀྱང་རུང༌། མ་ དད་པའི་སེམས་ཀྱིས་ཀྱང་རུང་སྟེ། གང་གིས་ཀྱང་བྱང་ཆུབ་སེམས་དཔའི་ཁའི་བྱི་དོར་བྱེད་མི་ནུས་ཏེ། དེ་ཁའི་བྱི་དོར་བྱའོ། །སྙམ་པ་དང༌། རྐང་པ་གཉིས་ལ་ཁའི་སྒོ་འབྱུང་ངོ༌། །དེ་ཅིའི་ཕྱིར་ ཞེ་ན། ཤཱ་རིའི་བུ། སྐྱེས་བུ་དམ་པ་དེ་དག་འདི་ལྟ་བུའི་ངོ་མཚར་དང༌། རྨད་ཀྱི་ཆོས་དང་ལྡན་ཞིང་སྐྱེས་བུ་དམ་པའི་ངག་མཆོག་དང་ལྡན་པར་འགྱུར་ཏེ། འདི་ནི། བལྟར་མི་སྣང་བར་བྱེད་པའི་ ཆོས་གསུམ་པའོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའི་དགེ་བའི་རྩ་བ་དེ་ཉིད་དང་ལྡན་པས་བྱང་ཆུབ་སེམས་དཔའ་སྐྱེས་མ་ཐག་ཏུ་གཞན་གྱིས་མ་བཟུང་བར་ས་ལ་འདུག་ནས་ ཕྱོགས་བཞིར་རྣམ་པར་བལྟ་སྟེ། དེ་ཡེ་ཤེས་འབར་བ་རྙེད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེས་སྔོན་གཡོ་མེད་པར་ཐོས་པ་བཙལ་བས་གཡོ་མེད་པའི་མིག་ཐོབ་སྟེ། ༄༅། །བྱང་ཆུབ་སེམས་དཔའ་གཡོ་མེད་པའི་མིག་དེ་དང་ལྡན་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་ ལྷའི་མིག་རྣམ་པར་དག་པ་མི་ལས་འདས་པས་མཐོང་ངོ༌། །དེ་ལྟར་བྱང་ཆུབ་སེམས་དཔའ་མྱུར་བའི་ཚེ་དང་ལྡན་པའི་ཡེ་ཤེས་ཆེན་པོ་ཐོབ་སྟེ། བྱང་ཆུབ་སེམས་དཔའ་ཡེ་ཤེས་ཆེན་པོ་དེ་དང་ལྡན་ པས་སེམས་ཅན་ཐམས་ཅད་ཀྱི་དུས་གསུམ་གྱི་སེམས་ཀྱི་ཚུལ་རབ་ཏུ་ཤེས་སོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེས་སྔོན་དོན་དུ་གཉེར་བར་བྱས། ཡིད་ལ་བྱས། སེམས་ ཅན་ཐམས་ཅད་ཀྱིས་བསམ་ཞིང་རི་མོར་བྱས་ནས་ཆོས་ལ་སྨན་དུ་འདུ་ཤེས་པ་དང༌། རིན་པོ་ཆེར་འདུ་ཤེས་པ་དང༌། དཀོན་པར་འདུ་ཤེས་པ་དང༌། ཇི་ལྟ་བ་བཞིན་དུ་འདུ་ཤེས་བསྐྱེད་དེ་ ཐོས་པ་ཡོངས་སུ་བཟུང་ངོ༌། །དེ་བས་ན། བྱང་ཆུབ་སེམས་དཔའ་མྱུར་དུ་རབ་ཏུ་རྣམ་པར་འབྱེད་པའི་ཡེ་ཤེས་རྙེད་དོ། །རབ་ཏུ་རྣམ་པར་འབྱེད་པའི་ཡེ་ཤེས་དེ་དང་ལྡན་པའི་བྱང་ཆུབ་སེམས་ དཔའ་སེམས་ཅན་ཐམས་ཅད་ཀྱི་ཚུལ་ཁྲིམས་ལ་ཡོངས་སུ་འཇལ་བ་ནས་ཐོས་པ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་ བའི་བར་ལ་ཡོངས་སུ་འཇལ་ལོ། །ཚུལ་ཁྲིམས་ཀྱི་སྤྱིར་ཡོངས་སུ་འཇལ་བ་ནས་ཐོས་པ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་ མཐོང་བའི་བར་གྱི་སྤྱིར་ཡོངས་སུ་འཇལ་ལོ། །སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་རྒྱུ་མཐུན་པ་ལ་ཡོངས་སུ་འཇལ་བ་ནས་ཐོས་པ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་ བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་རྒྱུ་མཐུན་པའི་བར་ལ་ཡོངས་སུ་འཇལ་ལོ། །སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་རྒྱུ་མཐུན་པ་ལས་ཤིན་ཏུ་ལྷག་པར་ཡོངས་སུ་འཇལ་བ་ ནས་ཐོས་པ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་རྒྱུ་མཐུན་པ་ལས་ཤིན་ཏུ་ལྷག་པའི་བར་ལ་ཡོངས་སུ་འཇལ་ལོ། །སེམས་ ཅན་ཐམས་ཅད་ཀྱི་སྤྱོད་ལམ་དང༌། སྤྱོད་པ་དང༌། ནན་ཏན་དང༌། བརྟུལ་བ་ལ་ཡོངས་སུ་འཇལ་ལོ། །སེམས་ཅན་ཐམས་ཅད་ཕན་ཚུན་བཙལ་ན། གང་སེམས་ཅན་ཐམས་ཅད་ཀྱི་ཚུལ་ཁྲིམས་ དང་ཐོས་པ་ནས་རྣམ་པར་གྲོལ་བའི་ཡེ་ཤེས་མཐོང་བའི་བར་དང༌། སེམས་ཅན་ཐམས་ཅད་ཀྱི་སྤྱིའི་ཚུལ་ཁྲིམས་ནས་སྤྱིའི་ཐོས་པ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་ བ་དང༌། རྣམ་པར་གྲོལ་བའི་ཡེ་ཤེས་མཐོང་བ་དང༌། གང་སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་རྒྱུ་མཐུན་པ་ལས་ཐོས་པ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་ གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་བར་གྱི་རྒྱུ་འདྲ་བ་དང༌། གང་སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་རྒྱུ་མཐུན་པ་ལས་ཤིན་ཏུ་ལྷག་པ་ནས་ཐོས་པ་དང༌། ཏིང་ངེ་ ༄༅། །འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་རྒྱུ་མཐུན་པ་ལས་ཤིན་ཏུ་ལྷག་པའི་བར་དང༌། གང་སེམས་ ཅན་ཐམས་ཅད་ཀྱི་སྤྱོད་ལམ་དང༌། སྤྱོད་པ་དང༌། བརྟུལ་བ་དེ་དག་ཐམས་ཅད་དང༌། བདག་གི་བསོད་ནམས་བསྒྲུན་ཅིང་ཡོངས་སུ་བཙལ་ན། བདག་དང་མཚུངས་ཤིང་མཉམ་པ་ཡང་དག་ པར་རྗེས་སུ་མི་མཐོང་ངོ༌། །དེ་ཡང་སེམས་ཅན་ཐམས་ཅད་ཀྱི་རྩ་བ་ལ་ལྷག་པར་གནས་པ་ཡོངས་སུ་ཚོལ་ཏེ། དེས་སེམས་ཅན་ཐམས་ཅད་ཡོངས་སུ་བཙལ་ན། བདག་དང་མཚུངས་ཤིང་ མཉམ་པ་ཡང་དག་པར་རྗེས་སུ་མི་མཐོང་ངོ༌། །དེ་ལྟར་ཤཱ་རིའི་བུ། བྱང་ཆུབ་སེམས་དཔའ་མྱུར་དུ་དེའི་སྐད་ཅིག་དེ་ཉིད་ལ་ལས་ཀྱི་རྣམ་པར་སྨིན་པས་སྒྲུབ་པའི་ཡེ་ཤེས་སྐྱེ་སྟེ། དེས་ སེ་གོལ་གཏོགས་པ་སྲིད་ཀྱིས་སེམས་ཅན་ཐམས་ཅད་ཀྱི་སེམས་ཀྱི་རྣམ་པ་སྟོང་རབ་ཏུ་ཤེས་ཏེ། དེས་ཐམས་ཅད་ཡོངས་སུ་བཙལ་ན། བདག་དང་མཚུངས་ཤིང་མཉམ་པ་ཡང་དག་པར་ རྗེས་སུ་མི་མཐོང་ངོ༌། །བདག་བླ་མའི་གནས་ལ་གནས་པར་ཤེས་ཤིང་མ་བཟུང་བར་སེངྒེའི་དང༌། གླང་པོ་ཆེའི་འགྲོས་ལྟ་བུས་ས་ལ་གོམ་པ་བདུན་བོར་ཏེ། དེ་བྱང་ཆུབ་ཀྱི་སྙིང་པོ་གང་ན་ བ་དེར་ལས་ཀྱི་རྣམ་པར་སྨིན་པ་མདུན་དུ་བྱས་ནས་གནས་ཏེ་བདག་ནི། འཇིག་རྟེན་གྱི་གཙོ་བོ། བདག་འཇིག་རྟེན་གྱི་མཆོག་སྟེ། སྐྱེ་བ་དང༌། རྒ་བ་དང༌། ན་བ་དང༌། འཆི་བ་མཐར་བྱའོ། ། སེམས་ཅན་སྐྱེ་བ་དང༌། རྒ་བ་དང༌། ན་བ་དང༌། འཆི་བས་གཟིར་བ་རྣམས་ཐར་པར་བྱའོ། །ཆོས་བཟང་པོ་བསྟན་པར་བྱའོ། །ཞེས་སྨྲས་ཏེ། ཤཱ་རིའི་བུ། བྱང་ཆུབ་སེམས་དཔས་ཚིག་ དེ་སྨྲས་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དབྱངས་ཀྱིས་གོ་བར་བྱས་པར་འགྱུར། ས་གཡོ་བས་འཇིགས་ཤིང་སྤུ་ཟིང་ཞེས་བྱེད་པ་ཡང་འཇིག་རྟེན་དུ་འབྱུང་བར་ འགྱུར་རོ། །ལྷའི་རྔ་ཡང་རྒྱུན་མི་འཆད་པར་བརྡུང་ངོ༌། །ས་ཕྱོགས་གང་ན་བྱང་ཆུབ་སེམས་དཔའ་གནས་པར་འགྱུར་བའི་ས་ཕྱོགས་དེར་འཁོར་ལོ་ཙམ་ཞིག་མི་གཡོའོ། །ཆུའི་ཕུང་པོ་གང་ལ་གནས་ པའི་ཆུའི་ཕུང་པོ་དེ་རླུང་གིས་བསྐྱོད་པར་མི་འགྱུར་རོ། །དེས་ཐམས་ཅད་དུ་བལྟས་ན། བདག་གི་སྣང་བར་གྱུར་ཅིང་གནས་པར་མཐོང་ངོ༌། །དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ མངོན་པར་རྫོགས་པར་སངས་རྒྱས་ན། དེ་ལ་སེམས་ཅན་ཐམས་ཅད་ཀྱིས་བལྟ་བར་མི་ནུས་སོ། །འདི་ནི། བལྟར་མི་སྣང་བར་བྱེད་པའི་ཆོས་ཐོབ་པར་བྱེད་པ་བཞི་པ་སྟེ། ཤཱ་རིའི་བུ། བལྟར་ མི་སྣང་བར་བྱེད་པའི་ཆོས་བཞི་པོ་དེ་དག་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། ཇི་ལྟར་སློབ་དཔོན་གྱིས་ཚུར་ཤོག་ཅིག་ཅེས་བྱས་ན་ཡང་འོང༌། སོང་ཞིག་ཅེས་བྱས་ནའང་འགྲོ་བའི་ ཕྱིར་རོ༑ ༑དེ་དགེ་བའི་རྩ་བ་དེ་ཉིད་དང་ལྡན་པས་ཡང་བ་བཞི་ཐོབ་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། སངས་རྒྱས་བཅོམ་ལྡན་འདས་རྣམས་ཀྱིས་བསྟན་པ་མཚན་ཉིད་མ་ཚང་ ༄༅། །པ་མེད་ཅིང་སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྟན་པ་འབྲས་བུ་ཡོད་པ་ཡང་བ་དང་པོ་འདི་འཐོབ་བོ། །དགེ་བའི་རྩ་བ་དེ་ཉིད་དང་ལྡན་པས་དེ་ བཞིན་གཤེགས་པས་དགེ་སློང་ཆུར་ཤོག་ཅེས་གསུང་བར་འགྱུར་ཏེ། དགེ་སློང་ཚུར་ཤོག་ཅེས་བྱས་ན་སྐྲ་བྲེགས་བར་འགྱུར། ངུར་སྨྲིག་གྱོན་ཅིང་ལྷུང་བཟེད་ཐོགས་པར་འགྱུར་ཏེ། ཡང་བ་གཉིས་པ་འདི་འཐོབ་བོ། །དགེ་བའི་རྩ་བ་དེ་ཉིད་དང་ལྡན་པས་དེ་བཞིན་གཤེགས་པ་སེམས་ཅན་ཐམས་ཅད་ཀྱི་དུས་གསུམ་གྱི་སེམས་རབ་ཏུ་མཁྱེན་ཏེ། ཡང་བ་གསུམ་པ་འདི་ འཐོབ་བོ། །དགེ་བའི་རྩ་བ་དེ་ཉིད་དང་ལྡན་པས་དེ་བཞིན་གཤེགས་པས་སེམས་ཅན་ཐམས་ཅད་ཀྱི་སྨན་ཇི་ལྟ་བ་བཞིན་དུ་རབ་ཏུ་མཁྱེན་ཏེ། ཡང་བ་བཞི་པ་འདི་འཐོབ་བོ། །དེ་དག་ནི། ཡང་ པ་བཞི་སྟེ། དེ་ཅིའི་ཕྱིར་ཞེ་ན། དེ་ལྟར་དེ་ལེགས་པར་ཞུགས་པས་སློབ་དཔོན་དང༌། མཁན་པོ་ལ་ཐ་ན་ཆུ་བུམ་པ་གང་ཙམ་ཡང་འབུལ་བའི་ཕྱིར་རོ། །གཞན་ཡང་ཤཱ་རིའི་བུ། བྱང་ཆུབ་ སེམས་དཔའ་དགེ་བའི་རྩ་བ་དེ་ཉིད་དང་ལྡན་པས་གཞན་གྱིས་མི་ཚུགས་པའི་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། ཤཱ་རིའི་བུ། དེ་བཞིན་གཤེགས་པའི་སྐུ་ལ་མེ་དང༌། མཚོན་དང༌། དུག་གིས་ཚུགས་པ་ནི། གནས་མ་ཡིན་ཞིང་སྐབས་མེད་པ་དང༌། ཕ་རོལ་གྱི་གནོད་པ་བྱས་པས་འཆི་བའི་དུས་བྱེད་པར་འགྱུར་བ་དེ་ལྟ་བུའི་གནས་མེད་དོ། །ཕ་རོལ་ གྱིས་མི་ཚུགས་པའི་ཆོས་བཞི་པོ་དེ་དག་ཐོབ་པར་འགྱུར་རོ། །དེ་ཡང་ཕ་རོལ་གྱིས་མི་ཚུགས་པའི་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། ཤཱ་རིའི་བུ། སེམས་ཅན་ཐམས་ཅད་ཀྱིས་ དེ་བཞིན་གཤེགས་པས་མ་གསན་པའི་ཆོས་ཐ་ན་ཆོས་ཀྱི་ཚིག་གཅིག་ཙམ་ཡང་ཐོས་པར་བྱེད་ནུས་པ་གནས་མ་ཡིན་ཞིང་སྐབས་མེད་དེ། དེ་ལྟ་བུའི་གནས་མེད་དོ། །སེམས་ཅན་ཐམས་ཅད་ ཀྱིས་ཐ་ན་སེམས་བསྐྱེད་པ་གཅིག་ཙམ་ཡང་མཉམ་པར་གཞག་པའི་སེམས་རྙེད་པར་འགྱུར་བའི་བར་དུ་དེ་ལྟ་བུའི་གནས་མེད་དོ། །གཞན་ཡང་ཤཱ་རིའི་བུ། དེ་བཞིན་གཤེགས་པ་ནི། རྟག་ ཏུ་མཉམ་པར་བཞག་པ་སྟེ། དེ་བཞིན་གཤེགས་པ་ནི། བྱམས་པ་ལ་གནས། སྙིང་རྗེ་ལ་གནས། དགའ་བ་ལ་གནས། བཏང་སྙོམས་ལ་གནས་སོ། །ཤཱ་རིའི་བུ། སེམས་ཅན་ཐམས་ ཅད་ཀྱིས་དེ་བཞིན་གཤེགས་པའི་ལུས་སམ་གཟུགས་ལ་མཚན་མར་འཛིན་ནུས་པ་ནི། གནས་མ་ཡིན་ཞིང་སྐབས་མེད་དེ། དེ་ལྟ་བུའི་གནས་མེད་དེ། གཞན་གྱིས་མི་ཚུགས་པར་ བྱེད་པའི་ཆོས་བཞི་པོ་དེ་དག་ཐོབ་པར་འགྱུར་རོ། །ཤཱ་རིའི་བུ། འདི་ལྔ་ནི། དེ་བཞིན་གཤེགས་པའི་ཚད་མེད་པར་བྱེད་པའི་ཆོས་སོ། །ལྔ་གང་ཞེ་ན། ཤཱ་རིའི་བུ། དེ་བཞིན་གཤེགས་ པའི་ཚུལ་ཁྲིམས་ཚད་མེད་པ་དང༌། ཤཱ་རིའི་བུ། དེ་བཞིན་གཤེགས་པའི་ཐོས་པ་ཚད་མེད་པ་དང༌། དེ་བཞིན་གཤེགས་པའི་ཏིང་ངེ་འཛིན་དང༌། ཤེས་རབ་ཀྱིས་རྣམ་པར་གྲོལ་བ་དང༌། ༄༅། །རྣམ་པར་གྲོལ་བའི་ཡེ་ཤེས་མཐོང་བ་ཚད་མེད་པ་སྟེ། ཤཱ་རིའི་བུ། ལྔ་པོ་དེ་དག་ནི། དེ་བཞིན་གཤེགས་པའི་ཚད་མེད་པར་བྱེད་པའི་ཆོས་སོ། །ཚུར་ཤོག་ ཅེས་བྱས་ན་ཡང་འོང་བའི་དགེ་བའི་རྩ་བ་དེ་ཉིད་དང་ལྡན་པས་ཐོགས་པ་མེད་པའི་ཡེ་ཤེས་བཞི་ཐོབ་པར་འགྱུར་ཏེ། བཞི་གང་ཞེ་ན། སངས་རྒྱས་བཅོམ་ལྡན་འདས་རྣམས་འདས་པའི་ དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང༌། སངས་རྒྱས་བཅོམ་ལྡན་འདས་རྣམས་མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་ པ་དང༌། སངས་རྒྱས་བཅོམ་ལྡན་འདས་རྣམས་ད་ལྟར་བྱུང་བའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང༌། དེ་བཞིན་གཤེགས་པས་སེམས་མཉམ་པར་ སྒྲུབ་པ་སྟེ། སེམས་མཉམ་པར་བསྒྲུབས་པ་དེས་དེ་བཞིན་གཤེགས་པས་དུས་གསུམ་མཉམ་པ་ཉིད་ཀྱི་ཡེ་ཤེས་དང༌། ཡང་དག་པའི་ཡེ་ཤེས་དང་ལྡན་ནོ། །ཡང་དག་པའི་ཡེ་ ཤེས་དེས་གཞན་ལ་རག་མ་ལས། གཞན་གྱི་ཁར་མ་ལས་པར་ཆོས་ཐམས་ཅད་ཤེས་ཏེ། དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་བོ། །བསམ་གྱིས་མི་ཁྱབ་ པའི་ཡེ་ཤེས་དེ་དང་ལྡན་པས་རླུང་དང་ཆར་རབ་ཏུ་མཁྱེན་ཏེ། རྗེས་སུ་མཐུན་པ་ཞེས་བྱ་བའི་རླུང་ལྡང་སྟེ། སེམས་ཅན་ཇི་སྙེད་པས་ཅུང་ཟད་སོ་སོར་རྗེས་སུ་མྱོང་བར་འགྱུར་ཏེ། རླུང་དེའི་འཕང་དུ་རྒྱང་གྲགས་གསུམ་མོ། །དེའི་སྟེང་གི་བར་སྣང་ལ་རླུང་སྤྲིན་ཞེས་བྱ་བའི་རླུང་ལྡང་སྟེ། དེའི་འཕང་དུ་རྒྱང་གྲགས་ལྔའོ། །དེའི་སྟེང་གི་བར་སྣང་ལ་འཇོམས་པ་ཞེས་བྱ་བའི་རླུང་ལྡང་ སྟེ༑ རླུང་དེའི་དཀྱིལ་འཁོར་གྱི་འཕང་དུ་དཔག་ཚད་བཅུའོ། །དེའི་སྟེང་གི་བར་སྣང་ལ་སྐྱེ་བྲལ་ཞེས་བྱ་བའི་རླུང་ལྡང་སྟེ། རླུང་གི་དཀྱིལ་འཁོར་དེའི་འཕང་དུ་དཔག་ཚད་སུམ་ཅུའོ། །དེའི་སྟེང་གི་བར་ སྣང་ལ་དེ་བཞིན་གཤེགས་པ་ཞེས་བྱ་བའི་རླུང་ལྡང་སྟེ། རླུང་གི་དཀྱིལ་འཁོར་དེའི་འཕང་དུ་དཔག་ཚད་བཞི་བཅུའོ། །ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་ནི། ཤེས་རབ་ལ་རྟོན་པ་སྟེ། རླུང་གི་དཀྱིལ་འཁོར་བྱེ་བ་སྟོང་ཕྲག་དྲུག་ཅུ་རྩ་བརྒྱད་རབ་ཏུ་མཁྱེན་ཏོ། །དེ་ལ་ཐ་མའི་རླུང་གི་དཀྱིལ་འཁོར་ཀུན་ཏུ་ཁྱབ་ཅེས་བྱ་སྟེ། གང་ལ་ས་ ཆེན་པོ་གནས་པའི་ཆུའི་ཕུང་པོ་འཕང་དུ་དཔག་ཚད་སྟོང་ཕྲག་དྲུག་ཅུ་རྩ་བརྒྱད་ཡོད་དེ། ས་ཆེན་པོའི་འཕང་དུ་ཡང་དཔག་ཚད་སྟོང་ཕྲག་དྲུག་ཅུ་རྩ་བརྒྱད་དོ། །དེ་ལྟར་ཤཱ་རིའི་བུ། གྲངས་དང་ བགྲང་བ་བསྟན་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཏེ། དེ་ན་ཕུང་པོ་ཆེན་པོ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ ལྟར་བཞུགས་ཏེ་འཚོ་ཞིང་གཞེས་སོ། །དེའི་ཚེའི་ཚད་ནི། ལོ་བྱེ་བ་ཕྲག་སུམ་ཅུའོ། །དེའི་འཁོར་ཉན་ཐོས་ནི། བྱེ་བ་ཁྲག་ཁྲིག་སུམ་ཅུ་སྟེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་ ༄༅། །པ༑ ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པའི་བར་དུ་སྟེ། ཉན་ཐོས་ཆེན་པོ་རྣམས་ ཀྱི་ཉན་ཐོས་འདུས་པ་ཆེན་པོ་ཡོད་དོ། །དེའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་བརྒྱ་བྱང་ཆུབ་སེམས་དཔའི་སྡེ་སྣོད་ཐོབ་པ། དོན་ལ་ཤིན་ཏུ་རྣམ་པར་ངེས་ པ༑ ཐོས་པ་རྒྱ་མཚོ། །ཆོས་སྨྲ་བ། སྟོང་པ་ཉིད་ལ་གནས་པ། མཚན་མ་མེད་པ་ལ་གནས་པ། སྨོན་པ་མེད་པ་ལ་གནས་པ་ཆེན་པོ་ཤ་སྟག་འདུས་པ་ཡོད་དོ། །དེ་ཡོངས་སུ་མྱ་ ངན་ལས་འདས་ནས་དམ་པའི་ཆོས་ལོ་སྟོང་དུ་གནས་པར་འགྱུར་རོ། །ང་ཡོངས་སུ་མྱ་ངན་ལས་འདས་ནས་ལོ་སྟོང་ན་དེ་ཡོངས་སུ་མྱ་ངན་ལས་འདའ་བར་འགྱུར་ཏེ། དེའི་རིང་ བསྲེལ་ཡང་རྒྱས་པར་འགྱུར་རོ། །འདི་ལྟ་སྟེ། དཔེར་ན། ང་ད་ལྟར་ཡོངས་སུ་མྱ་ངན་ལས་འདས་པའི་རིང་བསྲེལ་རབ་ཏུ་རྒྱས་པར་འགྱུར་བ་བཞིན་ནོ། །ཤཱ་རིའི་བུ། དེ་བཞིན་ གཤེགས་པ་ནི། ཡེ་ཤེས་ཐོགས་པ་མེད་པ་སྟེ། དེ་བས་ཀྱང་ལྷག་པར་དེ་བཞིན་གཤེགས་པའི་ཡེ་ཤེས་དཔག་ཏུ་མེད་པ་རླུང་གི་དཀྱིལ་འཁོར་ཡོངས་སུ་ཁྱབ་པས་སངས་ རྒྱས་ཀྱི་ཞིང་ཡོངས་སུ་ཁྱབ་བོ། །ཤཱ་རིའི་བུ། སྟེང་གི་ཕྱོགས་ཀྱི་འཇིག་རྟེན་གྱི་ཁམས་ན་ད་ལྟར་དེ་བཞིན་གཤེགས་པ་མེད་པ་ཡང་ཡོད་ལ། དེ་ན་རང་སངས་རྒྱས་བརྒྱ་ཕྲག་ སྟོང་ཡོད་དེ། དེ་དག་ལ་སེམས་ཅན་རྣམས་དགེ་བའི་རྩ་བ་བསྐྱེད་དོ། །ཤཱ་རིའི་བུ། དེ་བཞིན་གཤེགས་པ་ནི། ཡེ་ཤེས་ལ་རྟོན་པ་སྟེ། དེའི་ཡང་སྟེང་གི་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་དང་མཉམ་པ་ད་ལྟར་བྱུང་བ་རྣམས་རབ་ཏུ་མཁྱེན་ཏོ། །དེ་བཞིན་དུ་ཕྱོགས་བཅུ་ཀུན་ཏུ་ཚད་མེད། གྲངས་མེད། གཞལ་ དུ་མེད༑ དཔག་ཏུ་མེད་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་བྱུང་བ་དེ་དག་རབ་ཏུ་མཁྱེན་ཏོ། །སངས་རྒྱས་ཀྱི་ཞིང་ཚིག་པ་དེ་སྙེད་ཀྱང་རབ་ ཏུ་མཁྱེན་ཏོ། །དེ་སྐད་ཅེས་བཀའ་སྩལ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། དགེ་བའི་རྩ་བ་གང་དང་ལྡན་པས་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་ལྟ་བུར་སྒྲིབ་པ་མེད་པའི་ཡེ་ཤེས་དང་ལྡན། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། ང་དབང་ལ་ རབ་ཏུ་གནས་ཏེ་ཆོས་ལ་གུས་པའི་འདུ་ཤེས་དང༌། རི་མོར་བྱས་ཏེ་སྨན་དུ་འདུ་ཤེས་པ་དང༌། རིན་པོ་ཆེར་འདུ་ཤེས་པ་དང༌། དཀོན་པར་འདུ་ཤེས་པ་དང༌། དགེ་བའི་རྩ་བར་འདུ་ཤེས་ པ་དང༌། ཇི་ལྟ་བ་བཞིན་དུ་འདུ་ཤེས་བསྐྱེད་ནས་གུས་པའི་འདུ་ཤེས་དང༌། ཆོས་སུ་འདུ་ཤེས་ཡོངས་སུ་བཟུང་བ་ལ་གནས་ཏེ་ཤཱ་རིའི་བུ། དེ་ལྟར་དེ་བཞིན་གཤེགས་པའི་ཡེ་ཤེས་ ༄༅། །འབར་བས། ཤཱ་རིའི་བུ། དེ་བཞིན་གཤེགས་པས་ཤིན་ཏུ་མང་པོ་དང༌། དེ་བས་ཀྱང་ལྷག་པར་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་རྒྱུན་མི་ འཆད༑ དཔག་ཏུ་མེད། གྲངས་མེད། གཞལ་དུ་མེད། བརྗོད་དུ་མེད་པའང་རབ་ཏུ་མཁྱེན་ཏོ། །ཚུར་ཤོག་ཅེས་བྱས་ནའང་འོང་བའི་དབང་དེས་སེ་གོལ་གཏོག་པ་སྲིད་ཀྱིས་དེ་བཞིན་ གཤེགས་པ་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་དང་མཉམ་པར་འཆག་ཅིང་སླར་ཡང་འོང་ངོ༌། །ཤཱ་རིའི་བུ། ངས་མོས་པས་ཐོས་པ་བཟུང་བ་དེ་ཉིད་ཀྱིས་མྱུར་དུ་རྣམ་པར་ གྲོལ་བ་ཐོབ་སྟེ། རྣམ་པར་གྲོལ་བ་དེས་ཤིན་ཏུ་རྣམ་པར་གྲོལ་ལོ། །ཅི་ལས་རྣམ་པར་གྲོལ་ཅེ་ན། སྡུག་བསྔལ་ཐམས་ཅད་ལས་ཤིན་ཏུ་རྣམ་པར་གྲོལ་ལོ། །ཤཱ་རིའི་བུ། གང་ལ་ ལས་གུས་པའི་གནས་བཞི་ཐོབ་པ་ཙམ་གྱིས་དད་པ་ཐོབ་ནས་ཇི་ལྟར་སངས་རྒྱས་ཀྱི་ཆོས་དང་འབྲེལ་བར་མི་འགྱུར་བ་དེ་ལྟར་གནས། དེ་བཞིན་དུ་གནས། དེ་ལྟ་བུའི་ཚུལ་དུ་ གནས་པར་བྱའོ། །སྙམ་དུ་སེམས་བསྐྱེད་ན་ཡང་འདི་ལྟ་བུའི་མདོ་སྡེའི་ཆོས་ཀྱི་རྣམ་གྲངས་ཀྱི་ཚིག་དང་ཡི་གེ་མི་འཛིན་ཀྱང་དེ་དགེ་བའི་རྩ་བ་དེ་ཉིད་ཀྱིས་ཤེས་རབ་བྱེད་པའི་ ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། ཤེས་རབ་ཅན་ཤེས་རབ་ཆེན་པོ་དང་ལྡན་པར་འགྱུར་བ་དང༌། ཤེས་རབ་ཅན་སངས་རྒྱས་མཐོང་ཞིང་ཕྲད་ནས་མཉེས་པར་ བྱེད་པ་དང༌། ཤེས་རབ་ཅན་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དང༌། ཤེས་རབ་ཅན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་སྟེ། ཤེས་རབ་བྱེད་པའི་ཆོས་བཞི་པོ་དེ་དག་ཐོབ་པར་འགྱུར་རོ། །དེ་མང་པོར་བྱེད་པའི་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། མིར་འགྱུར་བ་མང་པོ་རྙེད་པ་དང༌། སངས་རྒྱས་འབྱུང་བ་ མཉེས་པར་བྱེད་པ་མང་པོ་དང༌། དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བ་མང་པོ་དང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་ མང་པོ་སྟེ། མང་པོར་བྱེད་པའི་ཆོས་བཞི་པོ་དེ་དག་ཐོབ་པར་འགྱུར་རོ། །དེ་ཡན་ལག་བཞི་རྗེས་སུ་འཐོབ་པར་འགྱུར་ཏེ། བཞི་གང་ཞེ་ན། འཁོར་ལོས་བསྒྱུར་བའི་ཡན་ལག་རྗེས་སུ་ འཐོབ་སྟེ། འཁོར་ལོས་བསྒྱུར་བའི་རྒྱལ་པོར་འགྱུར་བ་དང༌། ཚངས་པའི་འཇིག་རྟེན་དུ་ཚངས་པར་འགྱུར་བ་དང༌། ལྷའི་དབང་པོ་བརྒྱ་བྱིན་དུ་འགྱུར་བ་དང༌། བླ་ན་མེད་པ་ཡང་དག་པར་ རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཐམས་ཅད་ཡོངས་སུ་རྫོགས་པ་རྗེས་སུ་འཐོབ། སྟོབས་བསྔགས་པ་རྗེས་སུ་འཐོབ། སེམས་ཅན་ཡོངས་སུ་ རྟོགས་པའི་ཡེ་ཤེས་རྗེས་སུ་འཐོབ། རྫུ་འཕྲུལ་གྱི་སྤྱོད་ཡུལ་ཡང་རབ་ཏུ་མཁྱེན་ཅིང་ལྷར་བཅས་པའི་འཇིག་རྟེན་གྱི་མིག་ཏུ་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ ༄༅། །ཆེར་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་གྱི་ནི་སྐྱབས་དང་མིག །སེམས་ཅན་ཀུན་གྱི་དམ་པ་སྟེ། །གང་རེག་ མྱ་ངན་འདས་འགྱུར་བའི། །གསོ་བ་ཐམས་ཅད་རབ་ཏུ་ཤེས། །ཚུར་ཤོག་ཅེས་བྱས་འོང་འགྱུར་བའི། །རྣམ་པར་སྨིན་པ་འདི་འདྲ་སྟེ། །ནམ་ཡང་སྡུག་བསྔལ་མི་འགྱུར་ཞིང༌། །བཀའ་བློ་མི་ བདེར་ཡོང་མི་འགྱུར། །ལྷ་ཡི་ནང་དུ་མྱུར་འགྲོ་ཞིང༌། །མི་ཡི་ནང་དུའང་མྱུར་དུ་འགྲོ་།སངས་རྒྱས་དག་ཀྱང་མྱུར་མཐོང་ཞིང༌། །མི་ཁོམ་རྣམ་པར་སྤོང་བར་འགྱུར། །འབྱོར་ཞིང་ནོར་ཡང་ཆེན་ བོར་འགྱུར། །གཏེར་གྱི་རྣམས་ནི་མང་མཐོང་ཞིང༌། །གང་དུ་ལག་པ་བཅུག་པ་རྣམས། །ཐམས་ཅད་རིན་ཆེན་གང་བར་འགྱུར། །ཡན་ལག་བརྒྱད་ཀྱི་ཆུས་གང་བའི། །རྫིང་བུ་རབ་ཏུ་བསགས་ པར་འགྱུར། །ནམ་ཡང་མྱ་ངན་མི་མྱོང་སྟེ། །བཀའ་བློ་བདེ་བའི་འབྲས་བུ་འདི། །འཐེང་པོ་ཞ་བོར་མི་འགྱུར་ཞིང༌། །རྐང་པ་འཁུམས་དང་འབུབ་པ་དང༌། །ཡན་ལག་སྐམ་པར་མི་འགྱུར་ཞིང༌། ཡན་ལག་ཉམས་པར་མི་འགྲོའོ། །སོར་མོ་སྒུར་བར་མི་འགྱུར་ཞིང༌། །སྒུར་པོ་ཞར་པར་མི་འགྱུར་རོ། །གླང་པོའི་མགོ་ལྟར་མི་འགྱུར་ཏེ། །བཀའ་བློ་བདེ་བའི་འབྲས་བུ་འདི། །དེ་ཡི་ཡན་ ལག་རྒྱས་ཤིང་དཀར། །ལྕགས་ཀྱི་དངོས་པོ་འདྲ་བར་འགྱུར། །རབ་ཏུ་མཛེས་ཤིང་བལྟ་ན་སྡུག །ཁ་དོག་ལྡན་ཞིང་མཛེས་པར་གནས། །ལྷ་ཡིས་མངོན་པར་མཆོད་པར་འགྱུར། །མི་རྣམས་ ཤིན་ཏུ་བསྟི་སྟང་བྱེད། །ཀླུ་རྣམས་ཀྱིས་ནི་མངོན་མཆོད་འགྱུར། །བཀའ་བློ་བདེ་བའི་འབྲས་བུ་འདི། །ངན་འགྲོ་ཐམས་ཅད་སྤངས་ནས་ནི། །མི་དེ་མཐོ་རིས་འགྲོ་བར་འགྱུར། །མྱུར་དུ་བྱང་ཆུབ་ འཚང་རྒྱ་སྟེ། །བཀའ་བློ་བདེ་བའི་འབྲས་བུ་འདི། །མི་དེས་སེམས་ཅན་ཐམས་ཅད་ཀྱི། །སེམས་རྣམས་ཐམས་ཅད་རབ་ཏུ་ཤེས། །གོམ་པ་དག་ནི་བདུན་བོར་བས། །འཇིག་རྟེན་དབྱངས་ཀྱིས་གོ་བར་བྱེད། དེ་ཡི་ཡེ་ཤེས་མཆོག་འགྱུར་ཞིང༌། །ཤེས་རབ་དག་ཀྱང་མཆོག་ཏུ་འགྱུར། །རྣམ་པར་གྲོལ་བ་མཆོག་འགྱུར་ཏེ། །སེམས་ཅན་རྣམས་ནི་ཀུན་གྱི་མཆོག །ཤེས་རབ་ཀྱིས་ནི་ཤེས་རབ་སྦྱོང༌། །ཤེས་ རབ་ཡེ་ཤེས་གནས་པ་སྟེ། །ཤེས་རབ་ཡེ་ཤེས་རྣམ་པར་གྲོལ། །སངས་རྒྱས་ཀུན་གྱིས་བརྙེས་པ་ཡིན། །ཤེས་རབ་ཀྱིས་ནི་རང་བཞིན་ཤེས། །ཡེ་ཤེས་ཀྱིས་ནི་ཤེས་བྱ་ཤེས། །གང་དག་ཤེས་ རབ་ཡེ་ཤེས་དག །ཐམས་ཅད་དེ་ལ་དཀོན་མི་འགྱུར། །འདི་འདྲའི་དགེ་བའི་འདི་དག་གི། དོན་ནི་ཁྱོད་ལ་ངས་བཤད་དོ། །དེ་ནི་མོས་པ་ཆུང་བ་ཡི། །སེམས་ཅན་རྣམས་ཀྱི་དོན་མ་ཡིན། །གཏི་མུག་ གིས་ནི་རྨོངས་པ་དང༌། །སྡིག་པས་མངོན་པར་གཙེས་པ་རྣམས། །ཞེ་སྡང་ཁྲོ་བ་བསྐྱེད་བྱས་ནས། །ཆོས་ལ་གུས་པར་མི་འགྱུར་རོ། །ནམ་ཞིག་སེམས་ཅན་མོས་ཆུང་ཚེ། །འདི་འདྲ་བ་ཡི་ཆོས་ འབྱུང་སྟེ། །དེ་ན་ཕྱིར་ཞིང་གཅིག་ལ་གཅིག །གུས་པ་བྱེད་པར་མི་འགྱུར་ཏེ། །གང་ཚེ་སེམས་ཅན་མི་གུས་ཤིང༌། །ཁྲོ་བའི་ཉེས་ལ་ཡིད་དགའ་སྟེ། །ཀུན་ནས་ཉོན་མོངས་སེམས་ཀྱིས་ཀྱང༌། །དེ་ ༄༅། །དག་བདག་ཅག་དགྲ་བཅོམ་འཛེར། །གནས་བརྟན་གང་དག་རྒས་པ་དང༌། །རྒས་ཤིང་འཁོགས་པ་གཏུགས་པ་དག །དེ་དག་འཆི་བའི་དུས་བྱེད་ཚེ། །སྲིད་པའི་ཐ་ མར་གྱུར་ཅེས་ཟེར། །གནས་བརྟན་གང་དག་རྒས་པ་དང༌། །རྒས་ཤིང་འཁོགས་པ་གཏུགས་པ་དང༌། དགྲ་བཅོམ་བསོད་སྙོམས་ཟོས་གྱུར་ནས། །སེམས་ཅན་དམྱལ་བར་མྱུར་དུ་འགྲོ་།དེ་དག་ ཚུལ་ཁྲིམས་རབ་དཀོན་ན། །དགྲ་བཅོམ་པར་ལྟ་ག་ལ་འགྱུར། །དད་པས་མཆོད་རྟེན་བྱེད་འགྱུར་ཏེ། །དེ་དག་ངན་འགྲོ་རྣམས་སུ་འགྲོ། །ཤཱ་རིའི་བུ། དེ་ལྟར་ཚུལ་ཁྲིམས་སྤྱོད་པའི་བྱང་ཆུབ་ སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་དོན་གྱི་ཕྱིར་སློབ་དཔོན་ལ་བསྙེན་བཀུར་དང༌། རིམ་གྲོ་བྱེད་པ་ན། འདི་འདྲ་བའི་ཕན་ཡོན་དེ་དག་དང༌། དེ་བས་ཀྱང་ལྷག་པ་དཔག་ཏུ་མེད་ བསམ་གྱིས་མི་ཁྱབ་ཚད་མེད་པ་ཐོབ་པར་འགྱུར་རོ། །དེ་ལྟར་ཤཱ་རིའི་བུ། བྱང་ཆུབ་སེམས་དཔའི་སྡེ་སྣོད་ལ་རབ་ཏུ་གནས་པའི་བྱང་ཆུབ་སེམས་དཔའ་རབ་ཏུ་དབང་དུ་གྱུར་པ། ཚུལ་ཁྲིམས་ ཡོངས་སུ་དག་པ་བྱང་ཆུབ་སེམས་དཔའི་སྤྱད་པ་སྤྱོད་དོ། །དེ་ལ་ཚུལ་ཁྲིམས་ཡོངས་སུ་དག་པ་གང་ཞེ་ན། ཤཱ་རིའི་བུ། རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་ དག་པར་རིག་པར་བྱའོ། །བཅུ་གང་ཞེ་ན། སེམས་ཅན་ཐམས་ཅད་ལ་མི་འཚེ་བ་ཡིན། གཞན་གྱི་རྫས་ལ་མི་རྐུ་བ་ཡིན། གཞན་གྱི་ཆུང་མ་སྤངས་པ་ཡིན། སེམས་ཅན་ཐམས་ ཅད་ལ་མི་སླུ་བ་ཡིན། གཞན་གྱི་གཡོག་མཐུན་པ་ལ་ཕྲ་མ་མི་ཟེར་བ་ཡིན། ཚིག་དྲག་པོ་བཟོད་པའི་ཕྱིར་ངག་མི་རྩུབ་པ་ཡིན། ཚིག་བསྡམས་པས་ཚིག་ཀྱལ་པ་སྤངས་པ་ཡིན། གཞན་གྱི་ ལོངས་སྤྱོད་ལ་ང་ཡིར་མི་འཛིན་པས་བརྣབ་སེམས་མེད་པ་ཡིན། ཚིག་ངན་པར་སྨྲས་པ་བཟོད་པས་གནོད་སེམས་སྤངས་པ་ཡིན། ལྷག་གཞན་མི་འདོད་པས་ལོག་པར་ལྟ་བ་སྤངས་པ་ཡིན་ ཏེ༑ ཤཱ་རིའི་བུ། རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ། གཞན་ཡང་རྣམ་པ་བཅུས་བྱང་ཆུབ་སེམས་དཔའི་ཚུལ་ ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། མི་ཤེས་པ་མི་འདོད་པས་མ་ཉམས་པའི་ཚུལ་ཁྲིམས་ཡིན། ངན་པར་སྐྱེ་བ་ཡོངས་སུ་སྤངས་པས་སྐྱོན་མེད་པའི་ཚུལ་ཁྲིམས་ ཡིན༑ ཉོན་མོངས་པ་ཐམས་ཅད་དང་མ་འདྲེས་པས་འདྲེས་མ་མ་ཡིན་པའི་ཚུལ་ཁྲིམས་ཡིན། གཅིག་ཏུ་དཀར་པོའི་ཆོས་རྣམ་པར་སྤེལ་བས་བསྲ་བསྲེ་མེད་པའི་ཚུལ་ཁྲིམས་ཡིན། ཇི་ ལྟར་འདོད་པ་བཞིན་དུ་འགྲོ་བས་རང་དབང་གི་ཚུལ་ཁྲིམས་ཡིན། མཁས་པས་མ་སྨད་པས་བསྔགས་པའི་ཚུལ་ཁྲིམས་ཡིན། ཉེས་པ་ཐམས་ཅད་མི་སྒྲུབ་པས་མ་སྨད་པའི་ཚུལ་ཁྲིམས་ ཡིན༑ དབང་པོ་བསྲུངས་པས་ཤིན་ཏུ་སྦས་པའི་ཚུལ་ཁྲིམས་ཡིན། དྲན་པ་དང་ཤེས་བཞིན་གྱི་ཕྱིར་ཤིན་ཏུ་བསྲུངས་པའི་ཚུལ་ཁྲིམས་ཡིན་ཏེ། ཤཱ་རིའི་བུ། རྣམ་པ་བཅུ་པོ་དེ་དག་ ༄༅། །གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ། གཞན་ཡང་རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། རུང་བའི་ཚོད་ཤེས་པས་འདོད་པ་ཉུང་བའི་ཚུལ་ཁྲིམས་ཡིན། འདོད་པ་སྤོང་བས་ཆོག་ཤེས་པའི་ཚུལ་ཁྲིམས་ཡིན། ལུས་ དང་སེམས་རབ་ཏུ་དབེན་པས་ནན་ཏན་གྱི་ཚུལ་ཁྲིམས་ཡིན། འདུ་འཛི་ལ་སྨོད་པས་དགོན་པར་གནས་པའི་ཚུལ་ཁྲིམས་ཡིན། བདག་གི་ཁར་ལས་པའི་དགེ་བའི་རྩ་བ་བསྒྲུབ་ པའི་ཕྱིར་སྦྱངས་པའི་ཡོན་ཏན་དང་ཡོ་བྱད་བསྙུངས་པའི་ཚུལ་ཁྲིམས་ཡིན། ཕ་རོལ་གྱི་གདོང་དུ་མི་ལྟ་བས་འཕགས་པའི་རིགས་ལ་དགའ་བའི་ཚུལ་ཁྲིམས་ཡིན། ལྷ་དང་མི་རྣམས་ ལ་མི་སླུ་བས་ཇི་ལྟར་སྨྲས་པ་དེ་ལྟར་བྱེད་པའི་ཚུལ་ཁྲིམས་ཡིན། རང་གི་སེམས་ངེས་པར་རྟོག་པས་བདག་གི་འཁྲུལ་པ་ལ་སོ་སོར་རྟོག་པའི་ཚུལ་ཁྲིམས་ཡིན། ཕ་རོལ་གྱི་སེམས་ སྲུང་བས་གཞན་གྱི་འཁྲུལ་པ་ལ་ཉེས་པར་མི་ལྟ་བའི་ཚུལ་ཁྲིམས་ཡིན། བསྡུ་བའི་དངོས་པོ་རྗེས་སུ་མི་གཏོང་བས་སེམས་ཅན་ཡོངས་སུ་སྨིན་པར་བྱེད་པའི་ཚུལ་ཁྲིམས་ཡིན་ཏེ། ཤཱ་ རིའི་བུ༑ རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ། གཞན་ཡང་རྣམ་པ་བཅུས་བྱང་ཆུབ་སེམས་དཔའི་ཚུལ་ ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། འདི་ལྟ་སྟེ། ཐ་བའི་སེམས་མེད་པས་སངས་རྒྱས་ལ་དད་པའི་ཚུལ་ཁྲིམས་ཡིན། དམ་པའི་ཆོས་སྲུང་བས་ཆོས་ལ་དད་པའི་ ཚུལ་ཁྲིམས་ཡིན། འཕགས་པ་འདུས་པ་ལ་གུས་པས་དགེ་འདུན་ལ་དད་པའི་ཚུལ་ཁྲིམས་ཡིན། སངས་རྒྱས་དང་བྱང་ཆུབ་སེམས་དཔའ་ཡིད་ལ་བྱེད་པ་དང་མ་བྲལ་བས་འདུད་པའི་ ཚུལ་ཁྲིམས་ཡིན། བྱང་ཆུབ་ཀྱི་ཡན་ལག་གི་ཚོགས་བསགས་པས་དགེ་བའི་བཤེས་གཉེན་ལ་བརྟེན་པའི་ཚུལ་ཁྲིམས་ཡིན། མི་དགེ་བའི་ཆོས་ཐམས་ཅད་ཡོངས་སུ་སྤངས་པས་ སྡིག་པའི་གྲོགས་པོ་ཡོངས་སུ་སྤོང་བའི་ཚུལ་ཁྲིམས་ཡིན། སེམས་ཅན་ཐམས་ཅད་ཡོངས་སུ་སྨིན་པར་བྱེད་པས་བྱམས་པའི་ཚུལ་ཁྲིམས་ཡིན། ཉམ་ཐག་པར་གྱུར་པའི་སེམས་ཅན་ ཡོངས་སུ་སྨིན་པར་བྱེད་པས་སྙིང་རྗེའི་ཚུལ་ཁྲིམས་ཡིན། ཆོས་ལ་དགའ་ཞིང་རབ་ཏུ་མོས་པས་དགའ་བའི་ཚུལ་ཁྲིམས་ཡིན། རྗེས་སུ་ཆགས་པ་དང་ཁོང་ཁྲོ་བ་སྤངས་པས་བཏང་སྙོམས་ཀྱི་ ཚུལ་ཁྲིམས་ཡིན་ཏེ། ཤཱ་རིའི་བུ། རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ། གཞན་ཡང་རྣམ་པ་བཅུས་བྱང་ཆུབ་སེམས་ དཔའི་ཚུལ་ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། སེམས་ཅན་ཡོངས་སུ་སྨིན་པར་བྱེད་པས་སྦྱིན་པའི་ཚུལ་ཁྲིམས་ཡིན། སེམས་ཀུན་ཏུ་སྲུང་པས་བཟོད་པའི་ཚུལ་ཁྲིམས་ ༄༅། །ཡིན༑ མི་ལྡོག་པས་བརྩོན་འགྲུས་ཀྱི་ཚུལ་ཁྲིམས་ཡིན། བསམ་གཏན་གྱི་ཚོགས་ཡང་དག་པར་རྫོགས་པར་བྱེད་པས་བསམ་གཏན་གྱི་ཚུལ་ཁྲིམས་ཡིན་ ཐོས་པ་དང་ཚུལ་ཁྲིམས་ཀྱིས་མི་ངོམས་པས་ཤེས་རབ་ཀྱི་ཚུལ་ཁྲིམས་ཡིན། བྱང་ཆུབ་སེམས་དཔའི་སྡེ་སྣོད་ཡོངས་སུ་ཚོལ་བས་ཐོས་པ་ཡོངས་སུ་ཚོལ་བའི་ཚུལ་ཁྲིམས་ཡིན། རྟག་ པའི་འདུ་ཤེས་སོ་སོར་རྟོག་པས་ལུས་ལ་མི་ལྟ་བའི་ཚུལ་ཁྲིམས་ཡིན། སེམས་ལ་སྒྱུ་མ་ལྟ་བུར་སོ་སོར་རྟོག་པས་སྲོག་ལ་ཡིད་མི་རྟོན་པའི་ཚུལ་ཁྲིམས་ཡིན། །ཐོག་མ་ནས་ཚུལ་ཁྲིམས་ ཡོངས་སུ་དག་པས་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་ཚུལ་ཁྲིམས་ཡིན། ཚུལ་ཁྲིམས་ཐམས་ཅད་ཡོངས་སུ་བསྔོ་བས་དེ་བཞིན་གཤེགས་པ་དང་ཕྲད་པའི་ཚུལ་ཁྲིམས་ ཡིན་ཏེ། ཤཱ་རིའི་བུ། རྣམ་པ་བཅུ་པོ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ། དེ་ལྟར་ཚུལ་ཁྲིམས་ཤིན་ཏུ་ཡོངས་སུ་དག་པའི་ བྱང་ཆུབ་སེམས་དཔས་ལྷ་དང༌། མིའི་དཔལ་ཕུན་སུམ་ཚོགས་པ་མྱོང་བར་མི་འགྱུར་བ་གང་ཡང་མེད་དོ། །འཇིག་རྟེན་གྱི་བཟོའི་གནས་དང༌། ལས་ཀྱི་གནས་མི་ཤེས་པ་གང་ཡང་མེད་ དོ༑ ༑དེས་སེམས་ཅན་ཐམས་ཅད་ལོངས་སྤྱོད་དང༌། ཉེ་བར་སྤྱོད་པ་ཐོབ་པར་མི་བྱེད་པ་གང་ཡང་མེད་དོ། །སོ་སོའི་སྐྱེ་བོ་ཕན་ཚུན་མི་མཛའ་བར་འགྱུར་བ་དེ་གང་ཡང་མེད་དེ། དེ་ལ་བྱང་ ཆུབ་སེམས་དཔའ་ཁོང་ཁྲོ་བ་མེད་དོ། །གང་ལ་བྱང་ཆུབ་སེམས་དཔའ་མ་དད་པར་འགྱུར་བའི་བརྫུན་དུ་སྨྲ་བ་དེ་གང་ཡང་མེད་དོ། །དེ་སེམས་ཅན་གང་ལ་ཡང་མར་འདུ་ཤེས་མི་སྐྱེད་པ་མེད་དོ། ། དེ་སེམས་ཅན་གྱི་རིས་ན་སེམས་ཅན་གང་ལ་ཡང་ཕར་འདུ་ཤེས་མི་སྐྱེད་པ་མེད་དོ། །དེ་སེམས་ཅན་གང་ལ་ཡང་ཡིད་རྟོན་པའི་འདུ་ཤེས་མི་སྐྱེད་པ་མེད་དོ། །དེ་འདུས་བྱས་ཀྱི་ཆོས་གང་ལ་ཡང་ མི་རྟག་པར་འདུ་ཤེས་མི་སྐྱེད་པ་མེད་དོ། །དེ་ཐམས་ཅད་དུ་འདུ་བྱེད་དུ་གཏོགས་པར་ཤེས་ནས་ལུས་དང་སྲོག་ལ་མི་ལྟ་སྟེ། ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་བྱང་ཆུབ་ སེམས་དཔའི་སྤྱད་པ་སྤྱོད་དོ། །བཅོམ་ལྡན་འདས་ཀྱིས་དེ་སྐད་གསུངས་ཏེ། བདེ་བར་གཤེགས་པས་དེ་སྐད་བཀའ་སྩལ་ནས་སྟོན་པས་ཡང་འདི་སྐད་གསུངས་སོ། །ཚུལ་ཁྲིམས་འདི་ལ་ གང་གནས་པ། །སྐྱོབ་པ་ཡི་ནི་ཆོས་སྐུ་དང༌། །དབྱངས་དང་ཁ་དོག་གཟུགས་རྣམས་ནི། །དེ་དག་ལ་ནི་རྙེད་མི་དཀའ། །ལྡོངས་ཤིང་དམུས་ལོང་མི་འགྱུར་ལ། །ཞ་སྒུར་ཞར་བར་མི་འགྱུར་རོ། །འབྱུང་ བ་རྣམ་པར་དག་འགྱུར་ཞིང༌། །དེ་ཡི་ལུས་ནི་མཛེས་པར་འགྱུར། །སྟོབས་ཆེ་ཞིང་ནི་མཐུ་ཆེ་སྟེ། །གཟི་བརྗིད་ཆེ་ཞིང་གཟི་བརྗིད་རབ། །ཤེས་རབ་དང་ནི་བརྩོན་འགྲུས་ཀྱི། །སྡིག་ཅན་བདུད་ནི་སྐྲག་ པར་བྱེད། །རྒྱལ་པོ་ཡིས་ནི་མངོན་མཆོད་ཅིང༌། །ལྷ་ཀླུ་རྣམས་ཀྱིས་བཀུར་སྟི་བྱས། །ཐེ་ཚོམ་ཐམས་ཅད་ཆད་པར་འགྱུར། །དེ་དག་བྱམས་པ་ཤིན་ཏུ་བསྒོམས། །ཚུལ་ཁྲིམས་ཕུང་པོར་ ༄༅། །རབ་གནས་ནས། །གསོད་པར་བྱེད་ཀྱང་འཇིགས་པ་མེད། །གྲགས་པ་ཆེན་པོ་ཆོས་སྤྱོད་པ། །ངན་འགྲོ་དག་ཏུ་མི་འགྲོའོ། །སེམས་ཅན་ཐམས་ཅད་གཉིད་ལོག་ ཀྱང༌། །སྙོམ་པ་མེད་ཅིང་མི་ཉལ་ཏེ། །ཕྱོགས་བཞི་དག་ནི་ཀུན་ཏུ་ཡང༌། །ལེགས་པར་སྤྱད་པ་ཡོངས་སུ་ཚོལ། །ཚུལ་ཁྲིམས་ཕུང་པོར་གནས་པ་དག །རིན་ཆེན་མཆོག་དང་ཆུང་མ་ དང༌། །བདག་གི་ཤ་ཡང་རབ་གཏོང་ཞིང༌། །བྱང་ཆུབ་ལམ་ནི་ཀུན་ཏུ་ཚོལ། །སངས་རྒྱས་ཆོས་ནི་བླ་ན་མེད། །མཆོག་གི་ཆོས་རྣམས་ཡོངས་སུ་ཚོལ། །འཇིག་རྟེན་དག་གི་མགོན་འགྱུར་ ཞིང༌། །མཆོད་རྟེན་དང་ནི་སྦྱིན་པར་འོས། །གཤེ་ཤིང་ཡོངས་སུ་སྤྱོ་བ་དང༌། །ཉེས་པར་བྱས་པ་ཐམས་ཅད་བཟོད། །བཟོད་པ་ཉིད་ལ་རབ་གནས་ཤིང༌། །བཟོད་པ་ཡི་ནི་བསྔགས་པ་ བརྗོད། །མི་བདེན་པ་ནི་མི་སྨྲ་སྟེ། །ཇི་ལྟར་སྨྲས་པ་དེ་བཞིན་བྱེད། །བྱང་ཆུབ་སྙིང་པོར་འདུག་ནས་ནི། །ས་འདི་དག་ཀྱང་གཡོ་བར་བྱེད། །སངས་རྒྱས་ཆོས་ལ་ནེམ་ནུར་མེད། །ལྷ་གཞན་ དག་ནི་རབ་ཏུ་སྤོང༌། །རྟག་ཏུ་སངས་རྒྱས་བཅོམ་ལྡན་འདས། །ལྷ་གཞན་ཡོད་པར་མི་འགྱུར་རོ། །མཚོན་དག་དང་ནི་དུག་རྣམས་ཀྱིས། །ཕན་ཚུན་གནོད་པར་བྱེད་པ་ཡི། །སྡུམས་ནི་བྱེད་ པར་འགྱུར་བ་དང༌། །དེ་ནི་མ་ཁས་པའི་མཚན་ཉིད་དོ། །སེམས་ཅན་སྡུག་བསྔལ་རྣམས་མཐོང་ན། །བསྐལ་པ་བྱེ་བ་མང་པོར་ཡང༌། །བདག་གི་དོན་ནི་མེད་གྱུར་ཀྱང༌། །ཡལ་བར་འདོར་ བར་མི་འགྱུར་རོ། །དོན་རྙེད་ན་ནི་མཛའ་བོ་ཞེས། །ཕན་ཚུན་དུ་ནི་རབ་ཏུ་སྨྲ། །དོན་ནི་བྱེད་པར་མ་གྱུར་ན། །གཅིག་ལ་གཅིག་ནི་གསོད་པར་བྱེད། །འཛམ་བུ་ཡི་ནི་གླིང་འདི་དང༌། །སངས་རྒྱས་ ཀྱི་ནི་ཞིང་ཀུན་ཏུ། །རིན་ཆེན་བཀང་སྟེ་སྦྱིན་བྱས་ནས། །རྟག་ཏུ་བདག་གི་གྲོགས་སུ་འགྱུར། །གང་དག་མཚོན་རྣམས་རྣོན་པོ་ཡིས། །ཡན་ལག་ཉིང་ལག་གཅོད་པ་ཡི། །སེམས་ཅན་དག་ནི་ ཐམས་ཅད་ལ། །སེམས་ནི་མཉམ་པར་རབ་ཏུ་འཇུག །སངས་རྒྱས་དག་གི་ཆོས་རྣམས་ཕྱིར། །བྱིས་པ་རྣམས་ཀྱི་ཆོས་སྤོང་སྟེ། །ཆོས་ལ་ཤིན་ཏུ་གནས་གྱུར་པས། །ཚུལ་ཁྲིམས་རྟག་ཏུ་དག་པར་ འགྱུར༑ ༑ཆོས་ཀྱི་རྗེས་མཐུན་ཆོས་ཞུགས་ནས། །བྱང་ཆུབ་ཀྱི་ནི་སྤྱད་པ་སྤྱོད། །སངས་རྒྱས་ཀྱི་ནི་བྱང་ཆུབ་ཕྱིར། །རིག་གསུམ་བདུད་རྩི་རབ་ཏུ་སྦྱིན། །ཚུལ་ཁྲིམས་ཕུང་པོར་གནས་བྱས་ནས། །ཆོས་ རྣམས་ཐམས་ཅད་མངོན་པར་བསླབ། །མཁས་པ་ལྷ་དང་བཅས་པ་ཡི། །འཇིག་རྟེན་ན་ནི་མཆོད་པར་འོས། །ཆོས་རྣམས་ཀུན་ལ་ཐེ་ཚོམ་མེད། །བཟོ་ཀུན་ལ་ཡང་རབ་ཏུ་མཁས། །སེམས་ཅན་བསམ་ པ་ཤེས་གྱུར་ནས། །སྙན་པའི་ཚིག་ནི་སྟོན་པར་བྱེད། །ཚུལ་ཁྲིམས་ཕུང་པོ་རྣམ་སྦྱངས་ནས། །བྱང་ཆུབ་དམ་པར་སངས་རྒྱས་ཏེ། །ཤིང་མཆོག་དྲུང་དུ་འདུག་བྱས་ནས། །སྡིག་ཅན་བདུད་ནི་སྐྲག་ པར་བྱེད། །ཉི་ཟླ་དག་ནི་སྣང་བ་ལྟར། །གཟི་བརྗིད་དྲག་པོ་འོད་བྱེད་པ། །དེ་ལྟར་སེམས་ཅན་མཆོག་འགྱུར་ཞིང༌། །ཤེས་རབ་ཀྱི་ནི་མིག་ལས་བྱུང༌། །སེམས་ཅན་རྣམས་ལ་ལག་བྱིན་ཏེ། །དྲིས་པ་ ༄༅། །ལ་ནི་ལམ་རྣམས་སྟོན། །རྟག་ཏུ་གསོང་པོར་སྨྲ་འགྱུར་ཏེ། །དེ་དག་ལ་ནི་ཕྲག་དོག་མེད། །བདག་དང་རིན་ཆེན་གཞན་དག་ཀྱང༌། །མང་པོ་རྣམས་ནི་མྱུར་དུ་གཏོང༌། །དེ་ ནི་བརྒྱ་ལམ་བྱང་ཆུབ་མཆོག །གཏོང་བར་འགྱུར་བ་མ་ཡིན་ནོ། །དད་དང་ཚུལ་ཁྲིམས་ཕུན་སུམ་ཚོགས། །བདེན་པའི་ཚིག་ལ་རབ་ཏུ་གནས། །ཚུལ་ཁྲིམས་ཕུང་པོར་རབ་གནས་པས། ། དེ་དག་ལ་ནི་སྒྱུ་མེད་དོ། །རྫུན་ཟེར་བ་དག་འོངས་གྱུར་ནས། །སྦྱིན་ཞིང་བྱ་ཞེས་ཟེར་ཡང་ནི། །བདེན་པའི་ཚིག་ལ་གནས་པས་ན། །དད་པས་དེ་ལ་དད་པར་འགྱུར། །ཕན་ཚུན་གཅིག་ལ་ གཅིག་སྨྲ་བ། །ཆོས་གོས་དང་ནི་བསོད་སྙོམས་རྣམས། །འདི་བཞིན་སྨྲས་ཏེ་མ་ཡིན་ཡང༌། །དེ་ལ་ཡིད་ནི་འཁྲུག་པ་མེད། །གཞན་ཡང་ཤཱ་རིའི་བུ། དེ་ལྟར་ཚུལ་ཁྲིམས་ཡོངས་སུ་དག་ པའི་བྱང་ཆུབ་སེམས་དཔའ་ནི། འདུ་བྱེད་ཐམས་ཅད་ལ་མངོན་པར་མི་དགའ་བའི་འདུ་ཤེས་སྐྱེད་དོ། །སེམས་ཅན་ཐམས་ཅད་ལ་ཕ་མར་འདུ་ཤེས་སྐྱེད་དོ། །འདོད་པའི་ཡོན་ཏན་ལྔ་ལ་ ཡོན་ཏན་མེད་པར་འདུ་ཤེས་སྐྱེད་དོ། །ཚོར་བ་དང་རྣམ་པར་རིག་པ་ལ་རྣམ་པར་རིག་པ་མེད་པར་འདུ་ཤེས་སྐྱེད་དོ། །དེ་མཉམ་པ་དང་མི་མཉམ་པར་ཡང་སེམས་ཀྱིས་མངོན་པར་ མི་སྒྲུབ་བོ། །དེ་ཅིའི་ཕྱིར་ཞེ་ན། གལ་ཏེ་སེམས་ཀྱིས་མཉམ་པར་བྱེད་ན། མྱ་ངན་ལས་འདས་པ་སེམས་ལས་འདས་པར་འགྱུར་རོ། །སེམས་ཀྱིས་མི་མཉམ་པར་བྱེད་ན་ནི། ཆགས་ པའི་སེམས་སུ་འགྱུར་བས་ཆེས་མི་མཉམ་པར་འགྱུར་རོ། །མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་སྟེ། ཆགས་པའི་སེམས་བསྐྱེད་ནས་འགགས་པ་དེའི་བག་ལ་ ཉལ་གྱིས་སེམས་དེའི་རང་བཞིན་དུ་སྐྱེ་སྟེ། མི་བདེན་པའི་དམིགས་པ་ལ་མི་བདེན་པའི་སེམས་སྡུག་གོ །ཞེས་རྟོག་སྟེ། དེ་ནི། ཚུལ་བཞིན་མ་ཡིན་པའོ། །མི་སྡུག་པའོ། །ཞེས་མོས་པ་བྱེད་པ་ ནི། རྣམ་པར་གྲོལ་བའོ། །རྣམ་པར་གྲོལ་བ་གང་ན་བ་དེར་ཟད་པའོ། །ཅི་ཟད་ཅེ་ན། གང་ཟད་པ་དེ་ནི། འདོད་ཆགས་ཟད་པ། ཞེ་སྡང་ཟད་པ། གཏི་མུག་ཟད་པའོ། །དེ་ཅིའི་ཕྱིར་ཞེ་ན། འདོད་ ཆགས་སྐད་ཅིག་གིས་ཟད་པར་འགྱུར་ཏེ། འདོད་ཆགས་ཀྱང་གཞན་ལ་ཟད་པ་ཡང་གཞན་ཞིག་ཡིན་དུ་ཟིན་ན། འདོད་ཆགས་ཡང་དག་པ་ཉིད་དུ་འགྱུར་རོ། །དེ་ལྟར་འདོད་ཆགས་ཡང་དག་ པ་མ་ཡིན་པས་ཟད་པར་འགྱུར་བ་ཡང་ཤཱ་རིའི་བུ། འདོད་ཆགས་ནི། ཚུལ་བཞིན་མ་ཡིན་པའི་ཡིད་ལ་བྱེད་པ་ལས་བྱུང་བ་ཀུན་ཏུ་རྟོག་པས་ཕྱེ་བ་སྟེ། གང་ཀུན་ཏུ་མི་རྟོག་པ་དེ་ནི། མི་རྟོག་ གོ །རྟོག་པ་སྤངས་པ་ནི། ཡང་དག་པ་མ་ཡིན་པ་སྟེ། དེ་ལ་འདོད་ཆགས་བྱེད་པ་དེ་ནི། ཡང་དག་པ་མ་ཡིན་ནོ། །གང་ཡང་དག་པ་མ་ཡིན་པ་དེ་ལ་སྡུག་བསྔལ་མེད། ཡོངས་སུ་གདུང་བ་མེད་དོ། ། གང་ཡོངས་སུ་གདུང་བ་མེད་པ་དེ་ནི། ཡང་དག་པ་མ་ཡིན་པའོ། །གང་ཡང་དག་པ་མ་ཡིན་པ་དེ་ལ་གདུང་བ་མེད་དེ། དེ་ནི། བསིལ་བར་གྱུར་པ་མྱ་ངན་ལས་འདས་པ་ཡིན་པས་དེ་ལ་འདོད་ཆགས་མེད་ ༄༅། །དོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ནི། སེམས་དང་ལྡན་པ་མ་ཡིན་ཏེ། འདི་ལྟར་འདོད་ཆགས་ཟད་པར་བྱེད་པར་འགྱུར་རོ། །མྱ་ངན་ལས་འདས་པ་ནི། འདོད་ཆགས་ཟད་པ་སྟེ། དེ་ལྟར་འདོད་ཆགས་ཀྱང་གཞན། མྱ་ངན་ལས་འདས་པ་ཡང་གཞན་ཏེ། གང་གཞན་ཡིན་པ་དེ་ནི། ཕ་རོལ་བས་ཀྱང་ཕ་རོལ་ལོ། །ཕ་རོལ་བས་ཀྱང་ཕ་རོལ་ གང་ཡིན་པ་དེ་ནི། མཁས་པ་རྣམས་ཡོངས་སུ་ཚོལ་ཏེ། ཡོངས་སུ་ཚོལ་བ་ནི། སྙིང་པོ་མི་དམིགས་སོ། །གང་སྙིང་པོ་མེད་པ་དེ་ནི། གསོག་གོ །གསོག་གང་ཡིན་པ་དེ་ནི། གསོབ་བོ། ། གསོབ་གང་ཡིན་པ་དེ་ནི། སྟོང་པའོ། །ཅིས་སྟོང་ཞེ་ན། བདག་དང༌། བདག་གི་དང༌། རྟག་པ་དང༌། བརྟན་པ་དང༌། ཐེར་ཟུག་དང༌། མི་འགྱུར་བའི་ཆོས་ཀྱིས་སྟོང་སྟེ། གང་སེམས་ཅན་ མེད་པ་དེ་ནི། སྲོག་མེད་པ་སྟེ། དེ་ལས་འདོད་ཆགས་མི་སྐྱེ། ཞེ་སྡང་མི་སྐྱེ། གཏི་མུག་མི་སྐྱེའོ། །ཅི་ཡོད་པས་ང་ཞེས་བྱ་བའམ། ངའི་ཞེས་བྱ་བའམ། འདི་ནི། ང༌། འདི་ནི། ངའིའོ། ། ཞེས་ངར་འཛིན་དང༌། ང་ཡིར་འཛིན་པ་ལོག་པ་འདི་འབྱུང་ཞེ་ན། ང་ཡིར་འཛིན་པ་ལས་མངོན་པར་འདུ་བྱེད་པ་འབྱུང་སྟེ། དེ་ལ་མངོན་པར་འདུ་བྱེད་པ་ནི། བཞིའོ། །བཞི་གང་ཞེ་ན། ལུས་ཀྱིས་མངོན་པར་འདུ་བྱེད་དོ། །ངག་གིས་མངོན་པར་འདུ་བྱེད་དོ། །ཡིད་ཀྱིས་བརྟགས་ནས་ངག་རྩུབ་པོ་སྨྲས་ཏེ་དེ་ནས་ཕྱིས་ལུས་ཀྱིས་གནོད་པར་བྱེད་དོ། །དེ་ལྟར་བདག་དང༌། གཞན་དུ་འདུ་ཤེས་པ་ལ་འདུ་ཤེས་འཛིན་པར་འགྱུར་རོ། །གཞན་ཡང་ཤཱ་རིའི་བུ། བྱིས་པ་སོ་སོའི་སྐྱེ་བོ་ཐམས་ཅད་ནི། འདུ་ཤེས་ཀྱི་མདུད་པ་ཡིན་ཏེ། ཤཱ་རིའི་བུ། དེ་ལ་བྱང་ཆུབ་སེམས་ དཔས་ཕྱིན་ཅི་ལོག་གི་འདུ་ཤེས་འདི་ལྟ་བུར་རིག་ནས་སུ་ཡང་སྟེན་པར་མི་བྱེད་དོ། །དེ་ཅིའི་ཕྱིར་ཞེ་ན། བསྟེན་པ་ལས་དེའི་འཇིགས་པ་འབྱུང་སྟེ། བདག་ནི། འཇིགས་པ་མི་འདོད་དོ། །ཞེས་ ཤཱ་རིའི་བུ། དེའི་ཕྱིར་བྱང་ཆུབ་སེམས་དཔའ་སེམས་ཅན་ཐམས་ཅད་ལ་ཡིད་མི་རྟོན་པ་ཡིན་ནོ། །ཤཱ་རིའི་བུ། ཇི་ལྟར་ན། བྱང་ཆུབ་སེམས་དཔའ་སེམས་ ཅན་ཐམས་ཅད་ལ་ཕ་མར་འདུ་ཤེས་བསྐྱེད་ཅེ་ན། ཤཱ་རིའི་བུ། འདི་ལ་ཡུན་རིང་པོའི་དུས་ནས་མར་མ་གྱུར་པ་དང༌། ཕར་མ་གྱུར་བའི་སེམས་ཅན་གང་ཡང་རྙེད་པར་སླ་བ་མ་ཡིན་ཏེ། སེམས་ ཅན་ཐམས་ཅད་ཀྱང་ཕ་མར་གྱུར་ཏེ། དེ་དག་ལ་འདོད་ཆགས་ཀྱི་སེམས་སྐྱེས་ན། མར་འདུ་ཤེས་པས་སྤོང་ངོ༌། །ཞེ་སྡང་གི་སེམས་སྐྱེས་ན། ཕར་འདུ་ཤེས་པས་སྤོང་སྟེ། ཤཱ་རིའི་བུ། རྣམ་གྲངས་ འདིས་ཅི་ནས་སེམས་ཅན་ཐམས་ཅད་བྱང་ཆུབ་སེམས་དཔའི་གཉེན་ཡིན་པར་དེ་ལྟར་རིག་པར་བྱའོ། །ཤཱ་རིའི་བུ། སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བས་ཀྱང་ཆེས་གྲངས་ མེད་པ་ཡངས་པ། ཚད་མེད་པ། བསམ་གྱིས་མི་ཁྱབ་པ་དེའི་དུས་དེའི་ཚེ་ན་མཆོག་གི་ཚོགས་ཅན་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་ ༄༅། །དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་ བཅོམ་ལྡན་འདས་འཇིག་རྟེན་དུ་བྱུང་སྟེ། དེ་ལོ་བྱེ་བ་ཕྲག་དགུ་བཅུའི་བར་དུ་བཞུགས་སོ། །དེའི་ཉན་ཐོས་བྱེ་བ་ཁྲག་ཁྲིག་ཕྲག་དགུ་བཅུའི་འདུས་པ་ཆེན་པོ་བྱུང་ངོ༌། །ཡང་དེའི་ཚེ་བྱང་ཆུབ་སེམས་ དཔའ་དྲན་པ་རྙེད་ཅེས་བྱ་བ་ཞིག་རྒྱལ་པོའི་རིགས་སུ་སྐྱེས་ཏེ། གཟུགས་བཟང་ཞིང་མཛེས་ལ་བལྟ་ན་སྡུག་པ་སྟེ། ཁ་དོག་བཟང་པོ་རྒྱས་པའི་མཆོག་དང་ལྡན་པ་ཞིག་བྱུང་སྟེ། དེ་བཙས་མ་ཐག་ ཏུ་མས་བུ་མོ་བརྒྱད་ཁྲི་བཞི་སྟོང་བྱིན། ཕས་བུ་མོ་བརྒྱད་ཁྲི་བཞི་སྟོང་བྱིན། མཛའ་བོ་དང༌། ཉེ་དུ་དང༌། སྣག་གི་གཉེན་མཚམས་ཀྱིས་བུ་མོ་བརྒྱད་ཁྲི་བཞི་སྟོང་བྱིན། ཕ་མའི་གཉེན་ བཤེས་ཀྱིས་ཀྱང་བུ་མོ་བརྒྱད་ཁྲི་བཞི་སྟོང་གཉེན་གྱི་གཡོག་ཏུ་བྱིན་ན། །ཤཱ་རིའི་བུ། བྱང་ཆུབ་སེམས་དཔའི་ཕས་ཁང་པ་གསུམ་བྱེད་དུ་བཅུག་པ་འདི་ལྟ་སྟེ། དཔྱིད་ས་དང༌། དབྱར་ས་ དང༌། དགུན་ས་བྱས་སོ། །བྱང་ཆུབ་སེམས་དཔའ་དུས་བཞིན་དུ་ཁང་པའི་སྟེང་ན་འདུག་སྟེ། གང་ན་འདུག་པ་དེར་སིལ་སྙན་ཐོགས་པ་བརྒྱ་སྟོང་དུ་མ་འོངས་ནས་བསྙེན་བཀུར་དང་རིམ་གྲོ་ བྱེད་དོ། །རོལ་མོའི་སྒྲ་ཕྱུང་མ་ཐག་ཏུ་བྱང་ཆུབ་སེམས་དཔའ་དེ་སྐྱེ་བ་དང༌། འཇིག་པའི་འདུ་ཤེས་སྐྱེས་སོ། །སྒྲ་འགགས་མ་ཐག་ཏུ་སྒྲ་འདི་དག་ག་ལས་བྱུང༌། གང་དུ་བྱུང༌། གང་ནས་ འགགས། གང་དུ་འགགས་ཞེས་ཡོངས་སུ་ཚོལ་ཏེ། དེ་མཚན་མོའི་འདུ་ཤེས་ཀྱང་མི་སྐྱེ། ཉིན་མོའི་འདུ་ཤེས་ཀྱང་མི་སྐྱེ་ཞིང༌། གཞན་དུ་ན་རྟག་པར་འདུ་ཤེས་སྐྱེ་སྟེ། དེ་མངོན་པར་མི་ དགའ་བའི་འདུ་ཤེས་སྐྱེའོ། །ཤཱ་རིའི་བུ། དེ་ལྟར་བྱང་ཆུབ་སེམས་དཔའ་དྲན་པ་ཐོབ་པ་དེ་ལོ་སྟོང་ཕྲག་བཞི་བཅུར་ནམ་ཡང་ཡིད་རོལ་མོ་ལ་ཆགས་པར་མ་གྱུར་ཏོ། །ལོ་སྟོང་ཕྲག་བཞི་བཅུར་ནམ་ ཡང་འདོད་པ་ལ་མ་སྤྱད་དོ། །དེ་ཉིད་ན་དེ་ཁྱིམ་ན་གནས་བཞིན་དུ་བསམ་གཏན་བཞི་རྣམས་ལ་བསམ་གཏན་བྱེད་དེ། མངོན་པར་ཤེས་པ་ལྔ་བསྒྲུབས་ནས་དེ་ཁྱིམ་དེ་ནས་རྫུ་འཕྲུལ་གྱིས་སྟེང་གི་ བར་སྣང་ལས་བཅོམ་ལྡན་འདས་མཆོག་གི་ཚོགས་ཅན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ག་ལ་བ་དེར་སོང་སྟེ་བཅོམ་ལྡན་འདས་མཆོག་གི་ཚོགས་ ཅན་དེ་བཞིན་གཤེགས་པ་ལ་དགེ་བའི་རྩ་བའི་དངོས་པོ་ཅུང་ཟད་ཅིག་ཞུའོ། །སྙམ་པ་དང༌། ཤཱ་རིའི་བུ། བཅོམ་ལྡན་འདས་མཆོག་གི་ཚོགས་ཅན་དེ་བཞིན་གཤེགས་པ་དེ་ཉིད་ཀྱི་ཉིན་ པར་ཡོངས་སུ་མྱ་ངན་ལས་འདས་ཏེ། དེ་ཡོངས་སུ་མྱ་ངན་ལས་འདས་པའི་དྲུང་དུ་ཕྱིན་ནས་དགེ་སློང་དག་དེ་བཞིན་གཤེགས་པ་ལ་བསྙེན་བཀུར་བགྱིའོ། །ཞེས་དྲིས་ན། དེ་ལ་དགེ་སློང་དག་ ན་རེ། རིགས་ཀྱི་བུ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་སོ། །ཞེས་ཟེར་རོ། །དེ་ཡོངས་སུ་མྱ་ངན་ལས་འདས་ཞེས་ཐོས་ནས་ས་ཕྱོགས་དེ་ཉིད་དུ་ངུ་ཞིང་བརྒྱལ་ཏེ་ཁ་བུབ་ཏུ་ ༄༅། །སའི་སྟེང་དུ་འགྱེལ་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་སྒྲོལ་མཛད་འདི་ལྟ་བུ། །ཆོས་རྣམས་ཀུན་གྱི་ཕ་རོལ་ཕྱིན། །བག་མེད་གནས་ སུ་བདག་སོང་ནས། །བདག་ཉིད་ཡོངས་སུ་བསླུས་པར་གྱུར། །བསྐལ་པ་བྱེ་བ་ཕྲག་སྟོང་གིས། །དེ་བཞིན་གཤེགས་པ་འབྱུང་འགྱུར་ན། །མགོན་པོ་བདག་གིས་མ་མཉེས་བྱས། །བདག་གི་ སྐྱབས་གྱུར་སུ་ཞིག་ཡོད། །བདག་ལ་སངས་རྒྱས་མ་བརྗོད་པ། །མ་ནི་བདག་གི་དགྲ་ཡིན་སྙམ། །སྐྱེས་མ་ཐག་ཏུ་དེ་ཡི་ཚེ། །དེ་བཞིན་གཤེགས་པ་བལྟ་བ་ཞིག །གང་གིས་འདོད་ལ་ བདག་སྦྱར་བ། །ཕ་ནི་བདག་གི་དགྲར་སེམས་ཏེ། །དེ་དག་དབང་དུ་གྱུར་པས་ན། །འཇིག་རྟེན་མགོན་པོ་མ་མཉེས་བྱས། །འདི་ལྟར་སངས་རྒྱས་གསུང་སྒྲ་ནི། །ཡན་ལག་དྲུག་ཅུ་བདག་མ་ཐོས། ། བདག་གིས་སངས་རྒྱས་མ་མཉེས་བྱས། །བདག་ལ་ཉམས་པ་ཆེན་པོ་བྱུང༌། །འཇིག་རྟེན་ཕན་མཛད་ཐུགས་བརྩེ་དེ་ལྟ་བུ། །ཆོས་རྣམས་ཀུན་གྱི་ཕ་རོལ་ཕྱིན་པ་ནི། །བག་མེད་པ་ཡིས་དེ་རིང་ དུས་འདས་ཏེ། །རྐང་གཉིས་གཙོ་བོ་བདག་གིས་མ་མཉེས་བྱས། །བསྐལ་པ་ཁྲག་ཁྲིག་བྱེ་བ་ཕྲག་བརྒྱར་ཡང༌། །སངས་རྒྱས་བརྒྱ་ལམ་མཐོང་བའང་རྙེད་པར་དཀའ། །བདེ་གཤེགས་མྱ་ ངན་འདས་ནས་ཕྱིན་པ་ནི། །རྒྱལ་བ་དེང་འདིར་བདག་གིས་མ་མཉེས་བྱས། །སྐྱེས་མ་ཐག་ཏུ་སངས་རྒྱས་མ་བརྗོད་པ། །ཕ་དང་མ་ནི་དེ་རིང་དགྲ་ཡིན་སྙམ། །གལ་ཏེ་རྒྱལ་བ་བཞུགས་པ་ མཐོང་གྱུར་ན། །ཆོས་རྣམས་ཉན་ཅིང་མཆོད་པ་བྱ་བ་ཞིག །བདེ་གཤེགས་མྱ་ངན་འདས་ནས་གདོད་འོངས་པས། །དེ་བཞིན་གཤེགས་ཀྱི་ཡན་ལག་དྲུག་ཅུ་པོ། །དེ་དག་ཀུན་དང་ལྡན་པའི་དབྱངས་ འབྱུང་བ། །རྒྱལ་བའི་དེ་དག་བདག་གིས་དེང་མ་ཐོས། །མྱ་ངན་འདས་ནས་འདིར་ནི་བདག་ཕྱིན་པ། །དེ་རིང་བདག་ལ་ཉམས་པ་ཆེན་པོ་བྱུང༌། །སྔོན་གྱི་སངས་རྒྱས་དག་གིས་རྟག་བསྟན་པ། །གྱ་ནོམ་ ཆོས་རྣམས་བདག་ལ་མི་སྟོན་ཏོ། །དེ་ནས་ཚེ་དང་ལྡན་པ་ཤཱ་རིའི་བུ། བྱང་ཆུབ་སེམས་དཔའ་དེ་ས་ཕྱོགས་དེ་ནས་མྱུར་དུ་ལངས་ཏེ་བཅོམ་ལྡན་འདས་མཆོག་གི་ཚོགས་ཅན་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ག་ལ་བ་དེར་སོང་སྟེ་ཕྱིན་ནས་དེ་བཞིན་གཤེགས་པའི་ཁྲི་ལ་ངུ་ཞིང་ལན་བརྒྱ་སྟོང་དུ་མར་བསྐོར་བ་བྱས་ནས་ས་ཕྱོགས་གཅིག་ཏུ་འདུག་སྟེ་ཚིགས་ སུ་བཅད་པ་འདི་དག་གསོལ་ཏོ། །སེམས་ཅན་མཆོག་ནི་ཡང་དག་སྟེ། །ཡང་དག་ཆོས་རྣམས་བསྟན་པ་མཛད། །བྱང་ཆུབ་དམ་པ་མཆོག་གི་ཕྱིར། །བདག་གི་སེམས་ནི་ཡང་དག་སྐྱེས། །ཤེས་རབ་ ཆེན་པོ་ཡང་དག་གསུང༌། །དེ་བཞིན་གཤེགས་པ་མི་མཐོང་སྟེ། །རྒྱལ་བ་ཁྱོད་ཀྱི་ཅི་འདྲ་བ། །བདག་གི་ཤེས་པའང་དེ་འདྲར་འགྱུར། །བདག་སྔོན་སྟོབས་ཀྱང་ཆུང་བ་སྟེ། །ཤེས་རབ་ཞན་པ་བདུད་ཀྱི་ ཕྱོགས། །ཁྱིམ་གྱི་གནས་ན་མཆིས་པས་ན། །མི་ཡི་གཙོ་བོ་མ་མཉེས་བགྱིས། །སྔོན་བགྱིས་བསོད་ནམས་མཆིས་པས་ནི། །དེ་བཞིན་གཤེགས་པ་བདག་གིས་མཐོང༌། །ཆོས་རྣམས་བདག་ ༄༅། །ལ་མི་སྟོན་པས། །དེ་ཕྱིར་ཤིན་ཏུ་སྡུག་བསྔལ་ལོ། །ལྷ་དང་ཀླུ་ཡི་མདུན་དུ་ནི། །བདེན་པའི་ཚིག་རྣམས་བདག་གིས་བརྗོད། །ཅི་སྟེ་བདག་ནི་ཡང་དག་ཏུ། །ཇི་སྐད་སྨྲས་ པ་བཞིན་གྱུར་ཏེ། །མ་འོངས་པ་ཡི་དུས་ཀྱི་ཚེ། །གླང་པོ་ཆེན་པོ་དོན་གཟིགས་པ། །ཡང་དག་ཉིད་ཀྱི་ཆོས་སྟོན་པ། །མི་མཆོག་སངས་རྒྱས་འགྱུར་བར་བགྱི། །མི་ཁོམ་པར་ནི་མི་སྐྱེ་ཞིང༌། །སྐྱེས་ ནས་འདོད་པ་བསྟེན་མི་འགྱུར། །བུད་མེད་དངོས་པོར་མི་འགྱུར་ཞིང༌། །བདུད་ཀྱི་བཅིང་བ་གཅད་པར་བགྱི། །མངོན་སུམ་དུ་ནི་ཆོས་སྟོན་པ། །སངས་རྒྱས་རྣམས་ནི་རྟག་ཏུ་བལྟ། །མཐོང་ནས་རབ་ ཏུ་དད་པར་བགྱི། །དད་ནས་བསྟི་སྟང་རིམ་གྲོ་བགྱི། །བདག་གིས་གང་སྨྲས་ཚིག་འདི་ནི། །ཡང་དག་བདེན་པར་འགྱུར་ཞེ་ན། །བདེན་པ་དེས་ནི་སངས་རྒྱས་འདི། །བྱང་ཆུབ་བཞིན་དུ་བཞུགས་ པར་ཤོག །ཚིག་འདི་རྣམས་ནི་སྨྲས་པ་དང༌། །དེ་བཞིན་གཤེགས་པ་ཅོ་གེར་བཞུགས། །ལྷ་རྣམས་བྱེ་བ་ཕྲག་སྟོང་གིས། །དེ་ཚེ་རབ་ཏུ་གོས་རབ་གཏོར། །དེ་ནི་རབ་ཏུ་ཡིད་དགའ་ནས། །བར་ སྣང་ལ་ནི་འདུག་གྱུར་ཏེ། །བར་སྣང་ལ་ནི་འདུག་ནས་སུ། །རྒྱལ་བ་དེ་ལ་ཚིགས་བཅད་བསྟོད། །སྣང་བར་གྱུར་པ་ཕན་པའི་ཐུགས། །རྫུ་འཕྲུལ་ཆེན་པོ་དམ་པ་གསུང༌། །མཆོག་གི་ཆོས་ རྣམས་ཆོས་མཛད་པ། །སངས་རྒྱས་སྨྲ་བ་མགོན་པོ་དྲན། །དེས་ཚིགས་སུ་བཅད་པ་དེ་དག་སྨྲས་ནས་འཁོར་རྣམས་རྒྱ་ཆེ་ཚིམ་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་ སོ། །བདག་ནི་མི་གཙོས་ལུང་བསྟན་ཏོ། །འཇིག་རྟེན་དུ་ཡང་སངས་རྒྱས་འགྱུར། །བདག་གི་རྗེས་སུ་སློབ་གྱིས་ལ། །དེ་བཞིན་གཤེགས་ལ་རིམ་གྲོ་གྱིས། །བདག་ལ་རྗེས་སུ་ཐུགས་བརྩེའི་ཕྱིར། །མྱ་ ངན་འདས་པའང་བཞེངས་གྱུར་ན། །འཇིག་རྟེན་མགོན་པོ་བསམ་མི་ཁྱབ། །སུ་ཞིག་སངས་རྒྱས་དད་མི་བྱེད། །དེ་བཞིན་གཤེགས་པ་ལ་དེས་དགེ་བའི་རྩ་བ་བསྐྱེད་དེ། མཆོད་པ་དང༌། རིམ་གྲོ་བྱས་ ནས་དགེ་བའི་རྩ་བ་དེ་ཉིད་ཀྱིས་དེ་ནས་ཤི་འཕོས་པ་དང་བདེ་འགྲོ་མཐོ་རིས་སུ་སྐྱེས་ཏེ། དེ་བསྐལ་པ་བྱེ་བ་ཕྲག་ཉིས་ཤུར་ངན་འགྲོ་ལོག་པར་ལྟུང་བར་མ་སོང་ངོ༌། །བསྐལ་པ་བྱེ་བ་ཕྲག་ཉི་ཤུར་ འདོད་པ་ལ་ནམ་ཡང་ཡོངས་སུ་མ་སྤྱད་དོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་རབ་ཏུ་འདོད་པའི་ཕྱིར་དེ་དག་ཐམས་ཅད་ལ་ཡང་མཆོད་པ་དང༌། རིམ་གྲོ་ཆེར་བྱས་ཏེ་ཐམས་ཅད་ དུ་ཡང་ཚངས་པར་སྤྱོད་པ་སྤྱད་ནས་དེ་བསྐལ་པ་ཐ་མ། དུས་ཐ་མ། ལུས་ཐ་མ་ལ་བདག་གི་དངོས་པོ་ཐ་མ་ཐོབ་པའི་ཚེ་རང་གི་དགེ་བའི་རྩ་བས་བསྐུལ་ནས་སཱ་ལའི་རྒྱལ་པོ་ཞེས་བྱ་བ་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་སུ་འདུལ་བའི་ཁ་ལོ་སྒྱུར་ བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། ཤཱ་རིའི་བུ། བཅོམ་ལྡན་འདས་སཱ་ལའི་རྒྱལ་པོའི་ཚེའི་ཚད་ནི། བསྐལ་པ་བྱེ་བ་ཕྲག་ ༄༅། །ཉི་ཤུར་གྱུར་ཏོ། །ཤཱ་རིའི་བུ། དེ་བཞིན་གཤེགས་པ་སཱ་ལའི་རྒྱལ་པོའི་ཉན་ཐོས་འདུས་པ་ནི། གཉིས་འབྱུང་སྟེ། ཉན་ཐོས་འདུས་པ་གཅིག་ལ་ནི། དགེ་ སློང་བྱེ་བ་ཕྲག་ཉི་ཤུ་ཡོད་དོ། །ཉན་ཐོས་འདུས་པ་གཉིས་པ་ལ་ནི། དགེ་སློང་སྟོང་ཕྲག་བཞི་བཅུ་ཡོད་དེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་ དང་ལྡན་པར་གྱུར་པ་ནས་སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པའི་བར་དུའོ། །ཡོངས་སུ་མྱ་ངན་ལས་འདས་པའི་རིང་བསྲེལ་ཡང་རྒྱས་པར་གྱུར་ཏོ། །ཤཱ་རིའི་བུ། དེ་ བཞིན་གཤེགས་པ་ཤཱ་ལའི་རྒྱལ་པོ་ཡོངས་སུ་མྱ་ངན་ལས་འདས་པའི་དམ་པའི་ཆོས་ནི། ལོ་སྟོང་ཕྲག་བཅུར་གནས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་ འདི་དག་གསུངས་སོ། །བསྐལ་པ་བྱེ་བ་ཉི་ཤུར་ནི། །ངན་འགྲོར་ནམ་ཡང་མ་སོང་སྟེ། །བསྐལ་པ་བྱེ་བ་ཉི་ཤུར་ཡང༌། །འདོད་པ་དག་ལ་ཡོང་མ་བསྟེན། །དེ་ཡི་བར་དུ་སངས་རྒྱས་ནི། །སྟོང་ ཕྲག་བདུན་རྣམས་མྱ་ངན་འདས། །དེར་ནི་ཚངས་པར་སྤྱོད་སྤྱད་དེ། །ཆོས་འདོད་པར་ཡང་རྟག་ཏུ་གྱུར། །དེ་ཕྱིར་བྱང་ཆུབ་སངས་རྒྱས་ནས། །རྒྱལ་བ་སཱ་ལའི་དབང་པོར་གྱུར། །བྱེ་བ་སྟོང་ ཕྲག་སུམ་ཅུ་རྣམས། །བྱང་ཆུབ་མཆོག་ལ་རབ་ཏུ་བཀོད། །སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་དམ་པ་སངས་རྒྱས་ནས། །བསྐལ་བ་བྱེ་བ་ཉི་ཤུར་ནི། །སྲོག་ཆགས་རྣམས་ ལ་ཆོས་བསྟན་ཏེ། །སྟོང་ཕྲག་དག་ནི་བཞི་བཅུ་དང༌། །གཞན་ཡང་བྱེ་བ་ཉི་ཤུ་སྙེད། །ཐམས་ཅད་ཟག་ཟད་དྲང་སྲོང་གི །དགེ་འདུན་དེ་ཚེ་དེ་སྐད་བྱུང༌། །སྟོན་པ་མྱ་ངན་འདས་ནས་ཀྱང༌། །རིང་བསྲེལ་ ཤིན་ཏུ་རྒྱས་པར་གྱུར། །མཆོད་རྟེན་སྟོང་ཕྲག་དྲུག་ཅུ་དང༌། །བྱེ་བ་དག་ཀྱང་དེར་བྱུང་ངོ༌། །མྱ་ངན་འདས་ནས་དམ་པའི་ཆོས། །ལོ་ནི་སྟོང་ཕྲག་བཅུར་གནས་ཏེ། །རྒྱལ་བའི་བསྟན་པ་ཐོས་ནས་ ནི༑ ༑སུ་ཞིག་དེ་ལ་དད་མི་བྱེད། །སངས་རྒྱས་ཀྱི་ནི་ཆོས་ཐོས་ནས། །མཁས་པ་སུ་དག་ནེམ་ནུར་མེད། །དེ་དག་ངན་འགྲོར་མི་འགྲོ་སྟེ། །མྱུར་དུ་མྱ་ངན་འདས་ལ་རེག །ཤཱ་རིའི་བུ། དེ་ལྟར་ ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་སེམས་ཅན་ཐམས་ཅད་ལ་མ་དང་ཕར་འདུ་ཤེས་བསྐྱེད་དེ། འདོད་ཆགས་ཀྱི་སེམས་སྐྱེས་པ་ནི། མར་འདུ་ཤེས་པས་སྤོང་ངོ༌། །ཞེ་ སྡང་གི་སེམས་སྐྱེས་པ་ནི། ཕར་འདུ་ཤེས་པས་སྤོང་ངོ༌།། །།བམ་པོ་བཅུ་གཅིག་པ། ཤཱ་རིའི་བུ། གཞན་ཡང་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་བདག་ ཉིད་ལ་མི་མཐུན་པ་མང་དུ་གནས་པ་ཡིན་ཏེ། དེ་ལ་འདོད་ཆགས་ཀྱི་ཕྱིར་ཚུལ་བཞིན་ཡིད་ལ་བྱེད་པས་འདོད་པ་ལ་ཡང་དག་པར་མི་མཐུན་པ་སྐྱེད་དོ། །དེ་འདོད་པ་དང་འདོད་པའི་མི་མཐུན་ པ་ཡང་རབ་ཏུ་ཤེས་སོ། །དེ་ལ་འདོད་པ་གང༌། འདོད་པའི་མི་མཐུན་པ་གང་ཞེ་ན། འདོད་པ་ཞེས་བྱ་བ་ནི། གང་མིག་གིས་ཤེས་པར་བྱ་བའི་གཟུགས་ལ་མངོན་པར་ཆགས་པ་དེ་ནི། འདོད་པ་ ༄༅། །ཞེས་བྱའོ། །གཞན་ཡང་འདོད་པ་ཞེས་བྱ་བ་ནི། གང་རྣ་བས་ཤེས་པར་བྱ་བའི་སྒྲ་ལ་མངོན་པར་ཆགས་པའོ། །དེ་བཞིན་དུ་སྦྱར་ཏེ་གང་སྣས་ཤེས་པར་བྱ་བའི་ དྲི་དང༌། ལྕེས་ཤེས་པར་བྱ་བའི་རོ་དང༌། ལུས་ཀྱི་ཤེས་པར་བྱ་བའི་རེག་བྱ་ལ་མངོན་པར་ཆགས་པ་དེ་ནི། འདོད་པ་ཞེས་བྱའོ། །དེ་ལ་གང་མངོན་པར་ཆགས་པ་དེ་ནི། ལྷག་པར་ཞེན་ པའོ༑ ༑གང་ལྷག་པར་ཞེན་པ་དེ་ནི། ཀུན་ཏུ་སྦྱོར་བའོ། །གང་ཀུན་ཏུ་སྦྱོར་བ་དེ་ནི། མངོན་པར་འགྲུབ་པའོ། །གང་མངོན་པར་འགྲུབ་པ་དེ་ནི། འཆིང་བ་སྟེ། དེ་ཡང་དག་པ་མ་ཡིན་པ་ འདྲིད་པའོ། །དེ་ལྟར་ཀྱེ་མའོ། །སེམས་ཅན་འདི་དག་ནི། ཡང་དག་པ་མ་ཡིན་པ་འདྲིད་པའི་འཆིང་བས་བཅིངས་པ་སྟེ། བཅིངས་པ། ངེས་པར་བཅིངས་པ། ཤིན་ཏུ་ངེས་པར་བཅིངས་ པའོ༑ ༑ཅིས་བཅིངས་ཤེ་ན། གཟུགས་ཀྱི་འཆིང་བས་བཅིངས་པ་ནི། བཅིངས་ཞེས་བྱ་བ་ནས་སྒྲ་དང༌། དྲི་དང༌། རོ་དང༌། རེག་གི་བར་གྱི་འཆིང་བས་བཅིངས་པ་ནི། བཅིངས་ཞེས་ བྱའོ༑ ༑གཟུགས་ཀྱི་འཆིང་བ་གང་ཞེ་ན། འདི་ལྟ་སྟེ། ལུས་ཐོབ་པའི་གཟུགས་དེ་ལ་གང་བདག་ཏུ་འདུ་ཤེས་པ་དང༌། སྲོག་ཏུ་འདུ་ཤེས་པ་དང༌། གང་ཟག་ཏུ་འདུ་ཤེས་པ་དང༌། རྟག་ པར་འདུ་ཤེས་པ་དང༌། བརྟན་པར་འདུ་ཤེས་པ་དང༌། ཐེར་ཟུག་ཏུ་འདུ་ཤེས་པ་དང༌། རྫས་སུ་འདུ་ཤེས་པ་དང༌། རིལ་པོར་འདུ་ཤེས་པ་དང༌། གོང་བུར་འདུ་ཤེས་པ་དེ་ནི། གཟུགས་ ཀྱི་འཆིང་བ་ཞེས་བྱའོ། །ཡང་གཟུགས་ཀྱི་འཆིང་བ་གང་ཞེ་ན། འདི་ལྟ་སྟེ། ལུས་མངོན་པར་གྲུབ་པ་དེ་ལ་རིམ་གྲོ་བྱའོ། །སྙམ་ནས་དེ་བདག་ལ་བྱམས་པས་ཆུང་མ་ལ་མངོན་པར་ཆགས་ པར་བྱེད་དེ། གཟུགས་ཀྱི་འཆིང་བས་བཅིངས་ནས་འདོད་པའི་ལོངས་སྤྱོད་ཐོབ་པས་མི་དགེ་བའི་ལམ་མངོན་པར་འདུ་བྱེད་དེ། འདོད་པའི་ཉེས་པ་མི་ཤེས་སོ། །དེ་ལ་འདོད་པའི་ཉེས་པ་གང་ཞེ་ ན༑ ཉེས་པ་དག་ལ་འདོད་པ་དང༌། ཉེས་པ་ལ་འདོད་པ་མེད་མོད་ཀྱི། གང་ངན་སོང་དུ་གཞོལ་བའི་འདོད་པའི་ཉེས་པ་དེ་དག་བསྟན་པར་བྱའོ། །སྙམ་མོ། །དེ་ལ་ངན་སོང་དུ་གཞོལ་བའི་ འདོད་པའི་ཉེས་པ་གང་ཞེ་ན། ཤཱ་རིའི་བུ། འདོད་པ་བསྟེན་པ་ནི། སྡིག་པ་མི་བྱེད་པ་ཅུང་ཟད་ཀྱང་མེད་དེ། དེའི་རྣམ་པར་སྨིན་པས་སྡུག་བསྔལ་ཡོངས་སུ་གཟུང་བར་མི་འགྱུར་བ་གང་ཡང་ མེད་ཅེས་བཤད་དོ། །དེ་ལྟར་ཤཱ་རིའི་བུ། སྟོང་གི་འཇིག་རྟེན་གྱི་ཁམས་སུ་རབ་ཏུ་བརྟགས་ན། ཇི་ལྟར་བདག་གི་ཆུང་མ་ལྟ་བུ་དགྲར་གྱུར་པ་ནི། གཞན་གང་ཡང་མེད་དོ། །དེ་ཅིའི་ ཕྱིར་ཞེ་ན། ཤཱ་རིའི་བུ། དེ་བཞིན་གཤེགས་པ་ནི། ཡེ་ཤེས་དང་ལྡན་ནོ། །སེམས་ཅན་ཐམས་ཅད་ནི། མི་ཤེས་པ་སྟེ། གང་ཡེ་ཤེས་དང་ལྡན་པས་ཟིན་པ་དེ་ནི། རབ་ཏུ་ཡང་དག་ པའོ༑ ༑གང་མི་ཤེས་པས་ཡོངས་སུ་ཟིན་པ་དེ་ནི། ཡང་དག་པ་མ་ཡིན་པའོ༑ ༑མི་ཤེས་པས་གང་ཡོངས་སུ་བཟུང་ཞེ་ན། འདུས་བྱས་ཡོངས་སུ་བཟུང་ངོ༌། །བུ་དང༌། བུ་མོ་དང༌། ཆུང་མ་ ༄༅། །ཡོངས་སུ་བཟུང་ངོ༌། །དེས་དེ་ལྟར་ཡོངས་སུ་བཟུང༌། ཕན་ཚུན་དུ་དེ་ལྟར་ཡོངས་སུ་བཟུང༌། འཕགས་པའི་ལམ་གྱིས་ཀུན་ཏུ་མ་བཟུང་སྟེ། བུ་ཕོ་དང༌། བུ་ མོ་དང༌། ཆུང་མས་ཀུན་ཏུ་བསྐོར་ཅིང་སྲེད་པ་ཉེ་བར་ལེན་པ་ནི། རབ་ཏུ་འབྱུང་བའི་བར་དུ་གཅོད་དོ། །ཚུལ་ཁྲིམས་ཀྱི་བར་དུ་གཅོད། བསམ་གཏན་གྱི་བར་དུ་གཅོད། མཐོ་རིས་ ཀྱི་བར་དུ་གཅོད། མྱ་ངན་ལས་འདས་པའི་བར་དུ་གཅོད་པའོ། །བྲན་ཕོ་དང༌། བྲན་མོ་ཡོངས་སུ་འཛིན་པ་དང༌། བུ་ཕོ་དང༌། བུ་མོ་དང༌། ཆུང་མ་ཡོངས་སུ་འཛིན་པ་ནི། དགེ་བའི་ཆོས་ ཐམས་ཅད་ཀྱི་བར་དུ་གཅོད་པའོ། །གོང་མ་བཞིན་དུ་སྦྱར་ཏེ། བུ་ཕོ་དང༌། བུ་མོ་དང༌། ཆུང་མ་ཡོངས་སུ་འཛིན་པ་ནི། དགྲར་གྱུར་པ་ཡོངས་སུ་འཛིན་པའོ། །སེམས་ཅན་དམྱལ་བ་ དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་ཡོངས་སུ་འཛིན་པའོ། །མདོར་ན་མི་དགེ་བ་ཐམས་ཅད་ཡོངས་སུ་འཛིན་པ་སྟེ། ཐ་ན་ཟས་བཟང་པོའི་ཡང་བར་དུ་གཅོད་ པའོ༑ ༑སངས་རྒྱས་མཐོང་བའི་བར་དུ་གཅོད་པའོ། །གོང་མ་བཞིན་དུ་སྦྱར་ཏེ། ཆོས་མཉན་པ་དང༌། དགེ་འདུན་ལ་བསྙེན་བཀུར་བྱ་བ་དང༌། སངས་རྒྱས་བལྟ་བར་དད་པ་རྙེད་པ་དང༌། ཆོས་མཉན་པར་དད་པ་རྙེད་པ་དང༌། དགེ་འདུན་ལ་བསྙེན་བཀུར་བྱ་བར་དད་པ་རྙེད་པ་དང༌། དལ་བའི་འབྱོར་བ་རྙེད་པའི་བར་དུ་གཅོད་པའོ། །གོང་མ་བཞིན་དུ་སྦྱར་ཏེ་དད་པའི་ནོར་དང༌། ཚུལ་ཁྲིམས་ཀྱི་ནོར་དང༌། ཐོས་པའི་ནོར་དང༌། ཤེས་རབ་ཀྱི་ནོར་དང༌། གཏོང་བའི་ནོར་དང༌། ཁྲེལ་ཡོད་པའི་ནོར་དང༌། ངོ་ཚ་ཤེས་པའི་ནོར་རྙེད་པའི་བར་དུ་གཅོད་པའོ། །ཆུང་མ་དང༌། བུ་དང༌། བུ་མོ་ཡོངས་སུ་འཛིན་པ་ནི། མ་དད་པ་ཡོངས་སུ་འཛིན་པའོ། །ཆུང་མ་དང༌། བུ་དང༌། བུ་མོ་ཡོངས་སུ་འཛིན་པ་ནི། འཆལ་བའི་ཚུལ་ཁྲིམས་དང༌། སེར་སྣ་དང༌། འཆལ་ པའི་ཤེས་རབ་དང༌། ཁྲེལ་མེད་དང༌། ངོ་ཚ་མི་ཤེས་པ་ཡོངས་སུ་འཛིན་པའོ། །ཆུང་མ་དང༌། བུ་དང༌། བུ་མོ་ཡོངས་སུ་འཛིན་པ་ནི། ནད་དང༌། འབྲས་དང༌། ཟུག་རྔུ་ཡོངས་སུ་འཛིན་པའོ། ། མེའི་ཕུང་པོ་ཡོངས་སུ་འཛིན་པའོ། །སྦྲུལ་གདུག་པ་ཡོངས་སུ་འཛིན་པའོ། །ཁྱིམ་གྱི་གནས་ནི། དུར་ཁྲོད་ཀྱི་གནས་སོ། །དུར་ཁྲོད་དང་ཁྱིམ་ནི། མྱ་ངམ་དགོན་པ། སྨྲེ་བའི་ས་མེད་པ་སྟེ། ཆོས་ དཀར་པོ་ཐམས་ཅད་རྐུ་བའོ། །ཞེས་ངས་བཤད་དོ། །བུ་དང༌། བུ་མོ་དང༌། ཆུང་མ་ལ་ཆགས་པ་ནི། རྡོའི་སེར་བ་འབབ་པ་ལ་ཆགས་པའོ། །རལ་གྲིའི་སོ་ལ་ཆགས་པའོ། །ལྕགས་ཀྱི་ཁྲི་བསྲེགས་ པ་ལ་ཆགས་པའོ། །དེའི་མེ་ཏོག་དང༌། སྤོས་དང༌། ཕྲེང་བ་དང༌། བྱུག་པ་ལ་ཆགས་པ་ནི། ལྕགས་ཀྱི་ཁྲི་དང༌། ལྕགས་ཀྱི་ཐོ་ལུམ་གྱི་ཕྲེང་བ་དང༌། བཤང་གཅིས་བྱུགས་པ་ལ་ཆགས་པའོ། །ཁྱིམ་ ཡོངས་སུ་འཛིན་པ་ནི། ལྕགས་ཟངས་ཡོངས་སུ་འཛིན་པའོ། །བྲན་ཕོ་དང༌། བྲན་མོ་དང༌། ལས་བྱེད་པའི་མི་ཡོངས་སུ་འཛིན་པ་ནི། སེམས་ཅན་དམྱལ་བའི་སྲུང་མ་ཡོངས་སུ་འཛིན་པའོ། །གླང་ ༄༅། །པོ་ཆེ་དང༌། རྟ་དང༌། རྔ་མོ་དང༌། བ་ལང་དང༌། བོང་བུ་དང༌། ལུག་དང༌། ཁྱིམ་བྱ་དང༌། ཕག་པ་ཡོངས་སུ་འཛིན་པ་ནི། སྲོག་ཆགས་སྲེ་བོ་དང༌། ཁྲ་བོ་དཔག་ ཚད་བརྒྱ་པ་ཡོངས་སུ་འཛིན་པའོ། །ཆུང་མ་དང༌། བུ་དང༌། བུ་མོ་ཡོངས་སུ་འཛིན་པ་ནི། སྡུག་བསྔལ་དང༌། ཡིད་མི་བདེ་བ་དང༌། འཁྲུག་པ་ཐམས་ཅད་ཡོངས་སུ་འཛིན་པའོ། །ཤཱ་རིའི་བུ། ལྕགས་ཀྱི་ཁྲི་དཔག་ཚད་སྟོང་པ། རབ་ཏུ་ཆེ་བ། ཀུན་ཏུ་རབ་ཏུ་འབར་བ་མེ་དང་འདྲ་བར་གྱུར་པ་དང་མཐང་སྦྱར་ཀྱང་བླའི། ཕ་དང༌། མས་བྱིན་པའི་ཆུང་མ་ལ་རྒྱང་རིང་པོ་ནས་ཀུན་ཏུ་ཆགས་ པའི་སེམས་ཀྱིས་ལྟ་བ་ཡང་དེ་ལྟ་མ་ཡིན་ན། མཐང་སྦྱར་བ་ལྟ་ཅི་སྨོས། དེ་ཅིའི་ཕྱིར་ཞེ་ན། ཆུང་མ་ནི། སྡུག་བསྔལ་གྱི་རྩ་བའོ། །ཆུང་མ་ནི། སྡིག་པའི་རྩ་བའོ། །ཆུང་མ་ནི། ཀུན་ནས་ མནར་སེམས་ཀྱི་རྩ་བའོ། །ཆུང་མ་ནི། འཆིང་བའི་རྩ་བའོ། །ཆུང་མ་ནི། མྱ་ངན་གྱི་རྩ་བའོ། །ཆུང་མ་ནི། དགྲའི་རྩ་བའོ། །ཆུང་མ་ནི། དམུས་ལོང་གི་རྩ་བའོ། །ཆུང་མ་ནི། ཤེས་རབ་ཀྱི་ མིག་དང་མི་མཐུན་པའི་རྩ་བའོ། །ཆུང་མ་ནི། ལྕགས་དང་རྡོ་བསྲེགས་པ་བཀྲམ་པའི་སའོ། །ཆུང་མ་ནི། ཕ་རོལ་གནོན་པར་བྱེད་པ་དང་འདྲའོ། །ཆུང་མ་ནི། ལོག་པའི་ལས་ཀྱི་རབ་ཏུ་ གཟིར་བའོ། །ཅིའི་ཕྱིར་ཆུང་མ་ཞེས་བྱ་ཞེ་ན། ཁུར་བསྐུར་བ་དང༌། ཁུར་ཁྱེར་བ་དང༌། ཁུར་རབ་ཏུ་ལེན་པ་དང༌། ཁུར་ཐོགས་པ་དང༌། ཁྲུ་ཡོངས་སུ་ཐོགས་པ་དང༌། ཁུར་གྱིས་ ཉོན་མོངས་པ་དང༌། ཁུར་གྱིས་ཉེན་པ་དང༌། ཁུར་གྱིས་བསྲབས་པས་ན། དེའི་ཕྱིར་ཆུང་མ་ཞེས་བྱའོ། །སེམས་ཅན་དག་དེ་ལ་གསོ་བར་བྱེད་པ་ཞེས་ཀྱང་བྱ་སྟེ། སྲིད་པས་འཁོལ་བས་ ཆུང་མ་ལ་གཞོལ་ཞིང་ཆུང་མས་ཡོངས་སུ་ཟིན། ཆུང་མས་ཕམ་པར་བྱས། ཆུང་མས་ཡོངས་སུ་བསྡུས། ཆུང་མས་དབང་བྱས། ཆུང་མས་འཁོལ། ཆུང་མའི་རྗེས་སུ་འབྲང་སྟེ། དེའི་ ཕྱིར་ཆུང་མ་ཞེས་བྱའོ། །ཆུང་མའི་ཕྱིར་ཁུར་ཆེན་པོ་མི་འདོར་རོ། །ཁུར་གང་མི་འདོར་ཞེ་ན། འདི་ལྟ་སྟེ། ཕུང་པོ་ལྔ་པོའོ། །ཕུང་པོ་ལྔ་པོ་གང་ཞེ་ན། གཟུགས་ཀྱི་ཕུང་པོ་དང༌། ཚོར་བའི་ཕུང་ པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་ཀྱི་ཕུང་པོ་དང༌། རྣམ་པར་ཤེས་པའི་ཕུང་པོ་སྟེ། ཕུང་པོ་ལྔ་པོ་དེ་དག་གི་ཁུར་མི་འདོར་བས་དེའི་ཕྱིར་ཆུང་མ་ཞེས་བྱའོ། །ཅིའི་ཕྱིར་གོད་རྙིང་གཉིས་པ་ ཞེས་བྱ་ཞེ་ན། འདི་ལྟར་ཤཱ་རིའི་བུ། ཚུལ་ཁྲིམས་ཉམས་པ་གཉིས་པའོ། །ཆོ་ག་ཉམས་པ་གཉིས་པའོ། །ཡང་དག་པའི་ལྟ་བ་ཉམས་པ་གཉིས་པའོ། །བཟའ་བ་དང་བཏུང་བ་གཉིས་པའོ། ། སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་དུ་འགྲོ་བ་གཉིས་པའོ། །འཕགས་པའི་ཤེས་རབ་ཀྱི་བར་ཆད་བྱེད་པའོ། །མྱ་ངན་ལས་འདས་པའི་བདེ་བ་ལ་ མི་མཐུན་པའི་ཕྱོགས་བྱེད་པའོ། །སྡུག་བསྔལ་ཐམས་ཅད་ཡང་དག་པར་སྡུག་པ་གཉིས་པ་སྟེ། དེའི་ཕྱིར་གོད་རྙིང་གཉིས་པ་ཞེས་བྱའོ། །ཅིའི་ཕྱིར་བུད་མེད་ཅེས་བྱ་ཞེ་ན། ཉེས་པ་མང་ཞིང་ ༄༅། །སྒྱུ་མཐའ་ཡས་པས་དེའི་ཕྱིར་འདི་ནི། སྒྱུ་མ་སྟེ། བུད་མེད་ཅེས་བྱའོ། །གང་བུད་མེད་ཀྱི་ལག་ཏུ་སོང་བ་དེ་དག་བདུད་ཀྱི་ལག་ཏུ་སོང་བའོ། །གང་བདུད་ཀྱི་ ལག་ཏུ་སོང་བ་དེ་དག་སྡིག་ཅན་གྱི་དབང་དུ་སོང་བ་སྟེ། བུད་མེད་ནི། ཉེས་པ་མང་བ། སྒྱུ་མཐའ་ཡས་པ། སེམས་ཡང་བ། སེམས་འགྱུར་བ། སེམས་མི་བརྟན་པ། སེམས་རབ་ཏུ་ གཡོ་ཞིང་མི་བརྟན་པ། སྤྲེའུའི་སེམས། སྤྲེའུ་དང་མཚུངས་པ། སྒྱུ་མ་སྟོན་པ་ལ་མཁས་པ་སྟེ། དེའི་ཕྱིར་བུད་མེད་ཅེས་བྱའོ། །ཤཱ་རིའི་བུ། བུད་མེད་ནི། སྒྱུ་མའི་གྲོང་ཁྱེར། སྒྱུ་ མའི་རྒྱལ་པོའི་ཕོ་བྲང་འཁོར། སྒྱུ་མའི་གྲོང་རྡལ། སྒྱུ་མའི་རྒྱལ་པོའི་ཡུལ་འཁོར། སྒྱུ་མའི་རྒྱལ་སྲིད། སྒྱུ་མའི་ཡུལ། སྒྱུ་མའི་འཇིག་རྟེན། སྒྱུ་མའི་འཇིག་རྟེན་གྱི་ཁམས། སྒྱུ་ མ་མཐའ་ཡས་པ། སྒྱུ་མ་རྒྱས་པ། སྒྱུ་མ་དཔག་ཏུ་མེད་པ། སྒྱུ་མ་བསམ་གྱིས་མི་ཁྱབ་པ་སྟེ། དེའི་ཕྱིར་བུད་མེད་ཅེས་བྱའོ། །ཤཱ་རིའི་བུ། དེ་ལྟར་འདོད་པའི་ཉེས་པ་དེ་དག་ནི། ངན་ སོང་དུ་འགྲོ་བའོ། །ཞེས་བྱའོ། །འདི་ལྟ་སྟེ། ཤཱ་རིའི་བུ། སྒྱུ་མ་བྱེད་པ་ཤིན་ཏུ་བསླབ་པ་ཞིག་ལྟད་མོ་པའི་ནང་དུ་སོང་ནས་སྒྱུ་མ་རྣམ་པ་སྣ་ཚོགས་ཉེ་བར་སྟོན་པ་དེ་བཞིན་དུ་ཤཱ་རིའི་བུ། བུད་མེད་བུད་མེད་ཀྱི་སྒྱུ་མ་ཤིན་ཏུ་བསླབ་པ་ཡང་མཐོང་བས་ཀྱང་སྐྱེས་བུ་འཆིང་བར་བྱེད། ཐོས་པས་ཀྱང་སྐྱེས་བུ་འཆིང་བར་བྱེད། རེག་པས་ཀྱང་སྐྱེས་བུ་འཆིང་ཞིང་དབང་དུ་བྱེད། གླུ་ ལེན་པས་ཀྱང་སྐྱེས་བུ་ལ་དབང་དུ་བྱེད། གར་བྱེད་པས་ཀྱང་སྐྱེས་བུ་ལ་དབང་དུ་བྱེད། རྒོད་པས་ཀྱང་སྐྱེས་བུ་ལ་དབང་དུ་བྱེད་པ་ནས་ངུ་བ་དང༌། འགྲོ་བ་དང༌། འོང་བ་དང༌། འགྲེང་བ་དང་ འདུག་པ་དང༌། ཉལ་བ་དང༌། རྣམ་པ་ཐམས་ཅད་ཀྱིས་ཀྱང་སྐྱེས་བུ་ལ་འཆིང་ཞིང་དབང་དུ་བྱེད་དོ། །འདི་ལྟ་སྟེ། ཤཱ་རིའི་བུ། འབྲས་སཱ་ལུའི་ཞིང་ཕུན་སུམ་ཚོགས་པ་སྨིན་པ་ལ་ སེར་བ་ཆེན་པོ་བབ་ན་བརླག་པ་དེ་བཞིན་དུ་ཤཱ་རིའི་བུ། བུད་མེད་ཀྱི་སེར་བ་ཡང་དེ་དང་འདྲ་སྟེ། སྐྱེས་བུའི་ཞིང་ལ་བབ་ན། ཆོས་དཀར་པོ་ཐམས་ཅད་རྣམ་པར་འཇིག་པར་འགྱུར་རོ། །ཤཱ་ རིའི་བུ༑ དེ་དག་ནི། ངན་སོང་དུ་གཞོལ་བའི་འདོད་པའི་ཉེས་པ་ཡིན་ན། གང་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་མི་ཤེས་པས་ཆུང་མ་ཡོངས་སུ་འཛིན་ཏོ། །དེ་ལ་ཤཱ་རིའི་བུ། བྱང་ཆུབ་ སེམས་དཔའ་མཁས་པས་ནི། འདོད་པའི་ཉེས་པ་འདི་དག་རིག་ནས་འདུ་ཤེས་གཉིས་བསྐྱེད་དོ། །གཉིས་གང་ཞེ་ན། བྱིས་པ་སོ་སོའི་སྐྱེ་བོ་ཐམས་ཅད་ལ་སྐྱེས་བུ་ངན་པར་འདུ་ཤེས་བསྐྱེད་ པ་དང༌། འཕགས་པའི་སེམས་ཅན་ཐམས་ཅད་ལ་སྐྱེས་བུ་དམ་པར་འདུ་ཤེས་བསྐྱེད་པའོ། །དེ་འདུ་ཤེས་འདི་གཉིས་བསྐྱེད་ནས་འདི་སྙམ་དུ་སེམས་ཏེ། བདག་ནི། སྐྱེས་བུ་དམ་པའི་ འགྲོས་སུ་འགྲོ་བར་བྱའི། སྐྱེས་བུ་ངན་པའི་འགྲོས་སུ་ནི། མ་ཡིན་ནོ། །བདག་སེམས་ཅན་དམྱལ་བའི་འགྲོས་སུ་འགྲོ་བར་མི་བྱ། དུད་འགྲོའི་སྐྱེ་གནས་ཀྱི་འགྲོས་སུ་མ་ཡིན། གཤིན་རྗེའི་ ༄༅། །འཇིག་རྟེན་གྱི་འགྲོས་སུ་འགྲོ་བར་མི་བྱ། བདག་འཆལ་བའི་ཚུལ་ཁྲིམས་ཀྱི་འགྲོས་སུ་འགྲོ་བར་མི་བྱ། བདག་ཚུལ་ཁྲིམས་འཆལ་པ་དང་འགྲོགས་ཤིང་འགྲོ་ བར་མི་བྱའི། །མཆོག་དམ་པ་གཙོ་བོ་ཆོས་ཐམས་ཅད་སྒྲིབ་པ་མེད་པར་རྟོགས་པ། སངས་རྒྱས་ཀྱི་ཡེ་ཤེས་ཀྱི་འགྲོས་སུ་འགྲོ་བར་བྱའོ། །བདག་རྒྱུན་ལས་བཟློག་པ་སྤྱད་པར་བྱའི། རྒྱུན་ གྱི་རྗེས་སུ་སྤྱད་པར་མི་བྱ། བདག་སེངྒེའི་སྒྲ་སྒྲོག་པར་བྱའི། ཝའི་སྒྲ་སྒྲོག་པར་མི་བྱ། བདག་ནམ་མཁའ་ལྡིང་གི་མཐུ་སྟོན་པར་བྱའི། སྲོག་ཆགས་ཕྲ་མོ་ལྟར་མི་བྱ། བདག་མི་ཅང་ ཤེས་སུ་འགྱུར་བར་བྱའི། བདག་མི་མ་རུངས་པར་འགྱུར་བར་མི་བྱ། བདག་ཅང་ཤེས་ཀྱི་ཟས་དང༌། ཟས་ངན་པ་མ་ཡིན་པ་བཟའ་བར་བྱ་སྟེ། བདག་ཅང་ཤེས་པ་མ་ཡིན་པའི་ཟས་ དང༌། ཟས་ངན་པ་བཟའ་བར་མི་བྱའོ། །བདག་བསམ་གཏན་བཟང་པོ་དང༌། བསམ་གཏན་མཆོག་དང༌། བསམ་གཏན་རབ་དང༌། ཏིང་ངེ་འཛིན་དམ་པ་ཐོབ་པར་འགྱུར་བ་དེའི་རང་ བཞིན་གྱི་བསམ་གཏན་དག་ལ་བསམ་གཏན་དུ་བྱ་སྟེ། དེའི་རང་བཞིན་མ་ཡིན་པའི་བསམ་གཏན་དང༌། དམན་པའི་བསམ་གཏན་ལ་བསམ་གཏན་མི་བྱའོ། །བདག་སངས་རྒྱས་ ཀྱི་བསམ་གཏན་གྱིས་རྩེ་བར་བྱའི། ཉན་ཐོས་དང༌། རང་སངས་རྒྱས་དང༌། བྱིས་པ་སོ་སོའི་སྐྱེ་བོ་ཐམས་ཅད་ཀྱི་བསམ་གཏན་གྱིས་ནི། མ་ཡིན་ནོ། །བདག་མི་གནས་པར་བསམ་གཏན་ བྱ་སྟེ༑ གཟུགས་ལ་མི་གནས། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་ལ་མི་གནས། སའི་ཁམས་ལ་མི་གནས་པར་བསམ་གཏན་བྱའོ། །ཆུའི་ཁམས་ དང༌། མེའི་ཁམས་དང༌། རླུང་གི་ཁམས་ལ་མི་གནས་པར་བསམ་གཏན་བྱའོ། །འདོད་པའི་ཁམས་ལ་མི་གནས། གཟུགས་ཀྱི་ཁམས་ལ་མི་གནས། གཟུགས་མེད་པའི་ཁམས་ལ་ མི་གནས། འཇིག་རྟེན་འདི་ལ་མི་གནས། འཇིག་རྟེན་ཕ་རོལ་ལ་མི་གནས། གང་མཐོང་བ་དང༌། ཐོས་པ་དང༌། དྲན་པ་དང༌། རྣམ་པར་ཤེས་པ་དང༌། ཐོབ་པ་དང༌། རེག་པ་དང༌། མངོན་ སུམ་དུ་བྱས་པ་དེ་དག་ལ་ཡང་མི་གནས་པར་བསམ་གཏན་བྱའོ། །བསམ་གཏན་བྱེད་ན། ཇི་ལྟར་བདག་ལ་གནོད་པར་མི་འགྱུར་བ་དང༌། གཞན་ལ་གནོད་པར་མི་འགྱུར་བ་དང༌། གཉིས་ ཀ་ལ་གནོད་པར་མི་འགྱུར་བར་བྱའོ། །བདག་སངས་རྒྱས་ཀྱི་ཡེ་ཤེས་ཡོངས་སུ་གྲུབ་པ་ཀུན་ཏུ་ཚོལ་གྱི། བདག་ལ་འདོད་པ་ཚོལ་བས་ནི། ཆོག་གོ །དེ་ལ་ཤཱ་རིའི་བུ། བྱང་ཆུབ་སེམས་དཔའ་ མཁས་པ་ནི། ལྡོག་པ་བཞི་བསྐྱེད་དེ། བཞི་གང་ཞེ་ན། འདོད་པའི་ལས་ལྡོག་པ་དང༌། སྲེད་པ་ལས་ལྡོག་པ་དང༌། བྱས་པ་མི་གཟོ་བའི་སེམས་ཅན་ལས་ལྡོག་པ་དང༌། འདུ་བྱེད་དུ་གཏོགས་ པའི་སྡུག་བསྔལ་ཐམས་ཅད་ལས་ལྡོག་པ་སྟེ། ལྡོག་པ་བཞི་པོ་དེ་དག་བསྐྱེད་དོ། །ཤཱ་རིའི་བུ། བྱང་ཆུབ་སེམས་དཔའ་ངན་སོང་ན་གནས་པས་ཀྱང་ཁ་དོག་རྒྱས་པའི་བུད་མེད་མཐོང་ན། འདུ་ ༄༅། །ཤེས་བཞི་བསྐྱེད་དེ། བཞི་གང་ཞེ་ན། ཉམས་པར་འདུ་ཤེས་པ་དང༌། གཡང་སར་འདུ་ཤེས་པ་དང༌། ཕྱི་ས་ཁུང་དུ་འདུ་ཤེས་པ་དང༌། རྣག་ཏུ་བློས་ཉེ་བར་ དཔྱོད་ཅིང་འདུ་ཤེས་པའོ། །ཤཱ་རིའི་བུ། བྱང་ཆུབ་སེམས་དཔའ་ངན་སོང་ན་གནས་ན་ཡང་ཁ་དོག་རྒྱས་པའི་བུད་མེད་མཐོང་ན། འདུ་ཤེས་འདི་བཞི་བསྐྱེད་ན། མིར་གྱུར་པ་ན་ལྟ་ཅི་སྨོས། ཐེག་པ་ཆེན་པོ་ལ་ཞུགས་པའི་རིགས་ཀྱི་བུས་ཁ་དོག་རྒྱས་པའི་བུད་མེད་མཐོང་ན། འདུ་ཤེས་བཞི་བསྐྱེད་དེ། ཉམས་པར་འདུ་ཤེས་པ་དང༌། གཡང་སར་འདུ་ཤེས་པ་དང༌། ཕྱིས་ ཁུང་དུ་འདུ་ཤེས་པ་དང༌། རྣག་ཏུ་བློས་ཉེ་བར་དཔྱོད་ཅིང་འདུ་ཤེས་པའོ། །གལ་ཏེ་དེ་ལྟར་བརྟགས་ཀྱང་འདོད་ཆགས་ཀྱི་སེམས་སྐྱེ་བ་ལྟ་ན། དེས་འདུ་ཤེས་གསུམ་བསྐྱེད་པར་བྱའོ།། གསུམ་གང་ཞེ་ན། མ་འདྲ་བ་ལ་མར་འདུ་ཤེས་པ་དང༌། སྲིང་མོ་འདྲ་བ་ལ་སྲིང་མོར་འདུ་ཤེས་པ་དང༌། བུ་མོ་འདྲ་བ་ལ་བུ་མོར་འདུ་ཤེས་པ་སྟེ། འདུ་ཤེས་འདི་གསུམ་བསྐྱེད་པར་ བྱའོ༑ ༑དེ་ལྟར་ཤཱ་རིའི་བུ། བྱང་ཆུབ་སེམས་དཔས་ངས་ལེགས་པར་བཤད་པ་ཁོང་དུ་ཆུང་ནས་མདོ་སྡེ་དང་མཐུན་པར་བྱའོ། །ཡུན་རིང་པོ་ནས་བདག་གི་མར་མ་གྱུར་པའམ། ཕར་མ་ གྱུར་པའི་སེམས་ཅན་དེ་ལྟ་བུ་རྙེད་པར་སླ་བ་མ་ཡིན་ཏེ། སེམས་ཅན་ཐམས་ཅད་བདག་གི་མ་དང་ཕར་གྱུར་པས་མ་ཉིད་ཆུང་མ་བྱ་བའི་མི་རིགས་སོ། །ཞེས་དེ་ལྟར་བསླབ་པར་བྱའོ། ། བྱིས་པ་སོ་སོའི་སྐྱེ་བོ་ཐམས་ཅད་ནི། མི་མཐུན་པ་ལ་གནས་ཀྱི། བདག་ནི། མི་མཐུན་པ་ལ་གནས་པར་མི་བྱའོ། །དེ་ལྟར་སྤྱད་ཀྱང་འདོད་ཆགས་ཀྱི་སེམས་དེ་ཉིད་རྗེས་སུ་འབྲང་བ་ལྟ་ན་དེས་ ཚུལ་བཞིན་དུ་སོ་སོར་བརྟག་པར་བྱའོ། །འདི་ལྟ་སྟེ། འདོད་ཆགས་ཀྱི་སེམས་སྐྱེས་ན། དེ་ཅི་མཐོང་བ་ལས་སྐྱེ། འོན་ཏེ་འདོད་ཆགས་དེ་མིག་ལས་གྱུར་ན། དེས་འདི་ལྟར་ཚུལ་བཞིན་དུ་སོ་ སོར་བརྟག་པར་བྱའོ། །བདག་མིག་ལ་ཆགས་ན་ནི། ཅི་མིག་གིས་མིག་མཐོང་ངམ། དེ་ཅི་རང་བཞིན་གྱིས་རང་བཞིན་མཐོང་ངམ། དེ་ཅིའི་ཕྱིར་ཞེ་ན། དེ་ཡང་མིག་འདི་ཡང་མིག་གོ །དེ་ ཡང་འབྱུང་བ་ཆེན་པོ་ལས་གྱུར་པ་སྟེ། དེ་ཡང་འབྱུང་བ་ཆེན་པོ་ལས་འབྱུང་བའོ། །འདི་ཡང་འབྱུང་བ་ཆེན་པོ་ལས་བྱུང་བ་སྟེ། རང་བཞིན་གྱིས་རང་བཞིན་ལ་མི་ཆགས། བདག་གིས་བདག་ རང་ལའང་མ་ཡིན་ནོ། །དེ་ཅིའི་ཕྱིར་ཞེ་ན། དེ་ཅི་ཙམ་པ་འདི་ཡང་དེ་ཙམ་སྟེ། དེ་ལ་ཆགས་པ་དང༌། འདི་ལ་ཆགས་པ་དེ་དག་ནི། ཁྱད་པར་མེད་དེ། བྱིས་པ་སོ་སོའི་སྐྱེ་བོ་ཐམས་ཅད་ནི། ཁྱད་ པར་མེད་པར་གནས་སོ། །བདག་ནི། ཁྱད་པར་ཅན་དུ་འདོད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། འདོད་པ་ལ་རྣམ་པར་རྟོག་པ་དེ་ལྟ་བུ་ནི། ཡོན་ཏན་མ་ཡིན་ནོ། །དེ་ནས་བཅོམ་ལྡན་འདས་ ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཕན་ཚུན་དག་ནི་དོན་གཅིག་སྟེ། །དེ་ལ་ཁྱད་པར་ཡོང་མེད་པ། །དེ་ནི་ཚུལ་བཞིན་མ་ཡིན་འཛིན། །འདོད་ཆགས་སེམས་ནི་ཀུན་ནས་ ༄༅། །ལངས༑ ༑འདི་ནི་འབྱུང་ལས་གྱུར་པ་སྟེ། །འབྱུང་བ་ཆེ་ལ་ཇི་ལྟར་ཆགས། །ཆོས་འདི་རྣམས་ནི་ཤིང་འདྲ་སྟེ། །དེ་ལ་ཆགས་འགྱུར་གང་ཡང་མེད། །འདི་ནི་བདག་གིས་ བརྟགས་པ་སྟེ། །ཡང་དག་མིན་གྱིས་ཀུན་ནས་ལངས། །མེད་པ་ལས་ནི་འདོད་ཆགས་སྐྱེ། །འདོད་ཆགས་ཉིད་ཀྱང་ཡོད་མ་ཡིན། །ཕྱོགས་བཅུ་རྣམས་སུ་བཙལ་ན་ཡང༌། །འདོད་ཆགས་ཡོད་པ་ མ་ཡིན་ཏེ། །ཡང་དག་མ་ཡིན་ཡོངས་བརྟགས་པས། །འདོད་ཆགས་སེམས་ནི་ཀུན་ནས་ལངས། །གལ་ཏེ་དེ་ལྟར་སོ་སོར་བརྟགས་ཀྱང་འདོད་ཆགས་ཀྱི་སེམས་དེ་ཉིད་རྗེས་སུ་འབྲང་བ་ལྟ་ན། དེས་དམ་པ་རྒྱ་ཆེར་ལེགས་པར་བཤད་པ་ཁོང་དུ་ཆུད་ཅིང་མདོ་སྡེ་ལ་མཁས་པས་རབ་ཏུ་མདོ་སྡེ་དང་རྗེས་སུ་མཐུན་པར་བྱའོ། །མིག་འདི་ནི། དབུ་བ་དང་འདྲ་སྟེ། མཉེར་མི་བཟོད་དོ། །དབུ་པ་ ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། སྐྱེས་བུ་མེད། ཤེད་ལས་སྐྱེས་མེད། ཤེད་བུ་མེད། བྱེད་པ་པོ་མེད། ཚོར་བ་པོ་མེད་དེ། དེ་ལྟར་བྱེད་པ་མེད་པའི་ ཆོས་ལ་སུ་ཞིག་ཆགས་པར་འགྱུར། མིག་འདི་ནི། ཆུའི་ཆུ་བུར་དང་འདྲ་སྟེ། རང་བཞིན་གྱིས་སྙིང་པོ་མེད་པའོ། །ཆུའི་ཆུ་བུར་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་ མེད༑ སྐྱེས་བུ་མེད། ཤེད་ལས་སྐྱེས་མེད། ཤེད་བུ་མེད། བྱེད་པ་པོ་མེད། ཚོར་བ་པོ་མེད། དེ་ལྟར་བྱེད་པ་མེད་པ་གཡོ་བ་མེད་པའི་ཆོས་ལ་སུ་ཞིག་ཆགས་པར་འགྱུར། མིག་འདི་ནི། སྨིག་ རྒྱུ་དང་འདྲ་སྟེ། ལས་དང༌། ཉོན་མོངས་པ་དང༌། སྲེད་པ་ལས་བྱུང་བའོ། །སྨིག་རྒྱུ་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། སྐྱེས་བུ་མེད། ཤེད་ལས་སྐྱེས་མེད། ཤེད་ བུ་མེད། བྱེད་པ་པོ་མེད། ཚོར་བ་པོ་མེད། དེ་ལྟར་བྱེད་པ་མེད་པ་གཡོ་བ་མེད་པའི་ཆོས་ལ་སུ་ཞིག་ཆགས་པར་འགྱུར། མིག་འདི་ནི། ཆུ་ཤིང་དང་འདྲ་སྟེ། རང་བཞིན་གྱིས་སྙིང་པོ་མེད་པའོ། །ཆུ་ཤིང་ ལ་ཡང་བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར་བའི་བར་དུའོ། །མིག་འདི་ནི། སྒྱུ་མ་དང་འདྲ་སྟེ། ཕྱིན་ཅི་ལོག་ལས་བྱུང་བའོ། །སྒྱུ་མ་ལ་ཡང་བདག་མེད། སེམས་ཅན་མེད་ པ་ནས་སུ་ཞིག་ཆགས་པར་འགྱུར་བའི་བར་དུའོ། །མིག་འདི་ནི། རྨི་ལམ་དང་འདྲ་སྟེ། མི་བདེན་པ་ཡང་དག་པ་མ་ཡིན་པ་མཐོང་བའོ། །རྨི་ལམ་ལ་ཡང་བདག་མེད། སེམས་ཅན་མེད་པ་ནས་སུ་ཞིག་ ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི། བྲག་ཆ་དང་འདྲ་སྟེ། རྐྱེན་གྱིས་ཁ་ན་ལུས་པའོ། །བྲག་ཅ་ལ་ཡང་བདག་མེད། སེམས་ཅན་མེད་པ་ནས་སུ་ཞིག་ཆགས་ པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི། གཟུགས་བརྙན་དང་འདྲ་སྟེ། ལས་ཀྱི་གཟུགས་བརྙན་གྱིས་ཀུན་ཏུ་སྣང་བའོ། །གཟུགས་བརྙན་ལ་ཡང་བདག་མེད། སེམས་ ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི། སྤྲིན་དང་འདྲ་སྟེ། གསལ་པར་འཁྲུགས་པ་དང་བྲལ་བའི་མཚན་ཉིད་དོ། །སྤྲིན་ལ་ཡང་ ༄༅། །བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི། གློག་དང་འདྲ་སྟེ། སྐད་ཅིག་གིས་ འཇིག་པ་དང་ལྡན་པའོ། །གློག་ལ་ཡང་བདག་མེད་སེམས་ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི། སྟོང་པ་ཉིད་དང་འདྲ་སྟེ། བདག་དང༌། བདག་གི་དང་བྲལ་བའོ། །དེ་ལྟར་ཆོས་རྣམས་སྟོང་པ་སྟེ། བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་ འདི་ནི། བེམ་པོ་ལྟ་བུ་སྟེ། རྩྭ་དང༌། ཤིང་དང༌། རྩིག་པ་དང༌། རྡོ་བ་དང༌། མིག་ཡོར་ལྟ་བུའོ། །དེ་ལྟར་ཆོས་ཐམས་ཅད་བེམ་པོ་སྟེ། བདག་མེད། སེམས་ཅན་མེད་པ་ནས་སུ་ཞིག་ཆགས་ པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི། གཡོ་བ་མེད་པ་སྟེ། རླུང་གི་འཁྲུལ་འཁོར་དང་ལྡན་པས་འཇུག་པའོ། །དེ་ལྟར་ཆོས་ཐམས་ཅད་བྱེད་པ་མེད་དེ། བདག་ མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི། གསོབ་སྟེ། མི་གཙང་བ་དང༌། རྣག་གི་ཚོགས་སོ། །དེ་ལྟར་ཆོས་ ཐམས་ཅད་གསོབ་སྟེ། བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི། གསོག་སྟེ། འཇིག་པ་དང༌། འགྱེས་ པ་དང༌། འབྱེ་བ་དང༌། འཐོར་བ་དང༌། འཇོམས་པའི་ཆོས་ཅན་ནོ། །དེ་ལྟར་ཆོས་ཐམས་ཅད་གསོག་སྟེ། བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་ བའི་བར་དུའོ། །མིག་འདི་ནི། ཁྲོན་པ་རྙིང་པ་དང་འདྲ་སྟེ། རྟག་ཏུ་རྒས་པས་ཟིལ་གྱིས་ནོན་ཏོ། །དེ་ལྟར་ཆོས་ཐམས་ཅད་ཁྲོན་པ་རྙིང་པ་དང་འདྲ་སྟེ། བདག་མེད། སེམས་ཅན་མེད་པ་ནས་སུ་ཞིག་ ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི། ཐ་མར་མི་གནས་པ་སྟེ། ཐ་མར་འཆི་བའོ། །དེ་ལྟར་ཆོས་ཐམས་ཅད་ནི། མཐར་མི་གནས་པ་སྟེ། བདག་མེད། སེམས་ ཅན་མེད། སྲོག་མེད། གང་ཟག་མེད། སྐྱེས་བུ་མེད། ཤེད་ལས་སྐྱེས་མེད། ཤེད་བུ་མེད། བྱེད་པ་པོ་མེད། ཚོར་བ་པོ་མེད་དེ། དེ་ལྟར་བྱེད་པ་པོ་མེད་ཅིང་རྐྱེན་འདུས་པ་ལས་བྱུང་བ་དེ་ལ་སུ་ ཞིག་ཆགས་པར་འགྱུར། གང་དུ་ཆགས་པར་འགྱུར། དེ་བཞིན་དུ་ནང་དང༌། ཕྱིའི་སྐྱེ་མཆེད་ཐམས་ཅད་ལ་ཡང་རྒྱས་པར་སྦྱར་བར་བྱའོ། །ཤཱ་རིའི་བུ། དེ་ལྟར་ཚུལ་བཞིན་རབ་ཏུ་སྦྱོར་བའི་བྱང་ ཆུབ་སེམས་དཔའ་འདོད་ཆགས་ཀྱིས་མི་འཕྲོག་སྟེ། དེ་ལྟ་བུའི་གནས་མེད་དོ། །དེ་ཆོས་ཐམས་ཅད་ལ་འདོད་ཆགས་དང་བྲལ་བ་ཡིན་ནོ། །ཤཱ་རིའི་བུ། འདི་བྱང་ཆུབ་སེམས་དཔའ་སེམས་དཔའ་ ཆེན་པོའི་ཚུལ་ཁྲིམས་ཡོངས་སུ་དག་པའོ། །ཤཱ་རིའི་བུ། དེ་ལྟར་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། རྣམ་པ་ཐམས་ཅད་དུ་སྲོག་ཆགས་ལ་ ༄༅། །གསོད་པར་མི་བྱེད་དེ། སྲོག་ཆགས་སུ་གྱུར་པ་ཐམས་ཅད་ལ་གནོད་པ་མ་ཡིན་ནོ། །སྲོག་གི་ཕྱིར་ཡང་རྣམ་པ་ཐམས་ཅད་དུ་མ་བྱིན་པར་མི་ལེན་ཏེ། གཞན་གྱི་ ལོངས་སྤྱོད་ལ་མི་རྐུ་བ་ཡིན་ནོ། །སྲོག་གི་ཕྱིར་ཡང་རྣམ་པ་ཐམས་ཅད་དུ་འདོད་པ་ལ་ལོག་པས་གཡེམ་པ་མི་བསྟན་ཏེ། གཞན་གྱི་ཆུང་མ་ལ་སྙིང་ཆགས་པར་མི་བྱེད་དོ། །སྲོག་གི་ཕྱིར་ཡང་ རྫུན་གྱི་ཚིག་མི་སྨྲ་སྟེ། སེམས་ཅན་ཐམས་ཅད་ལ་མི་སླུ་བ་ཡིན་ནོ། །བདག་གི་གཡོག་གིས་ཆོག་པས་ཕྲ་མའི་ཚིག་མི་ཟེར་བ་ཡིན་ནོ། །སྲོག་གི་ཕྱིར་ཡང་ཕྲ་མའི་ཚིག་མེད་པ་ཡིན། ཚིག་ གཞན་མི་སྨྲ་བས་ཚིག་ཚོད་བཟུང་བ་ཡིན། སྲོག་གི་ཕྱིར་ཡང་གཞན་གྱི་ལོངས་སྤྱོད་ལ་བརྣབ་སེམས་མི་བསྐྱེད་པས་གཞན་གྱི་ལོངས་སྤྱོད་ལ་བརྣབ་སེམས་མེད་པ་ཡིན། སྲོག་གི་ཕྱིར་ ཡང་ངན་དུ་སྨྲ་བ་དང༌། ངན་དུ་བརྗོད་པའི་ཚིག་དང་དུ་ལེན་པས་མི་ཁྲོ་ཞིང་བཟོད་པ་ཡིན། སངས་རྒྱས་ལ་སྐྱབས་སུ་སོང་བས་སྲོག་གི་ཕྱིར་ཡང་ལོག་པར་ལྟ་བ་མི་སྤྱོད་དེ། ལྷ་གཞན་མེད་ པ་ཡིན། དེ་ཡེ་ཤེས་གཞན་ལ་རེ་བ་མེད་པས་མ་ཉམས་པའི་ཚུལ་ཁྲིམས་ཡིན། ངན་པར་སྐྱེ་བ་ཡོངས་སུ་སྤངས་པས་སྐྱོན་མེད་པའི་ཚུལ་ཁྲིམས་ཡིན། འགྲོ་བ་ངན་པ་ཉོན་མོངས་པ་རྣམས་ དང་མ་འདྲེས་པས་འདྲེན་མ་མ་ཡིན་པའི་ཚུལ་ཁྲིམས་ཡིན། ཆོས་དཀར་པོ་གཅིག་ཏུ་རྣམ་པར་འཕེལ་བ་བསྲ་བསྲེ་མེད་པའི་ཚུལ་ཁྲིམས་ཡིན། ཇི་ལྟར་འདོད་པ་བཞིན་དུ་འགྲོ་བས་རང་ དབང་གི་ཚུལ་ཁྲིམས་ཡིན། འགྲོ་བ་མཁས་པས་མ་སྨད་པས་བསྔགས་པའི་ཚུལ་ཁྲིམས་ཡིན། དྲན་པ་དང་ཤེས་བཞིན་དང་ལྡན་པས་ཤིན་ཏུ་བསྲུངས་པའི་ཚུལ་ཁྲིམས་ཡིན། ཉེས་པ་ ཐམས་ཅད་དུ་མི་སྐྱེ་བས་མ་སྨད་པའི་ཚུལ་ཁྲིམས་ཡིན། དབང་པོའི་སྒོ་བསྡམས་པས་ཤིན་ཏུ་སྦས་པའི་ཚུལ་ཁྲིམས་ཡིན། སངས་རྒྱས་ཐམས་ཅད་ཀྱིས་དགོངས་པས་རྣམ་པར་བསྒྲགས་པའི་ ཚུལ་ཁྲིམས་ཡིན། རུང་བ་ལ་ཆོག་ཤེས་པས་འདོད་པ་ཉུང་བའི་ཚུལ་ཁྲིམས་ཡིན། སྤོང་བ་ལ་དགའ་བས་ཆོག་ཤེས་པའི་ཚུལ་ཁྲིམས་ཡིན། ལུས་དང་སེམས་རབ་ཏུ་དབེན་པས་ནན་ཏན་གྱི་ ཚུལ་ཁྲིམས་ཡིན། འདུ་བ་ལ་མི་དགའ་བས་དགོན་པ་ལ་གནས་པའི་ཚུལ་ཁྲིམས་ཡིན། གཞན་གྱི་གདོང་དུ་མི་ལྟ་བས་འཕགས་པའི་རིགས་ལ་དགའ་བའི་ཚུལ་ཁྲིམས་ཡིན། བདག་གི་ ཁ་ན་ལས་པའི་དགེ་བའི་རྩ་བ་བསྐྱེད་པས་སྦྱངས་པའི་ཡོན་ཏན་གྱི་ཚུལ་ཁྲིམས་ཡིན། ལྷ་དང་མི་རྣམས་ལ་མི་བསླུ་བས་ཇི་ལྟར་སྨྲས་པ་ད་ལྟར་བྱེད་པའི་ཚུལ་ཁྲིམས་ཡིན། སེམས་ཅན་ཐམས་ཅད་ ལ་མི་འཚེ་བས་བྱམས་པའི་ཚུལ་ཁྲིམས་ཡིན། སྡུག་བསྔལ་ཐམས་ཅད་དང་དུ་ལེན་པས་སྙིང་རྗེའི་ཚུལ་ཁྲིམས་ཡིན། ཆོས་ལ་དགའ་ཞིང་ཞུམ་པ་མེད་པས་དགའ་བའི་ཚུལ་ཁྲིམས་ཡིན། རྗེས་ སུ་ཆགས་པ་དང་ཁོང་ཁྲོ་བ་སྤོང་བས་བཏང་སྙོམས་ཀྱི་ཚུལ་ཁྲིམས་ཡིན། རང་གི་སེམས་ངེས་པར་རྟོག་པས་བདག་གི་འཁྲུལ་བ་ལ་སོ་སོར་རྟོག་པའི་ཚུལ་ཁྲིམས་ཡིན། གཞན་གྱི་སེམས་ ༄༅། །རྗེས་སུ་སྲུང་བས་གཞན་གྱི་འཁྲུལ་པ་ལ་ཉེས་པར་མི་ལྟ་བའི་ཚུལ་ཁྲིམས་ཡིན། སྦྱིན་པའི་ཕ་རོལ་ཏུ་ཕྱིན་པས་སེམས་ཅན་ཡོངས་སུ་སྨིན་པར་བྱེད་པའི་ཚུལ་ཁྲིམས་ ཡིན༑ ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་ཤིན་ཏུ་བསྲུངས་པའི་ཚུལ་ཁྲིམས་ཡིན། །བཟོད་པའི་ཕ་རོལ་ཏུ་ཕྱིན་པས་ཁོང་ཁྲོ་བ་མེད་པའི་ཚུལ་ཁྲིམས་ཡིན། །བརྩོན་འགྲུས་ཀྱི་ཕ་རོལ་ཏུ་ཕྱིན་ པས་དགེ་བའི་ཆོས་མི་ཟློག་པའི་ཚུལ་ཁྲིམས་ཡིན། བསམ་གཏན་གྱི་ཕ་རོལ་ཏུ་ཕྱིན་པས་བསམ་གཏན་གྱི་ཡན་ལག་ཡོངས་སུ་རྫོགས་པའི་ཚུལ་ཁྲིམས་ཡིན། ཤེས་རབ་ཀྱི་ཕ་རོལ་ཏུ་ ཕྱིན་པས་ཐོས་པ་རབ་ཀྱི་ཚུལ་ཁྲིམས་ཡིན། བྱང་ཆུབ་ཀྱི་ཡན་ལག་གི་ཚོགས་བསགས་པས་དགེ་བའི་བཤེས་གཉེན་ལ་བརྟེན་པའི་ཚུལ་ཁྲིམས་ཡིན། ལམ་ངན་པ་ཡོངས་སུ་སྤོང་བས་ སྡིག་པའི་གྲོགས་པོ་ཡོངས་སུ་སྤོང་བའི་ཚུལ་ཁྲིམས་ཡིན། མི་རྟག་པའི་འདུ་ཤེས་སོ་སོར་རྟོག་པས་ལུས་ལ་མི་ལྟ་བའི་ཚུལ་ཁྲིམས་ཡིན། ཡིད་མི་རྟོན་པས་སྲོག་ལ་མི་ལྟ་བའི་ཚུལ་ ཁྲིམས་ཡིན། བསམ་པ་ཤིན་ཏུ་ཡོངས་སུ་དག་པས་མི་འགྱོད་པའི་ཚུལ་ཁྲིམས་ཡིན། རབ་ཏུ་སྦྱོར་བ་ཤིན་ཏུ་ཡོངས་སུ་དག་པས་བཅོས་མ་མ་ཡིན་པའི་ཚུལ་ཁྲིམས་ཡིན། ལྷག་པའི་ བསམ་པ་ཤིན་ཏུ་ཡོངས་སུ་དག་པས་ཡོངས་སུ་གདུང་བ་མེད་པའི་ཚུལ་ཁྲིམས་ཡིན། འདོད་ཆགས་དང་བྲལ་བས་མི་རྒོད་པའི་ཚུལ་ཁྲིམས་ཡིན། སྒྲུབ་པས་མི་སྙེམས་པའི་ཚུལ་ཁྲིམས་ ཡིན། ཅང་ཤེས་པས་མུ་ཅོར་མི་སྨྲ་བའི་ཚུལ་ཁྲིམས་ཡིན། ཁྲོ་བ་མེད་པས་དུལ་བའི་ཚུལ་ཁྲིམས་ཡིན། ཉེ་བར་ཞི་བས་ཞི་བའི་ཚུལ་ཁྲིམས་ཡིན། ཇི་ལྟར་བསྒོ་བ་བཞིན་ལས་འགལ་བར་མི་ བྱེད་པས་བཀའ་བློ་བདེ་བའི་ཚུལ་ཁྲིམས་ཡིན། བསྡུ་བའི་དངོས་པོ་རྗེས་སུ་མི་གཏོང་བས་སེམས་ཅན་ཡོངས་སུ་སྨིན་པར་བྱེད་པའི་ཚུལ་ཁྲིམས་ཡིན། རང་གི་ནོར་རབ་ཏུ་མི་འཇིག་པས་ཆོས་རྗེས་སུ་ སྲུང་བའི་ཚུལ་ཁྲིམས་ཡིན་ནོ། །ཤཱ་རིའི་བུ། བྱང་ཆུབ་སེམས་དཔའ་མཁས་པ་ནི། འདི་ལྟ་བུའི་ཚུལ་ཁྲིམས་ཀྱི་ཕུང་པོ་དང་ལྡན་པས་བྱང་ཆུབ་སེམས་དཔའི་སྤྱད་པ་སྤྱོད་དོ། །ཤཱ་རིའི་བུ། བྱང་ཆུབ་ སེམས་དཔའ་སེམས་དཔའ་ཆེན་པོ་རྣམས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྟེ། བྱང་ཆུབ་སེམས་དཔའ་དེ་ལ་བརྩོན་པ། བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་བདུད་དང༌། བདུད་ཀྱི་ རིས་ཀྱི་ལྷའི་བུས་མི་ཐུལ་བ་ཡིན། ཕས་ཀྱི་རྒོལ་བ་གཞན་དག་གིས་ཀྱང་མི་ཐུལ་བ་ཡིན་ནོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ལེའུ་སྟེ། བདུན་པའོ།། །།ཤཱ་རིའི་བུ། དེ་ལ་བྱང་ཆུབ་སེམས་ དཔའ་གང་ལ་བརྩོན་ཅིང་བྱང་ཆུབ་སེམས་དཔའི་སྤྱད་པ་སྤྱོད་པའི་བྱང་ཆུབ་སེམས་དཔའི་བཟོད་པའི་ཕ་རོལ་ཏུ་ཕྱིན་པ་གང་ཞེ་ན། འདི་ལྟར་ཤཱ་རིའི་བུ། བྱང་ཆུབ་སེམས་དཔའ་ནི། བཟོད་པ་དང་ ལྡན་ཞིང་དང་དུ་ལེན་པའི་ངང་ཚུལ་ཅན་ཡིན་པས། གྲང་བ་དང༌། ཚ་བ་དང༌། བཀྲེས་པ་དང༌། སྐོམ་པ་དང༌། རླུང་དང༌། ཉི་མ་དང༌། སྦྲང་བུ་དང༌། ཤ་སྦྲང་དང༌། སྡིག་སྦྲུལ་གྱིས་རེག་པ་དང༌། ༄༅། །ངན་དུ་སྨྲ་བ་དང༌། ངན་དུ་བརྗོད་པའི་ཚིག་གི་ལམ་ལ་བཟོད་པ་དང་ལྡན་པ་ཡིན་ནོ། །ལུས་ལས་ཚོར་བ་བྱུང་ཞིང་སྐྱེས་པ་སྡུག་བསྔལ་བ་ཤིན་ཏུ་དྲག་པོ་དང༌། རྩུབ་ པ་དང༌། ཚ་བ་དང༌། སྲོག་འཕྲོག་པ་དང༌། འཆི་བ་ལ་ཐུག་པའི་ཚོར་བ་རྣམས་བཟོད་པ་དང་ལྡན་ཞིང་དང་དུ་ལེན་པའི་ངང་ཚུལ་ཅན་ཡིན་ནོ། །ཤཱ་རིའི་བུ། ང་སྔོན་མངོན་པར་རྫོགས་པར་ སངས་མ་རྒྱས་པ་ན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་ཡུན་རིང་པོར་བཟོད་པ་བསྒོམས་སོ། །བཅོམ་ལྡན་འདས། བྱང་ཆུབ་སེམས་དཔའ་ཇི་ལྟར་བཟོད་པ་སྒོམ་པར་བགྱིད། བཅོམ་ ལྡན་འདས་ཀྱིས་བཀའ་སྩལ་པ། ཤཱ་རིའི་བུ། ངས་མངོན་པར་ཤེས་པ་འདས་པའི་དུས་ན་བྱང་ཆུབ་སེམས་དཔར་གྱུར་ཏེ་བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་ཅན་དག་འོངས་ནས་ གཤེ་ཞིང་བརྒྱད། ཚིག་ངན་པ་དང༌། ངག་རྩུབ་པོའི་ཚིག་སྨྲ་བ་དེ་ལ་ཤཱ་རིའི་བུ། ང་ཁྲོ་བ་དང༌། ཞེ་སྡང་དང༌། གཏི་མུག་དང༌། སེར་སྣས་ཡོངས་སུ་གདུང་བ་མ་སྐྱེས་སོ། །དེ་ལྟར་འཁོར་བར་ ཞུགས་པ་ན་འདི་ལྟ་སྟེ། གཤེ་བ་དང༌། མི་སྙན་པར་ཟེར་བ་ལྟར་རྙེད་པར་སླ་བ་གང་ཡང་མེད་མོད་ཀྱི། དེ་ལ་བདག་གིས་བཏང་སྙོམས་སུ་བྱ། དེ་ལ་སྙིང་རྗེ་བསྐྱེད་པར་བྱའོ། །དེ་ཅིའི་ཕྱིར་ཞེ་ན། འདི་ལྟ་གཤེ་བ་དང༌། མི་སྙན་པར་ཟེར་བ་ལ་ཕལ་ཆེར་རབ་ཏུ་གནས་པ་དེ་དག་ལས་དེ་འདྲ་བའི་རྣམ་པར་སྨིན་པ་མངོན་པར་འགྲུབ་སྟེ། གཤེ་བ་དང༌། མི་སྙན་པ་ཟེར་བ་རྙེད་པར་འགྱུར་རོ། ། གང་དང་གང་དུ་སྐྱེས་པ་ཐམས་ཅད་དུ་གཟུགས་ངན་པ་དང༌། མི་སྡུག་པའི་ལུས་རབ་ཏུ་ཐོབ་བོ། །ང་ནི། གཟུགས་ངན་པར་མི་འདོད། གཤེ་བ་དང༌། མི་སྙན་པ་ཟེར་བར་མི་འདོད་དོ། །དེ་ཅིའི་ཕྱིར་ཞེ་ ན༑ འདི་ལྟ་སྟེ། གཤེ་བ་དང༌། མི་སྙན་པར་ཟེར་བ་དེ་དག་ནི། མི་རིགས་པའོ། །དེ་དག་ནི། མི་རིགས་པའི་ལས་སོ། །དེ་དག་ནི། བྱིས་པ་སོ་སོའི་སྐྱེ་བོའི་ལས་སོ། །དེ་དག་ནི། དམན་པའི་ལས་ སོ༑ ༑དེ་དག་ནི། སྐྱེས་བུ་དམ་པ་མ་ཡིན་པའི་ལས་སོ། །དེ་དག་ནི། མི་དགྲུངས་[?] པའི་ལས་སོ། །འདི་ལྟ་སྟེ། གཤེ་བ་དང༌། མི་སྙན་པར་ཟེར་བའི་ཆོས་དེ་ལྟ་བུ་དེ་དག་ནི། སེམས་ཅན་དམྱལ་བར་ལྟུང་ བའོ༑ ༑འདི་ལྟ་སྟེ། གཤེ་བ་དང༌། མི་སྙན་པར་ཟེར་བའི་ཆོས་དེ་ལྟ་བུ་དེ་དག་ནི། གཤིན་རྗེའི་འཇིག་རྟེན་དུ་ལྟུང་བའོ། །འདི་ལྟ་སྟེ། གཤེ་བ་དང༌། མི་སྙན་པར་ཟེར་བའི་ཆོས་དེ་ལྟ་བུ་དེ་དག་ནི། སེམས་ཅན་དམྱལ་བའི་གཡོག་བྱེད་པའོ། །འདི་ལྟ་སྟེ། གཤེ་བ་དང༌། མི་སྙན་པར་ཟེར་བའི་ཆོས་དེ་ལྟ་བུ་དེ་དག་ནི། གནོད་སྦྱིན་དབུལ་པོར་བྱེད་པའོ། །འདི་ལྟ་སྟེ། གཤེ་བ་དང༌། མི་སྙན་པར་ ཟེར་བའི་ཆོས་དེ་ལྟ་བུ་དེ་དག་ནི། གནོད་སྦྱིན་དབུལ་པོར་བྱེད་པའི་རྩ་བའོ། །འདི་ལྟ་སྟེ། གཤེ་བ་དང༌། མི་སྙན་པར་ཟེར་བའི་ཆོས་དེ་ལྟ་བུ་དེ་དག་ནི། ཡིད་དྭགས་དབུལ་པོར་བྱེད་པ་དང༌། ཡིད་དྭགས་ དབུལ་པོར་བྱེད་པའི་རྩ་བའོ། །འདི་ལྟ་སྟེ། གཤེ་བ་དང༌། མི་སྙན་པར་ཟེར་བའི་ཆོས་དེ་ལྟ་བུ་དེ་དག་ནི། མི་དབུལ་པོར་བྱེད་པ་དང༌། མི་དབུལ་པོར་བྱེད་པའི་རྩ་བའོ། །འདི་ལྟ་སྟེ། གཤེ་བ་དང༌། མི་ ༄༅། །སྙན་པར་ཟེར་བའི་ཆོས་དེ་ལྟ་བུ་དེ་དག་ནི། དམན་པའི་འགྲོ་བར་བྱེད་པ་དང༌། དམན་པའི་འགྲོ་བར་བྱེད་པའི་རྩ་བ་སྟེ། ང་ནི། དམན་པའི་འགྲོ་བ་མི་འདོད་དོ། །དེ་ ཅིའི་ཕྱིར་ཞེ་ན། ངེད་རིགས་པ་དང༌། དེ་དག་མི་རིགས་པར་ཡང་ཁྱད་པར་ཡང་ཅི་ཞིག་ཡོད། བྱེ་བྲག་ཅི་ཞིག་ཡོད་པར་འགྱུར། ཤཱ་རིའི་བུ། དེ་བས་ན། བྱང་ཆུབ་སེམས་དཔའ་སེམས་དཔའ་ ཆེན་པོས་ངའི་རྗེས་སུ་སློབ་པར་འགྱུར་བའི་རང་བཞིན་ཅན་དུ་འགྱུར་བར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ། གང་གི་ཚེ་བྱང་ཆུབ་སེམས་དཔའ་ལ་གཞན་གཤེ་བའམ། མི་སྙན་པར་ཟེར་ ན༑ འདི་ལྟ་བུའི་ཆོས་ཡིད་ལ་བྱས་ན་བཟོད་པར་འགྱུར་ཏེ། གང་གླིང་ཆེན་པོ་བཞི་ཡི་འཇིག་རྟེན་གྱི་ཁམས་འདི་འགྲོན་བུ་དང༌། གསེར་དང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱི་རུ་དང༌། གསེར་དང༌། དངུལ་གྱིས་ཡོངས་སུ་བཀང་སྟེ་བྱིན་པ་བས་བཟོད་པས་བསྒྲུབས་པའི་དགེ་བའི་རྩ་བ་ཆེས་མང་དུ་ཡོངས་སུ་འཛིན་པར་འགྱུར་རོ། །དེ་ཅིའི་ཕྱིར་ཞེ་ ན༑ ཤཱ་རིའི་བུ། སྐྱེས་བུ་དམ་པས་ནན་ཏན་གྱིས་སྒྲུབ་པར་བྱེད། བཟོད་པས་སྟོབས་ཤེས་པར་བྱེད་དོ། །ཤཱ་རིའི་བུ། སེམས་ཅན་ཕལ་ཆེར་ནི། གཤེ་བ་དང༌། མི་སྙན་པར་ཟེར་བའི་ དབང་དུ་སོང་བས་འཁོར་བ་ལས་མི་ལྡོག་གོ །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་ཅི་བདག་ལ་ཕ་རོལ་གཤེ་བའམ་མི་སྙན་པར་ཟེར་ན། སངས་རྒྱས་དང༌། བྱང་ཆུབ་དང༌། ཆོས་དང༌། དགེ་འདུན་ཡིད་ལ་བྱེད་དམ་ཞེས་བདག་གིས་མཐུ་ཤེས་པར་བྱ་སྟེ། གལ་ཏེ་ཡིད་ལ་བྱེད་ན་ལེགས། ཡིད་ལ་མི་བྱེད་པར་གྱུར་ན། དེས་རྣམ་གྲངས་དུ་མར་སངས་རྒྱས་སམ། བྱང་ཆུབ་ བམ༑ ཆོས་སམ། དགེ་འདུན་ཡིད་ལ་བྱའོ། །ཡིད་ལ་མི་བྱེད་ན། དེ་དག་ཀྱང་གནོད་སེམས་དང་ལྡན་པ་སངས་རྒྱས་དང༌། བྱང་ཆུབ་དང༌། ཆོས་དང༌། དགེ་འདུན་ཡིད་ལ་མི་བྱེད་བདག་ཀྱང་ཡིད་ ལ་མི་བྱེད་ན། བདག་དང༌། སེམས་ཅན་དེ་དག་ཏུ་ཁྱད་པར་ཅི་ཞིག་ཡོད། ཐ་དད་པ་ཅི་ཞིག་ཡོད། དཀའ་བར་སྤྱོད་པ་ཅི་ཞིག་ཡོད་ཀྱི། དེ་དག་དང༌། བདག་ཅག་གནོད་སེམས་ཀྱི་དུས་ན་བཏང་སྙོམས་ སུ་བྱ་བ་དང༌། སངས་རྒྱས་དང༌། བྱང་ཆུབ་དང༌། ཆོས་དང༌། དགེ་འདུན་ཡིད་ལ་བྱ་བ་དང༌། བཟོད་པའི་སྟོབས་ཀྱང་གོ་བར་བྱ་བའི་རིགས་སོ། །ཞེས་བདག་ལ་བསྐུལ་བར་བྱའོ། །དེ་ཅིའི་ཕྱིར་ཞེ་ ན༑ བདག་ནི། སེམས་ཅན་གཅིག་བཟུང་ལ་སེམས་ཅན་ཐམས་ཅད་བཏང་བ་མ་ཡིན་གྱི། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་ སེམས་ཅན་ཐམས་ཅད་ལ་ཆོས་བསྟན་པར་བྱའོ། །ཞེས་དེ་ལྟ་བུའི་ཚིག་སྨྲས་ཏེ། སངས་རྒྱས་བཅོམ་ལྡན་འདས་རྣམས་ཀྱིས་ཀྱང་བདག་ལ་རིགས་ཀྱི་བུ་འདི་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་ཞུགས་ཏེ་སེམས་ཅན་ཐམས་ཅད་ལ་ཆོས་སྟོན་པར་མཁྱེན་ཏོ། །སངས་རྒྱས་བཅོམ་ལྡན་འདས་རྣམས་ཀྱི་ཡི་ཤེས་ཀྱིས་གཟིགས་པ་ཆགས་པ་མེད་པ་ཐོགས་པ་མེད་པས་ ༄༅། །སངས་རྒྱས་བཅོམ་ལྡན་འདས་ཀྱིས་བདག་མཁྱེན་ཏེ། གལ་ཏེ་བདག་གནོད་སེམས་ཀྱི་དུས་ན་བཏང་སྙོམས་སུ་མ་གྱུར་ཅིང༌། གང་སངས་རྒྱས་དང༌། བྱང་ཆུབ་དང༌། ཆོས་དང༌། དགེ་འདུན་ཡིད་ལ་མི་བྱེད་ན། དེ་ནི། བདག་གི་མི་ཆའོ། །ཤར་ཕྱོགས་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་བྱེ་མ་དང་ མཉམ་པ་གང་དེ་ལྟར་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་གིས་ཀྱང་རིགས་ཀྱི་བུ་དེས་འདི་ལྟར་སེམས་བསྐྱེད་དེ། བདག་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་ཐམས་ཅད་ལ་ཆོས་བསྟན་པར་བྱའོ། །སྙམ་དུ་བདག་གིས་སེམས་བསྐྱེད་པ་མཁྱེན་ཏོ། །ཡང་ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་དང༌། ཤར་ལྷོ་དང༌། ལྷོ་ནུབ་དང༌། ནུབ་བྱང་དང༌། བྱང་ཤར་དང༌། དེ་བཞིན་དུ་སྟེང་དང༌། འོག་གི་ཕྱོགས་དང༌། དེ་ལྟར་ཕྱོགས་དང༌། ཕྱོགས་མཚམས་ དང༌། དེ་བཞིན་དུ་ཕྱོགས་བཅུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་དང་མཉམ་པ་གང་ད་ལྟར་བཞུགས་ཏེ་འཚོ་ཞིང་གཞེས་ པ་དེ་དག་གིས་ཀྱང་རིགས་ཀྱི་བུ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་སོ། །ཞེས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་ སངས་རྒྱས་ནས་སེམས་ཅན་ཐམས་ཅད་ལ་ཆོས་སྟོན་ཅིང་བཟོད་པའི་བསྔགས་པ་བརྗོད་པར་བྱའོ། །ཞེས་སེམས་བསྐྱེད་པ་དེ་མཁྱེན་གྱི། དེ་བས་ན། སེངྒེའི་སྒྲ་བསྒྲགས་ལ་བདག་ ཝའི་སྒྲ་བསྒྲག་པར་ནི། མི་བྱའོ། །ཀྱེ་མའོ་འདི་ལྟ་སྟེ། སེངྒེའི་སྒྲ་དེ་ནི། བཟོད་པའི་སྟོབས་ཤེས་པར་བྱེད་པའོ། །ཀྱེ་མའོ་འདི་ལྟ་སྟེ། ཝའི་སྒྲ་དེ་ནི། གཤེ་བ་དང༌། མི་སྙན་པར་ཟེར་བའོ།། སེམས་ཅན་འདི་དག་ནི། སེམས་ཅན་གང་དོན་བྱེད་ན། སེམས་ཅན་དེ་ཡང་འདིའི་དོན་བྱེད་དོ། །བདག་ཀྱང་སེམས་ཅན་གང་གི་དོན་བྱས་པ་དེའི་ཕྱིར་དེའི་དོན་བྱེད་པར་གྱུར་ན། དེ་ལ་ཁྱད་པར་ ཅི་ཞིག་ཡོད། ཐ་དད་པ་ཅི་ཞིག་ཡོད། དཀའ་བར་སྤྱོད་པ་ཅི་ཞིག་ཡོད། སེམས་ཅན་འདི་དག་ནི། སེམས་ཅན་གང་གནོད་པར་བྱེད་ན། དེ་ལ་སེམས་ཅན་དེ་ཡང་གནོད་པར་བྱེད་དོ། །བདག་གིས་ ཀྱང་སེམས་ཅན་གང་གནོད་པར་བྱེད་ན། བདག་ཀྱང་དེ་ལ་གནོད་པར་བྱེད་དེ། གནོད་པའི་ཕྱིར་གནོད་པར་བྱེད་ན། དེ་ལ་ཁྱད་པར་ཅི་ཞིག་ཡོད། ཐ་དད་པ་ཅི་ཞིག་ཡོད། དཀའ་བར་སྤྱོད་པ་ཅི་ཞིག་ ཡོད་པར་འགྱུར། ཤཱ་རིའི་བུ། གཞན་ཡང་བྱང་ཆུབ་སེམས་དཔའ་འདི་ལྟར་སློབ་སྟེ། སེམས་ཅན་འདི་དག་ཐམས་ཅད་ནི། ཕན་ཚུན་དུ་མི་མཛའ་བ་སྟེ། དེ་དག་ནོར་ཐོབ་ན་ནི། མཛའ་བར་ཤེས། གནོད་པར་བྱས་ན་ནི། གཅིག་ལ་གཅིག་གསོད་པར་བྱེད་དོ། །བདག་ནི། སེམས་ཅན་གྱི་དོན་ལ་ཚམ་ཚོམ་མེད་དེ། བདག་ལ་གནོད་པར་གྱུར་ཀྱང་བདག་སེམས་ཅན་གྱི་དོན་བྱའོ། །སྙམ་མོ། ། ༄༅། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བསྐལ་པ་བྱེ་བ་མང་པོ་བརྒྱར། །བདག་ལ་གནོད་པར་གྱུར་ཀྱང་ནི། །སེམས་ཅན་ སྡུག་བསྔལ་རྣམས་མཐོང་ན། །ཡལ་བར་བོར་ཞིང་མི་འདུག་གོ །དོན་རྙེད་ན་ནི་མཛའ་བོ་ཞེས། །ཕན་ཚུན་གཅིག་ལ་གཅིག་སྨྲ་ཡི། །དོན་རྣམས་བྱེད་པར་མི་འགྱུར་ན། །ཕན་ཚུན་དུ་ནི་གནོད་ པར་བྱེད། །ང་དང་རྟག་ཏུ་མཛའ་བྱ་ཞེས། །ཛམྦུའི་གླིང་འདི་ཐམས་ཅད་དང༌། །སངས་རྒྱས་ཞིང་རྣམས་རིན་པོ་ཆེ། །འབའ་ཞིག་བཀང་སྟེ་སྦྱིན་བྱེད་དང༌། །གང་དག་མཚོན་ནི་རྣོན་པོ་ཡིས། །ཡན་ ལག་ཉིང་ལག་གཅོད་པ་ཡི། །སེམས་ཅན་རྣམས་ནི་ཐམས་ཅད་ལ། །མཉམ་པ་ཡི་ནི་སེམས་སུ་བྱ། །གཤེ་དང་མི་སྙན་ཟེར་བ་དང༌། །ངན་དུ་བྱས་པ་ཐམས་ཅད་བཟོད། །བཟོད་པ་ལ་ནི་རབ་ གནས་ནས། །བཟོད་པ་དག་གི་བསྔགས་པ་བརྗོད། །དུག་ལྡུད་མཚོན་གྱིས་འདེབས་པ་ཡི། །གཅིག་ལ་གཅིག་ནི་གནོད་བྱེད་པ། །སེམས་ཅན་དེ་དག་བསྡུམ་པར་བྱ། །དེ་ནི་མཁས་པའི་མཚན་ ཉིད་དོ༑ ༑བྱིས་པ་སྤྱོད་པའང་གཞན་ཡིན་ཏེ། །གང་གིས་མྱ་ངན་འདའ་བའང་གཞན། །བདག་ནི་ཁྱད་པར་ཚོལ་བས་ན། །བྱིས་པ་དག་ནི་བདག་མི་སློབ། །ཡང་ཤཱ་རིའི་བུ། བྱང་ཆུབ་སེམས་ དཔས་འདི་ལྟར་བསླབ་པར་བྱ་སྟེ། གལ་ཏེ་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་རྡོ་དབྱུག་དང༌། མཚོན་འདེབས་ཤིང་འཕེན་པས་ཡུད་ཙམ་ཡང་འཚོར་མི་སྟེར་ན། དེས་ཀྱེ་མའོ་ངོ་ མཚར་ཏོ། །ཞེས་བྱ་བ་ནས་སེམས་ཅན་འདི་དག་ནི། འཕགས་པ་སྟེ། བདག་གི་སྲོག་མ་བཅད་དོ། །སྙམ་པའི་བར་དུའོ། །དེ་ལྟར་བདག་གོ་བར་བྱ་ཞིང་ཡང་འདི་ལྟར་བསླབ་བོ། །ཡོངས་སུ་བརྟག་ པ་བཟུང་སྟེ་བརྒྱལ་བདག་གོམ་པ་བདུན་པོར་བ་ཙམ་གྱི་ཡུན་ལ་གངྒཱའི་ཀླུང་གི་བྱེ་མ་སྙེད་ཀྱི་མགོ་བཅད་པར་གྱུར་ཀྱང་བདག་ཁྲོ་བ་དང༌། གཤེ་བ་བསྒོམ་པར་མི་བྱའོ། །དེ་ཅིའི་ཕྱིར་ཞེ་ན། ཁོང་ཁྲོ་ བ་ཁོང་ཁྲོ་བ་ཞེས་བྱ་བ་ནི། བསྐལ་པ་བརྒྱ་སྟོང་དུ་བསྒྲུབས་པའི་དགེ་བའི་རྩ་བ་འཇོམས་པ་སྟེ། ཡང་ཕྱིར་བདག་གིས་བསྐལ་པ་བརྒྱ་སྟོང་དུ་དགེ་བའི་རྩ་བ་བསྒྲུབ་པར་བྱ་དགོས་སོ། །དེ་ལྟར་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་འདི་ནི། སྒྲུབ་དཀའ་བ་ཡིན་ཏེ། དེ་ལྟར་ཆོས་དེ་འབྱུང་བར་དཀའོ། །དེ་བས་ན། བདག་བཟོད་པའི་སྟོབས་ཀྱི་གོ་ཆ་བགོ་བར་བྱའོ། །དེ་ལྟར་ཤཱ་རིའི་བུ། ཐེག་པ་ཆེན་པོ་ལ་ཞུགས་པ་སེམས་སྡང་པར་གྱུར་པ་ལ་བདུད་ཀྱིས་གླགས་རྙེད་དོ། །གླགས་རྙེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་གཅོད་པར་འགྱུར་རོ། །སེམས་སྡང་ བས་ནི། བྱང་ཆུབ་ཏུ་བྱ་བ་ལ་གཡེང་བར་འགྱུར་རོ། །སེམས་གཡེང་བ་ལ་ནི། བདུད་སྡིག་ཅན་བདུད་ཀྱི་ལས་ཀྱིས་བསྐུལ་བར་བྱེད་དོ། །དེ་ལ་བདུད་ཀྱི་ལས་གང་ཞེ་ན། འདི་ལྟ་སྟེ། ལྷུང་བཟེད་ ལ་ཞུགས་པའི་སེམས་ནི། བདུད་ཀྱི་ལས་སོ། །ཆོས་གོས་ལ་ཞུགས་པའི་སེམས་ནི། བདུད་ཀྱི་ལས་སོ། །གྲོང་དུ་སློང་བ་ལ་ཞུགས་པའི་སེམས་ནི། བདུད་ཀྱི་ལས་སོ། །རྙེད་པ་དང༌། བཀུར་ ༄༅། །སྟི་དང༌། ཚིགས་སུ་བཅད་པ་ལ་ཞུགས་པའི་སེམས་ནི། བདུད་ཀྱི་ལས་སོ། །རབ་ཏུ་བྱུང་བ་ལ་འདུན་པ་ཟློག་པ་ནི། བདུད་ཀྱི་ལས་སོ། །ཆོས་དཀར་པོ་མང་པོ་ ལས་འདུན་པ་ཟློག་པ་ནི། བདུད་ཀྱི་ལས་སོ། །དགོན་པར་གནས་པ་ལས་མོས་པ་ཟློག་པ་ནི། བདུད་ཀྱི་ལས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་འདུན་པ་ཟློག་པ་ ནི། བདུད་ཀྱི་ལས་སོ། །ཡེ་ཤེས་གཞན་འདོད་པ་ནི། བདུད་ཀྱི་ལས་སོ། །མཁན་པོ་དང་སློབ་དཔོན་ལ་སྲི་ཞུ་མི་བྱེད་པ་ནི། བདུད་ཀྱི་ལས་སོ། །དེ་ལྟར་ཤཱ་རིའི་བུ། སེམས་སྡང་བ་ལ་ནི། བྱང་ཆུབ་ཏུ་བྱ་བ་ལ་གཡེང་བར་འགྱུར་རོ། །སེམས་གཡེང་བ་ནི། བདུད་སྡིག་ཅན་བདུད་ཀྱི་ལས་འདི་དག་ལ་འཛུད་དོ། །ཤཱ་རིའི་བུ། བདུད་སྡིག་ཅན་ཡུན་རིང་པོ་ནས་གླགས་ཚོལ་ཏེ། འདི་ ལྟ་སྟེ། ཁྲོ་བ་དང༌། གནོད་སེམས་ཚོལ་མོད་ཀྱི། ཤཱ་རིའི་བུ། ངས་མངོན་པར་ཤེས་པ་འདས་པའི་དུས་ན་ང་སྤྱོད་པའི་སྤྱོད་ཡུལ་ཞེས་བྱ་བའི་དྲང་སྲོང་དུ་གྱུར་ཏེ། དེ་ན་ང་ལ་བདུད་སྡིག་ ཅན་གྱིས་སྐྱེས་བུ་ལྔ་བརྒྱ་གཤེ་བ་ལ་དཔའ་བ་མངོན་པར་སྤྲུལ་ནས་དེ་དག་ལོ་ལྔ་བརྒྱའི་བར་དུ་རྟག་ཏུ་རྒྱུན་མི་འཆད་པར་ངའི་ཕྱི་བཞིན་ཉིན་ཐོག་ཐག་ཏུ་འགྲེང་ཞིང་དེ་དག་མཚན་མོ་ཡང་ གཤེ་།ཉིན་མོ་ཡང་གཤེ་།འགྲོ་ཡང་གཤེ་།འོང་ཡང་གཤེ་།འགྲེང་ཡང་གཤེ་།འདུག་ཀྱང་གཤེ་།ཉལ་བ་དང༌། འཆག་པ་དང༌། འདུག་པ་དང༌། གྲོང་དུ་འགྲོ་བ་དང༌། སྲང་ན་འགྲེང་ བ་དང༌། ཁྱིམ་ན་འགྲེང་བ་དང༌། སྲང་ན་འདུག་པ་དང༌། ཁྱིམ་ན་འདུག་པ་དང༌། དགོན་པར་སོང་བ་དང༌། དགོན་པ་ན་འགྲེང་བ་དང༌། དགོན་པ་ན་འདུག་ཀྱང་གཤེ་ཞིང་མི་སྙན་པར་ཟེར་ཏེ་ ངན་དུ་སྨྲ། ཚིག་རྩུབ་པོ་སྨྲ་ཞིང་ཐབས་དེ་ལྟ་བུར་གནས་ཏེ། དེ་དག་ལོ་ལྔ་བརྒྱའི་བར་དུ་ཕྱི་བཞིན་ཐོག་ཐག་ཏུ་འབྲངས་པར་གྱུར་ཏེ། འོན་ཀྱང་ཤཱ་རིའི་བུ། ལོ་ལྔ་བརྒྱར་གཤེ་བ་ལ་དཔའ་ བའི་སྐྱེས་བུ་དེ་དག་ལ་བྱམས་པ་ཉེ་བར་སྦྱོར་བས་ལྟ་བ་ལས་གཞན་ཐ་བའི་ཉེས་པ་བསྐྱེད་པའི་སེམས་བསྐྱེད་པ་གཅིག་ཙམ་ཡང་མི་ཤེས་སོ། །དེའི་ཚེ་ང་འདི་སྙམ་དུ་སེམས་ཏེ། གང་ རིགས་ཀྱི་བུ་དེ་དག་ནི། ཚུལ་ཁྲིམས་དང་ལྡན་པ། དགེ་བའི་ཆོས་ཅན། རང་བཞིན་གྱིས་འདོད་ཆགས་ཆུང་བ། ཞེ་སྡང་ཆུང་བ། གཏི་མུག་ཆུང་བ་སྟེ། བདག་ནི། དེ་དག་ཉི་ཚེའི་དོན་དུ་དཀའ་ བ་སྤྱོད་པ་མ་ཡིན། དེ་དག་ཉི་ཚེའི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པ་མ་ཡིན་གྱི། སེམས་ཅན་གང་དམུ་རྒོད་གདུལ་དཀའ་བ། ཚུལ་ཁྲིམས་འཆལ་བ། སྡིག་པའི་ ཆོས་ཅན། རང་བཞིན་གྱིས་འདོད་ཆགས་མང་བ། ཞེ་སྡང་མང་བ། གཏི་མུག་མང་བ། དེ་དག་གི་དོན་དུ་བདག་དཀའ་བ་སྤྱད་པ་སྤྱོད། དེ་དག་གི་དོན་དུ་བླ་ན་མེད་པ་ཡང་དག་པར་རྫོགས་པའི་ བྱང་ཆུབ་སྒྲུབ་སྟེ། དེ་དག་ཉིད་བདག་གིས་ཐོག་མར་མྱ་ངན་ལས་འདའ་བར་བྱའོ། །ཤཱ་རིའི་བུ། སེམས་སྡང་བ་མེད་པ་ལ་དྲན་པ་འདི་སྐྱེས་སོ། །དེ་ལྟར་ཤཱ་རིའི་བུ། དེ་བཞིན་གཤེགས་བ་ནི། ༄༅། །ཕན་པའི་དངོས་པོ་ཕུན་སུམ་ཚོགས་པ་སྟེ། སྔོན་གྱི་མཐའ་ནས་བྱང་ཆུབ་སེམས་དཔའི་སྤྱད་པ་སྤྱོད་ཅིང་འོངས་པའོ། །ཤཱ་རིའི་བུ། བྱང་ཆུབ་སེམས་དཔའ་ གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འདོད་པ་དེ་དག་གིས་བཟོད་པ་དང་ལྡན་ཞིང་དང་དུ་ལེན་པའི་རང་བཞིན་ཅན་དུ་བྱའོ། །གྲང་བ་དང༌། ཚ་བ་དང༌། བཀྲེས་ པ་དང༌། སྐོམ་པ་དང༌། རླུང་དང༌། ཉི་མ་དང༌། སྦྲང་བུ་དང༌། ཤ་སྦྲང་དང༌། སྡིག་སྦྲུལ་གྱིས་རེག་པ་དང༌། ཕ་རོལ་གྱིས་ངན་དུ་སྨྲས་པ་དང༌། ངན་དུ་བརྗོད་པའི་ཚིག་གི་ལམ་རྣམས་ ལ་བཟོད་པ་དང་ལྡན་ཞིང་དང་དུ་ལེན་པའི་རང་བཞིན་ཅན་དུ་བྱའོ། །ལུས་ལས་སྐྱེས་ཤིང་བྱུང་བའི་ཚོར་བ་སྡུག་བསྔལ་བ་མི་བཟོད་པ། རྩུབ་པ། སྲོག་འཕྲོག་པ། འཆི་བ་ལ་ཐུག་པའི་ ཚོར་བ་རྣམས་ལ་བཟོད་པ་དང་ལྡན་ཞིང་དང་དུ་ལེན་པའི་རང་བཞིན་ཅན་དུ་བྱའོ། །དེ་ལྟར་ཤཱ་རིའི་བུ། བཟོད་པ་དེ་ལྟ་བུ་ལ་གནས་པའི་བྱང་ཆུབ་སེམས་དཔས་བྱང་ཆུབ་སེམས་དཔའི་ བཟོད་པ་ཐོབ་པར་འགྱུར་རོ། །དེ་ལ་བྱང་ཆུབ་སེམས་དཔའི་བཟོད་པ་གང་ཞེ་ན། གནོད་སེམས་མེད་པ་ནི། བྱང་ཆུབ་སེམས་དཔའི་བཟོད་པར་བལྟའོ། །མི་ཁྲོ་བ་ནི། བྱང་ཆུབ་སེམས་ དཔའི་བཟོད་པར་བལྟའོ། །མི་འཚེ་བ་ནི། བྱང་ཆུབ་སེམས་དཔའི་བཟོད་པར་བལྟའོ། །རྩོད་པ་མེད་པ་ནི། བྱང་ཆུབ་སེམས་དཔའི་བཟོད་པར་བལྟའོ། །གནོད་པར་བྱེད་པ་མེད་ནི། བྱང་ ཆུབ་སེམས་དཔའི་བཟོད་པར་བལྟའོ། །གནོད་པར་བྱ་བ་མེད་པ་ནི། བྱང་ཆུབ་སེམས་དཔའི་བཟོད་པར་བལྟའོ། །བདག་རྗེས་སུ་སྲུང་བ་ནི། བྱང་ཆུབ་སེམས་དཔའི་བཟོད་པར་བལྟའོ། །གཞན་ རྗེས་སུ་སྲུང་བ་ནི། བྱང་ཆུབ་སེམས་དཔའི་བཟོད་པར་བལྟའོ། །ལུས་རྗེས་སུ་སྲུང་བ་ནི། བྱང་ཆུབ་སེམས་དཔའི་བཟོད་པར་བལྟའོ། །ངག་རྗེས་སུ་སྲུང་བ་ནི། བྱང་ཆུབ་སེམས་དཔའི་བཟོད་པར་བལྟའོ།། སེམས་རྗེས་སུ་སྲུང་བ་ནི། བྱང་ཆུབ་སེམས་དཔའི་བཟོད་པར་བལྟའོ། །ཚུལ་བཞིན་གྱིས་སོ་སོར་རྟོག་པ་ནི། བྱང་ཆུབ་སེམས་དཔའི་བཟོད་པར་བལྟའོ། །མྱ་ངན་ལས་འདས་པ་འདོད་ཆགས་དང་ བྲལ་བ་ནི། བྱང་ཆུབ་སེམས་དཔའི་བཟོད་པར་བལྟའོ། །ལས་ཀྱི་རྣམ་པར་སྨིན་པ་ལ་རྟོན་པ་ནི། བྱང་ཆུབ་སེམས་དཔའི་བཟོད་པར་བལྟའོ། །ལུས་ཡོངས་སུ་དག་པ་ནི། བྱང་ཆུབ་སེམས་དཔའི་ བཟོད་པར་བལྟའོ། །ངག་ཡོངས་སུ་དག་པ་ནི། བྱང་ཆུབ་སེམས་དཔའི་བཟོད་པར་བལྟའོ། །སེམས་ཡོངས་སུ་དག་པ་ནི། བྱང་ཆུབ་སེམས་དཔའི་བཟོད་པར་བལྟའོ། །ལྷ་དང་མིའི་ཕུན་སུམ་ཚོགས་པ་ རྗེས་སུ་མྱོང་བ་ནི། བྱང་ཆུབ་སེམས་དཔའི་བཟོད་པར་བལྟའོ། །བྱང་ཆུབ་སེམས་དཔའ་དེ་བཞིན་གཤེགས་པའི་མཚན་དང་དཔེ་བྱད་བཟང་པོ་ཡོངས་སུ་རྫོགས་པ་ནི། བྱང་ཆུབ་སེམས་དཔའི་བཟོད་ པར་བལྟའོ། །དེ་བཞིན་གཤེགས་པའི་གསུང་ཚངས་པའི་སྒྲ་དབྱངས་སྒྲོག་པ་ཐོབ་པ་ནི། བྱང་ཆུབ་སེམས་དཔའི་བཟོད་པར་བལྟའོ། །བྱང་ཆུབ་སེམས་དཔའི་སྤྱད་པ་སྤྱོད་པ་དང༌། དགེ་བའི་རྩ་བ་ ༄༅། །ཐམས་ཅད་ཆུད་མི་གསོན་པ་ནི། བྱང་ཆུབ་སེམས་དཔའི་བཟོད་པར་བལྟའོ། །ཕས་ཀྱི་གནོད་པར་བྱེད་པ་ཐམས་ཅད་ལས་འདས་པ་ནི། བྱང་ཆུབ་སེམས་དཔའི་བཟོད་ པར་བལྟའོ། །ཕྱིར་རྒོལ་བ་ཐམས་ཅད་བཅོམ་པ་ནི། བྱང་ཆུབ་སེམས་དཔའི་བཟོད་པར་བལྟའོ། །མདོར་ན་དེ་བཞིན་གཤེགས་པའི་སྟོབས་དང༌། མི་འཇིགས་པ་དང༌། མ་འདྲེས་པ་དང༌། སྙིང་རྗེ་ཆེན་པོ་དང༌། བྱམས་པ་ཆེན་པོ་དང༌། དགའ་བ་ཆེན་པོ་དང༌། བཏང་སྙོམས་ཆེན་པོ་དང༌། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པ་ནི། བྱང་ཆུབ་སེམས་དཔའི་བཟོད་ པར་བལྟའོ། །ཡང་ཤཱ་རིའི་བུ། བྱང་ཆུབ་སེམས་དཔའི་བཟོད་པ་ཞེས་བྱ་བ་ནི། འདི་ལྟར་བྲག་ཅའི་སྒྲ་དང་མཚུངས་པར་རབ་ཏུ་ཤེས་པས་སྤྱོས་ཀྱང་སླར་མི་གཤེའོ། །ལུས་གཟུགས་ བརྙན་དུ་ཤེས་པས་བརྡེགས་ཀྱང་སླར་མི་བརྡེག །སེམས་སྒྱུ་མ་ལྟ་བུར་རབ་ཏུ་རྟོགས་པས་ཁྲོས་ཀྱང་སླར་མི་ཁྲོ། རང་གི་ཡོན་ཏན་ཡོངས་སུ་རྫོགས་པས་དེ་མ་བསྔགས་པ་ལ་ཁོང་ཁྲོ་བ་ མེད། བསྔགས་པ་ལ་རྗེས་སུ་ཆགས་པར་མི་བྱེད་དོ། །དུལ་ཞིང་ཞི་བའི་ཕྱིར་རྙེད་པས་དགའ་པར་མི་འགྱུར། མི་རྙེད་པས་ཞུམ་པར་མི་འགྱུར། རབ་ཏུ་བརྟགས་པའི་བློ་རྒྱ་ཆེ་བའི་ཕྱིར་གྲགས་ པས་ངོ་མཚར་དུ་མི་འཛིན། མ་གྲགས་བས་འཁྲུལ་བར་མི་འགྱུར། མི་གཡོ་བར་རབ་ཏུ་གནས་པའི་ཕྱིར་སྨད་པས་འདུད་པར་མི་འགྱུར། བསྟོད་པས་ཁེངས་པར་མི་འགྱུར། སེམས་ ཅན་ལ་ལྟ་བའི་ཕྱིར་སྡུག་བསྔལ་གྱིས་ཡོངས་སུ་མི་སྐྱོ། །འདུས་བྱས་ཀྱི་བདེ་བ་མི་རྟག་པའི་ཕྱིར་བདེ་བ་ལ་དགའ་བ་མེད། སྲིད་པའི་འགྲོ་བར་སྐྱེ་བ་ཐམས་ཅད་ལ་མི་གནས་པས་འཇིག་རྟེན་གྱི་ ཆོས་ཀྱིས་མི་གོས། ཕ་རོལ་ལ་མི་གནོད་པས་བདག་ལ་གནོད་པ་བཟོད། བྱང་ཆུབ་ཀྱི་ཡན་ལག་གི་ཚོགས་ཡོངས་སུ་རྫོགས་པས་ཡན་ལག་དང༌། ཉིང་ལག་དང༌། མགོ་བཅད་ཀྱང་བཟོད། སངས་རྒྱས་ཀྱི་སྐུ་འདོད་པས་ལུས་གཏུབས་ཀྱང་བཟོད། ལེགས་པར་བྱས་པའི་ལས་ཀྱི་སྟོབས་བསྐྱེད་པས་ངན་དུ་བྱས་པ་ཐམས་ཅད་བཟོད་དེ། ཤཱ་རིའི་བུ། དེ་ནི། བྱང་ཆུབ་སེམས་དཔའི་ བཟོད་པ་ཞེས་བྱའོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའི་བཟོད་པ་ཞེས་བྱ་བ་ནི། འདི་ལྟ་སྟེ། རབ་ཏུ་བཟོད་པའོ། །དེ་ཅིའི་ཕྱིར་ཞེ་ན། གཤེ་བ་ནི། སུ། གཤེ་བར་བྱ་བ་ནི། གང་ ཞེས་བཟོད་ན། དེ་གཉི་ག་དམིགས་པའི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། །ཡང་འདི་ལ་གཤེ་བ་གང་ཞེས་བཟོད་ན། དེ་ཆོས་བགྲང་བའི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། ། ཅི་མིག་གིས་མིག་ལ་གཤེའམ་ཞེས་བཟོད་ན། དེ་སྐྱེ་མཆེད་ལ་སོ་སོར་རྟོག་པའི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། །འདི་ནི། ཡི་གེ་ཡིན་ནོ། །ཞེས་བཟོད་ན། དེ་བྲག་ཅའི་སྒྲའི་བཟོད་པ་ སྟེ། དེ་རབ་ཏུ་བཟོད་པ་མ་ཡིན་ནོ། །འདི་ཡང་མི་རྟག །བདག་ཀྱང་མི་རྟག་ཅེས་བཟོད་ན། དེ་མི་རྟག་པ་ལ་འཇུག་པའི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། །འདི་ནི། ཕྱིན་ཅི་ལོག །བདག་ནི། ༄༅། །ཕྱིན་ཅི་ལོག་མ་ཡིན་ཞེས་བཟོད་ན། དེ་མཐོ་དམན་གྱི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། །བདག་ནི། རིགས། འདི་ནི། མི་རིགས་སོ། །ཞེས་བཟོད་ན། དེ་ རིགས་པ་མ་ཡིན་པའི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། །བདག་ནི། ལམ་ལ་གནས། འདི་ནི། ལམ་ངན་པ་ལ་གནས་ཞེས་བཟོད་ན། དེ་གཉིས་ཀྱི་བཟོད་པ་སྟེ། དེ་རབ་ཏུ་བཟོད་ པ་མ་ཡིན་ནོ། །བདག་སྟོང་པ་ཉིད་བཟོད་ཀྱི། བདག་ལྟ་བར་སོང་བ་མི་བཟོད། བདག་མཚན་མ་མེད་པ་བཟོད་ཀྱི། བདག་རྣམ་པར་རྟོག་པ་མི་བཟོད། བདག་སྨོན་པ་མེད་པ་བཟོད་ཀྱི། བདག་ སྨོན་པ་ཡོད་པ་མི་བཟོད། བདག་མངོན་པར་འདུ་མི་བྱེད་པ་བཟོད་ཀྱི། བདག་མངོན་པར་འདུ་བྱེད་པ་མི་བཟོད། བདག་ཉོན་མོངས་པ་ཟད་པ་བཟོད་ཀྱི། བདག་ཉོན་མོངས་པ་མི་བཟོད། བདག་དགེ་བ་བཟོད་ཀྱི། བདག་མི་དགེ་བ་མི་བཟོད། བདག་ཁ་ན་མ་ཐོ་བ་མེད་པ་བཟོད་ཀྱི། བདག་ཁ་ན་མ་ཐོ་བ་མི་བཟོད། བདག་ཟག་བ་ཟད་པ་བཟོད་ཀྱི། བདག་ཟག་པ་དང་བཅས་པ་ མི་བཟོད། བདག་འཇིག་རྟེན་ལས་འདས་པ་བཟོད་ཀྱི། བདག་འཇིག་རྟེན་པ་མི་བཟོད། བདག་རྣམ་པར་བྱང་བ་བཟོད་ཀྱི། བདག་ཀུན་ནས་ཉོན་མོངས་པ་མི་བཟོད། བདག་མྱ་ངན་ལས་ འདས་པ་བཟོད་ཀྱི། བདག་འཁོར་བ་མི་བཟོད་ན། དེ་གཉེན་པོས་སྤོང་བའི་བཟོད་པ་སྟེ། རབ་ཏུ་བཟོད་པ་མ་ཡིན་ནོ། །དེ་ལ་རབ་ཏུ་བཟོད་པ་གང་ཞེ་ན། གང་སྟོང་པ་ཉིད་ཁོང་དུ་ཆུད་པ་དེ་ ལ་ལྟ་བ་བསལ་བའང་མེད། སྟོང་པ་ཉིད་དུ་སྒྲོ་འདོགས་པའང་མེད། གང་སྟོང་པ་ཉིད་ཁོང་དུ་ཆུད་པ་དེ་ལ་རྣམ་པར་རྟོག་པ་བསལ་བའང་མེད། མཚན་མ་མེད་པར་སྒྲོ་འདོགས་པ་དང་མེད། གང་ སྟོང་པ་ཉིད་ཁོང་དུ་ཆུད་པ་དེ་ལ་སྨོན་པ་བསལ་བའང་མེད། སྨོན་པ་མེད་པར་སྒྲོ་འདོགས་པའང་མེད། གང་སྟོང་པ་ཉིད་ཁོང་དུ་ཆུད་པ་དེ་ལ་མངོན་པར་འདུ་བྱེད་པ་བསལ་བའང་མེད། མངོན་པར་ འདུ་མི་བྱེད་པར་སྒྲོ་འདོགས་པའང་མེད། གང་སྟོང་པ་ཉིད་ཁོང་དུ་ཆུད་པ་དེ་ལ་ཉོན་མོངས་པ་བསལ་བའང་མེད། ཀུན་ནས་ཉོན་མོངས་པ་ཟད་པར་སྒྲོ་འདོགས་པའང་མེད། གང་སྟོང་པ་ཉིད་ཁོང་ དུ་ཆུད་པ་དེ་ལ་མི་དགེ་བ་བསལ་བའང་མེད། དགེ་བར་སྒྲོ་འདོགས་པའང་མེད། གང་སྟོང་པ་ཉིད་ཁོང་དུ་ཆུད་པ་དེ་ལ་ཁ་ན་མ་ཐོ་བ་དང་བཅས་པ་བསལ་བའང་མེད། ཁ་ན་མ་ཐོ་བ་མེད་པར་སྒྲོ་འདོགས་ པའང་མེད། གོང་མ་བཞིན་དུ་ཐམས་ཅད་ལ་རྒྱས་པར་བྱ་སྟེ། གང་སྟོང་པ་ཉིད་ཁོང་དུ་ཆུད་པ་དེ་ལ་འཁོར་བ་བསལ་བའང་མེད། མྱ་ངན་ལས་འདས་པར་སྒྲོ་འདོགས་པ་ཡང་མེད་དེ། གང་འདི་ལ་ བཟོད་པ་དེ་ནི། རབ་ཏུ་བཟོད་པ་ཞེས་བྱའོ། །གང་མ་སྐྱེས། མ་བསྐྱེད། མ་བྱུང༌། བྱུང་བར་མ་གྱུར་པ་དེ་ལ་འབྱུང་བ་གང་ཡང་མེད་དོ། །འབྱུང་བ་མེད་པས་མི་ཟད་དེ། གང་མི་ཟད་པ་དེ་རབ་ཏུ་བཟོད་ པའོ། །གང་འདུས་བྱས་ཀྱང་མ་ཡིན། འདུས་མ་བྱས་ཀྱང་མ་ཡིན། སྒྲོ་འདོགས་པའང་མ་ཡིན། མ་གཞག །མ་སྤེལ། ཡང་དག་པར་མ་སྤེལ་བ། མི་འཕྲོག་པ། མི་གསོག་པ། མི་འབྲི་བ་དེ་ལ་ ༄༅། །སྐྱེ་བ་གང་ཡང་མེད་དོ། །གང་མི་སྐྱ་བ་དེ་ནི། མི་ཟད་པ་སྟེ། གང་དེ་ལྟར་བཟོད་ན། དེ་ནི། མི་སྐྱེ་བ་ལ་བཟོད་པ་ཞེས་བྱའོ། །ཤཱ་རིའི་བུ། བཟོད་པ་འདི་ལྟ་བུ་དང་ ལྡན་པའི་བྱང་ཆུབ་སེམས་དཔའི་སེམས་དཔའ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་དོ། །ཤཱ་རིའི་བུ། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བཟོད་པའི་ཕ་ རོལ་ཏུ་ཕྱིན་པ་སྟེ། འདི་ལ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་དེ། བདུད་དང༌། བདུད་ཀྱི་རིས་ཀྱི་ལྷའི་བུ་རྣམས་དང༌། དེ་མ་ཡིན་པ་ གཞན་ཕས་ཀྱི་རྒོལ་བ་ཐམས་ཅད་ཀྱིས་མི་ཐུབ་པ་ཡིན་ནོ། །བཟོད་པའི་ཕ་རོལ་ཏུ་ཕྱིན་པའི་ལེའུ་སྟེ། བརྒྱད་པའོ།། །།བམ་པོ་བཅུ་གཉིས་པ། དེ་ལ་བྱང་ཆུབ་སེམས་དཔའ་སེམས་ དཔའ་ཆེན་པོ་གང་ལ་ཞུགས་པ་བྱང་ཆུབ་སེམས་དཔའི་སྤྱད་པ་སྤྱོད་ཅིང༌། བདུད་དང༌། བདུད་ཀྱི་རིས་ཀྱི་ལྷའི་བུ་རྣམས་དང༌། དེ་མ་ཡིན་པ་གཞན་ཕས་ཀྱི་རྒོལ་བ་ཐམས་ཅད་ཀྱིས་མི་ཐུལ་ བར་འགྱུར་བའི་བྱང་ཆུབ་སེམས་དཔའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་གང་ཞེ་ན། འདི་ལྟར་ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པའི་བརྩོན་ འགྲུས་དང་ལྡན་པ་ཡིན་ཏེ། རང་གི་ལུས་དང༌། སྲོག་ལ་མི་ལྟ་བར་བརྩོན་འགྲུས་དྲག་པོ་བསྐྱེད་ནས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཡོངས་སུ་ཚོལ་བར་ བྱེད། ཤིན་ཏུ་ཉན་པར་བྱེད། འཆང་བར་བྱེད། འཛིན་པར་བྱེད། ཀློག་པར་བྱེད། ཀུན་ཆུབ་པར་བྱེད། གཞན་ལ་ཡང་འཆད་པར་བྱེད། རྒྱ་ཆེར་ཡང་དག་པར་རབ་ཏུ་སྟོན་པར་བྱེད། བྲིས་ ནས་འཛིན་པར་བྱེད་དོ། །དེ་ཇི་ལྟར་ན། ལུས་དང༌། སྲོག་མི་ལྟ་བ་ཡིན་ཞེ་ན། འདི་ལ་ཤཱ་རིའི་བུ། བྱང་ཆུབ་སེམས་དཔའ་འདི་ལྟ་བུའི་མདོ་སྡེ་འཆང་བ་དང༌། འཛིན་པ་དང༌། ཀློག་པ་དང་ ཀུན་ཆུབ་པར་བྱེད་པ་དང༌། གཞན་ལ་ཡང་གོ་བར་བྱེད་པ་དང༌། རྒྱ་ཆེར་ཡང་དག་པར་རབ་ཏུ་སྟོན་པ་དང༌། བྲིས་ནས་འཛིན་པ་དང༌། དེ་བཞིན་དུ་ནན་ཏན་བྱེད་པ་དེ་དག་གི་ལུས་ལ་ངས་མདའ་ དང༌། མཚོན་དང༌། མདུང་ཐུང་བརྒྱས་ཕུག་སྟེ་སྲོག་བཅད་དོ། །ཞེས་ཕ་རོལ་གྱིས་བསྡིགས་ཀྱང་དེ་ལ་ཤཱ་རིའི་བུ། བྱང་ཆུབ་སེམས་དཔའ་མི་འཇིགས། མི་དངང༌། མི་སྐྲག །ཀུན་ཏུ་སྐྲག་པར་མི་འགྱུར་ གྱི། ཕྱིར་ཞིང་བརྩོན་འགྲུས་བརྟན་པ་བསྐྱེད་ནས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་མི་སྤོང༌། རྣམ་པར་མི་སྤོང༌། རབ་ཏུ་རྣམ་པར་མི་སྤོང་མི་འདོར་ཏེ། མོས་པ་དྲག་པོར་འགྱུར། མོས་པ་བརྟན་པར་འགྱུར། བཟོད་པ་བརྟན་པར་འགྱུར། བརྩོན་འགྲུས་བརྟན་པར་འགྱུར་རོ། །ཤཱ་རིའི་བུ། བཟོད་པ་བརྟན་པ་དང༌། བརྩོན་འགྲུས་བརྟན་པ་ལས་བཟུང་སྟེ་དཔེ་བསྟན་ཏོ། །བཟོད་ པ་བརྟན་པ་ཇི་ཙམ་པ་དང༌། བརྩོན་འགྲུས་བརྟན་པ་ཇི་ཙམ་པའི་བྱང་ཆུབ་སེམས་དཔའ་ལུས་དང་སྲོག་ལ་མི་ལྟ་བར་འགྱུར་ཏེ། ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ ༄༅། །སེམས་ཅན་ཇི་སྙེད་པ་སྒོ་ང་ལས་སྐྱེས་བའམ། མངལ་ནས་སྐྱེས་བའམ། དྲོད་གཤེར་ལས་སྐྱེས་པའམ། རྫུས་ཏེ་སྐྱེས་པའམ། གཟུགས་ཅན་ནམ། གཟུགས་ མེད་པའམ། འདུ་ཤེས་ཅན་ནམ། འདུ་ཤེས་མེད་པའམ། འདུ་ཤེས་མེད་འདུ་ཤེས་མེད་མིན་ནམ། སྣང་བར་གྱུར་བའམ། མི་སྣང་བར་གྱུར་བའམ། སེམས་ཅན་ཇི་སྙེད་སེམས་ཅན་དུ་ བསྡུ་བར་བསྡུས་པ་དེ་དག་ཐམས་ཅད་ཡོངས་སུ་བརྟག་པ་བཟུང་སྟེ་སྐད་ཅིག་ཐང་གཅིག་ཡུད་ཙམ་ལ་སྔ་ཕྱི་མེད་པར་མིའི་ལུས་ཐོབ་པར་གྱུར་ལ། དེ་དག་མིར་གྱུར་ནས་ཐམས་ཅད་ཀྱི་ལག་ཏུ་ མཚོན་རྣོན་པོ་ཐོགས་ཏེ་དགྲར་གྱུར་ནས་ཚིག་འདི་སྐད་ཅེས་འདི་ལྟ་བུའི་ཚིག་དང༌། ཡི་གེ་འཆང་བ་དང༌། འཛིན་པ་དང༌། ཀློག་པ་དང༌། གཞན་དག་ལ་འཆད་པ་དང༌། རྒྱ་ཆེར་ཡང་དག་པར་ རབ་ཏུ་སྟོན་པ་དང༌། དེ་བཞིན་དུ་ནན་ཏན་བྱེད་པ་དེ་དག་ངེད་ཀྱིས་བཟུང་སྟེ་སྲོག་གཅད་དོ། །ཞེས་ཟེར་ན་ཡང་དེ་ལ་ཤཱ་རིའི་བུ། བྱང་ཆུབ་སེམས་དཔའ་དངང་བ་དང་སྐྲག་པ་སྐྱེ་བའི་སེམས་ གཅིག་ཀྱང་མི་བསྐྱེད་ཀྱི། དེ་བས་ལྷག་པར་དམ་པའི་ཆོས་ཡོངས་སུ་འཛིན་པར་འགྱུར་ཏེ། དེ་ནི། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བའི་ཕྱིར་རོ། །ཤཱ་ རིའི་བུ༑ འདི་ནི། བྱང་ཆུབ་སེམས་དཔའི་མི་ལྡོག་པའི་བརྩོན་འགྲུས་དང་ལྡན། མཐའ་ཡས་པའི་བརྩོན་འགྲུས་ཀྱི་སྟོབས་ཀྱི་ཤུགས་དང་ལྡན་ཞིང༌། བརྩོན་འགྲུས་དཔའ་བ་དང༌། སེམས་ དཔའ་བ་དང༌། ཚུལ་ཁྲིམས་དཔའ་བ་དང༌། བཟོད་པ་དཔའ་བ་དང༌། ཏིང་ངེ་འཛིན་དཔའ་བ་དང༌། ཤེས་རབ་དཔའ་བ་དང༌། སྤྱོད་པའི་ཁྱད་པར་གྱི་ཡེ་ཤེས་དཔའ་བ་ཞེས་བྱའོ། །དེ་ལ་ཤཱ་རིའི་བུ། བྱང་ཆུབ་སེམས་དཔའ་གང་མཚོན་རྣོན་པོ་ཐོགས་པའི་དགྲ་རྣམས་ལ་གནོད་པའི་སེམས་གཅིག་ཀྱང་མི་བསྐྱེད་པ་དེ་ནི། བྱང་ཆུབ་སེམས་དཔའ་ཚངས་པ་དང་མཚུངས། དབང་པོ་དང་མཚུངས། ལྷུན་པོ་དང་མཚུངས་ཏེ། མི་བསྒུལ་བ། སྙིང་རྗེ་ཅན། བྱམས་པ་ལ་གནས་པ། སེམས་ཅན་ཐམས་ཅད་ཀྱི་བསམ་པ་གསོ་བ་ལ་མོས་པ། ཕྱིར་མི་ལྡོག་པའི་སྤྱོད་ཡུལ་བ། སེམས་ས་དང་མཚུངས་ པ༑ སེམས་ཆུ་དང་མཚུངས་པ། སེམས་མེ་དང་མཚུངས་པ། སེམས་རླུང་དང་མཚུངས་པ། སེམས་ནམ་མཁའ་དང་མཚུངས་པ། འདོད་ཆགས་དང༌། ཞེ་སྡང་དང༌། གཏི་མུག་དང༌། ཐ་བ་སེལ་བ་ ལ་ཞུགས་པ་ཞེས་བྱའོ། །ཡང་ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་གངྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་ཡོངས་སུ་གང་བར་ བྱས་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སྦྱིན་པ་བྱིན་པ་བས་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་བྱང་ཆུབ་སེམས་ དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཐོས་ནས་འདི་ལྟ་བུའི་ཆོས་བདག་གིས་བསླབ་པར་བྱའོ། །ཞེས་སེམས་ལ་རབ་ཏུ་བཞག་ན། ཤཱ་རིའི་བུ། བྱང་ཆུབ་སེམས་དཔའ་སློབ་པར་འདོད་ ༄༅། །པས་མ་བསླབ་ཀྱང་དགེ་བའི་རྩ་བ་ཆེས་མང་དུ་ཡོངས་སུ་གཟུང་བར་འགྱུར་ཏེ། སྦྱིན་པ་ཆེན་པོ་བྱིན་པས་ནི། དེ་ཙམ་མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ། བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ནི། འདིའི་ཁར་ལུས་སོ། །དེ་བས་ན། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོས་བྱང་ཆུབ་སེམས་དཔའི་སྡེ་སྣོད་ཀྱི་རྣམ་གྲངས་ མཉན་པ་དང༌། གཟུང་བ་དང༌། ཡི་གེར་འབྲི་བ་དང༌། བཀླག་པ་དང༌། བཅང་བ་དང༌། ཕ་རོལ་ལ་ཡང་ཡང་དག་པར་རབ་ཏུ་བསྟན་པའི་ཕྱིར་བརྩོན་འགྲུས་བརྩམ་མོ། །ཤཱ་རིའི་བུ། བྱང་ ཆུབ་སེམས་དཔའ་བརྩོན་འགྲུས་བརྩམས་པ་ནི། འགྲོ་བ་མེད་པའི་འགྲོ་བར་འགྲོ་བའོ། །འགྲོ་བ་མེད་པར་འགྲོ་བ་གང་ཞེ་ན། འདི་ལྟ་སྟེ། མྱ་ངན་ལས་འདས་པ་སྟེ། དེར་བདུད་སྡིག་ཅན་འགྲོ་ བ་མེད་དོ། །དེ་བས་ན། འགྲོ་བ་མེད་པར་འགྲོ་བ་ཞེས་བྱའོ། །དེར་འགྲོ་བ་ནི། བརྩོན་འགྲུས་དང་ལྡན་པ། སྐྱེས་བུ་དམ་པ་སངས་རྒྱས་དང༌། རང་སངས་རྒྱས་དང༌། ཉན་ཐོས་རྣམས་སོ། །དེ་ ཅིའི་ཕྱིར་ཞེ་ན། བརྩོན་འགྲུས་སྤྱོད་པའི་ལམ་དུ་ཞུགས་པ་དེ་ནི། དེ་ལྟ་བུའི་སྐྱེས་བུ་དམ་པ་དག་དང༌། སངས་རྒྱས་རྣམས་སོ། །གང་ལ་ལ་ཀུན་ནས་ཉོན་མོངས་པའི་ཆོས་ཅན་སེམས་ཅན་ཐམས་ ཅད་ནི༑ གནས་གསུམ་སྟེ། གསུམ་གང་ཞེ་ན། ངན་སོང་དུ་གཞོལ་བ་དང༌། ངན་སོང་དུ་འབབ་པ་དང༌། ངན་སོང་དུ་བབ་པ་སྟེ། ཚུལ་ཁྲིམས་དང༌། བཟོད་པ་དང༌། མང་དུ་ཐོས་པ་མ་གཏོགས་ པར་མངོན་པར་བྱུང་བའི་ཆོས་གཞན་གང་ཡང་མེད་དོ། །ཀྱེ་མའོ་སེམས་ཅན་འདི་དག་ནི། ང་ཞེས་ཟེར་བའི་ཚིག་གི་ལམ་ལ་གནས་པ་སྟེ། ལམ་མ་ཡིན་པ་ལ་གནས་སོ། །ཀྱེ་མའོ་སེམས་ཅན་འདི་ དག་ནི། ང་ཞེས་ཟེར་བའི་བརྩོན་འགྲུས་བརྩམས་པ་སྟེ། ལེ་ལོ་ཅན་ནོ། །ཤཱ་རིའི་བུ། བྱང་ཆུབ་སེམས་དཔའ་མཁས་པ་ནི། ལམ་མ་ཡིན་པ་ལ་གནས་པའི་སེམས་ཅན་ལེ་ལོ་ཅན་དང་མཛའ་བར་མི་ བྱེད༑ སྟེན་པར་མི་བྱེད་དེ། གཞན་དུ་ན་བྱང་ཆུབ་སེམས་དཔའ་མཐུན་པར་སྤྱོད་པ་བརྩོན་འགྲུས་བརྩམས་པ་དང་སྟེན་པར་བྱད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། སངས་རྒྱས་ཀྱི་ཡོངས་སུ་མྱ་ངན་ ལས་འདས་པ་ལས་གཞན་མྱ་ངན་ལས་འདས་པའི་མཆོག་གང་ཡང་མེད་དོ། །ཤཱ་རིའི་བུ། བྱང་ཆུབ་སེམས་དཔའ་རྣམ་པར་བྱང་བ་ལ་མོས་ཤིང་བརྩོན་འགྲུས་བརྩམས་པ་ནི། བདག་གིས་ལུས་ འབའ་ཞིག་ཉེ་བར་ཞི་བར་བྱ་བའི་ཕྱིར་བརྩོན་འགྲུས་རྩོམ་པ་མ་ཡིན་གྱི། སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཞུགས་ནས་ཁོང་དུ་ཆུད་པར་བྱེད། སྟོན་པར་བྱེད། སྐུལ་བར་བྱེད། འཛིན་དུ་འཇུག །འཕགས་པའི་ལམ་སྲང་དུ་འཛུད་དེ། དེ་བས་ན། སྐྱེས་བུ་དམ་པ་བྱང་ཆུབ་སེམས་དཔའ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་ སོ༑ ༑མདུད་པ་མེད་པའི་བརྩོན་འགྲུས་ཀྱིས། །རྟག་ཏུ་ཡང་དག་འཕགས་པར་འགྱུར། །མཁས་པ་བྱང་ཆུབ་སེམས་དཔའ་ཡི། །སྡེ་སྣོད་དག་ནི་རྟག་ཏུ་འཛིན། །ཆོས་རྣམས་ཀྱི་ནི་དོན་སེམས་ཏེ། །དེ་ ༄༅། །དག་བློ་ནི་བསམ་མི་ཁྱབ། །རྣམ་པར་བྱང་བ་ཀུན་ཚོལ་བ། །བྱང་ཆུབ་སེམས་དཔར་བརྗོད་པ་ཡིན། །ཤེས་རབ་ཆེན་པོ་དེ་དག་འབད། །ཤིང་མཆོག་དྲུང་དུ་འདུག་ནས་ནི། ། དེ་བཞིན་གཤེགས་ཤེས་རབ་བརྩོན་འགྲུས་ཀྱིས། །སྡིག་ཅན་བདུད་རྣམས་སྐྲག་པར་བྱེད། །འཇིག་རྟེན་ཀུན་གྱི་བརྡ་དག་ལས། །ཚུལ་ཁྲིམས་དག་ནི་ཐམས་ཅད་སྟོན། །སེམས་ཅན་ཀུན་ལ་ཕན་པའི་ ཕྱིར༑ ༑དེ་ལ་བརྩོན་འགྲུས་ཉམས་མི་འགྱུར། །ཤཱ་རིའི་བུ། དུས་འདི་ལྟ་བུ་དང༌། ཚོད་འདི་ལྟ་བུ་འབྱུང་བར་འགྱུར་ཏེ། གང་ང་དང་ཁྱོད་ཡོངས་སུ་མྱ་ངན་ལས་འདས་པའི་འོག་ཏུ་ལྔ་བརྒྱ་ཐ་ མ་ལ་འདི་ལྟ་བུའི་མདོ་སྡེ་འགྲོ་བ་མང་པོ་དགའ་བ་དང༌། མགུ་བར་བྱེད་པ། ཤེས་རབ་སྒྲུབ་པར་བྱེད་པ། བསོད་ནམས་སྒྲུབ་པར་བྱེད་པ། ལོངས་སྤྱོད་འཕེལ་བ་སྒྲུབ་པར་བྱེད་པ། མཐོ་རིས་ སྒྲུབ་པར་བྱེད་པ། ཕུན་སུམ་ཚོགས་པ་ཐམས་ཅད་སྒྲུབ་པར་བྱེད་པ། དེ་བཞིན་གཤེགས་པའི་སྟོབས་དང༌། མི་འཇིགས་པ་དང༌། སོ་སོ་ཡང་དག་པར་རིག་པ་དང༌། བྱམས་པ་ཆེན་པོ་དང༌། སྙིང་ རྗེ་ཆེན་པོ་དང༌། དགའ་བ་ཆེན་པོ་དང༌། བཏང་སྙོམས་ཆེན་པོ་དང༌། སངས་རྒྱས་ཀྱི་ཆོས་མ་འདྲེས་པ་རྣམས་སྒྲུབ་པར་བྱེད་པ། མདོར་ན་སངས་རྒྱས་ཀྱི་ཆོས་རྣམས་སྒྲུབ་པ། བདུད་སྐྲག་པར་ བྱེད་པ༑ སེམས་རྣམ་པར་དག་པར་བྱེད་པ། སྐྱེ་བ་ཟད་པའི་མཐར་བྱེད་པ། སྡུག་བསྔལ་ཟད་པའི་མཐར་བྱེད་པ། མྱ་ངན་ལས་འདས་པ་དང་ཉེ་བར་བྱེད་པ་འབྱུང་ན། དེ་དག་དེའི་དུས་ན་སྤོང་ བར་འགྱུར། མི་འདོད་པར་འགྱུར། ཡོངས་སུ་གཏོང་བར་འགྱུར་རོ། །དེ་ལ་ཤཱ་རིའི་བུ། གང་བརྩོན་པ། རབ་ཏུ་བརྩོན་པ། མངོན་པར་རབ་ཏུ་བརྩོན་པ། བླ་ན་མེད་པ་ཡང་དག་པར་རྫོགས་པའི་ བྱང་ཆུབ་འདོད་པ། ཚུལ་ཁྲིམས་འདོད་པ། ཐོས་པ་འདོད་པ། ཏིང་ངེ་འཛིན་འདོད་པ། ཤེས་རབ་འདོད་པ། རྣམ་པར་གྲོལ་བ་འདོད་པ། རྣམ་པར་གྲོལ་བའི་ཡེ་ཤེས་མཐོང་བ་འདོད་པ། སངས་ རྒྱས་ཀྱི་ཆོས་འདོད་པ། སེམས་ཅན་ཐམས་ཅད་ལ་ཕན་པ་དང་བདེ་བར་འདོད་པ། ལོག་པར་ལྟ་བ་སྤོང་བར་འདོད་པ། ཡང་དག་པར་ལྟ་བ་སྒོམ་པར་འདོད་པ། འཁོར་བ་སྤོང་བར་འདོད་པ། འཕགས་པའི་ལམ་སྒོམ་པར་འདོད་པ། ཆོས་སྟོན་པར་འདོད་པ། བདུད་སྐྲག་པར་བྱེད་པར་འདོད་པ། འདོད་ཆགས་ཞི་བར་འདོད་པ། ཞེ་སྡང་ཞི་བར་འདོད་པ། གཏི་མུག་འཇོམས་པར་འདོད་ པ༑ མ་རིག་པ་འཇོམས་པར་འདོད་པ། རིག་པ་བསྐྱེད་པར་འདོད་པའི་སེམས་ཅན་དེ་དག་འབྱུང་བར་འགྱུར་ཏེ། ཤཱ་རིའི་བུ། དེ་དག་འདི་ལྟ་བུའི་ཆོས་ཐོས་ནས་དགེ་བའི་རྩ་བའི་ཆོས་ཐམས་ཅད་ འདོད་པའི་ཕྱིར་བརྩོན་འགྲུས་རྩོམ་པར་འགྱུར་རོ། །འདི་འདྲ་བ་ཡི་ཆོས་ཐོས་ནས། །སངས་རྒྱས་ཆོས་རྣམས་ཐམས་ཅད་ནི། །བར་དུ་གཅོད་པ་མི་འབྱུང་སྟེ། །འདི་ལ་བདག་ནི་ཐེ་ཚོམ་མེད། །དེ་ལ་ ཤཱ་རིའི་བུ། སེམས་ཅན་གང་བསོད་ནམས་ཀྱི་སྟོབས་ཀྱིས་ཉེ་བར་བརྟན་པ། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཞུགས་པ་འབྱུང་བ་དེ་དག་འདི་ ༄༅། །ལྟ་བུའི་མདོ་སྡེ་འདི་ཉན་པར་བྱེད་དེ། ཐོས་ནས་རྒྱ་ཆེར་དགའ་ཞིང་མགུ་བ་ཐོབ་པར་འགྱུར། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་རབ་ཏུ་ཀུན་ ཆུབ་བར་བྱེད་པར་འགྱུར། །ནན་ཏན་གྱིས་བསྒྲུབ་པར་འགྱུར་རོ། །ཡང་གང་གིས་དེ་བཞིན་གཤེགས་པའི་བསྟན་པ་མཉན་པའི་ཆོས་སུ་བྱས་པར་གྱུར་བ་དེ་དག་རྒྱུ་ལ་ལ་དང༌། དམིགས་པ་ལ་ ལས་དབང་དུ་མ་གྱུར་པར་ཉན་པར་བྱེད་དེ། ཐོས་ནས་རྒྱ་ཆེར་དགའ་བ་དང༌། མགུ་བ་ཐོབ་པར་འགྱུར། དེ་དག་དགའ་བ་དང༌། མགུ་བ་སྐྱེས་ནས་བརྩོན་འགྲུས་ཤིན་ཏུ་བརྟན་པ་རྩོམ་ པར་འགྱུར་ཏེ། དེ་འདི་ལྟ་བུའི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་དཀོན་མཆོག་ལས་སྙིང་པོ་ཅུང་ཟད་ཙམ་ལེན་པར་འགྱུར་རོ། །འདི་ལྟ་སྟེ། དཔེར་ན། ཤཱ་རིའི་བུ། ཤིང་ཏོག་སྨིན་ པ་རྣམ་པ་མང་པོ་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ། རྒྱ་མཚོ་ཆེན་པོས་ཁྱེར་བ་དང༌། སྐྱེས་བུ་ལ་ལས་བརྩོན་འགྲུས་དང་རྟུལ་བ་ཆེན་པོ་ བསྐྱེད་ནས་ཆུ་ཆེན་པོར་ཞུགས་ཏེ་ལག་པ་དང་རྐང་པས་འབད་ནས་རྒྱ་མཚོ་ཆེན་པོ་དེ་ལས་ཤིང་ཏོག་གཅིག་བླངས། གཉིས་དང་གསུམ་བླངས་ནས་རྒྱ་མཚོ་ཆེན་པོ་དེ་ལས་བརྒལ་ ནས་དེ་ཕྱོགས་གཅིག་ཏུ་སོང་སྟེ་ཤིང་ཏོག་དེ་མྱངས་ན། དེས་སྔོན་མ་མྱོང་བའི་རོ་མྱོང་ནས་དེ་འདི་སྙམ་དུ་སེམས་ཏེ། ཤིང་ཏོག་འདི་དག་ཁ་དོག་དང་ལྡན་ཞིང༌། ཤིང་ཏོག་འདི་དག་ དྲི་དང་ལྡན། ཤིང་ཏོག་འདི་དག་རོ་དང་ལྡན་ཏེ། སྔོན་མ་མྱོང་གི །འདི་ལྟར་བདག་གིས་བརྩོན་འགྲུས་རབ་ཏུ་བརྩམས་ཏེ་ལག་པ་དང་རྐང་པས་འབད་ནས་ཤིང་ཏོག་གཞན་ཡང་བླང་སྙམ་སྟེ་ རྒྱ་མཚོ་ཆེན་པོ་དེ་ལ་ཡང་ཞུགས་པ་དང༌། དེས་ཕྱི་མ་མ་མཐོང་ནས་འདི་ལྟར་ཤིང་ཏོག་ཁ་དོག་དང༌། དྲི་དང༌། རོ་དང་ལྡན་ཞིང་སྨིན་པ་རྣམ་པ་སྣ་ཚོགས་དེ་དག་ལས་བདག་གིས་མང་དུ་མ་བླངས་ པས་ཡོངས་སུ་ཉམས་པར་གྱུར་ཏོ། །ཞེས་དེ་སྡུག་བསྔལ་ཞིང་ཡིད་མི་བདེ་ནས་འགྱོད་དོ། །དེ་བཞིན་དུ་ཤཱ་རིའི་བུ། ཕྱི་མའི་ཚེ་ཕྱི་མའི་དུས་ལྔ་བརྒྱ་ཐ་མ་ལ་དམ་པའི་ཆོས་ནུབ་པར་འགྱུར་བའི་དུས་ ཀྱི་ཚེ་དད་པ་ཆུང་བ། གཏོང་བ་ཆུང་བ། ཤེས་རབ་ཆུང་བ། བརྩོན་འགྲུས་ཆུང་བ་འབྱུང་སྟེ། རྣམ་གྲངས་འགའ་ཞིག་གིས་འདི་ལྟ་བུའི་མདོ་སྡེ་དཀོན་མཆོག་ཉན་པར་འགྱུར་ཏེ། ཐོས་ནས་ གང་ཅུང་ཟད་ཙམ་ཐ་ན་ཚིག་བཞི་པའི་ཚིགས་སུ་བཅད་པ་གཅིག་འཛིན་པ་དེ་དག་ལ་བདུད་སྡིག་ཅན་ཡོངས་སུ་འཚེ་བར་འགྱུར་རོ། །དེ་དག་ལ་སྐྱེ་བོ་མང་པོ་དགའ་བར་མི་འགྱུར། སྐྱེ་བོ་མང་པོས་ མཆོད་པར་མི་འགྱུར། སྐྱེ་བོ་མང་པོས་བསྟོད་པར་མི་འགྱུར་ཏེ། མི་དགའ། མི་མཆོད། མི་བསྟོད་པར་རིག་ནས་ཡལ་བར་འདོར་རོ། །ཡང་དེ་དག་གིས་གང་ཐོས་པར་འགྱུར་བ་དང༌། ཟིན་པར་ འགྱུར་བ་ཡང་ཉུང་ཞིང་དོག་ལ་ཆུང་སྟེ། མི་མང་བས་དེ་ཕྱོགས་གཅིག་ཏུ་སོང་ནས་སེམས་ལ་འཇོག་སྟེ། སེམས་ཀྱིས་ངེས་པར་རྟོག་ཅིང་དེ་དག་དགའ་བ་མི་སྐྱེ་ལ་འགྱོད་པར་འགྱུར་རོ། །ཀྱེ་ ༄༅། །མའོ་བདག་དེ་བཞིན་གཤེགས་པའི་བསྟན་པ་མཆོག་ལས་ཡོངས་སུ་ཉམས་ཏེ་ཆོས་མང་པོར་མ་ཐོས། ཆོས་མང་པོར་མ་བཟུང་ངོ༌། །ཞེས་དེ་དག་ཡུད་ཙམ་ཞིག་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྗེས་སུ་དྲན་པར་འགྱུར་རོ། །ཤཱ་རིའི་བུ། གཞན་ཡང་དེའི་དུས་ན་བདུད་ཀྱིས་བྱིན་གྱིས་བརླབས་པའི་དགེ་སློང་དག་ འབྱུང་བར་འགྱུར་ཏེ། གང་མདོ་སྡེ་འདི་ཐོས་ནས་སྐྱེ་བོ་མང་པོའི་མདུན་དུ་མདོ་སྡེ་འདི་ནི། རང་བཟོར་བྱས་པ་ཡིན་ཏེ། འདི་ནི། སངས་རྒྱས་ཀྱིས་གསུངས་པ་མ་ཡིན་ནོ། །ཞེས་སྤོང་བར་འགྱུར་ རོ༑ ༑ཡང་ཤཱ་རིའི་བུ། དེའི་དུས་ན་དགེ་སློང་གང་ཐམས་ཅད་ཡོད་མི་ཉན་པ་དག་ཀྱང་འབྱུང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་ སོ༑ ༑འདི་འདྲ་བ་ཡི་ཆོས་ཐོས་ནས། །བར་དུ་གཅོད་པར་ཡོང་མི་འགྱུར། །སངས་རྒྱས་ཀྱི་ནི་ཆོས་ཐམས་ཅད། །དེ་ལ་བདག་ནི་ནེམ་ནུར་མེད། །གང་དག་བསོད་ནམས་ཆུང་འབྱུང་བ། །དེ་དག་ འདི་འདྲ་ཉན་མི་འགྱུར། །གང་དག་བསོད་ནམས་ཆུང་འབྱུང་བ། །ཐོས་ནས་དད་པར་མི་འགྱུར་རོ། །གང་དག་བསོད་ནམས་ལྡན་འབྱུང་བ། །ཐོས་ནས་དད་པས་འཛིན་པར་འགྱུར། །གང་དག་ བསོད་ནམས་ཆུང་འབྱུང་བ། །འདི་ནི་བསྟན་པ་མིན་ཞེས་ཟེར། །དེ་དག་ངན་འགྲོར་འགྲོ་བར་འགྱུར། །ས་ཡི་སྟེང་ན་དམུས་ལོང་བཞིན། །བསོད་ནམས་ལྡན་འབྱུང་དེ་དག་ནི། །ཐོས་ནས་རབ་ ཏུ་དགའ་བར་འགྱུར། །བདེ་འགྲོ་བར་ནི་དེ་དག་འགྲོ། །སྤྲིས་མ་མར་གྱི་སྙིང་པོ་བཞིན། །གང་དག་བསོད་ནམས་ཆུང་འབྱུང་བ། ཐོས་ནས་ཡིད་ནི་མི་བདེར་འགྱུར། །དེ་དག་ཡུན་རིང་སྡུག་བསྔལ་ཏེ། ། མི་ཤེས་པས་ནི་གྲོལ་མི་འགྱུར། །ཉུང་དུ་ཐོས་པ་ཁ་ཅིག་ནི། །དེ་དག་བདུད་ཀྱིས་ཡོངས་སུ་གཙེས། །སངས་རྒྱས་བྱང་ཆུབ་སྤངས་གྱུར་ནས། །མྱུར་དུ་སེམས་ཅན་དམྱལ་བར་འགྲོ་།ཤཱ་རིའི་བུ། དེ་ བཞིན་གཤེགས་པའི་ཡེ་ཤེས་ནི། རྣམ་པར་དག་པ་སྟེ། ཤཱ་རིའི་བུ། འཁོར་བཞི་ལས་གང་ལ་ལ་ཐ་ན་དགེ་སློང་གཅིག་གམ། དགེ་སློང་མ་གཅིག་གམ། དགེ་བསྙེན་གཅིག་གམ། དགེ་བསྙེན་ མ་གཅིག་ཀྱང་སངས་རྒྱས་ཀྱི་ཆོས་ནུབ་པར་འགྱུར་བའི་དུས་ཀྱི་ཚེ་ན་དེ་འདི་ལྟ་བུའི་མདོ་སྡེ་ཉན་ཏེ། ཐོས་ནས་ནན་ཏན་བྱེད་ཅིང་འཛིན་པར་འགྱུར་བ་དང༌། གང་གིས་ཐོས་ནས་སྤོང་བར་འགྱུར་བ་ དང༌། གང་ཐམས་ཅད་ཡོད་ཉན་པར་མི་འགྱུར་བ་དེ་ཀུན་དེ་བཞིན་གཤེགས་པས་རབ་ཏུ་མཁྱེན་ཏོ། །དེ་ལ་གང་ཐོས་ནས་ནན་ཏན་བྱེད་ཅིང་འཛིན་པར་འགྱུར་བ་དེ་དག་སྒྲིབ་པ་མེད་ཅིང་ཡོངས་སུ་ དག་པ་བཞི་དང་ལྡན་པར་འགྱུར་རོ། །བཞི་གང་ཞེ་ན། ཚུལ་ཁྲིམས་རྣམ་པར་དག་ཅིང་སྒྲིབ་པ་མེད་པ་དང་ལྡན་པར་འགྱུར་བ་དང༌། དལ་བ་འབྱོར་པ་སོ་སོར་ཐོབ་པར་རྣམ་པར་དག་ཅིང་སྒྲིབ་ པ་མེད་པ་དང་ལྡན་པར་འགྱུར་བ་དང༌། སངས་རྒྱས་མངོན་སུམ་དུ་མཐོང་སྟེ་འགྲོགས་པ་རྣམ་པར་དག་པ་སྒྲིབ་པ་མེད་པ་དང་ལྡན་པར་འགྱུར་བ་དང༌། དེ་བཞིན་གཤེགས་པ་བྱམས་པ་ ༄༅། །མཐོང་ནས་མཐོང་མ་ཐག་ཏུ་རྣམ་པར་དག་ཅིང་སྒྲིབ་པ་མེད་པར་འགྱུར་ཏེ། ཇི་ལྟར་དགེ་བའི་རྩ་བ་སྐྱེད་པ་དང༌། ཇི་ལྟར་སྦྱོར་བ་དེ་བཞིན་དུ་སོ་སོར་མྱོང་བར་ འགྱུར་ཏེ། ཤཱ་རིའི་བུ། རྣམ་པར་དག་ཅིང་སྒྲིབ་པ་བཞི་པོ་དེ་དག་དང་ལྡན་པར་འགྱུར་རོ། །ཤཱ་རིའི་བུ། ཡང་དེའི་ཚེ་དེའི་དུས་ན་དམ་པའི་ཆོས་ནུབ་པར་འགྱུར་བ་དེའི་དུས་ཀྱི་ཚེ་ཐེག་པ་ ཆེན་པོ་ལ་གནས་པ་འདི་ལྟ་བུའི་མདོ་སྡེ་ལ་བརྩོན་པ་དག་འབྱུང་སྟེ། བརྩོན་འགྲུས་རབ་ཏུ་རྩོམ་པར་འགྱུར། འཛིན་པར་འགྱུར། འཆང་བར་འགྱུར། ཀློག་པར་འགྱུར། ཀུན་ཆུབ་པར་ བྱེད་པར་འགྱུར། འཆང་བར་འགྱུར། གཞན་དག་ལ་ཡང་གོ་བར་བྱེད་པར་འགྱུར། རྒྱ་ཆེར་ཡང་དག་པར་རབ་ཏུ་སྟོན་པར་འགྱུར་རོ། །དེའི་ཚེ་དེ་དག་ལ་བར་དུ་གཅོད་པ་བཅུ་འབྱུང་སྟེ། དེ་ དག་མཁས་པས་ཁོང་དུ་ཆུད་པར་བྱའི། དེ་དག་གི་དབང་དུ་འགྲོ་བར་མི་བྱ་སྟེ། བརྩོན་འགྲུས་ཀྱང་བརྩམ་པར་བྱའོ། །བར་དུ་གཅོད་པར་འགྱུར་བ་གང་མཁས་པ་དག་གིས་ཁོང་དུ་ཆུད་ པར་བྱའི། དེ་དག་གི་དབང་དུ་འགྲོ་བར་མི་བྱ་བ་བཅུ་གང་ཞེ་ན། ཤཱ་རིའི་བུ། དགེ་སློང་དོན་དུ་གཉེར་བ་མངོན་པར་བརྩོན་པ་དག་ལ་མདོ་སྡེ་རྣམས་བརྩམས་ན། བདུད་སྡིག་ཅན་ཚིག་ གཞིག་པར་བྱད་དེ། དེ་ནི། བར་དུ་གཅོད་པ་དང་པོ་སྟེ། མཁས་པས་ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ། གཞན་ཡང་དགེ་སློང་དོན་དུ་གཉེར་བ་མངོན་ པར་བརྩོན་པ་དག་ལ་མདོ་སྡེ་རྣམས་བརྩམས་ན། མིག་ནད་འབྱུང་བ་དེ་ནི། བར་དུ་གཅོད་པ་གཉིས་པ་སྟེ། མཁས་པས་ཁོད་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ། གཞན་ཡང་དགེ་སློང་དོན་དུ་གཉེར་བ་མངོན་པར་བརྩོན་པ་དག་ལ་མདོ་སྡེ་རྣམས་བརྩམས་ན། ཡན་ལག་དང་ཉིང་ལག་ན་བར་འགྱུར་བ་དེ་ནི། བར་དུ་གཅོད་པ་གསུམ་པ་སྟེ། མཁས་པས་ ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ། གཞན་ཡང་དགེ་སློང་དོན་དུ་གཉེར་བ་མངོན་པར་བརྩོན་པ་དག་ལ་མདོ་སྡེ་རྣམས་བརྩམས་ན། གནས་ལ་མི་དགའ་བར་ འགྱུར་ཞིང་འགྲོ་བའི་སེམས་བསྐྱེད་པར་འགྱུར་བ་དེ་ནི། བར་དུ་གཅོད་པ་བཞི་པ་སྟེ། མཁས་པས་ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ། གཞན་ཡང་དགེ་ སློང་དོན་དུ་གཉེར་བ་མངོན་པར་བརྩོན་པ་དག་ལ་མདོ་སྡེ་རྣམས་བརྩམས་ན། ཕན་ཚུན་དུ་ཁྲོ་བ་སྐྱེ་བར་འགྱུར་ཞིང་ཁྲོ་བའི་ཟིལ་གྱིས་ནོན་པས་གཅིག་ལ་གཅིག་གནོད་པའི་སེམས་ཀྱིས་ འདི་ལྟ་བུའི་མདོ་སྡེ་ལ་གནས་པར་མི་འགྱུར་བ་དེ་ནི། བར་དུ་གཅོད་པ་ལྔ་པ་སྟེ། མཁས་པས་ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ། གཞན་ཡང་དགེ་སློང་དོན་ དུ་གཉེར་བ་མངོན་པར་བརྩོན་པ་དག་ལ་མདོ་སྡེ་རྣམས་བརྩམས་ན། རྩོད་པའི་གཞི་བྱུང་ཞིང་གནས་པར་འགྱུར། འཐབ་མོ་འབྱུང་བ་དང༌། མཚང་འདྲུ་བ་འབྱུང་བ་དང༌། འགྱེད་པ་དང༌། ངན་ ༄༅། །སེམས་དང་ལྡན་པར་གྱུར་པས་གཅིག་ལ་གཅིག་དག་གི་མདུང་ཐུང་བརྒྱས་མངོན་པར་རྩོད་ཅིང་འཚེ་བ་ལ་གནས་པར་འགྱུར་རོ། །དེ་དག་རྩོད་པའི་གཞི་བྱུང་ བ་དང༌། མཚང་འདྲུ་བ་འབྱུང་བ་དང༌། འགྱེད་པ་དང་གནོད་སེམས་དང་ལྡན་ཞིང་ཕན་ཚུན་དག་གི་མདུང་ཐུང་བརྒྱས་རྩོད་ཅིང་འཚེ་བ་ལ་གནས་པས་བར་དུ་གཅོད་པར་འགྱུར་ཏེ། སྨོད་པའི་ ལས་ཀྱི་ཕྱིར་འདི་ལྟ་བུའི་མདོ་སྡེ་མི་བརྗོད་པར་བྱ་བ་ལ་བརྩོན་པར་འགྱུར་བ་དེ་ནི། བར་དུ་གཅོད་པ་དྲུག་པ་སྟེ། མཁས་པས་ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ། གཞན་ཡང་དགེ་སློང་དོན་དུ་གཉེར་བ་ལ་མངོན་པར་བརྩོན་པ་དག་ལ་མདོ་སྡེ་རྣམས་བརྩམས་ན། ཁྱིམ་པ་དང་རབ་ཏུ་བྱུང་བ་ལ་བདུད་སྡིག་ཅན་ཀུན་ནས་སློང་བར་འགྱུར་རོ། །དེ་དག་བདུད་ སྡིག་ཅན་གྱིས་ཀུན་ནས་བསླངས་ནས་འདི་ལྟ་བུའི་མདོ་སྡེ་ལ་ནན་ཏན་མི་བྱེད་པ་དང༌། རབ་ཏུ་སྨོད་ཅིང་སྤོང་བའི་ལས་ལ་སྤྲོ་བར་འགྱུར་བ་དེ་ནི། བར་དུ་གཅོད་པ་བདུན་པ་སྟེ། མཁས་པས་ ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ། གཞན་ཡང་དགེ་སློང་རྣམས་དེའི་ཚེ་དེའི་དུས་ན་དམ་པའི་ཆོས་ནུབ་པའི་དུས་ཀྱི་ཚེ་འདི་ལྟ་བུའི་མདོ་སྡེ་དང༌། ཆོས་འདུལ་ བ་ལ་བརྩོན་པའི་དགེ་སློང་གཞོན་ནུ་རིང་པོ་མ་ལོན་པ་འབྱུང་བར་འགྱུར་ཏེ། དེ་དག་དེས་པ་དང༌། དད་པ་དང༌། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ ལ་ཡང་དག་པར་ཞུགས་པ་དེ་དག་འདི་ལྟ་བུའི་མདོ་སྡེ་མཉན་ཏེ་ཐོས་ནས་དགའ་བ་དང༌། མོས་པ་རྒྱ་ཆེན་པོ་ཐོབ་པར་འགྱུར་བ་དེ་དག་ལ་དེ་དག་གི་མཁན་པོ་དང༌། སློབ་དཔོན་གྱིས་ཆོས་དཀར་ པོ་གཅོད་པར་བྱེད་དེ། འདི་ལྟ་བུ་ནི། སངས་རྒྱས་ཀྱི་ཚིག་མ་ཡིན། འདི་ནི། སངས་རྒྱས་ཀྱི་བྱང་ཆུབ་མ་ཡིན། འདི་ནི། འདུལ་བ་མ་ཡིན། འདི་ནི། སྟོན་པའི་བསྟན་པ་མ་ཡིན་ནོ། །ཞེས་བཟློག་པ་ དང༌། དེ་དག་དད་པས་རབ་ཏུ་བརྟགས་ནས་འདི་ནི། བདག་ཅག་གི་དོན་འདོད་པ་ཡང་དག་པ་ཡིན་ནོ། །ཞེས་སྨྲས་ནས་སངས་རྒྱས་ཀྱི་བྱང་ཆུབ་སྤོང་བར་འགྱུར་རོ། །དགེ་སློང་གསར་བུ་དེ་དག་ དད་པ་དང༌། ཡིད་ཆེས་པས་རབ་ཏུ་བརྟགས་ནས་སྔོན་གྱི་དགེ་བ་ཀུན་འཇོམས་པར་འགྱུར། ཡང་དག་པར་གཅོད་པར་འགྱུར་རོ། །དེ་དག་དགེ་བའི་རྩ་བ་ཆད་ནས་བདུད་སྡིག་ཅན་གྱིས་ཆོས་ རྣམས་ལས་ཀུན་ནས་བསླངས་ནས་ཆོས་ཀྱིས་ཕོངས་པར་འགྱུར་བའི་ལས་མངོན་པར་འདུ་བྱེད་པར་འགྱུར་ཏེ། དེ་དག་འཆི་བའི་དུས་ཀྱིས་ཚེ་མ་དུལ་བར་འཆི་བར་འགྱུར། འཆི་བ་ཆེན་པོར་ མངོན་པར་འགྲོ་བར་འགྱུར། སེམས་ཅན་དམྱལ་བའི་ལས་མངོན་པར་འདུ་བྱེད་པར་འགྱུར་ཏེ། དེ་དག་ཀྱང་ཤཱ་རིའི་བུ། དེ་བཞིན་གཤེགས་པས་རབ་ཏུ་མཁྱེན་ཏོ། །གང་ཡོངས་སུ་སྤོང་ བར་འགྱུར་བ་དང༌། སེམས་ཅན་ཇི་སྙེད་ཡོངས་སུ་སྤོང་བར་འགྱུར་བ་དང༌། གང་འོངས་ནས་ཡོངས་སུ་སྤོང་བར་འགྱུར་བ་དང༌། སོང་ནས་ཡོངས་སུ་སྤོང་བར་འགྱུར་བ་དེ་དག་ཀྱང་དེ་བཞིན་གཤེགས་པས་ ༄༅། །རབ་ཏུ་མཁྱེན་ཏོ། །དེ་ལ་ཤཱ་རིའི་བུ། བྱང་ཆུབ་སེམས་དཔའ་བརྩོན་འགྲུས་བརྩམས་ཤིང་ཐེག་པ་ཆེན་པོ་ལ་ཞུགས་པས་འདུ་ཤེས་བཞི་བསྐྱེད་པར་བྱའོ། །བཞི་གང་ཞེ་ ན༑ བདག་འདུལ་བའི་འདུ་ཤེས་བསྐྱེད་པར་བྱ་བ་དང༌། བདག་གིས་བྱས་པ་ལ་སོ་སོར་བརྟག་པར་བྱའི། གཞན་གྱིས་བྱས་པ་ལ་མ་ཡིན་པ་དང༌། སེམས་ཅན་གཞན་ལ་སྙིང་རྗེའི་འདུ་ཤེས་ བསྐྱེད་པར་བྱ་བ་དང༌། རང་གི་སེམས་རྗེས་སུ་བསྲུང་བ་དང༌། གཞན་གྱི་སེམས་རྗེས་སུ་བསྲུང་ཞིང་དགོན་པ་ནགས་ཀྱི་བས་མཐའི་གནས་མལ་དུ་གནས་པར་བྱ་བ་སྟེ། འདུ་ཤེས་འདི་བཞི་བསྐྱེད་ པར་བྱའོ། །ཤཱ་རིའི་བུ། གཞན་ཡང་དེའི་དུས་ན་སྐྱེ་བོ་མང་པོ་ལོག་པར་ལྟ་བ་ཡོངས་སུ་འཛིན་པར་འགྱུར་རོ། །དེའི་དུས་ན་ཆོས་སྨྲ་བའི་དགེ་སློང་ཉུང་བར་འགྱུར་ཞིང་དེ་དག་ལ་ཡང་བརྙས་པར་ འགྱུར༑ བསྟི་སྟང་མི་བྱེད། བླ་མར་མི་བྱེད། རི་མོར་མི་བྱེད། མཆོད་པར་མི་བྱེད། གཙང་མར་མི་བྱེད། བསྟེན་པར་མི་བྱེད། བསྙེན་བཀུར་མི་བྱེད་དོ། །དེའི་དུས་ན་ཆོས་མ་ཡིན་པར་སྨྲ་བའི་དགེ་ སློང་དག་ལ་སྐྱེ་བོ་མང་པོ་བསྟེན་པར་འགྱུར། བསྟི་སྟང་བྱེད། བླ་མར་བྱེད། རི་མོར་བྱེད། མཆོད་པར་བྱེད་དེ་རབ་ཏུ་བཀོད་པ་དང༌། ཤིན་ཏུ་སྟོབས་དང་ལྡན་པར་འགྱུར་ཏེ། དེ་དག་མདོ་སྡེ་འདི་ ལྟ་བུ་ལ་འཕྱ་ཞིང་བསྟིང་བར་འགྱུར་རོ། །དེ་ལ་ཤཱ་རིའི་བུ། གང་མི་འདོད་པ་དེ་དག་ནི། མི་འདོད་པ་ཉིད་དུ་འགྱུར་རོ། །གང་འདོད་པ་དེ་དག་ཀྱང་འདོད་པ་ཉིད་དུ་འགྱུར་རོ། །གང་འདི་ལྟ་བུའི་ མདོ་སྡེ་འདི་ལ་འཇུག་པར་འགྱུར་བ་དེ་དག་ནི། སྐྱེ་བོ་མང་པོའི་དོན་དུ་འཆད་པར་མི་འགྱུར་ཏེ། དེ་ནི། བར་དུ་གཅོད་པ་བརྒྱད་པ་སྟེ། མཁས་པ་དག་གིས་ཁོང་དུ་ཆུད་པར་བྱའི། དེའི་དབང་དུ་ འགྲོ་བར་མི་བྱའོ། །ཤཱ་རིའི་བུ། གཞན་ཡང་དེའི་ཚེ་དགེ་སློང་འདོད་པའི་ཟིལ་གྱིས་ནོན་པ་རྐུ་བ་མང་བ་དག་འབྱུང་སྟེ། དེ་དག་ཆོས་གསུམ་ལ་བརྩོན་པར་འགྱུར་རོ། །གསུམ་གང་ཞེ་ན། ལྷུང་ བཟེད་དང༌། ཆོས་གོས་ཀུན་ཏུ་ཚོལ་བ་དང༌། བཟའ་བ་དང་བཏུང་བ་ལ་ཆགས་པ་དང༌། འཇིག་རྟེན་རྒྱང་ཕན་པ་ཚོལ་བ་ལ་བརྩོན་པར་འགྱུར་བ་སྟེ། འདི་གསུམ་ལ་བརྩོན་པར་འགྱུར་བ་དེ་ནི། བར་དུ་གཅོད་པ་དགུ་པ་སྟེ། མཁས་པ་དག་གིས་ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །ཤཱ་རིའི་བུ། གཞན་ཡང་དེའི་ཚེ་དེའི་དུས་ན་ཐེག་པ་ཆེན་པོ་ལ་ཡང་དག་པར་ཞུགས་ པ་འདི་ལྟ་བུའི་མདོ་སྡེ་ལ་རབ་ཏུ་བརྩོན་པ་དག་འབྱུང་སྟེ། བརྩོན་འགྲུས་རབ་ཏུ་རྩོམ་པ་དང༌། འཛིན་པ་དང༌། ཡི་གེར་བྲིས་ནས་འཆང་བ་དང༌། ཀློག་པ་དང༌། ཀུན་ཆུབ་པར་བྱེད་པ་དང༌། གཞན་དག་ལ་ཡང་གོ་བར་བྱེད་ཅིང་རྒྱ་ཆེར་ཡང་དག་པར་རབ་ཏུ་སྟོན་པར་འགྱུར་བ་དེ་དག་བདུད་ཀྱིས་བྱིན་གྱིས་བརླབས་ནས་ལས་ཀྱི་སྒྲིབ་པས་བསྒྲིབས་པར་འགྱུར། ཉོན་མོངས་པའི་སྒྲིབ་ པས་བསྒྲིབས་པར་འགྱུར་ཏེ། དེ་དག་ལས་ལ་དགའ་བར་འགྱུར། ལས་ལ་དགའ་ཞིང་ལས་ལ་དགའ་བའི་སྦྱོར་བ་ལ་བརྩོན་པར་འགྱུར། སྨྲ་བ་ལ་དགའ་བར་འགྱུར། སྨྲ་བ་ལ་དགའ་ཞིང་ ༄༅། །སྨྲ་བ་ལ་དགའ་བའི་སྦྱོར་བ་ལ་བརྩོན་པར་འགྱུར། གཉིད་ལ་དགའ་བར་འགྱུར། གཉིད་ལ་དགའ་ཞིང་གཉིད་ལ་དགའ་བའི་སྦྱོར་བ་ལ་བརྩོན་པར་འགྱུར། འདུ་ འཛི་ལ་དགའ་བར་འགྱུར། འདུ་འཛི་ལ་དགའ་ཞིང་འདུ་འཛི་ལ་དགའ་བའི་སྦྱོར་བ་ལ་བརྩོན་པར་འགྱུར་ཏེ། དེ་དག་འདི་ལྟ་བུའི་མདོ་སྡེ་འདི་འཛིན་པར་མི་འགྱུར། འཆང་བར་མི་འགྱུར། ཀློག་པར་མི་འགྱུར། ཀུན་ཆུབ་པར་བྱེད་པར་མི་འགྱུར། ཕ་རོལ་ལ་གོ་བར་བྱེད་པར་མི་འགྱུར། ཕ་རོལ་ལ་རྒྱ་ཆེར་ཡང་དག་པར་རབ་ཏུ་སྟོན་པར་མི་འགྱུར་ཏེ། ཤཱ་རིའི་བུ། དེ་བཞིན་ གཤེགས་པའི་བསྟན་པའི་བར་དུ་གཅོད་པར་འགྱུར་བ་དང༌། དེ་བཞིན་གཤེགས་པའི་བསྟན་པ་རབ་ཏུ་འཇིག་པར་བྱེད་པ་ནི། དགེ་སློང་སྡིག་ཅན་ལས་གཞན་གང་ཡང་མེད་དོ། །ཤཱ་ རིའི་བུ༑ དེ་ནི། དེའི་དུས་ན་བར་དུ་གཅོད་པར་འགྱུར་བ་བཅུ་པ་སྟེ། ཤཱ་རིའི་བུ། མཁས་པ་དག་གིས་དེ་ཁོང་དུ་ཆུད་པར་བྱའི། དེའི་དབང་དུ་འགྲོ་བར་མི་བྱའོ། །དེ་ནས་བཅོམ་ལྡན་འདས་ ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །དེ་ནི་བདུད་ཀྱི་ལས་ཀྱིས་ནི། །བར་དུ་གཅོད་པ་མང་པོ་འབྱུང༌། །དཀར་པོའི་ཆོས་ནི་སྤོང་བར་འགྱུར། །དབེན་པ་དག་ནི་འདོད་པ་མེད། ཤེས་རབ་ཆུང་ཞིང་བློ་ངན་པས། །དམ་པའི་ཆོས་ལ་མི་གནས་ཤིང༌། །ཆོས་མ་ཡིན་པ་སྤྱད་བྱས་ཏེ། །དེ་དག་ངན་འགྲོ་སྤྱོད་ཡུལ་འགྱུར། །དེ་ནི་འཆི་བའི་དུས་ཀྱི་ཚེ། །བླ་མ་མཁན་པོ་ སློབ་དཔོན་རྣམས། །མགོན་དང་སྐྱབས་ནི་བྱེད་འགྱུར་ཡང༌། །དེ་དག་ངན་འགྲོར་འགྲོ་བར་འགྱུར། །བདག་གིས་བསྐལ་པ་བྱེ་སྟོང་དུ། །སྡུག་བསྔལ་འཇིག་རྟེན་དོན་སྤྱད་ན། །མེ་གསུམ་དག་གིས་ ཚིག་པ་ཡི། །སེམས་ཅན་ཇི་ལྟར་འགྲོ་བར་འགྱུར། །བདག་གིས་བྱང་ཆུབ་མཆོག་ཐོབ་སྟེ། །ཚངས་པའི་འཁོར་ལོ་རབ་བསྐོར་བས། །ལྷ་དང་བཅས་པའི་འཇིག་རྟེན་ན། །བདག་མཚུངས་མེད་ན་ ག་ལ་ལྷག །འཇིག་རྟེན་འདི་ན་རབ་དཀོན་པའི། །ང་ལ་བཏང་སྙོམས་དེ་དག་བྱེད། །ཕ་རོལ་ཕྱོགས་ནི་བསྟེན་པ་དང༌། །དེ་དག་རབ་ཏུ་སྡུག་བསྔལ་འགྱུར། །བྱང་ཆུབ་ཀྱི་ནི་ལམ་རྒྱུ་ཡི། །སྦྱིན་པ་ལས་ ནི་ཟློག་པར་བྱེད། །སངས་རྒྱས་བསྟན་དང་རབ་ལྡན་པ། །ལམ་ངག་ལས་ཀྱང་རྨོངས་པར་བྱེད། །འདི་འདྲ་པ་ཡི་ཆོས་ཐོས་ནས། །གང་དུ་སྟོང་པ་ཉིད་བསྔགས་ཤིང༌། །ནན་ཏན་ལ་ནི་གང་གནས་པ། ། བར་དུ་གཅོད་པ་འབྱུང་བར་འགྱུར། །འདི་མཆོག་ཡང་དག་འདི་ཡིན་ཞེས། །ཡང་དག་མིན་ལ་ཡང་དག་འཛིན། །དམ་པའི་ཆོས་རྣམས་སྨོད་པ་ལ། །བར་དུ་གཅོད་པ་མི་འབྱུང་ངོ༌། །སངས་རྒྱས་ལ་ ནི་དགའ་བ་དང༌། །གུས་པ་བརྟན་པར་གང་གྱུར་པ། །དེ་དག་འདི་འདྲའི་ཆོས་ཐོས་ནས། །བཟང་པོ་རྣམས་ནི་དགའ་བར་འགྱུར། །དགའ་བ་སྐྱེས་པར་རིག་ནས་ནི། །བདུད་རྣམས་ཡིད་ནི་མི་བདེ་ནས། དེ་དག་དེ་ལ་བར་ཆད་རྣམས། །རབ་ཏུ་འཇིག་པ་བྱེད་པར་འགྱུར། །དགེ་སློང་ཆ་བྱད་བསྒྱུར་བྱས་ནས། །འདི་ནི་བྱང་ཆུབ་ལམ་མིན་ན། །ཅི་ཕྱིར་འདི་ལ་ཡོངས་རྒྱུག་ཅེས། །དེ་ནི་རབ་ཏུ་འགྱོད་པར་བྱེད། ། ༄༅། །མདོ་སྡེ་འདི་ལ་རྒྱུ་ཡོད་དེ། །སྙིང་པོ་བརྟན་པར་རབ་གནས་ལ། །འཁྲུག་པར་འགྱུར་བ་བསྐྱེད་བྱས་ནས། །ཕྱིས་ནི་རབ་ཏུ་སྤོང་བར་འགྱུར། །བདུད་ཀྱིས་ཀུན་ནས་ བསླངས་གྱུར་ནས། །ཇི་ལྟར་བདེ་བ་བཞིན་དུ་བཟུང༌། །འདི་ནི་ཆོས་མིན་ཞེས་སྨྲས་ནས། །དེས་ནི་མྱ་ངན་འདས་པ་སྤངས། །དེ་དག་སྟོན་པ་བཏང་ནས་ནི། །ཆོས་ལ་དོན་དུ་གཉེར་བ་མེད། །བདག་ལ་ སྲེད་པ་བསྐྱེད་བྱས་ནས། །སེམས་ཅན་དམྱལ་བར་མྱུར་དུ་འགྲོ་།གང་དག་ཆུང་དུ་བྱུང་བ་ནི། །སྟོང་པའི་ཆོས་རྣམས་མི་གཉེར་ཏེ། །ཡུལ་ནི་སོ་སོར་གནས་གྱུར་ནས། །མི་འདུམ་པ་དང་ལྡན་ པར་འགྱུར། །ཆོས་རྣམས་ཀྱི་ནི་མཆོག་འདི་ཡང༌། །མཉན་ནས་འགལ་བ་སྨྲ་བར་བྱེད། །དངངས་ཤིང་སྐྲག་ནས་རབ་འབྲོས་པ། །ཕྱི་མའི་དུས་ན་བྱེད་པར་འགྱུར། །མི་ཆུང་བ་དག་གཞན་རྣམས་ ནི༑ ༑སྟོན་པར་བྱེད་པ་མི་འབྱུང་སྟེ། །ཡང་དག་ཆུང་ངུར་གྱུར་པ་རྣམས། །དེ་དག་རྣམས་ཀྱང་བཏང་སྙོམས་འགྱུར། །འཇིག་རྟེན་མགོན་གྱི་བསྟན་པ་ལ། །འདི་ལྟ་བུ་ཡི་ཆོས་འདི་ཡི། །བར་དུ་ གཅོད་པ་མང་འབྱུང་སྟེ། །མེ་ལྕེ་ཅི་འདྲ་བཞིན་དུ་འགྱུར། །དེ་ན་རབ་ཏུ་ངེས་པ་རྣམས། །སྲོག་བོར་དགོན་པར་གནས་པར་འགྱུར། །ཆོས་འདི་དག་ནི་བསྒོམས་བྱས་ན། །མྱུར་དུ་བདེ་འགྲོར་ འགྲོ་བར་འགྱུར། །དེ་ལ་ཤཱ་རིའི་བུ། ཐེག་པ་ཆེན་པོ་ལ་ཡང་དག་པར་ཞུགས་པས། འདི་ལྟ་བུའི་མི་བཟོད་པ་དང༌། མི་བསྔགས་པ་དང༌། དམ་པའི་ཆོས་རབ་ཏུ་འཇིག་པ་མཐོང་ནས་ བརྩོན་འགྲུས་ཆེན་པོའི་སྟོབས་ཀྱི་ཤུགས་རབ་ཏུ་བསྐྱེད་དེ། འདི་ལྟ་སྟེ། འདི་ལྟ་བུའི་མདོ་སྡེ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་རབ་ཏུ་མཉན་པར་བྱ། གཟུང་བར་བྱ། ཡི་ གེར་བྲིས་ནས་བཅད་བར་བྱ། གཞན་ལ་ཡང་གོ་བར་བྱ། རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །དེས་ཀྱང་འདུ་ཤེས་བཞི་བསྐྱེད་པར་བྱ་སྟེ། བཞི་གང་ཞེ་ན། བདག་གི་ཕའི་ནོར་གྱི་ཕུང་ པོ་འདི་རབ་ཏུ་འཇིག་པར་འགྱུར་ཏེ། གང་གི་ཕྱིར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེས་བསྐལ་པ་བྱེ་བ་ཁྲག་ཁྲིག་བརྒྱ་ སྟོང་ཕྲག་གྲངས་མེད་པ་ནས་བཟུང་སྟེ་དཀའ་བ་སྤྱད་པ་ཡིན་ན། དེའི་ཕྱིར་རབ་ཏུ་འཇིག་པར་འགྱུར་བ་གཟུང་བར་བྱ། ཀུན་ནས་རབ་ཏུ་གཟུང་བར་བྱ་སྟེ། ཆུད་ཟ་བར་མི་བྱའོ། །བརྩོན་འགྲུས་བརྩམ་ མོ༑ ༑འདི་ལྟ་སྟེ། དཔེར་ན། ཤཱ་རིའི་བུ། སྐྱེས་བུ་ཞིག་ལ་བུ་གཅིག་ཅིག་ཡོད་ལ་བྱམས་སྡུག་ཡིད་དུ་འོང་ཞིང་མི་མཐུན་པ་མེད་པར་སྣང་བ་དེ་གཡངས་ཆེན་པོར་ལྷུང་བར་གྱུར་པ་དང༌། དེས་ དེ་ལག་གིས་བཟུང་སྟེ་སེམས་ཅན་དམྱལ་བའི་གཡངས་འདིར་ལྷུང་བར་མ་གྱུར་ཅིག །ཅེས་འཛིན། རབ་ཏུ་འཛིན་པ་དེ་བཞིན་དུ་ཤཱ་རིའི་བུ། གང་སྐྱེས་བུ་དམ་པ་དེ་དག་ང་ལ་དད་ཅིང་ཆོས་ དཀོན་མཆོག་བླ་ན་མེད་པ་འདི་ཡང་ཡོངས་སུ་མི་གཏོང་ཞིང༌། མྱ་ངན་ལས་འདས་པ་ལ་ཡང་རེ་བར་འགྱུར་བ་དེ་དག་དེའི་དུས་ན་དམ་པའི་ཆོས་ཡོངས་སུ་འཛིན་པར་འགྱུར་བས་ངས་དེ་དག་ ༄༅། །ལ་བྱང་ཆུབ་མཆོག་འདི་གཏད་པར་བྱའོ། །འདི་ལྟ་སྟེ། དཔེར་ན། ཤཱ་རིའི་བུ། གཡུལ་ཆེན་པོའི་ནང་ན་གང་སྐྱེ་བོ་མང་པོ་བསྲུང་བའི་ཕྱིར་དམག་གི་མདུན་ན་ འདུག་པར་འགྱུར་བའི་སེམས་ཅན་དེ་དག་ནི། ཉུང་བར་འགྱུར་རོ། །ཡང་ཤཱ་རིའི་བུ། གང་དཔའ་བ། འོས་སུ་གྱུར་པར་བྱས་པ། གཡུལ་ལས་རྣམ་པར་རྒྱལ་བ་དེ་དག་དེ་ན་གཡུལ་མི་བཟད་ པ་ཆེན་པོའི་དུས་ན་སྐྱེ་བོ་མང་པོའི་ཕྱིར་དམག་གི་མདུན་ན་འདུག་པ་དེ་བཞིན་དུ་ཤཱ་རིའི་བུ། དེའི་ཚེ་དམ་པའི་ཆོས་རབ་ཏུ་འཇིག་པར་ཉེ་བར་གནས་པ་ན། གང་ལྷག་པའི་བསམ་པས་ ཡོངས་སུ་མྱ་ངན་ལས་འདས་པ་འདོད་པ། དཔའ་བ། བརྩོན་འགྲུས་བརྟན་པ། གོ་ཆ་སྲ་བ་བགོས་པ་དེ་དག་བརྩོན་འགྲུས་ཆེན་པོའི་སྟོབས་བསྐྱེད་དེ། བདུད་ཀྱི་དམག་ལས་རྒྱལ་ཞིང་འདི་ ལྟ་བུའི་ཆོས་དཀོན་མཆོག་འདི་ལས་སྙིང་པོ་ཅུང་ཟད་ཙམ་ལེན་པར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ། ཚིག་བཞི་པའི་ཚིགས་སུ་བཅད་པ་གཅིག་ཙམ་ཡོངས་སུ་སྤོང་བ་ལ་ཡང་ རྗེས་སུ་ཡི་རང་བར་མི་བྱེད་ཅིང་རྩོད་པར་མི་བྱེད་ལ། འདི་ནི། སངས་རྒྱས་ཀྱིས་བཤད་པ་ཡང་དག་པའོ། །ཞེས་སྐྱེ་བོ་མང་པོ་ལ་སྒྲོག་ཅིང་ཤེས་པར་བྱེད་པ་དེ་ནི། འདས་པ་དང༌། མ་འོངས་ པ་དང༌། ད་ལྟར་གྱི་སངས་རྒྱས་བཅོམ་ལྡན་འདས་རྣམས་ཀྱིས་ལེགས་པར་བཤད་པ་ལ་རྗེས་སུ་ཡི་རང་བ་སྟེ། ཤཱ་རིའི་བུ། དེ་ལྟ་བུའི་གང་ཟག་རྣམས་ལ་བསོད་ནམས་ཀྱི་རྣམ་པར་ སྨིན་པ་ཆུང་ངོ༌། །ཞེས་ང་མི་འཆད་དེ། ནམ་མཁའ་དང་མཉམ་པའི་བསོད་ནམས་ཀྱི་ཕུང་པོ་དང་ལྡན་པར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ། སྐྱེས་བུ་དམ་པ་དེ་ལྟ་བུ་ནི། ཤིན་ཏུ་དཀོན་ ཏེ༑ སྐྱེས་བུ་མཆོག་ཅེས་བརྗོད་དོ། །སྐྱེས་བུ་རབ་ཅེས་བརྗོད་དོ། །སྐྱེས་བུ་དཔའ་བོ་ཞེས་བརྗོད་དོ། །སྐྱེས་བུ་ཆེན་པོ་ཞེས་བརྗོད་དོ། །དེ་ནི། དེ་བཞིན་གཤེགས་པའི་ཆོས་ཀྱི་ཕྱོགས་སོ། །དེ་དག་སྡེར་ མི་སྨྲ་མི་འཁྲུག་གོ །དེ་དག་ནན་ཏན་སྙིང་པོར་བྱེད་པ་སྟེ། ཤཱ་རིའི་བུ། འཆི་བའི་མཐའི་བར་དུ་ནན་ཏན་སྙིང་པོར་བྱའོ། །འཆི་བའི་མཐའི་བར་དུ་དམ་པའི་ཆོས་ཡོངས་སུ་གཟུང་བར་བྱའོ། །འཆི་ བའི་མཐའི་བར་དུ་སྟོང་པ་ཉིད་ལ་མོས་པར་བྱའོ། །ཤཱ་རིའི་བུ། ཆོས་དེ་བཞི་དང་ལྡན་ན། དེའི་ཚེ་དེའི་དུས་ན་དམ་པའི་ཆོས་རབ་ཏུ་རྣམ་པར་འཇིག་པའི་དུས། དམ་པའི་ཆོས་ནུབ་པར་འགྱུར་བའི་དུས། ཚུལ་ཁྲིམས་འཆལ་བའི་ཕྱོགས་མང་བའི་དུས། འཇིག་རྟེན་རྒྱང་ཕན་པའི་གསང་ཚིག་ཀུན་ཏུ་ཚོལ་བ་མང་བའི་དུས། བསྐལ་པ་སྙིགས་མའི་དུས། སེམས་ཅན་སྙིགས་མའི་དུས། ཚེ་སྙིགས་ མའི་དུས། ཉོན་མོངས་པ་སྙིགས་མའི་དུས། ལྟ་བ་སྙིགས་མའི་དུས། དུས་གསུམ་ལ་གནས་པར་བྱ། འཐབ་མོ་ཉེ་བར་ཞི་བ་ལ་གནས་པར་བྱ། སངས་རྒྱས་ཀྱི་བྱང་ཆུབ་དང་འབྲལ་བར་མི་ འགྱུར་བར་བྱ་སྟེ། ཤཱ་རིའི་བུ། དུས་འདི་གསུམ་ལ་རབ་ཏུ་གནས་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །མཆོག་གི་ཆོས་དང་འབྲལ་བར་ ༄༅། །མི་འགྱུར་ཏེ། །རྒ་ཤི་ཟད་པར་བྱེད་དང་ལྡན་པར་འགྱུར། །དེ་ལ་ཕྱིར་ཞིང་ཉམས་པར་མི་འགྱུར་ཏེ། །བདག་དོན་སྐྱེ་མང་དོན་ཕན་ལྡན་པར་འགྱུར། །གང་དག་ངས་ བསྟན་ཆོས་ཐོས་ནས། །ཚུལ་བཞིན་གནས་པར་འགྱུར་བ་དག །དེ་ཡི་སྟོན་པ་ང་ཡིན་ཏེ། །དེ་དག་ང་ཡི་ཉན་ཐོས་ཡིན། །གང་དག་ཆོས་རྣམས་ཐོས་གྱུར་ནས། །ཚུལ་བཞིན་གནས་པ་མ་ཡིན་པ། ། དེ་དག་ངན་འགྲོར་འགྲོ་འགྱུར་ཏེ། །ཇི་ལྟར་རྒྱ་མཚོར་ཤིང་རྟ་བཞིན། །བསྐལ་པ་བྱེ་བ་ཕྲག་སྟོང་དུ། །སངས་རྒྱས་འབྱུང་བ་རབ་དཀའ་བ། །རྙེད་ཀྱང་མཉེས་པར་མི་བྱེད་པ། །དེ་དག་རྣམས་ཀྱང་བདུད་ དབང་སོང༌།། །།བམ་པོ་བཅུ་གསུམ་པ། ཤཱ་རིའི་བུ། སྔོན་བྱུང་བ་འདས་པའི་དུས་ན་བསྐལ་པ་དགུ་བཅུ་རྩ་གཅིག་ཏུ་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་རྣམ་པར་གཟིགས་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་ དང༌། མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བ་དེའི་གསུང་རབ་ལ་སྡིག་པའི་དགེ་སློང་དྲུག་འདི་ལྟ་སྟེ། ཤིན་ཏུ་མཐོང་ཞེས་བྱ་བ་དང༌། རྙེད་སླ་བ་དང༌། དགའ་ བྱེད་དང༌། དགེ་བྱེད་དང༌། གྲགས་པ་དང༌། མེས་བྱིན་ཞེས་བྱ་བ་རྣམས་བྱུང་སྟེ། བདག་ཏུ་སྨྲ་བ། གང་ཟག་ཏུ་སྨྲ་བ། ཆད་པར་སྨྲ་བ། རྟགས་པར་སྨྲ་བ་རྣམས་འགྲོགས་བསྡོངས་ཤིང་ཕན་ ཚུན་དུ་ཡིད་རྟོན་ཅིང་གནས་པ་དེ་དག་གིས་ཁྲིམས་འདི་ལྟ་བུ་ཞིག་བྱས་ཏེ། བདག་ཅག་རེ་རེས་ཀྱང་ཁྱིམ་བརྒྱ་བརྒྱ་གཟུང་བར་བྱའོ། །ཁྱིམ་བརྒྱ་ཡོངས་སུ་རྫོགས་པ་ལ་དེར་འོངས་ཏེ་གཅིག་ལ་ གཅིག་བསྙད་པར་བྱའོ། །ཁྱིམ་ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་དང༌། བརྒྱར་མ་གྲུབ་པ་ལ་བསྙད་པར་བྱའོ། །ཞེས་དེ་ལྟ་བུའི་ཁྲིམས་བྱས་ནས་གྲོང་དང༌། གྲོང་ཁྱེར་དང༌། གྲོང་ རྡལ་དང༌། ཡུལ་དང༌། ཕོ་བྲང་འཁོར་དུ་དོང་ནས་དེ་དག་ཐམས་ཅད་ཁྱིམ་གཅིག་ཏུ་དོང་ངོ༌། །ཁྱིམ་གཅིག་ཏུ་དོང་ནས་གཅིག་ལ་གཅིག་ཐོག་མ་ཉིད་དུ་སངས་རྒྱས་ལ་མི་སྙན་པ་ཟེར་རོ། །སངས་རྒྱས་ ལ་མི་སྙན་པ་ཇི་སྐད་ཟེར་ཞེ་ན། ཁྱིམ་དེར་ཕྱིན་ནས་འདི་སྐད་ཅེས་སྨྲས་ཏེ། བདག་ཡོད་དོ། །སེམས་ཅན་ཡོད་དོ། །སྲོག་ཡོད་དོ། །གང་ཟག་ཡོད་དོ། །གལ་ཏེ་བདག་མེད་དུ་ཟིན་ན། འོང་བ་སུ། འགྲོ་བ་ སུ། འགྲང་བ་སུ། འདུག་པ་སུ། ཉལ་བ་སུ། སྨྲ་བ་སུ། མི་སྨྲ་བར་འགྱུར་བ་སུ། སྦྱིན་པ་སྦྱིན་པར་བྱེད་པ་སུ། ལེན་པ་སུ། ཟ་བ་སུ། བདེ་བ་དང༌། སྡུག་བསྔལ་གྱི་ཚོར་བ་སོ་སོར་ཡང་དག་ པར་མྱོང་བ་སུ། གང་ཁྱོད་ལ་འདི་སྐད་དུ་བདག་མེད། སེམས་ཅན་མེད། སྲོག་མེད། གང་ཟག་མེད་ཅེས་སྨྲ་བ་དེ་ནི། ཁྱེད་ཀྱི་མི་དགེ་བའི་བཤེས་གཉེན་ཏེ། དགེ་བའི་བཤེས་གཉེན་མ་ཡིན་ ནོ༑ ༑ཞེས་ཟེར་བ་དང༌། དེ་ལ་ཤཱ་རིའི་བུ། བུད་མེད་དང༌། སྐྱེས་པ་དང༌། ཁྱེའུ་དང༌། བུ་མོ་དག་ན་རེ། གང་དགེ་བའི་བཤེས་གཉེན་མ་ཡིན་པ་དེ་ནི། སྡིག་པའི་གྲོགས་པོའོ། །དེའི་ཕྱིར་སྡིག་ ༄༅། །པའི་གྲོགས་པོར་གྱུར་པ་དེ་དགེ་བའི་བཤེས་གཉེན་མ་ཡིན་ནོ། །ཞེས་དེ་སྐད་སྨྲས་པ་དང༌། དེ་དག་གིས་དེ་དག་ལ་ཁྱེད་དེ་ལྟར་ཤེས་པ་ནི། མཁས་པ་ཡིན་ཏེ། སྡིག་ པའི་གྲོགས་པོ་གང་ཡིན་པ་དེ་ནི། དགེ་བའི་བཤེས་གཉེན་མ་ཡིན་ནོ། །དེ་ཅིའི་ཕྱིར་གང་ཁྱེད་ལ་འདི་སྐད་དུ་བདག་མེད། སེམས་ཅན་མེད། སྲོག་མེད། གང་ཟག་མེད་ཅེས་ཟེར་བ་ལ། བརྟེན་པར་མི་བྱ། འགྲོགས་པར་མི་བྱ། བསྙེན་བཀུར་མི་བྱའོ། །ཞེས་སྨྲས་ཏེ། དགེ་སློང་དེ་དག་རེ་རེས་ཀྱང་ཟླ་བ་ཕྱེད་ཀྱིས་ཁྱིམ་ལྔ་བརྒྱ་ལྔ་བརྒྱ་ལོག་པར་འཛིན་པ་ལ་བཙུད་དོ། །ཤཱ་རིའི་ བུ༑ དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཉན་ཐོས་དགེ་སློང་དགྲ་བཅོམ་པ་དྲི་མ་དང་ཉོན་མོངས་པ་ བསལ་བ་དག་གྲོང་དུ་དོང་སྟེ་ཕྱིན་པ་དང༌། བུད་མེད་དང༌། སྐྱེས་པ་དང༌། ཁྱེའུ་དང༌། བུ་མོ་དག་གཤེ་ཤིང་མི་སྙན་པ་ཟེར། ཚིག་ངན་པ་རྩུབ་པོས་སྤྱོས་ཏེ་ཚིགས་སུ་བཅད་པ་འདི་སྐད་ཟེར་ རོ༑ ༑ཁྱེད་ནི་ལམ་ལ་རྨོངས་པ་སྟེ། །ཆོས་ཤེས་པ་ནི་བྱེད་མ་ཡིན། །ཁྱེད་ནི་ཆོས་ལས་ཉམས་པས་ན། །ཐམས་ཅད་སེམས་ཅན་དམྱལ་བར་འགྲོ། །དེ་ལྟར་དགེ་སློང་དེ་དག་ལ་ཚིགས་སུ་བཅད་ བའི་དབྱངས་ཀྱིས་གཤེ་ཞིང་མི་སྙན་པ་སྨྲས་པ་དང༌། སངས་རྒྱས་ཀྱི་བསྔགས་པ་བརྗོད་ཅིང་སླར་ཚིགས་སུ་བཅད་དེ་སྨྲས་པ། འདུས་བྱས་ཐམས་ཅད་མི་རྟག་ཅིང༌། །ཆོས་ཀུན་ལ་ནི་བདག་མེད་ དེ༑ ༑རྟག་མེད་ཐེར་ཟུག་མེད་དོ་ཞེས། །སངས་རྒྱས་ཀྱིས་ནི་ཆོས་བཤད་དོ། །གསོ་བ་དང་གསོག་དང་སྟོང་པ་དང༌། །འདུས་བྱས་ཐམས་ཅད་སྙིང་པོ་མེད། །བརྫུན་པ་སླུ་བའི་ཆོས་ཅན་ཏེ། །བྱིས་པ་རྟག་ཏུ་འདྲིད་ པའོ༑ ༑དེ་བཞིན་གཤེགས་པས་བདག་མེད་སེམས་ཅན་མེད། །སྲོག་མེད་གང་ཟག་མེད་པར་ཆོས་བསྟན་ཏོ། །ཞེས་ཚིགས་སུ་བཅད་དེ་སྨྲས་སོ། །སྦྱིན་དང་ཟས་དང་ལེན་པ་དང༌། །ཚོར་བ་རྒྱ་ཆེན་ མྱོང་གྱུར་ལ། །དེ་དག་ངན་འགྲོར་འགྲོ་བར་འགྱུར། །བདག་མེད་པར་ནི་གང་སྨྲ་བ། །དེ་ལ་ཤཱ་རིའི་བུ། གང་སྐྱེས་པ་དང༌། བུད་མེད་དང༌། ཁྱེའུ་དང༌། བུ་མོ་སྐྱེས་བུ་དམ་པ་མ་ཡིན་པའི་ཚིག་བཞིན་དུ་ བྱེད་པ་དེ་དག་ལས་སྲོག་ཆགས་དྲུག་ཁྲི་བརྒྱད་སྟོང་དེ་ནས་ཤི་འཕོས་ནས་མནར་མེད་པའི་སེམས་ཅན་དམྱལ་བ་ཆེན་པོར་སྐྱེས་ཏེ། དེ་ན་དེ་དག་གི་ལུས་གཟུགས་འདི་ལྟ་སྟེ། ཉ་ལྟ་བུ་མངོན་ པར་གྲུབ་བོ། །མགོ་ནི། འདི་ལྟ་བུར་འདི་ལྟ་སྟེ། མིའི་ལྟ་བུར་གྱུར་པའོ། །འདི་ལྟ་བུའི་ལྕེ་མངོན་པར་གྲུབ་པ་ནི། འདི་ལྟ་སྟེ། དཔེར་ན། ཆང་ཚོང་གི་རེ་ལྡེ་ཆེན་པོ་ལྟ་བུ་སྟེ། དེ་དག་གི་ལྕེ་ དེ་ལ་ལྕགས་ཀྱི་གཤོལ་མང་པོས་རབ་ཏུ་རྨོས་སོ། །དེ་དག་གི་ལུས་རེ་རེ་ལ་ཡང་མདུང་ཐུང་བརྒྱ་བརྒྱས་དམྱལ་ཏོ། །སྟེང་གི་བར་སྣང་ལས་ཀྱང་ལྕགས་ཀྱི་ཐུ་ལུམ་ཀུན་ཏུ་འབར་བ། རབ་ཏུ་འབར་བ། ཀུན་ཏུ་རབ་ཏུ་མཆེད་ཅིང་འབར་བ། འབར་བ་དང་བཅས་པར་གྱུར་པ། །འབར་བ་གཅིག་ཏུ་གྱུར་པ་ལུས་ཀྱི་སྟེང་དུ་འབབ་བོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་ ༄༅། །གསུངས་སོ། །གློག་ལྕེ་རབ་ཏུ་འབར་བའི་མདའ། །བརྒྱ་ཕྲག་མང་པོ་སྟོང་རྣམས་ནི། །རྟག་ཏུ་ལུས་ལ་རབ་འབབ་སྟེ། །མི་དག་ན་ཚ་མྱོང་བར་བྱེད། །ཐམས་ཅད་ལུས་ ནི་ཀུན་ཏུ་འབར། །མེ་ལྕེ་འབར་བར་བསྙེན་པ་དཀའ། །དཔག་ཚད་བརྒྱ་སྙེད་གང་བ་ཡི། །ལུས་ལས་མེ་ལྕེ་རབ་ཏུ་འབྱུང༌། །རེ་རེ་དག་གི་ལྕེ་ལ་ཡང༌། །དེ་སྙེད་གཤོལ་གྱིས་རྨོ་བར་བྱེད། ། ཀུན་གྱི་ལྕེ་ནི་དྲལ་བས་ན། །སྡུག་བསྔལ་ཚོར་བ་མྱོང་བར་འགྱུར། །སྡིག་པའི་གྲོགས་པོ་བསྟེན་བྱས་པས། །དེ་དག་ཕྱི་ཕྱིར་འབྱུང་བར་འགྱུར། །ཚུལ་ཁྲིམས་ལྡན་པ་རྣམས་སྤངས་ པས༑ ༑མྱུར་དུ་ངན་འགྲོར་འགྲོ་བར་འགྱུར། །ཡང་ཤཱ་རིའི་བུ། སྐྱེས་བུ་དམ་པ་མ་ཡིན་པ་དྲུག་པོ་དེ་དག་དེ་ནས་ཤི་འཕོས་ཏེ་མནར་མེད་པའི་སེམས་ཅན་དམྱལ་བ་ཆེན་པོར་སྐྱེས་ནས་དེ་དག་ རེ་རེའི་ལུས་ཀྱང་དཔག་ཚད་བརྒྱ་བརྒྱ་པར་མངོན་པར་གྲུབ་པར་གྱུར་ཏེ། ལུས་རེ་རེ་ལ་ཡང་ཁ་སྟོང་སྟོང་མངོན་པར་གྲུབ་པར་གྱུར་ཏོ། །ཁ་རེ་ལ་ཡང་ལྕེ་གཉིས་གཉིས་ཆུ་ཞེང་དུ་ དཔག་ཚད་བཞི་ཙམ་ཡོད་པ་མངོན་པར་གྲུབ་པར་གྱུར་ཏོ། །ལྕེ་རེ་རེ་ལ་ཡང་གཤོལ་ལྔ་བརྒྱ་ལྔ་བརྒྱ་མངོན་པར་གྲུབ་པར་གྱུར་ཏེ། དེ་དག་ལྕགས་ཀྱི་ཐུ་ལུམ་དང༌། ལྕགས་ཀྱི་གཤོལ་གྱི་ རྨོས་ནས་དེ་དག་གི་ལྕེ་བཤགས་ནས་ཨ་ན་ཞེས་འཛར་ཀྱང་མི་ནུས་སོ། །དེ་དག་རེ་རེའི་མགོ་ལ་ཡང་སེམས་ཅན་དམྱལ་བའི་སྲུང་མ་བྱེ་བ་ཕྲག་སྟོང་གནས་ཤིང་མགུལ་བ་གཅོད་པར་བྱེད་ དོ༑ ༑དེ་ན་དེ་དག་གཅིག་གི་ཚེ་ཚད་ཀྱང་ལོ་བྱེ་བ་ཕྲག་སྟོང་དུ་གྱུར་ཏོ། །དེ་བཞིན་དུ་སེམས་ཅན་དམྱལ་བ་ཆེན་པོ་གཞན་དང་གཞན་དག་ཏུ་ཚོར་བ་རྣམ་པ་མང་པོ་ཡང་མྱོང་བར་གྱུར་ཏོ། །དེ་ཅིའི་ ཕྱིར་ཞེ་ན། དེ་ལྟར་སངས་རྒྱས་ཀྱི་བསྟན་པ་ལ་མི་བསྔགས་པ་བརྗོད་པ་བྱས་པའི་ཕྱིར་རོ། །ཡང་དེའི་དུས་ན་ཁྱིམ་བདག་བདེ་བ་ཞེས་བྱ་བ་ཕྱུག་ཅིང་ནོར་ཆེ་བ། ལོངས་སྤྱོད་ཆེ་བ། ལོངས་སྤྱོད་ མང་བ༑ བདག་དབང་བ་མང་བ། འགྲོན་བུ་དང༌། གསེར་དང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱི་རུ་དང༌། དངུལ་དང༌། ས་ལེ་སྦྲམ་མང་པོ་དང་ ལྡན་པ། བྲན་ཕོ་དང༌། བྲན་མོ་དང༌། ལས་བྱེད་པ་དང༌། ཞོ་ཤས་འཚོ་བའི་མི་མང་བ། ནོར་དང༌། འབྲུ་དང༌། བང་བ་དང༌། མཛོད་མང་པོ་དང་ལྡན་པ། དེ་སྐྱེས་བུ་དམ་པ་མ་ཡིན་པ་དེ་དག་གིས་ ཆད་པར་ལྟ་བ་མུ་སྟེགས་ཅན་གཅེར་བུ་པའི་སྨྲ་བ་ལ་བཞག་པར་གྱུར་ཏོ། །དེའི་ཆུང་མ་འོད་འཕྲོ་ཅན་ཞེས་བྱ་བ་ཞིག་ཡོད་དེ། གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་ རྒྱས་པ་མཆོག་དང་ལྡན་པ་ཞིག་བྱུང་ངོ༌། །དེ་ལས་བུ་ཞིག་བཙས་པ་ཡང་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་སངས་རྒྱས་བྱེ་བ་ཁྲག་ ཁྲིག་བརྒྱ་སྟོང་ཕྲག་མང་པོ་ལ་དགེ་བའི་རྩ་བ་བསྐྱེད་པ་ཞིག་བྱུང་སྟེ། དེ་བཙས་མ་ཐག་ཏུ་ལན་གསུམ་དུ་འཛུམ་མུལ་ཞེས་རྒོད་ནས་བདག་ནི། ཆད་པར་སྨྲ་བའི་རིགས་སུ་སྐྱེས་སོ། །ཞེས་དེ་སྐད་ ༄༅། །ཀྱི་ཚིག་གི་ལས་སྨྲས་པ་དང༌། ཁྱེའུ་དེའི་མས་སྒྲ་དེ་ཐོས་ནས་དངངས་སྐྲག་ཅིང་མི་དགའ་སྟེ། སྤུ་ཟིང་ཞེས་བྱེད་ནས་ཁྱེའུ་དེ་བོར་ཏེ་བྲོས་པ་དང༌། བུད་མེད་གཞན་ འདུས་པར་གྱུར་པ་དག་ཀྱང་བྱེར་རོ། །དེ་ནས་ཤཱ་རིའི་བུ། བུད་མེད་དེ་དག་རིང་ཞིག་ཏུ་ཕྱིན་པ་དང་སླར་ལོག་སྟེ་བལྟ་ཞིང་ལྷའམ། ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་ནམ་། ནམ་མཁའ་ལྡིང་ངམ། མི་འམ་ཅིའམ། ལྟོ་འཕྱེ་ཆེན་པོའམ། གྲུལ་བུམ་མམ། འབྱུང་པོའམ། ཤ་ཟའམ། མི་དང༌། མི་མ་ཡིན་པའམ། འདི་སུ་ཞིག་ཤེས་པར་བྱའོ། །སྙམ་མོ། །ཤཱ་ རིའི་བུ༑ དེ་ནས་ཁྱེའུ་དེས་བསམ་པ། ཀྱེ་མའོ་བུད་མེད་དེ་དག་ནི། བདེ་བ་ལས་བྲོས་པར་གྱུར་ཏོ། །སྙམ་ནས་དེའི་ཚེ་ཚིགས་སུ་བཅད་པ་འདི་སྨྲས་སོ། །ང་ནི་ཁྱོད་ཀྱི་དོན་འདོད་ཀྱི། །གནོད་མི་ འབྱུང་གི་མ་འཇིགས་ཤིག །ཁྱེད་ནི་ལམ་ངན་ཞུགས་པ་ལས། །ངས་ནི་རབ་ཏུ་ཐར་པར་བྱ། །ཁྱེད་རྣམས་དེ་ལས་འཇིགས་པར་བྱེད། །དགྲ་རྣམས་ཀྱིས་ནི་མདུན་དུ་བདར། །ལོག་པར་ལྟ་བར་ ལྷུང་བ་ལས། །ངས་ནི་ཁྱེད་རྣམས་དགྲོལ་བར་བྱ། །ཤཱ་རིའི་བུ། དེ་ནས་ཁྱེའུ་དེའི་མ་དང༌། ཕ་དང༌། སྐྱེ་བོ་ཕལ་པོ་ཆེས་ཚིགས་སུ་བཅད་པ་དེ་དག་ཐོས་ནས་ཁྱེའུ་དེ་ག་ལ་བ་དེར་དོང་ངོ༌། །དེ་ ནས་ཁྱེའུ་དེས་རང་གི་མ་དང༌། ཕ་ལ་ཚིགས་སུ་བཅད་པ་འདི་དག་སྨྲས་སོ། །ནོར་དག་དང་ནི་འབྲུ་དག་རྣམས། །ཁྱིམ་ན་རྒྱ་ཆེན་ཡོད་པ་དག །མྱུར་དུ་བདག་ལ་སྦྱིན་པར་གྱིས། །བདག་ནི་ སངས་རྒྱས་ཉན་ཐོས་སོ། །འཇིག་རྟེན་གསུམ་ཀུན་དཀྱིལ་འཁོར་ན། །རྣམ་གཟིགས་འཇིག་རྟེན་སྣང་མཛད་པ། །དེ་འདྲ་བ་ནི་གང་ཡང་མེད། །བདག་ནི་དེ་ཡི་ཉན་ཐོས་སོ། །སྲོག་ཆགས་ཀུན་ལ་ཕན་ པའི་ཕྱིར། །ཆོས་རྣམས་ཡང་དག་རབ་སྟོན་གང༌། །རྣམ་གཟིགས་འཇིག་རྟེན་སྣང་མཛད་པ། །བདག་ནི་དེ་ཡི་ཉན་ཐོས་སོ། །གང་གི་སྐུ་ལ་སྐྱེས་ཆེན་གྱི། །སུམ་ཅུ་རྩ་གཉིས་མཚན་མངའ་བ། །རྣམ་གཟིགས་ གཟིགས་འཇིག་རྟེན་སྒྲོན་མ་མཛད། །བདག་ནི་དེ་ཡི་ཉན་ཐོས་སོ། །བསྐལ་པ་བྱེ་བ་ཕྲག་སྟོང་དུ། །ཨུ་དུམ་ཝ་རའི་མེ་ཏོག་ལྟར། །ཡང་དག་ཤིན་ཏུ་ཐོས་དཀའ་བ། །བདག་ནི་དེ་ཡི་ཉན་ཐོས་སོ། ། དེ་ལྟར་ཤཱ་རིའི་བུ། ཁྱེའུ་དེའི་ཕ་དང་མས་གསེར་བྱེ་བ་ཕྲག་ཉི་ཤུ་བྱིན་ནས་ཁྱེའུ། འདི་ནི། ཁྱོད་ཀྱི་ཕ་མའི་ནོར་ཡིན་གྱི། གང་ལ་སེམས་དད་པར་གྱུར་པ་དེ་ལ་སྦྱིན་པ་བྱིན་ཅིག །ཅེས་དེ་སྐད་ སྨྲས་ནས་དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །འདི་ནི་ཁྱོད་ཀྱི་ཕ་ཡི་ནོར། །འདི་ནི་ཁྱོད་ཀྱི་མ་ཡི་ནོར། །གང་དུ་སེམས་ནི་དད་པར་གྱུར། །ཁྱེའུ་ཡིས་སྦྱིན་པ་བྱིན་པར་གྱིས། །དབྱིག་ རྣམས་དང་ནི་གསེར་གྱི་རྣམས། །ཁྱིམ་འདི་ན་ནི་ཡོད་པ་དག །དེ་དག་མྱུར་དུ་ཁྱེར་གྱིས་ཏེ། །གང་དུ་སེམས་དད་དེར་ཕུལ་ཅིག །མལ་ཆ་དང་ནི་གདིང་བ་དང༌། །བྱུག་པ་ཕྲེང་བ་སྤོས་ཀྱི་རྣམས། །དགའ་ བཞིན་དུ་ནི་ཁྱེར་གྱིས་ལ། །གང་དུ་སེམས་དང་དབུལ་བྱོས་ཤིག །སངས་རྒྱས་ཆོས་དང་དགེ་འདུན་ནི། །བླ་ན་མེད་པའི་བསོད་ནམས་ཞིང༌། །སྲོག་ཆགས་ཀུན་ལ་ཕན་པའི་ཕྱིར། །དེ་དག་ལ་ནི་ ༄༅། །སྦྱིན་པ་བྱིན། །ཤཱ་རིའི་བུ། དེ་ནས་ཁྱེའུ་དེས་རང་གི་ཕ་དང༌། མ་ལ་སླར་ཚིགས་སུ་བཅད་པ་འདི་དག་སྨྲས་སོ། །རྣམ་པར་གཟིགས་པ་འཇིག་རྟེན་མགོན། །དེ་ ཡི་དྲུང་དུ་བདག་མཆི་སྟེ། །སྲོག་ཆགས་ཀུན་ལ་ཕན་པའི་ཕྱིར། །ཤིན་ཏུ་རྒྱས་པའི་མཆོད་པ་བགྱི། །ལྷ་རྣམས་དང་ནི་མི་དག་ལས། །གང་དག་བདེ་བ་འདོད་པ་རྣམས། །བདག་ནི་གང་དུ་འགྲོ་ བ་ཡི༑ ༑རྗེས་བཞིན་དུ་ནི་ཀུན་ཤོག་ཅིག །ཤཱ་རིའི་བུ། དེ་ནས་ཁྱེའུ་དེས་ཤེས་བཞིན་དུ་ཕྱོགས་བཞིར་བལྟས་ནས་རང་གི་ཕ་མ་ལ་ཀྱེ་ཡབ་ཡུམ། བདག་ནི། བཅོམ་ལྡན་འདས་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དེ་ག་ལ་བ་དེར་མཆིའོ། །ཞེས་སྐད་སྨྲས་པ་དང༌། དེ་ན་སྐྱེ་བོ་མང་པོས་ཐོས་ནས་དེ་དག་འདི་སྙམ་དུ་སེམས་ཏེ། ཇི་ལྟར་ན་སྐྱེས་ནས་ཉིན་ཞག་གཅིག་ཁོ་ན་ལོན་པའི་ཁྱེའུ་ཕ་མ་ལ་སྨྲ་ཞིང་རྐང་གིས་འགྲོ་བ་ཞིག་གོ །སྙམ་ནས་དེ་ན་སྲོག་ཆགས་བྱེ་བ་བརྒྱད་ཁྲི་བཞི་སྟོང་འདུས་པར་གྱུར་ཏེ། ཁྱེའུ་ འདི་ལྷའམ། ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་ནམ། ནམ་མཁའ་ལྡིང་ངམ། མིའམ་ཅིའམ། མིའམ། མི་མ་ཡིན་པའམ། གང་ཡིན་ཤེས་པར་བྱའོ། །སྙམ་མོ།། དེ་ནས་ཁྱེའུ་དེ་སྲོག་ཆགས་བརྒྱད་ཁྲི་བཞི་སྟོང་པོ་དེ་དག་དང་ལྷན་ཅིག་ཏུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་ གཟིགས་ག་ལ་བ་དེར་དོང་ངོ༌། །ཡང་ཤཱ་རིའི་བུ། ཁྱེའུ་དེ་འགྲོ་བ་ན་སྟེང་གི་བར་སྣང་ལས་གདུགས་སྟོང་ཕྲག་བཅུ་བྱུང་ནས་དེ་དག་གིས་དེའི་ལུས་བསྐྱབས་ཏེ། དེའི་ལུས་ལ་རླུང་དང༌། ཉི་མས་གནོད་ པའམ་གྱུར་པར་བྱེད་དོ། །ཡང་ཁྱེའུ་དེ་འགྲོ་བ་ན་སྟེང་གི་བར་སྣང་ལས་གསེར་གྱི་དྲ་བ་བྲེས་པར་གྱུར་ཏོ། །ཡང་ཁྱེའུ་དེ་འགྲོ་བ་ན་ལྷའི་ལས་ཀྱང་འདས་པའི་མེ་ཏོག་གི་ཆར་དང༌། ཕྱེ་མའི་ཆར་ རབ་ཏུ་བབ་བོ། །ཡང་ཁྱེའུ་དེ་འགྲོ་བ་ན་བསིལ་བའི་རླུང་ལྷའི་དྲི་དང་ལྡན་པ་ལངས་སོ། །ཡང་ཁྱེའུ་དེ་འགྲོ་བ་ན་ལམ་སྤོས་ཆུས་བཏབ་པར་གྱུར་ཏོ། །ཡང་ཁྱེའུ་དེ་འགྲོ་བ་ན་ལམ་གསེར་གྱི་གླེགས་ མས་གཡོགས་པར་གྱུར་ཏོ། །ཡང་ཁྱེའུ་དེ་འགྲོ་བ་ན་ལམ་པུས་མོ་ནུབ་ཙམ་དུ་ལྷའི་མེ་ཏོག་ཆལ་བར་བཀྲམ་པར་གྱུར་ཏོ། །ཡང་ཁྱེའུ་དེ་འགྲོ་བ་ན་རྫིང་བུ་སྟོང་ཕྲག་དུ་མ་བྱུང་སྟེ། རྫིང་བུ་དེ་དག་ཀྱང་ ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ་ལ་མེ་ཏོག་ཨུཏྤལ་དང༌། པདྨ་དང༌། ཀུ་མུ་ཏ་དང༌། པདྨ་དཀར་པོས་ཁེབས་ཤིང་ངུར་པ་སྒྲ་འབྱིན་པར་གྱུར་ཏོ། །ཡང་ཁྱེའུ་དེ་འགྲོ་བ་ན་ལམ་ གྱི་མུ་རིན་པོ་ཆེ་སྣ་བདུན་གྱི་སྟེགས་བུ་དཀྲིགས་པར་གྱུར་ཏོ། །ཡང་ཁྱེའུ་དེ་འགྲོ་བ་ན་ལྷའི་སིལ་སྙན་མང་པོ་འཁྲོལ་བར་གྱུར་ཏོ། །ཡང་ཁྱེའུ་དེ་འགྲོ་བ་ན་ལམ་གྱི་གཡས་གཡོན་རིན་པོ་ཆེས་ཀུན་ཏུ་ བརྒྱན་པར་གྱུར་ཏོ། །ཡང་ཁྱེའུ་དེ་འགྲོ་བ་ན་མདུན་དུ་མེ་ཏོག་གི་སྲང་ཞིག་བྱུང་བར་གྱུར་ཏེ། དེ་ལ་རྐང་པ་འདོར་ཞིང༌། བཏེག་པ་དང་མི་སྣང་བར་གྱུར་ཏོ། །དེ་ནས་ཁྱེའུ་དེ་ཡུད་ཙམ་ཞིག་ལམ་དུ་འཕགས་ ༄༅། །ཏེ་སླར་བལྟས་ནས་ཚིགས་སུ་བཅད་དེ་སྨྲས་པ། རིགས་པ་མི་རིགས་ནམ་ཡང་མི་འགྲོགས་ཏེ། ང་ལམ་རྒྱ་ཆེན་ཚུལ་ནི་གུད་ན་ཡོད། ཁྱོད་ནི་མི་རིགས་ང་ནི་རིགས་ པ་སྟེ༑ ༑རིགས་པས་རྒྱལ་བའི་དྲུང་དུ་འགྲོ་བར་བྱ། །བསྐལ་པ་ཁྲག་ཁྲིག་མང་པོ་འདས་ཀྱང་ནི། །བརྒྱ་ལམ་དག་ན་མི་ཡི་ལུས་ཐོབ་ཅིང༌། །བརྒྱ་ལམ་དག་ན་སངས་རྒྱས་འབྱུང་འགྱུར་ཏེ། །དད་ དང་ཤེས་རབ་དག་ཀྱང་བརྒྱ་ལམ་ཐོབ། །ཤཱ་རིའི་བུ། ཁྱེའུ་དེས་ཚིགས་སུ་བཅད་པ་དེ་དག་སྨྲས་མ་ཐག་ཏུ་དེ་ནས་སྟེང་གི་བར་སྣང་ལས་ལྷ་བྱེ་བ་བརྒྱད་ཁྲི་བཞི་སྟོང་གིས་ལེགས་སོ། །ཞེས་ བྱ་བ་བྱིན་ཏེ། ལེགས་སོ་ལེགས་སོ་ཤེས་རབ་ཆེ། །ཁྱོད་ཀྱིས་སྨྲས་པ་མཆོག་ཡིན་གྱི། །མི་རིགས་རྣམས་ནི་ཕྱི་ནས་འོང༌། །གྲོགས་པོ་རིགས་པ་ཁྱོད་བཞུད་ཅིག །ཤཱ་རིའི་བུ། དེ་ནས་ཁྱེའུ་ དེས་ལྷ་རྣམས་ལ་སླར་ཚིགས་སུ་བཅད་དེ་སྨྲས་པ། ཁྱོད་ཀྱིས་རིགས་ཞེས་སྨྲས་པ་དང༌། །ཁྱོད་ཀྱིས་མི་རིགས་ཞེས་སྨྲས་པ། རིགས་པའི་དོན་ནི་ཇི་ལྟ་བུ། །མི་རིགས་དོན་ཀྱང་ཇི་ལྟ་བུ། ། ཤཱ་རིའི་བུ། དེ་ནས་ལྷ་དེ་དག་གིས་ཁྱེའུ་དེ་ལ་སླར་ཚིགས་སུ་བཅད་པ་འདི་དག་སྨྲས་སོ། །འདོད་པའི་ལོངས་སྤྱོད་གང་གནས་པ། །དེ་དག་མངོན་བྱུང་སྤྱོད་ཡུལ་མིན། །དེ་དག་མི་རིགས་ རྨོངས་པ་སྟེ། །དེ་དག་སེམས་ཅན་དམྱལ་ལ་གནས། །འདོད་པའི་ལོངས་སྤྱོད་སྤངས་བྱས་ནས། །ཁྱིམ་མེད་པར་ནི་རབ་བྱུང་བ། །འཇིག་རྟེན་འདི་ན་དེ་དག་རིགས། །དེ་དག་རིགས་ཞེས་རབ་ ཏུ་བཤད། །ཤཱ་རིའི་བུ། དེ་ནས་ཁྱེའུ་དེས་ལྷ་དེ་དག་ལ་སླར་ཚིགས་སུ་བཅད་དེ་སྨྲས་པ། ཇི་ལྟར་རིགས་ཞེས་བྱ་བ་དེ། །ཁྱེད་ཀྱིས་དེ་ནི་མི་ཤེས་སོ། །ཇི་ལྟར་མི་རིགས་ཞེས་བྱ་བ། །ངས་ནི་དེ་ དག་རབ་ཏུ་ཤེས། །དེ་ལྟར་ཤཱ་རིའི་བུ། ཁྱེའུ་དེ་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་སྟེ། བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་དེ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འཇིག་ རྟེན་དག་གི་དོན་ཕྱིར་སྤྱོད། །རིགས་གསུམ་བདུད་རྩི་རབ་སྦྱིན་པ། །གླང་པོ་ཆེན་པོ་སེངྒེ་ཆེ། །རྟག་ཏུ་ཁྱོད་ལ་ཕྱག་འཚལ་ལོ། །འཇིག་རྟེན་སྣང་མཛད་ཤིན་ཏུ་དཀོན། །འཇིག་རྟེན་མགོན་པོ་འོད་ མཛད་པ། །ཨུ་དུམ་ཝ་རའི་མེ་ཏོག་བཞིན། །ཁ་དོག་ལྡན་ཞིང་དབྱིབས་མཛེས་པ། །འཇིག་རྟེན་འདི་ནི་ཉེ་བར་གཅེས། །འཕགས་པའི་ལམ་ལ་མི་མཁས་ཏེ། །ས་ཡི་སྟེང་ན་དམུས་ལོང་བཞིན། །ལམ་ ངན་པར་ནི་རབ་ཏུ་རྒྱུག །མི་མཆོག་ཁྱོད་ནི་ཅི་འདྲ་བར། །བདག་ནི་འཇིག་རྟེན་སངས་རྒྱས་གྱུར། །མེ་གསུམ་དག་གིས་ཚིག་པ་ཡི། །སྡུག་བསྔལ་པ་ལས་སེམས་ཅན་དགྲོལ། །སྲོག་ཆགས་བརྒྱ་ པོ་འདི་ཀུན་ཡང༌། །བདག་གི་སླད་དུ་མཆིས་པ་ལགས། །འདི་དག་ལ་ནི་ཆོས་བསྟན་ཅིང༌། །བྱང་ཆུབ་མཆོག་ལ་དགོད་དུ་གསོལ། །དེ་ནས་ཤཱ་རིའི་བུ། ཁྱེའུ་དེས་ཚིགས་སུ་བཅད་པ་འདི་དག་གསོལ་ ༄༅། །ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཆོས་སྟོན་པ་དེ་ལ་དེ་སྐད་ཅེས་གསོལ་པ་ དང༌། སྲོག་ཆགས་བརྒྱད་ཁྲི་བཞི་སྟོང་པོ་དེ་དག་གིས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་འདི་ སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ཀྱང་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་གྱུར་ཅིང༌། འདི་ལྟ་སྟེ། བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ཆོས་སྟོན་པ་བཞིན་དུ་ཆོས་སྟོན་པར་གྱུར་ཅིག །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་རྣམ་པར་གཟིགས་ཀྱིས་སྲོག་ཆགས་བརྒྱད་ཁྲི་བཞི་སྟོང་པོ་དེ་དག་གི་ལྷག་པའི་བསམ་པ་མཁྱེན་ནས་དེའི་ཚེ་འཛུམ་པ་མཛད་དོ། །འདི་ནི། ཆོས་ཉིད་དེ། སངས་ རྒྱས་བཅོམ་ལྡན་འདས་གང་གི་ཚེ་འཛུམ་པ་མཛད་པ་དེ་ན་བཅོམ་ལྡན་འདས་ཀྱི་ཞལ་གྱི་སྒོ་ནས་ཁ་དོག་དུ་མ། ཁ་དོག་སྣ་ཚོགས་ཀྱི་འོད་ཟེར་འདི་ལྟ་སྟེ། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་དང༌། ལེབ་རྒན་དང༌། ཤེལ་དང༌། དངུལ་གྱི་ཁ་དོག་ལྟ་བུ་བྱུང་སྟེ། དེ་དག་གིས་མཐའ་ཡས་མུ་མེད་པའི་འཇིག་རྟེན་གྱི་ཁམས་སྣང་བས་ཁྱབ་པར་བྱས་ནས་ ཚངས་པའི་འཇིག་རྟེན་གྱི་བར་དུ་མངོན་པར་སོང་སྟེ། ཉི་མ་དང༌། ཟླ་བའི་གཟི་བརྗིད་སྤ་བཀོང་ནས་སླར་ལོག་སྟེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་རྣམ་པར་གཟིགས་ལ་ལན་བརྒྱ་སྟོང་ཕྲག་དུ་མར་བསྐོར་བ་བྱས་ནས་བཅོམ་ལྡན་འདས་དེའི་གཙུག་ཏུ་མི་སྣང་བར་གྱུར་ཏོ། །ཤཱ་རིའི་བུ། དེ་ནས་བཅོམ་ལྡན་འདས་དེ་བཞིན་ གཤེགས་པ་རྣམ་པར་གཟིགས་དེའི་ཞམ་འབྲིང་པ་དགེ་སློང་དེས་བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་འཛུམ་པ་མཛད་པ་མཐོང་ནས་སྟན་ལས་ལངས་ཏེ་ཆོས་གོས་ ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་དེ་བཞིན་གཤེགས་པ་རྣམ་པར་གཟིགས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་ འདས་དེ་བཞིན་གཤེགས་པ་རྣམ་པར་གཟིགས་ལ་ཚིགས་སུ་བཅད་པ་འདི་དག་གསོལ་ཏོ། །བཅོམ་ལྡན་ཅི་རྒྱུ་བདེ་གཤེགས་ཅི་རྐྱེན་གྱིས། །གང་ཕྱིར་འཇིག་རྟེན་མགོན་པོ་འཛུམ་མཛད་དེ། །རབ་ཏུ་ མཛེས་ཤིང་ཤིན་ཏུ་དཀོན་བྱུང་བ། །རྣམ་གཟིགས་སངས་རྒྱས་མཆོག་ལ་བདག་ཞུའོ། །རྒྱུ་མ་མཆིས་ཤིང་རྐྱེན་མ་མཆིས་པར་ནི། །རྐང་གཉིས་གཙོ་བོ་འཛུམ་པ་མི་མཛད་ན། །འཇིག་རྟེན་ཕན་པ་ ཐུགས་བརྩེ་འཛུམ་མཛད་པ། འདི་ཡི་རྒྱུ་རྐྱེན་གང་ལགས་བདག་ལ་གསུངས། །ཐུབ་ཆེན་གྱི་ནི་སྤྱན་སྔར་མཆིས་པ་ཡི། །སྲོག་ཆགས་བརྒྱ་སྟོང་མཆིས་པ་འདི་དག་ཀྱང༌། །རྣབ་བླགས་ཏེ་མཆིས་ཤིང་ ༄༅། །ཉན་འཚལ་ན། །དེ་དག་ཐུགས་བརྩེའི་སླད་དུ་མགོན་པོས་གསུངས། །ཁྱོད་ནི་སྲོག་ཆགས་ཀུན་གྱི་མིག་ལགས་ཏེ། །ཁྱོད་ནི་གནས་སྐྱབས་མགོན་དང་དཔུང་ གཉེན་ལགས། །ཁྱོད་ནི་སྲོག་ཆགས་ཀུན་གྱི་ཐེ་ཚོམ་གཅོད། །འཇིག་རྟེན་ཕན་པར་མཛད་ཅིང་ཐུགས་བརྩེ་བ། །ཁྱོད་ཀྱིས་འདས་ལ་རྟག་ཏུ་ཡེ་ཤེས་འཇུག །ཁྱོད་ཀྱིས་མ་འོངས་ཐམས་ཅད་རབ་ཏུ་ མཁྱེན༑ ༑སངས་རྒྱས་ཞིང་ན་ཅུང་ཟད་ཅི་མཆིས་པ། །བྱུང་བ་དག་ལའང་ཐེ་ཚོམ་མི་མངའ་འོ། །དེ་བཞིན་གཤེགས་པ་དུས་གསུམ་ཡེ་ཤེས་ལྡན། །ཆོས་ཀྱི་རྗེ་ནི་ཐམས་ཅད་འཛིན་པའི་གསུང༌།། འཇིག་རྟེན་མགོན་པོ་འཛུམ་པ་མཛད་པ་འདི། །རྒྱུ་རྐྱེན་གང་ལགས་བདག་ནི་ཁྱོད་ལ་ཞུ། །ཁྱོད་ཀྱིས་འདིར་ནི་ཐེ་ཚོམ་ཐམས་ཅད་ཆོད། །ཁྱོད་ནི་ཆོས་ཀུན་ལ་ཡང་ཐེ་ཚོམ་མེད། །ཡན་ལག་ བརྒྱད་དང་ལྡན་པའི་གསུང་འབྱིན་ཅིང༌། །སྲོག་ཆགས་མྱ་ངན་ཟུག་རྔུ་བསལ་དུ་གསོལ། །རབ་ཏུ་མགུ་ཞིང་དགའ་བའི་སེམས་རྒྱས་ནས། །སོར་མོ་བཅུ་རྣམས་ཐལ་མོ་རབ་སྦྱར་ཏེ། །འཛུམ་པ་ མཛད་འདི་རྒྱུ་རྐྱེན་གང་ལགས་པ། །ཆོས་རྗེ་ཁྱོད་ལ་བདག་ནི་དེ་ཞུ་འོ། །ཤཱ་རིའི་བུ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ རྣམ་པར་གཟིགས་དེས་ཞམ་འབྲིང་བ་དགེ་སློང་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་ཁྱོད་ཀྱིས་ཁྱེའུ་འདི་མཐོང་ངམ། །གསོལ་པ། བཅོམ་ལྡན་འདས། མཐོང་ལགས་སོ། །བདེ་ བར་གཤེགས་པ། མཐོང་ལགས་སོ། །བཀའ་སྩལ་པ། དགེ་སློང༌། ཁྱེའུ་འདིས་རྫོགས་པའི་བྱང་ཆུབ་བཙལ་བའི་ཕྱིར་སྔོན་འདས་པའི་དུས་ན་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ ཅུ་རྩ་བཞི་ལ་ཆོས་གོས་དང༌། བསོད་སྙོམས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་ཀྱིས་བསྟི་སྟང་བྱས། བླ་མར་བྱས། རིམ་གྲོ་བྱས། མཆོད་པ་བྱས་སོ། །དེ་ནས་ཁྱེའུ་འདིས་རྫོགས་ པའི་བྱང་ཆུབ་བཙལ་བའི་ཕྱིར་སངས་རྒྱས་ཁྲག་ཁྲིག་ཕྲག་བཅུ་ལ་ཚངས་པར་སྤྱོད་པ་སྤྱད་དོ། །དགེ་སློང༌། ཁྱོད་ཀྱིས་སྲོག་ཆགས་བརྒྱད་ཁྲི་བཞི་སྟོང་པོ་འདི་དག་མཐོང་ངམ། །གསོལ་པ། བཅོམ་ལྡན་ འདས། མཐོང་ངོ༌། །བདེ་བར་གཤེགས་པ། མཐོང་ངོ༌། །བཀའ་སྩལ་པ། སྲོག་ཆགས་བརྒྱད་ཁྲི་བཞི་སྟོང་པོ་འདི་དག་ནི། སྔོན་ཁྱེའུ་འདིའི་ཕ་མར་གྱུར་ཏོ། །དགེ་སློང༌། ཁྱེའུ་འདིས་འདི་ལྟ་བུའི་སྨོན་ ལམ་བཏབ་པར་གྱུར་ཏེ། དེ་གང་དང་གང་དུ་སྐྱེས་པ་ན་གང་བདག་གི་ཕ་མར་གྱུར་པ་དེ་དག་བདག་གིས་བྱང་ཆུབ་ལ་དགོད་དོ། །ཡང་གཉིས་སུ་ན་དེ་དག་བུད་མེད་ཀྱི་དངོས་པོར་མངོན་པར་མ་གྲུབ་ཅིག ། ཅེས་བྱས་པས་དེ་དག་དེ་ལྟར་ཁྱེའུ་དེའི་རྗེས་སུ་སློབ་པའི་ཚུལ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་ཞམ་འབྲིང་བ་དགེ་སློང་དེ་ལ་ཚིགས་སུ་བཅད་པ་འདི་དག་གསུངས་སོ། །དགེ་སློང་ཁྱོད་ཀྱི་མདུན་ན་ཁྱེའུ་འདི་དང༌། །སྲོག་ཆགས་སྟོང་ ༄༅། །གནས་མཆོག་ཏུ་དགའ་སེམས་ཀྱིས། །ཇི་ལྟར་ཆོས་ཀྱི་བདག་པོ་འདི་བཞིན་དུ། །གྱུར་ཅིག་ཅེས་སྨྲ་ཁྱོད་ཀྱིས་མཐོང་བ་སྟེ། །དགེ་སློང་འདིས་ནི་སྔོན་གྱི་ཚེ་རབས་ལ། །ལྷར་ བཅས་འཇིག་རྟེན་དག་ལ་ཕན་པའི་ཕྱིར། །འཇིག་རྟེན་རྣམ་འདྲེན་བྱེ་བ་ཁྲག་ཁྲིག་ཀྱང༌། །སྟོང་ཕྲག་དྲུག་ཅུ་བཞི་ལ་རི་མོར་བྱས། བྱང་ཆུབ་མཆོག་འདི་ལ་ནི་རེ་བའི་ཕྱིར། །དེ་ནི་སངས་རྒྱས་ཁྲག་ཁྲིག་ ཕྲག་བཅུ་ཡི། །བསྟན་པ་ལ་ནི་ཆེད་དུ་རབ་བྱུང་ནས། །དེ་ནས་ཚངས་པར་སྤྱོད་པ་མཆོག་སྤྱད་དོ། །ཁྱོད་ཀྱིས་སྲོག་ཆགས་སྟོང་ཕྲག་བརྒྱད་ཅུ་བཞི། །ང་མདུན་འདུག་པ་དེ་དག་ཀུན་མཐོང་ངམ། །དེ་དག་ སྔོན་ཆད་འདས་དུས་ཡངས་པ་ན། དེ་ཡི་མར་ནི་གྱུར་པ་ཤ་སྟག་གོ །གང་དང་གང་སྐྱེས་ང་ཡི་མར་གྱུར་པ། །ཐམས་ཅད་བདག་གིས་བྱང་ཆུབ་མཆོག་ལ་དགོད། །ཅི་ནས་བུད་མེད་དངོས་པོར་མ་ གྱུར་ཅེས། །དེས་ནི་སྨོན་ལམ་འདི་འདྲ་བཏབ་པར་གྱུར། །དེ་དག་ཐམས་ཅད་དེ་ཡི་རྗེས་སློབ་ཅིང༌། །བྱང་ཆུབ་ཀྱི་ནི་སེམས་ལ་གཞོལ་བར་འགྱུར། །འདི་དག་རྐང་གཉིས་ཀྱི་ནི་མཆོག་འགྱུར་ ཞེས༑ ༑དེ་དག་ལ་ནི་ངས་ལུང་བསྟན་པར་བྱ། །མ་འོངས་དུས་ན་ཇི་ལྟར་སྤྱོད་འགྱུར་ཞིང༌། །མི་མཆོག་ཏུ་ནི་ཇི་ལྟར་འགྱུར་བ་དང༌། །དེ་དག་སྔོན་གྱི་སྤྱོད་པ་རབ་ཤེས་ཏེ། །དེ་ཡི་ཕྱིར་ནི་འཛུམ་པ་ ངས་མཛད་དོ། །དེ་སྐད་ལུང་བསྟན་པ་ནི་ཐོས་གྱུར་ནས། །རྣམ་པར་གཟིགས་པ་འཇིག་རྟེན་སྤྱོད་པ་ལ། །ལྷ་དང་ཀླུ་དང་དེ་བཞིན་མི་རྣམས་དང༌། །སྲོག་ཆགས་བྱེ་བ་རྣམས་ནི་དགའ་བར་གྱུར། །ཤཱ་ རིའི་བུ༑ དེ་ནས་ཁྱེའུ་དེ་དག་དགའ་མགུ་རངས་རབ་ཏུ་དགའ་སྟེ། དགའ་བ་དང༌། ཡིད་བདེ་བ་སྐྱེས་ནས་རིངས་པའི་ཚུལ་གྱིས་རང་གི་ཕ་མ་གང་ན་བ་དེར་སོང་སྟེ་ཕྱིན་ནས་རང་གི་ཕ་མ་ལ་ཚིགས་སུ་ བཅད་པ་འདི་དག་སྨྲས་སོ། །སྲོག་ཆགས་བརྒྱ་པོ་དེ་དག་ཀུན། །སྔོན་ནི་བདག་གི་མར་གྱུར་ཏེ། །ཐམས་ཅད་བྱང་ཆུབ་རབ་ཏུ་ཞུགས་ན། །ཁྱོད་ཀྱི་སེམས་ནི་གང་དུ་འཇུག །ཤཱ་རིའི་བུ། དེ་ནས་ཁྱེའུ་དེའི་ ཕ་མས་ཁྱེའུ་དེ་ལ་སླར་ཚིགས་སུ་བཅད་པ་འདི་དག་སྨྲས་སོ། །ཁྱོད་ཀྱིས་དེ་དག་ཇི་ལྟ་བ། །དེ་ལྟར་ང་ཡི་སེམས་འཇུག་སྟེ། །ང་ནི་ཐམས་ཅད་མཁྱེན་པར་འགྱུར། །འདི་ལ་ང་ནི་ཐེ་ཚོམ་མེད། །གང་ དུ་སྐྱེས་པར་ང་མ་བྲལ། །ཁྱོད་ལ་གནས་ནི་འདི་སློང་གི །ཇི་ལྟར་བྱང་ཆུབ་ང་ཐོབ་པར། །རྟག་ཏུ་ང་ནི་དྲན་པར་གྱིས། །ཤཱ་རིའི་བུ། དེ་ནས་ཁྱེའུ་དེས་རང་གི་མ་སྐྱེད་པར་བྱེད་པ་ལ་ཚིགས་སུ་བཅད་ པ་འདི་དག་སྨྲས་སོ། །ཇི་སྙེད་བདག་གིས་བསྐུལ་བ་རྣམས། །དེ་དག་ཐོག་མར་སངས་རྒྱས་འགྱུར། །བདག་ནི་སྐྱེས་བུ་ཁ་ལོ་སྒྱུར། །འཇིག་རྟེན་སྒྲོན་མར་ཕྱིས་འགྱུར་བགྱི། །ཤཱ་རིའི་བུ། དེའི་ཚེ་དེའི་ དུས་ན་བཅོམ་ལྡན་འདས་རྣམ་པར་གཟིགས་ཀྱི་གསུང་རབ་ལ་ཁྱེའུ་ཞིག་བྱུང་བ་གཞན་ཡིན་སྙམ་དུ་ཐེ་ཚོམ་དང༌། ཡིད་གཉིས་ཟ་ན། དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ལྷའི་བུ་དབང་ཕྱུག་ ཆེན་པོ་འདི་ནི། དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་བསྟན་པ་ལ་ཁྱེའུ་དེར་གྱུར་ཏོ། །དེ་ཕྱིས་ ༄༅། །བསྐལ་པ་བྱེ་བ་ཁྲག་ཁྲིག་ཏུ་ལོག་པར་ལྷུང་བར་མ་སོང་ངོ༌། །བསྐལ་པ་བྱེ་བ་ཁྲག་ཁྲིག་འདས་པའི་འོག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་སྙིང་རྗེ་ཅན་ཞེས་བྱ་བར་འགྱུར་ཏེ། འཁོར་ལོས་བསྒྱུར་བའི་རིགས་ལས་མངོན་པར་འབྱུང་བར་འགྱུར་རོ། །དེའི་དུས་ན་དེའི་ཡབ་ནི། གྲགས་པ་ཞེས་བྱ་བར་འགྱུར་ཏེ། འདི་ལྟ་ སྟེ༑ དཔེར་ན། ད་ལྟར་ངའི་ཡབ་ཟས་གཙང་མ་བཞིན་ནོ། །དེའི་ཡུམ་མུན་པ་དང་བྲལ་བ་ཞེས་བྱ་བ་ནི། འདི་ལྟ་སྟེ། དཔེར་ན། ད་ལྟར་ངའི་ཡུམ་སྒྱུ་འཕྲུལ་བཞིན་ནོ། །དེའི་དུས་ན་མྱ་ངན་མེད་ཅེས་ བྱ་བ་སྲས་སུ་འགྱུར་བ་ནི། འདི་ལྟ་སྟེ། དཔེར་ན། ད་ལྟར་ངའི་སྲས་སྒྲ་གཅན་ཟིན་བཞིན་ཏེ། དེ་བྱུང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ སྟེ༑ དེ་བྱང་ཆུབ་ཐོབ་པ་ན་དེའི་ཚེའི་ཚད་ནི། ལོ་བྱེ་བ་ཁྲག་ཁྲིག་ཕྲག་བརྒྱ་སྟོང་དུ་འགྱུར་རོ། །སངས་རྒྱས་དེའི་འོད་ཀྱིས་དཔག་ཚད་སྟོང་ཕྲག་བཅུར་ཁྱབ་པར་འགྱུར་རོ། །དེའི་འཁོར་གྱི་དཀྱིལ་ འཁོར་ནི། དཔག་ཚད་བརྒྱར་འགྱུར་རོ། །དེའི་ཉན་ཐོས་བྱེ་བ་ཕྲག་བརྒྱ་དང༌། བྱེ་བ་ཁྲག་ཁྲིག་དང༌། བྱེ་བ་ཁྲག་ཁྲིག་བརྒྱ་སྟོང་གི་འདུས་པ་འབྱུང་སྟེ། དེའི་ཉན་ཐོས་བྱེ་བ་ནི། དགྲ་བཅོམ་པ་འབའ་ ཞིག་སྟེ༑ ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། རྣམ་པར་ཐར་པ་བརྒྱད་ལ་བསམ་གཏན་པ། མངོན་པར་ཤེས་པ་དྲུག་དང་ལྡན་པ་ཤ་སྟག་སྟེ། ཤཱ་རིའི་བུ། དགྲ་བཅོམ་པ་དེ་དག་དཀོན་མཆོག་གསུམ་འདུས་པ་ཐོབ་པ་ཡོངས་སུ་བརྗོད་པ་འབྱུང་བ་དེ་སྙེད་ཀྱི་དེའི་བྱང་ཆུབ་སེམས་དཔའི་དགེ་འདུན་འབྱུང་སྟེ། ཐམས་ཅད་ཀྱང་སྔོན་མར་གྱུར་པ་ཤ་སྟག་གོ ། ཕྱིར་མི་ལྡོག་པའི་ཆོས་བསྟན་ཏེ། ཚད་མེད་གྲངས་མེད་པའི་སེམས་ཅན་གྱི་དོན་བྱས་ནས་ཡོངས་སུ་མྱ་ངན་ལས་འདའ་བར་འགྱུར་ཏེ། དེ་ཡོངས་སུ་མྱ་ངན་ལས་འདས་ནས་དམ་པའི་ཆོས་ལོ་བྱེ་བར་ གནས་པར་འགྱུར། དེའི་རིང་བསྲེལ་ཡང་རྒྱས་པར་འགྱུར་ཏེ། འདི་ལྟ་སྟེ། དཔེར་ན། ད་ང་ཡོངས་སུ་མྱ་ངན་ལས་འདས་ནས་རིང་བསྲེལ་རྒྱས་པར་འགྱུར་བ་བཞིན་ནོ། །ཤཱ་རིའི་བུ། འདི་ནི། སྐྱེས་ བུ་དམ་པས་རྣམ་པར་བརྟགས་པ། སྐྱེས་བུ་དམ་པས་བལྟ་བ། ཚུལ་ཁྲིམས་མ་མཉམས་[*MNYAM?] པ། སྐྱེས་བུ་དམ་པ། བརྩོན་འགྲུས་མི་ལྡོག་པ་སྟེ། དེ་དག་གིས་བྱང་ཆུབ་སེམས་དཔའ་སེམས་ དཔའ་ཆེན་པོས་རྗེས་སུ་དྲན་པའི་སེམས་བསྐྱེད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བརྩོན་འགྲུས་རབ་ཏུ་བརྩམ་པར་བྱ་བར་གྲངས་ཀྱིས་བགྲང་བ་དེ་སྙེད་དུ་བཙལ་ཞིང་བསྐལ་པ་ དེ་སྙེད་དུ་ནི་འཁོར་བར་བྱའོ། །བསྐལ་པ་དེ་སྙེད་དུ་ནི་འཁོར་བར་མི་བྱའོ། །ཞེས་དེ་ལྟར་མི་བྱའི། ཤཱ་རིའི་བུ། བསམ་གྱིས་མི་ཁྱབ་པའི་གོ་ཆ་བགོ་བར་བྱ་སྟེ། འཁོར་བའི་མཐའ་མའི་མཐའ་ ཇི་ཙམ་པར་བདག་འཁོར་བར་བྱའི། ཡོངས་སུ་བརྟག་པ་བཟུང་སྟེ། བྱང་ཆུབ་ཀྱི་ཕྱིར་བརྩོན་འགྲུས་ལྷོད་པར་མི་བྱ་སྟེ། བརྩོན་འགྲུས་མི་ལྡོག་པ། རྟུལ་བ་དང་ལྡན་པར་འགྱུར་རོ། །བྱང་ཆུབ་ ༄༅། །སེམས་དཔའི་བརྩོན་འགྲུས་རྟུལ་བ་གང་ཞེ་ན། བརྩོན་འགྲུས་རྟུལ་བ་མ་ཉམས་པའི་བྱང་ཆུབ་སེམས་དཔའ་ནི། གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ ཁམས་མེས་ཡོངས་སུ་གང་བ་ལ་བརྒལ་ཞིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བལྟ་བའི་ཕྱིར་འགྲོ་བར་སྤྲོ་བ་དེ་ནི། བྱང་ཆུབ་སེམས་ དཔའི་བརྩོན་འགྲུས་རྟུལ་བ་མ་ཉམས་པའོ། །དམ་པའི་ཆོས་ཉན་པའི་ཕྱིར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མེས་ཡོངས་སུ་གང་བ་ལ་བརྒལ་ཞིང་ཡོངས་སུ་བརྟག་ པ་བཟུང་སྟེ་བརྒལ་ཞིང་འགྲོ་བར་སྤྲོ་བ་དེ་ནི། བྱང་ཆུབ་སེམས་དཔའི་བརྩོན་འགྲུས་རྟུལ་བ་མ་ཉམས་པའོ། །གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མེས་ཡོངས་སུ་གང་ བ་ལ་བརྒལ་ཞིང་དགེ་བའི་རྩ་བའི་ཕྱིར་འགྲོ་བར་སྤྲོ་བ་དེ་ནི། བྱང་ཆུབ་སེམས་དཔའི་བརྩོན་འགྲུས་རྟུལ་བ་མ་ཉམས་པའོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའི་བརྩོན་ འགྲུས་རྟུལ་བ་མ་ཉམས་པ་ནི། གང་གཞན་གྱི་དོན་གྱི་ཕྱིར་རྟུལ་བ་བསྐྱེད་པའོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའི་བརྩོན་འགྲུས་རྟུལ་བ་མ་ཉམས་པ་ནི། གང་གཞན་ཡོངས་ སུ་མྱ་ངན་ལས་འདས་པའི་ཕྱིར་རྟུལ་བ་བསྐྱེད་པའོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའི་བརྩོན་འགྲུས་རྟུལ་བ་མ་ཉམས་པ་ནི། མི་ལྷོད་པ་དང༌། བརྟན་པ་དང༌། མི་ལྡོག་པ་ དང༌། བསམ་པ་དགེ་བ་དང༌། སྙིང་རྗེ་ཆེན་པོས་རབ་ཏུ་ནོན་པས་རྟག་ཏུ་སེམས་ཅན་གྱི་དོན་ལ་བརྩོན་ཅིང་རྟུལ་བ་བསྐྱེད་པའོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའི་བརྩོན་འགྲུས་རྟུལ་ བ་མ་ཉམས་པ་ནི། གང་གོམ་པ་འདེག་ཅིང་འདོར་བ་ན་ཡང་བྱང་ཆུབ་ཀྱི་སེམས་མི་གཏོང་སྟེ། སངས་རྒྱས་དང༌། ཆོས་དང༌། དགེ་འདུན་མངོན་སུམ་དུ་བྱེད་ཅིང་སེམས་ཅན་ལ་ལྟ་ཡང་ཉོན་མོངས་ པའི་དབང་གིས་མི་འགྲོ་བའོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའི་བརྩོན་འགྲུས་རྟུལ་བ་མ་ཉམས་པ་ནི། གང་དགེ་བའི་རྩ་བའི་སེམས་སྐྱེས་ཤིང་བྱུང་བ་རྣམས་བྱང་ཆུབ་ཏུ་བསྔོ་བ་སྟེ། དེའི་དགེ་བའི་རྩ་བ་དེ་མི་ཟད་པར་འགྱུར་ཏེ། ཤཱ་རིའི་བུ། འདི་ལྟ་སྟེ། དཔེར་ན། རྒྱ་མཚོ་ཆེན་པོར་སོང་བའི་ཆུ་ནི། བར་མ་དོར་ཆུད་ཟ་བར་མི་འགྱུར་བ་དེ་བཞིན་དུ། ཤཱ་རིའི་བུ། བྱང་ཆུབ་ཏུ་བསྔོས་ པའི་དགེ་བའི་རྩ་བ་ཡང་བར་མ་དོར་ཟད་པར་མི་འགྱུར་ཏེ། དེའི་ཕྱིར་བརྩོན་འགྲུས་རྟུལ་བ་མ་ཉམས་པ་ཞེས་བྱའོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའི་བརྩོན་འགྲུས་རྟུལ་བ་མ་ཉམས་ པ་ཡང་དག་པར་ཞུགས་པ་ནི། དགེ་བའི་རྩ་བ་དེ་དག་སྡུད་ཅིང་ཐམས་ཅད་མཁྱེན་པའི་རྣམ་པ་མངོན་པར་སྒྲུབ་པའི་དགེ་བའི་རྩ་བ་སྡུད་པས་དེའི་ཕྱིར་བརྩོན་འགྲུས་རྟུལ་བ་མ་ཉམས་པ་ཞེས་བྱའོ། ། ཤཱ་རིའི་བུ། གཞན་ཡང་བྱང་ཆུབ་སེམས་དཔའ་ནི། འདི་ལྟར་སློབ་སྟེ། སེམས་ཅན་རྣམས་ཀྱི་བསོད་ནམས་ཀྱི་ཕུང་པོ་ཇི་སྙེད་པ་དང༌། སློབ་པ་དང་མི་སློབ་པའི་བསོད་ནམས་ཀྱི་ཕུང་པོ་ཇི་སྙེད་པ་ ༄༅། །དང༌། རང་སངས་རྒྱས་རྣམས་ཀྱི་བསོད་ནམས་ཀྱི་ཕུང་པོ་ཇི་སྙེད་པ་དང༌། བསོད་ནམས་དེ་དག་ཐམས་ཅད་ཀྱིས་དེ་བཞིན་གཤེགས་པའི་སྐུའི་བ་སྤུའི་ཁུང་བུ་ གཅིག་ཡོངས་སུ་འགྲུབ་བོ། །བ་སྤུའི་ཁུང་བུ་ཐམས་ཅད་དུ་གཏོགས་པ་ཇི་སྙེད་པ་དེའི་བསོད་ནམས་ཀྱི་ཕུང་པོ་དེ་དག་ཐམས་ཅད་ཀྱིས་ནི། གཏན་པ་མེད་པའི་མཆོད་སྦྱིན་བྱས་ན་འགྲུབ་པར་ འགྱུར་རོ། །དེ་ལྟ་བུའི་མཆོད་སྦྱིན་བརྒྱས་ནི། སྐུ་ལ་སྐྱེས་བུ་ཆེན་པོའི་མཚན་གཅིག་མངོན་པར་འགྲུབ་བོ། །དེ་ལྟར་འཇུག་པས་མཚན་ཐམས་ཅད་ཀྱང་མངོན་པར་འགྲུབ་བོ། །མཚན་ཐམས་ ཅད་དུ་གཏོགས་པའི་བསོད་ནམས་ཀྱི་ཕུང་པོ་ཇི་སྙེད་པའི་བསོད་ནམས་ཀྱི་ཕུང་པོ་དེ་དག་གིས་ནི། དེ་བཞིན་གཤེགས་པའི་སྨིན་མཚམས་ཀྱི་མཛོད་སྤུ་ཡོངས་སུ་འགྲུབ་བོ། །མཛོད་སྤུར་ གཏོགས་པའི་བསོད་ནམས་ཀྱི་ཕུང་པོ་ཇི་སྙེད་པ་དེ་ལས། བརྒྱ་ཕྲག་སྟོང་དུ་བསྒྲེས་པའི་བསོད་ནམས་ཀྱི་ཕུང་པོས་ནི། དེ་བཞིན་གཤེགས་པའི་དབུའི་གཙུག་ཏོར་བལྟར་མི་མཐོང་ བའི་སྐྱེས་བུ་ཆེན་པོ་དེའི་མཚན་མངོན་པར་འགྲུབ་བོ། །གཙུག་ཏོར་དུ་གཏོགས་པའི་བསོད་ནམས་ཀྱི་ཕུང་པོ་ཇི་སྙེད་པ་དེ་ལས་བྱེ་བ་བརྒྱ་སྟོང་དུ་བསྒྲེས་པའི་བསོད་ནམས་ཀྱི་ཕུང་པོས་ནི། དེ་ བཞིན་གཤེགས་པའི་ཆོས་ཀྱི་དུང་ཡོངས་སུ་འགྲུབ་སྟེ། མདོར་ན་དེ་བཞིན་གཤེགས་པའི་ཆོས་ཀྱི་དུང་དེས་མཐའ་ཡས་མུ་མེད་པའི་འཇིག་རྟེན་གྱི་ཁམས་དབྱངས་ཀྱིས་གོ་བར་མཛད་དེ། སེམས་ཅན་ཐམས་ཅད་ཀྱི་དབང་པོ་ཇི་ལྟ་བུར་མོས་ཤིང་འདུལ་བ་བཞིན་དུ་ཚིམ་པར་མཛད་དོ། །དེ་ལྟར་དཀའ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འགྲུབ་ཀྱང་བདག་གདོན་མི་ཟ་ བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་པར་བྱས་ཏེ། མཐའ་ཡས་མུ་མེད་པའི་འཇིག་རྟེན་གྱི་ཁམས་སུ་སངས་རྒྱས་ཀྱི་དབྱངས་ཀྱིས་གོ་བར་བྱའོ། །ཞེས་སྤྲོ་ ཞིང་གོ་ཆ་མི་འདོར་བ་དེ་ནི། བྱང་ཆུབ་སེམས་དཔའི་བརྩོན་འགྲུས་རྟུལ་བ་མ་ཉམས་པའོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའི་བརྩོན་འགྲུས་རྟུལ་བ་མ་ཉམས་པ་ནི། གང་སྟོང་གསུམ་ གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་དེ་དག་ཐམས་ཅད་དད་པས་རྗེས་སུ་འབྲང་བའི་ཡེ་ཤེས་དང་ལྡན་པར་གྱུར་པས་ནི། ཆོས་ཀྱི་རྗེས་སུ་འབྲང་བའི་ཡེ་ཤེས་དང་ལྡན་པ་དེའི་བརྒྱའི་ ཆར་ཡང་ཉེ་བར་མི་འགྲོའོ། །སྟོང་གི་ཆའམ། བརྒྱ་ཕྲག་སྟོང་གི་ཆའམ། ཆར་རམ། བགྲང་བར་རམ། རྒྱུར་ཡང་ཉེ་བར་མི་འགྲོའོ། །གོང་མ་བཞིན་དུ་སྦྱར་ཏེ་དེ་ལྟར་གང་སྟོང་གསུམ་གྱི་སྟོང་ཆེན་ པོའི་འཇིག་རྟེན་གྱི་ཁམས་ཀྱི་སེམས་ཅན་དེ་དག་ཐམས་ཅད་རྒྱུན་དུ་ཞུགས་པའི་ཡེ་ཤེས་དང་ལྡན་པར་གྱུར་པ་དང༌། དེ་དག་ལན་གཅིག་ཕྱིར་འོང་བའི་ཡེ་ཤེས་དང་ལྡན་པ་དང༌། དེ་བཞིན་དུ་ཕྱིར་མི་ འོང་བའི་ཡེ་ཤེས་དང་ལྡན་པ་དང༌། དེ་བཞིན་དུ་དགྲ་བཅོམ་པའི་ཡེ་ཤེས་དང་ལྡན་པ་དང༌། དེ་བཞིན་དུ་རང་སངས་རྒྱས་ཀྱི་ཡེ་ཤེས་དང་ལྡན་པ་དང༌། དེ་བཞིན་དུ་བསྐལ་པ་བརྒྱས་འབྱུང་བའི་བྱང་ ༄༅། །ཆུབ་སེམས་དཔའ་དང༌། དེ་བཞིན་དུ་ཕྱིར་མི་ལྡོག་པའི་ཡེ་ཤེས་དང་ལྡན་པ་དང༌། དེ་བཞིན་དུ་སྐྱེ་བ་གཅིག་གིས་ཐོགས་པ་སྟེ། རྒྱས་པར་མཐའ་ཡས་ མུ་མེད་པའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའི་ཡེ་ཤེས་དང་ལྡན་པར་གྱུར་པ་དེ་དག་གིས་ནི། དེ་བཞིན་ གཤེགས་པའི་གནས་དང་གནས་མ་ཡིན་པ་མཁྱེན་པའི་སྟོབས་དེའི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆར་རམ། བརྒྱ་ཕྲག་སྟོང་གི་ཆར་རམ། གྲངས་སུའམ། ཆར་རམ། བགྲང་ བར་རམ། རྒྱུར་ཡང་ཉེ་བར་མི་འགྲོའོ། །ཡེ་ཤེས་ལ་འཇུག་པ་འདི་ཐོས་ནས་མི་དངང༌། མི་སྐྲག །སྐྲག་པར་མི་འགྱུར་ཞིང་ཡེ་ཤེས་དེ་ལ་འཇུག་པར་མོས་པ་བསྐྱེད་དེ། བརྩོན་འགྲུས་རྩོམ་ ཞིང་བྲི་དང༌། རྒྱུས་པ་དང༌། རུས་པ་དང༌། པགས་པ་དང༌། ཤ་དང༌། ཁྲག་དང༌། ལུས་ཡོངས་སུ་བསྐམས་པར་གྱུར་ཀྱང་བླའི། དེ་བཞིན་གཤེགས་པའི་སྟོབས་མ་ཐོབ་ཀྱི་བར་དུ་བརྩོན་འགྲུས་ ཉམས་པར་མི་འགྱུར་བ་དེ་ནི། བརྩོན་འགྲུས་རྟུལ་བ་མ་ཉམས་པ་ཞེས་བྱའོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་འདི་ལྟར་སློབ་སྟེ། སེམས་ཅན་ཐམས་ཅད་ཀྱི་འདས་པའི་སེམས་ ཇི་སྙེད་པ་དེ་དག་སེམས་ཅན་གཅིག་གི་སེམས་གཅིག་ཏུ་ཞུགས་པར་གྱུར་ལ། དེ་བཞིན་དུ་སེམས་ཅན་ཐམས་ཅད་ཀྱི་སེམས་དེ་ཙམ་དུ་ཚད་མེད་ཅིང་མང་བར་གྱུར་ཏེ། གང་སེམས་ཅན་ཐམས་ ཅད་ཀྱི་འདོད་ཆགས་དང༌། ཞེ་སྡང་དང༌། གཏི་མུག་དང༌། ཉོན་མོངས་པ་ཐམས་ཅད་ཀྱིས་གང་བའི་སེམས་དེ་དག་སེམས་ཅན་གཅིག་གི་སེམས་གཅིག་ལ་འཇུག་པར་གྱུར་ལ། རྣམ་གྲངས་ འདིས་སེམས་ཅན་ཐམས་ཅད་དེ་སྙེད་ཀྱི་ཉོན་མོངས་པ་མང་པོ་ཚད་མེད་པར་གྱུར་ཀྱང་དེ་ལ་བདག་གིས་དེ་འདྲ་བའི་ཤེས་རབ་དང༌། ཡེ་ཤེས་ཀྱི་ཚོགས་ཡོངས་སུ་བཙལ་བར་བྱ། འབད་པར་བྱ། བརྩོན་འགྲུས་བརྩམ་པར་བྱ་སྟེ། ཇི་ལྟར་བརྩོན་འགྲུས་བརྩམས་པས་སེམས་ཅན་ཐམས་ཅད་ཀྱི་འདོད་ཆགས་ཀྱི་ཀུན་ཏུ་གདུང་བ་དང༌། ཞེ་སྡང་གི་ཀུན་ཏུ་གདུང་བ་དང༌། གཏི་མུག་གི་ཀུན་ཏུ་ གདུང་བ་དེ་དག་ཐམས་ཅད་རབ་ཏུ་ཞི་བར་བྱ། དུག་མེད་པར་བྱ། གཞོལ་བར་བྱ། དགྲོལ་བར་བྱ། ཐལ་བར་བྱ། མྱ་ངན་ལས་འདས་པའི་ལམ་ལ་རབ་ཏུ་དགོད་པར་བྱའོ། །སྙམ་དུ་གང་དེ་ལ་ རྟུལ་བ་དེ་ནི། བྱང་ཆུབ་སེམས་དཔའ་བརྩོན་འགྲུས་རྟུལ་བ་མ་ཉམས་པར་བྱའོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་བརྩོན་འགྲུས་རྟུལ་བ་མ་ཉམས་པ་ནི། གང་ལུས་ཀྱི་ལས་དགེ་ བ་ལ་གནས་པ་དང༌། ངག་གི་ལས་དགེ་བ་ལ་གནས་པ་དང༌། ཡིད་ཀྱི་ལས་དགེ་བ་ལ་གནས་པ་དང༌། བརྩོན་འགྲུས་གང་ཇི་སྙེད་ཡོད་པ་དེ་དག་ཐམས་ཅད་ལུས་དང༌། ངག་དང༌། སེམས་ དང་ལྡན་པའོ། །ལུས་དང་ངག་གི་བརྩོན་འགྲུས་བས་སེམས་ཀྱི་བརྩོན་འགྲུས་ཉིད་མཆོག་ཅེས་བྱའོ། །དེ་ལ་སེམས་ཀྱི་བརྩོན་འགྲུས་གང་ཞེ་ན། གང་སེམས་ཀྱི་འཇུག་པ་དང༌། གནས་པའོ། ། ༄༅། །དེ་ལ་སེམས་ཀྱི་འཇུག་པ་གང་ཞེ་ན། གང་བྱང་ཆུབ་ལ་རྩོལ་བའོ། དེ་ལ་སེམས་ཀྱི་གནས་པ་གང་ཞེ་ན། གང་བྱང་ཆུབ་ཀྱི་སེམས་ཉེ་བར་མ་ཞི་བའོ། །དེ་ལ་འཇུག་ པ་གང་ཞེ་ན། གང་སེམས་ཅན་ཐམས་ཅད་ལ་སྙིང་རྗེ་ཆེ་བའོ། །དེ་ལ་གནས་པ་གང་ཞེ་ན། གང་བདག་མེད་པ་ལ་བཟོད་པའོ། །དེ་ལ་འཇུག་པ་གང་ཞེ་ན། གང་སེམས་ཅན་ཐམས་ཅད་སྡུད་ པའོ༑ ༑དེ་ལ་གནས་པ་གང་ཞེ་ན། གང་སེམས་ཅན་ཐམས་ཅད་ལ་ཕན་འདོགས་པའོ། །འཇུག་པ་ནི། འཁོར་བས་ཡོངས་སུ་མི་སྐྱོ་བའོ། །གནས་པ་ནི། ཁམས་གསུམ་མི་དམིགས་པའོ། ། འཇུག་པ་ནི། ནོར་ཐམས་ཅད་ཡོངས་སུ་གཏོང་བའོ། །གནས་པ་ནི། སྦྱིན་པ་མི་སྙེམས་པའོ། །འཇུག་པ་ནི། ཚུལ་ཁྲིམས་ཡང་དག་པར་འཛིན་པའོ། །གནས་པ་ནི། ཚུལ་ཁྲིམས་མི་སྙེམས་ པའོ༑ ༑འཇུག་པ་ནི། བཟོད་པས་སྡུག་བསྔལ་བཟོད་པའོ། །གནས་པ་ནི། སེམས་མི་འཁྲུགས་པའོ། །འཇུག་པ་ནི། དགེ་བའི་རྩ་བའི་ཆོས་ཐམས་ཅད་བརྩོན་པའོ། །གནས་པ་ནི། རབ་ཏུ་དབེན་ པའོ༑ ༑འཇུག་པ་ནི། བསམ་གཏན་སྒྲུབ་པའོ། །གནས་པ་ནི། སེམས་ངེས་པར་རྟོགས་པའོ། །འཇུག་པ་ནི། ཐོས་པས་མི་ངོམས་པའོ། །གནས་པ་ནི། ཚུལ་བཞིན་རབ་ཏུ་སྦྱོར་བའོ། །འཇུག་ པ་ནི༑ ཐོས་པ་སྟོན་པའོ། །གནས་པ་ནི། བརྗོད་དུ་མེད་པའི་ཆོས་ཉིད་དོ། །འཇུག་པ་ནི། ཡེ་ཤེས་ཀྱི་ཚོགས་ཡོངས་སུ་ཚོལ་བའོ། །གནས་པ་ནི། སྤྲོས་པ་ཐམས་ཅད་ཡང་དག་པར་གཅོད་པའོ། ། འཇུག་པ་ནི། ཚངས་པའི་གནས་གསོག་པའོ། །གནས་པ་ནི། ཡང་དག་པའི་ཡེ་ཤེས་ཀྱི་བཏང་སྙོམས་སོ། །འཇུག་པ་ནི། མངོན་པར་ཤེས་པ་ལྔ་ཡོངས་སུ་རྫོགས་པའོ། །གནས་པ་ནི། ཟག་པ་ཟད་ པ་ཡོངས་སུ་འདྲིས་པར་བྱེད་པའོ། །འཇུག་པ་ནི། དྲན་པ་ཉེ་བར་གཞག་པ་སྒོམ་པའོ། །གནས་པ་ནི། དྲན་པ་མེད་པ་དང༌། ཡིད་ལ་བྱེད་པ་མེད་པའོ། །འཇུག་པ་ནི། ཡང་དག་པར་སྤོང་བ་ལ་རབ་ཏུ་སྦྱོར་ བའོ༑ ༑གནས་པ་ནི། དགེ་བ་དང༌། མི་དགེ་བ་དང་བྲལ་བའོ། །འཇུག་པ་ནི། རྫུ་འཕྲུལ་གྱི་རྐང་པ་མངོན་པར་སྒྲུབ་པའོ། །གནས་པ་ནི། ལྷུན་གྱིས་གྲུབ་པས་བྱ་བ་འཇུག་པའོ། །འཇུག་པ་ནི། དབང་ པོ་ལ་མཁས་པའོ། །གནས་པ་ནི། དབང་པོ་ཆོས་ལ་སོ་སོར་རྟོག་པའོ། །འཇུག་པ་ནི། སྟོབས་སྒྲུབ་པའོ། །གནས་པ་ནི། མི་རྫི་བའི་གནས་སོ། །འཇུག་པ་ནི། བྱང་ཆུབ་ཀྱི་ཡན་ལག་ཡང་དག་པར་ འབྱུང་བའོ། །གནས་པ་ནི། ཆོས་ལ་རབ་ཏུ་ཤེས་པའི་ཡེ་ཤེས་སོ། །འཇུག་པ་ནི། ལམ་གྱི་ཚོགས་ཡོངས་སུ་ཚོལ་བའོ། །གནས་པ་ནི། གང་དུ་ཡང་མི་འགྲོ་བའོ། །འཇུག་པ་ནི། ཞི་གནས་ཡོངས་སུ་ ཚོལ་བའོ། །གནས་པ་ནི། ཞི་གནས་ཀྱི་སེམས་སོ། །འཇུག་པ་ནི། ལྷག་མཐོང་གི་ཚོགས་སོ། །གནས་པ་ནི། ཆོས་ཉིད་རིག་པའོ། །འཇུག་པ་ནི། རྒྱུ་ཁོང་དུ་ཆུད་པའོ། །གནས་པ་ནི། རྒྱུ་ཡོངས་སུ་ ཤེས་པའོ། །འཇུག་པ་ནི། གཞན་གྱི་སྒྲ་ཐོས་པའོ། །གནས་པ་ནི། ཆོས་ལ་ནན་ཏན་བྱེད་པའོ། །འཇུག་པ་ནི། ཆོས་ཀྱི་སྐུའི་རྒྱན་ཏོ། །གནས་པ་ནི། ཆོས་ཀྱི་སྐུ་ཉིད་དོ། །འཇུག་པ་ནི། ངག་གི་རྒྱན་ ༄༅། །ཏོ། །གནས་པ་ནི། འཕགས་པའི་མི་སྨྲ་བའོ། །འཇུག་པ་ནི། རྣམ་པར་ཐར་པའི་སྒོ་གསུམ་ལ་མོས་པའོ། །གནས་པ་ནི། མི་བྱེད་པའོ། །འཇུག་པ་ནི། བདུད་བཞི་རྣམ་ པར་སྤོང་བའོ། །གནས་པ་ནི། བག་ཆགས་ཀྱི་ཉོན་མོངས་པ་འདོར་བའོ། །འཇུག་པ་ནི། ཐབས་མཁས་པའོ། །གནས་པ་ནི། ཤེས་རབ་ཀྱིས་བལྟའོ། །འཇུག་པ་ནི། མི་དམིགས་པར་བལྟའོ། ། གནས་པ་ནི། སྒྲོལ་བར་བལྟའོ། །འཇུག་པ་ནི། བརྡར་བལྟའོ། །གནས་པ་ནི། དོན་དུ་བལྟའོ། །འདི་ནི། སེམས་ཀྱི་བརྩོན་འགྲུས་ཞེས་བྱ་སྟེ། གང་བརྩོན་འགྲུས་ལ་རྩོམ་པ་དང༌། འབད་པ་ དང༌། རྟུལ་བ་དེ་ནི། བྱང་ཆུབ་སེམས་དཔའི་བརྩོན་འགྲུས་རྟུལ་བ་མ་ཉམས་པ་ཞེས་བྱའོ། །དེ་ལྟར་ཤཱ་རིའི་བུ། བརྩོན་འགྲུས་རྟུལ་བ་མ་ཉམས་པའི་བྱང་ཆུབ་སེམས་དཔའ་ནི། ཆོས་ ལྔས་མངོན་པར་འཕགས་པ་ཡིན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་རོ། །ཆོས་ལྔ་པོ་གང་དག་གིས་མངོན་པར་འཕགས་ པ་ཡིན་ཞེ་ན། སངས་རྒྱས་འབྱུང་བ་མཉེས་པར་བྱེད་པས་མངོན་པར་འཕགས་པ་ཡིན། དགེ་བའི་བཤེས་གཉེན་ལ་བརྟེན་པས་མངོན་པར་འཕགས་པ་ཡིན། དལ་པ་ཕུན་སུམ་ཚོགས་ པ་ཐོབ་པས་མངོན་པར་འཕགས་པ་ཡིན། ཇི་ལྟར་དགེ་བའི་ཆོས་བསྒྲུབས་བ་ཆུད་མི་ཟ་བས་མངོན་པར་འཕགས་པ་ཡིན། སྡོམ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ ཆེན་པོའི་རྗེས་སུ་བསླབ་པས་མངོན་པར་འཕགས་པ་ཡིན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་བཅོམ་ ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་གང་ཆོས་ལྔས་མངོན་པར་འཕགས་པར་མི་འགྱུར་བ་དེ་ལྟ་བུ་མཆིས་སམ་ བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། ཡོད་དོ། །བཅོམ་ལྡན་འདས། ཇི་ལྟར་ཇི་ལྟ་བུ་ལགས། བདེ་བར་གཤེགས་པ། ཇི་ལྟར་ཇི་ལྟ་བུ་ལགས། བཀའ་སྩལ་པ། ཤཱ་རིའི་ བུ། བྱང་ཆུབ་སེམས་དཔའ་ཆོས་ལྔ་དང་ལྡན་པ་སངས་རྒྱས་འབྱུང་བ་མཉེས་པར་མི་བྱེད་པ་དང༌། དགེ་བའི་བཤེས་གཉེན་ལ་མི་བརྟེན་པ་དང༌། དལ་བ་འབྱོར་བ་མི་རྙེད་པ་དང༌། དགེ་བའི་ ཆོས་ཇི་ལྟར་བསྒྲུབས་པ་ཆུད་གསོན་པ་དང༌། སྡོམ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་རྗེས་སུ་མ་བསླབ་པ་ཡིན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ ཆུབ་ཀྱང་མྱུར་དུ་མངོན་པར་རྫོགས་པར་འཚང་མི་རྒྱའོ། །ཆོས་ལྔ་གང་ཞེ་ན། འདི་ལ་ཤཱ་རིའི་བུ། བྱང་ཆུབ་སེམས་དཔའ་ཁྱིམ་པ་རྒྱལ་པོའི་བཀྲབས་པར་འགྱུར། སྐྱེ་བོ་མང་པོ་སྐྲག་པར་ འགྱུར་ཞིང་སྐྱེ་བོ་མང་པོས་བདག་ཅག་གི་དོན་བགྱིར་གསོལ་ཞེས་དེ་ལ་གསོལ་བ་བཏབ་པ་དང༌། དེ་དག་ལ་བྱའོ། །ཞེས་སྨྲས་ནས་དེ་མི་བྱེད་ཅིང་ཚིག་གི་དངོས་པོ་ཙམ་གྱི་བར་ལ་གནས་པ་ ༄༅། །མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ། འདི་ལྟ་བུའི་ཆོས་འདི་ནི། མཐོ་རིས་ལས་ཉམས་པར་འགྱུར་བའོ། །ཤཱ་རིའི་བུ། འདི་ལྟ་བུའི་ཆོས་འདི་ནི། དལ་བ་ཕུན་སུམ་ཚོགས་པ་ཐོབ་པ་ཉམས་པར་འགྱུར་བའོ། །ཤཱ་རིའི་བུ། ཆོས་དང་པོ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་ནི། ལུས་གསོ་བའི་ཕྱིར་སངས་རྒྱས་འབྱུང་བ་ མཉེས་པར་མི་བྱེད་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུའང་མྱུར་དུ་མངོན་པར་རྫོགས་པར་འཚང་རྒྱ་བར་མི་འགྱུར་རོ། །ཤཱ་རིའི་བུ། གཞན་ཡང་བྱང་ཆུབ་ སེམས་དཔའ་ཁྱིམ་པ་གྲོང་ཁྱེར་དུ་འཚེ་བ་ལ་ཆགས་པ་སྟེ། གྲོང་ཁྱེར་དུ་འཚེ་བ་གང་ཞེ་ན། ཤཱ་རིའི་བུ། འདི་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་འཇིག་རྟེན་དུ་བྱུང་སྟེ། ལྷ་དང༌། མི་དང༌། ལྷ་མ་ཡིན་དུ་བཅས་པའི་འཇིག་རྟེན་གྱི་མདུན་དུ་ཆོས་སྟོན་པ་ནི། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་ བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཡང་དག་པར་རབ་ཏུ་སྟོན་ཏེ། དེ་ལས་འཁོར་བཞི་འབྱུང་ངོ༌། །འཁོར་བཞི་གང་ ཞེ་ན། འདི་ལྟ་སྟེ། དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མའོ། །དེ་ལ་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མ་གྲོང་ངམ། གྲོང་ ཁྱེར་རམ། ལྗོངས་སམ། ཡུལ་ལམ། ཕོ་བྲང་འཁོར་གྱི་ནང་དུ་གནས་པར་གྱུར་པ་ལས་དེ་དག་གི་ཚུལ་ཁྲིམས་ཀྱི་ཕུང་པོ་ཉམས་པར་བྱེད་པ་སྟེ། དེ་ནི། གྲོང་ཁྱེར་ལ་འཚེ་བ་ཞེས་བྱའོ། །དེ་ལ་ཆགས་ ནས་བྱང་ཆུབ་སེམས་དཔའ་ཁྱིམ་པ་སངས་རྒྱས་འབྱུང་བ་མཉེས་པར་མི་བྱེད་པ་ནས་མྱུར་དུ་མངོན་པར་རྫོགས་པར་འཚང་མི་རྒྱ་བའི་བར་དུའོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་ཁྱིམ་པ་ ལེགས་པར་བཤད་པའི་ཆོས་འདུལ་བ་ལ་གནས་པ། ཕ་མ་ལ་ཆོས་ཀྱི་བར་ཆད་བྱེད་པ་དང༌། བུ་དང༌། བུ་མོ་དང༌། ཆུང་མ་དང༌། སྲིང་མོ་ལ་ཆོས་ཀྱི་བར་ཆད་བྱེད་པ་དང༌། མཛའ་བོ་དང༌། ཉེ་དུ་དང༌། སྣག་གི་གཉེན་མཚམས་རྣམས་ལ་ཆོས་ཀྱི་བར་ཆད་བྱེད་པ་དང༌། དེ་བཞིན་དུ་སེམས་ཅན་གཞན་རྣམས་ལའང་ཆོས་ཀྱི་བར་ཆད་བྱེད་པ་དེ་ནི། ཡུན་རིང་པོར་ཆོས་ཀྱི་བར་ཆད་དུ་འགྱུར་བ་ཡིན་ཏེ། ཤཱ་ རིའི་བུ། ཆོས་གསུམ་པོ་འདི་དང་ལྡན་པའི་བྱང་ཆུབ་སེམས་དཔའ་ནི། ཆོས་ཀྱི་བར་ཆད་བྱས་ནས་སངས་རྒྱས་འབྱུང་བ་མཉེས་པར་མི་བྱེད་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་ དུ་ཡང་མྱུར་དུ་མངོན་པར་རྫོགས་པར་འཚང་རྒྱ་བར་མི་འགྱུར་བའོ། །གཞན་ཡང་བྱང་ཆུབ་སེམས་དཔའ་ཁྱིམ་པ་དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདི་དག་འདོད་པ་ཉུང་བ་ དང་མཐུན་པ། ཡོ་བྱད་བསྙུངས་པ་དང་མཐུན་པ། ཐོས་ན་མི་དད་ཅིང་གཞན་ཡང་ལྟ་བ་དེ་ཉིད་ཡང་དག་པར་འཛིན་དུ་འཇུག་པ་དང༌། དེ་དེ་བཞིན་གཤེགས་པའི་བསྟན་པ་ལ་སྨོད་ཅིང་མཉེས་པར་མི་ ༄༅། །བྱེད་དེ། སྨད་པའི་འགྲོ་བ་ཉིད་དུ་འགྲོ་བའོ། །སྨད་པའི་འགྲོ་བ་གང་ཞེ་ན། འདི་ལྟ་སྟེ། སེམས་ཅན་དམྱལ་བ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་ རྟེན་དང༌། མཐའ་འཁོབ་ཀྱི་ཡུལ་མི་དང༌། ཡན་ལག་ཉམས་པ་དང༌། ཀླ་ཀློ་དང༌། ལོག་པར་ལྟ་བའི་སེམས་ཅན་གྱི་ནང་དུ་སྐྱེ་བ་སྟེ། ཤཱ་རིའི་བུ། ཆོས་བཞི་པོ་འདི་དང་ལྡན་པའི་བྱང་ཆུབ་ སེམས་དཔའ་ཁྱིམ་པ་ནི། སངས་རྒྱས་འབྱུང་བ་མཉེས་པར་མི་བྱེད་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་ཡང་མྱུར་དུ་མངོན་པར་རྫོགས་པར་འཚང་རྒྱ་བར་མི་འགྱུར་ རོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་ཁྱིམ་པ་འདི་ལྟ་སྟེ། བློན་པོ་དང༌། དེ་མ་ཡིན་པའི་འཁོར་གཞན་སྟོབས་ཆེན་པོ་ལ་བརྟེན་པར་གྱུར་ཏེ། དེ་དབང་ཕྱུག་གི་དབང་གིས་སྐྱེ་ བོ་མང་པོ་ལ་གཤེ་ཤིང་བརྒྱད་དེ་ཚིག་ངན་པ་རྩུབ་པོས་སྤྱོད་དེ། འཕྱས་འདོགས་ཤིང་འཐིང་སླད་བྱེད་དེ། ངག་གི་ཉེས་པར་སྤྱོད་པ་དེ་དང་ལྡན་པས་ངན་སོང་དུ་འཇིགས་སུ་རུང་བའི་ལུས་ འཐོབ་པར་འགྱུར་རོ། །ཤཱ་རིའི་བུ། ཆོས་ལྔ་པོ་འདི་དང་ལྡན་པའི་བྱང་ཆུབ་སེམས་དཔའ་ཁྱིམ་པ་ནི། སངས་རྒྱས་འབྱུང་བ་མཉེས་པར་མི་བྱེད། དགེ་བའི་བཤེས་གཉེན་ལ་ཡང་མི་བརྟེན། དལ་བ་ཕུན་སུམ་ཚོགས་པ་ཡང་མི་འཐོབ། ཇི་ལྟར་བསྒྲུབས་པའི་དགེ་བའི་རྩ་བ་ཡང་ཆུད་གསོན། སྡོམ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཡང་རྗེས་སུ་སློབ་ པར་མི་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱ་བར་མི་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་ འདི་དག་གསུངས་སོ། །ལས་ནི་རྣམ་པ་འདི་ལྟ་སྟེ། །དེས་ནི་ཤེས་རབ་མི་འཕེལ་འགྱུར། །བློ་ཡང་མྱུར་དུ་མ་རུང་འགྱུར། །མི་མཆོག་རྣམས་ནི་མཉེས་མི་བྱེད། །དེ་ནི་སེམས་ཅན་སླུ་བ་སྟེ། །ཕོ་བྲང་ འཁོར་གྱི་བཀྲབས་པ་ལྟར། །མི་དགེ་རྩ་བ་དེ་དག་གིས། །འཇིག་རྟེན་མགོན་པོ་མི་མཐོང་ངོ༌། །བདག་གིས་ཕྲོགས་ཤིག་ལོངས་ཤིག་ཅེས། །སེམས་ཅན་རྣམས་ལ་འཇིགས་བསྐྱེད་དེ། །ཉེས་པའི་ལས་ རྣམས་བྱས་གྱུར་ནས། །མི་མཆོག་རྣམས་ནི་མཉེས་མི་བྱེད། །དགེ་སློང་དང་ནི་དགེ་སློང་མ། །ཚུལ་ཁྲིམས་ཉམས་བྱས་སྡུག་བསྔལ་འགྱུར། །སངས་རྒྱས་མང་པོ་མཉེས་མི་བྱེད། །དེ་ལ་དལ་བ་རྙེད་ པར་དཀའ། །ཕ་དང་མ་དང་ཆུང་མ་རྣམས། །ཆོས་སྤྱོད་པ་ཡི་གེགས་བྱེད་དེ། །མྱུར་དུ་ཆོས་ཀྱང་མི་ཐོས་ཤིང༌། །གཏི་མུག་གིས་ནི་བསྒྲིབས་པར་འགྱུར། །རབ་ཏུ་འབྱུང་བར་འགྲོ་བ་ལ། །བར་དུ་གཅོད་ པར་བྱས་གྱུར་ནས། །སངས་རྒྱས་མང་པོ་མཉེས་མི་བྱེད། །དེ་ལ་དལ་པ་མི་འབྱུང་ངོ༌། །གང་དུ་སྟོང་པ་ཉིད་བསྔགས་པ། །འདི་ལྟ་བུ་ཡི་ཆོས་ཐོས་ནས། །ཁྲོ་བ་དག་ནི་ཉེར་ལེན་ཅིང༌། །འདི་ནི་ཆོས་མིན་ ཞེས་ཀྱང་སྨྲ། །བར་ཆད་འདི་དག་ཐམས་ཅད་ཀྱིས། །བཅུ་དྲུག་ཆར་ཡང་མི་འགྲོའོ། །དམ་པའི་ཆོས་ལ་སྨད་བྱས་ནས། །དམུས་ལོང་རབ་ཏུ་སྡུག་བསྔལ་འགྱུར། །རྫོགས་པའི་སངས་རྒྱས་དེས་མི་ ༄༅། །མཐོང༌། །མཐོང་དུ་ཟིན་ཀྱང་དད་མི་འགྱུར། །བུད་མེད་མ་ནིང་དམུས་ལོང་དང༌། །ཁྱི་དང་བོང་བུ་རྣམས་སུ་འགྱུར། །གང་ཞིག་སངས་རྒྱས་བྱང་ཆུབ་དང༌། །བྱང་ཆུབ་ སེམས་དཔའ་དགའ་བ་དག །བར་དུ་གཅོད་པ་རྣམས་སྤངས་ནས། །བཟང་པོ་དག་གི་ལམ་རྣམས་སྒོམ། །ཕ་དང་མ་ནི་ཆོས་འདི་ལ། །ཡང་དང་ཡང་དུ་སྦྱོར་བ་དང༌། །སེམས་ཅན་ཐམས་ཅད་ རབ་འབྱུང་བར། །མྱུར་བ་ཉིད་དུ་ལེན་དུ་བཅུག །མ་ནི་ཆོས་ལ་སྦྱར་བྱས་ན། །མྱུར་དུ་བཟང་པོའི་འགྲོ་བར་འགྲོ་།རབ་ཏུ་འབྱུང་བར་བསྔགས་པས་ན། །མྱུར་དུ་བྱང་ཆུབ་རྣམ་འཚང་རྒྱ། །ཤཱ་ རིའི་བུ། རབ་ཏུ་བྱུང་བའི་བྱང་ཆུབ་སེམས་དཔའ་ཆོས་ལྔ་དང་ལྡན་ན། སངས་རྒྱས་འབྱུང་བ་མཉེས་པར་མི་བྱེད། དགེ་བའི་བཤེས་གཉེན་ལ་མི་བརྟེན། དལ་བ་ཕུན་སུམ་ཚོགས་པ་ ཡང་མི་འཐོབ། ཇི་ལྟར་བསྒྲུབས་པའི་དགེ་བའི་རྩ་བ་རྣམས་ཀྱང་ཆུད་ཟ་བར་བྱེད། སྡོམ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཡང་རྗེས་སུ་སློབ་པར་མི་འགྱུར་ ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་མི་རྒྱའོ། །ལྔ་གང་ཞེ་ན། འཆལ་བའི་ཚུལ་ཁྲིམས་ལ་སྤྱོད་པ་དང༌། དམ་པའི་ཆོས་ལ་ སྨོད་པ་དང༌། རྙེད་པ་དང་བཀུར་སྟི་དང་ཚིགས་སུ་བཅད་པ་ལ་ཆགས་པ་དང༌། བདག་ཏུ་ལྟ་བའི་ཐིབས་པོ་དང༌། གཞན་གྱི་ཁྱིམ་ལ་ཕྲག་དོག་དང༌། སེར་སྣ་བསྐྱེད་པ་སྟེ། ཤཱ་རིའི་བུ། རབ་ཏུ་བྱུང་བའི་བྱང་ཆུབ་སེམས་དཔའ་ཆོས་ལྔ་པོ་དེ་དག་དང་ལྡན་ན། སངས་རྒྱས་འབྱུང་བ་མཉེས་པར་མི་བྱེད་པ་དང༌། དགེ་བའི་བཤེས་གཉེན་ལ་མི་བརྟེན་པ་དང༌། གོང་མ་བཞིན་དུ་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་ཡང་མྱུར་དུ་མངོན་པར་རྫོགས་པར་འཚང་མི་རྒྱའོ། །ཤཱ་རིའི་བུ། འདི་ལྟ་སྟེ། ཁྱི་ལྟོགས་པ་ཀེང་རུས་ཤ་མེད་པ་ཁྲག་གིས་འབགས་པ་ བླངས་ནས་དེ་སྲང་གི་སྒོ་ན་གནས་ཏེ་ཁ་ཆུས་གོས་པ་དེ་འཆའ་བ་ལས། དེ་ནས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་དང༌། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དང༌། ཁྱིམ་བདག་གི་རིགས་ ཤིང་སཱ་ལ་ཆེན་པོ་ལྟ་བུ་ཁྱི་ལྟོགས་པ་དེ་ལོགས་སུ་འོང་བ་ཁྱི་དེས་རྒྱང་མ་ནས་འོང་བ་མཐོང་ནས་དེ་འདི་སྙམ་དུ་བསམ་སྟེ། འདི་ནི། བདག་གི་ཁ་ཟས་རོ་ཞིམ་པོ་འདི་འཕྲོག་པ་ཞིག་གོ །སྙམ་ ནས་དེ་ཤིན་ཏུ་ཟུགས་ཤིང་མིག་ཚུགས་སུ་བལྟ་ལ་བྲང་བསྙེར་ཏེ་སྐད་ཆེར་ཟུགས་ན། ཤཱ་རིའི་བུ། དེ་ཇི་སྙམ་དུ་སེམས། སྐྱེས་བུ་དེ་ཀེང་རུས་ཤ་མེད་པ་ཁྲག་གིས་འབགས་པ་དེ་འདོད་པ་ ཡིན་ནམ། གསོལ་བ། བཅོམ་ལྡན་འདས། དེ་ནི། མ་ལགས་སོ། །བདེ་བར་གཤེགས་པ། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱི་དེ་ཅིའི་ཕྱིར་ཤིན་ཏུ་ཟུགས་ཤིང་ མིག་ཚུགས་སུ་བལྟལ་བྲང་བསྙེར་ཏེ་སྐད་ཆེར་ཞུགས། གསོལ་པ། དེ་འདི་སྙམ་དུ་སེམས་ཏེ། བདག་གི་ཁ་ཟས་རོ་ཞིམ་པོ་འདི་འཕྲོག་པ་ཞིག་གོ །སྙམ་སྟེ། ཤིན་ཏུ་ཟུགས་ཤིང་མིག་ ༄༅། །ཚུགས་སུ་བལྟ་ལ་བྲང་བསྙེར་ཏེ་སྐད་ཆེར་ཟུགས་སོ། །བཀའ་སྩལ་པ། ཤཱ་རིའི་བུ། དེ་བཞིན་དུ་གང་ཁྱིམ་གྱི་སེར་སྣ་ལ་བརྩོན་པ། བཤང་བ་དང༌། གཅི་བས་ཀུན་ ཏུ་བསྐོར་བ་ལ་ཆགས་པའི་དགེ་སློང་དག་འབྱུང་བར་འགྱུར་ཏེ། འདི་ལྟ་བུའི་དལ་བ་ཕུན་སུམ་ཚོགས་པ་རྙེད་ནས་དེས་ཆུད་ཟོས་པར་བྱེད་པ་དེ་དག་ནི། ངས་ཁྱི་དང་འདྲའོ། །ཞེས་བརྗོད་དེ། དེ་དག་འབའ་ཞིག་གི་ཕྱིར་དེ་བཞིན་གཤེགས་པ་འདི་ལྟ་བུའི་བརྗོད་པའི་གནས་བྱེད་པ་མ་ཡིན་གྱི། ཡང་ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སྐྱེ་བོ་མང་པོ་ ལ་ཕན་པ་དང༌། སྐྱེ་བོ་མང་པོ་ལ་བདེ་བའི་ཕྱིར་སངས་རྒྱས་ཀྱི་ཡེ་ཤེས་ཚོལ་བ་དེ་དག་ནི། བདག་གི་ཤ་ཡང་ཡོངས་སུ་གཏོང་ན། གཞན་གྱི་ཁྱིམ་ལ་རྟོག་ཅིང་བསྙེན་པའི་ཕྱིར་ཕྲག་དོག་དང༌། སེར་སྣ་བྱེད་པར་མི་འགྱུར་བ་ལྟ་ཅི་སྨོས། ཡང་ཤཱ་རིའི་བུ། སྐྱེས་བུ་གཏི་མུག་དེ་དག་འཚོ་བའི་ཕྱིར་ཟང་ཟིང་དང༌། བྲན་དང༌། འཇིག་རྟེན་གྱི་ཟང་ཟིང་ལྷུར་བྱེད་ཅིང་ཟས་དང༌། སྲོག་ལ་ལྷུར་ བྱེད་པ། རྟོག་ཅིང་བསྙེན་པའི་ཕྱིར་གཞན་གྱི་ཁྱིམ་ལ་ཕྲག་དོག་དང༌། སེར་སྣ་བསྐྱེད་པར་འགྱུར་ཏེ། ཤཱ་རིའི་བུ། དེ་ལྟར་བརྩོན་པའི་དགེ་སློང་མཐོང་ན། ཕྲག་དོག་དང༌། སེར་སྣ་བསྐྱེད་དེ། བདག་ནི། སྔོན་ཆད་འདིར་ཤེས་ན། ཕྱི་མ་འདི་ག་ལས་འོངས་པ་ཞིག །འདི་ནི། བདག་དང་སྔོན་འཐམས་པ་ཞིག་ཡིན་ན། ཕྱི་མ་འདི་ག་ལས་འོངས་པ་ཞིག་ཅེས་ཟེར་ཞིང༌། གལ་ཏེ་དེའི་ཁྱིམ་ བདག་དེ་དག་གིས་ལྷུང་བཟེད་དང༌། ཆོས་གོས་དང༌། བསོད་སྙོམས་དམ་བཅས་པར་གྱུར་པ་དང༌། མལ་སྟན་དང༌། ན་བའི་གསོས་སྨན་དང༌། ཡོ་བྱད་ཁས་བླངས་པར་གྱུར་པ་རྣམས་སྔོན་ནི། བདག་དང་དམ་བཅས་པར་གྱུར་མོད་ཀྱི། ཕྱིས་འོངས་ནས་སྦྱིན་པར་མི་འགྱུར་གྲང་སྙམ་ནས་དེ་དེ་ལ་ཉེས་པ་གསུམ་བསྐྱེད་དེ། གསུམ་གང་ཞེ་ན། གནས་ལ་ཉེས་པ་བསྐྱེད་དེ། གནས་དེ་ནས་ འགྲོའོ། །སྙམ་སེམས་པ་དང༌། ཤེས་པར་བྱ་བ་མ་ཡིན་པ་ཤེས་ཤིང་ཤེས་པར་བྱ་བ་མི་ཤེས་ལ། གང་ཅུང་ཟད་བསྟེན་པ་ཡང་མི་སྟེན་པ་དང༌། དེ་ཁྱིམ་པ་ལ་ཉེས་པ་བསྐྱེད་པ་སྟེ། དེ་དགེ་སློང་ དེ་གནས་གསུམ་བརྗོད་པར་བྱེད་དོ། །གསུམ་གང་ཞེ་ན། གནས་ཀྱི་ཉེས་པ་བརྗོད་པ་དང༌། ཉམས་མི་དགའ་བ་བརྗོད་ཅིང་ཁྱིམ་གཏོང་བར་བྱེད་པ་དང༌། མི་བདེན་པའི་གཏམ་ཟེར་ཞིང་སྐྱེས་བུ་ དམ་པ་མ་ཡིན་པ་འདི་དག་གཡོ་བྱེད་དོ། །ཞེས་ཡིད་རྟོན་པའི་སྦྱོར་བས་དམ་བཅའ་བར་བྱ་བའི་ཆོས་ཡང་དག་པ་རབ་ཏུ་སྟོན་པ་སྟེ། ཤཱ་རིའི་བུ། དེ་ལྟར་ན་ཁྱིམ་ལ་སེར་སྣ་བྱེད་པ་ཆོས་དཀར་པོ་ ཡོངས་སུ་ཉམས་པར་འགྱུར་བའོ། །ཡང་ཤཱ་རིའི་བུ། ཁྱིམ་ལ་སེར་སྣ་བྱེད་པ་ལ་གནས་པ་སྐྱེས་བུ་དམ་པ་མ་ཡིན་པ་དེ་དག་གིས་སྡོམ་པ་དང༌། སྡོམ་པ་ལ་གནས་པའི་བྱང་ཆུབ་སེམས་དཔའ་ ཡོངས་སུ་བཏང་བར་འགྱུར་ཏེ། སྡོམ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་རྗེས་སུ་སློབ་པར་མི་འགྱུར་རོ། །བམ་པོ་བཅུ་བཞི་པ། ཤཱ་རིའི་བུ། དེ་བས་ ༄༅། །ན། རྣམ་གྲངས་འདིས་ཀྱང་འདི་ལྟར་ཤེས་པར་བྱ་སྟེ། ཤཱ་རིའི་བུ། སྔོན་བྱུང་བ་འདས་པའི་དུས། བསྐལ་བ་གྲངས་མེད་པའི་ཡང་ཆེས་གྲངས་མེད་པ། ཡངས་ པ། ཚད་མེད་པ། བསམ་གྱིས་མི་ཁྱབ་པར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་འཕགས་ཞེས་བྱ་བ་འཇིག་ རྟེན་དུ་བྱུང་སྟེ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་ བཅོམ་ལྡན་འདས་དེ་ལོ་བྱེ་བ་ཕྲག་དགུ་བཅུའི་བར་དུ་བཞུགས་སོ། །དེའི་ཉན་ཐོས་ཀྱང་བྱེ་བ་ཁྲག་ཁྲིག་ཕྲག་དགུ་བཅུའི་ཉན་ཐོས་རྣམས་ཀྱི་ཉན་ཐོས་འདུས་པ་ཆེན་པོ་བྱུང་སྟེ། ཐམས་ ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ་ནས་སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ་ཤ་སྟག་གི་བར་དུའོ། །ཡང་དེའི་ ཚེ་ཁྱིམ་བདག་རབ་ཏུ་རྣམ་པར་འབྱེད་པ་ཞེས་བྱ་བ་ཕྱུག་ཅིང་ནོར་ཆེ་བ། ལོངས་སྤྱོད་ཆེ་ཞིང་ལོངས་སྤྱོད་མང་བ། བདག་དབང་བ་མང་བ། ནོར་དང་ཡོ་བྱད་མང་པོ་དང་ལྡན་ཞིང༌། འགྲོན་བུ་ དང༌། གསེར་དང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱི་རུ་དང༌། དངུལ་དང༌། ས་ལེ་སྦྲམ་མང་པོ་དང་ལྡན་པ། བྲན་ཕོ་དང༌། བྲན་མོ་དང༌། ལས་བྱེད་ པ་དང༌། ཞོ་ཤས་འཚོ་བ་མང་ཞིང༌། གླང་པོ་ཆེ་དང༌། རྟ་དང༌། ར་ལུག་མང་བ། ནོར་དང༌། འབྲུ་དང༌། མཛོད་དང༌། བང་བ་མང་པོ་དང་ལྡན་པ་ཞིག་བྱུང་སྟེ། དེའི་ཁྱེའུ་དེ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པའི་མཆོག་དང་ལྡན་པ་སྡོམ་པ་ཞེས་བྱ་བ་དང༌། སྡོམ་པ་ལ་གནས་པ་ཞེས་བྱ་བ་གཉིས་བྱུང་སྟེ། དེ་གཉིས་དུས་གཞན་ཞིག་ན་ཁང་ཐོག་ཏུ་ དོང་བར་གྱུར་ཏོ། །ཤཱ་རིའི་བུ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་འཕགས་པ་དེ་སྔ་དྲོའི་དུས་ཀྱི་ཚེ་ཆོས་གོས་ དང་ཤམ་ཐབས་མནབས། ལྷུང་བཟེད་བསྣམས་ཏེ་དགེ་སློང་གི་དགེ་འདུན་གྱིས་བསྐོར་ཅིང་དགེ་སློང་གི་དགེ་འདུན་གྱི་མདུན་དུ་བདར་ནས་བསོད་སྙོམས་ཀྱི་ཕྱིར་གྲོང་ཁྱེར་དེར་གཤེགས་པ་ དང༌། མཛེས་པ། དགའ་བར་གྱུར་པ། དབང་པོ་ཞི་བ། ཡིད་ཞི་བ། མཆོག་ཏུ་དུལ་བ་དང༌། ཞི་གནས་ཀྱི་མཆོག་ཐོབ་པ། ཤིན་ཏུ་དུལ་ཞིང་ཞི་གནས་ཀྱི་མཆོག་ཐོབ་པ། དབང་པོ་དུལ་ཞིང་ སྦས་པ། གླང་པོ་ལྟར་རབ་ཏུ་དུལ་བ། མཚོ་ལྟར་དྭངས་ཤིང་ཐོག་པ་མེད་ལ་གསལ་བ། གསེར་གྱི་མཆོད་སྡོང་ལྟ་བུ། ས་ལེ་སྦྲམ་གྱི་རི་ལྟ་བུ། རིན་པོ་ཆེས་ཡོངས་སུ་གང་བའི་མཚོ་ལྟ་བུ། ལྷས་ཀུན་ནས་བསྐོར་བའི་བརྒྱ་བྱིན་ལྟ་བུ། ཡིད་རབ་ཏུ་ཞི་བའི་ཚངས་པ་ལྟ་བུའི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་ ༄༅། །འཕགས་མཛེས་ཤིང་དགའ་བར་འགྱུར་བ་དེ་རྒྱང་མ་ནས་བྱོན་པ་ཁྱེའུ་དེ་གཉིས་ཀྱིས་མཐོང་ངོ༌། །ཤཱ་རིའི་བུ། དེ་ནས་གང་སྡོམ་པ་ལ་གནས་པ་ཞེས་བྱ་བའི་ གཞོན་ནུ་དེས་དང་པོ་ཉིད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་འཕགས་སྔར་མཐོང་ནས་དེས་ནུ་བོ་དེ་ལ་སྨྲས་པ། སེམས་ཅན་གྱི་རྒྱལ་པོ་འདི་ལྟ་བུར་མཛེས་པ་ནུ་བོ་ཁྱོད་ཀྱིས་སྔོན་ནམ་ཡང་རེས་འགའ་མཐོང་ངམ། དེས་ཕུ་བོ་ལ་ཕུ་བོ། །སེམས་ཅན་གྱི་རྒྱལ་པོ་མཛེས་པ་འདི་ལྟ་བུ་བདག་གིས་སྔོན་ལན་ འགའ་ཡང་མ་མཐོང་ངོ༌། །ཞེས་དེ་སྐད་སྨྲས་པ་དང༌། དེས་ནུ་བོ། །ང་ནི། འདི་དང་འདྲ་བ་ཉིད་དུ་འགྱུར་བར་བྱའོ། །ཞེས་དེ་སྐད་སྨྲས་སོ། །ཤཱ་རིའི་བུ། དེ་ནས་ཁྱེའུ་སྡོམ་པ་ལ་གནས་པས་ཁྱེའུ་ སྡོམ་པ་ལ་ཚིགས་སུ་བཅད་པ་འདི་དག་སྨྲས་སོ། །སྡོམ་པ་ཇི་ལྟར་མཐོང་བ་བཞིན། །དེ་འདྲ་བར་ནི་བདག་བསྒྱུར་ཏེ། །བདག་ནི་དེ་བས་མང་བ་ཡི། །དགེ་སློང་དགེ་འདུན་བསྡུ་བར་བྱ། །བྱང་ཆུབ་ཀྱི་ ནི་ལམ་གྱི་ཕྱིར། །ཟས་དང་སྐོམ་ནི་མི་བཟའ་འོ། །སྡོམ་པ་འདི་ནི་རྒྱལ་བ་སྟེ། །བདག་ནི་ཁྱིམ་འདིར་དགའ་བ་མེད། །སེམས་ཅན་ཀུན་གྱི་མཆོག་འདི་ནི། །སྐར་མང་དབུས་ན་ཟླ་བ་བཞིན། །མཐོང་ ན་དད་པར་སུ་མི་འགྱུར། །ཁྱིམ་ནས་མི་འབྱུང་སུ་ཞིག་ཡོད། །ཤཱ་རིའི་བུ། དེ་ནས་ཁྱེའུ་སྡོམ་པས་ཁྱེའུ་སྡོམ་པ་ལ་གནས་པ་ལ་སླར་ཚིགས་སུ་བཅད་པ་འདི་དག་སྨྲས་སོ། །ཚིག་ཏུ་བྱས་པས་ མི་འགྱུར་གྱི། །སྒྲ་བོ་ཆེ་ནི་མ་འབྱིན་ཅིག །ད་ནི་ཚིག་ཏུ་མི་སྨྲ་སྟེ། །འཚང་རྒྱ་གང་མྱུར་ཤེས་པར་བྱ། །ཤཱ་རིའི་བུ། དེ་ནས་ཁྱེའུ་སྡོམ་པ་ལ་གནས་པས་ཁྱེའུ་སྡོམ་པ་ལ་སླར་ཚིགས་སུ་བཅད་པ་འདི་དག་ སྨྲས་སོ། །བདག་ཉིད་སེར་སྣ་སེམས་པ་དང༌། །ཞུམ་པ་དག་གི་ལམ་མིན་ཏེ། །མི་མཆོག་སངས་རྒྱས་འགྱུར་རོ་ཞེས། །བཟང་པོའི་སྒྲ་ནི་བདག་གིས་བསྒྲགས། །བདག་ནོར་ཤེས་པར་མི་འགྱུར་བ། ། སེར་སྣ་ཅན་གྱི་རྟགས་ཡིན་ནོ། །བདག་ནི་མི་སྨྲ་མི་བྱ་སྟེ། །བདག་གཏོང་ནོར་ལྟ་ག་ལ་ཞིག །ཁྱིམ་འདི་དག་ནི་ཁྱོད་ཀྱིའོ། །ང་ནི་བྱང་ཆུབ་ལམ་ཕྱིར་འགྲོ་།ཁྱིམ་དང་ནོར་ནི་ཁྱོད་ཀྱི་སྟེ། །བདག་ནི་ སངས་རྒྱས་དགའ་བའོ། །སུམ་ཅུ་རྩ་གཉིས་མཆོག་གི་མཚན། །འདི་འདྲ་བ་དག་མཐོང་གྱུར་ན། །ལྟ་བ་ཉམས་པ་མ་གཏོགས་པར། །བྱང་ཆུབ་མཆོག་འདི་སུ་མི་ཚོལ། །ཁྱིམ་དག་དང་ནི་ནོར་རྣམས་ དང༌། །ཕ་དང་མ་དང་གཉེན་རྣམས་དང༌། །བདག་གིས་དེ་དག་ཀུན་སྤངས་ཏེ། །སངས་རྒྱས་དྲུང་དུ་འགྲོ་བར་བྱ། །འཇིག་རྟེན་མགོན་པོ་འོད་མཛད་པའི། །འཇིག་རྟེན་སྣང་མཛད་རབ་ཏུ་དཀོན། །བསྐལ་པ་ བྱེ་བ་སྟོང་དུ་ཡང༌། །དེ་ནི་ཐོས་པར་ཤིན་ཏུ་དཀོན། །ནམ་མཁའ་དག་པའི་ཟླ་བ་ནི། །ས་ལ་ལམ་མེར་འདུག་པ་ལྟར། །རྒྱལ་པོའི་ཕོ་བྲང་འཁོར་ཞུགས་ནས། །དགེ་སློང་དགེ་འདུན་མདུན་དུ་བྱས་སོ། །འོད་ ཟེར་སྟོང་པའི་ཉི་མ་ནི། །བར་སྣང་གནས་ན་ལྷང་ངེ་བ། །དེ་བཞིན་སངས་རྒྱས་སྲས་དབུས་ན། །ཀུན་ནས་རབ་ཏུ་མཛེས་པར་སྣང༌། །རིའི་རྒྱལ་པོ་རི་རབ་ནི། །རིན་ཆེན་བདག་ཉིད་མཛེས་པར་སྣང༌། །དེ་ ༄༅། །བཞིན་སངས་རྒྱས་མཛེས་པ་ཡང༌། །དགེ་སློང་དགེ་འདུན་མདུན་དུ་བྱས། །སྐུ་ཡི་གཟི་བརྗིད་འབར་བ་ནི། །འགྲོ་བ་འདི་དག་རྣམས་ལ་སྣང༌། །གཟི་བརྗིད་ཕུང་པོའི་ གཟུགས་ཅན་ཏེ། །རྐང་གཉིས་དམ་པ་དེ་མཛེས་སོ། །ལྷ་དང་ཀླུ་དང་མི་རྣམས་ནི། །རྫུ་འཕྲུལ་དག་གིས་རབ་སྡུད་ཅིང༌། །རྒྱལ་པོའི་ཕོ་བྲང་འཁོར་ཞུགས་ནས། །ཆོ་འཕྲུལ་དག་ནི་རྣམ་པར་ སྟོན། །སུམ་ཅུ་རྩ་གཉིས་བསོད་ནམས་མཚན་མཆོག་ལྡན། །ཆོས་ཀྱི་བདག་པོ་འདི་འདྲ་མཐོང་ནས་ནི། །བྱིས་པ་མ་བསླབ་པ་དག་མ་གཏོགས་པར། །ཐེག་པ་དམན་ལ་སུ་ཞིག་འཇུག་པར་ འགྱུར༑ ༑ཤིན་ཏུ་དཀོན་པ་རབ་ཏུ་མཛེས་བྱུང་བ། །མི་མཆོག་འདི་ནི་བདག་གིས་མཐོང་བས་ན། །བྱང་ཆུབ་ཕྱིར་ནི་མངོན་པར་ཞུགས་གྱུར་ནས། །བདེ་བར་གཤེགས་པའི་དྲུང་དུ་ཉེ་བར་འགྲོ་།ཤཱ་ རིའི་བུ༑ དེ་ནས་ཁྱེའུ་སྡོམ་པས་ཁྱེའུ་སྡོམ་པ་ལ་གནས་པ་ལ་ཚིགས་སུ་བཅད་པ་འདི་དག་སྨྲས་སོ། །བདག་ནི་ལེ་ལོའི་ལམ་དག་ནས། །སངས་རྒྱས་དྲུང་དུ་མི་འགྲོ་སྟེ། །ཁང་ཐོག་འདི་ནས་ཕྱི་རོལ་ ཏུ༑ ༑བདག་གི་ལུས་འདི་མཆོང་བར་བྱ། །བདག་ཏུ་འདུ་ཤེས་བསལ་གྱུར་ནས། །སྲོག་ལ་བལྟ་བར་མི་བྱ་སྟེ། །ཡེ་ཤེས་མཆོག་ནི་ཡོངས་བཙལ་ཞིང༌། །སངས་རྒྱས་དྲུང་དུ་འགྲོ་བར་བྱ། །ཕ་ལ་ ཆགས་དང་མ་ལ་ཆགས། །ཁྱིམ་ལ་ཆགས་པ་མི་བཟད་པ། །དེ་དག་ཐམས་ཅད་རྣམ་སྤངས་ནས། །སངས་རྒྱས་དྲུང་དུ་འགྲོ་བར་བྱ། །འདི་འདྲར་འགྱུར་བར་གང་འདོད་པ། །དེ་ནི་སངས་རྒྱས་དགའ་ བ་ཡིན༑ ༑རིན་པོ་ཆེ་ནི་ཀུན་སྤངས་ནས། །ཁྱིམ་མེད་པར་ནི་རབ་ཏུ་འབྱུང༌། །དེ་ལྟར་ཤཱ་རིའི་བུ། ཁྱེའུ་སྡོམ་པ་ལ་གནས་པ་ནི། ཁྱིམ་གྱི་སྐས་ལས་བབས་ཏེ་བཅོམ་ལྡན་འདས་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་འཕགས་ག་ལ་བ་དེར་སོང་ངོ༌། །ཡང་ཤཱ་རིའི་བུ། ཁྱེའུ་སྡོམ་པ་ནི། ཁང་ཐོག་དེ་ནས་མཆོང་ནས་དེ་བཅོམ་ལྡན་འདས་དེ་བཞིན་ གཤེགས་པ་མངོན་པར་འཕགས་པ་ག་ལ་བ་དེར་ཤིན་ཏུ་མྱུར་དུ་སོང་ངོ༌། །ཁྱེའུ་སྡོམ་པ་ལ་གནས་པ་ཕྱི་ནས་སོང་ངོ༌། །ཤཱ་རིའི་བུ། དེ་ནས་ཁྱེའུ་སྡོམ་པས་བཅོམ་ལྡན་འདས་དེ་ལ་ན་བཟའ་ སྲང་བྱེ་བ་རི་བ་ཕུལ་ཏེ། དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བདག་ནི་གཟུགས་རྣམས་ཚོལ་བའི་ཕྱིར། །སངས་རྒྱས་ན་བཟའ་འབུལ་མ་ལགས། །མི་མཆོག་དག་ནི་ཅི་འདྲ་བར། །དེ་ འདྲ་བར་ནི་འགྱུར་བར་བགྱི། །ཡེ་ཤེས་ཕུང་པོ་ལྡན་པ་དང༌། །བརྩོན་འགྲུས་སྟོབས་ལ་རབ་གནས་ཤིང༌། །སུམ་ཅུ་རྩ་གཉིས་མཚན་མངའ་བ། །རྐང་གཉིས་དམ་པར་འགྱུར་བར་ཤོག །སྟོབས་བཅུ་ རྣམས་དང་ལྡན་གྱུར་ཅིང༌། །མི་འཇིགས་པ་ལ་རབ་གནས་པ། །དེ་བཞིན་གཤེགས་པ་ཅི་འདྲ་བ། །དེ་འདྲ་བར་ནི་འགྱུར་བར་ཤོག །ཁྱོད་ཀྱིས་ཆོས་གང་མཁྱེན་པ་དང༌། །གང་ལ་ཞུགས་པར་ལྷང་ངེ་བ།། བྱང་ཆུབ་དམ་པར་སངས་རྒྱས་ནས། །བདག་ནི་ཆོས་དེ་སྟོན་པར་ཤོག །བདག་ནི་གཟུགས་རྣམས་མངོན་པར་ཚོལ་བའི་ཕྱིར། །སངས་རྒྱས་ན་བཟའ་མཆོག་འབུལ་མ་ལགས་ཀྱི། །ལྷར་བཅས་ ༄༅། །འཇིག་རྟེན་རྣམས་ལ་ཕན་པའི་ཕྱིར། །བྱང་ཆུབ་མཆོག་གི་ཞི་བ་མངོན་པར་ཚོལ། །གཉིས་སུ་མེད་པའི་ཆོས་མཆོག་དེར་གནས་ཤིང༌། །ཕ་རོལ་རྒོལ་བ་ཀུན་གྱིས་མི་ གཡོས་པ། །ཆོས་དེ་ཉིད་ནི་མངོན་པར་འཚལ་བའི་ཕྱིར། །སངས་རྒྱས་ལ་ནི་ན་བཟའ་མཆོག་ཕུལ་ལོ། །ལྷར་བཅས་འཇིག་རྟེན་དག་ལ་སྨན་པའི་ཕྱིར། །གང་ན་སྐྱེ་རྒན་འཆི་མ་མཆིས་ ཤིང༌། །མྱ་ངན་དང་ནི་སྨྲེ་སྔགས་མ་མཆིས་པ། །ཞི་བའི་ཆོས་དེ་བདག་ནི་སྟོན་པར་ཤོག །གང་ན་འདོད་ཆགས་ཞེ་སྡང་མ་མཆིས་ཤིང༌། །གཏི་མུག་མ་མཆིས་སྲེད་པ་མ་མཆིས་པ། །བསིལ་ དངོས་བདུད་རྩི་འདུས་མ་བགྱིས་པ་དེ། །བདག་ནི་བྱང་ཆུབ་སངས་རྒྱས་སྟོན་པར་ཤོག །གང་ལ་ཁྱོད་ཞུགས་སེམས་ཅན་ལྷ་ཀླུ་དང༌། །དེ་བཞིན་མི་དང་སེམས་མེད་དངོས་པོ་དང༌། །དེ་ལྟར་སེམས་ དང་ལྡན་པ་རབ་འདུད་པ། །བདག་ནི་ཞི་བའི་ཆོས་དེ་སྟོན་པར་ཤོག །གར་གནས་སངས་རྒྱས་ཞིང་དུ་སྣང་བ་དང༌། །ཕྱོགས་བཞི་དག་ན་ཀུན་ཏུ་སྣང་བ་དང༌། །མུན་པ་ཆེན་པོར་འོད་ཟེར་ཕུང་ལྟ་ བུའི། །བསིལ་དངོས་བདུད་རྩི་དེ་ལ་རེག་པར་ཤོག །འདོད་པའི་ཁམས་དང་གཟུགས་ཀྱི་ཁམས་དག་དང༌། །དེ་བཞིན་གཟུགས་མེད་ཁམས་ལ་རྟག་མི་གནས། །དགའ་དང་མི་དགའ་ཐམས་ ཅད་རབ་དབེན་པའི། །ཆོས་ཀྱི་དམ་པ་དེར་ནི་བདག་སོན་ཤོག །ཤཱ་རིའི་བུ། དེ་ནས་ཁྱེའུ་སྡོམ་པ་ལ་གནས་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་མངོན་པར་འཕགས་དེ་ལ་ཤིང་ལྷམ་གསར་པ་བཟུང་གཅིག་ཕུལ་ལོ། །ཕུལ་ནས་ཀྱང་ཚིགས་སུ་བཅད་པ་འདི་དག་གསོལ་ཏོ། །སེམས་ཅན་རྣམས་ཀྱི་གནས་རྟེན་ནས། །དཔུང་གཉེན་ མགོན་དུ་འགྱུར་བར་ཤོག །ངན་པའི་ལམ་དུ་མི་མཆི་ཞིང༌། །རྟག་ཏུ་ལམ་རྣམས་སྟོན་པར་ཤོག །བྱིས་པ་རྣམས་ཀྱི་སྤྱོད་ཡུལ་འདི། །འདོད་པ་ནམ་ཡང་བསྟེན་མ་གྱུར། །འདུས་བྱས་དག་ཀྱང་ རབ་སྤངས་ནས། །རྟག་ཏུ་སངས་རྒྱས་འབྱུང་རྙེད་གྱུར། །འཇིག་རྟེན་སྣང་མཛད་མཐོང་ནས་ཀྱང༌། །རྐང་གཉིས་དམ་པ་མཆོད་པར་གྱུར། །སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་དམ་པ་ཡོངས་ སུ་བཙལ། །སྲོག་ཆགས་ཀུན་ལ་ཕན་པའི་ཕྱིར། །མེ་ཏོག་ཕྲེང་བ་སྤོས་རྣམས་དང༌། །རྒྱལ་མཚན་དག་དང་གདུགས་རྣམས་ཀྱིས། །གླང་པོ་ཆེན་པོ་བཀུར་སྟིར་བགྱི། །སྲོག་ཆགས་ཀུན་ལ་ཕན་པའི་ ཕྱིར༑ ༑ཆོས་གོས་དག་དང་བསོད་སྙོམས་དང༌། །མལ་སྟན་རྣམས་དང་གདིང་པ་ཡིས། །སངས་རྒྱས་རྣམས་ལ་མཆོད་པར་བགྱི། །སྲོག་ཆགས་ཀུན་ལ་ཕན་པའི་ཕྱིར། །རྔ་དང་དུང་དང་རྔ་ཆེན་ དང༌། །སིལ་སྙན་དག་དང་པི་ཝང་གིས། །འཇིག་རྟེན་སྣང་མཛད་མཆོད་པར་ཤོག །བཟའ་བ་དང་ནི་བཅའ་བ་དང༌། །དུས་ཀྱིས་མ་ཕྱེ་བཟའ་བ་རྣམས། །དེ་དག་གིས་ནི་འཇིག་རྟེན་མགོན། །སྐྱོབ་པ་ བདག་གིས་མཆོད་པར་བགྱི། །སྲོག་ཆགས་ཀུན་ལ་ཕན་པའི་ཕྱིར། །མཆོད་པ་རྒྱ་ཆེན་བགྱིས་གྱུར་ནས། །དེ་ཉིད་དུ་ནི་རབ་བྱུང་སྟེ། །ཚངས་པར་སྤྱོད་པ་བདག་གིས་སྤྱད། །སྲོག་ཆགས་ཀུན་གྱི་ ༄༅། །མགོན་དུ་བདག་གྱུར་ཅིག །བདག་ནི་ལམ་གོལ་ནམ་ཡང་འགྲོ་མ་གྱུར། །ཡན་ལག་བརྒྱད་ལྡན་ལམ་མཆོག་རབ་གནས་པས། །བདག་གིས་སྲོག་ཆགས་བྱེ་བ་དེ་ ཉིད་དགྲོལ། །དམན་ལ་འཕགས་མིན་མཆོག་ཏུ་སྨད་པ་ཡི། །འདོད་པ་དག་ནི་ནམ་ཡང་བསྟེན་མ་གྱུར། །བག་མེད་ཐམས་ཅད་ཡོངས་སུ་སྤངས་གྱུར་ནས། །བདག་ནི་རྟག་ཏུ་བག་ཡོད་འགྱུར་བར་ ཤོག །མི་ཁོམ་བརྒྱད་ལམ་ནམ་ཡང་སྐྱེས་མ་གྱུར། །རྟག་ཏུ་དད་པའི་རིགས་སུ་སྐྱེས་གྱུར་ཅིང༌། །སྐྱེས་པར་གྱུར་ནས་མི་མཆོག་རྣམས་མཐོང་ལ། །མཐོང་ནས་དེ་ལ་བདག་ནི་དད་པར་ཤོག །དེ་ འདྲའི་ཡེ་ཤེས་དེ་ནི་བཙལ་བའི་ཕྱིར། །དང་པའི་སེམས་ཀྱིས་མེ་ཏོག་ཕྲེང་བ་དང༌། །བྱུག་པ་དག་དང་རྫ་ང་རྔ་ཆེན་དང༌། །རྔ་དང་གླིང་བུ་དག་གིས་རི་མོར་བགྱི། །བསྐལ་པ་བྱེ་མང་རྣམ་པ་སྣ་ཚོགས་ ཀྱི། །མཆོད་པ་ཆེན་པོ་དག་ནི་བགྱིས་གྱུར་ནས། །མྱུར་དུ་འདོད་པ་སྤངས་ཏེ་རབ་བྱུང་ལ། །ཚངས་པར་སྤྱད་པ་བདག་ནི་སྤྱོད་པར་ཤོག །དེ་དག་ས་ཕྱོགས་གང་དུ་འདུག་སྟེ་བཅོམ་ལྡན་འདས་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་འཕགས་པའི་རྒྱལ་པོ་དེ་ལ་ཚིགས་སུ་བཅད་པའི་གླུའི་དབྱངས་ཀྱིས་བསྟོད་པའི་ས་ཕྱོགས་དེར་ཙནྡན་ དམར་པོ་ལས་བྱས་པའི་དེ་བཞིན་གཤེགས་པའི་གཙུག་ལག་ཁང་རྒྱར་དཔག་ཚད་བཞི། འཕང་དུ་དཔག་ཚད་ཕྱེད་པ་བྱས་ཏེ། དེ་དག་གིས་གཙུག་ལག་ཁང་དེ་བྱས་ནས་དེ་བཞིན་གཤེགས་ པ་ལ་ཕུལ་ལོ། །ཕུལ་ནས་བཅོམ་ལྡན་འདས་དེ་བཞིན་གཤེགས་པ་མངོན་པར་འཕགས་པའི་རྒྱལ་པོ་ལ་ཚིགས་སུ་བཅད་པ་འདི་དག་གསོལ་ཏོ། །གནས་པ་གང་ལ་ཁྱོད་ནི་བཞུགས་གྱུར་བས། ། སྔོན་གྱི་རྒྱལ་བས་བཞི་པོ་གང་བསྔགས་པ། །གནས་པ་དེ་ནི་བཙལ་བར་བགྱི་བའི་ཕྱིར། །གཙུག་ལག་ཁང་འདི་བདེ་བར་གཤེགས་ལ་དབུལ། །གནས་པ་དག་ནི་གང་ལ་རྟག་བཞུགས་ན། །འདས་དང་ མ་འོངས་ད་ལྟར་བྱུང་བ་ཡི། །སེམས་ནི་སྲོག་ཆགས་བྱེ་བས་མི་འཚལ་བའི། །སྤྱོད་པ་དེ་ནི་བདག་གིས་བཙལ་བར་བགྱི། །སྤྱོད་པ་གང་དག་ཕ་རོལ་སོན་པ་ནི། །ཡང་དག་སྤོང་དང་དེ་བཞིན་དུ་རྫུ་འཕྲུལ་ རྐང༌། །མཆོག་བཞི་རྣམས་ཀྱི་སོ་སོ་ཡང་དག་རིག །སྤྱོད་པ་དེ་དག་བདག་གིས་བཙལ་བར་བགྱི། །དེ་དག་གིས་གཙུག་ལག་ཁང་དེ་ཉིད་དུ་བཅོམ་ལྡན་འདས་དེ་བཞིན་གཤེགས་པ་མངོན་པར་ འཕགས་པའི་རྒྱལ་པོ་དེ་དང༌། དགེ་སློང་གི་དགེ་འདུན་དུ་བཅས་པ་ལ་ཟླ་བ་ཕྱེད་ཀྱི་བར་དུ་བསྟི་སྟང་དུ་བྱེད། བླ་མར་བྱེད། རི་མོར་བྱེད། མཆོད་པར་བྱེད་དེ། དེ་དག་གིས་གཙུག་ལག་ཁང་དེར་ དེ་བཞིན་གཤེགས་པ་དགེ་སློང་གི་དགེ་འདུན་དུ་བཅས་པ་ལ་བསྟི་སྟང་དུ་བྱས། །བླ་མར་བྱས། རི་མོར་བྱས། མཆོད་པར་བྱས་ནས་དེ་བཞིན་གཤེགས་པ་དེ་ཉིད་ཀྱི་དྲུང་དུ་སྐྲ་དང༌། ཁ་སྤུ་བྲེགས་ ནས་གོས་ངུར་སྨྲིག་བགོས་ཏེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དགེ་བའི་ཆོས་ཚོལ་བ་ལ་བརྩོན་པར་གྱུར་ཏེ། དགེ་བའི་ཆོས་ཚོལ་བ་ལ་ཡིད་བརྩོན་པར་གྱུར་ཏོ། །དེ་ནས་གཅིག་ ༄༅། །གིས་སྨྲས་པ། འཇིག་རྟེན་མགོན་པོ་འོད་བྱེད་པར། །བདག་ནི་དང་པོ་སྔར་གྱུར་ཅིག །གཅིག་ཤོས་ཀྱིས་སྨྲས་པ། དེད་དཔོན་མི་ཡི་གཙོ་བོར་ཡང༌། །བདག་ནི་དང་ པོ་སྔར་གྱུར་ཅིག །དེ་ནས་ཤཱ་རིའི་བུ། གང་སྡོམ་པ་ཞེས་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཅོམ་ལྡན་འདས་དེ་བཞིན་གཤེགས་པ་མངོན་པར་འཕགས་པའི་རྒྱལ་ པོ་དེའི་སྤྱན་སྔར་འདུག་ནས་ཡི་དམ་བཅས་པ། སྟན་དག་ལ་ཡང་མི་འདུག་ཅིང༌། །བདག་ནི་མལ་དུ་མི་ཉལ་ལོ། །སྲོག་ཆགས་རྣམས་ཀྱི་དོན་འཚལ་ཕྱིར། །བདག་གིས་བྱང་ཆུབ་ལམ་ བཙལ་ལོ། །བདག་ཉིད་ཀྱི་ཡང་ལུས་དང་ནི། །སྲོག་ཀྱང་ཡོངས་སུ་སྤངས་བགྱིས་ཏེ། །ལེ་ལོ་དག་ནི་ཀུན་སྤངས་ནས། །བྱང་ཆུབ་དམ་པ་བཙལ་བར་བགྱི། །ཤ་རྣམས་དང་ནི་དེ་བཞིན་ཁྲག་ རྣམས་དང༌། །པགས་པ་དང་ནི་རྒྱུས་བསྐམས་སྲོག་བོར་ཏེ། །ལེ་ལོ་ཐམས་ཅད་ཡོངས་སུ་སྤངས་བགྱིས་ནས། །བྱང་ཆུབ་མཆོག་ཕྱིར་བརྩོན་འགྲུས་བརྩམ་པར་བགྱི། །ཤཱ་རིའི་བུ། དེ་ནས་ བྱང་ཆུབ་སེམས་དཔའ་སེམས་དཔའ་ཆེན་པོ་སྡོམ་པ་ལ་གནས་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྡོམ་པ་ལ་ཚིགས་སུ་བཅད་པ་འདི་དག་སྨྲས་སོ། །བདག་ཅག་ གཉིས་ནི་འདུས་གྱུར་ནས། །སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་སྤྱོད་པ་རྣམས་སྤྱད་ཅིང༌། །བརྩོན་འགྲུས་དམ་པ་བརྩམ་པར་བྱ། །ལུས་རྣམས་དང་ནི་དེ་བཞིན་སྲོག་པོར་ཏེ། ། ཤ་དང་ཁྲག་ནི་དེ་བཞིན་བསྐམས་གྱུར་ཀྱང༌། །སྲིད་པ་སྟོང་དུ་ཁྱོད་ཀྱི་རྗེས་སློབ་ཅིང༌། །བྱང་ཆུབ་མཆོག་ཕྱིར་བརྩོན་འགྲུས་བརྩམ་པར་བྱ། །གང་དུ་ཆོས་ཀྱི་བདག་པོ་བཞུགས་མཛེས་པའི། །ཡེ་ ཤེས་དམ་པ་ཡོངས་སུ་བཙལ་བྱ་ཞིང༌། །དགོན་པའི་གནས་ཀྱི་རི་དང་ཆུ་དྲུང་དུ། །ཐེ་ཚོམ་མེད་པར་བརྩོན་འགྲུས་བརྩམ་པར་བྱ། །ཤཱ་རིའི་བུ། དེ་ནས་བྱང་ཆུབ་སེམས་དཔའ་སྡོམ་པ་དང༌། སྡོམ་ པ་ལ་གནས་པ་ལོ་སྟོང་དུ་ལན་འགའ་ཡང་ཐ་ན་སེ་གོལ་གཏོགས་པ་སྲིད་དུ་ཡང་རྨུགས་པ་དང༌། གཉིད་ཀྱིས་ནོན་པར་མ་གྱུར་ཏོ། །ལོ་སྟོང་དུ་ལན་འགའ་ཡང་ཉལ་ལོ། །སྙམ་དུ་ཉལ་བའི་ སེམས་མ་བསྐྱེད་དོ། །ལོ་སྟོང་དུ་ལན་འགའ་ཡང་འདུག་གོ །སྙམ་དུ་སྟན་འདོད་པར་མ་གྱུར་ཏོ། །དེ་གཉིས་བཤང་བ་དང༌། གཅི་བའི་ཚེ་མ་གཏོགས་པར་ལོ་སྟོང་དུ་ཐ་ན་ལན་འགའ་ཡང་ ཙོག་ཙོག་པོར་མ་འདུག་གོ །ནམ་ཁ་ཟས་ཟ་བ་ན་ཡང་འགྲེང་བཞིན་དུ་ཁམས་གསུམ་གསུམ་ཙམ་ཟ་ཞིང་ཆུ་ཕོར་གང་ཙམ་འཐུང་ངོ༌། །དེ་གཉིས་ཀྱིས་ལོ་སྟོང་དུ་ལན་འགའ་ཡང་ཁ་ཟས་ འདོད་པའམ། བཀྲེས་ན་མྱུར་དུ་ཁ་ཟས་རྙེད་པར་དགའ་བ་མ་བསྐྱེད་དོ། །དེ་གཉིས་ཀྱིས་ལོ་སྟོང་དུ་ལན་འགའ་ཡང་ཁ་ཟས་དེ་ལས་ལྷག་པར་མ་ཟོས་སོ། །དེ་གཉིས་ཀྱིས་ལོ་སྟོང་དུ་ཁ་ཟས་ ཟ་བ་ན་ལན་འགའ་ཡང་ཁ་ཟས་ལ་མངར་བ་དང༌། སྐྱུར་བ་དང༌། བྲོ་བ་དང༌། ཚ་བ་དང༌། ཁ་བ་དང༌། བསྐ་བར་ཐ་ན་སེམས་བསྐྱེད་པ་གཅིག་ཙམ་ཡང་འདུ་ཤེས་མ་བསྐྱེད་དོ། །དེ་གཉིས་ཀྱིས་ ༄༅། །ལོ་སྟོང་དུ་བསོད་སྙོམས་སྒྲུབ་པ་ལ་ངེད་ལ་བསོད་སྙོམས་སྦྱིན་པ་འདི་བུད་མེད་དམ། སྐྱེས་པའམ། ཁྱེའུའམ། བུ་མོའམ། སུ་ཞིག་ཅེས་ལན་འགའ་ཡང་ གདོང་དུ་མ་བལྟས་སོ། །དེ་གཉིས་ཀྱིས་ལོ་སྟོང་དུ་ཤིང་གང་གི་དྲུང་ན་གནས་པའི་ཤིང་དེ་ལ་གྱེན་དུ་ལན་འགའ་ཡང་མ་བལྟས་སོ། །དེ་གཉིས་ཀྱིས་ལོ་སྟོང་དུ་ལན་འགའ་ཡང་ཆོས་གོས་གཉིས་ སུ་མ་བརྗེས་སོ། །དེ་གཉིས་ཀྱིས་ལོ་སྟོང་དུ་ལན་འགའ་ཡང་ཐན་སེམས་བསྐྱེད་པ་གཅིག་ཀྱང་འདོད་པའི་རྣམ་པར་རྟོག་པ་མ་བརྟགས། གནོད་སེམས་ཀྱི་རྣམ་པར་རྟོག་པ་མ་བརྟགས། འཚེ་ བའི་རྣམ་པར་རྟོག་པ་མ་བརྟགས་སོ། །དེ་གཉིས་ཀྱིས་ལོ་སྟོང་དུ་ལན་འགའ་ཡང་ཐ་ན་སེམས་བསྐྱེད་པ་གཅིག་ཀྱང་ཟླ་བ་ལ་སོང་བའམ། ཉི་མ་ལ་སོང་བའམ། ཕ་ལ་སོང་བའམ། མ་ལ་སོང་ བའམ། སྤུན་ལ་སོང་བའམ། སྲིང་མོ་ལ་སོང་བའམ། ཉེ་དུ་ལ་སོང་བའི་རྣམ་པར་རྟོག་པ་མ་བསྐྱེད་དོ། །དེ་གཉིས་ཀྱིས་ལོ་སྟོང་འདས་པའི་བར་དུ་ལན་འགའ་ཡང་ཐ་ན་སེམས་བསྐྱེད་པ་ གཅིག་ཀྱང་ཁྱིམ་ལ་གནས་པའི་རྣམ་པར་རྟོག་པ་མ་བརྟགས་སོ། །དེ་གཉིས་ཀྱིས་ལོ་སྟོང་དུ་ལན་འགའ་ཡང་ཟླ་བའམ། ཉི་མའམ། སྐར་མའི་གཟུགས་སམ། བར་སྣང་ལ་གྱེན་དུ་མ་ བལྟས་སོ། །དེ་གཉིས་ཀྱིས་ལོ་སྟོང་དུ་ལན་འགའ་ཡང་རྩིག་པའམ། ཤིང་ལ་མ་བསྙེས་སོ། །དེ་གཉིས་ཀྱིས་ལོ་སྟོང་དུ་ལན་འགའ་ཡང་མར་རམ། འབྲུ་མར་གྱིས་ལུས་མ་བསྐུས་སོ། ། དེ་གཉིས་ཀྱིས་ལོ་སྟོང་དུ་ལན་འགའ་ཡང་ཐ་ན་སེམས་བསྐྱེད་པ་གཅིག་ཀྱང་མར་དང་ལྡན་པའི་སེམས་མ་བསྐྱེད་དོ། །དེ་གཉིས་ཀྱིས་ལོ་སྟོང་དུ་ལན་འགའ་ཡང་ཐ་ན་སེམས་བསྐྱེད་པ་གཅིག་ཀྱང་ ལུས་ལ་སྐྱོ་བ་མ་བསྐྱེད་དོ། །དེ་གཉིས་ཀྱིས་ལོ་སྟོང་དུ་ལན་འགའ་ཡང་ཐ་ན་སེམས་བསྐྱེད་པ་གཅིག་ཀྱང་བདག་ཅག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་ པར་འཚང་རྒྱ་བར་མི་ནུས་ཞེས་ལུས་ལ་ངལ་བ་མ་བསྐྱེད་དོ། །དེ་གཉིས་ལོ་སྟོང་དུ་ལན་འགའ་ཡང་ལུས་ན་བའམ། སེམས་ན་བར་མ་གྱུར་ཏོ། །དེ་དག་གིས་ལོ་སྟོང་འདས་ཀྱི་བར་དུ་ནམ་ ཡང་སྐྲ་འབྲེག་པར་སེམས་མ་བསྐྱེད་དོ། །གཞན་དུ་ན་རྒྱལ་པོ་ཆེན་པོ་བཞི་འོངས་ནས་མགོ་ལ་བྱུགས་ཏེ་སྐྲ་ཁྱེར་ནས་ཕྱིར་འདོང་ངོ༌། །དེ་དག་སྐྲ་ཁྱེར་ནས་མཆོད་རྟེན་བཙུགས་སོ། །དེ་དག་གིས་ ལོ་སྟོང་གི་བར་དུ་རྒྱལ་པོ་ཆེན་པོ་དེ་དག་འོངས་པ་དང༌། སོང་བ་ལ་ནམ་ཡང་འོང་བ་དང་འགྲོ་བའི་སེམས་མ་བསྐྱེད་དོ། །དེ་གཉིས་ཀྱིས་ལོ་སྟོང་དུ་གྲིབ་མ་བབ་པ་ན་ཉི་མ་དང༌། ཉི་མས་ཕོག་ ན་གྲིབ་མའི་སེམས་མ་བསྐྱེད་དོ། །དེ་གཉིས་ཀྱིས་ལོ་སྟོང་དུ་གྲང་བའི་དུས་ན་ཡང་ལན་འགའ་ཡང་ལུས་ལ་གཡོགས་པའི་འདུ་ཤེས་མ་བསྐྱེད་དོ། །དེ་གཉིས་ཀྱིས་ལོ་སྟོང་དུ་ལན་འགའ་ཡང་འཇིག་ རྟེན་གྱི་ཚིག་མ་སྨྲས་སོ། །ཡང་ཤཱ་རིའི་བུ། དེའི་དུས་ན་དྲན་པ་རྨོངས་བྱེད་ཅེས་བྱ་བའི་བདུད་ཅིག་བྱུང་སྟེ། འདི་ལྟ་སྟེ། དཔེར་ན། ད་ལྟར་གྱི་ངའི་བདུད་སྡིག་ཅན་བཞིན་ནོ། །ཤཱ་རིའི་བུ། བདུད་དྲན་པ་ ༄༅། །རྨོངས་བྱེད་ཀྱིས་བྱང་ཆུབ་སེམས་དཔའ་སྡོམ་པའི་འཆག་སར་རལ་གྲི་སོ་གཏམས་པ་བྱས་པར་གྱུར་པ་དང༌། དེས་རལ་གྲིའི་སོ་དེ་ལ་རལ་གྲིའི་སོར་འདུ་ཤེས་བསྐྱེད་ ནས་དེས་བདག་ནི། བག་མེད་པ་ལ་གནས་སོ། །བདག་ནི། བག་མེད་པ་ལ་གནས་སོ། །ཞེས་སྒྲ་ཕྱུང་བ་དང༌། སྒྲ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དབྱངས་ཀྱིས་གོ་ བར་གྱུར་ཏོ། །དེ་ལྟར་ཤཱ་རིའི་བུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དབྱངས་ཀྱིས་གོ་བར་བྱས་པ་དང༌། སྟེང་གི་བར་སྣང་ལས་བདུད་ཀྱི་རིས་ཀྱི་ལྷ་བྱེ་བ་བརྒྱ་ཕྲག་སྟོང་ གིས་ཀྱེ་མའོ། །བྱང་ཆུབ་སེམས་དཔའ་ཤི་འཕོས་སུ་མ་གྱུར་ཏོ། །ཤི་འཕོས་སུ་མ་གྱུར་ཏོ། །ཞེས་སྒྲ་བྱུང་ངོ༌། །ཤཱ་རིའི་བུ། དེ་ལྟར་བྱང་ཆུབ་སེམས་དཔའ་སྡོམ་པ་དེ་ལྟར་འཆག་པས་སེམས་ བསྐྱེད་པ་དེའི་རྗེས་སུ་ཞུགས་ཏེ་ཡང་ཤཱ་རིའི་བུ། ལྷ་དང་བཅས་པས་སྒྲ་གཉིས་པ་ཕྱུང་བ་དེ་བྱང་ཆུབ་སེམས་དཔའ་སྡོམ་པས་མ་ཐོས་སོ། །གང་ལྷའི་སྒྲ་དང༌། གང་སྡོམ་པའི་སྒྲ་དེ་གཉིས་ ཀྱང་བྱང་ཆུབ་སེམས་དཔའ་སྡོམ་པ་ལ་གནས་པས་མ་ཐོས་ཏེ། ཤཱ་རིའི་བུ། སྐྱེས་བུ་དམ་པ་དེ་གཉིས་སྤྱོད་ལམ་དེ་ལྟ་བུ་དང༌། སྤྱོད་པ་དེ་ལྟ་བུ་དང༌། ནན་ཏན་དེ་ལྟ་བུ་དང༌། སྙིང་རྗེ་ ཆེན་པོ་དེ་ལྟ་བུ་དང༌། རྟུལ་བ་དེ་ལྟ་བུ་དང་ལྡན་པར་གྱུར་ཏེ། དེ་གཉིས་ཀྱིས་ལོ་སྟོང་དུ་སངས་རྒྱས་རྗེས་སུ་དྲན་པ་བསྒོམས་སོ། །གང་གི་ཚེ་བཅོམ་ལྡན་འདས་དེ་བཞིན་གཤེགས་པ་ མངོན་པར་འཕགས་པའི་རྒྱལ་པོ་དེ་ཡོངས་སུ་མྱ་ངན་ལས་འདས་པ་དང༌། དེ་ནས་ལྷ་ཞིག་འོངས་ནས་རིགས་ཀྱི་བུ་དག །དེ་བཞིན་གཤེགས་པ་ཡོངས་སུ་མྱ་ངན་ལས་འདས་སོ། །ཞེས་ སྦྲན་ཏེ། དེ་གཉིས་ཀྱིས་ཡོངས་སུ་མྱ་ངན་ལས་འདས་སོ། །ཞེས་ཐོས་ནས་བཅོམ་ལྡན་འདས་དེའི་ཁྲི་གང་ན་ཡོད་པ་དེར་སོང་སྟེ་འགྲེང་བཞིན་དུ་ཐལ་མོ་སྦྱར་ནས་ཉི་མ་བདུན་གྱི་བར་དུ་མིག་ མི་འཛུམ་པར་བལྟ་སྟེ། བྱམས་པ་དང་ལྡན་ཞིང་འགྲན་ཟླ་མེད་པའི་གུས་པས་རྗེས་སུ་དྲན་པར་བྱས་ཏེ། དེ་དག་གིས་བརྩོན་འགྲུས་མ་བཏང་བས་འགྲེང་བཞིན་དུ་འཆི་བའི་དུས་བྱས་སོ། ། དེ་དག་དེ་ནས་ཤི་འཕོས་ནས་ཚངས་པའི་འཇིག་རྟེན་དུ་སྐྱེས་སོ། །དེ་གཉིས་ཚངས་པར་གྱུར་ནས་སླར་ལོག་སྟེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་ མཆོད་རྟེན་བྱས་ནས་ལོ་བཞི་ཁྲིའི་བར་དུ་མཆོད་རྟེན་གྱི་ཡོ་བྱད་ཀྱི་ལས་བྱས་སོ། །དེ་གཉིས་ཀྱིས་དེ་བཞིན་གཤེགས་པའི་མཆོད་རྟེན་གྱི་གདུགས་བཙུགས་ཟིན་པར་ཤེས་ནས་ལོ་བདུན་ཁྲིའི་ བར་དུ་འགྲེང་བཞིན་དུ་ཐལ་མོ་སྦྱར་ཏེ་གནས་ནས་དེ་བཞིན་གཤེགས་པའི་མཆོད་རྟེན་དེ་ལ་ཕྱག་བྱེད་དོ། །དེ་དག་ཚེའི་མཐར་ཕྱིན་ཏེ་ཤི་འཕོས་ནས་ཡང་ཛམྦུའི་གླིང་ཉིད་དུ་སྐྱེས་ཏེ། འཁོར་ ལོས་བསྒྱུར་བའི་རིགས་སུ་མའི་མངལ་དུ་མ་ཚེ་མར་སྐྱེས་སོ། །དེ་གཉིས་སྐྱེས་མ་ཐག་ཏུ་གཅིག་གིས་གཅིག་དྲན་ནས་བདག་ཅག་བག་ཡོད་པ་ལ་གནས་པར་བྱའོ། །བདག་ཅག་བག་ཡོད་ ༄༅། །པའི་མཆོག་བསྒོམ་པར་བྱའོ། །ཞེས་སྨྲས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འབྱོར་དང་རྒྱས་ཤིང་རྟག་ཏུ་ལོ་ལེགས་པའི། །ཡིད་འོང་རྒྱལ་པོའི་ རིགས་སུ་བདག་ཅག་སྐྱེས། །བག་མེད་རྒྱགས་པ་རབ་ཏུ་སྤང་བྱ་སྟེ། །བྱང་ཆུབ་དམ་པ་རབ་ཏུ་བསྒྲུབ་པར་བྱ། །འདོད་དང་ལོངས་སྤྱོད་དེ་བཞིན་རྒྱལ་པོའི་སྲིད། །ཡིད་བརྟན་མི་རུང་རིང་པོར་ མི་ཐོགས་ཏེ། །བྱང་ཆུབ་དམ་པ་ཡོངས་སུ་ཚོལ་བ་ན། །མཁས་པ་དེ་ལ་འདོད་པ་མི་བསྐྱེད་དོ། །སྲོག་ཆགས་ཕན་ཕྱིར་བྱང་ཆུབ་གང་ཞུགས་པ། །འདོད་དང་ལོངས་སྤྱོད་ལ་ནི་འདོད་མི་བསྐྱེད།། མྱུར་དུ་འདོད་པ་སྤངས་ཤིང་རབ་བྱུང་ནས། །ཚངས་པར་སྤྱོད་པ་དམ་པ་མཆོག་སྤྱད་དོ། །སྔོན་འདས་དུས་ནི་ཤིན་ཏུ་རྒྱས་པ་ནས། །ལྷ་རྫས་དག་དང་མི་ཡི་བཟང་པོ་དང༌། །འདོད་པའི་ཡོན་ཏན་ ལྔ་དག་བསྟེན་གྱུར་ཀྱང༌། །དེ་ལ་ནམ་ཡང་ངོམས་པ་མ་རྙེད་དོ། །དེ་ཕྱིར་རྒྱལ་སྲིད་རྒྱས་དང་གཉེན་ཚོགས་དང༌། །འདོད་པའི་ཡོན་ཏན་འདི་དག་སྤང་བྱ་སྟེ། །ལུས་སྐྱེས་ནས་ནི་མྱུར་དུ་རབ་བྱུང་ལ། ། བྱང་ཆུབ་ཕྱིར་ནི་བརྩོན་འགྲུས་བརྩམ་པར་བྱ། །དེ་གཉིས་སྐྱེས་ནས་ལོ་བཅུ་དྲུག་ལོན་པ་དང་འདྲ་བར་གྱུར་ནས་སྐྲ་དང༌། ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་ མེད་པར་རབ་ཏུ་བྱུང་སྟེ་ལོ་ཉི་ཁྲིའི་བར་དུ་ཚངས་པར་སྤྱོད་པ་སྤྱད་དོ། །དེ་ནས་ཤི་འཕོས་ནས་སླར་ཡང་ཚངས་པའི་འཇིག་རྟེན་དུ་སྐྱེས་སོ། །ཚངས་པའི་འཇིག་རྟེན་ནས་ཤི་འཕོས་ནས་སླར་ ཡང་ཛམྦུའི་གླིང་དུ་སྐྱེས་སོ། །ཡང་ཤཱ་རིའི་བུ། དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མཆོག་ཅེས་བྱ་བ་རིག་པ་དང་ཞབས་སུ་ལྡན་པ། བདེ་ བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་བཞིན་གཤེགས་ པ་དེ་དེ་གཉིས་ཀྱིས་མཉེས་པར་བྱས་ཏེ། དེ་གཉིས་དེ་བཞིན་གཤེགས་པ་དེའི་དྲུང་དུ་སྐྲ་དང༌། ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །དེ་ གཉིས་རབ་ཏུ་བྱུང་ནས་ལོ་བྱེ་བར་ཚངས་པར་སྤྱོད་པ་སྤྱད་དོ། །ཤཱ་རིའི་བུ། རྣམ་གྲངས་དེས་སངས་རྒྱས་ཁྲི་མཉེས་པར་བྱས་ཏེ། བྱང་ཆུབ་སེམས་དཔའ་སྡོམ་པས་ཐམས་ཅད་དུ་ཚངས་པར་སྤྱོད་ པ་སྤྱད་དོ། །བྱང་ཆུབ་སེམས་དཔའ་སྡོམ་པ་ལ་གནས་པས་ནི། དེ་བཞིན་གཤེགས་པ་གཅིག་གི་དྲུང་དུ་ཚངས་པར་སྤྱོད་པ་སྤྱད་དོ། །དེ་ལ་ཤཱ་རིའི་བུ། གང་བྱང་ཆུབ་སེམས་དཔའ་སྡོམ་པ་ ཞེས་བྱ་བ་དེ་སྔར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་ འགྲུས་འབར་བ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་ ༄༅། །རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་ལོ་བྱེ་བ་ཕྲག་དགུ་བཅུའི་བར་དུ་གནས་སོ། །དེའི་ཉན་ཐོས་ཀྱང་བྱེ་བ་ཁྲག་ཁྲིག་ཕྲག་དགུ་བཅུའི་ཉན་ཐོས་ ཀྱི་འདུས་པ་ཆེན་པོ་བྱུང་ངོ༌། །ཤཱ་རིའི་བུ། དེ་བྱང་ཆུབ་སེམས་དཔའ་སྡོམ་པ་ལ་གནས་ཞེས་བྱ་བ་དེ་ནི། བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་འབར་བ་བྱང་ཆུབ་ ཐོབ་པ་དེའི་འཁོར་ལོས་བསྒྱུར་བའི་རྒྱལ་པོར་གྱུར་ཏེ། དེས་དེ་བཞིན་གཤེགས་པ་དེ་དང་དགེ་སློང་གི་དགེ་འདུན་དང་བཅས་པ་ལ་ཟླ་བ་གསུམ་གྱི་བར་དུ་ན་བཟའ་དང༌། བསོད་སྙོམས་ དང༌། མལ་སྟན་དང༌། ན་བའི་གསོས་སྨན་དང༌། ཡོ་བྱད་རྣམས་ཀྱིས་བསྟི་སྟང་དུ་བྱས། བླ་མར་བྱས། རི་མོར་བྱས། མཆོད་པར་བྱས་སོ། །དེ་ནས་ཤཱ་རིའི་བུ། བཅོམ་ལྡན་འདས་དེ་ བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་འགྲུས་འབར་བ་དེས་རྒྱལ་པོ་དེ་འོངས་པར་མཁྱེན་ནས་རྒྱལ་པོ་དེ་ལ་བསྐུལ་བའི་ཕྱིར་དེའི་ཚེ་ཚིགས་སུ་ བཅད་པ་འདི་དག་གསུངས་སོ། །སངས་རྒྱས་ཆོས་རྣམས་འཐོབ་པ་ལ། །བརྩོན་འགྲུས་དམ་པ་མཆོག་ཡིན་ཏེ། །འདོད་ལ་བརྐམ་པའི་སེམས་ཅན་རྣམས། །སེམས་ཅན་དོན་བྱེད་ཤིན་ཏུ་ དཀོན༑ ༑འདོད་ལ་བརྐམ་པའི་དོན་རྣམས་གང༌། །དེ་ནི་མཁས་པའི་དོན་མ་ཡིན། །ཁྱོད་ནི་དོན་མེད་གནས་པ་སྟེ། །མཆོག་གི་དོན་ནི་ཚོལ་མ་ཡིན། །ང་ཉིད་དང་ནི་ཁྱོད་ཉིད་དུ། །སྔོན་ནི་སྤུན་ དུ་གྱུར་པ་སྟེ། །རྫོགས་པའི་སངས་རྒྱས་མྱུར་བསྒྲུབ་ཅིང༌། །དེ་ན་བདག་ཅག་དམ་བཅས་སོ། །ངས་ནི་བྱང་ཆུབ་ཐོབ་གྱུར་ཏེ། །ཚངས་པའི་འཁོར་ལོ་བསྐོར་ལ་ལྟོས། །ཁྱོད་ནི་ཁྱིམ་དང་ཆུང་མ་ དག །རྟག་ཏུ་སྲུང་ཞིང་གནས་པ་ཡིན། །མཁས་པ་རྣམས་ནི་འདི་ལ་ཡིད་མི་རྟོན། །འདོད་པ་འདི་དག་ངན་ཞེས་རྒྱལ་བས་གསུངས། །སྐྱེ་བོ་དག་ནི་བག་མེད་དོན་སྤྱོད་དེ། །དེ་ཕྱིར་དོན་མིན་རྟག་ཏུ་ རྣམ་པར་སྤངས། །བློ་གྲོས་ངན་པ་དོན་མེད་ཁུར་ཁྱེར་ཏེ། །ཁྱོད་ནི་དོན་མེད་པ་ལ་རབ་ཏུ་གནས། །འཕགས་པ་དག་གིས་འབྱུང་བར་རབ་ཏུ་བསྔགས། །འདོད་ཡོན་སྡུག་བསྔལ་ཐོབ་བྱེད་མི་ཤེས་ སོ༑ ༑བཅོམ་ལྡན་འདས་དེས་ཚིགས་སུ་བཅད་པ་དེ་དག་གིས་དེ་བསྐུལ་བ་དང༌། དེ་བུ་ལ་མ་བལྟས། ཆུང་མ་ལ་ཡང་མ་བལྟས། ཚོང་དཔོན་དང༌། བློན་པོ་དང༌། ཕ་དང༌། མ་དང༌། མཁར་གྱི་ རྒྱལ་པོ་དང༌། གྲོང་རྡལ་དང༌། ལྗོངས་དང༌། རྒྱལ་སྲིད་ཐམས་ཅད་ལ་ཡང་མ་བལྟས། ནོར་བུའི་ཕུང་པོ་ཐམས་ཅད་ལ་ཡང་མ་ཆགས་པར་སྟན་ལས་ལངས་ཏེ་བཅོམ་ལྡན་འདས་དེའི་སྤྱན་ སྔར་འདུག་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཀྱི་ནི་བྱང་ཆུབ་ཕྱིར། །བདག་གི་ཤ་ཡང་བསྐམ་པར་བགྱི། །ཁྱིམ་ཀུན་ཀྱང་ནི་སྤང་བར་བགྱི། །དགོན་པར་མཆིས་ ནས་འགུམ་པར་བགྱི། །སྲོག་ཆགས་ཀུན་ལ་ཕན་པའི་ཕྱིར། །ཁྱིམ་མེད་པར་ནི་རབ་བྱུང་ནས། །དགོན་པ་རབ་དགོན་སྟེན་བགྱིད་ཅིང༌། །ཕྱིར་ཡང་བརྩོན་འགྲུས་བརྩམ་པར་བགྱི། །བྱིས་པ་ ༄༅། །སྨྲ་བ་སྡིག་པ་ཡི། །འདོད་པའི་ཕྱིར་ཡང་མི་སྟེན་ཏེ། །དེ་ལ་གནས་པར་གྱུར་བས་ན། །བདག་ནི་རྒྱབ་ཀྱིས་ཕྱོགས་བར་གྱུར། །འདོད་དང་ལོངས་སྤྱོད་རྒྱལ་སྲིད་དང༌།། ཐམས་ཅད་རྣམ་པར་སྤངས་གྱུར་ཏེ། །འཇིག་རྟེན་མགོན་གྱི་བསྟན་པ་ལ། །དེང་ཉིད་བདག་ནི་རབ་ཏུ་འབྱུང༌། །བྱང་ཆུབ་ཕྱིར་ནི་སྤྱད་པ་སྤྱོད་བྱེད་ན། །མཁས་པ་སུ་ཞིག་འདུས་བྱས་ཡིད་ རྟོན་བྱེད། །གང་དུ་བདག་ནི་འདོད་ལ་ཞུགས་གྱུར་པས། །བརྩོན་འགྲུས་བརྩམས་ཀྱང་བྱང་ཆུབ་རེག་མ་གྱུར། །དེ་བས་འདོད་པའི་ཡོན་ཏན་བདག་སྤངས་ཏེ། །ལོངས་སྤྱོད་བདེ་དང་རྒྱལ་ སྲིད་བདེ་སྤངས་ནས། །རྒྱལ་བའི་བསྟན་ལ་ཆེད་དུ་རབ་བྱུང་ལ། །བྱང་ཆུབ་མཆོག་ཕྱིར་བརྩོན་འགྲུས་བརྩམ་པར་བགྱི། །དེས་ཚིགས་སུ་བཅད་པ་དེ་དག་སྨྲས་ནས་བཅོམ་ལྡན་འདས་ དེ་ཉིད་ཀྱི་དྲུང་དུ་སྐྲ་དང༌། ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །རྒྱལ་པོ་མངོན་པར་བྱུང་ཞིང་རབ་ཏུ་བྱུང་བར་ཤེས་ནས་ སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །དེ་ནས་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་རིང་བསྲེལ་ལ་ མཆོད་པ་བྱས་ནས་དེ་ནས་ཤི་འཕོས་མ་ཐག་ཏུ་དགའ་ལྡན་གྱི་རིས་ཀྱི་ལྷའི་རྒྱལ་པོར་སྐྱེས་སོ། །དེ་དགའ་ལྡན་གྱི་ལྷའི་རིས་ནས་ཤི་འཕོས་ནས་བསྐལ་པ་དེ་ཉིད་ལ་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལེགས་སྤྱོད་ཅེས་བྱ་བ་འཇིག་རྟེན་དུ་བྱུང་སྟེ། རིག་པ་དང་ཞབས་སུ་ལྡན་པ་ནས་སངས་རྒྱས་བཅོམ་ལྡན་འདས་ཞེས་བྱ་བའི་བར་དུ་སྟེ། དེ་ལོ་བྱེ་བ་ཚང་བར་གནས་སོ། །དེའི་ཉན་ཐོས་ཀྱང་བྱེ་བ་ཁྲག་ཁྲིག་ཚང་བའི་ཉན་ཐོས་ཆེན་པོ་འདུས་ པར་གྱུར་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ་ནས་སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ་ཤ་སྟག་གི་བར་དུའོ། །བྱང་ཆུབ་སེམས་དཔའ་སེམས་དཔའ་ཆེན་ པོ་བརྒྱ་ཕྲག་སྟོང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་བར་དུ་བཀོད་དོ། །ཆོས་བསྟན་ནས་སེམས་ཅན་ཚད་མེད་གྲངས་མེད་པའི་དོན་བྱས་ཏེ་ཡོངས་ སུ་མྱ་ངན་ལས་འདས་སོ། །དེ་ཡོངས་སུ་མྱ་ངན་ལས་འདས་པའི་དམ་པའི་ཆོས་ནི། བསྐལ་པ་ལས་ལྷག་པར་གནས་པར་གྱུར་ཏོ། །དེའི་རིང་བསྲེལ་ཡང་རྒྱས་པར་གྱུར་ཏེ། འདི་ལྟ་སྟེ། དཔེར་ ན༑ ང་ད་ཡོངས་སུ་མྱ་ངན་ལས་འདས་ནས་རིང་བསྲེལ་རྒྱས་པར་འགྱུར་བ་བཞིན་ནོ། །ཤཱ་རིའི་བུ། བྱང་ཆུབ་སེམས་དཔའ་སྡོམ་པ་དང༌། བྱང་ཆུབ་སེམས་དཔའ་སྡོམ་པ་ལ་གནས་པའི་ རྗེས་སུ་བྱང་ཆུབ་སེམས་དཔའ་བསླབ་ཅིང་བརྩོན་འགྲུས་མ་ཉམས་པར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྤྱད་པར་བྱའི། སེམས་ཅན་ཀེང་རུས་ལ་གནས་པ་དང༌། སེར་སྣ་ལ་གནས་པ་དག་གི་ ༄༅། །རྗེས་སུ་བསླབ་པར་མི་བྱའོ། །ཤཱ་རིའི་བུ། བྱང་ཆུབ་སེམས་དཔའ་གང་ལ་ལ་བྱང་ཆུབ་འདོད་ལ་གཞན་གྱི་ཁྱིམ་ལ་སེར་སྣ་བསྐྱེད་ན། དེའི་ཚེ་དེ་ལ་འཇིགས་པ་ གསུམ་འབྱུང་བར་ཤེས་པར་བྱའོ། །གསུམ་གང་ཞེ་ན། གཞན་གྱི་ཁྱིམ་དག་ཏུ་ཁ་ཟས་ཀྱི་ཕྱིར་སྨྲ། ཀུན་ཏུ་སྨྲ་བའི་ཕྱིར་འཕགས་པའི་དགེ་སློང་གཞན་མཐོང་ན་ཕྲག་དོག་དང༌། སེར་སྣ་ བསྐྱེད་ཅིང་ཁོང་ཁྲོ་བའི་སེམས་གཅིག་ཙམ་གྱིས་ཀྱང་མི་མཐུན་པར་བྱེད་ན། དེས་སེམས་ཅན་དམྱལ་བའི་ལམ་ཡོངས་སུ་བཟུང་བར་འགྱུར། །དམུས་ལོང་གི་ས་བོན་བཏབ་བར་འགྱུར། མཐའ་འཁོབ་ཏུ་སྐྱེ་བའི་གནས་ཡོངས་སུ་བཟུང་བར་འགྱུར་རོ། །ཤཱ་རིའི་བུ། གང་ལ་ལས་འཕགས་པའི་དགེ་སློང་མཐོང་ན་ཁྲོ་བའི་ཟིལ་གྱིས་ནོན་ཏེ་ཁྲོ་བའི་སེམས་ཀྱིས་མི་སྨྲ་ཞིང་སེར་སྣ་ བསྐྱེད་དེ། ཁོང་ཁྲོ་བའི་སེམས་གཅིག་ཙམ་གྱིས་ཀྱང་མི་མཐུན་པར་བྱེད་ན། དེས་སེམས་ཅན་དམྱལ་བའི་ལམ་ཡོངས་སུ་བཟུང་བར་འགྱུར། དམུས་ལོང་གི་ས་བོན་བཏབ་པར་འགྱུར། མིར་ སྐྱེས་ན་ཡང་མཐའ་འཁོབ་ཀྱི་མིའི་ཡུལ་ཕྱོགས་སུ་སྐྱེ་བའི་གནས་ཡོངས་སུ་བཟུང་བར་འགྱུར། ཁོང་ཁྲོ་བ་མང་བར་འགྱུར། །དམུས་ལོང་དུ་འགྱུར། གཞན་གྱི་དྲིང་འཇོག་ཅིང་སྐུར་པ་ མང་བར་འགྱུར་རོ། །ཤཱ་རིའི་བུ། གང་གི་ཚེ་བྱང་ཆུབ་སེམས་དཔའ་གཞན་གྱི་ཁྱིམ་ལ་ཕྲག་དོག་དང༌། སེར་སྣ་སྐྱེས་པ་དེའི་ཚེ་དེ་དག་འཇིགས་པ་འདི་གསུམ་ཡིད་ལ་བྱའོ། །དེ་སྐད་ ཅེས་བཀའ་སྩལ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་ཆེན་པོ་དེ་དག་ལ་དེ་ལྟར་རྙེད་པ་ལེགས་པར་ རྙེད་དོ། །དེ་བཞིན་གཤེགས་པ་ཁྱིམ་གྱི་སེར་སྣ་ལས་བྱུང་བ་འདི་ལྟ་བུ་བཤད་པ་ངོ་མཚར་ཏོ། །བཅོམ་ལྡན་འདས། བདག་ཅག་ཉན་ཐོས་རྣམས་ལ་ཡང་ཁྱིམ་གྱི་སེར་སྣ་ལས་འབྱུང་བ་ལེགས་ པར་བཤད་དུ་གསོལ། བཅོམ་ལྡན་འདས། བདག་ཅག་ཀྱང་སེམས་ཅན་དམྱལ་བ་ལས་ཐར་པར་འཚལ་བ་ལགས་ཀྱི། བདག་ཅག་དམུས་ལོང་འཚལ་བ་མ་ལགས་སོ། །བདག་ཅག་གཅུགས་ མ་མཆིས་པའི་འཁོན་མི་འཚལ་ཏེ། བདག་ཅག་ཀྱང་སྐུར་པ་འདེབས་པ་འཚལ་བ་མ་ལགས་སོ། །བདག་ཅག་མཐའ་འཁོབ་ཀྱི་གནས་འཚལ་བ་མ་ལགས་སོ། །བཅོམ་ལྡན་འདས། བདག་ ཅག་ནི༑ ཡུལ་གྱི་དབུས་ཀྱི་ཕྱོགས་འཚལ་ཏེ། བདག་ཅག་གིས་དེ་བཞིན་གཤེགས་པ་དང༌། ཆོས་ཉན་པ་ཡོངས་སུ་མ་བཏང་ངོ༌། །དེ་སྐད་ཅེས་གསོལ་ནས་བཅོམ་ལྡན་འདས་ཀྱིས་ཚེ་དང་ ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། ཁྱོད་འདི་ལྟར་གནམ་ཞིང་དྲང་བར་གྱུར་ཏེ། གང་ཁྱོད་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་ནི། ལེགས་ སོ༑ ༑ལེགས་སོ། །ངོ་མཚར་ཏོ། །དེ་བས་ན། ཤཱ་རིའི་བུ། གང་འཇིག་རྟེན་ན་སངས་རྒྱས་ཀྱི་བསླབ་པ་ལ་སློབ་པར་འདོད་པ་དེ་དག་གི་ཕྱིར་བཤད་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ། ༄༅། །མ་བསླབ་ན། འཐབ་པའི་རྩ་བ་རྩོད་པར་འགྱུར་རོ། །ཤཱ་རིའི་བུ། བྱང་ཆུབ་སེམས་དཔའ་ནི། དད་པ་དང༌། དད་བ་མང་ཞིང་སེམས་ཅན་རྣམས་ཀྱི་སྐྱབས་ཀྱི་ཕྱིར་ ཡུན་རིང་པོར་བལྟ་བ་དང༌། དུས་རིང་པོར་བལྟ་བར་འགྱུར་ཞིང༌། དེ་བཞིན་གཤེགས་པའི་དྲུང་དུ་སོང་ནས་ཡོངས་སུ་འདྲི་བར་བྱེད་དེ། དེ་འདི་ལྟ་བུའི་ཆོས་འདི་ཐོས་ནས་དགའ་བ་དང༌། དད་ པ་དང༌། མཆོག་ཏུ་དགའ་བ་རྒྱ་ཆེན་པོ་ཐོབ་པར་གྱུར་ཏེ། ནན་ཏན་གྱིས་ཀྱང་སྒྲུབ་མོད་ཀྱི། ཤཱ་རིའི་བུ། གང་ལྷག་པའི་བསམ་པས་ཡོངས་སུ་མྱ་ངན་ལས་འདས་པ་འདོད་པའི་སེམས་ཅན་ དེ་དག་ནི། ཉུང་བར་འགྱུར་ཏེ། ཕལ་ཆེར་དངོས་པོ་གསུམ་ལ་གནས་སོ། །གསུམ་གང་ཞེ་ན། རྙེད་པ་དང༌། བཀུར་སྟི་དང༌། ཚིགས་སུ་བཅད་པ་ཚོལ་བ་དང༌། མཛའ་བོའི་ཁྱིམ་དང་སློང་ བའི་ཁྱིམ་ཚོལ་བ་དང༌། གནས་ཡོངས་སུ་འཛིན་པའི་ཕྱུག་པ་ཚོལ་ཏེ། དངོས་པོ་གསུམ་པོ་འདི་དག་ལ་གནས་སོ། །དེ་བས་ན། གང་དངོས་པོ་འདི་གསུམ་ལ་གནས་པ་དེ་དག་ནི། ངན་སོང་ གསུམ་ལས་ཡོངས་སུ་མི་ཐར་རོ། །དེ་དག་སེམས་ཅན་དམྱལ་བ་ལས་ཐར་པ་དང༌། དུད་འགྲོའི་སྐྱེ་གནས་དང༌། གཤིན་རྗེའི་འཇིག་རྟེན་ལས་ཐར་པར་བྱ་བ་ལ་སྤྲོ་བ་ཆུང་ཞིང་དེ་དག་ མཐོ་རིས་ཟད་པར་འགྱུར་བ་དང༌། གླེང་བ་དང༌། འཐབ་པ་དང༌། རྩོད་པ་དང༌། འབྲེག་པ་དང༌། འགྱེད་པ་ལ་བརྩོན་ཞིང་ལྟ་བར་འགྱུར་རོ། །དེ་དག་མ་དད་པར་གྱུར་པས་མཛའ་བ་མང་པོས་ ཡོངས་སུ་ཟིན་ནས་དགོན་པར་གནས་པ་སྤོང་བ་རྗེས་སུ་འཐོབ་པར་འགྱུར་ཏེ། དེ་དག་ལ་ཁྱིམ་པ་དག །ཚེ་དང་ལྡན་པ་ཁྱོད་ངེད་ཀྱི་གནས་དང་ཉེ་བར་གནས་པར་གྱིས་ཤིག་དང༌། ངེད་ཀྱིས་ཆོས་ གོས་དང༌། བསོད་སྙོམས་དང༌། མལ་སྟན་དང༌། ན་བའི་གསོས་སྨན་དང༌། ཡོ་བྱད་ཀྱིས་བསྙེན་བཀུར་བྱའོ། །ཚེ་དང་ལྡན་པ་དགོན་པ་ལ་གནས་ན། ངེད་ཀྱིས་ཀྱང་ཁྱོད་མི་མཐོང་ངོ༌། །ཁྱོད་ཀྱིས་ ཀྱང་ངེད་མི་མཐོང་ངོ༌། །ཞེས་དེ་སྐད་ཟེར་ཞིང༌། དེ་དག་ཕན་ཚུན་སྨྲ་བ་མང་བས་གནས་ལ་ཆགས་ནས་མངོན་པར་དགའ་བ་བསྐྱེད་དེ། དེ་དག་གནས་ལ་སྲེད་པ་བསྐྱེད་པར་འགྱུར། རིང་དུ་ གནས་པར་འགྱུར། མཛའ་བོའི་ཁྱིམ་དང༌། སློང་བ་སྦྱིན་པའི་ཁྱིམ་མང་བར་འགྱུར་ཏེ། དེ་དག་ཕྱི་ཕྱིར་ཞིང་མཐོང་ན། གཅིག་ལ་གཅིག་སྲེད་པར་འགྱུར་ཏེ། དེ་ལ་གང་དགེ་སློང་ཐོར་བུར་འོངས་ པ་དེ་དག་ལ་བསྔགས་པ་མ་ཡིན་པ་སྨྲ་བར་འགྱུར་ཏེ། མང་དུ་ཐོས་པ་མ་ཡིན་ནོ། །རྒྱུན་དུ་ཞུགས་པ་མ་ཡིན་ནོ། །ཞེས་སྨྲ་བར་བྱེད། ལན་གཅིག་ཕྱིར་འོང་བ་མ་ཡིན་ནོ། །ཞེས་སྨྲ་བར་བྱེད། དགྲ་ བཅོམ་པ་མ་ཡིན་ནོ། །ཞེས་སྨྲ་བར་བྱེད་དེ། གཞན་ལ་བསྔགས་པ་མ་ཡིན་པ་བརྗོད་པར་བྱ་བ་ལ་སྤྲོ་བར་བྱེད་དོ། །ཤཱ་རིའི་བུ། དེ་ལ་ཁྱིམ་པ་དེ་དག་གང་དགེ་སློང་ཐོར་བུར་འོངས་པ་དེ་ དག་ནི༑ བདག་ཅག་གི་དྲུང་ན་ཡུན་རིང་དུ་གནས་པ་མ་ཡིན་གྱི། གང་དགེ་སློང་འཁོད་པ་དག་ནི། བདག་ཅག་གཅིག་གི་གཅིག་དོན་གྱི་ཕོ་ཉ་ཡིན་ནོ། །ཞེས་པ་འདི་སྙམ་དུ་སེམས་ཏེ། དེ་ ༄༅། །དག་གཅིག་ལ་གཅིག་སེར་སྣ་བྱེད་པར་འགྱུར་རོ། །ཤཱ་རིའི་བུ། དེ་ལ་ཁ་ཅིག་ནི། ཆོས་འདི་ལྟ་བུ་ཁོང་དུ་ཆུད་པར་མ་གྱུར། ཁོང་དུ་མ་ཆུད། ཁོང་དུ་ཆུད་པར་ མི་འགྱུར་ཏེ། དེ་དག་ཐམས་ཅད་མདོ་སྡེ་འདི་ལྟ་བུ་དག་སྤངས་པར་གྱུར། སྤོང་བར་བྱེད། སྤོང་བར་འགྱུར་རོ། །ཡང་ཤཱ་རིའི་བུ། དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་ བུའི་ཚིག་དང་འབྲུའི་རྣམ་གྲངས་ཐོས་ནས་ཐོས་མ་ཐག་ཏུ་མོས་པར་མི་བྱེད་ཀྱི། སེམས་ཅན་ངན་སོང་དུ་འགྲོ་བའི་སེམས་ཅན་དེ་ལྟ་བུ་དག་ནི། སྨོད་པར་བྱེད་པར་འགྱུར་རོ། །ཤཱ་རིའི་བུ། དེ་ལ་བྱང་ཆུབ་སེམས་དཔའ་བརྩོན་འགྲུས་མ་ཉམས་པ་ནི། སེར་སྣ་དང༌། ཕྲག་དོག་གི་གཞི་འདི་ལྟ་བུ་ངན་སོང་དུ་འགྲོ་བའི་ལས་ཐོས་ནས་ཁྱིམ་གྱི་སེར་སྣ་མ་བྱེད་པ་ཡང་མི་བྱེད། ཁྱིམ་གྱི་ སེར་སྣ་བྱས་པ་ཡང་འཆགས་པར་འགྱུར་རོ། །ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་བརྩོན་འགྲུས་མ་ཉམས་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །གཞན་ཡང་ཤཱ་ རིའི་བུ། བརྩོན་འགྲུས་མ་ཉམས་པའི་བྱང་ཆུབ་སེམས་དཔའ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་སེམས་ཅན་ཐམས་ཅད་ལ་ནད་པར་འདུ་ཤེས་བསྐྱེད་དེ། སེམས་ཅན་དེ་དག་ ཐམས་ཅད་ནི། གདུང་བའི་ནད་འདི་གསུམ་གྱིས་རྟག་ཏུ་གདུངས་སོ། །གསུམ་གང་ཞེ་ན། འདི་ལྟ་སྟེ། འདོད་ཆགས་ཀྱི་གདུང་བ་དང༌། ཞེ་སྡང་གི་གདུང་བ་དང༌། གཏི་མུག་གི་གདུང་བའོ།། སྨན་དང༌། རྩི་བསྐུ་བའི་སྦྱོར་བ་གང་གིས་སེམས་ཅན་རྣམས་ཀྱི་འདོད་ཆགས་རབ་ཏུ་ཞི་བར་འགྱུར་བ་དང༌། ཞེ་སྡང་རབ་ཏུ་ཞི་བར་འགྱུར་བ་དང༌། གཏི་མུག་རབ་ཏུ་ཞི་བར་འགྱུར་བ་དེ་འདྲ་བའི་ ཆོས་ཀྱི་སྨན་དང༌། རྩིས་བསྐུ་བའི་སྦྱོར་བ་དག་གིས་བསྡུ་བར་བྱའོ། །ཞེས་དེ་ལྟར་སེམས་ཤིང་དེ་ཆོས་ཀྱི་སྨན་དང༌། རྩིས་བསྐུས་པའི་སྦྱོར་བ་གང་གིས་སེམས་ཅན་རྣམས་ཀྱི་འདོད་ཆགས་ རབ་ཏུ་ཞི་བར་འགྱུར་བ་དང༌། ཞེ་སྡང་རབ་ཏུ་ཞི་བར་འགྱུར་བ་དང༌། གཏི་མུག་རབ་ཏུ་ཞི་བར་འགྱུར་བ་དེ་འདྲ་བའི་ཆོས་ཀྱི་སྨན་དང༌། རྩིས་བསྐུས་པའི་སྦྱིན་པ་སྡུད་པར་བྱེད་དོ། །དེ་ནི། བྱང་ ཆུབ་སེམས་དཔའ་བརྩོན་འགྲུས་མ་ཉམས་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། སེམས་ཅན་ཐམས་ཅད་ནི། གདུང་བའི་ནད་གསུམ་གྱིས་རྟག་ཏུ་ གདུངས་ནས་ན་བ་སྟེ། འདི་ལྟ་སྟེ། འདོད་ཆགས་ཀྱི་གདུང་བ་དང༌། ཞེ་སྡང་གི་གདུང་བ་དང༌། གཏི་མུག་གི་གདུང་བའོ། །སེམས་ཅན་གང་སེམས་ཅན་དམྱལ་བར་སྐྱེ་བ་དེ་དག་ཀྱང་གདུང་ བ་འདི་གསུམ་གྱི་རྟག་ཏུ་གདུངས་ཏེ། འདོད་ཆགས་ཀྱི་གདུང་བ་དང༌། ཞེ་སྡང་གི་གདུང་བ་དང༌། གཏི་མུག་གི་གདུང་བའོ། །གང་དུད་འགྲོའི་སྐྱེ་གནས་པ་དང༌། གང་གཤིན་རྗེའི་འཇིག་རྟེན་པ་ དང༌། གང་མིའི་འཇིག་རྟེན་པ་དང༌། གང་ལྷར་སྐྱེས་པའི་སེམས་ཅན་དེ་དག་ཀྱང་འདོད་ཆགས་ཀྱི་གདུང་བ་དང༌། ཞེ་སྡང་གི་གདུང་བ་དང༌། གཏི་མུག་གི་གདུང་བ་འདི་གསུམ་གྱིས་རྟག་ ༄༅། །ཏུ་གདུངས་ཏེ། གང་སེམས་ཅན་དེ་དག་གི་སྨན་པ་གསོ་བར་བྱེད་པ་དེ་དག་ཀྱང་གང་འདོད་ཆགས་ཀྱི་གདུང་བ་དང༌། ཞེ་སྡང་གི་གདུང་བ་དང༌། གཏི་མུག་གི་གདུང་བ་ འདི་གསུམ་གྱིས་རྟག་ཏུ་གདུངས་ཏེ། དེ་ལ་སྨན་པ་གཞན་དང༌། སྨན་གཞན་བསྐུ་བའི་སྦྱོར་བས་སེམས་ཅན་དེ་དག་གི་འདོད་ཆགས་ཀྱི་གདུང་བ་དང༌། ཞེ་སྡང་གི་གདུང་བ་དང༌། གཏི་ མུག་གི་གདུང་བ་རབ་ཏུ་ཞི་བར་བྱ་མི་ནུས་ཀྱི། གཞན་དུ་ན་དེ་བཞིན་གཤེགས་པ་བླ་ན་མེད་པའི་སྨན་པའི་རྒྱལ་པོ་ཆེན་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་ སྐུ་ཐོབ་པས་བདག་ཉིད་སྨན་དུ་གྱུར་པར་བྱིན་གྱིས་བརླབས་ནས་སེམས་ཅན་དེ་དག་གི་འདོད་ཆགས་ཀྱི་གདུང་བ་དང༌། ཞེ་སྡང་གི་གདུང་བ་དང༌། གཏི་མུག་གི་གདུང་བ་རབ་ཏུ་ཞི་བར་ བྱེད་ནུས་སོ། །དེ་བས་ན། ཤཱ་རིའི་བུ། རྣམ་གྲངས་དེས་ཀྱང་འདི་ལྟར་རིག་པར་བྱ་སྟེ། གང་སྨན་པ་ཕལ་དང༌། སྨན་གྱིས་བསྐུ་བའི་སྦྱོར་བ་ཕལ་གྱིས་སེམས་ཅན་དེ་དག་གི་འདོད་ཆགས་ ཀྱི་གདུང་བ་དང༌། ཞེ་སྡང་གི་གདུང་བ་དང༌། གཏི་མུག་གི་གདུང་བ་རབ་ཏུ་ཞི་བར་ནུས་པ་སླ་བ་མ་ཡིན་གྱི། གཞན་དུ་ན་དེ་བཞིན་གཤེགས་པ་བླ་ན་མེད་པའི་སྨན་པའི་རྒྱལ་པོ་ཆེན་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་སྐུ་ཐོབ་པས་སེམས་ཅན་དེ་དག་གི་འདོད་ཆགས་ཀྱི་གདུང་བ་དང༌། ཞེ་སྡང་གི་གདུང་བ་དང༌། གཏི་མུག་གི་གདུང་བ་རབ་ཏུ་ཞི་བར་ནུས་ པར་རིག་པར་བྱའོ། །ཤཱ་རིའི་བུ། དེ་ཇི་སྙམ་དུ་སེམས། སེམས་ཅན་གྱི་ཁམས་རབ་ཏུ་མང་ངམ། གསོལ་པ། ཇི་ལྟར་བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་ཏེ། སེམས་ ཅན་གྱི་ཁམས་ནི། རབ་ཏུ་མང་གི །སའི་ཁམས་ནི། དེ་ལྟ་མ་ལགས་སོ། །ཆུའི་ཁམས་ནི། དེ་ལྟ་མ་ལགས། མེའི་ཁམས་ནི། དེ་ལྟ་མ་ལགས། རླུང་གི་ཁམས་ནི། དེ་ལྟ་མ་ལགས་སོ། །བཀའ་ སྩལ་པ། དེ་དེ་བཞིན་ནོ། །ཤཱ་རིའི་བུ། དེ་དེ་བཞིན་ཏེ། ཤཱ་རིའི་བུ། སེམས་ཅན་གྱི་ཁམས་ནི། རབ་ཏུ་མང་གི །སའི་ཁམས་ནི། དེ་ལྟ་མ་ཡིན། ཆུའི་ཁམས་ནི། དེ་ལྟ་མ་ཡིན། མེའི་ཁམས་ ནི༑ དེ་ལྟ་མ་ཡིན། རླུང་གི་ཁམས་ནི། དེ་ལྟ་མ་ཡིན་ནོ། །ཡང་ཤཱ་རིའི་བུ། སེམས་ཅན་སྐལ་བ་མཉམ་པར་གྱུར་པ་འདི་ལས་ཕྱི་རོལ་གྱི་དྲང་སྲོང་གི་ལྷའི་མིག་ལ་སྣང་བར་མ་གྱུར་པ། ཉན་ཐོས་ དང༑ རང་སངས་རྒྱས་ཀྱི་ལྷའི་མིག་ལ་སྣང་བར་མ་གྱུར་པ་ཡོད་དོ། །ཤཱ་རིའི་བུ། གང་ཤིང་རྟའི་འཁོར་ལོ་ཙམ་གྱི་ཁྱོན་ལ་དེ་བཞིན་གཤེགས་པའི་ལྷའི་སྤྱན་ལ་སྣང་བར་གྱུར་པ་དེ་ནི། རབ་ཏུ་ མང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ལྷ་དང༌། མིར་བཅས་པའི་སྐྱེ་རྒུ་ནི། དེ་ལྟ་མ་ཡིན་ཏེ། དེ་ལྟར་སེམས་ཅན་གྱི་ཁམས་དཔག་ཏུ་མེད་དོ། །ཤཱ་རིའི་བུ། ཇི་ ཙམ་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་སྒོ་ང་ལས་སྐྱེ་བའམ། མངལ་ནས་སྐྱེ་བའམ། དྲོད་གཤེར་ལས་སྐྱེ་བའམ། རྫུས་ཏེ་སྐྱེ་བའམ། གཟུགས་ཅན་ནམ་ ༄༅། །གཟུགས་མེད་པའམ། འདུ་ཤེས་ཅན་ནམ། འདུ་ཤེས་མེད་པའམ། འདུ་ཤེས་མེད་འདུ་ཤེས་མེད་མིན་ནམ། སྣང་བའམ། མི་སྣང་བའམ། ཇི་ཙམ་སེམས་ ཅན་གྱི་ཁམས་སུ་བཏགས་པ་དེ་དག་ཐམས་ཅད་ཡོངས་སུ་བརྟག་པ་བཟུང་སྟེ། སྐད་ཅིག་ཐང་གཅིག་ཡུད་ཙམ་གཅིག་ལ་སྔ་ཕྱི་མེད་པར་མིའི་ལུས་ཐོབ་པར་གྱུར་ལ་དེ་དག་ཐམས་ཅད་ མིར་གྱུར་ནས་ཀྱང་སྨན་པར་གྱུར་ཏེ། ཚེའི་ཚད་ཀྱང་བསྐལ་པར་གནས་པར་གྱུར་ནས་ཡོངས་སུ་བརྟག་པ་བཟུང་སྟེ་སློབ་དཔོན་ཁམས་གསོ་བ་ལ་མཁས་པ་འདི་ལྟ་སྟེ། ཤཱ་རིའི་བུ། ད་ ལྟར་གྱི་སྨན་པའི་རྒྱལ་པོའི་འཚོ་བྱེད་ལྟ་བུ་དེ་དག་ཐམས་ཅད་འདུས་ནས་སེམས་ཅན་གཅིག་གི་འདོད་ཆགས་ཀྱི་གདུང་བ་རབ་ཏུ་ཞི་བར་བྱ་བ་དང༌། ཞེ་སྡང་གི་གདུང་པ་དང༌། གཏི་མུག་གི་ གདུད་བ་རབ་ཏུ་ཞི་བར་བྱ་བའི་ཕྱིར་འབད་ཅིང༌། སྨན་པ་དེ་རེ་རེས་ཀྱང་བསིལ་བའི་ཡན་ལག་གི་སྨན་རི་རབ་ཙམ་གྱི་ཕུང་པོ་བསྡུས་ནས་དེ་དག་ཐམས་ཅད་སེམས་ཅན་གཅིག་གི་འདོད་ ཆགས་ཀྱི་གདུང་བ་རབ་ཏུ་ཞི་བར་བྱ་བའི་ཕྱིར་བསིལ་བའི་ཡན་ལག་གི་སྨན་གྱི་ཕུང་པོ་བཏགས་ཏེ་བསྐུས་པར་གྱུར་ཀྱང་ཤཱ་རིའི་བུ། སྨན་པ་ཚེའི་ཚད་བསྐལ་བར་གནས་པ་ཐམས་ ཅད་སྐྱོ་བར་གྱུར་ལ། བསིལ་བའི་ཡན་ལག་གི་སྨན་གྱི་ཕུང་པོ་དེ་དག་ཐམས་ཅད་ཡོངས་སུ་འབྲིང་ཅིང་ཟད་པར་གྱུར་ཀྱང་སེམས་ཅན་གཅིག་གི་འདོད་ཆགས་ཀྱི་གདུང་བ་དང༌། ཞེ་སྡང་གི་གདུང་བ་དང༌། གཏི་མུག་གི་གདུང་བ་དེ་དག་རབ་ཏུ་ཞི་བར་མི་ནུས་ཀྱི། དེ་ལྟར་དེ་བཞིན་གཤེགས་པས་མི་སྡུག་པའི་ཆོས་ཀྱི་སྨན་དང༌། རྩི་བསྐུ་བའི་སྦྱོར་བས་ནི། སེམས་ཅན་དུ་མ། སེམས་ཅན་བརྒྱ་ཕྲག་དུ་མ། སེམས་ཅན་སྟོང་ཕྲག་དུ་མ། སེམས་ཅན་བརྒྱ་སྟོང་ཕྲག་དུ་མ། སེམས་ཅན་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་མ། སེམས་ཅན་ཁྲག་ཁྲིག་དཀྲིགས་ཕྲག་དུ་མ། སེམས་ ཅན་གཏམས་ཕྲག་དུ་མ་ནས་བརྗོད་དུ་མེད་པའི་ཡང་བརྗོད་དུ་མེད་པའི་བར་གྱི་སེམས་ཅན་རྣམས་ཀྱི་འདོད་ཆགས་ཀྱི་གདུང་བ་མི་སྡུག་པའི་སྨན་དང༌། རྩི་བསྐུ་བའི་སྦྱོར་བས་རབ་ཏུ་ཞི་བར་བྱེད་དོ། ། བྱམས་པའི་ཆོས་ཀྱི་སྨན་དང༌། རྩིས་བསྐུ་བའི་སྦྱོར་བས་སེམས་ཅན་དུ་མའི་ཞེ་སྡང་གི་གདུང་བ་རབ་ཏུ་ཞི་བར་བྱེད་དེ། བརྗོད་དུ་མེད་པའི་ཡང་བརྗོད་དུ་མེད་པའི་བར་གྱི་སེམས་ཅན་རྣམས་ཀྱི་ཞེ་སྡང་གི་ གདུང་བ་རབ་ཏུ་ཞི་བར་བྱེད་དོ། །རྟེན་ཅིང་འབྲེལ་པར་འབྱུང་བའི་སྨན་དང༌། རྩིས་བསྐུ་བའི་སྦྱོར་བས་སེམས་ཅན་དུ་མའི་གཏི་མུག་གི་གདུང་བ་རབ་ཏུ་ཞི་བར་བྱེད་དེ། བརྗོད་དུ་མེད་པའི་ཡང་བརྗོད་ དུ་མེད་པའི་བར་གྱི་སེམས་ཅན་རྣམས་ཀྱི་གཏི་མུག་གི་གདུང་བ་རབ་ཏུ་ཞི་བར་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་སྐུ་ཐོབ་པས་ཀྱང་བདག་ཉིད་ཀྱི་ཆོས་ཀྱི་སྨན་དུ་གྱུར་ པར་བྱིན་གྱིས་བརླབས་ནས་སེམས་ཅན་དུ་མའི་འདོད་ཆགས་ཀྱི་གདུང་བར་རབ་ཏུ་ཞི་བར་བྱེད། །ཞེ་སྡང་གི་གདུང་བར་རབ་ཏུ་ཞི་བར་བྱེད། །གཏི་མུག་གི་གདུང་བ་རབ་ཏུ་ཞི་བར་བྱེད་དོ། །སེམས་ཅན་ ༄༅། །བརྗོད་དུ་མེད་པའི་ཡང་བརྗོད་དུ་མེད་པའི་བར་གྱི་འདོད་ཆགས་དང༌། ཞེ་སྡང་དང༌། གཏི་མུག་གི་གདུང་བ་རབ་ཏུ་ཞི་བར་བྱེད་དོ། །དེ་བས་ན། ཤཱ་རིའི་བུ། རྣམ་ གྲངས་འདིས་ཀྱང་འདི་ལྟར་རིག་པར་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་སྐུ་ལ་གནས་ནས་བདག་ཉིད་ཆོས་ཀྱི་སྨན་དུ་གྱུར་པར་བྱིན་གྱིས་བརླབས་ནས་སེམས་ ཅན་དུ་མ་ནས་སེམས་ཅན་བརྗོད་དུ་མེད་པའི་ཡང་བརྗོད་དུ་མེད་པའི་བར་གྱི་འདོད་ཆགས་ཀྱི་གདུང་བ་རབ་ཏུ་ཞི་བར་བྱེད། ཞེ་སྡང་གི་གདུང་བ་རབ་ཏུ་ཞི་བར་བྱེད། །གཏི་མུག་གི་གདུང་བ་ རབ་ཏུ་ཞི་བར་བྱེད་དོ། །ཤཱ་རིའི་བུ། ངས་མངོན་པར་ཤེས་པ་བསྐལ་པ་གྲངས་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་མར་མེ་མཛད་ཅེས་བྱ་བ་འཇིག་རྟེན་དུ་བྱུང་སྟེ། སངས་རྒྱས་བཅོམ་ལྡན་འདས་ཞེས་བྱ་བའི་བར་དུའོ། །ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་དེས་ང་ལ་ གཞོན་ནུ་ཁྱོད་མ་འོངས་པའི་དུས་བསྐལ་པ་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ལུང་ བསྟན་ཏོ། །ཡང་ཤཱ་རིའི་བུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱིས་ལུང་བསྟན་མ་ཐག་ཏུ་ངས་ཆོས་ཀྱི་སྐུ་ ཐོབ་པར་གྱུར་ཏེ། ང་ཆོས་ཀྱི་སྐུ་དང་ལྡན་པར་གྱུར་ནས་མར་མེ་མཛད་ཀྱི་འོག་ཏུ་ལྷའི་དབང་པོ་བརྒྱ་བྱིན་མིག་མཛེས་ཞེས་བྱ་བ་སུམ་ཅུ་རྩ་གསུམ་པ་རྣམས་ཀྱི་བདག་པོ་རྫུ་འཕྲུལ་ཆེ་བ། མཐུ་ཆེ་ བ༑ དབང་ཆེ་བར་གྲགས་པར་གྱུར་ཏོ། །ཡང་དེའི་ཚེ་ཛམྦུའི་གླིང་འདིར་གྲོང་ཁྱེར་ཆེན་པོ་བརྒྱད་ཁྲི་བཞི་སྟོང་ཕྲག་བཞི་བྱུང་ངོ༌། །གྲོང་དང༌། ཚོང་འདུས་དང༌། རི་ཁྲོད་སྟོང་ཕྲག་མང་པོ་བྱུང་སྟེ། གྲོང་ ཁྱེར་ཆེན་པོ་དང༌། ཚོང་འདུས་དང༌། རི་ཁྲོད་སྟོང་ཕྲག་མང་པོ་དེ་དག་ཐམས་ཅད་ཀྱང་སྲོག་ཆགས་བྱེ་བ་ཁྲག་ཁྲིག་བརྒྱ་ཕྲག་སྟོང་མང་པོས་གང་བར་གྱུར་ཏོ། །ཡང་དེའི་ཚེ་ནད་ཆེན་པོའི་བསྐལ་པ་ བར་མ་བྱུང་སྟེ། སེམས་ཅན་ཕལ་ཆེར་ལུས་རྨ་ཅན་དུ་གྱུར་ཏེ། ལུས་རུལ་པ་དང༌། ལྦ་བ་དང༌། འབྲས་དང༌། མེ་དབལ་དང༌། གཡན་པ་དང༌། རླུང་དང༌། མཁྲིས་པ་དང༌། བད་ཀན་གྱིས་རྒྱས་ པར་གྱུར་ཏོ། །དེ་ན་སྨན་པ་བརྒྱ་སྟོང་ཕྲག་མང་པོ་སེམས་ཅན་དེ་དག་གི་ནད་རབ་ཏུ་ཞི་བར་བྱ་བ་ལ་བརྩོན་པར་བྱེད་དོ། །ཤཱ་རིའི་བུ། དེ་ནས་སེམས་ཅན་དེ་དག་གསོ་བ་མ་རྙེད་དེ། མགོན་མེད། སྐྱབས་མེད་ནས་སྒྲ་ཆེར་ཕྱུང་བ། ལྷ་དག་དང་ནི་ཀླུ་རྣམས་དང༌། གནོད་སྦྱིན་དྲི་ཟ་སྲིན་པོ་དང༌། མི་དང་མི་མ་ཡིན་པ་དང༌། བདག་ཅག་ནས་ལས་ཐར་བྱེད་གང༌། བདག་ཅག་སྡུག་བསྔལ་ཐར་ བྱེད་ལ༑ ༑ནོར་རྣམས་ཐམས་ཅད་སྦྱིན་པར་བྱ། །དེ་ཡི་བཀའ་ཡི་རྗེས་སུ་འཇུག །བྱས་པ་བདག་ཀྱང་གཟོ་བར་བྱ།། །།བམ་པོ་བཅོ་ལྔ་པ། ཡང་ཤཱ་རིའི་བུ། ངས་མིའི་ལས་འདས་པའི་ ༄༅། །ལྷའི་མིག་རྣམ་པར་དག་པས་སེམས་ཅན་དེ་དག་ནད་ཀྱིས་གཟིར་ཏེ་དེ་དག་ཕལ་ཆེར་ལུས་རྨ་ཅན་དུ་གྱུར་ཏེ། ལུས་རུལ་བ་དང༌། ལྦ་བ་དང༌། འབྲས་དང༌། མེ་ དཔལ་དང༌། གཡན་པ་དང༌། རླུང་དང༌། མཁྲིས་པ་དང༌། བད་ཀན་གྱིས་བརྒྱལ་བར་མཐོང༌། །མིའི་ལས་འདས་པ་ལྷའི་རྣ་བ་རྣམ་པར་དག་པས་སེམས་ཅན་དེ་དག་གི་སྒྲ་ཆེར་ཕྱུང་ བ་ཐོས་ཏེ། མཐོང་ཞིང་ཐོས་ནས་སེམས་ཅན་དེ་དག་ལ་སྙིང་རྗེ་ཆེན་པོ་སྐྱེས་ཏེ། དེ་དག་ལ་ངས་འདི་སྙམ་དུ་བསམ་མོ། །ང་སེམས་ཅན་འདི་དག་གི་གནས་སུ་གྱུར་ཅིག །སེམས་ ཅན་སྐྱབས་མེད་པ་རྣམས་ཀྱི་སྐྱབས་སུ་གྱུར་ཅིག །སེམས་ཅན་རྟེན་མེད་པ་རྣམས་ཀྱི་རྟེན་དུ་གྱུར་ཅིག །སེམས་ཅན་གསོ་བ་མེད་པ་རྣམས་ཀྱི་གསོ་བ་སྦྱར་བར་བྱའོ། །སྙམ་སྟེ། ཤཱ་ རིའི་བུ། ངས་བརྒྱ་བྱིན་གྱི་ལུས་ཆེན་པོ་མི་སྣང་བར་བྱས་ནས་གྲོང་ཁྱེར་ཆེན་པོ་ཀུ་རུ་ནས་ཤིན་ཏུ་མི་རིང་བ་ཞིག་ཏུ་དེས་པ་ཞེས་བྱ་བའི་སྲོག་ཆགས་ཤིག་ཏུ་རྫུས་ཏེ་སྐྱེས་ནས་སྟེང་ གི་བར་སྣང་ལ་འདུག་སྟེ། འཛམ་བུའི་གླིང་གི་སྐྱེ་བོའི་ཚོགས་ཐམས་ཅད་ལ་ཚིགས་སུ་བཅད་པ་འདི་དག་གིས་བསྐུལ་ཏོ། །གྲོང་ཁྱེར་ཀུ་རུ་ནས་ནི་མི་རིང་ན། དེས་པ་ཞེས་བྱའི་སྲོག་ཆགས་ རྣམ་པ་ཡོད། །གང་དག་དེ་ཡི་ཤ་ལ་ཡོངས་ཟ་བ། །དེ་ཀུན་ནད་ལས་ཡོངས་སུ་ཐར་པར་འགྱུར། །འཇིགས་ཤིང་སྐྲག་པ་དག་པར་ཏུ་མ་བྱེད་པར། །དེ་ཡི་ཤ་ནི་ཇི་ལྟར་འདོད་དག་ལོངས། ། དེ་ནི་གནོད་པར་མི་སེམས་ཁྲོ་གཤེ་མེད། །དེ་ནི་ཛམྦུའི་གླིང་གི་རྩི་ཡིན་ནོ། །དེ་ལྟར་ཤཱ་རིའི་བུ། གྲོང་ཁྱེར་ཆེན་པོ་བརྒྱད་ཁྲི་བཞི་སྟོང་ཕྲག་བཞི་པོ་དེ་དག་དང༌། གྲོང་དང༌། གྲོང་ཁྱེར་དང༌། ཚོང་འདུས་དང༌། རི་ཁྲོད་སྟོང་པ་དེ་དག་ན་སེམས་ཅན་ན་བ་ཇི་སྙེད་ཡོད་པ་དེ་དག་ཐམས་ཅད་ཀྱིས་སྒྲ་དེ་ཐོས་ནས་གྲོང་ཁྱེར་ཆེན་པོ་ཀུ་རུ་ཞེས་བྱ་བ་ག་ལ་བ་དང༌། སྲོག་ཆགས་ཀྱི་རྣམ་པ་ དེས་པ་གང་ན་ཡོད་པ་དེར་སོང་སྟེ་ཕྱིན་ནས་སྲོག་ཆགས་དེས་པ་ཞེས་བྱ་བའི་ལུས་ལས་ཤ་བཅད་ཅིང་བཅད་ཅིང་ཁྱེར་ཡང་དེའི་ལུས་ལས་ཤ་ཡོངས་སུ་ཟད་པར་མ་གྱུར་ཏེ། དེའི་ཚེ་ཚིགས་སུ་ བཅད་པ་འདི་བྱུང་ངོ༌། །གང་ཕྱིར་བདེན་པས་བྱང་ཆུབ་རེག་འགྱུར་ཞིང༌། །ཡེ་ཤེས་ཕུང་པོ་དེ་ཟད་མི་འགྱུར་ཏེ། །ང་ཡི་ཚིག་དེ་བདེན་པར་འགྱུར་ཞེ་ན། །ལུས་ལ་ཤ་ནི་ནམ་ཡང་ཟད་མ་གྱུར། ། དེ་ལྟར་ཤཱ་རིའི་བུ། ཛམ་བུའི་གླིང་ཀུན་གྱི་སྐྱེ་བོའི་ཚོགས་ཐམས་ཅད་ཀྱིས་དེས་པ་ཞེས་བྱ་བའི་སྲོག་ཆགས་ཀྱིས་ཤ་བཅད་ཅིང་བཅད་ཅིང་ཁྱེར་ཡང་དེའི་ལུས་ལ་བྲི་བའམ་གང་བར་ཡང་མི་མངོན་ཏེ། དེ་ཡང་བཅད་ཡང་བཅད་ཀྱང་སླར་དེ་བཞིན་དུ་སྐྱེའོ། །ཡང་ཤཱ་རིའི་བུ། གང་སེམས་ཅན་ན་བ་རྣམས་ཀྱིས་དེས་པ་ཞེས་བྱ་བའི་སྲོག་ཆགས་ཀྱི་ཤ་ཟོས་ན། དེ་དག་གི་ནད་ཐམས་ཅད་བྱང་སྟེ་ནད་ མེད་ཅིང་བདེ་བ་ལས་མི་འགྱུར་བར་གྱུར་ཏོ། །དེ་བཞིན་དུ་མཐར་གྱིས་ཛམྦུའི་གླིང་ན་ན་བ་ཐམས་ཅད་ཀྱི་ནད་སྣ་ཚོགས་བྱང་སྟེ་ནད་མེད་པར་བྱས་ནས་བདེ་ཞིང་འགྱུར་བ་མེད་དོ། །དེ་ནས་ཛམྦུའི་ ༄༅། །གླིང་གི་སྐྱེས་པ་དང༌། བུད་མེད་དང༌། ཁྱེའུ་དང༌། བུ་མོ་དང༌། མི་ཐམས་ཅད་འདི་སྙམ་དུ་སེམས་ཏེ། དེས་པ་ཞེས་བྱ་བའི་སྲོག་ཆགས་དེས་བདག་ཅག་ནད་ལས་ ཡོངས་སུ་ཐར་ཏེ། བདེ་ཞིང་འགྱུར་བ་མེད་པར་བྱས་ན། བདག་ཅག་གིས་དེ་ལ་མཆོད་པ་དང༌། བཀུར་སྟི་ཅི་ཞིག་བྱ་སྙམ་སྟེ། དེ་དག་ཐམས་ཅད་གཅིག་ཏུ་འདུས་སོ། །འདུས་ནས་དེས་པ་ ཞེས་བྱ་བའི་སྲོག་ཆགས་ག་ལ་བ་དེར་སོང་སྟེ་ཕྱིན་ནས་སྲོག་ཆགས་དེས་པ་ལ་འཁོར་ཡུག་ཏུ་བསྐོར་ཏེ་སླར་ཚིགས་སུ་བཅད་པ་འདི་སྨྲས་སོ། །ཁྱོད་ནི་གནས་དང་སྐྱབས་ལགས་ཏེ། ཁྱོད་ ནི་སྨན་པ་ཁྱོད་ཉིད་སྨན། །ཁྱོད་ལ་མཆོད་པ་ཅི་བགྱི་བ། །བདག་ཅག་ལ་ནི་བཀའ་སྩོལ་ཅིག །ཤཱ་རིའི་བུ། ཨེ་མའོ་སྐྱེ་བོའི་ཚོགས་རྣམས་འདུན་པར་གྱུར་ཏོ། །སྙམ་དུ་ངས་ཤེས་ནས་ལུས་ ཆེན་པོ་དེ་མི་སྣང་བར་བྱས་ཏེ། རང་གི་བརྒྱ་བྱིན་གྱི་ཆ་བྱད་དུ་འདུག་ནས་སྐྱེ་བོའི་ཚོགས་ཆེན་པོ་དེ་དག་ལ་སྨྲས་པ། ཀྱེ་གྲོགས་པོ་དག །ང་ལ་གྲོང་དང༌། གྲོང་ཁྱེར་དང༌། གྲོང་རྡལ་དང༌། ཡུལ་ དང༑ རྒྱལ་པོའི་ཕོ་བྲང་འཁོར་མི་དགོས་སོ། །གྲོགས་པོ་དག །ང་ལ་ཞིང་གི་དངོས་པོ་དང༌། ཁྱིམ་གྱི་དངོས་པོ་དང༌། ཚོང་འདུས་ཀྱི་དངོས་པོ་དང༌། འགྲོན་བུ་དང༌། གསེར་དང༌། ནོར་བུ་ དང༑ མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱི་རུ་རྣམས་མི་དགོས་སོ། །གྲོགས་པོ་དག །ང་ལ་གླང་པོ་ཆེ་དང༌། རྟ་དང༌། རྔ་མོ་དང༌། བ་ལང་དང༌། བོང་བུ་དང༌། ར་ལུག་ དང༌། ཁྱིམ་བྱ་དང༌། ཕག་རྣམས་མི་དགོས་སོ། །སྐྱེས་པ་དང༌། བུད་མེད་དང༌། ཁྱེའུ་དང༌། བུ་མོ་དང༌། བྲན་ཕོ་དང༌། བྲན་མོ་དང༌། ལས་བྱེད་པ་དང༌། ཞོ་ཤས་འཚོ་བའི་མི་རྣམས་ཀྱང་མི་དགོས་ སོ༑ ༑བཟའ་བ་དང༌། བཏུང་བ་དང༌། མལ་ཆ་དང༌། ན་བའི་གསོ་སྨན་དང༌། ཡོ་བྱད་དང༌། སྐྱེད་མོས་ཚལ་དང༌། དཀའ་ཐུབ་ཀྱི་ནགས་ཚལ་གྱི་ལོངས་སྤྱོད་རྣམས་ཀྱང་མི་དགོས་སོ། །ཀྱེ་གྲོགས་ པོ་དག །ཁྱེད་ཀྱིས་སྲོག་གཅོད་པ་སྲོངས་ལ་སྲོག་གཅོད་པ་ལས་སླར་ལྡོག་པར་གྱིས་ཤིག །མ་བྱིན་པར་ལེན་པ་སྤོངས་ལ་མ་བྱིན་པར་ལེན་པ་ལས་སླར་ལྡོག་པར་གྱིས་ཤིག །འདོད་པས་ལོག་ པར་གཡེམ་པ་སྤོངས་ལ་འདོད་པས་ལོག་པར་གཡེམ་པ་ལས་སླར་ལྡོག་པར་གྱིས་ཤིག། །བརྫུན་དུ་སྨྲ་བ་སྤོངས་ལ་བརྫུན་དུ་སྨྲ་བ་ལས་སླར་ལྡོག་པར་གྱིས་ཤིག །ཕྲ་མ་སྤོངས་ལ་ཕྲ་མ་ལས་ སླར་ལྡོག་པར་གྱིས་ཤིག །དེ་བཞིན་དུ་སྦྱར་ཏེ་ངག་རྩུབ་པོ་དང༌། ཚིག་ཀྱལ་པ་དང༌། བརྣབ་སེམས་དང༌། གནོད་སེམས་དང༌། ལོག་པར་ལྟ་བའི་བར་དུ་སྤོངས་ལ་ལོག་པར་ལྟ་བ་ལས་སླར་ ལྡོག་པར་གྱིས་ཤིག །དེའི་ཚེ་སྐྱེ་བོའི་ཚོགས་ཆེན་པོ་ལ་ཚིགས་སུ་བཅད་པ་འདི་དག་སྨྲས་སོ། །ང་ལ་འགྲོན་བུ་བྱེ་བ་མི་དགོས་ཏེ། །གསེར་ཕུང་རི་རབ་ཙམ་ཡང་དགོས་པ་མེད། །བུད་མེད་ལྷ་མོ་ འདྲ་བ་མི་དགོས་ཏེ། །བཟའ་དང་བཏུང་དང་ཁ་ཟས་མི་དགོས་སོ། །དེས་པའི་སྲོག་ཆགས་ལ་ནི་མཆོད་འདོད་ན། །ལས་ཀྱི་ལམ་ནི་རབ་དག་བཅུ་པོ་འདི། །ཐམས་ཅད་འདུས་ནས་དེ་དག་སྲུང་བར་ ༄༅། །གྱིས༑ ༑ཕན་ཚུན་དུ་ཡང་བྱམས་པའི་ཡིད་ཀྱིས་ལྟོས། །ལས་ལམ་བཅུ་པོ་རྫོགས་པ་འདི་དག་རྣམས། །ཐམས་ཅད་གཅིག་ཏུ་འདུས་ཏེ་སྲུངས་ཤིག་དང༌། དེ་ཚེ་ང་ལ་མཆོད་པ་བྱས་པར་འགྱུར། །བྱང་ཆུབ་སེམས་དཔའ་ནོར་དང་འབྲུ་མི་ཚོལ། །ང་ལ་ནོར་རྣམས་དགོས་པ་མ་ཡིན་ཏེ། །བཟའ་བཏུང་དག་དང་དབྱིག་ནོར་འབྲུ་མི་དགོས། །རྟ་ དང་གླང་ཆེན་ཤིང་རྟ་མི་དགོས་ཏེ། །བུད་མེད་མཆོག་དང་རིན་ཆེན་གོས་མི་དགོས། །ཕན་ཚུན་དུ་ནི་བྱམས་སེམས་དག་པ་དང༌། །ཕན་པའི་དངོས་པོ་དག་གི་སེམས་བསྐྱེད་ལ། །ཐམས་ ཅད་ཀུན་ཀྱང་གཅིག་ཏུ་འདུས་གྱུར་ལ། །དགེ་བཅུའི་ལས་ལམ་དག་རྫོགས་སྲུང་བར་གྱིས། །དབང་པོས་མི་རྣམས་དེ་དག་རབ་བསྐུལ་བ། །ཚིག་དེ་དག་ནི་ཐོས་པར་གྱུར་པ་དང༌།། དགེ་བ་བཅུ་ཡི་ལས་ལམ་རྣམ་དག་པ། །དགེ་བ་རྣམས་ནི་ཡང་དག་རབ་ཏུ་ལེན། ཤཱ་རིའི་བུ། ངས་སྐྱེ་བོའི་ཚོགས་ཆེན་པོ་དེ་དག་ལ་ཆོས་ཀྱི་གཏམ་ཀུན་ཏུ་བསྟན། །ཡང་དག་ པར་འཛིན་དུ་བཙུད། ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་དེ་ཉིད་དུ་མི་སྣང་བར་གྱུར་བ་དེ་ནི། ང་ཡིན་ནོ། །ཤཱ་རིའི་བུ། ངས་མངོན་པར་ ཤེས་ཏེ་འཛམ་བུའི་གླིང་གི་སྐྱེས་པ་དང༌། བུད་མེད་དང༌། ཁྱེའུ་དང༌། བུ་མོ་དང༌། མི་དེ་སྙེད་ཐམས་ཅད་ཀྱིས་སྲོག་ཆགས་ངེས་པ་ཞེས་བྱ་བའི་ཤ་ཟོས་པ་ལས་ཐ་ན་སེམས་ ཅན་གཅིག་ཀྱང་དེ་ན་འཆི་བའི་དུས་བྱས་ཏེ་དེ་ནས་ཤི་འཕོས་ནས་ལོག་པར་ལྟུང་བར་སོང་བར་མ་གྱུར་ཏེ། །དེ་དག་ཐམས་ཅད་དེ་ནས་ཤི་འཕོས་ཏེ་འཆི་བའི་དུས་བྱས་ནས་སུམ་ཅུ་རྩ་ གསུམ་གྱི་ལྷ་རྣམས་དང་སྐལ་བ་མ་མཉམ་པར་སྐྱེས་སོ། །ཤཱ་རིའི་བུ། ངས་དེ་དག་ལ་ཆོས་ཀྱི་གཏམ་ཀུན་ཏུ་བསྟན། །ཡང་དག་པར་འཛིན་ཏུ་བཅུག །ཡང་དག་པར་གཟེངས་བསྟོད། ཡང་ དག་པར་རབ་ཏུ་དགའ་བར་བྱས་ནས་དེ་དག་ཐམས་ཅད་ཉན་ཐོས་ཀྱི་ཐེག་པ་དང༌། རང་སངས་རྒྱས་ཀྱི་ཐེག་པ་དང༌། བླ་ན་མེད་པའི་ཐམས་ཅད་མཁྱེན་པའི་ཡེ་ཤེས་དང་ཐེག་པ་གསུམ་ ལ་ངེས་པར་གྱུར་ཏེ། དེ་ལ་ལ་ལ་ནི། ཡོངས་སུ་མྱ་ངན་ལས་འདས། ལ་ལ་ནི། ཡོངས་སུ་མྱ་ངན་ལས་འདའ་བར་འགྱུར་རོ། །ཤཱ་རིའི་བུ། ངས་དེ་ལྟར་ལུས་གཅིག་ཡོངས་སུ་བཏང་ བས་སེམས་ཅན་དེ་སྙེད་ཐེག་པ་གསུམ་དག་ལ་ཡོངས་སུ་སྨིན་པར་བྱས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་སྐུ་ལ་གནས་པའི་རྫུ་འཕྲུལ་ཆེན་པོ་ཅི་འདྲ་བ་དང༌། མཐུ་ ཆེན་པོ་ཅི་འདྲ་བ་དང༌། དབང་ཆེ་བར་གྲགས་པ་ཅི་འདྲ་བ་ལ་ལྟོས། དེ་སྐད་ཅེས་བཀའ་སྩལ་པ་དང༌། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ ལྡན་འདས། བྱང་ཆུབ་སེམས་དཔའི་ཆོས་ཀྱི་སྐུ་དེ་ཅི་འདྲ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། བྱང་ཆུབ་སེམས་དཔའི་ཆོས་ཀྱི་སྐུ་ནི། བརྟན་པ། སྲ་བ། མི་ཤིགས་པ། ༄༅། །རྡོ་རྗེའི་སྐུ། འཆི་འཕོ་མེད་པ། མི་སྐྱེ་བ་སྟེ། དེ་ནི། སྐུ་ཐ་དད་པས་འདུལ་བ་སེམས་ཅན་རྣམས་འདུལ་བའི་དབང་གིས་ཐ་དད་དུ་འགྱུར་ཡང་མེས་མི་ཚིག །མཚོན་ གྱིས་མི་ཚུགས་ཏེ། རྡོ་རྗེ་ལྟ་བུར་བརྟན་པ། མི་ཤིགས་པ་ཡིན་ནོ། །ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་ཆོས་ཀྱི་སྐུ་ལ་གནས་པ་བརྩོན་འགྲུས་མ་ཉམས་པ་བརྩོན་འགྲུས་ཀྱི་ཕ་ རོལ་ཏུ་ཕྱིན་པ་ལ་ལྷུན་གྱིས་གྲུབ་པར་སྤྱོད་ཅིང༌། ལུས་ཀྱི་སེམས་ཅན་ཡོངས་སུ་སྨིན་པར་བྱེད་ཀྱང་སེམས་པ་མེད། ཡོངས་སུ་རྟོག་པ་མེད། ལུས་དབེན་པའི་མཚན་ཉིད་དུ་རབ་ཏུ་ ཤེས་སོ༑ ༑ལུས་དབེན་པའི་མཚན་ཉིད་ཀྱིས་ཀྱང་ཆོས་ཐམས་ཅད་དབེན་པའི་མཚན་ཉིད་རྗེས་སུ་ཤེས་ལ། ལུས་དབེན་པའི་མཚན་ཉིད་ཀྱིས་ཆོས་ཐམས་ཅད་དབེན་པའི་མཚན་ཉིད་ལ་ གཉིས་སུ་ཡང་མི་བྱེད་དེ། མཚན་ཉིད་གང་ལུས་དབེན་པའི་མཚན་ཉིད་ཡིན་པའི་མཚན་ཉིད་དེ་ནི། ཆོས་ཐམས་ཅད་དབེན་པའི་མཚན་ཉིད་དེས་དབེན་པའི་མཚན་ཉིད་གཅིག་གིས་རྗེས་ སུ་འཇུག་གོ །ནང་གི་ཆོས་མི་དམིགས་པའི་ཕྱིར་རང་གི་ལུས་དབེན་པའི་མཚན་ཉིད་ཀྱིས་ཀྱང་སེམས་ཅན་ཐམས་ཅད་ཀྱི་ལུས་དབེན་པའི་མཚན་ཉིད་དུ་མཉམ་པར་བྱེད་དོ། །དེ་སེམས་ ཅན་ཐམས་ཅད་ཀྱི་ལུས་དབེན་པའི་མཚན་ཉིད་ཀྱང་ཆོས་ཀྱི་དབྱིངས་དབེན་པའི་མཚན་ཉིད་ཀྱིས་རྗེས་སུ་ཤེས། ཆོས་ཀྱི་དབྱིངས་དབེན་པའི་མཚན་ཉིད་ཀྱང་ཆོས་ཐམས་ཅད་དབེན་པའི་ མཚན་ཉིད་ཀྱིས་རྗེས་སུ་སློབ་སྟེ། དེ་རང་གི་ལུས་ཀྱི་དེ་བཞིན་ཉིད་ཀྱིས་སེམས་ཅན་གྱི་ལུས་ཀྱི་དེ་བཞིན་ཉིད་རྗེས་སུ་ཤེས་སོ། །དེ་སེམས་ཅན་ཐམས་ཅད་ཀྱི་ལུས་ཀྱི་དེ་བཞིན་ཉིད་ཀྱིས་ རང་གི་ལུས་ཀྱི་དེ་བཞིན་ཉིད་རྗེས་སུ་ཤེས་སོ། །རང་གི་ལུས་ཀྱི་དེ་བཞིན་ཉིད་ཀྱིས་ཆོས་ཐམས་ཅད་ཀྱི་དེ་བཞིན་ཉིད་རྗེས་སུ་ཤེས་སོ། །ཆོས་ཐམས་ཅད་ཀྱི་དེ་བཞིན་ཉིད་ཀྱིས་རང་གི་ལུས་ཀྱི་ དེ་བཞིན་ཉིད་རྗེས་སུ་ཤེས་སོ། །རང་གི་ལུས་ཀྱི་དེ་བཞིན་ཉིད་ཀྱིས་སངས་རྒྱས་ཐམས་ཅད་ཀྱི་དེ་བཞིན་ཉིད་རྗེས་སུ་ཤེས་སོ། །སངས་རྒྱས་ཐམས་ཅད་ཀྱི་དེ་བཞིན་ཉིད་ཀྱིས་རང་གི་ལུས་ ཀྱི་དེ་བཞིན་ཉིད་རྗེས་སུ་ཤེས་སོ། །རང་གི་ལུས་ཀྱི་དེ་བཞིན་ཉིད་ཀྱིས་འདས་པ་དང༌། མ་འོངས་པ་དང༌། ད་ལྟར་བྱུང་བའི་དེ་བཞིན་ཉིད་རྗེས་སུ་ཤེས་སོ། །འདས་པ་དང༌། མ་འོངས་པ་དང༌། ད་ལྟར་བྱུང་བའི་དེ་བཞིན་ཉིད་ཀྱིས་རང་གི་ལུས་ཀྱི་དེ་བཞིན་ཉིད་རྗེས་སུ་ཤེས་ཏེ། འདས་པའི་དེ་བཞིན་ཉིད་ཀྱིས་ཀྱང་མ་འོངས་པའི་དེ་བཞིན་ཉིད་འགལ་བར་མི་བྱེད། འདས་པའི་དེ་བཞིན་ ཉིད་ཀྱིས་ཀྱང་ད་ལྟར་བྱུང་བའི་དེ་བཞིན་ཉིད་འགལ་བར་མི་བྱེད། ད་ལྟར་བྱུང་བའི་དེ་བཞིན་ཉིད་ཀྱིས་ཀྱང་འདས་པའི་དེ་བཞིན་ཉིད་འགལ་བར་མི་བྱེད། མ་འོངས་པའི་དེ་བཞིན་ཉིད་ཀྱིས་ཀྱང་ འདས་པའི་དེ་བཞིན་ཉིད་འགལ་བར་མི་བྱེད། འདས་པའི་དེ་བཞིན་ཉིད་ཀྱིས་ཀྱང་མ་འོངས་པའི་དེ་བཞིན་ཉིད་འགལ་བར་མི་བྱེད། མ་འོངས་པའི་དེ་བཞིན་ཉིད་ཀྱིས་ཀྱང་ད་ལྟར་བྱུང་བའི་ ༄༅། །དེ་བཞིན་ཉིད་འགལ་བར་མི་བྱེད། ད་ལྟར་བྱུང་བའི་དེ་བཞིན་ཉིད་ཀྱིས་ཀྱང་མ་འོངས་པའི་དེ་བཞིན་ཉིད་འགལ་བར་མི་བྱེད། མ་འོངས་པའི་དེ་བཞིན་ཉིད་ཀྱིས་ ཀྱང་ད་ལྟར་བྱུང་བའི་དེ་བཞིན་ཉིད་འགལ་བར་མི་བྱེད། ད་ལྟར་བྱུང་བའི་དེ་བཞིན་ཉིད་ཀྱིས་ཀྱང་འདས་པའི་དེ་བཞིན་ཉིད་འགལ་པར་མི་བྱེད། འདས་པའི་དེ་བཞིན་ཉིད་ཀྱིས་ཀྱང་ད་ ལྟར་བྱུང་བའི་དེ་བཞིན་ཉིད་འགལ་བར་མི་བྱད་དེ། ཡང་འདས་པའི་དེ་བཞིན་ཉིད་དང༌། མ་འོངས་པ་དང༌། ད་ལྟར་བྱུང་བའི་དེ་བཞིན་ཉིད་གང་ཡིན་པ་དེ་ཉིད་ཕུང་པོ་དང༌། ཁམས་ དང༌། སྐྱེ་མཆེད་ཀྱི་དེ་བཞིན་ཉིད་དོ། །ཕུང་པོ་དང༌། ཁམས་དང༌། སྐྱེ་མཆེད་ཀྱི་དེ་བཞིན་ཉིད་གང་ཡིན་པ་དེ་ཉིད། ཀུན་ནས་ཉོན་མོངས་པ་དང༌། རྣམ་པར་བྱང་བའི་དེ་བཞིན་ཉིད་དོ། ། ཀུན་ནས་ཉོན་མོངས་པ་དང༌། རྣམ་པར་བྱང་བའི་དེ་བཞིན་ཉིད་གང་ཡིན་པ་དེ་ཉིད་མྱ་ངན་ལས་འདས་པ་དང༌། འཁོར་བའི་དེ་བཞིན་ཉིད་དོ། །འཁོར་བ་དང༌། མྱ་ངན་ལས་འདས་པའི་ དེ་བཞིན་ཉིད་གང་ཡིན་པ་དེ་ཉིད་མངོན་པར་འདུ་བྱེད་པའི་དེ་བཞིན་ཉིད་དོ། །མངོན་པར་འདུ་བྱེད་པའི་དེ་བཞིན་ཉིད་གང་ཡིན་པ་འདུ་བྱེད་ཐམས་ཅད་ཀྱི་དེ་བཞིན་ཉིད་ཀྱང་དེ་ཉིད་ཡིན་ ཏེ༑ ཡང་ཤཱ་རིའི་བུ། དེ་བཞིན་ཉིད་ཅེས་བྱ་བ་ནི། དེ་ཁོ་ནའོ། །དེ་བཞིན་ཉིད་དོ། །གཞན་མ་ཡིན་པ་ཉིད་དོ། །བྲལ་བ་མེད་པའོ། །ལུས་མེད་པའོ། །དེ་བཞིན་ཉིད་ལ་ནི། ལུས་གང་ཡང་ མེད་དེ༑ ལུས་མེད་པའི་དེ་བཞིན་ཉིད་དོ། །དེ་བས་ན། དེ་བཞིན་གཤེགས་པའི་ལུས་ཞེས་བྱའོ། །དེའི་ཕྱིར་འདི་ནི། དེ་བཞིན་ཉིད་ཀྱི་ལུས་ཏེ། དེའི་ཕྱིར་དེ་བཞིན་གཤེགས་པའི་ལུས་ཞེས་ བྱའོ༑ ༑ལུས་དེ་ལྟ་བུ་ནི། ལུས་ཐམས་ཅད་དེ། དེ་ལྟ་བས་ན། བྱང་ཆུབ་སེམས་དཔའ་ལུས་ཐམས་ཅད་ཀྱང་སྟོན་པ་ལ་དེ་བཞིན་གཤེགས་པའི་ལུས་ཀྱང་མི་བྱེད་དེ། ལུས་མེད་པ་རྩོད་པ་ མེད་པས། གཟུགས་ཀྱི་ལུས་ཐམས་ཅད་ཀྱང་སྟོན་པ་ལ་དེ་བཞིན་གཤེགས་པའི་ལུས་ཀྱང་འཁྲུགས་པར་མི་བྱེད་དོ། །དེ་བཞིན་གཤེགས་བའི་ཡེ་ཤེས་ཀྱིས་ཀྱང་དེ་བཞིན་གཤེགས་པའི་སྐུ་ལ་སོ་ སོར་རྟོག་སྟེ། དེ་བཞིན་གཤེགས་པའི་སྐུ་མཉམ་པ་ཉིད་ཀྱིས་ཀྱང་རང་གི་ལུས་མཉམ་པ་ཉིད་སོ་སོར་རྟོག་གོ །རང་གི་ལུས་མཉམ་པ་ཉིད་ཀྱིས་ལུས་དང་ལུས་མེད་པ་ཐམས་ཅད་ཀྱི་མཉམ་ པ་ཉིད་སོ་སོར་རྟོག་གོ །ལུས་དང་ལུས་མེད་པ་ཐམས་ཅད་ཀྱི་མཉམ་པ་ཉིད་ཀྱིས་ཤིན་ཏུ་ལུས་མེད་པའི་ལུས་སུ་མཐོང་ངོ༌། །ལུས་ཐམས་ཅད་རྟེན་ཅིང་འབྲེལ་ཏེ་འབྱུང་བར་ཡང་ཤེས་སོ། །ཤེས་ ནས་ཀྱང་ཆོས་ཀྱི་སྐུ་མངོན་པར་སྒྲུབ་བོ། །ཆོས་ཀྱི་སྐུ་མངོན་པར་བསྒྲུབས་ནས་ཆོས་ཀྱི་སྐུ་ཉིད་ཡིན་གྱི། ཕུང་པོ་དང༌། ཁམས་དང༌། སྐྱེ་མཆེད་ཀྱི་ལུས་ནི། མ་ཡིན་ནོ། །དེ་ཆོས་ཀྱི་སྐུ་རབ་ཏུ་ ཕྱེ་བས་མཐོང་བས་ཀྱང་སེམས་ཅན་རྣམས་འདུལ་ལོ། །ཐོས་པས་ཀྱང་སེམས་ཅན་རྣམས་འདུལ་ལོ། །རེག་པས་ཀྱང་སེམས་ཅན་རྣམས་འདུལ་ལོ། །སེམས་ཅན་རྣམས་ཀྱི་དོན་བྱེད་དོ། །ཤཱ་ ༄༅། །རིའི་བུ། འདི་ལྟ་སྟེ། དཔེར་ན། སྨན་པའི་རྒྱལ་པོ་གསོ་བྱེད་ཀྱིས་རྩི་ཐམས་ཅན་བསྡུས་ནས་རྩི་ཤིང་མང་པོ་སྦྱར་བ་ལས་བུ་མོ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པའི་མཆོག་དང་ལྡན་པ་ཤིན་ཏུ་རྫོགས་པར་ཟིན་པ་བྱི་དོར་བྱས་པ་ཞིག་བྱས་ནས་དེར་འོང་བ་དང༌། འགྲོ་བ་དང༌། འགྲེང་བ་དང༌། འདུག་པ་དང༌། ཉལ་བར་བྱེད་ཀྱང་མི་རྟོག །རྣམ་པར་མི་རྟོག་མོད་ཀྱི། བྱ་བ་དེ་དག་ཀྱང་སྟོན་ཏོ། །དེ་ན་རྒྱལ་པོའམ། རྒྱལ་བུའམ། རྒྱལ་པོའི་བློན་པོ་ཆེན་པོའམ། ཚོང་དཔོན་ནམ། ཁྱིམ་བདག་གམ། མཁར་གྱི་རྒྱལ་པོ་ཡང་རུང་སྟེ། གང་ན་བ་ཆེན་པོ་ཆེ་བ་དེ་དག་འོངས་ན། དེ་དག་ལ་སྨན་པའི་རྒྱལ་པོ་འཚོ་བྱེད་ཀྱི་སྨན་གྱི་བུ་མོ་དེ་དང་སྤྲད་པ་དང༌། ཕྲད་མ་ཐག་ཏུ་ནད་ཐམས་ཅད་ཐུབ་པར་ འགྱུར༑ མི་ན་བར་འགྱུར་ཏེ། འགྱུར་བ་མེད་ཅིང་བདེ་བར་འགྱུར་རོ། །ཤཱ་རིའི་བུ། དེ་ལྟར་སྨན་པའི་རྒྱལ་པོ་འཚོ་བྱེད་འཇིག་རྟེན་གྱི་ནད་གསོ་བ་ཤེས་པ་དེ་ལྟར་སྨན་པ་གཞན་དག་ལ་ མེད་དོ༑ ༑ཤཱ་རིའི་བུ། དེ་བཞིན་དུ་བྱང་ཆུབ་སེམས་དཔའ་ཆོས་ཀྱི་སྐུས་ཆེ་བ་ཡང་འདི་ལྟ་སྟེ། བྱང་ཆུབ་སེམས་དཔའི་ལུས་ལ་སྐྱེས་པ་དང༌། བུད་མེད་དང༌། ཁྱེའུ་དང༌། བུ་མོ་སེམས་ ཅན་ཇི་སྙེད་འདོད་ཆགས་དང༌། ཞེ་སྡང་དང༌། གཏི་མུག་གིས་གདུངས་པ་རྣམས་ཀྱིས་རེག་ན། དེ་དག་རེག་མ་ཐག་ཏུ་བྱང་ཆུབ་སེམས་དཔའ་དེའི་སྔོན་གྱི་སྨོན་ལམ་ཤིན་ཏུ་ཡོངས་སུ་ དག་པས་ནད་ཐམས་ཅད་བྱང་ཞིང་གདུང་བ་ཡང་མེད་པར་འགྱུར་རོ། །ཤཱ་རིའི་བུ། ཡང་བྱང་ཆུབ་སེམས་དཔའ་ཆོས་ཀྱི་ལུས་ཅན་གྱི་ལུས་ནི། ཟས་དང༌། སྐོམ་གྱིས་གསོ་བ་མ་ཡིན་ན། ཟས་ ཁམ་གྱི་ཟ་བས་ལུས་གསོ་བ་མ་ཡིན་གྱི། དེ་ཁ་ཟས་ཐམས་ཅད་ཡོངས་སུ་ཤེས་པས་སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་ཟས་ཟའོ། །དེ་ཟས་ཟ་ཡང་གཏོང་བར་མི་བྱེད་དོ། །ཟས་ ཟ་ཡང་ལུས་ཀྱི་ནང་དུ་གཏོང་བར་མི་བྱེད་དོ། །ཆོས་ཀྱི་སྐུའི་སྟོབས་ལས་ཀྱང་མི་ཉམས། ཡོངས་སུ་མི་ཉམས་སོ། །ཤཱ་རིའི་བུ། ཡང་བྱང་ཆུབ་སེམས་དཔའ་ཆོས་ཀྱི་ལུས་ཅན་ལ་ཚེ་དང༌། འཆི་ འཕོ་བ་དང༌། སྐྱེ་བ་ཡང་མེད་ལ། སེམས་ཅན་ཡོངས་སུ་སྨིན་པར་བྱ་བའི་ཕྱིར་འཆི་འཕོ་དང༌། སྐྱེ་བ་ཡང་སྟོན་ཏོ། །དེ་འཆི་འཕོ་ཡང་ཆོས་ཐམས་ཅད་འཆི་འཕོ་མེད་པ་དང༌། མངོན་པར་འདུ་ བྱེད་པ་མ་ཡིན་པར་རབ་ཏུ་ཤེས་སོ། །སྐྱེ་ཡང་ཆོས་ཐམས་ཅད་འཕོ་བ་མེད་པར་རབ་ཏུ་ཤེས་སོ། །འབྱུང་ཡང་ཆོས་ཐམས་ཅད་སྐྱེ་བ་མེད་པར་རབ་ཏུ་ཤེས་སོ། །དེ་ཆོས་ཀྱི་ལུས་དང༌། ཆོས་ཀྱི་ཟས་དང༌། ཆོས་ཀྱི་སྟོབས་དང༌། ཆོས་ལ་རྟོན་པས་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྔོན་གྱི་སྨོན་ལམ་ལྷུན་གྱིས་གྲུབ་པས་བརྩོན་འགྲུས་མ་ཉམས་པར་བརྩོན་ འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱས་པར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །དེ་དག་ལུས་ནི་རྡོ་རྗེ་ ༄༅། །ལྟ་བུར་མི་ཤིགས་པ། །འདུལ་བའི་དུས་ཤེས་ནས་ནི་ཐ་དད་སྟོན་པར་འགྱུར། །མཚོན་གྱིས་མི་ཚུགས་མེས་ནི་ཚིག་པ་མ་ཡིན་ཡང༌། །འདུལ་བའི་ སེམས་ཅན་མཐོང་ན་ཚུགས་ཤིང་མེས་ཚིག་འགྱུར། །སེམས་ཅན་ན་བ་མཐོང་ན་སྨན་རྣམས་སུ་ཡང་འགྱུར། །དེ་བཞིན་བཀྲེས་པ་རྣམས་ལ་ཟས་དང་སྐོམ་དུ་འགྱུར། །འོན་ཀྱང་ཆོས་ ཀྱི་དབྱིངས་ལ་རྣམ་རྟོག་ཅི་ཡང་མེད། །ཆོས་ཀྱི་སྐུ་དང་ལུས་མེད་ཚུལ་གཅིག་རབ་ཏུ་འཇུག །ཤེད་ལས་སྐྱེས་དང་གསོ་དང་ཤེད་ཅན་ཡོད་མིན་ཏེ། །ཆོས་སོ་ཅོག་ནི་རྟེན་ཅིང་ འབྲེལ་ཏེ་བྱུང་བར་ཤེས། །གང་དེའི་སྐྱོན་ཡོད་པ་ན་སྡུག་བསྔལ་ལམ་འབྱུང་སྟེ། །རྐྱེན་མེད་པ་ན་སྡུག་བསྔལ་ལམ་ནི་ཆད་པར་འགྱུར། །གཟུགས་ནི་ལྦུ་བ་རྡོས་པ་འདྲ་ སྟེ་སྙིང་པོ་མེད། །ཚོར་བ་ཆུ་ཡི་ཆུ་བུར་མཚུངས་ཤིང་འདྲ་བར་སེམས། །འདུ་ཤེས་དཔྱིད་ཀྱི་དུས་ཀྱི་སྨིག་རྒྱུ་རྒྱུ་བ་འདྲ། །འདུ་བྱེད་རྣམས་ནི་ཆུ་སྐྱེས་ཤིང་དང་འདྲ་བར་བལྟ། །ཇི་ ལྟར་གར་ལ་བལྟ་བར་སྒྱུ་མ་བསླབ་པ་རྣམས། །སྐད་ཅིག་གིས་ནི་གཟུགས་རྣམས་སྣ་ཚོགས་སྟོན་བྱེད་པ། །མི་བདེན་བྱེད་པ་དེ་ལྟར་རྣམ་ཤེས་ཤེས་གྱུར་ནས། །མཁས་ པ་དེ་དག་ཐམས་ཅད་དུ་ཡང་སྨོན་པ་མེད། །ལོངས་སྤྱོད་རྣམས་ནི་རི་གཟར་ཆུ་དང་མཚུངས་ཤིང་འདྲ། །གློག་དང་མཁའ་སྤྲིན་ཕུང་པོ་ལྟ་བུར་བྱུང་ནས་མེད། །ལོངས་སྤྱོད་ འགྱུར་བ་གཞུ་དྲག་འཕངས་པའི་མདའ་ལྟར་ཤེས། །མཁས་པ་རྣམས་ནི་ཀུན་ཏུ་ལོངས་སྤྱོད་སྨོན་པ་མེད། །ལྷ་ཡི་འཇིག་རྟེན་ལྷ་རྫས་བདེ་བ་མ་མྱོང་བ། །འཇིག་རྟེན་གསུམ་པོ་དག་ ན་སེམས་ཅན་གང་ཡང་མེད། །སླར་ཡང་སེམས་དམྱལ་སྡུག་བསྔལ་མྱོང་བ་མཐོང་གྱུར་ནས། །བདེ་གཤེགས་སྲས་པོས་དེ་མཐོང་མཐོ་རིས་འགྲོ་མི་བྱེད། །ཡིད་ནི་ནམ་མཁའ་འདྲ་ བ་དེ་དག་གནས་མེད་དེ། །གནས་དང་བྲལ་བ་རྣམས་ལ་འབྱུང་བ་སྲིད་མ་ཡིན། །འབྱུང་བ་མེད་རྣམས་སྐྱེ་དང་འཆི་འཕོ་མེད་པར་འགྱུར། །བྱང་ཆུབ་སེམས་དཔའ་ཆེ་བ་མི་རྒ་མི་ འཆི་འཐོབ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་བརྩོན་འགྲུས་མ་ཉམས་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་འདི་ལྟར་སློབ་སྟེ། སྐྱེ་མའོ། །འཇིག་ རྟེན་གནས་པ་འདི་ནི། གང་འདོད་ཆགས་ནད་ཆེན་པོར་རབ་ཏུ་མི་ཤེས། ཞེ་སྡང་ནད་ཆེན་པོར་རབ་ཏུ་མི་ཤེས། གཏི་མུག་ནད་ཆེན་པོར་རབ་ཏུ་མི་ཤེས་ཏེ། གསུམ་པོ་འདི་དག་ ནད་ཆེན་པོར་མི་ཤེས་པའི་སྨན་པ་མི་མཁས་པ་ཤ་སྟག་གིས་ཡོངས་སུ་གང༌། སྨན་པ་མི་མཁས་པ་ཤ་སྟག་གིས་ཡོངས་སུ་གང་ནས་ནད་ཆེན་པོ་གསུམ་པོ་དེ་དག་གི་སྨན་གསུམ་ མི་ཤེས་ཏེ། འདོད་ཆགས་ཀྱི་ནད་ཆེན་པོའི་སྨན་ཆེན་པོ་མི་གཙང་བ་ཡིན་པར་རབ་ཏུ་མི་ཤེས། ཞེ་སྡང་གི་ནད་ཆེན་པོའི་སྨན་ཆེན་པོ་བྱམས་པ་ཡིན་པར་རབ་ཏུ་མི་ཤེས། གཏི་ ༄༅། །མུག་གི་ནད་ཆེན་པོའི་སྨན་ཆེན་པོ་རྟེན་ཅིང་འབྲེལ་ཏེ་འབྱུང་བ་ཡིན་པར་རབ་ཏུ་མི་ཤེས་ཏེ། ཀྱེ་མའོ་སྨན་པ་དེ་དག་ནི། ནད་གཞན་དང༌། གཞན་དག་ གསོ་ནུས་ཀྱི། ནད་ཐམས་ཅད་ནི། གསོ་བར་མི་ནུས་སོ། །ཀྱེ་མའོ་སྨན་པ་དེ་དག་གི་སྨན་དེ་ནི། རེ་ཞིག་གསོ་ནུས་པ་ཡིན་གྱི། གཏན་དུ་གསོ་བར་བྱེད་པ་མ་ཡིན་ནོ། །དེ་ བས་ན༑ བདག་ཅག་གིས་ནི། སྨན་པ་དེ་དག་གི་རྗེས་སུ་བསླབ་པར་མི་བྱའི། བདག་ཅག་གིས་ནི། སངས་རྒྱས་བཅོམ་ལྡན་འདས་ཆོས་ཐམས་ཅད་ལ་མཁས་པ་བླ་ན་མེད་པ་སྨན་ པའི་རྒྱལ་པོ་ཆེན་པོ་ནད་ཐམས་ཅད་གསོ་བར་བྱེད་པ་དེའི་རྗེས་སུ་བསླབ་པར་བྱའོ། །བདག་ཅག་གིས་ནི། ནད་ཐམས་ཅད་གསོ་བར་བྱའི། ནད་གཞན་དང༌། གཞན་དག་གསོ་ བར་མི་བྱ། བདག་ཅག་གིས་རེ་ཞིག་གསོ་བར་མི་བྱ་སྟེ། བདག་ཅག་གིས་གཏན་དུ་གསོ་བར་བྱེད་པ་བྱའོ། །གང་གི་སྒྲ་ཐོས་པས་འདོད་ཆགས་ཀྱི་ནད་ཆེན་པོ་རབ་ཏུ་ཞི་ བར་འགྱུར་བ་དང༌། ཞེ་སྡང་གི་ནད་ཆེན་པོ་རབ་ཏུ་ཞི་བར་འགྱུར་བ་དང༌། གཏི་མུག་གི་ནད་ཆེན་པོ་རབ་ཏུ་ཞི་བར་འགྱུར་བ་དེ་ལྟ་བུའི་ཆོས་ཀྱི་སྨན་དང༌། རྩི་བྱུག་པའི་སྦྱོར་ བ་བསྡུ་བར་བྱའོ། །ཤཱ་རིའི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་མ་ཉམས་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་དེ་བཞིན་ གཤེགས་པ་སྨན་པའི་རྒྱལ་པོ་བླ་ན་མེད་པ་ཆོས་ཐམས་ཅད་ལ་མཁས་པ་མ་གཏོགས་པར་གང་ཉན་ཐོས་དང་རང་སངས་རྒྱས་ཐམས་ཅད་ལ་མེད་པ་དེ་འདྲ་བའི་ཆོས་ཀྱི་སྨན་དང༌། རྩིས་བསྐུ་བའི་སྦྱོར་བ་སྡུད་བར་བྱེད་དེ། ཆོས་ཀྱི་སྨན་དང༌། རྩིས་བསྐུ་བའི་སྦྱོར་བ་དེས་ཆོས་ཀྱི་དུང་ཆེན་པོ་ལ་བསྐུས་ནས་ཡོངས་སུ་སྒྲོག་སྟེ། དེའི་སྒྲས་སྟོང་གསུམ་གྱི་སྟོང་ ཆེན་པོའི་འཇིག་རྟེན་གྱི་ཁམས་འདི་མངོན་པར་གོ་བར་བྱེད་དོ། །དེ་ན་སེམས་ཅན་དུ་མ། སེམས་ཅན་བརྒྱ་ཕྲག་དུ་མ། སེམས་ཅན་སྟོང་ཕྲག་དུ་མ། སེམས་ཅན་བརྒྱ་སྟོང་ཕྲག་དུ་མ། སེམས་ཅན་བྱེ་བ་ཕྲག་དུ་མ། སེམས་ཅན་བྱེ་བ་བརྒྱ་ཕྲག་དུ་མ། སེམས་ཅན་བྱེ་བ་སྟོང་ཕྲག་དུ་མ། སེམས་ཅན་བྱེ་བ་བརྒྱ་སྟོང་ཕྲག་དུ་མ། སེམས་ཅན་བྱེ་བ་ཁྲག་ཁྲིག་བརྒྱ་ སྟོང་ཕྲག་དུ་མ། སེམས་ཅན་དཀྲིགས་ཕྲག་དུ་མ་ནས་དེ་བཞིན་དུ་སྦྱར་ཏེ་བརྗོད་དུ་མེད་པའི་ཡང་བརྗོད་དུ་མེད་པའི་བར་གྱི་སེམས་ཅན་རྣམས་ཀྱི་འདོད་ཆགས་དང༌། ཞེ་སྡང་དང༌། གཏི་མུག་གི་ནད་ཆེན་པོ་རབ་ཏུ་ཞི་བར་འགྱུར་ཏེ། ཤཱ་རིའི་བུ། འདི་ལྟ་སྟེ། དཔེར་ན། གངས་ཀྱི་རིའི་རྒྱལ་པོ་ལ་སྨན་གྱི་རྒྱལ་པོ་ཆེན་པོ་འབྲལ་བར་བྱེད་པ་ཞེས་བྱ་བ་ཞིག་ཡོད་དེ། དེའི་དྲིས་དུག་གི་དྲག་ཤུལ་ཐམས་ཅད་ལས་རབ་ཏུ་ཐར་པར་འགྱུར་ཏེ། དཔག་ཚད་བརྒྱ་ཙམ་ན་འཁོད་པ་དག་ཀྱང་དུག་མེད་པར་འགྱུར་རོ། །ཤཱ་རིའི་བུ། གལ་ཏེ་དུང་ངམ་རྔ་ལ་སྨན་ ༄༅། །གྱི་རྒྱལ་པོ་ཆེན་པོ་འབྲལ་བར་བྱེད་པས་བསྐུས་ཏེ་བུས་སམ། བརྡུངས་ན། སེམས་ཅན་དུག་འཐུངས་པའམ། ཟོས་པའམ། བསྐུས་པས་ཟུག་པར་གྱུར་ པ་ཇི་སྙེད་པ་དེ་དག་ཐམས་ཅད་དེའི་སྒྲ་ཐོས་ན་དུག་མེད་པར་འགྱུར་རོ། །ཤཱ་རིའི་བུ། གང་སྨན་གྱི་རྒྱལ་པོ་འབྲལ་བར་བྱེད་པ་དེ་ལྟ་བུ་ནི། སྨན་པའི་རྒྱལ་པོ་འཚོ་བྱེད་མ་གཏོགས་ པར་སྨན་པ་ཐམས་ཅད་ཀྱིས་མི་ཤེས་སོ། །ཤཱ་རིའི་བུ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་བཞིན་གཤེགས་པ་ཆོས་ཐམས་ཅད་ལ་མཁས་པ་སྨན་ པའི་རྒྱལ་པོ་ཆེན་པོ་སེམས་ཅན་ཐམས་ཅད་ཀྱི་ནད་ཐམས་ཅད་སེལ་བ་མ་གཏོགས་པར་གང་ཉན་ཐོས་དང༌། རང་སངས་རྒྱས་ཐམས་ཅད་ལ་མེད་པ་དེ་འདྲ་བའི་ཆོས་ཀྱི་སྨན་དང༌། རྩིས་བསྐུ་བའི་སྦྱོར་བ་སྡུད་པར་བྱེད་དེ། ཆོས་ཀྱི་སྨན་དང༌། རྩིས་བསྐུ་བའི་སྦྱོར་བ་དེས་ཆོས་ཀྱི་དུང་ཆེན་པོ་ལ་བསྐུས་ནས་ཡོངས་སུ་སྒྲོག་སྟེ། དེའི་སྒྲས་སྟོང་གསུམ་གྱི་སྟོང་ཆེན་ པོའི་འཇིག་རྟེན་གྱི་ཁམས་འདི་མངོན་པར་གོ་བར་བྱེད་དོ། །དེ་ན་སེམས་ཅན་དུ་མས་དེ་ཐོས་ནས་འདོད་ཆགས་ཀྱི་ནད་ཆེན་པོ་རབ་ཏུ་ཞི་བར་འགྱུར་རོ། །ཞེ་སྡང་དང༌། གཏི་མུག་གི་ ནད་ཆེན་པོ་རབ་ཏུ་ཞི་བར་འགྱུར། སེམས་ཅན་དུ་མ། སེམས་ཅན་བརྒྱ་ཕྲག་དུ་མ། སེམས་ཅན་སྟོང་ཕྲག་དུ་མ། སེམས་ཅན་བརྒྱ་སྟོང་ཕྲག་དུ་མ། སེམས་ཅན་བྱེ་བ་ཕྲག་དུ་མ། སེམས་ ཅན་བྱེ་བ་བརྒྱ་ཕྲག་དུ་མ། སེམས་ཅན་བྱེ་བ་སྟོང་ཕྲག་དུ་མ། སེམས་ཅན་བྱེ་བ་བརྒྱ་སྟོང་ཕྲག་དུ་མ། སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ། སེམས་ཅན་དཀྲིགས་ཕྲག་དུ་མ་ནས་ དེ་བཞིན་དུ་སྦྱར་ཏེ་བརྗོད་དུ་མེད་པའི་ཡང་བརྗོད་དུ་མེད་པའི་བར་གྱི་སེམས་ཅན་རྣམས་ཀྱི་སྒྲ་དེ་ཐོས་ནས་འདོད་ཆགས་ཀྱི་ནད་ཆེན་པོ་རབ་ཏུ་ཞི་བར་འགྱུར། ཞེ་སྡང་དང༌། གཏི་མུག་གི་ནད་ ཆེན་པོ་རབ་ཏུ་ཞི་བར་འགྱུར་རོ། །དེ་གང་ནས་སྡུད་པར་བྱེད་ཅེ་ན། གང་དུ་བྱང་ཆུབ་སེམས་དཔའ་དེའི་ནོར་བཞག་པ་ནས་སོ། །བྱང་ཆུབ་སེམས་དཔའ་དེའི་ནོར་གང་དུ་བཞག་ཅེ་ན། བྱང་ཆུབ་སེམས་ དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ལས་གུད་ན་མ་ཡིན་ནོ། །ཤཱ་རིའི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་བརྩོན་འགྲུས་མ་ཉམས་པ་བརྩོན་འགྲུས་ཀྱི་ཕ་རོལ་ཏུ་ཕྱིན་ པ་ལ་སྤྱོད་པ་ན་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་རབ་ཏུ་ཉན་ཏོ། །འཛིན་ཏོ། །འཆང་ངོ༌། །ཀློག་གོ །ཀུན་ཆུབ་པར་བྱེད་དོ། །གཞན་ལ་ཡང་འཆད་ཅིང་རྒྱ་ཆེར་ཡང་དག་པར་རབ་ ཏུ་སྟོན་ཏོ། །ཤཱ་རིའི་བུ། དེ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་མ་ཉམས་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་བྱང་ཆུབ་སེམས་དཔའི་སྡེ་སྣོད་ ཀྱི་ཆོས་ཀྱི་རྣམ་གྲངས་ཤིན་ཏུ་ཉན་པར་བྱེད། འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་བྱེད། གཞན་དག་ལ་ཡང་འཆད་ཅིང་རྒྱ་ཆེར་ཡང་དག་པར་རབ་ཏུ་སྟོན་ཏེ། ཤཱ་ ༄༅། །རིའི་བུ། དེ་བས་ན། རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་བརྩོན་འགྲུས་མ་ཉམས་པ་ བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཉན་པར་བྱེད། འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ ཆུབ་པར་བྱེད། གཞན་དག་ལ་ཡང་འཆད་ཅིང་རྒྱ་ཆེར་ཡང་དག་པར་རབ་ཏུ་སྟོན་པར་བྱེད་དོ། །ཡང་ཤཱ་རིའི་བུ། སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བས་ ཀྱང་ཆེས་གྲངས་མེད་པ། ཡངས་པ། དཔག་ཏུ་མེད་པའི་ཕ་རོལ་གྱི་ཡང་ཤིན་ཏུ་ཕ་རོལ་ཏུ་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་པདྨའི་བླ་མ་ཞེས་བྱ་བ་འཇིག་རྟེན་དུ་བྱུང་སྟེ། སངས་རྒྱས་བཅོམ་ལྡན་འདས་ཞེས་བྱ་བའི་བར་དུའོ། །ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་པདྨའི་བླ་མ་དེ་འདི་ལྟ་སྟེ། ཉན་ཐོས་བྱེ་བ་ཕྲག་བརྒྱད་ཅུའི་ཉན་ཐོས་འདུས་པ་ཆེན་པོ་གཅིག་ཏུ་བྱུང་སྟེ། ཐམས་ཅད་ཀྱང་དགྲ་བཅོམ་པ་ཟག་ པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ་ནས་སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ་ཤ་སྟག་གོ །ཤཱ་རིའི་བུ། བཅོམ་ལྡན་འདས་དེ་ བཞིན་གཤེགས་པ་པདྨའི་བླ་མ་དེའི་ཚེའི་ཚད་ནི། ལོ་བརྒྱད་ཁྲི་ཐུབ་པར་གྱུར་ཏོ། །ཤཱ་རིའི་བུ། པདྨའི་བླ་མ་ཡོངས་སུ་མྱ་ངན་ལས་འདས་ནས་དམ་པའི་ཆོས་ལོ་ལྔ་བརྒྱའི་བར་དུ་གནས་ སོ༑ ༑ལོ་ལྔ་བརྒྱའི་བར་དུ་ཡང་དམ་པའི་ཆོས་ཀྱི་གཟུགས་བརྙན་གནས་སོ། །ཤཱ་རིའི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་བླ་མ་ཡོངས་ སུ་མྱ་ངན་ལས་འདས་པའི་རིང་བསྲེལ་ཡང་རྒྱས་པར་གྱུར་ཏེ། དེ་འདི་ལྟ་སྟེ། དཔེར་ན། ད་ང་ཡོངས་སུ་མྱ་ངན་ལས་འདས་པའི་རིང་བསྲེལ་རྒྱས་པར་འགྱུར་བ་བཞིན་ནོ། །ཤཱ་རིའི་བུ། དེའི་ཚེ་ན་བཅོམ་ལྡན་འདས་དེ་བཞིན་གཤེགས་པ་པདྨའི་བླ་མ་དེ་ཡོངས་སུ་མྱ་ངན་ལས་འདས་ནས་ལོ་བརྒྱ་ལོན་པ་ན་བྱང་ཆུབ་སེམས་དཔའ་གཅིག་ཅིག་འཇིག་རྟེན་གྱི་ཁམས་ གཞན་ཞིག་ནས་ཤི་འཕོས་ཏེ་དེའི་གསུང་རབ་ལ་རྒྱལ་རིགས་སུ་སྐྱེས་པར་གྱུར་ཏེ། དེ་བཙས་མ་ཐག་ཏུ་བདག་ནི། ཆོས་སྤྱོད་པའི་རིགས་སུ་སྐྱེས་ཀྱི། བདག་གིས་ཆོས་སྤྱོད་པར་བྱའོ།། ཞེས་ཚིག་དེ་སྐད་སྨྲས་ཏེ། དེའི་མིང་ཆོས་སྤྱོད་ཅེས་བཏགས་སོ། །ཤཱ་རིའི་བུ། དེ་ནས་རྒྱལ་བུ་ཆོས་སྤྱོད་དབང་པོ་ཡོངས་སུ་སྨིན་པའི་རྒྱུས་སྐྱེས་ནས་ལོ་ཉི་ཤུ་ལོན་པ་འདྲ་བ་དེ་དད་པས་ཁྱིམ་ ནས་ཁྱིམ་མེད་པར་རབ་ཏུ་བྱུང་སྟེ། དགོན་པ་ནགས་ཚལ་ན་གནས་པས་མཐའི་གནས་མལ་དུ་གནས་སོ། །དེ་གཅིག་པུ་དབེན་པར་སོང་སྟེ་ནང་དུ་ཡང་དག་འཇོག་པ་ན་ལྷ་ཞིག་འོངས་ནས་ ༄༅། །དགེ་སློང༌། ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་སྒྲ་རྣམ་པར་གྲགས་པར་འགྱུར་གྱི། བྱང་ཆུབ་སེམས་དཔའི་ སྡེ་སྣོད་ཀྱི་ཆོས་ཀྱི་རྣམ་གྲངས་ལ་བརྩོན་པར་གྱིས་ཤིག །དེ་མ་ཐོབ་པར་བརྩོན་འགྲུས་ཉམས་པར་མ་བྱེད་ཅིག །ཅེས་དོན་དེ་བསྟན་པ་དང༌། དེས་ལྷ་དེ་ལས་ཚིག་དེ་ཐོས་ནས་དགའ་ མགུ་ཡིད་རངས་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་གྲོང་དང༌། གྲོང་ཁྱེར་དང༌། གྲོང་རྡལ་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་དང༌། ལྗོངས་ནས་ལྗོངས་ སུ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀུན་ཏུ་ཚོལ་ཞིང་རྗེས་སུ་སྤྱོད་དེ། དེ་གང་དང་གང་དུ་དགེ་འདུན་གྱི་ཀུན་དགའ་ར་བར་དགེ་སློང་ཕ་དང་དགེ་སློང་མ་མཐོང་བ་དང་ དེ་དག་གི་གན་དུ་སོང་ནས་འཕགས་པ་བྱང་ཆུབ་སེམས་དཔས་གང་ལ་བསླབ་ན་སངས་རྒྱས་ཀྱི་ཆོས་རྣམས་ཀྱིས་འབྱུང་བར་འགྱུར་བའི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ ཀྱི་རྣམ་གྲངས་གང་ལགས་ཞེས་དྲིས་པ་དང༌། དེ་དག་གིས་སྨྲས་པ། དགེ་སློང༌། བདག་ཅག་གིས་བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་ཆོས་ཀྱི་རྣམ་གྲངས་དེ་ཅི་འདྲ་བ་མི་ ཤེས་ཏེ༑ དགེ་སློང༌། བདག་ཅག་གིས་ནི། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱི་མིང་ཡང་དེད་གདོད་རྣ་བས་ཐོས་སུ་ཟད་དོ། །ཞེས་སྨྲས་པ་དང༌། དེ་འདི་ སྙམ་དུ་སེམས་ཏེ། ལྷ་ནི། རྫུན་མི་ཟེར་གྱི། ཇི་སྲིད་དུ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་མ་ཐོས་པ་དེ་སྲིད་དུ་བརྩོན་འགྲུས་མ་ཉམས་པར་བྱའོ། །སྙམ་ནས་དེས་ཚེ་དང་ལྡན་པ་ དག༑ བཅོམ་ལྡན་འདས་དེ་བཞིན་གཤེགས་པ་པདྨའི་བླ་མ་དེ་གང་དུ་ཞུགས་ལ་བཞེན་ཅེས་དྲིས་པ་དང༌། དེ་དག་གིས་དགེ་སློང༌། ས་ཕྱོགས་འདིར་བཅོམ་ལྡན་འདས་དེ་བཞིན་གཤེགས་ པ་པདྨའི་བླ་མ་དེ་ཞུགས་ལ་བཞེན་ཏོ། །ཞེས་ཕྱོགས་དེ་བསྟན་ནས་དེས་ཕྱོགས་དེ་ག་ལ་བ་དེར་སོང་སྟེ་ཕྱིན་པ་དང༌། ས་ཕྱོགས་དེར་བསྐོར་བ་བྱས་ནས་ས་ཕྱོགས་དེ་ཉིད་དུ་ཕྱོགས་གཅིག་ ཏུ་འདུག་སྟེ་བཅོམ་ལྡན་འདས་དེ་བཞིན་གཤེགས་པ་པདྨའི་བླ་མ་དེ་མངོན་དུ་བྱས་ནས་དེ་འདི་སྙམ་དུ་སེམས་ཏེ། ཇི་སྲིད་དུ་བཅོམ་ལྡན་འདས་དེ་བཞིན་གཤེགས་པ་པདྨའི་བླ་མ་དེ་ ལས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་མངོན་དུ་མ་ཐོས་པ་དེ་སྲིད་དུ་བདག་ས་ཕྱོགས་འདི་ནས་མི་ལྡང་ཞིང་སྐྱིལ་མོ་ཀྲུང་མི་གཞིག་གོ །སྙམ་མོ། །ཤཱ་རིའི་བུ། དེ་ལྟར་ རྒྱལ་བུ་དྲང་སྲོང་བརྩོན་འགྲུས་མ་ཉམས་པས་དེ་ལྟ་བུར་དམ་བཅས་པ་བརྟན་པར་བྱས་ནས་ས་ཕྱོགས་དེ་ཉིད་དུ་འདུག་སྟེ་ཞག་བདུན་གྱི་བར་དུ་གནས་སོ། །ཞག་བདུན་འདས་པ་དང་ ཤར་ཕྱོགས་ཀྱི་འཇིག་རྟེན་གྱི་ཁམས་བཅུ་པ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ཞེས་བྱ་བ་བྱོན་ནས་ཆོས་ཀྱི་སྒོའི་ ༄༅། །ཚིག་བརྒྱད་པོ་འདི་དག་གིས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཁོང་དུ་ཆུད་པར་བྱའོ། །ཞེས་ཆོས་ཀྱི་སྒོའི་ཚིག་བརྒྱད་རྣམས་ཡང་དག་ པར་རབ་ཏུ་བསྟན་པ་དང༌། དེ་ཆོས་ཀྱི་སྒོའི་ཚིག་བརྒྱད་པོ་དེ་དག་གིས་མང་དུ་ཐོས་པ་བསམ་གྱིས་མི་ཁྱབ་པ་བླ་ན་མེད་པ་དང་ལྡན་པར་གྱུར་ནས་ས་ཕྱོགས་དེ་ཉིད་ནས་ལངས་ཏེ་སོང་ ངོ༑ ༑བརྩོན་འགྲུས་མ་ཉམས་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་ འཁོར་རྣམས་སུ་ལོ་དྲུག་ཅུའི་བར་དུ་རྒྱུ་ཞིང་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཉིད་རབ་ཏུ་བསྟན་ཏོ། །དེས་ལོ་དྲུག་ཅུའི་བར་དུ་ལྷ་དང་མིའི་སྲོག་ཆགས་བྱེ་བར་ ཚང་བ་སྙེད་ཐེག་པ་གསུམ་དག་ལ་བཀོད་ནས་འཆི་ཁར་སངས་རྒྱས་ཀྱི་ཞིང་དེ་ཉིད་དུ་མི་རྣམས་དང་སྐལ་པ་མཉམ་པར་སྐྱེ་བར་གྱུར་ཅིག །ཅེས་སྨོན་ལམ་བཏབ་ནས་དེ་འཆི་བའི་ དུས་བྱས་པ་དང༌། དེ་ཛམྦུའི་གླིང་དེ་ཉིད་དུ་ཚོང་དཔོན་གྱི་རིགས་ཤིག་ཏུ་སླར་སྐྱེས་ཏེ། དེ་བཙས་མ་ཐག་ཏུ་ཆོས་སྤྱོད་པར་བྱའོ། །ཆོས་སྤྱད་པར་བྱའོ། །ཞེས་ཚིག་དེ་སྐད་ཅེས་སྨྲས་ ནས་དེ་སྔ་མ་བཞིན་དུ་མིང་ཆོས་སྤྱོད་ཅེས་བཏགས་སོ། །དེ་བཙས་ནས་ལོ་དྲུག་ལོན་པ་འདྲ་བ་དེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །དེ་ལྟར་རབ་ཏུ་བྱུང་ནས་རིང་པོ་ མ་ལོན་པར་ཡང་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་མངོན་དུ་གྱུར་ཏོ། །དེ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ལ་གནས་ནས་ལོ་དྲུག་ཅུའི་བར་དུ་ གྲོང་ནས་གྲོང་དུ། གྲོང་ཁྱེར་ནས་གྲོང་ཁྱེར་དུ། ལྗོངས་ནས་ལྗོངས་སུ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་སྟོན་ཅིང་རྒྱུའོ། །དེས་ལོ་དྲུག་ཅུའི་ བར་དུ་ལྷ་དང་མིའི་སྐྱེ་རྒུའི་སྲོག་ཆགས་གཞན་བྱེ་བ་འདི་ལྟ་སྟེ། ཉན་ཐོས་ཀྱི་ཐེག་པ་དང༌། རང་སངས་རྒྱས་ཀྱི་ཐེག་པ་དང༌། ཐེག་པ་ཆེན་པོ་བླ་ན་མེད་པ་དང་ཐེག་པ་གསུམ་དག་ལ་ ཡོངས་སུ་སྨིན་པར་བྱས་སོ། །དེ་ཡང་འཆི་ཁར་མིར་སྐྱེས་པར་གྱུར་ཅིག །ཅེས་སྨོན་ལམ་བཏབ་པ་དང༌། དེའི་སྨོན་ལམ་གྱི་སྟོབས་ཀྱིས་ཛམྦུའི་གླིང་དེ་ཉིད་དུ་རྒྱལ་རིགས་ཤིག་ཏུ་སླར་ སྐྱེས་ཏེ༑ དེ་བཙས་མ་ཐག་ཏུ་ལྷས་ཀྱེ་མའོ་འཇིག་རྟེན་དུ་སེམས་ཅན་ཆོས་ཀྱི་བླ་མ་འདི་སྐྱེས་སོ། །ཀྱེ་མའོ་འཇིག་རྟེན་དུ་སེམས་ཅན་ཆོས་ཀྱི་བླ་མ་འདི་སྐྱེས་སོ། །ཞེས་སྒྲ་བྱུང་ནས་དེའི་མིང་ ཆོས་ཀྱི་བླ་མ་ཆོས་ཀྱི་བླ་མ་ཞེས་བཏགས་སོ། །དེ་ཡང་དབང་པོ་རྣམས་ཡོངས་སུ་སྨིན་པའི་རྒྱུས་སྐྱེས་ནས་ལོ་ཉི་ཤུ་ལོན་པ་འདྲ་བ་དེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། ། དེ་ལྟར་རབ་ཏུ་བྱུང་ནས་དགེ་སློང་ཆོས་ཀྱི་བླ་མ་དེ་དྲན་པའི་སྟོབས་བསྐྱེད་པ་དང༌། ཤེས་རབ་ཀྱི་སྟོབས་བསྐྱེད་པས་སླར་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་མངོན་ ༄༅། །དུ་གྱུར་ཏོ། །ཤཱ་རིའི་བུ། དེ་ལྟར་དགེ་སློང་ཆོས་ཀྱི་བླ་མས་ཐེ་ཚོམ་གཅོད་པ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཉིད་ལོ་སྟོང་དྲུག་ཁྲི་ ཚང་བར་གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་སྣ་ཚོགས་སུ་ཡང་དག་པར་རབ་ཏུ་བསྟན་ཏོ། །དེ་ལོ་སྟོང་དྲུག་ཁྲིའི་ བར་དུ་ལྷ་དང་མིའི་སྐྱེ་རྒུའི་སྲོག་ཆགས་གཞན་བྱེ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡོངས་སུ་སྨིན་པར་བྱས་ནས་དེ་ཡང་འཆི་ཁར་མིར་སྐྱེ་བར་སྨོན་ལམ་བཏབ་ སྟེ༑ དེ་འཆི་བའི་དུས་བྱས་པ་དང་ཛམྦུའི་གླིང་དེ་ཉིད་དུ་ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུར་སླར་སྐྱེས་ཏེ། དེ་བཙས་མ་ཐག་ཏུ་ལྷ་ཞིག་གིས་ཀྱེ་མའོ་འཇིག་རྟེན་དུ་སེམས་ ཅན་དྲན་པ་ཐོབ་པ་འདི་སྐྱེས་སོ། །ཀྱེ་མའོ་འཇིག་རྟེན་དུ་སེམས་ཅན་དྲན་པ་ཐོབ་པ་འདི་སྐྱེས་སོ། །ཞེས་སྒྲ་བྱུང་ནས་དེའི་མིང་དྲན་པ་ཐོབ་པ་དྲན་པ་ཐོབ་པ་ཞེས་བཏགས་སོ། །དེ་དབང་ པོ་ཡོངས་སུ་སྨིན་པའི་རྒྱུས་སྐྱེས་ནས་ལོ་ཉི་ཤུ་ལོན་པ་འདྲ་བ་དེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དྲན་པ་མི་བརྗེད་པས་མང་དུ་ཐོས་པ་བསམ་གྱིས་མི་ཁྱབ་པ་བླ་ན་ མེད་པ་དང་ལྡན་པར་གྱུར་ཏོ། །དེས་ལོ་དྲུག་ཁྲིའི་བར་དུ་གྲོང་དང༌། གྲོང་ཁྱེར་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་དུ་རྒྱུ་ཞིང་ཆོས་སྟོན་པ་འདི་ལྟ་སྟེ། ཐེ་ ཚོམ་ཐམས་ཅད་གཅོད་པ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཉིད་གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་ དུ་ལོ་དྲུག་ཁྲིའི་བར་དུ་ཆོས་སྟོན་ཏེ། ངེས་ལོ་དྲུག་ཁྲིའི་བར་དུ་ལྷ་དང་མིའི་སྐྱེ་རྒུའི་སྲོག་ཆགས་བྱེ་བ་ཕྲག་བཞི་འདི་ལྟ་སྟེ། ཉན་ཐོས་ཀྱི་ཐེག་པ་དང༌། རང་སངས་རྒྱས་ཀྱི་ཐེག་པ་དང༌། སངས་རྒྱས་ཀྱི་ཐེག་པ་བླ་ན་མེད་པ་དང་ཐེག་པ་གསུམ་དག་ལ་ཡོངས་སུ་སྨིན་པར་བྱས་སོ། །ཤཱ་རིའི་བུ། དེ་ལྟར་ཆོས་སྟོན་པའི་དགེ་སློང་དེ་ནས་ཤི་འཕོས་ཏེ་ཤི་བའི་དུས་བྱས་ནས་ཤར་ ཕྱོགས་ཀྱི་དེ་བཞིན་གཤེགས་པ་རིན་པོ་ཆེའི་སྙིང་པོའི་སངས་རྒྱས་ཀྱི་ཞིང་དུ་སྐྱེས་སོ། །ཤཱ་རིའི་བུ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ལྷ་དང༌། མི་དང༌། ལྷ་མ་ཡིན་ གྱི་སྐྱེ་རྒུའི་སྲོག་ཆགས་བྱེ་བ་ཕྲག་དྲུག་ཅུར་ཚང་བ་ཐེག་པ་གསུམ་དག་ལ་ཡོངས་སུ་སྨིན་པར་བྱས་པར་གྱུར་ཏོ། །ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དེ་བཞིན་གཤེགས་ པ་རིན་པོ་ཆེའི་སྙིང་པོའི་སངས་རྒྱས་ཀྱི་ཞིང་དེར་སྐྱེས་མ་ཐག་ཏུ་མང་དུ་ཐོས་པ་བསམ་གྱིས་མི་ཁྱབ་པ་བླ་ན་མེད་པ་དང་ལྡན་པར་གྱུར་ཏོ། །དེ་དེ་ན་ཚེ་ཇི་ཙམ་ཐུབ་པར་འདུག་ནས་དེ་ནས་ཤི་ འཕོས་ཏེ་ཤི་བའི་དུས་བྱས་པ་དང༌། དེ་སངས་རྒྱས་ཀྱི་ཞིང་དེ་ཉིད་དུ་སྐྱེས་ཏེ་གང་དུ་བཅོམ་ལྡན་འདས་དེ་བཞིན་གཤེགས་པ་པདྨའི་བླ་མ་བྱུང་བའི་འཇིག་རྟེན་གྱི་ཁམས་དེར་རྒྱལ་རིགས་ ༄༅། །སུ་སྐྱེས་སོ། །སྔོན་ཡོངས་སུ་སྨིན་པར་བྱས་པའི་སྲོག་ཆགས་བྱེ་བ་ཕྲག་དྲུག་ཅུ་པོ་དེ་དག་ཀྱང་དེ་ཉིད་དུ་སྐྱེས་ནས་དེའི་གཡོག་ཏུ་གྱུར་ཏོ། །དེའི་ཚེ་སངས་རྒྱས་ཀྱི་ ཞིང་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤིན་ཏུ་མཐོར་གཤེགས་ཞེས་བྱ་བ་འཇིག་རྟེན་དུ་བྱུང་ངོ༌། །ཤཱ་རིའི་བུ། དེ་བཞིན་གཤེགས་པ་ ཤིན་ཏུ་མཐོར་གཤེགས་དེ་ཚེའི་ཚད་ལོ་བྱེ་བ་ཕྲག་བརྒྱད་ཅུ་ཐུབ་པར་གྱུར་ཏོ། །དེའི་ཚེ་ན་མི་དེ་དག་གི་ཚེའི་ཚད་ཀྱང་ལོ་བྱེ་བ་ཕྲག་བརྒྱད་ཅུ་ཐུབ་པར་གྱུར་ཏོ། །ཤཱ་རིའི་བུ། དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤིན་ཏུ་མཐོར་གཤེགས་ཀྱི་ཉན་ཐོས་བྱེ་བ་ཕྲག་བརྒྱད་ཅུའི་ཉན་ཐོས་དགྲ་བཅོམ་པ་ཤ་སྟག་འདུས་པ་བྱུང་སྟེ། ལོ་བྱེ་བ་རེ་རེ་ཞིང་ཉན་ཐོས་འདུས་པ་རེ་རེ་བྱུང་ངོ༌། །ཉན་ཐོས་འདུས་པ་རེ་རེ་ལ་ཉན་ཐོས་བྱེ་བ་ཕྲག་བརྒྱད་ཅུ་བྱུང་སྟེ། དགྲ་བཅོམ་པ་འབའ་ཞིག་གོ། དེའི་ཚེ་བྱང་ཆུབ་སེམས་ དཔའ་རྒྱལ་བུ་གཞོན་ནུ་དཔའ་བས་བྱིན་ཞེས་བྱ་བ་མང་དུ་ཐོས་པ་ཡིད་གཞུངས་པ་དེའི་རྒྱུས་དཔྱོད་པ་དང་ལྡན་པ་ཞིག་བྱུང་ངོ༌། །ཤཱ་རིའི་བུ། གཞོན་ནུ་དེ་གཡོག་དང་བཅས་པ་ སྲོག་ཆགས་བྱེ་བ་ཕྲག་བརྒྱད་ཅུས་བསྐོར་ཏེ་མདུན་དུ་བདར་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤིན་ཏུ་མཐོར་ གཤེགས་དེ་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་དེ་བཞིན་གཤེགས་པ་ཤིན་ཏུ་མཐོར་གཤེགས་དེའི་ཞབས་ལ་མགོ་བོས་ཕྱག་འཚལ་ཏེ། གཞོན་ནུ་དཔའ་བས་བྱིན་གཡོག་ དང་བཅས་པ་ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་པ་དང༌། དེ་ནས་ཤཱ་རིའི་བུ། བཅོམ་ལྡན་འདས་དེ་བཞིན་གཤེགས་པ་ཤིན་ཏུ་མཐོར་གཤེགས་དེས་གཞོན་ནུ་དཔའ་ བས་བྱིན་དེའི་ལྷག་པའི་བསམ་པ་མཁྱེན་ནས་སྔོན་བྱུང་བ་དང་ལྡན་པའི་གཏམ་ཡང་དག་པར་རབ་ཏུ་བསྟན་ཏོ། །དེ་ནས་ཤཱ་རིའི་བུ། རྒྱལ་བུ་གཞོན་ནུ་དཔའ་བས་བྱིན་དེ་སྔོན་བྱུང་བ་དང་ ལྡན་པའི་གཏམ་དེ་ཐོས་ནས་དད་པ་རབ་ཏུ་ཐོབ་བོ། །དེ་སེམས་དད་པར་གྱུར་ནས་སྲོག་ཆགས་བྱེ་བ་ཕྲག་བརྒྱད་ཅུ་པོ་དེ་དག་དང་ལྷན་ཅིག་ཏུ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ ངོ༌། །དེ་དེ་ན་ཚེ་ཇི་ཙམ་ཐུབ་པར་བྱང་ཆུབ་ཚོལ་ཞིང་ཚངས་པར་སྤྱོད་པ་སྤྱད་པ་དང༌། བཅོམ་ལྡན་འདས་དེ་བཞིན་གཤེགས་པ་ཤིན་ཏུ་མཐོར་གཤེགས་དེས་དགེ་སློང་དག །བྱང་ཆུབ་སེམས་ དཔའ་སེམས་དཔའ་ཆེན་པོ་དཔའ་བས་བྱིན་འདི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་འགྲུས་ཆེན་པོ་ཞེས་བྱ་བར་འཇིག་རྟེན་དུ་འབྱུང་སྟེ། སངས་རྒྱས་བཅོམ་ལྡན་འདས་ཞེས་བྱ་བའི་བར་དུ་འགྱུར་རོ་ཞེས་ལུང་བསྟན་ ༄༅། །ཏོ༑ ༑བཅོམ་ལྡན་འདས་དེ་བཞིན་གཤེགས་པ་ཤིན་ཏུ་མཐོར་གཤེགས་དེ་ཡོངས་སུ་མྱ་ངན་ལས་འདས་པའི་རིང་བསྲེལ་ལ་དེས་མཆོད་པ་བྱས་ཏེ་དམ་པའི་ཆོས་ ཀྱང་ཡང་དག་པར་བཟུང་ནས་དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པ་བརྩོན་འགྲུས་ཆེན་པོ་ཞེས་ བྱ་བར་གྱུར་ཏོ། །ཤཱ་རིའི་བུ། དེ་བཞིན་གཤེགས་པ་བརྩོན་འགྲུས་ཆེན་པོའི་ཚེའི་ཚད་ནི། བསྐལ་པ་ཕྱེད་ཐུབ་པར་གྱུར་ཏོ། །དེའི་ཉན་ཐོས་ཀྱི་དགེ་འདུན་ཡང་དཔག་ཏུ་མེད་པ་ཞིག་བྱུང་སྟེ། དེའི་ཉན་ཐོས་འདུས་པ་རེ་རེ་ལ་ཡང་ཁྲག་ཁྲིག་ཕྲག་བཅུ་གཉིས་ཡོད་དེ། དགྲ་བཅོམ་པ་འབའ་ཞིག་གོ། ཤཱ་རིའི་བུ། དེ་ལྟར་བྱང་ཆུབ་སེམས་དཔའ་བརྩོན་འགྲུས་མ་ཉམས་པ། བརྩོན་ འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་བྱང་ཆུབ་སེམས་དཔའ་སྡེ་སྣོད་ཀྱི་ཆོས་ཀྱི་རྣམ་གྲངས་མང་དུ་ཐོས་ཏེ་བཟུངས། བཅངས། བཀླགས། ཀུན་ཆུབ་པར་བྱས་པས་མཐར་གྱིས་དེ་ བཞིན་གཤེགས་པ་བརྩོན་འགྲུས་ཆེན་པོ་ཞེས་བྱ་བ་འཇིག་རྟེན་དུ་བྱུང་བའི་བར་དུའོ། །ཤཱ་རིའི་བུ། དེ་བས་ན། ཐེག་པ་ཆེན་པོ་ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ ཀྱི་བུ་མོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པའི་བརྩོན་འགྲུས་མ་ཉམས་པ་དེ་དག་གིས་བྱང་ཆུབ་སེམས་དཔའི་སྡེ་སྣོད་ ཀྱི་ཆོས་ཀྱི་རྣམ་གྲངས་ཤིན་ཏུ་མཉན་པར་བྱ། གཟུང་བར་བྱ་བ་ནས་རྒྱ་ཆེར་ཡང་དག་པར་རབ་ཏུ་བསྟན་པའི་བར་དུ་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ། འདི་ལྟ་སྟེ། བྱང་ཆུབ་སེམས་དཔའི་ སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བ་ལ་བརྩོན་འགྲུས་མ་ཉམས་པ་འདི་ནི། བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །ཤཱ་རིའི་བུ། འདི་ནི། བྱང་ ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྟེ། དེ་ལ་བརྩོན་པས་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའ་སྤྱད་པ་སྤྱོད་དོ། །བརྩོན་འགྲུས་ཀྱི་ཕ་རོལ་ ཏུ་ཕྱིན་པའི་ལེའུ་སྟེ། དགུ་པའོ།། །།བམ་པོ་བཅུ་དྲུག་པ། དེ་ལ་གང་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་ན་བྱང་ཆུབ་སེམས་དཔའ་སྤྱད་པ་སྤྱོད་པར་འགྱུར་ བའི་བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཕ་རོལ་ཏུ་ཕྱིན་པ་གང་ཞེ་ན། ཤཱ་རིའི་བུ། འདི་ལ་བྱང་ཆུབ་སེམས་དཔའ་འདོད་པ་རྣམས་ལས་དབེན་པ། སྡིག་པ་མི་དགེ་བའི་ ཆོས་རྣམས་ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་རྫོགས་པར་བྱས་ཏེ་གནས་སོ། །ཤཱ་ རིའི་བུ༑ གཞན་ཡང་བྱང་ཆུབ་སེམས་དཔའ་རྟོག་པ་དང་དཔྱོད་པ་ཉེ་བར་ཞི་ཞིང་ནང་ཡོངས་སུ་དང་སྟེ་སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། དཔྱོད་པ་མེད་པ། ཏིང་ངེ་འཛིན་ ༄༅། །ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་རྫོགས་པར་བྱས་ཏེ་གནས་སོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་དགའ་བའི་ འདོད་ཆགས་དང་བྲལ་བས་བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་ལ་འཕགས་པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ ལ་གནས་པ་བཏང་སྙོམས་པའོ། །ཞེས་བརྗོད་པ་སྟེ། དགའ་བ་མེད་པའི་བསམ་གཏན་གསུམ་པ་རྫོགས་པར་བྱས་ཏེ་གནས་སོ། །ཤཱ་རིའི་བུ། གཞན་ཡང་བྱང་ཆུབ་སེམས་ དཔའ་བདེ་བ་ཡང་སྤངས་ཏེ། སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་མི་བདེ་བ་ཡང་ནུབ་པས་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་བཏང་སྙོམས་ དང་དྲན་པ་ཡོངས་སུ་དག་པའི་བསམ་གཏན་བཞི་པ་རྫོགས་པར་བྱས་ཏེ་གནས་སོ། །དེ་དེ་ལྟར་སེམས་མཉམ་པར་བཞག་པ། ཡོངས་སུ་དག་པ། ཡོངས་སུ་བྱང་བ། ཉོན་མོངས་ པ་མེད་པ། ཉེ་བའི་ཉོན་མོངས་པ་དང་བྲལ་བར་གྱུར་ནས་ཏིང་ངེ་འཛིན་ཀྱང་མི་གཏོང་ལ་བསམ་གཏན་གྱི་ལས་ཀྱང་བྱེད་དོ། །དེ་ལ་བྱང་ཆུབ་སེམས་དཔའི་བསམ་གཏན་གྱི་ ལས་གང་ཞེ་ན། གང་མངོན་པར་ཤེས་པ་དང་ཡེ་ཤེས་ཀྱི་ལས་ཡོངས་སུ་རྫོགས་པར་བྱེད་པའོ། །དེ་ལ་མངོན་པར་ཤེས་པ་གང༌། ཡེ་ཤེས་གང་ཞེ་ན། མངོན་པར་ཤེས་པ་ཞེས་ བྱ་བ་ནི༑ འདི་ལྟ་སྟེ། ལྷའི་མིག་དང༌། ལྷའི་རྣ་བ་དང༌། ཕ་རོལ་གྱི་སེམས་ཤེས་པ་དང༌། སྔོན་གྱི་གནས་དང༌། རྫུ་འཕྲུལ་གྱི་བྱ་བ་མངོན་སུམ་དུ་བྱ་བར་མངོན་པར་ཤེས་པ་སྟེ། འདི་དག་ ནི༑ མངོན་པར་ཤེས་པ་ལྔ་ཞེས་བྱའོ། །ཤཱ་རིའི་བུ། དེ་ལ་བྱང་ཆུབ་སེམས་དཔའི་ལྷའི་མིག་གིས་མངོན་སུམ་དུ་བྱ་བ་ཤེས་པའི་མངོན་པར་ཤེས་པ་ནི། གང༌། མངོན་པར་ཤེས་ པའི་ཡེ་ཤེས་ཀྱི་ལས་ཡོངས་སུ་རྫོགས་པར་བྱེད་པ་ནི། གང་ཞེ་ན། ཤཱ་རིའི་བུ། འདི་ལ་བྱང་ཆུབ་སེམས་དཔའ་དེ་ལྟར་སེམས་མཉམ་པར་བཞག་པ། ཡོངས་སུ་དག་པ། ཡོངས་སུ་ བྱང་བ༑ ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བས་སེམས་ཅན་རྣམས་ཀྱི་འཆི་འཕོ་དང་སྐྱེ་བ་མངོན་སུམ་དུ་བྱ་བའི་ཕྱིར་སེམས་འཇུག་པར་བྱེད་དེ། དེ་ལྷའི་མིག་ རྣམ་པར་དག་པ། མི་ལས་ཤིན་ཏུ་འདས་པས་སེམས་ཅན་རྣམས་ཀྱི་འཆི་འཕོ་དང༌། སྐྱེ་བ་དང༌། ཁ་དོག་བཟང་པོ་དང༌། ཁ་དོག་ངན་པ་དང༌། བདེ་འགྲོ་དང༌། ངན་འགྲོ་དང༌། བཟང་ པོ་དང༌། ངན་པ་རྣམས་མཐོང་སྟེ། ཀྱེ་སེམས་ཅན་འདི་དག་ནི། ལུས་ཀྱིས་ཉེས་པར་སྤྱོད་པ་དང་ལྡན་པ། ངག་གིས་ཉེས་པར་སྤྱོད་པ་དང་ལྡན་པ། ཡིད་ཀྱིས་ཉེས་པར་སྤྱོད་པ་དང་ ལྡན་པ༑ འཕགས་པ་རྣམས་ལ་སྐུར་པ་འདེབས་པ། ལོག་པར་ལྟ་བ་སྟེ། དེ་དག་ལོག་པར་ལྟ་བའི་ལས་ཡང་དག་པར་བླངས་པའི་རྒྱུས་ལུས་ཞིག་སྟེ་ཤི་བའི་འོག་ཏུ་ངན་འགྲོ་ལོག་ ༄༅། །པར་ལྟུང་བའི་སེམས་ཅན་དམྱལ་བར་སྐྱེ་བར་འགྱུར་རོ། །སེམས་ཅན་འདི་དག་ནི། ལུས་ཀྱིས་ལེགས་པར་སྤྱོད་པ་དང་ལྡན་པ། ངག་གིས་ལེགས་ པར་སྤྱོད་པ་དང་ལྡན་པ། ཡིད་ཀྱིས་ལེགས་པར་སྤྱོད་པ་དང་ལྡན་པ། འཕགས་པ་རྣམས་ལ་སྐུར་པ་མི་འདེབས་པ། ཡང་དག་པར་ལྟ་བ་སྟེ། དེ་དག་ཡང་དག་པར་ལྟ་བའི་ལས་ ཡང་དག་པར་བླངས་པའི་རྒྱུས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེའོ། །ཞེས་སེམས་ཅན་རྣམས་ཀྱི་ལས་ཇི་ལྟར་བསགས་པ་བཞིན་དུ་ཤེས་སོ། །དེ་ལྟར་ལྷའི་ མིག་རྣམ་པར་དག་པ་མི་ལས་འདས་པས་སེམས་ཅན་རྣམས་ཀྱི་ལས་ཇི་ལྟར་བསགས་པ་ཤིན་ཏུ་རབ་ཏུ་ཤེས་སོ། །ཤཱ་རིའི་བུ། དེ་ལྟར་བྱང་ཆུབ་སེམས་དཔའི་ལྷའི་མིག་སེམས་ཅན་ ཐམས་ཅད་ལས་ཁྱད་པར་དུ་འཕགས་པ། གཟུགས་སུ་སྣང་བ་ཐམས་ཅད་ལ་སྒྲིབ་པ་མེད་པ་སྟེ། གང་ཀླུ་ཐམས་ཅད་ཀྱི་ལྷའི་མིག་དང༌། གནོད་སྦྱིན་ཐམས་ཅད་དང༌། དྲི་ཟ་ཐམས་ ཅད་དང༌། ལྷ་མ་ཡིན་ཐམས་ཅད་དང༌། སློབ་པ་ཐམས་ཅད་དང༌། དགྲ་བཅོམ་པ་ཐམས་ཅད་དང༌། རང་སངས་རྒྱས་ཐམས་ཅད་ཀྱི་ལྷའི་མིག་དེ་བས་ལྷའི་མིག་གང་ཤིན་ཏུ་ཁྱད་ པར་དུ་འཕགས་པ། ཤིན་ཏུ་དམ་པ། ཤིན་ཏུ་རབ། ཤིན་ཏུ་བཟང་བ། ཤིན་ཏུ་གསལ་བ། འོད་གསལ་བ། ངེས་པར་འབྱུང་བའི་ལས་ཐམས་ཅད་ཀྱིས་ངེས་པར་བྱུང་བའི་ལྷའི་ མིག་ལ་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ན་རགས་པའམ། ཕྲ་བའམ། ངན་པའམ། བཟང་པོའམ། གང་རིང་བའམ། གང་ཉེ་བ་ཐམས་ཅད་སྣང་སྟེ། དེའི་ ལྷའི་མིག་གིས་ཤེས་སོ། །ཤིན་ཏུ་རྟོགས་སོ། །རབ་ཏུ་མཐོང་ངོ༌། །དེའི་ལྷའི་མིག་དེས་གཟུགས་མེད་པ་ན་སྤྱོད་པ་མ་གཏོགས་པར་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་ མེད་པ་དག་ན་སེམས་ཅན་གང་དག་འགྲོ་བ་ཐམས་ཅད་དུ་སྐྱེས་པ་དེ་དག་ཐམས་ཅད་ཀྱི་འཆི་འཕོ་དང༌། སྐྱེ་བ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་དག་གི་ལས་ཀྱི་རྒྱུ་ ཡང་རབ་ཏུ་ཤེས་སོ། །དེ་དག་གི་ལས་ཀྱི་འབྲས་བུ་ཡང་རབ་ཏུ་ཤེས་སོ། །དེ་དག་གི་དབང་པོ་རྣམས་ཀྱང་རབ་ཏུ་ཤེས་སོ། །དབང་པོའི་རྒྱུ་ཡང་རབ་ཏུ་ཤེས་སོ། །དབང་པོའི་རིམ་པ་ཡང་རབ་ ཏུ་ཤེས་སོ། །གང་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་གི་སངས་རྒྱས་བཅོམ་ལྡན་འདས་རྣམས་ཀྱི་ཞིང་གི་བཀོད་པ་དེ་དག་ཐམས་ཅད་ཀྱང་མངོན་སུམ་དུ་ མཐོང་བས་མཐོང་ངོ༌། །མཐོང་ནས་ཀྱང་ཚུལ་ཁྲིམས་ཀྱི་ཕུང་པོ་ཡོངས་སུ་དག་པར་བྱ་བའི་ཕྱིར་ཡོངས་སུ་བསྔོ་སྟེ། ཚུལ་ཁྲིམས་ཀྱི་ཕུང་པོ་ལ་གནས་པ་དེའི་བསྔོ་བ་འགྲུབ་པར་འགྱུར་རོ། ། དེའི་ལྷའི་མིག་རྣམ་པར་དག་པ་མི་ལས་ཤིན་ཏུ་འདས་པ་དེས་གང་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའི་དགེ་འདུན་དེ་དག་ཐམས་ཅད་ཀྱང་མཐོང་ངོ༌། །མཐོང་ ༄༅། །ནས་ཀྱང་གང་སྐྱེས་བུ་དམ་པ་དེ་དག་གི་ཆོ་ག་དང༌། སྤྱོད་ཡུལ་དང༌། སྤྱོད་པ་དང༌། དྲན་པ་དང༌། ཤེས་བཞིན་དང༌། སྤྱོད་ལམ་གྱི་གནས་དང༌། ཆོས་ཀྱི་རྣམ་པར་ ཐར་པའི་ཡེ་ཤེས་ལ་གནས་པ་དང༌། གཟུངས་ཐོབ་པའི་ཡེ་ཤེས་ལ་མཁས་པ་དང༌། ཤེས་རབ་དང༌། ཡེ་ཤེས་དང༌། ཐབས་མཁས་པ་ལ་འཇུག་པ་དེ་ཐམས་ཅད་ཡོངས་སུ་རྫོགས་ པར་བྱེད་དོ། །དེའི་མིག་དེ་ནི། གཟུགས་ཐམས་ཅད་མཐོང་བས་སྒྲིབ་པ་མེད་པའོ། །དེའི་མིག་དེ་ནི། གཟུགས་ཐམས་ཅད་ལ་མི་ཆགས་པས་ཆགས་པ་མེད་པའོ། །དེའི་མིག་དེ་ནི། བག་ ལ་ཉལ་དང་ལྟ་བ་ཐམས་ཅད་ལས་རྣམ་པར་གྲོལ་བའོ། །དེའི་མིག་དེ་ནི། རང་བཞིན་གྱིས་འོད་གསལ་བས་རྣམ་པར་དག་པའོ། །དེའི་མིག་དེ་ནི། ཡུལ་ཐམས་ཅད་ལ་མི་གནས་པའོ། ། དེའི་མིག་དེ་ནི། ཉོན་མོངས་པ་དང་བག་ལ་ཉལ་བ་རྣམས་མི་ལེན་པའོ། །དེའི་མིག་དེ་ནི། ཐེ་ཚོམ་མེད་པས་རབ་རིམ་མེད་པའོ། །དེའི་མིག་དེ་ནི། སྒྲིབ་པ་མེད་པའི་ཆོས་རྣམས་ལ་ཀུན་ ནས་ལྡང་བ་མེད་པའོ། །དེའི་མིག་དེ་ནི། ཆོས་སྣང་བ་རྣམས་ལ་ཆོས་སྣང་བ་ཐོབ་པའོ། །དེའི་མིག་དེ་ནི། རྣམ་པར་ཤེས་པའི་སྤྱོད་ཡུལ་མ་ཡིན་ཏེ། ཡེ་ཤེས་ལ་རྟེན་པའོ། །དེའི་མིག་ དེ་ནི༑ ཉོན་མོངས་པ་ཐམས་ཅད་ཀྱིས་གོས་པ་མེད་པ། ཞེ་སྡང་མེད་པ། རྨོངས་པ་མེད་པའོ། །དེའི་མིག་དེ་ནི། འཕགས་པའི་རྣམ་པའི་དབང་པོ་རྣམས་ཀྱིས་ངེས་པར་འབྱེད་པའི་ཆ་ དང་མཐུན་པའོ། །དེའི་མིག་དེ་ནི། སེམས་ཅན་ཐམས་ཅད་ལ་འོད་ཟེར་མཉམ་པར་གཏོང་བས་ཁོང་ཁྲོ་བ་མེད་པའི་མཚན་ཉིད་དོ། །དེའི་མིག་དེ་ནི། སེམས་ཀྱི་འཁྲུག་པ་དང་བྲལ་ བས་རྣམ་པར་དག་པའོ། །དེའི་མིག་དེ་ནི། རང་བཞིན་གྱིས་འོད་གསལ་བས་དྲི་མ་མེད་པའོ། །དེའི་མིག་དེ་ནི། བསམ་པ་མི་འདོར་བས་སངས་རྒྱས་ཀྱི་སྤྱན་གྱིས་མངོན་པར་བསྒྲུབས་ པའོ༑ ༑དེའི་མིག་དེ་ནི། ཆགས་པ་དང༌། ཁོང་ཁྲོ་བ་དང་བྲལ་བས་ཆགས་པ་མེད་པ། ཞེ་སྡང་མེད་པའོ། །དེའི་མིག་དེ་ནི། དོན་དང༌། སྤྱོད་ཡུལ་དང༌། སྤྱོད་པ་དང༌། སེམས་ཅན་ལ་སྙིང་ རྗེ་ཆེན་པོ་རླབས་པོ་ཆེར་གནས་པའོ། །དེའི་མིག་དེ་ནི། སློང་བ་རྣམས་ལ་ཁོང་ཁྲོ་བ་མེད་པའོ། །དེའི་མིག་དེ་ནི། ཚུལ་ཁྲིམས་འཆལ་བ་རྣམས་ལ་ཁོང་ཁྲོ་བ་མེད་པའོ། །དེའི་མིག་དེ་ནི། གནོད་པར་སེམས་པ་རྣམས་ལ་རྗེས་སུ་བསྲུངས་པའོ། །དེའི་མིག་དེ་ནི། ལེ་ལོ་ཅན་རྣམས་ལ་རབ་ཏུ་བཟུང་བ་སྟེར་བའོ། །དེའི་མིག་དེ་ནི། སེམས་འཁྲུགས་པ་རྣམས་ལ་བསམ་ གཏན་གྱི་ཡན་ལག་སྟོན་པའོ། །དེའི་མིག་དེ་ནི། ཤེས་རབ་འཆལ་པ་རྣམས་ལ་ཤེས་རབ་ཀྱི་མིག་སྦྱིན་པའོ། །དེའི་མིག་དེ་ནི། ལམ་ནོར་བར་ཞུགས་པ་རྣམས་ལ་ལམ་སྟོན་པའོ། ། དེའི་མིག་དེ་ནི། མོས་པ་ཆུང་བ་རྣམས་ལ་སངས་རྒྱས་རྒྱ་ཆེན་པོར་སྟོན་པའོ། །དེའི་མིག་དེ་ནི། ཐམས་ཅད་མཁྱེན་པའི་ཡེ་ཤེས་རྒྱ་ཆེན་པོས་མངོན་པར་འཕགས་པའི་མངོན་པར་ཤེས་ ༄༅། །པ་བྱང་ཆུབ་ཀྱི་སྙིང་པོར་མངོན་པར་བྱང་ཆུབ་ཀྱི་སྙིང་པོ་ལ་གཞོལ་བ་སྟེ། ཤཱ་རིའི་བུ། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལྷའི་ མིག་གི་མངོན་པར་ཤེས་པའི་ཡེ་ཤེས་ཀྱི་ལས་ཡོངས་སུ་རྫོགས་པར་བྱེད་པའོ། །ཤཱ་རིའི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལྷའི་རྣ་བའི་ཁམས་ཀྱིས་ མངོན་སུམ་དུ་བྱ་བ་ཤེས་པའི་མངོན་པར་ཤེས་པ་ནི། གང༌། མངོན་པར་ཤེས་པ་དང༌། ཡེ་ཤེས་ཀྱི་ལས་ཡོངས་སུ་རྫོགས་པ་ནི། གང་ཞེ་ན། ཤཱ་རིའི་བུ། དེ་ལ་བྱང་ཆུབ་སེམས་ དཔའི་ལྷའི་རྣ་བའི་ཁམས་རྣམ་པར་དག་པ། མི་ལས་ཤིན་ཏུ་འདས་པས་མི་དང༌། མི་མ་ཡིན་པ་གཉི་གའི་སྒྲ་ཡང་ཐོས་ཏེ། དེ་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་ མེད་པ་དག་ན་གང་ལ་ལ་སྒྲར་གྲགས་པ་ལྷའི་སྒྲའམ། ཀླུའི་སྒྲའམ། གནོད་སྦྱིན་གྱི་སྒྲའམ། དྲི་ཟའི་སྒྲའམ། ལྷ་མ་ཡིན་གྱི་སྒྲའམ། ནམ་མཁའ་ལྡིང་གི་སྒྲའམ། མིའམ་ ཅིའི་སྒྲའམ། ལྟོ་འཕྱེ་ཆེན་པོའི་སྒྲའམ། མི་དང་མི་མ་ཡིན་པའི་སྒྲའམ། གང་ཡང་འཕགས་པའི་སྒྲའམ། སངས་རྒྱས་ཀྱི་སྒྲའམ། རང་སངས་རྒྱས་ཀྱི་སྒྲའམ། བྱང་ཆུབ་ སེམས་དཔའི་སྒྲའམ། ཉན་ཐོས་ཀྱི་སྒྲ་ཡང་རུང་སྟེ། དེ་ཐམས་ཅད་བྱང་ཆུབ་སེམས་དཔའ་དེའི་ལྷའི་རྣ་བའི་ཁམས་ཀྱིས་རིག་གོ །གང་ཡང་ངན་སོང་གི་སྒྲའམ། སེམས་ཅན་ དམྱལ་བའི་སྒྲའམ། དུད་འགྲོའི་སྐྱེ་གནས་ཀྱི་སྒྲའམ། གཤིན་རྗེའི་འཇིག་རྟེན་གྱི་སྒྲའང་རུང་སྟེ། དེ་དག་ཐམས་ཅད་དེའི་ལྷའི་རྣ་བའི་ཁམས་ཀྱིས་རིག་སྟེ། ཐ་ན་སྲིན་བུ་དང༌། ཕྱེ་ མ་ལེབ་དང༌། སྦྲང་བུ་དང༌། ཤ་སྦྲང་གི་སྒྲའམ། སེམས་ཅན་དེ་དག་གི་སེམས་ཀྱི་དམིགས་པ་དགེ་བའམ། མི་དགེ་བ་དེ་དག་གིས་ངག་གི་ལས་འབྱིན་པ་དེ་ཐམས་ཅད་ཀྱང་རབ་ ཏུ་ཤེས་སོ། །ངག་གི་ལས་གང་དགེ་བའི་རྒྱུ་འཛིན་པ་དང༌། ངག་གི་ལས་གང་མི་དགེ་བའི་རྒྱུ་འཛིན་པ་དེ་ཡང་རབ་ཏུ་ཤེས་སོ། །གང་འདོད་ཆགས་བག་ལ་ཉལ་ལས་ཁོང་ཁྲོ་བའི་ ངག་གི་ལས་འབྱུང་བ་དང༌། གང་ཞེ་སྡང་བག་ལ་ཉལ་ལས་ཆགས་པའི་ངག་གི་ལས་འབྱུང་བ་དང༌། གང་འདོད་ཆགས་དང༌། ཞེ་སྡང་བག་ལ་ཉལ་ལས་རྨོངས་པའི་ངག་གི་ལས་ འབྱུང་བ་དེ་ཡང་རབ་ཏུ་ཤེས་སོ། །གང་གཏི་མུག་བག་ལ་ཉལ་ལས་ཆགས་པའི་ངག་གི་ལས་འབྱུང་བ་དང༌། གང་འདོད་ཆགས་བག་ལ་ཉལ་ལས་ཆགས་པའི་ངག་གི་ལས་འབྱུང་ བ་དང༌། གང་ཞེ་སྡང་བག་ལ་ཉལ་ལས་ཞེ་སྡང་འབྱུང་བ་དང༌། གཏི་མུག་བག་ལ་ཉལ་ལས་རྨོངས་པ་འབྱུང་བ་དེ་ཡང་རབ་ཏུ་ཤེས་སོ། །ངག་གི་ལས་གང་བསམ་པ་དག་ལ་སྦྱོར་བ་ ཁོང་ཁྲོ་དང༌། ངག་གི་ལས་གང་སྦྱོར་བ་དག་ལ་བསམ་པ་ཁོང་ཁྲོ་བ་དེ་ཐམས་ཅད་ཀྱང་ལྷའི་རྣ་བས་མངོན་པར་ཤེས་པ་དང༌། ཡེ་ཤེས་ཐོགས་པ་མེད་པས་ཡང་དག་པ་ཇི་ལྟ་བ་བཞིན་ ༄༅། །དུ་རབ་ཏུ་ཤེས་སོ། །དེ་ལྷའི་རྣ་བ་དེས་འཕགས་པ་རྣམས་དང༌། འཕགས་པ་མ་ཡིན་པ་རྣམས་ཀྱི་སྒྲ་རྣམས་ཐོས་ཏེ། ཐོས་ནས་ཀྱང་འཕགས་པ་རྣམས་ཀྱི་སྒྲ་ལ་ རྗེས་སུ་ཆགས་པ་ཡང་མེད། འཕགས་པ་མ་ཡིན་པ་རྣམས་ཀྱི་སྒྲ་ལ་ཁོང་ཁྲོ་བ་ཡང་མེད་དེ། དེ་འཕགས་པ་རྣམས་ཀྱི་སྒྲ་ལས་ནི། བྱམས་པ་ཆེན་པོ་རབ་ཏུ་རྙེད་དོ། །འཕགས་པ་ མ་ཡིན་པ་རྣམས་ཀྱི་སྒྲ་ལས་ནི། སྙིང་རྗེ་ཆེན་པོ་རབ་ཏུ་རྙེད་དོ། །དེ་སྒྲ་ཐམས་ཅད་ཀྱི་སྔོན་གྱི་མཐའ་དང༌། ཕྱི་མའི་མཐའ་ཡོངས་སུ་གཅོད་པའི་ཡེ་ཤེས་ཡང་དག་པ་ཇི་ལྟ་བ་བཞིན་ དུ་རབ་ཏུ་ཤེས་སོ། །དེ་ལྷའི་རྣ་བ་དེས་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་མ་ལུས་པ་ཐམས་ཅད་ཀྱི་སངས་རྒྱས་བཅོམ་ལྡན་འདས་ཐམས་ཅད་ཀྱིས་གསུངས་པ་ཐོས་ཏེ། ཐོས་ནས་ཀྱང་དྲན་པའི་སྣོད་མི་བརྗེད་པས་ཐམས་ཅད་ཀུན་ཏུ་འཛིན་ཏོ། །ཀུན་ཏུ་བཟུང་ནས་ཀྱང་མི་བརྗེད་པར་བྱེད་ཅིང་སེམས་ཅན་གྱི་སྣོད་ཇི་ལྟ་བ་བཞིན་དུ་སྟོན་པར་བྱེད་དོ། །ཆོས་ཐམས་ ཅད་ངང་གི་ངང་གི་འཇིག་པ་ཡང་རབ་ཏུ་ཤེས་སོ། །དེ་བཞིན་གཤེགས་པ་གཅིག་གིས་ཆོས་བསྟན་པ་ཉན་ཀྱང་དེ་བཞིན་གཤེགས་པ་གཉིས་པས་ཆོས་བསྟན་པ་ལ་སྒྲིབ་པའམ་ ཀུན་ནས་བཀྲིས་ཏེ་འདུག་པར་ཡང་མི་བྱེད་དེ། ཡང་ཤཱ་རིའི་བུ། སངས་རྒྱས་བཅོམ་ལྡན་འདས་ཐམས་ཅད་ཀྱིས་གསུངས་པ་སྔ་ཕྱི་མེད་པར་ཀུན་ཏུ་འཛིན་ཏོ། །གང་དགེ་བའི་རྩ་བའི་སྒྲ་ ཐོས་པ་དེ་ཡང་དུས་དང་དུས་མ་ཡིན་པར་སྦྱོར་ཞིང་སྟོན་ཏོ། །དེ་འཁོར་གྱི་དུས་ལ་མ་བབ་པའམ། སྐལ་པ་མི་མཉམ་པར་བསྟན་པའི་དུས་ཆོས་བསྟན་པའི་དུས་ལ་བབ་ཀྱང་འཇོག་སྟེ་ཐོས་ཀྱང་ མི་སྟོན་ཏོ། །དེ་ཆོས་ཀྱི་དུས་ལ་བབ་པའམ། འཁོར་གྱི་དུས་ལ་བབ་ན། གཅིག་སློབ་པ་ཡན་ཆད་ལ་ཡང་ཆོས་སྟོན་ཏེ། ལུང་བསྟན་པ་ཡང་དག་པའང་གཞན་ལ་གནོད་ན་མི་བྱེད་དོ། །ལུང་ བསྟན་པ་ཡང་དག་པ་མ་ཡིན་ཡང་དོན་དང་ལྡན་ན། གཞན་ལ་ཕན་གདགས་པ་དང་མཐུན་པར་ཐབས་ལ་མཁས་པས་རང་གི་སེམས་ཡོངས་སུ་དག་པའི་ཕྱིར་ལུང་སྟོན་ནོ། །སྒྲའི་རྣམ་ པ་ཇི་ལྟ་བུ་ཐོས་པར་དགའ་བ་དེ་ལྟ་བུའི་སྒྲ་ཐོས་སོ། །སྒྲའི་རྣམ་པ་ཇི་ལྟ་བུ་ལ་མི་དགའ་བ་དེ་ལྟ་བུའི་སྒྲའི་རྣམ་པ་མི་ཐོས་སོ། །འཁོར་གང་ལ་ཆོས་སྟོན་པ་ན་བྱིན་གྱི་རླབས་ཀྱིས་སེམས་ ཅན་རྣམས་ཀྱི་རྣ་བའི་རྣམ་པར་ཤེས་པས་སྒྲ་རབ་ཏུ་ཤེས་སོ། །དེ་ལ་སེམས་ཅན་གང་དག་ཆོས་ཅང་ཤེས་པ་དེ་དག་གིས་ནི། དེའི་ཆོས་ཐོས་སོ། །སེམས་ཅན་གང་དག་ཅང་ཤེས་པ་མ་ཡིན་ པ་དེ་དག་གིས་ནི། ཆོས་དེ་མི་ཐོས་སོ། །དེའི་རྣ་བའི་ཁམས་དེ་ཆོས་ཀྱི་དབྱིངས་ཀྱིས་རྣམ་པར་དག་པ་ཡིན། དེའི་རྣ་བའི་ཁམས་དེ་བདག་གི་ཁམས་ཀྱིས་རྣམ་པར་དག་པ་ཡིན། སེམས་ ཅན་གྱི་ཁམས་ཀྱིས་རྣམ་པར་དག་པ་ཡིན་ནོ། །དེ་རྣ་བའི་ཁམས་དེ་སྒྲ་ཇི་ལྟ་བ་བཞིན་གྱི་ཡི་གེའི་ངེས་པའི་ཚིག་ཐོས་པས་ཤིན་ཏུ་རྟོགས་པ་ཡིན་ནོ། །གང་འགྲོ་བ་ལྔར་སྐྱེས་པའི་སེམས་ ༄༅། །ཅན་དེ་དག་གི་སྐད་དང༌། སྨྲ་བ་སྣ་ཚོགས་ལ་འཇུག་པའི་ཕྱིར་ཆོས་སྟོན་ཏོ། །དེའི་རྣ་བའི་ཁམས་དེ་ཡང་དེ་བཞིན་གཤེགས་པའི་ལྷའི་སྙན་དུ་ཡོངས་སུ་བསྔོས་ བ་ཡིན་གྱི། ཐེག་པ་གཞན་དུ་ནི། མ་ཡིན་ཏེ། འདི་ནི། བྱང་ཆུབ་སེམས་དཔའི་ལྷའི་རྣ་བའི་མངོན་པར་ཤེས་པའི་ཡེ་ཤེས་ཀྱི་ལས་ཡོངས་སུ་རྫོགས་པ་ཞེས་བྱའོ། །ཤཱ་རིའི་བུ། དེ་ ལ་བྱང་ཆུབ་སེམས་དཔའི་ཕ་རོལ་གྱི་སེམས་ཤེས་པ་མངོན་སུམ་དུ་བྱ་བ་ཤེས་པའི་མངོན་པར་ཤེས་པ་ནི། གང༌། མངོན་པར་ཤེས་པའི་ཡེ་ཤེས་ཡོངས་སུ་རྫོགས་པ་ནི། གང་ཞེ་ན། ཤཱ་རིའི་བུ། འདི་ལ་བྱང་ཆུབ་སེམས་དཔའ་ནི། ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་མ་ལུས་པ་ཐམས་ཅད་ན་སེམས་ཅན་ཐམས་ཅད་ཀྱི་སྔོན་གྱི་མཐའི་སེམས་ཀྱང་ རབ་ཏུ་ཤེས། ཕྱི་མའི་མཐའི་སེམས་ཀྱང་རབ་ཏུ་ཤེས་ད་ལྟར་བྱུང་བའི་སེམས་ཀྱང་རབ་ཏུ་ཤེས་སོ། །དེ་འདས་པའི་སེམས་ཤེས་པས་སེམས་སན་འདིའི་སེམས་ཀྱི་རྒྱུ་ནི། རྒྱུ་ཆེ་བའོ། ། སེམས་ཅན་འདིའི་སེམས་ཀྱི་རྒྱུ་ནི། རྒྱུ་འབྲིང་ངོ༌། །སེམས་ཅན་འདིའི་སེམས་ཀྱི་རྒྱུ་ནི། རྒྱུ་ཆུང་ངོ༌། །སེམས་ཅན་འདིའི་དབང་པོ་རྣམས་ནི། སྦྱིན་པ་དང་ལྡན་པའོ། །སེམས་ཅན་འདིའི་ དབང་པོ་རྣམས་ནི། ཚུལ་ཁྲིམས་དང་ལྡན་པའོ། །སེམས་ཅན་འདིའི་དབང་པོ་རྣམས་ནི། བཟོད་པ་དང་ལྡན་པའོ། །སེམས་ཅན་འདིའི་དབང་པོ་རྣམས་ནི། བརྩོན་འགྲུས་ཀྱི་བསམ་པ་ དང་ལྡན་པའོ། །སེམས་ཅན་འདིའི་དབང་པོ་རྣམས་ནི། བསམ་གཏན་གྱི་བསམ་པ་དང་ལྡན་པའོ། །སེམས་ཅན་འདིའི་དབང་པོ་རྣམས་ནི། ཤེས་རབ་ཀྱི་བསམ་པ་དང་ལྡན་པའོ། །སེམས་ ཅན་འདིའི་དབང་པོ་རྣམས་ནི། བྱམས་པའི་རྣམ་པའོ། །སེམས་ཅན་འདིའི་དབང་པོ་རྣམས་ནི། སྙིང་རྗེའི་རྣམ་པའོ། །སེམས་ཅན་འདིའི་དབང་པོ་རྣམས་ནི། དགའ་བའི་རྣམ་པའོ། །སེམས་ ཅན་འདིའི་དབང་པོ་རྣམས་ནི། བཏང་སྙོམས་ཀྱི་རྣམ་པའོ། །སེམས་ཅན་འདིའི་དབང་པོ་རྣམས་ནི། ཐེག་པ་ཆེན་པོའི་རྣམ་པའོ། །སེམས་ཅན་འདིའི་དབང་པོ་རྣམས་ནི། རང་སངས་རྒྱས་ཀྱི་ ཐེག་པའི་རྣམ་པའོ། །སེམས་ཅན་འདིའི་དབང་པོ་རྣམས་ནི། ཉན་ཐོས་ཀྱི་ཐེག་པའི་རྣམ་པའོ། །སེམས་ཅན་འདི་ནི། རྒྱུའི་སྟོབས་ཅན་ཏེ། རྒྱུའི་གཙོ་བོའི་དགེ་བ་དང་ལྡན་པའོ། །སེམས་ ཅན་འདི་ནི། རྐྱེན་གྱི་སྟོབས་ཅན་ཏེ། རྐྱེན་གྱི་གཙོ་བོའི་རྒྱུ་དང་ལྡན་པའོ། །སེམས་ཅན་འདི་ནི། རྒྱུའི་སྟོབས་ཅན་ཡིན་ཡང་རྒྱུའི་གཙོ་བོའི་དགེ་བ་དང་ལྡན་པ་མ་ཡིན་ཏེ། སེམས་ཅན་འདི་ ནི༑ སྦྱོར་བའི་རྒྱུས་རིགས་དམའ་བར་སྐྱེས་པའོ། །སེམས་ཅན་འདི་ནི། སྦྱོར་བའི་སྟོབས་ཅན་ཡིན་ཡང་དགེ་བ་རྒྱ་ཆེན་པོའི་རྒྱུ་དང་མི་ལྡན་ཏེ། སེམས་ཅན་འདི་ནི། རྒྱུའི་སྟོབས་བསྐྱེད་ པའི་རྒྱུས་རིགས་ཆེན་པོར་སྐྱེས་པའོ། །སེམས་ཅན་འདི་ནི། བསམ་པ་དག་ལ་སྦྱོར་བ་མ་དག་པའོ། །སེམས་ཅན་འདི་ནི། སྦྱོར་བ་དག་ལ་བསམ་པ་མ་དག་པའོ། །སེམས་ཅན་ ༄༅། །འདི་ནི། སྦྱོར་བ་ཡང་དག་ལ་བསམ་པ་ཡང་དག་པའོ། །སེམས་ཅན་འདི་ནི། བསམ་པ་ཡང་མ་དག་ལ་སྦྱོར་བ་ཡང་མ་དག་པའོ། །ཞེས་སེམས་ཅན་ཐམས་ ཅད་ཀྱི་སེམས་ཀྱི་རྒྱུ་དང༌། ཉེ་བའི་རྒྱུའི་རྣམ་གྲངས་ཀྱི་སེམས་ཀྱི་ཤེས་པ་ལ་འཇུག་གོ །ཤཱ་རིའི་བུ། དེ་ལྟར་གང་སེམས་ཅན་ཐམས་ཅད་ཀྱི་འདས་པའི་རྒྱུའི་དབང་པོ་ལ་སེམས་ ཀྱི་སྤྱོད་པ་ཤེས་པ་དང༌། དེ་དག་ལ་ཅི་རིགས་པར་ཆོས་སྟོན་པར་ཤེས་པ་འདི་ནི། བྱང་ཆུབ་སེམས་དཔའི་ཕ་རོལ་གྱི་སེམས་ཤེས་པ་ཞེས་བྱའོ། །ཡང་སེམས་ཅན་འདི་དེ་ལྟར་ སྦྱིན་པའི་རྒྱུ་སྟེ། མ་འོངས་པའི་དུས་ན་ཚུལ་ཁྲིམས་ཀྱི་རྒྱུར་འགྱུར་རོ། །སེམས་ཅན་འདི་ད་ལྟར་ཚུལ་ཁྲིམས་ཀྱི་རྒྱུ་སྟེ། མ་འོངས་པའི་དུས་ན་སྦྱིན་པའི་རྒྱུར་འགྱུར་རོ། །སེམས་ ཅན་འདི་ད་ལྟར་བཟོད་པའི་རྒྱུ་སྟེ། མ་འོངས་པའི་དུས་ན་བརྩོན་འགྲུས་ཀྱི་རྒྱུར་འགྱུར་རོ། །སེམས་ཅན་འདི་ད་ལྟར་བརྩོན་འགྲུས་ཀྱི་རྒྱུ་སྟེ། མ་འོངས་པའི་དུས་ན་བཟོད་པའི་ རྒྱུར་འགྱུར་རོ། །སེམས་ཅན་འདི་ད་ལྟར་འཇིག་རྟེན་པའི་སྤྱོད་པ་ཡིན་ལ། མ་འོངས་པའི་དུས་ན་རང་སངས་རྒྱས་ཀྱི་ཐེག་པའི་རྒྱུར་འགྱུར་རོ། །སེམས་ཅན་འདིའི་དབང་པོ་རྣམས་ ནི༑ ད་ལྟར་ཉན་ཐོས་ཀྱི་ཐེག་པའི་རྒྱུ་ལས་སྐྱེས་པ་སྟེ། མ་འོངས་པ་ན་ཐེག་པ་ཆེན་པོའི་རྒྱུ་ལས་སྐྱེས་པའི་དབང་པོ་རྣམས་སུ་འགྱུར་རོ། །སེམས་ཅན་འདིའི་དབང་པོ་རྣམས་ནི། ད་ལྟར་ཉན་ཐོས་ཀྱི་ཐེག་པའི་རྒྱུ་ལས་སྐྱེས་པ་སྟེ། མ་འོངས་པའི་དུས་ན་རང་སངས་རྒྱས་ཀྱི་ཐེག་པའི་རྒྱུ་ལས་སྐྱེས་པའི་དབང་པོ་རྣམས་སུ་འགྱུར་རོ། །སེམས་ཅན་འདིའི་དབང་པོ་རྣམས་ ནི༑ ད་ལྟར་ཐེག་པ་ཆེན་པོའི་རྒྱུ་ལས་སྐྱེས་པ་སྟེ། མ་འོངས་པའི་དུས་ན་ཉན་ཐོས་ཀྱི་ཐེག་པའི་རྒྱུ་ལས་སྐྱེས་པར་འགྱུར་རོ། །ཞེས་ཕྱི་མའི་མཐའི་སེམས་ལ་འཇུག་པ་ཤེས་སོ། །ཤཱ་ རིའི་བུ། དེ་ལྟར་མ་འོངས་པའི་དུས་ན་སེམས་ཅན་ཐམས་ཅད་ཀྱི་དབང་པོ་རྣམས་ཀྱི་རྒྱུ་ལས་སྐྱེས་པ་གང་དང༌། རྣམ་པ་གང་དང༌། རྐྱེན་དུ་འགྱུར་བ་གང་ཡིན་པ་དེའི་རྒྱུ་ལས་སྐྱེས་པ་དང༌། དེའི་རྣམ་པ་དང༌། དེའི་རྐྱེན་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་སེམས་ཅན་ཡོངས་སུ་མ་སྨིན་པ་ཐམས་ཅད་ལ་དེའི་སེམས་ལ་འཇུག་པའི་ཤེས་པའི་བར་དུ་སྐྱོ་བར་ མི་བྱེད་དེ། དེའི་ཆོས་ཀྱི་སྣོད་ཅི་འདྲ་བ་དེ་འདྲ་བར་ཆོས་སྟོན་ཏོ། །དེ་འབྲས་བུ་ཡོད་པའི་ཆོས་སྟོན་ཀྱང་ཆོས་ཉིད་ལས་བྱས་སོ། །ཞེས་བྱེད་པ་མ་ཡིན་ནོ། །གང་ད་ལྟར་བྱུང་བའི་སེམས་ ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་ཆོས་རྣམས་འཇུག་པ་དེ་དག་ཐམས་ཅད་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། འདོད་ཆགས་དང་བཅས་པའི་ སེམས་ཀྱང་འདོད་ཆགས་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ཀྱང་འདོད་ཆགས་དང་བྲལ་བའི་སེམས་སུ་ཡང་ ༄༅། །དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེ་སྡང་དང་བཅས་པའི་སེམས་ཀྱང་ཞེ་སྡང་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ སོ༑ ༑ཞེ་སྡང་མེད་པའི་སེམས་ཀྱང་ཞེ་སྡང་མེད་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གཏི་མུག་དང་བཅས་པའི་སེམས་ཀྱང་གཏི་མུག་དང་བཅས་པའི་ སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གཏི་མུག་མེད་པའི་སེམས་ཀྱང་གཏི་མུག་དང་བྲལ་བའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཤཱ་ རིའི་བུ༑ དེ་ལྟར་ཀུན་ནས་ཉོན་མོངས་པ་གང་དང་གང་གིས་སེམས་ཅན་གང་དང་གང་གིས་སེམས་པ་སྒྲིབས་པ་དེ་ཐམས་ཅད་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཤེས་ ནས་ཀྱང་ཉོན་མོངས་པ་ལས་གདོན་པའི་ཕྱིར་དེ་ལྟ་དེ་ལྟ་བུར་ཆོས་སྟོན་ཏེ། འཁོར་གང་གི་ནང་དུ་འགྲོ་ཡང་ཐོག་མ་ཉིད་དུ་འཁོར་དེ་དག་ཐམས་ཅད་ལ་རྣམ་པར་ལྟའོ། །རྣམ་པར་ བལྟས་ནས་སེམས་ཅན་རྣམས་ལ་ཇི་ལྟ་ཇི་ལྟ་བུར་རིག་པ་དེ་ལྟ་དེ་ལྟ་བུའི་ཆོས་སྟོན་ཏེ། ཤཱ་རིའི་བུ། དེ་ལྟར་གང་སེམས་ཅན་དེ་དག་གི་དབང་པོ་མཆོག་དང་མཆོག་མ་ཡིན་པ་ ཤེས་པ་དེ་ཐམས་ཅད་རབ་ཏུ་ཤེས་ཀྱང་བྱང་ཆུབ་སེམས་དཔའ་རང་གི་སེམས་ལྷུར་བྱེད་པའང་མ་ཡིན་ལ། གཞན་གྱི་སེམས་ལྷུར་བྱེད་པའང་མ་ཡིན་ནོ། །དེ་ཅིའི་ཕྱིར་ཞེ་ན། དེ་ལྟར་ བྱང་ཆུབ་སེམས་དཔའ་དེའི་སེམས་ཀྱི་རྒྱུན་ནི། ཡེ་ཤེས་ཀྱིས་རིག་པའོ། །སེམས་ཀྱི་རྒྱུན་ནི། དྲན་པས་རིག་པའོ། །བློ་གྲོས་ཀྱིས་རིག་པའོ། །སེམས་ཀྱི་རྒྱུན་ནི། རྟོགས་པས་རིག་པའོ། ། སེམས་ཀྱི་རྒྱུན་ནི། ཤེས་རབ་ཀྱིས་རིག་པའོ། །སེམས་ཀྱི་རྒྱུན་ནི། བློས་རིག་པའོ། །སེམས་ཀྱི་རྒྱུན་ནི། ཉོན་མོངས་པ་མེད་པའོ། །བག་ཆགས་ཀྱི་མཚམས་སྦྱོར་བ་ཡང་དག་པར་བཅད་པ། དག་པ༑ དྲི་མ་མེད་པ། འོད་གསལ་བ། ཁ་ན་མ་ཐོ་བ་མེད་པ། མི་རྩུབ་པ། རྙོག་པ་མེད་པ། ཆོས་ཐམས་ཅད་སྣང་བར་རིག་པའོ། །སེམས་ཅན་ཐམས་ཅད་ཀྱི་སེམས་ཀྱི་སྤྱོད་པའི་རྗེས་སུ་ ཞུགས་པར་རིག་པའོ། །ཤཱ་རིའི་བུ། དེ་ལྟར་གང་དེ་ལྟ་བུའི་ཆོས་ལ་སེམས་ཤེས་པ་འཇུག་པ་འདི་ནི། བྱང་ཆུབ་སེམས་དཔའི་ཕ་རོལ་གྱི་སེམས་མངོན་པར་ཤེས་པ་དང༌། ཡེ་ཤེས་ཀྱི་ ལས་ཡོངས་སུ་རྫོགས་པ་ཞེས་བྱའོ། །ཤཱ་རིའི་བུ། དེ་ལ་བྱང་ཆུབ་སེམས་དཔའ་སྔོན་གྱི་གནས་རྗེས་སུ་དྲན་པ་མངོན་སུམ་དུ་བྱ་བའི་མངོན་པར་ཤེས་པ་ནི། གང༌། མངོན་པར་ཤེས་པའི་ ཡེ་ཤེས་ཀྱི་ལས་ཡོངས་སུ་རྫོགས་པར་བྱེད་པ་ནི། གང་ཞེ་ན། ཤཱ་རིའི་བུ། འདི་ལ་བྱང་ཆུབ་སེམས་དཔའ་ནི། ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་མ་ལུས་པ་ཐམས་ ཅད་ན་སེམས་ཅན་ཐམས་ཅད་ཀྱི་སྐྱེ་བ་གཅིག་དང༌། གཉིས་དང༌། གསུམ་དང༌། བཞི་དང༌། ལྔ་དང༌། བཅུ་དང༌། ཉི་ཤུ་དང༌། སུམ་ཅུ་དང༌། བཞི་བཅུ་དང༌། ལྔ་བཅུ་དང༌། སྐྱེ་བ་བརྒྱ་དང༌། སྐྱེ་བ་སྟོང་ ༄༅། །དང༌། སྐྱེ་བ་བརྒྱ་ཕྲག་སྟོང་དང༌། སྐྱེ་བ་བརྒྱ་ཕྲག་དུ་མ་དང༌། སྐྱེ་བ་སྟོང་ཕྲག་དུ་མ་དང༌། སྐྱེ་བ་བརྒྱ་སྟོང་ཕྲག་དུ་མ་དང༌། འཇིག་པའི་བསྐལ་པ་དང༌། ཆགས་ པའི་བསྐལ་པ་དང༌། འཇིག་པ་དང་ཆགས་པའི་བསྐལ་པ་དང༌། འཇིག་པའི་བསྐལ་པ་དུ་མ་དང༌། ཆགས་པའི་བསྐལ་པ་དུ་མ་དང༌། འཇིག་པ་དང་ཆགས་པའི་བསྐལ་པ་དུ་མ་དང༌། སེམས་ཅན་འདི་སྔོན་ཆེ་གེ་མོ་ཞེས་བྱ་བ་ཞིག་ཏུ་བྱུང་སྟེ། མིང་ནི། འདི་ཞེས་བྱ། རུས་ནི། འདི་ཞེས་བྱ། རིགས་ནི། འདི་ཞེས་བྱ། ཁ་དོག་ནི། འདི་ལྟ་བུ། ཆ་བྱད་ནི། འདི་ལྟ་བུ། དབྱིབས་ནི། འདི་ལྟ་བུ། ཟས་ནི། འདི་ལྟ་བུ་ཞིག་ཟ་ཟ། ཡུན་ནི། འདི་སྲིད་གཅིག་ཏུ་གནས་གནས། བདེ་བ་དང་སྡུག་བསྔལ་ནི། འདི་ལྟ་བུ་ཞིག་མྱོང་སྟེ། དེ་ནས་ཤི་འཕོས་ནས་ཆེ་ གེ་མོ་ཞིག་ཏུ་སྐྱེས་ཏེ། དེ་ནས་ཤི་འཕོས་ནས་འདིར་སྐྱེས་སོ། །ཞེས་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ། །དེ་ལྟར་ན། བདག་དང་སེམས་ཅན་ཐམས་ཅད་ཀྱི་སྔོན་གྱི་གནས་རྣམ་པ་དང་བཅས་ པ་དང༌། ཡུལ་ཕྱོགས་དང་བཅས་པ་རྣམ་པ་དུ་མ་རྗེས་སུ་དྲན་ནོ། །དེ་བདག་གི་སྔོན་གྱི་མཐའ་ནས་བཟུང་སྟེ་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ། །སེམས་ཅན་གཞན་རྣམས་ དང༌། གང་ཟག་གཞན་དག་གི་སྔོན་གྱི་མཐའ་ནས་བཟུང་སྟེ་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ། །དེ་རང་གི་དགེ་བའི་རྩ་བ་སྔོན་གྱི་རྒྱུ་ལས་བྱུང་བ་ཡང་རྗེས་སུ་དྲན་ནོ། གཞན་དག་གི་དགེ་བའི་རྩ་བའི་རྒྱུ་ཡང་རྗེས་སུ་དྲན་ནོ། །དེ་རང་གི་དགེ་བའི་རྩ་བ་ཡང་བྱང་ཆུབ་ཏུ་བསྔོ་བར་བྱེད་དོ། །སེམས་ཅན་གཞན་གྱི་དགེ་བའི་རྩ་བ་རྣམས་ཀྱང་སེམས་ཅན་རྣམས་ རྗེས་སུ་དྲན་པར་བྱས་ནས་བྱང་ཆུབ་ཏུ་སེམས་སྐྱེད་པར་བྱེད་དོ། །གང་སྔོན་གྱི་བདེ་བ་དང་སྡུག་བསྔལ་གྱི་རྒྱུ་དེ་ཡང་མི་རྟག་པ་དང༌། སྡུག་བསྔལ་པ་དང༌། སྟོང་པ་དང༌། བདག་མེད་པར་ སྟོན་ཏོ། །དེ་མི་རྟག་པ་དང༌། སྡུག་བསྔལ་བ་དང༌། སྟོང་པ་དང༌། བདག་མེད་པ་ལ་རྟོན་པས་གཟུགས་ཀྱིས་དྲེགས་པ་མ་ཡིན། ལོངས་སྤྱོད་ཀྱིས་དྲེགས་པ་མ་ཡིན། གཡོག་གིས་དྲེགས་ པ་མ་ཡིན། དབང་ཕྱུག་གིས་དྲེགས་པ་མ་ཡིན། འཁོར་ལོས་བསྒྱུར་བ་འདོད་པས་དྲེགས་པ་མ་ཡིན། བརྒྱ་བྱིན་འདོད་པས་དྲེགས་པ་མ་ཡིན། ཚངས་པ་འདོད་པས་དྲེགས་པ་མ་ཡིན་ འཇིག་རྟེན་སྐྱོང་བ་འདོད་པས་དྲེགས་པ་མ་ཡིན། སྐྱེ་བ་ཐམས་ཅད་འདོད་པས་དྲེགས་པ་མ་ཡིན། འདོད་པ་དང༌། རྒྱལ་པོའི་སྲིད་དང༌། དབང་ཕྱུག་གི་བདེ་བ་ཐམས་ཅད་འདོད་པའི་བློ་ གྲོས་ཅན་མ་ཡིན་ཏེ། གཞན་དུ་ན་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསམ་བཞིན་དུ་སྲིད་པ་འཛིན་པ་ནི། མ་གཏོགས་སོ། །དེ་མི་རྟག་པ་དང༌། སྡུག་བསྔལ་བ་དང༌། སྟོང་པ་ དང༌། བདག་མེད་པ་ལ་རྟོན་པས་སྔོན་གྱི་ཉོན་མོངས་པའི་སྤྱོད་པ་ལ་ཁྲེལ་ཞིང་ངོ་ཚ་བར་བྱེད། སྨོད་པར་བྱེད་དེ། ད་ལྟར་བྱུང་བའི་དངོས་པོས་སྲོག་གི་ཕྱིར་ཡང་མི་དགེ་བའི་རྩ་བར་ ༄༅། །འགྱུར་བའི་ལས་མི་བྱེད་དོ། །དེ་སྔོན་གྱི་དགེ་བའི་རྩ་བ་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་ཞིང་རྒྱས་པར་བྱེད་ དོ༑ ༑ད་ལྟར་གྱི་དགེ་བའི་རྩ་བ་རྣམས་ཀྱང་ཐམས་ཅད་བསྡུས་པའི་ཕྱིར་མི་མཐུན་པའི་ཡོངས་སུ་བསྔོ་བ་སྤངས་ཏེ། སངས་རྒྱས་ཀྱི་རིགས་དང༌། ཆོས་ཀྱི་རིགས་དང༌། དགེ་འདུན་གྱི་ རིགས་རྒྱུན་མི་འཆད་པར་བྱ་བའི་ཕྱིར་དྲན་པ་ཡང་དག་པར་བསྐྱེད་པའི་སྟོབས་ཀྱིས་ཐམས་ཅད་མཁྱེན་པར་ཡོངས་སུ་བསྔོ་སྟེ། དེའི་དྲན་པ་དེ་ཡང་ཆོས་ཀྱི་དབྱིངས་ཀྱི་བྱིན་གྱི་ རླབས་ཀྱིས་ཤིན་ཏུ་བྱིན་གྱིས་བརླབས་པའོ། །ཤིན་ཏུ་རིགས་པས་མི་གཡོའོ། །བསམ་གཏན་ཡོངས་སུ་སྦྱང་བ་བྱས་པས་མ་བརྟགས་པའོ། །ཞི་གནས་ཀྱིས་ཤིན་ཏུ་བྱིན་གྱིས་ བརླབས་པས་གནོད་པ་མེད་པའོ། །ལྷག་མཐོང་གིས་ཤིན་ཏུ་ཡང་དག་པར་ཟིན་པས་འཁྲུལ་པ་མེད་པའོ། །མངོན་སུམ་གྱི་ཕྱིར་ཕལ་པ་མ་ཡིན་པའོ། །དྲན་པ་མ་ཉམས་པའི་ ཕྱིར་བརྗེད་པ་མེད་པའོ། །བསོད་ནམས་ཀྱི་ཚོགས་ཆེན་པོ་བསགས་པ་དང༌། གཞན་ལ་རག་མ་ལུས་པའི་ཡེ་ཤེས་ཀྱི་ཚོགས་བསགས་པའི་ཕྱིར་མྱོང་བ་ཆེན་པོའོ། །ཕ་རོལ་ཏུ་ཕྱིན་ པ་ཐམས་ཅད་ཀྱི་ཚོགས་བསགས་པའི་ཕྱིར་ཕ་རོལ་ཏུ་སོང་བ་སྟེ། དེ་ལྟར་དྲན་པ་ཡང་དག་པར་བསྐྱེད་པའི་སྟོབས་ཀྱིས་འདས་པ་དང༌། ད་ལྟར་བྱུང་བའི་ཆོས་རྣམས་བརྗེད་པ་མེད་ པ་འདི་ནི། བྱང་ཆུབ་སེམས་དཔའི་སྔོན་གྱི་གནས་མངོན་པར་ཤེས་པའི་ཡེ་ཤེས་ཀྱི་ལས་ཡོངས་སུ་རྫོགས་པའོ། །ཤཱ་རིའི་བུ། དེ་ལ་བྱང་ཆུབ་སེམས་དཔའི་རྫུ་འཕྲུལ་གྱི་བྱ་བ་མངོན་ སུམ་དུ་བྱ་བ་ཤེས་པས་མངོན་པར་ཤེས་པ་ནི། གང༌། མངོན་པར་ཤེས་པའི་ཡེ་ཤེས་ཀྱི་ལས་ཡོངས་སུ་རྫོགས་པ་ནི། གང་ཞེ་ན། ཤཱ་རིའི་བུ། འདི་ལ་བྱང་ཆུབ་སེམས་དཔའི་འདུན་ པ་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་སྒོམ་པ་དང༌། བརྩོན་འགྲུས་དང༌། སེམས་དང༌། སྤྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་ གྱི་རྐང་པ་སྒོམ་པ་སྟེ། དེ་འདུན་པ་དང༌། བརྩོན་འགྲུས་དང༌། སེམས་དང༌། དཔྱོད་པས་རབ་ཏུ་ཟིན་པའི་ཆོས་རྣམས་འདོད་པ་དང༌། སྟུག་པར་བྱེད་པ་དང༌། དབང་སྒྱུར་བ་དང༌། རྫུ་འཕྲུལ་ གྱི་རྐང་པ་བཞི་པོ་འདི་དག་ཤིན་ཏུ་ཡོངས་སུ་བསྒོམ་པའི་ཕྱིར་རྫུ་འཕྲུལ་རྣམས་མངོན་དུ་ཐོབ་པ་ཡིན་ཏེ། དེ་རྫུ་འཕྲུལ་གྱི་ཆོ་འཕྲུལ་གྱི་སྤང་བ་རྣམ་པ་དུ་མ་མྱོང་ངོ༌། །དེ་རྫུ་འཕྲུལ་གྱི་ཆོ་ འཕྲུལ་དེ་དག་ཀྱང་སེམས་ཅན་ལ་བལྟ་བའི་ཕྱིར་ཡོངས་སུ་གོམས་པ་ཡིན་ནོ། །དེ་གཟུགས་སམ། སྟོབས་སམ། བྱིན་གྱིས་བརླབས་སམ། རྫུ་འཕྲུལ་གྱི་ཆོ་འཕྲུལ་གང་དང་གང་གིས་ སེམས་ཅན་རྣམས་འདུལ་བར་འགྱུར་བའི་རྫུ་འཕྲུལ་གྱི་ཆོ་འཕྲུལ་དེ་དང་དེ་ཉིད་ཉེ་བར་སྟོན་ཏེ། །དེ་གཟུགས་དང༌། ཁ་དོག་ཏུ་སྣང་བ་གང་དང་གང་གིས་སེམས་ཅན་རྣམས་འདུལ་བར་ ༄༅། །འགྱུར་བའི་གཟུགས་དང་ཁ་དོག་ཏུ་སྣང་བ་དེ་དང་དེ་ཉིད་སྟོན་ཏེ། སངས་རྒྱས་ཀྱི་གཟུགས་དང༌། ཁ་དོག་ཏུ་སྣང་བའམ། རང་སངས་རྒྱས་ཀྱི་གཟུགས་དང་ཁ་དོག་ ཏུ་སྣང་བའམ། ཉན་ཐོས་ཀྱི་གཟུགས་དང་ཁ་དོག་ཏུ་སྣང་བའམ། བརྒྱ་བྱིན་གྱི་གཟུགས་དང་ཁ་དོག་ཏུ་སྣང་བའམ། ཚངས་པའི་གཟུགས་དང་ཁ་དོག་ཏུ་སྣང་བའམ། འཇིག་རྟེན་སྐྱོང་ བའི་གཟུགས་དང་ཁ་དོག་ཏུ་སྣང་བའམ། འཁོར་ལོས་བསྒྱུར་བའི་གཟུགས་དང་ཁ་དོག་ཏུ་སྣང་བའམ། གཞན་ཡང་གཟུགས་དང་ཁ་དོག་ཏུ་སྣང་བ། ཐ་ན་དུད་འགྲོའི་སྐྱེ་གནས་ཀྱི་ གཟུགས་དང་ཁ་དོག་ཏུ་སྣང་བ་གང་དང་གང་གིས་སེམས་ཅན་རྣམས་འདུལ་བར་འགྱུར་བའི་གཟུགས་དང་ཁ་དོག་ཏུ་སྣང་བ་དེ་དང་དེ་ཉིད་སེམས་ཅན་རྣམས་ལ་ཉེ་བར་བསྟན་ནས་ཆོས་ སྟོན་ཏོ། །དེའི་སྟོབས་སྙེམས་པ་དང༌། ཁྲོ་བ་དང༌། རྒྱགས་པ་ལྷུར་བྱེད་པའི་སེམས་ཅན་རྣམས་སྟོབས་གང་གིས་འདུལ་བར་བྱ་བའི་སྟོབས་དེ་ཉེ་བར་སྟོན་ཏོ། །ཇི་ཙམ་སྲེད་མེད་ཀྱི་ བུ་ཆེན་པོའི་སྟོབས་ཙམ་མམ། ཇི་ཙམ་སྲེད་མེད་ཀྱི་བུ་ཆེན་པོའི་སྟོབས་ཀྱི་བཞི་ཆ་ཙམ་མམ། ཇི་ཙམ་སྲེད་མེད་ཀྱི་བུ་ཆེན་པོའི་སྟོབས་ཀྱི་ཕྱེད་ཙམ་མམ། ཇི་ཙམ་སྲེད་མེད་ཀྱི་བུ་ ཆེན་པོའི་སྟོབས་རངས་པ་ཙམ་མམ། ཇི་ཙམ་སྟོབས་གང་གིས་རིའི་རྒྱལ་པོ་རི་རབ་འཕང་དུ་དཔག་ཚད་སྟོང་ཕྲག་བརྒྱ་དྲུག་ཅུ། ཞེང་དུ་དཔག་ཚད་བརྒྱད་ཁྲི་བཞི་སྟོང་ཡོད་པ་སོར་ མོ་གཉིས་ཀྱིས་བླངས་ནས་འཕེན་ཏེ། འདི་ལྟ་སྟེ། དཔེར་ན། སྐྱུ་རུ་ར་འབྲུ་གཅིག་བླངས་པ་བཞིན་དུ་འཇིག་རྟེན་གྱི་ཁམས་གཞན་དུ་འཕངས་ཀྱང་བྱང་ཆུབ་སེམས་དཔའ་དེའི་སྟོབས་ཡོངས་ སུ་ཉམས་པར་མི་འགྱུར་བ་དང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལྟར་རྒྱ་ཆེ་བ། འདི་ལྟར་ཡངས་པ། འདིའི་ཆུའི་ཕུང་པོ་ནས་བཟུང་སྟེ་སྲིད་པའི་རྩེ་མོའི་བར་ དུ་ལག་མཐིལ་དུ་བཞག་ལ་བསྐལ་པར་འདུག་ཅིང་སྤྱོད་ལམ་ཐམས་ཅད་ཀྱང་སྟོན་པ་དེ་ལྟ་བུའི་སྟོབས་དང་ལྡན་པའི་བྱང་ཆུབ་སེམས་དཔའི་སྟོབས་སྙེམས་པ་དང༌། ཁྲོ་བ་དང༌། རྒྱགས་ པ་ལྷུར་བྱེད་པའི་སེམས་ཅན་རྣམས་ལ་སྟོབས་སྙེམས་པ་དང༌། ཁྲོ་བ་དང༌། རྒྱགས་པ་གཞིལ་བའི་ཕྱིར་ཆོས་སྟོན་ཏོ། །དེ་རྫུ་འཕྲུལ་གྱི་རྐང་པ་དེ་དག་གིས་བྱིན་གྱི་རླབས་ཀྱིས་ཡེ་ཤེས་ འཐོབ་སྟེ། བྱིན་གྱི་རླབས་ཀྱི་ཡེ་ཤེས་དེས་གང་བྱིན་གྱིས་བརླབས་པ་དེ་དེ་བཞིན་དུ་འགྱུར་ཏེ། གལ་ཏེ་རྒྱ་མཚོ་ཆེན་པོ་ཕྱུགས་རྗེས་ཀྱི་ཆུ་ཙམ་དུ་བྱིན་གྱིས་བརླབས་ན་དེ་ཕྱུགས་རྗེས་ ཀྱི་ཆུ་ཙམ་དུ་གནས་སོ། །གལ་ཏེ་ཕྱུགས་རྗེས་རྒྱ་མཚོ་ཆེན་པོ་ཙམ་དུ་གྱུར་ཅིག། ཅེ་ན་ཡང་དེ་རྒྱ་མཚོ་ཆེན་པོར་འགྱུར་རོ། །གལ་ཏེ་སྲེག་པའི་བསྐལ་བ་ཆུའི་ཕུང་པོར་གྱུར་ཅིག །ཅེས་བྱིན་ གྱིས་བརླབས་ན་ཡང་དེ་བཞིན་དུ་ཆུའི་ཕུང་པོར་འགྱུར་རོ། །ཆུས་འཇིག་པ་ཡང་མེས་འཇིག་པར་གྱུར་ཅིག །ཅེས་བྱིན་གྱིས་བརླབས་པ་དེ་དེ་བཞིན་དུ་འགྱུར་རོ། །དེ་བཞིན་དུ་སྦྱར་ཏེ་ཐ་མ་ ༄༅། །དང༌། རབ་དང༌། འབྲིང་གི་ཆོས་རྣམས་ཀྱིས་གང་དང༌། གང་བྱིན་གྱིས་བརླབས་པའི་བྱིན་གྱི་རླབས་དེ་དང་དེ་ཐམས་ཅད་དེ་བཞིན་དུ་འགྱུར་ཏེ། གཞན་དུ་ མ་ཡིན་ནོ། །དེའི་བྱིན་གྱི་རླབས་དེ་ནི། དགེ་སྦྱོང་ངམ། བྲམ་ཟེའམ། ལྷའམ། བརྒྱ་བྱིན་ནམ། བདུད་དམ། ཚངས་པའམ། འཇིག་རྟེན་འདི་ན་གང་གིས་ཀྱང་ཆོས་དང་མཐུན་པས་ བསྒུལ་བའམ། བསྐྱོད་པའམ། མི་སྣང་བར་བྱེད་མི་ནུས་ཏེ། སངས་རྒྱས་བཅོམ་ལྡན་འདས་རྣམས་ནི། མ་གཏོགས་སོ། །དེ་བྱིན་གྱི་རླབས་ཀྱི་སྟོབས་བསྐྱེད་པ་དེས་དགའ་བ་ དང༌། མཆོག་ཏུ་དགའ་བ་རྒྱ་ཆེན་པོ་སྣ་ཚོགས་ལྷུར་བྱེད་པའི་སེམས་ཅན་རྣམས་ལ་ཆོས་སྟོན་ཏོ། །དེ་རྫུ་འཕྲུལ་གྱི་རྐང་པ་དེ་དག་ཀྱང་ཉམས་པ་མེད་པའོ། །བདག་ཉིད་དབང་ བའོ། །བདུད་དང་ཉོན་མོངས་པའི་ཡུལ་ལས་ཤིན་ཏུ་འདས་པའོ། །སངས་རྒྱས་ཀྱི་ཡུལ་ལ་འཇུག་པའོ། །སེམས་ཅན་རྣམས་ལ་མི་འཚེ་བར་སྦྱོར་བའོ། །དགེ་བའི་རྩ་བའི་ཚོགས་ ཐམས་ཅད་བསགས་པའོ། །བདུད་དང་བདུད་ཀྱི་རིས་ཀྱི་ལྷའི་བུ་རྣམས་ཀྱིས་མི་ཕྱེད་པ་སྟེ། འདི་ནི། བྱང་ཆུབ་སེམས་དཔའི་རྫུ་འཕྲུལ་གྱི་བྱ་བ་མངོན་སུམ་དུ་བྱ་བ་མངོན་པར་ ཤེས་པའི་ཡེ་ཤེས་ཀྱི་ལས་ཡོངས་སུ་རྫོགས་པར་བྱེད་པའོ། །ཤཱ་རིའི་བུ། དེ་ལ་བྱང་ཆུབ་སེམས་དཔའི་མངོན་པར་ཤེས་པ་ནི། གང༌། ཡེ་ཤེས་ནི། གང་ཞེ་ན། གང་ལྷའི་ མིག་གིས་གཟུགས་རྣམས་མཐོང་བ་འདི་ནི། མངོན་པར་ཤེས་པ་ཞེས་བྱའོ། །གཟུགས་སུ་སྣང་བ་རྣམས་ལ་ཟད་པའི་ཆོས་ཉིད་དུ་ཤེས་ཀྱང་མངོན་སུམ་དུ་མི་བྱེད་པ་འདི་ནི། ཡེ་ཤེས་ཞེས་ བྱའོ། །གཞན་ཡང་ཤཱ་རིའི་བུ། གང་སྒྲར་གྲགས་པ་ཐམས་ཅད་ཐོས་པ་འདི་ནི། མངོན་པར་ཤེས་པ་ཞེས་བྱའོ། །གང་ཐོས་པའི་སྔོན་གྱི་མཐའ་བརྗོད་དུ་མེད་པ་འདི་ནི། ཡེ་ཤེས་ཞེས་ བྱའོ། །ཤཱ་རིའི་བུ། གཞན་ཡང་གང་སེམས་ཅན་ཐམས་ཅད་ཀྱི་སེམས་དང་སྤྱོད་པ་རབ་ཏུ་ཤེས་པ་འདི་ནི། མངོན་པར་ཤེས་པ་ཞེས་བྱའོ། །གང་སེམས་འགོག་པར་ཡང་ཤེས་ལ་ འགོག་པ་མངོན་སུམ་དུ་ཡང་མི་བྱེད་པ་འདི་ནི། ཡེ་ཤེས་ཞེས་བྱའོ། །ཤཱ་རིའི་བུ། གཞན་ཡང་གང་སྔོན་གྱི་མཐའ་ལ་ཆགས་པ་མེད་པར་དྲན་པ་འདི་ནི། མངོན་པར་ཤེས་པ་ཞེས་ བྱའོ། །གང་དུས་གསུམ་ལ་ཆགས་པ་མེད་པའི་ཡེ་ཤེས་འདི་ནི། ཡེ་ཤེས་ཞེས་བྱའོ། །ཤཱ་རིའི་བུ། གཞན་ཡང་གང་ཞིང་ཐམས་ཅད་དུ་འགྲོ་བ་དང་འོང་བ་འདི་ནི། མངོན་པར་ཤེས་པ་ ཞེས་བྱའོ། །གང་ཞིག་ནམ་མཁའ་ལྟ་བུར་ཤེས་པ་ལ་འཇུག་པ་འདི་ནི། ཡེ་ཤེས་ཞེས་བྱའོ། །གཞན་ཡང་གང་བཙུན་པའི་ཆོས་ལ་འཇུག་པ་འདི་ནི། མངོན་པར་ཤེས་པ་ཞེས་བྱའོ། ། གང་ཆོས་མཉམ་པར་མཐོང་བ་འདི་ནི། ཡེ་ཤེས་ཞེས་བྱའོ། །གཞན་ཡང་གང་འཇིག་རྟེན་ཐམས་ཅད་ལ་ཆགས་པར་འགྱུར་བ་འདི་ནི། མངོན་པར་ཤེས་པ་ཞེས་བྱའོ། །གང་ ༄༅། །འཇིག་རྟེན་ཐམས་ཅད་དང་མི་འདྲེ་བ་འདི་ནི། ཡེ་ཤེས་ཞེས་བྱའོ། །གཞན་ཡང་གང་བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་ཐམས་ཅད་ཟིལ་ གྱིས་གནོན་པ་འདི་ནི། མངོན་པར་ཤེས་པ་ཞེས་བྱའོ། །གང་ཉན་ཐོས་དང་རང་སངས་རྒྱས་ཐམས་ཅད་ཀྱི་རྫུ་འཕྲུལ་ཤེས་པ་འདི་ནི། ཡེ་ཤེས་ཞེས་བྱ་སྟེ། ཤཱ་རིའི་བུ། དེ་ལྟར་མངོན་ པར་ཤེས་པ་དེ་དག་དང༌། ཡེ་ཤེས་འདི་ནི། མངོན་པར་ཤེས་པའི་ཡེ་ཤེས་ཀྱི་ལས་ཡོངས་སུ་རྫོགས་པར་བྱེད་པ་ཞེས་བྱའོ། །ཤཱ་རིའི་བུ། དེ་ལྟར་ཉོན་མོངས་པའི་སེམས་གཡེང་ བ་ཇི་སྙེད་པར་བྱང་ཆུབ་སེམས་དཔའི་བསམ་གཏན་གྱི་ཚོགས་དང༌། སེམས་ཀྱི་བྱིན་གྱི་རླབས་ཀྱི་ཡེ་ཤེས་ཀྱང་དེ་ཙམ་མོ། །སེམས་ཅན་ཐམས་ཅད་ཀྱི་སེམས་གཡེང་བ་ཇི་སྙེད་པ་ དེ་ཙམ་དུ་བྱང་ཆུབ་སེམས་དཔས་བསམ་གཏན་གྱི་ཡན་ལག་གི་ཚོགས་ཡང་དག་པར་བསྡུ་བར་བྱའོ། །ཤཱ་རིའི་བུ། དེ་ལྟར་བྱང་ཆུབ་སེམས་དཔའ་ནམ་ཡང་དག་པར་བླངས་ཏེ། དེ་ལ་གནས་པ་དེ་ན་མཉམ་པར་གཞག་པ་ཞེས་བྱ་སྟེ། སེམས་ཅན་མཉམ་པ་ཉིད་ཀྱིས་མཉམ་པར་གཞག་པའོ། །སེམས་མཉམ་པ་ཉིད་ཀྱིས་མཉམ་པར་གཞག་པའོ། །བསམ་ པ་མཉམ་པ་ཉིད་ཀྱིས་མཉམ་པར་གཞག་པའོ། །སྦྱོར་བ་མཉམ་པ་ཉིད་ཀྱིས་མཉམ་པར་གཞག་པའོ། །ལྷག་པའི་བསམ་པ་མཉམ་པ་ཉིད་ཀྱིས་མཉམ་པར་གཞག་པའོ། །སྦྱིན་ པ་མཉམ་པ་ཉིད་ཀྱིས་མཉམ་པར་གཞག་པའོ། །ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་མཉམ་པ་ཉིད་ཀྱིས་མཉམ་པར་གཞག་པའོ། ། ཆོས་ཐམས་ཅད་མཉམ་པ་ཉིད་ཀྱིས་མཉམ་པར་གཞག་པའོ། །བྱང་ཆུབ་གང་དང་མཉམ་པ་སེམས་ཅན་ཐམས་ཅད་ཀྱང་དེ་དང་མཉམ་པའོ། །སེམས་ཅན་ཐམས་ཅད་གང་དང་མཉམ་པ་ ཆོས་ཐམས་ཅད་ཀྱང་དེ་དང་མཉམ་པ་སྟེ། གང་མཉམ་པ་དེ་ལ་སྙོམས་པར་ཞུགས་པ་དེ་ནི། སྙོམས་པར་ཞུགས་པ་ཞེས་བྱའོ། །སྟོང་པ་ཉིད་གང་དང་མཉམ་པ་ཆོས་ཐམས་ཅད་ཀྱང་དེ་ དང་མཉམ་པ་སྟེ། མཉམ་པ་དེ་ལ་སྙོམས་པར་ཞུགས་པས་དེའི་ཕྱིར་སྙོམས་པར་ཞུགས་པ་ཞེས་བྱའོ། །མཚན་མ་མེད་པ་གང་དང་མཉམ་པ་དང༌། སྨོན་པ་མེད་པ་གང་དང་མཉམ་པ་ དང༌། མངོན་པར་འདུ་མི་བྱེད་པ་གང་དང་མཉམ་པའི་མཉམ་པ་དེ་ལ་སྙོམས་པར་ཞུགས་པས་དེའི་ཕྱིར་སྙོམས་པར་ཞུགས་པ་ཞེས་བྱའོ། །རང་གི་སེམས་མཉམ་པ་ཉིད་ཀྱིས་ཆོས་ཐམས་ ཅད་མཉམ་པ་ཉིད་ལ་སྙོམས་པར་ཞུགས་པས་དེའི་ཕྱིར་སྙོམས་པར་ཞུགས་པ་ཤེས་བྱའོ། །ཕན་འདོགས་པ་དང༌། གནོད་པར་བྱེད་པ་ཐམས་ཅད་ལ་སེམས་ས་དང་མཉམ་པ། སེམས་ ཆུ་དང་མཉམ་པ། སེམས་མེད་དང་མཉམ་པ། སེམས་རླུང་དང་མཉམ་པ། སེམས་ནམ་མཁའ་དང་མཉམ་པ། མི་མཐོ་བ། མི་དམའ་བ། གནས་པ། ཤིན་ཏུ་གནས་པ། མི་གཡོ་བ་ ༄༅། །ཐོབ་པ། སྤྱོད་ལམ་ཐམས་ཅད་དང་མཉམ་པར་གཞག་པ། སྤྱོད་ལམ་མ་བཅོས་པ་རང་བཞིན་གྱིས་སྙོམས་པར་ཞུགས་པ། མི་རྒོད་པ། མི་གཡེང་བ། མི་ འཕྱར་བ། མུ་ཅོར་མི་སྨྲ་བ། ཚིག་མ་འཚལ་བ། དོན་ཤེས་པ། ཆོས་ཤེས་པ། དུས་ཤེས་པ། ཚོད་ཤེས་པ། དྲོད་ཤེས་པ། འཇིག་རྟེན་ཐམས་ཅད་དང་མཐུན་པ། འཇིག་རྟེན་ དང་མ་འདྲེས་པ། འཇིག་རྟེན་གྱི་ཆོས་བརྒྱད་ལས་ཡང་དག་པར་འདས་པ། ཉོན་མོངས་པ་ཐམས་ཅད་དང་མ་འདྲེས་པ། འདུ་འཛི་དང་བྲལ་བ། སྤྱོད་ཡུལ་དབེན་པ་སྟེ། དེ་ལྟ་བུའི་ ཆོས་ལ་གནས་པ། མཉམ་པ། གཞག་པའི་གནས་ཀྱང་མི་འདོར་བ་འཇིག་རྟེན་གྱི་བྱ་བ་ཐམས་ཅད་དུ་ཡང་ཀུན་ཏུ་སྣང་བ་འདི་ནི། བྱང་ཆུབ་སེམས་དཔའི་ཤེས་རབ་དང་ཐབས་ ཀྱིས་མངོན་པར་བསྒྲུབས་པའི་བསམ་གཏན་གྱི་ཕ་རོལ་ཏུ་ཕྱིན་པ་སྟེ། གང་ལ་སྙོམས་པར་འཇུག་པ་ན་སེམས་ཅན་ལ་ལྟ་བས་སྙིང་རྗེ་ཆེན་པོས་དམིགས་པའི་སེམས་ཉེ་བར་ འབྲེལ་བར་བྱེད་པ་འདི་ནི། དེའི་ཐབས་སོ། །ཞི་བ་དང༌། རབ་ཏུ་ཞི་བ་ལ་སྙོམས་པར་འཇུག་པ་འདི་ནི། དེའི་ཤེས་རབ་བོ། །གང་སྙོམས་པར་འཇུག་པ་ན་སངས་རྒྱས་ཀྱི་ཡེ་ཤེས་ སྒྲུབ་པ་འདི་ནི། དེའི་ཐབས་སོ། །གང་ཆོས་གང་ལ་ཡང་ཉེ་བར་འབྲེལ་པར་མི་བྱེད་པ་འདི་ནི། དེའི་ཤེས་རབ་པོ། །གང་སྙོམས་པར་འཇུག་པ་ན་ཆོས་ཐམས་ཅད་འཛིན་པ་ལ་ ལྟོས་པ་དེ་ནི། དེའི་ཐབས་སོ། །གང་ཆོས་ཀྱི་དབྱིངས་དབྱེར་མེད་པས་བསམ་གཏན་བྱེད་པ་འདི་ནི། དེའི་ཤེས་རབ་པོ། །གང་སྙོམས་པར་འཇུག་པ་ན་སངས་རྒྱས་ཀྱི་སྐུ་རྒྱན་མངོན་དུ་བྱེད་པ་ འདི་ནི། དེའི་ཐབས་སོ། །གང་ཆོས་ཀྱི་སྐུ་ལ་གནས་ནས་བསམ་གཏན་བྱེད་པ་འདི་ནི། དེའི་ཤེས་རབ་བོ། །གང་སྙོམས་པར་འཇུག་པ་ན་སངས་རྒྱས་ཀྱི་གསུང་དང༌། དབྱངས་དང༌། སྒྲ་ དང༌། ཚངས་པའི་དབྱངས་ལ་སེམས་པ་དེ་ནི། དེའི་ཐབས་སོ། །གང་བརྗོད་དུ་མེད་པའི་ཆོས་ཉིད་ཀྱིས་བསམ་གཏན་བྱེད་པ་དེ་ནི། དེའི་ཤེས་རབ་བོ། །གང་སྙོམས་པར་འཇུག་པ་ན་སེམས་ རྡོ་རྗེ་ལྟ་བུར་བྱིན་གྱིས་རློབ་པ་འདི་ནི། དེའི་ཐབས་སོ། །གང་དྲན་པ་མི་གཡེང་བས་བསམ་གཏན་བྱེད་པ་འདི་ནི། དེའི་ཤེས་རབ་བོ། །གང་སྙོམས་པར་འཇུག་པ་ན་སྔོན་གྱི་སྨོན་ལམ་གྱིས་ སེམས་ཅན་ཡོངས་སུ་སྨིན་པར་བྱེད་པ་བྱིན་གྱིས་རློབ་པ་འདི་ནི། དེའི་ཐབས་སོ། །གང་སེམས་ཅན་ཐམས་ཅད་བདག་མེད་པར་བསམ་གཏན་བྱེད་པ་འདི་ནི། དེའི་ཤེས་རབ་བོ། །གང་ བསམ་གཏན་བྱེད་པ་ན་དགེ་བའི་རྩ་བ་རྣམས་ལྷག་པར་དམིགས་པ་འདི་ནི། དེའི་ཐབས་སོ། །གང་རྩ་བ་མེད་པ་དང༌། གནས་མེད་པར་བསམ་གཏན་བྱེད་པ་འདི་ནི། དེའི་ཤེས་རབ་བོ། ། གང་སྙོམས་པར་འཇུག་པ་ན་སངས་རྒྱས་ཀྱི་ཞིང་ཡོངས་སུ་དག་པ་མངོན་དུ་བྱེད་པ་འདི་ནི། དེའི་ཐབས་སོ། །གང་ཞིང་ནམ་མཁའ་དང་མཉམ་པར་བསམ་གཏན་བྱེད་པ་འདི་ནི། དེའི་ཤེས་རབ་བོ། ། ༄༅། །གང་སྙོམས་པར་འཇུག་པ་ན་བྱང་ཆུབ་ཀྱི་སྙིང་པོའི་རྒྱན་བཀོད་པ་མངོན་དུ་བྱེད་པ་འདི་ནི། དེའི་ཐབས་སོ། །གང་ཉོན་མོངས་པ་ཉེ་བར་ཞི་བར་བསམ་གཏན་བྱེད་ པ་འདི་ནི། དེའི་ཤེས་རབ་བོ། །གང་སྙོམས་པར་འཇུག་པ་ན་ཆོས་ཀྱི་འཁོར་ལོ་རབ་ཏུ་བསྐོར་བ་ལ་དམིགས་པར་བྱེད་པ་འདི་ནི། དེའི་ཐབས་སོ། །གང་བསྐོར་བ་ཡང་མེད་ལྡོག་པ་ཡང་ མེད་པར་བསམ་གཏན་བྱེད་པ་འདི་ནི། དེའི་ཤེས་རབ་བོ། །བྱང་ཆུབ་ཀྱི་ཡན་ལག་གི་ཚོགས་ཇི་སྙེད་པ་དེ་ལ་སྙོམས་པར་འཇུག་པ་ན་བཏང་སྙོམས་སུ་བྱེད་པ་དང༌། མངོན་དུ་བྱེད་པ་འདི་ ནི༑ དེའི་ཐབས་སོ། །ཉེ་བའི་ཉོན་མོངས་པ་ཇི་སྙེད་པ་ཡོངས་སུ་གདུང་བ་མེད་པའི་དེ་བཞིན་གཤེགས་པའི་ཡེ་ཤེས་དང༌། བསམ་གཏན་གྱི་བདེ་བ་ཆོས་ཐམས་ཅད་དང་མི་ལྡན་པ་དང༌། འདུ་ཤེས་ཆགས་པ་མེད་པ་འདུ་ཤེས་ཡོངས་སུ་ཤེས་པ་དང༌། འདུ་ཤེས་ཐམས་ཅད་སེལ་བ་དང༌། བྱང་ཆུབ་སེམས་དཔའ་ཐམས་ཅད་ཀྱི་ངེས་པར་གྱུར་པ་དེ་ལ་བསམ་གཏན་དང༌། བསམ་ གཏན་མེད་པར་བསམ་གཏན་བྱེད་པ་འདི་ནི། དེའི་ཤེས་རབ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟ་བུར་ཞུགས་པ་རྣམས་ཀྱིས་བསམ་གཏན་གྱི་ཕ་རོལ་ཏུ་ཕྱིན་པ་ འདི་ནི། ཟད་མི་ཤེས་པའོ། །བདུད་ཐམས་ཅད་ཀྱིས་ཀྱང་གླགས་མི་རྙེད་དོ། །སངས་རྒྱས་ཀྱི་ཆོས་ཐམས་ཅད་ཀྱི་སྣོད་དུ་ཉེ་བར་གནས་པ་ཡིན་ནོ། །ཤཱ་རིའི་བུ། དེ་ལྟར་ན། འདི་ནི། ཐབས༑ འདི་ནི། ཤེས་རབ་སྟེ། དེའི་ཕྱིར་བྱང་ཆུབ་སེམས་དཔའ་རྣམས་ཀྱི་ཐབས་དང༌། ཤེས་རབ་ཀྱིས་མངོན་པར་བསྒྲུབས་པའི་བསམ་གཏན་གྱི་ཕ་རོལ་ཏུ་ཕྱིན་པ་ཞེས་བྱའོ། །ཤཱ་རིའི་བུ། གཞན་ ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ནི། མངོན་པར་ཤེས་པ་ལས་ཉམས་པ་མེད་པར་འདུ་ཤེས་སུ་གྱུར་པའི་ལས་རྣམས་ཀྱང་བྱེད་དོ། །མངོན་པར་ཤེས་པས་ཀྱང་རྣམ་པར་རོལ་ ལ་བྱ་བ་ཐམས་ཅད་ཀྱང་ཡོངས་སུ་སྟོན་ཏོ། །མངོན་པར་ཤེས་པ་ལ་ཡང་རབ་ཏུ་གནས་ལ། འཇུག་པ་ཆེན་པོ་ལ་ཡང་འཛུད་པར་བྱེད་དོ། །དེའི་མངོན་པར་ཤེས་པ་དེ་ནི། ཡེ་ཤེས་བྱེད་པའོ། ། འཇིག་རྟེན་ལས་འདས་པའོ། །ངེས་པར་འབྱེད་པའི་ཆ་དང་མཐུན་པའོ། །བྱ་བ་ཐམས་ཅད་ལ་རྣམ་པའི་མཆོག་ཐམས་ཅད་དང་ལྡན་པའོ། །དེའི་མངོན་པར་ཤེས་པ་དེ་ནི། ཤེས་རབ་བྱེད་ པའོ༑ ༑འཇིག་རྟེན་གྱི་དང༌། འཇིག་རྟེན་ལས་འདས་པའི་ཆོས་རྣམས་མངོན་སུམ་དུ་གྱུར་པའོ། །དེའི་མངོན་པར་ཤེས་པ་དེ་ནི། ཟད་པའི་རྣམ་པའོ། །ཐམས་ཅད་ཀྱི་རྗེས་སུ་འཇུག་པའོ། །ནམ་ མཁའ་དང་མཚུངས་པའོ། །དེའི་མངོན་པར་ཤེས་པ་དེ་ནི། གཟུགས་དང༌། གཟུགས་མེད་པ་རྣམས་སུ་གཟུགས་ཐམས་ཅད་ཀུན་ཏུ་སྟོན་པའོ། །དེའི་མངོན་པར་ཤེས་པ་དེ་ནི། སྔོན་གྱི་མཐའི་ སྒྲ་དང་མཉམ་པ་ཉིད་ཀྱིས་སྒྲ་ཐམས་ཅད་ཀྱི་རྗེས་སུ་སོང་ངོ༌། །དེའི་མངོན་པར་ཤེས་པ་དེ་ནི། རང་བཞིན་དག་མངོན་སུམ་དུ་མཐོང་བས་སེམས་ཅན་ཐམས་ཅད་ཀྱི་སེམས་དང་སྤྱོད་པ་ལ་རྣམ་ ༄༅། །པར་ལྟ་བའོ། །དེའི་མངོན་པར་ཤེས་པ་དེ་ནི། སྔོན་གྱི་མཐའ་དང༌། ཕྱི་མའི་མཐའ་ཡོངས་སུ་གཅོད་པས་བསྐལ་པ་ཐམས་ཅད་རྗེས་སུ་དྲན་པའོ། །དེའི་མངོན་པར་ ཤེས་པ་དེ་ནི། རྫུ་འཕྲུལ་དང༌། རྣམ་པར་འཕྲུལ་པ་ཀུན་ཏུ་སྟོན་ཅིང་གཞན་ལ་མངོན་དུ་ཕྱོགས་པ་མངོན་པར་འདུ་མི་བྱེད་པའི་མཚན་ཉིད་དོ། །དེའི་མངོན་པར་ཤེས་པ་དེ་ནི། དུས་ལས་ མི་འདའ་བས་དུས་ལ་སྡོད་པའི་ཕྱིར་ཟག་པ་ཟད་པའི་ཡེ་ཤེས་ཀྱི་རྗེས་སུ་སོང་བའོ། །དེའི་མངོན་པར་ཤེས་པ་དེ་ནི། འཕགས་པའོ། །འཇིག་རྟེན་ལས་འདས་པའི་ཆོས་ཐམས་ཅད་ལ་ངེས་ པར་འབྱེད་པའི་ཆ་དང་མཐུན་པའོ། །དེའི་མངོན་པར་ཤེས་པ་དེ་ནི། ཉན་ཐོས་དང་རང་སངས་རྒྱས་ཐམས་ཅད་ཀྱིས་གཏིང་དཔག་དཀའ་བའོ། །དེའི་མངོན་པར་ཤེས་པ་དེ་ནི། ཟབ་མོའི་ དོན་ཏོ༑ ༑བདུད་དང་ཕྱིར་རྒོལ་བ་བཅོམ་པའོ། །དེའི་མངོན་པར་ཤེས་པ་དེ་ནི། བྱང་ཆུབ་ཀྱི་སྙིང་པོ་འཛིན་པའོ། །སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་བྱང་ཆུབ་པ་ལ་ གཞོལ་བའོ། །དེའི་མངོན་པར་ཤེས་པ་དེ་ནི། ཆོས་ཀྱི་འཁོར་ལོ་བསྐོར་བ་དང་མཐུན་པའོ། །དེའི་མངོན་པར་ཤེས་པ་དེ་ནི། སེམས་ཅན་ཐམས་ཅད་འདུལ་བར་བྱེད་པའོ། །དེའི་མངོན་ པར་ཤེས་པ་དེ་ནི། ཆོས་ཐམས་ཅད་ལ་དབང་བས་དབང་བསྐུར་བ་ཐོབ་པའོ། །ཤཱ་རིའི་བུ། དེ་ལྟར་བྱང་ཆུབ་སེམས་དཔའ་མངོན་པར་ཤེས་པ་མ་ཉམས་པ་ནི། ཤེས་པས་བྱས་པའི་ ལས་རྣམས་བྱེད་ཀྱི། ང་རྒྱལ་གྱིས་བྱས་པ་ནི། མ་ཡིན་ནོ། །མངོན་པར་ཤེས་པ་མ་ཉམས་པ་དེ་སེམས་ཡོངས་སུ་དག་པ་དང༌། ཡོངས་སུ་བྱང་བ་དང༌། འོད་གསལ་བ་དང༌། ཉོན་མོངས་པ་ མེད་པ་དང༌། ཉེ་བའི་ཉོན་མོངས་པ་དང་བྲལ་བ་དང༌། ཤིན་ཏུ་དུལ་བ་དང༌། ཤིན་ཏུ་ཞི་བ་དང༌། ཤིན་ཏུ་སྦྱང་བ་བྱས་པ་དང༌། བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་ དང༌། སྙོམས་པར་འཇུག་པས་ཀྱང་བསམ་བཞིན་དུ་སྐྱེས་ཏེ། བཅིངས་བཞིན་དུ་སྐྱེ་བ་མ་ཡིན། བཅིངས་བཞིན་དུ་འཆི་འཕོ་བ་མ་ཡིན། བཅིངས་བཞིན་དུ་འབྱུང་བ་མ་ཡིན་ནོ། །དེ་ཅིའི་ ཕྱིར་ཞེ་ན། དེ་ནི། ཡང་དག་པ་མ་ཡིན་པ་ཀུན་རྟོག་པ་ལས་གྲོལ་བའོ། །དེ་ནི། ཉོན་མོངས་པའི་བཅིངས་པ་ཐམས་ཅད་ལས་གྲོལ་བའོ། །དེ་ནི། ཕྱིན་ཅི་ལོག་གི་རྩེ་མོའི་གནས་ལས་ གྲོལ་བའོ། །དེ་བས་ན། དེ་གྲོལ་བཞིན་དུ་སྐྱེ། གྲོལ་བཞིན་དུ་འཆི་འཕོ། །གྲོལ་བཞིན་དུ་འབྱུང་ངོ༌། །དེ་སྐྱེ་ཡང་ཐེག་པ་ཆེན་པོས་ཕོངས་པར་ཡང་མི་འགྱུར་ལ། སངས་རྒྱས་ཀྱི་ཆོས་ རྣམས་ཀྱིས་ཕུན་སུམ་ཚོགས་པར་ཡང་འགྱུར་རོ། །སངས་རྒྱས་ཀྱི་ཆོས་དེ་དག་ཀྱང་ཕྱོགས་བཅུ་ཀུན་ཏུ་བཙལ་ཀྱང་མི་རྙེད་མི་དམིགས་ལ། ཆོས་ཐམས་ཅད་ཀྱང་སངས་རྒྱས་ཀྱི་ཆོས་ཀྱི་རྗེས་ སུ་འཇུག་གོ །དེ་ལྟར་ན། སངས་རྒྱས་ཀྱི་ཆོས་དང༌། ཆོས་ཐམས་ཅད་དང་ནི། ཆོས་ཀྱང་མ་ཡིན་ལ། ཆོས་ཡིན་པ་ཡང་མ་ཡིན་པ་ཞེས་བྱའོ། །ཆོས་གང་ཡང་དག་པ་ཇི་ལྟ་བ་བཞིན་དུ་ཀུན་ཏུ་ ༄༅། །བཙལ་ཀྱང་མི་རྙེད་པ་དེ་ལ་བགྲང་བ་གང་ཡང་མེད་དེ། ཆོས་ཐམས་ཅད་ནི། བགྲང་བའི་ལམ་ལས་ཤིན་ཏུ་འདས་པའོ། །གང་ཆོས་ཐམས་ཅད་མཉམ་པ་ ཉིད་དུ་ཤེས་པ་དེ་ནི། ཆོས་དང༌། ཆོས་མ་ཡིན་པ་ལ་མངོན་པར་ཆགས་པར་མི་བྱེད་དོ། །མངོན་པར་ཆགས་པ་མེད་པ་དེ་ནི། ཆོས་ཐམས་ཅད་ཀྱི་དོན་ཏོ། །གང་དོན་ལ་རློམ་སེམས་སུ་ བྱེད་པ་དེ་ནི། དེའི་གནོད་པ་ཆེན་པོའོ། །གང་དོན་ལ་རློམ་སེམས་སུ་མི་བྱེད་པ་དེའི་མདུན་ན་ནི། དོན་ནམ་དོན་མ་ཡིན་པ་མི་གནས་སོ། །དོན་མཐོང་བ་ལས་གང་དུའང་བློ་ཐོགས་པར་མི་ འགྱུར་ཏེ། དེའི་བློ་ཐོགས་པ་མེད་དོ། །གང་བློ་ཐོགས་པ་མེད་པ་དེ་ཡོངས་སུ་མི་འཛིན་ཏོ། །གང་ཡོངས་སུ་མི་འཛིན་པ་དེ་མི་ཆགས་སོ། །གང་མི་ཆགས་པ་དེ་གནས་མེད་དོ། །གང་ གནས་མེད་པ་དེ་ཉམས་པ་མེད་དོ། །གང་ཉམས་པ་མེད་པ་དེའི་རྩོལ་བ་འབྲས་བུ་ཡོད་པའོ། །གང་རྩོལ་བའི་འབྲས་བུ་ཡོད་པ་དེ་ལ་གཏི་མུག་མེད་དོ། །གང་གཏི་མུག་མེད་པ་དེ་ལ་ ང་ཡི་བ་མེད་དོ། །གང་ལ་ང་ཡི་བ་མེད་པ་དེ་ལ་རྩོད་པ་མེད་དོ། །གང་ལ་རྩོད་པ་མེད་པ་དེ་དགེ་སྦྱོང་གི་ཆོས་རྩོད་པ་མེད་པའོ། །གང་དགེ་སྦྱོང་གི་ཆོས་རྩོད་པ་མེད་པ་དེ་ལག་པའི་ནམ་ མཁའ་དང་མཚུངས་སོ། །གང་ལག་པའི་ནམ་མཁའ་དང་མཚུངས་པ་དེ་འདོད་པའི་ཁམས་སུ་གཏོགས་པ་མ་ཡིན། གཟུགས་ཀྱི་ཁམས་སུ་གཏོགས་པ་མ་ཡིན། གཟུགས་མེད་པའི་ ཁམས་སུ་གཏོགས་པ་མ་ཡིན་ནོ། །གང་ཐམས་ཅད་དུ་གཏོགས་པ་མ་ཡིན་པ་དེ་ལ་ཁ་དོག་མེད། མཚན་མ་མེད། དབྱིབས་མེད་དོ། །གང་ཁ་དོག་མེད། མཚན་མ་མེད། དབྱིབས་ མེད་པ་དེའི་རྗེས་སུ་གཏོགས་པ་ནི། དེ་འདྲའོ། །དེའི་རྗེས་སུ་གཏོགས་པ་ཅི་འདྲ་བར་གཏོགས་པའང་དེ་འདྲའོ། །ཅིའི་ཕྱིར་རྗེས་སུ་གཏོགས་པ་དང༌། གཏོགས་པ་ཞེས་བྱ་ཞེ་ན། གང་གི་ ཕྱིར་གང་རྗེས་སུ་གཏོགས་པར་བྱ་བ་དང༌། གཏོགས་པར་བྱ་བའི་ཆོས་རྡུལ་ཙམ་ཡང་མི་དམིགས་པས་དེའི་ཕྱིར་རྗེས་སུ་གཏོགས་པ་དང༌། གཏོགས་པ་ཞེས་བྱའོ། །དེ་ལྟར་རྗེས་སུ་གཏོགས་ པ་དང༌། གཏོགས་པ་ལ་སྙོམས་པར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ངོ་མཚར་རྨད་དུ་བྱུང་བའི་ཆོས་དང་ལྡན་པ་ཞེས་བྱའོ། །བྱང་ཆུབ་སེམས་དཔའི་ངོ་ མཚར་རྨད་དུ་བྱུང་བའི་ཆོས་གང་ཞེ་ན། གང་བྱམས་པ་དང༌། བདག་མེད་པ་ཉིད་དང༌། སྙིང་རྗེ་དང༌། སེམས་ཅན་མེད་པ་ཉིད་དང༌། དགའ་བ་དང༌། སྲོག་མེད་པ་ཉིད་དང༌། བཏང་ སྙོམས་དང༌། གང་ཟག་མེད་པ་ཉིད་དང༌། སྦྱིན་པ་དང་སྦྱིན་པའི་སེམས་ཉིད་དང༌། ཚུལ་ཁྲིམས་དང་ཞི་བའི་སེམས་ཉིད་དང༌། བཟོད་པ་དང་མི་ཟད་པའི་སེམས་ཉིད་དང༌། བརྩོན་འགྲུས་ དང་དབེན་པའི་སེམས་ཉིད་དང༌། བསམ་གཏན་དང་ངེས་པར་རྟོགས་པའི་སེམས་ཉིད་དང༌། ཤེས་རབ་དང་སྤྲོས་པ་མེད་པའི་སེམས་ཉིད་དང༌། དྲན་པ་ཉེ་བར་གཞག་པ་དང་དྲན་པ་མེད་ཅིང་ ༄༅། །ཡིད་ལ་བྱེད་པ་མེད་པའི་སེམས་ཉིད་དང༌། ཡང་དག་པར་སྤོང་བ་དང་སྐྱེ་བ་མེད་ཅིང་འགག་པ་མེད་པའི་སེམས་ཉིད་དང༌། རྫུ་འཕྲུལ་གྱི་རྐང་པ་དང་སྤྲོས་པ་མེད་པའི་ སེམས་ཉིད་དང༌། དད་པ་དང་ཆགས་པ་མེད་པའི་སེམས་ཉིད་དང༌། དྲན་པ་དང་རང་བྱུང་གི་སེམས་ཉིད་དང༌། ཏིང་ངེ་འཛིན་དང་སྙོམས་པར་ཞུགས་པའི་སེམས་ཉིད་དང༌། ཤེས་རབ་དང་ དབང་པོ་མེད་པའི་སེམས་ཉིད་དང༌། སྟོང་པ་ཉིད་དང་ཁ་ན་མ་ཐོ་བ་མེད་པའི་སེམས་ཉིད་དང༌། བྱང་ཆུབ་ཀྱི་ཡན་ལག་དང་བྱང་ཆུབ་རབ་ཏུ་དབྱེ་བ་དང༌། ལམ་སྒོམ་པ་དང་སྒོམ་པའི་སེམས་ ཉིད་དང༌། ཞི་གནས་དང་ཉེ་བར་ཞི་བའི་སེམས་ཉིད་དང༌། ལྷག་མཐོང་དང་མཐོང་བ་བྲི་བ་མེད་པ་དང་འཕགས་པའི་བདེན་པ་སྒོམ་པ་དང་ཤིན་ཏུ་ཡོངས་སུ་ཤེས་པའི་སེམས་ཉིད་དང༌། སེམས་ཅན་ཡོངས་སུ་སྨིན་པར་བྱེད་པ་དང་ཐོག་མ་ནས་དག་པ་ཉིད་དང་དམ་པའི་ཆོས་ཡོངས་སུ་འཛིན་པ་དང་ཆོས་ཀྱི་དབྱིངས་དབྱེར་མེད་པའི་སེམས་ཉིད་དང༌། མི་སྐྱེ་བ་ལ་བཟོད་པ་ དང་མི་དམིགས་པའི་སེམས་ཉིད་དང༌། ཕྱིར་མི་ལྡོག་པའི་ས་དང་ཕྱིར་མི་ལྡོག་པའི་སེམས་ཉིད་དང༌། མཚན་རྙེད་པ་དང་མཚན་མེད་པའི་སེམས་ཉིད་དང༌། བྱང་ཆུབ་ཀྱི་སྙིང་པོའི་ རྒྱན་དང་ཁམས་གསུམ་གྱི་སྙིང་པོའི་སེམས་ཉིད་དང༌། བདུད་ཚར་གཅོད་པ་དང་སེམས་ཅན་ཐམས་ཅད་ལ་ཕན་འདོགས་པའི་སེམས་ཉིད་དང༌། བྱང་ཆུབ་དང་ཆོས་ཐམས་ཅད་ཀྱི་རང་ བཞིན་རྗེས་སུ་རྟོག་པའི་སེམས་ཉིད་དང༌། ཆོས་ཀྱི་འཁོར་ལོ་བསྐོར་བ་དང་ལྡོག་པ་མེད་པའི་སེམས་ཉིད་དང༌། ཡོངས་སུ་མྱ་ངན་ལས་འདས་པ་ཆེན་པོ་ཀུན་ཏུ་སྟོན་པའི་སེམས་ཉིད་དང༌། འཁོར་བའི་རང་བཞིན་མཉམ་པའི་སེམས་ཉིད་དེ། ཤཱ་རིའི་བུ། དེ་ལྟར་ན། རྗེས་སུ་གཏོགས་པ་དང༌། གཏོགས་པའི་དོན་ལ་སྙོམས་པར་ཞུགས་པའི་ངོ་མཚར་རྨད་དུ་བྱུང་བའི་ཆོས་ནི། འདི་དག་དང༌། གཞན་དག་སྟེ། དེའི་ཕྱིར་ངོ་མཚར་དང༌། རྨད་དུ་བྱུང་བའི་ཆོས་དང་ལྡན་པའི་སྐྱེས་བུ་དམ་པ་དེ་དག་དེ་འདྲ་ཞེས་བྱའོ། །ཤཱ་རིའི་བུ། དེ་ལ་བསམ་གཏན་ཞེས་བྱ་བ་ཅི་ཞེ་ན། བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། དེ་བཞིན་གཤེགས་པའི་ཏིང་ངེ་འཛིན་ཡོངས་སུ་རྫོགས་པར་བྱེད་པའི་ཕྱིར་དེ་ལ་མ་ཆགས་པའོ། །བྱང་ཆུབ་སེམས་དཔའ་རྣམས་ཀྱི་བསམ་ གཏན་ནི། བདག་བདེ་བ་ལ་མ་ཆགས་པའི་ཕྱིར་མྱོང་བ་མེད་པའོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། ཉོན་མོངས་པ་ཐམས་ཅད་སྤོང་བའི་ཕྱིར་སྙིང་རྗེ་ཆེན་པོ་ལ་དམིགས་པའོ།། བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། འདོད་པའི་ཁམས་ལ་མི་དམིགས་པའི་ཕྱིར་ཏིང་ངེ་འཛིན་ལས་མི་ལྡོག་པའོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། སེམས་ ཅན་ཐམས་ཅད་ཀྱི་སེམས་དང་སྤྱོད་པ་རབ་ཏུ་ཤེས་པའི་ཕྱིར་མངོན་པར་ཤེས་པ་སྦྱོང་བའོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། སེམས་ཀྱི་དབང་ཕྱུག་ཤེས་པའི་ཕྱིར་དེ་ཁོ་ན་ ༄༅། །ལ་འགྲོ་བའོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། གཟུགས་དང༌། གཟུགས་མེད་པའི་ཁམས་ཐམས་ཅད་ཀྱི་ཕྱིར་སྙོམས་པར་འཇུག་པ་ཐམས་ཅད་ ཤེས་པའོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། ཉན་ཐོས་དང་རང་སངས་རྒྱས་ཀྱི་སྙོམས་པར་འཇུག་པ་ཟིལ་གྱིས་ནོན་པའི་ཕྱིར་ཞི་བ། རབ་ཏུ་ཞི་བ། ཉེ་བར་ཞི་བའོ། ། བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། ཤིན་ཏུ་མཐར་ཕྱིན་པའི་ཕྱིར་མི་བསྐྱོད་པའོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། བག་ཆགས་ཀྱི་མཚམས་སྦྱོར་ བ་ཡང་དག་པར་འཇོམས་པའི་ཕྱིར་གཉེན་པོའོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། འཇིག་རྟེན་ཐམས་ཅད་ལས་འདས་པའི་ཕྱིར་ཤེས་རབ་ཀྱི་མཆོག་གོ །བྱང་ཆུབ་ སེམས་དཔའ་རྣམས་ཀྱི་བསམ་གཏན་ནི། སེམས་ཅན་ཐམས་ཅད་སྒྲོལ་བར་བྱེད་པའི་ཕྱིར་སེམས་ཅན་ལ་བསམ་པ་སྔོན་དུ་འགྲོ་བའོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་ ནི༑ དེ་བཞིན་གཤེགས་པའི་རྫུ་འཕྲུལ་ཟད་མི་ཤེས་པས་དཀོན་མཆོག་གསུམ་གྱི་རིགས་མི་འཆད་པའོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། རྟག་ཏུ་མཉམ་པར་གཞག་ པའི་ཕྱིར་མངོན་པར་འཕགས་པའོ། །བྱང་ཆུབ་སེམས་དཔའ་རྣམས་ཀྱི་བསམ་གཏན་ནི། ལས་ཐམས་ཅད་ཡོངས་སུ་རྫོགས་པར་དབང་བྱེད་པའོ། །བྱང་ཆུབ་སེམས་དཔའ་རྣམས་ཀྱི་ བསམ་གཏན་ནི། ཡེ་ཤེས་ཆེ་བ་ཉིད་ཀྱི་ཕྱིར་ཕྱིན་པ་སྟེ། ཤཱ་རིའི་བུ། དེ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བསམ་གཏན་ནོ། །ཤཱ་རིའི་བུ། དེ་ལ་བསམ་གཏན་ གྱི་ཕ་རོལ་ཏུ་ཕྱིན་པ་གང་གི་སྔོན་དུ་འགྲོ་ཞེ་ན། འདི་ལྟ་སྟེ། སེམས་ངེས་པར་རྟོག་པའི་སྔོན་དུ་འགྲོ་བའོ། །སེམས་རྩེ་གཅིག་པའི་སྔོན་དུ་འགྲོ་བའོ། །སེམས་གནས་པའི་སྔོན་དུ་འགྲོ་བའོ། ། སེམས་ཞི་གནས་ཀྱི་སྔོན་དུ་འགྲོ་བའོ། །ཏིང་ངེ་འཛིན་གྱི་དབང་པོའི་སྔོན་དུ་འགྲོ་བའོ། །ཏིང་ངེ་འཛིན་གྱི་སྟོབས་ཀྱི་སྔོན་དུ་འགྲོ་བའོ། །ཡང་དག་པའི་ཏིང་ངེ་འཛིན་གྱི་སྔོན་དུ་འགྲོ་བའོ། ། བསམ་གཏན་དང་རྣམ་པར་ཐར་པའི་སྔོན་དུ་འགྲོ་བའོ། །མཐར་གྱིས་གནས་པའི་སྙོམས་པར་འཇུག་པ་དགུའི་སྔོན་དུ་འགྲོ་བའོ། །འགོག་པ་དགུའི་སྔོན་དུ་འགྲོ་བའོ། །དགེ་བའི་ ཆོས་ཀྱི་སྔོན་དུ་འགྲོ་བའོ། །ཉོན་མོངས་པའི་དགྲ་འདུལ་བའི་སྔོན་དུ་འགྲོ་བའོ། །ཏིང་ངེ་འཛིན་གྱི་ཕུང་པོ་ཡོངས་སུ་རྫོགས་པའི་སྔོན་དུ་འགྲོ་བའོ། །བྱང་ཆུབ་སེམས་དཔའི་ཏིང་ངེ་ འཛིན་གྱི་སྔོན་དུ་འགྲོ་བའོ། །སངས་རྒྱས་ཀྱི་ཏིང་ངེ་འཛིན་གྱི་སྔོན་དུ་འགྲོ་བའོ། །དེ་ལྟར་ན། བསམ་གཏན་གྱི་ཕ་རོལ་ཏུ་ཕྱིན་པ་ནི། དེ་དག་དང༌། ཞི་བར་བྱེད་པའི་ཆོས་གཞན་རྣམས་ ཀྱི་ཡང་སྔོན་དུ་འགྲོ་བ་སྟེ། ཤཱ་རིའི་བུ། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བསམ་གཏན་གྱི་ཕ་རོལ་ཏུ་ཕྱིན་པ་སྟེ། དེ་ལ་བརྩོན་པའི་བྱང་ཆུབ་སེམས་ ༄༅། །དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་དོ། །དེ་ནས་བཅོམ་ལྡན་འདས་ཀྱིས་དེའི་དོན་དེ་ཉིད་རྒྱས་པར་བསྟན་པའི་ཕྱིར་དེའི་ཚེ་ཚིགས་སུ་བཅད་ པ་འདི་དག་གསུངས་སོ། །བསམ་གཏན་དང་ནི་རྣམ་ཐར་ཕ་རོལ་ཕྱིན། །པདྨ་ཆུ་ཡིས་གོས་པ་མེད་པ་ལྟར། །ཡིད་ནི་ཆགས་མེད་དག་པའི་འཇིག་རྟེན་ན། །བསྐལ་མང་རྒྱ་མཚོར་རྟག་ཏུ་ སྤྱད་པ་སྤྱོད། །གང་དུ་ཏིང་འཛིན་ཕ་རོལ་སོན་པ་ཡིས། །རྣམ་པར་སྣང་མཛད་ཞི་བའི་ཏིང་འཛིན་དང༌། །ཟླ་འོད་ཅེས་བྱ་ཏིང་འཛིན་རྣམ་བཀོད་པ། །དེ་ཉིད་གློག་གིས་རབ་ ཏུ་བརྒྱན་པ་དང༌། །མངོན་པར་འཕགས་དང་དེ་བཞིན་སེམས་པ་དང༌། །དྲི་མ་མེད་དང་སྣང་ལྡན་ཏིང་འཛིན་དང༌། །ཡོན་ཏན་འོད་དང་གྲུབ་འོད་མྱ་ངན་མེད། །ཆོས་རྣམས་ ཐམས་ཅད་ལ་ནི་དབང་བསྒྱུར་དང༌། །ཆོས་སྒྲོན་དང་ནི་དེ་བཞིན་ཆོས་པ་དང༌། །ཏིང་འཛིན་ཆོས་ཀྱི་དབང་ཕྱུག་རི་རབ་དཔའ། །དམ་པའི་ཆོས་ཀྱི་ཡེ་ཤེས་དབང་བྱེད་དང༌། །དམ་ཆོས་ཀུན་ འཛིན་ཤིན་ཏུ་རྣམ་དག་དང༌། །གཞན་གྱི་སེམས་ལ་རྣམ་སྤྱོད་ཏིང་འཛིན་དང༌། །དམ་ཆོས་དཀོན་མཆོག་འོད་ཟེར་ཏིང་འཛིན་དང༌། །རྒྱལ་མཚན་རྩེ་མོ་དཔུང་རྒྱན་ཉོན་མོངས་སེལ། །བདུད་ཀྱི་ སྟོབས་རྣམས་འཇོམས་པའི་ཏིང་འཛིན་དང༌། །སྟོབས་བཅུ་དང་ནི་སྟོབས་ལས་མངོན་འཕགས་དང༌། །ཀུན་བཅད་ཆགས་མེད་ཅེས་བྱའི་ཏིང་འཛིན་དང༌། །ལག་ན་སྒྲོན་མ་འདུག་སྦྱིན་ བསྐྲགས་པ་དང༌། །ས་འཛིན་ལེགས་པར་གནས་པའི་ཏིང་འཛིན་དང༌། །རི་རབ་སྒྲོན་དང་རྒྱལ་བ་མི་ཕམ་དང༌། །ཡེ་ཤེས་སྒྲོན་དང་དེ་བཞིན་མི་གཙང་དང༌། །རྒྱལ་བ་ཐམས་ཅད་དྲན་པའི་ཏིང་འཛིན་དང༌།། ཆོས་དྲན་དང་ནི་ཡོན་ཏན་ཡེ་ཤེས་འཇུག །སྟོང་པར་འཇུག་དང་དེ་བཞིན་མཚན་མེད་དང༌། །སྨོན་མེད་ཏིང་འཛིན་དེ་བཞིན་ཞི་བའི་ས། །འདུ་ཤེས་སྣ་ཚོགས་བྲལ་ཞེས་བྱ་བ་དང༌། །རབ་དུལ་ཀླུ་ དབང་སྟག་ཅེས་བྱ་བ་དང༌། །འཁྱིལ་བ་དང་ནི་རྣམ་པར་ལྡོག་པ་དང༌། འཛུམ་པ་མེད་དང་སྟོབས་དང་མིག་དག་དང༌། །ཏིང་འཛིན་རྡོ་རྗེ་འདྲ་དང་རྡོ་རྗེས། །མངོན་འཕགས་མི་འཛུམ་ལྷུན་པོ་ལྟ་ བུ་དང༌། །ཀུན་ནས་ཀློང་འཁྱིལ་རྣམ་པར་དག་སྒྲ་དང༌། །ངེས་རྟོག་ཉོན་མོངས་བྲལ་བའི་ཏིང་འཛིན་དང༌། །ནམ་མཁའ་འདྲ་དང་ནམ་མཁའི་བར་སྐབས་དང༌། །ཡོན་ཏན་ཐམས་ཅད་གུས་པར་ ལེན་པ་དང༌། །བློ་གྲོས་དྲན་རྟོགས་བློ་འཕེལ་སྤོབས་མི་ཟད། །ངེས་ཚིག་བསྟན་པ་མཐའ་ཡས་མི་ཟད་དང༌། །ལེགས་བྱས་བྱས་པ་ཆུད་མི་ཟ་བ་དང༌། །ལྟ་བ་དང་ནི་འགྲོ་བ་ཚིམ་བྱེད་དང༌། ། བྱམས་པ་མངོན་འཕགས་སྙིང་རྗེ་ཡངས་པའི་རྩ། །དགའ་དང་མཆོག་ཏུ་དགའ་བ་འཇུག་པ་དང༌། །བཏང་སྙོམས་དང་ནི་གཉིས་ལ་ཆགས་གྲོལ་དང༌། །ཆོས་དོན་ཆོས་ཀྱི་འོད་ཟེར་ཏིང་འཛིན་ དང༌། །འཁྲུག་མེད་ཡེ་ཤེས་སྒྲོན་དང་ཡེ་ཤེས་མཚོ། །རྣམ་གྲོལ་སྙིང་པོ་འགྲོ་བ་ཚིམ་བྱེད་དང༌། །རྡོ་རྗེ་རྒྱལ་མཚན་པདྨའི་དམ་པ་དང༌། །ཆོས་ཀྱི་རྒྱལ་དང་མི་གཡོ་ཏིང་འཛིན་དང༌། །ཤེས་རབ་ ༄༅། །རྩིབས་དང་ཞི་བ་སངས་རྒྱས་མཚོ། །འོད་ཟེར་མཐའ་ཡས་རྣམ་གྲོལ་སྦྱིན་པ་དང༌། །ཡེ་ཤེས་ཏིང་འཛིན་དེ་བཞིན་གཤེགས་ཀྱི་རྒྱན། །བཀོད་པ་ཆེན་པོ་ཞིང་ བཀོད་སྣང་བ་དང༌། །སེམས་ཅན་བསམ་པ་ཡོངས་རངས་དགའ་བ་དང༌། །རྫོགས་པའི་བྱང་ཆུབ་ལམ་ལ་རྟག་མཐུན་དང༌། །ཕ་རོལ་ཕྱིན་པ་རྒྱན་དང་དཀོན་མཆོག་གཙུག །ཏིང་འཛིན་ བྱང་ཆུབ་ཡན་ལག་མེ་ཏོག་སྦྱིན། །རྣམ་གྲོལ་སྙིང་པོ་བདུད་རྩི་སྦྱིན་པ་དང༌། །རླུང་དང་རླུང་བཞིན་འགྲོ་བ་མི་དམིགས་དང༌། །རྒྱ་མཚོ་ཤུགས་འཛིན་རིན་ཆེན་མཛོད་ལྡན་དང༌། །བྲག་ དང་རི་འཐབ་རྒྱལ་པོ་ཞེས་བྱ་དང༌། །རྫུ་འཕྲུལ་ཡངས་དང་ཤིན་ཏུ་དོན་འཛིན་དང༌། །སངས་རྒྱས་ཡུལ་སྟོན་ཏིང་ངེ་འཛིན་དག་དང༌། །དེ་དང་གཞན་ཡང་རྒྱ་ཆེན་མཐའ་ཡས་པའི། །ཞི་ བའི་ཏིང་འཛིན་བྱེ་བ་ཁོང་དུ་ཆུད། །གང་དག་བསམ་གཏན་ཕ་རོལ་ཕྱིན་སྤྱོད་པ། །བྱང་ཆུབ་སེམས་དཔའི་ཡོན་ཏན་དཔག་མེད་དེ། །མཉམ་པར་གཞག་ནས་བསམ་གཏན་སྤྱོད་ ཡུལ་འགྲེང༌། །མཉམ་པར་གཞག་ནས་རྒོད་པ་མེད་པར་འཆག །མཉམ་པར་གཞག་ནས་འདུག་ཅིང་ཉལ་བར་བྱེད། །དེ་ཡི་སྤྱོད་ལམ་མཉམ་པར་མ་གཞག་མེད། །མཉམ་པར་ གཞག་པས་སྒྲ་ནི་འབྱིན་བྱེད་དེ། །ཆོས་འདི་ཐམས་ཅད་ཞི་དང་རབ་ཞི་བ། །རྟོག་པ་མེད་ཅིང་རྣམ་པར་རྟོག་པ་མེད། །བདག་མེད་སྲོག་མེད་དབང་ཕྱུག་དག་ཀྱང་མེད། །བྱང་ཆུབ་སེམས་ དཔའ་མཁས་པ་སྙིང་རྗེ་ཅན། །བསམ་གཏན་ཕ་རོལ་ཕྱིན་པ་སྤྱོད་བྱེད་པ། །ཡོན་ཏན་རྒྱ་མཚོ་དེ་ཡི་ཡོན་ཏན་ནི། །འདི་དང་གཞན་ཡང་ཕ་རོལ་མཐའ་ཡས་པའོ། །བསམ་གཏན་གྱི་ཕ་རོལ་ཏུ་ ཕྱིན་པའི་ལེའུ་སྟེ། བཅུ་པའོ།། །།བམ་པོ་བཅུ་བདུན་པ། ཤཱ་རིའི་བུ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་བརྩོན་ན། བྱང་ཆུབ་སེམས་དཔའི་སྤྱད་པ་སྤྱོད་ པ་འགྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་གང་ཞེ་ན། ཤཱ་རིའི་བུ། འདི་ལ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ ཆོས་ཀྱི་རྣམ་གྲངས་རབ་ཏུ་ཉན་པར་བྱེད། འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད། གཞན་དག་ལ་ཡང་འཆད་ཅིང་རྒྱ་ཆེར་ཡང་དག་པར་རབ་ཏུ་སྟོན་པར་ བྱེད་དེ༑ ཤཱ་རིའི་བུ། དེ་ལ་བྱང་ཆུབ་སེམས་དཔས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཤིན་ཏུ་མཉན། བླངས། བཟུང༌། བཀླགས། གཞན་དག་ལ་ཡང་འཆད་ཅིང་རྒྱ་ ཆེར་ཡང་དག་པར་རབ་ཏུ་བསྟན་ན། ཤེས་རབ་ཀྱི་རྣམ་པ་འདི་དག་འཐོབ་པར་འགྱུར་རོ། །ཤེས་རབ་དེ་ཡང་རྣམ་པ་གང༌། འཇུག་པ་གང་ཞེ་ན། དེ་ལ་ཤེས་རབ་ཀྱི་ཐོས་པ་ནི། རྣམ་པའོ། ། ཚུལ་བཞིན་ཡིད་ལ་བྱེད་པ་ནི། འཇུག་པའོ། །ཐོས་པ་ཡང་རྣམ་པ་གང་ཞེ་ན། འདི་ལྟ་སྟེ། འདུན་པའི་རྣམ་པ་དང༌། བསམ་པའི་རྣམ་པ་དང༌། སྦྱོར་བའི་རྣམ་པ་དང༌། དགེ་བའི་བཤེས་ ༄༅། །གཉེན་གྱི་རྣམ་པ་དང༌། ང་རྒྱལ་མེད་པའི་རྣམ་པ་དང༌། རབ་ཏུ་འདུད་པའི་རྣམ་པ་དང༌། རི་མོར་བྱེད་པའི་རྣམ་པ་དང༌། མཐུན་པའི་རྣམ་པ་དང༌། བཀའ་བློ་བདེ་ བའི་རྣམ་པ་དང༌། བསྙེན་བཀུར་བྱེད་པའི་རྣམ་པ་དང༌། རྣ་བླགས་ཏེ་ཉན་པའི་རྣམ་པ་དང༌། བཀུར་སྟི་བྱེད་པའི་རྣམ་པ་དང༌། ཡིད་ལ་བྱེད་པའི་རྣམ་པ་དང༌། མི་གཡེང་བའི་རྣམ་ པ་དང༌། རིན་པོ་ཆེར་འདུ་ཤེས་པའི་རྣམ་པ་དང༌། སྨན་དུ་འདུ་ཤེས་པའི་རྣམ་པ་དང༌། ནད་ཐམས་ཅད་རབ་ཏུ་ཞི་བར་བྱེད་པའི་འདུ་ཤེས་ཀྱི་རྣམ་པ་དང༌། དྲན་པའི་སྣོད་ཀྱི་རྣམ་པ་ དང༌། རྟོགས་པ་ཤེས་པའི་རྣམ་པ་དང༌། བློ་གྲོས་འདོད་པའི་རྣམ་པ་དང༌། བློ་ལ་འཇུག་པའི་རྣམ་པ་དང༌། སངས་རྒྱས་ཀྱི་ཆོས་ཐོས་པས་མི་ངོམས་པའི་རྣམ་པ་དང༌། གཏོང་བ་ སྤེལ་བའི་རྣམ་པ་དང༌། བྱིན་ནས་མི་སྨོད་པའི་རྣམ་པ་དང༌། མང་དུ་ཐོས་པ་བསྟན་པའི་རྣམ་པ་དང༌། གུས་པར་དགའ་བ་མྱོང་བར་བྱེད་པའི་རྣམ་པ་དང༌། ལུས་སིམ་པའི་རྣམ་པ་ དང༌། སེམས་རངས་པའི་རྣམ་པ་དང༌། མི་སྐྱོ་བར་ཉན་པའི་རྣམ་པ་དང༌། དོན་ཉན་པའི་རྣམ་པ་དང༌། ཆོས་ཉན་པའི་རྣམ་པ་དང༌། ནན་ཏན་ཉན་པའི་རྣམ་པ་དང༌། ཐེག་པ་གཞན་ ལ་འདོད་པ་མེད་པར་ཉན་པའི་རྣམ་པ་དང༌། ཕ་རོལ་ཏུ་ཕྱིན་པ་ཉན་པའི་རྣམ་པ་དང༌། བྱང་ཆུབ་སེམས་དཔའི་སྡེ་སྣོད་ཉན་པའི་རྣམ་པ་དང༌། བསྡུ་བའི་དངོས་པོ་ཉན་པའི་རྣམ་པ་དང༌། ཐབས་མཁས་པ་ཉན་པའི་རྣམ་པ་དང༌། ཚངས་པའི་གནས་པ་ཉན་པའི་རྣམ་པ་དང༌། མངོན་པར་ཤེས་པ་ཉན་པའི་རྣམ་པ་དང༌། དྲན་པ་ཉེ་བར་གཞག་པ་ཉན་པའི་རྣམ་པ་དང༌། ཡང་དག་ པར་སྤོང་བ་ཉན་པའི་རྣམ་པ་དང༌། རྫུ་འཕྲུལ་གྱི་རྐང་པ་ཉན་པའི་རྣམ་པ་དང༌། རྟེན་ཅིང་འབྲེལ་བར་འབྱུང་བ་ཉན་པའི་རྣམ་པ་དང༌། མི་རྟག་པ་ཉན་པའི་རྣམ་པ་དང༌། སྡུག་བསྔལ་བ་ཉན་ པའི་རྣམ་པ་དང༌། བདག་མེད་པ་ཉན་པའི་རྣམ་པ་དང༌། ཞི་བ་ཉན་པའི་རྣམ་པ་དང༌། སྟོང་པ་ཉིད་ཉན་པའི་རྣམ་པ་དང༌། མཚན་མ་མེད་པ་ཉན་པའི་རྣམ་པ་དང༌། སྨོན་པ་མེད་པ་ཉན་པའི་ རྣམ་པ་དང༌། མངོན་པར་འདུ་མི་བྱེད་པ་ཉན་པའི་རྣམ་པ་དང༌། དགེ་བའི་རྩ་བ་མངོན་པར་འདུ་བྱེད་པ་ཉན་པའི་རྣམ་པ་དང༌། རང་དབང་དུ་གྱུར་པའི་རྣམ་པ་དང༌། ཆོས་ཉན་པར་འདུ་ ཤེས་པའི་རྣམ་པ་དང༌། ཀུན་ཏུ་འདྲ་བ་མི་མཐུན་པའི་ཕྱོགས་སུ་འདུ་ཤེས་པའི་རྣམ་པ་དང༌། ཉོན་མོངས་པ་ཐམས་ཅད་ཚར་གཅོད་པའི་རྣམ་པ་དང༌། མཁས་པ་ལ་མངོན་པར་དགའ་བའི་ རྣམ་པ་དང༌། འཕགས་པ་བསྟེན་པའི་རྣམ་པ་དང༌། འཕགས་པ་མ་ཡིན་པ་ཡོངས་སུ་སྤོང་བའི་རྣམ་པ་དང༌། འཕགས་པ་ཉན་པའི་རྣམ་པ་དང༌། དབང་པོ་ཉན་པའི་རྣམ་པ་དང༌། རྗེས་སུ་ དྲན་པ་སྒོམ་པ་ཉན་པའི་རྣམ་པ་དང༌། བྱང་ཆུབ་ཀྱི་ཡན་ལག་ཉན་པའི་རྣམ་པ་དང༌། འཕགས་པའི་ལམ་ཡན་ལག་བརྒྱད་པ་ཉན་པའི་རྣམ་པ་དང༌། དེ་བཞིན་གཤེགས་པའི་སྟོབས་དང༌། ༄༅། །མི་འཇིགས་པ་དང༌། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཆེན་པོ་དང༌། སོ་སོ་ཡང་དག་པར་རིག་པ་དང༌། སངས་རྒྱས་ཀྱི་ཆོས་མ་འདྲེས་ པ་བཅོ་བརྒྱད་རྣམས་ཉན་པའི་རྣམ་པ་སྟེ། ཤཱ་རིའི་བུ། དེ་ལྟར་གང་ན་ཐོས་པ་དེ་ན་ཤེས་པའོ། །གང་ན་ཤེས་པ་དེ་ན་ནན་ཏན་ནོ། །དེ་ཅིའི་ཕྱིར་ཞེ་ན། གང་བྱང་ཆུབ་སེམས་དཔའི་སྡེ་ སྣོད་ཀྱི་ཆོས་ཀྱི་རྣམ་གྲངས་ལ་མོས་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ ལ་བསམ་པ་ཡོད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ལ་སྦྱོར་བ་ཡོད་པ་ དེ་ནི༑ ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་དགེ་བའི་བཤེས་གཉེན་ལ་བརྟེན་པར་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་ང་རྒྱལ་མེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་མང་དུ་ཐོས་པ་ལ་རབ་ཏུ་འདུད་ པ་དེ་ནི༑ ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་མང་དུ་ཐོས་པ་ལ་རི་མོར་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ ནས་ནན་ཏན་བྱེད་དོ། །གང་མཐུན་པར་འཛིན་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་བཀའ་བློ་བདེ་བ་དེ་ནི། ཐོས་པར་འགྱུར་རོ། །ཐོས་ནས་ རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་མང་དུ་ཐོས་པ་ལ་བསྙེན་བཀུར་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་རྣ་བླགས་ཏེ་ཉན་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་མང་དུ་ཐོས་པ་ལ་བཀུར་སྟི་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་ བྱེད་དོ༑ ༑གང་འཆད་པ་དང༌། གང་མང་དུ་ཐོས་པ་ཡིད་ལ་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་མང་དུ་ཐོས་པ་རིན་པོ་ཆེར་འདུ་ཤེས་ པ་དེ་ནི༑ ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་མང་དུ་ཐོས་པ་ལ་རྩིར་འདུ་ཤེས་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ ནས་ནན་ཏན་བྱེད་དོ། །གང་མང་དུ་ཐོས་པ་ཐོས་ནས་འདོད་ཆགས་དང༌། ཞེ་སྡང་དང༌། གཏི་མུག་རབ་ཏུ་ཞི་བར་རབ་ཏུ་འདུ་ཤེས་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ ནས་ནན་ཏན་བྱེད་དོ། །གང་མང་དུ་ཐོས་པ་ཐོས་ནས་འཛིན་པར་འདུ་ཤེས་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་ཆོས་རྣམས་རྟོགས་ ༄༅། །པར་ཁོང་དུ་ཆུད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་མང་དུ་ཐོས་པར་བློ་གྲོས་འདོད་པ་དེ་ནི། ཐོས་པར་འགྱུར་ རོ༑ ༑ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་མང་དུ་ཐོས་པ་ཐོས་ནས་བློ་རྣམ་པར་གཡོ་བ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ ཏན་བྱེད་དོ། །གང་ཐོས་པས་མི་ངོམས་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་སྦྱིན་པའི་གཏམ་ཐོས་ནས་སྦྱིན་པ་གཏོང་བར་བྱེད་པ་དེ་ ནི༑ ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་ཚུལ་ཁྲིམས་ཀྱི་གཏམ་ཐོས་ནས་ཚུལ་ཁྲིམས་སྲུང་བ་དེ་ནི། ཐོས་པར་འགྱུར་རོ། །ཐོས་ནས་རབ་ ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་བཟོད་པའི་གཏམ་ཐོས་ནས་བཟོད་པར་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། ། གང་བརྩོན་འགྲུས་ཀྱི་གཏམ་ཐོས་ནས་བརྩོན་འགྲུས་མ་ཉམས་པར་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་བསམ་གཏན་གྱི་ གཏམ་ཐོས་ནས་སེམས་མི་གཡེང་བར་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་ཤེས་རབ་ཀྱི་གཏམ་ཐོས་ནས་ཟག་པ་ཟད་པ་ ལ་སེམས་གཞོལ་བར་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་མང་དུ་ཐོས་པར་དགའ་བ་སྐྱེ་བ་དེ་ནི། ཐོས་པར་འགྱུར་རོ། །ཐོས་ ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་ཆོས་ཐོས་ནས་ལུས་སིམ་པར་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་ཆོས་ ཐོས་ནས་རངས་པར་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་ཐེག་པ་ཆེན་པོ་ཐོས་ནས་མོས་པར་འགྱུར་བ་དེ་ནི། ཐོས་པར་འགྱུར་རོ། ། ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་བསྡུ་བའི་དངོས་པོ་ཐོས་ནས་གང་བསྡུ་བར་སེམས་བསྐྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ ནན་ཏན་བྱེད་དོ། །གང་དྲན་པ་ཉེ་བར་གཞག་པའི་གཏམ་ཐོས་ནས་དད་པ་ལུས་ལ་ཞུགས་པ་དང༌། དྲན་པ་ཚོར་བ་ལ་ཞུགས་པ་དང༌། དྲན་པ་སེམས་ལ་ཞུགས་པ་དང༌། དྲན་པ་ཆོས་ལ་ ཞུགས་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་ཡང་དག་པར་སྤོང་བའི་གཏམ་ཐོས་ནས་མི་དགེ་བ་སྐྱེས་ཤིང་བྱུང་བ་དག་ལ་ཁྲེལ་ཞིང་ ངོ་ཚ་བར་འགྱུར་བ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་དགེ་བའི་ཆོས་སྐྱེས་ཤིང་བྱུང་བ་ལ་མི་གཏོང་བར་བློ་འཇུག་པ་དེ་ནི། ཐོས་པར་ ༄༅། །འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་རྫུ་འཕྲུལ་གྱི་རྐང་པའི་གཏམ་ཐོས་ནས་ལུས་ཡང་བ་དང༌། སེམས་ཡང་བ་དང༌། འདུན་པ་ཡང་ བ་སྐྱེ་བ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་བསམ་གཏན་གྱི་གཏམ་ཐོས་ནས་ངེས་པར་རྟོག་པ་ལ་སེམས་གཏོང་བ་དེ་ནི། ཐོས་ པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་ཚད་མེད་པའི་གཏམ་ཐོས་ནས་སེམས་ཅན་ཐམས་ཅད་ལ་བྱམས་པ་དང༌། ཕོངས་པར་གྱུར་པ་རྣམས་ ལ་སྙིང་རྗེ་ཆེ་བ་དང༌། ཆོས་ལ་དགའ་བ་དང༌། མི་དགའ་བ་ལ་བཏང་སྙོམས་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་དབང་པོའི་ གཏམ་ཐོས་ནས་དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་པོ་དང༌། ཏིང་ངེ་འཛིན་གྱི་དབང་པོ་དང༌། ཤེས་རབ་ཀྱི་དབང་པོ་ལ་སེམས་འཇུག་པར་ བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་བྱང་ཆུབ་ཀྱི་ཡན་ལག་གི་གཏམ་ཐོས་ནས་ཆོས་ཐམས་ཅད་ཁོང་དུ་ཆུད་པར་བྱ་ བའི་ཕྱིར་སེམས་འཇུག་པར་བྱེད་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་ལམ་གྱི་གཏམ་ཐོས་ནས་མྱ་ངན་ལས་འདའ་བར་ འགྲོ་བ་ལ་སེམས་འཇུག་པ་དེ་ནི། ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །གང་དེ་བཞིན་གཤེགས་པའི་སྟོབས་དང༌། མི་འཇིགས་པ་དང༌། བྱམས་ པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཆེན་པོ་དང༌། སོ་སོ་ཡང་དག་པར་རིག་པ་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཡང་དག་པར་བསླབ་པ། སངས་རྒྱས་ཀྱི་ ཆོས་ཚད་མེད་པ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་འཇུག་སྟེ། དེ་ཐོས་པར་འགྱུར་རོ། །ཐོས་ནས་རབ་ཏུ་ཤེས་སོ། །ཤེས་ནས་ནན་ཏན་བྱེད་དོ། །ཤཱ་རིའི་ བུ༑ འདི་ནི། ཐོས་པའི་རྣམ་པ་ལ་འཇུག་པ་རྣམ་པ་བཞི་བཅུ་རྩ་གཅིག་ཅེས་བྱ་སྟེ། ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཤཱ་རིའི་ བུ༑ གཞན་ཡང་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཤིན་ཏུ་མཉན། བླངས། བཟུང༌། བཀླགས། ཀུན་ ཆུབ་པར་བྱས། གཞན་ལ་བཤད་ཅིང་རྒྱ་ཆེར་ཡང་དག་པར་རབ་ཏུ་བསྟན་ནས་ནན་ཏན་སྙིང་པོར་བྱེད་པ་ཡིན་ནོ། །ཆོས་རྣམས་ལ་ནན་ཏན་བྱེད་པ་གང་ཞེ་ན། གང་ཇི་ལྟར་བསྟན་པ་བཞིན་ དུ་གནས་པ་སྟེ། དེ་ནི། ཆོས་ལ་ནན་ཏན་བྱེད་པའོ། །གཞན་ཡང་ཆོས་ལ་ནན་ཏན་བྱེད་པ་ནི། གང་ཆོས་ཐམས་ཅད་མི་ལེན་པའོ། །དེ་ཅིའི་ཕྱིར་ཞེ་ན། ཆོས་རྣམས་ལེན་ན་ཡང་ལོག་པའི་ ༄༅། །ནན་ཏན་དུ་འགྱུར་ཏེ། གང་ཟག་གང་ཆོས་ལེན་པར་གནས་པ་ནི། དེ་ཆོས་དེ་དག་ལས་འབྱུང་བར་འགྱུར་བའི་གནས་དང༌། སྐབས་མེད་དེ། དེ་ནི། གནས་ མེད་པའོ། །གང་ཟག་མི་ལེན་པར་སྤྱོད་པ་རྣམས་ཀྱང་བསལ་བའི་ཕྱིར་ཆོས་འདི་དག་ལ་ནན་ཏན་དུ་གཞག་པ་ཐེ་ཚོམ་དུ་འགྱུར་ན། ཆོས་ལེན་པར་སྤྱོད་པ་རྣམས་ལྟ་སྨོས་ཀྱང་ཅི་ དགོས་ཏེ། དེ་བས་ན། ཆོས་ཐམས་ཅད་མི་ལེན་པ་ནི། ནན་ཏན་ནོ། །གཞན་ཡང་གང་ཆོས་རྣམས་ལ་མི་སྒྲིབ་པ་དེ་ནི། ནན་ཏན་ཞེས་བྱའོ། །གང་ཆོས་རྣམས་ལ་རློམ་སེམས་མེད་ པ་དང༌། གང་ཆོས་རྣམས་མི་ལེན་པ་དང༌། མི་རློམ་པ་དང༌། མི་སྐྱེ་བ་དང༌། མི་འགོག་པ་དེ་ནི། ནན་ཏན་ཞེས་བྱའོ། །གཞན་ཡང་ཆོས་རྣམས་ལ་བསྟན་པ་མེད་པ་དང༌། བསལ་བ་མེད་ པ་དེ་ནི༑ ནན་ཏན་ཞེས་བྱའོ། །གཞན་ཡང་གང་དུ་ཅུང་ཟད་ཀྱང་མ་བཤད། ཇི་ལྟར་བཤད་པ་བཞིན་དུ་མི་སྣང་བ་དེ་ལྟ་བུ་ནི། ཆོས་ཐམས་ཅད་མི་སྣང་བ། མཚན་ཉིད་གཅིག་ པའོ༑ ༑མཚན་ཉིག་དང་ཞེ་ན། འདི་ལྟ་སྟེ། མཚན་ཉིད་མེད་པའོ། །མཚན་ཉིད་ཅེས་བྱ་བ་ནི། མཚན་ཉིད་མེད་པ་སྟེ། དེ་ནི། གཉི་ག་ལས་འགྱུར་རོ། །དེ་ཅིའི་ཕྱིར་ཞེ་ན། ཀུན་བརྟགས་ པའམ༑ ཡང་དག་པར་བརྟགས་པ་དེ་ཉིད་མཚན་ཉིད་མེད་པར་བཤད་པ་ཡིན་ནོ། །འདི་ནི། མཚན་ཉིད་དོ། །འདི་ནི། མཚན་ཉིད་མ་ཡིན་པའོ། །ཞེས་འདི་ལྟ་སྟེ། ཆོས་ཐམས་ཅད་ ལ་མཚན་ཉིད་མེད་པ། མི་སྣང་བ། བླང་བ་མེད་པར་རྟོགས་པ་དེ་ནི། ནན་ཏན་ཞེས་བྱའོ། །ནན་ཏན་ལ་བརྩོན་པར་གྱིས་ཤིག །ཆོས་ཐམས་ཅད་མི་སྒྲིབ་པར་སྣང་བ་ཐོབ་པར་གྱིས་ཤིག། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །གང་ཞིག་བྱང་ཆུབ་སེམས་དཔའི་སྡེ་སྣོད་ལ། །ཤིན་ཏུ་ངེས་པར་ནན་ཏན་གནས་བྱེད་པ། །མཁས་པ་དེ་ནི་ཆོས་ ལ་འཛིན་མི་བྱེད། །མི་འཛིན་པས་ན་ནན་ཏན་དེ་འདྲའོ། །མིས་ནི་ཆོས་རྙེད་སྟོང་པར་མི་བྱེད་དོ། །ཆོས་ལའང་དེ་ནི་སྟོང་པར་རློམ་སེམས་མེད། །སྟོན་པའི་ཆོས་ལ་རློམ་སེམས་གང་ཡང་མེད། ། རློམ་སེམས་མེད་ཕྱིར་ནན་ཏན་དེ་འདྲའོ། །ཆོས་ལ་ལེན་པ་མེད་ཅིང་འདོར་བ་མེད། །ཆོས་ནི་ཆོས་ལ་ལེན་པར་བྱེད་པ་མེད། །ལེན་པ་མེད་ཕྱིར་འདི་ནི་ཆོས་ཀྱི་མཚན། །དེ་འདྲ་བ་ནི་ནན་ཏན་ ཞེས་བྱའོ༑ ༑གང་ཕྱིར་ཆོས་ལ་ནམ་ཡང་དེ་མི་ཆགས། །དེ་ལ་དེ་ཡི་ཡེ་ཤེས་བླངས་མི་འགྱུར། །ཡེ་ཤེས་མ་བླངས་དེ་ལའང་རློམ་སེམས་མེད། །དེ་འདྲ་བ་ལའང་ནན་ཏན་ཞེས་བྱའོ། །མཁས་ པས་སྦྱངས་པའི་ཡོན་ཏན་གནས་པར་གྱིས། །ཆོས་འདི་དག་ལ་ཤིན་ཏུ་བརྩོན་པར་གྱིས། །ཆོ་ག་སྤྱོད་པ་དག་ལ་གནས་གྱུར་ན། །དེ་ཚེ་དེ་ཡི་སྒོ་ནི་དག་པར་འགྱུར། །སྒོ་དག་ན་ནི་ཆོས་འདི་ འདྲ་བ་ཤེས། །དེ་ན་སེམས་ལ་བསམ་པའང་ཤེས་པར་འགྱུར། །མཁས་པ་དེ་ཚེ་བསམ་པ་ཤེས་ནས་ནི། །འདི་འདྲ་བ་ཡི་ཆོས་ཀྱང་འཆད་པར་འགྱུར། །ཟབ་མོའི་ཆོས་ལ་དོན་དམ་མཁའ་ ༄༅། །གྱུར་ནས། །རྟག་ཏུ་དོན་ལ་རྣམ་པར་གདོན་མི་ཟ། །སྤྱོད་པ་མཐའ་ཡས་ཡོན་ཏན་རྣམས་ཀྱིས་འཕགས། །མཁས་པ་མང་དུ་ཐོས་པ་རྒྱ་མཚོ་འདྲ། །དེ་ཡི་དོན་དང་ ཚིག་འབྲུ་དག་ལ་ཡང༌། །མཐའ་མ་རྟོགས་པར་རུང་བ་མ་ཡིན་ཞིང༌། །དོན་ཀྱང་མཐའ་ཡས་ཚིག་འབྲུ་མཐའ་ཡས་ཏེ། །ནན་ཏན་སྙིང་པོར་བྱེད་པ་མི་འཁྲུགས་འགྱུར། །ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་བྱང་ཆུབ་ སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཤིན་ཏུ་ཉན་པ་ནས་གཞན་ལ་རྒྱ་ཆེར་བསྟན་པའི་བར་དུ་བྱས་ནས་མ་རིག་པའི་མུན་པ་མུན་ནག་མུན་པ་རབ་རིབ་སྟུག་པོ་བསལ་བའི་ ཕྱིར་ཆོས་ཐམས་ཅད་ལ་སྣང་བ་ཐོབ་སྟེ། ཤེས་རབ་ཀྱི་སྣང་བའོ། །དེ་སྣང་བ་དེ་ཐོབ་པས་དགེ་བ་དང༌། མི་དགེ་བའི་ཆོས་རྣམས་རབ་ཏུ་ཤེས་ཏེ། དེ་སྲོག་གི་ཕྱིར་ཡང་མི་དགེ་ བའི་ཆོས་ལ་མི་གནས་ཏེ། དེ་མི་དགེ་བའི་ཆོས་རྣམས་སྤང་བའི་ཕྱིར་ཇི་ལྟར་ཐོས་པའི་ཆོས་རྣམས་རྟོགས་པས་ན། དགེ་བ། ཐུབ་པ། ཞི་བ་ཞེས་བྱའོ། །དེ་ནས་བཅོམ་ལྡན་འདས་ ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཇི་ལྟར་མུན་པས་ཁྱབ་བསྒྲིབས་པ། །ཁྱིམ་དུ་ཞུགས་པར་གྱུར་ན་ནི། །ཡོད་པར་གྱུར་པའི་གཟུགས་རྣམས་ཀྱང༌། །མིག་གིས་ མཐོང་བར་མི་འགྱུར་རོ། །དེ་བཞིན་དུ་ནི་འདི་ལ་ཡང༌། །ལ་ལའི་མི་དག་སྐྱེས་གྱུར་ཀྱང༌། །དགེ་བ་དང་ནི་སྡིག་པའི་ཆོས། །མ་ཐོས་པར་ནི་ཤེས་མི་འགྱུར། །ཐོས་ནས་ཆོས་རྣམས་རྣམ་པར་ ཤེས༑ ༑ཐོས་ནས་སྡིག་པ་སྟེན་མི་བྱེད། །ཐོས་ནས་གནོད་པ་སྤོང་བར་བྱེད། །ཐོས་ནས་མྱ་ངན་འདས་པ་འཐོབ། །ཐོས་པར་འདོད་པས་ཐོས་པ་འཕེལ། །ཐོས་པས་ཤེས་རབ་འཕེལ་བར་ འགྱུར༑ ༑ཤེས་རབ་ཀྱིས་ནི་དོན་རྣམས་སྦྱོང༌། །དོན་ཐོབ་ནས་ནི་བདེ་ཐོབ་འགྱུར། །དོན་ཐོབ་དེ་ནི་ཡིད་རྣོ་སྟེ། །ཚེ་འདི་ལ་ནི་མྱ་ངན་འདས། །ཆོས་ལ་སྦྱོར་ཞིང་གཙང་ལ་མཁས། །ཤིན་ཏུ་བདེ་ བ་འཐོབ་པར་འགྱུར། །བྱང་ཆུབ་སེམས་དཔའི་སྡེ་སྣོད་ནི། །ཐོས་ནས་ཆོས་ཉིད་གནས་པར་འགྱུར། །འཇིག་རྟེན་ལ་ནི་སྣང་གྱུར་ནས། །བྱང་ཆུབ་ཀྱི་ནི་སྤྱད་པ་སྤྱོད། །ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་བྱང་ཆུབ་སེམས་དཔའི་སྡེ་སྣོད་ འཛིན་པའི་གང་ཟག་ལ་དགེ་བའི་བཤེས་གཉེན་དུ་འདུ་ཤེས་བསྐྱེད་ནས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཉིད་ལ་ཤིན་ཏུ་བྱང་བར་བྱེད། རྣམ་པར་དག་པར་བྱེད་དེ། བྱང་ཆུབ་སེམས་དཔའི་སྡེ་སྣོད་འདིའི་དོན་གྱི་ཕྱིར་འདུན་པ་བསྐྱེད། འབད་པར་བྱེད། བརྩོན་འགྲུས་བརྩོན་པར་བྱེད། སེམས་ལ་རབ་ཏུ་འཛིན་པར་བྱེད། ཡང་དག་པར་རབ་ཏུ་འཇོག་པར་ ༄༅། །བྱེད་དེ༑ དེ་ཡང་དག་པར་སྤོང་བ་བཞི་ལ་རབ་ཏུ་ཞུགས་པས་ཆོས་ཐམས་ཅད་ལ་སྒྲིབ་པ་མེད་པ་འཐོབ་བོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་ པ་འདི་དག་གསུངས་སོ། །ཆོས་སྨྲ་བ་ནི་གང་ཡིན་པ། །དེ་ལ་དགེ་བའི་བཤེས་སུ་སེམས། །རྟག་པར་ནན་ཏན་གནས་གྱུར་ནས། །ཆོས་ལ་ནན་ཏན་བྱས་ཏེ་ཉན། །རྟག་པར་འདུན་པ་འབྲི་ མི་བྱེད༑ ༑རྟག་པར་བརྩོན་འགྲུས་ཤིན་ཏུ་འཕགས། །རྣམ་རྟག་ཤེས་རབ་རྣམ་པར་སྦྱོང༌། །ཡེ་ཤེས་ལ་ནི་རྟག་ཏུ་གནས། །དེ་ནི་བདག་ཉིད་ཆོས་ཤེས་ཏེ། །དད་པའི་ཕྱིར་ནི་འགྲོ་མི་ བྱེད༑ ༑སངས་རྒྱས་ཀྱིས་ནི་གང་བཤད་པ། །མི་གཡོ་བ་ཡི་ཆོས་ཤེས་སོ། །མཁས་པ་དེ་དག་ཚིག་རྣམས་འབྱེད་ལ་མཁས། །བསླབ་པའི་དོན་ལ་ཁོང་དུ་ཆུད་པར་བྱེད། །དེ་དག་དཀར་ པོའི་ཕྱོགས་ནི་རྟག་པར་སྦྱོང༌། །ནག་པོའི་ཕྱོགས་ནི་རྟག་ཏུ་སྤོང་བར་བྱེད། །དེ་ཡི་སེམས་ལ་ནམ་ཡང་ཉམས་པ་མེད། །དེ་ནི་ཆོས་རྣམས་གང་ལའང་ཞུམ་པ་མེད། །ལུས་ཀྱང་དེ་བཞིན་ སེམས་དང་བརྩོན་འགྲུས་དང༌། །འདུན་པ་ཡང་བའང་མྱུར་དུ་འཐོབ་པར་འགྱུར། །ཆོས་ཐོས་ནས་ནི་ཤེས་རབ་འཕེལ་བར་འགྱུར། །ཡེ་ཤེས་རྣམ་པར་རྟོགས་ནས་དྲན་མི་ཉམས། །དྲན་ དང་ཡེ་ཤེས་ལ་ནི་རྟག་གནས་ནས། །དགེ་དང་མི་དགེའི་ཆོས་ནི་རབ་ཏུ་ཤེས། །བླ་ན་མེད་པའི་ཆོས་རྣམས་བསླབ་ནས་ནི། །རྟོགས་དང་དྲན་པ་ཤེས་རབ་སྟོབས་མཆོག་ཐོབ། །ཇི་ལྟར་ བདག་ཉིད་ཡུན་རིང་བསླབ་པ་བཞིན། །དེས་ནི་སེམས་ཅན་རྣམས་ཀྱི་བསམ་པ་ཤེས། །ཆོས་བསླབ་ནས་ནི་ཁྱད་པར་འཐོབ་འགྱུར་ཏེ། །ཁྱད་པར་འཐོབ་ཅིང་ཡེ་ཤེས་དག་གྱུར་ནས། །དེ་ནི་སེམས་ ཅན་རྣམས་ཀྱི་བསམ་པ་ཤེས། །དེ་ཕྱིར་བསམ་པ་བཞིན་དུ་ཆོས་སྟོན་ཏོ། །ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཤཱ་རིའི་བུ། གཞན་ ཡང་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་ལྟར་བློ་སྦྱངས་པ་དང༌། དེ་ལྟར་ཆོས་སྣང་བའི་སྒོ་ཤིན་ཏུ་ཡོངས་སུ་དག་པས་འདི་ལྟར་སློབ་སྟེ། འཕགས་པའི་ཡང་ དག་པར་ལྟ་བ་འབྱུང་བ་ནི། རྒྱུ་གཉིས་དང༌། རྐྱེན་གཉིས་ཏེ། གཉིས་གང་ཞེ་ན། གཞན་གྱི་སྒྲ་དང༌། བདག་ཉིད་ཚུལ་བཞིན་ཡིད་ལ་བྱེད་པའོ། །དེ་འདི་སྙམ་དུ་སེམས་ཏེ། །གཞན་གྱི་སྒྲ་དེ་ གང༌། བདག་ཉིད་ཚུལ་བཞིན་དུ་ཡིད་ལ་བྱེད་པ་དེ་གང་ཞེ་ན། དེ་དེ་ལྟར་ཚུལ་བཞིན་ཡིད་ལ་བྱེད་པ་ན་འདི་སྙམ་དུ་སེམས་པར་འགྱུར་ཏེ། རྣལ་འབྱོར་སྤྱོད་པ་གང་དག་བྱང་ཆུབ་སེམས་དཔའི་ སྡེ་སྣོད་ཀྱི་ཆོས་ཀྱི་རྣམ་གྲངས་འདི་མ་ཐོས། འཕགས་པའི་ཆོས་འདུལ་བ་མ་ཐོས་པར་ཏིང་ངེ་འཛིན་ཙམ་གྱིས་དགའ་བ་རྙེད་ནས་ང་རྒྱལ་གྱི་དབང་གིས་ཆེ་བའི་ང་རྒྱལ་དུ་ལྷུང་བ་དེ་དག་ནི། སྐྱེ་བ་ དང༌། །རྒ་བ་དང༌། ན་བ་དང༌། འཆི་བ་དང༌། མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་ལས་ཡོངས་སུ་མི་ཐར། སྡུག་བསྔལ་གྱི་ཕུང་པོ་ ༄༅། །ལས་ཡོངས་སུ་མི་ཐར་ཏེ། དེ་དག་ལ་དེ་བཞིན་གཤེགས་པས་དགོངས་ནས་འདི་སྐད་གསུངས་སོ། །ཕ་རོལ་ལ་རྗེས་སུ་མཐུན་པ་ཐོས་པ་ནི། རྒ་བ་དང༌། འཆི་བ་ལས་ རྣམ་པར་གྲོལ་བའོ། །ཡང་བཅོམ་ལྡན་འདས་ཀྱིས་གསུངས་པ། ཆོས་རྣམས་ཐོས་ནས་རྣམ་པར་ཤེས། །ཐོས་ནས་སྡིག་པ་མི་བྱེད་དེ། །ཐོས་ནས་གནོད་པ་སྤོང་བར་འགྱུར། །ཐོས་ནས་ མྱ་ངན་འདས་པ་འཐོབ། །ཐོས་འདོད་ཐོས་པ་འཕེལ་བར་འགྱུར། །ཐོས་པས་ཤེས་རབ་འཕེལ་བར་འགྱུར། །ཤེས་རབ་ཀྱིས་ནི་དོན་རྣམས་སྦྱོང༌། །དོན་རྙེད་ནས་ནི་བདེ་ཐོབ་འགྱུར། །དོན་ རྙེད་དེ་ནི་ཡིད་རྣོ་སྟེ། །ཚེ་འདི་ལ་ནི་མྱ་ངན་འདས། །ཆོས་གཙང་མཁས་པ་གཙང་བ་དང༌། །མཆོག་ཏུ་བདེ་བ་འཐོབ་པར་འགྱུར། །ཤཱ་རིའི་བུ། དེ་ལྟར་བྱང་ཆུབ་སེམས་དཔས་བྱང་ཆུབ་ སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འཕགས་པའི་ཆོས་འདུལ་བ་ཤིན་ཏུ་མཉན་པར་བྱ། བླང་བར་བྱ། །གཟུང་བར་བྱ། བཀླག་པར་བྱ། ཀུན་ཆུབ་པར་བྱ། །གཞན་ལ་ཡང་ རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །ཤཱ་རིའི་བུ། གང་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་མི་ཉན་པ་དང༌། ཚུལ་བཞིན་དུ་སྦྱོར་བར་མི་བྱེད་པ་དེ་ དག་ནི། འཕགས་པའི་ལམ་ལས་ཡོངས་སུ་ཉམས་པར་འགྱུར་ཏེ། དེ་ལ་དགོངས་ནས་དེ་བཞིན་གཤེགས་པ་འདི་སྐད་དུ་བདག་ཉིད་ཚུལ་བཞིན་ཡིད་ལ་བྱེད་པ་ནི། རྒ་བ་དང༌། ན་བ་དང༌། འཆི་བ་ལས་གྲོལ་བའོ། །ཞེས་གསུངས་སོ། །དེ་འདི་ལྟར་སློབ་སྟེ། བྱང་ཆུབ་སེམས་དཔའི་ཚུལ་བཞིན་སྦྱོར་བ་ནི། གང༌། ཇི་ལྟར་ན་བྱང་ཆུབ་སེམས་དཔའི་ཚུལ་བཞིན་ སྦྱོར་བ་ཡིན་སྙམ་ནས་དེ་འདི་ལྟར་སློབ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཆོས་གང་ལའང་སྦྱོར་བར་མི་བྱེད། རབ་ཏུ་སྦྱོར་བར་མི་བྱེད་དོ། །ཚུལ་བཞིན་དུ་སྦྱོར་བ་ ཞེས་བྱ་བ་དེ་ནི། མི་སྦྱོར་བའི་ཚིག་བླ་དྭགས་སོ། །གཞན་ཡང་བྱང་ཆུབ་སེམས་དཔའ་ཚུལ་བཞིན་དུ་སྦྱོར་བ་ནི། སྒྲ་འབྱིན་པར་མི་བྱེད། ཟློས་པ་འབྱིན་པར་མི་བྱེད། གང་ནས་སྒྲ་འབྱུང་ བ་དེ་ཡང་མི་དམིགས། སྒྲ་དེ་ཉིད་གང་ནས་འབྱུང༌། གང་དུ་འགག་ཅེས་སྔོན་གྱི་མཐའ་དང༌། ཕྱི་མའི་མཐའ་ལ་རྟོག་པར་བྱེད་དེ། གང་སྨྲས་པ་དང༌། གང་སྨྲ་བ་དང༌། གང་སྨྲ་བར་འགྱུར་ བ་དང༌། གང་གིས་སྨྲས་པ་དང༌། གང་གིས་སྨྲ་བ་དང༌། གང་གིས་སྨྲ་བར་འགྱུར་བ་དང༌། གང་སྤོང་བའི་ཕྱིར་སྨྲས་པ་དང༌། གང་སྤོང་བའི་ཕྱིར་སྨྲ་བ་དང༌། གང་སྤོང་བའི་ཕྱིར་སྨྲ་བར་ འགྱུར་བ་དང༌། གང་ཁོང་དུ་ཆུད་པར་བྱ་བའི་ཕྱིར་སྨྲས་པ་དང༌། གང་ཁོང་དུ་ཆུད་པར་བྱ་བའི་ཕྱིར་སྨྲ་བ་དང༌། གང་ཁོང་དུ་ཆུད་པར་བྱ་བའི་ཕྱིར་སྨྲ་བར་འགྱུར་བ་དེ་ཐམས་ཅད་ཡོངས་ སུ་བཙལ་ན། འདས་པའི་རྣམ་པ་དང༌། མ་འོངས་པའི་རྣམ་པ་དང༌། ད་ལྟར་བྱུང་བའི་རྣམ་པར་མི་དམིགས་པ་དེ་ནི། དེའི་ཚུལ་བཞིན་དུ་སྦྱོར་བའོ། །ཞེས་དེ་དེ་ལྟར་སློབ་བོ། །བྱང་ཆུབ་ ༄༅། །སེམས་དཔའ་དེ་ལྟར་ཚུལ་བཞིན་དུ་སྦྱོར་བས་ཇི་ལྟར་ཚུལ་བཞིན་དུ་མཐོང་ཞེ་ན། དེ་འདི་ལྟར་སློབ་སྟེ། གང་གི་ཚེ་ན་བྱང་ཆུབ་སེམས་དཔའ་ཆོས་ཐམས་ཅད་རང་ བཞིན་གྱིས་འགག་པར་མཐོང་བ་དེའི་ཚེ་ཚུལ་བཞིན་མཐོང་ངོ༌། །གང་གི་ཚེ་ཆོས་ཐམས་ཅད་རང་བཞིན་གྱིས་ཉེ་བར་ཞི་བར་མཐོང་བ་དེའི་ཚེ་ཚུལ་བཞིན་མཐོང་ངོ༌། །གང་གི་ཚེ་ཆོས་ ཐམས་ཅད་རྣམ་པར་ཞི་བར་མཐོང་བ་དེའི་ཚེ་ཚུལ་བཞིན་མཐོང་ངོ༌། །གང་གི་ཚེ་ཆོས་ཐམས་ཅད་རང་བཞིན་གྱིས་སྙོམས་པར་མ་ཞུགས་པར་མཐོང་བ་དེའི་ཚེ་ཚུལ་བཞིན་མཐོང་ ངོ༌། །གང་གི་ཚེ་ཆོས་ཐམས་ཅད་མ་སྐྱེས་པར་མཐོང་བ་དེའི་ཚེ་ཚུལ་བཞིན་མཐོང་ངོ༌། །གང་གི་ཚེ་ཆོས་ཐམས་ཅད་མ་བྱུང་བར་མཐོང་བ་དེའི་ཚེ་ཚུལ་བཞིན་མཐོང་ངོ༌། །གང་གི་ཚེ་ ཆོས་ཐམས་ཅད་ཤིན་ཏུ་ཡང་དག་པར་མ་བྱུང་བར་མཐོང་བ་དེའི་ཚེ་ཚུལ་བཞིན་མཐོང་ངོ༌། །གང་གི་ཚེ་ཆོས་ཐམས་ཅད་མྱ་ངན་ལས་འདས་པར་མཐོང་བ་དེའི་ཚེ་ཚུལ་བཞིན་མཐོང་ ངོ༌། །དེ་གང་གིས་མཐོང་བ་དེ་ལ་ཡང་རྟོག་སྟེ། ཅི་ནས་ཀྱང་མི་མཐོང་བ་དང༌། མི་རྟོག་པ་དེ་ལྟར་མཐོང་སྟེ། དེ་ལྟར་མཐོང་ན། ཚུལ་བཞིན་མཐོང་བ་ཞེས་བྱའོ། །ཡང་འདི་ལྟར་སློབ་ སྟེ། བྱང་ཆུབ་སེམས་དཔའ་ཚུལ་བཞིན་དུ་སྦྱོར་བ་ནི། ཆོས་གང་ལ་ཡང་ཐེ་ཚོམ་དང༌། རྨོངས་པ་མེད་དོ། །ཚུལ་བཞིན་དུ་སྦྱོར་བ་ནི། ཆོས་གང་ལ་ཡང་སྒྲིབ་པ་མེད་དོ། །ཚུལ་བཞིན་ དུ་སྦྱོར་བ་ནི། ཆོས་གང་ལ་ཡང་གང་ཐར་པའི་སྒོར་མི་འགྱུར་བ་མེད་དོ། །ཚུལ་བཞིན་དུ་སྦྱོར་བ་ནི། ཆོས་གང་ཡང་སྤང་བར་བྱ་བའི་ཕྱིར་འབད་པ་མེད་དོ། །གང་ཚུལ་བཞིན་དུ་སྦྱོར་བ་ནི། ཆོས་གང་ལ་ཡང་རྟོགས་པར་བྱ་བའི་ཕྱིར་འབད་པ་མེད་དེ། ཆོས་གང་ཆོས་ཐམས་ཅད་ཡང་དག་པར་མཐོང་བ་དང༌། ཇི་ལྟ་བ་བཞིན་དུ་མཐོང་བ་དེ་ནི། ཡང་དག་པར་ལྟ་བའོ། །ཆོས་ ཐམས་ཅད་ཇི་ལྟ་བ་བཞིན་དུ་མཐོང་བ་གང་ཞེ་ན། འདི་ལྟ་སྟེ། མ་མཐོང་བའོ། །མ་མཐོང་བ་ཞེས་བྱ་བ་དེ་ནི། མ་སྐྱེས་པའི་ཚིག་བླ་དྭགས་སོ། །མ་སྐྱེས་པ་ཞེས་བྱ་བ་དེ་ནི། ཡང་དག་པར་ མ་བྱུང་བའི་ཚིག་བླ་དྭགས་སོ། །ཡང་དག་པར་མ་བྱུང་བ་ཞེས་བྱ་བ་གང་ཞེ་ན། དེ་ནི། མི་སྣང་བའི་ཚིག་བླ་དྭགས་ཏེ། དེ་བཞིན་གཤེགས་པ་དེ་ལ་དགོངས་ནས་འདུ་བྱེད་ཐམས་ཅད་མི་ སྐྱེ་བར་མཐོང་ན། ཡང་དག་པ་ཉིད་དུ་ངེས་པ་ལ་འཇུག་སྟེ། འདི་ལྟ་སྟེ། ཡང་དག་པ་ཉིད་དུ་ངེས་པ་ལ་འཇུག་པ་དེ་ནི། ཡང་དག་པར་ལྟ་བའོ། །ཞེས་དེ་སྐད་གསུང་ངོ༌། །དེ་འདི་སྙམ་དུ་ སེམས་ཏེ། ཅིའི་ཕྱིར་ན་ཡང་དག་པ་ཉིད་དུ་ངེས་པ་ལ་འཇུག་པ་ཞེས་བྱ་ཞེས་དེ་འདི་ལྟར་སློབ་སྟེ། ཆོས་ཐམས་ཅད་གང་དང་མཉམ་པ་སངས་རྒྱས་ཀྱི་ཆོས་དེ་དང་མཉམ་སྟེ། དེ་བས་ན་ ཡང་དག་པ་ཉིད་དུ་ངེས་པ་ལ་འཇུག་པའོ། །དེ་ལྟ་བས་ན། ཡང་དག་པ་ཉིད་དུ་ངེས་པ་ལ་འཇུག་པར་འདོད་པ་རྣམས་ཀྱིས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཉིད་ ༄༅། །ཤིན་ཏུ་མཉན་པར་བྱ། བླང་བར་བྱ། གཟུང་བར་བྱ། བཀླག་པར་བྱ། ཀུན་ཆུབ་པར་བྱའོ། །བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཉིད་ ལའང་ཚུལ་བཞིན་དུ་སྦྱར་བར་བྱ་སྟེ། ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་ ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་ལྟར་བློ་ཤིན་ཏུ་ཡོངས་སུ་སྦྱངས་པ་དང༌། དེ་ལྟར་ཆོས་སྣང་བའི་སྒོ་ཤིན་ཏུ་ཡོངས་སུ་དག་པས་ཚུལ་བཞིན་དུ་འཇུག་པ་ལ་བརྩོན་ན། ཚུལ་ བཞིན་གྱི་ཚིག་མཐོང་ངོ༌། །དེ་ལ་ཚུལ་བཞིན་དུ་འཇུག་པ་གང༌། ཚུལ་བཞིན་གྱི་ཚིག་གང་ཞེ་ན། དེ་ལྟར་བྱང་ཆུབ་སེམས་དཔའི་ཚུལ་བཞིན་དུ་འཇུག་པ་ནི། འདི་ལྟ་སྟེ། ཞི་གནས་ ཀྱི་གནས་ལ་འཇུག་པ་དང༌། ལྷག་མཐོང་རྣམ་པར་རྟོག་པ་ལ་འཇུག་པ་ནི། ཚུལ་བཞིན་དུ་འཇུག་པའོ། །ལུས་དབེན་པར་འཇུག་པ་དང༌། སེམས་ཡིད་དུ་འོང་བར་འཇུག་པ་དང༌། ཆད་པ་མ་ཡིན་པར་འཇུག་པ་དང༌། རྟག་པ་མ་ཡིན་པར་འཇུག་པ་དང༌། རྒྱུ་དང་རྐྱེན་ལ་འཇུག་པ་དང༌། རྟེན་ཅིང་འབྲེལ་པར་འབྱུང་བ་ལ་འཇུག་པ་དང༌། སེམས་ཅན་མེད་པ་དང༌། སྲོག་ མེད་པ་དང༌། གང་ཟག་མེད་པ་ལ་འཇུག་པ་དང༌། མ་འོངས་མ་ཕྱིན་མི་གནས་པ་ལ་འཇུག་པ་དང༌། མི་འཕོ་བ་དང༌། རྒྱུ་དང་འབྲས་བུ་ཆུད་མི་ཟ་བ་དང༌། རྒྱུ་སྟོང་པ་ཉིད་དུ་རྣམ་པར་ འབྱེད་པ་ལ་འཇུག་པ་དང༌། མཚན་མ་མེད་པ་འདྲིས་པར་བྱ་བ་ལ་འཇུག་པ་དང༌། སྨོན་པ་མེད་པ་རབ་ཏུ་ཤེས་པ་ལ་འཇུག་ཀྱང་སྟོང་པ་ཉིད་དང༌། སྨོན་པ་མེད་པ་ལེན་པར་འཇུག་པ་མ་ཡིན་པ་ དང༌། ཏིང་ངེ་འཛིན་དང༌། སྙོམས་པར་འཇུག་པ་ལེན་པ་ལ་འཇུག་ཀྱང་ཏིང་ངེ་འཛིན་གྱི་དབང་གིས་སྐྱེ་བ་ལ་མི་འཇུག་པ་དང༌། མངོན་པར་ཤེས་པའི་ཡེ་ཤེས་ལེན་པ་ལ་འཇུག་ཀྱང་ཟག་པ་ ཟད་པ་ལ་མི་འཇུག་པ་དང༌། མི་སྐྱེ་བར་རྟོག་པ་ལ་འཇུག་ཀྱང་ངེས་པར་གྱུར་པར་འགྲོ་བ་ལ་མི་འཇུག་པ་དང༌། སེམས་ཅན་ཐམས་ཅད་བདག་མེད་པར་རྟོག་པར་འཇུག་ཀྱང་སྙིང་རྗེ་ཆེན་པོ་ གཏོང་བ་ལ་མི་འཇུག་པ་དང༌། སྐྱེ་བ་ཐམས་ཅད་འཇིགས་པར་མཐོང་བ་ལ་འཇུག་ཀྱང་སྲིད་པ་བསམ་གྱིས་མི་ཁྱབ་པ་ལེན་པ་ལ་འཇུག་པ་དང༌། མྱ་ངན་ལས་འདའ་བར་འདོད་པ་ལ་ འཇུག་ཀྱང་ཆོས་མངོན་དུ་བྱ་བ་ལ་མི་འཇུག་པ་དང༌། འདོད་པའི་ཡོན་ཏན་གྱི་དགའ་བ་དང༌། བཏང་སྙོམས་པ་ལ་འཇུག་ཀྱང་ཆོས་ཀྱི་དགའ་བ་འདོར་བ་ལ་མི་འཇུག་པ་དང༌། རྟོག་པ་སྤྲོས་ པ་ཐམས་ཅད་གཏོང་བ་ལ་འཇུག་ཀྱང་ཐབས་མཁས་པ་གཏོང་བ་ལ་མི་འཇུག་པ་སྟེ། ཤཱ་རིའི་བུ། དེ་ནི། ཚུལ་བཞིན་དུ་འཇུག་པ་ཞེས་བྱའོ། །ཤཱ་རིའི་བུ། ཚུལ་བཞིན་གྱི་ཚིག་ཅེས་བྱ་ པ་གང་ཞེ་ན། རིགས་པའི་ཚིག་དེ་ནི། ཚུལ་བཞིན་གྱི་ཚིག་གོ །ཤཱ་རིའི་བུ། གཞན་ཡང་ཚུལ་བཞིན་གྱི་ཚིག་དེ་ནི། ཚུལ་གྱི་ཚིག་གོ །དེ་ནི། སྒོའི་ཚིག་གོ །དེ་ནི། ཁའི་ཚིག་གོ །དེ་ནི། ༄༅། །རྒྱུའི་ཚིག་གོ །དེ་ནི། རབ་ཏུ་རྣམ་པར་འབྱེད་པའི་ཚིག་གོ །དེ་ནི། མི་འགལ་བའི་ཚིག་གོ །དེ་ནི། མི་རྩོད་པའི་ཚིག་གོ །དེ་ནི། བཏང་སྙོམས་ཀྱི་ཚིག་གོ །མི་ལེན་པའི་ ཚིག་དང༌། མི་འདོར་བའི་ཚིག་དང༌། མ་སྤྲོས་པའི་ཚིག་དང༌། མི་བསྣན་པའི་ཚིག་དང༌། མ་བྲི་བའི་ཚིག་དང༌། མི་སྐྱེ་བའི་ཚིག་དང༌། རྩོད་པའི་གཞི་མེད་པའི་ཚིག་དང༌། མི་ལྡོག་པའི་ ཚིག་དང༌། གཉེན་པོ་མེད་པའི་ཚིག་དང༌། དེ་ཁོ་ནའི་ཚིག་དང༌། དེ་བཞིན་ཁོ་ནའི་ཚིག་དང༌། མ་ལོག་པ་དེ་བཞིན་ཉིད་ཀྱི་ཚིག་དང༌། གཞན་མ་ཡིན་པ་དེ་བཞིན་ཉིད་ཀྱི་ཆིག་དང༌། དེ་ བཞིན་ཉིད་ཀྱི་ཚིག་དང༌། ཇི་ལྟ་བ་བཞིན་གྱི་ཚིག་དང༌། དུས་གསུམ་མཉམ་པ་ཉིད་ཀྱི་ཚིག་དང༌། ཡོངས་སུ་ཆད་པའི་ཚིག་དང༌། གཟུགས་རྣམ་པར་ཤེས་པའི་གནས་མེད་པའི་ཚིག་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་གནས་མེད་པའི་ཚིག་གོ། དེ་ནི། མིག་དང༌། གཟུགས་དང༌། མིག་གི་རྣམ་པར་ཤེས་པའི་ཁམས་གནས་མེད་པའི་ ཚིག་གོ །དེ་ནི། རྣ་བ་དང༌། སྒྲ་དང༌། རྣ་བའི་རྣམ་པར་ཤེས་པའི་ཁམས་གནས་མེད་པའི་ཚིག་གོ །དེ་ནི། སྣ་དང༌། དྲི་དང༌། སྣའི་རྣམ་པར་ཤེས་པའི་ཁམས་གནས་མེད་པའི་ཚིག་གོ། དེ་ནི། ལྕེ་དང༌། རོ་དང༌། ལྕེའི་རྣམ་པར་ཤེས་པའི་ཁམས་གནས་མེད་པའི་ཚིག་གོ །དེ་ནི། ལུས་དང༌། རེག་དང༌། ལུས་ཀྱི་རྣམ་པར་ཤེས་པའི་ཁམས་གནས་མེད་པའི་ཚིག་གོ །དེ་ནི། ཡིད་དང༌། ཆོས་དང༌། ཡིད་ཀྱི་རྣམ་པར་ཤེས་པའི་ཁམས་གནས་མེད་པའི་ཚིག་གོ །དེ་ནི། དོན་ལ་རྟོན་པའི་ཚིག་གོ །དེ་ནི། ཆོས་ལ་རྟོན་པའི་ཚིག་གོ །དེ་ནི། ཡེ་ཤེས་ལ་རྟོན་པའི་ཚིག་གོ། དེ་ནི། ངེས་པའི་དོན་གྱི་མདོ་སྡེ་ལ་རྟོན་པའི་ཚིག་སྟེ། ཤཱ་རིའི་བུ། དེ་ནི། ཚུལ་བཞིན་གྱི་ཚིག་གོ །དེ་ལྟར་བྱང་ཆུབ་སེམས་དཔའ་ཚུལ་བཞིན་དུ་འཇུག་པ་ལ་བརྩོན་པ་ཚུལ་བཞིན་གྱི་ཚིག་ མཐོང་བ་དེ་ནི། གང་གིས་མཐོང་བ་དེ་ཉིད་མི་མཐོང་སྟེ། ཇི་ལྟར་མི་མཐོང་རྣམ་པར་མི་མཐོང་བ་དེ་ལྟར་མཐོང་ངོ༌། །དེ་ལྟར་མཐོང་ན། ཚུལ་བཞིན་མཐོང་བ་ཞེས་བྱའོ། །ཤཱ་རིའི་བུ། ཡང་བྱང་ ཆུབ་སེམས་དཔའ་ཚུལ་བཞིན་དུ་སྦྱོར་བ་ནི། ཆོས་གང་ལ་ཡང་རྨོངས་པར་མི་འགྱུར་རོ། །བྱང་ཆུབ་སེམས་དཔའ་ཚུལ་བཞིན་དུ་སྦྱོར་བ་ནི། ཆོས་གང་ཡང་གང་ཐར་པའི་སྒོར་མི་འགྱུར་བ་ མེད་དོ། །ཚུལ་བཞིན་དུ་སྦྱོར་བ་ནི། ཆོས་གང་ཡང་སྤང་བའི་ཕྱིར་འབད་པ་མེད་དོ། །ཚུལ་བཞིན་དུ་སྦྱོར་བ་ནི། ཆོས་གང་ཡང་རྟོགས་པར་བྱ་བའི་ཕྱིར་འབད་པ་མེད་དོ། །གང་ཆོས་ཐམས་ཅད་ ཡང་དག་པར་མཐོང་བ་དང༌། ཇི་ལྟ་བ་བཞིན་མཐོང་བ་དེ་ནི། ཡང་དག་པར་ལྟ་བའོ། །ཆོས་ཐམས་ཅད་ཇི་ལྟ་བ་བཞིན་དུ་མཐོང་བ་གང་ཞེ་ན། འདི་ལྟ་སྟེ། མི་མཐོང་བའོ། །མི་མཐོང་བ་གང་ཞེ་ ན། དེ་ནི། མི་སྐྱེས་པའི་ཚིག་བླ་དྭགས་སོ། །མ་སྐྱེས་པ་ཞེས་བྱ་བ་གང་ཞེ་ན། དེ་ནི། མི་སྣང་བའི་བར་གྱི་ཚིག་བླ་དྭགས་ཏེ། རྒྱ་ཆེར་སྔར་ཇི་ལྟར་བཟླས་པ་དེ་ལྟར་དེ་བཞིན་དུ་བཟླས་པར་ ༄༅། །བྱ་སྟེ། དེ་ལྟར་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ ལ་སྤྱོད་པ་འདི་ལྟར་སློབ་སྟེ། ཆོས་ཐམས་ཅད་ནི། བདག་བཞིན་དུ་ཚུལ་བཞིན་ཏེ། ཇི་ལྟར་བདག་ལ་བདག་མེད་པ་དེ་བཞིན་དུ་ཆོས་ཐམས་ཅད་བདག་མེད་པར་མཐོང་ངོ༌། །ཇི་ལྟར་ སེམས་ཅན་བདག་མེད་པ་དེ་བཞིན་དུ་ཆོས་ཐམས་ཅད་ནི། བདག་མེད་པར་མཐོང་སྟེ། དེ་ལྟར་མཐོང་ན། ཚུལ་བཞིན་དུ་མཐོང་ངོ༌། །གང་ཚུལ་བཞིན་འཁོར་བའི་ཁམས་མཐོང་བ་ དེ་ཚུལ་བཞིན་མྱ་ངན་ལས་འདས་པའི་ཁམས་དང་ལྡན་པར་མཐོང་སྟེ། དེ་ནི། ཚུལ་བཞིན་དུ་སྦྱོར་བ་ཞེས་བྱའོ། །དེ་ནི། ཆོས་ཐམས་ཅད་ཀྱི་རང་བཞིན་ལ་ཉོན་མོངས་པའི་རང་ བཞིན་དུ་བྱེ་བྲག་མེད་པ་དང་ལྡན་པར་མཐོང་ངོ༌། །རྣལ་འབྱོར་དང་རྣལ་འབྱོར་མ་ཡིན་པར་ཡང་མི་སྙེམས་སོ། །ཚུལ་བཞིན་སྦྱོར་བས་ཚུལ་བཞིན་མཐོང་སྟེ། ཚུལ་བཞིན་གྱི་སྦྱོར་ བ་ཇི་སྙེད་པ་སེམས་ཅན་གྱི་གནས་ཐམས་ཅད་ཀྱང་དེ་སྙེད་དེ། སེམས་ཅན་གྱི་གནས་ཀྱང་མི་མཐོང༌། །ཆོས་ཀྱི་གནས་ཀྱང་འཁྲུག་པར་མི་བྱེད་པ་དེ་ནི། བྱང་ཆུབ་སེམས་དཔའི་ཚུལ་ བཞིན་སྦྱོར་བ་སྟེ། ཤཱ་རིའི་བུ། དེ་ལྟར་ན། རྣམ་པ་འདི་དང༌། ཐོས་པ་འདི་དང༌། ཚུལ་བཞིན་དུ་འཇུག་པ་འདི་དང༌། ཚུལ་བཞིན་མཐོང་བ་འདི་དང༌། ཇི་ལྟ་བ་བཞིན་དུ་མཐོང་བའི་རྒྱུ་ མཐུན་པ་འདི་དང༌། འདི་དག་ནི། ཤེས་རབ་ཅེས་བྱ་སྟེ། ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཤཱ་རིའི་བུ། གཞན་ཡང་བྱང་ཆུབ་ སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་འདུས་བྱས་ལ་སྤྱོད་པའི་ཆོས་ཐམས་ཅད་ལ་ཤེས་རབ་ཀྱིས་མི་གནས་པ་ཡིན་ཏེ། འདི་ལྟ་སྟེ། མ་རིག་པ་དང་ལྷན་ཅིག་ཏུ་མི་གནས། འདུ་བྱེད་རྣམས་དང་ལྷན་ཅིག་ཏུ་མི་གནས་པ་ནས་རྒྱས་པར་བྱ་སྟེ། རྒ་ཤིའི་བར་དང་ལྷན་ཅིག་ཏུ་མི་གནས། བདག་ཏུ་ལྟ་བ་དང་ལྷན་ཅིག་ཏུ་མི་གནས་པ་ནས་བདག་ཏུ་ལྟ་བའི་རྩ་བ་ ལས་བྱུང་བའི་ལྟ་བར་གྱུར་བ་དྲུག་ཅུ་རྩ་གཉིས་དང་ལྷན་ཅིག་ཏུ་མི་གནས། མཐོ་བར་སེམས་པ་དང་ལྷན་ཅིག་ཏུ་མི་གནས། དམའ་བར་སེམས་པ་དང་ལྷན་ཅིག་ཏུ་མི་གནས། འཇིག་ རྟེན་གྱི་ཆོས་བརྒྱད་རྣམས་དང་ལྷན་ཅིག་ཏུ་མི་གནས། ང་རྒྱལ་དང༌། ཆེ་བའི་ང་རྒྱལ་དང༌། ལོག་པའི་ང་རྒྱལ་ནས་ཉེ་བའི་ཉོན་མོངས་པ་ཉི་ཤུའི་བར་དང་ལྷན་ཅིག་ཏུ་མི་གནས། ཆེན་ པོ་དང༌། འབྲིང་པོ་དང༌། ཕྲ་མོ་ནས་ཉོན་མོངས་པ་ཐམས་ཅད་ཀྱི་བར་དང་ལྷན་ཅིག་ཏུ་མི་གནས། གཏི་མུག་གི་མུན་པ་རབ་རིབ་ཀྱི་ལིང་ཏོག་གིས་བསྒྲིབས་པ་དང༌། ཆོད་པར་བྱེད་པ་ཀུན་ ཏུ་དཀྲིས་ཏེ་འདུག་པ་ནས་དམའ་བའི་ཆོས་ཐམས་ཅད་ཀྱི་བར་དང་ལྷན་ཅིག་ཏུ་མི་གནས། རྩོད་པའི་རྙོག་པ་དང༌། ཉོན་མོངས་པ་དང༌། ཕུང་པོ་དང༌། ལྷའི་བུ་དང༌། འཆི་བདག་གི་བདུད་ ༄༅། །ནས་བདུད་ཐམས་ཅད་ཀྱི་ལས་ཀྱི་བར་དང་ལྷན་ཅིག་ཏུ་མི་གནས། བདག་དང༌། སེམས་ཅན་དང༌། སྲོག་དང༌། གསོ་བ་དང༌། གང་ཟག་དང༌། ཤེད་བུ་དང༌། ཤེད་ ལས་སྐྱེས་པ་ནས་བདག་ཏུ་ལྟ་བ་ཐམས་ཅད་ཀྱི་བར་དང་ལྷན་ཅིག་ཏུ་མི་གནས། ལས་ཀྱི་སྒྲིབ་པ་དང༌། ཉོན་མོངས་པའི་སྒྲིབ་པ་དང༌། ཆོས་ཀྱི་སྒྲིབ་པ་དང༌། ལྟ་བའི་སྒྲིབ་པ་དང༌། རྣམ་པར་ སྨིན་པའི་སྒྲིབ་པ་དང༌། མི་ཤེས་པའི་སྒྲིབ་པ་ནས་བག་ཆགས་ཀྱི་མཚམས་སྦྱོར་བ་ཐམས་ཅད་ཀྱི་བར་དང་ལྷན་ཅིག་ཏུ་མི་གནས། ཀུན་ཏུ་རྟོག་པ་དང༌། རྣམ་པར་རྟོག་པ་དང༌། མཚན་ མ་དང༌། དམིགས་པ་དང༌། མཐོང་བ་དང༌། ཐོས་པ་དང༌། དྲན་པ་དང༌། རྣམ་པར་རིག་པ་དང༌། འདུད་པའི་སྒྲོ་འདོགས་པ་ཐམས་ཅད་དང་ལྷན་ཅིག་ཏུ་མི་གནས། སེར་སྣ་དང༌། གཏོང་བ་དང༌། ཚུལ་ཁྲིམས་དང༌། འཆལ་བའི་ཚུལ་ཁྲིམས་དང༌། བཟོད་པ་དང༌། གནོད་སེམས་དང༌། བརྩོན་འགྲུས་དང༌། ལེ་ལོ་དང༌། བསམ་གཏན་དང༌། གཡེང་བ་དང༌། ཤེས་རབ་དང༌། འཆལ་བའི་ཤེས་རབ་ནས་ཕ་རོལ་ཏུ་ཕྱིན་པའི་ཕྱོགས་དང་མི་མཐུན་པའི་ཕྱོགས་དང༌། ཤེས་པ་དང༌། མི་ཤེས་པའི་བར་ཐམས་ཅད་དང་ལྷན་ཅིག་ཏུ་མི་ གནས༑ ངེས་པ་དང༌། མ་ངེས་པ་དང༌། ལོག་པར་ངེས་པ་དང༌། དགེ་བ་དང༌། མི་དགེ་བ་དང༌། ཁ་ན་མ་ཐོ་བ་དང༌། ཁ་ན་མ་ཐོ་བ་མེད་པ་དང༌། འཁོར་བ་དང༌། མྱ་ངན་ལས་འདས་ པ་ནས་ཆོས་ཐམས་ཅད་ཀྱི་གཉེན་པོའི་བར་དང་ལྷན་ཅིག་ཏུ་མི་གནས། ཞིང་སྣ་ཚོགས་དང༌། སངས་རྒྱས་སྣ་ཚོགས་དང༌། སེམས་ཅན་སྣ་ཚོགས་དང༌། ཆོས་སྣ་ཚོགས་ནས་སྣ་ཚོགས་ ཐམས་ཅད་ཀྱི་བར་དང་ལྷན་ཅིག་ཏུ་མི་གནས། མི་ཤེས་པ་དང༌། ཤེས་པ་དང༌། རྣམ་པར་ཤེས་པ་དང༌། ཀུན་རྫོབ་དང༌། དོན་དམ་པ་ནས་སེམས་ཅན་ཐམས་ཅད་ཀྱི་མཚན་མ་ཡིད་ལ་ བྱེད་པ་དག་དང་ལྷན་ཅིག་ཏུ་མི་གནས། ཤེས་རབ་མི་རྒྱུ་བ་དང༌། ལུས་མེད་པ་དང༌། མཚན་ཉིད་མེད་པ་དང༌། མཚན་མ་མེད་པ་དང༌། འདུས་མ་བྱས་ནས་ཡིད་ལ་བྱེད་པ་ཐམས་ཅད་དང༌། སེམས་དང༌། རྣམ་པར་ཤེས་པའི་གནས་དག་གི་བར་དང་ལྷན་ཅིག་ཏུ་མི་གནས་ཏེ། དེ་དག་དང༌། གཞན་ཡང་འདུས་བྱས་ལ་སྤྱོད་པའི་ཆོས་དཔག་ཏུ་མེད་པ་དག་དང་ལྷན་ཅིག་ཏུ་མི་ གནས་སོ། །དེ་ལྟར་ན། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཤེས་རབ་དེ་ནི། གང་འདུས་བྱས་ཀྱི་སྤྱོད་པ་ཐམས་ཅད་དང་ལྷན་ཅིག་ཏུ་མི་གནས་ཏེ། ཤཱ་རིའི་ བུ༑ དེ་ལྟར་ན། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཤཱ་རིའི་བུ། གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ལ་གནས་པ་ཤེས་རབ་ ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་འབྱེད་མཁས་པ་ཡིན་ཏེ། ཆོས་ཐམས་ཅད་ལ་མཁས་པ་རྗེས་སུ་འཐོབ་བོ། །དེ་ལ་ཤེས་རབ་རྣམ་པར་འབྱེད་པ་གང་ ༄༅། །ཞེ་ན། འདི་ལྟ་སྟེ། ཕུང་པོ་ལ་མཁས་པ་དང༌། ཁམས་ལ་མཁས་པ་དང༌། སྐྱེ་མཆེད་ལ་མཁས་པ་དང༌། བདེན་པ་ལ་མཁས་པ་དང༌། སོ་སོ་ཡང་དག་པར་རིག་པ་ ལ་མཁས་པ་དང༌། རྟོན་པ་ལ་མཁས་པ་དང༌། རྣམ་པར་ཤེས་པ་དང་ཡེ་ཤེས་ལ་མཁས་པ་དང༌། བྱང་ཆུབ་ཀྱི་ཡན་ལག་ལ་མཁས་པ་དང༌། ལས་ལ་མཁས་པ་དང༌། རྟེན་ཅིང་འབྲེལ་ པར་འབྱུང་བ་ལ་མཁས་པ་དང་བཅུ་སྟེ། མཁས་པ་རྣམ་པ་བཅུ་པོ་འདི་དག་གིས་རྣམ་པར་འབྱེད་པ་གང་ཡིན་པ་དེ་ནི། ཤེས་རབ་རྣམ་པར་འབྱེད་པ་ཞེས་བྱའོ། །དེ་ལ་ཕུང་པོ་ལ་ མཁས་པ་གང་ཞེ་ན། གང་འདི་ཕུང་པོ་རྣམས་ཀྱི་དཔེར་བྱ་བ་བསྟན་པ་འདི་ལྟ་སྟེ། ལྦུ་བ་རྡོས་པ་ལྟ་བུར་བསྟན་པ་དང༌། སྨིག་རྒྱུ་ལྟ་བུར་བསྟན་པ་དང༌། ཆུ་བུར་ལྟ་བུར་བསྟན་པ་ དང༌། ཆུ་ཤིང་ལྟ་བུར་བསྟན་པ་དང༌། སྒྱུ་མ་ལྟ་བུར་བསྟན་པ་དང༌། རྨི་ལམ་ལྟ་བུར་བསྟན་པ་དང༌། བྲག་ཅ་ལྟ་བུར་བསྟན་པ་དང༌། མིག་ཡོར་ལྟ་བུར་བསྟན་པ་དང༌། གཟུགས་ བརྙན་ལྟ་བུར་བསྟན་པའོ། །གཟུགས་ནི། ཆུའི་ལྦུ་བ་ལྟ་བུ་སྟེ། ལྦུ་བ་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། སྐྱེས་བུ་མེད། ཤེད་བུ་མེད། ཤེད་ལས་ སྐྱེས་མེད་དེ། ལྦུ་བའི་རང་བཞིན་གང་ཡིན་པ་གཟུགས་ཀྱང་དེའི་རང་བཞིན་ཏེ། གང་དེ་ལ་མཁས་པ་དེ་ནི། ཕུང་པོ་ལ་མཁས་པ་ཞེས་བྱའོ། །ཚོར་བ་ནི། ཆུའི་ཆུ་བུར་ལྟ་བུ་སྟེ། ཆུ་ བུར་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། ཤེད་བུ་མེད། ཤེད་ལས་སྐྱེས་མེད། སྐྱེ་བ་པོ་མེད་དེ། ཆུ་བུར་གྱི་རང་བཞིན་གང་ཡིན་པ་ཚོར་བ་ཡང་དེའི་རང་ བཞིན་ཏེ། གང་དེ་ལ་མཁས་པ་འདི་ནི། ཕུང་པོ་ལ་མཁས་པ་ཞེས་བྱའོ། །འདུ་ཤེས་ནི། སྨིག་རྒྱུ་ལྟ་བུ་སྟེ། སྨིག་རྒྱུ་ལ་ཡང་བདག་མེད། སེམས་ཅན་མེད་པ་ནས་སྐྱེས་བུའི་བར་དུ་མེད་དེ། སྨིག་རྒྱུའི་རང་བཞིན་གང་ཡིན་པ་འདུ་ཤེས་ཀྱང་དེའི་རང་བཞིན་ཏེ། གང་དེ་ལ་མཁས་པ་དེ་ནི། ཕུང་པོ་ལ་མཁས་པ་ཞེས་བྱའོ། །འདུ་བྱེད་རྣམས་ནི། ཆུ་ཤིང་ལྟ་བུ་སྟེ། ཆུ་ཤིང་ལ་ཡང་ བདག་མེད། སེམས་ཅན་མེད། སྲོག་མེད་པ་ནས་སྐྱེས་བུའི་བར་དུ་མེད་པ་སྟེ། ཆུ་ཤིང་གི་རང་བཞིན་གང་ཡིན་པ་འདུ་བྱེད་ཀྱང་དེའི་རང་བཞིན་ཡིན་ཏེ། གང་དེ་ལ་མཁས་པ་དེ་ནི། ཕུང་ པོ་ལ་མཁས་པ་ཞེས་བྱའོ། །རྣམ་པར་ཤེས་པ་ནི། སྒྱུ་མ་ལྟ་བུ་སྟེ། སྒྱུ་མ་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། ཤེད་བུ་མེད། ཤེད་ལས་སྐྱེས་མེད། སྐྱེས་ བུ་མེད༑ བྱེད་པ་པོ་མེད། ཚོར་བ་པོ་མེད་པ་སྟེ། སྒྱུ་མའི་རང་བཞིན་གང་ཡིན་པ་རྣམ་པར་ཤེས་པའི་རང་བཞིན་ཡང་དེ་ཡིན་ཏེ། གང་དེ་ལ་མཁས་པ་དེ་ནི། ཕུང་པོ་ལ་མཁས་པ་ཞེས་བྱའོ། །གཞན་ ཡང་ཕུང་པོ་རྣམས་ཞེས་བྱ་བ་ནི། འཇིག་རྟེན་ཡིན་ཏེ། འཇིག་རྟེན་ཡང་འཇིག་པའི་མཚན་ཉིད་དོ། །འཇིག་རྟེན་རྣམས་ཀྱི་རང་བཞིན་གང་ཡིན་པ་ཕུང་པོ་རྣམས་ཀྱི་རང་བཞིན་ཡང་དེ་ཡིན་ནོ། ། ༄༅། །ཡང་འཇིག་རྟེན་གྱི་རང་བཞིན་གང་ཡིན་ཞེ་ན། འདི་ལྟ་སྟེ། མི་རྟག་པའི་རང་བཞིན་དང༌། སྡུག་བསྔལ་གྱི་རང་བཞིན་ཏེ། ཕུང་པོ་ཡང་དེའི་རང་བཞིན་ཡིན་ནོ། ། གང་དེ་ལ་མཁས་པ་དེ་ནི། ཕུང་པོ་ལ་མཁས་པ་ཞེས་བྱའོ། །དེ་ལྟར་ན། བྱང་ཆུབ་སེམས་དཔའ་ཕུང་པོ་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ལ་ཁམས་ལ་མཁས་ པ་གང་ཞེ་ན། འདི་ལྟ་སྟེ། ཆོས་ཀྱི་ཁམས་ནི། སའི་ཁམས་མོད་ཀྱི། ཆོས་ཀྱི་ཁམས་སྲ་བའི་མཚན་ཉིད་མ་ཡིན་ནོ། །ཆོས་ཀྱི་ཁམས་ནི། ཆུའི་ཁམས་མོད་ཀྱི། ཆོས་ཀྱི་ཁམས་རླན་པའི་ མཚན་ཉིད་མ་ཡིན་ནོ། །ཆོས་ཀྱི་ཁམས་ནི། མེའི་ཁམས་མོད་ཀྱི། ཆོས་ཀྱི་ཁམས་ཚ་བའི་མཚན་ཉིད་མ་ཡིན་ནོ། །ཆོས་ཀྱི་ཁམས་ནི། རླུང་གི་ཁམས་མོད་ཀྱི། ཆོས་ཀྱི་ཁམས་གཡོ་ བའི་མཚན་ཉིད་མ་ཡིན་ནོ། །ཆོས་ཀྱི་ཁམས་ནི། མིག་གི་རྣམ་པར་ཤེས་པའི་ཁམས་མོད་ཀྱི། ཆོས་ཀྱི་ཁམས་མཐོང་བའི་མཚན་ཉིད་མ་ཡིན་ནོ། །ཆོས་ཀྱི་ཁམས་ནི། རྣ་བའི་རྣམ་ པར་ཤེས་པའི་ཁམས་མོད་ཀྱི། ཆོས་ཀྱི་ཁམས་སྒྲ་རྟོགས་པའི་མཚན་ཉིད་མ་ཡིན་ནོ། །ཆོས་ཀྱི་ཁམས་ནི། སྣའི་རྣམ་པར་ཤེས་པའི་ཁམས་མོད་ཀྱི། ཆོས་ཀྱི་ཁམས་དི་[*DRI?] སྣོམ་པའི་ མཚན་ཉིད་མ་ཡིན་ནོ། །ཆོས་ཀྱི་ཁམས་ནི། ལྕེའི་རྣམ་པར་ཤེས་པའི་ཁམས་མོད་ཀྱི། ཆོས་ཀྱི་ཁམས་རོ་མྱོང་བའི་མཚན་ཉིད་མ་ཡིན་ནོ། །ཆོས་ཀྱི་ཁམས་ནི། ལུས་ཀྱི་རྣམ་པར་ ཤེས་པའི་ཁམས་མོད་ཀྱི། ཆོས་ཀྱི་ཁམས་རེག་པའི་མཚན་ཉིད་མ་ཡིན་ནོ། །ཆོས་ཀྱི་ཁམས་ནི། ཡིད་ཀྱི་རྣམ་པར་ཤེས་པའི་ཁམས་མོད་ཀྱི། ཆོས་ཀྱི་ཁམས་རྣམ་པར་སྒོམ་པའི་མཚན་ ཉིད་མ་ཡིན་ནོ། །ཆོས་ཀྱི་ཁམས་དང༌། བདག་གི་ཁམས་དེ་ནི། མཚུངས་སོ། །འདོད་པའི་ཁམས་དང༌། གཟུགས་ཀྱི་ཁམས་དང༌། གཟུགས་མེད་པའི་ཁམས་ནི། མཚུངས་སོ། །འཁོར་བའི་ ཁམས་དང༌། མྱ་ངན་ལས་འདས་པའི་ཁམས་དེ་མཚུངས་སོ། །དེ་ལྟར་ཆོས་ཐམས་ཅད་ཀྱི་ཁམས་དང༌། ནམ་མཁའི་ཁམས་དེ་མཚུངས་ཏེ། སྟོང་པ་ཉིད་དང་མཚུངས་པས་མཚུངས། མི་ འགྱུར་བ་དང་མཚུངས་པས་མཚུངས་ཏེ། འདུས་བྱས་ཀྱི་ཁམས་སུ་འཇུག་པ་དང༌། འདུས་མ་བྱས་ཀྱི་ཁམས་སུ་འཇུག་པའི་ཕྱིར་དེ་ལ་བཤད་པ་དཔག་ཏུ་མེད་དེ། གང་ཁམས་ལ་འཇུག་པ་ དེས་རབ་ཏུ་རྣམ་པར་འབྱེད་པ་དེ་ནི། མཁས་པ་ཞེས་བྱའོ། །དེ་ལྟར་ན། ཁམས་ལ་མཁས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ལ་ བྱང་ཆུབ་སེམས་དཔའ་སྐྱེ་མཆེད་ལ་མཁས་པ་གང་ཞེ་ན། འདི་ལ་མིག་བདག་དང༌། བདག་གིས་སྟོང་པ་དེ་བྱང་ཆུབ་སེམས་དཔའ་མིག་གི་རང་བཞིན་ནི། འདི་ལྟ་བུའོ། །ཞེས་ཡང་དག་པ་ ཇི་ལྟ་བ་བཞིན་རབ་ཏུ་ཤེས་ཏེ། དེ་ནི། བྱང་ཆུབ་སེམས་དཔའི་སྐྱེ་མཆེད་ལ་མཁས་པའོ། །གོང་མ་བཞིན་དུ་སྦྱར་ཏེ། དེ་བཞིན་དུ་རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་བདག་དང༌། ༄༅། །བདག་གིས་སྟོང་པ་དེ་བྱང་ཆུབ་སེམས་དཔའ་ཡིད་ཀྱི་རང་བཞིན་ནི། འདི་ལྟ་བུའོ། །ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཏེ། དགེ་བ་གསོག་པའི་ཕྱིར་ གང་སྐྱེ་མཆེད་ལ་ཀུན་གསོག་པ་དང༌། སྣ་ཚོགས་གསོག་པ་དེ་དག་གསོག་པར་མི་བྱེད་ཅིང་དགེ་བ་དང༌། མི་དགེ་བའི་ཆོས་རྣམས་ལ་འདུ་ཤེས་གཉིས་སུ་མི་འཇུག་སྟེ། དེ་ནི། བྱང་ ཆུབ་སེམས་དཔའི་སྐྱེ་མཆེད་ལ་མཁས་པའོ། །འདི་ནི། མིག་གི་སྐྱེ་མཆེད་དོ། །འདི་ནི། གཟུགས་ཀྱི་སྐྱེ་མཆེད་དོ། །ཞེས་དེ་ལྟར་མིག་དང་གཟུགས་རྣམས་ལ་འདོད་ཆགས་མེད་ པར་མཐོང་ཡང་འདོད་ཆགས་མེད་པ་མངོན་དུ་མི་བྱེད་པ་དེ་ནི། བྱང་ཆུབ་སེམས་དཔའི་སྐྱེ་མཆེད་ལ་མཁས་པའོ། །རྣ་བ་དང་སྒྲ། སྣ་དང་དྲི། ལྕེ་དང་རོ། ལུས་དང་རེག །ཡིད་དང་ ཆོས་གོང་མ་བཞིན་དུ་སྦྱར་ཏེ། དེ་ལྟར་བྱང་ཆུབ་སེམས་དཔའ་ཡིད་དང་ཆོས་ཀྱི་བར་དུ་འདོད་ཆགས་མེད་པར་མཐོང་མོད་ཀྱི། འདོད་ཆགས་མེད་པ་མངོན་དུ་མི་བྱེད་པ་དེ་ནི། བྱང་ ཆུབ་སེམས་དཔའི་སྐྱེ་མཆེད་ལ་མཁས་པའོ། །སྐྱེ་མཆེད་ཅེས་བྱ་བ་ཡང་འཕགས་པའི་སྐྱེ་མཆེད་དང༌། འཕགས་པ་མ་ཡིན་པའི་སྐྱེ་མཆེད་དེ། དེ་ལ་འཕགས་པའི་སྐྱེ་མཆེད་ ནི༑ གང་ལམ་སྡུད་པར་བྱེད་པའོ། །འཕགས་པ་མ་ཡིན་པའི་སྐྱེ་མཆེད་ནི། གང་ལམ་གཏོང་བར་བྱེད་པ་འདི་ལྟ་སྟེ། བྱང་ཆུབ་སེམས་དཔའ་ལམ་ལ་གནས་པ་ནི། སེམས་ཅན་ ལམ་ལ་བརྩོན་པ་བོར་ཞིང་གནས་པ་ལ་སྙིང་རྗེ་ཆེན་པོ་འཐོབ་ཅིང༌། ལམ་གྱི་སྐྱེ་མཆེད་ཀྱང་མི་གཏོང་སྟེ། དེ་ནི། བྱང་ཆུབ་སེམས་དཔའི་སྐྱེ་མཆེད་ལ་མཁས་པའོ། །དེ་ལྟར་ན། བྱང་ཆུབ་ སེམས་དཔའི་སྐྱེ་མཆེད་ཀྱང་མི་གཏོང་བ་སྟེ། དེ་ནི། བྱང་ཆུབ་སེམས་དཔའི་སྐྱེ་མཆེད་ལ་མཁས་པའོ། །དེ་ལྟར་ན། བྱང་ཆུབ་སེམས་དཔའི་སྐྱེ་མཆེད་ལ་མཁས་པ་ཤེས་རབ་ཀྱི་ཕ་རོལ་ ཏུ་ཕྱིན་པ་ལ་སྤྱོད་དོ། །དེ་ལ་བྱང་ཆུབ་སེམས་དཔའི་བདེན་པ་ལ་མཁས་པ་གང་ཞེ་ན། བྱང་ཆུབ་སེམས་དཔའི་བདེན་པ་ལ་འཇུག་པ་མཁས་པ་ནི། རྣམ་པ་བཞི་སྟེ། འདི་ལྟ་སྟེ། སྡུག་ བསྔལ་ཤེས་པ་དང༌། ཀུན་འབྱུང་བ་ཤེས་པ་དང༌། འགོག་པ་ཤེས་པ་དང༌། ལམ་ཤེས་པའོ། །དེ་ལ་སྡུག་བསྔལ་ཤེས་པ་གང་ཞེ་ན། ཕུང་པོ་རྣམས་ལ་མི་སྐྱེ་བར་ཤེས་པ་དེ་ནི། སྡུག་བསྔལ་ཤེས་པ་ཞེས་བྱའོ། །དེ་ལ་ཀུན་འབྱུང་བ་ཤེས་པ་གང་ཞེ་ན། གང་སྲེད་པ་འཇོམས་པ་དེ་ནི། ཀུན་འབྱུང་བཤེས་པ་ཞེས་བྱའོ། །དེ་ལ་འགོག་པ་ཤེས་པ་གང་ཞེ་ན། གང་མི་ འབྱུང་མི་འཇིག་པར་ཤེས་པ་དེ་ནི། འགོག་པ་ཤེས་པ་ཞེས་བྱའོ། །དེ་ལ་ལམ་ཤེས་པ་གང་ཞེ་ན། གང་མཉམ་པ་ཉིད་ཐོབ་པའི་ཆོས་རྣམས་ལ་སྒྲོ་མི་འདོགས་པ་དེ་ནི། ལམ་ཤེས་ པ་ཞེས་བྱའོ། །གང་གི་ཚེ་བྱང་ཆུབ་སེམས་དཔས་བདེན་པ་འདི་བཞི་དེ་ལྟར་ཤེས་རབ་ཀྱིས་ཤེས་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་མངོན་དུ་མི་བྱེད་པ་དེ་ནི། བདེན་པ་ལ་ ༄༅། །མཁས་པ་ཞེས་བྱའོ། །གཞན་ཡང་བདེན་པ་ལ་མཁས་པ་རྣམ་པ་གསུམ་སྟེ། འདི་ལྟ་སྟེ། ཀུན་རྫོབ་ཀྱི་བདེན་པ་དང༌། དོན་དམ་པའི་བདེན་པ་དང༌། མཚན་ ཉིད་ཀྱི་བདེན་པའོ། །དེ་ལ་ཀུན་རྫོབ་ཀྱི་བདེན་པ་ནི། འཇིག་རྟེན་གྱི་ཐ་སྙད་ཇི་སྙེད་པ་དང༌། ཡི་གེ་དང༌། སྒྲ་དང༌། བརྡར་བསྟན་པ་སྟེ། དེ་ནི། ཀུན་རྫོབ་ཀྱི་བདེན་ པ་ཞེས་བྱའོ། །དེ་ལ་དོན་དམ་པའི་བདེན་པ་གང་ཞེ་ན། གང་ལ་སེམས་ཀྱི་རྒྱུ་བ་ཡང་མེད་ན། ཡི་གེ་ལྟ་ཅི་སྨོས་ཏེ། དེ་ནི། དོན་དམ་པའི་བདེན་པ་ཞེས་བྱའོ། །དེ་ལ་མཚན་ཉིད་ ཀྱི་བདེན་པ་གང་ཞེ་ན། འདི་ལྟ་སྟེ། མཚན་ཉིད་ཐམས་ཅད་མཚན་ཉིད་གཅིག་ལ། མཚན་ཉིད་གཅིག་པ་ནི། མཚན་ཉིད་མེད་པའོ། །དེ་ལ་བྱང་ཆུབ་སེམས་དཔའ་ཀུན་རྫོབ་ཀྱི་ བདེན་པ་འཆད་པས་མི་སྐྱོ། །དོན་དམ་པའི་བདེན་པ་མངོན་དུ་བྱེད་པར་མི་ལྟུང༌། མཚན་ཉིད་ཀྱི་བདེན་པ་མཚན་ཉིད་མེད་པས་རྟོགས་པར་བྱེད་པ་དེ་ནི། བྱང་ཆུབ་སེམས་དཔའི་བདེན་ པ་ལ་མཁས་པ་ཞེས་བྱའོ། །གཞན་ཡང་བདེན་པ་ནི། གཅིག་པུ། གཉིས་མ་ཡིན་པ་སྟེ། འདི་ལྟ་སྟེ། འགོག་པའི་བདེན་པའོ། །དེ་ལ་བདེན་པ་གཅིག་པུ་ལ་གང་སྒྲོ་མི་འདོགས་པ་དང༌། སེམས་ཅན་སྒྲོ་འདོགས་པར་ལྷུང་བ་རྣམས་ལ་བདེན་པ་སྦྱོར་བར་བྱེད་པ་དེ་ནི། བྱང་ཆུབ་སེམས་དཔའི་བདེན་པ་ལ་མཁས་པ་ཞེས་བྱའོ། །གཞན་ཡང་ཕུང་པོ་ལྔ་རྣམས་ནི། སྡུག་ བསྔལ་བ་སྟེ། གང་ཕུང་པོ་ལྔ་རྣམས་ཀྱི་སྡུག་བསྔལ་གྱི་མཚན་ཉིད་དེ་ནི། སྡུག་བསྔལ་ཞེས་བྱའོ། །སྡུག་བསྔལ་གྱི་མཚན་ཉིད་ཀྱི་སྟོང་པ་ཉིད་ཀྱི་མཚན་ཉིད་རྟོགས་པ་དེ་ནི། སྡུག་ བསྔལ་འཕགས་པའི་བདེན་པ་ཞེས་བྱའོ། །གང་ཕུང་པོ་རྣམས་ཀྱི་བག་ལ་ཉལ་རྒྱུ་སྲེད་པ་ལས་བྱུང་བའི་ལྟ་བ་དེ་ནི། ཀུན་འབྱུང་བའི་བདེན་པའོ། །གང་སྲེད་པའི་རྒྱུ་ལྟ་བ་དེ་ལ་ཡང་སྒྲོ་ མི་འདོགས། མི་ལེན། མི་སྙེམས་པ་དེ་ནི། ཀུན་འབྱུང་བ་འཕགས་པའི་བདེན་པ་ཞེས་བྱའོ། །གང་ཕུང་པོ་ལྔ་རྣམ་ཤིན་ཏུ་ཟད་པའི་ཕྱིར་འགོག་པ་སྔོན་གྱི་མཐར་མ་བྱུང་བ། ཕྱི་མའི་ མཐར་མི་འཕོ་བ། ད་ལྟར་བྱུང་བར་མི་གནས་པ་དེ་ནི། འགོག་པ་འཕགས་པའི་བདེན་པ་ཞེས་བྱའོ། །གང་ལམ་ལ་བརྟེན་ནས་སྡུག་བསྔལ་ཤེས་པ་དང༌། ཀུན་འབྱུང་བ་ཤེས་པ་དང༌། འགོག་པ་ཤེས་པ་ལ་ཡང་རེག་པར་བྱེད་ལ། རྗེས་ལས་རྟོགས་པའི་ཤེས་པ་ཡང་ཐོབ་པར་བྱེད་པ་དེ་ནི། སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པ་ཞེས་བྱའོ། ། གང་བདེན་པ་ཤེས་པ་དེ་ལ་རྣམ་པར་རྟོག་པ་དང༌། སེམས་ཅན་ཡོངས་སུ་བརྟག་པ་ལ་རྟོག་པར་བྱེད་པ་དེ་ནི། བྱང་ཆུབ་སེམས་དཔའི་བདེན་པ་ལ་མཁས་པ་ཞེས་བྱའོ། །གཞན་ཡང་ཚོར་ བ་ཐམས་ཅད་སྡུག་བསྔལ་བ་སྟེ། དེ་ལ་ཚོར་བར་བྱ་བ་རྣམ་པར་འབྱེད་པ་དང༌། བློས་རིག་པ་ཉིད་དེ་ནི། སྡུག་བསྔལ་འཕགས་པའི་བདེན་པ་ཞེས་བྱའོ། །རྒྱུ་གང་གིས་ཀུན་འབྱུང་བར་ ༄༅། །ཤེས་པའི་རྒྱུ་དེ་ཇི་ལྟ་བ་ཡང་དག་པར་རབ་ཏུ་ཤེས་བ་དེ་ནི། ཀུན་འབྱུང་བ་འཕགས་པའི་བདེན་པ་ཞེས་བྱའོ། །གང་ཚོར་བ་གཏོང་ཞིང་མ་ཚོར་བ་ཚོར་བར་བྱེད་པ་ དང༌། འགོག་པ་ལ་ཡང་སོ་སོར་རྟོག་ལ་ཚོར་བ་འགོག་པ་ཡང་མངོན་དུ་མི་བྱེད་པ་དེ་ནི། བྱང་ཆུབ་སེམས་དཔའི་སྡུག་བསྔལ་འགོག་པ་འཕགས་པའི་བདེན་པ་ཞེས་བྱའོ། །ཚོར་བ་ གང་གིས་གཟིངས་དང་འདྲ་བའི་ལམ་དེ་སྡུད་པར་བྱེད་ལ་ཚོར་བར་དགོས་པ་ཡང་མ་ཡིན། ལམ་གྱི་དགོས་པ་ཡང་མ་ཡིན་པ་དེ་ནི། བྱང་ཆུབ་སེམས་དཔའི་སྡུག་བསྔལ་འགོག་ པར་འགྲོ་བའི་ལམ་འཕགས་པའི་བདེན་པ་ཞེས་བྱའོ། །དེ་ལྟར་རྟོགས་ནས་བདེན་པ་དེ་བཞི་ལ་མཉམ་པར་མཐོང་ཞིང་མཐོང་བ་ཤིན་ཏུ་དག་པའང་མ་ཡིན་པ་དེ་ནི། བྱང་ཆུབ་ སེམས་དཔའི་བདེན་པ་ལ་མཁས་པ་ཞེས་བྱའོ། །གཞན་ཡང་སྐྱེ་བ་སྡུག་བསྔལ་བ་སྟེ། གང་མི་སྐྱེ་བ་ལ་སོ་སོར་རྟོག་པར་ཤེས་པ་དེ་ནི། སྡུག་བསྔལ་ཤེས་པ་ཞེས་བྱའོ། །སྲིད་ པའི་རྐྱེན་གྱིས་སྐྱེ་བ་སྟེ། གང་སྲིད་པ་འཇིག་པར་ཤེས་པ་དེ་ནི། ཀུན་འབྱུང་བ་ཤེས་པ་ཞེས་བྱའོ། །སྐྱེ་བ་ཐམས་ཅད་གང་གིས་མི་སྐྱེ་བར་ཤེས་པ་དེ་ལ་འགོག་པ་གང་ཡང་མེད་ཅིང༌། གང་མི་འགོག་པར་ཤེས་པ་དེ་ནི། ཟད་པ་འགོག་པ་ཤེས་པ་ཞེས་བྱའོ། །གང་དེ་ལྟར་ཚོར་བ་དང༌། འཇལ་བ་དང༌། ཡོངས་སུ་ཚོར་བ་དང༌། རྣམ་པར་རྟོག་པ་དང༌། འཇུག་པའི་ཤེས་ པ་དེ་ནི། ལམ་ཤེས་པ་ཞེས་བྱ་བ་སྟེ། གང་བདེན་པའི་ཤེས་པ་དེ་ལ་གཞོག་པར་བྱེད་ཀྱང་བདེན་པའི་ཤེས་པ་དེ་ལ་མི་གནས་པ་དེ་ནི། བྱང་ཆུབ་སེམས་དཔའི་བདེན་པ་ལ་མཁས་པ་སྟེ། དེ་ལྟར་ན། བྱང་ཆུབ་སེམས་དཔའི་བདེན་པ་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ལ་བྱང་ཆུབ་སེམས་དཔའི་སོ་སོ་ཡང་དག་པར་རིག་པ་ལ་མཁས་པ་གང་ཞེ་ན། བཞི་པོ་འདི་དག་ནི། བྱང་ཆུབ་སེམས་དཔའི་སོ་སོ་ཡང་དག་པར་རིག་པ་སྟེ། བཞི་གང་ཞེ་ན། འདི་ལྟ་སྟེ། དོན་སོ་སོ་ཡང་དག་པར་རིག་པ་དང༌། ཆོས་སོ་སོ་ཡང་དག་པར་རིག་པ་དང༌། ངེས་པའི་ཚིགས་སོ་ཡང་དག་པར་རིག་པ་དང༌། སྤོབས་པ་སོ་སོ་ཡང་དག་པར་རིག་པའོ། །དེ་ལ་དོན་སོ་སོ་ཡང་དག་པར་རིག་པ་གང་ཞེ་ན། གང་ཆོས་རྣམས་ལ་དོན་དམ་པའི་ཚིག་ཏུ་ ཤེས་པ་དང༌། གཉིས་སུ་མེད་པའི་རྒྱུ་ཤེས་པ་དང༌། རྐྱེན་ཤེས་པ་དང༌། འདུས་པ་ཤེས་པ་དང༌། མཐའ་མེད་པའི་རྗེས་སུ་འགྲོ་བ་ཤེས་པ་དང༌། བརྟེན་པ་ལ་འཇུག་པ་ཤེས་པ་དང༌། ཆོས་ ཀྱི་དབྱིངས་དབྱེར་མེད་པར་ཤེས་པ་དང༌། དེ་བཞིན་ཉིད་ཀྱི་རྗེས་སུ་འཇུག་པ་ཤེས་པ་དང༌། ཡང་དག་པའི་མཐའ་མི་གནས་པ་ཤེས་པ་དང༌། སྟོང་པ་ཉིད་ཀྱི་རྗེས་སུ་རྟོགས་པ་ཤེས་པ་དང༌། མཚན་མ་མེད་པ་རྟོགས་པ་ཤེས་པ་དང༌། སྨོན་པ་མེད་པ་ལ་སྨོན་པ་མེད་པར་ཤེས་པ་དང༌། མངོན་པར་འདུ་མི་བྱེད་པ་ལ་མངོན་པར་འདུ་བྱེད་པར་ཤེས་པ་དང༌། ཚུལ་གཅིག་ཏུ་འཇུག་ ༄༅། །པ་ཤེས་པ་དང༌། སེམས་ཅན་མེད་བར་འཇུག་པ་ཤེས་པ་དང༌། བདག་མེད་པར་འཇུག་པ་ཤེས་པ་དང༌། སྲོག་མེད་པ་བྱེད་པ་གཅིག་པ་ཤེས་པ་དང༌། གང་ཟག་མེད་ པ་དོན་དམ་པར་ཤེས་པ་དང༌། འདས་པའི་དུས་ལ་མ་ཆགས་པར་ཤེས་པ་དང༌། མ་འོངས་པའི་དུས་ལ་མཐའ་མེད་པར་ཤེས་པ་དང༌། ད་ལྟར་བྱུང་བའི་དུས་ལ་ཐམས་ཅད་དུ་ཤེས་པ་ དང༌། ཕུང་པོ་རྣམས་ལ་སྒྱུ་མར་ཤེས་པ་དང༌། ཁམས་རྣམས་ལ་སྦྲུལ་གདུག་པ་དང་མཚུངས་པར་ཤེས་པ་དང༌། སྐྱེ་མཆེད་རྣམས་ལ་སྟོང་པ་ཉིད་དུ་ངེས་པར་རྟོག་པ་ཤེས་པ་དང༌། ནང་ཞི་བ་ཤེས་པ་དང༌། ཕྱི་རོལ་ཏུ་མི་རྒྱུ་བ་ཤེས་པ་དང༌། ཡུལ་ལ་ཡུལ་མེད་པར་ཤེས་པ་དང༌། དྲན་པ་ལ་གནས་སུ་ཤེས་པ་དང༌། རྟོགས་པ་ལ་ཁོང་དུ་ཆུད་པར་ཤེས་པ་དང༌། བློ་ གྲོས་ལ་མངོན་སུམ་དུ་ཤེས་པ་དང༌། བདེན་པ་ལ་རབ་ཏུ་རྟོགས་པར་ཤེས་པ་དང༌། སྡུག་བསྔལ་ལ་མི་འབྱུང་བར་ཤེས་པ་དང༌། ཀུན་འབྱུང་བ་ལ་མངོན་པར་འདུ་མི་བྱེད་པར་ཤེས་པ་ དང༌། འགོག་པ་ལ་མཚན་ཉིད་མེད་པར་ཤེས་པ་དང༌། ལམ་ལ་སྒྲོལ་བར་ཤེས་པ་དང༌། ཆོས་ལ་ཚིག་རབ་ཏུ་ཐ་དད་པར་ཤེས་པ་དང༌། དབང་པོ་རྣམས་ལ་འཇུག་པར་ཤེས་པ་དང༌། སྟོབས་རྣམས་ལ་མི་རྫི་བར་ཤེས་པ་དང༌། ཞི་གནས་ལ་གནས་སུ་ཤེས་པ་དང༌། ལྷག་མཐོང་ལ་སྣང་བར་ཤེས་པ་དང༌། སྒྱུ་མ་ལ་སྒྲུབ་པར་ཤེས་པ་དང༌། སྨིག་རྒྱུ་ལ་འཁྲུལ་པར་ ཤེས་པ་དང༌། རྨི་ལམ་ལ་མི་བདེན་པ་མཐོང་བར་ཤེས་པ་དང༌། བྲག་ཅག་ལ་རྐྱེན་ལ་འཇུག་པར་ཤེས་པ་དང༌། མིག་ཡོར་ལ་འཕོ་བར་ཤེས་པ་དང༌། མཚན་ཉིད་སྣ་ཚོགས་ལ་མཚན་ ཉིད་གཅིག་ཏུ་ཤེས་པ་དང༌། འདུ་བ་ལ་འབྲལ་བར་ཤེས་པ་དང༌། རབ་ཏུ་སྦྱངས་པ་ལ་ཕྱིར་མཚམས་སྦྱོར་བ་མེད་པར་ཤེས་པ་དང༌། ཉན་ཐོས་ཀྱི་ཐེག་པ་ལ་སྒྲའི་རྗེས་སུ་འགྲོ་བར་ འཇུག་པ་ཤེས་པ་དང༌། རང་སངས་རྒྱས་ཀྱི་ཐེག་པ་ལ་བརྟེན་པ་ལ་འཇུག་པ་ཤེས་ཤིང་དབེན་པ་ལ་མཆོག་ཏུ་ཤེས་པ་དང༌། ཐེག་པ་ཆེན་པོ་ལ་དགེ་བའི་རྩ་བའི་ཚོགས་བསགས་པ་ ཐམས་ཅད་ཤེས་པ་སྟེ། དེ་ནི། བྱང་ཆུབ་སེམས་དཔའི་དོན་སོ་སོ་ཡང་དག་པར་རིག་པ་ཞེས་བྱའོ། །གཞན་ཡང་དོན་སོ་སོ་ཡང་དག་པར་རིག་པ་ནི། གང་དོན་ལ་རྟོན་པ་སྟེ། ཆོས་ཐམས་ ཅད་ཀྱི་ཆོས་ཉིད་ཀུན་གྱི་དོན་ལ་རྟོན་པ་ཉིད་ཀྱི་རྗེས་སུ་འབྲང་བའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་མ་ལུས་པར་སྟོང་པ་སྟེ། སྟོང་པའི་དོན་གང་ཡིན་པ་དེ་ནི། དོན་ནོ། །ཆོས་ཐམས་ ཅད་མ་ལུས་པར་མཚན་མ་མེད་པ་སྟེ། མཚན་མ་མེད་པའི་དོན་གང་ཡིན་པ་དེ་ནི། དོན་ནོ། །ཆོས་ཐམས་ཅད་མ་ལུས་པར་སྨོན་པ་མེད་པ་སྟེ། སྨོན་པ་མེད་པའི་དོན་གང་ཡིན་པ་དེ་ནི། དོན་ནོ། །ཆོས་ཐམས་ཅད་མ་ལུས་པ་རྣམ་པར་ཕྱེ་བ་སྟེ། རྣམ་པར་ཕྱེ་བའི་དོན་གང་ཡིན་པ་དེ་ནི། དོན་ནོ། །ཆོས་ཐམས་ཅད་མ་ལུས་པར་སེམས་ཅན་མེད། སྲོག་མེད། གང་ཟག་མེད་པ་སྟེ། ༄༅། །གང་ཟག་མེད་པའི་དོན་གང་ཡིན་པ་དེ་ནི། དོན་ནོ། །གང་དེ་ལྟ་བུའི་ཆོས་རྣམས་རྟོགས་པ་དེ་ནི། དོན་སོ་སོ་ཡང་དག་པར་རིག་པ་ཞེས་བྱ་སྟེ། གང་དོན་སྟོན་པ་ དེ་ནི། གནས་མེད་པ་སྟོན་པའོ། །དེ་ནི། མི་ཟད་པ་སྟོན་པའོ། །སོ་སོ་ཡང་དག་པར་རིག་པ་ནི། རྟོགས་པའི་དོན་སྟོན་པ་ཡིན་ཏེ། སངས་རྒྱས་བཅོམ་ལྡན་འདས་རྣམས་ཀྱིས་གནང་བ་ རྗེས་སུ་ཡི་རང་བ། ཡང་དག་པ། དེ་ཁོ་ན། གཞན་མ་ཡིན་པ། ཤེས་རབ་ཀྱིས་ཤིན་ཏུ་རྟོགས་པ། ཐམས་ཅད་དུ་ཁ་ན་མ་ཐོ་བ་མེད་པ་དེ་ནི། བྱང་ཆུབ་སེམས་དཔའི་དོན་སོ་སོ་ཡང་ དག་པར་རིག་པ་ཞེས་བྱའོ། །དེ་ལ་ཆོས་སོ་སོ་ཡང་དག་པར་རིག་པ་གང་ཞེ་ན། གང་དགེ་བ་དང༌། མི་དགེ་བ་དང༌། ཁ་ན་མ་ཐོ་བ་དང་བཅས་པ་དང༌། ཁ་ན་མ་ཐོ་བ་མེད་པ་དང༌། ཟག་ པ་དང་བཅས་པ་དང༌། ཟག་པ་མེད་པ་དང༌། འཇིག་རྟེན་པ་དང༌། འཇིག་རྟེན་ལས་འདས་པ་དང༌། འདུས་བྱས་དང༌། འདུས་མ་བྱས་དང༌། ཀུན་ནས་ཉོན་མོངས་པ་དང༌། རྣམ་པར་ བྱང་བའི་ཆ་དང་མཐུན་པ་དང༌། འཁོར་བ་དང༌། མྱ་ངན་ལས་འདས་པར་ཉེ་བར་འགྲོ་བའི་ཆོས་རྣམས་ལ་འཇུག་ཤེས་པ་དང༌། ཆོས་ཀྱི་དབྱིངས་མཉམ་པ་ཉིད་ཤེས་པ་དང༌། བྱང་ཆུབ་ཀྱི་མཉམ་པ་ཉིད་ཤེས་པ་དང༌། ཁམས་མཉམ་པ་ཉིད་ཤེས་པ་སྟེ། དེ་ནི། ཆོས་སོ་སོ་ཡང་དག་པར་རིག་པ་ཞེས་བྱའོ། །གཞན་ཡང་ཆོས་སོ་སོ་ཡང་དག་པར་རིག་པ་ ནི། གང་འདོད་ཆགས་སྤྱོད་པ་རྣམས་ལ་སེམས་འཇུག་པ་ཤེས་པ་དང༌། བཅོས་པའི་འདོད་ཆགས་སྤྱོད་པ་རྣམས་དང༌། འདོད་ཆགས་བརྟན་པར་སྤྱོད་པ་རྣམས་དང༌། འདོད་ཆགས་ཆུང་ངུ་ སྤྱོད་པ་རྣམས་དང༌། རྣམ་པར་མི་ལྡང་བའི་འདོད་ཆགས་སྤྱོད་པ་རྣམས་དང༌། མཐའ་མ་རྟག་ཏུ་མེད་པའི་འདོད་ཆགས་སྤྱོད་པ་རྣམས་དང༌། ད་ལྟར་བྱུང་བ་ལ་རྐྱེན་གྱིས་འདོད་ཆགས་སྤྱོད་ པ་རྣམས་ལ་འཇུག་པ་སྟེ། སེམས་ཅན་གང་དག་ནང་དུ་འདོད་ཆགས་ལ་ཕྱི་རོལ་ཏུ་འདོད་ཆགས་མེད་པ་དང༌། ཕྱི་རོལ་ཏུ་འདོད་ཆགས་ལ་ནང་དུ་འདོད་ཆགས་མེད་པ་དང༌། ནང་དུའང་འདོད་ ཆགས་མེད། ཕྱི་རོལ་ཏུའང་འདོད་ཆགས་མེད་པ་དང༌། ནང་དང་ཕྱི་རོལ་ཏུ་འདོད་ཆགས་པ་དང༌། གཟུགས་ལ་འདོད་ཆགས་ལ་སྒྲ་ལ་འདོད་ཆགས་མེད་པ་དང༌། སྒྲ་ལ་འདོད་ཆགས་ ལ་གཟུགས་ལ་འདོད་ཆགས་མེད་པ་དང༌། གཟུགས་དང་སྒྲ་ལ་འདོད་ཆགས་པ་དང༌། གཟུགས་དང་སྒྲ་ལ་འདོད་ཆགས་མེད་པ་དང༌། དྲི་ལ་འདོད་ཆགས་མེད་པ་དང༌། དྲི་ལ་འདོད་ཆགས་ ལ་རེག་ལ་འདོད་ཆགས་མེད་པ་དང༌། རེག་ལ་འདོད་ཆགས་ལ་རོ་ལ་འདོད་ཆགས་མེད་པ་དང༌། རོ་ལ་འདོད་ཆགས་ལ་གཟུགས་ལ་འདོད་ཆགས་མེད་པ་དང༌། གཟུགས་ལ་འདོད་ཆགས་ ལ་དྲི་ལ་འདོད་ཆགས་མེད་པ་དེ་ནི། འདོད་ཆགས་སྤྱོད་པ་རྣམས་ཀྱི་འཇུག་པ་སྟེ། འཇུག་པ་དེའི་སྒོས་འདོད་ཆགས་སྤྱོད་པ་རྣམས་ལ་ཉི་ཁྲི་ཚིག་སྟོང༌། ཞེ་སྡང་སྤྱོད་པ་རྣམས་ལ་ཉི་ཁྲི་ཆིག་ ༄༅། །སྟོང༌། གཏི་མུག་སྤྱོད་པ་རྣམས་ལ་ཉི་ཁྲི་ཆིག་སྟོང༌། ཆ་མཉམ་པར་སྤྱོད་བ་རྣམས་ལ་ཉི་ཁྲི་ཆིག་སྟོང་སྟེ། གང་དེ་དག་གི་སྤྱོད་པ་བརྒྱད་ཁྲི་བཞི་སྟོང་གི་སེམས་ འཇུག་པ་ཤེས་པ་དང༌། ཇི་ལྟར་རིག་པར་བསྟན་པ་ཤེས་པ་དང༌། མི་མང་མི་ཉུང་བར་བསྟན་པ་ཤེས་པ་དང༌། འདོད་པ་ལས་ཡང་དག་པར་འདའ་བར་ཤེས་པ་དང༌། སྣོད་ཀྱི་ཁྱད་ པར་ཤེས་པ་དང༌། འབྲས་བུ་ཡོད་པར་བསྟན་པ་ཤེས་པ་དེ་ནི། ཆོས་སོ་སོ་ཡང་དག་པར་རིག་པ་ཞེས་བྱའོ། །དེ་ལ་ངེས་པའི་ཚིག་སོ་སོ་ཡང་དག་པར་རིག་པ་གང་ཞེ་ན། གང་སྐད་ ཐམས་ཅད་ལ་སྐད་མེད་པར་འཇུག་པ་ཤེས་པ་དང༌། ལྷའི་སྐད་དང༌། ཀླུའི་སྐད་དང༌། གནོད་སྦྱིན་གྱི་སྐད་དང༌། དྲི་ཟའི་སྐད་དང༌། མིའམ་ཅིའི་སྐད་དང༌། ལྟོ་འཕྱེ་ཆེན་པོའི་སྐད་དང༌། མི་དང་མི་མ་ཡིན་པའི་སྐད་དང༌། འགྲོ་བ་ལྔར་སྐྱེས་པའི་སེམས་ཅན་རྣམས་ཀྱི་སྐད་དང༌། སྒྲ་དང་དབྱིངས་རྣམས་ལས་སྐད་དེས་དེ་དག་ལ་ཆོས་འཆད་པ་སྟེ། དེ་ནི། ངེས་པའི་ཚིག་ སོ་སོ་ཡང་དག་པར་རིག་པ་ཞེས་བྱ་སྟེ། དེ་ལྟར་ཆོས་དེ་དག་བརྟག་པར་བྱའོ། །དེ་ལྟར་ཆོས་དེ་དག་བསྡུ་བར་བྱའོ། །དེ་ལྟར་ཆོས་དེ་དག་རྗེས་སུ་རྒྱུན་ཆགས་པར་བྱའོ། །དེ་ལྟར་ཆོས་ དེ་དག་ཡི་གེ་རྣམས་ཀྱིས་སྦྲེལ་བར་བྱའོ། །དེ་ཚིག་གཅིག་གི་བླ་དྭགས་ཤེས། ཚིག་གཉིས་པའི་བླ་དྭགས་ཤེས། ཚིག་མང་པོའི་བླ་དྭགས་ཤེས། བུད་མེད་ཀྱི་ཚིག་ཤེས། སྐྱེས་པའི་ ཚིག་ཤེས། མ་ནིང་གི་ཚིག་ཤེས། བསྡུས་པའི་ཚིག་ཤེས། རྒྱས་པའི་ཚིག་ཤེས། སྨད་པའི་ཚིག་ཤེས། བསྟོད་པའི་ཚིག་ཤེས། འདས་པའི་ཚིག་ཤེས། མ་འོང་པའི་ཚིག་ཤེས། ད་ལྟར་བྱུང་བའི་ཚིག་ཤེས། ཡི་གེ་གཅིག་གིས་སྒྲོ་བཏགས་པ་ཤེས། ཡི་གེ་མང་པོས་སྒྲོ་བཏགས་པ་ཤེས་ཏེ། དེ་ནི། ངེས་པའི་ཚིག་སོ་སོ་ཡང་དག་པར་རིག་པ་ཞེས་བྱའོ། །ཡང་ དེའི་ངེས་པའི་ཚིག་སོ་སོ་ཡང་དག་པར་རིག་པ་ནི། འཁྲུལ་པ་མ་ཡིན། ཟློས་པ་མ་ཡིན། བརྟགས་པ་མ་ཡིན། དོན་གསལ་བའི་ཡི་གེ་ཡོངས་སུ་བྱང་བ་སྟེ། ཅི་ནས་ཀྱང་འཁོར་ཡང་ དག་པར་དགའ་བ། སྣ་ཚོགས་པ། ཟབ་པ། ཟབ་པར་སྣང་བ། ཀུན་རྫོབ་དང་དོན་དམ་པས་བརྒྱན་པ། བདག་གི་སེམས་མཐོང་བའི་ཤེས་པ་ལ་རག་ལུས་པ། སངས་རྒྱས་ཀྱིས་གནང་ བ། སེམས་ཅན་ཐམས་ཅད་དགའ་བར་བྱེད་པ་སྟེ། དེ་ནི། བྱང་ཆུབ་སེམས་དཔའི་ངེས་བའི་ཚིག་སོ་སོ་ཡང་དག་པར་རིག་པ་ཞེས་བྱའོ། །དེ་ལ་བྱང་ཆུབ་སེམས་དཔའི་སྤོབས་པ་སོ་སོ་ ཡང་དག་པར་རིག་པ་གང་ཞེ་ན། གང་ཚིག་བཟང་བ་མི་གནས་པར་ལུང་བསྟན་པ། སྟོན་པ་རྒྱུན་མི་འཆད་པ། སྤོབས་པ་མྱུར་བ། སྤོབས་པ་མགྱོགས་ཤིང་མྱུར་བ། སྤོབས་པ་མི་རྨོངས་ པ། སྤོབས་པ་ཇི་ལྟར་དྲིས་པ་བཞིན་པ། སྤོབས་པ་ཡོངས་སུ་མ་ཉམས་པ། སྤོབས་པ་མི་འགལ་བ། སྤོབས་པ་རྩོད་པ་མེད་པ། སྤོབས་པ་ཆོས་ལ་རབ་ཏུ་དགའ་བ། སྤོབས་པ་བཟོད་པ་ ༄༅། །ལ་གནས་པ། སྤོབས་པ་ཟབ་པ། སྤོབས་པ་སྣ་ཚོགས་པ། ཀུན་རྫོབ་དང་དོན་དམ་པ་ལ་སྤོབས་པ། སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་ འགྲུས་དང༌། བསམ་གཏན་དང༌། ཤེས་རབ་ཐམས་ཅད་ལ་གནས་པའི་སྤོབས་པ། དྲན་པ་ཉེ་བར་གཞག་པ་དང༌། ཡང་དག་པར་སྤོང་བ་དང༌། རྫུ་འཕྲུལ་གྱི་རྐང་པ་དང༌། དབང་ པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། ལམ་དང༌། ཞི་གནས་དང༌། ལྷག་མཐོང་ལ་སྤོབས་པ། བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་ པར་འཇུག་པ་དང༌། བདེན་པ་ལ་འཇུག་པ་ཐམས་ཅད་ཤེས་པའི་སྤོབས་པ། ཐེག་པ་ཐམས་ཅད་ལ་སྤོབས་པ། སེམས་ཅན་ཐམས་ཅད་ཀྱི་སེམས་དང་སྤྱོད་པ་ལ་སྤོབས་པ། ཚིག་མི་ ལྐུག་པའི་སྤོབས་པ། ཚིག་མི་རྩུབ་པའི་སྤོབས་པ། ཚིག་མི་འཆལ་བའི་སྤོབས་པ། ཚིག་རྩུབ་མོ་མ་ཡིན་པའི་སྤོབས་པ། ཚིག་མཉེན་པའི་སྤོབས་པ་དང༌། ཚིག་དག་པ། ཚིག་ གྲོལ་བ། ཚིག་མ་ཆགས་པ། ཚིག་བཙུན་པ། ཚིག་འབྲེལ་པ། ཚིག་ལྡན་པ། ཚིག་མ་ཉམས་པ། ཚིག་སྙན་པ། ཚིག་འཇམ་པ། ཚིག་མ་སྨད་པ། ཚིག་འཕགས་པ་ཐམས་ ཅད་ཀྱིས་བསྟོད་པ་སྟེ། ཞིང་མཐའ་ཡས་པའི་རྣམ་པར་ཤེས་པའི་རྗེས་སུ་སོང་བའི་སྒྲ་ཚངས་པའི་སྒྲ་སྐད་ཀྱི་དབྱངས་དང་འདྲ་བ། རྟོགས་པར་བྱེད་པའི་སྒྲ་གཅིག་པ། སངས་རྒྱས་ ཀྱིས་གནང་བའི་སྤོབས་པས་སེམས་ཅན་གཞན་དང༌། གང་ཟག་གཞན་དག་ལ་ཆོས་སྟོན་ཏོ། །དེའི་ཆོས་བསྟན་པ་དེ་ཡང་འབྱུང་བར་བྱེད་པ། དེ་བྱེད་པའི་སྡུག་བསྔལ་ཡང་དག་པར་ ཟད་པར་འགྱུར་བ་སྟེ། དེ་ནི། བྱང་ཆུབ་སེམས་དཔའི་སྤོབས་པ་སོ་སོ་ཡང་དག་པར་རིག་པ་ཞེས་བྱའོ། །དེ་ནི། བྱང་ཆུབ་སེམས་དཔའི་སྤོབས་པ་ལ་མཁས་པ་སྟེ། དེ་ལྟར་ན། བྱང་ ཆུབ་སེམས་དཔའི་སྤོབས་པ་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ།། །།བམ་པོ་བཅོ་བརྒྱད་པ། དེ་ལ་བྱང་ཆུབ་སེམས་དཔའི་རྟོན་པ་ལ་མཁས་པ་གང་ཞེ་ན། བྱང་ ཆུབ་སེམས་དཔའ་རྣམས་ཀྱི་རྟོན་པ་འདི་བཞི་སྟེ། བཞི་གང་ཞེ་ན། འདི་ལྟ་སྟེ། དོན་ལ་རྟོན་གྱི་ཚིག་འབྲུ་ལ་མ་ཡིན་པ་དང༌། ཡེ་ཤེས་ལ་རྟོན་གྱི་རྣམ་པར་ཤེས་པ་ལ་མ་ཡིན་པ་དང༌། ངེས་པའི་དོན་གྱི་མདོ་སྡེ་རྣམས་ལ་རྟོན་གྱི་དྲང་བའི་དོན་རྣམས་ལ་མ་ཡིན་པ་དང༌། ཆོས་ཉིད་ལ་རྟོན་གྱི་གང་ཟག་ལ་མ་ཡིན་པའོ། །དེ་ལ་དོན་གང༌། ཚིག་འབྲུ་ནི། གང་ཞེ་ན། ཚིག་འབྲུ་ ཞེས་བྱ་བ་ནི། གང་འཇིག་རྟེན་གྱི་ཆོས་ཀྱི་བྱ་བ་ལ་འཇུག་པའོ། །དོན་ཞེས་བྱ་བ་ནི། གང་འཇིག་རྟེན་ལས་འདས་པའི་ཆོས་རྟོགས་པའོ། །ཚིག་འབྲུ་ཞེས་བྱ་བ་ནི། སྦྱིན་པ་དང༌། དུལ་བ་ དང༌། སྡོམ་པ་དང༌། ངེས་པ་བརྟན་པའོ། །དོན་ཞེས་བྱ་བ་ནི། དུལ་བ་དང༌། ཞི་གནས་དང༌། གསར་པ་མ་ཡིན་པ་དང༌། རྙིང་པ་མ་ཡིན་པར་ཤེས་པའོ། །ཚིག་འབྲུ་ཞེས་བྱ་བ་ནི། འཁོར་ ༄༅། །བ་ཡོངས་སུ་བཅད་པ་སྒྲོག་པའོ། །དོན་ཞེས་བྱ་བ་ནི། མི་དམིགས་པ་ལ་རྟོན་པའོ། །ཚིག་འབྲུ་ཞེས་བྱ་བ་ནི། མྱ་ངན་ལས་འདས་པའི་ཡོན་ཏན་ཡོངས་སུ་སྒྲོག་ པའོ། །དོན་ཞེས་བྱ་བ་ནི། ཆོས་རང་བཞིན་གྱིས་ཡོངས་སུ་མྱ་ངན་ལས་འདས་པ་རྣམས་ལ་རྣམ་པར་མི་རྟོག་པའོ། །ཚིག་འབྲུ་ཞེས་བྱ་བ་ནི། ཐེག་པ་ཇི་ལྟར་རྣམ་པར་བཞག་པ་ བཞིན་དུ་འཆད་པའོ། །དོན་ཞེས་བྱ་བ་ནི། ཆོས་ཚུལ་གཅིག་པར་རྟོགས་པར་ཤེས་པའོ། །ཚིག་འབྲུ་ཞེས་བྱ་བ་ནི། སེམས་ཅན་ཐམས་ཅད་མི་གཏོང་བར་བསྟན་པའོ། །དོན་ཞེས་བྱ་ བ་ནི། འཁོར་གསུམ་ཡོངས་སུ་དག་པའོ། །ཚིག་འབྲུ་ཞེས་བྱ་བ་ནི། ལུས་དང༌། ངག་དང༌། ཡིད་སྡོམ་ཞིང༌། བསླབ་པ་དང༌། སྦྱངས་པའི་ཡོན་ཏན་ཐམས་ཅད་ཡང་དག་པར་ ལེན་པར་བསྟན་པའོ། །དོན་ཞེས་བྱ་བ་ནི། ལུས་དང༌། ངག་དང༌། ཡིད་མི་དམིགས་ཤིང༌། མངོན་པར་འདུ་མི་བྱེད་པ་ཡོངས་སུ་དག་པའོ། །ཚིག་འབྲུ་ཞེས་བྱ་བ་ནི། གནོད་སེམས་ ཀྱི་ཐ་བ་དང༌། ཁྲོ་བ་དང༌། ང་རྒྱལ་དང༌། རྒྱགས་པ་དང༌། དྲེགས་པ་འཇོམས་ཤིང་བཟོད་པ་དང༌། ངེས་པ་བརྟན་པའོ། །དོན་ཞེས་བྱ་བ་ནི། མི་སྐྱེ་བའི་ཆོས་ལ་བཟོད་པ་ཐོབ་པའོ། །ཚིག་ འབྲུ་ཞེས་བྱ་བ་ནི། དགེ་བའི་རྩ་བ་ལ་བརྩོན་འགྲུས་རྩོམ་པ་ཐམས་ཅད་བསྟན་པའོ། །དོན་ཞེས་བྱ་བ་ནི། མི་ལེན་མི་གཏོང་བ་ལ་གནས་པའི་བརྩོན་འགྲུས་སོ། །ཚིག་འབྲུ་ཞེས་བྱ་བ་ ནི། བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང༌། སྙོམས་པར་འཇུག་པ་བསྟན་པའོ། །དོན་ཞེས་བྱ་བ་ནི། འགོག་པའི་སྙོམས་པར་འཇུག་པ་ཤེས་པའོ། །ཚིག་འབྲུ་ ཞེས་བྱ་བ་ནི། ཐོས་པ་ཐམས་ཅད་འཛིན་པ་ཤེས་རབ་ཀྱི་རྩ་བའོ། །དོན་ཞེས་བྱ་བ་ནི། བརྗོད་དུ་མེད་པའི་དོན་ཏོ། །ཚིག་འབྲུ་ཞེས་བྱ་བ་ནི། གང་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་ བདུན་གྱི་ཆོས་རྣམས་རབ་ཏུ་བསྟན་པའོ། །དོན་ཞེས་བྱ་བ་ནི། གང་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ཆོས་རྣམས་ནན་ཏན་དུ་བྱེད་པའི་འབྲས་བུ་མངོན་སུམ་དུ་བྱེད་པའོ།། ཚིག་འབྲུ་ཞེས་བྱ་བ་ནི། སྡུག་བསྔལ་བ་དང༌། ཀུན་འབྱུང་བ་དང༌། ལམ་རབ་ཏུ་བསྟན་པའོ། །དོན་ཞེས་བྱ་བ་ནི། འགོག་པ་མངོན་སུམ་དུ་བྱེད་པའོ། །ཚིག་འབྲུ་ཞེས་བྱ་བ་ནི། མ་རིག་ པ་ལ་སོགས་ཏེ་རྒ་ཤིའི་བར་དུ་བསྟན་པའོ། །དོན་ཞེས་བྱ་བ་ནི། མ་རིག་པ་འགོག་པ་ནས་རྒ་ཤིའི་བར་དུ་འགོག་པའོ། །ཚིག་འབྲུ་ཞེས་བྱ་བ་ནི། ཞི་གནས་དང༌། ལྷག་མཐོང་གི་ཚོགས་ བསྟན་པའོ། །དོན་ཞེས་བྱ་བ་ནི། རིག་པ་དང༌། རྣམ་པར་གྲོལ་བ་ཤེས་པའོ། །ཚིག་འབྲུ་ཞེས་བྱ་བ་ནི། གང་འདོད་ཆགས་དང༌། ཞེ་སྡང་དང༌། གཏི་མུག་དང༌། ཆ་མཉམ་པར་སྤྱོད་པ་ རྣམས་ལ་ཆོས་བསྟན་པའོ། །དོན་ཞེས་བྱ་བ་ནི། སེམས་ཀྱི་རྣམ་པར་གྲོལ་བ་མི་འཁྲུགས་པའོ། །ཚིག་འབྲུ་ཞེས་བྱ་བ་ནི། སྒྲིབ་པར་བྱེད་པའི་ཆོས་ཐམས་ཅད་རབ་ཏུ་བསྟན་པའོ། །དོན་ ༄༅། །ཞེས་བྱ་བ་ནི། སྒྲིབ་པ་མེད་པའི་ཡེ་ཤེས་རྣམ་པར་ཐར་པའོ། །ཚིག་འབྲུ་ཞེས་བྱ་བ་ནི། དཀོན་མཆོག་གསུམ་གྱི་ཡོན་ཏན་བསྔགས་པ་མཐའ་མེད་པ་ཡང་ དག་པར་རབ་ཏུ་བསྟན་པའོ། །དོན་ཞེས་བྱ་བ་ནི། གང་ཆོས་འདོད་ཆགས་མེད་པ་དང༌། འདུས་མ་བྱས་པའི་དགེ་འདུན་གྱི་ཡོན་ཏན་སྒྲུབ་པའོ། །ཚིག་འབྲུ་ཞེས་བྱ་བ་ནི། གང་བྱང་ཆུབ་ སེམས་དཔའི་ཐོག་མ་སེམས་བསྐྱེད་ནས་བྱང་ཆུབ་ཀྱི་སྙིང་པོའི་བར་དུ་བསླབ་པ་དང༌། ཡོན་ཏན་རྩོམ་པ་བསྟན་པའོ། །དོན་ཞེས་བྱ་བ་ནི། སེམས་ཀྱི་སྐད་ཅིག་གཅིག་དང་ལྡན་པས་ ཐམས་ཅད་མཁྱེན་པའི་ཡེ་ཤེས་མངོན་པར་རྫོགས་པར་བྱང་ཆུབ་པའོ། །མདོར་ན་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་བར་དུ་བསྟན་པ་དེ་ནི། ཚིག་འབྲུ་ཞེས་བྱའོ། །སྒྲ་དང༌། ཡི་གེ་ དང༌། ཚིག་འབྲུ་ཐམས་ཅད་བརྗོད་དུ་མེད་པའི་དོན་ཏོ། །དེ་ལ་དྲང་བའི་དོན་གྱི་མདོ་སྡེ་གང་ཞེ་ན། གང་ཚིག་འབྲུ་བཤད་པ་ཇི་ལྟར་བསྟན་པ་བཞིན་དུ་རྒྱ་ཆེར་ཁོང་དུ་ཆུད་པར་བྱ་སྟེ། འདི་དག་ནི། དྲང་བའི་དོན་གྱི་མདོ་སྡེ་དག་གོ །ངེས་པའི་དོན་གྱི་མདོ་སྡེ་གང་ཞེ་ན། དོན་གང་བཤད་པ་ཇི་ལྟར་བསྟན་པ་བཞིན་དུ་རྒྱ་ཆེར་ཁོང་དུ་ཆུད་པར་བྱ་སྟེ། དེ་དག་ནི། ངེས་པའི་ དོན་གྱི་མདོ་སྡེ་དག་གོ །ད་ཇི་ལྟར་ན། ཆོས་ལ་རྟོན་གྱི་གང་ཟག་ལ་མ་ཡིན་ཞེ་ན། གང་དྲང་བའི་དོན་དེ་ནི། གང་ཟག་གི་དོན་ཡིན་པས་དེ་ལ་མི་རྟོན་གྱི། གང་ངེས་པའི་དོན་དེ་ནི། ཆོས་ཉིད་ཇི་ལྟ་བ་བཞིན་པས་དེ་ལ་རྟོན་པ་སྟེ། འདི་དག་ནི། བྱང་ཆུབ་སེམས་དཔའི་རྟོན་པ་བཞིའོ། །དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྟོན་པ་ལ་མཁས་པ་ཤེས་ རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ལ་བྱང་ཆུབ་སེམས་དཔའ་རྣམས་ཀྱི་ཚིག་འབྲུ་ལ་མཁས་པ་གང་ཞེ་ན། འདི་ལ་བྱང་ཆུབ་སེམས་དཔའ་ཆོས་གཉིས་ལ་མཁས་པ་ཤེས་རབ་ཀྱི་ཕ་ རོལ་ཏུ་ཕྱིན་པ་ལ་སྤྱོད་དོ། །ཆོས་གཉིས་གང་ཞེ་ན། འདི་ལྟ་སྟེ། རྣམ་པར་ཤེས་པ་ལ་མཁས་པ་དང༌། ཡེ་ཤེས་ལ་མཁས་པ་ཡིན་ནོ། །དེ་ལ་རྣམ་པར་ཤེས་པ་གང༌། ཡེ་ཤེས་གང་ཞེ་ན། རྣམ་པར་ཤེས་པ་ཞེས་བྱ་བ་ནི། འདི་ལྟ་སྟེ། རྣམ་པར་ཤེས་པའི་གནས་པ་བཞིའོ། །བཞི་གང་ཞེ་ན། གཟུགས་ལ་ཞུགས་པའི་རྣམ་པར་ཤེས་པ་ཡོངས་སུ་གནས་ཤིང་གནས་པ་དང༌། ཚོར་བ་ལ་ཞུགས་པ་དང༌། འདུ་ཤེས་ལ་ཞུགས་པ་དང༌། འདུ་བྱེད་ལ་ཞུགས་པའི་རྣམ་པར་ཤེས་པ་ཡོངས་སུ་གནས་ཤིང་གནས་པ་སྟེ། དེ་ནི། རྣམ་པར་ཤེས་པ་ཞེས་བྱའོ། །དེ་ལ་ཡེ་ ཤེས་གང་ཞེ་ན། གང་ལེན་པའི་ཕུང་པོ་ལྔ་རྣམས་ལ་གནས་པ་རྣམ་པར་ཤེས་པའི་ཕུང་པོ་ཡོངས་སུ་ཤེས་པ་དེ་ནི། ཡེ་ཤེས་ཞེས་བྱའོ། །གང་སའི་ཁམས་རྣམས་པར་ཤེས་པ་དང༌། ཆུའི་ ཁམས་དང༌། མེའི་ཁམས་དང༌། རླུང་གི་ཁམས་རྣམ་པར་ཤེས་པ་དེ་ནི། རྣམ་པར་ཤེས་པ་ཞེས་བྱའོ། །གང་ཡང་ཡེ་ཤེས་ཁམས་བཞི་ལ་མི་གནས་པ། ཆོས་ཀྱི་དབྱིངས་ཐ་མི་དད་པར་ ༄༅། །ཤེས་པ་དེ་ནི། ཡེ་ཤེས་ཞེས་བྱའོ། །གཞན་ཡང་རྣམ་པར་ཤེས་པ་ཞེས་བྱ་བ་ནི། གང་མིག་གི་རྣམ་པར་ཤེས་པས་ཤེས་པར་བྱ་བའི་གཟུགས་རྣམས་ཤེས་ པ་དང༌། རྣ་བའི་རྣམ་པར་ཤེས་པས་ཤེས་པར་བྱ་བའི་སྒྲ་རྣམས་དང༌། སྣའི་རྣམ་པར་ཤེས་པས་ཤེས་པར་བྱ་བའི་དྲི་རྣམས་དང༌། ལྕེའི་རྣམ་པར་ཤེས་པས་ཤེས་པར་བྱ་བའི་རོ་ རྣམས་དང༌། ལུས་ཀྱི་རྣམ་པར་ཤེས་པས་ཤེས་པར་བྱ་བའི་རེག་རྣམས་དང༌། ཡིད་ཀྱི་རྣམ་པར་ཤེས་པས་ཤེས་པར་བྱ་བའི་ཆོས་རྣམས་ཤེས་པ་དེ་ནི། རྣམ་པར་ཤེས་པ་ཞེས་ བྱའོ། །གང་ཡང་ནང་གི་སྐྱེ་མཆེད་རྣམས་ལ་ཉེ་བར་ཞི་ཞིང༌། ཕྱི་རོལ་གྱི་སྐྱེ་མཆེད་རྣམས་ལ་རྒྱུ་བ་མེད་པས་ཡེ་ཤེས་ལ་རྟོན་པས་ཆོས་གང་ཡང་གཞོག་པར་མི་བྱེད་པ་དེ་ནི། ཡེ་ ཤེས་ཞེས་བྱའོ། །གཞན་ཡང་རྣམ་པར་ཤེས་པ་ཞེས་བྱ་བ་ནི། དམིགས་པ་ལས་རྣམ་པར་ཤེས་པ་སྐྱེ་བ་དང༌། ཡོངས་སུ་རྟོགས་པ་ལས་རྣམ་པར་ཤེས་པ་སྐྱེ་བ་སྟེ། དེ་ནི། རྣམ་ པར་ཤེས་པ་ཞེས་བྱའོ། །གང་ཡང་མི་འཛིན་པ། མི་སྙེམས་པ། མི་དམིགས་པ། རྣམ་པར་མི་རིག་པ། མི་འཁྲུག་པ་དེ་ནི། ཡེ་ཤེས་ཞེས་བྱའོ། །གཞན་ཡང་འདུས་བྱས་ལ་སྤྱོད་པའི་ ཆོས་རྣམས་ལ་རྣམ་པར་ཤེས་པ་ལ་གནས་ཀྱི། འདུས་མ་བྱས་ལ་རྣམ་པར་ཤེས་པ་རྒྱུ་བ་མེད་དོ། །གང་ཡང་འདུས་མ་བྱས་ཤེས་པ་དེ་ནི། ཡེ་ཤེས་སོ། །གཞན་ཡང་སྐྱེ་བ་དང༌། འཇིག་པ་ལ་གནས་པ་ནི། རྣམ་པར་ཤེས་པའོ། །གང་ཡང་མི་སྐྱེ་མི་འགག་མི་གནས་པ་དེ་ནི། ཡེ་ཤེས་ཞེས་བྱའོ། །དེ་ལ་ངེས་པའི་དོན་གྱི་མདོ་སྡེ་གང༌། དྲང་བའི་དོན་གྱི་མདོ་སྡེ་གང་ཞེ་ན། མདོ་སྡེ་གང་དག་ལམ་ལ་འཇུག་པར་བྱེད་པ་དེ་དག་ནི། དྲང་བའི་དོན་ཞེས་བྱའོ། །མདོ་སྡེ་གང་དག་འབྲས་བུ་ལ་འཇུག་པར་བྱེད་པ་དེ་དག་ནི། ངེས་པའི་དོན་ཞེས་བྱའོ། །མདོ་སྡེ་གང་དག་ ཀུན་རྫོབ་སྒྲུབ་པར་བྱེད་པ་དེ་དག་ནི། དྲང་བའི་དོན་ཞེས་བྱའོ། །མདོ་སྡེ་གང་དག་དོན་དམ་པ་བསྟན་པ་དེ་དག་ནི། ངེས་པའི་དོན་ཞེས་བྱའོ། །གཞན་ཡང་མདོ་སྡེ་གང་དག་ལས་ཀྱི་བྱ་བ་ལ་ འཇུག་པ་དེ་དག་ནི། དྲང་བའི་དོན་ཞེས་བྱའོ། མདོ་སྡེ་གང་དག་ལས་དང༌། ཉོན་མོངས་པ་ཟད་པར་བསྟན་པ་དེ་དག་ནི། ངེས་པའི་དོན་ཞེས་བྱའོ། །གཞན་ཡང་མདོ་སྡེ་གང་དག་ཀུན་ནས་ ཉོན་མོངས་པ་ཡོངས་སུ་བཤད་པའི་ཕྱིར་བསྟན་པ་དེ་དག་ནི། དྲང་བའི་དོན་ཏོ། །མདོ་སྡེ་གང་དག་རྣམ་པར་བྱང་བ་རྣམ་པར་དག་པའི་ཕྱིར་བསྟན་པ་དེ་དག་ནི། ངེས་པའི་དོན་ཏོ། །མདོ་ སྡེ་གང་དག་འཁོར་བས་སྐྱོ་བར་བྱེད་པ་དེ་དག་ནི། དྲང་བའི་དོན་ཏོ། །མདོ་སྡེ་གང་དག་འཁོར་བ་དང༌། མྱ་ངན་ལས་འདས་པ་གཉིས་སུ་མི་འཇུག་པ་དེ་དག་ནི། ངེས་པའི་དོན་ཏོ། །མདོ་ སྡེ་གང་དག་ཡི་གེ་དང༌། ཚིག་སྣ་ཚོགས་སུ་བསྟན་པ་དེ་དག་ནི། དྲང་བའི་དོན་ཏོ། །མདོ་སྡེ་གང་དག་ཟབ་པ། བལྟ་དཀའ་བ། རྟོགས་པར་དཀའ་བ་དེ་དག་ནི། ངེས་པའི་དོན་ཏོ། མདོ་སྡེ་ ༄༅། །གང་དག་ཚིག་འབྲུ་མང་བ། སེམས་ཅན་རྣམས་ཀྱི་སེམས་རངས་པར་བྱེད་པ་དེ་དག་ནི། དྲང་བའི་དོན་ཏོ། །མདོ་སྡེ་གང་དག་ཚིག་དང༌། ཚིག་འབྲུ་ཉུང་ལ་ངེས་ པར་རྟོགས་པར་བྱེད་པ་དེ་དག་ནི། ངེས་པའི་དོན་ཏོ། །གཞན་ཡང་མདོ་སྡེ་གང་དག་བདག་དང༌། སེམས་ཅན་དང༌། སྲོག་དང༌། སྐྱེས་བུ་དང༌། གང་ཟག་དང༌། ཤེད་བུ་དང༌། ཤེད་ལས་ སྐྱེས་དང༌། བྱེད་པ་པོ་དང༌། ཚོར་བ་པོའི་སྒྲ་སྣ་ཚོགས་བདག་པོ་མེད་པ་བདག་པོ་ཡོད་བཞིན་དུ་བསྟན་པ་དེ་དག་ནི། དྲང་བའི་དོན་ཏོ། །མདོ་སྡེ་གང་དག་སྟོང་པ་ཉིད་དང༌། མཚན་མ་མེད་ པ་དང༌། སྨོན་པ་མེད་པ་དང༌། མི་འབྱུང་བ་དང༌། མ་སྐྱེས་པ་དང༌། ཡང་དག་པར་མི་འབྱུང་བ་དང༌། སེམས་ཅན་མེད་པ་དང༌། གང་ཟག་མེད་པ་དང༌། དུས་གསུམ་ལས་རྣམ་པར་ཐར་ པའི་སྒོ་བསྟན་པ་དེ་དག་ནི། ངེས་པའི་དོན་ཞེས་བྱའོ། །དེ་ལ་ཆོས་གང༌། གང་ཟག་གང་ཞེ་ན། གང་ཟག་ཏུ་ལྟ་བ་ལ་གནས་ཏེ་ཆོས་ཁ་ཅིག་ལ་རྩོམ་པ་དེ་ནི། གང་ཟག་ཅེས་བྱའོ། ། གང་ཟག་ཏུ་ལྟ་བ་རྩོམ་པ་དེའི་གང་ཆོས་གནས་པ་ཆོས་ཀྱི་དབྱིངས་དེ་ནི། ཆོས་ཞས་བྱའོ། །གཞན་ཡང་གང་ཟག་ནི། སོ་སོའི་སྐྱེ་བོའི་གང་ཟག་དང༌། སོ་སོའི་སྐྱེ་བོའི་དགེ་བའི་གང་ ཟག་དང༌། དད་པའི་རྗེས་སུ་འབྲང་བའི་གང་ཟག་དང༌། ཆོས་ཀྱི་རྗེས་སུ་འབྲང་བའི་གང་ཟག་དང༌། བརྒྱད་པའི་གང་ཟག་དང༌། རྒྱུན་དུ་ཞུགས་པའི་གང་ཟག་དང༌། ལན་གཅིག་ཕྱིར་ འོང་བའི་གང་ཟག་དང༌། ཕྱིར་མི་འོང་བའི་གང་ཟག་དང༌། དགྲ་བཅོམ་པའི་གང་ཟག་དང༌། རང་སངས་རྒྱས་ཀྱི་གང་ཟག་དང༌། བྱང་ཆུབ་སེམས་དཔའི་གང་ཟག་དང༌། སྐྱེ་བོ་མང་ པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་ཐུགས་བརྩེ་བ་དང༌། ལྷ་དང་མིའི་སྐྱེ་བོ་ཕལ་པོ་ཆེའི་དོན་དང༌། ཕན་པ་དང་བདེ་བའི་ཕྱིར་གང་ཟག་གཅིག་འཇིག་རྟེན་ དུ་སྐྱེ་བ་འབྱུང་བར་འགྱུར་བ་འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏེ། གང་ཟག་གི་སྒྲ་དེ་ཐམས་ཅད་དེ་བཞིན་གཤེགས་པས་ཀུན་ རྫོབ་ཀྱི་གནས་ཀྱིས་སེམས་ཅན་རྣམས་གཟུང་བའི་ཕྱིར་བསྟན་པའོ། །དེ་ལ་གང་མངོན་པར་ཆགས་པ་དེ་དག་ནི། རྟོན་པ་མ་ཡིན་པ་ཞེས་བྱའོ། །དེ་དག་རྟོན་པ་ལ་དགོད་པའི་ཕྱིར་ཆོས་ ཉིད་ལ་རྟོན་པར་བྱའི། གང་ཟག་ལ་མ་ཡིན་ནོ། །ཞེས་བཅོམ་ལྡན་འདས་ཀྱིས་གསུངས་ཏེ། དེ་ལ་ཆོས་ཉིད་གང་ཞེ་ན། འདི་ལྟ་སྟེ། མི་འགྱུར་བ། སྒྲོ་མ་བཏགས་པ། མི་བྱེད་པ། རྣམ་ པར་མི་བྱེད་པ། མི་གནས་པ། གནས་པ་མེད་པ། རྩ་བ་མེད་པ། ཐམས་ཅད་དུ་མཉམ་པ། མཉམ་པ་ལ་མཉམ་པ། མི་མཉམ་པ་ལ་མཉམ་པ། མཉམ་པ་དང་མི་མཉམ་པ་ལ་ མཉམ་པ། རྣམ་པར་མི་རྟོག་པ། མི་རྩོམ་པ། ངེས་པར་གྱུར་པ་ཐོབ་པ། ཆོས་ཐམས་ཅད་ལ་ཤིན་ཏུ་ངོ་བོ་ཉིད་མེད་པའི་མཚན་ཉིད་དེ་ནི། ཆོས་ཉིད་ཅེས་བྱ་སྟེ། གང་དག་ཆོས་ཉིད་དེ་ལ་ ༄༅། །རྟོན་པར་བྱེད་པ་དེ་དག་ནི། ཁམས་གང་ལའང་རྟོན་པར་མི་བྱེད་དེ། དེ་བས་ན། ཆོས་ཀྱི་ཚུལ་གྱི་སྒོ་ལ་འཇུག་པ་འདིས་ཆོས་ཐམས་ཅད་ལ་རྟོན་པའི་ཕྱིར་ཆོས་ཐམས་ ཅད་དེ་ལྟ་བུའི་ཆོས་ཉིད་ཡིན་ནོ། །དེ་དག་ནི། བྱང་ཆུབ་སེམས་དཔའ་རྣམས་ཀྱི་རྟོན་པ་བཞི་ཞེས་བྱ་སྟེ། དེ་ནི། བྱང་ཆུབ་སེམས་དཔའི་རྟོན་པ་ལ་མཁས་པ་ཞེས་བྱའོ། །དེ་ལྟར་ན། བྱང་ ཆུབ་སེམས་དཔའ་རྟོན་པ་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ལ་བྱང་ཆུབ་སེམས་དཔའི་ཚོགས་ལ་མཁས་པ་གང་ཞེ་ན། བྱང་ཆུབ་སེམས་དཔའ་རྣམས་ཀྱི་ ཚོགས་ནི། འདི་གཉིས་ཏེ། གཉིས་གང་ཞེ་ན། འདི་ལྟ་སྟེ། བསོད་ནམས་ཀྱི་ཚོགས་དང༌། ཡེ་ཤེས་ཀྱི་ཚོགས་སོ། །དེ་ལ་བསོད་ནམས་ཀྱི་ཚོགས་གང་ཞེ་ན། སྦྱིན་པ་ལས་བྱུང་བའི་ བསོད་ནམས་བྱ་བའི་དངོས་པོ་དང༌། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་དང༌། བསྒོམས་པ་ལས་བྱུང་བའི་བསོད་ནམས་བྱ་བའི་དངོས་པོ་དང༌། བྱམས་པའི་ སེམས་ལ་སྙོམས་པར་འཇུག་པ་དང༌། སྙིང་རྗེའི་སྦྱོར་བ་དང༌། དགེ་བའི་རྩ་བ་ཐམས་ཅད་ལ་རྩོམ་པ་དང༌། བདག་དང་ཕ་རོལ་གྱི་སྡིག་པ་འཆགས་པ་དང༌། དུས་གསུམ་དུ་གཏོགས་ པའི་སེམས་ཅན་ཐམས་ཅད་དང༌། སློབ་པ་ཐམས་ཅད་དང༌། མི་སློབ་པ་ཐམས་ཅད་དང༌། རང་སངས་རྒྱས་ཐམས་ཅད་དང༌། སེམས་དང་པོ་བསྐྱེད་པ་རྣམས་དང༌། སྤྱོད་པ་ལ་ཞུགས་པ་ རྣམས་དང༌། ཕྱིར་མི་ལྡོག་པ་རྣམས་དང༌། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་ལ་རྗེས་སུ་ཡི་རང་བ་དང༌། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་དགེ་བ་ཐམས་ཅད་ཀྱི་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་དང༌། སངས་རྒྱས་ཐམས་ཅད་དང༌། འཕགས་ པ་ཐམས་ཅད་ལ་ཆོས་སྟོན་པར་གསོལ་བ་འདེབས་པ་དང་ལྡན་པའི་བསོད་ནམས་བྱ་བའི་དངོས་པོ་དང༌། དགེ་བ་ཐམས་ཅད་བྱང་ཆུབ་ཏུ་བསྔོ་བ་དང་ལྡན་པའི་བསོད་ནམས་བྱ་བའི་དངོས་ པོ་དང༌། སེམས་ཅན་བྱང་ཆུབ་ཏུ་སེམས་མ་བསྐྱེད་པ་རྣམས་བྱང་ཆུབ་ཏུ་སེམས་བསྐྱེད་པ་དང༌། བྱང་ཆུབ་ཏུ་སེམས་བསྐྱེད་པ་རྣམས་ལ་ཕ་རོལ་ཏུ་ཕྱིན་པའི་ལམ་སྟོན་པ་དང༌། དབུལ་པོ་ རྣམས་ལ་ལོངས་སྤྱོད་ཀྱིས་སྡུད་པ་དང༌། ནད་པ་རྣམས་ལ་སྨན་སྦྱིན་པ་དང༌། གུས་པར་བསྙེན་བཀུར་བྱེད་པ་དང༌། མཐུ་ཆུང་བ་རྣམས་ལ་བཟོད་ཅིང་དང་དུ་ལེན་པ་དང༌། ལྟུང་བ་རྣམས་མི་ འཆབ་པ་དང༌། སྡིག་པ་འཆགས་པ་དང༌། སངས་རྒྱས་བཅོམ་ལྡན་འདས་རྣམས་བཞུགས་པ་དང༌། ཡོངས་སུ་མྱ་ངན་ལས་འདས་པ་རྣམས་ལ་བསྙེན་བཀུར་དང་རི་མོ་ཐམས་ཅད་བྱེད་པ་ དང༌། སློབ་དཔོན་དང་མཁན་པོ་རྣམས་ལ་སྟོན་པ་བཞིན་དུ་རི་མོ་བྱེད་པ་དང༌། ཆོས་ལ་རིན་པོ་ཆེ་རིན་ཐང་མེད་པ་བཞིན་དུ་ཡོངས་སུ་ཚོལ་བའི་བརྩོན་འགྲུས་དང༌། ཆོས་སྨྲ་བ་ལ་དགའ་ཞིང་ ༄༅། །དཔག་ཚད་བརྒྱར་ཡང་སོང་སྟེ་ཆོས་ཉན་པས་ཆོག་མི་ཤེས་པ་དང༌། ཟང་ཟིང་མེད་པར་ཆོས་འཆད་པ་དང༌། ཕ་དང་མ་ལ་རིམ་གྲོ་བྱེད་པ་དང༌། བྱས་པ་གཟོ་བ་ དང༌། བྱས་པ་ཤེས་པ་དང༌། འགྱོད་པ་མེད་པ་དང༌། བསོད་ནམས་བསགས་པས་ཆོག་མི་ཤེས་པ་དང༌། ལུས་བསྡམས་ཤིང་ཚུལ་འཆོས་པ་མེད་པ་དང༌། ངག་བསྡམས་པའི་ངག་ལ་ ཚུལ་འཆོས་པ་མེད་པ་དང༌། ཡིད་བསྡམས་པའི་ཡིད་ལ་ཚུལ་འཆོས་པ་མེད་པ་དང༌། དེ་བཞིན་གཤེགས་པའི་མཆོད་རྟེན་བཙུགས་པའི་ཕྱིར་ཚངས་པའི་བསོད་ནམས་ཡོངས་སུ་འཛིན་ པ་དང༌། མཆོད་སྦྱིན་གཏན་པ་མེད་པ་བསགས་པས་མཚན་ཡོངས་སུ་རྫོགས་པ་དང༌། དགེ་བའི་རྩ་བའི་ཚོགས་སྣ་ཚོགས་བསགས་པས་དཔེ་བྱད་བཟང་པོ་ཡོངས་སུ་རྫོགས་པ་དང༌། ང་རྒྱལ་མེད་པས་ལུས་བརྒྱན་པ་དང༌། ངག་གི་ཉེས་པ་ཐམས་ཅད་སྤངས་པས་དག་བརྒྱན་པ་དང༌། བློ་ཐོགས་པ་མེད་པས་སེམས་བརྒྱན་པ་དང༌། མངོན་པར་ཤེས་པ་སྤྲུལ་པས་ སངས་རྒྱས་ཀྱི་ཞིང་གི་རྒྱན་དང༌། ཡེ་ཤེས་ཡོངས་སུ་དག་པས་ཆོས་ཀྱི་མཚན་ཉིད་ཀྱི་རྒྱན་དང༌། ཕྲ་མ་དང༌། ཞེ་གཅོད་པ་དང༌། དབྱེ་བའི་ཚིག་ཡོངས་སུ་སྤངས་པས་འཁོར་མང་པོའི་ རྒྱན་དང༌། ཆོས་འཛིན་པས་འདོད་ཆགས་མེད་པའི་ཆོས་ཀྱི་རྒྱན་དང༌། རབ་ཏུ་དགའ་ནས་ལེགས་སོ། །ཞེས་བྱ་བ་བྱིན་ནས་ཆོས་ཀྱི་གཏམ་མི་འཇིགས་པར་བྱེད་པ་དང༌། སྒྲིབ་པ་དང་ ཆོད་པ་རྣམ་པར་སྤངས་ཤིང་གུས་པར་ཆོས་ཉན་པས་འབྲས་བུ་ཡོད་པར་ཆོས་འཆད་པ་དང༌། སངས་རྒྱས་རྣམས་ལ་དཀའ་ཐུབ་ཀྱི་ནགས་ཚལ་ཕུལ་བས་བྱང་ཆུབ་ཀྱི་ཞིང་གི་རྒྱན་དང༌། དགེ་བའི་རྩ་བ་ཐམས་ཅད་སྔོན་དུ་འགྲོ་ཞིང་བྱང་ཆུབ་ཀྱི་སེམས་མི་གཏོང་བས་བྱང་ཆུབ་ཀྱི་སྙིང་པོའི་རྒྱན་དང༌། ལས་དང་ཉོན་མོངས་པ་མི་དམིགས་པས་ཚེ་དང་ཤི་འཕོ་ཡོངས་སུ་ དག་པ་དང༌། རིན་པོ་ཆེ་ཕངས་པའི་དངོས་པོ་ཐམས་ཅད་ཡོངས་སུ་གཏོང་བས་ལག་ན་རིན་པོ་ཆེ་དང༌། མི་ཟད་པའི་སྨོན་ལམ་ཐོབ་པས་ལོངས་སྤྱོད་མི་ཟད་པ་དང༌། ཁྲོ་གཉེར་མེད་པས་ མཐོང་མ་ཐག་ཏུ་སེམས་ཅན་རྣམས་དད་ཅིང་བཞིན་འཛུམ་པས་གསོང་པོར་སྨྲ་བ་དང༌། སེམས་ཅན་ཐམས་ཅད་ལ་འོད་ཟེར་སྙོམས་པས་མཉམ་པ་ཉིད་ཀྱི་རྒྱན་ཐོབ་པ་དང༌། མ་ལོབས་ པ་ལ་མི་བརྙས་པས་འོད་མང་པོ་གཏོང་བ་དང༌། ཚུལ་ཁྲིམས་ཀྱི་བསོད་ནམས་བསགས་པས་སྐྱེ་བ་ཡོངས་སུ་དག་པ་དང༌། ལྟུང་བ་ལ་མི་རྩོད་པས་མངལ་ཡོངས་སུ་དག་པ་དང༌། དགེ་ བ་བཅུའི་ལས་ཡོངས་སུ་དག་པས་ལྷ་དང་མིར་སྐྱེ་བ་དང༌། རྗེས་སུ་བསྟན་པ་ཐམས་ཅད་ལ་རབ་ཏུ་རྟོག་པས་གདོན་མི་ཟ་བར་ནོད་པ་དང༌། ཆོས་ལ་སློབ་དཔོན་གྱི་དཔེ་མཁྱུད་མེད་པས་ ཆོས་ཀྱི་དབང་ཕྱུག་དང༌། ལྷག་པའི་བསམ་པ་ཡོངས་སུ་དག་པས་འཇིག་རྟེན་ཐམས་ཅད་ལ་མངོན་སུམ་པ་དང༌། ཉི་ཚེ་བའི་སྤྱོད་པ་མི་འདོད་པས་རྒྱ་ཆེན་པོའི་ཆོས་ལ་དད་པ་དང༌། ༄༅། །ཐམས་ཅད་མཁྱེན་པའི་སེམས་མི་འདོར་བས་བསོད་ནམས་ཐམས་ཅད་ཡོངས་སུ་འཛིན་པ་དང༌། དད་པ་སྔོན་དུ་འགྲོ་བས་ནོར་བདུན་ཡོངས་སུ་རྫོགས་པ་དང༌། སྔོན་དམ་བཅས་པ་ཉམས་སུ་ལོན་པར་བྱེད་པས་འཇིག་རྟེན་ཐམས་ཅད་མི་སླུ་བ་དང༌། དགེ་བའི་ཆོས་ཡོངས་སུ་རྫོགས་པས་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པ་ སྟེ༑ དེ་ནི། བྱང་ཆུབ་སེམས་དཔའི་བསོད་ནམས་ཀྱི་ཚོགས་ལ་མཁས་པ་ཞེས་བྱའོ། །དེ་ལ་བྱང་ཆུབ་སེམས་དཔའི་ཡེ་ཤེས་ཀྱི་ཚོགས་ལ་མཁས་པ་གང་ཞེ་ན། རྒྱུ་གང་གིས་ཡེ་ཤེས་ སྐྱེ་བ་སྟེ། དེ་ལྟར་རྒྱུ་དང༌། རྐྱེན་གང་དང་གང་གིས་ཡེ་ཤེས་རྟོགས་པའོ། །དེ་ལ་རྒྱུ་གང༌། རྐྱེན་གང་ཞེ་ན། ཆོས་ཚོལ་བ་ལ་རབ་ཏུ་འདུན་པ་དང༌། ཡེ་ཤེས་ཀྱི་རྗེས་སུ་སོང་བའི་བཤེས་ གཉེན་བསྟེན་པ་དང༌། སངས་རྒྱས་ཀྱི་ཡེ་ཤེས་ལ་རྟོན་གྱི། ཉན་ཐོས་དང་རང་སངས་རྒྱས་ཀྱི་ཡེ་ཤེས་ལ་མི་རྟོན་པ་དང༌། དེ་དག་ལ་ང་རྒྱལ་མི་བྱེད་པ་དང༌། བླ་མ་ལ་དགའ་བ་དང༌། སྟོན་པ་ལ་དགའ་བ་དང༌། དེའི་དགེ་བའི་བཤེས་གཉེན་དེ་དག་གིས་འདི་ནི། བསམ་པ་དང་ལྡན་པར་ཤེས་ནས་ཡེ་ཤེས་ཀྱི་གཏམ་གང་ཡང་མི་སྟོན་པ་མེད་པ་དང༌། སྣོད་དུ་ཤེས་ནས་ བར་ཆད་མེད་པར་སེམས་རྩེ་གཅིག་ཏུ་ཆོས་སྟོན་པ་དང༌། དེས་ཆོས་དེ་ཐོས་ནས་ཆོས་ཀྱི་ཚོགས་ལ་བརྩོན་པར་བྱེད་དེ། གང་ཆོས་ཀྱི་ཚོགས་ལ་བརྩོན་པར་བྱེད་པ་དེ་ཉིད་དེའི་ཡེ་ཤེས་ ཀྱི་ཚོགས་ལ་བརྩོན་པ་ཡིན་ནོ། །དེ་ལ་ཆོས་ཀྱི་ཚོགས་ལ་བརྩོན་པ་གང་ཞེ་ན། འདི་ལྟ་སྟེ། དོན་ཉུང་བ་དང༌། བྱ་བ་ཉུང་བ་དང༌། སྒྲ་ཉུང་བ་དང༌། སྲོད་དང་ཐོ་རངས་ལ་མི་ཉལ་ཞིང་རྣལ་ འབྱོར་ལ་བརྩོན་པ་དང༌། འབྲེལ་བའི་དོན་ལ་ཡོངས་སུ་རྟོག་པ་དང༌། ཕྱིར་ཞིང་ཡོངས་སུ་ཚོལ་བ་དང༌། སེམས་ལ་རྙོག་པ་མེད་པ་དང༌། སྒྲིབ་པ་གནོན་པ་དང༌། ལྟུང་བ་ལས་འབྱུང་བར་ ཤེས་པ་དང༌། འགྱོད་པ་མེད་པ་དང༌། ཀུན་ནས་ལྡང་བ་མེད་པ་དང༌། ནན་ཏན་སྙིང་པོར་བྱེད་པ་དང༌། ཆོས་ལ་གཞོལ་བ་དང༌། ཆོས་ལ་འབབ་པ་དང༌། ཆོས་ལ་བབ་པ་དང༌། ཆོས་ལ་ རྟུལ་བ་དང༌། རྟག་པར་མགོ་དང་གོས་ལ་མེ་འབར་བ་ལྟ་བུ་དང༌། ཡེ་ཤེས་ཚོལ་བ་དེ་ཉིད་ལ་གནས་པ་དང༌། མི་ལྷོད་པ་དང༌། བརྩོན་འགྲུས་མི་གཏོང་བ་དང༌། ཁྱད་པར་དུ་འགྲོ་བ་དང༌། འདུ་འཛི་ལས་དབེན་པ་དང༌། གཅིག་པུར་དགའ་བ་དང༌། དགོན་པའི་བདེ་བ་ཡིད་ལ་བྱེད་པ་དང༌། འཕགས་པའི་རིགས་ལ་དགའ་བ་དང༌། སྦྱངས་པ་ལས་མི་འགྱུར་བ་དང༌། ཆོས་ ཀྱི་ཀུན་དགའ་ལ་དགའ་ཞིང་མོས་པ་དང༌། འཇིག་རྟེན་རྒྱང་ཕན་པའི་གསང་ཚིག་ལ་རི་མོར་མི་བྱེད་པ་དང༌། འཇིག་རྟེན་ལས་འོངས་པའི་ཆོས་ཚོལ་བ་ལ་དྲན་པ་མི་ཉམས་པ་དང༌། རྟོགས་པ་ལ་དོན་རྟོགས་པའི་རྗེས་སུ་འགྲོ་བ་དང༌། བློ་གྲོས་ལ་ལམ་གྱི་རྗེས་སུ་མཐུན་པར་བྱེད་པ་དང༌། མོས་པ་ལ་སྡོམ་པ་དང༌། རྐྱེན་ལ་ཡེ་ཤེས་ཀྱི་རྗེས་སུ་རིག་པ་དང༌། ཁྲེལ་ཡོད་ ༄༅། །པ་དང༌། ངོ་ཚ་ཤེས་པའི་རྒྱན་དང༌། སངས་རྒྱས་ཀྱི་འགྲོས་ཀྱི་རྗེས་སུ་འགྲོ་བ་དང༌། མི་ཤེས་པ་སེལ་བ་དང༌། མ་རིག་པ་དང༌། གཏི་མུག་གི་ལིང་ཏོག་སེལ་ བ་དང༌། ཤེས་རབ་ཀྱི་མིག་རྣམ་པར་དག་པ་དང༌། རབ་ཏུ་རྣམ་པར་དག་པ་དང༌། བློ་རྒྱ་ཆེ་བ་དང༌། བློ་མ་ཞུམ་པ་དང༌། བློ་རབ་ཏུ་ཐ་དད་པ་དང༌། མངོན་སུམ་དུ་ཤེས་པ་དང༌། གཞན་ ལ་རག་མ་ལུས་པའི་ཡོན་ཏན་དང༌། རང་གི་ཡོན་ཏན་གྱིས་མི་སྙེམས་པ་དང༌། ཕ་རོལ་གྱི་ཡོན་ཏན་ལ་རྟོག་པ་དང༌། ལེགས་པར་བྱ་བའི་ལས་བྱེད་པ་དང༌། ལས་ཀྱི་རྣམ་པར་ སྨིན་པ་ལ་མི་འགལ་བར་བྱེད་པ་དང༌། ལས་ཡོངས་སུ་དག་པར་བྱེད་པ་སྟེ། དེ་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་ཡེ་ཤེས་ཀྱི་ཚོགས་ཞེས་བྱའོ། །གཞན་ཡང་ ཡེ་ཤེས་ཀྱི་ཚོགས་ནི། སྦྱིན་པ་བཞི་སྟེ། ཆོས་སྨྲ་བ་ལ་འགྲོ་བ་དང༌། སྨྱུ་གུ་དང༌། སྣག་ཚ་དང༌། གླེགས་བམ་སྦྱིན་པ་དང༌། ཆོས་སྨྲ་བ་ལ་ཆོས་ཀྱི་སྟན་སྣ་ཚོགས་སྦྱིན་པ་དང༌། ཆོས་སྨྲ་བ་ལ་རྙེད་པ་དང༌། བཀུར་སྟི་དང༌། ཚིགས་སུ་བཅད་པ་ཐམས་ཅད་སྦྱིན་པ་དང༌། ཆོས་སྨྲ་བ་ལ་ཆོས་ཀུན་བསྡུ་བའི་ཕྱིར་གཡོ་མེད་པར་ལེགས་སོ། །ཞེས་བྱ་བ་སྦྱིན་པ་ སྟེ༑ སྦྱིན་པ་བཞི་པོ་དེ་དག་ནི། ཡེ་ཤེས་ཀྱི་ཚོགས་གསོག་པར་འགྱུར་རོ། །ཀུན་སྲུང་བ་བཞི་པོ་རྣམས་ཡེ་ཤེས་ཀྱི་ཚོགས་གསོག་པར་འགྱུར་ཏེ། བཞི་གང་ཞེ་ན། ཆོས་སྨྲ་བ་རྣམས་ ཀྱི་ལུས་ཡོངས་སུ་སྲུང་བ་དང༌། དགེ་བ་སྲུང་བ་དང༌། ཡུལ་དང་ལྗོངས་སུ་འཇུག་པ་ལ་ཡོངས་སུ་སྲུང་བ་དང༌། ཕན་པའི་དངོས་པོ་ཡོངས་སུ་སྲུང་བ་སྟེ། ཀུན་སྲུང་བ་ནི། བཞི་པོ་དེ་དག་གོ །ཉེ་ བར་རྟོན་པ་བཞི་ཡེ་ཤེས་ཀྱི་ཚོགས་སུ་འགྱུར་ཏེ། བཞི་གང་ཞེ་ན། ཆོས་སྨྲ་བ་རྣམས་ཀྱི་ཆོས་ཉེ་བར་རྟོན་པ་དང༌། ཡེ་ཤེས་ཉེ་བར་རྟོན་པ་དང༌། ཟང་ཟིང་ཉེ་བར་རྟོན་པ་དང༌། བྱང་ཆུབ་ཉེ་ བར་རྟོན་པའོ། །སྟོབས་ལྔ་ཡེ་ཤེས་ཀྱི་ཚོགས་སུ་འགྱུར་ཏེ། ལྔ་གང་ཞེ་ན། འདི་ལྟ་སྟེ། མོས་པའི་ཕྱིར་དད་པའི་སྟོབས་དང༌། ཐོས་པ་ཚོལ་བའི་ཕྱིར་བརྩོན་འགྲུས་ཀྱི་སྟོབས་དང༌། བྱང་ཆུབ་ཀྱི་སེམས་མི་བརྗེད་པའི་ཕྱིར་དྲན་པའི་སྟོབས་དང༌། ཉམ་པ་ཉིད་ཀྱི་ཆོས་ལ་ངེས་པར་རྟོག་པའི་ཕྱིར་ཏིང་ངེ་འཛིན་གྱི་སྟོབས་དང༌། ཐོས་པའི་སྟོབས་ཀྱི་ཕྱིར་ཤེས་རབ་ཀྱི་ སྟོབས་ཏེ། སྟོབས་ལྔ་པོ་དེ་དག་ཡེ་ཤེས་ཀྱི་ཚོགས་སུ་འགྱུར་རོ། །ཚུལ་ཁྲིམས་བཞི་ཡེ་ཤེས་ཀྱི་ཚོགས་གསོག་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ཆོས་ལ་ངེས་པའི་ཚུལ་ ཁྲིམས་དང༌། ཆོས་ཚོལ་བའི་ཚུལ་ཁྲིམས་དང༌། ཆོས་ལ་ངེས་པར་རྟོག་པའི་ཚུལ་ཁྲིམས་དང༌། བྱང་ཆུབ་ཏུ་བསྔོ་བའི་ཚུལ་ཁྲིམས་ཏེ། ཚུལ་ཁྲིམས་བཞི་པོ་དེ་དག་ཡེ་ཤེས་ཀྱི་ ཚོགས་གསོག་པར་འགྱུར་རོ། །བཟོད་པ་བཞི་ཡེ་ཤེས་ཀྱི་ཚོགས་གསོག་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ཆོས་ཚོལ་བ་ལ་མངོན་པར་བརྩོན་པས་ངན་དུ་སྨྲ་བ་དང༌། ༄༅། །ངན་དུ་བརྗོད་པའི་ཚིག་རྣམས་བཟོད་པ་དང༌། ཆོས་ཚོལ་བ་ལ་མངོན་པར་བརྩོན་པས་རླུང་དང༌། ཚ་བ་དང༌། གྲང་བ་དང༌། དྲོ་བ་དང༌། སྐོམ་པ་དང༌། བཀྲེས་པ་ བཟོད་པ་དང༌། ཆོས་ཚོལ་བ་ལ་མངོན་པར་བརྩོན་པས་སློབ་དཔོན་དང༌། མཁན་པོའི་རྗེས་སུ་འཇུག་པ་དང༌། ཆོས་ཚོལ་བ་ལ་མངོན་པར་བརྩོན་པས་སྟོང་པ་ཉིད་དང༌། མཚན་མ་མེད་ པ་དང༌། སྨོན་པ་མེད་པའི་ཆོས་བཟོད་པ་སྟེ། བཟོད་པ་བཞི་པོ་དེ་དག་ཡེ་ཤེས་ཀྱི་ཚོགས་གསོག་པར་འགྱུར་རོ། །བརྩོན་འགྲུས་བཞི་ཡེ་ཤེས་ཀྱི་ཚོགས་གསོག་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ཐོས་པའི་བརྩོན་འགྲུས་དང༌། གཟུངས་ཀྱི་བརྩོན་འགྲུས་དང༌། བརྟན་པའི་བརྩོན་འགྲུས་དང༌། ནན་ཏན་གྱི་བརྩོན་འགྲུས་ཏེ། བརྩོན་འགྲུས་ བཞི་པོ་དེ་དག་ཡེ་ཤེས་ཀྱི་ཚོགས་གསོག་པར་འགྱུར་རོ། །བསམ་གཏན་གྱི་ཡན་ལག་བཞི་ཡེ་ཤེས་ཀྱི་ཚོགས་གསོག་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། དབེན་པ་ དང༌། གཅིག་པུར་དགའ་བ་དང༌། ཡེ་ཤེས་དང༌། མངོན་པར་ཤེས་པ་ཚོལ་བ་དང༌། སངས་རྒྱས་ཀྱི་ཡེ་ཤེས་ལ་འཇུག་པ་སྟེ། བསམ་གཏན་གྱི་ཡན་ལག་བཞི་པོ་དེ་དག་ཡེ་ཤེས་ ཀྱི་ཚོགས་གསོག་པར་འགྱུར་རོ། །ཤེས་རབ་སྣང་བའི་ཆོས་འདི་བཞི་ཡེ་ཤེས་ཀྱི་ཚོགས་གསོག་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ཆད་པ་ལ་མི་གནས་པ་དང༌། རྟག་པ་ལ་མི་འཇུག་པ་དང༌། རྟེན་ཅིང་འབྲེལ་བར་འབྱུང་བ་དང་མི་འགལ་བ་དང༌། བདག་མེད་པ་ལ་མོས་པ་སྟེ། ཤེས་རབ་སྣང་བའི་ཆོས་བཞི་པོ་དེ་དག་ཡེ་ཤེས་ཀྱི་ཚོགས་གསོག་པར་ འགྱུར་རོ། །ཆོས་འདི་བཞི་ཐབས་ཀྱི་ཡེ་ཤེས་ཀྱི་ཚོགས་སུ་འགྱུར་ཏེ། བཞི་གང་ཞེ་ན། འདི་ལྟ་སྟེ། འཇིག་རྟེན་པའི་རྗེས་སུ་འཇུག་པ་དང༌། མདོ་སྡེའི་རྗེས་སུ་འཇུག་པ་དང༌། ཆོས་ཀྱི་རྗེས་སུ་ འཇུག་པ་དང༌། ཡེ་ཤེས་ཀྱི་རྗེས་སུ་འཇུག་པ་སྟེ། ཆོས་བཞི་པོ་དེ་དག་ཐབས་ཀྱི་ཡེ་ཤེས་ཀྱི་ཚོགས་སུ་འགྱུར་རོ། །ཆོས་འདི་བཞི་ལམ་གྱི་ཚོགས་ཀྱི་ཡེ་ཤེས་ལ་འཇུག་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ཕ་རོལ་ཏུ་ཕྱིན་པའི་ལམ་དང༌། བྱང་ཆུབ་ཀྱི་ཕྱོགས་ཀྱི་ལམ་དང༌། ཡན་ལག་བརྒྱད་པའི་ལམ་དང༌། ཐམས་ཅད་མཁྱེན་པའི་ཡེ་ཤེས་སུ་འགྲོ་བའི་ལམ་སྟེ། ཆོས་བཞི་པོ་དེ་དག་ལམ་གྱི་ཚོགས་ཀྱི་ཡེ་ཤེས་ལ་འཇུག་པར་འགྱུར་རོ། །མི་ངོམས་པ་འདི་བཞི་ཡེ་ཤེས་ཀྱི་ཚོགས་གསོག་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། ཐོས་པས་མི་ ངོམས་པ་དང༌། བསྟན་པས་མི་ངོམས་པ་དང༌། དཔྱོད་པས་མི་ངོམས་པ་དང༌། ཡེ་ཤེས་ཀྱིས་མི་ངོམས་པ་སྟེ། མི་ངོམས་པ་བཞི་པོ་དེ་དག་ཡེ་ཤེས་ཀྱི་ཚོགས་གསོག་པར་འགྱུར་རོ། །གཞན་ ཡང་ཡེ་ཤེས་ཀྱི་ཚོགས་ནི། གང་སེམས་ཅན་ཐམས་ཅད་ཀྱི་རྗེས་སུ་འགྲོ་བ་དང༌། ཞིང་ཐམས་ཅད་ཀྱི་རྗེས་སུ་འགྲོ་བ་སྟེ། སྦྱིན་པ་ལས་ཀྱང་ཡེ་ཤེས་ཀྱི་ཚོགས་སུ་བལྟའོ། །ཚུལ་ཁྲིམས་དང༌། ༄༅། །བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་དང༌། བྱམས་པ་དང་སྙིང་རྗེ་དང༌། འགའ་བ་དང༌། བཏང་སྙོམས་ལས་ཀྱང་ཡེ་ཤེས་ཀྱི་ ཚོགས་སུ་བལྟའོ། །དེ་ཅིའི་ཕྱིར་ཞེ་ན། ཇི་ཙམ་དུ་བྱང་ཆུབ་སེམས་དཔའི་རྩོམ་པ་དེ་ཐམས་ཅད་ཡེ་ཤེས་ཀྱི་ཁར་ལས་པ་ཡེ་ཤེས་སྔོན་དུ་འགྲོ་བ་ཡེ་ཤེས་ལ་རྟོན་པ་སྟེ། དེ་ཡེ་ཤེས་ ལ་གནས་པས་ཡེ་ཤེས་ཅན་ཐམས་ཅད་ཀྱི་རྟོན་པར་འགྱུར་ཏེ། བདུད་ཐམས་ཅད་ཀྱིས་ཀྱང་དེ་ལ་གླགས་མི་རྙེད་དོ། །སངས་རྒྱས་ཀྱི་བྱིན་གྱི་རླབས་ཀྱང་འཐོབ། ཐམས་ཅད་མཁྱེན་ པའི་ཡེ་ཤེས་ལ་ཡང་གཞོག་པར་བྱེད་དོ། །དེ་གཉིས་ནི། བྱང་ཆུབ་སེམས་དཔའི་བསོད་ནམས་ཀྱི་ཚོགས་དང༌། ཡེ་ཤེས་ཀྱི་ཚོགས་ཏེ། བྱང་ཆུབ་སེམས་དཔའ་སེམས་དཔའ་ཆེན་ པོ་ཚོགས་རྣམ་པ་དེ་གཉིས་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ལ་བྱང་ཆུབ་སེམས་དཔའ་རྣམས་ཀྱི་དྲན་པ་ཉེ་བར་གཞག་པ་ལ་མཁས་པ་གང་ཞེ་ན། འདི་བཞི་ནི། བྱང་ཆུབ་སེམས་དཔའ་རྣམས་ཀྱི་དྲན་པ་ཉེ་བར་གཞག་པ་སྒོམ་པ་སྟེ། བཞི་གང་ཞེ་ན། འདི་ལྟ་སྟེ། ལུས་ལ་ལུས་ཀྱི་རྗེས་སུ་ལྟ་བ་དྲན་པ་ཉེ་བར་གཞག་པ་སྒོམ་ པ་དང༌། ཚོར་བ་ལ་ཚོར་བའི་རྗེས་སུ་ལྟ་བ་དྲན་པ་ཉེ་བར་གཞག་པ་སྒོམ་པ་དང༌། སེམས་ལ་སེམས་ཀྱི་རྗེས་སུ་ལྟ་བ་དྲན་པ་ཉེ་བར་གཞག་པ་སྒོམ་པ་དང༌། ཆོས་ལ་ཆོས་ཀྱི་རྗེས་སུ་ ལྟ་བ་དྲན་པ་ཉེ་བར་གཞག་པ་སྒོམ་པའོ། །དེ་ལ་ལུས་ལ་ལུས་ཀྱི་རྗེས་སུ་ལྟ་བ་དྲན་པ་ཉེ་བར་གཞག་པ་སྒོམ་པ་གང་ཞེ་ན། ཤཱ་རིའི་བུ། འདི་ལ་བྱང་ཆུབ་སེམས་དཔའི་ལུས་ལ་ལུས་ཀྱིས་ རྗེས་སུ་ལྟ་ཞིང་གནས་པ་དེ་ལུས་ཀྱི་སྔོན་གྱི་མཐར་ལ་ཡང་སོ་སོར་རྟོག །ལུས་ཀྱི་ཕྱི་མའི་མཐའ་ལ་ཡང་སོ་སོར་རྟོག །ལུས་ཀྱི་ད་ལྟར་བྱང་བ་ལ་ཡང་སོ་སོར་རྟོག་སྟེ། ཀྱེ་མའོ་ལུས་འདི་ནི། ཕྱི་ཅི་ལོག་ལས་བྱང་བ་སྟེ། རྒྱུ་དང་རྐྱེན་ལས་སྐྱེས་པ་གཡོ་བ་མེད་པ། བྱེད་པ་མེད་པ། བདག་པོ་མེད་པ། ཡོངས་སུ་འཛིན་པ་མེད་པ། འདི་ལྟ་སྟེ། དཔེར་ན། ཕྱི་རོལ་གྱི་རྩྭ་དང༌། ཤིང་གེལ་པ་དང༌། སྨན་དང་ནགས་ཚལ་དག་རྒྱུ་དང་རྐྱེན་ལས་འབྱུང་ཞིང་བདག་པོ་མེད་པ། ཡོངས་སུ་འཛིན་པ་མེད་པ་དེ་བཞིན་དུ་ལུས་འདི་ཡང་རྩྭ་དང༌། རྩིག་པ་དང༌། ཤིང་དང༌། བོང་ བ་དང༌། མིག་ཡོར་ལྟ་བུ་ཕུང་པོ་དང༌། ཁམས་དང༌། སྐྱེ་མཆེད་ཡོངས་སུ་འཛིན་པ་དང༌། བདག་དང་བདག་གིའམ། རྟག་པའམ། བརྟན་པའམ། ཐེར་ཟུག་གམ། མི་འགྱུར་བའི་ཆོས་ ཀྱིས་སྟོང་སྟེ། ལུས་དེ་ལ་ང་ཡིར་མི་བྱའི། ལུས་སྙིང་པོ་མེད་པ་དེས་སྙིང་པོ་བླང་བར་བྱའོ། །དེ་ལ་སྙིང་པོ་གང་ཞེ་ན། འདི་ལྟ་སྟེ། དེ་བཞིན་གཤེགས་པའི་སྐུའོ། །དེ་བཞིན་གཤེགས་ པའི་སྐུ་ནི། ཆོས་ཀྱི་སྐུ། རྡོ་རྗེའི་སྐུ། མི་ཕྱེད་པའི་སྐུ། སྲ་བའི་སྐུ། འཇིག་རྟེན་གསུམ་པོ་ཐམས་ཅད་དང་ཁྱད་ཞུགས་པའི་སྐུ་བདག་གིས་བསྒྲུབ་པར་བྱའོ། །བདག་གི་ལུས་འདི་ཉེས་པ་དུ་ ༄༅། །མའི་སྐྱོན་ཆགས་མོད་ཀྱི། འོན་ཀྱང་ཉེས་པ་ཐམས་ཅད་དང་བྲལ་བའི་དེ་བཞིན་གཤེགས་པའི་སྐུ་ཐོབ་པར་བྱའོ། །ཞེས་དེ་སོ་སོར་རྟོག་པའི་མཐུས་ལོགས་ པར་མཐོང་ནས་འབྱུང་བ་ཆེན་པོའི་གནས་ཀྱི་ལུས་ཡོངས་སུ་སྲུང་བར་བྱེད་དེ། ངའི་ལུས་ནི། སེམས་ཅན་ཐམས་ཅད་ཀྱི་ཅི་དགོས་པར་ཟད་པར་བྱའོ། །འདི་ལྟ་སྟེ། དཔེར་ན། ཕྱི་ རོལ་གྱི་འབྱུང་བ་ཆེན་པོ་བཞི་པོ་སའི་ཁམས་དང༌། ཆུའི་ཁམས་དང༌། མེའི་ཁམས་དང༌། རླུང་གི་ཁམས་སྒོ་སྣ་ཚོགས་དང༌། དམིགས་པ་སྣ་ཚོགས་དང༌། རྣམ་གྲངས་སྣ་ཚོགས་ དང༌། ཡོ་བྱད་སྣ་ཚོགས་དང༌། ཡོངས་སུ་སྤྱོད་པ་སྣ་ཚོགས་ཀྱིས་སེམས་ཅན་རྣམས་ཉེ་བར་འཚོ་བ་དེ་བཞིན་དུ་བདག་གི་འབྱུང་བ་ཆེན་པོ་བཞི་ལས་གྱུར་པའི་ལུས་འདི་སྒོ་སྣ་ཚོགས་ དང༌། དམིགས་པ་སྣ་ཚོགས་དང༌། རྣམ་གྲངས་སྣ་ཚོགས་དང༌། ཡོངས་སུ་སྤྱོད་པ་སྣ་ཚོགས་ཀྱིས་སེམས་ཅན་རྣམས་ཀྱི་ཉེ་བར་འཚོ་བར་གྱུར་ཅིག་སྙམ་མོ། །དེའི་ལུས་མི་ རྟག་པ་ཉིད་དུ་ཡང་སོ་སོར་རྟོག་མོད་ཀྱི། སྐྱེ་བ་དང༌། ཤི་འཕོས་ཀྱང་མི་སྐྱོའོ། །ལུས་སྡུག་བསྔལ་ཉིད་དུ་སོ་སོར་རྟོག་མོད་ཀྱི། ལུས་ཀྱི་སྡུག་བསྔལ་བས་ཀྱང་ཡོངས་སུ་མི་གདུང་ ངོ༌། །ལུས་བདག་མེད་པ་ཉིད་དུ་ཡང་སོ་སོར་རྟོག་མོད་ཀྱི། སེམས་ཅན་ཡོངས་སུ་སྨིན་པར་བྱ་བ་ལ་ཡང་མི་སྐྱོའོ། །ལུས་ཞི་བ་ཉིད་དུ་ཡང་སོ་སོར་རྟོག་མོད་ཀྱི། ལུས་ཞི་བས་བཏང་ སྙོམས་སུ་ཡང་མི་ལྟུང་ངོ༌། །ལུས་སྟོང་པ་ཉིད་དང༌། ལུས་དབེན་པ་ཉིད་དུ་ཡང་སོ་སོར་རྟོག་མོད་ཀྱི། དབེན་པའི་མུར་ཡང་མི་ལྟུང་ངོ༌། །དེ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན་ལུས་ ལ་རྫས་དང་སྙིང་པོར་རྗེས་སུ་མི་མཐོང་ངོ༌། །ནང་གི་ལུས་ལ་ཡང་ལུས་ཀྱི་རྗེས་སུ་ལྟ་ཞིང་གནས་པ་ན་ནང་གི་རྗེས་སུ་སོང་བའི་ཉོན་མོངས་པ་རྣམས་ཀྱི་གོ་སྐབས་མི་འབྱེད་དོ། །དེ་ཕྱི་རོལ་ གྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན་ཕྱི་རོལ་གྱི་རྗེས་སུ་སོང་བའི་ཉོན་མོངས་པ་རྣམས་དང་ལྷན་ཅིག་མི་གནས་སོ། །དེ་ལ་ལུས་ཉོན་མོངས་པ་མེད་པས་ལུས་ཀྱི་ལས་ཡོངས་སུ་ དག་པ་དང་ལྡན་པ་ཡིན་ནོ། །དེ་ལུས་ཡོངས་སུ་དག་ནས་མཚན་གྱིས་ཡང་དག་པར་བརྒྱན་པའི་སྐུ་འཐོབ་བོ། །དེ་ལུས་བརྒྱན་པར་གྱུར་ནས་ལྷ་དང་མི་རྣམས་མངོན་དུ་འདུ་བར་འགྱུར་ཏེ། དེ་ནི། བྱང་ཆུབ་སེམས་དཔའི་ལུས་ལ་ལུས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་པའོ། །ཡང་ཇི་ལྟར་ན། བྱང་ཆུབ་སེམས་དཔའ་ཚོར་བ་ལ་ཚོར་བའི་རྗེས་སུ་ལྟ་བའི་དྲན་པ་ ཉེ་བར་གཞག་པ་སྒོམ་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་གང་ཅི་ཚོར་ཡང་རུང་སྟེ། དེ་ཐམས་ཅད་སྡུག་བསྔལ་ལོ། །ཞེས་དེ་འདི་སྙམ་དུ་སེམས་ཏེ། དེ་ཡེ་ཤེས་ཀྱིས་རྟོགས་ པ་དང༌། ཤེས་རབ་ཀྱིས་རྟོགས་པ་དང༌། ཐབས་ཀྱིས་རྟོགས་པའི་ཚོར་བ་ཤིན་ཏུ་རྟོགས་པས་བདེ་བར་ཚོར་པ་ཚོར་བར་ཡང་བྱེད་མོད་ཀྱི། འདོད་ཆགས་ཀྱི་བག་ལ་ཉལ་ཡང་བག་ལ་ ༄༅། །ཉལ་བར་མི་བྱེད་དོ། །སྡུག་བསྔལ་བའི་ཚོར་བས་རེག་ནས་ཀྱང་ངན་སོང་དུ་སྐྱེས་པ་ཐམས་ཅད་ལ་སྙིང་རྗེ་ཆེན་པོ་བསྐྱེད་ཅིང་ཁོང་ཁྲོ་བའི་བག་ལ་ཉལ་བ་ཡང་ བག་ལ་ཉལ་བར་མི་བྱེད་དོ། །བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བས་རེག་ཀྱང་མ་རིག་པའི་བག་ལ་ཉལ་ཡང་བག་ལ་ཉལ་བར་མི་བྱེད་དོ། །དེ་ཚོར་བའི་རྗེས་སུ་ སོང་བའི་དྲན་པས་བདེ་བའམ། སྡུག་བསྔལ་བའམ། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བ་གང་ཚོར་བ་ཡང་ཚོར་བ་དེ་དག་ལས་འབྱུང་བར་ལྟ་བ་ཡིན་ནོ། ། སེམས་ཅན་ཐམས་ཅད་ཀྱི་ཚོར་བ་ཡོངས་སུ་ཤེས་ཤིང་ཞི་བའི་ཕྱིར་ཡང་འཇུག་སྟེ། སེམས་ཅན་འདི་དག་ནི། ཚོར་བ་ལས་འབྱུང་བ་མི་ཤེས་པས་དེ་དག་བདེ་བའི་ཚོར་བ་ལ་ དགའ་བར་བྱེད། སྡུག་བསྔལ་བའི་ཚོར་བ་ལ་ཞེ་སྡང་བར་བྱེད། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བ་ལ་རྨོངས་པར་བྱེད་ཀྱི། བདག་ནི། ཤེས་རབ་ དང༌། ཡེ་ཤེས་ཀྱིས་རྗེས་སུ་རྟོགས་པའི་ཚོར་བ་ཐམས་ཅད་སོ་སོར་སྦྱངས་པ་དང༌། ཐབས་མཁས་པ་དང་སྙིང་རྗེ་ཆེན་པོས་ཡོངས་སུ་བཟུང་བའི་རྩོམ་པས་སེམས་ཅན་དེ་དག་གི་ ཚོར་བ་ཐམས་ཅད་རྒྱུན་གཅད་པའི་ཕྱིར་ཆོས་བསྟན་པར་བྱའོ། །ཅིའི་ཕྱིར་ཚོར་བ་ཞེས་བྱ་ཞེ་ན། རྟོགས་པའི་ཚོར་བ་ནི། བདེ་བར་འགྱུར་རོ། །མ་རྟོགས་པའི་ཚོར་བ་ནི། སྡུག་ བསྔལ་བར་འགྱུར་རོ། །དེ་ལ་རྟོགས་པའི་ཚོར་བ་གང་ཞེ་ན། འདི་ལ་བདག་གམ། སེམས་ཅན་ནམ། སྲོག་གམ། གང་ཟག་གང་ཡང་ཚོར་བར་བྱེད་པ་མེད་དེ། ཆགས་པ་ནི། ཚོར་ པའོ། །ཡོངས་སུ་འཛིན་པ་ནི། ཚོར་བའོ། །ལེན་པ་ནི། ཚོར་བའོ། །ཕྱིན་ཅི་ལོག་ནི། ཚོར་བའོ། །རྣམ་པར་རྟོག་པ་ནི། ཚོར་བའོ། །ལྟ་བའི་བག་ལ་ཉལ་ནི། ཚོར་བའོ། །མིག་ཏུ་འདུ། ཤེས་པ་ཚོར་བ་ཡིན་པ་ནས་ཡིད་ཀྱི་བར་དུ་འདུ་ཤེས་པ་ནི། ཚོར་བའོ། །གཟུགས་སུ་འདུ་ཤེས་པ་ཚོར་བ་ཡིན་པ་ནས་ཆོས་སུ་འདུ་ཤེས་པའི་བར་དུ་ནི། ཚོར་བའོ། །གང་མིག་གི་ འདུས་ཏེ་རེག་པའི་རྐྱེན་ལས་བྱུང་བའི་ཚོར་བ་བདེ་བའམ། སྡུག་བསྔལ་བའམ། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་བར་དུ་དེ་ནི། ཚོར་བ་ཞེས་བྱའོ། །གོང་མ་ བཞིན་དུ་ནང་དང་ཕྱིའི་ཆོས་རྣམས་ལ་སྦྱར་ཏེ། ཡིད་ཀྱི་བར་དུ་འདུས་ཏེ་རེག་པའི་རྐྱེན་ལས་བྱུང་བའི་ཚོར་བ་བདེ་བའམ། སྡུག་བསྔལ་བའམ། བདེ་བ་ཡང་མ་ཡིན་སྡུག་བསྔལ་ བ་ཡང་མ་ཡིན་པའི་བར་དུ་དེ་ནི། ཚོར་བ་ཞེས་བྱའོ། །གཞན་ཡང་རྣམ་གྲངས་ཀྱིས་ཚོར་བ་གཅིག་སྟེ། དེ་ནི། སེམས་གཅིག་པུས་རྣམ་པར་རིག་པའོ། །ཚོར་བ་གཉིས་ཏེ། ཕྱི་དང༌། ནང་གིའོ། །ཚོར་བ་གསུམ་སྟེ། འདས་པ་རྣམ་པར་རིག་པ་དང༌། མ་འོངས་པ་རྣམ་པར་རིག་པ་དང༌། ད་ལྟར་བྱུང་བ་རྣམ་པར་རིག་པའོ། །ཚོར་བ་བཞི་སྟེ། དེ་ནི། ཁམས་བཞི་རྣམ་ ༄༅། །པར་རིག་པའོ། །ཚོར་བ་ལྔ་སྟེ། དེ་ནི། ཕུང་པོ་ལྔ་ཡིད་ལ་བྱེད་པའོ། །ཚོར་བ་དྲུག་སྟེ། དེ་ནི། སྐྱེ་མཆེད་དྲུག་ཡོངས་སུ་རྟོག་པའོ། །ཚོར་བ་བདུན་ཏེ། དེ་ནི། རྣམ་པར་ཤེས་པ་ལ་གནས་པ་བདུན་ནོ། །ཚོར་བ་བརྒྱད་དེ། དེ་ནི། ལོག་པར་ངེས་པའི་སྦྱོར་བ་བརྒྱད་དོ། །ཚོར་བ་དགུ་སྟེ། དེ་ནི། སེམས་ཅན་གྱི་གནས་དགུའོ། །ཚོར་བ་བཅུ་སྟེ། དེ་ནི། དགེ་བ་བཅུའི་ལས་ཀྱི་ལམ་མོ། །གོང་མ་བཞིན་དུ་སྦྱར་ཏེ། ཐམས་ཅད་ནི། ཚོར་བ་སྟེ། དམིགས་པ་ཇི་སྙེད་པ་དང༌། ཡིད་ལ་བྱེད་པ་ཇི་སྙེད་པ་དེ་ཐམས་ཅད་ཚོར་བར་བྱ་བའོ། །དེ་ བས་ན། སེམས་ཅན་ཚད་མེད་པས་ཚོར་བ་ཚད་མེད་པ་ཞེས་བྱའོ། །དེ་ལ་བྱང་ཆུབ་སེམས་དཔའ་ཚོར་བ་ལ་ཚོར་བའི་རྗེས་སུ་ལྟ་ཞིང་གནས་པས་སེམས་ཅན་ཐམས་ཅད་ཀྱི་ཚོར་བ་སྐྱེས་ བ་དང༌། འཇིག་པ་དང༌། གནས་པ་ལ་ཡེ་ཤེས་བསྐྱེད་པར་བྱ་སྟེ། གང་སེམས་ཅན་ཐམས་ཅད་ཀྱི་དགེ་བ་དང༌། མི་དགེ་བའི་ཚོར་བ་ལ་ཚོར་བ་ཤེས་པ་དེ་ནི། བྱང་ཆུབ་སེམས་དཔའི་ ཚོར་བ་ལ་ཚོར་བའི་རྗེས་སུ་ལྟ་བའི་དྲན་པ་ཉེ་བར་གཞག་པའོ། །དེ་ལ་བྱང་ཆུབ་སེམས་དཔའི་སེམས་ལ་སེམས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་གང་ཞེ་ན། གང་ བྱང་ཆུབ་སེམས་དཔའི་མི་བརྗེད་པ་དང༌། སྦ་བ་དང༌། ཀུན་སྲུང་བ་དང༌། མི་གཡེང་བའོ། །དེ་འདི་ལྟར་སོ་སོར་རྟོག་སྟེ། སེམས་ནི། སྐྱེས་ནས་འཇིག་ཅིང་ཞུ་སྟེ་མི་གནས་པས་ནང་ ན་ཡང་མི་གནས། ཕྱི་རོལ་ཏུ་ཡང་མི་འཕོ་སྟེ། གང་བདག་གིས་ཐོག་མར་སེམས་བསྐྱེད་པ་དེ་ཡང་ཟད་མེད། རྣམ་པར་གྱུར་ཏེ་ཡུལ་ན་མི་གནས། ཕྱོགས་ན་མི་གནས་པས་དེ་རྙེད་པར་མི་ ནུས་ཏེ། སེམས་གང་གིས་དགེ་བའི་རྩ་བ་བསྒྲུབས་པ་དེ་དག་ཀྱང་ཟད་མེད། རྣམ་པར་གྱུར། ཡུལ་ན་མི་གནས། ཕྱོགས་ན་མི་གནས་སོ། །གང་ཡང་བྱང་ཆུབ་ཏུ་བསྔོས་པའི་སེམས་དེ་ ཡང་ངོ་བོ་ཉིད་ཀྱིས་མཚན་ཉིད་མེད་པ་སྟེ། སེམས་ཀྱིས་སེམས་རབ་ཏུ་མི་ཤེས། སེམས་ཀྱིས་སེམས་མི་མཐོང༌། སེམས་ཀྱིས་སེམས་མི་ཚོར་ན། གང་གིས་བདག་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་སེམས་དེ་གང་ཡིན། གང་བྱང་ཆུབ་ཀྱི་སེམས་དེ་ནི། དགེ་བའི་རྩ་བའི་སེམས་དང་མི་འགྲོགས། གང་དགེ་བའི་ རྩ་བའི་སེམས་དེ་ཡང་བསྔོ་བའི་སེམས་དང་མི་འགྲོགས། གང་བསྔོ་བའི་སེམས་དེ་ཡང་བྱང་ཆུབ་ཀྱི་སེམས་དང༌། དགེ་བའི་རྩ་བའི་སེམས་དང་མི་འགྲོགས་སོ། །ཞེས་དེ་དེ་ལྟར་སོ་ སོར་རྟོག་པ་དང༌། མི་སྐྲག། མི་དངང༌། དངང་བར་མི་འགྱུར་གྱི། དེ་ཡང་འདི་སྙམ་དུ་སེམས་ཏེ། རྟེན་ཅིང་འབྲེལ་བར་འབྱུང་བ་ཟབ་མོ་རྒྱུ་དང༌། འབྲས་བུ་ཆུད་མི་ཟ་བའོ། །གལ་ཏེ་ སེམས་ཀྱི་ཆོས་ཉིད་དེ་ལྟ་བུ་སེམས་ཀྱི་རང་བཞིན་ཉིད་ཡིན་ཡང་ཆོས་ཐམས་ཅད་རྒྱུ་དང་རྐྱེན་ལ་རག་ལས་པ། གཡོ་བ་མེད་པ། བྱེད་པ་མེད་པ། བདག་པོ་མེད་པ་ཇི་ལྟར་འདོད་པ་དེ་ ༄༅། །བཞིན་དུ་འགྲུབ་ཀྱི། བདག་གིས་སྒྲུབ་པ་ལ་བརྩོན་པར་བྱའོ། །སེམས་ཀྱི་ཆོས་ཉིད་དེ་མི་འབྲི་བར་བྱའོ། །དེ་ལ་སེམས་ཀྱི་ཆོས་ཉིད་གང༌། སྒྲུབ་པ་གང་ ཞེ་ན། སེམས་ནི། སྒྱུ་མ་དང་འདྲ་བ་སྟེ། དེ་ལ་སྒྲིབ་པར་བྱེད་པ་སུ་ཡང་མེད་དེ། དེ་ནི། སེམས་ཀྱི་ཆོས་ཉིད་དོ། །གང་ཡང་བདོག་པ་ཐམས་ཅད་ཡོངས་སུ་བཏང་ནས་སངས་རྒྱས་ཀྱི་ ཞིང་རྣམ་པར་སྒྲུབ་པའི་རྒྱན་དུ་བསྔོ་བར་བྱེད་པ་དེ་ནི། སྒྲུབ་པར་བྱེད་པའོ། །སེམས་རྨི་ལམ་དང་འདྲ་བ་རབ་ཏུ་ཞི་བའི་མཚན་ཉིད་དེ་ནི། སེམས་ཀྱི་ཆོས་ཉིད་དེ། གང་ཡང་ཚུལ་ ཁྲིམས་སྡོམ་པའི་ཚོགས་གསོག་གོ་ཅོག་དེ་ཐམས་ཅད་མྱུར་བའི་མངོན་པར་ཤེས་པར་བསྔོ་བ་དེ་ནི། སྒྲུབ་པའོ། །སེམས་སྨིག་རྒྱུ་ལྟ་བུ་ཤིན་ཏུ་ཟད་པར་གྱུར་པ་དེ་ནི། སེམས་ ཀྱི་ཆོས་ཉིད་དེ་གང་ཡང་བཟོད་པའི་སྟོབས་དང༌། དེས་པ་བྱང་ཆུབ་ཀྱི་རྒྱན་བསྒྲུབ་པའི་ཕྱིར་བསྔོ་བ་དེ་ནི། དེའི་སྒྲུབ་པའོ། །སེམས་ཆུ་ཟླ་ལྟ་བུ་ཤིན་ཏུ་དབེན་པས་དབེན་པ་དེ་ནི། སེམས་ ཀྱི་ཆོས་ཉིད་དེ། གང་ཡང་བརྩོན་འགྲུས་རྩོམ་པ་ཐམས་ཅད་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་བསྔོ་བ་དེ་ནི། དེའི་སྒྲུབ་པའོ། །སེམས་གཟུང་དུ་མེད་ པ་མི་མཐོང་བ་དེ་ནི། སེམས་ཀྱི་ཆོས་ཉིད་དེ། གང་ཡང་བསམ་གཏན་དང༌། རྣམ་པར་ཐར་པ་དང༌། ཏིང་ངེ་འཛིན་དང་མཉམ་པར་གཞག་པ་ཐམས་ཅད་སངས་རྒྱས་ཀྱི་ཏིང་ངེ་འཛིན་དུ་ བསྔོ་བ་དེ་ནི། དེའི་སྒྲུབ་པའོ། །སེམས་གཟུགས་མེད་པ། མི་མཐོང་བ། མི་ཐོགས་པ། རྣམ་པར་མི་རིག་པ་དེ་ནི། སེམས་ཀྱི་ཆོས་ཉིད་དེ། གང་ཡང་དྲིས་པའི་ཚིག་ཐ་དད་པ་བསྟན་ པ་ཐམས་ཅད་ཤེས་པས་སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བསྔོ་བ་དེ་ནི། དེའི་སྒྲུབ་པའོ། །དམིགས་པ་སྣ་ཚོགས་ལ་སེམས་སྐྱེ་བ་དེ་ནི། སེམས་ཀྱི་ཆོས་ཉིད་དེ། གང་ཡང་ དགེ་བའི་རྩ་བ་ལ་དམིགས་པའི་སེམས་ཉེ་བར་སྦྱོར་བ་དེ་ནི། དེའི་སྒྲུབ་པའོ། །རྒྱུ་མེད་པ་ལས་སེམས་མི་སྐྱེ་བ་དེ་ནི། སེམས་ཀྱི་ཆོས་ཉིད་དེ། གང་ཡང་བྱང་ཆུབ་ཀྱི་ཕྱོགས་ཀྱི་ཆོས་ ཀྱི་རྒྱུའི་སེམས་བསྐྱེད་པ་དེ་ནི། དེའི་སྒྲུབ་པའོ། །གང་ཡུལ་མེད་པར་སེམས་མི་སྐྱེ་བ་དེ་ནི། དེའི་སེམས་ཀྱི་ཆོས་ཉིད་དེ། གང་ཡང་སངས་རྒྱས་ཀྱི་ཡུལ་གྱི་རྒྱུའི་སེམས་ཉེ་བར་སྦྱོར་བ་ དེ་ནི༑ དེའི་སྒྲུབ་པའོ། །ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་སེམས་ལ་སེམས་ཀྱི་རྗེས་སུ་ལྟ་ཞིང་དྲན་པ་ཉེ་བར་གཞག་པ་སྒོམ་པའོ། །དེ་སེམས་ལ་སེམས་ཀྱི་རྗེས་སུ་ ལྟ་ཞིང་གནས་པ་ན་མངོན་པར་ཤེས་པ་ཐོབ་པའི་ཕྱིར་སེམས་ཤིན་ཏུ་འབྲེལ་པར་བྱེད་དེ། དེ་མངོན་པར་ཤེས་པ་ཐོབ་ནས་སེམས་གཅིག་གིས་སེམས་ཅན་ཐམས་ཅད་ཀྱི་སེམས་རབ་ ཏུ་ཤེས་ཏེ། ཤེས་ནས་ཀྱང་དེའི་རང་བཞིན་གྱི་ཆོས་འཆད་དོ། །གཞན་ཡང་བྱང་ཆུབ་སེམས་དཔའ་སེམས་ཀྱི་རྗེས་སུ་ལྟ་ཞིང་གནས་པ་ན་སྙིང་རྗེ་ཆེན་པོ་ཐོབ་པའི་ཕྱིར་སེམས་ཉེ་བར་ ༄༅། །འབྲེལ་པར་བྱེད་དེ། སྙིང་རྗེ་ཆེན་པོ་ཐོབ་པས་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་ཡོངས་སུ་མི་སྐྱོ་བའོ། །སེམས་ལ་སེམས་ཀྱི་རྗེས་སུ་ ལྟ་ཞིང་གནས་པ་ན་སེམས་ཟད་པ་དང༌། སེམས་འགག་པར་བྱ་བའི་ཕྱིར་སེམས་གནས་པར་མི་བྱེད་ཀྱི། འཁོར་བའི་རྒྱུན་གྱི་ཀུན་ཏུ་སྦྱོར་བ་རྣམས་ཀྱི་སེམས་མངོན་པར་སྒྲུབ་སྟེ། སེམས་ཀྱི་དྲན་པ་ཤེས་པ་དེ་མ་སྐྱེས་པ་དང༌། མི་སྐྱེ་བ་ངེས་པར་གྱུར་པ་ལ་ཞུགས་པའི་ཆོས་རྣམས་ཀྱིས་གནས་ཏེ། ཉན་ཐོས་དང༌། རང་སངས་རྒྱས་ཀྱི་སར་ཡང་མི་ལྟུང་ངོ༌། ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་མ་གྱུར་གྱི་བར་དུ་སེམས་ཀྱི་རྒྱུད་དེ་རྒྱུན་ཆགས་པར་བྱེད་དོ། །སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་འཚང་རྒྱ་སྟེ། ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་སེམས་ལ་སེམས་ཀྱི་རྗེས་སུ་ལྟ་ཞིང་དྲན་པ་ཉེ་བར་ གཞག་པ་སྒོམ་མོ། །ཤཱ་རིའི་བུ། ཇི་ལྟར་ན། བྱང་ཆུབ་སེམས་དཔའ་ཆོས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་སྒོམ་པ་ཡིན་ཞེ་ན། ཤཱ་རིའི་བུ། འདི་ལ་བྱང་ཆུབ་ སེམས་དཔས་འཕགས་པའི་ཤེས་རབ་ཀྱི་མིག་གིས་ཆོས་གང་མཐོང་བ་དེ་དག་བྱང་ཆུབ་ཀྱི་སྙིང་པོའི་བར་དུ་བར་མ་དོར་རྨོངས་པར་མི་འགྱུར་ཏེ། དེ་ཆོས་ལ་ཆོས་ཀྱི་རྗེས་སུ་ལྟ་ཞིང་ གནས་པ་ན་གང་སྟོང་པ་ཉིད་དུ་མ་གཏོགས་པ་དང༌། མཚན་མ་མེད་པར་མ་གཏོགས་པ་དང༌། སྨོན་པ་མེད་པར་མ་གཏོགས་པ་དང༌། མི་སྐྱེ་བར་མ་གཏོགས་པ་དང༌། མ་སྐྱེས་པར་མ་གཏོགས་ པ་དང༌། མངོན་པར་འདུ་མི་བྱེད་པར་མ་གཏོགས་པ་དང༌། དངོས་པོ་མེད་པར་མ་གཏོགས་པའི་ཆོས་རྡུལ་ཙམ་ཡང་མི་མཐོང་ངོ༌། །གང་རྟེན་ཅིང་འབྲེལ་པར་འབྱུང་བར་མ་གཏོགས་པའི་ ཆོས་རྡུལ་ཙམ་ཡང་ཡང་དག་པར་རྗེས་སུ་མི་མཐོང་ངོ༌། །བྱང་ཆུབ་སེམས་དཔའ་དེ་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་ན་ཆོས་ཉིད་ཡང་དག་པར་རྗེས་སུ་མཐོང་གི །ཆོས་མ་ ཡིན་པ་མི་མཐོང་ངོ༌། །དེ་ལ་ཆོས་གང་ཞེ་ན། འདི་ལྟ་སྟེ། བདག་མེད་པའི་དོན་དང༌། སེམས་ཅན་མེད་པའི་དོན་དང༌། སྲོག་མེད་པའི་དོན་དང༌། གང་ཟག་མེད་པའི་དོན་ཏེ། དེ་ནི། ཆོས་ཞེས་བྱའོ། །དེ་ལ་ཆོས་མ་ཡིན་པ་གང་ཞེ་ན། འདི་ལྟ་སྟེ། བདག་ཏུ་ལྟ་བ་དང༌། སེམས་ཅན་དུ་ལྟ་བ་དང༌། སྲོག་ཏུ་ལྟ་བ་དང༌། གང་ཟག་ཏུ་ལྟ་བ་དང༌། ཆད་པར་ལྟ་བ་དང༌། རྟག་པར་ལྟ་བ་དང༌། འབྱུང་བར་ལྟ་བ་དང༌། འཇིག་པར་ལྟ་བ་སྟེ། དེ་ནི། ཆོས་མ་ཡིན་པ་ཞེས་བྱའོ། །ཡང་ཤཱ་རིའི་བུ། ཆོས་ཐམས་ཅད་ནི། ཆོས་སོ། །ཆོས་ཐམས་ཅད་ནི། ཆོས་ མ་ཡིན་པའོ། །དེ་ཅིའི་ཕྱིར་ཞེ་ན། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་ཤེས་པའི་ཕྱིར་ཆོས་ཐམས་ཅད་ཆོས་སོ། །བདག་དང་བདག་གིར་ལྟ་བའི་བག་ལ་ཉལ་ ༄༅། །བའི་ཕྱིར་ཆོས་ཐམས་ཅད་ཆོས་མ་ཡིན་པའོ། །དེ་ལ་བྱང་ཆུབ་སེམས་དཔའི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་ན་ཆོས་དེ་དག་ལ་གང་ཡང་སངས་ རྒྱས་ཀྱི་ཆོས་མ་ཡིན་པ་གང་ལས་བྱང་ཆུབ་ཏུ་མི་འགྱུར་བ་དང༌། གང་ལས་སངས་རྒྱས་སུ་མི་འགྱུར་བ་དང༌། གང་ལས་ལམ་དུ་མི་འགྱུར་བ་དང༌། གང་ལས་ཐར་པར་མི་འགྱུར་ བ་དང༌། གང་ལས་འབྱུང་བར་མི་འགྱུར་བའི་ཆོས་རྡུལ་ཙམ་ཡང་མི་མཐོང་སྟེ། དེ་ཆོས་ཐམས་ཅད་འབྱུང་བར་ཤེས་ནས་སྒྲིབ་པ་མེད་པ་ཞེས་བྱ་བའི་སྙིང་རྗེ་ཆེན་པོ་འཐོབ་སྟེ། སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་ལའང་དེ་དག་ཉོན་མོངས་པ་དང་བཅས་པ་མ་ཡིན་གྱི། དེ་དག་ཉོན་མོངས་པ་མེད་པའོ། །ཞེས་བཅོས་མར་འདུ་ཤེས་བསྐྱེད་ དོ༑ ༑དེ་ཅིའི་ཕྱིར་ཞེ་ན། དེ་ལྟར་དེ་དག་ནི། ངེས་པའི་དོན་ལ་ཡང་དག་པར་འཇུག་པ་སྟེ། ཉོན་མོངས་པ་རྣམས་ལ་བསགས་པའམ། ཕུང་པོའི་དངོས་པོ་མེད་དེ། དེ་དག་ཉིད་ རྗེས་སུ་རྟོགས་པའི་ཕྱིར་བྱང་ཆུབ་བོ། །ཉོན་མོངས་པའི་རང་བཞིན་གང་ཡིན་པ་བྱང་ཆུབ་ཀྱི་རང་བཞིན་ཡང་དེ་ཡིན་ནོ། །བྱང་ཆུབ་ཀྱི་རང་བཞིན་གང་ཡིན་པ་ཉོན་མོངས་པའི་ རང་བཞིན་ཡང་དེ་ཡིན་ཏེ། དེ་ལྟར་དྲན་པ་ཉེ་བར་གཞོག་ཀྱང་ཅུང་ཟད་ཀྱང་ཉེ་བར་འཇོག་པ་མེད། རབ་ཏུ་འཇོག་བ་མེད། མི་འཇོག་པ་མེད་དེ། ཆོས་ཉིད་དེ་གནས་པ་ཉིད་དུ་ རབ་ཏུ་ཤེས་སོ། །དེ་བས་ན། ཆོས་ཀྱི་དབྱིངས་དེ་ནི། གནས་པ་ཉིད་ཅེས་བྱའོ། །ཆོས་ཀྱི་དབྱིངས་གནས་གང་ལ་གནས་པ་སེམས་ཅན་གྱི་ཁམས་ཀྱང་གནས་དེ་ལ་གནས་སོ། །སེམས་ ཅན་གྱི་ཁམས་གནས་གང་ལ་གནས་པ་ནམ་མཁའི་ཁམས་ཀྱང་གནས་དེ་ལ་གནས་ཏེ། དེ་བས་ན། ཆོས་ཐམས་ཅད་ནམ་མཁའ་དང་མཚུངས་ཞེས་བྱའོ། །བྱང་ཆུབ་སེམས་དཔའ་ དེ་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་ན་སངས་རྒྱས་ཀྱི་ཆོས་ལ་རྟོན་པ་ཡིན། ཆོས་ཐམས་ཅད་སངས་རྒྱས་ཀྱི་ཆོས་སུ་མོས་པར་བྱེད་དེ། དེ་ཟད་པ་ཤེས་པ་ཡང་བསྐྱེད་མོད་ཀྱི། འདུས་མ་བྱས་པའི་ཟད་པ་ཡང་མངོན་དུ་མི་བྱེད། མི་སྐྱེ་བ་ཤེས་པ་ཡང་མངོན་པར་སྒྲུབ་མོད་ཀྱི། སེམས་ཅན་ལ་བལྟ་བའི་ཕྱིར་ཡང་སྐྱེ་ལ། མི་སྐྱེ་བའི་མཐའ་དེ་ཡང་མི་གཏོང་ངོ༌། ། དྲན་པ་ཉེ་བར་གཞག་པ་ཞེས་བྱ་བ་ནི། ཆོས་ཐམས་ཅད་དང་དྲན་པ་དེ་ལ་གཞོག་པར་བྱེད་ཅིང༌། ཉན་ཐོས་སམ། རང་སངས་རྒྱས་སམ། སངས་རྒྱས་ཀྱི་ཆོས་ཇི་སྙེད་ཆོས་སུ་གདགས་ པ་དེ་དག་ཐམས་ཅད་མ་ལུས་པར་དྲན་པ་དེ་ལ་འཇོག་སྟེ། དྲན་པ་དེ་ཡང་བརྗེད་པར་མི་བྱེད། ཕྱི་མའི་མཐའི་བར་དུ་རྨོངས་པར་མི་བྱེད་དོ། །ཆོས་ལ་ཆོས་ཀྱི་རྗེས་སུ་ལྟ་ཞིང་དྲན་པ་ཉེ་ བར་གཞག་པའོ། །ཞེས་བྱ་བ་དེ་ནི། བསྟན་པ་དཔག་ཏུ་མེད་པ་སྟེ། ཀུན་ཏུ་སྤྱོད་ཡུལ་མ་ཡིན་པ་སངས་རྒྱས་ཀྱི་ཆོས་ཐམས་ཅད་ལ་ཡང་དག་པར་འདུལ་བ། སེམས་ཅན་ཐམས་ཅད་ཀྱི་ ༄༅། །སེམས་ཚིམ་པར་བྱེད་པ། བདུད་ཐམས་ཅད་འདུལ་བ་རང་བྱུང་བ་རྟོགས་པའི་ཕྱིར་ཏེ། ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་ཆོས་ལ་ཆོས་ཀྱི་རྗེས་སུ་ ལྟ་ཞིང་དྲན་པ་ཉེ་བར་གཞག་པ་སྒོམ་མོ། །དེ་དག་ནི། དྲན་པ་ཉེ་བར་གཞག་པ་བཞི་ཞེས་བྱ་སྟེ། ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་དྲན་པ་ཉེ་བར་གཞག་པ་བཞི་པོ་དེ་ དག་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཡན་ལག་ལ་མཁས་པ་གང་ཞེ་ན། བྱང་ཆུབ་སེམས་དཔའ་རྣམས་ ཀྱི་བྱང་ཆུབ་ཀྱི་ཡན་ལག་འདི་བདུན་ཏེ། བདུན་གང་ཞེ་ན། འདི་ལྟ་སྟེ། དྲན་པ་ཡང་དག་བྱང་ཆུབ་ཀྱི་ཡན་ལག་དང༌། ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང་ བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང༌། དགའ་བ་ཡང་དག་བྱང་ཆུབ་ཀྱི་ཡན་ལག་དང༌། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང༌། ཏིང་ངེ་འཛིན་ཡང་ དག་བྱང་ཆུབ་ཀྱི་ཡན་ལག་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་སྟེ། ཤཱ་རིའི་བུ། དེ་དག་ནི། བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཡན་ལག་བདུན་ནོ། ། དེ་ལ་དྲན་པ་ཡང་དག་བྱང་ཆུབ་ཀྱི་ཡན་ལག་གང་ཞེ་ན། དྲན་པ་གང་གིས་ཆོས་རྟོགས་པར་བྱེད། ཆོས་ལ་སོ་སོར་རྟོག་པར་བྱེད། ཆོས་ལ་དཔྱོད་པར་བྱེད། འཆོས་ཡོངས་སུ་ཚོལ་ བར་བྱེད་ཅིང་ཆོས་རྣམ་པར་འབྱེད་པར་བྱེད་པ་དང༌། ཆོས་ལ་རྣམ་པར་རྟོག་པར་བྱེད་དེ། དེ་དྲན་པ་དེས་གང་ཆོས་རྣམས་ཀྱི་ངོ་བོ་ཉིད་ཀྱི་མཚན་ཉིད་དེ་ཡང་རྗེས་སུ་རྟོགས་སོ། །ཡང་ ཆོས་རྣམས་ཀྱི་ངོ་བོ་ཉིད་ཀྱི་མཚན་ཉིད་ཤེས་པ་གང་ཞེ་ན། ཆོས་ཐམས་ཅད་རང་གི་མཚན་ཉིད་ཀྱིས་སྟོང་པ་སྟེ། གང་དེ་ལྟར་དྲན་ཞིང་ཁོང་ཆུད་པ་དེ་ནི། དྲན་པ་ཡང་དག་བྱང་ཆུབ་ཀྱི་ཡན་ ལག་ཅེས་བྱའོ། །དེ་ལ་ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་གང་ཞེ་ན། གང་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་རབ་ཏུ་རྣམ་པར་འབྱེད་པ་ཤེས་པ་སྟེ། ངེས་པའི་དོན་ ཀྱང་ངེས་པའི་དོན་དུ། དྲང་བའི་དོན་ཀྱང་དྲང་བའི་དོན་དུ། ཀུན་རྫོབ་ཀྱི་དོན་ཀྱང་ཀུན་རྫོབ་ཀྱི་དོན་དུ། དོན་དམ་པའི་དོན་ཀྱང་དོན་དམ་པའི་དོན་དུ། བརྡ་ཡང་བརྡར། རྣམ་པར་གཏན་ལ་ བབ་པ་ཡང་རྣམ་པར་གཏན་ལ་བབ་པར་ཆོས་དེ་དག་ཇི་ལྟར་རབ་ཏུ་དབྱེ་བར་བྱ་བ་དེ་བཞིན་དུ་དེ་དག་རྣམ་པར་འབྱེད་པར་བྱེད་དེ། དེ་ནི། ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ ཡན་ལག་ཅེས་བྱའོ། །དེ་ལ་བརྩོན་འགྲུས་ཡང་དག་བྱང་ཆུབ་ཡན་ལག་གང་ཞེ་ན། གང་ཆོས་རྣམ་པར་འབྱེད་པ་དེ་ཉིད་ཀྱི་དགའ་བ་དང༌། ཤིན་ཏུ་སྦྱངས་པ་དང༌། ཏིང་ངེ་འཛིན་དང༌། བཏང་སྙོམས་དང༌། ཡེ་ཤེས་ཀྱི་བར་དུ་འཛིན་པ་དང༌། སྤྲོ་བ་དང༌། སྟོབས་དང༌། རྟུལ་བ་དང༌། མི་ལྡོག་པའི་མོས་པ་དང༌། མཐུ་དང༌། བརྩོན་པ་མི་འདོར་བ་དང༌། ལམ་མངོན་པར་རྟོགས་ ༄༅། །པར་བྱ་བ་ལ་བརྩོན་འགྲུས་རྩོམ་པ་སྟེ། དེ་ནི། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །དེ་ལ་དགའ་བ་ཡང་དག་བྱང་ཆུབ་ཀྱི་ཡན་ ལག་གང་ཞེ་ན། དགའ་བ་གང་དང༌། ཆོས་ལ་དགའ་བ་གང་དང༌། ཆོས་ལ་མཆོག་ཏུ་དགའ་བ་གང་གིས་སེམས་མི་ཞུམ་ཞིང་དང་བ་སྟེ། མ་ཞུམ་པའི་དགའ་བ་དེས་གང་ལུས་ སམ༑ སེམས་ཀྱང་ཤིན་ཏུ་བྱང་བར་བྱེད་ལ། ཀུན་ནས་ཉོན་མོངས་པ་ཡང་སེལ་བ་དེ་ནི། དགའ་བ་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །དེ་ལ་ཤིན་ཏུ་སྦྱངས་པ་ཡང་དག་ བྱང་ཆུབ་ཀྱི་ཡན་ལག་གང་ཞེ་ན། གང་ལུས་ཤིན་ཏུ་སྦྱངས་པ་དང༌། སེམས་ཤིན་ཏུ་སྦྱངས་པ་དང༌། ཉོན་མོངས་པ་ཤིན་ཏུ་སྦྱངས་པ་དང༌། སྒྲིབ་པ་མེད་པ་དང༌། ཏིང་ངེ་འཛིན་དུ་ དམིགས་པ་ལ་སེམས་ཉེ་བར་གཞོག་པ་སྟེ། དེ་ནི། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །དེ་ལ་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་གང་ཞེ་ན། གང་སེམས་མཉམ་པར་བཞག་པས་ཆོས་ཤེས་པ་རྟོགས་པར་འགྱུར་ཏེ། སེམས་མཉམ་པར་མ་བཞག་པས་ནི། མ་ཡིན་པ་དང༌། སེམས་མཉམ་པར་གཞག་པས་ཆོས་དེ་དག་ མངོན་པར་རྫོགས་པར་འཚང་རྒྱའི། སེམས་མཉམ་པར་མ་གཞག་བསམ་ཡིན་ཏེ། ཆོས་མཉམ་པ་ཉིད་དང༌། ཆོས་ལ་གཞོལ་བ་མ་གཏོགས་པར་རྗེས་སུ་ཆགས་པའི་ཀུན་ ནས་དཀྲིས་པས་རྟོགས་པར་མི་བྱེད་དེ། དེ་ནི། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ཅེས་བྱའོ། །དེ་ལ་བཏང་སྙོམས་ཡང་དག་བྱང་ཆུབ་ཀྱི་ཡན་ལག་གང་ཞེ་ན། གང་ཡིད་བདེ་བ་ དང༌། གང་ཡིད་མི་བདེ་བའི་ཆ་དང་མཐུན་པའི་ཆོས་རྣམས་ལ་སེམས་མི་འཛིན་པ་དང༌། འཇིག་རྟེན་གྱི་ཆོས་ཀྱིས་མི་འཕྲོག་པ་དང༌། མཐོན་དམན་དུ་མི་གནས་པའི་ཕྱིར་རབ་ཏུ་མི་གཡོ། མི་འཁྲུག །རབ་ཏུ་མི་འཁྲུག །ཡང་དག་པར་མི་འཁྲུག །ཆགས་པར་མི་བྱེད། ཞེ་སྡང་བར་མི་བྱེད་ཀྱི། འཕགས་པའི་ལམ་དེ་ཉིད་དང་མཐུན་པར་བྱེད་པ་སྟེ། དེ་ནི། བཏང་སྙོམས་ཡང་ དག་བྱང་ཆུབ་ཀྱི་ཡན་ལག་ཅེས་བྱའོ། །ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཡན་ལག་བདུན་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། ། བམ་པོ་བཅུ་དགུ་པ། དེ་ལ་བྱང་ཆུབ་སེམས་དཔའ་རྣམས་ཀྱི་ལམ་ལ་མཁས་པ་གང་ཞེ་ན། བྱང་ཆུབ་སེམས་དཔའ་རྣམས་ཀྱི་ལམ་ནི། འདི་བརྒྱད་དོ། །བརྒྱད་གང་ཞེ་ན། འདི་ལྟ་སྟེ། ཡང་དག་པའི་ལྟ་བ་དང༌། ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང༌། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་ པའི་དྲན་པ་དང༌། ཡང་དག་པའི་ཏིང་ངེ་འཛིན་ཏེ། དེ་དག་ནི། བྱང་ཆུབ་སེམས་དཔའ་རྣམས་ཀྱི་ལམ་ཡན་ལག་བརྒྱད་པའོ། །དེ་ལ་ཡང་དག་པའི་ལྟ་བ་གང་ཞེ་ན། ལྟ་བ་གང་འཕགས་ ༄༅། །པ་འཇིག་རྟེན་ལས་འདས་པ་སྟེ། བདག་ཏུ་ལྟ་བ་ལས་ལངས་པ་མ་ཡིན། སེམས་ཅན་དུ་ལྟ་བ་ལས་ལངས་པ་མ་ཡིན། སྲོག་ཏུ་ལྟ་བ་ལས་ལངས་པ་མ་ ཡིན༑ གང་ཟག་ཏུ་ལྟ་བ་ལས་ལངས་པ་མ་ཡིན། ཆད་པ་དང་རྟག་པ་དང༌། འབྱུང་བ་དང་འཇིག་པར་ལྟ་བ་ལས་ལངས་པ་མ་ཡིན། དགེ་བ་དང་མི་དགེ་བར་ལྟ་བ་ལས་ལངས་པ་མ་ ཡིན་པ་ནས་མྱ་ངན་ལས་འདས་པར་ལྟ་བ་ལས་ལངས་པ་མ་ཡིན་པ་སྟེ། དེ་ནི། ཡང་དག་པའི་ལྟ་བ་ཞེས་བྱའོ། །དེ་ལ་ཡང་དག་པའི་རྟོག་པ་གང་ཞེ་ན། རྟོག་པ་གང་གིས་འདོད་ཆགས་ དང༌། ཞེ་སྡང་དང༌། གཏི་མུག་ལ་སོགས་པའི་ཉོན་མོངས་པ་གནས་པར་འགྱུར་བའི་རྟོག་པ་དེ་ལྡང་བར་མི་འགྱུར་གྱི། རྟོག་པ་གང་གིས་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་ རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བ་འབྱུང་བར་འགྱུར་བ་དེ་ལ་རྟོག་པ་སྟེ། དེ་ནི། ཡང་དག་པའི་རྟོག་པ་ཞེས་བྱའོ། །དེ་ལ་ཡང་དག་པའི་ངག་ གང་ཞེ་ན། ཡང་དག་པའི་ངག་གང་གིས་བདག་དང༌། གཞན་ལ་མི་གདུང་ཞིང༌། དེ་ཕན་པའི་རྗེས་སུ་སྦྱོར་བའི་ངག་དང་ལྡན་པ་ཡིན་ཏེ། ངག་དེས་ལམ་མཉམ་པ་ལ་འཇུག་པ་དེ་ ནི༑ ཡང་དག་པའི་ངག་ཅེས་བྱའོ། །དེ་ལ་ཡང་དག་པའི་ལས་ཀྱི་མཐའ་གང་ཞེ་ན། གང་ལས་ནག་ལ་རྣམ་པར་སྨིན་པ་ནག་པ་དེ་ལྟ་བུ་མངོན་པར་འདུ་མི་བྱེད་པ་དང༌། གང་ལས་ དཀར་ལ་རྣམ་པར་སྨིན་པ་དཀར་པ་དེ་ལྟ་བུའི་ལས་མངོན་པར་འདུ་བྱེད་པ་དང༌། གང་ལས་དཀར་ནག་ལ་རྣམ་པར་སྨིན་པ་དཀར་ནག་ཏུ་འགྱུར་བ་དེ་ལྟ་བུའི་ལས་མངོན་པར་འདུ་མི་བྱེད་ པ་དང༌། གང་ལས་དཀར་ནག་མ་ཡིན་ལ་རྣམ་པར་སྨིན་པར་མི་འགྱུར་བ་ལས་ཟད་པར་འགྱུར་བ་དེ་ལྟ་བུའི་ལམ་མངོན་པར་འདུ་བྱེད་པ་སྟེ། དེ་ལས་བདག་གིར་བྱ་བ། ལས་ལ་རྟོན་པ། ཡང་དག་པའི་ལས་ལ་བརྩོན་པས་ཡང་དག་པའི་ལས་ཀྱི་མཐའ་ཞེས་བྱའོ། །དེ་ལ་ཡང་དག་པའི་འཚོ་བ་གང་ཞེ་ན། གང་འཕགས་པའི་རིགས་དང༌། སྦྱངས་པའི་ཡོན་ཏན་མི་གཏོང་ བ་དང༌། ཁ་གསག་མེད་པ་དང༌། ཚུལ་འཆོས་པ་མེད་པ་དང༌། ཐོབ་ཀྱིས་འཇལ་བ་མེད་པ་དང༌། དགང་སླ་བ་དང༌། གསོ་སླ་བ་དང༌། ཆོ་ག་མི་ལྷོད་པ་དང༌། གཞན་གྱི་རྙེད་པ་ལ་ཕྲག་དོག་ མེད་པ་དང༌། བདག་གི་རྙེད་པས་ཆོག་ཤེས་པ་དང༌། ཁ་ན་མ་ཐོ་བ་མེད་པ་དང༌། འཕགས་པས་གནང་བའི་འཚོ་བ་སྟེ། དེ་ནི། ཡང་དག་པའི་འཚོ་བ་ཞེས་བྱའོ། །དེ་ལ་ཡང་དག་པའི་ རྩོལ་བ་གང་ཞེ་ན། རྩོལ་བ་ལོག་པར་སྤྱོད་པར་བཤད་པ་འདོད་ཆགས་དང༌། ཞེ་སྡང་དང༌། གཏི་མུག་གང་ཉོན་མོངས་པ་བག་ལ་ཉལ་བའི་རྩོལ་བ་དེ་མི་འདོད་ཀྱི། རྩོལ་བ་གང་འཕགས་ པའི་ལམ་དང༌། བདེན་པ་ལ་འཇུག་པ། མྱ་ངན་ལས་འདས་པར་འགྲོ་བའི་ལམ་དུ་འཇོག་པར་བྱེད་པའི་རྩོལ་བ་དེའི་རྗེས་སུ་འགྲོ་བ་སྟེ། དེ་ནི། ཡང་དག་པའི་རྩོལ་བ་ཞེས་བྱའོ། །དེ་ལ་ ༄༅། །ཡང་དག་པའི་དྲན་པ་གང་ཞེ་ན། དྲན་པ་གང་ཤིན་ཏུ་ཉེ་བར་གཞོག་པ་དང༌། ཐ་མལ་པ་མ་ཡིན་པ་དང༌། དྲང་བ་དང༌། གྱ་གྱུ་མེད་པ་དང༌། འཁོར་བའི་ཉེས་པ་དང་ སྐྱོན་ལ་ལྟ་བ་དང༌། མྱ་ངན་ལས་འདས་པའི་ལམ་དུ་འདྲེན་པའི་དྲན་པ་དང༌། དྲན་པར་བྱེད་པ་དང༌། འཕགས་པའི་ལམ་མི་བརྗེད་པ་སྟེ། དེ་ནི། ཡང་དག་པའི་དྲན་པ་ཞེས་བྱའོ། །དེ་ ལ་ཡང་དག་པའི་ཏིང་ངེ་འཛིན་གང་ཞེ་ན། ཡང་དག་པ་ཉིད་དུ་མཉམ་པ། ཆོས་ཐམས་ཅད་ལ་མཉམ་པ་སྟེ། ཏིང་ངེ་འཛིན་དེ་ལ་རབ་ཏུ་གནས་ན་ཡང་དག་པ་ཉིད་དུ་འཇུག་སྟེ། གང་ ཡང་བྱང་ཆུབ་སེམས་དཔའ་ཏིང་ངེ་འཛིན་དེ་ལ་གནས་ནས་སེམས་ཅན་ཐམས་ཅད་རབ་ཏུ་ཐར་བར་བྱ་བའི་ཕྱིར་ཡང་དག་པ་ཉིད་དུ་འཇུག་པ་དེ་ནི། ཡང་དག་པའི་ཏིང་ངེ་འཛིན་ཅེས་ བྱའོ༑ ༑འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ལམ་མི་ཟད་པ་འདི་བྱང་ཆུབ་སེམས་དཔས་མངོན་པར་རྟོགས་ནས་འཆད་པ་དང༌། སྟོན་པ་དང༌། ཡང་དག་པར་རབ་ཏུ་སྟོན་པ་དེ་ནི། ཡང་དག་པའི་ཏིང་ངེ་འཛིན་ཅེས་བྱའོ། །དེ་དག་ནི། བྱང་ཆུབ་སེམས་དཔའ་རྣམས་ཀྱི་ལམ་ཡན་ལག་བརྒྱད་པ་ཞེས་བྱ་སྟེ། དེ་ནི། བྱང་ཆུབ་སེམས་དཔའི་ལམ་ལ་མཁས་པའོ། །གཞན་ཡང་ལམ་ལ་མཁས་པ་ནི། བྱང་ཆུབ་སེམས་དཔའ་རྣམས་ཀྱི་ལམ་ཡན་ལག་གཉིས་པ་སྟེ། ཡན་ལག་གཉིས་གང་ཞེ་ན། འདི་ལྟ་སྟེ། ཞི་གནས་དང༌། ལྷག་མཐོང་སྟེ། དེ་ནི། ལམ་ཡན་ལག་གཉིས་པ་ཞེས་བྱའོ། །དེ་ལ་ཞི་གནས་གང་ཞེ་ན། གང་སེམས་ཀྱི་ཞི་བ་དང༌། རབ་ཏུ་ཞི་བ་དང༌། ཉེ་བར་ཞི་བ་དང༌། མི་གཡེང་བ་དང༌། དབང་པོ་རྣམས་བསྡམས་པ་དང༌། མི་རྒོད་པ་དང༌། མ་ཁེངས་པ་དང༌། མི་འཕྱར་བ་དང༌། མུ་ཅོར་མི་སྨྲ་བ་དང༌། དེས་པ་དང༌། སྦས་པ་དང༌། གཡོ་མེད་པ་དང༌། ཡིད་ དུ་འོང་བ་དང༌། གཅིག་པུར་དགའ་བ་དང༌། འདུ་འཛི་སེལ་བ་དང༌། དབེན་པར་དགའ་བ་དང༌། ལུས་དབེན་པ་དང༌། སེམས་མ་འཁྲུལ་བ་དང༌། དགོན་པའི་སྒོ་ཡིད་ལ་བྱེད་པ་དང༌། ཆོག་ ཤེས་པ་དང༌། འདོད་པ་ཉུང་བ་དང༌། འཚོ་བ་ཡོངས་སུ་དག་པ་དང༌། ཆོ་ག་ཕུན་སུམ་ཚོགས་པ་དང༌། སྤྱོད་ལམ་སྦས་པ་དང༌། དུས་ཤེས་པ་དང༌། ཚོད་ཤེས་པ་དང༌། དྲོད་ཤེས་པ་དང༌། དགང་སླ་བ་དང༌། གསོ་སླ་བ་དང༌། སོ་སོར་རྟོག་པ་དང༌། མི་མཐོ་མི་དམའ་བ་དང༌། ཚིག་ངན་པ་སྨྲས་པ་བཟོད་པ་དང༌། རྣལ་འབྱོར་གྱི་སྒོར་སེམས་བསྐྱེད་པ་དང༌། ནང་དུ་ཡང་དག་འཇོག་ལ་མངོན་པར་དགའ་ བ་དང༌། བསམ་གཏན་གྱི་ཡན་ལག་ཡིད་ལ་བྱེད་པ་དང༌། བྱམས་པ་བསྐྱེད་པ་དང༌། སྙིང་རྗེ་མངོན་པར་སྒྲུབ་པ་དང༌། དགའ་བ་ལ་གནས་པ་དང༌། བཏང་སྙོམས་སྒོམ་པ་དང༌། བསམ་ གཏན་དང་པོ་ནས་བརྒྱད་ཀྱི་བར་དུ་མཐར་གྱིས་སྙོམས་པར་འཇུག་པ་སྟེ། དེ་ནི། ཞི་གནས་ཞེས་བྱའོ། །གང་ཞི་གནས་ཀྱི་ཚོགས་ཚད་མེད་པ་སྟེ། ཚོགས་དེ་ལ་གང་རྗེས་སུ་རྟོགས་པ་དེ་ ༄༅། །ནི༑ ཞི་གནས་ཞེས་བྱའོ། །དེ་ལ་ལྷག་མཐོང་གང་ཞེ་ན། གང་ཤེས་རབ་ཀྱི་ཆ་དང་མཐུན་པའི་སྒོམ་པའི་ལམ་སྟེ། ཆོས་རྣམས་ལ་གཡོ་བ་མེད་པ་དང༌། སེམས་ ཅན་མེད་པ་དང༌། སྲོག་མེད་པ་དང༌། གང་ཟག་མེད་པ་དང༌། ཕུང་པོ་རྣམས་ལ་སྒྱུ་མའི་ཕུང་པོར་མཐོང་བའི་ཤེས་པ་དང༌། ཁམས་རྣམས་ལ་ཆོས་ཀྱི་ཁམས་སུ་མཐོང་བའི་ཤེས་པ་ དང༌། སྐྱེ་མཆེད་རྣམས་ལ་གྲོང་སྟོང་པར་མཐོང་བའི་ཤེས་པ་དང༌། མིག་ལ་རབ་ཏུ་རྣམ་པར་ཕྱེ་བ་མཐོང་བའི་ཤེས་པ་དང༌། རྟེན་ཅིང་འབྲེལ་པར་འབྱུང་བ་ལ་མི་འགལ་བར་མཐོང་ བའི་ཤེས་པ་དང༌། སེམས་ཅན་དུ་ལྟ་བ་དང་བྲལ་བར་མཐོང་བའི་ཤེས་པ་དང༌། རྒྱུ་དང་འབྲས་བུ་རྣམ་པར་སྨིན་པ་མཐོང་བའི་ཤེས་པ་དང༌། འབྲས་བུ་ཐོབ་པ་མངོན་སུམ་དུ་བྱ་བ་ མཐོང་བའི་ཤེས་པ་དང༌། ཡང་དག་པ་ཉིད་དུ་འཇུག་པ་ལ་འཇུག་པར་བྱེད་པ་མཐོང་བའི་ཤེས་པའོ། །ཡང་ལྷག་མཐོང་ཞེས་བྱ་བ་ནི། འདི་ལྟ་སྟེ། ཆོས་རྣམས་ཇི་ལྟ་བ་བཞིན་དུ་ མཐོང་བ་དང༌། ཆོས་རྣམས་ཀྱི་དེ་ཁོ་ན་ཉིད་མཐོང་བ་དང༌། ཆོས་རྣམས་ཀྱི་གཞན་མ་ཡིན་པ་ཉིད་མཐོང་བ་དང༌། ཆོས་རྣམས་ཀྱི་སྟོང་པ་ཉིད་མཐོང་བ་དང༌། མཚན་མ་མེད་པ་མཐོང་བ་ དང༌། སྨོན་པ་མེད་པ་མཐོང་བའོ། །ཡང་ལྷག་མཐོང་ཞེས་བྱ་བ་ནི། རྒྱུས་མཐོང་བ་མེད་པ་དང༌། རྒྱུ་མེད་པར་མཐོང་བ་མེད་པ་དང༌། སྐྱེ་བ་དང༌། འཇིག་པ་དང༌། གནས་པའི་རྒྱུས་མཐོང་ བ་མེད་པ་དང༌། དམིགས་པའི་རྒྱུས་མཐོང་བ་མེད་ཅིང་ལྷག་པར་མཐོང་ཡང་ཅུང་ཟད་ལྷག་པར་མི་མཐོང་བའོ། །གཞན་ཡང་ལྷག་མཐོང་ནི། མཐོང་བས་ཀྱང་མཐོང་ལ། བལྟ་བ་ཡང་མི་ མཐོང་བ་སྟེ། གང་གི་ཚེ་དེ་ལྟར་མཐོང་བ་དེའི་ཚེ་ཡང་དག་པ་མཐོང་བའོ། །ཡང་དག་པ་མཐོང་ན། ལྷག་མཐོང་ལ་མཁས་པ་ཡང་རྗེས་སུ་འཐོབ་སྟེ། དེ་ལ་བྱང་ཆུབ་སེམས་དཔའི་ལྷག་ མཐོང་དེ་ལྟར་མཐོང་ལ། མངོན་པར་འདུ་བྱེད་པར་ཡང་མི་ལྟུང་ཞིང་དགེ་བའི་རྩ་བ་མངོན་པར་འདུ་བྱེད་པ་ལ་ཡང་མི་གནས་ཏེ། དེ་ནི། བྱང་ཆུབ་སེམས་དཔའི་ལྷག་མཐོང་ངོ༌། །དེ་ལྟར་ན། བྱང་ཆུབ་སེམས་དཔའ་ཞི་གནས་དང༌། ལྷག་མཐོང་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །གཞན་ཡང་ལམ་ལ་མཁས་པ་ནི། བྱང་ཆུབ་སེམས་དཔའ་རྣམས་ཀྱི་ལམ་ རྣམ་པ་བཞི་སྟེ། རྣམ་པ་བཞི་གང་ཞེ་ན། འདི་ལྟ་སྟེ། སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་བསྐྱེད་པའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་ རབ་ཏུ་འཛིན། ཡང་དག་པར་རབ་ཏུ་འཇོག་པ་དང༌། སྡིག་པ་མི་དགེ་བའི་ཆོས་སྐྱེས་པ་རྣམས་སྤང་བའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན། ཡང་དག་པར་རབ་ཏུ་འཇོག་པ་དང༌། དགེ་བའི་ཆོས་མ་སྐྱེས་པ་རྣམས་བསྐྱེད་པའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན། ཡང་དག་པར་རབ་ཏུ་ ༄༅། །འཇོག་པ་དང༌། དགེ་བའི་ཆོས་སྐྱེས་པ་རྣམས་གནས་པ་དང༌། ཕྱིར་ཞིང་འབྱུང་བ་དང༌། ཉམས་པར་མི་འགྱུར་བ་དང༌། ཆུད་མི་ཟ་བར་བྱ་བའི་ཕྱིར་འདུན་པ་ སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན། ཡང་དག་པར་རབ་ཏུ་འཇོག་པའོ། །གང་སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་བསྐྱེད་པའི་ཕྱིར་འདུན་ པ་སྐྱེད་ཅེས་བྱ་བ་ནི། ཚུལ་བཞིན་ཡིད་ལ་བྱེད་པའི་ཚིག་བླ་དྭགས་སོ། །འབད་པར་བྱེད། བརྩོན་འགྲུས་རྩོམ་ཞེས་བྱ་བ་ནི། ཚུལ་བཞིན་ཡིད་ལ་བྱེད་པ་དེ་མི་གཏོང་བའོ། །སེམས་ རབ་ཏུ་འཛིན། ཡང་དག་པར་རབ་ཏུ་འཇོག་ཅེས་བྱ་བ་ནི་ཚུལ་བཞིན་ཡིད་ལ་སོ་སོར་རྟོག་པའི་ཚིག་བླ་དྭགས་སོ། །དེ་ཅིའི་ཕྱིར་ཞེ་ན། ཚུལ་བཞིན་ལ་རབ་ཏུ་སྦྱོར་བ་ནི། མི་དགེ་བའི་ ཆོས་རྣམས་མི་འབྱུང་བའི་ཕྱིར་རོ། །དེ་ལ་མི་དགེ་བའི་ཆོས་རྣམས་གང་ཞེ་ན། འདི་ལྟ་སྟེ། ཚུལ་ཁྲིམས་ཀྱི་མི་མཐུན་པའི་ཕྱོགས་དང༌། ཏིང་ངེ་འཛིན་གྱི་མི་མཐུན་པའི་ཕྱོགས་དང༌། ཤེས་རབ་ཀྱི་མི་མཐུན་པའི་ཕྱོགས་སོ། །དེ་ལ་ཚུལ་ཁྲིམས་ཀྱི་མི་མཐུན་པའི་ཕྱོགས་གང་ཞེ་ན། འདི་ལྟ་སྟེ། ཚུལ་ཁྲིམས་ཉམས་པ་དང༌། གང་གཞན་ལ་ལ་ཚུལ་ཁྲིམས་ཉམས་ པར་འགྱུར་བའི་ཆོས་རྣམས་ཏེ། དེ་ནི། ཚུལ་ཁྲིམས་ཀྱི་མི་མཐུན་པའི་ཕྱོགས་ཞེས་བྱའོ། །དེ་ལ་ཏིང་ངེ་འཛིན་གྱི་མི་མཐུན་པའི་ཕྱོགས་གང་ཞེ་ན། གང་ཆོ་ག་ཉམས་པ་དང༌། གང་ གཞན་ལ་ལ་སེམས་གཡེང་བར་བྱེད་པའི་ཆོས་ཏིང་ངེ་འཛིན་གྱི་ཕུང་པོའི་མི་མཐུན་པའི་ཕྱོགས་དེ་ནི། ཏིང་ངེ་འཛིན་གྱི་མི་མཐུན་པའི་ཕྱོགས་ཞེས་བྱའོ། །དེ་ལ་ཤེས་རབ་ཀྱི་མི་མཐུན་པའི་ ཕྱོགས་གང་ཞེ་ན། འདི་ལྟ་སྟེ། ལྟ་བ་ཉམས་པ་དང༌། གང་གཞན་ལ་ལ་ལྟ་བ་ཀུན་ནས་ལྡང་བ། སྒྲིབ་པར་བྱེད་པའི་ཆོས་གང་ཤེས་རབ་ཀྱི་ཕུང་པོའི་མི་མཐུན་པའི་ཕྱོགས་དེ་ནི། ཤེས་ རབ་ཀྱི་མི་མཐུན་པའི་ཕྱོགས་ཞེས་བྱ་སྟེ། དེ་ནི། སྡིག་པ་མི་དགེ་བའི་ཆོས་རྣམས་ཞེས་བྱའོ། །ཚུལ་བཞིན་ཡིད་ལ་བྱེད་པ་གང་གིས་སྡིག་པ་མི་དགེ་བའི་ཆོས་དེ་ལྟ་བུ་དེ་དག་སྤང་བའི་ ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན། ཡང་དག་པར་རབ་ཏུ་འཇོག་པ་སྟེ། དེ་བས་ན། མི་དགེ་བའི་ཆོས་དེ་དག་སེམས་ལ་ཕུང་པོར་གྱུར་པ་ མ་ཡིན། ཡུལ་ན་མི་གནས། ཕྱོགས་ན་མི་གནས་སོ། །གང་ཡང་མི་དགེ་བའི་ཆོས་དེ་རྣམས་སེམས་ལ་རྒྱུ་བའི་སྡུག་པའི་རྣམ་པས་འདོད་ཆགས་སམ། ཁོང་ཁྲོ་བའི་རྣམ་པས་ཞེ་སྡང་ དམ། མ་རིག་པའི་རྣམ་པས་གཏི་མུག་གམ། རྒྱུ་དང་སྒྲིབ་པ་གང་དག་ལས་བྱུང་བ་ཤེས་ཤིང་དེ་ལ་ཚུལ་བཞིན་ཡིད་ལ་བྱེད་པའི་རྣམ་པ་མི་གཙང་བས་འདོད་ཆགས་ཞི་བར་བྱེད། བྱམས་པས་ཞེ་སྡང་ཞི་བར་བྱེད། རྟེན་ཅིང་འབྲེལ་པར་འབྱུང་བས་གཏི་མུག་ཞི་བར་བྱེད་དེ། གང་ཀུན་ནས་ཉོན་མོངས་པ་དེ་དག་ཞི་བ་དེ་ནི། ཐ་སྙད་དུ་བཏགས་པའི་ཕྱིར་སྤོང་བ་ཞེས་ ༄༅། །བྱའོ། །གང་སྤོང་བ་དེ་ནི། གང་ཡང་རྙེད་པར་མི་འགྱུར་རོ། །མཉམ་པ་ཉིད་ཀྱི་ཆོས་ཐམས་ཅད་མངོན་སུམ་པས་ན། དེའི་ཕྱིར་ཡང་དག་པར་སྤོང་བ་ཞེས་ བྱ་སྟེ། དེ་ནི། ཡང་དག་པར་སྤོང་བ་གཉིས་པའོ། །གང་ཡང་དགེ་བའི་ཆོས་མ་སྐྱེས་པ་རྣམས་བསྐྱེད་པའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ ཏུ་འཛིན། ཡང་དག་པར་རབ་ཏུ་འཇོག་པ་ཞེས་བྱ་བ་དེ་ནི། གནས་ཚད་མེད་པ་སྟེ། དེ་ཅིའི་ཕྱིར་ཞེ་ན། གང་བྱང་ཆུབ་སེམས་དཔའ་སེམས་དཔའ་ཆེན་པོས་ཡང་དག་པར་བསྒྲུབ་པར་ བྱ་བའི་དགེ་བའི་ཆོས་ཚད་མེད་པའི་ཕྱིར་རོ། །དེ་ལ་འདུན་པ་ནི། དགེ་བའི་རྩ་བ་ཐམས་ཅད་ཀྱི་རྩ་བའོ། །བརྩོན་འགྲུས་ཡང་དག་པར་བསྒྲུབས་པ་ནི། དགེ་བའི་རྩ་བ་ཐམས་ཅད་ ཀྱི་རྩ་བའོ། །སེམས་རབ་ཏུ་འཛིན་པ་ཉམས་སུ་ལོན་པར་བྱེད་པ་དེ་ནི། དགེ་བའི་རྩ་བ་ཐམས་ཅད་ཀྱི་རྩ་བ་སྟེ། དེ་ནི། ཡང་དག་པར་སྤོང་བ་གསུམ་པའོ། །གང་ཡང་དགེ་བའི་ཆོས་ སྐྱེས་པ་རྣམས་གནས་པ་དང༌། ཉམས་པར་མི་འགྱུར་བ་དང༌། ཆུད་མི་ཟ་བར་བྱ་བའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན། ཡང་ དག་པར་རབ་ཏུ་འཇོག་ཅེས་བྱ་བ་དེ་ནི། དགེ་བའི་རྩ་བ་བྱང་ཆུབ་ཏུ་བསྔོས་པའི་ཚིག་བླ་དྭགས་སོ། །དེ་ཅིའི་ཕྱིར་ཞེ་ན། དགེ་བའི་རྩ་བ་བྱང་ཆུབ་ཏུ་བསྔོས་པ་ནི། མཐར་བྱང་ཆུབ་ ཀྱི་སྙིང་པོའི་བར་དུ་སླར་ཆུད་ཟ་བར་མི་འགྱུར་རོ། །དེ་ཅིའི་ཕྱིར་ཞེ་ན། དེ་ལྟར་ཁམས་གསུམ་ལ་མི་གནས་པར་སེམས་བསྐྱེད་པའི་ཕྱིར་རོ། །གང་ཁམས་གསུམ་ལ་གནས་པའི་དགེ་ བའི་རྩ་བ་དེ་ནི། ཟད་པར་འགྱུར་རོ། །དེ་ཅིའི་ཕྱིར་ཞེ་ན། དེ་ལྟར་སེམས་བསྐྱེད་པ་དེ་ནི། ཁམས་གསུམ་ལ་གནས་པའི་ཕྱིར་རོ། །གང་ཡང་དགེ་བའི་རྩ་བ་ཁམས་གསུམ་ལ་མི་གནས་ པ་ཐམས་ཅད་མཁྱེན་པར་བསྔོས་པ་དེ་ལ་ཟད་པ་གང་ཡང་མེད་དེ། དེ་ནི། ཡང་དག་པར་སྤོང་བ་བཞི་པའོ། །དེ་ལྟར་ན། བྱང་ཆུབ་སེམས་དཔའ་ལམ་ཡན་ལག་བཞི་པ་ལ་མཁས་པ་ ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །གཞན་ཡང་ལམ་ལ་མཁས་པ་ནི། བྱང་ཆུབ་སེམས་དཔའ་ལམ་ཡན་ལག་ལྔ་པ་སྟེ། ལྔ་གང་ཞེ་ན། འདི་ལྟ་སྟེ། དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་པོ་དང༌། ཏིང་ངེ་འཛིན་གྱི་དབང་པོ་དང༌། ཤེས་རབ་ཀྱི་དབང་པོ་སྟེ། དེ་ལ་དད་པའི་དབང་པོ་གང་ཞེ་ན། དད་པ་གང་གིས་ཆོས་བཞི་ལ་དད་ པར་བྱེད་པ་སྟེ། བཞི་གང་ཞེ་ན། འཁོར་བ་ན་སྤྱོད་པའི་འཇིག་རྟེན་པའི་ཡང་དག་པའི་ལྟ་བ་ལ་མངོན་པར་དད་དེ། དེ་ལས་ཀྱི་རྣམ་པར་སྨིན་པ་ལ་རྟོན་པ་ཡིན། དེ་སྲོག་གི་ཕྱིར་ཡང་ སྡིག་པའི་ལས་མི་བྱེད་པ་དང༌། བྱང་ཆུབ་སེམས་དཔའི་སྤྱོད་པ་ལ་ཡང་དད་དེ་སྤྱོད་པ་ལ་ཞུགས་པ་དེ། ཐེག་པ་གཞན་ལ་འདོད་པར་མི་བྱེད་པ་དང༌། དོན་དམ་པ་ངེས་པའི་དོན་དང༌། རྟེན་ ༄༅། །ཅིང་འབྲེལ་པར་འབྱུང་བ་ཟབ་མོ་དང༌། སེམས་ཅན་ལ་རྣམ་པར་སྤྱོད་པ་དང༌། སྟོང་པ་ཉིད་དང༌། མཚན་མ་མེད་པའི་མཚན་ཉིད་ཀྱི་ཆོས་ཐམས་ཅད་ལ་དད་དེ་ བལྟ་བར་བྱ་བ་ཐམས་ཅད་བག་ལ་ཉལ་བར་མི་བྱེད་པ་དང༌། སངས་རྒྱས་ཀྱི་ཆོས་ཐམས་ཅད་དང༌། སྟོབས་དང༌། མི་འཇིགས་པ་རྣམས་ལ་དད་ཅིང་ཐོས་ནས་ཐེ་ཚོམ་མེད་ནེམ་ནུར་མེད་ པར་ཆོས་དེ་རྣམས་སྡུད་པར་བྱེད་པ་དེ་ནི། དད་པའི་དབང་པོ་ཞེས་བྱའོ། །དེ་ལ་བརྩོན་འགྲུས་ཀྱི་དབང་པོ་གང་ཞེ་ན། ཆོས་གང་ལ་དད་པ་དེ་བརྩོན་འགྲུས་ཀྱི་དབང་པོས་བསྐྱེད་པར་ བྱེད་པ་སྟེ། དེ་ནི། བརྩོན་འགྲུས་ཀྱི་དབང་པོ་ཞེས་བྱའོ། །ཆོས་གང་དག་བརྩོན་འགྲུས་ཀྱིས་བསྡུས་པ་དེ་དག་དྲན་པའི་དབང་པོས་ཆུད་མི་ཟ་བར་བྱེད་པ་དེ་ནི། དྲན་པའི་དབང་པོ་ ཞེས་བྱའོ། །ཆོས་གང་དྲན་པའི་དབང་པོས་ཆུད་མི་ཟ་བར་བྱེད་པའི་ཆོས་དེ་དག་ཏིང་ངེ་འཛིན་གྱི་དབང་པོས་རྩེ་གཅིག་ཏུ་བྱེད་པ་དེ་ནི། ཏིང་ངེ་འཛིན་གྱི་དབང་པོ་ཞེས་བྱའོ། །ཆོས་ གང་དག་ཏིང་ངེ་འཛིན་གྱི་དབང་པོས་རྩེ་གཅིག་པར་བྱེད་པ་དེ་དག་ཤེས་རབ་ཀྱི་དབང་པོས་སོ་སོར་རྟོག་པར་བྱེད་དེ། གང་ཆོས་དེ་དག་ཤེས་པ་དེ་ནི། ཤེས་རབ་ཀྱི་དབང་པོ་ཞེས་ བྱའོ། །དེ་ལྟར་ན། དབང་པོ་ལྔ་པོ་དེ་དག་ལྷན་ཅིག་ཏུ་འབྲེལ་བ་སྟེ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད། ལུང་བསྟན་པའི་ས་ཡང་ཐོབ་པར་བྱེད་དེ། འདི་ ལྟ་སྟེ། དཔེར་ན། ཕྱི་རོལ་གྱི་མངོན་པར་ཤེས་པ་ལྔ་དང་ལྡན་པ་དག་མངལ་ན་འདུག་པ་བུད་མེད་དང་སྐྱེས་པའི་དབང་པོར་མ་གྱུར་གྱི་བར་དུ་མངལ་ན་འདུག་པ་ལ་ལུང་མི་སྟོན་པ་ དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་བྱང་ཆུབ་སེམས་དཔའ་དབང་པོ་ལྔ་པོ་དེ་དག་དང་མི་ལྡན་གྱི་བར་དུ་ལུང་མི་སྟོན་ཏེ། དེ་ནི། ལམ་ཡན་ལག་ལྔ་པའོ། །དེ་ ལྟར་ན༑ བྱང་ཆུབ་སེམས་དཔའ་ལམ་ཡན་ལག་ལྔ་པ་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །གཞན་ཡང་ཤཱ་རིའི་བུ། བྱང་ཆུབ་སེམས་དཔའ་ལམ་ཡན་ལག་ ལྔ་ལ་མཁས་པ་གང་ཞེ་ན། ཡན་ལག་ལྔ་ནི། འདི་ལྟ་སྟེ། དད་པའི་སྟོབས་དང༌། བརྩོན་འགྲུས་ཀྱི་སྟོབས་དང༌། དྲན་པའི་སྟོབས་དང༌། ཏིང་ངེ་འཛིན་གྱི་སྟོབས་དང༌། ཤེས་རབ་ཀྱི་ སྟོབས་སོ། །དེ་ལ་དད་པའི་སྟོབས་གང་ཞེ་ན། གང་མོས་པ་དད་པ་མགོ་གཅིག་པ་མི་རྫི་བ་སྟེ། གལ་ཏེ་དེའི་དྲུང་དུ་བདུད་སྡིག་ཅན་སངས་རྒྱས་ཀྱི་གཟུགས་སུ་བསྒྱུར་ཏེ་འོངས་ནས་ཆོས་ ཀྱི་ཡེ་ཤེས་ལ་དད་པ་གང་ཡང་རུང་བ་ལ་ལ་ཞིག་གིས་ཆོས་འདི་དག་ནི། སངས་རྒྱས་ཀྱི་ཆོས་མ་ཡིན་ནོ། །ཞེས་དབྲལ་བར་བྱེད། འདུན་པ་ཟློག་པར་བྱེད་ཀྱང་ཡོངས་སུ་བརྟག་པ་ བཟུང་ན། འབྱུང་བ་ཆེན་པོ་བཞི་རྣམས་ནི། གཞན་དུ་འགྱུར་གྱི། དད་པའི་སྟོབས་ལ་མོས་པའི་བྱང་ཆུབ་སེམས་དཔའ་ནི། དེ་ལྟ་མ་ཡིན་ནོ། །དེ་ལྟར་བྱང་ཆུབ་སེམས་དཔའ་སྟོབས་ ༄༅། །ལས་འབྲལ་བར་མི་ནུས་པ་དེ་ནི། དད་པའི་སྟོབས་སོ། །དེ་ལ་བྱང་ཆུབ་སེམས་དཔའི་བརྩོན་འགྲུས་ཀྱི་སྟོབས་གང་ཞེ་ན། གང་བརྩོན་འགྲུས་རྩོམ་ཞིང་དགེ་བའི་ ཆོས་གང་དང་གང་ལ་མངོན་པར་སྦྱོར་བ་དེ་དང་དེ་དག་ལ་བརྟན་པའི་སྟོབས་ཀྱི་མཐུ་ཐོབ་ཀྱང་གནས་དེར་མ་བསྒྲལ་གྱི་བར་དུ་སྟོབས་ཀྱི་མཐུ་དེ་ལ་ལྷ་དང་བཅས་པའི་འཇིག་རྟེན་ རྣམས་ཀྱིས་རྣམ་པར་བཟློག་པའམ། བསྟན་པའམ། རྣམ་པར་བསླང་བར་མི་ནུས་ཏེ། དེ་ནི། བྱང་ཆུབ་སེམས་དཔའི་བརྩོན་འགྲུས་ཀྱི་སྟོབས་ཞེས་བྱའོ། །དེ་ལ་བྱང་ཆུབ་ སེམས་དཔའི་དྲན་པའི་སྟོབས་གང་ཞེ་ན། ཆོས་གང་དག་ལ་དྲན་པ་ཉེ་བར་གཞག་པས་སེམས་ཉེ་བར་བཞག་པ་སྟེ། དེ་ནི། ཉོན་མོངས་པ་གང་ཡང་རུང་བ་དག་གིས་གཏོང་ བའམ་གཡེང་བར་མི་ནུས་ཏེ། དྲན་པའི་སྟོབས་བསྐྱེད་པ་དེས་ཉོན་མོངས་པ་ཐམས་ཅད་འཇོམས་ཤིང་དྲན་པ་དེ་ཡང་མི་ཆོམ་པ་སྟེ། དེ་ནི། བྱང་ཆུབ་སེམས་དཔའི་དྲན་པའི་ སྟོབས་ཞེས་བྱའོ། །དེ་ལ་བྱང་ཆུབ་སེམས་དཔའི་ཏིང་ངེ་འཛིན་གྱི་སྟོབས་གང་ཞེ་ན། གང་འདུ་འཛི་ཐམས་ཅད་དབེན་པར་སྤྱོད་པ་སྟེ། གང་དག་གི་ལམ་གྱི་སྒྲ་ཐམས་ཅད་ལ་ ཡང་རྟོག་ལ་དེའི་བསམ་གཏན་དང་པོའི་སྒྲའི་ཚེར་མ་ལ་སྒྲིབ་པར་མི་བྱེད་པ་དང༌། དགེ་བར་རྟོག་པ་ལ་ཡང་རྣམ་པར་རྟོག་མོད་ཀྱི། བསམ་གཏན་གཉིས་པ་ལ་ཡང་སྒྲིབ་པར་ མི་འབྱུང་བ་དང༌། དེ་དགའ་བ་དང་བདེ་བ་སྐྱེས་ཏེ་གནས་མོད་ཀྱི། དེའི་བསམ་གཏན་གསུམ་པ་ལ་ཡང་སྒྲིབ་པར་མི་འགྱུར་བ་དང༌། དེ་སེམས་ཅན་ཡོངས་སུ་སྨིན་པར་བྱ་བ་ དང༌། དམ་པའི་ཆོས་ཡོངས་སུ་གཟུང་བར་བྱ་བའི་ཕྱིར་བཏང་སྙོམས་པ་ཡང་མ་ཡིན་མོད་ཀྱི། བསམ་གཏན་བཞི་པ་ལ་ཡང་སྒྲིབ་པར་མི་འགྱུར་བ་སྟེ། དེ་བསམ་གཏན་དེ་བཞི་ ལ་གནས་ན། བསམ་གཏན་དང་རྣམ་པར་ཐར་པས་གཞོམ་པར་མི་ནུས་ཏེ། དེ་ཏིང་ངེ་འཛིན་གྱི་གནས་ཀྱང་མི་གཏོང་ལ་ཏིང་ངེ་འཛིན་གྱི་དབང་གིས་ཀྱང་མི་སྐྱེ་སྟེ། དེ་ནི། བྱང་ཆུབ་ སེམས་དཔའི་ཏིང་ངེ་འཛིན་གྱི་སྟོབས་སོ། །དེ་ལ་བྱང་ཆུབ་སེམས་དཔའི་ཤེས་རབ་ཀྱི་སྟོབས་གང་ཞེ་ན། གང་འཇིག་རྟེན་དང་འཇིག་རྟེན་ལས་འདས་པའི་ཆོས་རྣམས་ཀྱིས་མི་ཚོམ་ པའི་ཡེ་ཤེས་ཏེ། བྱང་ཆུབ་སེམས་དཔའི་སྐྱེས་མ་ཐག་ཏུ་བཟོའི་གནས་འཇིག་རྟེན་ན་ཇི་སྙེད་སྤྱོད་པ་དམ་པ་དང༌། དགའ་བར་བྱེད་པ་དང༌། རྙེད་དཀའ་བ་དེ་དག་ཐམས་ཅད་སློབ་ དཔོན་མེད་པར་མངོན་དུ་འགྱུར་ཏེ། གང་འཇིག་རྟེན་ལས་འདས་པ་དག་ཀྱང་གང་གིས་འཇིག་རྟེན་དག་སྒྲོལ་བར་བྱེད་དེ། དེ་དག་བྱང་ཆུབ་སེམས་དཔའི་ཤེས་རབ་དང༌། ཡེ་ཤེས་ ཀྱི་སྟོབས་ཀྱིས་བྱུང་བ། ལྷ་དང༌། མི་རྣམས་ཀྱིས་མི་ཆོམ་པ་སྟེ། དེ་ནི། བྱང་ཆུབ་སེམས་དཔའི་ཤེས་རབ་ཀྱི་སྟོབས་སོ། །འདི་ནི། ཡན་ལག་ལྔ་པའི་ལམ་གཞན་ནོ། །དེ་ལྟར་ན། ༄༅། །བྱང་ཆུབ་སེམས་དཔའ་ཡན་ལག་ལྔ་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །གཞན་ཡང་མདོར་བསྡུ་ན། བྱང་ཆུབ་སེམས་དཔའ་རྣམས་ ཀྱི་ལམ་ནི། མགོ་གཅིག་པ་སྟེ། དེ་ནི། ལམ་བགྲོད་པ་གཅིག་པའོ། །འདི་ལྟ་སྟེ། བྱང་ཆུབ་སེམས་དཔའ་གཅིག་པུ་གཉིས་སུ་མེད་པ་ཡང་དག་པར་རྫོགས་པའི་བྱང་ཆུབ་ཏུ་ གྲོགས་མེད་པར་ཤིན་ཏུ་བརྩོན་པའི་སྟོབས་ཀྱི་མཐུ་ཡོངས་སུ་བཟུང་བའི་བསམ་པས་གོ་ཆ་བགོས་པ་སྟེ། གཞན་གྱིས་མ་བསྟན་པ། གཞན་གྱི་དྲིང་མི་འཇོག་པ། བདག་ཉིད་བྱེད་པ། བདག་གི་ སྟོབས་ཀྱིས་ཡང་དག་པར་འཕགས་པ་སྟེ། དེ་ལྟར་གོ་ཆ་སྲ་བ་བགོས་ནས་གང་སེམས་ཅན་ཐམས་ཅད་ཀྱིས་མ་ཐོབ་པ་དེ་བདག་གིས་ཐོབ་པར་བྱའོ། །གང་འཕགས་པ་ཐམས་ ཅད་དང༌། གང་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་ཐམས་ཅད་ཀྱིས་མ་ཐོབ་པ་དེ་བདག་གིས་ཐོབ་པར་བྱའོ། །སྦྱིན་པ་ནི། ངའི་གྲོགས་མ་ཡིན་གྱི། ང་ནི། སྦྱིན་པའི་གྲོགས་སོ། །ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ནི། ངའི་གྲོགས་མ་ཡིན་གྱི། ང་ནི། དེ་དག་གི་གྲོགས་སོ། །ང་ ནི༑ ཕ་རོལ་ཏུ་ཕྱིན་པ་རྣམས་ཀྱིས་བསླང་བར་བྱ་བ་མ་ཡིན་གྱི། ཕ་རོལ་ཏུ་ཕྱིན་པ་རྣམས་ངས་བསླང་བར་བྱའོ། །གོང་མ་བཞིན་དུ་སྦྱར་ཏེ་དགེ་བའི་རྩ་བ་ཐམས་ཅད་ལ་རྒྱས་པར་ ཤེས་པར་བྱའོ། །ང་ནི། དགེ་བའི་རྩ་བ་ཐམས་ཅད་ཀྱིས་བསླང་བར་བྱ་བ་མ་ཡིན་གྱི་དགེ་བའི་རྩ་བ་ཐམས་ཅད་ངས་བསླང་བར་བྱའོ། །ཞེས་དེ་ལྟ་བུའི་ཆོས་རྣམས་ལ་གྲོགས་མེད་ཅིང་ ང་གཅིག་པུ་གཉིས་སུ་མེད་པར་རྡོ་རྗེའི་གདན་ལ་འདུག་ནས་བདུད་སྟོབས་དང་བཅས་པ་བཏུལ་ཏེ། སྐད་ཅིག་གཅིག་དང་ལྡན་པའི་ཤེས་རབ་ཀྱིས་བླ་ན་མེད་པ་ཡང་དག་པར་རྫོགས་ པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་བྱའོ། །ཞེས་དེ་ལ་ངེས་པར་རྟོག་པ་བསམ་པའི་སྦྱོར་བ་དེ་ནི། བྱང་ཆུབ་སེམས་དཔའི་ལམ་བགྲོད་པ་གཅིག་པུ་ཞེས་བྱ་སྟེ། དེ་ལྟར་ ན༑ བྱང་ཆུབ་སེམས་དཔའི་ལམ་བགྲོད་པ་གཅིག་པུ་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ནི། བྱང་ཆུབ་སེམས་དཔའ་རྣམས་ཀྱི་ལམ་ལ་མཁས་པ་སྟེ། དེ་ལྟར་ ན༑ བྱང་ཆུབ་སེམས་དཔའ་རྣམས་ཀྱི་ལམ་ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །དེ་ལ་བྱང་ཆུབ་སེམས་དཔའ་རྣམས་ཀྱི་རྟེན་ཅིང་འབྲེལ་བར་འབྱུང་བ་ལ་མཁས་ པ་གང་ཞེ་ན། འདི་ལ་བྱང་ཆུབ་སེམས་དཔའ་གཅིག་པུ་དཔེན་པར་སོང་སྟེ་ནང་དུ་ཡང་དག་བཞག་ནས་འདི་ལྟར་སེམས་ལ་རྟོག་པ་སྐྱེས་ཏེ། སྡུག་བསྔལ་གྱི་ཕུང་པོ་ཆེན་པོ་འདི་གང་ ལས་འབྱུང་བར་འགྱུར་སྙམ་པ་དང༌། དེ་འདི་ལྟར་སེམས་ཏེ། ཚུལ་བཞིན་མ་ཡིན་པ་བྱུང་བའི་ཕྱིར་མ་རིག་པ་འབྱུང༌། མ་རིག་པ་བྱུང་བའི་ཕྱིར་འདུ་བྱེད་འབྱུང༌། འདུ་བྱེད་བྱུང་ ༄༅། །བའི་ཕྱིར་རྣམ་པར་ཤེས་པ་འབྱུང༌། རྣམ་པར་ཤེས་པ་བྱུང་བའི་ཕྱིར་མིང་དང་གཟུགས་འབྱུང༌། མིང་དང་གཟུགས་བྱུང་བའི་ཕྱིར་སྐྱེ་མཆེད་དྲུག་འབྱུང་ སྐྱེ་མཆེད་དྲུག་བྱུང་བའི་ཕྱིར་རེག་པ་འབྱུང༌། རེག་པ་བྱུང་བའི་ཕྱིར་ཚོར་བ་འབྱུང༌། ཚོར་བ་བྱུང་བའི་ཕྱིར་སྲེད་པ་འབྱུང༌། སྲེད་པ་བྱུང་བའི་ཕྱིར་ལེན་པ་འབྱུང༌། ལེན་པ་བྱུང་བའི་ ཕྱིར་སྲིད་པ་འབྱུང༌། སྲིད་པ་འབྱུང་བའི་ཕྱིར་སྐྱེ་བ་འབྱུང༌། སྐྱེ་བ་བྱུང་བའི་ཕྱིར་རྒ་ཤི་འབྱུང༌། རྒ་ཤི་བྱུང་བའི་ཕྱིར་མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་འབྱུང་བར་འགྱུར་རོ། །སྙམ་མོ། །དེ་ཡང་འདི་ལྟར་སེམས་ཏེ། ཇི་ལྟར་མི་གཡོ་བ་དང༌། མི་བྱེད་པ་དང༌། བདག་པོ་མེད་པ་དང༌། དགེ་བའི་ རྒྱུ་ལས་བྱུང་བ་དང༌། མི་དགེ་བའི་རྒྱུ་ལས་བྱུང་བ་དང༌། མི་གཡོ་བའི་རྒྱུ་ལས་བྱུང་བ་དང༌། མྱ་ངན་ལས་འདས་པའི་རྒྱུ་ལས་བྱུང་བའི་ཆོས་དེ་དག་ཐམས་ཅད་རྐྱེན་ལས་བྱུང་བ་ སྟེ༑ གང་ཡང་ལས་ཀྱི་རྒྱུ་གང་དག་གིས་སེམས་ཅན་གང་དག་གི་དབང་པོའི་རྒྱུ་ཚད་མ་དང༌། ལྷག་པའི་ཆོ་གའི་རྒྱུ་ཚད་མའི་འབྲས་བུའི་རྒྱུ་འགྲུབ་པ་དང༌། དེ་ལྟར་ཟིན་པ་དང༌། མ་ཟིན་པ་ལ་གང་རྒྱུ་འདུས་པ་བྱུང་བ་དེ་ཐམས་ཅད་རབ་ཏུ་ཤེས་པ་སྟེ། དེ་ནི། བྱང་ཆུབ་སེམས་དཔའི་རྟེན་ཅིང་འབྲེལ་བར་འབྱུང་བ་ལ་མཁས་པ་ཞེས་བྱའོ། །དེ་ཡང་གང་འགག་ ཅེ་ན༑ ཚུལ་བཞིན་མ་ཡིན་པ་ཡིད་ལ་བྱེད་པ་འགགས་པའི་ཕྱིར་མ་རིག་པ་འགག་གོ །མ་རིག་པ་འགགས་པའི་ཕྱིར་འདུ་བྱེད་འགགས་པ་ནས་སྡུག་བསྔལ་གྱི་ཕུང་པོ་ཆེན་པོ་འབའ་ ཞིག་གི་བར་དུ་འགག་པར་འགྱུར་རོ། །ཞེས་དེ་སྙམ་དུ་སེམས་ཏེ། དེ་ལྟར་གང་དེ་ལ་ཤེས་པ་དེ་ནི། རྟེན་ཅིང་འབྲེལ་པར་འབྱུང་བ་ལ་མཁས་པ་ཞེས་བྱའོ། །དེ་ཡང་ཆོས་ཐམས་ཅད་ ནི༑ རྒྱུ་ལ་རག་ལས། རྐྱེན་ལ་རག་ལས། འདུས་པ་ལ་རག་ལས་པ་སྟེ། གང་རྒྱུ་དང༌། རྐྱེན་དང༌། འདུས་པ་ལ་རག་ལས་པ་དེ་ནི། བདག་གི་བྱིན་གྱི་རླབས་མ་ཡིན། སྲོག་དང༌། གང་ ཟག་གི་བྱིན་གྱི་རླབས་མ་ཡིན་ཏེ། དེ་ལ་བགྲང་བ་གང་ཡང་མེད་དོ། །ཞེས་དེ་ལྟར་སེམས་ཏེ། གང་དེ་ལྟར་སེམས་པ་དེ་ནི། རྟེན་ཅིང་འབྲེལ་བར་འབྱུང་བ་ལ་མཁས་པའོ། །དེ་ལྟར་ ན༑ བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་བྱང་ཆུབ་ཀྱི་རྣམ་པའི་རྐྱེན་དུ་སློང་བར་བྱེད་ལ། རྐྱེན་དེ་དག་ལ་ཡང་ཟད་པ་དང༌། འགག་པར་སོ་སོར་རྟོག་ལ་སེམས་ ཅན་ལ་བལྟ་བའི་ཕྱིར་ཟད་པ་དང་འགག་པ་མ་ཡིན་པ་ཡང་ཐོབ་པར་བྱེད་པ་དེ་ནི། བྱང་ཆུབ་སེམས་དཔའི་རྟེན་ཅིང་འབྲེལ་པར་འབྱུང་བ་ལ་མཁས་པའོ། །དེ་ལ་བྱང་ཆུབ་སེམས་ དཔའི་ཆོས་ཐམས་ཅད་ལ་མཁས་པ་གང་ཞེ་ན། ཆོས་ཐམས་ཅད་ཅེས་བྱ་བ་ནི། འདི་ལྟ་སྟེ། འདུས་བྱས་དང༌། འདུས་མ་བྱས་སོ། །དེ་ལ་བྱང་ཆུབ་སེམས་དཔའ་འདུས་བྱས་དང༌། ༄༅། །འདུས་མ་བྱས་ལ་མཁས་པར་བྱ་སྟེ། དེ་ལ་འདུས་བྱས་ལ་མཁས་པ་གང་ཞེ་ན། གང་ལུས་ཀྱི་འདུ་བྱེད་དང༌། ངག་གི་འདུ་བྱེད་དང༌། ཡིད་ཀྱི་འདུ་བྱེད་དོ། །གང་ལ་ལུས་ དང༌། ངག་དང༌། ཡིད་ཀྱི་དགེ་བའི་འདུ་བྱེད་ཀྱིས་འདུས་མ་བྱས་པའི་བྱང་ཆུབ་ལ་འདུས་མ་བྱས་པར་རྟོགས་པས་ཐམས་ཅད་མཁྱེན་པ་ཉིད་དུ་བསྔོ་བ་དེ་ནི། འདུས་མ་བྱས་ལ་མཁས་ པའོ༑ ༑གཞན་ཡང་འདུས་བྱས་ལ་མཁས་པ་ནི། འདི་ལྟ་སྟེ། གང་སྦྱིན་པའི་ཕ་རོལ་ཏུ་ཕྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་ རབ་ཀྱི་ཕ་རོལ་ཏུ་ཕྱིན་པ་དང༌། ཕ་རོལ་ཏུ་ཕྱིན་པ་ལྔ་རྣམས་སྡུད་པའོ། །གང་ཡང་འདུས་མ་བྱས་པའི་ཤེས་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕ་རོལ་ཏུ་ཕྱིན་པ་ལྔ་རྣམས་ཀྱིས་ སྨོད་པར་མི་བྱེད་ཅིང༌། ཕ་རོལ་ཏུ་ཕྱིན་པའི་ཚོགས་ཐམས་ཅད་ལ་མཁས་པ་དང༌། ཟག་པ་མེད་པའི་བྱང་ཆུབ་དེ་ལ་མོས་པས་གང་ཐམས་ཅད་མཁྱེན་པ་ཉིད་དུ་བསྔོ་བ་དེ་ནི། འདུས་མ་ བྱས་ལ་མཁས་པའོ། །གཞན་ཡང་འདུས་བྱས་ལ་མཁས་པ་ནི། སེམས་ཅན་ཐམས་ཅད་ལ་འོད་ཟེར་ཐོགས་པ་མེད་པ་དང༌། བསྡུ་བ་བཞིས་སེམས་ཅན་རྣམས་སྡུད་པའོ། །གང་ ཡང་སྙེམས་པ་མེད་པའི་ཕྱིར་སེམས་ཅན་ལ་བདག་མེད་པར་འཛིན་པ་དག་བསྡུ་བ་ལ་མཁས་ཤིང་འདུས་མ་བྱས་པའི་བྱང་ཆུབ་ལ་མོས་ནས་ཐམས་ཅད་མཁྱེན་པ་ཉིད་དུ་བསྔོ་བ་དེ་ ནི༑ དེའི་འདུས་མ་བྱས་ལ་མཁས་པའོ། །གཞན་ཡང་འདུས་བྱས་ལ་མཁས་པ་ནི། གང་འཁོར་བའི་རྒྱུན་གྱི་ཀུན་ནས་སྦྱོར་བ་རྣམས་ཡང་དག་པར་མི་གཅོད་ལ་འཁོར་བའི་རྒྱུན་གྱི་ ཉོན་མོངས་པ་རྣམས་ཡང་དག་པར་གཅོད་པ་དང༌། བྱང་ཆུབ་ཏུ་དམིགས་པའི་སྦྱོར་བ་རྣམས་རྒྱུན་ཆགས་པར་བྱེད་པ་དང༌། སྦྱོར་བ་ཕྱོགས་གཅིག་པ་རྣམས་མི་སྡུད་པར་སྤྱོད་པ་དེ་ནི། འདུས་ བྱས་ལ་མཁས་པ་ཞེས་བྱའོ། །གང་ཡང་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའི་ཆོས་རྣམས་ལ་འདྲིས་པར་བྱ་བ་ཤེས་ཤིང་མངོན་སུམ་དུ་མཁས་པ་དང༌། བྱང་ཆུབ་ཏུ་ གཞན་གྱི་དྲིང་ལ་མི་འཇོག་ཅིང་འདུས་མ་བྱས་ཀྱང་མངོན་དུ་མི་བྱེད་པ་དེ་ནི། འདུས་མ་བྱས་ལ་མཁས་པའོ། །གཞན་ཡང་ཁམས་གསུམ་ན་སྤྱོད་ཀྱང་ཁམས་གསུམ་ན་སྤྱོད་པའི་ཉོན་ མོངས་པ་རྣམས་ཀྱིས་མི་གོས་པ་དེ་ནི། དེའི་འདུས་བྱས་ལ་མཁས་པའོ། །གང་ཡང་ཁམས་གསུམ་ལས་འབྱུང་བའི་ཡེ་ཤེས་རབ་ཏུ་ཤེས་ཀྱང་འབྱུང་བའི་ཁམས་སུ་མི་ལྟུང་བ་དེ་ནི། འདུས་མ་བྱས་ལ་མཁས་པའོ། །གང་ཆོས་ཐམས་ཅད་ལ་མཁས་པ་ཞེས་བྱ་བ་དེ་ནི། ཐམས་ཅད་མཁྱེན་པའི་ཚིག་བླ་དྭགས་སོ། །གང་ཐམས་ཅད་མཁྱེན་པ་ཉིད་ཀྱི་ཡེ་ཤེས་རྟོགས་པ་ཡོངས་ སུ་རྫོགས་པ་དེ་ནི། ཤེས་རབ་དང་མཁས་པ་མེད་ན། འབྱུང་བར་མི་འགྱུར་བས། དེའི་ཕྱིར་ཆོས་ཐམས་ཅད་ལ་མཁས་པ་ཞེས་བྱ་སྟེ། དེ་ལྟར་ན། བྱང་ཆུབ་སེམས་དཔའ་ཆོས་ཐམས་ཅད་ ༄༅། །ལ་མཁས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སྡེ་སྣོད་ལ་ གནས་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། ཤེས་རབ་རྣམ་པར་འབྱེད་པ་ལ་མཁས་ཤིང༌། མཁས་པ་བཅུ་པོ་དེ་དག་ལ་ཡང་མཁས་པས་ཤེས་རབ་ཀྱི་ཕ་རོལ་ཏུ་ཕྱིན་ཕ་ལ་ སྤྱོད་དོ༑ ༑དེ་ལ་ཤེས་རབ་ནི། གང༌། ཕ་རོལ་ཏུ་ཕྱིན་པ་རྣམས་ཀྱི་དོན་ནི། གང་ཞེ་ན། ཤེས་རབ་ཅེས་བྱ་བ་ནི། དགེ་བ་དང༌། མི་དགེ་བའི་ཆོས་རྣམས་རབ་ཏུ་ཤེས་པའོ། །ཤེས་རབ་ནི། ངེས་པར་འབྱེད་པའི་ཆ་དང་མཐུན་པའི་ཆོས་རྣམས་ཀྱི་མངོན་སུམ་མོ། །འཕགས་པའི་ཆོས་མངོན་སུམ་དུ་གྱུར་པའི་ཕྱིར་ཚད་མར་གྱུར་པ་ནི། ཤེས་རབ་བོ། །ཆོས་ཡང་དག་པ་ཇི་ལྟ་བ་ བཞིན་དུ་རྟོགས་པའི་ཕྱིར་ཚད་མར་གྱུར་པའོ། །ཤེས་རབ་ནི། ལྟ་བར་གྱུར་པ་ཐམས་ཅད་དང༌། ཀུན་ནས་ལྡང་བ་དང༌། སྒྲིབ་པ་དང༌། སྒྲིབ་པར་བྱེད་པའི་ཆོས་རྣམས་རབ་ཏུ་རྟོགས་ པའོ༑ ༑ཤེས་རབ་ནི། འདོད་པ་དང༌། ཚོར་བ་དང༌། སྨོན་ལམ་ཐམས་ཅད་ཀྱི་སྨོན་ལམ་དང༌། བྲལ་བའོ། །ཤེས་རབ་ནི། ཤིན་ཏུ་སྦྱངས་པའི་ཕྱིར་སིམ་པར་བྱེད་པའོ། །ཤེས་རབ་ ནི༑ ཆོས་ཀྱི་དགའ་བ་ལ་དམིགས་པ་རྣམ་པར་མི་གཅོད་པའི་ཕྱིར་རབ་ཏུ་དགའ་བར་བྱེད་པའོ། །ཤེས་རབ་ནི། ཡེ་ཤེས་ཐམས་ཅད་མངོན་སུམ་དུ་གྱུར་པའི་ཕྱིར་རྟེན་པའོ། །ཤེས་ རབ་ནི༑ བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཀྱི་གནས་སོ། །ཤེས་རབ་ནི། ཐེག་པ་ཇི་ལྟ་བ་བཞིན་གྱི་འབྲས་བུ་རྟོགས་པའི་ཕྱིར་ཐོབ་པའི་མཚན་ཉིད་དོ། །ཤེས་རབ་ནི། རང་བཞིན་ གྱིས་ཡེ་ཤེས་སྣང་བ་རབ་ཏུ་ཤེས་པའི་མཚན་ཉིད་དོ། །ཤེས་རབ་ནི། ཆུ་བོ་ཐམས་ཅད་ལས་སྒྲོལ་བའི་ཕྱིར་རབ་ཏུ་སྒྲོལ་བའོ། །ཤེས་རབ་ནི། ཡང་དག་པར་གྱུར་པ་ལ་འདྲེན་པའོ། ། ཤེས་རབ་ནི། དགེ་བའི་ཆོས་ཐམས་ཅད་རབ་ཏུ་འཛིན་པའོ། །ཤེས་རབ་ནི། ཉོན་མོངས་པའི་བག་ལ་ཉལ་ཐམས་ཅད་དང་བར་བྱེད་པའོ། །ཤེས་རབ་ནི། ཆོས་ཐམས་ཅད་ཀྱི་སྤྱི་བོ་ཐོབ་ པའི་མཆོག་གོ། ཤེས་རབ་ནི། རང་བྱུང་བའི་ཡེ་ཤེས་རྟོགས་པར་བྱ་བ་ལ་དམ་པའོ། །ཤེས་རབ་ནི། ཁམས་གསུམ་དང་མ་འདྲེས་པས་རྒྱུ་དང་བྲལ་བའོ། །ཤེས་རབ་ནི། འཕགས་པ་ ཐམས་ཅད་ཀྱིས་ཤིན་ཏུ་བཟུང་བའོ། །ཤེས་རབ་ནི། མཚན་མར་ཡོངས་སུ་རྟོག་པ་ཐམས་ཅད་སྤངས་པས་སྨོན་ལམ་རྣམ་པར་ཆད་པའོ། །ཤེས་རབ་ནི། མུན་པ་མུན་ནག་དང་བྲལ་བས་ བག་མེད་པའི་གཉེན་པོའོ། །ཤེས་རབ་ནི། རྣལ་འབྱོར་སྤྱོད་པའི་ས་ལ་གནས་པ་ཐམས་ཅད་ཀྱི་སྦྱོར་བའོ། །ཤེས་རབ་ནི། ཐམས་ཅད་མཁྱེན་པའི་ཡེ་ཤེས་ཀྱི་ལམ་ལ་གནས་པ་ རྣམས་ཀྱི་རབ་ཏུ་འདྲེན་པའོ། །ཤེས་རབ་ནི། མ་རིག་པའི་རླུང་གི་མུན་པ་རབ་རིབ་ཀྱི་སྤྲིན་འཇོམས་པར་བྱེད་པས་སྣང་བར་བྱེད་པའོ། །ཤེས་རབ་ནི། མིག་ལ་ཇི་ལྟར་མོས་པ་རྣམས་ ༄༅། །ཀྱི་མིག་ཐམས་ཅད་སྦྱིན་པར་བྱེད་པའོ། །ཤེས་རབ་ནི། མིང་དང་གཟུགས་ཀྱི་ལམ་ལས་འདས་པའི་ཕྱིར་ཟག་པ་མེད་པའོ། །ཤེས་རབ་ནི། དབེན་པ་ལས་བྱུང་ བ་དོན་དམ་པའོ། །ཤེས་རབ་ནི། ཤིན་ཏུ་དུལ་བའི་ཕྱིར་མི་འཁྲུགས་པའོ། །ཤེས་རབ་ནི། ཡེ་ཤེས་ཀྱི་སྒོའི་སྣང་བའོ། །ཤེས་རབ་ནི། ཐམས་ཅད་རྒྱུ་བ་མི་ཟད་པའོ། །ཤེས་རབ་ ནི༑ རྟེན་ཅིང་འབྲེལ་པར་འབྱུང་བ་ལ་འཇུག་པར་མཐོང་བའི་ཕྱིར་འགལ་པ་མེད་པའོ། །ཤེས་རབ་ནི། ལེན་པའི་འཆིང་བ་ཐམས་ཅད་གཅོད་པར་བྱེད་པས་ཐར་པའི་ལམ་མོ། །ཤེས་ རབ་ནི། སྒྲིབ་པར་བྱེད་པའི་ཕྱིར་ཆོས་ཐམས་ཅད་དང་ལྷན་ཅིག་ཏུ་མི་གནས་པས་མ་འདྲེས་པའོ། །ཤཱ་རིའི་བུ། དེ་ལྟ་བས་ན། སེམས་ཅན་ཐམས་ཅད་ཀྱི་སེམས་དང་སྤྱོད་པ་ཇི་ སྙེད་པ་བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ལས་དང༌། ཡེ་ཤེས་ཀྱི་སྤྱོད་པ་ཡང་དེ་སྙེད་དོ། །སེམས་ཅན་ཐམས་ཅད་ཀྱི་བསམ་པ་ཇི་སྙེད་པ་བྱང་ཆུབ་སེམས་དཔའི་ ཤེས་རབ་ཀྱི་སྤྱོད་པ་དང༌། ཡེ་ཤེས་ཀྱང་དེ་སྙེད་དོ། །སེམས་ཅན་ཐམས་ཅད་ཀྱི་ཉོན་མོངས་པའི་སྒོ་ཇི་སྙེད་པ་བྱང་ཆུབ་སེམས་དཔའི་ཤེས་རབ་ལ་འཇུག་པའི་སྒོ་ཡང་དེ་སྙེད་ དོ༑ ༑ཉན་ཐོས་དང༌། རང་སངས་རྒྱས་དང༌། ཡང་དག་པར་རྫོགས་པའི་སངས་རྒྱས་རྣམས་ཀྱི་ཡོངས་སུ་ཤེས་པ་ཇི་སྙེད་པ་ཤེས་རབ་གནས་པའི་གནས་ཀྱང་དེ་སྙེད་དེ། བྱང་ཆུབ་ སེམས་དཔས་ཐམས་ཅད་ལ་བསླབ་པར་བྱ་སྟེ། དེ་ནི། བྱང་ཆུབ་སེམས་དཔའི་ཤེས་རབ་ཅེས་བྱའོ། །དེ་ལ་ཕ་རོལ་ཏུ་ཕྱིན་པའི་དོན་གང་ཞེ་ན། ཤེས་རབ་གང་ཡིན་པ་ཕ་རོལ་ཏུ་ཕྱིན་པའི་ དོན་ཀྱང་དེ་ཡིན་ཏེ། དགེ་བའི་ཆོས་རྣམས་རབ་ཏུ་ཤེས་པ་དེ་ནི། ཕ་རོལ་ཏུ་ཕྱིན་པའི་དོན་ཞེས་བྱའོ། །གོང་མ་བཞིན་དུ་སྦྱར་ཏེ་ཕ་རོལ་ཏུ་ཕྱིན་པ་ཐམས་ཅད་ཀྱི་ཚིག་ཀྱང་དེ་བཞིན་དུ་ དཔྱད་པར་བྱའོ། །གཞན་ཡང་བྱང་ཆུབ་སེམས་དཔའི་སྤྱོད་པའི་ཁྱད་པར་ཡོངས་སུ་རྫོགས་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །གཞན་ཡང་ཐམས་ཅད་མཁྱེན་པའི་ཡེ་ཤེས་ཡོངས་ སུ་རྫོགས་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །འདུས་བྱས་དང་འདུས་མ་བྱས་པའི་ཆོས་ལ་མངོན་པར་མ་ཆགས་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །འཁོར་བའི་ཉེས་པ་ ཁོང་དུ་ཆུད་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །ཟད་མི་ཤེས་པའི་ཆོས་ཀྱི་མཛོད་སྟོན་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །སྒྲིབ་པ་མེད་པའི་རྣམ་པར་ཐར་པ་ཡོངས་སུ་རྫོགས་ པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །སྦྱིན་པ་མཉམ་པ་ཉིད་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་མཉམ་པ་ཉིད་རྟོགས་པའི་ དོན་ནི། ཕ་རོལ་ཏུ་ཕྱིན་པའི་དོན་ཏོ། །རྣམ་པར་ངེས་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །སེམས་ཅན་ཐམས་ཅད་ཀྱི་ཁམས་ལ་འཇུག་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །མི་ ༄༅། །སྐྱེ་བའི་ཆོས་ལ་བཟོད་པ་ཡོངས་སུ་རྫོགས་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །ཕྱིར་མི་ལྡོག་པའི་ས་ཡོངས་སུ་རྫོགས་པའི་དོན་ནི། ཕ་རོལ་ཏུ་ཕྱིན་པའི་ དོན་ཏོ༑ ༑སངས་རྒྱས་ཀྱི་ཞིང་ཡོངས་སུ་རྫོགས་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །སེམས་ཅན་ཡོངས་སུ་སྨིན་པར་བྱ་བའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །བྱང་ཆུབ་ཀྱི་སྙིང་ པོ་ཡང་དག་པར་ཐོབ་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །བདུད་ཐམས་ཅད་རབ་ཏུ་འདུལ་བའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །སངས་རྒྱས་ཀྱི་ཆོས་ཐམས་ཅད་ཡོངས་སུ་ རྫོགས་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །གཞན་ཡང་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་གཞོག་པར་བྱེད་པའི་དོན་ནི། ཕ་རོལ་ཏུ་ཕྱིན་པའི་དོན་ཏོ། །ཤཱ་ རིའི་བུ༑ བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་བསླབ་ན། ཕ་རོལ་ཏུ་ཕྱིན་པ་ཐམས་ཅད་ཀྱི་ཕ་རོལ་ཏུ་སོན་པར་འགྱུར་རོ། །ཤཱ་རིའི་བུ། དེ་བས་ན། ཐེག་པ་ཆེན་པོ་ལ་ གནས་པའི་རིགས་ཀྱི་བུའམ་རིགས་ཀྱི་བུ་མོས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་བླང་བར་བྱ། གཟུང་བར་བྱ། བཀླག་པར་བྱ། གཞན་ལ་ཡང་བཤད་པར་ བྱ༑ རྒྱ་ཆེར་རབ་ཏུ་བསྟན་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཤིན་ཏུ་མཉན། བླངས། བཟུང༌། བཀླགས། ཀུན་ཆུབ་ པར་བྱས། གཞན་ལ་ཡང་བཤད། རྒྱ་ཆེར་ཡང་དག་པར་རབ་ཏུ་བསྟན་ན། ཡོན་ཏན་བཅུ་པོ་འདི་དག་ཐོབ་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། ཚེ་རབས་གཞན་དུ་འཕོས་ནས་ བཟོའི་གནས་དང༌། ལས་ཀྱི་གནས་ཐམས་ཅད་ལ་རྟོགས་པར་ཁོང་དུ་ཆུད་པར་འགྱུར། རིགས་མཐོ་ཞིང་བརྩོན་པར་འགྱུར། དབང་ཆེ་བར་གྲགས་པར་འགྱུར། ཚིག་བཙུན་པར་འགྱུར། ལོངས་སྤྱོད་ཆེ་བར་འགྱུར། ལྷ་དང་མི་རྣམས་ལ་ཕངས་པར་འགྱུར། འཁོར་ལོས་བསྒྱུར་བའི་རྒྱལ་པོ་ཐོབ་པར་འགྱུར། ཚངས་པ་ཐོབ་པར་འགྱུར། ཐམས་ཅད་དུ་བྱང་ཆུབ་ཀྱི་སེམས་ དང་མི་འབྲལ་བར་འགྱུར་ཏེ། ཡོན་ཏན་གྱི་ཕན་ཡོན་འདི་བཅུ་ཐོབ་པར་འགྱུར་རོ། །དེ་གཞན་ཡང་ཡོན་ཏན་གྱི་ཕན་ཡོན་བཅུ་ཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། གཅེར་ བུ་པའི་རྩོད་པ་དང་འདྲེས་པ་མ་ཡིན་པར་འགྱུར་བ་དང༌། བདག་ཏུ་མི་ལྟ་བ་དང༌། སེམས་ཅན་དུ་མི་ལྟ་བ་དང༌། སྲོག་ཏུ་མི་ལྟ་བ་དང༌། གང་ཟག་ཏུ་མི་ལྟ་བ་དང༌། ཆད་པར་མི་ལྟ་བ་དང༌། རྟག་པར་མི་ལྟ་བར་འགྱུར་བ་དང༌། དངོས་པོ་ཐམས་ཅད་ལ་མི་ལྟ་བ་དང༌། རབ་ཏུ་འབྱུང་བ་ལ་དགའ་བར་སེམས་བསྐྱེད་པ་འཐོབ་པ་དང༌། ཐོས་པའི་ཚིག་འབྲུ་མྱུར་དུ་ཁོང་དུ་ཆུད་པར་ འགྱུར་བ་སྟེ། ཡོན་ཏན་གྱི་ཕན་ཡོན་བཅུ་པོ་དེ་དག་ཐོབ་པར་འགྱུར་རོ། །དེ་གཞན་ཡང་ཡོན་ཏན་གྱི་ཕན་ཡོན་བཅུ་ཐོབ་པར་འགྱུར་ཏེ། བཅུ་གང་ཞེ་ན། དྲན་པ་དང་ལྡན་པར་འགྱུར་བ་ ༄༅། །དང༌། བློ་གྲོས་དང་ལྡན་པར་འགྱུར་བ་དང༌། རྟོགས་པ་དང་ལྡན་པར་འགྱུར་བ་དང༌། མོས་པ་དང་ལྡན་པར་འགྱུར་བ་དང༌། ཤེས་རབ་དང་ལྡན་པར་འགྱུར་བ་དང༌། དལ་བ་ཕུན་སུམ་ཚོགས་པ་རྙེད་པར་འགྱུར་བ་དང༌། ཚེ་རབས་དྲན་པར་འགྱུར་བ་དང༌། རང་བཞིན་གྱིས་འདོད་ཆགས་ཆུང་སྟེ་འདོད་ཆགས་བདོ་བ་མ་ཡིན་ལ། དེ་ཤིན་ཏུ་འདོད་ཆགས་ ཀྱི་གདུང་བས་ཡོངས་སུ་མི་གདུང་བ་དང༌། རང་བཞིན་གྱིས་ཞེ་སྡང་ཆུང་སྟེ་ཞེ་སྡང་བདོ་བ་མ་ཡིན་ལ། དེ་ཤིན་ཏུ་ཞེ་སྡང་གི་གདུང་བས་ཡོངས་སུ་མི་གདུང་བ་དང༌། རང་བཞིན་གྱིས་ གཏི་མུག་ཆུང་སྟེ་གཏི་མུག་བདོ་བ་མ་ཡིན་ལ། དེ་ཤིན་ཏུ་གཏི་མུག་གི་གདུང་བས་ཡོངས་སུ་གདུང་བར་མི་འགྱུར་བ་སྟེ། ཡོན་ཏན་གྱི་ཕན་ཡོན་བཅུ་པོ་དེ་དག་ཐོབ་པར་འགྱུར་རོ། །དེ་ གཞན་ཡང་ཡོན་ཏན་གྱི་ཕན་ཡོན་བཅུ་ཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། ཤེས་རབ་ངོ་མཚར་དུ་འགྱུར། ཤེས་རབ་མྱུར་བར་འགྱུར། ཤེས་རབ་རྣོ་བར་འགྱུར། ཤེས་ རབ་མགྱོགས་པར་འགྱུར། ཤེས་རབ་རྒྱ་ཆེ་བར་འགྱུར། ཤེས་རབ་ཟབ་པར་འགྱུར། ཤེས་རབ་ངེས་པར་འབྱེད་པར་འགྱུར། ཤེས་རབ་མ་ཆགས་པར་འགྱུར། དེ་བཞིན་གཤེགས་ པ་མངོན་སུམ་དུ་མཐོང་ཞིང་མཐོང་ནས་ཚིགས་སུ་བཅད་པའི་དབྱངས་ཀྱིས་བསྟོད་པ་དང༌། དེ་བཞིན་གཤེགས་པ་ལ་ཚུལ་བཞིན་གྱི་ཞུ་བ་ཡོངས་སུ་ཞུ་ཞིང་ཚུལ་བཞིན་དུ་ཞུ་བ་ཞུས་ ནས་ལན་ལྡོན་པར་འགྱུར་བ་སྟེ། ཡོན་ཏན་གྱི་ཕན་ཡོན་བཅུ་པོ་དེ་དག་ཐོབ་པར་འགྱུར་རོ། །དེ་གཞན་ཡང་ཡོན་ཏན་གྱི་ཕན་ཡོན་བཅུ་ཐོབ་པར་འགྱུར་ཏེ། བཅུ་གང་ཞེ་ན། འདི་ལྟ་སྟེ། དགེ་བའི་བཤེས་གཉེན་ཐམས་ཅད་མཉེས་པར་བྱས་པར་འགྱུར་བ་དང༌། བདུད་ཀྱི་བཅིངས་པ་ཐམས་ཅད་ལྷོད་པར་འགྱུར་བ་དང༌། དེས་བདུད་ཐམས་ཅད་ཚར་གཅོད་པར་འགྱུར་བ་དང༌། ཉོན་མོངས་པ་ཐམས་ཅད་སྨད་པར་འགྱུར་བ་དང༌། འདུ་བྱེད་ཐམས་ཅད་དུ་གཏོགས་པ་ལས་ཡིད་བསྐྱོད་པར་འགྱུར་བ་དང༌། འགྲོ་བ་ངན་པར་འགྲོ་བའི་ལམ་ཐམས་ཅད་ལ་རྒྱབ་ཀྱིས་ ཕྱོགས་པར་འགྱུར་བ་དང༌། མྱ་ངན་ལས་འདའ་བར་འགྲོ་བའི་ལམ་མངོན་དུ་འགྱུར་བ་དང༌། འཁོར་བ་ཐམས་ཅད་ལས་སྒྲོལ་བའི་སྦྱིན་པ་བྱིན་པར་འགྱུར་བ་དང༌། བྱང་ཆུབ་སེམས་དཔའ་ ཐམས་ཅད་ཀྱི་ཆོ་གའི་རྗེས་སུ་ཞུགས་པར་འགྱུར་བ་དང༌། སངས་རྒྱས་བཅོམ་ལྡན་འདས་ཐམས་ཅད་ཀྱི་བཀའི་རྗེས་སུ་ཞུགས་པར་འགྱུར་བ་སྟེ། ཡོན་ཏན་གྱི་ཕན་ཡོན་བཅུ་པོ་དེ་དག་ ཐོབ་པར་འགྱུར་རོ། །ཤཱ་རིའི་བུ། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཤིན་ཏུ་མཉན། བླངས། བཟུང༌། བཀླགས། ཀུན་ཆུབ་པར་བྱས། གཞན་ལ་ཡང་བཤད་ཅིང་རྒྱ་ ཆེར་ཡང་དག་པར་རབ་ཏུ་བསྟན་ན། ཡོན་ཏན་གྱི་ཕན་ཡོན་འདི་སྙེད་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱས་པར་བསྟན་པའི་ཕྱིར་དེའི་ཚེ་ཚིགས་སུ་བཅད་ ༄༅། །པ་འདི་དག་གསུངས་སོ། །གང་དག་མདོ་སྡེའི་རྒྱལ་པོ་འདི་འཛིན་པ། །མཁས་པ་དེ་དག་ཤེས་རབ་མཐའ་ཡས་འགྱུར། །ཆོས་དང་དོན་རྣམས་ལ་ཡང་མཁས་པར་ འགྱུར༑ ༑ཚིག་ཀྱང་ཁྱད་པར་འཕགས་ཤིང་ཡི་གེ་རྫོགས། །གང་ཞིག་མདོ་སྡེའི་རྒྱལ་པོ་འདི་འཛིན་པ། །དེ་ནི་རབ་དགའ་ཤིན་ཏུ་མགུ་སྐྱེས་ནས། །དགེ་སློང་དེ་ནི་འདིར་ཡང་ཆོས་འཆད་ དེ༑ ༑རྟག་ཏུ་ཆོས་ཀྱི་སྦྱིན་པ་བྱེད་པར་འགྱུར། །སེམས་ཅན་རྣམས་ནི་མང་དུ་ཆོས་ཐོས་ནས། །ཀྱེ་མའོ་ཡོན་ཏན་ཆེན་པོ་འཆད་བྱེད་པ། །ནམ་ཞིག་བདག་ཅག་འདི་འདྲའི་ཆོས་སྟོན་ཅིང༌། ། མདོ་སྡེ་འདི་འདྲ་འཛིན་པར་འགྱུར་ཞེས་ཟེར། །གང་དག་དེ་འདྲ་ཤེས་རབ་ལྡན་མཆོག་རྣམས། །ཆོས་རྣམས་གང་ལའང་ཞུམ་པར་མི་འགྱུར་ཏེ། །དྲན་དང་ཡེ་ཤེས་ཀྱིས་ནི་འཕགས་པ་ དང༌། །བླ་ན་མེད་པའི་ཡེ་ཤེས་ཚིག་སྟོན་འགྱུར། །གང་དག་མདོ་སྡེའི་རྒྱལ་པོ་འདི་འཛིན་པ། །དེ་ནི་འཕགས་པས་རྟག་བསྔགས་རྒྱལ་བས་གནང༌། །ཆོས་ཚིག་ལེགས་པར་བཤད་པ་ ཚོལ་བར་བྱེད། །དེ་ནི་ཐོས་པས་རྟག་ཏུ་འཕགས་པར་འགྱུར། །ཐོས་ནས་དོན་ནི་ཉེ་བར་འཛིན་པར་བྱེད། །ཤེས་རབ་ལྡན་པ་འབྲུ་ལ་མི་སྙེམས་ཏེ། །དོན་ལ་ལྟ་བས་རྟོགས་པ་འཕེལ་ བར་འགྱུར། །དེ་ཡི་ཡེ་ཤེས་རྟག་ཏུ་ཚད་མེད་དོ། །ཡེ་ཤེས་མཐའ་ཡས་དོན་ཀྱང་མཐའ་ཡས་ཏེ། །སེམས་པ་མཐའ་ཡས་དམ་པའི་དོན་ལ་མཁས། །དེ་ཡི་ཡོན་ཏན་ཕྱོགས་དང་ཕྱོགས་ སུ་འགྲོ་།དེ་ཡི་ཐོས་པའི་ཡོན་ཏན་འདི་དག་གོ །དེ་ཡི་འདོད་ཆགས་ཆུང་ལ་ཞེ་སྡང་ཆུང༌། །དེ་ཡི་གཏི་མུག་ཤིན་ཏུ་རབ་ཏུ་ཆུང༌། །སེམས་ཀྱང་ཤིན་ཏུ་དགའ་བ་རྙེད་པར་འགྱུར། །དེ་ཡི་ཐོས་པའི་ ཡོན་ཏན་འདི་དག་གོ །ལོངས་སྤྱོད་རྙེད་ནས་རྒྱགས་པར་མི་འགྱུར་ཏེ། །འདི་ལ་སྙིང་པོ་ཅི་ཞེས་དོན་ལ་རྟོག །ལོངས་སྤྱོད་སྙིང་པོ་མེད་པར་རབ་ཤེས་ནས། །དེ་ནི་ལོངས་སྤྱོད་མི་ལྟ་རབ་ཏུ་འབྱུང༌། ། མངོན་པར་བྱུང་སྟེ་དགོན་པར་གནས། །རྟག་ཏུ་གཡེལ་བ་མེད་པ་དང༌། །ཆོས་རྣམས་ཐོས་པས་མི་ངོམས་ཏེ། །ཆོས་སྦྱིན་པ་ལ་སེར་སྣ་མེད། །འཇིག་རྟེན་མགོན་པོའི་དྲུང་ཉིད་དུ། །སོང་སྟེ་ ཞུ་བ་ཞུ་བྱེད་པས། །དེ་ཕྱིར་དེ་ཡི་ཤེས་རབ་འཕེལ། །དེ་ལ་དཀར་པོ་འབྲི་བ་མེད། །ཤཱ་རིའི་བུ། དེ་ནི། བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། བྱང་ཆུབ་ སེམས་དཔའ་དེ་ལ་བརྩོན་པ་བྱང་ཆུབ་སེམས་དཔའི་སྤྱད་པ་སྤྱད་དོ། །དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་པ་ཞེས་བྱའོ། །དེ་ལ་བསྡུ་བའི་དངོས་པོའི་རྗེས་སུ་འཇུག་པ་གང་ཞེ་ན་ འདི་བཞི་ནི། བྱང་ཆུབ་སེམས་དཔའ་རྣམས་ཀྱི་བསྡུ་བའི་དངོས་པོ་སྟེ། བསྡུ་བའི་དངོས་པོ་དེ་དག་གིས་བྱང་ཆུབ་སེམས་དཔའ་ཡུན་རིང་པོར་སེམས་ཅན་རྣམས་ཡང་དག་པར་བསྡུ་བར་ བྱེད་དོ༑ ༑བཞི་གང་ཞེ་ན། འདི་ལྟ་སྟེ། སྦྱིན་པ་དང༌། སྙན་པར་སྨྲ་བ་དང༌། དོན་བྱེད་པ་དང༌། དོན་མཚུངས་པ་སྟེ། དེ་དག་ནི། བསྡུ་བའི་དངོས་པོ་བཞི་ཞེས་བྱའོ། །དེ་ལ་སྦྱིན་པ་གང་ཞེ་ན། ༄༅། །འདི་ལྟ་སྟེ། ཟང་ཞིང་སྦྱིན་པ་དང༌། མི་འཇིགས་པ་སྦྱིན་པ་དང༌། ཆོས་སྦྱིན་པ་སྟེ། དེ་ནི། སྦྱིན་པའོ། །དེ་ལ་སྙན་པར་སྨྲ་བ་གང་ཞེ་ན། སློང་བ་དང༌། ཆོས་ཉན་ པ་ལ་སྙན་པར་སྨྲ་བའོ། །དེ་ལ་དོན་བྱེད་པ་ནི། བདག་དང༌། གཞན་གྱི་བསམ་པ་ཡོངས་སུ་རྫོགས་པར་བྱེད་པའོ། །དོན་མཐུན་པ་ནི། ཐེག་པ་གང་ལ་ཡོན་ཏན་དུ་འདུ་ཤེས་པའི་ཐེག་ པ་དང༌། ཆོས་དེ་དག་ལ་འཛིན་པར་བྱེད་པའི་སེམས་ཅན་རྣམས་གཞོག་པའོ། །གཞན་ཡང་སྦྱིན་པ་ནི། གང་སློང་བ་ལ་ཡིད་དང་བར་བྱེད་པ་སྟེ། དེ་ནི། སྦྱིན་པ་ཞེས་བྱའོ། །སྙན་པར་ སྨྲ་བ་ནི། གང་སློང་བ་རྣམས་ལ་རིམ་གྲོ་བྱེད་པའོ། །དོན་བྱེད་པ་ནི། གང་གིས་སློང་བ་རྣམས་ཀྱི་དོན་དུ་འགྱུར་བའི་དོན་དེ་ཡོངས་སུ་ཐོབ་པར་བྱེད་པའོ། །དོན་མཚུངས་པ་ནི། གང་སློང་བ་ ལ་དོན་མཚུངས་པའོ། །གཞན་ཡང་སྦྱིན་པ་ནི། བསམ་པས་བཏང་བའོ། །སྙན་པར་སྨྲ་བ་ནི། སྦྱོར་བ་ཡོངས་སུ་ཆད་པའོ། །དོན་བྱེད་པ་ནི། ལྷག་པའི་བསམ་པ་འགྱོད་པ་མེད་པའོ།། དོན་མཐུན་པ་ནི། ཐེག་པ་ཆེན་པོ་ལ་བསྔོ་བའོ། །གཞན་ཡང་སྦྱིན་པ་ནི། བྱམས་པའི་རྗེས་སུ་ཞུགས་པའི་སེམས་ཀྱིས་བཏང་བའོ། །སྙན་པར་སྨྲ་བ་ནི། དགའ་ཞིང་རབ་ཏུ་དགའ་བ་ ལ་ཞུགས་པའི་སེམས་མི་གཏོང་བའོ། །དོན་བྱེད་པ་ནི། སྙིང་རྗེ་ཆེན་པོའི་གེ་ཆ་བགོས་པའི་སེམས་ཀྱིས་སེམས་ཅན་གྱི་བྱ་བ་ལ་བརྩོན་པའོ། །དོན་མཚུངས་པ་ནི། བཏང་སྙོམས་ལ་ མཐོན་དམན་མེད་ཅིང་ཐམས་ཅད་མཁྱེན་པའི་ཡེ་ཤེས་ལ་བསྔོ་བའི་སེམས་སོ། །གཞན་ཡང་སྦྱིན་པ་ནི། གང་ཆོས་ཀྱིས་བཙལ་བའི་ལོངས་སྤྱོད་ཡོངས་སུ་གཏོང་བའོ། །སྙན་པར་སྨྲ་བ་ནི། གང་ལ་སྦྱིན་པར་བྱེད་པ་དེ་ཆོས་ལ་འཛུད་པའོ། །དོན་བྱེད་པ་ནི། གང་བདག་གི་དོན་དང༌། གཞན་གྱི་དོན་ཡང་དག་པར་བསྐྱེད་པའོ། །དོན་མཚུངས་པ་ནི། གང་སེམས་ཅན་ཐམས་ཅད་ཀྱི་ དོན་གྱི་ཕྱིར་ཐམས་ཅད་མཁྱེན་པ་ཉིད་དུ་སེམས་བསྐྱེད་པའོ། །གཞན་ཡང་སྦྱིན་པ་ནི། གང་ནང་དང༌། ཕྱིའི་ཆོས་རྣམས་ལ་བདོག་པ་ཐམས་ཅད་ཡོངས་སུ་གཏོང་བའོ། །སྙན་པར་སྨྲ་བ་ནི། གང་ཆོས་ཐམས་ཅད་ཀྱི་ཡོན་ཏན་གྱི་ཡེ་ཤེས་ལ་སློབ་དཔོན་གྱི་དཔེ་མཁྱུད་མེད་པའོ། །དོན་བྱེད་པ་ནི། གང་གིས་དོན་བཏང་སྟེ་གཞན་གྱི་དོན་མྱོང་བར་བྱེད་པའོ། །དོན་མཚུངས་པ་ཉིད་ནི། བྱང་ཆུབ་ལག་ཏུ་འོང་བ་ལ་བལྟས་ནས་གཞན་ལ་སྦྱིན་པ་ན་ཡིད་མི་བདེ་བར་མི་འགྱུར་བའོ། །དེ་ལ་ཆོས་སྦྱིན་པ་གང་ཞེ་ན། གང་ཇི་ལྟར་ཐོས་པའི་ཆོས་རྣམས་སྟོན་པའོ། །དེ་ལ་སྙན་པར་སྨྲ་བ་ གང་ཞེ་ན། གང་ཟང་ཟིང་མེད་པར་ཆོས་སྟོན་པའོ། །དོན་བྱེད་པ་ནི། གང་ཕ་རོལ་ལ་ལུང་འབོགས་པ་དང༌། ཁ་ཏོན་བྱེད་པ་དང༌། འཆད་པ་དང༌། སྟོན་པ་ལ་མི་སྐྱོའོ། །དེ་ལ་དོན་མཚུངས་པ་ནི། གང་ཞེ་ན། གང་ཐམས་ཅད་མཁྱེན་པའི་སེམས་དང་མ་བྲལ་བར་ཆོས་ལ་འཛུད་པའོ། །གཞན་ཡང་སྦྱིན་པ་ནི། ཆོས་ཉན་པར་འོངས་པ་རྣམས་ལ་མི་གཡེང་བར་སྟོན་པའོ། །དེ་ལ་སྙན་པར་སྨྲ་ ༄༅། །བ་ནི༑ གང་རྒྱང་རིང་པོར་ཡང་སོང་སྟེ། དམ་པའི་ཆོས་སྟོན་པའོ། །དེ་ལ་དོན་བྱེད་པ་ནི། གང་ཆོས་འདོད་པས་ཆོས་སྨྲ་བ་རྣམས་གོས་དང་བྲལ་བར་གྱུར་ཏམ་ བསོད་སྙོམས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་དང་བྲལ་བར་གྱུར་ཏམ། ཅི་དགོས་པར་གྱུར་པ་ཐམས་ཅད་སྦྱིན་པར་བྱེད་པའོ། །དོན་མཚུངས་པ་ཉིད་ནི། ལྷག་ པའི་བསམ་པར་ཞུགས་པའི་རྒྱུད་ཀྱིས་ཆོས་སྟོན་པའོ། །གཞན་ཡང་ཆོས་ཀྱི་སྦྱིན་པ་ནི། གང་སྦྱིན་པ་ཐམས་ཅད་ཀྱི་ནང་ན་མཆོག་ཏུ་ཤེས་ནས་ཆོས་སྦྱིན་པར་བྱེད་པའོ། དེ་ལ་སྙན་ པར་སྨྲ་བ་ནི། གང་ཕན་པའི་དངོས་པོའི་ཕྱིར་སྟོན་པའོ། །དོན་བྱེད་པ་ནི། གང་དོན་ལ་རྟོན་གྱི། ཚིག་འབྲུ་ལ་མི་རྟོན་པའོ། །དེ་ལ་དོན་མཚུངས་པ་ནི། གང་སངས་རྒྱས་ཀྱི་ཆོས་ཡོངས་ སུ་བསྐང་བའི་ཕྱིར་ཆོས་སྟོན་པའོ། །གཞན་ཡང་སྦྱིན་པ་ནི། སྦྱིན་པའི་ཕ་རོལ་ཏུ་ཕྱིན་པའོ། །སྙན་པར་སྨྲ་བ་ནི། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་པའི་ཕ་རོལ་ཏུ་ཕྱིན་ པའོ༑ ༑དོན་བྱེད་པ་ནི། གང་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །དོན་མཚུངས་པ་ནི། བསམ་གཏན་གྱི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པའོ། །གཞན་ཡང་སྦྱིན་ པ་ནི༑ བྱང་ཆུབ་སེམས་དཔའ་སེམས་དང་པོ་བསྐྱེད་པ་རྣམས་ཀྱིའོ། །སྙན་པར་སྨྲ་བ་ནི། བྱང་ཆུབ་སེམས་དཔའ་སྤྱོད་པ་ལ་ཞུགས་པ་རྣམས་ཀྱིའོ། །དོན་བྱེད་པ་ནི། གང་བྱང་ཆུབ་ སེམས་དཔའ་ཕྱིར་མི་ལྡོག་པ་རྣམས་ཀྱིའོ། །དོན་མཚུངས་པ་ནི། བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་རྣམས་ཀྱིའོ། །གཞན་ཡང་སྦྱིན་པ་ནི། བྱང་ཆུབ་ཀྱི་རྩ་བའི་གནས་ སོ༑ ༑སྙན་པར་སྨྲ་བ་ནི། བྱང་ཆུབ་ཀྱི་མྱུ་གུ་ཡོངས་སུ་རྫོགས་པའོ། །དོན་བྱེད་པ་ནི། བྱང་ཆུབ་ཀྱི་མེ་ཏོག་ཡོངས་སུ་གྲུབ་པའོ། །དོན་མཚུངས་པར་བྱེད་པ་ནི། བྱང་ཆུབ་ཀྱི་འབྲས་བུ་མངོན་པར་ གྲུབ་པ་སྟེ། དེ་དག་ནི། བྱང་ཆུབ་སེམས་དཔའ་རྣམས་ཀྱི་བསྡུ་བའི་དངོས་པོ་རྣམ་པ་བཞིའོ། །བསྡུ་བའི་དངོས་པོ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེ་པོ་ཡུན་རིང་པོར་ སེམས་ཅན་རྣམས་ཡང་དག་པར་སྡུད་ཅིང་བྱང་ཆུབ་ཏུ་སྤྱོད་དོ། །དེ་ནི། བསྡུ་བའི་དངོས་པོའི་རྗེས་སུ་འཇུག་པ་ཞེས་བྱའོ། །དེ་ལྟ་བས་ན། ཚད་མེད་པ་དེ་དག་དང༌། ཕ་རོལ་ཏུ་ཕྱིན་པ་དེ་དག་ དང༑ བསྡུ་བའི་དངོས་པོ་དེ་དག་ནི། བྱང་ཆུབ་ཀྱི་ལམ་ཞེས་བྱའོ། །དེ་ལྟར་ཤཱ་རིའི་བུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ ཕུང་པོ་ཆེན་པོ་དེས་གཞོན་ནུ་བརྩོན་འགྲུས་སྤྱོད་ལ་བྱང་ཆུབ་ཀྱི་ལམ་དེ་ཡང་བཤད། འདས་པ་དང་མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བསྔགས་པ་ ཡང་བརྗོད་དེ། ཤཱ་རིའི་བུ། དེ་ནས་གཞོན་ནུ་བརྩོན་འགྲུས་སྤྱོད་ཀྱིས་བཅོམ་ལྡན་འདས་དེ་བཞིན་གཤེགས་པ་ཕུང་པོ་ཆེན་པོ་ལས་བྱང་ཆུབ་ཀྱི་ལམ་དེ་ཐོས། འདས་པ་དང༌། མ་བྱོན་པ་དང་ ༄༅། །ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡོན་ཏན་ཡང་ཐོས་ནས་དགའ་བ་དང༌། མགུ་པ་རྒྱ་ཆེན་པོ་རྙེད་པར་གྱུར་ཏོ། །དེ་དགའ་བ་དང༌། མགུ་བ་ རྒྱ་ཆེན་པོ་རྙེད་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕུང་པོ་ཆེན་པོ་དེ་ཉན་ཐོས་ཀྱི་དགེ་འདུན་དང་བཅས་པ་ལ་ལོ་བྱེ་བ་ ཕྲག་དགུ་བཅུ་རྩ་དྲུག་ཏུ་འདི་ལྟ་སྟེ། ན་བཟའ་དང༌། བསོད་སྙོམས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་རྣམས་ཀྱིས་བཀུར་སྟིར་བྱས། བླ་མར་བྱས། རིམ་གྲོར་ བྱས༑ མཆོད་པར་བྱས་ནས་བྱང་ཆུབ་ཏུ་སྨོན་ལམ་བཏབ་ཀྱང་བཅོམ་ལྡན་འདས་དེ་བཞིན་གཤེགས་པ་ཕུང་པོ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་ བསྟན་ཏོ། །ཤཱ་རིའི་བུ། དེའི་ཚེ་དེའི་དུས་ན་གཞོན་ནུ་བརྩོན་འགྲུས་སྤྱོད་ཅེས་བྱ་བ་དེ་གཞན་ཞིག་ཡིན་པ་སྙམ་དུ་ཁྱོད་ཐེ་ཚོམ་དང༌། ཡིད་གཉིས་ཟ་ན། དེ་ལྟར་མི་བལྟའོ། །དེ་ ཅིའི་ཕྱིར་ཞེ་ན། དེའི་ཚེ་དེའི་དུས་ན་ང་གཞོན་ནུ་བརྩོན་འགྲུས་སྤྱོད་ཅེས་བྱ་བར་གྱུར་ཏེ། ངས་བཅོམ་ལྡན་འདས་དེ་བཞིན་གཤེགས་པ་ཕུང་པོ་ཆེན་པོ་ཉན་ཐོས་ཀྱི་དགེ་འདུན་དང་ བཅས་པ་ལ་ན་བཟའ་དང༌། བསོད་སྙོམས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་རྣམས་ཀྱིས་ལོ་བྱེ་བ་ཕྲག་དགུ་བཅུ་རྩ་དྲུག་ཏུ་བཀུར་སྟིར་བྱས། བླ་མར་བྱས། རིམ་གྲོར་བྱས། མཆོད་པར་བྱས་ནས་བྱང་ཆུབ་ཏུ་སྨོན་ལམ་བཏབ་ཀྱང་ང་བཅོམ་ལྡན་འདས་དེས་གཞོན་ནུ་ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་སུ་འགྱུར་རོ། །ཞེས་ལུང་མ་བསྟན་ཏོ། །ཤཱ་རིའི་བུ། དེ་ལྟ་བས་ན། བཅོམ་ལྡན་འདས་འོད་འཕྲོའི་ཕུང་པོ་ཆེན་པོ་དེ་ཚུན་ཆད་བསྐལ་པ་གྲངས་མེད་པ་ན་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཀོན་མཆོག་ཡན་ལག་ཅེས་བྱ་བ་འཇིག་རྟེན་དུ་བྱུང་སྟེ། སངས་རྒྱས་བཅོམ་ལྡན་འདས་ཀྱི་བར་དུའོ། །ཤཱ་རིའི་བུ། དེ་བཞིན་གཤེགས་པ་དཀོན་མཆོག་ཡན་ལག་གི་ཉན་ཐོས་བྱེ་བ་ཕྲག་བརྒྱད་ཅུའི་ཉན་ཐོས་རྣམས་ཀྱི་ཉན་ཐོས་འདུས་པ་ཆེན་པོ་བྱུང་སྟེ། ཐམས་ཅད་ཀྱང་དགྲ་བཅོམ་པ། ཟག་པ་ ཟད་པ༑ ཉོན་མོངས་པ་མེད་པ། དབང་དང་ལྡན་པར་གྱུར་པ་ནས་སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ་ཤ་སྟག་གོ། ཤཱ་རིའི་བུ། ཡང་དེའི་ཚེ་ན་རྒྱལ་པོ་མཛེས་པར་ སྣང་བ་ཞེས་བྱ་བ་མཐའ་བཞིར་རྣམ་པར་རྒྱལ་བ། འཁོར་ལོས་བསྒྱུར་བ་ཆོས་དང་ལྡན་པ། ཆོས་ཀྱི་རྒྱལ་པོ། ཡུལ་གྱི་མཐུ་དང་བརྩོན་པ་ཐོབ་པ། རིན་པོ་ཆེ་སྣ་བདུན་དང་ལྡན་པ་ ཞིག་བྱུང་སྟེ། དེའི་རིན་པོ་ཆེ་སྣ་བདུན་བྱུང་བ་ནི། འདི་དག་གོ །འདི་ལྟ་སྟེ། འཁོར་ལོ་རིན་པོ་ཆེ་ནས་བློན་པོ་རིན་པོ་ཆེའི་བར་དུ་བདུན་ཏེ། མངོན་པར་བཏུལ་ནས་གནས་པའི་བར་དུའོ། ། ༄༅། །ཤཱ་རིའི་བུ། རྒྱལ་པོ་མཛེས་པར་སྣང་བ་དེའི་ཕོ་བྲང་ནི། གྲོང་ཁྱེར་འཛམ་བུའི་ཆུ་བོའི་གསེར་ཞེས་བྱ་སྟེ། ཤར་ཕྱོགས་ནས་ནུབ་ཕྱོགས་སུ་ཆུར་ནི། དཔག་ ཚད་བཅུ་གཉིས། ལྷོ་ཕྱོགས་ནས་བྱང་ཕྱོགས་སུ་ཞེང་དུ་ནི། དཔག་ཚད་བདུན་ཡོད་དེ། འབྱོར་པ་དང༌། རྒྱས་པ་དང༌། བདེ་བ་དང༌། ལོ་ལེགས་པ་དང༌། དགའ་བ་དང༌། སྐྱེ་བོ་མང་པོ་དང་ མིས་གང་བར་གྱུར་ཏོ། །ཡང་དེའི་ཚེ་ན་ཚོང་དཔོན་ཤེས་རབ་བཟང་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ་ནས་མཛོད་དང་བང་བས་ཡོངས་སུ་གང་བའི་བར་དུ་རྒྱས་པར་བྱ་སྟེ། སྔོན་གྱི་སངས་རྒྱས་ལ་དགེ་བའི་རྩ་བ་བསྐྱེད་པ། སྔོན་གྱི་སངས་རྒྱས་ལ་བྱ་བ་བྱས་པ་ཞིག་བྱུང་ངོ༌། །ཤཱ་རིའི་བུ། དེ་ནས་བཅོམ་ལྡན་འདས་དེ་བཞིན་གཤེགས་པ་དཀོན་མཆོག་ཡན་ ལག་དེས་ཚོང་དཔོན་ཤེས་རབ་བཟང་གི་བསམ་པ་ལ་བརྟགས་ནས་ཀྱེ་མའོ་ཚོང་དཔོན་ཤེས་རབ་བཟང་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱི་སྣོད་དུ་རུང་ངོ༌། །ཀྱེ་མའོ་ ཚོང་དཔོན་ཤེས་རབ་བཟང་སངས་རྒྱས་ཀྱི་ཆོས་རྣམས་ཀྱི་སྣོད་དུ་གྱུར་ཏོ། །སྙམ་དུ་དགོངས་ཏེ། སྣོད་དུ་གྱུར་པར་མཁྱེན་ནས་ཚོང་དཔོན་ཤེས་རབ་བཟང་ག་ལ་བ་དེར་གཤེགས་ཏེ་ ཕྱིན་ནས་རྫུ་འཕྲུལ་གྱིས་སྟེང་གི་བར་སྣང་ལ་སྐྱིལ་མོ་ཀྲུང་དུ་བཞུགས་ནས་བྱང་ཆུབ་ཀྱི་ལམ་ཡང་བཤད། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་ འདས་རྣམས་ཀྱི་བསྔགས་པ་ཡང་བརྗོད་དོ། །ཤཱ་རིའི་བུ། དེ་བས་ན། ཚོང་དཔོན་ཤེས་རབ་བཟང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལམ་འདི་ཡང་ཐོས། འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བསྔགས་པ་ཡང་ཐོས་ནས་དགའ་བ་དང༌། མགུ་བ་དང༌། མཆོག་ཏུ་དགའ་བ་རྒྱ་ཆེན་པོ་ཐོབ་པར་གྱུར་ཏོ། །དེ་ དགའ་བ་དང༌། མགུ་བ་དང༌། མཆོག་ཏུ་དགའ་བ་རྒྱ་ཆེན་པོ་ཐོབ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཀོན་མཆོག་ཡན་ ལག་ཉན་ཐོས་ཀྱི་དགེ་འདུན་དང་བཅས་པ་དེ་ལ་ལོ་སྟོང་དུ་འདི་ལྟ་སྟེ། ན་བཟའ་དང༌། བསོད་སྙོམས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་ཀྱིས་བསྙེན་བཀུར་བྱས། བླ་ མར་བྱས། བསྟི་སྟང་དུ་བྱས། མཆོད་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་ཀྱང་བཅོམ་ལྡན་འདས་དེ་བཞིན་གཤེགས་པ་དཀོན་མཆོག་ཡན་ ལག་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །ཤཱ་རིའི་བུ། ཡང་དེའི་ཚེ་དེའི་དུས་ན་ཚོང་དཔོན་ཤེས་རབ་བཟང་ཞེས་བྱ་བ་གཞན་ཞིག་ཡིན་པ་སྙམ་དུ་ཐེ་ ཚོམ་དང༌། ཡིད་གཉིས་ཟ་ན། དེ་ལྟར་མི་བལྟའོ། །དེའི་ཚེ་དེའི་དུས་ན་ང་ཚོང་དཔོན་ཤེས་རབ་བཟང་ཞེས་བྱ་བར་གྱུར་ཏོ། །ངས་བཅོམ་ལྡན་འདས་དེ་བཞིན་གཤེགས་པ་དཀོན་མཆོག་ ༄༅། །ཡན་ལག་ཉན་ཐོས་ཀྱི་དགེ་འདུན་དང་བཅས་པ་དེ་ལ་ལོ་སྟོང་དུ་ན་བཟའ་དང༌། བསོད་སྙོམས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་རྣམས་ ཀྱིས་བཀུར་སྟིར་བྱས། བླ་མར་བྱས། བསྟི་སྟང་དུ་བྱས། མཆོད་པར་བྱས་བྱང་ཆུབ་ཏུ་སྨོན་ལམ་བཏབ་ཀྱང་བཅོམ་ལྡན་འདས་དེ་བཞིན་གཤེགས་པ་དཀོན་མཆོག་ཡན་ལག་ དེས་ང་ལ་ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ། །ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ ཏུ་ལུང་མ་བསྟན་ཏོ། །ཤཱ་རིའི་བུ། འདི་ལྟ་སྟེ། དཀོན་མཆོག་ཡན་ལག་ཚུན་ཆད་བསྐལ་པ་གྲངས་མེད་པ་ན་དེ་བཞིན་གཤེགས་པ་མར་མེ་མཛད་ཅེས་བྱ་བ་འཇིག་རྟེན་དུ་བྱུང་ ངོ༌། །ཡང་དེའི་ཚེ་རྒྱལ་པོ་དགྲ་ཐུལ་ཞེས་བྱ་བ་ཞིག་བྱུང་སྟེ། ཤཱ་རིའི་བུ། རྒྱལ་པོ་དགྲ་ཐུལ་གྱི་གྲོང་ཁྱེར་པདྨ་ཅན་ཞེས་བྱ་བ་འབྱོར་པ་རྒྱས་པ། བདེ་བ། ལོ་ལེགས་པ། དགའ་བ་དང༌། སྐྱེ་བོ་མང་པོ་དང་མིས་གང་བ་ཞིག་ཡོད་དོ། །ཤཱ་རིའི་བུ། རྒྱལ་པོ་དགྲ་ཐུལ་གྱི་བྲམ་ཟེ་མར་མེའི་བདག་ཅེས་བྱ་བ་ཤིང་སཱ་ལ་ཆེན་པོ་ལྟ་བུའི་བུ། ཕྱུག་པ། ནོར་མང་བ། ལོངས་སྤྱོད་ ཆེ་བ་ནས་མཛོད་དང་བང་བའི་བར་དུ་ཡོངས་སུ་གང་བ་ཞིག་བྱུང་བ་དེ་རྒྱལ་པོ་དགྲ་ཐུལ་ལ་དབེན་ཞིང་ཕངས་པ། སྡུག་ཅིང་ཡིད་དུ་འོང་བ་སྟེ། མཐོང་ན་མི་མཐུན་པ་མེད་དེ། ཤཱ་རིའི་ བུ༑ བྲམ་ཟེ་མར་མེའི་བདག་པོ་ཤིང་སཱ་ལ་ཆེན་པོ་ལྟ་བུ་ལ་རྒྱལ་སྲིད་ཕྱེད་བྱིན་ནོ། །ཤཱ་རིའི་བུ། འདི་ལྟ་སྟེ། རྒྱལ་པོ་མར་མེའི་བདག་པོ་རྒྱལ་པོ་ཕྱེད་བྱེད་པ་ཆོས་ཀྱིས་བྱེད་དེ། ཆོས་མ་ ཡིན་པས་ནི། མ་ཡིན་ནོ། །ཡང་ཤཱ་རིའི་བུ། དུས་གཞན་ཞིག་ན་རྒྱལ་པོ་མར་མེའི་བདག་པོ་ལས་བུ་གཟུགས་བཟང་པོ། །མཛེས་པ། བལྟ་ན་སྡུག་པ། ཤིན་ཏུ་བཟང་བ། ཁ་དོག་རྒྱས་ པ་མཆོག་དང་ལྡན་པ། ལུས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ་ཞིག་བྱུང་སྟེ། དེའི་ལུས་ཐམས་ཅད་ལས་འོད་བྱུང་བ་ནི། འདི་ལྟ་སྟེ། ཉི་མའི་དཀྱིལ་འཁོར་ལས་ འབྱུང་བ་བཞིན་ཏེ། དེའི་མིང་མར་མེ་མཛད་དུ་བཏགས་སོ། །ཤཱ་རིའི་བུ། དེ་ནས་རྒྱལ་པོ་མར་མེའི་བདག་གིས་བྲམ་ཟེའི་མཚན་མཁན་ལྟས་ཤེས་པ་རྣམས་བསགས་ནས་རྒྱལ་བུ་ གཞོན་ནུ་མར་མེ་མཛད་བསྟན་པ་དང༌། དེ་དག་གིས་དེ་བྱང་ཆུབ་ཏུ་ལུང་བསྟན་ཏོ། །དེ་ལྟར་རྒྱལ་པོ་མར་མེའི་བདག་པོས་རྒྱལ་བུ་གཞོན་ནུ་མར་མེ་མཛད་མ་མ་དག་ལ་གཏད་དོ། །ཤཱ་རིའི་ བུ༑ དེ་ནས་རིང་པོ་མ་ལོན་པར་རྒྱལ་བུ་མར་མེ་མཛད་གཞོན་ནུར་མཁས་པར་གྱུར་ཏོ། །ཤཱ་རིའི་བུ། དེ་ནས་གནས་གཙང་མའི་རིས་ཀྱི་ལྷའི་བུ་རྣམས་འོག་མིན་གྱི་གནས་ནས་མི་སྣང་བར་ གྱུར་ནས་བྱང་ཆུབ་སེམས་དཔའ་མར་མེ་མཛད་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་མར་མེ་མཛད་ལ་བསྐོར་བ་བྱས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ ༄༅། །མར་མེ་མཛད་ལ་ཚིགས་སུ་བཅད་པ་འདི་དག་སྨྲས་སོ། །བཙུན་མོའི་འཁོར་གྱི་ནང་དུ་ནི། །ཡོན་ཏན་འབྱུང་གནས་གྱུར་པ་མེད། །དྲང་སྲོང་རྒྱལ་མཚན་ གནས་ནས་ནི། །བྱང་ཆུབ་དམ་པ་རྟོགས་པར་འགྱུར། །ལང་ཚོ་མྱུར་དུ་འགྲོ་བ་ནི། །རླུང་གི་ཤུགས་ལས་ལྷག་པར་མགྱོགས། །རྒ་བ་དེ་ནི་གཟུགས་འཇིག་སྟེ། །འཇིག་རྟེན་ཡིད་ དུ་མི་འོང་བ། །གྲོགས་པོ་རྒས་པ་མཐུ་ཉམས་ནི། །རབ་ཏུ་འབྱུང་བར་དཀའ་བ་སྟེ། །ཁྱོད་ནི་ཤིན་ཏུ་དར་ལ་བབ། །ཁྱོད་ནི་བཙལ་བའི་དུས་ཡིན་ནོ། །ལེགས་སོ་ལེགས་སོ་ཤེས་རབ་ ཆེ༑ ༑ལེགས་སོ་ལེགས་སོ་བློ་གྲོས་ཆེ། །མྱུར་དུ་མངོན་པར་བྱུང་ན་ལེགས། །ཐུབ་བསྟན་བྱང་ཆུབ་རྟོགས་པར་གྱིས། །བམ་པོ་ཉི་ཤུ་པ་སྟེ། ཐ་མ། ཤཱ་རིའི་བུ། དེ་ནས་ གནས་གཙང་མའི་རིས་ཀྱི་ལྷ་རྣམས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མར་མེ་མཛད་ལ་བསྐུལ་བ་དང༌། དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་ཉིད་ ཀྱི་ནུབ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། དེ་ཉིད་ཀྱི་ནུབ་མོ་དེ་ལྟར་བཅོམ་ལྡན་འདས་མར་མེ་མཛད་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་སངས་རྒྱས་བཅོམ་ལྡན་འདས་ཀྱི་བར་དུ་གྱུར་པའི་ཆེ་བ་དང༌། དགེ་བར་གྲགས་ པའི་སྒྲ་དང༌། ཚིགས་སུ་བཅད་པ་མངོན་པར་བྱུང་ནས་རྒྱལ་པོ་དགྲ་ཐུལ་གྱིས་རྒྱལ་པོ་མར་མེའི་བདག་གི་བུས་མ་བསླབ་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་ པར་རྫོགས་པར་སངས་རྒྱས་ནས་དེ་ཉིད་ཀྱི་ནུབ་མོ་རྒྱ་ཆེར་སངས་རྒྱས་བཅོམ་ལྡན་འདས་སུ་གྱུར་པའི་བར་དུ་ཆེ་བ་དང༌། དགེ་བར་གྲགས་པའི་སྒྲ་དང༌། ཚིགས་སུ་བཅད་པ་ཐོས་སོ། ། ཤཱ་རིའི་བུ། དེ་ནས་རྒྱལ་པོ་དགྲ་ཐུལ་གྱིས་རྒྱལ་པོ་མར་མེའི་བདག་ལ་ཁྱོད་ཀྱི་སྲས་རབ་ཏུ་བྱུང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་ རྒྱས་སོ༑ ༑ཞེས་བདག་གིས་ཐོས་ཏེ། བདག་ནི། ཁྱོད་ཀྱི་སྲས་མར་མེ་མཛད་མཐོང་བར་འཚལ་ན། བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ཐུགས་བརྩེ་བའི་སླད་དུ་ བདག་གི་དྲུང་དུ་གཤེགས་སུ་གསོལ། དེ་སྟེ་མི་གཤེགས་ན། བདག་ཉིད་དཔུང་གི་ཚོགས་ཡན་ལག་བཞི་པ་དང་བཅས་ཏེ་མཆིའོ། །ཞེས་ཕོ་ཉ་བཏང་བ་དང༌། དེ་ནས་ཤཱ་རིའི་བུ། རྒྱལ་པོ་མར་མེའི་བདག་གིས་རྩིས་པ་དང༌། བློན་པོ་དང༌། སྒོ་བ་དང༌། འཁོར་རྣམས་བསགས་ཏེ་དེ་ལྟར་གྱུར་པ་དག་བཟླས་པ་དང་དེ་དག་གིས། ལྷ། དེ་ལྟར་ན། བཅོམ་ལྡན་འདས་ དེ་ཉིད་ལ་གསོལ་ན། བཅོམ་ལྡན་འདས་དེ་ནི། ཐུགས་རྗེ་ཆེ་བས་ཐུགས་རྗེར་དགོངས་ཏེ་རྒྱལ་པོ་དགྲ་ཐུལ་གྱི་དྲུང་དུ་གཤེགས་པར་འགྱུར་ཏེ། རྒྱལ་པོ་དགྲ་ཐུལ་ཀྱང་འདིར་མི་མཆི་བར་ ༄༅། །འགྱུར་རོ། །ཞེས་སྨྲས་པ་དང༌། ཤཱ་རིའི་བུ། དེ་ནས་རྒྱལ་པོ་མར་མེའི་བདག་བློན་པོ་དག་དང་འགྲོགས་ཏེ་བཅོམ་ལྡན་འདས་མར་མེ་མཛད་ག་ལ་པ་དེར་སོང་སྟེ་ཕྱིན་ནས་ བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་དེ་ལྟར་གྱུར་པ་དེ་དག་གསོལ་ཏོ། །དེ་སྐད་གསོལ་ནས་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ཀྱིས་རྒྱལ་པོ་མར་ མེའི་བདག་པོ་ལ་དེ་བས་ན་རྒྱལ་པོ་ཆེན་པོ། །ཐུགས་བརྩེ་བའི་ཕྱིར་རྒྱལ་པོ་དགྲ་ཐུལ་གྱི་དྲུང་དུ་གཤེགས་སོ། །ཞེས་བཀའ་སྩལ་ཏོ། །ཤཱ་རིའི་བུ། དེ་ནས་བཅོམ་ལྡན་འདས་དེ་ བཞིན་གཤེགས་པ་མར་མེ་མཛད་ལྷ་རྫས་མཆོག་གི་རྒྱལ་པོའི་ཕོ་བྲང་དུ་ཇི་སྲིད་དགྱེས་པར་བཞུགས་ནས་དགྲ་བཅོམ་པ་བྱེ་བ་ཕྲག་བརྒྱད་ཅུ་དང༌། བྱང་ཆུབ་སེམས་དཔའ་སྟོང་ཕྲག་ བརྒྱད་ཅུ་རྩ་བཞི་དང་ཐབས་ཅིག་ཏུ་ཡུལ་རྒྱུ་ཞིང་གཤེགས་བཞི་པ་དང་བཅས་ཏེ་ཞམ་འབྲིང་ཐོག་ཐག་ཏུ་འབྲང་ཞིང་བཞི་པ་དང་བཅས་ཏེ་ཞམ་འབྲིང་ཐོག་ཐག་ཏུ་འབྲང་ཞིང་ དེ་བཞིན་གཤེགས་པ་མར་མེ་མཛད་འཁོར་དང་བཅས་པ་ལ་ན་བཟའ་དང༌། བསོད་སྙོམས་དང༌། མལ་ཆ་དང༌། ན་བའི་གསོས་སྨན་དང༌། ཡོ་བྱད་རྣམས་ཀྱིས་བཀུར་སྟི་བྱེད་ཅིང་ བདག་གི་ཡུལ་གྱི་བར་དུ་ཞམ་འབྲིང་བྱས་ནས་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ཀྱི་ཞབས་ལ་ཕྱག་འཚལ་ནས་ལན་གསུམ་བསྐོར་བ་བྱས་ཏེ་མཆི་མ་ བླགས་ནས་སླར་ལོག་པ་དང༌། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་དགྲ་བཅོམ་པ་བྱེ་བ་ཕྲག་བརྒྱད་ཅུ་དང་ ཐབས་ཅིག་ཏུ་རྒྱལ་པོའི་ཕོ་བྲང་པདྨ་ཅན་དུ་གཤེགས་པར་རྒྱལ་པོ་དགྲ་ཐུལ་གྱིས་ཐོས་སོ། །དེ་ནས་རྒྱལ་པོ་དགྲ་ཐུལ་གྱིས་རྒྱལ་པོའི་ཕོ་བྲང་པདྨ་ཅན་བརྒྱན་ཏེས་གཞི་དང༌། ལམ་གྱི་བཞི་ མདོ་དང༌། སུམ་མདོ་དག་ལ་བསེག་མ་དང༌། གྱོ་མོ་དག་སེལ་དུ་བཙུད་དེ་བསལ་ནས་ཕྱག་དར་དང་ཆག་ཆག་འདེབས་སུ་བཙུད་དོ། །སྤོས་ཆུའི་ཆག་ཆག་ཀྱང་འདེབས་སུ་བཙུད་དོ། །མེ་ ཏོག་བཀྲམ་པས་པུས་མོ་ནུབ་ཙམ་དུ་ཕྱིན་པར་བྱ་བ་བྱེད་དུ་བཙུད་དོ། །བདུག་པའི་སྣོད་ནས་ཀྱང་བདུག་པ་བྱས་སོ། །གོས་རིན་པོ་ཆེ་སྣ་ཚོགས་ཀྱི་བླ་རེ་བྲེས། སིལ་སྙན་སྣ་ཚོགས་ཀྱང་དཀྲོལ་ དུ་བཙུད་དོ། །དེ་ནས་རྒྱལ་པོ་དགྲ་ཐུལ་གྱིས་རྒྱལ་པོའི་ཕོ་བྲང་པདྨ་ཅན་བརྒྱན་ནས་གང་རྒྱལ་པོའི་ཕོ་བྲང་པདྨ་ཅན་ཀུན་ན་མེ་ཏོག་དང༌། དྲི་དང༌། བྱུག་པ་ཡོད་པ་རྣམས་སུས་ཀྱང་མ་སྤྱད་ཅིག། མ་བཙོང་ཞིག །དེ་ཐམས་ཅད་བཅོམ་ལྡན་འདས་མར་མེ་མཛད་ལ་དབུལ་ཞིང་མཆོད་པའི་ལས་སུ་གྱིས་ཤིག །ལ་ལ་ཞིག་སྤྱོད་དམ་འཚོང་ན། དེ་ནི། ཆད་པ་ཆེན་པོས་གཅད་དོ། །ཞེས་སྒྲ་བསྒྲགས་ སོ༑ ༑དེ་ནས་རྒྱལ་པོ་དགྲ་ཐུལ་གྱིས་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ལ་བལྟ་བ་དང༌། ཕྱག་བྱ་བའི་ཕྱིར་དཔུང་གི་ཚོགས་ཡན་ལག་བཞི་པ་དང་བཅས་ཏེ་མེ་ཏོག་དང༌། ༄༅། །དྲི་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། བ་དན་རྣམས་དང༌། སིལ་སྙན་སྣ་ཚོགས་དཀྲོལ་བ་དང༌། རྒྱལ་ པོའི་མཐུ་ཆེན་པོ་དང༌། རྒྱལ་པོའི་འབྱོར་བ་ཆེན་པོས་རྒྱལ་པོའི་ཕོ་བྲང་པདྨ་ཅན་ནས་ཕྱིར་བྱུང་ངོ༌། །པདྨ་ཅན་གྱི་བྲམ་ཟེ་དང༌། ཁྱིམ་བདག་རྣམས་ཀྱང་བཅོམ་ལྡན་འདས་དེ་བཞིན་ གཤེགས་པ་དེ་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་དེའི་ཞབས་ལ་མགོ་བོས་ཕྱག་འཚལ་ཏེ། མེ་ཏོག་དང༌། ཕྲེང་པ་དང༌། དྲི་དང༌། བྱུག་པ་དང༌། ཕྱེ་མ་དང༌། ན་བཟའ་དང༌། གདུགས་དང༌། རྒྱལ་མཚན་དང༌། བ་དན་རྣམས་ཀྱིས་བཅོམ་ལྡན་འདས་ལ་མཆོད་པ་བྱས། བློན་པོ་དང༌། འཁོར་དང༌། བྲམ་ཟེ་དང་ཁྱིམ་ བདག་དེ་དག་གིས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་མཆོད་པ་བྱས་ཏེ་ཞམ་འབྲིང་དུ་འབྲང་བ་དང༌། རྒྱལ་པོ་དགྲ་ཐུལ་སེམས་ དགའ། སེམས་མགུ། སེམས་ལ་སྒྲིབ་པ་མེད། སེམས་རངས་པར་གྱུར་ནས་བཅོམ་ལྡན་འདས་ཀྱི་ཞམ་འབྲིང་དུ་འབྲང་ངོ༌། །ཡང་དེའི་ཚེ་ན་གངས་ཀྱི་རིའི་ངོས་ལ་བྲམ་ཟེ་རིན་ པོ་ཆེ་ཞེས་བྱ་བ་གཡོག་བྲམ་ཟེ་གཞོན་ནུ་ལྔ་བརྒྱ་ཡོད་པ། ཀློག་ཏུ་འཛུད་པའི་མཁན་པོ། སྔགས་འཆང་བ། རིག་བྱེད་གསུམ་པོ་སྒྲ་ངེས་པར་སྦྱོར་བ་དང་བཅས་པ་དང༌། ཤེས་ གསལ་དང་བཅས་པ་དང༌། ཡི་གེ་རབ་ཏུ་དབྱེ་བ་དང་བཅས་པ་དང༌། སྔོན་བྱུང་བ་ལྔ་པ་རྣམས་ཀྱི་ཕ་རོལ་ཏུ་ཕྱིན་པ། ཚིག་རེ་རེ་ཞིང་ལུང་བསྟན་པ་དང༌། འཇིག་རྟེན་རྒྱང་ཕན་པ་དང༌། མཆོད་སྦྱིན་ གྱི་རྒྱུ་དང༌། སྐྱེས་བུ་ཆེན་པོའི་མཚན་རྗེས་སུ་རྟོགས་པ། རང་གི་ཚིག་རབ་ལ་གསུམ་རིག་པ་དང༌། སློབ་དཔོན་དུ་གྱུར་པར་ཡོངས་སུ་ཤེས་པ་ཞིག་གནས་ཏེ། ཤཱ་རིའི་བུ། ཡང་བྲམ་ཟེ་ རིན་པོ་ཆེ་དེ་ལ་གཞོན་ནུ་སྤྲིན་ཞེས་བྱ་བ་ཉེ་གནས་བྱེད་པ། ཀློག་ཏུ་འཇུག་པ། སྔགས་འཆང་བ། རིག་བྱེད་གསུམ་པོ་སྒྲ་ངེས་པར་སྦྱོར་བ་དང་བཅས་པ་དང༌། ཤེས་གསལ་དང་བཅས་ པ་དང༌། ཡི་གེ་རབ་ཏུ་དབྱེ་བ་དང་བཅས་པ་དང༌། སྔོན་བྱུང་བ་ལྔ་པ་རྣམས་ཀྱི་ཕ་རོལ་ཏུ་ཕྱིན་པ། ཚིག་རེ་རེ་ཞིང་ལུང་སྟོན་པ་དང༌། འཇིག་རྟེན་རྒྱང་ཕན་པ་དང༌། མཆོད་སྦྱིན་གྱི་རྒྱུད་དང༌། སྐྱེས་ བུ་ཆེན་པོའི་མཚན་རྗེས་སུ་རྟོགས་པ་ཁ་ན་མ་ཐོ་བ་མེད་པ། རང་གི་ཚིག་རབ་ལ་གསུམ་རིག་པ་དང༌། སློབ་དཔོན་དུ་གྱུར་པར་ཡོངས་སུ་ཤེས་པ་ཞིག་ཡོད་དོ། །ཤཱ་རིའི་བུ། དེ་ནས་བྲམ་ཟེ་ གཞོན་ནུ་སྤྲིན་ཞེས་བྱ་བར་རིག་བྱེད་ལོབས་ནས་མཁན་པོ་ལ་ཀྱེ་མཁན་པོ། བདག་གིས་རིག་བྱེད་ལོབས་ཏེ། བདག་ནི། ཡུལ་དུ་མཆི་ན། བདག་གིས་བགྱི་བ་ཅི་མཆིས་ཞེས་དེ་སྐད་ ཅེས་སྨྲས་པ་དང༌། ཀྱེ་བུ་གཞོན་ནུ་སྤྲིན། སློབ་དཔོན་ལ་ནོར་འགྲོན་བུ་ལྔ་བརྒྱ་བྱིན་ཅིག་ཅེས་དེས་དེ་སྐད་ཅེས་སྨྲས་སོ། །དེ་ནས་བྲམ་ཟེ་གཞོན་ནུ་སྤྲིན་གྱིས་མཁན་པོའི་རྐང་པ་ལ་ཕྱག་ ༄༅། །འཚལ་ཏེ་ལན་གསུམ་བསྐོར་ནས་མཁན་པོའི་དྲུང་ནས་སོང་སྟེ། དེ་གྲོང་དང༌། གྲོང་ཁྱེར་དང༌། གྲོང་རྡལ་དང༌། རྒྱལ་པོའི་ཕོ་བྲང་དག་ན་རྒྱུ་ཞིང་སློབ་དཔོན་ལ་དབུལ་ བའི་སློབ་དཔོན་གྱི་ནོར་བཙལ་ཏེ། དེས་སློབ་དཔོན་ལ་དབུལ་བའི་སློབ་དཔོན་གྱི་ནོར་བསྡུས་ནས་མཐར་གྱིས་རྒྱལ་པོའི་ཕོ་བྲང་པདྨ་ཅན་དུ་ཕྱིན་ཏེ། བྲམ་ཟེ་གཞོན་ནུ་སྤྲིན་གྱིས་རྒྱལ་པོའི་ ཕོ་བྲང་པདྨ་ཅན་ཀུན་བརྒྱན་པར་མཐོང་ངོ༌། །མཐོང་ནས་མི་ཞིག་བོས་ཏེ་ཀྱེ་སྐྱེས་བུ། རྒྱལ་པོའི་ཕོ་བྲང་པདྨ་ཅན་འདིར་ཅིའི་དགའ་སྟོན་ཞིག་གཡོས་པར་གྱུར་ཅེས་སྨྲས་པ་དང༌། དེས་ གཞོན་ནུ་ཁྱོད་ཀྱིས་མི་ཤེས་སམ། དེ་རིང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་དགྲ་བཅོམ་པ་བྱེ་བ་ཕྲག་ བརྒྱད་ཅུ་དང༌། བྱང་ཆུབ་སེམས་དཔའ་སྟོང་ཕྲག་བརྒྱད་ཅུ་རྩ་བཞི་དང་ཐབས་ཅིག་ཏུ་རྒྱལ་པོའི་ཕོ་བྲང་པདྨ་ཅན་དུ་གཤེགས་ཏེ། དེའི་ཕྱིར་རྒྱལ་པོའི་ཕོ་བྲང་པདྨ་ཅན་འདི་ཀུན་བརྒྱན་ ཏོ༑ ༑དེ་ལ་མི་དག་སྦྱིན་པ་ཡང་སྦྱིན་པར་བྱེད། བསོད་ནམས་ཀྱང་བྱེད་དོ། །ཞེས་དེ་སྐད་ཅེས་སྨྲས་པ་དང༌། དེ་ནས་བྲམ་ཟེ་སྤྲིན་གཞོན་ནུས་སངས་རྒྱས་ཀྱི་སྒྲ་ཐོས་ནས་དགའ་བ་དང༌། དད་པ་དང༌། མགུ་པ་ཆེར་སྐྱེས་ནས་སངས་རྒྱས་བཅོམ་ལྡན་འདས་རྣམས་འབྱུང་བ་དཀོན་ཏེ། ཤིན་ཏུ་དཀོན་པ་ཨུ་དུམ་ཝ་རའི་མེ་ཏོག་དང་འདྲ་བ། མཆོད་སྦྱིན་གྱི་ཤིང་གཅིག་པུའི་ ཚུལ་ལྟ་བུ་ཡིན་པས། གང་བདག་གིས་ཀཪྴ་པ་ཎ་ལྔ་བརྒྱ་པོ་འདིས་མེ་ཏོག་ཉོས་ཏེ་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ལ་མེ་ཏོག་གཏོར་ལ་སློབ་དཔོན་གྱི་ནོར་གུད་ ནས་བཙལ་ལོ། །སྙམ་མོ། །ཡང་དེའི་ཚེ་ན་བུ་མོ་ཞིག་མེ་ཏོག་ཨུཏྤ་ལ་བདུན་ཁྱེར་ཏེ་ལམ་གྱི་སྲང་ནས་སོང་བ་དང༌། དེ་ནས་བྲམ་ཟེ་གཞོན་ནུ་སྤྲིན་གྱིས་བུ་མོ་དེ་ལ་ཀྱེ་བུ་མོ། ཆུ་ནས་བྱུང་བའི་ མེ་ཏོག་གང་ནས་རྙེད་པར་གྱུར་ཅེས་དེ་སྐད་ཅེས་སྨྲས་པ་དང༌། དེས་ཕྱོགས་ཆེ་གེ་མོ་ཞིག་ན་ཕྲེང་བ་བྱེད་པའི་ཁང་པ་ནས་བདག་གིས་ཀཪྴ་པ་ཎ་ལྔ་བརྒྱས་ཉོས་སོ། །ཞེས་སྨྲས་སོ། །དེ་ནས་ བྲམ་ཟེ་གཞོན་ནུ་སྤྲིན་གྱིས་བུ་མོ་དེ་ལ་མེ་ཏོག་ཆུ་ལས་སྐྱེས་པ་འདི་དག་ཇི་ཙམ་གྱིས་ཉོས་པ་བཞིན་དུ་ང་ལ་ཚོང་ཞིག །ཅེས་དེ་སྐད་ཅེས་སྨྲས་ནས་དེས་དེ་ལྟར་མི་རུང་ངོ༌། །ཞེས་སྨྲས་ནས་ དེས་འོ་ན་གཉིས་ཁྱོད་ལ་ཞོག་ལ། ལྔ་ང་ལ་ཀཪྴ་པ་ཎ་ལྔ་བརྒྱས་ཉོར་བྱིན་ཅིག་ཅེས་སྨྲས་ནས་དེས་འདི་དག་གིས་ཅི་བྱ་ཞེས་སྨྲས་པ་དང༌། དེས་བཅོམ་ལྡན་འདས་མར་མེ་མཛད་ལ་ གཏོར་བར་བྱའོ། །ཞེས་སྨྲས་སོ། །དེས་གལ་ཏེ་ཁྱོད་སྲིད་པའི་འགྲོ་བ་འཆི་འཕོ་ཐམས་ཅད་དུ་བདག་གི་ཁྱིམ་ཐབ་ཏུ་འགྱུར་བར་དམ་འཆའ་ན་སྦྱིན་ནོ། །དེས་བུ་མོ་ཐོང༌། ཁྱོད་དེ་སྐད་མ་ཟེར་ ཅིག །དེ་ཅིའི་ཕྱིར་ཞེ་ན། ཁྱོད་ནི། གཡེང་ཞིང་རྒོད་པའོ། །བུ་མོ། བླ་ན་མེད་པའི་སངས་རྒྱས་ཀྱི་ཆོས་གྲངས་མེད་པ་ནི། བསྐལ་པ་གྲངས་མེད་པས་བསྒྲུབ་དགོས་ཏེ། དེའི་ཕྱིར་འདི་ལྟ་སྟེ། ༄༅། །འགྲོན་བུ་དང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱི་རུ་ཆེན་པོ་དང༌། གསེར་དང༌། དངུལ་དང་ལྡན་པ་དང༌། རྟ་དང༌། གླང་པོ་ཆེ་ དང༌། བོང་བུ་དང༌། བ་གླང་དང༌། ལུག་དང༌། རྒྱལ་སྲིད་ཀྱང་ཡོངས་སུ་བཏང་བ་དང༌། ཤིང་རྟ་ཡོངས་སུ་བཏང་བ་དང༌། སླས་ཡོངས་སུ་བཏང་བ་དང༌། བུ་ཕོ་དང༌། བུ་མོ་ཡོངས་སུ་བཏང་བ་ དང༌། ལག་པ་ཡོངས་སུ་བཏང་བ་དང༌། རུས་པ་དང༌། རྐང་དང༌། གཙུག་ཕུད་ཡོངས་སུ་བཏང་བ་དང༌། རྣ་བ་དང༌། སྣ་དང༌། མིག་དང༌། ཡན་ལག་མཆོག་ཡོངས་སུ་གཏོང་བའི་སྦྱིན་པ་སྦྱིན་ བར་བྱ་སྟེ། མདོར་ན་བུ་མོ། ནང་ངམ་ཕྱིའི་དངོས་པོ་གང་ཡང་བདག་གིས་ཡོངས་སུ་མི་གཏང་བར་བྱ་བ་མེད་དེ། བུ་མོ། གང་བདག་གིས་ཁྱོད་ཀྱང་ཡོངས་སུ་བཏང་སྟེ་དེ་བཞིན་གཤེགས་ པའི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བའི་དུས་དང༌། ཚོད་དུ་གྱུར་ན། ཁྱོད་ནི། གཡེང་ཞིང་རྒོད་ཀྱི། ཁྱོད་ངའི་སྦྱིན་པའི་བར་ཆད་མ་བྱེད་ཅིག །ཅེས་དེ་སྐད་ ཅེས་སྨྲས་པ་དང༌། དེས་གལ་ཏེ་ཁྱོད་ལུས་ལས་ཤ་ཡུངས་ཀར་གྱི་འབྲུམ་བུ་ཙམ་དུ་བཅད་དེ་ངལ་བྱིན་དུ་ཟིན་ཀྱང་ངས་ཁྱོད་ཀྱི་བྱིན་པའི་བར་ཆད་མི་བྱའོ། །ཞེས་སྨྲས་ནས་དེས་དེ་ ལ་དེ་ལྟར་གྱུར་ཅིག །ཆུ་ལས་སྐྱེས་པའི་མེ་ཏོག་དག་ང་ལ་བྱིན་ཅིག་ཅེས་སྨྲས་པ་དང༌། དེས་ཀྱང་བྱིན་ནོ། །དེ་ནས་བྲམ་ཟེ་གཞོན་ནུ་སྤྲིན་གྱིས་མེ་ཏོག་ཨུཏྤ་ལ་དེ་དག་བླངས་ནས་ བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ག་ལ་བ་དེར་སོང་སྟེ་བྲམ་ཟེ་གཞོན་ནུ་སྤྲིན་གྱིས་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་སྲོག་ཆགས་བྱེ་བ་ཁྲག་ ཁྲིག་བརྒྱ་སྟོང་དུ་མས་བསྐོར་ཅིང་མདུན་དུ་བདར་བ་མཐོང་སྟེ། སྤྱོད་ལམ་མཛེས་པའི་བར་དུ་རྒྱས་པར་བྱའོ། །དེ་བཅོམ་ལྡན་འདས་ལ་སེམས་དང་བར་གྱུར་ཏོ། །དེ་སེམས་དང་བར་གྱུར་ ནས་ཤིན་ཏུ་དགའ་བ་དང༌། དང་བ་དང༌། བཀུར་སྟི་བསྐྱེད་ནས་བཅོམ་ལྡན་འདས་མར་མེ་མཛད་ག་ལ་བ་དེར་སོང་སྟེ་བྲམ་ཟེ་གཞོན་ནུ་སྤྲིན་གྱིས་མི་མང་པོ་དག་གིས་གོས་བཟང་པོ་ བཟང་བདག་བཅོམ་ལྡན་འདས་མར་མེ་མཛད་ཀྱི་དྲུང་དུ་བཀྲམ་པ་མཐོང་ནས་དེས་བདག་ལ་གོས་མེད་ཀྱི། གང་བདག་གིས་རི་དྭགས་ཀྱི་པགས་པ་འདི་གདིང་ངོ༌། །སྙམ་ནས་དེ་རི་དྭགས་ ཀྱི་བགས་པ་དེ་བཏིང་བ་དང༌། དེ་ན་མི་དེ་དག་འདི་འདྲ་བའི་སེམས་ཅན་དཀོན་མཆོག་གི་དྲུང་དུ་རི་དྭགས་ཀྱི་པགས་པ་གདིང་ངམ་ཞེས་འཕྱ་ཞིང་བཏིང་བ་ཡང་བརྟུལ་བར་བྱེད་དོ། །དེ་ནས་ བྲམ་ཟེ་གཞོན་ནུ་སྤྲིན་ཕྱོགས་ཀྱི་མཐའ་ག་ལ་བ་དེར་སོང་སྟེ་ཕྱིན་ནས་རི་དྭགས་ཀྱི་བགས་པ་བཏིང་སྟེ། དགོངས་ཤིག་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ཀུན་ནས་ སྤྱན་རི་དྭགས་ཀྱི་པགས་པ་འདི་ལ་ཞབས་གཞག་པར་མཛད་ཅིག་ཅེས་སེམས་བསྐྱེད་པ་དང༌། བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ཀྱིས་དགོངས་ནས་བྲམ་ཟེ་ ༄༅། །གཞོན་ནུ་སྤྲིན་གྱི་རི་དྭགས་ཀྱི་པགས་པ་ལ་ཞབས་བཞག་གོ །དེ་དེས་བྲམ་ཟེ་གཞོན་ནུ་སྤྲིན་དགའ་མགུ་རངས་རབ་ཏུ་དགའ་ཞིང་ཡིད་བདེ་བ་སྐྱེས་ནས་དེ་ བཞིན་གཤེགས་པ་མར་མེ་མཛད་ལ་མེ་ཏོག་ཨུཏྤ་ལ་ལྔ་གཏོར་བ་དང༌། ལྷའི་བུ་བརྒྱ་ཕྲག་དུ་མས་ལྷའི་མེ་ཏོག་མནྡཱ་ར་བ་དང༌། ལྷའི་མེ་ཏོག་ཨུཏྤ་ལ་དང༌། པདྨ་དང༌། ལྷའི་ཙནྡན་ གྱི་ཕྱེ་མ་རྣམས་ཀྱིས་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ལ་མངོན་པར་གཏོར། ལྷའི་སིལ་སྙན་རྣམས་དཀྲོལ། ལྷའི་གླུ་དབྱངས་བླངས་ནས་བཅོམ་ལྡན་འདས་ དེ་བཞིན་གཤེགས་པ་མར་མེ་མཛད་ལ་བསྟི་སྟང་བྱ་བའི་ཕྱིར་མེ་ཏོག་ཨུཏྤ་ལ་དེ་དག་ཨུཏྤ་ལ་སྟོང་ཕྲག་དུ་མར་བྱས་ཏེ། མེ་ཏོག་གི་བླ་གྲེ་འདབ་མ་ཐུར་དུ་བལྟ། སྡོང་བུ་གྱེན་དུ་ བལྟ་བར་བྱས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ལ་མངོན་པར་གཏོར་ཏེ་འདི་ལྟ་སྟེ། བྲམ་ཟེ་ གཞོན་ནུ་སྤྲིན་སེམས་དད་ནས་བཅོམ་ལྡན་འདས་མར་མེ་མཛད་ཀྱི་སྤྱན་སྔར་ལོ་བཅུ་གཉིས་སུ་རལ་པ་གསེར་གྱི་ཁ་དོག་ལྟ་བུ་བཏིང་ནས་བདག་མ་འོངས་པའི་དུས་ན་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་ཞེ་ན། བཅོམ་ལྡན་འདས་ཀྱིས་བདག་དབུགས་དབྱུང་བར་མཛོད་ཅིག །བདག་ལ་ཕྱག་གིས་དྲང་བར་ གསོལ་ཞེས་ཡི་དམ་བརྟན་པར་བྱས་སོ། །བཅོམ་ལྡན་འདས་དེ་བཞིན་གཤེགས་པ་མར་མེ་མཛད་བདག་གི་རལ་པ་གསེར་གྱི་ཁ་དོག་ལྟ་བུའི་སྟེང་དུ་ཞབས་མི་འཇོག་ཅིང༌། བདག་ལ་ དབུགས་འབྱིན་པར་མི་མཛད་ཅིང༌། བདག་ལ་བྱང་ཆུབ་ཏུ་ལུང་ཡང་མི་སྟོན་ན། དེའི་ཕྱིར་བདག་འདི་ཉིད་དུ་ལུས་བསྐམ་པར་བགྱིའོ། །ཞེས་ཡི་དམ་ཡང་བཅས་སོ། །ཤཱ་རིའི་བུ། དེ་ནས་ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀུན་ནས་སྤྱན། ཀུན་ནས་མཁྱེན་པ། དུས་གསུམ་གང་ཡང་མི་མཁྱེན་པ་ཅུང་ ཟད་ཀྱང་མི་མངའ་བ་དེས་བྲམ་ཟེའི་ཁྱེའུ་སྤྲིན་གྱི་བསམ་པ་མཁྱེན་ནས་བྲམ་ཟེའི་ཁྱེའུ་སྤྲིན་གྱི་སྐྲ་རལ་བ་གསེར་གྱི་ཁ་དོག་ལྟ་བུ་ལ་ཞབས་ཞག་སྟེ་གཡས་ཕྱོགས་ནས་གླང་པོ་ཆེའི་ གཟིགས་པས་གཟིགས་ཏེ། ཉན་ཐོས་ཀྱི་དགེ་འདུན་དེ་ལ་དགེ་སློང་དག། རལ་བ་རྣམས་ལ་རྐང་པ་མ་གཞག་ཅིག །དེ་ཅིའི་ཕྱིར་ཞེ་ན། དགེ་སློང་དག །བྲམ་ཟེའི་ཁྱེའུ་འདི་ནི། བསྐལ་པ་ གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱ་ཀྱ་ཐུབ་པ་ཞེས་བྱ་བར་འགྱུར་རོ། །ཞེས་བཀའ་སྩལ་ཏོ། །ཤཱ་རིའི་བུ། དེ་ལྟར་བྲམ་ཟེའི་ ཁྱེའུ་སྤྲིན་གྱིས་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ལས་ལུང་བསྟན་པ་ཐོས་ནས་དགའ་ཞིང་མགུ་ནས་སྟེང་གི་བར་སྣང་གི་ནམ་མཁའ་ལ་མངོན་པར་འཕགས་ཏེ། ༄༅། །ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྗོད་དུ་མེད་པ་མངོན་སུམ་དུ་བྱེད་དོ། །དེ་མངོན་པར་ཤེས་པའི་ཡེ་ཤེས་ཀྱི་སྟོབས་ཀྱིས་ཤར་ཕྱོགས་ན་སངས་རྒྱས་ བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་འདས་པ་དག་གིས་བྲམ་ཟེའི་ཁྱེའུ་ཁྱོད་མ་འོངས་པའི་དུས་བསྐལ་བ་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ལུང་སྟོན་པ་དང༌། དེ་བཞིན་དུ་ལྷོ་དང༌། ནུབ་དང༌། བྱང་དང༌། དེ་བཞིན་དུ་ཤར་དང་ལྷོའི་མཚམས་ནས་སྟེང་དང༌། འོག་གི་བར་དང༌། ཕྱོགས་བཅུ་ཀུན་ནས་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་པས་ལྷག་པ་དག་གིས་བྲམ་ཟེའི་ཁྱེའུ་ཁྱོད་མ་འོངས་པའི་དུས་བསྐལ་པ་གྲངས་མེད་ པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་བྱ་བར་ལུང་སྟོན་པ་མཐོང་ངོ༌། །ཤཱ་རིའི་བུ། དེ་ ལྟར་བྲམ་ཟེའི་ཁྱེའུ་སྤྲིན་ལུང་བསྟན་པ་ཐོས་ནས་དབུགས་ཕྱིན་པར་གྱུར་ཏེ། ནམ་མཁའི་དཀྱིལ་དེ་ནས་བབས་ནས་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ དེའི་དྲུང་དུ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་ཚངས་པར་སྤྱད་པ་སྤྱོད་དོ། །ཤཱ་རིའི་བུ། ཁྱོད་དེའི་ཚེ་དེའི་དུས་ན་བྲམ་ཟེའི་ཁྱེའུ་སྤྲིན་ཞེས་བྱ་བར་གྱུར་པ་དེ་གཞན་ ཡིན་པ་སྙམ་དུ་དེ་ལྟར་དོགས་ཤིང་ཐེ་ཚོམ་ཟ་ན། དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་བྲམ་ཟེའི་ཁྱེའུ་སྤྲིན་ཞེས་བྱ་བར་གྱུར་པ་དེ་ཡིན་ཏེ། ངས་བཅོམ་ལྡན་ འདས་དེ་བཞིན་གཤེགས་པ་མར་མེ་མཛད་དེ་ལ་མེ་ཏོག་ཨུཏྤ་ལ་ལྔ་གཏོར་ཏེ། རལ་པ་ཡང་བཏིང་ངོ༌། །ཤཱ་རིའི་བུ། དེ་ལྟར་ན། བྱང་ཆུབ་སེམས་དཔའ་ལུང་བསྟན་པ་མྱུར་དུ་ཐོབ་ པར་འདོད་པ་དག་གིས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཤིན་ཏུ་མཉན་པར་བྱ། བླང་བར་བྱ། གཟུང་བར་བྱ། གཞན་དག་ལ་ཡང་བརྗོད་པར་བྱ། རྒྱ་ཆེར་ཡང་ དག་པར་རབ་ཏུ་བསྟན་པར་བྱའོ། །གང་འདི་མཚན་མ་མེད་པའི་སྤྱོད་པའི་ནན་ཏན་གྱིས་བསྒྲུབ་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ། ངས་མངོན་པར་ཤེས་ཏེ། འདས་པའི་དུས་ན་ མར་མེ་མཛད་ཀྱི་ཕ་རོལ་ན་ངས་དཀར་པོའི་ཆོས་ཀྱི་སྤྱོད་པ་གང་ལམ་སྤྱད་པ་དེ་གང་ཡང་མེད་དེ། འོན་ཀྱང་སངས་རྒྱས་བཅོམ་ལྡན་འདས་དེ་དག་གིས་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། འདི་ལྟར་ང་མཚན་མ་དང་བཅས་པར་སྤྱོད་པར་གྱུར་ཏོ། །གང་གི་ཚེ་ང་གང་འདི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་མཚན་མ་མེད་པར་སྤྱོད་པ། དམིགས་པ་མེད་པར་ སྤྱོད་པ། ཇི་ལྟར་ཐོས་པ་བཞིན་དུ་སྒྲུབ་པས་གནས་པ་དེའི་འོག་ཏུ་དེ་བཞིན་གཤེགས་པ་མར་མེ་མཛད་ཀྱིས་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་ ༄༅། །པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ང་ལུང་བསྟན་ཏོ། །ཤཱ་རིའི་བུ། དེ་ལྟར་ངས་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་མཐོང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་མཐོང་མ་ཐག་ཏུ་ སྤྱོད་པ་ཐམས་ཅད་ལས་འདས་ཏེ་ཆོས་ཐམས་ཅད་མཉམ་པ་ཉིད་དུ་མཐོང་བ་ཁོང་དུ་ཆུད་དོ། །མཐོང་མ་ཐག་ཏུ་ཆོས་ཐམས་ཅད་རང་བཞིན་གྱིས་མ་སྐྱེས་པར་ཤེས་སོ། །དེའི་འོག་ཏུ་ བཅོམ་ལྡན་འདས་དེ་བཞིན་གཤེགས་པ་མར་མེ་མཛད་དེས་བྲམ་ཟེའི་ཁྱེའུ་ཁྱོད་མ་འོངས་པའི་དུས་བསྐལ་པ་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ཞེས་ལུང་བསྟན་ཏོ། །ལུང་བསྟན་མ་ཐག་ཏུ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་བོ། །བཟོད་པ་རབ་ཏུ་ཐོབ་པ་ཇི་ལྟ་བུ་ཞེ་ན། གང་འདི་ གཟུགས་རབ་ཏུ་མི་རྙེད་པར་བཟོད་པ་རབ་ཏུ་ཐོབ་པ་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་རབ་ཏུ་མི་རྙེད་པར་བཟོད་པ་རབ་ཏུ་ཐོབ་པ་དང༌། ཕུང་པོ་ དང༌། ཁམས་དང༌། སྐྱེ་མཆེད་རྣམས་ཀྱི་ཆོས་ཐམས་ཅད་རབ་ཏུ་མི་རྙེད་པར་བཟོད་པ་རབ་ཏུ་ཐོབ་པའོ། །ཡང་བཟོད་པ་རབ་ཏུ་ཐོབ་པ་ཞེས་བྱ་བ་འདི་ནི། བཟོད་པ་མེད་པའི་ཆོས་བར་ཏུ་ ཐོབ་པའི་ཚིག་བླ་དྭགས་སོ། །དེ་ཅིའི་ཕྱིར་ཞེ་ན། བཟོད་པར་རབ་ཏུ་ཐོབ་པའི་ཆོས་དེ་ལ་ནི། འཇིག་རྟེན་གྱི་ཆོས་རྣམས་ཀུན་ཏུ་མི་འབྱུང་ངོ༌། །སོ་སོའི་སྐྱེ་བོའི་ཆོས་རྣམས་མ་ཡིན། སློབ་ པའི་ཆོས་རྣམས་མ་ཡིན། མི་སློབ་པའི་ཆོས་རྣམས་མ་ཡིན། བྱང་ཆུབ་སེམས་དཔའི་ཆོས་རྣམས་མ་ཡིན་ཏེ། སངས་རྒྱས་ཀྱི་ཆོས་རྣམས་ཀྱང་མི་འབྱུང་ངོ༌། །ཆོས་ཐམས་ཅད་མི་འབྱུང་ བས་དེའི་ཕྱིར་བཟོད་པ་རབ་ཏུ་ཐོབ་པ་ཞེས་བྱའོ། །ཆོས་ཐམས་ཅད་ཐོབ་པ་མེད་ཅིང་མི་དམིགས་པས་དེའི་ཕྱིར་བཟོད་པ་རབ་ཏུ་ཐོབ་པ་ཞེས་བྱའོ། །བཟོད་པ་དེ་ཡང་མཚན་མ་ཐམས་ཅད་ དང༌། དམིགས་པ་ཐམས་ཅད་ཀྱིས་སྐད་ཅིག་པ་ཡིན་ཏེ། དེའི་ཕྱིར་བཟོད་པ་རབ་ཏུ་ཐོབ་པ་ཞེས་བྱ་སྟེ། དེ་ལ་ནི། མིག་མེད་དོ། །མིག་ལ་སྨོས་པ་མེད་དོ། །གོང་མ་བཞིན་དུ་སྦྱར་ཏེ་རྣ་བ་མེད། སྣ་མེད། ལྕེ་མེད། ལུས་མེད། ཡིད་མེད། ཡིད་ལ་སྨོས་པ་མེད་དེ། མི་ཟད་པའི་ཡུལ་དེ་ནི། བཟོད་པ། འགྲོ་བ་མེད་པའི་ཡུལ་དེ་ནི། བཟོད་པ་སྟེ། དེའི་ཕྱིར་བཟོད་པ་རབ་ཏུ་ཐོབ་པ་ཞེས་ བྱའོ། །ཤཱ་རིའི་བུ། དེ་བས་ན། བྱང་ཆུབ་སེམས་དཔའ་ལུང་བསྟན་པ་མྱུར་དུ་ཐོབ་པར་འདོད་པ་དག་གིས་གང་འདི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་མཚན་མ་མེད་ པར་སྤྱོད་པ། ལྷུན་གྱིས་གྲུབ་པར་སྤྱོད་པ། དམིགས་པ་མེད་པར་སྤྱོད་པ་ཤིན་ཏུ་མཉན་པར་བྱ། བླང་བར་བྱ། གཟུང་བར་བྱ། ཀུན་ཆུབ་པར་བྱ། གཞན་དག་ལ་ཡང་བརྗོད་པར་བྱ། རྒྱ་ ༄༅། །ཆེར་ཡང་དག་པར་རབ་ཏུ་བསྟན་པར་བྱའོ། །ནན་ཏན་གྱིས་བསྒྲུབ་པར་བྱའོ། །ཡང་དེའི་ཚེ་འཁོར་དེ་ཉིད་དུ་ཚོང་དཔོན་གྱི་བུ་མིས་བྱིན་ཞེས་བྱ་བ་འདུས་པར་གྱུར་ཏེ་འདུག་ པ་དེས་བཅོམ་ལྡན་འདས་ལས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་དང༌། སངས་རྒྱས་ཀྱི་ཡོན་ཏན་དང༌། བྱང་ཆུབ་སེམས་དཔའི་ཡོན་ཏན་རྣམས་ཐོས་ནས་སྟན་ལས་ ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་ སྐད་ཅེས་གསོལ་ཏོ། །བཅོམ་ལྡན་འདས། གནས་བརྟན་མ་འགག་པས་བདག་ལ་ཁྱིམ་བདག །དགྲ་བཅོམ་པ་ཐོབ་སྟེ། འདི་ནི། རྒ་ཤི་ཐ་མའོ། །ཞེས་དེ་ལྟར་འཇུག་པར་བགྱིས་དེ་ སྐད་ཅེས་རྗེས་སུ་བསྟན་མོད་ཀྱི། བདག་བཅོམ་ལྡན་འདས་ལས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་དང༌། སངས་རྒྱས་ཀྱི་ཡོན་ཏན་དང༌། བྱང་ཆུབ་སེམས་ དཔའི་ཡོན་ཏན་རྣམས་ཐོས་ནས་འདི་སྙམ་དུ་གང་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐེག་པ་ཆེན་པོ་འདི་ནི། མཆོག །གཙོ་བོ། །དམ་པ། མཆོག་རབ། གྱ་ནོམ་པ། བླ་ན་མེད་པའོ། །སྙམ་བགྱིད་དོ། །བཅོམ་ལྡན་འདས་ལས་ཀྱང་བདག་གིས་རབ་ཏུ་རྣམ་པར་ཕྱེ་བའི་ཆོས་རྣམས་ཀྱི་མཆོག་གང་ཡིན་པ་དེ་བསྐྱེད་པར་བྱའོ། །ཞེས་མངོན་སུམ་དུ་ཐོས་ མངོན་སུམ་དུ་བཟུང་ནས་བདག་འདི་སྙམ་དུ་རབ་ཏུ་རྣམ་པར་ཕྱ་བའི་ཆོས་གཟུང་བ་མ་མཆིས་པ། ང་ཡི་བ་མ་མཆིས་པ། ཡོངས་སུ་གཟུང་བ་མ་མཆིས་པ་རྣམས་ཀྱིས་ཆོས་གང་ཡང་མཆོག། གཙོ་བོ། །མཆོག་རབ། གྱ་ནོམ་པ། བླ་ན་མེད་པའི་ཆོས་དེ་ཡང་དག་པར་བསྒྲུབས་ཏེ་འཇུག་གོ །སྙམ་བགྱིད་དོ། །བཅོམ་ལྡན་འདས། བདག་འདི་སྙམ་དུ་ཐེག་པ་ཐམས་ཅད་ཀྱི་ནང་ན་ནི། སངས་ རྒྱས་ཀྱི་ཐེག་པ་བླ་ན་མེད་པར་གནས་པ་ལགས་ཏེ། དེ་བཞིན་གཤེགས་པའི་ཐེག་པ་ནི། ཐེག་པ་གང་ཇི་སྙེད་པ་དེ་དག་གི་མཆོག་ཏུ་བརྗོད་པ་ནས་བླ་ན་མེད་པའི་བར་དུ་བརྗོད་པ་སྟེ། བཅོམ་ ལྡན་འདས། བདག་སྐྱེ་བོ་མང་པོ་ལ་ཕན་པ་དང༌། སྐྱེ་བོ་མང་པོ་ལ་བདེ་བ་དང༌། འཇིག་རྟེན་ལ་སྙིང་བརྩེ་བ་དང༌། སྐྱེ་བོའི་ཚོགས་ཆེན་པོ་དང༌། ལྷ་དང་མི་རྣམས་ཀྱི་དོན་དང༌། ཕན་པ་དང་ བདེ་བའི་སླད་དུ་ད་སླན་ཆད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །ཇི་ལྟར་བྱང་ཆུབ་སེམས་དཔའི་བསླབ་པ་བཅས་པ་ལ་ཡང་བསླབ་པར་བགྱིའོ། ། སྙམ་བགྱིད་དོ། །དེ་སྐད་ཅེས་གསོལ་བ་དང༌། བཅོམ་ལྡན་འདས་ཀྱིས་ཚོང་དཔོན་གྱི་བུ་མིས་བྱིན་ལ་འདི་སྐད་ཅེས་བཀའ་སྩལ་ཏོ། །མིས་བྱིན། བླ་ན་མེད་པ་ཡང་དག་པར་རྫོགས་པའི་ བྱང་ཆུབ་ནི། ཡིད་ཆེས་པར་དཀའ་བ། སྒྲུབ་པར་དཀའ་བའོ། །གསོལ་པ། བཅོམ་ལྡན་འདས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡིད་ཆེས་པར་དཀའ་ཞིང་སྒྲུབ་པར་དཀའ་ ༄༅། །ལགས་ཀྱང༌། བཅོམ་ལྡན་འདས། དེ་དང་མཐུན་པར་བརྩོན་འགྲུས་བརྩམས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྒྲུབ་པར་བགྱིའོ། །ཅི་ནས་ཀྱང་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བགྱིའོ། །བཅོམ་ལྡན་འདས། གལ་ཏེ་སེམས་བསྐྱེད་པ་གངྒཱའི་ཀླུང་གི་བྱེ་མ་སྙེད་ཀྱིས་བླ་ན་མེད་པ་ཡང་དག་པར་ རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ནུས་པར་གྱུར་ལ། སེམས་བསྐྱེད་པ་རེ་རེ་ཡང་བསྐལ་པ་གངྒཱའི་ཀླུང་གི་བྱེ་མ་སྙེད་དུ་གྱུར་ལ། བྱང་ཆུབ་ཀྱི་སེམས་བསྐྱེད་པ་ ལན་རེ་ཞིང་ཡང་མགོ་གངྒཱའི་ཀླུང་གི་བྱེ་མ་སྙེད་ཆད་པར་གྱུར་ཀྱང་དེ་ལྟར་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་མི་གཏོང་སྟེ། བཅོམ་ལྡན་འདས། བདག་ནི། རྣམ་གྲངས་འདིས་བྱང་ཆུབ་མངོན་པར་རྫོགས་པར་འཚང་རྒྱ་བར་སྤྲོ་ན། གང་བདེ་བའི་ཡོ་བྱད་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་བར་ལྟ་སྨོས་ཀྱང་ཅི་འཚལ། དེ་ཅིའི་སླད་དུ་ཞེ་ན། བཅོམ་ལྡན་འདས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི། ཇི་ལྟར་བསྐལ་པ་བྱེ་བ་བརྒྱ་སྟོང་དུ་ཚིག་གིས་ཀྱང་ཁོང་དུ་ཆུད་པར་སླ་བ་མ་ལགས་ཏེ། དེ་ལྟར་རྒྱ་ཆེ་བའོ། །སངས་རྒྱས་ཀྱི་ཆོས་འདི་དག་ཀྱང་དེ་ལྟར་རྒྱ་ཆེ་བའོ། །དེ་ལྟར་བསམ་གྱིས་མི་ཁྱབ་པའོ། །དེ་ལྟར་མཚུངས་པ་མ་མཆིས་སོ། །དེ་ལྟར་དཔག་ཏུ་མ་མཆིས་སོ། །དེ་ལྟར་ གྲངས་མ་མཆིས་སོ། །སངས་རྒྱས་བཅོམ་ལྡན་འདས་རྣམས་ཀྱིས་མཁྱེན་པ་ཡང་དེ་ལྟར་ཆགས་པ་མ་མཆིས་སོ། །དེ་ནས་ཚོང་དཔོན་གྱི་བུ་མིས་བྱིན་གྱིས་དེའི་ཚེ་ཚིགས་སུ་བཅད་པ་འདི་དག་ སྨྲས་སོ། །བསྐལ་པ་བྱེ་བ་སྟོང་རྣམས་སུ། །བདག་ནི་བྱང་ཆུབ་སེམས་བསྐྱེད་ཅིང༌། །སྡུག་བསྔལ་ཀུན་གྱིས་གཙེས་གྱུར་ཀྱང༌། །སེམས་ཅན་རྣམས་ནི་མི་གཏོང་ངོ༌། །སེམས་བསྐྱེད་པ་ནི་ལན་རེ་ ཞིང༌། །མགོ་ཡི་ཕུང་པོ་རི་རབ་ཀྱི། །འཕང་ཙམ་མཐོན་པོར་གྱུར་པ་དག །ཐམས་ཅད་གཅོད་པ་སྤྲོ་བར་བགྱི། །སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་འདི་ལ་བདག་འདུག་གོ །དེ་བཞིན་ གཤེགས་པ་ཁྱོད་ཅི་འདྲ། །དེ་འདྲ་ཁོ་ནར་གྱུར་པར་ཤོག །ཐེག་པ་ཆུང་ངུ་ཐེག་པ་དམན། །ཉན་ཐོས་ཐེག་པ་སྤངས་ནས་ནི། །དེ་བཞིན་གཤེགས་པ་ཁྱོད་ཅི་འདྲ། །དེ་འདྲ་ཁོ་ནར་གྱུར་པར་ཤོག། ཐེག་པ་འདི་ནི་ཐེག་པ་ཆེ། །སངས་རྒྱས་རྣམས་ཀྱིས་མཆོག་ཅེས་བསྔགས། །གཟུང་བར་འོས་པ་གཞན་མ་མཐོང༌། །དེ་བས་བདག་ནི་བྱང་ཆུབ་མོས། །གནོད་པར་གྱུར་པ་རྣམས་ལ་སྐྱོབ། །ངན་འགྲོ་ གསུམ་ལས་ཐར་པར་བགྱི། །དེ་ཡི་ཕྱིར་ནི་སངས་རྒྱས་དག །དེ་བཞིན་གཤེགས་པ་རྣམས་འབྱུང་ངོ༌། །དེ་ནས་ཚོང་དཔོན་གྱི་བུ་མིས་བྱིན་འདི་སྙམ་དུ་སེམས་ཏེ། བདག་གིས་སངས་རྒྱས་ཀྱི་ ཆོས་རྒྱ་ཆེན་པོ་འདི་ལྟ་བུ་དག་ཤེས་ལ། གང་བུ་དང༌། ཆུང་མ་དག་ཆོས་འདི་དག་ཡང་དག་པར་འཛིན་དུ་མ་བཅུག་ན། འདི་ནི། བདག་གིས་མི་ཆའོ། །སྙམ་ནས་དེ་བཅོམ་ལྡན་འདས་ཀྱི་ ༄༅། །ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་རིངས་ཤིང་མྱུར་བའི་གཟུགས་ཀྱིས་རང་གི་ཁྱིམ་ག་ལ་བ་དེར་ སོང་སྟེ༑ ཆུང་མ་བདུན་དང༌། ཁྱེའུ་བདུན་དང༌། བུ་མོ་བདུན་དང༌། བྲན་ཕོ་བདུན་དང༌། བྲན་མོ་བདུན་དང་ལྷན་ཅིག་ཏུ་རས་བཅོས་བུ་ཟུང་སྟོང་ཐོགས་ཏེ་རོལ་མོ་མཁན་ལྔ་བརྒྱ་ཙམ་དང་ ལྷན་ཅིག་བཅོམ་ལྡན་འདས་ལ་བལྟ་བར་འདོད་པས། རིངས་ཤིང་མྱུར་བའི་གཟུགས་ཀྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་བ་དང༌། རྒྱལ་པོའི་ཁབ་ཀྱི་མི་དང༌། མི་ མ་ཡིན་པ་རབ་ཏུ་མང་པོ་དག་གིས་ཚོང་དཔོན་གྱི་བུ་མིས་བྱིན་གཡོག་དང་བཅས་ཏེ་རིངས་ཤིང་མྱུར་བའི་གཟུགས་ཀྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་བར་མཐོང་ངོ༌། ། མཐོང་ནས་ཀྱང་འདི་སྐད་ཅེས་མིས་བྱིན། ཁྱོད་གཡོག་དང་བཅས་ཏེ་རིངས་ཤིང་མྱུར་བའི་གཟུགས་ཀྱིས་གར་ཆ་ཞེས་འཛེར་པ་དང༌། སྨྲས་པ། སྐྱེས་བུ་ཁྱེད་ཅག་གིས་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱ་རྒོད་ཀྱི་ཕུང་པོའི་རི་ལ་འཁོར་བརྒྱ་སྟོང་ཕྲག་དུ་མས་བསྐོར་ཏེ་མདུན་དུ་བདར་ནས་རྣམ་གྲངས་དུ་མས་སངས་ རྒྱས་ཀྱི་ཆོས་རྒྱ་ཆེན་པོ་དག་ཡང་དག་པར་རབ་ཏུ་སྟོན་ཏེ། སངས་རྒྱས་ཀྱི་ཆོས་རྒྱ་ཆེན་པོ་དག་གི་དོན་དང༌། སངས་རྒྱས་ཀྱི་ཡེ་ཤེས་བསམ་གྱིས་མི་ཁྱབ་ཅིང་མཚུངས་པ་མེད་པ་ཡོངས་ སུ་བསྒྲུབ་པའི་ཕྱིར་བདག་གཡོག་དང་བཅས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ག་ལ་བ་དེར་སོང་སྟེ་བླ་ན་མེད་པ་ཡང་དག་པར་རྫོགས་པའི་ བྱང་ཆུབ་ཏུ་དགེ་བའི་རྩ་བ་སྐྱེད་པར་བྱེད་པ་མི་ཤེས་པ་སྟེ། གལ་ཏེ་ཁྱོད་སངས་རྒྱས་ཀྱི་ཆོས་རྒྱ་ཆེན་པོ་དག་ཡོངས་སུ་སྒྲུབ་པར་འདོད་ན། ཚུར་ཤོག་འདོང་ངོ༌། །བཅོམ་ལྡན་འདས་དེའི་ གན་དུ་དོང་སྟེ་སངས་རྒྱས་ཀྱི་ཆོས་རྒྱ་ཆེ་བ་རྒྱ་ཆེ་བ་དག་གི་ཕྱིར་དགེ་བའི་རྩ་བ་བསྐྱེད་པར་བྱའོ། །དེ་ལྟར་རྒྱལ་པོའི་ཁབ་ཀྱི་མི་རྣམས་མིས་བྱིན་གྱི་ཚིག་དེ་ཐོས་ནས་སྲོག་ཆགས་ཁྲི་ཕྱི་ བཞིན་དུ་འབྲང་བར་གྱུར་ཏོ། །དེ་ནས་ཚོང་དཔོན་གྱི་བུ་མིས་བྱིན་ཆུང་མ་བདུན་དང༌། ཁྱེའུ་བདུན་དང༌། བུ་མོ་བདུན་དང༌། བྲན་ཕོ་བདུན་དང༌། བྲན་མོ་བདུན་དང་ལྷན་ཅིག་ཏུ་རས་བཅོས་བུ་ ཟུང་སྟོང་ཐོགས་ནས་སྲོག་ཆགས་སྟོང་ཕྲག་བཅུ་པོ་དེ་དག་དང༌། རོལ་མོ་མཁན་ལྔ་བརྒྱ་ཙམ་པོ་དེ་དག་དང་ལྷན་ཅིག་ཏུ་མེ་ཏོག་དང༌། སྤོས་དང༌། ཕྲེང་བ་དང༌། བྱུག་པ་དང༌། ཕྱེ་མ་དང༌། ན་ བཟའ་དང༌། གདུགས་དང༌། རྒྱལ་མཚན་དང༌། བ་དན་དང༌། རྔ་དང༌། རོལ་མོའི་སིལ་སྙན་དཀྲོལ་ཏེ། བཅོམ་ལྡན་འདས་ལ་མཆོད་པ་བྱས་ནས་རས་བཅོས་བུ་ཟུང་སྟོང་པོ་དེ་དག་བཅོམ་ ལྡན་འདས་ཀྱི་སྐུ་ལ་གསོལ་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སེམས་ཅན་དམ་པ་མི་མཆོག་གང་ལགས་པ། །བྱང་ཆུབ་མཆོག་ཏུ་རྣམ་པར་དག་པ་སྤྱོད། །མཐའ་ཡས་ ༄༅། །གཟིགས་པ་རྐང་གཉིས་རྣམས་ཀྱི་མཆོག །དེ་ལ་དེ་རིང་བདག་ནི་མཆོད་པར་བགྱི། །གང་ཞིག་སྔོན་གྱི་བསྐལ་པ་མང་པོར་སྤྱད། །སྲོག་ཆགས་རྣམས་ལ་ཕན་ ཕྱིར་བྱང་ཆུབ་བཙལ། །རྫོགས་པའི་སངས་རྒྱས་ཆོས་ཀྱི་དབང་མཆོག་བརྙེས། །དེ་ལ་དེ་རིང་བདག་གིས་མཆོད་པར་བགྱི། །བུ་དང་བྲན་བཅས་ཉེ་དུའི་ཚོགས་དང་བཅས། །སྲོག་ཆགས་ རྣམས་ལ་ཕན་ཕྱིར་བྱང་ཆུབ་ཚོལ། །སྲོག་ཆགས་སྟོང་པོ་འདི་དང་ལྷན་ཅིག་ཏུ། །སངས་རྒྱས་དང་ནི་ཚོགས་ལ་སྐྱབས་སུ་མཆི། །དེ་ནས་ཚོང་དཔོན་གྱི་བུ་མིས་བྱིན་གྱིས་བཅོམ་ལྡན་ འདས་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སེམས་ཅན་ཇི་སྙེད་བདག་དང་ལྷན་ཅིག་ཏུ་ བཅོམ་ལྡན་འདས་ཀྱི་གན་དུ་མཆིས་པ་དེ་དག་ཐམས་ཅད་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་ཤ་སྟག་ལགས་ན། བཅོམ་ལྡན་འདས་ ཀྱིས་ཅི་ནས་ཀྱང་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་མི་འགྱུར་བ་དང༌། བཅོམ་ལྡན་འདས། བདག་གིས་བཅོམ་ལྡན་འདས་ ལས་དགེ་བའི་རྩ་བ་བསྐྲུན་པ་གང་ལགས་པ་དགེ་བའི་རྩ་བ་འདིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་ལྟར་དེ་དག་ ལ་ཆོས་བསྟན་དུ་གསོལ། འདི་ལྟ་སྟེ། ད་ལྟར་བཅོམ་ལྡན་འདས་བཞིན་དུ་སེམས་ཅན་ཐམས་ཅད་ཀྱང་ཆོས་འདི་དག་ཐོབ་པར་གྱུར་ཅིག། དེ་ནས་ཚོང་དཔོན་གྱི་བུ་མིས་བྱིན་དང༌། སྐྱེ་ རྒུའི་བདག་མོ་བདུན་པོ་དེ་དག་དང༌། ཁྱེའུ་བདུན་དང༌། བུ་མོ་བདུན་དང༌། བྲན་ཕོ་བདུན་དང༌། བྲན་མོ་བདུན་དང༌། སྲོག་ཆགས་ཁྲི་པོ་དེ་དག་དང༌། རོལ་མོ་མཁན་ལྔ་བརྒྱ་པོ་དེ་དག་ གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་སངས་རྒྱས་དང༌། ཆོས་དང༌། དགེ་སློང་གི་དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས། བདག་ཅག་ལ་དགེ་བསྙེན་དུ་གཟུང་དུ་གསོལ། དེང་ནས་ཇི་སྲིད་འཚོ་བའི་བར་དུ་སྲོག་གཅོད་པ་སྤོང་ངོ༌། །སྐྱབས་སུ་མཆིས་སོ། །མངོན་པར་དད་དོ། །བཅོམ་ལྡན་འདས། བདག་ཅག་ དེང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །འདི་ལྟ་སྟེ། ད་ལྟར་ཡང་དག་པར་རྫོགས་པའི་སངས་རྒྱས་ཁྱོད་བཞིན་དུ་བདག་ཅག་ཀྱང་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་རྣམས་ལ་ཆོས་བསྟན་པར་བགྱིའོ། །འདི་ལྟ་སྟེ། ད་ལྟར་བཅོམ་ལྡན་འདས་ཚོགས་ལ་ གདམས་ངག་མཛད་པ་དེ་བཞིན་དུ་ཚོགས་ལ་གདམས་པར་བགྱིའོ། །བཅོམ་ལྡན་འདས། འདི་ལྟ་སྟེ། ད་ལྟར་བཅོམ་ལྡན་འདས་སེམས་ཅན་སྡུག་བསྔལ་གྱིས་ཉེན་པ་རྣམས་ཐར་པ་ ༄༅། །མཛད་པ་དེ་བཞིན་དུ་བདག་ཅག་ཀྱང་སེམས་ཅན་སྡུག་བསྔལ་གྱིས་ཉེན་པ་རྣམས་ཐར་པར་བགྱིའོ། །དེ་ནས་རོལ་མོ་མཁན་ལྔ་བརྒྱ་པོ་དེ་དག་གིས་སིལ་སྙན་གྱི་ སྒྲ་ཆེན་པོས་བཅོམ་ལྡན་འདས་ལ་ལན་གསུམ་བསྐོར་བ་བྱེད་དོ། །སྲོག་ཆགས་ཁྲི་པོ་དེ་དག་དང༌། ཚོང་དཔོན་གྱི་བུ་མིས་བྱིན་ཆུང་མ་བདུན་དང༌། ཁྱེའུ་བདུན་དང༌། བུ་མོ་བདུན་དང༌། བྲན་ཕོ་བདུན་དང༌། བྲན་མོ་བདུན་དང༌། གཡོག་ཐམས་ཅད་དང༌། རོལ་མོ་མཁན་ལྔ་བརྒྱ་པོ་དེ་དག་དང་ལྷན་ཅིག་ཏུ་བཅོམ་ལྡན་འདས་ལ་ལན་གསུམ་བསྐོར་བ་བྱེད་དོ། །དེ་ནས་ བཅོམ་ལྡན་འདས་སེམས་ཅན་དེ་དག་ལ་ཐུགས་བརྩེ་བའི་སླད་དུ་སྟེང་གི་བར་སྣང་ལ་སྐྱིལ་མོ་ཀྲུང་བཅས་ཏེ་བཞུགས་སོ། །དེ་ནས་རོལ་མོ་མཁན་ལྔ་བརྒྱ་པོ་དེ་དག་གིས་བཅོམ་ ལྡན་འདས་སྟེང་གི་བར་སྣང་ལ་སྐྱིལ་མོ་ཀྲུང་བཅས་ཏེ་བཞུགས་པ་མཐོང་ངོ༌། །མཐོང་ནས་ཀྱང་དད་པ་སྐྱེས་ནས་སངས་རྒྱས་ཀྱི་མཐུས་རོལ་མོའི་ཆ་བྱད་དེ་དག་ཐམས་ཅད་བོར་པ་ དང༌། སངས་རྒྱས་ཀྱི་མཐུས་དེ་དག་མ་བཟུང་བར་སྟེང་གི་བར་སྣང་ལ་གནས་ཤིང་སྒྲ་འབྱིན་ཏེ། སྒྲ་འབྱིན་བཞིན་དུ་དེ་བཞིན་གཤེགས་པ་བར་སྣང་ལ་བཞུགས་པ་ལ་ལན་གསུམ་ བསྐོར་བ་བྱེད་དོ། །དེ་ནས་ཚོང་དཔོན་གྱི་བུ་མིས་བྱིན་གཡོག་དང་བཅས་པ་དང༌། རོལ་མོ་མཁན་ལྔ་བརྒྱ་ཙམ་པོ་དེ་དག་དང༌། སྲོག་ཆགས་ཁྲི་པོ་དེ་དག་གིས་བཅོམ་ལྡན་འདས་ཀྱི་ རྫུ་འཕྲུལ་དང༌། ཆོ་འཕྲུལ་འདི་མཐོང་ནས་དགའ་མགུ་ཡིད་རངས་ཏེ་དགའ་བ་དང༌། ཡིད་བདེ་བ་སྐྱེས་ནས་ཐམས་ཅད་ཐལ་མོ་སྦྱར་ཏེ། བཅོམ་ལྡན་འདས་ལ་ཕྱག་འཚལ་ལོ། །སྟེང་གི་བར་ སྣང་ལ་དཔག་ཚད་གཅིག་ཁོར་ཡུག་ཏུ་ཡང་སིལ་སྙན་སྟོང་ཕྲག་དུ་མ་ཡོངས་སུ་མ་བཟུང་བ་དག་གིས་ཁྱབ་པར་གྱུར་ཏེ། དཔེར་ན། སྦྲང་རྩིའི་སྦྲང་མའི་ཚང་བཞིན་དུ་སྟེང་གི་བར་སྣང་ལ་རྔ་ དང༌། རོལ་མོའི་སིལ་སྙན་གྱི་སྒྲ་འབྱུང་ངོ༌། །དེ་ནས་ཚོང་དཔོན་གྱི་བུ་མིས་བྱིན་གཡོག་དང་བཅས་པ་དང༌། རོལ་མོ་མཁན་ལྔ་བརྒྱ་ཙམ་པོ་དེ་དག་དང༌། སྲོག་ཆགས་ཁྲི་པོ་དེ་དག་དང༌། ཆོས་ ཉན་དུ་སྔར་ལྷགས་པ་ལས་སྲོག་ཆགས་དྲུག་སྟོང་ཙམ་ཞིག་དང༌། དགེ་སློང་སྟོང་ཉིས་བརྒྱ་ལྔ་བཅུ་པོ་དེ་དག་ཐམས་ཅད་སངས་རྒྱས་ཀྱི་མཐུས་སྟེང་གི་བར་སྣང་ལ་མངོན་པར་འཕགས་པ་ དང༌། སངས་རྒྱས་ཀྱི་མཐུས་སྟེང་གི་བར་སྣང་ལ་ཁང་པ་བརྩེགས་པ་ལྔ་ལྔ་བྱུང་ངོ༌། །རོལ་མོ་མཁན་གྱི་ཁང་པ་བརྩེགས་པ་བཞིས་མདུན་གྱིས་བལྟས་པའི་རོལ་མོ་མཁན་གྱི་ཁང་པ་བརྩེགས་ པ་ཐམས་ཅད་ན་ཆོས་སྟོན་ཏོ། །བར་སྣང་ལ་གནས་པའི་ལྷ་སྟོང་ཕྲག་བྱེ་བ་དུ་མ་དག་གིས་ཀྱང་ལྷའི་མེ་ཏོག་མནྡཱ་ར་བ་དག་གཏོར་ཏོ། །མེ་ཏོག་དེ་དག་ཀྱང་སངས་རྒྱས་ཀྱི་མཐུས་སྟེང་གི་བར་སྣང་ ལ་ཁང་པ་བརྩེགས་པ་བརྒྱད་ཅུར་གྱུར་ཏོ། །དེ་ནས་སྐྱེ་བོའི་ཚོགས་ཆེན་པོ་སྟེང་གི་བར་སྣང་ལ་གནས་པས་རྫུ་འཕྲུལ་གྱི་མཐུ་ཆེན་པོ་དེ་མཐོང་ནས་བཅོམ་ལྡན་འདས་ལ་དགའ་བ་དང༌། དད་པ་ ༄༅། །དང༌། གུས་པ་དང་རྗེ་ས་ཆེར་བྱེད་དོ། །དེ་ནས་བཅོམ་ལྡན་འདས་ཀྱིས་སྐྱེ་བོའི་ཚོགས་ཆེན་པོ་དེའི་དད་པ་མཁྱེན། ཚོང་དཔོན་གྱི་བུ་མིས་བྱིན་དང༌། སྐྱེ་བོའི་ ཚོགས་ཆེན་པོ་དེའི་ལྷག་པའི་བསམ་པ་མཁྱེན་ནས་དེའི་ཚེ་འཛུམ་པ་མཛད་དེ་དབུའི་གཙུག་ཏུ་མི་སྣང་བར་གྱུར་ཅེས་བྱ་བའི་བར་དུ་རྒྱས་པར་སྦྱར་རོ། །དེ་ནས་ཚེ་དང་ལྡན་པ་ཀུན་ དགའ་བོས་བཅོམ་ལྡན་འདས་འཛུམ་པ་མཛད་པ་མཐོང་ནས་ཆོས་གོས་ཕྲག་པ་གཅིག་ཏུ་གཟར་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སངས་རྒྱས་བཅོམ་ལྡན་འདས་དག་ནི། རྒྱུ་མ་མཆིས། རྐྱེན་མ་མཆིས་པར་འཛུམ་པ་མི་མཛད་ན། འཛུམ་པ་མཛད་པའི་རྒྱུ་གང་ ལགས། རྐྱེན་གང་ལགས། དེ་སྐད་ཅེས་གསོལ་པ་དང༌། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། ཚོང་དཔོན་གྱི་བུ་ མིས་བྱིན་འདིས་ཆུང་མ་བདུན་དང༌། ཁྱེའུ་བདུན་དང༌། བུ་མོ་བདུན་དང༌། བྲན་ཕོ་བདུན་དང༌། བྲན་མོ་བདུན་གྱིས་ང་ལ་མཆོད་པ་བྱས་ཏེ་བསྐལ་པ་བྱེ་བ་ཕྲག་སྟོང་དུ་ལོག་པར་ལྷུང་ བར་མི་འགྲོ་སྟེ། ལྷ་དང༌། མི་རྣམས་ཀྱི་ནང་དུ་སྐྱེ་བར་འགྱུར་རོ། །དེ་བསྐལ་པ་བྱེ་བ་སྟོང་ཕྲག་བརྒྱ་འདས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་དེད་དཔོན་ཞེས་བྱ་བ་མཉེས་པར་བྱེད་པར་འགྱུར་རོ། །མཉེས་པར་བྱས་ནས་བསྟི་སྟང་དུ་བྱེད་པར་འགྱུར། བླ་མར་བྱེད་པར་འགྱུར། རིམ་གྲོར་བྱེད་པར་འགྱུར། མཆོད་པར་བྱེད་པར་ འགྱུར༑ དེའི་འོག་ཏུ་བསྐལ་པ་ཉི་ཤུར་ལོག་པར་ལྟུང་བར་འགྲོ་བར་མི་འགྱུར་རོ། །ཀུན་དགའ་བོ། དེ་ལ་ཚོང་དཔོན་གྱི་བུ་མིས་བྱིན་གྱི་ཆུང་མ་བདུན་དང༌། ཁྱེའུ་བདུན་དང༌། བུ་མོ་བདུན་ དང༌། བྲན་ཕོ་བདུན་དང༌། བྲན་མོ་བདུན་གང་ཡིན་པ་དག་ནི། འདི་ནས་ཤི་འཕོས་ནས་བུད་མེད་ཀྱི་ལུས་ལས་གྱུར་ཏེ་སྐྱེས་པའི་ལུས་ཐོབ་ནས་བྱང་ཆུབ་སེམས་དཔའ་མིས་བྱིན་དང་ལྷན་ ཅིག་ཏུ་བྱང་ཆུབ་སེམས་དཔའི་སྤྱད་པ་སྤྱོད་པར་འགྱུར་རོ། །དེ་དག་བསྐལ་པ་གཅིག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། ཀུན་དགའ་བོ། བྱང་ཆུབ་སེམས་དཔའ་སེམས་དཔའ་ཆེན་པོ་མིས་བྱིན་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེམས་སྙོམས་ཞེས་བྱ་བར་ འགྱུར་རོ། །བྱང་ཆུབ་སེམས་དཔའ་མིས་བྱིན་གྱི་ཞམ་འབྲིང་བ་གང་ཡིན་པ་ཐམས་ཅད་ནི། དེ་བཞིན་གཤེགས་པ་མིང་ཐ་དད་པར་འགྱུར་རོ། །རོལ་མོ་མཁན་ལྔ་བརྒྱ་པོ་གང་ཡིན་པ་ དེ་དག་ནི། བསྐལ་པ་གྲངས་མེད་པར་ལོག་པར་ལྟུང་བར་མི་འགྲོ་སྟེ། འཁོར་ལོས་བསྒྱུར་བའི་རྒྱལ་པོ་བྱེ་བ་ཕྲག་སྟོང་བྱེད་པར་བགྲང་བས་སྨྲ་སྟ། བར་སྐབས་དེར་སངས་རྒྱས་སྟོང་ ༄༅། །ཕྲག་བཅུ་མཉེས་པར་བྱས་ནས་བསྟི་སྟང་དུ་བྱེད་པར་འགྱུར། བླ་མར་བྱེད་པར་འགྱུར། རི་མོར་བྱེད་པར་འགྱུར། མཆོད་པ་བྱེད་པར་འགྱུར་རོ། །ཐམས་ ཅད་ཀྱང་བསྐལ་པ་གཅིག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་ པར་རྫོགས་པའི་སངས་རྒྱས་དབྱངས་འཇམ་ཞེས་བྱ་བར་ཐམས་ཅད་མིང་མཐུན་པར་འགྱུར་རོ། །སྲོག་ཆགས་ཁྲི་པོ་དེ་ལས་སྲོག་ཆགས་བཞི་བརྒྱ་ནི། དེ་བཞིན་གཤེགས་པ་བྱམས་ པ་མཉེས་པར་བྱས་ནས་དེའི་ཚེ་ཡོངས་སུ་མྱ་ངན་ལས་འདའ་བར་འགྱུར་རོ། །ལྷག་མ་རྣམས་ནི། བསྐལ་པ་གངྒཱའི་ཀླུང་གི་བྱེ་མ་སྙེད་དུ་ལོག་པར་ལྟུང་བར་མི་འགྲོ་སྟེ། ཚུལ་ འདིས་སངས་རྒྱས་བྱེ་བ་ཕྲག་སྟོང་མཉེས་པར་བྱས་ནས་བསྟི་སྟང་དུ་བྱེད་པར་འགྱུར། བླ་མར་བྱེད་པར་འགྱུར། རི་མོར་བྱེད་པར་འགྱུར། མཆོད་པ་བྱེད་པར་འགྱུར་རོ། །ཐམས་ ཅད་ཀྱང་བསྐལ་པ་གཅིག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་ངོ་མཚར་ཞེས་བྱ་བར་ཐམས་ཅད་ཀྱང་མིང་མཐུན་པར་འགྱུར་རོ། །སྲོག་ཆགས་དྲུག་སྟོང་པོ་དེ་དག་ལས་སྲོག་ཆགས་སྟོང་ནི། ང་ཡོངས་སུ་མྱ་ངན་ལས་ འདས་ཏེ་དམ་པའི་ཆོས་ནུབ་ནས་མཚོན་གྱི་བསྐལ་པ་བར་མ་ནི། འདས། དེ་བཞིན་གཤེགས་པ་བྱམས་པ་ནི། མ་བྱུང་བའི་དུས་དེར་སེམས་ཅན་རྣམས་ཀྱི་ཚེ་འཕེལ་བར་འགྱུར་བའི་དུས་ དེ་ནི་རང་སངས་རྒྱས་བརྒྱད་ཁྲི་འབྱུང་བར་འགྱུར་ཏེ། སྲོག་ཆགས་སྟོང་པོ་དེ་དག་གིས་རང་སངས་རྒྱས་དེ་དག་ཐམས་ཅད་མཉེས་པར་བྱས་ནས་བསྟི་སྟང་དུ་བྱེད་པར་འགྱུར། བླ་མར་བྱེད་ པར་འགྱུར། རི་མོར་བྱེད་པར་འགྱུར། མཆོད་པ་བྱེད་པར་འགྱུར་རོ། །གང་ཟག་གི་མཆོག་བྱམས་པ་དེ་ཡང་མཉེས་པར་བྱས་ནས་བསྟི་སྟང་དུ་བྱེད་པར་འགྱུར། བླ་མར་བྱེད་པར་འགྱུར། རི་མོར་བྱེད་པར་འགྱུར། མཆོད་པ་བྱེད་པར་འགྱུར་རོ། །དེའི་འོག་ཏུ་བསྐལ་པ་བྱེ་བ་ཁྲག་ཁྲིག་ཕྲག་ཉི་ཤུར་ལོག་པར་ལྟུང་བར་འགྲོ་བར་མི་འགྱུར་རོ། །དེ་ནས་ལུས་ཀྱི་ཐ་མ་བདག་གི་ ལུས་ཀྱི་ཐ་མ་ཐོབ་ནས་དགེ་བའི་རྩ་བ་རྣམས་ཀྱིས་བསྐུལ་ཏེ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་རང་བྱང་ཆུབ་མངོན་སུམ་དུ་བྱེད་པར་འགྱུར་རོ། །སྲོག་ཆགས་ཁྲི་པོ་ལས་ སྲོག་ཆགས་མཐོང་བ་སྐྱེས་བ་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལྷའི་བུ་ཁྲི་ཕྲག་དྲུག་ཅུ་ནི། ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ ཞིང་དྲི་མ་མེད་པ་སྐྱེས་སོ། །ཀུན་དགའ་བོ། བྱིས་པ་རྣམས་མ་གཏོགས་པར་དེ་བཞིན་གཤེགས་པ་རྣམས་ལ་སུ་ཞིག་དགའ་བ་དང༌། དད་པ་དང༌། གུས་པ་དང༌། རྗེ་ས་སྐྱེད་པར་མི་ ༄༅། །བྱེད༑ དེ་ཅིའི་ཕྱིར་ཞེ་ན། འདི་ལྟར་དགེ་བའི་རྩ་བ་ཆུང་ངུས་འདི་ལྟ་བུའི་ཆེ་བ་ཉིད་ཐོབ་ཅིང་མྱ་ངན་ལས་འདས་པ་ལ་ཡང་རེག་གོ །དེ་ནས་བཅོམ་ལྡན་འདས་ ཀྱིས་ཚིགས་སུ་བཅད་པ་འདི་དག་གསུངས་སོ། །སངས་རྒྱས་ལ་ནི་གུས་བྱས་ན། །འདི་འདྲ་བ་ཡི་དཔལ་འཐོབ་སྟེ། །དེ་ཕྱིར་གང་ལ་བྱིན་པ་ནི། །འབྲས་བུ་ཆེ་བའི་སྟོན་ལ་མཆོད། ། གང་ཡང་བཞུགས་ལ་མཆོད་པ་དང༌། །གང་ཡང་མྱ་ངན་འདས་པ་ཡི། །རིང་བསྲེལ་ཡུངས་འབྲུ་ཙམ་མཆོད་པ། །དེ་བཞིན་གཤེགས་པར་འགྱུར་བ་མཐོང༌། །གང་ཡང་བཞུགས་ ལ་མཆོད་པ་དང༌། །གང་ཡང་མྱ་ངན་འདས་པ་ཡི། །རིང་བསྲེལ་ཡུངས་འབྲུ་ཙམ་མཆོད་པ། །སེམས་ཀྱང་མཉམ་ལ་འབྲས་བུ་མཉམ། །མཉམ་པའི་སེམས་སུ་བྱས་ནས་ནི། །གང་ ཟག་མཆོག་ལ་མཆོད་བྱེད་པ། །དེ་ཡི་རྣམ་པར་སྨིན་པ་མཉམ། །མཚུངས་པར་བྱང་ཆུབ་འཚང་ཡང་རྒྱ། །བདེ་བར་གཤེགས་པའི་ལམ་བཟུང་སྟེ། །ངན་པར་འགྲོ་བའི་ལམ་ཡང་ བཅད༑ ༑མྱ་ངན་འདས་པར་འགྲོ་བའི་ལམ། །དེ་ཡང་དེ་ལ་མི་དཀོན་ནོ། །སངས་རྒྱས་ཚུལ་ཁྲིམས་དམ་པ་དང༌། །སངས་རྒྱས་ཏིང་ངེ་འཛིན་མཆོག་གིས། །དེ་ཕྱིར་མཆོག་ལ་དད་ བྱས་ནས། །དེ་བཞིན་གཤེགས་པ་མཆོག་ཏུ་འགྱུར། །མཆོད་པ་དམ་པ་བྱས་ནས་ནི། །མྱུར་དུ་མཆོག་ཏུ་འགྱུར་བ་ཡིན། །ཆོས་ཀྱི་དམ་པ་སྟོན་མཛད་པ། །རྫོགས་པའི་སངས་རྒྱས་ མཆོག་ཏུ་འགྱུར། །མི་གང་མཁས་པ་སངས་རྒྱས་ཀྱི། །ཆོས་ལ་བརྟེན་པར་འདོད་པ་དེ། །འདུན་པ་དྲག་པོ་བསྐྱེད་པར་བྱ། །མང་དུ་ཐོས་ནས་ཚུལ་བཞིན་ནོ། །འཁོར་ལོས་བསྒྱུར་བའི་ རྒྱལ་པོ་དང༌། །ཚངས་པ་དབང་བྱེད་གྱུར་ནས་ནི། །ཡོན་ཏན་མང་པོའི་འབྱུང་གནས་དང༌། །མྱ་ངན་འདས་པར་ངེས་པར་འགྱུར། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ ལ་བཀའ་སྩལ་པ། ཤཱ་རིའི་བུ། དེ་བས་ན། རིགས་ཀྱི་བུའམ་རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་ རྫོགས་པར་འཚང་རྒྱ་བར་འདོད་པ་དག་གིས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ལ་འདུན་པ་དྲག་པོ་བསྐྱེད་དེ་ཤིན་ཏུ་མཉན་པར་བྱ། བླང་བར་བྱ། གཟུང་བར་བྱ། བཀླག་པར་བྱ། ཀུན་ཆུབ་པར་བྱ། གཞན་དག་ལ་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཤིན་ཏུ་མཉན་ ཏམ༑ བླངས་སམ། བཟུང་ངམ། ཀུན་ཆུབ་པར་བྱས་སམ། གཞན་དག་ལ་བརྗོད་དམ། གཞན་དག་ལ་རྒྱ་ཆེར་ཡང་དག་པར་རབ་ཏུ་བསྟན་ན། དཀོན་མཆོག་གསུམ་གྱི་གདུང་རྒྱུན་མི་ འཆད་པར་བྱ་བའི་ཕྱིར་ཞུགས་པ་ཡིན་ནོ། །ཚད་མེད་པ་བཞི་དང་མི་འབྲལ་བ་ཡིན་ནོ། །ཕ་རོལ་ཏུ་ཕྱིན་པ་དྲུག་ལ་བརྩོན་པ་ཡིན་ནོ། །བསྡུ་བའི་དངོས་པོ་བཞིས་སེམས་ཅན་རྣམས་སྡུད་ ༄༅། །པར་བརྩོན་པ་ཡིན་ནོ། །ཤཱ་རིའི་བུ། གང་འདི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ནི། བྱང་ཆུབ་ཀྱི་ལམ་ཡིན་ནོ། །དེ་ཅིའི་ཕྱིར་ཞེ་ན། བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ནི། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་དང་འབྲེལ་ཏོ། །ཤཱ་རིའི་བུ། བྱང་ཆུབ་སེམས་དཔའ་རྣམས་ཀྱི་ནོར་ནི། བྱང་ཆུབ་ སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱི་ནང་དུ་བཅུག་གོ །ཤཱ་རིའི་བུ། ངས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ལ་བསླབ་ནས་ཡང་དག་པར་ཆད་པ་རྗེས་སུ་ ཐོབ་པོ༑ ༑ཕ་རོལ་ཏུ་ཕྱིན་པ་ཐམས་ཅད་ཀྱི་ཕ་རོལ་ཏུ་ཕྱིན་པ་ཡང་རྗེས་སུ་ཐོབ་བོ། །ཕ་རོལ་ཏུ་ཕྱིན་པ་ཐམས་ཅད་གང་ཞེ་ན། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ ཆུབ་ཀྱི་ཕ་རོལ་ཏུ་སོན་པའོ། །དེ་བཞིན་གཤེགས་པ་ཕ་རོལ་ཏུ་ཕྱིན་པ་ཐམས་ཅད་ལ་ངེས་པར་བྱས་པ། དེ་བཞིན་གཤེགས་པའི་མཛད་པ་རྒྱུན་མ་བཅད་པ། རྣམ་པ་ཐམས་ཅད་ཀྱི་ ཚད་མེད་པའི་རྗེས་སུ་ཐོབ་པ། དེ་བཞིན་གཤེགས་པས་དཔག་ཏུ་མེད་པ་རྗེས་སུ་ཐོབ་པ། ཕ་རོལ་ཏུ་ཕྱིན་པ་ཐམས་ཅད་རྗེས་སུ་ཐོབ་པ། ཕ་རོལ་ཏུ་ཕྱིན་པ་ཐམས་ཅད་ལ་ཤིན་ཏུ་ གནས་པའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ལུས་ཀྱི་ལས་དང་རྣམ་སྨིན་གྱིས། །རྣམ་པར་སྨིན་པ་ཤེས་པར་བྱ། །ལས་སྨིན་རྣམ་སྨིན་ མ་ཡིན་གང༌། །དེ་བདེ་དེ་ནི་མྱ་ངན་འདས། །གང་ལས་ཤེས་པ་མེད་པ་ཡི། །འདུས་བྱས་ཐམས་ཅད་སྡུག་བསྔལ་ཏེ། །དེ་ཕྱིར་ཤེས་པ་བསྐྱེད་པས་ནི། །འདུས་བྱས་ཀུན་ལས་རྣམ་པར་གྲོལ། ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཤཱ་རིའི་བུ་དང༌། དགེ་སློང་དེ་དག་དང༌། ལྷ་དང༌། མི་དང༌། ལྷ་མ་ཡིན་དང༌། དྲི་ཟར་བཅས་པའི་འཇིག་རྟེན་ཡི་རང་སྟེ་ བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། བྱང་ཆུབ་སེམས་དཔའི་ སྡེ་སྣོད་ཅེས་བྱ་བའི་ཆོས་ཀྱི་རྣམ་གྲངས་ཀྱི་ལེའུ་ཞེས་བྱ་བ་སྟེ། བཅུ་གཉིས་པ་རྫོགས་སོ།། །།རྒྱ་གར་གྱི་མཁན་པོ་སུ་རེནྡྲ་པོ་དྷི་དང༌། ཤཱི་ལེནྡྲ་བོ་དྷི་དང༌། ཨཱཪྻ་དྷརྨ་ཏཱ་ ཤཱི་ལས་བསྒྱུར་ཅིང་ཞུས་ཏེ། སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ། Copyright © 2012 by the Asian Classics Input Project. All rights reserved.